﻿Whakatauki.
2.
E tāku tama, ki te tango koe i āku kupu, ki te huna i āku whakahau ki roto ki a koe, 
ā, ka tahuri tōu taringa ki te whakaaro nui, ka anga anō tōu ngākau ki te mātauranga; 
āe rā, ki te mea ka kārangarangatia e koe te mātauranga, ā, ka puaki tōu reo ki te ngākau mōhio; 
ki te rapua hoki ia e koe ānō he hiriwa, ki te kimihia ānō he taonga huna – 
ko reira koe mātau ai ki te wehi o Ihowā, kite ai i te mōhio ki te Atua. 
Mā Ihowā hoki e hōmai te whakaaro nui; nō tōna māngai te mātauranga me te ngākau mōhio. 
E rongoātia ana e ia te whakaaro nui mā te hunga tika; he whakangungu rākau ia mō te hunga he tapatahi nei te haere, 
kia tiakina ai e ia ngā ara o te whakawā, kia tohungia ai te ara o tāna hunga tapu. 
Ko reira koe mōhio ai ki te tika, ki te whakawā, ki te mea anō e rite ana, āe rā, ki ngā ara pai katoa. 
Ka uru hoki te whakaaro nui ki roto ki tōu ngākau, ā, ka reka te mātauranga ki tōu wairua; 
ka ai te ngārahu pai hei tiaki i a koe, te ngākau mōhio hei pupuri i a koe; 
hei kukume mai i a koe i te ara o te kino, i te tangata e puta kē ana āna kōrero; 
i te hunga e whakarere nei i ngā ara o te tika, e haere ana i ngā ara o te pōuri; 
e koa ana, i a rātou e mahi ana i te kino, e hari ana ki ngā tikanga parori kē o te kino; 
he ara kōpikopiko ō rātou, he whanokē rātou i ō rātou huarahi; 
hei whakaora i a koe i te wahine tauhou, i te wahine tauhou e whakapati nei ki āna kupu. 
Kua whakarērea nei e ia te hoa o tōna tamāhinetanga, kua wareware ki te kawenata o tōna Atua. 
E heke atu ana hoki tōna whare ki te mate, ōna ara ki ngā tūpāpaku. 
Ko te hunga katoa e haere atu ana ki a ia e kore e hoki mai; e kore anō e mau i a rātou ngā ara o te ora. 
Ā, ka haere koe i ngā ara o ngā tāngata pai, ka mau anō ki ngā ara o te hunga tika. 
Ka noho hoki te hunga tika ki te whenua; ka mau te hunga ngākau tapatahi ki reira. 
Ka hātepea atu ia te hunga kino i runga i te whenua, ka hūtia atu i reira te hunga he kōpeka tā rātou mahi. 
