﻿Whakatauki.
18.
Ko te tangata tū kē, e whai ana i tā tōna ake hiahia, e ngangau ana ki ngā whakaaro tōtika katoa. 
Kāhore o te whakaarokore āhuareka ki te mātauranga; engari kia whakakitea e ia tōna ngākau. 
I te taenga mai o te tangata kino ka tae mai anō te whakahāwea, me te tāwai hei hoa mō te whakamā. 
He wai hōhonu ngā kupu a te māngai o te tangata; he awa e rere ana te puna o te whakaaro nui. 
Ehara i te mea pai te whakapai ki te kanohi o te tangata kino, te whakapeau kē rānei i tā te tangata tika ina whakawā. 
E uru ana ngā ngutu o te whakaarokore ki te totohe, e karanga ana tōna māngai ki ngā whiu. 
Hei huna anō mōna te māngai o te whakaarokore; ā, ko ōna ngutu hei rore mō tōna wairua. 
Ānō he kai reka ngā kupu a te kawe kōrero; tae tonu iho ki ngā wāhi o roto rawa o te kōpū. 
Ko te tangata anō hoki e māngere ana ki tāna mahi, hei teina ia ki te tangata maumau. 
Hei pourewa kaha te ingoa o Ihowā; rere ana te tangata tika ki reira, ā, ora ake. 
Ko ngā rawa o te tangata taonga hei pā kaha mōna, hei pā tiketike ki tōna whakaaro. 
I mua ake o te whakangaromanga ka whakakake te ngākau o te tangata; i mua ake anō hoki o te hōnore ko te ngākau pāpaku. 
Ko te tangata e whakahoki kupu ana i te mea kāhore anō ia i rongo noa, he mahi wairangi tērā nāna, he hanga whakamā. 
E whakamanawanui te wairua o te tangata ki tōna mate; tēnā ko te wairua marū, ko wai e kaha ki tērā? 
Ka whiwhi te ngākau o te tangata mātau ki te mōhio; e rapu ana hoki te taringa o ngā whakaaro nui ki te mōhio. 
Mā te mea tuku noa a te tangata ka wātea ai he wāhi mōna, ka kawea hoki ia e tērā ki te aroaro o ngā tāngata nunui. 
Ko te tangata nāna te kupu tuatahi i te whakawā me te mea kei a ia te tika; nā, ka haere mai tōna hoa, kei te rapu i te tikanga o tāna. 
Mā te rota e mutu ai ngā tautohe, ā, ko tērā hei tauārai i waenganui o te hunga kaha. 
Ko te tuakana, teina rānei, i whakatakariritia, pakeke atu i te pā kaha; ā, ko aua tū ngangare me he tūtaki tatau nō te whare rangatira. 
Ka kī te kōpū o te tangata i ngā hua o tōna māngai, ka mākona ia i ngā hua o ōna ngutu. 
Ko te mate, ko te ora kei te arero; ko te hunga e aroha ana ki tērā ka kai i ōna hua. 
Ko te tangata kua kite i te wahine māna, kua kite i te mea pai, kua whiwhi hoki ki tā Ihowā whakapai. 
He īnoi tā te rawakore hanga he taikaha ia te whakahoki a te tangata taonga. 
Ko te tangata tini ngā hoa aroha e whai ana i te hē mōna; tērā anō ia te hoa aroha, nui atu i tō te tuakana, i tō te teina, tōna piri mai. 
