﻿Whakatauki.
13.
Ko te tama whakaaro nui ka rongo ki tā tōna pāpā ako; ko te tangata whakahī ia e kore e rongo ki te riri. 
E kai te tangata i te pai i te hua o tōna māngai; ka kai ia te wairua o te hunga whanokē i te tutū. 
Ko te tangata e tiaki ana i tōna māngai e pupuri ana i tōna ora; ko te tangata ia e hāmama nui ana ōna ngutu, ko te whakangaromanga mōna. 
E hiahia ana te wairua o te tangata māngere, ā, kāhore he mea māna; ka meinga ia kia mōmona te wairua o te hunga uaua. 
E kino ana te tangata tika ki te kōrero teka; he mea whakarihariha ia te tangata kino, ā, whakamā noa iho. 
Ko te tika hei kaitiaki mō te tangata e tapatahi ana te ara; ka whakatakā anō te tangata kino e te hara. 
Tērā tētahi kei te āmene taonga mōna, heoi kāhore rawa he mea i a ia; tērā tētahi kei te whakarawakore i a ia, heoi nui atu ōna rawa. 
Ko ngā utu mō te tangata kia ora, ko ōna rawa; tēnā ko te rawakore, e kore e rongo i te riri. 
E koa ana te mārama o te hunga tika; ka keto ia te rama o te hunga kino. 
He totohe anake i ahu mai i te whakapehapeha; he whakaaro nui ia kei te hunga i ngā kupu tika. 
Ko ngā taonga i puta mai i te whakamanamana ka iti haere; ko tā te tangata i whakaemi ai, he mea mahi, ka tupu haere. 
He manako tāringa roa, he patu ngākau; ka tae te koronga, ko te rākau ia o te ora. 
Ko te tangata e whakahāwea ana ki te kupu, ka ngaro i a ia anō; ko te tangata ia e wehi ana i te whakahau, ka whiwhi ki te utu. 
Ko te ture o te hunga whakaaro nui, he puna nō te ora, e puta ai i ngā reti o te mate. 
Ko tō te ngārahu pai he hōmai atawhai; he taikaha ia te ara o te hunga nanakia. 
He mahi mōhio tā te tangata tūpato; ko tā te wairangi he hora i te kūwaretanga. 
Ka hinga te karere kino ki te kino; ko te karere pono ia, ānō he rongoā. 
Ko te tangata kāhore e pai ki te papaki, māna te rawakore, te whakamā; engari ko te tangata e whai mahara ana ki te ako, ka whakahōnoretia. 
Ko te hiahia kua rite, he reka ki te wairua; he whakarihariha ia ki ngā kūware te whakarere i te kino. 
Haere i te taha o te hunga whakaaro nui, ā, ka whai whakaaro koe; ko te takahoa ia o ngā kūware, ka mamae. 
Ka whai te kino i te hunga hara; ko te utu ia ki te hunga tika, he pai. 
He whakarerenga iho tā te tangata pai mō ngā tamariki a ngā tamariki; kei te rongoā mō te tangata tika ngā taonga o te tangata hara. 
He nui te kai kei te ngakinga a ngā rawakore; tērā ia te mea e ngaro ana i te kore o te tikanga pai. 
Ko te tangata e kaiponu ana i tāna whiu, e kino ana ia ki tāna tama; ko te tangata ia e aroha ana ki a ia, ka papaki wawe i a ia. 
Kai ana te tangata tika, mākona ana tōna wairua; ka hapa ia te kōpū o te tangata kino. 
