﻿Ehekiera.
19.
“Nā, whakahuatia he tangi mō ngā rangatira o Īharaira, 
mea atu hoki: ‘He aha tōu whaea? He raiona uha; i roto ia i ngā raiona e takoto ana, ko āna kūao he mea whakatupu nāna i roto i ngā raiona. 
Nā, atawhaitia ake ana e ia tētahi o āna kūao; kua rahi. Kua ako ki te hopu tūpāpaku māna; kua kai tāngata. 
I rongo anō ngā iwi ki a ia; i mau ia ki roto ki tā rātou poka. Nā, kawea ana e rātou, mekameka rawa, ki te whenua o Īhipa. 
“ ‘Nā, i tōna kitenga he tatari kau tāna ā, kua kore tāna i tūmanako ai, nā, ka mau ki tētahi atu o āna kūao, meinga ana e ia hei kūao rahi. 
Nā, kei te hāereere tērā i roto i ngā raiona, kua rahi. Kua ako ki te hopu tūpāpaku māna; kua kai tāngata. 
I mōhio anō ia ki ō rātou whare kīngi, whakaururuatia ana e ia ō rātou pā; mōtī iho te whenua me ōna tini mea i te haruru o tōna hāmama. 
Kātahi ia ka whakaekea e ngā iwi o ngā kāwanatanga i tētahi taha, i tētahi taha; horahia ana e rātou he kupenga ki runga ki a ia; kua mau ia ki roto ki tā rātou poka. 
Nā, ka tūtakina atu ia, mea rawa ki te mekameka, ka kawea ki te kīngi o Papurōna. I kawea ia ki ngā pā kaha, kia kore ai tōna reo e rangona i muri ki runga ki ngā maunga o Īharaira. 
“ ‘I rite tōu whaea ki te wāina, ōu toto nā anō, he mea whakatō ki te taha o ngā wai. He mea whai hua, he mea whai manga, he maha hoki nō ngā wai. 
He peka kaha anō ōna hei hēpeta mō ngā kīngi; pūrero tonu rātou, roa tonu, i roto i ngā manga pūruru, i kitea atu rātou e pūrero ana, me ōna manga maha. 
Otiia, i hūtia ia i runga i te āritarita, makā iho ki te whenua, maroke ake ōna hua i te hau marangai; i whatiwhatiia ōna peka kaha, maroke ake; kainga ake e te ahi. 
Nā ināianei, kua oti ia te whakatō ki te koraha, ki te whenua maroke, waikore. 
Ā, kua puta atu he ahi i roto i ngā peka o ōna manga, pau ake ōna hua; kore ake ōna peka kaha hei hēpeta kīngi.’ He tangi tēnei, ka waiho anō hei tangi.” 
