﻿Whakatauki.
3.
E tāku tama, kei wareware ki tāku ture; kia puritia hoki āku whakahau e tōu ngākau. 
Kātahi ka nui ake ngā rā roa mōu, ngā tau e ora ai, me te āta noho. 
Kei whakarērea koe e te atawhai, e te pono; heia ki tōu kakī; tuhituhia iho ko tōu ngākau ānō hei papa. 
Pēnei ka whiwhi koe ki te atawhai, ki te mātauranga pai i te aroaro o te Atua, o te tangata. 
Whakapaua tōu ngākau ki te whakawhirinaki ki a Ihowā, kaua hoki e okioki ki tōu mātauranga ake. 
I ōu ara katoa whakaaro ki a ia, ā, māna e whakatika ōu huarahi. 
Kei whakaaro ki a koe he mōhio koe; e wehi ki a Ihowā, kia mawehe i te kino; 
hei ora tēnā ki tōu pito, hei mākūkū ki ōu wheua. 
Kia whai korōria a Ihowā i ōu rawa, i ngā mātāmua anō hoki o āu hua katoa; 
ā, ka kī āu toa i ngā mea maha, ka pakaru anō hoki āu rua wāina i te wāina. 
E tāku tama, kaua e whakahāwea ki tā Ihowā papaki; kei ngākaukore anō koe ina ākona e ia. 
Ka ākona hoki e Ihowā tāna e aroha ai, ka pērā tāna me tā te matua ki te tamaiti e matenuitia ana e ia. 
Ka hari te tangata kua kitea nei e ia te whakaaro nui, me te tangata anō kua whiwhi ki te mātauranga, 
pai atu hoki te hokohoko o tērā i tō te hiriwa e hokohokona nei, ōna hua i te kōura parakore. 
Nui atu ōna utu i o ngā rupi; e kore anō hoki ngā mea katoa e minaminatia e koe e rite ki a ia. 
Kei tōna ringa matau ngā rā roa; kei tōna mauī ngā taonga me te korōria. 
Ko ōna ara he ara āhuareka, ko ōna ara katoa he rangimārie. 
He rākau ia nō te ora ki te hunga e ū ana ki a ia; ka hari te tangata e pupuri ana i a ia. 
Nā te whakaaro nui o Ihowā i whakatūria ai e ia te whenua; nā tōna mōhio tāna whakapūmautanga i ngā rangi. 
He mōhio nōna i pakaru ai ngā rire, i māturuturu ai te tōmairangi o ngā kapua. 
E tāku tama, kei kotiti kē ēnā i ōu kanohi: puritia te whakaaro nui me te ngārahu pai, 
kei ēnā he oranga mō tōu wairua, he whakapaipai mō tōu kakī. 
Pēnei ka haere koe i tōu ara, tē ai he wehi, e kore anō tōu waewae e tūtuki. 
Ka takoto koe, e kore e wehi, inā, ka takoto koe, ka reka anō tāu moe. 
Kaua e wehi i te mataku huaki tata, i te whakangaromanga rānei o te hunga kino ina pā mai. 
Ko Ihowā hoki hei okiokinga mōu, ā, māna e tiaki tōu waewae kei mau. 
Kaua e kaiponuhia te pai ki te hunga i tika nei mā rātou, i ngā wā e taea ai e tōu ringa. 
Kaua e mea ki tōu hoa, “Haere, ka hoki mai ai, ā, āpōpō ka hoatu e ahau,” i te mea kei a koe anō te mea e takoto ana. 
Kei whakatakoto i te kino mō tōu hoa, kei te noho hū noa nā hoki ia i tōu taha. 
Kei ngangau pokanoa ki te tangata, ki te mea kāhore āna mahi kino ki a koe. 
Kei hae ki te tangata nanakia, kaua hoki e whiriwhiria tētahi o ōna ara. 
He mea whakarihariha hoki te whanokē ki a Ihowā; kei te hunga tika ia tōna whakaaro ngaro. 
He kanga nā Ihowā kei roto i te whare o te tangata kino, he mea manaaki ia nāna te nohoanga o te hunga tika. 
He pono ka whakahī ia ki te hunga whakahī, ka puta ia tōna atawhai ki te hunga whakaiti. 
Ka whiwhi te hunga whakaaro nui ki te korōria; he whakamā ia te whakanui o ngā wairangi. 
