﻿Ihāia.
29.
Auē te mate mō Ariere, mō Ariere, mō te pā i noho ai a Rāwiri! Tāpiritia iho tētahi tau ki tētahi tau; mahia ngā hākari i ngā wā e rite ai. 
Hei reira raru ai i ahau a Ariere, ā, ka pōuri, ka tangi; ā, ka rite ia ki ahau ānō ko Ariere. 
Ka nohoia atu anō koe e ahau, ā karapoi noa; ka whakapaea koe ki te parepare, ka ara anō i ahau he taiepa hei tatau ki a koe. 
Ā, ka whakahokia iho koe, ka kōrero ake i te whenua; ka iti anō tāu kupu i roto i te puehu; ka rite tōu reo ki tō te tangata i te atua māori, he mea puta ake i te whenua, ka kohimu ake tāu kupu i roto i te puehu. 
Ko te huihuinga ia o ōu hoariri ka rite ki te puehu ririki, ā, ko te huihuinga o te hunga nanakia ki te pāpapa e rere atu ana. Āe rā, ka hemorere tonu, 
ka pā tā Ihowā o ngā mano ki a ia, he whatitiri, he rū, he reo nui, he tūkauati, he tūpuhi, he mura ahi e kā ana. 
Ā, ka rite ki te moe, ki te rekanga kanohi o te pō ngā iwi maha katoa e whawhai ana ki Ariere, arā te hunga katoa e ngangare ana ki a ia, ki tōna pā kaha, e whakatupu kino ana hoki i a ia. 
Ka rite anō ki te tangata matekai e moe ana, nā, kei te kai ia; heoi, kei te ohonga ake, e takoto kau ana tōna wairua; ka rite hoki ki te tangata matewai e moe ana, nā, kei te inu ia; te ohonga ake, kāhore he kaha, kei te hiahia anō tōna wairua; ko te rite tērā o te hui o ngā iwi katoa e whawhai ana ki Maunga Hiona. 
E tū koutou, e mīharo; e hari, ā, ka matapō; e haurangi ana rātou, ehara ia i te wāina; e hūrori ana, engari ehara i te wai kaha. 
Nō te mea kua ringihia e Ihowā te wairua o te moe au tonu ki runga ki a koutou, kua oti anō i a ia te whakamoe ō koutou kanohi, ngā poropiti; ko ō koutou rangatira, ko ngā matakite, kua taupokina e ia. 
Ā, ka rite ki a koutou te kitenga katoa ki ngā kupu o tētahi pukapuka i hīritia, e hoatu ana e ngā tāngata ki tētahi tangata mātau ki te kōrero pukapuka, ka mea atu, “Tēnā, kōrerotia tēnei”, ā, ka mea mai ia, “E kore e taea e ahau, e hīri nā hoki.” 
Nā, ka hoatu taua pukapuka ki te mea kāhore nei e mātau ki te kōrero pukapuka; nā, ko te kīanga atu, “Tēnā, kōrerotia tēnei,” anō rā ko ia, “Kāhore ahau e mātau ki te kōrero.” 
Nā, ka mea te Ariki: “I te mea e whakatata ana mai te iwi nei ki ahau, ā, e whakahōnore ana i ahau ki tō rātou māngai, ki ō rātou ngutu, otiia e matara noa atu ana i ahau ō rātou ngākau, ā, ko tō rātou wehi ki ahau he mea whakaako e tā te tangata tohutohu. 
Nā, ka tahuri ahau ki te mahi i tētahi mahi whakamīharo ki waenganui i tēnei iwi, he mahi whakamīharo rawa, he mīharo whakaharahara; ka whakamōtītia hoki ngā whakaaro o ō rātou mea whakaaro nui, ka ngaro te mātauranga o ō rātou mea mōhio.” 
Auē te mate mō te hunga e whai ana i te wāhi hōhonu, kia ngaro ai tō rātou whakaaro i a Ihowā; ā, kei te pōuri ā rātou mahi, e mea ana hoki, “Ko wai e kite ana i a tātou? Ko wai e mātau ana ki a tātou?” 
Tā koutou whakaputa kē! E kīia rānei te kaihanga rīhi he rite ki te paru? E kī ake rānei te mea i hangā ki tōna kaihanga, “Kīhai ahau i hangā e ia”? E mea ake rānei te mea i mahia ki tōna kaimahi, “Kāhore ōna mātauranga”? 
He teka rānei he iti rawa nei te takiwā, ā, ka puta kē a Repanōna hei māra whai hua, ā, ka kīia te māra whai hua hei ngahere? 
I taua rā ka rongo ngā turi i ngā kupu o te pukapuka, ka kite anō ngā kanohi o ngā matapō i roto i te kākarauri, i te pōuri. 
Ka neke ake anō te hari o te hunga māhaki ki a Ihowā, ka koa anō ngā tāngata rawakore ki te Mea Tapu o Īharaira. 
Kua mōtī hoki te tangata nanakia; ā, ko te tangata whakahī, kua poto; kua hātepea atu anō te hunga katoa i whanga ki te kino – 
e whakatau hē nei ki te tangata e kōrero ana, e whakatakoto rore nei mō te kairiri o te hē i te kūwaha; ā, kāhore he rawa i whakapeaua kētia ai e rātou te tangata tika. 
Nā, ko te kupu tēnei a Ihowā, nāna nei a Āperahama i hoko, mō te whare o Hākopa: “E kore a Hākopa e whakamā āianei, e kore anō e kōmā tōna mata āianei. 
Engari, kia kite ia i āna tamariki, i te mahi a ōku ringa, i roto i a ia, ka whakatapua e rātou tōku ingoa; āe rā, ka whakatapua anō e rātou te Mea Tapu o Hākopa, ā, ka wehi ki te Atua o Īharaira. 
Ka mōhiotia anō te mātauranga e ngā wairua kotiti kē, ā, ka ako te hunga amuamu ki te kupu mōhio.” 
