﻿Waiata.
144.
Nā Rāwiri. Kia whakapaingia a Ihowā, tōku kāmaka, e whakaako nei i ōku ringa ki te whawhai, i ōku maihao ki te tatau; 
ko te atawhai mōku, ko tōku pā, ko tōku pourewa me tōku kaiwhakaora, ko tōku whakangungu rākau, ko tāku e whakawhirinaki ai, ko te kaipēhi hoki o tōku iwi ki raro i ahau. 
E Ihowā, he aha te tangata i maharatia ai ia e koe, te tama rānei a te tangata i whakaaroa ai ia e koe? 
Ko te rite o te tangata kei te mea memeha noa; ōna rā me te mea he ātārangi e rere atu ana. 
Whakapikoa iho ōu rangi e Ihowā, ā, heke iho; pā ki ngā maunga, ā, ka pongere. 
Kōkiritia mai he uira hei whakamarara i a rātou; kōperea mai āu pere, kia whati ai rātou. 
Totoro iho tōu ringa i runga; tangohia ahau, whakaorangia ahau i ngā wai nunui, i te ringa o ngā tāngata kē; 
e kōrero teka nei tō rātou māngai, ā, he ringa matau teka tō rātou ringa matau. 
Ka waiatatia e ahau he waiata hou ki a koe, e te Atua; ka hīmene atu ahau ki a koe i runga i te hātere aho tekau. 
Ko ia te kaihōmai i te whakaoranga ki ngā kīngi, te kaiwhakaora i a Rāwiri, i tāna pononga, i te hoari whakamate. 
Tangohia ahau, whakaorangia hoki i ngā ringa o ngā tāngata kē, e kōrero teka nei ō rātou māngai, ā, he ringa matau teka tō rātou ringa matau. 
Ā, kia rite ā mātou tama i tō rātou taitamarikitanga ki ngā māhuri e tupu ake ana; ā mātou tamāhine hoki ki ngā kōhatu kokonga, whakapaipai rawa, nō te whare rangatira te tauira. 
Kia kī ā mātou pākoro, mō te tiki noa atu i tēnā mea, i tēnā mea; kia mano, kia tini ngā hua o ā mātou hipi i ō mātou pārae; 
kia taimaha ā mātou kau i ngā pīkaunga. Kia kāhore he pākarutanga mai ki roto, he whatinga atu hoki ki waho, ā, kia kāhore he auē i ō mātou huarahi. 
Ka hari te iwi e pēnā ana; āe, ka hari te iwi ko Ihowā nei tō rātou Atua. 
