﻿Waiata.
132.
He waiata; he pikitanga. E Ihowā, maharatia a Rāwiri, me ōna mamaetanga ngākau katoa; 
tāna oati ki a Ihowā, tāna kupu taurangi ki te Mea Nui o Hākopa, 
“E kore rawa ahau e tae ki tōku whare e noho ai ahau, e eke rānei ki runga ki tōku moenga; 
e kore ahau e tuku i ōku kanohi kia moe, i ōku kamo kia nenewha, 
kia kitea rā anō e ahau he wāhi mō Ihowā, he nohoanga mō te Mea Nui o Hākopa.” 
Nā, i rangona e mātou ki Ēparata, i kitea ki ngā māra o te ngahere. 
“Ka haere mātou ki roto ki ōna tapenākara; ka koropiko ki tōna tūranga waewae.” 
E ara, e Ihowā, ki tōu okiokinga, a koe, me te āka o tōu kaha. 
Kia whakakākahuria āu tohunga ki te tika, kia hāmama tāu hunga tapu i te hari. 
Whakaaro ki a Rāwiri, ki tāu pononga, kaua e whakapeaua atu te mata o tāu i whakawahi ai. 
Kua oati pono a Ihowā ki a Rāwiri, e kore ia e tahuri kē i tēnā: “Ka whakanohoia e ahau tētahi hua o tōu kōpū ki tōu torōna. 
Ki te puritia e āu tama tāku kawenata, me tāku whakaaturanga e ako ai ahau ki a rātou, ka noho anō ā rātou tama ki tōu torōna ake ake.” 
Kua whiriwhiria hoki e Ihowā a Hiona; kua hiahiatia e ia hei nohoanga mōna: 
“Ko tōku okiokinga tēnei ake ake; ko konei ahau noho ai, kua hiahiatia hoki e ahau. 
Ka manaakitia rawatia e ahau tāna kai; ka whakamākonatia e ahau ōna rawakore ki te taro. 
Ka whakakākahuria hoki e ahau ōna tohunga ki te whakaoranga, ā, ka hāmama tōna hunga tapu i te hari. 
“Ka meinga e ahau kia pihi ki reira te haona o Rāwiri; kua whakapaia e ahau he rama mō tāku i whakawahi ai. 
Ka whakakākahuria e ahau ōna hoariri ki te whakamā, ā, ka matomato tōna karauna i runga i a ia.” 
