﻿Waiata.
141.
He hīmene nā Rāwiri. E Ihowā, kua tangi nei ahau ki a koe; hohoro mai ki ahau; whakarongo ki tōku reo ua karanga ahau ki a koe. 
Kia whakatikaia tāku īnoi ki tōu aroaro, hei whakakakara; te toronga atu hoki o ōku ringa ānō ko te whakahere o te ahiahi. 
Hōmai he kaitiaki mō tōku māngai, e Ihowā; tiakina te kūwaha o ōku ngutu. 
Kaua e whakaangahia tōku ngākau ki te mea kino, ki te mahi i ngā mahi hīanga i roto i ngā kaimahi i te kino; kaua anō ahau e kai i ā rātou mea papai. 
Mā te tangata tika ahau e patu; he mahi aroha tēnā; māna ahau e riri. He hinu tēnā ki runga ki te upoko, kaua ia e paopaongia e tōku upoko. Ahakoa hoki i roto i tō rātou kino ka īnoi tonu ahau. 
E turakina ana ō rātou kaiwhakawā ki te taha o te kōhatu, ā, ka rongo rātou i āku kupu, he reka hoki. 
“Pera i tētahi e haehae ana, e wāwāhi ana i te whenua, e tītaritaria ana ō mātou wheua ki te waha o te rēinga.” 
Otiia, e tau ana ōku kanohi, e Ihowā, e te Ariki, ki a koe; ko koe tōku whakawhirinakitanga; kaua tōku wairua e waiho pani. 
Tiakina ahau kei mau i ngā māhanga i whakatakotoria e rātou mōku, i ngā rore hoki a ngā kaimahi i te kino. 
Kia taka te hunga kino ki roto ki ā rātou kupenga anō; ko ahau ia kia mawhiti. 
