﻿Whakatauki.
5.
E tāku tama, tahuri ki ōku whakaaro nui; kia anga tōu taringa ki tōku mātauranga, 
kia ū ai koe ki te ngārahu pai, mau ai te mātauranga i ōu ngutu. 
Ko ngā ngutu hoki o te wahine kē, kei te māturuturunga iho o te honikoma, ngāwari iho tōna māngai i te hinu; 
he kawa rawa hoki tōna mutunga i te taru kawa, he koi, ānō he hoari matarua. 
Ko ōna waewae e heke ana ki te mate; mau pū te rēinga i ōna takahanga. 
Heoi, kāhore i kitea e ia te ara tōtika ki te ora; he kotiti kē ōna ara, ā, kāhore ia i tē mātau. 
Nā reira, e āku tamariki, whakarongo mai ki ahau, kei mahue hoki ngā kupu a tōku māngai. 
Kia matara tōu ara i a ia, kaua hoki e tata ki te tatau o tōna whare; 
kei hoatu tōu hōnore ki ngā tāngata kē, ōu tau ki te hunga nanakia. 
Kei mākona ngā tāngata kē i tōu kaha, kei riro ōu māuiui ki te whare o te tangata kē; 
ā, ka tangi koe i tōu whakamutunga, ina poto ōu kikokiko me tōu tinana, 
ā, ka mea, “Kātae tōku kino ki te ako; kātae te māuiui o tōku ngākau ki te tohutohu! 
Kīhai hoki ahau i whakarongo ki te reo o ōku kaiwhakaako, kīhai tōku taringa i anga ki te hunga e tohutohu ana i ahau. 
Wāhi iti kei ngā kino katoa ahau i waenganui o te whakaminenga, o te huihui.” 
Inumia he wai i roto i tāu ake rua, me ngā wai rere anō i roto i tāu ake poka. 
Kia tohatoha noa atu koia āu puna wai, ngā awa wai i ngā huarahi? 
Waiho ēnā māu anake, kauaka mā koutou tahi ko ngā tāngata kē. 
Kia manaakitia tāu puna wai; kia koa anō koe ki te wahine o tōu taitamarikitanga. 
Kia rite ia ki taua mea āhuareka, ki te hāta, ki te mea ātaahua ki te anaterope. Kia mākona koe i ōna ū i ngā wā katoa, kia matenuitia tonutia e koe tōna aroha. 
He aha oti koe, e tāku tama, ka matenui ai ki te wahine kē, i awhi ai i te uma o te wahine kē? 
Kei mua hoki i ngā kanohi o Ihowā ngā ara o te tangata, ā, e meinga ana e ia kia papatairite ōna ara katoa. 
Ko ōna kino anō hei hopu i te tangata kino, hei taura ōna hara e mau ai ia. 
Ka mate ia, he mea kīhai i whakaakona, ka pōhēhē i te nui o tōna wairangi. 
