﻿Hōhea.
14.
Hoki mai, e Īharaira, ki a Ihowā, ki tōu Atua; kua taka hoki koe i tōu hē. 
Tīkina ētahi kupu mā koutou, tahuri mai hoki ki a Ihowā; mea atu ki a ia, “Whakakāhoretia katoatia atu te hē, kia manako mai ki te mea pai; ā, ka hoatu e mātou anō he pūru te whakahere, arā ō mātou ngutu. 
E kore mātou e ora i a Ahuru; e kore mātou e eke hōiho, ā, heoi anō ā mātou kīanga atu ki te mahi a ō mātou ringa, ‘Ko koutou ō mātou atua,’ e arohaina ana hoki te pani e koe.” 
“Ka rongoātia e ahau tō rātou tahuri kē, ka aroha ahau ki a rātou, he mea utukore; nō te mea kua tōku riri i a ia. 
Ko tāku ki a Īharaira ka rite ki te tōmairangi; ka rite tōna tupu ki tō te rengarenga, te totoro o ōna pakiaka ka rite ki tō Repanōna. 
Ka tautoro ōna manga, ka rite tōna ātaahua ki tō te ōriwa, tōna kakara ki tō Repanōna. 
Ko te hunga e noho ana i raro i tōna marumaru ka hoki mai; ka ora ake rātou, ka pērā me te wīti, ka rite tō rātou tupu ki tō te wāina. Ko tōna kakara ka rite ki tō te wāina o Repanōna. 
Tērā a Ēparaima e kī, ‘Hei aha ake māku ngā whakapakoko?’ Kua rongo ahau ki a ia, kua kite i a ia; ko tōku rite kei te kauri matomato; ka kitea ki ahau he hua mōu.” 
Ko wai te mea whakaaro nui hei mātau ki ēnei mea? Ko wai te mea tūpato e mōhiotia ai? Tika tonu hoki ngā ara a Ihowā, ā, ka haere te hunga tika i reira, ka taka ia te hunga hē i reira.
