﻿Whakatauki.
15.
Mā te kupu ngāwari e kaupare te riri; mā te kupu taimaha ia e whakaoho te riri. 
Ko te arero o te tangata whakaaro nui e whakahua tika ana i te mātauranga; e whakapuaki ana ia te māngai o ngā kūware i te wairangi. 
Kei ngā wāhi katoa ngā kanohi o Ihowā, e titiro ana ki te hunga kino, ki te hunga pai. 
Ko te arero reka he rākau nō te ora; tēnā ki te whanokē a roto he wāwāhi wairua. 
E whakahāwea ana te wairangi ki te papaki a tōna pāpā; ko te tangata ia e mahara ana ki te ako ka mōhio ki te tūpato. 
He nui te taonga kei te whare o te tangata tika; he raruraru ia kei roto i ngā mea hua ki te tangata kino. 
E ruia ana te mātauranga e ngā ngutu o ngā whakaaro nui; kāhore ia he pēnā a te ngākau o ngā kūware. 
He mea whakarihariha ki a Ihowā te whakahere a te hunga kino; engari, e manako ana ia ki te īnoi a te hunga tika. 
He mea whakarihariha ki a Ihowā te huarahi o te tangata kino; ko te tangata ia e whai ana i te tika tāna e aroha ai. 
He kino te papaki ki te tangata e whakarere ana i te ara; ā, ko te tangata e kino ana ki te ako, ka mate. 
Kei te aroaro o Ihowā te rēinga me te whakangaromanga; engari rawa hoki ngā ngākau o ngā tama a te tangata. 
E kore te tangata whakahī e aroha ki te kaipapaki; e kore hoki e haere ki te hunga whakaaro nui. 
Mā te koa o te ngākau ka pai ai te mata; mā te pōuri ia o te ngākau ka marū ai te wairua. 
E rapu ana te ngākau mōhio i te mātauranga; ko te kūware ia tā te māngai o ngā wairangi e kai ai. 
He kino ngā rā katoa o te hunga pōuri; he hākari tonu tā te tangata i te ngākau mārama. 
He pai kē te iti i kīnakitia ki te wehi ki a Ihowā, i te nui taonga i kīnakitia ki te raruraru. 
He pai ake te tina pūwhā ko te aroha hei kīnaki, i te kau whāngai e kīnakitia ana ki te mauāhara. 
He whakaoho tautohe tā te tangata pukuriri; he pēhi pakanga ia tā te tangata manawanui. 
Ko te ara o te tangata māngere, ānō he taiepa tātarāmoa; he ara nui ia tō te tangata tika. 
He tama whakaaro nui, ka koa te pāpā; tēnā ko te tama kūware, he whakahāwea ki tōna whaea. 
Ki te tangata maharakore he mea whakahari te wairangi; he tika ia te haere a te tangata mātau. 
Ki te kāhore he rūnanga, ka pororaru ngā tikanga; mā te tokomaha ia o ngā kaiwhakatakoto whakaaro ka mau ai. 
Kei tā tōna māngai i whakahoki ai he koa mō te tangata; ko te kupu i te wā i tika ai, ānō te pai! 
Ki te tangata whakaaro nui e ahu whakarunga ana te ara ki te ora, he mea kia mahue ai i a ia te rēinga o raro. 
Ka hūtia ake e Ihowā te whare o te tangata whakakake; engari ka whakapūmautia e ia te rohe o te pouaru. 
He mea whakarihariha ki a Ihowā ngā whakaaro nanakia; he mea kohakore ia ngā kupu āhuareka. 
Ko te tangata apo taonga, raruraru ana i a ia tōna whare; ka ora ia te tangata e kino ana ki ngā mea hōmai noa. 
Ko te ngākau o te tangata tika e āta whakaaro ana ki te kupu hei whakahokinga; ko te māngai ia o te tangata kino e tāhoro ana i ngā mea kikino. 
E matara ana a Ihowā i te hunga kino; otiia e rongo ana ia ki te īnoi a te hunga tika. 
Mā te mārama o ngā kanohi ka koa ai te ngākau; ā, mā te rongo pai ka mōmona ai ngā wheua. 
Ko te taringa e whakarongo ana ki te whakatūpato e ora ai, ka noho i waenga i te hunga whakaaro nui. 
Ko te tangata e whakakāhore ana ki te papaki, e whakahāwea ana ki tōna wairua; engari ko te tangata e rongo ana ki te ako, ka whiwhi ki te ngākau mahara. 
Ko te wehi ki a Ihowā te ako o te whakaaro nui; ko te ngākau whakaiti hoki e haere ana i mua i te hōnore. 
