﻿Ihāia.
46.
Kua piko a Pere, kua tuohu a Nepo; kei runga i te kīrehe, i te kararehe ā rātou whakapakoko; ko ngā mea e haria haeretia ana e koutou ka meinga hei kawenga, hei taimaha ki te kararehe māuiui rā. 
Tuohu ana rātou, piko ngātahi ana; kīhai i taea te pīkaunga te pupuri, heoi ko rātou nei anō ka riro hei pārau. 
“Whakarongo ki ahau, e te whare o Hākopa, e ngā mōrehu katoa o te whare o Īharaira, he mea waha nei koutou nāku nō te kōpū mai anō, he mea pīkau nō roto mai rā anō i te puku; 
tae noa atu ki tō koutou koroheketanga ko ahau tēnei, ka pīkaua anō koutou e ahau ā hina noa. Nāku i mahi, māku anō e mau; māku anō e pīkau, māku anō e whakaora. 
“Ki tā koutou kei tō wai he āhua mōku? Ko wai e rite ana ki ahau? Me whakarite ahau ki a wai, e kotahi ai tō māua āhua? 
Ko te hunga e tāhoro ana i te kōura i te pēke, e pāuna ana i te hiriwa ki te pāuna – kei te utu i te kaitahu kōura, hangā ake e ia hei atua; tāpapa ana rātou, koropiko ana. 
Amohia ana ia e rātou i runga i te pokohiwi, pīkaua ana, kua waiho e rātou ki tōna wāhi, tū ana ia; tē taea e ia te nekeneke atu i tōna wāhi. Ka karanga anō hoki tētahi ki a ia, heoi e kore ia e whakahoki kupu, e kore e whakaora i a ia i roto i tōna mate. 
“Mahara ki tēnei, whakatāne, whakahokia ki te ngākau, e te hunga poka kē. 
Maharatia ngā mea tuatahi onamata; ko ahau hoki te Atua, kāhore kē atu; ko ahau te Atua, kāhore hoki tētahi hei rite mōku. 
I te tīmatanga e whakaatu ana i ngā mea o te mutunga, ā, i ngā wā onamata ko ngā mea kāhore anō i meatia; i kī ahau: Ko te whakaaro i whakatakotoria e ahau mau tonu, ka oti anō i ahau tāku katoa i pai ai. 
Ka karangatia hoki e ahau he manu kai kino i te rāwhiti, ko te tangata kei a ia tōku whakaaro i te whenua tawhiti. Inā, kua kōrerotia nei e ahau, ka whakaputaina anō e ahau; kua takoto i ahau, ka oti anō i ahau. 
“Whakarongo ki ahau, e te hunga ngākau pakari, e matara atu ana i te tika. 
Ka kawea mai e ahau tōku tika kia tata; e kore e matara atu; e kore anō tāku whakaora e roa; ka whakawhiwhia anō e ahau a Hiona ki te whakaora, mō Īharaira, mō tōku korōria.” 
