﻿Whakatauki.
21.
Kei roto te ngākau o te kīngi i te ringa o Ihowā ānō he awa rerenga wai; e whakaangahia ana e ia ki ngā wāhi katoa e pai ai ia. 
Ko ngā ara katoa o te tangata, tika kau ki ōna kanohi ake; ko Ihowā ia hei pāuna i ngā ngākau. 
Ko te mahi i te tika, i te whakawā, ki tā Ihowā, pai atu i te patunga tapu. 
He kanohi whakakake, he ngākau whakapehapeha, ā, ko te rama hoki o te hunga kino, he hara kau. 
Ko ngā whakaaro o te tangata uaua e ahu anake ana ki te hua o te taonga; ko te hunga tākare katoa ia e whawhai kau ana ki te mūhore. 
E rite ana tā te arero teka āmi i te taonga ki te mamaoa e āia noatia ana; ko te hunga e rapu ana i ērā e rapu ana i te mate. 
Mā te pāhua a te hunga kino e tahi atu rātou; mō rātou kāhore e pai ki te whakawā. 
He ara tino kōpikopiko tō te tangata e waha ana i te hara; tēnā ko te tangata mā, he tika tāna mahi. 
He pai kē te noho i te kokonga o te tuanui, i te noho tahi me te wahine ngangare i roto i te whare māhorahora. 
Ko tā te wairua o te tangata kino he hiahia ki te kino; e kore ōna kanohi e manako ki tōna hoa. 
Ki te whiua te tangata whakahī, ka whai whakaaro te kūware; ā, ki te whakaakona te tangata whakaaro nui, ka whiwhi ia ki te mātauranga. 
Ka āta whakaaroa e te tangata tika te whare o te tangata kino; te pēheatanga e whakatakā ai te hunga kino ki te mate mō rātou. 
Ko te tangata e puru ana i ōna taringa ki te karanga a te rawakore, tērā hoki ia e karanga, heoi e kore e whakarangona. 
Mā te mea hōmai puku ka mārie ai te riri, mā te moni whakapati hoki i roto i te uma ka mārie ai te āritarita kaha. 
He mahi koa nā te tangata tika te whakawā; mō ngā kaimahi ia i te kino, ko te whakangaromanga. 
Ko te tangata e kotiti kē ana i te huarahi o te mahara, ka noho ia i te whakaminenga o ngā tūpāpaku. 
Ko te tangata matenui ki ngā āhuareka, ka rawakore; ā, ko te tangata e matenui ana ki te wāina, ki te hinu, e kore e whai taonga. 
Hei utu te tangata kino mō te tangata tika; ā, ka haere mai te tangata kōpeka hei whakakapi mō te tangata tū tika. 
He pai kē te noho i te koraha, i te noho tahi me te wahine tohetohe, wahine pukukino. 
Kei te nohoanga o te tangata whakaaro nui te taonga mōmōhanga me te hinu; heoi maumauria ake e te wairangi. 
Ko te tangata e whai ana i te tika, i te atawhai, ka whiwhi ki te ora, ki te tika, ki te hōnore. 
Ka pikitia e te tangata whakaaro nui te pā o ngā mārohirohi, ka taka hoki i a ia te kaha i whakawhirinaki ai rātou. 
Ko te tangata e tiaki ana i tōna māngai, i tōna arero, e tiaki ana i tōna wairua kei raru. 
Ko te tangata whakakake, whakapehapeha, ko te tangata whakahī tōna ingoa, e mahi ana ia i runga i te whakahirahira o tōna whakamanamana. 
Ka mate te tangata māngere i tōna hiahia anō; e kore hoki ōna ringa e pai ki te mahi. 
Tērā te hanga he kaiapo tonu ā pau noa te rā; ko tā te tangata tika ia he hōmai, kāhore hoki āna kaiponu. 
He mea whakarihariha te whakahere a te tangata kino; tērā noa ake ina hē te whakaaro i kawea mai ai e ia. 
Ka mate te kaiwhakaatu teka; nā, ko te tangata whakarongo, ka kōrero, kāhore he kaiwhakahē. 
Ka whakamārō te tangata kino i tōna mata; tēnā ko te tangata tika, ka whakapai i ōna ara. 
I tō Ihowā aroaro kāhore he whakaaro nui, kāhore he mātauranga, kāhore he kupu mōhio, e tū. 
Kua rite noa ake he hōiho mō te rā o te whawhai; kei a Ihowā ia te whakaoranga. 
