﻿Waiata a Horomona.
7.
Anō te ātaahua o ōu waewae i roto i ōu hū, e te tamāhine a te rangatira! Ko ngā hononga o ōu hūhā, koia anō kei o ngā peara, he mea hanga nā ngā ringa o te kaimahi mōhio. 
Ko tōu pito, koia anō kei te oko porotaka, kīhai i hapa i te wāina whakaranu; ko tōu kōpū, ānō he pūranga wīti kua oti te karapoti ki ngā rengarenga. 
Nō ōu ū e rua, ānō ko ngā kūao e rua, he māhanga nā te anaterope. 
Ko tōu kakī ānō he pourewa rei. Ko ōu kanohi, ānō ko ngā roto wai i Hehepona, i te Kūwaha o Peterapimi. Ko tōu ihu, ānō ko te Pourewa o Repanōna, e titiro atu nei ki Ramahiku. 
Ko tōu māhunga, i runga i a koe rite tonu ki Karamere, ā, ko te makawe o tōu māhunga, ki te pāpura; e mau herehere ana te kīngi i roto i ōna uru. 
Anō te ātaahua, anō te pai ōu, e te mea e arohaina ana, āhuareka tonu! 
Rite tonu koe ki te nīkau i a koe e tū nei, ā, ko ōu ū ki ngā tautau karepe. 
I mea ahau, “Ka pikitia e ahau te nīkau, ka hopukia atu e ahau ōna manga.” Kia rite ōu ū ki ngā tautau o te wāina, te kakara o tōu hā ki te āporo; 
ā, ko tōu māngai kia rite ki te wāina tino pai e mania nei tāna heke mā tāku e aroha nei, e rere ana nā ngā ngutu o te hunga e moe ana. 
Kei tāku e aroha nei ahau; ko ahau anō tāna e hiahia ai. 
Haere mai, e tāku e aroha nei, tāua ka haere ki te pārae, ka moe tāua ki ngā pā ririki. 
Kia moata tō tāua maranga ki ngā māra wāina; kia kite ai, e tupu ana rānei te wāina, kua puta rānei te karepe hou, e kōpuku ana rānei ngā pamekaranete. Ko reira hoatu ai e ahau tōku aroha ki a koe. 
Kei te patu te kakara o ngā manitareki, kei ō tāua kūwaha anō ngā momo hua papai katoa, ngā mea hou, ngā mea tawhito, he mea rongoā nāku māu, e tāku e aroha nei. 
