﻿Whakatauki.
11.
He mea whakarihariha ki a Ihowā te pāuna hē; engari te taimaha tika tāna i pai ai. 
Ka tae te whakapehapeha, ka tae anō te whakamā; kei te hunga whakaiti ia te whakaaro nui. 
Ko tō rātou ngākau tapatahi hei ārahi i te hunga tika; ka ai anō ko te whanokē ia o te hunga poka kē hei whakangaro mō rātou. 
E kore te taonga e whai mana i te rā o te riri; kei te tika ia he oranga ake i te mate. 
Mā te tika o te ngākau tapatahi ka tika ai tōna ara; ka hinga ia te tangata kino i runga i tōna kino. 
Mā te tika o te hunga tika ka mawhiti ai rātou; ka mau ia ngā poka kē i runga i tō rātou kino. 
I te matenga o te tangata kino, kore iho āna mea i tūmanako atu ai; kāhore noa iho he tūmanakohanga mā te hunga hē. 
Ka mawhiti te tangata tika i roto i te raru, ā, ka riro te tangata kino hei whakakapi mō tōna tūranga. 
Hei huna mō tōna hoa te māngai o te tangata whakapono kore; nā, mā te mōhio te hunga tika ka mawhiti ai. 
Ka pai te hunga tika, ka hari te pā; ka whakangaromia te hunga kino, ka tangi te umere. 
Mā te manaaki o te hunga tika ka kake ai te pā; ka pakaru ia i te māngai o te hunga kino. 
Ko te tangata e whakahāwea ana ki tōna hoa he maharakore; tēnā ko te tangata mātau, whakarongo puku ana. 
Ko te tangata haere, ka kawekawe kōrero e whāki ana i ngā mea ngaro; ko te tangata i te wairua pono, e hīpoki ana i te kōrero. 
Ki te kāhore he mōhio hei ārahi, ka hinga te iwi; he ora ia kei ngā kaiwhakatakoto whakaaro tokomaha. 
Ko te tangata ko tāna nei hei whakakapi mō tā te tangata kē, ka mamae; kei te ora ia te tangata e kino ana ki te tikanga whakakapi tūranga. 
Ka mau te korōria i te wahine tikanga pai; ka mau hoki te taonga i ngā tāngata taikaha. 
He atawhai i tōna wairua tā te tangata atawhai; ā, he whakararu i ōna kikokiko tā te tangata nanakia. 
Ko te mahi a te tangata kino e utua ana ki te teka; ko te utu ia mō te kaiwhakatakoto i te tika, ū rawa. 
Ko te tangata ū ki te tika, ka whiwhi ki te ora; ā, ko te tangata e whai ana i te kino e mea ana i te mate mōna. 
Ko tā Ihowā e whakarihariha ai he ngākau whanokē; ko tāna e āhuareka ai ko te hunga e tika ana tō rātou ara. 
Ahakoa awhi ngā ringa ki a rāua, e kore te tangata kino e waiho kia kore e whiua; ka mawhiti ia te uri o te hunga tika. 
Rite tonu ki te whakakai kōura i te ihu o te poaka te wahine ātaahua kāhore nei ōna ngārahu pai. 
Ko tā te hunga tika e minamina ai, ko te pai anake; ko te tūmanako ia a te hunga kino, ko te riri. 
Tērā tētahi kei te rui, ā, tāpiritia mai ana anō; tērā tētahi kei te kaiponu i te mea e tika ana, heoi rawakore noa iho. 
Ko te wairua ohaoha ka mōmona; ko te tangata e whakamākūkū ana, ka whakamākūkūria anō ia. 
Ko te tangata e kaiponu ana i te wīti, ka kangā tērā e te nuinga; ka tau ia te manaaki ki runga ki te māhunga o te tangata e hoko atu ana. 
Ko te tangata e āta rapu ana i te pai, e rapu ana i te whakapai; ko te tangata ia e rapu ana i te hē, ka tae tērā ki a ia. 
Ko te tangata e whakawhirinaki ana ki ōna taonga, ka taka; nā, ko te hunga tika ka rite tō rātou tupu ki tō te rau matomato. 
Ko te tangata e whakararu ana i tōna whare, he hau te taonga e whakarērea iho mōna; hei pononga anō te kūware mā te ngākau whakaaro nui. 
Ko ngā hua o te tangata tika he rākau nō te ora; ka hopu wairua anō te tangata whakaaro tika. 
Nanā, he utu anō tō te tangata tika i runga i te whenua; nui atu ia tō te tangata kino rāua ko te tangata hara. 
