﻿Waiata.
147.
Whakamoemititia a Ihowā! He pai hoki te hīmene ki tō tātou Atua; āhuareka rawa, ātaahua tonu te whakamoemiti. 
Ko Ihowā hei hanga i Hiruhārama; māna hoki ngā whati o Īharaira e kohikohi. 
Ko ia hei rongoā i te hunga ngākau marū; māna e takai ō rātou wāhi mamae. 
E taua ana e ia ngā whetū, te maha; e huaina ana hoki e ia ō rātou ingoa katoa. 
He nui tō tātou Ariki, he nui hoki tōna kaha; e kore e taea tōna mātauranga te whakaaro. 
Ko Ihowā te kaitautoko mō te hunga māhaki; ka turakina e ia te hunga kino ki te whenua. 
Waiata, whakawhetai ki a Ihowā; hīmene i runga i te hāpa ki tō tātou Atua. 
Ko ia nei te kaiuwhi i te rangi ki ngā kapua, te kaihanga i te ua mō te whenua; e whakatupu ana ia i te tarutaru ki runga ki ngā maunga. 
E hōmai ana e ia he kai mā te kīrehe; mā ngā pī raweni hoki ina tangi. 
E kore ia e āhuareka ki te kaha o te hōiho; e kore ia e manako ki ngā waewae o te tangata. 
E manako ana a Ihowā ki te hunga e wehi ana i a ia, ki te hunga e tūmanako ana ki tōna aroha. 
Whakamoemititia a Ihowā, e Hiruhārama! Whakamoemititia tōu Atua, e Hiona! 
Nāna nei hoki i whakakaha ngā tūtaki o ōu tatau; manaakitia ana e ia āu tamariki i roto i a koe. 
Nāna anō i mau ai te rongo i roto i ōu rohe; nāna koe i mākona ai i te wīti pai rawa. 
E tukua ana e ia tāna kupu ki te whenua; tere rawa te rere o tāna kupu. 
E hōmai ana e ia te hukarere ānō he huruhuru hipi; e whakatītaritaria ana te haupapa ānō he pungarehu. 
Makā mai ana e ia tāna hauhunga ānō he maramara – ko wai e tū i mua i tāna mātao? 
E tukua ana e ia tāna kupu, ā, whakarewaina ana aua mea; ka meinga tāna hau kia pupuhi, rere ana ngā wai. 
E whakakitea ana e ia tāna kupu ki a Hākopa; āna tikanga, me āna whakaritenga ki a Īharaira. 
Kāhore i pērā tāna hanga ki tētahi iwi; kīhai anō āna whakaritenga i mōhiotia e rātou. Whakamoemititia a Ihowā! 
