﻿Ko te Pukapuka a  Nahumu.
1.
Ko te poropititanga mō Ninewe. Ko te pukapuka o te kite a Nahumu Erekohi. 
He Atua hae a Ihowā, he rapu utu; he rapu utu a Ihowā, ā, kī tonu i te riri; e rapu utu ana a Ihowā i ōna hoariri, ā, e rongoātia ana e ia he riri mō ōna hoariri. 
He pūhoi a Ihowā ki te riri, he nui tōna kaha, e kore rawa e whakaharakoretia e ia te tangata hara. Ko tō Ihowā ara kei te tūkauati, kei te paroro, ko ngā kapua te puehu o ōna waewae. 
E rīria ana e ia te moana, ā, meinga ana kia maroke, ā, whakamaroketia ana ngā awa katoa. E ngohe ana a Pahana, me Karamere, ā, kahakore noa iho te puāwai o Repanōna. 
Wiri ana ngā maunga i a ia, rewa ana ngā pukepuke; huamo ake ana te whenua i tōna aroaro, āe rā, te ao, me ngā tāngata katoa e noho ana i reira. 
Ko wai e kaha ki te tū i mua i tōna āritarita? Ko wai e kaha ki te whakatika, ina mura tōna riri; ko te ringihanga mai o tōna weriweri, ānō he ahi; ko ngā kāmaka wāhia iho e ia. 
He pai a Ihowā, he pā kaha i te rā o te raru; e mōhio ana hoki ia ki te hunga e whakawhirinaki ana ki a ia. 
Otiia ka mōtī tō reira wāhi i tāna waipuke e ngawhā ana; ka whāia anō e ia ōna hoariri ki roto ki te pōuri. 
Ko te aha tā koutou e whakaaro nā ki a Ihowā? Ka mōtī rawa i a ia; e kore e tuaruatia te putanga ake o te aituā. 
Nō te mea, ahakoa rite rātou ki te tātarāmoa e whiwhi ana, ahakoa ki ngā kōpū anō nā tā rātou wāina, ka tino pau rātou, ānō he kakau wīti kua maroke. 
Kua puta mai i roto i a koe tētahi e whakaaro ana i te hē mō Ihowā, he kaiwhakatakoto i te whakaaro kino. 
Ko te kupu tēnei a Ihowā, “Ahakoa tino kaha rātou, ahakoa tini, heoi ka tapahia rātou, ka pahemo ia. Ahakoa i whiua koe e ahau, e kore koe e whiua e ahau ā muri ake nei. 
Nā, ākuanei ahau wāhi ai i tāna ioka i runga i a koe, momotu ai i ōu here.” 
He whakahau hoki tā Ihowā mōu, arā: “Kia kaua e whakatōkia tētahi o tōu ingoa ā muri ake nei; ka hātepea atu e ahau te whakapakoko tārai me te whakapakoko whakarewa i roto i te whare o ōu atua. Ka hangā e ahau he urupā mōu; nō te mea he kino koe.” 
Nanā, kei runga i ngā maunga ngā waewae o te kaikawe mai i te kōrero pai, o te kaikauwhau i te rongo mau! Mahia āu hākari, e Hūrā, whakamanā āu kupu taurangi; nō te mea heoi anō haeretanga atu o te tangata kino nā waenga i a koe; kua hātepea rawatia atu ia. 
