﻿Ehekiera.
32.
Nā, i te tekau mā rua o ngā tau, i te tekau mā rua o ngā marama, i te tuatahi o ngā rā o te marama, ka puta mai te kupu a Ihowā ki ahau, i mea: 
“E te tama a te tangata, kia ara tōu tangi mō Parao kīngi o Īhipa, mea atu hoki ki a ia: Ko tōu rite kei te kūao raiona o ngā iwi; otiia, e rite ana koe ki te tarakona o ngā moana; i kōkiri mai anō koe me ōu awa, pōkarekare ana ngā wai i ōu waewae, poke ana i a koe ō rātou awa.” 
Ko te kupu tēnei a te Ariki, a Ihowā: “Ka horahia e ahau tāku kupenga ki runga ki a koe, he huihuinga hoki nō ngā iwi maha; ā, ka riro ake koe i a rātou i tāku kupenga. 
Ka waiho anō koe e ahau ki runga ki te whenua, ka ākiritia atu anō koe ki te mata o te pārae, māku anō e mea kia nohoia koe e ngā manu katoa o te rangi, kia mākona anō ngā kīrehe o te whenua katoa i a koe. 
Ka takoto anō i ahau ōu kikokiko ki runga ki ngā maunga, ka whakakīia anō ngā awaawa ki a koe e tiketike nā. 
Ka whakamākūkūria anō e ahau ki ōu toto te whenua e kau nā koe, ā, tutuki noa ki ngā maunga; ka kī anō hoki ngā awa i a koe. 
Ā, ka oti koe te tinei e ahau, ka hīpokina e ahau te rangi, ka whakapōuritia anō hoki ngā whetū o reira; ka hīpokina e ahau te rā ki te kapua, e kore anō e titi te atarau. 
Nā, ko ngā whakamārama katoa e mārama nei te rangi, ka whakapōuritia e ahau ki runga ki a koe, ka hoatu anō e ahau he pōuri ki runga ki tōu whenua, 
He maha anō ngā iwi e mamae ō rātou ngākau i ahau, ina meinga e ahau kia tae atu tōu whakangaromanga ki ngā iwi, ki ngā whenua kīhai i mōhiotia e koe. 
Inā, he maha ngā iwi e meinga e ahau kia ketekete ki a koe, ka nui anō te wehi o ō rātou kīngi, ina whakaaro ki a koe. Ua wherikoriko tāku hoari ki tō rātou aroaro, hono tonu anō tō rātou wiri, ia tangata, ia tangata, i te wehi mō tōna oranga anō, i te rā e hinga ai koe. 
“Nō te mea ko te kupu tēnei a te Ariki, a Ihowā: Tērā e tae atu te hoari a te kīngi o Papurōna ki a koe. 
Ka meinga e ahau ōu mano tini, te hunga nanakia o ngā iwi, rātou katoa kia hinga i ngā hoari a ngā mārohirohi. Ā, ka pāhuatia e rātou ngā mea whakaī o Īhipa, ka ngaro anō ō reira mano tini katoa. 
Ka ngaro anō i ahau ō reira kararehe katoa i te taha o ngā wai maha; e kore anō e pōkarekare i te wae tangata ā muri ake nei, e kore anō e ngarungaru i te wae kararehe. 
Ko reira ahau mea ai i ō rātou wai kia purata, ka meinga anō e ahau ō rātou awa kia rite ki te hinu te rere, e ai tā te Ariki, tā Ihowā. 
Kia meinga e ahau te whenua o Īhipa hei ururua, ā, kore iho ngā tini mea o te whenua, kia patua anō e ahau te hunga katoa e noho ana i reira, kātahi rātou ka mōhio ko Ihowā ahau. 
“Ko te tangi tēnei e tangihia ai ia e rātou, ka tangihia ia e ngā tamāhine a ngā iwi. Ka tangihia ia e rātou, arā a Īhipa rātou ko ōna mano tini, e ai tā te Ariki, tā Ihowā.” 
Nā, i te tekau mā rua o ngā tau, i te tekau mā rima o ngā rā o te marama, ka puta mai te kupu a Ihowā ki ahau, i mea: 
“E te tama a te tangata, auē ki te mano tini o Īhipa, makā iho rātou, a ia, me ngā tamāhine a ngā iwi nunui, ki ngā wāhi o raro rawa o te whenua, rātou ko te hunga e heke ana ki te rua. 
‘He ātaahua rawa koe i a wai? Heke iho, takoto tahi koutou ko te hunga kokotikore.’ 
Ka hinga rātou ki waenga i te hunga i patua ki te hoari. Kua tukua atu ia ki te hoari; tōia atu me ōna mano tini katoa. 
Ka kōrero mai ngā tāngata kaha o ngā mārohirohi ki a ia i roto i te rēinga, rātou ko ōna kaiāwhina: ‘Kua heke rātou ki raro, kei te takoto rātou, te korikori, arā ngā kokotikore, he mea patu ki te hoari.’ 
“Kei reira anō a Ahuru rātou ko tōna hui katoa; ko ōna urupā, kei tētahi taha ōna, kei tētahi taha; he mea patu katoa, kua hinga i te hoari. 
Ko ōna urupā, he mea mahi ki ngā pito rawa o te rua. Ko tōna rōpū anō kei tētahi taha o tōna urupā, kei tētahi taha; he mea patu katoa rātou, kua hinga i te hoari, te hunga i puta ai te wehi ki te whenua o te hunga ora. 
“Kei reira a Erama, rātou ko ōna mano tini i tētahi taha o tōna urupā, i tētahi taha. Ko rātou katoa he mea patu, kua hinga i te hoari, he hunga kua heke kokotikore atu ki ngā wāhi o raro rawa o te whenua, he hunga i mea i tō rātou wehi kia puta ki te whenua o te hunga ora. Heoi, kei te mau te whakamā o rātou, o te hunga anō e heke ana ki te rua. 
Kua hangā te takotoranga mōna ki roto ki te hunga i patua, mō rātou anō ko ōna mano tini katoa. Ko ōna urupā kei tētahi taha ōna, kei tētahi taha; he kokotikore rātou katoa, he mea patu ki te hoari. I puta hoki tō rātou wehi ki te whenua o te hunga ora, heoi kua mau te whakamā o rātou, o te hunga anō e heke ana ki te rua; kua tukua atu ia ki roto ki te hunga i patua. 
“Kei reira a Meheke, a Tūpara, rātou ko ōna mano tini katoa; ko ōna urupā kei tētahi taha ōna kei tētahi taha, he mea kokotikore rātou katoa, he mea patu ki te hoari; i puta anō tō rātou wehi i mua ki te whenua o te hunga ora. 
E kore anō rātou e takoto i roto i ngā mārohirohi o ngā kokotikore kua hinga, kua heke ki te rēinga me ā rātou patu anō o te whawhai. I whakatakotoria anō e rātou ā rātou hoari ki raro i ō rātou māhunga, ā, kei te mau ō rātou kino ki ō rātou wheua; ko te hunga hoki tēnā i wehi ai ngā mārohirohi o te whenua o te ora. 
“Otiia, ka whatia koe i roto i te hunga kokotikore, ka takoto tahi hoki koutou ko te hunga i patua ki te hoari. 
“Kei reira a Ēroma, ōna kīngi, ōna rangatira katoa i tukua nei i runga i tō rātou mārohirohi ki roto ki te hunga i werohia e te hoari. Ka takoto tahi rātou ko ngā kokotikore, rātou anō ko te hunga e heke ana ki te rua. 
“Kei reira ngā ariki o te raki, rātou katoa, me ngā Haironi katoa i heke nei i roto i te hunga i patua; whakamā iho rātou i te wehi i tupu mai i tō rātou mārohirohi, ā, takoto kokotikore ana rātou i roto i te hunga i patua ki te hoari, me te mau te whakamā o rātou, o te hunga anō e heke ana ki te rua. 
“E kite a Parao i a rātou, ā, ka whai whakamārietanga ki āna mano tini katoa i patua ki te hoari – a Parao rātou ko tāna ope katoa, e ai tā te Ariki, tā Ihowā. 
Nō te mea kua tukua e ahau tōna wehi ki te whenua o te hunga ora; ā, ka whakatakotoria ia ki roto ki te hunga kokotikore, rātou ko te hunga i patua ki te hoari – a Parao rātou ko āna mano tini, e ai tā te Ariki, tā Ihowā.” 
