﻿Waiata.
124.
He waiata; he pikitanga. Nā Rāwiri. Me kaua a Ihowā i a tātou – he kī tēnei mā Īharaira – 
me kaua a Ihowā i a tātou, i te whakatikanga mai o te tangata ki a tātou; 
pēnei kua horomia oratia tātou e rātou, i te muranga o tō rātou riri ki a tātou. 
Kua ngaro tātou i ngā wai, kua taupokina ō tātou wairua e te ia; 
pēnei kua taupokina ō tātou wairua e ngā wai whakakake. 
Kia whakapaingia a Ihowā, kīhai nei i tuku i a tātou hei ngaunga mā ō rātou niho. 
Kua mawhiti ō tātou wairua, me he manu i roto i te māhanga a ngā kaihopu; kua motu te māhanga, ā, mawhiti ana tātou. 
Kei te ingoa o Ihowā he āwhina mō tātou, kei te kaihanga i te rangi, i te whenua. 
