﻿Waiata.
122.
He waiata; he pikitanga. Nā Rāwiri. I koa ahau i tā rātou meatanga mai ki ahau, “Tātou ka haere ki te whare o Ihowā!” 
E tū ana ō mātou waewae ki ōu tatau, e Hiruhārama. 
Ko te hanganga o Hiruhārama, rite tonu ki tō te pā kua tūhonohonoa ki a ia anō. 
Hāereere ana ki reira ngā iwi, ngā iwi o Ihowā, ki tō Īharaira whakaaturanga, ki te whakawhetai ki te ingoa o Ihowā. 
Kua whakatūria hoki ki reira ngā torōna whakawā, ngā torōna o te whare o Rāwiri. 
Īnoia he āta noho mō Hiruhārama: “Ka whiwhi ki te pai te hunga e aroha ana ki a koe. 
Kia mau te rongo ki ōu taiepa, me te pai ki ōu whare kīngi.” 
He mea mō ōku tēina, mō ōku hoa, tāku e mea nei, “Kia mau te rongo ki roto ki a koe.” 
He whakaaro ki te whare o Ihowā, o tō tātou Atua, ka rapu ahau i te pai mōu. 
