﻿Kaikauwhau.
10.
Mā ngā ngaro mate ka piro whakahouhou ai te hinu a te kaiwhakananu; ka pērā anō te whakaaro nui me te ingoa nui, he iti noa te wairangi māna e tāmi. 
Kei tōna ringa matau te ngākau o te tangata whakaaro nui; kei tōna mauī ia te ngākau o te wairangi. 
Āe rā hoki, ka haere te wairangi i te ara, ka taka ōna mahara, ā, ka kōrero ia ki ngā tāngata katoa he wairangi ia. 
Ki te ara te wairua o te rangatira, he riri ki a koe, kaua tōu wāhi e whakarērea; ka ai hoki te whakangāwari hei whakamārie mō ngā hara nui. 
Tēnei tētahi kino i kitea e ahau i raro i te rā, e rite tonu ana ki te hē i puta mai i te rangatira: 
ko te wairangi e whakanohoia ana ki runga ki ngā wāhi tiketike rawa, ā, ko ngā tāngata taonga e noho ana i te wāhi i raro. 
I kite ahau i ngā kaimahi i runga i te hōiho, ā, ko ngā rangatira e haere ana, ānō he kaimahi, i runga i te whenua. 
Ko te tangata e keri ana i te rua, ka taka anō ki roto; ko te tangata e wāhi ana i te taiepa, ka ngaua e te nākahi. 
Ko te tangata e tārai ana i ngā kōhatu, ka mamae anō i reira; ko te tangata e tata ana i te rākau, ka ora noa anō i reira. 
Ki te pūhuki te rino, ā, kāhore e whakakoia te mata, kia nui ake anō tōna kaha; he pai ia ngā whakaaro nui hei whakatikatika. 
Ki te ngau te nākahi i te mea kīanō i whakawaia, kāhore hoki he painga o te kaiwhakawai. 
He ātaahua ngā kupu a te māngai o te tangata whakaaro nui; tēnā ko te wairangi ka horomia a ia anō e ōna ngutu. 
Ko te tīmatanga o ngā kupu a tōna māngai he wairangi; ko te mutunga o tāna kōrero, he haurangi, he hē. 
He maha anō hoki ngā kupu a te wairangi; engari e kore te tangata e mōhio ko te aha e puta mai. Nā, ko ngā mea e puta mai i muri i a ia, mā wai rā e whakaatu ki a ia? 
Hōhā iho ngā wairangi i tāna mahi, i tāna mahi; e kore nei hoki ia e mātau ki te haere ki te pā. 
Auē te mate mōu, e te whenua he tamaiti nei tōu kīngi, ā, e kai ana ōu rangatira i te ata! 
Ka hari koe, e te whenua, he tamaiti nei nō ngā rangatira tōu kīngi, ā, e kai ana ōu rangatira i te wā e tika ai – hei mea whakakaha, ehara i te mea hei whakahaurangi. 
Mā te māngere ka totohu iho ai te tuanui o te whare; mā te ngoikore anō o ngā ringa ka tūturu ai te whare. 
Hei mea mō te kata te hākari i tukua ai, he mea whakahari anō te wāina; ā, mā te hiriwa ka rite ai ngā mea katoa. 
Kaua e kangā te kīngi, kaua rawa i roto i tōu whakaaro; kaua hoki e kangā te tangata taonga i roto i tōu whare moenga; nō te mea ka kawea te reo e tētahi manu o te rangi, ka kōrerotia hoki taua mea e tētahi mea whai parirau. 
