﻿Waiata.
140.
Ki te tino kaiwhakatangi. He hīmene nā Rāwiri. Whakaorangia ahau, e Ihowā, i te tangata kino; āraia atu i ahau te tangata tutū, 
e whakaaro kino nei i ō rātou ngākau, e whakamine nei i a rātou i ngā wā katoa ki te whawhai. 
Kua whakakoia tō rātou arero, ānō he nākahi; kei raro i ō rātou ngutu te wai whakamate o te neke. Hera 
Tiakina ahau, e Ihowā, i ngā ringa o te hunga kino; āraia atu i ahau te tangata tutū, kua mea nei kia tutea ōku hīkoinga. 
Kua hunā e te hunga whakakake te māhanga mōku, me ngā aho; kua horahia e rātou he kupenga ki te taha o te ara; kua whakapikoa e rātou he rore mōku. Hera 
I mea ahau ki a Ihowā, “Ko koe tōku Atua.” Whakarongo, e Ihowā, ki tōku reo īnoi. 
E Ihowā, e te Ariki, e te kaha o tōku whakaoranga, nāu i hīpoki tōku upoko i te rā o te tatauranga. 
Aua e whakaaetia, e Ihowā, ngā hiahia o te tangata kino; kei taea tōna whakaaro korokē; kei whakakake rātou. Hera 
Tēnā ko te upoko o te hunga e whakapae nei i ahau, kia hīpokina rātou e te kino o ō rātou ngutu! 
Kia taka he waro mura ki runga ki a rātou; kia pangā rātou ki te ahi, ki roto ki ngā poka hōhonu, kei whakatika ake anō rātou. 
E kore te tangata kōrero kino e whakapūmautia ki runga ki te whenua; mā te kino e aruaru te tangata tutū, kia turakina atu ia ki raro. 
E mātau ana anō ahau mā Ihowā e tohe te whakawā a te tangata e tūkinotia ana, te mea hoki e rite ana mā ngā rawakore. 
He pono ka whakawhetai te hunga pai ki tōu ingoa; ka noho te hunga tika ki tōu aroaro. 
