﻿Waiata.
142.
He Makiri nā Rāwiri; he īnoi i a ia i roto i te ana. He karanga tā tōku reo ki a Ihowā; he īnoi tā tōku reo ki a Ihowā. 
Horahia ana tāku īnoi ki tōna aroaro; whakaaturia ana e ahau tōku mate ki tōna aroaro. 
I te ngaromanga o tōku wairua i roto i ahau i mātau koe ki tōku ara. Kua whakatakotoria pukutia e rātou te māhanga mōku i te ara i haere ai ahau. 
Titiro ki tōku taha matau, kia kite – kāhore hoki tētahi tangata e mōhio ana ki ahau; kāhore he piringa mōku; kāhore tētahi e mahara ana ki tōku wairua. 
I karanga ahau ki a koe, e Ihowā; i mea, “Ko koe tōku piringa, tōku wāhi i te whenua o te hunga ora.” 
Tahuri mai ki tāku karanga, kua whakaititia rawatia hoki ahau. Whakaorangia ahau i ōku kaitūkino, he kaha rawa hoki rātou i ahau. 
Whakaputaina tōku wairua i te herehere, kia whakamoemiti ai ahau ki tōu ingoa. Ka karapotia ahau e te hunga tika; nōu ka atawhai nei i ahau. 
