﻿Waiata.
148.
Whakamoemititia a Ihowā! Whakamoemititia a Ihowā i runga i ngā rangi; whakamoemititia ia i ngā wāhi tiketike! 
Whakamoemititia ia, e āna anahera katoa; whakamoemititia ia, e āna mano whāioio! 
Whakamoemititia ia, e te rā, e te marama; whakamoemititia ia, e ngā whetū whakamārama katoa! 
Whakamoemititia ia, e ngā rangi o ngā rangi, e ngā wai hoki o runga atu i ngā rangi! 
Kia whakamoemititia e rātou te ingoa o Ihowā; nāna hoki i whakahau, ā, kua hangā rātou. 
Nāna hoki aua mea i whakapūmau ake ake; i whakatakotoria e ia he tikanga e kore e taka. 
Whakamoemititia a Ihowā, i runga i te whenua, e ngā tarakona, e ngā rire katoa; 
e te kāpura, e te whatu; e te hukarere, e te kohu; e te tūpuhi, e mahi nei i tāna kupu! 
E ngā maunga, e ngā puke katoa; e ngā rākau hua, e ngā hīta katoa; 
e ngā kīrehe, e ngā kararehe katoa; e ngā mea ngōkingōki, e ngā manu whai pākau! 
E ngā kīngi o te whenua, e ngā iwi katoa, e ngā rangatira, e ngā kaiwhakawā katoa o te whenua, 
e ngā taitama, e ngā taitamāhine, e ngā koroheke rātou ko ngā tamariki! 
Kia whakamoemititia e rātou te ingoa o Ihowā; nōna anake hoki te ingoa e nui ana; kei runga ake i te whenua, i te rangi, tōna korōria. 
Ko ia hoki te kaiwhakaara o te haona o tāna iwi; e whakamoemititia ana e āna tāngata tapu katoa; e ngā tama a Īharaira, e te iwi e tata ana ki a ia. Whakamoemititia a Ihowā! 
