﻿Whakatauki.
9.
Kua oti i te whakaaro nui tētahi whare mōna te hanga, e whitu ngā pou kua oti te tārai e ia. 
Kua oti āna kararehe te patu e ia, whakananu rawa tāna wāina; kua oti anō tāna tēpu te whakapai. 
Kua ungā e ia āna kōtiro, e karanga ana ia i runga i ngā wāhi tiketike rawa o te pā. 
“Ki te mea he kūware tētahi, me peka mai ia ki konei!” Ko te tangata maharakore, ko tāna kupu tēnei ki a ia, 
“Haere mai, kainga tāku taro, inumia hoki te wāina kua oti nei te whakananu e ahau. 
Kāti rā, e te hunga kūware, kia ora ai koutou; haere hoki i te ara o te mātauranga.” 
Ko ia e papaki ana i te tangata whakahīhī, ka whakamā; ā, ko ia e riri ana i te tangata kino, ka piri mai he hē ki a ia. 
Kaua e rīria te tangata whakahī, kei kino ia ki a koe; rīria ko te tangata whakaaro nui, ā, ka aroha ia ki a koe. 
Hoatu te mōhio ki te tangata whakaaro nui, ā, ka neke ake ōna whakaaro; whakaakona te tangata tika, ā, ka nui ake tōna mōhio. 
Ko te tīmatanga o te whakaaro nui ko te wehi ki a Ihowā; ko te mātauranga, ko te mōhio ki te Mea Tapu. 
Māku hoki ka maha ai ōu rā, māku ka neke ake ai ngā tau e ora ai koe. 
Ki te nui ōu whakaaro, mōu anō ōu whakaaro nui; ki te whakahī koe, māu anake tāu pīkaunga. 
Ko te wahine wairangi, he māngai nui ia; he kūware ia, kāhore ōna mōhio ki te aha, ki te aha. 
Noho ana ia i te kūwaha o tōna whare i runga i te nohoanga i ngā wāhi tiketike o te pā; 
kia karanga atu ai ia ki ngā tāngata e haere ana i te ara, e mārō tonu ana ō rātou huarahi, 
“Ko te kūware, peka mai ki konei!” Tēnā ko te tangata whakaarokore, ko tāna kupu tēnei ki a ia, 
“He reka te wai tāhae, ā, he āhuareka te taro kai huna.” 
Tē mōhio ia kei reira ngā tūpāpaku; kei te rēinga riro ana i karanga ai. 
