﻿Whakatauki.
7.
E tāku tama, puritia āku kupu, hunā āku whakahau ki roto ki a koe. 
Puritia āku whakahau, ā, ka ora; tāku ture, ānō ko te whatupango o tōu kanohi. 
Herea ki ōu maihao; tuhituhia, ko tōu ngākau ānō hei papa. 
Kī atu ki te whakaaro nui, “He tuahine koe nōku,” kīia hoki te mātauranga ko tōu whanaunga wahine. 
Kia ai ēnei hei tiaki i a koe kei hē i te wahine kē, i te wahine kē, he kōrero whakapati nei āna. 
I titiro atu hoki ahau i te matapihi o tōku whare i roto i tōku whakakahokaho, 
ā, i mātakitaki ahau i roto i ngā kūware, i kite i roto i ngā taitama, i tētahi tamaiti kāhore rawa he whakaaro, 
e haere ana i te ara i te wāhi tata e piko atu ai ki a ia, ā, haere ana ia i te ara ki tōna whare, 
i te kākarauritanga, i te ahiahi o te rā, i te titiwhatanga o te pō, i te pōuri kerekere. 
Nā, kua tūtaki tētahi wahine ki a ia, he kākahu pūremu tōna, he ngākau hīanga. 
He māngai korokī tōna, he tohetohe; ko ōna waewae, kāhore e tau ki tōna whare; 
ināianei kei ngā ara ia, inamata kei ngā waharoa, e tauwhanga ana i ngā kokinga katoa. 
Koia i hopukia ai ia e ia, kei te kihi i a ia, ā, ka mea atu ki a ia, me te whakatoi anō i tōna mata: 
“He patunga mō te pai kei ahau; nō tēnei rā nei ahau i whakamana ai i āku kupu taurangi; 
koia ahau i haere mai ai ki te whakatau i a koe, ki te āta rapu i tōu mata, ā, ka kitea nei koe e ahau. 
Ko tōku moenga kua horahia e ahau, whakapaipai rawa ki te kaitaka, ki ngā kākahu purepure nō te rīnena o Īhipa. 
Kua ruia e ahau tōku moenga ki ngā mea whakakakara, ki te maira, ki te aroe, ki te hinamona. 
Haere mai, kia whaowhina tāua ki te aroha, ā ao noa; kia ora ō tāua ngākau i te aroha. 
Kāhore hoki tāku tāne i te whare; kua riro ia, he haere tawhiti. 
I maua atu e ia he pūtea moni i tōna ringa; ka hoki mai anō ia i te kōwhititanga o te marama.” 
He maha nō āna kōrero whakawai, riro ana ia i a ia ki tāna; nā te whakapati a ōna ngutu ka kūmea atu ia e ia. 
Haere tonu ia i muri i a ia, ānō he kau e haere ana kia patua, he kūware rānei e haere ana ki ngā rākau here waewae e whiua ai te hē, 
ā, tū noa te tao ki tōna ate puta rawa. Rite tonu ia ki te manu e hohoro ana ki te māhanga, tē mōhio he matenga tērā mōna. 
Nō reira, e āku tamariki, whakarongo ki ahau, maharatia ngā kupu a tōku māngai. 
Kei peau kē tōu ngākau ki ōna ara, kei kotiti kē ki ōna huarahi. 
He tokomaha hoki ngā tāngata i tū, i hinga i a ia, āe rā, he ope nui rawa tāna i patu ai. 
He huarahi tōna whare ki te rēinga, e anga ana ki raro ki ngā rūma o te mate. 
