﻿Whakatauki.
10.
Ko ngā whakatauki a Horomona. He tama whakaaro nui, ka koa te pāpā; tēnā he tama kūware, he utanga nui mō tōna whaea. 
Kāhore he rawa o ngā taonga o te kino; mā te tika ia te oranga ake i te mate. 
E kore a Ihowā e tuku i te wairua o te tangata tika kia hemokai; ka panā atu ia e ia te hiahia o te hunga kino. 
He rawakore te tukunga iho o te ringa ngehe; mā te ringa kakama ia ka hua te taonga. 
He kohi raumati tā tama ngākau mahara; he whakamā ia te rawa a tama moe ngahuru. 
He manaaki kei te tumuaki o te tangata tika; he ārita ia kei te waha o te tangata kino, taupoki ai. 
Ka manaakitia te maharatanga ki te tangata tika; ka pirau ia te ingoa o te hunga kino. 
He ngākau whakaaro, ka tahuritia te whakahau; he ngutu wairangi, ka hinga. 
Ko te tangata haere tika, e haere ora ana; ko te tangata parori kē ōna ara, ka mōhiotia ia. 
Mā te whakakini o te kanohi ka puta ai te pōuri; ko te ngutu wairangi ia, ka hinga. 
He puna ora te māngai o te tangata tika; tēnā ko te māngai o te hunga kino, ka taupokina tērā e te mahi nanakia. 
Ko tō te mauāhara he whakaoho i ngā totohe; ko tō te aroha he hīpoki i ngā hē katoa. 
E kitea te whakaaro nui ki ngā ngutu o te tangata mātau; ko te rākau ia te mea mō te tuarā o te ngākaukore. 
Rongoā ai te hunga whakaaro nui i te mātauranga; he whakangaromanga ia kei te hori tonu, te māngai o te wairangi. 
Ko ōna rawa te pā kaha o te tangata taonga; tēnā ko te hunga kore taonga, hei whakangaromanga tō rātou rawakore. 
Ko te mahi a te tangata tika e ahu ana ki te ora; ko ngā hua o te kino ki te hara. 
Kei te ara ki te ora te tangata e pupuri ana i te kupu ako; ko te tangata ia e kore e pai kia rīria tōna hē, ka kotiti kē. 
Ko te tangata e huna ana i te mauāhara he ngutu teka; ā, he kūware te tangata e whakapuaki ana i te ngautuarā. 
E kore ngā kupu maha e hapa i te kino; he mahara nui ia te tangata he ngutu kokopi nei ōna. 
He hiriwa pai rawa te arero o te tangata tika; ko te ngākau o te hunga kino, he hauwarea rawa. 
He tokomaha e whāngaia ana e ngā ngutu o te tangata tika; ka mate ia te hunga kūware, he kore nō te ngākau mahara. 
Ka hua te taonga i tā Ihowā manaaki; kāhore hoki e kīnakitia e ia ki te pōuri. 
Hei tākaro mā te wairangi te mahi hē; mā te tangata mātau ia ko te whakaaro nui. 
Ko tā te tangata kino i wehi ai ka tae anō ki a ia; ā, ko tā te hunga tika i hiahia ai, ka hōmai. 
Pahure rawa ake te tūkauati kua kore te hunga kino; tēnā ko te tangata tika he tūranga pūmau tērā. 
He winika ki ngā niho, he paowa ki ngā kanohi; koia anō te māngere ki ōna kaiunga. 
Ko te wehi ki a Ihowā e whakaroa ana i ngā rā; ka whakapotoa mai ia ngā tau o te hunga kino. 
Tūmanako atu te hunga tika, koa iho; tūmanako atu te hunga kino, ngaro iho. 
He kaha mō te tangata tika tā Ihowā ara; he whakangaromanga ia mō ngā kaimahi i te kino. 
E kore te tangata tika e whakangāueuetia ā ake ake; e kore ia e nohoia e te hunga kino te whenua. 
Ko te māngai o te tangata tika hua ana te whakaaro nui; ka tapahia ia te arero whanokē. 
E mōhio ana ngā ngutu o te tangata tika ki ngā mea ka manakohia; he whanokē ia e whakapuakina ana e te māngai o te hunga kino. 
