﻿Ihāia.
9.
Otiia, e kore e pōuri tonu ia i mamae nei. I te wā i mua i whakaititia e ia te whenua o Hepurona me te whenua o Napatari; i te wā ia i muri nei ka whakakorōriatia e ia, i te ara o te moana, i tāwāhi o Horano, i Karirī o ngā tauiwi. 
Ko te hunga i hāereere i te pōuri, kua kite i te mārama nui; ko ngā tāngata e noho ana i te whenua o te ātārangi o te mate; kua whiti te mārama ki a rātou. 
Kua whakatokomahatia e koe te iwi, kua whakanuia e koe tō rātou koa; koa noa iho rātou ki tōu aroaro, me te mea e koa ana ki te kotinga wīti, e whakamanamana ana rānei ki ngā taonga parakete e wehewehea ana. 
Whati pū hoki i a koe te ioka o tāna kawenga, te rākau whiu mō tōna pokohiwi, te rākau o tōna kaiwhakatupu kino, koia anō kei tō te rā i a Miriana. 
Ko ngā mea whawhai katoa hoki a te tangata whawhai mō te ngangau, ko ngā kākahu i okeokea ki te toto, hei tahunga ēnā, hei kai mā te ahi. 
Kua whānau nei hoki he tamaiti mā tātou, kua hōmai he tama ki a tātou; ā, ki runga ki tōna pokohiwi te rangatiratanga; nā, ko te ingoa e huaina ki a ia ko Whakamīharo, ko Kaiwhakatakoto Whakaaro, ko te Atua Kaha Rawa, ko te Matua Mutungakore, ko te Rangatira o te Rongomau. 
Kāhore he mutunga o te nui haere o tōna kīngitanga, o te mau o tana rongo, ki runga ki te torōna o Rāwiri, ki runga hoki i tōna rangatiratanga. Kia ū ai, kia mau ai hoki i runga i te whakawā, i runga i te tika āianei ā ake tonu atu. Ka oti tēnei i te ngākau whakapuke o Ihowā o ngā mano. 
I ungā e te Ariki he kupu ki a Hākopa, kua tau anō ki a Īharaira; 
ā, ka mōhio te iwi katoa – a Ēparaima rātou ko te tangata o Hamaria – he whakapehapeha nei, he ngākau nui nei tō rātou ki te kī mai, 
“Kua horo ngā pereki, ā, mā tātou e hanga ki te kōhatu tārai; kua oti ngā hikamora te tapahi, ka puta kē i a tātou he hīta.” 
Nō reira ka whakaarahia e Ihowā ngā hoariri o Retini ki a ia, ā, ka oho i a ia ōna hoa whawhai; 
ko ngā Hīriani ki mua, ko ngā Pirihitini ki muri, hāmama tonu ki te kai i a Īharaira. Ahakoa ko tēnei katoa e kore tōna riri e tahuri kē, engari mārō tonu tōna ringa. 
Nā, kīhai anō te iwi i tahuri ki tō rātou kaiwhiu, kīhai anō hoki i rapu i a Ihowā o ngā mano. 
Mō reira ka tapahia e Ihowā te upoko o Īharaira me te hiawero, te nīkau me te wīwī, i te rā kotahi – 
ko te kaumātua me te tangata ingoa nui, ko ia te upoko; ko te poropiti whakaako teka, ko ia te hiawero. 
Ko ngā kaiārahi hoki o tēnei iwi hei whakapōhēhē i a rātou, ā, pau ake a rātou i ārahi ai. 
Mō reira kāhore o te Ariki koa ki ā rātou taitamariki, e kore anō e tohungia ā rātou pani, ā rātou pouaru; nō te mea he noa rātou katoa, he kaimahi i te kino, he wairangi te kōrero a ngā māngai katoa. Ahakoa ko tēnei katoa, e kore tōna riri e tahuri kē, engari mārō tonu tōna ringa. 
Kei te toro nei hoki te kino, ānō he ahi; pau ake i a ia ngā tātarāmoa me ngā tūmatakuru; nā, ka kā ki ngā rākau pūruru o te ngahere, ka pupū ake ngā kapua pongere o te paowa whakarunga. 
Nā te riri o Ihowā o ngā mano i toro ai te whenua; ā, ko te iwi, ānō he kai mā te ahi; e kore tōna tuakana, tōna teina e tohungia e tētahi. 
Ā, ka kapohia e tētahi māna i te taha ki matau, ā, ka matekai anō; ā, ka kai ia i te taha ki mauī, ā, e kore rātou e mākona. Ka kainga e rātou, e tēnā, e tēnā o rātou te kikokiko o tōna ake ringa; 
a Mānahi ki a Ēparaima; a Ēparaima ki a Mānahi; ā, ko rāua tokorua ki a Hūrā. Ahakoa ko tēnei katoa, e kore tōna riri e tahuri kē, engari mārō tonu tōna ringa. 
