﻿Ihāia.
63.
Ko wai tēnei e haere mai nei i Ēroma, he mea rongoā mai ngā kākahu i Potora? Tēnei he korōria rawa nei ōna kākahu, e haere ana i runga i te nui o tōna kaha? “Ko ahau e kōrero atu nei i runga i te tika, ko te mea kaha ki te whakaora.” 
He aha i whero ai ōu kākahu, i rite ai ōu weweru ki ō te kaitakahi i te takahanga wāina? 
“Nā tōku kotahi te takahanga wāina i takahi, kāhore hoki he tangata o te iwi hei hoa mōku. Takahia iho rātou e ahau, he riri nōku; takatakahia ana rātou e ahau ki raro, i ahau e weriweri ana; patī ana ō rātou toto ki ōku weruweru, whakapokea iho e ahau tōku kākahu katoa. 
Kei roto hoki i tōku ngākau te rā o te rapu utu; kua tae mai anō te tau o āku i hoko ai. 
Nā, ka titiro atu ahau, ā, kāhore he kaiāwhina, mīharo ana ahau nō te mea kāhore he kaitautoko ake; nā, kua meatia e tōku tākakau, he whakaoranga mōku; ko tōku weriweri, nā tērā ahau i tautoko ake. 
Nā, takahia ana e ahau ngā iwi, i ahau e riri nei; i ahau anō e weriweri ana ka whakahaurangitia rātou e ahau, ā, ringihia ana e ahau tō rātou toto ki te whenua.” 
Ka whakahuatia e ahau ngā mahi aroha a Ihowā, ngā whakamoemiti ki a Ihowā, ka rite ki ngā mea i hōmai e Ihowā ki a tātou; ki te nui hoki o te pai ki te whare o Īharaira i hōmai nei e ia ki a rātou; he mea i rite tonu ki āna mahi tohu tangata, ki te nui anō o āna mahi aroha. 
I mea hoki ia, “He pono, ko tāku iwi rātou, he tamariki e kore e kōrero teka”; nā, ko ia tō rātou kaiwhakaora. 
I ō rātou pōuritanga ngākau katoa i pōuri anō ia, ā, whakaorangia ake rātou e te anahera o tōna aroaro. He aroha nōna, he mahi tohu tangata i hoko ai ia i a rātou, hikitia ana rātou, whakahāereerea ana i ngā rā katoa onamata. 
Heoi, whakakeke ana rātou whakapōuritia iho e rātou tōna Wairua Tapu. Nā, ka puta kē ia hei hoariri mō rātou; kei te whawhai anō ia ki a rātou. 
Kātahi ia ka mahara ki ngā rā o mua, ki a Mohi, ki tāna iwi, i mea ia, Kei hea ia nāna rātou i kawe ake i te moana me ngā hēpara o tāna kāhui? Kei hea te kaiwhakanoho o tōna Wairua Tapu ki waenganui i a rātou? 
I ārahi nei i a rātou, he meatanga nā te ringa matau o Mohi, nā tōna tākakau korōria? I wāhi nei i ngā wai i tō rātou aroaro, hei mea i tētahi ingoa mōna e mau tonu ana? 
I ārahi nei i a rātou i waenganui o te moana, ānō he hōiho i te koraha, tē hinga rātou? 
Kei te kararehe e haere ana ki raro ki te awaawa te rite, pērā tonu tā te Wairua o Ihowā meatanga i a rātou kia okioki. Pērā tonu tāu arahanga i tāu iwi, i whai ingoa korōria ai koe. 
Titiro mai i runga i te rangi, mātakitaki mai i runga i te nohoanga o tōu tapu, o tōu korōria. Kei hea tōu ngākau nui, me āu mahi nunui? Ko te ohoohonga o ōu whēkau, ko āu mahi tohu ka pēhia iho ki ahau. 
He pono ko koe tō mātou pāpā, kāhore nei hoki a Āperahama e mōhio ki a mātou, kāhore anō hoki a Īharaira e mahara ki a mātou; ko koe, e Ihowā, tō mātou pāpā; ko tō mātou kaihoko, nōnamata mai tōu ingoa. 
He aha koe, e Ihowā, i mea ai i a mātou kia kotiti atu i āu ara, whakapakeketia iho e koe ō mātou ngākau kia kaua e wehi ki a koe? Hoki mai, kia mahara ki āu pononga, ki ngā hapū o tōu kāinga pūmau. 
He iti nei te wā i mau ai taua kāinga ki te iwi o tōu tapu; e takatakahia ana tōu wāhi tapu e ō mātou hoariri. 
Kua meinga mātou kia rite ki te hunga kīhai nei koe i kīngi mō rātou; ki te hunga kīhai nei i huaina ki tōu ingoa. 
