﻿Ihāia.
56.
Ko te kupu tēnei a Ihowā: “Puritia te whakawā, mahia te tika; nō te mea ka tata he putanga mō tāku whakaora, he whakakitenga mō tōku tika. 
Ka hari te tangata nāna tēnei mahi, te tama a te tangata e pupuri nei i a ia, mau tonu; e pupuri ana, ā, kāhore e whakapoke i te hāpati, e tiaki ana i tōna ringa kei mahi i tētahi hē.” 
Kaua hoki te tama a te tangata kē, kua honoa nei ki a Ihowā, e kōrero, e mea, “He pono ka wehea rawatia mai ahau e Ihowā i roto i tāna iwi.” Kaua anō te unaka e kī, “Nanā, he rākau maroke ahau.” 
Ko tā Ihowā kupu hoki tēnei: “Mō ngā unaka e pupuri ana i āku hāpati, e whiriwhiri ana i ngā mea e paingia ana e ahau, ā, e hopu ana i tāku kawenata; 
ka hoatu e ahau he wāhi ki a rātou i roto i tōku whare, i roto anō i ōku taiepa, he ingoa anō e pai ake ana i o ngā tama, i o ngā tamāhine; he ingoa mau tonu tāku e hoatu ai ki a rātou, he mea e kore e hātepea atu. 
Ko ngā tamariki hoki a te tangata kē, kua oti te hono ki a Ihowā, he mea kia mahi ai rātou ki a ia, kia aroha ki te ingoa o Ihowā, kia waiho hei pononga māna, ko te hunga katoa e pupuri ana, ā, kāhore e whakapoke i te hāpati, ā, e hopu ana i tāku kawenata – 
ka kawea rātou e ahau ki tōku maunga tapu, ka whakahari anō ahau i a rātou i roto i tōku whare īnoi; ka manakohia ā rātou tahunga tinana, me ā rātou patunga tapu i runga i tāku āta; nō te mea ka kīia tōku whare, he whare īnoi mō ngā iwi katoa.” 
He kupu tēnei nā te Ariki, nā Ihowā, nā te kaikohikohi mai o te hunga o Īharaira i peia atu, “Kua kohikohia ērā ki a ia; ka kohikohi anō ahau i ētahi atu ki a ia.” 
E ngā kīrehe katoa o te pārae, haere mai ki te kai, e ngā kīrehe katoa o te ngahere! 
Ko ōna tūtei, he matapō katoa, kāhore e mōhio; he kurī reokore katoa rātou, e kore e tau; he momoe, he takoto, e matenui ana ki te moe. 
Āe rā, he kurī apo kai rātou; kāhore rawa e mākona. He hēpara ēnei e kore e ngoto te mātauranga; anga katoa ana rātou ki tōna ara, ki tōna ara, ki te mea taonga mōna i tōna wāhi, i tōna wāhi. 
Ko tā rātou kī, “Haere mai, māku e tiki he wāina, kia nui anō tā tātou inu i te wai kaha; ā, ka rite te rā āpōpō ki tēnei rā, he rā kei runga noa atu tōna nui.” 
