﻿Ko te Rongopai ki te Ritenga a  Hoani.
1.
I te tīmatanga te Kupu, i te Atua te Kupu, ko te Atua anō te Kupu. 
I te Atua anō tēnei Kupu i te tīmatanga. 
Nāna ngā mea katoa i hanga; kāhore hoki tētahi mea i kore te hanga e ia o ngā mea i hangā. 
I a ia te ora; ko te ora te mārama mō ngā tāngata. 
I roto i te pōuri te mārama e whiti ana; heoi, kīhai i mau i te pōuri. 
I tonoa mai he tangata e te Atua, ko Hoani tōna ingoa. 
I haere mai ia hei kaiwhakaatu, hei whakaatu mō te mārama, kia meinga ai e ia ngā tāngata katoa kia whakapono. 
Ehara ia i te mārama, engari, i haere mai hei kaiwhakaatu mō te mārama. 
Ko te mārama pono tērā, arā, ko te mārama e mārama ai ngā tāngata katoa e haere mai ana ki te ao. 
I te ao ia, i hangā anō e ia te ao, ā, kīhai te ao i mōhio ki a ia. 
I haere mai ia ki ōna, ā, kīhai ōna i manako ki a ia. 
Tēnā ko te hunga i manako ki a ia i tukua e ia ki a rātou ngā tikanga e meinga ai rātou hei tamariki mā te Atua, arā ki te hunga e whakapono ana ki tōna ingoa. 
Ki te hunga ehara nei i te toto, ehara i tā te kikokiko i pai ai, ehara i tā te tangata i pai ai, engari, nā te Atua i whānau ai. 
I whakakikokikotia te Kupu, ā, noho ana i a mātou, i kite anō mātou i tōna korōria he korōria e rite ana ki tō te Tama kotahi a te Matua, kī tonu i te aroha noa, i te pono. 
I kōrerotia ia e Hoani; i karanga tērā, i mea, “Ko ia tēnei i kōrerotia rā e ahau, ‘Ko ia e haere mai ana i muri i ahau e meinga ana ki mua i ahau; nō mua hoki ia i ahau.’ ” 
Kua riro hoki i a tātou katoa tētahi wāhi o tōna raneatanga, te aroha noa hono iho ki te aroha noa. 
Nā Mohi hoki i hōmai te ture; ko te aroha noa me te pono i ahu mai i a Īhu Karaiti. 
Kāhore anō he tangata i kite noa i te Atua; ko te Tama kotahi, kei te uma nei o te Matua, nāna ia i whakapuaki. 
Nā, ko te kōrero tēnei a Hoani, i te tononga mai a ngā Hūrai i Hiruhārama i ngā tohunga nui rātou ko ngā Rīwaiti hei ui ki a ia, “Ko wai koe?” 
Nā, ka whākina e ia, kīhai i whakakāhore, i whāki hoki, “Ehara ahau i a te Karaiti.” 
Ā, ka ui rātou ki a ia, “Tēnā, pēhea? Ko Irāia koe?” Ka mea ia, “Kāhore.” “Ko te poropiti oti koe?” Ka whakahokia e ia, “Kāhore.” 
Nā, ka mea rātou ki a ia, “Ko wai koia koe? Hei kupu whakahoki mā mātou ki te hunga i tonoa mai ai mātou. E pēhea ana koe ki a koe?” 
Ka mea ia: “He reo ahau nō tētahi e karanga ana i te koraha, ‘Whakatikaia te huarahi o te Ariki!’ ” He pērā me tā Ihāia poropiti i mea ai. 
Nō ngā Parihi hoki te hunga i tonoa mai rā. 
Nā, ka ui rātou ki a ia, ka mea ki a ia, “He aha oti koe i iriiri ai, ki te mea ehara koe i a te Karaiti, ehara i a Irāia, ehara i te poropiti?” 
Nā, ka whakahoki a Hoani ki a rātou, ka mea, “He iriiri tāku ki te wai; otiia tēnā te tū nā i waenganui i a koutou tētahi kāhore e mōhiotia e koutou. 
Ko ia tēnei e haere mai ana i muri i ahau kāhore hoki ahau e tau hei wewete i te here o tōna hū.” 
I meatia ēnei mea ki Petapara, ki tāwāhi atu o Horano, ki te wāhi e iriiri ana a Hoani. 
I te aonga ake, ka kite ia i a Īhu e haere ana mai ki a ia, ka mea, “Nā te Reme a te Atua, hei waha atu i te hara o te ao! 
Ko ia tēnei i kōrero ai ahau, ‘Kei te haere mai i muri i ahau tētahi tangata kua meinga ki mua i ahau; nō mua hoki ia i ahau.’ 
Ā, kāhore ahau i mātau ki a ia; heoi, hei whakakite i a ia ki a Īharaira, i haere mai ai ahau me tāku iriiri ki te wai.” 
Nā, ka whakaatu a Hoani, ka mea, “I kite ahau i te Wairua e heke iho ana i te rangi, ānō he kūkupa, ā, noho ana i runga i a ia. 
Ā, kāhore ahau i mātau ki a ia; engari i kī mai ki ahau te kaitono mai i ahau ki te iriiri ki te wai, ‘Ko te tangata e kite ai koe i te Wairua e heke iho ana, e noho ana ki runga ki a ia, ko ia tēnā te kaiiriiri ki te Wairua Tapu.’ 
Ā, kua kite ahau, kua whakaatu nei hoki, ko te Tama tēnei a te Atua.” 
I te aonga ake i te tū anō a Hoani me āna ākonga tokorua; 
nā, ka titiro ia ki a Īhu e haere ana, ka mea, “Nā, te Reme a te Atua!” 
Ā, ka rongo ngā ākonga tokorua ki a ia e kōrero ana, ā, aru ana rāua i a Īhu. 
Ā, ka tahuri a Īhu, ka kite i a rāua e aru ana, ka mea ia ki a rāua “E rapu ana kōrua i te aha?” Nā, ko tā rāua meatanga ki a ia, “E Rapi” (ko te tikanga tēnei ina whakamāoritia, e te Kaiwhakaako), “kei hea tōu kāinga?” 
Ka mea ia ki a rāua, “Haere mai kia kite.” Haere ana rāua, ā, ka kite i tōna wāhi i noho ai, ā, noho ana i a ia i taua rā; ko te tekau hoki ia o ngā hāora. 
Ko Anaru, teina o Haimona Pita tētahi o taua tokorua i rongo nei ki a Hoani e kōrero ana, ā, aru ana i a ia. 
Ko ia kua kite wawe i tōna tuakana ake, i a Haimona, ka mea ki a ia, “Kua kitea e māua te Mīhaia.” (Ko te tikanga tēnei ina whakamāoritia, ko te Karaiti). 
Nā, ka ārahina mai ia e ia ki a Īhu. Ā, ka titiro a Īhu ki a ia, ka mea, “Ko Haimona koe, ko te tama a Hona, me hua koe ko Kipa.” (Tōna whakamāoritanga ko Pita, arā ko Kōhatu). 
I te aonga ake ka mea a Īhu kia haere ki Karirī, ā, ka kite i a Piripi; ā, ka mea a Īhu ki a ia, “E aru i ahau.” 
Nā, ko Piripi nō Petahaira, nō te pā o Anaru rāua ko Pita. 
Ka kite a Piripi i a Natanahira, ka mea ki a ia, “Kua kitea e mātou a ia, mōna nei te tuhituhi a Mohi i roto i te ture, tā ngā poropiti hoki, a Īhu o Nahareta te tama a Hōhepa.” 
Nā, ka mea a Natanahira ki a ia, “E puta koia tētahi mea pai i Nahareta?” Ka mea a Piripi ki a ia, “Haere mai kia kite.” 
Ka kite a Īhu i a Natanahira e haere ana mai ki a ia, ka puaki tāna kupu mōna, “Nā, he tino tangata nō Īharaira, kāhore ōna tinihanga.” 
Ka mea a Natanahira ki a ia, “Nō hea koe i mātau ai ki ahau?” Ka whakahoki a Īhu ki a ia, ka mea, “I te mea kīanō koe i karangatia e Piripi, i a koe anō i raro i te piki, i kite ahau i a koe.” 
Nā, ka whakahoki a Natanahira, ka mea ki a ia, “E Rapi, ko te Tama koe a te Atua, ko te Kīngi koe o Īharaira!” 
Nā, ka whakahoki a Īhu, ka mea ki a ia, “Nō tāku meatanga ki a koe, ‘I kite ahau i a koe i raro i te piki,’ i whakapono ai koe? Rahi atu i ēnei ngā mea e kitea e koe.” 
I mea anō ia ki a ia, “He pono, he pono tēnei kupu āku ki a koutou, tērā koutou e kite i te rangi e tuwhera ana, i ngā anahera a te Atua e piki ake ana, e heke iho ana ki te Tama a te tangata.” 
