﻿Ehekiera.
30.
I puta mai anō te kupu a Ihowā ki ahau, i mea: 
“E te tama a te tangata, poropiti, mea atu, Ko te kupu tēnei a te Ariki, a Ihowā: Auē koutou, ‘Taukiri e, taua rā nei!’ 
Kua tata mai hoki te rā, te rā o Ihowā kua tata mai, he rangi tukupū, ko te wā ia o ngā iwi. 
Ā, ka tae mai te hoari ki Īhipa, ka nui anō te mamae o Etiopia, ina hinga ngā tūpāpaku ki Īhipa; ā, ka riro atu i ā rātou ōna mano, ka wāhia hoki ōna tūranga. 
Ko Etiopia, ko Putu, ko Ruru, ko te iwi whakauru katoa, ko Kupu, ko ngā tāngata anō o te whenua o te kawenata, ka hinga ngātahi rātou i te hoari. 
Ko te kupu tēnei a Ihowā: Ka hinga anō ngā kaiāwhina o Īhipa; ka riro iho anō te whakapehapeha o tōna kaha; ka hinga rātou i te hoari i reira, i te taumaihi atu o Hewene, e ai tā te Ariki, tā Ihowā. 
“Ka noho kau noa iho rātou i waenganui o ngā whenua tūhea, ka tū anō ōna pā i waenganui i ngā pā kua ururuatia. 
Ā, ka mōhio rātou ko Ihowā ahau, ina tukua e ahau he ahi ki Īhipa, ina whakamōtītia ōna kaiāwhina katoa. 
“I taua rā ka haere atu ngā karere i tōku aroaro i runga i ngā kaipuke, ki te whakawehi i ngā Etiopiana kāhore nei e ohooho. Ka nui anō tō rātou mamae, ka rite ki tō te rā o Īhipa; nanā, te haere mai nei! 
“Ko te kupu tēnei a te Ariki, a Ihowā: Ka meinga anō e ahau te ringa o Nepukareha kīngi o Papurōna hei whakamutu i ngā mano tini o Īhipa. 
Ka kawea mai ia, rātou anō ko tōna iwi, ko te hunga nanakia o ngā iwi, ki te huna i te whenua. Ka maunu anō ā rātou hoari ki Īhipa, ā, ka kapi te whenua i te tūpāpaku. 
Ka maroke anō ngā awa i ahau, ka hokona atu anō te whenua ki te ringa o te hunga kino. Ka ururua anō i ahau te whenua, me ōna tini mea, mea rawa ki te ringa o ngā tautāngata; nāku, nā Ihowā te kupu. 
“Ko te kupu tēnei a te Ariki, a Ihowā: Ka ngaro i ahau ngā whakapakoko, ka mutu anō i ahau ngā whakaahua o Nopo. Kore ake e mea mai he rangatira i te whenua o Īhipa; ka tukua anō e ahau he wehi ki te whenua o Īhipa. 
Ka ururua anō i ahau a Pātoro, ka tukua he ahi ki Toana, ka mahia anō e ahau he whakawā ki Nō. 
Ka ringihia anō e ahau tōku weriweri ki Hini, ki tō Īhipa kaha; ka hātepea atu anō e ahau ngā mano tini o Nō. 
Ka tukua anō e ahau he ahi ki Īhipa; ka nui noa atu te mamae o Hini, ka haehaea pūtia a Nō; ka whai hoariri anō a Nopo i ia rā, i ia rā. 
Ka hinga ngā taitama o Āwene, o Pipehete i te hoari; ā, ka riro ēnei pā i te whakarau. 
Ka whakapōuritia anō te rā ki Tehapanehe ina pakaru i ahau ngā ioka o Īhipa ki reira; ā, ka mutu i roto i a ia te whakapehapeha o tōna kaha. Ko ia anō ka taupokina e te kapua, ka riro āna tamāhine i te whakarau. 
Heoi, ka mahia e ahau he whakawā ki Īhipa; ā, ka mōhio rātou ko Ihowā ahau.” 
Nā, i te tekau mā tahi o ngā tau, i te marama tuatahi, i te whitu o ngā rā o te marama, ka puta te kupu a Ihowā ki ahau, i mea: 
“E te tama a te tangata, kua whati i ahau te ringa o Parao kīngi o Īhipa; nanā, kāhore i takaia hei meatanga iho mō te rongoā, kāhore i meatia iho te tākai hei takai, e kaha ai ki te pupuri hoari. 
Mō reira ko te kupu tēnei a te Ariki, a Ihowā: Nanā, hei hoariri ahau mō Parao kīngi o Īhipa, ka whati anō i ahau ōna ringa, te mea kaha, te mea anō i whati; ka meinga anō e ahau te hoari kia marere i tōna ringa. 
Ka marara anō i ahau ngā Īhipiana ki roto ki ngā tauiwi, ka tītaria ki ngā whenua. 
Ka kaha anō i ahau ngā ringa o te kīngi o Papurōna, ka hoatu anō e ahau tāku hoari ki tōna ringa; ka whati ia i ahau ngā ringa o Parao, ā, nō te tangata i werohia ngā auē e auē ai ia ki tōna aroaro. 
Ā, ka kaha i ahau ngā ringa o te kīngi o Papurōna, ā, ka tukua iho ngā ringa o Parao; ā, ka mōhio rātou ko Ihowā ahau, ina hoatu e ahau tāku hoari ki te ringa o te kīngi o Papurōna, ā, ka whakatorona atu e ia ki runga ki te whenua o Īhipa. 
Ka marara anō i ahau ngā Īhipiana ki roto ki ngā iwi, ka tītaria ki ngā whenua; ā, ka mōhio rātou ko Ihowā ahau.” 
