GEN 1:1 He mea hanga nā te Atua i te tīmatanga te rangi me te whenua,
GEN 1:2 ā, kāhore he āhua o te whenua, i takoto kau; he pōuri anō a runga i te mata o te hōhonu. Nā, ka whakapāho te Wairua o te Atua i runga i te kare o ngā wai.
GEN 1:3 Ā, ka kī te Atua, “Kia mārama”; nā, ka mārama.
GEN 1:4 Ā, ka kite te Atua i te mārama, he pai; ā, ka wehea e te Atua te mārama i te pōuri.
GEN 1:5 Nā, ka huaina e te Atua te mārama ko te Awatea, ā, ko te pōuri i huaina e ia ko te Pō. Ā, ko te ahiahi, ko te ata, he rā kotahi.
GEN 1:6 Nā, ka mea te Atua, “Kia whai kikorangi a waenganui o ngā wai, hei wehe i waenganui o ngā wai.”
GEN 1:7 Nā, ka hangā e te Atua te kikorangi, ka wehea e ia ngā wai i raro o te kikorangi i ngā wai o runga o te kikorangi. Ā, ka oti.
GEN 1:8 Nā, ka huaina te kikorangi e te Atua ko te Rangi. Ā, ko te ahiahi, ko te ata, he rā tuarua.
GEN 1:9 Nā, ka mea te Atua, “Kia huihuia ngā wai i raro i te rangi kia kotahi te wāhi, ā, kia puta te tuawhenua.” Ā, ka oti.
GEN 1:10 Nā, ka huaina e te Atua te tuawhenua ko te “whenua”; ā, ko te huihuinga o ngā wai i huaina e ia ko ngā Moana. Ā, ka kite te Atua, he pai.
GEN 1:11 Nā, ka mea te Atua, “Kia pihi ake te tarutaru i te whenua: te otaota whai purapura, me te rākau hua, ki runga ki te whenua, e hua ana ōna hua, he mea rite tonu ki a ia, kei roto nei i a ia ōna purapura.” Ā, ka oti.
GEN 1:12 Nā, ka whakaputaina e te whenua te tarutaru: te otaota hoki e hua ana ōna hua he mea rite tonu ki a ia, me te rākau whai hua, kei roto nei i a ia ōna purapura he mea rite tonu ki a ia. Ā, ka kite te Atua, he pai.
GEN 1:13 Ā, ko te ahiahi, ko te ata, he rā tuatoru.
GEN 1:14 Nā, ka mea te Atua, “Kia whai mea whakamārama te kiko o te rangi, hei wehe i te awatea, i te pō; hei tohu anō aua mea, hei tāima, hei rā, hei tau.
GEN 1:15 Hei whakamārama aua mea i te kiko o te rangi, hei whakamārama i te whenua.” Ā, ka oti.
GEN 1:16 Nā, ka hangā e te Atua ngā mea whakamārama nui e rua – ko te whakamārama nui hei tohutohu mō te awatea, ko te whakamārama tuaiti hei tohutohu mō te pō – i hangā anō hoki e ia ngā whetū.
GEN 1:17 Ā, whakanohoia ana aua mea e te Atua ki te kiko o te rangi, hei whakamārama mō te whenua,
GEN 1:18 hei tohutohu i te awatea, i te pō, hei wehe hoki i te mārama, i te pōuri. Ā, ka kite te Atua, he pai.
GEN 1:19 Ā, ko te ahiahi, ko te ata, he rā tuawhā.
GEN 1:20 Nā, ka mea te Atua, “Kia ngahue ake i roto i ngā wai te mea ora e ngōki ana, kia rere anō hoki te manu i runga ake i te whenua i te mata o te kiko o te rangi.”
GEN 1:21 Nā, ka hangā e te Atua ngā tohorā nunui, me ngā mea ora katoa, ngā mea ngōkingōki i ngahue ake nei i roto i ngā wai, o ia āhua, o ia āhua, me ngā manu whai parirau katoa, o ia āhua, o ia āhua. Ā, ka kite te Atua, he pai.
GEN 1:22 Nā, ka manaaki te Atua i a rātou, ka mea, “Kia hua koutou, kia tini, kia kapi hoki ngā wai o ngā moana i a koutou, kia tini anō hoki ngā manu ki runga ki te whenua.”
GEN 1:23 Ā, ko te ahiahi, ko te ata, he rā tuarima.
GEN 1:24 Nā, ka mea te Atua, “Kia whakaputaina e te whenua te mea ora o ia āhua, o ia āhua, te kararehe me te mea ngōkingōki me te kīrehe o te whenua o ia āhua, o ia āhua.” Ā, ka oti.
GEN 1:25 Nā, ka hangā e te Atua te kīrehe o te whenua o ia āhua, o ia āhua, me te kararehe o ia āhua, o ia āhua, me ngā mea ngōkingōki katoa o te whenua o ia āhua, o ia āhua; ā, ka kite te Atua he pai.
GEN 1:26 Nā, ka mea te Atua, “Kia hanga tātou i te tangata kia rite ki a tātou, hei tō tātou anō te āhua. Ā, kia waiho ko rātou hei rangatira mō ngā ika o te moana, mō te manu o te rangi, mō ngā kararehe hoki, mō te whenua katoa, mō ngā mea ngōkingōki katoa anō hoki e ngōkingōki ana i runga i te whenua.”
GEN 1:27 Nā, ka hangā e te Atua te tangata rite tonu ki a ia; i hangā e ia kia rite ki te Atua; i hangā rāua he tāne, he wahine.
GEN 1:28 Nā, ka manaakitia rāua e te Atua, ā, ka mea te Atua ki a rāua, “Kia hua, kia tini, kia kapi hoki te whenua i a kōrua, kia mate hoki ōna tara i a kōrua; ko kōrua hei rangatira mō te ika o te moana, mō te manu hoki o te rangi, mō ngā mea ora katoa anō hoki e ngōkingōki ana i runga i te whenua.”
GEN 1:29 Ā, ka mea te Atua, “Nā, kua oti te hoatu e ahau ki a kōrua ngā otaota katoa e whai purapura ana i runga i te mata o te whenua katoa, me te rākau katoa, he hua rākau tōna e whai purapura ana; hei kai ēnā mā kōrua.
GEN 1:30 Ā, kua hoatu anō e ahau ngā otaota matomato katoa hei kai mā ngā kararehe katoa o te whenua, mā ngā manu katoa o te rangi, mā ngā mea katoa hoki e ngōkingōki ana i runga i te whenua kei roto nei i a rātou he wairua ora.” Ā, ka oti.
GEN 1:31 Ā, ka kite te Atua i ngā mea katoa kua hangā nei e ia, nā, pai whakaharahara. Ā, ko te ahiahi, ko te ata, ko te rā tuaono.
GEN 2:1 Nā, ka oti te rangi me te whenua me ō reira mano katoa.
GEN 2:2 Ā, nō te whitu o ngā rā i oti ai i te Atua tāna mahi i mahi ai, nā, ka okioki ia i te rā whitu i āna mahi katoa i mahia e ia.
GEN 2:3 Nā, ka whakapaingia e te Atua te rā whitu, whakatapua ana hoki e ia; mōna i okioki i taua rā i āna mahi katoa i oti i te Atua te hanga.
GEN 2:4 Ko ngā whakatupuranga ēnei o te rangi, o te whenua, i te hanganga ai. I te rā i hangā ai e Ihowā, e te Atua, te whenua me te rangi.
GEN 2:5 Kāhore anō hoki tētahi rākau riki o te pārae i te whenua, kāhore anō tētahi otaota o te pārae kia pihi noa – kāhore hoki a Ihowā, te Atua, i mea kia ua ki te whenua, ā, kāhore rawa he tangata hei mahi i te oneone;
GEN 2:6 engari, i pupū ake he kohu i te whenua, nā reira i whakamākūkū te mata katoa o te oneone –
GEN 2:7 nā, ka whakaahuatia te tangata e Ihowā, e te Atua, he puehu nō te oneone, ā, whakahāngia ana e ia ki roto ki ōna pongāihu te manawa ora; ā, ka wairua ora te tangata.
GEN 2:8 Nā, ka whakatōkia e Ihowā, e te Atua, tētahi kāri ki te taha ki te rāwhiti, ki Erene; ā, whakanohoia iho e ia ki reira te tangata i hangā e ia.
GEN 2:9 Ā, i whakatupuria e Ihowā, e te Atua, i roto i te oneone ngā rākau katoa he mea āhuareka ki te titiro, he pai hoki hei kai; ko te rākau hoki o te ora ki waenganui o te kāri, me te rākau o te mātauranga ki te pai, ki te kino.
GEN 2:10 I rere mai anō he awa i Erene hei whakamākūkū i te kāri; ā, i reira ka manganga e whā ngā tino awa.
GEN 2:11 Ko te ingoa o te tuatahi ko Pihona; ko ia tērā e taiāwhio rā i te whenua katoa o Hāwira, he kōura kei reira.
GEN 2:12 He pai hoki te kōura o taua whenua; kei reira te teriuma me te kōhatu onika.
GEN 2:13 Ko te ingoa o te rua o ngā awa ko Kihona; ko ia tērā e taiāwhio rā i te whenua katoa o Etiopia.
GEN 2:14 Ko te ingoa o te toru o ngā awa ko Hirekere; ko te mea tērā e rere rā i mua o Ahiria. Ko Uparati te whā o ngā awa.
GEN 2:15 Nā, ka tango a Ihowā, te Atua, i te tangata, ā, whakanohoia ana e ia ki te kāri o Erene, hei ngaki, hei tiaki hoki i reira.
GEN 2:16 Nā, ka ako a Ihowā, te Atua, ki te tangata, ka mea, “E pai ana kia kai noa atu koe i ngā hua o ngā rākau katoa o te kāri;
GEN 2:17 ko te rākau ia o te mātauranga ki te pai, ki te kino, kaua e kainga tētahi o ōna hua; ko te rā e kai ai koe i tētahi o ōna hua, ka mate koe, mate rawa.”
GEN 2:18 Nā, ka mea a Ihowā, te Atua, “E kore e pai kia noho te tangata ko ia anake; me hanga e ahau tētahi hoa pai mōna.”
GEN 2:19 Nā, he mea whakaahua mai nā Ihowā, nā te Atua, i roto i te oneone ngā kīrehe katoa o te pārae, me ngā manu katoa o te rangi; ā, kawea mai ana e ia ki a Ārama, kia kitea ai te ingoa e huaina e ia ki a rātou; ā, ko a Ārama i hua ai ki ngā mea ora katoa, hei ingoa ērā mō rātou.
GEN 2:20 Nā, ka huaina e Ārama he ingoa mō ngā kararehe katoa, mō ngā manu o te rangi, mō ngā kīrehe katoa hoki o te pārae. Ko Ārama ia kāhore i kitea tētahi hoa pai mōna.
GEN 2:21 Nā, ka mea a Ihowā, te Atua, kia parangia a Ārama e te moe, ā, moe ana ia. Nā, tangohia ana e ia tētahi o ōna rara, ā, whakatūtakina atu ana te kikokiko hei whakakapi mō reira.
GEN 2:22 Nā, ka hanga a Ihowā, te Atua, i te rara i tangohia mai rā e ia i roto i a Ārama hei wahine, ā, kawea ana e ia ki a Ārama.
GEN 2:23 Ā, ka mea a Ārama, “Kātahi anō ki tēnei te wheua o roto o ōku wheua, me te kikokiko o roto o ōku kikokiko; me hua ia ko te Wahine, nōna hoki i tangohia mai i roto i te Tangata.”
GEN 2:24 Nō konei te tangata ka whakarere i tōna pāpā me tōna whaea, ā, ka piri ki tāna wahine; ā, hei kikokiko kotahi rāua.
GEN 2:25 Ā, e tū tahanga ana rāua tokorua, te tangata me tāna wahine, kīhai hoki i whakamā.
GEN 3:1 Nā, ko te nākahi he mōhio rawa i ngā kīrehe katoa o te pārae i hangā nei e Ihowā, e te Atua. Nā, ko tāna meatanga ki te wahine, “Koia, i mea anō te Atua, ‘Kaua e kainga e kōrua ngā hua o tētahi rākau o te kāri’?”
GEN 3:2 Ā, ka mea te wahine ki te nākahi, “E kai anō māua i ngā hua o ngā rākau o te kāri.
GEN 3:3 Ko ngā hua ia o te rākau i waenganui o te kāri, kua mea mai te Atua, ‘Kaua kōrua e kai i tētahi o ōna hua, kaua anō hoki e pā ki reira, kei mate kōrua.’ ”
GEN 3:4 Nā, ko te meatanga a te nākahi ki te wahine, “E kore kōrua e mate rawa.
GEN 3:5 Erangi, e mōhio ana te Atua ko te rā e kai ai kōrua i tētahi o ōna hua, kātahi ka mārama ō kōrua kanohi, ā, ka rite kōrua ki te Atua, ka mōhio ki te pai, ki te kino.”
GEN 3:6 Ā, i te kitenga o te wahine he pai te rākau rā hei kai, he āhuareka ki te titiro atu, he rākau hoki e minaminatia hei whakamōhio, nā, ka tango ia i ētahi o ōna hua, ka kai, ka hoatu hoki ki tāna tahu i tōna taha; ā, kai ana ia.
GEN 3:7 Nā, ka mārama ō rāua kanohi tahi, ka mōhio rāua kei te tū tahanga rāua; nā, ka tuia e rāua ētahi rau piki, meatia ana hei rāpaki mō rāua.
GEN 3:8 Ā, ka rongo rāua i te reo o Ihowā, o te Atua, e hāereere ana i te kāri i te hauhautanga o te rā; ā, ka piri a Ārama rāua ko tāna wahine i te aroaro o Ihowā, o te Atua, ki roto ki ngā rākau o te kāri.
GEN 3:9 Nā, ka karanga a Ihowā, te Atua, ki a Ārama, ka mea ki a ia, “Kei hea koe?”
GEN 3:10 Ā, ka mea ia, “I rongo ahau ki tōu reo i te kāri, ā, wehi ana ahau, nōku i tū tahanga; nā piri ana ahau.”
GEN 3:11 Nā, ka mea ia, “Nā wai i mea ki a koe e tū tahanga ana koe? Kua kainga rānei e koe ētahi o ngā hua o te rākau i kīia atu rā e ahau ki a koe, ‘Kaua ōna hua e kainga’?”
GEN 3:12 Nā, ka mea te tangata rā, “Nā te wahine i hōmai nei e koe hei hoa mōku, nāna i hōmai ētahi o ngā hua o te rākau ki ahau, ā, kainga ana e ahau.”
GEN 3:13 Nā, ka mea a Ihowā, te Atua, ki te wahine, “He aha tēnei kua meatia nei e koe?” Ka mea te wahine, “Nā te nākahi ahau i māminga, ā, kai ana ahau.”
GEN 3:14 Nā, ka mea a Ihowā, te Atua, ki te nākahi, “Mō tēnei mahi āu nui atu te kanga mōu i ō ngā kararehe katoa, i ō ngā kīrehe katoa o te pārae; ko tōu kōpū hei haere mōu, ko te puehu hei kai māu i ngā rā katoa e ora ai koe.
GEN 3:15 Ka whakatupuria hoki e ahau he pakanga mā kōrua ko te wahine, mā tōu uri rātou ko tōna uri; ka marū tōu mātenga i a ia, ka marū i a koe tōna rekereke.”
GEN 3:16 Ka mea ia ki te wahine, “Ka whakanuia rawatia e ahau tōu mamae, me tōu hapūtanga; ka mamae koe ina whānau tamariki; ka hiahia koe ki tō tahu, ko ia anō hoki hei rangatira mōu.”
GEN 3:17 Ā, ka mea ia ki a Ārama, “Mō tōu rongonga ki te reo o tāu wahine, mō tāu kainga hoki i te hua o te rākau i kīia atu e ahau ki a koe, i meatia atu rā, ‘Kaua e kainga ētahi o ōna hua.’ Ka oti te oneone te kanga mō tāu mahi; ka kainga e koe ōna hua i runga i te mamae i ngā rā katoa e ora ai koe.
GEN 3:18 He tātarāmoa anō hoki, he tūmatakuru āna e whakatupu ake ai māu; ā, ka kai koe i te otaota o te pārae.
GEN 3:19 Mā te werawera o tōu mata e kai ai koe i te taro, ā hoki noa koe ki te oneone; i tangohia mai nei hoki koe i reira; he puehu hoki koe, ā, ka hoki anō ki te puehu.”
GEN 3:20 Ā, i huaina e Ārama te ingoa o tāna wahine ko Iwi; nō te mea ko te whaea ia o ngā mea ora katoa.
GEN 3:21 Nā, ka hangā e Ihowā, e te Atua, ētahi kākahu hiako mō Ārama rāua ko tāna wahine, ā, whakakākahuria ana rāua.
GEN 3:22 Nā, ka mea a Ihowā, te Atua, “Nanā, kua rite nei te tangata ki tētahi o tātou, te mōhio ki te pai, ki te kino; nā, kei totoro atu tōna ringa āianei, kei tango i tētahi o ngā hua o te rākau o te ora, kei kai, ā, ka ora tonu.”
GEN 3:23 Koia i tonoa atu ai ia e Ihowā, e te Atua, i te kāri o Erene hei ngaki i te oneone i tangohia mai nei ia i reira.
GEN 3:24 Heoi, peia ana e ia te tangata; ā, whakanohoia ana ki te taha ki te rāwhiti o te kāri o Erene tētahi kerupima, me tētahi hoari mura, he mea piupiu tonu ki tētahi taha, ki tētahi taha, hei tiaki i te huarahi ki te rākau o te ora.
GEN 4:1 Nā, ka mōhio a Ārama ki a Iwi, ki tāna wahine, ā, ka hapū ia. Ā, ka whānau a Kaina, nā, ka mea ia, “Kua whakawhiwhia mai ahau e Ihowā ki tētahi tangata.”
GEN 4:2 Nā, ka whānau anō tōna teina, a Āpera. Nā, he kaiwhāngai hipi a Āpera, ko Kaina ia he kaingaki whenua.
GEN 4:3 Ā, i te mutunga o ētahi rangi, ka kawea e Kaina ētahi o ngā hua o te whenua hei whakahere ki a Ihowā.
GEN 4:4 Me Āpera hoki, i kawea e ia ētahi o ngā whānau mātāmua o tāna kāhui, o ō rātou ngako hoki. Ā, ka aro a Ihowā ki a Āpera, ki tāna whakahere,
GEN 4:5 kīhai ia i aro ki a Kaina, ki tāna whakahere. Ā, he nui rawa te riri o Kaina, ā, whakapoururu ana tōna mata.
GEN 4:6 Nā, ka mea a Ihowā ki a Kaina, “He aha koe i riri ai, ā, he aha i whakapoururu ai tōu mata?
GEN 4:7 E kore ianei koe e kake, ki te mahi koe i te pai? Ki te kāhore koe e mahi i te pai, kei te kūwaha te hara e takoto ana. Nā, ko koe tāna e hiahia ai, ko koe ia hei rangatira mōna.”
GEN 4:8 Nā, ka kōrero a Kaina ki a Āpera, ki tōna teina, “Ā, i a rāua i te pārae.” Ka whakatika a Kaina ki a Āpera, ki tōna teina, ā, patua iho.
GEN 4:9 Kātahi a Ihowā ka mea ki a Kaina, “Kei hea a Āpera, tōu teina?” Ka mea ia, “Kāhore ahau e mōhio. Ko ahau ianei te kaitiaki o tōku teina?”
GEN 4:10 Nā, ka mea ia, “He mahi aha tēnei āu? E tangi mai ana te reo o te toto o tōu teina ki ahau i roto i te whenua.
GEN 4:11 Nā, ka kangā koe i runga i te whenua, i hāmama nei tōna waha hei rerenga atu mō te toto o tōu teina i whakahekea nei e tōu ringa.
GEN 4:12 Ka ngaki koe i te oneone, e kore e tukua tōna kaha ā muri ake nei ki a koe; ka waiho koe hei tangata hāereere noa, hei manene i runga i te whenua.”
GEN 4:13 Nā, ka mea a Kaina ki a Ihowā, “He nui rawa te whiu mō tōku kino, e kore e taea e ahau.
GEN 4:14 Titiro hoki, ka peia ahau e koe ināianei i te mata o te whenua, ā, ka ngaro i tōu kanohi. Ka waiho hoki ahau hei tangata hāereere noa, hei manene i runga i te whenua; ā, tēnei ake, ki te tūtaki tētahi tangata ki ahau, nā, ka patua ahau e ia.”
GEN 4:15 Nā, ka mea a Ihowā ki a ia, “Nā reira ki te patu tētahi i a Kaina, whitu ngā utu e rapua i a ia.” Nā, ka hōmai e Ihowā he tohu ki a Kaina, kei patua ia e tētahi tangata ina tūtaki ki a ia.
GEN 4:16 Nā, ka haere atu a Kaina i te aroaro o Ihowā, ā, noho ana i te whenua o Noro, i te taha ki te rāwhiti o Erene.
GEN 4:17 Nā, ka mōhio a Kaina ki tāna wahine; ā, ka hapū ia, ka whānau a Ēnoka. Nā, ka hanga ia i tētahi pā, ā, huaina iho te ingoa o te pā ko Ēnoka, ko te ingoa o tāna tama.
GEN 4:18 Ā, whānau ake tā Ēnoka tama ko Irara; nā Irara ko Mehutaere: tā Mehutaere ko Metuhaere; tā Metuhaere ko Rameka.
GEN 4:19 Nā, ka tangohia e Rameka ētahi wāhine tokorua māna; ko Āraha te ingoa o tētahi, ko Tira tō tētahi.
GEN 4:20 Nā, ka whānau tā Āraha tama ko Iapara. Ko ia te matua o te hunga noho tēneti, rātou ko ngā tāngata whāngai kararehe.
GEN 4:21 Ā, ko te ingoa o tōna teina ko Iupara. Ko ia te matua o ngā mea rahurahu ki te hāpa, ki te ōkana.
GEN 4:22 Me Tira anō hoki, whānau ake tāna ko Tuparakaina, he kaihanga ia i ngā mea tapahi katoa i te mea parāhi, i te mea rino. Ā, ko Naama te tuahine o Tuparakaina.
GEN 4:23 Nā, ka mea a Rameka ki āna wāhine: “E Āraha rāua ko Tira, whakarongo mai ki tōku reo; e ngā wāhine a Rameka, kia whai taringa mai ki tāku kupu: Kua patua hoki he tangata e ahau mōku i motu, he taitamariki hoki mōku i marū.
GEN 4:24 Nā, mō Kaina e whitu ngā utu, ina, kia whitu tekau mā whitu mō Rameka.”
GEN 4:25 Ā, i mōhio anō a Ārama ki tāna wahine; ka whānau tāna tama, ā, huaina iho tōna ingoa ko Heta; i mea hoki ia, “Ka rite mai nei i te Atua tētahi atu uri mōku hei whakakapi mō Āpera i patua nei e Kaina.”
GEN 4:26 Me Heta anō hoki, i whānau tāna tama; ā, huaina ana tōna ingoa ko Ēnoha. Nō reira i tīmata ai te tangata te karanga ki te ingoa o Ihowā.
GEN 5:1 Ko te pukapuka tēnei o ngā whakatupuranga o Ārama. I te rā i hangā ai te tangata e te Atua, i hangā ia e ia kia rite ki te Atua.
GEN 5:2 I hangā rāua he tāne, he wahine, ā, i manaakitia rāua e ia, i huaina hoki tō rāua ingoa ko Ārama, i te rā i hangā ai rāua.
GEN 5:3 Ā, ka kotahi rau ka toru tekau ngā tau i ora ai a Ārama, nā, ka whānau tāna tama, nōna te āhua, rite tonu ki a ia; ā, huaina ana tōna ingoa ko Heta.
GEN 5:4 Ā, ko ngā rā o Ārama i muri i te whānautanga o Heta e waru rau tau. Ā, ka whānau he tama, he tamāhine māna.
GEN 5:5 Nā, ko ngā rā katoa i ora ai a Ārama e iwa rau e toru tekau tau; ā, ka mate ia.
GEN 5:6 Ā, kotahi rau e rima ngā tau i ora ai a Heta, ka whānau tāna tama, a Ēnoha.
GEN 5:7 Ā, e waru rau e whitu ngā tau i ora ai a Heta i muri iho i te whānautanga o tāna tama, o Ēnoha, ā, ka whānau he tama, he tamāhine māna.
GEN 5:8 Nā, ko ngā rā katoa o Heta e iwa āu kotahi tekau mā rua tau; ā, ka mate ia.
GEN 5:9 Ā, ka iwa tekau ngā tau i ora ai a Ēnoha, nā, ka whānau tāna tama a Kēnana.
GEN 5:10 Ā, e waru rau kotahi tekau mā rima ngā tau i ora ai a Ēnoha i muri iho i te whānautanga o tāna tama, o Kēnana, ā, ka whānau he tama, he tamāhine māna.
GEN 5:11 Nā, ko ngā rā katoa o Ēnoha e iwa rau mā rima tau; ā, ka mate.
GEN 5:12 Ā, ka whitu tekau ngā tau i ora ai a Kēnana, ka whānau tāna tama, a Mahararēre.
GEN 5:13 Ā, e waru rau e whā tekau ngā tau i ora ai a Kēnana i muri iho i te whānautanga o tāna tama, o Mahararēre, ā, ka whānau he tama, he tamāhine māna.
GEN 5:14 Nā, ko ngā rā katoa o Kēnana e iwa rau kotahi tekau tau; ā, ka mate ia.
GEN 5:15 Ā, ka ono tekau mā rima ngā tau i ora ai a Mahararēre, nā, ka whānau tāna tama, a Iarere.
GEN 5:16 Ā, e waru rau e toru tekau ngā tau i ora ai a Mahararēre i muri i te whānautanga o tāna tama, o Iarere, ā, ka whānau he tama, he tamāhine māna.
GEN 5:17 Ā, e waru rau e iwa tekau mā rima tau ngā rā katoa o Mahararēre; ā, ka mate.
GEN 5:18 Ā, kotahi rau e ono tekau mā rua ngā tau i ora ai a Iarere, ā, ka whānau tāna tama, a Ēnoka.
GEN 5:19 Ā, e waru rau ngā tau i ora ai a Iarere i muri iho i te whānautanga o tāna tama, o Ēnoka, ā, ka whānau he tama, he tamāhine māna.
GEN 5:20 Ā, e iwa rau e ono tekau mā rua tau ngā rā katoa o Iarere; ā, ka mate.
GEN 5:21 Ā, e ono tekau mā rima ngā tau i ora ai a Ēnoka, nā, ka whānau tāna tama, a Matuhara.
GEN 5:22 Ā, e toru rau ngā tau i hāereere tahi ai a Ēnoka i te Atua i muri iho i te whānautanga o tāna tama, o Matuhara, ā, ka whānau he tama, he tamāhine māna,
GEN 5:23 Ā, e toru rau e ono tekau mā rima tau ngā rā katoa o Ēnoka.
GEN 5:24 Ā, i hāereere tahi a Ēnoka i te Atua; ā, kua kāhore ia, nā te Atua hoki ia i tango.
GEN 5:25 Ā, kotahi rau e waru tekau mā whitu ngā tau i ora ai a Matuhara, nā, ka whānau tāna tama, a Rameka,
GEN 5:26 ā, e whitu rau e waru tekau mā rua ngā tau i ora ai a Matuhara i muri iho i te whānautanga o tāna tama, o Rameka, ā, ka whānau he tama, he tamāhine māna.
GEN 5:27 Ā, e iwa rau e ono tekau mā iwa tau ngā rā katoa o Matuhara; ā, ka mate.
GEN 5:28 Ā, kotahi rau e waru tekau mā rua ngā tau i ora ai a Rameka, nā, ka whānau tāna tama.
GEN 5:29 Ā, huaina ana e ia tōna ingoa ko Noa; i mea hoki ia, “Mā tēnei e whakahauora o ō tātou ngākau i ā tātou mahi, i te ruha hoki o ō tātou ringa, i te oneone kua oti nei te kanga e Ihowā.”
GEN 5:30 Ā, e rima rau e iwa tekau mā rima ngā tau i ora ai a Rameka i muri i te whānautanga o tāna tama, o Noa, ā, ka whānau he tama, he tamāhine māna.
GEN 5:31 Ā, ko ngā rā katoa o Rameka e whitu rau e whitu tekau mā whitu; ā, ka mate ia.
GEN 5:32 Ā, ka rima rau ngā tau o Noa, nā, ka whānau ngā tama a Noa, ko Hema, ko Hama, ko Iapeta.
GEN 6:1 Nā, ka tīmata te tangata te tini haere ki runga ki te mata o te whenua, ā, ka whānau ā rātou tamāhine.
GEN 6:2 Ka kite ngā tama a te Atua i ngā tamāhine a te tangata, he ātaahua; nā, ka tango rātou i ā rātou i pai ai o rātou katoa, hei wāhine mā rātou.
GEN 6:3 Nā, ka mea a Ihowā, “E kore tōku wairua e whakawā tonu i te tangata, he kikokiko nei anō hoki ia. Nā, kia kotahi rau kia rua tekau tau ōna rā.”
GEN 6:4 He roroa ngā tāngata o te whenua i aua rā – ā, i muri iho – i te haerenga o ngā tama a te Atua ki ngā tamāhine a te tangata, ā, ka whānau ā rātou tamariki. Ko rātou ngā mārohirohi ō mua, he tāngata whai ingoa.
GEN 6:5 Ā, ka kite te Atua he nui te kino o te tangata i runga i te whenua, he kino hoki ngā tokonga ake o ngā whakaaro katoa o tōna ngākau i ngā wā katoa.
GEN 6:6 Nā, ka puta kē te whakaaro o Ihowā i hangā ai e ia te tangata ki runga ki te whenua, ā, ka pōuri tōna ngākau.
GEN 6:7 Nā, ka mea a Ihowā, “Ka whakangaromia atu e ahau i te mata o te whenua te tangata i hangā nei e ahau – te tangata, te kīrehe, te mea ngōkingōki, me ngā manu o te rangi; kua puta kē hoki tōku whakaaro i hangā ai rātou e ahau.”
GEN 6:8 Ko Noa ia i manakohia e Ihowā.
GEN 6:9 Ko ngā whakatupuranga ēnei o Noa. Ko Noa he tangata tika, he ngākau tapatahi i ōna whakatupuranga. I hāereere tahi a Noa i te Atua.
GEN 6:10 Ā, whānau ake ngā tama a Noa tokotoru, ko Hema, ko Hama, ko Iapeta.
GEN 6:11 Nā, kua kino te whenua i te aroaro o Ihowā, kua kī katoa hoki te whenua i te tutū.
GEN 6:12 Nā, ka titiro te Atua ki te whenua, kua kino; kua hē hoki te ara o ngā kikokiko katoa o runga o te whenua.
GEN 6:13 Nā, ka mea te Atua ki a Noa, “Kua tae mai ki tōku aroaro te mutunga o ngā kikokiko katoa; nō te mea kua kī i a rātou te whenua i te tutū; nā, ka whakangaromia rātou tahi ko te whenua e ahau.
GEN 6:14 Hangā e koe tētahi āka mōu ki te rākau kopera; me hanga e koe ētahi rūma ki roto i te āka, ka pani ai i roto, i waho, ki te ware.
GEN 6:15 Nā, kia pēnei tāu hanga i taua mea. Kia toru rau whatīanga te roa o te āka, kia rima tekau whatīanga te whānui, ko te teitei kia toru tekau whatīanga.
GEN 6:16 Me hanga e koe he matapihi mō te āka, kia kotahi te whatīanga ki raro iho i te tuanui, e whakaotia ai e koe; ā, ko te tatau o te āka me whakanoho e koe ki tōna taha; ka mea ai koe he papanga rūma, tō raro, te tuarua, me te tuatoru.
GEN 6:17 Nā, ko ahau, tēnei ahau te tuku atu nei i te waipuke ki runga ki te whenua, hei whakangaro i ngā kikokiko katoa e whai manawa ora ana i raro i te rangi; ā, ka mate ngā mea katoa i runga i te whenua.
GEN 6:18 Otiia, ka whakamanā e ahau tāku kawenata ki a koe; me haere koe ki roto ki te āka, koutou tahi ko āu tama, ko tāu wahine, ko ngā wāhine anō hoki a āu tama.
GEN 6:19 Me mau e koe ki roto ki te āka ētahi o ngā mea ora katoa o ngā kikokiko katoa, kia rua o ia āhua, o ia āhua, kia ora tahi ai me koe; hei te toa, hei te uha.
GEN 6:20 Ko ētahi o ngā manu o ia āhua, o ia āhua, o ngā kararehe hoki o ia āhua, o ia āhua, o ngā mea ngōkingōki katoa o te whenua o ia āhua, o ia āhua, kia tātaki rua o te katoa e haere ki a koe, kia ora ai.
GEN 6:21 Tangohia mai hoki māu ētahi o ngā kai katoa e kainga ana, me āmene mai ki a koe; ā, hei kai tēnā māu, mā rātou hoki.”
GEN 6:22 Nā, ka meatia e Noa; rite tonu ki ngā mea katoa i whakahaua mai e te Atua ki a ia tāna i mea ai.
GEN 7:1 Nā, ka mea a Ihowā ki a Noa, “Haere mai koutou ko tōu whare katoa ki roto ki te āka; kua kite hoki ahau i a koe he tika ki tōku aroaro i tēnei whakatupuranga.
GEN 7:2 Tangohia e koe ētahi o ngā kīrehe pokekore, kia takiwhitu, te toa me tāna uha; o ngā kararehe poke hoki, kia takirua, te toa me tāna uha;
GEN 7:3 me ngā manu anō hoki o te rangi, kia takiwhitu, te toa me te uha; kia ora ai he uri ki runga ki te mata o te whenua katoa.
GEN 7:4 Kia whitu ake hoki ngā rā ka meatia e ahau kia ua te ua ki runga ki te whenua, kia whā tekau ngā rā, kia whā tekau ngā pō; ā, ka whakangaromia atu e ahau i runga i te mata o te whenua ngā mea ora katoa i hangā e ahau.”
GEN 7:5 Ā, rite tonu tā Noa i mea ai ki a Ihowā katoa i whakahau ai ki a ia.
GEN 7:6 Nā, e ono rau ngā tau o Noa i te putanga mai o te waipuke ki runga ki te whenua.
GEN 7:7 Nā, ka tomo a Noa rātou tahi ko āna tama, ko tāna wahine, ko ngā wāhine hoki a āna tama, ki roto ki te āka, i te wehi i ngā wai o te waipuke.
GEN 7:8 Me ētahi o ngā kīrehe pokekore, o ngā kīrehe poke hoki, o ngā manu, o ngā mea katoa anō hoki e ngōkingōki ana i runga i te whenua;
GEN 7:9 i haere tātaki rua rātou ki roto ki te āka ki a Noa, te toa me te uha, i pērā tonu me tā te Atua i whakahau ai ki a Noa.
GEN 7:10 Nā, i muri iho i ngā rā e whitu ka puta mai ngā wai o te waipuke ki runga ki te whenua.
GEN 7:11 Nō te ono rau o ngā tau o te oranga o Noa, nō te rua o ngā marama, nō te tekau mā whitu o ngā rā o te marama, nō taua rangi anō i pakaru mai ai ngā mātāpuna katoa o te rire nui, ā, ka whakatuwheratia ngā matapihi o te rangi.
GEN 7:12 Ā, e whā tekau ngā rā, e whā tekau ngā pō, i ua ai te ua ki runga ki te whenua.
GEN 7:13 Nō taua rangi pū anō i tomo ai a Noa, rātou ko Hema, ko Hama, ko Iapeta, ngā tama a Noa, rātou tahi ko te wahine a Noa, ko ngā wāhine tokotoru anō hoki a āna tama, ki roto ki te āka;
GEN 7:14 rātou ko ngā kīrehe mohoao katoa o ia āhua, o ia āhua, ko ngā kararehe katoa o ia āhua, o ia āhua, ko ngā mea ngōki katoa e ngōkingōki nei i runga i te whenua, o ia āhua, o ia āhua, me ngā manu katoa, o ia āhua, o ia āhua, me ngā mea whai parirau katoa, o ia āhua, o ia āhua.
GEN 7:15 Nā, ka haere ki roto ki te āka ki a Noa, tātaki rua o ngā kikokiko katoa, o ngā mea whai wairua ora.
GEN 7:16 Ko ngā mea i haere, i haere he toa he uha o ngā kikokiko katoa, he pērā tonu me tā te Atua i whakahau ai ki a ia; ā, tūtakina ana ia e Ihowā ki roto.
GEN 7:17 Ā, e whā tekau ngā rā o te waipuke ki runga ki te whenua; ā, ka nui haere ngā wai, ka whakamanutia ake te āka, ā, ka maiangi ake ki runga i te whenua.
GEN 7:18 Nā, ka kaha ngā wai, ā, ka tino nui haere ki runga ki te whenua; ā, ka tere te āka i runga i te kare o ngā wai.
GEN 7:19 Nā, kua tino kaha rawa ngā wai ki runga ki te whenua; ā, ka taupokina ngā maunga teitei katoa i raro i te rangi, ā puta noa.
GEN 7:20 Kotahi tekau mā rima ngā whatīanga i pari ake ai ngā wai; ā, taupokina ana ngā maunga.
GEN 7:21 Nā, ka mate ngā kikokiko katoa i korikori i runga i te whenua; te manu, te kararehe, te kīrehe, ngā mea ngōki katoa hoki i ngōkingōki i runga i te whenua, me ngā tāngata katoa.
GEN 7:22 Ko ngā mea katoa kei roto nei i ō rātou pongāihu te manawa ora, o ngā mea katoa i te tuawhenua, i mate.
GEN 7:23 Ā, ngaro iho ngā mea ora katoa i runga i te mata o te whenua, te tangata, te kararehe, ngā mea ngōkingōki, me te manu o te rangi; i whakangaromia atu rātou i runga i te whenua. Ā, toe ake ko te kotahi o Noa, me ngā mea i a ia, i roto i te āka.
GEN 7:24 Ā, kotahi rau e rima tekau ngā rā i huri ai ngā wai ki runga ki te whenua.
GEN 8:1 Nā, ka mahara te Atua ki a Noa, ki ngā mea ora katoa me ngā kararehe katoa anō hoki i a ia i roto i te āka. Nā, ka mea te Atua kia tika atu tētahi hau i runga i te whenua, ā, ka māriri ngā wai.
GEN 8:2 Ā, ka tūtakina atu ngā mātāpuna o te rire me ngā matapihi o te rangi, ka whakamutua anō hoki te ua o te rangi.
GEN 8:3 Nā, ka hoki haere ngā wai i runga i te whenua; ā, i te paunga o ngā rā kotahi rau e rima tekau kua iti iho ngā wai.
GEN 8:4 Ā, i tau iho te āka i te whitu o ngā marama, i te kotahi tekau mā whitu o ngā rā o te marama, ki runga ki ngā maunga o Ararata.
GEN 8:5 Me te heke haere tonu o ngā wai, ā taea noatia te tekau o ngā marama; nō te tekau o ngā marama, nō te rā tuatahi o te marama, ka kitea ngā tihi o ngā maunga.
GEN 8:6 Ā, i te mutunga o ngā rā e whā tekau, nā, ka uakina e Noa te matapihi o te āka i hangā e ia.
GEN 8:7 Ā, ka tukua atu e ia he raweni, ā, ko tōna rerenga atu, ka kōpiko atu, ka kōpiko mai, ā, maroke noa ngā wai i runga i te whenua.
GEN 8:8 Nā, ka tukua atu anō e ia he kūkupa, kia kitea ai kua iti iho rānei ngā wai i runga i te mata o te whenua,
GEN 8:9 ā, kīhai i kitea e te kūkupa tētahi taunga iho mō te takahanga o tōna waewae, ā, ka hoki mai ki a ia, ki roto ki te āka; i runga hoki ngā wai i te mata o te whenua katoa. Nā, ka totoro atu tōna ringa, ā, hopukia ana ia, tangohia ana mai ki a ia ki roto ki te āka.
GEN 8:10 Nā, ka tatari anō ia, e whitu atu ngā rā; ā, ka tukua atu anō e ia te kūkupa i roto i te āka.
GEN 8:11 Ā, i te ahiahi ka rere mai te kūkupa ki a ia; nā, i roto i tōna waha he rau ōriwa, he mea kōrari mai; ā, ka mōhio a Noa kua iti iho ngā wai i runga i te whenua.
GEN 8:12 Ā, ka tatari anō ia, e whitu atu anō ngā rā; ā, tukua atu ana e ia te kūkupa; ā, kīhai tēnā i hoki mai anō ki a ia i muri iho.
GEN 8:13 Ā, nō te ono rau mā tahi o ngā tau, nō te marama tuatahi, nō te rā tuatahi o te marama, i maroke atu ai ngā wai i runga i te whenua. Nā, ka hurahia atu e Noa te hīpoki o te āka, ā, ka kite, nā, kua maroke te mata o te whenua.
GEN 8:14 Ā, nō te rua o ngā marama, nō te rua tekau mā whitu o ngā rā o te marama, i maroke ai te whenua.
GEN 8:15 Nā, ka kōrero te Atua ki a Noa, ka mea,
GEN 8:16 “Puta mai koe i te āka, koutou tahi ko tāu wahine, ko āu tama, me ngā wāhine a āu tama.
GEN 8:17 Kia puta tahi mai me koe ngā mea ora katoa i a koe nā, ngā kikokiko katoa, ngā manu, ngā kararehe, me ngā mea ngōki katoa e ngōkingōki ana i runga i te whenua; ā, kia whakatuputupu rātou ki runga ki te whenua, kia hua, kia ngahue ki runga ki te whenua.”
GEN 8:18 Nā, ka puta a Noa, rātou tahi ko āna tama, ko tāna wahine, me ngā wāhine a āna tama.
GEN 8:19 Ka puta hoki i roto i te āka ngā kīrehe katoa, ngā mea ngōkingōki katoa, ngā manu katoa, me ngā mea ngōki katoa i runga i te whenua o ia āhua, o ia āhua.
GEN 8:20 Nā, ka hangā e Noa tētahi āta mā Ihowā, ā, ka tango ia i ētahi o ngā kararehe pokekore katoa, o ngā manu pokekore katoa hoki, ā, whakaekea tinanatia ana e ia ki runga ki te āta.
GEN 8:21 Nā, ka hongi a Ihowā ki te kakara reka; ā, ka mea a Ihowā i roto i tōna ngākau, “E kore ahau e kanga anō i te oneone ā muri ake nei mō ngā mahi a te tangata; otiia he kino ngā tokonga ake o te ngākau o te tangata, o tōna taitamarikitanga ake anō; e kore anō hoki ahau e patu i ngā mea ora katoa ā muri ake nei, e pēnei me tēnei meatanga āku.
GEN 8:22 E mau ana te whenua, e kore e mutu te pō rui me te pō kokoti, te māeke me te mahana, te raumati me te hōtoke, te ao me te pō.”
GEN 9:1 Nā, ka manaakitia a Noa rātou ko āna tama e te Atua, i mea ia ki a rātou, “Kia hua, kia tini koutou, kia kapi anō hoki te whenua i a koutou.
GEN 9:2 Ā, ko tō koutou wehi, ko tō koutou whakamataku, ka tau ki runga ki ngā kīrehe katoa o te whenua, ki ngā manu katoa o te rangi, ki ngā mea katoa e ngahue ana i runga i te whenua, ki ngā ika katoa anō hoki o te moana; kua hoatu ēnā mea ki tō koutou ringa.
GEN 9:3 Hei kai mā koutou ngā mea korikori katoa, ngā mea ora; rite tonu ki tāku hoatutanga i ngā otaota matomato tāku hoatutanga i ngā mea katoa ki a koutou.
GEN 9:4 “Otiia kaua e kainga e koutou te kikokiko me tōna ora, arā ko ōna toto.
GEN 9:5 Nā, ko ō koutou toto, ko te toto e ora nei koutou, he pono ka rapua e ahau he utu. Ka rapua e ahau he utu i ngā kīrehe katoa; i te tangata anō hoki, ka rapua e ahau he utu mō te matenga o te tangata i te teina o ia tangata, o ia tangata.
GEN 9:6 Ko ia e whakaheke i ngā toto o te tangata, mā te tangata anō ōna toto e whakaheke; nō te Atua hoki te āhua i hangā ai e ia te tangata.
GEN 9:7 Ā, ko koutou, kia hua, kia tini; kia nui tō koutou uri ki runga ki te whenua, kia tini hoki ki reira.”
GEN 9:8 Ā, i kōrero te Atua ki a Noa rātou ko āna tama, i mea,
GEN 9:9 “Ko ahau nei, nanā, ka whakapūmau ahau i tāku kawenata ki a koutou, ki tō koutou uri i muri i a koutou,
GEN 9:10 ki ngā mea ora katoa hoki i a koutou, ki te manu, ki te kararehe, ki ngā kīrehe katoa hoki o te whenua e noho ana i a koutou; ki ngā mea katoa i puta mai i roto i te āka, puta noa ki ngā kīrehe katoa o te whenua.
GEN 9:11 Ā, ka whakapūmautia e ahau tāku kawenata ki a koutou; e kore e hātepea atu ngā kikokiko katoa ā muri ake nei e ngā wai o te waipuke; e kore anō e puta mai he waipuke ā muri ake nei hei whakangaro mō te whenua.”
GEN 9:12 Ka mea te Atua, “Ko te tohu tēnei o te kawenata, e whakatakotoria nei e ahau ki waenganui ōku, o koutou tae atu ki ngā mea ora katoa i a koutou, mō ngā whakatupuranga mutungakore:
GEN 9:13 ka whakatakotoria e ahau tāku kōpere ki te kapua, ā, ka waiho hei tohu mō te kawenata i waenganui ōku, o te whenua.
GEN 9:14 Tēnei ake anō, i te wā e whakaputa ai ahau i te kapua ki runga ki te whenua, ka kitea te kōpere i te kapua,
GEN 9:15 ā, ka mahara ahau ki tāku kawenata i waenganui ōku, o koutou me ngā mea ora katoa, arā ngā kikokiko katoa; e kore ngā wai e pupuke ā muri ake nei hei whakangaro i ngā kikokiko katoa.
GEN 9:16 Ā, ka piri te kōpere ki te kapua; ā, ka titiro atu ahau ki taua mea, kia mahara ai ahau ki te kawenata mau tonu i waenganui o te Atua, o ngā wairua ora katoa o ngā kikokiko katoa runga i te whenua.”
GEN 9:17 Nā, ka mea te Atua ki a Noa, “Ko te tohu tēnei o te kawenata e whakapūmautia nei e ahau ki waenganui ōku, o ngā kikokiko katoa i runga i te whenua.”
GEN 9:18 Nā, ko ngā tama a Noa, i puta mai nei i roto i te āka, ko Hema, ko Hama, ko Iapeta; ā, ko Hama te matua o Kanāna.
GEN 9:19 Ko ngā tama tokotoru ēnei a Noa; ā, nā ēnei i kapi ai te whenua katoa.
GEN 9:20 Nā, ka tīmata a Noa te ngaki whenua, ā, whakatōkia ana e ia he māra wāina.
GEN 9:21 Ā, ka inumia e ia te wāina, ka haurangi; nā, ka takoto tahanga i roto i tōna tēneti.
GEN 9:22 Ā, i te kitenga o Hama, o te matua o Kanāna, i tōna matua e takoto tahanga ana, ka kōrerotia e ia ki ōna tuākana tokorua i waho.
GEN 9:23 Nā, ka tango a Hema rāua ko Iapeta i tētahi kākahu, makā iho e rāua ki runga ki ō rāua pokohiwi, nā, ka haere whakatuarā atu rāua, ā, hīpokina ana te wāhi takoto kau o tō rāua pāpā; me te ahu anō ō rāua kanohi ki muri, ā, kīhai rāua i kite i te wāhi takoto kau o tō rāua pāpā.
GEN 9:24 Nā, ka maranga ake a Noa i tāna wāina, ka mōhio ki tā tāna pōtiki i mea ai ki a ia.
GEN 9:25 Nā, ka mea ia, “Ka kangā a Kanāna; ka waiho ia hei tino pononga mā ōna tuākana.”
GEN 9:26 I mea anō ia, “Kia whakapaingia a Ihowā, te Atua o Hema; ā, ka waiho a Kanāna hei pononga māna.
GEN 9:27 Ka meinga a Iapeta e te Atua kia tohatoha noa atu, kia noho hoki ia ki ngā tēneti o Hema; ā, hei pononga a Kanāna māna.”
GEN 9:28 Ā, e toru rau e rima tekau ngā tau i ora ai a Noa i muri i te waipuke.
GEN 9:29 Ā, ko ngā rā katoa o Noa e iwa rau e rima tekau tau; ā, ka mate ia.
GEN 10:1 Nā, ko ngā whakatupuranga ēnei o ngā tama a Noa, o Hema, o Hama, o Iapeta. I whānau hoki he tama mā rātou i muri i te waipuke.
GEN 10:2 Ko ngā tama a Iapeta: ko Kōmere, ko Makoko, ko Marai, ko Iawana, ko Tūpara, ko Meheke, ko Tīraha.
GEN 10:3 Ā, ko ngā tama a Kōmere: ko Ahekenata, ko Rīpata, ko Tokārama.
GEN 10:4 Ā, ko ngā tama a Iawana: ko Erihaha, ko Tarahihi, ko Kitimi, ko Totanimi.
GEN 10:5 (Nā ēnei ngā motu o ngā tauiwi i wehe puta noa i ō rātou whenua, tēnā iwi i tōna reo; tērā toronga, tērā toronga o rātou, i ō rātou iwi hoki.)
GEN 10:6 Ā, ko ngā tama a Hama: ko Kuhu, ko Mitiraima, ko Putu, ko Kanāna.
GEN 10:7 Ko ngā tama a Kuhu: ko Tepa, ko Hāwira, ko Hāpata, ko Rāma, ko Hapateka. Ā, ko ngā tama a Rāma: ko Hēpā, ko Rerana.
GEN 10:8 Ā, whānau ake tā Kuhu ko Nimirota, i tīmata ia hei tangata nui ki runga ki te whenua.
GEN 10:9 He māia ia i te aroaro o Ihowā ki te whai kīrehe mohoao; nō reira te kupu nei, “He pērā me Nimirota te māia i te aroaro o Ihowā ki te whai kīrehe mohoao.”
GEN 10:10 Ā, i Papera te tīmatanga o tōna kīngitanga, i Ereke, i Ākara, i Karane, i te whenua o Hinara.
GEN 10:11 I haere atu ia i taua whenua ki Ahiria, ā, hangā ana e ia a Ninewe, me te pā, me Rehopoto, me Kara,
GEN 10:12 me Rehena hoki, i waenganui o Ninewe, o Kara; he pā nui ia.
GEN 10:13 Ā, whānau ake a Mitiraima, ko ngā Rurimi, ko ngā Anamime, ko ngā Rehapimi, ko ngā Napatuhimi,
GEN 10:14 ko ngā Pataruhimi, ko ngā Kaheruhimi, i puta mai hoki i ēnā ngā Pirihitini, ā, ko ngā Kapatorimi.
GEN 10:15 Ā, whānau ake tā Kanāna ko Hairona, ko tāna mātāmua, rāua ko Hete,
GEN 10:16 me te Iepuhi, me te Amori, me te Kirikahi,
GEN 10:17 me te Hiwi, me te Araki, me te Hini,
GEN 10:18 me te Arawari, me te Temari, me te Hāmati. Ā muri iho ka marara noa atu ngā hapū o ngā Kanaani.
GEN 10:19 I Hairona hoki te rohe ki ngā Kanaani, kei tōu haerenga atu ki Kerara, ki Kaha; kei tōu haerenga ki Horoma, ki Komora, ki Arema, ki Tepoimi, ā tae noa ki Raha.
GEN 10:20 Ko ngā tama ēnei a Hama, tērā toronga, tērā toronga o rātou, tērā reo, tērā reo o rātou, me ō rātou whenua, me ō rātou iwi.
GEN 10:21 Me Hema anō hoki, me te pāpā o ngā tamariki katoa a Ēpere, te tuakana o Iapeta, i whānau anō hoki he tamariki māna.
GEN 10:22 Ko ngā tama a Hema: ko Erama, ko Āhura, ko Arapahata, ko Ruru, ko Arame.
GEN 10:23 Ā, ko ngā tamariki a Arame: ko Uhu, ko Huru, ko Ketere, ko Maha.
GEN 10:24 Nā Arapahata ko Haraha, tā Haraha ko Ēpere.
GEN 10:25 Tokorua ngā tama a Ēpere: ko Pereke te ingoa o tētahi. Nō tōna rā hoki i wehea ai te whenua; ā, ko Iokētana te ingoa o tōna teina.
GEN 10:26 Ā, whānau ake a Iokētana ko Aramotata, ko Herepe, ko Hataramaweta, ko Ieraha,
GEN 10:27 ko Hatorama, ko Utara, ko Tikera,
GEN 10:28 ko Opara, ko Apimaera, ko Hēpā,
GEN 10:29 ko Ōpira, ko Hāwira, ko Iopapa; he tama katoa ēnei nā Iokētana.
GEN 10:30 Kei Meha hoki tō rātou nohoanga, ā tae noa koe ki Hepara; he maunga ia kei te rāwhiti.
GEN 10:31 Ko ngā tama ēnei a Hema, tōna hapū, tōna hapū, tōna reo, tōna reo, ō rātou kāinga, me ō rātou iwi.
GEN 10:32 Ko ngā toronga ēnei o ngā tama a Noa, i ō rātou whakatupuranga, me ō rātou iwi; ā, i wehea mai i ēnei ngā iwi o te whenua i muri iho i te waipuke.
GEN 11:1 Nā, kotahi tonu te reo o te whenua katoa, rite tonu anō ngā kōrero.
GEN 11:2 Ā, i a rātou e haere ana whaka te rāwhiti, nā, ka kite rātou i tētahi mānia i te whenua o Hinara; ā, noho ana rātou i reira.
GEN 11:3 Nā, ka mea rātou ki tōna hoa, ki tōna hoa, “Tēnā, tātou ka hanga pereki, me āta tahu mārire anō hoki.” Nā, ka meinga e rātou he pereki hei kōhatu, he uku hoki tā rātou moata.
GEN 11:4 Nā, ka mea rātou, “Tēnā, tātou ka hanga i tētahi pā me tētahi pourewa, ā, kia tutuki a runga ki te rangi, kia whai ingoa ai tātou; kei marara noa atu tātou ki te mata o te whenua katoa.”
GEN 11:5 Nā, ka heke iho a Ihowā kia kite i te pā me te pourewa, i hangā nei e ngā tama a te tangata.
GEN 11:6 Ā, ka mea a Ihowā, “Nanā, kotahi tonu te iwi nei, kotahi anō hoki tō rātou reo; ā, ka tīmataia nei tēnei mahi e rātou; e kore anō rātou e taea te pupuri mai i tētahi mea, e whakaaro ana rātou kia mahia.
GEN 11:7 Tēnā, tātou ka heke atu, ka whakapōauau i ō rātou reo i reira, kia kore ai rātou e mātau, ia tangata, ia tangata ki te reo o tōna hoa.”
GEN 11:8 Nā, whakamararatia atu ana rātou i reira e Ihowā ki runga ki te mata o te whenua katoa; ā, mahue ake i a rātou te hanga i te pā.
GEN 11:9 Nā konā i huaina ai tō reira ingoa ko Papera, nō te mea i whakapōauautia e Ihowā i reira te reo o te whenua katoa; nō reira anō hoki te whakamararatanga a Ihowā i a rātou ki te mata o te whenua katoa.
GEN 11:10 Ko ngā whakatupuranga ēnei o Hema. Ka kotahi rau ngā tau o Hema, nā, ka whānau a Arapahata i te rua o ngā tau i muri i te waipuke.
GEN 11:11 Ā, e rima rau ngā tau i ora ai a Hema i muri i te whānautanga o Arapahata, ā, ka whānau āna tama me āna tamāhine.
GEN 11:12 Ā, ka toru tekau mā rima ngā tau i ora ai a Arapahata, nā, ka whānau a Haraha;
GEN 11:13 ā, e whā rau e toru ngā tau i ora ai a Arapahata i muri i te whānautanga o Haraha, ka whānau āna tama me āna tamāhine.
GEN 11:14 Ā, ka toru tekau ngā tau i ora ai a Haraha, nā, ka whānau a Ēpere;
GEN 11:15 ā, e whā rau e toru ngā tau o Haraha i muri i te whānautanga o Ēpere, ka whānau āna tama me āna tamāhine.
GEN 11:16 Ā, e toru tekau mā whā ngā tau i ora ai a Ēpere, ka whānau a Pereke;
GEN 11:17 e whā rau e toru tekau ngā tau i ora ai a Ēpere i muri i te whānautanga o Pereke, ā, ka whānau āna tama me āna tamāhine.
GEN 11:18 Ā, ka toru tekau ngā tau o Pereke, ka whānau a Reu;
GEN 11:19 ā, e rua rau e iwa ngā tau i ora ai a Pereke i muri i te whānautanga o Reu, ka whānau āna tama me āna tamāhine.
GEN 11:20 Ā, ka toru tekau mā rua ngā tau o Reu, nā, ka whānau a Heruka;
GEN 11:21 ā, e rua rau mā whitu ngā tau i ora ai a Reu i muri i te whānautanga o Heruka, ka whānau āna tama me āna tamāhine.
GEN 11:22 Ā, ka toru tekau ngā tau o Heruka, nā, ka whānau a Nahora;
GEN 11:23 ā, e rua rau ngā tau i ora ai a Heruka i muri i te whānautanga o Nahora, ka whānau āna tama me āna tamāhine.
GEN 11:24 Ā, e rua tekau mā iwa ngā tau i ora ai a Nahora, nā, ka whānau a Teraha;
GEN 11:25 ā, kotahi rau kotahi tekau mā iwa ngā tau i ora ai a Nahora i muri i te whānautanga o Teraha, ā, ka whānau āna tama me āna tamāhine.
GEN 11:26 Ā, ka whitu tekau ngā tau i ora ai a Teraha, nā, ka whānau a Āperama, a Nahora, rātou ko Harana.
GEN 11:27 Nā, ko ngā whakatupuranga ēnei o Teraha. Nā Teraha ko Āperama, ko Nahora, rātou ko Harana; nā Harana ko Rota.
GEN 11:28 Ā, i mate a Harana i te oranga anō o tōna pāpā o Teraha i te whenua i whānau ai ia, i Uru o ngā Karari.
GEN 11:29 Nā, ka tango a Āperama rāua ko Nahora i ētahi wāhine mā rāua; ko te ingoa o te wahine a Āperama ko Harai, ko te ingoa o te wahine a Nahora ko Mireka tamāhine a Harana, pāpā o Mireka, pāpā anō hoki o Ihēka.
GEN 11:30 Ā, he pākoko a Harai; kāhore āna tamariki.
GEN 11:31 Nā, ka tango a Teraha i a Āperama i tāna tama, rāua ko Rota tama a Harana, ko te tama a tāna tama, rātou ko tāna hunaonga, ko Harai wahine a tāna tama a Āperama; ā, whakatika tahi ana rātou i Uru o ngā Karari, haere ana ki te whenua o Kanaana; ka tae ki Harana, ā, noho ana i reira.
GEN 11:32 Ā, ko ngā rā o Teraha e rua rau mā rima tau; nā, ka mate a Teraha ki Harana.
GEN 12:1 Nā, ka mea atu a Ihowā ki a Āperama, “Haere atu i tōu whenua, i roto i ōu whanaunga, i te whare anō hoki o tōu pāpā, ki te whenua e whakaaturia e ahau ki a koe.
GEN 12:2 Ā, ka meinga koe e ahau hei iwi nui, ka manaakitia anō koe e ahau, ka whakanuia anō hoki tōu ingoa; ā, ka waiho koe hei manaakitanga.
GEN 12:3 Ā, ka manaaki ahau i te hunga e manaaki ana i a koe, ka kanga hoki i te tangata e kanga ana i a koe; ā, māu ka manaakitia ai ngā hapū katoa o te whenua.”
GEN 12:4 Nā, haere ana a Āperama, pērā ana me tā Ihowā i kōrero ai ki a ia; i haere tahi anō a Rota i a ia. Ā, e whitu tekau mā rima ngā tau o Āperama i tōna hekenga mai i Harana.
GEN 12:5 Nā, ka tango a Āperama i a Harai, i tāna wahine rāua ko Rota tama a tōna teina, i ō rātou rawa katoa i whakaemi ai, i ngā mea ora katoa i whiwhi ai rātou ki Harana; ā, whakatika ana rātou, haere ana ki te whenua o Kanaana. Nā, ka tae rātou ki te whenua o Kanaana.
GEN 12:6 Nā, ka tika a Āperama nā waenganui o te whenua ki te wāhi o Hekeme, ki te oki i More. I taua whenua anō te Kanaani i taua wā.
GEN 12:7 Nā, ka puta a Ihowā ki a Āperama, ka mea, “Ka hoatu e ahau tēnei whenua ki tōu uri.” Nā, ka hangā e ia tētahi āta ki reira mā Ihowā i puta mai nei ki a ia.
GEN 12:8 Nā, ka neke atu ia i reira ki te maunga i te rāwhiti o Pētēre, ā, ka whakatū i tōna tēneti; ko Pētēre ki te hauāuru, ko Hai ki te rāwhiti. I hangā anō e ia tētahi āta mā Ihowā ki reira, ā, karanga ana ki te ingoa o Ihowā.
GEN 12:9 Nā, ka tūria atu e Āperama, me te neke haere whaka te tonga.
GEN 12:10 Ā, he matekai tō te whenua; ā, ka haere a Āperama ki raro, ki Īhipa, ki reira noho ai; he nui hoki te matekai o te whenua.
GEN 12:11 Ā, i a ia ka tata te tae ki Īhipa; ka mea ia ki a Harai, ki tāna wahine, “Nanā, e mōhio ana ahau he wahine ātaahua koe ki te titiro atu;
GEN 12:12 nā, ākuanei kei te kitenga o ngā Īhipiana i a koe, ka mea rātou, ‘Ko tāna wahine tēnei’; ā, ka patua ahau e rātou, ka whakaora hoki i a koe.
GEN 12:13 Me kī koe, nē, he tuahine koe nōku? Kia whiwhi ai ahau ki te pai i a koe; ā, kia ora ai tōku wairua i a koe.”
GEN 12:14 Ā, i te taenga o Āperama ki Īhipa, ka titiro ngā Īhipiana ki te wahine, he tino ātaahua.
GEN 12:15 Ka kite hoki ngā rangatira a Parao i a ia, ka kōrero whakamihi mōna ki a Parao, ā, ka kawea te wahine rā ki te whare o Parao.
GEN 12:16 Nā, ka atawhai ia i a Āperama, he mea hoki mō te wahine; ā, ka riro i a ia he hipi, he kau, he kāihe toa, he pononga tāne, he pononga wāhine, he kāihe uha, he kāmera.
GEN 12:17 Nā, ka whiua e Ihowā a Parao rātou ko tōna whare, he nui ngā pakinga, mō Harai wahine a Āperama.
GEN 12:18 Nā, ka karanga a Parao ki a Āperama, ka mea, “He aha tēnei mahi āu ki ahau? He aha koe tē kōrero mai ai ki ahau ko tāu wahine ia?
GEN 12:19 Nā te aha koe i mea ai, ‘Ko tāku tuahine ia’ i tango ai ahau i a ia hei wahine māku? Nā, tāu wahine, tangohia, haere.”
GEN 12:20 Nā, ka whakatūpato a Parao ki ngā tāngata, kei aha atu ki a ia; ā, tukua atu ana ia e rātou, me tāna wahine, me āna mea katoa.
GEN 13:1 Nā, ka haere mai a Āperama i Īhipa ki te tonga, rāua ko tāna wahine, me āna mea katoa, me Rota hoki.
GEN 13:2 He nui rawa hoki ngā kararehe, te hiriwa me te kōura ki a Āperama.
GEN 13:3 Nā, ka tūria mai e ia, ā, ka haere i te tonga ā tae noa ki Pētēre, ki te wāhi i oroko tū ai tōna tēneti, i waenganui o Pētēre, o Hai,
GEN 13:4 ki te wāhi i te āta i hangā e ia ki reira i te tīmatanga. Nā, ka karanga a Āperama i reira ki te ingoa o Ihowā.
GEN 13:5 Nā, ko Rota, i haere tahi nei i a Āperama, he hipi anō āna, he kau, he tēneti.
GEN 13:6 Ā, kīhai i nui te whenua mō rāua, hei nohoanga tahitanga mō rāua. He nui hoki ō rāua rawa, tē āhei rāua te noho tahi.
GEN 13:7 Nā, ka tautohe ki a rātou ngā hēpara a Āperama me ngā hēpara a Rota. Nā, i taua whenua e noho ana te Kanaani me te Perihi i taua wā.
GEN 13:8 Nā, ka mea a Āperama ki a Rota, “Kaua rā taua e whakatete ki a tāua, kaua hoki ā tāua hēpara e whakatete ki a rātou; he tēina nei hoki, he tuākana tāua.
GEN 13:9 Kāhore ianei te whenua katoa i tōu aroaro? Tēnā, wehe atu koe i ahau. Ki te anga koe ki mauī, ka ahu ahau ki matau, ā, ki te haere koe ki matau, nā, ka ahu ahau ki mauī.”
GEN 13:10 Nā, ka anga ake ngā kanohi o Rota, ka titiro ki te mānia katoa o Horano, he mākūkū katoa, i te mea kāhore anō kia whakangaromia noatia a Horoma, a Komora e Ihowā, he pērā ānō me te kāri a Ihowā, me te whenua hoki o Īhipa, i tōu haerenga ki Toara.
GEN 13:11 Nā, ka whiriwhiria e Rota ko te mānia katoa o Horano māna. Nā, ka haere a Rota whaka te rāwhiti, ā, ka wehe rāua i a rāua.
GEN 13:12 Ko Āperama i noho ki te whenua o Kanaana, ko Rota i noho ki ngā pā o te mānia, ā, whakatūria ana e ia tōna tēneti ki Horoma.
GEN 13:13 Nā, he kino ngā tāngata o Horoma, he hunga hara rawa ki te aroaro o Ihowā.
GEN 13:14 Nā, ka mea a Ihowā ki a Āperama, i muri i te wehenga atu o Rota i a ia, “Anga ake ōu kanohi, titiro atu hoki i te wāhi e tū nā koe, ki te raki, ki te tonga, ki te rāwhiti, ki te hauāuru;
GEN 13:15 ko te whenua katoa hoki e kite atu nā koe, ka hoatu e ahau ki a koe, ki tōu uri hoki ake tonu atu.
GEN 13:16 Ka meinga hoki e ahau ōu uri kia rite ki te puehu o te whenua; ā, ki te āhei i tētahi tangata te tatau i te puehu o te whenua, e taua anō hoki ōu uri.
GEN 13:17 Whakatika, hāereerea te whenua, tōna roa, tōna whānui; nō te mea ka hoatu e ahau ki a koe.”
GEN 13:18 Nā, nekehia ana tōna tēneti e Āperama, ā, haere ana, noho ana ki ngā oki i Mamere, ki ērā i Heperona, ā, hangā ana e ia tētahi āta mā Ihowā ki reira.
GEN 14:1 Nā, i ngā rā o Amarapera, kīngi o Hinara, o Arioka, kīngi o Eratara, o Keroraoma, kīngi o Erama, o Tirara hoki, kīngi o Koimi,
GEN 14:2 ka whawhai ēnei ki a Pera, kīngi o Horoma, rātou ko Pīreta, kīngi o Komora, ko Hinapa, kīngi o Arema, ko Hemepera, kīngi o Tepoimi, ko te kīngi hoki o Pera, (arā o Toara).
GEN 14:3 I huihui katoa ēnei ki te raorao i Hirimi, arā ki te Moana Tote.
GEN 14:4 Kotahi tekau mā rua ngā tau i mahi ai rātou ki a Keroraoma, ā, i te kotahi tekau mā toru o ngā tau ka whakakeke rātou.
GEN 14:5 Nā, i te tekau mā whā o ngā tau ka haere mai a Keroraoma, rātou ko ngā kīngi i whakauru ki a ia, ā, patua iho e rātou ngā Repaima i Ahateroto Karanaima, rātou ko ngā Tutimi i Hama me ngā Emime i Hawe Kiriataima,
GEN 14:6 me ngā Hori i tō rātou maunga, i Heira, ā tae noa ki Ereparana, ki te taha o te koraha.
GEN 14:7 Nā, ka hoki rātou, ā, ka tae ki Enimihipata, (arā ki Karehe), ā, patua katoatia ana e rātou te whenua o ngā Amareki, rātou ko ngā Amori i noho rā i Hatetonatamara.
GEN 14:8 Nā, ka puta atu te kīngi o Horoma, rātou ko te kīngi o Komora, ko te kīngi o Arema, ko te kīngi o Tepoimi, me te kīngi o Pera, (arā o Toara) ā, ka tūria e rātou he pakanga ki a rātou ki te raorao i Hirimi
GEN 14:9 Ki a Keroraoma, kīngi o Erama, ki a Tirara, kīngi o Koimi, ki a Amarapera, kīngi o Hinara, rātou ko Arioka, kīngi o Eratara, tokowhā ēnei kīngi, tokorima hoki ērā.
GEN 14:10 Nā, kī tonu te raorao i Hirimi i te poka uku; nā, ka whati ngā kīngi o Horoma rāua ko Komora, ā, ka hinga ki reira; ā, rere ana ngā mōrehu ki te maunga.
GEN 14:11 Nā, murua ana e rātou ngā taonga katoa o Horoma, o Komora, me ā rātou kai katoa, ā, haere ana.
GEN 14:12 I mauria anō e rātou a Rota, te tama a te teina o Āperama, me ōna taonga, ā, haere ana; i Horoma hoki ia e noho ana.
GEN 14:13 Nā, ka tae he mōrehu, ka kōrero ki a Āperama Hiperu; i te noho hoki ia i ngā oki o Mamere Amori, teina o Ehekora, he teina ia nō Anera. Kotahi anō tō rātou whakaaro ko Āperama.
GEN 14:14 Ā, i te rongonga o Āperama, kua hereherea atu tōna irāmutu, tākiritia ana e ia āna tāngata mōhio, ngā mea i whānau ki tōna whare, e toru rau kotahi tekau mā waru, ā, whāia ana rātou ki Rāna.
GEN 14:15 Nā, wāhia ana rātou ko āna tāngata kia rua ngā matua, hei whakaeke mō rātou i te pō, ā, patua ana rātou e ia, whāia ana, ā tae noa ki Hopaha, ki te taha ki mauī o Ramahiku.
GEN 14:16 Ā, whakahokia mai ana e ia ngā taonga katoa, whakahokia mai ana anō hoki tōna irāmutu, a Rota, me ōna taonga, me ngā wāhine anō hoki, me ngā tāngata.
GEN 14:17 Nā, ka puta mai te kīngi o Horoma ki te whakatau i a ia i tōna hokinga mai i te patu i a Keroraoma rātou ko ōna hoa, ko ngā kīngi ki te raorao o Hawe, (arā ki te Raorao o te Kīngi).
GEN 14:18 Ā, i maua mai e Merekihereke, e te kīngi o Harema, he taro, he wāina; he tohunga anō hoki ia nō te Atua, nō te Runga Rawa.
GEN 14:19 Nā, ka manaaki ia i a ia, ka mea, “Kia manaakitia a Āperama e te Atua, e te Runga Rawa, nōna nei te rangi me te whenua.
GEN 14:20 Kia manaakitia anō te Atua, te Runga Rawa, nāna nei i tuku mai ōu hoariri ki tōu ringa.” Ā, ka hoatu e ia ki a ia ngā whakatekau o ngā mea katoa.
GEN 14:21 Nā, ka mea te kīngi o Horoma ki a Āperama, “Hōmai ngā tāngata ki ahau, ko ngā taonga ia tangohia mōu.”
GEN 14:22 Anō rā ko Āperama ki te kīngi o Horoma, “Kua totoro atu tōku ringa ki a Ihowā, ki te Atua, ki te Runga Rawa, nōna nei te rangi me te whenua;
GEN 14:23 e kore ahau e tango ahakoa he miro, ahakoa he here nō te hū, i tētahi mea rānei āu, kei mea koe, ‘Nāku a Āperama i whai taonga ai.’
GEN 14:24 Kāti anō i a ngā taitama i kai ai, me te wāhi a ngā tāngata i haere tahi nei mātou – a Anera, rātou ko Ehekora, ko Mamere; mā rātou e tango te wāhi i a rātou.”
GEN 15:1 Muri iho i ēnei mea ka puta moemoeā mai te kupu a Ihowā ki a Āperama, ka mea: “Kaua e wehi, e Āperama. Ko ahau tōu whakangungu rākau, tōu utu nui whakaharahara.”
GEN 15:2 Nā, ka mea a Āperama, “E te Ariki, e Ihowā, ko te aha e hōmai e koe ki ahau, e haere urikore nei ahau, ā, ko te taunga o tōku whare hei tēnei Eriētera o Ramahiku?”
GEN 15:3 I mea anō a Āperama, “Titiro hoki, kāhore nei i hōmai e koe he uri ki ahau; ā, ākuanei, kei tētahi tamaiti i whānau ki tōku whare te mahuetanga iho o ōku taonga.”
GEN 15:4 Nā, kua puta mai te kupu a Ihowā ki a ia, i mea ia, “E kore e mahue iho ōu taonga mō tēnā; engari, ka mahue iho mō tētahi e puta mai i roto i ōu whēkau.”
GEN 15:5 Nā, ka kawea ia e ia ki waho, ā, ka mea mai, “Tēnā tirohia atu te rangi, taua hoki ngā whetū, ki te taea ēnā e koe te tatau.” Ā, ka mea ia ki a ia, “Ka pērā tōu uri.”
GEN 15:6 I whakapono hoki ia ki a Ihowā, ā, ka whakairia ki a ia hei tika.
GEN 15:7 I mea anō ia ki a ia, “Ko Ihowā ahau, nāna nei koe i kawe mai i Uru o ngā Karari, kia hoatu ai ki a koe tēnei whenua hei kāinga pūmau.”
GEN 15:8 Anō rā ko ia, “E te Ariki, e Ihowā, mā te aha ka mōhio ai ahau ka riro mai tēnei i ahau?”
GEN 15:9 Nā, ka mea ia ki a ia, “Tīkina tētahi kau māku, hei te tau toru, me tētahi koati uha, hei te tau toru, me tētahi hipi toa, hei te tau toru, me tētahi kūkupa, me tētahi pī kūkupa.”
GEN 15:10 Nā, tīkina ana e ia aua mea katoa, ā, tapahia ana i waenganui, whakatakotoria ana ngā wāhi kia rite mai ki ā rāua whakawahi; ko ngā manu ia kīhai i tapahia e ia.
GEN 15:11 Ā, ka rere iho ngā manu ki ngā tinana, ka āia atu e Āperama.
GEN 15:12 Nā, i te rerenga o te rā, ka parangia a Āperama e te moe; nā, ko te whakawehi o te pōuri kerekere e tau iho ana ki a ia.
GEN 15:13 Ā, ka mea ia ki a Āperama, “Kia tino mōhio koe, ka noho manene tōu uri ki tētahi whenua ehara nei i a rātou, ā, ka mahi ki a rātou; ā, e whā rau ngā tau e whakatupuria kinotia ai rātou.
GEN 15:14 Ka whakawākia anō e ahau te iwi e whakamahia ai rātou, ā muri iho ka puta mai rātou me ngā taonga maha.
GEN 15:15 Ko koe ia ka haere mārie ki ōu mātua; ka pai tōu koroheketanga, ā, tanumia noatia koe.
GEN 15:16 Kei te whā ia o ngā whakatupuranga ka hoki mai rātou ki konei nō te mea kāhore anō kia tutuki noa te hara o ngā Amori.”
GEN 15:17 Nā, i te tōnga o te rā, nō ka pōuri, nā, ko te oumu paowa, me te rama e kā ana, e tika ana i waenganui o aua porohanga.
GEN 15:18 I taua rangi anō ka whakaritea e Ihowā he kawenata ki a Āperama, ka mea ia, “Ka hoatu e ahau tēnei whenua ki tōu uri, mai rā anō o te awa o Īhipa, ā tae noa ki te awa nui, ki te awa, ki Uparati;
GEN 15:19 ngā Keni, ngā Keniti, ngā Karamoni,
GEN 15:20 ngā Hiti, ngā Perihi, ngā Repaima,
GEN 15:21 ngā Amori, ngā Kanaani, ngā Kirikahi, me ngā Iepuhi.”
GEN 16:1 Nā, kāhore a Harai, te wahine a Āperama, i whai tamariki māna. Nā, he pononga wahine tāna, nō Īhipa, ko Hakara tōna ingoa.
GEN 16:2 Nā, ka mea a Harai ki a Āperama, “Nanā, kua tūtakina nei ahau e Ihowā kei whānau tamariki. Māu e haere ki roto, ki tāku pononga; māna pea ahau e tū ai.” Ā, ka whakarongo a Āperama ki te reo o Harai.
GEN 16:3 Nā, ka tango a Harai, wahine a Āperama i a Hakara, i te wahine o Īhipa, i tāna pononga, i te takanga o ngā tau kotahi tekau o te nohoanga o Āperama i te whenua o Kanaana, ā, hōmai ana e ia ki a Āperama, ki tāna tāne, hei wahine māna.
GEN 16:4 Nā, ka haere ia ki roto, ki a Hakara, ā, ka hapū ia. Ā, nō tōna kitenga kua hapū ia, ka iti tōna rangatira wahine ki tāna titiro.
GEN 16:5 Nā, ka mea a Harai ki a Āperama, “Hei runga i a koe tēnei tutū ki ahau. I hoatu e ahau tāku pononga wahine ki tōu uma; ā, nō tōna kitenga kua hapū ia, ka iti ahau ki tāna titiro iho. Mā Ihowā e whakariterite tāku kōrero me tāu hoki.”
GEN 16:6 Nā, ka mea a Āperama ki a Harai, “Ha, kei tōu ringa anō tāu pononga; māu e mea ki a ia te mea e pai ana ki tāu titiro iho.” Nā, ka whakatupu kino a Harai i a ia, ā, rere ana ia i tōna aroaro.
GEN 16:7 Ā, ka kitea ia e te anahera a te Atua i tētahi puna wai i te koraha, i te puna i te huarahi ki Huru,
GEN 16:8 ka mea, “E Hakara, e te pononga a Harai, i haere mai koe i hea? E anga ana hoki koe ko hea?” Ā, ka mea ia, “E rere ana ahau i a Harai, i tōku rangatira.”
GEN 16:9 Nā, ka mea te anahera a Ihowā ki a ia, “Hoki atu ki tōu rangatira, kia whakaririka hoki koe i raro i ōna ringa.”
GEN 16:10 Ka mea anō te anahera a Ihowā ki a ia, “Ka whakanuia rawatia e ahau tōu uri, ā, e kore e taea te tatau, i te tini hoki.”
GEN 16:11 I mea anō te anahera a Ihowā ki a ia: “Nanā, e hapū ana koe, ā, ka whānau he tama, me hua e koe tōna ingoa ko Ihimaera; mō Ihowā i whakarongo ki tāu tangi.
GEN 16:12 Ā, ka rite ia ki te kāihe mohoao i waenganui o te tangata; ka ara tōna ringa ki te katoa, me te ringa o te katoa ki a ia; ā, ka noho ia i te aroaro o ōna tēina katoa.”
GEN 16:13 Nā, ka huaina e ia te ingoa o Ihowā i kōrero nei ki a ia, “He Atua koe e kite ana,” i mea hoki ia, “I titiro rānei ahau i konei ki muri i tōku kaititiro mai?”
GEN 16:14 Koia i huaina ai taua puna ko Peere-Rahai-Roi; nā, kei waenganui i Karehe, i Perere.
GEN 16:15 Nā, ka whānau te tama a Hakara rāua ko Āperama; ā, huaina ana e Āperama te ingoa o tāna tama, i whānau nei i a Hakara, ko Ihimaera.
GEN 16:16 Nā, e waru tekau mā ono ngā tau o Āperama i te whānautanga o Ihimaera tama a Hakara rāua ko Āperama.
GEN 17:1 Ā, i te mea ka iwa tekau mā iwa ngā tau o Āperama, ka puta mai a Ihowā ki a Āperama, ka mea ki a ia, “Ko ahau te Atua Kaha Rawa; hāereere i mua i tōku aroaro, kia tapatahi hoki te whakaaro.
GEN 17:2 Ā, ka waiho e ahau tāku kawenata ki waenganui i a tāua, ka tino whakanui rawa anō ahau i a koe.”
GEN 17:3 Nā, ka kūpapa te kanohi o Āperama; ā, ka kōrero te Atua ki a ia, ka mea,
GEN 17:4 “Nā, ko ahau, kei a koe tāku kawenata, ā, ka matua koe mō ngā iwi maha.
GEN 17:5 E kore hoki tōu ingoa e huaina ā muri ake nei ko Āperama, engari ko Āperahama te ingoa mōu; ka meinga hoki koe e ahau hei matua mō ngā iwi maha.
GEN 17:6 Ka meinga anō koe e ahau kia tino hua rawa, ka meinga koe e ahau hei take mō ngā iwi, ā, ka puta mai ngā kīngi i roto i a koe.
GEN 17:7 Ā, ka whakapūmautia e ahau tāku kawenata ki waenganui ōku, o koutou hoki ko ōu uri i muri i a koe, o tērā whakatupuranga, o tērā whakatupuranga o rātou, hei kawenata mau tonu, ā, hei Atua ahau mōu, mō ōu uri hoki i muri i a koe.
GEN 17:8 Ā, ka hoatu e ahau ki a koe, ki ōu uri hoki i muri i a koe, te whenua e noho manene nā koe, te whenua katoa o Kanaana, hei kāinga pūmau; ā, hei Atua ahau mō rātou.”
GEN 17:9 I mea anō te Atua ki a Āperahama, “Inā, ko koe, me whakarite e koe tāku kawenata, e koutou ko ōu uri i muri i a koe, e tērā whakatupuranga, e tērā whakatupuranga o rātou.
GEN 17:10 Ko tāku kawenata tēnei hei whakaritenga mā koutou i waenganui ōku, o koutou ko ōu uri i muri i a koe: Me kokoti ā koutou tāne katoa.
GEN 17:11 Me kokoti e koutou tō koutou kiri matamata; ā, ka waiho tēnā hei tohu mō te kawenata i waenganui ōku, o koutou.
GEN 17:12 Me kokoti e koutou ngā tamariki ina waru ngā rā, ngā tāne katoa o tēnā whakatupuranga, o tēnā whakatupuranga o koutou, ngā mea i whānau i roto i te whare, i hokona rānei ki te moni i tētahi tangata kē, ehara nei i te uri nōu.
GEN 17:13 Me kokoti tonu te tangata i whānau i roto i tōu whare, i hokona rānei ki tāu moni, ā, ka mau tāku kawenata ki ō koutou kikokiko, hei kawenata mau tonu.
GEN 17:14 Ā, ko te tāne kīhai i kotia, kīhai nei i kotia tōna kiri matamata, ka hātepea atu tēnā wairua i roto i tōna iwi; kua whakatakā e ia tāku kawenata.”
GEN 17:15 Ā, ka mea te Atua ki a Āperahama, “Ko Harai, ko tāu wahine, kaua e huaina tōna ingoa ko Harai, engari ko Hara he ingoa mōna.
GEN 17:16 Ā, ka manaaki ahau i a ia, ka hoatu anō hoki i tētahi tama ki a koe i roto i a ia. Inā, ka manaaki ahau i a ia, ā, hei whaea ia mō ngā iwi; ka puta mai ngā kīngi mō ngā iwi i roto i a ia.”
GEN 17:17 Nā, ka kūpapa te kanohi o Āperahama ki raro, ā, ka kata ia, ka mea hoki i roto i tōna ngākau, “Tērā rānei e whānau he tama mā te tangata kua kotahi rau nei ōna tau? E whānau tamariki rānei a Hara, te wahine kua iwa tekau nei ōna tau?”
GEN 17:18 Nā, ka mea ake a Āperahama ki te Atua, “Kia ora noa oti a Ihimaera ki tōu aroaro!”
GEN 17:19 Nā, ka mea te Atua, “Ehara, ka whānau tā kōrua tama ko Hara; ā, me hua e koe tōna ingoa ko Īhaka. Ka whakapūmau anō ahau i tāku kawenata ki a ia, ki ōna uri hoki i muri i a ia, hei kawenata mau tonu.
GEN 17:20 Ko Ihimaera ia, nā, kua whakarongo ahau ki a koe; nanā, kua oti ia te manaaki e ahau, ā, ka meinga ia e ahau kia hua, kia tino nui rawa hoki; ka whānau āna tamariki kotahi tekau mā rua he ariki, ā, ka meinga ia e ahau hei iwi nui.
GEN 17:21 Ka whakapūmautia ia e ahau tāku kawenata ki a Īhaka, ka whānau nei i a kōrua ko Hara ā te tāima e rite ana ki tēnei o te tau e haere ake nei.”
GEN 17:22 Ā, ka mutu tāna kōrero ki a ia, ā, mawehe atu ana te Atua i a Āperahama ki runga.
GEN 17:23 Kātahi ka tango a Āperahama i a Ihimaera i tāna tama, rātou ko ngā mea katoa i whānau i roto i tōna whare, me ngā mea katoa i hokona ki tāna moni, ngā tāne katoa i roto i ngā tāngata o te whare o Āperahama; ā, kotia ana e ia tō rātou kiri matamata i taua rā pū anō, i pērā me tā te Atua i kōrero ai ki a ia.
GEN 17:24 Nā, e iwa tekau mā iwa ngā tau o Āperahama i te kotinga o tōna kiri matamata.
GEN 17:25 Kotahi tekau mā toru hoki ngā tau o tāna tama o Ihimaera i te kotinga o tōna kiri matamata.
GEN 17:26 Nō taua rangi pū anō i kotia ai a Āperahama, rāua ko tāna tama, ko Ihimaera,
GEN 17:27 ā, i kotia ngātahitia me ia ngā tāngata katoa o tōna whare, ngā mea i whānau i roto i te whare, me ngā mea i hokona ki te moni i te tangata iwi kē.
GEN 18:1 Ā, ka puta anō a Ihowā ki a ia i ngā oki o Mamere, i a ia e noho ana i te kūwaha o te tēneti i te tīkākātanga o te rā.
GEN 18:2 Ā, ka anga ake ōna kanohi, ka titiro, nā, ko ngā tāngata tokotoru e tū ana i tōna taha. Ā, nō tōna kitenga atu, ka rere atu ia i te kūwaha o te tēneti ki te whakatau i a rātou, ā, ka piko ki te whenua.
GEN 18:3 Ka mea, “E tōku Ariki, ki te mea he pai tōku ki tāu titiro, kaua rā e kapea tāu pononga.
GEN 18:4 Kia tīkina koa tētahi wai, ka horoi i ō koutou waewae, ā, ka okioki koutou i raro i te rākau.
GEN 18:5 Ā, māku e tiki tētahi wāhi taro hei oranga mō ō koutou ngākau; hei muri rā ka haere ai koutou. He mea hoki kua tae mai nei koutou ki tā koutou pononga.” Ā, ka mea rātou, “Pēnātia me tāu i kī nā.”
GEN 18:6 Nā, ka hohoro a Āperahama ki te tēneti ki a Hara, ā, ka mea, “Kia hohoro te pokepoke i tētahi parāoa pai, kia toru ngā mēhua, ka hanga i ētahi keke.”
GEN 18:7 Nā, ka rere a Āperahama ki te kāhui, ā, hopukia ana e ia tētahi kūao kau, he kiri ngāwari, he mea pai, ā, hoatu ana e ia ki tētahi taitamariki; ā, hohoro ana ia te taka i taua mea.
GEN 18:8 Nā, ka tīkina e ia he pata, he waiū, me te kūao i raweketia e ia, ā, whakatakotoria ana ki tō rātou aroaro; me te tū anō ia i tō rātou taha i raro i te rākau, ā, ka kai rātou.
GEN 18:9 Nā, ka mea rātou ki a ia, “Kei hea a Hara, tāu wahine?” Ā, ka mea ia, “Arā, kei te tēneti.”
GEN 18:10 Nā, ka mea ia, “He pono ka hoki mai anō ahau ki a koe ā te huringa mai anō o te wā; ā, ka whai tama tāu wahine, a Hara.” Nā, ka rongo atu a Hara i te kūwaha o te tēneti, i muri i a ia.
GEN 18:11 Nā, kua koroheke rawa a Āperahama rāua ko Hara, kua maha ō rāua rā; kua mutu a Hara te pērā me ētahi wāhine.
GEN 18:12 Nā, ka kata a Hara i roto i a ia, ka mea, “Ka rūruhitia nei ahau, ā tērā rānei ahau e whai koa, he koroheke nei anō hoki tōku ariki?”
GEN 18:13 Nā, ka mea a Ihowā ki a Āperahama, “He aha a Hara i kata ai, i mea ai, ‘He pono, ka whānau tamariki rānei ahau, he rūruhi nei hoki ahau?’
GEN 18:14 He pakeke rawa rānei tētahi mea ki a Ihowā? Kei te tāima i whakaritea, kei te hurihanga mai o te wā, ka hoki mai ahau ki a koe, ā, ka whai tamaiti a Hara.”
GEN 18:15 Nā, ka whakawareware a Hara, ka mea, “Kīhai ahau i kata”; i wehi hoki ia. Ā, ka mea ia, “Kāhore; i kata tonu koe.”
GEN 18:16 Nā, ka whakatika atu ngā tāngata rā i reira, ā, ka titiro ki te ritenga mai o Horoma; i haere anō a Āperahama i a rātou, ki te tuku i a rātou kia haere.
GEN 18:17 Ā, ka mea a Ihowā, “Me huna rānei e ahau i a Āperahama tāku e mea ai.
GEN 18:18 Ka meinga nei hoki a Āperahama hei iwi nui, hei iwi kaha, ā, māna ka manaakitia ai ngā iwi katoa o te ao?
GEN 18:19 E mōhio ana hoki ahau ki a ia, hei mea kia whakahaua iho ai e ia āna tama, me tōna whare, i muri i a ia, ā, kia whakaritea e rātou te ara o Ihowā, ka mahi hoki i te tika, i te whakawā; ā, kia kawea mai ai e Ihowā ki runga ki a Āperahama ngā mea katoa i kōrerotia e ia mōna.”
GEN 18:20 Nā, ka mea a Ihowā, “I te mea he nui te karanga o Horoma, o Komora, he taimaha rawa hoki ō rāua kino;
GEN 18:21 me haere tēnei ahau kia kite he mea rite rānei tā rāua mahi ki tōna karanga kua tae ake nei ki ahau; ā, ki te kāhore, ka mōhio ahau.”
GEN 18:22 Nā, ka tahuri ngā tāngata rā i reira, ā, ka ahu ki Horoma; ko Āperahama ia i tū tonu i te aroaro o te Atua.
GEN 18:23 Nā, ka whakatata a Āperahama, ka mea, “Ka whakangaromia anō hoki e koe te tangata tika rāua ko te tangata kino?
GEN 18:24 Ākuanei pea e rima tekau ngā tāngata tika i roto i te pā; ka whakangaromia rānei e koe, e kore rānei koe e tohu i taua wāhi mō ngā tāngata tika e rima tekau i roto?
GEN 18:25 Kaua rā tēnā e waiho hei tikanga mō tāu mahi, te whakamate ngātahi i te tangata tika rāua ko te tangata kino. Pēnei ka rite te tangata tika ki te tangata kino; kaua rā koe e pērā. E kore rānei e tika te mahi a te Kaiwhakawā o te whenua katoa?”
GEN 18:26 Nā, ka mea a Ihowā, “Ki te kitea e ahau i Horoma e rima tekau ngā tāngata tika i roto i te pā, ka tohungia e ahau tēnā wāhi katoa, ka whakaaro hoki ki a rātou.”
GEN 18:27 Nā, ka whakahoki a Āperahama, ka mea, “Nā, kua tīmata nei ahau te kōrero ki te Ariki; he puehu nei ahau, he pungarehu.
GEN 18:28 Tērā pea e kore te tokorima o te rima tekau o ngā tāngata tika ka kore te tokorima, e whakangaro rānei koe i te pā katoa?” Ka mea ia, “E kore e whakangaromia e ahau ki te mea ka kitea e ahau i reira ngā tāngata e whā tekau mā rima.”
GEN 18:29 Nā, ka kōrero atu anō ia ki a ia, ka mea, “Tērā pea e kitea e whā tekau kei reira.” Ka mea ia, “Ka whakaaro ahau ki te whā tekau, ā, e kore e meatia e ahau.”
GEN 18:30 Anō rā ko ia, “Kaua rā e riri te Ariki, ā, ka kōrero ahau. Tērā pea e kitea e toru tekau kei reira.” Ka mea ia, “E kore e meatia e ahau, ki te kitea e ahau e toru tekau kei reira.”
GEN 18:31 Ā, ka mea ia, “Nā, kua whakapakari nei ahau ki te kōrero ki te Ariki. Tērā pea e kitea e rua tekau kei reira.” Ka mea ia, “Ka whakaaro ahau ki ngā tekau e rua, ā, e kore e whakangaromia e ahau.”
GEN 18:32 Nā, ka mea ia, “Kaua e riri te Ariki ki te kōrero ahau, heoi anō ko tēnei kōrerotanga. Tērā pea e kitea kotahi tekau kei reira.” Ka mea ia, “Ka whakaaro ahau ki te tekau kotahi, ā, e kore e whakangaromia e ahau.”
GEN 18:33 Nā, ka haere a Ihowā i te mutunga o tāna kōrero ki a Āperahama; ā, hoki ana a Āperahama ki tōna wāhi.
GEN 19:1 Nā, ka haere mai ngā anahera tokorua ki Horoma i te ahiahi; ā, ko Rota i te kūwaha o Horoma e noho ana. Ā, ka kite a Rota i a rāua, ka whakatika ki te whakatau i a rāua, ā, ka tuohu tōna kanohi ki te whenua,
GEN 19:2 ka mea ia, “Nanā, e ōku ariki, peka mai ki te whare o tā kōrua pononga, nē? Ki konei moe ai, horoi ai hoki i ō kōrua waewae, ā, ka moata ai te maranga, ka haere i tā kōrua haere.” Ka mea rāua, “Kāhore; engari ki te huarahi noa māua moe ai.”
GEN 19:3 Nā, ka kaha tāna tohe ki a rāua, ā, peka atu ana rāua ki a ia, haere ana ki tōna whare. Nā, ka taka ia i tētahi hākari mā rāua, ka tunu hoki i ētahi keke rēwenakore, ā, ka kai rāua.
GEN 19:4 Kīanō rāua i takoto noa, ka karapotia te whare e ngā tāngata o te pā, e ngā tāngata o Horoma, e te koroheke, e te taitamariki, e ngā tāngata katoa o ngā wāhi katoa.
GEN 19:5 Ā, ka karanga rātou ki a Rota, ka mea ki a ia, “Kei hea aua tāngata i haere mai nei ki a koe i te pō nei? Whakaputaina mai ki a mātou, kia mōhio ai mātou ki a rāua.”
GEN 19:6 Nā, ka puta atu a Rota ki a rātou ki te kūwaha, me tāna tūtaki anō i te tatau i muri i a ia.
GEN 19:7 Ka mea, “Kaua rā e kino, e ōku tuākana.
GEN 19:8 Nanā, tokorua āku tamāhine, kāhore nei i mōhio noa ki te tāne, me whakaputa atu rāua e ahau ki a koutou, ā, mā koutou e mea ki a rāua te mea e pai ana ki tā koutou titiro. Kaua ia e meatia tētahi mea ki ēnei tāngata; he mea hoki ka tae mai nei rāua ki te taumarumarutanga iho o tōku tuanui.”
GEN 19:9 Anō rā ko rātou, “Tū atu!” Ā, ka mea anō rātou, “I haere mai tēnei korokē kotahi ki konei noho ai, ā, e whai ana kia māna e whakarite tikanga. Ākuanei tōu mate i a mātou nui atu i tō rāua.” Nā, ka āki rawa rātou ki te tangata rā, ki a Rota, ā, ka whakatata ki te wāhi i te tatau.
GEN 19:10 Otirā, ka totoro atu te ringa o aua tāngata, ā, kūmea ana a Rota ki a rāua ki roto ki te whare, ā, tūtakina ana e rāua te tatau.
GEN 19:11 Nā, ka whiua e rāua ngā tāngata i te kūwaha o te whare, te iti, te rahi, ki te matapōtanga; ā, ngenge noa rātou i te rapunga i te tatau.
GEN 19:12 Nā, ka mea aua tāngata ki a Rota, “Kāhore atu rānei ōu tāngata i konei? Me he hunaonga, he tama rānei āu, he tamāhine rānei āu, tētahi atu mea rānei āu i roto i te pā, mauria atu i tēnei wāhi.
GEN 19:13 Ka whakangaromia hoki tēnei wāhi e māua, nō te mea kua nui tō rātou karanga ki te aroaro o Ihowā; kua tonoa mai hoki māua e Ihowā ki te whakangaro.”
GEN 19:14 Nā, ka haere a Rota, ka kōrero ki āna hunaonga i mārenatia nei ki āna tamāhine, ka mea, “Whakatika, haere atu i konei; ka whakangaromia hoki e Ihowā tēnei pā.” Otiia, ki te whakaaro o āna hunaonga i rite ia ki tētahi tangata e hangareka ana.
GEN 19:15 Ā, i te huakanga ake o te ata, ka akiaki ngā anahera i a Rota, ka mea, “Whakatika, haria tāu wahine, me ēnei tamāhine tokorua āu, kei hunā koe i roto i te kino o tēnei pā.”
GEN 19:16 Otirā, i whakaroa ia; nā, ka hopu aua tāngata ki tōna ringa, ki te ringa o tāna wahine, ki ngā ringa o āna tamāhine tokorua; he tohu hoki nā Ihowā i a ia. Ā, kawea atu ana ia e rāua ki waho, ka waiho i waho o te pā.
GEN 19:17 Ā, ka oti rātou te kawe atu e rāua ki waho, ka mea ia, “Rere atu kia ora ai koe; kaua e titiro ki muri i a koe, kaua hoki e tū ki tētahi wāhi o te mānia; rere atu ki te maunga, kei ngaro koe.”
GEN 19:18 Nā, ka mea a Rota ki a rāua, “Kaua rā e pēnā, e tōku Ariki.
GEN 19:19 Nanā, kua manakohia nei tāu pononga e koe, kua whakanuia anō e koe tōu aroha i whakaputaina nei, e koe ki ahau, i a koe i whakaora nei i tōku wairua; nā, e kore e taea e ahau te rere ki te maunga, kei mau ahau i tētahi kino, ā, ka mate.
GEN 19:20 Titiro hoki, e tata ana tēnei pā hei rerenga atu, he mea nohinohi noa nei. Kia rere ahau ki reira nē? – Ehara ianei i te mea nohinohi? – ā, ka ora tōku wairua.”
GEN 19:21 Anō rā ko ia ki a ia, “Nā, kua whakaae anō hoki ahau ki tēnei meatanga āu, kia kaua e hunā e ahau tēnei pā i kōrero mai nā koe.
GEN 19:22 Kia hohoro, rere atu ki reira; e kore hoki e taea e ahau tētahi mea, kia tae rā anō koe ki reira.” Nā reira i huaina ai te ingoa o taua pā ko Toara.
GEN 19:23 Kua rewa te rā ki runga ki te whenua, ka tae a Rota ki Toara.
GEN 19:24 Kātahi ka uaina e Ihowā ki Horoma, ki Komora, he whānāriki, he ahi nā Ihowā, nō te rangi;
GEN 19:25 ā, hurihia iho e ia aua pā, me te mānia katoa, me ngā tāngata katoa o ngā pā, me ngā mea e tupu ana i te whenua.
GEN 19:26 Nā, i titiro tāna wahine ki muri i a ia, ā, meinga ana hei pou tote.
GEN 19:27 Ā, i maranga wawe a Āperahama i te ata ki te wāhi i tū ai ia i te aroaro o Ihowā.
GEN 19:28 Nā, ko tōna tirohanga atu ki te ritenga o Horoma, o Komora, ki te whenua katoa hoki o te mānia, ka kite, nā, e kake ana te paowa o te whenua, me te mea he paowa oumu.
GEN 19:29 Nā, i te whakangaromanga a Ihowā i ngā pā o te mānia, ka mahara te Atua ki a Āperahama, ā, tonoa ana e ia a Rota i roto i te hurihanga i tāna hurihanga i ngā pā i noho ai a Rota.
GEN 19:30 Nā, ka piki atu a Rota i Toara, ka noho ki te maunga, rātou tahi ko āna tamāhine tokorua; i wehi hoki ia ki te noho i Toara; ā, ka noho i roto i tētahi ana, a ia me āna tamāhine tokorua.
GEN 19:31 Nā, ka mea te tuakana ki tō muri, “Kua koroheke tō tāua pāpā, ā, kāhore he tangata o te whenua hei haere mai ki a tāua, hei pērā me tō te whenua katoa tikanga.
GEN 19:32 Tēnā, tāua ka whakainu i tō tāua pāpā ki te wāina, ka takoto ai tāua ki a ia, kia tupu ai i a tāua tētahi uri mō tō tāua pāpā.”
GEN 19:33 Nā, ka whakainu rāua i tō rāua pāpā ki te wāina i taua pō; ā, ka haere atu te tuakana, ka takoto ki tōna pāpā, kīhai hoki tērā i mōhio ki tōna takotoranga iho, ki tōna whakatikanga ake.
GEN 19:34 Ā, i te aonga ake ka mea te tuakana ki tō muri, “Nanā, i takoto ahau inapō ki tōku pāpā; tāua anō ka whakainu i a ia ki te wāina i tēnei pō; ā, māu e haere atu, e takoto ki a ia, kia tupu ai i a tāua tētahi uri mō tō tāua pāpā.”
GEN 19:35 Nā, ka whakainu anō rāua i tō rāua pāpā ki te wāina i taua pō; ā, ka whakatika tō muri, ka takoto hoki ki a ia; ā, kīhai ia i mōhio ki tōna takotoranga iho, ki tōna whakatikanga ake.
GEN 19:36 Koia ka hapū ngā tamāhine tokorua a Rota i tō rāua pāpā.
GEN 19:37 Ā, ka whānau tā te tuakana, he tama, ā, huaina ana e ia tōna ingoa ko Moapa; ko ia te pāpā o ngā Moapi, ā tae noa ki tēnei rā.
GEN 19:38 Me tō muri, whānau ake anō tāna, he tama, ā, huaina iho e ia tōna ingoa ko Penami. Ko ia te pāpā o ngā tama a Āmona, ā tae noa ki tēnei rā.
GEN 20:1 Nā, ka tūria atu e Āperahama i reira ki te whenua i te tonga, ā, ka noho ki waenganui o Karehe, o Huru, ā, ka noho ia ki Kerara, he noho manene.
GEN 20:2 Nā, ko Hara, ko tāna wahine, ka kīia e Āperahama, “Ko tōku tuahine ia.” Ā, ka tonoa mai e Apīmereke kīngi o Kerara, tangohia atu ana a Hara.
GEN 20:3 Nā, ka puta moemoeā mai te Atua ki a Apīmereke i te pō, ka mea ki a ia, “Nanā, ka mate koe mō te wahine i tangohia nei e koe; he wahine hoki ia nā te tāne.”
GEN 20:4 Kāhore anō ia a Apīmereke kia tata noa ki a ia, ā, ka mea ia, “E te Ariki, ka whakamate anō rānei koe i te iwi tika?
GEN 20:5 Kāhore rānei ia i mea mai ki ahau, ‘Ko tōku tuahine ia?’ Me te wahine hoki, i mea mai anō ia, ‘Ko tōku tungāne ia.’ He tapatahi tōku ngākau, he harakore hoki ōku ringa i mea ai ahau i tēnei mea.”
GEN 20:6 Ā, ka kōrero moemoeā mai te Atua ki a ia, “Āe rā, i mōhio tonu ahau he tapatahi tōu ngākau i a koe i mea ai i tēnei mea; i pupuri hoki ahau i a koe kei hara koe ki ahau. Nā reira, koe tē tukua ai e ahau kia pā ki a ia.
GEN 20:7 Nā, whakahokia ākuanei te wahine a tēnā tangata; nō te mea hoki he poropiti ia, ā, māna e īnoi mōu, ā, ka ora koe. Ki te kore e whakahokia e koe, kia mōhio koe, ka tino mate koe, koutou ko ngā mea katoa i a koe.”
GEN 20:8 Nā, i te atatū ka maranga a Apīmereke, karangatia ana āna tāngata katoa, ā, kōrerotia ana ēnei mea katoa ki ō rātou taringa. Ā, nui atu te wehi o aua tāngata.
GEN 20:9 Nā, ka karanga a Apīmereke ki a Āperahama, ka mea ki a ia, “He mahi aha tēnei āu ki a mātou? Ā, he aha tōku hara ki a koe, i tākina mai ai e koe he hara nui ki ahau, ki tōku kīngitanga anō hoki? Kua meinga e koe ētahi mea ki ahau kāhore nei i tika kia mahia.”
GEN 20:10 Ā, ka mea anō a Apīmereke ki a Āperahama, “I kite koe i te aha i meatia ai tēnei mea e koe?”
GEN 20:11 Nā, ka mea a Āperahama, “I mahara hoki ahau, ‘He pono, kāhore te wehi o te Atua i tēnei wāhi; ā, ka patua ahau e rātou mō tāku wahine.’
GEN 20:12 He pono anō ia he tuahine ia nōku, ko te tamāhine a tōku pāpā, otiia ehara i te tamāhine nā tōku whaea; ā, ka noho hei wahine māku.
GEN 20:13 Ā, i tā te Atua meatanga i ahau kia kōpiko haere ake i te whare o tōku pāpā, ka mea ahau ki a ia, ‘Ko tōu aroha tēnei, hei whakaputa māu ki ahau: hei ngā wāhi katoa e tae ai tāua, kōrero mōku, “Ko tōku tungāne ia.” ’ ”
GEN 20:14 Nā, ka tīkina e Apīmereke he hipi, he kau, he pononga tāne, he pononga wāhine, ā, hoatu ana e ia ki a Āperahama, ā, whakahokia ana e ia a Hara, tāna wahine, ki a ia.
GEN 20:15 Ā, ka mea a Apīmereke, “Nanā, kei tōu aroaro tōku whenua; nohoia e koe te wāhi e pai ana ki tāu titiro.”
GEN 20:16 Ā, ki a Hara i mea ia, “Nanā, kua hoatu e ahau ki tōu tungāne kotahi mano ngā hiriwa; nā, hei uhi tēnā mō ōu kanohi ki ngā tāngata katoa i a koe; hei tohu hoki mō tōu tika i katoa.”
GEN 20:17 Kātahi ka īnoi a Āperahama ki te Atua; nā, kua ora i te Atua a Apīmereke, rātou ko tāna wahine, ko āna pononga wāhine; ā, ka whānau tamariki rātou.
GEN 20:18 Kua tūtakina rawatia hoki e Ihowā ngā kōpū katoa o te whare o Apīmereke, mō Hara, mō te wahine a Āperahama.
GEN 21:1 Nā, ka tirohia mai a Hara e Ihowā, ka pērātia me tāna i kōrero ai, ā, rite tonu ki tāna kupu tā Ihowā i mea ai ki a Hara.
GEN 21:2 Nā, ka hapū a Hara, ā, ka whānau he tama mā Āperahama i tōna koroheketanga i te wā anō i whakaritea e te Atua ki a ia.
GEN 21:3 Nā, ka huaina e Āperahama te ingoa o tāna tama i whānau nei māna, i whānau mai nei i a Hara, ko Īhaka.
GEN 21:4 Ā, ka waru ōna rā, ka kotia e Āperahama a Īhaka, tāna tama, ka pērātia me tā te Atua i whakahau ai ki a ia.
GEN 21:5 Ā, kotahi rau ngā tau o Āperahama i te whānautanga o tāna tama, o Īhaka.
GEN 21:6 Nā, ka mea a Hara, “Kua meinga ahau e te Atua kia kata; ā, ka kata tahi mātou ko ngā tāngata e rongo mai ana.”
GEN 21:7 Ā, i mea anō ia, “Ko wai ō mua hei mea ki a Āperahama, tērā e whakangote tamariki a Hara? Kua whānau nei i ahau he tama māna, i a ia kua koroheketia.”
GEN 21:8 Nā, ka tupu te tamaiti rā, ā, ka whakamutua tāna kai ū; nā, ka tukua e Āperahama tētahi hākari nui i te rā i whakamutua ai te ngote ū a Īhaka.
GEN 21:9 Ā, ka kite a Hara i te tama a Hakara, a te wahine o Īhipa, i whānau nei i a rāua ko Āperahama, e kata whakahāwea ana.
GEN 21:10 Nā, ka mea ia ki a Āperahama, “Peia atu tēnei pononga me tāna tama. E kore rawa te tama a tēnei wahine pononga e tū tahi me tāku tama, me Īhaka, i ngā whakarerenga iho.”
GEN 21:11 Ā, ko taua mea he hē rawa ki te titiro a Āperahama, ko tāna tama hoki ia.
GEN 21:12 Ka mea te Atua ki a Āperahama, “Kei kino tēnā ki tāu titiro, kaua e whakaaro ki te tamaiti rāua ko tāu pononga wahine. Engari, i ngā mea katoa i kōrero ai a Hara ki a koe, whakarongo atu ki tōna reo; kei a Īhaka hoki te karangatanga mō tōu uri.
GEN 21:13 Nā, ko te tama a te pononga wahine, ka meinga ia e ahau hei iwi, nō te mea he uri ia nōu.”
GEN 21:14 Nā, ka maranga wawe a Āperahama i te ata, ka mau ki tētahi taro, ki tētahi tahā wai, ā, hoatu ana e ia ki a Hakara, whakawahā ana ki tōna pokohiwi, me te tamaiti hoki, ā, tonoa atu ana. Nā, ka haere ia, ka kōpikopiko i te koraha o Peerehepa.
GEN 21:15 Ā, ka pau te wai i roto i te tahā, nā, whakarērea iho e ia te tamaiti i raro i tētahi rākau iti.
GEN 21:16 Nā, ka haere ia, ā, ka noho mai i tawhiti, me te anga nui mai anō ki a ia, he pērā te matara me te taunga pere; i mea hoki ia, “Kei kite ahau i te matenga o te tamaiti.” Nā, ka noho ia me te aronui mai anō ki a ia, ā, ka puaki tōna reo, ka tangi.
GEN 21:17 Ā, i rongo te Atua ki te reo o te tamaiti, ā, ka karanga mai te anahera a te Atua ki a Hakara i runga i te rangi, ka mea ki a ia, “He aha kei a koe, e Hakara? Kaua e wehi; kua rongo hoki te Atua ki te reo o te tamaiti i a ia e takoto nā.
GEN 21:18 Whakatika, hāpainga ake te tamaiti, puritia hoki ki tōu ringa; nō te mea ka meinga ia e ahau hei iwi nui.”
GEN 21:19 Nā, ka whakatirohia e te Atua ōna kanohi, ā, ka kite ia i tētahi puna wai. Nā, ka haere ia, ka whakakī i te tahā ki te wai, ā, whakainumia ana te tamaiti.
GEN 21:20 Ā, i noho te Atua ki te tamaiti, ā, ka tupu ia; i noho ia i te koraha, ā, ka mōhio ki te kōpere.
GEN 21:21 Nā, ka noho ia ki te koraha o Parana; ā, ka tīkina atu e tōna whaea he wahine māna i te whenua o Īhipa.
GEN 21:22 Ā, i taua wā anō ka kōrero a Apīmereke rāua ko Pikora, ko te rangatira o tāna ope, ki a Āperahama, ka mea, “Nā, kei a koe te Atua i ngā mea katoa e mea ai koe;
GEN 21:23 tēnā oatitia mai te Atua ki ahau, e kore koe e teka ki ahau, ki tāku tama, ki te tama rānei a tāku tama. Engari ka rite ki te aroha i whakaputaina e ahau ki a koe tāu mahi ki ahau, ki te whenua anō hoki i noho nei koe.”
GEN 21:24 Nā, ka mea a Āperahama, “Ka oati ahau.”
GEN 21:25 Nā, ka whakawā a Āperahama i a Apīmereke mō tētahi puna wai i murua e ngā tāngata a Apīmereke.
GEN 21:26 Nā, ka mea a Apīmereke, “Kāhore ahau e mōhio nā wai rānei tēnei mahi. Kīhai hoki koe i kōrero mai ki ahau, ā, kīhai ahau i rongo, nō tēnei rā tonu.”
GEN 21:27 Nā, ka tīkina e Āperahama he hipi, he kau, ka hoatu ki a Apīmereke; nā, ka whakarite kawenata rāua.
GEN 21:28 Nā, ka wehea e Āperahama ki tahaki e whitu ngā reme uha o ngā hipi.
GEN 21:29 Ā, ka mea a Apīmereke ki a Āperahama, “He aha te tikanga o ēnei reme uha e whitu i wehea nei e koe ki tahaki?”
GEN 21:30 Ka mea ia, “Ko ēnei reme uha e whitu me tango e koe i tōku ringa, kia ai ēnei mea hei whakaatu māku, nāku i keri tēnei poka.”
GEN 21:31 Nā, reira i huaina ai e ia taua wāhi ko Peerehepa; nō rāua hoki i oati ki reira.
GEN 21:32 Heoi, whakaritea ana e rāua te kawenata i Peerehepa. Ā, ka whakatika a Apīmereke rāua ko Pikora, ko te rangatira o tāna ope, ā, hoki ana ki te whenua o ngā Pirihitini.
GEN 21:33 Nā, ka whakatōkia e Āperahama he rākau, he tamarihi, ki Peerehepa, ā, ka karanga i reira ki te ingoa o Ihowā, o te Atua ora tonu.
GEN 21:34 Ā, ka noho a Āperahama ki te whenua o ngā Pirihitini mō ngā rā maha.
GEN 22:1 Nā, i muri i ēnei mea ka whakamātau te Atua i a Āperahama, ka mea ki a ia, “E Āperahama!” Ka mea ia, “Tēnei ahau.”
GEN 22:2 Nā, ka mea ia, “Kawea atu tāu tamaiti, tāu huatahi, tāu e aroha nei, a Īhaka, ā, haere ki te whenua o Moria. Ka whakaeke i a ia ki reira hei tahunga tinana ki runga ki tētahi o ngā maunga e kōrero ai ahau ki a koe.”
GEN 22:3 Nā, ka maranga wawe a Āperahama i te ata, ā, whakanohoia ana e ia tana kāihe, ā, mauria ana e ia ētahi o āna taitamariki hei hoa mōna, me Īhaka hoki, me tāna tama, ā, tātāngia ana e ia ngā wahie mō te tahunga tinana, ā, whakatika ana, haere ana ki te wāhi i kōrero ai te Atua ki a ia.
GEN 22:4 I te rā tuatoru ka maranga ngā kanohi o Āperahama, ā, ka kite ia i taua wāhi i tawhiti.
GEN 22:5 Nā, ka mea a Āperahama ki āna taitamariki, “E noho kōrua i konei ki te kāihe. Ka haere māua ko te tamaiti nei ki kō, ki te koropiko, ka hoki mai ai ki a kōrua.”
GEN 22:6 Nā, ka tango a Āperahama i te wahie mō te tahunga tinana, ā, whakawahā ana e ia ki a Īhaka, ki tāna tama, ā, ka mauria e ia he ahi i tōna ringa me tētahi māripi. Ā, haere tahi ana rāua.
GEN 22:7 Nā, ka kōrero a Īhaka ki a Āperahama, ki tōna pāpā, ka mea, “E tōku matua!” Ka mea ia, “Tēnei ahau, e tāku tama.” Ā, ka mea ia, “Nanā, ko te ahi me ngā wahie; kei hea ia te reme hei tahunga tinana?”
GEN 22:8 Ka mea a Āperahama, “Kei te Atua te whakaaro, e tāku tamaiti, ki tētahi reme māna hei tahunga tinana.” Nā, ka haere tahi rāua.
GEN 22:9 Ā, ka tae rāua ki te wāhi i kōrero ai te Atua ki a ia; ā, ka hangā e Āperahama tētahi āta ki reira, ā, whakapapatia ana e ia ngā wahie, nā, ka herea e ia a Īhaka, tāna tama, whakatakotoria iho ki te āta, ki runga ki ngā wahie.
GEN 22:10 Nā, ka totoro atu te ringa o Āperahama, ka mau ki te māripi hei patu mō tāna tama.
GEN 22:11 Nā, ko te karangatanga mai a te anahera a Ihowā ki a ia i runga i te rangi, ka mea, “E Āperahama, e Āperahama!” Ka mea ia, “Tēnei ahau.”
GEN 22:12 Nā, ka mea ia, “Kaua e totoro tōu ringa ki te tamaiti, kaua anō hoki tētahi mea e meatia ki a ia. Kātahi hoki ahau ka mātau e wehi ana koe i te Atua, i a koe kīhai nei i kaiponu i tāu tamaiti, i tāu huatahi, i ahau.”
GEN 22:13 Ā, ka maranga ake ngā kanohi o Āperahama, nā, ka kite ia ko tētahi hipi toa i muri i a ia, e mau ana ōna haona i roto i te puia rākau. Nā, ka haere a Āperahama, ka hopu i te hipi rā, ā, whakaekea ana e ia hei tahunga tinana, hei whakarite mō tāna tama.
GEN 22:14 Nā, ka huaina e Āperahama te ingoa o taua wāhi ko Ihowātire. E kōrerotia nei ināianei, “Kei te maunga o Ihowā te kitea ai.”
GEN 22:15 Nā, ka karanga anō te anahera a Ihowā ki a Āperahama i te rangi,
GEN 22:16 ka mea, “Kua waiho e ahau ko ahau anō hei oati, e ai tā Ihowā, mōu i mea i tēnei mea, mōu anō hoki kīhai i kaiponu i tāu tama, i tāu huatahi,
GEN 22:17 nā, ka manaakitia rawatia koe e ahau, ā, ka whakanuia rawatia e ahau ōu uri kia pērā me ngā whetū o te rangi, me te onepū hoki i te tahatika o te moana. Ā, ka riro i ōu uri te kūwaha o ōna hoariri,
GEN 22:18 mā tōu uri anō hoki ka manaakitia ai ngā iwi katoa o te whenua; mōu i whakarongo ki tōku reo.”
GEN 22:19 Nā, ka hoki a Āperahama ki āna taitamariki, ā, whakatika ana rātou, haere tahi ana ki Peerehepa; ā, ka noho a Āperahama ki Peerehepa.
GEN 22:20 Nā, i muri i ēnei mea ka kōrerotia ki a Āperahama, ka meatia, “Nanā, kua whānau tamariki anō a Mireka rāua ko Nahora, ko tōu teina:
GEN 22:21 ko Hutu, ko tāna mātāmua, rāua ko Putu, ko tōna teina, me Kemuera hoki, matua o Arame,
GEN 22:22 rātou ko Kehere, ko Hato, ko Piretata, ko Irirapa, ko Petuere.”
GEN 22:23 Ā, whānau ake tā Petuere ko Ripeka. Ko ēnei tokowaru te whānau a Mireka rāua ko Nahora, teina o Āperahama.
GEN 22:24 Ā, ko tāna wahine iti, tōna ingoa nei ko Reuma, i whānau anō āna: ko Tepa rātou ko Kahama, ko Tahaha, ko Maaka.
GEN 23:1 Nā, kotahi rau e rua tekau mā whitu ngā tau i ora ai a Hara. Ko ngā tau ēnei i ora ai a Hara.
GEN 23:2 Nā, ka mate a Hara ki Kiriata Arapa (arā ki Heperona) i te whenua o Kanaana; ā, ka haere a Āperahama ki te uhunga ki a Hara, ki te tangi hoki ki a ia.
GEN 23:3 Ā, ka whakatika a Āperahama i te ritenga atu o tōna tūpāpaku, ka kōrero ki ngā tama a Hete, ka mea,
GEN 23:4 “He manene ahau, he noho noa iho i roto i a koutou; hōmai tētahi wāhi ki ahau hei tanumanga i roto i a koutou, kia tanumia ai e ahau tōku tūpāpaku, kia ngaro ai i tāku tirohanga.”
GEN 23:5 Nā, ka whakahoki ngā tama a Hete ki a Āperahama, ka mea ki a ia,
GEN 23:6 “Whakarongo ki a mātou, e tōku ariki; he rangatira nui koe i roto i a mātou. Whiriwhiria e koe tētahi o ō mātou urupā, ka tanu ai i tōu tūpāpaku. E kore e kaiponuhia e tētahi o mātou tana urupā i a koe, hei tanumanga mō tōu tūpāpaku.”
GEN 23:7 Nā, ka whakatika a Āperahama, ka piko ki te tangata whenua, ki ngā tama a Hete,
GEN 23:8 ā, ka kōrero ia ki a rātou, ka mea, “Ki te whai ngākau koutou kia tanumia e ahau tōku tūpāpaku kia ngaro atu i tāku tirohanga, whakarongo mai ki ahau, ka tohe atu ki a Eperona, tama a Tohara, mōku,
GEN 23:9 kia hōmai e ia ki ahau tana ana, a Makapera, i te pito o tōna wāhi oneone. Kia hōmai e ia ki ahau i waenganui i a koutou mō ngā moni e rite ana hei utu, kia puritia e ahau hei urupā.”
GEN 23:10 Nā, ko Eperona i roto i ngā tama a Hete e noho ana; nā, ka whakahoki a Eperona Hiti ki a Āperahama, me te whakarongo anō ngā tama a Hete, me ngā tāngata katoa hoki i tomo i te kūwaha o tōna pā, ka mea,
GEN 23:11 “Kāhore, e tōku ariki, whakarongo ki ahau; ka hoatu e ahau tēnā wāhi ki a koe, me te ana i reira, ka hoatu e ahau ki a koe. Ka hoatu e ahau i te aroaro o ngā tama a tōku iwi; tanumia tōu tūpāpaku.”
GEN 23:12 Nā, ka tuohu a Āperahama i te aroaro o ngā tāngata whenua,
GEN 23:13 ka kōrero ki a Eperona, me te whakarongo anō ngā tāngata whenua, ka mea, “Erangi ki te hōmai e koe, whakarongo ki ahau. Ka hoatu e ahau he hiriwa ki a koe mō taua wāhi; tangohia, ā, ka tanumia e ahau tōku tūpāpaku ki reira.”
GEN 23:14 Nā, ko te whakahokinga a Eperona ki a Āperahama, ka mea ki a ia,
GEN 23:15 “E tōku ariki, whakarongo mai ki ahau; he wāhi whenua e whā rau ngā hekere hiriwa tōna utu, he aha tēnā i waenganui ōku, ōu? Tanumia tōu tūpāpaku.”
GEN 23:16 Nā, ka whakarongo a Āperahama ki a Eperona; ā, pāunatia ana e Āperahama ki a Eperona te hiriwa i kōrerotia e ia i te aroaro o ngā tama a Hete, e whā rau ngā hekere hiriwa, nō ngā moni e tangohia ana e ngā kaihokohoko.
GEN 23:17 Nā, whakapūmautia ana te wāhi oneone o Eperona, i Makapera, i te ritenga o Mamere, te oneone, me te ana i reira, me ngā rākau katoa i runga i te oneone, i roto i ōna rohe katoa, ā tawhio noa,
GEN 23:18 hei wāhi mō Āperahama, i te tirohanga a ngā tama a Hete, i te aroaro o ngā tāngata katoa i tomo i te kūwaha o tōna pā.
GEN 23:19 Ā muri iho i tēnei ka tanumia e Āperahama a Hara, tāna wahine, ki roto ki te ana, i te wāhi i Makapera i te ritenga o Mamere, arā o Heperona i te whenua o Kanaana.
GEN 23:20 Heoi, whakapūmautia ana e ngā tama a Hete taua wāhi me te ana i reira mō Āperahama, kia puritia hei tanumanga.
GEN 24:1 Nā, kua koroheketia a Āperahama, ā, kua maha rawa ōna rā; ā, i manaaki a Ihowā i a Āperahama i ngā mea katoa.
GEN 24:2 Nā, ka mea a Āperahama ki te kaumātua o āna pononga i roto i tōna whare, ki te kaiwhakahaere o āna mea katoa, “Tēnā, whakapākia mai tōu ringa ki raro ki tōku hūhā,
GEN 24:3 ā, me whakaoati koe e ahau ki a Ihowā, ki te Atua o te rangi, ki te Atua hoki o te whenua, kia kaua e tangohia e koe he wahine mā tāku tama i roto i ngā tamāhine a ngā Kanaani, a te iwi e noho nei ahau i roto i a rātou.
GEN 24:4 Engari me haere koe ki tōku whenua, ki ōku whanaunga, ka tango mai ai i tētahi wahine mā tāku tama, mā Īhaka.”
GEN 24:5 Nā, ka mea te pononga ki a ia, “Ākuanei pea ka kore e pai te wahine ki te whai mai i ahau ki tēnei whenua; me whakahoki rānei e ahau tāu tama ki te whenua i haere mai nei koe i reira?”
GEN 24:6 Ka mea a Āperahama ki a ia, “Kia tino mōhio koe, kaua rawa tāku tama e whakahokia ki reira.
GEN 24:7 Ko Ihowā, ko te Atua o te rangi, nāna nei ahau i tango mai i te whare o tōku pāpā, i te whenua hoki i whānau ai ahau, i kōrero ki ahau, i oati hoki ki ahau, ‘Ka hoatu e ahau tēnei whenua ki ōu uri,’ māna e tono mai tāna anahera ki mua i koe, ā, ka riro mai i a koe tētahi wahine mā tāku tama i reira.
GEN 24:8 Ā, ki te kāhore te wahine e pai ki te whai mai i a koe, kātahi koe ka wātea i tēnei oati āku; otiia kaua e whakahokia e koe tāku tama ki reira.”
GEN 24:9 Nā, ka whakapākia e te pononga tōna ringa ki raro i te hūhā o Āperahama, o tōna ariki, ā, ka oati ki a ia mō taua mea.
GEN 24:10 Nā, ka tangohia e te pononga ētahi kāmera kotahi tekau i roto i ngā kāmera a tōna ariki, ā, haere ana; i tōna ringa hoki ngā mea papai katoa a tōna ariki; ā, whakatika ana ia, haere ana ki Mehopotamia, ki te pā o Nahora.
GEN 24:11 Nā, ka mea ia i ngā kāmera kia tūturi ki te taha o te puna wai i waho o te pā i te ahiahi, i te wā e puta mai ai ngā wāhine ki te utu wai.
GEN 24:12 Ā, ka mea ia, “E Ihowā, e te Atua o tōku ariki, o Āperahama, kia whai wāhi ahau ākuanei, whakaputaina hoki he aroha ki tōku ariki, ki a Āperahama.
GEN 24:13 Tēnei ahau te tū nei i te taha o te puna wai; ā, e haere mai ana ngā tamāhine a ngā tāngata o te pā ki te utu wai.
GEN 24:14 Ā, ko te kōtiro e mea ai ahau ki a ia, ‘Tukua iho tāu oko kia inu ai ahau,’ ā, ka mea ia, ‘E inu, me whakainu anō e ahau āu kāmera,’ kia rite ia i a koe mā tāu pononga, mā Īhaka; mā reira ka mōhio ai ahau e whakaputa aroha ana koe ki tōku ariki.”
GEN 24:15 Heoi, kīanō i mutu noa tāna kōrero, nā, kua puta mai a Ripeka, tamāhine a Petuere, tama a Mireka, a te wahine a Nahora, teina o Āperahama, me tāna oko i runga i tōna pokohiwi.
GEN 24:16 Nā, ko te kōtiro rā he tino ātaahua ki te titiro atu, he wāhina, kāhore anō tētahi tāne kia mōhio noa ki a ia. Nā, ka heke atu ia ki te puna, ka whakakī i tāna oko, ā, ka haere ake.
GEN 24:17 Nā, ka rere te pononga rā ki te whakatūtaki i a ia, ka mea, “Hōmai he wai mōku, nē, o tāu oko kia iti nei?”
GEN 24:18 Ā, ka mea ia, “E inu, e tōku ariki,” nā, hohoro tonu tāna tuku iho i tāna oko ki runga ki tōna ringa, ā, whakainumia ana ia.
GEN 24:19 Ā, ka mutu tāna whakainu i a ia, ka mea ia, “Me utu anō hoki e ahau mō āu kāmera, kia poto rā anō rātou te whakainu.”
GEN 24:20 Nā, hohoro tonu tāna riringi atu i te wai o tāna oko ki roto ki te waka, ā, rere ana anō ki te puna ki te utu, ā, utuhia mai ana e ia mō ana kāmera katoa.
GEN 24:21 Ko taua tangata ia matatau tonu tāna titiro ki a ia, kīhai hoki i hamumu, kia mōhio ia ka whakatikaia rānei e Ihowā tōna ara, kāhore rānei.
GEN 24:22 Ā, ka mutu te inu o ngā kāmera, nā, ka tīkina e taua tangata tētahi whakakai kōura, he hāwhe hekere tōna taimaha, me ngā poroporo e rua mō ōna ringa, kotahi tekau ngā hekere kōura te taimaha;
GEN 24:23 ā, ka mea, “Nā wai koe tamāhine? Tēnā, kōrero mai ki ahau; he wāhi rānei kei te whare o tōu pāpā hei moenga mō mātou?”
GEN 24:24 Nā, ka mea ia ki a ia, “He tamāhine ahau nā Petuere, tama a Mireka, i whānau nei i a rāua ko Nahora.”
GEN 24:25 Ā, ka mea anō ia ki a ia, “He nui ā mātou kakau wīti, me ā mātou otaota hei kai, me tētahi wāhi hoki hei moenga.”
GEN 24:26 Nā, tuohu ana taua tangata, koropiko ana ki a Ihowā,
GEN 24:27 ā, ka mea, “Kia whakapaingia a Ihowā, te Atua o tōku rangatira, o Āperahama, kīhai nei i wareware ki tōna aroha, ki tōna pono ki tōku rangatira. Tēnā ko ahau, nā Ihowā anō ahau i arataki mai i te ara ki te whare o ngā tēina o tōku rangatira.”
GEN 24:28 Nā, ka oma te kōtiro rā, ka kōrero i ēnei mea ki te whare o tōna whaea.
GEN 24:29 Nā, he tungāne tō Ripeka, ko Rāpana tōna ingoa; nā, ka rere a Rāpana ki taua tangata, ki waho, ki te puna.
GEN 24:30 Nā, i tōna kitenga i te whakakai me ngā poroporo i ngā ringa o tōna tuahine, ā, ka rongo hoki ki ngā kupu a Ripeka, a tōna tuahine, i mea rā, “I pēnei ngā kōrero a taua tangata ki ahau,” ka haere ia ki taua tangata; nā, i te taha ia o ngā kāmera, i te puna wai e tū ana;
GEN 24:31 ā, ka mea, “Tomo mai, e te manaakitanga a Ihowā; he aha koe i tū ai i waho? Kua oti hoki i ahau te whare te whakapai, me tētahi wāhi mō ngā kāmera.”
GEN 24:32 Nā, ka haere taua tangata ki te whare, ā, wetekina ana e ia ngā mea o ngā kāmera; i hōmai anō e ia he kakau wīti me tētahi otaota hei kai mā ngā kararehe, me te wai hei horoi mō ōna waewae, mō ngā waewae hoki o ōna hoa.
GEN 24:33 Nā, ka whakatakotoria he kai ki tōna aroaro; otiia ka mea ia, “E kore ahau e kai, kia kōrerotia rā anō e ahau tāku haere.” Ka mea tērā, “Kōrero.”
GEN 24:34 Nā, ka mea ia, “He pononga ahau nā Āperahama.
GEN 24:35 Ā, kua manaakitia rawatia tōku ariki e Ihowā; kua nui ia; ā, kua hōmai hoki ki a ia he hipi, he kau, he hiriwa, he kōura, he pononga tāne, he pononga wāhine, he kāmera, he kāihe.
GEN 24:36 Ā, kua whānau he tama mā tōku ariki i a Hara, i te wahine a tōku ariki, i a ia kua rūruhitia; ā, kua hoatu e ia āna mea katoa ki a ia.
GEN 24:37 Nā, i whakaoati tōku ariki i ahau, i mea mai, ‘Kei tangohia e koe he wahine mā tāku tama i roto i ngā tamāhine a ngā Kanaani, e noho nei ahau i tō rātou whenua;
GEN 24:38 engari me haere koe ki te whare o tōku pāpā, ki ōku whanaunga ka tango ai i tētahi wahine mā tāku tama.’
GEN 24:39 “Anō rā ko ahau ki tōku ariki, ‘E kore pea te wahine e whai mai i ahau.’
GEN 24:40 “Ā, ka mea mai ia ki ahau, ‘Mā Ihowā, kei tōna aroaro nei tōku hāereerenga, māna e tono tāna anahera hei hoa mōu, māna hoki e whakatika tōu ara; ā, ka tango mai koe i tētahi wahine mā tāku tama i roto i ōku whanaunga, i roto hoki i te whare o tōku pāpā.
GEN 24:41 Kātahi koe ka wātea i tāku oati, ki te haere koe ki ōku whanaunga; ā, ki te kāhore e hōmai e rātou ki a koe, nā, ka wātea koe i tāku oati.’
GEN 24:42 “I haere mai ahau i tēnei rā ki te puna, ā, ka mea ahau, ‘E Ihowā, e te Atua o tōku ariki, o Āperahama, ki te mea e whakatika ana koe i tōku ara e haere nei ahau.
GEN 24:43 Nā, tēnei ahau te tū nei i te taha o te puna wai; ā, ko te kōtiro e puta mai ki te utu, ā, ka mea ahau ki a ia, “Hōmai he wāhi wai mōku i tāu oko kia inu ahau,”
GEN 24:44 ā, ka mea mai ia ki ahau, “E inu, ā, me utu anō e ahau mō āu kāmera.” Kia rite ia i a Ihowā hei wahine mā te tama a tōku ariki.’
GEN 24:45 “Kīanō i mutu noa tāku kōrero i roto i tōku ngākau, nā, ko te putanga ake o Ripeka me tāna oko i runga i tōna pokohiwi; kua heke ki te poka ki te utu. Nā, ka mea ahau ki a ia, ‘Kia inu ahau, nē?’
GEN 24:46 “Nā, ka hohoro ia, ka tuku i tāna oko i tōna pokohiwi, ā, ka mea mai, ‘E inu, me whakainu anō e ahau āu kāmera.’ Nā, inu ana ahau, ā, i whakainumia anō hoki e ia ngā kāmera.
GEN 24:47 “Nā, ka ui ahau ki a ia, ‘He tamāhine koe nā wai?’ “Ā, ka mea mai ia, ‘He tamāhine nā Petuere, tama a Nahora, i whānau nei mā rāua ko Mireka.’ “Nā, kuhua ana e ahau te whakakai ki tōna ihu, me ngā poroporo ki ōna ringa.
GEN 24:48 Nā, ka tuohu ahau, ka koropiko ki a Ihowā, ka whakapai hoki i a Ihowā, i te Atua o tōku ariki, o Āperahama, mōna i ārahi i ahau i te huarahi tika ki te tiki mai i te tamāhine a te teina o tōku ariki mā tāna tama.
GEN 24:49 Nā, ki te mea he aroha tō koutou, he mahi pono ki tōku ariki, kōrero mai ki ahau; ki te kāhore, kōrero mai; kia tahuri ake ai ahau ki matau rānei, ki mauī rānei.”
GEN 24:50 Nā, ka whakahoki a Rāpana rāua ko Petuere, ka mea, “I puta mai tēnei mea i a Ihowā; e kore e taea e māua te kōrero ki a koe te pai, te kino rānei.
GEN 24:51 Nanā, kei tōu aroaro a Ripeka, tangohia, haere, ā, kia meinga ia hei wahine mā te tama a tōu ariki, hei pērā me tā Ihowā i kōrero ai.”
GEN 24:52 Ā, ka rongo te pononga a Āperahama i ā rāua kōrero, nā, piko ana ia ki te whenua, ki a Ihowā.
GEN 24:53 Nā, ka tangohia ake e te pononga he mea hiriwa, he mea kōura, he kākahu hoki, ā, hoatu ana e ia ki a Ripeka; ā, i hoatu e ia ētahi mea tino papai ki tōna tungāne rāua ko tōna whaea.
GEN 24:54 Nā, ka kai rātou, ka inu, rātou tahi ko ōna hoa haere, ā, moe iho i te pō. Ā, i te ata ka oho rātou, ka mea atu ia, “Tukua ahau kia haere ki tōku ariki.”
GEN 24:55 Nā, ka mea tōna tungāne rāua ko tōna whaea, “Waiho te kōtiro i a mātou mō ētahi rā torutoru, kia kotahi tekau pea; muri iho ka haere.”
GEN 24:56 Nā, ka mea ia ki a rāua, “Kaua ahau whakawarea, kua whakatikaia nei hoki tōku ara e Ihowā; tukua ahau kia haere ki tōku ariki.”
GEN 24:57 Nā, ka mea rāua, “Me karanga e māua te kōtiro, ka ui ai ki tōna māngai.”
GEN 24:58 Nā, ka karangatia e rāua a Ripeka, ka mea ki a ia, “Ka haere rānei koe i te tangata nei?” Ka mea ia, “Ka haere.”
GEN 24:59 Nā, tukua ana e rātou a Ripeka, tō rātou tuahine, rātou ko tōna kaiwhakangote, ko te pononga hoki a Āperahama, me āna tāngata.
GEN 24:60 Nā, ka manaaki rātou i a Ripeka, ka mea ki a ia, “E tō mātou tuahine, kia meinga koe hei whaea mō ngā mano tini; ā, kia riro i ōu uri te kūwaha o ō rātou hoariri!”
GEN 24:61 Nā, ka whakatika a Ripeka, rātou ko āna kōtiro, ā, eke ana ki runga ki ngā kāmera, aru ana i taua tangata; nā, ka mauria e taua pononga a Ripeka, ā, haere ana.
GEN 24:62 Nā, ka hoki mai a Īhaka, i te haere i Peere-Rahai-Roi; i te wāhi hoki ki te tonga ia e noho ana.
GEN 24:63 Ā, ka puta atu a Īhaka ki te pārae i te tūahiahi ki te whakaaroaro; nā, ka maranga ake ōna kanohi, ka titiro, nā, ko ngā kāmera e haere mai ana.
GEN 24:64 Ā, ka whakaara ake a Ripeka i ōna kanohi, ā, nō tōna kitenga i a Īhaka, ka marere ia ki raro i te kāmera.
GEN 24:65 Ā, ka mea atu ia ki te pononga, “Ko wai tēnei tangata e haere mai nei i te pārae ki te whakatau i a tātou?” Anō rā ko te pononga, “Ko tōku ariki tēnā.” Nā, ka mau ia ki tētahi ārai kanohi, ka hīpoki i a ia.
GEN 24:66 Nā, ka kōrerotia e te pononga ki a Īhaka ngā mea katoa i mea ai ia.
GEN 24:67 Nā, ka kawea ia e Īhaka ki te tēneti o tōna whaea, o Hara. Ā, tangohia ana e ia a Ripeka, ā, ka noho ia hei wahine māna; ā, ka aroha ia ki a ia. Ā, ka whai tānga manawa a Īhaka i muri i te matenga o tōna whaea.
GEN 25:1 Nā, ka tangohia e Āperahama tētahi wahine anō, ko Ketura tōna ingoa.
GEN 25:2 Ā, whānau ake ā rāua tama ko Timirana, ko Iokohana, ko Merana, ko Miriana, ko Ihipaka, rātou ko Huaha.
GEN 25:3 Ā, whānau ake a Iokohana ko Hēpā, ko Rerana. Ā, ko ngā tama a Rerana ko Ahurimi, ko Retuhimi, ko Reumime.
GEN 25:4 Ā, ko ngā tama a Miriana ko Epa, ko Ēpere, ko Hanoka, ko Āpira, ko Ererāha. He tama katoa ēnei nā Ketura.
GEN 25:5 Ā, i hoatu e Āperahama āna mea katoa ki a Īhaka.
GEN 25:6 Ki ngā tama ia a ngā wāhine iti a Āperahama i hoatu e ia ētahi taonga, ā, tonoa atu ana e ia i a ia anō e ora ana kia matara atu i a Īhaka, i tāna tama, whaka te rāwhiti, ki te whenua i te rāwhiti.
GEN 25:7 Ko ngā rā ēnei o ngā tau o te oranga o Āperahama i ora ai ia, kotahi rau e whitu tekau mā rima ngā tau.
GEN 25:8 Nā, ka hemo a Āperahama, ā, ka mate, he pai hoki tōna koroheketanga, he kaumātua, kua āta tutuki ōna tau; ā, kohia ana ia ki tōna iwi.
GEN 25:9 Ā, ka tanumia ia e āna tama e Īhaka rāua ko Ihimaera ki te ana o Makapera, ki te wāhi o Eperona tama a Tohara Hiti, i te ritenga o Mamere,
GEN 25:10 ki te wāhi i hokona rā e Āperahama i ngā tama a Hete. I tanumia ki reira a Āperahama, rāua ko Hara, ko tāna wahine.
GEN 25:11 Ā muri iho i te matenga o Āperahama ka manaakitia e te Atua a Īhaka, tāna tama; ā, ka noho a Īhaka ki te taha o Peere-Rahai-Roi.
GEN 25:12 Nā, ko ngā whakatupuranga ēnei o Ihimaera tama a Āperahama, i whānau nei mā Āperahama i a Hakara, i te Īhipiana, pononga wahine a Hara.
GEN 25:13 Ā, ko ngā ingoa ēnei o ngā tama a Ihimaera, ō rātou ingoa i ō rātou whakatupuranga: tā Ihimaera mātāmua ko Nepaioto; nā, ko Kerara, ko Arapēre, ko Mipihama,
GEN 25:14 ko Mihima, ko Rūma, ko Maha,
GEN 25:15 ko Hatara, ko Tema, ko Ieturu, ko Nāpihi, ko Kerema.
GEN 25:16 Ko ngā tama ēnei a Ihimaera, ko ō rātou ingoa hoki ēnei i ō rātou pā, i ō rātou puni; kotahi tekau mā rua ngā rangatira o ō rātou iwi.
GEN 25:17 Ā, ko ngā tau ēnei o te oranga o Ihimaera, kotahi rau e toru tekau mā whitu ngā tau; nā, ka hemo ia, ā, ka mate; ka kohia ki tōna iwi.
GEN 25:18 Ā, ko ō rātou nohoanga i Hāwira ā tae noa ki Huru, i te ritenga o Īhipa ina haere koe ki Ahiria; ā, i noho ia ki te aroaro o ōna tēina katoa.
GEN 25:19 Nā, ko ngā whakatupuranga ēnei o Īhaka tama a Āperahama: nā Āperahama ko Īhaka.
GEN 25:20 Nā, e whā tekau ngā tau o Īhaka i tāna tangohanga i a Ripeka, tamāhine a Petuere Hīriani o Paranārama, tuahine o Rāpana Hīriani, hei wahine māna.
GEN 25:21 Nā, ka īnoi a Īhaka ki a Ihowā mō tāna wahine, nō te mea he pākoko ia; ā, ka whakaae a Ihowā ki a ia, ā, ka hapū a Ripeka, tāna wahine.
GEN 25:22 Ā, ka takatakahi ngā tamariki i a rāua i roto i a ia; ā, ka mea ia, “Ki te mea ko tēnei, he aha ahau i pēnei ai?” Nā, haere ana ia ki a Ihowā ki te ui.
GEN 25:23 Ā, ka mea a Ihowā ki a ia, “E rua ngā iwi kei roto i tōu kōpū, ā, e rua ngā iwi e wehea mai i roto i ōu whēkau; ā, ka kaha tētahi iwi i tētahi iwi; ka waiho hoki te tuakana hei apa mō te teina.”
GEN 25:24 Ā, ka rite ōna rā e whānau ai ia, nā, he māhanga kei roto i tōna kōpū.
GEN 25:25 Nā, ka puta mai te tuatahi, he whero, rite katoa ia ki te kākahu huruhuru; ā, huaina ana e rātou tōna ingoa ko Ēhau.
GEN 25:26 Ā muri iho ka puta mai tōna teina, me te pupuri anō tōna ringa i te rekereke o Ēhau; ā, huaina iho tōna ingoa ko Hākopa; ā, e ono tekau ngā tau o Īhaka i tō rāua whānautanga.
GEN 25:27 Nā, ka tupu ngā tamariki rā, ko Ēhau he tangata mōhio ki te hopu kīrehe mohoao, he tangata noho koraha; ko Hākopa ia he tangata āta noho, he tangata noho tēneti.
GEN 25:28 Nā, i aroha a Īhaka ki a Ēhau, he kai nōna i āna i hopu ai; ko Ripeka i aroha ki a Hākopa.
GEN 25:29 Nā, ka kōhuatia he kai e Hākopa, ā, ka haere mai a Ēhau i te koraha, ā, hemo ana ia.
GEN 25:30 Ā, ka mea a Ēhau ki a Hākopa, “E, hōmai he kai māku i taua mea whero e whero nā, nē? E hemo ana hoki ahau.” Koia i huaina ai tōna ingoa ko Ēroma.
GEN 25:31 Nā, ko te meatanga mai a Hākopa, “Hokona mai ki ahau i tēnei rā tōu mātāmuatanga.”
GEN 25:32 Nā, ka mea a Ēhau, “Nā, kua tata ahau te mate; ā, he aha te hua o te mātāmuatanga ki ahau?”
GEN 25:33 Ā, ka mea a Hākopa, “Oati mai ki ahau āianei.” Nā, ka oati ia ki a ia; ā, ka hokona atu e ia tōna mātāmuatanga ki a Hākopa.
GEN 25:34 Kātahi ka hoatu e Hākopa he taro ki a Ēhau me ngā pī i kōhuatia rā. Nā, ka kai ia, ka inu, ka whakatika hoki, ā, haere ana. Nā, whakahāweatia ana e Ēhau tōna mātāmuatanga.
GEN 26:1 Nā, ka matekai te whenua, hāunga te matekai tuatahi i puta mai i ngā rā o Āperahama. Ā, ka haere a Īhaka ki a Apīmereke, kīngi o ngā Pirihitini, ki Kerara.
GEN 26:2 Nā, ka puta mai a Ihowā ki a ia, ka mea, “Kaua e haere ki raro, ki Īhipa; e noho ki te whenua e kōrero ai ahau ki a koe.
GEN 26:3 E noho i tēnei whenua, ā, ka tata ahau ki a koe, ka manaaki hoki i a koe; ka hoatu nei hoki e ahau ēnei whenua katoa ki a koutou ko ōu uri, ā, ka whakapūmautia te oati i oati ai ahau ki a Āperahama, ki tōu pāpā.
GEN 26:4 Ā, ka whakanuia e ahau ōu uri kia pērā me ngā whetū o te rangi, ka hoatu hoki e ahau ēnei whenua katoa ki ōu uri; ā, mā tōu uri ka manaakitia ai ngā iwi katoa o te whenua;
GEN 26:5 nō te mea i rongo a Āperahama ki tōku reo, i mau ki āku ako, ki āku whakahau, ki āku tikanga, ki āku ture.”
GEN 26:6 Nā, ka noho a Īhaka i Kerara.
GEN 26:7 Ā, ka ui ngā tāngata o taua wāhi ki tāna wahine, ā, ka mea ia, “Ko tōku tuahine ia,” i wehi hoki ia, te mea ai, “Ko tāku wahine,” i mea hoki, “Kei patua ahau e ngā tāngata o tēnei wāhi mō Ripeka, he ātaahua hoki ia ki te titiro atu.”
GEN 26:8 Ā, ka maha ōna rā ki reira, ka titiro atu a Apīmereke, kīngi o ngā Pirihitini, i te matapihi, ā, ka kite, nā, ko Īhaka e tākaro ana ki a Ripeka, ki tāna wahine.
GEN 26:9 Nā, ka karangatia e Apīmereke a Īhaka, ka mea atu, “Koia anō, ko tāu wahine tonu ia. Nā te aha koe i mea ai, ‘Ko tāku tuahine ia’?” Ka mea a Īhaka ki a ia, “I mea hoki ahau, Kei mate ahau mōna.”
GEN 26:10 Nā, ka mea a Apīmereke, “He aha tēnei mahi āu ki a mātou? Wāhi iti kua takoto tētahi o te iwi nei ki tāu wahine, ā, kua tākina mai e koe he hara ki runga ki a mātou.”
GEN 26:11 Nā, ka whakatūpato a Apīmereke ki tōna iwi katoa, ka mea, “Ko te tangata e pā ki tēnei tangata, ki tāna wahine rānei, he pono ka mate ia.”
GEN 26:12 Ā, i rui a Īhaka ki taua whenua, ā, maea ake i taua tau anō kotahi rau. I manaakitia hoki ia e Ihowā,
GEN 26:13 nā, ka kake taua tangata, ka tino nui haere, nō ka nui noa ake ia.
GEN 26:14 Ā, ka whiwhi ia i ngā kāhui hipi, i ngā kāhui kau, i te tini o te pononga, ā, ka hae ngā Pirihitini ki a ia.
GEN 26:15 Nā, ko ngā poka katoa i keria e ngā pononga a tōna pāpā i ngā rā o Āperahama, o tōna pāpā, i tanumia ērā e ngā Pirihitini, i whakakīia hoki ki te oneone.
GEN 26:16 Nā, ka mea a Apīmereke ki a Īhaka, “Haere atu i roto i a mātou; he kaha rawa hoki koe i a mātou.”
GEN 26:17 Nā, haere atu ana a Īhaka i reira, ā, whakatūria ana tōna puni ki te awaawa o Kerara, ā, noho ana i reira.
GEN 26:18 Nā, ka keria anō e Īhaka ngā poka wai i keria rā i ngā rā o Āperahama, o tōna pāpā; i tanumia hoki e ngā Pirihitini i muri i te matenga o Āperahama. Ā, huaina ana e ia hei ingoa mō aua poka ko ngā ingoa i huaina iho e tōna pāpā.
GEN 26:19 Nā, ka keri ngā pononga a Īhaka ki te awaawa, ā, ka kitea e rātou i reira he puna manawa-whenua.
GEN 26:20 Nā, ka tautohe ngā hēpara o Kerara ki ngā hēpara a Īhaka, ka mea, “Nā mātou tēnei wai.” Ā, huaina ana e ia te ingoa o te poka ko Ēheke; mō rātou hoki i whakatetete ki a ia.
GEN 26:21 Nā, ka keri rātou i tētahi atu poka, ka tautohetia anō tērā e rātou; ā, huaina iho e ia tōna ingoa ko Hitina.
GEN 26:22 Nā, ka neke atu ia i reira, ā, ka keri i tētahi atu poka. Kīhai tērā i tautohetia e rātou; nā, ka huaina e ia tōna ingoa ko Rehopoto; i mea hoki ia, “Kātahi nei hoki a Ihowā ka whakawātea i tētahi nohoanga mō tātou, ā, ka hua tātou ki runga ki te whenua.”
GEN 26:23 Nā, ka haere atu ia i reira ki runga, ki Peerehepa.
GEN 26:24 Ā, ka puta mai a Ihowā ki a ia i taua pō anō, ka mea, “Ko ahau te Atua o Āperahama, o tōu pāpā. Kaua e wehi, kei a koe nei hoki ahau, ā, ka manaaki ahau i a koe, ka whakanui hoki i ōu uri, he whakaaro ki a Āperahama, ki tāku pononga.”
GEN 26:25 Nā, ka hangā e ia he āta ki reira, ā, ka karanga ki te ingoa o Ihowā, ā, whakatūria ana hoki e ia tōna tēneti ki reira. Ā, ka keria tētahi poka ki reira e ngā pononga a Īhaka.
GEN 26:26 Nā, ka haere mai a Apīmereke i Kerara ki a ia, rātou ko Ahutata ko tētahi o ōna hoa, ko Pikora hoki, ko te rangatira o tāna ope.
GEN 26:27 Ā, ka mea a Īhaka ki a rātou, “I haere mai koutou ki ahau ki te aha, inā hoki kua kino koutou ki ahau, kua pei hoki i ahau i roto i a koutou?”
GEN 26:28 Ā, ka mea rātou, “I kite mārama mātou, kei a koe a Ihowā; koia mātou i mea ai, ‘Kia takoto āianei he oati ki waenganui i a tātou, ki waenganui o mātou,’ ōu, kia whakarite kawenata hoki mātou ki a koe;
GEN 26:29 kia kaua koe e tūkino i a mātou, kia pēnei me mātou kīhai nei i pā ki a koe, kīhai hoki i aha ki a koe, heoi ko te pai anake, i āta tuku anō i a koe. Ināianei ko koe te manaakitanga a Ihowā.”
GEN 26:30 Nā, ka tukua e ia he hākari mā rātou, ā, ka kai rātou, ka inu.
GEN 26:31 Nā, ka maranga wawe rātou i te ata, ka oati rātou tētahi ki tētahi; ā, tukua ana rātou e Īhaka kia haere, ā, hoki mārie atu ana rātou i a ia.
GEN 26:32 Ā, i taua rangi anō ka haere mai ngā pononga a Īhaka, ka kōrero ki a ia i te poka i keria e rātou, ā, ka mea ki a ia, “Kua kitea e mātou he wai.”
GEN 26:33 Ā, huaina iho e ia taua poka ko Hepaha. Nō konā te ingoa o tēnā pā, o Peerehepa, ā mohoa noa nei.
GEN 26:34 Ā, ka whā tekau ngā tau o Ēhau, ka tango ia i a Iuriti tamāhine a Peeri Hiti, hei wahine māna, rāua ko Pahemata tamāhine a Erona Hiti;
GEN 26:35 ā, ka waiho rāua hei mea pōuri ki ngā ngākau o Īhaka, rāua ko Ripeka.
GEN 27:1 Nā, i a Īhaka kua koroheketia, kua atarua hoki ngā kanohi, i kore ai ia e kite, ka karangatia e ia a Ēhau, tāna tama mātāmua, ka mea ki a ia, “E tāku tama!” Ā, ka mea ia ki a ia, “Tēnei ahau.”
GEN 27:2 Nā, ka mea ia, “Nanā, kua koroheke ahau, kāhore hoki ahau e mōhio ki te rā e mate ai ahau.
GEN 27:3 Nā reira mauria e koe āu rākau tāu papa pere me tāu kōpere, ka haere ki te koraha ki te hopu kai māku.
GEN 27:4 Ka taka ai i tētahi kai reka māku, hei tāku i pai ai, ka mau mai ai ki ahau kia kai ahau; kia manaaki ai tōku wairua i a koe i mua o tōku matenga.”
GEN 27:5 Ā, i rongo a Ripeka i te kōrerotanga Īhaka ki a Ēhau, ki tāna tama. Nā, ko te haerenga o Ēhau ki te koraha ki te hopu kai hei maunga mai māna.
GEN 27:6 Nā, ka kōrero a Ripeka ki a Hākopa, ki tāna tama, ka mea, “Nanā, kua rongo ahau i tōu pāpā e kōrero ana ki a Ēhau, ki tōu tuakana, e mea ana,
GEN 27:7 ‘Mauria mai tētahi kai māku, ka taka ai i tētahi kai reka māku, kia kai ahau, kia manaaki ai ahau i a koe i te aroaro o Ihowā, keiwhā mate ahau.’
GEN 27:8 Nā, whakarongo ki tōku reo, e tāku tama, kia rite ki tāku e whakahau nei ki a koe.
GEN 27:9 Haere ināianei ki te kāhui, ka mau mai ki ahau i reira kia rua ngā kūao papai o ngā koati; ā, māku ēnā e taka hei kai reka mā tōu pāpā, hei pērā me tāna e pai ai.
GEN 27:10 Ā, māu e kawe ki tōu pāpā, kia kai ia, kia manaaki ai ia i a koe keiwhā mate ia.”
GEN 27:11 Nā, ka mea a Hākopa ki a Ripeka, ki tōna whaea, “Nā, ko Ēhau, ko tōku tuakana, he tangata pūhuruhuru, ko ahau ia he kiri maheni.
GEN 27:12 Tērā pea tōku pāpā e whāwhā i ahau, ā, ki tāna ka rite ahau ki te tangata tinihanga; ā, he kanga te mea e riro mai i ahau, kāhore he manaaki.”
GEN 27:13 Nā, ko te meatanga a tōna whaea ki a ia, “Hei runga i ahau tōu kanga, e tāku tama; whakarongo mai ia ki tōku reo, haere, tīkina aua mea ki ahau.”
GEN 27:14 Nā, ka haere ia, ka tīkina, ka mauria mai ki tōna whaea, ā, ka takā e tōna whaea he kai reka, he pērā me tā tōna pāpā i pai ai.
GEN 27:15 Nā, ka tīkina e Ripeka ngā kākahu papai o Ēhau, o tāna tama ō mua, i a ia hoki aua mea i roto i te whare; ā, whakakākahuria ana e ia ki a Hākopa, ki tāna tama ō muri.
GEN 27:16 Ā, ka whakapiritia e ia ngā hiako o ngā kūao koati ki ōna ringa, ki te wāhi māeneene hoki o tōna kakī.
GEN 27:17 Nā, ka hoatu e ia te kai reka me te taro i hangā e ia ki te ringa o Hākopa, o tāna tama.
GEN 27:18 Nā, ka tae ia ki tōna pāpā, ka mea, “E tōku matua!” Ā, ka mea ia, “Tēnei ahau; ko wai koe, e tāku tama?”
GEN 27:19 Nā, ka mea a Hākopa ki tōna pāpā, “Ko Ēhau ahau, ko tāu mātāmua; kua oti i ahau tāu i kī mai ai ki ahau. Nā, maranga ake, e noho ki te kai i te kai i hopukia nei e ahau, kia manaaki ai tōu wairua i ahau.”
GEN 27:20 Ā, ka mea a Īhaka ki tāna tama, “Nā te aha i hohoro ai te kitea e koe, e tāku tama?” Ka mea ia, “Nā Ihowā hoki, nā tōu Atua, i hōmai kia hohoro.”
GEN 27:21 Ā, ka mea a Īhaka ki a Hākopa, “Nuku mai nei nā, kia whāwhā ahau ki a koe, e tāku tama, ko tāku tama tonu rānei koe, ko Ēhau, kāhore rānei.”
GEN 27:22 Nā, ka neke atu a Hākopa ki a Īhaka, ki tōna pāpā, ā, ka whāwhā tērā i a ia, ka mea, “Ko te reo, nō Hākopa te reo, ko ngā ringa ia, nō Ēhau ngā ringaringa.”
GEN 27:23 Ā, kīhai ia i mōhio ki a ia, nō te mea he huruhuru ōna ringa, i rite ki ngā ringa o Ēhau, o tōna tuakana; nā, ka manaaki ia i a ia.
GEN 27:24 Ā, ka mea, “Ko tāku tama pū rānei koe, ko Ēhau?” Ā, ka mea ia, “Ko ahau tēnei.”
GEN 27:25 Nā, ka mea ia, “Kawea mai kia tata ki ahau, kia kai ahau i te kai i hopukia e tāku tama, kia manaaki ai tōku wairua i a koe.” Nā, kawea atu ana e ia ki a ia, ā, ka kai ia. I mauria atu anō e ia he wāina ki a ia, ā, inu ana ia.
GEN 27:26 Kātahi ka mea a Īhaka, tōna pāpā, ki a ia, “Nuku mai nei, ka kihi i ahau, e tāku tama.”
GEN 27:27 Nā, ka neke atu ia, ā, ka kihi ia i a ia; ā, ka hongi ia i te haunga o ōna kākahu, ka manaaki i a ia, ka mea, “Titiro hoki, rite tahi te haunga o tāku tama ki te haunga o te pārae i manaakitia e Ihowā.
GEN 27:28 Kia hōmai anō e te Atua ki a koe te tōmairangi o te rangi, me te mōmonatanga o te whenua, kia nui anō hoki te wīti me te wāina!
GEN 27:29 Kia mahi ngā iwi ki a koe, kia piko iho hoki ngā tauiwi ki a koe. Kia waiho koe hei rangatira mō ōu tēina, ā, kia piko iho ki a koe ngā tama a tōu whaea. Kia kangā te tangata e kanga ana i a koe, ā, kia manaakitia te tangata e manaaki ana i a koe.”
GEN 27:30 Ā, mutu ana te manaaki a Īhaka i a Hākopa, puta kau atu anō a Hākopa i te aroaro o Īhaka, o tōna pāpā, nā, ka tae mai a Ēhau, tōna tuakana, i tāna hopu kīrehe mohoao.
GEN 27:31 Kua oti anō hoki i a ia tētahi kai reka te taka, ā, kawea ana ki tōna pāpā, nā, ka mea ki tōna pāpā, “Kia ara ake tōku pāpā ki te kai i te mea i hopukia mai e tāna tama, kia manaaki ai tōu wairua i ahau.”
GEN 27:32 Nā, ka mea a Īhaka, tōna pāpā, ki a ia, “Ko wai koe?” Ā, ka mea ia, “Ko tāu tama ahau, ko Ēhau, ko tāu mātāmua.”
GEN 27:33 Nā, tino wiri rawa ana a Īhaka, ā, ka mea, “Ha, ko wai rā tēnei i hopukia nei e ia he kai, ā, kawea ana mai ki ahau, ā, kainga katoatia ana e ahau i te mea kāhore anō koe i tae mai, ā, manaakitia ana ia e ahau? Āe rā, ka manaakitia anō ia.”
GEN 27:34 Ā, i te rongonga o Ēhau i ngā kupu a tōna pāpā, ka tangi ia, he tangi nui, he tangi tīwerawera, ā, ka mea ki tōna pāpā, “Manaakitia ahau, āe rā, ahau anō hoki, e tōku pāpā.”
GEN 27:35 Ā, ka mea ia, “I haere tinihanga mai tōu teina, ā, riro ana tōu manaaki i a ia.”
GEN 27:36 Nā, ka mea ia, “Ka tika ha te tapanga i a ia ko Hākopa? Kua rua nei hoki ōku māmingatanga e ia. Ko tōku mātāmuatanga kua riro i a ia; ā, ināianei kua riro tōku manaaki i a ia.” Ka mea anō ia, “Kāhore rānei i mahue atu ki a koe tētahi manaaki mōku?”
GEN 27:37 Nā, ka whakahoki a Īhaka, ka mea ki a Ēhau, “Nā, kua waiho ia e ahau hei rangatira mōu, kua hoatu hoki ōna tuākana katoa ki a ia hei apa; kua whakaūkia hoki ia e ahau ki te wīti, ki te wāina. Ā, he aha rā māu hei meatanga māku, e tāku tama?”
GEN 27:38 Nā, ka mea a Ēhau ki tōna pāpā, “Kotahi tonu ia tāu manaaki, e tōku pāpā? Manaakitia ahau, āe rā, ahau anō hoki, e tōku pāpā.” Nā, nui atu te reo o Ēhau ki te tangi.
GEN 27:39 Nā, ka whakahoki a Īhaka, tōna pāpā, ka mea ki a ia: “Nā, nō te mōmonatanga o te whenua te nohoanga mōu, nō te tōmairangi hoki o te rangi i runga.
GEN 27:40 Mā tāu hoari hoki e ora ai koe, me mahi anō koe ki tōu teina; ā, tēnei ake, kei tōu kakenga hei rangatira, nā, ka wāhia atu e koe tāna ioka i tōu kakī.”
GEN 27:41 Nā, ka mauāhara a Ēhau ki a Hākopa mō te manaaki i manaakitia ai ia e tōna pāpā, ā, ka mea a Ēhau i roto i tōna ngākau, “E tata ana ngā rā e uhungatia ai tōku pāpā; ko reira ahau patu ai i tōku teina, i a Hākopa.”
GEN 27:42 Nā, ka kōrerotia ki a Ripeka ngā kupu a Ēhau, a tāna tama ō mua. Ā, ka tono tangata ia ki te karanga i a Hākopa, i tāna tama ō muri, ka mea ki a ia, “Nā, tēnei tōu tuakana, a Ēhau, mō te wāhi ki a koe, te whakamārie nei i a ia, te mea nei ki te patu i a koe.
GEN 27:43 Nō konei, e tāku tama, whakarongo ki tōku reo; whakatika, e rere ki a Rāpana, ki tōku tungāne, ki Harana,
GEN 27:44 hei a ia koe noho ai mō ētahi rangi, kia tahuri atu rā anō te āritarita o tōu tuakana –
GEN 27:45 kia tahuri kē atu rā anō i a koe te riri a tōu tuakana, kia wareware hoki i a ia tāu i mea ai ki a ia. Kātahi ahau ka tono tangata ki te tiki atu i a koe i reira. He aha kia tangohia atu ai kōrua tokorua i ahau i te rangi kotahi?”
GEN 27:46 Nā, ka mea a Ripeka ki a Īhaka, “Kei te hōhā ahau ki te ora i ngā tamāhine a Hete. Ki te tango a Hākopa i tētahi wahine māna i roto i ngā tamāhine a Hete, i tētahi e pēnei ana me ēnei tamāhine o te whenua nei, hei aha ake mōku te ora?”
GEN 28:1 Nā, ka karanga a Īhaka i a Hākopa, ka manaaki i a ia, ka tohutohu ki a ia, ā, ka mea ki a ia: “Kaua koe e tango wahine o ngā tamāhine o Kanaana.
GEN 28:2 Whakatika, haere ki Paranārama ki te whare o Petuere, pāpā o tōu whaea; ka tango mai i reira i tētahi wahine māu o ngā tamāhine a Rāpana, tungāne o tōu whaea.
GEN 28:3 Ā, mā te Atua Kaha Rawa koe e manaaki, māna koe e mea kia hua, kia nui, kia meinga hoki hei huihuinga iwi.
GEN 28:4 Māna e hōmai ki a koe te manaaki o Āperahama, ki a koutou tahi ko ōu uri; kia riro ai i a koe te whenua e noho manene nei koe, i hōmai nei hoki e te Atua ki a Āperahama.”
GEN 28:5 Nā, tonoa atu ana a Hākopa e Īhaka; ā, haere ana ia ki Paranārama ki a Rāpana, ki te tama a Petuere Hīriani, ki te tungāne o Ripeka, whaea o Hākopa rāua ko Ēhau.
GEN 28:6 Ā, ka kite a Ēhau kua manaaki a Īhaka i a Hākopa, kua tono hoki i a ia ki Paranārama ki te tiki wahine māna i reira; kua tohutohu hoki ki a ia, i a ia e manaaki ana i a ia, kua mea, “Kei tangohia e koe he wahine i ngā tamāhine o Kanaana,”
GEN 28:7 ā, kua rongo a Hākopa ki tōna pāpā rāua ko tōna whaea, kua riro hoki ki Paranārama.
GEN 28:8 Ā, ka kite a Ēhau e kino ana ngā tamāhine o Kanaana ki te titiro a Īhaka, a tōna pāpā.
GEN 28:9 Nā, haere ana a Ēhau ki a Ihimaera, ā, tangohia ana mai e ia ki roto ki āna wāhine a Maharata, te tamāhine a Ihimaera, tama a Āperahama, te tuahine o Nepaioto, hei wahine māna.
GEN 28:10 Nā, ka tūria atu e Hākopa i Peerehepa, ā, haere ana ki Harana.
GEN 28:11 Ā, ka pono atu ia ki tētahi wāhi, ka moe i reira, kua tō hoki te rā. Nā, ka tīkina atu e ia tētahi o ngā kōhatu o taua wāhi, ā, meatia ana e ia hei urunga mōna, ka takoto ia i taua wāhi, ka moe.
GEN 28:12 Nā, moe iho ia, ko tētahi arawhata e tū ana i runga i te whenua, ko tōna pito i tutuki ki te rangi; nā, ko ngā anahera a te Atua e piki ana, e heke ana i runga i taua mea.
GEN 28:13 Nā, ko Ihowā e tū ana i runga atu i taua mea, e mea ana, “Ko Ihowā ahau, ko te Atua o Āperahama, o tōu pāpā, ko te Atua hoki o Īhaka; ko te whenua e takoto nā koe ka hoatu e ahau ki a koe, ki ōu uri anō hoki;
GEN 28:14 ā, ka rite ōu uri ki te puehu o te oneone, ka tohatoha atu koe ki te hauāuru, ki te rāwhiti, ki te raki, ki te tonga; ā, māu, mā tōu uri hoki e manaakitia ai ngā hapū katoa o te whenua.
GEN 28:15 Nā, kei a koe tēnei ahau, ka tiaki ahau i a koe i ngā wāhi katoa e haere ai koe, ka whakahoki mai anō ahau i a koe ki tēnei whenua; e kore hoki ahau e whakarere i a koe, kia oti rā anō tāku i kī atu ai ki a koe.”
GEN 28:16 Nā, ka oho ake a Hākopa i tāna moe, ka mea, “He pono kei tēnei wāhi a Ihowā – ā, kīhai ahau i mōhio.”
GEN 28:17 Nā, ka wehi ia, ka mea, “Anō te wehi o tēnei wāhi! Ehara tēnei i te mea kē atu i te whare o te Atua, ā, ko te kūwaha tēnei ki te rangi.”
GEN 28:18 Nā, ka ara wawe a Hākopa i te ata, ā, ka mau ki te kōhatu i waiho rā hei urunga mōna, whakatūria ana e ia hei pou, ringihia iho e ia he hinu ki runga.
GEN 28:19 Ā, huaina iho e ia te ingoa o taua wāhi ko Pētēre; ko Rutu ia te ingoa o taua pā i mua.
GEN 28:20 Nā, ka puaki tā Hākopa kupu taurangi, ka mea ia, “Ki te mea ka tata mai ki ahau te Atua, ā, ka tiakina ahau e ia i tēnei ara e haere nei ahau, ā, ka hōmai e ia ki ahau he taro hei kai, me tētahi kākahu hei kākahu,
GEN 28:21 ā, ka hoki mai ahau i runga i te rangimārie ki te whare o tōku pāpā; nā, ko Ihowā hei Atua ki ahau.
GEN 28:22 Ā, ko tēnei kōhatu i whakatūria nei e ahau hei pou, ka waiho hei whare mō te Atua; ā, o ngā mea katoa e hōmai e koe ki ahau, ka hoatu e ahau ki a koe ngā whakatekau.”
GEN 29:1 Nā, ka tūria atu e Hākopa, ka haere ki te whenua o ngā tāngata o te rāwhiti.
GEN 29:2 Nā, ka titiro atu ia, ā, ka kite i tētahi poka i te pārae; nā, ko ētahi kāhui hipi e toru e takoto ana i te taha; i whakainumia hoki e rātou ngā kāhui ki te wai o taua poka. He nui hoki te kōhatu i te waha o te poka.
GEN 29:3 I huihuia hoki ki reira ngā kāhui katoa; ā, whakatakā atu ana e rātou te kōhatu i te waha o te poka, kia whakainumia ai ngā hipi, nā, ka whakahokia anō e rātou te kōhatu ki te waha o te poka, ki tōna wāhi.
GEN 29:4 Nā, ka mea a Hākopa ki a rātou, “E ōku tuākana, nō hea koutou?” Ā, ka mea rātou, “Nō Harana mātou.”
GEN 29:5 Nā, ka mea ia ki a rātou, “E mōhio ana ianei koutou ki a Rāpana, tama a Nahora?” Ka mea rātou, “E mōhio ana anō mātou.”
GEN 29:6 Ā, ka mea ia ki a rātou, “E ora ana rānei ia?” Ka mea rātou, “E ora ana anō. Ko Rahera anō tēnei, ko tāna tamāhine, te haere mai nei me ngā hipi.”
GEN 29:7 Nā, ka mea ia, “Nanā, he nui anō te rā, ehara tēnei i te wā hei huihuinga mai mō ngā kararehe. Whakainumia ngā hipi, haere hoki ki te whāngai.”
GEN 29:8 Nā, ka mea rātou, “E kore e taea e mātou, kia huihuia mai rā anō ngā kāhui katoa, kia whakatakā hoki e rātou te kōhatu i te waha o te poka; kātahi ka whakainu mātou i ngā hipi.”
GEN 29:9 I a ia anō e kōrero ana ki a rātou, ka puta mai a Rahera me ngā hipi a tōna pāpā; ko ia hoki te kaiwhāngai.
GEN 29:10 Ā, nō te kitenga o Hākopa i a Rahera tamāhine a Rāpana, tungāne o tōna whaea, me ngā hipi hoki a Rāpana, tungāne o tōna whaea, nā, ka haere a Hākopa, ā, whakatakā atu ana e ia te kōhatu i te waha o te poka, whakainumia ana e ia ngā hipi a Rāpana, tungāne o tōna whaea.
GEN 29:11 Nā, ka kihi a Hākopa i a Rahera, ā, nui atu tōna reo ki te tangi.
GEN 29:12 Nā, ka whakaaturia e Hākopa ki a Rahera ko ia te irāmutu o tōna pāpā, he tama hoki nā Ripeka, ā, ka rere ia ki te kōrero ki tōna pāpā.
GEN 29:13 Nā, i te taenga atu ki a Rāpana o te rongo o Hākopa, tama a tōna tuahine, ka rere ia ki te whakatau i a ia, ka awhi i a ia, ka kihi hoki i a ia, ā, kawea ana ki tōna whare. Ā, ka kōrerotia e ia ēnei mea katoa ki a Rāpana.
GEN 29:14 Nā, ka mea a Rāpana ki a ia, “He pono ko tōku wheua, ko tōku kikokiko koe.” Ā, kotahi te marama i noho ai ia ki a ia.
GEN 29:15 Nā, ka mea a Rāpana ki a Hākopa, “Nō te mea ko tāku irāmutu koe, me mahi noa anō koe ki ahau? Kōrero mai ki ahau, me aha he utu mōu?”
GEN 29:16 Nā, tokorua ngā tamāhine a Rāpana; ko te ingoa o te tuakana ko Rea, ko te ingoa hoki o te teina ko Rahera.
GEN 29:17 He papahewa ngā kanohi o Rea; he mea āhuareka ia a Rahera, he ātaahua hoki ki te titiro atu.
GEN 29:18 Nā, i aroha a Hākopa ki a Rahera; ā, ka mea ia, “Kia whitu ngā tau e mahi ai ahau ki a koe mō Rahera, mō tāu tamāhine ō muri.”
GEN 29:19 Nā, ka mea a Rāpana, “Engari te hoatu e ahau ki a koe, kei hoatu ki te tangata kē; e noho ki ahau.”
GEN 29:20 Nā, e whitu ngā tau i mahi ai a Hākopa mō Rahera; ā, he rangi torutoru noa ake te rite o aua tau ki tōna whakaaro, i tōna aroha ki a ia.
GEN 29:21 Nā, ka mea a Hākopa ki a Rāpana, “Hōmai tāku wahine, kua rite nei hoki ōku rā, kia haere ahau ki roto, ki a ia.”
GEN 29:22 Nā, ka huihuia mai e Rāpana ngā tāngata katoa o taua wāhi, ā, tukua ana e ia he hākari.
GEN 29:23 Ā, i te ahiahi ka mau ia ki a Rea ki tāna tamāhine, ā, kawea ana ia ki a ia; ā, ka haere ia ki roto, ki a ia.
GEN 29:24 Ā, i hoatu e Rāpana a Tiripa, tāna pononga wahine, hei pononga mā Rea, mā tāna tamāhine.
GEN 29:25 Ā, i te ata, nā, ko Rea ia; ā, ka mea ia ki a Rāpana, “He aha tēnei mahi āu ki ahau? Ehara ianei a Rahera i tāku i mahi ai ahau ki a koe? He aha rā koe i tinihanga, ai ki ahau?”
GEN 29:26 Nā, ko te meatanga a Rāpana, “Ehara tēnei i te tikanga o tō mātou whenua, kia hoatu te teina ki mua o te tuakana.
GEN 29:27 Whakatutukitia te wiki mō tēnei, ā, ka hoatu anō hoki tērā e mātou ki a koe mō te mahi e mahi ai koe ki ahau i ētahi atu tau e whitu.”
GEN 29:28 Ā, pērā ana a Hākopa, ā, whakatutukitia ana e ia te wiki mō tēnei; ā, ka hōmai e ia a Rahera, tāna tamāhine, ki a ia hei wahine māna.
GEN 29:29 I hōmai anō e Rāpana a Piriha, tāna pononga wahine, ki a Rahera, ki tāna tamāhine, hei pononga māna.
GEN 29:30 Nā, ka haere anō hoki ia ki roto, ki a Rahera, ā, nui atu tōna aroha ki a Rahera i tōna ki a Rea; e whitu atu anō ngā tau i mahi ai ia ki a ia.
GEN 29:31 Ā, ka kite a Ihowā e kinongia ana a Rea, ka whakatuwheratia e ia tōna kōpū; he pākoko ia a Rahera.
GEN 29:32 Nā, ka hapū a Rea, ā, ka whānau he tama, ā, huaina ana e ia tōna ingoa ko Reupena; i mea hoki ia, “Mō Ihowā hoki i titiro mai ki tōku tangihanga; tā te mea hoki ākuanei tāku tahu aroha ai ki ahau.”
GEN 29:33 Nā, ka hapū anō ia, ā, ka whānau he tama; ā, ka mea ia, “I rongo hoki a Ihowā e kinongia ana ahau, koia i hōmai ai hoki e ia tēnei ki ahau.” Ā, huaina ana e ia tōna ingoa ko Himiona.
GEN 29:34 Nā, ka hapū anō ia, ā, ka whānau he tama; ā, ka mea ia, “Kātahi anō tāku tahu ka piri mai ki ahau, nō te mea hoki ka tokotoru ā māua tama ka whānau”; nā reira i huaina ai e ia tōna ingoa ko Rīwai.
GEN 29:35 Nā, ka hapū anō ia, ā, ka whānau he tama; ā, ka mea ia, “Kātahi ahau ka whakamoemiti ki a Ihowā”; koia i huaina ai e ia tōna ingoa ko Hūrā; ā, ka mutu tāna whānau.
GEN 30:1 Ā, nō te kitenga o Rahera kāhore i whānau tētahi tama mā rāua ko Hākopa, ka hae a Rahera ki tōna tuakana; ā, ka mea ia ki a Hākopa, “Kia whai tamariki ahau, ki te kāhore, ka mate ahau.”
GEN 30:2 Nā, ka mura ake te riri a Hākopa ki a Rahera; ka mea ia, “Ko te Atua rānei ahau e kaiponu atu nei i te hua mō tōu kōpū?”
GEN 30:3 Ā, ka mea tērā, “Nā, tāku pononga wahine, a Piriha, haere ki roto, ki a ia; kia whānau ai ia ki runga ki ōku turi, ā, māna ka whai tamariki ai ahau.”
GEN 30:4 Nā, ka hōmai e ia a Piriha, tāna pononga wahine, ki a ia hei wahine, ā, ka haere atu a Hākopa ki roto, ki a ia.
GEN 30:5 Nā, ka hapū a Piriha, ā, ka whānau tā rāua tama ko Hākopa.
GEN 30:6 Nā, ka mea a Rahera, “Kua whakarite te Atua i tāku whakawākanga, kua rongo anō ki tōku reo, kua hōmai hoki e ia tētahi tama ki ahau.” Nā reira i huaina ai e ia tōna ingoa ko Rāna.
GEN 30:7 Nā, ka hapū anō a Piriha, te pononga wahine a Rahera, ā, ka whānau te rua o ā rāua tama ko Hākopa.
GEN 30:8 Nā, ka mea a Rahera, “Nui whakaharahara ngā nōnoketanga i nōnoke ai māua ko tōku tuakana, ā, taea ana ia e ahau.” Nā, huaina iho e ia tōna ingoa ko Napatari.
GEN 30:9 I te kitenga o Rea ka mutu ia te whānau, ka tango ia i a Tiripa, i tāna pononga wahine, ā, hoatu ana e ia ki a Hākopa hei wahine.
GEN 30:10 Nā, ka whānau te tama a Hākopa rāua ko Tiripa, pononga a Rea.
GEN 30:11 Ā, ka mea a Rea, “He waimarie!” Nā, huaina ana e ia tōna ingoa ko Kara.
GEN 30:12 Nā, ka whānau te rua o ngā tama a Hākopa rāua ko Tiripa, pononga a Rea.
GEN 30:13 Ā, ka mea a Rea, “E hari ana ahau, ka kīia nei hoki ahau e ngā tamāhine he mea hari”; ā, huaina ana e ia tōna ingoa ko Āhera.
GEN 30:14 Nā, ka haere a Reupena i ngā rā o te kotinga wīti, ā, ka kite i ētahi manitareki i te koraha, ā, kawea ana e ia ki a Rea, ki tōna whaea. Ā, ka mea atu a Rahera ki a Rea, “Tēnā koa māku ētahi o ngā manitareki a tāu tama.”
GEN 30:15 Nā, ko te meatanga a tērā ki a ia, “He mea nohinohi ianei tāu tangohanga i tāku tahu? Ā, me tango anō koe i ngā manitareki a tāku tama?” Ā, ka mea atu a Rahera, “Nā, me takoto ia ki a koe i tēnei pō hei utu mō ngā manitareki a tāu tama.”
GEN 30:16 Ā, i te ahiahi ka haere mai a Hākopa i te māra, nā, ka puta atu a Rea ki te whakatau i a ia, ka mea, “Me haere mai koe ki ahau; kua oti hoki koe te hoko e ahau ki ngā manitareki a tāku tama.” Nā, ka takoto ia ki a ia i taua pō.
GEN 30:17 I whakarongo hoki te Atua ki a Rea, ā, ka hapū ia, ā, ka whānau te tokorima o ā rāua tama ko Hākopa.
GEN 30:18 Nā, ka mea a Rea, “Kua hōmai e te Atua tōku utu, mōku i hoatu i tāku pononga ki tāku tahu”; ā, huaina ana e ia tōna ingoa ko Ihākara.
GEN 30:19 Nā, ka hapū anō a Rea, ā, ka whānau te tokoono o ā rāua tama ko Hākopa.
GEN 30:20 Nā, ka mea a Rea, “He pai te hākari i hōmai nei e te Atua ki ahau; kātahi tāku tahu ka noho ki ahau, mō te whānautanga o ā māua tama tokoono”; ā, huaina ana e ia tōna ingoa ko Hepurona.
GEN 30:21 Ā muri iho ka whānau he kōtiro, ā, huaina ana e ia tōna ingoa ko Rina.
GEN 30:22 Ā, i mahara te Atua ki a Rahera, i whakarongo hoki te Atua ki a ia, ā, whakatuwheratia ana e ia tōna kōpū.
GEN 30:23 Nā, ka hapū ia, ā, ka whānau he tama. Ā, ka mea ia, “Kua whakamutua e te Atua tōku tāwainga.”
GEN 30:24 Nā, huaina ana e ia tōna ingoa ko Hōhepa; ā, ka mea, “Ka tāpiritia mai e Ihowā tētahi atu tama māku.”
GEN 30:25 Nā, ka whānau rā a Hōhepa i a Rahera, ka mea a Hākopa ki a Rāpana, “Tukua ahau, kia haere ai ahau ki tōku ake wāhi, ki tōku whenua.
GEN 30:26 Hōmai āku wāhine me āku tamariki i mahi ai ahau ki a koe, ā, ka haere ahau. E mōhio ana hoki koe ki tāku mahi i mahi ai ahau ki a koe.”
GEN 30:27 Nā, ka mea a Rāpana ki a ia, “Ki te mea e manakohia ana ahau e koe, e noho; kua kite hoki ahau nāu i manaakitia ai ahau e Ihowā.”
GEN 30:28 I mea anō ia, “Whakaritea ki ahau te utu mōu, ā ka hoatu e ahau.”
GEN 30:29 Ā, ka mea ia ki a ia, “E mōhio ana koe ki tāku mahinga ki a koe, ki āu kararehe hoki i ahau, tō rātou pēheatanga.
GEN 30:30 I mua atu hoki i ahau he iti āu mea, nā, kua nui noa atu tēnei; ā, kua manaakitia koe e Ihowā ahakoa tahuri ahau ki hea, ki hea. Nā, ināianei āhea rānei ahau mea ai hoki i tētahi mea mō tōku ake whare?”
GEN 30:31 Ā, ka mea tērā, “Ko te aha tāku e hoatu ai ki a koe?” Ā, ka mea a Hākopa, “Kaua e hōmai tētahi mea ki ahau. Ki te meatia mai e koe tēnei mea āku, ka whāngai anō ahau, ka tiaki i āu hipi.
GEN 30:32 Ka tika ahau nā waenganui i tāu kāhui katoa ākuanei, ā, ka wehea i reira ngā mea whai tongitongi katoa, ngā mea purepure, me ngā mea pākākā katoa i roto i ngā hipi, me ngā purepure, me ngā mea whai tongitongi i roto i ngā koati; ā, ko ērā hei utu mōku.
GEN 30:33 Pēnei ka whakatikaia ahau e tōku tika āpōpō ake nei, ina tae atu ki tōu aroaro ki te utu mōku. Ko ngā mea i roto i ngā koati kāhore nei he tongitongi, kāhore he purepure, me ngā mea kāhore e pākākā i roto i ngā hipi, he mea tāhae tēnā nāku.”
GEN 30:34 Nā, ka mea a Rāpana, “Āe, pai tonu kia pēnā me tāu i kī mai nā.”
GEN 30:35 Nā, ka wehea e ia i taua rangi ngā koati toa, ngā mea whakahekeheke, me ngā mea purepure, me ngā koati uha e whai tongitongi ana, me ngā mea purepure, ngā mea he mā tētahi wāhi, me ngā mea pākākā o ngā hipi, ā, hoatu ana ki ngā ringa o āna tama.
GEN 30:36 Nā, ka whakatakiwātia e ia he takiwā i waenganui i a ia, i a Hākopa, kia toru ngā rā e haerea ai; ā, ka whāngai a Hākopa i ngā hipi a Rāpana i mahue iho.
GEN 30:37 Kātahi ka tīkina e Hākopa ētahi rākau māna, he pāpara mata, he aramona, he pereni; ā, tīhorea ana e ia ētahi tīhorenga mā i aua mea, ā, ka meinga kia āta kitea te wāhi mā o ngā rākau.
GEN 30:38 Ā, i whakatūria e ia aua rākau i tīhorea rā ki roto ki ngā hake, ki roto ki ngā waka wai, kia taurite mai ki ngā hipi, ina haere ngā hipi ki te inu; i whakahapūtia hoki i te haerenga ki te inu.
GEN 30:39 Nā, ka whakahapūtia ngā kāhui ki mua i ngā rākau, ā, he whakahekeheke, he mea tongitongi, he purepure ngā kūao i whānau.
GEN 30:40 Nā, ka wehea atu ngā reme e Hākopa, ā, whakaangahia ana e ia ngā kanohi o ngā kāhui ki ngā mea whakahekeheke, ki ngā mea pākākā katoa i roto i te kāhui a Rāpana. Nā, ko āna ake kāhui i wehea e ia ki te whanga, kīhai hoki i tukua ki roto ki te kāhui a Rāpana.
GEN 30:41 Nā, i ngā wā katoa e whakahapūtia ai ngā mea kaha o te kāhui ka whakatūria e Hākopa ngā rākau ki te tirohanga a te kāhui, ki roto ki ngā hake, kia whakahapūtia ai rātou ki waenga i ngā rākau;
GEN 30:42 ā, ki te mea he ngoikore te kāhui, kīhai i whakatūria e ia. Nā, i a Rāpana ngā mea ngoikore, ā, i a Hākopa ngā mea kaha.
GEN 30:43 Nā, ka tino nui haere rawa taua tangata, ā, ka whai kāhui nunui anō ia, me ngā pononga wāhine, me ngā pononga tāne, me ngā kāmera, me ngā kāihe.
GEN 31:1 Ā, i rongo ia i ngā kupu a ngā tama a Rāpana, e kī ana, “Kua riro i a Hākopa ngā mea katoa a tō tātou pāpā; nā ngā mea hoki a tō tātou pāpā i whiwhi ai ia ki tēnei korōria katoa.”
GEN 31:2 Ā, ka titiro a Hākopa ki te mata o Rāpana, nā, kīhai i pērā ki a ia me tō ērā rangi ake.
GEN 31:3 Ā, ka mea a Ihowā ki a Hākopa, “E hoki ki te whenua o ōu mātua, ki ōu whanaunga hoki; ā, ka tata ahau ki a koe.”
GEN 31:4 Nā, ka tono tangata a Hākopa hei karanga i a Rahera rāua ko Rea ki tāna kāhui, ki te pārae,
GEN 31:5 ā, ka mea ia ki a rāua, “E kite ana ahau i te mata o tō kōrua pāpā, kāhore e pērā mai ki ahau me tō ērā rangi ake; otiia i tata mai ki ahau te Atua o tōku pāpā.
GEN 31:6 E mōhio ana anō kōrua, i poto katoa atu tōku kaha ki tāku mahi ki tō kōrua pāpā.
GEN 31:7 Ko tō kōrua pāpā ia i tinihanga ki ahau, ka tekau rawa āna whakaputanga kētanga i ōku utu; otiia kīhai ia i tukua e te Atua kia tūkino i ahau.
GEN 31:8 Mehemea i kōrero pēnei ia, ‘Hei ngā mea whai tongitongi te utu mōu,’ nā, he mea tongitongi katoa ngā whānau o ngā kāhui, ā, mehemea ia i kī pēnei, ‘Hei ngā mea whakahekeheke he utu mōu,’ nā, he whakahekeheke katoa ngā whānau o ngā kāhui.
GEN 31:9 Koia i tangohia ai e Ihowā ngā hipi a tō kōrua pāpā, ā, hōmai ana ki ahau.
GEN 31:10 “Nā, i te wā i whakahapūtia ai te kāhui, ka maranga ake ōku kanohi, ā, ka kite moemoeā ahau, ko ngā toa i ekengia ai ngā kāhui, he whakahekeheke, he mea whai tongitongi, he mea kōtingotingo.
GEN 31:11 I kōrero moemoeā mai anō te anahera a te Atua ki ahau, ‘E Hākopa,’ ā, ka mea atu ahau, ‘Tēnei ahau.’
GEN 31:12 Nā, ka mea mai ia, ‘Tēnā, whakaarahia ake ōu kanohi, ka titiro ki ngā toa katoa e ekeeke ana i ngā kāhui, he whakahekeheke, he whai tongitongi, he kōtingotingo hoki; kua kite hoki ahau i ngā mea katoa i mea nei a Rāpana ki a koe.
GEN 31:13 Ko ahau te Atua o Pētēre, o te wāhi i whakawahi nā koe i te pou, i puaki ai hoki tāu kupu taurangi ki ahau. Kāti, whakatika, haere atu i tēnei whenua, hoki atu ki te whenua i whānau ai koe.’ ”
GEN 31:14 Nā, ka whakahoki a Rahera rāua ko Rea, ka mea ki a ia, “Tērā atu anō ianei tētahi wāhi, tētahi taonga tupu rānei mō māua i roto i te whare o tō māua pāpā?
GEN 31:15 Kāhore ianei māua i te kīia e ia he wāhine kē noa atu? Kua hokona nei hoki māua e ia, kua pau rawa anō i a ia ā māua moni.
GEN 31:16 Mō tātou nei hoki, mō ā tātou tamariki ngā taonga katoa i tangohia nei e te Atua i tō māua pāpā. Nā, tēnā, meatia ngā mea katoa i kīia e te Atua ki a koe.”
GEN 31:17 Nā, ka whakatika a Hākopa, ā, whakaekea ana e ia āna tamariki me āna wāhine ki runga ki ngā kāmera;
GEN 31:18 ā, kāwhakina atu ana e ia āna kararehe katoa, me ōna taonga katoa i whiwhi ai ia, ngā kararehe i whiwhi ai ia, i riro hoki i a ia i Paranārama, ā, haere ana ki a Īhaka, ki tōna pāpā, ki te whenua o Kanaana.
GEN 31:19 Nā, ko Rāpana kua riro ki te kutikuti i āna hipi; kātahi ka tāhaetia e Rahera ngā whakapakoko a tōna pāpā.
GEN 31:20 Nā, tahuti ana a Hākopa i a Rāpana Hīriani, kīhai hoki i whakaaturia tōna omanga ki a ia.
GEN 31:21 Nā, ka oma ia, me āna mea katoa; i whakatika ia, ka whiti i te awa, i ahu hoki tōna mata ki te maunga, ki Kireara.
GEN 31:22 Ā, i te toru o ngā rā ka kōrerotia ki a Rāpana, kua oma a Hākopa.
GEN 31:23 Nā, ka tango ia i ōna tēina hei hoa mōna, ā, ka whai i a ia, e whitu ngā rā ki te ara; ā, mau atu ia i a ia ki Maunga Kireara.
GEN 31:24 Nā, ka puta moemoeā te Atua ki a Rāpana Hīriani i te pō, ka mea ki a ia, “Kia tūpato kei kōrero koe ki a Hākopa, ahakoa pai, ahakoa kino.”
GEN 31:25 Nā, ka mau a Hākopa i a Rāpana. Nā tērā kua whakatūria e Hākopa tōna tēneti ki te maunga. Heoi, whakatūria ana hoki e Rāpana rātou ko ōna tēina ki Maunga Kireara.
GEN 31:26 Nā, ka mea a Rāpana ki a Hākopa, “He mahi aha tāu, i tahuti mai nei koe i ahau, i kāhaki mai nei hoki i āku tamāhine, ānō he pārau nā te hoari?
GEN 31:27 He aha i hunā ai e koe tōu omanga, i tahuti mai ai i ahau? Ā, kīhai i kōrero mai ki ahau, kia tukua ai koe e ahau i runga i te hari, i ngā waiata, i te timipera, i te hāpa.
GEN 31:28 Kīhai anō ahau i tukua e koe kia kihi i āku tama, i āku tamāhine? He mahi pōauau tēnei mahi āu.
GEN 31:29 He kaha kei tōku ringa hei whakatupu kino i a koutou; otiia kua kōrero mai te Atua o tō koutou pāpā ki ahau inapō, kua mea mai, ‘Kia tūpato kei kōrero atu koe, ahakoa pai, ahakoa kino, ki a Hākopa.’
GEN 31:30 Nā, ahakoa i whakamatea e koe tōu haere, nō te mea i koroa e koe te whare o tōu pāpā, he aha rā koe i tāhae ai i ōku atua?”
GEN 31:31 Nā, ka whakahoki a Hākopa, ka mea ki a Rāpana, “Nō te mea hoki i wehi ahau; i mea hoki ahau, ‘Kei tangohia e koe āu tamāhine i ahau.’
GEN 31:32 Ko te tangata e kitea e koe ōu atua i a ia, kaua ia e whakaorangia; tirohia iho e koe i te aroaro o ō tāua tēina ko ēhea mea āu kei ahau, ka tango atu ai māu.” Kīhai hoki a Hākopa i mōhio, kua tāhaetia aua mea e Rahera.
GEN 31:33 Nā, ka haere a Rāpana ki te tēneti o Hākopa, ki te tēneti hoki o Rea, ki te tēneti anō hoki o ngā pononga wāhine tokorua; ā, kīhai i kitea. Ā, ka puta atu ia i te tēneti o Rea, ā, ka tomo atu ki te tēneti o Rahera.
GEN 31:34 Nā, tērā kua tīkina ngā whakapakoko e Rahera, kua whaongia ki roto ki te nohoanga kāmera, ā, nohoia iho e ia. Nā, poto katoa te tēneti te whāwhā e Rāpana, ā, kīhai i kitea.
GEN 31:35 Nā, ka mea ia ki tōna pāpā, “Kei riri mai tōku ariki mōku e kore e āhei te whakatika ake ki tōu aroaro; nō te mea ko tō te wāhine mate tēnei kei ahau.” Nā, rapu noa ia, kīhai i kitea ngā whakapakoko.
GEN 31:36 Nā, ka riri a Hākopa, ka ngangare ki a Rāpana; ā, ka oho a Hākopa, ka mea ki a Rāpana, “He aha tōku hara? He aha tōku hē, i tākare ai koe ki te whai mai i ahau?
GEN 31:37 Kua whāwhākia nei e koe āku mea katoa, he aha te mea i kitea e koe o ngā mea katoa o tōu whare? Hōmai ki konei ki te aroaro o ōku tēina, o ōu tēina, mā rātou e whakariterite tā tāua whakawā.
GEN 31:38 “Ka rua tekau ēnei tau ōku ki a koe; kīhai i whānau whakatahe āu hipi, āu koati, kīhai anō i kainga e ahau ngā hipi toa o tāu kāhui.
GEN 31:39 Ko te mea i haea e ngā kīrehe mohoao kīhai i kawea e ahau ki a koe; nāku anō tēnā i whakautu; i rapu utu anō koe mō tēnā i tōku ringa, ahakoa mō te mea i tāhaetia i te awatea, mō te mea rānei i tāhaetia i te pō.
GEN 31:40 Ko tāku hanga tēnā: i te awatea i pau ahau i te matewai, i te pō i te huka; ā, tūrere ana te moe i ōku kanohi.
GEN 31:41 “Ka rua tekau ēnei tau ōku ki tōu whare; kotahi tekau mā whā ngā tau i mahi ai ahau ki a koe mō āu tamāhine tokorua, e ono tau hoki mō āu hipi; ā, ka tekau āu whakaputanga kētanga i ngā utu mōku.
GEN 31:42 Me i kāhore i tata mai ki ahau te Atua o tōku pāpā, te Atua o Āperahama, te wehi hoki o Īhaka, ina kua tonoa kautia mai ahau e koe. I kite mai te Atua i tōku tūkinotanga, i te mahi hoki a ōku ringa, i rīria ai koe e ia inapō.”
GEN 31:43 Nā, ko te whakahokinga a Rāpana, ko te meatanga ki a Hākopa, “He tamāhine nāku ēnei tamāhine, he tamariki anō nāku ēnei tamariki, he kāhui anō hoki nāku ēnei kāhui, ā, ko ngā mea katoa e kite nei koe, nāku. Ā, he aha tāku e mea ai ākuanei ki ēnei tamāhine āku, ki a rāua tamariki rānei i whānau nei i a rāua?
GEN 31:44 Nā, tēnā, haere mai, kia whakarite kawenata tāua, a koe me ahau; ā, ka waiho hei kaiwhakaatu ki a tāua.”
GEN 31:45 Nā, ka tīkina tētahi kōhatu e Hākopa, ā, whakaarahia ake e ia hei pou.
GEN 31:46 Ā, ka mea a Hākopa ki ōna tēina, “Kohia mai he kōhatu.” Nā, ka tīkina atu e rātou ētahi kōhatu, ka hangā he pūranga. Ā, kai ana rātou ki reira ki runga ki te pūranga.
GEN 31:47 Ā, huaina iho taua mea e Rāpana ko Iekarahaharuta; nā Hākopa ia i hua ko Kareere.
GEN 31:48 Nā, ka mea a Rāpana, “Hei kaiwhakaatu tēnei pūranga i tēnei rā ki a tāua.” Nā reira i huaina ai tōna ingoa ko Kareere;
GEN 31:49 ko Mihipa hoki; i mea hoki ia, “Mā Ihowā e titiro mai ki a tāua, ina matara atu tāua i a tāua.
GEN 31:50 Ki te tūkino koe i āku tamāhine, ki te tango rānei i ētahi wāhine kē atu i āku tamāhine, kāhore he tangata i a tāua; kia mahara, hei kaititiro te Atua ki ahau, ki a koe.”
GEN 31:51 I mea anō a Rāpana ki a Hākopa, “Titiro ki tēnei pūranga, ā, titiro hoki ki tēnei pou i waiho iho nei e ahau i waenganui i a tāua.
GEN 31:52 Hei kaiwhakaatu tēnei pūranga, hei kaiwhakaatu anō hoki tēnei pou, mōku kei haere ki tua atu o tēnei pūranga ki a koe, mōu hoki kei haere ake ki ahau ki tua o tēnei pūranga, o tēnei pou hoki, mō te kino.
GEN 31:53 Mā te Atua o Āperahama, mā te Atua hoki o Nahora, mā te Atua o tō rāua pāpā, e whakarite tā tāua whakawā.” Nā, ka oatitia e Hākopa te wehi o tōna pāpā, o Īhaka.
GEN 31:54 Nā, patua ana e Hākopa he patunga tapu ki runga ki te maunga, ā, karangatia ana e ia ōna tēina ki te kai taro. Nā, ka kai taro rātou, ā, ka moe ki te maunga.
GEN 31:55 Ā, ka maranga wawe a Rāpana i te ata, ka kihi i āna tama, i āna tamāhine, ka manaaki hoki i a rātou; nā, haere ana a Rāpana, hoki ana ki tōna wāhi.
GEN 32:1 Nā, haere ana a Hākopa i tōna huarahi, ā, ka tūtaki ki a ia ngā anahera a te Atua.
GEN 32:2 Ā, ka mea a Hākopa i tōna kitenga i a rātou, “Ko te ope tēnei a te Atua!” Nā, huaina iho e ia te ingoa o tēnā wāhi ko Mahanaima.
GEN 32:3 Nā, ka tono tāngata atu a Hākopa ki mua i a ia ki a Ēhau, ki tōna tuakana, ki te whenua o Heira, ki te whenua o Ēroma.
GEN 32:4 Ka ako hoki ia ki a rātou, ka mea, “Kia pēnei he kōrero atu mā koutou ki tōku ariki, ki a Ēhau: ‘E pēnei ana te kupu a tāu pononga, a Hākopa, i a Rāpana ahau e noho ana ā tae mai ki tēnei wā;
GEN 32:5 he kau anō āku, he kāihe, he hipi, he pononga tāne, he pononga wāhine. Ā, kua tono tāngata nei ahau ki te kōrero ki tōku ariki, kia manakohia ai ahau e koe.’ ”
GEN 32:6 Nā, ka hoki mai ngā karere ki a Hākopa, ka mea, “I tae atu mātou ki tōu tuakana, ki a Ēhau, ā, tēnei anō ia te haere mai nei ki te whakatau i a koe, rātou tahi ko ngā tāngata e whā rau.”
GEN 32:7 Nā, he nui te wehi o Hākopa, ka mānukanuka; nā, ka wehea e ia ōna tāngata, me ngā hipi, me ngā kau, me ngā kāmera, kia rua ngā rōpū;
GEN 32:8 i mea hoki ia, “Ki te tae mai a Ēhau ki te rōpū tuatahi, ā, ka patua e ia, nā, ka mawhiti te rōpū i mahue.”
GEN 32:9 Nā, ka mea a Hākopa, “E te Atua o tōku pāpā, o Āperahama, e te Atua o tōku pāpā, o Īhaka, e Ihowā, nāu nei te kupu ki ahau, ‘Hoki atu ki tōu whenua, ki ōu whanaunga hoki, ā, ka pai tāku mahi ki a koe.’
GEN 32:10 He iti rawa ahau, he nui āu arohatanga katoa, me te pono katoa hoki i whakaputaina mai e koe ki tāu pononga; i whiti mai hoki ahau me tōku tokotoko i tēnei Horano; ā, ka rua nei ōku rōpū.
GEN 32:11 Tēnā rā, whakaorangia ahau i te ringa o tōku tuakana, i te ringa o Ēhau; e wehi ana hoki ahau i a ia, kei haere mai ia ki te patu i ahau, i te whaea rātou tahi ko ngā tamariki.
GEN 32:12 I mea mai nei hoki koe, ‘Inā, ka pai tāku mahi ki a koe, ā, ka meinga e ahau ōu uri kia rite ki te onepū o te moana, e kore nei e taea te tatau i te tini.’ ”
GEN 32:13 Ā, i moe ia ki reira i taua pō; ā, i tangohia e ia i roto i ngā mea i pono ki tōna ringa he hākari mā Ēhau, mā tōna tuakana:
GEN 32:14 e rua rau ngā koati uha, e rua tekau hoki ngā koati toa, e rua rau ngā hipi uha, e rua tekau ngā hipi toa,
GEN 32:15 e toru tekau ngā kāmera whai waiū, me ā rātou kūao, e whā tekau ngā kau, kotahi tekau hoki ngā pūru, e rua tekau ngā kāihe uha, me ngā kūao hoki kotahi tekau.
GEN 32:16 Ā, ka hoatu e ia ki ngā ringa o āna pononga tēnei kāhui, tēnei kāhui, motumotu rawa; ka mea ia ki āna pononga, “Haere i mua i ahau, kia whai takiwā tētahi kāhui, tētahi kāhui.”
GEN 32:17 I ako anō ia i te tuatahi, i mea: “E tūtaki a Ēhau, tōku tuakana, i a koe, e mea, ‘Nā wai koe? Ā, e haere ana koe ki hea? Ā, nā wai ēnei mea i tōu aroaro?’
GEN 32:18 Nā, ka mea atu koe, ‘Nā tāu pononga, nā Hākopa; i hōmai e ia hei hākari mā tōku ariki, mā Ēhau, ā, tēnei anō hoki ia kei muri i a mātou.’ ”
GEN 32:19 He pērā anō tāna ako ki te tuarua, ki te tuatoru hoki, ki ngā tāngata katoa anō hoki i haere i muri i ngā kāhui, i mea ia: “Ko te tikanga tēnei mō ngā kupu e kōrero ai koutou ki a Ēhau, ina tūtaki ki a ia,
GEN 32:20 ā, me kī atu e koutou, ‘Nā, tēnei anō hoki tāu pononga, a Hākopa, kei muri i a mātou.’ ” I mea hoki ia, “Me whakamārie ia e ahau ki te hākari e haere ana i mua i ahau, ā muri iho ka kite ahau i tōna kanohi; tērā pea ia e manako ki ahau.”
GEN 32:21 Nā, ka haere atu te hākari i mua i a ia; ā, ko ia i moe i taua pō i te puni.
GEN 32:22 Ā, i whakatika ia i taua pō, i tango hoki i āna wāhine tokorua, me āna wāhine pononga tokorua, me āna tamariki tekau mā tahi, ā, ka whiti i te whitinga i Iapoko.
GEN 32:23 Ā, i tango ia i a rātou, i mea hoki kia whiti i te awa, ā, i tukua atu e ia kia whiti ngā mea i a ia.
GEN 32:24 Ā, i mahue iho a Hākopa ko ia anake; ā, nōnoke ana rāua ko tētahi tangata, ā, tākiri noa te ata.
GEN 32:25 Ā, nō te kitenga o tērā kīhai ia i taea e ia, ka pā ia ki te ateatenga o tōna hūhā; ā, ka takoki te ateatenga o te hūhā o Hākopa i a rāua e nōnoke ana.
GEN 32:26 Nā, ka mea ia, “Tukua ahau, kua tākiri hoki te ata.” Ā, ka mea ia, “E kore koe e tukua e ahau, kia manaakitia rā anō ahau e koe.”
GEN 32:27 Ā, ka mea ia, “Ko wai tōu ingoa?” Ā, ka mea ia, “Ko Hākopa.”
GEN 32:28 Ā, ka mea ia, “Heoi anō kīanga ko Hākopa tōu ingoa, engari ko Īharaira. Nō te mea kua tohe koe ki te Atua, ki te tangata hoki, ā, i a koe anō te mutunga.”
GEN 32:29 Nā, ka ui a Hākopa, ka mea, “Tēnā koa, kōrerotia mai tōu ingoa.” Anō rā ko ia, “He aha tōku ingoa i uia ai e koe?” Ā, ka manaaki ia i a ia i reira.
GEN 32:30 Nā, huaina ana e Hākopa te ingoa o taua wāhi ko Peniere, i mea hoki ia, “Mōku i titiro ki te Atua, he kanohi, he kanohi, ā, kei te ora nei ahau.”
GEN 32:31 Ā, i tara mai te rā ki a ia i a ia ka whiti i Penuere, kei te totitoti anō tōna hūhā.
GEN 32:32 Koia ngā tama a Īharaira tē kai ai i te uaua i memenge, arā i tērā i te ateatenga o te hūhā, ā tae noa ki tēnei rā. Nō te mea hoki i pā ia ki te ateatenga o te hūhā o Hākopa, ki te uaua i memenge.
GEN 33:1 Ā, ka maranga ake ngā kanohi o Hākopa, nā, ka titiro atu ia, ā, ko Ēhau e haere mai ana, rātou ko ngā tāngata e whā rau. Nā, ka wehea e ia ngā tamariki ki a Rea, ki a Rahera, ki ngā pononga wāhine hoki tokorua.
GEN 33:2 I makā anō e ia ngā pononga wāhine me ā rāua tamariki ki mua, ko Rea rātou ko āna tamariki ki muri mai, ā, ko Rahera rāua ko Hōhepa ki muri rawa.
GEN 33:3 Nā, ko ia i haere ki mua i a rātou, ā, e whitu ōna pikonga ki te whenua, ā, whakatata noa ia ki tōna tuakana.
GEN 33:4 Nā, ka rere a Ēhau ki te whakatau i a ia, ā, ka awhi i a ia, ka hinga hoki ki runga ki tōna kakī, ka kihi i a ia; nā, ka tangi rāua.
GEN 33:5 Nā, ka maranga ōna kanohi, ka kite ia i ngā wāhine, rātou ko ngā tamariki; ā, ka mea, “Ko wai ēnei i a koe nei?” Ā, ka mea ia, “Ko ngā tamariki, ko ngā ohaohatanga a te Atua ki tāu pononga.”
GEN 33:6 Nā, ka whakatata ngā pononga wāhine, rāua ko ā rāua tamariki, ā, ka piko iho.
GEN 33:7 Nā, ka whakatata hoki a Rea, rātou ko āna tamariki, ā, ka piko iho; ā muri iho ka whakatata a Hōhepa rāua ko Rahera, ā, ka piko iho rāua.
GEN 33:8 Ā, ka mea ia, “Hei aha māu tēnei rōpū katoa i tūtaki nei ki ahau?” Anō rā ko ia, “Kia manakohia mai ai ahau e tōku ariki.”
GEN 33:9 Ā, ka mea a Ēhau, “He nui kei ahau; waiho anō i a koe tāu, e tōku teina.”
GEN 33:10 Anō rā ko Hākopa, “Kaua rā; mehemea kua manakohia mai ahau e koe, nā, me tango e koe te hākari a tōku ringa. Ka kite atu nei hoki ahau i tōu kanohi, me te mea e titiro atu ana ki te kanohi o te Atua, ā, ka pai mai anō koe ki ahau.
GEN 33:11 Tangohia rā tāku manaaki i kawea atu nā ki a koe; kua atawhai mai nei hoki te Atua ki ahau, ā, e hua ana āku mea.” Nā, ka tohe ia ki a ia, ā, ka tangohia e ia.
GEN 33:12 Nā, ka mea ia, “Hāpainga, tātou ka haere, me haere anō ahau i mua i a koe.”
GEN 33:13 Ā, ka mea ia ki a ia, “E mōhio ana tōku ariki he kahakore ngā tamariki, ā, kei ahau hoki ngā kāhui me ngā kau whai kūao. Kia kotahi noa rangi e akiakina ana rātou, nā, ka mate katoa ngā kāhui.
GEN 33:14 Ko koe, ko tōku ariki, e haere i mua i tāna pononga; ā, ka rite tāku āta arataki ki te haere a ngā mea i tōku aroaro nei, ki te haere hoki a ngā tamariki, ā, kia tae rā anō ahau ki tōku ariki, ki Heira.”
GEN 33:15 Nā, ka mea a Ēhau, “Kāti, me waiho e ahau ki a koe ētahi o ngā tāngata i ahau nei.” Ā, ka mea ia, “Hei aha koa? Kia manakohia mai ahau e tōku ariki.”
GEN 33:16 Nā, ka hoki a Ēhau i taua rangi anō, ka haere ki Heira.
GEN 33:17 Ā, ka tūria atu e Hākopa ki Hukota, ka hangā e ia tētahi whare mōna, i hangā anō hoki e ia ētahi tīhokahoka mō āna kararehe. Nā reira i huaina ai te ingoa o taua wāhi ko Hukota.
GEN 33:18 Ā, ka tae a Hākopa ki Hareme, ki tētahi pā o Hekeme, ki te whenua o Kanaana, i tōna haerenga mai i Paranārama; ā, ka noho ki te ritenga atu o te pā.
GEN 33:19 Nā, ka hokona e ia te wāhi whenua i tū ai tōna tēneti i te ringa o ngā tama a Hāmora, pāpā o Hekeme, ki ngā moni kotahi rau.
GEN 33:20 Nā, ka whakatūria e ia tētahi āta ki reira, ā, huaina iho e ia ko Erērohe Īharaira.
GEN 34:1 Nā, ka haere atu a Rina, tamāhine a Rea, i whānau nei i a rāua ko Hākopa, kia kite i ngā tamāhine o te whenua.
GEN 34:2 Ā, ka kite a Hekeme, tama a Hāmora Hiwi, rangatira o taua whenua, i a ia; ā, ka hopukia ia e ia, ā, ka takoto ki a ia, ka whakaiti hoki i a ia.
GEN 34:3 Nā, ka piri tōna wairua ki a Rina, tamāhine a Hākopa, ā, ka aroha ia ki te kōtiro rā, ka whakamārie hoki i te ngākau o taua kōtiro.
GEN 34:4 Nā, ka kōrero a Hekeme ki a Hāmora, ki tōna pāpā, ka mea, “Tīkina te kōtiro nei hei wahine māku.”
GEN 34:5 Nā, i rongo a Hākopa kua pōkea a Rina, tāna tamāhine, e ia; ā, i te pārae āna tama, i āna kararehe. Nā, ka whakarongo puku a Hākopa, kia tae mai rā anō rātou.
GEN 34:6 Nā, ka haere a Hāmora pāpā o Hekeme ki a Hākopa ki te kōrero ki a ia.
GEN 34:7 Nā, ka haere mai ngā tama a Hākopa i te pārae, i tō rātou rongonga; ā, ka matangerengere aua tāngata, ka tino riri hoki, mō tāna mahi wairangi i roto i a Īharaira, i a ia i takoto rā ki te tamāhine a Hākopa; he mahi hoki kīhai i tika.
GEN 34:8 Nā, ka kōrero a Hāmora ki a rātou, ka mea, “Ko Hekeme, ko tāku tama, piri tonu tōna wairua ki tā koutou tamāhine. Hōmai ia ki a ia, nē? hei wahine.
GEN 34:9 Ā, kia mārenatia tātou ki a tātou; hōmai ā koutou tamāhine ki a mātou, ā, me tango hoki ā mātou tamāhine mā koutou.
GEN 34:10 Ā, me noho koutou ki a mātou; ā, ka takoto atu te whenua i mua i a koutou; e noho i reira, ka hokohoko i reira, ka whakatupu rawa mā koutou i reira.”
GEN 34:11 Ā, ka mea a Hekeme ki tōna pāpā rātou ko ōna tungāne, “Kia manakohia mai ahau e koutou, ā, ko tā koutou e kī mai ai ki ahau ka hoatu e ahau.
GEN 34:12 Ahakoa pēhea te nui o te tāpākūhā me te hākari e meatia mai e koutou ki ahau, ka hoatu e ahau tā koutou e kī mai ai ki ahau; otirā hōmai te kōtiro hei wahine māku.”
GEN 34:13 Nā, ka whakahoki tinihanga, ngā tama a Hākopa ki a Hekeme rāua ko Hāmora, ko tōna pāpā, i mea hoki rātou mō Rina, mō tō rātou tuahine, whakapokea e ia;
GEN 34:14 ka mea rātou ki a rāua, “E kore tēnei mea e taea e mātou te mea, te hoatu i tō mātou tuahine ki te tangata kāhore i kotia; he tāwainga hoki tēnā mō mātou.
GEN 34:15 Tēnei ia te mea e whakaae ai mātou ki a koutou. Ki te pēneitia koutou me mātou, ki te kotia ō koutou tāne katoa.
GEN 34:16 Kātahi ka hoatu e mātou ā mātou tamāhine ki a koutou, ka tangohia mai hoki ā koutou tamāhine mā mātou, ā, ka noho mātou i roto i a koutou, ā, ka meinga tātou hei iwi kotahi.
GEN 34:17 Ki te kāhore ia koutou e rongo ki tā mātou, kia kotia koutou; nā, ka tango mātou i tā mātou tamāhine, ka haere.”
GEN 34:18 Nā, i pai ā rātou kupu ki a Hāmora, ki a Hekeme hoki, ki te tama a Hāmora,
GEN 34:19 ā, kīhai i whakaroa taua tamaiti ki te mea i taua mea, he matenui hoki nōna ki te tamāhine a Hākopa. He nui atu anō ia i ngā tāngata katoa o te whare o tōna pāpā.
GEN 34:20 Nā, ka haere a Hāmora rāua ko Hekeme, ko tāna tama, ki te kūwaha o tō rāua pā, ā, ka kōrero ki ngā tāngata o tō rāua pā, ka mea,
GEN 34:21 “He hunga āta noho tēnei ki a tātou nō reira tukua rātou kia noho ki tēnei whenua, kia hokohoko ki konei. Nā, ko te whenua nei, nanā, he nui noa atu mō rātou; me tango mai e tātou ā rātou tamāhine hei wāhine mā tātou, ka hoatu hoki i ā tātou tamāhine ki a rātou.
GEN 34:22 Kotahi anō ia te mea e whakaae mai ai aua tāngata ki a tātou, kia noho ki a tātou, kia waiho hei iwi kotahi, ki te kotia ō tātou tāne katoa, ki te pērātia me rātou kua kotia nei.
GEN 34:23 Ko ā rātou kararehe, ko ā rātou taonga, me ā rātou kīrehe katoa, e kore ianei ēnā e riro mai i a tātou? Erangi me whakaae atu tātou ki a rātou, ā, ka noho rātou ki a tātou.”
GEN 34:24 Ā, i whakarongo ki a Hāmora rāua ko Hekeme, ko tāna tama, ngā tāngata katoa i haere atu i te kūwaha o tōna pā; ā, i kotia katoatia ngā tāne, ngā tāngata katoa i haere atu i te kūwaha o tōna pā.
GEN 34:25 Ā, i te toru o ngā rā, i a rātou e mamae ana, nā, ka tango ngā tama tokorua a Hākopa, a Himiona rāua ko Rīwai, ngā tungāne o Rina, i tāna hoari, i tāna hoari, ā, haere ohorere ana ki te pā, ā, patua iho e rāua ngā tāne katoa.
GEN 34:26 I patua anō hoki e rāua a Hāmora rāua ko Hekeme, ko tāna tama ki te mata o te hoari, ā, tangohia ana e rāua a Rina i roto i te whare o Hekeme, ā, haere ana.
GEN 34:27 Nā, ka haere ngā tama a Hākopa ki te hunga i patua, ā, pāhuatia ana e rātou te pā, mō tō rātou tuahine i whakapokea e rātou.
GEN 34:28 I tangohia e rātou ā rātou hipi, ā rātou kau, ā rātou kāihe, me ngā mea hoki i te pā, me ngā mea anō hoki i te māra;
GEN 34:29 me ā rātou taonga katoa, ā, whakaraua ana ā rātou tamariki katoa, me ā rātou wāhine, i pāhuatia anō hoki ngā mea katoa i roto i te whare.
GEN 34:30 Nā, ka mea a Hākopa ki a Himiona rāua ko Rīwai, “Ka raru ahau i a kōrua, ka meinga kia piro i roto i ngā tāngata whenua, i roto i ngā Kanaani rātou ko ngā Perihi, ā, ka huihui mai rātou ki ahau, ki te hunga tokoiti, ā, ka patua ahau; ā, ka ngaro ahau, ahau me tōku whare.”
GEN 34:31 Ā, ka mea rāua, “Kia pērātia koia e ia tō mātou tuahine me te wahine kairau?”
GEN 35:1 Nā, ka mea te Atua ki a Hākopa, “Whakatika, haere ake ki Pētēre, ki reira noho ai; ka hanga hoki ki reira i tētahi āta mā te Atua i puta mai nei ki a koe, i tōu rerenga mai i te aroaro o Ēhau, o tōu tuakana.”
GEN 35:2 Kātahi ka mea a Hākopa ki tōna whare, ki ōna tāngata katoa hoki, “Whakarērea atu ngā atua kē i roto i a koutou, e pure i a koutou, ā, kākahuria ētahi kākahu kē mō koutou.
GEN 35:3 Ā, whakatika tātou, ka haere ake ki Pētēre; ā, ka hangā e ahau ki reira tētahi āta mā te Atua i whakarongo mai nei ki ahau i te rā i pōuri ai ahau, i tata anō hoki ki ahau i te huarahi i haere ai ahau.”
GEN 35:4 Nā, ka hōmai e rātou ki a Hākopa ngā atua kē katoa i roto i tō rātou ringa, me ngā whakakai i ō rātou taringa; ā, ka hunā e Hākopa ki raro i te oki i Hekeme.
GEN 35:5 Nā, ka tūria atu e rātou; i runga anō te wehi o te Atua i ngā pā i tētahi taha i tētahi taha o rātou, ā, kīhai rātou i whai i ngā tama a Hākopa.
GEN 35:6 Heoi, ka tae a Hākopa ki Rutu, ki tērā hoki i te whenua o Kanaana, (arā ki Pētēre), a ia me tōna nuinga katoa.
GEN 35:7 Ā, ka hangā e ia he āta ki reira, ā, huaina iho e ia taua wāhi ko Erepetēre. Nō te mea hoki i puta mai te Atua ki a ia i reira, i tōna rerenga i te aroaro o tōna tuakana.
GEN 35:8 Nā, ka mate a Tepora kaiwhakangote o Ripeka, ā, ka tanumia ki raro i Pētēre, ki raro i te oki; ā, ka huaina tō reira ingoa ko Aronipakuta.
GEN 35:9 I puta mai anō te Atua ki a Hākopa i tōna haerenga mai i Paranārama, i manaaki hoki i a ia.
GEN 35:10 Ā, ka mea te Atua ki a ia, “Ko Hākopa tōu ingoa; e kore tōu ingoa e huaina ko Hākopa ā muri ake nei, engari ko Īharaira hei ingoa mōu.” Nā, huaina ana e ia tōna ingoa ko Īharaira.
GEN 35:11 I mea anō te Atua ki a ia, “Ko ahau te Atua Kaha Rawa: kia hua koe, kia tini; kia puta he iwi, he huinga iwi anō hoki i roto i a koe, kia puta anō hoki ngā kīngi i roto i tōu hope.
GEN 35:12 Ko te whenua hoki i hoatu e ahau ki a Āperahama rāua ko Īhaka, ka hoatu anō e ahau ki a koe, ka hoatu anō hoki e ahau tēnā whenua ki ōu uri i muri i a koe.”
GEN 35:13 Nā, ka mawehe atu te Atua i a ia ki runga, i te wāhi i kōrero ai ia ki a ia.
GEN 35:14 Nā, ka whakatūria e Hākopa he pou ki te wāhi i kōrero ai ia ki a ia, he pou kōhatu; ā, ka ringihia e ia he ringihanga ki runga, ā, i ringihia hoki e ia he hinu ki runga.
GEN 35:15 Ā, huaina iho e Hākopa te ingoa o te wāhi i kōrero ai te Atua ki a ia, ko Pētēre.
GEN 35:16 Nā, ka hāpainga atu e rātou i Pētēre; ā, ka whano ka tae rātou ki Ēparata. Nā, ka whakawhānau a Rahera, ka whakauaua hoki tōna whānautanga.
GEN 35:17 Ā, i te mea ka whakauaua tōna whānautanga, ka mea te kaiwhakawhānau ki a ia, “Kaua e wehi; tā te mea he tama anō tēnei āu.”
GEN 35:18 Nā, i te mea ka haere tōna wairua, (i mate hoki ia), ka huaina e ia tōna ingoa ko Penoni; nā tōna pāpā ia i hua ko Pineamine.
GEN 35:19 Nā, ka mate a Rahera, ka tanumia ki te ara ki Ēparata, (koia nei a Pēterehema),
GEN 35:20 ā, ka whakatūria e Hākopa he pou ki runga ki tōna rua. Ko te pou ia o te rua o Rahera ā tae noa ki tēnei rā.
GEN 35:21 Nā, ka tūria atu e Īharaira, ā, ka whakaarahia e ia tōna tēneti ki tua atu i te pourewa i Erara.
GEN 35:22 Ā, i a Īharaira e noho ana i taua whenua, nā, ka haere a Reupena ka takoto ki a Piriha wahine iti a tōna pāpā; ā, ka rongo a Īharaira. Nā, kotahi tekau mā rua ngā tama a Hākopa:
GEN 35:23 Ko ngā tama a Rea: ko Reupena, (ko te mātāmua a Hākopa), ko Himiona, ko Rīwai, ko Hūrā, ko Ihākara, ko Hepurona.
GEN 35:24 Ko ngā tama a Rahera: ko Hōhepa rāua ko Pineamine.
GEN 35:25 Ko ngā tama a Piriha, pononga wahine a Rahera: ko Rāna rāua ko Napatari.
GEN 35:26 Ko ngā tama a Tiripa, pononga wahine a Rea: ko Kara rāua ko Āhera. Ko ngā tama ēnei a Hākopa i whānau nei māna ki Paranārama.
GEN 35:27 Nā, kua tae a Hākopa ki a Īhaka, ki tōna pāpā, ki Mamere, ki te pā o Arapa, arā ki Heperona, ki te wāhi hoki i noho ai a Āperahama rāua ko Īhaka.
GEN 35:28 Ā, kotahi rau e waru tekau tau ngā rā o Īhaka.
GEN 35:29 Nā, ka hemo a Īhaka, ka mate, ka kohia atu ki tōna iwi, he koroheke, kua maha hoki ōna rā; ā, nā āna tama, nā Ēhau rāua ko Hākopa ia i tanu.
GEN 36:1 Nā, ko ngā whakatupuranga ēnei o Ēhau, arā o Ēroma.
GEN 36:2 I tangohia āna wāhine e Ēhau i roto i ngā tamāhine o Kanaana: a Āraha, tamāhine a Erona Hiti, a Ahoripama, tamāhine a Anaha, tamāhine a Tipeona Hiwi;
GEN 36:3 rātou ko Pahemata, tamāhine a Ihimaera, tuahine o Nepaioto.
GEN 36:4 Ā, whānau ake tā Āraha rāua ko Ēhau ko Eripāta; whānau ake tā Pahemata ko Reuere;
GEN 36:5 ā, whānau ake a Ahoripama, ko Ieuhu, ko Iārama, ko Koraha. Ko ngā tama ēnei a Ēhau i whānau nei māna ki te whenua o Kanaana.
GEN 36:6 Nā, ka tangohia e Ēhau āna wāhine, āna tama, āna tamāhine, ngā tāngata katoa o tōna whare, āna kararehe, āna kīrehe katoa, āna taonga katoa i whiwhi ai ia ki te whenua o Kanaana, ā, haere atu ana ki tētahi whenua kē atu i tōna teina i a Hākopa.
GEN 36:7 He nui rawa hoki nō ā rāua taonga, tē noho tahi ai rāua; kīhai hoki te whenua i noho manene nei rāua i nui hei nohoanga mō rāua, i ā rāua kararehe hoki.
GEN 36:8 Nā, ka noho a Ēhau ki Maunga Heira; ko Ēroma a Ēhau.
GEN 36:9 Ā, ko ngā whakatupuranga ēnei a Ēhau pāpā o ngā Ēromi i Maunga Heira.
GEN 36:10 Ko ngā ingoa ēnei o ngā tama a Ēhau: ko Eripāta tama a Āraha wahine a Ēhau ko Reuere tama a Pahemata wahine a Ēhau.
GEN 36:11 Ā, ko ngā tama a Eripāta, ko Temana, ko Ōmara, ko Tepo, ko Katama, ko Kenaha.
GEN 36:12 Nā, ko Timina he wahine iti nā Eripāta tama a Ēhau; ā, whānau ake tā rāua ko Eripāta, ko Amareke. Ko ngā tama ēnei a Āraha wahine a Ēhau.
GEN 36:13 Ko ngā tama hoki ēnei a Reuere: ko Nahata, ko Heraha, ko Hamaha, ko Miha; ko ngā tama ēnei a Pahemata wahine a Ēhau.
GEN 36:14 Nā, ko ngā tama ēnei a Ahoripama a Anaha, tamāhine a Tipeona, a te wahine a Ēhau: ā, whānau ake ā rāua ko Ēhau ko Ieuhu, ko Iārama, ko Koraha.
GEN 36:15 Ko ēnei o ngā tama a Ēhau i waiho hei ariki. Ko ngā tama a Eripāta mātāmua a Ēhau: ko Temana ariki, ko Ōmara ariki, ko Tepo ariki, ko Kenaha ariki,
GEN 36:16 ko Koraha ariki, ko Katama ariki, ko Amareke ariki. Nā Eripāta ēnei ariki i te whenua o Ēroma; ko ngā tama ēnei a Āraha.
GEN 36:17 Ā, ko ngā tama ēnei a Reuere tama a Ēhau: ko Nahata ariki, ko Heraha ariki, ko Hamaha ariki, ko Miha ariki. Nā Reuere ēnei ariki i te whenua o Ēroma; ko ngā tama ēnei a Pahemata wahine a Ēhau.
GEN 36:18 Ko ngā tama hoki ēnei a Ahoripama, wahine a Ēhau: ko Ieuhu ariki, ko Iārama ariki, ko Koraha ariki. Nā Ahoripama ēnei ariki, nā te tamāhine a Anaha, nā te wahine a Ēhau.
GEN 36:19 Ko ngā tama ēnei a Ēhau, arā a Ēroma, ā, ko ēnei anō ō rātou ariki.
GEN 36:20 Ko ngā tama ēnei a Heira Hori, ko ngā tāngata whenua hoki: ko Rōtana, ko Hopara, ko Tipeona, ko Anaha,
GEN 36:21 ko Rīhona, ko Ētere, ko Rīhana. Ko ngā ariki ēnei o ngā Hori, ko ngā tama hoki a Heira i te whenua o Ēroma.
GEN 36:22 Ko ngā tama a Rōtana, ko Hori, ko Hēmama; ā, ko Timina te tuahine o Rōtana.
GEN 36:23 Ko ngā tama hoki ēnei a Hopara: ko Arawana, ko Manahata, ko Ēpara, ko Hepo, ko Ōnama.
GEN 36:24 Ko ngā tama hoki ēnei a Tipeona: ko Aiaha rāua ko Anaha. (Nā tēnei Anaha i kite ngā puia i te koraha, i a ia e whāngai ana i ngā kāihe a Tipeona, a tōna pāpā.)
GEN 36:25 Ko ngā tama hoki ēnei a Anaha: ko Rīhona, ko Ahoripama tamāhine a Anaha.
GEN 36:26 Ā, ko ngā tama ēnei a Rīhona; ko Hemerana, ko Ehepana, ko Itirana, ko Kerana.
GEN 36:27 Ko ngā tama ēnei a Ētere: ko Pirihana, ko Taawana, ko Akana.
GEN 36:28 Ko ngā tama ēnei a Rīhana: ko Uhu rāua ko Arana.
GEN 36:29 Nō ngā Hori ēnei ariki: ko Rōtana ariki, ko Hopara ariki, ko Tipeona ariki, ko Anaha ariki,
GEN 36:30 ko Rīhona ariki, ko Ētere ariki, ko Rīhana ariki; nō ngā Hori ēnei ariki, nō roto i ō rātou ariki i te whenua o Heira.
GEN 36:31 Ko ngā kīngi ēnei i kīngi i te whenua o Ēroma, i te mea kāhore anō he kīngi o ngā tama a Īharaira.
GEN 36:32 Ā, he kīngi nō Ēroma a Pera tama a Peoro, ā, ko Rinihapa te ingoa o tōna pā.
GEN 36:33 Nā, ka mate a Pera, ā, ko Iopapa tama a Tera o Potora te kīngi i muri a ia.
GEN 36:34 Nā, ka mate a Iopapa, ā, ko Hūhama o te whenua o Temani te kīngi i muri i a ia.
GEN 36:35 Nā, ka mate a Hūhama, ā, ko Harara tama a Perara, a te tangata nāna nei i patu a Miriana ki te pārae o Moapa, te kīngi i muri i a ia. Ā, ko Awiti te ingoa o tōna pā.
GEN 36:36 Nā, ka mate a Harara, ā, ko Hāmara o Mahareka te kīngi i muri i a ia.
GEN 36:37 Nā, ka mate a Hāmara, ā, ko Haora o Rehopoto i te taha o te awa te kīngi i muri i a ia.
GEN 36:38 Nā, ka mate a Haora, ā, ko Paara-Hanana, ko te tama a Akaporo, te kīngi i muri i a ia.
GEN 36:39 Nā, ka mate a Paara-Hanana tama a Akaporo, ā, ko Harara te kīngi i muri i a ia; ā, ko Pau te ingoa o tōna pā; ko Mehetapere hoki te ingoa o tāna wahine, he tamāhine ia nā Matarere tamāhine a Metāhapa.
GEN 36:40 Nā, ko ngā ingoa ēnei o ngā ariki, arā o ngā whānau a Ēhau, o tōna hapū, o tōna hapū, o tōna kāinga, o tōna kāinga, tōna ingoa, tōna ingoa: ko Timina ariki, ko Arawa ariki, ko Ietete ariki,
GEN 36:41 ko Ahoripama ariki, ko Eraha ariki, ko Pinona ariki,
GEN 36:42 ko Kenaha ariki, ko Temana ariki, ko Mipitara ariki,
GEN 36:43 ko Makatiere ariki, ko Irama ariki. Nō Ēroma ēnei ariki, me ō rātou nohoanga i te whenua i nohoia e rātou. Ko Ēhau ia ko te pāpā o ngā Ēromi.
GEN 37:1 Ā, i noho a Hākopa i te whenua i noho manene ai tōna pāpā, i te whenua o Kanaana.
GEN 37:2 Ko ngā whakatupuranga ēnei o Hākopa. Kotahi tekau mā whitu ngā tau o Hōhepa, ā, i te whāngai hipi ia, rātou ko ōna tuākana; he taitama hoki ia i te taha o ngā tama a Piriha, o ngā tama a Tiripa, a ngā wāhine a tōna pāpā; ā, ka kawea e Hōhepa te kōrero kino mō rātou ki tō rātou pāpā.
GEN 37:3 Nā, i arohaina nuitia a Hōhepa e Īharaira i āna tama katoa, nō te mea ko te tama ia o tōna koroheketanga; ā, ka hangā e ia tētahi koti purepure mōna.
GEN 37:4 Ā, ka kite ōna tuākana e arohatia nuitia ana ia e tō rātou pāpā i ōna tuākana katoa, nā, ka kino rātou ki a ia, kīhai anō hoki i āhei te āta kōrero ki a ia.
GEN 37:5 Nā, ka moe a Hōhepa i tētahi moe, ā, ka kōrerotia e ia ki ōna tuākana; ka nui haere anō tō rātou kino ki a ia.
GEN 37:6 Ā, i mea ia ki a rātou, “Tēnā, whakarongo ki tēnei moe i moe nei ahau.
GEN 37:7 Nanā, i te paihere wīti tātou i waenga māra, nā, ka whakatika ake tāku paihere, ā, ka tū. Ko te tino karapotinga mai o ā koutou paihere, kei te piko iho ki tāku paihere.”
GEN 37:8 Nā, ka mea ōna tuākana ki a ia, “Koia rānei ko koe hei kīngi mō mātou? Hei rangatira anō rānei koe mō mātou?” Nā, ka nui haere anō tō rātou kino ki a ia mō āna moe, mō āna kupu.
GEN 37:9 Ā, i moe anō ia i tētahi atu moe, ā, ka kōrerotia e ia ki ōna tuākana, ka mea ia, “Nanā, tēnei anō hoki tētahi moe i moe ai ahau; nā, ko te rā me te marama, me ngā whetū kotahi tekau mā tahi, e piko mai ana ki ahau.”
GEN 37:10 Ā, ka kōrerotia e ia ki tōna pāpā rātou ko ōna tuākana; nā, ka whakatūpehupehu tōna pāpā ki a ia, ka mea ki a ia, “He aha tēnei moe i moe nei koe? Tērā rānei mātou, ko tōu whaea, ko ōu tuākana, e haere mai ki te piko ki a koe, ki te whenua?”
GEN 37:11 Nā, ka hae ōna tuākana ki a ia; ko tōna pāpā ia i mahara ki te kupu.
GEN 37:12 Nā, ka haere ōna tuākana ki te whāngai i ngā hipi a tō rātou pāpā i Hekeme.
GEN 37:13 Ā, ka mea a Īharaira ki a Hōhepa, “Kāhore ianei ōu tuākana i te whāngai hipi i Hekeme? Haere mai, me tono koe e ahau ki a rātou.” Ka mea ia, “Tēnei ahau.”
GEN 37:14 Nā, ka mea ia ki a ia, “Tēnā, haere, tirohia, kei te ora rānei ōu tuākana, kei te ora anō rānei ngā hipi; ka whakahoki mai ai i te kōrero ki ahau.” Nā, ka tonoa atu ia e ia i te raorao o Heperona. Ā, ka haere ia ki Hekeme,
GEN 37:15 ā, ka tūtaki tētahi tangata ki a ia, e pōhēhē ana hoki ia i te pārae, ā, ka ui taua tangata ki a ia, “He aha tāu e rapu nā?”
GEN 37:16 Nā, ka mea ia, “E rapu ana ahau i ōku tuākana. Tēnā koa, whakaaturia mai ki ahau, kei hea rātou e whāngai ana i te kāhui.”
GEN 37:17 Ka mea taua tangata, “Kua riro atu rātou i konei; i rongo hoki ahau i a rātou e kī ana, ‘Kia haere tātou ki Rōtana.’ ” Nā, ka haere a Hōhepa ki te whai i ōna tuākana, ā, ka kitea rātou e ia ki Rōtana.
GEN 37:18 Nā, ka kite mai rātou i a ia tawhiti, ā, i te mea kāhore anō ia i tata noa ki a rātou, ka whakatakoto whakaaro rātou mōna kia whakamatea.
GEN 37:19 Ā, ka mea rātou tētahi ki tētahi, “Nanā, ko te moemoeā tēnei te haere mai nei.
GEN 37:20 Tēnā, tātou ka haere, ka patu i a ia, ka maka hoki i a ia ki tētahi o ngā poka, ā, ka mea tātou. Nā tētahi mohoao nanakia ia i kai; ā, ka kite tātou i te tukunga iho o āna moe.”
GEN 37:21 Nā, i rongo a Reupena, ā, ka whakaorangia ia e ia i roto i ō rātou ringa; ka mea ia, “Kaua ia e patua e tātou.”
GEN 37:22 Ka mea anō a Reupena ki a rātou, “Kaua e whakahekea he toto; makā atu ia ki roto ki tēnei poka i te koraha nei, kaua hoki tētahi ringa e pā ki a ia.” He mea hoki kia whakaora ai ia i a ia i roto i ō rātou ringa, kia whakahoki ai ia i a ia ki tōna pāpā.
GEN 37:23 Ā, i te taenga o Hōhepa ki ōna tuākana, ka huia e rātou te koti o Hōhepa, te koti purepure e mau ana i a ia;
GEN 37:24 ā, mauria ana ia, makā ana e rātou ki te poka. He tuwhera kau anō te poka, kāhore he wai o roto.
GEN 37:25 Nā, ka noho rātou ki te kai taro, ā, ka anga ake ō rātou kanohi, nā, ko tētahi tira Ihimaeri e haere mai ana i Kireara me ā rātou kāmera, he waha i ngā mea kakara, i te pama, i te maira, e haere ana ki te kawe ki raro, ki Īhipa.
GEN 37:26 Nā, ka mea a Hūrā ki ōna tuākana rātou ko ōna tēina, “He aha te pai o tā tātou patu i tō tātou teina, o te huna hoki i ōna toto?
GEN 37:27 Tātou ka haere, ka hoko i a ia ki ngā Ihimaeri, ā, kaua ō tātou ringa e pā ki a ia; ko tō tātou teina nei hoki ia, ko tō tātou kikokiko.” Ā, i whakaae ōna tuākana rātou ko ōna tēina.
GEN 37:28 Nā, ka haere mai ngā Miriani, he hunga hokohoko; ka hūtia ake e rātou a Hōhepa i roto i te poka, ā, ka hokona atu a Hōhepa e rātou ki ngā Ihimaeri, ki ngā hiriwa e rua tekau; ā, ka kawea a Hōhepa e rātou ki Īhipa.
GEN 37:29 Ā, ka hoki mai a Reupena ki te poka; nā, kāhore a Hōhepa i roto i te poka; ā, ka haea e ia ōna kākahu.
GEN 37:30 Nā, ka hoki ia ki ōna tēina, ka mea, “Kāhore nei te tamaiti; ā, ko ahau, me haere ahau ki hea?”
GEN 37:31 Nā, ka tango rātou i te koti o Hōhepa, ā, ka patua he koati toa, ka tukua hoki te koti ki te toto.
GEN 37:32 Nā, ka hoatu te koti purepure kia kawea ki tō rātou pāpā; ka mea rātou, “I kitea tēnei e mātou; tēnā, tirohia ko te koti rānei o tāu tama, ehara rānei?”
GEN 37:33 Ā, ka mōhiotia e ia, ā, ka mea ia, “Ko te koti tēnei o tāku tama; kua kainga ia e te kīrehe nanakia; kua tino haea rawatia a Hōhepa.”
GEN 37:34 Nā, ka haea e Hākopa ōna kākahu, ka kākahuria e ia tōna hope ki te kākahu taratara, ā, he maha ngā rā i uhungatia ai e ia tāna tama.
GEN 37:35 Ka whakatika hoki āna tama katoa me āna tamāhine katoa ki te whakamārie i a ia; ā, kīhai ia i pai kia whakamārietia; ka mea ia, “Engari ka heke tangi atu ahau ki tāku tama ki te pō.” Nā, ka uhungatia ia e tōna pāpā.
GEN 37:36 Nā, ka hokona atu ia e ngā Miriani ki Īhipa ki a Potiwhara, ki tētahi o ngā tāngata nui a Parao, ki te rangatira o ngā kaitiaki.
GEN 38:1 I taua wā ka maunu atu a Hūrā i roto i ōna tuākana, ā, peka ana ki tētahi Aturami, ko Hira tōna ingoa.
GEN 38:2 Ā, kitea ana e Hūrā i reira te tamāhine a tētahi Kanaani, ko Huaha tōna ingoa. Nā, ka tango ia i a ia, ā, haere ana ki roto, ki a ia.
GEN 38:3 Nā, ka hapū ia, ā, ka whānau he tama; ā, huaina iho tōna ingoa ko Ere.
GEN 38:4 Nā, ka hapū anō ia, ā, ka whānau he tama; ā, huaina iho tōna ingoa ko Onana.
GEN 38:5 Ā, ka hapū anō ia, ā, ka whānau he tama; ā, huaina iho tōna ingoa ko Heraha; i Ketipi hoki te tāne i tōna whānautanga.
GEN 38:6 Nā, ka tangohia e Hūrā he wahine mā Ere, mā tāna mātāmua, ko tōna ingoa ko Tāmara.
GEN 38:7 He tangata kino a Ere mātāmua a Hūrā ki tā Ihowā titiro; ā, whakamatea ana ia e Ihowā.
GEN 38:8 Nā, ka mea a Hūrā ki a Onana, “Haere ki roto, ki te wahine a tōu tuakana, hei whakakapi mō te whāwhārua, kia whai uri ai tōu tuakana.”
GEN 38:9 I mōhio anō a Onana e kore e waiho te uri mōna; ā, i tōna haerenga ki te wahine a tōna tuakana, nā, ka tukua e ia kia heke atu ki te whenua, kei hoatu e ia he uri ki tōna tuakana.
GEN 38:10 He kino hoki tāna mahi ki tā Ihowā titiro; nā, ka whakamatea hoki ia.
GEN 38:11 Kātahi ka mea a Hūrā ki a Tāmara, ki tāna hunaonga, “Me noho pouaru koe ki te whare o tōu pāpā, kia kaumātua rā anō a Heraha, tāku tama.” I mea hoki ia, “Kei mate anō hoki tēnei, kei pērā me ōna tuākana.” Nā, ka haere a Tāmara, ā, noho ana i te whare o tōna pāpā.
GEN 38:12 Ā, ka maha ngā rā, ka mate te tamāhine a Huaha, te wahine a Hūrā; ā, ka mārie a Hūrā, ā, ka haere rāua ko tōna hoa ko Hira Aturami ki runga ki Timinata, ki āna kaikutikuti hipi.
GEN 38:13 Ā, ka kōrerotia ki a Tāmara, ka meatia, “Ko tōu hungawai tēnei te haere ake nei ki Timinata, ki te kutikuti i āna hipi.”
GEN 38:14 Nā, ka whakarērea atu e ia ōna kākahu pouaru, ka hīpoki i a ia ki tōna ārai, roropi tonu ki a ia, ā, ka noho i te tomokanga ki Enaima, i te huarahi ki Timinata. I kite hoki ia kua kaumātua a Heraha, ā, kāhore anō ia i hoatu hei wahine māna.
GEN 38:15 Nā, ka kite a Hūrā i a ia, hua noa ia he wahine kairau; nō te mea i hīpokina tōna mata.
GEN 38:16 Nā, ka peka ia ki te ara ki a ia, ka mea, “Tukua atu ahau, nē? Kia haere atu ki a koe.” Kīhai hoki ia i mōhio ko tāna hunaonga ia. Ā, ka mea ia, “He aha tāu e hōmai ai ki ahau, ki te haere mai koe ki ahau?”
GEN 38:17 Ā, ka mea ia, “Ka tukua atu e ahau tētahi kūao koati o te kāhui.” Ā, ka mea ia, “Ka hōmai rānei e koe tētahi taunaha ki ahau, kia tukua mai rā anō taua mea e koe?”
GEN 38:18 Ā, ka mea ia, “He aha te taunaha e hoatu e ahau ki a koe?” Ka mea ia, “Ko tōu hīri, me āu tau, me tāu tokotoko i tōu ringa.” Nā, ka hoatu e ia ki a ia, ā, ka haere atu ia ki a ia, ā, ka hapū ia i a ia.
GEN 38:19 Nā, ka whakatika ia, ā, haere ana, whakarērea ana e ia tōna ārai, ā, kākahuria iho ōna kākahu pouaru.
GEN 38:20 Nā, ka hoatu te kūao koati e Hūrā kia kawea e tōna hoa e te Aturami, ki te tiki i te taunaha i te ringa o te wahine; ā, kīhai ia i kitea.
GEN 38:21 Ā, ka ui ia ki ngā tāngata o taua wāhi, ka mea, “Kei hea te wahine kairau i Enaima, nei i te taha o te ara?” Ā, ka mea rātou, “Kāhore he wahine kairau i konei.”
GEN 38:22 Nā, ka hoki ia ki a Hūrā, ka mea, “Kāhore ia i kitea e ahau; e mea ana hoki ngā tāngata o tērā wāhi, kāhore he wahine kairau i reira.”
GEN 38:23 Nā, ka mea a Hūrā, “Tukua kia tangohia e ia, kei tāwaia tāua. Titiro hoki, kua tukua atu nei e ahau te kūao nei, ā, kīhai ia i kitea e koe.”
GEN 38:24 Ā, ka toru ngā marama, nā, ka kōrerotia ki a Hūrā, ka meatia, “Kua kairau a Tāmara, tāu hunaonga; kua hapū anō hoki ia i ōna kairautanga.” Ā, ka mea a Hūrā, “Kawea ki waho, kia tahuna.”
GEN 38:25 Ā, ka kawea ia ki waho, ka tono tangata ia ki tōna hungawai, ka mea, “Nā te tangata nāna ēnei mea tōku hapū.” I mea anō ia, “Tēnā, tirohia, nā wai ēnei, te hīri nei, me ngā tau, me te tokotoko.”
GEN 38:26 Nā, ka mōhiotia e Hūrā, ā, ka mea ia, “Nui atu tōna tika i tōku; kīhai hoki ia i hoatu e ahau ki a Heraha, ki tāku tama.” Ā, kīhai ia i mōhio ki a ia i muri iho.
GEN 38:27 Ā, ka taka ki te wā e whānau ai ia, nā, he māhanga kei roto i tōna kōpū.
GEN 38:28 Ā, i tōna whānautanga, nā, ka torona te ringa o tētahi; nā, ka mau te kaiwhakawhānau ki te miro whero, ā, herea ana ki tōna ringa, ka mea, “Ko tēnei i puta mai i mua.”
GEN 38:29 Ā, i tāna whakahokinga atu i tōna ringa, nā, ka puta mai tōna tuakana; ā, ka mea ia, “Ka tae tōu pakaru mai! Nāu te pakaru mai.” Koia i huaina ai tōna ingoa ko Parete.
GEN 38:30 Ā muri iho ka puta tōna teina, i herea nei tōna ringa ki te miro whero, ā, ka huaina tōna ingoa ko Tera.
GEN 39:1 Ā, i kawea iho a Hōhepa ki Īhipa; nā, ka hokona ia e Potiwhara, he tangata nui nā Parao, he rangatira nō ngā kaitiaki, he Īhipiana, i roto i ngā ringa o ngā Ihimaeri, nāna nei ia i kawe ki reira.
GEN 39:2 Nā, i a Hōhepa a Ihowā, ā, he tangata whai rawa ia; i noho anō ia i roto i te whare o tōna ariki, o te Īhipiana,
GEN 39:3 ā, i kite tōna ariki kei a ia a Ihowā, pono tonu hoki i a Ihowā ngā mahi katoa a tōna ringa.
GEN 39:4 Nā, ka manakohia a Hōhepa e ia, ka mahi ia ki a ia; ā, ka waiho ia hei kaitirotiro mō tōna whare, ā, ka hōmai, e ia āna mea katoa ki tōna ringa.
GEN 39:5 Ā, i a ia ka waiho nei hei kaitirotiro mō tōna whare, mō āna mea katoa, nā, ka manaakitia e Ihowā te whare o te Īhipiana he whakaaro ki a Hōhepa i runga anō i āna mea katoa te manaaki a Ihowā, i te whare, i te māra.
GEN 39:6 I waiho hoki e ia i te ringa o Hōhepa āna mea katoa; kīhai hoki i mōhiotia e ia tētahi o āna mea, heoi anō ko te taro i kai ai ia. Ā, he tangata ātaahua a Hōhepa, he pai hoki ia ki te titiro atu.
GEN 39:7 Ā, i muri i ēnei mea, ka anga ngā kanohi o te wahine a tōna ariki ki a Hōhepa; ā, ka mea ia, “Takoto tāua.”
GEN 39:8 Ā, ka whakakāhore ia, ka mea hoki ki te wahine a tōna ariki, “Nā, e kore tōku ariki e mōhio ko te aha kei ahau i roto i te whare, kua hōmai nei hoki e ia āna mea katoa ki tōku ringa;
GEN 39:9 kāhore tētahi i roto i tēnei whare e nui ake i ahau; kāhore anō hoki i kaiponuhia e ia tētahi mea ki ahau, ko koe anake, nō te mea ko tāna wahine koe. Nā, me pēhea e mahi ai ahau i tēnei kino nui, e hara ai ki te Atua?”
GEN 39:10 Heoi, kōrero noa ia ki a Hōhepa i tēnei rā, i tēnei rā, ā, kīhai ia i rongo ki a ia, kia takoto tahi rāua, kia noho tahi rāua.
GEN 39:11 Nā, i taua wā ka haere a Hōhepa ki te whare ki te mahi i tāna mahi; ā, kāhore tētahi o ngā tāngata o te whare i reira i roto i te whare.
GEN 39:12 Nā, ka hopukia ia e ia, arā tōna kākahu, ka mea, “Takoto tāua.” Nā, ka whakarērea e ia tōna kākahu ki tōna ringa, ā, rere ana, puta ana ki waho.
GEN 39:13 Ā, nō tōna kitenga kua whakarērea e ia tōna kākahu i roto i tōna ringa, ā, kua rere ki waho,
GEN 39:14 nā, ka karanga ia ki ngā tāngata o tōna whare, ka kōrero ki a rātou, ka mea, “Titiro, kua kawea mai e ia tētahi Hiperu hei hangarau i a tātou! I haere mai ia ki ahau kia takoto māua, ā, he rahi tōku reo ki te hāmama.
GEN 39:15 Ā, ka rongo ia he rahi tōku reo ki te hāmama, nā, ka whakarērea e ia tōna kākahu ki ahau, ā, rere ana, puta ana ki waho.”
GEN 39:16 Nā, ka waiho e ia tōna kākahu ki tōna taha, kia hoki mai rā anō tōna ariki ki tōna whare.
GEN 39:17 Ā, ka kōrero ia ki a ia, ko aua kupu anō, ka mea, “I haere mai ki ahau taua pononga Hiperu, i kawea mai nei e koe ki a mātou, ki te hangarau i ahau.
GEN 39:18 Ā, ka rahi tōku reo ki te hāmama, nā, ka whakarērea e ia tōna kākahu ki ahau, ā, rere ana ki waho.”
GEN 39:19 Ā, ka rongo tōna ariki i ngā kupu a tāna wahine i kōrero ai ia ki a ia, i mea ai, “Ko ngā mea ēnei i mea ai tāu pononga ki ahau.” Nā, ka mura tōna riri.
GEN 39:20 Ā, ka mau te ariki o Hōhepa ki a ia, ā, makā ana ia ki te whare herehere, ki te wāhi i herea ai ngā herehere a te kīngi, ā, noho ana ia i reira, i te whare herehere.
GEN 39:21 Otiia, i a Hōhepa a Ihowā, ka puta anō tōna aroha ki a ia, ā, ka hoatu ki a ia kia manakohia ia e te rangatira o te whare herehere.
GEN 39:22 Ā, i tukua e te rangatira o te whare herehere ki te ringaringa o Hōhepa ngā herehere katoa i roto i te whare herehere; ko ia anō te kaimahi o ngā mea katoa i meatia e rātou i reira.
GEN 39:23 Kīhai te rangatira o te whare herehere i titiro ki tētahi o ngā mea i tōna ringa; nō te mea i a ia a Ihowā, i mea anō a Ihowā kia pono tāna i mea ai.
GEN 40:1 Nā, i muri i ēnei mea ka hara te kaiwhakainu a te kīngi o Īhipa, rāua ko tāna kaihanga taro, ki tō rāua ariki, ki te kīngi o Īhipa.
GEN 40:2 Ā, ka riri a Parao ki āna kaitohutohu tokorua, ki te tino kaiwhakainu rāua ko te tino kaihanga taro.
GEN 40:3 Nā, ka hōmai rāua e ia kia puritia ki te whare o te rangatira o ngā kaitiaki, ki te whare herehere, ki te wāhi i herea ai a Hōhepa.
GEN 40:4 Ā, ka meinga a Hōhepa e te rangatira o ngā kaitiaki hei kaititiro mō rāua, ā, ka mahi ia ki a rāua; ā, ka puritia rāua i ētahi rā.
GEN 40:5 Nā, ka moe rāua i ā rāua moe, kotahi anō te pō i moemoeā ai rāua, tētahi, tētahi, me te tikanga anō o tāna moe, te kaiwhakainu rāua ko te kaihanga taro a te kīngi o Īhipa, i herea nei rāua i roto i te whare herehere.
GEN 40:6 Ā, i te taenga o Hōhepa ki a rāua i te ata, ka titiro ia ki a rāua, nā, e pōuri ana rāua.
GEN 40:7 Nā, ka ui ia ki aua kaitohutohu a Parao, i puritia tahitia nei me ia i te whare o tōna ariki, ka mea, “He aha i whakapoururu ai ō kōrua kanohi ināianei?”
GEN 40:8 Ā, ka mea rāua ki a ia, “I moe māua i tētahi moe, ā, kāhore he kaiwhakaatu i tōna tikanga.” Nā, ka mea a Hōhepa ki a rāua, “Ehara ianei te Atua i te kaiwhakaatu? Tēnā, kōrerotia mai ki ahau.”
GEN 40:9 Nā, ka kōrerotia e te tino kaiwhakainu tāna moe ki a Hōhepa, ā, ka mea ki a ia, “Moe iho ahau, nā, ko tētahi wāina i tōku aroaro;
GEN 40:10 nā, e toru ngā peka o te wāina. Ā, e āhua pihi ana, ā, ka kohera ōna puāwai; ā, e hua ana ngā tautau, maoa tonu ngā karepe.
GEN 40:11 Nā, ko te kapu a Parao i tōku ringa; ā, ka mau ahau ki ngā karepe, ā, tauia ana e ahau ki te kapu a Parao, ā, hoatu ana e ahau te kapu ki te ringa o Parao.”
GEN 40:12 Nā, ko te meatanga a Hōhepa ki a ia, “Ko tōna tikanga tēnei: Ko aua peka e toru, e toru ngā rā.
GEN 40:13 Kia toru ake rā ka whakaara ake ai a Parao i tōu mātenga, ka whakahoki anō i a koe ki tāu mahi, ā, ka hoatu anō e koe te kapu a Parao ki tōna ringa, ka pērā hoki me mua, i te mea ko koe tāna kairiringi wāina.
GEN 40:14 Otirā, kia mahara ki ahau ina pono te pai ki a koe, kia puta anō tōu aroha ki ahau, kōrerotia hoki ahau ki a Parao, kia puta atu ai ahau i tēnei whare.
GEN 40:15 I tāhaetia pūtia mai hoki ahau i te whenua o ngā Hiperu; ā, kāhore āku mahi i konei i makā ai ahau e rātou ki tēnei whare herehere.”
GEN 40:16 Ā, ka kite te tino kaihanga taro he pai te tikanga, ka mea ia ki a Hōhepa, “Moe iho hoki ahau, nā, e toru ngā kete taro mā i runga i tōku upoko;
GEN 40:17 ā, i tō runga kete ko ngā tū āhua kai katoa mā Parao; nā, ko ngā manu e kai ana i aua mea i roto i te kete i runga i tōku upoko.”
GEN 40:18 Nā, ka whakahoki a Hōhepa, ka mea, “Ko tōna tikanga tēnei: Ko aua kete e toru, e toru ngā rā
GEN 40:19 kia toru ake ngā rā, ka tangohia ake e Parao tōu upoko i runga i a koe, ā, ka whakairihia koe ki runga ki te rākau; ā, ka kainga e ngā manu ōu kikokiko e piri nā ki a koe.”
GEN 40:20 Ā, i te toru o ngā rā, i te rā whānau o Parao, nā, ka tukua e ia he hākari mā āna tāngata katoa; ā, whakaarahia ake ana e ia te mātenga o te tino kaiwhakainu, me te mātenga o te tino kaihanga taro, i waenganui i āna pononga.
GEN 40:21 Ā, whakahokia ana e ia te tino kaiwhakainu ki tāna mahi whakainu, hei hoatu i te kapu ki te ringa o Parao;
GEN 40:22 ko te tino kaihanga taro ia i whakairihia ake e ia, i pērātia me tā Hōhepa i whakaatu ai ki a rāua.
GEN 40:23 Otiia, kīhai te tino kaiwhakainu i mahara ki a Hōhepa; i wareware hoki ki a ia.
GEN 41:1 Ā, ka taka ngā tau e rua, ka moe a Parao; nā, i te taha ia o te awa e tū ana.
GEN 41:2 Nā, ko te putanga ake o ngā kau e whitu i roto i te awa, he āhua pai, e whai kiko ana; ā, ka kai rātou i roto i ngā wīwī.
GEN 41:3 Nā, ko te putanga ake anō o ētahi kau e whitu i muri i a rātou i roto i te awa, he āhua kino, he kikokore; ā, tū ana rātou i te taha o ērā kau i te pareparenga o te awa.
GEN 41:4 Nā, ka kainga e ngā kau āhua kino, kikokore, ngā kau āhua pai e whitu, ngā mea mōmona. Ā, ka ara ake a Parao.
GEN 41:5 Ā, ka parangia anō ia, nā, ko te rua o āna moe. Nā, ko te putanga ake o ngā puku wīti e whitu, kotahi anō hoki te kakau, he mea whai kiko, he pai.
GEN 41:6 Nā, ko ngā puku e whitu e tupu ake ana i muri i ērā, he mea kikokore, he mea ngingio i te marangai.
GEN 41:7 Ā, horomia ake ngā puku whai kiko e whitu, ngā mea whai kai, e ngā puku kikokore e whitu. Ko te aranga ake o Parao; nā, he moe!
GEN 41:8 Ā, i te ata; nā, ka pororaru tōna wairua; ā, ka tono tāngata ia ki te karanga i ngā tohunga māori katoa o Īhipa, me ngā mea mōhio katoa o reira. Ā, kōrerotia atu ana tāna moe e Parao ki a rātou, otiia, kīhai i taea e tētahi te whakaatu i te tikanga o aua moe ki a Parao.
GEN 41:9 Nā, ka kōrero te tino kaiwhakainu ki a Parao, ka mea, “Kātahi ahau ka mahara ki ōku hē.
GEN 41:10 I riri mai a Parao ki āna pononga, ā, i tuku i ahau kia puritia ki roto ki te whare o te rangatira o ngā kaitiaki, ahau me te tino kaihanga taro.
GEN 41:11 Ā, ka moe māua i tētahi moe i te pō kotahi, ahau, a ia hoki; i moe māua ahau, a ia, me te tikanga anō o ā māua moe.
GEN 41:12 Nā, i reira i a māua tētahi taitama Hiperu, he pononga nā te rangatira o ngā kaitiaki; ā, ka kōrerotia e māua ki a ia, ā, whakaaturia mai ana e ia te tikanga o ā māua moe ki a māua; rite tonu tāna whakaaturanga ki tā tērā moe, ki tāku.
GEN 41:13 Ā, tika tonu tāna i whakaatu ai ki a māua; ko ahau i whakahokia e ia ki tāku mahi, ko tērā i tāronatia.”
GEN 41:14 Nā, ka tono tangata a Parao, hei karanga i a Hōhepa, ā, ka hohoro rātou te mau mai i a ia i roto i te whare herehere. Nā, ka heu ia i a ia, ka tango i ētahi kākahu kē mōna, ā, haere ana ki a Parao.
GEN 41:15 Ā, ka mea a Parao ki a Hōhepa, “I moe ahau i tētahi moe, ā, kāhore he tangata hei whakaatu i tōna tikanga. Nā, kua tae mai tōu rongo ki ahau, e kōrerotia ana ki te rongo koe i te moe ka taea e koe te whakaatu tōna tikanga.”
GEN 41:16 Nā, ka whakahoki a Hōhepa ki a Parao, ka mea, “Ehara i ahau; mā te Atua e whakahoki te kupu pai ki a Parao.”
GEN 41:17 Nā, ka mea a Parao ki a Hōhepa, “I ahau e moe ana, nā, e tū ana ahau i te pareparenga o te awa;
GEN 41:18 nā, ka puta ake i te awa ngā kau e whitu, he mea whai kiko, he āhua pai; ā, ka kai rātou i roto i ngā wīwī.
GEN 41:19 Nā, ko te putanga ake o ētahi atu kau e whitu i muri i ērā, he hīroki, he āhua kino noa iho, he kikokore, kāhore ahau i kite i tō rātou rite te kino i te whenua katoa o Īhipa.
GEN 41:20 Nā, ka kainga ngā kau e whitu ō mua, ngā mea mōmona, e ngā kau hīroki, e ngā mea kino;
GEN 41:21 ā, i tō rātou toremitanga ki roto i a rātou, e kore e mōhiotia kua toremi rātou ki roto i a rātou; he mau tonu hoki tō rātou āhua kino, he pērā me tō te tīmatanga. Nā, ka ara ahau.
GEN 41:22 “Nā, i kite anō ahau i ahau e moe ana, ko ngā puku wīti e whitu e tupu ake ana i te kakau kotahi, he mea whai kai, he mea pai.
GEN 41:23 Nā, ko ngā puku e whitu, he mea taramore, he mea kikokore, i ngingio nei i te marangai, e tupu ake ana i muri i aua puku;
GEN 41:24 ā, horomia ake ngā puku papai e whitu e ngā puku kikokore. Nā, ka kōrerotia e ahau ki ngā tohunga māori; ā, kāhore tētahi hei whakaatu ki ahau.”
GEN 41:25 Nā, ko te meatanga a Hōhepa ki a Parao, “Ko te moe a Parao kotahi tonu; e whakaaturia ana e te Atua ki a Parao ngā mea e meatia ana e ia.
GEN 41:26 Ko ngā kau pai e whitu, e whitu ngā tau; ko ngā puku pai anō e whitu, e whitu ngā tau; kotahi anō te moe.
GEN 41:27 Ā, ko ngā kau hīroki e whitu, ko ngā mea kino i puta ake rā i muri i a rātou, e whitu ēnā ngā tau; ā, ko ngā puku wīti e whitu, ko ngā mea i ngingio i te marangai, e whitu ēnā ngā tau matekai.
GEN 41:28 “Ko te mea tēnā i kōrerotia e ahau ki a Parao; ko tā te Atua e mea ai e whakakitea ana e ia ki a Parao.
GEN 41:29 Nanā, e whitu ngā tau e haere mai nei e nui ai te hua o te whenua katoa o Īhipa;
GEN 41:30 ā, e whitu ngā tau matekai e ara ake i muri i ērā; ā, ka wareware katoa te hua i te whenua o Īhipa; ā, ka ngaro te whenua i te matekai.
GEN 41:31 Ā, e kore taua hua e mōhiotia e te whenua, i taua matekai hoki ō muri; nō te mea he tino nanakia.
GEN 41:32 Ā, i tuaruatia ai te moe a Parao, he mea pūmau nā te Atua, ka hohoro anō te meatia e te Atua.
GEN 41:33 “Nā, reira, me titiro e Parao tētahi tangata mōhio, whai whakaaro, kia tukua e ia ngā tikanga o te whenua o Īhipa ki a ia.
GEN 41:34 Kia meatia tēnei e Parao, kia whakaritea hoki e ia ētahi kaitirotiro mō te whenua, ā, kia tangohia e ia te rima o ngā wāhi o te whenua o Īhipa i ngā tau hua e whitu.
GEN 41:35 Kia kohia hoki ngā kai katoa o ēnei tau pai e haere ake nei, kia āmitia mai hoki he wīti ki raro i te ringa o Parao, kia tohungia anō hoki he kai i roto i ngā pā.
GEN 41:36 Nā, ka pae taua kai mā te whenua mō ngā tau matekai e whitu e puta mai ana ki te whenua o Īhipa; e kore ai e ngaro te whenua i te matekai.”
GEN 41:37 Ā, he pai taua mea ki te titiro a Parao, ki te titiro hoki a āna tāngata katoa.
GEN 41:38 Nā, ka mea a Parao ki āna tāngata, “E kitea rānei e tātou he pēnei, he tangata kei a ia nei te Wairua o te Atua?”
GEN 41:39 Ā, ka mea a Parao ki a Hōhepa, “Nā, kua whakakitea nei e te Atua ēnei mea katoa ki a koe, kāhore hoki he tangata hei rite mōu, te mōhio, te whai whakaaro.
GEN 41:40 Ko koe hei rangatira mō tōku whare, ā, mā tāu kupu tōku iwi katoa e tohutohu; ko te torōna anake te mea e nui ake ai ahau i a koe.”
GEN 41:41 Ā, ka mea a Parao ki a Hōhepa, “Titiro, kua waiho nei koe e ahau hei rangatira mō te whenua katoa o Īhipa.”
GEN 41:42 Nā, ka tangohia e Parao tōna mōwhiti i tōna ringa, ā, kuhua ana e ia ki te ringa o Hōhepa, i whakakākahuria hoki ia e ia ki ngā kākahu rīnena pai, ā, whakaheia ana he hei kōura ki tōna kakī.
GEN 41:43 I whakaekea anō ia e ia ki runga ki te tuarua o ōna hāriata; ā, ka karangatia e rātou i mua i a ia, “Kia piko te turi!” Ka waiho ia e ia hei rangatira mō te whenua katoa o Īhipa.
GEN 41:44 I mea anō a Parao ki a Hōhepa, “Ko Parao ahau, ā, ki te kāhore koe, e kore e ara ake te ringa, te waewae rānei o tētahi i te whenua katoa o Īhipa.”
GEN 41:45 Nā, ka huaina e Parao te ingoa o Hōhepa. Ko Tawhanatapaneaha; ā, i hōmai anō e ia hei wahine māna, a Ahenata, tamāhine a Potiwhera, tohunga o Ono. Nā, ka haere a Hōhepa ā puta noa i te whenua katoa o Īhipa.
GEN 41:46 E toru tekau ngā tau o Hōhepa i tōna tūranga i te aroaro o Parao, o te kīngi o Īhipa. Nā, ka puta atu a Hōhepa i te aroaro o Parao, ā, ka haere ā puta noa i te whenua katoa o Īhipa.
GEN 41:47 Ā, i ngā tau hua e whitu, me te mea he aohanga nā te ringa te hua o te whenua.
GEN 41:48 Nā, ka kohia e ia ngā kai katoa o ngā tau e whitu i puta ki te whenua o Īhipa, ā, rongoātia ana te kai ki ngā pā. Ko te kai o te māra i tētahi taha, i tētahi taha o te pā, i rongoātia e ia ki taua pā anō.
GEN 41:49 Heoi, āmitia ana e Hōhepa he wīti, me te mea ko te onepū o te moana, he hira whakaharahara; ā, whakarērea noatia iho e ia te tatau; kāhore hoki i taea te tatau.
GEN 41:50 Nā, ka whānau ngā tama tokorua a Hōhepa, i te mea kāhore anō kia puta noa ngā tau matekai, i whānau hoki i a rāua ko Ahenata tamāhine a Potiwhera tohunga o Ono.
GEN 41:51 Ā, i huaina e Hōhepa te ingoa o te mātāmua ko Mānahi, “Nō te mea,” e kī ana ia, “kua meinga ahau e te Atua kia wareware ki tāku mahi nui katoa, ki te whare katoa anō hoki o tōku pāpā.”
GEN 41:52 Ā, i huaina e ia te ingoa o te tuarua ko Ēparaima, “Mōku hoki i meinga e te Atua kia hua ki te whenua o tōku tangihanga.”
GEN 41:53 Nā, ka taka ngā tau hua e whitu i puta mai rā ki te whenua o Īhipa,
GEN 41:54 ā, ka tīmata ngā tau matekai e whitu te puta ake, ka pērā hoki me tā Hōhepa i kōrero ai. Ā, i ngā whenua katoa te matekai; ko te whenua katoa ia o Īhipa i whai taro.
GEN 41:55 Nā, i te matenga o te whenua katoa o Īhipa i te kai, ka tangi te iwi ki a Parao ki te taro mā rātou; ā, ka mea a Parao ki ngā Īhipiana katoa, “Haere ki a Hōhepa; me mea e koutou tāna e mea ai ki a koutou.”
GEN 41:56 Nā, i runga i te mata katoa o te whenua te matekai; ā, ka wāhia e Hōhepa ngā toa katoa, ā, hokona ana e ia ki ngā Īhipiana; he nanakia hoki te matekai i te whenua o Īhipa.
GEN 41:57 Ā, ka haere ngā whenua katoa ki Īhipa, ki a Hōhepa, ki te hoko wīti; nō te mea he nui rawa te matekai o ngā whenua katoa.
GEN 42:1 Nā, ka kite a Hākopa he wīti kei Īhipa, ka mea a Hākopa ki āna tama, “He aha koutou i tirotiro ai ki a koutou anō?”
GEN 42:2 I mea anō ia, “Nanā, kua rongo ahau he wīti kei Īhipa; haere iho ki reira, ki te hoko i tētahi mā tātou i reira; kia ora ai tātou, kei mate.”
GEN 42:3 Nā, ka haere ngā tuākana kotahi tekau o Hōhepa ki raro, ki Īhipa, ki te hoko wīti.
GEN 42:4 Ko Pineamine ia, teina o Hōhepa, kīhai i tonoa e Hākopa i roto i ōna tuākana; i mea hoki ia, “Kei pono tētahi aituā ki a ia.”
GEN 42:5 Ā, ka haere ngā tama a Īharaira ki te hoko i roto i te hunga i haere; he matekai hoki tō te whenua o Kanaana.
GEN 42:6 Nā, ko Hōhepa te kāwana o te whenua, ko ia te kaihoko ki ngā tāngata katoa o te whenua. Nā, ka haere mai ngā tuākana o Hōhepa, ā, ka piko ō rātou kanohi ki te whenua i tōna aroaro.
GEN 42:7 Ā, i te kitenga o Hōhepa i ōna tuākana, ka mōhio ia ki a rātou, otiia ka whakatangata kē ia ki a rātou, ka kōrero whakatuma ki a rātou; ka mea hoki ki a rātou, “I haere mai koutou i hea?” Ā, ka mea rātou, “I te whenua o Kanaana, ki te hoko kai.”
GEN 42:8 Ā, i mōhio a Hōhepa ki ōna tuākana ko rātou ia kīhai i mōhio ki a ia.
GEN 42:9 Nā, ka mahara a Hōhepa ki ngā moe i moe ai ia mō rātou, ā, ka mea ki a rātou, “He tūtei koutou; he whakataki i te wāteatanga o te whenua i haere mai ai koutou!”
GEN 42:10 Ā, ka mea rātou ki a ia, “Kāhore, e tōku ariki, engari i haere mai āu pononga ki te hoko kai.
GEN 42:11 He tama katoa mātou nā te tangata kotahi; he hunga pono mātou, ehara āu pononga i te tūtei.”
GEN 42:12 Ā, ka mea ia ki a rātou, “Kāhore, engari he whakataki i te wāteatanga o te whenua i haere mai ai koutou.”
GEN 42:13 Ā, ka mea rātou, “Kotahi tekau mā rua āu pononga, he tēina, he tuākana mātou, he tama nā te tangata kotahi, nō te whenua o Kanaana. Ko te whakaotinga kei tō mātou pāpā ināianei, ko tētahi kua kāhore.”
GEN 42:14 Nā, ko te meatanga a Hōhepa ki a rātou, “Ko ia tāku i kōrero ai ki a koutou, i mea ai, ‘He tūtei koutou.’
GEN 42:15 Mā konei ka mōhiotia ai koutou: e ora ana a Parao e kore koutou e haere atu i konei, ki te kāhore tō koutou whakaotinga e haere mai ki konei.
GEN 42:16 Tukua atu tētahi o koutou ki te tiki i tō koutou teina, ko koutou hoki, ka herea koutou, kia mōhiotia ai ā koutou kōrero, he pono rānei tā koutou. Ā, ki te kāhore, e ora ana a Parao, inā, he tūtei koutou.”
GEN 42:17 Nā, ka huihuia rātou e ia kia tiakina, e toru ngā rā.
GEN 42:18 Ā, i te toru o ngā rā ka mea a Hōhepa ki a rātou, “Ko tēnei tā koutou e mea ai kia ora ai koutou; he tangata wehi hoki ahau i te Atua:
GEN 42:19 ki te mea he hunga pono koutou, me here tētahi o ō koutou tuākana i roto i te whare i tiakina ai koutou; otiia, me haere koutou ki te kawe wīti mō te matekai o ō koutou whare.
GEN 42:20 Ā, me kawe mai tō koutou teina, te whakaotinga, ki ahau; kia whakatikaia ai ā koutou kupu; ā, e kore koutou e mate.” Ā pēnā ana rātou.
GEN 42:21 Ā, ka mea rātou tētahi ki tētahi, “He pono kua whai hara tātou i tō tātou teina; i kite hoki tātou i te mamae o tōna wairua, i a ia i īnoi ai ki a tātou, ā, kīhai tātou i whakarongo atu; nā reira hoki i puta mai ai tēnei hē ki a tātou.”
GEN 42:22 Nā, ka whakahoki a Reupena ki a rātou, ka mea, “Kāhore ianei ahau i kī atu ki a koutou, i mea, ‘Kaua e hara ki te tamaiti’; ā, kīhai koutou i rongo? Nā, ko ōna toto anō hoki tēnei te whakatakina nei.”
GEN 42:23 Ā, kīhai rātou i mōhio e rongo ana a Hōhepa; nō te mea he kaiwhakamāori hoki i waenganui i a rātou.
GEN 42:24 Nā, ka tahuri kē atu ia i a rātou, ā, ka tangi. Ka hoki anō ia ki a rātou, ka kōrero ki a rātou, ka tango hoki i a Himiona i roto i a rātou, ā, herea ana e ia ki tō rātou aroaro.
GEN 42:25 Nā, ka whakahaua e Hōhepa kia whakakīia ā rātou pēke ki te wīti, kia whakahokia atu ngā moni a tēnei, a tēnei, ki ā rātou pēke, kia hoatu anō hoki ki a rātou he ō ki te ara; nā, pērā ana ia ki a rātou.
GEN 42:26 Nā, ka utaina e rātou ā rātou wīti ki ā rātou kāihe, ā, haere atu ana i reira.
GEN 42:27 Ā, i te whakatuwheratanga a tētahi o rātou i tāna pēke kia hoatu he kai mā tana kāihe i te whare tira, ka kitea e ia tāna moni; nā, kei te waha tonu o tāna pēke.
GEN 42:28 Ā, ka mea ia ki ōna tuākana, “Kua whakahokia mai tāku moni; ā, tēnei anō kei roto i tāku pēke.” Nā, kore ake ō rātou ngākau, ā, ka tahuri rātou me te wiri, ka mea tētahi ki tētahi, “He mahi aha tēnei a te Atua ki a tātou?”
GEN 42:29 Nā, ka tae rātou ki a Hākopa, ki tō rātou pāpā, ki te whenua o Kanaana, ā, ka kōrerotia ki a ia ngā mea katoa i pono ki a rātou; ka mea,
GEN 42:30 “I kōrero whakatuma mai te rangatira o te whenua ki a mātou; i kīia anō mātou e ia he tūtei mō te whenua.
GEN 42:31 Ā, ka mea mātou ki a ia, ‘He tangata pono mātou; ehara mātou i te tūtei.
GEN 42:32 Kotahi tekau mā rua mātou, he tuākana, he tēina, he tama nā tō mātou pāpā; kotahi kua kore, kei tō mātou pāpā hoki te whakaotinga ināianei, kei te whenua o Kanaana.’
GEN 42:33 “Nā, ko te meatanga mai a taua tangata, a te rangatira o te whenua, ki a mātou, ‘Mā tēnei e mōhio ai ahau he hunga pono koutou; me waiho e koutou tētahi o ō koutou tuākana ki ahau, ā, me mau atu e koutou he kai mō te matekai o ō koutou whare, ā, ka haere.
GEN 42:34 Ā, me kawe mai tō koutou teina, te whakaotinga, ki ahau, kia mōhio ai ahau ehara koutou i te tūtei, engari he hunga pono koutou. Pēnei ka hoatu e ahau tō koutou tuakana ki a koutou, ā, ka hokohoko koutou ki tēnei whenua.’ ”
GEN 42:35 Ā, i a rātou e ringiringi ana i ā rātou pēke, nā, ko te moni a tēnei, a tēnei e takai ana i roto i ā rātou pēke; ā, ka kite rātou ko tō rātou pāpā i ngā moni e takai ana, nā, ka wehi rātou.
GEN 42:36 Nā, ka mea a Hākopa, tō rātou pāpā, ki a rātou, “Ka whakapania ahau e koutou: ko Hōhepa kua kāhore, ko Himiona hoki kua kāhore, ā, ka tangohia nei e koutou a Pineamine. He pēhi mōku ēnei mea katoa.”
GEN 42:37 Nā, ka kōrero a Reupena ki tōna pāpā, ka mea, “Whakamatea āku tama tokorua, ki te kāhore ia e kawea mai e ahau ki a koe; hōmai ia ki tōku ringa, ā, māku ia e whakahoki mai ki a koe.”
GEN 42:38 Ā, ka mea ia, “E kore tāku tama e haere tahi i a koutou ki raro; kua mate hoki tōna tuakana, ā, ko ia anake ka mahue nei; ā, ki te pono he aituā ki a ia i te ara e haere nei koutou, kātahi ka meinga tōku koroheketanga e koutou kia heke tangi atu ki te pō.”
GEN 43:1 Ā, he tino nui te matekai o te whenua.
GEN 43:2 Ā, ka pau te wīti i maua mai e rātou i Īhipa, nā, ka mea tō rātou pāpā ki a rātou, “Hoki atu ki te hoko i tētahi wāhi kai mā tātou.”
GEN 43:3 Ā, ka kōrero a Hūrā ki a ia, ka mea, “I tino whakatūpato taua tangata i a mātou, i mea, ‘E kore koutou e kite i tōku mata ki te kāhore tō koutou teina i a koutou.’
GEN 43:4 Ki te tukua e koe tō mātou teina hei hoa mō mātou, ka haere mātou ki raro ki te hoko kai māu.
GEN 43:5 Ki te kāhore ia e tukua e koe, e kore mātou e haere ki raro. Nō te mea i kī mai taua tangata ki a mātou, ‘E kore koutou e kite i tōku mata ki te kāhore tō koutou teina i a koutou.’ ”
GEN 43:6 Nā, ka mea a Īharaira, “He aha koutou i ngārahu kino ai ki ahau, i whakaatu ai ki taua tangata he teina anō tō koutou?”
GEN 43:7 Ā, ka mea rātou, “I tino ui taua tangata ki ō mātou āhua, ki ō mātou whanaunga hoki, i mea mai, ‘E ora ana anō rānei tō koutou pāpā? Tēnā anō rānei tētahi atu teina o koutou?’ Ā, rite tonu ki ēnei kupu tā mātou i kōrero ai ki a ia; tērā rānei mātou e āta mōhio ka kī mai ia, ‘Kawea mai tō koutou teina ki raro nei’?”
GEN 43:8 Nā, ka mea a Hūrā ki tōna pāpā, ki a Īharaira, “Tukua te tamaiti ki ahau, ā, ka whakatika mātou, ka haere; kia ora ai tātou, kei mate tahi hoki mātou me koe, me ā mātou pōtiki.
GEN 43:9 Ko ahau hei utu mōna; me rapu ia e koe i tōku ringa. Ki te kāhore ahau e kawe mai i a ia ki a koe, e whakatū hoki i a ia ki tōu aroaro, nā, hei whakahēnga ahau māu i ngā rā katoa.
GEN 43:10 Me i kāhore hoki mātou i roa nei, kua rua ēnei hokinga mai o mātou ināianei.”
GEN 43:11 Kātahi ka mea a Īharaira, tō rātou pāpā ki a rātou, “Ki te mea rā he pēnei te hanga, ko tēnei tā koutou e mea ai: maua atu ētahi o ngā hua papai o te whenua i roto i ā koutou oko, kawea atu hoki he hākari ki raro, ki taua tangata – tētahi wāhi pama, me tētahi wāhi honi, ētahi paihe, me ētahi maira, ētahi nati, me ētahi aramona.
GEN 43:12 Kia takirua hoki ngā hiriwa e maua atu i roto i ō koutou ringa; ko te moni hoki i whakahokia mai i te waha o ā koutou pēke, me whakahoki atu anō tēnā i roto i ō koutou ringa; he pōhēhē noa pea tēnā.
GEN 43:13 Kawea atu anō hoki tō koutou teina, ā, whakatika, hoki atu anō ki taua tangata.
GEN 43:14 Ā, mā te Atua Kaha Rawa e tuku mai ki a koutou kia arohaina mai e taua tangata, kia tonoa mai anō e ia tērā tuakana o koutou, rāua ko Pineamine. Ko ahau hoki, ki te whakapania ahau, ka whakapania ahau.”
GEN 43:15 Nā, ka mau aua tāngata ki taua hākari, e rua hoki ngā moni i maua atu e rātou i roto i ō rātou ringa, me Pineamine hoki; ā, whakatika ana rātou, haere ana ki raro, ki Īhipa, ā, ka tū ki te aroaro o Hōhepa.
GEN 43:16 Ā, ka kitea a Pineamine e Hōhepa i roto i a rātou, nā, ka mea ia ki te kaitohutohu o tōna whare, “Kawea ēnā tāngata ki te whare, patua he kai, takā hoki; ka kai tahi hoki mātou ko ēnā tāngata ina tū te rā.”
GEN 43:17 Nā, ka meatia e taua tangata tā Hōhepa i kī ai; ā, ka kawea aua tāngata e taua tangata ki te whare o Hōhepa.
GEN 43:18 Nā, ka wehi aua tāngata, mō rātou i kawea ki te whare o Hōhepa; ā, ka mea rātou, “Mō te moni i whakahokia i roto i ā tātou pēke i te haerenga tuatahi i kawea mai ai tātou; kia whai take mai ai ia ki a tātou, mō tāna rere mai ki a tātou ki te tango i a tātou hei pononga, me ā tātou kāihe hoki.”
GEN 43:19 Nā, ka whakatata rātou ki te kaitohutohu o te whare o Hōhepa, ka kōrero ki a ia i te kūwaha o te whare,
GEN 43:20 ka mea, “E te ariki, i haere mai anō mātou i mua ki te hoko kai.
GEN 43:21 Ā, nō tō mātou taenga ki te whare tira, i tā mātou whakatuwheratanga i ā mātou pēke, nā, ko te moni a tēnei, a tēnei, i te waha o tāna pēke, tā mātou moni, rite tonu te taimaha; ā, kua whakahokia mai taua mea e mātou i roto i ō mātou ringa.
GEN 43:22 Kua kawea mai anō e mātou i roto i ō mātou ringa tētahi atu moni hei hoko kai. Kāhore mātou e mōhio nā wai rānei i maka ā mātou moni ki ā mātou pēke.”
GEN 43:23 Ā, ka mea ia, “Kia tau te rangimārie ki a koutou, kaua e wehi. Nā tō koutou Atua, nā te Atua hoki o tō koutou pāpā i hōmai he taonga ki a koutou ki roto ki ā koutou pēke. I tae mai anō tā koutou moni ki ahau.” Ā, ka kawea e ia a Himiona ki a rātou.
GEN 43:24 Nā, ka kawe taua tangata i aua tāngata ki te whare o Hōhepa, ka hoatu e ia he wai hei horoi mō ō rātou waewae; i hoatu anō e ia he kai mā ā rātou kāihe.
GEN 43:25 Nā, ka takā e rātou te hākari mō te taenga mai o Hōhepa i te awatea; i rongo hoki rātou me kai taro rātou ki reira.
GEN 43:26 Ā, i te taenga mai o Hōhepa ki te whare, ka kawea e rātou ki a ia te hākari a ō rātou ringa ki te whare, ā, ka piko ki a ia ki te whenua.
GEN 43:27 Nā, ka ui ia ki a rātou ki te pai, ka mea, “Kei te pai rānei tō koutou pāpā, te koroheke i kōrerotia mai rā e koutou? E ora ana anō rānei ia?”
GEN 43:28 Ā, ka mea rātou ki a ia, “Kei te pai tāu pononga, tō mātou pāpā, e ora ana anō ia.” Nā, ka tuohu rātou, ka piko iho.
GEN 43:29 Ka maranga tōna kanohi, ka kite ia i a Pineamine, i tōna teina, i te tama a tōna whaea, ā, ka mea, “Ko tō koutou teina tēnei, ko te whakaotinga i kōrerotia rā e koutou ki ahau?” I mea anō ia, “Kia aroha te Atua ki a koe, e tāku tama.”
GEN 43:30 Nā, ka hohoro a Hōhepa; he tokonga ake hoki nō tōna ngākau aroha ki tōna teina; ā, ka rapua e ia tētahi wāhi hei tangihanga. Ā, haere ana ia ki te rūma i roto, ki reira tangi ai.
GEN 43:31 Nā, ka horoia e ia tōna mata, ka puta ki waho, ka whakamanawanui, ka mea, “Whakatakotoria he taro.”
GEN 43:32 Nā, ka whakatakotoria e rātou, māna ki a ia anake, mā rātou ki a rātou anake, mā ngā Īhipiana, i kai tahi me ia, ki a rātou anake. E kore hoki e āhei i ngā Īhipiana te kai taro tahi me ngā Hiperu; he mea whakarihariha hoki tēnā ki ngā Īhipiana.
GEN 43:33 Nā, ka noho rātou ki tōna aroaro, tō mua rite tonu anō ki tōna muanga, tō muri rite tonu anō ki tōna muringa; ā, mīharo ana aua tāngata tētahi ki tētahi.
GEN 43:34 Nā, ka tuwhaina atu e ia ētahi o ngā wāhi i tōna aroaro mā rātou. He nui rawa ia te wāhi i a Pineamine; me i takirimatia te wāhi a tētahi o rātou kua rite ki tāna. Nā, ka inu rātou, ka koa tahi me ia.
GEN 44:1 Nā, ka whakahau ia ki te kaitohutohu o tōna whare, ka mea, “Whakakīia ngā pēke a aua tāngata ki ngā kai e taea te whawhao ki roto, me maka anō te moni a tēnei, a tēnei, ki te waha o tāna pēke.
GEN 44:2 Whaowhina hoki tāku kapu, te kapu hiriwa, ki te waha o te pēke a te whakaotinga, me te moni anō mō tāna wīti.” Nā, rite tonu tāna i mea ai ki tā Hōhepa kupu i kī ai.
GEN 44:3 Ā, ka mārama te ata, ka tonoa atu aua tāngata, rātou me ā rātou kāihe.
GEN 44:4 Ā, nō tō rātou haerenga atu i te pā, kīhai i matara, ka mea a Hōhepa ki te kaitohutohu o tōna whare, “Whakatika, whāia aua tāngata; ā, ka mau rātou i a koe, ka mea ki a rātou, ‘He aha i utua ai e koutou te pai ki te kino?
GEN 44:5 Ehara ianei tēnei i te mea e inu ai tōku ariki, i tāna hoki e kite tohu ai ia? Ka kino tā koutou mahi.’ ”
GEN 44:6 Nā, ka mau rātou i a ia, ā, kōrerotia ana e ia aua kupu ki a rātou.
GEN 44:7 Ā, ka mea rātou ki a ia, “He aha ēnei kupu i kōrerotia ai e tōku ariki? Auē, kia meatia tēnei mea e āu pononga.
GEN 44:8 Nanā, ko te moni i kitea e mātou i te waha o ā mātou pēke, i whakahokia mai e mātou ki a koe i te whenua o Kanaana; ā, kia tāhae mātou hei aha i te hiriwa, i te kōura rānei, i roto i te whare o tōu ariki?
GEN 44:9 Ki te mea ka kitea taua mea ki tētahi o āu pononga, kia mate ia, kia waiho anō mātou hei pononga mā tōku ariki.”
GEN 44:10 Ā, ka mea ia, “Kia rite anō hoki āianei ki tā koutou i mea ai: e kitea taua mea ki tētahi, hei pononga ia māku; ā, kāhore he whakahē mō koutou.”
GEN 44:11 Nā, hohoro tonu tā rātou tuku iho i tāna pēke, i tāna pēke, ki te whenua, ā, whakatuwheratia ana e rātou tāna pēke, tāna pēke.
GEN 44:12 Nā, ka rapu ia, tīmata i te mātāmua, ā, whakamutu ki te whakaotinga; ā, ka kitea te kapu i roto i te pēke a Pineamine.
GEN 44:13 Nā, ka haehae rātou i ō rātou kākahu, ā, whakawahā ana e rātou tana kāihe, tana kāihe, hoki ana ki te pā.
GEN 44:14 Nā, ka haere a Hūrā rātou ko ōna tuākana, ko ōna tēina, ki te whare o Hōhepa; ā, i reira tonu ia; ā, tāpapa ana ki te whenua i tōna aroaro.
GEN 44:15 Nā, ka mea a Hōhepa ki a rātou, “He aha tēnei mea i meatia nei e koutou? Kīhai rānei koutou i mahara he tangata matakite te pēnei me ahau nei?”
GEN 44:16 Nā, ka mea a Hūrā, “He aha tā mātou e mea ai ki tōku ariki? He aha tā mātou e kōrero ai? Me aha rānei hei whakatika i a mātou? Kua kitea e te Atua te hara o āu pononga; nā, tēnei mātou hei pononga mā tōku ariki, mātou tahi hoki ko te tangata i kitea nei te kapu ki a ia.”
GEN 44:17 Anō rā ko ia, “Engari, kia meatia tēnei e ahau! Ko te tangata i kitea nei te kapu ki a ia, ko ia hei pononga māku; ko koutou ia, haere mārie koutou ki runga, ki tō koutou pāpā.”
GEN 44:18 Kātahi ka whakatata a Hūrā ki a ia, ka mea, “Tukua tāu pononga, e tōku ariki, kia kōrero i tētahi kupu ki ngā taringa o tōku ariki, kei mura hoki tōu riri ki tāu pononga; ko kōrua hoki ko Parao rite tahi.
GEN 44:19 I ui mai tōku ariki ki āna pononga, i mea, ‘He pāpā rānei tō koutou, he teina rānei?’
GEN 44:20 Ā, ka mea mātou ki tōku ariki, ‘He pāpā anō tō mātou, he koroheke, me tētahi tama o tōna koroheketanga, he mea iti; kua mate hoki tōna tuakana, ā, ko ia anake i mahue o ngā tamariki a tōna whaea, e aroha ana hoki tōna pāpā ki a ia.’
GEN 44:21 “Nā, ka mea mai koe ki āu pononga, ‘Kawea mai ia ki raro nei, ki ahau, kia tau atu ai ōku kanohi ki a ia.’
GEN 44:22 Kātahi mātou ka mea ki tōku ariki, ‘E kore e āhei kia whakarērea tōna pāpā e taua tamaiti. Nō te mea ka mate tōna pāpā ki te mahue i a ia.’
GEN 44:23 Nā, ka mea koe ki āu pononga, ‘Ki te kāhore tō koutou teina, te whakaotinga, e haere tahi mai i a koutou ki raro nei, e kore koutou e kite i tōku kanohi ā muri ake nei.’
GEN 44:24 Ā, i tō mātou haerenga ki runga, ki tāu pononga, ki tōku pāpā, nā, ka kōrerotia e mātou ngā kupu a tōku ariki ki a ia.
GEN 44:25 “Ā, ka mea mai tō mātou pāpā, ‘Hoki atu ki te hoko i tētahi wāhi kai mā tātou.’
GEN 44:26 Nā, ka mea mātou, ‘E kore e āhei ki a mātou te haere ki raro. Ki te mea kei a mātou tō mātou teina, te whakaotinga, nā, ka haere mātou ki raro; nō te mea hoki e kore e taea e mātou te titiro ki te kanohi o taua tangata, ki te kāhore tō mātou teina, te whakaotinga, i a mātou.’
GEN 44:27 “Nā, ka mea tāu pononga, tōku pāpā, ki a mātou, ‘E mōhio ana koutou, tokorua ngā tama a māua ko tāku wahine.
GEN 44:28 Ā, i haere atu tētahi i tōku taha, i mea hoki ahau, “He pono kua haea pūtia ia.” Ā, kāhore ahau i kite i a ia ā mohoa noa nei.
GEN 44:29 Ki te tangohia anō hoki tēnei e koutou i tōku aroaro, ā, ka pono he aituā ki a ia, kātahi ka meinga e koutou kia heke tangi atu tōku koroheketanga ki te pō.’
GEN 44:30 “Heoi, ki te haere atu ahau ki tāu pononga, ki tōku pāpā, ā, kāhore taua tamaiti i a mātou; kei roto nei hoki i tōna wairua tōna wairua e paihere ana.
GEN 44:31 Nā, kei tōna kitenga kua kore tēnei tama, ka mate ia; ā, ka meinga e mātou, e āu pononga, te koroheketanga o tāu pononga, o tō mātou pāpā, kia heke tangi atu ki te pō.
GEN 44:32 I waiho hoki tāu pononga hei utu mō tēnei tama ki tōku pāpā, i mea ahau, ‘Ki te kāhore ia e kawea mai e ahau ki a koe, nā, hei whakahēnga ahau mā tōku pāpā i ngā rā katoa.’
GEN 44:33 “Heoi, kia noho rā tāu pononga āianei hei utu mō tēnei tama, hei pononga mā tōku ariki; ā, kia haere tahi te tama i ōna tuākana ki runga.
GEN 44:34 Me pēhea hoki ahau e haere ai ki runga, ki tōku pāpā, ki te kāhore te tama i ahau? Kei kite ahau i te kino e pā ana ki tōku pāpā.”
GEN 45:1 Nā, kīhai i taea e Hōhepa te whakamanawanui i te aroaro o te hunga katoa e tū ana i tōna taha; ā, ka karanga ia, “Haere katoa atu ngā tāngata i tōku taha.” Ā, kīhai i tū tētahi tangata i tōna taha, i a Hōhepa e whakaatu ana i a ia ki ōna tuākana.
GEN 45:2 Nā, he nui tōna reo ki te tangi; ā, ka rongo ngā Īhipiana, ka rongo anō hoki te whare o Parao.
GEN 45:3 Nā, ka mea a Hōhepa ki ōna tuākana, “Ko Hōhepa ahau; e ora ana anō rānei tōku pāpā?” Ā, kīhai ōna tuākana i āhei te whakahoki kupu ki a ia; i pororaru hoki rātou i tōna aroaro.
GEN 45:4 Ā, ka mea a Hōhepa ki ōna tuākana, “Whakatata mai rā ki ahau.” Ā, ka whakatata rātou. Ā, ka mea ia, “Ko Hōhepa ahau, ko tō koutou teina i hokona nei e koutou ki Īhipa.
GEN 45:5 Nā, kaua rā e pōuri, kaua hoki e mumura ō koutou kanohi, mō koutou i hoko i ahau ki konei; nō te mea he mea tono mai ahau e te Atua ki mua i a koutou hei whakaora tāngata.
GEN 45:6 Ka rua hoki ēnei tau o te matekai ki te whenua; kei muri anō ētahi atu tau e rima, e kore ai e parau, e kore ai e kokoti.
GEN 45:7 Kua tonoa mai nei hoki ahau e te Atua ki mua i a koutou kia whai putanga ai koutou ki te ao, kia ora ai hoki koutou i runga i te whakaoranga nui.
GEN 45:8 “Inā, ehara i a koutou nāna ahau i tono mai ki konei, engari nā te Atua. Kua waiho hoki ahau e ia hei matua ki a Parao, hei ariki anō mō tōna whare katoa, hei kāwana hoki mō te whenua katoa o Īhipa.
GEN 45:9 Hohoro, haere ki runga, ki tōku pāpā, mea atu ki a ia, ‘He pēnei te kupu a tāu tama a Hōhepa, Kua meinga ahau e te Atua hei ariki mō Īhipa katoa; haere mai ki ahau, kaua e whakaroa.
GEN 45:10 Ā, me noho koe ki te whenua o Kohena, ā, ka tata koe ki ahau, koutou ko āu tama, ko ngā tama hoki a āu tama, me āu kāhui, me āu kau, me āu mea katoa.
GEN 45:11 Ā, ka atawhai ahau i a koe ki reira – e rima hoki ēnei tau matekai kei muri nei – kei rawakoretia koutou ko tōu whare me āu mea katoa.’
GEN 45:12 “Nā, ka kite nei ō koutou kanohi, me ngā kanohi o tōku teina, o Pineamine, ko tōku waha tēnei te kōrero nei ki a koutou.
GEN 45:13 Ā, mā koutou e kōrero ki tōku pāpā tōku korōria katoa i Īhipa, me ngā mea katoa i kite nei koutou; kia hohoro anō tā koutou kawe mai i tōku pāpā ki konei.”
GEN 45:14 Nā, ka hinga ia ki runga ki te kakī o Pineamine, o tōna teina, ā, ka tangi, ka tangi anō a Pineamine i runga i tōna kakī.
GEN 45:15 Ā, ka kihi ia i ōna tuākana katoa, ka tangi hoki ki a rātou. Ā muri iho ka kōrero ōna tuākana ki a ia.
GEN 45:16 Nā, ka tae te rongo ki te whare o Parao, ka kōrerotia, “Kua tae mai ngā tuākana o Hōhepa.” He mea pai anō tēnā ki te whakaaro o Parao, o āna tāngata hoki.
GEN 45:17 Nā, ka mea a Parao ki a Hōhepa, “Kōrero ki ōu tuākana, ‘Ko tēnei tā koutou e mea ai: whakawahā ā koutou kararehe, ā, whakatika, haere ki te whenua o Kanaana.
GEN 45:18 Tīkina hoki tō koutou pāpā, me ngā tāngata o ō koutou whare, ā, haere mai ki ahau; ā, ka hoatu e ahau ki a koutou ngā mea papai o te whenua o Īhipa, ā, ka kai koutou i te mōmonatanga o te whenua.’
GEN 45:19 “Nā, kua whakahaua nei koe, meatia tēnei e koutou, ‘Mauria atu ētahi kāta mā koutou i te whenua o Īhipa mō ā koutou tamariki, mō ā koutou wāhine, ā, kawea mai tō koutou pāpā, haere mai hoki.
GEN 45:20 Ā, kaua e whakaaro ki ā koutou mea; mā koutou hoki ngā mea pai o te whenua katoa o Īhipa.’ ”
GEN 45:21 Nā, ka pērā ngā tama a Īharaira, ā, ka hōmai he kāta e Hōhepa ki a rātou, ka pērā me tā Parao i kī ai, i hōmai anō e ia he ō mō rātou ki te ara.
GEN 45:22 I hōmai anō hoki e ia ki a rātou katoa he whakatakirua mō ngā kākahu o tētahi, o tētahi; ki a Pineamine ia i hōmai e ia e toru rau hiriwa, takirima anō hoki ngā kākahu.
GEN 45:23 Ā, ko ngā mea tēnei i hōmai e ia kia kawea ki tōna pāpā; kotahi tekau ngā kāihe e waha ana i ngā mea papai o Īhipa, me ngā kāihe uha kotahi tekau, ko tā rātou kawenga he wīti, he taro, hei kai mā tōna pāpā ki te ara.
GEN 45:24 Nā, ka tonoa atu e ia ōna tuākana, ā, haere ana rātou; ka mea hoki ia ki a rātou, “Kei ngangau koutou ki te ara.”
GEN 45:25 Nā, haere ana rātou i Īhipa ki runga, ā, ka tae ki te whenua o Kanaana, ki a Hākopa, ki tō rātou pāpā,
GEN 45:26 ā, ka kōrero ki a ia, ka mea, “E ora ana anō a Hōhepa, ko ia hoki te kāwana o te whenua katoa o Īhipa.” Nā, ka whakapau te manawa o Hākopa, kīhai hoki ia i whakapono ki a rātou.
GEN 45:27 Nā, ka kōrerotia e rātou ki a ia ngā kupu katoa a Hōhepa i kōrero ai ia ki a rātou; ā, ka kite ia i ngā kāta i tukua mai e Hōhepa hei tiki mai mōna, nā, ka ora ake te wairua o Hākopa, o tō rātou pāpā;
GEN 45:28 ā, kātahi a Īharaira ka mea, “Heoi anō; e ora ana anō tāku tama, a Hōhepa. Ka haere ahau kia kite i a ia keiwhā mate ahau.”
GEN 46:1 Nā, ka tūria e Īharaira me āna mea katoa, ā, ka tae ki Peerehepa, ā, ka patua e ia ētahi patunga tapu mā te Atua o tōna pāpā, o Īhaka.
GEN 46:2 Nā, ka kōrero moemoeā te Atua ki a Īharaira i te pō, ka mea, “E Hākopa, e Hākopa.” Ā, ka mea ia, “Tēnei ahau.”
GEN 46:3 Ā, ka mea ia, “Ko te Atua ahau, ko te Atua o tōu pāpā; kaua e wehi ki te haere ki raro, ki Īhipa; ka meinga hoki koe e ahau hei iwi nui ki reira.
GEN 46:4 Ka haere tahi ahau i a koe ki raro, ki Īhipa; māku anō koe e whakahoki mai ki runga nei; ā, mā te ringa o Hōhepa e pēhi ōu kanohi.”
GEN 46:5 Nā, ka whakatika atu a Hākopa i Peerehepa, ā, ka kawea a Hākopa, tō rātou pāpā, e ngā tama a Īharaira, me ā rātou tamariki, me ā rātou wāhine, i runga i ngā kāta i tukua mai e Parao hei tiki atu i a ia.
GEN 46:6 I kawea anō e rātou ā rātou kararehe, me ā rātou taonga i whiwhi ai ki te whenua o Kanaana, ā, haere ana ki Īhipa a Hākopa rātou tahi ko ōna uri katoa,
GEN 46:7 ko āna tama; ko ngā tama hoki a āna tama, ko āna tamāhine, me ngā tamāhine a āna tama, me ōna uri katoa i kawea e ia ki Īhipa.
GEN 46:8 Nā, ko ngā ingoa ēnei o ngā tama a Īharaira, i haere nei ki Īhipa, ko Hākopa rātou ko āna tama. Ko Reupena, mātāmua a Hākopa.
GEN 46:9 Ko ngā tama a Reupena: ko Hanoka, ko Paru, ko Heterono, ko Karami.
GEN 46:10 Ko ngā tama a Himiona: ko Iemuere, ko Iamini, ko Ohara, ko Iakini, ko Tohara, rātou ko Hauru, ko te tama a tētahi wahine Kanaani.
GEN 46:11 Ko ngā tama a Rīwai: ko Kerehona, ko Kohata, ko Merari.
GEN 46:12 Ko ngā tama a Hūrā: ko Ere, ko Onana, ko Heraha, ko Parete, ko Tera (ko Ere ia rāua ko Onana i mate ki te whenua o Kanaana). Ko ngā tama a Parete: ko Heterono rāua ko Hāmuru.
GEN 46:13 Ko ngā tama a Ihākara: ko Tora, ko Puwa ko Hopa, ko Himirono.
GEN 46:14 Ko ngā tama a Hepurona: ko Herete, ko Erono, ko Iahareere.
GEN 46:15 Ko ngā tama ēnei a Rea, i whānau nei i a rāua ko Hākopa ki Paranārama, rātou ko tāna tamāhine Rina. E toru tekau mā toru ngā wairua katoa o āna tama, o āna tamāhine.
GEN 46:16 Ko ngā tama a Kara: ko Hipiona, ko Haki, ko Huni, ko Etepono, ko Eri, ko Arori, ko Areri.
GEN 46:17 Ko ngā tama a Āhera: ko Imina, ko Ihua, ko Ihui, ko Peria, rātou ko Hera, ko tō rātou tuahine. Ko ngā tama a Peria: ko Hēpere rāua ko Marakiere.
GEN 46:18 Ko ngā tama ēnei a Tiripa, a tērā i hōmai nei e Rāpana ki a Rea, ki tāna tamāhine, i whānau nei i a rāua ko Hākopa; kotahi tekau mā ono wairua.
GEN 46:19 Ko ngā tama a Rahera, wahine a Hākopa: ko Hōhepa rāua ko Pineamine.
GEN 46:20 Ā, whānau ake a Hōhepa i te whenua o Īhipa, ko Mānahi rāua ko Ēparaima, he whānau ēnei nā rāua ko Ahenata, tamāhine a Potiwhera tohunga o Ono.
GEN 46:21 Ko ngā tama a Pineamine: ko Pera, ko Pekere, ko Ahapere, ko Kera, ko Naamana, ko Ehi, ko Roho, ko Mupimi, ko Hupimi, ko Arare.
GEN 46:22 Ko ngā tama ēnei a Rahera, i whānau nei mā Hākopa; ko ngā wairua katoa kotahi tekau mā whā.
GEN 46:23 Ko ngā tama a Rāna: ko Huhimi.
GEN 46:24 Ko ngā tama a Napatari: ko Iahateere, ko Kuni, ko Iētere, ko Hireme.
GEN 46:25 Ko ngā tama ēnei a Piriha, a tērā i hōmai nei e Rāpana ki tāna tamāhine, ki a Rahera, ā, whānau ake ēnei i a rāua ko Hākopa; e whitu aua wairua katoa.
GEN 46:26 Ko ngā wairua katoa i haere tahi nei i a Hākopa ki Īhipa, i puta mai nei i roto i tōna hope, e ono tekau mā ono ngā wairua katoa; hāunga ngā wāhine a ngā tama a Hākopa.
GEN 46:27 Ko ngā tama a Hōhepa, i whānau nei māna ki Īhipa, e rua ngā wairua, e whitu tekau ngā wairua katoa o te whare o Hākopa i haere nei ki Īhipa.
GEN 46:28 Nā, ka tonoa e ia a Hūrā ki mua a ia, ki a Hōhepa, hei ārahi i a ia ki Kohena; ā, ka tae rātou ki te whenua o Kohena.
GEN 46:29 Nā, ka whakanohoia e Hōhepa tōna hāriata, ā, haere ana ki te whakatau i tōna pāpā, i a Īharaira ki Kohena. Ā, ka tae atu ki tōna aroaro, nā, ka hinga ia ki runga ki tōna kakī, ā, he roa tāna tangihanga i runga i tōna kakī.
GEN 46:30 Nā, ka mea a Īharaira ki a Hōhepa, “He pai ki te mate ahau āianei, nōku hoki ka kite i tōu mata, nō te mea e ora ana anō koe.”
GEN 46:31 Nā, ka mea a Hōhepa ki ōna tuākana, ki te whare anō hoki o tōna pāpā, “Ka haere ahau ki runga, ki te kōrero ki a Parao, ki te mea ki a ia, ‘Kua tae mai ki ahau ōku tuākana, me te whare o tōku pāpā, i noho rā i te whenua o Kanaana.
GEN 46:32 Nā, he hēpara aua tāngata, he hunga whāngai kararehe rātou; kua kawea mai anō e rātou ā rātou kāhui, ā rātou kau, me ā rātou mea katoa.’
GEN 46:33 Ā, ka karanga a Parao i a koutou, ka mea, ‘He aha tā koutou mahi?’
GEN 46:34 Me kī atu e koutou, ‘He hunga whāngai kararehe āu pononga, o tō mātou taitamarikitanga ake ā mohoa noa nei, mātou, me ō mātou mātua’ – kia noho ai koutou ki te whenua o Kohena; nō te mea hoki he mea whakarihariha ki ngā Īhipiana ngā hēpara katoa.”
GEN 47:1 Nā, ka haere a Hōhepa, ka kōrero ki a Parao, ka mea, “Kua tae mai tōku pāpā me ōku tuākana, me ā rātou kāhui, ā rātou kau, ā rātou mea katoa, i te whenua o Kanaana; nā, kei te whenua rātou o Kohena.”
GEN 47:2 Nā, ka tango ia i ētahi o ōna tuākana, tokorima, ā, whakatūria ana rātou e ia ki te aroaro o Parao.
GEN 47:3 Ā, ka mea a Parao ki ōna tuākana, “He aha tā koutou nā mahi?” Ā, ka mea rātou ki a Parao, “He hēpara āu pononga, mātou me ō mātou mātua.”
GEN 47:4 I mea anō rātou ki a Parao, “He noho ki tēnei whenua i haere mai ai mātou; nō te mea kāhore he kai mā ngā hipi a āu pononga; he nui hoki te matekai o te whenua o Kanaana; koia rā kia noho āu pononga ki te whenua o Kohena.”
GEN 47:5 Nā, ka kōrero a Parao ki a Hōhepa, ka mea, “Kua tae mai nei tōu pāpā me ōu tuākana ki a koe.
GEN 47:6 Kei tōu aroaro te whenua o Īhipa; whakanohoia e koe tōu pāpā me ōu tuākana ki te wāhi pai o te whenua; kia noho rātou ki te whenua o Kohena. Ki te mea hoki e mōhiotia ana e koe ētahi tāngata pakari i roto i a rātou, meinga rātou hei rangatira mō āku kararehe.”
GEN 47:7 Nā, ka kawea mai a Hākopa, tōna pāpā, e Hōhepa, ka whakatūria ki te aroaro o Parao; ā, ka manaaki a Hākopa i a Parao.
GEN 47:8 Ā, ka mea a Parao ki a Hākopa, “Ka hia ōu tau?”
GEN 47:9 Ka mea a Hākopa ki a Parao, “Ka kotahi rau e toru tekau tau ngā rā o ngā tau o tōku noho manene. He torutoru, ā, he kino ngā rā o ngā tau o tōku ora, kīhai anō hoki i rite ki ngā rā o ngā tau o te ora o ōku mātua, i ngā rā i noho manene ai rātou.”
GEN 47:10 Nā, ka manaaki a Hākopa i a Parao, ā, puta atu ana i te aroaro o Parao.
GEN 47:11 Nā, ka whakanohoia e Hōhepa tōna pāpā me ōna tuākana, ā, hoatu ana e ia ki a rātou he kāinga i te whenua o Īhipa, i te wāhi pai rawa o te whenua, i te whenua o Ramehehe, pērā me tā Parao i whakahau ai.
GEN 47:12 Nā, ka atawhai a Hōhepa i tōna pāpā, rātou ko ōna tuākana, ko te whare katoa anō hoki o tōna pāpā ki te taro, he mea whakarite tonu ki ō rātou hapū.
GEN 47:13 Ā, kāhore he taro o te whenua katoa; he nui rawa hoki te matekai; ā, hemo noa iho te whenua o Īhipa i te matekai, me te whenua hoki o Kanaana.
GEN 47:14 Ā, kohia ana e Hōhepa te moni katoa i kitea ki te whenua o Īhipa, ki te whenua hoki o Kanaana, mō te wīti i hokona e rātou; ā, kawea ana e Hōhepa te moni ki te whare o Parao.
GEN 47:15 Ā, nō te potonga o te moni o te whenua o Īhipa, o te whenua hoki o Kanaana, nā, ka haere ngā Īhipiana katoa ki a Hōhepa, ka mea, “Hōmai he taro ki a mātou; kia mate hoki mātou ki tōu aroaro hei aha? Kua poto nei hoki te moni.”
GEN 47:16 Nā, ka mea a Hōhepa, “Hōmai ā koutou kararehe; ā, ka hoatu e ahau hei utu mō ā koutou kararehe, i te mea kua poto te moni.”
GEN 47:17 Nā, ka kawea mai e rātou ā rātou kararehe ki a Hōhepa; ā, hoatu ana e Hōhepa he taro ki a rātou hei utu mō ngā hōiho, mō ngā kāhui hipi, mō ngā kāhui kau, mō ngā kāihe. Ā, whāngaia ana rātou e ia ki te taro i taua tau, hei utu mō ā rātou kararehe katoa.
GEN 47:18 Ā, nō te takanga o taua tau, ka haere mai rātou ki a ia i te rua o ngā tau, ka mea ki a ia, “E kore e hunā e mātou i tōku ariki, kua poto te moni; kei tōku ariki hoki ā mātou kāhui kararehe; kāhore he mea e toe ana hei tirohanga mā tōku ariki, ko ō mātou tinana anake, me ō mātou oneone.
GEN 47:19 Kia mate mātou ki tōu aroaro hei aha? Mātou tahi hoki me tō mātou oneone? Hokona mātou me tō mātou oneone ki te taro, ā, ka riro mātou me tō mātou oneone hei pononga mā Parao. Hōmai anō hoki he purapura, ā, ka ora mātou, ā, e kore e mate, e kore anō hoki e ururuatia te whenua.”
GEN 47:20 Nā, ka hokona e Hōhepa te oneone katoa o Īhipa mō Parao. I hokona hoki e ngā Īhipiana tāna māra, tāna māra; he pēhi rawa hoki nā te matekai i a rātou. Ā, riro ana te whenua i a Parao;
GEN 47:21 tēnā ko ngā tāngata, i whakawhitiwhitia e ia ki ngā pā, i tētahi pito o ngā rohe o Īhipa ā puta noa ki tētahi pito o reira.
GEN 47:22 Ko te oneone anake ia o ngā tohunga kīhai i hokona e ia; i whakaritea hoki tētahi wāhi e Parao mā ngā tohunga, ā, i kai rātou i tā rātou wāhi i hōmai e Parao mā rātou; koia tē hokona ai e rātou ō rātou oneone.
GEN 47:23 Ā, ka mea a Hōhepa ki te iwi, “Nanā, kua hokona nei koutou e ahau ināianei, me tō koutou oneone, mā Parao. Nā, he purapura mā koutou, ruia te whenua.
GEN 47:24 Ā, ka whai hua ā mua, me hōmai e koutou te rima o ngā wāhi ki a Parao, ā, mā koutou ngā wāhi e whā, hei purapura mō te māra, hei kai hoki mā koutou, mā te hunga hoki i roto i ō koutou whare, hei kai anō hoki mā ā koutou tamariki.”
GEN 47:25 Ā, ka mea rātou, “Ka ora mātou i a koe; kia manakohia mātou e tōku ariki, hei pononga mātou mā Parao.”
GEN 47:26 Nā, ka whakatakotoria te tikanga e Hōhepa mō te oneone o Īhipa ā tae noa mai ki tēnei rā, mā Parao te rima o ngā wāhi; hāunga ia te oneone o ngā tohunga, kīhai hoki tēnā i riro i a Parao.
GEN 47:27 Nā, ka noho a Īharaira ki te whenua o Īhipa, ki te whenua o Kohena; ka whai kāinga rātou ki reira, ka hua, ka nui whakaharahara.
GEN 47:28 Ā, kotahi tekau mā whitu ngā tau i ora ai a Hākopa ki te whenua o Īhipa; ā, kotahi rau e whā tekau mā whitu ngā tau o te oranga o Hākopa.
GEN 47:29 Nā, ka whakatata ngā rā o Īharaira e mate ai ia; ā, ka karanga i tāna tama, i a Hōhepa, ka mea ki a ia, “Nā, ki te mea ka manakohia ahau e koe, tēnā, whakapākia mai tōu ringa ki raro i tōku hūhā, ā, whakaputaina mai he aroha, he pono ki ahau; kaua rā ahau e tanumia ki Īhipa.
GEN 47:30 Engari, kia takoto ahau ki ōku mātua, me kawe atu ahau e koe i Īhipa, me tanu hoki ki tō rātou urupā.” Ā, ka mea ia, “Ka rite i ahau tāu kupu.”
GEN 47:31 Ā, ka mea ia ki a ia, “Oati mai ki ahau.” Ā, oati ana ia ki a ia, ā, ka piko a Īharaira ki runga ki te urunga o te moenga.
GEN 48:1 Nā, i muri i ēnei mea, ka kōrerotia ki a Hōhepa, “Nanā, e mate ana tōu pāpā.” Ā, ka tango ia i āna tamariki tokorua, i a Mānahi rāua ko Ēparaima, hei hoa mōna.
GEN 48:2 Ā, ka kōrerotia ki a Hākopa, ka meatia, “Nā, ko Hōhepa, ko tāu tama, tēnei te haere mai nei ki a koe,” nā, ka whakakaha ake a Īharaira i a ia, ā, ka noho ki runga i te moenga.
GEN 48:3 Nā, ka mea a Hākopa ki a Hōhepa, “I puta mai te Atua Kaha Rawa ki ahau i Rutu, i te whenua o Kanaana, i manaaki i ahau,
GEN 48:4 i mea anō ki ahau, ‘Nā, ka meinga koe e ahau kia hua, ka whakanui ahau i a koe, ka meinga hoki koe e ahau hei huinga iwi; ā, ka hoatu e ahau tēnei whenua ki ōu uri i muri i a koe hei kāinga pūmau.’
GEN 48:5 “Nā, ko āu tama tokorua, ko Ēparaima rāua ko Mānahi, i whānau nei māu ki te whenua o Īhipa i mua ake o tōku taenga mai ki a koe, ki Īhipa, māku ēnā; ka riro mai rāua i ahau, ka pērā anō me Reupena rāua ko Himiona.
GEN 48:6 Ā, ko tāu whānau e whānau māu i muri i a rāua, māu ēnā; ka huaina ki a rātou te ingoa o ō rātou tuākana i tō rātou kāinga pūmau.
GEN 48:7 Ko ahau hoki, i tōku haerenga mai i Parana, ka mate a Rahera ki tōku taha, ki te whenua o Kanaana, ki te ara, e takoto mai ana he wāhi e haere atu ai ki Ēparata; ā, tanumia ana e ahau ki reira ki te ara ki Ēparata” (arā ki Pēterehema).
GEN 48:8 Ā, ka kite a Īharaira i ngā tama a Hōhepa, ka mea, “Ko wai ēnei?”
GEN 48:9 Ā, ka mea a Hōhepa ki tōna pāpā, “Ko āku tama ēnei i hōmai e te Atua ki ahau i konei.” Ka mea ia, “Nekehia mai nei ki ahau, kia manaaki ai ahau i a rāua.”
GEN 48:10 Nā, he atarua ngā kanohi o Īharaira, nā, te koroheke hoki, kīhai ia i āhei te kite atu. Nā, ka whakatata ia i a rāua ki a ia, ā, ka kihi ia i a rāua, ka awhi hoki i a rāua.
GEN 48:11 Nā, ka mea a Īharaira ki a Hōhepa, “Kīhai ahau i mea ka kite ahau i tōu mata. Kua whakakitea mai nei anō hoki e te Atua ōu uri ki ahau.”
GEN 48:12 Nā, ka nekehia atu rāua e Hōhepa i roto i ōna turi, ā, ka piko tōna mata ki te whenua.
GEN 48:13 Nā, ka puritia rāua e Hōhepa, a Ēparaima e tōna ringa matau ki te mauī o Īharaira, a Mānahi e tōna mauī ki te matau o Īharaira, ā, ka whakatata atu ia i a rāua ki a ia.
GEN 48:14 Nā, ka torona e Īharaira tōna ringa matau, ā, whakatakotoria ana e ia ki runga ki te mātenga o Ēparaima, ko ia anō hoki te teina, me tōna ringa mauī hoki ki runga ki te mātenga o Mānahi, he āta whakatakoto hoki nāna i ōna ringa, ko Mānahi hoki te mātāmua.
GEN 48:15 Nā, ka manaaki ia i a Hōhepa, ka mea, “Mā te Atua i hāereere nei ōku mātua, a Āperahama rāua ko Īhaka i tōna aroaro, mā te Atua nāna nei ahau i whāngai i ahau i ora nei ā taea noatia tēnei rā,
GEN 48:16 mā te anahera nāna nei ahau i whakaora i roto i ngā hē katoa, e manaaki ēnei tamariki; ā, kia huaina tōku ingoa ki a rāua, me te ingoa hoki o ōku mātua, o Āperahama rāua ko Īhaka; ā, kia tino nui haere rāua i waenganui i te whenua.”
GEN 48:17 Ā, nō te kitenga o Hōhepa kua whakatakotoria e tōna pāpā tōna matau ki runga ki te mātenga o Ēparaima, ka kino ki tāna titiro; ā, ka whakarewaina ake e ia te ringa o tōna pāpā, kia nekehia atu e ia i te mātenga o Ēparaima ki runga ki te mātenga o Mānahi.
GEN 48:18 Ā, ka mea a Hōhepa ki tōna pāpā, “Kaua e pēnā, e tōku pāpā; ko te tuakana hoki tēnei; whakatakotoria tōu matau ki runga ki tōna mātenga.”
GEN 48:19 Nā, ka whakakāhore tōna pāpā, ka mea, “E mōhio ana ahau, e tāku tama, e mōhio ana ahau. Ka whakatupu iwi anō tēnei, ka nui anō hoki ia. Otiia, ka nui atu tōna teina i a ia, ā, ka waiho ōna uri hei iwi maha.”
GEN 48:20 Nā, ka manaaki ia i a rāua i taua rangi, ka mea, “Ko koe tā Īharaira manaakitanga, ā, ka kōrerotia, ‘Kia meinga koe e te Atua kia rite ki a Ēparaima, kia rite hoki ki a Mānahi.’ ” Nā, ka makā e ia a Ēparaima ki mua i a Mānahi.
GEN 48:21 Nā, ka mea a Īharaira ki a Hōhepa, “Ka mate tēnei ahau; hei a koutou ia te Atua, māna hoki koutou e whakahoki ki te whenua o ō koutou mātua.
GEN 48:22 Nā, kotahi te wāhi ka hoatu nei e ahau mōu, e hira ake ai tōu i tō ōu tuākana, ko tāku hoki i tango ai i ngā Amori ki tāku hoari, ki tāku kōpere.”
GEN 49:1 Nā, ka karanga a Hākopa ki āna tamariki, ka mea, “Huihui mai, ā, ka kōrerotia e ahau ki a koutou ngā mea e pono ki a koutou i ngā rā ō muri.
GEN 49:2 Huihui mai, whakarongo hoki, e ngā tama a Hākopa; whakarongo hoki ki a Īharaira, ki tō koutou pāpā.
GEN 49:3 “E Reupena, ko koe tāku mātāmua, tōku pakaritanga, me te tīmatanga o tōku kaha; te hiranga ake o te korōria, te hiranga ake hoki o te kaha.
GEN 49:4 He mea pōkarekare, ānō he wai, e kore koe e kake; mō tōu pikitanga i te moenga o tōu pāpā; pōkea iho e koe a reira – i pikitia e ia tōku takotoranga!
GEN 49:5 “He tuakana, he teina, a Himiona rāua ko Rīwai; he rākau riri kino ā rāua hoari.
GEN 49:6 Kaua e tomo, e tōku wairua, ki tō rāua rūnanga; kaua e huihuia, e tōku korōria, ki tō rāua whakaminenga – i patu tangata hoki rāua i a rāua e riri ana, ā, he hīkaka nō rāua i kopa ai te kau.
GEN 49:7 Kia kangā tō rāua riri, i kaha nei; me tō rāua āritarita, nō te mea he nanakia! Ka wehea atu rāua e ahau ki roto ki a Hākopa, ka whakamararatia hoki rāua ki roto ki a Īharaira.
GEN 49:8 “E Hūrā, ko koe e whakamoemititia e ōu tuākana, e ōu tēina; ka ū tōu ringa ki te kakī o ōu hoariri; ka piko ki a koe ngā tama a tōu pāpā.
GEN 49:9 He kūao raiona a Hūrā; i kake atu koe, e tāku tama, i te haenga. I piko, i tāpapa ia, i pērā me te raiona, i pērā hoki me te raiona kātua – mā wai ia e whakaoho?
GEN 49:10 E kore e riro kē te hēpeta i a Hūrā, me te tokotoko o te kāwana i waenganui o ōna waewae, kia tae mai rā anō a Hiro; ā, ka rongo ngā iwi katoa ki a ia.
GEN 49:11 Ka herea e ia tana kūao ki te wāina, te tama hoki a tana kāihe ki te wāina pai rawa; ka horoia e ia ōna kākahu ki te wāina, ōna weruweru hoki ki te toto o te karepe.
GEN 49:12 Ka mumura hoki ōna kanohi i te wāina, ka mā ōna niho i te waiū.
GEN 49:13 “Ka noho a Hepurona ki te wahapū o te moana; hei wahapū anō ia mō ngā kaipuke; ka tutuki atu hoki tōna rohe ki Hairona.
GEN 49:14 “He kāihe kaha a Ihākara, e tāpapa ana i waenga o ngā moenga hipi e rua;
GEN 49:15 ā, i tōna kitenga i te okiokinga he pai, i te whenua hoki he āhuareka; nā, ka tukua iho e ia tōna pokohiwi ki te pīkaunga, ā, meinga ana ia hei pononga hōmai takoha.
GEN 49:16 “Ka whakawā a Rāna i tōna iwi, ka pērā ānō me tētahi o ngā iwi o Īharaira.
GEN 49:17 Hei nākahi a Rāna ki te ara, hei neke hoki ki te huarahi, e ngau ai i te rekereke o te hōiho, ā, ka taka whakamuri tōna kaieke.
GEN 49:18 “Kua tatari atu ahau ki tāu whakaoranga, e Ihowā.
GEN 49:19 “Ko Kara, ka āki te ope ki runga ki a ia; otiia ka āki ia ki tō rātou rekereke.
GEN 49:20 “Ko tā Āhera, ka mōmona tāna taro, ā, he kai kīngi ōna hua.
GEN 49:21 “Ko Napatari, he hāta kua tukua kia haere; e hōmai ana e ia ngā kupu papai.
GEN 49:22 “Ko Hōhepa he peka hua, he peka hua i te taha o te puna; e toro atu ana ōna manga ki tua o te taiepa.
GEN 49:23 I whakatupu kino ngā kaikōpere i a ia, i pere mai hoki, i kino hoki ki a ia.
GEN 49:24 Otiia, i mau tāna kōpere i runga i te kaha, ā, i whakapakaritia ngā tākakau o ōna ringa e ngā ringa o te Mea Kaha o Hākopa, nō reira nei te hēpara, te kāmaka o Īharaira,
GEN 49:25 arā e te Atua o tōu pāpā, māna anō koe e āwhina; e te Kaha Rawa hoki, māna e tuku mai ki a koe ngā manaaki o te rangi i runga, ngā manaaki hoki o te rire e takoto ana i raro, ngā manaaki o ngā ū, o te kōpū hoki.
GEN 49:26 Hira ake ngā manaaki a tōu pāpā i ngā manaaki a ōku tūpuna, tae atu ana ki tērā taha rawa o ngā pukepuke tū tonu; ka tau iho ēnā mea ki runga ki te mātenga o Hōhepa, ki te tumuaki hoki ōna i motuhia atu nei i ōna tuākana.
GEN 49:27 “Ka haehae a Pineamine ānō he wuruhi, ka kainga e ia te tūpāpaku i te ata, ā, i te ahiahi ka tuwhaina e ia ngā taonga parakete.”
GEN 49:28 Ko ēnei katoa ngā iwi kotahi tekau mā rua o Īharaira, ko te kōrero hoki tēnei a tō rātou pāpā ki a rātou, ko tāna manaaki i a rātou, i manaakitia rātou e ia, tēnei, tēnei, me tōna manaaki anō.
GEN 49:29 Ā, i whakahau ia ki a rātou, i mea ki a rātou, “Ka kohia atu ahau ki tōku iwi. Tanumia ahau ki ōku mātua, ki te ana i te pārae o Eperona Hiti,
GEN 49:30 ki te ana i te pārae o Makapera, i te ritenga o Mamere, i te whenua o Kanaana, i hokona, me te pārae anō, e Āperahama i a Eperona Hiti, kia puritia hei tanumanga.
GEN 49:31 I tanumia a Āperahama rāua ko Hara, ko tāna wahine, ki reira; i tanumia a Īhaka rāua ko Ripeka, ko tāna wahine, ki reira; i tanumia hoki a Rea e ahau ki reira.
GEN 49:32 I hokona te pārae me te ana i reira i ngā tama a Hete.”
GEN 49:33 Ā, ka mutu te whakahau a Hākopa ki āna tama, ka pēpeke ake ōna waewae ki roto ki te moenga, ā, ka hemo, ka kohia atu ki tōna iwi.
GEN 50:1 Nā, ka hinga a Hōhepa ki runga ki te mata o tōna pāpā, ā, ka tangi i runga i a ia, ka kihi hoki i a ia.
GEN 50:2 Nā, ka whakahau a Hōhepa i āna tāngata, i ngā kairongoā, kia whakapakokotia tōna pāpā. Nā, whakapakokotia ana a Īharaira e ngā kairongoā.
GEN 50:3 Nā, ka tutuki ōna rā e whā tekau; ko ngā rā hoki ēnā e whakatutukitia ana mō te hunga e whakapakokotia ana. Ā, e whitu tekau ngā rā i uhungatia ai ia e ngā Īhipiana.
GEN 50:4 Ā, ka taka ngā rā e uhungatia ai ia, ka kōrero a Hōhepa ki te whare o Parao, ka mea, “Nā, ki te mea kua manakohia ahau e koutou, tēnā, kōrero atu ki ngā taringa o Parao, mea atu,
GEN 50:5 I whakaoati tōku pāpā i ahau, i mea, ‘Ka mate tēnei ahau; hei roto tāku tanumanga i keria e ahau mōku ki te whenua o Kanaana, hei reira ahau tanumia ai e koe.’ Nā, kia tukua ahau e koe āianei kia haere ki runga, ki te tanu i tōku pāpā, ka hoki mai ai.”
GEN 50:6 Nā, ka mea a Parao, “Haere ki runga ki te tanu i tōu pāpā, kia rite ki tāna i whakaoati ai i a koe.”
GEN 50:7 Nā, haere ana a Hōhepa ki runga ki te tanu i tōna pāpā, i haere tahi anō i a ia ngā pononga katoa a Parao, ngā kaumātua o tōna whare, me ngā kaumātua katoa o te whenua o Īhipa,
GEN 50:8 me te whare katoa anō hoki o Hōhepa, rātou ko ōna tuākana, me te whare anō hoki o tōna pāpā. Ko ā rātou tamariki anake, me ā rātou hipi, me ā rātou kau i mahue i a rātou i te whenua o Kohena.
GEN 50:9 I haere tahi anō i a ia ngā hāriata me ngā tāngata hōiho; he nui whakaharahara te tira.
GEN 50:10 Nā, ka tae rātou ki te patunga wīti a Atara, i tāwāhi o Horano, ā, he tino nui whakaharahara te tangihanga i tangi ai rātou ki reira; e whitu hoki ngā rā i uhungatia ai e ia tōna pāpā.
GEN 50:11 Ā, ka kite ngā tāngata whenua, ngā Kanaani, i te uhunga i te patunga wīti a Atara, ka mea rātou, “He uhunga nui tēnei nā ngā Īhipiana!” Nā reira i huaina ai te ingoa o reira ko Apere Mitiraima kei tāwāhi hoki o Horano.
GEN 50:12 Nā, rite tonu ki tāna i whakahau ai ki a rātou tā āna tama i mea ai ki a ia.
GEN 50:13 I kawea hoki ia e āna tama ki te whenua o Kanaana, ā, tanumia ana ki te ana i te pārae o Makapera, i hokona tahitia nei e Āperahama me te pārae i a Eperona Hiti, kia puritia hei tanumanga, kei te ritenga atu o Mamere.
GEN 50:14 Nā, hoki ana a Hōhepa ki Īhipa, rātou tahi ko ōna tuākana, ko ngā tāngata katoa anō hoki i haere tahi i a ia ki runga ki te tanu i tōna pāpā, i te mutunga o tāna tanu i tōna pāpā.
GEN 50:15 Nā, i te kitenga o ngā tuākana o Hōhepa kua mate tō rātou pāpā, ka mea rātou, “Tērā pea e kino mai a Hōhepa ki a tātou, ā, ka utua mai e ia ā tātou kino katoa i meatia e tātou ki a ia.”
GEN 50:16 Nā, ka tuku tangata rātou ki a Hōhepa, ā, ka mea, “I whakahau mai tōu pāpā i mua ake i tōna matenga, i mea mai,
GEN 50:17 ‘Kia pēnei tā koutou kupu ki a Hōhepa: Tēnā, whakarērea te hē o ōu tuākana, me tō rātou hara; he kino hoki tā rātou mahi ki a koe.’ Nā, tēnā whakarērea te hē o ngā pononga a te Atua o tōu pāpā.” Ā, ka tangi a Hōhepa i ā rātou kupu ki a ia.
GEN 50:18 Nā, ka haere ōna tuākana, ka tāpapa ki tōna aroaro; ka mea, “Tēnei mātou hei pononga māu.”
GEN 50:19 Ā, ka mea a Hōhepa ki a rātou, “Kaua e wehi. He kaiwhakakapi oti ahau mō tō te Atua wāhi?
GEN 50:20 Ko koutou hoki, i hē ō koutou whakaaro ki ahau; he pai ia tō te Atua whakaaro, kia meatia ai tēnei ināianei, kia whakaorangia ai hoki ngā tāngata tokomaha.
GEN 50:21 Heoi, kaua e wehi; māku koutou e atawhai, koutou ko ā koutou tamariki.” Ā, ka whakamārie ia i a rātou, ka whakamāmā hoki i ō rātou ngākau.
GEN 50:22 Nā, ka noho a Hōhepa ki Īhipa, rātou ko te whare o tōna pāpā; ā, kotahi rau kotahi tekau ngā tau i ora ai a Hōhepa.
GEN 50:23 Ā, i kite a Hōhepa i te tuatoru o ngā whakatupuranga o ngā tamariki a Ēparaima; i whakatupuria anō hoki ngā tamariki a Makiri, tama a Mānahi, ki runga ki ngā turi o Hōhepa.
GEN 50:24 Nā, ka mea a Hōhepa ki ōna tuākana, “Ka mate ahau; otiia ka āta tirohia koutou e te Atua, ā, ka kawea atu koutou e ia i tēnei whenua ki runga, ki te whenua i oati ai ia ki a Āperahama, ki a Īhaka, ki a Hākopa.”
GEN 50:25 Nā, ka whakaoatitia ngā tama a Īharaira e Hōhepa, ka mea ia, “Ka tīkina mai koutou, ka āta tirohia e te Atua, ā, me kawe atu e koutou ōku iwi i konei ki runga.”
GEN 50:26 Nā, ka mate a Hōhepa i te kotahi rau i te kotahi tekau o ōna tau; ā, ka whakapakokotia e rātou, ka whakatakotoria hoki ki te kāwhena i Īhipa.
EXO 1:1 Nā, ko ngā ingoa ēnei o ngā tama a Īharaira i haere ki Īhipa; i haere tahi mai rātou me Hākopa, me te whare o tēnei, o tēnei:
EXO 1:2 ko Reupena, ko Himiona, ko Rīwai, ko Hūrā,
EXO 1:3 ko Ihākara, ko Hepurona, ko Pineamine,
EXO 1:4 ko Rāna, ko Napatari, ko Kara, ko Āhera.
EXO 1:5 Nā, ko ngā wairua katoa i puta mai i te hope o Hākopa, e whitu tekau wairua; i Īhipa hoki a Hōhepa.
EXO 1:6 Nā, kua mate a Hōhepa, me ōna tuākana katoa, me tērā whakapaparanga katoa.
EXO 1:7 Ā, ka tupu ngā tama a Īharaira, ka tini haere, ka hira rawa, ka kaha noa atu; ā, kapi ana te whenua i a rātou.
EXO 1:8 Nā, kua puta he kīngi hou mō Īhipa, kīhai i mōhio ki a Hōhepa.
EXO 1:9 Ā, ka kī ia ki tōna iwi, “Nanā, hira ake, kaha ake i a tātou te iwi o ngā tama a Īharaira.
EXO 1:10 Tēnā, kia āta ngārahu tātou ki a rātou; kei tini haere, ā, tēnei ake, ki te ara he pakanga, nā, ka uru hoki rātou ki ō tātou hoariri, ka whawhai ki a tātou, ā, ka maunu atu i te whenua.”
EXO 1:11 Nā, ka whakaritea he rangatira akiaki mō rātou, hei whakawhiu mō rātou ki ā rātou kawenga. Ā, hangā ana e rātou ngā pā takotoranga taonga mō Parao, a Pitoma, a Ramahehe.
EXO 1:12 Engari whakawhiu noa rātou i a rātou, e hua tonu mai ana, e tupu ana, ā, pāwera ana rātou i ngā tama a Īharaira.
EXO 1:13 Ā, nanakia noa iho te whakamahinga a ngā Īhipiana i ngā tama a Īharaira;
EXO 1:14 ā, meatia ana e rātou kia kawa ake rātou ki te ora, i te nui o te mahi, i te paru pokepoke, i te pereki, i ngā mahi katoa o te māra, ā rātou mahi katoa, i whakawhiua ai rātou ki te mahi.
EXO 1:15 Nā, ka mea te kīngi o Īhipa ki ngā wāhine whakawhānau i ngā wāhine a ngā Hiperu; ko te ingoa o tētahi ko Hipera, ko te ingoa hoki o tētahi ko Pua,
EXO 1:16 i kī ia, “E whakawhānau kōrua i ngā wāhine a ngā Hiperu, ā, ka kite i a rātou i runga i ngā kumete, ki te mea he tamaiti tāne, whakamatea; he kōtiro ia, kia ora tēnā.”
EXO 1:17 Otirā, i wehi ngā kaiwhakawhānau ki te Atua, kīhai hoki i mea i tā te kīngi o Īhipa i mea ai ki a rāua, ā, whakaorangia ana e rāua ngā tamariki tāne.
EXO 1:18 Nā, ka karangatia ngā kaiwhakawhānau e te kīngi o Īhipa, ā, ka mea ki a rāua, “Nā te aha tēnei mahi a kōrua, i whakaora ai kōrua i ngā tamariki tāne?”
EXO 1:19 Ā, ka mea ngā kaiwhakawhānau ki a Parao, “Nō te mea rā, ehara ngā wāhine a ngā Hiperu i te pēnā me ngā wāhine a ngā Īhipiana; e māia ana hoki rātou, kāhore anō kia tae atu te kaiwhakawhānau ki a rātou kua whānau.”
EXO 1:20 Nā, ka atawhai te Atua ki ngā kaiwhakawhānau; ā, ka nui haere te iwi, ā, kaha rawa ana.
EXO 1:21 Ā, nō te mea i wehi ngā kaiwhakawhānau ki te Atua, ka hangā e ia he whare mō rāua.
EXO 1:22 Nā, ka ako a Parao ki tōna iwi katoa, ka mea, “Ko ngā tamariki tāne katoa e whānau mai, makā atu e koutou ki te awa, ko ngā kōtiro katoa ia, me whakaora.”
EXO 2:1 Nā, ka haere tētahi tangata o te whare o Rīwai, ka tango i tētahi tamāhine a Rīwai hei wahine.
EXO 2:2 Ā, ka hapū te wahine, ka whānau he tāne; ā, ka kitea he tamaiti pai, e toru ngā marama i hunā ai ia e ia.
EXO 2:3 Ā, tē āhei ia te huna tonu i a ia, ka tango ia i tētahi āka kākaho mōna, pani rawa ki te uku, ki te ware, ā, whaowhina ana te tamaiti ki roto; whakatakotoria iho ki roto ki ngā wīwī i te pareparenga o te awa.
EXO 2:4 Ā, tū ana i tawhiti tōna tuahine, kia kite e ahatia rānei ia.
EXO 2:5 Nā, ko te haerenga iho o te tamāhine a Parao ki te awa, ki te horoi; ko āna kōtiro hoki e haere ana i te taha o te awa. Ā, ka kite ia i te āka i roto i ngā wīwī, ka ngare i tāna kōtiro ki te tiki.
EXO 2:6 Ā, nō tāna hurahanga ake, ka kite i te tamaiti; nā, ka tangi te tamaiti. Ā, ka aroha ia ki a ia, ka mea, “Nō ngā tamariki a ngā Hiperu tēnei.”
EXO 2:7 Kātahi ka mea tōna tuahine ki te tamāhine a Parao, “Kia haere ahau ki te karanga i tētahi wahine whakangote o ngā Hiperu ki a koe hei whakangote māu i te tamaiti?”
EXO 2:8 Ā, ka kī te tamāhine a Parao ki a ia, “Haere.” Ā, haere ana te kōtiro, karanga ana i te whaea o te tamaiti.
EXO 2:9 Ā, ka mea te tamāhine a Parao ki a ia, “Tangohia te tamaiti nei, whakangotea māku, ā, māku e hoatu he utu ki a koe.” Nā, tango ana te wahine i te tamaiti, ā, whakangotea ana e ia.
EXO 2:10 Ā, ka nui te tamaiti, ka kawea e ia ki te tamāhine a Parao, ā, ka waiho ia hei tama māna. Ā, huaina iho e ia tōna ingoa ko Mohi; i mea hoki, “Nō te mea i tōia ake ia e ahau i roto i te wai.”
EXO 2:11 Ā, i aua rā, ka kaumātuatia a Mohi, nā, ka haere ki ōna tuākana, ka titiro hoki ki ā rātou kawenga; ā, ka kite ia i tētahi Īhipiana e patu ana i tētahi Hiperu, nō ōna tuākana.
EXO 2:12 Nā, ka tāhurihuri ia, ā, ka kite kāhore he tangata, patua iho te Īhipiana, ā, hunā iho ki te onepū.
EXO 2:13 Ā, ka haere ia i te rua o ngā rā, nā, tokorua ngā tāngata o ngā Hiperu e whawhai ana ki a rāua; ā, ka mea atu ia ki te tangata nāna te kino, “He aha koe i patu ai i tōu hoa?”
EXO 2:14 Nā, ka mea tērā, “Nā wai koe i kī hei rangatira, hei kaiwhakawā mō mātou? E mea ana koe ki te patu i ahau me koe i patu rā i te Īhipiana?” Ā, ka wehi a Mohi, ka mea, “Koia hoki, kua rangona tēnei mea.”
EXO 2:15 Ā, ka rongo a Parao i taua mea, nā, ka whai kia patua a Mohi. Otiia i rere a Mohi i te aroaro o Parao, ā, noho ana i te whenua o Miriana; nā, kua noho ia ki te puna.
EXO 2:16 Nā, tokowhitu ngā tamāhine a te tohunga o Miriana; ā, ka haere rātou, ka utuutu wai, ka whakakī i ngā waka, hei whakainu i ngā hipi a tō rātou pāpā.
EXO 2:17 Ā, ko te haerenga o ngā hēpara, kei te atiati i a rātou; ā, ka whakatika a Mohi ka araarai i a rātou, ka whakainu i ā rātou hipi.
EXO 2:18 Ā, ka tae rātou ki a Reuere, ki tō rātou pāpā, ka mea ia, “Nā te aha koutou i hohoro mai ai ināianei?”
EXO 2:19 Ā, ka mea rātou, “Nā tētahi Īhipiana i ora ai mātou i te ringa o ngā hēpara, nāna anō i utuutu he wai mā mātou, i whakainu hoki ngā hipi.”
EXO 2:20 Nā, ka mea ia ki āna tamāhine, “Ā, kei hea ia? He aha taua tangata i whakarērea ai e koutou? Karangatia ki te kai taro.”
EXO 2:21 Ā, i pai a Mohi ki te noho ki taua tangata; ā, ka hōmai e ia a Hipora, tāna tamāhine, ki a Mohi.
EXO 2:22 Ā, ka whānau ia, he tāne, ā, huaina iho e ia tōna ingoa ko Kerehoma; i mea hoki ia, “He manene ahau i te whenua kē.”
EXO 2:23 Nā, i muri i ngā rā e maha ka mate te kīngi o Īhipa; ā, ka hotu te manawa o ngā tama a Īharaira i te whakamahinga. Ā, auē ana rātou; ā, ka puta ake tā rātou auē ki te Atua, nō rātou hoki e whakamahia ana.
EXO 2:24 Ā, ka rongo te Atua ki tā rātou tangi, ka mahara te Atua ki tāna kawenata ki a Āperahama, ki a Hākopa, ki a Īhaka.
EXO 2:25 Nā, ka titiro te Atua ki ngā tama a Īharaira, ā, ka mōhio te Atua ki a rātou.
EXO 3:1 Nā, i te tiaki a Mohi i ngā hipi a tōna hungawai, a Ietoro, tohunga o Miriana; ā, ka ārahi ia i ngā hipi ki te taha ki muri o te koraha, ka tae ki te maunga o te Atua, ki Horepa.
EXO 3:2 Ā, ka puta ki a ia te anahera a Ihowā i roto i te mura ahi, i waenganui o tētahi rākau; ā, ka titiro ia, nā, e toro ana te rākau i te ahi, ā, kīhai i pau te rākau.
EXO 3:3 Nā, ka mea a Mohi, “Ka tahuri ahau, ka mātakitaki atu ki tēnei mea nui kua puta nei, he aha te rākau tē pau ai.”
EXO 3:4 Ā, ka kite a Ihowā e tahuri ana ia ki te mātakitaki, ka karanga te Atua ki a ia i waenganui o te rākau, ka mea, “E Mohi, e Mohi!” Ā, ka mea ia, “Tēnei ahau.”
EXO 3:5 Nā, ka mea ia, “Kaua e whakatata mai ki konei; wetekina ōu hū i ōu waewae, ko te wāhi hoki e tū nā koe, he wāhi tapu.”
EXO 3:6 Ka mea anō ia, “Ko ahau te Atua o tōu pāpā, te Atua o Āperahama, te Atua o Īhaka, te Atua o Hākopa.” Ā, huna ana a Mohi i tōna kanohi; i wehi hoki ia ki te titiro atu ki te Atua.
EXO 3:7 Ā, ka mea a Ihowā, “Kua kite pū ahau i te tūkino o tāku iwi i Īhipa, kua rongo hoki ki tā rātou auē i ō rātou kaiakiaki; e mōhio ana hoki ahau ki ō rātou mamae,
EXO 3:8 ā, kua heke iho nei ahau ki te whakaora i a rātou i te ringa o ngā Īhipiana, ki te kawe atu i a rātou i tērā whenua ki tētahi whenua pai, whenua nui, ki tētahi whenua e rerengia ana e te waiū, e te honi, ki te wāhi o ngā Kanaani, o ngā Hiti, o ngā Amori, o ngā Perihi, o ngā Hiwi, o ngā Iepuhi.
EXO 3:9 Nā, kua tae ake te karanga a ngā tama a Īharaira ki ahau; kua kite hoki ahau i te tūkino e tūkinotia nei rātou e ngā Īhipiana.
EXO 3:10 Nā reira, haere mai, māku koe e unga ki a Parao, ā, māu e whakaputa mai tāku iwi, ngā tama a Īharaira, i Īhipa.”
EXO 3:11 Nā, ka mea a Mohi ki te Atua, “He aha ahau, kia haere ahau ki a Parao, kia whakaputa mai hoki i ngā tama a Īharaira i Īhipa?”
EXO 3:12 Ā, ka mea ia, “Kei a koe tonu rā ahau; ko te tohu anō tēnei mōu ka ungā nei e ahau. Ka whakaputaina mai e koe te iwi i Īhipa, ka mahi koutou ki te Atua ki runga i tēnei maunga.”
EXO 3:13 Nā, ka mea a Mohi ki te Atua, “Nā, ka tae ahau ki ngā tama a Īharaira, ka mea ki a rātou, ‘Nā te Atua o ō koutou mātua ahau i ngare mai ki a koutou’; ā, ka mea mai rātou ki ahau, ‘Ko wai tōna ingoa?’ Me pēhea atu ahau ki a rātou?”
EXO 3:14 Nā, ka mea te Atua ki a Mohi, “KO AHAU ANŌ AHAU NEI.” I mea anō ia, “Kia pēnei atu koe ki ngā tama a Īharaira, ‘Nā te AHAU NEI ahau i ngare mai ki a koutou.’ ”
EXO 3:15 Ā, ka mea anō te Atua ki a Mohi, “Kia pēnei atu koe ki ngā tama a Īharaira, ‘Nā Ihowā, nā te Atua o ō koutou mātua, nā te Atua o Āperahama, nā te Atua o Īhaka, nā te Atua hoki o Hākopa, i tono mai ahau ki a koutou.’ Ko tōku ingoa tēnei ake ake, ko tōku whakamaharatanga hoki tēnei ki ngā whakapaparanga katoa.
EXO 3:16 “Haere, whakaminea ngā kaumātua o Īharaira, mea atu ki a rātou, ‘Kua puta mai ki ahau a Ihowā, te Atua o ō koutou mātua, te Atua o Āperahama, o Īhaka, o Hākopa; e ai tāna: Kua tīkina mai, kua tirohia mārietia koutou e ahau, me ngā mea e meatia ana ki a koutou i Īhipa.
EXO 3:17 Kua mea nei anō ahau, ka whakaputaina mai koutou e ahau i te whakawhiu a Īhipa ki te whenua o ngā Kanaani o ngā Hiti, o ngā Amori, o ngā Perihi, o ngā Hiwi, o ngā Iepuhi, ki te whenua e rerengia ana e te waiū, e te honi.’
EXO 3:18 “Ā, e rongo rātou ki tōu reo; ā, ka haere koe, koutou tahi ko ngā kaumātua o Īharaira, ki te kīngi o Īhipa, ka mea ki a ia, ‘Kua tūtaki a Ihowā, te Atua o ngā Hiperu ki a mātou; tukua mātou kia haere, kia toru ngā rā e haere ana i te koraha, kia patu ai, mātou he whakahere mā Ihowā, mā tō mātou Atua.’
EXO 3:19 Ā, e mōhio ana ahau e kore te kīngi o Īhipa e tuku i a koutou, kāhore, ki te kāhore he ringa kaha.
EXO 3:20 Ā, ka tākiritia tōku ringa, ka patua hoki a Īhipa ki āku merekara katoa, e mea ai ahau i waenganui ōna; ā muri iho, ka tukua mai koutou e ia.
EXO 3:21 “Ā, māku e mea kia paingia tēnei iwi i te aroaro o ngā Īhipiana; ā, ka haere koutou, e kore e haere kau.
EXO 3:22 Engari me tono e ia wahine, e ia wahine, ki tōna hoa tata, ki te wahine hoki e noho ana i tōna whare, he mea hiriwa, he mea kōura, he kākahu; ā, ka hoatu ki ā koutou tama, ki ā koutou tamāhine; ā, ka pāhuatia e koutou ngā Īhipiana.”
EXO 4:1 Ā, ka whakahoki a Mohi, ka mea, “Nā, e kore rātou e whakapono ki ahau, e kore hoki e whakarongo ki tōku reo; e mea hoki rātou, ‘Kāhore a Ihowā i puta mai ki a koe.’ ”
EXO 4:2 Ā, ka mea a Ihowā ki a ia, “He aha tēnā i tōu ringa?” Ā, ka mea ia, “He tokotoko.”
EXO 4:3 Nā, ka mea ia, “Makā atu ki te whenua.” Nā, makā ana e ia ki te whenua, nā, he nākahi! Ko te tino rerenga o Mohi i tōna aroaro.
EXO 4:4 Ka mea anō a Ihowā ki a Mohi, “Totoro atu tōu ringa, hopukia i te hiku” – ko te toronga atu o tōna ringaringa, hopukina iho, nā, kua tokotoko anō ki tōna ringa –
EXO 4:5 “kia whakapono ai rātou kua puta ki a koe a Ihowā, te Atua o ō rātou mātua, te Atua o Āperahama, te Atua o Īhaka, te Atua o Hākopa.”
EXO 4:6 I mea anō a Ihowā ki a ia, “Tēnā, kuhua tōu ringa ki tōu uma.” Ā, kuhua ana e ia tōna ringa ki tōna uma; te unuhanga anō, nā, kua repera tōna ringa, kua rite ki te hukarere.
EXO 4:7 I mea anō ia, “Whakahokia anō tōu ringa ki tōu uma” – ā, whakahokia ana anō e ia tōna ringa ki tōna uma; ā, nō te unuhanga i tōna uma, nā, kua hoki, kua rite ki tōna kiri anō –
EXO 4:8 “Ā, ki te kore rātou e whakapono ki a koe, ki te kore e whakarongo ki te reo o te tohu tuatahi, nā, ka whakapono rātou ki te reo o tō muri tohu.
EXO 4:9 Ā, ki te kore anō rātou e whakapono ki ēnei tohu e rua, ki te kore e whakarongo ki tōu reo, utuhia e koe ki te wai o te awa, ka riringi ki te oneone maroke; ā, ko te wai e utuhia e koe i te awa, hei toto ki runga ki te whenua maroke.”
EXO 4:10 Nā, ka kī a Mohi ki a Ihowā, “E tōku Ariki, ehara ahau i te pūkōrero, i mua, i muri rānei i tāu kōrerotanga ki tāu pononga; he reo ngoikore hoki tōku, he arero paremo.”
EXO 4:11 Nā, ka mea a Ihowā ki a ia, “Nā wai i hanga te māngai o te tangata? Nā wai hoki i mea kia wahangū, kia turi, kia titiro rānei, kia matapō rānei? Ehara koia i ahau, i a Ihowā?
EXO 4:12 Nā, haere, ā, hei tōu waha ahau, ako ai i a koe ki tāu e kōrero ai.”
EXO 4:13 Nā, ka mea ia, “E tōku Ariki, māu rā e unga tāu e unga ai.”
EXO 4:14 Nā, ka mura te riri a Ihowā ki a Mohi; ka mea ia, “Ehara ianei a Ārona Rīwaiti i te tuakana nōu? E mātau ana ahau he pūkōrero ia. Ina hoki, nā, e haere mai nei ia ki te whakatau i a koe; ā, ka kite i a koe, ka koa tōna ngākau.
EXO 4:15 Ā, māu e kōrero ki a ia, e hoatu ngā kupu ki tōna waha; ā, hei tōu māngai ahau, hei tōna māngai hoki, whakaako ai i a kōrua ki tā kōrua e mea ai.
EXO 4:16 Ā, ko ia hei kaikōrero māu ki te iwi; ā, ko ia, inā, ka ai ia hei māngai mōu, ko koe hoki hei Atua ki a ia.
EXO 4:17 Maua atu anō tēnei tokotoko i tōu ringa, e mea ai koe i ngā tohu.”
EXO 4:18 Nā, haere ana a Mohi, hoki ana ki a Ietoro, ki tōna hungawai, ā, ka mea ki a ia, “Tukua ahau kia haere, kia hoki ki ōku tuākana i Īhipa, kia kite kei te ora anō rānei rātou.” Ā, ka mea a Ietoro ki a Mohi, “Haere i runga i te pai.”
EXO 4:19 I mea anō a Ihowā ki a Mohi i Miriana, “Haere, e hoki ki Īhipa; kua mate katoa hoki ngā tāngata i whai i a koe kia patua.”
EXO 4:20 Nā, ka mau a Mohi ki tāna wahine rātou ko āna tama, ā, whakanohoia ana ki runga ki te kāihe, ā, hoki ana ki te whenua o Īhipa; i tango anō a Mohi i te tokotoko a te Atua ki tōna ringa.
EXO 4:21 I mea anō a Ihowā ki a Mohi, “E haere koe, e hoki ki Īhipa, kia mahara kia meatia ki te aroaro o Parao ēnā merekara katoa kua hoatu nā e ahau ki tōu ringa. Otiia, māku e whakapakeke tōna ngākau, kia kore ai ia e tuku i te iwi.
EXO 4:22 Ā, ka mea koe ki a Parao, ‘Ko te kupu tēnei a Ihowā: Ko Īharaira tāku tama, tāku mātāmua.
EXO 4:23 Ko tāku kupu anō tēnei ki a koe, “Tukua tāku tama kia mahi ki ahau.” Ā, ki te kore koe e rongo ki te tuku i a ia, nā, ka patua e ahau tāu tama, tāu mātāmua.’ ”
EXO 4:24 Ā, i a rātou i te whare tira i te ara, nā, pono pū a Ihowā ki a ia, ā, ka whai i a ia kia whakamatea.
EXO 4:25 Ā, ka tango a Hipora i tētahi kōhatu koi, ā, kotia iho te kiri matamata o tāna tama, nā, whakapākia ana e ia ki ōna waewae, ka mea, “He tāne toto koe ki ahau.”
EXO 4:26 Heoi, ka tuku atu ia i a ia. I reira anō ka mea te wahine, “He tāne toto koe; mō te kotinga hoki.”
EXO 4:27 Nā, ka mea a Ihowā ki a Ārona, “Haere ki te koraha, ki te whakatau i a Mohi.” Ā, haere ana ia, ā, ka tūtaki ki a ia ki te maunga o te Atua, ka kihi i a ia.
EXO 4:28 Ā, kōrerotia ana e Mohi ki a Ārona ngā kupu katoa a Ihowā i unga nei i a ia, me ngā tohu katoa i ako ai ia ki a ia.
EXO 4:29 Nā, haere ana a Mohi rāua ko Ārona, ā, whakaminea ana ngā kaumātua katoa o ngā tama a Īharaira.
EXO 4:30 Nā, kōrerotia ana e Ārona ngā kupu katoa i kōrero ai a Ihowā ki a Mohi, mahia ana hoki e ia ngā tohu i te tirohanga a te iwi.
EXO 4:31 Ā, whakapono tonu te iwi; ā, ka rongo rātou kua tae mai a Ihowā ki ngā tama a Īharaira, kua titiro ki tō rātou whakawhiunga, ka tuohu rātou, ka koropiko.
EXO 5:1 Ā muri iho, ka haere a Mohi rāua ko Ārona, ka kōrero ki a Parao, “Ko te kupu tēnei a Ihowā, a te Atua o Īharaira, ‘Tukua tāku iwi kia haere ki te taka hākari ki ahau i te koraha.’ ”
EXO 5:2 Nā, ka mea a Parao, “Ko wai a Ihowā, kia rongo ahau ki tōna reo, kia tukua a Īharaira? Kāhore ahau e mōhio ki a Ihowā, e kore hoki e tukua atu e ahau a Īharaira.”
EXO 5:3 Ā, ka mea rāua, “Kua tūtaki te Atua o ngā Hiperu ki a mātou. Kia haere rā mātou, kia toru ngā rā ki te ara i te koraha, ka mea patunga tapu ai mātou ki a Ihowā, ki tō mātou Atua; kei tōrere mai ia ki a mātou i te mate urutā rānei, i te hoari rānei.”
EXO 5:4 Nā, ka mea te kīngi o Īhipa ki a rāua, “He aha kōrua, e Mohi kōrua ko Ārona, i whakaware ai i te iwi ki ā rātou mahi? Haere ki ā koutou kawenga.”
EXO 5:5 I mea anō a Parao, “Nanā, ka tini nei ngā tāngata o te whenua, nā kōrua hoki rātou i noho ai i ā rātou kawenga.”
EXO 5:6 Nā, ka ako a Parao i taua rā ki ngā kaiakiaki o te iwi, ki ō rātou rangatira, ka mea:
EXO 5:7 “Kaua e hoatu he tākakau ki te iwi ā muri ake nei, hei hanga pereki, pērā i ō mua rā; me haere rātou ki te kohikohi tākakau mā rātou.
EXO 5:8 Otiia, whakaritea ki a rātou kia rite tonu ngā pereki te maha ki ērā i hangā e rātou i mua; kaua e whakahokia iho te maha; he māngere hoki rātou; koia rātou i karanga ai, i mea ai, ‘Kia haere mātou ki te mea patunga tapu ki tō mātou Atua.’
EXO 5:9 Whakanuia te mahi mā ngā tāngata rā, ā, ko tēnā hei mahi mā rātou; kaua hoki rātou e whakarongo ki ngā kupu horihori.”
EXO 5:10 Nā, ka haere ngā kaiakiaki o te iwi, me ō rātou rangatira, ka kōrero ki te iwi, ka mea, “Ko te kupu tēnei a Parao, ‘E kore e hoatu e ahau he tākakau ki a koutou.
EXO 5:11 Haere ki te kohikohi tākakau mā koutou i te wāhi e kitea ai e koutou; otiia, kaua e whakahokia iho tētahi wāhi o tā koutou e mahi ai.’ ”
EXO 5:12 Nā, ka marara noa atu te iwi ki te whenua katoa o Īhipa, ki te kohikohi pūtake wīti hei tākakau.
EXO 5:13 Ā, ka whakatatutatu ngā kaiakiaki, ka mea, “Whakaotia ā koutou mahi, tō tēnei rangi, tō tēnei rangi, kia rite ki ō te wā i whai tākakau ai.”
EXO 5:14 Nā, ka whiua ngā rangatira o ngā tama a Īharaira i whakaritea mō rātou e ngā kaiakiaki a Parao, ka mea rātou, “He aha tē whakaotia ai inanahi, ināianei, ā koutou pereki i whakaritea ki a koutou, tē pērā ai me ō mua rā?”
EXO 5:15 Nā, ka haere ngā rangatira o ngā tama a Īharaira, me te tangi anō, ki a Parao, ka mea, “He aha koe i pēnei ai ki āu pononga?
EXO 5:16 Kāhore he tākakau i hōmai ki āu pononga, ā, e mea ana rātou ki a mātou, ‘Hangā he pereki!’ Nā, ka whiua āu pononga; nō āu tāngata ia te hē.”
EXO 5:17 Nā, ka mea ia, “He māngere koutou, he māngere; nā reira koutou ka mea ai, ‘Tukua mātou kia haere ki te mea patunga tapu ki a Ihowā.’
EXO 5:18 Nā, haere, e mahi; e kore hoki e hoatu he tākakau ki a koutou; otiia me hōmai anō ngā pereki i whakaritea rā.”
EXO 5:19 Nā, ka kite ngā rangatira o ngā tama a Īharaira i te kino mō rātou, i te kīanga rā, “Kaua e whakaokuokutia iho ā koutou pereki, hei mahinga mā koutou i tēnei rā, i tēnei rā.”
EXO 5:20 Ā, ka tūtaki rātou ki a Mohi rāua ko Ārona, e tū mai ana i mua i a rātou, i tō rātou haerenga mai i a Parao.
EXO 5:21 Ā, ka mea ki a rāua, “Mā Ihowā e titiro ki a kōrua, e whakawā. Nā kōrua hoki mātou i piro whakarihariha ai ki te aroaro o Parao, ki te aroaro hoki o āna pononga, nā kōrua i hoatu he hoari ki ō rātou ringa hei patu i a mātou.”
EXO 5:22 Nā, ka hoki a Mohi ki a Ihowā, ā, ka mea, “E te Ariki, he aha koe i mahi hē ai ki tēnei iwi? He aha koe i unga ai i ahau?
EXO 5:23 Nō tōku haerenga atu hoki ki a Parao ki te kōrero i runga i tōu ingoa, i kino ai ia ki tēnei iwi; kāhore anō hoki koe kia whakaora noa i tāu iwi, kāhore rawa.”
EXO 6:1 Nā, ka mea a Ihowā ki a Mohi, “Ākuanei koe kite ai i tāku e mea ai ki a Parao; he kaha hoki te ringa e tuku ai ia i a rātou, he kaha hoki te ringaringa e pei ai ia i a rātou i tōna whenua.”
EXO 6:2 Ā, ka kōrero te Atua ki a Mohi, ka mea ki a ia, “Ko IHOWĀ ahau.
EXO 6:3 I ōku putanga ia ki a Āperahama, ki a Īhaka, ki a Hākopa, ko te Atua Kaha Rawa ahau, otiia kīhai rātou i mōhio ki ahau, ko IHOWĀ tōku ingoa.
EXO 6:4 Ka whakamanā anō e ahau tāku kawenata ki a rātou, kia hoatu te whenua o Kanaana ki a rātou, te whenua o tō rātou nohoanga manenetanga, i noho manene ai rātou.
EXO 6:5 Kua rongo anō ahau ki te auē a ngā tama a Īharaira, e whakamahia nei e ngā Īhipiana, kua mahara hoki ki tāku kawenata.
EXO 6:6 “Mō konei me kī e koe ki ngā tama a Īharaira: ‘Ko Ihowā ahau, ā, māku koutou e whakaputa i raro i ngā kawenga a ngā Īhipiana, māku hoki koutou e tango i tā rātou whakamahinga, he mārō hoki te ringa, he nui ngā whakawā, e whakaora ai ahau i a koutou.
EXO 6:7 Ā, ka tango ahau i a koutou hei iwi māku, ko ahau anō hei Atua mō koutou. Ā, e mōhio koutou ko Ihowā ahau, ko tō koutou Atua, e whakaputa ana i a koutou i raro i ngā kawenga a ngā Īhipiana.
EXO 6:8 Māku anō hoki koutou e kawe atu ki te whenua i whakamārō ai ahau i tōku ringaringa mō reira kia hoatu ki a Āperahama, ki a Īhaka, ki a Hākopa; ā, ka hoatu a reira e ahau ki a koutou hei kāinga tūturu. Ko Ihowā ahau.’ ”
EXO 6:9 Ā, he pēnā tā Mohi kōrero ki ngā tama a Īharaira; otiia kīhai rātou i whakarongo ki a Mohi i te mamae o te ngākau, i te kino o te mahi.
EXO 6:10 I kōrero anō a Ihowā ki a Mohi, i mea,
EXO 6:11 “Haere, kōrero ki a Parao kīngi o Īhipa kia tukua e ia ngā tama a Īharaira i tōna whenua.”
EXO 6:12 Nā, ka kōrero a Mohi i te aroaro o Ihowā, ka mea, “Nanā, kāhore ngā tama a Īharaira i whakarongo ki ahau; me pēhea e rongo ai a Parao ki ahau, he ngutu kokotikore nei hoki ahau?”
EXO 6:13 Nā, ka kōrero a Ihowā ki a Mohi rāua ko Ārona, hōmai ana e ia ki a rāua he ako ki ngā tama a Īharaira, ki a Parao hoki kīngi o Īhipa, mō ngā tama a Īharaira kia whakaputaina i te whenua o Īhipa.
EXO 6:14 Ko ngā upoko ēnei o ngā whare o ō rātou mātua: Ko ngā tama a Reupena mātāmua a Īharaira: ko Hanoka, ko Paru, ko Heterono, ko Karami; ko ngā hapū ēnei o Reupena.
EXO 6:15 Nā, ko ngā tama a Himiona: ko Iemuere, ko Iamini, ko Ohara, ko Iakini, ko Tohara, ko Hauru, he tama nā tētahi wahine o ngā Kanaani; ko ngā hapū ēnei o Himiona.
EXO 6:16 Nā, ko ngā ingoa ēnei o ngā tama a Rīwai i ō rātou whakatupuranga: ko Kerehona, ko Kohata, ko Merari; ko ngā tau hoki i ora ai a Rīwai, kotahi rau e toru tekau mā whitu tau.
EXO 6:17 Ko ngā tama a Kerehona: ko Ripini, ko Himei, i ō rāua hapū.
EXO 6:18 Ko ngā tama a Kohata: ko Āmarama, ko Itihara, ko Heperona, ko Utiere; ā, ko ngā tau i ora ai a Kohata, kotahi rau e toru tekau mā toru ngā tau.
EXO 6:19 Ko ngā tama a Merari: ko Māhari, ko Muhi. Ko ngā hapū ēnei o Rīwai i ō rātou whakatupuranga.
EXO 6:20 Ā, i tango a Āmarama i a Iokepete, tuahine o tōna pāpā, hei wahine māna; ā, whānau ake ana ko Ārona rāua ko Mohi. Ko ngā tau hoki i ora ai a Āmarama, kotahi rau e toru tekau mā whitu tau.
EXO 6:21 Ko ngā tama a Itihara: ko Koraha, ko Nepeke, ko Tīkiri.
EXO 6:22 Ko ngā tama a Utiere: ko Mihāera, ko Eritapana, ko Hitiri.
EXO 6:23 Ā, ka tango a Ārona i a Erihepa tamāhine a Aminarapa, i te tuahine o Nāhona, hei wahine māna; ā, whānau ake ana ko Nātapa, ko Apihu, ko Ereātara, ko Itamara.
EXO 6:24 Ko ngā tama a Koraha: ko Ahiri ko Erekana, ko Apihapa; ko ngā hapū ēnei o ngā Korahi.
EXO 6:25 Ā, i tango a Ereātara tama a Ārona i tētahi o ngā tamāhine a Putiera hei wahine māna; ā, whānau ake tāna ko Pinehaha. Ko ngā upoko ēnei o ngā mātua o ngā Rīwaiti puta noa i ō rātou hapū.
EXO 6:26 Ko taua Ārona rāua ko Mohi tēnei i kōrero nei a Ihowā ki a rāua, “Kia whakaputaina mai ngā tama a Īharaira i te whenua o Īhipa, tēnei rōpū, tēnei rōpū o rātou.”
EXO 6:27 Ko rāua ēnei nāna i kōrero ki a Parao kīngi o Īhipa, kia whakaputaina mai ngā tama a Īharaira i Īhipa; ko taua Mohi rāua ko Ārona tēnei.
EXO 6:28 Ā, i te rā anō i kōrero rā a Ihowā ki a Mohi i te whenua o Īhipa,
EXO 6:29 ka kōrero a Ihowā ki a Mohi, ka mea, “Ko Ihowā ahau; kōrerotia ki a Parao kīngi o Īhipa ngā mea katoa e kōrero nei ahau ki a koe.”
EXO 6:30 Ā, ka mea a Mohi i te aroaro o Ihowā, “Nanā, he ngutu kokotikore ahau, ā, me pēhea e rongo ai a Parao ki ahau?”
EXO 7:1 Ā, ka mea a Ihowā ki a Mohi, “Nā, kua oti koe te mea e ahau hei atua ki a Parao; ko Ārona hoki, ko tōu tuakana, hei poropiti māu.
EXO 7:2 Kōrerotia ngā mea katoa e kī ai ahau ki a koe; ā, mā Ārona, mā tōu tuakana, e kōrero ki a Parao, kia tukua e ia ngā tama a Īharaira i tōna whenua.
EXO 7:3 Ā, māku e whakapakeke te ngākau o Parao, e whakamaha hoki āku tohu me āku merekara ki te whenua o Īhipa.
EXO 7:4 Otiia, e kore a Parao e rongo ki a kōrua, ā, ka pā tōku ringa ki Īhipa, he nui anō hoki ngā whakawā e whakaputaina ai e ahau āku mano tini, tāku iwi, ngā tama a Īharaira, i te whenua o Īhipa.
EXO 7:5 A, e mōhio ngā Īhipiana ko Ihowā ahau, ina totoro tōku ringa ki Īhipa, ā, ka whakaputaina mai e ahau ngā tama a Īharaira i roto i a rātou.”
EXO 7:6 I mea anō a Mohi rāua ko Ārona i tā Ihowā i whakahau ai ki a rāua, pērā ana rāua.
EXO 7:7 Ā, e waru tekau ngā tau o Mohi, e waru tekau mā toru ngā tau o Ārona, i tā rāua kōrerotanga ki a Parao.
EXO 7:8 Ā, i kōrero a Ihowā ki a Mohi rāua ko Ārona, i mea,
EXO 7:9 “Ki te puta ki a kōrua tā Parao kupu, ‘Tēnā koa, tētahi merekara i a kōrua,’ ko reira koe mea ai ki a Ārona, ‘E mau ki tāu tokotoko, makā iho ki te aroaro o Parao,’ ā, ka nākahi.”
EXO 7:10 Nā, ka haere a Mohi rāua ko Ārona ki a Parao, ā, pērātia ana e rāua me tā Ihowā i mea ai; makā iho ana e Ārona tōna tokotoko ki te aroaro o Parao, ki te aroaro hoki o āna tāngata, nā, kua nākahi.
EXO 7:11 Nā, ka karanga hoki a Parao i ngā tāngata mōhio, i ngā tohunga māori; nā, ko rātou, ko ngā tohunga o Īhipa, i pērā anō rātou ki ā rātou nei karakia māori.
EXO 7:12 Makā iho ana hoki e tēnei, e tēnei, ā rātou tokotoko, ā, nākahi ana. Otiia, i horomia ā rātou tokotoko e te tokotoko a Ārona.
EXO 7:13 Nā, ka whakapakeketia e ia te ngākau o Parao, ā, kīhai ia i rongo ki a rāua, ko tā Ihowā hoki i kī ai.
EXO 7:14 I mea anō a Ihowā ki a Mohi, “E pakeke ana te ngākau o Parao, kāhore ia e whakaae ana ki te tuku i te iwi.
EXO 7:15 Haere ki a Parao i te ata, nā, e haere ana ia ki te wai; ā, hei te pareparenga o te awa tū atu ai koe ki a ia; ko te tokotoko hoki i nākahi rā, maua i tōu ringa.
EXO 7:16 Ā, ka mea koe ki a ia, ‘Nā Ihowā, nā te Atua o ngā Hiperu ahau i unga mai ki a koe; e mea ana ia: Tukua tāku iwi kia mahi ki ahau i te koraha, titiro, kāhore koe kia rongo ā mohoa noa nei.
EXO 7:17 Ko te kupu tēnei a Ihowā: Mā konei e mōhio ai koe ko Ihowā ahau. Nanā, māku e patu ngā wai i te awa ki te tokotoko i tōku ringa, ā, ka riro kē hei toto.
EXO 7:18 E mate hoki ngā ika i roto i te awa, ā, e piro te awa; ā, e anuanu ngā Īhipiana ki te inu i te wai o te awa.’ ”
EXO 7:19 Ā, i kōrero a Ihowā ki a Mohi, “Mea atu ki a Ārona, ‘E mau ki tāu tokotoko, totoro hoki tōu ringa ki ngā wai o Īhipa, ki ō rātou wai e rere ana, ki ō rātou awa, ki ō rātou roto, ki ō rātou huihuinga wai katoa, kia meinga ai hei toto; ā, ka whai toto ngā oko rākau, kōhatu hoki, i te whenua katoa o Īhipa.’ ”
EXO 7:20 Ā, pērātia ana e Mohi rāua ko Ārona me tā Ihowā i ako ai. Hāpainga ana e ia te tokotoko, patua ana ki ngā wai o te awa, i te tirohanga a Parao, i te tirohanga anō hoki a āna tāngata; ā, riro kē ana hei toto ngā wai katoa o te awa.
EXO 7:21 Ā, mate ana ngā ika i te awa, ā, piro ana te awa, kīhai hoki i āhei i ngā Īhipiana te inu i te wai o te awa. Nā, he toto tērā i te whenua katoa o Īhipa.
EXO 7:22 Ā, pērātia ana e ngā tohunga o Īhipa ki ā rātou nā mahi māori; ā; ka whakapakeketia te ngākau o Parao, kāhore hoki ia i whakarongo ki a rāua; i rite tonu ki tā Ihowā i kōrero ai.
EXO 7:23 Nā, tahuri ana a Parao, haere ana ki roto ki tōna whare, kīhai anō hoki i whakaanga i tōna ngākau ki tēnei.
EXO 7:24 Nā, ka keri ngā Īhipiana katoa ki ngā taha o te awa i te wai hei inu; kīhai hoki i āhei te inu i te wai o te awa.
EXO 7:25 Nā, kua rite ngā rā e whitu i muri i tā Ihowā patunga i te awa.
EXO 8:1 Nā, ka kōrero a Ihowā ki a Mohi, “Haere ki a Parao, mea atu ki a ia, ‘Ko te kupu tēnei a Ihowā: Tukua tāku iwi kia haere, kia mahi rātou ki ahau.
EXO 8:2 Ā, ki te kore koe e rongo ki te tuku i a rātou, nā, ka patua e ahau ōu rohe katoa ki te poroka.
EXO 8:3 Ā, ka ngahuehue ake te poroka i te awa, ka tae rātou ki tōu whare, ki tōu whare moenga, ki runga hoki ki tōu moenga, ki roto hoki ki te whare o ōu tāngata, ki runga hoki ki tōu iwi, ki roto ki āu oumu, ki roto hoki ki āu pokepokenga parāoa.
EXO 8:4 Ā, e haere ake te poroka ki runga ki a koe, ki runga ki tōu iwi, ki runga hoki ki ōu tāngata katoa.’ ”
EXO 8:5 I kōrero anō a Ihowā ki a Mohi, “Mea atu ki a Ārona, ‘Totoro tōu ringa, me tāu tokotoko, ki ngā wai e rere ana, ki ngā awa, ki ngā roto, kia haere ake ai ngā poroka ki te whenua o Īhipa.’ ”
EXO 8:6 Ā, ka totoro atu te ringa o Ārona ki ngā wai o Īhipa; nā, kua puta ake te poroka, ā, kapi ana te whenua o Īhipa.
EXO 8:7 Ā, i pērātia anō e ngā tohunga ki ā rātou karakia māori, ā, whakaputaina ake ana e rātou te poroka ki te whenua o Īhipa.
EXO 8:8 Nā, ka karanga a Parao ki a Mohi rāua ko Ārona, ka mea, “Īnoi atu ki a Ihowā, kia tangohia e ia ngā poroka i ahau, i tōku iwi hoki; ā, ka tuku ahau i te iwi ki te mea patunga tapu ki a Ihowā.”
EXO 8:9 Nā, ka mea a Mohi ki a Parao, “Kia whakanuia ake koe i ahau; āhea īnoi ai ahau mōu, mō ōu tāngata, mō tōu iwi hoki, kia whakakāhoretia atu ngā poroka i a koe, i ōu whare anō hoki, kia toe ki te awa anake?”
EXO 8:10 Ā, ka mea ia, “Hei āpōpō.” Nā, ka mea ia, “Kia rite ki tāu nā, kia mōhio ai koe kāhore tētahi e rite ana ki a Ihowā, ki tō mātou Atua.
EXO 8:11 Ā, ka mawehe atu i a koe ngā poroka, i ōu whare hoki, i ōu tāngata, i tōu iwi anō hoki; ā, e toe ki te awa anake.”
EXO 8:12 Nā, ka haere atu a Mohi rāua ko Ārona i a Parao; ā, ka karanga a Mohi ki a Ihowā, mō ngā poroka i whakamuia ake e ia ki a Parao.
EXO 8:13 Ā, pērātia ana e Ihowā me tā Mohi i mea ai; nā, ka mate atu ngā poroka i ngā whare, i ngā kāinga, i ngā māra anō hoki.
EXO 8:14 Ā, apoapohia ana e rātou, pūranga atu, pūranga atu; ā, piro ana te whenua.
EXO 8:15 Otirā, i te kitenga o Parao ka whai tānga manawa, ka whakapakeke anō i tōna ngākau, kāhore hoki i rongo ki a rāua; ko tā Ihowā hoki i kī ai.
EXO 8:16 Nā, ka mea a Ihowā ki a Mohi, “Mea atu ki a Ārona, ‘Totoro tāu tokotoko, patua te puehu o te whenua, kia kutu ai ki te whenua katoa o Īhipa.’ ”
EXO 8:17 Ā, pērā ana rāua; ko te toronga atu o te ringa o Ārona me tāna tokotoko, patua ana te puehu o te whenua, ā, ka meinga hei kutu ki te tangata, ki te kararehe; he kutu kau te puehu katoa o te oneone, i te whenua katoa o Īhipa.
EXO 8:18 Ā, pērā ana anō ngā tohunga ki ā rātou mahi māori, kia puta ai te kutu; kīhai ia i taea e rātou; ā, muia ana te tangata me te kararehe e te kutu.
EXO 8:19 Nā, ka mea ngā tohunga ki a Parao, “Nā te matikara o te Atua tēnei!” Ā, ka whakapakeketia te ngākau o Parao, kīhai hoki ia i rongo ki a rāua; ko tā Ihowā hoki i kī ai.
EXO 8:20 Nā, ka mea a Ihowā ki a Mohi, “Maranga wawe i te ata, e tū ki te aroaro o Parao; nā, e haere ana ia ki te wai; mea atu ki a ia, ‘Ko te kupu tēnei a Ihowā: Tukua tāku iwi ki te mahi ki ahau.
EXO 8:21 Ā, ki te kāhore koe e tuku i tāku iwi, nā, ka tukua atu e ahau ngā pōkai namu ki a koe, ki ōu tāngata, ki tōu iwi, ki ōu whare. E kī hoki ngā whare o ngā Īhipiana i ngā pōkai namu, me te whenua e noho nei rātou.
EXO 8:22 “ ‘Ā, ka wehea atu e ahau i taua rā te whenua o Kohena, e noho nei tāku iwi, kei whai pōkai namu a reira; kia mōhio ai koe ko Ihowā ahau i waenganui o te whenua.
EXO 8:23 Ka whakatakoto ārai anō ahau ki waenganui o tāku iwi, o tōu iwi. Ko āpōpō tēnei tohu meatia ai.’ ”
EXO 8:24 Ā, pērā ana a Ihowā; nā, kua tae mai ngā pōkai namu, tōna nanakia rā, ki te whare o Parao, ki ngā whare o āna tāngata, ki te whenua katoa anō hoki o Īhipa; ā, ngaro ana te whenua i te huihuinga namu.
EXO 8:25 Nā, ka karanga a Parao ki a Mohi rāua ko Ārona, ka mea, “Haere, meatia he patunga tapu ki tō koutou Atua, ki te whenua nei.”
EXO 8:26 Nā, ka mea a Mohi, “E kore e pai kia pēnā; ka patua hoki e mātou mā Ihowā, mā tō mātou Atua, tā ngā Īhipiana e mōrikarika ai. Nā, ki te patua e mātou ki tō rātou aroaro ngā mea e mōrikarika ai ngā Īhipiana, e kore rānei rātou e āki i a mātou ki te kōhatu?
EXO 8:27 Ka haere mātou ki te koraha, kia toru ngā rā ki te ara, ka mea patunga tapu ai ki a Ihowā, ki tō mātou Atua, ka pērā ai me tāna e ako ai ki a mātou.”
EXO 8:28 Nā, ka mea a Parao, “Ka tukua koutou ki te mea patunga tapu mā Ihowā, mā tō koutou Atua, ki te koraha. Otiia, aua e haere rawa ki tawhiti. Īnoi kōrua mōku.”
EXO 8:29 Ā, ka mea a Mohi, “Nanā, ka mawehe atu ahau i a koe, ka īnoi ahau ki a Ihowā kia tūrere atu ngā pōkai namu i a Parao, i ōna tāngata, i tōna iwi āpōpō; otiia kaua a Parao e tinihanga anō, ā, kore ake e tuku i te iwi ki te mea patunga tapu ki a Ihowā.”
EXO 8:30 Nā, ka mawehe a Mohi i a Parao, ā, ka īnoi ki a Ihowā.
EXO 8:31 Ā, pērātia ana e Ihowā me tā Mohi i mea ai; i mea ia i ngā pōkai namu kia rere atu i a Parao, i ōna tāngata, i tōna iwi. Kīhai i toe tētahi.
EXO 8:32 Nā, ka whakapakeke anō a Parao i tōna ngākau i taua tāima hoki, ā, kīhai i tuku i te iwi.
EXO 9:1 Nā, ka mea a Ihowā ki a Mohi, “Haere ki a Parao, mea atu ki a ia, ‘Ko te kupu tēnei a Ihowā, a te Atua o ngā Hiperu: “Tukua tāku iwi kia haere ki te mahi ki ahau.”
EXO 9:2 Ki te kore hoki koe e rongo ki te tuku, ki te pupuri tonu i a rātou;
EXO 9:3 nanā, ka pā te ringa o Ihowā ki āu kararehe i te pārae: ki ngā hōiho, ki ngā kāihe, ki ngā kāmera, ki ngā kau, ki ngā hipi; ka pā he mate kino rawa.
EXO 9:4 Ā, e wehewehe a Ihowā i ngā kararehe a Īharaira, i ngā kararehe a Īhipa; e kore e mate tētahi o ngā mea katoa a ngā tama a Īharaira.’ ”
EXO 9:5 I whakaritea anō e Ihowā he tāima, i mea ia, “Ko āpōpō a Ihowā mea ai i tēnei mea ki te whenua.”
EXO 9:6 I te aonga ake ka meatia taua mea e Ihowā; ā mate iho ngā kararehe katoa o Īhipa; ko ngā kararehe ia a ngā tama a Īharaira, kīhai i mate tētahi.
EXO 9:7 Nā, ka tonoa he kaititiro e Parao, nā, kāhore i mate kia kotahi o ngā kararehe a ngā tama a Īharaira. Ā, ka whakapakeketia te ngākau o Parao, kīhai hoki ia i tuku i te iwi.
EXO 9:8 Nā, ka mea a Ihowā ki a Mohi rāua ko Ārona, “Aohia mai ētahi pungarehu mā kōrua i te oumu, kia kī ngā ringa, ā, mā Mohi e ruke whaka te rangi i te tirohanga a Parao.
EXO 9:9 Ā, ka whakapuehu ririki ki te whenua katoa o Īhipa, ā, ka meinga hei whēwhē pukupuku e tupu ana ki te tangata, ki te kararehe i te whenua katoa o Īhipa.”
EXO 9:10 Nā, ka aohia e rāua he pungarehu i te oumu, ā, tū ana ki te aroaro o Parao; ā, ka rukea e Mohi whaka te rangi, nā, he whēwhē pukupuku e tupu ana ki te tangata, ki te kararehe.
EXO 9:11 Ā, kīhai ngā tohunga i āhei te tū ki te aroaro o Mohi i ngā whēwhē; kei ngā tohunga hoki te whēwhē, kei ngā Īhipiana katoa anō hoki.
EXO 9:12 Nā, ka whakapakeke a Ihowā i te ngākau o Parao, ā, kīhai ia i rongo ki a rāua; ko tā Ihowā hoki i kī ai ki a Mohi.
EXO 9:13 Nā, ka mea a Ihowā ki a Mohi, “Maranga wawe i te ata, ka tū ki te aroaro o Parao, ka mea ki a ia, ‘E pēnei mai ana a Ihowā, te Atua o ngā Hiperu: Tukua tāku iwi kia haere ki te mahi ki ahau.
EXO 9:14 Ko ā tēnei tāima hoki ka tukua atu e ahau āku whiu katoa ki tōu ngākau, ki ōu tāngata hoki, rātou ko tōu iwi; kia mōhio ai koe kāhore tētahi e rite ana ki ahau i te whenua katoa.
EXO 9:15 Ko ākuanei hoki tākiritia ai tōku ringa, ā, ka patu ahau i a koe, i tōu iwi hoki, ki te mate urutā; ā, ka ngaro atu koe i te whenua.
EXO 9:16 Otiia mō konei pū ahau i whakaara ai i a koe, kia ai koe hei whakakitenga mō tōku kaha; kia kōrerotia ai hoki tōku ingoa ki te ao katoa.
EXO 9:17 E whakakake tonu ana anō koe ki tāku iwi, tē tuku ai i a rātou?
EXO 9:18 Nanā, kia pēnei āpōpō, ka uaina e ahau he whatu, he mea nanakia rawa, kāhore he pēnā i Īhipa o te pito nohoanga iho anō ā mohoa noa nei.
EXO 9:19 Nā, ungā atu, huihuia āu kararehe, me āu mea katoa i te pārae; ko ngā tāngata katoa me ngā kararehe e rokohanga ki te pārae, ā, kīhai i huihuia ki te whare, ina, ka rere iho te whatu ki runga ki a rātou, ā, ka mate.’ ”
EXO 9:20 Ko te tangata a Parao i wehi i te kupu a Ihowā, i meatia e ia ōna tāngata me āna kararehe kia rere ki ngā whare.
EXO 9:21 Ko te tangata ia kīhai i anga tōna ngākau ki te kupu a Ihowā, i waiho atu e ia āna tāngata me āna kararehe i te pārae.
EXO 9:22 Nā, ka mea a Ihowā ki a Mohi, “Totoro atu tōu ringa ki te rangi, kia puta ai he whatu ki te whenua katoa o Īhipa, ki te tangata, ki te kararehe, ki ngā mea tupu katoa o te māra, i te whenua katoa o Īhipa.”
EXO 9:23 Nā, ka toro atu te tokotoko a Mohi whaka te rangi; ko te tino tukunga mai a Ihowā i ngā whatitiri, i te whatu; ā, rere ana te ahi ki runga i te whenua; ā, uaina iho ana e Ihowā te whatu ki te whenua o Īhipa.
EXO 9:24 Nā, he whatu tēnā, he ahi hoki e whakauru ana ki roto ki te whatu, he nanakia rawa, kāhore ōna rite i te whenua katoa o Īhipa, o te tīmatanga iho anō o taua iwi.
EXO 9:25 Nā, i patua iho e te whatu, i te whenua katoa o Īhipa, ngā mea katoa i te pārae, te tangata, te kararehe; i patu anō te whatu i ngā otaota katoa o te māra, i whatiwhati hoki i ngā rākau katoa o te māra.
EXO 9:26 Ko te whenua ia o Kohena, i ngā tama a Īharaira, kāhore he whatu.
EXO 9:27 Nā, ka tono tangata a Parao hei karanga i a Mohi rāua ko Ārona, ā, ka mea ia ki a rāua, “Kua hara ahau i tēnei wā; he tika a Ihowā, tēnā ko ahau, mātou tahi ko tōku iwi, he kino.
EXO 9:28 Īnoi ki a Ihowā; kua iro nā hoki i ēnei whatitiri nunui me ngā whatu; ā, ka tuku ahau i a koutou, ā, heoi anō tō koutou nohoanga.”
EXO 9:29 Nā, ka mea a Mohi ki a ia, “Kia puta atu ahau ki waho i te pā, ka whakatuwhera atu ahau i ōku ringa ki a Ihowā; ā, e mutu ngā whatitiri, ā, ka kore noa iho te whatu; kia mōhio ai koe nō Ihowā te whenua.
EXO 9:30 Ko koe ia, me āu tāngata, e mōhio ana ahau kāhore anō koutou i wehi noa i a Ihowā, i te Atua.”
EXO 9:31 (I patua te kōrari, me te pārei; kua pupuku hoki te pārei, kua pua hoki te kōrari.
EXO 9:32 Ko te wīti ia me te rai kīhai i patua; kāhore hoki ēnā i tupu noa.)
EXO 9:33 Nā, ka mawehe atu a Mohi i a Parao ki waho i te pā, ā, ka whakatuwhera i ōna ringa ki a Ihowā; ā mutu iho ngā whatitiri me te whatu, kīhai hoki te ua i ringihia ki te whenua.
EXO 9:34 Ā, nō te kitenga a Parao kua mutu te ua, te whatu, me ngā whatitiri, ka hara anō ia, ka whakapakeke i tōna ngākau, rātou tahi ko ōna tāngata.
EXO 9:35 Heoi, whakapakeketia ana te ngākau o Parao, kīhai hoki ia i tuku i ngā tama a Īharaira; ko tā Ihowā hoki i kōrero ai ki a Mohi.
EXO 10:1 Nā, ka mea a Ihowā ki a Mohi, “Haere ki a Parao; kua whakapakeke hoki ahau i tōna ngākau, i te ngākau hoki o ōna tāngata, kia whakakite ai ahau i ēnei tohu āku ki tōna aroaro,
EXO 10:2 kia kōrero ai hoki koe ki ngā taringa o tāu tama, o te tama hoki a tāu tama, i tāku i mahi ai ki Īhipa, i āku tohu hoki i meatia e ahau i roto i a rātou – kia mōhio ai koutou ko Ihowā ahau.”
EXO 10:3 Ā, haere ana a Mohi rāua ko Ārona ki a Parao, mea ana ki a ia, “Ko te kupu tēnei a Ihowā, a te Atua o ngā Hiperu, ‘Kia pēhea te roa ōu kāhore nei e ngohengohe ki tōku aroaro? Tukua tāku iwi kia haere, kia mahi ki ahau.
EXO 10:4 Ko tēnei, ka kore koe e rongo ki te tuku i tāku iwi, nanā, āpōpō ahau kawe mai ai i te māwhitiwhiti ki tōu rohe.
EXO 10:5 Ā, e kapi i a rātou te mata o te whenua, e kore anō e āhei te kite i te whenua; ā, e kai rātou i ngā toenga i mahue, i toe mā koutou i te whatu, e kai hoki rātou i ngā rākau katoa e tupu ana mā koutou i te māra.
EXO 10:6 Ā, e kī i a rātou ōu whare, me ngā whare o ōu tāngata katoa, me ngā whare o ngā Īhipiana katoa; he mea kīhai nei i kitea e ōu mātua, e ngā mātua rānei o ōu mātua, o te rā iho anō i noho ai rātou ki te whenua ā moroki noa nei.’ ” Ā, tahuri ana ia, haere atu ana i a Parao.
EXO 10:7 Ā, ka mea ngā tāngata a Parao ki a ia, “Kia pēhea te roa o tēnei tangata ka waiho nei hei rore ki a tātou? Tukua ngā tāngata ki te mahi ki a Ihowā, ki tō rātou Atua. Kīanō koe i mōhio noa kua ngaro a Īhipa?”
EXO 10:8 Nā, ka whakahokia a Mohi rāua ko Ārona ki a Parao; ā, ka mea ia ki a rāua, “Haere, e mahi ki a Ihowā ki tō koutou Atua; ko wai mā oti e haere?”
EXO 10:9 Ā, ka mea a Mohi, “E haere rā mātou me ā mātou taitamariki, me ō mātou koroheke, me ā mātou tama, me ā mātou tamāhine, e haere me ā mātou hipi, me ā mātou kau; he hākari hoki tā mātou ki a Ihowā.”
EXO 10:10 Nā, ka mea ia ki a rāua, “Kia pēnā te noho o Ihowā ki a koutou, me ahau ka tuku nei i a koutou me ā koutou pōtiki. Mā koutou e titiro; he kino hoki kei mua i a koutou.
EXO 10:11 Kāhore rā hoki! Haere e ngā tāne, e mahi ki a Ihowā; ko tā koutou hoki tēnā i whai nā.” Ā, peia ana rāua i te aroaro o Parao.
EXO 10:12 Nā, ka mea a Ihowā ki a Mohi, “Totoro atu tōu ringaringa ki te whenua o Īhipa mō te māwhitiwhiti kia puta ki te whenua o Īhipa, ki te kai i ngā otaota katoa o te whenua, i ngā mea katoa i toe i te whatu.”
EXO 10:13 Nā, ka toro atu te tokotoko a Mohi ki runga i te whenua o Īhipa, ā, kua puta he hau i a Ihowā, he marangai, ki te whenua, ā, pau katoa taua rangi, pau katoa taua pō; ā, huaki ake te ata, nā, kua kawea mai ngā māwhitiwhiti e te marangai.
EXO 10:14 Ā, puta ake ana te māwhitiwhiti ki te whenua katoa o Īhipa, ā, tau iho ki ngā rohe katoa o Īhipa, he nanakia rawa; kāhore he māwhitiwhiti ō mua atu hei rite mō ēnei, e kore anō hoki e rite ā muri ake nei.
EXO 10:15 Ngaro ana hoki i a rātou te mata o te whenua katoa, pōuri ana te whenua; ā, kainga ake e rātou ngā otaota katoa o te whenua, me ngā hua katoa o ngā rākau i toe i te whatu. Kīhai i mahue tētahi tupu o ngā rākau, o ngā otaota rānei o te māra, i te whenua katoa o Īhipa.
EXO 10:16 Nā, ka hohoro a Parao te karanga ki a Mohi rāua ko Ārona ka mea, “Kua hara ahau ki a Ihowā, ki tō koutou Atua, ki a kōrua hoki.
EXO 10:17 Nā, whakarērea tōku hara, heoi rawa anō ko tō tēnei tāima, ā, īnoi ki a Ihowā, ki tō koutou Atua, kia tangohia atu e ia ko tēnei mate anake i ahau.”
EXO 10:18 Ā, mawehe ana ia i a Parao, īnoi ana ki a Ihowā.
EXO 10:19 Nā, whakatakā ana e Ihowā he hauāuru nui rawa, nāna i kāhaki atu ngā māwhitiwhiti, i whiu ki te Moana Whero; kīhai i toe tētahi māwhitiwhiti i ngā rohe katoa o Īhipa.
EXO 10:20 Otiia whakapakeke ana a Ihowā i te ngākau o Parao, ā, kīhai ia i tuku i ngā tama a Īharaira.
EXO 10:21 Ā, ka mea a Ihowā ki a Mohi, “Totoro ake tōu ringaringa ki te rangi, kia whai pōuri ai ki te whenua o Īhipa, he pōuri e hakiri mai ana ki te ringa.”
EXO 10:22 Nā, ka toro atu te ringa o Mohi ki te rangi, ā, kua pōuri kerekere i te whenua katoa o Īhipa, e toru ngā rā.
EXO 10:23 Kāhore tētahi i kite i tētahi, kīhai anō hoki i whakatika atu tētahi i tōna wāhi i ngā rā e toru. Tēnā ko ngā tama a Īharaira, mārama ana ō rātou nā nohoanga.
EXO 10:24 Nā, ka karanga a Parao ki a Mohi, ka mea, “Haere, e mahi ki a Ihowā, otiia me waiho ā koutou hipi me ā koutou kau. Ko ā koutou tamariki nonohi hoki me haere tahi i a koutou.”
EXO 10:25 Ā, ka mea a Mohi, “Me hōmai anō e koe ki a mātou he patunga tapu, he tahunga tinana, hei mahinga mā mātou ki a Ihowā, ki tō mātou Atua.
EXO 10:26 Me haere anō ā mātou kararehe i a mātou; e kore tētahi maikuku e mahue. Ka tangohia hoki e mātou ētahi o ēnā hei mahinga ki a Ihowā, ki tō mātou Atua; e kore hoki mātou e mōhio ki tā mātou e mahi ai ki a Ihowā, kia tae rā anō ki reira.”
EXO 10:27 Otiia whakapakeketia ana e Ihowā te ngākau o Parao, ā, kīhai ia i pai ki te tuku i a rātou.
EXO 10:28 Nā, ka mea a Parao ki a ia, “Mawehe atu i ahau, kia tūpato kei kite koe i tōku kanohi ā muri ake nei; ko te rā hoki e kite ai koe i tōku kanohi, ka mate koe.”
EXO 10:29 Anō rā ko Mohi, “Ka tika tāu kōrero, heoi anō tāku kitenga i tōu kanohi ki muri ake nei.”
EXO 11:1 Nā, ka mea a Ihowā ki a Mohi, “Kia kotahi atu whiu e whakapāngia e ahau ki a Parao, ki Īhipa; muri iho ka tukua koutou e ia i konei. Ka tukua koutou, inā, ka tino peia katoatia koutou e ia i konei.
EXO 11:2 Kōrero ināianei ki ngā taringa o te iwi, ā, mā te tāne, mā te wahine, e tono he mea hiriwa, he mea kōura i tōna hoa, i tōna hoa.”
EXO 11:3 (Ā, i meinga anō e Ihowā kia paingia te iwi e ngā Īhipiana. Ko te tangata nei hoki ko Mohi, i nui rawa ki te whenua o Īhipa, ki te aroaro o ngā tāngata a Parao, ki te aroaro anō hoki o te iwi.)
EXO 11:4 Nā, ka mea a Mohi, “Ko te kupu tēnei a Ihowā: ‘Hei waenganui pō ahau ka tika nā waenganui o Īhipa;
EXO 11:5 ā, ka mate ngā mātāmua katoa o te whenua o Īhipa, te mātāmua a Parao e noho ana i runga i tōna torōna, ā tae iho ana ki te mātāmua a te pononga wahine i tua i te mira; me ngā mātāmua katoa a ngā kararehe.
EXO 11:6 Ā, ka nui te tangi i te whenua katoa o Īhipa, kāhore he pērā i mua, e kore anō hoki e pērā e takoto ake nei.
EXO 11:7 Otirā, e kore e oraora te arero o tētahi kurī ki tētahi o ngā tama a Īharaira, ki te tangata, ki te kararehe;’ kia mōhio ai koutou e tītore ana a Ihowā i waenga o ngā Īhipiana, o Īharaira.
EXO 11:8 Ā, e haere ake ēnei tāngata katoa āu ki ahau, e piko ki ahau, e mea, ‘Haere koe me te iwi katoa e haere ana i raro i ōu waewae.’ Ā muri iho ka haere ahau.” Ā, puta ana ia i a Parao, he nui hoki tōna riri.
EXO 11:9 Ā, ka mea a Ihowā ki a Mohi, “E kore a Parao e rongo ki a kōrua, kia maha ai āku merekara ki te whenua o Īhipa.”
EXO 11:10 Ā, meatia ana e Mohi rāua ko Ārona ēnei merekara katoa ki te aroaro o Parao; ā, i whakapakeke anō a Ihowā i te ngākau o Parao, ā, kīhai ia i tuku i ngā tama a Īharaira i tōna whenua.
EXO 12:1 Ā, i kōrero a Ihowā ki a Mohi rāua ko Ārona i te whenua o Īhipa, i mea:
EXO 12:2 “Ko tēnei marama hei marama tīmatanga ki a koutou; hei tīmatanga tēnei mō ngā marama o tō koutou tau.
EXO 12:3 Kōrero ki te huihuinga katoa o Īharaira, mea atu, Hei te tekau o ngā rā o tēnei marama, me tango he reme mā rātou e tēnei, e tēnei, kia rite ki ngā whare o ngā mātua, he whare, he reme.
EXO 12:4 Ā ki te tokoouou te whare mō te reme, mā rāua ko tōna hoa noho tata ki tōna whare e tango, kia rite ki te tokomaha o ngā tāngata; whakaritea te tokomaha o ngā tāngata mō te reme ki te kai a tēnei, a tēnei.
EXO 12:5 Kei whai koha tā koutou reme, hei te toa, hei te tau tahi; tangohia mai i ngā hipi, i ngā koati rānei.
EXO 12:6 Ā, me tiaki e koutou taea noatia te tekau mā whā o ngā rā o tēnei marama; ā, mā te huihui katoa o tō Īharaira whakaminenga e patu i te ahiahi.
EXO 12:7 Ā, me tango e rātou tētahi wāhi o ngā toto, ka tā atu ai ki ngā pou e rua, ki te kōrupe hoki o te tatau o ngā whare e kainga ai tēnā mea e rātou.
EXO 12:8 Ā, me kai te kikokiko i taua pō anō, he mea tunu ki te ahi, he taro rēwenakore hoki; he pūwhā kawa hoki tā rātou e kīnaki ai ki taua mea.
EXO 12:9 Kaua tētahi wāhi e kainga matatia, he mea kōhua rānei ki te wai, engari kia tunua ki te ahi; ko tōna pane, ko ōna waewae, me ōna whēkau.
EXO 12:10 Kaua hoki e whakatoea tētahi wāhi ōna ki te ata; ā, ko te wāhi ōna e toe ki te ata, tahuna ki te ahi.
EXO 12:11 Ā, me pēnei tā koutou kai i taua mea; kia whītikiria ō koutou hope, hei ō koutou waewae ō koutou hū, ko ā koutou tokotoko hoki ki ō koutou ringaringa; kia hohoro hoki te kai. Ko te Kapenga hoki a Ihowā tēnā.
EXO 12:12 “Tā te mea ka tika ahau rā waenganui o te whenua o Īhipa i taua pō, ka patu hoki i ngā mātāmua katoa i te whenua o Īhipa, i te tangata ā tae iho ana ki te kararehe; ā, ka puta āku whakawā ki ngā atua katoa o Īhipa. Ko Ihowā ahau.
EXO 12:13 Ā, hei tohu mō koutou te toto i ngā whare e noho ai koutou; ā, ka kite ahau i te toto, ka kape ahau i a koutou, e kore anō hoki te whiu e pā ki a koutou hei whakamate, ina patu ahau i te whenua o Īhipa.
EXO 12:14 “Ā, hei whakamaharatanga mō koutou tēnei rā; hei konei koutou tuku ai i te hākari ki a Ihowā, tuku iho ki ō koutou whakatupuranga; ko te ture tēnei ake nei, ake nei, kia hākaritia e koutou tēnei rā.
EXO 12:15 E whitu ngā rā e kai ai koutou i te taro rēwenakore; hei te rā tuatahi anō ka whakakorea ai te rēwena o ō koutou whare; tā te mea ki te kai tētahi i te taro rēwena i te rā tuatahi, ā taea noatia te whitu o ngā rā, ka hātepea atu taua wairua i roto i a Īharaira.
EXO 12:16 Hei te rā tuatahi hoki he huihuinga tapu, hei te rā tuawhitu hoki he huihuinga tapu mō koutou; kaua tētahi mahi e mahia i aua rā; heoi anō ko te kai mā tēnei, mā tēnei, tā koutou e raweke ai.
EXO 12:17 “Kia mau hoki ki te Hākari o te Taro Rēwenakore; nō te mea, nō tēnei rangi pū anō i whakaputaina ai e ahau ō koutou rōpū i te whenua o Īhipa. Mō konei, kia mau ki tēnei rā, i ō koutou whakatupuranga; hei tikanga tēnei ake ake.
EXO 12:18 Hei te marama tuatahi, hei te kotahi tekau mā whā o ngā rā, i te ahiahi, ka kai koutou i te taro rēwenakore, ā tae noa ki te rua tekau mā tahi o ngā rā o te marama, i te ahiahi.
EXO 12:19 Kaua he rēwena e kitea ki ō koutou whare i ngā rā e whitu; tā te mea ki te kai tētahi i te mea kua rēwenatia, inā, ka hātepea atu taua wairua i roto i te huihui o Īharaira, ahakoa tangata kē, ahakoa tangata whenua rānei.
EXO 12:20 Kaua e kainga tētahi mea kua rēwenatia; hei te taro rēwenakore he kai mā koutou i ō koutou nohoanga katoa.”
EXO 12:21 Nā, ka karanga a Mohi ki ngā kaumātua katoa o Īharaira, ka mea ki a rātou, “Tīkina, tangohia mai mā koutou he reme, kia rite ki ō koutou whānau, patua hoki te Kapenga.
EXO 12:22 Ā, tangohia he paihere hihopa, ka tuku ki te toto i te peihana, nā, ka tātā atu i te kōrupe me ngā pou e rua ki te toto i te peihana; kaua hoki tētahi o koutou e puta ki waho o te kūwaha o tōna whare, ā taea noatia te ata.
EXO 12:23 He mea hoki, ka haere atu a Ihowā ki te patu i ngā Īhipiana; ā, ka kite ia i te toto i te kōrupe, i ngā pou e rua hoki, ka kapea e Ihowā te kūwaha, e kore hoki e tukua e ia te kaiwhakamate kia haere ki roto ki ō koutou whare patu ai.
EXO 12:24 “Kia mau hoki ki tēnei mea, hei ture mōu, mō āu tamariki, ake ake.
EXO 12:25 Ā tēnei ake, ā te wā e tae ai koutou ki te whenua e hōmai e Ihowā ki a koutou, ki tāna i kōrero ai, nā, kia mau ki tēnei mahi.
EXO 12:26 Ā tēnei ake, ki te mea ā koutou tamariki ki a koutou, ‘He aha tēnei e mahia nei e koutou?’
EXO 12:27 Nā, ka mea atu, ‘Ko te patunga rā i tā Ihowā Kapenga, nāna rā i kape ngā whare o ngā tama a Īharaira i Īhipa, i a ia i patu ai i ngā Īhipiana, ā, whakaorangia ake ō mātou whare.’ ” Nā, tuohu ana te iwi, koropiko ana.
EXO 12:28 Nā, ka haere ngā tama a Īharaira, ā, mea ana i tā Ihowā i whakahau ai ki a Mohi rāua ko Ārona, pērā ana rātou.
EXO 12:29 Nāwai ā, ka waenganui pō, nā, patua ana e Ihowā ngā mātāmua katoa i te whenua o Īhipa, te mātāmua a Parao e noho ana i runga i tōna torōna, ā tae iho ana ki te mātāmua a te herehere i roto i te whare herehere; me ngā mātāmua katoa a te kararehe.
EXO 12:30 Nā, ka maranga ake a Parao i te pō, rātou ko āna tāngata katoa, ko ngā Īhipiana katoa; nā, he nui te tangi i Īhipa; kāhore hoki he whare i kore te tūpāpaku.
EXO 12:31 Nā, ka karanga ia ki a Mohi rāua ko Ārona i te pō, ā, ka mea, “Whakatika, haere atu i roto i tōku iwi, koutou ko ngā tama a Īharaira; haere ki te mahi ki a Ihowā, ki te pērā me tā koutou i kī ai.
EXO 12:32 Tangohia hoki ā koutou hipi, ā koutou kau hoki, ā koutou i kī ai, ā, haere atu; me manaaki anō hoki i ahau.”
EXO 12:33 Ā, akiaki ana ngā Īhipiana ki te iwi, kia tonoa wawetia atu ai rātou i te whenua; i mea hoki rātou, “Ka mate katoa tātou.”
EXO 12:34 Ā, maua atu ana e te iwi tā rātou, parāoa pokepoke, i te mea kāhore anō i rēwenatia noatia, he mea takai ā rātou pokepokenga parāoa ki ō rātou kākahu, nā, kei ō rātou pokohiwi.
EXO 12:35 Nā, ka pērā ngā tama a Īharaira me tā Mohi i kī ai; nā, kei te tono mea hiriwa, mea kōura, kākahu, i ngā Īhipiana.
EXO 12:36 Ā, nā Ihowā i mea kia paingia te iwi e ngā Īhipiana, ā, hōmai ana e rātou; ā, pāhuatia ana e rātou ngā Īhipiana.
EXO 12:37 Nā, ka tūria mai e ngā tama a Īharaira i Ramehehe ki Hukota, tata tonu ngā tāne ki ngā mano e ono rau, he mea haere i raro, hāunga ngā tamariki.
EXO 12:38 He nui te whakauru i haere i a rātou; me te hipi, me te kau, he tini kē te kararehe.
EXO 12:39 Ā, tunua iho e rātou ētahi taro rēwenakore i te parāoa pokepoke i maua atu e rātou i Īhipa, kāhore hoki i rēwenatia; nō te mea hoki i peia rātou i Īhipa, kīhai hoki i āhei te noho iho, kīhai hoki rātou i taka i te ō mō rātou.
EXO 12:40 Nā, ko te nohoanga o ngā tama a Īharaira, i noho rā ki Īhipa, e whā rau e toru tekau ngā tau.
EXO 12:41 Ā, i te mutunga o ngā tau e whā rau e toru tekau, i taua rā pū anō, nā, ka puta ngā mano katoa o Ihowā i te whenua o Īhipa.
EXO 12:42 Ka maharatia taua pō nei, hei mea ki a Ihowā, mō tō rātou whakaputanga i te whenua o Īhipa. Ko taua pō tēnei o Ihowā hei maharatanga mā ngā tama katoa a Īharaira, i ō rātou whakatupuranga.
EXO 12:43 I mea anō a Ihowā ki a Mohi rāua ko Ārona, “Ko te tikanga tēnei mō te Kapenga: Kaua tētahi tangata kē e kai i tēnā mea;
EXO 12:44 engari, ngā pononga katoa a te tangata i utua ki te moni, kia oti te kokoti e koe, ka kai ai i tēnā mea.
EXO 12:45 Kaua te manene, te kaimahi rānei, e kai i tēnā mea.
EXO 12:46 “Kia kotahi te whare e kainga ai; kaua e mauria tētahi wāhi o te kikokiko ki waho i te whare; kaua hoki e whatia tētahi wheua ōna.
EXO 12:47 Mā te huihuinga katoa o Īharaira tēnā mahi.
EXO 12:48 “Nā, he tangata kē e noho ana i a koe, ā, ka mahi i te Kapenga a Ihowā, kotia āna tāne katoa, kātahi ka whakatata ai ia ki tēnā mahi; ā, ka rite ki te tangata whenua. Kei kainga e te kokotikore.
EXO 12:49 Kia kotahi anō te ture mō te tangata whenua rāua ko te tangata kē e noho ana i roto i a koutou.”
EXO 12:50 Nā, ka pērā ngā tama katoa a Īharaira me tā Ihowā i ako ai ki a Mohi rāua ko Ārona; pērā ana rātou.
EXO 12:51 Nā, nō taua rā pū anō i whakaputaina mai ai e Ihowā ngā tama a Īharaira i te whenua o Īhipa, tēnei rōpū, tēnei rōpū o rātou.
EXO 13:1 Ā, i kōrero a Ihowā ki a Mohi, i mea:
EXO 13:2 “Whakatapua māku ngā mea mātāmua katoa; ngā mea katoa a ngā tama a Īharaira e oroko puta mai ana i te kōpū, a te tangata, a te kararehe, māku.”
EXO 13:3 Ā, i mea a Mohi ki te iwi, “Kia mahara ki tēnei rā i haere atu ai koutou i Īhipa, i te whare pononga; he kaha hoki te ringa i whakaputaina ai koutou e Ihowā i konei. Kaua hoki te taro rēwena e kainga.
EXO 13:4 Ko te rā tēnei i haere atu ai koutou, ko Apipi te marama.
EXO 13:5 Nā, ka kawea koe a mua e Ihowā ki te whenua o ngā Kanaani, o ngā Hiti, o ngā Amori, o ngā Hiwi, o ngā Iepuhi, i oati ai ia ki ōu mātua ka hoatu ki a koe, he whenua e rerengia ana e te waiū, e te honi, ko reira koe mahi ai i tēnei mea, i tēnei marama anō.
EXO 13:6 E whitu ngā rā e kai ai koe i te taro rēwenakore, ā, hei te rā whitu te hākari a Ihowā.
EXO 13:7 E whitu ngā rā e kainga ai te taro rēwenakore; aua hoki te taro rēwena e kitea ki a koe; aua anō e kitea ki a koe he rēwena i ōu rohe katoa.
EXO 13:8 Ā, māu e kōrero ki tāu tama i taua rā, e mea, ‘Mō tā Ihowā i mea ai ki ahau tēnei, i tōku haerenga mai i Īhipa.’
EXO 13:9 Hei tohu anō tēnā ki a koe i tōu ringa, hei whakamahara hoki ki waenganui i ōu kanohi; kia mau ai te ture a Ihowā i roto i tōu waha; he kaha hoki te ringa i whakaputaina ai koe e Ihowā i Īhipa.
EXO 13:10 Nā, kia mau ki tēnei tikanga i tōna wā anō, i tēnei tau, i tēnei tau.”
EXO 13:11 “Nā, ka kawea koe e Ihowā ki te whenua o ngā Kanaani, ki tāna i oati ai ki a koutou ko ōu mātua, ā, ka hōmai a reira e ia ki a koe,
EXO 13:12 ko reira wehea ai e koe mā Ihowā ngā mea katoa e puta tuatahi mai ana i te kōpū, me ngā mātāmua katoa o āu kararehe; ko ngā tāne mā Ihowā.
EXO 13:13 Otiia, me utu e koe ki te reme ngā mātāmua katoa a te kāihe; ā, ki te kāhore e utua e koe, whatia tōna kakī. Ko ngā mātāmua katoa hoki a te tangata, i roto i āu tamariki, me utu e koe.
EXO 13:14 “Ā tēnei ake, ki te ui tāu tama ki a koe ā mua, ki te mea, ‘He aha tēnei?’ Nā, ka mea ki a ia, ‘He kaha te ringa i whakaputaina mai ai mātou e Ihowā i Īhipa, i te whare pononga.
EXO 13:15 Ā, i te mea ka pakeke a Parao ki te tuku i a mātou, nā, patua iho e Ihowā ngā mātāmua katoa o te whenua o Īhipa, te mātāmua a te tangata, te mātāmua anō hoki a te kararehe. Nā reira i patua ai e ahau mā Ihowā ngā mea katoa e puta tuatahi mai ana i te kōpū, ngā toa; ko ngā mātāmua katoa ia o āku tama e utua ana e ahau.’
EXO 13:16 Ā, hei tohu tēnā ki tōu ringa hei pare ki waenganui i ōu kanohi; he kaha hoki te ringa i whakaputaina mai ai mātou e Ihowā i Īhipa.”
EXO 13:17 Ā, i te tukunga o te iwi e Parao, kīhai a Ihowā i ārahi i a rātou nā te huarahi i te whenua o ngā Pirihitini, ahakoa tata tērā; i mea hoki te Atua, “Kei āwangawanga te iwi, ua kite rātou i te pakanga, ā, ka hoki ki Īhipa.”
EXO 13:18 Engari i ārahina āwhiotia te iwi e te Atua nā te huarahi i te koraha o te Moana Whero, ā, haere tōpuni ana ngā tama a Īharaira i te whenua o Īhipa.
EXO 13:19 I maua atu anō e Mohi ngā wheua o Hōhepa; nāna hoki i whakaoati mārie ngā tama a Īharaira, i mea, “Ka tīkina mai koutou, ka āta tirohia e te Atua; ā, mā koutou e mau atu ōku wheua i konei.”
EXO 13:20 Ā, ka tūria mai e rātou i Hukota, ā, noho rawa ki Ētama, ki te pito o te koraha.
EXO 13:21 Ā, haere ana a Ihowā i mua i a rātou, i te pou kapua i te awatea, hei ārahi i a rātou i te huarahi; i te pou kāpura anō i te pō, hei whakamārama i a rātou; kia haere ai rātou i te ao, i te pō.
EXO 13:22 Kīhai i tangohia e ia te pou kapua i te aroaro o te iwi i te awatea, me te pou kāpura hoki i te pō.
EXO 14:1 Nā, ka kōrero a Ihowā ki a Mohi, ka mea:
EXO 14:2 “Kōrero ki ngā tama a Īharaira, kia tahuri, kia noho ki te ritenga atu o Pihahirota, i waenganui o Mikitoro, o te moana, ki te ritenga o Paara-Hepona; hei te wāhi e hāngai tonu ana ki reira, hei te taha o te moana koutou noho ai.
EXO 14:3 Ā, e kīia ngā tama a Īharaira e Parao, ‘E pōhēhē ana rātou i te whenua, kua tūtakina mai rātou e te koraha.’
EXO 14:4 Ā, māku e whakapakeke te ngākau o Parao, kia whai ai ia i a rātou; ā, ka whai korōria ahau i a Parao rātou ko tōna nuinga katoa; ā, ka mōhio ngā Īhipiana ko Ihowā ahau.” Ā, pērā ana rātou.
EXO 14:5 Ā, ka kōrerotia ki te kīngi o Īhipa, kua whati te iwi; nā, ka puta kē te ngākau o Parao rātou ko āna tāngata, ki te iwi, ā, ka mea rātou, “He aha tēnei mahi a tātou, i tukua atu ai a Īharaira i ā tātou mahi?”
EXO 14:6 Nā, ka here ia i tana hāriata, i mauria anō hoki e ia tōna iwi;
EXO 14:7 ā, tākiritia ake e ia e ono rau hāriata, whiriwhiri rawa, me ngā hāriata katoa o Īhipa, rite katoa i te rangatira.
EXO 14:8 Nā, whakapakeke ana a Ihowā i te ngākau o Parao kīngi o Īhipa, ko te tino whāinga i muri i ngā tama a Īharaira. Tēnā ko ngā tama a Īharaira, kei runga tonu te ringaringa i haere atu ai rātou.
EXO 14:9 Nā, whai ana ngā Īhipiana i a rātou, ngā hōiho katoa, ngā hāriata a Parao, me āna hōia eke hōiho, me āna mano, ā, mau rawa rātou, i a rātou e noho ana i te tahatai, i Pihahirota, e titiro atu nei ki Paara-Hepona.
EXO 14:10 Ā, i te whakatatanga mai o Parao, nā, ka anga ake ngā kanohi o ngā tama a Īharaira, nā, ko ngā Īhipiana e whai ana i muri i a rātou; ā, tino wehi ana rātou. Nā, ka karanga ngā tama a Īharaira ki a Ihowā.
EXO 14:11 Ā, ka mea rātou ki a Mohi, “He onge koia nō te urupā o Īhipa i kāhaki mai ai koe i a mātou ki te koraha mate ai? He aha rā tēnei mahi āu ki a mātou, i ārahina mai ai mātou e koe i Īhipa?
EXO 14:12 Ehara koia tēnei i tā mātou kupu i kī rā ki a koe i Īhipa, i mea rā, ‘Waiho rā mātou kia whakamahia ana e ngā Īhipiana’? Pai kē kia whakamahia mātou e ngā Īhipiana i tō mātou mate ki te koraha.”
EXO 14:13 Nā, ka mea a Mohi ki te iwi, “Kaua e wehi; tū mārie, ka titiro atu ki te whakaoranga a Ihowā e whakaputaina mai e ia ki a koutou i tēnei rā. Nā, ko ngā Īhipiana e kitea atu rā e koutou i tēnei rā, e kore e kitea anō e koutou ā muri ake nei.
EXO 14:14 Mā Ihowā tā koutou pakanga; ko koutou ia e kore e hamumu.”
EXO 14:15 Nā, ka mea a Ihowā ki a Mohi, “He aha koe i karanga ai ki ahau? Kī atu ki ngā tama a Īharaira kia mārō te haere.
EXO 14:16 Nā, hāpainga e koe tāu tokotoko, ka whakamārō atu ai i tōu ringa ki runga ake i te moana, kia wehea ai; nā, ka haere atu ngā tama a Īharaira mā waenga moana, i te wāhi maroke.
EXO 14:17 Ā, ko ahau, inā, māku e whakapakeke ngā ngākau o ngā Īhipiana, ā, ka whai rātou i muri i a rātou; ā, ka whai korōria ahau i a Parao, i āna mano, i ana hāriata, i āna hōia eke hōiho.
EXO 14:18 Ā, ka mōhio ngā Īhipiana ko Ihowā ahau, ina whai korōria ahau i a Parao, i ana hāriata, i āna hōia eke hōiho.”
EXO 14:19 Nā, ka whakatika te anahera a te Atua, i haere rā i mua i te ope o Īharaira, ā, haere ana ki muri i a rātou; i neke atu anō te pou kapua i tō rātou aroaro, ā, tū ana i muri i a rātou.
EXO 14:20 I haere hoki ki waenganui o te nohoanga o ngā Īhipiana, o te nohoanga hoki o Īharaira. Ā, tērā te kapua me te pōuri, otiia e whakamārama ana ia i te pō, ā, kīhai tētahi i whakatata ki tētahi ā pau katoa te pō.
EXO 14:21 Nā, torona atu ana e Mohi tōna ringa ki runga i te moana; ā, panaia ana ki muri e Ihowā te moana ki tētahi hau nui, ki te marangai, ā, pau noa taua pō, nā, kua maroke te moana, kua tuwhera ngā wai.
EXO 14:22 Ā, haere ana ngā tama a Īharaira i waenga moana rā te wāhi maroke; hei taiepa anō ngā wai ki a rātou i te taha ki matau, ki mauī.
EXO 14:23 Nā, ka whai ngā Īhipiana, ā, haere ana i muri i a rātou, ngā hōiho katoa a Parao, ana hāriata, me āna hōia eke hōiho, ki waenga moana.
EXO 14:24 Ā, i tō te ata whakaaraara, nā, ka titiro a Ihowā ki te ope o ngā Īhipiana, i roto i te pou ahi, i te pou kapua, ka whakararu hoki i te ope o ngā Īhipiana,
EXO 14:25 ā, whakamareretia ana e ia ngā wīra o ngā hāriata, kia pūhoi ai te haere; ā, ka mea ngā Īhipiana, “Kia oma atu tātou i te aroaro o Īharaira; kei a rātou hoki a Ihowā e whawhai mai ana ki ngā Īhipiana.”
EXO 14:26 Nā, ka mea a Ihowā ki a Mohi, “Whakamārōkia tōu ringa ki runga i te moana, kia hoki ai ngā wai ki runga ki ngā Īhipiana, ki ō rātou hāriata, ki ā rātou hōia eke hōiho.”
EXO 14:27 Ā, ko te whakamārōkanga o te ringa o Mohi ki runga i te moana, nā, tākiri rawa ake te ata, kua hoki te moana ki tōna tūturutanga; tūtataki pū ki ngā Īhipiana e rere ana; ā, tāia iho ngā Īhipiana e Ihowā ki waenga moana.
EXO 14:28 Ā, hoki ana ngā wai, taupokina iho ngā hāriata, me ngā hōia eke hōiho, me te ope katoa o Parao, i haere i muri i a rātou ki te moana; kīhai rawa tētahi o rātou i toe.
EXO 14:29 Tēnā ko ngā tama a Īharaira, i haere rātou rā te wāhi maroke i waenganui o te moana; ko ngā wai hoki hei taiepa ki a rātou, ki te taha matau, ki te taha mauī.
EXO 14:30 Ā, whakaorangia ana e Ihowā a Īharaira i taua rā i ngā ringa o ngā Īhipiana; ā, ka kite a Īharaira i ngā Īhipiana i te tahatai, he tūpāpaku katoa.
EXO 14:31 Ā, i kite a Īharaira i te mahi nui i mahia e Ihowā ki ngā Īhipiana; ā, ka wehi te iwi a Ihowā, whakapono ana ki a Ihowā, ki tāna pononga hoki, ki a Mohi.
EXO 15:1 Kātahi ka waiata a Mohi rātou ko ngā tama a Īharaira i tēnei waiata ki a Ihowā, ā, ka whakahua, ka mea: “Ka waiata ahau ki a Ihowā, he hira noa atu hoki tōna korōria; ko te hōiho rāua ko tōna kaieke, kua pangā e ia ki te moana.
EXO 15:2 Ko Ihowā tōku kaha, tāku waiata, ko ia anō hoki hei whakaora mōku; ko tōku Atua tēnei, ā, māku ia e whakakorōria; ko te Atua o tōku pāpā, ā, māku ia e whakanui.
EXO 15:3 He tangata whawhai a Ihowā; ko Ihowā tōna ingoa.
EXO 15:4 Ko ngā hāriata a Parao, me tāna ope, kua makā e ia ki te moana; ko āna rangatira whiriwhiri toremi iho ki te Moana Whero.
EXO 15:5 Taupokina iho rātou e ngā wai hōhonu; totohu ana rātou ki te rire, ānō he kāmaka.
EXO 15:6 “Ka whai korōria tōu ringa matau, e Ihowā, mō te kaha; nā tōu ringa, e Ihowā i mongamonga ai te hoa whawhai.
EXO 15:7 Nā te nui o tōu kaha ka turakina e koe te hunga i whakatika mai rā ki a koe. Te whakaputanga o tōu riri, pau katoa rātou, me he tumutumu otaota.
EXO 15:8 Nā te hau hoki o tōu ihu i haupū ai ngā wai; i tū ake ngā roma, ānō he pūranga, ā, whakatotoka ana te rire i te takere o te moana.
EXO 15:9 “I mea te hoariri, ‘Ka whai atu ahau, ka hopu, ka tuwha i ngā taonga, ka nā tōku ngākau i a rātou; ka unuhia tāku hoari, mā tōku ringa rātou e huna.’
EXO 15:10 I pupuhi atu koe ki tāu hau, taupokina iho rātou e te moana; totohu iho rātou, ānō he matā, i ngā wai nui.
EXO 15:11 “Ko wai o ngā atua hei rite mōu, e Ihowā? Ko wai hei rite mōu, e whakamoemititia nei mō te tapu, e wehingia nei, e whakapaingia nei, e mahi nei i ngā mea whakamīharo?
EXO 15:12 I totoro atu tōu ringa matau, horomia ana rātou e te whenua.
EXO 15:13 “Nā tōu atawhai i ārahina mai ai e koe te iwi kua hokona nei e koe; nā tōu kaha i aratakina ai rātou e koe ki tōu nohoanga tapu.
EXO 15:14 Ka rongo ngā iwi, ka tūiri; mau tonu te matapōuri ki ngā tāngata o Pirihitia.
EXO 15:15 Nō reira i ohorere ai ngā rangatira o Ēroma; ko ngā tāngata nunui o Moapa, mau tonu te wiri ki a rātou; memeha noa ngā tāngata katoa o Kanaana.
EXO 15:16 Tau ana ki a rātou te tūiri me te wehi; mā te nui o tōu ringa e tū tonu ai rātou, ānō he kōhatu, kia pahemo rā anō tāu iwi, e Ihowā, kia pahemo rā anō tēnei iwi kua hokona nei e koe.
EXO 15:17 Māu rātou e kawe atu, e whakatupu ki te maunga, ki tōu kāinga ō mua iho, ki te wāhi, e Ihowā, i hangā e koe hei nohoanga mōu, ki te wāhi tapu, e te Ariki, i whakapūmautia e ōu ringa.
EXO 15:18 Hei kīngi a Ihowā ake ake.”
EXO 15:19 I haere hoki ngā hōiho a Parao, me ana hāriata, me āna hōia eke hōiho ki te moana, ā, nā Ihowā i whakahoki ngā wai o te moana ki runga ki a rātou; tēnā ko ngā tama a Īharaira, i haere rā te wāhi maroke, i waenga moana.
EXO 15:20 Ā, ka tango a Miriama poropiti, tuahine o Ārona, i te timipera ki tōna ringa; ā, haere atu ana ngā wāhine katoa i muri i a ia me ngā timipera, me te kanikani anō rātou.
EXO 15:21 Ā, i whakahokia e Miriama tā rātou: “Waiata ki a Ihowā, he hira noa atu hoki tōna korōria; nāna hoki te hōiho rāua ko tōna kaieke i whiu ki te moana.”
EXO 15:22 Ā, ārahina atu ana e Mohi a Īharaira i te Moana Whero, ā, ka haere rātou ki te koraha o Huri, ā, e toru ngā rā i haere ai rātou i te koraha, ā, kīhai i kitea he wai.
EXO 15:23 Nā, ka tae rātou ki Mara, kīhai hoki i āhei te inu i ngā wai o Mara; he kawa hoki. Nā reira i huaina ai tōna ingoa ko Mara.
EXO 15:24 Nā, ka amuamu te iwi ki a Mohi, ka mea, “Ko te aha hei inu mā mātou?”
EXO 15:25 Nā, ka karanga ia ki a Ihowā; ā, ka whakakitea mai he rākau e Ihowā ki a ia, ā, pangā ana e ia ki ngā wai, nā, ka reka ngā wai. I hōmai e ia he ture ki a rātou i reira, me tētahi ritenga; i whakamātauria rātou e ia ki reira.
EXO 15:26 I mea hoki ia, “Ki te rongo mārie koe ki te reo o Ihowā, o tōu Atua, ā, ka mahi i te mea tika ki tāna titiro, ā, ka whai taringa ki āna whakahau, ka pupuri hoki i āna tikanga katoa, e kore rawa tētahi o aua mate i whakapāngia ki ngā Īhipiana e ahau, e whakapāngia atu e ahau ki a koe. Ko Ihowā hoki ahau e whakaora nei i a koe.”
EXO 15:27 Nā, ka tae rātou ki Erimi, kotahi tekau mā rua nei ngā puna wai i reira, me ngā nīkau e whitu tekau; ā, ka noho rātou ki reira, ki te taha o ngā wai.
EXO 16:1 Nā, ka tūria e rātou i Erimi, ā, ka tae te huihuinga katoa o ngā tama a Īharaira ki te koraha o Hini, ki waenganui o Erimi o Hinai, i te tekau mā rima o ngā rā o te rua o ngā marama o tō rātou haerenga mai i te whenua o Īhipa.
EXO 16:2 Nā, ka amuamu te huihui katoa o ngā tama a Īharaira ki a Mohi rāua ko Ārona i te koraha.
EXO 16:3 Ā, ka mea ngā tama a Īharaira ki a rāua, “Ē, te mate atu rā mātou i te ringa o Ihowā i te whenua o Īhipa, i a mātou e noho ana i te taha o ngā kōhua kikokiko, e kai taro ana, ā mākona noa! Nā kōrua nei hoki mātou i kawe mai ki tēnei koraha kia kōhurutia ai tēnei whakaminenga katoa ki te matekai.”
EXO 16:4 Nā, ka mea a Ihowā ki a Mohi, “Nanā, ka uaina iho e ahau he taro i te rangi mā koutou; ā, mā te iwi e haere, e kohikohi i tō tēnei rangi, i tō tēnei rangi, kia whakamātau ai ahau i a rātou, e haere rānei rātou i tāku ture, kāhore rānei.
EXO 16:5 Ā, te ono o ngā rā, ka takā e rātou tā rātou e mau mai ai; kia takiruatia tā rātou i kohikohi ai i ētahi rangi ake ka rite ki tō tēnei.”
EXO 16:6 Nā, ka mea a Mohi rāua ko Ārona ki ngā tama katoa a Īharaira, “Ka ahiahi, nā, ka mōhio koutou nā Ihowā koutou i ārahi mai i te whenua o Īhipa;
EXO 16:7 ā, i te ata, nā, ka kite koutou i te korōria o Ihowā; e whakarongo mai ana hoki ia ki ā koutou amuamu ki a Ihowā. Tēnā ko māua, he aha māua, i amuamu ai koutou ki a māua?”
EXO 16:8 I mea anō a Mohi, “Ka mōhio koutou, ua hōmai e Ihowā ki a koutou he kikokiko hei kai i te ahiahi, ā, i te ata he taro, ā mākona noa, nō te mea kua rongo a Ihowā ki ā koutou amuamu e amuamu nā koutou ki a ia – ko māua ia, hei aha? Kīhai koutou i amuamu ki a māua, engari ki a Ihowā.”
EXO 16:9 Nā, ka mea a Mohi ki a Ārona, “Mea atu ki te huihui katoa o ngā tama a Īharaira, ‘Whakatata mai ki te aroaro o Ihowā kua rongo hoki ia ki ā koutou amuamu.’ ”
EXO 16:10 Ā, i a Ārona e kōrero ana ki te huihui katoa o ngā tama a Īharaira, nā, ka tahuri rātou whaka te koraha, nā, ko te korōria o Ihowā e puta mai ana i roto i te kapua.
EXO 16:11 Nā, ka kōrero a Ihowā ki a Mohi, ka mea,
EXO 16:12 “Kua rongo ahau ki ngā amuamu a ngā tama a Īharaira; kōrero atu ki a rātou, mea atu, ‘Kia ahiahi ka kai koutou i te kikokiko, ā, i te ata ka mākona i te taro; ā, ka mōhio koutou ko Ihowā ahau, ko tō koutou Atua.’ ”
EXO 16:13 Ā, i te ahiahi, nā, ka puta mai te koitareke, ā, kapi ana te puni; ā, i te ata kua takoto te tōmairangi i te nohoanga, tawhio noa, tawhio noa.
EXO 16:14 Ā, ka mimiti ake te papanga tōmairangi, nā, he mea ririki, pōtakataka nei, kei te mata o te koraha, ririki, me te haupapa, i runga i te whenua.
EXO 16:15 Ā, i te kitenga o ngā tama a Īharaira, ka mea rātou tētahi ki tētahi, “He aha tēnā?” Kīhai hoki rātou i mōhio he aha rānei. Nā, ka mea a Mohi ki a rātou, “Ko te taro rā tēnā ka hōmai nei e Ihowā ki a koutou hei kai.
EXO 16:16 Ko te mea tēnā i ākona mai rā e Ihowā, ‘Kohikohia mai i reira e tērā, e tērā, kia rite ki tāna e kai ai; he omere mā te tangata, kia rite ki tō koutou tokomaha; kohikohia e tērā, e tērā, mā te hunga i tōna tēneti.’ ”
EXO 16:17 Ā, pērā ana ngā tama a Īharaira, nā, kohikohia ana, tā tētahi he nui, tā tētahi he iti.
EXO 16:18 Ā, ka mēhuatia e rātou ki te omere, kīhai i hira tā te tangata i te wāhi nui, kīhai hoki he hapa o tāna i te wāhi nohinohi. Rite tonu ki te kai a tērā, a tērā, tā rātou i kohikohi ai.
EXO 16:19 Nā, ka mea a Mohi ki a rātou, “Kaua e whakatoea tētahi wāhi o tēnā ki te ata.”
EXO 16:20 Engari kīhai rātou i whakarongo ki a Mohi; ā, whakatoea ana e ētahi tētahi wāhi o taua mea mō te ata, ā, muia ana e te kutukutu, ā, piro ake; ā, riri ana a Mohi ki a rātou.
EXO 16:21 Ā, kohikohia ana taua mea e rātou i tēnei ata, i tēnei ata, rite tonu ki tā tēnei tangata, ki tā tēnei tangata, e kai ai; ā, ka mahana te rā, nā, kua rewa.
EXO 16:22 Ā, i te ono o ngā rā ka takiruatia te taro i kohikohia e rātou, e rua hoki ngā omere mā te tangata kotahi; ā, ka haere mai ngā rangatira katoa o te huihui, ka kōrero ki a Mohi.
EXO 16:23 Nā, ka mea ia ki a rātou, “Ko ia tēnei tā Ihowā i kōrero rā, ‘Ko āpōpō te okiokinga o te hāpati tapu o Ihowā; tunua tā koutou e tunu ai, kōhuatia hoki tā koutou e kōhua ai; ā, ko te toenga, waiho mā koutou, rongoātia mō te ata.’ ”
EXO 16:24 Ā, rongoātia atu ana e rātou mō te ata, i pērā anō me tā Mohi i kī ai; kīhai hoki i piro, kāhore hoki i whai kutukutu.
EXO 16:25 Nā, ka mea a Mohi, “Kainga tēnā i tēnei rā; he hāpati hoki tēnei rā nā Ihowā; e kore tēnā mea e kitea e koutou ki te pārae i tēnei rā.
EXO 16:26 E ono ngā rā e kohikohi ai koutou i tēnā mea; ā, i te whitu o ngā rā ko te hāpati, ko reira kore ai.”
EXO 16:27 Ā, i te whitu o ngā rā ka haere atu ētahi o te iwi ki te kohikohi, ā, kīhai i kitea.
EXO 16:28 Nā, ka mea a Ihowā ki a Mohi, “Kia pēhea te roa o koutou e kore nei e pupuri i āku whakahau, i āku ture?
EXO 16:29 Titiro, nō te mea kua hoatu e Ihowā te hāpati ki a koutou, koia i hoatu ai e ia i te rā ono he taro mō ngā rangi e rua. E noho koutou e tērā, e tērā, ki tōna wāhi anō; kaua tētahi e haere atu i tōna nohoanga i te rā whitu.”
EXO 16:30 Nā, ka noho te iwi i te rā whitu.
EXO 16:31 Ā, huaina iho e te whare o Īharaira te ingoa o taua mea he mana. Tōna rite kei te purapura korianara, mā tonu; tōna reka kei te papa honi.
EXO 16:32 I mea anō a Mohi, “Ko te mea tēnei i ākona mai nei e Ihowā, ‘Whakakīia tētahi omere ki taua mea, ka rongoā ai mā ō koutou whakapaparanga; kia kite ai rātou i te taro i whāngaia ai koutou e ahau i te koraha i tāku whakaputanga mai i a koutou i te whenua o Īhipa.’ ”
EXO 16:33 Ā, ka mea a Mohi ki a Ārona, “Tangohia tētahi oko, whaowhina hoki he mana ki roto, kia kotahi whakakīnga o te omere, ka whakatakoto ki te aroaro o Ihowā, rongoā ai mā ō koutou whakatupuranga.”
EXO 16:34 Ā, whakatakotoria ana taua mea e Ārona ki mua i te Whakaaturanga rongoā ai, pērā tonu ia me tā Ihowā i ako ai ki a Mohi.
EXO 16:35 Ā, e whā tekau ngā tau i kai ai ngā tama a Īharaira i te mana, ā tae noa ki te whenua tāngata; he mana tā rātou i kai ai, ā tae noa ki ngā rohe o te whenua o Kanaana.
EXO 16:36 Nā, ko te omere, ko te wāhi whakatekau o te epa.
EXO 17:1 Nā, ka haere te huihui katoa o ngā tama a Īharaira i te koraha o Hini i ō rātou haerenga, i pērā tonu me tā Ihowā i ako ai, ā, noho rawa atu ki Repirimi; otiia kāhore he wai hei inu mā te iwi.
EXO 17:2 Nā, ka ngangau te iwi ki a Mohi, ka mea, “Hōmai rā he wai mō mātou, kia inu ai mātou.” Ā, ka mea a Mohi ki a rātou, “He aha koutou i ngangau ai ki ahau? He aha koutou i whakamātautau ai i a Ihowā?”
EXO 17:3 Nā, ka mate te iwi i te wai i reira; ā, amuamu ana te iwi ki a Mohi, ā, ka mea, “He aha mātou i kawea mai ai e koe i Īhipa kia kōhurutia ai mātou, me ā mātou tamariki, me ā mātou kararehe ki te matewai?”
EXO 17:4 Nā, ka karanga a Mohi ki a Ihowā, ka mea, “Me pēhea ahau ki te iwi nei? Whano rātou āki i ahau ki te kōhatu.”
EXO 17:5 Nā, ka mea a Ihowā ki a Mohi, “Haere i mua i te iwi, ka tango hoki i ētahi o ngā kaumātua o Īharaira hei hoa mōu; ko tāu tokotoko hoki i patua e koe ki te awa, me mau atu i tōu ringa, ka haere.
EXO 17:6 Nanā, tēnā ahau te tū atu nā i tōu aroaro i reira, i runga i te kāmaka i Horepa, ā, māu e patu te kāmaka, ā, ka puta he wai i reira, hei inu mā te iwi.” Ā, pērātia ana e Mohi i te tirohanga a ngā kaumātua o Īharaira.
EXO 17:7 Ā, huaina ana e ia te ingoa o taua wāhi ko Maha, ko Meripa; mō te ngangautanga a ngā tama a Īharaira, mō tā rātou whakamātau hoki i a Ihowā, i a rātou i mea rā, “Kei roto rānei a Ihowā i a tātou, kāhore rānei?”
EXO 17:8 Nā, ka haere mai a Amareke, kei te whawhai ki a Īharaira ki Repirimi.
EXO 17:9 Nā, ka mea a Mohi ki a Hohua, “Whiriwhiria mai ētahi tāngata mā tāua, ka haere ki te whawhai ki a Amareke. Ka tū ahau āpōpō ki runga i te tihi o te pukepuke, me te rākau anō hoki a te Atua ki tōku ringa.”
EXO 17:10 Nā, pērātia ana e Hohua me tā Mohi i kōrero ai ki a ia; ko te tino whawhaitanga ki a Amareke; ko Mohi ia, rātou ko Ārona, ko Huru, i piki ki te tihi o te pukepuke.
EXO 17:11 Ā, ka maiangi ake te ringa o Mohi, nā, ka kaha a Īharaira; ā, ka tukua iho tōna ringa, nā, ka kaha a Amareke.
EXO 17:12 Otiia ka taimaha ngā ringa o Mohi; ā, ka mau rāua ki tētahi kōhatu, ā, whakatakotoria ana ki raro i a ia, ā, noho ana ia i runga; ā, puritia ake ana ōna ringa e Ārona rāua ko Huru, kotahi i tētahi taha, kotahi i tētahi taha; kātahi ka tūturu tonu ōna ringa, ā tō noa te rā.
EXO 17:13 Nā, patua ana a Amareke, rātou ko tōna iwi, e Hohua ki te mata o te hoari.
EXO 17:14 Nā, ka mea a Ihowā ki a Mohi, “Tuhituhia tēnei ki te pukapuka, hei whakamaharatanga; kōrerotia hoki ki ngā taringa o Hohua. Ka tino horoia atu hoki e ahau te maharatanga o Amareke i raro i te rangi.”
EXO 17:15 Ā, hangā ana e Mohi he āta, ā, huaina iho tōna ingoa ko “Ihowānihi.”
EXO 17:16 I mea hoki ia, “Kua ara nei te ringa ki te torōna o Ihowā, nā, he pakanga tā Ihowā ki a Amareke i tēnei whakapaparanga, i tēnei whakapaparanga.”
EXO 18:1 Ā, ka rongo a Ietoro, te tohunga o Miriana, te hungawai o Mohi, ki ngā mea katoa i meatia e te Atua ki a Mohi, ki a Īharaira hoki, ki tāna iwi; ki a Ihowā anō hoki kua whakaputa mai i a Īharaira i Īhipa.
EXO 18:2 Kātahi a Ietoro, hungawai o Mohi, ka tango i a Hipora, wahine a Mohi, i muri nei i tāna tononga i a ia kia hoki,
EXO 18:3 me āna tamariki tokorua, ko te ingoa o tētahi ko Kerehoma, i mea hoki ia, “He manene ahau i te whenua kē,”
EXO 18:4 ko te ingoa hoki o tētahi ko Eriētere; “Mōku hoki i āwhinatia mai e te Atua o tōku pāpā, nāna hoki ahau i whakaora i te hoari a Parao.”
EXO 18:5 Nā, ka haere mai a Ietoro, te hungawai o Mohi, rātou ko āna tamariki, ko tāna wahine, ki a Mohi, ki te koraha i noho ai ia, ki te maunga o te Atua.
EXO 18:6 Ā, ka mea ki a Mohi, “Ko ahau, ko Ietoro, ko tōu hungawai, kua tae mai ki a koe, me tāu wahine, rātou ko āna tama tokorua.”
EXO 18:7 Nā, ka haere a Mohi ki te whakatau i tōna hungawai, ā, ka tuohu, ka kihi hoki i a ia; ā, ka ui rāua ki a rāua ki te pai i tētahi, i tētahi; ā, haere ana rāua ki te tēneti.
EXO 18:8 Nā, ka kōrerotia e Mohi ki tōna hungawai ngā mea katoa i meatia e Ihowā ki a Parao rātou ko ngā Īhipiana, mō Īharaira, me ngā mate katoa hoki i pono ki a rātou i te ara, me rātou hoki kua whakaorangia nei e Ihowā.
EXO 18:9 Nā, ka hari a Ietoro mō ngā mea pai katoa i meatia e Ihowā ki a Īharaira, mō rātou hoki i whakaorangia e ia i te ringa o ngā Īhipiana,
EXO 18:10 ā, ka mea a Ietoro, “Kia whakapaingia a Ihowā nāna nei koutou i whakaora i te ringa o ngā Īhipiana, i te ringa hoki o Parao; nāna hoki te iwi nei i whakaora i raro i te ringa o ngā Īhipiana.
EXO 18:11 Kātahi ahau ka mōhio he nui ake a Ihowā i ngā atua katoa; āe rā, i te mea hoki ka whakapehapeha rātou, hira ake ana anō ia i a rātou.”
EXO 18:12 Nā, ka tangohia e Ietoro, e te hungawai o Mohi tētahi tahunga tinana me ētahi patunga tapu mā te Atua; ā, haere mai ana a Ārona, me ngā kaumātua katoa o Īharaira, ki te hungawai o Mohi, ki te kai taro ki te aroaro o te Atua.
EXO 18:13 Ā, i te aonga ake o te rā ka noho a Mohi ki te whakawā i te iwi; ā, ka tū te iwi i te taha o Mohi nō te ata ā ahiahi noa.
EXO 18:14 Ā, nō te kitenga o te hungawai o Mohi i ngā mea katoa i mea ai ia ki te iwi, ka mea ia, “He aha tēnei mea e mea nei koe ki te iwi? He aha koe i noho ai ko koe anake, i tū ai hoki te iwi katoa i tōu taha nō te ata ā tae noa ki te ahiahi?”
EXO 18:15 Ā, ka mea a Mohi ki tōna hungawai, “E haere mai ana hoki te iwi ki ahau, ki te rapu tikanga i te Atua.
EXO 18:16 Ka ai he mea ki a rātou, nā, ka haere mai ki ahau; ā, māku e whakarite te whakawā a tētahi ki tētahi; e whakaatu hoki ngā tikanga a te Atua me āna ture.”
EXO 18:17 Nā, ka mea te hungawai o Mohi ki a ia, “Ehara tēnei i te pai e mea nei koe.
EXO 18:18 Ka honia noatia iho koe, koutou tahi ko tēnei iwi i a koe nei; he pēhi rawa hoki tēnei mea i a koe; e kore e taea e koe anake.
EXO 18:19 Nā, whakarongo mai ki tōku reo, māku koe e tohutohu; hei a koe te Atua, hei te aroaro o te Atua koe mō te iwi, ā, māu e kawe ngā kōrero ki te Atua.
EXO 18:20 Māu anō rātou e whakaako ki ngā tikanga, ki ngā ture, e whakaatu hoki ki a rātou te huarahi e haere ai rātou, me ngā mahi e mahi ai rātou.
EXO 18:21 Māu anō hoki e titiro i roto i te iwi katoa ētahi tāngata māia, e wehi ana i te Atua; hei te hunga pono, e kino ana ki te apo; ka waiho ai hei rangatira mō rātou, hei rangatira mō ngā mano, hei rangatira mō ngā rau, hei rangatira mō ngā rima tekau, hei rangatira mō ngā tekau.
EXO 18:22 Ā, mā rātou te iwi e whakawā i ngā wā katoa; ā, ko ngā mea nunui katoa, me kawe mai ki a koe; ko ngā mea nohinohi katoa ia, mā rātou e whakarite; pēnei ka māmā koe, ā, mā koutou tahi te pīkaunga.
EXO 18:23 Ki te mea koe i tēnei mea, ā, ka kī mai te Atua ki a koe, kātahi koe ka matatū ake, ā, ka haere mārie tēnei iwi katoa ki ō rātou kāinga.”
EXO 18:24 Ā, rongo tonu a Mohi ki te kupu a tōna hungawai, ā, meatia katoatia iho e ia ngā mea i kōrero ai ia.
EXO 18:25 Ā, whiriwhiria ana e Mohi ētahi tāngata māia i roto i a Īharaira katoa, ā, waiho iho rātou e ia hei upoko mō te iwi, hei rangatira mō ngā mano, hei rangatira mō ngā rau, hei rangatira mō ngā rima tekau, hei rangatira hoki mō ngā tekau.
EXO 18:26 Ā, nā rātou te iwi i whakawā i ngā wā katoa; ko te mea pakeke i kawea e rātou ki a Mohi; ko ngā mea nohinohi katoa ia nā rātou anō i whakarite.
EXO 18:27 Nā, ka tukua atu e Mohi tōna hungawai; ā, haere ana ia ki tōna whenua.
EXO 19:1 Nō te toru o ngā marama o te haerenga mai o ngā tama a Īharaira i te whenua o Īhipa, nō taua rangi anō, ka tae rātou ki te koraha o Hinai.
EXO 19:2 Ā, i tō rātou haerenga atu i Repirimi, ka tae ki te koraha o Hinai, ka noho iho rātou i te koraha; ā, noho ana a Īharaira ki reira, ki te ritenga atu o te maunga.
EXO 19:3 Nā, ka piki a Mohi ki te Atua, ā, ka karanga a Ihowā ki a ia i te maunga, ka mea, “Kia pēnei tāu kōrero ki te whare o Hākopa, tāu kauwhau hoki ki ngā tama a Īharaira:
EXO 19:4 ‘Kua kite koutou i ngā mea i mea ai ahau ki ngā Īhipiana, i tāku whakawahanga hoki i a koutou i runga i ngā parirau ēkara, me te kawenga mai i a koutou ki ahau.
EXO 19:5 Heoi, ki te āta whakarongo koutou ki tōku reo, ki te pupuri hoki i tāku kawenata, ka waiho koutou hei taonga mōku, motu kē i ngā iwi katoa; i ahau hoki te whenua katoa;
EXO 19:6 ā, ka waiho koutou e ahau hei kīngi, hei tohunga, hei iwi tapu hoki.’ Ko ngā kupu ēnei e kōrero ai koe ki ngā tama a Īharaira.”
EXO 19:7 Nā, ka haere iho a Mohi, ka karanga ia ki ngā kaumātua o te iwi, ā, hoatu ana e ia ki tō rātou aroaro ēnei kupu katoa i ākona nei e Ihowā ki a ia.
EXO 19:8 Nā, ka pā katoa te iwi ki te whakahoki, ka mea: “Ka mahia e mātou ngā mea katoa i kōrerotia mai nā e Ihowā.” Ā, kawea ana e Mohi ngā kupu a te iwi ki a Ihowā.
EXO 19:9 Nā, ka mea a Ihowā ki a Mohi, “Nanā, ka haere atu ahau ki a koe i roto i tētahi kapua mātotoru, kia rongo ai te iwi, ua kōrero ahau ki a koe, kia whakapono ai hoki rātou ki a koe ā mua tonu atu. Ā, kōrerotia ana e Mohi ngā kupu a te iwi ki a Ihowā.”
EXO 19:10 Nā, ka mea a Ihowā ki a Mohi, “Haere ki te iwi, ka whakatapu hoki i a rātou ākuanei, āpōpō hoki, kia horoi hoki rātou i ō rātou kākahu,
EXO 19:11 kia takatū hoki mō te rā tuatoru; tā te mea hei te rā tuatoru a Ihowā haere iho ai ki te aroaro o te iwi katoa, ki runga ki Maunga Hinai.
EXO 19:12 Ā, whakatakotoria e koe he rohe mō te iwi, tawhio noa, tawhio noa, ka mea atu, ‘Kia mōhio koutou kei piki ki te maunga, kei pā rānei ki tōna taha; ko ngā tāngata katoa e pā ana ki te maunga, inā, me whakamate.
EXO 19:13 Kaua te ringa e pā ki a ia, engari me āki ki te kōhatu, me wero rānei ki te tao; ahakoa kararehe, ahakoa tangata, e kore e ora.’ Ka kukume roa te tangi o te tētere, ka haere mai ai rātou ki te maunga.”
EXO 19:14 Nā, ka haere iho a Mohi i te maunga ki te iwi, ka whakatapu ia i te iwi, ā, horoia ana e rātou ō rātou kākahu.
EXO 19:15 Ā, i mea ia ki te iwi, “Kia takatū koutou i te toru o ngā rā; kaua e whakatata atu ki te wahine.”
EXO 19:16 Ā, ka taka ki te toru o ngā rā, i te ata, nā, ka puta mai ngā whatitiri, me ngā uira, me te kapua mātotoru i runga i te maunga, me te tangi o te tētere, tōna nui nā! Ā, wiri katoa ana te hunga i te puni.
EXO 19:17 Nā, ka ārahina atu te iwi e Mohi i te puni ki te whakatau i te Atua; ā, tū ana rātou ki raro i te maunga.
EXO 19:18 Ā, he paowa kau Maunga Hinai, nō te mea kua heke iho a Ihowā ki runga, i roto i te ahi; ā, kake ana tōna paowa, ānō he paowa oumu, ā, wiri pū te maunga katoa.
EXO 19:19 Ā, i te mea ka nui haere rawa te tangi o te tētere, ka kōrero atu a Mohi, ā, ka kōrero ā-reo tangata mai te Atua ki a ia.
EXO 19:20 Nā, ka heke iho a Ihowā ki Maunga Hinai, ki te tihi o te maunga; ā, karangatia iho ana a Mohi e Ihowā ki te tihi o te maunga; ā, piki atu ana a Mohi.
EXO 19:21 Nā, ka mea a Ihowā ki a Mohi, “Heke atu, kauwhautia te iwi rā, kei wāhi ake rātou ki a Ihowā ki te mātakitaki, ā, he tokomaha o rātou e hinga.
EXO 19:22 Ko ngā tohunga hoki e whakatata ana ki a Ihowā, kia tapu rātou, kei auta atu a Ihowā ki a rātou.”
EXO 19:23 Ā, ka mea a Mohi ki a Ihowā, “E kore e āhei i te iwi te piki ake ki Maunga Hinai; nāu hoki i kauwhau iho ki a mātou, i mea, ‘Taiepatia te maunga, whakatapua hoki.’ ”
EXO 19:24 Nā, ka mea a Ihowā ki a ia, “Haere, heke atu; ka piki mai anō koe, kōrua ko Ārona; ko ngā tohunga ia, me te iwi, kei wāhi mai rātou, kei piki ki a Ihowā; kei auta atu ia ki a rātou.”
EXO 19:25 Ā, heke atu ana a Mohi ki te iwi, kōrero ana ki a rātou.
EXO 20:1 Nā, ka kōrerotia e te Atua ēnei kupu katoa, ka mea:
EXO 20:2 “Ko Ihowā ahau, ko tōu Atua, nāku koe i whakaputa mai i te whenua o Īhipa, i te whare pononga;
EXO 20:3 aua ētahi atua kē atu mōu ki mua i ahau.
EXO 20:4 “Kei hanga koe i te whakapakoko mōu, i tētahi ritenga rānei o ngā mea o te rangi i runga, o te whenua rānei i raro, o te wai rānei i raro i te whenua.
EXO 20:5 Kei koropiko koe ki ēnā mea, kei mahi rānei ki ēnā mea; ko Ihowā hoki ahau, ko tōu Atua, he Atua hae, e mea ana i ngā hara o ngā mātua kia tau iho ki ngā tamariki ā te toru, te whā rā anō o ngā whakatupuranga o te hunga e kino ana ki ahau;
EXO 20:6 e whakaputa aroha ana hoki ki ngā mano, ki te hunga e aroha ana ki ahau, e whakarite ana i āku ture.
EXO 20:7 “Kei whakahuatia noatia e koe te ingoa o Ihowā, o tōu Atua; e kore hoki a Ihowā e mea, he harakore te tangata e whakahua noa ana i tōna ingoa.
EXO 20:8 “Kia mahara ki te rā hāpati, kia whakatapua.
EXO 20:9 E ono ngā rā e mahi ai koe, e mea ai hoki i āu mea katoa.
EXO 20:10 Tēnā ko te rā whitu, he hāpati nō Ihowā, nō tōu Atua; kaua e mahia tētahi mahi i reira – e koe, e tāu tama, e tāu tamāhine, e tāu pononga tāne, e tāu pononga wahine, e āu kararehe hoki, me tōu tangata kē i roto i ōu tatau.
EXO 20:11 E ono hoki ngā rā i hangā ai e Ihowā te rangi, me te whenua, te moana, me ngā mea katoa i roto, ā, okioki ana i te rā whitu. Nā reira i whakapaingia ai te rā hāpati e Ihowā, ā whakatapua ana.
EXO 20:12 “Whakahōnoretia tōu pāpā me tōu whaea; kia roa ai ōu rā ki te whenua e hōmai nei e Ihowā, e tōu Atua, ki a koe.
EXO 20:13 “Kaua e patu.
EXO 20:14 “Kaua e pūremu.
EXO 20:15 “Kaua e tāhae.
EXO 20:16 “Kaua e whakapae teka ki tōu hoa.
EXO 20:17 “Kaua e hiahia ki te whare o tōu hoa. Kaua e hiahia ki te wahine a tōu hoa, ki tāna pononga tāne rānei, ki tāna pononga wahine rānei, ki tāna kau rānei, ki tana kāihe rānei, ki tētahi mea rānei a tōu hoa.”
EXO 20:18 Ā, i kite te iwi katoa i ngā whatitiri, i ngā uira, i te tangi o te tētere, i te maunga hoki e paowa ana; ā, i te kitenga o te iwi, ka wiri rātou, ā, tū rawa i tawhiti.
EXO 20:19 Ā, ka mea rātou ki a Mohi, “Māu e kōrero mai ki a mātou, ā, ka whakarongo atu mātou; engari kaua te Atua e kōrero ki a mātou, kei mate mātou.”
EXO 20:20 Nā, ka mea a Mohi ki te iwi, “Kaua e wehi; he whakamātau hoki i a koutou i haere mai ai te Atua, kia mau ai hoki tōna wehi i ō koutou kanohi, kei hara koutou.”
EXO 20:21 Ā, tū ana te iwi i tawhiti; ko Mohi ia, i whakatata ki te pōuri kerekere i noho ai te Atua.
EXO 20:22 Ā, ka mea a Ihowā ki a Mohi: “Kia pēnei tāu kupu ki ngā tama a Īharaira: ‘Ka kite koutou kua kōrero ahau i te rangi ki a koutou.
EXO 20:23 Kei hanga koutou he atua kē atu ki tōku taha; kei hanga koutou he atua hiriwa, he atua kōura rānei, mō koutou.
EXO 20:24 “ ‘Hangā he āta oneone māku, ki runga patu ai koe i āu tahunga tinana, i āu whakahere mō te pai, i āu hipi, i āu kau. I ngā wāhi katoa e whakamaharatia ai e ahau tōku ingoa ka haere atu ahau ki a koe, ka manaaki i a koe.
EXO 20:25 Ā, ki te hanga koe i te āta kōhatu māku, kei hangā e koe ki te kōhatu hahau; ki te hāpai hoki koe i tāu toki ki taua mea, kua whakanoatia e koe.
EXO 20:26 Kaua anō e piki nā te arawhata ki tōku āta, kei kitea koe i reira e tū tahanga ana.’ ”
EXO 21:1 “Ā, ko ngā whakariteritenga ēnei e whakatakotoria e koe ki tō rātou aroaro:
EXO 21:2 Ki te hoko koe i tētahi pononga Hiperu, e ono ngā tau e mahi ai ia; ā, i te whitu ka haere noa atu, kaua he utu.
EXO 21:3 Ki te mea he takakau ia i tōna haerenga mai, me haere atu anō he takakau; ki te mea he wahine tāna, ko rāua ko tāna wahine e haere.
EXO 21:4 Ki te mea nā tōna ariki te wahine i hoatu ki a ia, ā, ka whānau ā rāua tama, tamāhine rānei; mā tōna ariki te wahine rātou ko āna tamariki, ko ia anake e haere.
EXO 21:5 “Ā, ki te mea matanui te pononga, ‘E aroha ana ahau ki tōku ariki, ki tāku wahine, ki āku tamariki; e kore ahau e haere noa atu,’
EXO 21:6 nā, me kawe ia e tōna ariki ki te Atua. Me kawe hoki ia e ia ki te tatau, ki te pou rānei o te tatau; ā, ka pokaia tōna taringa e tōna ariki ki te oka; ā, ka oti iho ia hei kaimahi māna.
EXO 21:7 “Ki te hokona atu hoki e tētahi tangata tāna tamāhine hei pononga, e kore e rite tōna haerenga ki waho ki te haerenga o ngā pononga tāne.
EXO 21:8 Ki te kino ia ki te titiro a tōna ariki, i taumau nei i a ia māna, nā, me whakahoki ia mō tētahi utu; e kore e āhei te hoko i a ia ki tētahi iwi kē; mōna hoki i tinihanga ki a ia.
EXO 21:9 Ā, ki te taumautia ia e ia mā tāna tama, kia rite ki te tikanga ki ngā tamāhine tupu tāna e mea ai ki a ia.
EXO 21:10 Ki te tango ia i tētahi atu wahine māna kaua e whakaititia e ia te kai mā tērā, te kākahu mōna, me tā rāua moe tahi.
EXO 21:11 Ā, ki te kāhore ēnei mea e toru e meatia e ia ki a ia, nā, me haere noa atu ia, kaua he moni.”
EXO 21:12 “Ki te patu tētahi i te tangata kia mate, me tino whakamate anō ia.
EXO 21:13 Ā, ki te kāhore tētahi e whanga atu, ā, ka mea te Atua kia tūpono ki tōna ringa; nā, māku e whakarite ki a koe te wāhi e rere ai ia.
EXO 21:14 Tēnā ko tēnei, i poka noa te tangata ki tōna hoa, ki te kōhuru tinihanga i a ia; me tango ia e koe i tāku āta, kia mate ai ia.
EXO 21:15 “Me tino whakamate anō hoki te tangata e patu ana i tōna pāpā, i tōna whaea rānei.
EXO 21:16 “Ko te tangata hoki e tāhae ana i tētahi tangata, ā, hokona ana e ia, e kitea ana rānei ki tōna ringa, me tino whakamate anō ia.
EXO 21:17 “Me tino whakamate anō hoki te tangata e kanga ana i tōna pāpā, i tōna whaea rānei.
EXO 21:18 “Ki te whawhai hoki ētahi tāngata ki a rāua, ā, ka ākina tōna hoa e tētahi ki te kōhatu, ka motokia rānei, ā, kāhore ia e mate, engari ka takoto i runga i te moenga;
EXO 21:19 ki te ara ake ia, ā, ka hāereere ki waho me te toko i tāna tokotoko, kātahi ka kore te hara o te tangata i patua ai ia; otiia me utu e ia tōna whakamāngeretanga ki te mahi, me mea hoki kia āta rongoātia kia ora ai.
EXO 21:20 “Ki te patu hoki te tangata i tāna pononga tāne, i tāna pononga wahine rānei, ki te rākau, ā, ka mate i raro iho i tōna ringa; me āta takitaki tōna matenga.
EXO 21:21 Otiia ki te ora ia, kotahi, e rua rānei, ngā rā, e kore e takitakina; nō te mea ko tāna moni ia.
EXO 21:22 “Ki te whawhai ētahi tāngata ki a rātou, ā, ka whara tētahi wahine e hapū ana, ā, ka materoto tāna tamaiti, otiia kāhore atu he hē, me tango he utu i a ia, arā tā te tahu o te wahine e whakarite ai ki a ia; hei tā ngā kaiwhakawā e mea ai tāna e hōmai ai.
EXO 21:23 Engari ki te mate, nā, me hōmai e koe he mate hei utu mō te mate,
EXO 21:24 he kanohi mō te kanohi, he niho mō te niho, he ringa mō te ringa, he waewae mō te waewae,
EXO 21:25 he wera mō te wera, he motu mō te motu, he kārawarawa mō te kārawarawa.
EXO 21:26 “Ki te patua e te tangata te kanohi o tāna pononga tāne, te kanohi rānei o tāna pononga wahine, ā, ka matapōtia; me tuku kia haere noa atu, hei utu mō tōna kanohi.
EXO 21:27 Ā, ki te patua e ia kia marere te niho o tāna pononga tāne, te niho rānei o tāna pononga wahine; me tuku kia haere noa atu, hei utu mō tōna niho.”
EXO 21:28 “Ki te werohia tētahi tangata tētahi wahine rānei, e te kau, ā, ka mate; me tino āki te kau ki te kōhatu, kaua anō hoki ōna kikokiko e kainga; ā, ka tukua noatia atu te rangatira o te kau.
EXO 21:29 Otiia ki te mea he kau wero ia nō mua, ā, kua whakaaturia ki tōna rangatira, ā, kāhore ia e tiaki i a ia, ā, ka mate i a ia tētahi tangata, tētahi wahine rānei; me āki te kau ki te kōhatu, me whakamate anō hoki tōna rangatira.
EXO 21:30 Ki te whakaritea kia hōmai e ia he moni, me hōmai e ia hei utu mō tōna ora te mea i whakaritea ki a ia.
EXO 21:31 Ki te mea he tama, he kōtiro rānei i werohia e ia, kia rite anō ki tēnei tikanga te meatanga ki a ia.
EXO 21:32 Ki te wero te kau i tētahi pononga tāne, i tētahi pononga wahine rānei; kia toru tekau ngā hekere hiriwa e hōmai ki tō rāua ariki, me āki hoki te kau ki te kōhatu.
EXO 21:33 “Ki te whakatuwhera hoki te tangata i tētahi poka, ki te keria rānei e te tangata tētahi poka, ā, e kore e hīpokina e ia, ā, ka taka he kau, he kāihe rānei ki roto;
EXO 21:34 me utu e te tangata nāna te poka, me hōmai he moni e ia ki tō rāua ariki; ā, māna te mea mate.
EXO 21:35 “Ki te tukia te kau a tētahi tangata e te kau e tētahi, ā, ka mate; nā, me hoko e rāua te kau ora, ka wehe ai i ōna utu; me wehe anō hoki e rāua te mea kua mate.
EXO 21:36 Otiia ki te mea i mōhiotia he kau wero ia nō mua, ā, kāhore i tiakina e tōna ariki, me utu e ia te kau ki te kau; ā, māna te mea mate.”
EXO 22:1 “Ki te tāhae te tangata i te kau, i te hipi rānei, ā, ka patua, ka hokona rānei e ia; kia rima ngā kau e hōmai e ia hei utu mō te kau kotahi, kia whā hoki ngā hipi mō te hipi kotahi.
EXO 22:2 “Ki te mau te tāhae e poka ara ana, ā, ka patua, ka mate, kāhore he toto e heke mōna.
EXO 22:3 Ki te mea kua whiti te rā ki a ia, ka heke he toto mōna; me hōmai hoki e ia he utu; ki te kāhore āna mea, nā, me hoko ia mō tāna tāhae.
EXO 22:4 “Ki te mau pū ki tōna ringa te mea i tāhaetia, he kau, he kāihe rānei, he hipi rānei, ā, e ora ana; kia rua ngā utu e hōmai e ia.
EXO 22:5 “Ki te mea tētahi tangata kia kainga tētahi māra, tētahi kāri wāina rānei, ā, ka tukua atu e ia tana kararehe hei kai i te māra a tētahi; me utu e ia ki ngā hua papai rawa o tāna māra, ki ngā hua papai rawa hoki o tāna kāri wāina.
EXO 22:6 “Ki te toro atu te ahi, ā, ka pono ki ngā tātarāmoa, ā, ka pau ngā whakapū wīti, te wīti rānei e tū ana, te māra rānei; me āta whakautu e te tangata nāna i tahu te ahi.
EXO 22:7 “Ki te hōmai e te tangata tētahi moni ētahi mea rānei, ki tōna hoa kia tiakina, ā, ka tāhaetia i roto i te whare o taua tangata; ki te kitea te tāhae, kia rua ngā utu e hōmai e ia.
EXO 22:8 Ki te kāhore i kitea te tāhae, nā, me kawe te rangatira o te whare ki te Atua, kia kitea me kāhore i totoro tōna ringaringa ki ngā taonga a tōna hoa.
EXO 22:9 I ngā whakawākanga hara katoa mō te kau, kāihe, hipi, kākahu, mō te ngaromanga o tētahi mea e kīia ana e tētahi nōna, me haere te kōrero a te tokorua ki te Atua; ko te tangata kua whakataua te hē ki a ia e te Atua, kia rua ngā utu e hōmai e ia ki tōna hoa.
EXO 22:10 “Ki te hōmai e tētahi he kāihe ki tōna hoa, he kau rānei, he hipi rānei, tētahi rānei o ngā tini kararehe, kia tiakina; ā, ka mate, ka whara rānei, ka pāhuatia rānei, kīhai anō hoki i kitea.
EXO 22:11 Ka waiho i waenganui i a rāua te oati a Ihowā, mō tōna ringa kīhai i totoro atu ki te taonga o tōna hoa; ā, me whakaae mai e te rangatira o taua mea, e kore anō hoki e utua.
EXO 22:12 Otiia, ki te mea kua tāhaetia atu i a ia, me hoatu he utu ki tōna rangatira.
EXO 22:13 Ki te mea kua haehaea, me kawe mai e ia hei whakaatu, ā, e kore e utua e ia te mea i haea.
EXO 22:14 “Ki te tīkina anō hoki e te tangata tētahi mea a tōna hoa, ā, ka whara, ka mate rānei, me te ngaro anō te rangatira o taua mea, me āta whakautu anō e ia.
EXO 22:15 Kei reira te rangatira, e kore e utua; ki te mea e utua ana tōna tukunga, i haere mai hoki mō tōna utu.”
EXO 22:16 “Ki te whakawai te tangata i te kōtiro kīhai i taumautia, ā, ka moe rāua, me whakarite he tāpākūhā, ā, me mārena e ia hei wahine māna.
EXO 22:17 Ki te tino whakakāhore rawa tōna pāpā, ā, e kore e tukua ki a ia, me hōmai e ia ngā moni e rite ana ki te kaireperepe mō ngā kōtiro.
EXO 22:18 “Kei tukua e koe te wahine mākutu kia ora.
EXO 22:19 “Ko te tangata i takotoria e ia he kararehe, me whakamate rawa.
EXO 22:20 “Me whakangaro rawa te tangata e patu whakahere ana mā tētahi atua kē; engari mā Ihowā anake.
EXO 22:21 “Kaua hoki e whakatoia te manene, kaua anō hoki ia e tūkinotia; he manene hoki koutou i mua, i te whenua o Īhipa.
EXO 22:22 “Kaua e whakatupuria kinotia te pouaru, te pani rānei.
EXO 22:23 Ki te anga koe ki te whakatupukino i a rāua, ā, ka tangi rāua ki ahau, inā, ka whakarongo ahau ki tā rāua karanga;
EXO 22:24 ā, ka mura tōku riri, ka patua anō hoki koutou ki te hoari; ā, ka pouarutia ā koutou wāhine, ka pania anō hoki ā koutou tamariki.
EXO 22:25 “Ki te whakatārewa koe i te moni ki tētahi o tāku iwi, ki tētahi o ōu rawakore, kei rite tāu ki a ia ki tā te kaiwhakatuputupu moni, kei tangohia i a ia te moni whakatuputupu.
EXO 22:26 Ki te tangohia e koe te kākahu o tōu hoa hei taunaha, kaua e tukua kia rere te rā ka whakahoki ai ki a ia;
EXO 22:27 ko tēnā anake nā hoki hei uhi mōna, hei kākahu mōna, mō tōna kiri; ā, ko te aha hei moenga iho mōna? Ki te karanga mai hoki ia ki ahau, nā, ka whakarongo atu ahau; nō te mea he mahi tohu tangata tāku.
EXO 22:28 “Kaua e kohukohu ki te Atua, kaua anō hoki e kanga ki te ariki o tōu iwi.
EXO 22:29 “Kei whakaroa koe ki te hōmai i ngā mātāmua o ōu hua, o ōu wai. “Me hōmai e koe te mātāmua o āu tamariki ki ahau.
EXO 22:30 Kia pērā anō tāu e mea ai ki āu kau, ki āu hipi: e whitu ngā rā e noho ai ia ki tōna whaea; i te waru o ngā rā me hōmai ki ahau.
EXO 22:31 “Hei tāngata tapu hoki koutou māku; kaua anō e kai i te kikokiko i haea ki te pārae; me maka mā te kurī.”
EXO 23:1 “Kei puaki i a koe te kōrero tito noa. Kei totoro tahi tōu ringa me te tangata kino, kei meinga hei kaiwhakaatu teka.
EXO 23:2 “Kei whai tahi me te tokomaha ki te kino. Kaua anō hoki e hamumu i te totohenga, hei mea kia riro ai i tā te tokomaha, hei whakapeau kē i te tika;
EXO 23:3 kaua anō e whakanuia te rawakore, ina tohe ia.
EXO 23:4 “Ki te tūtaki koe ki te kau a tōu hoariri, ki tana kāihe rānei, e atiti noa ana, me āta whakahoki e koe ki a ia.
EXO 23:5 Ki te kite koe i te kāihe a tōu hoariri e takoto ana i raro i tāna pīkaunga, ā, ka ngākaukore koe ki te whakaara, me āta whakaara tahi e kōrua.
EXO 23:6 “Kei whakapeaua kētia e koe te whakawā mō tōu tangata rawakore, ina tohe ia.
EXO 23:7 Kia matara koe i te teka; kaua anō e whakamatea te tangata harakore rāua ko te tangata tika; e kore hoki ahau e whakatika i tā te tangata hara.
EXO 23:8 “Kaua anō e tango i te utu whakapati; he mea whakamatapō hoki te utu whakapati i te kānohi kite, he mea whakaparori kē hoki i ngā kupu a te hunga tika.
EXO 23:9 “Kaua anō e tūkinotia te manene; e mōhio ana hoki koutou ki te ngākau o te manene; he manene hoki koutou i mua, i te whenua o Īhipa.”
EXO 23:10 “Kia ono hoki ngā tau e rui ai koe i tōu oneone, e kohikohi ai hoki i ōna hua;
EXO 23:11 i te whitu ia me waiho kia takoto kau ana, kia pariri, ā, ka kai ngā tāngata rawakore o tōu iwi; ā, mā ngā kīrehe o te pārae ā rātou toenga e kai. Kia pēnā anō koe ki tāu māra wāina, ki tāu māra ōriwa.
EXO 23:12 “E ono ngā rā e mahi ai koe i āu mahi, ā, i te whitu ka okioki; kia okioki ai tāu kau, me tāu kāihe, kia whai tānga manawa ai hoki te tama a tāu pononga wahine me te manene.
EXO 23:13 “Kia tūpato anō ki ngā mea katoa kua kōrerotia nei e ahau ki a koutou. Kaua hoki e whakahuatia te ingoa o ngā atua kē, kei rangona hoki ki tōu māngai.”
EXO 23:14 “E toru ngā wā o te tau e tuku hākari ai koe ki ahau.
EXO 23:15 “Kia mau ki te Hākari o te Taro Rēwenakore; e whitu ngā rā e kai ai koe i te taro rēwenakore, e pērā ai me tāku i whakahau ai ki a koe, i te wā anō i whakaritea o te marama, o Apipi; nō reira hoki koe i haere mai ai i Īhipa. “Kaua anō hoki tētahi e puta kau mai ki tōku aroaro.
EXO 23:16 “Ki te Hākari o te Kotinga, o te mātāmua o āu mahi, i ruia e koe ki te māra. “Ki te Hākari o te Kohikohinga i te mutunga o te tau, ina oti te kohikohi mai e koe āu mahi i te māra.
EXO 23:17 “E toru ngā wā o te tau e kitea ai ōu tāne katoa ki te aroaro o te Ariki, o Ihowā.
EXO 23:18 “Kaua e whakaherea tahitia me te taro rēwena te toto o tāku patunga tapu; kei toe anō hoki ki te ata te ngako o tāku hākari.
EXO 23:19 “Me kawe e koe ki te whare o Ihowā, o tōu Atua ngā mea mataati o ngā mātāmua o tōu oneone. “Kaua e kōhuatia te kūao koati ki te waiū o tōna whaea.”
EXO 23:20 “Nanā, ka tonoa nei e ahau he anahera ki mua i a koe, hei tiaki i a koe i te ara, hei kawe hoki i a koe ki te wāhi i whakaritea e ahau.
EXO 23:21 Kia tūpato ki a ia, whakarongo hoki ki tōna reo, kaua e whakapātaritari ki a ia; nō te mea e kore ia e whakarere noa iho i tō koutou hara; kei a ia nei hoki tōku ingoa.
EXO 23:22 Ki te āta whakarongo i a koe ki tōna reo, ki te mea hoki i ngā mea katoa e kōrero ai ahau; nā, ko ahau hei hoariri mō ōu hoariri, hei hoa whawhai hoki ki ōu hoa whawhai.
EXO 23:23 Ka haere hoki tāku anahera ki mua i a koe, hei kawe i a koe ki ngā Amori, ki ngā Hiti, ki ngā Perihi, ki ngā Kanaani, ki ngā Hiwi, ki ngā Iepuhi; ka hunā rātou e ahau.
EXO 23:24 Kei koropiko koe ki ō rātou atua, kei mahi hoki ki a rātou, kei rite hoki āu mahi ki ā rātou mahi. Engari, me turaki rawa e koe, me wāwāhi rawa anō hoki ā rātou whakapakoko.
EXO 23:25 Ā, me mahi koutou ki a Ihowā, ki tō koutou Atua, ā, ka manaakitia e ia tāu taro, me tōu wai; ka whakakorea atu anō hoki e ahau te mate i roto i a koe.
EXO 23:26 E kore tētahi mea e whānau whakatahe, e pākoko rānei, i tōu whenua; ka āta tutuki anō i ahau te maha o ōu rā.
EXO 23:27 “Ka tukua atu e ahau tāku wehi ki mua i a koe, ā, ka whakamatea ngā iwi katoa e haere atu nei koe ki a rātou, ka meinga anō hoki e ahau kia tahuri ngā tuarā o ōu hoariri katoa ki a koe.
EXO 23:28 Ka ungā anō e ahau te horonete ki mua i a koe, māna e pei ngā Hiwi, ngā Kanaani, me ngā Hiti i tōu aroaro.
EXO 23:29 E kore rātou e peia e ahau i tōu aroaro i te tau kotahi; kei ururuatia te whenua, ā, ka nui rawa i a koe te kīrehe o te pārae.
EXO 23:30 Ka peia rikirikitia atu rātou e ahau i tōu aroaro, kia hua rā anō koe, kia riro rā anō hoki te whenua i a koe.
EXO 23:31 “Ā, ka whakatakotoria e ahau tōu rohe ki te Moana Whero ā tae noa ki te Moana o ngā Pirihitini, ki te koraha hoki ā tae noa ki te awa. Ka tukua atu nei hoki e ahau ki ō koutou ringa ngā tāngata o te whenua, ā, ka peia rātou e koe i tōu aroaro.
EXO 23:32 Kaua e whakarite kawenata ki a rātou, ki ō rātou atua rānei.
EXO 23:33 Kaua rātou e noho ki tōu whenua, kei mea rātou i a koe kia hara ki ahau; tā te mea, ki te mahi koe ki ō rātou atua, ka ai tēnā hei rore mōu.”
EXO 24:1 Nā, ka mea ia ki a Mohi, “Piki ake ki a Ihowā koutou ko Ārona, ko Nātapa, ko Apihu, kia whitu tekau anō hoki o ngā kaumātua o Īharaira; ā, me koropiko mai koutou i tawhiti.
EXO 24:2 Ko Mohi anake hoki e whakatata mai ki a Ihowā; ko rātou ia, kaua rātou e whakatata mai; me te iwi hoki, kaua rātou e piki tahi ake me ia.”
EXO 24:3 Nā, ka haere a Mohi, ka kōrerotia e ia ki te iwi ngā kupu katoa a Ihowā, me ngā whakariteritenga katoa; ā, kotahi anō te reo o te iwi katoa ki te whakahoki, ka kī rātou, “Ka meatia e mātou ngā mea katoa i kōrerotia mai e Ihowā.”
EXO 24:4 Nā, ka tuhituhia e Mohi ngā kupu katoa a Ihowā. Ā, ka maranga wawe ia i te ata, ā, hangā ana e ia tētahi āta ki raro iho i te maunga, me ngā pou kotahi tekau mā rua mō ngā iwi kotahi tekau mā rua o Īharaira.
EXO 24:5 I ungā anō e ia ētahi taitama o ngā tama a Īharaira, hei whakaeke i ngā tahunga tinana, hei patu hoki i ngā pūru hei patunga mō te pai ki a Ihowā.
EXO 24:6 Nā, ka tango a Mohi i tētahi wāhi o te toto, ā, makā ana e ia ki roto ki ngā peihana; ko tētahi wāhi hoki o te toto i tāia atu ki te āta.
EXO 24:7 Nā, ka mau ia ki te Pukapuka o te Kawenata, ā, kōrerotia ana ki ngā taringa o te iwi; ā, ka mea rātou, “Ko ngā mea katoa i kīia mai nā e Ihowā ka meatia e mātou, ka rongo anō mātou.”
EXO 24:8 Nā, ka mau a Mohi ki te toto, ā, tāia atu ana e ia ki te iwi, me te kī anō ia, “Nanā, te toto nei o te kawenata e whakaritea nei e Ihowā ki a koutou mō ēnei mea katoa.”
EXO 24:9 Nā, ka piki ake a Mohi rātou ko Ārona, ko Nātapa, ko Apihu, me ngā kaumātua e whitu tekau o Īharaira;
EXO 24:10 nā, ka kite i te Atua o Īharaira. Kei raro anō i ōna waewae me te mea ko te hāpira i hangā hei whāriki, he rite tonu anō ki te tino rangi te mārama.
EXO 24:11 Ā, kīhai i totoro tōna ringa ki tētahi o ngā rangatira o ngā tama a Īharaira; heoi, ka titiro atu rātou ki te Atua, ka kai hoki, ka inu.
EXO 24:12 Nā, ka mea a Ihowā ki a Mohi, “Piki ake ki ahau ki te maunga, ā, hei reira koe noho ai; ā, ka hoatu e ahau ki a koe ngā papa kōhatu, me te ture, me te whakahau kua oti nei i ahau te tuhituhi, hei whakaako māu ki a rātou.”
EXO 24:13 Nā, ko te whakatikanga ake o Mohi, rāua ko tāna tangata, ko Hohua; ka piki atu a Mohi ki te maunga o te Atua.
EXO 24:14 I mea anō ia ki ngā kaumātua, “Tāria ake māua i konei, kia hoki mai rā anō māua ki a koutou; nā, ko Ārona rāua ko Huru tēnā hei hoa mō koutou. Ki te whai take tētahi tangata, me haere ia ki a rāua.”
EXO 24:15 Nā, piki ana a Mohi ki te maunga, e taupokina ana hoki te maunga e te kapua.
EXO 24:16 Ā, i tau te korōria o Ihowā ki runga ki Maunga Hinai; ā, e ono ngā rā i taupokina ai a reira e te kapua; ā, i te whitu o ngā rā ka karanga ia ki a Mohi i waenganui o te kapua.
EXO 24:17 Ā, i rite te āhua o te korōria o Ihowā ki te ahi e kai ana i runga i te tihi o te maunga, i te tirohanga a ngā tama a Īharaira.
EXO 24:18 Nā, ka haere a Mohi ki waenganui o te kapua, ā, pikitia ana e ia te maunga. Ā, e whā tekau ngā rā o Mohi ki runga ki te maunga, e whā tekau hoki ngā pō.
EXO 25:1 Nā, ka kōrero a Ihowā ki a Mohi, ka mea,
EXO 25:2 “Kōrero atu ki ngā tama a Īharaira, kia maua mai e rātou he whakahere māku. Me tango e koutou te whakahere māku i ngā tāngata katoa e hihiko noa mai ana ō rātou ngākau.
EXO 25:3 Ko te whakahere anō tēnei e tangohia e koutou i a rātou; he kōura, he hiriwa, he parāhi,
EXO 25:4 me te kākahu purū, me te pāpura, me te ngangana, me te rīnena pai, me te huruhuru koati,
EXO 25:5 me ngā hiako hipi kua oti te whakawhero, me ngā hiako pateri, me ētahi rākau, he hitimi,
EXO 25:6 te hinu mō te whakamārama, ngā mea kakara mō te hinu whakawahi, mō te whakakakara reka hoki,
EXO 25:7 ngā kōhatu onika, me ngā kōhatu hei whakanoho ki te epora, ki te kōuma.
EXO 25:8 “Ā, kia hangā e rātou he wāhi tapu mōku; kia noho ai ahau i waenganui i a rātou.
EXO 25:9 Kia rite ā koutou e hanga ai ki ngā mea katoa e whakakitea nei e ahau ki a koe, ki te tauira o te tapenākara, ki te tauira hoki o ōna mea katoa.”
EXO 25:10 “Me hangā anō hoki e rātou he āka, ki te hitimi te rākau; kia rua ngā whatīanga me te hāwhe te roa, kia kotahi whatīanga me te hāwhe te whānui, ā, kia kotahi whatīanga me te hāwhe te teitei.
EXO 25:11 Ā, me whakakikorua e koe ki te kōura parakore; me whakakikorua e koe taua mea, a roto, a waho, me hanga anō hoki e koe he niao kōura ā tawhio noa.
EXO 25:12 Kia whā anō ngā mōwhiti kōura e whakarewaina mō taua āka, ka whakanoho ai ki ngā poti e whā; kia rua mōwhiti ki tētahi taha ōna, kia rua mōwhiti ki tētahi taha ōna.
EXO 25:13 Me hanga anō e koe ētahi rākau amo, ki te hitimi te rākau, ka whakakikorua hoki ki te kōura.
EXO 25:14 Ka kuhu ai i ngā rākau amo ki roto ki ngā mōwhiti i ngā taha o te āka, kia ai aua mea hei maunga mō te āka.
EXO 25:15 Hei ngā mōwhiti o te āka ngā amo mau ai; kaua e unuhia ki waho.
EXO 25:16 Ā, me hoatu e koe ki roto ki te āka te whakaaturanga e hoatu e ahau ki a koe.
EXO 25:17 “Me hanga anō e koe te taupoki ki te kōura parakore; kia rua ngā whatīanga me te hāwhe tōna roa, kia kotahi hoki whatīanga me te hāwhe tōna whānui.
EXO 25:18 Me hanga anō ētahi kerupima, kia rua, he mea patu te kōura e hangā ai aua mea ā puta noa, mō ngā pito e rua o te taupoki.
EXO 25:19 Me hanga hoki tētahi kerupi ki tētahi pito, me tētahi kerupi ki tētahi pito; me hono ngā kerupima ki te taupoki, ki ōna pito e rua.
EXO 25:20 Ā, ka roha whakarunga ngā parirau o ngā kerupima, me te uhi anō i te taupoki ki ō rāua parirau, ka anga anō ō rāua mata ki a rāua; ka anga ki te taupoki ngā mata o ngā kerupima.
EXO 25:21 Ā, me whakanoho e koe te taupoki ki runga ki te āka; me hoatu anō ki roto ki te āka te whakaaturanga e hoatu e ahau ki a koe.
EXO 25:22 Ā, ka tūtaki ahau ki a koe ki reira, ka kōrerotia anō ki a koe i runga i te taupoki i waenganui i ngā kerupima e rua, i ērā i runga i te āka o te whakaaturanga, ngā mea katoa e whakahau ai ahau ki a koe mō ngā tama a Īharaira.”
EXO 25:23 “Me hanga anō e koe tētahi tēpu, ki te hitimi te rākau; kia rua ngā whatīanga te roa, kia kotahi whatīanga te whānui, kia kotahi whatīanga me te hāwhe te teitei.
EXO 25:24 Me whakakikorua taua mea ki te kōura parakore, ka hanga ai i tētahi niao kōura mōna ā tawhio noa.
EXO 25:25 Me hanga anō he awhi mō taua mea, hei te whānui ringa ā tawhio noa; me hanga anō he niao kōura mō tōna awhi ā tawhio noa.
EXO 25:26 Me hanga anō ētahi mōwhiti kōura, kia whā, mō taua mea, ka whakanoho ai i ngā mōwhiti ki ngā poti e whā i ōna waewae e whā.
EXO 25:27 Hei te taha tonu ake o te awhi ngā mōwhiti, hei kuhunga atu mō ngā amo hei maunga mō te tēpu.
EXO 25:28 He hitimi te rākau e hangā ai e koe ngā amo; me whakakikorua anō ki te kōura; ā, ka ai aua mea hei maunga mō te tēpu.
EXO 25:29 Me hanga anō ōna rīhi, ōna koko, ōna kapu, me ngā peihana mō ngā ringihanga; me hanga ki te kōura parakore.
EXO 25:30 Me whakatakoto tonu te taro aroaro ki te tēpu, ki tōku aroaro.”
EXO 25:31 “Me hanga anō te tūranga rama ki te kōura parakore. Me patu te mahinga o te tūranga rama tae noa ki tōna take, ki ōna peka; ko ōna kapu, ko ōna puku, me ōna puāwai he kotahi me ia.
EXO 25:32 Ā, kia ono ngā peka e puta ake i ōna taha; e toru ngā peka o te tūranga rama i tētahi taha, e toru hoki ngā peka o te tūranga rama i tētahi taha.
EXO 25:33 Kia toru ngā kapu, he mea rite ki te puāwai aramona, te puku, me te puāwai, ki te peka kotahi; me ngā kapu e toru, he mea rite ki te puāwai aramona ki tētahi atu peka, te puku, me te puāwai. Me pērā tonu i ngā peka e ono e puta ake ana i te tūranga rama.
EXO 25:34 Kia whā ia ngā kapu o te tūranga rama, kia rite ki te puāwai aramona, te puku, me te puāwai, o tētahi, o tētahi.
EXO 25:35 Ā, e rua ōna peka, kia kotahi puku o raro ake, he mea kotahi; e rua ōna peka, kia kotahi puku o raro ake, he mea kotahi; e rua ōna peka, kia kotahi puku o raro ake, he mea kotahi anō, o ngā peka e ono e puta mai ana i te tūranga rama.
EXO 25:36 Nō te mea kotahi ngā puku, ngā peka; ko taua mea katoa, he mea patu, kotahi tonu, he kōura parakore.
EXO 25:37 “Me hanga ōna rama e whitu; ā, me tahu ōna rama, hei whakamārama i tōna hāngaitanga atu.
EXO 25:38 Me kōura parakore anō ōna kuku me ōna oko ngārahu.
EXO 25:39 Kia kotahi taranata kōura parakore e hangā ai taua mea, me ēnā oko katoa.
EXO 25:40 Kia tūpato anō kia hangā aua mea kia rite ki te tauira i whakakitea ki a koe i te maunga.”
EXO 26:1 “Me hanga anō e koe te tapenākara, kia tekau pīhi rīnena miro pai; he purū hoki, he pāpura, he ngangana; me whatu ki roto ētahi kerupima; kia tohunga rawa te mahi.
EXO 26:2 Kia rua tekau mā waru whatīanga te roa o te pīhi kotahi, kia whā whatīanga te whānui o te pīhi kotahi; kia rite te nui o ngā pīhi katoa.
EXO 26:3 Me hono ngā pīhi e rima tētahi ki tētahi; me ērā atu pīhi e rima hoki, me hono tētahi ki tētahi.
EXO 26:4 Me hanga anō ētahi koropiko purū ki te taha o tētahi pīhi, ki te taha e honoa ana. Me pēnā anō e koe ki te taha ki waho o tētahi pīhi, ki te taha e honoa mai ai te rua.
EXO 26:5 Kia rima tekau ngā koropiko e hangā e koe ki tētahi pīhi, kia rima tekau hoki ngā koropiko e hangā ki te taha o te pīhi e honoa mai ai te rua, kia hāngai ai ngā koropiko tētahi ki tētahi.
EXO 26:6 Me hanga anō ētahi toromoka kōura, kia rima tekau, ka hono ai i ngā pīhi ki ngā toromoka; ā, ka kotahi te tapenākara.
EXO 26:7 “Me hanga anō hoki ētahi pīhi ki te huruhuru koati, hei tēneti mō runga i te tapenākara; kia kotahi tekau mā tahi ngā pīhi e hangā e koe.
EXO 26:8 Kia toru tekau whatīanga te roa o tētahi pīhi, kia whā hoki whatīanga te whānui o tētahi pīhi, kia rite tonu te nui o ngā pīhi kotahi tekau mā tahi.
EXO 26:9 Ā, me hono ngā pīhi e rima ki a rātou anō, me ngā pīhi e ono ki a rātou anō; ā, me whawhati te tuaono o ngā pīhi ki te wāhi ki mua o te tapenākara.
EXO 26:10 Me hanga anō kia rima tekau ngā koropiko mō te tapa o tō waho pīhi, i te hononga, me ngā koropiko e rima tekau ki te tapa o te pīhi o waho rawa, e honoa mai ai te rua.
EXO 26:11 “Me hanga anō ētahi toromoka parāhi, kia rima tekau, ā, ka kuhu i ngā toromoka ki ngā koropiko, ka hono hoki i te tēneti kia kotahi.
EXO 26:12 Ā, ko te wāhi i kohirahira atu o ngā pīhi o te tēneti, te taha o te pīhi i mahue atu rā, me whakapahika ki waho atu o te tuarongo o te tapenākara.
EXO 26:13 Ā, ko te wāhi e roa iho ana o ngā pīhi o te tēneti, kia kotahi whatīanga o tētahi pito, kia kotahi whatīanga o tētahi pito, e pūrero iho i ngā taha o te tapenākara, i tētahi taha, i tētahi taha, hei uhi.
EXO 26:14 Me hanga anō e koe ētahi hiako hipi, he mea kua oti te whakawhero, hei uhi mō te tēneti, me ētahi hiako pateri, hei uhi mō waho atu.”
EXO 26:15 “Me hanga anō ētahi papa mō te tapenākara, ki te hitimi te rākau, he mea whakatū.
EXO 26:16 Kia kotahi tekau whatīanga te roa o te papa, kia kotahi hoki whatīanga me te hāwhe te whānui o te papa kotahi.
EXO 26:17 Kia rua ngā arero o te papa kotahi, kia ririte ki a rāua; kia pēnā tonu tāu e mea ai ki ngā papa katoa o te tapenākara.
EXO 26:18 Nā, me hanga ngā papa mō te tapenākara, kia rua tekau ngā papa mō te taha ki te tonga whaka te tonga.
EXO 26:19 Me hanga anō ngā tūranga hiriwa e whā tekau mō raro iho i ngā papa e rua tekau; kia rua ngā tūranga ki raro i tētahi papa mō ōna arero e rua, kia rua hoki tūranga ki raro i tētahi papa mō ōna arero e rua.
EXO 26:20 Kia rua tekau hoki ngā papa mō te rua o ngā taha o te tapenākara, mō te taha ki te raki,
EXO 26:21 me ngā tūranga hiriwa e whā tekau o aua mea, ngā tūranga e rua mō raro i tētahi papa, me ngā tūranga e rua mō raro i tētahi atu papa.
EXO 26:22 Ā, mō te tuarongo o te tapenākara whaka te hauāuru me hanga e koe kia ono ngā papa.
EXO 26:23 Kia rua ngā papa e hangā e koe mō ngā koki o te tapenākara i te tuarongo.
EXO 26:24 Ā, me hono aua papa i raro, me hono anō hoki i runga rawa ki te mōwhiti kotahi; me pēnā aua papa e rua, me waiho mō ngā koki e rua.
EXO 26:25 Nā, ka waru ēnā papa me ngā tūranga hiriwa; kotahi tekau mā ono ngā tūranga; e rua ngā tūranga mō raro i tētahi papa, e rua hoki ngā tūranga mō raro i tētahi atu papa.
EXO 26:26 “Me hanga anō hoki e koe ētahi kaho, ki te hitimi te rākau; kia rima mō ngā papa o tētahi taha o te tapenākara,
EXO 26:27 kia rima hoki ngā kaho mō ngā papa o tētahi atu taha o te tapenākara, kia rima hoki ngā kaho mō ngā papa o tētahi pito o te tapenākara, arā o te tuarongo whaka te hauāuru.
EXO 26:28 Ā, ko tō waenga kaho, i waenganui o ngā papa, ka rere atu i tētahi pito, ki tētahi pito.
EXO 26:29 Ā, me whakakikorua e koe ngā papa ki te kōura, me hanga anō hoki ngā mōwhiti ki te kōura hei kuhunga mō ngā kaho; me whakakikorua anō hoki ngā kaho ki te kōura.
EXO 26:30 “Nā, me whakaara e koe te tapenākara; kia rite hoki ki tōna tauira i whakakitea ki a koe i te maunga.”
EXO 26:31 “Me hanga anō e koe he ārai ki te mea purū, ki te pāpura, ki te ngangana, ki te rīnena miro pai; kia whatua anō hoki he kerupima ki roto; kia tohunga rawa te mahi.
EXO 26:32 Ka whakairi ai ki runga ki ngā pou hitimi e whā, he mea whakakikorua ki te kōura; me kōura ngā matau, ki runga anō i ngā tūranga hiriwa e whā.
EXO 26:33 Ā, me whakairi e koe te ārai ki raro i ngā toromoka, ka kawe ai i te āka o te whakaaturanga ki reira, ki roto i te ārai; ā, ko te ārai hei wehe mā koutou i te Wāhi Tapu, i te Wāhi Tino Tapu.
EXO 26:34 “Me whakatakoto anō e koe te taupoki ki runga ki te āka o te whakaaturanga, ki te Wāhi Tino Tapu.
EXO 26:35 Me whakatū anō te tēpu ki waho mai o te ārai, me te tūranga rama ki te ritenga atu o te tēpu, ki te taha o te tapenākara whaka te tonga. Me whakatū hoki e koe te tēpu ki te taha ki te raki.
EXO 26:36 “Me hanga anō he pā mō te whatitoka o te tēneti, ki te mea purū, ki te pāpura, ki te ngangana, ki te rīnena miro pai, he mea whakairo ki te ngira.
EXO 26:37 Me hanga anō mō te pā kia rima ngā pou hitimi, ka whakakikorua ki te kōura, me kōura ngā matau o aua mea; me whakarewa anō hoki e koe ētahi tūranga parāhi e rima mō aua mea.”
EXO 27:1 “Me hanga anō e koe tētahi āta, ki te hitimi te rākau, kia rima ngā whatīanga te roa, kia rima whatīanga te whānui; kia tapawhā te āta; kia toru hoki ngā whatīanga te teitei.
EXO 27:2 Me hanga ōna haona ki ngā koki e whā; kia kotahi te rākau o taua mea, o ōna haona; me whakakikorua anō ki te parāhi.
EXO 27:3 Me hanga anō ōna takotoranga mō ōna pungarehu, me ōna koko pungarehu, me ōna peihana, me ōna mārau, me ōna oko ngārahu; me hanga ōna mea katoa ki te parāhi.
EXO 27:4 Me hanga anō tōna pae kupenga ki te parāhi, he mea rīpekapeka; ā, me hanga ki runga i taua mea rīpekapeka ngā mōwhiti parāhi e whā ki ōna pito e whā.
EXO 27:5 Ā, me whakanoho taua mea ki raro i te awhi o te āta, ki raro iho, kia takapū ai taua mea rīpekapeka ki waenganui o te āta.
EXO 27:6 Me hanga ētahi amo mō te āta, he amo hitimi, ka whakakikorua hoki ki te parāhi.
EXO 27:7 Ā, ka kuhua ngā amo ki ngā mōwhiti, hei ngā taha e rua o te āta ngā amo, hei amo.
EXO 27:8 Kia tuwhera kau a roto, me hanga e koe ki te papa; kia rite tāu e hanga ai ki tērā i whakakitea ki a koe ki te maunga.”
EXO 27:9 “Me hanga anō te marae o te tapenākara. Hei te rīnena miro pai he pā mō te taha ki te tonga whaka te tonga; kia kotahi rau whatīanga te roa mō tētahi taha;
EXO 27:10 ko ngā pou kia rua tekau, ko ngā tūranga o aua mea kia rua tekau, me parāhi; me hiriwa ia ngā matau o ngā pou, me ngā awhi.
EXO 27:11 Me ngā pā mō te taha ki te raki kia kotahi rau whatīanga te roa, me ngā pou e rua tekau, me ngā tūranga e rua tekau, he parāhi; me ngā matau hiriwa o ngā pou, me ngā awhi hiriwa.
EXO 27:12 “Me ngā pā mō te whānui o te marae ki te taha ki te hauāuru kia rima tekau whatīanga; kia kotahi tekau ngā pou, me ngā tūranga kotahi tekau.
EXO 27:13 Kia rima tekau hoki whatīanga te whānui o te marae ki te taha ki te rāwhiti whaka te rāwhiti.
EXO 27:14 Kia tekau mā rima whatīanga ngā pā o tētahi taha o te kūwaha, kia toru ngā pou, kia toru hoki ngā tūranga.
EXO 27:15 Kia tekau mā rima hoki whatīanga o ngā pā o tērā taha; kia toru ngā pou, kia toru hoki ngā tūranga.
EXO 27:16 “Kia rua tekau hoki whatīanga o te pā mō te kūwaha o te marae, he purū, he pāpura, he ngangana, he rīnena miro pai, he mea whakairo ki te ngira; kia whā hoki ngā pou, kia whā hoki ngā tūranga.
EXO 27:17 Me whakawhaiawhi ngā pou katoa o te marae ā taka noa ki te hiriwa; me hiriwa ngā matau, me parāhi ngā tūranga.
EXO 27:18 Kia kotahi rau whatīanga te roa o te marae, kia rima tekau hoki te whānui i ngā wāhi katoa, kia rima hoki whatīanga te teitei, ki te rīnena miro pai, me parāhi hoki ngā tūranga.
EXO 27:19 Me parāhi ngā oko katoa o te tapenākara mō ngā mahi katoa o reira, ngā titi katoa o reira, me ngā titi katoa o te marae.”
EXO 27:20 “Me whakahau anō e koe ngā tama a Īharaira kia kawea mai ki a koe he hinu ōriwa, he mea parakore, he mea tuki, mō te whakamārama, kia kā tonu ai te rama.
EXO 27:21 Me whakapai e Ārona rātou ko āna tama taua mea i roto i te tapenākara o te whakaminenga, i waho o te ārai e iri ana i mua mai o te whakaaturanga, i te ahiahi ā tae noa ki te ata, ki te aroaro o Ihowā; hei tikanga tēnei mō ake tonu atu, mā ō rātou whakatupuranga, mō ngā tama a Īharaira.”
EXO 28:1 “Tangohia mai anō ki a koe a Ārona, tōu tuakana, rātou ko āna tama i roto i ngā tama a Īharaira, hei tohunga māku, a Ārona rātou ko Nātapa, ko Apihu, ko Ereātara, ko Itamara, ngā tama a Ārona.
EXO 28:2 Me hanga anō e koe ētahi kākahu tapu mō Ārona, mō tōu tuakana, hei korōria, hei ātaahua.
EXO 28:3 Me kōrero anō e koe ki ngā ngākau mōhio katoa, ki āku i whakakī ai ki te wairua mōhio, kia hangā e rātou ngā kākahu mō Ārona, mō tōna whakatapunga, mō tāna mahi tohunga ki ahau.
EXO 28:4 Ā, ko ngā kākahu ēnei e hangā e rātou; he kōuma, he epora, he koroka, he koti whakairo, he pōtae tohunga, he whītiki. Nā, me hanga ētahi kākahu tapu mō Ārona, mō tōu tuakana, rātou ko āna tama, mō tāna mahi tohunga ki ahau.
EXO 28:5 Me tango hoki he kōura, he purū, he pāpura, he ngangana, he rīnena pai.”
EXO 28:6 “Ā, ka hangā te epora ki te kōura, ki te purū, ki te pāpura, ki te ngangana, ki te rīnena miro pai; kia tohunga rawa te mahi.
EXO 28:7 Kia rua ngā wāhi i ngā pokohiwi, he mea hono ki a rāua i ngā pito e rua; kia kotahi ai.
EXO 28:8 Ā, ko te whītiki whakairo o te epora, kia kotahi anō te mea e hangā ai rāua, kia rite hoki tō rāua hanganga; he mea kōura, purū, pāpura, ngangana, rīnena miro pai.
EXO 28:9 “Me tango anō e koe ngā kōhatu onika e rua, ka tuhi ai i ngā ingoa o ngā tama a Īharaira ki aua mea;
EXO 28:10 kia ono ngā ingoa o rātou ki tētahi kōhatu, me ērā ingoa atu hoki e ono ki tētahi atu kōhatu; kia rite ki ō rātou whānautanga.
EXO 28:11 Hei te mahi a te kaituhi kōhatu tāu tuhi i ngā ingoa o ngā tama a Īharaira ki ngā kōhatu e rua, kia rite ki te tuhinga o te hīri; me mea e koe kia whakanohoia aua mea ki ngā nohoanga kōura.
EXO 28:12 Ā, me whakanoho e koe ngā kōhatu e rua ki ngā pokohiwi o te epora, hei kōhatu whakamahara mō ngā tama a Īharaira; ā, ka mau ō rātou ingoa ki runga ki ngā pokohiwi e rua o Ārona i te aroaro o Ihowā, hei whakamahara.
EXO 28:13 Me hanga anō e koe ngā nohoanga kōhatu ki te kōura;
EXO 28:14 me ngā mekameka kōura parakore e rua; me whiri tāu mahinga i aua mea, ka whakaū ai i ngā mekameka whiri ki ngā nohoanga.”
EXO 28:15 “Kia tohunga rawa te hanga o te kōuma whakawā, kia rite tāu mahinga ki te mahinga o te epora; me hanga e koe taua mea ki te kōura, ki te purū, ki te pāpura, ki te ngangana, ki te rīnena miro pai.
EXO 28:16 Kia whā ōna taha, me rererua; kia kotahi whanganga a te ringa tōna roa, kia kotahi whanganga hoki a te ringa tōna whānui.
EXO 28:17 Me whakanoho anō ki taua mea ētahi nohoanga kōhatu; kia whā ngā rārangi kōhatu. Mō te rārangi tuatahi he harariu, he tōpaha, he kapakara; ko te rārangi tuatahi tēnei.
EXO 28:18 Mā te rārangi tuarua he emerara, he hapaira, he taimana.
EXO 28:19 Mō te rārangi tuatoru he rikuri, he akete, he ametihita.
EXO 28:20 Mō te rārangi tuawhā he perira, he onika, he hahapa; me whakanoho ki te kōura ki te wāhi e mau ai.
EXO 28:21 Nā, ka tekau mā rua ngā kōhatu me ngā ingoa o ngā tama a Īharaira; ko te maha kei ō rātou ingoa; ko te tuhi hei o te hīri, tēnei tangata me tōna ingoa, tēnei tangata me tōna ingoa, rite tonu ki ngā iwi kotahi tekau mā rua.
EXO 28:22 “Me hanga anō e koe ki te kōura parakore ētahi mekameka, he mahi whiri, mō te kōuma, mō ngā pito.
EXO 28:23 Me hanga anō e koe ētahi mōwhiti kōura kia rua mō te kōuma, ka whakanoho ai i ngā mōwhiti e rua ki ngā pito e rua o te kōuma.
EXO 28:24 Me whakaū anō ngā mekameka kōura, ngā mea whiri, ki ngā mōwhiti e rua i ngā pito o te kōuma.
EXO 28:25 Ko ērā pito e rua hoki o ngā mekameka whiri e rua, me whakaū e koe ki ngā nohoanga kōhatu e rua, ka whakanoho ai ki ngā pokohiwi o te epora, ki te taha ki mua.
EXO 28:26 Me hanga anō ētahi mōwhiti kōura kia rua, ka whakanoho ai ki ngā pito e rua o te kōuma ki tōna remu, ki te taha ki roto whaka te epora.
EXO 28:27 Me hanga anō hoki e koe ētahi atu mōwhiti kōura kia rua, ka whakanoho ai ki ngā pokohiwi e rua o te epora ki te taha ki raro, ki te taha ki mua, ki te ritenga mai anō o tōna hononga, ki runga ake o te whītiki whakairo o te epora.
EXO 28:28 Me here anō e rātou te kōuma, ko ōna mōwhiti ki ngā mōwhiti o te epora, ki ētahi miro purū, kia mau ai ki runga ake o te whītiki whakairo o te epora, kei takoto kē hoki te kōuma i te epora.
EXO 28:29 “Ā, ka mau ngā ingoa o ngā tama a Īharaira ki te ngākau o Ārona, arā ki te kōuma o te whakawā, ina haere ia ki te wāhi tapu, hei whakamahara ki te aroaro o Ihowā i ngā rā katoa.
EXO 28:30 Me whakanoho anō hoki e koe ngā Urimi me ngā Tumime ki te kōuma whakawā; ā, hei te ngākau o Ārona aua mea, ina haere ki te aroaro o Ihowā; ā, ka mau tonu ki te ngākau o Ārona te whakawā o ngā tama a Īharaira i te aroaro o Ihowā.”
EXO 28:31 “Me hanga anō e koe te koroka o te epora, hei te purū anake.
EXO 28:32 Me whakakōhao a runga, i waenganui; me whakawhaiwhiri anō ki te mea whatu tōna kōhao ā huri noa, kia rite ki te kōhao o te pukupuku, kei pakaru.
EXO 28:33 Ā, i te remu i raro me hanga e koe ētahi pamekaranete ki te mea purū, pāpura, ngangana, hei te remu ā huri noa; me ētahi pere kōura ki ngā takiwā o aua mea ā huri noa,
EXO 28:34 he pere kōura he pamekaranete, he pere kōura he pamekaranete, ki te remu o te koroka ā huri noa.
EXO 28:35 Ā, me kākahu taua mea e Ārona ina minita; ā, ka rangona tōna tangi ina haere ki roto, ki te wāhi tapu, ki te aroaro o Ihowā, ina puta mai hoki ki waho kei mate ia.
EXO 28:36 “Me hanga anō e koe tētahi pāraharaha ki te kōura parakore, tuhia iho, he tuhi hīri anō: HE TAPU KI A IHOWĀ.
EXO 28:37 Ā, me whakanoho e koe ki te tau purū, kia mau ai ki te pōtae tohunga; hei te taha ki mua o te pōtae.
EXO 28:38 Ā, ka mau tēnā ki te rae o Ārona, kia mauria ai e Ārona te kino o ngā mea tapu e whakatapua e ngā tama a Īharaira i ā rātou hoatutanga tapu katoa; ā, ka mau tonu tēnā ki tōna rae, kia manakohia ai rātou i te aroaro o Ihowā.
EXO 28:39 “Ā, me whakairo e koe ki te mūmū te koti rīnena pai, me hanga anō te pōtae tohunga ki te rīnena pai; hei te mea i hangā ki te ngira te mea e hangā ai e koe te whītiki.
EXO 28:40 “Me hanga anō ētahi koti mō ngā tama a Ārona, me hanga anō ētahi whītiki mō rātou, me hanga hoki ētahi pōtae mō rātou, hei korōria, hei ātaahua.
EXO 28:41 Ka whakakākahu atu ai ki a Ārona, ki tōu tuakana, rātou ko āna tama; nā, ka whakawahi koe i a rātou, ka whakatohunga hoki i a rātou, ka whakatapu hoki i a rātou, kia mahi, tohunga ai ki ahau.
EXO 28:42 “Me hanga anō ētahi tarau rīnena mō rātou, hei kākahu mō ngā wāhi takoto tahanga o rātou; mō te hope ā tae noa ki ngā hūhā;
EXO 28:43 ā, hei kākahu ēnā mō Ārona, mō āna tama, ina haere ki roto ki te tapenākara o te whakaminenga, ina whakatata rānei ki te āta, ki te minita i roto i te wāhi tapu; kei whai hara, ā, ka mate. “Hei tikanga pūmau tēnei mōna, mō ōna uri hoki i muri i a ia.”
EXO 29:1 “Ā, ko tēnei tāu e mea ai ki a rātou, ina whakatapu i a rātou hei tohunga māku. Tīkina he pūru, hei te kūao, me ngā hipi toa e rua, hei te mea kohakore,
EXO 29:2 he taro rēwenakore, he keke rēwenakore, i kōnatunatua ki te hinu, he mea angiangi anō hoki, he rēwenakore, i pania ki te hinu. He mea hanga e koe ki te parāoa wīti.
EXO 29:3 Nā, ka makā ki te kete kotahi, ā, ka kawea i roto i te kete, me te pūru me ngā hipi toa e rua.
EXO 29:4 “Nā, ka kawe i a Ārona rātou ko āna tama, ki te whatitoka o te tapenākara o te whakaminenga, ka horoi i a rātou ki te wai.
EXO 29:5 Nā, ka mau koe ki ngā kākahu, ā, ka whakakākahu i a Ārona ki te koti, ki te koroka o te epora, ki te epora, ki te kōuma, ka whītiki hoki i a ia ki te whītiki whakairo o te epora.
EXO 29:6 Ā, ka pōtae i tōna mātenga ki te pōtae tohunga, ka whakanoho anō i te karauna tapu ki runga ki te pōtae.
EXO 29:7 Nā, ka mau ki te hinu whakawahi, ka riringi ki runga ki tōna mātenga, ka whakawahi i a ia.
EXO 29:8 Ā, ka kawe koe i āna tama, ka whakakākahu hoki i a rātou ki ngā koti.
EXO 29:9 Me whītiki anō rātou e koe, a Ārona rātou ko āna tama, ka pōtae anō hoki i ngā pōtae ki a rātou; ā, mā rātou te mahi tohunga; kia pūmau tonu anō hoki tēnei tikanga. Nā, ka whakatohunga koe i a Ārona rātou ko āna tama.
EXO 29:10 “Nā, ka mea kia kawea tētahi pūru ki mua o te tapenākara o te whakaminenga; ā, ka popoki iho ngā ringa o Ārona rātou ko āna tama ki runga ki te pane o te pūru.
EXO 29:11 Nā, ka patu koe i te pūru ki te aroaro o Ihowā, ki te whatitoka o te tapenākara o te whakaminenga.
EXO 29:12 Nā, me tango tētahi wāhi o te toto a te pūru, me pani e tōu ringa ki ngā haona o te āta, ka riringi katoa ai i ngā toto ki te tūranga o te āta.
EXO 29:13 Nā, ka tango koe i te ngako katoa e whiwhiwhiwhi ana ki ngā whēkau, me te pā i runga ake i te ate, me ngā whatukuhu e rua, me te pā i aua mea, ka tahu ai ki runga ki te āta.
EXO 29:14 Ko te kikokiko ia o te pūru, me tōna hiako, me ōna paru, me tahu e koe ki te ahi ki waho o te puni; he whakahere hara hoki tēnā.
EXO 29:15 “Nā, ka mau koe ki tētahi o ngā hipi toa; ā, ka popoki iho ngā ringaringa o Ārona rātou ko āna tama ki runga ki te mātenga o te hipi.
EXO 29:16 Nā, ka patu koe i te hipi, ā, ka tango i ōna toto, ka tāuhi ai ki te āta ā tawhio noa.
EXO 29:17 Nā, ka tapatapahi koe i te hipi, ā, ka horoi i ōna whēkau, me ōna waewae, ka maka ai ki runga ki ngā wāhi ōna i tapahia, ki runga hoki i tōna mātenga.
EXO 29:18 Kātahi koe ka tahu i te hipi katoa ki runga ki te āta. He tahunga tinana tēnā ki a Ihowā, he kakara reka, he whakahere ahi ki a Ihowā.
EXO 29:19 “Nā, ka mau koe ki te rua o ngā hipi, ā, ka popoki iho ngā ringaringa o Ārona rātou ko āna tama ki runga ki te mātenga o te hipi.
EXO 29:20 Nā, ka patu koe i te hipi, ā, ka tango i tētahi wāhi o ōna toto, ka pani atu ki te matamata o te taringa matau o Ārona, ki te matamata anō hoki o ngā taringa matau o āna tama, ki te koromatua anō hoki o ō rātou ringa matau, ki te koromatua anō hoki o ō rātou waewae matau, me tāuhiuhi atu anō hoki te toto ki te āta ā tawhio noa.
EXO 29:21 Me tango anō e koe tētahi wāhi o ngā toto i runga i te āta, o te hinu whakawahi anō hoki, ā, ka tāuhiuhi atu ki a Ārona, ki ōna kākahu, ki a rātou, tahi anō ko āna tama, ki ngā kākahu hoki o āna tama. Nā, ka tapu ia, me ōna kākahu, me āna tama, me ngā kākahu anō hoki o āna tama.
EXO 29:22 “Me tango anō hoki e koe te ngako o te hipi toa, me te hiawero, me te ngako e whiwhiwhiwhi ana ki ngā whēkau, me te pā i te ate, i ngā whatukuhu e rua; me te ngako i aua mea, me te peke matau (he hipi whakatohungatanga hoki),
EXO 29:23 me te rohi taro kotahi, me tētahi keke taro hinu, me tētahi keke angiangi i roto i te kete taro rēwenakore i te aroaro o Ihowā.
EXO 29:24 Nā, ka hoatu katoa e koe ki ngā ringa o Ārona, ki ngā ringa anō o āna tama; ā, me poipoi hei whakahere poipoi ki te aroaro o Ihowā.
EXO 29:25 Nā, ka tango koe i aua mea i ō rātou ringa, ka tahu ai ki runga ki te āta, hei tahunga tinana, hei kakara reka ki te aroaro o Ihowā, hei whakahere ahi ki a Ihowā.
EXO 29:26 “Nā, ka tango koe i te uma o te hipi toa o te whakatohungatanga o Ārona, ā, ka poipoi hei whakahere poipoi i te aroaro o Ihowā; ko te wāhi hoki tēnā māu.
EXO 29:27 Me whakatapu anō e koe te uma o te whakahere poipoi, me te peke o te whakahere hapahapai, ērā e poipoia ana, e hapahapainga ana, o te hipi o te whakatohungatanga, o tā Ārona, o tā āna tama.
EXO 29:28 Ā, ka waiho mā Ārona rātou ko āna tama, e ngā tama a Īharaira; kia pūmau tonu tēnei tikanga. He whakahere hapahapai hoki; ā, ka waiho e ngā tama a Īharaira hei whakahere hapahapai, he mea nō ā rātou patunga mō te pai, arā he whakahere hapahapai nā rātou ki a Ihowā.
EXO 29:29 “Ā, ka riro ngā kākahu tapu o Ārona i āna tama i muri i a ia, hei kākahu e whakawahia ai, e whakatohungatia ai rātou.
EXO 29:30 Ā, e whitu ngā rā e kākahuria ai aua mea e te tama e meinga hei tohunga i muri i a ia, ina haere ia ki roto ki te tapenākara o te whakaminenga ki te minita i roto i te wāhi tapu.
EXO 29:31 “Me tango anō e koe te hipi toa o te whakatohungatanga, ā, ka kōhua i ōna kikokiko ki te wāhi tapu.
EXO 29:32 Ā, mā Ārona rātou ko āna tama e kai te kikokiko o te hipi, me te taro i roto i te kete, ki te whatitoka o te tapenākara o te whakaminenga.
EXO 29:33 Me kai anō e rātou aua mea o te whakamārie, hei whakatohunga, hei whakatapu mō rātou. Kauaka ia te tangata kē e kai; he mea tapu hoki ēnā.
EXO 29:34 Ā, ki te toe tētahi wāhi o te kikokiko o ngā whakatohungatanga, o te taro rānei, ki te ata, me tahu e koe taua toenga ki te ahi; kei kainga, he mea tapu hoki.
EXO 29:35 “Kia pēnei tāu e mea ai ki a Ārona rātou ko āna tama; kia rite ki ngā mea katoa i whakahaua atu nei e ahau ki a koe. E whitu ngā rā e whakatohunga ai koe i a rātou.
EXO 29:36 Ā, me tuku e koe i tēnei rā, i tēnei rā, tētahi kau hei whakahere hara, hei whakamārie. Me pure anō e koe te āta, ina oti i a koe te whakamārie mō taua mea; me whakawahi anō kia tapu ai.
EXO 29:37 E whitu ngā rā e whakamārie ai koe mō te āta, hei whakatapu; ā, ka meinga hei āta tino tapu; ko ngā mea katoa e pā ana ki te āta, ka tapu.”
EXO 29:38 “Ā, ko tēnei tāu e tuku ai ki runga ki te āta; e rua reme, he tau tahi me mea tonu tēnei i ngā rā katoa.
EXO 29:39 Ko tētahi reme me tuku i te ata, ko te rua o ngā reme me tuku i te ahiahi.
EXO 29:40 Ko te reme me te whakatekau o te parāoa, he mea kōnatunatu ki te hinu tuki, he whakawhā nō te hine, me te whakawhā o te hine wāina, hei ringihanga.
EXO 29:41 Ā, me tuku e koe tētahi reme i te ahiahi; kia rite tāu tukunga ki tō te whakahere totokore o te ata, me tōna ringihanga hoki, hei kakara reka, hei whakahere ahi ki a Ihowā.
EXO 29:42 “Hei tahunga tinana tēnei e mau tonu ana i ō koutou whakatupuranga, i te whatitoka o te tapenākara o te whakaminenga, i te aroaro o Ihowā, i te wāhi e tūtaki ai ahau ki a koutou, kōrero ai ki a koe.
EXO 29:43 Ā, ka tūtaki ahau ki reira ki ngā tama a Īharaira, ka tapu anō a reira i tōku korōria.
EXO 29:44 “Ka whakatapua anō e ahau te tapenākara o te whakaminenga me te āta; ka whakatapua anō a Ārona rātou ko āna tama, hei tohunga māku.
EXO 29:45 Ā, ka noho ahau ki waenganui i ngā tama a Īharaira, ā, hei Atua ahau mō rātou.
EXO 29:46 Ā, ka mōhio rātou ko Ihowā ahau, ko tō rātou Atua, i whakaputaia mai ai rātou i te whenua o Īhipa, kia noho ai ahau i waenganui i a rātou; ko Ihowā ahau, ko tō rātou Atua.”
EXO 30:1 “Ā, me hanga e koe he āta hei tahunga mea kakara; ko te rākau e hangā ai he hitimi.
EXO 30:2 Kia kotahi whatīanga te roa, kia kotahi hoki whatīanga te whānui; kia tapawhā. Kia rua whatīanga te teitei; nō taua mea rā anō ngā haona.
EXO 30:3 Me whakakikorua ki te kōura parakore a runga me ōna taha ā taka noa, me ōna haona hoki; me hanga anō te niao kōura ā tawhio noa.
EXO 30:4 Me hanga anō ētahi mōwhiti kōura mōna kia rua, mō raro i tōna niao, ki ōna koki e rua, me hanga ki ōna taha e rua, hei kuhunga mō ngā amo, hei amohanga.
EXO 30:5 He hitimi anō hoki te rākau e hangā ai e koe ngā amo, me whakakikorua ki te kōura.
EXO 30:6 Ka whakatū ai ki mua o te ārai, o tērā i te āka o te whakaaturanga, ki mua o te taupoki i runga o te whakaaturanga, o te wāhi e tūtaki ai ahau ki a koe.
EXO 30:7 “Ā, me tahu e Ārona he whakakakara reka ki runga, i tēnei ata, i tēnei ata; me tahu e ia te whakakakara ki runga, ina whakapaia e ia ngā rama.
EXO 30:8 Ā, ka tahuna e Ārona ngā rama i te ahiahi, me tahu he whakakakara ki runga i taua āta, he whakakakara e mau tonu ana ki te aroaro o Ihowā i ō koutou whakatupuranga.
EXO 30:9 Kei whakaekea he whakakakara kē ki runga, he tahunga tinana rānei, he whakahere totokore rānei; kaua anō e ringihia he ringihanga ki runga.
EXO 30:10 Nā, ka whakamārie a Ārona ki runga ki ōna haona, kia kotahi te meatanga i te tau. Ka whakamārie ia ki te toto o te whakahere hara o te whakamārie ki runga ki taua mea, kia kotahi te meatanga i te tau, puta noa i ō koutou whakatupuranga. He mea tapu rawa tēnā ki a Ihowā.”
EXO 30:11 I kōrero anō a Ihowā ki a Mohi, i mea,
EXO 30:12 “E taua e koe ngā tāngata o ngā tama a Īharaira, arā ngā mea o rātou e taua ana, me hōmai e tērā, e tērā, he utu mō tōna wairua ki a Ihowā, ina taua rātou; kia kore ai he whiu i roto i a rātou ina taua.
EXO 30:13 Ko tēnei tā rātou e hōmai ai, ko ngā tāngata katoa e haere ana ki roto ki te hunga kua taua, hei te hāwhe o te hekere, o te hekere o te wāhi tapu (e rua tekau ngā kera kei roto i te hekere kotahi) hei te hāwhe hekere te whakahere ki a Ihowā.
EXO 30:14 Ko ngā tāngata katoa e haere ana ki roto ki te hunga kua taua, ko ngā mea e rua tekau ō rātou tau, me ngā mea i maha atu, me hōmai e rātou he whakahere ki a Ihowā.
EXO 30:15 E kore e maha ake a te tangata taonga, e kore anō hoki e torutoru iho i te hāwhe hekere a te rawakore, ina hōmai he whakahere ki a Ihowā, hei whakamārie mō ō koutou wairua.
EXO 30:16 Nā, me tango e koe te moni whakamārie a ngā tama a Īharaira, ā, ka waiho mō ngā mahi o te tapenākara o te whakaminenga; ā, hei whakamahara tēnā ki ngā tama a Īharaira ki te aroaro o Ihowā, hei whakamārie mō ō koutou wairua.”
EXO 30:17 I kōrero anō a Ihowā ki a Mohi, i mea,
EXO 30:18 “Me hanga anō e koe he takotoranga wai ki te parāhi, ki te parāhi anō hoki tōna tūranga, hei horoinga. Ka whakatū ai ki te takiwā o te āta o te tapenākara o te whakaminenga, me riringi anō he wai ki roto;
EXO 30:19 ā, me horoi ō rātou ringa me ō rātou waewae e Ārona rātou ko āna tama ki reira.
EXO 30:20 Ka haere rātou ki roto ki te tapenākara o te whakaminenga, me horoi rātou ki te wai, kei mate; ki te whakatata rānei rātou ki te āta ki te minita, ki te tahu i te whakahere ahi ki a Ihowā.
EXO 30:21 Nā, ka horoi i ō rātou ringa, i ō rātou waewae, kei mate; ā, ka waiho hei tikanga pūmau mā rātou, māna, mā ōna uri, i ō rātou whakatupuranga.”
EXO 30:22 I kōrero anō a Ihowā ki a Mohi, i mea,
EXO 30:23 “Tīkina māu he tino mea kakara: he maira pai, kia rima rau hekere, he hinamona reka, me hāwhe tērā, arā, kia rua rau kia rima tekau hekere, me te karamuha reka, kia rua rau kia rima tekau hekere,
EXO 30:24 he kahia hoki, kia rima rau hekere – ki ngā hekere o te wāhi tapu – me te hinu ōriwa, kia kotahi hine;
EXO 30:25 ā, me hanga e koe hei hinu mō te whakawahinga tapu, he hinu whakaranu, he mea kakara, ko tā te kaiwhakaranu e hanga ai; ka waiho hei hinu mō te whakawahinga tapu.
EXO 30:26 Ka whakawahia ai te tapenākara o te whakaminenga, me te āka hoki o te whakaaturanga,
EXO 30:27 me te tēpu, me ngā oko katoa i runga, me te tūranga rama, me ōna oko, me te āta whakakakara,
EXO 30:28 me te āta tahunga tinana, me ōna oko katoa, me te takotoranga wai, me tōna tūranga.
EXO 30:29 Ā, me whakatapu kia tino tapu; ka tapu ngā mea katoa e pā ana ki aua mea.
EXO 30:30 “Me whakawahi anō e koe a Ārona rātou ko āna tama, me whakatapu hoki rātou hei tohunga māku.
EXO 30:31 Me kōrero anō e koe ki ngā tama a Īharaira, me kī atu, ‘Hei hinu tēnei māku, mō te whakawahinga tapu i ō koutou whakatupuranga.
EXO 30:32 Kei ringihia ki te kikokiko tangata kei hangā anō tētahi mea pēnā, e rite ana ki tōna hanganga; he tapu tēnā, ā, ka tapu ki a koutou.
EXO 30:33 Ki te whakaranua e te tangata tētahi mea pēnā; ki te makā rānei e ia ki runga ki te tangata kē, inā, ka hātepea atu ia i roto i tōna iwi.’ ”
EXO 30:34 I mea anō a Ihowā ki a Mohi, “Tīkina māu he mea kakara, he takete, he oneka, he karapanuma; ēnei mea kakara me te parakihe parakore (kia rite te taimaha o tētahi, o tētahi),
EXO 30:35 ka whakaranu ai hei mea kakara, ko tā te kaiwhakaranu e hanga ai, he mea rongoā ki te tote, he mea parakore, he mea tapu.
EXO 30:36 Nā, ka tukia tētahi wāhi kia ririki rawa, ka whakatakoto ai i tētahi wāhi ki mua mai o te whakaaturanga i roto i te tapenākara o te whakaminenga, ki te wāhi e tūtaki ai ahau ki a koe; hei mea tino tapu tēnā ki a koutou.
EXO 30:37 Ā, ko taua mea kakara ka hangā nei e koe, kei hangā tētahi mā koutou he rite te hanganga ki tō tērā; hei mea tapu tēnā ki a koe mā Ihowā.
EXO 30:38 Ki te hangā e te tangata he mea pēnā, hei honginga māna, ka hātepea atu ia i roto i tōna iwi.”
EXO 31:1 I kōrero anō a Ihowā ki a Mohi, i mea:
EXO 31:2 “Titiro, kua whakahuatia nei e ahau te ingoa o Petarēre, tama a Uri, ko ia nei he tama nā Huru, nō te iwi o Hūrā:
EXO 31:3 kua whakakīia anō ia e ahau ki te Wairua o te Atua, ki te ngākau tūpato, ki te whakaaro, ki te mōhio, ki ngā mahi katoa hoki,
EXO 31:4 hei whakaaro ki ngā mahi a te tohunga, hei mahi i te kōura, i te hiriwa, i te parāhi,
EXO 31:5 mō te whakairo kōhatu hoki, mō te whakanoho hoki, mō te whakairo rākau, mō te mahi anō hoki i ngā mahi katoa.
EXO 31:6 “Nā, tēnei anō te hoatu nei e ahau hei hoa mōna a Ahoriapa tama a Ahihamaka, nō te iwi o Rāna; kua whakanohoia anō e ahau he mahara ki ngā ngākau o te hunga ngākau mahara katoa, hei hanga i ngā mea katoa i whakahaua atu nei e ahau ki a koe:
EXO 31:7 i te tapenākara o te whakaminenga, i te āka o te whakaaturanga, i tōna taupoki, i ngā mea katoa o te tapenākara,
EXO 31:8 i te tēpu, i ōna mea, i te tūranga parakore o ngā rama, i ōna mea katoa, i te āta mō te whakakakara,
EXO 31:9 i te āta mō te tahunga tinana, i ōna mea katoa, i te takotoranga wai rāua ko tōna tūranga.
EXO 31:10 I ngā kākahu mō te mahi minita, i ngā kākahu tapu mō Ārona, mō te tohunga, i ngā kākahu mō āna tama, mō te mahi tohunga,
EXO 31:11 i te hinu whakawahi, i te whakakakara reka mō te wāhi tapu. Kia rite tā rātou e mea ai ki ngā mea katoa i whakahaua atu e ahau ki a koe.”
EXO 31:12 I kōrero anō a Ihowā ki a Mohi, i mea:
EXO 31:13 “Kōrero anō ki ngā tama a Īharaira, mea atu: Me whakarite anō e koutou āku hāpati; hei tohu hoki ki waenganui ōku, o koutou, i ō koutou whakatupuranga; kia mōhio ai ko ahau, ko Ihowā, te whakatapu nei i a koutou.
EXO 31:14 “Nā, me whakarite te hāpati; he tapu hoki tēnā ki a koutou; he mate kau mō te tangata e whakanoa ana i taua rā. Ko te tangata hoki e mahi ana i tētahi mahi i reira, inā, ka hātepea atu taua wairua i roto i tōna iwi.
EXO 31:15 E ono ngā rā e mahia ai te mahi; kei te whitu ia o ngā rā te hāpati okiokinga, he tapu ki a Ihowā; ko te tangata e mahi ana i tētahi mahi i te rā hāpati he mate kau mōna.
EXO 31:16 Mō reira me mahara ngā tama a Īharaira ki te hāpati, kia whakaritea te hāpati i ō rātou whakatupuranga; kia mau tonu tēnei kawenata.
EXO 31:17 He tohu tēnā rā ki waenganui ōku, o ngā tama a Īharaira, ake ake; e ono hoki ngā rā i hangā ai e Ihowā te rangi me te whenua, ā, i te whitu o ngā rā ka okioki, ā, tā ana tōna manawa.”
EXO 31:18 I hōmai anō e ia ki a Mohi, i te mutunga o tāna kōrero ki a ia i runga i Maunga Hinai, e rua ngā papa whakaaturanga, he papa kōhatu, he mea tuhituhi nā te ringa o te Atua.
EXO 32:1 Ā, nō te kitenga o te iwi i roa te hekenga iho o Mohi i runga i te maunga, ka huihui te iwi ki a Ārona, ka mea ki a ia, “Whakatika, hangā ētahi atua mō tātou, hei haere i mua i a tātou; ko tēnei Mohi hoki, ko te tangata nāna tātou i kawe mai ki runga nei i te whenua o Īhipa, kāhore tātou e mōhio kua ahatia rānei ia.”
EXO 32:2 Nā, ka mea a Ārona ki a rātou, “Whakia mai ngā whakakai kōura i ngā taringa o ā koutou wāhine, o ā koutou tama, o ā koutou tamāhine, ka kawe mai ki ahau.”
EXO 32:3 Nā, whakia ana e te iwi katoa ngā whakakai kōura i ō rātou taringa, ā, kawea ana mai ki a Ārona.
EXO 32:4 Nā, ka tangohia e ia i ō rātou ringa, ā, whakaahuatia ana e ia ki te purupuru tāna kūao kau i whakarewa ai. Nā, ka mea rātou, “Ko ōu atua ēnei, e Īharaira, nāna nei koe i kawe mai ki runga nei i te whenua o Īhipa!”
EXO 32:5 Ā, nō te kitenga o Ārona, hangā ana e ia tētahi āta ki mua i taua mea; ā, ka karanga a Ārona, ka mea, “Ko āpōpō, he hākari ki a Ihowā.”
EXO 32:6 Nā, ka maranga wawe rātou i te aonga ake, ā, whakaekea ana he tahunga tinana, i kawea anō he whakahere mō te pai; nā, ka noho te iwi ki te kai, ki te inu, ā, ka whakatika ki te tākaro.
EXO 32:7 Nā, ka mea a Ihowā ki a Mohi, “Haere, heke atu, kua hē hoki tōu iwi i kawea mai nei e koe i te whenua o Īhipa.
EXO 32:8 Kua hohoro rātou te peka kē i te huarahi i kīia e ahau ki a rātou; kua hangā mā rātou he kūao kau, he mea whakarewa, kua koropiko ki taua mea, kua patu whakahere māna, ā, e mea ana, ‘Ko ōu atua ēnei, e Īharaira, i kawea mai ai koe i te whenua o Īhipa.’ ”
EXO 32:9 I mea anō a Ihowā ki a Mohi, “Kua kite ahau i tēnei iwi, nā, he iwi kakī mārō rātou.
EXO 32:10 Nā, tukua atu ahau, ā, ka mura tōku riri ki a rātou, ā, ka pau rātou i ahau; ka hangā anō koe hei iwi nui.”
EXO 32:11 Nā, ka īnoi a Mohi ki a Ihowā, ki tōna Atua, ka mea, “He aha tōu riri i mura ai, e Ihowā, ki tāu iwi i kawea mai nei e koe i te whenua o Īhipa i runga i te kaha nui, i te ringa mārō?
EXO 32:12 Ha, kia kōrero ngā Īhipiana, kia mea, ‘He whakaputanga atu ki te hē tāna i a rātou, kia whakamatea ai rātou ki ngā maunga, kia whakangaromia atu ai i te mata o te whenua’? Tahuri i tōu riri nui e mura nei, kia puta kē hoki tōu whakaaro ki tēnei kino mō tāu iwi.
EXO 32:13 Kia mahara ki āu pononga, ki a Āperahama, ki a Īhaka, ki a Īharaira, ki tāu oatitanga hoki i a koe ki a rātou, ki tāu meatanga ki a rātou, ‘Ka whakanuia e ahau ō koutou uri kia rite ki ngā whetū o te rangi; ko tēnei whenua katoa hoki i kōrerotia atu nei e ahau, ka hoatu e ahau ki ō koutou uri, ā, ka nohoia e rātou ake ake.’ ”
EXO 32:14 Nā, ka puta kē tā Ihowā i whakaaro ai mō te kino i kīia e ia kia meatia ki tāna iwi.
EXO 32:15 Nā, ka tahuri a Mohi, ka heke iho i te maunga, me ngā papa e rua o te whakaaturanga i tōna ringa; he mea tuhi ngā taha e rua o ngā papa; i tētahi taha, i tētahi taha te tuhi.
EXO 32:16 He mea mahi hoki nā te Atua aua papa, me te tuhituhi hoki, nā te Atua te tuhituhi, he mea whaowhao ki ngā papa.
EXO 32:17 Ā, ka rongo a Hohua i te reo o te iwi e hāmama ana, ka mea ki a Mohi, “He ngē whawhai kei te puni rā.”
EXO 32:18 Nā, ka mea ia: “Ehara tērā reo i te hāmama mō te hinganga o te taua, ehara hoki tērā reo i te hāmama o te hunga e hinga ana; he reo waiata tāku e rongo nei.”
EXO 32:19 Ā, ka tata ia ki te puni, nā, ka kite ia i te kūao kau, i te kanikani. Nā, ka mura te riri o Mohi, ā, ka makā atu e ia ngā papa i roto i ōna ringa, ā, pākarua ana aua mea e ia i raro i te maunga.
EXO 32:20 Nā, ka tango ia i te kūao kau i hangā e rātou, ā, tahuna ana e ia ki te ahi, ā, hurihia ana, ā, ngotangota noa, ā, ruiruia ana e ia ki te wai, whakainumia atu ana mā ngā tama a Īharaira.
EXO 32:21 Nā, ka mea a Mohi ki a Ārona, “I aha tēnei iwi ki a koe, i tākina ai e koe tēnei hara nui ki a rātou?”
EXO 32:22 Ā, ka mea a Ārona, “Kei mura mai te riri o tōku ariki; e mōhio ana koe ki tēnei iwi, mō te kino tonu rātou.
EXO 32:23 I mea hoki rātou ki ahau, ‘Hangā ētahi atua mō tātou hei haere i mua i a tātou; ko tēnei Mohi hoki, ko te tangata nāna nei tātou i kawe mai i te whenua o Īhipa, kāhore tātou e mōhio kua ahatia rānei ia.’
EXO 32:24 Nā, ka mea ahau ki a rātou, ‘Ki te mea he kōura tō tētahi, whakia mai.’ Nā, ka hōmai e rātou ki ahau; ā, makā ana e ahau ki te ahi; ā, puta ake ko te kūao kau nei.”
EXO 32:25 Ā, i te kitenga o Mohi i te iwi e korara noa ana, (nā Ārona hoki rātou i tuku kia korara, hei taunu mā ō rātou hoariri).
EXO 32:26 Nā, ka tū a Mohi ki te kūwaha o te puni, ka mea, “Ko wai tō Ihowā haere mai ki ahau?” Nā, ka huihui ngā tama katoa a Rīwai ki a ia.
EXO 32:27 Nā, ka mea ia ki a rātou, “Ko te kupu tēnei a Ihowā, a te Atua o Īharaira, ‘Whakanohoia e tērā, e tērā tāna hoari ki tōna hūhā, ā, haere atu, hoki mai, i tētahi kūwaha ki tētahi kūwaha, i waenga puni, ā, patua e tērā tōna teina, e tērā tōna hoa, e tērā tōna hoa e noho tata ana.’ ”
EXO 32:28 Nā, rite tonu ki te kupu a Mohi tā ngā tama a Rīwai i mea ai; ā, tata tonu ki te toru mano ngā tāngata i hinga i taua rangi.
EXO 32:29 Nā Mohi hoki i mea, “Hei runga i tāna tama, i tōna teina, te whakatohungatanga ki a Ihowā o tērā, o tērā, o koutou āianei; kia hōmai ai e ia he manaaki ki a koutou āianei.”
EXO 32:30 Nā, i te aonga ake, ka mea a Mohi ki te iwi, “Kua hara koutou, he nui te hara. Nā, me haere ahau āianei ki runga, ki a Ihowā; tērā pea e taea e ahau te whakamārie mō tō koutou hara.”
EXO 32:31 Nā, ka hoki a Mohi ki a Ihowā, ka mea, “Auē! Kua hara tēnei iwi, he nui te hara, kua hangā hoki e rātou ētahi atua kōura mō rātou.
EXO 32:32 Nā, māu e horoi tō rātou hara; ā, ki te kāhore, tēnā rā, horoia atu ahau i roto i tāu pukapuka i tuhituhia e koe.”
EXO 32:33 Nā, ka mea a Ihowā ki a Mohi, “Ko te tangata e hara ana ki ahau, ka horoia atu ia e ahau i roto i tāku pukapuka.
EXO 32:34 Nā, haere rā, ārahina atu te iwi ki te wāhi i kōrerotia atu e ahau ki a koe, tēnā tāku anahera te haere atu nā i mua i a koe. Ahakoa rā, ko ā te rā e mea ai ahau, inā, ka meinga e ahau tō rātou hara kia tau ki runga ki a rātou.”
EXO 32:35 Nā, ka whiua e Ihowā te iwi mō tā rātou hanganga i te kūao kau, i hangā nei e Ārona.
EXO 33:1 Nā, ka mea a Ihowā ki a Mohi, “Haere, tūria atu ki runga, koutou ko te iwi i kawea mai nei e koe i te whenua o Īhipa, ki te whenua i oati ai ahau ki a Āperahama, ki a Īhaka, ki a Hākopa, i mea ia, ‘Ka hoatu e ahau ki ōu uri.’
EXO 33:2 Ā, ka ungā he anahera e ahau ki mua i a koe, māku anō hoki e pei ngā Kanaani, ngā Amori, ngā Hiti, ngā Perihi, ngā Hiwi, me, ngā Iepuhi.
EXO 33:3 Ki te whenua e rerengia ana e te waiū, e te honi; e kore hoki ahau e haere atu i roto i a koe; he iwi kakī mārō hoki koe; kei pau koe i ahau ki te ara.”
EXO 33:4 Ā, i te rongonga o te iwi i tēnei rongo kino, ka pōuri, kīhai anō i whakanohoia e tētahi ōna whakapaipai.
EXO 33:5 Ā, i kī atu a Ihowā ki a Mohi, “Mea atu ki ngā tama a Īharaira, ‘He iwi kakī mārō koutou. Kia mea kau ka puta atu ahau ki waenganui i a koe, ā, ka ngaro koe i ahau. Nā, whakarērea atu ōu whakapaipai, ā, ka mōhio ahau ki tāku e mea ai ki a koe.’ ”
EXO 33:6 Nā, i aurutia e ngā tama a Īharaira ō rātou whakapaipai i Maunga Horepa ahu atu.
EXO 33:7 Nā, tango ai a Mohi i te tapenākara ka whakatū ki waho o te puni ki tētahi wāhi mamao atu i te puni, ā, huaina ana e ia, “Ko te tapenākara o te whakaminenga”. Ā, i haere ngā tāngata katoa e rapu ana i a Ihowā, ki te tapenākara o te whakaminenga, ki waho o te puni.
EXO 33:8 Ā, i a Mohi e haere ana ki te tapenākara ka whakatika te iwi katoa, ā, ka tū tērā, tērā, i te kūwaha o tōna tēneti, ā, ka titiro ki muri i a Mohi, ā haere noa ia ki roto ki te tapenākara.
EXO 33:9 Ā, i a Mohi e haere ana ki roto ki te tapenākara, ka heke iho te pou kapua, ā, tū ana i te whatitoka o te tapenākara, ā, ka kōrero a Ihowā ki a Mohi.
EXO 33:10 Ā, ko te kitenga o te iwi katoa i te pou kapua e tū ana i te whatitoka o te tapenākara, nā, ka whakatika te iwi katoa, ka koropiko hoki ia tangata, ia tangata, i te whatitoka o tōna tēneti.
EXO 33:11 Nā, ka kōrero a Ihowā ki a Mohi, he kanohi, he kanohi, pērā hoki me te tangata e kōrero nei ki tōna hoa. Ā, hoki ana ia ki te puni; ko tāna tangata ia, ko Hohua, tama a Nunu, kīhai taua taitamariki i neke atu i roto i te tapenākara.
EXO 33:12 Ā, i mea a Mohi ki a Ihowā, “Titiro, kua mea mai nei koe ki ahau, ‘Kawea tēnei iwi ki runga’; ā, kāhore i whakaaturia mai e koe ki ahau tāu e ungā ai hei hoa mōku. Kua mea mai anō koe ki ahau, ‘E mōhio ana ahau ki a koe, ki tōu ingoa hoki, kua manakohia anō koe e ahau.’
EXO 33:13 Nā, ki te mea kua manakohia ahau e koe, tēnā, whakaaturia mai ki ahau ōu ara, kia mōhio ai ahau ki a koe, kia manakohia ai ahau e koe; kia mahara hoki he iwi nāu tēnei iwi.”
EXO 33:14 Nā, ka mea ia, “Ka haere atu tōku aroaro, ā, ka mea ahau i a koe kia okioki.”
EXO 33:15 Nā, ka mea ia ki a ia, “Ki te kāhore tōu aroaro e haere, kaua mātou e kawea ki runga i konei.
EXO 33:16 Mā te aha hoki e mōhiotia ai kua manakohia mātou ko tāu iwi e koe? He teka ianei māu kia haere tahi i a mātou? Pēnei ka motuhia mātou ko tāu iwi i ngā iwi katoa i te mata o te whenua.”
EXO 33:17 Nā, ka mea a Ihowā ki a Mohi, “Ko tēnei mea anō i kōrerotia mai nā e koe, ka rite i ahau; nō te mea e manakohia ana koe e ahau, ā, e mōhio ana ahau ki a koe, ki tōu ingoa hoki.”
EXO 33:18 Nā, ka mea ia, “Tēnā rā, whakakitea mai ki ahau tōu korōria.”
EXO 33:19 Nā, ka mea ia, “Ka meatia e ahau tōku pai katoa kia haere atu i tōu aroaro, ā, ka karangatia e ahau te ingoa o Ihowā i tōu aroaro, ka atawhai hoki ahau i tāku e atawhai ai, ka tohu hoki i tāku e tohu ai.”
EXO 33:20 I mea anō ia, “E kore e taea e koe te titiro ki tōku mata; e kore hoki tētahi tangata e titiro ki ahau, ā, e ora.”
EXO 33:21 I mea anō a Ihowā, “Nanā, he wāhi tēnei kei ahau, ā, me tū koe ki runga ki te kāmaka;
EXO 33:22 ā, ka haere atu tōku korōria, nā, ka kawea koe e ahau ki roto ki te kapiti kōhatu, ā, ka taupokina koe e ahau ki tōku ringa, i ahau e haere atu ana.
EXO 33:23 Ā, ka tangohia e ahau tōku ringa, ā, ka kite koe i muri ōku; ko tōku mata ia e kore e kitea.”
EXO 34:1 Nā, ka mea a Ihowā ki a Mohi, “Tāraia māu ētahi papa kōhatu, kia rua, kia rite ki ō mua; ā, ka tuhituhia e ahau ki aua papa ngā kupu i mau ki ō mua papa, i wāhia nā e koe.
EXO 34:2 Ā, kia takatū i te ata, ka haere ake i te ata ki Maunga Hinai, ā, me tū koe i tōku aroaro, ki reira, ki te tihi o te maunga.
EXO 34:3 Kaua hoki tētahi e haere ake i a koe, kei kitea hoki tētahi i te maunga katoa; ko ngā hipi hoki, me ngā kau, kaua e kai ki te ritenga o taua maunga.”
EXO 34:4 Nā, tāraia ana e ia ētahi papa kōhatu e rua, rite tonu ki ō mua; ā, ka maranga wawe a Mohi i te ata, ka piki atu ki Maunga Hinai, ka pērā anō me tā Ihowā i whakahau ai ki a ia, me te mau anō i ngā papa kōhatu e rua ki tōna ringa.
EXO 34:5 Nā, ka heke iho a Ihowā i roto i te kapua, ka tū tahi me ia ki reira, ā, ka karangatia te ingoa o Ihowā.
EXO 34:6 Nā, ka haere atu a Ihowā i tōna aroaro, ā, ka karangatia, “Ko Ihowā, ko Ihowā ko te Atua tohu, atawhai, he tukuroa nei i te riri, he nui nei te aroha, te pono,
EXO 34:7 e rongoā nei i te aroha mō ngā mano, e muru nei i te kino, i te tutū, i te hara, e kore rawa anō hoki e tuku noa i te hē; e mea nei i te hara o ngā mātua kia tau iho ki ngā tamariki, ki ngā tamariki a ngā tamariki ā te toru, te whā rā anō o ngā whakatupuranga.”
EXO 34:8 Nā, ka hohoro a Mohi, ka tuohu iho ki te whenua, koropiko ana;
EXO 34:9 ā, ka mea, “Ki te mea kua manakohia mai ahau e koe, e te Ariki, kia haere rā tōku Ariki i waenganui i a mātou; he iwi kakī mārō hoki tēnei; murua atu hoki tō mātou kino, me tō mātou hara, waiho hoki mātou hei taonga tupu mōu.”
EXO 34:10 Nā, ka mea ia: “Nanā, ka whakarite kawenata ahau. Ka meatia e ahau he mea whakamīharo ki te aroaro o tōu iwi katoa, he mea kīhai i meatia i te whenua katoa, i ngā iwi katoa anō hoki; ā, ka kitea te mahi a Ihowā e te iwi katoa kei roto nei koe i a rātou. He mea whakamataku hoki tāku e mahi tahi ai ahau me koe.
EXO 34:11 Kia mau ki tāku e whakahau atu nei ki a koe ināianei. Nanā, ka peia atu e ahau ngā Amori, ngā Kanaani, ngā Hiti, ngā Perihi, ngā Hiwi, ngā Iepuhi.
EXO 34:12 Kia tūpato kei whakarite kawenata koe ki ngā tāngata o te whenua e haere nei koe ki reira; kei waiho hei rore i waenganui i a koe.
EXO 34:13 Engari, me wāwāhi ā rātou āta, me pākarukaru ā rātou whakapakoko, me tua hoki ā rātou Aherimi.
EXO 34:14 (Kāhore atu hoki he hei atua koropikotanga māu, ko Ihowā hoki ko Hae nei tōna ingoa, he Atua hae ia).
EXO 34:15 “Kei whakarite kawenata koe ki ngā tāngata o te whenua, ā, ka whai atu rātou, ka pūremu atu ki ō rātou atua, ā, ka patu whakahere mā ō rātou atua, ā, ka karangatia koe e tētahi, nā, ka kai koe i tāna patunga tapu.
EXO 34:16 Ā, ka tango koe i ā rātou tamāhine mā āu tama, ā, ka whai atu, ka pūremu atu ā rātou tamāhine ki ō rātou atua, ā, ka meinga āu tamariki kia whai atu, kia pūremu atu ki ō rātou atua.
EXO 34:17 “Kaua e whakarewaina he atua mōu.
EXO 34:18 “Kia mau ki te Hākari Taro Rēwenakore. E whitu ngā rā e kai ai koe i te taro rēwenakore, e pērā ai me tāku i whakahau ai ki a koe, i te wā anō i whakaritea o te marama, o Apipi; ko Apipi hoki te marama i haere mai ai koe i Īhipa.
EXO 34:19 “Ko ngā mea katoa e puta tuatahi mai ana i te kōpū, nāku; me ngā mātāmua a āu kararehe, a ngā kau, a ngā hipi.
EXO 34:20 “Ā, me utu e koe ki te reme te mātāmua a te kāihe; ā, ki te kāhore utua e koe, whatia tōna kakī. Me utu e koe ngā mātāmua o āu tama. “E kore anō hoki tētahi e puta kau mai ki tōku aroaro.
EXO 34:21 “E ono ngā rā e mahi ai koe, i te whitu ia o ngā rā me okioki; me okioki anō koe i te ruinga, i te kotinga.
EXO 34:22 “Me mahi anō te Hākari o Ngā Wiki, arā o ngā mātāmua o te kotinga wīti, me te Hākari o te Kohikohinga i te takanga o te tau.
EXO 34:23 E toru ngā wā o te tau e kitea ai ōu tāne katoa ki te aroaro o te Ariki, o Ihowā, o te Atua o Īharaira.
EXO 34:24 Ka peia hoki e ahau ngā tauiwi i tōu aroaro, ka whakanuia anō ōu rohe; ā, e kore tētahi e minamina ki tōu whenua, ina haere koe ki runga kia kitea ki te aroaro o Ihowā, o tōu Atua, i ngā wā e toru o te tau.
EXO 34:25 “Kaua he rēwena ina whakahekea te toto o tāku patunga tapu; kei toe anō hoki ki te ata te patunga tapu o te Hākari o te Kapenga.
EXO 34:26 “Me kawe ki te whare o Ihowā, o tōu Atua, ngā mea mataati o ngā mātāmua o tōu oneone. “Kaua e kōhuatia te kūao koati ki te waiū o tōna whaea.”
EXO 34:27 Nā, ka mea a Ihowā ki a Mohi, “Tuhituhia ēnei kupu; kei ēnei kupu hoki te tikanga o te kawenata e whakaritea nei e ahau ki a koe, ki a Īharaira.
EXO 34:28 Nā, i reira ia i a Ihowā e whā tekau ngā rā, e whā tekau ngā pō; kīhai i kai taro, kīhai anō i inu wai. Nā, tuhituhia ana e ia ki ngā papa ngā kupu o te kawenata, ngā ture kotahi tekau.”
EXO 34:29 Ā, i te hekenga iho o Mohi i runga i Maunga Hinai me ngā papa e rua o te whakaaturanga i te ringa o Mohi, i tōna hekenga iho i runga i te maunga, nā, kīhai a Mohi i mōhio e tīaho ana te kiri o tōna mata, nōna i kōrero ki a ia.
EXO 34:30 Ā, i te tirohanga a Ārona rātou ko ngā tama katoa a Īharaira ki a Mohi, nā, e tīaho ana te kiri o tōna mata; nā, ka wehi rātou ki te whakatata ki a ia.
EXO 34:31 Nā, ka karanga a Mohi ki a rātou; ā, ka hoki ki a ia a Ārona rātou ko ngā rangatira katoa o te whakaminenga; ā, ka kōrero a Mohi ki a rātou.
EXO 34:32 Ā muri iho ka whakatata ngā tama katoa a Īharaira, ā, ka whakahaua iho e ia ki a rātou ngā mea katoa i kōrerotia e Ihowā ki a ia i Maunga Hinai.
EXO 34:33 Ā, ka mutu tā Mohi kōrero ki a rātou, ka makā ki tōna mata he ārai.
EXO 34:34 Otiia, ka haere a Mohi ki te aroaro o Ihowā, ki te kōrero ki a ia, ka tangohia e ia te ārai ā puta noa mai ki waho, ā, ko tōna putanga mai ki waho, ka kōrerotia e ia ki ngā tama a Īharaira ngā mea i whakahaua ki a ia;
EXO 34:35 ā, i kite ngā tama a Īharaira i te mata o Mohi, e tīaho ana te kiri o te mata o Mohi. Nā, ka whakahokia e Mohi te ārai ki tōna mata ā haere noa ia ki te kōrero ki a ia.
EXO 35:1 Nā, ka huihuia e Mohi te whakaminenga katoa o ngā tama a Īharaira, ā, ka mea ia ki a rātou, “Ko ngā kupu ēnei i whakahaua mai e Ihowā kia mahia:
EXO 35:2 E ono ngā rā e mahia ai te mahi; ko te rā whitu ia me waiho hei rā tapu, hei hāpati okiokinga ki a Ihowā; ki te mahia he mahi e tētahi tangata i taua rā, me whakamate.
EXO 35:3 Kei tahuna he ahi, puta noa i ō koutou nohoanga, i te rā hāpati.”
EXO 35:4 I kōrero anō a Mohi ki te whakaminenga katoa o ngā tama a Īharaira, i mea: Ko te mea tēnei i whakahau mai ai a Ihowā, i mea ai:
EXO 35:5 Tangohia i roto i a koutou he whakahere mā Ihowā; ko ngā tāngata katoa he ngākau hihiko ō rātou, me kawe mai e rātou taua mea hei whakahere ki a Ihowā: he kōura, he hiriwa, he parāhi,
EXO 35:6 he purū, he pāpura, he ngangana, he rīnena pai, he huruhuru koati,
EXO 35:7 me ngā hiako hipi kua oti te whakawhero, me ngā hiako pateri, me ētahi rākau, hei te hitimi,
EXO 35:8 me te hinu mō te whakamārama, me ngā mea kakara mō te hinu whakawahi, mō te whakakakara reka hoki,
EXO 35:9 me ngā kōhatu onika, me ngā kōhatu hei whakanoho ki te epora, ki te kōuma.
EXO 35:10 “Me haere mai anō ngā tāngata ngākau mōhio katoa i roto i a koutou, ki te hanga i ngā mea katoa i whakahaua mai e Ihowā;
EXO 35:11 i te tapenākara, i tōna tēneti, i tōna uhi hoki, i ōna toromoka, i ōna papa, i ōna kaho, i ōna pou, i ōna tūranga pou,
EXO 35:12 i te āka, me ōna amo, i te taupoki, me te ārai hīpoki,
EXO 35:13 i te tēpu, me ōna amo, me ōna oko katoa, me te taro aroaro,
EXO 35:14 i te tūranga rama hoki mō te whakamārama me ōna mea, me ōna rama, me te hinu hoki mō te whakamārama,
EXO 35:15 me te āta whakakakara, me ōna amo, me te hinu whakawahi, me te whakakakara reka, me te pā mō te whatitoka i te tomokanga atu o te tapenākara,
EXO 35:16 i te āta mō te tahunga tinana, me tōna pae kupenga parāhi, i ōna amo me ōna mea katoa, i te takotoranga wai me tōna tūranga,
EXO 35:17 i ngā pā o te marae, i ōna pou, me ngā tūranga pou, me te pā mō te whatitoka o te marae,
EXO 35:18 i ngā titi o te tapenākara, me ngā titi o te marae, me ngā aho,
EXO 35:19 i ngā kākahu mō te mahi minita ina minita ki te wāhi tapu, i ngā kākahu tapu mō Ārona, mō te tohunga, me ngā kākahu mō āna tama, mō te mahi tohunga.”
EXO 35:20 Kātahi ka haere atu te whakaminenga katoa o ngā tama a Īharaira i te aroaro o Mohi.
EXO 35:21 Nā, ka haere rātou, ngā tāngata i toko ake ō rātou ngākau me ngā tāngata i hihiko noa ake ō rātou wairua, me te kawe anō i te whakahere mā Ihowā, mō te mahi o te tapenākara o te whakaminenga, mō ōna mahi katoa, mō ngā kākahu tapu.
EXO 35:22 I haere hoki rātou, ngā tāne, ngā wāhine, ngā mea i hihiko noa te ngākau, ā, kawea ana e rātou ngā poroporo, ngā whakakai, ngā mōwhiti, ngā heitiki, he mea kōura katoa; i tukua anō hoki e tērā, e tērā, he whakahere kōura ki a Ihowā.
EXO 35:23 Ā, ko ngā tāngata katoa i kitea nei he purū ki a rātou, he pāpura, he ngangana, he rīnena pai, he huruhuru koati, he hiako hipi kua oti te whakawhero, he hiako pateri, i kawea mai e rātou.
EXO 35:24 Ko ngā tāngata katoa i whakahere nei i te hiriwa, i te parāhi, i kawea mai e rātou te whakahere ki a Ihowā; me ngā tāngata katoa i kitea nei he rākau hitimi ki a rātou mō tētahi meatanga o te mahi, i kawea mai anō e rātou.
EXO 35:25 Me ngā wāhine ngākau mōhio katoa, i whatu ō rātou ringa, ā, kawea mai ana tā rātou i whatu ai, te purū, te pāpura, te ngangana, te rīnena pai.
EXO 35:26 Ā, i whatu anō ngā wāhine katoa, i toko ake nei ō rātou ngākau ki te mōhio, i te huruhuru koati.
EXO 35:27 I kawea mai anō e ngā rangatira ngā kōhatu onika, me ngā kōhatu hei whakanoho, mō te epora, mō te kōuma;
EXO 35:28 me te mea kakara, me te hinu mō te whakamārama, mō te hinu whakawahi, mō te whakakakara reka.
EXO 35:29 I kawea mai he whakahere tuku noa ki a Ihowā e ngā tama a Īharaira, e ngā tāne, e ngā wāhine katoa, i toko ake nei ō rātou ngākau ki te kawe mai, mō ngā tini mahi i whakahaua e Ihowā kia mahia, ā, i kōrerotia e Mohi.
EXO 35:30 Nā, ka mea a Mohi ki ngā tama a Īharaira: “Titiro, kua karangatia e Ihowā te ingoa o Petarēre tama a Uri, tama a Huru, o te iwi o Hūrā;
EXO 35:31 kua whakakīia anō hoki e ia ki te Wairua o te Atua, ki te ngākau tūpato, ki te whakaaro, ki te mōhio, ki ngā mahi katoa anō hoki,
EXO 35:32 hei whakaaro ki ngā mahi a te tohunga, mō te mahi i te kōura, i te hiriwa, i te parāhi,
EXO 35:33 mō te tuhi kōhatu, mō te whakanoho, mō te whakairo rākau, mō te mahi i ngā mahi katoa a te tohunga.
EXO 35:34 Kua hōmai anō te ako ki tōna ngākau, ki a rāua ko Ahoriapa, tama a Ahihamaka, o te iwi o Rāna.
EXO 35:35 Kua whakakīia rāua e ia ki te ngākau mahara, hei mahi i ngā tini mahi, a te kaituhi, a te mea mōhio, a te kaiwhakairo purū, pāpura, ngangana, rīnena pai, a te kaiwhatu hoki, a ngā kaimahi i ngā tini mahi, a ngā tohunga ki te mahi.”
EXO 36:1 “Nā, ka mahi a Petarēre rāua ko Ahoriapa, rātou ko ngā tāngata ngākau mōhio katoa, i hōmai nei e Ihowā he ngākau tūpato ki a rātou me te whakaaro e mōhiotia ai te mahi i ngā tini mahi, o ngā mea o te wāhi tapu, o te pērā me ngā mea katoa i whakahaua e Ihowā.”
EXO 36:2 Ā, i karangatia e Mohi a Petarēre rāua ko Ahoriapa, me ngā tāngata ngākau mōhio katoa; i hōmai nei e Ihowā he mahara ki ō rātou ngākau, ngā tāngata katoa i toko ake ō rātou ngākau kia haere ki te mahi, mahi ai.
EXO 36:3 Nā, ka tangohia e rātou i te aroaro o Mohi ngā whakahere katoa i kawea e ngā tama a Īharaira hei hanga i ngā mea mō te wāhi tapu, kia oti. I kawea anō e rātou he whakahere hōmai noa ki a ia i tēnei ata, i tēnei ata.
EXO 36:4 Nā, ka haere mai ngā tāngata mōhio katoa, ngā kaimahi o ngā mea katoa o te wāhi tapu, tērā, tērā, i tāna mahi i mahi ai;
EXO 36:5 ā, ka kōrero ki a Mohi, ka mea, “He nui noa atu tā te iwi e kawe mai nei mō te mahinga o ngā mea i whakahaua e Ihowā kia meatia.”
EXO 36:6 Nā, ka whakahau a Mohi, ā, ka pā te karanga i te puni, ka mea: “Kaua tētahi tāne, wahine rānei e mahi i tētahi atu, mahi hei whakahere mō te wāhi tapu.” Nā, ka whakamutua te kawe mai a te iwi.
EXO 36:7 He nui hoki, ā, toe ake, ngā mea i a rātou mō te mahinga o ngā mea katoa.
EXO 36:8 Nā ngā tāngata ngākau mōhio katoa o ngā kaimahi i hanga te tapenākara ki ngā pīhi kotahi tekau, ki te rīnena miro pai, ki te purū, ki te pāpura, ki te ngangana. He tohunga rawa te mahinga o ngā kerupima i whatua ki roto.
EXO 36:9 E rua tekau mā waru whatīanga te roa o te pīhi kotahi, e whā whatīanga te whānui o te pīhi kotahi; rite tonu te nui o ngā pīhi katoa.
EXO 36:10 I honoa e ia ngā pīhi e rima tētahi ki tētahi; me ērā atu pīhi e rima hoki, i honoa e ia tētahi ki tētahi.
EXO 36:11 Ā, i hangā anō e ia ētahi koropiko purū ki te taha o tētahi pīhi, ki te taha e honoa ana. I pērā anō tāna mahi ki te taha ki waho o tētahi pīhi, ki te hononga mai o te rua.
EXO 36:12 E rima tekau ngā koropiko i hangā e ia ki tētahi pīhi, e rima tekau hoki ngā koropiko i hangā e ia ki te taha o te pīhi i te hononga mai o te rua; ā, i mau ngā koropiko tētahi ki tētahi.
EXO 36:13 I hangā anō hoki e ia ētahi toromoka kōura e rima tekau, ā, honoa ana ngā pīhi tētahi ki tētahi ki ngā toromoka; ā, ka kotahi anō te tapenākara.
EXO 36:14 I hangā anō e ia ētahi pīhi ki te huruhuru koati, hei tēneti mō runga i te tapenākara; kotahi tekau mā tahi ngā pīhi i hangā e ia.
EXO 36:15 E toru tekau whatīanga te roa o te pīhi kotahi, e whā hoki ngā whatīanga te whānui o te pīhi kotahi, rite tonu te nui o ngā pīhi kotahi tekau mā tahi.
EXO 36:16 Ā, i honoa e ia ngā pīhi e rima ki a rātou anō, me ngā pīhi e ono ki a rātou anō.
EXO 36:17 I hangā anō e ia ngā koropiko e rima tekau ki te tapa ki waho o te pīhi i te hononga, i hangā anō e ia ngā koropiko e rima tekau ki te tapa o te pīhi e honoa mai ai te rua.
EXO 36:18 I hangā anō e ia ngā toromoka parāhi e rima tekau, hei hono i te tēneti kia kotahi.
EXO 36:19 I hangā anō hoki e ia ētahi hiako hipi he mea whakawhero, hei uhi mō te tēneti, me ētahi hiako pateri hei uhi mō waho atu.
EXO 36:20 I hangā anō hoki e ia ētahi papa mō te tapenākara, he hitimi te rākau, he mea tū ki runga.
EXO 36:21 Kotahi tekau whatīanga te roa o te papa kotahi, kotahi whatīanga me te hāwhe te whānui o te papa kotahi.
EXO 36:22 E rua ngā arero o te papa kotahi, he mea hono ki a rāua; he pērā tonu tāna i mea ai ki ngā papa katoa o te tapenākara.
EXO 36:23 I hangā anō e ia ngā papa mō te tapenākara: e rua tekau ngā papa mō te taha ki te tonga whaka te tonga;
EXO 36:24 e whā tekau hoki ngā tūranga hiriwa i hangā e ia mō ngā papa e rua tekau; e rua ngā tūranga i raro i tētahi papa mō ōna arero e rua, e rua hoki ngā tūranga i raro i tētahi atu papa mō ōna arero e rua.
EXO 36:25 Ā, e rua tekau ngā papa i hangā e ia mō tērā taha o te tapenākara, mō te taha ki te raki.
EXO 36:26 Me ngā tūranga hiriwa e whā tekau; ngā tūranga e rua mō raro iho i tētahi papa, me ngā tūranga e rua mō raro i tētahi atu papa.
EXO 36:27 Ā, mō te tuarongo o te tapenākara whaka te hauāuru, e ono ngā papa i hangā e ia.
EXO 36:28 E rua hoki ngā papa i hangā e ia mō ngā koki o te tapenākara i te tuarongo.
EXO 36:29 Ā, i honoa aua papa i raro, i honoa anō i runga ki te mōwhiti kotahi; i pērātia e ia aua papa e rua i ngā koki e rua.
EXO 36:30 Nā, ka waru aua papa; me ngā tūranga hiriwa, kotahi tekau mā ono ngā tūranga; e rua ngā tūranga i raro i tētahi papa, i tētahi papa.
EXO 36:31 I hangā anō e ia ētahi kaho, he hitimi te rākau; e rima mō ngā papa o tētahi taha o te tapenākara,
EXO 36:32 e rima hoki ngā kaho mō ngā papa o tētahi taha o te tapenākara, ā, e rima ngā kaho mō ngā papa o te tapenākara, mō te tuarongo ki te hauāuru.
EXO 36:33 Ā, ko tō waenga kaho i meinga e ia kia rere nā waenganui o ngā papa i tētahi pito ki tētahi pito.
EXO 36:34 I whakakikoruatia anō e ia ngā papa ki te kōura, ā, ka hangā ngā mōwhiti o aua papa ki te kōura hei kuhunga mō ngā kaho; i whakakikoruatia anō e ia ngā kaho ki te kōura.
EXO 36:35 I hangā anō e ia he ārai ki te purū, ki te pāpura, ki te ngangana, ki te rīnena miro pai; he tohunga rawa te mahinga o ngā kerupima i whatua e ia ki roto.
EXO 36:36 I hangā anō e ia ōna pou e whā ki te hitimi, ā, whakakikoruatia iho e ia ki te kōura; he kōura ngā matau. I whakarewaina anō e ia ngā tūranga hiriwa e whā mō aua mea.
EXO 36:37 I hangā anō he pā mō te whatitoka o te tēneti ki te purū, ki te pāpura, ki te ngangana, ki te rīnena miro pai hoki, he mea mahi ki te ngira;
EXO 36:38 me ōna pou e rima, me ngā matau a aua pou. Ā, i whakakikoruatia e ia ngā pito ki runga o aua pou me ngā awhi ki te kōura; ko ngā tūranga e rima ia he parāhi.
EXO 37:1 I hangā anō e Petarēre te āka, he hitimi te rākau; e rua whatīanga me te hāwhe te roa, kotahi whatīanga me he hāwhe te whānui, kotahi whatīanga me te hāwhe te teitei.
EXO 37:2 Ā, i whakakikoruatia e ia ki te kōura parakore a roto, a waho; i hangā anō e ia he niao kōura ā tawhio noa.
EXO 37:3 I whakarewaina anō ngā mōwhiti kōura e whā mō ōna koki e whā; e rua ngā mōwhiti mō tētahi taha, e rua hoki ngā mōwhiti mō tētahi taha.
EXO 37:4 I hangā anō e ia he amo, he hitimi te rākau, ā, whakakikoruatia iho ki te kōura.
EXO 37:5 Ā, i kuhua e ia ngā amo ki ngā mōwhiti i ngā taha o te āka, hei amo mō te āka.
EXO 37:6 I hangā anō e ia te taupoki ki te kōura parakore; e rua whatīanga me te hāwhe te roa, kotahi whatīanga me te hāwhe te whānui.
EXO 37:7 I hangā anō ngā kerupima e rua ki te kōura, he mea patu tāna mahinga, ki ngā pito e rua o te taupoki.
EXO 37:8 Kotahi te kerupi ki tēnei pito, kotahi kerupi ki tērā pito; i honoa ngā kerupima ki te taupoki ki ōna pito e rua.
EXO 37:9 Ā, i roha atu whakarunga ngā parirau o ngā kerupima, i uhi i te taupoki ki ō rāua parirau, me te anga anō ō rāua mata ki a rāua; i anga whaka te taupoki ngā mata o ngā kerupima.
EXO 37:10 I hangā anō te tēpu, he hitimi te rākau; e rua whatīanga te roa, kotahi whatīanga te whānui, kotahi whatīanga me te hāwhe te teitei.
EXO 37:11 Ā, i whakakikoruatia ki te kōura parakore, i hangā anō hoki he niao kōura mō taua mea ā tawhio noa.
EXO 37:12 I hangā anō e ia he awhi mō taua mea, he whānui ringa te nui ā tawhio noa; i hangā anō he niao kōura mō te awhi ā tawhio noa.
EXO 37:13 Ā, i whakarewaina ngā mōwhiti kōura e whā, ā, whakanohoia iho ngā mōwhiti ki ngā koki e whā i ōna waewae e whā.
EXO 37:14 I te ritenga ake o te awhi ngā mōwhiti, hei kuhunga mō ngā amo, hei maunga mō te tēpu.
EXO 37:15 Ā, i hangā e ia ngā amo, he hitimi te rākau, ā, whakakikoruatia iho ki te kōura, hei amo mō te tēpu.
EXO 37:16 I hangā anō ngā oko mō runga i te tēpu ki te kōura parakore, ōna rīhi, ōna koko, ōna peihana me ōna kapu mō ngā ringihanga.
EXO 37:17 I hangā anō te tūranga rama ki te kōura parakore. Ko tāna hanganga i te tūranga rama he mea patu; nō reira anō tōna take, tōna peka, ōna kapu, ōna puku, me ōna puāwai.
EXO 37:18 Ā, e ono ngā peka i puta ake i ōna taha; e toru ngā peka o te tūranga rama i tētahi taha, e toru hoki ngā peka o te tūranga rama i tētahi taha.
EXO 37:19 E toru ngā kapu, he mea rite ki te puāwai aramona, te puku, me te puāwai, ki tētahi peka; e toru hoki ngā kapu, he mea rite ki te puāwai aramona ki tētahi atu peka, te puku me te puāwai. He pērā tonu i ngā peka e ono e puta ake ana i te tūranga rama.
EXO 37:20 Ā, e whā ngā kapu o te tūranga rama, he mea rite ki te puāwai aramona, me te puku, me te puāwai o tētahi, o tētahi.
EXO 37:21 Ā, e rua ngā peka, kotahi puku, o raro ake, nō taua kōura rā anō, e rua hoki ngā peka, kotahi puku, o raro ake nō taua kōura rā anō, e rua hoki ngā peka, kotahi puku, o raro ake, nō taua kōura rā anō, rite tonu ki ngā peka e ono e puta mai ana i roto i taua mea.
EXO 37:22 Nō te mea kotahi ngā puku, ngā peka; he kōura parakore katoa; kotahi tonu, he mea patu.
EXO 37:23 I hangā anō hoki e ia ki te kōura parakore ngā rama e whitu o taua mea, me ōna kuku, me ōna oko ngārahu.
EXO 37:24 Kotahi anō te taranata kōura parakore i hangā ai taua mea, me ōna oko katoa.
EXO 37:25 I hangā anō e ia te āta hei tahunga mea kakara, he hitimi te rākau; kotahi whatīanga te roa, kotahi whatīanga te whānui; he tapawhā; e rua whatīanga te teitei; nō taua mea rā anō ōna haona.
EXO 37:26 Ā, whakakikoruatia iho e ia taua mea ki te kōura parakore, ā runga, me ōna taha, ā pōtae katoa, me ōna haona. I hangā anō e ia he niao kōura mō taua mea ā tawhio noa.
EXO 37:27 I hangā anō ngā mōwhiti kōura e rua mō taua mea, mō raro iho i tōna niao, ki ōna koki e rua, ki ōna taha e rua, hei kuhunga mō ngā amo, hei amohanga.
EXO 37:28 I hangā anō ngā amo, he hitimi te rākau, ā, whakakikoruatia iho ki te kōura.
EXO 37:29 I hangā anō e ia te hinu tapu hei whakawahi, me te whakakakara parakore ki ngā mea kakara, tā te kaiwhakaranu hoki e hanga ai.
EXO 38:1 I hangā anō e ia he āta mō ngā tahunga tinana, he hitimi te rākau. E rima ngā whatīanga te roa, e rima whatīanga te whānui, he tapawhā; e toru ngā whatīanga te teitei.
EXO 38:2 I hangā anō ōna haona ki ōna koki e whā; kotahi te rākau o taua mea, o ōna haona; ā, whakakikoruatia iho e ia ki te parāhi.
EXO 38:3 I hangā anō ngā oko katoa o te āta, ngā pāta, me ngā koko pungarehu, me ngā peihana, me ngā mārau, me ngā oko ngārahu. I hangā e ia ōna mea katoa ki te parāhi.
EXO 38:4 I hangā anō ki te parāhi he pae kupenga mō te āta, he mea rīpekapeka, mō raro i tōna awhi, ki raro iho, i waenganui.
EXO 38:5 Ā, e whā ngā mōwhiti parāhi i whakarewaina e ia mō ngā koki e whā o te pae kupenga parāhi, hei kuhunga mō ngā amo.
EXO 38:6 I hangā anō ngā amo, he hitimi te rākau, ā, whakakikoruatia iho ki te parāhi.
EXO 38:7 Nā, kuhua ana e ia ngā amo ki ngā mōwhiti i ngā taha o te āta, hei amo; i hangā e ia te āta ki te papa, he mea tuwhera kau a roto.
EXO 38:8 I hangā anō te takotoranga wai ki te parāhi, me tōna tūranga hoki ki te parāhi, ki ngā whakaata o ngā wāhine i huihui mai, i huihui mai nei ki te whatitoka o te tapenākara o te whakaminenga.
EXO 38:9 I hangā anō te marae; he rīnena miro pai ngā pā o te marae, o te taha ki te tonga whaka te tonga, kotahi rau whatīanga;
EXO 38:10 e rua tekau ngā pou o aua mea, e rua tekau anō hoki ngā tūranga parāhi; he hiriwa ngā matau o ngā pou me ngā awhi.
EXO 38:11 Me ngā pā mō te taha ki te raki, kotahi rau whatīanga, e rua tekau ngā pou, e rua tekau hoki ngā tūranga parāhi. He hiriwa ngā matau o ngā pou me ngā awhi.
EXO 38:12 He pā anō hoki mō te taha ki te hauāuru, e rima tekau whatīanga, kotahi tekau ngā pou, kotahi tekau anō hoki ngā tūranga; he hiriwa ngā matau o ngā pou me ngā awhi.
EXO 38:13 E rima tekau hoki whatīanga o te taha ki te rāwhiti whaka te rāwhiti.
EXO 38:14 Kotahi tekau mā rima whatīanga o ngā pā o tētahi taha o te kūwaha; e toru ngā pou, e toru hoki ngā tūranga.
EXO 38:15 Ā, kotahi tekau mā rima whatīanga o ngā pā o tērā taha o te kūwaha o te marae, o tēnei, o tērā; e toru ngā pou, e toru hoki ngā tūranga.
EXO 38:16 He rīnena miro pai ngā pā katoa o te marae ā tawhio noa.
EXO 38:17 He parāhi ngā tūranga mō ngā pou, he hiriwa ngā matau o ngā pou me ngā awhi; i whakakikoruatia anō hoki ki te hiriwa ngā pito ki runga. I whakawhaiawhitia anō hoki ngā pou katoa o te marae ki te hiriwa.
EXO 38:18 He mea hanga hoki ki te ngira te pā mō te kūwaha o te marae, he purū, he pāpura, he ngangana, he rīnena miro pai. E rua tekau whatīanga te roa, e rima whatīanga te teitei, arā te whānui, rite tonu anō ki ngā pā o te marae.
EXO 38:19 Ā, e whā ngā pou o aua pā, e whā anō hoki ngā tūranga parāhi; he hiriwa ngā matau; i whakakikoruatia anō hoki ngā pito o aua pou me ngā awhi ki te hiriwa.
EXO 38:20 He parāhi anō ngā titi katoa o te tapenākara, o te marae ā tawhio noa.
EXO 38:21 Ko ngā mea tēnei o te tapenākara, arā o te tapenākara o te whakaaturanga, ko ngā mea i whakaritea e Mohi i tāna kōrero hei mahi mā ngā Rīwaiti i raro i te ringa o Itamara, tama a Ārona tohunga.
EXO 38:22 Nā, hangā ana e Petarēre tama a Uri, tama a Huru, o te iwi o Hūrā, ngā mea katoa i whakahaua e Ihowā ki a Mohi.
EXO 38:23 Ko tōna hoa ko Ahoriapa, tama a Ahihamaka nō te iwi o Rāna, he kaimahi, he mea mōhio, he kaiwhakairo hoki i te purū, i te pāpura, i te ngangana, i te rīnena pai.
EXO 38:24 Ā, ko te kōura katoa i mahia mō ngā mea, mō ngā mea katoa o te wāhi tapu, te kōura o te whakahere, e rua tekau mā iwa taranata, e whitu rau e toru tekau hekere, he hekere wāhi tapu.
EXO 38:25 Ā, ko te hiriwa o te hunga i taua o te whakaminenga, kotahi rau taranata, kotahi mano e whitu rau e whitu tekau mā rima hekere, he hekere wāhi tapu.
EXO 38:26 Kotahi te pekaha a te tangata, arā kotahi te hāwhe hekere, ko te hekere hoki o te wāhi tapu, nā te hunga hoki i haere kia taua, nā ngā mea e rua tekau, maha atu rānei, ō rātou tau; e ono rau hoki ō rātou mano e toru mano e rima rau e rima tekau.
EXO 38:27 Ā, i whakarewaina ngā taranata hiriwa kotahi rau hei tūranga pou mō te wāhi tapu, hei tūranga pou hoki mō te ārai; kotahi rau taranata, kotahi rau ngā tūranga, kotahi te taranata, kotahi te tūranga.
EXO 38:28 Ā, i hangā e ia ngā hekere kotahi mano e whitu rau e whitu tekau mā rima hei matau mō ngā pou, ā, whakakikoruatia iho e ia ngā pito ki runga, whakawhaiawhitia hoki.
EXO 38:29 Ā, e whitu tekau ngā taranata o te parāhi o te whakahere, e rua hoki mano e whā rau hekere.
EXO 38:30 Hangā ake e ia ngā tūranga pou mō te whatitoka o te tapenākara o te whakaminenga, te āta parāhi; me tōna pae kupenga, te mea parāhi; me ngā mea katoa o te āta;
EXO 38:31 me ngā tūranga pou o te marae ā tawhio noa, me ngā tūranga pou mō te kūwaha o te marae, me ngā titi katoa o te tapenākara, me ngā titi katoa o te marae ā tawhio noa.
EXO 39:1 I hangā anō hoki e rātou te purū, te pāpura, me te ngangana, hei kākahu minita mō te minitatanga i te wāhi tapu, i hangā anō ngā kākahu tapu mō Ārona; ko tā Ihowā i whakahau ai ki a Mohi.
EXO 39:2 I hangā anō e ia te epora ki te kōura, ki te purū, ki te pāpura, ki te ngangana, ki te rīnena miro pai.
EXO 39:3 I patua anō hoki te kōura hei pāraharaha, ā, ripiripia ana hei mangemange, ā, mahia ana ki roto ki te purū, ki te pāpura, ki te ngangana, ki te rīnena pai, he tohunga rawa te mahi.
EXO 39:4 I hangā anō ngā pokohiwi o te epora hei hononga; he mea hono ki ngā taha e rua.
EXO 39:5 Me te whītiki whakairo e mau ana ki tōna epora, kotahi anō te mea i hanga ai rāua, me te hanganga anō; he kōura, he purū, he pāpura, he ngangana, he rīnena miro pai; ko tā Ihowā i whakahau ai ki a Mohi.
EXO 39:6 I mahia anō ngā kōhatu onika, he mea whakanoho ki te nohoanga kōura, tuhituhi rawa ki ngā ingoa o ngā tama a Īharaira, he tuhi hīri te tuhi.
EXO 39:7 Ā, whakanohoia iho e ia ki ngā pokohiwi o te epora hei kōhatu whakamahara mō ngā tama a Īharaira; hei pērā me tā Ihowā i whakahau ai ki a Mohi.
EXO 39:8 He tohunga rawa te mahi i hangā ai e ia te kōuma, he pērā anō me te mahinga o te epora: he kōura, he purū, he pāpura, he ngangana, he rīnena miro pai.
EXO 39:9 He tapawhā, he rererua te kōuma i hangā e rātou; kotahi whanganga a te ringa te roa, kotahi hoki whanganga te whānui, he mea rererua.
EXO 39:10 E whā hoki ngā rārangi kōhatu i whakanohoia e rātou ki taua mea. Ko te rārangi tuatahi, he harariu, he tōpaha, he kapakara; ko te rārangi tuatahi tēnei.
EXO 39:11 Ko te rārangi tuarua, he emerara, he hapaira, he taimana.
EXO 39:12 Ko te rārangi tuatoru, he rikuri, he akete, he ametihita.
EXO 39:13 Ko te rārangi tuawhā, he perira, he onika, he hahapa; he mea whakapiri ki te nohoanga kōura i ngā wāhi i mau ai.
EXO 39:14 Ā, rite tonu ngā kōhatu ki ngā ingoa o ngā tama a Īharaira kotahi tekau mā rua, rite tonu ki ō rātou ingoa, i rite te tuhi ki tō te hīri, tēnei tangata me tōna ingoa, tēnei tangata me tōna ingoa; rite tonu ki ngā iwi kotahi tekau mā rua.
EXO 39:15 I hangā anō e rātou ki te kōura parakore ngā mekameka, he mea whiri, mō te kōuma, mō ngā pito.
EXO 39:16 I hangā anō ētahi nohoanga kōura e rua, me ētahi mōwhiti kōura e rua; ā, whakanohoia iho ētahi mōwhiti e rua ki ngā pito e rua o te kōuma.
EXO 39:17 I whakanohoia anō ngā mekameka kōura e rua, ngā mea whiri, ki ngā mōwhiti e rua i ngā pito o te kōuma.
EXO 39:18 I whakaūkia anō ngā pito e rua o ngā mekameka whiri e rua ki ngā nohoanga e rua, ā, whakanohoia ana ki ngā pokohiwi e rua o te epora, ki te taha ki mua.
EXO 39:19 I hangā anō ngā mōwhiti kōura e rua, ā, whakanohoia ana ki ngā pito e rua o te kōuma, ki tōna remu, ki te taha ki roto whaka te epora.
EXO 39:20 I hangā anō ētahi atu mōwhiti kōura e rua, ā, whakanohoia ana ki ngā pokohiwi e rua o te epora, ki te taha ki raro, ki te taha ki mua, ki te ritenga o tōna hononga ake, ki runga ake o te whītiki whakapaipai o te epora.
EXO 39:21 Ā, herea iho e rātou te kōuma, ōna mōwhiti ki ngā mōwhiti o te epora, ki te miro purū, kia mau ai ki runga ake o te whītiki whakapaipai o te epora, kei takoto kē te kōuma i te epora; ko tā Ihowā hoki i whakahau ai ki a Mohi.
EXO 39:22 I hangā anō e ia te koroka o te epora, he mea whatu, he purū katoa.
EXO 39:23 Ko te kōhao i waenganui o te koroka, he pērā me te kōhao o te pukupuku, me te whiri anō i te kōhao ā huri noa, kei pakaru.
EXO 39:24 I hangā anō ētahi pamekaranete mō te remu o te koroka ki te purū, ki te pāpura, ki te ngangana, ki te rīnena miro.
EXO 39:25 I hangā anō e rātou ētahi pere ki te kōura parakore, ā, whakanohoia ana ngā pere ki te takiwā o ngā pamekaranete, ki te remu o te koroka ā huri noa, ki te takiwā o ngā pamekaranete;
EXO 39:26 he pere he pamekaranete, he pere he pamekaranete, ki te remu o te koroka ā huri noa, hei mea minita; ko tā Ihowā hoki i whakahau ai ki a Mohi.
EXO 39:27 I hangā anō ētahi koti ki te rīnena pai, ki te mea whatu, mō Ārona rātou ko āna tama;
EXO 39:28 me te pōtae tohunga ki te rīnena pai, me ētahi pōtae pai ki te rīnena pai me ngā tarautete rīnena ki te rīnena miro pai.
EXO 39:29 Me te whītiki ki te rīnena miro pai, ki te purū, ki te pāpura, ki te ngangana, ki ngā mea i hangā ki te ngira; ko tā Ihowā hoki i whakahau ai ki a Mohi.
EXO 39:30 I hangā anō te pāraharaha o te karauna tapu ki te kōura parakore, ā, ko te tuhi i tuhia, he tuhi hīri, “HE TAPU KI A IHOWĀ.”
EXO 39:31 Nā, ko tētahi miro purū, kia mau ai ki te pōtae tohunga, ki te taha ki runga; ko tā Ihowā i whakahau ai ki a Mohi.
EXO 39:32 Nā, ka oti katoa te mahi o te tapenākara o te tēneti o te whakaminenga. Rite tonu tā ngā tama a Īharaira i mea ai ki ngā mea katoa i whakahaua e Ihowā ki a Mohi; i pērā anō rātou.
EXO 39:33 Nā, ka kawea e rātou te tapenākara ki a Mohi, te tēneti me ōna mea katoa, ōna toromoka, ōna papa, ōna kaho, ōna pou, me ōna tūranga pou,
EXO 39:34 me te uhi iho, ngā hiako hipi kua oti te whakawhero, me tētahi uhi, arā ngā hiako pateri, me te ārai hīpoki,
EXO 39:35 me te āka o te whakaaturanga, me ōna amo, me te taupoki,
EXO 39:36 te tēpu me ōna oko katoa, me te taro aroaro,
EXO 39:37 te tūranga rama parakore me ōna rama, ngā rama rārangi, me ōna oko katoa, me te hinu mō te whakamārama,
EXO 39:38 te āta kōura, te hinu whakawahi, te whakakakara reka, te pā mō te whatitoka o te tapenākara,
EXO 39:39 te āta parāhi, me tōna pae kupenga parāhi, ōna amo me ōna oko katoa, te takotoranga wai me tōna tūranga,
EXO 39:40 ngā pā o te marae, ōna pou, me ōna tūranga pou, me te pā mō te kūwaha o te marae, ōna aho, me ōna titi, me ngā oko katoa mō ngā mahi o te tapenākara, mō te tēneti o te whakaminenga,
EXO 39:41 ngā kākahu minita mō ngā minitatanga ki te wāhi tapu, me ngā kākahu tapu mō Ārona tohunga, me ngā kākahu mō āna tama, ina minita.
EXO 39:42 Rite tonu ki ngā mea katoa i whakahaua e Ihowā ki a Mohi tā ngā tama a Īharaira mahinga i ngā mahi katoa.
EXO 39:43 Nā, ka tirohia iho e Mohi te mahi katoa, nā, rite tonu tā rātou mahi ki tā Ihowā i whakahau ai, i pērā anō rātou; ā, manaakitia ana rātou e Mohi.
EXO 40:1 Ā, i kōrero a Ihowā ki a Mohi, i mea:
EXO 40:2 “Hei te rā tuatahi o te marama tuatahi koe whakaara ai i te tapenākara o te tēneti o te whakaminenga.
EXO 40:3 Ā, me hoatu ki roto te āka o te whakaaturanga, ka hīpoki ai i te āka ki te ārai.
EXO 40:4 Me kawe anō te tēpu ki roto, ka āta whakatakoto ai i ngā mea e whakatakotoria ana ki runga; me kawe anō e koe te tūranga rama ki roto, ka tahu ai i ōna rama.
EXO 40:5 Me whakatū anō e koe te āta kōura mō te whakakakara ki mua o te āka o te whakaaturanga, ka whakairi ai i te pā o te whatitoka ki te tapenākara.
EXO 40:6 “Me whakatū anō e koe te āta mō te tahunga tinana ki mua o te whatitoka o te tapenākara o te tēneti o te whakaminenga.
EXO 40:7 Me whakatū anō te takotoranga wai ki te takiwā o te āta, o te tēneti o te whakaminenga, ka riringi wai ai ki roto.
EXO 40:8 Me whakatū anō te marae ā tawhio noa, ka whakairi ai i te pā ki te kūwaha o te marae.
EXO 40:9 “Nā, ka tango i te hinu whakawahi, ka whakawahi ai i te tapenākara me ngā mea katoa i roto, ka whakatapu ai i taua mea, i ōna mea katoa; ā, ka tapu.
EXO 40:10 Me whakawahi anō te āta mō te tahunga tinana me ōna oko katoa, me whakatapu anō te āta; ā, ka meinga hei āta tino tapu.
EXO 40:11 Me whakawahi anō te takotoranga wai me tōna tūranga, me whakatapu.
EXO 40:12 “Me kawe anō e koe a Ārona rātou ko āna tama ki te whatitoka o te tapenākara o te whakaminenga, ka horoi ai i a rātou ki te wai,
EXO 40:13 ka whakakākahu ai i ngā kākahu tapu ki a Ārona, ka whakawahi ai i a ia, ka whakatapu ai i a ia; ā, ka waiho ia hei tohunga māku.
EXO 40:14 Nā, me kawe mai āna tama, me whakakākahu ngā koti ki a rātou.
EXO 40:15 Me whakawahi, kia rite ki tāu whakawahinga i tō rātou pāpā, ā, ka meinga rātou hei tohunga māku. Ā, ka ai tō rātou whakawahinga hei whakatohunga i a rātou mō ake tonu atu, puta noa i ō rātou whakatupuranga.”
EXO 40:16 I pērā anō a Mohi; rite tonu tāna i mea ai ki ngā mea katoa i whakahaua e Ihowā ki a ia.
EXO 40:17 Nā, i te marama tuatahi o te rua o ngā tau, i te rā tuatahi o te marama ka whakaarahia te tapenākara.
EXO 40:18 I whakaarahia hoki e Mohi te tapenākara, i whakatakotoria ōna tūranga, i whakaarahia ōna papa, i kuhua ōna kaho, ā, whakaarahia ana ōna pou.
EXO 40:19 I hīpokina anō e ia te tēneti ki runga i te tapenākara, ā, makā iho ana te hīpoki o te tēneti ki runga ake, ko tā Ihowā hoki i whakahau ai ki a Mohi.
EXO 40:20 Nā, ka mau ia ki te whakaaturanga, ā, hoatu ana ki roto ki te āka, ā, kuhua ana ngā amo ki te taha o te āka, nā, ka makā iho te taupoki ki runga ki te āka.
EXO 40:21 Nā, ka maua e ia te āka ki roto ki te tapenākara, ā, whakairihia ake ana te ārai hīpoki, hei hīpoki mō te āka o te whakaaturanga; ko tā Ihowā hoki i whakahau ai ki a Mohi.
EXO 40:22 I whakatūria anō e ia te tēpu ki te tēneti o te whakaminenga, ki te taha whaka te raki o te tapenākara, ki waho mai o te ārai.
EXO 40:23 I whakarārangitia hoki te taro ki runga, ki te aroaro o Ihowā; ko tā Ihowā hoki i whakahau ai ki a Mohi.
EXO 40:24 I whakatūria anō e ia te tūranga rama ki te tēneti o te whakaminenga, ki te ritenga atu o te tēpu, ki te taha whaka te tonga o te tapenākara.
EXO 40:25 Ā, tahuna ana e ia ngā rama ki te aroaro o Ihowā; ko tā Ihowā i whakahau ai ki a Mohi.
EXO 40:26 I whakatūria hoki e ia te āta kōura ki te tēneti o te whakaminenga ki mua mai o te ārai.
EXO 40:27 Ā, tahuna ana e ia he whakakakara reka ki runga; ko tā Ihowā i whakahau ai ki a Mohi.
EXO 40:28 I whakairihia anō te pā mō te whatitoka o te tapenākara.
EXO 40:29 Ā, i whakatūria e ia te āta mō te tahunga tinana ki te whatitoka o te tapenākara o te tēneti o te whakaminenga, ā, whakaekea ana ki runga te tahunga tinana me te whakahere totokore; ko tā Ihowā i whakahau ai ki a Mohi.
EXO 40:30 Ā, i whakatūria e ia te takotoranga wai ki te takiwā o te āta, o te tēneti o te whakaminenga, ā, ringihia ana he wai ki roto hei horoi.
EXO 40:31 Ā, i horoia e Mohi, e Ārona hoki rātou ko āna tama, ō rātou ringa me ō rātou waewae ki reira;
EXO 40:32 i tō rātou haerenga ki roto ki te tēneti o te whakaminenga, i te mea rānei ka whakatata ki te āta, ka horoi rātou; ko tā Ihowā i whakahau ai ki a Mohi.
EXO 40:33 I whakatūria anō te marae o te tapenākara, o te āta ā tawhio noa, ā, whakairihia ana te pā o te kūwaha o te marae. Nā, ka oti te mahi i a Mohi.
EXO 40:34 Kātahi ka taupokina iho te tēneti o te whakaminenga e te kapua, ā, ka kī te tapenākara i te korōria o Ihowā.
EXO 40:35 Ā, kīhai i taea e Mohi te tomo ki te tēneti o te whakaminenga nō te mea e taungia iho ana e te kapua, e kī ana hoki te tapenākara i te korōria o Ihowā.
EXO 40:36 Ā, ka riro ake te kapua i te tapenākara, ka haere ngā tama a Īharaira i ō rātou haerenga katoa;
EXO 40:37 ki te mea ia kīhai i riro te kapua, kīhai i haere, ā taea noatia te rā i riro ake ai.
EXO 40:38 I runga hoki i te tapenākara te kapua o Ihowā i te awatea, ā, he ahi kei runga i te pō, i te tirohanga a te whare katoa o Īharaira, i ō rātou haerenga katoa.
LEV 1:1 Nā, ka karanga a Ihowā ki a Mohi, ka kōrero ki a ia i roto i te tapenākara o te whakaminenga, ka mea:
LEV 1:2 “Kōrero ki ngā tama a Īharaira, mea atu ki a rātou: Ki te kawea e tētahi tangata o koutou he whakahere ki a Ihowā, me kawe tā koutou whakahere i roto i ngā kararehe, arā i roto i ngā kau, i roto rānei i ngā hipi.
LEV 1:3 “Ki te mea he tahunga tinana tāna whakahere nō ngā kau, me tāpae e ia he toa, he kohakore; ka tuku ai ki te whatitoka o te tapenākara o te whakaminenga, hei mea e manakohia ai ia i te aroaro o Ihowā.
LEV 1:4 Ā, me popoki tōna ringa ki te pane o te tahunga tinana; ā, ka manakohia tāna, hei whakamārie mōna.
LEV 1:5 Nā, me patu te kau ki te aroaro o Ihowā; ā, me kawe te toto e ngā tohunga, e ngā tama a Ārona, me tāuhiuhi te toto ki te āta ā tawhio noa, ki tērā i te whatitoka o te tapenākara o te whakaminenga.
LEV 1:6 Nā, me tīhore e ia te tahunga tinana, ā, me tapatapahi tēnei wāhi ōna, tēnei wāhi ōna.
LEV 1:7 Nā, me maka he ahi e ngā tama a Ārona tohunga ki runga ki te āta, me whakapai hoki ngā wahie ki runga ki te ahi.
LEV 1:8 Nā, ka whakarārangi ai ngā tohunga, ngā tama a Ārona, i ngā pīhi, te pane me te ngako, ki ngā wahie o te ahi i te āta.
LEV 1:9 Ko ōna whēkau ia, me ōna waewae, me horoi ki te wai, ka tahu katoa ai te tohunga ki runga ki te āta hei tahunga tinana, hei whakahere ahi, hei kakara reka ki a Ihowā.
LEV 1:10 “Nā, nō te kāhui tāna whakahere nō ngā hipi, nō ngā koati rānei, hei tahunga tinana; me kawe e ia he toa, he mea kohakore,
LEV 1:11 ka patu ai ki te taha ki te raki o te āta, ki te aroaro o Ihowā; ā, mā ngā tohunga, mā ngā tama a Ārona, e tāuhiuhi ōna toto ki te āta ā tawhio noa.
LEV 1:12 Nā, ka tapatapahi ai ia he wāhi, he wāhi, tōna pane, tōna ngako; ā, mā te tohunga e whakarārangi ki ngā wahie o te ahi i runga i te āta.
LEV 1:13 Ko ngā whēkau ia, me ngā waewae, me horoi ki te wai; ā, ka kawe katoa ai te tohunga, ka tahu ai ki te āta. He tahunga tinana hoki, he whakahere ahi, he kakara reka ki a Ihowā.
LEV 1:14 “Nā, mehemea he tahunga tinana nō ngā manu tāna whakahere ki a Ihowā, nā, me kawe e ia tāna whakahere i roto i ngā kūkupa i roto rānei i ngā pī kūkupa.
LEV 1:15 Ā, mā te tohunga e kawe ki te āta, e whakawiri atu tōna pane, ka tahu ai ki runga ki te āta; ā, ko ōna toto me tuku kia heke ki te taha o te āta.
LEV 1:16 Ā, ko tōna puku me tōna paru me tango, ā, ka makā ki te taha ki te rāwhiti o te āta, ki te wāhi o ngā pungarehu.
LEV 1:17 Nā, me hahae e ia mā ōna parirau, otiia kaua e motuhia rawatia; ā, mā te tohunga e tahu ki runga ki te āta, ki ngā wahie o te ahi. He tahunga tinana tēnā, he whakahere ahi, he kakara reka ki a Ihowā.”
LEV 2:1 “Ā, ki te kawea e tētahi he whakahere totokore ki a Ihowā, hei te parāoa pai he whakahere māna; ā, me riringi e ia he hinu ki runga ki taua mea, ka maka hoki i te parakihe ki runga;
LEV 2:2 ā, ka kawe ai ia ki ngā tohunga, ki ngā tama a Ārona. Nā, me ao e ia i roto i taua mea, kia kī tōna ringa i te parāoa pai, i te hinu, me te parakihe katoa hoki; nā, ka tahu te tohunga i te whakamahara o taua mea ki te āta, hei whakahere ahi, hei kakara reka ki a Ihowā.
LEV 2:3 Ā, ko te toenga o te whakahere totokore, mā Ārona rātou ko āna tama; he mea tino tapu tēnā i roto i ngā whakahere ahi a Ihowā.
LEV 2:4 “Ā, ki te kawea e koe hei whakahere he whakahere totokore i tunua ki te oumu, hei ngā keke parāoa, hei ngā mea rēwenakore, me kōnatunatu ki te hinu, hei ngā keke angiangi rānei kāhore nei he rēwena, he mea pani ki te hinu.
LEV 2:5 Ā, ki te mea he whakahere totokore te whakahere, he mea i tunua ki te pāraharaha, hei te mea parāoa pai, kīhai nei i rēwenatia, kua oti nei te konatu ki te hinu.
LEV 2:6 Me whatiwhati e koe, ka riringi ai ki te hinu; he whakahere totokore tēnā.
LEV 2:7 Nā, mehemea he whakahere totokore tāu whakahere, he mea i parāipanatia, me hanga ki te parāoa, ki te hinu.
LEV 2:8 Ā, me kawe e koe te whakahere totokore, i hangā ki ēnei mea, ki a Ihowā; ā, ka tukua atu ki te tohunga, nā māna e mau atu ki te āta.
LEV 2:9 Nā, ka tangohia e te tohunga i roto i te whakahere totokore te whakamahara o taua mea, ka tahu ai ki te āta; hei whakahere ahi, hei kakara reka ki a Ihowā.
LEV 2:10 Ā, mā Ārona rātou ko āna tama te toenga o te whakahere totokore; he mea tino tapu tēnā i roto i ngā whakahere ahi a Ihowā.
LEV 2:11 “Kei hangā ki te rēwena tētahi whakahere totokore e kawea ana e koutou mā Ihowā; kei tahuna hoki e koutou he rēwena, he honi rānei, i roto i tētahi o ngā whakahere ahi a Ihowā.
LEV 2:12 Nā, hei whakahere tūāpora, me whakahere ēnā mā Ihowā; otiia e kore e tahuna ki te āta hei kakara reka.
LEV 2:13 Me kīnaki anō ki te tote āu whakahere totokore katoa ina whakaherea. Kei whakamutua hoki te tote o te kawenata a tōu Atua mō tāu whakahere totokore; me whakahere he tote e koe ki runga i āu whakahere katoa.
LEV 2:14 “Nā, mehemea he whakahere tūāpora tāu whakahere totokore ki a Ihowā, hei te wīti hou, i whakamaroketia ki te ahi, hei te wīti i patua i roto i ngā puku hou, tāu whakahere totokore o āu tūāpora.
LEV 2:15 Me riringi anō he hinu ki taua mea, me whakatakoto hoki he parakihe ki runga; he whakahere totokore tēnā.
LEV 2:16 Nā, me tahu e te tohunga te whakamahara o taua mea, arā tētahi wāhi o te wīti i patua, o te hinu, me te parakihe katoa; hei whakahere ahi taua mea ki a Ihowā.”
LEV 3:1 “Nā, mehemea he patunga mō te pai tāna e tāpae ai; ki te mea nō ngā kau tāna whakahere, ahakoa toa, ahakoa uha, kia kohakore tāna e tuku ai ki te aroaro o Ihowā.
LEV 3:2 Nā, ka popoki tōna ringa ki te mātenga o tāna whakahere, ka patu ai ki te whatitoka o te tapenākara o te whakaminenga. Nā, ka tāuhiuhia te toto e ngā tohunga, e ngā tama a Ārona, ki te āta ā tawhio noa.
LEV 3:3 Nā, me tāpae e ia he whakahere ahi ki a Ihowā i roto i te patunga mō te pai; ko te ngako e whiwhiwhiwhi ana ki ngā whēkau, me te ngako katoa o ngā whēkau,
LEV 3:4 me ngā whatukuhu e rua, me tō reira ngako, tērā i te hope, me te taupā i te ate, me ngā whatukuhu, me tango tērā e ia.
LEV 3:5 Ā, me tahu e ngā tama a Ārona ki te āta, ki runga i te tahunga tinana i runga i ngā wahie o te ahi. He whakahere ahi tēnā, he kakara reka ki a Ihowā.
LEV 3:6 “Ā, ki te mea nō ngā hipi tāna e tāpae ai ki a Ihowā hei patunga mō te pai; he toa, he uha rānei, kei whai koha tāna e tuku ai.
LEV 3:7 Ki te tāpaea e ia he reme hei whakahere māna, me tāpae ki te aroaro o Ihowā.
LEV 3:8 Me popoki hoki tōna ringa ki te pane o tāna whakahere, ka patu ai ki mua i te tapenākara o te whakaminenga. Ā, ka tāuhiuhia ōna toto e ngā tama a Ārona ki te āta ā tawhio noa.
LEV 3:9 Me tāpae anō e ia tētahi wāhi o te patunga mō te pai hei whakahere ahi ki a Ihowā; ko tōna ngako me te hiawero katoa, kia tino tata ki te tiki tāna tapahanga; ā, ko te ngako e whiwhiwhiwhi ana ki ngā whēkau, me te ngako katoa o ngā whēkau,
LEV 3:10 me ngā whatukuhu e rua, me tō reira taupā, tērā i te hope, me te taupā o te ate, me ngā whatukuhu, me tango tērā e ia.
LEV 3:11 Ā, mā te tohunga e tahu ki runga ki te āta; he kai hoki nō tā Ihowā whakahere ahi.
LEV 3:12 “Ā, ki te mea he koati tāna whakahere, me tāpae ki te aroaro o Ihowā.
LEV 3:13 Ā, ka popoki tōna ringa ki tōna pane, ka patu ai ki mua o te tapenākara o te whakaminenga; ā, mā ngā tama a Ārona e tāuhiuhi ōna toto ki te āta ā tawhio noa.
LEV 3:14 “Ā, me tāpae atu e ia tētahi wāhi ōna hei whakahere ahi māna ki a Ihowā; ko te ngako e whiwhiwhiwhi ana ki ngā whēkau, me te ngako katoa o ngā whēkau,
LEV 3:15 me ngā whatukuhu e rua, me tō reira ngako, tērā i te hope, me te taupā i te ate, me ngā whatukuhu, me tango tērā e ia.
LEV 3:16 Ā, me tahu e te tohunga ki te āta he kai tēnā nō te whakahere ahi, hei kakara reka. Ko te ngako katoa mā Ihowā.
LEV 3:17 “Hei tikanga mau tonu tēnei mō ō koutou whakatupuranga, i ō koutou nohoanga katoa, kia kaua e kainga tētahi ngako, toto rānei, e koutou.”
LEV 4:1 I kōrero anō a Ihowā ki a Mohi, i mea,
LEV 4:2 “Kōrero ki ngā tama a Īharaira, mea atu: Ki te pōhēhē tētahi tangata, ā, ka hara ki tētahi o ngā mea i whakahaua e Ihowā kia kaua e meatia, ā, ka mea i tētahi o aua mea.
LEV 4:3 “Ki te hara te tohunga i whakawahia, e tau ai he hē ki runga ki te iwi; nā, me whakahere e ia ki a Ihowā mō tōna hara i hara ai ia tētahi pūru, hei te kūao kohakore, hei whakahere hara.
LEV 4:4 Nā, me kawe e ia te pūru ki te whatitoka o te tapenākara o te whakaminenga, ki te aroaro o Ihowā; ā, ka popoki i tōna ringa ki te mātenga o te pūru, ka patu ai te pūru ki te aroaro o Ihowā.
LEV 4:5 Nā, me tango e te tohunga i whakawahia tētahi wāhi o ngā toto o te pūru, ā, ka kawe ki te tapenākara o te whakaminenga.
LEV 4:6 Ā, ka tou te tohunga i tōna maihao ki te toto, ā, kia whitu āna tāuhiuhinga i te toto ki te aroaro o Ihowā, ki mua o te ārai o te wāhi tapu.
LEV 4:7 Me pani anō e te tohunga tētahi wāhi o ngā toto ki ngā haona o te āta whakakakara reka, ki te aroaro o Ihowā, ki tērā i te tapenākara o te whakaminenga. Ka riringi ai i ngā toto katoa o te pūru ki te tūranga o te āta mō te tahunga tinana, ki tērā i te whatitoka o te tapenākara o te whakaminenga.
LEV 4:8 Ā, me tango e ia ngā ngako katoa o te pūru whakahere hara; te ngako e whiwhiwhiwhi ana ki ngā whēkau, me ngā ngako katoa o ngā whēkau,
LEV 4:9 me ngā whatukuhu e rua, me tō reira ngako, tērā i te hope, me te taupā o te ate, me ngā whatukuhu, me tango tērā e ia,
LEV 4:10 kia rite ki te tangohanga o tō te pūru o te patunga mō te pai. Ā, me tahu e te tohunga ki runga ki te āta mō te tahunga tinana.
LEV 4:11 Ko te hiako ia o te pūru, ko ōna kikokiko katoa, ko tōna pane, ko ōna i waewae, ko ōna whēkau, me tōna paru –
LEV 4:12 arā, ko te pūru katoa hoki – me kawe e ia ki waho o te puni, ki tētahi wāhi pokekore, ki te wāhi e ringihia ai ngā pungarehu, ka tahu ai ki te rākau ki te ahi; hei te ringihanga pungarehu tahu ai.
LEV 4:13 “Ā, ki te pōhēhē te whakaminenga katoa o Īharaira, ā, ka hara, ā, ka ngaro taua mea i ngā kanohi o te whakaminenga, ā, ka tika kē i tētahi o ngā whakahau a Ihowā tētahi o ā rātou mahi, he mea e kore e tika kia meatia, ā, ka whai hara rātou;
LEV 4:14 ā, ka kitea te hara i hara ai rātou, kātahi ka whakaherea e te whakaminenga tētahi pūru kūao mō te hara, me kawe hoki ki mua o te tapenākara o te whakaminenga.
LEV 4:15 Ka popoki ai ngā ringa o ngā kaumātua o te whakaminenga ki te pane o te pūru ki te aroaro o Ihowā; ā, hei te aroaro o Ihowā patu ai i te pūru.
LEV 4:16 “Ā, mā te tohunga i whakawahia e kawe tētahi wāhi o ngā toto o te pūru ki te tapenākara o te whakaminenga;
LEV 4:17 ka tou ai te tohunga i tōna maihao ki te toto, ā, kia whitu āna tāuhiuhinga ki te aroaro o Ihowā ki mua o te ārai.
LEV 4:18 Me pani anō e ia tētahi wāhi o te toto ki ngā haona o te āta i te aroaro o Ihowā, ki tērā i te tapenākara o te whakaminenga, ka riringi ai i ngā toto katoa ki te tūranga o te āta tahunga tinana, ki tērā i te whatitoka o te tapenākara o te whakaminenga.
LEV 4:19 Me tango anō e ia ōna ngako katoa, ka tahu ai ki runga ki te āta.
LEV 4:20 Ko tāna tēnā e mea ai ki te pūru; kia rite ki tāna i mea ai ki te pūru whakahere hara, kia pērā tāna meatanga ki tēnei; ā, me mea e te tohunga he whakamārie mō rātou, ā, ka murua tō rātou hara.
LEV 4:21 Ā, me kawe e ia te pūru ki waho o te puni, ka tahu, ka pērā anō me ia i tahu i te pūru tuatahi; ko te whakahere hara tēnā mō te whakaminenga.
LEV 4:22 “Ki te hara tētahi rangatira, ā, ka mahi i runga i te pōhēhē i tētahi o ngā mea i whakahaua e Ihowā, e tōna Atua, kia kaua e mahia, ā, ka whai hara,
LEV 4:23 ki te mōhiotia e ia tōna hara i hara ai, me kawe tāna whakahere, he koati, hei te toa, hei te mea kohakore.
LEV 4:24 Ā, ka popoki tōna ringa ki runga ki te mātenga o te koati, ka patu ai ki te wāhi e patua nei te tahunga tinana ki te aroaro o Ihowā; he whakahere hara tēnā.
LEV 4:25 Ā, me tango e te tohunga tētahi wāhi o te toto o te whakahere hara ki tōna maihao, ka pani ai ki ngā haona o te āta tahunga tinana, me riringi anō ōna toto ki te tūranga o te āta tahunga tinana.
LEV 4:26 Nā, me tahu e ia ōna ngako katoa ki te āta, me pērā me te ngako o ngā patunga mō te pai; ā, ka whakamārie te tohunga mōna, mō tōna hara, ā, ka murua.
LEV 4:27 “Ā, ki te pōhēhē tētahi tangata noa atu, ā, ka hara, nōna i mea i tētahi mea e tika kē ana i tētahi o ngā whakahau a Ihowā, he mea e kore e tika kia meatia, ā, ka whai hara;
LEV 4:28 ki te mōhiotia e ia tōna hara i hara ai, me kawe e ia tāna whakahere, he koati, he uha, he kohakore, mō tōna hara i hara ai.
LEV 4:29 Ā, ka popoki tōna ringa ki te mātenga o te whakahere hara, ka patu ai i te whakahere hara ki te wāhi mō te tahunga tinana.
LEV 4:30 Nā, ka tango te tohunga i tētahi wāhi o ōna toto ki tōna maihao, ka pani ai ki ngā haona o te āta tahunga tinana, ka riringi ai i ōna toto katoa ki te tūranga o te āta.
LEV 4:31 Me tango anō e ia ōna ngako katoa, me pērā me te ngako e tangohia ana i ngā patunga mō te pai; ā, me tahu e te tohunga ki runga ki te āta hei kakara reka ki a Ihowā. Nā, ka whakamārie te tohunga mōna, ā, ka murua tōna.
LEV 4:32 “Ā, ki te mea he reme tāna whakahere e kawea ana e ia mō te hara, me kawe e ia hei te uha, hei te mea kohakore.
LEV 4:33 Nā, ka popoki tōna ringa ki te mātenga o te whakahere hara, ā, ka patua hei whakahere hara ki te wāhi e patua nei e rātou te tahunga tinana.
LEV 4:34 Nā, me tango e te tohunga tētahi wāhi o te toto o te whakahere hara ki tōna maihao, ka pani ai ki ngā haona o te āta tahunga tinana, me riringi anō ōna toto katoa ki te tūranga o te āta.
LEV 4:35 Me tango anō e ia ōna ngako katoa, kia rite ki te tangohanga o te ngako o te reme o ngā patunga mō te pai; ka tahu ai e te tohunga ki runga ki te āta, ki runga ki ngā whakahere ahi ki a Ihowā. Nā, ka whakamārie te tohunga mō tōna hara i hara ai, ā, ka murua.”
LEV 5:1 “Ki te hara tētahi, mōna i rongo ki te reo whakaoati, he kaiwhakaatu nei ia mō tāna i kite ai, i mōhio ai rānei, ki te kāhore e whakaaturia e ia, nā, me waha e ia tōna hara.
LEV 5:2 “Ki te pā tētahi ki te mea poke – ki te tinana rānei o te kīrehe poke, ki te tinana rānei o te kararehe poke, ki te tinana rānei o ngā mea ngōki – arā o ngā mea poke, ā, e huna ana i a ia, ā, ka poke ia, nā, ka whai hara ia.
LEV 5:3 “Ki te pā rānei ia ki te poke tangata, ki ngā tini poke e poke ai te tangata, ā, ka huna i a ia; ina mōhiotia e ia, ka whai hara ia.
LEV 5:4 “Ki te oati rānei tētahi, he mea puta ohorere i ōna ngutu, kia mahi i te kino, i te pai rānei, i ngā tini mea rānei e puaki ohorere mai i te tangata ina oati, ā, e huna ana i a ia; ina mōhiotia e ia, nā, ka whai hara ia i tētahi o ēnei mea.
LEV 5:5 “Ā, ki te mea kua whai hara ia i tētahi o ēnei mea, nā, me whāki tōna hara i taua mea;
LEV 5:6 ā, me kawe e ia tāna whakahere mō te hē ki a Ihowā, mō tōna hara i hara ai, he uha nō te kāhui, he reme, he kūao koati rānei, hei whakahere hara; ā, mā te tohunga e whakamārie mōna, mō tōna hara.
LEV 5:7 “Ā, ki te kāhore e taea e ia i ōna rawa he reme, me kawe e ia ki a Ihowā mō tōna hē i hē ai, kia rua ngā kūkupa, kia rua rānei ngā pī kūkupa; ko tētahi hei whakahere hara, ko tētahi hei tahunga tinana.
LEV 5:8 Me kawe rāua e ia ki te tohunga, ka whakahere ai e ia, ko te mea mō te whakahere hara ki mua, ka kikini ai i tōna pane i te ritenga o tōna kakī, otiia kaua e motuhia rawatia.
LEV 5:9 Nā, ka tāuhiuhi ai ia i tētahi wāhi o ngā toto o te whakahere hara ki te taha o te āta; ka whakatē ai i te toenga o te toto ki te tūranga o te āta; he whakahere hara tēnā.
LEV 5:10 Ā, ko te rua me tuku hei tahunga tinana, kia rite ki te tikanga; ā, ka whakamārie te tohunga mōna, mō tōna hara i hara ai, ā, ka murua.
LEV 5:11 “Ā, ki te kāhore e taea e ia i ōna rawa te kawe ngā kūkupa e rua, ngā pī kūkupa rānei e rua, nā, me kawe tāna whakahere e te tangata i hara, te whakatekau epa parāoa, hei whakahere hara; kaua e meatia ki te hinu, kaua anō e meatia he parakihe ki runga; he whakahere hara hoki.
LEV 5:12 Nā, me kawe e ia ki te tohunga, ā, ka aohia ake e te tohunga, kia kī tōna ringa, he whakamahara nō taua mea, ka tahu ai ki runga ki te āta, ki runga ki ngā whakahere ahi ki a Ihowā; he whakahere hara tēnā.
LEV 5:13 Ā, ka whakamārie te tohunga mōna, mō tōna hara i hara ai ki tētahi o ēnei mea, ā, ka murua. Ā, mā te tohunga te toenga, ānō he whakahere totokore.”
LEV 5:14 I kōrero anō a Ihowā ki a Mohi, i mea:
LEV 5:15 “Ki te kino te mahi a tētahi, he hara pōhēhē, ki ngā mea tapu a Ihowā; nā, me kawe e ia tāna whakahere mō te hē ki a Ihowā, kia kotahi hipi toa, hei te mea kohakore, nō te kāhui hipi, me whakarite anō e koe ōna utu ki te hekere hiriwa, hekere o te wāhi tapu, hei whakahere mō te hē.
LEV 5:16 Ka utu ai i tōna hara ki te mea tapu, me tāpiri anō ki te wāhi whakarima, ka hōmai ki te tohunga; ā, ka whakamārie te tohunga mōna ki te hipi toa e whakaherea ana mō te hē, ā, ka murua tōna.
LEV 5:17 “Ā, ki te hara tētahi, ki te poka kē i tētahi o ngā whakahau a Ihowā, he mahi poka noa; ahakoa e kore e mōhiotia e ia, kua hara ia, ā, ka waha ia i tōna kino.
LEV 5:18 Ā, me kawe e ia he hipi toa ki te tohunga, he kohakore, nō te kāhui, kei tau te utu, hei whakahere mō te hē. Ā, ka whakamārie te tohunga mōna, mō tōna pōhēhē i pōhēhē ai ia, ā, kīhai nei i mātau, ā, ka murua tōna hē.
LEV 5:19 He whakahere tēnā mō te hē; he pono tōna hē ki a Ihowā.”
LEV 6:1 I kōrero anō a Ihowā ki a Mohi, i mea:
LEV 6:2 “Ki te hara tētahi, ā, ka hē tāna ki a Ihowā, ā, ka teka hoki ki tōna hoa, he mea i tukua ki a ia kia tiakina, he whakaaetanga rānei, he mea rānei i pāhuatia, he whakahaere hē rānei ki tōna hoa;
LEV 6:3 i kitea rānei e ia te mea i ngaro, ā, ka kōrero teka ki taua mea, ka oati teka; i tētahi rānei o ēnei tini mea e mea ai te tangata, e whai hara ai.
LEV 6:4 “Nā, kua hara nei ia, kua hē, me whakahoki e ia te mea i pāhuatia, te mea rānei i murua e ia, te mea rānei i waiho ki a ia kia tiakina, te mea ngaro rānei i kitea e ia,
LEV 6:5 ngā mea katoa rānei i oati teka ai ia. Me utu e ia taua mea kia tino rite, ka tāpiri anō ki te wāhi whakarima; me hōmai e ia ki te tangata nōna, i te rā e kitea ai kua hara ia.
LEV 6:6 Ā, me kawe e ia tāna whakahere mō te hē ki a Ihowā, he hipi toa, he kohakore nō te kāhui, kei tau te utu, hei whakahere mō te hē, ki te tohunga.
LEV 6:7 Ā, mā te tohunga e whakamārie mōna ki te aroaro o Ihowā, ā, ka murua te hē o tāna i ngā mea katoa i mea ai ia, i hara ai.”
LEV 6:8 I kōrero anō a Ihowā ki a Mohi, i mea:
LEV 6:9 “Whakahaua a Ārona rātou ko āna tama, mea atu: Ko te ture tēnei mō te tahunga tinana. Me uta te tahunga tinana ki runga ki te takuahi o te āta ā pau noa te pō, taea noatia te ata; kia kā tonu hoki te ahi o te āta ki runga ki a ia.
LEV 6:10 Ā, me kākahu e te tohunga tōna kākahu rīnena, me mau anō ōna tarau rīnena ki tōna kiri, ka kohi ai i ngā pungarehu i pau tahi me te tahunga tinana i te ahi i runga i te āta, ā, ka waiho i te taha o te āta.
LEV 6:11 Nā, ka whakarere atu ia i ōna kākahu, ka kākahu i ētahi atu kākahu, ā, ka mau i ngā pungarehu ki waho i te puni, ki te wāhi pokekore.
LEV 6:12 Kia kā tonu anō te ahi o te āta, kei pirau. Me whakaū anō e te tohunga ngā wahie ki runga, i tēnei ata, i tēnei ata; me āta whakatakoto anō e ia te tahunga tinana ki runga, ā, me tahu e ia te ngako o ngā whakahere mō te pai ki runga.
LEV 6:13 Kia kā tonu te ahi i runga i te āta; kei pirau.”
LEV 6:14 “Nā, ko te ture tēnei mō te whakahere totokore. Mā ngā tama a Ārona e tāpae ki te aroaro o Ihowā, ki mua i te āta.
LEV 6:15 Me ao e ia, kia kī tōna ringa, i te parāoa pai o te whakahere totokore, i te hinu hoki, me te parakihe katoa anō hoki i runga i te whakahere totokore, ka tahu ai ki runga ki te āta hei kakara reka, hei whakamahara mō taua mea ki a Ihowā.
LEV 6:16 Ā, mā Ārona rātou ko āna tama e kai te toenga o taua mea; me kai kore rēwena ki te wāhi tapu; hei te marae o te tapenākara o te whakaminenga rātou kai ai.
LEV 6:17 E kore e tunua rēwenatia; kua hoatu e ahau taua mea hei wāhi mā rātou i roto i āku whakahere ahi. He tino tapu tēnā, rite tonu anō ki te whakahere hara, ki te whakahere mō te hē.
LEV 6:18 Hei kai tēnā mā ngā tāne katoa o ngā tama a Ārona, hei wāhi pūmau mā rātou puta noa i ō koutou whakatupuranga o ngā whakahere ahi a Ihowā; ka tapu ngā tāngata katoa e pā ana ki ēnā.”
LEV 6:19 I kōrero anō a Ihowā ki a Mohi, i mea:
LEV 6:20 “Ko te whakahere tēnei mā Ārona rātou ko āna tama, ko tā rātou e whakahere ai ki a Ihowā i te rā e whakawahia ai ia: ko te whakatekau epa parāoa hei whakahere totokore, hei mea mau tonu, ko tētahi wāhi ōna i te ata, ko tētahi wāhi i te ahiahi.
LEV 6:21 Me hanga ki te hinu ki runga i te pāraharaha; ā, ka oti te tunu, ka kawe ki roto; ā, ka whakahere i ngā wāhi i tunua o te whakahere totokore, hei kakara reka ki a Ihowā.
LEV 6:22 Mā te tohunga i whakawahia i roto i āna tama hei whakakapi mōna e mahi; he tikanga pūmau, me tahu katoa ki a Ihowā.
LEV 6:23 Me tahu katoa ngā whakahere totokore katoa a te tohunga; kaua hei kainga.”
LEV 6:24 I kōrero anō a Ihowā ki a Mohi, i mea:
LEV 6:25 “Kōrero ki a Ārona rātou ko āna tama, mea atu: Ko te ture tēnei mō te whakahere hara. Ko te wāhi e patua ai te tahunga tinana, ko reira patu ai i te whakahere hara, ki te aroaro o Ihowā; he tino tapu tēnā.
LEV 6:26 Ko te tohunga nāna i whakahere taua mea mō te hara, māna e kai; me kai ki te wāhi tapu, ki te marae o te tapenākara o te whakaminenga.
LEV 6:27 Ki te pā tētahi mea ki tōna kikokiko, ka tapu; ā, ki te maringi tētahi wāhi o ōna toto ki tētahi kākahu, me horoi ki te wāhi tapu te mea i maringi nei taua toto ki runga.
LEV 6:28 Ko te oko oneone ia i kōhuatia ai me wāhi; ā, ki te mea i kōhuatia ki te oko parāhi, nā, me mukumuku, ka horoi ai ki te wai.
LEV 6:29 Mā ngā tāne katoa i roto i ngā tohunga e kai; he mea tino tapu.
LEV 6:30 Kaua hei kainga te whakahere hara, e kawea nei tētahi wāhi o ōna toto ki roto ki te tapenākara o te whakaminenga hei whakamārie ki te wāhi tapu; me tahu ki te ahi.”
LEV 7:1 “Nā, ko te ture tēnei mō te whakahere mō te hē; he tino tapu tēnā.
LEV 7:2 Hei te wāhi e patua ai te tahunga tinana patua ai e rātou te whakahere mō te hē; me tāuhiuhi anō e ia ōna toto ki te āta, ā tawhio noa.
LEV 7:3 Me whakahere anō e ia ōna ngako katoa; ko te hiawero mōmona me te ngako e whiwhiwhiwhi ana ki ngā whēkau,
LEV 7:4 me ngā whatukuhu e rua, me tō reira ngako, tērā i te hope, me te taupā i te ate, me ngā whatukuhu, me tango tērā e ia.
LEV 7:5 Ā, mā te tohunga e tahu ki runga ki te āta, hei whakahere ahi ki a Ihowā; he whakahere mō te hē tēnā.
LEV 7:6 Mā ngā tāne katoa i roto i ngā tohunga e kai tēnā; me kai ki te wāhi tapu; he mea tapu rawa tēnā.
LEV 7:7 “Ko te whakahere hara, ko te whakahere mō te hē, rite tonu rāua. Kotahi anō te ture mō ēnā; ka riro mā te tohunga nāna tēnā i mea hei whakamārie.
LEV 7:8 Ā, ko te tohunga nāna i whakahere te tahunga tinana a tētahi tangata, mā taua tohunga anō te hiako o te tahunga tinana i whakaherea e ia.
LEV 7:9 Me te whakahere totokore katoa, ngā mea e tunua ana ki te oumu, me ngā mea katoa e parāipanatia ana, e meatia ana rānei ki te pāraharaha, mā te tohunga ēnā nāna i whakahere.
LEV 7:10 Ko ngā whakahere totokore katoa ia i kōnatunatua ki te hinu, ngā mea maroke rānei, mā ngā tama katoa a Ārona; kia rite te wāhi mā tētahi, mā tētahi.”
LEV 7:11 “Ā, ko te ture tēnei mō te patunga mō te pai e tāpaea ana ki a Ihowā.
LEV 7:12 “Ki te whakaherea hei whakawhetai, nā, me tāpae tahi me te patunga whakawhetai ngā keke rēwenakore i kōnatunatua ki te hinu, me ētahi mea angiangi anō hoki, hei ngā mea rēwenakore i pania ki te hinu, me ētahi keke parāoa pai i kōnatunatua ki te hinu, ā, tunua iho.
LEV 7:13 Me tāpae anō e ia, hei tāpiri mō ngā keke, ētahi taro rēwena hei whakahere māna, i runga anō i te patunga whakawhetai o āna whakahere mō te pai.
LEV 7:14 Ā, me tāpae tētahi o tēnā, arā o te whakahere katoa, hei whakahere hapahapai ki a Ihowā, ā, mā te tohunga tēnā, mā te kaitāuhiuhi o te toto o ngā whakahere mō te pai.
LEV 7:15 Nā, ko te kikokiko o āna whakahere mō te pai, arā whakawhetai, me kai i te rā anō i tāpaea ai; kei whakatoea tētahi wāhi mō te ata.
LEV 7:16 “Ki te mea ia he kupu taurangi te patunga o tāna whakahere, he whakahere noa ake rānei, me kai i te rā anō i whakaherea ai e ia tāna patunga; ā, i te aonga ake me kai te toenga.
LEV 7:17 Ko te wāhi ia o te kikokiko o te patunga i toe ki te rā tuatoru, me tahu ki te ahi.
LEV 7:18 Nā, ki te kainga he kikokiko o te patunga o āna whakahere mō te pai i te toru o ngā rā, e kore e manakohia, e kore anō e kīia nā te kaiwhakahere. Ka waiho hei mea whakarihariha, ā, ka waha tōna kino e te tangata nāna i kai.
LEV 7:19 “E kore anō hoki e kainga te kikokiko i pā ki te mea poke; me tahu ki te ahi. Ko te kikokiko ia me kai e ngā tāngata pokekore katoa,
LEV 7:20 ki te kainga ia e tētahi te kikokiko o te patunga mō te pai a Ihowā, me te mau anō tōna poke, ka hātepea atu tēnā wairua i roto i tōna iwi.
LEV 7:21 Me te tangata anō i pā ki te mea poke – ki te poke tangata, ki te kararehe poke rānei, ki tētahi poke whakarihariha rānei – ā, ka kai i te kiko o te patunga mō te pai a Ihowā, ka hātepea atu taua wairua i roto i tōna iwi.”
LEV 7:22 I kōrero anō a Ihowā ki a Mohi, i mea:
LEV 7:23 “Kōrero ki ngā tama a Īharaira, mea atu: Kei kainga tētahi ngako, o te kau, o te hipi, o te koati.
LEV 7:24 Me te ngako o te mea mate māori, me te ngako o te mea i haea e te kīrehe, ka waiho mō ngā tini meatanga kē atu; e kore rawa ia e kainga.
LEV 7:25 Ā, ko te tangata e kai ana i te ngako o ngā kararehe, e meinga nei hei whakahere ahi mā Ihowā, inā, ka hātepea atu i roto i tōna iwi taua wairua nāna nei i kai.
LEV 7:26 Kaua anō te toto e kainga, o te manu, o te kararehe rānei, i ō koutou nohoanga katoa.
LEV 7:27 Ki te kai tētahi i te toto, ka hātepea atu taua wairua i roto i tōna iwi.”
LEV 7:28 I kōrero anō a Ihowā ki a Mohi, i mea:
LEV 7:29 “Kī atu ki ngā tama a Īharaira, mea atu: Ki te tāpae tētahi i tāna patunga mō te pai ki a Ihowā, me kawe tāna whakahere ki a Ihowā, he wāhi nō tāna patunga mō te pai,
LEV 7:30 mā ōna ringa ake e kawe ngā whakahere ahi mā Ihowā; ko te ngako me te uma, me kawe tēnā e ia kia poipoia ai te uma hei whakahere poipoi ki te aroaro o Ihowā.
LEV 7:31 Ā, me tahu te ngako e te tohunga ki runga ki te āta; ko te uma ia mā Ārona rātou ko āna tama.
LEV 7:32 Ko te hūhā matau o ā koutou patunga mō te pai me hoatu ki te tohunga, hei whakahere hapahapai.
LEV 7:33 Me waiho te hūhā matau hei wāhi mā te tama a Ārona, māna nei e tāpae te toto me te ngako o ngā whakahere mō te pai.
LEV 7:34 Kua tangohia nei hoki e ahau i ngā tama a Īharaira te uma poipoi me te peke hapahapai, i roto i ā rātou patunga mō te pai, ā, kua hoatu ki te tohunga ki a Ārona rātou ko āna tama, i roto i te wāhi a ngā tama a Īharaira; he tikanga tūturu tēnei.”
LEV 7:35 Nō te whakawahinga tēnei o Ārona, nō te whakawahinga hoki o āna tama, nō ngā whakahere ahi a Ihowā, o te rā i meinga ai rātou e ia kia whakatata ki a Ihowā, ki te mahi tohunga.
LEV 7:36 Ko ngā mea i whakahaua mai e Ihowā kia hōmai ki a rātou e ngā tama a Īharaira i te rā i whakawahia ai rātou e ia. Hei tikanga mau tonu tēnei i ō rātou whakatupuranga.
LEV 7:37 Ko te ture tēnei mō te tahunga tinana, mō te whakahere totokore, mō te whakahere hara, mō te whakahere mō te hē, mō ngā whakatohungatanga, mō ngā patunga mō te pai.
LEV 7:38 Ko tā Ihowā hoki i whakahau nei i Maunga Hinai ki a Mohi, i te rā i whakahaua ai e ia ngā tama a Īharaira kia tāpaea ā rātou whakahere ki a Ihowā, i te koraha o Hinai.
LEV 8:1 I kōrero anō a Ihowā ki a Mohi, i mea,
LEV 8:2 “Tīkina atu a Ārona rātou tahi ko āna tama, me ngā kākahu, me te hinu whakawahi, me te pūru mō te whakahere hara, me ngā hipi toa e rua, me te kete taro rēwenakore;
LEV 8:3 huihuia anō hoki e koe te whakaminenga katoa ki te whatitoka o te tapenākara o te whakaminenga.”
LEV 8:4 Ā, rite tahi ki tā Ihowā i whakahau ai tā Mohi i mea ai; ā, huihuia ana te whakaminenga ki te whatitoka o te tapenākara o te whakaminenga.
LEV 8:5 Nā, ka mea a Mohi ki te whakaminenga, “Ko te mea tēnei i whakahaua e Ihowā kia meatia.”
LEV 8:6 Nā, ka kawea mai a Ārona rātou ko āna tama e Mohi, ā, horoia ana rātou e ia ki te wai.
LEV 8:7 Ā, i whakakākahuria e ia te koti ki a ia, i whītikiria hoki te whītiki, i whakakākahuria atu hoki te koroka, i meatia atu anō hoki te epora ki a ia, ā, whītikiria ana ki a ia te whītiki whakairo o te epora, kia mau ai te epora ki a ia.
LEV 8:8 I whakamaua anō te kōuma ki a ia; ā, whakanohoia ana e ia ngā Urimi me ngā Tumime ki te kōuma.
LEV 8:9 Ā, i pōtaea e ia te pōtae tohunga ki tōna mātenga; i makā iho anō te pāraharaha kōura, te karauna tapu, ki te pōtae tohunga, ki te wāhi ki mua; ko tā Ihowā hoki i whakahau ai ki a Mohi.
LEV 8:10 Nā, ka mau a Mohi ki te hinu whakawahi, ā, whakawahia ana e ia te tapenākara, me ngā mea katoa i roto, hei whakatapu.
LEV 8:11 Ā, e whitu āna tāuhiuhinga atu i te hinu ki te āta, nā, whakawahia ana e ia te āta me ōna oko katoa, te takotoranga wai anō me tōna tūranga, kia tapu ai.
LEV 8:12 I ringihia anō e ia tētahi wāhi o te hinu whakawahi ki runga ki te mātenga o Ārona, ā, whakawahia ana ia kia tapu.
LEV 8:13 Ā, i ārahina mai e Mohi ngā tama a Ārona, ā, whakakākahuria ana ngā koti ki a rātou, whītikiria ana hoki ngā whītiki ki a rātou, pōtaea ana hoki ngā pōtae ki a rātou; ko tā Ihowā hoki i whakahau ai ki a Mohi.
LEV 8:14 Ā, i kawea anō e ia te pūru mō te whakahere hara; nā, ka popoki ngā ringa o Ārona rātou ko āna tama ki te mātenga o te pūru mō te whakahere hara,
LEV 8:15 ā, patua iho e ia. Ā, ka tango a Mohi i te toto, ā pania atu ana ki tōna maihao ki ngā haona o te āta ā tawhio noa, ā, horohoroa ana e ia te āta, ringihia ana hoki e ia te toto ki te tūranga o te āta, ā, whakatapua ana, hei whakamārie mōna.
LEV 8:16 Nā, ka tango ia i ngā ngako katoa o ngā whēkau, me te taupā o te ate, me ngā whatukuhu e rua, me tō reira ngako, ā, tahuna ana e Mohi ki te āta.
LEV 8:17 Ko te pūru ia me tōna hiako, ōna kikokiko, me tōna paru, i tahuna e ia ki te ahi i waho o te puni; i pērātia anō me tā Ihowā i whakahau ai ki a Mohi.
LEV 8:18 I kawea anō e ia te hipi toa mō te tahunga tinana, ā, ka popoki ngā ringa o Ārona rātou ko āna tama ki te mātenga o te hipi,
LEV 8:19 ā, patua iho e ia. Ā, tāuhiuhia atu ana te toto e Mohi ki te āta ā tawhio noa.
LEV 8:20 Nā, ka tapatapahia te hipi; ā, tahuna ana te pane e Mohi, me ngā tapahanga, me te ngako.
LEV 8:21 Nā, ka horoia e ia ngā whēkau, me ngā waewae ki te wai; ā, tahuna katoatia ana e Mohi te hipi ki runga ki te āta; he tahunga tinana tērā, he kakara reka, he whakahere ahi ki a Ihowā; ko tā Ihowā hoki i whakahau ai ki a Mohi.
LEV 8:22 Nā, ka kawea e ia te rua o ngā hipi toa, te hipi mō te whakatohungatanga; ā, ka popoki ngā ringa o Ārona rātou ko āna tama ki te mātenga o te hipi.
LEV 8:23 Ā patua iho e ia; nā, ka tangohia e Mohi tētahi wāhi o ōna toto, ā, pania ana e ia ki te matamata o te taringa matau o Ārona, ki te koromatua anō o tōna ringa matau, ki te koromatua anō hoki o tōna waewae matau.
LEV 8:24 Nā, ka ārahina e ia ngā tama a Ārona, ā, pania ana e Mohi tētahi wāhi o ngā toto ki te matamata o ō rātou taringa matau, ki ngā koromatua hoki o ō rātou ringa matau, ki ngā koromatua anō hoki o ō rātou waewae matau; ā, ka tāuhiuhia e Mohi te toto ki te āta ā tawhio noa.
LEV 8:25 Nā, ka tangohia e ia te ngako me te hiawero, me ngā ngako katoa o ngā whēkau, me te taupā o te ate, me ngā whatukuhu e rua, me tō reira ngako, me te hūhā matau.
LEV 8:26 I tangohia anō e ia i roto i te kete taro rēwenakore i te aroaro o Ihowā, kotahi keke rēwenakore, kotahi keke taro hinu me tētahi o ngā mea angiangi, ā, makā iho e ia ki runga ki te ngako, ki runga hoki ki te hūhā matau.
LEV 8:27 Ā, hoatutia katoatia ana e ia ki ngā ringa o Ārona, ki ngā ringa anō o āna tama, ā, poipoia ana hei whakahere poipoi ki te aroaro o Ihowā.
LEV 8:28 Nā, ka tangohia e Mohi i ō rātou ringa, ā, tahuna ana ki runga ki te āta, ki runga ki te tahunga tinana: hei whakatohunga; hei kakara reka, hei whakahere ahi ki a Ihowā.
LEV 8:29 Nā, ka tangohia e Mohi te uma, ā, poipoia ana e ia hei whakahere poipoi ki te aroaro o Ihowā; i a Mohi tēnā wāhi o te hipi toa o te whakatohungatanga; ko tā Ihowā hoki i whakahau ai ki a Mohi.
LEV 8:30 Nā, ka tango a Mohi i tētahi wāhi o te hinu whakawahi, o te toto anō i runga i te āta, ā, tāuhiuhia ana e ia ki a Ārona, ki ōna kākahu, ki a rātou tahi anō ko āna tama, ki ngā kākahu anō o āna tama; ā, whakatapua ana e ia a Ārona, ōna kākahu, āna tama, me ngā kākahu o āna tama.
LEV 8:31 Nā, ka mea a Mohi ki a Ārona rātou ko āna tama, “Kōhuatia te kikokiko ki te whatitoka o te tapenākara o te whakaminenga; kainga hoki ki reira me te taro i te kete o te whakatohungatanga; kia rite ki tāku i whakahau ai, i mea ai, ‘Me kai e Ārona rātou ko āna tama’;
LEV 8:32 ā, ko te toenga o te kikokiko, o te taro, me tahu ki te ahi.
LEV 8:33 Nā, kaua koutou e puta i te whatitoka o te tapenākara o te whakaminenga kia whitu rā anō ngā rā, kia taka rā anō ngā rā o tō koutou whakatohungatanga; e whitu hoki ngā rā e whakatohunga ai ia i a koutou.
LEV 8:34 Ko ngā mea i meatia ināianei, he mea whakahau mai nā Ihowā kia meatia, hei whakamārie mō koutou.
LEV 8:35 Ā, me noho koutou ki te whatitoka o te tapenākara o te whakaminenga i te ao, i te pō, kia whitu rā anō ngā rā, ki te tiaki i ngā mea a Ihowā, kei mate koutou; ko te mea hoki tēnei i whakahaua ki ahau.”
LEV 8:36 Nā, ka meatia e Ārona, rātou ko āna tama, ngā whakahau katoa a Ihowā, i kōrerotia e Mohi.
LEV 9:1 Ā, i te waru o ngā rā ka karangatia e Mohi a Ārona rātou ko āna tama, ko ngā kaumātua o Īharaira;
LEV 9:2 ā, ka mea ia ki a Ārona, “Tīkina tētahi kūao kau māu, hei whakahere hara, me tētahi hipi toa hei tahunga tinana, hei te mea kohakore, ka whakahere ai ki te aroaro o Ihowā.
LEV 9:3 Ā, me kōrero koe ki ngā tama a Īharaira, me kī atu: ‘Tīkina he koati toa mā koutou hei whakahere hara; me tētahi kūao kau, me tētahi reme, hei te tau tahi, hei te mea kohakore, hei tahunga tinana;
LEV 9:4 me tētahi pūru, me tētahi hipi toa hei whakahere mō te pai, hei patunga tapu ki te aroaro o Ihowā; me tētahi whakahere totokore, hei te mea konatu ki te hinu; ko āianei hoki a Ihowā puta mai ai ki a koutou.’ ”
LEV 9:5 Nā, ka kawea e rātou tā Mohi i whakahau ai ki te roro o te tapenākara o te whakaminenga; ā, ka whakatata katoa te whakaminenga, ka tū hoki ki te aroaro o Ihowā.
LEV 9:6 Nā, ka mea a Mohi, “Ko te mea tēnei i whakahaua mai nei e Ihowā kia meatia e koutou; ā, ka puta mai te korōria o Ihowā ki a koutou.”
LEV 9:7 Ā, ka mea a Mohi ki a Ārona, “Whakatata ki te āta, mahia tāu whakahere hara, me tāu tahunga tinana, ka whakamārie ai mōu, mō te iwi hoki. Ka whakahere atu ai hoki i te whakahere a te iwi, ka whakamārie ai mō rātou, ko tā Ihowā hoki i whakahau ai.”
LEV 9:8 Nā, ka haere a Ārona ki te āta, ā, patua ana e ia te kūao kau, te whakahere hara, te mea hoki mōna.
LEV 9:9 Ā, ka kawea e ngā tama a Ārona te toto ki a ia; ā, ka toua e ia tōna maihao ki te toto, ā, pania ana ki ngā haona o te āta, ringihia ana hoki te toto e ia ki te tūranga o te āta.
LEV 9:10 Ko te ngako ia, me ngā whatukuhu, me te taupā i te ate o te whakahere hara, i tahuna e ia ki runga ki te āta; ko tā Ihowā i whakahau ai ki a Mohi.
LEV 9:11 Ā, ko te kikokiko hoki, me te hiako, i tahuna e ia ki te ahi i waho o te puni.
LEV 9:12 Ā, patua ana e ia te tahunga tinana; ā, ka hōmai e ngā tama a Ārona te toto ki a ia, ā, tāuhiuhia ana e ia ki te āta ā tawhio noa.
LEV 9:13 Nā, ka hōmai e rātou te tahunga tinana ki a ia, tēnā tapahanga, tēnā tapahanga, me te pane; ā, tahuna ana e ia ki runga ki te āta.
LEV 9:14 Ā, i horoia anō e ia ngā whēkau me ngā waewae, ā, tahuna ana ki runga ki te tahunga tinana ki runga ki te āta.
LEV 9:15 I kawea anō e ia te whakahere a te iwi, ā, ka mau ki te koati, ki te whakahere hara mō te iwi, ā, patua ana e ia, whakaherea ana hoki mō te hara; i pērātia anō me te tuatahi.
LEV 9:16 I kawea anō e ia te tahunga tinana, ā, mahia ana e ia, pērātia ana i tō te tikanga.
LEV 9:17 I kawea anō e ia te whakahere totokore, ā, aohia ana tētahi wāhi e ia, kī tonu te ringa, ā, tahuna ana ki runga ki te āta, hei tāpiri mō te tahunga tinana o te ata.
LEV 9:18 I patua anō hoki e ia te pūru, me te hipi toa, hei patunga mō te pai mō te iwi; ā, ka hōmai e ngā tama a Ārona te toto ki a ia, ā, tāuhiuhia ana e ia ki te āta ā tawhio noa,
LEV 9:19 me te ngako o te pūru; ā, o te hipi toa – ko te hiawero mōmona, me te whiwhiwhiwhi o ngā whēkau, me ngā whatukuhu, me te taupā i te ate –
LEV 9:20 ā, i makā iho e rātou ngā ngako ki runga ki ngā uma, ā, tahuna ana e ia ngā ngako ki runga ki te āta.
LEV 9:21 I poipoia anō e Ārona ngā uma me te hūhā matau hei whakahere poipoi ki te aroaro o Ihowā; i pērātia anō me tā Mohi i whakahau ai.
LEV 9:22 Kātahi ka whakarewaina atu e Ārona ōna ringa ki te iwi, ā, manaakitia iho rātou e ia; nā, ka heke iho ia i te meatanga i te whakahere hara, i te tahunga tinana, i ngā whakahere mō te pai.
LEV 9:23 Nā, ka haere a Mohi rāua ko Ārona ki roto ki te tapenākara o te whakaminenga, ā, ka puta mai anō, ka manaaki hoki i te iwi; nā, ka puta mai te korōria o Ihowā ki te iwi katoa.
LEV 9:24 I puta mai anō he ahi i te aroaro o Ihowā, ā, pau ake te tahunga tinana, me ngā ngako, i runga i te āta; ā, nō te kitenga o te iwi katoa, ka hāmama rātou, ā, kūpapa ana ki raro.
LEV 10:1 Nā, ka mau a Nātapa rāua ko Apihu, ngā tama a Ārona, ki ā rāua tahu kakara, ā, makā ana he ahi ki roto, ā, whakatakotoria iho e rāua he whakakakara ki runga, nā, whakaherea ana e rāua he ahi kē ki te aroaro o Ihowā, he mea kīhai i whakahaua e ia ki a rāua.
LEV 10:2 Nā, ko te putanga mai o te ahi i te aroaro o Ihowā, ā, pau ake rāua, ā, mate iho rāua i te aroaro o Ihowā.
LEV 10:3 Nā, ka mea a Mohi ki a Ārona, “Ko te mea tēnei i kōrero rā a Ihowā, i mea rā, ‘Me whakatapu ahau e te hunga katoa e whakatata mai ana ki ahau, me whakakorōria anō hoki ahau ki te aroaro o te iwi katoa.’ ” Ā, whakarongo puku ana a Ārona.
LEV 10:4 Nā, ka karanga a Mohi ki a Mihāera rāua ko Eritapana, ngā tama a Utiere matua kēkē o Ārona, ka mea ki a rāua, “Haere mai, maua atu ō kōrua tuākana i mua i te wāhi tapu, ki waho o te puni.”
LEV 10:5 Nā, ka haere rāua, ka mau i a rāua i roto i ō rāua koti ki waho o te puni; i pērā anō rāua me tā Mohi i kī ai.
LEV 10:6 Nā, ka mea a Mohi ki a Ārona, rātou ko āna tama ko Ereātara, ko Itamara, “Kaua ngā makawe o ō koutou mātenga e waiho kia mahora noa, kaua anō hoki e haea ō koutou kākahu; kei mate koutou, kei rīria hoki te iwi katoa. Engari kia tangihia e ō koutou tēina, e te whare katoa o Īharaira, te tahunga i tahuna nei e Ihowā.
LEV 10:7 Kaua hoki koutou e puta i te whatitoka o te tapenākara o te whakaminenga, kei mate koutou; kei runga hoki i a koutou te hinu whakawahi a Ihowā.” Nā, ka meatia e rātou tā Mohi i kōrero ai.
LEV 10:8 Nā, ka kōrero a Ihowā ki a Ārona, ka mea,
LEV 10:9 “Kaua e inumia he wāina, tētahi wai whakahaurangi rānei, e koutou tahi ko āu tama, ina haere ki te tapenākara o te whakaminenga, kei mate koutou. Hei tikanga pūmau tēnei ki ō koutou whakatupuranga.
LEV 10:10 Kia taea ai hoki te wehe, te tapu me te noa, te poke me te pokekore;
LEV 10:11 kia taea ai hoki te whakaako i ngā tama a Īharaira ki ngā tikanga katoa i kōrerotia e Ihowā ki a rātou, arā e Mohi.”
LEV 10:12 I kōrero anō a Mohi ki a Ārona, ki āna tama anō i ora, ki a Ereātara, ki a Itamara: “Tīkina te whakahere totokore e toe ana o ngā whakahere ahi a Ihowā, ka kai rēwenakore ai ki te taha o te āta, he tino tapu hoki;
LEV 10:13 ā, me kai ki te wāhi tapu, ko taua wāhi hoki o ngā whakahere ahi a Ihowā māu, mā āu tama hoki; ko te mea tēnā i whakahaua ki ahau.
LEV 10:14 Ko te uma poipoi me te hūhā hapahapai me kai ki te wāhi pokekore, e koe, e koutou tahi ko āu tama, ko āu tamāhine; i whakaritea hoki ēnā hei wāhi māu, hei wāhi hoki mā āu tama, he mea hōmai nō roto i ngā patunga mō te pai a ngā tama a Īharaira.”
LEV 10:15 Me kawe tahi mai e rātou te hūhā hapahapai, te uma poipoi, me te ngako mō ngā whakahere ahi, ā, ka poipoia hei whakahere poipoi ki te aroaro o Ihowā; ā, ka waiho mā koutou tahi ko āu tama; hei tikanga pūmau tēnei; ko tā Ihowā hoki i whakahau ai.
LEV 10:16 Nā, ka āta rapu a Mohi i te koati o te whakahere hara, nā, kua tahuna – nā, ka riri ia ki a Ereātara rāua ko Itamara, ki ngā tama a Ārona i ora, ka mea,
LEV 10:17 “He aha tē kainga ai e koutou te whakahere hara ki te wāhi tapu, he tino tapu nei hoki, ā, kua hōmai anō mā koutou, mā koutou hoki e waha te kino o te whakaminenga, e whakamārie hoki mō rātou ki te aroaro o Ihowā?
LEV 10:18 Titiro hoki, kāhore anō ōna toto i kawea ki roto ki te wāhi tapu; ko te tikanga kia kainga tēnā e koutou ki te wāhi tapu, ko tāku hoki i whakahau ai.”
LEV 10:19 Nā, ka mea atu a Ārona ki a Mohi, “Nanā, nōnāianei i whakaherea ai e rātou tā rātou whakahere hara, me tā rātou tahunga tinana, ki te aroaro o Ihowā; ā, kua pā mai ēnei mea ki ahau! Ā, me i kainga te whakahere hara e ahau ināianei, tērā rānei e manakohia mai e Ihowā?”
LEV 10:20 Ā, ka rongo a Mohi, nā, ka whakaae.
LEV 11:1 Ā, i kōrero a Ihowā ki a Mohi rāua ko Ārona, i mea ki a rāua:
LEV 11:2 “Kōrero ki ngā tama a Īharaira, mea atu: Ko ngā kīrehe ēnei e kainga e koutou o ngā kararehe katoa i runga i te whenua.
LEV 11:3 Ko ngā mea katoa i roto i ngā kararehe e tararua ana te matimati, e tino mawehe ana hoki te tītorehanga, e whakahoki ake ana hoki i te kai, ko tēnā tā koutou e kai ai.
LEV 11:4 “Otiia, kaua e kainga ēnei o ngā mea e whakahoki ake ana i te kai, o ngā mea hoki e tararua ana te matimati: ko te kāmera, nō te mea e whakahoki ake ana anō ia i te kai, otiia kāhore i tararua te matimati; hei mea poke tēnā ki a koutou.
LEV 11:5 Me te koni, nō te mea e whakahoki ake ana anō ia i te kai, otiia kāhore i tararua te matimati; hei mea poke ia ki a koutou.
LEV 11:6 Me te hea, nō te mea e whakahoki ake ana anō ia i te kai, otiia kāhore i tararua te matimati; hei mea poke ia ki a koutou.
LEV 11:7 Me te poaka, ahakoa e tararua ana te matimati, e tino mawehe ana hoki te tītorehanga, kāhore e whakahokia ake te kai; hei mea poke ia ki a koutou.
LEV 11:8 Kaua e kainga tētahi wāhi o ō rātou kikokiko, kaua anō e pā ki ō rātou tinana mate; hei poke ēnā ki a koutou.
LEV 11:9 “Ko ēnei ā koutou e kai ai o ngā mea katoa o roto o ngā wai. Ko ngā mea katoa o ngā wai, o ngā moana, o ngā awa, he tara ō rātou, he unahi, ko ēnā ā koutou e kai ai.
LEV 11:10 Ā, ko ngā mea katoa kāhore he tara, kāhore he unahi, o ngā moana, o ngā awa, o roto o ngā mea katoa e tere ana i ngā wai, o ngā mea ora katoa o ngā wai; hei mea whakarihariha ēnā ki a koutou.
LEV 11:11 Inā, hei mea whakarihariha anō ēnā ki a koutou; kei kainga tētahi wāhi o ō rātou kikokiko e koutou, ā, me whakarihariha atu ki ō rātou tinana mate.
LEV 11:12 Ko ngā mea katoa o ngā wai kāhore he tara, kāhore he unahi, hei mea whakarihariha ēnā ki a koutou.
LEV 11:13 “Ko ēnei anō o ngā manu ā koutou e whakarihariha ai; e kore e kainga, he whakarihariha hoki: ko te ēkara, ko te wāwāhi-iwi, ko te ahipare,
LEV 11:14 ko te whatura, ko te kāiaia, me ngā mea pērā;
LEV 11:15 ko ngā raweni katoa, me ngā mea pērā;
LEV 11:16 me te otereti, me te kāhu pō, me te koekoeā, me te kāhu, me ngā mea pērā,
LEV 11:17 me te ruru nohinohi, me te kawau, me te ruru nui,
LEV 11:18 me te wani, me te perikana, me te kia ēkara,
LEV 11:19 me te tāka, me te heroni, me ngā mea pērā, me te hupou, me te pekapeka.
LEV 11:20 “Ko ngā mea ngōkingōki katoa e rere ā-manu ana, e whā ngā waewae hei haere, me whakarihariha atu e koutou.
LEV 11:21 Otiia, me kai anō ēnei e koutou o ngā mea ngōkingōki katoa e rere ā-manu ana, e whā nei ngā waewae hei haere, ā, he waewae anō ō rātou kei runga ake i ngā raparapa, hei mokowhiti i runga i te whenua.
LEV 11:22 Ko ēnei o rātou e kainga e koutou; ko te māwhitiwhiti, me ngā mea e rite ana ki a ia, me te tātarakihi, me ngā mea e rite ana ki a ia, me te pākauroharoha, me ngā mea e rite ana ki a ia, me te koeke, me ngā mea e rite ana ki a ia.
LEV 11:23 Ko ngā mea ngōkingōki kē atu ia, ko ngā mea rere ā-manu, e whā nei ō rātou waewae, me whakarihariha atu e koutou.”
LEV 11:24 “He mea hoki ēnei e poke ai koutou; ki te pā tētahi ki ō rātou tinana mate, ka poke ā ahiahi noa.
LEV 11:25 Ā, ki te mauria e te tangata tētahi wāhi o ō rātou tinana mate, me horoi e ia ōna kākahu, ka poke hoki ia ā ahiahi noa.
LEV 11:26 “Ko ngā kararehe katoa e tararua ana te matimati, ā, kāhore anō i tino mawehe te tītorehanga, kāhore rānei e whakahoki ake i te kai, hei mea poke ki a koutou; ka poke ngā tāngata katoa e pā ana ki a rātou.
LEV 11:27 Nā, ko ngā mea katoa he tū ā-ringaringa nei ngā waewae e haere ai rātou, o roto o ngā kīrehe katoa e whā nei ngā waewae hei haere, hei mea poke ēnā ki a koutou; ki te pā tētahi ki ō rātou tinana mate, ka poke ia ā ahiahi noa.
LEV 11:28 Ā, ki te mauria e tētahi te tinana mate o tētahi o rātou, me horoi e ia ōna kākahu, ka poke hoki ia ā ahiahi noa; kia poke ēnā ki a koutou.
LEV 11:29 “Ka poke anō hoki ēnei ki a koutou o ngā mea ngōkingōki katoa e ngōkingōki ana i runga i te whenua: ko te wīhara, ko te kiore, me te tuatara, me ngā mea e rite ana ki a ia,
LEV 11:30 me te koka, me te korokotaera, me te mokomoko, me te moeone, me te kamiriona.
LEV 11:31 Kia poke ēnei ki a koutou o ngā mea ngōkingōki katoa; ki te pā atu tētahi ki a rātou, ina mate, ka poke ia ā ahiahi noa.
LEV 11:32 Ā, ki te taka tētahi o rātou, ina mate, ki runga ki tētahi mea, ka poke taua mea; ahakoa he oko rākau, he mea kākahu, hiako rānei, pēke rānei; ahakoa he oko aha rānei, aha rānei, e meatia ai tētahi mea, me maka ki te wai, ā, ka poke ā ahiahi noa; kātahi ka kore te poke.
LEV 11:33 Ā, ki te taka tētahi o rātou ki roto ki tētahi oko oneone, ahakoa he aha rānei, he aha rānei, kei roto, kua poke, ā, me wāhi.
LEV 11:34 Ki te maringi taua wai ki runga ki tētahi o ngā kai e kainga ana, ka poke; ka poke anō hoki ngā wai katoa e inumia ana i roto i aua oko katoa.
LEV 11:35 Ka poke anō hoki ngā mea katoa kua taka nei tētahi wāhi o ō rātou tinana mate ki runga; ahakoa oumu, tūranga kōhua rānei, me wāhi kia ngotangota; he mea poke hoki, ā, ka poke anō ki a koutou.
LEV 11:36 Otiia ki te mea he puna, he poka rānei, he nui nei te wai, kāhore ōna poke; ki te pā ia tētahi ki ō rātou tinana mate, ka poke.
LEV 11:37 Ki te taka anō hoki tētahi wāhi o ō rātou tinana mate ki ngā purapura e whakatōkia ana, e kore e poke.
LEV 11:38 Otiia, ki te mea kua oti te purapura te mea ki te wai, ā, ka taka tētahi wāhi o ō rātou tinana mate ki runga, ka poke ēnā ki a koutou.
LEV 11:39 “Ā, ki te mate māori tētahi o ngā kararehe e kainga ana e koutou; ki te pā tētahi ki tōna tinana mate, ka poke ia ā ahiahi noa.
LEV 11:40 Ā, ki te kai tētahi i tētahi wāhi o tōna tinana, me horoi e ia ōna kākahu, ka poke hoki ia ā ahiahi noa; ki te mauria hoki e tētahi tōna tinana, me horoi e ia ōna kākahu, ka poke hoki ia ā ahiahi noa.
LEV 11:41 “Hei mea whakarihariha ngā mea ngōkingōki katoa e ngōkingōki ana i runga i te whenua; e kore e kainga.
LEV 11:42 Ko ngā mea katoa ko te kōpū hei haere, me ngā mea katoa ko taua tū haere o ngā wae e whā, arā ko ngā mea katoa he maha ngā waewae, i roto i ngā mea ngōki katoa e ngōki nei i runga i te whenua, kaua ēnā e kainga; he mea whakarihariha hoki.
LEV 11:43 Kei waiho tētahi mea ngōkingōki, hei take e whakariharihangia ai koutou, hei mea rānei e poke ai, e noa ai.
LEV 11:44 Nō te mea hoki ko Ihowā ahau, ko tō koutou Atua; mō reira me whakatapu koutou e koutou, ā, ka tapu; he tapu hoki ahau; kaua anō hoki e whakapokea koutou ki tētahi mea ngōkingōki e ngōkingōki ana i runga i te whenua.
LEV 11:45 Ko Ihowā hoki ahau, i kawe mai nei i a koutou i te whenua o Īhipa, kia waiho ai ahau hei Atua mō koutou; mō reira kia tapu koutou, he tapu hoki ahau.
LEV 11:46 “Ko te ture tēnei mō te kararehe, mō te manu, mō ngā mea ora katoa e tere ana i ngā wai, mō ngā mea katoa hoki e ngōki ana i runga i te whenua.
LEV 11:47 Kia wehea ai te poke me te pokekore, te kararehe e kainga me te kararehe e kore e kainga.”
LEV 12:1 I kōrero anō a Ihowā ki a Mohi, i mea:
LEV 12:2 “Kōrero ki ngā tama a Īharaira, mea atu: Ki te hapū tētahi wahine, ā, ka whānau he tāne, nā, kia whitu ngā rā e poke ai ia; kia rite tōna pokenga ki ngā rā o tōna mate paheke.
LEV 12:3 Ā, i te waru o ngā rā ka kotia te kiri matamata o te tamaiti.
LEV 12:4 Ā, me noho te wahine ki te toto o tōna purenga, kia toru tekau mā toru ngā rā. Kaua ia e pā ki tētahi mea tapu, e haere rānei ki te wāhi tapu, kia taka rā anō ngā rā mō tōna purenga.
LEV 12:5 Ki te mea ia ka whānau he kōtiro, kia rua ngā wiki e poke ai, kia rite ki ō tōna paheketanga; ā, kia ono tekau mā ono ngā rā e noho ai ia ki te toto o tōna purenga.
LEV 12:6 “Ā, ka rite ngā rā mō tōna purenga mō te tama, mō te kōtiro rānei, me kawe mai e ia he reme, hei te tau tahi, hei tahunga tinana, me te pī kūkupa, me te kūkupa rānei, hei whakahere hara ki te whatitoka o te tapenākara o te whakaminenga, ki te tohunga.
LEV 12:7 Ā, māna e whakahere ki te aroaro o Ihowā, ā, ka meinga he whakamārie mōna; ā, ka kore ōna poke i te rerenga o ōna toto. “Ko te ture tēnei mō te wahine kua whānau nei tāna tama, kōtiro rānei.
LEV 12:8 Ā, ki te kāhore e taea e ia i ōna rawa te kawe mai he reme, me kawe mai ngā kūkupa e rua, ngā pī kūkupa rānei e rua; ko tētahi hei tahunga tinana, ko tētahi hei whakahere hara; ā, mā te tohunga e whakamārie mōna, ā, ka kore ōna poke.”
LEV 13:1 Ā, i kōrero a Ihowā ki a Mohi rāua ko Ārona, i mea,
LEV 13:2 “Ki te mea he puku tō te kiri o te kikokiko o tētahi tangata, he paku rānei, he wāhi tū ā-kanapa rānei, ā, ka rite, i te kiri o tōna kikokiko, ki te pānga mai o te repera; nā, me kawe ia ki a Ārona tohunga, ki tētahi rānei o āna tama, o ngā tohunga.
LEV 13:3 Nā, ka tirohia e te tohunga te mea i pā ki te kiri o te kikokiko; ā, ki te mea kua puta kē, kua mā te huruhuru o te wāhi i pāngia, ā, ki te titiro atu, kua hōhonu iho te mea i pā mai i te kiri o tōna kikokiko, he pānga mai tēnā nō te repera; ā, ka titiro te tohunga ki a ia, ā, ka mea he poke ia.
LEV 13:4 “Ā, ki te mea e mā ana te wāhi tū ā-kanapa o te kiri o tōna kikokiko, ā, ki te titiro atu kīhai i hōhonu iho i te kiri, ā, kīhai i puta kē, kīhai i mā te huruhuru o reira. Nā, ka tūtakina atu e te tohunga te tangata i pāngia, kia whitu ngā rā.
LEV 13:5 Ā, ka tirohia ia e te tohunga i te whitu o ngā rā; nā, kua tūturu te mea i pā mai rā, ki tāna titiro iho, ā, kīhai i hōrapa atu te mate ki te kiri; kātahi ka tūtakina atu anō ia e te tohunga, kia whitu atu anō rā.
LEV 13:6 Ā, ka tirohia anō ia e te tohunga i te whitu o ngā rā; ā, ki te mea kua āhua mangu te mea i pā mai rā, ā, kīhai i hōrapa atu te mate ki te kiri, nā, ka mea te tohunga, kāhore ōna poke; he paku kau. Ā, ka horoia e ia ōna kākahu, ā, ka kore ōna poke.
LEV 13:7 Mehemea ia kua nui te hōrapatanga atu o te paku ki te kiri, i muri i te tirohanga a te tohunga i a ia kia purea ai ia, me titiro anō te tohunga ki a ia.
LEV 13:8 Ā, ki te mea ka kite iho te tohunga, nā, kua hōrapa atu te paku ki te kiri, kātahi ka mea te tohunga, he poke ia; he repera tēnā.
LEV 13:9 “Ki te pāngia te tangata e te repera, nā, me kawe ia ki te tohunga.
LEV 13:10 Ā, ka tirohia e te tohunga, ki te mea kua mā te puku o te kiri; ā, kua puta kē te huruhuru, kua mā, he wāhi ora anō nō te kikokiko ora kei te puku;
LEV 13:11 he repera tawhito tēnā i te kiri o tōna kikokiko, me mea te tohunga he poke ia. E kore anō hoki ia e tūtakina atu; e poke ana hoki.
LEV 13:12 “Ā, ki te hōrapa noa atu te repera ki te kiri, ā, ka ngaro i te repera te kiri katoa o te tangata i pāngia, o tōna māhunga iho, ā tae noa ki tōna waewae, o ngā wāhi katoa e titiro ai te tohunga.
LEV 13:13 Nā, ka titiro iho te tohunga, ā, ki te mea kua kapi katoa ōna kikokiko i te repera; nā, ka mea ia, kāhore he poke o te tangata i pāngia; kua puta kē, kua mā katoa; kāhore ōna poke.
LEV 13:14 Otiia, ka poke ia i te rā e kitea ai e ora ana tētahi wāhi o ōna kikokiko.
LEV 13:15 Ā, me titiro iho anō te tohunga ki te kiko ora, ā, ka mea, he poke ia; he mea poke hoki te kikokiko ora; he repera hoki.
LEV 13:16 Otiia ki te hoki anō ki te mā te kikokiko ora, me haere ia ki te tohunga;
LEV 13:17 ā, ka titiro te tohunga ki a ia, ā, ki te mea kua puta kē te wāhi i pāngia kua mā, nā, ka mea te tohunga, he pokekore te tangata i pāngia; kāhore ōna poke.
LEV 13:18 “Me te kikokiko hoki, he whēwhē nei tō tōna kiri i mua, ā, kua ora,
LEV 13:19 ā, ka puta ake i te wāhi o te whēwhē he puku mā, he wāhi tū ā-kanapa rānei, he mea mā, āhua pūwhero, ā, ka whakakitea ki te tohunga;
LEV 13:20 ā, ki te mea, i te tirohanga a te tohunga, nā, kei raro iho i te kiri, ki te titiro atu, ā, kua puta kē, kua mā te huruhuru o reira. Kātahi ka mea te tohunga, he poke ia, he pānga mai tēnā nō te repera; e tupu ana i runga i te whēwhē.
LEV 13:21 Ki te tirohia ia e te tohunga, nā, kāhore he huruhuru mā o reira, ā, kāhore i raro i te kiri, engari e āhua mangu ana, nā, me tūtaki atu ia e te tohunga, kia whitu ngā rā.
LEV 13:22 Ā, ki te mea kua hōrapa nui atu ki te kiri, nā, ka mea te tohunga, he poke ia; he pānga mate tēnā.
LEV 13:23 Ki te tūturu ia te wāhi tū ā-kanapa ki taua wāhi, ā, kāhore e hōrapa atu, he nawe whēwhē tēnā; ā, ka mea te tohunga, kāhore ōna poke.
LEV 13:24 “Ki te mea rānei he wera anō nā te ahi kei te kiri o tētahi kikokiko, ā, he wāhi mā kanapa, he mea āhua whero, he mea mā rānei kei te kikokiko ora i wera nei;
LEV 13:25 nā, me titiro e te tohunga. Nā, ki te mea kua puta kē, kua mā te huruhuru o te wāhi kanapa, ā, ka hōhonu iho i te kiri ki te titiro atu; he repera tēnā e tupu ake ana i runga i te wera. Ā, me mea te tohunga, he poke ia; he pānga tēnā nō te repera.
LEV 13:26 Otiia ki te tirohia e te tohunga, nā, kāhore he huruhuru mā o te wāhi kanapa, ā, kāhore i raro i te kiri, otiia e āhua pōuri ana; nā, me tūtaki ia e te tohunga kia whitu ngā rā.
LEV 13:27 Ā, i te whitu o ngā rā me titiro te tohunga ki a ia; ā, ki te mea kua hōrapa nui atu ki te kiri, kātahi ka kīia ia e te tohunga, he poke; he pānga tēnā nō te repera.
LEV 13:28 Ā, ki te tūturu te wāhi tū ā-kanapa ki tēnā wāhi, ā, kāhore e hōrapa atu ki te kiri, otiia he āhua pōuri; he puku tēnā nō te weranga, ā, ka kīia ia e te tohunga he pokekore; he nawe wera hoki.
LEV 13:29 “Nā, he tāne, he wahine i pāngia te mātenga, te pāhau rānei,
LEV 13:30 me titiro te tohunga ki te mea i pā mai. Ā, ki te mea he hōhonu iho i te kiri ki tāna titiro; ā, he āhua mā kōwhai nei, he ririki te huruhuru; kātahi ka kīia ia e te tohunga, he poke. He pātito tēnā, he repera nō te mātenga, nō te pāhau.
LEV 13:31 Ā, ki te titiro te tohunga ki te pātito i pā nei, ā, kīhai i hōhonu iho i te kiri ki te titiro, ā, kāhore o reira huruhuru mangu. Nā, ka tūtakina atu e te tohunga te tangata i pāngia nei e te pātito, kia whitu ngā rā.
LEV 13:32 Ā, i te whitu o ngā rā ka titiro te tohunga ki te mate; ā, ki te kāhore i hōrapa atu te pātito, ā, kāhore ōna huruhuru mā kōwhai nei, ā, ki te titiro kāhore te pātito i hōhonu iho i te kiri.
LEV 13:33 Nā, ka heua ia, ko te pātito ia e kore e heua; ā, ka tūtakina atu e te tohunga te tangata i te pātito, kia whitu atu ngā rā.
LEV 13:34 Ā, i te whitu o ngā rā, me titiro te tohunga ki te pātito, ā, ki te kāhore i hōrapa te pātito ki te kiri, ā, kāhore anō e hōhonu iho i te kiri ki te titiro; kātahi ka kīia ia e te tohunga, he pokekore. Ā, ka horoia e ia ōna kākahu, ā, ka kore te poke.
LEV 13:35 “Otiia, ki te hōrapa nui te pātito ki te kiri i muri i te whakakorenga o tōna poke;
LEV 13:36 nā, me titiro anō te tohunga ki a ia; ā, ki te mea kua hōrapa tēnā te pātito ki te kiri, e kore e rapua e te tohunga te huruhuru mā kōwhai; he poke ia.
LEV 13:37 Ki te tūturu ia te pātito ki tāna titiro, ā, kua tupu te huruhuru mangu ki reira; kua mahu te pātito, kāhore ōna poke; ā, ka kīia e te tohunga he pokekore.
LEV 13:38 “Ki te mea he wāhi kanapa tō te kiri o te kikokiko o tētahi tangata, o tētahi wahine rānei, arā he wāhi kanapa mā nei;
LEV 13:39 nā, me titiro e te tohunga; ā, ki te mea he mā mangu nei ngā wāhi kanapa o te kiri o tō rātou kikokiko; he pāpaka tēnā e tupu ana i te kiri; kāhore ōna poke.
LEV 13:40 “Me te tangata hoki kua horo ngā huruhuru o tōna mātenga, he pākira ia, kāhore ōna poke.
LEV 13:41 Me te tangata hoki kua horo ngā huruhuru o te wāhi o tōna mātenga whaka tōna mata, he rae pākira ia; kāhore ōna poke.
LEV 13:42 Ā, ki te mea kua pāngia tētahi wāhi o te mātenga pākira, o te rae pākira rānei, he mea mā āhua whero nei, he repera tēnā e tupu ana i tōna mātenga pākira, i tōna rae pākira rānei.
LEV 13:43 Nā, me titiro ia e te tohunga; nā, ki te mā āhua whero te puku; i pā ki tōna mātenga pākira, ki tōna rae pākira rānei, ki te rite ki te putanga o te repera ki te kiri o te kikokiko;
LEV 13:44 he repera ia, he poke. Me tino mea te tohunga, he poke ia; ko tōna mātenga i pāngia.
LEV 13:45 “Ā, ko te repera i pāngia nei, me haehae ōna kākahu, kia roha noa atu ngā makawe o tōna māhunga, ka ārai i tōna ngutu o runga, ā, ka karanga, ‘He poke, he poke!’
LEV 13:46 Ka poke ia i ngā rā katoa e pāngia ai; he poke ia; me noho ko ia anake; ko waho o te puni te nohoanga mōna.
LEV 13:47 “Me te kākahu anō hoki i pāngia e te repera, ahakoa he kākahu huruhuru, he kākahu rīnena rānei;
LEV 13:48 ahakoa i te whenu, i te aho rānei; i ngā mea rīnena, huruhuru rānei; ahakoa i te hiako, i tētahi mea hiako rānei.
LEV 13:49 Ki te mea he mā kākāriki, he pūwhero rānei te wāhi i pāngia o te kākahu, o te hiako rānei, o te whenu rānei, o te aho rānei, o tētahi mea hiako rānei, he pānga tēnā nō te repera, ā, me whakakite ki te tohunga.
LEV 13:50 Nā, ka tirohia e te tohunga te wāhi i pāngia, ā, ka tūtakina atu e ia te mea i pāngia, kia whitu ngā rā.
LEV 13:51 Ā, i te whitu o ngā rā ka tirohia e ia te wāhi i pāngia; ki te mea kua hōrapa te mea i pā ki te kākahu, ki te whenu rānei, ki te aho rānei, ki tētahi hiako, ki tētahi mea rānei i hangā ki te hiako. He repera ngau kino te mea i pā; he mea poke tēnā.
LEV 13:52 Nā, ka tahuna e ia taua kākahu, ahakoa he whenu, he aho rānei, ahakoa he huruhuru, he rīnena rānei, ahakoa he mea hiako te mea i pāngia; he repera ngau kino tēnā; me tahu ki te ahi.
LEV 13:53 “Ā, ki te titiro te tohunga, nā, kīhai te mea i pā i hōrapa atu ki te kākahu, ki te whenu, ki te aho, ki tētahi mea hiako rānei.
LEV 13:54 Kātahi ka whakahau te tohunga kia horoia te mea i pāngia, ā, ka tūtakina atu e ia, kia whitu atu anō ngā rā.
LEV 13:55 Ā, me titiro e te tohunga te mea i pā mai, i muri i te horoinga; ā, ki te mea kīhai i rerekē te kara o te wāhi i pāngia, ā, kīhai i hōrapa atu te mea i pā mai; he poke tēnā. Me tahu e koe ki te ahi; kua ngaua a roto, ahakoa i tiwha te taha ki roto, te taha rānei ki waho.
LEV 13:56 “Ā, ki te mea ka kite te tohunga, nā, kua tāpouri te wāhi i pāngia i muri i te horoinga; kātahi ka haea atu e ia i roto i te kākahu, i te hiako rānei, i te whenu rānei, i te aho rānei.
LEV 13:57 Ā, ki te kitea anō i te kākahu, i te whenu rānei, i te aho rānei, i tētahi mea hiako rānei; he mea tupu tēnā; me tahu e koe ki te ahi taua mea i pāngia.
LEV 13:58 Ko te kākahu hoki, ko te whenu rānei, ko te aho rānei, ko te mea hiako rānei i horoia e koe, ā, kua riro te mate, nā, ka horoia anō, ā, ka kore ōna poke.”
LEV 13:59 Ko te ture tēnei mō te pānga mai o te repera ki te kākahu huruhuru, ki te kākahu rīnena rānei, ki te whenu, ki te aho rānei, ki tētahi mea hiako rānei, mō te kī he pokekore, mō te kī rānei he poke.
LEV 14:1 Ā, i kōrero a Ihowā ki a Mohi, i mea:
LEV 14:2 “Ko te ture tēnei mō te repera, i te rā e purea ai: Me kawe ki te tohunga;
LEV 14:3 ā, ka haere te tohunga ki waho o te puni, ā, ka titiro te tohunga, ā, ki te mea kua ora te repera i pā ki taua tangata i reperatia;
LEV 14:4 kātahi ka whakahau te tohunga kia tīkina mā te tangata e purea ana kia rua ngā manu, hei ngā mea ora, hei ngā mea pokekore, me te rākau hīta, me te ngangana, me te hihopa.
LEV 14:5 Ā, ka whakahau te tohunga kia patua tētahi o ngā manu ki roto ki tētahi oko oneone, ki runga i te wai rere.
LEV 14:6 Nā, ko te manu ora me mau e ia, me te rākau hīta, me te ngangana, me te hihopa, ā, ka toua tahitia me te manu ora ki te toto o te manu i patua ki runga i te wai rere.
LEV 14:7 Ā, kia whitu āna tāuhiuhinga ki te tangata e purea ana i te repera, ā, ka kīia he pokekore, ā, ka tukua atu te manu ora ki te mata o te pārae.
LEV 14:8 “Ā, me horoi ōna kākahu e te tangata e purea ana, me heu katoa hoki ōna huruhuru; ka horoi anō i a ia ki te wai, ā, ka kore ōna poke. Ā muri iho, ka haere mai ki te puni; otiia kia whitu ngā rā e noho ai i waho i tōna tēneti.
LEV 14:9 Nā, i te whitu o ngā rā, me heu katoa ōna makawe o tōna mātenga, tōna pāhau, ōna tukemata, arā ōna huruhuru katoa, me heu. Me horoi hoki ōna kākahu, me horoi anō hoki ōna kikokiko ki te wai, ā, ka kore ōna poke.
LEV 14:10 “Ā, i te waru o ngā rā me tiki e ia ētahi reme toa, kia rua, hei ngā mea kohakore, me tētahi reme uha tau tahi, hei te mea kohakore, kia toru hoki ngā whakatekau parāoa hei whakahere totokore, hei te mea konatu ki te hinu, kia kotahi hoki te roko hinu.
LEV 14:11 Ā, mā te tohunga, mā te kaipure, e whakatū te tangata e purea ana, me aua mea hoki, ki te aroaro o Ihowā, ki te whatitoka o te tapenākara o te whakaminenga.
LEV 14:12 “Nā, ka mau te tohunga ki tētahi o ngā reme toa, ā, ka whakaherea hei whakahere mō te hē, me te roko hinu hoki, ā, ka poipoia hei whakahere poipoi ki te aroaro o Ihowā.
LEV 14:13 Me patu anō e ia te reme toa ki te wāhi e patua ai e ia te whakahere hara me te tahunga tinana, ki te wāhi tapu; i te mea mā te tohunga te whakahere hara, māna anō hoki te whakahere mō te hē; he mea tino tapu tēnā.
LEV 14:14 Nā, ka mau te tohunga ki tētahi wāhi o te toto o te whakahere mō te hē, ā, ka pania e te tohunga ki te matamata o te taringa matau o te tangata e purea ana, ki te koromatua hoki o tōna ringa matau, ki te koromatua anō hoki o tōna waewae matau.
LEV 14:15 “Nā, ka mau te tohunga ki tētahi wāhi o te roko hinu, ka riringi ki te kapu o tōna ake ringa mauī;
LEV 14:16 ā, ka toua e te tohunga tōna maihao matau ki te hinu i tōna ringa mauī, ā, kia whitu ngā tāuhiuhinga i te hinu e tōna maihao, ki te aroaro o Ihowā.
LEV 14:17 Ā, me pani e te tohunga tētahi wāhi o te toenga o te hinu i tōna ringa ki te matamata o te taringa matau o te tangata e purea ana, ki te koromatua hoki o tōna ringa matau, ki te koromatua anō hoki o tōna waewae matau ki runga i te toto o te whakahere mō te hē.
LEV 14:18 Ā, ko te toenga o te hinu i te ringa o te tohunga, me riringi ki te mātenga o te tangata e purea ana; ā, ka whakamārie te tohunga mōna ki te aroaro o Ihowā.
LEV 14:19 “Ā, ka whakaherea e te tohunga te whakahere hara, ka whakamārie hoki mō te tangata e purea ana, arā mō tōna poke; ā muri iho, ka patua e ia te tahunga tinana;
LEV 14:20 ā, ka whakaekea te tahunga tinana me te whakahere totokore e te tohunga ki te āta. Ā, ka whakamārie te tohunga mōna, ā, ka kore ōna poke.
LEV 14:21 “Ā, ki te mea he rawakore ia, ā, e kore ēnā mea e taea, nā, me tiki e ia kia kotahi reme toa hei whakahere mō te hē, hei mea poipoi, hei whakamārie mōna, kia kotahi anō hoki te whakatekau parāoa, hei te mea i kōnatunatua ki te hinu, hei whakahere totokore, me tētahi roko hinu;
LEV 14:22 me ētahi kūkupa kia rua, ētahi pī kūkupa rānei kia rua, ngā mea e taea e tōna ringa; ko tētahi hei whakahere hara, ko tētahi hei tahunga tinana.
LEV 14:23 “Ā, hei te waru o ngā rā ka kawe ai ki te tohunga hei purenga mōna, ki te whatitoka o te tapenākara o te whakaminenga, ki te aroaro o Ihowā.
LEV 14:24 Nā, ka mau te tohunga ki te reme mō te whakahere mō te hē, me te roko hinu, ā, ka poipoia e te tohunga hei whakahere poipoi ki te aroaro o Ihowā.
LEV 14:25 Ā, ka patua e ia te reme e whakaherea ana mō te hē, ā, ka tango te tohunga i tētahi wāhi o te toto o te whakahere mō te hē, ka pani ai ki te matamata o te taringa matau o te tangata e purea ana, ki te koromatua hoki o tōna ringa matau, ki te koromatua anō hoki o tōna waewae matau.
LEV 14:26 “Ā, me riringi e te tohunga tētahi wāhi o te hinu ki te kapu o tōna ake ringa mauī;
LEV 14:27 ā, ka tāuhiuhia e te tohunga ki tōna maihao matau tētahi wāhi o te hinu i tōna ringa mauī, kia whitu ngā meatanga ki te aroaro o Ihowā.
LEV 14:28 Ā, ka pania e te tohunga tētahi wāhi o te hinu i tōna ringa ki te matamata o te taringa matau o te tangata e purea ana, ki te koromatua hoki o tōna ringa matau, ki te koromatua anō hoki o tōna waewae matau, ki te wāhi i te toto o te whakahere mō te hē.
LEV 14:29 Ā, ko te toenga o te hinu i te ringa o te tohunga, me riringi ki te mātenga o te tangata e purea ana, hei whakamārie mōna ki te aroaro o Ihowā.
LEV 14:30 Ā, me whakahere tētahi o ngā kūkupa, o ngā pī kūkupa rānei, o ngā mea hoki i taea e tōna ringa;
LEV 14:31 āe rā, o ngā mea i taea e tōna ringa, ko tētahi hei whakahere hara, ko tētahi hei tahunga tinana, me te whakahere totokore hoki; ā, ka whakamārie te tohunga mō te tangata e purea ana, ki te aroaro o Ihowā.”
LEV 14:32 Ko te ture tēnei mō te tangata i pāngia e te repera, e kore nei e taea e tōna ringa ngā mea mō tōna purenga.
LEV 14:33 I kōrero anō a Ihowā ki a Mohi rāua ko Ārona, i mea,
LEV 14:34 “E tae koutou ki te whenua o Kanaana e hoatu nei e ahau hei kāinga tupu mō koutou, ā, ka whakapāngia atu e ahau te repera ki tētahi whare o te whenua e nohoia e koutou;
LEV 14:35 ā, ka haere te tangata nōna te whare, ka kōrero ki te tohunga, ka mea, ‘Ki tāku titiro, me te mea kua pāngia te whare.’
LEV 14:36 Nā, ka whakahau te tohunga kia whakawāteatia te whare, i te mea kāhore anō te tohunga i haere noa kia kite i te mea i pā mai; kei poke ngā mea katoa o roto o te whare; ā, ka oti, ka haere te tohunga kia kite i te whare.
LEV 14:37 Nā, ka titiro ia ki te mea i pā mai, ā, ki te mea kua pāngia ngā tara o te whare, ā, kua whai kōputaputa he mea mā kākāriki, pūwhero rānei, ā, ki te titiro atu kua ngoto ki roto ki te tara.
LEV 14:38 Nā, ka puta te tohunga ki waho o te whare ki te kūwaha o te whare, ā, ka tūtakina te whare, kia whitu ngā rā.
LEV 14:39 Ā, ka haere mai anō te tohunga i te whitu o ngā rā, ā, ka titiro; ā, ki te mea kua hōrapa ki ngā pakitara o te whare te mea i pā mai;
LEV 14:40 nā, ka whakahau te tohunga kia tangohia ngā kōhatu i pāngia, kia makā ki te wāhi poke ki waho o te pā.
LEV 14:41 Ā, ka mea ia kia waruhia a roto o te whare ā taka noa, ā, me riringi e rātou te puehu i waruhia e rātou ki waho o te pā, ki te wāhi poke.
LEV 14:42 Ā, ka tīkina e rātou ētahi atu kōhatu, ka whakanoho atu ai ki te wāhi o aua kōhatu; me tiki anō e ia he moata kē, ka pani ai ki te whare.
LEV 14:43 “Ā, ki te hoki mai te mea i pā mai, ā, ka tupu ki te whare i muri i tāna tangohanga i ngā kōhatu, i tāna waruhanga i te whare, i te paninga hoki;
LEV 14:44 kātahi ka haere te tohunga, ā, ka titiro; ā, ki te mea kua hōrapa ki te whare te mea i pā mai, he repera ngau kino tō te whare; he poke.
LEV 14:45 Nā, ka wāwāhi i te whare, i ōna kōhatu, i ōna rākau, i te moata katoa o te whare; ā, ka kawea atu ki waho o te pā, ki te wāhi poke.
LEV 14:46 “Ki te haere hoki tētahi ki roto ki te whare, i te mea e tūtaki ana, ka poke ia ā ahiahi noa.
LEV 14:47 Ki te takoto hoki tētahi ki roto i te whare, me horoi e ia ōna kākahu; ki te kai anō hoki tētahi ki roto i te whare, me horoi anō e ia ōna kākahu.
LEV 14:48 “Ā, ki te haere te tohunga ki roto, ā, ka titiro, ā, kīhai i hōrapa ki te whare te mea i pā mai, i muri iho i te paninga o te whare. Nā, ka kīia e te tohunga he pokekore te whare, nō te mea kua kore taua mea i pā rā.
LEV 14:49 Ā, ka tīkina e ia ētahi manu, kia rua, hei horohoro mō te whare, he rākau hīta, he ngangana, he hihopa.
LEV 14:50 Ā, ka patua e ia tētahi o ngā manu ki roto ki te oko oneone, ki runga i te wai rere.
LEV 14:51 Nā, ka mau ki te rākau hīta, ki te hihopa, ki te ngangana, me te manu ora, ka tou ai ki te toto o te manu i patua, ki te wai rere hoki, nā, kia whitu āna tāuhiuhinga ki te whare.
LEV 14:52 Ā, ka horohoroa e ia te whare ki te toto o te manu, ki te wai rere hoki, ki te manu ora, ki te rākau hīta, ki te hihopa, ki te ngangana.
LEV 14:53 Engari, me tuku e ia te manu ora ki waho o te pā, ki te mata o te pārae; nā, ka whakamārie mō te whare; ā, ka kore ōna poke.”
LEV 14:54 Ko te ture tēnei mō ngā pānga katoa o te repera: mō te pātito hoki,
LEV 14:55 mō te repera hoki o te kākahu, o te whare,
LEV 14:56 mō te puku, mō te paku, mō te wāhi tū ā-kanapa nei.
LEV 14:57 Hei whakaatu ko āhea poke ai, ko āhea pokekore ai; ko te ture tēnei mō te repera.
LEV 15:1 I kōrero anō a Ihowā ki a Mohi rāua ko Ārona, i mea:
LEV 15:2 “Kōrero ki ngā tama a Īharaira, mea atu ki a rātou: Ki te mea he rere tō tētahi tangata, nō roto i tōna kikokiko, e poke ana ia i tōna rere.
LEV 15:3 Ā, ko tōna poke tēnei i a ia e rere nei; ahakoa rere te rere o tōna kikokiko, ahakoa kua mimiti te rere o tōna kikokiko, he mea whakapoke tēnā i a ia.
LEV 15:4 “He poke ngā moenga katoa e takoto ai te tangata i te rere; ka poke anō hoki ngā mea katoa e noho ai ia.
LEV 15:5 Ki te pā hoki tētahi ki tōna moenga, me horoi e ia ōna kākahu, me ia anō hoki me horoi ki te wai, ka poke hoki ia ā ahiahi noa.
LEV 15:6 Ki te noho hoki tētahi ki runga ki tētahi mea i nohoia e te tangata i te rere, me horoi e ia ōna kākahu, me ia anō hoki me horoi ki te wai, ka poke hoki ia ā ahiahi noa.
LEV 15:7 “Ā, ki te pā tētahi ki te kikokiko o te tangata i te rere, me horoi e ia ōna kākahu, me ia anō hoki me horoi ki te wai, ka poke hoki ia ā ahiahi noa.
LEV 15:8 “Ā, ki te tuwha atu te tangata i te rere ki tētahi tangata pokekore, nā, me horoi e ia ōna kākahu, me ia anō hoki me horoi ki te wai, ka poke hoki ia ā ahiahi noa.
LEV 15:9 “Me te nohoanga hōiho i nohoia e te tangata he rere tōna, kua poke.
LEV 15:10 Nā, he mea nō raro i a ia, ko te tangata i pā atu, kua poke ā ahiahi noa; ki te mauria hoki e tētahi, tētahi o aua mea, me horoi ōna kākahu, me ia anō hoki me horoi ki te wai, ka poke hoki ā ahiahi noa.
LEV 15:11 “Nā, ko te tangata i pā tērā i te rere ki a ia, ā, kīhai i horoia ōna ringa ki te wai, me horoi ōna kākahu, me ia anō hoki me horoi ki te wai, ka poke hoki ia ā ahiahi noa.
LEV 15:12 “Me wāwāhi anō hoki te oko oneone i pāngia e te tangata he rere tōna; ko ngā oko rākau katoa ia me horoi ki te wai.
LEV 15:13 “Ā, e purea i tōna rere te tangata he rere tōna, nā, me tatau e ia ngā rangi e whitu mō tōna purenga, nā, ka horoia e ia ōna kākahu, me horoi anō hoki tōna kikokiko ki te wai rere, ā, ka kore ōna poke.
LEV 15:14 Ā, i te waru o ngā rā me tiki e ia, kia rua ngā kūkupa, kia rua rānei ngā pī kūkupa, ā, ka haere ki te aroaro o Ihowā ki te whatitoka o te tapenākara o te whakaminenga, ka hoatu ai ki te tohunga.
LEV 15:15 Kātahi ka whakaherea aua mea e te tohunga, tētahi hei whakahere hara, tētahi hoki hei tahunga tinana; ā, ka whakamārie te tohunga mōna ki te aroaro o Ihowā mō tōna rere.
LEV 15:16 “Ki te paheke mai hoki te purapura moenga o tētahi tangata, nā, me horoi e ia tōna tinana katoa ki te wai, ka poke hoki ia ā ahiahi noa.
LEV 15:17 Me horoi anō hoki ki te wai ngā kākahu katoa, me ngā hiako kei aua mea nei te purapura moenga, ka poke hoki aua mea ā ahiahi noa.
LEV 15:18 Ki te moe māori hoki tētahi tangata ki tētahi wahine, me horoi rāua ki te wai, ka poke hoki rāua ā ahiahi noa.
LEV 15:19 “Ā, ki te mea he rere tō tētahi wahine, ā, he toto te rere o tōna kikokiko, me whakamotuhake kia whitu ngā rā. Ka poke anō hoki ngā tāngata katoa e pā ana ki a ia ā ahiahi noa.
LEV 15:20 “Ka poke anō ngā mea katoa e takotoria ana e ia i tōna whakamotuhaketanga; ka poke anō ngā mea katoa e noho ai ia.
LEV 15:21 Ki te pā hoki tētahi ki tōna moenga, me horoi e ia ōna kākahu, a ia ake anō hoki me horoi ki te wai, ka poke hoki ia ā ahiahi noa.
LEV 15:22 Ki te pā atu hoki tētahi ki tētahi mea i noho ai ia, me horoi e ia ōna kākahu, a ia ake anō hoki me horoi ki te wai, ka poke hoki ia ā ahiahi noa.
LEV 15:23 Ahakoa i runga taua mea i te moenga, i runga rānei i tētahi mea e nohoia ana e ia, ki te pā atu tētahi, ka poke ia ā ahiahi noa.
LEV 15:24 “Ki te takoto hoki tētahi tangata ki a ia, ā, ka mau ki a ia ōna whakapoke, ka poke, e whitu ngā rā; ka poke katoa anō ngā moenga katoa e takoto ai ia.
LEV 15:25 “Ā, ki te maha ngā rā o te rerenga toto o tētahi wahine, ā, ehara i te wā e paheke ai, ki te roa atu rānei te rerenga i tō te wā e paheke ai; ka pērā anō me ngā rā o tōna paheketanga, ngā rā katoa e rere ai tōna whakapoke; ka poke ia.
LEV 15:26 Ka pērā anō ki a ia me te moenga o tōna paheketanga ngā moenga katoa e takoto ai ia i ngā rā katoa e rere ai; ka poke anō hoki ngā mea katoa e noho ai ia, ka rite ki te whakapoke o tōna paheketanga.
LEV 15:27 Ka poke anō hoki te tangata e pā ana ki aua mea, me horoi anō hoki e ia ōna kākahu, a ia ake anō hoki me horoi ki te wai, ka poke hoki ia ā ahiahi noa.
LEV 15:28 “Otiia ki te mea kua whakapokekoretia taua wahine i te rere, kātahi ka taua e ia ngā rangi e whitu, ā muri iho ka kore ōna poke.
LEV 15:29 Ā, i te waru o ngā rā me tiki e ia kia rua ngā kūkupa, kia rua rānei pī kūkupa māna, ā, ka kawea ki te tohunga, ki te whatitoka o te tapenākara o te whakaminenga.
LEV 15:30 Ā, me whakahere tētahi e te tohunga hei whakahere hara, me tētahi hoki hei tahunga tinana, ā, ka whakamārie te tohunga mōna ki te aroaro o Ihowā mō te rere o tōna whakapoke.
LEV 15:31 “Nā, me pēnā tā koutou wehe i ngā tama a Īharaira i ō rātou whakapoke; kei mate rātou i ō rātou poke, ina whakapokea e rātou tōku tapenākara e tū nā i roto i a rātou.”
LEV 15:32 Ko te ture tēnei mō te tangata he rere tōna, mō te tangata hoki kua paheke atu tōna purapura moenga, ā poke iho;
LEV 15:33 mō te wahine hoki e paheke ana, mō te tangata hoki he rere tōna, mō te tāne rāua ko te wahine, mō te tangata hoki i takoto ki te wahine poke.
LEV 16:1 Ā, i kōrero a Ihowā ki a Mohi i muri i te matenga o ngā tama tokorua a Ārona, i te mea i whakahere nei rāua ki te aroaro o Ihowā, ā mate iho.
LEV 16:2 I kōrero anō a Ihowā ki a Mohi: “Kōrero ki a Ārona, ki tōu tuakana, kei haere i ngā wā katoa ki te wāhi tapu, ki roto i te ārai, i tērā i mua mai o te taupoki o te āka; kei mate; ka puta atu hoki ahau i roto i te kapua ki runga ki te taupoki.
LEV 16:3 “Ko ngā mea tēnei hei haerenga mō Ārona ki roto ki te wāhi tapu: ko te kūao pūru hei whakahere hara, me te hipi toa hei tahunga tinana.
LEV 16:4 Me kākahu e ia te koti rīnena tapu; hei tōna kikokiko ngā tarau rīnena, me whītiki anō ki a ia te whītiki rīnena, me pōtae anō te pōtae rīnena; ko ngā kākahu tapu ēnei; mō reira me horoi e ia tōna kikokiko ki te wai, ka kākahu ai.
LEV 16:5 Nā, ka mau ia ki ētahi koati kia rua a te whakaminenga o ngā tama a i Īharaira hei whakahere hara, kia kotahi hoki te hipi toa hei tahunga tinana.
LEV 16:6 “Ā, ka whakaherea e Ārona tāna pūru mō te whakahere hara, te mea hoki mōna, ā, ka whakamārie mōna, mō tōna whare hoki.
LEV 16:7 Nā, ka mau ia ki ngā koati e rua, ka tāpae ki te aroaro o Ihowā ki te whatitoka o te tapenākara o te whakaminenga.
LEV 16:8 Nā, ka makā he rota e Ārona mō ngā koati e rua, tētahi rota mō tā Ihowā, tētahi rota mō te koati haere noa.
LEV 16:9 Ā, ka kawea mai e Ārona te koati i puta nei tā Ihowā rota ki a ia, ā, ka whakaherea hei whakahere hara.
LEV 16:10 Ko te koati ia i puta nei te rota ki a ia hei koati haere noa, ka tāpaea oratia ki te aroaro o Ihowā, ki te whakamārie mōna, kia tukua ai ki te koraha hei koati haere noa.
LEV 16:11 “Ā, ka kawea e Ārona te pūru mō te whakahere hara, te mea mōna ake, ā, ka whakamārie mōna, mō tōna whare hoki, ā, ka patua te pūru mō te whakahere hara, te mea hoki mōna ake.
LEV 16:12 Nā, ka mau ki te tahu kakara, kī tonu i ngā waro ahi nō runga i te āta, i te aroaro o Ihowā; kia kī hoki ōna ringa i te whakakakara reka, tuki rawa kia ririki, ka kawe ai ki roto i te ārai.
LEV 16:13 Nā, ka maka i te whakakakara ki te ahi ki te aroaro o Ihowā, kia ngaro ai i te kapua whakakakara te taupoki i runga i te whakaaturanga, kei mate hoki ia.
LEV 16:14 Nā, ka tango i tētahi wāhi o te toto o te pūru, ā, ka tāuhiuhia e tōna maihao ki te taupoki ki te taha ki te rāwhiti; kia whitu ngā tāuhiuhinga a tōna maihao i te toto ki te taha ki mua o te taupoki.
LEV 16:15 “Kātahi ka patua e ia te koati o te whakahere hara, te mea mō te iwi, ā, ka kawea ōna toto ki roto i te ārai, ā, ka pērā tāna meatanga ki taua toto, me tāna ki te toto o te pūru, ā, ka tāuhiuhia e ia ki te taupoki, ki mua hoki o te taupoki.
LEV 16:16 Ā, ka whakamārie mō te wāhi tapu, mō te poke o ngā tama a Īharaira, mō ā rātou mahi tutū i ō rātou haranga katoa. Kia pērā hoki tāna meatanga mō te tapenākara o te whakaminenga e tū ana i roto i a rātou waenganui o tō rātou poke.
LEV 16:17 Kaua anō hoki he tangata mō roto te tapenākara o te whakaminenga, ina haere ia ki te whakamārie i roto i te wāhi tapu, ā puta noa mai ki waho, kia oti rā anō te whakamārie mōna, mō tōna whare, mō te whakaminenga katoa anō hoki o Īharaira.
LEV 16:18 “Nā, ka puta ia ki te āta, ki tērā i te aroaro o Ihowā, mea ai i tō reira whakamārie; ka tango hoki i tētahi wāhi o te toto o te pūru, o te toto hoki o te koati, ka pani ai ki ngā haona o te āta ā tawhio noa.
LEV 16:19 Kia whitu hoki ngā tāuhiuhinga a tōna maihao i te toto, ā, ka purea, ka whakatapua, kia mā ai i te poke o ngā tama a Īharaira.
LEV 16:20 “Ā, ka oti tāna whakamārie mō te wāhi tapu, mō te tapenākara o te whakaminenga, mō te āta, nā, me kawe mai e ia te koati ora.
LEV 16:21 Nā, ka popoki ngā ringa e rua o Ārona ki te mātenga o te koati ora, ka whāki ai i ngā kino katoa o ngā tama a Īharaira ki runga i a ia, i ā rātou mahi tutū katoa, me ō rātou hara katoa; me uta hoki ki runga ki te mātenga o te koati, ka tuku ai kia kawea ki te koraha e tētahi tangata e noho rite ana.
LEV 16:22 Nā, ka mauria e te koati ō rātou kino katoa i runga i a ia ki tētahi whenua mokemoke; ā, ka tukua atu te koati ki te koraha.
LEV 16:23 “Nā, ka haere a Ārona ki roto ki te tapenākara o te whakaminenga, ā, ka unuhia atu ngā kākahu rīnena i kākahuria e ia i tōna haerenga ki roto ki te wāhi tapu, ka waiho hoki ki reira.
LEV 16:24 Me horoi anō e ia tōna kikokiko ki te wai ki te wāhi tapu, ka kākahu ai i ōna kākahu, ā, ka puta mai ia ki waho, ka mea hoki i tāna tahunga tinana, i te tahunga tinana hoki a te iwi, hei whakamārie mōna, mō te iwi.
LEV 16:25 Me tahu anō e ia te ngako o te whakahere hara ki runga ki te āta.
LEV 16:26 “Ko te kaituku hoki o te koati hei koati haere noa, me horoi e ia ōna kākahu, me horoi anō tōna kikokiko ki te wai, ā muri iho, ka haere mai ki te puni.
LEV 16:27 Ā, ko te pūru mō te whakahere hara, me te koati mō te whakahere hara, nō rāua nei ngā toto i kawea ki roto ki te wāhi tapu hei whakamārie, me mau ki waho o te puni; ā, ka tahuna ki te ahi ō rāua hiako, ō rāua kikokiko, me tō rāua paru.
LEV 16:28 Nā, ko te kaitahu, me horoi ōna kākahu, me horoi anō tōna kikokiko ki te wai, ā muri iho, ka haere mai ki te puni.
LEV 16:29 “Hei tikanga pūmau anō tēnei mā koutou; i te whitu o ngā marama, i te tekau o ngā rā o te marama, me whakapōuri ō koutou wairua, kaua rawa tētahi mahi e mahia, e te tangata whenua, e te manene rānei i roto i a koutou.
LEV 16:30 Ko ā taua rangi hoki te tohunga whakamārie ai mō koutou, hei pure i a koutou i ō koutou hara katoa, kia mā ai koutou i te aroaro o Ihowā.
LEV 16:31 Hei hāpati okiokinga taua rā ki a koutou, me whakapōuri ō koutou wairua; hei tikanga pūmau.
LEV 16:32 Me whakamārie anō te tohunga e whakawahia nei ia, e whakatohungatia hoki hei tohunga i muri i tōna pāpā, me kākahu anō ngā kākahu rīnena, ngā kākahu tapu,
LEV 16:33 me whakamārie ia mō te wāhi tapu, me whakamārie anō mō te tapenākara o te whakaminenga, mō te āta hoki; me whakamārie anō mō ngā tohunga, mō ngā tāngata katoa hoki o te whakaminenga.
LEV 16:34 “Hei tikanga pūmau tēnei ki a koutou, kia whakamārie mō ngā tama a Īharaira, mō ō rātou hara katoa; kia kotahi meatanga i te tau.” Nā, ka meinga e ia tā Ihowā i whakahau ai ki a Mohi.
LEV 17:1 I kōrero anō a Ihowā ki a Mohi, i mea:
LEV 17:2 “Kōrero ki a Ārona, ki āna tama, ki ngā tama katoa a Īharaira, mea atu ki a rātou: Ko te mea tēnei i whakahau ai a Ihowā, i mea ai:
LEV 17:3 Ki te patua e tētahi tangata o te whare o Īharaira he kau, he reme, he koati rānei, i roto i te puni, ki te patua rānei e ia ki waho o te puni,
LEV 17:4 ā, e kore e kawea ki te whatitoka o te tapenākara o te whakaminenga, kia whakaherea he whakahere ki a Ihowā ki mua i te tapenākara o Ihowā. Ka whakairia he toto ki taua tangata; kua whakaheke toto ia; ā, ka hātepea atu taua tangata i roto i tōna iwi.
LEV 17:5 He mea kia kawea ai e ngā tama a Īharaira ā rātou patunga e whakaherea ana e rātou i te mata o te pārae, kia kawea ai hoki ki a Ihowā, ki te whatitoka o te tapenākara o te whakaminenga, ki te tohunga, ka patu ai hei whakahere mō te pai ki a Ihowā.
LEV 17:6 Ā, ka tāuhiuhia te toto e te tohunga ki te āta a Ihowā i te whatitoka o te tapenākara o te whakaminenga, me tahu anō e ia te ngako hei kakara reka ki a Ihowā.
LEV 17:7 Ā, ka mutu ā rātou patunga tapu ki ngā rēwera i whāia nei e rātou, pūremu atu ai. Hei tikanga pūmau tēnei ki a rātou i ō rātou whakatupuranga.
LEV 17:8 “Me kī atu anō ki a rātou: Ki te whakaherea e tētahi tangata o te whare o Īharaira, o ngā manene rānei i roto i a koutou, tētahi tahunga tinana, patunga tapu rānei,
LEV 17:9 ā, e kore e kawea ki te whatitoka o te tapenākara o te whakaminenga, whakahere ai ki a Ihowā; inā, ka hātepea atu taua tangata i roto i tōna iwi.”
LEV 17:10 “Ki te kainga hoki tētahi toto e tētahi tangata o te whare o Īharaira, o ngā manene rānei i roto i a koutou; ka ū atu tōku mata ki taua wairua i kainga ai te toto, ā, ka hātepea atu e ahau i roto i tōna iwi.
LEV 17:11 Kei roto hoki i te toto te oranga o te kikokiko; kua hoatu anō e ahau ki a koutou mō runga i te āta, hei whakamārie mō ō koutou wairua; ko te toto hoki, nā tōna ora, te mea hei whakamārie.
LEV 17:12 Koia ahau i mea ai ki ngā tama a Īharaira: Kaua tētahi o koutou e kai toto, kaua anō hoki te manene i roto i a koutou e kai toto.
LEV 17:13 “Ki te whai hoki tētahi o ngā tama a Īharaira, o ngā manene rānei i roto i a koutou, ā, ka mau tētahi kīrehe, tētahi manu rānei e tika ana kia kainga; me riringi ōna toto, ka tanu ai ki te puehu.
LEV 17:14 Nō te mea ko te toto o te kikokiko e kotahi katoa āna me te ora o te kikokiko; koia ahau i mea ai ki ngā tama a Īharaira: Kaua rawa e kainga te toto o tētahi kikokiko; ko te toto hoki te ora o ngā kikokiko katoa; ki te kainga e tētahi, ka hātepea atu.
LEV 17:15 “Ki te kainga hoki e tētahi te mea i mate māori, te mea rānei i haea e te kīrehe, ahakoa tangata whenua, iwi kē rānei, me horoi ōna kākahu, me ia anō me horoi ki te wai, ka poke hoki ā ahiahi noa; kātahi ka kore te poke.
LEV 17:16 Ā, ki te kāhore e horoia e ia, ki te kāhore hoki e horoia tōna tinana, nā, ka waha e ia tōna kino.”
LEV 18:1 I kōrero anō a Ihowā ki a Mohi, i mea,
LEV 18:2 “Kōrero ki ngā tama a Īharaira, mea atu ki a rātou: Ko Ihowā ahau, ko tō koutou Atua.
LEV 18:3 Kei rite ā koutou mahi ki ngā mahi a te whenua o Īhipa, i noho nā koutou. Kei rite hoki ā koutou mahi ki ngā mahi a te whenua o Kanaana, e kawea nei koutou e ahau ki reira. Kei haere i runga i ā rātou tikanga.
LEV 18:4 Me mahi āku whakaritenga, kia mau ki āku tikanga, me haere hoki i reira; ko Ihowā ahau, ko tō koutou Atua.
LEV 18:5 Inā, kia mau ki āku tikanga, ki āku whakaritenga; ki te mahia hoki ēnā e te tangata, mā reira e ora ai. Ko Ihowā ahau.
LEV 18:6 “Kaua tētahi o koutou e whakatata ki tētahi o ōna whanaunga tupu, hura ai i tō rātou kiri tahanga: Ko Ihowā ahau.
LEV 18:7 “Kei hurahia e koe tōu pāpā, tōu whaea rānei, kia takoto tahanga; ko tōu whaea ia; kei hurahia e koe kia takoto tahanga.
LEV 18:8 “Kei hurahia e koe kia takoto tahanga te wahine a tōu pāpā; ko te wāhi takoto tahanga ia o tōu pāpā.
LEV 18:9 “Kei hurahia e koe kia takoto tahanga tōu tuahine, te tamāhine a tōu pāpā, te tamāhine rānei a tōu whaea, ahakoa i whānau ki te kāinga, i whānau rānei ki tētahi atu wāhi; kei hurahia rāua e koe kia takoto tahanga.
LEV 18:10 “Kei hurahia e koe kia takoto tahanga te tamāhine a tāu tama, te tamāhine rānei a tāu tamāhine, kei hurahia rāua e koe kia takoto tahanga; nōu hoki te wāhi o rāua i takoto tahanga nā.
LEV 18:11 “Kei takoto tahanga i a koe te tamāhine a te wahine a tōu pāpā, te whānau a tōu pāpā, he tuahine ia nōu, kei hurahia ia e koe kia takoto tahanga.
LEV 18:12 “Kei hurahia te tuahine o tōu pāpā kia takoto tahanga; he whanaunga tupu ia nō tōu pāpā.
LEV 18:13 “Kei hurahia e koe te tuakana, teina rānei, o tōu whaea kia takoto tahanga; he whanaunga tupu hoki ia nō tōu whaea.
LEV 18:14 “Kei hurahia e koe kia takoto tahanga te teina, tuakana rānei, o tōu pāpā, kei whakatata koe ki tāna wahine; ko tōu whaea kēkē ia.
LEV 18:15 “Kei hurahia e koe tāu hunaonga kia takoto tahanga; ko te wahine ia a tāu tama, kei hurahia ia e koe kia takoto tahanga.
LEV 18:16 “Kei hurahia e koe kia takoto tahanga te wahine a tōu tuakana, teina rānei; nō tōu tuakana, teina rānei, taua wāhi i takoto tahanga nā.
LEV 18:17 “Kei hurahia e koe kia takoto tahanga te wahine rāua ko tāna tamāhine, kaua anō e tangohia te tamāhine a tāna tama, te tamāhine rānei a tāna tamāhine, hura ai i a ia kia takoto tahanga; he whanaunga pū hoki rātou ki a ia; he mea kino tēnā.
LEV 18:18 “Kaua anō hoki e tangohia he wahine ki te taha o tōna tuakana, teina rānei, hei whakatetetete ki a ia; kaua ia e hurahia kia takoto tahanga, me te ora anō hoki tērā.
LEV 18:19 “Kaua anō hoki e whakatata ki te wahine ki te hura i a ia kia takoto tahanga, i a ia e poke ana i te paheketanga.
LEV 18:20 “Kaua anō hoki e takoto pūremu ki te wahine a tōu hoa, whakapoke ai i a koe ki a ia.
LEV 18:21 “Kaua anō e tukua tētahi o ōu uri kia haere nā waenga ahi hei mea ki a Moreke, kaua anō e whakanoatia te ingoa o tōu Atua. Ko Ihowā ahau.
LEV 18:22 “Kei takotoria wahinetia te tāne; he mea whakarihariha tēnā.
LEV 18:23 “Kaua anō hoki e takoto ki tētahi kararehe, whakapoke ai i a koe ki taua mea. Kaua hoki tētahi wahine e tū ki te aroaro o tētahi kararehe, takoto tahi ai rāua; he mea anuanu tēnā.
LEV 18:24 “Kei poke koutou i tētahi o ēnei mea; e poke ana hoki i ēnei mea katoa ngā iwi ka peia nei e ahau i tō koutou aroaro.
LEV 18:25 Kua poke anō hoki te whenua; koia ahau i mea ai kia tau iho tōna kino ki runga ki a ia; ā, e whakaruaki ana te whenua i ōna tāngata.
LEV 18:26 Mō reira kia mau ki āku tikanga ki āku whakaritenga whakawā; kaua anō e mahia tētahi o ēnei mea whakarihariha e te tangata whenua, e te manene rānei i roto i a koutou
LEV 18:27 (nō te mea kua mahia ēnei mea whakarihariha katoa e ngā tāngata whenua ō mua i a koutou, ā, poke iho te whenua);
LEV 18:28 kei whakaruakina anō hoki koutou e te whenua, ina poke i a koutou, pērā me ngā iwi e whakaruakina nei i tō koutou aroaro.
LEV 18:29 “Ki te mahia hoki tētahi o ēnei mea whakarihariha e tētahi tangata, inā, ka hātepea atu ngā wairua e pēnā i roto i tō rātou iwi.
LEV 18:30 Nō reira kia mau ki āku i whakahau atu ai, kei mahia e koutou tētahi o ēnei ritenga whakarihariha i mahia nei i mua i a koutou, kei poke hoki koutou i aua mea. Ko Ihowā ahau, ko tō koutou Atua.”
LEV 19:1 I kōrero anō a Ihowā ki a Mohi, i mea,
LEV 19:2 “Kōrero ki te whakaminenga katoa o ngā tama a Īharaira, mea atu ki a rātou: Kia tapu koutou; he tapu hoki ahau, a Ihowā, tō koutou Atua.
LEV 19:3 “Me wehi tērā, tērā, ki tōna whaea, ki tōna pāpā, kia mau hoki ki āku hāpati: ko Ihowā ahau, ko tō koutou Atua.
LEV 19:4 “Kei tahuri ki te whakapakoko, kei whakarewaina he atua mā koutou. Ko Ihowā ahau, ko tō koutou Atua.
LEV 19:5 “Ki te whakaherea anō he patunga mō te pai ki a Ihowā, hei te patunga e manakohia ai koutou.
LEV 19:6 Me kai i te rangi anō i whakaherea ai, i te aonga ake anō hoki; ā, ki te toe tētahi wāhi ki te toru o ngā rā, me tahu ki te ahi.
LEV 19:7 Ki te kainga hoki tētahi wāhi i te toru o ngā rā, ka whakariharihangia; e kore e manakohia.
LEV 19:8 Ā, ka waha ō rātou hara e ngā tāngata katoa i kainga ai, nō te mea kua whakanoatia te mea tapu a Ihowā; ā, ka hātepea atu taua tangata i roto i tōna iwi.
LEV 19:9 “Ina kotia e koutou ngā hua o tō koutou whenua, kaua e kotia rawatia ngā kokonga o tāu māra, kaua anō hoki e hamua ngā toenga o āu hua.
LEV 19:10 Kaua hoki e hamua tāu māra wāina, kaua anō e kohia ngā karepe taka o tāu māra wāina; me waiho mā te rawakore, mā te tangata iwi kē. Ko Ihowā ahau, ko tō koutou Atua.
LEV 19:11 “Kaua e tāhae; kaua hoki e teka, kaua anō e tinihanga tētahi ki tētahi.
LEV 19:12 Kei oatitia tekatia hoki tōku ingoa, kaua anō hoki e whakanoatia te ingoa o tōu Atua. Ko Ihowā ahau.
LEV 19:13 “Kaua e tūkinotia tōu hoa; kaua hoki e pāhuatia. “Kaua ngā utu o te kaimahi e takoto tonu ki a koe i te pō, ā tae noa ki te ata.
LEV 19:14 “Kaua e kangā te turi, kaua anō e makā he whakatūtuki ki te aroaro o te matapō; engari me wehi ki tōu Atua. Ko Ihowā ahau.
LEV 19:15 “Kei whakahaere hē ina whakawā; kaua e whakaaro ki te kanohi o te rawakore, kaua hoki e whakahōnoretia te kanohi o te nui; me whakawā koe mō tōu hoa i runga i te tika.
LEV 19:16 “Kaua e kōpikopiko i roto i tōu iwi kawekawe kōrero ai; kaua anō hoki e tū kia whakahekea te toto o tōu hoa. Ko Ihowā ahau.
LEV 19:17 “Kei kino koe ki tōu teina i roto i tōu ngākau; rīria mārietia tōu hoa, kaua e waiho he hara i runga i a ia.
LEV 19:18 “Kaua e rapu utu, kaua hoki e mauāhara ki ngā tamariki a tōu iwi; engari arohaina tōu hoa ānō ko koe. Ko Ihowā ahau.
LEV 19:19 “Kia mau ki āku tikanga. Kaua e whakatupuria he uri mō āu kararehe ki tērā atu tū kararehe. Kaua e whakauruurua ngā purapura e whakatōngia e koe ki tāu māra. Kaua anō hoki e meatia ki a koe he kākahu ko tētahi wāhi he rīnena, ko tētahi he huruhuru.
LEV 19:20 “Ki te takoto pūremu hoki tētahi ki te wahine pononga kua oti te taumau mā te tāne, ki te mea kīhai i utua, i whakahokia, kīhai anō hoki i tukua kia haere noa atu; ka whiua rāua. E kore rāua e whakamatea, nō te mea kīhai ia i tukua kia haere noa atu.
LEV 19:21 Ā, me kawe e te tāne tāna whakahere mō te hē ki a Ihowā, ki te whatitoka o te tapenākara o te whakaminenga, he hipi toa hei whakahere mō te hē.
LEV 19:22 Ā, ka whakamārie te tohunga mōna ki te hipi toa, ki te whakahere mō te hē, ki te aroaro o Ihowā, mō tōna hara i hara ai; ā, ka murua tōna hara i hara ai.
LEV 19:23 “E tae hoki koutou ki te whenua, ā, ka whakatōngia e koutou ngā rākau kai katoa; me waiho ngā hua hei mea kokotikore. Kia toru ngā tau e waiho ai e koutou hei mea kokotikore; e kore e kainga.
LEV 19:24 I te whā ia o ngā tau ka tapu ngā hua katoa o reira, hei whakamoemiti ki a Ihowā.
LEV 19:25 Engari i te rima o ngā tau me kai e koutou ngā hua o reira, ā, ka maha ake ōna hua mā koutou. Ko Ihowā ahau, ko tō koutou Atua.
LEV 19:26 “Kaua e kainga tototia tētahi mea. Kaua anō hoki e rapu tikanga i ngā tohu, i ngā kapua.
LEV 19:27 “Kaua e whakaporotakatia ngā taha o ō koutou māhunga, kaua anō hoki e whakaahuatia kinotia ngā taha o tōu pāhau.
LEV 19:28 Kaua e haea ō koutou kikokiko mō te tūpāpaku, kaua anō hoki e tāia he tohu ki a koutou. Ko Ihowā ahau.
LEV 19:29 “Kaua e whakanoatia tāu tamāhine, e meinga hei wahine kairau; kei riro te whenua i te kairau, ā, ka kī te whenua i te kino.
LEV 19:30 “Kia mau ki āku hāpati, kia hopohopo hoki ki tōku wāhi tapu. Ko Ihowā ahau.
LEV 19:31 “Kaua e whakaaro atu ki ngā waka atua, kaua anō hoki e whai atu ki ngā mata māori, whakapokea ai e rātou. Ko Ihowā ahau, ko tō koutou Atua.
LEV 19:32 “Me whakatika ake koe i te aroaro o te mātenga hina, me whakahōnore hoki te mata o te koroheke, me wehi anō hoki ki tōu Atua. Ko Ihowā ahau.
LEV 19:33 “Ki te noho hoki te tangata iwi kē ki a koe, ki tōu whenua, kaua koutou e mahi i te kino ki a ia.
LEV 19:34 Ki tā koutou kia rite ki tētahi o ō koutou tangata whenua te manene e noho ana i a koutou, arohaina ia ānō ko koe; he manene hoki koutou i mua, i te whenua o Īhipa. Ko Ihowā ahau, ko tō koutou Atua.
LEV 19:35 “Kei hē tā koutou whakahaere ina whakawā, i te rūri rānei, i te pāuna taimaha rānei, i te mēhua rānei.
LEV 19:36 Kia tika ā koutou pāuna, kia tika ngā whakataimaha, kia tika te epa, kia tika hoki te hine. Ko Ihowā ahau, ko tō koutou Atua, i kawe mai nei i a koutou i te whenua o Īhipa.
LEV 19:37 “Mō reira kia mau ki āku tikanga katoa, me āku whakaritenga katoa, mahia anō hoki. Ko Ihowā ahau.”
LEV 20:1 I kōrero anō a Ihowā ki a Mohi, i mea:
LEV 20:2 “Me kōrero anō koe ki ngā tama a Īharaira: Ahakoa nō ngā tama a Īharaira, nō te manene rānei e noho ana i a Īharaira, te tangata i hoatu e ia tōna uri ki a Moreke, inā, me whakamate ia; me āki e ngā tāngata whenua ki te kōhatu.
LEV 20:3 Ka ū atu anō hoki tōku mata ki taua tangata, ā, ka hātepea atu e ahau i roto i tōna iwi; mōna i hoatu i tōna uri ki a Moreke, whakapoke ai i tōku wāhi tapu, whakanoa ai hoki i tōku ingoa tapu.
LEV 20:4 Ā, ki te hunā e ngā tāngata whenua ō rātou kanohi, kei kite i taua tangata, ina hoatu e ia tōna uri ki a Moreke, ā, e kore e whakamate i a ia;
LEV 20:5 ko reira ū atu ai tōku mata ki taua tangata, ki ōna whanaunga hoki, ā, ka hātepea atu e ahau i roto i tō rātou iwi, a ia, me ngā tāngata katoa e whai ana i a ia, pūremu atu ai, pūremu ai ki a Moreke.
LEV 20:6 “Ki te tahuri anō tētahi wairua ki ngā waka atua, ki ngā mata māori, whai atu ai, pūremu atu ai ki a rātou, ka ū atu anō tōku mata ki taua wairua, ā, ka hātepea atu i roto i tōna iwi.
LEV 20:7 “Engari whakatapua koutou, kia tapu anō hoki; ko Ihowā hoki ahau, ko tō koutou Atua.
LEV 20:8 Ā, kia mau ki āku tikanga, me mahi anō hoki; ko Ihowā ahau e whakatapu nei i a koutou.
LEV 20:9 “Ki te kangā hoki e tētahi tōna pāpā, tōna whaea rānei, me whakamate rawa; kua kanga e ia tōna pāpā, whaea rānei; ko runga anō i a ia ōna toto.
LEV 20:10 “Ā, ki te pūremu tētahi ki te wahine a te tangata, me whakamate rawa te kaipūremu ki te wahine a tōna hoa, te kaipūremu rāua ko te wahine i pūremutia.
LEV 20:11 “Me te tangata hoki i takoto ki te wahine a tōna pāpā, kua hurahia e ia tōna pāpā kia takoto tahanga; me whakamate rāua tokorua, ko runga i a rāua ō rāua toto.
LEV 20:12 “Ki te takoto hoki te tangata ki tāna hunaonga wahine, me whakamate rawa rāua tokorua; he mahi anuanu tā rāua; ko runga i a rāua ō rāua toto.
LEV 20:13 “Ki te takoto hoki he tāngata ki a rāua whakatāne ki te pērā me te takoto ki te wahine, he mahi whakarihariha tā rāua, me whakamate rawa rāua; ko runga i a rāua ō rāua toto.
LEV 20:14 “Ki te tango hoki te tangata i te wahine rāua ko tōna whaea, he mea kino tēnā. Me tahu rātou ki te ahi, te tāne me ngā wāhine; kei whai kino koutou i roto i a koutou.
LEV 20:15 “Ki te takoto hoki te tangata ki te kararehe, me whakamate rawa ia; me whakamate anō hoki te kararehe.
LEV 20:16 “Ki te whakatata hoki te wahine ki tētahi kararehe, ā, ka takoto ki a ia, me whakamate e koe te wahine rāua ko te kararehe; me whakamate rawa rāua, ko runga i a rāua ō rāua toto.
LEV 20:17 “Ki te tango hoki te tangata i tōna tuahine, i te tamāhine a tōna pāpā, i te tamāhine rānei a tōna whaea, ā, ka kite i a ia e takoto tahanga ana, ā, ka kite anō te wahine i a ia e takoto tahanga ana. He mea kino tēnā; ā, ka hātepea atu rāua i te tirohanga a ngā tamariki o tō rāua iwi. Nāna hoki i hura tōna tuahine kia takoto tahanga; ka waha e ia tōna kino.
LEV 20:18 “Ki te takoto hoki te tangata ki te wahine i a ia e paheke ana, ā, ka hura i a ia kia takoto tahanga; kua takoto kau i a ia tōna puna, kua whakaaturia anō e te wahine te puna o ōna toto; ā, ka hātepea atu rāua i roto i tō rāua iwi.
LEV 20:19 “Kaua anō e hurahia kia takoto tahanga te teina, tuakana rānei, o tōu whaea, te tuahine rānei o tōu pāpā. E hurahia ana hoki e ia tōna whanaunga tupu; ka waha e rāua tō rāua kino.
LEV 20:20 “Ki te takoto hoki he tangata ki te wahine a tōna matua kēkē, kua hurahia e ia kia takoto tahanga tōna matua kēkē. Ka waha e rāua tō rāua hara; ka mate urikore rāua.
LEV 20:21 “Ki te tango hoki te tangata i te wahine a tōna tuakana, teina rānei, he mea poke tēnā. Kua hurahia e ia tōna tuakana, teina rānei, kia takoto tahanga; e kore rāua e whai tamariki.
LEV 20:22 “Engari kia mau ki āku tikanga katoa me āku whakaritenga katoa, me mahi anō hoki; kei whakaruakina koutou e te whenua ka kawea nei koutou e ahau ki reira noho ai.
LEV 20:23 Kaua anō e haere i runga i ngā ritenga o te iwi ka peia nei e ahau i tō koutou aroaro; nā rātou hoki ēnei mahi katoa, koia i whakarihariha ai ahau ki a rātou,
LEV 20:24 i mea ai hoki ki a koutou: Ka riro tō rātou whenua i a koutou, ka hoatu hoki e ahau ki a koutou hei kāinga pūmau, he whenua e rerengia ana e te waiū, e te honi. Ko Ihowā ahau, ko tō koutou Atua, i wehe mai nei i a koutou i roto i ngā iwi.
LEV 20:25 “Mō reira me wehe kē e koutou ngā kararehe pokekore me ngā mea poke, ngā manu hoki, ngā mea poke me ngā mea pokekore kei ai hei take whakarihariha mō ō koutou wairua tētahi kararehe, manu rānei, tētahi mea rānei e ngahue ana i te whenua, o ngā mea i wehea atu e ahau i a koutou hei mea poke.
LEV 20:26 Ā, ka tapu koutou ki ahau; nō te mea he tapu ahau, a Ihowā, ā, kua wehea mai koutou e ahau i roto i ngā iwi, kia waiho māku.
LEV 20:27 “Me whakamate rawa anō hoki te tangata, te wahine rānei, he atua māori tōna; me te mata māori hoki. Me āki rāua ki te kōhatu; ko runga i a rāua ō rāua toto.”
LEV 21:1 I mea anō a Ihowā ki a Mohi: “Kōrero ki ngā tohunga, ki ngā tama a Ārona, mea atu ki a rātou: Kaua tētahi e whakapoke i a ia mō te tūpāpaku o tōna iwi;
LEV 21:2 engari, mō tōna whanaunga, mō te mea e tata ana ki a ia, mō tōna whaea, mō tōna pāpā, mō tāna tama, mō tāna tamāhine, mō tōna tuakana, teina rānei,
LEV 21:3 mō tōna tuahine hoki, ki te mea he wāhina, he mea e tata ana ki a ia, ā, kāhore āna tāne; e āhei ana kia poke ia mōna.
LEV 21:4 Kaua ia, he ariki nei nō tōna iwi, e whakapoke i a ia kia noa.
LEV 21:5 “Kaua e whakatiwhaia ō rātou mātenga, kaua hoki e heua ngā taha o ō rātou pāhau, kaua anō hoki e haea tō rātou kikokiko.
LEV 21:6 Kia tapu rātou ki tō rātou Atua, kaua hoki e whakanoatia te ingoa o tō rātou Atua; nō te mea ko rātou hei whakahere i ngā whakahere ahi a Ihowā, i te kai a tō rātou Atua; mō reira kia tapu rātou.
LEV 21:7 “Kaua rātou e tango i te wahine kairau, i te mea noa rānei, hei wahine; kaua anō hoki rātou e tango i te wahine i whakarērea e tāna tāne; he tangata tapu hoki ia nā tōna Atua.
LEV 21:8 Mō reira me whakatapu ia e koe, māna hoki e whakahere te kai a tōu Atua; kia tapu ia ki a koe; he tapu hoki ahau, a Ihowā, tōu kaiwhakatapu.
LEV 21:9 “Me te tamāhine hoki a tētahi tohunga, ki te whakanoa ia i a ia, ki te kairau, kua whakanoatia e ia tōna pāpā; me tahu ki te ahi.
LEV 21:10 “Me te tino tohunga hoki i roto i ōna tēina, te tangata i ringihia nei tōna mātenga ki te hinu whakawahi, ā, i whakatohungatia hei kākahu i ngā kākahu, kaua e tukua e ia ōna makawe kia mahora noa, kaua anō hoki e haea ōna kākahu.
LEV 21:11 Kaua hoki ia e haere atu ki tētahi tūpāpaku mate, kaua anō hoki ia e whakapoke i a ia mō tōna pāpā, mō tōna whaea rānei.
LEV 21:12 Kaua hoki ia e haere ki waho o te wāhi tapu, kei noa i a ia te wāhi tapu o tōna Atua; kei runga hoki i a ia te karauna o te hinu whakawahi o tōna Atua. Ko Ihowā ahau.
LEV 21:13 “Me tango anō hoki e ia he wahine i tōna wāhinatanga.
LEV 21:14 He pouaru, he wahine rānei i whakarērea, he wahine noa rānei, he wahine kairau rānei, kaua ēnei e tangohia e ia. Engari, me tango e ia he wāhina i roto i tōna iwi ake hei wahine,
LEV 21:15 kaua hoki e whakanoatia e ia ōna uri i roto i tōna iwi: ko Ihowā hoki ahau te whakatapu nei i a ia.”
LEV 21:16 I kōrero anō a Ihowā ki a Mohi, i mea,
LEV 21:17 “Kōrero ki a Ārona, mea atu: Ki te mea he koha tō tētahi o ōu uri i ō rātou whakatupuranga, kaua ia e whakatata mai ki te whakahere i te kai a tōna Atua.
LEV 21:18 Kaua hoki e whakatata mai tētahi tangata he koha tōna: te matapō, te kopa, te tangata he ihu parehe tōna, i hira ake rānei tētahi wāhi ōna,
LEV 21:19 te tangata rānei i whati te waewae, i whati rānei te ringa,
LEV 21:20 te tuarā piko rānei, te mea i pūwhenua te tupu, ki te papahewa, rānei tōna kanohi, ki te mea rānei he pāpaka, he hakihaki rānei tōna, ki te mea rānei kua kōmurumurua ōna mea.
LEV 21:21 Kaua tētahi o ngā uri o te tohunga, o Ārona, ki te mea he koha tōna, e whakatata mai ki te whakahere i ngā whakahere ahi a Ihowā; he koha tōna, kaua ia e whakatata ki te whakahere i te kai a tōna Atua.
LEV 21:22 Me kai e ia te kai a tōna Atua, te mea tapu rawa, me te mea tapu.
LEV 21:23 Otiia kaua ia e haere ki te ārai, e whakatata rānei ki te āta; he koha hoki tōna; kei noa i a ia ōku wāhi tapu. Ko Ihowā hoki ahau te whakatapu nei i a rātou.”
LEV 21:24 Ko ngā kōrero ēnei a Mohi ki a Ārona rātou ko āna tama, ki ngā tama katoa anō hoki a Īharaira.
LEV 22:1 I kōrero anō a Ihowā ki a Mohi, i mea,
LEV 22:2 “Kōrero ki a Ārona rātou ko āna tama kia wehea rātou i ngā mea tapu a ngā tama a Īharaira, e whakatapua ana e rātou māku kei noa tōku ingoa tapu. Ko Ihowā ahau.
LEV 22:3 “Mea atu ki a rātou: Ki te whakatata tētahi o ō koutou uri katoa, puta noa i ō koutou whakatupuranga, ki ngā mea tapu e whakatapua ana e ngā tama a Īharaira mā Ihowā, me te mau anō tōna poke, ka hātepea atu taua wairua i tōku aroaro. Ko Ihowā ahau.
LEV 22:4 “Ki te mea he repera tētahi o ngā uri o Ārona, ki te mea rānei he rere tōna; kei kainga e ia ngā mea tapu; kia kore rā anō ōna poke. Ki te pā hoki tētahi ki te mea i poke i te tūpāpaku, ki te tangata rānei kua paheke atu tōna purapura moenga;
LEV 22:5 ki te pā rānei tētahi ki te mea ngōki, e poke ai ia, ki te tangata rānei e poke ai ia, ahakoa he aha rānei, he aha rānei, tōna poke.
LEV 22:6 Ka poke ā ahiahi noa te tangata i pā ki taua mea, kaua anō hoki ia e kai i ngā mea tapu, ki te kāhore i horoia e ia tōna kikokiko ki te wai.
LEV 22:7 Ā, ka tō te rā, ka kore ōna poke; ā muri iho, ka kai i ngā mea tapu, nō te mea ko tāna kai tēnā.
LEV 22:8 He mea mate māori, i haea rānei e te kīrehe, kaua tēnā e kainga e ia, kei poke. Ko Ihowā ahau.
LEV 22:9 Inā, kia mau rātou ki tāku i whakarite ai, kei whai hara, ā, ka mate ki te whakanoatia e rātou. Ko Ihowā ahau te whakatapu nei i a rātou.
LEV 22:10 “Kaua tētahi manene e kai i te mea tapu. Kaua te tangata e noho ana ki te tohunga, te kaimahi rānei, e kai i te mea tapu.
LEV 22:11 Otiia, ki te hokona tētahi tangata e te tohunga ki tāna moni, e kai anō ia; me ngā tāngata anō i whānau ki tōna whare, e kai anō rātou i tāna kai.
LEV 22:12 He tamāhine hoki nā te tohunga kua riro i te tangata iwi kē, kaua ia e kai i te whakahere poipoi o ngā mea tapu.
LEV 22:13 Otiia, ki te mea he pouaru te tamāhine a te tohunga, i whakarērea atu rānei, ā, kāhore āna tamariki, kua hoki mai anō ki te whare o tōna pāpā, kua pērā me ia i tōna taitamāhinetanga, e kai anō ia i te kai a tōna pāpā; kaua ia te tangata kē e kai.
LEV 22:14 “Ā, ki te kai pōhēhē te tangata i te mea tapu, me tāpiri e ia te whakarima o taua mea, ā, ka hōmai tahi me te mea tapu ki te tohunga.
LEV 22:15 Kei whakanoatia e rātou ngā mea tapu a ngā tama a Īharaira, e whakaherea ana mā Ihowā;
LEV 22:16 kei meinga rātou kia whakawaha i te kino o te hē, ina kai i ā rātou mea tapu. Ko Ihowā hoki ahau te whakatapu nei i a rātou.”
LEV 22:17 I kōrero anō a Ihowā ki a Mohi, i mea,
LEV 22:18 “Kōrero ki a Ārona, ki āna tama, ki ngā tama katoa anō a Īharaira, mea atu ki a rātou: Ko te tangata o te whare o Īharaira, o ngā manene rānei i roto i a Īharaira, e mea ana ki te tāpae i tāna whakahere, he kī taurangi, he mea tuku noa rānei nāna, tā rātou e tāpae ai ki a Ihowā hei tahunga tinana;
LEV 22:19 kia manakohia ai koutou, ko tā koutou e tāpae ai hei te toa kohakore, nō roto i ngā kau, i ngā hipi rānei, i ngā koati rānei.
LEV 22:20 Kaua rawa ia e whakaherea tētahi mea he koha tōna; nō te mea e kore e manakohia hei mea mā koutou.
LEV 22:21 “Ki te whakaherea anō hoki e tētahi he patunga mō te pai ki a Ihowā, hei whakamana mō te kī taurangi, hei whakahere tuku noa ake rānei, he kau, he hipi rānei, hei te mea kohakore, kia manakohia ai; kei whai koha.
LEV 22:22 He matapō, he whati, he kopa, kua whai puku, he pāpaka, he mea hakihaki rānei – kaua ēnā e whakaherea mā Ihowā, kaua anō e hōmai hei whakahere ahi ki runga ki te āta mā Ihowā.
LEV 22:23 He pūru he reme rānei, e hira ake ana, kua kore rānei tētahi wāhi ōna, e whakaherea anō tēnā e koe hei whakahere noa ake; otiia e kore e manakohia mō te kī taurangi.
LEV 22:24 Kaua e whakaherea mā Ihowā te mea i romia, te mea rānei i kurua, i unuhia rānei, i pokaia rānei; kaua anō hoki e pēnā i tō koutou whenua.
LEV 22:25 Kaua anō hoki tētahi o ēnei e tāpaea hei kai mā tō koutou Atua, ina hōmai e te tangata iwi kē; he whakahē hoki kei roto, he koha kei roto. E kore ēnei e manakohia hei mea mā koutou.”
LEV 22:26 I kōrero anō a Ihowā ki a Mohi, i mea,
LEV 22:27 “Ka whānau he kau, he hipi, he koati rānei, kia whitu ngā rā e waiho ai ki tōna whaea; ā, i te waru o ngā rā, i ō muri iho hoki, ka manakohia hei whakahere ahi mā Ihowā.
LEV 22:28 Otiia, ahakoa he kau, he hipi rānei, kaua rāua ko tāna kūao e patua i te rangi kotahi.
LEV 22:29 “Ka patua anō e koutou he patunga whakawhetai ki a Ihowā, hei te patunga e manakohia ai koutou.
LEV 22:30 Me kai i taua rangi anō; kaua e waiho tētahi wāhi ki te ata. Ko Ihowā ahau.
LEV 22:31 “Nā, kia mau ki āku whakahau, mahia hoki. Ko Ihowā ahau.
LEV 22:32 Kaua anō e whakanoatia tōku ingoa tapu; engari me whakatapu ahau i roto i ngā tama a Īharaira. Ko Ihowā ahau te whakatapu nei i a koutou,
LEV 22:33 i whakaputa mai nei hoki i a koutou i te whenua o Īhipa, kia waiho ai hei Atua mō koutou. Ko Ihowā ahau.”
LEV 23:1 I kōrero anō a Ihowā ki a Mohi, i mea,
LEV 23:2 “Kōrero ki ngā tama a Īharaira, mea atu ki a rātou: Ko ngā hākari nunui a Ihowā, e karangatia e koutou hei huihuinga tapu, ko ēnei āku hākari.”
LEV 23:3 “E ono ngā rā e mahia ai te mahi; ko te whitu ia o ngā rā he hāpati okiokinga, he huihuinga tapu. Kaua tētahi mahi e mahia; he hāpati tēnā nō Ihowā, i ō koutou nohoanga katoa.
LEV 23:4 “Ko ngā hākari nunui ēnei a Ihowā, ko ngā huihuinga tapu e karangatia e koutou i ngā wā e rite ai.
LEV 23:5 Kei te marama tuatahi, kei te tekau mā whā o te mārama, i te ahiahi, ko te Kapenga a Ihowā,
LEV 23:6 ā, i te tekau mā rima o ngā rā o taua marama anō ko te Hākari Taro Rēwenakore a Ihowā; e whitu ngā rā e kai ai koutou i te taro rēwenakore.
LEV 23:7 Hei te rā tuatahi he huihuinga tapu mā koutou; kaua tētahi mahi a te kaimahi e mahia.
LEV 23:8 Engari, kia whitu ngā rā e whakahere ai koutou i te whakahere ahi mā Ihowā; ā, i te whitu o ngā rā he huihuinga tapu; kaua e mahia tētahi mahi a te kaimahi.”
LEV 23:9 I kōrero anō a Ihowā ki a Mohi, i mea,
LEV 23:10 “Kōrero ki ngā tama a Īharaira, mea atu ki a rātou: E tae koutou ki te whenua e hoatu e ahau ki a koutou, ā, ka kotia ōna hua, me kawe mai tētahi paihere o ngā hua mataati o tā koutou kotinga ki te tohunga.
LEV 23:11 Ā, māna e poipoi te paihere ki te aroaro o Ihowā, kia manakohia ai mō koutou; me poipoi e te tohunga i te aonga ake o te hāpati.
LEV 23:12 Me whakahere anō hoki i te rā e poipoia ai e koutou te paihere, he reme toa, hei te mea kohakore, hei te tau tahi, hei tahunga tinana ki a Ihowā.
LEV 23:13 Ā, ko te whakahere totokore, kia rua ngā whakatekau o te epa parāoa, he mea konatu ki te hinu, hei whakahere ahi mā Ihowā, hei kakara reka; me wāina hoki tōna ringihanga, ko te whakawhā o te hine.
LEV 23:14 Kaua anō hoki e kai i te taro, i te mea pāhūhū, i ngā puku hou rānei, kia taea rā anō te tino rā e kawea ai te whakahere ki tō koutou Atua. He tikanga pūmau mā ō koutou whakatupuranga i ō koutou nohoanga katoa.”
LEV 23:15 “Me tatau anō e koutou i te aonga ake o te hāpati, i te rā i kawea ai te paihere mō te whakahere poipoi; kia tino rite ngā hāpati e whitu.
LEV 23:16 Kia tae rā anō ki te aonga ake o te whitu o ngā hāpati tā koutou tatau i ngā rā e rima tekau; ka whakahere ai koutou i te whakahere totokore, i te mea hou ki a Ihowā.
LEV 23:17 Me kawe mai e koutou i roto i ō koutou nohoanga, kia rua ngā taro poipoi e rua nei ō rāua whakatekau o te epa; he mea parāoa, he mea i tunua rēwenatia, ā, ko ngā tūāpora ēnā mā Ihowā.
LEV 23:18 Me whakahere tahi anō me te taro kia whitu ngā reme, hei te mea kohakore, hei te tau tahi, me tētahi pūru kūao, me ngā hipi toa e rua. Hei tahunga tinana ēnā ki a Ihowā, te whakahere totokore anō hoki, me ngā ringihanga, hei whakahere ahi, hei kakara reka ki a Ihowā.
LEV 23:19 Nā, ka whakaherea tētahi koati toa hei whakahere hara, kia rua anō hoki ngā reme toa, hei te tau tahi, hei patunga mō te pai.
LEV 23:20 Me poipoi ngātahi e te tohunga me te taro o ngā tūāpora, hei whakahere poipoi, ki te aroaro o Ihowā, me ngā reme e rua; ka tapu ēnā ki a Ihowā mā te tohunga.
LEV 23:21 Me karanga anō i taua tino rā he huihuinga tapu mā koutou; kaua e mahia tētahi mahi a te kaimahi. He tikanga pūmau i ō koutou nohoanga katoa, mā ō koutou whakatupuranga.
LEV 23:22 “Ā, ka kotia ngā hua o tō koutou whenua, kaua e tino whakapotoa ngā kokonga o tāu māra ina kotia e koe, kaua anō hoki e hamua ngā toenga o āu hua; me waiho mā te rawakore, mā te manene. Ko Ihowā ahau, ko tō koutou Atua.”
LEV 23:23 I kōrero anō a Ihowā ki a Mohi, i mea,
LEV 23:24 “Kōrero ki ngā tama a Īharaira, mea atu: Hei te whitu o ngā marama, hei te tuatahi o te marama, he hāpati mā koutou, he whakamaharatanga, he whakatangihanga tētere, he huihuinga tapu.
LEV 23:25 Kaua e mahia tētahi mahi a te kaimahi; engari me whakahere he whakahere ahi mā Ihowā.”
LEV 23:26 I kōrero anō a Ihowā ki a Mohi, i mea,
LEV 23:27 “Ko te tekau anō hoki o tēnei marama, o te whitu, hei Rā Whakamārietanga; hei huihuinga tapu tēnā mā koutou. Me whakapōuri hoki ō koutou wairua; me whakahere anō hoki he whakahere ahi ki a Ihowā;
LEV 23:28 ā, kaua rawa e mahia he mahi i taua rangi; he Rā Whakamārie hoki tēnā, e meinga ai he whakamārie mō koutou ki te aroaro o Ihowā, o tō koutou Atua.
LEV 23:29 Nā, ko te wairua e kore e whakapōuritia i taua rā, ka hātepea atu i roto i tōna iwi.
LEV 23:30 Ki te mahia hoki e tētahi wairua tētahi mahi i taua rā, ka whakangaromia e ahau taua wairua i roto i tōna iwi.
LEV 23:31 Kei mahia tētahi mahi, he tikanga pūmau tēnā mā ō koutou whakatupuranga i ō koutou nohoanga katoa.
LEV 23:32 Hei hāpati okiokinga tēnā mō koutou, me whakapōuri ō koutou wairua; me whakahāpati tā koutou hāpati i te iwa o te marama i te ahiahi; i te ahiahi ā tae noa ki tētahi ahiahi.”
LEV 23:33 I kōrero anō a Ihowā ki a Mohi, i mea,
LEV 23:34 “Kōrero ki ngā tama a Īharaira, mea atu: Ko te kotahi tekau mā rima o ngā rā o tēnei marama, o te whitu, te Hākari Whare Wharau ki a Ihowā, kia whitu ngā rā.
LEV 23:35 Hei te rā tuatahi he huihuinga tapu; kaua e mahia tētahi mahi a te kaimahi.
LEV 23:36 E whitu ngā rā e whakahere ai koutou i te whakahere ahi ki a Ihowā; hei te rā waru he huihui tapu mō koutou; ā, ka whakahere he whakahere ahi ki a Ihowā; he huihui nui tēnā, kaua te mahi a te kaimahi e mahia.
LEV 23:37 “Ko ngā hākari ēnei a Ihowā e karangatia e koutou hei huihui tapu, hei whakaherenga mō te whakahere ahi ki a Ihowā, mō te tahunga tinana, mō te whakahere totokore, mō te patunga tapu, mō ngā ringihanga, tēnei mea i tōna rangi, tēnei mea i tōna rangi.
LEV 23:38 Hāunga ngā hāpati a Ihowā, hāunga ā koutou mea hōmai noa, hāunga ā koutou kī taurangi katoa, hāunga ā koutou whakahere tuku noa katoa e hōmai ana ki a Ihowā.
LEV 23:39 “I te tekau mā rima hoki o ngā rā o te whitu o ngā marama, ina poto i a koutou te kohikohi ngā hua o te whenua, me whakarite e koutou he hākari ki a Ihowā, kia whitu ngā rā. Ko te rā tuatahi hei hāpati, ko te rā tuawaru hoki hei hāpati.
LEV 23:40 Nā, i te rā tuatahi ka mau ki ngā peka rākau papai, ki ngā peka nīkau, ki ngā peka hoki o ngā rākau pūruru, ki ngā wirou o te awa; ā, ka koa koutou ki te aroaro o Ihowā, o tō koutou Atua, kia whitu ngā rā.
LEV 23:41 Kia whitu hoki ngā rā o te tau e whakarite ai koutou i te hākari ki a Ihowā. Hei tikanga pūmau tēnei, puta noa i ō koutou whakatupuranga; ko ā te whitu o ngā marama whakaritea ai e koutou.
LEV 23:42 Kia whitu ngā rā e noho ai koutou i roto i ngā wharau; ko ngā tāngata whenua katoa o Īharaira me noho i roto i ngā wharau.
LEV 23:43 Kia mōhio ai ō koutou whakatupuranga i meinga e ahau ngā tama a Īharaira kia noho i roto i ngā wharau, i tāku whakaputanga mai i a rātou i te whenua o Īhipa. Ko Ihowā ahau, ko tō koutou Atua.”
LEV 23:44 Nā, ka kōrerotia atu e Mohi ngā hākari a Ihowā ki ngā tama a Īharaira.
LEV 24:1 I kōrero anō a Ihowā ki a Mohi, i mea,
LEV 24:2 “Whakahaua ngā tama a Īharaira kia kawea e rātou ki a koe, he hinu ōriwa, hei te mea parakore, hei te mea tuki, mō te whakamārama, kia kā tonu ai ngā rama.
LEV 24:3 Me whakapai tonu tēnā e Ārona ki waho o te ārai o te whakaaturanga, i roto i te tapenākara o te whakaminenga, ki te aroaro o Ihowā, i te ahiahi ā tae noa ki te ata; he tikanga pūmau, mā ō koutou whakatupuranga.
LEV 24:4 Me whakapai tonu e ia ngā rama i runga i te tūranga parakore o ngā rama ki te aroaro o Ihowā.”
LEV 24:5 “Me tiki anō e koe he parāoa pai, ka tunu ai kia tekau mā rua ngā keke; kia rua ngā whakatekau o te epa ki te keke kotahi.
LEV 24:6 Ka whakatakoto ai e koe, kia rua ngā rārangi, kia ono ki te rārangi kotahi, ki runga ki te tēpu parakore i te aroaro o Ihowā.
LEV 24:7 Me maka anō hoki e koe he parakihe parakore ki runga i tētahi rārangi, i tētahi rārangi, kia ai taua mea i runga i te taro hei whakamahara, hei whakahere ahi ki a Ihowā.
LEV 24:8 Me whakarārangi tonu e ia, i tēnei hāpati, i tēnei hāpati, ki te aroaro o Ihowā, he mea mō ngā tama a Īharaira; hei kawenata pūmau.
LEV 24:9 Ā, mā Ārona rātou ko āna tama tēnā; me kai e rātou ki te wāhi tapu; he tino tapu hoki tēnā māna i roto i ngā whakahere ahi a Ihowā; hei tikanga pūmau.”
LEV 24:10 Ā, i haere atu i roto i ngā tama a Īharaira tētahi tama a tētahi wahine o Īharaira, ko tōna pāpā nō Īhipa; nā, ka whawhai tēnei tama a te wahine o Īharaira ki tētahi tangata o Īharaira i roto i te puni.
LEV 24:11 Nā, ka kohukohu te tama a te wahine o Īharaira i te ingoa o Ihowā, ka kanga hoki. Ā, kawea ana ia e rātou ki a Mohi, ā, ko te ingoa o tōna whaea ko Heromiti, he tamāhine nā Tipiri, nō te iwi o Rāna.
LEV 24:12 Nā, ka hoatu ia e rātou kia tiakina, mā te kupu hoki a Ihowā te tikanga ki a rātou.
LEV 24:13 Nā, ka kōrero a Ihowā ki a Mohi, ka mea:
LEV 24:14 “Kawea te tangata i kanga rā ki waho o te puni; ā, ko ngā tāngata katoa i rongo i a ia, me popoki ō rātou ringa ki tōna mātenga, ka āki ai te whakaminenga katoa i a ia ki te kōhatu.
LEV 24:15 Me kōrero anō e koe ki ngā tama a Īharaira, me kī atu: Ki te kanga tētahi tangata i tōna Atua, ka waha e ia tōna hara.
LEV 24:16 Ā, ko te tangata e kohukohu i te ingoa o Ihowā, me tino whakamate ia; me tino āki ia e te whakaminenga ki te kōhatu. Ko te manene rāua tahi ko te tangata whenua ka whakamatea, ina kohukohua e ia te ingoa o Ihowā.
LEV 24:17 “Ki te whakamate hoki tētahi i tētahi tangata me tino whakamate anō ia.
LEV 24:18 Ki te whakamate hoki tētahi i te kararehe, me utu e ia; he kararehe mō te kararehe.
LEV 24:19 Ki te mate hoki i te tangata tētahi wāhi o tōna hoa; me mea ki a ia tāna i mea ai:
LEV 24:20 he whati mō te whati, he kanohi mō te kanohi, he niho mō te niho; ko te mate i meatia e ia ki te tangata, me mea anō ki a ia.
LEV 24:21 Ki te whakamate hoki tētahi i te kararehe, me utu e ia; ki te whakamate hoki tētahi i te tangata, me whakamate anō ia.
LEV 24:22 Kia kotahi anō tā koutou whakawā mō te manene, mō te tangata whenua. Ko Ihowā hoki ahau, ko tō koutou Atua.”
LEV 24:23 Nā, ka kōrero a Mohi ki ngā tama a Īharaira, ā, kawea ana e rātou ki waho o te puni te tangata nāna te kanga, ā, ākina ana hoki ki te kāmaka. Ā, meatia ana e ngā tama a Īharaira tā Ihowā i whakahau ai ki a Mohi.
LEV 25:1 I kōrero anō a Ihowā ki a Mohi i Maunga Hinai, i mea,
LEV 25:2 “Kōrero ki ngā tama a Īharaira, mea atu ki a rātou: E tae koutou ki te whenua e hoatu e ahau ki a koutou, nā, ka whakahāpati te whenua i tētahi hāpati ki a Ihowā.
LEV 25:3 E ono ngā tau e whakatōngia ai e koe tāu māra, e ono hoki ngā tau e tapatapahia ai e koe tāu māra wāina, e kohia ai hoki ōna hua;
LEV 25:4 ko te whitu ia o ngā tau hāpati okiokinga mō te whenua, hei hāpati ki a Ihowā. Kaua e whakatōngia tāu māra, e tapatapahia rānei tāu māra wāina.
LEV 25:5 Kaua e kotia te mea i tupu noa ake i tērā kotinga āu, kaua anō e whakia ngā karepe o tāu wāina kīhai nei i mahia; he tau okiokinga hoki tēnā mō te whenua.
LEV 25:6 Ā, hei kai mā koutou te hāpati o te whenua – māu, mā tāu pononga tāne, mā tāu pononga wahine, mā tāu kaimahi, mā tōu manene hoki e noho ana i a koe;
LEV 25:7 mā āu kararehe hoki, mā te kīrehe hoki o tōu whenua, ōna hua katoa, hei kai.”
LEV 25:8 “Ā, me tatau e koe kia whitu ngā tau hāpati, kia whitu ngā whitu o ngā tau; ā, ko taua takiwā, ko ngā tau hāpati e whitu, ka kīia e koe e whā tekau mā iwa tau.
LEV 25:9 Kātahi ka whakatangihia e koe te tētere tangi nui i te tekau o ngā rā o te whitu o ngā marama – ko ā te Rā Whakamārietanga – mea ai koutou kia pakū atu te tangi o te tētere puta noa i tō koutou whenua.
LEV 25:10 Ā, me whakatapu te rima tekau o ngā tau, ka karanga ai i te haere noa puta noa i te whenua mā ngā tāngata katoa o te whenua; hei Tiupiri nui tēnā mā koutou; ā, me hoki koutou ki tōna kāinga, ki tōna kāinga, me hoki anō ki ōna whanaunga, ki ōna whanaunga.
LEV 25:11 Ko tēnā tau, ko te rima tekau, hei Tiupiri mā koutou: kaua e rui, kaua e kokoti i te mea tupu noa ake o tēnā tau, kaua hoki e whakia ngā wāina kīhai i mahia.
LEV 25:12 Ko te Tiupiri hoki ia; kia tapu ki a koutou; ko ōna hua o te māra hei kai mā koutou.
LEV 25:13 “Me hoki koutou i tēnei tau Tiupiri, ki tōna kāinga, ki tōna kāinga.
LEV 25:14 Ki te hokona atu anō e koe tētahi mea ki tōu hoa, ki te hokona mai rānei tētahi mea e te ringa o tōu hoa, kaua e tūkinotia tētahi e tētahi.
LEV 25:15 Kia rite āu utu ki tōu hoa ki te maha o ngā tau i muri i te Tiupiri; kia rite anō ki te maha o ngā tau hua tāna hoko ki a koe.
LEV 25:16 Kia rite tāu whakanui i te utu o taua mea ki te maha o ngā tau, kia rite hoki tāu whakaiti i ōna utu ki te torutoru o ngā tau; e rite ana hoki ki te maha o ngā tau hua tāna hoko ki a koe.
LEV 25:17 Ā, kaua e tūkino tētahi ki tētahi, engari e wehi koe ki tōu Atua. Ko Ihowā hoki ahau, ko tō koutou Atua.”
LEV 25:18 “Mō reira me mahi e koutou āku tikanga, me pupuru āku whakaritenga, me mahi hoki; ā, ka noho hūmārie koutou i runga i te whenua.
LEV 25:19 Ā, ka tukua ōna hua e te whenua, ā, ka kai koutou, ka mākona, ka noho hūmārie hoki ki reira.
LEV 25:20 Ā, ki te mea koutou, ‘He aha he kai mā tātou i te whitu o ngā tau? Titiro hoki, e kore tātou e rui, e kore hoki e kohi i ā tātou hua.’
LEV 25:21 Māku rā e whakahau iho tāku manaaki ki a koutou i te ono o ngā tau, ā, ka whai hua mō ngā tau e toru.
LEV 25:22 Ā, ka rui koutou i te waru o ngā tau, ka kai anō i ngā hua pakoko; ā tae noa ki te iwa o ngā tau, me kai ngā mea pakoko, kia riro rā anō ngā hua o tēnā tau.”
LEV 25:23 “Kaua e hokona te whenua, he mea oti tonu atu; nōku hoki te whenua; he manene hoki koutou, he noho noa ki ahau.
LEV 25:24 Me whakaae hoki ki te utu e hoki ai te whenua, i tō koutou whenua katoa.
LEV 25:25 “Ki te rawakoretia tōu teina, ā, ka hokona e ia tētahi wāhi o tōna kāinga, me haere mai tōna whanaunga e tata rawa ana ki a ia, ka utu i te mea i hokona atu e tōna teina kia hoki ai.
LEV 25:26 Ā, ki te kāhore he kaiutu a tētahi tangata, ā, ka whiwhi taonga ia, ā, ka taea anō e ia te utu.
LEV 25:27 Nā, me tatau e ia ngā tau i hokona ai, ā, ka whakahoki i te tuhene ki te tangata i hokona atu ai; ā, ka hoki ai ia ki tōna kāinga.
LEV 25:28 Otiia, ki te kāhore e taea e ia te whakahoki mai ki a ia anō, nā, me waiho tāna i hoko ai ki te ringa o te tangata nāna i hoko, ā tae noa ki te tau Tiupiri. Ā, i te Tiupiri ka riro, ā, ka hoki ia ki tōna kāinga.
LEV 25:29 “Ki te hokona e te tangata he whare nohoanga i te pā taiepa, e āhei ia te utu kia hoki mai anō i roto i te tau kotahi i muri i te rironga; kotahi tino tau hei whakahokinga māna.
LEV 25:30 Ā, ki te kāhore e utua, ā tino taka noa te tau, kātahi ka whakapūmautia mō ake tonu atu te whare i te pā taiepa mō te tangata nāna i hoko, puta noa i ōna whakatupuranga; e kore e riro i te Tiupiri.
LEV 25:31 Ko ngā whare ia o ngā kāinga, kāhore nei he taiepa ā tawhio noa, ka kīia e rite ana ki ngā pārae o te whenua; ka hoki anō ēnā ina utua, ka riro anō i te Tiupiri.
LEV 25:32 “Ko ngā pā ia o ngā Rīwaiti, me ngā whare o ngā pā e nohoia ana e rātou, e hoki ki ngā Rīwaiti, ahakoa utua i tēhea wā.
LEV 25:33 Ā, mehemea nā tētahi o ngā Rīwaiti i utu – nā, ka riro te whare i hokona rā me tōna pā i te Tiupiri – ko ngā whare hoki o ngā pā o ngā Rīwaiti tō rātou kāinga pūmau i roto i ngā tama a Īharaira.
LEV 25:34 Ko te māra ia i te taha o ō rātou pā kaua e hokona; nō te mea he wāhi pūmau tēnā nō rātou.”
LEV 25:35 “Ā, ki te rawakoretia tōu teina, ā, ka wiri tōna ringa i roto i a koe; me atawhai e koe; me noho manene ia, me noho noa rānei i a koe.
LEV 25:36 Kaua e tangohia i a ia he moni whakatuputupu, he whakanuinga rānei; engari me wehi koe ki tōu Atua; kia noho ai tōu teina i a koe.
LEV 25:37 Kaua tāu moni e hoatu ki a ia hei mea whakatuputupu, kaua anō hoki āu kai e hoatu ki a ia, me te whakaaro anō ki tētahi whakanuinga ake.
LEV 25:38 Ko Ihowā ahau, ko tō koutou Atua, i kawe mai nei i a koutou i te whenua o Īhipa, e mea nei kia hoatu te whenua o Kanaana, ki a koutou kia waiho anō ahau hei Atua mō koutou.”
LEV 25:39 “Ā, ki te rawakoretia tōu teina e noho ana i roto i a koe, ā, ka hokona ki a koe; kaua ia e whakamahia e koe ki te mahi pononga.
LEV 25:40 Kia rite ia i roto i a koe ki te kaimahi, ki te noho noa. Ka mahi anō ia ki a koe, ā tae noa ki te tau Tiupiri.
LEV 25:41 Ko reira ia mawehe ai i a koe, rātou ko āna tamariki, ā, ka hoki ki ōna whanaunga, ka hoki anō ki te kāinga o ōna mātua.
LEV 25:42 Ko rātou hoki āku pononga, i whakaputaina mai ai e ahau i te whenua o Īhipa; kaua rātou e hokona hei pononga.
LEV 25:43 Kaua e taikaha tāu whakarangatira ki a ia; engari me wehi ki tōu Atua.
LEV 25:44 “Tēnā ko ngā pononga tāne me ngā pononga wāhine māu; me hoko e koe i ngā iwi i tētahi taha ōu, i tētahi taha he pononga tāne, he pononga wāhine māu.
LEV 25:45 Mā koutou anō hoki e hoko ētahi o ngā tamariki a ngā manene e noho ana i roto i a koutou, ētahi hoki o roto o ō rātou hapū i roto i a koutou, o ngā mea i whānau i a rātou ki tō koutou whenua; ā, puritia iho mā koutou.
LEV 25:46 Me waiho hoki ēnā e koutou hei taonga tupu e tukua iho kia puritia e ā koutou tama i muri i a koutou; hei pononga rātou mā koutou ake ake. Kaua ia e taikaha tā koutou whakarangatira ki a koutou anō, ki ō koutou tēina, ki ngā tama a Īharaira.
LEV 25:47 “Ki te whai rawa hoki te manene, noho noa rānei, i roto i a koe, ā, ka rawakoretia tōu teina i tōna taha, ā, ka hoko i a ia ki te manene, ki te noho noa rānei i roto i a koe, ki te toronga rānei o te hapū o te manene;
LEV 25:48 e whakahokia anō ia mō te utu i muri i tōna hokonga; mā tētahi o ōna tēina ia e whakahoki,
LEV 25:49 mā tōna matua kēkē, mā te tamaiti rānei a tōna matua kēkē ia e whakahoki, mā tētahi rānei o ōna whanaunga tupu o tōna hapū ia e whakahoki; māna anō rānei ia e whakahoki, ki te taea e ia.
LEV 25:50 Nā, ka tatau ia, rāua ko te tangata nāna ia i hoko, ka tīmata i te tau i hokona ai ia ki a ia, tae noa ki te tau Tiupiri; ā, ka rite te utu e hokona ai ia ki te maha o ngā tau; kia rite ki ō te kaimahi ōna rā ki a ia.
LEV 25:51 Ki te maha ake ngā tau, kia rite ki ēnā te utu mō tōna hokinga e whakahokia atu e ia i roto i te moni i hokona ai ia.
LEV 25:52 Ā, ki te torutoru ngā tau e toe ana ki te tau Tiupiri, nā, ka tatau rāua; ā, kia rite ki ōna tau te utu e whakahokia e ia ki a ia.
LEV 25:53 Ko tōna noho ki a ia kia rite ki tā te kaimahi e utua ana i te tau; kaua hoki tērā e whakatupu rangatira nanakia ki a ia i tāu tirohanga.
LEV 25:54 “Ā, ki te kāhore ia e hokona i ēnei tikanga, nā, me haere atu ia i te tau Tiupiri, rātou tahi ko āna tamariki.
LEV 25:55 He pononga hoki ki ahau ngā tama a Īharaira; ko āku pononga rātou i whakaputaina mai e ahau i te whenua o Īhipa: ko Ihowā ahau, ko tō koutou Atua.”
LEV 26:1 “Kei hanga koutou he whakapakoko mā koutou, kei whakaara rānei he whakapakoko, he mea whaowhao, he pou rānei, kaua anō hoki he kōhatu āhua ki tō koutou whenua hei koropikotanga atu; ko Ihowā hoki ahau, ko tō koutou Atua.
LEV 26:2 Kia mau ki āku hāpati, kia hopohopo anō ki tōku wāhi tapu. Ko Ihowā ahau.
LEV 26:3 “Ki te haere koutou i runga i āku tikanga, ā, ka pupuri i āku whakahau, ka mahi hoki.
LEV 26:4 Nā, ka hoatu e ahau he ua ki a koutou i tōna pō anō, ā, ka tukua ōna hua e te whenua, ā, ka hua ngā hua o ngā rākau o te pārae.
LEV 26:5 Ā, ka tutuki atu tā koutou patunga wīti ki te whakinga wāina, me te whakinga wāina ki te wā ruinga; ā, ka kai koutou i tā koutou taro, ka mākona, ka ū anō te noho ki tō koutou whenua.
LEV 26:6 “Ā, ka tukua iho e ahau te āta noho ki te whenua, ā, ka takoto iho koutou, kāhore anō hoki he tangata hei mea i a koutou kia wehi. Ka whakakāhoretia atu anō hoki e ahau ngā kīrehe kino i te whenua, e kore anō hoki te hoari e tika nā waenga o tō koutou whenua.
LEV 26:7 Ā, ka whāia e koutou ō koutou hoariri, ā, ka hinga rātou i te hoari ki tō koutou aroaro.
LEV 26:8 Ka whāia hoki te rau kotahi e te tokorima o koutou, ā, ka whati ngā mano kotahi tekau i te rau kotahi o koutou; nā, ka hinga ō koutou hoariri i te hoari ki tō koutou aroaro.
LEV 26:9 “Ka whai whakaaro hoki ahau ki a koutou, ā, ka meinga koutou kia hua, kia tini; ā, ka pūmau tāku kawenata ki a koutou.
LEV 26:10 Ā, ka kai koutou i te kai kua roa e pakoko ana, ā, ka whakaputa i te pakoko ki waho mō te hua hou.
LEV 26:11 Ā, ka whakatūria e ahau tāku tapenākara ki waenganui i a koutou, e kore anō tōku wairua e whakarihariha ki a koutou.
LEV 26:12 Ka hāereere anō hoki ahau i roto i a koutou, ā, hei Atua ahau mō koutou, ko koutou hoki hei iwi māku.
LEV 26:13 Ko Ihowā ahau, ko tō koutou Atua i kawe mai nei i a koutou i te whenua o Īhipa, kei waiho hei pononga mā rātou; motu pū hoki i ahau ngā here o tō koutou ioka, ā, meinga ana koutou kia haere tū.”
LEV 26:14 “Tēnā ko tēnei, ka kore koutou e whakarongo ki ahau, ka kore e mahi i ēnei whakahau katoa;
LEV 26:15 ā, ka whakahāwea ki āku tikanga, ka whakarihariha rānei ō koutou wairua ki āku whakaritenga, ā, kāhore e mahia āku whakahau katoa, engari ka whakatakā tāku kawenata.
LEV 26:16 Nā, ka meinga anō hoki tēnei e ahau ki a koutou; ka meinga e ahau hei rangatira mō koutou te pāwera, te kohi, me te kirikā, hei ngau i ngā kanohi, hei whakapōuri i te ngākau. Ā, ka maumau tā koutou rui i ā koutou purapura; nō te mea ka kainga e ō koutou hoariri.
LEV 26:17 Ā, ka ū atu tōku mata ki a koutou, ā, ka patua koutou i te aroaro o ō koutou hoariri, ka meinga hei kīngi mō koutou te hunga e kino ana ki a koutou; ā, ka rere koutou, ahakoa kāhore he kaiwhai.
LEV 26:18 “Ā, ki te kāhore tonu koutou e rongo ki ahau i ēnei meatanga, nā, e whitu atu āku pakinga i a koutou mō ō koutou hara.
LEV 26:19 Ka whati anō i ahau te whakapehapeha o tō koutou kaha; ā, ka meinga tō koutou rangi kia whakarino, tō koutou whenua hoki kia whakaparāhi.
LEV 26:20 Ā, ka poto kau ō koutou uaua; nō te mea e kore tō koutou whenua e tuku ake i ōna hua, e kore anō hoki e hua ngā hua o ngā rākau o te whenua.
LEV 26:21 “Ā, ki te anga kē atu tā koutou haere i ahau, ki te kore e rongo ki ahau; nā, ka hoatu e ahau kia whitu atu anō ngā whiu ki a koutou, kia rite ki ō koutou hara.
LEV 26:22 Ka tukua anō e ahau te kīrehe koraha ki a koutou, hei kāwhaki i ā koutou tama, hei whakamōtī i ā koutou kararehe, hei mea i a koutou kia torutoru; ā, ka ururuatia ō koutou huanui.
LEV 26:23 “Ā, ki te kāhore koutou e hoki ake ki te pai i ēnei meatanga āku, ā, ka anga kē atu koutou i ahau;
LEV 26:24 heoi, ka anga kē atu hoki ahau i a koutou; ā, ka whiua koutou e ahau, e ahau anō nei, kia whitu atu anō, mō ō koutou hara.
LEV 26:25 Ā, ka kawea e ahau he hoari ki a koutou, hei tohe i te utu mō tāku kawenata. Ā, ka huihui koutou ki roto ki ō koutou pā; ā, ka tukua e ahau te mate urutā ki a koutou; ā, ka hoatu koutou ki te ringa o te hoariri.
LEV 26:26 Ki te whati i ahau tā koutou tokotoko, arā te taro, ka tunua tā koutou taro e ngā wāhine kotahi tekau ki te oumu kotahi, ā, ka whakahokia e rātou tā koutou taro, he mea pāuna; ā, ka kai koutou, ā, e kore e mākona.
LEV 26:27 “Ā, ki te kāhore koutou e rongo ki ahau i ēnei meatanga katoa, ā, ka anga kē atu anō koutou i ahau.
LEV 26:28 Kātahi ahau ka tahuri kino atu i a koutou; ā, māku nei anō koutou e papaki, e whitu atu pakinga, mō ō koutou hara.
LEV 26:29 Ā, e kai koutou i te kikokiko o ā koutou tama, ka kainga hoki e koutou te kikokiko o ā koutou tamāhine.
LEV 26:30 Ā, ka ngaro i ahau ā koutou wāhi teitei, ka tapahia anō hoki ā koutou whakapakoko, ka makā ō koutou tinana ki runga ki ngā tinana o ā koutou whakapakoko; ā, ka whakarihariha anō hoki tōku wairua ki a koutou.
LEV 26:31 Ka ururua anō i ahau ō koutou pā, ka hoki ō koutou wāhi tapu, e kore anō hoki ahau e hongi ki ā koutou kakara reka.
LEV 26:32 Ā, ka tūhea i ahau te whenua; e mīharotia ai e ō koutou hoariri e noho ana i reira.
LEV 26:33 Ā, ka whakamararatia koutou ki roto ki ngā tauiwi, ka maunu hoki i ahau te hoari hei whai i a koutou. Ā, ka tūheatia tō koutou whenua, ka ururuatia hoki ō koutou pā.
LEV 26:34 “Ko reira koa ai te whenua i ōna hāpati, i ngā rā katoa ōna e takoto tūhea ana, i a koutou hoki i te whenua o ō koutou hoariri; ko reira hoki te whenua okioki ai, koa ai hoki i ōna hāpati.
LEV 26:35 Ka okioki i ngā rā katoa o tōna tūheatanga; ko te okioki kīhai i a ia i ō koutou hāpati, i a koutou e noho ana i reira.
LEV 26:36 “Tēnā ko ngā mōrehu o koutou ka ungā e ahau he whakangohe ki ō rātou ngākau i ngā whenua o ō rātou hoariri; ā, ka whati rātou i te ngaehe rau rākau e āia ana; ā, ka rere rātou, ānō e rere ana i te hoari; ā, ka hinga ahakoa kāhore he kaiwhai.
LEV 26:37 Ā, ka tutetute rātou tētahi ki tētahi, ānō e whāia ana e te hoari, i te mea kāhore he kaiwhai. Ā, ka kore he tūranga ake mō koutou ki te aroaro o ō koutou hoariri.
LEV 26:38 Ā, ka ngaro koutou i ngā tauiwi, ka pau anō i te whenua o ō koutou hoariri.
LEV 26:39 Ā, ko ngā toenga o koutou, ka memeha haere i roto i tō rātou kino i ngā whenua o ō koutou hoariri; ka memeha haere rātou i roto i ngā kino ō rātou ko ō rātou mātua.
LEV 26:40 “Ā, ka whākina e rātou tō rātou kino, me te kino o ō rātou mātua, i tō rātou haranga i hara ai ki ahau, me tō rātou haerenga kētanga atu i tāku –
LEV 26:41 i anga kē atu ai ahau i a rātou, i kawea ai rātou ki te whenua o ō rātou hoariri; ki te iro i reira ō rātou ngākau kokotikore, ā, ka whakaae ki te pakinga mō tō rātou kino.
LEV 26:42 Kātahi ahau ka mahara ki tāku kawenata ki a Hākopa; ki tāku kawenata hoki ki a Īhaka; ka mahara anō ki tāku kawenata ki a Āperahama; ka mahara ki te whenua.
LEV 26:43 Ka mahue anō te whenua i a rātou, ā, ka koa ki ōna hāpati, i a ia e takoto tūhea ana, i te mea kāhore nei rātou: me rātou hoki, ka whakaae ki te whiu mō tō rātou kino. Mō tēnei hoki, āe rā mō tēnei, i whakahāwea rātou ki āku whakaritenga, ā, i whakarihariha tō rātou wairua ki āku tikanga.
LEV 26:44 “Nā, ahakoa he pēnā, e kore ahau e whakakāhore ki a rātou, i a rātou i te whenua o ō rātou hoariri, e kore anō e whakarihariha ki a rātou, e huna rawa i a rātou, e whakataka rānei i tāku kawenata ki a rātou. Ko Ihowā hoki ahau, ko tō rātou Atua.
LEV 26:45 Engari, he mea mō rātou, ka mahara ahau ki te kawenata o ō rātou tūpuna, i kawea mai nei e ahau i te whenua o Īhipa i te tirohanga a ngā tauiwi, ki ahau hei Atua mō rātou. Ko ahau a Ihowā.”
LEV 26:46 Ko ngā tikanga ēnei, me ngā whakaritenga, me ngā ture i whakatakotoria e Ihowā ki waenganui ōna, o ngā tama a Īharaira, ki Maunga Hinai, he mea nā te ringa o Mohi.
LEV 27:1 I kōrero anō a Ihowā ki a Mohi, i mea,
LEV 27:2 “Kōrero ki ngā tama a Īharaira, mea atu ki a rātou: Ki te motuhia e te tangata, he mea kī taurangi, mā Ihowā ngā tāngata, me whakarite e koe ngā moni.
LEV 27:3 Ā, kia pēnei tāu whakarite mō te tāne e rua tekau ōna tau, he maha ake rānei, ā, ono tekau noa ngā tau, arā kia rima tekau ngā hekere hiriwa e whakaritea e koe, hei te hekere o te wāhi tapu.
LEV 27:4 Ā, ki te mea he wahine, kia toru tekau ngā hekere e whakaritea e koe.
LEV 27:5 Ā, ki te mea e rima ōna tau, tae noa atu rānei ki te rua tekau tau, nā, kia rua tekau ngā hekere e whakaritea e koe mō te tāne, kia tekau hoki ngā hekere mō te wahine.
LEV 27:6 Ā, ki te mea kotahi tōna marama ā tae noa atu rānei ki te rima ōna tau, nā, kia rima ngā hekere hiriwa e whakaritea e koe mō te tāne, kia toru ngā hekere hiriwa e whakaritea e koe mō te wahine.
LEV 27:7 Ā, ki te mea e ono tekau ōna tau, he maha atu rānei; ki te mea he tāne, kia kotahi tekau mā rima ngā hekere e whakaritea e koe, kia kotahi tekau hoki ngā hekere mō te wahine.
LEV 27:8 Ā, ki te iti iho ōna rawa i āu i whakarite ai, nā, me tū ia ki te aroaro o te tohunga, ā, me whakarite ōna utu e te tohunga. Kei ngā mea e taea atu e te ringa o te tangata nāna te kī taurangi te tikanga mō tā te tohunga e whakarite ai hei utu mōna.
LEV 27:9 “Ā, mehemea he kararehe nō reira nei te whakahere a te tangata ki a Ihowā, ka tapu katoa ngā mea o tēnā i hōmai e ia mā Ihowā.
LEV 27:10 Kaua e whakareretia kētia e ia, e whakawhitia rānei, he pai mō te kino, he kino rānei mō te pai. Ā, ki te tūpono ka whakawhitia e ia he kararehe ki tētahi kararehe, nā, ka tapu taua mea me te mea i whakawhitia ai.
LEV 27:11 Ā, ki te mea he poke te kararehe, he mea e kore e whakaherea tētahi pērā mā Ihowā, nā, ka whakatūria e ia te kararehe ki te aroaro o te tohunga.
LEV 27:12 Ā, me whakarite ōna utu e te tohunga, ahakoa pai, ahakoa kino; me waiho i tāu i whakarite ai, e te tohunga.
LEV 27:13 Otiia, ki te mea ia kia utua kia hoki ai, nā, me tāpiri tōna wāhi whakarima ki tāu i whakarite ai.
LEV 27:14 “Ki te whakatapua anō e te tangata tōna whare kia tapu ki a Ihowā, nā, me whakarite ōna utu e te tohunga, ahakoa pai, ahakoa kino; ko tā te tohunga e whakarite ai, ka tūturu ki reira.
LEV 27:15 Ā, ki te mea te kaiwhakatapu kia utua kia hoki ai tōna whare, nā, me tāpiri tōna whakarima o te moni i whakaritea e koe, ā, ka riro i a ia.
LEV 27:16 “Ā, ki te whakatapua e te tangata mō Ihowā tētahi wāhi māra o tōna kāinga, nā, kia rite ki ngā purapura mō reira tāu whakaritenga utu: kotahi te homa pārei hei purapura, kia rima tekau hekere hiriwa.
LEV 27:17 Ki te mea nō te tau Tiupiri tāna whakatapunga i tāna māra, ka tūturu anō ki tāu utu i whakarite ai.
LEV 27:18 Mehemea ia nō muri i te Tiupiri tāna whakatapunga i tāna māra, nā, mā te tohunga e tatau ngā moni ki a ia, kia rite ki ngā tau e toe ana ki te tau Tiupiri, ka tango ai i roto i tāu i whakarite ai.
LEV 27:19 Ā, ki te mea te kaiwhakatapu o te māra kia utua kia hoki atu ai, nā, me tāpiri tōna whakarima o te moni i whakaritea e koe, ā, ka whakatūturutia māna.
LEV 27:20 Ā, ki te kāhore ia e utu kia hoki ai te māra, ki te mea rānei i hokona e ia te māra ki te tangata kē, e kore e utua kia hoki atu i muri iho.
LEV 27:21 Engari ka tapu te māra ki a Ihowā, ina riro atu i te Tiupiri, he māra hoki i oti rawa; hei kāinga tēnā mō te tohunga.
LEV 27:22 “Ki te whakatapua ia e tētahi ki a Ihowā he māra i hokona mai e ia, ehara nei i te māra tupu nāna;
LEV 27:23 kātahi ka taua e te tohunga ki a ia ngā utu i whakaritea e koe mō te takiwā atu ki te tau Tiupiri. Ā, ka hōmai e ia tāu i whakarite ai i taua rangi, he mea tapu hoki nā Ihowā.
LEV 27:24 Ko ā te tau Tiupiri hoki ai te māra ki te tangata i hokona mai nei i a ia, arā ki te tangata nōna te tūturutanga o te whenua.
LEV 27:25 Hei te hekere o te wāhi tapu te tikanga mō āu whakaritenga katoa; e rua tekau ngā kera o te hekere kotahi.
LEV 27:26 “Ko te mātāmua ia o ngā kararehe, i meinga nei hei mātāmua ki a Ihowā, kaua ēnā e whakatapua e te tangata; ahakoa kau, hipi rānei; nā Ihowā ēnā.
LEV 27:27 Ā, ki te mea nō ngā kararehe poke, nā, kia rite ki tāu whakaritenga tāna utu mō te whakahokinga atu, me tāpiri anō e ia tōna whakarima; ā, ki te kāhore e utua, e whakahokia, nā, me hoko; kia rite ngā utu ki āu i whakarite ai.
LEV 27:28 “Kaua ia e hokona, e utua rānei kia hoki atu te mea i oti rawa, i tukua pūtia mai e te tangata ki a Ihowā i roto i ōna taonga katoa, te tangata rānei, te kararehe rānei, te māra rānei o tōna kāinga tupu; he tino tapu ki a Ihowā ngā mea katoa i oti.
LEV 27:29 “Ki te tukua pūtia mai tētahi tangata, he mea oti rawa, e kore e utua, e whakahokia; me whakamate rawa.
LEV 27:30 “Me ngā whakatekau katoa o te whenua, o te purapura rānei o te whenua, o ngā hua rānei o te rākau, nā Ihowā ēnā; he tapu ki a Ihowā.
LEV 27:31 Ā, ki te mea te tangata kia utua, kia hoki ai ētahi o āna whakatekau; me tāpiri mai tētahi o ōna wāhi whakarima.
LEV 27:32 Ā, ko ngā whakatekau katoa o ngā kau, o ngā hipi, o ngā mea katoa e haere mai ana i raro i te tokotoko, ka tapu tēnā whakatekau ki a Ihowā.
LEV 27:33 Kaua e tirohia iho e ia, wehe ai i te pai i te kino, kaua anō hoki e whakawhitia; ā, ki te whakawhitia e ia, nā, ka tapu taua mea me tōna utu anō; e kore e utua kia hoki.”
LEV 27:34 Ko ngā whakahau ēnei ki ngā tama a Īharaira i whakahaua e Ihowā ki a Mohi ki Maunga Hinai.
NUM 1:1 Ā, i kōrero a Ihowā ki a Mohi i te i koraha o Hinai i roto i te tapenākara o te whakaminenga, i te rā tuatahi o te rua o ngā marama, i te rua o ngā tau o tō rātou haerenga mai i te whenua o Īhipa, i mea:
NUM 1:2 “Tirohia te tokomaha o te whakaminenga katoa o ngā tama a Īharaira, i ō rātou hapū, i ngā whare o ō rātou mātua, tatau rawa i ngā ingoa o ngā tāne katoa, tēnei pane, tēnei pane ō rātou.
NUM 1:3 Ko ngā mea e rua tekau, he maha atu rānei ngā tau, ko ngā mea hoki e kaha ana i roto i a Īharaira ki te haere ki te whawhai, mā kōrua ko Ārona rātou e tatau, tēnei ope, tēnei ope.
NUM 1:4 Kia kotahi hoki te tangata o tēnei iwi, o tēnei iwi, hei hoa mō kōrua; arā ko ngā upoko o tēnei whare, o tēnei whare o ō rātou mātua.
NUM 1:5 Ko ngā ingoa hoki ēnei o ngā tāngata e tū tahi me kōrua: Nō Reupena; ko Erituru, tama a Hereuru.
NUM 1:6 Nō Himiona; ko Herumiere, tama a Turiharai.
NUM 1:7 Nō Hūrā; ko Nāhahona, tama a Aminarapa.
NUM 1:8 Nō Ihākara; ko Netanēre, tama a Tuara.
NUM 1:9 Nō Hepurona; ko Eriapa, tama a Herona.
NUM 1:10 Nō ngā tama a Hōhepa: nō Ēparaima; ko Erihama, tama a Amihuru; nō Mānahi; ko Kamariere, tama a Peraturu.
NUM 1:11 Nō Pineamine; ko Apirana, tama a Kirioni.
NUM 1:12 Nō Rāna; ko Ahiētere, tama a Amiharai.
NUM 1:13 Nō Āhera; ko Pakiere, tama a Okorana.
NUM 1:14 Nō Kara; ko Eriāhapa, tama a Teuere.
NUM 1:15 Nō Napatari; ko Ahira, tama a Enana.”
NUM 1:16 Ko ngā mea whai ingoa ēnei o te whakaminenga, ko ngā ariki o ngā iwi o ō rātou mātua; ko rātou ngā upoko o ngā mano i roto i a Īharaira.
NUM 1:17 Nā, ka tīkina e Mohi rāua ko Ārona ēnei tāngata nō rātou ngā ingoa kua whakahuatia nei,
NUM 1:18 ā, huihuia ana e rātou te whakaminenga katoa i te rā tuatahi o te rua o ngā marama. Ā, ka whakaaturia e rātou ō rātou whakapapa, tēnei hapū, tēnei hapū, me ngā whare o ō rātou mātua, tatau rawa ngā ingoa, he pane, he pane, ngā mea e rua tekau, he maha atu rānei ō rātou tau.
NUM 1:19 Rite tonu ki tā Ihowā i whakahau ai ki a Mohi tāna tauanga i a rātou i te koraha o Hinai.
NUM 1:20 Ā, ko ngā tama a Reupena, mātāmua a Īharaira: i ō rātou toronga, i ō rātou hapū, i ngā whare o ō rātou mātua, tatau rawa ngā ingoa, he pane, he pane, o ngā tāne katoa e rua tekau. He maha atu rānei ngā tau, o ngā mea katoa i kaha ki te haere ki te whawhai.
NUM 1:21 Ko ngā mea o rātou, o te iwi o Reupena, i taua, e whā tekau mā ono mano e rima rau.
NUM 1:22 Nō ngā tama a Himiona: i ō rātou toronga, i ō rātou hapū, i ngā whare o ō rātou mātua, ko ngā mea o rātou i taua, tatau rawa ngā ingoa, he pane, he pane, o ngā tāne katoa e rua tekau he maha atu rānei ngā tau, o ngā mea katoa i kaha ki te haere ki te whawhai.
NUM 1:23 Ko ngā mea i taua o rātou, o te iwi o Himiona, e rima tekau mā iwa mano e toru rau.
NUM 1:24 Nō ngā tama a Kara: i ō rātou toronga, i ō rātou hapū, i ngā whare o ō rātou mātua, tatau rawa ngā ingoa o ngā mea e rua tekau, he maha atu rānei ngā tau, o ngā mea katoa i kaha ki te haere ki te whawhai.
NUM 1:25 Ko ngā mea i taua o rātou, o te iwi o Kara, e whā tekau mā rima mano e ono rau e rima tekau.
NUM 1:26 Nō ngā tama a Hūrā: i ō rātou toronga, i ō rātou hapū, i ngā whare o ō rātou mātua, tatau rawa ngā ingoa o ngā mea e rua tekau, he maha atu rānei ō rātou tau, o ngā mea katoa i kaha ki te haere ki te whawhai.
NUM 1:27 Ko ngā mea i taua o rātou, o te iwi o Hūrā, e whitu tekau mā whā mano e ono rau.
NUM 1:28 Nō ngā tama a Ihākara: i ō rātou toronga, i ō rātou hapū, i ngā whare o ō rātou mātua, tatau rawa ngā ingoa o ngā mea e rua tekau, he maha atu rānei ō rātou tau, o ngā mea katoa i kaha ki te haere ki te whawhai.
NUM 1:29 Ko ngā mea i taua o rātou, o te iwi o Ihākara, e rima tekau mā whā mano e whā rau.
NUM 1:30 Nō ngā tama a Hepurona: i ō rātou toronga, i ō rātou hapū, i ngā whare o ō rātou mātua, tatau rawa ngā ingoa o ngā mea e rua tekau, he maha atu rānei ō rātou tau, o ngā mea katoa i kaha ki te haere ki te whawhai.
NUM 1:31 Ko ngā mea i taua o rātou, o te iwi o Hepurona, e rima tekau mā whitu mano e whā rau.
NUM 1:32 Nō ngā tama a Hōhepa: arā nō ngā tama a Ēparaima: i ō rātou torōna, i ō rātou hapū, i ngā whare o ō rātou Matua, tatau rawa ngā ingoa o ngā mea e rua tekau, he maha atu rānei ō rātou tau, o ngā mea katoa i kaha ki te haere ki te whawhai.
NUM 1:33 Ko ngā mea i taua o rātou, o te iwi o Ēparaima, e whā tekau mano e rima rau.
NUM 1:34 Nō ngā tama a Mānahi: i ō rātou toronga, i ō rātou hapū, i ngā whare o ō rātou mātua, tatau rawa ngā ingoa o ngā mea e rua tekau, he maha atu rānei ō rātou tau, o ngā mea katoa i kaha ki te haere ki te whawhai.
NUM 1:35 Ko ngā mea i taua o rātou, o te iwi o Mānahi, e toru tekau mā rua mano e rua rau.
NUM 1:36 Nō ngā tama a Pineamine: i ō rātou toronga, i ō rātou hapū, i ngā whare o ō rātou mātua, tatau rawa ngā ingoa o ngā mea e rua tekau, he maha atu rānei ō rātou tau, o ngā mea katoa i kaha ki te haere ki te whawhai.
NUM 1:37 Ko ngā mea i taua o rātou, o te iwi o Pineamine, e toru tekau mā rima mano e whā rau.
NUM 1:38 Nō ngā tama a Rāna: i ō rātou toronga, i ō rātou hapū, i ngā whare o ō rātou mātua, tatau rawa ngā ingoa o ngā mea e rua tekau, he maha atu rānei ō rātou tau, o ngā mea katoa i kaha ki te haere ki te whawhai.
NUM 1:39 Ko ngā mea i taua o rātou, o te iwi o Rāna, e ono tekau mā rua mano e whitu rau.
NUM 1:40 Nō ngā tama a Āhera: i ō rātou toronga, i ō rātou hapū, i ngā whare o ō rātou mātua, tatau rawa ngā ingoa o ngā mea e rua tekau, he maha atu rānei ō rātou tau, o ngā mea katoa i kaha ki te haere ki te whawhai.
NUM 1:41 Ko ngā mea i taua o rātou, o te iwi o Āhera, e whā tekau mā tahi mano e rima rau.
NUM 1:42 Nō ngā tama a Napatari: i ō rātou toronga, i ō rātou hapū, i ngā whare o ō rātou mātua, tatau rawa ngā ingoa o ngā mea e rua tekau, he maha atu rānei ō rātou tau, o ngā mea katoa i kaha ki te haere ki te whawhai.
NUM 1:43 Ko ngā mea i taua o rātou, o te iwi o Napatari, e rima tekau mā toru mano e whā rau.
NUM 1:44 Ko ngā mea ēnei i taua nei e Mohi, e Ārona rātou ko ngā ariki kotahi tekau mā rua o Īharaira; takikotahi te tangata o rātou ki te whare o ōna mātua.
NUM 1:45 Ā, ko aua tāngata i taua o ngā tama a Īharaira, i ngā whare o ō rātou mātua, ngā mea e rua tekau, he maha atu rānei ō rātou tau i roto i a Īharaira i kaha ki te haere ki te whawhai –
NUM 1:46 ko aua tāngata katoa i taua e ono rau e toru mano e rima rau e rima tekau.
NUM 1:47 Ko ngā Rīwaiti ia, i te iwi o ō rātou mātua, kīhai i taua i roto i a rātou.
NUM 1:48 Nā Ihowā hoki i kōrero ki a Mohi, i mea:
NUM 1:49 “Otiia kaua e taua te iwi o Rīwai, kaua anō e tirohia tō rātou tokomaha i roto i ngā tama a Īharaira.
NUM 1:50 Engari me whakarite ngā Rīwaiti mō te tapenākara o te whakaaturanga, mō ōna oko katoa, mō ōna mea katoa hoki. Mā rātou te tapenākara e amo, me ōna oko katoa; ā, me mahi ki reira, me noho hoki ki tētahi taha, ki tētahi taha o te tapenākara.
NUM 1:51 Ā, ka maunu atu te tapenākara, mā ngā Rīwaiti e wāhi iho; ka whakatūria anō hoki te tapenākara, mā ngā Rīwaiti e whakatū; ā, ko te tangata kē e whakatata atu, ka whakamatea.
NUM 1:52 Me whakatū anō ō rātou tēneti e ngā tama a Īharaira ki tōna puni, ki tōna puni, ki tōna kara, ki tōna kara, puta noa i ō rātou ope.
NUM 1:53 Ko ngā Rīwaiti ia, me whakatū o rātou ki tētahi taha, ki tētahi taha o te tapenākara o te whakaaturanga, kei puta he riri ki te whakaminenga o ngā tama a Īharaira; ā, mā ngā Rīwaiti e tiaki te tapenākara o te whakaaturanga.”
NUM 1:54 Nā, i pērā ngā tama a Īharaira; rite tonu ki tā Ihowā katoa i whakahau ai ki a Mohi tā rātou mahi.
NUM 2:1 I kōrero anō a Ihowā ki a Mohi rāua ko Ārona, i mea:
NUM 2:2 “Me whakatū tōna tēneti e ngā tama a Īharaira, ki te taha o tōna kara, o tōna kara, ki ngā tohu o ngā whare o ō rātou mātua; hei te takiwā atu ki te tapenākara o te whakaminenga te tūranga o ō rātou tēneti ā tawhio noa.”
NUM 2:3 Ki te taha ki te rāwhiti, arā ki te putanga mai o te rā, whakatū ai ngā tāngata o te kara o te puni o Hūrā, me ō rātou ope. Ko Nāhahona tama a Aminarapa hei rangatira mō ngā tama a Hūrā.
NUM 2:4 Ā, ko tōna ope, ko ngā mea o rātou i taua, e whitu tekau mā whā mano e ono rau.
NUM 2:5 Nā, ko ngā mea e whakatū tēneti ki tua atu i a ia ko te iwi o Ihākara; ā, ko Netanēre tama a Tuara hei rangatira mō ngā tama a Ihākara;
NUM 2:6 ko tōna ope, ko ngā mea o rātou i taua, e rima tekau mā whā mano e whā rau.
NUM 2:7 Ā, ko te iwi o Hepurona: ā, ko Eriapa tama a Herona, hei rangatira mō ngā tama a Hepurona;
NUM 2:8 ā, ko tōna ope, ko ngā mea o rātou i taua, e rima tekau mā whitu mano e whā rau.
NUM 2:9 Ko ngā tāngata katoa i taua o te puni o Hūrā kotahi rau e waru tekau mā ono mano e whā rau, i ō rātou ope. Ko ēnei e haere wawe.
NUM 2:10 Hei te taha ki te tonga te kara o te puni o Reupena, me ō rātou ope. Ā, ko Erituru tama a Hereuru, hei rangatira mō ngā tama a Reupena;
NUM 2:11 ā, ko tōna ope, ko ngā mea o rātou i taua, e whā tekau mā ono mano e rima rau.
NUM 2:12 Ā, me whakatū ki tōna taha ko te iwi o Himiona; ā, ko Herumiere tama a Turiharai, hei rangatira mō ngā tama a Himiona.
NUM 2:13 Ko tōna ope, ko ngā mea o rātou i taua, e rima tekau mā iwa mano e toru rau.
NUM 2:14 Ko reira te iwi o Kara; ā, ko Eriāhapa tama a Reuere, hei rangatira mō ngā tama a Kara;
NUM 2:15 ā, ko tōna ope, ko ngā mea o rātou i taua, e whā tekau mā rima mano e ono rau e rima tekau.
NUM 2:16 Ko ngā tāngata katoa i taua o te puni o Reupena kotahi rau e rima tekau mā tahi mano e whā rau e rima tekau, i ō rātou ope. Me haere rātou hei tuarua mō ngā matua.
NUM 2:17 Ko reira maunu atu ai te tapenākara o te whakaminenga, ko te puni o ngā Rīwaiti ki waenganui o ngā puni; kia rite tō rātou haerenga ki tō rātou nohoanga iho, ia tangata ki tōna wāhi, i te taha anō o ō rātou kara.
NUM 2:18 Hei te taha ki te hauāuru te kara o te puni o Ēparaima, me ō rātou ope. Ko te rangatira mō ngā tama a Ēparaima, ko Erihama, tama a Amihuru;
NUM 2:19 ā, ko tōna ope, ko ngā mea o rātou i taua, e whā tekau mano e rima rau.
NUM 2:20 Ā, ki tōna taha ko te iwi o Mānahi; ā, ko te rangatira mō ngā tama a Mānahi ko Kamariere, tama a Peraturu;
NUM 2:21 ā, ko tōna ope, ko ngā mea o rātou i taua, e toru tekau mā rua mano e rua rau.
NUM 2:22 Ko reira te iwi o Pineamine; ā, ko te rangatira mō ngā tama a Pineamine ko Apirana tama a Kirioni;
NUM 2:23 ā, ko tōna ope, ko ngā mea o rātou i taua, e toru tekau mā rima mano e whā rau.
NUM 2:24 Ko ngā tāngata katoa i taua o te puni o Ēparaima kotahi rau e waru mano, kotahi rau, i ō rātou ope. Ā, ka hāpainga rātou hei tuatoru mō ngā matua.
NUM 2:25 Hei te taha ki te raki te kara o te puni o Rāna, me ō rātou ope; ā, ko te rangatira mō ngā tama a Rāna ko Ahiētere tama a Amiharai;
NUM 2:26 ā, ko tōna ope, ko ngā mea o rātou i taua, e ono tekau mā rua mano e whitu rau.
NUM 2:27 Nā, me whakatū ki tōna taha ko te iwi o Āhera; ā, ko te rangatira mō ngā tama a Āhera ko Pakiere tama a Okorana;
NUM 2:28 ā, ko tōna ope, ko ngā mea o rātou i taua, e whā tekau mā tahi mano e rima rau.
NUM 2:29 Ko reira te iwi o Napatari; ā, ko te rangatira mō ngā tama a Napatari ko Ahira tama a Enana;
NUM 2:30 ā, ko tōna ope, ko ngā mea o rātou i taua, e rima tekau mā toru mano e whā rau.
NUM 2:31 Ko ngā mea katoa i taua o te puni o Rāna kotahi rau e rima tekau mā whitu mano e ono rau. Hei muri rawa rātou haere ai, me ō rātou kara.
NUM 2:32 Ko ēnei o ngā tama a Īharaira i taua, i ngā whare o ō rātou mātua; taua ake o ngā puni, i ō rātou ope, e ono rau e toru mano e rima rau e rima tekau.
NUM 2:33 Ko ngā Rīwaiti ia, kīhai i taua i roto i ngā tama a Īharaira; ko tā Ihowā hoki tēnā i whakahau ai ki a Mohi.
NUM 2:34 Nā, ka pērātia e ngā tama a Īharaira; ka pērātia katoatia i tā Ihowā i whakahau ai ki a Mohi: Tā rātou whakanoho ki te taha o ā rātou kara, tō rātou hāpainga atu, tēnei, tēnei, i roto i tōna hapū anō, rite tonu ki ngā whare o ō rātou mātua.
NUM 3:1 Nā, ko ngā whakatupuranga anō hoki ēnei o Ārona rāua ko Mohi i te rā i kōrero ai a Ihowā ki a Mohi i Maunga Hinai.
NUM 3:2 Ko ngā ingoa hoki ēnei o ngā tama a Ārona: ko Nātapa, ko te mātāmua, rātou ko Apihu, ko Ereātara, ko Itamara.
NUM 3:3 Nō ngā ingoa ēnei Ārona, o ngā tohunga i whakawahia, i whakatohungatia nei e ia hei tohunga.
NUM 3:4 I mate hoki a Nātapa rāua ko Apihu ki te aroaro o Ihowā, i tā rāua whakaherenga i te ahi kē ki te aroaro o Ihowā, ki te koraha o Hinai, kāhore anō hoki ā rāua tamariki; ā, i mahi a Ereātara rāua ko Itamara i ngā mahi a te tohunga i te tirohanga mai a tō rāua pāpā, a Ārona.
NUM 3:5 Ā, i kōrero a Ihowā ki a Mohi, i mea:
NUM 3:6 “Whakatātaia mai te iwi o Rīwai, whakatūria hoki ki te aroaro o Ārona tohunga, kia mahi ai rātou ki a ia.
NUM 3:7 Ā, mā rātou e tiaki ngā mea hei tiakanga māna, hei tiakanga hoki mā te whakaminenga katoa, ki mua i te tapenākara o te whakaminenga, e mahi hoki ngā mahi o te tapenākara.
NUM 3:8 Mā rātou anō e tiaki ngā mea katoa o te tapenākara o te whakaminenga, me ngā mea hei tiakanga mā ngā tama a Īharaira, kia mahi ai hoki ngā mahi o te tapenākara.
NUM 3:9 Ā, me hoatu e koe ngā Rīwaiti ki a Ārona rātou ko āna tama e hoatutia katoatia ana rātou ki a ia mō ngā tama a Īharaira.
NUM 3:10 Me whakarite anō e koe a Ārona rātou ko āna tama, ā, ka ū rātou ki tā rātou mahi tohunga; ko te tangata kē e whakatata mai ka whakamatea.”
NUM 3:11 I kōrero anō a Ihowā ki a Mohi, i mea:
NUM 3:12 “Ko ahau nei, nanā, kua tango ahau i ngā Rīwaiti i roto i ngā tama a Īharaira hei utu mō ngā mātāmua katoa e oroko puta mai ana i te kōpū i roto i ngā tama a Īharaira. Māku hoki ngā Rīwaiti,
NUM 3:13 nō te mea, nāku ngā mātāmua katoa; nō te rā anō i patu ai ahau i ngā mātāmua katoa o te whenua o Īhipa tāku whakatapunga i ngā mātāmua katoa a Īharaira māku, i ā te tangata, i ā te kararehe; māku ērā. Ko Ihowā ahau.”
NUM 3:14 I kōrero anō a Ihowā ki a Mohi, i te koraha o Hinai, i mea:
NUM 3:15 Taua ngā tama a Rīwai, tēnei whare, tēnei whare o ō rātou mātua, tēnei hapū, tēnei hapū o rātou; me tatau rātou e koe, ngā tāne katoa kotahi nei te marama, ahu atu.
NUM 3:16 Nā, ka taua rātou e Mohi ka pērātia me tā Ihowā i kī ai, i whakahau ai.
NUM 3:17 Ā, ko ngā tama ēnei a Rīwai me ō rātou ingoa: ko Kerehona, ko Kohata, ko Merari.
NUM 3:18 Ā, ko ngā ingoa ēnei o ngā tama a Kerehona, o tēnei hapū, o tēnei hapū o rātou: ko Ripini rāua ko Himei.
NUM 3:19 Me ngā tama a Kohata, o tēnei hapū, o tēnei hapū o rātou: ko Āmarama, ko Itihara, ko Heperona, ko Utiere.
NUM 3:20 Me ngā tama a Merari, o tēnei hapū, o tēnei hapū o rātou: ko Māhari, ko Muhi. Ko ngā hapū ēnei o ngā Rīwaiti, o tēnei whare, o tēnei whare o ō rātou mātua.
NUM 3:21 Nā, Kerehona te hapū o ngā Ripini, me te hapū o ngā Himei; ko ngā hapū ēnei o ngā Kerehoni.
NUM 3:22 Ko ngā mea o rātou i taua, ko te tokomaha o ngā tāne katoa, kotahi nei te marama ahu atu, ko ngā mea o rātou i taua e whitu mano e rima rau.
NUM 3:23 Hei muri i te tapenākara, hei te taha ki te hauāuru, te puni o ngā Kerehoni.
NUM 3:24 Ko Eriāhapa hoki, ko te tama a Raere, hei ariki mō te whare o te matua o ngā Kerehoni.
NUM 3:25 Ā, ko tā ngā tama a Kerehona e tiaki ai i roto i te tapenākara o te whakaminenga, ko te tapenākara, ko te tēneti, me tōna hīpoki, ko te pā o te whatitoka o te tapenākara o te whakaminenga,
NUM 3:26 me ngā pā o te marae, me te pā o te whatitoka o te marae, o tērā i te tapenākara, i te āta hoki ā tawhio noa, me ōna aho hoki mō ōna meatanga katoa.
NUM 3:27 Nā, Kohata hoki te hapū o ngā Amarami, me te hapū o ngā Itihari, me te hapū o ngā Heperoni, me te hapū o ngā Utieri; ko ngā hapū ēnei o ngā Kohati.
NUM 3:28 Ko te tokomaha o ngā tāne katoa, kotahi nei te marama, ahu atu, e waru mano e ono rau, ko rātou ngā kaitiaki o te wāhi tapu.
NUM 3:29 Hei te taha whaka te tonga o te tapenākara he puni mō ngā hapū o ngā tama a Kohata.
NUM 3:30 Ā, ko Eritapana, tama a Utiere, hei ariki mō te whare o te matua o ngā hapū o ngā Kohati.
NUM 3:31 Ā, ko tā rātou e tiaki ai ko te āka, ko te tēpu, ko te tūranga rama, ko ngā āta, ko ngā oko o te wāhi tapu, arā ko ngā mea e minita ai rātou, me te pā ārai, me ngā mea katoa o ēnā mahinga.
NUM 3:32 Ā, ko Ereātara tama a Ārona tohunga hei ariki mō ngā ariki o ngā Rīwaiti, māna hoki e tirotiro ngā kaitiaki e tiaki ana i te wāhi tapu.
NUM 3:33 Nā Merari te hapū o ngā Māhari, me te hapū o ngā Muhi: ko ngā hapū ēnei o Merari.
NUM 3:34 Ā, ko ngā mea o rātou i taua, ko te tokomaha o ngā tāne katoa, kotahi nei te marama ahu atu, e ono mano e rua rau.
NUM 3:35 Ā, ko Turiere, ko te tama a Apihaira hei ariki mō te whare o te matua o ngā hapū o Merari; hei te taha ki te raki o te tapenākara he puni mō ēnei.
NUM 3:36 Ko tā ngā tama hoki a Merari e tūpato ai, e tiaki ai, ko ngā papa o te tapenākara, me ōna kaho, me ōna pou, me ngā tūranga pou, me ngā mea katoa o aua mea, me ngā mea katoa o ēnā mahinga;
NUM 3:37 me ngā pou o te marae ā tawhio noa, me ngā tūranga, me ngā titi, me ngā aho.
NUM 3:38 Ā, ko ēnei e noho ki mua i te tapenākara, ki te rāwhiti, ki mua i te tapenākara o te whakaminenga, ki te putanga mai o te rā, ko Mohi rātou ko Ārona, ko āna tama, hei tiaki i te wāhi tapu, i ngā mea hei tiakanga mā ngā tama a Īharaira; ā, ko te tangata kē e whakatata mai, ka whakamatea.
NUM 3:39 Ko ngā Rīwaiti katoa i taua, ko ērā i taua rā e Mohi rāua ko Ārona, i tā Ihowā whakahau, i ō rātou hapū, ko ngā tāne katoa kotahi nei te marama ahu atu, e rua tekau mā rua mano.
NUM 3:40 Ā, i mea a Ihowā ki a Mohi, “Taua ngā tāne mātāmua katoa o ngā tama a Īharaira, ngā mea kotahi nei te marama, me ngā mea i maha atu, tuhituhia hoki te maha o ō rātou ingoa.
NUM 3:41 Ā, me tango ngā Rīwaiti māku – ko Ihowā ahau – hei utu mō ngā mātāmua katoa o ngā tama a Īharaira; me ngā kararehe a ngā Rīwaiti hei utu mō ngā mātāmua katoa i roto i ngā kararehe a ngā tama a Īharaira.”
NUM 3:42 Nā, ka taua e Mohi, ka pērātia me tā Ihowā i whakahau ai ki a ia, ngā mātāmua katoa i roto i ngā tama a Īharaira.
NUM 3:43 Ā, ko ngā tāne mātāmua katoa, ko te maha o ngā ingoa, kotahi nei te marama ā ahu atu, ko ngā mea o rātou i taua, e rua tekau mā rua mano e rua rau e whitu tekau mā toru.
NUM 3:44 Ā, i kōrero a Ihowā ki a Mohi, i mea,
NUM 3:45 “Tangohia ngā Rīwaiti hei utu mō ngā tāne mātāmua katoa i roto i ngā tama a Īharaira, me ngā kararehe a ngā Rīwaiti hei utu mō ā rātou kararehe; ā, māku ngā Rīwaiti. Ko Ihowā ahau.
NUM 3:46 Nā, hei whakahoki atu, hei utu mō te rua rau e whitu tekau mā toru, mō ngā mātāmua o ngā tama a Īharaira i hira ake i te tokomaha o ngā Rīwaiti;
NUM 3:47 me tango e koe kia rima hekere mō tēnei pane, mō tēnei pane; kia rite ki te hekere o te wāhi tapu āu e tango ai; e rua tekau ngā kera o te hekere kotahi.
NUM 3:48 Me hoatu te moni e utua ai ngā tuhene o rātou ki a Ārona rātou ko āna tama.”
NUM 3:49 Nā, ka tango a Mohi i te moni whakahoki i ngā tāngata i hira ake i ērā i utua ki ngā Rīwaiti;
NUM 3:50 i tangohia e ia te moni i ngā mātāmua a ngā tama a Īharaira; kotahi mano e toru rau e ono tekau mā rima hekere; he pērā me te hekere o te wāhi tapu;
NUM 3:51 ā, i hoatu e Mohi te moni a te hunga i utua ki a Ārona rātou ko āna tama, i pērā me tā Ihowā i kī ai, me tā Ihowā i whakahau ai ki a Mohi.
NUM 4:1 I kōrero anō a Ihowā ki a Mohi rāua ko Ārona, i mea:
NUM 4:2 “Taua ngā tama a Kohata, i roto i ngā tama a Rīwai, tēnei hapū, tēnei hapū o rātou, i ngā whare o ō rātou mātua,
NUM 4:3 ngā mea e toru tekau, he maha atu rānei ō rātou tau, ā tae noa ki ngā mea e rima tekau ō rātou tau, ngā mea katoa e uru ana ki te mahi, ki te mea i ngā mea o te tapenākara o te whakaminenga.
NUM 4:4 “Ko te mahi tēnei mā ngā tama a Kohata i roto i te tapenākara o te whakaminenga, ko ngā mea tino tapu.
NUM 4:5 Ā, ka maunu te puni, me haere a Ārona ki roto, rātou ko āna tama, ka tuku i te ārai hīpoki ki raro, ā, ka hīpoki iho ki te āka o te whakaaturanga.
NUM 4:6 Nā, ka makā iho te hīpoki ki runga, arā ngā hiako pateri, ā, ka uhi iho i tētahi kākahu ki runga, he mea purū katoa, ka kuhu i ngā amo.
NUM 4:7 “Me uhi anō ki te kākahu purū te tēpu taro aroaro, ka whakatakoto ai i ngā rīhi ki runga, me ngā koko, me ngā peihana, me ngā kapu hei ringihanga; hei runga anō hoki te taro pūmau takoto ai.
NUM 4:8 Ka uhi ki te kākahu ngangana, ka hīpoki ai ki te hiako pateri hei hīpoki mō runga, ka kuhu i ōna amo.
NUM 4:9 “Nā, ka mau rātou ki tētahi kākahu purū, ka hīpoki ai i te tūranga whakamārama, i ōna rama hoki, i ōna kuku, i ōna oko ngārahu, i ōna oko hinu katoa, i ngā mea e minita ai rātou ki reira.
NUM 4:10 Ka hoatu ai me ōna mea katoa ki roto ki te tākai, hei te mea hiako pateri, ka whakaeke ai ki runga ki te amo.
NUM 4:11 “Ā, me uhi iho e rātou he kākahu purū ki runga ki te āta kōura, ka hīpoki ai ki tētahi hīpoki hiako pateri, ka kuhu ai i ōna amo.
NUM 4:12 “Nā, ka mau ki ngā mea e minita ai rātou i te wāhi tapu, ka hoatu ki roto ki te kākahu purū, ka hīpoki ki tētahi hīpoki hiako pateri, ka whakaeke ki te amo.
NUM 4:13 “Nā, ka tahi atu rātou i ngā pungarehu o te āta, ka hīpoki ai ki te kākahu pāpura.
NUM 4:14 Me whakatakoto anō ki runga ōna oko katoa e minita ai rātou ki reira, ngā tahu kakara, ngā mārau kikokiko, ngā koko pungarehu, ngā peihana, ngā mea katoa o te āta; ka hīpoki ai ki te hīpoki hiako pateri, ka kuhu ai i ōna amo.
NUM 4:15 “Ā, ka oti i a Ārona rātou ko āna tama te hīpoki te wāhi tapu, me ngā mea katoa o te wāhi tapu, ina tata te puni te maunu; ka mutu, nā, ka haere mai ngā tama a Kohata ki te kauhoa. Otiia, kaua rātou e pā ki tētahi mea tapu kei mate rātou. Ko ēnei ngā mea a ngā tama a Kohata e mau ai o te tapenākara o te whakaminenga.
NUM 4:16 “Ā, ko tā Ereātara, ko tā te tama a te tohunga, a Ārona, e whakaaro ai, ko te hinu mō te whakamārama, ko te whakakakara reka, ko te whakahere totokore o tēnei rā, o tēnei rā, ko te hinu whakawahi, me te tirotiro i te tapenākara katoa, i ngā mea katoa hoki o reira, i te wāhi tapu, i ōna mea hoki.
NUM 4:17 “I kōrero anō a Ihowā ki a Mohi rāua ko Ārona, i mea:
NUM 4:18 Kei hātepea atu e koutou te iwi o ngā hapū o ngā Kohati i roto i ngā Rīwaiti.
NUM 4:19 Engari, ko tēnei tā koutou e mea ai ki a rātou, kia ora ai rātou, kei mate, ina whakatata ki ngā mea tino tapu: me haere a Ārona rātou ko āna tama ki roto, ka whakarite ai i a rātou ki tāna mahi, ki tāna mahi, ki tāna amohanga, ki tāna amohanga.
NUM 4:20 Otiia, kaua rātou e haere ki roto ki te mātakitaki i te wāhi tapu ahakoa he wā poto, kei mate rātou.”
NUM 4:21 I kōrero anō a Ihowā ki a Mohi, i mea,
NUM 4:22 “Taua hoki ngā tama a Kerehona, i ngā whare o ō rātou mātua, i ō rātou hapū.
NUM 4:23 Ko ngā mea e toru tekau, he maha atu rānei ngā tau, ā tae noa ki ngā mea e rima tekau ō rātou tau, āu e tatau ai; ko ngā mea katoa hoki e uru ana ki te mahi i ngā mahi o te tapenākara o te whakaminenga.
NUM 4:24 “Ko te mahi tēnei mā ngā hapū o ngā Kerehoni, ko te mahi, ko te amo.
NUM 4:25 Mā rātou hoki e amo ngā pā o te tapenākara, te tapenākara hoki o te whakaminenga, tōna hīpoki, me te hīpoki hiako pateri i waho ake, me te pā o te whatitoka o te tapenākara o te whakaminenga;
NUM 4:26 me ngā pā o te marae, me te pā mō te whatitoka o te kūwaha o te marae, o tērā i te tapenākara, i te āta ā tawhio noa, me ngā aho, me ngā mea katoa mō te mahinga o aua mea, me ngā mea katoa i hangā mō aua mea; ko tā rātou mahi tēnā.
NUM 4:27 Kei a Ārona rātou ko āna tama te tikanga mō ngā mahi katoa a ngā tama a ngā Kerehoni, mō ā rātou amohanga katoa, mō ā rātou mahi katoa; mā koutou hoki e whakarite ki a rātou te tikanga mō ngā mea katoa e amo ai rātou.
NUM 4:28 Ko te mahi tēnei mā ngā hapū o ngā tama a Kerehona i te tapenākara o te whakaminenga; ā, ko ngā tikanga mā rātou kei a Itamara tama a te tohunga, a Ārona.”
NUM 4:29 “Ko ngā tama a Merari, me tatau rātou e koe i ō rātou hapū, i ngā whare o ō rātou mātua;
NUM 4:30 ko ngā mea e toru tekau, he maha atu rānei ō rātou tau, ā tae noa ki ngā mea e rima tekau ō rātou tau, āu e tatau ai, ko ngā tāngata katoa e uru ana ki te mahi, ki te mahi i te mahi o te tapenākara o te whakaminenga.
NUM 4:31 Ā, ko te tikanga anō tēnei mō tā rātou e amo ai, i ā rātou mahinga katoa i te tapenākara o te whakaminenga; ko ngā papa o te tapenākara, me ōna kaho, me ōna pou, me ōna tūranga pou;
NUM 4:32 me ngā pou o te marae ā tawhio noa, me ngā tūranga pou, me ngā titi, me ngā aho, me ngā mea katoa o aua mea, me ngā mea katoa o ēnā mahinga: me tatau ā-ingoa ngā mea kei a rātou nei te tikanga mō te amo.
NUM 4:33 Ko te mahi tēnei a ngā hapū o ngā tama a Merari, i ā rātou mahinga katoa i te tapenākara o te whakaminenga, i raro i te ringa o Itamara tama a te tohunga, a Ārona.”
NUM 4:34 Nā, ka taua e Mohi rātou ko Ārona, ko ngā ariki o te whakaminenga, ngā tama a ngā Kohati, i ō rātou hapū, i ngā whare anō o ō rātou mātua,
NUM 4:35 ngā mea e toru tekau, he maha atu rānei ō rātou tau, ā tae noa ki ngā mea e rima tekau ō rātou tau, ngā tāngata katoa i uru ki te mahi, ki te mahi i te tapenākara o te whakaminenga.
NUM 4:36 Ā, taua ake o rātou, i ō rātou hapū, e rua mano e whitu rau e rima tekau.
NUM 4:37 Ko ēnei i taua o ngā hapū o ngā Kohati, ko ngā tāngata hei mahi i te tapenākara o te whakaminenga, i taua nei e Mohi rāua ko Ārona, pērā me tā Ihowā i whakahau ai, nā te ringa o Mohi.
NUM 4:38 Ā, taua ake o ngā tama a Kerehona i ō rātou hapū, i ngā whare o ō rātou mātua,
NUM 4:39 ngā mea e toru tekau, he maha atu rānei ō rātou tau, ā tae noa ki ngā mea e rima tekau ō rātou tau, ngā mea katoa i uru ki te mahi, ki te mahi i te tapenākara o te whakaminenga,
NUM 4:40 taua ake o rātou i ō rātou hapū, i ngā whare o ō rātou mātua, e rua mano e ono rau e toru tekau.
NUM 4:41 Ko ēnei i taua o ngā hapū o ngā tama a Kerehona, o ngā tāngata katoa hei mahi i te tapenākara o te whakaminenga, i taua nei e Mohi rāua ko Ārona, pērā me tā Ihowā i whakahau ai.
NUM 4:42 Ā, taua ake o ngā hapū o ngā tama a Merari, i ō rātou hapū, i ngā whare o ō rātou mātua,
NUM 4:43 ngā mea hoki e toru tekau, he maha atu rānei ō rātou tau, ā tae noa ki ngā mea e rima tekau ō rātou tau, ngā tāngata katoa i uru ki te mahi, hei mahi i te tapenākara o te whakaminenga,
NUM 4:44 taua ake o rātou i ō rātou hapū, e toru mano e rua rau.
NUM 4:45 Ko ēnei i taua o ngā hapū o ngā tama a Merari, i taua nei e Mohi rāua ko Ārona, pērā me tā Ihowā i whakahau ai, nā te ringa o Mohi.
NUM 4:46 Ko ngā tāngata katoa o ngā Rīwaiti i taua, a Mohi rātou ko Ārona, ko ngā ariki o Īharaira i tatau ai, i ō rātou hapū, i ngā whare o ō rātou mātua,
NUM 4:47 ko ngā mea hoki e toru tekau, he maha atu rānei ō rātou tau, ā tae noa ki ngā mea e rima tekau ō rātou tau, ko ngā tāngata katoa i uru ki te mahi i ngā mahi e mahia ana, ki te mahi hoki, ki te amoamo i roto i te tapenākara o te whakaminenga;
NUM 4:48 taua ake o rātou e waru mano e rima rau e waru tekau.
NUM 4:49 Rite tonu ki tā Ihowā i whakahau ai te tauanga o rātou e te ringa o Mohi, tēnei, tēnei, me tāna mahi, me tāna amo. Nā, poto ake rātou te tatau e ia, te pērā me tā Ihowā i whakahau ai ki a Mohi.
NUM 5:1 I kōrero anō a Ihowā ki a Mohi, i mea,
NUM 5:2 “Whakahaua ngā tama a Īharaira kia motuhia kētia atu ngā repera katoa i roto i te puni, ngā tāngata katoa e rere ana te pirau, me ngā tāngata katoa e poke ana i te tūpāpaku.
NUM 5:3 Ko te tāne, ko te wahine, me ngare atu, me ngare e koutou ki waho o te puni; kei poke i a rātou ō rātou puni e nohoia nei e ahau.”
NUM 5:4 Nā, pērātia ana e ngā tama a Īharaira, ā, motuhia kētia ana rātou i roto i te puni; rite tonu ki tā Ihowā i kōrero ai ki a Mohi tā ngā tama a Īharaira i mea ai.
NUM 5:5 I kōrero anō a Ihowā ki a Mohi, i mea:
NUM 5:6 “Mea atu ki ngā tama a Īharaira: Ki te mahia e te tangata, e te wahine rānei, tētahi mea e hara ai te tangata, hei mahi i te kino ki a Ihowā, ā, ka hē taua wairua;
NUM 5:7 nā, me whāki tō rātou hara i hara ai. Me whakahoki e ia te mea i hē ai ia, te tino mea, me tāpiri anō ki tōna whakarima, ka hoatu ai ki te tangata i hara nei ia ki a ia.
NUM 5:8 Otiia ki te kāhore he whanaunga o taua tangata hei hoatutanga mō te utu, me hoatu te utu mō te hara ki a Ihowā, arā ki te tohunga; hei tāpiri mō te hipi whakamārie hei whakamārie mōna.
NUM 5:9 Nā, ko ngā whakahere hapahapai katoa o ngā mea tapu katoa a ngā tama a Īharaira, e kawea ana ki te tohunga, māna ērā.
NUM 5:10 Māna ake ngā mea tapu a te tangata; ko tā te tangata e hoatu ai ki te tohunga, māna tēnā.”
NUM 5:11 I kōrero anō a Ihowā ki a Mohi, i mea,
NUM 5:12 “Kōrero ki ngā tama a Īharaira, mea atu ki a rātou: Ki te peka kē te wahine a tētahi tangata, ā, ka hara ki a ia,
NUM 5:13 ā, ka takoto, ka pūremu tētahi ki a ia, ā, ka ngaro i ngā kanohi o tāna tahu, ka huna, ā, ka poke te wahine, kāhore anō hoki he kaiwhakaatu mō tōna hē, kāhore anō ia i mau rawa.
NUM 5:14 Ā, ka tau ki a ia te wairua hae, ā, ka hae ia ki tāna wahine, ā, ka poke te wahine. Ki te tau rānei ki a ia te wairua hae, ā, ka hae ia ki tāna wahine kīhai nei i poke;
NUM 5:15 kātahi ka kawe taua tangata i tāna wahine ki te tohunga, me kawe anō e ia tā te wahine whakahere hei mea mōna, te whakatekau epa parāoa pārei. Kaua he hinu e ringihia ki runga, kaua anō he parakihe e hoatu ki runga; he whakahere totokore hoki mō te hae, he whakahere whakamahara, hei whakamahara ki te kino.
NUM 5:16 “Nā, ka nekehia mai ia e te tohunga, ā, ka whakatūria ki te aroaro o Ihowā.
NUM 5:17 Ā, ka mau te tohunga ki te wai tapu i te oko oneone; ka mau anō te tohunga ki tētahi wāhi o te puehu o te papa o te tapenākara, ka maka ai ki te wai.
NUM 5:18 Nā, ka whakatūria e te tohunga te wahine ki te aroaro o Ihowā, ā, ka tuku ngā makawe o te wahine kia mahora noa, ka hoatu ai i te whakahere whakamahara ki ōna ringa, arā i te whakahere totokore mō te hae. Hei te ringa ia o te tohunga te wai kawa e tau ai te kanga.
NUM 5:19 Nā, ka whakaoati te tohunga i a ia, ā, ka mea ki te wahine, ‘Ki te mea kāhore anō tētahi tangata i takoto ki a koe, ki te kāhore anō hoki koe i peka atu, i poke, i te mea i raro koe i tāu tāne, kia ora koe i tēnei wai kawa e tau ai te kanga.
NUM 5:20 Ki te mea ia kua peka kē koe, i te mea i raro koe i tāu tāne, ā, kua poke koe, ā, kua takoto ki a koe tētahi tangata ehara nei i te tāne nāu,’
NUM 5:21 – kātahi ka whakaoati te tohunga i te wahine ki te oati kanga, ā, ka mea te tohunga ki te wahine – ‘mā Ihowā koe e mea hei kanga, hei oati i roto i tōu iwi, ina mea a Ihowā kia pirau tōu hūhā, kia pupuhi hoki tōu puku;
NUM 5:22 ā, ka tae ki roto ki ōu whēkau tēnei wai e tau ai te kanga, e pupuhi ai tōu puku, e pirau ai tōu hūhā.’ “Me kī te wahine, ‘Āmine, Āmine.’
NUM 5:23 “Ā, me tuhituhi ēnei kanga e te tohunga ki te pukapuka, ka horoi atu anō e ia ki roto ki te wai kawa.
NUM 5:24 Nā, ka whakainumia e ia te wahine ki te wai kawa e tau ai te kanga, ā, ka tae te wai e tau ai te kanga ki roto ki a ia, ka kawa.
NUM 5:25 “Me tango hoki e te tohunga te whakahere mō te hae i te ringa o te wahine, ā, ka poipoia te whakahere ki te aroaro o Ihowā, ka whakaherea ki runga ki te āta.
NUM 5:26 Nā, ka aohia e te tohunga tētahi wāhi o te whakahere, kia kī te ringa, ko tōna whakamaharatanga hoki, ā, ka tahuna ki runga ki te āta, ā muri iho ka whakainumia te wahine ki te wai.
NUM 5:27 Ā, ka oti ia te whakainu ki te wai, nā, ki te mea kua poke ia, kua hara ki tāna tahu, nā, ka tae ki roto ki a ia te wai e tau ai te kanga, ka kawa, ā, ka pupuhi tōna puku, ka pirau hoki tōna hūhā. Ā, hei mea kanga tēnā wahine i roto i tōna iwi.
NUM 5:28 Ā, ki te mea kīhai i poke te wahine, ā, e mā ana; nā, ka ora, ā, ka whai tamariki.
NUM 5:29 “Ko te ture tēnei mō ngā hae, mehemea te wahine, kei raro nei ia i tāna tāne, ka peka kē, ā, ka poke;
NUM 5:30 ina tau iho rānei te wairua hae ki tētahi, ā, ka hae ia ki tāna wahine. Nā, me whakatū taua wahine e ia ki te aroaro o Ihowā; nā, ka mahia e te tohunga tēnei ture katoa ki a ia.
NUM 5:31 Nā, ka kore he hē mō te tangata, ā, ka waha e taua wahine tōna kino.”
NUM 6:1 I kōrero anō a Ihowā ki a Mohi, i mea,
NUM 6:2 “Kōrero ki ngā tama a Īharaira, mea atu ki a rātou: E momotu te tangata, te wahine rānei i a ia, he kī taurangi nā te Natari, mōna kia wehea mā Ihowā;
NUM 6:3 me wehe ia i a ia kei tata ki te wāina, ki te wai whakahaurangi rānei, kaua hoki ia e inu i te winika wāina, i te winika whakahaurangi, kaua hoki e inu i te wai karepe, ā, kaua e kai i te karepe hou, maroke rānei.
NUM 6:4 I ngā rā katoa e wehea ai ia kaua ia e kai i tētahi mea nō te wāina te mea i hangā ai, ahakoa nganga, ahakoa peha.
NUM 6:5 “I ngā rā katoa o tāna kī taurangi wehe i a ia, kaua te heu e pā ki tōna mātenga; kia tutuki rā anō ngā rā e wehea ai ia ki a Ihowā, ka tapu ia, ā, me tuku e ia ngā makawe o tōna mātenga kia tupu, kia roroa.
NUM 6:6 I ngā rā katoa e wehe ai ia i a ia ki a Ihowā kaua ia e whakatata ki te tūpāpaku.
NUM 6:7 Kaua ia e whakapoke i a ia mō tōna pāpā, mō tōna whaea, mō tōna tuakana, teina rānei, mō tōna tuahine, ina mate rātou; nō te mea kei runga i tōna mātenga te wehenga a tōna Atua.
NUM 6:8 Ka tapu ia ki a Ihowā i ngā rā katoa e wehea ai ia.
NUM 6:9 “Ā, ki te mate tētahi tangata ki tōna taha, he mea pā whakarere, ā, kua poke i a ia tōna mātenga i wehea nei; nā, me heu e ia tōna mātenga i te rā e purea ai ia, me heu e ia i te whitu o ngā rā.
NUM 6:10 Ā, i te waru o ngā rā me kawe mai e ia he kūkupa kia rua, he pī kūkupa rānei kia rua, ki te tohunga, ki te whatitoka o te tapenākara o te whakaminenga.
NUM 6:11 Ā, me whakahere tētahi e te tohunga hei whakahere hara, me tētahi hei tahunga tinana, ā, ka whakamārie mōna, nōna hoki i whai hara i te tūpāpaku, ka whakatapua anō tōna mātenga i taua rā anō.
NUM 6:12 Ā, me whakatapu e ia ki a Ihowā ngā rā o tōna wehenga, me kawe mai anō he reme toa, he tau tahi, hei whakahere mō te hē. Ko ngā rā ia ō mua ka whakatakā, nō te mea kua poke tōna wehenga.
NUM 6:13 “Ā, ko te ture tēnei mō te Natari, ina rite ngā rā e wehea ai ia: me kawe ia ki te whatitoka o te tapenākara o te whakaminenga;
NUM 6:14 ā, me whakahere e ia tāna whakahere ki a Ihowā, kia kotahi te reme toa tau tahi, hei te mea kohakore, hei tahunga tinana, me tētahi reme uha tau tahi, hei te mea kohakore, hei whakahere hara, me tētahi hipi toa kohakore, hei whakahere mō te pai,
NUM 6:15 me tētahi kete taro rēwenakore, me ngā keke parāoa pai i kōnatunatua ki te hinu, me ētahi me angiangi anō hoki, hei ngā mea rēwenakore i pania ki te hinu, me te whakahere totokore, me ngā ringihanga o aua mea.
NUM 6:16 “Ā, me kawe aua mea e te tohunga ki te aroaro o Ihowā, ā, ka whakaherea tāna whakahere hara, me tāna tahunga tinana;
NUM 6:17 me whakahere anō e ia te hipi toa, hei patunga mō te pai ki a Ihowā, me te kete taro rēwenakore; me whakahere anō e te tohunga tāna whakahere totokore, me tāna ringihanga.
NUM 6:18 “Ā, me heu e te Natari tōna mātenga, i wehea nei, ki te whatitoka o te tapenākara o te whakaminenga, ka tango ai i ngā makawe o tōna mātenga i wehea nei, ā, ka maka ki te ahi, ki tērā i raro i te patunga mō te pai.
NUM 6:19 “Ā, me tango e te tohunga te peke o te hipi toa, ina oti te kōhua, me tētahi o ngā keke rēwenakore i te kete, me tētahi o ngā keke angiangi, o ngā mea rēwenakore, ā, ka hoatu e ia ki ngā ringa o te Natari, i muri i te heunga o ōna makawe i wehea nei.
NUM 6:20 Nā, ka poipoia e te tohunga hei whakahere poipoi ki te aroaro o Ihowā. Ka tapu tēnei mā te tohunga, me te uma poipoi, me te hūhā hapahapai; ā muri iho ka inu wāina te Natari.
NUM 6:21 “Ko te ture tēnei mō te Natari, nāna te kī wehe, mō tāna whakahere hoki ki a Ihowā ina wehea, hei tāpiri mō tā tōna ringa i whiwhi ai. Kia rite ki tāna kī i kī ai; kei te ture o tōna wehenga te tikanga mō tāna e mea ai.”
NUM 6:22 I kōrero anō a Ihowā ki a Mohi, i mea,
NUM 6:23 “Kōrero ki a Ārona rātou ko āna tama, mea atu: Kia pēnei tā koutou manaaki i ngā tama a Īharaira; mea atu ki a rātou,
NUM 6:24 ‘Mā Ihowā koe e manaaki, māna koe e tiaki;
NUM 6:25 Mā Ihowā e mea kia tīaho tōna mata ki a koe, māna anō hoki koe e atawhai;
NUM 6:26 Mā Ihowā tōna kanohi e whakaara ki a koe, māna anō e tuku te rangimārie ki a koe.’
NUM 6:27 “Ā, ka karangatia e rātou tōku ingoa ki runga ki ngā tama a Īharaira; ā, māku rātou e manaaki.”
NUM 7:1 Ā, i te rā i oti ai i a Mohi te tapenākara te whakaara, i whakawahia ai, i whakatapua ai hoki te tapenākara me ōna mea katoa, te āta, me ōna mea katoa, ā, ka oti te whakawahi, te whakatapu.
NUM 7:2 Nā, ka whakahere ngā ariki o Īharaira, ngā upoko o ngā whare o ō rātou mātua; ko rātou ngā ariki o ngā iwi, i a rātou hoki ngā tikanga mō te hunga i taua.
NUM 7:3 Ā, ka kawea mai e rātou tā rātou whakahere ki te aroaro o Ihowā, e ono ngā kāta whai taupoki, kotahi tekau mā rua ngā kau; tokorua ngā ariki kotahi anō te kāta, kotahi anō hoki te pūru a tētahi, a tētahi; ā, whakatūtūria ana e rātou ki te aronga o te tapenākara.
NUM 7:4 Ā, i kōrero a Ihowā ki a Mohi, i mea,
NUM 7:5 “Tangohia tā rātou, hei mea mō te mahi o te tapenākara o te whakaminenga; ā, me hoatu e koe ki ngā Rīwaiti, kia rite ki te mahi a tēnei, a tēnei.”
NUM 7:6 Nā, tangohia ana e Mohi ngā kāta me ngā kau, ā, hoatu ana e ia ki ngā Rīwaiti.
NUM 7:7 E rua ngā kāta, e whā ngā kau i hoatu e ia ki ngā tama a Kerehona, he mea whakarite ki tā rātou mahi.
NUM 7:8 E whā ngā kāta, e waru ngā kau i hoatu e ia ki ngā tama a Merari, he mea whakarite ki tā rātou mahi, i te ringa o Itamara tama a te tohunga, a Ārona.
NUM 7:9 Ki ngā tama ia a Kohata, kīhai i hoatu e ia; nō te mea ko te mahi o te wāhi tapu mā rātou ko te kauhoa i runga i ō rātou pokohiwi.
NUM 7:10 Ā, i whakahere anō ngā ariki hei tāinga kawa mō te āta i te rā i whakawahia ai, i whakahere ngā ariki i ā rātou whakahere ki mua i te āta.
NUM 7:11 Nā, ka mea a Ihowā ki a Mohi, “Me hoatu e rātou ā rātou whakahere, tēnā ariki i tōna rā, tēnā ariki i tōna rā, hei tāinga kawa mō te āta.”
NUM 7:12 Nā, ko te tangata nāna te whakahere i te rā tuatahi, ko Nāhahona tama a Aminarapa, nō te iwi o Hūrā.
NUM 7:13 Ā, ko tāna whakahere, he rīhi hiriwa, kotahi rau e toru tekau hekere te taimaha, he peihana, hiriwa, e whitu tekau ōna hekere, he hekere wāhi tapu; kī tonu rāua i te parāoa pai i kōnatunatua ki te hinu hei whakahere totokore;
NUM 7:14 kotahi koko kōura, tekau ōna hekere, kī tonu i te whakakakara;
NUM 7:15 kotahi pūru, he kūao, kotahi hipi toa, kotahi reme toa, he tau tahi, hei tahunga tinana;
NUM 7:16 kotahi koati toa hei whakahere hara;
NUM 7:17 e rua hoki ngā pūru hei patunga mō te pai, e rima hipi toa, e rima koati toa, e rima reme toa, he tau tahi; ko te whakahere tēnei a Nāhahona tama a Aminarapa.
NUM 7:18 I te rā tuarua nā Netanēre te whakahere; he tama ia nā Tuara, he ariki nō Ihākara.
NUM 7:19 Ko tāna whakahere i whakahere ai, he rīhi hiriwa, kotahi rau e toru tekau hekere te taimaha, he peihana hiriwa, e whitu tekau ōna hekere, he hekere wāhi tapu; kī tonu aua mea e rua i te parāoa pai i kōnatunatua ki te hinu hei whakahere totokore;
NUM 7:20 he koko kōura, tekau ōna hekere, kī tonu i te whakakakara;
NUM 7:21 kotahi pūru, he kūao, kotahi hipi toa, kotahi reme toa, he tau tahi, hei tahunga tinana;
NUM 7:22 kotahi koati toa hei whakahere hara;
NUM 7:23 e rua hoki ngā pūru hei patunga mō te pai, e rima hipi toa, e rima koati toa, e rima reme toa, he tau tahi. Ko te whakahere tēnei a Netanēre tama a Tuara.
NUM 7:24 I te rā tuatoru nā Eriapa, nā te tama a Herona, he ariki nō ngā tama a Hepurona.
NUM 7:25 Ko tāna whakahere he rīhi hiriwa, kotahi rau e toru tekau hekere te taimaha, he peihana, hiriwa, e whitu tekau ōna hekere, he hekere wāhi tapu; kī tonu rāua i te parāoa pai i kōnatunatua ki te hinu hei whakahere totokore;
NUM 7:26 kotahi koko kōura, tekau ōna hekere, kī tonu i te whakakakara;
NUM 7:27 kotahi pūru, he kūao, kotahi hipi toa, kotahi reme toa, he tau tahi, hei tahunga tinana;
NUM 7:28 kotahi koati toa hei whakahere hara;
NUM 7:29 e rua hoki ngā pūru hei patunga mō te pai, e rima ngā hipi toa, e rima koati toa, e rima reme toa, he tau tahi. Ko te whakahere tēnei a Eriapa tama a Herona.
NUM 7:30 I te rā tuawhā nā Erituru, nā te tama a Hereuru, he ariki nō ngā tama a Reupena.
NUM 7:31 Ko tāna whakahere he rīhi hiriwa, kotahi rau e toru tekau hekere te taimaha, he peihana hiriwa, e whitu tekau ōna hekere, he hekere wāhi tapu; kī tonu rāua i te parāoa pai i kōnatunatua ki te hinu, hei whakahere totokore;
NUM 7:32 he koko kōura, tekau ōna hekere, kī tonu i te whakakakara.
NUM 7:33 Kotahi pūru, he kūao, kotahi hipi toa, kotahi reme toa, he tau tahi, hei tahunga tinana;
NUM 7:34 kotahi koati toa hei whakahere hara;
NUM 7:35 e rua ngā pūru hei patunga mō te pai, e rima ngā hipi toa, e rima koati toa, e rima reme toa, he tau tahi; ko te whakahere tēnei a Erituru tama a Hereuru.
NUM 7:36 I te rā tuarima, nā Herumiere, nā te tama a Turiharai, he ariki nō ngā tama a Himiona.
NUM 7:37 He rīhi hiriwa tāna whakahere, kotahi rau e toru tekau hekere tōna taimaha, he peihana hiriwa, e whitu tekau ōna hekere, he hekere wāhi tapu; kī tonu rāua i te parāoa pai i kōnatunatua ki te hinu hei whakahere totokore;
NUM 7:38 kotahi koko kōura, tekau ōna hekere, kī tonu i te whakakakara;
NUM 7:39 kotahi pūru, he kūao, kotahi hipi toa, kotahi reme toa, he tau tahi, hei tahunga tinana;
NUM 7:40 kotahi koati toa hei whakahere hara;
NUM 7:41 e rua hoki ngā pūru hei patunga mō te pai, e rima hipi toa, e rima koati toa, e rima reme toa, he tau tahi. Ko te whakahere tēnei a Herumiere tama a Turiharai.
NUM 7:42 I te rā tuaono nā Eriāhapa, tama a Teuere, he ariki nō ngā tama a Kara.
NUM 7:43 He rīhi hiriwa tāna whakahere, kotahi rau e toru tekau hekere te taimaha, he peihana hiriwa, e whitu tekau ōna hekere, he hekere wāhi tapu; kī tonu rāua i te parāoa pai i kōnatunatua ki te hinu hei whakahere totokore;
NUM 7:44 he koko kōura, tekau ōna hekere, kī tonu i te whakakakara;
NUM 7:45 kotahi pūru, he kūao, kotahi hipi toa, kotahi reme toa, he tau tahi, hei tahunga tinana;
NUM 7:46 kotahi koati toa hei whakahere hara;
NUM 7:47 e rua hoki ngā pūru hei patunga mō te pai, e rima ngā hipi toa, e rima koati toa, e rima reme toa, he tau tahi. Ko te whakahere tēnei a Eriāhapa tama a Teuere.
NUM 7:48 I te rā tuawhitu nā Erihama; tama a Amihuru, he ariki nō ngā tama a Ēparaima.
NUM 7:49 He rīhi hiriwa tāna whakahere, kotahi rau e toru tekau hekere te taimaha, he peihana hiriwa, e whitu tekau ōna hekere, he hekere wāhi tapu; kī tonu rāua i te parāoa pai i kōnatunatua ki te hinu hei whakahere totokore;
NUM 7:50 kotahi koko kōura, tekau ōna hekere, kī tonu i te whakakakara;
NUM 7:51 kotahi pūru, he kūao, kotahi hipi toa, kotahi reme toa, he tau tahi, hei tahunga tinana;
NUM 7:52 kotahi koati toa hei whakahere hara;
NUM 7:53 e rua hoki ngā pūru hei patunga mō te pai, e rima ngā hipi toa, e rima koati toa, e rima reme toa, he tau tahi. Ko te whakahere tēnei a Erihama tama a Amihuru.
NUM 7:54 I te rā tuawaru nā Kamariere, tama a Peraturu, he ariki nō ngā tama a Mānahi.
NUM 7:55 He rīhi hiriwa tāna whakahere, kotahi rau e toru tekau hekere te taimaha, he peihana hiriwa e whitu tekau ōna hekere, he hekere wāhi tapu; kī tonu rāua i te parāoa pai i kōnatunatua ki te hinu hei whakahere totokore;
NUM 7:56 kotahi koko kōura, tekau ōna hekere, kī tonu i te whakakakara;
NUM 7:57 kotahi pūru, he kūao, kotahi hipi toa, kotahi reme toa, he tau tahi, hei tahunga tinana;
NUM 7:58 kotahi koati toa hei whakahere hara;
NUM 7:59 e rua hoki ngā pūru hei patunga mō te pai, e rima ngā hipi toa, e rima koati toa, e rima reme toa, he tau tahi. Ko te whakahere tēnei a Kamariere tama a Peraturu.
NUM 7:60 I te rā tuaiwa nā Apirana, tama a Kirioni, he ariki nō ngā tama a Pineamine.
NUM 7:61 He rīhi hiriwa tāna whakahere, kotahi rau e toru tekau hekere te taimaha, he peihana hiriwa, e whitu tekau ōna hekere, he hekere wāhi tapu; kī tonu rāua i te parāoa pai i kōnatunatua ki te hinu hei whakahere totokore;
NUM 7:62 he koko kōura, tekau ōna hekere, kī tonu i te whakakakara;
NUM 7:63 kotahi pūru, he kūao, kotahi hipi toa, kotahi reme toa, he tau tahi, hei tahunga tinana;
NUM 7:64 kotahi koati toa hei whakahere hara;
NUM 7:65 e rua hoki ngā pūru hei patunga mō te pai, e rima ngā hipi toa, e rima koati toa, e rima reme toa, he tau tahi. Ko te whakahere tēnei a Apirana tama a Kirioni.
NUM 7:66 I te tekau o ngā rā nā Ahiētere, tama a Amiharai, he ariki nō ngā tama a Rāna.
NUM 7:67 He rīhi hiriwa tāna whakahere, kotahi rau e toru tekau hekere te taimaha, he peihana, hiriwa, e whitu tekau ōna hekere, he hekere wāhi tapu; kī tonu rāua i te parāoa pai i kōnatunatua ki te hinu hei whakahere totokore;
NUM 7:68 kotahi koko kōura, tekau ōna hekere, kī tonu i te whakakakara;
NUM 7:69 kotahi pūru, he kūao, kotahi hipi toa, kotahi reme toa, he tau tahi, hei tahunga tinana;
NUM 7:70 kotahi koati toa hei whakahere hara;
NUM 7:71 e rua hoki ngā pūru hei patunga mō te pai, e rima ngā hipi toa, e rima koati toa, e rima reme toa, he tau tahi. Ko te whakahere tēnei a Ahiētere tama a Amiharai.
NUM 7:72 I te tekau mā tahi o ngā rā nā Pakiere, tama a Okorana, he ariki nō ngā tama a Āhera.
NUM 7:73 He rīhi hiriwa tāna whakahere, kotahi rau e toru tekau hekere te taimaha, he peihana hiriwa, e whitu tekau ōna hekere, he hekere wāhi tapu; kī tonu rāua i te parāoa pai i kōnatunatua ki te hinu hei whakahere totokore;
NUM 7:74 kotahi koko kōura, tekau ōna hekere, kī tonu i te whakakakara;
NUM 7:75 kotahi pūru, he kūao, kotahi hipi toa, kotahi reme toa, he tau tahi, hei tahunga tinana;
NUM 7:76 kotahi koati toa hei whakahere hara;
NUM 7:77 e rua hoki ngā pūru hei patunga mō te pai, e rima ngā hipi toa, e rima koati toa, e rima reme toa, he tau tahi. Ko te whakahere tēnei a Pakiere tama a Okorana.
NUM 7:78 I te tekau mā rua o ngā rā nā Ahira, tama a Enana, he ariki nō ngā tama a Napatari.
NUM 7:79 He rīhi hiriwa tāna whakahere, kotahi rau e toru tekau hekere te taimaha, he peihana hiriwa, e whitu tekau ōna hekere, he hekere wāhi tapu; kī tonu rāua i te parāoa pai i kōnatunatua ki te hinu hei whakahere totokore;
NUM 7:80 kotahi koko kōura, tekau ōna hekere, kī tonu i te whakakakara;
NUM 7:81 kotahi pūru, he kūao, kotahi hipi toa, kotahi reme toa, he tau tahi, hei tahunga tinana;
NUM 7:82 kotahi koati toa hei whakahere hara;
NUM 7:83 e rua hoki ngā pūru hei patunga mō te pai, e rima ngā hipi toa, e rima koati toa, e rima reme toa, he tau tahi. Ko te whakahere tēnei a Ahira tama a Enana.
NUM 7:84 Ko tā ngā ariki a Īharaira tāinga kawa tēnei mō te āta, i te rā i whakawahia ai: tekau mā rua ngā rīhi hiriwa, tekau mā rua ngā peihana hiriwa, tekau mā rua ngā koko kōura;
NUM 7:85 kotahi rau e toru tekau ngā hekere o te rīhi hiriwa kotahi, e whitu tekau hoki o te peihana kotahi; e rua mano e whā rau ngā hekere o ngā oko hiriwa katoa, he hekere wāhi tapu.
NUM 7:86 Tekau mā rua ngā koko kōura, kī tonu i te whakakakara, tekau ngā hekere o tētahi, o tētahi, he hekere wāhi tapu; kotahi rau e rua tekau hekere te kōura katoa o ngā koko.
NUM 7:87 Ko ngā kau katoa mō te tahunga tinana tekau mā rua ngā pūru, kotahi tekau mā rua ngā hipi toa, tekau mā rua ngā reme toa tau tahi, me ō rātou whakahere totokore; tekau mā rua anō ngā kūao koati hei whakahere hara.
NUM 7:88 Ko ngā kau katoa hoki mō te patunga mō te pai, e rua tekau mā whā ngā pūru, e ono tekau ngā hipi toa, e ono tekau hoki ngā koati toa, e ono tekau ngā reme toa tau tahi. Ko te tāinga kawa tēnei o te āta i muri i tōna whakawahinga.
NUM 7:89 Ā, i te haerenga o Mohi ki roto ki te tapenākara o te whakaminenga ki te kōrero ki a ia, nā, ka rongo ia ki te reo o tētahi e kōrero ana ki a ia i runga i te taupoki, i tērā i runga i te āka o te whakaaturanga, i waenganui i ngā kerupima e rua; ā, ka kōrero ki a ia.
NUM 8:1 I kōrero anō a Ihowā ki a Mohi, i mea,
NUM 8:2 “Kōrero ki a Ārona, mea atu ki a ia: Ka tahuna e koe ngā rama, kia mārama i ngā rama e whitu te wāhi i mua o taua tūranga rama.”
NUM 8:3 I pērā anō a Ārona; i meinga e ia kia kā ngā rama ki te wāhi i mua o te tūranga rama; i pērā ia me tā Ihowā i whakahau ai ki a Mohi.
NUM 8:4 Ā, ko te mahinga tēnei o te tūranga rama, he mea patu te kōura; ko tōna take, ko ōna puāwai, he mea patu; ko tāna hanga i te tūranga rama rite tonu ki te tauira i whakakitea e Ihowā ki a Mohi.
NUM 8:5 I kōrero anō a Ihowā ki a Mohi, i mea:
NUM 8:6 “Tangohia ngā Rīwaiti i roto i ngā tama a Īharaira, ka pure i a rātou.
NUM 8:7 Ko tēnei tāu e mea ai ki a rātou, hei pure i a rātou: tāuhiuhia ki a rātou he wai hei pure, kia heua ō rātou tinana katoa, ā, me horoi e rātou ō rātou kākahu, kia mā ai.
NUM 8:8 Kātahi rātou ka mau ki tētahi pūru kūao, me tōna whakahere totokore, arā, te parāoa pai i kōnatunatua ki te hinu; me tango anō e koe tētahi atu pūru kūao hei whakahere hara.
NUM 8:9 Nā, ka kawe koe i ngā Rīwaiti ki mua i te tapenākara o te whakaminenga, ka tāwhiu mai ai i te huihui katoa o ngā tama a Īharaira.
NUM 8:10 Nā, ka kawe koe i ngā Rīwaiti ki te aroaro o Ihowā; ā, ka popoki ngā ringa o ngā tama a Īharaira ki ngā Rīwaiti;
NUM 8:11 ā, me whakahere e Ārona ngā Rīwaiti ki te aroaro o Ihowā, hei whakahere poipoi mā ngā tama a Īharaira, ā, ka waiho rātou hei mahi i te mahi a Ihowā.
NUM 8:12 “Nā, ka popoki ngā ringa o ngā Rīwaiti ki runga ki ngā mātenga o ngā pūru; ā, me tuku tētahi e koe hei whakahere hara, tētahi hoki hei tahunga tinana ki a Ihowā, hei whakamārie mō ngā Rīwaiti.
NUM 8:13 Nā, ka whakatū koe i ngā Rīwaiti ki te aroaro o Ārona, ki te aroaro anō o āna tama, ka whakahere ai hei whakahere poipoi ki a Ihowā.
NUM 8:14 Nā, me momotu e koe ngā Rīwaiti i roto i ngā tama a Īharaira, ā, māku ngā Rīwaiti.
NUM 8:15 “Ā muri iho, ka haere ngā Rīwaiti ki roto, ki te mahi i te mahi o te tapenākara o te whakaminenga; ā, me pure rātou e koe, me whakahere hoki hei whakahere poipoi.
NUM 8:16 Ka tukua rawatia mai hoki rātou ki ahau i roto i ngā tama a Īharaira; hei utu mō ngā mea katoa e oroko puta mai ana i te kōpū, arā mō ngā mātāmua o ngā tama katoa a Īharaira i tangohia ai rātou e ahau māku.
NUM 8:17 Nāku hoki ngā mātāmua katoa o ngā tama a Īharaira, ngā tāngata me ngā kararehe; nō te rā i patua ai e ahau ngā mātāmua katoa o te whenua o Īhipa tāku whakatapunga i a rātou māku.
NUM 8:18 Nā, ka tangohia nei e ahau ngā Rīwaiti hei utu mō ngā mātāmua katoa o ngā tama a Īharaira.
NUM 8:19 He mea hoatu nāku ngā Rīwaiti i roto i ngā tama a Īharaira ki a Ārona rātou ko āna tama, hei mahi i ngā mahi a ngā tama a Īharaira, i te tapenākara o te whakaminenga, hei whakamārie mō ngā tama a Īharaira; kei pā te whiu ki ngā tama a Īharaira, ina whakatata ngā tama a Īharaira ki te wāhi tapu.”
NUM 8:20 Nā, ko tā Mohi rātou ko Ārona, ko te whakaminenga katoa o ngā tama a Īharaira i mea ai ki ngā Rīwaiti, pērā tonu me ngā mea katoa i whakahau ai a Ihowā ki a Mohi mō ngā Rīwaiti; i pērā tonu ngā tama a Īharaira ki a rātou.
NUM 8:21 Nā, ka horohoroa ngā Rīwaiti, ā, ka horoia ō rātou kākahu; ā, whakaherea ana rātou e Ārona hei whakahere poipoi ki te aroaro o Ihowā; ā, ka whakamārie a Ārona mō rātou hei pure mō rātou.
NUM 8:22 Ā, ka mutu tērā, ka tomo ngā Rīwaiti ki te mahi i ā rātou mahi i te tapenākara o te whakaminenga, i te aroaro o Ārona, i te aroaro anō hoki o āna tama; pērā tonu me tā Ihowā i whakahau ai ki a Mohi mō ngā Rīwaiti tā rātou i mea ai ki a rātou.
NUM 8:23 I kōrero anō a Ihowā ki a Mohi, i mea:
NUM 8:24 “Ko te mea tēnei mā ngā Rīwaiti; ka rua tekau mā rima ō rātou tau, ka maha ake rānei, me tomo rātou ki te mahi i ngā mahi o te tapenākara o te whakaminenga;
NUM 8:25 ka maha ake ō rātou tau i te rima tekau, me whakamutu tā rātou mahi i ngā mahi o reira, kaua anō hoki he mahi mā rātou i muri iho.
NUM 8:26 Engari, me minita tahi me ō rātou tuākana i te tapenākara o te whakaminenga, me tiaki i ngā mea e tiakina ana, kaua hoki e mahi i tētahi mahi. Ko tēnei tāu e mea ai ki ngā Rīwaiti, ina tiaki rātou.”
NUM 9:1 I kōrero anō a Ihowā ki a Mohi i te koraha o Hinai, i te rua o ngā tau o tō rātou haerenga mai i te whenua o Īhipa, i te tahi o ngā marama, i mea,
NUM 9:2 “Me mahi anō te Kapenga e ngā tama a Īharaira i tōna wā anō.
NUM 9:3 Me mahi i te tekau mā whā o ngā rā o tēnei marama, i te ahiahi, i tōna wā anō; kia rite ki ōna tikanga katoa, ki ōna ritenga katoa, tā koutou meatanga.”
NUM 9:4 Nā, ka kōrero a Mohi ki ngā tama a Īharaira kia mahia te Kapenga.
NUM 9:5 Ā, ka mahia e rātou te Kapenga i te tekau mā whā o ngā rā o te marama tuatahi, i te ahiahi, i te koraha o Hinai; rite tonu ki ngā mea katoa i whakahau ai a Ihowā ki a Mohi tā ngā tama a Īharaira i mea ai.
NUM 9:6 Nā, tērā ētahi tāngata i poke i te tūpāpaku, i kore ai e āhei te mahi i te Kapenga i taua rā. Nā, ka haere rātou ki te aroaro o Mohi rāua ko Ārona i taua rā;
NUM 9:7 ā, ka mea aua tāngata ki a ia, “Kua poke mātou i te tūpāpaku; he aha mātou tē tukua ai ki te whakahere i te whakahere mā Ihowā i tōna wā i rite ai, i roto i ngā tama a Īharaira?”
NUM 9:8 Nā, ka mea a Mohi ki a rātou, “E tū koutou, ā, me whakarongo atu ahau ki tā Ihowā e whakahau ai mō koutou.”
NUM 9:9 Ā, i kōrero a Ihowā ki a Mohi, i mea,
NUM 9:10 “Kōrero ki ngā tama a Īharaira, mea atu: Ki te poke i te tūpāpaku tētahi o koutou, o ō koutou uri rānei, ki te mea rānei kei tawhiti e haere ana, me mahi anō e ia te Kapenga ki a Ihowā.
NUM 9:11 Me mahi e rātou i te rua o ngā marama, i te tekau mā whā o ngā rā, i te ahiahi, me kīnaki ki te taro rēwenakore, ki ngā pūwhā kawa.
NUM 9:12 Kaua tētahi wāhi o tēnā mea e whakatoea e rātou mō te ata, kaua anō hoki e whatia tētahi o ōna wheua; kia rite ki ngā tikanga katoa o te Kapenga tā rātou mahinga i tēnā mahi.
NUM 9:13 “Ko te tangata ia kāhore ōna poke, ā, kāhore anō i te haere, ā, e māngere ana ki te mahi i te Kapenga, inā, ka hātepea atu taua wairua i roto i tōna iwi; kāhore nei hoki i kawea e ia te whakahere mā Ihowā i tōna wā i rite ai, ka waha e taua tangata tōna hara.
NUM 9:14 “Ā, ki te noho he manene i roto i a koutou, ā, ka mea ki te mahi i te Kapenga ki a Ihowā; kia rite ki ngā tikanga o te Kapenga, ki ngā ritenga anō o taua mahi, tāna e mea ai. Kia kotahi anō tā koutou tikanga mō te manene rāua ko te tangata whenua.”
NUM 9:15 Ā, i te rā i whakaarahia ai te tapenākara, ka taupokina te tapenākara e te kapua, arā te tēneti o te whakaaturanga; ā, i te ahiahi i rite a runga o te tapenākara ki te āhua ahi, taea noatia te ata.
NUM 9:16 I pērā tonu: i taupokina e te kapua i te awatea, e te āhua ahi hoki i te pō.
NUM 9:17 Ka riro ake hoki te kapua i runga i te tapenākara, nā, muri iho, ka haere ngā tama a Īharaira; ā, i te wāhi i tau ai te kapua ka whakatūria e ngā tama a Īharaira ō rātou tēneti ki reira.
NUM 9:18 Nā, ko ngā haerenga o ngā tama a Īharaira nā te whakahau a Ihowā, ā, ko ō rātou nohoanga iho nā te whakahau anō a Ihowā. I noho anō rātou i ngā rā katoa i tau ai te kapua ki runga ki te tapenākara.
NUM 9:19 Ā, ka maha ngā rā i roa ai te kapua ki runga ki te tapenākara, nā, ka rite i ngā tama a Īharaira tā Ihowā i whakarite ai, ā, kīhai i haere.
NUM 9:20 Ā, he wā anō i torutoru ngā rā o te kapua ki runga ki te tapenākara; heoi nā te whakahau a Ihowā ka noho rātou i ō rātou tēneti, ā, nā te whakahau anō a Ihowā ka haere rātou.
NUM 9:21 Ā, i ētahi wā i tūturu te kapua i te ahiahi taea noatia te ata; ā, ka riro ake te kapua i te ata, nā, ka haere rātou. Ahakoa he ao, he pō rānei, i riro ake ai te kapua, i haere anō rātou.
NUM 9:22 Ahakoa e rua ngā rā, kotahi marama rānei, kotahi tau rānei, i roa ai te kapua ki runga ki te tapenākara, i mau ai ki reira, nā, noho ā-puni tonu iho ngā tama a Īharaira, kāhore hoki i haere; tōna rironga ake ki runga, nā, ka haere rātou.
NUM 9:23 Nā te whakahau a Ihowā tā rātou noho, nā te whakahau hoki a Ihowā tā rātou haere. I rite i a rātou tā Ihowā i whakarite ai, tā Ihowā i whakahau ai, i kōrerotia ai e Mohi.
NUM 10:1 I kōrero anō a Ihowā ki a Mohi, i mea:
NUM 10:2 “Hangā ētahi tētere hiriwa māu, kia rua; me patupatu tō rāua hanganga, ina hangā e koe; hei tāwhiunga māu i te hui, mō ngā maunutanga anō hoki o ngā puni.
NUM 10:3 Ā, ka whakatangihia aua mea, me huihui te whakaminenga katoa ki a koe, ki te whatitoka o te tapenākara o te whakaminenga.
NUM 10:4 Ā, ki te mea kotahi anō e whakatangihia, nā, me huihui ki a koe ngā ariki, ngā upoko o ngā mano o Īharaira.
NUM 10:5 Ka whakatangihia he whakaoho e koutou, nā, ka hāpainga ngā puni e noho ana ki te taha ki te rāwhiti.
NUM 10:6 Ā, i te rua o ā koutou whakatangihanga o te whakaoho, nā, ka hāpainga ngā puni e noho ana ki te taha ki te tonga. Me whakatangi he whakaoho e rātou mō ō rātou maunutanga.
NUM 10:7 Otiia, ka meatia kia huihuia te whakaminenga, me whakatangi e koutou, engari kaua e whakatangihia he whakaoho.
NUM 10:8 “Ā, mā ngā tama a Ārona, mā ngā tohunga, e whakatangi ngā tētere, ā, hei tikanga tēnā ki a koutou ake ake, i ō koutou whakatupuranga.
NUM 10:9 Ā, ki te anga koutou ki te whawhai i tō koutou whenua ki te hoariri e whakatupu kino ana i a koutou, nā, me whakatangi he whakaoho ki ngā tētere; ā, ka maharatia koutou e Ihowā, e tō koutou Atua, ka whakaorangia hoki i ō koutou hoariri.
NUM 10:10 I te rā anō e hari ai, i ō koutou rā nunui hoki, i ngā tīmatanga o ō koutou marama, me whakatangi ngā tētere ki ā koutou tahunga tinana, ki ā koutou patunga mō te pai; ā, hei whakamahara ēnā ki a koutou ki te aroaro o tō koutou Atua. Ko Ihowā ahau, ko tō koutou Atua.”
NUM 10:11 Ā, i te rua tekau o te rua o ngā marama, i te rua o ngā tau, kua riro ake te kapua i runga i te tapenākara o te whakaaturanga.
NUM 10:12 Nā, ka hāpainga e ngā tama a Īharaira i te koraha o Hinai; ā, ka tau te kapua ki te koraha o Parana.
NUM 10:13 Ā, rite tonu tā rātou hāpainga mataati ki te kupu a Ihowā i kōrerotia e Mohi.
NUM 10:14 Ko te tuatahi i maunu, ko te kara o te puni o ngā tama a Hūrā, me ō rātou rōpū; ā, ko te kaiwhakahaere o tāna ope ko Nāhahona tama a Aminarapa.
NUM 10:15 Ā, ko te kaiwhakahaere o te ope o te iwi o ngā tama a Ihākara ko Netanēre tama a Tuara.
NUM 10:16 Ko te kaiwhakahaere hoki o te ope o te iwi o ngā tama a Hepurona ko Eriapa tama a Herona.
NUM 10:17 Nā, ka wāhia te tapenākara; ā, ka tūria atu e ngā tama a Kerehona, rātou ko ngā tama a Merari, ko rātou ki te amo i te tapenākara.
NUM 10:18 Nā, ka maunu ko te kara o te puni o Reupena, me ō rātou rōpū. Ko te kaiwhakahaere o tāna ope ko Erituru tama a Hereuru.
NUM 10:19 Ā, ko te kaiwhakahaere o te ope o te iwi o ngā tama a Himiona ko Herumiere tama a Turiharai.
NUM 10:20 Ā, ko te kaiwhakahaere o te ope o te iwi o ngā tama a Kara ko Eriāhapa tama a Teuere.
NUM 10:21 Nā, ka tūria atu e ngā Kohati me te amo i te nohoanga tapu; ā tae rawa atu rātou kua tū te tapenākara i ētahi.
NUM 10:22 Nā, ka maunu atu ko te kara o te puni o ngā tama a Ēparaima, me ō rātou rōpū; ā, ko te kaiwhakahaere o tāna ope ko Erihama tama a Amihuru.
NUM 10:23 Ā, ko te kaiwhakahaere o te ope o te iwi o ngā tama a Mānahi ko Kamariere tama a Peraturu.
NUM 10:24 Ā, ko te kaiwhakahaere o te ope o te iwi o ngā tama a Pineamine ko Apirana tama a Kirioni.
NUM 10:25 Nā, ka maunu ko te kara o te puni o ngā tama a Rāna, ko te hiku tēnā o ngā puni katoa, puta noa i ō rātou ope. Ā, ko te kaiwhakahaere o tāna ope ko Ahiētere tama a Amiharai.
NUM 10:26 Ā, ko te kaiwhakahaere o te ope o te iwi o ngā tama a Āhera ko Pakiere tama a Okorana.
NUM 10:27 Ā, ko te kaiwhakahaere o te ope o te iwi o ngā tama a Napatari ko Ahira tama a Enana.
NUM 10:28 Ko ngā maunutanga ēnei o ngā tama a Īharaira, me ō rātou ope, i ō rātou whakatikanga atu.
NUM 10:29 Nā, ka mea a Mohi ki a Hōpapa, tama a Reuere Miriani, a te hungawai o Mohi, “E haere ana mātou ki te wāhi mea nei a Ihowā, ‘Ka hoatu a reira e ahau ki a koutou’; haere mai tātou, ka pai tā mātou mahi ki a koe; he pai hoki te kōrero a Ihowā mō Īharaira.”
NUM 10:30 Ā, ka mea tērā ki a ia, “E kore ahau e haere; engari me haere ahau ki tōku whenua, ki ōku whanaunga.”
NUM 10:31 Ā, ka mea ia, “Kaua rā mātou e whakarērea; e mōhio ana hoki koe ki ngā puni mō mātou i te koraha, ā, ka ai koe hei kanohi mō mātou.
NUM 10:32 Nā, tēnei ake, ki te haere koe i a mātou, inā, tēnei ake ko te pai e meatia mai e Ihowā ki a mātou ka meatia hoki e mātou ki a koe.”
NUM 10:33 Nā, ka tūria atu e rātou i te maunga o Ihowā, e toru ngā rā i haere ai; ā, i haere te āka o te kawenata o Ihowā i mua i a rātou, i ngā rā e toru i haere ai, ki te titiro okiokinga mō rātou.
NUM 10:34 Ā, i runga i a rātou te kapua o Ihowā i te awatea, i tō rātou whakatikanga atu i te puni.
NUM 10:35 Ā, ka maunu te āka, nā, ka mea a Mohi, “Whakatika, e Ihowā, ā, kia marara ōu hoariri; kia rere hoki i tōu aroaro te hunga e kino ana ki a koe.”
NUM 10:36 Ā, ka tū te āka, nā, ka mea ia, “Hoki mai, e Ihowā, ki ngā mano tini o Īharaira.”
NUM 11:1 Ā, ka tāki amuamu te iwi, ka kōrero kino ki ngā taringa o Ihowā; ā, nō te rongonga o Ihowā, ka mura tōna riri. Ā, ka kā te ahi a Ihowā i roto i a rātou, ā, pau ake te hunga i ngā pito ki waho o te puni.
NUM 11:2 Nā, ka tangi te iwi ki a Mohi; ā, ka īnoi a Mohi ki a Ihowā, nā, ka mate te ahi.
NUM 11:3 Ā, huaina iho te ingoa o tēnā wāhi ko Tapera; nō te kānga hoki o te ahi a Ihowā i roto i a rātou.
NUM 11:4 Nā, ka minamina ngā whakauru i roto i a rātou; me ngā tama hoki a Īharaira i tangi anō, i mea, “Mā wai e hōmai he kikokiko hei kai mā tātou?
NUM 11:5 E mahara ana tātou ki ngā ika i kainga noatia e tātou ki Īhipa; ki ngā kūkamo, ki ngā merengi, ki ngā rīki, ki ngā aniana, me te karika.
NUM 11:6 Ko tēnei ia, kua maroke ō tātou wairua; kāhore rawa nei tētahi mea; kāhore he mea kē hei tirohanga mā tātou ko tēnei mana anake.”
NUM 11:7 Nā, ko te rite o te mana kei te pua korianara; ko tōna kara kei te kara teriuma.
NUM 11:8 I kōpikopiko te iwi ki te kohi, ā, hurihia ana e rātou ki ngā mira, i tukia rānei ki te kumete, ā, tunua ana e rātou ki te kōhua, hangā ana hoki hei keke; ko tōna reka kei tō te hinu hou.
NUM 11:9 Ā, i te taunga iho o te haunui ki te puni i te pō, i tau anō te mana ki runga.
NUM 11:10 Ā, i rongo a Mohi i te iwi e tangi ana, puta noa i ō rātou hapū, tēnei, tēnei, i te whatitoka o tōna tēneti; ā, he nui te muranga o te riri o Ihowā; ā, i kino hoki ki tā Mohi.
NUM 11:11 Nā, ka mea a Mohi ki a Ihowā, “He aha koe i whakatupu kino ai i tāu pononga? He aha ahau tē manakohia ai e koe, i whakawahā ai e koe tēnei iwi katoa ki ahau?
NUM 11:12 He uri ianei nōku tēnei iwi katoa? I whānau rānei rātou i ahau, i mea ai koe ki ahau, ‘Hikitia ki tōu uma, kia rite ki tā te matua atawhai, ki tāna hiki i te pōtiki,’ ki te whenua i oatitia e koe ki ō rātou mātua?
NUM 11:13 Nō hea aku kikokiko hei hoatutanga māku ki tēnei iwi katoa? E tangi mai ana hoki rātou ki ahau, e mea mai ana, ‘Hōmai he kikokiko ki a mātou hei kai mā mātou.’
NUM 11:14 E kore tēnei iwi katoa e taea e ahau anake te waha, he taimaha rawa māku.
NUM 11:15 Ā, ki te pēnei tāu mahi ki ahau, tēnā, whakamatea rawatia ahau, ki te mea kua manakohia mai ahau e koe; kaua hoki ahau e kite i te hē mōku.”
NUM 11:16 Nā, ka mea a Ihowā ki a Mohi: “Huihuia mai ki ahau kia whitu tekau o ngā kaumātua o Īharaira, āu i mōhio ai he kaumātua nō te iwi, he rangatira nō rātou; me kawe mai rātou ki te tapenākara o te whakaminenga, me tū tahi koutou ki reira.
NUM 11:17 Ā, māku e haere iho, e kōrero ki a koe ki reira; me tango anō e ahau tētahi wāhi o te wairua i runga i a koe, ka hoatu ki runga ki a rātou; ā, ko rātou hei hoa mōu ki te waha i te pīkaunga, arā i te iwi; kei waha e koe anake.
NUM 11:18 “Me kī atu hoki e koe ki te iwi: ‘Whakatapu i a koutou mō āpōpō, ā, ka kai kikokiko koutou. Kua tangi nā hoki koutou ki ngā taringa o Ihowā, kua mea, “Mā wai e hōmai he kikokiko hei kai mā mātou? He pai hoki ngā mea i a mātou i Īhipa.” Mō reira ka hōmai e Ihowā he kikokiko ki a koutou, ā, ka kai koutou.
NUM 11:19 E kore e kotahi te rā e kai ai koutou, e kore anō hoki e rua ngā rā, e kore e rima ngā rā, e kore e tekau ngā rā, e kore e rua tekau ngā rā;
NUM 11:20 engari, kia pau te marama, ā, puta noa i ō koutou ihu, ā, ngaruru iho koutou. Mō koutou i whakahāwea ki a Ihowā e noho nei i waenganui i a koutou, i tangi hoki ki tōna aroaro, i mea, “He aha tātou i haere mai ai i Īhipa?” ’
NUM 11:21 “Ko te iwi kei roto nei ahau i a rātou e ono rau mano, he hunga haere raro, ā, kua mea mai nei koe, ‘Ka hoatu e ahau he kikokiko ki a rātou, ā, kia kotahi tino marama e kai ai rātou.’
NUM 11:22 Me patu rānei ngā hipi me ngā kau mā rātou, kia rato ai rātou? Me kohi mai rānei ngā ika katoa o te moana mā rātou, kia rato ai rātou?”
NUM 11:23 Anō rā ko Ihowā ki a Mohi, “Kua mutua rānei te ringa o Ihowā? Ka kite koe āianei he pono rānei tāku kupu ki a koe, kāhore rānei.”
NUM 11:24 Nā, ka puta a Mohi ki waho, ā, kōrerotia ana e ia ngā kupu a Ihowā ki te iwi, ā, huihuia ana e ia e whitu tekau o ngā kaumātua o te iwi, ā, whakatūria ana ki tētahi taha, ki tētahi taha o te tapenākara.
NUM 11:25 Nā, ko te hekenga iho o Ihowā i roto i te kapua, ko te kōrerotanga hoki ki a ia, nā, ka tangohia e ia tētahi wāhi o te wairua i runga i a ia, ā, hoatu ana ki ngā kaumātua e whitu tekau. Ā, i te taunga iho o te wairua ki a rātou, ka poropiti rātou, ā, kore ake i pērā i muri.
NUM 11:26 Ā, tokorua i mahue ki te puni, ko Ererara te ingoa o tētahi, ko Merara te ingoa o tētahi. Nā, ko te taunga iho o te wairua ki runga ki a rāua; nō te hunga hoki rāua i tuhituhia, otiia kīhai i haere ki te tapenākara; nā, ka poropiti rāua i roto i te puni.
NUM 11:27 Nā, ka oma tētahi taitama ki te kōrero ki a Mohi, ā, ka mea, “Kei te poropiti a Ererara rāua ko Merara i roto i te puni.”
NUM 11:28 Nā, ko te ohonga o te tangata a Mohi, o Hohua tama a Nunu, ko tētahi hoki ia o āna taitamariki, ka mea, “E tōku ariki, e Mohi, rīria rāua.”
NUM 11:29 Anō rā ko Mohi ki a ia, “He whakaaro ki ahau i hae ai koe? He oranga ngākau rā me i poropiti katoa te iwi o Ihowā, me i tukua iho hoki e Ihowā tōna wairua ki a rātou.”
NUM 11:30 Nā, ka haere a Mohi ki roto ki te puni, ā, ia me ngā kaumātua o Īharaira.
NUM 11:31 Nā, ka puta he hau i a Ihowā, ā, kawea ana mai ngā koitareke i te moana, kua makā ki te taha o te puni, kia kotahi pea te rā e haere ai i tētahi taha, kia kotahi pea hoki te rā e haere ai i tērā taha, ā tawhio noa te puni, me te mea ānō e rua whatīanga te teitei i runga i te mata o te whenua.
NUM 11:32 Nā, ka tū te iwi ā pau katoa taua rā, taua pō katoa hoki, me te rā katoa hoki i te aonga ake, ki te kohikohi i ngā koitareke; kotahi tekau ngā homa a te tangata nāna te kohinga iti. Ā, horahorangia noatia atu ana e rātou hei kai mā rātou, ā tawhio noa te puni.
NUM 11:33 Ā, i te mea kei ō rātou niho anō te kikokiko, i te mea kāhore anō i ngaua noatia, nā, ka mura te riri o Ihowā ki te iwi, ā, whiua ana te iwi e Ihowā ki tētahi whiu nui rawa atu.
NUM 11:34 Nā, huaina iho e ia te ingoa o taua wāhi ko Kipiroto Hataawa; nō te mea i tanumia e rātou ki reira te hunga i minamina.
NUM 11:35 Nā, ka tūria atu e te iwi i Kipiroto Hataawa ki Hateroto; ā, noho ana i Hateroto.
NUM 12:1 Nā, ka whakahē a Miriama rāua ko Ārona ki a Mohi mō te wahine Kuhi i mārenatia e ia (he wahine Kuhi hoki tāna i mārena ai);
NUM 12:2 ā, ka mea rāua, “Koia rānei i a Mohi anake ngā kōrero a Ihowā? Kāhore rānei ana kōrero hoki i a māua?” Ā, ka rongo a Ihowā.
NUM 12:3 Nā, he tangata māhaki rawa a Mohi i ngā tāngata katoa o te mata o te whenua.
NUM 12:4 Nā, i ohorere tonu te kōrerotanga a i Ihowā ki a Mohi rātou ko Ārona, ko Miriama, “Puta mai koutou tokotoru ki te tapenākara o te whakaminenga.” Ā, ka puta atu rātou tokotoru.
NUM 12:5 Nā, ka heke iho a Ihowā i roto i te pou kapua, ā, ka tū ki te whatitoka o te tapenākara, ka karanga hoki ki a Ārona rāua ko Miriama; ā, ka puta rāua.
NUM 12:6 Ā, ka mea ia, “Tēnā, whakarongo ki āku kōrero: Ki te mea he poropiti kei a koutou, ka whakaatu atu ahau, a Ihowā i ahau ki a ia, he mea whakakite, he kōrero moemoeā ki a ia.
NUM 12:7 Ehara tāku pononga, a Mohi i te pērā; he pono ia i tōku whare katoa.
NUM 12:8 Ka kōrero ahau ki a ia, he māngai, he māngai, he kōrero mata nui, kāhore hoki he kupu ngaro; ā, e kite anō ia i te āhua o Ihowā. He aha rā kōrua tē wehi ai ki te whakahē mō tāku pononga, mō Mohi?”
NUM 12:9 Nā, ka mura te riri o Ihowā ki a rāua, ā, haere ana ia.
NUM 12:10 Nā, ka riro atu te kapua i runga i te tapenākara; nā! He repera a Miriama, kua rite ki te hukarere; ā, ka titiro a Ārona ki a Miriama, e! He repera.
NUM 12:11 Nā, ka mea a Ārona ki a Mohi, “Auē, e tōku ariki, kaua e utaina ki a māua tēnei hara i pōauau nei, i hara nei māua.
NUM 12:12 Kei rite ia ki te mea kua mate, ki te mea kua pau tētahi wāhi o ōna kikokiko i te putanga mai i te kōpū o tōna whaea.”
NUM 12:13 Nā, ka karanga atu a Mohi ki a Ihowā, ka mea, “E te Atua, tēnā rā, whakaorangia ia.”
NUM 12:14 Nā, ka mea a Ihowā, ki a Mohi, “Me i tuwha kau tōna pāpā ki tōna mata e kore ianei ia e whakamā, ā, whitu noa ngā rā? Kia whitu ngā rā e tūtakina atu ai ia ki waho o te puni, ā muri iho ka mauria mai anō.”
NUM 12:15 Nā, tūtakina atu ana a Miriama ki waho o te puni, e whitu ngā rā; kīhai anō hoki te iwi i haere, kia whakahokia mai rā anō a Miriama.
NUM 12:16 Ā muri iho ka tūria e te iwi i Hateroto, ā, noho ana i te koraha o Parana.
NUM 13:1 I kōrero anō a Ihowā ki a Mohi, i mea,
NUM 13:2 “Me unga e koe ētahi tāngata hei tūtei mō te whenua o Kanaana, mō tērā e hoatu nei e ahau ki ngā tama a Īharaira. Kia kotahi o tēnei iwi, o tēnei iwi o ō rātou mātua e tonoa e koutou, hei te rangatira anake.”
NUM 13:3 Nā, ka unga a Mohi i a rātou i te koraha o Parana, ka pērā me tā Ihowā i kī ai; he upoko katoa ēnei tāngata nō ngā tama a Īharaira.
NUM 13:4 Ko ō rātou ingoa ēnei: nō te iwi o Reupena, ko Hāmua tama a Tākuru;
NUM 13:5 nō te iwi o Himiona, ko Hāpata tama a Hori;
NUM 13:6 nō te iwi o Hūrā, ko Karepe tama a Iepune;
NUM 13:7 nō te iwi o Ihākara, ko Ikara tama a Hōhepa;
NUM 13:8 nō te iwi o Ēparaima, ko Hohea tama a Nunu;
NUM 13:9 nō te iwi o Pineamine, ko Parati tama a Rapu;
NUM 13:10 nō te iwi o Hepurona, ko Kariere tama a Hori;
NUM 13:11 nō te iwi o Hōhepa, arā nō te iwi o Mānahi, ko Kari tama a Huhi;
NUM 13:12 nō te iwi o Rāna, ko Amiere tama a Kemari;
NUM 13:13 nō te iwi o Āhera, ko Heturu tama a Mikaere;
NUM 13:14 nō te iwi o Napatari, ko Nahapi tama a Wopohi;
NUM 13:15 nō te iwi o Kara, ko Keuere tama a Maki.
NUM 13:16 Ko ngā ingoa ēnei o ngā tāngata i ungā nei e Mohi hei tūtei mō te whenua. Ā, huaina iho e Mohi a Hohea tama a Nunu ko Hohua.
NUM 13:17 Nā, ka ungā rātou e Mohi hei tūtei mō te whenua o Kanaana, ka mea ia ki a rātou, “Haere atu ki runga nā konei, nā te tonga, ka kake ki te maunga;
NUM 13:18 ka titiro ai i te whenua, he aha rānei; i te iwi anō hoki e noho ana i reira, he kaha rānei, he kahakore rānei, he tokoouou rānei, he tokomaha rānei.
NUM 13:19 He pēhea te whenua e nohoia ana e rātou, he pai rānei, he kino rānei; he pēhea hoki ngā pā e nohoia ana e rātou, he tēneti rānei, he mea taiepa rānei;
NUM 13:20 he pēhea hoki te whenua, he mōmona rānei, he kikokore rānei, he rākau rānei tō reira, kāhore rānei. Kia māia hoki, maua mai anō ētahi o ngā hua o te whenua.” Nā, ko taua wā ko te wā o ngā karepe mātāmua.
NUM 13:21 Nā, ko tō rātou haerenga ki runga, tūteia ana e rātou te whenua i te koraha o Hini, ā tae noa ki Rehopo, ki te haerenga atu ki Hāmata.
NUM 13:22 Ā, i haere rātou nā te tonga, ka tae ki Heperona; ā, i reira a Ahimana, a Hehai, a Tāramai, ngā tama a Anaka. (Nā, ko Heperona, ko tōna hanganga, e whitu ngā tau i mua i tō Toana i Īhipa.)
NUM 13:23 Ā, ka tae iho rātou ki te awaawa ki Ehekora, ka tapahia i reira he manga karepe, kotahi te tautau, ka amohia e te tokorua i runga i te tokotoko; i mauria mai anō ētahi pamekaranete, me ētahi piki.
NUM 13:24 Ā, huaina iho taua wāhi ko te raorao o Ehekora, nō te tautau karepe i tapahia e ngā tama a Īharaira i reira.
NUM 13:25 Nō te paunga o ngā rā e whā tekau ka hoki mai rātou i te tūtei i te whenua.
NUM 13:26 Nā, haere ana, ā, ka tae ki a Mohi rātou ko Ārona, ko te whakaminenga katoa o ngā tama a Īharaira, ki te koraha o Parana, ki Karehe; ki te whakahoki i te kōrero ki a rātou ko te whakaminenga katoa, ā, whakakitea ana e rātou ngā hua o te whenua ki a rātou.
NUM 13:27 Ā, ka kōrero ki a ia, ka mea, “I tae mātou ki te whenua i ungā nei mātou e koe, nā, he pono e rerengia ana e te waiū, e te honi; ko ōna hua tēnei.
NUM 13:28 Otiia he kaha te iwi e noho ana i taua whenua, he mea taiepa hoki ngā pā, he nunui rawa; i kite anō mātou i ngā tama a Anaka ki reira.
NUM 13:29 E noho ana ngā Amareki i te whenua ki te tonga; ko ngā Hiti, ko ngā Iepuhi, ko ngā Amori, e noho ana i ngā maunga; kei te taha o te moana ngā Kanaani e noho ana, kei te taha anō o Horano.”
NUM 13:30 Nā, ka whakamārietia te iwi e Karepe i te aroaro o Mohi, ā, ka mea ia, “Kia hohoro tā tātou haere ki te tango i reira; e taea hoki e tātou.”
NUM 13:31 Ko ngā tāngata ia i haere tahi me ia ki runga, i mea, “E kore e āhei i a tātou te haere ki runga, ki taua iwi; he kaha ake hoki rātou i a tātou.”
NUM 13:32 Nā, ka kawea e rātou he kōrero kino mō te whenua i tūteia e rātou ki ngā tama a Īharaira, i mea rātou, “Ko taua whenua i haerea rā e mātou, i tūteia, he whenua e ngau ana i ōna tāngata; he tangata nunui rawa hoki te hunga katoa i kitea e mātou ki reira.
NUM 13:33 He nunui rawa hoki ngā tāngata i kitea e mātou ki reira, he tama nā Anaka, he uri nō ngā tāngata roroa; ā, ki tā mātou titiro, me he māwhitiwhiti mātou; he pērā anō mātou ki tā rātou titiro.”
NUM 14:1 Nā, ka hāmama te reo o te whakaminenga katoa; ā, ka tangi te iwi i taua pō.
NUM 14:2 Ā, amuamu ana ngā tama katoa a Īharaira ki a Mohi rāua ko Ārona; ā, ka mea te whakaminenga katoa ki a rāua, “Auē, me i mate tātou ki te whenua o Īhipa! Auē, me i mate rānei tātou ki tēnei koraha!
NUM 14:3 He aha tātou i kawea mai ai e Ihowā ki tēnei whenua, kia hinga i te hoari? Ka waiho ā tātou wāhine, ā tātou tamariki hei taonga pārau; ehara ianei te hoki ki Īhipa i te mea pai mō tātou?”
NUM 14:4 Ā, ka mea rātou tētahi ki tētahi, “Me whakatū he upoko mō tātou, ka hoki ki Īhipa.”
NUM 14:5 Nā, ka tāpapa a Mohi rāua ko Ārona ki te aroaro o te huihui katoa o te whakaminenga o ngā tama a Īharaira.
NUM 14:6 Ā, ka haehae a Hohua, tama a Nunu, rāua ko Karepe, tama a Iepune, i ō rāua kākahu; ko rāua hoki ētahi o ngā kaitūtei o te whenua;
NUM 14:7 ā, ka kōrero rāua ki te whakaminenga katoa o ngā tama a Īharaira, ka mea, “He whenua pai rawa te whenua i haerea nei, i tūteia nei e mātou.
NUM 14:8 Ki te aro mai a Ihowā ki a tātou, ka kawea tātou e ia ki taua whenua, ka hōmai anō e ia ki a tātou; he whenua e rerengia ana e te waiū, e te honi.
NUM 14:9 Kaua rāia koutou e tutū ki a Ihowā, kaua hoki e wehi i ngā tāngata o taua whenua, he taro hoki rātou mā tātou. Kua mahue rātou i tō rātou whakamarumaru, ā, kei a tātou a Ihowā; kaua e wehi i a rātou.”
NUM 14:10 Heoi, ko tā te whakaminenga katoa kī, “Me āki rāua ki te kōhatu.” Nā, ko te putanga mai o te korōria o Ihowā i runga i te tapenākara o te whakaminenga ki te aroaro o ngā tama katoa a Īharaira.
NUM 14:11 Nā, ka mea a Ihowā ki a Mohi, “Kia pēhea ake te roa o te whakahāwea a tēnei iwi ki ahau? Āhea rānei rātou whakapono ai ki ahau, he maha nei hoki āku tohu i whakakitea i roto i a rātou?
NUM 14:12 Ka patua rātou e ahau ki te mate urutā, ka peia atu, ā, ka meinga koe hei iwi nui atu, kaha atu, i a rātou.”
NUM 14:13 Anō rā ko Mohi ki a Ihowā, “Ākuanei ka rongo ngā Īhipiana; nāu hoki tēnei iwi i whakaputa mai i runga i tōu kaha i roto i a rātou.
NUM 14:14 Nā, ka kōrero rātou ki ngā tāngata o tēnei whenua. Kua rongo hoki rātou kei roto koe, e Ihowā, i tēnei iwi; e kitea ana anō koe e Ihowā, titiro atu, titiro mai, e tū ana hoki tōu kapua i runga i a rātou, e haere ana hoki koe i mua i a rātou i roto i te pou kapua i te awatea, i roto hoki i te pou ahi i te pō.
NUM 14:15 Nā, ki te whakamatea e koe tēnei iwi, ānō he tangata kotahi, kātahi ngā iwi i rongo nei ki tōu rongo ka whai kupu, ka mea,
NUM 14:16 ‘Nō te mea kīhai i kaha a Ihowā ki te kawe i tēnei iwi ki te whenua i oati ai ia ki a rātou, koia i whakamatea ai rātou e ia ki te koraha.’
NUM 14:17 “Nā, kia nui rā te kaha o tōku Ariki, kia rite ki tāu i kōrero ai, i mea ai,
NUM 14:18 ‘He pūhoi a Ihowā ki te riri, he nui tōna atawhai, e muru ana i te kino, i te tutū, e kore rawa anō e tuku noa i te hunga hē; e mea ana i te kino o ngā mātua kia tau ki ngā tamariki, ā te toru, te whā rā anō, o ngā whakatupuranga.’
NUM 14:19 Tēnā, murua te kino o tēnei iwi, kia rite ki te nui o tōu atawhai, ki tāu muru hoki i ngā hara o tēnei iwi, o Īhipa mai anō, ā taea noatia a konei.”
NUM 14:20 Nā, ka mea a Ihowā, “Kua murua e ahau, kua pērātia me tāu i kī mai nā.
NUM 14:21 Otiia – e ora nei ahau, ā, ka kapi te whenua katoa i te korōria o Ihowā –
NUM 14:22 nā, i te mea ko ēnei tāngata katoa, i kite nei i tōku korōria, i āku merekara hoki i meinga ki Īhipa, ki te koraha, ā, ka tekau nei ā rātou whakamātautauranga i ahau, kāhore anō i whakarongo ki tōku reo;
NUM 14:23 inā, e kore rawa rātou e kite i te whenua i oati ai ahau ki ō rātou mātua, e kore anō tētahi o te hunga i whakahāwea nei ki ahau e kite i reira.
NUM 14:24 “Engari tāku pononga a Karepe, he wairua kē hoki tōna, ā, kua tino whai ia i ahau; e kawea ia e ahau ki te whenua i haere atu nā ia; ā, ka riro a reira i ōna uri.
NUM 14:25 “Nā, kei te raorao ngā Amareki me ngā Kanaani e noho ana. Tahuri atu koutou āpōpō, haere atu ki te koraha, nā te huarahi ki te Moana Whero.”
NUM 14:26 I kōrero anō a Ihowā ki a Mohi rāua ko Ārona, i mea:
NUM 14:27 “Kia pēhea ake te roa o tāku whakamanawanui ki tēnei whakaminenga kino, e amuamu nei ki ahau? Kua rangona e ahau ngā amuamu a ngā tama a Īharaira, e amuamu nei rātou ki ahau.
NUM 14:28 Mea atu ki a rātou, ‘E ora ana ahau,’ e ai tā Ihowā, ‘ko tā koutou i kōrero mai ai ki ōku taringa, he pono, ko tāku tēnā e mea ai ki a koutou:
NUM 14:29 ka hinga ō koutou tinana ki tēnei koraha; ā, ko koutou katoa i taua, puta noa atu i tō koutou tokomaha, ngā mea e rua tekau, he maha ake hoki, ō rātou tau, te hunga hoki i amuamu nei ki ahau,
NUM 14:30 e kore koutou e tae ki te whenua i oati ai ahau ka whakanohoia koutou ki reira, heoi anō ko Karepe tama a Iepune, rāua ko Hohua tama a Nunu.
NUM 14:31 Otiia, ko ā koutou pōtiki, i mea nā koutou ka waiho hei taonga pārau, ka kawea e ahau ki reira, ā, ka mōhio rātou ki te whenua i whakahāweatia nei e koutou.
NUM 14:32 Ko koutou ia, ka hinga ō koutou tinana ki tēnei koraha.
NUM 14:33 Ā, ka kōpikopiko noa ā koutou tamariki i te koraha, e whā tekau ngā tau, mā rātou hoki e waha ā koutou pūremutanga, kia poto rā anō ō koutou tinana ki te koraha.
NUM 14:34 Kia rite rā anō ki te maha o ngā rā, ki ngā rā e whā tekau, i tūteia ai e koutou te whenua, he tau he rā, he tau he rā; e whā tekau ngā tau e waha ai e koutou ō koutou kino, ā, ka mōhio koutou ki te takanga o tāku kupu.’
NUM 14:35 Nāku, nā Ihowā te kupu, inā, ka meatia tēnei e ahau ki tēnei whakaminenga kino katoa, kua huihui nei ki te whakahē ki ahau. Ka poto rātou ki tēnei koraha, ka mate anō hoki ki konei.”
NUM 14:36 Nā, ko ngā tāngata i ungā e Mohi hei tūtei mō te whenua, i hoki mai nei, i mea nei kia amuamutia ia e te whakaminenga katoa, i tā rātou kawenga mai i te kōrero kino mō te whenua,
NUM 14:37 ko aua tāngata, nā rātou nei i kawe mai te kōrero kino mō te whenua, i mate rātou i te whiu ki te aroaro o Ihowā.
NUM 14:38 Ko Hohua ia, tama a Nunu, rāua ko Karepe, tama a Iepune, ko rāua i ora o ngā tāngata i haere ki te tūtei i te whenua.
NUM 14:39 Nā, kōrerotia ana e Mohi ēnei kupu katoa ki ngā tama katoa a Īharaira; ā, ka pōuri rawa te iwi.
NUM 14:40 Nā, ka maranga wawe rātou i te ata, ā, ka haere ki te tihi o te maunga, me te kī anō, “Tēnei mātou, ā, ka haere mātou ki runga, ki te wāhi i kōrerotia mai e Ihowā; kua hara hoki mātou.”
NUM 14:41 Nā, ka mea a Mohi, “He aha koutou i takahi ai i te kupu a Ihowā, i te mea kāhore e whai wāhi?
NUM 14:42 Kaua e haere, kāhore nā hoki a Ihowā i a koutou, kei patua koutou ki te aroaro o ō koutou hoariri.
NUM 14:43 Kei reira hoki ngā Amareki rātou ko ngā Kanaani, kei mua i a koutou, ā, ka hinga koutou i te hoari; mō koutou kua tahuri atu i te whai i a Ihowā, koia a Ihowā tē piri ai ki a koutou.”
NUM 14:44 Heoi, ka pokanoa rātou ki te piki ki te tihi o te maunga; otiia kīhai te āka o te kawenata a Ihowā, me Mohi hoki, i hiki atu i te puni.
NUM 14:45 Nā, ka heke iho ngā Amareki rātou ko ngā Kanaani e noho ana i taua maunga, ā, patua ana rātou, tukituki rawa, ā taea noatia a Horema.
NUM 15:1 I kōrero anō a Ihowā, ki a Mohi, i mea,
NUM 15:2 “Kōrero ki ngā tama a Īharaira, mea atu ki a rātou: E tae koutou ki te whenua e noho ai koutou, ki tāku e hoatu ai ki a koutou,
NUM 15:3 ā, ka mea i te whakahere ahi ki a Ihowā – i te tahunga tinana, i te patunga tapu rānei hei whakamana mō te kī taurangi, i te whakahere tuku noa rānei, i ā koutou hākari nunui rānei – hei whakakakara reka ki a Ihowā, he mea nō ngā kau, nō ngā hipi rānei.
NUM 15:4 Nā, me kawe mai tāna whakahere e te kaiwhakahere ki a Ihowā he whakahere totokore, ko te whakatekau o te epa o te parāoa pai, he mea kōnatunatu ki te whakawhā o te hine hinu.
NUM 15:5 Kia rite mai anō i a koe te whakawhā o te hine wāina, hei ringihanga, hei kīnaki mō te tahunga tinana, mō te patunga tapu rānei, mō te reme kotahi.
NUM 15:6 “Ki te mea he hipi toa, kia rite i a koe hei whakahere totokore ngā whakatekau e rua o te epa o te parāoa pai, he mea kōnatunatu ki te whakatoru o te hine hinu.
NUM 15:7 Me whakahere anō e koe te whakatoru o te hine wāina hei ringihanga, hei kakara reka ki a Ihowā.
NUM 15:8 “Ā, ka mea koe i te pūru hei tahunga tinana, hei patunga tapu rānei, hei whakamana i te kupu taurangi, hei whakahere rānei mō te pai ki a Ihowā;
NUM 15:9 nā, me kawe tahi anō e ia me te pūru, hei whakahere totokore, kia toru ngā whakatekau o te epa o te parāoa pai, he mea kōnatunatu ki te hāwhe o te hine hinu.
NUM 15:10 Me kawe anō e koe te hāwhe o te hine wāina hei ringihanga, hei whakahere ahi, hei kakara reka ki a Ihowā.
NUM 15:11 “Kia pēnei te meatanga mō te pūru kotahi, mō te hipi toa kotahi, mō te reme toa, mō te kūao koati.
NUM 15:12 Kia rite ki te maha o ā koutou e tuku ai tā koutou e mea ai ki tētahi, ki tētahi, kia rite tonu ki te maha o rātou.
NUM 15:13 Kia pēnei te meatanga a ngā tāngata whenua katoa i ēnei mea, ina whakahere i te whakahere ahi, hei kakara reka ki a Ihowā.
NUM 15:14 Ā, ki te noho i a koe tētahi manene, tētahi noa atu rānei, i roto i a koutou i ō koutou whakatupuranga, ā, ka mea kia whakahere i te whakahere ahi, i te kakara reka ki a Ihowā; kia rite tāna e mea ai ki tā koutou e mea ai.
NUM 15:15 Mō te whakaminenga kia kotahi te tikanga mō koutou, mō te manene hoki e noho tahi ana me koutou, hei tikanga pūmau i ō koutou whakatupuranga; kia pērā anō me koutou te manene i te aroaro o Ihowā.
NUM 15:16 Kia kotahi anō te ture, kia kotahi anō te ritenga mō koutou, mō te manene hoki e noho ana i a koutou.
NUM 15:17 “I kōrero anō a Ihowā ki a Mohi, i mea:
NUM 15:18 Kōrero ki ngā tama a Īharaira, mea atu ki a rātou: E tae koutou ki te whenua e kawea nei koutou e ahau ki reira,
NUM 15:19 nā, e kai koutou i te taro o te whenua, me whakahere he whakahere hapahapai ki a Ihowā.
NUM 15:20 Me whakahere he keke nō tā koutou parāoa pokepoke mataati hei whakahere hapahapai; kia rite ki te whakahere hapahapai o te patunga wīti tā koutou hapahapai.
NUM 15:21 Me hoatu tētahi wāhi o tā koutou pokepokenga mataati ki a Ihowā, hei whakahere hapahapai, puta noa i ō koutou whakatupuranga.
NUM 15:22 “Ā, ki te mea kua pōhēhē koutou, ā, kīhai i rite ēnei whakahau katoa i kōrerotia nei e Ihowā ki a Mohi –
NUM 15:23 arā ngā mea katoa i whakahaua ai koutou e Ihowā, i kōrerotia e Mohi, o te rā anō i whakahau ai a Ihowā ā tuku iho ki ō koutou whakatupuranga –
NUM 15:24 ko reira, ki te meatia tētahi mea, he pōhēhē hoki, e ngaro ana i ngā kanohi o te whakaminenga, nā, me whakahere e te whakaminenga katoa tētahi pūru kūao hei tahunga tinana, hei kakara reka ki a Ihowā, me tōna whakahere totokore, me tōna ringihanga; kia rite ki te tikanga, kia kotahi hoki koati toa hei whakahere hara.
NUM 15:25 Ā, ka whakamārie te tohunga mō te whakaminenga katoa o ngā tama a Īharaira, ā, ka murua tō rātou hē; he pōhēhē hoki; ā, me kawe tā rātou whakahere, hei whakahere ahi ki a Ihowā, me tā rātou whakahere hara ki te aroaro o Ihowā, mō tō rātou pōhēhē.
NUM 15:26 Ā, ka murua taua hē o te whakaminenga katoa o ngā tama a Īharaira, o te manene anō e noho ana i a rātou; nō te mea i pōhēhē katoa te iwi.
NUM 15:27 “Ki te pōhēhē anō tētahi wairua, ā, ka hara, nā, me kawe mai e ia he koati uha, hei te tau tahi, hei whakahere hara.
NUM 15:28 Ā, me whakamārie te tohunga mō te wairua i hara pōhēhē, ina hara pōhēhē ia, ki te aroaro o Ihowā, hei whakamārie mōna; ā, ka murua tāna.
NUM 15:29 “Kia kotahi anō tā koutou ture mō te tangata i hara pōhēhē, mō te tangata whenua o ngā tama a Īharaira rāua ko te manene e noho ana i a rātou.
NUM 15:30 “Ko te wairua ia i whakakake, ahakoa tangata whenua, manene rānei, he kohukohu tāna i a Ihowā; ā, ka hātepea atu taua wairua i roto i tōna iwi.
NUM 15:31 I whakahāwea ia ki te kupu a Ihowā, i whakataka hoki i tāna whakahau; ka tino hātepea atu taua wairua; ka mau tōna kino ki a ia.”
NUM 15:32 Ā, i ngā tama a Īharaira i te koraha, ka kitea tētahi tangata e kohikohi rākau ana i te rā hāpati.
NUM 15:33 Nā, ka kawea ia e ngā tāngata, i kite rā i a ia e kohikohi ana i ngā rākau, ki a Mohi rāua ko Ārona, ā, ki te whakaminenga katoa.
NUM 15:34 Nā, hoatu ana ia e rātou kia tiakina, nō te mea kāhore anō i whakaaturia me aha ia.
NUM 15:35 Ā, ka mea a Ihowā ki a Mohi, “Me whakamate rawa tēnā tangata; mā te whakaminenga katoa ia e āki ki te kōhatu ki waho o te puni.”
NUM 15:36 Nā, kawea ana ia e te whakaminenga katoa ki waho o te puni, ā, ākina ana ki te kōhatu, ā, ka mate; pērā me tā Ihowā i whakahau ai ki a Mohi.
NUM 15:37 I kōrero anō a Ihowā ki a Mohi, i mea,
NUM 15:38 “Kōrero ki ngā tama a Īharaira, mea atu ki a rātou kia hangā ētahi tāniko mō rātou, mō ngā taha o ō rātou kākahu, puta noa i ō rātou whakatupuranga, kia karapitia hoki te tāniko o te pito ki te miro purū;
NUM 15:39 ā, hei tāniko tēnā mō koutou, hei titiro iho mā koutou, nā, ka mahara ki ngā whakahau katoa a Ihowā, ā, ka mahi; kei rapu koutou i tā ō koutou ngākau, i tā ō koutou kanohi, arā i ngā mea e whāia atu nei, e pūremutia atu nei e koutou.
NUM 15:40 Kia mahara ai koutou ki te mahi i āku whakahau katoa, kia tapu ai hoki ki tō koutou Atua.
NUM 15:41 Ko Ihowā ahau, ko tō koutou Atua i kawe mai nei i a koutou i te whenua o Īhipa, kia waiho ai ahau hei Atua mō koutou: Ko Ihowā ahau, ko tō koutou Atua.”
NUM 16:1 Nā, ka tango tāngata a Koraha tama a Itihara, tama a Kohata, tama a Rīwai, rātou ko Ratana, ko Āpirama, tama a Eriapa, ko Ono hoki, tama a Perete, he tama nā Reupena;
NUM 16:2 ā, ka whakatika rātou ki te aroaro o Mohi, me ētahi o ngā tama a Īharaira, e rua rau e rima tekau, he rangatira nō te whakaminenga, e rangona ana i roto i te huihui, he hunga whai ingoa.
NUM 16:3 Ka whakahuihui rātou i a rātou ki a Mohi rāua ko Ārona, ka mea ki a rāua, “He kaha rawa tā kōrua tango tikanga, he tapu kau nei te whakaminenga katoa, kei waenganui anō hoki a Ihowā i a rātou. He aha rā kōrua i whakanui ai i a kōrua ki runga ake i te whakaminenga a Ihowā?”
NUM 16:4 Ā, nō te rongonga o Mohi, ka hinga tāpapa iho ia;
NUM 16:5 ā, ka kōrero ki a Koraha rātou ko tāna hui katoa, ka mea: “Ā te ata ka whakaaturia mai e Ihowā ko wai tāna, ko wai te mea tapu; ka meinga anō e ia kia whakatata ki a ia. Ko tāna i whiriwhiri ai, ko ia tāna e mea ai kia whakatata ki a ia.
NUM 16:6 Ko tēnei tā koutou e mea ai: Tīkina ētahi tahu kakara mā koutou, e Koraha rātou ko tāna hui katoa;
NUM 16:7 ka makā hoki he ahi ki roto, ka mea ai i te whakakakara ki runga, ki te aroaro o Ihowā āpōpō, ā, ko te tangata e whiriwhiri ai a Ihowā, ko ia te mea tapu; kāti tā koutou, e ngā tama a Rīwai.”
NUM 16:8 I mea anō a Mohi ki a Koraha, “Nā, whakarongo mai, e ngā tama a Rīwai!
NUM 16:9 He mea iti ianei ki tā koutou kia wehea koutou e te Atua o Īharaira i roto i te huihui o Īharaira, kia meinga kia whakatata ki a ia, kia mahi i te mahi o te tapenākara o Ihowā, kia tū hoki ki te aroaro o te hui, hei minita mā rātou?
NUM 16:10 Kua meinga anō koe e ia kia tata, koutou tahi ko ōu tēina katoa, ko ngā tama a Rīwai; nā, me whai anō hoki e koutou te tohungatanga?
NUM 16:11 Koia koutou ko tāu hui katoa ka huihui nei ki a Ihowā; ko Ārona hoki, he aha ia, i amuamu ai koutou ki a ia?”
NUM 16:12 Nā, ka tono tāngata a Mohi hei karanga i a Ratana rāua ko Āpirama, i ngā tama a Eriapa; ā, ka mea rāua, “E kore māua e haere atu.
NUM 16:13 He mea iti ianei tāu kawe mai i a mātou i te whenua e rerengia ana e te waiū, e te honi, kia mate ai mātou ki te koraha, ā, ka mea rawa hoki koe i a koe hei rangatira ki runga i a mātou?
NUM 16:14 Kāhore anō hoki koe i kawe i a mātou ki te whenua e rerengia ana e te waiū, e te honi, i hōmai rānei i ngā māra, i ngā kāri, hei kāinga. Ka pokaia rānei e koe ngā kanohi o ngā tāngata nei? E kore mātou e haere atu!”
NUM 16:15 Nā, ko te tino riringa o Mohi, ka mea ki a Ihowā, “Kaua e tahuri ki tā rātou whakahere. Kāhore anō kia kotahi te kāihe i tangohia e ahau i a rātou, kāhore anō ahau i kino noa ki tētahi o rātou.”
NUM 16:16 Nā, ka mea a Mohi ki a Koraha, “Puta mai koutou ko tāu hui katoa ki te aroaro o Ihowā āpōpō, a koe, me rātou ko Ārona, āpōpō.
NUM 16:17 Ā, me mau e tēnei, e tēnei o koutou tāna tahu kakara, ka mea he whakakakara ki runga, ka kawe ai tēnā i tāna tahu kakara, i tāna ki te aroaro o Ihowā, kia rua rau kia rima tekau ngā tahu kakara; ā, koe me tāu tahu kakara, a Ārona hoki me tāna.”
NUM 16:18 Nā, ka mau rātou ki tāna tahu kakara, ki tāna tahu kakara, ā, hoatu ana he ahi ki roto, meatia ana hoki he whakakakara ki runga, ā, ka tū tahi me Mohi rāua ko Ārona ki te whatitoka o te tapenākara o te whakaminenga.
NUM 16:19 Nā, ka tāwhiua e Koraha te whakaminenga katoa ki a rāua ki te whatitoka o te tapenākara o te whakaminenga; ā, ka puta mai te korōria o Ihowā ki te whakaminenga katoa.
NUM 16:20 Nā, ka kōrero a Ihowā ki a Mohi rāua ko Ārona, ka mea,
NUM 16:21 “Wehea atu kōrua i roto i tēnei whakaminenga, e kore hoki e aha ka pau rātou i ahau.”
NUM 16:22 Nā, ka tāpapa rāua, ka mea, “E te Atua, e te Atua o ngā wairua o ngā kikokiko katoa, kia hara rānei te tangata kotahi, ā, ka riri koe ki te whakaminenga katoa?”
NUM 16:23 Nā, ka kōrero a Ihowā ki a Mohi, ka mea,
NUM 16:24 “Kōrero ki te whakaminenga, mea atu: ‘Whakatika i te tapenākara o Koraha, o Ratana, o Āpirama.’ ”
NUM 16:25 Nā, ka whakatika a Mohi, ka haere ki a Ratana rāua ko Āpirama; me te whai tahi anō ngā kaumātua o Īharaira i a ia.
NUM 16:26 Nā, ka kōrero ia ki te whakaminenga, ka mea, “Tēnā, mawehe mai i ngā tēneti o ēnei tāngata kikino, kaua hoki e pā ki tētahi mea a rātou, kei ngaro koutou i roto i ō rātou hara katoa.”
NUM 16:27 Nā, ka whakatika rātou i ngā taha katoa o te tapenākara o Koraha, o Ratana, o Āpirama. Ā, ka puta a Ratana rāua ko Āpirama, ka tū ki ngā whatitoka o ō rāua tēneti, rātou ko ā rātou wāhine, ko ā rātou tama, ko ā rātou kōhungahunga hoki.
NUM 16:28 Nā, ka mea a Mohi, “Mā tēnei e mōhio ai koutou nā Ihowā ahau i unga mai ki te mahi i ēnei mahi katoa; ā, ehara i te mea whakaaro noa ake nāku.
NUM 16:29 Ki te mea ko te mate o ngā tāngata katoa te mate mō ēnei, ko te whiu rānei o ngā tāngata katoa te whiu mō rātou, kāhore ahau i ungā mai e Ihowā.
NUM 16:30 Tēnā ko tēnei, ka pokaia houtia e Ihowā he mahi hou, ā, ka hāmama te waha o te oneone, ā, ka horomia rātou me ā rātou mea katoa, ā, ka heke ora rātou ki te rua; kātahi koutou ka mōhio i whakahāwea ēnei tāngata ki a Ihowā.”
NUM 16:31 Ā mutu kau tāna kōrero i ēnei kōrero katoa, ko te tino kowheratanga o te oneone i raro i a rātou;
NUM 16:32 nā, hāmama ana te waha o te whenua, horomia ake hoki rātou me ō rātou whare, me ngā tāngata katoa o Koraha, me ō rātou rawa katoa.
NUM 16:33 Ā, heke ora ana rātou me ā rātou mea katoa ki te rua, nā, ka taupokina iho rātou e te whenua; ā, ngaro iho rātou i roto i te whakaminenga.
NUM 16:34 Nā, rere ana a Īharaira katoa i ngā taha katoa o rātou i tō rātou auē; i mea hoki, “Kei horomia hoki tātou e te whenua.”
NUM 16:35 Nā, ka puta mai he ahi i a Ihowā, ā, pau ake ngā tāngata e rua rau e rima tekau i whakahere nei i te whakakakara.
NUM 16:36 Nā, ka kōrero a Ihowā ki a Mohi, ka mea,
NUM 16:37 “Mea atu ki a Ereātara tama a te tohunga, a Ārona, kia tangohia ake e ia ngā tahu kakara i roto i te tahunga, ā, rukerukea atu hoki e koe te ahi ki kō; he tapu hoki ēnā;
NUM 16:38 ko ngā tahu kakara anō a taua hunga i hara rā ki ō rātou wairua, me hangā hei papa pāraharaha, hei kōpaki mō te āta. I tāpaea hoki ki te aroaro o Ihowā, koia i tapu ai; ā, ka waiho hei tohu ki ngā tama a Īharaira.”
NUM 16:39 Nā, tīkina atu ana e te tohunga, e Ereātara, ngā tahu kakara parāhi i tāpaea e te hunga i tahuna rā, ā, ka hangā hei papa pāraharaha, hei kōpaki mō te āta.
NUM 16:40 Hei whakamahara mō ngā tama a Īharaira, kei whakatata he tangata kē, ehara nei i te uri nō Ārona, ki te tahu whakakakara ki te aroaro o Ihowā. Kei rite ki a Koraha rātou ko tāna hui; ko tā Ihowā tēnei i kōrerotia e Mohi ki a ia.
NUM 16:41 Otiia, i te aonga ake ka amuamu te whakaminenga katoa o ngā tama a Īharaira ki a Mohi rāua ko Ārona, ka mea, “Nā kōrua i mate ai te iwi a Ihowā.”
NUM 16:42 Ā, i te huihuinga o te whakaminenga katoa ki a Mohi rāua ko Ārona, i tō rātou tahuritanga ake ki te tapenākara o te whakaminenga, e! Kua taupokina e te kapua, ā, ka kitea te korōria o Ihowā.
NUM 16:43 Nā, ka haere a Mohi rāua ko Ārona ki mua i te tapenākara o te whakaminenga.
NUM 16:44 Ā, ka kōrero a Ihowā ki a Mohi, ka mea,
NUM 16:45 “Whakatika atu kōrua i roto i tēnei whakaminenga, e kore e aha ka pau rātou i ahau.” Nā, ka tāpapa iho rāua.
NUM 16:46 Nā, ka mea a Mohi ki a Ārona, “E mau ki te tahu kakara, meatia iho hoki he ahi i te āta, ka hoatu ai i te whakakakara ki runga, ā, kia hohoro te haere ki te whakaminenga, te whakamārie mō rātou; kua puta he riri i te aroaro o Ihowā; kua tīmata te whiu.”
NUM 16:47 Nā, tīkina ana e Ārona, pērātia ana me tā Mohi i kī ai, ā, rere ana ia ki waenganui o te whakaminenga; nā, kua tīmata tēnā te whiu i roto i te iwi. Nā, ka makā iho e ia he whakakakara, ā, ka whakamārie mō te iwi.
NUM 16:48 Nā, tū ana ia i waenganui o te hunga mate, o te hunga ora; ā, ka mutu te whiu.
NUM 16:49 Nā, ko ngā tāngata i mate i te whiu, kotahi tekau mā whā mano e whitu rau, hāunga ērā i mate i tō Koraha rā.
NUM 16:50 Nā, hoki ana a Ārona ki a Mohi, ki te whatitoka o te tapenākara o te whakaminenga, ā mutu iho te whiu.
NUM 17:1 I kōrero anō a Ihowā ki a Mohi, i mea,
NUM 17:2 “Kōrero ki ngā tama a Īharaira, tangohia mai anō he tokotoko i tēnei, i tēnei, o rātou, i ngā whare o ō rātou mātua, i ngā ariki katoa o ngā whare o ō rātou mātua, kia kotahi tekau mā rua ngā tokotoko. Me tuhituhi te ingoa o tēnei, o tēnei, ki tāna tokotoko.
NUM 17:3 Me tuhituhi anō hoki te ingoa o Ārona ki te tokotoko a Rīwai. Ā, kia kotahi te tokotoko mā ia upoko o te whare o ō rātou mātua.
NUM 17:4 Ā, me whakatakoto e koe ki roto ki te tapenākara o te whakaminenga ki mua o te whakaaturanga, ki te wāhi e tūtaki ai ahau ki a koutou.
NUM 17:5 Nā, ko te tangata e whiriwhiri ai ahau, ka pihi tāna tokotoko, ā, ka pēhia atu e ahau te amuamu a ngā tama a Īharaira, e amuamu nei ki a kōrua.”
NUM 17:6 Nā, ka kōrero a Mohi ki ngā tama a Īharaira, ā, hōmai ana e ō rātou ariki katoa ki a ia, he tokotoko e tēnei ariki, he tokotoko e tēnei ariki, e ngā whare o ō rātou mātua, kotahi tekau mā rua ngā tokotoko; i roto anō i ā rātou tokotoko te tokotoko a Ārona.
NUM 17:7 Ā, whakatakotoria ana ngā tokotoko e Mohi ki te aroaro o Ihowā ki te tapenākara o te whakaaturanga.
NUM 17:8 Ā, i te aonga ake, nā, ka haere a Mohi ki te tapenākara o te whakaaturanga, e! Kua pihi te tokotoko a Ārona, tā te whare o Rīwai, kua wana, kua rāpupuku, kua kohera hoki he puāwai, kua hua he aramona.
NUM 17:9 Nā, kawea ana e Mohi ngā tokotoko katoa i te aroaro o Ihowā ki ngā tama katoa a Īharaira; ā, tirohia iho ana e rātou, tangohia ana hoki e rātou tāna tokotoko, tāna tokotoko.
NUM 17:10 Nā, ka mea a Ihowā ki a Mohi, “Whakahokia mai te tokotoko a Ārona ki mua i te Whakaaturanga, kia tiakina, hei tohu ki te hunga tutū; ā, ka kore i a koe ā rātou amuamu e rongo nei ahau, kei mate rātou.”
NUM 17:11 Ā, pērātia ana e Mohi, rite tonu ki tā Ihowā i whakahau ai ki a ia tāna i mea ai.
NUM 17:12 Nā, ka mea ngā tama a Īharaira ki a Mohi, “Nanā, ka mate mātou, ka ngaro mātou, ngaro katoa.
NUM 17:13 Ko te tangata e whakatata ana ki te tapenākara o Ihowā, ka mate. Kia poto rānei mātou katoa ki te mate?”
NUM 18:1 I mea anō a Ihowā ki a Ārona, “Māu, mā āu tama, mā koutou ko te whare o tōu pāpā e waha te kino o te wāhi tapu; ā, mā koutou ko āu tama e waha te kino o tā koutou mahi tohunga.
NUM 18:2 Ā, ko ōu tēina hoki, o te iwi o Rīwai, o te iwi o tōu pāpā, me whakatata tahi me koe, kia tāpiritia ai rātou ki a koe, hei minita ki a koe; ko koutou tahi ia ko āu tama hei te tapenākara o te whakaaturanga.
NUM 18:3 Ā, mā rātou tāu mahi e tiaki, me te mahi tiaki o te tapenākara katoa. Otiia, kaua e whakatata ki ngā oko o te wāhi tapu, ki te āta rānei, kei mate ko rātou, ko koutou rānei.
NUM 18:4 Ā, ka tāpiritia rātou ki a koe, hei tiaki i ngā mea o te tapenākara o te whakaminenga, mō ngā mahi katoa o te tapenākara; kaua hoki te tangata kē e tata ki a koutou.
NUM 18:5 “Mā koutou hoki e tiaki ngā mea o te wāhi tapu, me ngā mea o te āta; kei puta he riri ki ngā tama a Īharaira ā muri ake nei.
NUM 18:6 Me ahau hoki, nanā, kua tango ahau i ō koutou tēina, i ngā Rīwaiti i roto i ngā tama a Īharaira; he mea hoatu ki a koutou mā Ihowā, hei mahi i ngā mahi o te tapenākara o te whakaminenga.
NUM 18:7 Ko koutou ia ko āu tama, kia mau ki tā koutou mahi tohunga ki ngā mea katoa o te āta, o roto atu anō hoki i te ārai, hei mahi mā koutou. He mea hoatu noa atu tā koutou mahi tohunga e hoatu nei e ahau; ā, ka whakamatea te tangata kē e whakatata mai ana.”
NUM 18:8 I kōrero anō a Ihowā ki a Ārona: “Nā, kua tukua atu nei e ahau ki a koe te tiaki o āku whakahere hapahapai, o ngā mea tapu katoa a ngā tama a Īharaira; he mea hoatu nāku ki a koutou ko āu tama, he whakaaro hoki ki te whakawahinga, he tikanga pūmau.
NUM 18:9 Ko ngā mea tēnei māu o ngā mea tino tapu e kore nei e tukua ki te ahi; ko ā rātou whakahere katoa, ko ā rātou whakahere totokore katoa, me ā rātou whakahere hara katoa, me ā rātou whakahere katoa mō te hē, e tāpaea ki ahau; ka tino tapu mā koutou ko āu tama.
NUM 18:10 Hei te wāhi tino tapu kai ai, mā ngā tāne katoa e kai; he tapu tēnā māu.
NUM 18:11 “Māu anō tēnei: ko ngā whakahere hapahapai e hōmai ana e rātou me ngā whakahere poipoi katoa a ngā tama a Īharaira; kua hoatu aua mea e ahau ki a koe, ki a koutou ko āu tama, ko āu tamāhine, he tikanga pūmau; e kainga tēnā e ngā mea pokekore katoa o tōu whare.
NUM 18:12 “Ko ngā wāhi papai katoa o te hinu, me ngā wāhi papai katoa o te wāina, o te wīti hoki, ko ngā tūāpora o aua mea e hōmai ana ki a Ihowā, kua hoatu ēnā e ahau ki a koe.
NUM 18:13 Māu ngā hua mataati o ngā mea katoa o te whenua, e kawea mai ana ki a Ihowā; me kai e ngā mea pokekore katoa o tōu whare.
NUM 18:14 “Māu ngā mea katoa i oti rawa i roto i a Īharaira.
NUM 18:15 Ko ngā mea katoa e oroko puta mai ana i te kōpū o ngā kikokiko katoa, ko ngā mea hoki e whakaherea ana mā Ihowā, o te tangata, o te kararehe, māu ēnā. Otiia, me tino whakahoki atu e koe ki te utu ngā mātāmua a te tangata, me tango utu anō mō ngā mātāmua a te kararehe poke.
NUM 18:16 Ā, ko ngā mea e utua ana e whakahokia ana, ka kotahi marama o tōna whānautanga, me tango ōna utu; kia rite ki tāu e whakarite ai, kia rima hekere ngā moni; hei ngā hekere wāhi tapu, (e rua tekau nei ngā kera).
NUM 18:17 “Ko te mātāmua ia a te kau, me te mātāmua a te hipi, me te mātāmua a te koati, kaua e whakahokia atu e koe; he tapu ēnā. Me tāuhi e koe ō rātou toto ki te āta, me tahu anō ō rātou ngako hei whakahere ahi, hei kakara reka ki a Ihowā.
NUM 18:18 Ā, māu ō rātou kikokiko, ka pērā me te uma poipoi, me te hūhā matau, nāu hoki ēnā.
NUM 18:19 Ko ngā whakahere hapahapai katoa o roto o ngā mea tapu e tāpaea ana e ngā tama a Īharaira ki a Ihowā, kua hoatu e ahau ki a koutou ko āu tama, ko āu tamāhine; hei tikanga pūmau. Hei kawenata tote i te aroaro o Ihowā ake ake, ki a koutou tahi ko ōu uri.”
NUM 18:20 Ā, i kōrero a Ihowā ki a Ārona, “Kāhore he kāinga tupu mōu i tō rātou whenua, kāhore anō hoki he wāhi mōu i roto i a rātou; ko ahau te wāhi mōu, tōu kāinga tupu i roto i ngā tama a Īharaira.
NUM 18:21 “Kua hoatu nei hoki e ahau ki ngā tama a Rīwai ngā whakatekau katoa i roto i a Īharaira hei taonga tupu, hei utu mō tā rātou mahi e mahi ai rātou, mō te mahinga i te tapenākara o te whakaminenga.
NUM 18:22 Kaua anō hoki ngā tama a Īharaira e whakatata ā muri ake nei ki te tapenākara o te whakaminenga, kei whai hara, kei mate.
NUM 18:23 Mā ngā Rīwaiti ia e mahi ngā mahi o te tapenākara o te whakaminenga, me waha anō hoki e rātou tō rātou kino; hei tikanga pūmau ia mā ō koutou whakatupuranga, kia kāhore he kāinga tupu mō rātou i roto i ngā tama a Īharaira.
NUM 18:24 Ko ngā whakatekau hoki a ngā tama a Īharaira, e tāpaea nei hei whakahere hapahapai ki a Ihowā, kua hoatu e ahau hei wāhi tupu ki ngā Rīwaiti. Koia ahau i mea ai ki a rātou, e kore rātou e whai kāinga tupu i roto i ngā tama a Īharaira.”
NUM 18:25 I kōrero anō a Ihowā ki a Mohi, i mea,
NUM 18:26 “Kōrero anō ki ngā Rīwaiti, mea atu ki a rātou: ‘Ka tangohia e koutou ngā whakatekau a ngā tama a Īharaira e hoatu nei e ahau ki a koutou i roto i ā rātou mea hei wāhi tupu mō koutou, me tāpae he whakahere hapahapai ki a Ihowā i roto i taua mea, he wāhi whakatekau o aua whakatekau.
NUM 18:27 Ā, ka kīia tēnei whakahere hapahapai he mea nā koutou, he pērā me te wīti o te patunga wīti, me te pūrenatanga hoki o te poka wāina.
NUM 18:28 Nā, me tāpae anō hoki e koutou he whakahere hapahapai ki a Ihowā i roto i ā koutou whakatekau katoa e tangohia ana e koutou i ngā tama a Īharaira; me hōmai te whakahere hapahapai a Ihowā i roto i taua mea ki te tohunga, ki a Ārona.
NUM 18:29 Me tāpae ngā whakahere hapahapai katoa mā Ihowā i roto i ngā mea katoa e hōmai ana ki a koutou, i roto i ngā mea papai katoa o ēnā, arā te wāhi tapu o roto.’
NUM 18:30 “Me kī atu ki a rātou: ‘Ka hapahapai koutou i te wāhi tino pai o taua mea, me kī tēnā he mea nā ngā Rīwaiti, he pērā me te hua o te patunga wīti, me te pūrenatanga hoki o te poka wāina.
NUM 18:31 Ā, me kai tēnā e koutou ko ō koutou whare ki ngā wāhi katoa; ko tō koutou utu hoki ia mō tā koutou mahi i te tapenākara o te whakaminenga.
NUM 18:32 Ā, e kore e waha e koutou he hara i reira, ina hapahapainga tōna wāhi pai; kaua anō e whakapokea ngā mea tapu a ngā tama a Īharaira, kei mate koutou.’ ”
NUM 19:1 I kōrero anō a Ihowā ki a Mohi rāua ko Ārona, i mea:
NUM 19:2 “Ko te tikanga tēnei o te ture i whakahaua e Ihowā, i mea ia: Kōrero ki ngā tama a Īharaira kia tīkina he kūao kau uha, he mea whero māu, hei te mea kāhore he nawe, kāhore he koha, ā, kāhore anō hoki i utaina ki te ioka.
NUM 19:3 Me hoatu e koutou ki a Ereātara, tohunga, māna ia e kawe ki waho o te puni, me patu hoki e tētahi ki tōna aroaro.
NUM 19:4 Nā, ka tango a Ereātara, tohunga, i tētahi wāhi o ōna toto ki tōna maihao, kia whitu ana tāuhiuhinga i ōna toto ki te roro tonu o te tapenākara o te whakaminenga.
NUM 19:5 Nā, mā tētahi e tahu te kau i tāna tirohanga atu; ko tōna hiako, me ōna kiko, me ōna toto, me tahu tahi me tōna paru.
NUM 19:6 Nā, ka mau te tohunga ki te rākau hīta, ki te hihopa, ki te mea ngangana, ā, ka makā e ia ki waenganui o te tahunga o te kau.
NUM 19:7 Kātahi ka horoi te tohunga i ōna kākahu, ka horoi anō hoki i tōna kiri ki te wai, ā muri iho ka haere ki te puni, ka poke hoki te tohunga ā ahiahi noa.
NUM 19:8 Me te kaitahu anō, me horoi ōna kākahu ki te wai, me horoi anō tōna kiri ki te wai, ka poke hoki ia ā ahiahi noa.
NUM 19:9 “Ā, me āmene ngā pungarehu o te kau e tētahi tangata pokekore, ā, ka waiho i waho o te puni, i te wāhi pokekore, ka tiaki ai mō te whakaminenga o ngā tama a Īharaira hei wai wehenga; hei horohoro tēnā mō te hara.
NUM 19:10 Me horoi anō hoki ōna kākahu e te kaiāmene i ngā pungarehu o te kau, ka poke hoki ia ā ahiahi noa. Me waiho anō tēnā hei tikanga tūturu mā ngā tama a Īharaira, mā te manene hoki e noho manene ana i roto i a rātou.”
NUM 19:11 “Ki te pā tētahi ki te tinana mate o tētahi tangata, ka poke ia, e whitu ngā rā.
NUM 19:12 Me pure ia e ia ki taua wai i te toru o ngā rā, ā, i te whitu o ngā rā ka kore ōna poke. Otiia ki te kore ia e pure i a ia i te toru o ngā rā, e kore ia e pokekore i te whitu o ngā rā.
NUM 19:13 Ki te pā tētahi ki te tinana mate o tētahi tangata kua mate, ā, kāhore e pure i a ia, e whakapokea ana e ia te tapenākara o Ihowā. Ka hātepea taua wairua i roto i a Īharaira; nō te mea kīhai i tāuhiuhia ki a ia te wai wehenga, ka poke anō ia; e mau ana anō ki a ia tōna poke.
NUM 19:14 “Ko te ture tēnei ina mate te tangata i roto i te tēneti. Ko ngā tāngata katoa e tomo ana ki te tēneti, me ngā tāngata katoa i roto i te tēneti, ka poke kia whitu ngā rā.
NUM 19:15 Ko ngā oko katoa anō e puare kau ana, kāhore nei i herea te taupoki, ka poke.
NUM 19:16 “Ki te pā hoki tētahi ki te tangata i patua ki te hoari ki waenga pārae, ki te tūpāpaku rānei, ki te wheua tangata rānei, ki te urupā rānei, ka poke ia kia whitu ngā rā.
NUM 19:17 “Nā, mō te tangata poke, me tiki e rātou ētahi o ngā pungarehu o te kau i tahuna hei horohoronga mō ngā hara, ka riringi ai ki te wai ora, ki roto anō ki te oko.
NUM 19:18 Nā, ka mau tētahi tangata pokekore ki te hihopa, ka tuku ki te wai, nā, ka tāuhiuhi i te tēneti me ngā oko katoa, i ngā tāngata anō hoki o reira, me te tangata i pā atu nei ki te wheua ki te tangata rānei i patua, ki te tūpāpaku rānei, ki te urupā rānei.
NUM 19:19 Me tāuhiuhi anō hoki e te tangata pokekore te tangata poke i te toru o ngā rā, i te whitu hoki o ngā rā; ā, me pure ia e ia anō i te whitu o ngā rā ka horoi ai i ōna kākahu, ka horoi anō hoki i a ia ki te wai, ā, i te ahiahi ka kore te poke.
NUM 19:20 “Ā, ki te poke tētahi tangata, ā, kāhore e pure i a ia, ka hātepea atu taua wairua i roto i te huihui, mōna i whakapoke i te wāhi tapu o Ihowā. Kīhai te wai o te wehenga i tāuhiuhia ki a ia; he poke.
NUM 19:21 Ā, hei tikanga tūturu tēnei mā rātou. “Me horoi ōna kākahu e te kaitāuhiuhi o te wai wehenga; ka poke anō ā ahiahi noa te tangata e pā ana ki te wai wehenga.
NUM 19:22 Ka poke anō ngā mea katoa e pā ai te tangata poke; ka poke anō ā ahiahi noa te wairua e pā ana.”
NUM 20:1 Nā, ka tae ngā tama a Īharaira, arā te whakaminenga katoa, ki te koraha o Hini i te marama tuatahi; ā, ka noho te iwi ki Karehe. Nā, ka mate a Miriama ki reira, ā, tanumia ana ki reira.
NUM 20:2 Ā, kāhore he wai mō te whakaminenga; ā, ka huihui ki te ngangare ki a Mohi rāua ko Ārona.
NUM 20:3 Nā, ka ngangau te iwi ki a Mohi, ka kōrero, ka mea, “Auē, me i mate mātou i te matenga o ō mātou tuākana i te aroaro o Ihowā!
NUM 20:4 He aha hoki i kawea mai ai e kōrua te whakaminenga a Ihowā ki tēnei koraha, kia mate tahi mātou me ā mātou kararehe ki konei?
NUM 20:5 He aha hoki mātou i meinga ai e kōrua kia haere mai i Īhipa, kia kawea mai mātou ki tēnei wāhi kino? Ehara nei i te wāhi purapura, i te wāhi piki, wāina, pamekaranete; kāhore anō hoki he wai hei inu.”
NUM 20:6 Nā, ka haere a Mohi rāua ko Ārona i te aroaro o te whakaminenga ki te whatitoka o te tapenākara o te whakaminenga, ā, ka kūpapa iho ō rāua mata. Nā, ko te putanga mai o te korōria o Ihowā ki a rāua.
NUM 20:7 Ā, ka kōrero a Ihowā ki a Mohi, ka mea,
NUM 20:8 “Maua atu te tokotoko, huihuia mai anō te whakaminenga e kōrua ko tōu tuakana, ko Ārona, ka kōrero ai kōrua ki te kāmaka i mua i ō rātou kanohi, kia tukua mai tōna wai; ā, ka whakaputaina mai e koe he wai mō rātou i roto i te kāmaka; ā, ka meinga e koe te whakaminenga me ā rātou kararehe kia inu.”
NUM 20:9 Nā, ka maua e Mohi te tokotoko i te aroaro o Ihowā, pērā ana ia me tāna i whakahau ai.
NUM 20:10 I huihuia hoki te whakaminenga e Mohi rāua ko Ārona ki mua o te kāmaka, ā, ka mea ia ki a rātou, “Whakarongo mai, e te hunga tutū; me whakaputa mai rānei e maua he wai mō koutou i roto i tēnei kāmaka?”
NUM 20:11 Nā, ka ara te ringa o Mohi, ā, e rua āna patunga i te kāmaka ki tāna tokotoko; ko te tino putanga mai o te wai, tōna nui, ā, inu ana te iwi me ā rātou kararehe.
NUM 20:12 Nā, ka mea a Ihowā ki a Mohi rāua ko Ārona, “Kāhore nei kōrua i whakapono ki ahau, kia whakatapu i ahau i te tirohanga a ngā tama a Īharaira, mō reira e kore kōrua e kawe i tēnei whakaminenga ki te whenua e hoatu nei e ahau ki a rātou.”
NUM 20:13 Ko te wai tēnā o Meripa; i ngangau hoki ngā tama a Īharaira ki a Ihowā ki reira, ā, meinga ana rātou hei whakatapu mōna.
NUM 20:14 Nā, ka unga tāngata a Mohi i Karehe ki te kīngi o Ēroma: “Ko te kupu tēnei a tōu teina, a Īharaira: E mōhio ana koe ki ngā hē katoa i pono mai ki a mātou:
NUM 20:15 ki te hekenga o ō mātou mātua ki Īhipa, ki tō mātou nohoanga hoki i Īhipa, ā, maha noa ngā rā; ā, ka tūkino ngā Īhipiana i a mātou ko ō mātou mātua;
NUM 20:16 ā, i tā mātou karangatanga atu ki a Ihowā, nā, ka rongo ia ki tō mātou reo, ā, ungā ana e ia he anahera hei whakaputa mai i a mātou i Īhipa. “Nā, kei Karehe tēnei mātou, kei te pā whakamutunga o tōu rohe.
NUM 20:17 Tēnā, tukua atu mātou mā tōu whenua; e kore mātou e haere nā ngā māra, nā ngā māra wāina rānei, e kore anō mātou e inu i te wai o ngā puna. Ka haere mātou i te huanui o te kīngi, e kore mātou, e peka ki matau, ki mauī, kia pahemo rā anō i a mātou ōu rohe.”
NUM 20:18 Nā, ka mea a Ēroma ki a ia, “E kore koe e tika nā tōku wāhi, kei haere ahau me te hoari ki te tū i a koe.”
NUM 20:19 Nā, ka mea ngā tama a Īharaira ki a ia, “Ka haere mātou nā te huanui; ā, ki te inu ahau me āku kāhui i tōu wai, me utu e ahau. Heoi rawa tāku e mea ai, ko te haere kau o ōku waewae nā konā.”
NUM 20:20 Nā, ka mea ia, “E kore koe e haere rā konei.” Ā, ka puta a Ēroma me te ope nui, me te ringa kaha, ki te tū i a ia.
NUM 20:21 Heoi, kīhai a Ēroma i pai ki te tuku i a Īharaira kia haere nā tōna rohe; nā, peka kē ana a Īharaira i a ia.
NUM 20:22 Nā, ka tūria atu e rātou i Karehe; ā, ka tae ngā tama a Īharaira, arā te whakaminenga katoa ki Maunga Horo.
NUM 20:23 Nā, ka kōrero a Ihowā ki a Mohi rāua ko Ārona i Maunga Horo, i te rohe o te whenua o Ēroma, ka mea,
NUM 20:24 “Ka kohia atu a Ārona ki tōna iwi; e kore hoki ia e tae ki te whenua ka hoatu nei e ahau ki ngā tama a Īharaira, mō kōrua i whakatoi ki tāku kupu i te wai o Meripa.
NUM 20:25 Tangohia a Ārona rāua ko Ereātara, ko tāna tama, kawea hoki rāua ki runga ki Maunga Horo.
NUM 20:26 Unuhia hoki ngā kākahu o Ārona, ka whakakākahu ai ki tāna tama, ki a Ereātara; ā, ka kohia atu a Ārona ki tōna iwi, ka mate hoki ki reira.”
NUM 20:27 Nā, ka pērā a Mohi me tā Ihowā i whakahau ai, ā, haere ana rātou ki runga ki Maunga Horo i te tirohanga a te whakaminenga katoa.
NUM 20:28 Nā, ka unuhia e Mohi ngā kākahu o Ārona, ā, whakakākahuria ana e ia ki tāna tama, ki a Ereātara; ā, ka mate a Ārona ki reira, ki te tihi o te maunga. Ā, ka heke iho a Mohi rāua ko Ereātara i runga i te maunga.
NUM 20:29 Ā, nō te kitenga o te whakaminenga katoa kua mate a Ārona, e toru tekau ngā rā i tangihia ai a Ārona e rātou, e te whare katoa o Īharaira.
NUM 21:1 Ā, ka rongo a Kīngi Arara, te Kanaani, i noho nei ki te taha ki te tonga, e haere ana a Īharaira nā te ara o Atarimi; nā, ka tatau ia ki a Īharaira, ā, whakaraua ana ētahi o rātou e ia.
NUM 21:2 Nā, ka puta te kī taurangi a Īharaira ki a Ihowā, ka mea, “Ki te tukua mai e koe tēnei iwi ki tōku ringa ka tino whakangaromia e ahau ō rātou pā.”
NUM 21:3 Ā, i whakarongo a Ihowā ki te reo o Īharaira, ā, hōmai ana e ia ngā Kanaani; ā, tino whakangaromia ana rātou me ō rātou pā e rātou; ā, huaina iho te ingoa o taua wāhi ko Horema.
NUM 21:4 Nā, ka tūria atu e rātou i Maunga Horo nā te ara o te Moana Whero ki te taiāwhio i te whenua o Ēroma; ā pōuri noa iho te wairua o te iwi i te ara.
NUM 21:5 Ā, ka whakahē te iwi i te Atua, i a Mohi hoki, “He aha i kawea mai ai mātou ki runga nei i Īhipa kia mate ki te koraha? Kāhore nei hoki he taro, kāhore he wai; ā, e whakarihariha ana tō mātou wairua ki tēnei taro māmā.”
NUM 21:6 Nā, ka tukua mai e Ihowā he nākahi tū ā-ahi ki te iwi, ā, ka ngaua te iwi; ā, he tokomaha o Īharaira i mate.
NUM 21:7 Nā, ka haere te iwi ki a Mohi, ka mea, “Kua hara mātou i a mātou i whakahē i a Ihowā, i a koe hoki; īnoi ki a Ihowā kia tangohia atu e ia ngā nākahi i a mātou.” Nā, ka īnoi a Mohi mō te iwi.
NUM 21:8 Nā, ka mea a Ihowā ki a Mohi, “Hangā tētahi nākahi tū ā-ahi māu, ka whakanoho ki te pou; nā, mehemea kua ngaua tētahi, ā, ka titiro atu ia ki reira, ka ora.”
NUM 21:9 Nā, hangā ana e Mohi te nākahi ki te parāhi, ā, whakanohoia ana ki te pou; nā, mehemea kua ngaua tētahi e te nākahi, ka titiro ia ki te nākahi parāhi, kua ora.
NUM 21:10 Nā, ka tūria atu e ngā tama a Īharaira, ā, noho ana i Opoto.
NUM 21:11 Ā, ka tūria atu i Opoto, ā, noho ana i Iteaparimi, i te koraha i te ritenga atu o Moapa, whaka te rāwhiti.
NUM 21:12 Ā, ka haere atu rātou i reira, ā, noho ana i te raorao i Terete.
NUM 21:13 Nā, ka tūria atu i reira, ā, noho ana i tērā taha o Aranona, o tērā i te koraha e puta mai ana i ngā wāhi o ngā Amori; ko Aranona hoki te rohe ki a Moapa, kei waenganui o Moapa, o ngā Amori.
NUM 21:14 Koia i kōrerotia ai i te Pukapuka o ngā Whawhai a Ihowā, “Ko tāna i mea ai ki te Moana Whero, ki ngā awa hoki o Aranona,
NUM 21:15 ki ngā hurihanga wai anō hoki, e anga ana ki te nohoanga i Ara, e piri nei ki te rohe o Moapa.”
NUM 21:16 Ā, i haere atu rātou i reira ki Pēre; ko te puna ia i kōrero ai a Ihowā ki a Mohi, “Huihuia te iwi, ā, māku e hoatu he wai ki a rātou.”
NUM 21:17 Nā, ka waiatatia tēnei waiata e Īharaira: “Pupuke ake, e te puna! Waiatatia!
NUM 21:18 Te puna i keria e ngā rangatira, i keria e ngā ariki o te iwi, ki te hēpeta, ā, ki ā rātou tokotoko.” Nā, ka tūria atu e rātou i te koraha ki Matana,
NUM 21:19 i Matana hoki ki Nahariere; ā, i Nahariere ki Pamoto,
NUM 21:20 ā, i Pamoto ki te raorao i te whenua o Moapa, ki te tihi o Pihika, e titiro iho ana ki te koraha.
NUM 21:21 Nā, ka unga tāngata a Īharaira ki a Hihona kīngi o ngā Amori, hei mea:
NUM 21:22 “Tukua atu ahau nā tōu whenua; e kore mātou e peka ki ngā māra, ki ngā māra wāina rānei; e kore mātou e inu i te wai o ngā puna. Ka haere mātou nā te huanui o te kīngi, kia pahemo rā anō ōu rohe i a mātou.”
NUM 21:23 Otiia kīhai a Hihona i tuku i a Īharaira kia tika nā tōna wāhi; nā, huihuia ana e Hihona tōna iwi katoa, ā, puta mai ana ki te tū i a Īharaira ki te koraha, nā, ka haere ia ki Iahata; ā, ka tatau ia i a Īharaira.
NUM 21:24 Ā, patua iho ia e Īharaira ki te mata o te hoari, tangohia ana e rātou tōna whenua, o Aranona atu ā tae noa ki Iapoko, ki ngā tama rā anō a Āmona; he rohe hoki e kore e taea tō ngā tama a Āmona.
NUM 21:25 Ā, riro ana i a Īharaira ēnei pā katoa; ā, nohoia ana e Īharaira ngā pā katoa o ngā Amori, a Hehepona, me ōna pā ririki.
NUM 21:26 He pā hoki a Hehepona nō Hihona kīngi o ngā Amori; i whawhai hoki ia ki tō mua kīngi o Moapa, ā, tangohia ana ia tōna whenua katoa i tōna ringa ā tae noa ki Aranona.
NUM 21:27 Koia te hunga kōrero whakatauki ka mea ai, “Haere mai ki Hehepona, kia hangā; kia whakaūngia te pā o Hihona.
NUM 21:28 “Kua puta atu hoki he ahi i Hehepona, he mura i te pā o Hihona. Ā, pau ake a Ara o Moapa, me ngā ariki o ngā wāhi tiketike o Aranona.
NUM 21:29 Auē te mate mōu, e Moapa! Ka ngaro koe, e te iwi o Kemoho! Kua hoatu e ia āna tama i rere mōrehu, me āna tamāhine, hei pononga mā Hihona, mā te kīngi o ngā Amori.
NUM 21:30 “I kōpere atu mātou ki a rātou kua ngaro a Hehepona, tae noa ki Ripono, kua hunā e mātou tae noa ki Nopa e totoro atu nei ki Merepa.”
NUM 21:31 Nā, ka noho a Īharaira ki te whenua o ngā Amori.
NUM 21:32 Ā, ka tono tāngata a Mohi ki te tūtei i Iatere, ā, ka riro i a rātou ngā pā o reira, i panā hoki ngā Amori e noho ana i reira.
NUM 21:33 Nā, ka tahuri rātou, ā, ka haere ki runga nā te ara o Pahana; nā, ko te putanga mai o Oka kīngi o Pahana, ki te whakatūtaki i a rātou, a ia, me tōna iwi katoa ki te whawhai ki Eterei.
NUM 21:34 Ā, ka mea a Ihowā ki a Mohi, “Kei wehi i a ia; kua hoatu hoki ia e ahau ki tōu ringa, me tōna iwi katoa, me tōna whenua; ā, ka rite tāu e mea ai ki a ia ki tāu i mea ai ki a Hihona kīngi o ngā Amori i noho rā i Hehepona.”
NUM 21:35 Nā, patua iho ia e rātou, me āna tama, me tōna iwi katoa, ā, kore noa e toe tētahi mōrehu ōna; ā, tangohia ana e rātou tōna whenua.
NUM 22:1 Nā, ka tūria atu e ngā tama a Īharaira, ā, ka noho ki ngā mānia o Moapa, ki tēnei taha o Horano ki te ritenga atu o Heriko.
NUM 22:2 Ā, i kite a Pāraka tama a Tiporo i ngā mea katoa i mea ai a Īharaira ki ngā Amori.
NUM 22:3 Nā, nui atu te wehi o Moapa ki te iwi, nō te mea he tokomaha; ā, tuatea noa iho a Moapa i ngā tama a Īharaira.
NUM 22:4 Nā, ka mea a Moapa ki ngā kaumātua o Miriana, “Ākuanei tēnei hui horomiti ai i ngā tāngata katoa i ngā taha katoa o tātou, pērā ai me te kau e horomiti nei i te tarutaru o te māra.” Ā, ko Pāraka tama a Tiporo te kīngi o Moapa i taua wā.
NUM 22:5 Nā, ka tukua e ia he karere ki a Paraama tama a Peoro ki Petoro, i te taha o te awa, ki te whenua o ngā tama o tōna iwi, ki te tiki i a ia, hei mea: “He iwi tēnei kua puta mai i Īhipa, nā, kapi ana i a rātou te mata o te whenua; e noho nei anō rātou i tōku aroaro.
NUM 22:6 Nā, tēnā, haere mai hei kaikanga māku i te iwi nei; he kaha kē hoki rātou i ahau; tērā pea ka toa ahau, ka patua rātou e mātou, ā, ka peia atu rātou i te whenua; e mōhio ana hoki ahau ko tāu e manaaki ai ka manaakitia, ko tāu hoki e kanga ai ka kangā.”
NUM 22:7 Ā, ka haere ngā kaumātua o Moapa rātou ko ngā kaumātua o Miriana me ngā utu mākutu i ō rātou ringa; ā, ka tae ki a Paraama, ā, kōrerotia ana e rātou ngā kupu a Pāraka.
NUM 22:8 Nā, ka mea ia ki a rātou, “E noho ki konei i tēnei pō, ā, māku e whakahoki he kōrero ki a koutou, ko tā Ihowā hoki e kōrero ai ki ahau.” Nā, ka noho ngā rangatira o Moapa ki a Paraama.
NUM 22:9 Nā, ka haere te Atua ki a Paraama, ka mea, “Ko wai ēnā tāngata i a koe nā?”
NUM 22:10 Ā, ka mea a Paraama ki te Atua, “Kua unga tāngata mai a Pāraka tama a Tiporo, kīngi o Moapa, ki ahau, hei kī mai:
NUM 22:11 ‘He iwi tēnei kua puta mai i Īhipa, ā, kapi ana i a rātou te mata o te whenua; tēnā, haere mai hei kaikanga māku i a rātou; tērā pea e taea e ahau te whawhai ki a rātou, te pei hoki i a rātou.’ ”
NUM 22:12 Nā, ka mea te Atua ki a Paraama, “Kaua e haere i a rātou; kaua e kangā tēnā iwi; kua oti hoki rātou te manaaki.”
NUM 22:13 Nā, ka maranga a Paraama i te ata, ka mea ki ngā rangatira a Pāraka, “Haere ki tō koutou whenua; e kore hoki a Ihowā e pai ki te tuku i ahau kia haere i a koutou.”
NUM 22:14 Nā, ka whakatika ngā rangatira o Moapa, ka haere ki a Pāraka, ka mea, “Kīhai a Paraama i pai ki te haere tahi mai i a mātou.”
NUM 22:15 Nā, ka tonoa e Pāraka ētahi atu rangatira, he tokomaha atu, he nunui atu i ērā.
NUM 22:16 Ā, ka tae rātou ki a Paraama, ka mea ki a ia: “Ko te kupu tēnei a Pāraka tama a Tiporo: ‘Kei puritia atu koe e tētahi mea, haere mai ki ahau.
NUM 22:17 Ka whakanuia rawatia hoki koe e ahau, ka meatia anō e ahau ngā mea katoa e mea mai ai koe ki ahau; haere mai rā hei kaikanga māku i tēnei iwi.’ ”
NUM 22:18 Nā, ka utu Paraama, ka mea ki ngā tāngata a Pāraka, “Ahakoa i kī tōna whare i te hiriwa, i te kōura, e hōmai e Pāraka ki ahau, e kore e āhei i ahau te whakawhiti ki kō atu i te kupu a Ihowā, a tōku Atua, te mea i te mea iti iho, i te mea nui ake rānei.
NUM 22:19 Nā, e noho ki konei i tēnei pō, kia mōhio ahau ki tā Ihowā e mea mai ai anō ki ahau.”
NUM 22:20 Ā, i puta mai te Atua ki a Paraama i te pō, ā, ka mea ki a ia, “Ki te haere mai aua tāngata ki te karanga i a koe, whakatika, haere i a rātou; ko te kupu ia e kōrero ai ahau ki a koe, ko tēnā tāu e mea ai.”
NUM 22:21 Nā, ka maranga a Paraama i te ata, ā, whakanohoia ana e ia tana kāihe, ā, haere ana i ngā rangatira o Moapa.
NUM 22:22 Nā, ka mura te riri o te Atua mōna i haere, ā, ka tū te anahera a Ihowā ki te ara hei hoariri mōna. Ā, i runga ia i tōna kāihe e noho ana, ko āna tāngata tokorua hoki ōna hoa.
NUM 22:23 Ā, ka kite te kāihe i te anahera a Ihowā e tū ana i te ara, me tāna hoari i tōna ringa, unu rawa, ka peka atu te kāihe i te ara, ā, ka haere ki te pārae. Nā, ka whiua e Paraama te kāihe kia anga ki te ara.
NUM 22:24 Kātahi ka tū te anahera a Ihowā ki tētahi huarahi whāwhārua o ngā māra wāina, he taiepa kei tēnei taha, he taiepa hoki kei tērā taha.
NUM 22:25 Ā, nō te kitenga o te kāihe i te anahera a Ihowā, ka whakapiri ki te taiepa, ā, karapitia ana te waewae o Paraama ki te taiepa; nō, ka whiua anō e ia.
NUM 22:26 Nā, ka neke anō te anahera a Ihowā, ā, ka tū ki te wāhi kūiti, kāhore nei he ara hei pekanga ki matau, ki mauī.
NUM 22:27 Ā, nō te kitenga o te kāihe i te anahera a Ihowā, ka takoto ki raro i a Paraama; ā, ka mura te riri o Paraama, ka patua e ia te kāihe ki tāna rākau.
NUM 22:28 Nā, ka whakahamumutia e Ihowā te waha o te kāihe, ā, ka kōrero ki a Paraama, “I aha ahau ki a koe, i toru ai ēnei patunga āu i ahau?”
NUM 22:29 Ā, ka mea a Paraama ki te kāihe, “Mō tāu māminga rā ki ahau. Me he hoari i tōku ringa, inā, kua whakamatea koe e ahau ināianei.”
NUM 22:30 Nā, ka mea ake te kāihe ki a Paraama, “Ehara ianei ahau i tāu kāihe, i ekengia nei e koe o tōku rironga mai rā anō i a koe, ā tae noa mai ki tēnei rā? He pēnei rānei tāku hanga ki a koe i mua?” Ā, ka mea ia, “Kāhore.”
NUM 22:31 Kātahi ka whakatirohia e Ihowā ngā kanohi o Paraama, ā, ka kite ia i te anahera a Ihowā e tū ana i te ara, me tāna hoari i tōna ringa, unu rawa; nā, ka tuohu ia, ka piko iho tōna mata.
NUM 22:32 Nā, ka mea te anahera a Ihowā ki a ia, “Nā te aha ēnei patunga e toru āu i tāu kāihe? Nanā, i puta atu ahau hei hoariri mōu, nō te mea e peau kē ana tōu ara i tōku aroaro.
NUM 22:33 Ā, i kite te kāihe i ahau, ā, e toru ōna pekanga ki tahaki i tōku aroaro. Me i kāhore ia te peka atu ki tahaki i tōku aroaro, inā, kua patua tēnei koe e ahau, ā, ko ia kua whakaorangia.”
NUM 22:34 Nā, ka mea a Paraama ki te anahera a Ihowā, “Kua hara ahau; nōku kīhai i mōhio ko koe te tū mai ana i te ara ki te whakatūtaki i ahau; nā, ki te hē tēnei ki tāu titiro, me hoki ahau.”
NUM 22:35 Nā, ka mea te anahera a Ihowā ki a Paraama, “Haere i aua tāngata; ko te kupu ia e kōrero ai ahau ki a koe, ko tēnā anake tāu e kōrero ai.” Nā, ka haere a Paraama i ngā rangatira a Pāraka.
NUM 22:36 Ā, ka rongo a Pāraka e tae mai ana a Paraama, ka haere ia ki te whakatau i a ia ki tētahi pā o Moapa i te rohe o Aranona, i te rohe whakamutunga.
NUM 22:37 Ā, ka mea a Pāraka ki a Paraama, “Kāhore ianei ahau i āta unga ki a koe, ki te karanga i a koe? He aha koe tē haere mai ai ki ahau? He pono rānei e kore e āhei i ahau te whakanui i a koe?”
NUM 22:38 Nā, ka mea a Paraama ki a Pāraka, “Nā, kua tae mai nei ahau ki a koe. E taea rānei e ahau te kōrero tētahi mea, ahakoa iti? Ko te kupu e hōmai e te Atua ki tōku māngai, ko tēnā tāku e kōrero ai.”
NUM 22:39 Nā, ka haere a Paraama i a Pāraka, ā, ka tae rāua ki Kiriata Hutoto.
NUM 22:40 Nā, ka patua he kau, he hipi, e Pāraka, ā, ka unga tāngata ki a Paraama rātou ko ōna hoa, ko ngā rangatira.
NUM 22:41 Ā, i te ata ka mau a Pāraka ki a Paraama, ā, kawea ana e ia ki runga ki ngā wāhi teitei o Paara, ā, ka kite atu ia i reira i te hiku o te iwi.
NUM 23:1 Nā, ka mea a Paraama ki a Pāraka, “Hangā ētahi āta māku kia whitu, kia rite mai hoki māku he pūru kia whitu, he hipi toa hoki kia whitu.”
NUM 23:2 Nā, rite tonu tā Pāraka i mea ai ki ngā mea i kōrerotia e Paraama; ā, whakaekea ana e Pāraka rāua ko Paraama he pūru, he hipi, ki tētahi āta, ki tētahi āta.
NUM 23:3 Nā, ka mea a Paraama ki a Pāraka, “E tū ki te taha o tāu tahunga tinana, ā, ka haere ahau; tērā pea a Ihowā e tūpono mai ki ahau. Ā, me kōrero atu e ahau ki a koe te kupu e whakakitea mai e ia ki ahau.” Nā, ka haere ia ki tētahi puke hamore.
NUM 23:4 Nā, ka tūpono a Ihowā ki a Paraama; ā, ka mea ia ki a ia, “Kua oti i ahau ngā āta e whitu, kua whakaekea anō hoki he pūru, he hipi, ki tēnei āta, ki tēnei āta.”
NUM 23:5 Nā, ka hōmai e Ihowā he kupu ki te waha o Paraama, ka mea, “Hoki atu ki a Pāraka, ā, kia pēnei tāu kī atu.”
NUM 23:6 Ā, ka hoki atu ia ki a ia, nā, i te taha ia o tāna tahunga tinana e tū ana, rātou ko ngā rangatira katoa o Moapa.
NUM 23:7 Nā, ka ara tāna kī pepeha, ka mea: “Nā, Pāraka kīngi o Moapa ahau i ārahi mai i Arame, i ngā maunga o te rāwhiti, i mea: ‘Haere mai hei kaikanga māku mō Hākopa; haere mai hoki hei whakatara ki a Īharaira.’
NUM 23:8 Me aha e kanga ai ahau i tā te Atua i kore ai e kanga? Me aha hoki e whakatara ai ahau ki tā Ihowā kīhai i whakatara?
NUM 23:9 Tēnei hoki ahau kei te tihi o ngā kāmaka e titiro atu ana ki a ia, e kite atu ana i a ia i runga i ngā pukepuke. Nanā, he iwi noho ko ia anake, e kore anō hoki e tāua i roto i ngā tauiwi.
NUM 23:10 Mā wai e tatau te puehu o Hākopa, e titiro rānei te maha o te whakawhā o Īharaira? Hei te mate o te hunga tika he matenga mōku, kia rite hoki tōku whakamutunga ki tōna!”
NUM 23:11 Nā, ka mea a Pāraka, ki a Paraama, “He aha tāu e mea nei ki ahau? I tīkina atu koe e ahau hei kanga i ōku hoariri, nā, kua manaakitia rawatia rātou e koe.”
NUM 23:12 Nā, ka whakautua e ia, ka mea, “Kaua rānei ahau e mahara ki te whakapuaki i te kupu e hōmai e Ihowā ki tōku waha?”
NUM 23:13 Nā, ka mea a Pāraka ki a ia, “Tēnā, haere mai tāua ki tētahi wāhi kē atu, e kite ai koe i a rātou. Ko tō rātou pito tāu e kite ai; e kore hoki koe e kite i a rātou katoa; ā, hei reira puaki ai i a koe tāku kanga mō rātou.”
NUM 23:14 Nā, ka kawea ia e ia ki te māra o Topimi, ki te tihi o Pihika, ā, hangā ana e ia e whitu ngā āta, whakaekea atu ana hoki e ia he pūru, he hipi, ki tēnei āta, ki tēnei āta.
NUM 23:15 Nā, ka mea ia ki a Pāraka, “E tū ki konei ki te taha o tāu tahunga tinana, ka whakatau ahau ki kō, ki a Ihowā.”
NUM 23:16 Nā, ka tūpono a Ihowā ki a Paraama, ka hōmai e ia he kupu ki tōna waha, ka mea, “Hoki atu ki a Pāraka, kia pēnei hoki tāu kī atu.”
NUM 23:17 Ā, ka haere atu ia ki a ia, nā, e tū ana ia i te taha o tāna tahunga tinana, rātou ko ngā rangatira o Moapa. Ā, ka mea a Pāraka ki a ia, “I pēhea mai te kupu a Ihowā?”
NUM 23:18 Nā, ka ara tāna kī pepeha, ka mea: “Whakatika, e Pāraka, whakarongo mai; kia whai taringa mai ki ahau, e te tama a Tiporo.
NUM 23:19 Ehara te Atua i te tangata e teka ai; i te tama rānei a te tangata e puta kē ai ōna whakaaro. Tērā rānei ia e kōrero, ā, kore ake e mahi? E puaki rānei tāna kupu, ā, kāhore e mana?
NUM 23:20 Nanā, kua riro mai i ahau te kupu manaaki; kua oti hoki i a ia te kupu manaaki; ā, e kore e taea e ahau te whakaputa kē.
NUM 23:21 “Kāhore i tirohia e ia he kino i a Hākopa, kāhore anō hoki i kitea he tutū i a Īharaira. Kei a ia a Ihowā, tōna Atua, kei roto hoki i a rātou te hāmama a te kīngi.
NUM 23:22 Nā, Ihowā rātou i whakaputa mai i Īhipa; kei tō te unikanga tōna kaha.
NUM 23:23 He pono kāhore he mākutu mō Hākopa, kāhore anō hoki he whaiwhaiā mō Īharaira. Hei tēnei wā anō ka kōrerotia a Hākopa, āe rā, a Īharaira, ‘Anō te mahi a te Atua!’
NUM 23:24 Nanā, ka whakatika te iwi ānō he raiona kātua, ka ara ake anō hoki ānō he raiona; e kore e takoto, kia kainga rā anō te tūpāpaku, kia inumia hoki ngā toto o te parekura.”
NUM 23:25 Nā, ka mea a Pāraka ki a Paraama, “Kaua rawa e kanga i a rātou, kaua rawa rānei e manaaki i a rātou.”
NUM 23:26 Nā, ka whakautua e Paraama, ka mea ki a Pāraka, “Kāhore ianei ahau i kōrero ki a koe, i mea, ‘Ko ngā mea katoa e kōrero mai ai a Ihowā, ko tēnā tāku e mea ai’?”
NUM 23:27 Nā, ka mea a Pāraka ki a Paraama, “Tēnā, me kawe koe e ahau ki tētahi atu wāhi; tērā pea e pai te Atua kia whakapuakina e koe i reira tāku kanga mō rātou.”
NUM 23:28 Kātahi ka kawea a Paraama e Pāraka ki te tihi o Peoro, e titiro iho ana ki te koraha.
NUM 23:29 Ā, ka mea a Paraama ki a Pāraka, “Hangā he āta māku ki konei kia whitu, kia rite hoki māku ki konei he pūru kia whitu, he hipi toa kia whitu.”
NUM 23:30 Ā, rite tonu tā Pāraka i mea ai ki ngā mea i kōrerotia e Paraama, ā, whakaekea ana e ia he pūru, he hipi, ki runga ki tēnei āta, ki tēnei āta.
NUM 24:1 Ā, nō te kitenga o Paraama ko tā Ihowā i pai ai he manaaki i a Īharaira, kīhai ia i haere me mua rā ki te whai i te mea mākutu; engari i anga tōna mata ki te koraha.
NUM 24:2 Nā, ka maranga ngā kanohi o Paraama, ā, ka kite i a Īharaira e noho ana i ō rātou iwi. Nā, ko te putanga mai o te Wairua o te Atua ki a ia.
NUM 24:3 Nā, ka ara tāna kī pepeha, ka mea: “He kī tēnei nā Paraama, tama a Peoro, he kī hoki nā te tangata i kopi rā tōna kanohi,
NUM 24:4 he kī nā te tangata e rongo ana i ngā kupu a te Atua, e kite ana i te whakakitenga a te Kaha Rawa, e taka iho ana, me te titiro anō ōna kanohi.
NUM 24:5 “Anō te pai o ōu tēneti, e Hākopa, o ōu nohoanga, e Īharaira!
NUM 24:6 “Ānō ko ngā awaawa e takoto atu ana, rite tahi ānō ki ngā kāri i te taha o te awa, ki ngā aroe i whakatōkia e Ihowā, ki ngā hīta i te taha o ngā wai.
NUM 24:7 Ka maringi iho he wai i āna pere, ā, hei roto āna purapura i ngā wai maha. “Ka nui ake hoki tōna kīngi i a Akaka, ā, ka kake tōna kīngitanga.
NUM 24:8 “Nā te Atua ia i whakaputa mai i Īhipa; ko tōna kaha, rite pū ki tō te unikanga; ka pau ngā iwi, ōna hoariri, i a ia, ka whatiwhatiia e ia ō rātou wheua, ka werohia hoki rātou ki āna pere.
NUM 24:9 I tāpapa ia, i takoto, ānō he raiona, ānō he raiona kātua; mā wai ia e whakaoho? “Ka manaakitia te tangata e manaaki ana i a koe, ka kangā hoki te tangata e kanga ana i a koe.”
NUM 24:10 Nā, ka mura te riri o Pāraka ki a Paraama, ka papaki ōna ringa. Nā, ka mea a Pāraka ki a Paraama, “He kanga i ōku hoariri i karanga ai ahau i a koe, nā, ka toru nei āu manaakitanga i a rātou.
NUM 24:11 Nā, rere atu āianei ki tōu wāhi; i mea ahau kia whakanuia rawatia koe; heoi, kua puritia nei koe e Ihowā kei whai korōria.”
NUM 24:12 Nā, ka mea atu a Paraama ki a Pāraka, “Kāhore ianei ahau i kōrero, i mea ki āu karere i ungā ake rā e koe ki ahau,
NUM 24:13 ‘Ahakoa i kī tōna whare i te hiriwa, i te kōura, e hōmai e Pāraka ki ahau, e kore e āhei i ahau te whakawhiti kē i te kupu a Ihowā, te mea i te pai, i te kino rānei, i tā tōku ngākau ake; ko tā Ihowā e kōrero ai, ko tēnā tāku e kōrero ai?’
NUM 24:14 Nā, ka haere tēnei ahau ki tōku iwi; haere mai, māku e whakaatu ki a koe tā tēnei iwi e mea ai ki tōu iwi i ngā rā whakamutunga.”
NUM 24:15 Nā, ka ara tāna kī pepeha, ka mea: “He kī tēnei nā Paraama, nā te tama a Peoro, he kī hoki nā te tangata i kopi rā tōna kanohi,
NUM 24:16 he kī nā te tangata, e rongo ana i ngā kupu a te Atua, e mōhio ana ki ngā mea a te Runga Rawa, e kite nei i te whakakitenga mai a te Kaha Rawa, e taka iho ana, me te titiro anō ōna kanohi.
NUM 24:17 “E kite anō ahau i a ia, otiia kāhore āianei; e titiro atu ahau ki a ia, otiia e kore e tata. Tērā e puta he whetū i roto i a Hākopa, ka ara ake anō hoki he Hēpeta i roto i a Īharaira, ā, ka patua e ia ngā pito o Moapa, ka hunā anō hoki e ia ngā tama katoa a Hete.
NUM 24:18 Ā, ka riro a Ēroma, ka riro anō a Heira, ko ōna hoariri nei ērā; ā, ka māia te mahi a Īharaira.
NUM 24:19 Ā, ka whai rangatiratanga tētahi e puta mai i roto i a Hākopa, ā, ka hunā e ia ngā mōrehu o te pā.”
NUM 24:20 Nā, ka titiro ia ki a Amareke, ā, ka ara tāna kī pepeha, ka mea: “Ko Amareke te tīmatanga o ngā iwi; ko tōna whakamutunga ia he whakangaromanga.”
NUM 24:21 Nā, ka titiro ia ki te Keni, ā, ka ara tāna kī pepeha, ka mea: “He kaha tōu nohoanga, kua hangā anō hoki tōu ōhanga ki te kāmaka.
NUM 24:22 He ahakoa rā ka pau te Keni; ā, whakaraua noatia koe e Ahiria.”
NUM 24:23 Nā, ka ara anō tāna kī pepeha, ka mea: “Auē, ko wai e ora, ina meatia tēnei e te Atua?
NUM 24:24 Ā, ka ū mai he kaipuke i te taha o Kitimi, ā, ka tūkinotia e rātou a Ahiria, ka tūkinotia anō a Ēpere, ko ia anō hoki ka whakangaromia.”
NUM 24:25 Kātahi ka whakatika a Paraama, ā, haere ana, hoki ana ki tōna wāhi; me Pāraka anō hoki i haere i tōna ara.
NUM 25:1 Nā, ka noho a Īharaira ki Hitimi, ā, ka anga te iwi ka moepuku ki ngā tamāhine a Moapa.
NUM 25:2 Nā rātou hoki i karanga te iwi ki ngā patunga tapu mā ō rātou atua; nā, kai ana te iwi, ā, koropiko ana ki ō rātou atua.
NUM 25:3 Nā, ka whakaūkia a Īharaira ki a Paara-Peoro, ā, ka mura te riri o Ihowā ki a Īharaira.
NUM 25:4 Nā, ka mea a Ihowā ki a Mohi, “Tangohia ngā ariki katoa o te iwi, tāronatia hoki ki te aroaro o Ihowā, i te ritenga atu o te rā, kia tahuri atu ai i a Īharaira te riri o Ihowā e mura nei.”
NUM 25:5 Nā, ka mea a Mohi ki ngā kaiwhakawā o Īharaira, “Patua e tēnei, e tēnei o koutou ōna tāngata i whakaūkia ki a Paara-Peoro.”
NUM 25:6 Nā, ka puta tētahi o ngā tama a Īharaira, e mau ana mai i tētahi wahine Miriani ki ōna tēina i te tirohanga atu a Mohi, i te tirohanga atu anō hoki a te whakaminenga katoa o ngā tama a Īharaira, i a rātou e tangi ana i te whatitoka o te tapenākara o te whakaminenga.
NUM 25:7 Ā, nō te kitenga o Pinehaha, tama a Ereātara, tama a Ārona tohunga, ka whakatika i te whakaminenga. Ka hopu i te tao ki tōna ringa;
NUM 25:8 nā, ka haere i muri i te tangata o Īharaira ki te tēneti, ā, werohia ana rāua tokorua, te tangata o Īharaira, me te wahine hoki i tōna tia. Ā mutu iho te whiu o ngā tama a Īharaira.
NUM 25:9 Ā, ko te hunga i mate i te whiu e rua tekau mā whā mano.
NUM 25:10 Nā, ka kōrero a Ihowā ki a Mohi, ka mea,
NUM 25:11 “Nā Pinehaha, tama a Ereātara, tama a Ārona tohunga, tōku riri i anga kē atu ai i ngā tama a Īharaira, i tōna ngākau hae pēnei i tōku i roto i a rātou, i kore ai ngā tama a Īharaira e poto i ahau, i ahau e hae ana.
NUM 25:12 Mō reira me kī atu e koe, ‘Nanā, ka hoatu e ahau ki a ia tāku kawenata mō te rangimārie;
NUM 25:13 ā, ka mau ki a ia, ki ōna uri hoki i muri i a ia, hei kawenata kia mau tonu te mahi tohunga; mōna i hae, he whakaaro ki tōna Atua, i mea whakamārietanga anō hoki mō ngā tama a Īharaira.’ ”
NUM 25:14 Ā, ko te ingoa o te tangata o Īharaira i patua, i patua tahitia rā me te wahine Miriani, ko Tīmiri tama a Hāru, he rangatira nō tētahi whare kaumātua i roto i ngā Himioni.
NUM 25:15 Ko te ingoa hoki o te wahine Miriani i patua nei ko Kohopi, he tamāhine nā Turu; he rangatira ia nō tētahi iwi, nō tētahi whare kaumātua o Miriana.
NUM 25:16 Nā, ka kōrero a Ihowā ki a Mohi, ka mea,
NUM 25:17 “Whakataria he pakanga ki ngā Miriani, patua hoki;
NUM 25:18 e whakatari ana hoki rātou i a koutou ki ā rātou mahi tinihanga, i tinihangatia rā koutou e rātou i te mea mō Peoro, i te mea hoki mō Kohopi, tamāhine a te rangatira o Miriana, he tuahine nō rātou, i patua rā i te rā o te whiunga mō Peoro.”
NUM 26:1 Ā, i muri iho i te whiu ka kōrero a Ihowā ki a Mohi rāua ko Ereātara, tama a Ārona tohunga, ka mea,
NUM 26:2 “Taua ngā tāngata o te whakaminenga katoa o ngā tama a Īharaira, ngā mea e rua tekau, he maha atu rānei ō rātou tau, i ngā whare o ō rātou mātua, ngā mea katoa e kaha ana i roto i a Īharaira ki te haere ki te whawhai.”
NUM 26:3 Nā, ka kōrero a Mohi rāua ko Ereātara tohunga ki a rātou i ngā mānia o Moapa, i te wāhi o Horano e tata ana ki Heriko, ka mea,
NUM 26:4 “Taua ngā tāngata e rua tekau, he maha atu rānei ō rātou tau,” kia rite ki tā Ihowā i whakahau ai ki a Mohi rātou ko ngā tama a Īharaira, i puta mai i te whenua o Īhipa:
NUM 26:5 ko Reupena mātāmua o Īharaira. Ko ngā tama a Reupena: ko Hanoka, nāna te hapū o ngā Hanoki; nā Paru, ko te hapū o ngā Parui;
NUM 26:6 nā Heterono, ko te hapū o ngā Heteroni; nā Karami, ko te hapū o ngā Karami.
NUM 26:7 Ko ngā hapū ēnei o ngā Reupeni; taua ake o rātou e whā tekau mā toru mano e whitu rau e toru tekau.
NUM 26:8 Ā, ko ngā tama a Paru; ko Eriapa.
NUM 26:9 Ā, ko ngā tama a Eriapa; ko Nemuere, ko Ratana, ko Āpirama. Ko taua Ratana rāua ko Āpirama tēnei i whai ingoa nei i roto i te whakaminenga, i whawhai nei ki a Mohi rāua ko Ārona i roto i te hui a Koraha, i tā rātou whawhaitanga ki a Ihowā,
NUM 26:10 ā, ko te hāmamatanga o te māngai o te whenua, horomia ana rātou ko Koraha, i te matenga o taua hui; i te wā i kainga ai e te ahi ngā tāngata e rua rau e rima tekau; nā waiho ana rātou hei tohu.
NUM 26:11 Kīhai ia i mate ngā tama a Koraha.
NUM 26:12 Ko ngā tama a Himiona, i ō rātou hapū: nā Nemuere, ko te hapū o ngā Nemueri; nā Iamini, ko te hapū o ngā Iamini; nā Iakini, ko te hapū o ngā Iakini;
NUM 26:13 nā Tera, ko te hapū o ngā Terahi; nā Hauru, ko te hapū o ngā Hauri.
NUM 26:14 Ko ngā hapū ēnei o ngā Himioni, e rua tekau mā rua mano e rua rau.
NUM 26:15 Ko ngā tama a Kara, i ō rātou hapū: nā Tepono, ko te hapū o ngā Teponi; nā Haki, ko te hapū o ngā Haki; nā Huni, ko te hapū o ngā Huni;
NUM 26:16 nā Otoni, ko te hapū o ngā Otoni; nā Eri, ko te hapū o ngā Eri;
NUM 26:17 nā Āroro, ko te hapū o ngā Arori; nā Areri, ko te hapū o ngā Areri.
NUM 26:18 Ko ngā hapū ēnei o ngā tama a Kara, o ngā mea o rātou i taua, e whā tekau mano e rima rau.
NUM 26:19 Ko ngā tama a Hūrā: ko Ere rāua ko Onana; i mate hoki a Ere rāua ko Onana ki te whenua o Kanaana.
NUM 26:20 Ā, ko ngā tama a Hūrā, i ō rātou hapū: nā Heraha, ko te hapū o ngā Herani; nā Parete, ko te hapū o ngā Pareti; nā Tera, ko te hapū o ngā Terahi.
NUM 26:21 Ā, ko ngā tama ēnei a Parete; nā Heterono, ko te hapū o ngā Heteroni; nā Hāmuru, ko te hapū o ngā Hāmuri.
NUM 26:22 Ko ngā hapū ēnei o Hūrā: ko ngā mea o rātou i taua; e whitu tekau mā ono mano e rima rau.
NUM 26:23 Ko ngā tama a Ihākara, i ō rātou hapū: nā Tora, ko te hapū o ngā Torai; nā Pua, ko te hapū o ngā Puni;
NUM 26:24 nā Iahupu, ko te hapū o ngā Iahupi; nā Himirono, ko te hapū o ngā Himironi.
NUM 26:25 Ko ngā hapū ēnei o Ihākara, ko ngā mea o rātou i taua, e ono tekau mā whā mano e toru rau.
NUM 26:26 Ko ngā tama a Hepurona i ō rātou hapū: nā Herete, ko te hapū o ngā Hereti; nā Erono, ko te hapū o ngā Eroni; nā Iahareere, ko te hapū o ngā Iahareeri.
NUM 26:27 Ko ngā hapū ēnei o ngā Hepuroni, ko ngā mea o rātou i taua; e ono tekau mano e rima rau.
NUM 26:28 Ko ngā tama a Hōhepa, i ō rātou hapū: ko Mānahi rāua ko Ēparaima:
NUM 26:29 Ko ngā tama a Mānahi: nā Makiri, ko te hapū o ngā Makiri; (ā, whānau ake tā Makiri ko Kireara); nā Kireara, ko te hapū o ngā Kireari.
NUM 26:30 Ko ngā tama ēnei a Kireara; nā Iētere, ko te hapū o ngā Iēteri; nā Hereke, ko te hapū o ngā Hereki;
NUM 26:31 nā Ahariere, ko te hapū o ngā Aharieri; nā Hekeme hoki, ko te hapū o ngā Hekemi;
NUM 26:32 nā Hemira, ko te hapū o ngā Hemiri: nā Hewhere, ko te hapū o ngā Hewheri.
NUM 26:33 Ā, kāhore he tama a Teropēhara tama a Hewhere, engari he tamāhine: ā, ko ngā ingoa ēnei o ngā tamāhine a Teropēhara, ko Mahara, ko Noa, ko Hokora, ko Mirika, ko Tirita.
NUM 26:34 Ko ngā hapū ēnei o Mānahi, ko ngā mea hoki o rātou i taua, e rima tekau mā rua mano e whitu rau.
NUM 26:35 Ko ngā tama ēnei a Ēparaima, i ō rātou hapū: nā Hutera, ko te hapū o ngā Huteri; nā Pekere, ko te hapū o ngā Pekeri; nā Tahana, ko te hapū o ngā Tahani.
NUM 26:36 Ko ngā tama anō hoki ēnei a Hutera: nā Erana, ko te hapū o ngā Erani.
NUM 26:37 Ko ngā hapū ēnei o ngā tama a Ēparaima, ko ngā mea o rātou i taua, e toru tekau mā rua mano e rima rau. Ko ngā tama ēnei a Hōhepa i ō rātou hapū.
NUM 26:38 Ko ngā tama a Pineamine, i ō rātou hapū: nā Pera, ko te hapū o ngā Perai: nā Ahapere, ko te hapū o ngā Ahaperi; nā Ahirama, ko te hapū o ngā Ahirami;
NUM 26:39 nā Hupama, ko te hapū o ngā Hupami; nā Huwhama, ko te hapū o ngā Huwhami.
NUM 26:40 Ā, ko ngā tama a Pera ko Arare rāua ko Naamana: nā Arare, ko te hapū o ngā Arari; nā Naamana, ko te hapū o ngā Naami.
NUM 26:41 Ko ngā tama ēnei a Pineamine, i ō rātou hapū; ā, ko ngā mea o rātou i taua e whā tekau mā rima mano e ono rau.
NUM 26:42 Ko ngā tama ēnei a Rāna, i ō rātou hapū: nā Hūhama, ko te hapū o ngā Hūhami. Ko ngā hapū ēnei o Rāna, tēnei hapū, tēnei hapū, o rātou.
NUM 26:43 Ko ngā hapū katoa o ngā Hūhami: ko ngā mea hoki o rātou i taua, e ono tekau mā whā mano e whā rau.
NUM 26:44 Ko ngā tama a Āhera, i ō rātou hapū: nā Imina, ko te hapū o ngā Imini; nā Ihui, ko te hapū o ngā Ihui; nā Peria, ko te hapū o ngā Perii.
NUM 26:45 Ko ngā tama a Peria: nā Hēpere, ko te hapū o ngā Heperi; nā Marakiere, ko te hapū o ngā Marakieri.
NUM 26:46 Ā, ko te ingoa o te tamāhine a Āhera ko Hera.
NUM 26:47 Ko ngā hapū ēnei o ngā tama a Āhera: ko ngā mea o rātou i taua, e rima tekau mā toru mano e whā rau.
NUM 26:48 Ko ngā tama a Napatari, i ō rātou hapū: nā Iahateere, ko te hapū o ngā Iahateeri; nā Kuni, ko te hapū o ngā Kuni;
NUM 26:49 nā Iētere, ko te hapū o ngā Iēteri: nā Hireme, ko te hapū o ngā Hiremi.
NUM 26:50 Ko ngā hapū ēnei o Napatari, i ō rātou hapū: ā, ko ngā mea o rātou i taua e whā tekau mā rima mano e whā rau.
NUM 26:51 Ko ngā mea ēnei i taua o ngā tama a Īharaira: e ono rau kotahi mano, e whitu rau e toru tekau.
NUM 26:52 I kōrero anō a Ihowā ki a Mohi, i mea:
NUM 26:53 Me tuwha te whenua mō ēnei, hei kāinga tupu; kia rite ki te maha o ngā ingoa.
NUM 26:54 He tokomaha, kia nui te wāhi mō rātou, he tokotorutoru, kia iti hoki te wāhi mō rātou; kia rite ki tōna tokomaha te wāhi e hoatu ki tēnei, ki tēnei.
NUM 26:55 Otiia, me rota te tuwha o te whenua kia rite ki ngā ingoa o ngā iwi o ō rātou mātua tō rātou nohoanga iho.
NUM 26:56 Kia rite ki tā te rota te tūwhanga o ngā kāinga o reira mō te tokomaha, mō te tokotorutoru.
NUM 26:57 Ā, o ngā Rīwaiti, ko ēnei i taua, i ō rātou hapū: nā Kerehona, ko te hapū o ngā Kerehoni; nā Kohata, ko te hapū o ngā Kohati; nā Merari, ko te hapū o ngā Merari.
NUM 26:58 Ko ngā hapū ēnei o ngā Rīwaiti: ko te hapū o ngā Ripini, ko te hapū o ngā Heperoni, ko te hapū o ngā Māhari, ko te hapū o ngā Muhi, ko te hapū o ngā Korati. Ā, whānau ake tā Kohata ko Āmarama.
NUM 26:59 Ā, ko te ingoa o tā Āmarama wahine ko Iokepete, he tamāhine nā Rīwai, i whānau nei mā Rīwai ki Īhipa; ā, whānau ake a rāua ko Āmarama, ko Ārona, ko Mohi, ko tō rāua tuahine hoki, ko Miriama.
NUM 26:60 Ā, whānau ake a Ārona, ko Nātapa, ko Apihu, ko Ereātara, ko Itamara.
NUM 26:61 Ā, i mate a Nātapa rāua ko Apihu i tā rāua tāpaenga i te ahi kē ki te aroaro o Ihowā.
NUM 26:62 Ā, taua ake o rātou, e rua tekau mā toru mano, ngā tāne katoa, kotahi nei te marama, maha ake rānei. Kīhai hoki rātou i taua i roto i ngā tama a Īharaira; nō te mea kīhai tētahi kāinga tupu i hōmai ki a rātou i roto i ngā tama a Īharaira.
NUM 26:63 Ko ngā mea ēnei i taua e Mohi rāua ko Ereātara tohunga, i tā rāua tauanga i ngā tama a Īharaira ki ngā mānia o Moapa, ki te wāhi o Horano e tata ana ki Heriko.
NUM 26:64 Kāhore anō i roto i ēnei tētahi o te hunga i taua e Mohi rāua ko Ārona tohunga, i tā rāua tauanga i ngā tama a Īharaira ki te koraha o Hinai.
NUM 26:65 I kīia hoki rātou e Ihowā, “Ka mate rawa ki te koraha.” Ā, kāhore tētahi o rātou i toe, ko Karepe anake tama a Iepune, rāua ko Hohua tama a Nunu.
NUM 27:1 Nā, ka haere mai ngā tamāhine a Teropēhara, tama a Hewhere, he tama hoki ia nā Kireara, tama a Makiri, tama a Mānahi; nō ngā hapū o Mānahi, tama a Hōhepa. Ā, ko ngā ingoa ēnei o āna tamāhine: ko Mahara, ko Noa, ko Hokora, ko Mirika, ko Tirita.
NUM 27:2 Ā, ka tū rātou ki te aroaro o Mohi, ki te aroaro hoki o Ereātara tohunga, ki te aroaro anō o ngā rangatira, o te whakaminenga katoa hoki, ki te whatitoka o te tapenākara o te whakaminenga, ā, ka mea,
NUM 27:3 “I mate tō mātou pāpā ki te koraha, kāhore hoki ia i roto i te hui o te hunga i huihui ki te whawhai ki a Ihowā i roto i te hui a Koraha, engari, i mate ia i runga i tōna hara ake, kāhore anō hoki āna tama.
NUM 27:4 He aha i whakakorea ai te ingoa o tō mātou pāpā i roto i tōna hapū, i a ia kāhore nei i whai tama? Hōmai he wāhi ki a mātou i roto i ngā tēina o tō mātou pāpā.”
NUM 27:5 Nā, ka kawea tā rātou kōrero e Mohi ki te aroaro o Ihowā.
NUM 27:6 Ā, ka kōrero a Ihowā ki a Mohi, ka mea,
NUM 27:7 “He tika ngā kōrero a ngā tamāhine a Teropēhara, me hoatu tētahi wāhi ki a rātou hei kāinga tupu i roto i ngā tēina o tō rātou pāpā; me whakariro ki a rātou te kāinga tupu o tō rātou pāpā.
NUM 27:8 “Me kōrero anō hoki e koe ki ngā tama a Īharaira, me kī atu, ‘Ki te mate te tangata, ā, kāhore āna tama, nā, me whakariro tōna kāinga tupu ki tāna tamāhine.
NUM 27:9 Ā, ki te kāhore āna tamāhine, nā, me hoatu tōna kāinga tupu ki ōna tuākana, tēina rānei.
NUM 27:10 Ā, ki te kāhore ōna tuākana, tēina rānei, nā, me hoatu tōna kāinga tupu ki te tuākana, tēina rānei o tōna pāpā.
NUM 27:11 Ā, ki te kāhore he tuākana, tēina rānei o tōna pāpā, nā, me hoatu tōna kāinga tupu ki tōna whanaunga o tōna hapū e tata ana ki a ia, ā, ka riro a reira i a ia. Me waiho hoki tēnā hei tikanga whakaritenga mā ngā tama a Īharaira; ko tā Ihowā hoki i whakahau ai ki a Mohi.’ ”
NUM 27:12 I mea anō a Ihowā ki a Mohi, “E piki koe ki tēnei maunga, ki Aparimi, ka titiro atu ki te whenua ka hoatu nei e ahau ki ngā tama a Īharaira.
NUM 27:13 Ā, ka kitea e koe, nā, ka kohia atu hoki koe ki tōu iwi, ka pērātia me tōu tuakana, me Ārona i kohia atu nei,
NUM 27:14 mō kōrua i whakatoi ki tāku kupu i te koraha o Hini, i te ngangautanga a te whakaminenga, ā, kīhai i whakatapu i ahau i tō rātou aroaro, i te wai.” (Ko te wai o Meripa tēnā i Karehe, i te koraha o Hini.)
NUM 27:15 Ā, i kōrero a Mohi ki a Ihowā, i mea,
NUM 27:16 “Kia whakaritea e Ihowā, e te Atua o ngā wairua o ngā kikokiko katoa, tētahi tangata mō te whakaminenga,
NUM 27:17 hei haere atu i tō rātou aroaro, hei haere mai hoki i tō rātou aroaro, hei ārahi atu hoki i a rātou, hei ārahi mai anō i a rātou; kei rite hoki te whakaminenga a Ihowā ki ngā hipi kāhore nei ō rātou hēpara.”
NUM 27:18 Nā, ka mea a Ihowā ki a Mohi, “Tangohia mai ki a koe a Hohua tama a Nunu, he tangata kei a ia nei te wairua, ka popoki ai ōu ringa ki runga ki a ia.
NUM 27:19 Ka whakatū ai hoki i a ia ki te aroaro o Ereātara tohunga, ki te aroaro anō hoki o te whakaminenga katoa, ka whakahau ai i a ia i tā rātou tirohanga.
NUM 27:20 Me hoatu anō e koe tētahi wāhi o tōu korōria ki runga ki a ia, kia rongo ai te whakaminenga katoa o ngā tama a Īharaira.
NUM 27:21 Ā, ka tū ia ki te aroaro o Ereātara tohunga, ko tērā anō hei kaitono whakaaro māna, i tā te Urimi e whakarite ai i te aroaro o Ihowā. Mā tāna kupu e haere atu ai, mā tāna kupu e haere mai ai rātou, a ia, me ngā tama katoa a Īharaira, arā te whakaminenga katoa.”
NUM 27:22 Nā, pēnā ana a Mohi me tā Ihowā i whakahau ai ki a ia; ā, tangohia mai ana e ia a Hohua, whakatūria ana ki te aroaro o Ereātara tohunga, ki te aroaro anō o te whakaminenga katoa.
NUM 27:23 Ā, pōkia iho e ia ōna ringa ki runga ki a ia, me te whakahau anō ki a ia i tā Ihowā i kōrerotia e Mohi.
NUM 28:1 I kōrero anō a Ihowā ki a Mohi, i mea:
NUM 28:2 “Whakahaua ngā tama a Īharaira, mea atu ki a rātou: Kia mau ki tāku whakahere, ki tāku taro mō āku whakahere ahi, hei kakara reka ki ahau, kia tāpaea mai ki ahau i tōna wā anō.
NUM 28:3 Me kī atu hoki e koe ki a rātou, Ko te whakahere ahi tēnei e tāpaea e koutou ki a Ihowā; kia rua ngā reme toa tau tahi, he mea kohakore, hei tahunga tinana tūturu mō ia rā.
NUM 28:4 Ko tētahi reme me tuku i te ata, ko te rua o ngā reme me tuku i te ahiahi;
NUM 28:5 me te whakatekau o te epa parāoa, hei whakahere totokore, he mea kōnatunatu ki te whakawhā o te hine hinu, o te mea i patua.
NUM 28:6 Ka tūturu tēnei hei tahunga tinana, he mea i whakaritea ki Maunga Hinai hei kakara reka, hei whakahere ahi ki a Ihowā.
NUM 28:7 Ā, hei te whakawhā o te hine he ringihanga mō te reme kotahi; kia ringihia te wāina kaha ki te wāhi tapu hei ringihanga ki a Ihowā.
NUM 28:8 Me tuku tētahi o ngā reme i te ahiahi; kia rite ki tō te whakahere totokore o te ata, ki tō tōna ringihanga hoki, tāu tukunga i tēnā hei whakahere ahi, hei kakara reka ki a Ihowā.”
NUM 28:9 “Ā, i te rā hāpati; kia rua ngā reme toa tau tahi, he mea kohakore, kia rua hoki ngā whakatekau o te epa parāoa pai, hei whakahere totokore, hei te mea i kōnatunatua ki te hinu, me tōna ringihanga anō.
NUM 28:10 Ko te tahunga tinana tēnei mō ngā hāpati katoa; tērā anō hoki te tahunga tinana, te mea tūturu, me tōna ringihanga.”
NUM 28:11 “Ā, i ngā tīmatanga anō o ō koutou marama me tāpae e koutou he tahunga tinana ki a Ihowā: kia rua ngā pūru, hei te kūao, kia kotahi te hipi toa, kia whitu ngā reme toa tau tahi, he mea kohakore;
NUM 28:12 kia toru whakatekau o te epa parāoa pai hei whakahere totokore, hei te mea i kōnatunatua ki te hinu, mō te pūru kotahi. Kia rua whakatekau parāoa pai, hei whakahere totokore, hei te mea i kōnatunatua ki te hinu, mō te hipi toa kotahi;
NUM 28:13 me te whakatekau parāoa pai mō tēnei reme, mō tēnei reme, hei whakahere totokore, hei te mea i kōnatunatua ki te hinu; hei tahunga tinana he reka nei te kakara, hei whakahere ahi ki a Ihowā.
NUM 28:14 Ā, ko ngā ringihanga o aua mea kia kotahi hāwhe hine wāina mō te pūru kotahi, ko te whakatoru o te hine mō te hipi toa, me te whakawhā o te hine mō te reme: ko te tahunga tinana tēnei o tēnei marama, o tēnei marama, o ngā marama o te tau.
NUM 28:15 Kia kotahi kūao koati toa anō hoki e tukua hei whakahere hara ki a Ihowā: tērā anō hoki te tahunga tinana, te mea tūturu, me tōna ringihanga anō.”
NUM 28:16 “Kei te marama tuatahi, kei te kotahi tekau mā whā o ngā rā o te marama, te Kapenga a Ihowā.
NUM 28:17 Hei te tekau mā rima o ngā rā o tēnei marama tētahi hākari; e whitu ngā rā e kainga ai te taro rēwenakore.
NUM 28:18 “Hei te rā tuatahi te huihuinga tapu; kaua tētahi mahi a te kaimahi e mahia.
NUM 28:19 Engari me tāpae he whakahere ahi hei tahunga tinana ki a Ihowā: kia rua ngā pūru, hei te kūao, kia kotahi hipi toa, kia whitu hoki ngā reme toa tau tahi; hei te mea kohakore ngā mea mā koutou.
NUM 28:20 Ā, hei te parāoa pai i kōnatunatua ki te hinu he whakahere totokore mō ēnā: kia toru whakatekau e tukua mō te pūru, kia rua ngā whakatekau mō te hipi toa;
NUM 28:21 me tuku e koe he whakatekau mō te reme, mō ngā reme e whitu.
NUM 28:22 Kia kotahi koati toa anō hoki hei whakahere hara, hei whakamārie mō koutou.
NUM 28:23 Hei tāpiri ēnei e tukua nei e koutou mō te tahunga tinana o te ata; hei tahunga tinana tūturu hoki tēnā.
NUM 28:24 Kia pēnei tonu i te rā, i ngā rā e whitu, tā koutou tukunga i te kai o te whakahere ahi, hei kakara reka ki a Ihowā. Hei tāpiri mō te tahunga tinana tūturu te tukunga o tēnā mea me tōna ringihanga.
NUM 28:25 Ā, kei te rā whitu he huihuinga tapu mō koutou; kaua tētahi mahi a te kaimahi e mahia.”
NUM 28:26 “Ā, i te Rā o te Tūāpora, ina tāpaea he whakahere totokore hou e koutou ki a Ihowā i roto i tā koutou Hākari o ngā Wiki, me mea huihuinga tapu mō koutou; kaua tētahi mahi a te kaimahi e mahia.
NUM 28:27 Engari, me tāpae te tahunga tinana hei kakara reka ki a Ihowā: kia rua ngā pūru, hei te kūao, kia kotahi hipi toa, kia whitu ngā reme toa tau tahi;
NUM 28:28 me tō rātou whakahere totokore he parāoa pai i kōnatunatua ki te hinu, kia toru whakatekau mō te pūru kotahi, kia rua whakatekau mō te hipi toa kotahi,
NUM 28:29 hei te whakatekau mō te reme, o ngā reme e whitu;
NUM 28:30 kia kotahi koati toa hei whakamārie mō koutou.
NUM 28:31 Ko ēnei ā koutou e mahi me te tahunga tinana tūturu me tōna whakahere totokore, hei te mea kohakore ngā mea mā koutou, me ngā ringihanga anō.”
NUM 29:1 “Hei te whitu o ngā marama, hei te rā tuatahi o te marama he huihuinga tapu mō koutou; kaua tētahi mahi a te kaimahi e mahia. Hei rā whakatangi tētere tēnā mā koutou.
NUM 29:2 Me tuku anō he tahunga tinana hei kakara reka ki a Ihowā; kia kotahi pūru, hei te kūao, kia kotahi hipi toa, kia whitu ngā reme toa tau tahi, he mea kohakore.
NUM 29:3 Ā, hei te parāoa pai i kōnatunatua ki te hinu te whakahere totokore, kia toru ngā whakatekau mō te pūru, kia rua hoki ngā whakatekau mō te hipi toa,
NUM 29:4 me te whakatekau mō te reme kotahi, o ngā reme e whitu.
NUM 29:5 Kia kotahi koati toa anō hoki hei whakahere hara, hei whakamārie mō koutou.
NUM 29:6 Ko te tahunga tinana anō o te marama, me tōna whakahere totokore, ko te tahunga tinana tūturu, me tōna whakahere totokore, me ngā ringihanga o ērā, kia rite ki ngā ritenga o te pērā, hei kakara reka, hei whakahere ahi ki a Ihowā.”
NUM 29:7 “Ā, i te tekau o ngā rā o tēnei marama, o te whitu, he huihuinga tapu mō koutou; me whakapōuri ō koutou wairua; kaua tētahi mahi e mahia.
NUM 29:8 Engari, me tāpae he tahunga tinana ki a Ihowā hei kakara reka; kia kotahi pūru, hei te kūao, kia kotahi hipi toa, kia whitu ngā reme toa tau tahi; hei ngā mea kohakore ngā mea mā koutou.
NUM 29:9 Hei te parāoa pai anō hoki i kōnatunatua ki te hinu te whakahere totokore mō ērā, kia toru ngā whakatekau mō te pūru, kia rua hoki ngā whakatekau mō te hipi toa kotahi,
NUM 29:10 hei te whakatekau mō te reme, puta noa i ngā reme e whitu.
NUM 29:11 Kia kotahi koati toa hei whakahere hara; me te whakahere hara hei whakamārie, te tahunga tinana tūturu, me tōna whakahere totokore, me ngā ringihanga.”
NUM 29:12 “Ā, hei te tahi tekau mā rima o ngā rā o te whitu o ngā marama he huihuinga tapu mō koutou; kaua tētahi mahi a te kaimahi e mahia, ā, kia whitu ngā rā e mea hākari ai koutou ki a Ihowā.
NUM 29:13 “Me tāpae anō he tahunga tinana, he whakahere ahi, hei kakara reka ki a Ihowā. Kia kotahi tekau mā toru ngā pūru, hei te kūao, kia rua ngā hipi toa, kia kotahi tekau mā whā ngā reme toa tau tahi, hei ngā mea kohakore.
NUM 29:14 Hei te parāoa pai anō i kōnatunatua ki te hinu te whakahere totokore; kia toru ngā whakatekau ki te pūru, o ngā pūru kotahi tekau mā toru, kia rua ngā whakatekau ki te hipi toa, arā o ngā hipi toa e rua,
NUM 29:15 me te whakatekau ki te reme, o ngā reme kotahi tekau mā whā;
NUM 29:16 me tētahi koati toa, hei whakahere hara; me te tahunga tinana tūturu anō, me tōna whakahere totokore, me tōna ringihanga.
NUM 29:17 “Me tuku hoki i te rua o ngā rā ngā pūru kotahi tekau mā rua, hei te kūao, kia rua ngā hipi toa, kia tekau mā whā ngā reme toa tau tahi, he mea kohakore;
NUM 29:18 ā, ko ngā whakahere totokore o aua mea, me ngā ringihanga, arā o ngā pūru, o ngā hipi, o ngā reme, kia rite ki te maha, kia rite ki te ritenga.
NUM 29:19 Kia kotahi koati toa anō hei whakahere hara; tērā atu anō te tahunga tinana tūturu me tōna whakahere totokore, me ngā ringihanga.
NUM 29:20 “Ā, hei te toru o ngā rā, kia kotahi tekau mā tahi ngā pūru, kia rua ngā hipi toa, kia tekau mā whā ngā reme toa tau tahi, he mea kohakore;
NUM 29:21 ā, ko ngā whakahere totokore, me ngā ringihanga, arā o ngā pūru, o ngā hipi toa, o ngā reme, kia rite ki tō rātou maha, kia rite ki te ritenga.
NUM 29:22 Kia kotahi koati toa hei whakahere hara; me te whakahere hara tūturu anō, me tōna whakahere totokore, me tōna ringihanga.
NUM 29:23 “Ā, i te whā o ngā rā kia kotahi tekau ngā pūru, kia rua ngā hipi toa, kia tekau mā whā ngā reme toa tau tahi, he mea kohakore.
NUM 29:24 Nā, ko ngā whakahere totokore me ngā ringihanga, arā o ngā pūru, o ngā hipi toa, o ngā reme, kia rite ki tō rātou maha, kia rite ki te ritenga;
NUM 29:25 kia kotahi koati toa anō hoki hei whakahere hara; me te tahunga tinana tūturu anō, me tōna whakahere totokore, me tōna ringihanga.
NUM 29:26 “Ā, i te rima o ngā rā kia iwa ngā pūru, kia rua ngā hipi toa, kia tekau mā whā ngā reme toa tau tahi, he mea kohakore;
NUM 29:27 ā, ko ngā whakahere totokore, me ngā ringihanga, arā o ngā pūru, o ngā hipi toa, o ngā reme, kia rite ki tō rātou maha, kia rite ki te ritenga.
NUM 29:28 Kia kotahi koati toa anō hoki hei whakahere hara; tērā anō te tahunga tinana tūturu, me tōna whakahere totokore, me tōna ringihanga.
NUM 29:29 “Ā, i te ono o ngā rā kia waru ngā pūru, kia rua ngā hipi toa, kia tekau mā whā ngā reme toa tau tahi, he mea kohakore;
NUM 29:30 ā, ko ngā whakahere totokore, me ngā ringihanga, arā o ngā pūru, o ngā hipi toa, o ngā reme, kia rite ki tō rātou maha, kia rite ki te ritenga.
NUM 29:31 Kia kotahi koati toa anō hoki hei whakahere hara; tērā anō te tahunga tinana tūturu, tōna whakahere totokore, me tōna ringihanga.
NUM 29:32 “Ā, i te whitu o ngā rā, kia whitu ngā pūru, kia rua ngā hipi toa, kia tekau mā whā ngā reme toa tau tahi, he mea kohakore;
NUM 29:33 ā, ko ngā whakahere totokore, me ō rātou ringihanga, arā o ngā pūru, o ngā hipi toa, o ngā reme, kia rite ki tō rātou maha, kia rite ki te ritenga.
NUM 29:34 Kia kotahi koati toa anō hoki hei whakahere hara; tērā anō te tahunga tinana tūturu, tōna whakahere totokore, me tōna ringihanga.
NUM 29:35 “Hei te waru o ngā rā he huihuinga nui mā koutou; kaua tētahi mahi a te kaimahi e mahia.
NUM 29:36 Engari, me tāpae he tahunga tinana, he whakahere ahi, he kakara reka ki a Ihowā: kia kotahi pūru, kia kotahi hipi toa, kia whitu ngā reme toa tau tahi, he mea kohakore;
NUM 29:37 ā, ko ngā whakahere totokore, me ō rātou ringihanga, arā o te pūru, o te hipi toa, o ngā reme, kia rite ki tō rātou maha, kia rite ki te ritenga.
NUM 29:38 Kia kotahi koati toa anō hoki hei whakahere hara; tēnā anō te tahunga tinana tūturu, me tōna whakahere totokore, me tōna ringihanga.
NUM 29:39 “Ko ēnei ā koutou e mea ai ki a Ihowā i ā koutou hākari nunui, hāunga ā koutou kī taurangi, me ā koutou whakahere tuku noa, ko ā koutou tahunga tinana, me ā koutou whakahere totokore, ā koutou ringihanga, me ā koutou whakahere mō te pai.”
NUM 29:40 Nā, ka kōrerotia e Mohi ki ngā tama a Īharaira ngā mea katoa i whakahau ai a Ihowā ki a Mohi.
NUM 30:1 Nā, ka kōrero a Mohi ki ngā ariki o ngā iwi o ngā tama a Īharaira, ka mea: “Ko te mea tēnei i whakahaua e Ihowā:
NUM 30:2 Ki te puaki i tētahi te kupu taurangi ki a Ihowā, ki te oati rānei i te oati e mau ai tōna wairua te here; kei whakatakā e ia tāna kupu, kia rite tāna e mea ai ki ngā mea katoa i puta mai i tōna māngai.
NUM 30:3 “Ā, mehemea he kī taurangi tā te wahine ki a Ihowā, ā, ka mau tāna here ki a ia, i a ia anō i te whare o tōna pāpā i tōna tamarikitanga;
NUM 30:4 ā, ka rongo tōna pāpā ki tāna kī taurangi, ki tāna here hoki i herea ai tōna wairua, ā, ka whakarongo kau tōna pāpā ki a ia; nā, ka mau āna kī taurangi katoa, ka mau anō hoki ngā here katoa i herea ai e ia tōna wairua.
NUM 30:5 Tēnā ia, ki te whakakāhoretia e tōna pāpā i te rā i rongo ai ia; e kore tētahi o āna kī taurangi, o āna here hoki e herea ai e ia tōna wairua e ū; ā, ka whakarērea noatia e Ihowā ki a ia, nō te mea kua whakakāhoretia tāna e tōna pāpā.
NUM 30:6 “Ā, ki te mea he tahu tāna, ā, ka puaki tāna kī taurangi, ka puta hohoro mai rānei i ōna ngutu te mea e herea ai e ia tōna wairua;
NUM 30:7 ā, ka rongo tāna tahu, ā, ka whakarongo puku ki a ia i te rā i rongo ai; nā, ka ū āna kī taurangi, ka mau anō hoki ngā here i herea ai e ia tōna wairua.
NUM 30:8 Tēnā ia, ki te whakakāhoretia tāna e tāna tahu i te rā i rongo ai ia; nā, ka taka tāna kī taurangi i puaki i a ia, me te mea i puta hohoro mai i ōna ngutu, i herea ai e ia tōna wairua. Ā, ka whakarērea noatia e Ihowā ki a ia.
NUM 30:9 “Ko te kī taurangi ia a te pouaru, a te wahine rānei i whakarērea, arā ko ngā mea katoa i herea ai e ia tōna wairua, ka ū ki a ia.
NUM 30:10 “Ki te mea ia nō te whare mai anō o tāna tahu tāna kī taurangi, tāna herenga rānei i te here, arā i te oati, ki tōna wairua,
NUM 30:11 ā, i rongo anō tāna tahu, i whakarongo puku hoki ki a ia, ā, kīhai i whakakāhore i tāna; nā, ka mau āna kī taurangi katoa, ka mau anō hoki ngā here katoa i herea ai e ia tōna wairua.
NUM 30:12 Tēnā ia, mehemea i whakatakā rawatia aua mea e tāna tahu i te rā i rongo ai ia; e kore e ū tētahi mea i puta mai i ōna ngutu mō āna kī taurangi, mō te mea e herea ai tōna wairua. Kua whakatakā e tāna tahu; ā, ka whakarērea noatia e Ihowā ki a ia.
NUM 30:13 Ko ngā kī taurangi katoa, ko ngā oati here katoa hei pēhi i te wairua, mā tāna tahu e whakaū, mā tāna tahu hoki e whakataka.
NUM 30:14 Ki te whakarongo puku tonu ia tāna tahu i tēnā rā, i tēnā rā; nā, e whakaū ana ia i āna kī taurangi katoa, arā i āna here katoa i mau ai ia. Kua whakaūngia e ia, nō te mea i whakarongo puku ia ki a ia i te rā i rangona ai.
NUM 30:15 Ki te whakatakā rawatia ia e ia aua mea i muri iho i tōna rongonga; nā, māna e waha te kino o te wahine.”
NUM 30:16 Ko ngā tikanga ēnei i whakahaua e Ihowā ki a Mohi mā te tangata rāua ko tāna wahine, mā te pāpā rāua ko tāna tamāhine i te mea he taitamāhine ia, i te whare o tōna pāpā.
NUM 31:1 I kōrero anō a Ihowā ki a Mohi, i mea,
NUM 31:2 “Rapua he utu mō ngā tama a Īharaira i ngā Miriani; hei muri iho ka kohia koe ki tōu iwi.”
NUM 31:3 Nā, ka kōrero a Mohi ki te iwi, ka mea, “Whītiki ētahi o koutou mō te whawhai, ka haere ai ki te tū i a Miriana, ki te tohe i tā Ihowā utu i a Miriana.
NUM 31:4 Kia kotahi te mano o tēnei iwi, o tēnei iwi, o ngā iwi katoa o Īharaira, e ungā ki te whawhai.”
NUM 31:5 Nā, ka wehea e rātou i roto i ngā mano o Īharaira, he mano nō ia iwi, tekau mā rua mano, rite tonu i te patu mō te whawhai.
NUM 31:6 Nā, ka ungā rātou e Mohi ki te whawhai, he mano nō tēnei iwi, nō tēnei iwi, me Pinehaha tama a Ereātara tohunga, ki te whawhai, me ngā mea tapu anō, me ngā tētere i tōna ringa hei whakaoho.
NUM 31:7 Nā, ka whawhai rātou ki a Miriana, ka pērā me tā Ihowā i whakahau ai ki a Mohi; ā, patua iho e rātou ngā tāne katoa.
NUM 31:8 I patua anō e rātou ngā kīngi o Miriana, i roto i te parekura: a Ēwi rātou ko Rekeme, ko Turu, ko Huru, ko Repa, ngā kīngi tokorima o Miriana; i patua anō e rātou a Paraama, te tama a Peoro ki te hoari.
NUM 31:9 Ā, whakaraua ana e ngā tama a Īharaira ngā wāhine o Miriana, me ā rātou kōhungahunga; i tangohia anō ā rātou kararehe katoa, hei taonga pārau, me ā rātou kāhui katoa, me ō rātou taonga katoa.
NUM 31:10 Tahuna ake hoki e rātou ki te ahi ō rātou pā katoa i noho ai rātou, me ō rātou whare rangatira katoa.
NUM 31:11 Ā, tangohia ana e rātou ngā taonga katoa, me ngā mea pārau katoa, te tangata me te kararehe.
NUM 31:12 Ā, kawea ana e rātou ki a Mohi rāua ko Ereātara tohunga, ki te whakaminenga anō hoki o ngā tama a Īharaira, ngā whakarau, me ērā mea pārau, me ngā taonga, ki te puni ki ngā mānia o Moapa, ki te wāhi o Horano e tata ana ki Heriko.
NUM 31:13 Ā, ka puta a Mohi rātou ko Ereātara tohunga, ko ngā ariki katoa o te whakaminenga ki te whakatau i a rātou ki waho o te puni.
NUM 31:14 Nā, ka riri a Mohi ki ngā rangatira o te ope, ki ngā rangatira o ngā mano, ki ngā rangatira anō hoki o ngā rau, i haere mai nei i te whawhai.
NUM 31:15 Nā, ka mea a Mohi ki a rātou, “Kua whakaorangia e koutou ngā wāhine katoa?
NUM 31:16 Nanā, ko ngā mea ēnei nāna i tutū ai ngā tama a Īharaira ki a Ihowā i tō Peoro rā, he mea tohutohu nā Paraama, i pā ai te whiu ki te whakaminenga a Ihowā.
NUM 31:17 Nā reira patua āianei ngā tāne katoa i roto i ngā kōhungahunga, patua hoki ngā wāhine katoa kua mōhio, kua takoto ki te tāne.
NUM 31:18 Ko ngā kōhungahunga wāhine katoa ia, kāhore nei i mōhio, i takoto ki te tāne, whakaorangia mā koutou.
NUM 31:19 “Ko koutou hoki, me noho ki waho o te puni, kia whitu ngā rā; ko ngā tāngata katoa i patu i te tangata, me ngā mea katoa hoki i pā ki te tangata i patua, me pure koutou i a koutou, me ā koutou whakarau i te toru o ngā rā, i te whitu hoki o ngā rā.
NUM 31:20 Me pure anō hoki ngā kākahu katoa, me ngā oko hiako, me ngā mea katoa i hangā ki te huruhuru koati, me ngā oko rākau katoa.”
NUM 31:21 I mea anō a Ereātara tohunga ki ngā tāngata whawhai, i haere ki te riri, “Ko te tikanga tēnei o te ture i whakahaua e Ihowā ki a Mohi:
NUM 31:22 ko te kōura anake, me te hiriwa, ko te parāhi, ko te rino, ko te tine, me te matā –
NUM 31:23 ko ngā mea katoa e puta i te ahi, me tuku nā roto i te ahi, ā, ka kore te poke. Otiia, me pure anō ki te wai o te wehenga; ā, ko ngā mea katoa e kore e puta i te ahi, me tuku nā roto i te wai.
NUM 31:24 Ā, me horoi ō koutou kākahu i te whitu o ngā rā, ā, ka kore ō koutou poke, ā, hei muri iho ka tomo ki te puni.”
NUM 31:25 Ā, i kōrero a Ihowā ki a Mohi, i mea,
NUM 31:26 “Tirohia te maha o te taonga pārau i riro mai, o te tangata, o te kararehe, e kōrua ko Ereātara tohunga, e ngā mātua ariki anō hoki o ngā whare o te whakaminenga.
NUM 31:27 Wehea hoki ngā taonga pārau kia rua ngā wāhi; mā te hunga i hāpai i te pakanga, i haere atu ki te whawhai, mā te whakaminenga katoa anō.
NUM 31:28 “Tangohia anō hoki he takoha mā Ihowā i ngā tāngata i whawhai, i haere atu nā ki te riri. Kia kotahi wairua i roto i ngā rau e rima, o te tangata, rātou tahi ko te kau, ko te kāihe, ko ngā hipi hoki.
NUM 31:29 Me tango i roto i tā rātou hāwhe, ka hoatu ai ki a Ereātara, ki te tohunga, hei whakahere hapahapai ki a Ihowā.
NUM 31:30 “Me tango anō e koe i roto i te hāwhe a ngā tama a Īharaira, kia kotahi wāhi i roto i te rima tekau, o te tangata, o te kau, o te kāihe, o te hipi, arā o ngā kararehe katoa, ka hoatu ai mā ngā Rīwaiti, mā ngā kaitiaki o ngā mea o te tapenākara o Ihowā.”
NUM 31:31 Nā, pērātia ana e Mohi rāua ko Ereātara tohunga me tā Ihowā i whakahau ai ki a Mohi.
NUM 31:32 Ā, ko te taonga, ko te toenga iho o ngā mea i riro pārau i ngā tāngata i whawhai, e ono rau e whitu tekau mā rima mano hipi,
NUM 31:33 e whitu tekau mā rua mano hoki ngā kau,
NUM 31:34 e ono tekau mā tahi mano ngā kāihe,
NUM 31:35 e toru tekau mā rua mano ngā tāngata, arā ngā wāhine kāhore anō i mōhio noa, i takoto noa, ki te tāne.
NUM 31:36 Ā, ko tērā hāwhe, ko te wāhi a te hunga i haere ki te whawhai: e toru rau e toru tekau mā whitu mano e rima rau te maha o ngā hipi;
NUM 31:37 ā, ko te takoha mā Ihowā o ngā hipi e ono rau e whitu tekau mā rima.
NUM 31:38 E toru tekau mā ono mano ngā kau; ā, ko te takoha mā Ihowā e whitu tekau mā rua.
NUM 31:39 E toru tekau mano e rima rau ngā kāihe; ā, ko te takoha mā Ihowā e ono tekau mā tahi.
NUM 31:40 Ā, ko ngā tāngata tekau mā ono mano; ā, ko te takoha mā Ihowā, e toru tekau mā rua tāngata.
NUM 31:41 Nā, ka hoatu e Mohi te takoha, te whakahere hapahapai mā Ihowā, ki a Ereātara tohunga, ka pērātia me tā Ihowā i whakahau ai ki a Mohi.
NUM 31:42 Nā, nō roto i te hāwhe a ngā tama a Īharaira i wehea nei e Mohi i roto i tā te hunga i whawhai,
NUM 31:43 ko te hāwhe hoki a te whakaminenga, e toru rau e toru tekau mā whitu mano e rima rau hipi,
NUM 31:44 e toru tekau mā ono mano ngā kau,
NUM 31:45 e toru tekau mano e rima rau ngā kāihe,
NUM 31:46 kotahi tekau mā ono mano ngā tāngata;
NUM 31:47 i tangohia e Mohi i roto i te hāwhe a ngā tama a Īharaira, kotahi wāhi i roto i te rima tekau, o te tangata, o te kararehe; ā, hoatu ana ki ngā Rīwaiti i tiaki nei i ngā mea o te tapenākara o Ihowā; i pērātia anō me tā Ihowā i whakahau ai ki a Mohi.
NUM 31:48 Nā, ka haere mai ki a Mohi ngā rangatira mano o te ope, ngā rangatira mano rātou ko ngā rangatira rau,
NUM 31:49 ā, ka mea ki a Mohi, “Kua tirohia e āu pononga te tokomaha o ngā tāngata i whawhai nei i raro i ō mātou ringa, ā, kāhore i ngaro tētahi o mātou.
NUM 31:50 Koia i kawea mai ai e mātou he whakahere mā Ihowā, e ia tangata, e ia tangata, tāna i whiwhi ai, ētahi mea kōura, ētahi mekameka, poroporo, mōwhiti, whakakai, heitiki hoki, hei whakamārie mō ō mātou wairua ki te aroaro o Ihowā.”
NUM 31:51 Nā, ka tangohia e Mohi rāua ko Ereātara tohunga te kōura i a rātou, he mea mahi katoa.
NUM 31:52 Ā, kotahi tekau mā ono mano e whitu rau e rima tekau hekere o te kōura katoa o te whakahere i tāpaea e rātou ki a Ihowā, o tā ngā rangatira mano rātou ko ngā rangatira rau.
NUM 31:53 I pāhuatia hoki e ngā tāngata i whawhai ētahi taonga, tēnā mōna ake, tēnā mōna ake.
NUM 31:54 Nā, tangohia ana e Mohi rāua ko Ereātara tohunga te kōura a ngā rangatira o ngā mano, o ngā rau, ā, kawea ana e rāua ki roto ki te tapenākara o te whakaminenga, hei whakamahara mō ngā tama a Īharaira ki te aroaro o Ihowā.
NUM 32:1 Nā, he tini rawa ngā kāhui a ngā tama a Reupena, rātou ko ngā tama a Kara; ā, ka kite rātou i te whenua o Iatere, i te whenua hoki o Kireara, nā, he wāhi pai tēnā wāhi mō ngā kāhui.
NUM 32:2 Nā, ka haere ngā tama a Kara rātou ko ngā tama a Reupena, ka kōrero ki a Mohi rāua ko Ereātara tohunga, ki ngā rangatira anō o te whakaminenga, ka mea,
NUM 32:3 “Ko Ataroto, ko Ripono, ko Iatere, ko Nimira, ko Hehepona, ko Ereare, ko Hepama, ko Nepo, ko Peono –
NUM 32:4 ko te whenua katoa i patua nā e Ihowā i te aroaro o te whakaminenga o Īharaira – he whenua pai tēnā mō ngā kāhui, he kāhui anō hoki a āu pononga.”
NUM 32:5 I mea anō rātou, “Mehemea e manakohia ana mātou i tōu aroaro, me hōmai tēnei whenua hei kāinga mō āu pononga; kaua mātou e meatia kia whiti i Horano.”
NUM 32:6 Nā, ka mea a Mohi ki ngā tama a Kara rātou ko ngā tama a Reupena: “Ko ō koutou tēina koia kia haere ki te whawhai, ā, ko koutou kia noho ki konei?
NUM 32:7 He aha koutou i pēhi ai i te ngākau o ngā tama a Īharaira kia kaua e whiti ki te whenua i hōmai e Ihowā ki a rātou?
NUM 32:8 I pēnā anō ō koutou mātua i tāku tononga atu i a rātou i Karehepārenea kia kite i te whenua.
NUM 32:9 I tō rātou haerenga hoki ki runga ki te awaawa o Ehekora, ā, ka kite rātou i te whenua, nā, pēhia ana e rātou ngā ngākau o ngā tama a Īharaira, kia kaua e haere ki te whenua i hōmai nei e Ihowā ki a rātou.
NUM 32:10 Nā, ko te muranga o tō Ihowā riri i taua rā, ā, ka oati ia, ka mea,
NUM 32:11 ‘E kore rawa ngā tāngata i haere mai nei i Īhipa, ngā mea e rua tekau, he maha atu rānei ō rātou tau, e kite i te whenua i oati ai ahau ki a Āperahama, ki a Īhaka, ki a Hākopa; mō rātou kīhai i tino whai i ahau –
NUM 32:12 heoi anō ko Karepe, ko te tama a Iepune Keniti, rāua ko Hohua, te tama a Nunu; mō rāua i tino whai i a Ihowā.’
NUM 32:13 Nā, ko te muranga o te riri o Ihowā ki a Īharaira, ā, meinga ana rātou kia kōpikopiko i te koraha, e whā tekau ngā tau, ā poto noa taua whakapaparanga i mahi nā i te kino i te tirohanga a Ihowā.
NUM 32:14 “Nā, kua ara ake nā koutou hei whakakapi mō ō koutou mātua, he huanga tāngata hara, hei whakanui atu i te mura o tō Ihowā riri ki a Īharaira.
NUM 32:15 Nō te mea ki te tahuri kē koutou, ā, kāhore e whai i a ia, ka waiho anō rātou e ia i te koraha; ā, mā koutou ka ngaro ai tēnei iwi katoa.”
NUM 32:16 Nā, ka whakatata rātou ki a ia, ka mea: “Ka hangā e mātou he taiepa hipi ki konei mō ā mātou kararehe, me ētahi pā mō ā mātou tamariki.
NUM 32:17 Ko mātou ia ka haere me ā mātou patu i mua i ngā tama a Īharaira, kia kawea rā anō rātou e mātou ki te wāhi mō rātou; ā, me noho ā mātou tamariki ki ngā pā e whai taiepa ana, he wehi hoki i ngā tāngata o tēnei whenua.
NUM 32:18 E kore mātou e hoki ki ō mātou whare, kia riro rā anō tōna kāinga i tēnei, i tēnei o ngā tama a Īharaira.
NUM 32:19 E kore hoki mātou e tū tahi me rātou i te kāinga i tāwāhi o Horano, i tua atu rānei; nō te mea ka riro mai he kāinga mō mātou i tēnei taha o Horano, i te taha ki te rāwhiti.”
NUM 32:20 Nā, ka mea a Mohi ki a rātou: “Ki te meatia tēnei mea e koutou – ki te haere koutou me ā koutou patu i te aroaro o Ihowā ki te whawhai,
NUM 32:21 ki te whiti katoa hoki koutou i Horano me ā koutou patu i te aroaro o Ihowā, kia peia rā anō e ia ōna hoariri i mua i a ia,
NUM 32:22 ā, ka taea te whenua i te aroaro o Ihowā – kātahi koutou ka hoki, ā, ka harakore ki te aroaro o Ihowā, ki te aroaro anō hoki o Īharaira; ā, mō koutou tēnei whenua hei nohoanga i te aroaro o Ihowā.
NUM 32:23 “Tēnā ia, ka kore koutou e pēnā, nanā, kua hara koutou ki a Ihowā; ā, kia mōhio koutou, e hopukia anō koutou e tō koutou hara.
NUM 32:24 Hangā ngā pā mō ā koutou tamariki, me ngā taiepa mō ā koutou hipi; meatia anō hoki te mea i puta mai i ō koutou māngai.”
NUM 32:25 Nā, ka kōrero ngā tama a Kara rātou ko ngā tama a Reupena ki a Mohi, ka mea, “Ka pēnā āu pononga me tā tōku ariki i whakahau ai.
NUM 32:26 Ko reira ā mātou tamariki, ā mātou wāhine, ā mātou kāhui, me ā mātou kararehe katoa, ko ngā pā o Kireara.
NUM 32:27 Ko āu pononga ia me whiti katoa atu, rite rawa i te patu mō te pakanga, whawhai ai i te aroaro o Ihowā; me pērā me tā tōku ariki i kī ai.”
NUM 32:28 Nā, ka whakahaua te tikanga mō rātou e Mohi ki a Ereātara tohunga, rātou ko Hohua tama a Nunu, ko ngā ariki hoki o ngā whare o ngā mātua o ngā iwi o ngā tama a Īharaira.
NUM 32:29 Ā, ka mea a Mohi ki a rātou, “Ki te whiti katoa atu i roto i a koutou ngā tama a Kara i Horano, rātou ko ngā tama a Reupena, me ā rātou patu anō, whawhai ai i te aroaro o Ihowā, ā, ka taea te whenua i tō koutou aroaro; nā, me hoatu e koutou te whenua o Kireara kia puritia e rātou;
NUM 32:30 ki te kāhore ia rātou e whiti tahi i a koutou, me ā rātou patu, nā, tēnā he wāhi hei puritanga mā rātou i roto i a koutou i te whenua o Kanaana.”
NUM 32:31 Nā, ka whakautua e ngā tama a Kara rātou ko ngā tama a Reupena, ka mea, “Ka rite tonu tā mātou e mea ai ki tā Ihowā i kōrero mai ai ki āu pononga.
NUM 32:32 Me whiti mātou me ā mātou patu i te aroaro o Ihowā ki te whenua o Kanaana, ā, hei puritanga mā mātou tō mātou kāinga i tēnei taha o Horano.”
NUM 32:33 Nā, ka hōmai e Mohi ki a rātou, ki ngā tama a Kara, ki ngā tama a Reupena rātou ko tētahi tānga o te iwi o Mānahi tama a Hōhepa te kīngitanga o Hihona kīngi o ngā Amori, me te kīngitanga o Oka kīngi o Pahana, te whenua me ōna pā i roto i ō rātou rohe, arā ngā pā o te whenua ā tawhio noa.
NUM 32:34 Nā, ka hangā e ngā tama a Kara a Ripono, a Ataroto, a Aroere,
NUM 32:35 me Ateroto Hopana, me Iatere, me Iokopeha,
NUM 32:36 me Petenimira, me Peteharana; he pā taiepa, me ngā taiepa mō ngā hipi.
NUM 32:37 Ā, nā ngā tama a Reupena i hanga a Hehepona, a Ereare, a Kiriataima,
NUM 32:38 a Nepo, a Paara-Meono, (i whakaputaia kētia hoki ngā ingoa) me Hipima. I huaina anō hoki e rātou he ingoa kē ki ngā pā i hangā e rātou.
NUM 32:39 Ā, i haere atu ngā tama a Makiri tama a Mānahi ki Kireara, ā, tangohia ana e ia, peia ana hoki te Amori i reira.
NUM 32:40 Ā, i hoatu e Mohi a Kireara ki a Makiri tama a Mānahi; ā, noho ana ia i reira.
NUM 32:41 Ā, i haere a Haira tama a Mānahi, ā, tangohia ana e ia ngā pā o reira, ā, huaina iho e ia, ko Hawotohaira.
NUM 32:42 Ā, i haere a Nopaha, ā, tangohia ana e ia a Kenata, me ōna pā ririki, ā, huaina iho ki tōna ingoa, ki a Nopaha.
NUM 33:1 Ko ngā haerenga ēnei o ngā tama a Īharaira i tō rātou putanga mai i te whenua o Īhipa i ō rātou rōpū i raro i te ringa o Mohi rāua ko Ārona.
NUM 33:2 I tuhituhia hoki e Mohi ō rātou haerenga atu, ō rātou whakatikanga atu, he mea ki mai nā Ihowā; ā, ko ō rātou whakatikanga atu ēnei, me ō rātou haerenga.
NUM 33:3 I tūria atu i Ramehehe i te marama tuatahi, i te kotahi tekau mā rima o ngā rā o te marama tuatahi; nō te aonga ake o te Kapenga i puta mai ai ngā tama a Īharaira, i runga tonu anō te ringa i te tirohanga a ngā Īhipiana katoa;
NUM 33:4 i ngā Īhipiana e tanu ana i ā rātou mātāmua katoa, i patua nei e Ihowā i roto i a rātou; ā, mahi whakawā ana a Ihowā ki ō rātou atua.
NUM 33:5 Nā, tūria ana e ngā tama a Īharaira i Ramehehe, ā, noho ana i Hukota.
NUM 33:6 I tūria i Hukota, ā, noho ana i Ētama, i te pito o te koraha.
NUM 33:7 I tūria i Ētama, ā, tahuri ana whaka Pihahirota ki te ritenga atu o Paara-Hepona; ā, noho ana i te ritenga atu o Mikitoro.
NUM 33:8 I tūria i te ritenga atu o Pihahirota, ā, tika ana nā waenganui o te moana ki te koraha; ā, haere ana, e toru ngā rā ki te ara, i te koraha o Ētama, ā, noho ana i Mara.
NUM 33:9 I tūria i Mara, ā, haere ana ki Erimi; kotahi tekau mā rua hoki ngā puna wai i Erimi, e whitu tekau hoki ngā nīkau; ā, noho ana rātou i reira.
NUM 33:10 I tūria i Erimi, ā, noho ana i te taha o te Moana Whero.
NUM 33:11 I tūria i te Moana Whero, ā, noho ana i te koraha o Hini.
NUM 33:12 I tūria i te koraha o Hini, ā, noho ana i Ropoka.
NUM 33:13 I tūria i Ropoka, ā, noho ana i Aruhu.
NUM 33:14 I tūria i Aruhu, ā, noho ana i Repirimi, i te wāhi kāhore nei he wai hei inu mā te iwi.
NUM 33:15 I tūria i Repirimi, ā, noho ana i te koraha o Hinai.
NUM 33:16 I tūria i te koraha o Hinai, ā, noho ana i Kipiroto Hataawa.
NUM 33:17 I tūria i Kipiroto Hataawa, ā, noho ana i Hateroto.
NUM 33:18 I tūria i Hateroto, ā, noho ana i Ritima.
NUM 33:19 I tūria i Ritima, ā, noho ana i Rimono Parehe.
NUM 33:20 I tūria i Rimono Parehe, ā, noho ana i Rīpina.
NUM 33:21 I tūria i Rīpina, ā, noho ana i Ritaha.
NUM 33:22 I tūria i Ritaha, ā, noho ana i Keherataha.
NUM 33:23 I tūria i Keherataha, ā, noho ana i Maunga Hapere.
NUM 33:24 I tūria i Maunga Hapere, ā, noho ana i Harataha.
NUM 33:25 I tūria i Harataha, ā, noho ana i Makaheroto.
NUM 33:26 I tūria i Makaheroto, ā, noho ana i Tahata.
NUM 33:27 I tūria i Tahata, ā, noho ana i Taraha.
NUM 33:28 I tūria i Taraha, ā, noho ana i Mitika.
NUM 33:29 I tūria i Mitika, ā, noho ana i Hahamona.
NUM 33:30 I tūria i Hahamona, ā, noho ana i Moheroto.
NUM 33:31 I tūria i Moheroto, ā, noho ana i Pene Iaakana.
NUM 33:32 I tūria i Pene Iaakana, ā, noho ana i Horo Hakirikara.
NUM 33:33 I tūria i Horo Hakirikara, ā, noho ana i Iotopata.
NUM 33:34 I tūria i Iotopata, ā, noho ana i Eperona.
NUM 33:35 I tūria i Eperona, ā, noho ana i Ehiono Kēpere.
NUM 33:36 I tūria i Ehiono Kēpere, ā, noho ana i te koraha o Hini, arā o Karehe.
NUM 33:37 I tūria i Karehe, ā, noho ana i Maunga Horo, i te pito o te whenua o Ēroma.
NUM 33:38 Ā, i kake a Ārona tohunga ki Maunga Horo, he mea kī mai nā Ihowā, ā, mate iho ki reira, i te whā tekau o ngā tau o te putanga mai o ngā tama a Īharaira i te whenua o Īhipa, i te rā tuatahi o te rima o ngā marama.
NUM 33:39 Ā, kotahi rau e rua tekau mā toru ngā tau o Ārona i tōna matenga ki Maunga Horo.
NUM 33:40 Ā, i rongo te kīngi o Arara, te Kanaani, i noho nei i te whenua o Kanaana, i te taha ki te tonga, ki te taenga mai o ngā tama a Īharaira.
NUM 33:41 Ā, i tūria e rātou i Maunga Horo, ā, noho ana i Taramona.
NUM 33:42 I tūria i Taramona, ā, noho ana i Punono.
NUM 33:43 I tūria i Punono, ā, noho ana i Opoto.
NUM 33:44 I tūria i Opoto, ā, noho ana i Iteaparimi, i ngā rohe o Moapa.
NUM 33:45 I tūria i Īmi, ā, noho ana i Riponokara.
NUM 33:46 I tūria i Riponokara, ā, noho ana i Aramono Ripirataima.
NUM 33:47 I tūria i Aramono Ripirataima, ā, noho ana i ngā maunga o Aparimi, i te ritenga atu o Nepo.
NUM 33:48 I tūria i ngā maunga o Aparimi, ā, noho ana i ngā mānia o Moapa, i te wāhi o Horano e tata ana ki Heriko.
NUM 33:49 Nā, ka noho rātou ki te taha o Horano ki Peteiehimoto, tae noa ki Āperehitimi, ki ngā mānia o Moapa.
NUM 33:50 I kōrero anō a Ihowā ki a Mohi i ngā mānia o Moapa, i te wāhi o Horano e tata ana ki Heriko, i mea:
NUM 33:51 “Kōrero ki ngā tama a Īharaira, mea atu ki a rātou: E whiti koutou i Horano ki te whenua o Kanaana;
NUM 33:52 nā, me pei ngā tāngata whenua katoa i tō koutou aroaro, me whakamōtī ā rātou āhua kōhatu, me whakamōtī katoa anō hoki ā rātou whakapakoko whakarewa, ka whakakāhore anō hoki i ā rātou wāhi teitei katoa.
NUM 33:53 Ā, ka tangohia te whenua e koutou, ka nohoia hoki; kua hoatu nei hoki e ahau te whenua kia nohoia e koutou.
NUM 33:54 “Me rota tā koutou tuwha i te whenua hei kāinga mō ō koutou hapū; he nui, kia nui tōna wāhi, he iti, kia iti tōna wāhi; hei te wāhi i tika ai tōna rota te wāhi mō tēnei, mō tēnei; kia rite ki ngā iwi o ō koutou mātua te tūwhanga o ō koutou wāhi.
NUM 33:55 “Ko tēnei, ki te kāhore e peia e koutou ngā tāngata whenua i tō koutou aroaro; nā, hei koikoi i roto i ō koutou kanohi ngā mea o rātou e whakatoea e koutou, hei tūmatakuru anō i ō koutou kaokao, ā, ka whakatoi rātou i a koutou ki te whenua e noho ai koutou.
NUM 33:56 Nā, ko ngā mea i whakaaro ahau hei meatanga ki a rātou, ka meatia e ahau ki a koutou.”
NUM 34:1 I kōrero anō a Ihowā ki a Mohi, i mea,
NUM 34:2 “Whakahaua ngā tama a Īharaira, mea atu ki a rātou: E tae koutou ki te whenua o Kanaana (ko te whenua tēnei e riro i a koutou hei kāinga tupu, arā te whenua o Kanaana, me ōna rohe),
NUM 34:3 nā, kei te koraha o Hini te taha ki a koutou whaka te tonga, haere tonu i te rohe o Ēroma. Ā, hei rohe ki a koutou ki te tonga te pito rawa o te Moana Tote, whaka te rāwhiti.
NUM 34:4 Nā, ka piko tō koutou rohe i te tonga ki te pikitanga o Akarapimi, ā, whiti tonu ki Hini. Nā, ka rere i te tonga, a Karehepārenea, haere, a Hatarārara, whiti tonu atu ki Atamono.
NUM 34:5 Nā, ka piko te rohe i Atamono, ā te awa o Īhipa, ā, marere atu ki te moana.
NUM 34:6 “Nā, ko te rohe ki te hauāuru, ko te Moana Nui me tōna rohe; ko tō koutou rohe ki te hauāuru tēnei.
NUM 34:7 “Ā, ko tēnei tō koutou rohe ki te raki: me whakatakoto e koutou i te Moana Nui ki Maunga Horo;
NUM 34:8 me whakatakoto anō hoki i Maunga Horo ki te haerenga atu ki Hāmata; ā, kei Terara ngā putanga atu o te rohe;
NUM 34:9 ā, ka tae te rohe ki Tipirono, ā, kei Hataraenana ōna putanga atu; ko te rohe tēnei ki a koutou whaka te raki.
NUM 34:10 “Me whakatakoto anō tō koutou rohe ki te rāwhiti i Hataraenana ki Hepama;
NUM 34:11 ā, ka haere te rohe ki raro i Hepama ki Ripira, ki te taha ki te rāwhiti o Aina; ā, ka haere tonu te rohe ki raro, ā, ka tae ki te taha o te Moana o Kinereta whaka te rāwhiti;
NUM 34:12 ā, ka haere te rohe ki Horano, ā, kei te Moana Tote ōna putanga. “Ko te whenua tēnei mō koutou, me ōna rohe ā tawhio noa.
NUM 34:13 “Nā, ka whakahau a Mohi i ngā tama a Īharaira, ka mea: Ko te whenua tēnei e rotarotatia hei kāinga pūmau mō koutou, ko tā Ihowā i whakahau ai kia hoatu ki ngā iwi e iwa, ki tētahi tānga hoki o tētahi iwi;
NUM 34:14 kua whiwhi hoki te iwi o ngā tama a Reupena, ngā whare o ō rātou mātua, me te iwi o ngā tama a Kara, ngā whare o ō rātou mātua; kua whiwhi anō tētahi tānga o te iwi o Mānahi ki tō rātou wāhi.
NUM 34:15 Kua whiwhi ngā iwi e rua me tētahi tānga o tētahi iwi ki tō rātou wāhi i tēnei taha o Horano, e anga ana ki Heriko whaka te rāwhiti, ki te putanga mai o te rā.”
NUM 34:16 I kōrero anō a Ihowā ki a Mohi, i mea,
NUM 34:17 Ko ngā ingoa ēnei o ngā kaituwha i te whenua mō koutou: ko Ereātara tohunga rāua ko Hohua tama a Nunu.
NUM 34:18 Me tango anō tētahi rangatira o tēnei iwi, o tēnei iwi, hei tuwha mō te whenua.
NUM 34:19 Ā, ko ngā ingoa o aua tāngata: “Karepe tama a Iepune o te iwi o Hūrā,
NUM 34:20 Ā, ko tō te iwi o ngā tama a Himiona, Hemuera tama a Amihuru.
NUM 34:21 Ko tō te iwi o Pineamine, ko Erirara tama a Kihirono.
NUM 34:22 Ko te rangatira hoki o te iwi o ngā tama a Rāna, ko Puki tama a Iokiri.
NUM 34:23 Ko te rangatira o ngā tama a Hōhepa, arā o te iwi o ngā tama a Mānahi, ko Haniere tama a Epora.
NUM 34:24 Ko te rangatira o te iwi o ngā tama a Ēparaima, ko Kemuere tama a Hipitana.
NUM 34:25 Ko te rangatira o te iwi o ngā tama a Hepurona, ko Eritapana, tama a Paranaka.
NUM 34:26 Ko te rangatira o te iwi o ngā tama a Ihākara, ko Paratiere tama a Atana.
NUM 34:27 Ko te rangatira o te iwi o ngā tama a Āhera, ko Ahihuru tama a Heromi.
NUM 34:28 Ko te rangatira o te iwi o ngā tama a Napatari, ko Perahere tama a Amihuru.”
NUM 34:29 Ko ēnei a Ihowā i whakahau ai hei tuwha i te kāinga mō ngā tama a Īharaira i te whenua o Kanaana.
NUM 35:1 I kōrero anō a Ihowā ki a Mohi i ngā mānia o Moapa, i te wāhi o Horano, ki Heriko, i mea,
NUM 35:2 “Whakahaua ngā tama a Īharaira kia hōmai ki ngā Rīwaiti ētahi pā o ō rātou kāinga ka riro nei i a rātou hei nohoanga; me hoatu anō ki ngā Rīwaiti ngā wāhi o waho o aua pā ā tawhio noa.
NUM 35:3 Ā, ko ngā pā hei nohoanga mō rātou; ko ngā wāhi hoki o waho ake mō ā rātou kararehe, mō ō rātou taonga, mō ā rātou kīrehe katoa.
NUM 35:4 “Ā, ko ngā wāhi o waho o ngā pā, e hoatu e koutou ki ngā Rīwaiti, kia kotahi mano ngā whatīanga i te taiepa atu anō o te pā, ā, haere whakawaho ā tawhio noa.
NUM 35:5 Me rūri anō e koutou i waho o te pā, i te taha ki te rāwhiti kia rua mano whatīanga, i te taha ki te tonga kia rua mano whatīanga, i te taha ki te hauāuru kia rua mano whatīanga, i te taha hoki ki te raki kia rua mano whatīanga, ā, hei waenganui te pā. Ko ngā wāhi tēnei mō rātou o waho i ngā pā.
NUM 35:6 “Ā, kia ono ngā pā whakaora i roto i ngā pā e hoatu e koutou ki ngā Rīwaiti; me hoatu hei rerenga atu mō te kaiwhakamate. Kia whā tekau mā rua hoki ngā pā e tāpiritia e koutou ki ēnā.
NUM 35:7 Ko ngā pā katoa e hoatu e koutou ki ngā Rīwaiti, kia whā tekau mā waru; ērā, me ngā wāhi o waho ake.
NUM 35:8 Ā, hei roto i te wāhi tūturu o ngā tama a Īharaira ngā pā e hoatu e koutou; kia maha i roto i ngā mea maha, kia ouou hoki i roto i ngā mea ouou, kia rite ki tōna kāinga e riro i a ia ōna pā e hoatu e tērā, e tērā, ki ngā Rīwaiti.”
NUM 35:9 I kōrero anō a Ihowā ki a Mohi, i mea:
NUM 35:10 “Kōrero ki ngā tama a Īharaira, mea atu ki a rātou, E whiti koutou i Horano ki te whenua o Kanaana;
NUM 35:11 nā, ka whakarite i ētahi pā mō koutou hei pā whakaora, hei rerenga atu mō te tangata whakamate, i whakamate nei i te tangata, otiia ehara i te mea āta whakaaro.
NUM 35:12 Ā, ka waiho e koutou hei pā whakaora kei mate i te kaitakitaki; kei mate te tangata whakamate, kia tū rā anō ia ki te aroaro o te whakaminenga, kia whakawākia.
NUM 35:13 “Ā, kia ono ngā pā e waiho hei whakaora, o ngā pā e hoatu nei e koutou.
NUM 35:14 Kia toru ngā pā e hoatu e koutou i tēnei taha o Horano, kia toru hoki ngā pā e hoatu e koutou i te whenua o Kanaana; me waiho hei pā whakaora.
NUM 35:15 Hei whakaora ēnei pā e ono mō ngā tama a Īharaira, mō te manene, mō te nohonoa i roto i a koutou; hei rerenga atu mō ngā tāngata i mate ai tētahi, otiia ehara i te mea āta whakaaro.”
NUM 35:16 “Otiia, ki te patu ia i a ia ki te mea rino, ā, ka mate, he kaikōhuru ia; kia mate rawa te kaikōhuru.
NUM 35:17 Ki te patu anō hoki ia i a ia ki te kōhatu i whiua e ia kia mate rawa ai, ā, ka mate, he kaikōhuru ia; kia mate rawa te kaikōhuru.
NUM 35:18 Ki te patu rānei ia i a ia ki te mea rākau a te ringa kia mate ai, ā, ka mate, he kaikōhuru ia; kia mate rawa te kaikōhuru.
NUM 35:19 Mā te kaitakitaki toto ake anō e whakamate te kaikōhuru; e whakamate ia i a ia ina tūtaki ki a ia.
NUM 35:20 “Ki te mea he ngākau kino tōna, ā, i ka wero ia i a ia; ki te whanga atu rānei ia, ā, ka epaina atu ia kia mate;
NUM 35:21 ki te mauāhara rānei ia, ā, ka patu i a ia ki tōna ringa e mate ai ia; kia mate rawa te kaipatu, he kaikōhuru ia. E whakamatea te kaikōhuru e te kaitakitaki toto, ina tūtaki ki a ia.
NUM 35:22 “Tēnā ia, mehemea he oho noa ake tāna wero i a ia, ā, ehara i te mea mauāhara; ki te epaina rānei ia ki tētahi mea, ā, kīhai i whanga atu;
NUM 35:23 ki te kōhatu rānei, ki te mea e mate ai, ā, kīhai i kitea atu, nā kua ū ki a ia, ā, ka mate, kāhore anō hoki ōna mauāhara ki a ia, kīhai anō hoki i rapu i te hē mōna;
NUM 35:24 kātahi ka whakarite te whakaminenga i tā te kaipatu, i tā te kaitakitaki toto; kia rite ki ēnei ritenga.
NUM 35:25 Ā, ka whakaorangia e te whakaminenga te kaiwhakamate i roto i te ringa o te kaitakitaki toto, me whakahoki anō ia e te whakaminenga ki tōna pā whakaora, i rere atu ai ia; ā, ka noho ia ki reira ā mate noa te tino tohunga i whakawahia ki te hinu tapu.
NUM 35:26 “Ki te puta kau atu te kaiwhakamate ki waho o te rohe o tōna pā whakaora i rere atu nei ia;
NUM 35:27 ā, ka pono ki a ia te kaitakitaki toto ki waho o te rohe o tōna pā whakaora, ā, ka patua te kaiwhakamate e te kaitakitaki toto, e kore e whakairia he toto ki a ia.
NUM 35:28 Me noho hoki ia i roto i tōna pā whakaora, kia mate rā anō te tino tohunga; ā muri iho i te matenga o te tino tohunga ka hoki te kaiwhakamate ki tōna whenua tupu.
NUM 35:29 “Nā, hei tikanga whakawā ēnei mā koutou, i ō koutou whakatupuranga, i ō koutou nohoanga katoa.
NUM 35:30 “Ki te patu tētahi i te tangata, mā te māngai o ngā kaiwhakaatu e whakamatea ai te kaikōhuru. Kaua anō te kaiwhakaatu kotahi e whakatau hē ki tētahi, e mate ai.
NUM 35:31 “Kaua anō hoki e tangohia he utu mō te kaikōhuru kia ora, ki te mea he hara tōna e mate ai. Engari, kia mate rawa ia.
NUM 35:32 “Kaua anō e tango utu mō te tangata i rere ki tōna pā whakaora, kia hoki ai ia ki te whenua noho ai; kia mate rā anō te tohunga.
NUM 35:33 “Kia kore ai e whakapokea e koutou te whenua kei reira nei koutou; mā ngā toto hoki e poke ai te whenua; heoi anō hoki te mea hei pure i ngā toto i whakahekea ki te whenua, ko ngā toto o te kaiwhakaheke.
NUM 35:34 Kaua e whakapokea te whenua e noho ai koutou, e noho ai ahau; nō te mea e noho ana ahau, a Ihowā, i waenganui i ngā tama a Īharaira.”
NUM 36:1 Nā, ka whakatata ngā ariki o ngā whare o ngā mātua o ngā hapū o ngā tama a Kireara tama a Makiri, tama a Mānahi, nō ngā hapū o ngā tama a Hōhepa, ka kōrero ki te aroaro o Mohi, ki te aroaro anō o ngā rangatira, o ngā ariki o ngā whare o ngā mātua o ngā tama a Īharaira;
NUM 36:2 ka mea, “I whakahau a Ihowā i tōku ariki kia hoatu te whenua hei kāinga tupu mō ngā tama a Īharaira, he mea rota; i whakahaua anō tōku ariki e Ihowā kia hoatu te wāhi o Teropēhara, o tō mātou teina ki āna tamāhine.
NUM 36:3 Nā, ki te mārenatia rātou ki ētahi atu o ngā tama o ērā iwi o ngā tama a Īharaira, nā, ka tītorehia tō rātou wāhi i te wāhi o ō mātou mātua, ā, ka tāpiritia ki te wāhi o te iwi e riro atu ai rātou, ā, ka tītorehia i te wāhi i meatia hei kāinga tupu mō mātou.
NUM 36:4 Ā, i te takanga hoki o te Tiupiri a ngā tama a Īharaira, nā, ka tāpiritia atu tō rātou wāhi ki te wāhi o te iwi e riro atu ai rātou, ā, ka tītorehia tō rātou kāinga i te kāinga o te iwi o ō mātou mātua.”
NUM 36:5 Nā, ka whakahau a Mohi ki ngā tama a Īharaira, he mea kī mai nā Ihowā, ā, ka mea: “He tika ngā kupu a te iwi o ngā tama a Hōhepa.
NUM 36:6 Ko tā Ihowā tēnei i whakahau ai mō ngā tamāhine a Teropēhara; e mea ana: Me mārena rātou ki ā rātou e pai ai; otiia me mārena ki te hapū o te iwi o tō rātou pāpā.
NUM 36:7 Ā, e kore e riro kē te kāinga tupu o tētahi iwi i tētahi iwi atu i roto i ngā tama a Īharaira; ka whai hoki ngā tama a Īharaira, tērā, tērā, ki te kāinga o te iwi o ō rātou mātua.
NUM 36:8 Me mārena anō ngā tamāhine katoa, i a rātou nei tētahi kāinga o tētahi o ngā iwi o ngā tama a Īharaira, ki tētahi o te hapū o te iwi o ō rātou pāpā; kia mau ai te kāinga tupu o ōna mātua i tēnei, i tēnei, o ngā tama a Īharaira.
NUM 36:9 Kei riro kē hoki te kāinga tupu o tētahi iwi i tētahi atu iwi; engari me whai ngā iwi o ngā tama a Īharaira, ia tangata, ia tangata, ki ō rātou kāinga ake.”
NUM 36:10 Rite tonu ki tā Ihowā i whakahau ai ki a Mohi, i pērā tā ngā tamāhine a Teropēhara;
NUM 36:11 ka riro hoki a Mahara, a Tirita, a Hokora, a Mirika, a Noa, ngā tamāhine a Teropēhara, hei wahine mā ngā tama a ngā tēina o tō rātou pāpā.
NUM 36:12 I mārenatia hoki ki ngā hapū o ngā tama a Mānahi, tama a Hōhepa, ā, i mau tō rātou kāinga tupu ki te iwi o te hapū o tō rātou pāpā.
NUM 36:13 Ko ngā whakahau ēnei me ngā whakaritenga a Ihowā i whakahaua e Mohi ki ngā tama a Īharaira i ngā mānia o Moapa i te wāhi o Horano, ki Heriko.
DEU 1:1 Ko ngā kupu ēnei i kōrero ai a Mohi ki a Īharaira katoa i tēnei taha o Horano – i te koraha, i te mānia, i te ritenga atu o Tupu, i waenganui o Parana, o Topera, o Rāpana, o Hateroto, o Rihahapa.
DEU 1:2 (Kia kotahi tekau mā tahi ngā rā e haere atu ana i Horepa, ki te tika nā Maunga Heira, ka tae ai ki Karehepārenea.)
DEU 1:3 Nō te whā tekau o ngā tau, nō te tekau mā tahi o ngā marama, nō te rā tuatahi o te marama, ka kōrerotia e Mohi ki ngā tama a Īharaira ngā mea katoa i ako ai a Ihowā ki a ia mō rātou.
DEU 1:4 I muri i tāna patunga i a Hihona kīngi o ngā Amori, i noho rā i Hehepona, i a Oka hoki kīngi o Pahana, i noho rā i Ahataroto, i Eterei.
DEU 1:5 I tīmata a Mohi i tēnei taha o Horano, i te whenua o Moapa, te kauwhau i tēnei ture, i mea ia:
DEU 1:6 I kōrero mai a Ihowā, tō tātou Atua, ki a tātou i Horepa, i mea, “Ka roa tō koutou noho ki tēnei maunga.
DEU 1:7 Anga atu, hāpainga atu, haere ki te maunga o ngā Amori, ki ngā wāhi katoa hoki e tata ana ki reira – o te mānia, o ngā pukepuke, o te raorao, o te tonga, o te tahatika anō o te moana – ki te whenua o ngā Kanaani, ki Repanōna, ki te awa nui anō, ki te awa, ki Uparati.
DEU 1:8 Nanā, kua tukua atu nei e ahau te whenua ki tō koutou aroaro. Haere ki roto, tangohia te whenua i oati ai a Ihowā ki ō koutou mātua, ki a Āperahama, ki a Īhaka, ki a Hākopa kia hoatu mō rātou, mō tō rātou uri hoki i muri i a rātou.”
DEU 1:9 I kōrero anō ahau ki a koutou i taua wā, i mea, “E kore e āhei ko ahau anake hei pīkau i a koutou.
DEU 1:10 Kua whakanui a Ihowā, tō koutou Atua, i a koutou, ā, tēnei koutou te rite nei ināianei ki ngā whetū o te rangi te tini.
DEU 1:11 Mā Ihowā, mā te Atua o ō koutou mātua, e tāpiri anō ā muri i a koutou ki ngā mano tini atu i a koutou e noho nei, māna koutou e manaaki, e pērā anō me tāna i kōrero ai ki a koutou!
DEU 1:12 Me pēhea e taea ai e ahau anake tā koutou whakararu, tō koutou whakataimaha, me tā koutou ngangau?
DEU 1:13 Whakaritea mai e koutou ētahi tāngata tūpato, whai whakaaro, e mōhiotia ana e ō koutou iwi, ā, māku rātou e mea hei upoko mō koutou.”
DEU 1:14 Nā, ka utu koutou ki ahau, ka mea, “He mea pai tāu e kī mai nā kia meatia.”
DEU 1:15 Nā, ka tango ahau i ngā upoko o ō koutou iwi, i ngā mea whakaaro, e mōhiotia ana, ā, meatia iho rātou e ahau hei upoko mō koutou, hei rangatira mō ngā mano, hei rangatira mō ngā rau, hei rangatira mō ngā rima tekau hei rangatira mō ngā tekau, hei kaiwhakahauhau hoki mō ō koutou iwi.
DEU 1:16 I kī anō ahau i taua wā ki ō koutou kaiwhakawā, i mea: “Whakarangona ngā kupu a ō koutou tēina, a tētahi, a tētahi, kia tika te whakawā mō te tangata, mō tōna teina, mō te tangata kē hoki e noho ana i a ia.
DEU 1:17 Kei whakaaro ki te kanohi ina whakawā, kia rite tā koutou whakarongo ki te iti, ki te rahi; kei wehi koutou i te kanohi tangata; nō te mea nā te Atua te whakawā; ā, ko te mea e ngaro ana i a koutou, ka kawe mai ki ahau, ā, māku e whakarongo.”
DEU 1:18 Ā, whakahaua ana e ahau i reira ngā mea katoa e mahi ai koutou.
DEU 1:19 Ā, ka tūria mai e tātou i Horepa, nā, haerea katoatia ana e tātou taua koraha nui, e wehingia ana, i kite rā koutou i te ara o te whenua maunga o ngā Amori; i pērā me tā Ihowā, me tā tō tātou Atua, i ako mai ai ki a tātou; nā, ka tae atu ki Karehepārenea.
DEU 1:20 Nā, ka mea ahau ki a koutou, “Kua tae mai nei koutou ki te whenua maunga o ngā Amori, ka hōmai nei e Ihowā, e tō tātou Atua, ki a tātou.
DEU 1:21 Nanā, ka tukua nei te whenua e Ihowā, e tōu Atua, ki tōu aroaro; haere ki runga, tangohia, kia rite ai ki tā Ihowā, ki tā te Atua o ōu mātua, i kī ai ki a koe; kaua e wehi, kaua hoki e pāwera.”
DEU 1:22 Nā, ka whakatata mai koutou katoa ki ahau, ka mea, “Kia tono tātou i ētahi ki mua i a tātou, ā, ko rātou hei titiro i tō tātou whenua, hei whakahoki mai i te kōrero ki a tātou, mō te huarahi e haere ai tātou ki runga, mō ngā pā hoki ka haere atu nei tātou ki reira.”
DEU 1:23 Ā, i pai anō taua kupu ki ahau; nā, ka tango ahau i ētahi tāngata kotahi tekau mā rua i roto i a koutou, tātaki kotahi o tēnei iwi, o tēnei iwi.
DEU 1:24 Ā, ka tahuri rātou, ka piki ki te maunga, ā, ka tae ki te awaawa o Ehekora, ka tirotiro hoki i taua wāhi.
DEU 1:25 Ā, ka tango rātou i ētahi o ngā hua o te whenua ki ō rātou ringa, ā, maua ana ki raro, ki a tātou, i whakahoki ake anō rātou i te kupu ki a tātou, i mea, “He pai te whenua ka hōmai nei e Ihowā, e tō tātou Atua, ki a tātou.”
DEU 1:26 Heoi, kīhai koutou i pai ki te haere ki runga; nā, ka tutū ki te kupu a Ihowā, a tō koutou Atua;
DEU 1:27 ā, amuamu ana i roto i ō koutou tēneti, mea ana, “He kino nō Ihowā ki a tātou i whakaputaina mai ai tātou e ia i te whenua o Īhipa, kia hoatu ai tātou ki te ringa o ngā Amori, kia hunā ai tātou.
DEU 1:28 Kia haere tātou ki runga ki hea? Kua ngohe nei hoki ō tātou ngākau i tā ō tātou tuākana, e mea rā, ‘He nunui te iwi, he roroa i a tātou; ko ngā pā he nui, taiepa rawa ā tutuki noa ki te rangi. I kite anō hoki mātou i ngā tama a ngā Anakimi ki reira.’ ”
DEU 1:29 Nā, ka mea ahau ki a koutou, “Kei pāwera, kei wehi i a rātou.
DEU 1:30 Ko Ihowā, ko tō koutou Atua, te haere nei i mua i a koutou, māna tā koutou pakanga; ka rite ki ngā mea katoa i mea ai ia mō koutou ki tō koutou aroaro i Īhipa;
DEU 1:31 i te koraha anō, i kite rā koe i reira i tā Ihowā, i tā tōu Atua wahanga i a koe, ānō he tangata e waha ana i tāna tamaiti, i te ara katoa i haere nā koutou, ā tae noa mai ki tēnei wāhi.”
DEU 1:32 I tēnei mea anō, kīhai koutou i whakapono ki a Ihowā, ki tō koutou Atua,
DEU 1:33 i haere rā i mua i a koutou i te ara, hei whakataki i tētahi wāhi mō koutou, e tū ai ō koutou tēneti, i te pō i roto i te ahi, hei whakaatu ki a koutou i te ara e haere ai koutou, ā, i roto i te kapua i te awatea.
DEU 1:34 Ā, ka rongo a Ihowā i ō koutou reo e kōrero ana, nā, ka riri, ka oati, ka mea:
DEU 1:35 “E kore rawa tētahi o ēnei tāngata – o tēnei whakatupuranga kino – e kite i taua whenua pai i oati ai ahau kia hoatu ki ō koutou mātua,
DEU 1:36 heoi anō ko Karepe, ko te tama a Iepune, e kite ia; ā, ka hoatu e ahau ki a ia, ki āna tama hoki, te whenua i haerea e ia, mōna i tino whai i a Ihowā.”
DEU 1:37 Ā, i riri anō a Ihowā ki ahau, mō koutou hoki, i mea mai, “E kore anō koe e tae ki reira.
DEU 1:38 Ko Hohua, ko te tama a Nunu, e tū ana i tōu aroaro, e tae ia ki reira; whakatenatenangia ia; tā te mea māna a Īharaira e whakawhiwhi ki tērā wāhi.
DEU 1:39 Nā, ko ā koutou pōtiki, i mea nā koutou ka waiho hei pārau, me ā koutou tama kīhai nei i mōhio i taua rā ki te pai, ki te kino, e tae rātou ki reira, ka hoatu anō e ahau a reira ki a rātou, ā, e whiwhi rātou ki tērā whenua.
DEU 1:40 Ko koutou ia, tahuri atu, haere ki te koraha, nā te huarahi ki te Moana Whero.”
DEU 1:41 Nā, ka utu koutou, ka mea mai ki ahau, “Kua hara mātou ki a Ihowā; ka haere mātou ki runga, ki te whawhai, kia rite ai ngā mea katoa i whakahau mai ai a Ihowā, tō tātou Atua, ki a tātou.” Ā, whītikiria ana e koutou, e tērā, e tērā, āna mea mō te riri, nā, ka mea koutou ki te piki ki te maunga.
DEU 1:42 Kātahi ka mea a Ihowā ki ahau, “Mea atu ki a rātou, ‘Kaua e haere, kaua anō e tū ki te riri; kāhore hoki ahau i roto i a koutou; kei patua ki te aroaro o ō koutou hoariri.’ ”
DEU 1:43 Nā, ka kōrero ahau ki a koutou; ā, kīhai koutou i rongo, heoi, ka tutū koutou ki te kupu a Ihowā, nā, hīkaka ana koutou, piki ana ki te maunga.
DEU 1:44 Nā, ka puta ngā Amori, e noho ana i taua maunga, ki te tū i a koutou, ā, whai ana i a koutou, ānō he pī, patua iho koutou i Heira, ā taea noatia a Horema.
DEU 1:45 Nā, ka hoki koutou, ka tangi ki te aroaro o Ihowā; otiia kīhai a Ihowā i whakarongo ki tō koutou reo, kīhai anō i anga tōna taringa ki a koutou.
DEU 1:46 Nā, ka noho koutou ki Karehe, ā, maha noa ngā rā, ngā rā hoki i noho ai koutou.
DEU 2:1 Nā, ka tahuri tātou, ka haere ki te koraha nā te ara ki te Moana Whero; i pērā anō me tā Ihowā i kī mai ai ki ahau; ā, he maha ngā rā i taiāwhiotia ai e tātou a Maunga Heira.
DEU 2:2 Nā, ka kōrero a Ihowā ki ahau, ka mea,
DEU 2:3 “Ka roa nei tā koutou taiāwhio i tēnei maunga; tahuri whaka te raki.
DEU 2:4 Whakahau hoki ki te iwi, mea atu: ‘Ka haere nei koutou nā ngā rohe o ō koutou tuākana, o ngā tama a Ēhau, e noho ana i Heira; ā, ka wehi rātou i a koutou. Nā, kia tūpato i a koutou;
DEU 2:5 kaua e whakapātaritari i a rātou; e kore hoki e hoatu e ahau ki a koutou tētahi wāhi o tō rātou whenua, ahakoa takahanga mō te kapu o te waewae, nō te mea kua hoatu e ahau a Maunga Heira ki a Ēhau hei kāinga tupu.
DEU 2:6 Hokona he kai i a rātou ki te moni, ka kai ai koutou; ko te wai hoki me hoko e koutou i a rātou ki te moni, ka inu ai.
DEU 2:7 “ ‘He mea hoki kua manaaki a Ihowā, tōu Atua, i a koe, i ngā mahi katoa a tōu ringa; e mōhio ana ia ki tōu haerenga i tēnei koraha nui; i tōu taha a Ihowā, tōu Atua, i ēnei tau e whā tekau; ā, kāhore koe i hapa i tētahi mea.’ ”
DEU 2:8 Ā, ka pahemo i a tātou ō tātou tuākana, ngā tama a Ēhau, e noho ana i Heira, i te ara i te mānia o Erata, o Ehiono Kēpere. Nā, ka tahuri tātou, ka haere nā te huarahi i te koraha o Moapa,
DEU 2:9 ā, ka mea a Ihowā ki ahau: “Kei whawhai koe ki ngā Moapi, kaua anō e whakatari pakanga ki a rātou; tā te mea e kore e hoatu e ahau tētahi wāhi o tōna whenua hei kāinga mōu, nō te mea kua hoatu a Ara e ahau hei kāinga mō ngā tama a Rota.”
DEU 2:10 (I noho ngā Emime ki reira i mua, he nui, he tini, he roroa tēnā iwi, rite tahi anō ki ngā Anakimi.
DEU 2:11 I kōrerotia hoki rātou he roroa, he pērā me ngā Anakimi; nā ngā Moapi ia rātou i hua he Emime.
DEU 2:12 I noho hoki ngā Hori ki Heira i mua; ā muri iho i a rātou, ko ngā tama a Ēhau, nā rātou hoki te hunanga i ērā i ō rātou aroaro, ā, noho iho ana ki tō rātou wāhi, rite tahi tā rātou ki tā Īharaira i mea ai ki te whenua i riro mai i a ia, i hōmai nei e Ihowā ki a rātou.)
DEU 2:13 “Tēnā, whakatika, whiti atu i te awa, i Terete.” Nā, ka whiti mai tātou i te awa, i Terete.
DEU 2:14 Ā, ko ngā rā i haere mai ai tātou i Karehepārenea, ā tae noa ki tō tātou whitinga mai i te awa, i Terete, e toru tekau mā waru ngā tau, nō ka poto atu i roto i te ope te whakapaparanga katoa o ngā tāngata hāpai patu; te pērā me tā Ihowā i oati ai ki a rātou.
DEU 2:15 I runga anō hoki i a rātou te ringa o Ihowā e whakamate ana i a rātou i te puni ā poto noa rātou.
DEU 2:16 Ā, ka poto katoa ngā tāngata hāpai patu te mate atu i roto i te iwi.
DEU 2:17 Nā, ka kōrero a Ihowā ki ahau, ka mea,
DEU 2:18 “Hei tēnei rā koe haere ai mā Ara, mā te rohe o Moapa;
DEU 2:19 ā, e tata atu koe ki te ritenga atu o ngā tama a Āmona, kaua e whawhai ki a rātou, kaua anō hoki e whakatari pakanga ki a rātou. E kore hoki e hoatu e ahau tētahi wāhi o te whenua o ngā tama a Āmona hei kāinga mōu, nō te mea kua hoatu e ahau hei kāinga mō ngā tama a Rota.”
DEU 2:20 (I kōrerotia hoki tērā he whenua tāngata roroa; i noho hoki ngā tāngata roroa ki reira i mua, ā, huaina iho rātou e ngā Āmoni he Hamahumi.
DEU 2:21 He nui, he maha, he roroa taua iwi, rite tahi ki ngā Anakimi. Nā Ihowā ia rātou i huna i tō rātou aroaro; ā, riro ana tō rātou kāinga i a rātou, ā, noho tonu iho i muri i a rātou;
DEU 2:22 pērā me tāna i mea ai ki ngā tama a Ēhau, e noho rā i Heira, i tāna hunanga i ngā Hori i tō rātou aroaro; nā, riro ana i a rātou tō rātou kāinga, ā, noho tonu iho rātou i muri i a rātou ā mohoa noa nei.
DEU 2:23 Nā, ko ngā Āwimi, i noho rā ki ngā pā ā puta noa ki Kaha, nā,ngā Kapatorimi i haere mai rā i Kapatoro rātou i huna, ā, noho iho i muri i a rātou.)
DEU 2:24 “Whakatika, haere, whiti atu i te awa i Aranona; nā, kua hoatu e ahau ki tōu ringa a Hihona kīngi o Hehepona, te Amori me tōna whenua; anga atu, tangohia, e riri i tā kōrua riri.
DEU 2:25 Kei tēnei rā ahau tīmata ai te whakapā i tōu pāwera, i tōu wehi ki ngā iwi i raro i te rangi, puta noa, puta noa, ina rongo ki tōu rongo, ā, ka wiri rātou, ka auē i a koe.”
DEU 2:26 Nā, tukua atu ana e ahau ngā karere i te koraha, i Keremota, ki a Hihona kīngi o Hehepona; mō te āta noho ngā kupu, ā, ka mea atu:
DEU 2:27 “Kia haere atu ahau nā tōu whenua; ka haere ahau nā te huanui; e kore ahau e peka ki matau, ki mauī.
DEU 2:28 Māu e hōmai he kai māku hei utu mō te moni, ka kai ai ahau; e hōmai hoki he wai mōku mō te moni, ka inu ai ahau; heoi anō ko te haere kau a ōku waewae –
DEU 2:29 kia rite ki tā ngā tama a Ēhau e noho ana i Heira i mea ai ki ahau, me tā ngā Moapi hoki e noho rā i Ara – kia whiti atu rā anō ahau i Horano ki te whenua i hōmai e Ihowā, e tō mātou Atua, ki a mātou.”
DEU 2:30 Heoi, kīhai a Hihona kīngi o Hehepona i pai kia haere atu tātou nā tōna kāinga; nā Ihowā hoki, nā tōu Atua i whakapakeke tōna wairua, i whakamāia hoki tōna ngākau, kia hōmai ai ia ki tōu ringa; koia anō tēnei ināianei.
DEU 2:31 Nā, ka mea a Ihowā ki ahau, “Titiro, kua tīmata ahau te tuku ki tōu aroaro i a Hihona, i tōna whenua; anga atu, tangohia tōna whenua hei kāinga.”
DEU 2:32 Nā, ka puta mai a Hihona ki te tū i a tātou, ki te whawhai hoki i Iahata, ā, ia me tōna iwi katoa.
DEU 2:33 Ā, hōmai ana ia e Ihowā, e tō tātou Atua, ki tō tātou aroaro; nā, patua ana ia e tātou, me āna tama, me tōna iwi katoa.
DEU 2:34 Ā, horo ana i a tātou ōna pā katoa i taua wā anō, hunā iho ana hoki ngā tāngata o ngā pā katoa, me ngā wāhine, me ngā pōtiki, kīhai tētahi mōrehu i mahue i a tātou.
DEU 2:35 Ko ngā kararehe ia i tangohia mā tātou, me ngā taonga hoki o ngā pā i horo i a tātou.
DEU 2:36 O Aroere atu anō, i te taha o te awa o Aranona (me te pā hoki i te awa) ā pakū noa ki Kireara, kāhore tētahi pā i māia i a tātou. Hōmai katoa ana e Ihowā, e tō tātou Atua, ki a tātou.
DEU 2:37 Heoi anō ko te whenua o ngā tama a Āmona kīhai i taea atu e koe, me ngā wāhi katoa o te awa, o Iapoko, me ngā pā o ngā maunga, me ngā wāhi katoa i kīia mai e Ihowā, e tō tātou Atua.
DEU 3:1 Kātahi tātou ka tahuri, ka haere ki runga nā te huarahi ki Pahana; nā, ka puta mai a Oka kīngi o Pahana ki te tū i a tātou, ā, ia me tōna iwi katoa, ki Eterei whawhai ai.
DEU 3:2 Ā, ka mea a Ihowā ki ahau, “Kei wehi i a ia; tā te mea kua hoatu ia e ahau ki tōu ringa, me tōna iwi katoa, me tōna oneone; ā, ka rite tāu meatanga ki a ia ki tāu i mea ai ki a Hihona, ki te kīngi o ngā Amori, i noho rā i Hehepona.”
DEU 3:3 Nā, hōmai ana e Ihowā, e tō tātou Atua, ki tō tātou ringa a Oka hoki, te kīngi o Pahana me tōna iwi katoa; ā, patua ana ia e tātou, ā, kāhore tētahi mōrehu ōna i mahue.
DEU 3:4 Nā, ka horo i a tātou i taua wā anō ōna pā katoa, kāhore he pā i kore te tangohia e tātou i a rātou – e ono tekau ngā pā, ko ngā wāhi katoa o Ārakopa, o te rangatiratanga o Oka i Pahana.
DEU 3:5 Ko ēnei pā katoa hangā rawa ki ngā taiepa teitei, ki ngā tatau, ki ngā tūtaki; hāunga ngā kāinga noho koraha, tōna tini.
DEU 3:6 I hunā katoatia ēnei e tātou, i pērātia me tā tātou i mea ai ki a Hihona, ki te kīngi o Hehepona, hunā iho ngā tāngata o ngā pā katoa, me ngā wāhine, me ngā tamariki.
DEU 3:7 Ko ngā kararehe ia, me ngā taonga o ngā pā, i tangohia mā tātou.
DEU 3:8 Nā, i taua wā anō ka tangohia e tātou i te ringa o ngā kīngi tokorua o ngā Amori te whenua i tēnei taha o Horano, o te awa, o Aranona atu ā tae noa ki Maunga Heremona.
DEU 3:9 (Ko Heremona i huaina e ngā Haironi ko Hiriona; nā ngā Amori ia i hua ko Heniri),
DEU 3:10 ko ngā pā katoa o te mānia, me Kireara katoa, me Pahana katoa, ā tae noa ki Hareka, ki Eterei, ngā pā hoki o te rangatiratanga o Oka i Pahana.
DEU 3:11 Ko Oka anake hoki, ko te kīngi o Pahana, i mahue, he mōrehu nō ngā tāngata roroa. Nā, ko tōna moenga he moenga rino; kāhore iana i Rāpata, i ngā tama a Āmona? E iwa whatīanga te roa, e whā hoki whatīanga te whānui, ki tō te tangata whatīanga.
DEU 3:12 Ā, ko tēnei whenua i riro mai nā i a tātou i taua wā, i Aroere atu, i tērā i te awa, i Aranona, me tētahi taha o te whenua maunga o Kireara, me ōna pā, i hoatu e ahau ki ngā Reupeni rātou ko ngā Kari.
DEU 3:13 Ā, ko te wāhi o Kireara i mahue me Pahana katoa, te rangatiratanga o Oka, i hoatu e ahau ki tētahi tānga o te hapū o Mānahi; (ko ngā wāhi katoa o Ārakopa me Pahana katoa e kīia nei ko te whenua o ngā tāngata roroa.
DEU 3:14 Nā Haira tama a Mānahi i tango te whenua katoa o Ārakopa, ā tae noa ki ngā rohe o Kehuri, o Maakati; ā, huaina iho te ingoa ki tōna, ko Pahana Hawotohaira, ā tēnei anō ināianei.)
DEU 3:15 Ā, tukua atu ana e ahau a Kireara mō Makiri.
DEU 3:16 I tukua e ahau ki ngā Reupeni rātou ko ngā Kari te wāhi i Kireara ā tae noa ki te awa, ki Aranona, ki waenganui o te awa me te rohe anō, ā tae noa ki te awa, ki Iapoko, ko te rohe ia ki ngā tama a Āmona.
DEU 3:17 Me te mānia hoki, me Horano, me tōna rohe, e takoto atu ana i Kinereta, taea noatia te moana i te mānia, te Moana Tote, i raro i Ahatotopihika, whaka te rāwhiti.
DEU 3:18 Ā, i whakahau ahau i a koutou i taua wā, i mea: “Kua hōmai e Ihowā e tō koutou Atua tēnei whenua kia nohoia; haere, e ngā māia katoa, me ā koutou patu i mua i ō koutou tuākana, i ngā tama a Īharaira.
DEU 3:19 Ko ā koutou wāhine ia me ā koutou pōtiki me ā koutou kararehe – e mōhio ana hoki ahau he tini ā koutou kararehe – me noho ki ō koutou pā i hoatu e ahau ki a koutou.
DEU 3:20 Kia meinga rā anō e Ihowā ō koutou tuākana kia okioki, kia pēnātia me koutou nā, kia whiwhi anō rātou ki te whenua ka hōmai nei e Ihowā, e tō koutou Atua, ki a rātou i tāwāhi o Horano. Kātahi koutou ka hoki, tērā, tērā, ki tōna kāinga i hoatu e ahau ki a koutou.”
DEU 3:21 Ā, i whakahau anō ahau i a Hohua i taua wā, i mea: “Kua kite ōu kanohi i ngā mea katoa i mea ai a Ihowā, tō koutou Atua, ki ēnei kīngi tokorua; ka pēnātia e Ihowā ngā rangatiratanga katoa ka whiti atu nei koe ki reira.
DEU 3:22 Kei wehi koutou i a rātou; nā te mea, mā Ihowā, mā tō koutou Atua, tā koutou whawhai.”
DEU 3:23 I īnoi anō ahau i taua wā ki a Ihowā, i mea:
DEU 3:24 “E te Ariki, e Ihowā, kua tīmata nei koe te whakakite ki tāu pononga i tōu nui, i tōu ringa kaha; ko wai hoki te Atua i te rangi, i te whenua rānei, e pēnā ana te mahi me āu mahi, he rite rānei ki a koe te kaha?
DEU 3:25 Tēnā rā, kia whiti atu ahau kia kite i tēnā whenua pai i tāwāhi o Horano, i tēnā maunga pai, i Repanōna anō hoki.”
DEU 3:26 Otiia, i riri mai a Ihowā ki ahau, mō tā koutou hoki, kāhore anō hoki i rongo ki ahau; nā, ka mea mai a Ihowā ki ahau, “Kāti rā tāu! Kaua e kōrero mai anō ki ahau i tēnei mea.
DEU 3:27 Piki atu ki te tihi o Pihika, ka anga ai ōu kanohi whaka te hauāuru, whaka te raki, whaka te tonga, whaka te rāwhiti, ā, mā ōu kanohi e titiro atu; tā te mea e kore koe e whiti i tēnei Horano.
DEU 3:28 Engari whakahaua a Hohua, whakatenatenangia hoki, whakamāiatia; tā te mea ko ia te haere atu i te aroaro o tēnei iwi, māna rātou e whakawhiwhi ki te whenua e kite ai koe.”
DEU 3:29 Nā, ka noho tātou ki te raorao i te ritenga atu o Petepeoro.
DEU 4:1 Nā, whakarongo mai rā ināianei, e Īharaira, ki ngā tikanga, ki ngā whakaritenga e whakaako atu nei ahau ki a koutou kia mahia; kia ora ai koutou, kia tae atu ai, kia noho ai hoki ki te whenua e hōmai nei e Ihowā, e te Atua o ō koutou mātua, ki a koutou.
DEU 4:2 Ko te kupu, e whakahaua atu nei e ahau ki a koutou, kaua e tāpiritia ki ētahi atu, kaua anō e kinitia atu tētahi wāhi ōna; kia rite ai i a koutou ngā whakahau a Ihowā, a tō koutou Atua, e whakahaua nei e ahau ki a koutou.
DEU 4:3 Kua kite ō koutou kanohi i tā Ihowā i mea ai mō Paara-Peoro. Ko ngā tāngata katoa hoki i whai i a Paara-Peoro whakamatea rawatia iho rātou e Ihowā, e tō koutou Atua, i roto i a koutou.
DEU 4:4 Ko koutou ia, i awhi rā ki a Ihowā, ki tō koutou Atua, e ora katoa ana i tēnei rā.
DEU 4:5 Titiro, kua whakaako ahau i a koutou ki ngā tikanga, ki ngā whakaritenga, ki a Ihowā, ki a tōku Atua i ako ai ki ahau, hei mahi mā koutou i waenganui o te whenua e haere atu nei koutou ki reira ki te tango.
DEU 4:6 Nā, puritia, mahia; ko tō koutou whakaaro nui hoki ia, me tō koutou mōhio ki te titiro mai a ngā tauiwi, a ngā mea e rongo ana ki ēnei tikanga katoa, ā, ka mea rātou, “Koia hoki, he hunga mōhio, he hunga tūpato tēnei iwi nui.”
DEU 4:7 Ko wai hoki te iwi nui, e whiwhi ana ki te atua pēnei te tata ki a rātou me Ihowā, me tō tātou Atua, e tata mai nei i ā tātou kārangaranga katoa ki a ia?
DEU 4:8 Ko wai hoki te iwi nui, i a ia nei ngā tikanga me ngā whakaritenga tika, pēnei me tēnei ture katoa e hoatu nei e ahau ki tō koutou aroaro i tēnei rā?
DEU 4:9 Māu ia koe e tiaki, me tiaki mārie anō tōu wairua, kei wareware ki ngā mea i kite ai ōu kanohi, kei riro atu hoki i roto i tōu ngākau, i ngā rā katoa e ora ai koe; engari me whakaako āu tama, me ngā tama hoki a āu tama ki ēnā mea –
DEU 4:10 ki te rā anō hoki i tū ai koe i te aroaro o Ihowā, o tōu Atua, i Horepa, i a Ihowā meatanga mai ki ahau, “Huihuia mai te iwi ki ahau, ā, māku e mea kia rongo rātou i āku kōrero, kia whakaakona ai kia wehi i ahau i ngā rā katoa e ora ai rātou i runga i te whenua, hei whakaako atu mā rātou ki ā rātou tama.”
DEU 4:11 Nā, ka whakatata koutou, ka tū hoki i raro iho o te maunga; ko te maunga hoki kā tonu i te ahi, ā, kakati noa ki waenganui o te rangi, te pōuri! Te kapua! Nā, pōuri kerekere.
DEU 4:12 Nā, ka kōrero mai a Ihowā ki a koutou i waenganui o te ahi. Ko te puakanga mai o ngā kupu tā koutou i rongo ai, tēnā ko tētahi āhua kīhai i kitea; heoi anō ko te reo kau.
DEU 4:13 Nā, ka kauwhautia e ia ki a koutou tāna kawenata, i whakahaua e ia ki a koutou kia whakaritea, arā ngā ture kotahi tekau, ā, tuhituhia iho e ia ki ngā papa kōhatu e rua.
DEU 4:14 I whakahau anō a Ihowā i ahau i taua wā, kia whakaakona koutou ki ngā tikanga, ki ngā whakaritenga, hei mahi mā koutou ki te whenua e haere atu nei koutou ki reira ki te tango.
DEU 4:15 Tiakina mārietia rā ō koutou wairua; kīhai hoki koutou i kite i tētahi āhua, me he aha, me he aha, i te rā i kōrero ai a Ihowā ki a koutou i Horepa, i waenganui o te ahi;
DEU 4:16 kei hē koutou, kei hangā i te whakapakoko mā koutou, i te ritenga o tētahi tauira – i te āhua o te tāne, o te wahine rānei;
DEU 4:17 i te āhua o tētahi kararehe o te whenua, i te āhua o tētahi manu whai parirau e rererere ana i te rangi,
DEU 4:18 i te āhua o tētahi mea e ngōkingōki ana i te whenua, i te āhua o tētahi ika i roto i te wai i raro iho o te whenua.
DEU 4:19 Kei anga ake rānei ōu kanohi ki te rangi, ka kite i te rā, i te marama rānei, i ngā whetū, i te ope katoa o te rangi, nā, ka tākina atu koe ki te koropiko atu ki ēnā mea, ki te mahi atu hoki ki ēnā mea, i tuwhaina mai nei e Ihowā, e tōu Atua, mō ngā iwi katoa i raro o te rangi, puta noa, puta noa.
DEU 4:20 Nā Ihowā ia koutou i tango, nāna hoki koutou i whakaputa mai i roto i te oumu rino, i Īhipa, kia waiho ai hei iwi tupu māna, me koutou ināianei.
DEU 4:21 I riri mai anō a Ihowā ki ahau mō tā koutou hoki, ā, oati mai ana e kore ahau e whiti i Horano, e kore anō e tae ki te whenua pai, ka hōmai nei e Ihowā, e tōu Atua, ki a koe hei kāinga tupu.
DEU 4:22 Engari ka mate ahau ki tēnei whenua, e kore ahau nei e whiti i Horano; ko koutou ia ka whiti, ka tango hoki i taua whenua pai.
DEU 4:23 Kia tūpato, kei wareware ki te kawenata a Ihowā, a tō koutou Atua, i whakaritea e ia ki a koutou, kei hanga hoki he whakapakoko mā koutou ki te ritenga o tētahi mea i rīria mai nei koe e Ihowā, e tōu Atua.
DEU 4:24 Ko Ihowā hoki, ko tōu Atua, he ahi e kai ana, he Atua hae ia.
DEU 4:25 E whānau āu tamariki me ngā tamariki a āu tamariki, ā, ka roa tō koutou noho ki te whenua, ā, ka taka koutou, ka hanga hoki i te whakapakoko ki te āhua o tētahi mea, ā, ka mahi i te mea e kino ana ki te titiro a Ihowā, a tōu Atua, hei whakapātaritari i a ia.
DEU 4:26 Ka waiho e ahau i tēnei rā te rangi me te whenua hei kaititiro mō koutou, mō te matenga hoki e hohoro ai koutou te mate atu i te whenua e whiti atu nei koutou i Horano ki reira, ki te tango; e kore e roa ō koutou rā ki reira, engari ka tino ngaro rawa koutou.
DEU 4:27 Ā, ka whakamarara a Ihowā i a koutou ki ngā tauiwi, ā, he hunga torutoru o koutou e toe i roto i ngā tauiwi, e kawea atu ai koutou e Ihowā ki reira.
DEU 4:28 Ā, ka mahi koutou i reira ki ngā atua i hangā e ngā ringa tangata, ki te rākau, ki te kōhatu, e kore nei e kite, e kore e rongo, e kore e kai, e kore anō e hongi.
DEU 4:29 Otiia ki te rapu koe i reira i a Ihowā, i tōu Atua, nā, ka kitea e koe, ki te whakapaua katoatia tōu ngākau me tōu wairua ki te rapu i a ia.
DEU 4:30 Ki te mate koe, ā, ka pono ki a koe ēnei mea katoa i ngā rā ā muri ake nei, ka hoki koe ki a Ihowā, ki tōu Atua, ka whakarongo anō hoki ki tōna reo.
DEU 4:31 He Atua tohu hoki a Ihowā, tōu Atua; e kore ia e whakarere i a koe, e kore anō hoki e whakangaro i a koe, e kore hoki e wareware ki te kawenata ki ōu mātua, i oati ai ia ki a rātou.
DEU 4:32 Ui atu hoki ki ngā rangi onamata, ō mua i a koe, o te rā i hangā ai e te Atua te tangata ki runga ki te whenua, i tētahi pito o te rangi pakū noa ki tētahi pito o te rangi, i puta mai rānei tētahi mea hei rite mō tēnei mea te nui, i rangona rānei he rite ki tēnei?
DEU 4:33 I rongo rānei tētahi iwi i te reo o te Atua e kōrero mai ana i waenganui o te ahi, me tāu i rongo ai, ā, ora ake?
DEU 4:34 I whakamātau rānei te Atua te haere iho, te tango i tētahi iwi māna waenganui i tētahi iwi kē, i runga i ngā whakamātau, i ngā tohu, i ngā merekara, i te whawhai, i te ringaringa kaha, i te ringaringa mārō, i ngā whakawehi nui, i ngā mea katoa i mea ai a Ihowā, tō koutou Atua ki a koutou, ki tō koutou aroaro i Īhipa?
DEU 4:35 I whakakitea mai ai ēnā mea ki a koe kia mōhio ai koe ki a Ihowā, ko ia te Atua; kāhore kē atu i a ia.
DEU 4:36 I meatia koe e ia kia rongo ki tōna reo i te rangi, hei whakaako i a koe; ā, i te whenua i whakakitea e ia tāna ahi nui ki a koe; ko āna kupu hoki i rangona e koe i waenganui i te ahi.
DEU 4:37 Ā, nō te mea i aroha ia ki ōu mātua, koia i whiriwhiria ai e ia ō rātou uri i muri i a rātou, i whakaputaina mai ai hoki koe i Īhipa, me tāna titiro tonu iho, i runga anō i tōna kaha nui;
DEU 4:38 i mea ai ki te pei i ngā iwi he nui, he kaha i a koe i tōu aroaro, ki te kawe i a koe, ki te hoatu i tō rātou oneone ki a koe hei kāinga pūmau; koia tēnei ināianei.
DEU 4:39 Nā, kia mōhio koe i tēnei rā, kia whakaaro hoki i roto i tōu ngākau, ko Ihowā, ko ia te Atua i te rangi i runga, i te whenua hoki i raro; kāhore kē atu.
DEU 4:40 Nā, kia mau ki āna tikanga, ki āna whakahau, e whakahaua nei e ahau i tēnei rā ki a koe, hei pai hoki mōu, mō āu tama i muri i a koe, kia roa ai ōu rā ki te whenua ka hoatu nei e Ihowā, e tōu Atua ki a koe ā ake tonu atu.
DEU 4:41 Kātahi a Mohi ka motuhake i ngā pā e toru i tēnei taha o Horano, whaka te rāwhiti;
DEU 4:42 hei rerenga atu mō te tangata whakamate, i whakamate i tōna hoa, otiia, ehara i te mea āta whakaaro, ehara hoki i te hoariri nōna i mua. Nā, ka rere ia ki tētahi o aua pā, ā, ka ora:
DEU 4:43 arā, i Pehere i te koraha, i te whenua mānia, mō ngā Reupeni; i Rāmoto i Kireara, mō ngā Kari; i Korana i Pahana, mō ngā Mānahi.
DEU 4:44 Ā, ko te ture tēnei i hoatu e Mohi ki te aroaro o ngā tama a Īharaira.
DEU 4:45 Ko ngā whakaaturanga anō ēnei, me ngā tikanga, me ngā whakaritenga i kōrerotia e Mohi ki ngā tama a Īharaira, i tō rātou putanga mai i Īhipa,
DEU 4:46 i tēnei taha o Horano, i te raorao i te ritenga atu o Petepeoro, i te whenua o Hihona, o te kīngi o ngā Amori, i noho rā i Hehepona, i patua rā e Mohi rātou ko ngā tama a Īharaira, i tō rātou putanga mai i Īhipa.
DEU 4:47 Ā, tangohia ana tōna whenua e rātou, me te whenua hoki o Oka o te kīngi o Pahana, tō ngā kīngi tokorua o ngā Amori, i tēnei taha o Horano, whaka te rāwhiti:
DEU 4:48 o Aroere i te taha o te awa o Aranona, a Maunga Hiona, arā a Heremona,
DEU 4:49 me te Arapaha katoa i tērā taha o Horano, whaka te rāwhiti, ā tae noa ki te moana o te Arapaha, i raro iho i ngā tītahatanga o Pihika.
DEU 5:1 Ā, i karanga atu a Mohi ki a Īharaira katoa, i mea ki a rātou: Whakarongo, e Īharaira, ki ngā tikanga, ki ngā whakaritenga e kōrerotia nei e ahau ki ō koutou taringa i tēnei rā, ka ako ai, ka pupuri ai, ka mahi ai.
DEU 5:2 I whakarite a Ihowā, tō tātou Atua, i te kawenata ki a tātou i Horepa.
DEU 5:3 Kīhai a Ihowā i whakarite i tēnei kawenata ki ō tātou mātua; engari ki a tātou, ki a tātou nei anō, e ora katoa nei i konei ināianei.
DEU 5:4 I kōrero ā-kanohi mai a Ihowā ki a koutou i te maunga i waenganui o te ahi.
DEU 5:5 (Ko ahau i tū i waenganui o Ihowā, o koutou, i taua wā, hei whakapuaki ki a koutou i te kōrero a Ihowā. I wehi hoki koutou i te ahi, kīhai hoki i piki ake ki te maunga.) I mea ia:
DEU 5:6 “Ko Ihowā ahau, ko tōu Atua, nāku koe i whakaputa mai i te whenua o Īhipa, i te whare pononga.
DEU 5:7 “Aua ētahi atua kē atu mōu ki mua i ahau.
DEU 5:8 “Kei hanga koe i te whakapakoko mōu, i tētahi ritenga rānei o ngā mea o te rangi i runga, o te whenua rānei i raro, o te wai rānei i raro i te whenua.
DEU 5:9 Kei koropiko koe ki ēnā mea, kei mahi rānei ki ēnā mea; ko Ihowā hoki ahau ko tōu Atua, he Atua hae, e mea ana i ngā hara o ngā mātua kia tau iho ki ngā tamariki a te toru, te whā rā anō o ngā whakatupuranga o te hunga e kino ana ki ahau;
DEU 5:10 e whakaputa aroha ana hoki ki ngā mano, ki te hunga e aroha ana ki ahau, e whakarite ana i āku ture.
DEU 5:11 “Kei whakahuatia noatia e koe te ingoa o Ihowā, o tōu Atua; e kore hoki a Ihowā e mea he harakore te tangata e whakahua noa ana i tōna ingoa.
DEU 5:12 “Kia mau ki te rā hāpati, kia whakatapua, kia pērā me tā Ihowā, me tā tōu Atua i whakahau ai ki a koe.
DEU 5:13 E ono ngā rā e mahi ai koe, e mea ai hoki i āu mea katoa.
DEU 5:14 Tēnā ko te rā whitu, he hāpati nō Ihowā, nō tōu Atua; kaua e mahia tētahi mahi i reira – e koe, e tāu tama, e tāu tamāhine, e tāu pononga tāne, e tāu pononga wahine, e tāu kau, e tāu kāihe, e āu kararehe katoa hoki, me tōu tangata kē i roto i ōu tatau; kia okioki ai tāu pononga tāne, tāu pononga wahine, kia pēnā ai me koe.
DEU 5:15 Kia mahara anō he pononga koe i te whenua o Īhipa, ā, nā Ihowā, nā tōu Atua koe i whakaputa mai i reira, i runga i te ringa kaha, i te ringa mārō. Nā reira i whakahau ai a Ihowā, tōu Atua, i a koe kia whakaritea te rā hāpati.
DEU 5:16 “Whakahōnoretia tōu pāpā me tōu whaea, kia rite ki tā Ihowā, ki tā tōu Atua i whakahau ai ki a koe; kia roa ai ōu rā, kia whiwhi ai hoki koe ki te pai i runga i te whenua e hōmai nei e Ihowā, e tōu Atua, ki a koe.
DEU 5:17 “Aua e patu.
DEU 5:18 “Aua e pūremu.
DEU 5:19 “Aua e tāhae.
DEU 5:20 “Aua e whakapae teka ki tōu hoa.
DEU 5:21 “Aua hoki e hiahia ki te wahine a tōu hoa, aua hoki e hiahia ki te whare o tōu hoa, ki tāna māra, ki tāna pononga tāne, ki tāna pononga wahine, ki tāna kau, ki tana kāihe, ki tētahi mea rānei a tōu hoa.
DEU 5:22 “Ko ēnei kupu i kōrerotia mai e Ihowā ki tō koutou huihui katoa i te maunga, i waenganui o te ahi, o te kapua, o te pōuri hoki, he nui anō hoki te reo; ā, kāhore atu anō āna kupu. Ā, tuhituhia iho e ia ki ngā papa kōhatu e rua, ā, hōmai ana ki ahau.”
DEU 5:23 Ā, nō tō koutou rongonga i te kupu i roto i te pōuri, ko te maunga hoki e kā ana i te ahi, ka whakatata mai ki ahau, arā ngā upoko katoa o ō koutou iwi, me ō koutou kaumātua;
DEU 5:24 ā, ka mea mai, “Nā, kua whakakite mai a Ihowā, tō tātou Atua, i tōna korōria, i tōna nui ki a tātou, kua rongo hoki tātou i tōna reo i roto i te ahi; kua kite tātou i tēnei rā ka kōrero a Ihowā ki te tangata, ā, ka ora anō ia.
DEU 5:25 Nā, kia mate mātou hei aha? Ka pau hoki mātou i tēnei ahi nui; ki te rongo anō mātou i te reo o Ihowā, o tō tātou Atua, nā, ka mate mātou.
DEU 5:26 Ko wai hoki o ngā kikokiko katoa i rongo ki te reo o te Atua ora e kōrero ana i roto i te ahi, me tātou nei i rongo, ā, i ora anō?
DEU 5:27 Māu e whakatata atu, e whakarongo ki ngā mea katoa e kōrero ai a Ihowā, tō tātou Atua; māu hoki e kōrero ki a mātou ngā mea katoa e kōrero ai a Ihowā, tō tātou Atua, ki a koe; ā, mā mātou e whakarongo, e mahi.”
DEU 5:28 Ā, ka rongo mai a Ihowā i te puaki o ā koutou kupu, i a koutou e kōrero ana ki ahau; nā, ka mea a Ihowā ki ahau: “Kua rongo ahau i te puaki mai o ngā kupu a te iwi nei, i kōrero rā rātou ki a koe; he pai ngā mea katoa i kōrero rā rātou.
DEU 5:29 Ē! Me i pēnā ō rātou ngākau i roto i a rātou, te wehi i ahau, te pupuri hoki i āku whakahau katoa i ngā rā katoa, kia whiwhi ai rātou ki te pai me ā rātou tamariki hoki ake tonu atu!
DEU 5:30 “Haere, mea atu ki a rātou, ‘Hoki atu koutou ki ō koutou tēneti.’
DEU 5:31 Ko koe ia, e tū ki konei tāua, ā, māku e kōrero ki a koe ngā whakahau katoa, me ngā tikanga, me ngā whakaritenga e whakaako ai koe ki a rātou, hei mahi mā rātou ki te whenua e hoatu nei e ahau kia nohoia e rātou.”
DEU 5:32 Nā, kia mahara koutou kia pērā te mahi me tā Ihowā, me tā tō koutou Atua, i whakahau ai ki a koutou; kaua e peka kē ki matau, ki mauī.
DEU 5:33 Haere i ngā huarahi katoa i whakahau ai a Ihowā, tō koutou Atua ki a koutou, kia ora ai koutou, kia whiwhi ai ki te pai, kia roa ai hoki ō koutou rā ki te whenua ka riro nei i a koutou.
DEU 6:1 Nā, ko te whakahau tēnei – ko ngā tikanga me ngā whakaritenga – i whakahaua mai e Ihowā, e tō koutou Atua, kia whakaakona atu ki a koutou, hei mahi mā koutou ki te whenua e haere atu nei koutou ki reira ki te tango.
DEU 6:2 Kia wehi ai koe i a Ihowā, i tōu Atua, kia puritia ai āna tikanga katoa, me āna whakahau e whakahaua nei e ahau ki a koe, e koe, e tāu tama, e te tama hoki a tāu tama, i ngā rā katoa e ora ai koe; kia roa ai hoki ōu rā.
DEU 6:3 Nā, whakarongo, e Īharaira, kia mahara hoki kia mahia ēnei mea, kia whiwhi ai koe ki te pai, kia nui rawa ai hoki koutou, kia pērā ai me tā Ihowā, me tā te Atua o ōu mātua i kōrero ai ki a koe, ki te whenua e rerengia ana e te waiū, e te honi.
DEU 6:4 Whakarongo, e Īharaira: Ko Ihowā, ko tō tātou Atua, he Ihowā kotahi;
DEU 6:5 ā, me whakapau katoa tōu ngākau, tōu wairua, tōu kaha ki te aroha ki a Ihowā, ki tōu Atua.
DEU 6:6 Hei roto anō i tōu ngākau ēnei kupu e whakahau atu nei ahau ki a koe i tēnei rā.
DEU 6:7 Whakaakona mārietia atu hoki ki āu tamariki, kōrerotia i a koe e noho ana i tōu whare, i a koe e haere ana i te huarahi, i a koe e takoto ana, i tōu aranga ake hoki.
DEU 6:8 Me here e koe hei tohu ki tōu ringa, hei pare anō ēnā mea ki waenganui o ōu kanohi.
DEU 6:9 Tuhituhia anō hoki ki ngā pou tatau o tōu whare, ki ōu tatau hoki.
DEU 6:10 Ā, ā mua ake nei, ina kawea koe e Ihowā, e tōu Atua, ki te whenua i oati ai ia ki ōu mātua, ki a Āperahama, ki a Īhaka, ki a Hākopa, ā, ka hōmai e ia ki a koe he pā nunui, papai, kīhai nei i hangā e koe,
DEU 6:11 he whare kī tonu i ngā mea papai katoa, kīhai nei i whakakīia e koe, he poka wai oti rawa te keri, kīhai i keria e koe, he māra wāina, he ōriwa, kīhai nei i whakatōkia e koe; ā, ka kai koe, ka mākona;
DEU 6:12 kia tūpato ki a koe i reira, kei wareware ki a Ihowā, nāna nei koe i whakaputa mai i te whenua o Īhipa, i te whare pononga.
DEU 6:13 Ko Ihowā, ko tōu Atua tāu e wehi ai, me mahi anō hoki ki a ia, ko tōna ingoa hoki hei oatitanga māu.
DEU 6:14 Kei whai ki ngā atua kē, o ngā atua o ngā tauiwi i tētahi taha o koutou, i tētahi taha;
DEU 6:15 he Atua hae hoki a Ihowā, tōu Atua i waenganui i a koe; kei mura te riri o Ihowā, o tōu Atua ki a koe, ā, ka ngaro koe i te mata o te whenua.
DEU 6:16 Kei whakamātautau i a Ihowā, i tō koutou Atua, me koutou rā i whakamātautau i a ia i Maha.
DEU 6:17 Puritia mārietia ngā whakahau a Ihowā, a tō koutou Atua, me āna whakaatu, me āna tikanga, i whakahaua mai nei e ia ki a koe.
DEU 6:18 Mahia hoki te mea tika, te mea pai ki te aroaro o Ihowā; kia whiwhi ai koe ki te pai, kia tae atu ai, kia noho ai ki te whenua pai i oatitia e Ihowā ki ōu mātua,
DEU 6:19 kia peia ai ōu hoariri katoa i tōu aroaro, kia rite ai ki tā Ihowā i kī ai.
DEU 6:20 Ā, ki te ui tāu tama ki a koe ā mua, ki te mea, “Hei aha ngā whakaatu, me ngā tikanga, me ngā whakaritenga, i whakahaua mai nei e Ihowā, e tō tātou Atua, ki a koutou?”
DEU 6:21 Nā, ka mea atu koe ki tāu tama, “He pononga mātou nā Parao i Īhipa; ā, he kaha te ringa i whakaputaina mai ai mātou e Ihowā i Īhipa.
DEU 6:22 Ā, whakakitea mai ana e Ihowā he tohu, he merekara, he nui, he nanakia ki Īhipa, ki a Parao, ki tōna whare katoa, me te titiro anō mātou;
DEU 6:23 ā, whakaputaina mai ana mātou e ia i reira, kia kawea mai ai mātou, kia hōmai ai e ia te whenua i oati ai ia ki ō tātou mātua.
DEU 6:24 Ā, whakahaua ana tātou e Ihowā kia mahia ēnei tikanga katoa, kia wehi i a Ihowā, i tō tātou Atua, hei pai mō tātou i ngā rā katoa, kia whakaorangia ai tātou e ia, kia pēnei ai i tēnei ināianei.
DEU 6:25 Ā, hei tika mō tātou ki te mau te mahi i ēnei whakahau katoa ki te aroaro o Ihowā, o tō tātou Atua, ki te pērā me tāna i whakahau ai ki a tātou.”
DEU 7:1 E kawe a Ihowā, tōu Atua, i a koe ki te whenua e haere atu nei koe ki reira ki te tango, ā, ka peia ngā iwi maha i tōu aroaro – te Hiti, te Kirikahi te Amori, te Kanaani, te Perihi, te Hiwi, me te Iepuhi, ngā iwi e whitu, he nui ake, he kaha ake i a koe –
DEU 7:2 ā, ka tukua rātou e Ihowā, e tōu Atua, ki tōu aroaro; nā, me patu rātou e koe, me whakamōtī rawa rātou. Kaua e whakaritea he kawenata ki a rātou, kaua hoki rātou e tohungia.
DEU 7:3 Kaua hoki koe e mārenarena ki a rātou; ko tāu tamāhine kaua e tukua atu mā tāna tama, ko tāna tamāhine hoki kaua e tangohia mā tāu tama.
DEU 7:4 Nō te mea ka whakariroia kētia e ia tāu tama, kei whai i ahau, kia mahi ai rātou ki ngā atua kē, ā, ka mura te riri o Ihowā ki a koutou, ka huna whakarere hoki ia i a koe.
DEU 7:5 Engari, me pēnei tā koutou ki a rātou; ko ā rātou āta, wāhia, ko ā rātou pou, pākarua, ko ā rātou Aherimi, tuaina, ko ā rātou whakapakoko, tahuna ki te ahi.
DEU 7:6 Nō te mea he iwi tapu koe nā Ihowā, nā tōu Atua; i whiriwhiria ai koe e Ihowā, e tōu Atua, kia waiho ai hei iwi motuhake māna i ngā iwi katoa i te mata o te whenua.
DEU 7:7 Ehara i te nui nō koutou i ngā iwi katoa i matenui ai a Ihowā ki a koutou, i whiriwhiri ai i a koutou; he iti rawa hoki koutou i ngā iwi katoa.
DEU 7:8 Engari, he aroha nō Ihowā ki a koutou, he whakamana hoki nāna i te oati i oati ai ia ki ō koutou mātua, i whakaputa mai ai a Ihowā i a koutou ki te ringa kaha, i hoko ai i a koe i roto i te whare pononga, i te ringa hoki o Parao, o te kīngi o Īhipa.
DEU 7:9 Nā, kia mōhio koe ki a Ihowā, ki tōu Atua, ko te Atua ia, ko te Atua pono, e pupuri ana i te kawenata, i te atawhai mō te hunga e aroha ana ki a ia, e pupuri ana i āna whakahau ā mano noa ngā whakatupuranga;
DEU 7:10 e hoatu ana anō e ia ki tō rātou aroaro te utu mō te hunga e kino ana ki a ia, arā he whakangaro mō rātou. E kore ia e whakaroa ki te tangata e kino ana ki a ia, ka hoatu anō e ia he utu ki tōna aroaro.
DEU 7:11 Inā, puritia ngā whakahau, ngā tikanga, me ngā whakaritenga e whakahau nei ahau ki a koe i tēnei rā kia mahia.
DEU 7:12 Ā tēnei ake, ki te rongo koutou ki ēnei whakaritenga, ki te puritia, ki te mahia, nā, ka whakamanā e Ihowā, e tōu Atua, te kawenata ki a koe, me te atawhai i oati ai ia ki ōu mātua.
DEU 7:13 Ā, ka aroha ia ki a koe, ka manaaki i a koe, ka whakanui hoki i a koe, ka manaaki anō hoki i te hua o tōu kōpū, i te hua o tōu oneone, i tāu wīti, i tāu wāina, i tāu hinu, i ngā whānau a āu kau, i ngā kāhui o āu hipi, ki te whenua i oati ai ia ki ōu mātua kia hoatu ki a koe.
DEU 7:14 Ka manaakitia koe, nui atu i ngā iwi katoa. E kore e pākoko te tāne, te wahine rānei, i roto i a koe, i roto rānei i āu kararehe.
DEU 7:15 Ka tangohia atu anō e Ihowā ngā tūrorotanga katoa, e kore rawa hoki ia e whakapā ki a koe i tētahi o ngā mate nanakia o Īhipa, i kite rā koe; engari ka whakapākia atu e ia ki ōu hoariri katoa.
DEU 7:16 Ā, ka whakapaua e koe ngā iwi katoa e hoatu nei e Ihowā, e tōu Atua, ki a koe; kaua tōu kanohi e tohu i a rātou. Aua anō koe e mahi ki ō rātou atua; he rore hoki tēnā mōu.
DEU 7:17 Ki te mea koe i roto i tōu ngākau, “He nui ngā iwi nei i ahau; me pēhea e taea ai rātou te pei e ahau?”
DEU 7:18 Kei wehi i a rātou, kia āta mahara ki ngā mea i meatia e Ihowā, e tōu Atua, ki a Parao, ki Īhipa katoa;
DEU 7:19 ki ngā whakamātau nunui i kite rā ōu kanohi, ki ngā tohu, ki ngā merekara, ki te ringa kaha, ki te tākakau mārō, i tangohia mai ai koe e Ihowā, e tōu Atua. Ka pērātia e Ihowā, e tōu Atua, ngā iwi katoa e wehi nā koe.
DEU 7:20 Ka tukua atu anō e Ihowā, e tōu Atua, te horonete ki a rātou, kia mōtī rā anō ngā mea i mahue, me ngā mea i ngaro atu i ōu kanohi.
DEU 7:21 Kaua e wehi i a rātou; tā te mea kei waenganui i a koe a Ihowā, tōu Atua; he Atua nui ia, e wehingia ana.
DEU 7:22 Ā, ka whakangaromia rikirikitia ēnei iwi e Ihowā, e tōu Atua, i tōu aroaro; e kore e āhei i a koe te huna wawe i a rātou, kei hira ake i a koe ngā kīrehe mohoao o te whenua.
DEU 7:23 Otiia, ka tukua atu rātou e Ihowā, e tōu Atua, ki tōu aroaro, ā, he nui te hunanga e hunā ai rātou e ia, kia ngaro rā anō rātou.
DEU 7:24 Ā, ka hoatu e ia ō rātou kīngi ki tōu ringa, ā, ka whakangaromia e koe ō rātou ingoa i raro i te rangi; e kore e tū tētahi tangata ki tōu aroaro, kia ngaro rā anō rātou i a koe.
DEU 7:25 Ko ngā whakapakoko o ō rātou atua me tahu ki te ahi; aua e minamina atu ki te hiriwa, ki te kōura rānei e mau ana ki aua mea, kaua hoki e tangohia mōu, kei māhangatia koe e ēnā mea. He mea whakarihariha hoki ēnā ki a Ihowā, ki tōu Atua.
DEU 7:26 Kaua hoki e maua te mea whakarihariha ki roto ki tōu whare; kei kangā koe, kei pērātia me taua mea; engari, kia tino whakarihariha koe, kia tino anuanu; he mea hoki kua oti te kanga.
DEU 8:1 Kia mahara kia mahia ngā whakahau katoa e whakahaua nei e ahau i tēnei rā, kia ora ai koutou, kia tini ai, kia tae ai hoki, kia whiwhi ai ki te whenua i oati rā a Ihowā ki ō koutou mātua.
DEU 8:2 Kia mahara hoki ki te ara katoa i ārahi ai a Ihowā, tōu Atua, i a koe i te koraha, i ēnei tau e whā tekau, kia iro ai koe, hei whakamātautau hoki i a koe, kia mōhiotia ai ngā aha noa i roto i tōu ngākau, ka pupuri rānei koe i āna whakahau, kāhore rānei.
DEU 8:3 Ā, whakawhiua ana koe e ia, whakamatea ana ki te kai, whāngaia ana ki te mana, kīhai nei i mōhiotia e koe, kīhai anō i mōhiotia e ōu mātua; kia whakamōhio ai ia i a koe e kore te tangata e ora i te taro kau, engari mā ngā kupu katoa e puta mai ana i te māngai o Ihowā ka ora ai te tangata.
DEU 8:4 Kīhai tōu kākahu i tawhitotia ki runga ki a koe, kīhai anō hoki tōu waewae i pupuhi, i ēnei tau e whā tekau.
DEU 8:5 Ā, ka mahara koe i roto i tōu ngākau, e papaki ana a Ihowā, tōu Atua i a koe, e pērā ana me te tangata e papaki ana i tāna tama.
DEU 8:6 Nā, kia mau ki ngā whakahau a Ihowā, a tōu Atua, haere hoki i āna huarahi me te wehi anō ki a ia.
DEU 8:7 Nā te mea e kawe ana a Ihowā, tōu Atua, i a koe ki te whenua pai, ki te whenua o ngā awa wai, o ngā puna, o ngā wai hōhonu, e pupū mai ana i ngā raorao, i ngā maunga;
DEU 8:8 ki te whenua o te wīti, o te pārei, o te wāina, o te piki, o te pamekaranete; ki te whenua o te hinu ōriwa, o te honi,
DEU 8:9 ki te whenua e kore ai e onge tāu taro e kai ai koe, e kore rawa ai koe e hapa i tētahi mea; ki te whenua he rino ōna kōhatu, ka keri anō koe i te parāhi i roto i ōna maunga.
DEU 8:10 Ā, ka kai koe, ka mākona, nā, kia whakapai atu koe ki a Ihowā, ki tōu Atua, mō te whenua pai kua hōmai e ia ki a koe.
DEU 8:11 Kia tūpato kei wareware ki a Ihowā, ki tōu Atua, kei kore koe e pupuri i āna whakahau, i āna whakaritenga, i āna tikanga, e whakahaua nei e ahau ki a koe i tēnei rā.
DEU 8:12 Kei kai koe, ā, ka mākona, kei hanga hoki i ngā whare papai, ā, noho iho;
DEU 8:13 ā, ka tini haere āu kau, me āu hipi ka nui hoki te hiriwa me te kōura ki a koe, ā, ka tini haere ngā mea katoa ki a koe;
DEU 8:14 nā, ka kake tōu ngākau, ā, ka wareware koe ki a Ihowā, ki tōu Atua, i whakaputa mai rā i a koe i te whenua o Īhipa, i te whare pononga;
DEU 8:15 i arataki hoki i a koe i tēnā koraha nui, whakamataku, i reira nei ngā nākahi tū a-ahi me ngā kopiona, me te whenua matewai, kāhore o reira wai. I whakaputa mai anō i te wai mōu i roto i te kōhatu kiripaka;
DEU 8:16 i whāngai i a koe i te koraha ki te mana, kīhai nei i mōhiotia e ōu mātua; kia iro ai koe, kia whakamātautau ai hoki ia i a koe, ā, kia pai ai te tukunga iho ki a koe.
DEU 8:17 Ā, ka mea koe i roto i tōu ngākau, “Nā tōku kaha, nā te uaua hoki o tōku ringa, i whiwhi ai ahau ki ēnei taonga.”
DEU 8:18 Engari, kia mahara ki a Ihowā, ki tōu Atua, nāna hoki i hōmai te kaha ki a koe i whiwhi ai ki te taonga; kia mana ai tāna kawenata i oati ai ia ki ōu mātua, ā, ka rite nei ināianei.
DEU 8:19 Nā, ki te wareware koe ki a Ihowā, ki tōu Atua, ā, ka whai ki ngā atua kē, ka mahi ki a rātou, ka koropiko atu hoki ki a rātou, māku e kī atu ki a koutou i tēnei rā, ka ngaro rawa koutou.
DEU 8:20 Ka rite ki ngā iwi e whakangaromia nei e Ihowā i tō koutou aroaro, ka pērā anō koutou, ka ngaro; mō koutou kīhai i rongo ki te reo o Ihowā, o tō koutou Atua.
DEU 9:1 Whakarongo, e Īharaira! Ko ā tēnei rā koe whiti ai i Horano, ā, ka tae, ka riro i a koe ngā iwi nunui ake, kaha ake i a koe, ngā pā nunui hoki, he mea taiepa ā tutuki noa ki te rangi,
DEU 9:2 he iwi nunui, he iwi roroa, ko ngā tama a te Anakimi, e mōhio nā koe. Kua rongo nā koe i te pepeha mō rātou, “Ko wai e tū ki te aroaro o ngā tama a Anaka?”
DEU 9:3 Nā, kia mōhio koe i tēnei rā, ko Ihowā, ko tōu Atua, ko ia kei tōu aroaro e haere ana ānō he ahi e kai ana; māna rātou e huna, māna hoki e whakamate tō rātou tara ki tōu aroaro; ā, ka peia rātou e koe, ka meinga kia hohoro tō rātou ngaro, ka rite ki tā Ihowā i kōrero ai ki a koe.
DEU 9:4 Kei kōrero koe i roto i tōu ngākau, ua pei a Ihowā, tōu Atua, i a rātou i tōu aroaro, kei mea, “He tika nōku i kawe mai ai a Ihowā i ahau ki te tango i tēnei whenua.” Kāhore, nō te kino o ēnei iwi i pei ai a Ihowā i a rātou i tōu aroaro.
DEU 9:5 Ehara, i te tika nōu, i te tapatahi rānei o tōu ngākau, i haere ai koe ki te tango i tō rātou whenua; engari he kino nō ēnei iwi i pei ai a Ihowā, tōu Atua, i a rātou i tōu aroaro, he mea hoki kia mana ai te kupu i oati ai a Ihowā ki ōu mātua, ki a Āperahama, ki a Īhaka, ki a Hākopa.
DEU 9:6 Inā, kia mōhio koe, ehara i te tika nōu e hoatu nei e Ihowā, e tōu Atua, tēnei whenua pai ki a koe, kia tangohia e koe; nō te mea he iwi kakī mārō koe.
DEU 9:7 Kia mahara, kei wareware ki āu whakataritari ki a Ihowā, ki tōu Atua, i te koraha. Nō te rā iho anō i haere mai ai koe i te whenua o Īhipa, ā tae noa mai koutou ki tēnei wāhi, e tutū ana koutou ki a Ihowā.
DEU 9:8 I Horepa anō hoki, i whakapātaritari koutou ki a Ihowā kia riri, ā, riri ana a Ihowā ki a koutou, mea ana kia hunā koutou.
DEU 9:9 I tōku pikinga ki te maunga, ki te tiki i ngā papa kōhatu, i ngā papa o te kawenata i whakaritea e Ihowā ki a koutou, nā, ka noho ahau i te maunga, e whā tekau ngā rā, e whā tekau ngā pō; kāhore ahau i kai taro, kāhore i inu wai.
DEU 9:10 Ā, hōmai ana e Ihowā ki ahau ngā papa kōhatu e rua, he mea tuhituhi nā te ringa o te Atua; ā, i reira e mau ana, he mea tuhituhi, ngā kupu katoa i kōrero ai a Ihowā ki a koutou i te maunga, i waenganui o te ahi, i te rā o te huihuinga.
DEU 9:11 Nāwai ā, ka taka ngā rā e whā tekau me ngā pō e whā tekau, nā, ka hōmai e Ihowā ki ahau ngā papa kōhatu e rua, arā ngā papa o te kawenata.
DEU 9:12 Ā, ka mea a Ihowā ki ahau, “Whakatika, hohoro te heke atu i konei; ko tōu iwi hoki i kawea mai nei e koe i Īhipa kua taka ki te hē; kua hohoro rātou te peka kē i te huarahi i kīia ai e ahau ki a rātou; kua hangā e rātou he whakapakoko, he mea whakarewa mō rātou.”
DEU 9:13 I kōrero mai anō a Ihowā ki ahau, i mea, “Kua kite ahau i tēnei iwi, nanā, he iwi kakī mārō rātou;
DEU 9:14 tukua ahau ki te huna i a rātou, ki te horoi atu hoki i tō rātou ingoa i raro i te rangi. Ā, māku koe e mea hei iwi kaha ake, hei iwi nui ake i a rātou.”
DEU 9:15 Heoi, tahuri ana ahau, heke iho ana i te maunga, ko te maunga hoki kā tonu i te ahi; ā, ko ngā papa e rua o te kawenata i ōku ringa e rua.
DEU 9:16 Nā, ko tāku tirohanga atu, nā, kua hara koutou ki a Ihowā, ki tō koutou Atua; kua hanga koutou i te kūao kau mā koutou, he mea whakarewa: kua hohoro koutou te peka kē i te huarahi i kīia e Ihowā ki a koutou.
DEU 9:17 Nā, ka mau ahau ki ngā papa e rua, pangā atu ana e ahau i roto i ōku ringa e rua, ā, wāhia iho aua mea e ahau ki tō koutou aroaro.
DEU 9:18 Nā, takoto ana ahau ki te aroaro o Ihowā, pērā anō me te tīmatanga, e whā tekau ngā rā, e whā tekau ngā pō; kīhai ahau i kai taro, kīhai i inu wai; mō ō koutou hara katoa hoki i hara ai koutou, i mahi ai i te kino ki te aroaro o Ihowā, hei whakapātaritari i a ia.
DEU 9:19 I pāwera hoki ahau i te riri, i te āritarita, i a Ihowā rā i whakatakariri ai ki a koutou, e mea ana, kia hunā koutou. Otiia whakarongo mai ana anō a Ihowā ki ahau i taua wā hoki.
DEU 9:20 Ā, tino kaha te riri o Ihowā ki a Ārona, i mea kia whakamatea ia; nā, ka īnoi anō hoki ahau mō Ārona i taua wā.
DEU 9:21 Nā, ka tango ahau i tō koutou hara, i te kūao kau i hangā e koutou, ā, tahuna ana e ahau ki te ahi, patōkia iho, whakangakungakutia ana kia ririki, ngotangota noa ānō he puehu. Nā, pangā atu ana e ahau ōna ngota ki te awa e rere iho ana i te maunga.
DEU 9:22 Ā, i Tapera, i Maha hoki, i Kipiroto Hataawa i whakapātaritari anō koutou ki a Ihowā.
DEU 9:23 Nā, i te tononga a Ihowā i a koutou i Karehepārenea, i tāna meatanga mai, “Haere ki runga, tangohia te whenua i hoatu e ahau ki a koutou,” nā, ka tutū koutou ki te kupu a Ihowā, a tō koutou Atua, kīhai anō i whakapono ki a ia, kīhai i whakarongo ki tōna reo.
DEU 9:24 He tutū tonu tā koutou ki a Ihowā mai o te rā i mōhio ai ahau ki a koutou.
DEU 9:25 Nā, takoto ana ahau i te aroaro o Ihowā i ngā rā e whā tekau, i ngā pō e whā tekau, i takoto ai ahau; mō te meatanga mai a Ihowā kia whakangaromia koutou.
DEU 9:26 Ā, ka īnoi ahau ki a Ihowā, ka mea, “E Ihowā, e te Atua, kaua e whakangaromia tāu iwi, tāu taonga tupu, i hokona nei e koe i runga i tōu nui, i whakaputaina mai nei e koe i Īhipa ki te ringa kaha.
DEU 9:27 Kia mahara ki āu pononga, ki a Āperahama, ki a Īhaka, ki a Hākopa; kaua e titiro mai ki te pakeke o tēnei iwi, ki tō rātou kino, ki tō rātou hara.
DEU 9:28 Kei mea te whenua i whakaputaina mai nei mātou e koe i reira, ‘He kore kīhai a Ihowā i kaha ki te kawe i a rātou ki te whenua i kōrero ai ia ki a rātou, he kino hoki nōna ki a rātou, i kawea ai rātou e ia kia whakamatea ki te koraha.’
DEU 9:29 Otirā, ko tāu iwi anō rātou, ko tāu taonga tupu hoki, i whakaputaina mai nei e koe i runga i tōu kaha nui, i tōu tākakau mārō hoki.”
DEU 10:1 I reira anō, ka kōrero mai a Ihowā ki ahau, “Hāua e koe kia rua ngā papa kōhatu, kia rite ki ō te tīmatanga, ka haere ake ai ki ahau ki te maunga, hangā hoki e koe he āka rākau.
DEU 10:2 Ā, māku e tuhituhi ki ngā papa ngā kupu o ngā papa ō mua, i wāhia rā e koe, ā, me hoatu e koe ki roto ki te āka.”
DEU 10:3 Nā, hangā ana e ahau he āka, he hitimi te rākau, tāraia ana hoki e ahau ngā papa kōhatu e rua, rite tonu ki ō mua, nā, ka piki ahau ki te maunga me ngā papa e rua i tōku ringa.
DEU 10:4 Nā, ka tuhituhi ia ki ngā papa, rite tonu ki tō mua tuhituhinga, i ngā ture kotahi tekau i kōrerotia mai e Ihowā ki a koutou i te maunga, i waenganui o te ahi, i te rā o te huihuinga; ā, hōmai ana e Ihowā ki ahau.
DEU 10:5 Nā, tahuri ana ahau, heke iho ana i te maunga, ā, whaowhina ana ngā papa ki roto ki te āka i hangā e ahau, ā, kei reira anō, ko tā Ihowā i whakahau ai ki ahau.
DEU 10:6 (Nā, ka haere atu ngā tama a Īharaira i Peerota-Pene-Iaakana ki Mohera; ā, ka mate a Ārona ki reira, ā, tanumia iho ki reira; nā, ko tāna tama, ko Ereātara te tohunga i muri i a ia.
DEU 10:7 I haere atu rātou i reira a Kurekora; i Kurekora atu ki Iotopata, he whenua awa wai.
DEU 10:8 I taua wā anō ka wehea e Ihowā te iwi o Rīwai hei amo i te āka o te kawenata a Ihowā hei tū ki te aroaro o Ihowā hei minita ki a ia, hei manaaki hoki i runga i tōna ingoa ā mohoa noa nei.
DEU 10:9 Nō reira i kore ai tētahi wāhi mō Rīwai, tētahi kāinga tūturu i roto i ōna tuākana, i ōna tēina; ko tōna kāinga tūturu ko Ihowā, rite tonu ki tā Ihowā ki tā tōu Atua, i kōrero ai ki a ia.)
DEU 10:10 Ā, i noho ahau i te maunga, ko ngā rā he pērā me ō mua, e whā tekau ngā rā, e whā tekau ngā pō; ā, i rongo mai anō a Ihowā ki ahau i reira; kīhai a Ihowā i aro ki te whakamate i a koe.
DEU 10:11 Ā, ka mea mai a Ihowā ki ahau, “Whakatika, haere atu i tōu huarahi i mua i te iwi; ā, me haere rātou ki te tango i te whenua, i oati ai ahau ki ō rātou mātua kia hoatu ki a rātou.”
DEU 10:12 Nā, he aha e Īharaira, tā Ihowā, tā tōu Atua, e mea nei i a koe? Ehara oti i te wehi i a Ihowā, i tōu Atua, i te haere i āna haerenga katoa, i te aroha ki a ia, i te mahi hoki ki a Ihowā, ki tōu Atua, tōu ngākau katoa, tōu wairua katoa,
DEU 10:13 i te pupuri hoki i ngā whakahau a Ihowā, i āna tikanga e whakahaua nei e ahau i tēnei rā ki a koe, hei pai mōu?
DEU 10:14 Nanā, nō Ihowā nō tōu Atua, te rangi me te rangi o ngā rangi, te whenua me ōna mea katoa.
DEU 10:15 Ko Ihowā anake i āhuareka ki ōu mātua, i aroha ki a rātou, ā, ko ō rātou uri i muri i a rātou, arā, ko koutou, tāna i whiriwhiri ai o ngā iwi katoa; koia anō tēnei ināianei.
DEU 10:16 Kotia rā e koutou te kiri matamata o ō koutou ngākau, kaua hoki e whakamārōkia anō ō koutou kakī.
DEU 10:17 Ko Ihowā hoki, ko tōu Atua, ko ia te Atua o ngā atua, te Ariki o ngā ariki, he Atua nui ia, he kaha, he whakamataku, e kore nei e whakapai kanohi, e kore anō hoki e tango utu.
DEU 10:18 E whakahaere ana ia i te tikanga mō te pani, mō te pouaru, e aroha ana ki te manene, e hoatu ana hoki he taro, he kākahu mōna.
DEU 10:19 Nō reira kia aroha koutou ki te manene; he manene hoki koutou i mua, i te whenua o Īhipa.
DEU 10:20 Ko Ihowā, ko tōu Atua, tāu e wehi ai, me mahi anō ki a ia, me awhi ki a ia, me waiho hoki tōna ingoa hei oati.
DEU 10:21 Ko ia tāu e whakamoemiti ai, ko ia hoki tōu Atua, i mahi nei i ēnei mea nunui, i ēnei mea whakawehi, i kite rā ōu kanohi.
DEU 10:22 Ko ōu mātua, i heke atu rā ki Īhipa, e whitu tekau ngā tāngata; nā, ināianei, ka oti koe te mea e Ihowā, e tōu Atua, kia rite ki ngā whetū o te rangi te tini.
DEU 11:1 Nā reira, me aroha koe ki a Ihowā, ki tōu Atua, kia mau ki tāna ako, ki āna tikanga, ki tāna i whakarite ai, me āna whakahau, i ngā rā katoa.
DEU 11:2 Kia mōhio hoki koutou i tēnei rā kāhore anō ia ahau e kōrero ana ki ā koutou tamariki, (kāhore hoki rātou i mōhio, kāhore anō hoki i kite i te whakawhiu a Ihowā), a tō koutou Atua, i tōna nui, i tōna ringa kaha, i tōna tākakau i mārō rā,
DEU 11:3 i āna merekara hoki, i āna mahi i meatia e ia i waenganui o Īhipa ki a Parao kīngi o Īhipa, ki tōna whenua katoa hoki.
DEU 11:4 I tāna hoki i mea ai ki te ope o Īhipa, ki ō rātou hōiho, ki ō rātou hāriata; i a ia i mea rā i ngā wai o te Moana Whero kia huri ki runga ki a rātou i tō rātou whāinga mai i a koutou, ā, hunā iho rātou e Ihowā ā mohoa noa nei.
DEU 11:5 I ngā mea hoki i mea ai ia ki a koutou i te koraha, ā tae noa mai koutou ki tēnei wāhi.
DEU 11:6 I tāna hoki i mea ai ki a Ratana rāua ko Āpirama, ki ngā tama a Eriapa tama a Reupena; i te kowheratanga ake o te māngai o te whenua, ā, horomia ana rātou, me ngā tāngata o ō rātou whare, me ō rātou tēneti hoki, me ā rātou mea ora katoa, i waenganui i a Īharaira katoa.
DEU 11:7 Ko ō koutou kanohi ia kua kite i ngā mahi nunui katoa a Ihowā i mahi ai ia.
DEU 11:8 Āe rā, kia mau ki ngā whakahau katoa e whakahau atu nei ahau ki a koe i tēnei rā, kia kaha ai koe, kia tae atu ai hoki, kia whiwhi ai ki te whenua e haere atu nei koutou ki reira ki te tango;
DEU 11:9 kia roa ai hoki ō koutou rā ki te whenua i oati ai a Ihowā ki ōu mātua kia hoatu ki a rātou, ki ō rātou uri, he whenua e rerengia ana e te waiū, e te honi.
DEU 11:10 Ko te whenua hoki e haere atu nei koe ki reira ki te tango, ehara i te pērā me te whenua o Īhipa, i mahue atu rā i a koe, e whakatō ai koe i tāu purapura, e whakamākūkū ai hoki ki tōu waewae, ānō he kāri otaota.
DEU 11:11 Engari, he whenua pukepuke, he whenua raorao te whenua e haere atu nei koutou ki reira ki te tango, e inu ana hoki i te ua o te rangi hei wai;
DEU 11:12 he whenua e matapoporetia ana e Ihowā, e tōu Atua; kei reira tonu ngā kanohi o Ihowā, o tōu Atua, nō te tīmatanga o te tau taea noatia te mutunga o te tau.
DEU 11:13 Ā, ki te whakarongo mārie koutou ki āku whakahau e whakahau atu nei ahau ki a koutou i tēnei rā – kia aroha ki a Ihowā, ki tō koutou Atua, kia whakapaua ō koutou ngākau, ō koutou wairua ki te mahi ki a ia –
DEU 11:14 nā, ka hoatu e ahau te ua mō tō koutou whenua i tōna pō anō, te ua mataati me te ua ō muri, ā, ka kohikohi koe i tāu wīti, i tāu wāina, i tāu hinu.
DEU 11:15 Ā, ka hoatu e ahau te tarutaru ki ōu pārae, mā āu kararehe, ā, ka kai koe, ka mākona.
DEU 11:16 Kia mahara ki a koutou, kei māmingatia ō koutou ngākau, kei peka kē koutou, kei mahi ki ngā atua kē, kei koropiko ki a rātou;
DEU 11:17 ā, ka mura te riri o Ihowā ki a koutou, ā, ka tūtakina e ia te rangi, e kore ake ai te ua, e kore ai hoki e tukua mai e te whenua ōna hua. Nā, ka hohoro koutou te mate atu i te whenua pai ka hōmai nei e Ihowā ki a koutou.
DEU 11:18 Engari, rongoātia ēnei kupu āku ki roto ki ō koutou ngākau, ki ō koutou wairua; herea hoki hei tohu ki ō koutou ringa, hei pare anō ki waenganui i ō koutou kanohi.
DEU 11:19 Whakaakona atu hoki ki ā koutou tamariki, kōrerotia ina noho i tōu whare, ina haere koe i te huarahi, ina takoto, ina whakatika rānei.
DEU 11:20 Tuhituhia anō hoki ki ngā pou tatau o tōu whare, ki ōu tatau hoki;
DEU 11:21 kia tini ai ōu rā, me ngā rā o ā koutou tamariki ki te whenua i oati ai a Ihowā ki ōu mātua kia hoatu ki a rātou, kia rite ai ki ngā rā o te rangi i runga i te whenua.
DEU 11:22 Ki te āta pupuri hoki koutou i ēnei whakahau katoa e whakahau atu nei ahau ki a koutou kia mahia; ki te aroha ki a Ihowā, ki tō koutou Atua, ki te haere hoki i āna huarahi, ki te awhi ki a ia;
DEU 11:23 nā, ka peia atu e Ihowā ēnei iwi katoa i tō koutou aroaro, ā, ka riro i a koutou ngā iwi he nui ake, he kaha ake i a koutou.
DEU 11:24 Mō koutou ngā wāhi katoa e takahia e te kapu o ō koutou waewae; kei te koraha, kei Repanōna hoki, kei te awa, kei Uparati, ā tae noa ki te moana ki te hauāuru, ngā rohe ki a koutou.
DEU 11:25 E kore e tū te tangata ki tō koutou aroaro; ka whakapāngia hoki e Ihowā, e tō koutou Atua, tō koutou wehi, me tō koutou tūiri ki te mata katoa o te whenua e takahia e koutou, ka rite ki tāna i kōrero ai ki a koutou.
DEU 11:26 Nanā, ka hoatu e ahau ki tō koutou aroaro i tēnei rā te manaaki me te kanga:
DEU 11:27 te manaaki, ki te rongo koutou ki ngā whakahau a Ihowā, a tō koutou Atua, e whakahau atu nei ahau ki a koutou i tēnei rā;
DEU 11:28 te kanga hoki, ki te kāhore koutou e rongo ki ngā whakahau a Ihowā, a tō koutou Atua, ā, ka peka kē i te huarahi e kīia atu nei e ahau ki a koutou i tēnei rā, ki te whai ki ngā atua kē, kīhai nei i mōhiotia e koutou.
DEU 11:29 Ā tēnei ake, ā te wā e kawea ai koe e Ihowā, e tōu Atua, ki te whenua, ka haere atu nei koe ki reira ki te tango, nā, me hoatu e koe te manaaki ki runga ki Maunga Keritimi me te kanga ki runga ki Maunga Ēpara.
DEU 11:30 Kāhore ianei ēnā i tāwāhi o Horano, i te taha o te huarahi e tō ai te rā, i te whenua o ngā Kanaani e noho ana i te Arapaha i te ritenga atu o Kirikara, i te taha o ngā oki i More?
DEU 11:31 Ka whiti atu hoki koutou i Horano, ka haere ki te tango i te whenua e hōmai ana e Ihowā, e tō koutou Atua, ki a koutou, ā, ka riro a reira i a koutou, ā, ka noho koutou ki reira.
DEU 11:32 Nā, kia mahara ki te mahi i ngā tikanga katoa, i ngā whakaritenga e hoatu nei e ahau ki tō koutou aroaro i tēnei rā.
DEU 12:1 Tēnei anō ngā tikanga me ngā whakaritenga, hei pupuri mā koutou hei mahi ki te whenua e hōmai ana Ihowā, e te Atua o ōu mātua, ki a koe kia nohoia, i ngā rā katoa e ora ai runga i te whenua.
DEU 12:2 Whakamōtītia rawatia e koutou ngā wāhi katoa i mahi ai ngā iwi ka riro nei i a koutou ki ō rātou atua, i runga i ngā maunga teitei, i ngā pukepuke hoki, i raro hoki i ngā rākau kōuru nui katoa.
DEU 12:3 Pākarua ā rātou āta, wāhia kia kongakonga ā rātou pou, ko ā rātou Aherimi tahuna e koutou ki te ahi; ā, tuaina ki raro ngā whakapakoko o ō rātou atua, ā, whakangaromia rawatia atu ō rātou ingoa i taua wāhi.
DEU 12:4 Aua e pēnā ki a Ihowā, ki tō koutou Atua.
DEU 12:5 Engari, me whai ki tōna nohoanga, ki te wāhi e whiriwhiri ai a Ihowā, tō koutou Atua, i roto i ō koutou iwi katoa, kia waiho tōna ingoa ki reira, me haere hoki koe ki reira.
DEU 12:6 Ā, me kawe e koutou ki reira ā koutou tahunga tinana, ā koutou patunga tapu, ā koutou whakatekau ngā whakahere e hapahapainga ana e ō koutou ringa, ā koutou kī taurangi, ā koutou whakahere tuku noa, me ngā whānau mātāmua o ā koutou kau, o ā koutou hipi.
DEU 12:7 Ā, ko reira koutou kai ai, ko te aroaro o Ihowā, o tō koutou Atua, ā, ka koa koutou ki ngā mea katoa e whātoro atu ai ō koutou ringa, koutou me ō koutou whare, ki ngā manaaki a Ihowā, a tōu Atua, i a koe.
DEU 12:8 Kei rite tā koutou mahi ki ēnei katoa e mahia nei e tātou i konei i tēnei rā, he tika tonu ia tangata ki tāna titiro ake;
DEU 12:9 kāhore nei hoki koutou kia tae noa ki te okiokinga, ki te kāinga tupu e hōmai ana e Ihowā, e tōu Atua, ki a koe.
DEU 12:10 Engari, ki te whiti koutou i Horano, ā, ka noho ki te whenua e hōmai ana e Ihowā, e tō koutou Atua hei kāinga tupu mō koutou, ā, ka meinga e ia kia okioki i ō koutou hoa whawhai katoa i tētahi taha, i tētahi taha, ā, ka noho koutou i runga i te whenua rangatira.
DEU 12:11 Kātahi ka ai te wāhi e whiriwhiria e Ihowā, e tō koutou Atua, ki reira tōna ingoa noho ai, hei kawenga mā koutou i ngā mea katoa e whakahaua nei e ahau ki a koutou; ā koutou tahunga tinana, ā koutou patunga tapu, ā koutou whakatekau, me ngā whakahere hapahapai a ō koutou ringa, me ngā mea papai katoa o ngā mea i kīia taurangitia e koutou mā Ihowā.
DEU 12:12 Ā, ka koa koutou ki te aroaro o Ihowā, o tō koutou Atua, koutou, ā koutou tama, ā koutou tamāhine, ā koutou pononga tāne, ā koutou pononga wāhine, me te Rīwaiti i roto i ō koutou tatau, kāhore hoki ia i rato tahi me koutou i tētahi wāhi, i tētahi kāinga tupu rānei mōna.
DEU 12:13 Kia mahara kei tukua e koe āu tahunga tinana ki ngā wāhi katoa e kite ai koe;
DEU 12:14 engari, hei te wāhi e whiriwhiria e Ihowā i roto i tētahi o ōu iwi, hei reira koe tuku ai i āu tahunga tinana, hei reira hoki koe mea ai i ngā mea katoa e whakahau atu nei ahau ki a koe.
DEU 12:15 Otiia ka āhei koe ki te patu, ki te kai hoki he kikokiko i roto i ōu tatau katoa, ki tā te hiahia katoa a tōu ngākau, kia rite ki te manaaki a Ihowā, a tōu Atua, i hōmai ai ki a koe; me kai e te poke, e te pokekore, he pērā me te kahera, me te hāta.
DEU 12:16 Engari rāia kei kainga e koutou te toto; ringihia atu ki te whenua ānō he wai.
DEU 12:17 E kore koe e tukua kia kai i roto i ōu tatau i ngā whakatekau o tāu wīti, o tāu wāina rānei, o tāu hinu rānei, i ngā mātāmua rānei o āu kau, o āu hipi rānei, i tētahi rānei o ngā mea e kīia taurangitia e koe, i āu whakahere tuku noa rānei, i ngā whakahere hapahapai rānei a tōu ringa.
DEU 12:18 Engari, me kai ēnā ki te aroaro o Ihowā, o tōu Atua, hei te wāhi e whiriwhiri ai a Ihowā, tōu Atua, e koe, e tāu tama e tāu tamāhine, e tāu pononga tāne, e tāu pononga wahine, e te Rīwaiti hoki i roto i ōu tatau. Ā, ka koa koe ki te aroaro o Ihowā, o tōu Atua, ki ngā mea katoa e totoro atu ai ōu ringa.
DEU 12:19 Kia tūpato kei mahue i a koe te Rīwaiti i ngā rā katoa e ora ai koe i runga i te whenua.
DEU 12:20 E whakanui a Ihowā, tōu Atua, i tōu rohe, e pērā me tāna i kōrero ai ki a koe, ā, ka mea koe, “Ka kai kikokiko ahau,” he hiahia hoki nō tōu ngākau ki te kai kikokiko, e kai koe i te kikokiko, i te hiahia katoa a tōu ngākau.
DEU 12:21 Ki te mamao rawa atu i a koe te wāhi e whiriwhiri ai a Ihowā, tōu Atua, kia waiho tōna ingoa i reira, nā, patua tētahi o āu kau, o āu hipi rānei, kua hōmai nā e Ihowā ki a koe, kia rite ki tāku i whakahau ai ki a koe, ā, ka kai i roto i ōu tatau, i tā te hiahia katoa a tōu ngākau.
DEU 12:22 Kainga ēnā, pērātia me te kahera, me te hāta e kainga ana; ko te poke, ko te pokekore, rite tahi rāua te kai.
DEU 12:23 Engari, rāia kia tino ū koe kia kaua e kainga te toto; ko te toto hoki te ora; kaua hoki e kainga ngātahitia e koe te toto me te kikokiko.
DEU 12:24 Kaua tēnā e kainga e koe; me riringi e koe ki te whenua ānō he wai.
DEU 12:25 Kei kainga tēnā e koe; kia whiwhi ai koe ki te pai, koutou ko āu tamariki i muri i a koe, ina mahi koe i te mea e tika ana ki tā Ihowā titiro.
DEU 12:26 Ko āu mea tapu ia, i a koe nā, me āu kī taurangi, me tango e koe, ka haere ki te wāhi e whiriwhiri ai a Ihowā.
DEU 12:27 Nā, ka tuku mai koe i āu tahunga tinana, i te kikokiko me te toto, ki runga ki te āta a Ihowā, a tōu Atua. Nā, ko te toto o āu patunga tapu me riringi ki runga ki te āta a Ihowā, a tōu Atua, ko te kikokiko ia me kai e koe.
DEU 12:28 Maharatia, whakarangona ēnei kupu katoa e whakahau nei ahau ki a koe, kia whiwhi ai koe ki te pai, koutou ko āu tamariki i muri i a koe, ake tonu atu, ina mahi koe i te mea e pai ana, e tika ana ki te titiro a Ihowā, a tōu Atua.
DEU 12:29 Ina hunā e Ihowā, e tōu Atua, i tōu aroaro ngā iwi, e haere nei koe ki reira ki te pei, ā, ka riro rātou i a koe, ā, ka noho koe ki tō rātou whenua;
DEU 12:30 kia tūpato ki a koe, kei māhangatia koe kia whai i muri i a rātou, ina whakangaromia atu rātou i tōu aroaro; kei ui atu anō hoki koe ki ō rātou atua, kei mea, “E pēhea ana te mahi a ēnei iwi ki ō rātou atua? Ka pēnā anō hoki ahau.”
DEU 12:31 Kei pērā tāu mahi ki a Ihowā, ki tōu Atua; ko ngā mea katoa hoki e whakarihariha ai a Ihowā, e kino ai, ko ia tā rātou i mahi ai ki ō rātou atua. Nā, ko ā rātou tama nei anō, me ā rātou tamāhine e tahuna ana e rātou ki te ahi mā ō rātou atua.
DEU 12:32 Ko ngā mea katoa e whakahau ai ahau ki a koutou, ko ēnā tā koutou e mahara ai kia mahia; kaua e tāpiritia ki ētahi atu, kaua anō hoki e kinitia atu tētahi wāhi.
DEU 13:1 Ki te whakatika ake i roto i a koutou he poropiti, he moemoeā rānei, ā, ka hōmai e ia ki a koe he tohu, he merekara rānei,
DEU 13:2 ā, ka puta mai te tohu, te merekara rānei, i kōrero ai ia ki a koe, i mea ai, “Tātou ka whai ki ngā atua kē” (kīhai nei i mōhiotia e koe) “ka mahi atu hoki ki a rātou,”
DEU 13:3 kei whakarongo koe ki ngā kōrero a taua poropiti, a taua tangata moemoeā rānei. E whakamātautau ana hoki a Ihowā, tō koutou Atua, i a koutou, kia mōhio ai e whakapaua rānei ō koutou ngākau katoa, ō koutou wairua katoa ki te aroha ki a Ihowā, ki tō koutou Atua.
DEU 13:4 Me haere koutou i muri i a Ihowā, i tō koutou Atua ko ia tā koutou e wehi ai, me pupuri āna whakahau, me whakarongo hoki ki tōna reo, me mahi anō ki a ia, me awhi ki a ia.
DEU 13:5 Ā, ko taua poropiti, ko taua tangata moemoeā rānei, me whakamate; mōna i takahi i a Ihowā, i tō koutou Atua – i tangohia mai ai koutou i te whenua o Īhipa, i hokona ai koe i roto i te whare pononga – kia tākina koe ki wāhi kē i te huarahi i whakahau ai a Ihowā, tōu Atua, ki a koe kia haerea. Pēnei ka whakakorea e koe te kino i roto i a koe.
DEU 13:6 Ki te whakawaia pukutia koe e tōu teina, e te tama rānei a tōu whaea, e tāu tama rānei, e tāu tamāhine rānei, e tōu hoa wahine rānei i tōu uma, e tōu hoa rānei e rite ana ki tōu ngākau, ki te mea ia, “Tātou ka haere, ka mahi ki ngā atua kē,” kīhai nei koe i mōhio, a koe, ōu mātua rānei;
DEU 13:7 ki ētahi o ngā atua o ngā iwi i tētahi taha ōu, i tētahi taha, e tata ana ki a koe, kei tawhiti atu rānei i a koe, i tētahi pito o te whenua puta noa ki tētahi pito o te whenua;
DEU 13:8 kei whakaae koe ki a ia, kei whakarongo rānei ki a ia; kaua anō hoki tōu kanohi e aroha ki a ia, kaua e tohu i a ia, kaua hoki e huna i a ia.
DEU 13:9 Engari, patua rawatia kia mate; ko tōu ringa te pā wawe atu ki a ia hei whakamate i a ia, muri iho ko te ringa o te iwi katoa.
DEU 13:10 Ā, me āki ia e koe ki te kōhatu, kia mate; mōna i whai kia whakapeautia koe i a Ihowā, i tōu Atua, i tangohia mai ai koe i te whenua o Īhipa, i te whare pononga.
DEU 13:11 Ā, ka rongo a Īharaira katoa ka wehi, e kore hoki e mahi i te mea kino pēnā i tēnā i roto i a koutou i muri iho.
DEU 13:12 Ki te rongo kōrero koe mō tētahi o ōu pā, e hōmai e Ihowā, e tōu Atua, ki a koe hei nohoanga, e kōrerotia ana,
DEU 13:13 kua haere atu ētahi, he tama nā Periara, i roto i a koe, kua whakapeau kē hoki i ngā tāngata o tō rātou pā, kua mea, “Tātou ka haere, ka mahi atu ki ngā atua kē,” kīhai nei i mōhiotia e koutou;
DEU 13:14 nā, me rapu e koe, me ore atu, me te ui mārie anō. Nā, ki te mea he pono, he tūturu rawa te kōrero, kei te mahia tēnā mea whakarihariha i roto i a koe;
DEU 13:15 tukitukia rawatia ngā tāngata o taua pā ki te mata o te hoari, whakamōtītia rawatia a reira, me ngā mea katoa i roto, me āna kararehe, ki te mata o te hoari.
DEU 13:16 Ko ngā taonga katoa hoki o reira me kohi ki waenganui o tōna huarahi, ka tahu ai koe i te pā, me ōna taonga katoa, ki te ahi, ā, rūpeke noa, hei mea ki a Ihowā, ki tōu Atua. Me waiho hoki a reira hei pūranga mō ake tonu atu; kaua e hangā ā muri ake nei.
DEU 13:17 Kei piri hoki ki tōu ringa tētahi wāhi o te mea kua oti nei te kanga; kia tahuri mai ai a Ihowā i te muranga o tōna riri, ka whakaputa mai he atawhai ki a koe, kia atawhai ai hoki ia i a koe, kia whakanui ai i a koe, kia rite ai ki tāna i oati ai ki ōu mātua;
DEU 13:18 ina whakarongo koe ki te reo o Ihowā, o tōu Atua, ina pupuri i āna whakahau katoa, e whakahau atu nei ahau ki a koe i tēnei rā, kia mahi i te mea e tika ana ki te titiro a Ihowā, a tōu Atua.
DEU 14:1 Ko koutou ngā tamariki a Ihowā, a tō koutou Atua. Kaua koutou e haehae i a koutou, kaua hoki e tiwhaina a waenganui o ō koutou kanohi mō te tūpāpaku.
DEU 14:2 He iwi tapu hoki koe ki a Ihowā, ki tōu Atua, ā, kua whiriwhiri a Ihowā i a koe hei iwi māna, motuhake rawa i ngā iwi katoa i te mata o te whenua.
DEU 14:3 Kaua e kainga tētahi mea whakarihariha.
DEU 14:4 Ko ngā kararehe ēnei e kai ai koutou: ko te kau, ko te hipi, ko te koati,
DEU 14:5 ko te hāta, ko te kahera, ko te rōpaka, ko te koati mohoao, ko te pikareka, ko te anaterope, ko te temera.
DEU 14:6 Ko ngā kararehe katoa hoki e tararua ana te matimati, e weherua ana te tītorehanga, e rua nei ngā matimati, ā, e whakahoki ake ana i te kai, i roto i ngā kararehe, ko ēnā me kai.
DEU 14:7 Otiia kaua e kainga ēnei o ngā mea e whakahoki ake ana i te kai, o ngā mea hoki e tararua ana ngā matimati, e tītore pū ana; ko te kāmera, ko te hea, ko te koni, nō te mea e whakahoki ake ana rātou i te kai, otiia kīhai i tararua te matimati; hei mea poke ēnā ki a koutou.
DEU 14:8 Me te poaka hoki, nō te mea e tītore ana ngā matimati, otiia kāhore e whakahoki ake ana i te kai; hei mea poke tēnā ki a koutou. Kaua e kainga ō rātou kikokiko, kaua hoki e pā atu ki ō rātou tinana mate.
DEU 14:9 Ko ēnei ā koutou e kai ai o ngā mea katoa o roto i te wai: ko ngā mea katoa e whai tara ana, e whai unahi ana, ko ēnā tā koutou e kai.
DEU 14:10 Ā, ko ngā mea kāhore he tara, kāhore hoki he unahi i a rātou, kaua e kainga; hei mea poke ēnā ki a koutou.
DEU 14:11 Ko ngā manu pokekore katoa me kai e koutou.
DEU 14:12 Engari, tēnei anō ngā mea kaua e kainga e koutou: ko te ēkara, ko te wāwāhi-iwi, me te ahipare,
DEU 14:13 ko te kireti, ko te kāiaia, ko te whatura, me ngā mea pērā;
DEU 14:14 ko ngā raweni katoa, me ngā mea pērā;
DEU 14:15 ko te otereti, ko te kāhu pō, ko te koekoea, ko te kāhu, me ngā mea pērā;
DEU 14:16 ko te ruru nohinohi, ko te ruru nui, ko te wani,
DEU 14:17 ko te perikana, ko te kia ēkara, ko te kawau,
DEU 14:18 ko te tāka, ko te heroni, ko ngā pērā, ko te hupou, ko te pekapeka.
DEU 14:19 Ā, ko ngā mea ngōki katoa e rere ā-manu ana, he mea poke ēnā ki a koutou; kaua e kainga.
DEU 14:20 Ko ngā manu pokekore katoa me kai.
DEU 14:21 Kei kainga te mea i mate māori noa; me hoatu ki te manene i roto i ōu tatau, ā, māna e kai; me hoko atu rānei ki te tangata iwi kē. He iwi tapu hoki koe ki a Ihowā, ki tōu Atua. Kaua e kōhuatia he kūao koati ki te waiū o tōna whaea.
DEU 14:22 Whakatekautia ngā hua katoa o āu purapura, e tupu ake ana i te māra i tēnei tau, i tēnei tau.
DEU 14:23 Me kai hoki ki te aroaro o Ihowā, o tōu Atua, ki te wāhi e whiriwhiri ai ia kia waiho tōna ingoa ki reira, ngā whakatekau o tāu wīti, o tāu wāina, o tāu hinu hoki, me ngā mātāmua anō o āu kau, o āu hipi hoki; kia ako ai koe ki te wehi i a Ihowā, i tōu Atua, i ngā rā katoa.
DEU 14:24 Ā, ki te roa rawa tōu huarahi, e kore ai e taea e koe tēnā mea te kawe, nō te mea he mamao atu i a koe te wāhi e whiriwhiri ai a Ihowā, tōu Atua, kia waiho tōna ingoa ki reira, ina manaakitia koe e Ihowā, e tōu Atua.
DEU 14:25 Nā, me hoko e koe ki te moni, me takai hoki te moni ki roto ki tōu ringa, ka haere ki te wāhi e whiriwhiri ai a Ihowā, tōu Atua.
DEU 14:26 Nā, ka hoko atu koe i te moni ki ngā mea katoa e hiahia ai tōu ngākau, ki te kau, ki te hipi rānei, ki te wāina rānei, ki te wai kaha rānei, ki ngā mea katoa rānei e matea nuitia ana e tōu ngākau; ka kai ai ki reira ki te aroaro o Ihowā, o tōu Atua, ka hari hoki koe, koutou ko tōu whare.
DEU 14:27 Ā, ko te Rīwaiti i roto i ōu tatau, kaua ia e whakarērea e koe; he mea hoki kāhore ōna wāhi, kāinga tupu rānei i roto i a koe.
DEU 14:28 Hei te mutunga o ngā tau e toru ka mau koe ki waho i ngā whakatekau katoa o āu hua o tēnā tau, ka whakatakoto ai ki ōu kūwaha.
DEU 14:29 Nā, ka haere te Rīwaiti, nō te mea kāhore ōna wāhi, kāinga tupu rānei i roto i a koe, me te manene, me te pani, me te pouaru, kei roto nei i ōu tatau, ā, ka kai rātou, ka mākona; kia manaaki ai a Ihowā, tōu Atua, i a koe i ngā mahi katoa a tōu ringa e mahi ai koe.
DEU 15:1 Hei te mutunga o ngā tau e whitu ka mea koe he tukunga noatanga.
DEU 15:2 Ā, ko te tikanga tēnei mō te tuku noa: ko ngā kaiwhakatārewa moni katoa, e whakatārewa moni ana ki ō rātou hoa, me tuku noa atu; kaua te kaiwhakatārewa e tohe ki tōna hoa, ki tōna teina rānei; nō te mea e karangatia ana ko te tukunga noatanga a Ihowā.
DEU 15:3 He tangata iwi kē, tohea atu; ko tāu mea ia i tōu teina, me tuku noa e tōu ringa.
DEU 15:4 Engari hoki me kore te rawakore i roto i a koe; ka manaaki rawa hoki a Ihowā i a koe i runga i te whenua ka hōmai nei e Ihowā, e tōu Atua, ki a koe, kia tangohia hei kāinga tupu,
DEU 15:5 ki te āta whakarongo i a koe ki te reo o Ihowā, o tōu Atua, kia puritia, kia mahia ēnei whakahau katoa e whakahau nei ahau i tēnei rā ki a koe.
DEU 15:6 Nō te mea ka manaakitia koe e Ihowā, e tōu Atua, ka pērātia me tāna i kī ai ki a koe. Ā, māu e whakatārewa moni ki ngā iwi maha, ko koe ia kaua e tango i te moni tārewa; ā, ko koe hei ariki mō ngā iwi maha, kāhore hoki rātou e ariki ki a koe.
DEU 15:7 Ki te mea kei roto i a koe tētahi e rawakore ana, tētahi o ōu tēina, i roto i tētahi o ōu kūwaha o tōu whenua, e hōmai nei e Ihowā, e tōu Atua, ki a koe, kaua e whakauaua tōu ngākau, kaua hoki e kopia tōu ringa ki tōu teina rawakore.
DEU 15:8 Engari, me whakatuwhera mārie tōu ringa ki a ia, kia ngāwari hoki ki te whakatārewa moni ki a ia kia rite ki tōna mate i te mea e hapa ana i a ia.
DEU 15:9 Kia tūpato kei puta ake te whakaaro kino i roto i tōu ngākau, kei mea, “E tata ana te tau whitu, te tau tuku noa,” ā, ka kino tōu kanohi ki tōu teina rawakore, ā, e kore e hoatu e koe ki a ia; nā, ka tangi atu ia ki a Ihowā i a koe ka kino nei, ā, ka whai hara koe.
DEU 15:10 Me tino hoatu e koe ki a ia, kaua hoki tōu ngākau e pōuri, ina hoatu e koe ki a ia; ko te mea hoki tēnei e manaaki ai a Ihowā, tōu Atua, i a koe, i āu mahi katoa, i ngā mea katoa e totoro atu ai tōu ringa.
DEU 15:11 E kore hoki e kore te rawakore i te whenua; koia tāku e whakahau nei ki a koe, e mea nei, “Kia tuwhera tonu tōu ringa ki tōu teina, ki tōu hunga matekai, ki ōu rawakore, i tōu whenua.”
DEU 15:12 Ki te hokona atu ki a koe tōu teina, he tāne Hiperu, he wahine Hiperu rānei, ā, ka mahi ki a koe e ono ngā tau; nā, hei te whitu o ngā tau me tuku ia kia haere noa atu i a koe.
DEU 15:13 Ā, ki te tuku koe i a ia kia haere noa atu i a koe, kaua ia e tukua rawakoretia atu.
DEU 15:14 Engari, kia māhorahora te hoatu ki a ia i ētahi o āu hipi, o tāu patunga wīti, o tāu poka wāina hoki; me hoatu ki a ia ētahi o ngā mea i hoatu e Ihowā, e tōu Atua, hei manaaki mōu.
DEU 15:15 Kia mahara hoki he pononga koe i mua, i te whenua o Īhipa, ā, nā Ihowā, nā tōu Atua, koe i whakaora; koia ahau i whakahau ai i tēnei mea ki a koe ināianei.
DEU 15:16 Nā, ki te mea ia ki a koe, “E kore ahau e mawehe atu i a koe,” he aroha hoki nōna ki a koutou ko tōu whare, he pai nō tāna noho ki a koe;
DEU 15:17 kātahi koe ka tango i tētahi mea poka, ka titi ai i tōna taringa ki te tatau, ā, ka waiho ia hei pononga māu, oti tonu atu. Me pēnā hoki ki tāu pononga wahine.
DEU 15:18 Kei mea he pakeke rawa ki a koe, ina tukua ia kia haere noa atu i a koe; e rite ana hoki āna mahi ki a koe i ngā tau e ono ki a ngā kaimahi tokorua e utua ana; ā, ka manaaki a Ihowā, tōu Atua, i a koe i ngā mea katoa e mea ai koe.
DEU 15:19 Ko ngā toa mātāmua e whānau ana i roto i āu kau, i āu hipi, me whakatapu e koe mā Ihowā, mā tōu Atua; kaua e whakamahia tāu pūru mātāmua, kaua hoki e kutikutia tāu hipi mātāmua.
DEU 15:20 Kainga ki te aroaro o Ihowā, o tōu Atua, i tēnei tau, i tēnei tau, e koe, e tōu whare, ki te wāhi e whiriwhiri ai a Ihowā, tōu Atua.
DEU 15:21 Ā, ki te mea he koha tōna – inā rā he totitoti, he matapō – tētahi atu koha kino rānei, kaua ia e patua mā Ihowā, mā tōu Atua.
DEU 15:22 Kainga i roto i ōu kūwaha; mā te poke, mā te pokekore taua mea e kai, pērā me te kahera, me te hāta.
DEU 15:23 Otiia, kaua e kainga ōna toto; ringihia atu ki te whenua, ānō he wai.
DEU 16:1 Kia mahara ki te marama, ki a Apipi, ka mahi i te Kapenga ki a Ihowā, ki tōu Atua; ko Apipi hoki te marama i whakaputaina mai ai koe e Ihowā, e tōu Atua, i Īhipa i te pō.
DEU 16:2 Nā, me patu e koe te Kapenga ki a Ihowā, ki tōu Atua, o te kāhui hipi, o te kāhui kau, ki te wāhi e whiriwhiri ai a Ihowā kia waiho tōna ingoa ki reira.
DEU 16:3 Kaua e kainga tahitia te parāoa rēwena me taua mea. Kia whitu ngā rā e kai ai koe i te taro rēwenakore me taua mea, arā i te taro tangihanga; i haere pōtatutatu mai hoki koe i te whenua o Īhipa; kia mahara ai koe ki te rā i puta mai ai koe i te whenua o Īhipa i ngā rā katoa e ora ai koe.
DEU 16:4 Ā, kia whitu ngā rā e kore ai e kitea he rēwena ki a koe i ōu rohe katoa; kaua hoki e whakatoea mō te ata tētahi wāhi o te kikokiko e patua e koe i te ahiahi o te rā tuatahi.
DEU 16:5 E kore e āhei kia patua te Kapenga i roto i tētahi o ōu tatau, e hōmai ana e Ihowā, e tōu Atua, ki a koe.
DEU 16:6 Engari hei te wāhi e whiriwhiri ai a Ihowā, tōu Atua, kia waiho tōna ingoa ki reira, hei reira koe patu ai i te Kapenga i te ahiahi, i te toenetanga o te rā, i te wā anō i puta mai ai koe i Īhipa.
DEU 16:7 Nā, me tunu e koe, me kai hoki ki te wāhi e whiriwhiri ai a Ihowā, tōu Atua; ā, i te ata ka tahuri, ka haere ki ōu tēneti.
DEU 16:8 E ono ngā rā e kai ai koe i te taro rēwenakore; ā, i te rā whitu ko te huihui nui ki a Ihowā, ki tōu Atua; kaua tētahi mahi e mahia i taua rā.
DEU 16:9 Taua e koe, kia whitu ngā wiki; kei tau tukunga mataati i te toronaihi ki te kotinga koe tīmata mai ai te tatau i ngā wiki e whitu.
DEU 16:10 Nā, me mahi te Hākari o Ngā Wiki ki a Ihowā, ki tōu Atua, ki tētahi tahua, he mea hoatu noa nā tōu ringa; kia rite tāu e hoatu ai ki te manaaki a Ihowā, a tōu Atua, i a koe.
DEU 16:11 Nā, ka koa koe ki te aroaro o Ihowā, o tōu Atua – a koe, koutou tahi ko tāu tama, ko tāu tamāhine, me tāu pononga tāne, me tāu pononga wahine, me te Rīwaiti i roto i ōu tatau, me te manene, me te pani, me te pouaru i roto i a koe – ki te wāhi i whiriwhiria e Ihowā, e tōu Atua, kia waiho tōna ingoa ki reira.
DEU 16:12 Ā, kia mahara koe he pononga koe i Īhipa i mua; me pupuri hoki, me mahi ēnei tikanga.
DEU 16:13 Me mahi te Hākari Whare Wharau, kia whitu ngā rā, ua poto i a koe te kohikohi mai i tāu patunga wīti me tāu poka wāina.
DEU 16:14 Ā, ka koa koe ki tāu hākari, a koe, koutou tahi ko tāu tama, ko tāu tamāhine, ko tāu pononga tāne, ko tāu pononga wahine, me te Rīwaiti, te manene, te pani me te pouaru i roto i ōu tatau.
DEU 16:15 Kia whitu ngā rā o tāu hākari ki a Ihowā, ki tōu Atua, i te wāhi e whiriwhiri ai a Ihowā; ka manaaki hoki a Ihowā, tōu Atua, i a koe i āu hua katoa, i ngā mahi katoa hoki a ōu ringa, ā, ka tino harakoa koe.
DEU 16:16 E toru ngā wā o te tau e kitea ai ōu tāne katoa ki te aroaro o Ihowā, o tōu Atua, ki te wāhi e whiriwhiri ai ia; ko te Hākari Taro Rēwenakore, ko te Hākari o Ngā Wiki, ko te Hākari Whare Wharau. Kaua hoki e puta kau ki te aroaro o Ihowā;
DEU 16:17 me hōmai e ia tangata te mea e taea e ia, kia rite ki te manaaki i hōmai e Ihowā, e tōu Atua, ki a koe.
DEU 16:18 Whakatūria ētahi kaiwhakawā, me ētahi rangatira mōu i ōu kūwaha katoa, e hōmai ana e Ihowā, e tōu Atua, ki a koe, mō ōu iwi; kia tika hoki tā rātou whakawā mō te iwi.
DEU 16:19 Kaua e whakapeaua kētia te whakawā; kaua hoki e whakapai kanohi; kaua anō e tango i te utu whakapati; he mea whakamatapō hoki te utu whakapati i ngā kanohi o te hunga whakaaro nui, he mea whakapeau kē i ngā kupu a te hunga tika.
DEU 16:20 Ko te mea tika anake tāu e whai ai, kia ora ai koe, kia noho ai hoki ki te whenua e hōmai nei e Ihowā, e tōu Atua, ki a koe.
DEU 16:21 Kaua e whakatōkia e koe he Āhera o tēhea momo rākau ki te taha o te āta a Ihowā, a tōu Atua, e hangā e koe.
DEU 16:22 Kaua anō hoki e whakatūria ake tētahi pou whakapakoko māu e kinongia nei e Ihowā, e tōu Atua.
DEU 17:1 Kaua e patua mā Ihowā, mā tōu Atua, tētahi kau, hipi rānei, he koha tōna, tētahi atu hē rānei; he mea whakarihariha hoki tēnā ki a Ihowā, ki tōu Atua.
DEU 17:2 Ki te mea ka kitea i roto i a koe, i roto i tētahi o ōu tatau e hōmai nei e Ihowā, e tōu Atua, ki a koe tētahi tangata, tētahi wahine rānei, i mahi i te kino ki te titiro a Ihowā, a tōu Atua, i whakapaheke hoki i tāna kawenata,
DEU 17:3 i haere hoki, i mahi ki ngā atua kē i koropiko ki a rātou – ki te rā rānei, ki te marama rānei, ki tētahi rānei o ngā mano o te rangi kīhai nei i whakaritea atu e ahau –
DEU 17:4 ā, ka kōrerotia ki a koe, ā, ka rongo koe, nā, me āta ui mārie e koe, nā, mehemea he tika, he pono te kōrero kei te meatia taua mea whakarihariha i roto i a Īharaira.
DEU 17:5 Me whakaputa e koe taua tangata, taua wahine rānei, i mahi nei i taua mea kino, ki ōu tatau, taua tangata, taua wahine rānei; ka āki ai i a rāua ki te kōhatu, ā mate noa.
DEU 17:6 Mā te kupu a ngā kaiwhakaatu tokorua, a ngā kaiwhakaatu tokotoru rānei, e mate ai te tangata e tika ana kia whakamatea; e kore ia e mate i te kupu a te kaiwhakaatu kotahi.
DEU 17:7 Ko ngā ringa o ngā kaiwhakaatu te pā wawe ki a ia hei whakamate i a ia, ā muri iho ko ngā ringa o te iwi katoa. Pēnei ka whakakorea atu e koe te kino i roto i a koe.
DEU 17:8 Ki te ara ake tētahi take pakeke rawa i a koe te whakawā, he toto ki te toto, he whakawā ki te whakawā, he patu ki te patu, he take tautohetohe i roto i ōu tatau – nā, me whakatika koe, me haere ki runga ki te wāhi e whiriwhiri ai a Ihowā, tōu Atua;
DEU 17:9 ā, ka tae koe ki ngā tohunga, ki ngā Rīwaiti, ki te kaiwhakawā hoki e whakarite ana i aua rā; ā, ka ui koe; ā, mā rātou e whakapuaki ki a koe te tikanga mō te whakarite.
DEU 17:10 Nā, me mahi e koe tā rātou e whakapuaki ai ki a koe i taua wāhi i whiriwhiri ai e Ihowā; kia tūpato hoki kia rite te meatanga ki ngā mea katoa e kīia e rātou ki a koe.
DEU 17:11 Kia rite tāu meatanga ki te tikanga o te ture e kīia e rātou ki a koe, ki te ritenga hoki e kōrerotia e rātou ki a koe; kaua e peka kē atu, ki matau rānei, ki mauī rānei, i te kupu e whakapuakina e rātou ki a koe.
DEU 17:12 Ā, ki te poka wāhi tētahi tangata, kāhore e whakarongo ki te tohunga e tū ana, e minita ana i reira i te aroaro o Ihowā, o tōu Atua, ki te kaiwhakawā rānei, me whakamate taua tangata; ā, ka whakakorea atu e koe te kino i roto i a Īharaira.
DEU 17:13 Ā, ka rongo katoa te iwi, ka wehi, e kore e poka wāhi noa i muri iho.
DEU 17:14 Ka tae koe ki te whenua e hōmai ana e Ihowā, e tōu Atua, ki a koe, ā, ka riro mai a reira i a koe, ā, ka noho koe ki reira, ka mea hoki, “Ka meinga e ahau tētahi kīngi mōku, ka pērā me ngā iwi katoa i tētahi taha ōku, i tētahi taha.”
DEU 17:15 Ko tā Ihowā, ko tā tōu Atua e whiriwhiri ai, ko ia anake tāu e mea ai hei kīngi mōu. Ko tētahi o ōu tuākana tāu e mea ai hei kīngi mōu; e kore e āhei kia meatia e koe hei kīngi mōu te tangata iwi kē, ehara nei i te tuakana nōu.
DEU 17:16 Otiia kaua ia e whakamaha i te hōiho mōna, kaua anō hoki e whakahokia te iwi ki Īhipa, hei whakamaha i ngā hōiho; kua mea nei hoki a Ihowā ki a koutou, “E kore koutou e hoki nā taua huarahi ā mua ake nei.”
DEU 17:17 Kaua anō ia e whakamaha wāhine māna, kei riro kē tōna ngākau; kaua anō hoki e whakanuia rawatia e ia te hiriwa me te kōura māna.
DEU 17:18 Ā, ka noho ia ki te torōna o tōna rangatiratanga, nā, me tuhituhi e ia ki tētahi pukapuka ngā kupu o tēnei ture, nō ēnā i te aroaro o ngā tohunga, o ngā Rīwaiti;
DEU 17:19 ā, hei a ia takoto ai, ā, me kōrero ia ki reira i ngā rā katoa e ora ai ia. Kia ako ai ia ki te wehi ki a Ihowā, ki tōna Atua, ki te pupuri i ngā kupu katoa o tēnei ture, i ēnei tikanga, hei mahi māna;
DEU 17:20 kei whakakake tōna ngākau ki ōna tēina, kei peka kē atu hoki ia i te whakahau ki matau, ki mauī; kia roa ai ōna rā i tōna kīngitanga, ōna me o āna tama, i waenganui i a Īharaira.
DEU 18:1 Kaua tētahi wāhi, tētahi kāinga tupu rānei i roto i a Īharaira mō ngā tohunga, mō ngā Rīwaiti, mō te iwi katoa anō hoki o Rīwai; ko ngā whakahere ahi a Ihowā, ko ōna taonga ake hoki, hei kai mā rātou.
DEU 18:2 Ā, kāhore tētahi kāinga tupu mō rātou i waenganui i ō rātou tuākana; ko Ihowā, ko ia tō rātou taonga tupu, pērā hoki me tāna i kōrero ai ki a rātou.
DEU 18:3 Ā, ko te tikanga tēnei mō ngā mea a te iwi mā ngā tohunga, mō ā ngā tāngata e patu ana i te patunga tapu, ahakoa kau, ahakoa hipi, me hōmai e rātou ki te tohunga te peke, ngā pāpāringa e rua, me te puku.
DEU 18:4 Ko ngā hua mātāmua o tāu wīti, o tāu wāina, o tāu hinu, me te huruhuru mātāmua o āu hipi, me hoatu ki a ia.
DEU 18:5 Nō te mea kua whiriwhiria ia e Ihowā, e tōu Atua, i roto i ōu iwi katoa, kia tū hei minita i runga i te ingoa o Ihowā, a ia me āna tama ake tonu atu.
DEU 18:6 Ā, ki te haere mai tētahi Rīwaiti i hea noa atu o Īharaira, i tētahi o ōu kūwaha i noho ai ia, ā, ka tae mai me te hiahia katoa o tōna ngākau ki te wāhi e whiriwhiria e Ihowā;
DEU 18:7 nā, me minita ia i runga i te ingoa o Ihowā, o tōna Atua, me pērā me ōna tuākana katoa me ngā Rīwaiti, e tū nei i reira i te aroaro o Ihowā.
DEU 18:8 Kia rite te wāhi hei kai mā rātou, hāunga anō ngā utu i a ia mō ngā taonga a ōna mātua.
DEU 18:9 E tae koe ki te whenua e hōmai ana e Ihowā, e tōu Atua, ki a koe, kei ako koe ki te mahi i ngā mea whakarihariha a ēnā iwi.
DEU 18:10 Kei kitea i roto i a koe tētahi e mea ana i tāna tama, i tāna tamāhine rānei, kia haere i roto i te ahi, tētahi tohunga whakaaro ki ngā tohu, tētahi e whakaari ana i ngā mea kei mua, tētahi tohunga māori, tētahi tohunga mākutu rānei,
DEU 18:11 tētahi tohunga whaiwhaiā rānei, tētahi kaiui i te atua māori, tētahi mata māori rānei, tētahi kaiui i te tūpāpaku.
DEU 18:12 Nō te mea e whakarihariha ana a Ihowā ki ngā tāngata katoa e mea ana i ēnā mea; ā, nā aua mea whakarihariha i peia ai rātou i tōu aroaro e Ihowā, e tōu Atua.
DEU 18:13 Kia tino tika koe i te aroaro o Ihowā, o tōu Atua.
DEU 18:14 Ko ēnei iwi hoki, ka riro nei i a koe, e whakarongo ana ki ngā tohunga tāima, ki ngā tohunga māori; tēnā ko koe, e kore a Ihowā, tōu Atua, e tuku i a koe kia pērā.
DEU 18:15 Mā Ihowā, mā tōu Atua, e whakaara ake he poropiti mōu i roto i a koe, nō ōu tēina, he rite mai ki ahau; ko ia tā koutou e whakarongo ai.
DEU 18:16 Hei whakarite mō ngā mea katoa i īnoi ai koe ki a Ihowā, ki tōu Atua, i Horepa i te rā o te huihuinga, i mea ai: “Kaua ahau e rongo atu anō i te reo o Ihowā, o tōku Atua, kaua hoki ahau e titiro anō ki tēnei ahi nui, kei mate ahau.”
DEU 18:17 Nā, ka mea a Ihowā ki ahau: “He pai tā rātou kōrero i kōrero nā.
DEU 18:18 Māku e whakaara ake he poropiti mō rātou i roto i ō rātou tēina, rite tahi ki a koe, ā, ka hoatu e ahau āku kupu ki tōna waha; māna e kōrero ki a rātou ngā mea katoa e kōrero ai ahau ki a ia.
DEU 18:19 Nā, ko te tangata e kore e whakarongo ki āku kupu, e kōrero ai ia i runga i tōku ingoa, māku e rapu he utu i a ia.
DEU 18:20 Tēnā ko te poropiti e poka noa te kōrero i runga i tōku ingoa, i tētahi kupu kīhai nei i whakahaua atu e ahau kia kōrerotia, e kōrero rānei i runga i te ingoa o ngā atua kē, inā, ka mate taua poropiti.”
DEU 18:21 Ā, ki te mea koe i roto i tōu ngākau, “Mā te aha e mōhio ai tātou ki te kupu kīhai nei i kōrerotia e Ihowā?”
DEU 18:22 Ki te kōrero tētahi poropiti i runga i te ingoa o Ihowā, ā, kāhore e puta mai te mea, kāhore hoki e tae mai, koia tēnā te mea kīhai i kōrerotia e Ihowā; i kōrero poka noa te poropiti, kaua koe e wehi i a ia.
DEU 19:1 E whakangaromia ana e Ihowā, e tōu Atua, ngā iwi nō rātou nei te whenua ka hōmai nei e Ihowā, e tōu Atua, ki a koe, ā, ka riro tō rātou wāhi i a koe, ā, ka noho koe ki ō rātou pā, ki ō rātou whare;
DEU 19:2 me wehe e koe kia toru ngā pā mōu i waenganui o tōu whenua, ka hōmai nei e Ihowā, e tōu Atua, ki a koe, hei kāinga pūmau.
DEU 19:3 Whakapaia e koe he huarahi, ka tapahi i ngā rohe o tōu whenua, ka whakawhiwhia nei e Ihowā, e tōu Atua, ki a koe, kia toru ngā wāhanga, hei rerenga atu mō ngā tāngata whakamate katoa.
DEU 19:4 Ā, ko te āhua tēnei mō te tangata whakamate, e rere ai ki reira, e ora ai hoki; arā ki te patua e ia tōna hoa he mea urupā, kāhore hoki ōna kino ki a ia i mua atu:
DEU 19:5 Pēnei me te tangata ka haere tahi rāua ko tōna hoa ki te ngahere ki te tapahi rākau, ā, ka āki atu tōna ringa i te toki ki te tua i te rākau, nā, ka maunu te pane i te kakau, pono tonu ki tōna hoa, ā mate iho. Nā, ka rere atu ia ki tētahi o aua pā, ā, ka ora.
DEU 19:6 Kei whai te kaitakitaki toto i te tangata whakamate, i te mea e pāwerawera ana tōna ngākau, ā, ka hopu i a ia, he roa hoki nō te huarahi, ā, ka patu i a ia; kīhai ia i tika te mate mōna, nō te mea kāhore ia i kino ki a ia i mua atu.
DEU 19:7 Koia tāku e whakahau atu nei ki a koe, e mea nei: Me wehe e koe kia toru ngā pā mōu.
DEU 19:8 Ā, ki te whakanui a Ihowā, tōu Atua, i tōu rohe, ki te rite ki tāna i oati ai ki ōu mātua – ā, ka hōmai e ia te whenua katoa i mea ai ia kia hōmai ki ōu mātua;
DEU 19:9 ki te puritia e koe, ki te mahia ēnei whakahau katoa, e whakahau atu nei ahau ki a koe i tēnei rā, arā kia aroha ki a Ihowā, ki tōu Atua, kia haere hoki i ōna huarahi i ngā rā katoa – ko reira koe tango ai kia toru atu ngā pā mōu, hei tāpiri mō ēnā pā e toru.
DEU 19:10 Kei whakahekea te toto harakore ki waenganui o tōu whenua, ka hōmai nei e Ihowā, e tōu Atua, ki a koe hei kāinga, kei whakairia hoki te toto ki runga ki a koe.
DEU 19:11 Engari ia ki te kino tētahi ki tōna hoa, ā, ka whanga ki a ia, ka whakatika hoki ki a ia, ka patu rawa i a ia, nō ka mate ia; ā, ka rere ia ki tētahi o aua pā.
DEU 19:12 Nā, me tono e ngā kaumātua o tōna pā, ka tiki atu hoki i a ia i reira, ka hoatu i a ia ki te ringa o te kaitakitaki toto, kia mate ai ia.
DEU 19:13 Kei tohu tōu kanohi i a ia, engari me whakakāhore e koe te toto harakore i roto i a Īharaira, kia whiwhi ai koe ki te pai.
DEU 19:14 Kei nekehia kētia e koe te rohe o tōu hoa, i rohea ai e ngā tāngata onamata, ki tōu kāinga e nohoia e koe i te whenua ka hōmai nei e Ihowā, e tōu Atua, ki a koe hei kāinga.
DEU 19:15 Kei whakatika ki te tangata te kaiwhakaatu kotahi mō te kino, mō tētahi hara rānei, ahakoa he aha, e hara ai ia. Mā te kupu a ngā kaiwhakaatu tokorua, mā te kupu rānei a ngā kaiwhakaatu tokotoru, e whakatikaia ai te kōrero.
DEU 19:16 Ki te whakatika tētahi kaiwhakaatu teka ki tētahi tangata, hei kōrero teka i mahi ia i te hē;
DEU 19:17 nā, me tū ngā tāngata tokorua, nā rāua nei te totohe, ki te aroaro o Ihowā, ki te aroaro hoki o ngā tohunga rātou ko ngā kaiwhakawā e whakariterite ana i aua rā.
DEU 19:18 Nā, me whakataki mārie e ngā kaiwhakawā; ā, ka kitea he kaiwhakaatu teka te kaiwhakaatu, he teka tāna kōrero mō tōna teina;
DEU 19:19 nā, pērātia ia e koutou me tāna i whakaaro ai kia meatia ki tōna teina; pēnei ka whakakorea te kino i roto i a koe.
DEU 19:20 Ā, ka rongo te nuinga, ā, ka wehi, e kore hoki e mea i te kino pērā i roto i a koe ā muri.
DEU 19:21 Kaua anō tōu kanohi e tohu: ko tō te ora utu he ora, tō te kanohi he kanohi, tō te niho he niho, tō te ringa he ringa, tō te waewae he waewae.
DEU 20:1 E haere koe ki te whawhai ki ōu hoariri, ā, ka kite i ngā hōiho me ngā hāriata, i te iwi hoki he tokomaha ake i a koe, kei wehi i a rātou; kei a koe hoki a Ihowā, tōu Atua, i kawea mai ai koe i te whenua o Īhipa.
DEU 20:2 Ā, ka whakatata koutou ki te whawhai, nā, me haere mai te tohunga, me kōrero ki te iwi,
DEU 20:3 ka mea ki a rātou: “Whakarongo, e Īharaira! E whakatata atu ana koutou āianei ki te whawhai ki ō koutou hoariri. Kei hopī ō koutou ngākau; kaua e wehi. Kaua e pōtatutatu, kaua anō hoki e pāwera i tō rātou aroaro;
DEU 20:4 ko Ihowā hoki, ko tō koutou Atua, ko ia te haere tahi ana i a koutou, māna tā koutou whawhai ki ō koutou hoariri, māna koutou e whakaora.”
DEU 20:5 Me kōrero anō hoki ngā kaiwhakahauhau ki te iwi, me kī atu: “Tēnei rānei tētahi kua hangā e ia he whare hou, ā, kāhore anō i tāia te kawa? Me haere ia, me hoki atu ki tōna whare, kei mate ki te whawhaitanga, ka riro mā te tangata kē e tā te kawa.
DEU 20:6 Tēnei rānei tētahi kua whakatōkia e ia he māra wāina, ā, kāhore anō i kainga ngā hua? Me haere ia, me hoki atu ki tōna whare, kei mate ki te whawhaitanga, ka riro mā te tangata kē e kai.
DEU 20:7 Tēnei rānei tētahi kua oti tētahi wahine te taumau māna, ā, kāhore anō i tangohia e ia? Me haere ia, me hoki atu ki tōna whare, kei mate ki te whawhaitanga, ka riro mā te tangata kē e tango.”
DEU 20:8 Ā, me kōrero anō ngā kaiwhakahauhau ki te iwi, me kī atu, “Tēnei rānei tētahi e wehi ana, e hopī ana te ngākau? Me haere ia, me hoki atu ki tōna whare, kei ngohe ngā ngākau o ōna tēina, kei rite ki tōna ngākau.”
DEU 20:9 Nā, ka mutu te kōrero a ngā kaiwhakahauhau ki te iwi, me whakarite e rātou ētahi rangatira ope hei upoko mō te iwi.
DEU 20:10 Ka whakatata atu koe ki te tatau ki tētahi pā, nā, me karanga atu e koe te rangimārie ki reira.
DEU 20:11 Ā, ki te mea he rangimārie tāna e whakahoki mai ai ki a koe, ā, ka whakapuaretia ki a koe, kātahi ka waiho ngā tāngata katoa e kitea e koe ki reira hei kaihōmai takoha ki a koe, hei apa anō rātou māu.
DEU 20:12 Ā, ki te kore e mau tā reira rongo ki a koe, ā, ka anga ki te whawhai ki a koe, kātahi ka whakapaea e koe;
DEU 20:13 ā, ki te hoatu e Ihowā, e tōu Atua, ki ōu ringa, nā, me patu e koe ngā tāne katoa o reira ki te mata o te hoari.
DEU 20:14 Ko ngā wāhine ia me ngā tamariki, ko ngā kararehe me ngā mea katoa i roto i te pā, ko ngā taonga katoa o reira, me tango e koe māu; ā, ka pau i a koe ngā mea a ōu hoariri, e hoatu ana e Ihowā, e tōu Atua, ki a koe.
DEU 20:15 Ko tēnei tāu e mea ai ki ngā pā katoa e mamao rawa atu ana i a koe, ehara nei i te pā nō ēnei iwi.
DEU 20:16 Ko ngā pā ia o ēnei iwi, e hoatu nei e Ihowā, e tōu Atua, ki a koe hei kāinga tupu, kaua e whakaorangia tētahi mea e whai manawa ana.
DEU 20:17 Engari, me whakangaro rawa rātou e koe – ngā Hiti, ngā Amori, ngā Kanaani, ngā Perihi, ngā Hiwi, ngā Iepuhi – kia rite ki tā Ihowā, ki tā tōu Atua, i whakahau ai ki a koe.
DEU 20:18 Kei whakaakona koutou e rātou ki te mahi i ā rātou mahi whakarihariha katoa e mahia nei e rātou ki ō rātou atua; ā, ka hara koutou ki a Ihowā, ki tō koutou Atua.
DEU 20:19 Ki te maha ngā rā e whakapaea ai e koe he pā, e tauria ai kia horo, kei whakakorea e koe ngā rākau o reira, kei ākina atu ki te toki. Nō te mea hei kai ēnā māu, ā, kaua e tuaina e koe; he tangata koia te rākau o te pārae kia whakapaea e koe?
DEU 20:20 Ko ngā rākau anake e mōhio ai koe ehara i te rākau kai, ko ēnā āu e whakakore, ka tua ki raro; ā, ka hangā he taiepa whakapae mō te pā e whawhai ana ki a koe, ā horo noa.
DEU 21:1 E kitea te tangata i whakamatea ki te whenua i hōmai e Ihowā, e tōu Atua, hei kāinga mōu, e takoto ana i te pārae, ā, kāhore e mōhiotia nā wai i patu.
DEU 21:2 Nā, me puta mai ōu kaumātua me ōu kaiwhakawā, ka whanganga atu ki ngā pā i tētahi taha o te tūpāpaku, i tētahi taha.
DEU 21:3 Nā, ko te pā e tata ana ki te tūpāpaku, me tiki e ngā kaumātua o taua pā tētahi kūao kau, hei te uha, hei te mea kāhore anō i whakamahia, kāhore nei i tō ioka.
DEU 21:4 Me kawe anō hoki e ngā kaumātua o taua pā te kūao kau ki raro, ki tētahi awaawa wai, kāhore nei i ngakia, i whakatōkia rānei, ka whawhati ai i te kakī o te kau ki reira, ki te awaawa.
DEU 21:5 Nā, ka whakatata ngā tohunga, ngā tama a Rīwai; ko rātou hoki tā Ihowā, tā tōu Atua, i whiriwhiri ai hei minita ki a ia, hei manaaki anō hoki i runga i te ingoa o Ihowā; ā, mā rātou te kupu mō ngā tautohe katoa, mō ngā patu katoa.
DEU 21:6 Nā, me horoi e ngā kaumātua katoa o taua pā, e tata ana ki te tūpāpaku, ō rātou ringa ki runga ki te kūao kau i whatia nei te kakī ki te awaawa;
DEU 21:7 nā, ka kōrero rātou, ka mea: “Kīhai i whakahekea tēnei toto e ō mātou ringa, kīhai anō ō mātou kanohi i kite.
DEU 21:8 Kia mārie ki tōu iwi ki a Īharaira, e Ihowā, i hokona nei e koe, kaua anō hoki e whakairia he toto harakore ki runga ki tāu iwi, ki a Īharaira.” Nā, ka whai whakamārie rātou mō aua toto.
DEU 21:9 Pēnei ka whakakorea te toto harakore i roto i a koe, ina mea koe i te mea e tika ana ki tā Ihowā titiro.
DEU 21:10 Ka haere koe ki te whawhai ki ōu hoariri, ā, ka hōmai rātou e Ihowā, e tōu Atua, ki ōu ringa, ā, ka whakaraua rātou e koe hei whakarau;
DEU 21:11 ā, ka kite koe i tētahi wahine ātaahua i roto i ngā whakarau, ā, ka hiahia koe ki a ia, ka mea ki te tango i a ia hei wahine māu.
DEU 21:12 Nā, me kawe ia e koe ki tōu whare; ā, me heu e ia tōna mātenga, ka whakapai i ōna maikuku;
DEU 21:13 nā, me whakarere e ia te kākahu o tōna whakaraunga, ā, ka noho ki tōu whare, ka tangi ki tōna pāpā, ki tōna whaea, kia kotahi tino marama; ā muri iho ka haere atu koe ki a ia, ā, ka meinga hei tahu ki a ia, ko ia hoki hei wahine māu.
DEU 21:14 Ā, ki te kāhore koe e whakaahuareka ki a ia, me tuku atu ia e koe ki tāna wāhi e pai ai, kaua rawa e hokona ki te moni, kaua hoki e waiho hei mea pononga; he mea hoki kua whakaititia nei ia e koe.
DEU 21:15 Ki te tokorua ngā wāhine a tētahi tangata, kotahi e arohaina ana, kotahi e kinongia ana, ā, kua whānau he tamariki māna i te mea e arohaina ana, i te mea hoki e kinongia ana; ā, nā te mea e kinongia ana te tama mātāmua.
DEU 21:16 Ā, ka tae ki te rā e whakarērea iho ai e ia āna mea mā āna tamariki, e kore e āhei kia meinga hei mātāmua te tama a te mea e arohaina ana, arā hei kauaemua mō te tino mātāmua, mō te tama a te wahine e kinongia ana.
DEU 21:17 Engari, me whakaae ia ki te tama a te mea e kinongia ana, ko ia te mātāmua, me hoatu ki a ia ngā wāhi e rua o āna mea katoa. Nō te mea ko ia te tīmatanga o tōna kaha; māna ngā tikanga o te mātāmua.
DEU 21:18 Ki te mea he whakakeke, he whakatoi, te tama a tētahi tangata, ā, kāhore e rongo ki te reo o tōna pāpā, ki te reo rānei o tōna whaea, ā, ahakoa ka whiua e rāua, kāhore e rongo ki a rāua,
DEU 21:19 nā, me mau tōna pāpā rāua ko tōna whaea ki a ia, ka kawe i a ia ki ngā kaumātua o tōna pā, ki te kūwaha o tōna wāhi.
DEU 21:20 Ā, ka mea ki ngā kaumātua o tōna pā, “Ko tēnei tama a māua he whakakeke, he whakatoi, ā, e kore e rongo ki ō māua reo; he tangata haututū, he poro haurangi.”
DEU 21:21 Kātahi ngā tāngata katoa o tōna pā ka āki i a ia ki te kōhatu, kia mate; ā, ka whakakorea atu e koe te kino i roto i a koe, ā, ka rongo a Īharaira katoa, ka wehi.
DEU 21:22 Ki te mea anō he hara tō te tangata e tika ai te mate mōna, ā, ka whakamatea, ā, ka tāronatia e koe ki runga ki te rākau;
DEU 21:23 kaua e waiho tōna tinana runga i te rākau i te pō, engari, me tino tanu i taua rangi anō; he mea kanga hoki nā te Atua te tangata i tāronatia; kei poke tōu oneone, e hoatu nei e Ihowā, e tōu Atua, ki a koe hei kāinga tupu.
DEU 22:1 E kite koe i te kau a tōu teina, i tāna hipi rānei, e ātiutiu kē ana kei ninihi atu koe i a rāua; me āta whakahoki anō e koe ki tōu teina.
DEU 22:2 Ā, ki te kāhore tōu teina e tata mai ana ki a koe, ki te kāhore rānei koe e mōhio ki a ia, nā, me kawe mai ki tōu whare, ā, ki a koe noho ai, ā, rapu noa tōu teina i a ia; kātahi koe ka whakahoki atu ai ki a ia.
DEU 22:3 Me pēnā anō e koe ki tana kāihe; ā, me pēnā anō e koe ki tōna kākahu; me pēnā anō hoki ki ngā mea ngaro katoa a tōu teina, ina ngaro i a ia, ā, e kitea e koe; e kore e āhei kia ninihi koe.
DEU 22:4 E kite koe i te kāihe a tōu teina, i tāna kau rānei, kua hinga i te ara, kei ninihi koe i a rāua; me tino āwhina koe i a ia ki te whakaara i a rāua.
DEU 22:5 Kei kākahuria e te wahine tētahi mea o te tāne, kei kākahuria hoki e te tāne te kākahu o te wahine; he mea whakarihariha hoki ki a Ihowā, ki tōu Atua, te hunga katoa e pēnā ana.
DEU 22:6 Ki te pono koe ki te ōhanga manu i te ara, i runga i te rākau, i te whenua rānei, me ngā pī anō, me ngā hua rānei, me te kātua e pēhi ana i ngā pī i ngā hua rānei, kei tangohia ngātahitia e koe te kātua me ngā pī.
DEU 22:7 Me tuku tonu atu e koe te kātua, ka tango ai i ngā pī māu; kia whiwhi ai koe ki te pai, kia roa ai ōu rā.
DEU 22:8 Ki te hanga koe he whare hou, me hanga anō he taiepa mō tōu tuanui kei whai toto i a koe tōu whare, ina taka te tangata i runga.
DEU 22:9 Kaua e whakauruurua ngā purapura e whakatōkia e koe ki tāu māra wāina; kei poke te hua o te purapura e whakatōkia e koe, me ngā hua o te māra wāina.
DEU 22:10 Kaua e huihuia te kau ki te kāihe hei parau māu.
DEU 22:11 Kei kākahuria e koe te mea kakano whakauru, arā te huruhuru hipi i whakaurua nei ki te rīnena.
DEU 22:12 Hangā ētahi tāniko māu mō ngā tapa e whā o tōu kākahu e kākahu ai koe.
DEU 22:13 Ki te tango te tangata i te wahine, ā, ka haere ki roto, ki a ia, ā, ka kino ki a ia,
DEU 22:14 ā, ka hahani ki a ia, ka whakakinokino i tōna ingoa, ā, ka mea, “I tango ahau i tēnei wahine, ā, i tōku whakatatanga ki a ia, ka kite ahau ehara ia i te wāhina.”
DEU 22:15 Kātahi te pāpā rāua ko te whaea o te kōtiro ka tiki, ka kawe i ngā tohu o te wāhinatanga o te kōtiro ki ngā kaumātua o te pā, ki te kūwaha.
DEU 22:16 Ā, ka kōrero te pāpā o te kōtiro ki ngā kaumātua: “I hoatu e ahau tāku tamāhine nei hei wahine mā tēnei tangata, ā, e kinongia ana e ia.
DEU 22:17 Nā, tēnei ia te mea nei kia kōrerotia kinotia ia, e mea ana, ‘Kīhai ahau i kite tohu he wāhina tāu tamāhine.’ Nā, ko ngā tohu ēnei o te wāhinatanga o tāku kōtiro.” Nā, me hora e rāua te kākahu ki te aroaro o ngā kaumātua o te pā.
DEU 22:18 Kātahi ka mau ngā kaumātua o taua pā ki taua tangata, ka whiu i a ia;
DEU 22:19 ā, me tango e rātou i taua tangata kia kotahi rau ngā hekere hiriwa hei utu, (ka hoatu ai ki te pāpā o te kōtiro) mōna hoki i whakairi i te ingoa kino ki runga ki tētahi o ngā wāhina o Īharaira. Ā, hei wahine ia māna; e kore e āhei kia whakarērea e ia i ngā rā katoa e ora ai ia.
DEU 22:20 Ki te mea ia he tika taua mea, kāhore i kitea ngā tohu o te wāhinatanga o te kōtiro;
DEU 22:21 nā, me kawe mai e rātou te kōtiro ki te kūwaha o te whare o tōna pāpā, ā, me āki e ngā tāngata o tōna pā ki te kōhatu, kia mate; mō tāna mahi pōauau i roto i a Īharaira, mō tāna kairautanga i roto i te whare o tōna pāpā; ā, ka whakakorea e koe te kino i roto i a koe.
DEU 22:22 Ki te mau tētahi tangata e takoto ana ki te wahine whai tahu, nā, me whakamate rāua tokorua, te tāne i takoto ki te wahine, me te wahine anō hoki; ā, ka whakakorea e koe te kino i roto i a Īharaira.
DEU 22:23 Mehemea tērā tētahi kōtiro, he wāhina, i taumautia mā te tāne, ā, ka tūpono tētahi tangata ki a ia i te pā, ā, ka takotoria e ia;
DEU 22:24 me kawe rāua ki te kūwaha o tēnā pā, me āki ki te kōhatu, kia mate; te kōtiro, i te mea i roto ia i te pā kīhai ia i karanga; te tangata, mōna i whakaiti i te wahine a tōna hoa. Ā, ka whakakorea atu e koe te kino i roto i a koe.
DEU 22:25 Otiia, ki te tūpono te tangata, i te pārae, ki tētahi kōtiro kua oti te taumau, ā, ka hopukia atu ia e te tangata rā, ka takotoria hoki e ia; nā, ko taua tangata anake i takoto nei ki a ia e mate.
DEU 22:26 Kauaka ia e ahatia e koe te kōtiro; kāhore hoki o te kōtiro hara e mate ai. E rite ana hoki tēnei mea ki te whakatikanga ake o te tangata ki tōna hoa, ā, kōhurutia iho.
DEU 22:27 I tūpono hoki te tāne ki a ia i te pārae; ā, i karanga te kōtiro i taumautia nei, ā, kāhore tētahi hei whakaora i a ia.
DEU 22:28 Ki te tūpono tētahi tangata ki te kōtiro, ki te wāhina, kāhore nei i taumautia, ā, ka hopu i a ia, ka takoto ki a ia, ā, ka kitea rāua;
DEU 22:29 nā, kia rima tekau ngā hekere hiriwa e hōmai ki te pāpā o te kōtiro e te tangata i takoto nei ki a ia, ā, ka waiho te wahine hei wahine māna, mōna i whakaiti i a ia; e kore e āhei kia whakarērea e ia i ngā rā katoa e ora ai ia.
DEU 22:30 E kore e āhei kia tangohia e te tangata te wahine a tōna pāpā, kia hurahia hoki te remu o tōna pāpā.
DEU 23:1 Ko te tangata kua unakatia, kua romiromia, kua tapahia atu rānei tōna mea ngaro, e kore e uru ki roto ki te whakaminenga a Ihowā.
DEU 23:2 E kore e uru te pōriro ki roto ki te whakaminenga a Ihowā; ahakoa tae ki te tekau o ōna whakatupuranga, e kore e uru ki roto ki te whakaminenga a Ihowā.
DEU 23:3 E kore e uru te Āmoni, te Moapi rānei, ki roto ki te whakaminenga a Ihowā; ahakoa tae ki te tekau o ō rātou whakatupuranga, e kore e uru ki roto ki te whakaminenga a Ihowā ake ake.
DEU 23:4 Mō rātou kīhai i whakatau i a koutou, me te mau taro mai, me te mau wai mai mō koutou ki te ara, i tō koutou putanga mai i Īhipa; mō rātou hoki i utu i a Paraama, i te tama a Peoro i Petoro i Mehopotamia, hei kanga mōu.
DEU 23:5 Otiia, kīhai a Ihowā, tōu Atua, i pai ki te whakarongo ki tā Paraama engari whakaputaina kētia ake e Ihowā, e tōu Atua te kanga hei manaaki mōu; nō te mea e aroha ana a Ihowā, tōu Atua, ki a koe.
DEU 23:6 Kei whai koe kia mau te rongo ki a rātou, kia kake rānei rātou i ngā rā katoa e ora ai koe.
DEU 23:7 Kaua e whakarihariha ki te Ēromi ko tōu tuakana hoki ia; kaua e whakarihariha ki te Īhipiana; he manene hoki koe i tōna whenua i mua.
DEU 23:8 Kei te toru o ngā whakatupuranga ka uru ā rātou tamariki e whānau ai ki roto ki te whakaminenga a Ihowā.
DEU 23:9 Ki te haere ā-ope atu koe ki ōu hoariri, kia tūpato i ngā mea kino katoa.
DEU 23:10 Ki te mea kei roto i a koe tētahi tangata kāhore i mā i te paheketanga o te pō, nā, me haere atu ia ki waho o te puni; kaua ia e haere ki roto ki te puni.
DEU 23:11 Otiia ka whakaahiahi, nā, me horoi ia e ia ki te wai; ā, ka toene te rā, ka haere ia ki roto ki te puni.
DEU 23:12 Ā, me waiho e koe tētahi wāhi i waho o te puni, hei putanga atu mōu ki waho.
DEU 23:13 Kia whai kāheru hoki koe i roto i āu mea; ā, ka noho koe ki waho, nā, me keri e koe ki taua mea, ā, ka tahuri ki te tanu i te mea i puta i roto i a koe.
DEU 23:14 Kei te hāereere hoki a Ihowā, tōu Atua, i waenganui o tōu puni, hei whakaora i a koe, hei tuku hoki i ōu hoariri ki tōu aroaro. Mō reira kia tapu tōu puni; kei kite ia i tētahi mea whakarihariha i roto i a koe, ā, ka tahuri kē i a koe.
DEU 23:15 Kaua e tukua atu ki tōna rangatira te pononga i tahuti mai i tōna rangatira ki a koe;
DEU 23:16 me noho ia ki a koe, ki waenga ōu, ki te wāhi e whiriwhiri ai ia, ki tētahi o ōu kūwaha, ki tāna e pai ai; kaua ia e tūkinotia.
DEU 23:17 Kaua tētahi o ngā tamāhine a Īharaira e waiho hei kairau, kaua anō hoki tētahi o ngā tama a Īharaira e whakatangata o Horoma.
DEU 23:18 Kei kawea e koe te utu o te wahine kairau, te utu rānei o te kurī ki roto ki te whare o Ihowā, o tōu Atua, hei mea kī taurangi. He mea whakarihariha hoki ēnā e rua ki a Ihowā, ki tōu Atua.
DEU 23:19 Kei whakatārewa koe i tētahi mea ki tōu teina hei mea whakatupu; hei moni whakatupu, hei kai whakatupu, i tētahi rānei o ngā mea e whakatārewaina ana hei whakatupu.
DEU 23:20 He tangata kē, whakatārewaina atu te moni whakatupu; ki tōu teina ia kaua e whakatārewaina. Kia manaakitia ai koe e Ihowā, e tōu Atua, i ngā mea katoa e totoro atu ai tōu ringa i runga i te whenua e haere atu nei koe ki reira tango ai.
DEU 23:21 Ki te puaki tāu kī taurangi ki a Ihowā, ki tōu Atua, kei whakaroa ki te whakamana; nō te mea ka whāia mai e Ihowā, e tōu Atua, ki a koe; ā, ka waiho hei hara mōu.
DEU 23:22 Ki te kāhore ia e puaki tāu kī taurangi, e kore e waiho hei hara mōu.
DEU 23:23 Ko te mea i puta atu i ōu ngutu kia mana i a koe, mahia; kia rite hoki ki tāu kī taurangi ki a Ihowā, ki tōu Atua, hei whakahere tuku noa, hei pērā me tā tōu māngai i kōrero ai.
DEU 23:24 E haere koe ki te māra wāina a tōu hoa, kainga ngā karepe e pai ai koe, ā, mākona noa koe; kaua ia e kohia ētahi ki tāu oko.
DEU 23:25 E haere koe ki te wīti kāhore anō kia kotia a tōu hoa, nā, mā tōu ringa e kato ētahi hua; kaua ia he toronaihi e ākina atu ki te wīti a tōu hoa, kāhore anō kia kotia e ia.
DEU 24:1 Ki te tango te tangata i te wahine, ā, ka mārena i a ia, nā, ki te kore ia e manakohia e ia, nō te mea kua kitea e ia tētahi hē ōna, me tuhituhi e ia he pukapuka whakarere ki a ia, ka hoatu ki tōna ringa, ā, ka tono atu i a ia ki waho o tōna whare.
DEU 24:2 Ā, ka puta ia i tōna whare, ka āhei ia te haere ā, ka riro hei wahine mā tētahi atu.
DEU 24:3 Ā, ki te kino tō muri tahu ki a ia, ā, ka tuhituhia e ia he pukapuka whakarere ki a ia, ka hoatu hoki ki tōna ringa, ka tono atu anō hoki i a ia i roto i tōna whare (ki te mate rānei tō muri tahu i tango nei i a ia hei wahine māna);
DEU 24:4 e kore e āhei i te tahu tuatahi, nāna nei ia i tono atu, te tango anō i a ia hei wahine māna i muri i tōna whakapokenga; he mea whakarihariha hoki tēnā ki te aroaro o Ihowā. Kaua anō hoki e mea kia whai hara te whenua i hoatu nei e Ihowā, e tōu Atua, ki a koe hei kāinga tupu.
DEU 24:5 Ki te tango te tangata i te wahine hou, kaua ia e haere ki te whawhai, kaua anō hoki tētahi mahi e whakaritea māna. Me noho noa ia i tōna whare kia kotahi tau, whakahari ai i te ngākau o tāna wahine i tango ai.
DEU 24:6 Kaua e tangohia e te tangata tō raro kōhatu, tō runga kōhatu rānei o te mira, hei taunaha. He tango hoki tēnā i te oranga o te tangata hei taunaha.
DEU 24:7 Ki te mau tētahi tangata e tāhae ana i tētahi o ōna tēina o ngā tama a Īharaira, hei pononga māna, hei hoko rānei māna, me mate taua tāhae. Ā, ka whakakorea atu e koe te kino i roto i a koe.
DEU 24:8 Kia mahara, i ngā pānga mai o te repera, kia whakaritea mārietia, kia mahia ngā mea katoa e ako ai ngā tohunga, ngā Rīwaiti, ki a koutou; kia mahara kia mahia tāku i whakahau ai ki a rātou.
DEU 24:9 Maharatia tā Ihowā, tā tōu Atua, i mea ai ki a Miriama i te ara, i tō koutou haerenga mai i Īhipa.
DEU 24:10 Ki te whakatārewa atu koe i tētahi mea ki tōu hoa, kaua e haere ki roto ki tōna whare ki te tiki atu i tāna taunaha.
DEU 24:11 Me tū atu koe i waho, ā, mā te tangata i a ia nei tāu mea, e kawe mai te taunaha ki a koe ki waho.
DEU 24:12 Otiia, mehemea he rawakore taua tangata, kei moe koe me te takoto tahi mai tāna taunaha;
DEU 24:13 me tino whakahoki atu e koe te taunaha ki a ia ina toene te rā, kia moe ai ia i roto i tōna kākahu, ā, ka manaaki i a koe. Ā, ka waiho hei tika mōu ki te aroaro o Ihowā, o tōu Atua.
DEU 24:14 Kei tūkinotia e koe te kaimahi, he rawakore, he mate, ahakoa nō ōu tuākana, nō ōu tāngata iwi kē rānei i tōu whenua, i roto i ōu kūwaha.
DEU 24:15 Me hoatu e koe tōna utu i tōna rā, kei tō te rā me te takoto anō taua mea; he rawakore hoki ia, ā, e ōkaka ana tōna ngākau ki taua mea. Kei karanga ia ki a Ihowā mō tōu kino, ā, ka waiho hei hara mōu.
DEU 24:16 E kore e whakamatea ngā mātua mō te hē o ngā tamariki, e kore anō hoki e whakamatea ngā tamariki mō te hē o ngā mātua; mō tōna ake hara anō e whakamatea ai tēnā tangata, tēnā.
DEU 24:17 Kei whakapeaua kētia e koe te whakawā mō te manene, mō te pani rānei; kaua anō hoki e tangohia te kākahu o te pouaru hei taunaha.
DEU 24:18 Engari kia mahara he pononga koe i Īhipa, ā, nā Ihowā, nā tōu Atua, koe i whakaora mai i reira; koia ahau i whakahau ai i a koe ki te mea i tēnei mea.
DEU 24:19 Ka kotia e koe āu hua i tāu māra, ā, ka wareware tētahi paihere i te māra, kei hoki koe ki te tiki; waiho mā te manene, mā te pani, mā te pouaru; kia manaakitia ai koe e Ihowā, e tōu Atua, i ngā meatanga katoa a ōu ringa.
DEU 24:20 E tāia e koe tāu ōriwa, kaua e hoki anō ki ngā manga ketu ai; waiho mā te manene, mā te pani, mā te pouaru.
DEU 24:21 E whakia e koe ngā karepe o tāu māra wāina, kaua e hamua i muri i a koe; waiho mā te manene, mā te pani, mā te pouaru.
DEU 24:22 Me mahara anō hoki koe he pononga koe i te whenua o Īhipa; koia ahau i whakahau ai i a koe kia mea i tēnei mea.
DEU 25:1 Ki te mea he tautohe tā ētahi, ā, ka haere mai kia whakawākia, ā, ka whakawākia e ngā kaiwhakariterite; me whakatika e rātou tā te tika, me whakahē tā te hē.
DEU 25:2 Ā, ki te meinga te tangata kino kia whiua, nā, me mea ia e te kaiwhakariterite kia takoto, kia whiua ki mua i tōna aroaro, kia rite ki tōna kino te maha o ngā whiu.
DEU 25:3 Kia whā tekau āna whakapānga ki a ia, kaua e maha ake; he mea hoki, ki te tuhene, ā, ka maha atu i ēnei ngā whakapānga, nā, ka iti tōu teina ki tāu titiro.
DEU 25:4 Kaua e whakamōkātia te kau ina takahia e ia te wīti.
DEU 25:5 Ki te noho tahi te teina me te tuakana, ā, ka mate tētahi o rāua, ā, kāhore āna tama, kaua te wahine a te tangata i mate e mārenatia ki waho, ki te tangata kē; me haere tōna autāne ki a ia, ka tango ai i a ia hei wahine māna, me mea ki a ia ngā mea e tika ana mā te autāne.
DEU 25:6 Ā, ka whānau tāna mātāmua, ko ia hei whakarerenga iho mō te ingoa o tōna tuakana, teina rānei, i mate nei, ā, ka kore tōna ingoa e horoia atu i roto i a Īharaira.
DEU 25:7 Ki te kāhore taua tangata e pai ki te tango i tōna auwahine, kātahi ka haere tōna auwahine ki te kūwaha, ki ngā kaumātua, ā, ka mea, “E kore tōku autāne e pai ki te whakatupu ingoa mō tōna tuakana, teina rānei, i roto i a Īharaira, e kore e meatia e ia ngā mea e tika ana mā tōku autāne.”
DEU 25:8 Kātahi ka karangatia ia e ngā kaumātua o tōna pā, ā, ka kōrero rātou ki a ia; ā, ki te ū tonu tāna, ā, ka mea ia, “E kore ahau e pai ki te tango i a ia,”
DEU 25:9 kātahi ka whakatata tōna auwahine ki a ia i te tirohanga a ngā kaumātua, ā, ka unu i tōna hū i tōna waewae, ka tuwha hoki ki tōna mata, ā, ka kōrero ake, ka mea, “Kia pēneitia te tangata e kore e hanga i te whare o tōna tuakana, teina rānei.”
DEU 25:10 Ā, ka huaina tōna ingoa i roto i a Īharaira, “Ko te whare o te tangata i unuhia nei tōna hū.”
DEU 25:11 Ki te whawhai ētahi tāngata ki a rāua, ā, ka whakatata te wahine a tētahi ki te whakaora i tāna tahu i te tangata e patu ana i a ia, ā, ka totoro tōna ringa, ka mau hoki ki ōna wāhi ngaro;
DEU 25:12 me tapahi atu e koe tōna ringa, kaua e tohu tōu kanohi.
DEU 25:13 Kaua e waiho i roto i tāu kete ngā kōhatu pāuna e kore e taurite, te mea nui, te mea iti.
DEU 25:14 Kaua e waiho i roto i tōu whare ngā mēhua e kore e taurite, te mea nui, te mea iti.
DEU 25:15 Hei te mea rite tonu, hei te mea tika, tāu kōhatu pāuna; hei te mea rite tonu, hei te mea tika, tāu mēhua; kia roa ai ōu rā ki te whenua e hōmai nei e Ihowā, e tōu Atua, ki a koe.
DEU 25:16 He mea whakarihariha hoki ki a Ihowā, ki tōu Atua, te hunga katoa e pēnā ana, te hunga katoa e hē ana te mahi.
DEU 25:17 Kia mahara ki tā Amareke i mea ai ki a koe i te ara, i tō koutou putanga mai i Īhipa;
DEU 25:18 ki tōna tūtakitanga ki a koe ki te ara, ā, patua iho tōu hiku e ia, ngā mea ngoikore katoa i muri i a koe, i a koe e hemo ana, e ngenge ana; ā, kīhai ia i wehi ki te Atua.
DEU 25:19 Mō reira e meinga koe e Ihowā, e tōu Atua, kia okioki i ōu hoariri katoa ā tawhio noa, ki te whenua e hōmai nei e Ihowā, e tōu Atua, ki a koe kia nohoia hei kāinga tupu, me ūkui rawa atu te maharatanga ki a Amareke i raro i te rangi; kei wareware rawa koe.
DEU 26:1 Ā tēnei ake, ā te wā e tae ai koe ki te whenua e hōmai e Ihowā, e tōu Atua, ki a koe hei kāinga tūturu, ā, ka riro a reira i a koe, ā, ka noho koe ki reira;
DEU 26:2 nā, ka tango koe i ētahi o ngā mea mātāmua o ngā hua katoa o te whenua, e mauria mai e koe i tōu oneone, ka hōmai nei e Ihowā, e tōu Atua, ki a koe; ā, me whawhao e koe ki te kete, ka haere ai ki te wāhi e whiriwhiri ai a Ihowā, tōu Atua, kia waiho tōna ingoa ki reira.
DEU 26:3 Nā, ka haere koe ki te tohunga e minita ana i aua rā, ka mea ki a ia, “Tēnei ahau te kōrero nui nei i tēnei rā ki a Ihowā, ki tōu Atua, kua tae mai ahau ki te whenua i oati ai a Ihowā ki ō tātou mātua kia hōmai ki a tātou.”
DEU 26:4 Nā, ka tango te tohunga i te kete i tōu ringa, ka whakatakoto hoki ki mua o te āta a Ihowā, a tōu Atua.
DEU 26:5 Ko reira koe oho atu ai, mea ai ki te aroaro o Ihowā, o tōu Atua, “Ko tōku matua he Hīriani, i ora noa i te mate; ā, haere ana ia ki raro, ki Īhipa, ā, noho ana i reira, he hunga torutoru; nā, meinga ana ia hei iwi nui i reira, he kaha, he tini.
DEU 26:6 Nā, tūkinotia ana mātou e ngā Īhipiana, whakawhiua ana mātou, ā, he kino tā rātou whakamahinga i a mātou;
DEU 26:7 ā, ka tangi mātou ki a Ihowā, ki te Atua o ō mātou mātua, nā, whakarongo mai ana a Ihowā ki tō mātou reo, titiro mai ana ki tō mātou whakawhiunga, ki tō mātou whakamahinga, ki tō mātou tūkinotanga.
DEU 26:8 Nā, whakaputaina mai ana mātou e Ihowā i Īhipa ki te ringa kaha, ki te tākakau mārō tonu, me te whakamataku nui, me ngā tohu, me ngā merekara;
DEU 26:9 ā, kawea mai ana mātou e ia ki tēnei wāhi, ā, hōmai ana ki a mātou tēnei whenua, he whenua e rerengia ana e te waiū, e te honi.
DEU 26:10 Nā, titiro, kua kawea mai nei e ahau ngā hua mātāmua o te whenua i hōmai nei e koe, e Ihowā, ki ahau.” Kātahi koe ka whakatakoto atu ki te aroaro o Ihowā, o tōu Atua, me te koropiko anō ki te aroaro o Ihowā, o tōu Atua;
DEU 26:11 ka koa hoki ki ngā mea pai katoa i hōmai e Ihowā, e tōu Atua, ki a koutou ko tōu whare, a koe, me te Rīwaiti me te manene i roto i a koe.
DEU 26:12 Ka pae ngā whakatekau katoa o āu hua i te toru o ngā tau, i te tau whakatekau, me hoatu e koe ki te Rīwaiti, ki te manene, ki te pani, ki te pouaru, kia kainga i roto i ōu kūwaha, ā, ka mākona;
DEU 26:13 ā, ka mea koe ki te aroaro o Ihowā, o tōu Atua: “Kua poto mai i ahau i roto i tōku whare ngā mea tapu, kua hoatu anō e ahau ki te Rīwaiti, ki te manene, ki te pani, ki te pouaru, kua rite i ahau āu whakahau katoa i whakahau ai koe ki ahau; kāhore ahau i whakapaheke i tētahi o āu whakahau, kāhore anō i wareware.
DEU 26:14 Kīhai i kainga e ahau tētahi wāhi i ahau e noho tauā ana; kīhai i tangohia e ahau tētahi wāhi mō te poke, kīhai anō hoki i hoatu hei mea tūpāpaku; i whakarongo ahau ki te reo o Ihowā, o tōku Atua, rite tonu āku mahi ki ngā mea katoa i whakahaua e koe ki ahau.
DEU 26:15 Titiro iho i tōu nohoanga tapu, i te rangi, manaakitia hoki tāu iwi, a Īharaira, me te oneone i hōmai nei e koe ki a mātou, pērā me tāu i oati ai ki ō mātou mātua, he whenua e rerengia ana e te waiū e te honi.”
DEU 26:16 Nō tēnei rā a Ihowā, tōu Atua, i whakahau ai i a koe, kia mahia ēnei tikanga, me ēnei whakaritenga; nā, puritia e koe, mahia, e tōu ngākau katoa, e tōu wairua katoa.
DEU 26:17 Kua whakaae koe i tēnei rā ki a Ihowā hei Atua mōu, kia haere i āna huarahi, kia whakaritea hoki āna tikanga, me āna whakahau, me āna whakaritenga, kia rongo anō hoki ki tōna reo.
DEU 26:18 Ā, kua whakaae hoki a Ihowā ki a koe i tēnei rā hei iwi māna, motuhake rawa hei pērā me tāna i kōrero ai ki a koe, hei pupuri hoki i āna whakahau katoa;
DEU 26:19 hei mea kia teitei ake koe i ngā iwi katoa i hangā e ia, te whakamoemiti, te ingoa, te korōria; kia waiho hoki koe hei iwi tapu mā Ihowā, mā tōu Atua, hei pērā me tāna i kōrero ai.
DEU 27:1 Nā, ka whakahau a Mohi rātou ko ngā kaumātua o Īharaira i te iwi, ka mea: “Puritia ngā whakahau katoa e whakahau nei ahau ki a koutou i tēnei rā.
DEU 27:2 Ā tēnei ake, ā te rā e whiti atu ai koutou i Horano ki te whenua e hōmai ana e Ihowā, e tōu Atua, ki a koe, nā, ka whakaara ake koe i ētahi kōhatu nunui māu, ka pani hoki ki te raima.
DEU 27:3 Ka tuhituhi hoki i ngā kupu katoa o tēnei ture ki reira, ua whiti atu koe; kia haere atu koe ki te whenua e hōmai ana e Ihowā, e tōu Atua, ki a koe, ki te whenua e rerengia ana e te waiū, e te honi, kia pērā me tā Ihowā, me tā te Atua o ōu mātua, i kōrero ai ki a koe.
DEU 27:4 Mō reira, e whiti koutou i Horano, me whakaara ēnei kōhatu e whakahaua nei e ahau i tēnei rā ki a koutou, ki runga ki Maunga Ēpara ka pani hoki ki te raima.
DEU 27:5 Ā, me hanga e koe ki reira tētahi āta mā Ihowā, mā tōu Atua, hei te āta kōhatu; kaua e ākina iho e koe ki te rino.
DEU 27:6 Me hanga e koe te āta mā Ihowā, mā tōu Atua, ki ngā kōhatu toitū; ka whakaeke ai i ngā tahunga tinana mā Ihowā, mā tōu Atua, ki runga;
DEU 27:7 patua hoki ngā whakahere mō te pai, ā, kainga ki reira; me te koa anō ki te aroaro o Ihowā, o tōu Atua.
DEU 27:8 Ka tuhituhi hoki i ngā kupu o tēnei ture ki ngā kōhatu, kia mārama tonu.”
DEU 27:9 I kōrero anō a Mohi rātou ko ngā tohunga, ko ngā Rīwaiti, ki a Īharaira, i mea, “Noho puku mai, ā, whakarongo, e Īharaira; nō tēnei rā i meinga ai koe hei iwi mō Ihowā, mō tōu Atua.
DEU 27:10 Nā, me whakarongo koe ki te reo o Ihowā, o tōu Atua, me mahi hoki i āna whakahau, me āna tikanga e whakahaua atu nei e ahau ki a koe i tēnei rā.”
DEU 27:11 I whakahau hoki a Mohi i te iwi i taua rangi anō, i mea:
DEU 27:12 Ko ēnei e tū ki runga ki Maunga Keritimi hei manaaki i te iwi, ua whiti atu koutou i Horano; ko Himiona, ko Rīwai, ko Hūrā, ko Ihākara, rātou ko Hōhepa, ko Pineamine.
DEU 27:13 Ko ēnei e tū ki runga ki Maunga Ēpara hei kanga; ko Reupena, ko Kara, ko Āhera, ko Hepurona, ko Rāna, ko Napatari.
DEU 27:14 Nā, ka kōrero ngā Rīwaiti, ka mea, kia nui hoki te reo, ki ngā tāngata katoa o Īharaira:
DEU 27:15 “Kia kangā te tangata e hanga ana i te whakapakoko, i te mea whakairo, whakarewa rānei, e whakariharihangia nei e Ihowā, he mea mahi nā te ringa o te kaimahi, e whakanoho ana hoki i taua mea ki te wāhi ngaro.” Mā te iwi katoa e whakahoki, e mea, “Āmine.”
DEU 27:16 “Kia kangā te tangata e whakahāwea ana ki tōna pāpā, ki tōna whaea rānei.” Mā te iwi katoa e whakahoki, e mea, “Āmine.”
DEU 27:17 “Kia kangā te tangata e neke atu ana i te rohe o tōna hoa.” Mā te iwi katoa e mea, “Āmine.”
DEU 27:18 “Kia kangā te tangata e whakapōhēhē ana i te matapō ki te huarahi.” Mā te iwi katoa e mea, “Āmine.”
DEU 27:19 “Kia kangā te tangata e whakaputa kē ana i te whakawā mō te manene, mō te pani, mō te pouaru.” Mā te iwi katoa e mea, “Āmine.”
DEU 27:20 “Kia kangā te tangata e moe ana ki te wahine a tōna pāpā; mōna i hura i te remu o tōna pāpā.” Mā te iwi katoa e mea, “Āmine.”
DEU 27:21 “Kia kangā te tangata e moe ana ki tētahi kararehe.” Mā te iwi katoa e mea, “Āmine.”
DEU 27:22 “Kia kangā te tangata e moe ana ki tōna tuahine, ki te tamāhine a tōna pāpā, ki te tamāhine rānei a tōna whaea.” Mā te iwi katoa e mea, “Āmine.”
DEU 27:23 “Kia kangā te tangata e moe ana ki tōna hungawai wahine.” Mā te iwi katoa e mea, “Āmine.”
DEU 27:24 “Kia kangā te tangata e patu puku ana i tōna hoa.” Mā te iwi katoa e mea, “Āmine.”
DEU 27:25 “Kia kangā te tangata e tango ana i te utu mō te patunga o te tangata harakore.” Mā te iwi katoa e mea, “Āmine.”
DEU 27:26 “Kia kangā te tangata e kore e mau i a ia ngā kupu o tēnei ture, hei mahi māna.” Mā te iwi katoa e mea, “Āmine.”
DEU 28:1 Ā tēnei ake, ki te āta whakarongo koe ki te reo o Ihowā, o tōu Atua ki te mau ki te mahi i āna whakahau katoa e whakahau atu nei ahau i tēnei rā ki a koe, nā, ka whakanui a Ihowā, tōu Atua, i a koe ki runga ake i ngā iwi katoa o te whenua.
DEU 28:2 Ā, ka tae mai ēnei manaaki katoa ki a koe, ka hopu i a koe, ki te whakarongo koe ki te reo o Ihowā, o tōu Atua:
DEU 28:3 Ka manaakitia koe i roto i te pā, ka manaakitia hoki koe i te māra.
DEU 28:4 Ka manaakitia ngā hua o tōu kōpū, me ngā hua o tōu oneone, me ngā hua o āu kararehe, ngā uri o āu kau, me ngā kūao o āu hipi.
DEU 28:5 Ka manaakitia tāu kete me tāu pokepokenga parāoa.
DEU 28:6 Ka manaakitia koe ina haere mai, ka manaakitia hoki ina haere atu.
DEU 28:7 Ka meinga e Ihowā ōu hoariri e whakatika ana ki a koe kia tukitukia i tōu aroaro. Kotahi anō te ara e puta mai ai rātou ki a koe, ā, e whitu ngā ara e rere atu ai rātou i tōu aroaro.
DEU 28:8 Ka whakahau a Ihowā i te manaaki mōu, mō ōu whare taonga, mō ngā mea katoa hoki e toro atu ai tōu ringa; ā, ka manaaki ia i a koe ki te whenua ka hōmai nei e Ihowā, e tōu Atua, ki a koe.
DEU 28:9 Ka whakatūturutia koe e Ihowā hei iwi tapu māna, ka pērātia me tāna i oati ai ki a koe; ki te mau koe ki ngā whakahau a Ihowā, a tōu Atua, ki te haere i āna huarahi.
DEU 28:10 Ā, ka kite ngā iwi katoa o te whenua kua huaina iho te ingoa o Ihowā ki a koe; ā, ka wehi i a koe.
DEU 28:11 Ā, ka whakanui rawa a Ihowā i te pai mōu, ka whai hua hoki tōu kōpū, ka whai hua āu kararehe, ka whai hua tōu oneone, i te whenua i oati ai a Ihowā ki ōu mātua kia hoatu ki a koe.
DEU 28:12 Ka whakatuwheratia e Ihowā ki a koe tāna taonga pai, te rangi hei hōmai i te ua ki tōu whenua i tōna pō anō, hei manaaki hoki i ngā mahi katoa a tōu ringa; ā, ka tuku moni atu koe ki ngā iwi maha, e kore anō koe e tango i te moni tārewa.
DEU 28:13 Ā, ka meinga koe e Ihowā hei upoko, e kore hoki e waiho hei hiku; ki runga anake koe, ā, kāhore ki raro; ki te whakarongo koe ki ngā whakahau a Ihowā, a tōu Atua, e whakahau atu nei ahau i tēnei rā ki a koe, ā, ka puritia e koe, ka mahia.
DEU 28:14 Ki te kore e peka atu i tētahi o ngā kupu e whakahau nei ahau i tēnei rā ki a koe, ki matau rānei, ki mauī rānei, whai ai ki ngā atua kē, mahi ai ki a rātou.
DEU 28:15 Engari, ki te kore koe e whakarongo ki te reo o Ihowā, o tōu Atua, e mau hoki ki te mahi i āna whakahau katoa, i āna tikanga, e whakahau atu nei ahau i tēnei rā ki a koe; nā, ka tae mai ki a koe, ka hopu i a koe, ēnei kanga katoa:
DEU 28:16 Ka kangā koe i te pā, ka kangā koe i te māra.
DEU 28:17 Ka kangā tāu kete me tāu pokepokenga parāoa.
DEU 28:18 Ka kangā te hua o tōu kōpū, me te hua o tōu oneone, te uri o āu kau, me ngā kūao o āu hipi.
DEU 28:19 Ka kangā koe i tōu haerenga mai, ka kangā hoki koe i tōu haerenga atu.
DEU 28:20 Ka tukua e Ihowā ki a koe te kanga, te tuatea me te whakatūpehupehu, ki ngā mea katoa e toro atu ai tōu ringa ki te mahi, kia ngaro rā anō koe, kia hohoro rā anō te mate atu; mō te kino o āu mahi, i whakarere nei koe i ahau.
DEU 28:21 Ka meinga e Ihowā te mate urutā kia piri tonu ki a koe, kia whakapotoa atu rā anō koe e ia i runga i te whenua e haere atu nā koe ki reira ki te tango.
DEU 28:22 Ka whiua koe e Ihowā ki te kohi, ki te kirikā, ki te mumura, ki te toronga nui, ki te hoari, ki te tauraki, te hōpurupuru; ā, ka whai ēnā i a koe ā ngaro noa koe.
DEU 28:23 Ā, ka whakaparāhi tōu rangi i runga i tōu māhunga, ka whakarino hoki te whenua i raro i a koe.
DEU 28:24 Ka hōmai e Ihowā hei ua mō tōu whenua te puehu me te nehu; ka rere iho taua mea i te rangi ki runga ki a koe, kia ngaro rā anō koe.
DEU 28:25 Ka mea a Ihowā kia patua koe ki te aroaro, o ōu hoariri. Kotahi anō te ara e haere atu ai koe ki a ia, ā, e whitu ngā ara e rere ai koe i tōna aroaro; ā, ka makamakaia haeretia koe i waenganui o ngā rangatiratanga katoa o te whenua.
DEU 28:26 Ā, ka ai tōu tinana mate hei kai mā ngā manu katoa o te rangi, mā ngā kararehe hoki o te whenua, ā, kāhore he tangata hei whakawehi atu i a rātou.
DEU 28:27 Ka patu a Ihowā i a koe ki te tūwhenua o Īhipa, ki ngā pukupuku, ki te pāpaka, ki te waihakihaki hoki, e kore nei koe e taea te rongoā.
DEU 28:28 Ka patu a Ihowā i a koe ki te pōrangi, ki te matapō, ki te ngākau pōhēhē;
DEU 28:29 ā, ka whāwhā koe i te tino awatea, ka pērā me te tangata matapō e whāwhā nei i roto i te pōuri, ā, e kore e whiwhi i ōu huarahi; ā, ka waiho koe hei tūkinotanga kautanga, hei murunga i ngā rā katoa, ā, kāhore he kaiwhakaora mōu.
DEU 28:30 Ka taumau koe i te wahine, ā, he tangata kē māna ia e moe; ka mahi koe i te whare, ā, e kore koe e noho ki roto; ka whakatō koe i te māra wāina, ā, e kore koe e kai i ōna hua.
DEU 28:31 Ka patua tāu kau i mua i ōu kanohi, ā, e kore koe e kai i tētahi wāhi ōna; ko tāu kāihe ka pāhuatia atu i tōu aroaro, e kore e whakahokia ki a koe. Ko āu hipi ka hoatu mā ōu hoariri, ā, kāhore ōu tāngata hei whakaora i a koe.
DEU 28:32 Ko āu tama me āu tamāhine ka hoatu ki te iwi kē, ā, ka matawaia ōu kanohi i te tirohanga ki a rātou, ā pau noa te rā; kāhore hoki he kaha i tōu ringa.
DEU 28:33 Ko ngā hua o tōu oneone me tōu uauatanga katoa, ka kainga e tētahi iwi kīhai nei i mōhiotia e koe; ā, hei tūkinotanga kautanga koe, hei kurunga i ngā rā katoa;
DEU 28:34 ā, ka haurangi koe i te kitenga a ōu kanohi e kite ai koe.
DEU 28:35 Ka patu a Ihowā i a koe, i ngā turi, i ngā waewae, ki te tūwhenua kino e kore e taea te rongoā, i te kapu o tōu waewae, ā tae noa ki tōu tumuaki.
DEU 28:36 Ka whakaheke atu a Ihowā i a koe, i tōu kīngi hoki e meatia e koe hei kīngi mōu, ki te iwi kīhai nei koe i mōhio, koutou ko ōu mātua; ā, ka mahi koe i reira ki ngā atua kē, ki te rākau, ki te kōhatu.
DEU 28:37 Ā, ka waiho koe hei mīharotanga, hei whakatauki, hei taunu i roto i ngā iwi katoa e kawea atu ai koe e Ihowā ki reira.
DEU 28:38 He nui te purapura e kawea atu e koe ki te māra, ā, he iti tāu e kohikohi mai ai; ka pau hoki i te māwhitiwhiti.
DEU 28:39 Ka whakatōkia e koe, ka mahia ngā māra wāina, ko te wāina ia e kore e inumia e koe, e kore anō e whakia ngā hua; ka kainga hoki e te huhu.
DEU 28:40 Ka whai ōriwa koe puta noa i ōu rohe katoa, ko te hinu ia e kore e whakawahia e koe; nō te mea ka horo ngā hua o āu ōriwa.
DEU 28:41 Ka whānau he tama māu, he tamāhine, otiia e kore e waiho māu; ka riro hoki rātou ki te herehere.
DEU 28:42 Ko āu rākau katoa me ngā hua o tōu oneone ka pau i te māwhitiwhiti.
DEU 28:43 Ko te manene i roto i a koe ka kake ake ki runga i a koe, ki runga noa atu; ko koe ia ka heke iho ki raro, ā, ki raro noa iho.
DEU 28:44 Ko ia hei hōmai i te moni tārewa ki a koe, ko koe ia e kore e hoatu i te mea tārewa ki a ia; ko ia hei pane, ko koe hei hiku.
DEU 28:45 Ā, ka tae ēnei kanga ki a koe, ka whai i a koe, ka hopu anō i a koe, kia hunā rā anō koe; mōu kīhai i whakarongo ki te reo o Ihowā, o tōu Atua, kīhai i mau ki āna whakahau, ki āna tikanga i whakahaua e ia ki a koe.
DEU 28:46 Ā, ka piri ēnā ki a koe hei tohu, hei mīharotanga, ki ōu uri anō hoki ā ake ake.
DEU 28:47 Mōu kīhai i mahi ki a Ihowā, ki tōu Atua, i runga i te koa, me te ngākau hari mō te huanga o ngā mea katoa.
DEU 28:48 Koia ka mahi koe ki ōu hoariri, e tukua mai e Ihowā ki a koe, i runga i te matekai, i te matewai me te kākahukore, me te kore hoki o ngā mea katoa; ā, ka hoatu e ia he ioka rino ki tōu kakī ā ngaro noa koe i a ia.
DEU 28:49 Ka hāpainga mai e Ihowā ki a koe he iwi nō tawhiti, nō te pito o te whenua, ānō he ēkara e rere ana; he iwi e kore e mōhiotia e koe tōna reo;
DEU 28:50 he iwi mata hīnana, e kore e whakapai ki te kanohi o te koroheke, e kore hoki e tohu i te taitamariki.
DEU 28:51 Ā, ka kainga e ia ngā hua o āu kararehe, te hua hoki o tōu oneone, ā, hunā noatia koe; ā, e kore e toe i a ia he wīti māu, he wāina, he hinu rānei, ngā uri rānei o āu kau, me ngā kuao o āu hipi, ā, meinga rā anō koe e ia kia ngaro.
DEU 28:52 Ā, ka whakapaea koe e ia i roto i ōu kūwaha katoa, ā, whenuku noa ōu taiepa teitei, kaha hoki, i whakamanamana ai koe, ā puta noa i tōu whenua; ā, ka whakapae ia i a koe i roto i ōu kūwaha katoa, puta noa i tōu whenua, i hōmai nei e Ihowā, e tōu Atua, ki a koe.
DEU 28:53 Ā, ka kai koe i te hua o tōu kōpū, i te kikokiko o āu tama, o āu tamāhine, e hōmai e Ihowā, e tōu Atua, ki a koe; i te whakapaenga, i te kōpaninga hoki, e kōpania ai koe e ōu hoariri.
DEU 28:54 Ko te tangata whakatarapī i roto i a koutou, whakaahu noa iho, ka hē tōna kanohi ki tōna teina, ki te wahine hoki o tōna uma, ā, ki te mōrehu o āna tamariki e toe ana ki a ia;
DEU 28:55 e kore ai e hoatu e ia ki tētahi o rātou tētahi wāhi o te kikokiko o āna tamariki, e kainga e ia, nō te mea kāhore he mea e toe ana ki a ia; i te whakapaenga, i te kōpaninga, e kōpania ai koe e ōu hoariri i roto i ōu kūwaha katoa.
DEU 28:56 Ko te wahine whakatarapī i roto i a koutou, whakaahu noa iho, e kore nei e whakamātau atu ki te whakatū i te kapu o tōna waewae ki te whenua, i te whakatarapī hoki, i te whakaahu, ka kino tōna kanohi ki te tāne o tōna uma, ki tāna tama, ki tāna tamāhine hoki;
DEU 28:57 ki tāna pōtiki hoki e puta mai i waenganui o ōna waewae, ki āna tamariki hoki e whānau i roto i a ia. Ka kainga pukutia hoki e ia i te kore o ngā mea katoa; i te whakapaenga, i te kōpaninga, e kōpania ai koe e ōu hoariri i roto i ōu kūwaha.
DEU 28:58 Ki te kāhore koe e mahara kia mahia ngā kupu katoa o tēnei ture e tuhituhia nei ki tēnei pukapuka, kia wehi koe i tēnei ingoa whai korōria, ingoa whakamataku, i a IHOWĀ, I TŌU ATUA.
DEU 28:59 Nā, ka meinga e Ihowā ōu whiunga kia mīharotia, me ngā whiunga o ōu uri, he whiunga nunui, kawenga roa hoki, me ngā mate ngau kino, kawenga roa hoki.
DEU 28:60 Ā, ka whakapāngia anō e ia ki a koe ngā mate katoa o Īhipa, i wehi rā koe; ā, ka piri ki a koe.
DEU 28:61 Me ngā mate katoa me ngā whiu katoa, kāhore nei i tuhituhia ki te pukapuka o tēnei ture, ka whakapāngia e Ihowā ki a koe, ā, hunā noatia koe.
DEU 28:62 Ā, ka mahue iho koutou he hunga torutoru, koutou i rite nei ki ngā whetū o te rangi te tini; nō te mea kīhai koe i whakarongo ki te reo o Ihowā, o tōu Atua.
DEU 28:63 Nā, ka rite ki te koa o Ihowā i tāna whakawhiwhinga i a koutou ki te pai, i tāna whakanuinga hoki i a koutou; ka pēnā anō hoki te koa o Ihowā ki te mea i a koutou kia ngaro, ki te huna rawa atu i a koutou; ā, ka hūtia atu koutou i te whenua e haere atu nei koutou ki reira ki te tango.
DEU 28:64 Ā, ka whakamararatia koe e Ihowā ki waenga i ngā iwi katoa, i tētahi pito o te whenua tae noa atu ki tētahi pito o te whenua; ā, ka mahi koe i reira ki ngā atua kē, kāhore nei koe i mōhio, koutou tahi ko ōu mātua, ki te rākau, ki te kōhatu.
DEU 28:65 Ā, e kore e tā tōu manawa i roto i ēnā iwi, kāhore hoki he okiokinga mō te kapu o tōu waewae. Engari, ka hōmai e Ihowā ki a koe i reira he manawa hēhē, he kanohi haumaruru, me te ngākau tuatea.
DEU 28:66 Ā, ka tārewa noa tōu ora i tōu aroaro; ka wehi koe i te pō, i te ao, ā, kāhore he tūturutanga mō tōu ora.
DEU 28:67 I te ata ka mea koe, “Auē, te ahiahi noa!” – ā, i te ahiahi ka mea koe, “Auē, te awatea noa!” I te pāwera hoki o tōu ngākau e pāwera ai koe, i te kitenga hoki a ōu kanohi e kite ai koe.
DEU 28:68 Ā, ka whakahoki a Ihowā i a koe ki Īhipa i runga kaipuke, nā te huarahi i kōrero rā ahau ki a koe, E kore koe e kite i reira ā muri ake nei; ā, ka hoko koutou i a koutou i reira ki ō koutou hoariri hei pononga tāne, hei pononga wāhine, ā, kāhore he tangata hei hoko.
DEU 29:1 Ko ngā kupu ēnei o te kawenata i ākona e Ihowā ki a Mohi kia whakaritea atu ki ngā tama a Īharaira i te whenua o Moapa; hāunga te kawenata i whakaritea e ia ki a rātou i Horepa.
DEU 29:2 Ā, ka karanga a Mohi ki a Īharaira katoa, ka mea ki a rātou: Kua kite koutou i ngā mea katoa i mea ai a Ihowā ki tō koutou aroaro i te whenua o Īhipa ki a Parao, ki ōna tāngata, ki tōna whenua katoa;
DEU 29:3 i ngā whakamātauranga nunui i kite rā ōu kanohi, i ngā tohu, i aua merekara nunui.
DEU 29:4 He ahakoa rā, kāhore anō, i hōmai e Ihowā ki a koutou he ngākau mōhio, he kanohi hei titiro, he taringa hei whakarongo ā tae noa ki tēnei rā.
DEU 29:5 Nā, ka whā tekau ngā tau i ārahi ai ahau i a koutou i te koraha; kāhore nei i tawhitotia ō koutou kākahu ki a koutou, kāhore hoki tōu hū i tawhitotia ki tōu waewae.
DEU 29:6 Kāhore anō koutou i kai i te taro, i inu rānei i te wāina, i te wai whakahaurangi rānei; kia mōhio ai koutou ko Ihowā ahau, ko tō koutou Atua.
DEU 29:7 Ā, ka tae mai koutou ki tēnei whenua, nā, ka puta mai a Hihona kīngi o Hehepona, rāua ko Oka kīngi o Pahana, ki te tū i a tātou ki te riri, ā patua iho e tātou.
DEU 29:8 Nā, tangohia ana e tātou tō rātou oneone, ā, hoatu ana hei kāinga mō ngā Reupeni, mō ngā Kari, mō tētahi tānga hoki o te iwi o Mānahi.
DEU 29:9 Nā, puritia rā ngā kupu o tēnei kawenata, mahia hoki, kia kake ai koutou i ngā mea katoa e mea ai koutou.
DEU 29:10 E tū ana koutou katoa i tēnei rā i te aroaro o Ihowā, o tō koutou Atua – ō koutou upoko, ō koutou iwi, ō koutou kaumātua, ō koutou rangatira, arā ngā tāngata katoa o Īharaira,
DEU 29:11 ā koutou tamariki, ā koutou wāhine, me tōu tangata iwi kē i roto i ōu puni, te kaitātā i āu wahie tae noa ki te kaiutuutu wai mōu –
DEU 29:12 kia uru ai koe ki te kawenata a Ihowā, a tōu Atua, ki tāna oati hoki e whakaritea nei e Ihowā, e tōu Atua, ki a koe i tēnei rā;
DEU 29:13 kia whakapūmautia ai koe i tēnei rā hei iwi māna, ko ia hoki hei Atua mōu, kia rite ai ki tāna i kōrero ai ki a koe, ki tāna hoki i oati ai ki ōu mātua, ki a Āperahama, ki a Īhaka, ki a Hākopa.
DEU 29:14 Nā, kāhore ki a koutou anake tāku whakarite i tēnei kawenata, i tēnei oati hoki;
DEU 29:15 engari, ki tēnei e tū tahi nei me tātou i konei i tēnei rā i te aroaro o Ihowā, o tō tātou Atua, ki te mea hoki kāhore i konei i a tātou i tēnei rā.
DEU 29:16 E mōhio ana hoki koutou ki tō tātou nohoanga ki te whenua o Īhipa, ki tō tātou haerenga mai hoki nā waenganui o ngā iwi i haere mai nei koutou;
DEU 29:17 ā, kua kite koutou i ā rātou mea whakarihariha, i ā rātou whakapakoko rākau, kōhatu, hiriwa, kōura, i waenganui i a rātou.
DEU 29:18 Kei noho i roto i a koutou he tangata, he wahine rānei, he hapū, he iwi rānei, e tahuri kē atu ana tōna ngākau i tēnei rā i a Ihowā, i tō tātou Atua, e haere ana ki te mahi ki ngā atua o ērā iwi; kei puta ake i roto i a koutou he pakiaka e tupu ake ai te taru whakamate me te taru kawa.
DEU 29:19 Ā tēnei ake, kei tōna rongonga i ngā kupu o tēnei kanga, nā, ka manaaki ia i a ia anō i roto i tōna ngākau, ka mea, “Ka mau te rongo ki ahau, ahakoa haere ahau i te pakeketanga o tōku ngākau.” Ki te whakangaro tahi i te mea mākūkū me te mea maroke.
DEU 29:20 E kore a Ihowā e tuku noa atu i tōna hē, engari ka paowa te riri o Ihowā me tōna ngākau hae ki taua tangata, ā, ka tāpapa iho ki runga ki a ia te kanga katoa ka tuhituhia nei ki tēnei pukapuka, ā, ka murua atu e Ihowā tōna ingoa i raro i te rangi.
DEU 29:21 Ā, ka wehea ia e Ihowā mō te kino i roto i ngā iwi katoa o Īharaira, ka rite ki ngā kanga katoa o te kawenata ka tuhituhia nei ki tēnei Pukapuka o te Ture.
DEU 29:22 Ā, ka mea tō muri whakatupuranga, ā koutou tamariki e tupu ake i muri i a koutou, me te tangata iwi kē hoki e haere mai i te whenua tawhiti, ua kite rātou i ngā whiunga o tēnā whenua, i ngā matenga e whakamatea ai a reira e Ihowā –
DEU 29:23 i te whenua katoa hoki he whānāriki, he tote, he ngiha, kāhore e whakatōkia, kāhore e tupu, kāhore hoki e pihi ake tētahi otaota ki reira, pērā me te hunanga o Horoma rāua ko Komora, o Arema rāua ko Tepoimi, i hunā e Ihowā i a ia e āritarita ana, e riri ana –
DEU 29:24 nā, ka mea ngā iwi katoa, “Nā te aha a Ihowā i pēnei ai ki tēnei whenua? He aha te tikanga o te mura o tēnei riri nui?”
DEU 29:25 Kātahi ka mea te tangata, “Mō rātou rā i whakarere i te kawenata a Ihowā, a te Atua o ō rātou mātua, i whakaritea e ia ki a rātou, i tāna whakaputanga mai i a rātou i te whenua o Īhipa.
DEU 29:26 Ā, haere ana rātou, mahi ana ki ngā atua kē, ā, koropiko ana ki a rātou, ki ngā atua kīhai nei i mōhiotia e rātou, ā, ehara nei i a ia i hoatu ki a rātou.
DEU 29:27 Nā, mura ana te riri o Ihowā ki tēnei whenua, hei whakaputa ki a rātou i ngā kanga katoa i tuhituhia ki tēnei pukapuka;
DEU 29:28 ā, huarangatia atu ana rātou e Ihowā i runga i tō rātou oneone, i tōna riri, i te āritarita, i te whakatakariri noa iho, ā, makā ana rātou he whenua kē, me tēnei ināianei.”
DEU 29:29 Kei a Ihowā, kei tō tātou Atua, ngā mea ngaro; ko ngā mea ia ka oti nei te whakapuaki mai, mā tātou ēnā, mā ā tātou tamariki, ake nei, kia mahi ai tātou i ngā kupu katoa o tēnei ture.
DEU 30:1 Ā tēnei ake, ā te wā e tae mai ai ēnei mea katoa ki a koe, te manaaki me te kanga, i hoatu nei e ahau ki tōu aroaro, ā, ka mahara tōu hinengaro ki aua mea i roto i ngā iwi katoa e peia ai koe e Ihowā, e tōu Atua ki reira,
DEU 30:2 ā, ka tahuri koe ki a Ihowā, ki tōu Atua, ka whakarongo ki tōna reo, ki ngā mea katoa e whakahau nei ahau i tēnei rā ki a koe, koutou ko āu tamariki, i tōu ngākau katoa, i tōu wairua katoa,
DEU 30:3 kātahi a Ihowā, tōu Atua, ka whakaputa kē i tōu pārautanga, ka aroha anō ki a koe, ka tahuri hoki, ka kohikohi i a koe i roto i ngā iwi katoa i whakamararatia atu ai koe e Ihowā, e tōu Atua ki reira.
DEU 30:4 Mehemea tērā ētahi o koutou i peia kei ngā tōpito rā anō o te rangi, ka kohikohia mai anō koe e Ihowā, e tōu Atua, i reira, ka tīkina anō koe e ia i reira.
DEU 30:5 Ā, ka kawea mai koe e Ihowā, e tōu Atua, ki te whenua i nohoia e ōu mātua, ka nohoia hoki a reira e koe; ā, ka mahi ia i te pai ki a koe, ka mea hoki i a koe kia maha atu i ōu mātua.
DEU 30:6 Ā, ka kokoti a Ihowā, tōu Atua, i tōu ngākau, i te ngākau anō hoki o ōu uri, e aroha ai koe ki a Ihowā, ki tōu Atua, i tōu ngākau katoa, i tōu wairua katoa, kia ora ai koe.
DEU 30:7 Ā, ka tukua iho e Ihowā, e tōu Atua, ēnei kanga katoa ki ōu hoariri, ki te hunga hoki e kino ana ki a koe, i whakatupu kino nei i a koe.
DEU 30:8 Ko koe ia ka tahuri, ka whakarongo ki te reo o Ihowā, ka mahi i āna whakahau katoa, e whakahau nei ahau ki a koe i tēnei rā.
DEU 30:9 Ā, ka mea a Ihowā, tōu Atua, kia nui ngā mea māu i te mahi katoa a tōu ringa, i te hua o tōu kōpū, i te hua hoki o āu kararehe, i te hua hoki o tōu oneone, mō te pai: nō te mea ka tahuri mai anō a Ihowā, ka hari ki a koe mō te pai, ka pērā me ia i hari ki ōu mātua.
DEU 30:10 Ki te whakarongo koe ki te reo o Ihowā, o tōu Atua, ki te pupuri i āna whakahau, i āna tikanga, ka tuhituhia nei ki tēnei Pukapuka o te Ture; ki te tahuri koe ki a Ihowā, ki tōu Atua, i tōu ngākau katoa, i tōu wairua katoa.
DEU 30:11 Ko tēnei ture hoki, e whakahau nei ahau i tēnei rā ki a koe, ehara i te mea pakeke rawa ki a koe, i te mea tawhiti rānei.
DEU 30:12 Kāhore i te rangi, e mea ai koe, “Ko wai o tātou hei piki ki te rangi ki te tiki atu i tēnā mea mā tātou, hei mea kia rongo atu tātou, kia mahi ai tātou?”
DEU 30:13 Kāhore i tāwāhi o te moana, hei meatanga māu, “Ko wai o tātou hei whakawhiti ki tāwāhi o te moana, ki te tiki i tēnā mea ki a tātou, hei mea kia rongo atu tātou, kia mahi ai tātou?”
DEU 30:14 Kei te tata tonu rā te kupu ki a koe, kei roto i tōu waha, kei roto hoki i tōu ngākau, mō tāu mahi atu.
DEU 30:15 Titiro, kua hoatu e ahau ki tōu aroaro i tēnei rā te ora me te pai, te mate me te kino;
DEU 30:16 i ahau e whakahau nei i a koe i tēnei rā kia aroha ki a Ihowā, ki tōu Atua, kia haere i āna huarahi, kia pupuri i āna whakahau, i āna tikanga, i āna whakaritenga, kia ora ai koe, kia nui ai hoki, kia manaaki ai a Ihowā, tōu Atua, i a koe ki te whenua e haere nei koe ki reira ki te tango.
DEU 30:17 Otiia, ki te tahuri kē tōu ngākau, ki te kore koe e rongo, ā, ka tākina atu koe ki te koropiko ki ngā atua kē, kia mahi hoki ki a rātou;
DEU 30:18 māku e whakaatu ki a koutou i tēnei rā, ka ngaro rawa atu koutou; e kore e roa ō koutou rā ki te whenua e whiti atu nei koe i Horano, e haere atu nei koe ki reira ki te tango.
DEU 30:19 Ka waiho e ahau i tēnei rā te rangi me te whenua hei kaititiro i a koutou, kua hoatu e ahau ki tōu aroaro te ora me te mate, te manaaki me te kanga; nā reira manakohia te ora, kia ora ai koutou ko ōu uri;
DEU 30:20 aroha ki a Ihowā, ki tōu Atua, whakarongo ki tōna reo, piri atu hoki ki a ia. Ko ia hoki tōu ora, te whakaroanga atu mō ōu rā; kia noho ai koe ki te whenua i oati ai a Ihowā ki ōu mātua kia hoatu ki a rātou, ki a Āperahama, ki a Īhaka, ki a Hākopa.
DEU 31:1 Ā, i haere a Mohi, i kōrero i ēnei kupu ki a Īharaira katoa.
DEU 31:2 I mea ia ki a rātou: “Ko tōku kaumātua i tēnei rā ka kotahi rau e rua tekau ngā tau; e kore ahau e āhei anō te kōpiko atu, te kōpiko mai. Kua mea mai hoki a Ihowā ki ahau, ‘E kore koe e whiti i tēnei Horano.’
DEU 31:3 Ko Ihowā, ko tōu Atua, ko ia e whakawhiti ki mua i a koe; māna e whakangaro atu ēnei iwi i mua i a koe, ā, ka riro rātou i a koe. Ā, ko Hohua, ko ia e whiti atu i mua i a koe, ka rite ki tā Ihowā i kōrero ai.
DEU 31:4 Ā, ka rite tā Ihowā e mea ai ki a rātou ki tāna i mea ai ki a Hihona rāua ko Oka, ki ngā kīngi o ngā Amori, ki tō rātou whenua hoki; i hunā nei e ia.
DEU 31:5 Ā, ka hōmai rātou e Ihowā ki tō koutou aroaro, ā, ka rite tā koutou e mea ai ki a rātou ki ngā whakahau katoa i whakahau ai ahau ki a koutou.
DEU 31:6 Kia māia, kia toa, kaua e wehi, kaua e pāwera i a rātou: nō te mea ko Ihowā, ko tōu Atua, ko ia te haere tahi ana i a koe; e kore ia e whakarere i a koe, e kore hoki e mawehe atu i a koe.”
DEU 31:7 Nā, ka karanga a Mohi ki a Hohua, ā, ka mea ki a ia i te tirohanga a Īharaira katoa, “Kia māia, kia toa; ko koe hoki e haere tahi me tēnei iwi ki te whenua i oati ai a Ihowā ki ō rātou mātua kia hōmai ki a rātou; māu anō rātou e whakawhiwhi ki taua wāhi.
DEU 31:8 Ko Ihowā anō, ko ia te haere ana i tōu aroaro, hei tōu taha ia, e kore ia e whakarere i a koe, e kore hoki e mawehe atu i a koe; kaua e wehi, kaua hoki e pāwera.”
DEU 31:9 Ā, tuhituhia iho e Mohi tēnei ture, hoatu ana ki ngā tohunga, ki ngā tama a Rīwai, ko rātou nei ngā kaiamo i te āka o te kawenata a Ihowā, ki ngā kaumātua katoa anō hoki o Īharaira.
DEU 31:10 I ako anō a Mohi ki a rātou, i mea: “Hei te mutunga o ngā tau e whitu, hei te wā anō e rite ai i te tau tuku noa, i te Hākari o Ngā Whare Wharau,
DEU 31:11 i te wā e tae ai a Īharaira katoa ki te whakakite i a rātou ki te aroaro o Ihowā, o tōu Atua, ki te wāhi e whiriwhiri ai ia, ka kōrero ai koe i tēnei ture ki te aroaro o Īharaira katoa, kia rongo ai rātou.
DEU 31:12 Whakaminea te iwi – ngā tāne, ngā wāhine, ngā tamariki, me tōu tangata iwi kē i roto i ōu kūwaha – kia rongo ai rātou, kia whakaakona ai, kia wehi ai i a Ihowā, i tō koutou Atua, kia mau ai ki te mahi i ngā kupu katoa o tēnei ture.
DEU 31:13 Kia rongo ai hoki ā rātou tamariki, kīhai nei i mōhio, kia whakaakona ai kia wehi i a Ihowā, i tō koutou Atua, i ngā rā katoa e ora ai koutou ki te whenua e whiti atu nei koutou i Horano ki reira ki te tango.”
DEU 31:14 Nā, ka mea a Ihowā ki a Mohi, “Nanā, ka tata ōu rā e mate ai koe; karangatia atu a Hohua, e tū hoki kōrua ki roto ki te tapenākara o te whakaminenga, ā, māku e ako ki a ia.” Nā, ka haere a Mohi rāua ko Hohua, ā, tū ana rāua i roto i te tapenākara o te whakaminenga.
DEU 31:15 Nā, ka puta mai a Ihowā ki te tapenākara i roto anō i te pou kapua; ā, tū ana te pou kapua i runga i te kūwaha o te tapenākara.
DEU 31:16 Kātahi ka mea a Ihowā ki a Mohi, “Nanā, ka takoto koe ki ōu mātua; ā, ka whakatika te iwi nei, ka whai atu, ka pūremu ki ngā atua kē o te whenua, e haere nā rātou ki reira noho ai ki waenganui i a rātou; ka whakarere i ahau, ka whakataka hoki i tāku kawenata i whakaritea atu e ahau ki a rātou.
DEU 31:17 Ā, ka mura tōku riri ki a rātou i taua rā, ā, ka whakarere ahau i a rātou, ka huna hoki i tōku kanohi i a rātou, ā, ka pau rātou, ka pā anō hoki ngā kino maha me ngā matenga ki a rātou. Ā, ka mea rātou i taua rā, ‘Kāhore ianei ēnei kino i pā mai ki a tātou, nō te mea kāhore tō tātou Atua i roto i a tātou?’
DEU 31:18 Ko ahau ia, ka huna rawa ahau i tōku kanohi i taua rā, mō ngā kino katoa i meatia e rātou, mō rātou i tahuri ki ngā atua kē.
DEU 31:19 “Nā, tuhituhia tēnei hei waiata mā kōrua, ka whakaako hoki ki ngā tama a Īharaira; hoatu hoki ki roto ki ō rātou waha, kia ai tēnei waiata hei kaiwhakaatu mōku ki ngā tama a Īharaira.
DEU 31:20 Nō te mea ka oti rātou te kawe e ahau ki te whenua i oati ai ahau ki ō rātou mātua, e rerengia nei e te waiū, e te honi; ā, ka kai rātou, ka mākona, ka mōmona hoki; ko reira rātou tahuri ai ki ngā atua kē, mahi ai ki a rātou, ā, ka whakahāwea rātou ki ahau, ka whakataka hoki i tāku kawenata.
DEU 31:21 Ā tēnei ake, hei te pānga o ngā kino maha, o ngā mate maha ki a rātou, nā, mā tēnei waiata e whakaatu ki tō rātou aroaro; nō te mea e kore e mahue i ngā waha o ō rātou uri. E mōhio ana hoki ahau ki ō rātou whakaaro e tito nei rātou ināianei nei anō, i te mea kīanō ahau i kawe noa i a rātou ki te whenua i oati ai ahau.”
DEU 31:22 Nā, tuhituhia ana e Mohi tēnei waiata i taua rangi anō, ā, whakaakona ana ki ngā tama a Īharaira.
DEU 31:23 Ā, i whakahau anō ia i a Hohua, i te tama a Nunu, i mea, “Kia māia, kia toa; māu hoki e kawe ngā tama a Īharaira ki te whenua i oati ai ahau ki a rātou; ā, hei a koe ahau.”
DEU 31:24 Ā, ka oti i a Mohi te tuhi ngā kupu o tēnei ture ki tētahi pukapuka, ā poto noa,
DEU 31:25 nā, ka whakahau a Mohi i ngā Rīwaiti, i ngā kaiamo i te āka o te kawenata a Ihowā, ka mea,
DEU 31:26 “Tangohia tēnei Pukapuka o te Ture, hoatu ki te taha o te āka o te kawenata a Ihowā, a tō koutou Atua, ā, hei reira takoto ai, hei whakaatu ki a koe.
DEU 31:27 Nō te mea e mōhio ana ahau ki tōu tutū, ki tōu kakī mārō; nanā, i ahau e ora nei anō i a koutou i tēnei rā, e tutū ana anō koutou ki a Ihowā; ā, ka mate ahau, tērā noa ake!
DEU 31:28 Huihuia mai ki ahau ngā kaumātua katoa o ō koutou iwi, me ō koutou rangatira, ā, ka kōrero ahau i ēnei kupu ki ō rātou taringa, ka waiho hoki i te rangi, i te whenua hei kaititiro mō rātou.
DEU 31:29 Nō te mea e mōhio ana ahau, ko muri i tōku matenga taka rawa ai koutou, peka kē ai i te huarahi i kīia atu e ahau ki a koutou; ā, ka pono mai te kino ki a koutou i ngā rā whakamutunga; mō koutou ka mahi i te kino i te tirohanga a Ihowā, hei whakapātaritari i a ia ki te mahi a ō koutou ringa.”
DEU 31:30 Ā, kōrerotia ana e Mohi ngā kupu o tēnei waiata ki ngā taringa o te huihuinga katoa o Īharaira ā poto noa:
DEU 32:1 Kia whai taringa mai, e ngā rangi, ā, ka kōrero ahau; whakarongo mai hoki, e te whenua, ki ngā kupu a tōku māngai.
DEU 32:2 Ka kōpatapata iho tāku whakaako, ānō he ua, ka māturuturu iho tāku kupu me te tōmairangi; me te ua pūnehunehu ki runga i te tupu hou, me te ua tā ki runga i te tarutaru.
DEU 32:3 Nō te mea ka kauwhautia e ahau te ingoa o Ihowā; waiho te nui i tō tātou Atua.
DEU 32:4 Ko te Kāmaka, tika tonu tāna mahi; he whakarite tikanga nei hoki ōna huarahi katoa. He Atua pono, kāhore ōna hē, he tika, he tapatahi ia.
DEU 32:5 Kua mahi rātou i te kino ki a ia, ehara rātou i te tamariki nāna, nō rātou te koha; he whakatupuranga mārō, parori kē rātou.
DEU 32:6 Ko tā koutou utu ianei tēnei ki a Ihowā, e te iwi kūware, e kore nei e mōhio? Ehara ianei ia i tōu matua nāna koe i hoko? Nāna koe i hanga, nāna hoki koe i whakaū.
DEU 32:7 Kia mahara ki ngā rā onamata; whakaarohia ngā tau o ngā whakatupuranga e maha. Ui atu ki tōu pāpā, ā, māna e whakaatu ki a koe; ki ōu kaumātua, ā, mā rātou e kōrero ki a koe.
DEU 32:8 I tā te Runga Rawa whakaritenga kāinga mō ngā iwi, i tāna wehewehenga i ngā tama a te tangata, i whakatūria e ia ngā rohe mō ngā iwi, me te whakaaro anō ki te tokomaha o ngā tama a Īharaira.
DEU 32:9 Ko tō Ihowā wāhi hoki, ko tāna iwi; ko Hākopa hei wāhi pūmau mōna.
DEU 32:10 I kitea ia e ia ki te whenua koraha, ki te tahora tūhea e hāmama kau ana. I taiāwhiotia ia e ia, i atawhaitia, i tiakina hoki e ia, ānō ko te whatupango o tōna kanohi.
DEU 32:11 Ānō he ēkara e whakakorikori ana i tāna ōhanga, e whakapāho ana i runga i āna pī, e roharoha ana ia i ōna parirau, e tango ana i a rātou, e waha ana hoki i a rātou i runga i ōna parirau.
DEU 32:12 Nā Ihowā anake ia i ārahi, kāhore hoki he atua kē i tōna taha.
DEU 32:13 Nāna hoki ia i whakaeke ki ngā wāhi tiketike o te whenua, hei hōiho mōna, ā, i kai ia i ngā hua o te māra; ā, nāna ia i ngongo ai i te honi i roto i te kāmaka, i te hinu hoki i roto i te kōhatu kiripaka;
DEU 32:14 i te pata o te kau, i te waiū hipi, i te ngako reme, i ngā hipi toa o te momo o Pahana, i ngā koati, me te taupā o ngā whatukuhu o te wīti – ā, i inu koe i te wāina, i te toto o te karepe.
DEU 32:15 Nāwai ā ka whai kiko a Iēhuruna, ā, whana mai ana; kua whai kiko koe, kua tetere, kua kī i te ngako; ā, whakarērea iho e ia te Atua nāna ia i hanga, whakahāwea ana ki te Kāmaka o tōna whakaoranga.
DEU 32:16 Nā rātou i mea kia hae ia ki ngā atua kē, whakapātaritari ana rātou i a ia ki ngā mea whakarihariha kia riri.
DEU 32:17 Ko ā rātou patunga tapu i tāpaea e rātou mā ngā rēwera, ehara nei i te Atua, mā ngā atua kīhai nei rātou i mōhio, he mea puta hou ake nōnāianei, kīhai nei i wehingia e ō koutou mātua.
DEU 32:18 Ko te Kāmaka i whānau ai koe ka wareware i a koe, kāhore hoki ōu mahara ki te Atua nāna koe i hanga.
DEU 32:19 Ā, ka kite a Ihowā, nā anuanu ana ia ki a rātou, mō te mahi whakapātaritari a āna tama, a āna tamāhine.
DEU 32:20 Nā, ka mea, “Ka huna ahau i tōku mata i a rātou, ka titiro atu ahau he aha he mutunga mō rātou; he whakatupuranga parori kē hoki rātou, he tamariki kāhore he pono i roto.
DEU 32:21 Nā, rātou ahau i mea kia hae ki te mea ehara i te Atua; i whakapātaritari kia riri ki ā rātou mea horihori. Nā, māku rātou e mea kia hae ki te hunga ehara i te iwi; māku rātou e whakapātaritari kia riri ki te iwi pōauau.
DEU 32:22 Ka ngiha hoki te ahi i ahau e riri ana, ka toro atu ki te takere rā anō o te rēinga, pau ake hoki te whenua, tahuna ana ngā tūranga o ngā maunga.
DEU 32:23 “Ka opehia e ahau ngā kino ki runga ki a rātou; ka whakapotoa āku pere ki a rātou.
DEU 32:24 Ka hemo rātou i te matekai, ka pau hoki i te hana o te wera me te hunanga nui whakaharahara; māku hoki e tuku iho te niho o ngā kararehe ki a rātou, me te hūwhare whakamate o ngā mea e ngōki ana i te puehu.
DEU 32:25 Ko te hoari ki waho whakamate ai, ko te wehi ki roto i ngā whare. Māna e huna ngātahi te taitama me te taitamāhine, te mea ngote ū rāua ko te tangata hina.
DEU 32:26 I mea ahau, ‘Ka whakamararatia rātou e ahau ki tawhiti, ka meinga e ahau kia mutu te mahara ki a rātou i roto i ngā tāngata.’
DEU 32:27 Me i kāhore ahau te wehi i te ngākau kino o te hoa whawhai, kei pōhēhē ōna hoariri, kei mea rātou, ‘Kua kake tō tātou ringa, kāhore anō hoki a Ihowā i mea i ēnei mea katoa.’ ”
DEU 32:28 He iwi whakaarokore hoki rātou, ā, kāhore he mōhio i roto i a rātou.
DEU 32:29 Ē, me i tūpato rātou, me i mōhio ki tēnei, me i whakaaro ki tō rātou mutunga iho!
DEU 32:30 Me pēhea e whai ai te kotahi i te mano, e whati ai ngā mano kotahi tekau i te tokorua, me i kāhore rātou i hokona e tō rātou Kāmaka, i tukua atu hoki e Ihowā?
DEU 32:31 Nō te mea ehara tō rātou kāmaka i te pēnei me tō tātou Kāmaka, nā ō tātou hoariri nei anō te kī.
DEU 32:32 Nō te mea ko ā rātou wāina nō te wāina o Horoma, nō ngā māra hoki o Komora: ko ā rātou karepe he karepe au kawa, ko ā rātou tautau kakati ana;
DEU 32:33 ko tā rātou wāina ko te hūwhare whakamate o ngā tarakona, me te ware ngau kino o ngā ahipi.
DEU 32:34 “Kāhore ianei tēnei i rongoātia ki roto ki ahau, i hīritia hoki ki waenga i āku taonga?
DEU 32:35 Māku ngā utu e rapu, māku hoki e ea ai, ā te wā e paheke ai ō rātou waewae; e tata ana hoki te rā e hunā ai rātou, ā, kei te kaikā mai ngā mea i whakaritea mō rātou.”
DEU 32:36 Nō te mea ka whakatika a Ihowā i tā tāna iwi, ka aroha hoki ki āna pononga; ina kite ia kua riro tō rātou kaha, ā, kāhore he mea i toe, i tūtakina ki roto, i waiho atu rānei ki waho.
DEU 32:37 Ā, ka mea ia: “Kei hea ō rātou atua, te kāmaka i okioki atu ai rātou;
DEU 32:38 i kai nei i te ngako o ā rātou patunga tapu, i inu hoki i te wāina o ā rātou ringihanga? Me whakatika rātou ki te āwhina i a koutou, kia ai hoki rātou hei kuhunga atu mō koutou.
DEU 32:39 “Nā titiro, ko ahau, inā ko ahau ia, kāhore hoki he atua i tōku taha. E whakamate ana ahau, ā, e whakaora ana; i tukitukia e ahau, ko ahau anō e whakamahu ana; kāhore hoki he tangata e ora ai tētahi i tōku ringa.
DEU 32:40 Nō te mea e totoro atu ana tōku ringa ki te rangi, me tāku kī anō: I ahau e ora tonu nei,
DEU 32:41 ki te whakakoia e ahau tāku hoari kānapanapa, ā, ka mau tōku ringa ki te whakariterite; ka whakahokia atu e ahau he utu ki ōku hoariri, ka ea hoki i ahau tā te hunga e kino ana ki ahau.
DEU 32:42 Ka whakahaurangitia e ahau āku pere ki te toto, ā, ka kai tāku hoari i te kikokiko; ki te toto o te hunga i patua, o ngā herehere, nō te māhunga o ngā rangatira o te hoariri.”
DEU 32:43 Kia hari tahi, e ngā tauiwi, me tāna iwi: ka takitakina hoki e ia te toto o āna pononga, ā, ka whakahokia he utu ki ōna hoariri, ka whakamārie anō ki tōna whenua, ki tāna iwi.
DEU 32:44 Nā, ka haere mai a Mohi, ka kōrero i ngā kupu katoa o tēnei waiata ki ngā taringa o te iwi, a ia, me Hohua, me te tama a Nunu.
DEU 32:45 Ā, ka mutu tā Mohi kōrero i ēnei kupu katoa ki a Īharaira katoa;
DEU 32:46 nā, ka mea ia ki a rātou: “Kia anga mai ō koutou ngākau ki ngā kupu katoa e kauwhautia atu nei e ahau ki a koutou i tēnei rā; hei whakahau atu mā koutou ki ā koutou tamariki kia puritia, kia mahia, ngā kupu katoa o tēnei ture.
DEU 32:47 Nō te mea ehara tēnei i te mea noa iho ki a koutou; ko tō koutou oranga hoki ia, ā, mā tēnei mea e roa ai ō koutou rā ki te whenua ka whiti atu nei koutou i Horano ki reira ki te tango.”
DEU 32:48 I kōrero anō a Ihowā ki a Mohi i taua tino rangi anō, i mea,
DEU 32:49 “E piki koe i tēnei maunga, i Aparimi, ki Maunga Nepo, i te whenua o Moapa, e anga atu ana ki Heriko; ka titiro atu ki te whenua o Kanaana e hoatu nei e ahau ki ngā tama a Īharaira hei kāinga;
DEU 32:50 ā, e mate koe ki runga ki te maunga e piki atu nā koe, ka kohia hoki ki tōu iwi; ka pērātia me Ārona, me tōu tuakana, i mate rā ki Maunga Horo, ā, kohia atu ana ki tōna iwi;
DEU 32:51 mō kōrua hoki i hara ki ahau i waenganui o ngā tama a Īharaira i ngā wai o Meripa, i Karehe, i te koraha o Hini; mō kōrua kīhai i whakatapu i ahau i waenganui o ngā tama a Īharaira.
DEU 32:52 Heoi, ka kite koe i te whenua i mua i tōu aroaro; otiia e kore koe e tae ki reira – ki te whenua e hoatu ana e ahau mō ngā tama a Īharaira.”
DEU 33:1 Ko te manaaki tēnei i manaaki ai a Mohi, te tangata a te Atua, i ngā tama a Īharaira i mua ake o tōna matenga.
DEU 33:2 Nā, ka mea ia: I haere mai a Ihowā i Hinai, i rere mai i Heira ki runga ki a rātou; i whiti mai ia i Maunga Parana, ā, haere mai ana ia i ngā mano tini o te hunga tapu; he ture i tōna ringa matau mō rātou, e mura ana.
DEU 33:3 Inā, e aroha ana ia ki ngā iwi; kei roto i tōu ringa āna tāngata tapu katoa; ā, noho ana rātou i ōu waewae; ka riro i a rātou katoa āu kōrero.
DEU 33:4 Nā Mohi te ture i ako ki a tātou, hei taonga tuku iho, tuku iho mō te huihui o Hākopa.
DEU 33:5 Ko ia anō te kīngi o Iēhuruna i te huihuinga o ngā upoko o te iwi, rātou ko ngā iwi katoa o Īharaira.
DEU 33:6 “Kia ora a Reupena, kaua hoki e mate; otiia kia tokoouou ōna tāngata.”
DEU 33:7 Ā, tēnei anō te manaaki mō Hūrā: nā, ka mea ia: “Whakarongo, e Ihowā, ki te reo o Hūrā, māu anō hoki ia e kawe ki tōna iwi. I kaha hoki ōna ringa ki te tohe mōna ake; ā, māu ia e āwhina ki ōna hoariri.”
DEU 33:8 Ā, mō Rīwai i mea ia: “Kei tōu tangata tapu ōu Tumime me ōu Urimi, i whakamātautauria rā ia e koe ki Maha, i ngangautia rā e koe ki ngā wai o Meripa;
DEU 33:9 i mea nei mō tōna pāpā rāua ko tōna whaea, ‘Kāhore ahau i kite i a ia.’ Kīhai anō hoki ia i mōhio ki ōna tuākana, kīhai i mātau ki āna ake tamariki; he mea hoki, e pupuri ana rātou i tāu kupu, e tiaki ana i tāu kawenata.
DEU 33:10 Mā rātou a Hākopa e whakaako ki āu whakaritenga, a Īharaira hoki ki tāu ture; mā rātou hoki te paowa kakara e hoatu ki tōu aroaro, me te tahunga tinana ki runga ki tāu āta.
DEU 33:11 Manaakitia ōna rawa, e Ihowā, kia aro mai hoki koe ki te mahi a ōna ringa; whatia ngā hope o te hunga e whakatika ana ki a ia, o ngā mea hoki e kino ana ki a ia, kei whakatika mai anō rātou.”
DEU 33:12 Ko tāna kupu mō Pineamine: “Ko tā Ihowā i aroha ai ka noho hūmārie ki tōna taha – ko ia e uhi ana i a ia ā pau noa te rā – e noho ana i waenganui o ōna pokohiwi.”
DEU 33:13 Ko tāna kupu mō Hōhepa: “He manaakitanga tōna whenua nā Ihowā; ki ngā mea papai o te rangi, ki te tōmairangi, ki te wai hōhonu e takoto ake ana i raro,
DEU 33:14 ki ngā hua papai o te rā, ki ngā mea papai hoki e whakaputaina mai ana e te marama,
DEU 33:15 ki ngā mea nunui hoki o ngā maunga onamata, ki ngā mea papai o ngā maunga tū tonu;
DEU 33:16 ki ngā mea papai hoki o te whenua me ōna tini mea; ki te manakohanga hoki ana i noho i te rākau. Kia tae mai te manaaki ki runga ki te māhunga o Hōhepa, ki te tumuaki hoki ōna i wehea i ōna tuākana.
DEU 33:17 He korōria kei te mātāmua a tāna pūru; ko ōna haona kei ngā haona o te unikanga; ka panā e ia ngā iwi, rātou katoa, ki ērā, tae noa ki ngā pito o te whenua; ā, ko ēnei ngā mano tini o Ēparaima, ko ēnei hoki ngā mano o Mānahi.”
DEU 33:18 Ā, ko tāna kupu mō Hepurona: “Kia koa, e Hepurona, i tōu putanga ki waho; e Ihākara hoki, i ōu tēneti.
DEU 33:19 Mā rātou ngā iwi e karanga ki te maunga; ki reira rātou patu ai i ngā patunga o te tika; nō te mea ka ngongo rātou i te raneatanga o ngā moana, i ngā taonga huna hoki o te onepū.”
DEU 33:20 Ko tāna kupu mō Kara: “Ka manaakitia te kaiwhakawhānui i a Kara! Noho ana ia me he raiona kātua, haea iho e ia te ringa, āe rā me te tumuaki.
DEU 33:21 Ā, tangohia ana e ia te wāhi tuatahi mōna; nō te mea kei reira te wāhi a te kaiwhakahaere tikanga e tiakina ana; ā, haere mai ana me ngā upoko o te iwi, ā, oti ana i a ia, rātou tahi ko Īharaira, te tikanga a Ihowā, me āna whakaritenga.”
DEU 33:22 Ā, ko tāna kupu mō Rāna: “Hei kūao raiona a Rāna, ka mokowhiti mai ia i Pahana.”
DEU 33:23 Ā, ko tāna kupu mō Napatari: “E Napatari, e mākona nei i te manakohanga, e kī ana hoki i te manaaki a Ihowā; nohoia e koe te taha ki te hauāuru me te tonga.”
DEU 33:24 Ā, ko tāna kupu mō Āhera: “Ko ngā tamariki te manaaki mō Āhera; kia arongia mai ia e ōna tuākana, kia toua hoki tōna waewae ki te hinu.
DEU 33:25 Ko ōu tūtaki he rino, he parāhi; ā, ka rite tōu kaha ki ōu rā.”
DEU 33:26 “Kāhore he rite mō te Atua, e Iēhuruna, e eke hōiho nei i ngā rangi ki te whakauru i a koe, ki ngā kapua hoki, i runga anō i tōna korōria.
DEU 33:27 Ko te Atua ora tonu tōu nohoanga, ā, kei raro ko ngā ringa o tua iho; ā, i peia e ia te hoariri i tōu aroaro, i mea hoki, ‘Whakangaromia!’
DEU 33:28 Nā, ka noho hūmārie a Īharaira, me te mātāpuna o Hākopa ko ia anake, ki te whenua wīti, wāina; āe rā, ka māturuturu iho te tōmairangi o ōna rangi.
DEU 33:29 Ka hari koe, e Īharaira! Ko wai hei rite mōu, mō te iwi i whakaorangia nei e Ihowā, te pukupuku hei whakapuru mōu, ko te hoari hoki e whai korōria ai koe! Ā, ka tuku mai ōu hoariri i a rātou ki a koe; ā, ka takatakahi koe i ō rātou wāhi teitei.”
DEU 34:1 Nā, ka piki atu a Mohi i ngā mānia o Moapa ki Maunga Nepo, ki te tihi o Pihika, e titiro ana ki Heriko. Ā, whakakitea ana e Ihowā ki a ia te whenua katoa o Kireara ā tae noa ki Rāna,
DEU 34:2 a Napatari katoa, me te whenua o Ēparaima, o Mānahi hoki, te whenua katoa hoki o Hūrā, tae noa atu ki te moana whakamutunga mai;
DEU 34:3 te tonga me te mānia i te papatairitetanga o Heriko, o te pā nīkau, ā Toara atu ana.
DEU 34:4 Nā, ka mea a Ihowā ki a ia, “Ko te whenua tēnei i oati ai ahau ki a Āperahama, ki a Īhaka, ki a Hākopa, i mea ai, ‘Ka hoatu e ahau a reira ki ōu uri.’ Kua meinga koe e ahau kia kite ā-kanohi i reira, otiia e kore koe e whiti ki reira.”
DEU 34:5 Nā, ka mate a Mohi, te pononga a Ihowā ki reira, ki te whenua o Moapa, ka pērā me tā Ihowā i kōrero ai.
DEU 34:6 Ā, tanumia iho ia e ia ki tētahi kokoru o te whenua o Moapa, i te ritenga o Petepeoro; otiia kāhore tētahi tangata e mōhio ana ki tōna urupā ā mohoa noa nei.
DEU 34:7 Ā, kotahi rau e rua tekau ngā tau o Mohi i tōna matenga; kāhore anō i ataruatia ōna kanohi, kāhore anō hoki i heke noa tōna kaiotatanga.
DEU 34:8 Nā, uhungatia ana a Mohi e ngā tama a Īharaira i ngā mānia o Moapa, e toru tekau ngā rā; ā taka noa ngā rā i uhungatia ai, i tangihia ai a Mohi.
DEU 34:9 Ā, kī tonu a Hohua, te tama a Nunu, i te wairua o te mātauranga; nā Mohi hoki i whakapā ōna ringa ki runga ki a ia; ā, rongo ana ki a ia ngā tama a Īharaira, mea ana i ngā mea i whakahaua e Ihowā ki a Mohi.
DEU 34:10 Ā, kāhore anō kia ara i roto i a Īharaira i muri nei tētahi atu poropiti hei rite mō Mohi, i mōhio nei a Ihowā ki a ia, titiro atu, titiro mai;
DEU 34:11 arā, mō ngā tohu katoa, mō ngā merekara i ungā ai ia e Ihowā ki te mahi i te whenua o Īhipa, ki a Parao rātou ko ōna tāngata katoa, ki tōna whenua katoa hoki;
DEU 34:12 mō ngā mahi katoa hoki a te ringa kaha, mō ngā mea whakawehi nui i meatia e Mohi ki te aroaro o Īharaira katoa.
JOS 1:1 Nā, i muri iho i te matenga o Mohi, o te pononga a Ihowā, ka kōrero a Ihowā ki a Hohua, ki te tama a Nunu, ki te tangata a Mohi, ka mea,
JOS 1:2 “Kua mate a Mohi, tāku pononga. Nā, whakatika, whiti atu i tēnei Horano, a koe me tēnei iwi katoa, ki te whenua ka hoatu nei e ahau ki a rātou, arā ki ngā tama a Īharaira.
JOS 1:3 Ko ngā wāhi katoa e takahia e ngā kapu o ō koutou waewae kua hoatu e ahau a reira ki a koutou, ka rite ki tāku i kōrero ai ki a Mohi.
JOS 1:4 Ko te rohe ki a koutou kei te koraha, kei Repanōna nei, ā te awa nui atu ana, arā te awa Uparati, ko te whenua katoa o ngā Hiti, ā tae noa ki te Moana Nui, ki te toenetanga o te rā.
JOS 1:5 E kore tētahi e kaha ki te tū ki tōu aroaro i ngā rā katoa e ora ai koe. I a Mohi ahau, ka pērā anō ahau ki a koe; e kore ahau e whakarere i a koe, e kore hoki e mawehe i a koe.
JOS 1:6 “Kia kaha, kia māia rawa; māu hoki tēnei iwi e whakawhiwhi ki te whenua i oati ai ahau ki ō rātou mātua kia hoatu ki a rātou.
JOS 1:7 Heoi, kia kaha, kia tino māia rawa ki te pupuri, ki te mahi i ngā ture katoa i whakahaua ki a koe e Mohi, e tāku pononga; kei peka kē koe i reira ki matau, ki mauī rānei, kia tika ai tāu i ngā wāhi katoa e haere ai koe.
JOS 1:8 Kei whakarērea e tōu waha tēnei Pukapuka o te Ture; engari kia ū ōu whakaaro ki reira i te ao, i te pō, kia mau ai koe ki te mahi i ngā mea katoa kua oti te tuhi ki reira; mā reira ka whai wāhi ai koe i tōu huarahi, mā reira hoki koe ka kake ai.
JOS 1:9 Kāhore ianei ahau i whakahau ki a koe? Kia kaha, kia māia; kaua e wehi, kaua hoki e pāwera; nō te mea kei a koe a Ihowā, tōu Atua, i ngā wāhi katoa e haere ai koe.”
JOS 1:10 Nā, ka whakahau a Hohua i ngā rangatira o te iwi, ka mea,
JOS 1:11 “Haere rā waenganui o te puni, ka whakahau i te iwi, ka mea: ‘Takā he ō mō koutou; nō te mea kia toru ake rā ka whiti koutou i te Horano nei, ka haere ki te tango i te whenua ka hōmai nei e Ihowā, e tō koutou Atua, kia nohoia e koutou.’ ”
JOS 1:12 I kōrero anō a Hohua ki ngā Reupeni, ki ngā Kari, ki tētahi tānga hoki o te iwi o Mānahi, i mea,
JOS 1:13 “Kia mahara ki te kupu i whakahau ai a Mohi, te pononga a Ihowā ki a koutou, i mea ai: ‘E mea ana a Ihowā, tō koutou Atua, i a koutou kia okioki, ka hōmai hoki e ia tēnei whenua ki a koutou.’
JOS 1:14 Ko ā koutou wāhine, ko ā koutou tamariki, me ā koutou kararehe, me noho ki te whenua i hoatu e Mohi ki a koutou i tēnei taha o Horano, ko koutou ia, ko ngā mārohirohi katoa, me haere tōpuni atu i te aroaro o ō koutou tuākana, hei whakauru mō rātou;
JOS 1:15 kia meinga rā anō e Ihowā ō koutou tuākana kia okioki, kia pēnā me koutou, ā, kia whiwhi rātou ki te whenua ka hōmai nei e Ihowā, e tō koutou Atua, ki a rātou. Kātahi koutou ka hoki ai ki te whenua i riro nei i a koutou, ka noho ai hoki ki te wāhi i hoatu e Mohi, e te pononga a Ihowā, ki a koutou i tēnei taha o Horano, i te putanga mai o te rā.”
JOS 1:16 Nā, ka whakahoki rātou ki a Hohua, ka mea: “Ko ngā mea katoa e whakahaua e koe ki a mātou ka meatia e mātou, ā, ka haere hoki mātou ki ngā wāhi katoa e ungā ai mātou e koe.
JOS 1:17 Ko tō mātou rongo ki a Mohi i ngā mea katoa, ka pērā anō tō mātou rongo ki a koe; kia noho rā ia a Ihowā, tōu Atua, ki a koe, me ia hoki i noho ki a Mohi.
JOS 1:18 Ahakoa ko wai te tangata e tutū ki tāu whakahau, e kore hoki e rongo ki āu kupu, ki ngā mea katoa e whakahau ai koe ki a ia, me whakamate. Ko koe ia kia kaha, kia māia!”
JOS 2:1 Nā, ka tonoa atu e Hohua, e te tama a Nunu, ētahi tāngata tokorua i Hitimi hei tūtei puku atu, i mea ia, “Tīkina, tirohia te whenua, me Heriko hoki.” Nā, haere ana rāua, ā, ka tae ki te whare o tētahi wahine kairau, ko Rahapa tōna ingoa, ā, ka moe i reira.
JOS 2:2 Nā, ka kōrerotia ki te kīngi o Heriko, ka meatia, “Nanā, kua tae mai ētahi tāngata ki konei i te pō nei, nō ngā tama a Īharaira, he whakataki i te whenua.”
JOS 2:3 Nā, ka tonoa atu e te kīngi o Heriko ki a Rahapa, ka mea, “Whakaputaina mai ki waho ngā tāngata i haere mai nā ki a koe, i haere atu nā ki tōu whare; i haere mai hoki rāua he mātaki i te whenua katoa.”
JOS 2:4 Nā, ka hopu te wahine rā ki ngā tāngata tokorua, ā, hunā iho e ia; ā, ka mea atu ia, “He tika i haere mai ngā tāngata ki ahau, heoi, kīhai ahau i mōhio nō hea rānei rāua.
JOS 2:5 Ā, nō te wā o te tūtakitanga o te kūwaha, nō te mea ka pōuri nei, ka puta atu aua tāngata ki waho. Kāhore ahau e mōhio i haere aua tāngata ki hea. Kia hohoro te whai i muri i a rāua; ka mau hoki rāua i a koutou.”
JOS 2:6 (Kāhore ia, kua kawea rāua e ia ki runga ki te tuanui, ā, hunā ana rāua ki ngā kakau rīnena i horahorangia e ia ki runga i te tuanui.)
JOS 2:7 Nā, ka whai ngā tāngata i muri i a rāua nā te huarahi ki Horano ā tae noa ki ngā whakawhitinga; ā, nō te putanga atu anō o ngā kaiwhai i a rāua ki waho ka tūtakina te kūwaha.
JOS 2:8 Ā, kīanō rāua i takoto noa, nā, ka haere ake ia ki a rāua ki te tuanui,
JOS 2:9 ka mea ki aua tāngata, “E mōhio ana ahau kua hoatu te whenua nei e Ihowā ki a koutou, kua tau mai hoki te wehi o koutou ki a mātou, ā, kei te ngohe noa ngā tāngata katoa o te whenua nei i a koutou.
JOS 2:10 I rongo hoki mātou ki tā Ihowā whakamaroketanga i te wai o te Moana Whero i ō koutou aroaro, i tō koutou putanga mai i Īhipa; ki ngā mea hoki i meatia e koutou ki ngā kīngi tokorua o ngā Amori i tāwāhi o Horano, ki a Hihona rāua ko Oka, i hunā nei e koutou.
JOS 2:11 Ā, i tō mātou rongonga anō, ka ngohe noa ō mātou ngākau, kāhore atu hoki he tokonga ake o te wairua i roto i tētahi, nā koutou hoki; nō te mea ko Ihowā, ko tō koutou Atua, ko ia te Atua i te rangi i runga, i te whenua hoki i raro.
JOS 2:12 Nā, tēnā, oatitia mai a Ihowā ki ahau, i te mea kua atawhaitia nei kōrua e ahau, ka atawhai hoki koutou ki te whare o tōku matua, ā, ka hōmai he tohu pono ki ahau.
JOS 2:13 Ka whakaora hoki koutou i tōku pāpā, i tōku whaea, i ōku tungāne, i ōku tuākana, me ā rātou mea katoa, ā, ka araarai i a mātou kei mate.”
JOS 2:14 Nā, ka mea aua tāngata ki a ia, “Ko tō māua ora mō tō koutou, ki te kāhore koutou e whāki i tā māua take; ā tēnei ake, hei te hōmaitanga a Ihowā i te whenua ki a mātou, ka puta hoki tā mātou mahi atawhai, tā mātou mahi pono ki a koe.”
JOS 2:15 Nā, tukua iho ana rāua e ia ki tētahi taura nā te matapihi; kei te taiepa tonu hoki o te pā tōna whare, ā, noho ai ia i runga i te taiepa.
JOS 2:16 Ā, ka mea ia ki a rāua, “Haere ki te maunga, kei tūtaki ngā kaiwhai ki a kōrua; ka piri ai ki reira kia toru ngā rā, kia hoki mai rā anō ngā kaiwhai; kātahi kōrua ka haere i tō kōrua huarahi.”
JOS 2:17 Kātahi ka mea aua tāngata ki a ia, “E kore māua e whai hara mō tēnei oati āu i whakaoati nei koe i a māua.
JOS 2:18 Nanā, ina tae mai mātou ki tēnei whenua, herea te miro nei, te aho whero nei ki te matapihi i tukua iho nei māua e koe nā reira; ā, me whakahuihui mai ki a koe, ki roto ki te whare, tōu pāpā, me tōu whaea, me ōu tungāne, me te nohoanga katoa o tōu pāpā.
JOS 2:19 Nā, ahakoa ko wai te tangata e puta atu ana ki waho o ngā tatau o tōu whare, hei runga anō i tōna māhunga ōna toto, ko māua ia ka harakore; tēnā ko ngā tāngata katoa i roto tahi koutou i te whare, hei ō māua māhunga ōna toto, ki te pā atu tētahi ringa ki a ia.
JOS 2:20 Otiia, ki te kōrero koe i tā māua take, ka wātea māua i tāu oati i whakaoati nei koe i a māua.”
JOS 2:21 Anō rā ko ia, “Waiho i tā kōrua i mea nā.” Ā, tukua atu ana rāua e ia, ā, haere ana rāua; ā, herea ana e ia te aho whero ki te matapihi.
JOS 2:22 Nā, ka haere rāua, ā, ka tae ki te maunga, ā, noho ana i reira e toru ngā rā, ā, hoki noa ngā kaiwhai; ā, rapu noa ngā kaiwhai i a rāua i te huarahi katoa, ā, kāhore i kitea.
JOS 2:23 Kātahi ka hoki aua tāngata tokorua, ka heke iho i te maunga, ā, ka whiti, ka tae ki a Hohua, tama a Nunu, ka kōrero ki a ia i ngā mea katoa i pono ki a rāua.
JOS 2:24 Ā, ka mea rāua ki a Hohua, “Koia anō, kua hōmai e Ihowā te whenua katoa ki ō tātou ringa; ā, ngohe kau ngā tāngata katoa o te whenua i a tātou.”
JOS 3:1 Nā, ka maranga wawe a Hohua i te ata, ā, ka tūria atu e rātou i Hitimi, ka tae ki Horano, ā, ia me ngā tama katoa a Īharaira, ā, moe ana ki reira i te mea kīanō i whiti noa.
JOS 3:2 Nā, i te paunga o ngā rā e toru, ka haere ngā rangatira nā waenganui o te puni;
JOS 3:3 ā, ka whakahau i te iwi, ka mea, “E kite koutou i te āka o te kawenata a Ihowā, a tō koutou Atua, i ngā tohunga hoki, i ngā Rīwaiti e amo ana, hei konā ka whakatika atu i ō koutou nohoanga, ka haere i muri.
JOS 3:4 Otiia, kia whai takiwā ki waenganui o koutou, o taua mea; kia rua mano whatīanga, he mea whanganga, mārie; kaua e whakatata ki taua mea, kia mōhio ai koutou ki te huarahi e haere ai koutou; kāhore nei hoki koutou i haere i tēnā huarahi i mua ake nei.”
JOS 3:5 Ā, i mea anō a Hohua ki te iwi, “Whakatapu i a koutou; ko āpōpō hoki a Ihowā mahi ai i ngā mea whakamīharo ki waenganui i a koutou.”
JOS 3:6 I mea anō a Hohua ki ngā tohunga, “Hāpainga ake te āka o te kawenata, haere i mua i te iwi.” Ā, hāpainga ana e rātou te āka o te kawenata, ā, haere ana i mua i te iwi.
JOS 3:7 Ā, ka mea a Ihowā ki a Hohua, “Ko āianei ahau tīmata ai te whakanui i a koe ki te aroaro o Īharaira katoa kia mōhio ai rātou, i a Mohi ahau, ka pērā anō ahau ki a koe.
JOS 3:8 Ā, māu e whakahau ki ngā tohunga e amo ana i te āka o te kawenata, e mea, ‘E tae koutou ki te tapa o te wai o Horano, me āta tū i roto i Horano.’ ”
JOS 3:9 Nā, ka mea a Hohua ki ngā tama a Īharaira, “Haere mai, whakarongo ki ngā kupu a Ihowā, a tō koutou Atua.”
JOS 3:10 Nā, ka mea a Hohua, “Mā konei koutou ka mōhio ai kei roto i a koutou te Atua ora, ā, ka peia rawatia e ia i tō koutou aroaro ngā Kanaani, ngā Hiti, ngā Hiwi, ngā Perihi, ngā Kirikahi, ngā Amori, me ngā Iepuhi.
JOS 3:11 Nanā, ko te āka o te kawenata a te Ariki o te ao katoa te haere nei i mua i a koutou ki roto o Horano.
JOS 3:12 Nā, motuhia ki a koutou kia tekau mā rua tāngata o ngā iwi o Īharaira, kia takikotahi te tangata o te iwi.
JOS 3:13 Ā, ina tatū ngā kapu o ngā waewae o ngā tohunga e amo ana i te āka a Ihowā, a te Ariki o te ao katoa, ki ngā wai o Horano, ka motuhia ngā wai o Horano, arā ngā wai e rere mai ana i runga; ā, ka tū ake, kotahi anō pūranga.”
JOS 3:14 Ā, nō te haerenga atu o te iwi i ō rātou tēneti ki te whakawhiti i Horano, me ngā tohunga hoki e amo ana i te āka o te kawenata i mua i te iwi.
JOS 3:15 Ā, i te taenga o ngā kaiamo i te āka ki Horano, i te tukunga atu hoki o ngā waewae o ngā tohunga e amo ana i te āka ki te taha o te wai; e ngawhā ana hoki a Horano ki runga i ōna pareparenga katoa i ngā rā katoa o te kotinga;
JOS 3:16 ko te tino tūranga o ngā wai e heke iho ana i runga, ara ake ana kotahi anō pūranga, i tawhiti noa atu i te pā i Ārama, i te taha o Haretana; ā, ko ngā wai e rere iho ana ki te moana o te mānia, ki te Moana Tote, mimiti ana, motu kē atu ana; ā, whiti ana te iwi i te ritenga atu o Heriko.
JOS 3:17 Ā, tū mārie ana ngā tohunga i amo nei i te āka o te kawenata a Ihowā i te wāhi maroke i waenganui o Horano, me te haere anō a Īharaira katoa ki tāwāhi nā te wāhi maroke, ā poto noa te iwi katoa te whiti i Horano.
JOS 4:1 Ā, ka poto katoa te iwi te whiti i Horano, nā, ka kōrero a Ihowā ki a Hohua, ka mea,
JOS 4:2 “Tangohia mai e koutou i roto i te iwi kia kotahi tekau mā rua tāngata, kia takikotahi tangata o te iwi,
JOS 4:3 ā, ka whakahau ki a rātou, ka mea, ‘Tangohia atu i konei, i waenganui o Horano, i te wāhi i āta tū ai ngā waewae o ngā tohunga, kia tekau mā rua ngā kōhatu, ā, maua atu, waiho ki te moenga e moe ai koutou ā tēnei pō.’ ”
JOS 4:4 Nā, ka karangatia e Hohua ngā tāngata kotahi tekau mā rua i whakaritea e ia i roto i ngā tama a Īharaira, takikotahi te tangata o roto o te iwi;
JOS 4:5 ā, ka mea a Hohua ki a rātou, “Haere atu i mua i te āka a Ihowā, a tō koutou Atua, ki waenganui o Horano, ka hāpai ake kia takikotahi te kōhatu mā te tangata ki runga ki tōna pokohiwi, kia rite ki ngā iwi o ngā tama a Īharaira te maha;
JOS 4:6 kia waiho ai tēnei mea hei tohu ki waenganui i a koutou. Mō te ui a ā koutou tamariki ā mua, mō te mea, ‘Hei aha ēnei kōhatu mā koutou?’
JOS 4:7 Kātahi koutou ka mea atu ki a rātou, ‘Nō te motuhanga i ngā wai o Horano i mua i te āka o te kawenata a Ihowā; i tōna whitinga mai i Horano i motuhia ngā wai o Horano.’ Ā, ko ēnei kōhatu hei whakamahara mō ngā tama a Īharaira ā ake ake.”
JOS 4:8 Ā, pērātia ana e ngā tama a Īharaira me tā Hohua i whakahau ai, hāpainga ake ana e rātou ngā kōhatu kotahi tekau mā rua i waenganui o Horano, pērātia ana me tā Ihowā i kōrero ai ki a Hohua, he mea rite ki ngā iwi o ngā tama a Īharaira te maha; ā, mauria ana ki tō rātou puni, waiho ana i reira.
JOS 4:9 Ā, i whakatūria e Hohua ētahi kōhatu kotahi tekau mā rua ki waenganui o Horano, ki te wāhi i tū ai ngā waewae o ngā tohunga i amo i te āka o te kawenata; kei reira anō aua kōhatu ā mohoa noa nei.
JOS 4:10 Heoi, tū ana tērā ngā tohunga i amo i te āka i waenganui o Horano ā oti noa ngā mea katoa i whakahau ai a Ihowā ki a Hohua kia kōrerotia ki te iwi, i rite tonu ki ngā mea katoa i whakahau ai a Mohi ki a Hohua; ā, i hohoro tonu te iwi te whiti.
JOS 4:11 Ā, ka tapeke katoa te iwi te whiti, nā, ka whiti te āka a Ihowā, me ngā tohunga i te tirohanga a te iwi.
JOS 4:12 Ko ngā tama a Reupena, ko ngā tama a Kara, me tētahi tānga o te iwi o Mānahi i whiti tōpuni atu i te aroaro o ngā tama a Īharaira, i pērā me tā Mohi i kōrero ai ki a rātou.
JOS 4:13 Kei te whā tekau ngā mano, he hunga tūmatohi tonu mō te riri, i haere i te aroaro o Ihowā ki ngā mānia o Heriko ki te whawhai.
JOS 4:14 Nō taua rā i whakanui ai a Ihowā i a Hohua i te aroaro o Īharaira katoa; ā, wehi ana rātou i a ia, pērā ana me rātou i wehi i a Mohi, i ngā rā katoa i ora ai ia.
JOS 4:15 I kōrero anō a Ihowā ki a Hohua, i mea,
JOS 4:16 “Kī atu ki ngā tohunga e amo ana i te āka o te whakaaturanga, kia haere ake i roto i Horano.”
JOS 4:17 Nā, ka mea atu a Hohua ki ngā tohunga, “Haere ake i roto i Horano.”
JOS 4:18 Ā, nō te haerenga ake o ngā tohunga i amo i te āka o te kawenata a Ihowā i waenganui o Horano, ā, ka mahuta ake ngā kapu o ngā waewae o ngā tohunga ki te wāhi maroke, ko te tino hokinga o te wai o Horano ki tōna wāhi anō, ā, huri tonu ake ki runga i ōna pareparenga, pērā ana me tō mua.
JOS 4:19 Nō te tekau o ngā rā o te marama tuatahi te iwi i haere ake ai i Horano, ā, noho ana i Kirikara i te taha ki te rāwhiti o Heriko.
JOS 4:20 Ā, ko aua kōhatu kotahi tekau mā rua i tangohia ake e rātou i roto i Horano, nā Hohua i whakatū ki Kirikara.
JOS 4:21 Ā, i kōrero ia ki ngā tama a Īharaira, i mea, “E ui ā koutou tamariki ā mua ki ō rātou mātua, e mea, ‘He aha ēnei kōhatu?’
JOS 4:22 Nā, me whakaatu ki ā koutou tama, me kī atu, ‘I whiti maroke mai a Īharaira i tēnei Horano.’
JOS 4:23 Nā, Ihowā hoki, nā tō koutou Atua i whakamaroke ngā wai o Horano i mua i a koutou, ā whiti noa koutou rite tahi ki tā Ihowā, ki tā tō koutou Atua i mea ai ki te Moana Whero, i whakamaroketia rā e ia i mua hoki i a tātou, ā whiti noa mai tātou.
JOS 4:24 Kia mōhio ai ngā iwi katoa o te whenua ki te ringa o Ihowā, he kaha; kia wehi ai rātou i a Ihowā, i tō koutou Atua, i ngā rā katoa.”
JOS 5:1 Ā, nō te rongonga o ngā kīngi katoa o ngā Amori, o ērā ki te taha ki te hauāuru o Horano, me ngā kīngi katoa o ngā Kanaani, o ērā i te moana, ki te whakamaroketanga a Ihowā i ngā wai o Horano i te aroaro o ngā tama a Īharaira ā whiti noa mātou, nā, ka ngohe noa ō rātou ngākau, kāhore atu hoki ō rātou wairua, i te wehi ki ngā tama a Īharaira.
JOS 5:2 Nā, i taua wā ka mea a Ihowā ki a Hohua, “Hangā ētahi māripi kōhatu māu, ā, ka tuarua i te kotinga o ngā tama a Īharaira.”
JOS 5:3 Ā, hangā ana e Hohua ētahi māripi kōhatu, ā, kotia iho ngā tama a Īharaira ki te pukepuke o ngā kiri matamata.
JOS 5:4 Ā, ko te take tēnei i kokoti ai a Hohua: ko te hunga katoa i puta mai i Īhipa, ko ngā tāne, ko ngā tāngata hāpai patu, i mate ki te ara i te koraha, i muri i tō rātou putanga mai i Īhipa.
JOS 5:5 Nā, ko te hunga katoa i puta mai he mea kokoti katoa; tēnā ko te hunga i whānau ki te ara i te koraha i tō rātou putanga mai i Īhipa, kīhai ēnā i kotia e rātou.
JOS 5:6 E whā tekau hoki ngā tau i haere ai ngā tama a Īharaira i te koraha, ā poto noa te hunga hāpai patu katoa i puta mai i Īhipa, mō rātou kīhai i rongo ki te reo o Ihowā; ko ngā tāngata hoki i oati nei a Ihowā ki a rātou, e kore e whakakitea ki a rātou te whenua i oati ai a Ihowā ki ō rātou mātua kia hōmai e ia ki a tātou, te whenua hoki e rerengia ana e te waiū, e te honi.
JOS 5:7 Ā, ko ā rātou tamariki i whakaarahia ake e ia hei whakakapi mō rātou, ko rātou i kotia e Hohua; nō te mea kāhore ō rātou kotinga; kāhore nei hoki rātou i kotia i te huarahi.
JOS 5:8 Ā, nō ka poto katoa ngā tāngata te kokoti e rātou, ka noho rātou ki te puni ki ō rātou wāhi ā mahu noa.
JOS 5:9 Nā, ka mea a Ihowā ki a Hohua, “Nō tēnei rā i hurihia atu ai e ahau te taunutanga o Īhipa i a koutou.” Nā reira i huaina ai te ingoa o taua wāhi ko Kirikara ā tae noa mai ki tēnei rā.
JOS 5:10 Ā, i noho ngā tama a Īharaira ki Kirikara; ā, i mahi rātou i te Kapenga i te tekau mā whā o ngā rā o te marama i te ahiahi, i ngā mānia o Heriko.
JOS 5:11 Ā, nō te aonga ake i te Kapenga, i kai ai rātou i te wīti o te whenua, he keke kīhai i rēwenatia, me te wīti pāhūhū, nō taua rangi pū anō.
JOS 5:12 Ā, i whakamutua te mana i te aonga ake o te rā, i muri i tā rātou kainga i te wīti ake o te whenua; kāhore atu hoki he mana mā ngā tama a Īharaira; heoti, kai ana rātou i ngā hua o te whenua o Kanaana i taua tau.
JOS 5:13 Ā, i a Hohua i Heriko, nā, ka anga ake ōna kanohi, ka titiro, nā, he tangata e tū mai ana i tōna aroaro, ko tāna hoari hoki i tōna ringa, unu rawa. Nā, ka haere atu a Hohua ki a ia, ka mea ki a ia, “Mō mātou rānei koe, mō ō mātou hoariri rānei?”
JOS 5:14 Ka mea ia, “Kāhore; engari he rangatira nō te ope a Ihowā ahau i haere mai nei.” Nā, ka tāpapa a Hohua ki te whenua, ka koropiko, ka mea ki a ia, “E pēhea mai ana tōku ariki ki tāna pononga?”
JOS 5:15 Ā, ka mea te rangatira o te ope a Ihowā ki a Hohua, “Wetekina tōu hū i tōu waewae; he tapu hoki te wāhi e tū nā koe.” Ā, pērā ana a Hohua.
JOS 6:1 Nā, he mea tino tūtaki a Heriko i te wehi i ngā tama a Īharaira; kāhore he tangata i haere ki waho, kāhore hoki tētahi i haere ki roto.
JOS 6:2 Ā, ka mea a Ihowā ki a Hohua, “Titiro, kua hoatu e ahau ki tōu ringa a Heriko, me tōna kīngi, rātou ko ngā mārohirohi.
JOS 6:3 Nā, taiāwhiotia te pā e koutou, e ngā tāngata hāpai patu katoa, me haere ā tawhio noa te pā, kia kotahi anō āwhiotanga. Kia ono ngā rā e pēnā ai koe,
JOS 6:4 ā, kia tokowhitu ngā tohunga e mau i ngā tētere haona hipi e whitu ki mua i te āka. Ā, i te whitu o ngā rā me taiāwhio e koutou te pā, kia whitu ngā taiāwhiotanga, ā, me whakatangi e ngā tohunga ngā tētere.
JOS 6:5 Ā, ka roa te tangi o te haona hipi, ā, ka rangona e koutou te tangi o te tētere, me hāmama katoa te iwi, kia nui te hāmama; nā, ka hinga te taiepa o te pā, papa rawa ki raro, ā, ka piki atu te iwi, tērā, tērā, i ngā wāhi e rite mai ana ki a rātou.”
JOS 6:6 Nā, ka karanga a Hohua, te tama a Nunu, ki ngā tohunga, ka mea ki a rātou, “Hāpainga te āka o te kawenata, ā, mā ngā tohunga tokowhitu e mau ngā tētere haona hipi e whitu ki mua i te āka a Ihowā.”
JOS 6:7 Ā, i mea rātou ki te iwi, “Haere, taiāwhiotia te pā, ā, ko ngā tāngata hāpai patu e haere i mua i te āka a Ihowā.”
JOS 6:8 Heoi, i te kōrerotanga a Hohua ki te iwi, nā, ka mau ngā tohunga tokowhitu ki ngā tētere haona hipi e whitu, ā, haere ana i mua i a Ihowā, me te whakatangi anō i ngā tētere; i haere hoki te āka o te kawenata a Ihowā i muri i a rātou.
JOS 6:9 Ā, ko ngā tāngata hāpai patu i haere i mua i ngā tohunga e whakatangi ana i ngā tētere, ko te hiku i haere i muri i te āka, haere ana ngā tohunga me te whakatangi haere i ngā tētere.
JOS 6:10 Ā, i whakaako a Hohua i te iwi, i mea, “Kaua e hāmama, kaua ō koutou reo e rangona, kei puta hoki tētahi kupu i ō koutou waha, ā tae noa ki te rā e mea ai ahau ki a koutou, kia hāmama; hei reira koutou ka hāmama.”
JOS 6:11 Nā, meinga ana e ia kia taiāwhiotia te pā e te āka a Ihowā, haere ana ā tawhio noa, kotahi anō taiāwhiotanga; nā, ka haere rātou ki te puni, ā, moe ana ki te puni.
JOS 6:12 Ā, ka maranga wawe a Hohua i te ata, ā, hāpainga ake ana e ngā tohunga te āka a Ihowā.
JOS 6:13 I mau anō hoki ngā tohunga tokowhitu i ngā tētere haona hipi e whitu i mua i te āka a Ihowā, i haere tonu me te whakatangi haere i ngā tētere; ā, ko ngā tāngata hāpai patu i haere i mua i a rātou; ko te nuinga ia i haere i muri i te āka a Ihowā. Haere ana ngā tohunga me te whakatangi anō i ngā tētere.
JOS 6:14 Ā, i te rua o ngā rā i taiāwhiotia e rātou te pā, kotahi anō taiāwhiotanga, ā, hoki ana ki te puni; ā, pērā tonu rātou i ngā rā e ono.
JOS 6:15 Nā, i te whitu o ngā rā, ka maranga wawe rātou i te pūaotanga o te rā, ka taiāwhio hoki i te pā, e whitu ngā taiāwhiotanga, ko taua ritenga rā anō; otiia i taua rā e whitu ā rātou taiāwhiotanga i te pā.
JOS 6:16 Nā, i te whitu o ngā taiāwhiotanga, ka whakatangi ngā tohunga i ngā tētere, ka mea a Hohua ki te iwi, “Hāmama; kua hōmai hoki e Ihowā te pā ki a koutou.
JOS 6:17 Hei mea oti atu anō te pā mā Ihowā, a reira me ngā mea katoa i roto; ko Rahapa anake, ko te wahine kairau, ko ia kia ora me ngā mea katoa i a ia i roto i te whare, mōna i huna i ngā tāngata i tonoa atu e tātou.
JOS 6:18 Ko koutou ia, kia hopohopo ki te mea kua oti te kanga, kei tākina he kanga ki a koutou, ki te tango i tētahi wāhi o te mea kua oti te kanga; ā, ka meinga te ope o Īharaira kia kangā, ā, whakararua iho e koutou.
JOS 6:19 Engari ngā hiriwa me ngā kōura, me ngā mea parāhi, rino hoki, kia tapu ēnā mā Ihowā; me riro ēnā ki roto ki te whare taonga a Ihowā.”
JOS 6:20 Heoi, ka hāmama te iwi, ā, ka whakatangi ngā tohunga i ngā tētere. Nā, i te rongonga o te iwi i te tangi o te tētere, ko te tino hāmamatanga o te iwi, he nui te hāmama, ā, hinga iho te taiepa, papā rawa ki raro, ā, piki atu ana te iwi ki roto ki te pā, tērā, tērā, i te wāhi e rite mai ana ki a ia, nā, horo ana i a rātou te pā.
JOS 6:21 Ā, tino hunā rawatia e rātou ngā mea katoa i te pā, ngā tāne, ngā wāhine, ngā taitamariki, ngā koroheke, ngā kau, ngā hipi, ngā kāihe, ki te mata o te hoari.
JOS 6:22 Ā, i mea a Hohua ki ngā tāngata tokorua i tūteia ai te whenua, “Haere ki te whare o te wahine kairau, mauria mai hoki i reira te wahine me ngā mea katoa i a ia, whakaritea tā kōrua i oati ai ki a ia.”
JOS 6:23 Nā, ka haere aua taitama, ngā tūtei, ā, mauria ana mai e rāua a Rahapa, tōna pāpā, tōna whaea, ōna tungāne, me ngā mea katoa i a ia, ā, mauria katoatia mai ana hoki e rāua ōna whanaunga katoa ki waho; ā, waiho ana i waho o te puni o Īharaira.
JOS 6:24 Nā, tahuna ake e rātou te pā ki te ahi, me ngā mea katoa i roto; ko te hiriwa anake, me te kōura, me ngā mea parāhi, rino hoki, i hoatu e rātou ki te whare taonga o te whare o Ihowā.
JOS 6:25 Otiia ko Rahapa, ko te wahine kairau, ko te nohoanga o tōna pāpā, me ngā mea katoa i a ia, i whakaorangia e Hohua; ā, noho ana ia i waenganui o Īharaira ā tae noa mai ki tēnei rā, mōna i huna i ngā tāngata i tonoa e Hohua ki te tūtei i Heriko.
JOS 6:26 Nā, ka whakaoati a Hohua i a rātou i taua wā, ka mea: “Ka kangā te tangata ki te aroaro o Ihowā e whakatika ana, ka hanga i tēnei pā, i Heriko: Ka whakatūria e ia hei runga i tāna mātāmua, ka whakanohoia anō ngā tatau hei runga i tāna tama ō muri.”
JOS 6:27 Heoi i a Hohua tonu a Ihowā; ā, pakū ana tōna rongo puta noa i te whenua.
JOS 7:1 Otiia, i taka ngā tama a Īharaira ki te kino i te mea kua oti te kanga: he tangohanga nā Ākana tama a Karami, tama a Taperi, tama a Tera, o te iwi o Hūrā, i tētahi wāhi o te mea kua oti te kanga; ā mura iho te riri o Ihowā ki ngā tama a Īharaira.
JOS 7:2 Nā, ka tonoa atu e Hohua ētahi tāngata i Heriko ki Hai, ki te taha o Peteawene, i te taha ki te rāwhiti o Pētēre, ka kōrero hoki ki a rātou, ka mea, “Haere ki runga ki te titiro i te whenua.” Nā, ka haere aua tāngata, ka titiro i Hai.
JOS 7:3 Ā, ka hoki mai rātou ki a Hohua, ka mea ki a ia, “Kaua e haere katoa te iwi ki runga; engari kia rua, kia toru rānei mano o ngā tāngata e haere ki runga ki te patu i Hai. Kaua hei whakangenge kau atu i te iwi ki reira; he tokoouou hoki rātou.”
JOS 7:4 Heoi, haere ana ki reira ētahi o te iwi, me te mea e toru mano; nā, rere ana rātou i te aroaro o ngā tāngata o Hai.
JOS 7:5 Ā, tukitukia iho o rātou e ngā tāngata o Hai me te mea e toru tekau mā ono tāngata; i whāia hoki rātou i mua i te kūwaha ā tae noa ki Heparimi, nā, patupatua ana rātou i te heketanga. Ā, ngohe kau te ngākau o te iwi, koia anō kei te wai.
JOS 7:6 Nā, ka haehae a Hohua i ōna kākahu, ka tāpapa ki te whenua, ki mua o te āka a Ihowā ā ahiahi noa, a ia me ngā kaumātua o Īharaira; ā, opehia ana e rātou he puehu ki ō rātou upoko.
JOS 7:7 Nā, ka mea a Hohua, “Auē, e te Ariki, e Ihowā, nā te aha rawa rā koe i anga ai ki te whakawhiti mai i tēnei iwi i Horano, i hoatu ai mātou ki te ringa o ngā Amori, kia hunā ai mātou? Auē, me i aro mātou ki te noho atu i tērā taha o Horano!
JOS 7:8 E te Ariki, me pēhea rā he kupu māku, kua parea atu nei e Īharaira ō rātou tuarā i te aroaro o ō rātou hoariri?
JOS 7:9 Nā te mea ka rongo ngā Kanaani me ngā tāngata katoa o te whenua, nā, ka karapotia mātou, ka hunā hoki ō mātou ingoa i te whenua; ā, ka pēhea koe ki tōu ingoa nui?”
JOS 7:10 Nā, ka mea a Ihowā ki a Hohua, “Whakatika! He aha tāu e takoto tāpapa nā?
JOS 7:11 Kua hara a Īharaira; āe, kua takahi rātou i tāku kawenata i whakarite ai ahau ki a rātou. Āe, kua tangohia nei e rātou tētahi wāhi o te mea kua oti te kanga, me te tāhae, me te teka anō rātou, ā, whaowhina ana e rātou ki roto ki ā rātou mea.
JOS 7:12 Nā reira ngā tama a Īharaira tē āhei ai te tū i te aroaro o ō rātou hoariri, nā, hurihia ana ō rātou tuarā i te aroaro o ō rātou hoariri, kua kangā hoki rātou. E kore ahau e haere i a koutou ā muri atu, ki te kāhore koutou e whakangaro i te mea kanga i roto i a koutou.
JOS 7:13 “Whakatika, whakatapua te iwi, mea atu, ‘Whakatapu i a koutou mō āpōpō; ko te kupu hoki tēnei a Ihowā, a te Atua o Īharaira, “Kei roto i a koe, e Īharaira, te mea kanga; e kore koe e kaha ki te tū ki te aroaro o ōu hoariri, kia tangohia atu rā anō e koutou te mea kanga i roto i a koutou.”
JOS 7:14 “ ‘Nā, i te ata me whakatata mai koutou, arā ō koutou iwi; ā tērā ko te iwi e tango ai a Ihowā me whakatata mai ā-hapū; ā, ko te hapū e tango ai a Ihowā me whakatata ā-whare mai; ā, ko te whare e tango ai a Ihowā me whakatata mai ia tangata, ia tangata.
JOS 7:15 Ā, ko te tangata e hopukia kei a ia te mea kanga, me tahu ki te ahi, a ia me āna mea katoa; mōna i takahi i te kawenata a Ihowā, i mahi pōauau hoki i roto i a Īharaira.’ ”
JOS 7:16 Nā, ka maranga wawe a Hohua i te ata, ā, whakatātaia mai ana e ia a Īharaira, arā ōna iwi; nā, ka mau ko te iwi o Hūrā.
JOS 7:17 Nā, ka ārahina mai e ia te hapū o Hūrā; ā, ka mau te hapū o ngā Terahi; nā, ka ārahina mai e ia te hapū o ngā Terahi, tēnei tangata, tēnei tangata; ā, ka mau ko Taperi.
JOS 7:18 Nā, ka ārahi ia i tōna whare, i tēnei tangata, i tēnei tangata; ā, ka mau ko Ākana tama a Karami, tama a Taperi, tama a Tera, nō te iwi o Hūrā.
JOS 7:19 Kātahi a Hohua ka mea ki a Ākana, “E tāku tama, whakakorōriatia a Ihowā, te Atua o Īharaira, ā, whākina ki a ia, whakaaturia mai hoki ki ahau, i aha koe; kaua e huna i ahau.”
JOS 7:20 Nā, ka whakautua e Ākana ki a Hohua, ka mea, “He pono i hara ahau ki a Ihowā, ki te Atua o Īharaira, ā, tēnei tāku i mea ai:
JOS 7:21 I tāku kitenga i tētahi koroka whakapaipai nō Papurōna i roto i ngā taonga, i ngā hekere hiriwa e rua rau, i tētahi poro kōura, e rima tekau hekere tōna taimaha, nā, ka minamina ahau, ka tango. Ā tērā kei te whenua i waenganui o tōku tēneti e huna ana, me te hiriwa hoki kei raro iho.”
JOS 7:22 Nā, ka tonoa atu e Hohua ētahi tāngata, ā, ko tō rātou rerenga atu ki te tēneti; nā, ko taua mea e huna ana i roto i tōna tēneti, me te hiriwa i raro iho.
JOS 7:23 Nā, tangohia ana e rātou aua mea i waenganui o te tēneti, ā, mauria ana ki a Hohua rātou ko ngā tama katoa a Īharaira, ā, whakatakotoria ana ki te aroaro o Ihowā.
JOS 7:24 Nā, ka tango a Hohua rātou tahi ko Īharaira katoa i a Ākana tama a Tera, i te hiriwa, i te koroka, i te poro kōura, i āna tama, i āna tamāhine, i āna kau, i ana kāihe, i āna hipi, i tōna tēneti, i ngā mea katoa hoki i a ia, ā, kawea ana rātou ki te Raorao o Ākoro.
JOS 7:25 Nā, ka mea a Hohua, “Nā te aha koe i whakararu ai i a tātou? Ka whakararu hoki a Ihowā i a koe i tēnei rā.” Nā, ākina ana ia e Īharaira katoa ki te kāmaka, ā, tahuna ana ki te ahi i muri iho i tā rātou ākinga i a rātou ki te kāmaka.
JOS 7:26 Ā, whakapūrangatia ana e rātou ētahi kōhatu ki runga i a ia, he nui te pūranga, e tū nei anō ā tae noa ki tēnei rā. Kātahi ka tahuri a Ihowā i te muranga o tōna riri. Nā reira i huaina ai te ingoa o taua wāhi, ko te Raorao o Ākoro, ā mohoa noa nei.
JOS 8:1 Nā, ka mea a Ihowā ki a Hohua, “Kaua e mataku, kaua e pāwera; tangohia ki a koe te hunga hāpai patu katoa, ā, whakatika, haere ki runga, ki Hai. Titiro hoki, kua hoatu e ahau ki tōu ringa te kīngi o Hai, tōna iwi, tōna pā, me tōna whenua.
JOS 8:2 Ā, kia rite tāu e mea ai ki Hai, ki tōna kīngi hoki, ki tāu i mea ai ki Heriko, ki tōna kīngi; ko ōna taonga ia, me ōna kararehe, me tango mā koutou; whakatakotoria he pehipehi mō te pā ki tērā pito.”
JOS 8:3 Nā, ko te whakatikanga o Hohua me te hunga hāpai patu katoa ki te whakaeke i Hai. Ā, whiriwhiria ana e Hohua e toru tekau mano o ngā tāngata, he mārohirohi, ā, tonoa atu ana rātou e ia i te pō.
JOS 8:4 I whakahau anō ia i a rātou, i mea, “Kia mahara, me whakatakoto he pehipehi mō te pā ki tērā pito o te pā; kei matara rawa atu i te pā, engari kia tūmatohi koutou katoa.
JOS 8:5 Ā, māku, mā te hunga katoa hoki i ahau, e whakatata ki te pā; ā, ka puta mai rātou ki te tū i a mātou, ka pērā me tō mua, nā, ka rere mātou i tō rātou aroaro.
JOS 8:6 Nā, ka puta mai rātou ka whai i a mātou, ā, ka manukāwhakitia e mātou i roto i te pā; tērā hoki rātou e mea, ‘E rere ana rātou i ō tātou aroaro, pērā anō me tō mua.’ Ā, ka rere mātou i tō rātou aroaro;
JOS 8:7 hei reira koutou whakatika ai i te pehipehi, ā, ka tomo i te pā; mā Ihowā hoki, mā tō koutou Atua e tuku ki ō koutou ringa.
JOS 8:8 Nā, ka riro te pā i a koutou, tahuna te pā ki te ahi; pērātia me tā Ihowā i kī ai. Kia mahara, kua whakaritea atu nei e ahau ki a koutou.”
JOS 8:9 Nā, tonoa ana rātou e Hohua; ā, haere ana rātou ki te whakatakoto pehipehi, ā, noho ana i waenganui o Pētēre, o Hai, ki te taha ki te hauāuru o Hai; ko Hohua ia i moe i waenganui o te iwi i taua pō.
JOS 8:10 Nā, ka maranga wawe a Hohua i te ata, ā, whakaemia ana e ia te iwi, nā, haere ana ia me ngā kaumātua o Īharaira i mua i te iwi ki Hai.
JOS 8:11 Ā, ko te iwi katoa tae noa ki te hunga hāpai patu i a ia, i haere, i whakatata, ā, ka tae ki mua o te pā, ā, noho rawa atu ki te taha ki te raki o Hai; nā, he whārua i waenganui o rātou, o Hai.
JOS 8:12 Nā, ka tango ia i ētahi tāngata tata tonu ki te rima mano, ā, whakanohoia ana e ia hei pehipehi ki waenganui o Pētēre, o Hai, ki te taha ki te hauāuru o te pā.
JOS 8:13 Ā, ka oti i a rātou te whakanoho te iwi, arā te ope katoa, tērā i te raki o te pā, me ā rātou pehipehi ki te hauāuru o te pā. Nā, ka haere a Hohua i taua pō anō ki waenganui o te whārua.
JOS 8:14 Ā, nō te kitenga o te kīngi o Hai, nā, hohoro ana rātou, maranga wawe ana; ko te tino putanga mai o ngā tāngata o te pā ki te tū i a Īharaira ki te riri, a ia me tōna iwi katoa i te wā i whakaritea, i te ritenga mai o te mānia; kīhai ia i mōhio he pehipehi tērā mōna kei tua o te pā.
JOS 8:15 Ā, whakawhati ana a Hohua rātou ko Īharaira katoa i a rātou anō i ō rātou aroaro, ā, rere ana i te huarahi ki te koraha.
JOS 8:16 Kātahi ka karangatia te iwi katoa i roto i Hai ki te whai i a rātou; nā, whai ana rātou i muri i a Hohua, ā, manukāwhakitia ana rātou i roto i te pā.
JOS 8:17 Ā, kāhore he tangata o Hai rāua ko Pētēre i noho, i tē haere ki te whai i a Īharaira; nā, whakarērea ana e rātou te pā kia takoto kau ana, ā, whai ana i muri i a Īharaira.
JOS 8:18 Nā, ka mea a Ihowā ki a Hohua, “Whakatoroa atu te tīmata i tōu ringa nā, ki Hai; nō te mea ka hoatu e ahau a reira ki tōu ringa.” Nā, whakatoroa atu ana e Hohua te tīmata i tōna ringa ki te pā.
JOS 8:19 Nā, hohoro tonu te rewa o te pehipehi i tō rātou wāhi, ā, rere ana i te toronga atu anō o tōna ringa; ā, tomokia ana e rātou te pā ā horo noa, nā, hohoro tonu tā rātou tahu i te pā ki te ahi.
JOS 8:20 Ā, nō te tahuritanga o ngā tāngata o Hai, ka titiro, nā, ko te paowa o te pā e kake ana ki te rangi, nā, kāhore ō rātou kaha ki te rere pēnei rānei, pērā rānei. Nā, ka tahuri te hunga i rere whaka te koraha ki ngā mea i whai rā.
JOS 8:21 Ā, nō te kitenga o Hohua rātou ko Īharaira katoa kua horo te pā i te pehipehi, ā, ko te paowa o te pā e kake ana ki runga, nā, ka tahuri rātou, ka patu i ngā tāngata o Hai.
JOS 8:22 Ā, ka puta mai ērā i roto i te pā ki te whakatūtaki i a rātou; nā, ka noho rātou ki waenganui o Īharaira, ko ētahi ki tēnei taha, ko ētahi ki tērā taha; nā, tukitukia iho rātou e rātou, ā, kore rawa i toe tētahi mōrehu, tētahi rānei i rere atu.
JOS 8:23 Ā, hopukia oratia ana e rātou te kīngi o Hai, ā, kawea ana ki a Hohua.
JOS 8:24 Ā, nō ka poto i a Īharaira te patu ngā tāngata katoa o Hai i te pārae, i te koraha i whāia nei rātou ki reira, ā, ka hinga katoa rātou i te mata o te hoari ā poto noa rātou, kātahi ka hoki katoa a Īharaira ki Hai, ka tukituki hoki i reira ki te mata o te hoari.
JOS 8:25 Ā, ko ngā tāngata katoa i hinga i taua rā, ngā tāne me ngā wāhine, kotahi tekau mā rua mano, ko ngā tāngata katoa hoki o Hai.
JOS 8:26 Kāhore hoki a Hohua i whakahoki mai i tōna ringa, i torona atu ai e ia me te tīmata, ā, ngaro noa i a ia ngā tāngata katoa o Hai.
JOS 8:27 Ko ngā kararehe anake me ngā taonga o taua pā i tangohia e Īharaira mā rātou, i pērā anō me te kupu a Ihowā i tohutohu ai ki a Hohua.
JOS 8:28 Ā, tahuna ana e Hohua a Hai, meinga iho hei pūranga mō ā mua tonu atu, hei ururua ā tae noa mai ki tēnei rā.
JOS 8:29 Ā, ko te kīngi o Hai i tāronatia e Hohua ā ahiahi noa; ā, ka tō te rā, ka whakahaua e Hohua kia tangohia iho tōna tinana i runga i te rākau, kia makā ki te kūwaha o te tomokanga ki te pā. Kia whakapūrangatia he kōhatu ki runga i a ia, he pūranga nui e tū nei ā taea noatia tēnei rā.
JOS 8:30 Nā, hangā ana e Hohua tētahi āta mā Ihowā, mā te Atua o Īharaira, ki Maunga Ēpara,
JOS 8:31 pērā me tā Mohi, me tā te pononga a Ihowā i whakahau ai ki ngā tama a Īharaira, he mea e rite ana ki tērā i tuhituhia ki roto i te Pukapuka o te Ture a Mohi, he āta kāmaka toitū, kīhai nei i ākina iho te rino ki runga; ā, whakaekea ana e rātou he tahunga tinana mā Ihowā, i patua hoki he whakahere mō te pai.
JOS 8:32 Ā, tuhituhia ana e ia i reira ki ngā kōhatu ngā kupu o te ture a Mohi, he mea tuhituhi i te aroaro o ngā tama a Īharaira.
JOS 8:33 Ā, ko Īharaira katoa, ko ōna kaumātua, ko ngā rangatira, ko ōna kaiwhakawā, i tū ki tētahi taha o te āka, ki tētahi taha, ki mua o ngā tohunga, o ngā Rīwaiti, o ngā kaiamo i te āka o te kawenata a Ihowā rātou tahi ko te manene, ko te tangata tupu; ko tētahi tānga o rātou i te ritenga atu o Maunga Keritimi, ā, ko tētahi tānga o rātou i te ritenga atu o Maunga Ēpara; i rite tonu ki tā Mohi, ki tā te pononga a Ihowā i whakahau ai i mua, hei manaaki i te iwi o Īharaira.
JOS 8:34 Ā muri iho ka kōrerotia e ia ngā kupu katoa o te ture, ngā manaaki me ngā kanga, rite tonu ki ngā mea katoa i tuhituhia ki te Pukapuka o te Ture.
JOS 8:35 Kāhore he kupu o ngā mea katoa i whakahaua e Mohi i kore te kōrerotia e Hohua ki te aroaro o te huihui katoa o Īharaira, o ngā wāhine hoki me ngā tamariki, me ngā manene i noho tahi nei me rātou.
JOS 9:1 Nā, i te rongonga o ngā kīngi katoa o tēnei taha o Horano, o te whenua pukepuke, o te mānia, o te tahatika katoa hoki o te Moana Nui i te ritenga atu o Repanōna – te Hiti, te Amori, te Kanaani, te Perihi, te Hiwi, te Iepuhi –
JOS 9:2 nā, huihui tahi ana rātou ki te whawhai ki a Hohua rātou ko Īharaira, kotahi tonu te whakaaro.
JOS 9:3 Nō te rongonga ia o ngā tāngata o Kipeono ki ngā mea i meatia e Hohua ki Heriko rāua ko Hai,
JOS 9:4 ka mahi korokē rātou, ka haere me te mea he karere rātou; ka tango hoki ki ngā pūtea tawhito ki runga ki ō rātou kāihe, i ngā kōkī wāina hoki kua tawhitotia, kua pākarukaru, pūtiki rawa;
JOS 9:5 me ngā hū tawhito ki ō rātou waewae, pāpaki rawa, ko ō rātou kākahu he mea tawhito; ko ngā taro katoa hoki, ko ō rātou ō, he maroke, he puruhekaheka.
JOS 9:6 Nā, haere ana rātou ki a Hohua ki te puni, ki Kirikara, ā, mea ana ki a ia, ki ngā tāngata hoki o Īharaira, “I haere mai mātou i te whenua mamao; nā, whakaritea he kawenata ki a mātou.”
JOS 9:7 Nā, ka mea atu ngā tāngata o Īharaira ki ngā Hiwi, “E noho nei anō pea koe i waenganui i ahau; ā, me pēhea e whakarite ai ahau i te kawenata ki a koe?”
JOS 9:8 Nā, ka mea rātou ki a Hohua, “He pononga mātou nāu.” Ā, ka mea a Hohua ki a rātou, “Ko wai mā koutou? I haere mai koutou i hea?”
JOS 9:9 Nā, ka mea rātou ki a ia: “I haere mai āu pononga i tētahi whenua tawhiti noa atu, nā te ingoa hoki o Ihowā, o tōu Atua; i rongo hoki mātou ki tōna rongo, ki ngā mea katoa hoki i mea ai ia ki Īhipa,
JOS 9:10 ki ngā mea katoa anō hoki i mea ai ia ki ngā kīngi tokorua o ngā Amori i tērā taha o Horano, ki a Hihona kīngi o Hehepona, rāua ko Oka kīngi o Pahana, i noho rā i Ahataroto.
JOS 9:11 Nā reira i kī mai ai ō mātou kaumātua me ngā tāngata katoa o tō mātou whenua ki a mātou, i mea ai, ‘Maua atu i ō koutou ringa he ō ki te huarahi, ā, haere ki te whakatau i a rātou, ka mea hoki ki a rātou, “Ko ā koutou pononga mātou; nā, whakaritea mai he kawenata ki a mātou.” ’
JOS 9:12 Nā, ko ā mātou taro i maua mahanatia mai nei i ō mātou whare hei ō mō mātou i te rā i tūria mai ai e mātou, i haere mai ai ki a koutou, nanā, kua maroke, kua puruhekahekatia.
JOS 9:13 Ko ngā kōkī wāina nei hoki, i hou nei i tā mātou whakakīnga, nā, kua pākarukaru; ko ēnei kākahu hoki o mātou, me ō mātou hū, kua tawhitotia i te roa whakaharahara o te huarahi.”
JOS 9:14 Nā, ka tango ngā tāngata i ētahi o ō rātou ō, ā, kīhai i ui whakaaro i tō Ihowā waha.
JOS 9:15 Ā, houhia iho e Hohua te rongo ki a rātou, whakaritea ana hoki e ia he kawenata whakaora mō rātou; i oati anō ngā rangatira o te huihui ki a rātou.
JOS 9:16 Nā, i te mutunga o ngā rā e toru i muri iho i tā rātou whakaritenga i te kawenata ki a rātou, ka rongo rātou, e tata tonu ana rātou ki a rātou, e noho ana hoki i waenganui i a rātou.
JOS 9:17 Nā, ka hāpainga atu e ngā tama a Īharaira, ka tae i te rā tuatoru ki ō rātou pā. Ko ō rātou pā hoki ko Kipeono, ko Kepira, ko Peeroto, ko Kiriata Tearimi.
JOS 9:18 Ā, kīhai ngā tama a Īharaira i patu i a rātou, nō te mea kua oati ngā rangatira o te huihuinga i a Ihowā, i te Atua o Īharaira, ki a rātou. Ā, amuamu katoa ana te huihuinga ki ngā rangatira.
JOS 9:19 Nā, ka mea ngā rangatira katoa ki te huihui katoa, “Kua oati tātou i a Ihowā i te Atua o Īharaira, ki a rātou; nō reira e kore tātou e āhei āianei te pā ki a rātou.
JOS 9:20 Ko tēnei tā tātou e mea ai ki a rātou, ka waiho i a rātou kia ora; kei rīria tātou mō te oati i oati ai tātou ki a rātou.”
JOS 9:21 Ā, ka mea ngā rangatira ki a rātou, me whakaora rātou; otiia me waiho rātou hei tapatapahi rākau, hei utuutu wai mō te huihui katoa; kia rite ai ki tā ngā rangatira i kōrero ai ki a rātou.
JOS 9:22 Kātahi ka karangatia rātou e Hohua, ka kōrero ia ki a rātou, ka mea, “He aha koutou i nuka ai i a mātou, i mea ai, ‘Kei tawhiti noa atu koutou i a mātou; e noho nei anō koutou i waenganui i a mātou?’
JOS 9:23 Nō reira ka kangā koutou; ā, e kore e kore he kaimahi o koutou, hei tapatapahi rākau, hei utuutu wai hoki mō te whare o tōku Atua.”
JOS 9:24 Nā, ka whakautua e rātou ki a Hohua, ka mea, “I tino kōrerotia hoki ki āu pononga ngā mea i whakaritea e Ihowā, e tōu Atua, ki a Mohi, ki tāna pononga mō te whenua katoa, kia hoatu ki a koutou, kia hunā atu hoki ngā tāngata katoa o te whenua i ō koutou aroaro. Nā reira mātou i tino wehi ai i a koutou, kei mate mātou, nā, meatia ana e mātou tēnei mea.
JOS 9:25 Nā, kei roto tēnei mātou i ōu ringa: māu e mea ki a mātou te mea e pai ana, e tika ana ki tāu titiro.”
JOS 9:26 Nā, pērātia ana rātou e ia, ā, whakaorangia ake rātou i te ringa o ngā tama a Īharaira, ā, kīhai rātou i patua.
JOS 9:27 Nā, waiho iho rātou i taua rā e Hohua hei tapatapahi rākau, hei utuutu wai mō te huihui, mō te āta hoki a Ihowā ki te wāhi e whiriwhiri ai ia ā tae noa mai ki tēnei rā.
JOS 10:1 Ā, ka rongo a Aronitereke, te kīngi o Hiruhārama, kua horo a Hai i a Hohua, ā, kua whakangaromia hoki e ia; ā, ko tāna i mea ai ki Heriko, ki tōna kīngi, ko tāna hoki tērā i mea ai ki Hai, ki tōna kīngi; ā, kua houhia e ngā tāngata o Kipeono te rongo ki a Īharaira, kua noho hoki ki waenganui i a rātou.
JOS 10:2 Nā, tino wehi ana rātou; nō te mea he pā nui a Kipeono, pērā me tētahi o ngā pā rangatira he nui atu hoki i Hai, ā, ko ōna tāngata katoa he toa.
JOS 10:3 Nā, ka tono tāngata a Aronitereke kīngi o Hiruhārama ki a Hōhama kīngi o Heperona, ki a Pirama kīngi o Iaramuta, ki a Tapia kīngi o Rakihi, rātou ko Repiri kīngi o Ekerona, ka mea,
JOS 10:4 “Haere mai ki ahau, hei āwhina mōku, kia patua ai e tātou a Kipeono, mō rātou i hohou i te rongo ki a Hohua rātou ko ngā tama a Īharaira.”
JOS 10:5 Nā, huihui ana, haere mai ana ngā kīngi tokorima o ngā Amori, te kīngi o Hiruhārama, te kīngi o Heperona, te kīngi o Iaramuta, te kīngi o Rakihi, te kīngi o Ekerona, rātou ko ā rātou taua katoa, ā, whakapae ana i Kipeono, tatau ana i reira.
JOS 10:6 Nā, ka tono tāngata ngā tāngata o Kipeono ki a Hohua ki te puni, ki Kirikara, ka mea: “Kei pūhoi mai tōu ringa ki āu pononga; hohoro te haere mai ki a mātou, ki te whakaora i a mātou āwhinatia mai hoki mātou; nō te mea kua rūpeke mai ngā kīngi katoa o ngā Amori e noho ana i ngā maunga ki a mātou.”
JOS 10:7 Nā, haere atu ana a Hohua i Kirikara, rātou tahi ko te hunga hāpai patu katoa, me ngā tāngata māia katoa.
JOS 10:8 Nā, ka mea a Ihowā ki a Hohua, “Kaua e wehi i a rātou; kua hoatu hoki rātou e ahau ki tōu ringa, ā, e kore tētahi tangata o rātou e tū ki tōu aroaro.”
JOS 10:9 Nā, huakina tatatia ana rātou e Hohua; i haere ake hoki ia i Kirikara i te pō.
JOS 10:10 Nā, meinga ana rātou e Ihowā kia pororaru i mua i a Īharaira, ā, patua ana rātou e ia ki Kipeono, he nui te parekura, ā, whāia ana rātou e ia i te huarahi e haere ana ki runga ki Petehorono, nā, tukitukia ana rātou ā tae noa ki Ateka, a Makera atu ana.
JOS 10:11 Ā, i a rātou e rere ana i te aroaro o Īharaira, i te hekenga iho ki Petehorono, nā, ka makā iho e Ihowā he kōhatu nunui i te rangi ki runga ki a rātou ā tae noa ki Ateka, nā, mate ana rātou; hira ake ngā tāngata i mate i ngā nganga kōhatu i ngā mea i patua e ngā tama a Īharaira ki te hoari.
JOS 10:12 Kātahi ka kōrero a Hohua ki a Ihowā i te rā i hōmai ai e Ihowā ngā Amori ki te aroaro o ngā tama a Īharaira, ka mea hoki i te tirohanga mai o Īharaira, “Kāti mai koe, e te rā, i runga i Kipeono; me koe hoki, e te marama, ki te Raorao o Atarono.”
JOS 10:13 Nā, mau tonu mai te rā, tū tonu mai hoki te marama, ā whiwhi noa te iwi ki te utu i ō rātou hoariri. Kāhore ianei tēnei mea i tuhituhia ki te Pukapuka a Iahera? Tū ana tērā te kōmaru i waenganui o te rangi, kāhore anō hoki i hohoro te heke ā rite noa tētahi rā tūturu.
JOS 10:14 Nā, kāhore he rite mō taua rā i mua atu, i muri mai rānei, i rongo ai a Ihowā ki te reo tangata; i whawhai hoki a Ihowā mō Īharaira.
JOS 10:15 Nā, hoki ana a Hohua rātou tahi ko Īharaira katoa ki te puni, ki Kirikara.
JOS 10:16 Ko aua kīngi tokorima ia i rere, ā, piri ana ki roto ki tētahi ana i Makera.
JOS 10:17 Ā, ka kōrerotia ki a Hohua, i meatia, “Kua kitea ngā kīngi tokorima, kei te ana i Makera e piri ana.”
JOS 10:18 Nā, ka mea a Hohua, “Hurihia atu ētahi kōhatu nunui ki te kūwaha o te ana, whakanohoia hoki ētahi tāngata ki reira hei tiaki i a rātou.
JOS 10:19 Ko koutou ia kaua hei tū; whāia ō koutou hoariri, patua te hiku o rātou; kaua hoki rātou e tukua kia tapoko ki roto ki ō rātou pā; he mea hoki kua hōmai rātou e Ihowā, e tō koutou Atua, ki tō koutou ringa.”
JOS 10:20 Ā, nō ka mutu i a Hohua rātou ko ngā tama a Īharaira te patu i a rātou, he nui rawa te parekura ā poto noa rātou, ko ngā mōrehu o rātou i toe i riro ki roto ki ngā pā whai taiepa,
JOS 10:21 Nā, hoki mārie ana te iwi katoa ki a Hohua, ki te puni, ki Makera. Kīhai rawa hoki oraora te arero o tētahi tangata, ki tētahi o ngā tama a Īharaira.
JOS 10:22 Katahi ka mea a Hohua, “Uakina te kūwaha o te ana, whakaputaina mai hoki ki ahau i te ana ngā kīngi tokorima nā.”
JOS 10:23 Nā, pērātia ana e rātou, whakaputaina mai ana e rātou ki a ia i te ana aua kīngi tokorima, te kīngi o Hiruhārama, te kīngi o Heperona, te kīngi o Iaramuta, te kīngi o Rakihi, me te kīngi o Ekerona.
JOS 10:24 Ā, ka oti aua kīngi te whakaputa mai e rātou ki a Hohua, ka karanga a Hohua ki ngā tāngata katoa o Īharaira, ā, ka mea ki ngā rangatira o ngā tāngata hāpai patu i haere tahi me ia, “Whakatata mai, e tū ō koutou waewae ki runga ki ngā kakī o ēnei kīngi.” Nā, whakatata ana mai rātou, tū ana ō rātou waewae ki runga ki ō rātou kakī.
JOS 10:25 I mea anō a Hohua ki a rātou, “Kaua koutou e wehi, kaua hoki e pāwera, kia kaha, kia toa; nō te mea ka pēneitia e Ihowā ō koutou hoariri katoa e whawhai nei koutou ki a rātou.”
JOS 10:26 Ā muri iho ka patua rātou e Hohua, ka whakamatea, ā, whakairihia ake rātou ki runga ki ngā rākau e rima. Nā, iri ana rātou i runga i ngā rākau ā ahiahi noa.
JOS 10:27 Nā, i te wā o te tōnga o te rā ka whakahaua e Hohua kia tangohia ki raro o ngā rākau, kia makā hoki ki roto ki te ana i piri ai rātou, kia whakatakotoria hoki ētahi kōhatu nunui ki te kūwaha o te ana; e takoto mai nei ā taea noatia tēnei rā.
JOS 10:28 Ā, horo ana i a Hohua a Makera i taua rangi anō, patua iho ana hoki e ia ki te mata o te hoari, me tōna kīngi anō; i whakangaromia rawatia rātou e ia me ngā wairua katoa i roto, kāhore he mōrehu i mahue i a ia; ā, pērātia ana e ia te kīngi o Makera me tāna i mea ai ki te kīngi o Heriko.
JOS 10:29 Nā, haere atu ana a Hohua rātou tahi ko Īharaira katoa i Makera ki Rīpina, ā, tauria ana e ia a Rīpina.
JOS 10:30 Ā, i hōmai anō e Ihowā a reira, me tōna kīngi, ki te ringa o Īharaira. Nā, patua iho e ia a reira ki te mata o te hoari, me ngā tāngata katoa i roto; kīhai i mahue i a ia tētahi mōrehu i reira; heoi pērātia ana e ia te kīngi o reira me tāna i mea ai ki te kīngi o Heriko.
JOS 10:31 Nā, haere atu ana a Hohua i Rīpina, rātou tahi ko Īharaira katoa, ki Rakihi, ā, whakapaea ana a reira, tauria ana e ia.
JOS 10:32 Ā, i hōmai e Ihowā a Rakihi ki te ringa o Īharaira, ā, horo ana a reira i a ia i te rua o ngā rā; patua iho hoki ki te mata o te hoari, me ngā tāngata katoa i roto; i rite tonu ki ngā mea katoa i mea ai ia ki Rīpina.
JOS 10:33 I reira anō ka haere mai a Hōrama kīngi o Kētere hei āwhina mō Rakihi; ā, patua iho ia me tōna iwi e Hohua, ā, kāhore rawa tētahi mōrehu ōna i toe.
JOS 10:34 Nā, ka haere atu a Hohua rātou tahi ko Īharaira katoa i Rakihi ki Ekerona; ā, whakapaea ana a reira e rātou, tauria ana.
JOS 10:35 Nā, horo ana a reira i a rātou i taua rangi anō, patua ana hoki ki te mata o te hoari, ko ngā tāngata katoa i roto hunā iho e ia i taua rangi anō, rite tonu ki ngā mea katoa i mea ai ia ki Rakihi.
JOS 10:36 Nā, haere atu ana a Hohua i Ekerona, me Īharaira katoa anō hoki ki Heperona, ā, tauria ana a reira e ia.
JOS 10:37 Ā, horo ana i a rātou a reira, patua iho hoki ki te mata o te hoari, me tōna kīngi, me ōna pā katoa, me ngā tāngata katoa i roto. Kāhore tētahi mōrehu i mahue i a ia, rite tonu ki ngā mea katoa i mea ai ia ki Ekerona; nā, hunā iho e ia a reira, me ngā tāngata katoa i roto.
JOS 10:38 Kātahi ka hoki a Hohua rātou tahi ko Īharaira katoa ki Repiri; ka tatau hoki ki reira.
JOS 10:39 Ā, riro ana i a ia a reira me tōna kīngi, me ōna pā katoa; ā, patua iho e rātou ki te mata o te hoari, whakangaromia katoatia ana hoki ngā tāngata i roto. Kāhore tētahi mōrehu i mahue i a ia; ko tāna i mea ai ki Heperona i meatia anō e ia ki Repiri, ki tōna kīngi; i pērā anō me tāna i mea ai ki Rīpina, ki tōna kīngi.
JOS 10:40 Nā, patua ana e Hohua te whenua katoa, te whenua pukepuke, te tonga, te mānia me ngā pukenga wai, me ngā kīngi katoa hoki o reira; kāhore i waiho e ia tētahi mōrehu. Engari, i hunā katoatia e ia ngā mea whai manawa i rite tonu ki tā Ihowā, ki tā te Atua o Īharaira, i whakahau ai.
JOS 10:41 Nā, patua ana rātou e Hohua i Karehepārenea ā tae noa ki Kaha, me te whenua katoa hoki o Kohena ā tae noa ki Kipeono.
JOS 10:42 Ko ēnei kīngi katoa me tō rātou oneone i riro i a Hohua i te whakaekenga kotahi, nō te mea i roto i a Īharaira a Ihowā e whawhai atu ana.
JOS 10:43 Nā, hoki ana a Hohua rātou tahi ko Īharaira katoa ki te puni, ki Kirikara.
JOS 11:1 Nā, i te rongonga o Iapini kīngi o Hatoro, ka tono tāngata ia ki a Iopapa kīngi o Marono, ki te kīngi o Himirono, ki te kīngi hoki o Akahapa,
JOS 11:2 ki ngā kīngi anō hoki i te raki, ki ērā i ngā maunga, i te mānia hoki ki te tonga o Kinerota, i te whenua raorao, ā, i ngā Hiwi o Roro ki te hauāuru,
JOS 11:3 ki te Kanaani i te rāwhiti me te hauāuru, ki te Amori, ki te Hiti, ki te Perihi, ki te Iepuhi i te whenua pukepuke, ki te Hiwi hoki i raro o Heremona i te whenua o Mihipa.
JOS 11:4 Nā, ka haere mai, me ā rātou ope katoa, he tini te tangata, me te onepū i te taha o te moana te tokomaha, me ngā hōiho, me ngā hāriata, tōna tini.
JOS 11:5 Nā, ka huihui ēnei kīngi katoa; ā, ka haere mai rātou, ka noho huihui ki ngā wai o Meromo, ki te whawhai ki a Īharaira.
JOS 11:6 Nā, ko te meatanga a Ihowā ki a Hohua, “Kei wehi i a rātou; kia pēnei hoki āpōpō ka hoatu katoa rātou e ahau, mate rawa, ki a Īharaira; me whakangonge ō rātou hōiho, me tahu hoki ō rātou hāriata ki te ahi.”
JOS 11:7 Nā, huakina tatatia ana rātou e Hohua rātou ko te hunga hāpai pakanga katoa ki ngā wai o Meromo; heoi kōkiri ana rātou ki a rātou.
JOS 11:8 Nā, hōmai ana rātou e Ihowā ki te ringa o Īharaira, ā, patua iho rātou, ā, whāia ana e rātou ā tae noa ki Hairona nui, ki Mihirepoto Maimi, ki te raorao hoki o Mihipe whaka te rāwhiti; ā, patupatua ana rātou, kāhore rawa he mōrehu i waiho kia toe.
JOS 11:9 Ā, rite tonu tā Hohua i mea ai ki a rātou ki tā Ihowā i kōrero ai ki a ia; i whakangongea e ia ō rātou hōiho, i tahuna hoki ō rātou hāriata ki te ahi.
JOS 11:10 Ā, i taua wā ka tahuri a Hohua, ā, horo ana i a ia a Hatoro, patua iho hoki e ia tōna kīngi ki te hoari. (Ko Hatoro hoki te upoko o aua kīngitanga katoa i mua.)
JOS 11:11 Nā, patua iho e rātou ngā mea ora katoa o reira ki te mata o te hoari ā poto noa; kāhore i mahue tētahi mea whai manawa; i tahuna hoki e ia a Hatoro ki te ahi.
JOS 11:12 Nā, i riro katoa i a Hohua ngā pā katoa o ērā kīngi, me ngā kīngi katoa o reira, ā, patua iho e ia ki te mata o te hoari ā poto noa; i pērā anō ia me tā Mohi, me tā te pononga a Ihowā i whakahau ai.
JOS 11:13 Ko ngā pā ia i tū i runga i ngā pukepuke, kīhai ēnā i tahuna e Īharaira, heoi anō ko Hatoro anake; i tahuna tēnā e Hohua.
JOS 11:14 Otiia, ko ngā taonga parakete katoa o aua pā, me ngā kararehe, i tangohia e ngā tama a Īharaira mā rātou; ko ngā tāngata katoa ia i patua ki te mata o te hoari ā poto noa rātou, kīhai i mahue tētahi mea whai manawa.
JOS 11:15 Ko tā Ihowā i whakahau ai ki tāna pononga ki a Mohi, ko tā Mohi anō tērā i whakahau ai ki a Hohua; ā, koia tā Hohua i mea ai; kīhai i kapea e ia tētahi o ngā mea katoa i whakahaua e Ihowā ki a Mohi.
JOS 11:16 Nā, riro ana i a Hohua taua whenua katoa, te whenua pukepuke, me ngā wāhi katoa o te tonga, me te whenua katoa o Kohena, me te raorao, me te mānia, me te whenua pukepuke o Īharaira, me tōna raorao,
JOS 11:17 atu i Maunga Haraka, e anga nei whakarunga ki Heira, ā tae noa ki Paara-Kara i te raorao o Repanōna, i raro iho o Maunga Heremona; ā, ko ō rātou kīngi katoa, i mau i a ia, ā, patua iho, whakamatea iho.
JOS 11:18 He maha ngā rā i whawhai ai a Hohua ki aua kīngi katoa.
JOS 11:19 Nā, kāhore he pā i hohou rongo ki ngā tama a Īharaira, heoi anake ko ngā Hiwi i noho i Kipeono; i riro katoa i a rātou i runga i te whawhai.
JOS 11:20 Nā Ihowā hoki i whakapakeke ō rātou ngākau, kia tūria ai e rātou a Īharaira ki te riri, kia tino whakangaromia ai rātou e ia, kia kore ai hoki rātou e tohungia, engari kia whakangaromia rātou e ia, kia pērātia me tā Ihowā i whakahau ai ki a Mohi.
JOS 11:21 I taua wā anō ka haere atu a Hohua, ā, hunā iho e ia ngā Anakimi o ngā maunga, o Heperona, o Repiri, o Ānapa, o ngā maunga katoa o Hūrā, o ngā maunga katoa anō hoki o Īharaira; i tino whakangaromia rawatia rātou e Hohua me ō rātou pā.
JOS 11:22 Kīhai tētahi o ngā Anakimi i mahue i te whenua o ngā tama a Īharaira; toe ake ko ētahi anake i Kaha, i Kāta, i Aharoro.
JOS 11:23 Nā, ka riro i a Hohua te whenua katoa, ka pērā me, ngā mea katoa i kōrerotia e Ihowā ki a Mohi; ā, hoatu ana e Hohua hei kāinga tupu mō Īharaira, he mea whakarite ki ō rātou wehenga, ki ō rātou iwi. Nā, ka takoto mārie te whenua i te whawhai.
JOS 12:1 Nā, ko ngā kīngi ēnei o te whenua i patua nei e ngā tama a Īharaira, ā, tangohia ana tō rātou whenua i tāwāhi o Horano whaka te rāwhiti, atu i te awa o Aranona ā tae noa ki Maunga Heremona, me te mānia katoa anō hoki whaka te rāwhiti:
JOS 12:2 Ko Hihona kīngi o ngā Amori, i noho rā ki Hehepona, ko tōna kīngitanga kei Aroere, kei tērā i te taha o te awaawa, o Aranona, kei te pā hoki i waenganui o te awaawa, kei te hāwhe hoki o Kireara ā tae noa ki Iapoko, ki te awa, ki te rohe ki ngā tama a Āmona;
JOS 12:3 kei te mānia hoki ā tae noa ki te moana o Kinerota, whaka te rāwhiti, ki te moana anō o te mānia, arā ki te Moana Tote, whaka te rāwhiti, ki te ara ki Peteiehimoto; kei Temana anō, kei raro i Aharoto Pihika;
JOS 12:4 me te wāhi o Oka kīngi o Pahana, o te mōrehu o ngā Repaima, i noho rā i Ahataroto, i Eterei,
JOS 12:5 ko tōna kīngitanga anō hoki kei Maunga Heremona, kei Hareka, kei Pahana katoa hoki, tae noa ki te rohe ki ngā Kehuri, ki ngā Maakati ki te hāwhe hoki o Kireara, ki te rohe ki a Hihona kīngi o Hehepona.
JOS 12:6 Nā Mohi, nā te pononga a Ihowā, nā rātou ko ngā tama a Īharaira rāua i patu; ā, hoatu ana e Mohi, e te pononga a Ihowā a reira hei kāinga tupu ki ngā Reupeni rātou ko ngā Kari, ko tētahi tānga hoki o te iwi o Mānahi.
JOS 12:7 Ā, ko ngā kīngi ēnei o te whenua i patua e Hohua, e rātou ko ngā tama a Īharaira, ki tēnei taha o Horano whaka te hauāuru, atu i Paara-Kara i te raorao o Repanōna tae noa ki Maunga Haraka e anga nei whakarunga ki Heira; ā, nā Hohua i hoatu ki ngā iwi o Īharaira hei kāinga tupu, he mea whakarite ki ō rātou wehenga;
JOS 12:8 i ngā maunga, i ngā raorao, i te mānia, i ngā mātāpuna, i te koraha i te whenua ki te tonga; te Hiti, te Amori, te Kanaani, te Perihi, te Hiwi, te Iepuhi:
JOS 12:9 ko te kīngi o Heriko tētahi; ko te kīngi o Hai, o tērā i Pētēre tētahi;
JOS 12:10 ko te kīngi o Hiruhārama tētahi; ko te kīngi o Heperona tētahi;
JOS 12:11 ko te kīngi o Iaramuta tētahi; ko te kīngi o Rakihi tētahi;
JOS 12:12 ko te kīngi o Ekerona tētahi; ko te kīngi o Kētere tētahi;
JOS 12:13 ko te kīngi o Repiri tētahi; ko te kīngi o Kerere tētahi;
JOS 12:14 ko te kīngi o Horema tētahi; ko te kīngi o Arara tētahi;
JOS 12:15 ko te kīngi o Rīpina tētahi; ko te kīngi o Aturama tētahi;
JOS 12:16 ko te kīngi o Makera tētahi; ko te kīngi o Pētēre tētahi;
JOS 12:17 ko te kīngi o Tapua tētahi; ko te kīngi o Hēpere tētahi;
JOS 12:18 ko te kīngi o Apeke tētahi; ko te kīngi o Raharono tētahi;
JOS 12:19 ko te kīngi o Marono, tētahi; ko te kīngi o Hatoro tētahi;
JOS 12:20 ko te kīngi o Himirono Merono tētahi; ko te kīngi o Akahapa tētahi;
JOS 12:21 ko te kīngi o Tānaka tētahi; ko te kīngi o Mekiro tētahi;
JOS 12:22 ko te kīngi o Kerehe tētahi; ko te kīngi o Iokonēama i Karamere tētahi;
JOS 12:23 ko te kīngi o Roro i te pukepuke o Roro tētahi; ko te kīngi o ngā iwi o Kirikara tētahi;
JOS 12:24 ko te kīngi o Tirita tētahi; e toru tekau mā tahi ēnā kīngi katoa.
JOS 13:1 Ā, ka koroheketia a Hohua, kua maha ōna rā; nā, ka mea a Ihowā ki a ia, “Kua koroheketia koe, kua maha ōu rā, ā, he nui atu te whenua e toe ana, kāhore anō i tangohia.
JOS 13:2 “Ko te whenua tēnei e toe ana: ko ngā wāhi o ngā Pirihitini, ko ngā Kehuri katoa:
JOS 13:3 o Hihoro mai anō, i te ritenga atu o Īhipa ā tae noa ki ngā rohe o Ekerono whaka te raki, e kīia nei nō ngā Kanaani (e rima ngā wāhi ariki o ngā Pirihitini; ko ngā Kahati, ko ngā Aharori, ko ngā Ahakeroni, ko ngā Kiti, ko ngā Ekeroni), me ngā Āwimi,
JOS 13:4 ki te tonga; ko te whenua katoa o ngā Kanaani, me Meara i te taha o ngā Haironi tae noa ki Apeke, ki ngā rohe o ngā Amori;
JOS 13:5 me te whenua o ngā Kipiri, me Repanōna katoa whaka te rāwhiti atu o Paara-Kara i raro iho o Maunga Heremona tae noa ki te haerenga atu ki Hāmata.
JOS 13:6 “Ko ngā tāngata katoa o te whenua pukepuke, o Repanōna tae noa ki Mihirepoto Maimi, me ngā Haironi katoa; ka peia rātou e ahau i te aroaro o ngā tama a Īharaira; māu ia e wehe a reira hei kāinga tupu mō Īharaira, me pērā me tāku i whakahau ai ki a koe.
JOS 13:7 Nā reira, wehewehea tēnei whenua hei kāinga tupu mō ngā iwi e iwa, rātou ko tētahi tānga o te iwi o Mānahi.”
JOS 13:8 I whiwhi tahi rātou ko ngā Reupeni, ko ngā Kari ki tō rātou wāhi, i hoatu rā ki a rātou e Mohi ki tāwāhi o Horano whaka te rāwhiti, arā ko tā Mohi, ko tā te pononga a Ihowā i hoatu ai ki a rātou.
JOS 13:9 O Aroere atu i te taha o te awaawa o Aranona, me te pā i waenganui o te awaawa, me te mānia katoa o Merepa tae noa ki Ripono;
JOS 13:10 me ngā pā katoa o Hihona kīngi o ngā Amori, i kīngi rā ki Hehepona, tae noa ki te rohe ki ngā tama a Āmona;
JOS 13:11 me Kireara, me te rohe ki ngā Kehuri, ki ngā Maakati, me Maunga Heremona katoa, me Pahana katoa, tae noa ki Hareka;
JOS 13:12 te kīngitanga katoa o Oka i Pahana; i kīngi hoki ia ki Ahataroto, ki Eterei, (he toenga ia nō ngā oranga o ngā Repaima); i patua hoki ēnei e Mohi, ā, peia atu ana.
JOS 13:13 Ko ngā Kehuri ia me ngā Maakati kīhai i peia e ngā tama a Īharaira; engari i noho ngā Kehuri rātou ko ngā Maakati i waenganui o Īharaira ā taea noatia tēnei rā.
JOS 13:14 Ko te iwi anake o Rīwai, kīhai i hoatu e ia he kāinga tupu; ko ngā whakahere ahi a Ihowā, a te Atua o Īharaira, te wāhi tupu mō rātou, ko tāna hoki i kōrero ai ki a ia.
JOS 13:15 Ā, rite tonu ki ō rātou hapū tā Mohi i hoatu ai ki te iwi o ngā tama a Reupena:
JOS 13:16 Ā, ko te rohe ki a rātou kei Aroere, kei te taha o te awaawa o Aranona, kei te pā hoki i waenganui o te awaawa me te mānia katoa i Merepa;
JOS 13:17 ko Hehepona me ō reira pā katoa i te mānia; ko Ripono, me Pāmotopaara, me Petepaara Meono,
JOS 13:18 ko Iahata hoki, me Keremoto, me Mepaata,
JOS 13:19 me Kiriataima, me Hipima, me Terete Hahara i te maunga o taua raorao,
JOS 13:20 me Petepeoro, me Aharoto Pihika, me Peteiehimoto,
JOS 13:21 me ngā pā katoa o te mānia, me te kīngitanga katoa o Hihona, o te kīngi o ngā Amori, i kīngi nei ki Hehepona, i patua ngātahitia nei e Mohi me ngā ariki o Miriana, me Ēwi, rātou ko Rekeme, ko Turu, ko Huru, ko Repa; nā Hihona ēnā ariki, ā, i noho ki taua whenua.
JOS 13:22 I patua anō hoki e ngā tama a Īharaira ki te hoari a Paraama tama a Peoro, te tohunga māori, i roto i ērā atu o tō rātou parekura.
JOS 13:23 Ā, ko te rohe ki ngā tama a Reupena ko Horano, me tōna rohe anō. Ko te wāhi tūturu tēnei i ngā tama a Reupena, i ō rātou hapū, ngā pā me ngā kāinga o aua pā.
JOS 13:24 Ā, i hoatu anō e Mohi he wāhi ki te iwi o Kara, ki ngā tama a Kara, he mea whakarite ki ō rātou hapū:
JOS 13:25 Ā, ko te rohe ki a rātou ko Iatere, me ngā pā katoa o Kireara, me te hāwhe o te whenua o ngā tama a Āmona, ā tae noa ki Aroere ki te ritenga atu o Rapa;
JOS 13:26 i Hehepona hoki ā tae noa ki Ramata Mihipe, ki Petonimi; i Mahanaima ā tae noa ki te rohe o Repiri.
JOS 13:27 Ā, i te raorao, ko Petearama, ko Petenimira, ko Hukota, ko Tawhono, ā, ko te toenga atu o te kīngitanga o Hihona, o te kīngi o Hehepona, ko Horano me tōna rohe tae noa ki te pito o te moana o Kinereta, i tāwāhi o Horano, whaka te rāwhiti.
JOS 13:28 Ko te wāhi tupu tēnei i ngā tama a Kara, i ō rātou hapū, ko ngā pā me ngā kāinga o aua pā.
JOS 13:29 Ā, i hoatu e Mohi he wāhi tūturu ki tētahi tānga o te iwi o Mānahi; ā, ka riro i tētahi tānga o te iwi o ngā tama a Mānahi, he mea whakarite ki ō rātou hapū:
JOS 13:30 Ā, nō Mahanaima atu te rohe ki a rātou, ko Pahana katoa me te kīngitanga katoa o Oka, o te kīngi o Pahana, me ngā pā katoa o Haira, ērā i Pahana rā, e ono tekau ngā pā;
JOS 13:31 ko tētahi hāwhe o Kireara, me Ahataroto, me Eterei, ko ngā pā o te kīngitanga o Oka i Pahana, i riro ērā i ngā tama a Makiri, a te tama a Mānahi, arā i tētahi tānga o ngā tama a Makiri, he mea whakarite ki ō rātou hapū.
JOS 13:32 Ko ēnei ngā wāhi i hoatu ai e Mohi hei kāinga tupu i ngā mānia o Moapa i tāwāhi o Horano whaka te rāwhiti, i te wāhi e anga ana ki Heriko.
JOS 13:33 Otiia kīhai i hoatu e Mohi he wāhi tupu ki te iwi o Rīwai: ko Ihowā, ko te Atua o Īharaira, ko ia hei wāhi tupu mō rātou; ko tāna hoki tēnā i kōrero ai.
JOS 14:1 Ā, ko ngā wāhi ēnei i riro i ngā tama a Īharaira i te whenua o Kanaana, i tuwhaina nei e Ereātara tohunga, e Hohua tama a Nunu, e ngā upoko hoki o ngā whare o ngā mātua o ngā iwi o ngā tama a Īharaira mō rātou.
JOS 14:2 He mea rota ō rātou wāhi, he mea pērā me tā Ihowā whakahau i whakapuakina e Mohi, mō ngā iwi e iwa me tētahi tānga hoki o tētahi iwi.
JOS 14:3 Kua hoatu hoki e Mohi he wāhi mō ngā iwi e rua, mō tētahi tānga hoki o tētahi iwi i tāwāhi o Horano; otiia kīhai i hoatu i roto i a rātou tētahi wāhi mō ngā Rīwaiti.
JOS 14:4 E rua hoki ngā iwi o ngā tama a Hōhepa, ko Mānahi rāua ko Ēparaima; ā, kīhai i hoatu e rātou tētahi wāhi o te whenua mō ngā Rīwaiti, heoi anō ko ngā pā hei nohoanga, me ngā wāhi o waho ā tawhio noa, mō ā rātou kararehe, mō ā rātou mea.
JOS 14:5 Rite tonu ki tā Ihowā i whakahau ai ki a Mohi tā ngā tama a Īharaira i mea ai, ā, wehewehea ana e rātou te whenua.
JOS 14:6 Kātahi ka whakatata ngā tama a Hūrā ki a Hohua i Kirikara; ā, ka mea a Karepe tama a Iepune Keniti ki a ia, “E mōhio ana koe ki te kupu i kōrerotia e Ihowā ki a Mohi, ki te tangata a te Atua, mōku, a mōu hoki, i Karehepārenea.
JOS 14:7 E whā tekau ōku tau i te tononga a Mohi, a te pononga a te Atua i ahau i Karehepārenea ki te tūtei i te whenua; ā, i whakahokia e ahau he kōrero ki a ia, ko ngā mea o roto o tōku ngākau.
JOS 14:8 Ā, ko ōku tēina i haere tahi nei mātou ki runga, nā, ngohe ana i a rātou ngā ngākau o te iwi; ko ahau ia, i pau katoa atu ahau ki te whai i a Ihowā, i tōku Atua.
JOS 14:9 Nā, ko te oatitanga mai a Mohi i taua rā, ko te meatanga, ‘Ko taua whenua i takahia nā e ōu waewae, he pono mōu pū hei kāinga tupu, mō āu tamariki hoki ake ake; mōu i whakapau ki te whai i a Ihowā, i tōku Atua.’
JOS 14:10 “Heoi ināianei kua whakaora a Ihowā i ahau, kua pērā me tāna i kōrero ai, ka whā tekau mā rima ēnei tau, mai o te kōrerotanga a Ihowā i tēnei kupu ki a Mohi, i a Īharaira e hāereere ana i te koraha; nā, ināianei, ka waru tekau mā rima ōku tau.
JOS 14:11 Kei te kaha tonu ahau i tēnei rā, pērā anō i te rā i tonoa ai ahau e Mohi; ko tōku kaha i reira koia anō tōku kaha ināianei mō te whawhai, mō te haere atu, mō te haere mai.
JOS 14:12 Nō reira, hōmai ki ahau tēnei maunga, ko tā Ihowā hoki i kōrero ai i taua rā; i rongo rā hoki koe i taua rā kei reira ngā Anakimi, me ngā pā nunui, taiepa rawa; tērā pea e tata mai a Ihowā ki ahau, ā, ka peia rātou e ahau, ā, ka pērātia me tā Ihowā i kōrero ai.”
JOS 14:13 Nā, ka manaakitia ia e Hohua; ā, hoatu ana e ia a Heperona ki a Karepe tama a Iepune hei kāinga tupu.
JOS 14:14 Koia i waiho ai a Heperona hei kāinga tupu mō Karepe, mō te tama a Iepune Keniti, ā mohoa noa nei; mōna i whakapau ki te whai i a Ihowā, i te Atua o Īharaira.
JOS 14:15 (Nā, ko te ingoa o Heperona i mua ko Kiriata Arapa; ko taua Arapa hoki te tangata tino nui i roto i ngā Anakimi.) Heoi, takoto kau ana te whenua i te whawhai.
JOS 15:1 Nā, ko te rota o te iwi o ngā tama a Hūrā, he mea whakarite ki ō rātou hapū, i tae atu ki te rohe ki a Ēroma, ki te koraha o Hini rā anō whaka te tonga, ki te pito whakamutunga ki te tonga.
JOS 15:2 Ko tō rātou rohe ki te tonga kei te pito rā anō o te Moana Tote, kei te matamata e anga ana whaka te tonga;
JOS 15:3 nā, ka rere whaka te tonga o te pīnakitanga o Akarapimi, ka haere atu ki Hini, ā, ka ahu whakarunga i te taha ki te tonga o Karehepārenea, nā, haere tonu, kei Heterono, ka anga ki runga, ki Arara, nā, ka whawhe kei Karakā.
JOS 15:4 Nā, haere tonu whaka Atamono, ā puta atu ki te awa o Īhipa; nā, ko ngā pākarutanga atu o tēnā rohe kei te moana. Ko te rohe tēnei ki a koutou ki te tonga.
JOS 15:5 Ā, ko te rohe ki te rāwhiti ko te Moana Tote tae noa ki te kōngutuawa o Horano. Ā, ko te rohe i te taha ki te raki i te kokoru o te moana i te kōngutuawa o Horano;
JOS 15:6 ā, ka haere te rohe ki runga, ki Petehokora, ā, haere tonu i te raki o Petearapa; ā, ka ahu te rohe ki runga, ki te kōhatu o Pohana tama a Reupena.
JOS 15:7 Nā, haere tonu te rohe ki runga, ki Repiri, atu i te raorao o Ākoro, nā, ka anga atu whaka te raki ki te ritenga o Kirikara, o te wāhi i mua mai o te pikitanga ki Arumine, ki tērā i te taha tonga o te awa; ā, i haere tonu te rohe mā ngā wai o Enehemehe, ā, ko ōna pākarutanga atu i Enerōkere;
JOS 15:8 ā, i rere whakarunga te rohe rā te raorao o te tama a Hinomo mā te taha o tō te Iepuhi whaka te tonga, (arā o Hiruhārama); ā, i haere tonu te rohe ki te tihi o te maunga e whakapae ana i mua o te raorao o Hinomo, whaka te hauāuru, ki tērā i te pito rawa o te raorao o Repaima, whaka te raki;
JOS 15:9 ā, i whakatakotoria atu te rohe i te tihi o te maunga ki te puna wai o Nepetoa, ā, i puta atu ki ngā pā o Maunga Eperona; ā, i whakatakotoria atu te rohe ki Paara, (arā ki Kiriata Tearimi).
JOS 15:10 Kātahi ka whawhe atu te rohe i Paara, whaka te hauāuru, ki Maunga Heira, ā, haere tonu atu ki te taha o Maunga Tearimi, (arā o Keharono), ki te taha ki te raki, ā, ka heke ki raro ki Petehemehe, ā, haere tonu atu ki Timina.
JOS 15:11 Ā, i puta tonu atu te rohe ki te taha o Ekerono, whaka te raki; ā, i whakatakotoria atu te rohe ki Hikirono, ā, haere tonu atu ki Maunga Paara, ā, puta tonu atu ki Iapaneere; ā, pakaru rawa atu te rohe kei te moana.
JOS 15:12 Ā, ko te rohe ki te hauāuru kei te Moana Nui me tōna pareparenga. Ko te rohe tēnei ki ngā tama a Hūrā ā tawhio noa, ki tēnei hapū, ki tēnei hapū o rātou.
JOS 15:13 Ā, i hoatu e ia he wāhi ki a Karepe, ki te tama a Iepune i roto i ngā tama a Hūrā, he mea kī mai hoki nā Ihowā ki a Hohua, ko Kiriata Arapa, arā ko Heperona, (ko taua Arapa nei te pāpā o Anaka).
JOS 15:14 Nā, ka peia e Karepe i reira ngā tama tokotoru a Anaka, a Hehai, a Ahimana, a Tāramai, ngā tama a Anaka.
JOS 15:15 Nā, ka haere atu ia i reira ki runga, ki ngā tāngata o Repiri; nā, ko te ingoa o Repiri i mua ko Kiriata Hēpere.
JOS 15:16 Nā, ka mea a Karepe, “Ko te tangata e patua ai a Kiriata Hēpere, ā, ka horo i a ia, ka hoatu e ahau a Ākaha, tāku tamāhine hei wahine māna.”
JOS 15:17 Nā, ka horo i a Otoniere, i te tama a Kenaha, a te teina o Karepe; ā, hoatu ana e ia tāna tamāhine, a Ākaha hei wahine māna.
JOS 15:18 Ā, i a ia e haere atu ana ki a ia, ka whakakīkītia e ia te tāne kia tonoa he māra i tōna pāpā; ā, ka marere atu ia ki raro i te kāihe; nā, ka mea a Karepe ki a ia, “He aha tāu?”
JOS 15:19 Nā, ka mea ia, “Hōmai he manaaki ki ahau; i te mea kua whakanohoia ahau e koe ki te whenua i te tonga, hōmai anō hoki ētahi puna wai ki ahau.” Nā, hoatu ana e ia ki a ia ngā puna o runga me ngā puna o raro.
JOS 15:20 Ko te wāhi tupu tēnei o te iwi o ngā tama a Hūrā, o ō rātou hapū:
JOS 15:21 Ā, ko ngā pā whakamutunga o te iwi o ngā tama a Hūrā, ki te taha ki Ēroma, whaka te tonga: Ko Kapateere, ko Ērere, ko Iakuru,
JOS 15:22 ko Kinaha, ko Rimona, ko Arara,
JOS 15:23 ko Kerehe, ko Hatoro, ko Itinana,
JOS 15:24 ko Tiwhi, ko Tereme, ko Pearoto,
JOS 15:25 ko Hatoro, ko Harata, ko Kerioto, ko Heterono, (arā ko Hatoro),
JOS 15:26 ko Āmama, ko Hema, ko Morara,
JOS 15:27 ko Hatarakara, ko Hehemono, ko Peteperete,
JOS 15:28 ko Hatarahuara, ko Peerehepa, ko Pitiotia,
JOS 15:29 ko Paara, ko Īmi, ko Eteme,
JOS 15:30 ko Eretorara, ko Kehiri, ko Horema,
JOS 15:31 ko Tikiraka, ko Māramana, ko Hanahana,
JOS 15:32 ko Repaoto, ko Hirihimi, ko Aina, ko Rimono: e rua tekau mā iwa ngā pā katoa me ngā kāinga o aua pā.
JOS 15:33 O te mānia ko Ehetaoro, ko Torea, ko Ahena,
JOS 15:34 ko Tanoa, ko Enekanimi, ko Tapua, ko Enama,
JOS 15:35 ko Iaramuta, ko Aturama, ko Hokoho, ko Ateka,
JOS 15:36 ko Haaraimi, ko Aritaimi, ko Kerera, ko Kererotaimi: kotahi tekau mā whā ngā pā me ngā kāinga o aua pā.
JOS 15:37 Ko Tenana, ko Haraha, ko Mikirarakara,
JOS 15:38 ko Rireana, ko Mihipe, ko Iokoteere,
JOS 15:39 ko Rakihi, ko Pohokata, ko Ekerona,
JOS 15:40 ko Kapono, ko Rahamama, ko Kitirihi,
JOS 15:41 ko Kereroto, ko Pēterakono ko Naama, ko Makera: kotahi tekau mā whā ngā pā me ngā kāinga o aua pā.
JOS 15:42 Ko Rīpina, ko Ētere, ko Ahana,
JOS 15:43 ko Ipita, ko Ahena, ko Netipi,
JOS 15:44 ko Keira, ko Akatipi, ko Mareha: e iwa ngā pā, me ngā kāinga o aua pā.
JOS 15:45 Ko Ekerono me ōna pā ririki, me ōna kāinga;
JOS 15:46 ko ngā pā katoa e tata ana ki Aharoro o Ekerono atu ā tae noa ki te moana, me ngā kāinga anō hoki o reira.
JOS 15:47 Ko Aharoro me ōna pā ririki, me ōna kāinga; ko Kaha me ōna pā ririki, me ōna kāinga tae noa ki te awa o Īhipa; ki te Moana Nui anō hoki, me tōna pareparenga.
JOS 15:48 Ā, o ngā maunga: ko Hāmiri, ko Iatiri, ko Hokoho,
JOS 15:49 ko Ranaha, ko Kiriatahana, (arā ko Repiri),
JOS 15:50 ko Ānapa, ko Ehetomo, ko Animi,
JOS 15:51 ko Kohena, ko Horono, ko Kiroho: kotahi tekau mā tahi ngā pā, me ngā kāinga o aua pā.
JOS 15:52 Ko Ārapa, ko Rumaha, ko Ēheana,
JOS 15:53 ko Ianumu, ko Petetapua, ko Apeka,
JOS 15:54 ko Humuta, ko Kiriata Arapa, (arā ko Heperona), ko Tioro: e iwa ngā pā, me ngā kāinga o aua pā.
JOS 15:55 Ko Maono, ko Karamere, ko Tiwhi, ko Iutaha,
JOS 15:56 ko Ietereere, ko Iokorēama, ko Tanoa,
JOS 15:57 ko Kaini, ko Kipea, ko Timina: kotahi tekau ngā pā me ngā kāinga o aua pā.
JOS 15:58 Ko Harahuru, ko Peteturu, ko Keroro,
JOS 15:59 ko Maarata, ko Peteanoto, ko Eretekono: e ono ngā pā, me ngā kāinga o aua pā.
JOS 15:60 Ko Kiriatapaara, (arā ko Kiriata Tearimi), ko Rapa: e rua ngā me ngā kāinga o aua pā.
JOS 15:61 O te koraha: ko Petearapa, ko Mirini, ko Hekaka,
JOS 15:62 ko Nipihana, me te Pā Tote, me Enekeri: e ono ngā pā, me ngā kāinga o aua pā.
JOS 15:63 Ko ngā Iepuhi ia, ko ngā tāngata o Hiruhārama, kīhai rātou i taea te pei e ngā tama a Hūrā; heoi noho tahi ana ngā Iepuhi me ngā tama a Hūrā ki Hiruhārama ā taea noatia tēnei rā.
JOS 16:1 Ā, ko te rota i ngā tama a Hōhepa, i rere atu i Horano i Heriko, i ngā wai o Heriko ki te rāwhiti, ā tae noa ki te koraha, e aupiki atu rā i Heriko mā te whenua pukepuke ki Pētēre.
JOS 16:2 Nā, ka haere atu i Pētēre ki Rutu, ā, tika tonu atu ki ngā rohe o Araki ki Ataroto.
JOS 16:3 Nā, ka haere ki raro whaka te hauāuru ki te rohe o Iaparēti tae noa ki te rohe o Petehorono ki raro, ki Kētere; ā, ko tōna putanga atu kei te moana.
JOS 16:4 Nā, ka riro i ngā tama a Hōhepa, i a Mānahi rāua ko Ēparaima tō rātou kāinga tupu.
JOS 16:5 Ā, ko te rohe tēnei ki ngā tama a Ēparaima, ki ō rātou hapū: Ko te rohe o tō rātou kāinga whaka te rāwhiti ko Ataroto Arara, tae noa ki Petehorono ki runga;
JOS 16:6 ā, i puta atu te rohe whaka te hauāuru ki Mikimeta ki te raki; ā, i āwhio haere te rohe whaka te rāwhiti ki Taanata Hiro, ā, ka whakarērea atu a reira i te taha ki te rāwhiti o Ianoha.
JOS 16:7 Nā, ka anga i Ianoha ki raro ki Ataroto, ā, ki Naarata, ā, ka pā ki Heriko, puta rawa atu kei Horano.
JOS 16:8 I haere atu te rohe i Tapua whaka te hauāuru ki te awa ki Kanaha; ā, kei te moana ōna putanga atu. Ko te wāhi tupu tēnei o te iwi o ngā tama a Ēparaima, o ō rātou hapū;
JOS 16:9 me ngā pā i motuhia mō ngā tama a Ēparaima i roto i te wāhi o ngā tama a Mānahi, ngā pā katoa me ngā kāinga o aua pā.
JOS 16:10 Ā, kīhai i peia e rātou te Kanaani e noho ana i Kētere; heoi noho ana te Kanaani i waenganui o Ēparaima ā taea noatia tēnei rā, ā, ka meinga hei pononga, hei mahi i ngā mahi.
JOS 17:1 Ā, ko te rota tēnei i te iwi o Mānahi; ko ia hoki te mātāmua a Hōhepa. I a Makiri, i te mātāmua a Mānahi, matua o Kireara, i te mea he tangata hāpai pakanga ia, i a ia a Kireara, a Pahana.
JOS 17:2 Ā, ko te rota i ērā atu tama a Mānahi, i ō rātou hapū; i ngā tama a Apiētere, i ngā tama a Hereke, i ngā tama a Ahariere, i ngā tama a Hekeme, i ngā tama a Hewhere, i ngā tama hoki a Hemira; ko ngā tama ēnei a Mānahi tama a Hōhepa, i ō rātou hapū.
JOS 17:3 Otiia kāhore he tama a Teropēhara, tama a Hewhere, tama a Kireara, tama a Makiri, tama a Mānahi; engari he tamāhine; ā, ko ngā ingoa ēnei o āna tamāhine: ko Mahara, ko Noa, ko Hokora, ko Mireka, ko Tirita.
JOS 17:4 Nā, ka whakatata rātou ki te aroaro o Ereātara tohunga, ki te aroaro o Hohua tama a Nunu, ki te aroaro anō hoki o ngā ariki, ā, ka mea, “I whakahau a Ihowā i a Mohi kia hōmai he kāinga tupu ki a mātou i roto i ō mātou tungāne.” Nā, hōmai ana e ia ki a rātou tā Ihowā i kī ai, he kāinga tupu i roto i ngā tēina o tō rātou pāpā.
JOS 17:5 Ā, tekau ngā wāhi i taka ki a Mānahi, hāunga te whenua o Kireara, o Pahana, i tāwāhi o Horano;
JOS 17:6 nō te mea i whiwhi ngā tamāhine a Mānahi i te wāhi tupu i roto i āna tama; ā, i riro te whenua o Kireara i ngā tama a Mānahi i mahue.
JOS 17:7 Ā, ko te rohe ki a Mānahi kei a Āhera ā tae noa ki Mikimeta, ki tērā i te ritenga atu o Hekeme; ā, i haere tonu te rohe ki matau, ki ngā tāngata o Enetapua.
JOS 17:8 I a Mānahi te whenua o Tapua; ko Tapua ia i te rohe o Mānahi, i ngā tama a Ēparaima tērā.
JOS 17:9 Ā, i puta atu te rohe ki te awa, ki Kana, whaka te tonga o te awa. Ko ēnei pā nō Ēparaima i roto i ngā pā o Mānahi; ā, ko te rohe o Mānahi i te taha tūāraki o te awa, ā, ko ōna putanga kei te moana.
JOS 17:10 I a Ēparaima te taha ki te tonga, ā, i a Mānahi te taha ki te raki, ā, ko te moana te rohe ki a ia; ā, i tūtaki rāua ki a Āhera ki te raki, ki a Ihākara hoki ki te rāwhiti.
JOS 17:11 Ā, i riro i a Mānahi i roto i tō Ihākara, i tō Āhera, a Peteheana me ōna pā ririki, a Ipireama me ōna pā ririki, ngā tāngata o Roro, o ōna pā ririki, ngā tāngata o Eneroro, o ōna pā ririki, ngā tāngata o Tānaka, o ōna pā ririki, ngā tāngata anō hoki o Mekiro, o ōna pā ririki, (arā e toru ngā taumata).
JOS 17:12 Otiia, kīhai i taea e ngā tama a Mānahi te pei ngā tāngata o aua pā; ko ngā Kanaani ia i whakamate kia noho tonu i taua whenua.
JOS 17:13 Nā, nō ka kaha ngā tama a Īharaira, ka meinga e rātou ngā Kanaani hei kaimahi, ā, kāhore i peia rawatia atu e rātou.
JOS 17:14 Nā, ka kōrero ngā tama a Hōhepa ki a Hohua, ka mea, “Nā te aha i kotahi tonu ai te rota, i kotahi ai te wāhi i hōmai e koe ki ahau hei kāinga tupu, he iwi nui nei hoki ahau, ā, he manaakitanga hoki ahau nā Ihowā ā mohoa noa nei?”
JOS 17:15 Nā, ka mea a Hohua ki a rātou, “Ki te mea he iwi nui koe, haere ki te ngahere tua ai he wāhi māu i reira, i te whenua o ngā Perihi rātou ko ngā Repaima; inā hoki he kūiti rawa te whenua pukepuke o Ēparaima mōu.”
JOS 17:16 Nā, ka mea ngā tama a Hōhepa, “He iti rawa te whenua pukepuke mō mātou; ā, ko ngā Kanaani katoa e noho ana i te wāhi mānia he hāriata o rātou, o ērā e noho rā i Peteheana, i ōna pā ririki, o ērā hoki i te mānia i Ietereere.”
JOS 17:17 Nā, ka kōrero a Hohua ki te whare o Hōhepa, ki a Ēparaima rāua ko Mānahi, ka mea, “He iwi nui koe, he nui hoki tōu kaha; e kore e kotahi tonu te rota mōu,
JOS 17:18 engari, mōu anō te whenua pukepuke; ahakoa hoki he ngahere ia, māu e tua, ā, mōu ōna putanga atu; ka peia atu hoki e koe ngā Kanaani, he ahakoa tō rātou whai hāriata rino, me tō rātou kaha.”
JOS 18:1 Nā, ka huihui te whakaminenga katoa o ngā tama a Īharaira ki Hiro, ā, whakatūria ana e rātou ki reira te tapenākara o te whakaminenga; ā, i taea hoki te whenua e rātou.
JOS 18:2 Nā, ka toe e whitu ngā iwi o ngā tama a Īharaira, kāhore nei i wehea tō rātou kāinga tupu ki a rātou.
JOS 18:3 Nā, ka mea a Hohua ki ngā tama a Īharaira: “Kia pēhea ake te roa o tō koutou nei māngere ki te haere ki te tango i te whenua kua hoatu nei ki a koutou e Ihowā, e te Atua o ō koutou mātua?
JOS 18:4 Whakaritea mō koutou kia tokotoru mō ia iwi; ā, māku rātou e tono, ā, ka whakatika rātou, ka haere i te whenua, ā, ka tuhituhi kia rite ki ō rātou wāhi; ā, ka haere mai ai rātou ki ahau.
JOS 18:5 Me wehe hoki e rātou kia whitu ngā wāhi; me noho a Hūrā ki tōna wāhi ki te tonga, me noho anō hoki te whare o Hōhepa ki tōna wāhi ki te raki.
JOS 18:6 Nā, me tuhituhi e koutou te whenua kia whitu ngā wāhi, ka kawe mai ai i te pukapuka ki ahau ki konei, ā, māku e maka ō koutou rota ki konei ki te aroaro o Ihowā, o tō tātou Atua.
JOS 18:7 Otirā, kāhore he wāhi mō ngā Rīwaiti i roto i a koutou; ko te mahi tohunga ki a Ihowā te wāhi mō rātou; ā, ko Kara, ko Reupena, ko tētahi tānga hoki o te iwi o Mānahi, kua whiwhi rātou ki tō rātou wāhi i tāwāhi o Horano whaka te rāwhiti, ki tā Mohi, ki tā te pononga a Ihowā i hoatu ai ki a rātou.”
JOS 18:8 Nā, ka whakatika aua tāngata, ā, ka haere; ā, i whakahau a Hohua i te hunga i haere ki te tuhituhi i te whenua, i mea, “Tūria atu, hāereerea hoki te whenua, tuhituhia hoki, ka hoki mai ai ki ahau, ā, māku e maka ō koutou rota ki konei, ki te aroaro o Ihowā, ki Hiro.”
JOS 18:9 Nā, ka tūria atu e aua tāngata, ka haere ā puta noa te whenua, ā, tuhituhia iho e rātou ki te pukapuka, e whitu ngā wāhi, he mea whakaaro ki ngā pā, ā, haere ana ki a Hohua, ki te puni ki Hiro.
JOS 18:10 Ā, makā ana e Hohua he rota mō rātou i Hiro, i te aroaro o Ihowā; nā, ka wehea e Hohua te whenua i reira mō ngā tama a Īharaira, kia rite ki ō rātou wehenga.
JOS 18:11 I puta ake te rota o te iwi o ngā tama a Pineamine, arā o ō rātou hapū; i haere te rohe o tō rātou wāhi i te takiwā o tō ngā tama a Hūrā, o tō ngā tama a Hōhepa:
JOS 18:12 Ā, ko tō rātou rohe ki te taha ki te raki i Horano; nā, i haere te rohe ki runga, ki te taha o Heriko, ki te raki, ā, i haere whakarunga, nā te whenua pukepuke whaka te hauāuru, ā, puta tonu atu i te koraha o Peteawene.
JOS 18:13 Ā, i tika atu te rohe i reira ki Rutu, ki te taha o Rutu, arā ki Pētēre whaka te tonga; nā, i anga whakararo te rohe ki Ataroto Arara, tata tonu ki te pukepuke e tū ana i te tonga o Petehorono ki raro.
JOS 18:14 Nā, ka whakatakotoria atu te rohe, ā, ka āwhio haere mā te taha hauāuru whaka te tonga, atu i te pukepuke e tū ana i te ritenga atu o Petehorono whaka te tonga; ā, ko ōna putanga i Kiriatapaara, arā i Kiriata Tearimi, he pā nō ngā tama a Hūrā. Ko te taha tēnei ki te hauāuru.
JOS 18:15 Ā, ko te taha ki te tonga i te pito rawa o Kiriata Tearimi, ā, i puta atu te rohe whaka te hauāuru, ā, puta tonu atu ki te puna wai i Nepetoa;
JOS 18:16 ā, i anga whakararo te rohe ki te pito rawa o te maunga e tū ana i mua i te raorao o te tama a Hinomo, ki tērā i te raorao o Repaima whaka te raki. Nā, i heke ki te raorao o Hinomo, ki te taha o te Iepuhi ki te tonga, ā, i heke ki Enerōkere.
JOS 18:17 Nā, i whakatakotoria atu i te raki, ā, ka puta atu ki Enehemehe, ā, ka puta atu ki Keriroto, ki te ritenga atu o te pīnakitanga ki Arumine; ā, heke noa ki te kōhatu o Pohana, o te tama a Reupena.
JOS 18:18 Nā, i haere tonu i te taha ki te raki ki te ritenga atu o Arapa, ā, i heke tonu atu ki Arapa.
JOS 18:19 Nā, i haere tonu te rohe ki te taha ki te raki o Petehokora; ā, i pakaru rawa atu te rohe ki te kokoru whaka te raki o te Moana Tote i te pito ki i te tonga o Horano; ko te rohe tēnei ki te tonga.
JOS 18:20 Ā, ko Horano tōna rohe i te taha ki te rāwhiti. Ko te kāinga tupu tēnei o ngā tama a Pineamine, ko ngā rohe hoki o reira ā tawhio noa, arā o ō rātou hapū.
JOS 18:21 Nā, ko ngā pā o te iwi o ngā tama a Pineamine, o ō rātou hapū: ko Heriko, ko Petehokora, me Emekeketiti,
JOS 18:22 ko Petearapa, ko Temaraima, ko Pētēre,
JOS 18:23 ko Āwimi, ko Paraha, ko Opora,
JOS 18:24 ko Kepara Hamonai, ko Oponi, ko Kepa – kotahi tekau mā rua ngā pā me ngā kāinga o aua pā.
JOS 18:25 Ko Kipeono, ko Rama, ko Peeroto,
JOS 18:26 ko Mihipe, ko Kepira, ko Motaha,
JOS 18:27 ko Rekeme, ko Iripeere, ko Tarara,
JOS 18:28 ko Heraha, ko Erepe, ko Iepuhi, arā ko Hiruhārama, ko Kipeata, ko Kiriata; kotahi tekau mā whā ngā pā me ngā kāinga. Ko te kāinga tupu tēnei o ngā tama a Pineamine, o ō rātou hapū.
JOS 19:1 Ā, ka puta ake te rua o ngā rota, ko tō Himiona, arā ko tō te iwi o ngā tama a Himiona, i te ritenga o ō rātou hapū; ā, ko tō rātou wāhi i waenganui o te wāhi o ngā tama a Hūrā.
JOS 19:2 Ā, nō ō rātou kāinga tupu hoki a Peerehepa, arā a Hēpā, a Morara,
JOS 19:3 a Hatarahuara, a Pāra, a Ateme,
JOS 19:4 a Eretorara, a Peturu, a Horema,
JOS 19:5 a Tikiraka, a Pete Marakapoto, a Hatara Huha,
JOS 19:6 a Peterepaoto, a Haruhene – kotahi tekau mā toru ngā pā, me ngā kāinga;
JOS 19:7 a Aina, a Rimono, a Ētere, a Ahana – e whā ngā pā me ngā kāinga;
JOS 19:8 me ngā kāinga katoa o ēnei pā ā tawhio noa, ā tae noa ki Paarata-Peere, ki Ramata ki te tonga. Ko te wāhi tupu tēnei o te iwi o ngā tama a Himiona, o ō rātou hapū.
JOS 19:9 Nō te wāhi o ngā tama a Hūrā te wāhi o ngā tama a Himiona; he nui rawa hoki te wāhi o ngā tama a Hūrā mō rātou. Nā reira i riro ai he kāinga tupu mō ngā tama a Himiona i roto i tō rātou wāhi.
JOS 19:10 Ā, ko te putanga ake o te toru o ngā rota, ko tō ngā tama a Hepurona, ki te ritenga o ō rātou hapū: ā tutuki noa te rohe o tō rātou wāhi ki Hariri.
JOS 19:11 Ā, i haere whakarunga tō rātou rohe ki te hauāuru, ki Marara atu rā anō, ā, i tae hoki ki Rapahete; i tae anō hoki ki te awa i mua i Iokonēama.
JOS 19:12 Nā, i anga atu i Hariri whaka te rāwhiti ki te putanga mai o te rā, ki te rohe o Kihiroto Taporo; nā, i puta atu ki Taperata, ā, i haere tonu atu ki runga, ki Iāpia.
JOS 19:13 Nā, i rere atu i reira whaka te rāwhiti ki Katahewhere, ki Itakatini; ā, puta tonu atu ki Rimono, ki tērā e takoto atu rā ki Neaha.
JOS 19:14 Nā, i taiāwhio te rohe i te taha ki te raki ā tae noa ki Hanatono; ā, ko ōna pākarutanga i te raorao o Ipitaere;
JOS 19:15 me Katata, me Naharara, me Himirono, me Irara, me Pēterehema – kotahi tekau mā rua ngā pā me ngā kāinga.
JOS 19:16 Ko te wāhi tupu tēnei o ngā tama a Hepurona, o ō rātou hapū – ko ēnei pā me ngā kāinga o aua pā.
JOS 19:17 Ā, ko te putanga ake o te whā o ngā rota, ko tō Ihākara, ko tō ngā tama a Ihākara i te ritenga o ō rātou hapū.
JOS 19:18 Ā, ko te rohe ki a rātou i Ietereere, nā, ko Kehuroto, ko Huneme,
JOS 19:19 ko Haparaima, ko Hihono, ko Anaharata,
JOS 19:20 ko Rāpiti, ko Kihiono, ko Āpete,
JOS 19:21 ko Remete, ko Enekanimi, ko Eneharaha, ko Petepatete;
JOS 19:22 ā, i puta atu te rohe ki Taporo, ki Hahatima, ki Petehemehe; ā, i pakaru tonu atu tō rātou rohe ki Horano – kotahi tekau mā ono ngā pā me ngā kāinga.
JOS 19:23 Ko te wāhi tupu tēnei o te iwi o ngā tama a Ihākara, o ō rātou hapū – ko ngā pā me ngā kāinga.
JOS 19:24 Ā, ko te putanga ake o te rima o ngā rota, ko tō te iwi o ngā tama a Āhera, o ō rātou hapū.
JOS 19:25 Ā, ko tō rātou rohe: ko Herekata, ko Hari, ko Petene, ko Akahapa,
JOS 19:26 ko Aramereke, ko Āmara, ko Miheara; ā, tutuki noa ki Karamere ki te taha ki te hauāuru, ki Hihoro Ripinata anō hoki.
JOS 19:27 Nā, ka anga ki te rāwhiti ki Pēterakono, ā, tutuki noa ki Hepurona, ki te raorao o Ipitaere hoki, ki te taha ki te raki o Pete-Emeke, o Neiere, ā puta noa ki Kapuru ki mauī;
JOS 19:28 ko Heperona hoki, ko Rehopo, ko Hamono, ko Kanaha, ā tae noa ki Hairona nui.
JOS 19:29 Kātahi ka anga te rohe ki Rama, ki Tāira hoki ki te pā taiepa; nā, ka anga te rohe ki Hōha; ā, ko ōna putanga atu i te moana, i ngā wāhi o Akatipi;
JOS 19:30 ko Umaha anō hoki, ko Apeke, ko Rehopo – e rua tekau mā rua ngā pā me ō rātou kāinga.
JOS 19:31 Ko te kāinga tupu tēnei o te iwi o ngā tama a Āhera, o ō rātou hapū – ko ēnei pā me ngā kāinga o aua pā.
JOS 19:32 Ko te putanga ake o te ono o ngā rota, ko tō ngā tama a Napatari, arā ko tō ngā tama a Napatari ki te ritenga o ō rātou hapū:
JOS 19:33 Ā, i anga atu tō rātou rohe i Herepe, i te oki i roto i Taananimi, ki Arami Nekepe, ki Iapaneere, tae noa ki Rakumu; ā, ko ōna pākarutanga atu i Horano.
JOS 19:34 Nā, i anga te rohe whaka te hauāuru ki Atanoto Taporo, ā, i haere tonu i reira ki Hukoko. Nā, i te taha ki te tonga i tutuki atu ki tō Hepurona, ā, i te taha ki te hauāuru i tutuki atu ki tō Āhera, ā, i te takiwā ki te rerenga mai o te rā, ki tō Hūrā i Horano.
JOS 19:35 Ā, ko ngā pā taiepa, ko Tirimi, ko Tere, ko Hāmata, ko Rakata, ko Kinereta,
JOS 19:36 ko Aramaha, ko Rama, ko Hatoro,
JOS 19:37 ko Kerehe, ko Eterei, ko Enehatoro,
JOS 19:38 ko Irono, ko Mikitaraere, ko Hōreme, ko Peteanata, ko Petehemehe; kotahi tekau mā iwa ngā pā me ngā kāinga o aua pā.
JOS 19:39 Ko te kāinga tupu tēnei o te iwi o ngā tama a Napatari, o ō rātou hapū – ko ngā pā me ō rātou kāinga.
JOS 19:40 Ā, ko te putanga ake o te whitu o ngā rota, ko tō te iwi o ngā tama a Rāna, i te ritenga ki ō rātou hapū.
JOS 19:41 Ā, ko te rohe o tō rātou wāhi i Toraha, i Ehetaoro, i Irihemehe,
JOS 19:42 i Haarapini, i Aitarono, i Iētera,
JOS 19:43 i Erono, i Timinata, i Ekerono,
JOS 19:44 i Eretekehe, i Kipetono, i Paarata,
JOS 19:45 i Iehuru, i Peneperaka, i Katarimono,
JOS 19:46 i Meiarakono, i Rakono, me te rohe anō hoki i mua i Hopa.
JOS 19:47 (Ā, i puta atu te rohe o ngā tama a Rāna ki kō atu i a rātou; nō te mea i haere ngā tama a Rāna ki runga, ā, i whawhai ki Reheme, ā, riro ana a reira i a rātou, ā, patua iho a reira ki te mata o te hoari. Nā tangohia ana a reira e rātou, ā, nohoia iho, ā, huaina iho a Reheme ko Rāna, ko te ingoa o tō rātou pāpā o Rāna.)
JOS 19:48 Ko te wāhi tēnei o te iwi o ngā tama a Rāna, o ō rātou hapū – ko ngā pā ēnei me ngā kāinga.
JOS 19:49 Nā, ka mutu tā rātou whakarite i te whenua hei kāinga tupu, i tēnei rohe, i tēnei rohe; nā, ka hoatu e ngā tama a Īharaira he wāhi tupu mō Hohua tama a Nunu i roto i a rātou.
JOS 19:50 I hoatu e rātou ki a ia tā Ihowā i kī ai, te pā i tonoa e ia, arā a Timinata Heraha i te whenua pukepuke o Ēparaima; nā, ka hangā e ia te pā, ā, noho ana i reira.
JOS 19:51 Ko ngā kāinga ēnei i tuwhaina e Ereātara tohunga, e Hohua tama a Nunu, e ngā upoko o ngā whare o ngā mātua o ngā iwi o ngā tama a Īharaira, he mea rota i Hiro i te aroaro o Ihowā, i te whatitoka o te tapenākara o te whakaminenga. Heoi, ka mutu tā rātou wehewehe i te whenua.
JOS 20:1 Nā, ka kōrero a Ihowā ki a Hohua, ka mea:
JOS 20:2 “Kōrero ki ngā tama a Īharaira, mea atu: Whakaritea e koutou ētahi pā whakaora, ko āku i kōrero ai, nā Mohi i whakapuaki ki a koutou;
JOS 20:3 hei rerenga atu mō te tangata whakamate, i patu nei i tētahi tangata, he mea urupā, ehara i te mea āta whakaaro; ā, ka waiho hei whakaora mō koutou, kei mate i te kaitakitaki toto.
JOS 20:4 “Ā, ka rere ia ki tētahi o ēnei pā, ka tū i te kūwaha o te tomokanga o te pā, nā, ka kōrero i āna kōrero ki ngā taringa o ngā kaumātua o tēnā pā. Ā, me tango atu ia e rātou ki roto ki te pā, ki roto ki a rātou, ka hōmai he wāhi ki a ia, ā, ka noho ia ki a rātou.
JOS 20:5 “Ā, ki te whāia atu ia e te kaitakitaki toto, kaua e tukua atu te tangata whakamate e rātou ki tōna ringa; nō te mea ehara i te mea āta whakaaro tāna patunga i tōna hoa, kīhai anō ia i kino ki a ia i mua ake.
JOS 20:6 Engari, me noho ia ki taua pā, kia tū rā anō ia ki mua i te whakaminenga whakawākia ai, ā, kia mate rā anō te tino tohunga o aua rā. Ko reira hoki ai te tangata whakamate, haere ai ki tōna pā, ki tōna whare hoki, ki te pā i rere atu nei ia i reira.”
JOS 20:7 Nā, ka whakatapua e rātou ko Kerehe i Karirī, i te whenua pukepuke o Napatari, ko Hekeme i te whenua pukepuke o Ēparaima, ko Kiriata Arapa, arā ko Heperona, i te whenua pukepuke o Hūrā.
JOS 20:8 Nā, i tāwāhi o Horano, i te wāhi e anga ana ki Heriko whaka te rāwhiti ka whakaritea e rātou ko Pētere i te koraha i te mānia, nō te iwi o Reupena, ko Rāmoto i Kireara, nō te iwi o Kara, ko Korana hoki i Pahana, nō te iwi o Mānahi.
JOS 20:9 Ko ngā pā ēnei i whakaritea mō ngā tama katoa a Īharaira, mō te manene hoki e noho ana i roto i a rātou, hei rerenga atu mō ngā tāngata katoa i whakamatea ai tētahi tangata, he mea urupā, kei mate i te ringa o te kaitakitaki toto, kia tū rā anō i mua i te whakaminenga.
JOS 21:1 Nā, ka whakatata mai ngā upoko o ngā whare o ngā mātua o ngā Rīwaiti ki a Ereātara tohunga, ki a Hohua tama a Nunu, rātou ko ngā upoko o ngā whare o ngā mātua o ngā iwi o ngā tama a Īharaira;
JOS 21:2 ā, ka kōrero ki a rātou i Hiro, i te whenua o Kanaana, ka mea, “I whakahau a Ihowā, nā Mohi i whakapuaki, kia hōmai ki a mātou ētahi pā hei nohoanga, me ngā wāhi o waho ake mō ā mātou kararehe.”
JOS 21:3 Kātahi ka hoatu e ngā tama a Īharaira i roto i ō rātou wāhi ēnei pā me ngā wāhi o waho ake ki ngā Rīwaiti, ko tā Ihowā hoki ia i kī ai.
JOS 21:4 Nā, ka puta ake te rota, ko tō ngā hapū o ngā Kohati. Ā, i riro i ngā tama a Ārona tohunga, i ērā o ngā Rīwaiti, tekau mā toru ngā pā, he mea rota, nō roto i ō te iwi o Hūrā, nō roto i ō te iwi o Himiona, nō roto hoki i ō te iwi o Pineamine.
JOS 21:5 Nā, i riro i ērā atu o ngā tama a Kohata tekau ngā pā, he mea rota, nō roto i o ngā hapū o te iwi o Ēparaima, nō roto i ō te iwi o Rāna, nō roto hoki i o tētahi tānga o te iwi o Mānahi.
JOS 21:6 Ā, i riro i ngā tama a Kerehona kotahi tekau mā toru ngā pā, he mea rota, nō roto i o ngā hapū o te iwi o Ihākara, nō roto i ō te iwi o Āhera, nō roto i ō te iwi o Napatari, nō roto hoki i o tētahi tānga o te iwi o Mānahi i Pahana.
JOS 21:7 Ā, i riro i ngā tama a Merari, i ō rātou hapū, kotahi tekau mā rua ngā pā, nō roto i ō te iwi o Reupena, nō roto i ō te iwi o Kara, nō roto hoki i ō te iwi o Hepurona.
JOS 21:8 Nā, hoatu ana e ngā tama a Īharaira ki ngā Rīwaiti, he mea rota, ēnei pā, me ngā wāhi o waho ake, he mea pērā me tā Ihowā i whakahau ai, i whakapuakina e Mohi.
JOS 21:9 Ā, i hoatu e rātou i roto i ō te iwi o ngā tama a Hūrā, i ō te iwi hoki o ngā tama a Himiona, ēnei pā ka whakahuatia nei ngā ingoa;
JOS 21:10 ā, i riro i ngā tama a Ārona, arā i ngā hapū o ngā Kohati, he tama nei rātou nā Rīwai; nō rātou hoki te rota tuatahi.
JOS 21:11 I hoatu anō ki a rātou a Kiriata Arapa, (ko taua Arapa nei te pāpā o Anaka), arā o Heperona, i te whenua pukepuke o Hūrā, me ōna wāhi o waho ake ā tawhio noa.
JOS 21:12 Ko ngā māra ia o te pā, me ōna kāinga, i hoatu e rātou ki a Karepe tama a Iepune hei kāinga tupu mōna.
JOS 21:13 Nā, hoatu ana e rātou ki ngā tama a te tohunga, a Ārona a Heperona me ōna wāhi o waho ake, hei pā rerenga atu mō te tangata whakamate, a Rīpina hoki, me ōna wāhi o waho ake,
JOS 21:14 a Iatiri me ōna wāhi o waho ake, a Ehetemoa me ōna wāhi o waho ake,
JOS 21:15 a Horono me ōna wāhi o waho ake, a Repiri me ōna wāhi o waho ake,
JOS 21:16 a Aina hoki me ōna wāhi o waho ake, a Iuta me ōna wāhi o waho ake, a Petehemehe me ōna wāhi o waho ake; e iwa ngā pā i roto i o ēnei iwi e rua.
JOS 21:17 Ā, nō roto i ō te iwi o Pineamine: ko Kipeono me ōna wāhi o waho ake, ko Kepa me ōna wāhi o waho ake,
JOS 21:18 ko Anatoto me ōna wāhi o waho ake, ko Aramono me ōna wāhi o waho ake; e whā ngā pā.
JOS 21:19 Nā, ko ngā pā katoa o ngā tama a Ārona, o ngā tohunga; kotahi tekau mā toru me ngā wāhi o waho ake.
JOS 21:20 Nā, i riro i ngā hapū o ngā tama a Kohata, i ngā Rīwaiti, arā i ērā atu o ngā tama a Kohata, he mea rota, ngā pā nō roto i tō te iwi o Ēparaima:
JOS 21:21 Ā, i hoatu e rātou a Hekeme i te whenua pukepuke o Ēparaima ki a rātou, me ōna wāhi o waho ake, hei pā rerenga atu mō te tangata whakamate, a Kētere hoki me ōna wāhi o waho ake,
JOS 21:22 a Kipitaima me ōna wāhi o waho ake, a Petehorono me ōna wāhi o waho ake – e whā ngā pā.
JOS 21:23 Ā, nō roto i tō te iwi o Rāna: ko Eretekeha me ōna wāhi o waho ake, ko Kipetono me ōna wāhi o waho ake,
JOS 21:24 ko Aitarono me ōna wāhi o waho ake, ko Katarimono me ōna wāhi o waho ake – e whā ngā pā.
JOS 21:25 Ā, nō roto i tō tētahi tānga o te iwi o Mānahi: ko Tānaka me ōna wāhi o waho ake, ko Katarimono hoki me ōna wāhi o waho ake – e rua ngā pā.
JOS 21:26 Ko ngā pā katoa o ngā hapū o ērā atu o ngā tama a Kohata kotahi tekau me ngā wāhi o waho ake.
JOS 21:27 Nā, i hoatu e rātou, nō roto i tō tētahi tānga o te iwi o Mānahi, ki ngā tama a Kerehona, o ngā hapū o ngā Rīwaiti, ko Korana i Pahana me ōna wāhi o waho ake, hei pā rerenga atu mō te tangata whakamate; a Peehetera hoki me ōna wāhi o waho ake – e rua ngā pā.
JOS 21:28 Ā, nō roto i tō te iwi o Ihākara: ko Kihiono me ōna wāhi o waho ake, ko Tāpare me ōna wāhi o waho ake;
JOS 21:29 ko Iaramuta me ōna wāhi o waho ake, ko Enekanimi me ōna wāhi o waho ake; e whā ngā pā.
JOS 21:30 Nō roto i tō te iwi o Āhera: ko Mihara me ōna wāhi o waho ake, ko Aparono me ōna wāhi o waho ake;
JOS 21:31 ko Herekata me ōna wāhi o waho ake, ko Rehopo me ōna wāhi o waho ake; e whā ngā pā.
JOS 21:32 Ā, nō roto i tō te iwi o Napatari: ko Kerehe i Karirī me ōna wāhi o waho ake, hei pā rerenga atu mō te tangata whakamate, ko Hāmotororo me ōna wāhi o waho ake, ko Karatana hoki me ōna wāhi o waho ake – e toru ngā pā.
JOS 21:33 Ko ngā pā katoa o ngā Kerehoni, o tēnei hapū, o tēnei hapū o rātou, kotahi tekau mā toru ngā pā me ngā wāhi o waho ake.
JOS 21:34 Nā, ko tō ngā hapū o ngā tama a Merari, arā o ērā atu o ngā Rīwaiti, nō roto i ō te iwi o Hepurona: ko Iokonēama me ōna wāhi o waho ake, ko Karata me ōna wāhi o waho ake,
JOS 21:35 ko Rimina me ōna wāhi o waho ake, ko Naharara me ōna wāhi o waho ake – e whā ngā pā.
JOS 21:36 Ā, nō roto i ō te iwi o Reupena: ko Pētere me ōna wāhi o waho ake, ko Iahata me ōna wāhi o waho ake,
JOS 21:37 ko Keremoto me ōna wāhi o waho ake, ko Mepaata me ōna wāhi o waho ake; e whā ngā pā.
JOS 21:38 Ā, nō roto i tō te iwi o Kara: ko Rāmoto i Kireara me ōna wāhi o waho ake, hei pā rerenga atu mō te tangata whakamate, ā, ko Mahanaima me ōna wāhi o waho ake,
JOS 21:39 ko Hehepona me ōna wāhi o waho ake, ko Iatere me ōna wāhi o waho ake – e whā katoa ngā pā.
JOS 21:40 Ko ngā pā katoa ēnei mō ngā tama a Merari, mō tēnei hapū, mō tēnei hapū o rātou, arā mō ērā atu o ngā hapū o ngā Rīwaiti; kotahi tekau mā rua ngā pā, he mea whakarite nā tō rātou rota.
JOS 21:41 Ko ngā wāhi katoa o ngā Rīwaiti i roto i te wāhi o ngā tama a Īharaira, e whā tekau mā waru ngā pā me ngā wāhi hoki o waho ake.
JOS 21:42 I riro ēnei pā me ngā wāhi o waho ake o tēnei, o tēnei, ā tawhio noa; nā, i pēnei ēnei pā katoa.
JOS 21:43 Nā, ka hōmai e Ihowā ki a Īharaira te whenua katoa i oati ai ia kia hōmai ki ō rātou mātua; ā, ka riro a reira i a rātou, ā, ka nohoia e rātou.
JOS 21:44 Nā, ka meinga rātou e Ihowā kia whai okiokinga ā tawhio noa, i pērā me āna katoa i oati ai ki ō rātou mātua; ā, kīhai rawa tētahi tangata o ō rātou hoariri katoa i tū ki tō rātou aroaro; i hōmai e Ihowā ō rātou hoariri katoa ki ō rātou ringa.
JOS 21:45 Kīhai rawa i taka tētahi kupu o ngā kupu pai katoa i kōrerotia e Ihowā ki te whare o Īharaira; i mana katoa.
JOS 22:1 Kātahi ka karanga a Hohua ki ngā Reupeni, ki ngā Kari, ā, ki tētahi tānga o te iwi o Mānahi,
JOS 22:2 ā, ka mea ki a rātou, “Kua mau i a koutou ngā mea katoa i whakahau ai a Mohi, te pononga a Ihowā ki a koutou, kua whakarongo mai hoki koutou ki tōku reo i ngā mea katoa i whakahau ai ahau ki a koutou.
JOS 22:3 Kīhai koutou i whakarere i ō koutou tuākana i ēnei rangi e maha ā tae noa mai ki tēnei rā, engari i āta pupuri mārie koutou i te whakahau a Ihowā, a tō koutou Atua.
JOS 22:4 Nā, kua mea nei a Ihowā, tō koutou Atua i ō koutou tēina kia okioki, ka rite ki tāna i kōrero ai ki a rātou; nā reira, hoki atu, haere ki ō koutou tēneti, ki te whenua hoki i whiwhi nā koutou, i hoatu nā e Mohi, e te pononga a Ihowā ki a koutou i tāwāhi o Horano.
JOS 22:5 Otirā, kia mahara mārie kia mahia te whakahau me te ture, i whakahau ai a Mohi, te pononga a Ihowā ki a koutou, kia aroha ki a Ihowā, ki tō koutou Atua, kia haere i āna huarahi katoa, kia pupuri i āna whakahau, kia awhi hoki ki a ia, kia whakapotoa ō koutou ngākau katoa, ō koutou wairua katoa ki te mahi ki a ia.”
JOS 22:6 Nā, ka manaaki a Hohua i a rātou, ā, tukua ana rātou kia haere; ā, haere ana rātou ki ō rātou tēneti.
JOS 22:7 Nā, i hoatu e Mohi he kāinga i Pahana ki tētahi tānga o te iwi o Mānahi; engari, ki tētahi tānga i hoatu e Hohua he kāinga i roto i ō rātou tuākana i tēnei taha o Horano whaka te hauāuru. Ā, i tā Hohua, tukunga atu i a rātou ki ō rātou tēneti, i manaaki anō ia i a rātou,
JOS 22:8 i kōrero ki a rātou, i mea, “Hoki atu ki ō koutou tēneti me ngā taonga maha, me te tini noa iho o te kararehe, me te hiriwa, me te kōura, me te parāhi, me te rino, me te nui noa atu o te kākahu. Tuwhaina atu ngā taonga o ō koutou hoariri ki ō koutou tuākana.”
JOS 22:9 Nā, hoki ana ngā tama a Reupena, me ngā tama a Kara, me tētahi tānga o te iwi o Mānahi, mawehe atu ana i roto i ngā tama a Īharaira i Hiro, i te whenua o Kanaana, ā, haere ana ki te whenua o Kireara, ki te whenua i whiwhi ai rātou, i whakawhiwhia ki a rātou e te kupu a Ihowā i whakapuakina e Mohi.
JOS 22:10 Nā, i tō rātou taenga ki te takiwā i ngā taha o Horano, ki tērā i te whenua o Kanaana, ka hangā e ngā tama a Reupena, e ngā tama a Kara, e tētahi tānga o te iwi o Mānahi, tētahi āta ki reira, ki te taha o Horano, he āta nui hei tirohanga atu.
JOS 22:11 Nā, ka rongo ngā tama a Īharaira e kōrerotia ana, “Nanā, kua hanga ngā tama a Reupena, me ngā tama a Kara, me tētahi tānga o te iwi o Mānahi, i tētahi āta ki te ritenga mai o te whenua o Kanaana ki ngā taha o Horano, ki te wāhi i ngā tama a Īharaira.”
JOS 22:12 Ā, nō te rongonga o ngā tama a Īharaira, huihui ana te whakaminenga katoa o ngā tama a Īharaira ki Hiro, i mea kia haere ki te whawhai ki a rātou.
JOS 22:13 Nā, ka tonoa atu e ngā tama a Īharaira a Pinehaha tama a Ereātara tohunga ki ngā tama a Reupena, ki ngā tama hoki a Kara, ā, ki tētahi tānga o te iwi o Mānahi, ki te whenua o Kireara;
JOS 22:14 me ētahi rangatira kotahi tekau hoki hei hoa mōna, tātaki kotahi te rangatira o ia koromatua, o ia koromatua o ngā iwi katoa o Īharaira; he ariki hoki rātou, ia tangata, ia tangata, nō ngā whare o ō rātou mātua i roto i ngā mano o Īharaira.
JOS 22:15 Nā, haere ana rātou ki ngā tama a Reupena, ki ngā tama a Kara, ki tētahi tānga hoki o te iwi o Mānahi, ki te whenua o Kireara, ā, ka kōrero ki a rātou, ka mea:
JOS 22:16 “Ko te kōrero tēnei a te whakaminenga katoa a Ihowā: ‘He aha tēnei hara i mea nei koutou ki te Atua o Īharaira, i a koutou ka tahuri atu nei i tēnei rā i te whai i a Ihowā, ka hanga nei i tētahi āta mā koutou, hei mahi tutū mā koutou ki a Ihowā?
JOS 22:17 He nohinohi rawa ianei ki a tātou te haranga ki a Peoro, kāhore anō nei i horoia atu i a tātou ā tae noa mai ki tēnei rā, ahakoa rā i pā he mate urutā ki te whakaminenga a Ihowā,
JOS 22:18 e tahuri kē nei koutou i tēnei rā i te whai i a Ihowā? “ ‘Nā, ki te mea ka tutū koutou i tēnei rā ki a Ihowā, tērā ia e riri āpōpō ki te whakaminenga katoa o Īharaira.
JOS 22:19 Otiia, mehemea he poke te whenua e noho nei koutou, haere ake ki te whenua e nohoia ana e Ihowā, kei reira nei e tū ana te tapenākara o Ihowā, ā, ka noho i waenganui i a mātou. Engari, kaua e tutū ki a Ihowā, kaua anō hoki e tutū ki a mātou, i a koutou ka hanga nei i tētahi āta kē atu mā koutou i te āta a Ihowā, a tō tātou Atua.
JOS 22:20 Kāhore ianei a Ākana, te tama a Tera i taka ki te hara i te mea kanga, ā, tau ana te riri ki runga ki te whakaminenga katoa o Īharaira? Ā, kīhai i mate ko taua tangata anake mō tōna hara.’ ”
JOS 22:21 Kātahi ka whakahoki ngā tama a Reupena, ngā tama a Kara, me tētahi tānga o te iwi o Mānahi, ka mea ki ngā ariki o ngā mano o Īharaira:
JOS 22:22 “Ko Ihowā, ko te Atua o ngā atua, ko Ihowā, ko te Atua o ngā atua, e mōhio ana ia, ko Īharaira hoki ka mōhio anō ia; mehemea nā te tutū, mehemea rānei nā te hara ki a Ihowā, pēnei kaua mātou e whakaorangia e koe i tēnei rā.
JOS 22:23 I hangā ai e mātou tētahi āta hei tahuritanga kētanga i muri i a Ihowā; mehemea rānei hei whakaekenga mō te tahunga tinana mō te whakahere rānei, hei meatanga rānei mō ētahi patunga mō te pai, mā Ihowā ake anō e rapu utu.
JOS 22:24 “Mehemea rānei kāhore i meatia e mātou tēnei mea i runga i te tūpato, me te āta whakaaro, ka kī, Āpōpō ake nei ka kōrero mai ā koutou tama ki ā mātou tama, ka mea, ‘He aha tā koutou kei a Ihowā, kei te Atua o Īharaira?
JOS 22:25 Kua whakatakotoria nei hoki e Ihowā a Horano hei rohe ki waenganui o mātou, o koutou, e ngā tama a Reupena, e ngā tama a Kara; kāhore ō koutou wāhi i roto i a Ihowā.’ Pēnā ka meinga e ā koutou tama ā mātou tama kia mutu te wehi i a Ihowā.
JOS 22:26 “Koia mātou i mea ai, ‘Tēnā, tātou ka haere, ka hanga i tētahi āta mā tātou, ehara i te mea mō ngā tahunga tinana, mō ngā patunga tapu rānei.
JOS 22:27 Engari, kia ai tēnā mea hei kaiwhakaatu ki a mātou, ki a koutou, ki ō tātou uri hoki i muri i a tātou, kia mahi ai tātou i ngā mahi a Ihowā ki tōna aroaro, i ā tātou tahunga tinana, i ā tātou patunga tapu, i ā tātou whakahere mō te pai. Kei mea ā koutou tama ki ā mātou tama ā ko ake nei, “Kāhore ō koutou wāhi i roto i a Ihowā.” ’
JOS 22:28 “Koia mātou i mea ai, Nā tēnei ake, kei tā rātou meatanga pērā ki a tātou, ki ō tātou uri rānei, nā, ka mea tātou, ‘Titiro ki te mea e rite ana ki te āta a Ihowā, i hangā e ō mātou mātua, ehara i te mea mō ngā tahunga tinana, mō ngā patunga tapu rānei; engari hei kaiwhakaatu i waenganui i a mātou, i a koutou.’
JOS 22:29 “Auē, kia tutū mātou ki a Ihowā! Kia tahuri atu i tēnei rā i muri i a Ihowā, ki te hanga i tētahi āta mō ngā tahunga tinana, mō ngā whakahere, mō ngā patunga tapu rānei, hei mea kē atu i te āta a Ihowā, a tō tātou Atua, i mua mai o tōna tapenākara!”
JOS 22:30 Nā, i te rongonga o Pinehaha tohunga, rātou ko ngā rangatira o te whakaminenga, arā ko ngā upoko o ngā mano o Īharaira, ki ngā kupu i kōrerotia e ngā tama a Reupena, rātou ko ngā tama a Kara, ko ngā tama a Mānahi, ka pai ki a rātou.
JOS 22:31 Kātahi ka mea a Pinehaha tama a Ereātara tohunga ki ngā tama a Reupena rātou ko ngā tama a Kara, ko ngā tama a Mānahi, “Nō tēnei rā mātou i mōhio ai, kei waenganui i a tātou a Ihowā, inā hoki kīhai koutou i taka ki tēnei hara ki a Ihowā. Nā, kua whakaora nei koutou i ngā tama a Īharaira i te ringa o Ihowā.”
JOS 22:32 Kātahi ka hoki a Pinehaha tama a Ereātara tohunga, me ngā rangatira, i ngā tama a Reupena rātou ko ngā tama a Kara i te whenua o Kireara, ki te whenua o Kanaana, ki ngā tama a Īharaira, ki te whakahoki i te kōrero ki a rātou.
JOS 22:33 Ā, pai tonu te kōrero ki ngā tama a Īharaira; nā, whakapai atu ana ngā tama a Īharaira ki te Atua, kīhai hoki rātou i mea anō kia haere ki runga ki te whawhai ki a rātou, ki te huna i te whenua e nohoia ana e ngā tama a Reupena, rātou ko ngā tama a Kara.
JOS 22:34 Nā, huaina iho taua āta e ngā tama a Reupena, rātou ko ngā tama a Kara, ko Eri; i mea hoki rātou, “Hei kaiwhakaatu tēnā mea ki waenganui i a tātou, ko Ihowā te Atua.”
JOS 23:1 Ā, ka maha ngā rā i muri i tā Ihowā, meatanga i a Īharaira kia okioki i ō rātou hoariri katoa i tētahi taha, i tētahi taha, ā, ka maha haere ngā rā o Hohua, ka koroheketia,
JOS 23:2 nā, ka karanga a Hohua ki a Īharaira katoa, ki ō rātou kaumātua, ki ō rātou ariki, ki ō rātou kaiwhakariterite, ki ō rātou rangatira, ā, ka mea ki a rātou: “Kua koroheketia ahau, kua maha ōku rā;
JOS 23:3 ā, kua kite koutou i ngā mea katoa i mea ai a Ihowā, tō koutou Atua ki ēnei iwi katoa, nā te whakaaro hoki ki a koutou; nō te mea ko Ihowā ko tō koutou Atua, nāna tā koutou riri.
JOS 23:4 Titiro, kua oti te wehe atu e ahau mō koutou ēnei iwi ka mahue nei, hei wāhi tupu mō ō koutou iwi, ō Horano atu me ngā iwi katoa i hunā e ahau ā tae noa ki te Moana Nui, ki te toenetanga o te rā.
JOS 23:5 Ā, ko Ihowā, ko tō koutou Atua, māna rātou e pei i tō koutou aroaro, māna hoki rātou e huna i tō koutou aroaro; ā, ka riro tō rātou oneone i a koutou, ka pērā me te kupu a Ihowā, a tō koutou Atua ki a koutou.
JOS 23:6 “Nō reira kia uaua rawa ki te pupuri, ki te mahi i ngā mea katoa i tuhituhia ki te Pukapuka o te Ture a Mohi, kei peka kē i reira ki matau, ki mauī,
JOS 23:7 kei haere hoki ki roto ki ēnei iwi, i mahue iho nei ki waenganui i a koutou; kei whakahuatia ngā ingoa o ō rātou atua, kei oatitia, kei mahi ki a rātou, kei koropiko ki a rātou.
JOS 23:8 Engari, me awhi ki a Ihowā, ki tō koutou Atua, me pērā me tā koutou i mea ai ā tae noa mai ki tēnei rā.
JOS 23:9 “Kua peia hoki e Ihowā i mua i a koutou ngā iwi nunui, kaha hoki; tēnā ko koutou, kāhore anō tētahi tangata kia tū ki tō koutou aroaro ā taea noatia tēnei rā.
JOS 23:10 Kia kotahi tangata o koutou hei whai i te mano; nō te mea ko Ihowā, ko tō koutou Atua, māna tā koutou riri, ka pērā me tāna i kōrero ai ki a koutou.
JOS 23:11 Nā reira tiakina mārietia koutou, kia aroha ai koutou ki a Ihowā, ki tō koutou Atua.
JOS 23:12 “Ki te anga hoki koutou ki te hoki atu, ki te awhi ki ngā toenga o ēnei iwi, o ēnei ka mahue nei i roto i a koutou, ā, ka mārenatia ki a rātou, ka whakauru hoki ki a rātou, me rātou hoki ki a koutou;
JOS 23:13 kia tino mōhio, e kore a Ihowā, tō koutou Atua e pei anō i ēnei iwi i mua i a koutou; engari ka waiho rātou hei rore, hei māhanga mō koutou, hei whiu hoki mō ō koutou kaokao, hei koikoi i roto i ō koutou kanohi kia hunā rā anō koutou i runga i tēnei whenua pai ka hōmai nei e Ihowā, e tō koutou Atua ki a koutou.
JOS 23:14 “Nanā, ko āianei ahau haere ai i te huarahi o te whenua katoa; ā, e mōhio ana ō koutou ngākau katoa, ō koutou wairua katoa, kāhore anō i taka tētahi mea o ngā mea pai katoa i kōrerotia e Ihowā, e tō koutou Atua mō koutou; kua pono katoa ki a koutou, kāhore anō tētahi mea o ēnā i taka.
JOS 23:15 Nā tēnei ake ka rite ki te putanga mai ki a koutou o ngā mea pai katoa i kōrerotia e Ihowā, e tō koutou Atua ki a koutou, ka pērā anō te whakaputanga mai a Ihowā i ngā mea kino katoa ki a koutou, kia whakangaromia rā anō koutou e ia i tēnei whenua pai, kua hōmai nei e Ihowā, e tō koutou Atua ki a koutou.
JOS 23:16 Ina whakapaheketia e koutou te kawenata a Ihowā, a tō koutou Atua, i whakaritea mai nei e ia ki a koutou, ā, ka haere, ka mahi ki ngā atua kē, ka koropiko ki a rātou; ko reira mura ai te riri o Ihowā ki a koutou, ā, ka ngaro whakarere atu koutou i runga i te whenua pai kua hōmai nei e ia ki a koutou.”
JOS 24:1 Nā, ka whakaemia e Hohua ngā iwi katoa o Īharaira ki Hekeme, ā, ka karangatia e ia ngā kaumātua o Īharaira, ō rātou ariki, ō rātou kaiwhakawā, ō rātou rangatira; ā, tū ana rātou i te aroaro o te Atua.
JOS 24:2 Nā, ka mea a Hohua ki te iwi katoa, “Ko te kōrero tēnei a Ihowā, a te Atua o Īharaira: I noho ō koutou mātua i mua i tāwāhi o te awa – a Teraha matua o Āperahama, matua hoki o Nahora – i mahi anō hoki ki ngā atua kē.
JOS 24:3 Nā, tangohia ana e ahau tō koutou matua, a Āperahama i tāwāhi o te awa, ā, ārahina ana ā puta noa i te whenua o Kanaana, ā, whakanuia ana tōna uri e ahau; i hoatu hoki a Īhaka ki a ia,
JOS 24:4 ā, hoatu ana e ahau a Hākopa rāua ko Ēhau ki a Īhaka. Ā, hoatu ana e ahau a Maunga Heira ki a Ēhau, hei kāinga; ko Hākopa ia rātou ko āna tama i heke ki Īhipa.
JOS 24:5 “I tonoa anō e ahau a Mohi rāua ko Ārona, ā, patua iho e ahau a Īhipa, pērātia ana me tāku i mea ai i waenganui i a rātou; ā muri iho ka whakaputaina mai koutou e ahau.
JOS 24:6 Ā, whakaputaina mai ana e ahau ō koutou mātua i Īhipa; ā, ka tae koutou ki te moana; nā, ka whai mai ngā Īhipiana i muri i ō koutou mātua ki te Moana Whero, me ngā hāriata, me ngā hōia eke hōiho.
JOS 24:7 Ā, i tā rātou karangatanga ki a Ihowā, tukua iho ana e ia he pōuri ki waenganui o koutou, o ngā Īhipiana, ā, kawea mai ana e ia te moana ki runga ki a rātou, taupokina ana rātou. Ā, i kite ō koutou kanohi i ngā mea i mea ai ahau ki Īhipa; ā, he maha ngā rā i noho ai koutou i te koraha.
JOS 24:8 “Nā, kawea ana koutou e ahau ki te whenua o ngā Amori, i noho rā i tāwāhi o Horano; ā, whawhai ana rātou ki a koutou; ā, tukua ana rātou e ahau ki ō koutou ringa, nā, riro ana tō rātou oneone i a koutou; ā, hunā iho rātou e ahau i tō koutou aroaro.
JOS 24:9 Nā, ka whakatika a Pāraka tama a Tiporo kīngi o Moapa, kei te whawhai ki a Īharaira; ā, tīkina ana e ia a Paraama tama a Peoro, hei kanga mō koutou.
JOS 24:10 Otiia, kīhai ahau i pai kia rongo ki a Paraama; nā, ko te manaakitanga i manaaki ai ia i a koutou; ā, whakaorangia ake koutou e ahau i tōna ringa.
JOS 24:11 “Nā, ka whiti mai koutou i Horano, ā, ka tae ki Heriko; ā, whawhai ana ngā tāngata o Heriko ki a koutou, ngā Amori, ngā Perihi, ngā Kanaani, ngā Hiti, ngā Kirikahi, ngā Hiwi, me ngā Iepuhi; ā, tukua ana rātou e ahau ki tō koutou ringa.
JOS 24:12 Ā, tonoa atu ana e ahau te horonete ki mua i a koutou, ā, nāna rātou i pei i tō koutou aroaro, arā ngā kīngi tokorua o ngā Amori; ehara i te mea nā tāu hoari, nā tāu kōpere rānei.
JOS 24:13 Ā, hoatu ana e ahau ki a koutou he whenua kīhai nei koutou i mahi, he pā hoki kīhai i hangā e koutou, ā, noho ana koutou i reira; ehara i te mea whakatō nā koutou ngā māra wāina, māra ōriwa rānei, e kainga nei e koutou.
JOS 24:14 “Nā konā, kia wehi i a Ihowā, mahi atu hoki ki a ia i runga i te tika, i runga i te pono; whakarērea atu hoki ngā atua i mahi nā ō koutou mātua ki a rātou i tāwāhi o te awa, i Īhipa hoki; ā, mahi atu ki a Ihowā.
JOS 24:15 Ā, ki te mea he kino ki tō koutou whakaaro te mahi ki a Ihowā, mā koutou e whiriwhiri i tēnei rā ko wai tā koutou e mahi ai; ki ngā atua rānei i mahi rā ō koutou mātua ki a rātou i tāwāhi o te awa, ki ngā atua rānei o ngā Amori, e noho nei koutou ki tō rātou oneone. Ko ahau ia me tōku whare, ka mahi mātou ki a Ihowā.”
JOS 24:16 Nā, ka whakautua e te iwi, ka mea, “Auē, kia whakarere koia mātou i a Ihowā, kia mahi ki ngā atua kē!
JOS 24:17 Ko Ihowā hoki, ko tō tātou Atua, nāna tātou me ō tātou mātua i whakaputa mai i te whenua o Īhipa, i te whare pononga, nāna hoki aua tohu nunui i mahi ki tō tātou aroaro, ā, nāna tātou i tiaki i te huarahi katoa i haere rā tātou i roto hoki i ngā iwi katoa, i haere mai rā tātou rā waenganui i a rātou.
JOS 24:18 Nā Ihowā anō i pei i tō tātou aroaro ngā iwi katoa, arā ngā Amori, i noho nei i tēnei whenua. Inā, ka mahi mātou ki a Ihowā; ko ia hoki tō tātou Atua.”
JOS 24:19 Nā, ka mea a Hohua ki te iwi, “E kore e āhei i a koutou te mahi ki a Ihowā; he Atua tapu hoki ia; he Atua hae ia; e kore e tukua noatia e ia ā koutou mahi tutū, ō koutou hara.
JOS 24:20 Ki te whakarere koutou i a Ihowā, ā, ka mahi ki ngā atua kē, nā, ka tahuri mai ia ka whakawhiu i a koutou, ka huna hoki i a koutou, i muri iho i tāna mahi pai ki a koutou.”
JOS 24:21 Nā, ka mea te iwi ki a Hohua, “Kāhore; engari ka mahi mātou ki a Ihowā.”
JOS 24:22 Nā, ka mea a Hohua ki te iwi, “Hei kaiwhakaatu koutou ki a koutou anō mō tā koutou whiriwhiri i a Ihowā, kia mahi ki a ia.” Ā, ka mea rātou, “Āe, hei kaiwhakaatu mātou.”
JOS 24:23 “Nā reira,” e ai ki tāna, “whakarērea atu ngā atua kē i waenganui i a koutou nā, ka whakatahuri i ō koutou ngākau ki a Ihowā, ki te Atua o Īharaira.”
JOS 24:24 Kātahi ka mea te iwi ki a Hohua, “Ka mahi mātou ki a Ihowā, ki tō tātou Atua, ko tōna reo hoki tā mātou e whakarongo ai.”
JOS 24:25 Ā, whakaritea iho e Hohua he kawenata ki te iwi i taua rangi anō, ā, hoatu ana e ia ki a rātou tētahi tikanga me tētahi ritenga i Hekeme.
JOS 24:26 Ā, tuhituhia ana e Hohua ēnei kupu ki te Pukapuka o te Ture a te Atua; ā, ka tango ia i tētahi kōhatu nui, whakaarahia ake ana i reira i raro i te oki, i te taha o te whare tapu o Ihowā.
JOS 24:27 Ā, ka mea a Hohua ki te iwi katoa, “Nanā, ko tēnei kōhatu hei kaiwhakaatu ki a tātou; kua rongo hoki ia i ngā kupu katoa a Ihowā i kōrerotia e ia ki a tātou. Nā, hei kaiwhakaatu ia ki a koutou, kei whakakāhore ki tō koutou Atua.”
JOS 24:28 Heoi, tukua ana e Hohua te iwi kia haere, tēnā tangata, tēnā ki tōna wāhi ake.
JOS 24:29 Ā muri iho i ēnei mea, nā, ka mate a Hohua tama a Nunu, te pononga a Ihowā, ā, kotahi rau kotahi tekau ōna tau i ora ai.
JOS 24:30 Ā, tanumia iho ia e rātou ki te rohe o tōna kāinga, ki Timinata Heraha, ki te whenua pukepuke o Ēparaima, ki te taha ki te raki o Maunga Kāha.
JOS 24:31 Ā, i mahi a Īharaira ki a Ihowā i ngā rā katoa o Hohua, i ngā rā katoa anō o ngā kaumātua i hipa ake ō rātou rā i o Hohua, i mōhio hoki ki ngā mahi katoa a Ihowā i mahi ai mō Īharaira.
JOS 24:32 Ā, ko ngā wheua o Hōhepa, i maua mai e ngā tama a Īharaira i Īhipa, i tanumia e rātou ki Hekeme, ki te wāhi o te māra i hokona e Hākopa i ngā tama a Hāmora matua o Hekeme ki ngā moni kotahi rau; nā riro ana taua wāhi i ngā tama a Hōhepa hei kāinga tupu.
JOS 24:33 Nā, ka mate a Ereātara tama a Ārona; ā, tanumia ana ki te pukepuke o tāna tama, o Pinehaha, i hōmai ki a ia i te whenua pukepuke o Ēparaima.
JDG 1:1 Ā, i muri iho i te matenga o Hohua, nā, ka ui ngā tamariki a Īharaira ki a Ihowā, ka mea, “Ko wai e mātua haere mō mātou ki runga ki ngā Kanaani ki te whawhai ki a rātou?”
JDG 1:2 Nā, ka mea a Ihowā, “Ko Hūrā e haere. Nanā, kua hoatu e ahau te whenua ki tōna ringa.”
JDG 1:3 Nā, ka mea a Hūrā ki a Himiona ki tōna tuakana, “Hoake tāua ki tōku wāhi, kia whawhai ai tāua ki ngā Kanaani; ā, ka haere ai hoki ahau i a koe ki tōu wāhi.” Nā, haere ana rāua ko Himiona.
JDG 1:4 Ā, ko te haerenga atu o Hūrā, ka hōmai e Ihowā ngā Kanaani me ngā Perihi ki ō rātou ringa, ā, patua iho o rātou ki Peheke kotahi tekau mano tāngata.
JDG 1:5 I rokohanga anō a Aronipeheke ki Peheke, ā, whawhai ana ki a ia, ā, patua iho ngā Kanaani me ngā Perihi.
JDG 1:6 Nā, ka rere a Aronipeheke, ā, whāia ana e rātou, ā, ka mau, nā, tapahia ana ngā koromatua o ōna ringa, o ōna waewae.
JDG 1:7 Nā, ka mea a Aronipeheke, “E whitu tekau ngā kīngi, he mea tapahi ngā koromatua o ō rātou ringa, o ō rātou waewae, i kohi kai i raro i tāku tēpu; ko tāku i mea ai, kua whakahokia mai e te Atua ki ahau.” Nā, ka kawea ia ki Hiruhārama, ā, mate iho ki reira.
JDG 1:8 I tauria hoki a Hiruhārama e ngā tamariki a Hūrā, ā, horo ana i a rātou, patua iho e rātou ki te mata o te hoari, tahuna ake hoki e rātou te pā ki te ahi.
JDG 1:9 Ā muri iho ka haere ki raro ngā tamariki a Hūrā ki te whawhai ki ngā Kanaani i noho i te whenua pukepuke i te tonga, i te mānia.
JDG 1:10 Nā, haere ana a Hūrā, whawhai ana ki ngā Kanaani i noho ki Heperona (nā, ko te ingoa o Heperona i mua ko Kiriata Arapa); patua iho e rātou a Hehai, a Ahimana, rātou ko Tāramai.
JDG 1:11 Nā, ka haere atu ia i reira, ka whawhai ki ngā tāngata o Repiri (ā, ko te ingoa o Repiri i mua ko Kiriata Hēpere).
JDG 1:12 Nā, ka mea a Karepe, “Ko te tangata e patua ai a Kiriata Hēpere, ā, e horo ai, ka hoatu e ahau tāku tamāhine, a Ākaha hei wahine māna.”
JDG 1:13 Nā, ka horo i a Otoniere tama a Kenaha teina o Karepe, ā, hoatu ana e ia tāna tamāhine, a Ākaha hei wahine māna.
JDG 1:14 Ā, nō te taenga atu o taua wahine ki a ia, ka whakakīkī i a ia kia tonoa he māra i tōna pāpā; ā, ka marere iho ia ki raro i tōna kāihe; nā, ka mea a Karepe ki a ia, “He aha tāu?”
JDG 1:15 Nā, ka mea ia ki a ia, “Hōmai he manaakitanga mōku, kei te tonga hoki te whenua i hōmai e koe mōku; hōmai anō hoki ētahi puna wai mōku.” Nā, hoatu ana e Karepe ki a ia ngā puna o runga me ngā puna o raro.
JDG 1:16 Nā, ka haere ngā tamariki a te Keni, a te hungawai o Mohi, i te pā nīkau, rātou ko ngā tamariki a Hūrā, ki te koraha o Hūrā, ki te tonga o Arara, ā, haere ana, noho ana i roto i te iwi.
JDG 1:17 Nā, ka haere a Hūrā rāua ko tōna tuakana ko Himiona, ā, patua iho e rātou ngā Kanaani i noho i Hepata, whakangaromia iho; nā reira i huaina ai te ingoa o taua pā, ko Horema.
JDG 1:18 Ā, i riro anō i a Hūrā a Kaha me tōna rohe, a Ahakerono me tōna rohe, a Ekerono me tōna rohe.
JDG 1:19 Ā, i a Hūrā a Ihowā, ā, peia atu ana e ia ngā tāngata o te whenua pukepuke; otiia kīhai i taea e ia te pei ngā tāngata o te mānia; nō te mea he hāriata rino o rātou.
JDG 1:20 I hoatu anō e rātou a Heperona ki a Karepe, i pērā me tā Mohi i kōrero ai; ā, peia atu ana e ia i reira ngā tama; tokotoru a Anaka.
JDG 1:21 Ko ngā Iepuhi ia i noho ki Hiruhārama, kīhai i peia atu e ngā tamariki a Pineamine, nā, noho ana te Iepuhi i roto i ngā tamariki a Pineamine ki Hiruhārama ā taea noatia tēnei rā.
JDG 1:22 Me te whare anō o Hōhepa, i haere atu ki te whawhai ki Pētēre, ā, i a rātou a Ihowā.
JDG 1:23 Ā, i tūteia a Pētēre e te whare o Hōhepa (nā, ko te ingoa o taua pā i mua ko Rutu).
JDG 1:24 Nā, ka kitea e ngā kaiwhanga tētahi tangata e puta mai ana i te pā, ā, ka mea ki a ia, “Tēnā, whakaaturia ki a mātou te tomokanga atu ki te pā, ā, ka puta tā mātou koha ki a koe.”
JDG 1:25 Kātahi ka whakaaturia e ia ki a rātou te tomokanga atu ki te pā, ā, patua iho e rātou te pā ki te mata o te hoari; ko taua tangata ia rātou ko tōna hapū katoa i tukua atu e rātou.
JDG 1:26 Nā, haere ana taua tangata ki te whenua o ngā Hiti, ā, hangā ana tētahi pā e ia, huaina iho te ingoa ko Rutu; ko tōna ingoa anō tēnā ā taea noatia tēnei rā.
JDG 1:27 Otiia kīhai i peia e Mānahi ngā tāngata o Peteheana me ōna pā ririki, o Tānaka me ōna pā ririki, ngā tāngata anō hoki o Roro, o ōna pā ririki, ngā tāngata o Ipireama, o ōna pā ririki, ngā tāngata o Mekiro, o ōna pā ririki heoi ka mea ngā Kanaani kia noho ki taua whenua.
JDG 1:28 Ā, nō ka kaha haere a Īharaira, ka meinga e rātou ngā Kanaani hei kaihōmai takoha, kīhai hoki rātou i peia rawatia atu.
JDG 1:29 Kīhai anō hoki a Ēparaima i pei atu i ngā Kanaani i noho ki Kētere; heoi noho ana ngā Kanaani ki Kētere i waenganui i a rātou.
JDG 1:30 Kīhai a Hepurona i pei atu i ngā tāngata o Kitirono; i ngā tāngata anō hoki o Naharoro; heoi ka noho ngā Kanaani i waenganui i a rātou, ā, meinga ana hei kaihōmai takoha.
JDG 1:31 Kīhai a Āhera i pei atu i ngā tāngata o Āko, i ngā tāngata rānei o Hairona, o Aharapa, o Akatipi, o Hērepa, o Apiki, o Rehopo;
JDG 1:32 nā, ka noho ngā Āheri ki waenganui o ngā Kanaani, o ngā tāngata whenua; nō te mea kīhai rātou i pei atu i a rātou.
JDG 1:33 Kīhai a Napatari i pei atu i ngā tāngata o Petehemehe, i ngā tāngata hoki o Peteanata; heoi noho ana ia waenganui o ngā Kanaani, o ngā tāngata whenua. Otiia, i meinga ngā tāngata o Petehemehe, o Peteanata hei kaihōmai takoha ki a rātou.
JDG 1:34 Nā, i ākina atu e ngā Amori ngā tamariki a Rāna ki te whenua pukepuke; kīhai hoki rātou i tukua kia heke ki te mānia.
JDG 1:35 Heoi, ka mea ngā Amori kia noho ki Maunga Herehe, ki Aitarono, ki Haarapimi; otiia i kaha anō te ringa o te whare o Hōhepa, ā, ka meinga rātou hei kaihōmai takoha.
JDG 1:36 Nā, ko te rohe ki ngā Amori kei te pīnakitanga ki Akarapimi; kei te kāmaka, ā, ahu whakarunga.
JDG 2:1 Nā, ka haere ake te anahera a Ihowā i Kirikara ki Pokimi, ā, ka mea, “Nāku koutou i haere mai ai i Īhipa, nāku hoki koutou i kawe mai ki te whenua i oati ai ahau ki ō koutou mātua. I mea anō ahau, ‘E kore e taka tāku kawenata ki a koutou.’
JDG 2:2 Kaua anō koutou e whakarite kawenata ki ngā tāngata o tēnei whenua; me pakaru e koutou ā rātou āta. Heoi, kīhai nei koutou i rongo ki tōku reo. He aha tēnei mahi a koutou?
JDG 2:3 Koia hoki ahau ka mea nei, E kore ahau e pei atu i a rātou i tō koutou aroaro; ā, ka waiho rātou ānō he tātarāmoa ki ō koutou kaokao; ko ō rātou atua hoki hei rore mō koutou.”
JDG 2:4 Ā, nō te kōrerotanga a te anahera a Ihowā i ēnei kupu ki ngā tamariki katoa a Īharaira, ka ara te reo o te iwi, ka tangi.
JDG 2:5 Nā, huaina iho e rātou te ingoa o taua wāhi ko Pokimi; i patu whakahere anō hoki rātou mā Ihowā ki reira.
JDG 2:6 Nā, i tā Hohua tukunga i te iwi kia haere, ka haere ngā tamariki a Īharaira ki tōna wāhi, ki tōna wāhi, ki te tango i te whenua.
JDG 2:7 Ā, i mahi te iwi ki a Ihowā i ngā rā katoa o Hohua, i ngā rā katoa anō o ngā kaumātua i roa ake nei ō rātou rā i o Hohua, i kite nei i ngā mahi nunui katoa a Ihowā i meinga e ia mō Īharaira.
JDG 2:8 Nā, ka mate a Hohua tama a Nunu, te pononga a Ihowā, kotahi rau kotahi tekau ōna tau.
JDG 2:9 Ā, tanumia iho ia e rātou ki te rohe o tōna wāhi, ki Timinataherehe, ki te whenua pukepuke o Ēparaima, ki te taha ki te raki o Maunga Kāha.
JDG 2:10 Nā, ka kohia anō hoki taua whakatupuranga katoa ki ō rātou mātua; ā, ka ara ake tētahi whakatupuranga kē i muri i a rātou, kīhai nei i mōhio ki a Ihowā, ki ngā mahi anō hoki i mahia e ia mō Īharaira.
JDG 2:11 Nā, ka mahi ngā tamariki a Īharaira i te kino i te tirohanga a Ihowā, ka mahi hoki ki ngā Paara.
JDG 2:12 Ā, whakarērea ake e rātou a Ihowā, te Atua o ō rātou mātua i whakaputa mai nei i a rātou i te whenua o Īhipa, ā, haere ana ki te whai i ngā atua kē, i ngā atua o ngā iwi i tētahi taha, i tētahi taha o rātou, ā, koropiko ana ki a rātou, nā, ka mea rātou i a Ihowā kia riri.
JDG 2:13 Heoi, whakarere ana rātou i a Ihowā, ā, mahi ana ki a Paara, ki te Ahataroto hoki.
JDG 2:14 Nā, ka mura te riri o Ihowā ki a Īharaira, ā, tukua ana rātou e ia ki ngā ringa o ngā kaipāhua hei pāhua i a rātou, ā, hokona ana rātou e ia ki te ringa o ō rātou hoariri i tētahi taha, i tētahi taha; kīhai hoki i taea e rātou i muri iho te tū ake i te aroaro o ō rātou hoariri.
JDG 2:15 I ō rātou haerenga katoa, i runga i a rātou te ringa o Ihowā mō te kino; i rite hoki ki tā Ihowā i kōrero ai, ki tā Ihowā hoki i oati ai ki a rātou; nā te taea tō rātou raru.
JDG 2:16 I whakaara ake anō a Ihowā i ētahi kaiwhakarite hei whakaora i a rātou i te ringa o ō rātou kaipāhua.
JDG 2:17 Heoi, kīhai anō rātou i whakarongo ki ō rātou kaiwhakarite; nā, kei te pūremu, kei te whai ki ngā atua kē, kei te koropiko ki a rātou. Hohoro tonu tō rātou peka kē i te ara i haere ai ō rātou mātua, arā i te whakarongo ki ngā whakahau a Ihowā; kīhai rātou i pērā.
JDG 2:18 Ā, i ngā wā i whakaara ake ai a Ihowā i ngā kaiwhakarite mō rātou, nā, i te kaiwhakarite a Ihowā, ā, whakaorangia ake rātou e ia i te ringa o ō rātou hoariri i ngā rā katoa o te kaiwhakarite: i puta kē hoki te whakaaro o Ihowā i a rātou e auē ana i ō rātou kaitūkino, i ō rātou kaiwhakatoi.
JDG 2:19 Ā, nō te matenga o te kaiwhakarite, ka hoki rātou ki muri, nui atu tō rātou takanga i tō ō rātou mātua; i haere hoki ki te whai i ngā atua kē, mahi ai ki a rātou, koropiko ai ki a rātou; kīhai i mutu ā rātou mahi, me tā rātou tikanga pakeke.
JDG 2:20 Nā, ka mura te riri o Ihowā ki a Īharaira, ā, ka mea ia, “Nā, kua takahia e tēnei iwi tāku kawenata i whakahaua e ahau ki ō rātou mātua; kīhai anō i rongo ki tōku reo;
JDG 2:21 nā, e kore anō ahau e pei atu i tētahi tangata i mua i a rātou o ngā iwi i mahue iho i a Hohua i tōna matenga.
JDG 2:22 Kia ai rātou hei whakamātautau māku i a Īharaira, e mau rānei ki te ara o Ihowā haere ai; e rite rānei te mau ki tā ō rātou mātua, kāhore rānei.”
JDG 2:23 Nā, ka waiho ērā iwi e Ihowā, kīhai hoki i hohoro te peia atu; kīhai anō hoki i tukua ki te ringa o Hohua.
JDG 3:1 Nā, ko ngā iwi ēnei i waiho e Ihowā ko rātou hei whakamātautau i a Īharaira, arā ko ngā mea o Īharaira kīhai i mōhio ki ngā pakanga katoa o Kanaana
JDG 3:2 (mō ngā whakatupuranga anō ia o ngā tamariki a Īharaira kia mōhio, kia ako ki te whawhai, arā mō te hunga kīhai i mōhio ki tērā i mua):
JDG 3:3 nā, ko ngā rangatira tokorima o ngā Pirihitini, ko ngā Kanaani katoa, ko ngā Haironi rātou ko ngā Hiwi i noho i Maunga Repanōna, i Maunga Paara-Heremona ā tae noa ki te haerenga atu ki Hāmata.
JDG 3:4 Ko rātou hei whakamātautau mō Īharaira, kia mōhiotia ai e rongo rānei rātou ki ngā whakahau a Ihowā i whakahaua e ia ki ō rātou mātua, he mea whakapuaki nā Mohi.
JDG 3:5 Nā, ka noho ngā tamariki a Īharaira ki waenganui o ngā Kanaani, o ngā Hiti, o ngā Amori, o ngā Perihi, o ngā Hiwi, o ngā Iepuhi;
JDG 3:6 ā, ka tango i ā rātou tamāhine hei wahine mā rātou, ka hoatu hoki i ā rātou tamāhine ki ā rātou tama, ka mahi anō hoki ki ō rātou atua.
JDG 3:7 Nā, kua mahi ngā tamariki a Īharaira i te kino i te tirohanga o Ihowā, wareware ake ki a Ihowā, ki tō rātou Atua, mahi ana hoki ki ngā Paara, ki te Ahataroto.
JDG 3:8 Nā, ka mura te riri o Ihowā ki a Īharaira, ā, hokona atu ana rātou e ia ki te ringa o Kuhanarihataimi kīngi o Mehopotamia. Nā, e waru ngā tau i mahi ai ngā tama a Īharaira ki a Kuhanarihataimi.
JDG 3:9 Ā, nō te tangihanga a ngā tamariki a Īharaira ki a Ihowā, ka whakaarahia ake e Ihowā he kaiwhakaora mō ngā tamariki a Īharaira, nāna rātou i whakaora; arā a Otoniere tama a Kenaha teina o Karepe.
JDG 3:10 Nā, i tau iho ki runga i a ia te Wairua o Ihowā, ā, i whakawā ia mō Īharaira; i haere hoki ki te whawhai; ā, hōmai ana e Ihowā ki tōna ringa a Kuhanarihataimi kīngi o Mehopotamia; nā, kua kaha tōna ringa ki te whawhai ki a Kuhanarihataimi.
JDG 3:11 Ā, e whā tekau ngā tau i okioki ai te whenua i te whawhai. Nā, ka mate a Otoniere, tama a Kenaha.
JDG 3:12 Nā, ka mahi kino anō ngā tama a Īharaira i te tirohanga a Ihowā, ā, ka whakakahangia e Ihowā a Ekerona kīngi o Moapa ki te whawhai ki a Īharaira, mō rātou i mahi kino i te tirohanga a Ihowā.
JDG 3:13 Nā, ka huihuia e ia ki a ia ngā tamariki a Āmona rātou ko Amareke, ā, haere ana, patua ana e ia a Īharaira, ā, tangohia ana e ia te pā nīkau.
JDG 3:14 Ā, kotahi tekau mā waru ngā tau i mahi ai ngā tamariki a Īharaira ki a Ekerona, kīngi o Moapa.
JDG 3:15 Nō te tangihanga ia a ngā tama a Īharaira ki a Ihowā, ka whakaarahia ake e Ihowā he kaiwhakaora mō rātou, a Ehuru tama a Kera, he Pineamini, he tangata ringa mauī. Nā, ka hoatu e ngā tama a Īharaira he takoha kia kawea e ia ki a Ekerona kīngi o Moapa.
JDG 3:16 Otiia kua oti i a Ehuru tētahi hoari te hanga māna; e rua ōna mata, kotahi whatīanga te roa; nā, ka whītikiria e ia i roto i ōna kākahu ki tōna hūhā matau.
JDG 3:17 Nā, ko tāna tukunga i te takoha ki a Ekerona kīngi o Moapa; nā, he tangata tetere rawa a Ekerona.
JDG 3:18 Ā, ka mutu tā tērā tuku i te takoha ka tonoa atu e ia te hunga i mauria mai ai te takoha.
JDG 3:19 Ko ia tonu ia i hoki whakamuri atu i ngā whakapakoko i Kirikara, ka mea, “He kupu huna tāku ki a koe, e te kīngi.” Nā, ka mea tērā, “Whakarongoa!” Nā, mawehe atu ana i a ia te hunga katoa e tū ana i tōna taha.
JDG 3:20 Nā, ka haere atu a Ehuru ki a ia; ā, e noho ana ia ko ia anake i tōna rūma raumati. Nā, ka mea a Ehuru, “He kupu nā te Atua tāku ki a koe.” Nā, ka whakatika ia i tōna nohoanga.
JDG 3:21 Nā, ka torona e Ehuru tōna ringa mauī, ka mau ki te hoari i tōna hūhā matau, werohia ana ki tōna kōpū.
JDG 3:22 Ā, ngoto tahi atu ana te kakau me te mata, ā, tūtakina iho te mata e te ngako, kīhai i unuhia mai te hoari i roto i tōna kōpū, ā, puta atu ana ki muri.
JDG 3:23 Nā, ka haere atu a Ehuru nā te whakamahau, ā, tūtakina atu ana e ia ngā tatau o te rūma ki a ia, kīia iho hoki.
JDG 3:24 Ā, i tōna haerenga atu, ka haere mai ngā pononga a tērā, nā, i tō rātou kitenga kua kīia ngā tatau o te rūma, ka mea rātou, “He pono kei te uhi ia i ōna waewae i te rūma raumati.”
JDG 3:25 Tatari noa rātou ā ka whakamā; nā, kīhai ia i whakapuare i ngā tatau o te rūma; kātahi rātou ka mau ki te kī, ā, whakapuaretia ana. Nā, ko tō rātou ariki kua hinga ki te whenua, kua mate.
JDG 3:26 Ko Ehuru ia i mawhiti i a rātou e tatari roa ana, ā, kua tae ki tua i ngā whakapakoko, kua mawhiti ki Heirata.
JDG 3:27 Ā, nō tōna taenga, ka whakatangihia e ia te tētere ki te whenua maunga o Ēparaima, ā, heke ana ngā tamariki a Īharaira i runga i te maunga hei hoa mōna, ko ia hoki i mua i a rātou.
JDG 3:28 Nā, ka mea ia ki a rātou, “Haere mai i muri i ahau, kua hōmai hoki e Ihowā ngā Moapi, ō koutou hoariri ki ō koutou ringa.” Nā, heke ana rātou i muri i a ia, ā, ka riro mai i a rātou ngā whitinga atu o Horano i ngā Moapi; kīhai hoki i tukua tētahi tangata kia whiti atu.
JDG 3:29 Nā, patua iho e rātou ngā Moapi i taua wā, me te mea tekau mano ngā tāngata, te hunga pakari anake, ngā mārohirohi katoa; kīhai hoki tētahi i mawhiti.
JDG 3:30 Nā, ka hinga a Moapa i taua rā i te ringa o Īharaira. Ā, e waru tekau ngā tau i okioki ai te whenua i te pakanga.
JDG 3:31 Ā, i muri i a ia ko Hamakara tama a Anata, ā, patua iho e ia ngā Pirihitini, e ono rau tāngata, ki te wero kau. Nā, ka ora anō a Īharaira i a ia.
JDG 4:1 Ā, ka mate a Ehuru, ka mahi kino anō ngā tamariki a Īharaira i te tirohanga a Ihowā.
JDG 4:2 Nā, ka hokona atu rātou e Ihowā ki te ringa o Iapini kīngi o Kanaana, ko te kīngi hoki ia o Hatoro, ko Hihera hoki te rangatira o tāna ope; i Harohete anō hoki o ngā tauiwi tōna nohoanga.
JDG 4:3 Nā, ka tangi ngā tamariki a Īharaira ki a Ihowā; e iwa rau nei hoki ana hāriata rino, ā, e rua tekau ngā tau i tūkinotia rawatia ai e ia ngā tamariki a Īharaira.
JDG 4:4 Ā, ko Tepora poropiti, wahine a Rapiroto, ko ia te kaiwhakarite o Īharaira i taua wā.
JDG 4:5 Ā, ko tōna nohoanga kei raro i te nīkau a Tepora i te takiwā o Rama, o Pētēre, i te whenua pukepuke o Ēparaima; nā, ka haere ngā tamariki a Īharaira ki runga, ki a ia kia whakawākia.
JDG 4:6 Nā, ka tono tāngata ia hei karanga i a Paraka tama a Apīnoama i Kerehe Napatari, ā, ka mea ki a ia, “Kīhai ianei a Ihowā, te Atua o Īharaira i whakahau: ‘Haere whakatata atu ki Maunga Taporo, mauria hoki hei hoa mōu kia tekau mano tāngata o ngā tamariki a Napatari, o ngā tamariki hoki a Hepurona?
JDG 4:7 Ā, māku e kukume atu ki a koe ki te awa, ki Kihona a Hihera rangatira o te ope a Iapini, me ana hāriata, me ōna mano ka hoatu anō hoki e ahau ki tōu ringa.’ ”
JDG 4:8 Nā, ka mea a Paraka ki a ia, “Ki te haere tahi koe i ahau, ka haere ahau; ki te kāhore ia koe e haere tahi i ahau, e kore ahau e haere.”
JDG 4:9 Ā, ka mea ia, “Āe rā, me haere tahi tāua; otiia e kore koe e whai korōria i te ara ka haere nei koe; tā te mea ka hokona atu e Ihowā a Hihera ki roto ki te ringa o te wahine.” Nā, ka whakatika a Tepora, ā, haere tahi ana me Paraka ki Kerehe.
JDG 4:10 Kātahi ka kārangarangatia a Hepurona rāua ko Napatari e Paraka ki Kerehe; ā, kotahi tekau mano ngā tāngata i haere i raro i ōna waewae; i haere tahi anō hoki a Tepora i a ia.
JDG 4:11 Nā, kua wehe atu a Hēpere te Keni i roto i ngā Keni, i ngā tamariki anō a Hōpapa hungawai o Mohi; ā tae noa atu tāna whakatūranga tēneti ki te oki i Taananimi, ki tērā i Kerehe.
JDG 4:12 Ā, ka kōrerotia e rātou ki a Hihera, kua riro a Paraka tama a Apīnoama ki runga ki Maunga Taporo;
JDG 4:13 ka kārangarangatia e Hihera ana hāriata katoa, e iwa rau, he hāriata rino, me tōna nuinga katoa, i Harohete o ngā tauiwi ki te awa, ki Kihona.
JDG 4:14 Ka mea hoki a Tepora ki a Paraka, “Whakatika, ko te rā hoki tēnei e tukua ai e Ihowā a Hihera ki tōu ringa; kāhore ianei a Ihowā i haere atu i mua i a koe?” Nā, ko te haerenga iho o Paraka i runga i Maunga Taporo, kotahi tekau mano hoki ngā tāngata ki te whai i a ia.
JDG 4:15 Ā, meinga ana e Ihowā a Hihera kia whati, me ana hāriata katoa, me tāna ope katoa, i te mata o te hoari i te aroaro o Paraka. Nā, ka marere iho a Hihera i runga i tana hāriata, ā, rere ā-waewae ana.
JDG 4:16 Nā, ka whāia ngā hāriata me te ope e Paraka ā tae noa ki Harohete o ngā tauiwi; ā, hinga ana te ope katoa a Hihera i te mata o te hoari; kīhai hoki tētahi i toe.
JDG 4:17 Ko Hihera ia rere ā-waewae ana ki te tēneti o Taere wahine a Hēpere Keni; he rongo mau hoki tā Iapini kīngi o Hatoro rātou ko te whare o Hēpere, o te Keni.
JDG 4:18 Nā, ka puta a Taere ki te whakatau i a Hihera, ka mea ki a ia, “Peka mai, e tōku ariki, peka mai ki ahau; kaua e wehi.” Kātahi ia ka peka atu ki a ia ki te tēneti, ā, ka hīpokina e ia ki te koroka.
JDG 4:19 Ka mea atu ia ki te wahine, “Hōmai koa he wai inu mōku, kia iti nei; e matewai ana hoki ahau.” Kātahi ka wetekina e ia te kōkī waiū, ā, whakainumia ana ia, hīpokina atu ana hoki.
JDG 4:20 Nā, ka mea tērā ki a ia, “E tū ki te kūwaha o te tēneti, ā, ki te haere mai he tangata ki te ui ki a koe, ki te mea, ‘He tangata rānei kei konei?’ Ka mea atu koe, ‘Kāhore.’ ”
JDG 4:21 Kātahi ka tīkina e Taere wahine a Hēpere tētahi titi o te tēneti, ā, ka mau tōna ringa ki te hama, nā, ka haere toropuku atu ki a ia, heoi patua iho e ia te titi ki tōna rahirahinga, ā, ngoto tonu atu ki te whenua; i parangia hoki ia e te moe, i ngenge. Nā, ko tōna hemonga, kua mate.
JDG 4:22 Nā, ko te whāinga a Paraka i a Hihera; ā, ka puta atu a Taere ki te whakatau i a ia, ka mea ki a ia, “Haere mai, ā, māku e whakaatu ki a koe tāu tangata e rapu nā.” Ā, i tōna haerenga atu ki a ia, nā, ko Hihera e takoto ana, kua mate, me te titi i tōna rahirahinga.
JDG 4:23 Heoi, hinga ana a Iapini kīngi o Kanaana i te Atua i taua rā i te aroaro o ngā tamariki a Īharaira.
JDG 4:24 Nā, ka kaha haere tonu te ringa o ngā tamariki a Īharaira ki a Iapini kīngi o Kanaana, ā whakangaromia noatia e rātou a Iapini kīngi o Kanaana.
JDG 5:1 Nā, ka waiata a Tepora rāua ko Paraka tama a Apīnoama i taua rā, ka mea:
JDG 5:2 “Whakapaingia a Ihowā mō te takitakinga a ngā kaitakitaki o Īharaira, mō te hihikotanga mai o te iwi.
JDG 5:3 “Whakarongo, e ngā kīngi, kia whai taringa, e ngā rangatira; māku, āe rā, māku e waiata ki a Ihowā, ka hīmene ahau ki a Ihowā, ki te Atua o Īharaira.
JDG 5:4 “E Ihowā, i tōu putanga atu i Heira, i tōu haerenga atu i te pārae i Ēroma, i wiri te whenua, i māturuturu iho anō ngā rangi; i māturuturu iho anō hoki ngā wai o ngā kapua.
JDG 5:5 I rere ā-wai ngā maunga i te aroaro o Ihowā, ko taua Hinai anō hoki, i te aroaro o Ihowā, o te Atua o Īharaira.
JDG 5:6 “I ngā rā o Hamakara tama a Anata, i ngā rā o Taere, i takoto kau ngā huarahi, i haere hoki ngā tira haere i ngā ara i tahaki.
JDG 5:7 I mutu rawa ngā rangatira o Īharaira, i kāhore rawa, ā, whakatika noa ake ahau, a Tepora, whakatika ake ahau, he whaea nō Īharaira.
JDG 5:8 I whiriwhiria e rātou he atua hou; kātahi ka puta he whawhai ki ngā kūwaha. I kitea rānei he pukupuku, he tao rānei, i roto i ngā mano e whā tekau o Īharaira?
JDG 5:9 Kei ngā kaiwhakatakoto tikanga o Īharaira tōku ngākau; i hihiko rātou ki te tuku i a rātou i roto i te iwi. Whakapaingia a Ihowā.
JDG 5:10 “Kōrerotia, e ngā kaieke kāihe mā, e te hunga e noho ana i runga i ngā whāriki utu nui, e te hunga e haere ana i te ara.
JDG 5:11 Mamao noa mai i te reo o ngā kaikōpere, i ngā wāhi utuhanga wai, ka kōrerotia e rātou i reira ngā mahi tika a Ihowā, ngā mahi tika o tāna whakahaere tikanga i roto i a Īharaira. “Kātahi te iwi o Ihowā ka heke ki raro ki ngā kūwaha.
JDG 5:12 Maranga, maranga, e Tepora! Maranga, maranga, whakahuatia he waiata! Whakatika, e Paraka, ārahina tāu whakaraunga ki te whakarau, e te tama a Apīnoama.
JDG 5:13 “Kātahi ka haere mai ki raro te mōrehu o ngā rangatira, me te iwi; i haere mai hoki a Ihowā ki raro mōku ki te whawhai ki te mea nui.
JDG 5:14 I puta mai i a Ēparaima te hunga ko tō rātou pakiaka nei kei a Amareke; kei muri i a koe, e Pineamine, i roto i ōu iwi; i haere mai ngā kaiwhakatakoto tikanga i roto i a Makiri; nō roto i a Hepurona ngā kaihāpai i te tokotoko a te kaiwhakahaere;
JDG 5:15 i a Tepora hoki ngā rangatira o Ihākara; he pērā a Ihākara; he pērā hoki a Paraka; huaki atu ana rātou i raro i ōna waewae ki te raorao. I ngā manga wai o Reupena, tērā ngā whakaaroaronga nunui o te ngākau.
JDG 5:16 He aha koe i noho ai ki ngā taiepa hipi, whakarongo ai ki ngā whakatangi mō ngā kāhui? I ngā manga wai o Reupena, tērā ngā rapurapunga nunui o te ngākau.
JDG 5:17 I noho a Kireara ki tērā taha o Horano; nā, ko Rāna, he aha ia i noho ai i runga i ngā kaipuke? Ko Āhera, whakakeke tonu mai i te takutai moana, ā, noho ana ia i te taha o ōna manga wai.
JDG 5:18 Ko Hepurona he iwi i whakahāwea ō rātou tinana ki te mate; rāua ko Napatari i ngā wāhi teitei o te pārae.
JDG 5:19 “I haere mai ngā kīngi, i whawhai, nā, ka whawhai ngā kīngi o Kanaana ki Tānaka, ki te taha o ngā wai o Mekiro; kīhai tētahi moni i riro hei taonga mō i rātou.
JDG 5:20 I whawhai iho rātou i te rangi; i whawhai ngā whetū i ō rātou huarahi ki a Hihera.
JDG 5:21 I kāhakina atu rātou e te awa, e Kihona, e taua awa tawhito, e te awa, e Kihona. E tōku wairua, haere tonu i runga i te kaha.
JDG 5:22 Takatakahi ana i reira ngā pāua o ngā hōiho, nā ngā pekenga, nā ngā tūpeketanga a ō rātou mārohirohi.
JDG 5:23 ‘Kangā a Meroho,’ e ai tā te anahera a Ihowā; ‘kangā kinotia ngā tāngata o reira; mō rātou kīhai i haere mai hei āwhina mō Ihowā, hei āwhina mō Ihowā ki te whawhai ki te hunga nunui.’
JDG 5:24 “Kia manaakitia i roto i ngā wāhine a Taere wahine a Hēpere Keni; kia manaakitia i roto i ngā wāhine o te tēneti.
JDG 5:25 I tonoa e tuahangata he wai mōna, he waiū tāna i hoatu ai, kawea ana e ia he pata i roto i te peihana rangatira.
JDG 5:26 Totoro atu ana tōna ringa ki te titi tōna matau ki te hama a ngā kaimahi; hama iho e ia a Hihera, ākina iho tōna pane; titia iho hoki e ia tōna rahirahinga ā puta rawa.
JDG 5:27 Kūpapa ana ia ki ōna waewae, hinga ana, takoto ana; i kūpapa ia, i hinga, ki ōna waewae; ko te wāhi i kūpapa ai ia, hinga ana ia i reira, mate rawa.
JDG 5:28 “I titiro mai te whaea o Hihera i te matapihi, i karanga hoki i te wini whakakahokaho, ‘Nā te aha i roa ai te haere mai o tana hāriata? Nā te aha i pūhoi ai ngā wīra o ana hāriata?’
JDG 5:29 Ka utua e ngā mea mōhio o āna wāhine rangatira; āe, ko ia anō hei whakahoki ake i te kupu ki a ia anō,
JDG 5:30 ‘Kāhore rānei rātou i tūpono atu, i wehewehe i ngā taonga? He kōtiro, tokorua ngā kōtiro ki tērā, ki tērā; he taonga kōtingotingo tō Hihera, he taonga kōtingotingo, he mea whatu ki te ngira, he mea kōtingotingo, he mea whatu ki te ngira i tētahi taha, i tētahi taha, mō ngā kakī o te hunga i te taonga parakete?’
JDG 5:31 “Kia pēnā te whakangaromanga o ōu hoariri katoa, e Ihowā. Kia rite ia te hunga e aroha ana ki a ia ki te rā i tōna putanga kaha mai.” Nā, e whā tekau ngā tau i okioki ai te whenua.
JDG 6:1 Nā, ka mahi kino ngā tamariki a Īharaira i te tirohanga a Ihowā, ā, tukua ana rātou e Ihowā ki te ringa o Miriana e whitu ngā tau.
JDG 6:2 Ā, nui atu te kaha o te ringa o Miriana i tō Īharaira; ā, nā Miriana i hangā ai e ngā tamariki a Īharaira ngā rua i ngā maunga mō rātou, me ngā ana, me ngā pā taiepa.
JDG 6:3 Nā, ka oti te mahi whakatō a Īharaira, ka haere ake ngā Miriani rātou ko ngā Amareki, me ngā tāngata o te rāwhiti; ka haere ake ki te whakaeke i a rātou.
JDG 6:4 Whakapaea iho e rātou, ā, mōtī ake i a rātou ngā hua o te whenua, ā tae noa koe ki Kaha, kīhai hoki i mahue tētahi oranga mō Īharaira, kāhore he hipi, he kau, he kāihe rānei.
JDG 6:5 I whakaeke mai hoki rātou me ā rātou kararehe, i haere mai me ō rātou tēneti; koia anō kei ngā māwhitiwhiti te maha; e kore hoki e taea te tatau rātou me ā rātou kāmera. Nā, haere mai ana rātou ki te whenua whakangaro ai.
JDG 6:6 Nā, kua rawakore noa iho a Īharaira i a Miriana; ā, ka tangi ngā tamariki a Īharaira ki a Ihowā.
JDG 6:7 Ā, nō te tangihanga o ngā tamariki a Īharaira ki a Ihowā i te mahi a Miriana,
JDG 6:8 ka tono tangata a Ihowā ki ngā tamariki a Īharaira, he poropiti, hei mea ki a rātou, “Ko te kupu tēnei a Ihowā, a te Atua o Īharaira: Nāku koutou i kawe mai ki runga nei i Īhipa, nāku hoki koutou i whakaputa mai i te whare pononga;
JDG 6:9 nāku koutou i whakaora i te ringa o ngā Īhipiana, i te ringa hoki o ō koutou kaitūkino katoa; ā, peia atu ana rātou e ahau i tō koutou aroaro, hoatu ana hoki e ahau tō rātou whenua ki a koutou.
JDG 6:10 I mea anō ahau ki a koutou, ‘Ko Ihowā ahau, ko tō koutou Atua; kaua e wehingia ngā atua o ngā Amori nō rātou nei te whenua e noho nā koutou.’ Heoi, kāhore koutou i rongo ki tōku reo.”
JDG 6:11 Nā, ka haere mai te anahera a Ihowā, ā, noho ana i raro i tētahi oki i Opora, he rākau nā Ioaha Apiēteri; i te patu wīti hoki tāna tama, a Kiriona ki te poka wāina, he mea kia toe ai i ngā Miriani.
JDG 6:12 Nā, ka puta te anahera a Ihowā ki a ia, ka mea ki a ia, “Kei a koe a Ihowā, e te tangata mārohirohi.”
JDG 6:13 Nā, ka mea a Kiriona ki a ia, “Auē, e tōku Ariki, me i a mātou a Ihowā, nā te aha i pono mai ai ki a mātou ēnei mea katoa? Kei hea hoki āna merekara i kōrero mai ai ō mātou mātua ki a mātou, i mea ai, ‘Kāhore ianei a Ihowā i kawe mai i a tātou i Īhipa?’ Nā, kua whakarere nei a Ihowā i a mātou, kua tukua anō mātou ki te ringa o Miriana.”
JDG 6:14 Nā, ka tahuri atu a Ihowā ki a ia, ka mea, “Haere i runga i tēnei kaha ōu, whakaorangia hoki a Īharaira i te ringa o Miriana; kāhore ianei ahau i tono i a koe?”
JDG 6:15 Nā, ka mea tērā ki a ia, “Auē, e tōku Ariki, mā te aha ahau e whakaora ai i a Īharaira? Titiro, nōku te hapū rawakore i roto i a Mānahi, ko te iti rawa hoki ahau i roto i te whare o tōku pāpā.”
JDG 6:16 Nā, ka mea a Ihowā ki a ia, “Ko ahau rā hei hoa mōu; ā, ka patua e koe ngā Miriani, me te mea he tangata kotahi.”
JDG 6:17 Anō rā ko ia ki a ia, “Nā ki te mea kua manakohia ahau e koe, tēnā rā, whakaaturia mai he tohu ki ahau ko koe tēnei e kōrero mai nei ki ahau.
JDG 6:18 Kaua rā e haere atu i konei, kia tae mai rā anō ahau ki a koe ki te kawe mai i tāku whakahere, kia whakatakotoria rā anō e ahau ki tōu aroaro.” Nā, ko tāna meatanga, “Ka noho ahau, kia hoki mai rā anō koe.”
JDG 6:19 Kātahi ka haere a Kiriona ki roto, ā, takā ana e ia tētahi kūao koati, me tētahi epa parāoa hei keke rēwenakore. Ko te kikokiko i whaowhina e ia ki te kete, ko te hupa i ringihia ki te pāta, nā, kawea ana ki waho, ki a ia ki raro i te oki; ā, tāpaea atu ana ki a ia.
JDG 6:20 Nā, ka mea te anahera a te Atua ki a ia, “Tangohia te kikokiko me ngā keke rēwenakore, ka whakatakoto ai ki runga ki tēnei kāmaka, ka riringi ai hoki i te hupa.” Nā pērā ana ia.
JDG 6:21 Kātahi ka whātorona atu e te anahera a Ihowā te pito o te tokotoko i tōna ringa, ā, pā ana ki te kikokiko, ki ngā keke rēwenakore. Nā, ko te putanga ake o te ahi i roto i te kāmaka, pau ake te kikokiko me ngā keke rēwenakore. Nā, kua riro atu te anahera a Ihowā i tāna tirohanga.
JDG 6:22 Ā, nō te kitenga o Kiriona ko te anahera ia a Ihowā, ka mea a Kiriona, “Auē, e te Ariki, e Ihowā mōku hoki i kite i te anahera a Ihowā, he kanohi, he kanohi.”
JDG 6:23 Nā, ka mea a Ihowā ki a ia, “Kia tau te rangimārie ki a koe; kaua e wehi. E kore koe e mate.”
JDG 6:24 Nā, ka hangā e Kiriona tētahi āta mā Ihowā ki reira, ā, huaina iho e ia ko Ihowāharomo. Kei Opora o ngā Apiēteri nā anō taua mea ā taea noatia tēnei rā.
JDG 6:25 Ā, i taua pō anō ka mea a Ihowā ki a ia, “Tīkina te pūru a tōu pāpā, arā te rua o ngā pūru, e whitu nei ōna tau, ka wāwāhi ai i te āta a Paara, i tērā a tōu pāpā; me tua hoki te motu nehenehe i tōna taha.
JDG 6:26 Me hanga hoki ki tōna tikanga anō he āta mā Ihowā mā tōu Atua ki runga ki tēnei kāmaka, ka mau ai ki te tuarua o ngā pūru, ka whakaeke hei tahunga tinana ki runga ki ngā rākau o te nehenehe e tuaina e koe.”
JDG 6:27 Nā, ka tango a Kiriona i ētahi tāngata kotahi tekau nō āna pononga, ā, rite tonu tāna i mea ai ki tā Ihowā i kōrero ai ki a ia. Nā, i wehi ia i te whare o tōna pāpā, i ngā tāngata anō hoki o te pā, i kore ai e meatia e ia i te awatea; koia i meatia ai e ia i te pō.
JDG 6:28 Nā, i te marangatanga ake o ngā tāngata o te pā i te ata, rere kua wāhia iho te āta a Paara, kua oti te motu nehenehe i tōna taha te tua, kua oti hoki te tuarua o ngā pūru te whakaeke ki te āta i hangā rā.
JDG 6:29 Nā, ka mea tētahi ki tētahi, “Nā wai tēnei mahi?” Ā, ka rapu rātou, ka ui, nā, ka kōrerotia, “I meatia tēnei e Kiriona tama a Ioaha.”
JDG 6:30 Nā, ka mea ngā tāngata o te pā ki a Ioaha, “Whakaputaina mai tāu tama ki waho, kia whakamatea; mōna i wāhi i te āta a Paara, i tua hoki i te nehenehe i tōna taha.”
JDG 6:31 Nā, ka mea a Ioaha ki te hunga katoa e tū mai ana ki a ia, “Ko koutou rānei hei tohe i tā Paara? Ko koutou rānei hei whakaora i a ia? Ki te tohe tētahi mōna, me whakamate ia i te ata nei anō. Ki te mea he atua ia, māna anō ia e tohe mō tāna āta kua wāhia nei.”
JDG 6:32 Nā, huaina iho ia e ia i taua rā, ko Ierupāra; i mea hoki, “Mā Paara anō e tohe ki a ia mō tāna āta kua wāhia nei.”
JDG 6:33 Nā, ka huihui tahi ngā Miriani katoa rātou ko ngā Amareki, ko ngā tāngata o te rāwhiti, ā, ka whiti, ka noho hoki ki te raorao o Ietereere.
JDG 6:34 Nā, kua tau te Wairua o Ihowā ki runga ki a Kiriona, ā, whakatangihia ana e ia te tētere; ā, huihuia ana a Apiētere ki te aru i a ia.
JDG 6:35 I tono karere anō ia puta noa i a Mānahi, ā, ka huihuia anō rātou ki a ia. I tono karere anō ia ki a Āhera, ki a Hepurona, ki a Napatari; ā, ka haere ake rātou ki te whakatau i a rātou.
JDG 6:36 Nā, ka mea a Kiriona ki te Atua, “Ki te mea nōku te ringa e whakaorangia ai e koe a Īharaira, pērā me tāu i kōrero mai rā,
JDG 6:37 nā, ka waiho e ahau te huruhuru hipi ki runga ki te patunga wīti; ā, ki te mea kei te huruhuru anake te tōmairangi, ā, he maroke a runga katoa o te whenua, kātahi ahau ka mōhio nōku te ringa e whakaorangia ai e koe a Īharaira, ka rite anō ki tāu i kōrero rā.”
JDG 6:38 Ā, pērā tonu. I maranga wawe hoki ia i te ata, ā, ka romia e ia te huruhuru, ā, tauia ana te tōmairangi i roto i te huruhuru, kī tonu te peihana i te wai.
JDG 6:39 I mea anō a Kiriona ki te Atua, “Kei mura tōu riri ki ahau, ā, heoi anō he kōrero māku ko tēnei; tēnā, kia kotahi ake whakamātau māku i te huruhuru, ā, ka kāti. Kia maroke ko te huruhuru anake, ā, kia whai tōmairangi a runga i te whenua katoa.”
JDG 6:40 Ā, i pērātia e te Atua i taua pō; ko te huruhuru anake i maroke, ā, he tōmairangi i te whenua katoa.
JDG 7:1 Nā, ka maranga wawe a Ierupāra, arā a Kiriona, rātou ko tōna nuinga katoa, ā, noho ana i te puna o Haroro; ā, i te taha ki te raki o rātou te puni o Miriana, i te puke o More, i te raorao.
JDG 7:2 Nā, ka mea a Ihowā ki a Kiriona, “He nui rawa te iwi i a koe nei hei hoatutanga māku i ngā Miriani ki ō rātou ringa, kei whakapehapeha a Īharaira ki ahau, kei mea, ‘Nā tōku ringa ake ahau i whakaora.’
JDG 7:3 Nā, tēnā, karanga ki ngā taringa o te iwi, mea atu, ‘Ki te wehi, ki te pāwera tētahi, hoki atu, hohoro te haere atu i Maunga Kireara.’ ” Nā, e rua tekau mā rua mano o te iwi i hoki; ā, mahue iho, kotahi tekau mano.
JDG 7:4 I mea anō a Ihowā ki a Kiriona, “He nui rawa anō te iwi nā; kawea rātou ki raro, ki te wai, ā, ko ahau hei kaiwhakamātautau māu i a rātou ki reira; ā, ko tāku e mea ai ki a koe, ‘Me haere tahi tēnei i a koe; ko ia e haere tahi i a koe,’ ā, ko tāku e mea ai ki a koe, ‘E kore tēnei e haere tahi i a koe,’ kaua tēnā e haere.”
JDG 7:5 Nā, ko tāna kawenga i te iwi ki raro, ki te wai, ā, ka mea a Ihowā ki a Kiriona, “Ko te hunga katoa e mitikia ai te wai ki ō rātou arero, pērā me te kurī e miti nei, me whakatū rātou ki tahaki me te hunga katoa anō e tūturi ana ki te inu.”
JDG 7:6 Ā, ko te tokomaha o te hunga i mitimiti, me te pā anō o ō rātou ringa ki ō rātou māngai, e toru rau tāngata; i tūturi ia te nuinga katoa o te iwi ki te inu i te wai.
JDG 7:7 Nā, ka mea a Ihowā ki a Kiriona, “Mā ngā rau tāngata e toru i mitimiti rā e whakaora ai ahau i a koutou, e hoatu ai hoki ngā Miriani ki tōu ringa, ā, kia haere te iwi katoa tērā, tērā, ki tōna wāhi.”
JDG 7:8 Nā, ka mauria e te iwi he ō ki ō rātou ringa, me ā rātou tētere; ko te nuinga ia o Īharaira i tonoa e ia ki tōna tēneti, ki tōna tēneti, ā, puritia ana aua tāngata e toru rā. Nā, i raro i a ia te puni o Miriana, i te raorao.
JDG 7:9 Nā, i taua pō anō ka mea a Ihowā ki a ia, “Whakatika, haere ki raro, ki te puni rā, kua hoatu hoki e ahau ki tōu ringa.
JDG 7:10 Ā, ki te wehi koe ki te haere ki raro, haere kōrua ko Pura, ko tāu tangata, ki raro ki te puni.
JDG 7:11 Ā, ka rongo koe ki ā rātou kōrero, muri iho ka māia ōu ringa, ā, ka haere koe ki raro, ki te puni.” Nā, ko tō rāua haerenga atu ko tāna tangata, ko Pura, ki te hiku o ngā matua o te puni.
JDG 7:12 Ā, e takoto haere ana i te raorao ngā Miriani, rātou ko ngā Amareki, me ngā tamariki katoa o te rāwhiti, kei te māwhitiwhiti te tokomaha; me ā rātou kāmera, kāhore e taea te tatau; rite tahi ki te onepū i te taha o te moana te tokomaha.
JDG 7:13 Ā, nō te taenga atu o Kiriona, nā, e kōrero ana tētahi i te moe ki tōna hoa, e mea ana, “Nanā, moe iho ahau, he keke taro pāre e takahuri mai ana ki te puni o Miriana. Nā, kua tae mai ki te tēneti; kua āki atu; nā, kua hinga, kua huri kōaro, ā, takoto ana te tēneti.”
JDG 7:14 Nā, ka utu tōna hoa, ka mea, “Ehara tēnā i te mea kē atu i te hoari a Kiriona tama a Ioaha, he tangata nō Īharaira; kua hoatu e te Atua a Miriana me te ope katoa ki tōna ringa.”
JDG 7:15 Ā, i te rongonga o Kiriona i te kōrerotanga o te moe, i tōna tikanga, nā, ka koropiko ia, ā, hoki ana ki te puni o Īharaira, ka mea, “Whakatika, kua hōmai hoki e te Atua te ope o Miriana ki ō koutou ringa.”
JDG 7:16 Kātahi ka wehea e ia ngā tāngata e toru rau, kia toru ngā matua, ā, whakawhiwhia ana e ia ngā ringa o rātou katoa ki te tētere, ki te oko tahanga, ki te rama i roto i te oko.
JDG 7:17 I mea anō ia ki a rātou, “Me titiro mai ki ahau, ā, kia rite tā koutou ki tāku; nā, e tae ahau ki te wāhi i waho rawa o te puni, ko tāku e mea ai, kia pērā hoki koutou.
JDG 7:18 Ka whakatangi ahau i te tētere, mātou ko ōku hoa katoa, me whakatangi hoki koutou i ngā tētere i ngā taha katoa o te puni, me te karanga anō, ‘Ko te hoari a Ihowā, a Kiriona!’ ”
JDG 7:19 Nā, ka tae a Kiriona me te rau tāngata i a ia ki te wāhi i waho rawa o te puni, i te tīmatanga o tō waenga mataaratanga, i te mea kātahi anō ka whakatūria atu ngā kaimataara. Nā, whakatangihia ana e rātou ngā tētere, ā, wāhia iho ngā oko i ō rātou ringa.
JDG 7:20 Ā, whakatangihia ana hoki ngā tētere e ngā matua e toru, wāhia iho ngā oko, i puritia anō ngā rama ki ō rātou ringa mauī, me ngā tētere ki ō rātou ringa matau whakatangi ai; me tā rātou karanga hoki, “Ko te hoari a Ihowā, a Kiriona.”
JDG 7:21 Nā, tū ana rātou i tōna tūranga, i tōna tūranga, taiāwhio noa te puni; ā, ka rere katoa te puni; ā, ko tō rātou hāmamatanga, nā, ko te whatinga.
JDG 7:22 I whakatangihia hoki e rātou ngā tētere e toru rau, ā, meinga ana e Ihowā kia anga te hoari a tēnei tangata, a tēnei tangata, ki tōna hoa, ki tōna hoa, ki te ope katoa anō hoki; ā, ka whati te ope tae noa ki Petehita e ahu atu ana ki Tererara, tae noa ki te rohe o Āperemehora, e tata ana ki Tapata.
JDG 7:23 Kātahi ka huihuia ngā tāngata o Īharaira, i roto i a Napatari, i a Āhera, i a Mānahi katoa, ā, whāia ana a Miriana e rātou.
JDG 7:24 Ā, i tono karere a Kiriona, puta noa i te whenua pukepuke katoa o Ēparaima hei mea, “Haere mai ki raro ki te whawhai ki a Miriana; tangohia hoki ngā wai i mua i a rātou, ā puta noa ki Petepara ki Horano.” Nā, ka huihui ngā tāngata katoa o Ēparaima, ā, tangohia ana ngā wai, ā puta noa ki Petepara ki Horano.
JDG 7:25 Ā, tokorua ngā rangatira o Miriana i mau i a rātou, ko Orepe rāua ko Teepe; ā, patua iho e rātou a Orepe ki te kāmaka a Orepe, i patua hoki a Teepe ki te poka wāina a Teepe, ā, whāia ana e rātou a Miriana, ā, kawea ana e rātou ngā mātenga o Orepe rāua ko Teepe ki a Kiriona ki tāwāhi o Horano.
JDG 8:1 Nā, ka mea ki a ia ngā tāngata o Ēparaima, “He aha tēnei mea i mea nei koe ki a mātou, tē karangatia mātou i tōu haerenga atu ki te whawhai ki a Miriana?” Nā, nui atu tā rātou ngangau ki a ia.
JDG 8:2 Nā, ka mea ia ki a rātou, “Ko tēhea mahi āku ināianei hei rite mō tā koutou? He teka ianei pai atu te hamunga wāina a Ēparaima i te whakinga katoa a Apiētere?
JDG 8:3 I hōmai e te Atua ki ō koutou ringa ngā rangatira o Miriana, a Orepe rāua ko Teepe; ā, he aha te mea i taea e ahau hei rite mō tā koutou?” Kātahi ka iti haere tō rātou riri ki a ia i tāna kōrerotanga i taua kupu.
JDG 8:4 Nā, kua tae a Kiriona ki Horano, kua whiti, rātou tahi ko āna tāngata e toru rau; e ruha ana, otiia me te whai tonu.
JDG 8:5 Nā, ka mea ia ki ngā tāngata o Hukota, “Hōmai ētahi rohi taro mā te hunga e haere tahi nei mātou, e hemo ana hoki rātou, e whai ana hoki ahau i a Tepa rāua ko Taramuna i ngā kīngi o Miriana.”
JDG 8:6 Nā, ka mea ngā rangatira o Hukota, “Kei roto koia i tōu ringa ngā ringa o Tepa rāua ko Taramuna, e hoatu ai e mātou he taro mā tōu ope?”
JDG 8:7 Nā, ka mea a Kiriona, “Mō reira kia hōmai e Ihowā a Tepa rāua ko Taramuna ki tōku ringa, ka haehaea e ahau ō koutou kikokiko ki ngā tātarāmoa o te koraha, ki ngā tūmatakuru.”
JDG 8:8 Nā, ka haere atu ia i reira ki Penuere, ā, ka kōrero pērā anō ki a rātou; heoi, rite tonu ki tā ngā tāngata o Hukota i whakahoki ai tā ngā tāngata o Penuere i whakahoki ai ki a ia.
JDG 8:9 Nā, ka kōrero anō hoki ia ki ngā tāngata o Penuere, ka mea, “Ka hoki mai ahau i runga i te pai, ka wāhia e ahau tēnei pourewa.”
JDG 8:10 Nā, i Karakoro a Tepa rāua ko Taramuna, me ō rāua ope hoki, me te mea tekau mā rima ngā mano, ko te hunga katoa i mahue o te ope katoa o ngā tāngata o te rāwhiti. I hinga hoki o te hunga mau hoari, kotahi rau e rua tekau ngā mano.
JDG 8:11 Nā, ka haere ki runga a Kiriona nā te huarahi o te hunga noho tēneti, nā te rāwhiti o Nopaha, o Iokopeha, ā, patua iho e ia te ope; kua tau hoki te ope.
JDG 8:12 Nā, ka rere a Tepa rāua ko Taramuna, ā, ka whāia e ia, ka mau i a ia ngā kīngi tokorua o Miriana, a Tepa rāua ko Taramuna, ā, whati ana te ope katoa.
JDG 8:13 Ā, i hoki mai a Kiriona tama a Ioaha i te whawhai i te pikitanga atu o Herehe.
JDG 8:14 Ā, hopukia ana e ia tētahi taitama o ngā tāngata o Hukota, ā, uia ana e ia ki a ia; nā, ka tuhituhia e tērā ngā rangatira o Hukota me ngā kaumātua anō o reira, e whitu tekau mā whitu ngā tāngata.
JDG 8:15 Nā, ka tae atu ia ki ngā tāngata o Hukota, ka mea, “Tēnei a Tepa rāua ko Taramuna, i whākorekore rā koutou ki ahau, i mea rā, ‘Kei tōu ringa rānei ngā ringa o Tepa rāua ko Taramuna e hoatu ai e mātou he taro mā āu tāngata e hemo rā?’ ”
JDG 8:16 Nā, ka mau ia ki ngā kaumātua o te pā, ki ngā tātarāmoa hoki o te koraha, ki ngā tūmatakuru, ā, whakaakona ana ki ēnā ngā tāngata o Hukota.
JDG 8:17 I wāhia iho hoki e ia te pourewa o Penuere, ā, patua iho ngā tāngata o taua pā.
JDG 8:18 Kātahi ia ka mea ki a Tepa rāua ko Taramuna, “He tangata pēhea ērā i patua rā e kōrua ki Taporo?” Ka mea rāua, “Ko koe, ko rātou; rite tonu ki tō ngā tama a te kīngi te āhua o tēnei, o tēnei o rātou.”
JDG 8:19 Nā, ka mea ia, “Ko ōku tēina rātou, ko ngā tama a tōku whaea; e ora ana a Ihowā, me i whakaorangia ērā e kōrua, kīhai ahau i patu i a kōrua.”
JDG 8:20 Ā, ka mea ia ki tāna mātāmua, ki a Iētere, “Whakatika, patua rāua!” Heoi, kīhai taua tamaiti i unu i tāna hoari, i te wehi; he tamariki hoki.
JDG 8:21 Nā, ka mea a Tepa rāua ko Taramuna, “Whakatika ko koe, ka rere ki runga i a māua; he tangata tonu hoki, pērā anō tōna kaha.” Kātahi ka whakatika a Kiriona, ā, patua iho a Tepa rāua ko Taramuna, tangohia ana hoki e ia ngā heitiki i ngā kakī o ō rāua kāmera.
JDG 8:22 Kātahi ka mea ngā tāngata o Īharaira ki a Kiriona, “Hei kīngi koe mō mātou, a koe, tāu tama, te tama hoki a tāu tama; nāu hoki mātou i ora ai i te ringa o Miriana.”
JDG 8:23 Nā, ka mea a Kiriona ki a rātou, “Kaua ahau e waiho hei kīngi mō koutou, kaua anō tāku tama e waiho hei kīngi mō koutou. Ko Ihowā hei kīngi mō koutou.”
JDG 8:24 I mea anō a Kiriona ki a rātou, “He hiahia tōku ki te tono i tētahi mea i a koutou, kia hōmai ki ahau e tēnā, e tēnā o koutou, ngā whakakai o tāna taonga parakete.” (He whakakai kōura hoki a rātou, nō ngā Ihimaeri hoki rātou.)
JDG 8:25 Nā, ka whakahoki rātou, “Āe, me hoatu noa e mātou.” Nā, ka whārikitia e rātou tētahi kākahu, ā, makā ana ki runga e tērā, e tērā, ngā whakakai o tāna taonga parakete.
JDG 8:26 Ā, kotahi mano e whitu rau ngā hekere kōura te taimaha o ngā whakakai kōura i tonoa e ia; me ngā heitiki, me ngā poroporo, me ngā kākahu pāpura o ngā kīngi o Miriana, me ngā mekameka hoki o ngā kakī o ngā kāmera.
JDG 8:27 Nā, ka hangā e Kiriona hei epora, ā, ka waiho ki tōna pā ki Opora. Nā, ka whai a Īharaira katoa ki reira pūremu ai ki taua mea; ā, ka waiho hei rore mō Kiriona rātou ko tōna whare.
JDG 8:28 Heoi, hinga ana a Miriana i mua i ngā tamariki a Īharaira, kīhai anō i ara ō rātou mātenga i muri iho. Nā, ka okioki te whenua, e whā tekau ngā tau, i ngā rā o Kiriona.
JDG 8:29 Nā, ka haere a Ierupāra tama a Ioaha, ā, ka noho ki tōna whare.
JDG 8:30 Ā, e whitu tekau ngā tama a Kiriona, he mea nā tōna tinana; he tokomaha hoki āna wāhine.
JDG 8:31 Ā, ko tāna wahine iti i Hekeme, i whānau anō hoki tā rāua tama; ā, huaina iho e ia tōna ingoa ko Apīmereke.
JDG 8:32 Nā, ka mate a Kiriona, tama a Ioaha, i a ia ka tino koroheke; ā, tanumia ana ki te rua o Ioaha, o tōna pāpā, ki Opora o ngā Apiēteri.
JDG 8:33 Ā, nō te matenga o Kiriona, nā, ka hoki ngā tama a Īharaira, ka pūremu ki ngā Paara; ā, ka waiho a Paara-Periti hei atua mō rātou.
JDG 8:34 Kīhai anō hoki ngā tamariki a Īharaira i mahara ki a Ihowā, ki tō rātou Atua, i whakaora nei i a rātou i te ringa o ō rātou hoariri katoa i tētahi taha, i tētahi taha.
JDG 8:35 Kīhai anō hoki i puta tō rātou aroha ki te whare o Ierupāra, arā o Kiriona; kīhai i rite ki āna mahi pai katoa ki a Īharaira.
JDG 9:1 Nā, ka haere a Apīmereke tama a Ierupāra ki Hekeme ki ngā tungāne o tōna whaea, ā, ka kōrero ki a rātou, ki te hapū katoa anō hoki o te whare o te pāpā o tōna whaea, ka mea,
JDG 9:2 “Tēnā, kī atu ki ngā taringa o ngā tāngata katoa o Hekeme, ‘Ko tēhea te mea pai ki a koutou, ko ngā tāngata e whitu tekau, ko ngā tama katoa a Ierupāra, hei kīngi mō koutou, kia kotahi rānei te tangata hei kīngi mō koutou?’ Kia mahara hoki he wheua, ahau nō koutou, he kikokiko nō koutou.”
JDG 9:3 Nā, ka kōrerotia e ngā tungāne o tōna whaea ēnei kupu katoa mōna ki ngā taringa o ngā tāngata katoa o Hekeme, ā, ka anga ō rātou ngākau ki te aru i a Apīmereke; i mea hoki rātou, “Ko tō tātou teina ia.”
JDG 9:4 Nā, ka hōmai e rātou ki a ia ētahi hiriwa, e whitu tekau, i roto i te whare o Paara-Periti, ā, ka utua e Apīmereke ki aua mea ētahi tāngata wairangi, he hunga hīkaka, ā, aru ana rātou i a ia.
JDG 9:5 Nā, ka haere ia ki te whare o tōna pāpā ki Opora, ā, patua iho e ia ōna tuākana, ōna tēina, ngā tama a Ierupāra, e whitu tekau ngā tāngata, i runga i te kōhatu kotahi; otiia i mahue a Iotama te tama whakaotinga a Ierupāra; i piri hoki ia.
JDG 9:6 Nā, ka huihui ngā tāngata katoa o Hekeme, rātou ko te whare katoa o Miro, ā, ka haere, ka mea i a Apīmereke hei kīngi, ki te oki i te pou i Hekeme.
JDG 9:7 Ā, ka kōrerotia ki a Iotama, nā, ka haere ia, ā, tū ana i runga i te tihi o Maunga Keritimi; nā, ka ara tōna reo, ka karanga, ka mea ki a rātou, “Whakarongo mai ki ahau, e ngā tāngata o Hekeme, kia whakarongo ai te Atua ki a koutou.
JDG 9:8 I haere ngā rākau ki te whakawahi i tētahi kīngi mō rātou, ā, ka mea ki te ōriwa, ‘Ko koe hei kīngi mō mātou.’
JDG 9:9 “Nā, ka mea te ōriwa ki a rātou, ‘Kia whakarērea koia e ahau tōku mōmonatanga, tāku mea i whai korōria ai te Atua, te tangata, ā, kia haere ki runga i ngā rākau tīwhaiwhai ai?’
JDG 9:10 “Nā, ka mea ngā rākau ki te piki, ‘Haere mai hei kīngi mō mātou.’
JDG 9:11 “Anō rā ko te piki ki a rātou, ‘Kia whakarērea koia e ahau tōku reka me ōku hua pai, ā, kia haere ki runga i ngā rākau tīwhaiwhai ai?’
JDG 9:12 “Kātahi ka mea ngā rākau ki te wāina, ‘Haere mai koe hei kīngi mō mātou.’
JDG 9:13 “Nā, ka mea te wāina ki a rātou, ‘Kia whakarērea koia e ahau tōku wāina e whakahari nei i te Atua, i te tangata, ā, kia haere ki runga i ngā rākau tīwhaiwhai ai?’
JDG 9:14 “Nā, ka mea ngā rākau katoa ki te taraheke, ‘Haere mai hei kīngi mō mātou.’
JDG 9:15 “Nā, ka mea te taraheke ki ngā rākau, ‘Ki te mea he pono tā koutou whakawahi i ahau hei kīngi mō koutou, haere mai ki raro ki tōku taumarumarutanga iho okioki ai, ā, ki te kāhore, kia puta atu he ahi i roto i te taraheke hei kai i ngā hīta o Repanōna.’
JDG 9:16 “Nā, ki te mea he pono, he tika, tā koutou mahi, i a koutou i mea nei i a Apīmereke hei kīngi, ki te pai hoki tā koutou mahi ki a Ierupāra rātou ko tōna whare, ki te mea hoki i rite ki ngā mahi a ōna ringa tā koutou i mea ai ki a ia –
JDG 9:17 nā tōku pāpā hoki i whawhai ā koutou whawhai, ā, tāruke ana ki te mate; ā, ora ake koutou i te ringa o Miriana.
JDG 9:18 Nā, kua whakatika nei koutou i tēnei rā ki te whare o tōku pāpā, ā, patua iho āna tama, e whitu tekau tāngata, ki runga ki te kōhatu kotahi, ā, meinga ana a Apīmereke, tama a tāna pononga wahine hei kīngi mō ngā tāngata o Hekeme, nō te mea ko tō koutou teina ia –
JDG 9:19 nā, ki te mea he pono, he tika, tā koutou i mea ai ki a Ierupāra rātou ko tōna whare i tēnei rā, kia hari ki a Apīmereke, kia hari hoki ia ki a koutou.
JDG 9:20 Ki te kāhore ia kia puta he ahi i a Apīmereke hei kai i ngā tāngata o Hekeme, rātou ko te whare o Miro; kia puta hoki he ahi i ngā tāngata o Hekeme, i te whare hoki o Miro, hei kai i a Apīmereke.”
JDG 9:21 Nā, ko te rerenga i rere ai a Iotama, haere ana ki Pēre, ā, noho ana i reira i te wehi o tōna tuakana, o Apīmereke.
JDG 9:22 Ā, e toru ngā tau o Apīmereke e kāwana ana i a Īharaira.
JDG 9:23 Nā, ka ungā e te Atua he wairua kino hei wehe i a Apīmereke rātou ko ngā tāngata o Hekeme; ā, ka mahi tinihanga ngā tāngata o Hekeme ki a Apīmereke.
JDG 9:24 He mea mō te tūkinotanga i ngā tama e whitu tekau a Ierupāra kia eke mai, kia utaina ō rātou toto ki runga ki tō rātou teina, ki a Apīmereke, nāna nei rātou i patu; ki runga anō hoki i ngā tāngata o Hekeme nāna nei i whakakaha ōna ringa i patua ai ōna tuākana, ōna tēina.
JDG 9:25 Nā, ka whakanohoia e ngā tāngata o Hekeme he kaiwhanga mōna ki ngā tihi o ngā maunga, ā, pāhuatia ana e rātou te hunga katoa i puta ki a rātou i te ara, ā, ka kōrerotia ki a Apīmereke.
JDG 9:26 Nā, ka haere mai a Kāra tama a Ēpere rātou ko ōna tēina, ā, ka tae atu ki Hekeme; nā, ka whakawhirinaki ngā tāngata o Hekeme ki a ia.
JDG 9:27 Nā, ka haere rātou ki te māra, ā, whakia ana ngā hua o ā rātou māra wāina, takahia ana. Nā, ka tuku hākari rātou, ā, ka haere ki te whare o tō rātou atua, ka kai, ka inu, ā, kohukohua ana e rātou a Apīmereke.
JDG 9:28 I mea anō a Kāra tama a Ēpere, “Ko wai a Apīmereke, ko wai hoki a Hekeme e mahi ai tātou ki a ia? Ehara ianei ia i te tama a Ierupāra? Ko Tepūru hoki tāna kaiwhakahauhau? Me mahi koutou ki ngā tāngata a Hāmora, a te pāpā o Hekeme; engari he aha tātou ka mahi ai ki a ia?
JDG 9:29 Nā, me i pai te Atua ki tēnei iwi ki raro ki tōku ringa! Inā, kua peia e ahau a Apīmereke. Kātahi ia ka mea ki a Apīmereke, ‘Whakanuia tōu ope, puta mai hoki.’ ”
JDG 9:30 Ā, nō te rongonga o Tepūru rangatira o te pā ki ngā kupu a Kāra tama a Ēpere, ka mura tōna riri.
JDG 9:31 Nā, ka tono puku ia i ētahi tāngata ki a Apīmereke hei mea, “Ko Kāra tama a Ēpere tēnei, rātou ko ōna tēina, kua tae mai ki Hekeme; ā, kei te whakatūtehu rātou i te pā kia tū atu ki a koe.
JDG 9:32 Nā reira whakatika i te pō, ā, koe me āu tāngata, ka takoto tauwhanga ai i te pārae.
JDG 9:33 Ā, ka whiti te rā i te ata, ka maranga wawe koe, ka huaki ki te pā; ā, ka puta ia, rātou ko āna tāngata ki te whawhai ki a koe, māu e mea ki a ia tāu e kite ai.”
JDG 9:34 Nā, ko te whakatikanga ake o Apīmereke rātou ko āna tāngata katoa i te pō, ā, e whā ō rātou matua i takoto tauwhanga ai mō Hekeme.
JDG 9:35 Ā, ka puta atu a Kāra tama a Ēpere, ka tū i te tomokanga ki te kūwaha o te pā; nā, kua whakatika ake a Apīmereke rātou ko āna tāngata i te pehipehi.
JDG 9:36 Ā, i te kitenga o Kāra i aua tāngata, ka mea ia ki a Tepūru, “Nanā, he tangata e heke mai rā i ngā tihi o ngā maunga.” Nā, ka mea a Tepūru ki a ia, “Ko te ata o ngā maunga tāu e kite nā, me te mea he tangata.”
JDG 9:37 Nā, ka kōrero anō a Kāra, ka mea, “Nanā, titiro ki te hunga e heke mai rā mā waenganui o te whenua; kotahi hoki tērā matua e haere mai rā i te ara i te oki o Meonenimi.”
JDG 9:38 Nā, ka mea a Tepūru ki a ia, “Kei hea rā tōu māngai i mea rā koe, ‘Ko wai a Apīmereke, e mahi ai tātou ki a ia?’ Ehara ianei tēnei i te iwi i whakahāweatia rā e koe? Nā, haere atu ināianei ki te whawhai ki a ia.”
JDG 9:39 Nā, ka haere a Kāra i te aroaro o ngā tāngata o Hekeme ki te whawhai ki a Apīmereke.
JDG 9:40 Nā, ka whāia ia e Apīmereke, ā, rere ana ia i tōna aroaro, ā, he tokomaha i hinga, i patua, ā te tomokanga rā anō o te kūwaha.
JDG 9:41 Nā, ka noho a Apīmereke ki Aruma; ā, ka peia a Kāra rātou ko ōna tēina e Tepūru, kei noho ki Hekeme.
JDG 9:42 Ā, i te aonga ake ka puta atu ngā tāngata ki te pārae; ā, ka kōrerotia e rātou ki a Apīmereke.
JDG 9:43 Nā, ka mau ia ki ngā tāngata, ā, wehea ana e ia kia toru ngā matua, ā, ka tauwhanga i te pārae. Ā, ka kite ia, nā, kua puta mai te iwi i roto i te pā, ka whakatika ia ki a rātou, ā, patua iho.
JDG 9:44 I kōkiri hoki a Apīmereke rātou ko āna ngohi, ā, tū ana i te tomokanga ki te kūwaha o te pā; ā, kōkiri ana ngā ngohi e rua ki te hunga katoa i te pārae, ā, patua iho.
JDG 9:45 Ā, whakapaua ana e Apīmereke taua rā ki te whawhai ki te pā, ā, horo ana te pā i a ia, patua iho hoki ngā tāngata katoa i roto; nā, wāhia ana e ia te pā, ruia iho ki te tote.
JDG 9:46 Ā, nō te rongonga o ngā tāngata katoa o te pourewa o Hekeme, ka haere rātou ki roto ki te taumaihi o te whare o te atua, o Periti.
JDG 9:47 Ā, ka kōrerotia ki a Apīmereke kua huihui katoa ngā tāngata o te pourewa o Hekeme.
JDG 9:48 Kātahi ka piki atu a Apīmereke ki Maunga Taramono, rātou ko āna tāngata katoa; i mauria atu anō i Apīmereke he toki i tōna ringa. Nā, ka tapahia e ia he rākau, ā, hāpainga ana, amohia ana e ia i runga i ōna pokohiwi, me te mea anō ki āna tāngata, “Ko tā koutou i kite nei e meatia ana e ahau, kia hohoro tā koutou pērā.”
JDG 9:49 Nā, ka tapahia he peka e tēnei, e tēnei o te iwi katoa, ā, haere ana ki te whai i a Apīmereke. Nā, ka whakatakotoria e rātou ki te taha o te taumaihi, ā, tahuna ana te taumaihi ki te ahi ki runga ki a rātou. Nā, ka mate anō hoki ngā tāngata katoa o te pourewa o Hekeme; ki te whakaaro iho kotahi mano ngā tāne, ngā wāhine.
JDG 9:50 Kātahi ka haere a Apīmereke ki Tepehe, ā, whakapaea ana a Tepehe e ia, ā, horo ana i a ia.
JDG 9:51 Nā, i waenganui o te pā he pourewa kaha, ā, ka rere ki reira ngā tāne katoa, me ngā wāhine, ngā tāngata katoa o te pā, ā, tūtakina ana mai rātou ki roto, ā, piki ana rātou ki runga ki te tuanui o te pourewa.
JDG 9:52 Nā, ko te haerenga atu o Apīmereke ki te pourewa, tauria ana e ia, ka whakatata hoki ki te kūwaha o te pourewa, he tahu ki te ahi.
JDG 9:53 Ko te tino makanga iho a tētahi wahine i tō runga kōhatu mira ki runga ki te mātenga o Apīmereke, nā, ngawhā iho tōna angaanga.
JDG 9:54 Nā, hohoro tonu tāna karanga ki te tangata i mau i āna patu, ka mea ki a ia, “Unuhia tāu hoari, whakamatea hoki ahau, kei kōrerotia ahau, ‘He wahine nāna ia i patu.’ ” Nā, werohia ana ia e tāna tangata, ā, ka mate.
JDG 9:55 Ā, nō te kitenga o ngā tāngata o Īharaira kua mate a Apīmereke, ka haere rātou ki tōna wāhi, ki tōna wāhi.
JDG 9:56 Nā, i pēnei te whakautu a te Atua i te kino a Apīmereke i meatia e ia ki tōna pāpā, i a ia i patu ai i ōna tuākana, i ōna tēina, e whitu tekau;
JDG 9:57 me te kino hoki a ngā tāngata o Hekeme, i whakautua katoatia e te Atua ki runga ki ō rātou mātenga; ā, ka tau iho ki a rātou te kanga a Iotama tama a Ierupāra.
JDG 10:1 Ā, i muri i a Apīmereke, ka whakatika ake hei kaiwhakaora mō Īharaira ko Tora tama a Pua tama a Roro, he tangata nō Ihākara; ā, i noho ia ki Hāmiri ki te whenua pukepuke o Ēparaima.
JDG 10:2 Ā, e rua tekau mā toru ngā tau i whakarite ai ia mō Īharaira, nā, ka mate, ā, tanumia ana ki Hāmiri.
JDG 10:3 Ā, i muri i a ia ka whakatika ko Haira Kireari, e rua tekau mā rua ngā tau i whakarite ai ia mō Īharaira.
JDG 10:4 Nā, e toru tekau āna tama, e toru tekau anō ngā kūao kāihe i eke ai rātou, e toru tekau hoki ō rātou pā, e huaina nei ko Hawotohaira, ā tae noa ki tēnei rā; kei te whenua o Kireara.
JDG 10:5 Nā, ka mate a Haira, ā, ka tanumia ki Kamono.
JDG 10:6 Nā, ka mahi kino anō ngā tamariki a Īharaira ki tā Ihowā titiro, i mahi ki ngā Paara, ki te Ahataroto, ki ngā atua o Hīria, ki ngā atua o Hairona ki ngā atua o Moapa, ki ngā atua o ngā tamariki a Āmona, ki ngā atua o ngā Pirihitini; whakarērea ake e rātou a Ihowā, kīhai anō hoki i mahi ki a ia.
JDG 10:7 Nā, ka mura te riri o Ihowā ki a Īharaira, ā, hokona atu ana rātou e ia ki te ringa o ngā Pirihitini, ki te ringa hoki o ngā tamariki a Āmona.
JDG 10:8 Ā, i taua tau i kurua, i tūkinotia e rātou ngā tamariki a Īharaira; ā, tekau mā waru ngā tau i tūkinotia ai ngā tamariki katoa a Īharaira i tāwāhi o Horano, i te whenua o ngā Amori, i Kireara.
JDG 10:9 Nā, ka whiti atu ngā tamariki a Āmona i Horano ki te whawhai anō hoki ki a Hūrā, ki a Pineamine, ki te whare hoki o Ēparaima, ā, taea rawatia iho te raru o Īharaira.
JDG 10:10 Kātahi ka karanga ngā tamariki a Īharaira ki a Ihowā, ka mea, “Kua hara mātou ki a koe, kua whakarērea hoki e mātou tō mātou Atua, kua mahi hoki ki ngā Paara.”
JDG 10:11 Ā, ka mea a Ihowā ki ngā tamariki a Īharaira, “Kāhore ianei koutou i whakaorangia e ahau i ngā Īhipiana, i ngā Amori, i ngā tamariki a Āmona, i ngā Pirihitini?
JDG 10:12 I tūkino anō hoki ngā Haironi, ngā Amareki, rātou ko ngā Maoni i a koutou, ā, nō tā koutou tangihanga, ki ahau, ka ora koutou i ahau i roto i tō rātou ringa.
JDG 10:13 Heoi, whakarērea ana ahau e koutou, ā, mahi ana koutou ki ngā atua kē; koia ahau tē whakaora ai anō i a koutou.
JDG 10:14 Haere, karanga atu ki ā koutou atua i whiriwhiri ai; mā rātou koutou e whakaora i te wā o tō koutou hēmanawa.”
JDG 10:15 Nā, ka mea ngā tamariki a Īharaira ki a Ihowā, “Kua hara mātou, māu e mea ki a mātou ngā mea katoa e pai ana ki tāu titiro; otiia whakaorangia mātou ināianei.”
JDG 10:16 Nā, ka whakarērea e rātou ngā atua kē i roto i a rātou, ā, ka mahi ki a Ihowā; nā, ka kōingo tōna ngākau ki a Īharaira i mate nei.
JDG 10:17 Nā, ka huihuia ngā tamariki a Āmona, ā, ka noho ki Kireara, i huihui anō ngā tamariki a Īharaira, ā, noho ana i Mihipa.
JDG 10:18 Nā, ka mea te iwi rātou ko ngā rangatira o Kireara tētahi ki tētahi, “Ko wai te tangata hei tīmata i te whawhai ki ngā tamariki a Āmona? Ka waiho ia hei upoko mō ngā tāngata katoa o Kireara.”
JDG 11:1 Nā, he tangata mārohirohi a Iepeta Kireari, he tama nā tētahi wahine kairau; ā, nā Kireara hoki a Iepeta.
JDG 11:2 Ā, i whānau ētahi tama mā Kireara rāua ko tāna wahine; ā, nō te kaumātuatanga ake o ngā tama a tāna wahine, ka peia e rātou a Iepeta; i mea ki a ia, “Kāhore he tukunga iho mōu i te whare o tō tātou pāpā; he tama hoki koe nā te wahine kē.”
JDG 11:3 Nā, ka rere a Iepeta i ōna tēina, ā, noho ana i te whenua o Topo; nā, ka huihui ētahi tāngata wairangi ki a Iepeta, ā, haere tahi ana rātou.
JDG 11:4 Ā roa iho, nā, ka whawhai ngā tamariki a Āmona ki a Īharaira.
JDG 11:5 Ā, i te whawhaitanga a ngā tamariki a Āmona ki a Īharaira, nā, ka haere ngā kaumātua o Kireara ki te tiki i a Iepeta i te whenua o Topo.
JDG 11:6 Ā, ka mea ki a Iepeta, “Haere mai, ā, ko koe hei rangatira hōia mō mātou, kia whawhai ai tātou ki ngā tamariki a Āmona.”
JDG 11:7 Nā, ka mea a Iepeta ki ngā kaumātua o Kireara, “Kāhore ianei koutou i kino ki ahau, i pei i ahau i roto i te whare o tōku pāpā? Ā, he aha koutou i haere mai ai ki ahau i a koutou ka hēmanawa nei?”
JDG 11:8 Nā, ka mea ngā kaumātua o Kireara ki a Iepeta, “Koia mātou ka tahuri atu nei ki a koe ināianei, kia haere ai koe i a mātou ki te whawhai ki ngā tamariki a Āmona, ā, ko koe hei upoko mō mātou, mō ngā tāngata katoa hoki o Kireara.”
JDG 11:9 Nā, ka mea a Iepeta ki ngā kaumātua o Kireara, “Ki te whakahokia atu ahau e koutou ki te whawhai ki ngā tamariki a Āmona, ā, ka hōmai rātou e Ihowā ki ahau, tērā rānei ahau e waiho hei upoko mō koutou?”
JDG 11:10 Nā, ka mea ngā kaumātua o Kireara ki a Iepeta, “Ko Ihowā hei kaititiro i waenganui i a tātou; he pono e rite ki tāu kupu tā mātou e mea ai.”
JDG 11:11 Nā, ka haere tahi a Iepeta rātou ko ngā kaumātua o Kireara, ā, ka meinga ia e te iwi hei upoko, hei rangatira mō rātou; ā, ka kōrerotia e Iepeta āna kupu katoa ki te aroaro o Ihowā ki Mihipa.
JDG 11:12 Kātahi ka tono tāngata atu a Iepeta ki te kīngi o ngā tamariki a Āmona, hei mea, “He aha tāu i haere mai ai koe ki ahau, ki tōku whenua whawhai ai?”
JDG 11:13 Nā, ka mea te kīngi o ngā tamariki a Āmona ki ngā tāngata a Iepeta, “Nā Īharaira hoki i tango tōku whenua i tōna haerenga ake i Īhipa, i Aranona atu ā tae noa ki Iapoko, ki Horano; nā, āta whakahokia mai aua wāhi.”
JDG 11:14 Nā, ka tono tāngata anō a Iepeta ki te kīngi o ngā tamariki a Āmona;
JDG 11:15 hei mea ki a ia: “Ko te kupu tēnei a Iepeta: Kīhai i tangohia e Īharaira te whenua o Moapa, te whenua rānei o ngā tamariki a Āmona.
JDG 11:16 Engari, i tō Īharaira haerenga ake i Īhipa, ā, ka hāereerea te koraha ā tae noa ki te Moana Whero, ā, ka tae ki Karehe.
JDG 11:17 Nā, ka tono tāngata a Īharaira ki te kīngi o Ēroma, hei mea, ‘Tukua ahau kia tika atu mā tōu whenua’; nā, kīhai te kīngi o Ēroma i rongo. I tono anō ia ki te kīngi o Moapa; ā, kīhai tērā i pai. Nā, ka noho a Īharaira ki Karehe.
JDG 11:18 “Kātahi rātou ka haere puta noa i te koraha; taiāwhiotia ana e rātou te whenua o Ēroma, me te whenua o Moapa, ā, ka tae mai ki te taha ki te rāwhiti o te whenua o Moapa, ka noho ki tērā taha o Aranona, kīhai hoki i haere ki roto ki te rohe o Moapa; ko Aranona hoki te rohe o Moapa.
JDG 11:19 “Nā, ka tono tāngata a Īharaira ki a Hihona kīngi o ngā Amori, kīngi o Hehepona; ā, ka mea a Īharaira ki a ia, ‘Tukua mātou kia tika atu mā tōu whenua ki tōku wāhi.’
JDG 11:20 Heoi, kīhai a Hihona i tuku i a Īharaira kia tika mā tōna rohe; nā, huihuia ana e Hihona tōna iwi katoa, ā, noho ana ki Iahata; nā, ko tāna whawhaitanga ki a Īharaira.
JDG 11:21 “Nā, ka hōmai e Ihowā, e te Atua o Īharaira a Hihona me tōna iwi katoa ki te ringa o Īharaira; nā, patua iho rātou, ā, tangohia ana e Īharaira te whenua katoa o ngā Amori i noho ki taua whenua.
JDG 11:22 I tangohia hoki e rātou ngā rohe katoa o ngā Amori; i Aranona ki Iapoko, i te koraha ki Horano.
JDG 11:23 “Nā, kua peia nei e Ihowā, e te Atua o Īharaira ngā Amori i te aroaro o tāna iwi, o Īharaira, ā, me riro rānei i a koe?
JDG 11:24 E kore ianei koe e mau ki ngā wāhi i whakawhiwhia ki a koe e tōu atua, e Kemoho? Ā, ka riro mai hoki i a mātou tō te hunga e peia ana e Ihowā, e tō mātou Atua, i tō mātou aroaro.
JDG 11:25 “He nui ake rānei tōu pai i tō Pāraka tama a Tiporo kīngi o Moapa? I mea rānei ia ki te tohe ki a Īharaira, ki te whawhai rānei ki a rātou?
JDG 11:26 “I a Īharaira e noho ana i Hehepona, i ōna pā ririki, i Aroere hoki, i ōna pā ririki, i ngā pā katoa anō i ngā taha o Aranona, e toru rau ngā tau; he aha hoki tē tangohia ai e koutou i taua wā?
JDG 11:27 “Nā, kāhore ōku hara ki a koe; engari e hē ana tāu mahi ki ahau, tāu whawhai ki ahau; mā Ihowā, mā te kaiwhakawā e whakawā āianei ngā tamariki a Īharaira me ngā tamariki a Āmona.”
JDG 11:28 Heoi, kīhai i rongo te kīngi o ngā tamariki a Āmona ki ngā kupu a Iepeta i tukua atu ai ki a ia.
JDG 11:29 Nā, ka tau te Wairua o Ihowā ki runga ki a Iepeta, ā, ka haere ia puta noa i Kireara, i Mānahi, i haere hoki puta noa i Mihipe o Kireara, ā, haere ana i Mihipe o Kireara ki ngā tamariki a Āmona.
JDG 11:30 Nā, ka oatitia he oati e Iepeta ki a Ihowā; i mea ia: “Ki te tino hōmai e koe ngā tama a Āmona ki tōku ringa,
JDG 11:31 nā, ko te mea e puta mai ana i ngā tatau o tōku whare ki te whakatau i ahau, ina hoki ora mai ahau i ngā tama a Āmona, mā Ihowā tēnā, ka whakaekea anō e ahau hei tahunga tinana.”
JDG 11:32 Nā, ka haere a Iepeta ki ngā tamariki a Āmona ki te whawhai ki a rātou; ā, ka hōmai rātou e Ihowā ki tōna ringa.
JDG 11:33 Nā, tukitukia ana rātou e ia, i Aroere atu ā tae noa koe ki Miniti, e rua tekau ngā pā, ki te mānia anō i ngā māra wāina; he nui rawa te patunga. Nā, kua hinga ngā tamariki a Āmona i ngā tamariki a Īharaira.
JDG 11:34 Nā, ka haere a Iepeta ki tōna whare ki Mihipa, nā, ko te putanga mai o tāna tamāhine ki te whakatau i a ia, me te timipera, me te kanikani. Ko tāna huatahi ia; kāhore atu hoki āna tama, tamāhine rānei, ko ia anake.
JDG 11:35 Ā, nō tōna kitenga i a ia, nā, ka haea ōna kākahu, ka mea, “Auē, e tāku tamāhine! Kua pēhia rawatia ahau e koe ki raro, kei roto hoki koe i te hunga e raru ai ahau; kua puaki hoki tōku māngai ki a Ihowā, e kore anō e taea te hoki.”
JDG 11:36 Nā, ka mea tērā ki a ia, “E tōku pāpā, kua puaki nei tōu māngai ki a Ihowā, meatia ki ahau ngā mea i puta mai i tōu māngai, mō tā Ihowā tohenga i te utu mōu i ōu hoariri, i ngā tamariki a Āmona.”
JDG 11:37 I mea anō ia ki tōna pāpā, “Kia meatia tēnei mea ki ahau, waiho noa iho ahau, kia rua ngā marama, ā, ka piki ahau, ka heke i ngā maunga tangi ai ki tōku wāhinatanga, mātou ko ōku hoa.”
JDG 11:38 Anō rā ko ia, “Haere.” Nā, ka ungā atu ia e ia, kia rua ngā marama; heoi haere ana ia, rātou ko ōna hoa, ā, tangihia ana e ia tōna wāhinatanga i runga i ngā maunga.
JDG 11:39 Ā, nō te takanga o ngā marama e rua, nā, ka hoki ia ki tōna pāpā, ā, meatia ana e ia ki a ia tāna i oati ai; kīhai hoki taua kōtiro i mōhio ki te tāne. Nā, ka waiho hei tikanga i roto i a Īharaira,
JDG 11:40 kia haere ngā tamāhine a Īharaira i ia tau, i ia tau, ki te tangi i te kōtiro a Iepeta Kireari; e whā ngā rā i roto i te tau.
JDG 12:1 Nā, ka huihuia ngā tāngata o Ēparaima, ā, ka haere ki te raki, ka mea ki a Iepeta, “He aha koe i haere ai ki te whawhai ki ngā tamariki a Āmona, ā, kīhai i karanga i a mātou kia haere tahi tātou? Ka tahuna e mātou tōu whare i runga i a koe ki te ahi.”
JDG 12:2 Nā, ka mea a Iepeta ki a rātou, “He nui tā mātou whawhai ko tōku iwi ki ngā tamariki a Āmona; ā, i tāku karangatanga atu ki a koutou, kīhai koutou i whakaora i ahau i roto i tō rātou ringa.
JDG 12:3 Ā, nō tōku kitenga kīhai koutou i whakaora i ahau, whakamomori atu ana ahau ki te mate, ā, haere ana ki ngā tamariki a Āmona, nā, hōmai ana rātou e Ihowā ki tōku ringa; ā, he aha rā koutou i haere mai ai ki ahau ināianei, whawhai ai?”
JDG 12:4 Kātahi ka huihuia e Iepeta ngā tāngata katoa o Kireara, ā, ka whawhai ki a Ēparaima; ā, patua iho a Ēparaima e ngā tāngata o Kireara mō tā rātou kī, “He rerenga koutou, e ngā Kireari, nō Ēparaima, i roto i ngā Ēparaimi, i roto i ngā Mānahi.”
JDG 12:5 Nā, ka nohoia e ngā Kireari ngā whitinga mō ngā Ēparaimi i Horano, ā, i te meatanga a ngā rerenga o ngā Ēparaimi, “Kia whiti atu ahau,” nā, ka mea ngā tāngata o Kireara ki a ia, “Nō Ēparaima koe?” Ā, nō tāna kīanga, “Kāhore,”
JDG 12:6 kātahi rātou ka mea ki a ia, “Tēnā, whakahuatia, ‘Hiporete.’ ” Nā, ko tāna meatanga, “Iporete,” kāhore hoki i taea e ia te tikanga o te whakahua. Nā, hopukia ana ia e rātou, ā, patua iho ki ngā whitinga o Horano. Ā, e whā tekau mā rua mano o ngā Ēparaimi i hinga i taua wā.
JDG 12:7 Ā, e ono ngā tau i whakarite ai a Iepeta mō Īharaira. Nā, ka mate a Iepeta Kireari, ā, tanumia ana ki tētahi o ngā pā o Kireara.
JDG 12:8 Ā, i muri i a ia nā Ipitana i whakarite a Īharaira; nō Pēterehema ia.
JDG 12:9 Ā, e toru tekau āna tama, e toru tekau hoki āna tamāhine; ko ēnei i tonoa e ia ki waho, e toru tekau anō hoki ngā tamāhine i tangohia mai e ia i waho mā āna tama. Ā, e whitu ngā tau i whakarite ai ia mō Īharaira.
JDG 12:10 Nā, ka mate a Ipitana, ā, ka tanumia ki Pēterehema.
JDG 12:11 Ā, i muri i a ia nā Erono Hepuroni i whakarite a Īharaira; ā, kotahi tekau ngā tau i whakarite ai ia mō Īharaira.
JDG 12:12 Nā, ka mate a Erono Hepuroni, ā, tanumia ana ki Aitarona ki te whenua o Hepurona.
JDG 12:13 Ā muri iho i a ia, nā Aparono tama a Hirere o Piratono i whakarite a Īharaira.
JDG 12:14 Ā, e whā tekau āna tama, e toru tekau hoki ngā tama a āna tama; e whitu tekau ngā kūao kāihe i eke ai rātou; ā, e waru ngā tau i whakarite ai ia mō Īharaira.
JDG 12:15 Nā, ka mate a Aparono tama a Hirere o Piratono, ā, ka tanumia ki Piratono ki te whenua o Ēparaima, ki te whenua pukepuke o ngā Amareki.
JDG 13:1 Nā, ka mahi kino anō ngā tamariki a Īharaira i te tirohanga a Ihowā, ā, ka hoatu rātou e Ihowā ki te ringa o ngā Pirihitini, e whā tekau tau.
JDG 13:2 Nā, ko tētahi tangata o Toraha nō te hapū o ngā Rāni, tōna ingoa ko Manoa, he pākoko hoki tāna wahine, kāhore anō i whānau tamariki.
JDG 13:3 Nā, ka puta te anahera a Ihowā ki te wahine, ka mea ki a ia, “Nā, he pākoko koe, kāhore hoki i whānau tamariki; otiia ka hapū koe, ā, ka whānau he tama.
JDG 13:4 Nā, kia tūpato, kaua e inumia he wāina, he wai whakahaurangi rānei; kaua anō e kainga tētahi mea poke.
JDG 13:5 Nō te mea ka hapū koe, ā, ka whānau he tama; nā, kaua he heu e pā ki tōna mātenga; hei Natari hoki tēnā tamaiti ki te Atua nō te kōpū mai anō; ā, māna e tīmata te whakaora i a Īharaira i roto i te ringa o ngā Pirihitini.”
JDG 13:6 Nā, haere ana te wahine, kōrero ana ki tāna tahu, ka mea, “Ko te tangata rā a te Atua i puta mai nei ki ahau, tōna āhua kei te āhua o te anahera a te Atua; nui rawa te wehi; heoi kīhai ahau i ui nō hea ia, kīhai anō i kōrerotia mai e ia tōna ingoa ki ahau.
JDG 13:7 Otiia i kī mai ia ki ahau, ‘Ka hapū koe, ā, ka whānau he tama. Nā, kaua koe e inu i te wāina, i te wai whakahaurangi rānei, kaua anō hoki e kainga tētahi mea poke; he Natari hoki tēnā tamaiti ki te Atua nō te kōpū mai anō ā mate noa.’ ”
JDG 13:8 Nā, ka īnoi a Manoa ki a Ihowā, ka mea, “Tēnā rā, e tōku Ariki, kia haere mai anō ki a māua te tangata a te Atua i tonoa mai nā e koe, hei whakaatu i tētahi tikanga ki a māua mō te tamaiti ka whānau nei.”
JDG 13:9 Ā, i rongo te Atua ki te reo o Manoa, ā, ka haere mai anō te anahera a te Atua ki te wahine i a ia e noho ana i te pārae; ko Manoa ia, ko tāna tahu, kāhore i a ia.
JDG 13:10 Nā, hohoro tonu te wahine, oma ana, kōrero ana ki tāna tahu, ka mea ki a ia, “Nanā, kua puta ki ahau te tangata i haere mai rā ki ahau i tērā rā.”
JDG 13:11 Nā, ka whakatika a Manoa, ā, aru ana i tāna wahine, ā, ka tae ki taua tangata, ka mea ki a ia, “Ko koe rānei te tangata i kōrero rā ki te wahine nei?” Ka mea ia, “Āe, ko ahau.”
JDG 13:12 Nā, ka mea a Manoa, “Kia mana rā tāu kupu. Tēnā koa ngā tikanga mō te tamaiti, he aha he mahi māna?”
JDG 13:13 Ka mea te anahera a Ihowā ki a Manoa, “Kia tūpato te wahine i ngā mea katoa i kōrero ai ahau ki a ia.
JDG 13:14 Kaua ia e kai i tētahi mea i puta mai i te wāina; kaua anō e inumia e ia he wāina, he wai whakahaurangi rānei, kaua anō hoki ia e kai i tētahi mea poke. Kia mau ia ki ngā mea katoa i kīia atu e ahau ki a ia.”
JDG 13:15 Nā, ka mea a Manoa ki te anahera a Ihowā, “Me pupuri māua i a koe, kia takā ai e māua he kūao koati māu.”
JDG 13:16 Ka mea te anahera a Ihowā ki a Manoa, “Ahakoa pupuri noa koe i ahau, e kore ahau e kai i tāu taro; ā, ki te meatia e koe he tahunga tinana, me whakaeke mā Ihowā.” Kīhai hoki a Manoa i mōhio he anahera ia nā Ihowā.
JDG 13:17 Nā, ka mea a Manoa ki te anahera a Ihowā, “Ko wai tōu ingoa, kia whakahōnore ai māua i a koe, ina mana āu kōrero?”
JDG 13:18 Ka mea te anahera a Ihowā ki a ia, “He aha tōku ingoa i uia ai e koe; he mea whakamīharo nei hoki?”
JDG 13:19 Heoi, ka tīkina e Manoa tētahi kūao koati, me tētahi whakahere totokore, ā, whakaekea ana e ia ki runga ki te kāmaka ki a Ihowā. Nā, he mea whakamīharo te mahi a taua anahera, me te titiro anō a Manoa rāua ko tāna wahine.
JDG 13:20 I te putanga ake hoki o te mura i runga i te āta whaka te rangi, nā, kua kake atu te anahera a Ihowā i roto i te mura o te āta. Ā, i te kitenga o Manoa rāua ko tāna wahine, tāpapa ana rāua ki te whenua.
JDG 13:21 Kīhai ia i puta mai anō te anahera a Ihowā ki a Manoa rāua ko tāna wahine. Kātahi a Manoa ka mōhio he anahera ia nā Ihowā.
JDG 13:22 Nā, ka mea a Manoa ki tāna wahine, “Ka mate rawa tāua; kua kite hoki tāua i te Atua.”
JDG 13:23 Anō rā ko tāna wahine ki a ia, “Me i pai a Ihowā ki te whakamate i a tāua, kīhai i tangohia e ia te tahunga tinana me te whakahere totokore i ō tāua ringa, kīhai anō hoki i whakakitea mai e ia ēnei mea katoa ki a tāua, kīhai hoki i kōrerotia mai ināianei ki a tāua ngā mea pēnei i ēnei.”
JDG 13:24 Nā, ka whānau taua wahine, he tama, ā, huaina ana e ia tōna ingoa ko Hamahona; nā, ka tupu taua tamaiti, ā, ka manaakitia e Ihowā.
JDG 13:25 Nā, ka tīmata te Wairua o Ihowā te whakaohooho i a ia i te puni o Rāna, i te takiwā o Toraha, o Ehetaoro.
JDG 14:1 Nā, ka heke a Hamahona, ki Timinata, ā, ka kite i tētahi wahine i Timinata nō ngā tamāhine a ngā Pirihitini.
JDG 14:2 Nā, ka haere ia, ka kōrero ki tōna pāpā rāua ko tōna whaea, ka mea, “I kite ahau i tētahi wahine i Timinata, nō ngā tamāhine a ngā Pirihitini; nā, mā kōrua ia e tiki āianei hei wahine māku.”
JDG 14:3 Kātahi ka mea tōna pāpā rāua ko tōna whaea ki a ia; “He kore koia nō te wahine i roto i ngā tamāhine a ōu tuākana, a tōku iwi katoa hoki, i haere ai koe ki te tiki wahine i roto i ngā Pirihitini kokotikore?” Ā, ka mea a Hamahona ki tōna pāpā, “Tīkina atu māku; he pai hoki ia ki tāku titiro.”
JDG 14:4 Kīhai hoki tōna pāpā rāua ko tōna whaea i mōhio he mea tēnā nā Ihowā, he take riri ki ngā Pirihitini te rapua ana e ia. Nā, i taua wā he rangatira ngā Pirihitini nō Īharaira.
JDG 14:5 Nā, ka haere a Hamahona, rātou ko tōna pāpā, ko tōna whaea, ki Timinata, ā, ka tae ki ngā māra wāina o Timinata, nā, ko te hāmamatanga o tētahi kūao raiona; rere ana ki a ia.
JDG 14:6 Nā, ko te putanga iho o te Wairua o Ihowā ki runga ki a ia, haea ana e ia, me te mea e haehae ana ia i te kūao koati; kāhore hoki he mea i tōna ringa. Kīhai hoki i kōrerotia e ia ki tōna pāpā rāua ko tōna whaea tāna i mea ai.
JDG 14:7 Nā, ka haere ia ki raro, ā, ka kōrero ki taua wahine; ā, pai tonu tērā ki tā Hamahona titiro.
JDG 14:8 Ā roa iho, ka hoki ia ki te tiki i a ia, ā, nō tōna pekanga atu kia kite i te tinana o te raiona, nā, he pōkai pī kei roto i te riu o te raiona, he honi anō hoki.
JDG 14:9 Nā, ka mauria e ia i ōna ringa, ā, ka kai haere; ā, ka tae ki tōna pāpā rāua ko tōna whaea, ka hoatu mā rāua, ā, kai ana rāua, kīhai hoki i kōrerotia e ia ki a rāua he mea tango mai nāna taua honi i roto i te riu o te raiona.
JDG 14:10 Nā, ka haere tōna pāpā ki taua wahine, ā, ka tukua e Hamahona he hākari ki reira; ko te tikanga hoki tērā mā ngā taitamariki.
JDG 14:11 Ā, nō tō rātou kitenga i a ia, nā, ka tīkina atu e rātou ētahi hoa e toru tekau, hei noho ki a ia.
JDG 14:12 Nā, ka mea a Hamahona ki a rātou, “Me kōrero e ahau he kai ki a koutou. Ki te āta whakaaturia mai tōna tikanga ki ahau i ngā rā e whitu o te hākari, ki te kitea e koutou, nā, me hoatu e ahau ētahi kākahu rīnena ki a koutou, kia toru tekau, kia toru tekau anō ngā whakarua mō ngā kākahu.
JDG 14:13 Ā, ki te kāhore e taea e koutou te whakaatu tōna tikanga ki ahau, nā, kia toru tekau ngā kākahu rīnena e hōmai e koutou ki ahau, kia toru tekau anō hoki ngā whakarua mō ngā kākahu.” Nā, ka mea rātou ki a ia, “Makā mai tāu kai, ā, mā mātou e whakarongo atu.”
JDG 14:14 Nā, ka mea ia ki a rātou, “Ko tāna hanga he kai, puta mai ana he kai i roto i a ia; i puta mai anō hoki he reka i roto i te mea kaha.” Ā, e toru ngā rā kīhai i taea e rātou te whakaatu i te tikanga o tēnā kai.
JDG 14:15 Ā, i te whitu o ngā rā ka mea rātou ki te wahine a Hamahona, “Whakawaia tāu tahu kia whakaaturia mai e ia te kai ki a mātou, kei tahuna koe me te whare o tōu pāpā e mātou ki te ahi. He pāhua koia i a mātou i karangatia ai mātou e kōrua?”
JDG 14:16 Ā, ka tangi te wahine a Hamahona ki a ia, ka mea, “Kua kino noa iho koe ki ahau, kāhore hoki ōu aroha ki ahau. Kua makā nei e koe he kai ki ngā tama a tōku iwi, ā, kīhai i whakaaturia tōna tikanga ki ahau.” Nā, ka mea ia ki a ia, “Nanā, kāhore i whakaaturia e ahau ki tōku pāpā, ki tōku whaea, ā, me whakaatu anō e ahau ki a koe?”
JDG 14:17 Nā, ka tangi ia ki a ia i aua rā e whitu o tā rātou hākari; ā, i te whitu o ngā rā ka whakaaturia e ia ki a ia, he tohe hoki nōna ki a ia; ā, whakaaturia ana e ia ki ngā tama a tōna iwi.
JDG 14:18 Nā, ka mea ngā tāngata o te pā ki a ia i te whitu o ngā rā, i te mea kāhore anō i tō noa te rā, “Ko tēhea te mea reka atu i te honi? Ko te aha hoki te mea kaha atu i te raiona?” Ā, ka mea ia ki a rātou, “Me i kāhore tāku kau uha hei parau mā koutou, kīhai i kitea e koutou tāku kai.”
JDG 14:19 Nā, ko te tino putanga mai o te Wairua o Ihowā ki runga ki a ia, ā, haere ana ia ki raro, ki Ahakerono, ā, patua iho o rātou e toru tekau ngā tāngata, nā, huia ana e ia o rātou, ā, hoatu ana he whakarua mō ngā kākahu o ngā kaiwhakaatu o te tikanga o te kai. Nā, mura tonu tōna riri, ā, haere ana ia ki runga ki te whare o tōna pāpā.
JDG 14:20 Heoi, hoatu ana tā Hamahona wahine ki tōna hoa i waiho hei hoa mōna.
JDG 15:1 Otiia i muri iho, nā, ka haere a Hamahona, me tētahi kūao koati, i te wā o te kotinga wīti, kia kite i tāna wahine, ā, ka mea, “Ka haere ahau ki tāku wahine ki roto ki te whare moenga.” Otiia, kīhai ia i tukua e te pāpā o te wahine kia haere ki roto.
JDG 15:2 I mea hoki tōna pāpā, “I tino mea ahau e kino rawa ana koe ki a ia; nā, hoatu ana ia e ahau mā tōu hoa; kāhore ianei tōna teina e pai atu i a ia? Tēnā kia riro tēnei i a koe hei utu mō tērā.”
JDG 15:3 Nā, ka mea a Hamahona ki a rātou, “Engari i tēnei, ka kore hara ahau ki ngā Pirihitini, ina tūkino ahau ki a rātou.”
JDG 15:4 Nā, haere ana a Hamahona, ā, hopukia ana e ia e toru rau ngā pokiha. Kātahi ka tīkina ētahi rama e ia, ā, whakaangahia atu ana ngā hiawero ki ā rāua whaka hiawero, ā, whakanohoia iho he rama ki waenganui o ngā hiawero e rua.
JDG 15:5 Nā, ka tahuna e ia ngā rama, ā, tukua atu ana ki te wīti a ngā Pirihitini, wera ake ngā pūranga wīti, me ngā mea anō e tū ana; ngā māra wāina, ōriwa anō hoki.
JDG 15:6 Ā, ka kī ngā Pirihitini, “Nā wai tēnei mahi?” Nā, ka kōrerotia, “Nā Hamahona hunaonga a te Timini; mōna i tango i tāna wahine, ā, hoatu ana ki tōna hoa.” Kātahi ka haere ngā Pirihitini, ā, tahuna ake e rātou te wahine rāua ko tōna pāpā ki te ahi.
JDG 15:7 Nā, ka mea a Hamahona ki a rātou, “Ahakoa kua meatia tēnei e koutou, he pono ka rapu utu anō ahau i a koutou, ā muri iho ka mutu tāku.”
JDG 15:8 Nā, tukitukia ana rātou e ia, te papa, te hūhā, he nui te patunga, ā, haere ana, noho ana i te kapiti o te kāmaka i Etama.
JDG 15:9 Kātahi ka haere ngā Pirihitini, noho ana i Hūrā, tohatoha noa atu i Rehi.
JDG 15:10 Nā, ka mea ngā tāngata o Hūrā, “He aha koutou i haere mai ai ki a mātou?” Nā, ka mea rātou, “He here i a Hamahona i haere mai ai mātou, kia meatia ki a ia tāna i mea ai ki a mātou.”
JDG 15:11 Kātahi ka haere ētahi tāngata o Hūrā, e toru ngā mano, ki te kapiti o te kōhatu i Etama, ka mea ki a Hamahona, “Kāhore ianei koe e mōhio he rangatira nō tātou ngā Pirihitini? He mahi aha tēnei nāu ki a mātou?” Nā, ka mea ia ki a rātou, “Rite tonu ki tā rātou i mea mai ai ki ahau, tāku i mea ai ki a rātou.”
JDG 15:12 Nā, ka mea rātou ki a ia, “He here i a koe i haere mai ai mātou, kia hoatu koe ki te ringa o ngā Pirihitini.” Nā, ka mea a Hamahona ki a rātou, “Oati mai ki ahau e kore koutou nā e rere ki runga ki ahau.”
JDG 15:13 Nā, ka kōrero rātou ki a ia, ka mea, “Kāhore; erangi me āta here koe e mātou, ā, ka hoatu koe ki tō rātou ringa; ko te whakamate ia, e kore mātou e whakamate i a koe.” Nā, ka herea ia e rātou ki ngā taura hou e rua, ā, kawea atu ana i te kāmaka.
JDG 15:14 I tōna taenga ki Rehi, nā, ka hāmama ngā Pirihitini i te tūtakitanga ki a ia. Ko te tino putanga o te Wairua o Ihowā ki runga ki a ia; nā, rite tonu ngā taura i ōna ringa ki te muka kua wera i te ahi; harotu noa iho ngā here o ōna ringa.
JDG 15:15 Nā, ka pono ia ki tētahi kauae kāihe, he mea hou, ā, totoro atu ana tōna ringa, tangohia ake ana; nā, kotahi mano tāngata i patua e ia ki taua mea.
JDG 15:16 Nā, ka mea a Hamahona, “Nā te kauae kāihe, pūranga atu, pūranga atu; nā te kauae kāihe, patua iho e ahau kotahi mano tāngata.”
JDG 15:17 Ā, i te mutunga o tāna kōrero, nā, makā atu ana e ia te kauae i tōna ringa, ā, huaina iho te ingoa o tēnā wāhi, ko Ramatarehi.
JDG 15:18 Nā, nui rawa tōna matewai, ā, ka karanga ia ki a Ihowā, ka mea, “Nāu i hōmai tēnei whakaoranga nui ki te ringa o tāu pononga, ā, ka mate nei ahau i te matewai, ka hinga hoki i te ringa o te hunga kokotikore?”
JDG 15:19 Nā, ka wāhia e te Atua he poka i Rehi, ā, ka puta mai he wai i reira. Kātahi ka inu ia, ā, hoki ana tōna wairua, nā, kua ora ia. Nā reira i huaina ai tō reira ingoa, Ko Enehakore; kei Rehi nā anō ā tae noa ki tēnei rā.
JDG 15:20 Nā, e rua tekau ngā tau i whakarite ai ia mō Īharaira i ngā rā o ngā Pirihitini.
JDG 16:1 I haere anō a Hamahona ki Kaha, ā, ka kitea e ia tētahi wahine kairau i reira, ā, haere atu ana ki a ia.
JDG 16:2 Ā, ka kōrerotia ki ngā Kahi, ka meatia, “Kua tae mai a Hamahona ki konei.” Nā, ka karapotia ia e rātou, ka whanga hoki rātou ki a ia ā pau noa te pō i te kūwaha o te pā. Nā, takoto puku ana rātou ā pau noa taua pō; i mea hoki, “Waiho kia awatea, ka patu ai tātou i a ia.”
JDG 16:3 Heoi, takoto ana a Hamahona ā tūruawaenga pō. Kātahi ia ka whakatika i waenganui pō, ā, ka mau i te tatau o te kūwaha o te pā, ki ngā pou hoki e rua. Nā, unuhia ake ana, āna tūtaki, āna aha; ā, hikitia ana ki runga ki ōna pokohiwi, amohia ana ki te tihi o te maunga i te ritenga atu o Heperona.
JDG 16:4 Ā muri iho ka aroha ia ki tētahi wahine i te awaawa o Horeke, ko Terīra tōna ingoa.
JDG 16:5 Nā, ka haere ngā rangatira o ngā Pirihitini ki taua wahine, ka mea ki a ia, “Whakawaia ia kia kitea ai nō hea tōna kaha nui, ā, mā te aha ia e taea ai e mātou, kia herea ai ia e mātou, kia whakaitia. Ā, kotahi mano kotahi rau ngā hiriwa e hoatu e tēnei, e tēnei o mātou ki a koe.”
JDG 16:6 Nā, ka mea a Terīra ki a Hamahona, “Tēnā, whakaaturia mai ki ahau nō hea tōu kaha nui, mā te aha hoki e taea ai koe te here, kia whakaitia ai koe?”
JDG 16:7 Nā, ka mea a Hamahona ki a ia, “Ki te herea ahau e rātou ki ngā aka hou e whitu, kāhore nei i whakamaroketia, kātahi ahau ka kahakore, ka rite ki tētahi atu tangata.”
JDG 16:8 Nā, ka maua e ngā rangatira o ngā Pirihitini ētahi aka hou e whitu ki a ia, he mea kāhore anō i whakamaroketia; ā, herea ana ia e ia ki aua mea.
JDG 16:9 Nā, tērā i taua wahine, i te rūma i roto, ētahi tāngata e tauwhanga ana. Nā, ka mea ia ki a ia, “E Hamahona, ko ngā Pirihitini, ka eke ki a koe!” Nā, motumotuhia ana e ia ngā aka; koia anō kei te miro muka e motu ana ina pā ki te ahi. Heoi, kīhai i mōhiotia tōna kaha.
JDG 16:10 Nā, ka mea a Terīra ki a Hamahona, “Nanā, kua tinihangatia ahau e koe, kua teka koe ki ahau; tēnā rā, whakaaturia mai ki ahau mā te aha koe e mau ai te here?”
JDG 16:11 Ā, ka mea ia ki a ia, “Ki te herea iana ahau ki ētahi taura hou kāhore anō i meatia ki te mahi, kātahi ahau ka kahakore, ka rite ki tētahi atu tangata.”
JDG 16:12 Nā, ka mau a Terīra ki ētahi taura hou, ka here i a ia; ā, ka mea ki a ia, “E Hamahona, ko ngā Pirihitini, ka eke ki a koe!” Nā, i te rūma i roto ngā kaiwhanga e noho ana. Nā, motuhia ana e ia i ōna ringa, ānō he miro.
JDG 16:13 Nā, ka mea a Terīra ki a Hamahona, “He tinihanga tāu ki ahau, he kōrero teka ā tae mai nei; whakaaturia ki ahau mā te aha koe e mau ai te here?” Ka mea ia ki a ia, “Ki te whatua e koe ngā makawe e whitu o tōku mātenga ki roto ki te whenu.”
JDG 16:14 Nā, titia iho ana e ia ki te titi. Ā, ka mea ki a ia, “E Hamahona, ko ngā Pirihitini ka eke ki a koe!” Nā, ko tōna ohonga ake i tāna moe, ka unuhia te titi o te mea whatu me te whenu anō.
JDG 16:15 Nā, ka mea te wahine ki a ia, “He aha koe i mea ai, ‘E aroha ana ahau ki a koe,’ kāhore nei hoki tōu ngākau i riro mai i ahau? Ka toru ēnei māmingatanga āu i ahau, kīhai anō hoki i whakaaturia e koe ki ahau nō hea tōu kaha nui.”
JDG 16:16 Nāwai ā, kāhore he rā i kapea tāna āki i a ia ki āna kupu, me te tohe ki a ia, ā mate noa iho tōna wairua i te hōhā.
JDG 16:17 Kātahi ka whakaaturia e ia ki a ia tōna ngākau katoa, ka mea ki a ia, “Kāhore anō i pā noa he heu ki tōku māhunga; he Natari hoki ahau ki a Ihowā nō te kōpū mai anō o tōku whaea. Ki te heua ahau, kātahi ka riro atu tōku kaha i ahau, ā, ka kahakore ahau, ka rite ki te mano o te tangata.”
JDG 16:18 Ā, nō te kitenga o Terīra kua whakaaturia tōna ngākau katoa ki a ia, ka tono tāngata ia ki te karanga i ngā rangatira o ngā Pirihitini, hei mea, “Haere mai anō koa āianei, kua whakaaturia hoki e ia tōna ngākau katoa ki ahau.” Nā, ka haere mai ngā rangatira o ngā Pirihitini ki a ia, me te mau mai i te moni i ō rātou ringa.
JDG 16:19 Nā, ka whakamoea ia e ia ki runga i ōna turi, ā, ka karanga ki tētahi tangata, ā, heua ana ngā makawe e whitu o tōna māhunga. Nā, ka tīmata tāna whakaiti i a ia, ā, mahue ake ia i tōna kaha.
JDG 16:20 Nā, ka mea tērā, “E Hamahona ko ngā Pirihitini ka eke ki a koe!” Nā, maranga ana ia i tāna moe, ka mea, “Ka haere ahau ki waho, ka pērā me mua rā, rūrū ai i ahau.” Heoi, kīhai ia i mātau kua mawehe atu a Ihowā i a ia.
JDG 16:21 Nā, ka hopukia ia e ngā Pirihitini, ā, tīkarohia ana ōna kanohi; ā, kawea ana ia e rātou ki raro, ki Kaha. Nā, herea ana ia ki ngā mekameka parāhi; ā, he huri mira tāna mahi i roto i te whare herehere.
JDG 16:22 Heoi, kua tīmata anō ngā makawe o tōna māhunga te tupu i muri i tōna heunga.
JDG 16:23 Nā, ka huihui ngā rangatira o ngā Pirihitini ki te patu i tētahi whakahere nui ki a Rakono, ki tō rātou atua, ki te whakamanamana anō hoki; i mea hoki, “Kua hōmai tō tātou hoariri a Hamahona e tō tātou atua ki tō tātou ringa.”
JDG 16:24 Ā, nō te kitenga o te iwi i a ia, ka whakamoemiti ki tō rātou atua; i mea hoki, “Kua hōmai tō tātou hoariri e tō tātou atua ki tō tātou ringa, te tangata nāna tō tātou whenua i huna, he tokomaha hoki o tātou i patua e ia.”
JDG 16:25 Ā, i ō rātou ngākau e koa ana, ka mea rātou, “Karangatia a Hamahona, hei mea tākaro mā tātou.” Kātahi ka karangatia a Hamahona i roto i te whare herehere, ā, tākaro ana ia i tō rātou aroaro. Nā, ka whakatūria ia e rātou ki waenganui o ngā pou.
JDG 16:26 Nā, ka mea a Hamahona ki te tamaiti i pupuri nei i a ia ki tōna ringa, “Tukua ahau kia whāwhā ki ngā pou tokomanawa o te whare hei okiokinga atu mōku.”
JDG 16:27 Nā, kī tonu te whare i te tāne, i te wahine; i reira anō hoki ngā rangatira katoa o ngā Pirihitini; i runga anō i te tuanui me te mea e toru mano ngā tāne, ngā wāhine, e mātakitaki ana ki ngā mahi tākaro a Hamahona.
JDG 16:28 Kātahi ka karanga a Hamahona ki a Ihowā, ka mea, “E te Ariki e Ihowā, kia mahara ki ahau, whakakahangia hoki ahau e te Atua i tēnei wā kotahi nei, kia ea tonu āianei ki runga i ngā Pirihitini tōku mate i ōku kanohi e rua.”
JDG 16:29 Nā, hopukia atu ana e Hamahona ngā pou tokomanawa e rua o waenga, i tū ai, i mau ai te whare, ko tētahi ki tōna ringa matau, ko tētahi ki tōna mauī.
JDG 16:30 Nā, ka mea a Hamahona, “Kia mate tahi ahau me ngā Pirihitini.” Ko tōna tino pikonga iho, me te whakapau anō i tōna kaha; heoi hinga ana te whare ki runga ki ngā rangatira, ki runga anō hoki ki te iwi katoa i roto. Heoi, tini atu i āna i patu ai i tōna oranga te hunga i mate i whakamatea nei e ia, i tōna matenga.
JDG 16:31 Kātahi ka haere iho ōna tēina ki raro, rātou ko te whare katoa o tōna pāpā, ā, tangohia ana ia e rātou, kawea atu ana, tanumia ana ki waenganui o Toraha o Ehetaoro, ki te rua o Manoa, o tōna pāpā. Ā, e rua tekau ngā tau i whakarite ai ia mō Īharaira.
JDG 17:1 Nā, i te whenua pukepuke o Ēparaima tētahi tangata, ko Mika tōna ingoa.
JDG 17:2 Nā, ka mea ia ki tōna whaea, “Ko ngā hiriwa kotahi tekau mā tahi rau i tangohia rā i a koe, te mea i kanga rā koe, i kōrero ai hoki koe ki ōku taringa – nanā, kei ahau aua hiriwa; nāku i tango.” Nā, ka mea tōna whaea, “Mā Ihowā koe e manaaki, e tāku tama.”
JDG 17:3 Nā, ka whakahokia e ia ngā hiriwa kotahi tekau mā tahi rau ki tōna whaea, ā, ka mea tōna whaea, “Ka whakatapua rawatia e ahau te hiriwa mā Ihowā, he mea nā tōku ringa mā tāku tama, hei hanga whakapakoko, he mea whaowhao, he mea whakarewa. Nā, me whakahoki atu e ahau ki a koe ināianei.”
JDG 17:4 Nā, i tāna whakahokinga i te moni ki tōna whaea, ka tango tōna whaea i ngā pīhi hiriwa e rua rau, ā, hoatu ana ki te kaiwhakarewa, ā, nāna i hanga tētahi whakapakoko, whaowhao, me tētahi mea whakarewa. Nā, ka takoto aua mea ki te whare o Mika.
JDG 17:5 Nā, he whare atua tō taua tangata, tō Mika, i hangā anō he epora e ia, me ētahi terapimi, ā, i whakatohungatia hoki e ia tētahi o āna tama, ā, meinga ana hei tohunga māna.
JDG 17:6 I aua rā kāhore o Īharaira kīngi; ko tā rātou i mea ai ko ngā mea i tika ki te titiro a tēnei, a tēnei.
JDG 17:7 Nā, tērā tētahi taitama o Pēterehema Hūrā, o te hapū o Hūrā, he Rīwaiti, ā, i reira anō ia e noho ana.
JDG 17:8 Nā, ka haere atu taua tangata i te pā, i Pēterehema Hūrā, kia noho ki tāna wāhi e kite ai; ā, i a ia e haere ana, ka tae ia ki te whenua pukepuke o Ēparaima, ki te whare o Mika.
JDG 17:9 Nā, ka mea a Mika ki a ia, “I haere mai koe i hea?” Ā, ka mea ia ki a ia, “He Rīwaiti ahau nō Pēterehema Hūrā, ā, e haere ana ahau kia noho ki tāku wāhi e kite ai.”
JDG 17:10 Nā, ka mea a Mika ki a ia, “E noho ki ahau, ā, hei matua koe mōku, hei tohunga hoki, ā, kia tekau ngā hiriwa e hoatu e ahau ki a koe i te tau, kia kotahi anō te whakaritenga kākahu, me te kai anō māu. Nā, ka tomo atu te Rīwaiti.”
JDG 17:11 Ā, pai tonu te Rīwaiti kia noho ki taua tangata; ā, ka meinga taua taitamariki e ia kia rite ki tētahi o āna tama.
JDG 17:12 Nā, whakatohungatia ana e Mika taua Rīwaiti, ā, ka waiho taua taitama hei tohunga māna, ā, noho ana i roto i te whare o Mika.
JDG 17:13 Nā, ka mea a Mika, “Kātahi ahau ka mōhio ka atawhaitia ahau e Ihowā, ina hoki ka riro mai nei te Rīwaiti hei tohunga mōku.”
JDG 18:1 I aua rā kāhore o Īharaira kīngi. I aua rā hoki e rapu ana te iwi o ngā Rāni i tētahi kāinga mō rātou hei nohoanga; kīhai hoki tētahi kāinga tupu i tau ki a rātou i roto i ngā iwi o Īharaira ā tae noa ki taua rā.
JDG 18:2 Nā, ka tono ngā tamariki a Rāna i ētahi tāngata tokorima o tō rātou hapū, he hunga māia, i roto i ō rātou rohe, i Toraha, i Ehetaoro, hei tūtei i te whenua, hei titiro hoki; i mea hoki ki a rātou, “Tīkina, tirohia te whenua.” Nā, ka tae rātou ki te whenua pukepuke o Ēparaima, ki te whare o Mika, noho ana i reira.
JDG 18:3 I a rātou i te whare o Mika, ka mōhiotia e rātou te reo o taua taitamariki, o te Rīwaiti; nā, peka ana ki reira, ā, ka mea ki a ia, “Nā wai koe i kawe mai ki konei? E aha ana hoki koe i konei? Ā, he aha tāu i konei?”
JDG 18:4 Nā, ka mea ia ki a rātou, “Ko ngā mea tēnei i meatia e Mika ki ahau; nāna hoki ahau i utu, nā, hei tohunga anō ahau ki a ia.”
JDG 18:5 Ā, ka mea rātou ki a ia, “Tēnā, ui atu ki te Atua kia mōhio ai mātou ka tika rānei tō mātou ara e haere nei mātou.”
JDG 18:6 Nā, ka mea te tohunga ki a rātou, “Haere mārie, kei te aroaro o Ihowā tō koutou ara e haere nā koutou.”
JDG 18:7 Nā, ka haere aua tāngata tokorima, ka tae ki Raihi, ā, ka kite i ngā tāngata o reira, i te pai o tā rātou noho, rite tonu ki a ngā Haironi, te āta noho, te mau; kāhore hoki he tangata whai mana o te whenua hei mea kia whakamā rātou ki tētahi mea, ā, e matara mai ana rātou i ngā Haironi, kāhore hoki ā rātou aha ki tētahi tangata.
JDG 18:8 Nā, ka tae rātou ki ō rātou tuākana, ki Toraha, ki Ehetaoro; ā, ka mea ō rātou tuākana ki a rātou, “He aha tā koutou kōrero?”
JDG 18:9 Kātahi rātou ka mea atu, “Whakatika, kia whakaekea rātou e tātou; kua kite hoki mātou i te whenua, nā, he pai rawa; ā, me āta noho anō rānei koutou? Kaua rā e māngere, ki te haere ki te tango i tērā whenua.
JDG 18:10 Ka haere koutou, ka tae atu koutou ki tētahi iwi e noho tatū ana, ā, he nui hoki te whenua; kua hōmai nei hoki e te Atua ki ō koutou ringa; he wāhi, kāhore nei i hapa i tētahi mea o te whenua.”
JDG 18:11 Nā, tūria atu ana i reira e te hapū o ngā Rani, i roto i Toraha, i Ehetaoro, e ono rau tāngata, whītiki rawa ki ngā rākau o te whawhai.
JDG 18:12 Nā, ka haere rātou, ā, ka pūpahi ki Kiriata Tearimi, ki Hūrā; koia i huaina ai te ingoa o tērā wāhi, ko Mahanerana ā mohoa noa nei; koia tēnā i tua atu o Kiriata Tearimi.
JDG 18:13 Nā, i haere atu rātou i reira ki te whenua pukepuke o Ēparaima, ā, ka tae ki te whare o Mika.
JDG 18:14 Nā, ko te ohonga o ngā tāngata tokorima i haere nei ki te tūtei i te whenua o Raihi, ka mea ki ō rātou tuākana, “E mōhio ana rānei koutou kei ēnei whare he epora, he terapimi, he whakapakoko whaowhao, me tētahi mea whakarewa? Nā, mā koutou te whakaaro ki tā koutou e mea ai.”
JDG 18:15 Nā, ka peka rātou ki reira, ā, ka tae ki te whare o taua taitamariki, o te Rīwaiti, arā ki te whare o Mika, ā, oha atu ana ki a ia.
JDG 18:16 Ā, ko ngā tāngata e ono rau o ngā tama a Rāna me ā rātou rākau whawhai, tū tonu i te tomokanga o te kūwaha.
JDG 18:17 Nā, haere atu ana ngā tāngata tokorima i haere rā ki te tūtei i te whenua, ā, ka tae ki reira; kei te tango i te whakapakoko whakairo, i te epora, i ngā terapimi, i te whakapakoko hoki i whakarewaina. Nā, ko te tohunga i te tomokanga ki te kūwaha e tū ana, rātou ko ngā tāngata e ono rau, me ā rātou rākau whawhai, whītiki tonu.
JDG 18:18 Ā, nō te haerenga o ērā ki te whare o Mika, nō te tangohanga i te whakapakoko whakairo, i te epora, i ngā terapimi, i te mea hoki i whakarewaina, ka mea te tohunga ki a rātou, “E aha ana koutou?”
JDG 18:19 Anō rā ko rātou ki a ia, “Whakarongoa, kōpania atu tōu ringa ki tōu māngai, ā, haere mai tātou, hei matua hoki koe mō mātou, hei tohunga. Ko tēhea te mea pai kia waiho koe hei tohunga mō te whare o te tangata kotahi, kia waiho rānei hei tohunga mō tētahi iwi, mō tētahi hapū hoki o Īharaira?”
JDG 18:20 Nā, ka koa te ngākau o te tohunga, ā, ka mau ia ki te epora, ki ngā terapimi, ki te whakapakoko whakairo, ā, haere ana i roto i taua hunga.
JDG 18:21 Kātahi rātou ka tahuri, ka haere; ā, makā ana e rātou ngā tamariki, ngā kararehe, me ngā taonga ki mua i a rātou.
JDG 18:22 Ka matara atu rātou i te whare o Mika, nā, ka huihuia ngā tāngata o ngā whare i tata ki te whare o Mika, ā, ka mau atu i a rātou ngā tama a Rāna.
JDG 18:23 Nā, ka karanga rātou ki ngā tama a Rāna. Ā, ka tahuri mai ngā aroaro o ērā, ka mea ki a Mika, “He aha tāu i huihui tāngata mai ai koe?”
JDG 18:24 Nā, ka mea ia, “Kua tangohia atu rā e koutou āku atua i hanga ai, me te tohunga, ā, kua haere atu; ā, he aha atu anō tāku? He aha hoki kia kī mai koutou ki ahau, ‘He aha tāu?’ ”
JDG 18:25 Ā, ka mea ngā tama a Rāna ki a ia, “Kei rangona tōu reo e mātou, kei tōrere atu ki a koe te hunga ngākau āritarita, ā, ka mate koe me tōu whare katoa.”
JDG 18:26 Nā, haere ana ngā tama a Rāna i tō rātou ara, ā, i te kitenga hoki o Mika he kaha rawa rātou i a ia, ka tahuri ia, ā, hoki ana ki tōna whare.
JDG 18:27 Ā, maua atu ana e rātou ngā mea i hangā e Mika, me te tohunga i noho ki a ia, ā, haere ana ki Raihi, ki tētahi iwi e āta noho ana, kāhore ōna whakaohooho. Nā, patua iho e rātou ki te mata o te hoari, tahuna ake hoki e rātou te pā ki te ahi.
JDG 18:28 Kāhore hoki he tangata hei whakaora; nō te mea he matara a reira i Hairona, kāhore anō ā rātou aha ki tētahi tangata; i te raorao hoki a reira, i Peterehopo. Nā, hangā ana e rātou te pā, ā, noho ana i reira.
JDG 18:29 Ā, huaina ana e rātou te ingoa o te pā ko Rāna, ko te ingoa o tō rātou matua, o Rāna, i whānau nei mā Īharaira; ko Raihi ia te ingoa o te pā i mua.
JDG 18:30 Nā, whakatūria ana e ngā tama a Rāna mō rātou te whakapakoko whaowhao, ā, ko Honatana hoki tama a Kerehoma, tama a Mohi, rātou ko āna tama ngā tohunga o te iwi o ngā Rāni tae noa ki te rā i whakaraua ai te whenua.
JDG 18:31 Ā, tū tonu tā rātou whakapakoko whakairo, tā Mika i hanga rā, i ngā rā katoa o te whare o te Atua i Hiro.
JDG 19:1 Ā, i aua rā, i te mea kāhore he kīngi o Īharaira. Nā, ko tētahi tangata, he Rīwaiti, e noho noa iho ana i te taha ki tua o te whenua pukepuke o Ēparaima. Nā, ka tango ia i tētahi wahine iti māna i roto i Pēterehema Hūrā.
JDG 19:2 Nā, kua pūremu tāna wahine iti, ā, mawehe atu ana i a ia ki te whare o tōna pāpā, ki Pēterehema Hūrā, ā, e whā ngā tino marama ōna ki reira.
JDG 19:3 Nā, ka whakatika tāna tahu, ā, haere ana ki te whai i a ia, ki te whakamārie i a ia, ki te whakahoki mai i a ia; ko tāna tangata hoki tōna hoa haere, me ngā kāihe e rua. Nā, ka kawea ia e te wahine rā ki te whare o tōna pāpā, ā, nō te kitenga o te pāpā o te kōtiro i a ia, koa tonu, nō te mea ka tūtaki ki a ia.
JDG 19:4 Nā, ka pupuri tōna hungawai, te pāpā o te kōtiro, i a ia; ā, e toru ngā rā i noho ai ia ki a ia; heoi kai ana, inu ana rāua, ā, noho ana i reira.
JDG 19:5 Ā, i te whā o ngā rā ka maranga wawe rātou i te ata, ā, whakatika ana ia ki te haere. Nā, ka mea te pāpā o te kōtiro ki tāna hunaonga, “Kia ora tōu ngākau i tētahi wāhi taro, ā muri iho ka haere.”
JDG 19:6 Nā, ka noho rāua, ka kai, ka inu tahi tō rāua tokorua, nā, ka mea te pāpā o te kōtiro ki taua tangata, “Tēnā koa, noho iho i te pō nei, kia koa hoki tōu ngākau.”
JDG 19:7 Ā, i te whakatikanga o taua tangata ki te haere, ka tohea ia e tōna hungawai, nā, ka moe anō ia ki reira.
JDG 19:8 Ā, i te rima o ngā rā ka maranga wawe ia ki te haere, ā, ka mea te pāpā o te kōtiro, “Kia ora tōu ngākau; e noho kōrua kia tītaha rā te rā.” Ā, kai ana rāua tokorua.
JDG 19:9 Nā, ka whakatika taua tangata ki te haere, a ia, tāna wahine iti me tāna tangata, ā, ka mea tōna hungawai, te pāpā o te kōtiro ki a ia, “Nanā, kua heke te rā, kua ahiahi, e noho rā. Nanā, kua tāwharara te rā, hei konei moe ai, kia koa ai tōu ngākau; ā, hei te ata āpōpō ka maranga wawe ai koutou ki te ara, ka haere ki tōu kāinga.”
JDG 19:10 Otiia kīhai taua tangata i pai kia noho i taua pō, engari whakatika ana ia, haere ana, ā, ka tae ki te ritenga atu o Iepuhu, arā o Hiruhārama. I a ia anō hoki ngā kāihe e rua, whakanoho rawa, i a ia anō hoki tāna wahine iti.
JDG 19:11 Ka tata rātou ki Iepuhu, nā, kua aua noa atu te rā; ā, ka mea te tangata ki tōna rangatira, “Tēnā, kia peka tātou ki tēnei pā o ngā Iepuhi, ki reira moe ai.”
JDG 19:12 Nā, ka mea tōna rangatira ki a ia, “E kore tātou e peka ki te pā o te iwi kē, ehara nei i ngā tamariki a Īharaira; engari me haere atu tātou ki Kipea.”
JDG 19:13 Nā, ka mea ia ki tāna tangata, “Haere mai, tātou ka whakatata ki tētahi o ēnei wāhi; ka moe ai tātou ki Kipea, ki Rama rānei.”
JDG 19:14 Nā, ka whiti atu rātou, ka haere; ā, kua toene te rā i a rātou ka tata ki Kipea, ki tētahi pā o Pineamine.
JDG 19:15 Nā, ka peka rātou ki reira, ka haere ki Kipea moe ai; ā, i tōna taenga atu, ka noho ki te waharoa o te pā; kāhore hoki he tangata hei mau i a rātou ki tōna whare moe ai.
JDG 19:16 Nā, ko tētahi tangata, he koroheke, e haere mai ana i tāna mahi i te māra i te ahiahi; ā, ko taua tangata nō te whenua pukepuke o Ēparaima, i Kipea hoki e noho ana; ko ngā tāngata ia o te pā, he Pineamini.
JDG 19:17 Ā, ka maranga ake ōna kanohi, ka kite i te tangata konene rā i te waharoa o te pā, nā, ka mea taua koroheke, “Ko hea koe? I haere mai anō hoki koe i hea?”
JDG 19:18 Nā, ka mea ia ki a ia, “I haere mai mātou i Pēterehema Hūrā, ā, e haere ana mātou ki tērā taha o te whenua pukepuke o Ēparaima; nō reira ahau; ā, i haere ahau ki Pēterehema Hūrā. Otiia e haere ana tēnei ahau ki te whare o Ihowā; heoi kāhore he tangata hei mau i ahau ki roto ki tōna whare.
JDG 19:19 He kakau wīti anō ia tēnei, he kai mā ā mātou kāihe; he taro anō tēnei, he wāina hoki māku, ā, mā tāu pononga wahine, mā te tāhake hoki a āu pononga; kāhore he mate ki te aha, ki te aha.”
JDG 19:20 Nā, ka mea taua koroheke, “Kia tau te rangimārie ki a koe. He ahakoa rā, waiho mai i ahau ngā mea katoa e matea e koe; otiia kaua e moe ki te waharoa.”
JDG 19:21 Nā, mauria ana e ia ki tōna whare, ā, hoatu ana he kai mā ngā kāihe; ā, horoia ana e rātou ō rātou waewae, kai ana, inu ana.
JDG 19:22 E mea ake ana ō rātou ngākau ki te koa, nā, ko te karapotinga o te whare e ngā tāngata o te pā, he tama nā Periara; kei te pātuki ki te tatau, ka kōrero ki te tangata nōna te whare, ki taua koroheke rā, ka mea, “Whakaputaina mai ki waho tēnā tangata i haere nā ki tōu whare, kia mōhio ai mātou ki a ia.”
JDG 19:23 Nā, ka haere atu ki a rātou te tangata nōna te whare, ka mea ki a rātou, “Kaua rā, e ōku tuākana, kaua e mahia te mea kino; kua tae mai nei hoki tēnei tangata ki tōku whare, kaua tēnei mea pōauau e meatia.
JDG 19:24 Nā, ko tāku tamāhine tēnei, he wāhina, me tāna wahine iti hoki; māku rāua e kawe atu ināianei, whakaititia rāua e koutou, meatia hoki ki a rāua te mea e pai ana ki tā koutou titiro; ko tēnei tangata ia, kaua tēnei mea pōauau e meatia ki a ia.”
JDG 19:25 Ā, tē pai ngā tāngata ki te whakarongo ki a ia, nā, ka mau taua tangata ki tāna wahine iti, ā, kawea atu ana ki waho ki a rātou, ā, ka mōhio rātou ki a ia, ka tūkino hoki i a ia i taua pō katoa ā tae noa ki te ata; ā, ka hī te ata, ka tukua ia e rātou.
JDG 19:26 Nā, ka haere mai te wahine rā i te pūaotanga o te ata, takoto ana ki te kūwaha o te whare o te tangata kei reira nei tōna ariki, ā mārama noa.
JDG 19:27 Ā, ka whakatika ake tōna ariki i te ata, nā, ka huakina e ia ngā tatau o te whare, ka puta atu, he mea kia haere i tōna ara. Nā, ko te wahine rā, ko tāna wahine iti, kua hinga ki te kūwaha o te whare, ko ōna ringa i runga i te paepae o te tatau.
JDG 19:28 Nā, ka mea ia ki a ia, “Whakatika kia haere tātou.” Kāhore ia tētahi i whakaō mai. Nā, ka hāpainga ia e ia ki runga ki te kāihe. Ā, ka maranga taua tangata, haere ana ki tōna wāhi.
JDG 19:29 Ā, nō tōna taenga ki tōna whare, ka tīkina e ia tētahi māripi, ā, ka mau ki tāna wahine iti, tapatapahia ana e ia ōna wāhi, kia tekau mā rua ngā wāhanga, ā, tukua ana ki ngā rohe katoa o Īharaira, puta noa.
JDG 19:30 Ā, i mea te hunga katoa i kitea ai, “Kāhore tēnei i mua, kāhore anō hoki i kitea he rite mō tēnei o te rā i haere mai ai ngā tamariki a Īharaira i te whenua o Īhipa ā mohoa noa nei. Maharatia iho, whakaaroa, kōrerotia.”
JDG 20:1 Nā, ka puta ngā tamariki katoa a Īharaira, ā, huihui ana te whakaminenga me te mea he tangata kotahi, nō Rāna mai anō a Peerehepa atu ana, nō te whenua anō hoki o Kireara, ki a Ihowā, ki Mihipa.
JDG 20:2 I puta mai anō ngā rangatira o te iwi katoa, o ngā iwi katoa o Īharaira, i roto i te huihui o te iwi a te Atua, e whā rau ngā mano, he hunga haere i raro, he hunga mau hoari.
JDG 20:3 Ā, i rongo ngā tamariki a Pineamine kua tae ngā tamariki a Īharaira ki Mihipa. Nā, ka mea ngā tamariki a Īharaira, “Kōrerotia mai i pēheatia tēnei mea kino.”
JDG 20:4 Nā, ka utua e te Rīwaiti, e te tangata nāna te wahine i kōhurutia rā, ka mea, “I haere mai ahau ki Kipea, ki tērā i a Pineamine, māua ko tāku wahine iti, moe ai.
JDG 20:5 Nā, ko te whakatikanga mai o ngā tāngata o Kipea ki ahau, kei te karapoti i te whare i te pō, he mea hoki mōku; i mea rātou kia patua ahau; nā, whakaititia ana tāku wahine ā mate iho.
JDG 20:6 Nā, ka mau ahau ki tāku wahine, ā, tapatapahia ana e ahau, hoatu ana kia kawea puta noa i te whenua, i te kāinga tupu o Īharaira, mō rātou i mahi i te mahi kino, i te mahi pōauau i roto i a Īharaira.
JDG 20:7 Nā, e ngā tamariki a Īharaira, koutou katoa, hōmai ki konei tā koutou kupu, me tō koutou whakaaro.”
JDG 20:8 Nā, ka whakatika katoa te iwi ānō he tangata kotahi, ka mea, “E kore tētahi o tātou e haere ki tōna tēneti, e kore anō hoki tētahi o tātou e peka atu ki tōna whare.
JDG 20:9 Engari, ko tā tātou tēnei e mea ai ki Kipea: Mā te rota te tikanga mō tā tātou whawhai ki reira.
JDG 20:10 Me tango tāngata, kia tekau i roto i te rau, i ngā iwi katoa o Īharaira, he rau i roto i te mano, he mano i roto i te tekau mano, hei mau ō mō te iwi; ā, ka tae ki Kipea o Pineamine ka rite tā rātou e mea ai ki ngā mea pōauau katoa i mahia e rātou i roto i a Īharaira.”
JDG 20:11 Heoi, huihui ana ngā tāngata katoa o Īharaira hei whakaeke mō te pā, piri tonu me te mea he tangata kotahi rātou.
JDG 20:12 Nā, ka tono tāngata ngā iwi o Īharaira puta noa i te iwi katoa o Pineamine, hei mea, “He aha tēnei mea kino kua meatia nei i roto i a koutou?
JDG 20:13 Nā, hōmai āianei aua tāngata, ngā tama a Periara, i Kipea, kia whakamatea e mātou, kia whakakorea ai te kino i roto i a Īharaira.” Otiia kīhai a Pineamine i pai ki te whakarongo ki te reo o ō rātou tuākana, o ngā tamariki a Īharaira.
JDG 20:14 Nā, ka huihui ngā tama a Pineamine i roto i ngā pā ki Kipea, ka haere ki te whawhai ki ngā tama a Īharaira.
JDG 20:15 Nā, ka taua i taua rā ngā tama a Pineamine o ngā pā, e rua tekau mā ono mano ngā tāngata, he hunga mau hoari; tērā atu anō ngā tāngata o Kipea; i taua rātou e whitu rau tāngata, whiriwhiri rawa.
JDG 20:16 Kei roto anō i tēnei hunga katoa ētahi, e whitu rau, he hunga whiriwhiri, he mauī; ko ēnei katoa he hunga e piua ai te kōhatu ki te huruhuru māhunga, ā, e kore e taha.
JDG 20:17 I taua anō hoki ngā tāngata o Īharaira, ngā mea ehara i a Pineamine, e whā rau mano tāngata, he hunga mau hoari; he hunga hāpai pakanga ēnei katoa.
JDG 20:18 Kātahi ngā tama a Īharaira ka whakatika, ka haere ki Pētēre, ka ui atu ki te Atua, ka mea, “Ko wai o mātou hei tīmata te haere ki te whawhai ki ngā tama a Pineamine?” Nā, ka mea a Ihowā, “Mā Hūrā e tīmata.”
JDG 20:19 Nā, ka maranga ngā tama a Īharaira i te ata, ā, ka noho ki Kipea.
JDG 20:20 Nā, ka haere ngā tama a Īharaira ki te whawhai ki a Pineamine; ā, whakaritea ana ā rātou ngohi e ngā tama a Īharaira mō te whawhai ki Kipea.
JDG 20:21 Nā, ka puta ngā tama a Pineamine i roto i Kipea, ā, pirau rawa i a rātou ki te whenua i taua rā e rua tekau mā rua mano o ngā tāngata o Īharaira.
JDG 20:22 Nā, ka whakatenatena te iwi, ngā tāngata o Īharaira, i a rātou anō, ā, whakaritea ana anō ā rātou ngohi kia whawhai ai ki taua wāhi anō i whakaritea ai i te rā tuatahi.
JDG 20:23 I haere anō ngā tama a Īharaira, i tangi ki te aroaro o Ihowā ā ahiahi noa, i ui atu hoki ki a Ihowā, i mea, “Me haere atu anō ahau ki te whawhai ki ngā tama a Pineamine, a tōku teina?” Nā, ka mea a Ihowā, “Haere ki te whawhai ki a ia.”
JDG 20:24 Nā, ka whakatata ngā tama a Īharaira ki ngā tama a Pineamine i te rua o ngā rā.
JDG 20:25 I puta mai anō a Pineamine i roto i Kipea i te rua o ngā rā ki te tū ki a rātou, ā, pirau rawa anō i a rātou ki te whenua tekau mā waru mano o ngā tama a Īharaira; he hunga mau hoari katoa ēnei.
JDG 20:26 Kātahi ka haere ngā tama katoa a Īharaira me te iwi katoa, ā, ka tae ki Pētēre. Nā, ka tangi rātou, ā, ka noho i reira ki te aroaro o Ihowā, kāhore rawa, hoki i kai i taua rā ā ahiahi noa; me te whakaeke anō hoki i ngā tahunga tinana, i ngā whakahere mō te pai ki te aroaro o Ihowā.
JDG 20:27 Nā, ka ui ngā tama a Īharaira ki a Ihowā, i reira hoki te āka o te kawenata a te Atua i aua rā,
JDG 20:28 ko Pinehaha hoki, tama a Ereātara, tama a Ārona, te tū ana i tōna aroaro i aua rā; ka mea rātou, “Me haere atu anō ahau ki te whawhai ki ngā tama a Pineamine, a tōku teina, me whakamutu rānei?” Nā, ka mea a Ihowā, “Haere, ko āpōpō hoki rātou hoatu ai e ahau ki tōu ringa.”
JDG 20:29 Kātahi ka whakatakotoria he pehipehi e Īharaira mō Kipea ā taka noa, taka noa.
JDG 20:30 Nā, ka haere ngā tama a Īharaira ki ngā tama a Pineamine i te toru o ngā rā, e whakatakotoria ana ngā ngohi hei whawhai ki Kipea, pērā anō me mua rā.
JDG 20:31 Nā, ko te putanga mai o ngā tama a Pineamine ki te tū ki te iwi, manukāwhakitia ana rātou i te pā. Nā, ka tīmata rātou te patu i ētahi o te iwi, te tukituki, te pērā me mua rā, i ngā huarahi e tika atu rā, ko tētahi ki Pētēre, ko tētahi ki Kipea i te pārae, me te mea e toru tekau ngā tāngata o Īharaira.
JDG 20:32 Nā, ka mea ngā tama a Pineamine, “Kua hinga rātou i a tātou, kua pērā me tō te tīmatanga.” Otiia i mea ngā tama a Īharaira, “Kia rere atu tātou; me manukāwhaki mai rātou i roto i te pā ki ngā huarahi.”
JDG 20:33 Nā, ka whakatika ake ngā tāngata katoa o Īharaira i ō rātou wāhi, ā, ka tū ā-matua ki Paara-Tamara; i puta mai anō ngā pehipehi o Īharaira i tō rātou wāhi, arā i Marehekepa.
JDG 20:34 Nā, haere tonu atu ki Kipea ngā tāngata kotahi tekau mano, he hunga whiriwhiri i roto i a Īharaira katoa, ā, ka nui haere te whawhai; kīhai rātou i mōhio ka tata te kino ki a rātou.
JDG 20:35 Nā, patua iho e Ihowā a Pineamine i te aroaro o Īharaira, ā, ngaro iho o Pineamine i ngā tama a Īharaira i taua rā, e rua tekau mā rima mano kotahi rau; he hunga mau hoari ēnei katoa.
JDG 20:36 Heoi, ka kite ngā tama a Pineamine e patua ana rātou. I tukua mai a Pineamine e ngā tāngata o Īharaira, i whakamanawa atu hoki ki te pehipehi i whakatakotoria e rātou ki Kipea.
JDG 20:37 Nā, hohoro tonu te pehipehi, huakina ana e rātou a Kipea; te unuhanga mai hoki o te pehipehi, nā, patua iho e rātou te pā katoa ki te mata o te hoari.
JDG 20:38 Nā, kua oti tētahi tohu te whakarite e ngā tāngata o Īharaira ki te pehipehi, arā kia meinga e rātou kia nui te kake o te pongere o te paowa i te pā.
JDG 20:39 Ā, i te whatinga o ngā tāngata o Īharaira i te mea e whawhai ana. Ka anga a Pineamine ka patu, ka tukituki i ngā tāngata o Īharaira, me te mea e toru tekau tāngata; i mea hoki rātou, “Koia rawa anō! E hinga ana anō rātou i a tātou, e pērā ana anō me tō te whawhaitanga tuatahi.”
JDG 20:40 Otiia ka tīmata nei te kake o te pongere o te pā ki runga, me te pou auahi, nā, ka titiro ngā Pineamini ki muri i a rātou, nā, kua pau te pā i te ahi, e kake ana tērā he paowa ki te rangi.
JDG 20:41 Ko te tahuritanga atu o ngā tāngata o Īharaira, kanakana kau ana ngā tāngata o Pineamine; i kite hoki rātou kua tae mai te hē ki a rātou.
JDG 20:42 Nā reira ka whati rātou i te aroaro o ngā tāngata o Īharaira ki te huarahi ki te koraha; otiia i pipiri tonu te whai a te hoariri i a rātou. Nā, ko te hunga i puta mai i roto i ngā pā, kei te whakangaro i a rātou, he mea karapoti nā rātou.
JDG 20:43 Ka karapotia e rātou ngā Pineamini ā taka noa, ā, whāia ana, takatakahia ana i ō rātou okiokinga, i te ritenga atu o Kipea whaka te rāwhiti.
JDG 20:44 Ā, kotahi tekau mā waru mano o ngā tāngata o Pineamine i hinga; he hunga māia ēnei katoa.
JDG 20:45 Nā, ka whati rātou, ā, rere ana ki te koraha, ki te kāmaka o Rimono; ā, e rima mano tāngata i hamua e rātou ki ngā huarahi, nā, ka whāia anō rātou ki Kiromo, ā, patua iho o rātou e rua mano tāngata.
JDG 20:46 Nā, ko te hunga katoa i hinga o Pineamine i taua rā, e rua tekau mā rima mano, he hunga mau hoari; he hunga māia katoa ēnei.
JDG 20:47 Ā, e ono rau tāngata i tahuri, i rere ki te koraha, ki te kāmaka o Rimono, ā, e whā ngā marama i noho ai ki te kāmaka o Rimono.
JDG 20:48 Ā, i tahuri atu anō ngā tāngata o Īharaira ki ngā tama a Pineamine, ā, patua iho rātou ki te mata o te hoari, ko ngā tāngata o ngā pā, me ngā kararehe, me ngā mea katoa i tūpono atu ai rātou; i tūngia anō e rātou ki te ahi ngā pā katoa i tae atu ai rātou.
JDG 21:1 Nā, kua puaki noa ake te oati a ngā tāngata o Īharaira i Mihipa, i mea rātou: “Kaua tētahi tangata o tātou e hoatu i tāna tamāhine hei wahine mā Pineamine.”
JDG 21:2 Nā, ka haere te iwi ki Pētēre, ā, noho ana i reira i te aroaro o te Atua ā ahiahi noa; nā, rahi noa atu ō rātou reo, he nui te tangi.
JDG 21:3 I mea hoki rātou, “Nā te aha, e Ihowā, e te Atua o Īharaira, i puta ake ai tēnei i roto i a Īharaira; i ngaro ai tētahi iwi i tēnei rā i roto i a Īharaira?”
JDG 21:4 Nā, i te ata ka maranga wawe te iwi, ā, hangā ana he āta e rātou, ā, whakaekea ana he tahunga tinana, he whakahere mō te pai.
JDG 21:5 Nā, ka mea ngā tama a Īharaira, “Ko wai o ngā iwi katoa o Īharaira kāhore i tae mai i roto i te whakaminenga ki a Ihowā?” Kua takoto hoki he oati nui mō te tangata e kore e haere ki a Ihowā ki Mihipa; i mea rātou, “Ka whakamatea rawatia.”
JDG 21:6 Ā, kōingo tonu ngā tama a Īharaira ki tō rātou teina, ki a Pineamine; i mea, “Kua hautopea atu tētahi iwi i tēnei rā i roto i a Īharaira.
JDG 21:7 Me aha tātou ki ētahi wāhine mā ngā mea o rātou i mahue; kua oatitia hoki a Ihowā e tātou e kore ā tātou tamāhine e hoatu hei wāhine mā rātou?”
JDG 21:8 Nā, ka mea anō rātou, “Ko tēhea o ngā iwi o Īharaira kāhore nei i tae mai ki a Ihowā ki Mihipa?” Nā, kāhore tētahi tangata o Iapehe Kireara i haere ki te puni ki te whakaminenga.
JDG 21:9 I taua hoki te iwi, ā, kāhore tētahi tangata i reira o ngā tāngata o Iapehe Kireara.
JDG 21:10 Nā, ka tono te huihui i ētahi tāngata ki reira, kotahi tekau mā rua mano, he hunga toa, ā, ka whakahau i a rātou, ka mea, “Tīkina patua ngā tāngata o Iapehe Kireara ki te mata o te hoari, me ngā wāhine me ngā tamariki.
JDG 21:11 Ā, ko tēnei tā koutou e mea ai, Ko ngā tāne katoa, me ngā wāhine katoa i takoto ki te tāne, me huna.”
JDG 21:12 Ā, e whā rau ngā kōtiro i mau i a rātou i roto i ngā tāngata o Iapehe Kireara, he wāhina kāhore anō i mōhio noa, arā i takoto ki te tāne. Nā, kawea ana e rātou ki te puni ki Hiro, ki tērā i te whenua o Kanaana.
JDG 21:13 Kātahi ka unga tāngata te huihui katoa hei kōrero ki ngā tama a Pineamine i te kāmaka i Rimono, hei karanga ki a rātou, “Kua mau te rongo.”
JDG 21:14 Nā, ka hoki a Pineamine i taua wā; ā, ka hoatu ki a rātou ngā wāhine i whakaorangia e rātou i roto i ngā wāhine o Iapehe Kireara; otiia kīhai anō i rato.
JDG 21:15 Nā, kōingo tonu te iwi ki a Pineamine, nō te mea kua wāhia e Ihowā ngā iwi o Īharaira.
JDG 21:16 Nā, ka mea ngā kaumātua o te huihui, “Me aha tātou ki ētahi wāhine mā ngā mea i mahue, kua hunā nei hoki ngā wāhine a Pineamine?”
JDG 21:17 I mea anō rātou, “Kia whai kāinga tupu ngā mōrehu o Pineamine, kei mōtī rawa tētahi iwi i roto i a Īharaira.
JDG 21:18 Otiia e kore e taea te hoatu e tātou ā tātou tamāhine hei wāhine mā rātou.” Nō te mea kua oati ngā tama a Īharaira, kua mea: “Kia kangā te tangata e hoatu ana i te wahine ki a Pineamine.”
JDG 21:19 Nā, ka mea rātou, “Nanā, he hākari tērā ki a Ihowā i Hiro, i tēnei tau, i tēnei tau, i te taha ki te raki o Pētēre, i te taha ki te rāwhiti o te huarahi e tika atu ana i Pētēre ki Hekeme, i te tonga o Repona.”
JDG 21:20 Nā, ka whakahau atu rātou ki ngā tama a Pineamine, ka mea, “Haere ki ngā māra wāina whanga ai;
JDG 21:21 ā, e kite koutou. Nā, kua puta ngā tamāhine o Hiro ki te kanikani, nā, ka haere atu koutou i ngā māra wāina hopu i tāna wahine, i tāna wahine, i roto i ngā tamāhine o Hiro, ā, ka haere ki te whenua o Pineamine.
JDG 21:22 Ā, ka tae mai ō rātou mātua, ō rātou tungāne rānei, ki ā mātou whakawā ai, ko reira mātou mea ai ki a rātou, ‘Kia atawhai ki a mātou, arā ki a rātou; kīhai hoki i riro i a mātou he wahine mā tēnei, mā tēnei, o rātou i te mea e whawhai ana; ehara anō i te mea nā koutou i hoatu i tēnei wā, e hē ai koutou.’ ”
JDG 21:23 Nā, pērā ana ngā tama a Pineamine, ā, tangohia ana e rātou ētahi wāhine i roto i te hunga i kanikani rite tonu ki a rātou te tokomaha, mea hopu nā rātou; ā, haere ana noho ana ki tō rātou kāinga tupu; kei te hanga i ō rātou pā, nohoia iho e rātou.
JDG 21:24 Nā, ka tūria atu i reira i taua wā ngā tama a Īharaira ki tōna iwi ki tōna iwi, ki tōna hapū, ki tōna hapū. Nā, haere ana rātou i reira ki tōna kāinga, ki tōna kāinga.
JDG 21:25 I aua rā kāhore o Īharaira kīngi; ko tā rātou i mea ai ko ngā mea i tika ki te titiro a tēnei, a tēnei.
RUT 1:1 Nā, i ngā rā i whakarite ai ngā kaiwhakarite, kua pā te matekai ki te whenua, ā, ka haere tētahi tangata o Pēterehema Hūrā ki te whenua o Moapa noho ai; a ia, tāna wahine, me āna tama tokorua.
RUT 1:2 Nā, ko te ingoa o taua tangata, ko Erimereke, ko Naomi hoki te ingoa o tāna wahine; ko ngā ingoa hoki o āna tama tokorua, ko Maharono, ko Kiriono, he Ēparati rātou, nō Pēterehema Hūrā. Nā, haere ana ki te whenua o Moapa, ā, noho ana i reira.
RUT 1:3 Nā, ka mate a Erimereke, te tahu a Naomi, ā, mahue iho ko ia, rātou ko āna tama tokorua.
RUT 1:4 Nā, ka tango wāhine rāua mā rāua i roto i ngā wāhine o Moapa; ko Oropa te ingoa o tētahi, ko Rutu te ingoa o tētahi, ā, noho ana i reira, kotahi tekau ngā tau.
RUT 1:5 Nā, ka mate rāua tokorua, ā, Maharono rāua ko Kiriono, ā, ko te wahine anake te putanga o āna tama tokorua, o tāna tahu.
RUT 1:6 Kātahi ia ka whakatika, rātou ko āna hunaonga, ā, hoki ana i te whenua o Moapa; i rongo hoki i te whenua o Moapa kua titiro mai a Ihowā ki tāna iwi, kua hoatu e ia he taro mā rātou.
RUT 1:7 Heoi, haere atu ana ia i te wāhi i noho ai, rātou tahi ko āna hunaonga tokorua, ā, haere ana i te ara, hoki ana ki te whenua o Hūrā.
RUT 1:8 Nā, ka mea a Naomi ki āna hunaonga tokorua, “E hoki ki ngā whare o ō kōrua whaea. Mā Ihowā kōrua e atawhai; kia rite tāna ki tā kōrua mahi ki ngā tūpāpaku, ki ahau hoki.
RUT 1:9 Mā Ihowā e hōmai ki a kōrua kia kite kōrua i te okiokinga i roto i te whare o tāna tahu, o tāna tahu.” Nā, ka kihi ia i a rāua, ā, rahi noa atu ō rātou reo ki te tangi.
RUT 1:10 Nā, ka mea rāua ki a ia, “Engari me hoki tahi tātou ki tōu iwi.”
RUT 1:11 Anō rā ko Naomi, “Hoki atu, e āku tamāhine; kia haere tahi kōrua i ahau hei aha? He tama anō ianei ēnei kei roto i tōku kōpū hei tāne mā kōrua?
RUT 1:12 Hoki atu, e āku tamāhine, haere, kua rūruhitia nei hoki ahau, ā, e kore e whai tahu. Me i kī ahau, Kei te tūmanako ahau, tērā anō ahau e whai tāne i tēnei pō, ā, ka whānau anō he tama māku.
RUT 1:13 Tērā rānei kōrua e tatari ki a rāua kia kaumātua rā anō? Tērā rānei e mau tonu kōrua ki a rāua, ā, e whakakāhore ki te tāne? Kāhore, e āku tamāhine, nui noa atu hoki tōku pōuri ina whakaaro ki a kōrua; nā te ringa hoki o Ihowā kua puta mai nei ki ahau.”
RUT 1:14 Nā, ka puaki anō tō rātou reo, ā, ka tangi. Nā, ka kihi a Oropa i tōna hungawai; ko Rutu ia i piri ki a ia.
RUT 1:15 Nā, ka mea ia, “Nanā, kua hoki tōu taokete ki tōna iwi, ki ōna atua; hoki atu, whāia tōu taokete.”
RUT 1:16 Nā, ka mea a Rutu, “Kaua rā e tohe ki ahau kia whakarērea koe, kia hoki atu i te whai i a koe! Tā te mea ka haere ahau ki tāu wāhi e haere ai, ka noho hoki ki tāu wāhi e noho ai; ko tōu iwi hei iwi mōku, ko tōu Atua hei Atua mōku.
RUT 1:17 Ka mate ahau ki te wāhi e mate ai koe – ka tanumia hoki ki reira. Kia meatia tēnei e Ihowā ki ahau, ētahi atu mea anō hoki, inā, ko te mate anake hei wehe i a tāua.”
RUT 1:18 Ā, i tōna kitenga e ū ana tōna ngākau kia haere tahi rāua, mutu ake tāna kōrero ki a ia.
RUT 1:19 Heoi, haere ana rāua tokorua, ā tae noa ki Pēterehema. Ā, ka tae rāua ki Pēterehema, nā, ka oho katoa te pā ki a rāua, ka mea ngā wāhine, “Ko Naomi tēnei?”
RUT 1:20 Nā, ka mea ia ki a rātou, “Kaua ahau e karangatia, ko Naomi; ko Mara tā koutou e karanga ai ki ahau; he kawa rawa hoki tā te Kaha Rawa mahi ki ahau.
RUT 1:21 Kī tonu ahau i tōku haerenga atu; nā, kua whakahokia kautia mai e Ihowā. Nā te aha ahau i karangatia ai ko Naomi e koutou, kua whakaaturia nei hoki tōku hē e Ihowā, kua tūkinotia ahau e te Kaha Rawa?”
RUT 1:22 Heoi, hoki mai ana a Naomi rāua tahi ko tāna hunaonga, ko Rutu Moapi hoki ana i te whenua o Moapa; ā, haere ana ki Pēterehema i te tīmatanga o te kotinga pārei.
RUT 2:1 Nā, he whanaunga tō Naomi arā tō tāna tahu, he tangata taonga nui, nō te hapū o Erimereke; ko Poaha tōna ingoa.
RUT 2:2 Nā, ka mea a Rutu Moapi ki a Naomi, “Kia haere ahau ki te māra ki te hamu i ngā puku pārei i muri i te tangata e manakohia mai ai ahau.” Anō rā ko tērā, “Haere, e tāku tamāhine.”
RUT 2:3 Nā, haere ana ia, ā, nō te taenga atu, ka hamu i te māra i muri i ngā kaikokoti; ā, tūpono noa ia ko te wāhi o te māra i a Poaha o te hapū o Erimereke.
RUT 2:4 Nā, ko te taenga o Poaha i Pēterehema, ka mea ki ngā kaikokoti, “Kia noho a Ihowā ki a koutou.” Anō rā ko rātou ki a ia, “Kia manaakitia koe e Ihowā.”
RUT 2:5 Kātahi ka mea a Poaha ki tāna tangata i tohutohu nei i ngā kaikokoti, “Nā wai tēnei kōtiro?”
RUT 2:6 Nā, ka whakahoki te kaitohutohu i ngā kaikokoti, ka mea, “Ko te kōtiro Moapi tēnei i hoki tahi mai nei rāua ko Naomi i te whenua o Moapa.
RUT 2:7 I mea mai hoki ia, ‘Tukua ahau kia hamu, kia kohikohi i roto i ngā paihere, i muri i ngā kaikokoti.’ Heoi, haere ana ia, ā, i konei tonu ia o te ata iho anō ā tae mai ki nāianei; he iti nei tōna noho i te whare.”
RUT 2:8 Nā, ka mea a Poaha ki a Rutu, “E kore rānei koe e rongo mai, e tāku tamāhine? Kaua e haere ki tētahi māra kē hamu ai; kaua anō e haere atu i konei; engari me noho tonu ki konei, ki āku kōtiro.
RUT 2:9 Kia matatau ōu kanohi ki te māra e kotia ana e rātou, ka whai i a rātou; kāhore ianei ahau i kī atu ki ngā taitamariki kia kaua rātou e pā ki a koe? E matewai hoki koe, haere ki ngā oko, inu ai i tā ngā taitamariki i utu mai ai.”
RUT 2:10 Nā, ka tāpapa iho tērā, ka piko iho ki te whenua, ā, ka mea ki a ia, “Nā te aha koe i manako mai ai ki ahau, i mōhio ai hoki ki ahau, he manene nei hoki ahau?”
RUT 2:11 Nā, ka whakahoki a Poaha ka mea ki a ia, “Kua āta kōrerotia mai ki ahau ngā mea katoa i mea ai koe ki tōu hungawai i muri i te matenga o tāu tahu, tāu whakarerenga hoki i tōu pāpā, i tōu whaea, i te whenua anō i whānau ai koe, ā, haere mai ana ki te iwi kīhai i mōhiotia e koe i mua ake nei.
RUT 2:12 Mā Ihowā e utu tāu mahi; kia āta rite hoki te utu e hōmai ki a koe e Ihowā, e te Atua o Īharaira, kua tae mai nei hoki koe ki raro ki ōna parirau okioki ai.”
RUT 2:13 Anō rā ko tērā, “Kia manakohia mai ahau, e tōku ariki; ka ora nei hoki tōku ngākau i a koe, he pai hoki tāu kupu ki tāu pononga; ko ahau ia kāhore e rite ki tētahi o āu pononga wāhine.”
RUT 2:14 I mea anō a Poaha ki a ia i te wā i kai ai, “Haere mai ki konei, ki te kai taro māu, ka tuku hoki i tāu kongakonga ki roto ki te winika.” Nā, ka noho ia ki te taha o ngā kaikokoti, i hōmai anō e rātou he wīti pāhūhū māna. Nā, kai ana ia, ā, ka mākona, ā, toe ake.
RUT 2:15 Ā, i tōna whakatikanga ki te hamu, ka ako a Poaha i āna taitamariki, ka mea, “Kia hamu anō ia i roto i ngā paihere; kaua anō hoki ia e meinga kia whakamā.
RUT 2:16 Whakangahorotia anō ētahi kapunga māna, whakarērea atu kia kohia e ia, kaua hoki e rīria.”
RUT 2:17 Nā, ka hamu ia i te māra ā ahiahi noa, ā, patupatua ana e ia āna i hamu ai; ā, me te mea kotahi te epa pārei.
RUT 2:18 Nā, tangohia ana e ia, ā, haere ana ki te pā, ā, ka kite tōna hungawai i āna i hamu ai; i whakaputaina anō e ia, i hōmai ki a ia ngā toenga i a ia kua mākona.
RUT 2:19 Nā, ka mea tōna hungawai ki a ia, “I hamu koe ki hea ināianei? I hea hoki, koe e mahi ana? Kia manaakitia te tangata i mōhio nā ki a koe.” Nā, kōrerotia ana e ia ki tōna hungawai te tangata i mahi nei ia ki a ia, ā, ka mea, “Ko te ingoa o te tangata i mahi nei ahau ki a ia ināianei ko Poaha.”
RUT 2:20 Anō rā ko Naomi ki tāna hunaonga, “Kia manaakitia ia e Ihowā, kīhai nei tōna aroha i mahue ki te hunga ora, ki te hunga mate.” Nā, ka mea a Naomi ki a ia, “He tata taua tangata ki a tāua, nō ō tāua whanaunga tupu.”
RUT 2:21 Nā, ka mea anō a Rutu Moapi, “I mea mai anō hoki ia ki ahau, ‘Kia tata tonu koe ki āku tāngata, kia poto rā anō āku mea katoa te kokoti.’ ”
RUT 2:22 Nā, ka mea a Naomi ki a Rutu, ki tāna hunaonga, “He pai, e tāku tamāhine, ki te haere tahi koe me āna kōtiro, kei rīria koe i te māra kē.”
RUT 2:23 Nā, kei te whai tonu ia i ngā kōtiro a Poaha, ka hamu ā poto noa ngā pārei te kokoti, me te wīti hoki te kokoti; i tōna hungawai ia tōna nohoanga.
RUT 3:1 Nā, ka mea a Naomi tōna hungawai ki a ia, “Kaua ianei ahau e rapu i te okiokinga mōu, e tāku tamāhine, e puta mai ai te pai ki a koe?
RUT 3:2 Ehara ianei i te whanaunga nō tāua a Poaha nāna nei aua kōtiro, ōu hoa nā? Nanā, ko ā tēnei pō ia whakarererere ai i te pāpapa o te pārei i te patunga wīti.
RUT 3:3 Nā, horoia koe, ka whakawahi i a koe, ka kākahu ai i ōu kākahu, ka haere ki raro, ki te patunga wīti; kaua ia koe e whakaaturia ki taua tangata, ā mutu noa tāna kai, tāna inu.
RUT 3:4 Ā, ka takoto ia, nā, me titiro koe ki te wāhi e takoto ai ia; ā, ka haere atu, ka hura i ngā kākahu o ōna waewae, ka takoto; ko reira ia whakaatu ai ki a koe i tāu e mea ai.”
RUT 3:5 Nā, ka mea tērā ki a ia, “Māku e mea ngā mea katoa i kōrerotia mai nā e koe ki ahau.”
RUT 3:6 Nā, ko tōna haerenga ki raro, ki te patunga wīti, meatia ana e ia ngā mea katoa i whakahaua e tōna hungawai ki a ia.
RUT 3:7 Nā, ka kai a Poaha ka inu, ā, hari ana tōna ngākau, ā, ka haere, ka takoto ki te pito o te pūranga; nā, ko te āta haerenga o tērā, hurahia ana ngā kākahu o ōna waewae, nā, kua takoto.
RUT 3:8 Ā, i waenganui pō ka oho te mauri o taua tangata, ka tahuri ia; nā, he wahine e takoto ana i ōna waewae.
RUT 3:9 Nā, ka mea ia, “Ko wai koe?” Ā, ka mea ake tērā, “Ko Rutu ahau, ko tāu pononga wahine; nā, uhia iho te pito o tōu ki tāu pononga; he whanaunga tupu hoki koe.”
RUT 3:10 Nā, ka mea ia, “Kia manaakitia koe e Ihowā, e tāku tamāhine; nui atu hoki i tō te tīmatanga tōu aroha o te whakamutunga, i a koe kīhai nei i aru i ngā taitama, i te mea rawakore, i te mea whai taonga rānei.
RUT 3:11 Nā, kaua e wehi, e tāku tamāhine; ka meatia e ahau ki a koe āu mea katoa i kī mai ai; e mōhio ana hoki te pā katoa o tōku iwi he wahine koe e uaua ana ki te pai.
RUT 3:12 Nā, he tika anō, he whanaunga tupu ahau nōu; otiia tēnā anō tētahi e tata rawa ana i ahau.
RUT 3:13 Takoto mārie i tēnei pō; ā, i te ata ki te whakawhanaunga ia ki a koe, he tika, māna te tikanga whanaunga; ki te kāhore ia e pai māna te tikanga o te whanaunga ki a koe, nā māku te tikanga whanaunga ki a koe; e ora ana ā Ihowā. Āta takoto, kia taea rā anō te ata.”
RUT 3:14 Nā, takoto tonu ia ki ōna waewae ā taea noatia te ata; ā, ka maranga, i te mea e kore te tangata e kite i tōna hoa. Nā, ka mea tērā, “Kei mōhiotia i haere mai he wahine ki te patunga wīti.”
RUT 3:15 I mea anō ia, “Tēnā koa te koroka i runga i a koe nā, puritia mai.” Nā, puritia ana e ia. Nā, ka mēhuatia atu ētahi pārei e ia, e ono ngā mēhua; ā, whakawahā atu ana ki a ia; nā, haere ana ia ki te pā.
RUT 3:16 Ā, nō tōna taenga ki tōna hungawai, ka mea tērā, “Kei te pēhea koe, e tāku tamāhine?” Nā, kōrerotia ana e ia ki a ia ngā mea katoa i mea ai taua tangata ki a ia.
RUT 3:17 I mea anō ia, “Ko ēnei mēhua pārei e ono i hōmai e ia ki ahau; i mea hoki ki ahau, ‘Kei haere kau koe ki tōu hungawai.’ ”
RUT 3:18 Nā, ka mea tērā, “Āta noho, e tāku tamāhine, kia mōhiotia rā anō e koe te tukunga iho o tēnei mea. E kore hoki e mutu tā taua tangata, kia oti rā anō tēnei mea i a ia āianei.”
RUT 4:1 Nā, ka haere a Poaha ki te kūwaha, ā, noho ana i reira. Nā, ko te whanaunga tata i kōrerotia rā e Poaha e haere ana. Kātahi tērā ka mea atu, “E! Ko koe tonu ia! Peka mai nei ki konei noho ai.” Nā, ka peka atu ia, ā, noho ana.
RUT 4:2 Nā, ka tīkina e ia ētahi tāngata o ngā kaumātua o te pā, kotahi tekau, ā, ka mea, “E noho ki konei.” Nā, noho ana rātou.
RUT 4:3 Nā, ka mea ia ki taua whanaunga tata, “E hokona ana e Naomi i haere mai nei i te whenua o Moapa, te wāhi o te māra i tō tātou tuakana, i a Erimereke.
RUT 4:4 Nā, ka whakaaro ahau, me whakaatu ki a koe, me te kī atu: Māu e hoko i te aroaro o ngā tāngata e noho nei, i te aroaro anō hoki o ngā kaumātua o tōku iwi. Ki te hokona e koe, hokona; ā, ki te kāhore e hokona, kōrerotia mai ki ahau, kia mōhio ai ahau; kāhore hoki he tangata hei hoko, ko koe anake, ā, ko ahau tō muri i a koe.” Nā, ka mea tērā, “Māku e hoko.”
RUT 4:5 Kātahi a Poaha ka mea, “Ā te rā e hoko ai koe i te māra i te ringa o Naomi, e hoko ana hoki koe i a Rutu, i taua Moapi, i te wahine a te tūpāpaku, hei whakaara ingoa ake mō te tūpāpaku ki tōna wāhi tupu.”
RUT 4:6 Nā, ka mea taua whanaunga tata, “E kore e taea te hoko e ahau māku; kei hē tōku kāinga tupu. Māu tāku hokonga e hoko; e kore hoki e taea te hoko e ahau.”
RUT 4:7 Nā, i mua ko te tikanga tēnei i roto i a Īharaira mō ngā hoko mai anō, mō ngā whakawhiti, hei whakaū mō ngā mea katoa. Unuhia ai e tētahi tōna hū, ā, ka hoatu ki tōna hoa; ā, hei kaiwhakaatu tēnā i roto i a Īharaira.
RUT 4:8 Nā, ka mea taua whanaunga ki a Poaha, “Māu e hoko.” Ā, unuhia ake e ia tōna hū.
RUT 4:9 Nā, ka mea a Poaha ki ngā kaumātua rātou ko te iwi katoa, “He kaititiro koutou i tēnei rā ki tāku hokonga mai i ngā mea katoa a Erimereke, i ngā mea katoa anō a Kiriono, a Maharono, i roto i te ringa o Naomi;
RUT 4:10 me Rutu Moapi hoki me te wahine a Maharono. Kua hokona mai ia e ahau hei wahine māku, hei whakaara ingoa ake mō te tūpāpaku ki tōna kāinga tupu, kei hautopea atu te ingoa o te tūpāpaku i roto i ōna tēina, i te kūwaha anō o tōna wāhi; ko koutou ngā kaititiro i tēnei rā.”
RUT 4:11 Nā, ka mea ngā tāngata katoa i te kūwaha, rātou ko ngā kaumātua, “He kaititiro mātou. Mā Ihowā e mea tēnā wahine e haere mai nā ki tōu whare kia rite ki a Rahera rāua ko Rea, nā rāua nei i tū ai te whare o Īharaira. Kia nui anō hoki tāu mahi i Ēparata, kia whai ingoa koe i Pēterehema.
RUT 4:12 Hei te whare o Parete, whānau a Tāmara rāua ko Hūrā, te rite mō tōu whare, arā mō te uri e hōmai e Ihowā ki a koe i roto i tēnei kōtiro.”
RUT 4:13 Nā, ka tango a Poaha i a Rutu, ā, waiho iho ia hei wahine māna. Nā, ka tae atu ia ki a ia, ā, ka meinga e Ihowā kia hapū; nā, kua whānau tāna tama.
RUT 4:14 Nā, ka mea ngā wāhine ki a Naomi, “Kia whakapaingia a Ihowā, kīhai nei i waiho i a koe i tēnei rā kia hapa i tētahi whanaunga tata; kia rangona anō tōna ingoa i roto i a Īharaira.
RUT 4:15 Māna hoki tōu wairua e whakahoki ake, ko ia hoki hei atawhai mō tōu rūruhitanga; he whānau hoki ia nā tāu hunaonga e aroha nei ki a koe, he nui kē nei tōna pai ki a koe i tō ngā tama tokowhitu.”
RUT 4:16 Nā, ka tango a Naomi i taua tamaiti, ā, whakatakotoria ana ki tōna uma, ā, ko ia hei kaihikihiki mōna.
RUT 4:17 Nā, huaina ana he ingoa mōna e ngā wāhine e noho tata ana; i mea rātou, “Kua whānau tētahi tamaiti mā Naomi.” Nā, huaina ana e rātou tōna ingoa ko Ōpere. Ko te pāpā tēnei o Hehe, pāpā o Rāwiri.
RUT 4:18 Nā, ko ngā whakatupuranga ēnei o Parete: 1 nā Parete ko Heterono;
RUT 4:19 nā Heterono ko Rame, nā Rame ko Aminarapa,
RUT 4:20 nā Aminarapa ko Nāhahona, nā Nāhahona ko Haramono,
RUT 4:21 nā Haramono ko Poaha, nā Poaha ko Ōpere,
RUT 4:22 nā Ōpere ko Hehe, nā Hehe ko Rāwiri.
1SA 1:1 Nā, tērā tētahi tangata nō Ramataima Topimi, nō te whenua pukepuke o Ēparaima, ko Erekana tōna ingoa, he Ēparati, he tama nā Ierohama, tama a Erihu, tama a Tohu, tama a Tupu.
1SA 1:2 Ā, tokorua āna wāhine; ko Hana te ingoa o tētahi, ko Penina te ingoa o tētahi; nā, he tamariki a Penina, kāhore ia he tamariki a Hana.
1SA 1:3 Ā, haere atu ai tēnei tangata i ia tau, i ia tau, i tōna pā ki te koropiko, ki te patu whakahere ki a Ihowā o ngā mano, ki Hiro, ā, i reira ngā tama tokorua a Eri, a Hōponi rāua ko Pinehaha, ngā tohunga a Ihowā.
1SA 1:4 Ā, ka tae ki te rā i patu whakahere ai a Erekana, nā, hoatu ana e ia ētahi mea ki a Penina, ki tāna wahine, ki āna tama katoa anō, rātou ko āna tamāhine;
1SA 1:5 ki tāna wahine ia, ki a Hana, e rua ngā wāhi i hoatu e ia; i aroha hoki ia ki a Hana; otiia kua oti tōna kōpū te tūtaki e Ihowā.
1SA 1:6 Ā, nui atu te whakatoi a tōna hoa tauwhāinga ki a ia, ā mamae noa ia, nō te mea kua tūtakina tōna kōpū e Ihowā.
1SA 1:7 Pēnā tonu tā te tāne mahi, i ia tau, i ia tau, i ngā haerenga o tēnei ki runga, ki te whare o Ihowā, ā, pēnā tonu tā tērā whakatoi i tēnei; ā, tangi noa ia, kīhai hoki i kai.
1SA 1:8 Nā, ka mea tāna tahu, a Erekana ki a ia, “E Hana, he aha koe i tangi ai? He aha hoki koe tē kai ai? He aha anō i pōuri ai tōu ngākau? Ki tāu e kore ianei e nui atu tōku pai i tō ngā tama kotahi tekau?”
1SA 1:9 Heoi, ka whakatika a Hana i muri i a rātou i kai ai i Hiro, i inu ai hoki. Nā, ko Eri ko te tohunga, i runga i tōna nohoanga noho ai, i te pou o te kūwaha o te temepara o Ihowā.
1SA 1:10 Ā, i tino pōuri te ngākau o tērā, ka īnoi ki a Ihowā, ā, nui atu tāna tangi.
1SA 1:11 Nā, ka puaki tāna kī taurangi, i mea ia, “E Ihowā o ngā mano, ki te āta titiro mai koe ki te pōuri o tāu pononga wahine, ā, ka mahara ki ahau, ā, e kore e wareware ki tāu pononga, engari ka hōmai i tētahi tama ki tāu pononga, nā, ka hoatu ia e ahau ki a Ihowā i ngā rā katoa e ora ai ia; e kore anō he heu e heua ki tōna mātenga.”
1SA 1:12 Nā, i te mea e īnoi tonu ana ia i te aroaro o Ihowā, ka titiro a Eri ki tōna waha.
1SA 1:13 Nā, ko Hana, e kōrero ana ia i roto i tōna ngākau; ko ōna ngutu kau e komeme ana, kīhai ia tōna reo i rangona; nā reira i mea ai a Eri e haurangi ana ia.
1SA 1:14 Nā, ka mea a Eri ki a ia, “Ka tae te roa o tōu haurangi! Whakarērea atu tāu wāina.”
1SA 1:15 Nā, ka utua e Hana, ka mea, “Kāhore, e tōku ariki; he wahine ngākau pōuri ahau; kāhore ahau i inu i te wāina, i te wai whakahaurangi rānei; engari e ringihia ana e ahau tōku ngākau ki te aroaro o Ihowā.
1SA 1:16 Kaua tāu pononga e kīia he tamāhine nā Periara; nā te nui hoki o tōku mamae, o tōku pōuri, ēnei kōrero āku.”
1SA 1:17 Kātahi ka utua e Eri, ka mea ia, “Haere mārie; ā, mā te Atua o Īharaira e hōmai tāu mea i īnoi ai koe ki a ia.”
1SA 1:18 Nā, ka mea tērā, “Kia manakohia tāu pononga e koe.” Kātahi taua wahine ka haere, ka kai, ā, mutu ake te pōuri o tōna mata.
1SA 1:19 Nā, ka maranga wawe rātou i te ata, ā, ka koropiko ki te aroaro o Ihowā, ā, hoki ana, haere ana ki tō rātou whare i Rama. Nā, ka mōhio a Erekana ki a Hana, ki tāna wahine; i mahara anō a Ihowā ki a ia.
1SA 1:20 Nā, ka taka ngā rā, ka hapū a Hana, ā, ka whānau he tama; ā, huaina iho e ia tōna ingoa ko Hamuera, i mea hoki, “Nō te mea i īnoia ia e ahau i a Ihowā.”
1SA 1:21 Nā, ka haere taua tangata a Erekana me tōna whare katoa ki runga, ki te patu i te whakahere o te tau ki a Ihowā, me tāna kī taurangi hoki.
1SA 1:22 Ko Hana ia kīhai i haere; i mea hoki ki tāna tahu, “Kia whakamutua rā anō te kai ū a te tamaiti, ko reira ahau kawe atu ai i a ia, kia puta ai ia ki te aroaro o Ihowā, mō tōna noho tonu atu ki reira.”
1SA 1:23 Nā, ka mea a Erekana tāna tahu ki a ia, “Meatia tā tōu whakaaro e whakapai ai; e noho, kia whakamutua rā anō tāna kai ū otiia kia mau te kupu a Ihowā. Heoi, noho ana taua wahine, whakangotea ana tāna tama, ā mutu noa tāna kai ū.”
1SA 1:24 Nā, i te mutunga o tāna kai ū ka mauria ia e ia, me ētahi pūru e toru, kotahi hoki te epa parāoa, me te pounamu wāina, kawea ana ia e ia ki te whare o Ihowā, ki Hiro; he tamariki rawa hoki taua tamaiti.
1SA 1:25 Nā, patua ana e rātou te pūru, ā, kawea ana te tamaiti ki a Eri.
1SA 1:26 Ā, ka mea ia, “E tōku ariki, kia ora tōu wairua; e tōku ariki, ko ahau te wahine i tū i tōu taha i konei nei, i īnoi rā ki a Ihowā.
1SA 1:27 Ko tēnei tamaiti tāku i īnoi ai; ā, hōmai ana e Ihowā ki ahau tāku mea i īnoi ai ahau ki a ia.
1SA 1:28 Nā reira kua tukua atu nei ia e ahau ki a Ihowā; he mea tuku ia ki a Ihowā i ngā rā katoa e ora ai ia.” Ā, koropiko ana te tamaiti ki a Ihowā ki reira.
1SA 2:1 Nā, ka karakia a Hana, ka mea, “E whakamanamana ana tōku ngākau ki a Ihowā; kua ara tōku haona i a Ihowā. Ka rahi tōku waha ki ōku hoariri, nōku ka koa ki tāu whakaoranga.
1SA 2:2 “Kāhore he mea tapu, ko Ihowā anake; kāhore kē atu, ko koe anake; kāhore anō hoki he kāmaka hei rite mō tō tātou Atua.
1SA 2:3 “Kāti te whakanui i te kōrero whakahīhī; kei puta te whakapehapeha i ō koutou māngai; he Atua mōhio hoki a Ihowā, ā, ka pāunatia e ia ngā mahi.
1SA 2:4 “Whati ana ngā kōpere a te hunga mārohirohi, ā, ko te hunga i tūtuki te waewae, ko te kaha hei whītiki mō rātou.
1SA 2:5 E mahi ana hei utu taro te hunga i mākona i mua, ā, mutu ake tā te hunga i matekai. Heoi, kua tokowhitu a te pākoko i whānau ai; ā, iwikore noa iho te mea kua tokomaha nei āna tamariki.
1SA 2:6 “Ko Ihowā e whakamate ana, ā, ko ia e whakaora ana; māna e riro ai ki raro ki te rēinga, māna e kake ai ki runga.
1SA 2:7 Ko Ihowā hei whakarawakore, ko ia hei whakawhiwhi ki te taonga; māna e whakaiti, māna anō hoki e whakaara.
1SA 2:8 Whakaarahia ana e ia te iti i roto i te puehu; ara ana i a ia te rawakore i roto i te pūranga paru, ā, whakanohoia iho ki roto ki ngā rangatira, meinga ana kia whiwhi ki te torōna korōria. “Nō Ihowā rā hoki ngā pou tūranga o te whenua; ā, whakanohoia iho e ia te ao ki runga.
1SA 2:9 Māna ngā waewae o tāna hunga tapu e tiaki; ko te hunga kino ia ka whakanohoia ki roto ki te pōuri wahangū ai; ehara hoki te kaha i te mea e riro ai te pāpā i te tangata.
1SA 2:10 “Mongamonga noa ngā hoariri o Ihowā; ka papā mai tāna whatitiri i te rangi ki a rātou. Ka whakarite whakawā a Ihowā mō ngā pito o te whenua; māna e hōmai he kaha ki tāna kīngi, e whakaara te haona o tāna i whakawahi ai.”
1SA 2:11 Nā, ka haere a Erekana ki Rama ki tōna whare, ā, minita ana taua tamaiti ki a Ihowā i te aroaro o te tohunga, o Eri.
1SA 2:12 Nā, he tama nā Periara ngā tama a Eri; kīhai rātou i mōhio ki a Ihowā.
1SA 2:13 Nā, ko te tikanga tēnei a ngā tohunga i roto i te iwi; i te patunga a tētahi i te whakahere, ka haere te tangata a te tohunga, i te mea kei te kōhua anō ngā kiko, me te mārau e toru nei ngā koikoi i tōna ringa.
1SA 2:14 Nā, ka werohia e ia ki te peihana, ki te pāta rānei, ki te hōpane rānei, ki te kōhua rānei; ko ngā mea katoa i riro ake i te mārau, i tangohia e te tohunga ki taua mea. Pēnā tonu tā rātou mahi i Hiro ki ngā Īharaira katoa i haere ki reira.
1SA 2:15 Āe rā, i te mea anō hoki kāhore i tahuna noatia ngā ngako, ka haere te tangata a te tohunga, ka mea ki te tangata nāna te whakahere, “Hōmai tētahi wāhi kiko kia tunua mā te tohunga; e kore hoki ia e tango i āu kiko, i te mea kōhua, engari i te mea mata.”
1SA 2:16 Ā, ki te kī mai te tangata ki a ia, “Āianei pū tahuna ai e rātou te ngako, ā, hei reira koe tango ai i tā tōu ngākau i pai ai.” Kātahi tērā ka mea atu, “Kāhore; engari me hōmai e koe āianei; ā, ki te kāhore, ka tangohia māoritia e ahau.”
1SA 2:17 Nā, nui atu te hara o aua taitama i te aroaro o Ihowā; nō te mea i whakarihariha ngā tāngata ki te whakahere a Ihowā.
1SA 2:18 Ko Hamuera ia i minita ki te aroaro o Ihowā, he tamariki nei ia, whītiki rawa tōna epora rīnena.
1SA 2:19 I hangā anō he koroka iti e tōna whaea mōna, ā, kawea ana ki a ia i tēnei tau, i tēnei tau, i ō rāua haerenga ko tāna tahu ki te patu i te whakahere o te tau.
1SA 2:20 Nā, ka whakapai a Eri i a Erekana rāua ko tāna wahine, ka mea, “Mā Ihowā e hōmai he uri ki a koe i roto i tēnei wahine mō tēnei ka tukua nei ki a Ihowā.” Nā, hoki ana rāua ki tō rāua wāhi.
1SA 2:21 Nā, ka titiro a Ihowā ki a Hana, ā, ka hapū anō ia, ka whānau, tokotoru ngā tama, tokorua ngā kōtiro. Ā, tupu ana te tamaiti, a Hamuera, i te aroaro o Ihowā.
1SA 2:22 Nā, kua koroheke rawa a Eri. Kua rongo hoki ki ngā mea katoa i mea ai āna tama ki a Īharaira katoa, ki tō rāua takotoranga hoki ki ngā wāhine i mahi ki te whatitoka o te tapenākara o te whakaminenga.
1SA 2:23 Nā, ka mea ia ki a rāua, “He aha kōrua i mahi ai i ēnei mea? Kua rongo hoki ahau ki tēnei iwi katoa ki ā kōrua mahi kino.
1SA 2:24 Kāti rā, e āku tama; ehara hoki i te pai te kōrero e rangona nei e ahau; e mea ana kōrua i te iwi o Ihowā kia poka kē.
1SA 2:25 Ki te hara he tangata ki tōna hoa, mā te Atua te whakawā mōna; tēnā ko tēnei, ka hara te tangata ki a Ihowā, ko wai hei kaiwawao mōna?” Heoi, kīhai rāua i pai ki te whakarongo ki te reo o tō rāua pāpā, nō te mea i pai a Ihowā kia whakamatea rāua.
1SA 2:26 Ā, nui haere ana anō taua tamaiti, a Hamuera, e paingia ana e Ihowā, e ngā tāngata.
1SA 2:27 Nā, ka haere mai tētahi tangata a te Atua ki a Eri, ka mea ki a ia, “Ko te kupu tēnei a Ihowā, ‘Kāhore ianei ahau i puta mārama ki te whare o tōu pāpā, i a rātou i Īhipa, i pononga ai i te whare o Parao?
1SA 2:28 Kāhore rānei ahau i whiriwhiri i a ia i roto i ngā iwi katoa o Īharaira hei tohunga mōku, hei whakaeke whakahere ki runga ki tāku āta, hei tahu whakakakara, hei kākahu i te epora ki tōku aroaro? Ā, hoatu ana ki te whare o tōu pāpā ngā whakahere ahi katoa a ngā tamariki a Īharaira?
1SA 2:29 Ā, he aha koutou i takahi ai i ōku patunga tapu, i ōku whakahere, i kīia e ahau mō tōku nohoanga; i a koe ka whakahōnore nei i āu tama ki runga ake i ahau, ā, ka tetere nei koutou i ngā mea papai o ngā whakahere katoa a Īharaira, a tāku iwi?’
1SA 2:30 “Nā reira tēnei kupu a Ihowā, a te Atua o Īharaira: ‘He tika i mea ahau, ko tōu whare me te whare o tōu matua ka haere i tōku aroaro ā ake ake.’ Nā, ko tā Ihowā kupu tēnei ināianei: ‘Kāhore rā hoki; ka whakahōnore hoki ahau i te hunga e whakahōnore ana i ahau, ka whakaiti anō i te hunga e whakahāwea ana ki ahau.
1SA 2:31 Nanā, meāke puta ngā rā e tapahia ai e ahau tōu ringa, me te ringa o te whare o tōu pāpā, ā, kore iho tētahi koroheke i roto i tōu whare.
1SA 2:32 Ā, ka kite koe i te tūkinotanga i tōku nohoanga, i ngā pai katoa e hoatu e te Atua ki a Īharaira; e kore anō tōu whare e whai koroheke ā ake ake.
1SA 2:33 Nā, ko te tangata āu e kore e hautopea atu i tāku āta, ka ai ia hei whakapaunga mō ōu kanohi, hei whakamamae mō tōu ngākau; whakakaumātua kau hoki ngā whānau hou o tōu whare, ka mate i tō rātou taiohinga.
1SA 2:34 “ ‘Ko te tohu hoki tēnei ki a koe, ka puta ki āu tama tokorua, ki a Hōponi rāua ko Pinehaha, kotahi anō te rā e mate ai rāua tokorua.
1SA 2:35 Ā, ka whakaarahia ake e ahau he tohunga pono māku, hei mahi i tā tōku ngākau, i tā tōku hinengaro i pai ai, māku anō e hanga he whare pūmau mōna; ā, ka hāereere ia i ngā rā katoa i te aroaro o tāku e whakawahi ai.
1SA 2:36 Ā, ko te hunga katoa e mahue iho ki tōu whare, ka haere mai, ka piko iho ki a ia mō tētahi pīhi hiriwa, mō tētahi wāhi taro, ka mea, “Tēnā koe, kia uru atu ahau ki tētahi o ngā mahi tohunga, kia kai ai ahau i tētahi kongakonga taro.” ’ ”
1SA 3:1 Nā, i te minita te tamaiti, a Hamuera, ki a Ihowā i te aroaro o Eri. Ā, he taonga mōmōhanga te kupu a Ihowā i aua rā; kāhore he whakakitenga nui.
1SA 3:2 Nā, i taua wā kei te takoto a Eri i tōna wāhi, kua tīmata hoki ōna kanohi te atarua, kāhore hoki i āta kite.
1SA 3:3 Nā, kāhore anō te rama a te Atua kia pirau noa, ā, i te takoto a Hamuera, he moe, i roto i te temepara o Ihowā, i te wāhi i tū ai te āka a te Atua.
1SA 3:4 Nā, ka karanga a Ihowā ki a Hamuera. Ka mea tērā, “Tēnei ahau.”
1SA 3:5 Nā, ka rere ia ki a Eri, ka mea, “Tēnei ahau; i karanga ake nā hoki koe ki ahau.” Nā, ka mea tērā, “Kīhai ahau i karanga; hoki atu ki te takoto.” Nā, haere ana ia, takoto ana.
1SA 3:6 Nā, ka karanga anō hoki a Ihowā, “E Hamuera.” Ā, ka whakatika a Hamuera, haere ana ki a Eri, ka mea, “Tēnei ahau; i karanga ake nā hoki koe ki ahau.” Nā, ka mea tērā, “Kīhai ahau i karanga, e tāku tamaiti; hoki atu ki te takoto.”
1SA 3:7 Nā, kāhore a Hamuera i mōhio noa ki a Ihowā, kāhore anō hoki te kupu a Ihowā i whakapuakina noatia ki a ia.
1SA 3:8 Nā, ka karanga anō a Ihowā i a Hamuera, ko te tuatoru o ngā karangatanga. Ā, ka whakatika ia, ka haere ki a Eri, ka mea, “Tēnei ahau; i karanga ake nā hoki koe ki ahau.” Nā, ka mōhio a Eri ko Ihowā tērā i karanga rā ki te tamaiti.
1SA 3:9 Nā, ka mea a Eri ki a Hamuera, “Haere ki te takoto; ā, ki te karanga ia ki a koe, ka mea ake koe, ‘Kōrero e Ihowā; e whakarongo ana hoki tāu pononga.’ ” Heoi, haere ana a Hamuera, ā, takoto ana i tōna wāhi.
1SA 3:10 Nā, ka haere mai a Ihowā, ka tū, ka karanga, ka pērā me ērā karangatanga, “E Hamuera, e Hamuera.” Kātahi ka mea a Hamuera, “Kōrero; e whakarongo ana hoki tāu pononga.”
1SA 3:11 Nā, ka mea a Ihowā ki a Hamuera: “Nanā, ka mahia e ahau he mahi i roto i a Īharaira, e pāorooro ai ngā taringa e rua o te hunga katoa e rangona ai.
1SA 3:12 Ko te rangi tēnā e puta ake ai i ahau mō Eri ngā mea katoa i kōrerotia e ahau mō tōna whare; i te tīmatanga ā ki te mutunga.
1SA 3:13 Kua mea atu nā hoki ahau ki a ia, ka whakawākia tōna whare e ahau ā ake ake, mō te kino i mōhiotia nā e ia; mō tā āna tama i mea ai, i tau ai he kanga ki a rāua, ā, kīhai ia i pēhi i a rāua.
1SA 3:14 Nā reira kua oati ahau mō te whare o Eri, ‘E kore e tau te patunga tapu, te whakahere totokore rānei, hei pure mō te kino o te whare o Eri ā ake ake.’ ”
1SA 3:15 Nā, takoto tonu a Hamuera ā tae noa ki te ata, nā, uakina ana e ia ngā tatau o te whare o Ihowā. Ā, i wehi a Hamuera ki te whakaatu ki a Eri i te mea i whakakitea mai ki a ia.
1SA 3:16 Nā, ka karanga a Eri ki a Hamuera, ka mea, “E Hamuera, e tāku tamaiti.” Ā, ka mea tērā, “Tēnei ahau.”
1SA 3:17 Nā, ka mea ia, “Tēnā koa te kupu i kōrerotia e Ihowā ki a koe? Kaua rā e hunā ki ahau; kia meatia tēnei e te Atua ki a koe, ētahi atu mea anō hoki, ki te hunā e koe i ahau tētahi o ngā kupu katoa i kōrerotia e ia ki a koe.”
1SA 3:18 Nā, ka kōrerotia ngā kupu katoa e Hamuera ki a ia, kīhai hoki i hunā tētahi mea i a ia. Nā, ka mea tērā, “Nā Ihowā rā hoki; māna e mea tā tōna whakaaro i pai ai.”
1SA 3:19 Nāwai ā, ka kaumātua a Hamuera, ā, noho ana a Ihowā ki a ia, kīhai hoki tētahi o āna kupu i tukua e ia kia taka ki te whenua.
1SA 3:20 Ā, i mōhio a Īharaira katoa, o Rāna ā tae noa ki Peerehepa, kua whakapūmautia a Hamuera hei poropiti mā Ihowā.
1SA 3:21 Ā, i puta mai anō a Ihowā i Hiro; i whakaatu anō hoki a Ihowā i a ia ki a Hamuera i Hiro, he mea kōrero mai nā Ihowā.
1SA 4:1 Nā, puta mai ana te kupu a Hamuera ki a Īharaira katoa. Nā, ka haere a Īharaira ki te whawhai ki ngā Pirihitini, ā, ka noho ā-puni ki Epenētere; ā, i noho te puni o ngā Pirihitini ki Apeke.
1SA 4:2 Nā, ka whakaritea e ngā Pirihitini ā rātou ngohi hei whawhai ki a Īharaira; ā, ka hōrapa haere te whawhai, nā, ka patua a Īharaira e ngā Pirihitini; e whā mano tāngata o te ope i patua ki te pārae.
1SA 4:3 Ā, nō te taenga o ngā tāngata ki te puni, ka mea ngā kaumātua o Īharaira, “He aha tātou i patua ai e Ihowā ināianei i te aroaro o ngā Pirihitini? Me tiki atu ki a tātou te āka o te kawenata a Ihowā i Hiro, kia tae mai ki roto i a tātou, hei whakaora i a tātou i te ringa o ō tātou hoariri.”
1SA 4:4 Heoi, ka tonoa e te iwi ki Hiro, ā, ka mauria mai i reira te āka o te kawenata a Ihowā o ngā mano e noho nei i runga i ngā kerupima; i reira anō ngā tama tokorua a Eri, a Hōponi rāua ko Pinehaha, i te āka o te kawenata a Ihowā.
1SA 4:5 Ā, i te taenga mai o te āka o te kawenata a Ihowā ki te puni, ka hāmama a Īharaira katoa, he nui te hāmama, ā, ngateri ana te whenua.
1SA 4:6 Ā, ka rongo ngā Pirihitini i te reo e hāmama ana, ka mea rātou, “He reo aha tēnei e nui nei te hāmama i te puni o ngā Hiperu?” Nā, ka mōhio rātou kua tae mai te āka a Ihowā ki te puni.
1SA 4:7 Nā, ka wehi ngā Pirihitini; i mea hoki, “Kua tae te Atua ki roto i te puni.” Nā, ka mea rātou, “Auē te mate mō tātou! Kāhore hoki he mea pēnei me tēnei i mua ake nei.
1SA 4:8 Auē te mate mō tātou! Mā wai tātou e whakaora i roto i te ringa o ēnei atua nui? Ko ngā atua ēnei nāna ngā whakapānga mate katoa i patua ai ngā Īhipiana i te koraha.
1SA 4:9 Kia māia, whakatāne i a koutou, e ngā Pirihitini, kei whakataurerekatia koutou e ngā Hiperu, kei pērātia me rātou i whakataurerekatia nā e koutou; nā, me whakatāne koutou, me whawhai.”
1SA 4:10 Nā, ka whawhai ngā Pirihitini, ā, patua ana a Īharaira, ā, rere ana ki tōna tēneti, ki tōna tēneti; he tino nui rawa te parekura; e toru tekau mano hoki o Īharaira i hinga, he hunga haere raro.
1SA 4:11 Nā, riro ana te āka a te Atua; i mate hoki a Hōponi rāua ko Pinehaha, ngā tama tokorua a Eri.
1SA 4:12 Nā, ka rere tētahi tangata o Pineamine i te ope, tae tonu atu ki Hiro i taua rā anō, he mea haehae ōna kākahu, he oneone hoki i runga i tōna mātenga.
1SA 4:13 Ā, nō tōna taenga, nā, e noho ana a Eri i runga i te nohoanga i te taha o te ara, e tūtei atu ana; he pāwera hoki nō tōna ngākau mō te āka a te Atua. Ā, ka tae taua tangata ki te pā, ka kōrero, nā, hāmama katoa ana te pā.
1SA 4:14 Ā, ka rongo a Eri i te reo e hāmama ana, ka mea ia, “He reo aha tēnei e ngangau nei?” Nā, hohoro tonu taua tangata, ā, kua tae, kua kōrero ki a Eri.
1SA 4:15 Nā, e iwa tekau mā waru ngā tau o Eri; kua mārō hoki ōna kanohi, tē āhei ia te kite.
1SA 4:16 Nā, ka mea taua tangata ki a Eri, “Ko ahau tēnei i puta mai i roto i te ope, i rere tonu mai ināianei i te ope.” Ka mea tērā, “I pēhea te mea rā, e tāku tama?”
1SA 4:17 Nā, ka whakaatu a ia i kawea mai nei ngā kōrero, ka mea, “I rere a Īharaira i te aroaro o ngā Pirihitini, he nui hoki te parekura o te iwi; ā, ko āu tama tokorua, ko Hōponi, rāua ko Pinehaha, kua mate; kua riro anō hoki te āka a te Atua.”
1SA 4:18 Ā, nō tāna whakahuatanga i te āka a te Atua, hinga ana tērā ki muri i runga i te nohoanga, ki te taha o te kūwaha, ā, whati iho tōna kakī, mate ake; he koroheke hoki ia, he taimaha. Nā, e whā tekau ngā tau i whakarite ai ia mō Īharaira.
1SA 4:19 Nā, e hapū ana tāna hunaonga, te wahine a Pinehaha, meāke whānau; ā, nō tōna rongonga i te kōrero o te āka a te Atua kua riro, o te matenga anō o tōna hungawai rāua ko tāna tahu, ka piko iho ia, ka whānau; i pā whakarere mai hoki te mamae ki a ia.
1SA 4:20 Ā, i a ia e whakahemohemo ana, ka mea ngā wāhine e tū ana i tōna taha, “Kaua e wehi; he tāne hoki tēnei tamaiti āu.” Heoi, kāhore āna kupu i whakahoki ai, kīhai anō hoki i anga mai tōna ngākau.
1SA 4:21 Nā, huaina iho e ia te tama ko Ikaporo, i mea, “Kua heke te korōria o Īharaira,” nō te mea kua riro te āka a te Atua, mō tōna hungawai hoki rāua ko tāna tahu.
1SA 4:22 I mea anō ia, “Kua heke te korōria o Īharaira; kua riro nei hoki te āka a te Atua.”
1SA 5:1 Nā, tērā kua riro te āka a te Atua i ngā Pirihitini, kua mauria atu i Epenētere ki Aharoro.
1SA 5:2 Nā, ka mau ngā Pirihitini ki te āka a te Atua, ā, kawea ana e rātou ki te whare o Rakono, whakatūria ake ki te taha o Rakono.
1SA 5:3 Ā, nō te marangatanga ake o ngā Aharori i te aonga ake, nā, kua taka, kua tāpapa iho a Rakono ki te whenua ki mua i te āka a Ihowā. Nā, ka mau rātou ki a Rakono, whakanohoia ake ana e rātou ki tōna wāhi anō.
1SA 5:4 Nā, i tō rātou marangatanga ake i te ata tonu o tētahi rā, nā, kua taka a Rakono, kua tāpapa ki te whenua ki mua i te āka a Ihowā; ā, ko te mātenga o Rakono me ngā kapu e rua o ōna ringa, e takoto mutu ana i runga i te paepae o te tatau; ko te tumutumu anake o Rakono i mahue ki a ia.
1SA 5:5 Koia ngā tohunga o Rakono me te hunga katoa e haere ana ki te whare o Rakono tē takahi ai ki runga ki te paepae o Rakono ki Aharoro, ā mohoa noa nei.
1SA 5:6 Ka pēhia ia ngā Aharori e te ringa o Ihowā, ā, hunā iho rātou e ia; i patua hoki rātou e ia ki te pukupuku, arā a Aharoro me ōna rohe.
1SA 5:7 Ā, nō te kitenga o ngā tāngata o Aharoro i taua meatanga, ka mea rātou, “E kore te āka a te Atua o Īharaira e noho ki a tātou; he uaua mai hoki tōna ringa ki a tātou, ki tō tātou atua hoki, ki a Rakono.”
1SA 5:8 Heoi, ka unga tāngata rātou hei huihui i ngā rangatira katoa o ngā Pirihitini ki a rātou. Nā, ka mea, “Me aha mātou ki te āka a te Atua o Īharaira?” Ā, ka mea rātou, “Me kawe te āka a te Atua o Īharaira ki Kāta.” Nā, kawea ana e rātou te āka a te Atua o Īharaira ki reira.
1SA 5:9 Ā, nō te kawenga atu, kātahi ka pā te ringa o Ihowā ki te pā, nui atu te aituā; i patua hoki e ia ngā tāngata o te pā, te iti, te rahi, ā, whakaputaputa ana te pukupuku i runga i a rātou.
1SA 5:10 Nā, ka tukua e rātou te āka a te Atua ki Ekerono. Ā, i te taenga atu o te āka a te Atua ki Ekerono, nā, ka karanga ngā Ekeroni, ka mea, “Kua kawea mai e rātou te āka a te Atua o Īharaira ki a tātou, hei whakamate i a tātou, i tō tātou iwi.”
1SA 5:11 Koia rātou ka unga tāngata atu, ka huihui i ngā rangatira katoa o ngā Pirihitini, ā, ka mea, “Ungā atu te āka a te Atua o Īharaira kia whakahokia ki tōna wāhi, kei whakamatea mātou me tō mātou iwi.” He aituā whakamate hoki kei te pā katoa; he pēhi rawa te ringa o te Atua ki reira.
1SA 5:12 Nā, ko ngā tāngata kīhai i mate, i patua ki te pukupuku, ā, kake ana te auē o te pā ki te rangi.
1SA 6:1 Ā, e whitu ngā marama o te āka a Ihowā ki te whenua o ngā Pirihitini.
1SA 6:2 Nā, ka karanga ngā Pirihitini ki ngā tohunga karakia rātou ko ngā tohunga tūāhu, ka mea, “Me aha e mātou te āka a Ihowā? Whakaaturia mai ki a mātou hei te aha he mea mā mātou ina kawea atu taua mea ki tōna wāhi.”
1SA 6:3 Nā, ka mea rātou, “Ki te tukua atu e koutou te āka a te Atua o Īharaira, kaua e tukua tahangatia; engari me hoatu anō he whakahere mō te hē hei whakahokinga atu ki a ia. Ko reira koutou ora ai, ā, ka mōhio nā te aha tōna ringa tē neke atu ai i a koutou.”
1SA 6:4 Anō rā ko ērā, “He aha te whakahere mō te hē hei whakahokinga atu ki a ia?” Nā, ka mea rātou, “Kia rima ngā puku kōura, kia rite ki te tokomaha o ngā rangatira o ngā Pirihitini, kia rima hoki ngā kiore kōura; kotahi tonu nei hoki te mate o koutou katoa, o ō koutou rangatira anō hoki.
1SA 6:5 Nā, me hanga he āhua nō ō koutou puku, he āhua anō nō ā koutou kiore i ngaro ai te whenua; ā, ka hoatu korōria anō ki te Atua o Īharaira; tērā pea e māmā iho tōna ringa ki a koutou, ki ō koutou atua, ki tō koutou whenua.
1SA 6:6 He aha koutou i whakapakeke ai i ō koutou ngākau, i pērā ai me ngā Īhipiana rātou ko Parao i whakapakeke nei i ō rātou ngākau? I tāna mahinga i ngā mea nunui i roto i a rātou, kīhai ianei rātou i tuku i te iwi, ā, haere ana rātou?
1SA 6:7 “Nā reira tangohia ka hangā he kāta hou, tīkina hoki kia rua ngā kau kutētē kāhore anō i mau ioka, ka here ai i ngā kau ki te kāta, ā, ko ā rāua kūao me tango mai i a rāua ki te whare.
1SA 6:8 Nā, ka tiki i te āka a Ihowā, ka whakatakoto ki runga ki te kāta; ā, ka hoatu ki tōna taha, ki roto i tētahi pouaka, ngā mea kōura, tā koutou whakahere mō te hē hei whakahokinga ki a ia; ā, ka tuku ai kia haere.
1SA 6:9 Ko reira tirohia atu ai e koutou; ki te haere nā te ara o tōna rohe ki runga, ki Petehemehe, nāna tēnei kino nui i mea ki a tātou; ki te kāhore ia, kātahi tātou ka mōhio, ehara i a ia te ringa i patua ai tātou; he mea tūpono noa mai taua mea i pā mai nei ki a tātou.”
1SA 6:10 Nā, pērā ana aua tāngata. Tīkina ana e rātou ngā kau kutētē e rua, ā, herea ana ki te kāta, ko ā rāua kūao ia i tūtakina ki te whare.
1SA 6:11 Ā, whakanohoia ana e rātou te āka a Ihowā ki runga ki te kāta, me te pouaka, me ngā kiore kōura, me ngā āhua o ō rātou puku.
1SA 6:12 Ā, tika tonu ngā kau i te ara ki te huarahi ki Petehemehe; i haere rāua rā te huanui, me te tangi haere, kīhai hoki i peka ki matau, ki mauī; ā, i aru ngā rangatira o ngā Pirihitini i a rāua, ā tae noa ki te rohe ki Petehemehe.
1SA 6:13 Nā, i te kokoti wīti ngā tāngata o Petehemehe i te raorao, ā, ko te marangatanga ake o ō rātou kanohi, ka kite i te āka, nā, koa ana rātou i te kitenga atu.
1SA 6:14 Nā, haere tonu tērā te kāta ki te māra a Hohua, a tētahi Petehemehi, ā, tū ana i reira, kei reira anō tētahi kōhatu nui. Nā, tātāngia ana e rātou te rākau o te kāta, ā, whakaekea ana ngā kau hei tahunga tinana ki a Ihowā.
1SA 6:15 I tangohia iho anō e ngā Rīwaiti te āka a Ihowā, me te pouaka i te taha, i reira rā ngā mea kōura, ā, whakatakotoria ana ki runga ki te kōhatu nui; i whakaeke tahunga tinana anō hoki, i patu patunga tapu ngā tāngata o Petehemehe i taua rā ki a Ihowā.
1SA 6:16 Ā, nō te kitenga o ngā rangatira e rima o ngā Pirihitini, hoki ana ki Ekerono i taua rangi anō.
1SA 6:17 Ā, ko ngā puku kōura ēnei i whakahokia atu nei e ngā Pirihitini hei whakahere mō te hē ki a Ihowā; mō Aharoro kotahi, mō Kaha kotahi, mō Ahakerono kotahi, mō Kāta kotahi, mō Ekerono kotahi;
1SA 6:18 me ngā kiore kōura, rite tonu ki te maha o ngā pā katoa o ngā Pirihitini, nō aua rangatira tokorima nei, o ngā pā taiepa me ngā pā koraha; tae noa atu ki te kōhatu nui, ki Apere, i whakatakotoria rā te āka a Ihowā ki reira; kei te māra a Hohua Petehemehi taua kōhatu ā taea noatia tēnei rā.
1SA 6:19 Nā, ka patua ngā tāngata o Petehemehe mō rātou i titiro ki roto ki te āka a Ihowā; koia i patua ai e ia ngā tāngata o te iwi, e rima tekau mano e whitu tekau. Nā, ka tangi te iwi mō te patunga nui i patua ai te iwi e Ihowā.
1SA 6:20 Nā, ka mea ngā tāngata o Petehemehe, “Ko wai hei tū ki te aroaro o Ihowā, o tēnei Atua tapu? Me haere atu anō hoki ia i roto i a tātou ki a wai?”
1SA 6:21 Kātahi rātou ka tono tāngata ki ngā tāngata o Kiriata Tearimi, hei mea, “Kua whakahokia mai te āka a Ihowā e ngā Pirihitini; haere mai, mauria atu ki a koutou.”
1SA 7:1 Nā, ka haere ngā tāngata o Kiriata Tearimi ki te tiki i te āka a Ihowā, ā, kawea ana e rātou ki te whare o Apinarapa i te pukepuke. I whakatapua hoki e rātou a Ereātara tāna tama hei tiaki i te āka a Ihowā.
1SA 7:2 Ā, i te nohoanga o te āka ki Kiriata Tearimi, i te mea kua maha ngā rā; e rua tekau hoki ngā tau; nā, ka tangi te whare katoa o Īharaira ki a Ihowā.
1SA 7:3 Nā, ka kōrero a Hamuera ki te whare katoa o Īharaira, ka mea, “Ki te mea e hoki katoa ana ō koutou ngākau ki a Ihowā, whakarērea ngā atua kē i roto i a koutou, me Ahataroto anō hoki; whakapūmautia hoki ō koutou ngākau ki a Ihowā, me mahi hoki ki a ia anake, ā, māna koutou e whakaora i roto i te ringa o ngā Pirihitini.”
1SA 7:4 Kātahi ka whakarērea e ngā tama a Īharaira ngā Paara me Ahataroto, ā, mahi ana ki a Ihowā anake.
1SA 7:5 Nā, ka mea a Hamuera, “Huihuia mai a Īharaira katoa ki Mihipa, ā, ka īnoi ahau ki a Ihowā mō koutou.”
1SA 7:6 Nā, ka huihui rātou ki Mihipa, ā, utuhia ana he wai, ringihia ana ki te aroaro o Ihowā, i nohopuku anō hoki i taua rā, ā, ka mea i reira, “Kua hara mātou ki a Ihowā.” Nā, ka whakawā a Hamuera mō ngā tama a Īharaira ki Mihipa.
1SA 7:7 Ā, nō te rongonga o ngā Pirihitini kua huihui ngā tama a Īharaira ki Mihipa, ka haere ngā rangatira o ngā Pirihitini ki a Īharaira. Ā, i te rongonga, o ngā tama a Īharaira, ka wehi rātou i ngā Pirihitini.
1SA 7:8 Nā, ka mea ngā tama a Īharaira ki a Hamuera, “Kei whakamutua tāu karanga ki a Ihowā, ki tō tātou Atua, mō mātou, kia whakaorangia mātou i te ringa o ngā Pirihitini.”
1SA 7:9 Nā, tīkina ana e Hamuera he reme, he mea ngote ū, ā, whakaekea katoatia ana hei tahunga tinana ki a Ihowā. Nā, ka karanga a Hamuera ki a Ihowā mō Īharaira, ā, ka whakarongo a Ihowā ki a ia.
1SA 7:10 Ā, i a Hamuera e whakaeke ana i te tahunga tinana, ka whakatata mai ngā Pirihitini ki te whawhai ki a Īharaira; otirā nui atu te papātanga o tā Ihowā whatitiri i taua rā ki runga ki ngā Pirihitini, ā, hinga ana rātou; patua iho hoki i te aroaro o Īharaira.
1SA 7:11 Nā, ka puta ngā tāngata o Īharaira i roto i Mihipa, ā, whāia ana ngā Pirihitini, tukitukia ana ā tae noa ki raro, ki Pētekara.
1SA 7:12 Nā, ka mau a Hamuera ki tētahi kōhatu nui, ā, whakatakotoria ana ki waenganui o Mihipa, o Hene, ā, huaina iho tōna ingoa, ko Epenētere; i mea hoki, “Ko Ihowā tō tātou kaiāwhina ā tae noa mai ki tēnei wā.”
1SA 7:13 Heoi, kua taea ngā Pirihitini, kīhai anō i haere mai i muri ki te rohe o Īharaira; i runga hoki i ngā Pirihitini te ringa o Ihowā i ngā rā katoa o Hamuera.
1SA 7:14 Ā, i whakahokia atu ki a Īharaira ngā pā i tangohia e ngā Pirihitini i a Īharaira, a Ekerono tae noa ki Kāta; i tangohia hoki ngā rohe o ēnā pā e Īharaira i roto i te ringa o ngā Pirihitini. Ā, ka mau tā Īharaira rongo ki ngā Amori.
1SA 7:15 Ā, i whakarite a Hamuera mō Īharaira i ngā rā katoa i ora ai ia.
1SA 7:16 I taiāwhio haere hoki ia i tēnei tau, i tēnei tau, ki Pētēre, ki Kirikara, ki Mihipa, i whakarite anō mō Īharaira i aua wāhi katoa.
1SA 7:17 Ā, hoki ana ki Rama; i reira hoki tōna whare, ā, whakarite ana mō Īharaira ki reira; i hangā hoki e ia tētahi āta mā Ihowā ki reira.
1SA 8:1 Nā, ka koroheketia a Hamuera, ka meinga e ia āna tama hei kaiwhakarite mō Īharaira.
1SA 8:2 Nā, ko te ingoa o tāna mātāmua ko Hoera; ko Apia hoki te ingoa o tāna tuarua. I whakarite rāua ki Peerehepa.
1SA 8:3 Nā, kīhai āna tama i tika i tōna ara, engari peka kē ana rāua ki te apo, i tango hoki i te moni whakapati, ā, whakapeaua kētia ake te whakawā.
1SA 8:4 Kātahi ka huihui ngā kaumātua katoa o Īharaira, ka haere ki a Hamuera ki Rama.
1SA 8:5 Ka mea ki a ia, “Kua koroheketia koe, kāhore hoki āu tama e tika i ōu huarahi; heoi whakaritea he kīngi mō mātou hei whakarite mō mātou, hei pērā anō me o ngā iwi katoa.”
1SA 8:6 Otirā, i kino taua kupu ki a Hamuera, mō rātou i mea, “Hōmai he kīngi ki a mātou hei whakarite mō mātou.” Nā, ka īnoi a Hamuera ki a Ihowā.
1SA 8:7 Nā, ka mea a Ihowā ki a Hamuera, “Whakarongo ki te reo o te iwi nā, ki ngā mea katoa i kōrerotia e rātou ki a koe; ehara hoki i te mea ko koe tā rātou i paopao ai, ko ahau ia tā rātou i paopao mai nā hei kīngi mō rātou.
1SA 8:8 E rite ana ki ngā mea katoa i mea ai rātou, o te rā iho anō i kawea mai ai rātou e ahau i Īhipa ā tae noa ki tēnei rā; i whakarere hoki rātou i ahau, i mahi atu ki ngā atua kē; ko tā rātou mahi hoki tēnā ki a koe.
1SA 8:9 Heoi, whakarongo āianei ki tō rātou reo; otiia kia kaha te kauwhau ki a rātou, whakaaturia hoki ngā tikanga o te kīngi e whakakīngitia mō rātou.”
1SA 8:10 Nā, ka kōrerotia e Hamuera ngā kupu katoa a Ihowā ki te hunga i tono kīngi nei i a ia;
1SA 8:11 ka mea, “Ko te tikanga tēnei a te kīngi e whakakīngitia mō koutou: ko ā koutou tama ka tangohia e ia, ka meinga māna, mō ana hāriata, hei tāngata eke hōiho hoki māna, hei rere anō ki mua i ana hāriata.
1SA 8:12 Ka meinga hoki hei rangatira mano māna, hei rangatira mō ngā rima tekau, hei parau i tāna māra, hei kokoti i āna wīti, hei hanga hoki i āna mea mō te whawhai, i āna mea mō ana hāriata.
1SA 8:13 Ka tangohia hoki e ia ā koutou tamāhine hei mahi keke, hei taka kai, hei tunu taro.
1SA 8:14 Me ā koutou māra, ā koutou kāri wāina, ā koutou kāri ōriwa, ka tangohia e ia ngā mea papai, ā, ka hoatu ki āna pononga.
1SA 8:15 Ka tangohia hoki e ia te whakatekau o ā koutou purapura, o ā koutou kāri wāina, ā, ka hoatu ki āna unaka, ki āna pononga.
1SA 8:16 Ka tangohia anō e ia ā koutou pononga tāne, ā koutou pononga wāhine, ā koutou taitamariki papai, me ā koutou kāihe, ā, ka whakamahia ki tāna mahi.
1SA 8:17 Ka tangohia anō e ia ngā whakatekau o ā koutou hipi; ka waiho anō hoki koutou hei pononga māna.
1SA 8:18 Ā, ka tangi koutou i taua rā i tā koutou kīngi i whiriwhiri ai mō koutou; e kore anō a Ihowā e rongo ki a koutou i taua rā.”
1SA 8:19 Otirā, kīhai te iwi i pai kia whakarongo ki te reo o Hamuera. Nā, ka mea rātou, “Kāhore; engari me whai kīngi mātou;
1SA 8:20 kia rite ai hoki mātou ki ngā iwi katoa; ā, ka whakarite tō mātou kīngi mō mātou, ka haere atu hoki i tō mātou aroaro, hei whawhai i ā mātou whawhai.”
1SA 8:21 Ā, ka rongo a Hamuera i ngā kupu katoa a te iwi, kōrerotia ana e ia ki ngā taringa o Ihowā.
1SA 8:22 Ā, ka mea a Ihowā ki a Hamuera, “Whakarongo atu ki tō rātou reo, whakaritea hoki he kīngi mō rātou.” Ā, ka mea a Hamuera ki ngā tāngata o Īharaira, “Haere atu koutou ki tōna pā, ki tōna pā.”
1SA 9:1 Nā, tērā tētahi tangata o Pineamine, ko Kihi tōna ingoa, he tama nā Apiere, tama a Teroro, tama a Pekorata, tama a Apiaha, he Pineamini, he tangata mārohirohi.
1SA 9:2 He tama anō tāna, ko tōna ingoa ko Haora, he taitama, he ātaahua, he pai, kāhore he tangata o ngā tama a Īharaira i ātaahua atu i a ia; pūrero tonu ōna pokohiwi ki runga ake i te iwi katoa.
1SA 9:3 Nā, kua ngaro ngā kāihe a Kihi pāpā o Haora, ā, ka mea a Kihi ki a Haora, ki tāna tama, “Tangohia tētahi o ngā tamariki hei hoa mōu, whakatika, haere ki te rapu i ngā kāihe.”
1SA 9:4 Nā, ka tika ia nā te whenua pukepuke o Ēparaima, ā, haere tonu nā te whenua o Hariha; heoi kīhai i kitea. Kātahi rāua ka tika nā te whenua o Haarimi, heoi kāhore noa iho. Nā, ka haere ia nā te whenua o ngā Pineamini, ā, kāhore i kitea.
1SA 9:5 Ā, nō tō rāua taenga ki te whenua o Tupu, ka mea a Haora ki tāna tangata, ki tōna hoa, “Haere mai, tāua ka hoki; kei mutu te whakaaro o tōku pāpā ki ngā kāihe, ā, ka mānukanuka kē ki a tāua.”
1SA 9:6 Nā, ka mea tērā ki a ia, “He tangata nā te Atua tēnei kei te pā nei, he tangata e whakahōnoretia ana; mana pū āna kupu katoa. Nā, kia haere tāua ki reira; tērā pea e kōrerotia mai e ia ki a tāua te haere e haere nei tāua.”
1SA 9:7 Anō rā ko Haora ki tāna tangata, “Engari, ki te haere tāua he aha te mea hei mauranga atu mā tāua ki taua tangata, kua hemo nei hoki te taro i roto i ā tāua pūtea, ā, kāhore he hākari hei kawenga atu ki taua tangata a te Atua. He aha oti tā tāua?”
1SA 9:8 Nā, ka whakahoki taua tangata ki tā Haora, ka mea, “Nanā, ko te whakawhā tēnei o te hekere hiriwa kei tōku ringa; me hoatu e ahau ki taua tangata a te Atua, kia whakaaturia mai e ia tō tāua ara ki a tāua.”
1SA 9:9 (I mua hoki i roto i a Īharaira, ina haere te tangata ki te ui tikanga i te Atua, ko tāna kī tēnei, “Hoake, tāua ka haere ki te matakite;” he matakite hoki tā mua ingoa mō te poropiti.)
1SA 9:10 Nā, ka mea a Haora ki tāna tangata, “Ka pai tāu kupu; hoatu, tāua ka haere.” Nā, haere ana rāua ki te pā kei reira nei taua tangata a te Atua.
1SA 9:11 I a rāua e piki ana i te pikitanga ki te pā, ka tūtaki rāua ki ētahi kōtiro e puta mai ana ki te utu wai. Nā, ka mea rāua ki a rātou, “Tēnei rānei te matakite?”
1SA 9:12 Nā, ka whakahoki rātou ki a rāua, ka mea, “Tēnei anō; nanā, kei mua atu i a koe nā. Hohoro atu ināianei tonu, nō tēnei rā hoki ia i tae mai ai ki te pā; he patunga tapu hoki tā te iwi nei āianei i te wāhi tiketike.
1SA 9:13 Tomo kau kōrua ki te pā, ka tūpono kōrua ki a ia i te mea kāhore anō i piki noa ki te wāhi tiketike ki te kai. E kore hoki te iwi e kai kia tae atu rā anō ia; ko ia hoki hei whakapai i te patunga tapu, muri iho ka kai te hunga i karangatia. Heoi, piki atu; ko te wā hoki tēnei e kitea ai ia e kōrua.”
1SA 9:14 Nā, piki ana rāua ki te pā; ā, ka uru atu rāua ki roto ki te pā, ko Hamuera kua puta; tūtaki tonu ki a rāua; e piki ana ki te wāhi tiketike.
1SA 9:15 Nā, kua whakapuakina e Ihowā ki a Hamuera i te rā i mua atu i te taenga mai o Haora, kua mea:
1SA 9:16 “Kia pēnei āpōpō ka ungā atu e ahau ki a koe tētahi tangata nō te whenua o Pineamine, nā, me whakawahi ia e koe hei rangatira mō tāku iwi, mō Īharaira, ā, māna e whakaora tāku iwi i te ringa o ngā Pirihitini; kua titiro atu hoki ahau ki tāku iwi, nō te mea kua tae ake tā rātou karanga ki ahau.”
1SA 9:17 Ā, nō te kitenga o Hamuera i a Haora, ka mea a Ihowā ki a ia, “Ko te tangata tēnei i kōrerotia rā e ahau ki a koe. Māna e whakahaere tikanga mō tāku iwi.”
1SA 9:18 Kātahi ka whakatata a Haora ki a Hamuera, ki te kūwaha, ka mea, “Tēnā koe, whakaaturia mai ki ahau, kei hea te whare o te matakite.”
1SA 9:19 Nā, ka whakahoki a Hamuera ki a Haora, ka mea, “Ko ahau te matakite; piki atu i mua i ahau ki te wāhi tiketike, ka kai tahi hoki kōrua i ahau āianei; ā, ka tukua atu koe e ahau i te ata, ka whakaaturia hoki ki a koe ngā mea katoa i tōu ngākau.
1SA 9:20 Ā, ko āu kāihe, ka toru nei ngā rā e ngaro ana, kaua tōu ngākau e whai ki ērā; kua kitea hoki. Kei a wai koia te hiahia katoa o Īharaira? He teka ianei kei a koe, kei te whare katoa anō hoki o tōu pāpā?”
1SA 9:21 Nā, ka whakahokia e Haora, ka mea, “He teka ianei he Pineamini ahau, nō te iti rawa o ngā iwi o Īharaira, ko tōku hapū hoki te iti rawa o ngā hapū katoa o te iwi o Pineamine? He aha rā ēnā kupu i puaki mai ai i a koe?”
1SA 9:22 Nā, ka mau a Hamuera ki a Haora rāua ko tāna tangata, ā, kawea ana ki te whare, ā, hoatu ana e ia he nohoanga ki a rāua, i runga ake o te hunga i karangatia; e toru tekau anō hoki rātou.
1SA 9:23 Nā, ka mea a Hamuera ki te tuari, “Hōmai te wāhi i hoatu e ahau ki a koe, tērā i kīia atu rā e ahau ki a koe, ‘Kia takoto tēnā ki a koe.’ ”
1SA 9:24 Nā, hāpainga ana e te tuari te hūhā me ōna aha noa, ā, whakatakotoria ana ki te aroaro o Haora. Nā, ka mea a Hamuera, “Nanā, ko te wāhi i tohungia nā, waiho i tōu aroaro hei kai māu; he mea rongoā tonu hoki māu ā tae noa ki tēnei wā, nō tāku kīanga. ‘He hunga tēnei kua karangatia e ahau.’ ” Nā, kai tahi ana a Haora rāua ko Hamuera i taua rā.
1SA 9:25 Ā, i tō rātou hekenga iho i te wāhi tiketike ki te pā, ka kōrero ia ki a Haora i runga i te tuanui.
1SA 9:26 Nā, ka maranga wawe rātou; ā, i te mea ka puta ake te rā, ka karangatia a Haora e Hamuera ki runga ki te tuanui, i mea ia, “Whakatika, kia ungā atu koe e ahau.” Nā, ka whakatika a Haora, ā, puta atu ana rāua tokorua, a ia, a Hamuera, ki waho.
1SA 9:27 I a rāua e heke ana i te pito o te pā, ka mea a Hamuera ki a Haora, “Mea atu ki te tangata rā kia haere atu ki mua i a tāua; kātahi tērā ka haere; ko koe ia, tū mārie koe, kia whakapuakina atu e ahau ki a koe te kupu a te Atua.”
1SA 10:1 Kātahi ka mau a Hamuera ki te pounamu hinu, ringihia ana e ia ki runga ki tōna mātenga; nā, ka kihi ia i ia, ka mea, “Ehara ianei i te mea nā Ihowā koe i whakawahi hei rangatira mō tōna wāhi tupu?
1SA 10:2 Ka mawehe atu koe i ahau āianei, ka tūpono koe ki ētahi tāngata tokorua i te taha o te tanumanga o Rahera, i te rohe o Pineamine, i Tereta; ā, tērā rāua e mea ki a koe, ‘Kua kitea ngā kāihe i haere nā koe ki te rapu. Nā, ko tōu pāpā, mahue ake ngā whakaaro ki ngā kāihe, kei te mānukanuka hoki tērā ki a kōrua, e mea ana, “Me pēhea ahau ki tāku tama?” ’
1SA 10:3 “Kātahi ka haere tonu atu koe i reira, ā, ka tae ki te oki o Taporo, ka tūpono ki a koe ētahi tāngata tokotoru e haere ana ki runga, ki te Atua, ki Pētēre, e toru ngā kūao koati e kawea ana e tētahi, e toru ngā rohi taro e kawea ana e tētahi, ā, ko tētahi e mau ana i te pounamu wāina.
1SA 10:4 Nā, ka oha rātou ki a koe, ka hōmai anō hoki ētahi taro e rua ki a koe, ā, me tango e koe i ō rātou ringa.
1SA 10:5 “Muri iho i tērā ka tae ki te puke o te Atua, kei reira nei ngā hōia pupuri a ngā Pirihitini; ā, i tōu taenga ki reira, ki te pā, nā, ka tūtaki koe ki te rōpū poropiti e haere iho ana i te wāhi tiketike, me te hātere, me te timipera, me te pūtōrino, me te hāpa hoki ki mua i a rātou; me te poropiti anō hoki rātou.
1SA 10:6 Nā, ka puta kaha mai te Wairua o Ihowā ki runga ki a koe, ā, ka poropiti tahi koutou, a koe me rātou, ā, ka puta tōu āhua hei tangata kē.
1SA 10:7 Me i reira, ki te puta ēnā tohu ki a koe, meatia e koe te mea e tūpono atu ai tōu ringa; nō te mea kei a koe te Atua.
1SA 10:8 “Nā, me haere koe i mua i ahau ki Kirikara; nā, tēnā ahau te haere atu nā ki raro, ki a koe, ki te whakaeke i ngā tahunga tinana, ki te patu i ngā patunga mō te pai. Kia whitu ngā rā e tatari ai koe kia tae atu ahau ki a koe, kātahi ka whakaaturia e ahau ki a koe tāu e mea ai.”
1SA 10:9 Koia anō, kei te tahuritanga o tōna tuarā, he mawehe atu i a Hamuera, ka hōmai e te Atua he ngākau kē mōna; ā, puta katoa ana aua tohu i taua rangi anō.
1SA 10:10 Ā, nō tō rāua taenga ki reira, ki te puke, nā, ko tētahi rōpū poropiti kua tūtaki ki a ia; ko te tino putanga mai o te Wairua o te Atua ki runga ki a ia, nā, poropiti ana ia i roto i a rātou.
1SA 10:11 Ā, nō te kitenga o te hunga katoa i mōhio ki a ia i mua ake, nā, kei roto ia i ngā poropiti e poropiti ana; kātahi ka mea te iwi tētahi ki tētahi, “He aha tēnei kua puta nei ki te tama a Kihi? Kei roto anō koia a Haora i ngā poropiti?”
1SA 10:12 Nā, ka whakahoki tētahi o taua wāhi, ka mea, “Ha, ko wai tō rātou pāpā?” Koia te whakatauki nei, “Kei roto anō koia a Haora i ngā poropiti?”
1SA 10:13 Ā, i te mutunga o tāna poropiti, ka haere ia ki te wāhi tiketike.
1SA 10:14 Nā, ka mea te matua kēkē o Haora ki a rāua ko tāna tangata, “I haere kōrua ki hea?” Ā, ka kī atu ia, “Ki te rapu i ngā kāihe; ā, i tō māua mōhiotanga kāhore anō rātou i kitea, haere ana māua ki a Hamuera.”
1SA 10:15 Anō rā ko te matua kēkē o Haora, “Tēnā rā, whakaaturia mai ki ahau, i pēhea a Hamuera ki a kōrua.”
1SA 10:16 Nā, ka mea a Haora ki tōna matua kēkē, “I āta whakaaturia mai e ia ki a māua kua kitea ngā kāihe.” Otiia ko te mea o te kīngitanga, ko tā Hamuera i kōrero rā, kīhai tērā i whakaaturia ki a ia.
1SA 10:17 Kātahi ka kārangarangatia te iwi e Hamuera ki a Ihowā ki Mihipa,
1SA 10:18 nā, ka mea ia ki ngā tama a Īharaira, “Ko te kupu tēnei a Ihowā, a te Atua o Īharaira: ‘Nāku a Īharaira i kawe mai i Īhipa, nāku hoki koutou i whakaora i roto i te ringa o ngā Īhipiana, i te ringa anō o ngā rangatiratanga katoa, i whakatupu kino i a koutou.’
1SA 10:19 Nā, kua whakakāhore nei koutou i tēnei rā ki tō koutou Atua, e whakaora nei i a koutou i roto i ō koutou hē katoa, i ō koutou mate; ā, kua mea koutou ki a ia, ‘Engari, me whakarite e koe he kīngi mō mātou.’ Nā reira, me tū koutou ināianei ki te aroaro o Ihowā, ō koutou iwi, ō koutou mano.”
1SA 10:20 Kātahi a Hamuera ka mea i ngā iwi katoa o Īharaira kia whakatata mai; nā, ka tangohia ko te iwi o Pineamine.
1SA 10:21 Nā, ka mea ia i te iwi o Pineamine kia whakatata mai, tēnei hapū, tēnei hapū, ā, ka tangohia ko te hapū o Matari; nā, ka tangohia ko Haora, ko te tama a Kihi; nō tā rātou rapunga ia i a ia, kāhore i kitea.
1SA 10:22 Nā reira ka ui anō rātou ki a Ihowā, “Tēnā anō rānei he tangata kia tae mai ki konei?” Ā, ka whakautua e Ihowā, “Nā, kei roto ia i ngā mea nā e piri ana.”
1SA 10:23 Nā, ko tō rātou rerenga, ka tīkina atu ia i reira; ā, nō tōna tūnga i waenganui i te iwi, teitei ake ia i te iwi katoa, i ōna pokohiwi ahu ake.
1SA 10:24 Nā, ka mea a Hamuera ki te iwi katoa, “Kia kite koutou i tā Ihowā i whiriwhiri ai; kāhore hoki he rite mōna o te iwi katoa.” Nā, ka hāmama te iwi katoa, ka mea, “Kia ora te kīngi!”
1SA 10:25 Kātahi ka kōrerotia e Hamuera ki te iwi te tikanga o te kīngitanga, ā, tuhituhia ana e ia ki te pukapuka, whakatakotoria ana ki te aroaro o Ihowā. Nā, ka tonoa e Hamuera te iwi katoa kia haere ki tōna whare, ki tōna whare.
1SA 10:26 Me Haora anō i haere ia ki tōna whare ki Kipea; i haere tahi anō i a ia tētahi rōpū tāngata i whakapākia nei ō rātou ngākau e Ihowā.
1SA 10:27 Tērā anō ia ētahi tama a Periara, i mea, “Me pēwhea e ora ai tātou i tēnei tangata?” Nā, whakahāweatia ana ia e rātou, kīhai anō i kawea he hākari e rātou ki a ia. Otiia whakarongo puku, tonu ia.
1SA 11:1 Nā, ka haere mai a Nahaha Āmoni ki te whakapae i Iapehe Kireara; ā, ka mea ngā tāngata katoa o Iapehe ki a Nahaha, “Whakaritea mai he kawenata ki a mātou, ā, ka mahi mātou ki a koe.”
1SA 11:2 Nā, ka mea a Nahaha Āmoni ki a rātou, “Ko te mea tēnei e whakarite kawenata ai ahau ki a koutou, kia pokaia ō koutou kanohi matau katoa; ā, ka waiho e ahau hei tāwai mō Īharaira katoa.”
1SA 11:3 Anō rā ko ngā kaumātua o Iapehe ki a ia, “Tukua mai koa ki a mātou kia whitu ngā rā, kia tono tāngata ai mātou puta noa i ngā rohe o Īharaira; ā, ki te kāhore he kaiwhakaora mō mātou, nā, ka puta atu mātou ki a koe.”
1SA 11:4 Kātahi ka haere ngā karere ki Kipea o Haora, ā, kōrerotia ana ēnei kupu ki ngā taringa o te iwi; nā, nui atu te reo o te iwi katoa ki te tangi.
1SA 11:5 Nā, e haere mai ana tērā a Haora i te māra, i muri i ngā kau; nā, ka mea a Haora, “Nā te aha te iwi i tangi ai?” Nā, ka kōrerotia ki a ia ngā kōrero a ngā tāngata o Iapehe.
1SA 11:6 I te rongonga o Haora i ēnei kōrero, nā, ko te tino putanga o te Wairua o te Atua ki runga ki a ia, ā, mura whakarere tōna riri ki taua rongo.
1SA 11:7 Nā, ka mau ia ki ētahi kau e rua, tapatapahia ana e ia; tukua ana ki ngā rohe katoa o Īharaira, he mea kawe nā ngā karere, ā, ka mea, “Ki te kāhore tētahi e puta mai ki te aru i a Haora, ki te aru hoki i a Hamuera, ka pēneitia āna kau.” Nā, ka tau te wehi o Ihowā ki runga ki te iwi, ā, ka puta rātou anō he tangata kotahi.
1SA 11:8 Nā, ka taua rātou e ia ki Peheke; e toru rau mano ngā tama a Īharaira, e toru tekau hoki mano ngā tāngata o Hūrā.
1SA 11:9 Nā, ka mea rātou ki ngā karere i haere mai rā, “Kia pēnei tā koutou kī atu ki ngā tāngata o Iapehe Kireara, ‘Āpōpō, kia mahana te rā, ka puta he whakaoranga mō koutou.’ ” Nā, haere ana aua karere, ā, kōrerotia ana ki ngā tāngata o Iapehe; ā, koa ana rātou.
1SA 11:10 Nā reira ka mea ngā tāngata o Iapehe, “Āpōpō ka puta atu mātou ki a koutou, ā, mā koutou e mea ki a mātou ngā mea e pai ana ki tō koutou whakaaro.”
1SA 11:11 Heoi, i te aonga ake ka wehea e Haora te iwi kia toru ngā ngohi. Nā, haere ana rātou ki waenganui o te puni i te whakaaraara o te ata, patua iho ngā Āmoni ā mahana noa te rā; ā, ko ngā toenga, i marara noa atu, ā, kīhai hoki i waiho kia tokorua o rātou e haere tahi ana.
1SA 11:12 Nā, ka mea te iwi ki a Hamuera, “Ko wai tēnei i mea nei, ‘Hei kīngi koia a Haora mō tātou?’ Hōmai aua tāngata kia whakamatea e mātou.”
1SA 11:13 Anō rā ko Haora, “E kore tētahi e whakamatea āianei; ko te rā hoki tēnei i puta ai tā Ihowā whakaora mō Īharaira.”
1SA 11:14 Kātahi ka mea a Hamuera ki te iwi, “Haere mai, tātou ka haere ki Kirikara, ki reira whakahou ai i te kīngitanga.”
1SA 11:15 Nā, haere ana te iwi katoa ki Kirikara, ā, whakakīngitia ana a Haora ki reira ki te aroaro o Ihowā ki Kirikara. Nā, patua ana e rātou ki reira he patunga mō te pai ki te aroaro o Ihowā; ā, nui atu te koa o Haora, rātou ko ngā tāngata katoa o Īharaira i reira.
1SA 12:1 Nā, ka mea a Hamuera ki a Īharaira katoa, “Nanā, kua rongo nei ahau ki tō koutou reo, ki ngā mea katoa i kīia mai ki ahau, kua whakakīngi hoki i tētahi kīngi mō koutou.
1SA 12:2 Inā, te kīngi nā, e hāereere nā i tō koutou aroaro; ko ahau hoki, kua koroheketia ahau, kua hina; ā, ko āku tama kei a koutou ēnā. Nō tōku tamarikitanga hoki tōku hāereere i tō koutou aroaro ā tae noa mai ki tēnei rā.
1SA 12:3 “Tēnei ahau; whakaaturia mai tōku hē i te aroaro o Ihowā, i te aroaro anō hoki o tāna tangata i whakawahi ai. I tango rānei ahau i te kau a tētahi? I tango rānei ahau i te kāihe a tētahi? I riro mai rānei i ahau ngā taonga o tētahi? I tūkinotia rānei e ahau tētahi? I tango rānei ahau i te utu whakapati a tētahi hei mea kia huna ōku kanohi? Ā, ka whakahokia e ahau ki a koutou.”
1SA 12:4 Anō rā ko rātou, “Kīhai tētahi mea a mātou i riro hē i a koe, kīhai hoki koe i tūkino i a mātou, kīhai anō hoki i tangohia e koe tētahi mea a te tangata.”
1SA 12:5 Nā, ka mea ia ki a rātou, “Ko Ihowā hei kaiwhakaatu mō tā koutou; hei kaiwhakaatu anō hoki ināianei tāna tangata i whakawahi ai, kīhai i mau i a koutou tētahi mea a tōku ringa.” Ā, ka mea rātou, “Hei kaiwhakaatu anō ia.”
1SA 12:6 Nā, ka mea a Hamuera ki te iwi, “Nā Ihowā i whakatū a Mohi rāua ko Ārona, nāna hoki ō koutou mātua i kawe mai i te whenua o Īhipa.
1SA 12:7 Nā, tū tonu koutou, ā, ka whakahaerea e ahau ki a koutou ki te aroaro o Ihowā ngā mahi tika katoa a Ihowā i mahia e ia ki a koutou, ki ō koutou mātua hoki.
1SA 12:8 “I te haerenga atu o Hākopa ki Īhipa, ā, ka tangi ō koutou mātua ki a Ihowā, nā, ka tonoa e Ihowā a Mohi rāua ko Ārona hei whakaputa mai i ō koutou mātua i Īhipa, hei whakanoho hoki i a rātou ki tēnei wāhi.
1SA 12:9 “Ā, ka wareware rātou ki a Ihowā, ki tō rātou Atua, nā, hokona ana rātou e ia ki te ringa o Hihera, rangatira o te ope a Hatoro, ki te ringa hoki o ngā Pirihitini, ki te ringa hoki o te kīngi o Moapa, ā, whawhai ana rātou ki a rātou.
1SA 12:10 Ā, ka tangi atu rātou ki a Ihowā, ka mea, ‘Kua hara mātou, i a mātou i whakarere nei i a Ihowā, i mahi ki ngā Paara, ki a Ahataroto; otiia whakaorangia mātou i te ringa o ō mātou hoariri, ā, ka mahi mātou ki a koe.’
1SA 12:11 Nā, ka ungā mai e Ihowā a Ierupāra, a Perana, a Iepeta, a Hamuera, ā, whakaorangia ana koutou i roto i ngā ringa o ō koutou hoariri i tētahi taha, i tētahi taha, ā, noho wehikore noa iho ana koutou.
1SA 12:12 “Ā, nō tō koutou kitenga e haere mai ana a Nahaha kīngi o ngā tama a Āmona ki a koutou, ka mea koutou ki ahau, ‘Kāhore, engari me whai kīngi anō mātou,’ i te mea ko Ihowā, ko tō koutou Atua tō koutou kīngi.
1SA 12:13 Inā rā te kīngi i whiriwhiria nei e koutou, i tonoa nei e koutou! Nanā, kua hoatu e Ihowā he kīngi mō koutou.
1SA 12:14 Ki te wehi koutou i a Ihowā, ki te mahi ki a ia, ki te whakarongo ki tōna reo ki te kore hoki e tutū ki te kupu a Ihowā, kātahi koutou ko te kīngi e kīngi ana i a koutou ka whai tonu i a Ihowā, i tō koutou Atua.
1SA 12:15 Engari ki te kore koutou e rongo ki te reo o Ihowā, ā, ka tutū anō ki te kupu a Ihowā, kātahi ka anga mai ki a koutou te ringa o Ihowā, ka rite ki tāna ki ō koutou mātua.
1SA 12:16 “Tēnā, tū tonu koutou, kia kite koutou i tēnei mea nui ka meatia nei e Ihowā ki tō koutou aroaro.
1SA 12:17 Ehara ianei tēnei i te kotinga wīti ināianei? Ka karanga ahau ki a Ihowā, ā, ka hōmai he whatitiri, he ua, kia mōhio ai koutou, kia kite ai, he nui tō koutou hē i meatia nei e koutou i te aroaro o Ihowā i a koutou i tono kīngi nei mō koutou.”
1SA 12:18 Nā, ka karanga a Hamuera ki a Ihowā, ā, hōmai ana e Ihowā he whatitiri, he ua, i taua rangi anō. Nā, nui noa atu te wehi o te iwi katoa ki a Ihowā, ki a Hamuera.
1SA 12:19 Nā, ka mea te iwi katoa ki a Hamuera, “Īnoi atu mō āu pononga ki a Ihowā, ki tōu Atua, kei mate mātou; kua tāpiritia hoki ō mātou hara katoa ki tēnei kino, ki tā mātou tono i te kīngi mō mātou.”
1SA 12:20 Anō rā ko Hamuera ki te iwi, “Kaua e wehi; kua oti tēnei kino katoa te mea e koutou, kaua ia e peka atu i te whai i a Ihowā; engari me whakapau ō koutou ngākau ki te mahi ki a Ihowā.
1SA 12:21 Kaua anō hoki e peka atu; ko reira hoki koutou whai ai i ngā mea tekateka noa, e kore e mana, e kore anō hoki e whakaora; he mea tekateka noa hoki.
1SA 12:22 E kore hoki a Ihowā e whakarere i tāna iwi, ka mahara ia ki tōna ingoa nui; kua pai nei hoki a Ihowā ki te mea i a koutou hei iwi māna.
1SA 12:23 Ko ahau hoki! E! Kia hara ahau ki a Ihowā! Kia mutu tāku īnoi mō koutou! Tēnā ko tēnei, me whakaako koutou e ahau ki te ara pai, ki te ara tika.
1SA 12:24 Engari, kia wehi i a Ihowā; whakapaua hoki ō koutou ngākau ki te mahi ki a ia i runga i te pono; whakaaroa hoki ngā mea nunui i mea ai ia ki a koutou.
1SA 12:25 Nā, ki te mahi tonu koutou i te hē, ka ngaro ngātahi koutou ko tō koutou kīngi.”
1SA 13:1 E toru tekau ngā tau o Haora ka kīngi ia; ā, e rua ōna tau e kīngi ana mō Īharaira.
1SA 13:2 Nā, ka whiriwhiria e Haora ētahi tāngata o Īharaira māna, e toru mano. Ā, o aua mano, e rua i a Haora i Mikimaha, i Maunga Pētēre, kotahi mano i a Honatana i Kipea o Pineamine; ko te nuinga ia o te iwi i tonoa atu e ia ki tōna tēneti, ki tōna tēneti.
1SA 13:3 Nā, ka patua e Honatana ngā hōia pupuri a ngā Pirihitini i Kepa, ā, rongo ana ngā Pirihitini. Nā, ka whakatangihia te tētere e Haora puta noa i te whenua katoa, ā, ka mea, “Kia rongo ngā Hiperu.”
1SA 13:4 Ā, ka rongo a Īharaira katoa i te kōrero kua patua e Haora ngā hōia pupuri a ngā Pirihitini, ā, kua whakahouhou hoki a Īharaira ki ngā Pirihitini, nā, ka huihui te iwi ki te whai i a Haora ki Kirikara.
1SA 13:5 Me ngā Pirihitini hoki, i huihui ki te whawhai ki a Īharaira, e toru tekau mano ngā hāriata, e ono mano ngā hōia eke hōiho, me ngā tāngata e rite ana ki te onepū i te taha o te moana te tini. Nā, ka haere rātou, ka noho ki Mikimaha, whaka te rāwhiti o Peteawene.
1SA 13:6 I te kitenga o ngā tāngata o Īharaira kei roto rātou i te raru, kua pāwera hoki te iwi, nā, piri ana te iwi i roto i ngā ana, i ngā wāhi ururua, i runga i ngā kāmaka, i ngā taumaihi, i roto i ngā rua.
1SA 13:7 Nā tērā ētahi o ngā Hiperu i whiti atu i Horano ki te whenua o Kara, o Kireara. Ko Haora ia, i Kirikara anō ia; ā, aru wehi ana te iwi katoa i a ia.
1SA 13:8 Ā, e whitu ngā rā i tatari ai ia, ko te wā hoki ia i whakaritea e Hamuera; kāhore ia a Hamuera i tae ki Kirikara, ā, marara noa atu tōna nuinga.
1SA 13:9 Nā, ka mea a Haora, “Kawea mai te tahunga tinana ki ahau, me ngā whakahere mō te pai.” Nā, whakaekea ana e ia te tahunga tinana.
1SA 13:10 Ā, ka oti tāna tahunga tinana te whakaeke, nā, kua puta a Hamuera; ā, haere ana a Haora ki te whakatau i a ia, ki te oha ki a ia.
1SA 13:11 Nā, ka mea a Hamuera, “He mahi aha tāu?” Anō rā ko Haora, “I kite hoki ahau kua marara noa atu tōku nuinga, ā, kāhore koe i tae mai i ngā rā i whakaritea, heoi e huihui ana ngā Pirihitini ki Mikimaha,
1SA 13:12 koia ka mea ahau, ‘Ākuanei ngā Pirihitini haere mai ai ki ahau ki Kirikara, ā, kāhore anō ahau kia īnoi ki a Ihowā.’ Nā, pēhia ana e ahau tōku ngākau, ā, whakaekea ana te tahunga tinana.”
1SA 13:13 Nā, ko te kīanga a Hamuera ki a Haora, “He mahi kūware tāu; kīhai nei i pupuri i te whakahau a Ihowā, a tōu Atua i whakahau ai ia ki a koe; pēnei kua whakapūmautia e Ihowā āianei tōu kīngitanga ki a Īharaira ā ake ake.
1SA 13:14 Ko tēnei, e kore e tū tōu kīngitanga; kua rapua e Ihowā tētahi tangata māna, ko tā tōna ngākau i pai ai, kua oti anō ia te whakahau e Ihowā hei rangatira mō tāna iwi; mōu kīhai i pupuri i tā Ihowā i whakahau ai ki a koe.”
1SA 13:15 Nā, whakatika ana a Hamuera, ā, haere atu ana i Kirikara ki Kipea o Pineamine. Ā, taua ana e Haora ngā tāngata i piri ki a ia; tata tonu aua tāngata ki te ono rau.
1SA 13:16 Nā, i Kepa o Pineamine a Haora rāua ko tāna tama, ko Honatana, me te hunga hoki i piri ki a rāua; i Mikimaha anō ngā Pirihitini e noho ana.
1SA 13:17 Nā, ka puta ngā kaipāhua i te puni o ngā Pirihitini, e toru ngā ngohi; kotahi te ngohi i anga nā te ara ki Opora, ki te whenua o Huara,
1SA 13:18 kotahi te ngohi i anga nā te huarahi ki Petehorono; kotahi te ngohi i anga nā te ara ki te rohe e aro nui ana ki te raorao o Tepoimi whaka te koraha.
1SA 13:19 Nā, kāhore he parakimete i kitea puta noa i te whenua katoa o Īharaira; i mea hoki ngā Pirihitini, “Kei hangā he hoari, he tao rānei, e ngā Hiperu!”
1SA 13:20 Haere ai a Īharaira katoa ki raro, ki ngā Pirihitini ki te whakakoi i te hea, i te māripi o tāna parau, i tāna toki, i tāna ko.
1SA 13:21 Otiia he whaiuru anō tā rātou mō ngā hea, mō ngā māripi o ngā parau, mō ngā mārau, mō ngā toki, hei oro anō hoki mō ngā wero kau.
1SA 13:22 Heoi, i te rā o te pakanga kāhore i kitea he hoari, he tao i roto i te ringa o tētahi o ngā tāngata a Haora rāua ko Honatana; otiia i kitea anō ki a Haora rāua ko tāna tama, ko Honatana.
1SA 13:23 Nā, ka haere ngā hōia pupuri a ngā Pirihitini ki te whakawhitinga atu o Mikimaha.
1SA 14:1 Nā, i tētahi o aua rā ka mea a Honatana, tama a Haora, ki te taitama e mau ana i āna patu, “Haere mai, tāua ka whiti atu ki ngā hōia pupuri a ngā Pirihitini i tāwāhi rā.” Otiia kīhai i kōrerotia e ia ki tōna pāpā.
1SA 14:2 Ā, i tērā pito o Kipea a Haora e noho ana i raro i tētahi pamekaranete i Mikirono; tata tonu āna tāngata ki te ono ngā rau;
1SA 14:3 me Āhia anō hoki, tama a Ahitupu, tuakana o Ikaporo, tama a Pinehaha, tama a Eri tohunga a Ihowā i Hiro, ko te kaikākahu ia o te epora. Nā, kīhai te iwi i mōhio kua riro a Honatana.
1SA 14:4 Nā, i waenga o ngā whitinga i whai ai a Honatana kia whiti atu ki ngā hōia pupuri a ngā Pirihitini, tērā tētahi pari kōhatu i tētahi taha, he pari kōhatu hoki i tētahi taha; ko te ingoa o tētahi ko Potete, ko te ingoa o tētahi ko Henehe.
1SA 14:5 I te raki tētahi pari e tū ana, i te ritenga atu o Mikimaha; i te tonga tētahi, i te ritenga atu o Kipea.
1SA 14:6 Nā, ka mea a Honatana ki te taitama e mau ana i āna patu, “Haere mai, tāua ka haere ki ngā hōia o ēnei kokotikore. Tērā pea a Ihowā e mahi mō tāua. Kāhore he aha ki a Ihowā kia riro mā te tokomaha, mā te tokoiti rānei e whakaora.”
1SA 14:7 Anō rā ko te kaimau o āna patu ki a ia, “Meatia ngā mea katoa e paingia ana e tōu ngākau; anga atu, tēnei ahau hei hoa mōu, hei pērā me tā tōu ngākau e pai ai.”
1SA 14:8 Anō rā ko Honatana, “Nanā, me haere atu tāua ki ngā tāngata rā, me whakaputa atu hoki ki a rātou.
1SA 14:9 Ki te pēnei mai tā rātou kī ki a tāua, ‘Tū mārie, kia tae atu rā anō mātou ki a kōrua; nā, me tū tāua i tō tāua tūranga, e kore anō e piki ki a rātou.’
1SA 14:10 Engari ki te pēnei tā rātou kī, ‘Piki ake ki a mātou,’ ko reira tāua piki atu ai; nō te mea kua hōmai rātou e Ihowā ki ō tāua ringa; ā, ko tēnei hei tohu ki a tāua.”
1SA 14:11 Nā, ka puta rāua tokorua ki ngā hōia pupuri a ngā Pirihitini; ā, ka mea ngā Pirihitini, “Nanā, ko ngā Hiperu e puta mai ana i roto i ngā rua i piri ai rātou.”
1SA 14:12 Nā, ka oho ngā hōia pupuri ki a Honatana rāua ko tāna kaimau patu, ka mea, “Piki ake ki a mātou kia whakakitea ai tētahi mea e mātou ki a kōrua.” Nā, ka mea a Honatana ki te kaimau o āna patu, “Piki ake i muri i ahau; kua hōmai hoki rātou e Ihowā ki te ringa o Īharaira.”
1SA 14:13 Nā, ka piki atu a Honatana, he mea ngōki atu, me tāna kaimau patu i muri i a ia; nā, hinga ana rātou i a Honatana, me te patu anō te kaimau patu i muri i a ia.
1SA 14:14 Nā, ko te patunga tuatahi i patu ai a Honatana rāua ko tāna kaimau patu, tata tonu ki te rua tekau ngā tāngata; ko te nui o taua wāhi, me te mea kei te hāwhe eka whenua.
1SA 14:15 Nā, ka pā te wiri ki te puni, ki ērā i te pārae, ki te iwi katoa anō hoki; ko ngā hōia, me ngā kaipāhua, i wiri anō hoki rātou; i rū anō te whenua; nui rawa te wiri.
1SA 14:16 Ā, ka titiro ngā tūtei a Haora i Kipea o Pineamine; nā, kua papahoro te ope, me te haere anō rātou, kōpiko atu, kōpiko mai.
1SA 14:17 Kātahi a Haora ka mea ki te iwi i reira, i a ia, “Tatauria tātou kia kitea ko wai kua riro.” Ā, nō ka tatauria e rātou, nā, kāhore a Honatana rāua ko tāna kaimau patu i reira.
1SA 14:18 Nā, ka mea a Haora ki a Āhia, “Kawea mai te āka a te Atua.” I ngā tama hoki a Īharaira te āka a te Atua i taua wā.
1SA 14:19 Ā, i a Haora e kōrero ana ki te tohunga, ka tino nui haere te ngangau i te puni o ngā Pirihitini; nā, ka kī a Haora ki te tohunga, “Pēpeke ake tōu ringa.”
1SA 14:20 Nā, ka huihui a Haora rātou ko tōna nuinga, ā, haere ana ki te whawhai. Nā, e anga mai ana tērā te hoari a tētahi, a tētahi, ki tōna hoa, ki tōna hoa; nui atu te pōkaikaha.
1SA 14:21 Nā, ko ngā Hiperu i roto i ngā Pirihitini i mua atu, i haere tahi atu nei me rātou ki te puni i te whenua i tētahi taha, i tētahi taha; nā, huri ana anō hoki rātou ki te taha i a Īharaira, ki ngā hoa o Haora rāua ko Honatana.
1SA 14:22 Nā pērā anō ngā tāngata katoa o Īharaira i piri nei ki te whenua pukepuke o Ēparaima, i tō rātou rongonga kua whati ngā Pirihitini, nā, kei te whai haere anō hoki i a rātou i roto i te pakanga.
1SA 14:23 Heoi, whakaorangia ana a Īharaira, i taua rā e Ihowā; ā, puta kē ana te whawhai ki Peteawene.
1SA 14:24 Ā, i hēmanawa ngā tāngata o Īharaira i taua rā; i whakaoati hoki a Haora i te iwi, i mea, “Ki te kai tētahi tangata i te kai ā ahiahi noa, ka kangā ia, kia whai utu rā anō ahau i ōku hoariri.” Nā reira kīhai tētahi o te iwi i ānga ki te kai.
1SA 14:25 Nā, ko te haerenga o ngā tāngata katoa o te whenua ki tētahi ngahere; ā, he honi kei runga i te whenua.
1SA 14:26 Ā, nō te taenga o te iwi ki te ngahere, nā, e turuturu iho ana te honi; otiia kīhai i pā te ringa o tētahi tangata ki tōna waha; i wehi hoki te iwi i te oati.
1SA 14:27 Ko Honatana ia kīhai i rongo i te whakaoati a tōna pāpā i te iwi; nā, ka kōkiritia e ia te pito o te tokotoko i tōna ringa, ā, toua ana ki roto ki te honikoma, whakahokia ana e ia tōna ringa ki tōna waha, ā, ka mārama ōna kanohi.
1SA 14:28 Kātahi ka oho tētahi o te iwi, ā, ka mea, “I tino whakaoatitia te iwi e tōu pāpā; i mea ia, ‘Kia kangā te tangata e kai ana i tētahi kai āianei.’ Ā, e hemo ana te iwi.”
1SA 14:29 Kātahi a Honatana ka mea, “Raru ana te whenua nei i tōku pāpā. Titiro hoki, kua mārama ōku kanohi, nōku i kai i tētahi wāhi iti o te honi nei.
1SA 14:30 Tērā noa ake mehemea pea i kai noa atu te iwi ināianei i ngā mea i pāhuatia mai i ō rātou hoariri i tūpono atu ai rātou? Ko tēnei kāhore i rahi te parekura o ngā Pirihitini.”
1SA 14:31 Nā, patua iho e rātou ngā Pirihitini i taua rangi i Mikimaha atu ā tae noa ki Aitarono; ā, e tino hemo ana te iwi.
1SA 14:32 Nā, ko te rerenga atu o te iwi ki ngā taonga; ka mau ki ngā hipi, ki ngā kau, ki ngā kūao kau, patua iho ki te whenua, kainga tahitia ana e te iwi me ngā toto.
1SA 14:33 Kātahi ka kōrerotia ki a Haora ka meatia, “Nanā, kua hara te iwi ki a Ihowā, e kainga tahitia ana tā rātou kai me ngā toto.” Nā, ka mea ia, “He mahi hīanga tā koutou; hurihia mai he kōhatu nui ki ahau āianei.”
1SA 14:34 Ka mea anō a Haora, “Tomotomo atu koutou ki roto ki te iwi mea atu hoki ki a rātou, Kawea mai ki ahau, e tērā, e tērā, tāna kau, tāna hipi, ka patu ai ki konei hei kai mā koutou; kaua hoki e hara ki a Ihowā, e kai i te toto.” Kātahi ka kawea mai e te iwi katoa i taua pō te kau a tēnā, a tēnā, ā, patua iho ana ki reira.
1SA 14:35 Nā, ka hangā e Haora he āta mā Ihowā. Koia tēnei ko te āta tuatahi i hangā e ia mā Ihowā.
1SA 14:36 Nā, ka mea a Haora, “Tātou ka haere ki raro, ka whai i ngā Pirihitini i te pō, ka pāhua i a rātou ā mārama noa te ata; kaua anō e waiho tētahi tangata o rātou.” Nā, ka mea rātou, “Meatia rā ngā mea katoa e pai ana ki tōu whakaaro.” Nā, ka mea ake te tohunga, “Kia whakatata tātou ki a Ihowā.”
1SA 14:37 Nā, ka tono whakaaro a Haora i te Atua, “Me haere rānei ahau ki raro, ki te whai i ngā Pirihitini? E hōmai rānei rātou e koe ki te ringa o Īharaira?” Otiia kāhore he kupu i whakahokia ki a ia i taua rā.
1SA 14:38 Nā, ka mea a Haora, “Neke mai, e ngā rangatira katoa o te iwi; kia mōhio ai, kia kite ai koutou nō hea tēnei hara i tēnei rā.
1SA 14:39 Tā te mea, e ora ana a Ihowā e whakaora nei i a Īharaira, ahakoa nō tāku tama, nō Honatana, ka mate ia, mate rawa.” Otiia kāhore he tangata o te iwi katoa hei whakahoki kupu ki a ia.
1SA 14:40 Kātahi ia ka mea ki a Īharaira katoa, “Hei tētahi taha koutou, hei tētahi taha māua ko tāku tama, ko Honatana.” Nā, ka mea te iwi ki a Haora, “Meatia rā te mea e pai ana ki tōu whakaaro.”
1SA 14:41 Kātahi a Haora ka mea ki a Ihowā, ki te Atua o Īharaira, “Kia tika te hōmaitanga o te rota.” Nā, ka mau ko Honatana rāua ko Haora; i mawhiti hoki te iwi.
1SA 14:42 Nā, ka mea a Haora, makā te rota mō māua ko tāku tama, ko Honatana. Nā, ka mau ko Honatana.
1SA 14:43 Kātahi ka mea a Haora ki a Honatana, “Whakaaturia mai ki ahau, i aha koe.” Kātahi ka whakaaturia e Honatana ki a ia, ka mea, “He tika i whakamātau kau atu ahau i tētahi wāhi iti o te honi ki te pito o te tokotoko i tōku ringa; nā, ka mate nei ahau.”
1SA 14:44 Anō rā ko Haora, “Kia meatia tēnei e te Atua, tērā atu anō hoki; ka mate rawa hoki koe, e Honatana.”
1SA 14:45 Nā, ka mea te iwi ki a Haora, “Kia mate a Honatana nāna nei tēnei whakaoranga nui i roto i a Īharaira? Kāhore rā hoki. E ora ana a Ihowā, e kore e taka tētahi makawe o tōna mātenga ki te whenua; i te mahi tahi nei hoki ia me te Atua i tēnei rā.” Heoi, whakaorangia ana a Honatana e te iwi, ā, kīhai i mate.
1SA 14:46 Kātahi ka hoki a Haora i te whai i ngā Pirihitini; ā, haere ana ngā Pirihitini ki tō rātou nā wāhi.
1SA 14:47 Ā, nō ka riro i a Haora te kīngitanga o Īharaira, ka whawhai ia ki ōna hoariri katoa i tētahi taha, i tētahi taha, ki a Moapa, ki ngā tama a Āmona, ki a Ēroma, ki ngā kīngi anō o Topa, ki ngā Pirihitini, ā, hē ana rātou i a ia i ngā wāhi katoa i tahuri ai ia.
1SA 14:48 Ā, i puta tōna toa, ā, patua ana ngā Amareki, ā, ora ake i a ia a Īharaira i te ringa o ōna kaipāhua.
1SA 14:49 Nā, ko ngā tama a Haora, ko Honatana, ko Ihui, ko Marikihua; ā, ko ngā ingoa ēnei o āna tamāhine tokorua: ko te ingoa o te mātāmua ko Merapa, ko te ingoa o tō muri ko Mikara.
1SA 14:50 Ā, ko te ingoa o te wahine a Haora ko Ahinoama, he tamāhine nā Ahimāta; ko te ingoa hoki o te rangatira o tāna ope ko Āpanēre, tama a Nere matua kēkē o Haora.
1SA 14:51 Ko Kihi hoki te pāpā o Haora; ā, he tama nā Apiere a Nere pāpā o Āpanēre.
1SA 14:52 Ā, he nui te whawhai ki ngā Pirihitini i ngā rā katoa o Haora; ā, ka kite a Haora i tētahi mārohirohi, i tētahi māia, nā, ka tangohia e ia māna.
1SA 15:1 Nā, ka mea a Hamuera ki a Haora, “I tonoa mai ahau e Ihowā ki te whakawahi i a koe hei kīngi mō tāna iwi mō Īharaira; nā, whakarongo mai ki te reo o ngā kupu a Ihowā.
1SA 15:2 Ko te kupu tēnei a Ihowā o ngā mano: ‘E whakaaro ana ahau ki tā Amareke i mea ai ki a Īharaira, ki tāna whanganga i a ia i te ara i tōna haerenga mai i Īhipa.
1SA 15:3 Nā, tīkina, patua a Amareke, whakangaromia rawatia ā rātou mea katoa, kaua hoki rātou e tohungia; engari whakamatea ngātahitia te tāne me te wahine te pōtiki me te mea ngote ū, te kau me te hipi, te kāmera me te kāihe.’ ”
1SA 15:4 Nā, ka huihuia te iwi e Haora, ā, taua ana e ia ki Teraimi, e rua rau mano, he hunga haere i raro, me ngā tāngata hoki o Hūrā, kotahi tekau mano.
1SA 15:5 Nā, ko te haerenga atu o Haora ki te pā o Amareke, ā, whakatakoto pehipehi ana i roto i te awaawa.
1SA 15:6 I mea hoki a Haora ki ngā Keni, “Whakatika, mawehe atu, haere ki raro i roto i ngā Amareki, kei hunā tahitia koe e ahau me rātou; i puta hoki tā koutou atawhai ki ngā tamariki katoa a Īharaira i tō rātou haerenga mai i Īhipa.” Heoi, ka mawehe ngā Keni i roto i a Amareki.
1SA 15:7 Nā, tukitukia ana e Haora ngā Amareki i Hāwira atu ā tae noa koe ki Huru, ki te ritenga atu o Īhipa.
1SA 15:8 Hopukia oratia ana hoki e ia a Akaka kīngi o Amareke, ko te iwi katoa hoki i whakangaromia rawatia e ia ki te mata o te hoari.
1SA 15:9 Otiia i tohungia e Haora rātou ko te iwi a Akaka, me ngā mea papai o ngā hipi, o ngā kau, o ngā mea mōmona hoki, me ngā reme, me ngā mea pai katoa, kīhai hoki i aro ki te whakangaro i a rātou; engari ngā mea e whakaparahakotia ana, e rukea ana, ko ēnā a rātou i whakangaro ai.
1SA 15:10 Kātahi ka puta te kupu a Ihowā ki a Hamuera, ka mea:
1SA 15:11 “Kua puta kē ōku whakaaro i meinga ai e ahau a Haora hei kīngi; kua hoki atu hoki ia i te whai i ahau, ā, kīhai hoki i whakamana i āku kupu.” Nā, ka oho te riri i a Hamuera; ā, pau katoa taua pō i a ia e tangi ana ki a Ihowā.
1SA 15:12 Nā, ka maranga wawe a Hamuera i te ata ki te whakatau i a Haora; ā, ka kōrerotia ki a Hamuera, ka meatia, “I tae mai a Haora ki Karamere, nā, whakatūria ana e ia he tohu māna, ā, haere āwhio atu ana, kua pahemo atu, kua riro ki raro, ki Kirikara.”
1SA 15:13 Nā, ka tae atu a Hamuera ki a Haora, ā, ka mea a Haora ki a ia, “Kia manaakitia koe e Ihowā, kua whakamanā e ahau te kupu a Ihowā.”
1SA 15:14 Nā, ka mea a Hamuera, “He aha koia tēnei tangi o ngā hipi i roto nei i ōku taringa, me te tangi o ngā kau e rongo nei ahau?”
1SA 15:15 Anō rā ko Haora, “He mea mau mai e rātou i ngā Amareki; i tohungia hoki e te iwi ngā mea papai o ngā hipi, o ngā kau, hei mea patunga tapu ki a Ihowā, ki tōu Atua; ā, ko te toenga, whakangaromia iho e mātou.”
1SA 15:16 Kātahi ka mea a Hamuera ki a Haora, “Kāti! Kia kōrerotia e ahau ki a koe tā Ihowā i mea ai ki ahau i tēnei pō.” Anō rā ko tērā, “Kōrero.”
1SA 15:17 Ā, ka mea a Hamuera, “I a koe e iti ana ki tōu whakaaro, kīhai ianei koe i meinga hei upoko mō ngā iwi o Īharaira, i whakawahia e Ihowā hei kīngi mō Īharaira?
1SA 15:18 Nā, ka tono a Ihowā i a koe kia haere, ka mea, ‘Tīkina, whakangaromia te hunga hara, ngā Amareki, whawhai hoki ki a rātou ā poto noa rātou.’
1SA 15:19 He aha koe tē whakarongo ai ki te reo o Ihowā, i aurara atu ai ki ngā taonga parakete, i mahi ai i te kino i te tirohanga a Ihowā?”
1SA 15:20 Nā, ka mea a Haora ki a Hamuera, “Inā, i whakarongo anō ahau ki te reo o Ihowā, i haere i te ara i tonoa ai ahau e Ihowā, kua kawea mai anō hoki e ahau a Akaka kīngi o Amareke; ko ngā Amareki anō hoki, whakangaromia iho e ahau.
1SA 15:21 Nā te iwi hoki i tango ētahi o ngā taonga, o ngā hipi, o ngā kau, ngā mea tino papai o ngā mea e whakangaromia ana hei mea patunga tapu ki a Ihowā, ki tōu Atua, ki Kirikara.”
1SA 15:22 Anō rā ko Hamuera: “Ki tā Ihowā, he pērā rānei te āhuareka o ngā tahunga tinana, o ngā patunga tapu, me te whakarongo ki te reo o Ihowā? Nanā, pai atu te whakarongo i te patunga tapu, te ngākau mahara i te ngako o ngā hipi toa.
1SA 15:23 Rite tonu hoki te tutū ki te hara mākutu; te whakatuturi ki te kino, ki te karakia whakapakoko. He whakaparahako nāu ki te kupu a Ihowā, ka whakaparahako hoki ia ki a koe hei kīngi.”
1SA 15:24 Nā, ka kī a Haora ki a Hamuera, “Kua hara ahau, i ahau i takahi nei i te kupu a Ihowā, i āu kupu anō hoki; i wehi hoki ahau i te iwi, i whakarongo ki tō rātou reo.
1SA 15:25 Tēnā rā, whakarērea noatia iho tōku hara, kia hoki atu tāua, kia koropiko ai ahau ki a Ihowā.”
1SA 15:26 Anō rā ko Hamuera ki a Haora, “E kore ahau e hoki tahi tāua; he mea hoki kua whakaparahako koe ki te kupu a Ihowā, ā, kua whakaparahako a Ihowā ki a koe hei kīngi mō Īharaira.”
1SA 15:27 Ā, i te tahuritanga o Hamuera ki te haere, ka mau tērā ki te pito o tōna kākahu, ā, kua pakaru.
1SA 15:28 Nā, ka mea a Hamuera ki a ia, “Kua haea mai e Ihowā ināianei tōu kīngitanga i roto i a Īharaira, kua hoatu ki tōu hoa e pai atu ana i a koe.
1SA 15:29 E kore anō hoki te Kaha o Īharaira e teka; e kore anō hoki e puta kē ōna whakaaro; nō te mea ehara ia i te tangata e puta kē ai ōna whakaaro.”
1SA 15:30 Anō rā ko tērā, “Kua hara ahau; otiia whakahōnoretia ahau āianei i te aroaro o ngā kaumātua o tōku iwi, i te aroaro o Īharaira, kia hoki tahi tāua, kia koropiko ai ahau ki a Ihowā, ki tōu Atua.”
1SA 15:31 Heoi, hoki ana a Hamuera i muri i a Haora, ā, karakia ana a Haora ki a Ihowā.
1SA 15:32 Kātahi a Hamuera ka mea, “Kawea mai ki ahau a Akaka kīngi o Amareke.” Nā, ka āta hīkoi a Akaka ki a ia. Ā, ka mea a Akaka, “He pono kua pahemo kē te ngau kino a te mate.”
1SA 15:33 Anō rā ko Hamuera, “Nā tāu hoari i kore ai ngā uri o ngā wāhine, ka pēnā anō tōu whaea te urikore i roto i ngā wāhine.” Nā, hāua iho a Akaka e Hamuera i te aroaro o Ihowā i Kirikara.
1SA 15:34 Kātahi ka haere a Hamuera ki Rama; ko Haora ia i haere ki runga ki tōna whare, ki Kipea o Haora.
1SA 15:35 Kīhai hoki a Haora i tirotirohia e Hamuera i muri iho ā taea noatia te rā i mate ai ia; heoi tangihia ana a Haora e Hamuera. I puta kē anō hoki ngā whakaaro o Ihowā i meinga ai e ia a Haora hei kīngi mō Īharaira.
1SA 16:1 Nā, ka mea a Ihowā ki a Hamuera, “Kia pēhea ake te roa o tāu tangi mō Haora, kua whakakāhoretia nei hoki ia e ahau hei kīngi mō Īharaira? Whakakīia tāu haona ki te hinu, ā, haere, ka tonoa koe e ahau ki a Hehe o Pēterehema; kua kitea hoki e ahau he kīngi māku i roto i āna tama.”
1SA 16:2 Nā, ka mea a Hamuera, “Me pēhea ahau e haere ai? Ki te rongo hoki a Haora, ka patua ahau e ia.” Anō rā ko Ihowā, “Kawea atu i tōu ringa tētahi kūao kau, hei te uwha, ka mea atu, ‘I haere mai ahau ki te patu whakahere ki a Ihowā.’
1SA 16:3 Me karanga hoki a Hehe ki te patunga tapu, ā, māku e whakaatu ki a koe tāu e mea ai; me whakawahi anō e koe māku te tangata e kōrero ai ahau ki a koe.”
1SA 16:4 Nā, meatia ana e Hamuera tā Ihowā i kōrero ai, ā, haere ana ki Pēterehema. Nā, ka haere mai ngā kaumātua o te pā ki te whakatau i a ia me te wiri anō, ā, ka mea, “E haere mai ana rānei koe i runga i te rangimārie?”
1SA 16:5 Anō rā ko ia, “I runga i te rangimārie; i haere mai ahau ki te patu whakahere ki a Ihowā; whakatapua koutou, ka haere tātou ki te patunga tapu.” I whakatapua anō e ia a Hehe rātou ko āna tama, ā, karangatia ana rātou e ia ki te patunga tapu.
1SA 16:6 Ā, nō tō rātou taenga, nā, ka titiro atu ia ki a Eriapa, ā, ka mea, “He pono kei te aroaro o Ihowā tāna tangata e whakawahi ai.”
1SA 16:7 Nā, ka mea a Ihowā ki a Hamuera, “Kaua e titiro ki tōna āhua, ki tōna roa rānei, i a ia e tū nā; kua whakaparahako hoki ahau ki a ia. E kore hoki e rite tā Ihowā ki tā te tangata titiro; he titiro hoki tā te tangata ki te kanohi; ko tā Ihowā ia he titiro ki te ngākau.”
1SA 16:8 Kātahi ka karangatia e Hehe a Apinarapa, ā, ka meinga kia haere atu mā te aroaro o Hamuera. Nā, ka mea ia, “Ehara anō tēnei i tā Ihowā i whiriwhiri ai.”
1SA 16:9 Kātahi ka meinga e Hehe a Hamaha kia haere atu. Nā, ka mea ia, “Ehara anō tēnei i tā Ihowā i whiriwhiri ai.”
1SA 16:10 Nā, meinga ana e Hehe āna tama tokowhitu kia haere atu mā te aroaro o Hamuera. Ā, ka mea a Hamuera ki a Hehe, “Kīhai ēnei i whiriwhiria e Ihowā.”
1SA 16:11 Nā, ka mea a Hamuera ki a Hehe, “Kei konei katoa rānei āu tamariki?” Ā, ka mea ia, “Tēnei anō tētahi, tō muri rawa; nā, kei te tiaki hipi ia.” Anō rā ko Hamuera ki a Hehe, “Tonoa atu he tangata ki te tiki i a ia; e kore hoki tātou e noho ki te kai kia tae mai rā anō ia ki konei.”
1SA 16:12 Nā, ka tono tangata atu tērā, ā, tīkina ana ia. Nā, he kiri pūwhero ia, he kanohi ātaahua, he pai ki te titiro atu. Nā, ka mea a Ihowā, “Whakatika, whakawahia ia, koia hoki ia.”
1SA 16:13 Kātahi ka mau a Hamuera ki te haona hinu, ā, whakawahia ana ia i roto i ōna tuākana; ko te tino putanga mai o te Wairua o Ihowā ki runga ki a Rāwiri i taua rangi anō ā ahu ake nei. Nā, whakatika ana a Hamuera, haere ana ki Rama.
1SA 16:14 Nā, kua mawehe atu i a Haora te Wairua o Ihowā, ā, ka takakinotia ōna whakaaro e tētahi wairua kino nō Ihowā.
1SA 16:15 Ā, ka mea ngā tāngata a Haora ki a ia, “Nanā, he wairua kino nō te Atua te whakararu nei i a koe.
1SA 16:16 Nā, kia kī mai koa tō mātou ariki ki āna pononga, e tau nei i tōu aroaro, kia rapua he tangata mōhio ki te whakatangi hāpa; kia tau mai ai te wairua kino a te Atua ki a koe, ka whakatangi ia ki tōna ringa, ā, ka mārie koe.”
1SA 16:17 Nā, ka mea a Haora ki āna tāngata, “Tēnā rā, tirohia tētahi kaiwhakatangi pai, ka kawe mai ki ahau.”
1SA 16:18 Kātahi ka oho tētahi o ngā taitama, ka mea, “Nanā, kua kite ahau i tētahi o ngā tama a Hehe o Pēterehema, he mōhio ki te whakatangi, he toa, he pakari, he tangata hāpai patu, he kōrero tūpato, he tangata ātaahua, kei a ia anō hoki a Ihowā.”
1SA 16:19 Heoi, ka tono tāngata a Haora ki a Hehe, hei mea, “Tēnā a Rāwiri, tāu tama i ngā hipi nā, tonoa mai ki ahau.”
1SA 16:20 Nā, ka mau a Hehe ki tētahi kāihe, he taro te pīkaunga, me tētahi ipu wāina, me tētahi kūao koati, ā, ungā ana kia kawea e tāna tama, e Rāwiri, ki a Haora.
1SA 16:21 Nā, ka tae a Rāwiri ki a Haora, ā, tū ana i tōna aroaro. Ā, nui atu te aroha o tērā ki a ia; meinga ana ia e ia hei kaimau patu māna.
1SA 16:22 Nā, ka tono tāngata a Haora ki a Hehe hei mea atu ki a ia, “Tukua a Rāwiri kia tū i tōku aroaro; kua manakohia hoki ia e ahau.”
1SA 16:23 Ā, i ngā wā i puta mai ai te wairua kino i te Atua ki a Haora, ka mau a Rāwiri ki te hāpa, ka whakatangi ki tōna ringa. Heoi, ka tā te manawa o Haora, ā, ka mārie, ā, mahue ake ia i te wairua kino.
1SA 17:1 Nā, kua huihui ngā Pirihitini i ā rātou ope ki te whawhai, ā, ka whakaminea ki Hokoho o Hūrā, noho ana i waenganui o Hokoho, o Ateka, i Epeheramime.
1SA 17:2 I huihui anō a Haora rātou ko ngā tāngata o Īharaira, i noho ki te raorao o Eraha; ā, ka whakatakoto i ā rātou ngohi mō te whawhai ki ngā Pirihitini.
1SA 17:3 Nā, i runga ngā Pirihitini i te maunga i tēnei taha e tū ana, me Īharaira i te maunga i tērā taha e tū ana; he whārua hoki i waenganui o rātou.
1SA 17:4 Nā, ko te putanga o tētahi tangata, he papatū, i roto i te puni o ngā Pirihitini, ko tōna ingoa, ko Koriata, nō Kāta, e ono whatīanga kotahi hoki whanganga a te ringa tōna roa.
1SA 17:5 Ā, he parāhi te pōtae o tōna mātenga, he pukupuku unahi hoki tōna kākahu; ko te taimaha o te pukupuku e rima mano hekere parāhi.
1SA 17:6 He whakapuru tao parāhi kei ōna waewae, ā, i ōna pokohiwi he tīmata parāhi.
1SA 17:7 Rite tonu hoki ki te rākau a te kaiwhatu te kakau o tāna taoroa. Nā, ko te taimaha o te tete o tāna taoroa e ono rau hekere rino; i mua anō i a ia e haere ana te kaimau o tāna whakangungu rākau.
1SA 17:8 Nā, ka tū ia, ā, ka karanga ki ngā ngohi a Īharaira, ka mea ki a rātou, “He aha koutou i puta mai ai ki te whakatakoto i ā koutou ngohi? Ehara ianei ahau i te Pirihitini, ko koutou he pononga nā Haora? Whiriwhiria he tangata mā koutou, ā, kia heke iho ia ki ahau.
1SA 17:9 Ki te kaha ia ki te whawhai ki ahau, ki te patu i ahau, nā, ko mātou hei pononga mā koutou; ki te kaha ia ko ahau i a ia, ki te patu i a ia, nā hei pononga koutou mā mātou, ā, me mahi koutou ki a mātou.”
1SA 17:10 I mea anō taua Pirihitini, “Tēnei tāku whakatara ināianei mō ngā ngohi a Īharaira; hōmai he tangata ki ahau kia whawhai māua.”
1SA 17:11 Ā, i te rongonga o Haora rātou ko Īharaira katoa ki ēnei kupu a te Pirihitini, hopī noa iho rātou, nui atu te wehi.
1SA 17:12 Nā, he tama a Rāwiri nā taua Ēparati o Pēterehema Hūrā, ko Hehe nei tōna ingoa, tokowaru hoki āna tama. Ā, i ngā rā o Haora kua koroheketia taua tangata i roto i ngā tāngata.
1SA 17:13 Nā, tokotoru ngā tama a Hehe, ko ngā kaumātua, i haere, i aru i a Haora ki te pakanga; ko ngā ingoa ēnei o āna tama tokotoru i haere nei ki te pakanga, ko Eriapa te mātāmua, ko tō muri iho i a ia ko Apinarapa, ā, ko Hamaha te tuatoru.
1SA 17:14 Ko Rāwiri hoki tō muri rawa; nā, aru ana ngā mea kaumātua tokotoru i a Haora.
1SA 17:15 Nā, haere ai a Rāwiri, ā, ka hoki atu i a Haora ki te tiaki i ngā hipi a tōna pāpā i Pēterehema.
1SA 17:16 Nā, i te ata, i te ahiahi, ka whakatata mai taua Pirihitini, ka whakaatu i a ia, e whā tekau ngā rā.
1SA 17:17 Nā, ka mea a Hehe ki tāna tama, ki a Rāwiri, “Tēnā, maua atu tētahi wāhi o tēnei wīti pāhūhū, kia kotahi epa, mā ōu tuākana, me ēnei taro kotahi tekau, rere atu ki te puni, ki ōu tuākana.
1SA 17:18 Maua atu hoki ēnei tīhi kotahi tekau ki tō rātou rangatira mano, ka tirotiro atu kei te pēhea ōu tuākana, ka tango mai ai i ā rātou tohu.
1SA 17:19 Nā, i te raorao o Eraha a Haora me rātou, me ngā tāngata katoa hoki o Īharaira e whawhai ana ki ngā Pirihitini.”
1SA 17:20 Nā, ka maranga wawe a Rāwiri i te ata, tukua atu ana e ia ngā hipi ki te kaitiaki, ā, mauria ana aua mea e ia, haere ana; pērā ana ia me tā Hehe i whakahau ai ki a ia. Ā, nō tōna taenga ki te parepare e haere ana te ope ki te whawhai, e hāmama ana, mō te whai.
1SA 17:21 Kua oti hoki i a Īharaira rātou ko ngā Pirihitini ngā ngohi te whakatakoto, tēnei ngohi hei whawhai ki tērā ngohi.
1SA 17:22 Nā, tukua ana e Rāwiri tāna pīkaunga, ki te ringa o te kaitiaki o ngā pīkaunga, ā, rere ana ki te taua, ka tae, ka oha ki ōna tuākana.
1SA 17:23 I a ia anō e kōrero ana ki a rātou, nā, ko taua papatū, ko te Pirihitini o Kāta, ko Koriata tōna ingoa, e haere mai ana i roto i ngā ngohi a ngā Pirihitini, ā, ka kōrero ko aua kōrero rā anō, ā, ka rongo a Rāwiri.
1SA 17:24 Ā, i te kitenga o ngā tāngata katoa o Īharaira i taua tangata, rere ana rātou i tōna aroaro, ā, nui atu tō rātou wehi.
1SA 17:25 Nā, ka mea ngā tāngata o Īharaira, “I kite rānei koutou i taua tangata i haere mai nei? He pono he whakatara mō Īharaira i haere mai ai ia. Nā, ko te tangata e patua ai ia, nui atu ngā taonga e hōmai e te kīngi ki a ia, ka hōmai anō e ia tāna tamāhine ki a ia, ka whakarangatiratia anō te whare o tōna pāpā i roto i a Īharaira.”
1SA 17:26 Nā, ka kōrero a Rāwiri ki ngā tāngata e tū ana i tōna taha, ka mea, “Ka pēheatia te tangata e patua ai tēnei Pirihitini, e mutu ai te tāwai o Īharaira? Ko wai hoki tēnei Pirihitini kokotikore i whakatara ai ia ki ngā ngohi a te Atua ora?”
1SA 17:27 Nā, ka pēnei te whakahoki a te iwi ki a ia, ka mea rātou, “Ka pērā anō te hanga ki te tangata, e patua ai ia.”
1SA 17:28 Ā, nō te rongonga o Eriapa, o tōna tuakana mātāmua, i a ia e kōrero ana ki aua tāngata, ko te tino muranga o te riri o Eriapa ki a Rāwiri, ka mea ia, “He aha koe i haere mai ai? I tukua e koe ki a wai aua hipi torutoru rā i te koraha? E mōhio ana ahau ki tōu whakapehapeha, ki te kino anō hoki o tōu ngākau, he mātakitaki hoki i te whawhai i haere mai ai koe ki raro nei.”
1SA 17:29 Nā, ka mea a Rāwiri, “I aha koia ahau? Kāhore rānei he take?”
1SA 17:30 Nā, ka tahuri atu ia i a ia ki tētahi atu, ā, ka kōrero atu ko aua kupu anō; ā, rite tonu ki te kupu tuatahi te kupu i whakahokia mai e te iwi ki a ia.
1SA 17:31 Ā, nō ka rangona ngā kupu i kōrerotia e Rāwiri, kōrerotia ana e rātou ki a Haora; ā, ka tono ia kia tīkina ia.
1SA 17:32 Nā, ka mea a Rāwiri ki a Haora, “Kei hopī te ngākau o tētahi ki a ia; mā tāu pononga e haere ki te whawhai ki tēnei Pirihitini.”
1SA 17:33 Nā, ka mea a Haora ki a Rāwiri, “E kore e taea e koe te haere ki tēnei Pirihitini whawhai ai; he tamariki nei hoki koe, he tangata hāpai patu ia nō tōna tamarikitanga ake.”
1SA 17:34 Nā, ka mea a Rāwiri ki a Haora, “I te tiaki tāu pononga i ngā hipi a tōna pāpā. Nā, ko te haerenga mai o tētahi raiona, o tētahi pea, kāhakina atu ana he reme i roto i te kāhui;
1SA 17:35 nā, ka puta atu ahau ki te whai i a ia, ā, patua ana ia e ahau; tangohia mai ana hoki te reme i roto i tōna waha. Ā, nō tōna whakatikanga mai ki ahau, hopukia ana tōna kumikumi e ahau, patua iho kia mate.
1SA 17:36 I patua rūruatia te raiona me te pea e tāu pononga; ā, ka rite tēnei Pirihitini kokotikore ki tētahi o rāua; mōna i whakatara ki ngā ngohi a te Atua ora.”
1SA 17:37 I mea anō a Rāwiri, “Mā Ihowā nāna nei ahau i whakaora i te wae o te raiona, i te wae o te pea, māna ahau e whakaora i te ringa o tēnei Pirihitini.” Anō rā ko Haora ki a Rāwiri, “Haere, hei a koe anō a Ihowā.”
1SA 17:38 Nā, ka whakakākahuria a Rāwiri e Haora ki ōna kākahu, i pōtaea anō tōna mātenga e ia ki te pōtae parāhi; i whakakākahuria anō hoki e ia he pukupuku rino ki a ia.
1SA 17:39 Ā, whītikiria ana e Rāwiri tāna hoari ki waho ake o ōna kākahu; ka anga, ka haere; kīhai hoki i whakamātauria e ia. Nā, ka mea a Rāwiri ki a Haora, “E kore e tika tāku haere i ēnei, kāhore hoki i whakamātauria e ahau.” Nā, whakarērea atu ana e Rāwiri.
1SA 17:40 Nā, ka maua atu e ia ko tāna tokotoko i tōna ringa; i whiriwhiria anō ētahi kōhatu māeneene e rima māna i roto i te awa, ā, whaowhina ana ki roto ki tāna pēke hēpara, arā ki te pūtea; i tōna ringa anō tāna kōtaha, nā, ko tōna whakatatanga atu ki te Pirihitini.
1SA 17:41 Ā, i haere tonu mai te Pirihitini, i whakatata mai ki a Rāwiri; ko te kaimau anō o tāna whakangungu rākau i haere i mua i a ia.
1SA 17:42 Ā, nō te tirotirohanga o te Pirihitini, ka kite i a Rāwiri, whakahāwea ana ki a ia; he taitamariki hoki ia, he kiri pūwhero, he ātaahua hoki.
1SA 17:43 Nā, ka mea te Pirihitini ki a Rāwiri, “He kurī ahau i haere mai ai koe me ngā tokotoko ki ahau?” Nā, kangā iho a Rāwiri e te Pirihitini ki ōna atua.
1SA 17:44 I mea anō te Pirihitini ki a Rāwiri, “Haere mai ki ahau, ā, ka hoatu e ahau ōu kikokiko mā ngā manu o te rangi, mā ngā kararehe o te pārae.”
1SA 17:45 Kātahi ka mea a Rāwiri ki te Pirihitini, “I haere mai koe ki ahau me te hoari, me te taoroa, me te tīmata; ko ahau ia ka haere atu nei ki a koe i runga i te ingoa o Ihowā o ngā mano, o te Atua o ngā taua a Īharaira, o tāu i whakatara ake nā.
1SA 17:46 Ko āianei koe tukua mai ai e Ihowā ki tōku ringa, ā, ka patua koe e ahau, ka tangohia tōu upoko i a koe, ā, ka hoatu āianei ngā tinana o te ope o ngā Pirihitini mā ngā manu o te rangi, mā ngā kararehe mohoao o te whenua, ā, ka mōhio te whenua katoa he Atua anō tō Īharaira.
1SA 17:47 Ā, ka mōhio tēnei whakaminenga katoa, ehara te hoari, te taoroa rānei, i tā Ihowā mea hei whakaora; nā Ihowā hoki te whawhai, ā, māna koutou e hōmai ki ō mātou ringa.”
1SA 17:48 Nā, ka whakatika te Pirihitini, ka haere mai, ka whakatata ki te whakatūtaki i a Rāwiri, nā, ka hohoro a Rāwiri, ā, rere ana ki te taua kia tūtaki ki te Pirihitini.
1SA 17:49 Nā, kua totoro iho te ringa o Rāwiri ki roto ki te pēke, kei te tango i tētahi kōhatu i roto, piua atu ana e ia. Nā, kua tū te rae o te Pirihitini, toremi atu te kōhatu ki roto ki tōna rae; nā, hinga tāpapa iho ana ia ki te whenua.
1SA 17:50 Heoi he kōtaha, he kōhatu tā Rāwiri, ā, hinga ana i a ia te Pirihitini, patua ana e ia, mate rawa. Otiia, kāhore he hoari i te ringa o Rāwiri.
1SA 17:51 Kātahi ka rere a Rāwiri, ā, tū ana i runga i te Pirihitini, nā, ka mau ki tāna hoari, unuhia ana e ia i roto i te takotoranga, nā, whakamatea ana ia, ā, tapahia ana tōna upoko ki taua hoari. Ā, nō te kitenga o ngā Pirihitini kua mate tō rātou toa, whati ana rātou.
1SA 17:52 Nā, ka whakatika ngā tāngata o Īharaira rātou ko Hūrā, hāmama ana, nā, whāia ana e rātou ngā Pirihitini ā tae noa koe ki te raorao, ki ngā kūwaha o Ekerono. Nā, hinga ana ngā mea i patua o ngā Pirihitini i te ara ki Haaraimi ā tae noa ki Kāta, ki Ekerono.
1SA 17:53 Nā, ka hoki ngā tama a Īharaira i te whai i ngā Pirihitini, nā, kei te pāhua i tō rātou puni.
1SA 17:54 Nā, ka mau a Rāwiri ki te upoko o te Pirihitini, ā, kawea ana ki Hiruhārama: ko āna mea ia mō te patu i waiho e ia i tōna tēneti.
1SA 17:55 Nā, i te kitenga o Haora i a Rāwiri e haere atu ana ki te tū i te Pirihitini, ka mea ia ki a Āpanēre, ki te rangatira ope, “E Āpanēre, he tama nā wai tēnā tamaiti?” Ka mea a Āpanēre, “E ora ana tōu wairua, e te kīngi, kāhore ahau e mōhio.”
1SA 17:56 Nā, ka mea te kīngi, “Ui atu he tama nā wai taua tamaiti.”
1SA 17:57 Nā, i te hokinga mai o Rāwiri i te patu i te Pirihitini, ka mau a Āpanēre ki a ia, ā, kawea ana ki te aroaro o Haora, me te pane anō o te Pirihitini i tōna ringa.
1SA 17:58 Nā, ka mea a Haora ki a ia, “E tama, nā wai koe tamaiti?” Anō rā ko Rāwiri, “He tama ahau nā tāu pononga, nā Hehe o Pēterehema.”
1SA 18:1 Ā, ka mutu tāna kōrero ki a Haora, nā, piri tonu te wairua o Honatana ki te wairua o Rāwiri, ā, aroha ana a Honatana ki a ia me te mea ko tōna wairua ake.
1SA 18:2 Nā, ka mau a Haora ki a ia i taua rā, kīhai hoki ia i tukua kia hoki ki te whare o tōna pāpā.
1SA 18:3 I whakarite kawenata anō a Honatana rāua ko Rāwiri; i arohaina hoki ia e ia, me te mea ko tōna wairua ake.
1SA 18:4 I huia anō e Honatana tōna koroka i runga i a ia, ā, hoatu ana ki a Rāwiri, me ōna kākahu, tae noa ki tāna hoari, me tāna kōpere, me tōna whītiki.
1SA 18:5 Nā, ka haere a Rāwiri ki ngā wāhi katoa i tonoa ai ia e Haora, ka mahi tūpato; ā, ka meinga ia e Haora hei rangatira mō ngā tāngata whawhai, ā, pai tonu ia ki te titiro a te iwi katoa, ki te titiro anō hoki a ngā tāngata a Haora.
1SA 18:6 Nā, i tō rātou haerenga mai, i te hokinga mai o Rāwiri i te patu i te Pirihitini, ka puta ngā wāhine i ngā pā katoa o Īharaira, me te waiata, me te kanikani, me ngā timipera, me te koa, me ngā mea whakatangi, ki te whakatau i a Kīngi Haora.
1SA 18:7 Nā, ka waiata whakatene ngā wāhine i a rātou e tākaro ana, ka mea, “Nā Haora āna mano, nā Rāwiri āna tekau mano i patu.”
1SA 18:8 Nā, nui rawa te riri o Haora; he mea kino hoki taua kupu ki tōna whakaaro. Nā, ka mea ia, “Tekau ā rātou mano i hoatu ai ki a Rāwiri, he mano kau nei a rātou i hōmai nei ki ahau; ko te aha ake māna ki te kāhore te kīngitanga?”
1SA 18:9 Nā, whakatau ana te kanohi o Haora ki a Rāwiri nō taua rā tonu iho.
1SA 18:10 Nā, i te aonga ake ka puta kaha mai he wairua kino i te Atua ki a Haora, ā, ka poropiti ia i waenganui o te whare; ā, ka whakatangi te ringa o Rāwiri i te hāpa, ko tāna hanga i tēnā rā, i tēnā rā. He tao anō i te ringa o Haora.
1SA 18:11 Ko te tino werohanga a Haora i te tao; i mea hoki ia, “Me patu a Rāwiri e ahau, kia titi rawa ki te pakitara.” Nā, karohia ana e Rāwiri; e rua ngā mawhititanga i tōna aroaro.
1SA 18:12 Nā, ka wehi a Haora i a Rāwiri, nō te mea i a ia a Ihowā, ā, kua mawehe i a Haora.
1SA 18:13 Koia i wehea atu ai ia e Haora i a ia, ā, meinga ana ia e ia ko tāna rangatira mano. Nā, ka haere atu ia, ka haere mai i te aroaro o te iwi.
1SA 18:14 Nā, tūpato tonu te whakahaere a Rāwiri i ōna ara katoa; i a ia anō a Ihowā.
1SA 18:15 Ā, i te kitenga o Haora he tangata tūpato rawa ia, ka wehi ia i a ia.
1SA 18:16 Ā, i aroha a Īharaira katoa rātou ko Hūrā ki a Rāwiri, nō te mea i haere atu ia, i haere mai i tō rātou aroaro.
1SA 18:17 Nā, ka mea a Haora ki a Rāwiri, “Nanā, tāku tamāhine mātāmua, a Merapa, me hoatu e ahau hei wahine māu, otiia ko koe hei toa māku, hei whawhai i ngā whawhai a Ihowā.” I mea hoki a Haora, “Kaua tōku ringa e pā ki a ia; engari kia pā te ringa o ngā Pirihitini ki a ia.”
1SA 18:18 Nā, ka mea a Rāwiri ki a Haora, “Ko wai ahau, he oranga aha hoki tōku, he hapū aha tō tōku pāpā i roto i a Īharaira, e meinga ai ahau hei hunaonga mā te kīngi?”
1SA 18:19 I te wā ia e hōmai ai a Merapa, te tamāhine a Haora mā Rāwiri, nā, ka hoatu ia hei wahine mā Atariere o Mehora.
1SA 18:20 Nā, i aroha a Mikara, te tamāhine a Haora ki a Rāwiri, ā, ka kōrerotia ki a Haora, ā, he mea āhuareka tēnā ki tōna whakaaro.
1SA 18:21 Nā, ka mea a Haora, “Me hoatu ia e ahau ki a ia, ā, hei rore ia mōna e pā ai te ringa o ngā Pirihitini ki a ia.” Koia a Haora i mea ai ki a Rāwiri, “Ko āianei te rua o ōu meatanga hei hunaonga māku.”
1SA 18:22 Nā, ka whakahau a Haora ki āna tāngata, “Kōrero puku ki a Rāwiri, mea atu, ‘Nanā, e whakaahuareka ana te kīngi ki a koe, e aroha ana hoki āna tāngata katoa ki a koe; nā reira ko koe hei hunaonga mā te kīngi.’ ”
1SA 18:23 Nā, kōrerotia ana aua kupu e ngā tāngata a Haora ki ngā taringa o Rāwiri. Ā, ka mea a Rāwiri, “He mea noa iho koia ki a koutou kia meinga ahau hei hunaonga mā te kīngi, he rawakore nei hoki ahau, he ware?”
1SA 18:24 Nā, ka kōrero ngā tāngata a Haora ki a ia, ka mea, “Ko ngā kupu ēnei i puaki mai i a Rāwiri.”
1SA 18:25 Nā, ka mea a Haora, “Kia pēnei tā koutou kī ki a Rāwiri, ‘Kāhore o te kīngi hiahia ki te kaipākūhā; engari ki ngā kiri matamata kotahi rau o ngā Pirihitini; kia whai utu ai i ngā hoariri o te kīngi.’ ” I whakaaro hoki a Haora kia hinga a Rāwiri i te ringa o ngā Pirihitini.
1SA 18:26 Ā, nō ka kōrerotia e āna tāngata ēnei kupu ki a Rāwiri, āhuareka tonu ki a Rāwiri kia meinga ia hei hunaonga mā te kīngi. Ā, kāhore anō ngā rā kia rite.
1SA 18:27 Nā, ka whakatika a Rāwiri, ā, haere ana rātou ko āna tāngata, nā, patua iho e ia o ngā Pirihitini e rua rau ngā tāngata; ā, kawea ana e Rāwiri ō rātou kiri matamata. Nā, hoatu ana e rātou ki te kīngi te mea e rite ana, kia meinga ai ia hei hunaonga mā te kīngi. Nā, ka hōmai e Haora a Mikara, tāna tamāhine hei wahine māna.
1SA 18:28 Ā, i kite a Haora, i mōhio, kei a Rāwiri a Ihowā; ā, i arohaina ia e Mikara tamāhine a Haora.
1SA 18:29 Nā, ka nui rawa atu te wehi o Haora i a Rāwiri; ā, he ito a Rāwiri ki a Haora i ngā rā katoa.
1SA 18:30 Kātahi ka whakaputa ngā rangatira o ngā Pirihitini, ā, i ngā wā katoa i whakaputa ai rātou, nui atu te tika o te ngārahu a Rāwiri i tā ngā tāngata katoa a Haora; koia i tino matea nuitia ai tōna ingoa.
1SA 19:1 Nā, ka kōrero a Haora ki a Honatana, ki tāna tama, rātou ko āna tāngata katoa, kia whakamatea a Rāwiri.
1SA 19:2 Otiia nui atu te whakaahuareka o Honatana, tama a Haora, ki a Rāwiri. Nā, ka kōrero a Honatana ki a Rāwiri, ka mea, “E whai ana tōku pāpā, a Haora kia whakamatea koe; nā, kia tūpato ki a koe i te ata, me noho ki te wāhi ngaro, ka huna ai i a koe.
1SA 19:3 Ā, ka puta atu ahau, ka tū ki te taha o tōku pāpā i te māra kei reira nei koe, nā, ka kōrerotia koe e ahau ki tōku pāpā, ā, ko tāku e kite ai ka kōrerotia e ahau ki a koe.”
1SA 19:4 Nā, ka kōrerotia paitia a Rāwiri e Honatana ki tōna pāpā, ki a Haora; i mea ia ki a ia, “Kei hara te kīngi ki tāna pononga, ki a Rāwiri; kāhore hoki ōna hara ki a koe, he nui rawa hoki te pai o āna mahi ki a koe.
1SA 19:5 I whakamomori atu nā hoki ia ki te mate, ā, patua iho te Pirihitini, nā, he nui te whakaoranga i whakaora ai a Ihowā i a Īharaira katoa. I kite koe, i koa hoki, ā, he aha rā koe ka hara ai ki ngā toto harakore, ka whakamate noa iho ai i a Rāwiri?”
1SA 19:6 Nā, ka whakarongo a Haora ki te reo o Honatana; ā, ka oati a Haora, “E ora ana a Ihowā, e kore ia e whakamatea.”
1SA 19:7 Nā, ka karangatia a Rāwiri e Honatana, ā, whakaaturia ana e Honatana ēnei mea katoa ki a ia. Nā, kawea ana a Rāwiri e Honatana ki a Haora; ā, noho ana ia ki tōna aroaro, pērā i mua.
1SA 19:8 Nā, he whawhai anō tērā; ā, haere ana a Rāwiri ki te whawhai ki ngā Pirihitini, ā, patua iho rātou e ia, he nui te parekura, ā, whati ana rātou i tōna aroaro.
1SA 19:9 Nā, kua puta he wairua kino i a Ihowā ki a Haora, i a ia e noho ana i tōna whare, me tāna tao i tōna ringa; ā, ko Rāwiri i whakatangi i te hāpa ki tōna ringa.
1SA 19:10 Nā, ka whai a Haora kia werohia a Rāwiri ki te tao, kia titi pū ki te pakitara. Otiia, i whakahipa ia i te aroaro o Haora, ā, ākina kautia ana e tērā te tao ki te pakitara; ko Rāwiri ia i rere, i mawhiti i taua pō.
1SA 19:11 Nā, ka tono karere a Haora ki te whare o Rāwiri, ki te whanga ki a ia, kia whakamatea ia i te ata. Nā, ka kōrerotia ki a Rāwiri e Mikara, e tāna wahine; i mea, “Ki te kāhore koe e whakaora i a koe i tēnei pō, āpōpō koe whakamatea ai.”
1SA 19:12 Heoi, ka tukua iho a Rāwiri e Mikara nā te matapihi; ā, ka haere ia, ka rere, ka ora.
1SA 19:13 Nā, ka mau a Mikara ki tētahi whakapakoko, ā, whakatakotoria ana e ia ki te moenga, i whakatakotoria iho anō e ia tētahi urunga huruhuru koati ki tō tērā urunga, hīpokina iho ki te kākahu.
1SA 19:14 Ā, nō te tononga a Haora i ngā tāngata ki te tiki i a Rāwiri, ka mea tērā, “E mate ana ia.”
1SA 19:15 Nā, ka tono anō a Haora i ngā karere kia kite i a Rāwiri, ka mea, “Kawea mai ki ahau i runga i te moenga, kia whakamatea ia e ahau.”
1SA 19:16 Ā, i te taenga atu o ngā karere, nā, ko te whakapakoko i te moenga, me te urunga huruhuru koati i te wāhi ki tōna pane.
1SA 19:17 Nā, ka mea a Haora ki a Mikara, “Nā te aha koe i tinihanga nei ki ahau, i tuku nei i tōku hoariri kia haere, ā, mawhiti atu ana ia?” Anō rā ko Mikara ki a Haora, “Nāna rā i kī mai ki ahau, ‘Tukua ahau kia haere; kia whakamate ahau i a koe hei aha?’ ”
1SA 19:18 Heoi, ka rere a Rāwiri, ā, mawhiti atu ana; tae tonu atu ki a Hamuera, ki Rama, ā, kōrerotia ana ki a ia ngā mea katoa i mea ai a Haora ki a ia. Nā, ka haere rāua ko Hamuera, ā, noho ana rāua ki Naioto.
1SA 19:19 Ā, i kōrerotia te kōrero ki a Haora, “Ko Rāwiri tērā kei Naioto o Rama e noho ana.”
1SA 19:20 Nā, ka tono tāngata a Haora ki te hopu i a Rāwiri; nā, i tō rātou kitenga i te rōpū poropiti e poropiti ana, me Hamuera e tū ana hei tumuaki mō rātou, ka tau iho te Wairua o te Atua ki ngā tāngata a Haora, ā, poropiti ana hoki rātou.
1SA 19:21 Ā, nō ka kōrerotia ki a Haora, ka tono ia i ētahi atu tāngata, ā, ka poropiti anō rātou. Nā, ko te toru o ngā tononga tāngata anō a Haora, ā, poropiti ana anō hoki rātou.
1SA 19:22 Kātahi ka haere ko ia hoki ki Rama, ā, ka tae ki te puna nui i Heku; ā, ka ui ia, ka mea, “Kei hea a Hamuera rāua ko Rāwiri?” Ka mea ko tētahi, “Nanā, kei Naioto o Rama.”
1SA 19:23 Nā, ka haere ia ki reira, ki Naioto o Rama; ā, ka tau iho te Wairua o te Atua ki a ia anō hoki; nā, ka haere ia, me te poropiti haere, ā tae noa ki Naioto o Rama.
1SA 19:24 Ā, i huia hoki e ia ōna kākahu, ā, poropiti ana anō ia i te aroaro o Hamuera; ā, takoto tahanga ana ia i taua rā katoa, me taua pō katoa. Nā reira tā rātou kupu, “Kei roto anō koia a Haora i ngā poropiti?”
1SA 20:1 Nā, ka rere a Rāwiri i Naioto o Rama, ā, ka tae, ka kōrero ki a Honatana, “I aha ahau? He aha tōku hē? He aha hoki tōku hara i te aroaro o tōu pāpā, i whai ai ia kia whakamatea ahau?”
1SA 20:2 Nā, ka mea tērā ki a ia, “Kāhore rāpea, e kore koe e mate. Nanā, e kore e meatia e tōku pāpā tētahi mea, nui, iti rānei; ki te kāhore e whakakitea mai e ia ki ahau; ā, he aha tēnei mea e hunā ai e tōku pāpā i ahau? Ehara tēnā.”
1SA 20:3 Nā, ka oati anō a Rāwiri, ka mea, “E tino mōhio ana tōu pāpā kua manakohia ahau e koe; koia ia i mea ai, ‘Kei mōhiotia tēnei e Honatana, kei pōuri ia.’ Otiia, e ora ana a Ihowā, e ora ana hoki tōu wairua, he hīkoinga kotahi noa ko te mate mōku.”
1SA 20:4 Kātahi a Honatana ka mea ki a Rāwiri, “He aha nei te mea e hiahiatia ana e tōu wairua, ka meatia tonutia e ahau māu.”
1SA 20:5 Nā, ka mea a Rāwiri ki a Honatana, “Nanā, āpōpō ka kōwhiti te marama, ā, ko te tikanga kia noho tahi ai ahau me te kīngi ki te kai; nā, tukua ahau kia haere, kia piri ai ahau ki te pārae ā te ahiahi rā anō o te toru o ngā rā.
1SA 20:6 Ki te ui ia tōu pāpā mō tōku ngaro, ko reira koe ka kī atu, ‘I tono kaha a Rāwiri ki ahau kia tukua ia kia rere ki tōna pā, ki Pēterehema; kei reira hoki te patunga tapu o te tau mā te hapū katoa.’
1SA 20:7 Ki te pēnei mai tāna kī, ‘E pai ana!’ Ka mau te rongo ki tāu pononga; e nui rawa ia tōna riri, kātahi koe ka mōhio kua takoto te kino i a ia.
1SA 20:8 Nā reira, kia pai tāu mahi ki tāu pononga, nāu nei hoki i mea tāu pononga kia uru taua ki tā Ihowā kawenata. Otiia ki te mea he kino tōku, māu ahau e whakamate; kia kawea atu hoki ahau e koe ki tōu pāpā hei aha?”
1SA 20:9 Nā, ka mea a Honatana, “Kaua tēnā e meatia ki a koe; engari ki te mōhio kau ahau kua takoto i tōku pāpā kia whakapākia he kino ki a koe, e kore ianei e kōrerotia e ahau ki a koe?”
1SA 20:10 Kātahi a Rāwiri ka mea ki a Honatana, “Mā wai e kōrero ki ahau, ki te pakeke te kupu e whakahokia e tōu pāpā ki a koe?”
1SA 20:11 Anō rā ko Honatana ki a Rāwiri, “Haere mai, tāua ka haere ki te pārae.” Nā, haere ana rāua tokorua ki te pārae.
1SA 20:12 Nā, ka mea a Honatana ki a Rāwiri, “Ko Ihowā, ko te Atua o Īharaira, hei kaititiro; māku e rapu te whakaaro o tōku pāpā i tēnei wā pea āpōpō, i te toru rānei o ngā rā; ki te mea he pai mō Rāwiri, e kore ianei ahau e tuku tonu atu, e whakaatu ki a koe?
1SA 20:13 Kia meatia tēnei e Ihowā ki a Honatana, me ētahi atu mea; pēnā he kino tā tōku pāpā e pai ai mōu, ā, ka kore ahau e whakaatu ki a koe, ka tuku i a koe kia haere i runga i te rangimārie; ā, kia noho a Ihowā ki a koe kia pērā me ia i noho ki tōku pāpā.
1SA 20:14 Ā, kaua anō e waiho i tōku oranga anake tāu whakaputa i tō Ihowā aroha ki ahau, kia kaua ahau e mate;
1SA 20:15 kauaka anō hoki e hautopea atu tōu aroha ki tōku whare ā ake ake; kauaka rawa, ina hautopea atu e Ihowā ngā hoariri katoa o Rāwiri i te mata o te whenua.”
1SA 20:16 Heoi, ka whakarite kawenata a Honatana ki te whare o Rāwiri, ka mea, “Kia rapu utu anō a Ihowā i te ringa o ngā hoariri o Rāwiri.”
1SA 20:17 Ā, i mea a Honatana kia oati anō a Rāwiri; he aroha hoki nōna ki a ia; i aroha hoki ia ki a ia, me te mea ko te aroha ki tōna wairua ake.
1SA 20:18 Kātahi a Honatana ka mea ki a ia, “Āpōpō te kōwhiti ai te marama; ā, ka kitea tōu ngaromanga, ka takoto kau hoki tōu nohoanga.
1SA 20:19 Ā, ka toru ōu rā e noho ana, kia hohoro tōu haere ki raro, ā, ka tae ki te wāhi i piri ai koe i te rā i kōrerotia ai, ā, ka noho ki te taha o Ētere kōhatu.
1SA 20:20 Ā, māku e kōpere ētahi pere kia toru ki tōna taha, ānō e kōpere ana ki tētahi kōperenga pere.
1SA 20:21 Nā, ka tono ahau i te tamaiti, ‘Tīkina, rapua ngā pere.’ Ki te mea atu ahau ki te tamaiti, ‘Nei nā ngā pere, kei tēnei taha ōu, tīkina mai,’ kātahi koe ka haere mai; e mau ana hoki te rongo ki a koe, kāhore hoki he rawa, e ora ana a Ihowā.
1SA 20:22 Ki te pēnei ia tāku kī atu ki te tamaiti, ‘Nā, ko ngā pere, kei tua atu i a koe,’ kātahi koe ka haere atu; he mea tono hoki koe nā Ihowā.
1SA 20:23 Nā, ko tēnei mea i kōrerotia nei e tāua, nanā, kei waenganui i a tāua a Ihowā ā ake ake.”
1SA 20:24 Heoi, piri ana a Rāwiri ki te pārae; ā, i te kōwhititanga o te marama ka noho te kīngi ki te kai.
1SA 20:25 Ā, i te noho te kīngi ki tōna nohoanga ō mua iho, ki te nohoanga i te pakitara; i whakatika anō hoki a Honatana, ā, ka noho a Āpanēre ki te taha o Haora; nā, e takoto kau ana tō Rāwiri wāhi.
1SA 20:26 Ahakoa rā kīhai i puaki tētahi kupu a Haora i taua rā; i mea hoki ia, “Kua pā tētahi mea ki a ia, kāhore anō kia kore noa tōna poke; inā kāhore anō kia kore noa tōna poke.”
1SA 20:27 Nā, i te aonga ake, arā i te rua o ngā rā o te marama, e takoto kau ana anō tō Rāwiri wāhi. Nā, ka mea a Haora ki tāna tama, ki a Honatana, “Nā te aha te tama a Hehe tē haere mai ai ki te kai inanahi, ināianei?”
1SA 20:28 Nā, ka utua e Honatana ki a Haora, “I tono kaha a Rāwiri ki ahau kia tukua ia kia haere ki Pēterehema;
1SA 20:29 i mea mai hoki ia, ‘Tukua ahau kia haere, he patunga tapu hoki tā tō mātou hapū i taua pā; nā tōku tuakana pū anō hoki ahau i poroaki mai. Nā, ki te mea kua manakohia ahau e koe, tukua ahau kia rere atu kia kite i ōku tuākana.’ Koia ia tē haere mai ai ki te tēpu a te kīngi.”
1SA 20:30 Ko te tino muranga o te riri o Haora ki a Honatana, ka mea ki a ia, “E te tama a te wahine parori kē, tutū! Kāhore rānei ahau i te mōhio kua tango koe i te tama a Hehe, hei mea whakamā ki a koe tonu, hei mea whakamā hoki ki te hahaketanga o tōu whaea?
1SA 20:31 I ngā rā katoa e ora ai te tama a Hehe ki runga ki te whenua, e kore koe e tū, me tōu rangatiratanga. Nā, tonoa kia tīkina ia ki ahau, kua tino takoto hoki te mate mōna.”
1SA 20:32 Nā, ka whakahoki a Honatana ki tōna pāpā, ka mea ki a ia, “Kia whakamatea ia mō te aha? I aha ia?”
1SA 20:33 Nā, ko te werohanga a Haora i te tao ki a ia, hei patu mōna. Kātahi a Honatana ka mōhio kua takoto i tōna pāpā te mate mō Rāwiri.
1SA 20:34 Heoi, ka whakatika atu a Honatana i te tēpu, mura tonu hoki tōna riri, kīhai anō i kai i te rua o ngā rā o te marama; i pōuri hoki ia mō Rāwiri, mōna i meinga e tōna pāpā kia whakamā.
1SA 20:35 Nā, i te ata ka haere a Honatana ki te pārae i te wā i whakaritea ki a Rāwiri, rāua ko tētahi tamaiti nohinohi.
1SA 20:36 Nā, ka mea ia ki taua tamaiti, “Rere atu ki te rapu i ngā pere e kōperea atu ana e ahau.” Ko te rerenga atu o te tamaiti, nā, kōperea atu ana e ia he pere ki kō noa atu i a ia.
1SA 20:37 Ā, nō te taenga atu o te tamaiti ki te wāhi i te pere i kōperea nei e Honatana, ka karanga a Honatana i muri i te tamaiti, ka mea, “Kāhore iana te pere i kō atu i a koe nā?”
1SA 20:38 Nā, ka karanga anō a Honatana i muri i taua tamaiti, “Kia kakama, kia hohoro, kaua e tū.” Nā, kohikohia ana ngā pere e te tamaiti a Honatana, ā, haere mai ana ki tōna rangatira.
1SA 20:39 Otiia kīhai tētahi mea i mōhiotia e taua tamaiti; engari a Honatana rāua ko Rāwiri, i mōhio rāua ki tōna tikanga.
1SA 20:40 Nā, ka hoatu e Honatana āna patu ki tāna tamaiti, ka mea ki a ia, “Haere, kawea atu ki te pā.”
1SA 20:41 Ā, nō te haerenga o taua tamaiti, nā, ka whakatika mai a Rāwiri i te taha ki te tonga, ā, ka tāpapa ki te whenua, e toru hoki ōna pikonga iho. Nā, ka kihi rāua i a rāua, ka tangi hoki tētahi ki tētahi, ā, rahi noa ake tā Rāwiri.
1SA 20:42 Nā, ka mea a Honatana ki a Rāwiri, “Haere i runga i te rangimārie. Kua oati nei hoki tāua i runga i te ingoa o Ihowā, kua mea tāua, ‘Hei waenganui a Ihowā i a tāua hei waenganui hoki i ōku uri, i ōu uri mō ake tonu atu.’ ” Nā, whakatika ana ia, ā, haere ana; ko Honatana hoki i haere ki te pā.
1SA 21:1 Kātahi ka tae a Rāwiri ki Nopo ki te tohunga ki a Ahimereke, ā, wiri ana a Ahimereke i te tūtakitanga ki a Rāwiri, ā, ka mea ki a ia, “He aha koe i haere mai ai, tōu kotahi, kāhore nā hoki ōu hoa?”
1SA 21:2 Nā, ka mea a Rāwiri ki te tohunga, ki a Ahimereke, “He mea i whakahaua ai ahau e te kīngi; i mea mai hoki ia ki ahau, ‘Kei mōhiotia e tētahi he kupu o te take ka tonoa atu nei koe e ahau, i whakahaua atu nei koe e ahau.’ Nā, ko ngā tāngata, kei te wāhi i kīia e ahau mō rātou.
1SA 21:3 Nā, he aha kei raro i tōu ringa? Hōmai ētahi taro ki tōku ringa, kia rima; ētahi atu mea rānei kei konei.”
1SA 21:4 Nā, ka utu te tohunga ki a Rāwiri, ka mea, “Kāhore he taro noa i tōku ringa; engari tēnei te taro tapu; ki te mea rāia kāhore i tata ngā tāngata ki te wahine.”
1SA 21:5 Nā, ka whakahoki a Rāwiri ki te tohunga, ka mea ki a ia, “He pono kīhai tētahi wahine i tukua kia tata ki a mātou i ēnei rā e toru; nōku i haere mai nei e tapu ana anō ngā mea o ngā tamariki, ahakoa rā he haere noa tēnei; tērā noa atu ia te tapu ināianei o ō rātou mea.”
1SA 21:6 Nā, ka hoatu te mea tapu e te tohunga ki a ia; kāhore hoki o reira taro, heoi anō ko te taro aroaro, i tangohia nei i te aroaro o Ihowā, kia whakatakotoria ai he taro mahana i te rā i tangohia ai.
1SA 21:7 Nā, i reira tētahi o ngā tāngata a Haora i taua rā, e whakawarea ana ki te aroaro o Ihowā, ko tōna ingoa ko Roeke Ēromi, ko te mea tino nui o ngā kaitiaki hipi a Haora.
1SA 21:8 Nā, ka mea a Rāwiri ki a Ahimereke, “Kāhore ianei i konei i raro i tōu ringa tētahi tao, hoari rānei? Kīhai hoki i maua mai e ahau tāku hoari me āku patu, he mea whakapōtatutatu hoki te take a te kīngi.”
1SA 21:9 Anō rā ko te tohunga, “Ko te hoari a Koriata, a te Pirihitini, i patua nā e koe ki te raorao o Eraha; nanā, koia tēnei he mea takai ki te kākahu i muri o te epora. Ki te tangohia tēnā e koe māu, tangohia; kāhore atu hoki, ko tēnā anake.” Nā, ka mea a Rāwiri, “Kāhore ōna rite, hōmai ki ahau.”
1SA 21:10 Kātahi a Rāwiri ka whakatika, ā, rere ana i taua rā anō i te wehi i a Haora, ā tae tonu atu ki a Ākihi kīngi o Kāta.
1SA 21:11 Nā, ka mea ngā tāngata a Ākihi ki a ia, “Ehara ianei tēnei i a Rāwiri, i te kīngi o te whenua? Kīhai ianei rātou i waiata mōna, tētahi ki tētahi i roto i ngā kanikani, i mea: ‘Nā Haora āna mano i patu, nā Rāwiri ko āna tekau mano’?”
1SA 21:12 Nā, mau tonu iho ēnei kupu i te ngākau o Rāwiri, ā, nui atu tōna wehi i a Ākihi kīngi o Kāta.
1SA 21:13 Nā, ka whakaahua kē ia ki tō rātou aroaro, ā, ka whakahaurangi i a ia i roto i a rātou; ka haehae hoki i ngā tatau o te kūwaha, ā, ka tuku i tōna hūhare kia tārere iho ki tōna kumikumi.
1SA 21:14 Kātahi a Ākihi ka mea ki āna tāngata, “Nanā, kua kite koutou i te tangata nei e haurangi ana; he aha i kawea mai ai ki ahau?
1SA 21:15 He onge nō āku tāngata haurangi i kawea mai ai tēnei e koutou hei mahi i ngā mahi a te haurangi ki ahau? Me uru mai koia tēnei tāhake ki tōku whare?”
1SA 22:1 Nā, ka haere atu a Rāwiri i reira, ā, rere ana ki te ana o Aturama. Ā, ka rongo ōna tuākana, me te whare katoa o tōna pāpā, nā, ka haere ki reira, ki a ia.
1SA 22:2 I huihui anō ki a ia ngā tāngata katoa e pēhia ana e te aha, e te aha, me ngā tāngata i a rātou nei ētahi taonga tārewa, me ngā tāngata katoa e mamae ana te ngākau. Ā, ko ia hei rangatira mō rātou, tata tonu ki te whā rau ngā tāngata i piri ki a ia.
1SA 22:3 Nā, ka haere atu a Rāwiri i reira ki Mihipa o Moapa, ka mea ki te kīngi o Moapa, “Tukua tōku pāpā me tōku whaea kia haere mai ki a koutou, kia mōhio rā anō ahau ki tā te Atua e mea ai ki ahau.”
1SA 22:4 Nā, ka kawea rāua e ia ki te aroaro o te kīngi o Moapa, ā, noho ana rāua ki a ia i ngā rā katoa i noho ai a Rāwiri i te pourewa.
1SA 22:5 Nā, ka mea a Kara poropiti ki a Rāwiri, “Kaua e noho ki te pourewa, whakatika, haere ki te whenua o Hūrā.” Nā, ka haere a Rāwiri, ā, noho ana i te nehenehe i Harete.
1SA 22:6 Ā, nō te rongonga o Haora kua kitea a Rāwiri rātou ko ōna hoa, nā, i Kipea a Haora e noho ana, i raro i tētahi rākau, i Rama, me tāna tao i tōna ringa, me te tū āna tāngata katoa i tōna taha.
1SA 22:7 Ka mea a Haora ki āna tāngata e tū ana i tōna taha, “Whakarongo mai ki ahau, e ngā Pineamini; e hōmai rānei e te tama a Hehe he māra ki a koutou katoa, he kāri wāina, e meinga rānei koutou katoa e ia hei rangatira mano, hei rangatira rau.
1SA 22:8 I whakatenetene mai ai koutou ki ahau; ā, kāhore tētahi hei whakaatu ki ahau i te whakaritenga kawenata a tāku tama rāua ko te tama a Hehe. Kāhore tētahi o koutou e pōuri mōku, e whāki rānei ki ahau, nā tāku tama i whakatūtehu tāku tangata ki ahau, kia whanga puku, pēnei me tēnei ināianei?”
1SA 22:9 Kātahi ka oho mai ko Roeke Ēromi, he kaitohutohu nō ngā tāngata a Haora, ka mea, “I kite ahau i te tama a Hehe e haere ana ki Nopo, ki a Ahimereke tama a Ahitupu.
1SA 22:10 Nā, uia ana e tērā he tikanga māna i a Ihowā; i hoatu anō e ia he ō mōna; ko te hoari hoki a Koriata Pirihitini i hoatu anō e ia ki a ia.”
1SA 22:11 Kātahi te kīngi ka unga tāngata atu hei karanga i te tohunga, i a Ahimereke tama a Ahitupu rātou ko te whare katoa o tōna pāpā, i ngā tohunga e noho ana i Nopo, ā, ka haere katoa mai rātou ki te kīngi.
1SA 22:12 Nā, ka mea a Haora, “Whakarongo mai, e te tama a Ahitupu.” Ā, ka mea tērā, “Tēnei ahau, e tōku ariki.”
1SA 22:13 Anō rā ko Haora ki a ia, “He aha kōrua ko te tama a Hehe i whakatenetene mai ai ki ahau, ā, hoatu ana e koe he taro māna, he hoari, uia ana anō e koe he tikanga māna i te Atua, kia whakatika mai ai ia ki ahau whanga ai; koia anō tēnei ināianei?”
1SA 22:14 Nā, ka utu a Ahimereke ki te kīngi, ka mea, “Ha, ko wai o āu tāngata katoa hei rite mō Rāwiri te pono? Ko te hunaonga hoki ia a te kīngi, e haere ana i tāu ngare, e whakahōnoretia ana hoki i roto i tōu whare?
1SA 22:15 Nō tēnei rā koia i tīmata ai ahau ki te ui mea māna i te Atua? Kāhore rāpea! Kaua tētahi mea e whakairia mai e te kīngi ki tāna pononga, ki tētahi rānei o te whare o tōku pāpā. Kāhore hoki tāu pononga i mōhio ki tētahi aha o tēnei, ahakoa iti, ahakoa rahi.”
1SA 22:16 Nā, ka mea te kīngi, “Ko te mate anake mōu, e Ahimereke, mōu, mō te whare katoa anō o tōu pāpā.”
1SA 22:17 Nā, ka mea te kīngi ki ngā kaitiaki e tū ana i tōna taha, “Tahuri atu, whakamatea ngā tohunga a Ihowā; he mea ko ō rātou ringa anō kei a Rāwiri; i mōhio hoki rātou e rere ana ia, ā, kīhai i whakaatu mai ki ahau.” Otiia kīhai i pai ngā tāngata a te kīngi kia totoro atu ō rātou ringa, kia rere ki runga ki ngā tohunga a Ihowā.
1SA 22:18 Nā, ka mea te kīngi ki a Roeke, “Tahuri atu, e rere ki runga ki ngā tohunga.” Nā, tahuri ana a Roeke Ēromi, ā, rere ana ki runga ki ngā tohunga, ā, e waru tekau mā rima ngā tāngata i patua e ia i taua rā, he hunga kākahu i te epora rīnena.
1SA 22:19 I patua anō hoki e ia a Nopo, te pā o ngā tohunga, ki te mata o te hoari, te tāne, te wāhine, ngā tamariki, ngā mea ngote ū, ngā kau, ngā kāihe, ngā hipi, ki te mata o te hoari.
1SA 22:20 Nā, i mawhiti tētahi o ngā tama a Ahimereke tama a Ahitupu, tōna ingoa ko Apiātara; ā, rere ana ki te whai i a Rāwiri.
1SA 22:21 Ā, nā Apiātara i kōrero ki a Rāwiri tā Haora patunga i ngā tohunga a Ihowā.
1SA 22:22 Nā, ka mea a Rāwiri ki a Apiātara, “I mōhio anō ahau i taua rā i a Roeke Ēromi i konā, ka whakaaturia e ia ki a Haora. Nāku i mate ai ngā tāngata katoa o te whare o tōu pāpā.
1SA 22:23 E noho koe ki ahau, kaua e wehi; ko te tangata hoki e whai ana i te mate mōku, e whai ana i te mate mōu; nā, kei ahau nei koe, ka tiakina koe.”
1SA 23:1 Nā, ka kōrerotia te kōrero ki a Rāwiri, “Nanā, kei te whawhai ngā Pirihitini ki Keira, ā, e pāhua ana i ngā patunga wīti.”
1SA 23:2 Nā reira i ui ai a Rāwiri ki a Ihowā, i mea ai, “Me haere rānei ahau ki te patu i ēnei Pirihitini?” Nā, ka mea a Ihowā ki a Rāwiri, “Haere, patua ngā Pirihitini, whakaorangia hoki a Keira.”
1SA 23:3 Nā, ka mea ngā tāngata a Rāwiri ki a ia, “Nanā, e wehi nei tātou i konei i Hūrā, ā tērā noa ake ki te haere ki Keira, ki ngā taua a ngā Pirihitini.”
1SA 23:4 Kātahi a Rāwiri ka ui anō ki a Ihowā; ā, ka whakahokia mai te kōrero e Ihowā ki a ia, “Whakatika, haere ki raro, ki Keira; kua hoatu hoki ngā Pirihitini e ahau ki tōu ringa.”
1SA 23:5 Nā, haere ana a Rāwiri rātou ko āna tāngata ki Keira, ā, whawhai ana ki ngā Pirihitini, ā, āia mai ana e ia ā rātou kararehe, patua iho hoki rātou, he nui te parekura. Nā, whakaorangia ana ngā tāngata o Keira e Rāwiri.
1SA 23:6 Nā, i te rerenga o Apiātara tama a Ahimereke ki a Rāwiri ki Keira, i maua mai e ia tētahi epora i tōna ringa.
1SA 23:7 Ā, ka kōrerotia ki a Haora, kua tae a Rāwiri ki Keira, ā, ka mea a Haora, “Kua tukua mai ia e te Atua ki tōku ringa; ka tūtakina nei hoki ia ki roto, i a ia ka tomo nei ki te pā whai tatau, whai tūtaki.”
1SA 23:8 Nā, ka karangatia te iwi katoa e Haora ki te whawhai, kia haere ki raro, ki Keira, ki te whakapae i a Rāwiri rātou ko āna tāngata.
1SA 23:9 Nā, kua mōhio a Rāwiri e whakatakoto puku ana a Haora i te kino mōna; ā, ka mea ia ki a Apiātara tohunga, “Kawea mai te epora.”
1SA 23:10 Kātahi a Rāwiri ka mea, “E Ihowā e te Atua o Īharaira, kua tino rongo tāu pononga e mea ana a Haora kia haere mai ki Keira ki te whakangaro i te pā, he mea mōku.
1SA 23:11 Tērā rānei e tukua ahau e ngā tāngata o Keira ki tōna ringa? E haere mai rānei a Haora, e pērā rānei me tā tāu pononga i rongo ai? E Ihowā, e te Atua o Īharaira, tēnā rā, whakaaturia mai ki tāu pononga.” Nā, ka mea a Ihowā, “Ka haere mai anō ia.”
1SA 23:12 Anō rā ko Rāwiri, “Tērā rānei ngā tāngata o Keira e tuku i a mātou, ko āku tāngata ki te ringa o Haora?” Nā, ka mea a Ihowā, “Ka tuku anō.”
1SA 23:13 Kātahi a Rāwiri ka whakatika, rātou ko āna tāngata me te mea e ono rau ā haere atu ana i Keira; i haere rātou i tā rātou haere noa atu. Ā, kōrerotia ki a Haora kua rere atu a Rāwiri i Keira, nā, kīhai ia i haere atu.
1SA 23:14 Nā, ka noho a Rāwiri ki te koraha, ki ngā pourewa, ka noho ki te whenua pukepuke i te koraha o Tiwhi. Ā, rapua ana ia e Haora i ngā rā katoa; otiia kīhai ia i tukua e te Atua ki tōna ringa.
1SA 23:15 Nā, kua kite a Rāwiri kua puta mai a Haora, e whai ana kia whakamatea ia; i te koraha anō hoki o Tiwhi a Rāwiri, i roto i te ngahere.
1SA 23:16 Nā, ka whakatika a Honatana tama a Haora, ā, haere ana ki a Rāwiri ki te ngahere, ā, whakakahangia ana e ia tōna ringa i roto i te Atua.
1SA 23:17 I mea hoki ia ki a ia, “Kaua e wehi; e kore hoki te ringa o Haora, o tōku pāpā e pono ki a koe; ā, ko koe anō hei kīngi mō Īharaira, ko ahau hoki ki muri i a koe; e mōhiotia ana anō tēnei e Haora, e tōku pāpā.”
1SA 23:18 Nā, whakarite kawenata ana rāua i te aroaro o Ihowā; ā, noho ana a Rāwiri i te ngahere, ko Honatana hoki i haere ki tōna whare.
1SA 23:19 Kātahi ngā Tiwhi ka haere ki a Haora ki Kipea, ka mea, “He teka ianei kei te piri a Rāwiri i roto i a mātou, i ngā pourewa i te ngahere i Maunga Hakira, i te taha ki te tonga o Hehimono?”
1SA 23:20 Nā, tēnā rā, e te kīngi, kua hiahia rawa nei hoki tōu ngākau ki te haere ki raro; haere ake, ā, mā mātou te tuku i a ia ki te ringa o te kīngi.
1SA 23:21 Nā, ka mea a Haora, “Kia manaakitia koutou e Ihowā; mō koutou i aroha ki ahau.
1SA 23:22 Nā, haere, whakatikaia rawatia, kia mōhiotia, kia kitea, tōna wāhi e hāereere ai, i kitea hoki ia e wai ki reira; e kōrerotia ana hoki ki ahau he tūpato rawa ia.
1SA 23:23 Tirohia iho, kia mōhio hoki ki ngā piringa katoa e piri ai ia, ka hoki mai ai ki ahau inā tino tika, ā, ka haere tahi atu tātou. Nā, ki te mea kei te whenua nei ia, māku ia e rapu atu i roto i ngā mano katoa o Hūrā.”
1SA 23:24 Nā, whakatika ana rātou, haere ana ki Tiwhi ki mua i a Haora; i te koraha ia o Maono a Rāwiri rātou ko āna tāngata, i te mānia i te tonga o Hehimono.
1SA 23:25 Nā, ka haere a Haora rātou ko āna tāngata ki te rapu i a ia. Ā, ka kōrerotia ki a Rāwiri, nā, ka haere atu ia ki raro, ki tētahi kāmaka, ā, noho ana i te koraha o Maono. Ā, ka rongo a Haora, nā, ka whāia e ia a Rāwiri i te koraha o Maono.
1SA 23:26 Nā, i tēnei taha o te maunga a Haora e haere ana, i tērā taha hoki o te maunga a Rāwiri rātou ko āna tāngata; ā, ka hohoro a Rāwiri te haere atu i te wehi i a Haora; e karapotia ana hoki a Rāwiri rātou ko āna tāngata e Haora rātou ko āna tāngata, kia hopukia.
1SA 23:27 Otiia ko te taenga mai o te karere ki a Haora hei mea, “Kia hohoro te haere mai; kua huaki mai hoki ngā Pirihitini ki te whenua.”
1SA 23:28 Heoi, ka hoki atu a Haora i te whai i a Rāwiri, ā, haere ana ki te whawhai ki ngā Pirihitini; nā reira i huaina ai te ingoa o tērā wāhi, ko te Kōhatu o ngā Wehewehenga.
1SA 23:29 Nā, haere atu ana a Rāwiri i reira, ā, noho ana i ngā pourewa i Enekeri.
1SA 24:1 Ā, nō te hokinga o Haora i te whai i ngā Pirihitini, nā, ka kōrerotia te kōrero ki a ia, “Nanā, kei te koraha o Enekeri a Rāwiri.”
1SA 24:2 Kātahi ka tākiritia e Haora ētahi tāngata, e toru mano, he hunga whiriwhiri i roto i a Īharaira katoa, ā, haere ana ki te rapu i a Rāwiri rātou ko āna tāngata ki ngā kāmaka o ngā koati mohoao.
1SA 24:3 Ā, ka tae ki ngā taiepa hipi i te ara, he ana hoki kei reira, ā, ka haere atu a Haora ki te uhi i ōna waewae, heoi i ngā wāhi i roto rawa o te ana a Rāwiri rātou ko āna tāngata e noho ana.
1SA 24:4 Nā, ka mea ngā tāngata a Rāwiri ki a ia, “Nā, ko te rā tēnei i mea ai a Ihowā ki a koe, ‘Nanā, ka hoatu e ahau tōu hoariri ki tōu ringa, ā, ka meatia e koe ki a ia tā tōu hinengaro e pai ai.’ ” Kātahi ka whakatika a Rāwiri, ā, tapahia pukutia ana e ia te pito o te koroka o Haora.
1SA 24:5 Ā muri iho, ka whakawiri te ngākau o Rāwiri i roto i a ia, mōna i tapahi i te pito o te koroka o Haora.
1SA 24:6 Nā, ka mea ia ki āna tāngata, “Mā Ihowā ahau e ārai kei meatia tēnei mea ki tōku ariki, ki tā Ihowā i whakawahi ai, kia totoro atu tōku ringa ki a ia, ko tā Ihowā hoki ia i whakawahi ai.”
1SA 24:7 Ko ngā kupu ēnei a Rāwiri i haukotia ai e ia āna tāngata, ā, kīhai i tukua kia whakatika ki a Haora. Nā, whakatika ana a Haora i roto i te ana, ā, haere ana i tōna ara.
1SA 24:8 Ka whakatika a Rāwiri i muri, ā, puta ana anō i te ana, ka karanga i muri i a Haora, ka mea, “E tōku ariki, e te kīngi.” Ā, i te tirohanga o Haora ki muri i a ia, ka tuohu te mata o Rāwiri, ā, piko ana ki te whenua.
1SA 24:9 Nā, ka mea a Rāwiri ki a Haora, “He aha koe i whakarongo ai ki ngā kupu a te tangata ina mea, ‘Kei te rapu a Rāwiri i te hē mōu’?
1SA 24:10 Nā, kua kite nei ōu kanohi i tēnei rā i tā Ihowā hōmaitanga i a koe ināianei ki tōku ringa i roto i te ana; ā, i kī mai ētahi kia patua koe; otiia i tohu tōku kanohi i a koe; i mea hoki ahau, ‘E kore tōku ringa e totoro ki tōku ariki; ko tā Ihowā ia i whakawahi ai.’
1SA 24:11 Titiro mai anō hoki, e tōku pāpā, āe rā, tirohia mai te pito o tōu koroka i tōku ringa nei; tā te mea i ahau nei i tapahi ai i te pito o tōu koroka, ā, kīhai i patu i a koe. Nā, ka mōhio koe, ka kite, kāhore he kino, he tutū rānei i tōku ringa; kāhore anō ōku hara ki a koe; heoi e whāia nei ahau e koe kia whakamatea.
1SA 24:12 “Mā Ihowā e whakarite tā tāua whakawā, mā Ihowā anō e rapu he utu mōku i a koe; ko tōku ringa ia e kore e pā ki a koe.
1SA 24:13 E kī nei hoki te whakatauki onamata, ‘Nō te hunga kino mai te kino’; nā, e kore tōku ringa e pā ki a koe.
1SA 24:14 “He whai i a wai i puta mai ai te kīngi o Īharaira? Ko wai tēnei te arumia nei e koe? He kurī mate, he puruhi.
1SA 24:15 Mā Ihowā e whakarongo, e whakarite tā tāua whakawā, māna e titiro mai, e tohe tāku tohe, e whakaora hoki ahau i roto i tōu ringa.”
1SA 24:16 Ā, i te mutunga o tā Rāwiri kōrero i ēnei kupu ki a Haora, ka mea a Haora, “Ko tōu reo tēnā, e tāku tama, e Rāwiri?” Nā, ka puaki nui te reo o Haora ka tangi.
1SA 24:17 Nā, ka mea ia ki a Rāwiri, “Tika rawa koe i ahau; he pai hoki tāu utu ki ahau, ko tāku utu ia ki a koe he kino.
1SA 24:18 Kua whakakitea mai nei hoki e koe ināianei te pai o tāu mahi ki ahau; i tā Ihowā tukunga putanga hoki i ahau ki tōu ringa, nā, kīhai koe i patu i ahau.
1SA 24:19 Ki te tūpono hoki te tangata ki tōna hoariri, tērā rānei ia e tukua paitia atu e ia kia haere? Nā, mā Ihowā e hōmai te pai ki a koe hei utu mō tāu mahi ki ahau i tēnei rā.
1SA 24:20 “Nā, e mōhio ana tēnei ahau ko koe pū anō hei kīngi, ā, ka pūmau ki tōu ringa te kīngitanga o Īharaira.
1SA 24:21 Nā, oatitia mai a Ihowā ki ahau e kore e hautopea atu e koe ōku uri i muri i ahau, e kore anō hoki e hunā e koe tōku ingoa i roto i te whare o tōku pāpā.”
1SA 24:22 Nā, oati ana a Rāwiri ki a Haora, ā, haere ana a Haora ki tōna whare; ko Rāwiri ia rātou ko āna tāngata i haere ki te pourewa.
1SA 25:1 Nā, ka mate a Hamuera, ā, ka huihui a Īharaira katoa ki te tangi ki a ia, ā, tanumia iho ia ki tōna whare ki Rama. Nā, ka whakatika a Rāwiri, ā, haere ana ki te koraha o Parana.
1SA 25:2 Ā, i Maono tētahi tangata, kei Karamere ōna taonga; he nui rawa taua tangata, e toru mano āna hipi, kotahi mano ngā koati. Heoi, kei te kutikuti tērā i āna hipi ki Karamere.
1SA 25:3 Nā, ko te ingoa o taua tangata ko Nāpara, ko Apikaira hoki te ingoa o tāna wahine; ā, he pai ngā whakaaro o te wahine, he mata ātaahua anō hoki; he pakeke ia te tāne, i kino hoki āna mahi; nō te whare anō ia o Karepe.
1SA 25:4 Ā, ka rongo a Rāwiri i te koraha kei te kutikuti a Nāpara i āna hipi.
1SA 25:5 Ka ungā ētahi taitama e Rāwiri, kotahi tekau; i mea hoki a Rāwiri ki ngā taitama, “Haere ki runga ki Karamere, ā, ka tae ki a Nāpara ka oha ki a ia, me te whakahua anō i tōku ingoa.
1SA 25:6 Ā, kia pēnei tā koutou kī atu ki taua tangata e noho ora mai nei, ‘Kia mau te rongo ki a koe, kia mau te rongo ki tōu whare, kia mau te rongo ki āu mea katoa.
1SA 25:7 “ ‘Nā, kua rongo nei ahau he kaikutikuti āu; nā, āu hēpara i a mātou rā, kīhai rātou i ahatia e mātou, kīhai rawa hoki tētahi o ā rātou mea i ngaro i ngā rā katoa o rātou ki Karamere.
1SA 25:8 Māu e ui ki āu taitama, ā, ka kōrerotia e rātou ki a koe. Nā, kia manakohia ngā taitama nā e koe; kua tae mai hoki mātou i te rā pai. Tēnā, hōmai tā tōu ringa i tūpono ai ki āu pononga, ki tāu tama hoki, ki a Rāwiri.’ ”
1SA 25:9 Nā, i te taenga o ngā tāngata a Rāwiri, kōrerotia ana e rātou ēnei kupu katoa ki a Nāpara, me te whakahua anō i te ingoa o Rāwiri, ā, heoi anō tā rātou?
1SA 25:10 Nā, ka utu a Nāpara ki tā ngā tāngata a Rāwiri, ka mea, “Ko wai a Rāwiri? Ko wai hoki te tama a Hehe? He tini ngā pononga i ēnei rā e tahuti ana i ō rātou rangatira.
1SA 25:11 Me tango koia e ahau tāku taro, tōku wai, me āku mea hoki i patua nei e ahau mā āku kaikutikuti, me hoatu mā ngā tāngata kāhore nei e mōhiotia e ahau nō hea rānei rātou?”
1SA 25:12 Nā, ka tahuri ngā tāngata a Rāwiri ki tō rātou ara, ā, hoki ana, haere ana, kōrerotia ana e rātou ki a ia ēnei mea katoa.
1SA 25:13 Nā, ka mea a Rāwiri ki āna tāngata, “Whītikiria ā koutou hoari, e tēnei, e tēnei.” Nā, whītikiria ana e rātou tāna hoari, tāna hoari; i whītiki anō a Rāwiri i tāna hoari. Nā, ka haere ki runga, ka whai i a Rāwiri; tata tonu aua tāngata ki te whā ngā rau; e rua hoki ngā rau i noho ki ngā taonga.
1SA 25:14 Otiia ka kōrero tētahi o ngā taitama ki a Apikaira wahine a Nāpara ka mea, “Nanā, i tonoa mai ētahi tāngata e Rāwiri i te koraha, ki te oha ki tō mātou rangatira; heoi whakatūpehupehu ana ia ki a rātou.
1SA 25:15 Otiia, pai rawa aua tāngata ki a mātou, kīhai hoki i aha ki a mātou, kīhai anō i ngaro tētahi mea a mātou i ngā rā katoa i hāereere tahi ai mātou me rātou, i ā mātou rā i te pārae.
1SA 25:16 He taiepa rātou ki a mātou i te pō, i te ao, i ngā rā katoa i tata ai mātou ki a rātou, i a mātou e tiaki ana i ngā hipi.
1SA 25:17 Tēnā rā, māu e whakaaro, e titiro ki tāu e mea ai; kua takoto hoki he kino mō tō mātou rangatira, rātou ko tōna whare katoa; koia rawa hoki kia tama ia nā Periara, kāhore tētahi e āhei te kōrero ki a ia.”
1SA 25:18 Nā, hohoro tonu a Apikaira, maua atu ana e ia he taro e rua rau, he wāina e rua ngā ipu, he hipi e rima, he mea kua oti te taka, he kānga pāhūhū e rima ngā mēhua, he tautau karepe maroke kotahi rau, he papa piki e rua rau, he mea whakawaha ki te kāihe.
1SA 25:19 Nā, ka mea ia ki āna taitama, “Hoake ki mua i ahau; tēnā ahau te haere atu nā i muri i a koutou.” Kīhai hoki i kōrerotia e ia ki tāna tahu, ki a Nāpara.
1SA 25:20 Nā, i a ia e haere atu ana i runga i tōna kāihe, ā, e heke atu ana i te wāhi ruru o te maunga, nā, ko Rāwiri rātou ko āna tāngata e heke mai ana, e tika mai ana ki a ia; nā, pono tonu atu ia ki a rātou.
1SA 25:21 Heoi, kua kī a Rāwiri, “Maumau tiaki noa ahau i ngā mea katoa a tēnei korokē i te koraha, kāhore rawa hoki tētahi o āna mea katoa i ngaro; nā, utua mai ana e ia te pai ki te kino.
1SA 25:22 Kia meatia tēnei e te Atua ki ngā hoariri o Rāwiri me ētahi mea anō hoki, ki te waiho e ahau o āna mea katoa i te aonga ake kia kotahi nei tamaiti tāne.”
1SA 25:23 Nā, i te kitenga o Apikaira i a Rāwiri, hohoro tonu ia, marere ana ki raro i te kāihe, tāpapa ana i te aroaro o Rāwiri, me te piko anō ki te whenua.
1SA 25:24 Nā, ka takoto ia ki ōna waewae, ā, ka mea, “Hei runga i ahau, e tōku ariki, hei runga i ahau te kino; nā, kia kōrero tāu pononga wahine ki ōu taringa, whakarongo mai hoki ki ngā kupu a tāu pononga.
1SA 25:25 Kaua te ngākau o tōku ariki e mea ki tēnei tangata a Periara, ki a Nāpara; ko tōna ingoa hoki, ko ia, rite tahi; ko Nāpara tōna ingoa; kei a ia anō te wairangi. Ko ahau ia, ko tāu pononga wahine, kīhai i kite i ngā taitama a tōku ariki i tonoa ake rā e koe.
1SA 25:26 “Nā, e tōku ariki, e ora ana a Ihowā, e ora ana hoki tōu wairua, i a Ihowā kua pupuri nei i a koe i te hara o te whakaheke toto, kei pā tōu ringa ake ki te rapu utu, kia rite āianei ki a Nāpara ōu hoariri, me te hunga e rapu ana i te hē mō tōku ariki.
1SA 25:27 Nā, ko tēnei manaakitanga i kawea mai nei e tāu pononga ki tōku ariki, tukua kia hoatu ki ngā taitama i raro i ngā waewae o tōku ariki.
1SA 25:28 “Tēnā rā, whakarērea noatia iho te kino a tāu pononga wahine; he mea kua takoto rawa tā Ihowā whakapūmau i te whare o tōku ariki; e whawhai ana hoki tōku ariki i ngā whawhai a Ihowā; ā, e kore e mau tētahi hē ōu i ōu rā katoa.
1SA 25:29 Ahakoa whakatika mai tētahi tangata ki te whai i a koe, ki te rapu i tōu wairua, heoi ka paiherea te wairua o tōku ariki ki roto ki te paihere ora ki a Ihowā, ki tōu Atua; ko ngā wairua ia o ōu hoariri ka piua atu me te mea nō waenga pū i te kōtaha.
1SA 25:30 “Ā tēnei ake, kei tā Ihowā meatanga ki tōku ariki i ngā mea katoa i kōrerotia e ia hei pai mōu, ā, ka whakatūria koe e ia hei rangatira mō Īharaira.
1SA 25:31 Nā, e kore tēnei e waiho hei whakapōuri mōu, hei whakararu rānei mō te ngākau o tōku ariki, arā tāu whakaheke noa i te toto, te rapu rānei a tōku ariki i te utu mōna ake. E puta rāia tā Ihowā pai ki tōku ariki, nā, kia mahara ki tāu pononga wahine.”
1SA 25:32 Nā, ka mea a Rāwiri ki a Apikaira, “Kia whakapaingia a Ihowā, te Atua o Īharaira, nāna nei koe i tono mai i tēnei rā ki te whakatau i ahau.
1SA 25:33 Kia whakapaingia anō tōu whakaaro tika, kia whakapaingia anō koe, mōu i pupuri i ahau i tēnei rā i te hara o te whakaheke toto, i te rapu utu hoki a tōku ringa ake.
1SA 25:34 Nā, e ora ana a Ihowā, te Atua o Īharaira, nāna nei ahau i pupuri kei kino ki a koe, me i kāhore koe i hohoro te haere mai ki te whakatau i ahau, inā, kīhai i toe ki te awatea āpōpō tētahi mea a Nāpara kia kotahi nei tamaiti tāne.”
1SA 25:35 Heoi, ka tangohia e Rāwiri i tōna ringa ngā mea i kawea mai e ia ki a ia, ā, ka mea ki a ia, “Haere i runga i te rangimārie ki tōu whare; titiro, kua whakarongo nei ahau ki tōu reo, kua whakapai hoki ki a koe.”
1SA 25:36 Nā, haere ana a Apikaira ki a Nāpara, ā, i te mea hākari tērā i roto i tōna whare, koia anō kei te hākari a te kīngi, ā, koa ana te ngākau o Nāpara i roto i a ia, he nui hoki tōna haurangi. Nā, kīhai i kōrerotia e ia tētahi mea ki a ia, ahakoa iti, ahakoa rahi, ā, mārama noa te ata.
1SA 25:37 Ā, i te ata i te mea ka kore atu te wāina i a Nāpara, nā, kōrerotia ana e tāna wahine ki a ia ēnei mea katoa; nā, mate iho tōna ngākau i roto i a ia, heoi kua rite ia ki te kōhatu.
1SA 25:38 Ā, ka tekau ngā rā, ka patua a Nāpara e Ihowā, ā, ka mate.
1SA 25:39 Ā, nō te rongonga o Rāwiri kua mate a Nāpara, ka mea ia, “Kia whakapaingia a Ihowā i tohe nei i te tohe ki a Nāpara mō tōku tāwainga; i pupuri nei i tāna pononga kei kino, ā, whakahokia atu ana e Ihowā te kino a Nāpara ki runga ki tōna mātenga ake.” Nā, ka tono tāngata a Rāwiri ki te kōrero ki a Apikaira, ki te tiki i a ia hei wahine māna.
1SA 25:40 Ā, i te taenga o ngā tāngata a Rāwiri ki a Apikaira ki Karamere, ka kōrero ki a ia, ka mea, “I tonoa mai mātou e Rāwiri ki te tiki mai i a koe hei wahine māna.”
1SA 25:41 Nā, ka whakatika tērā, ā, piko ana tōna mata ki te whenua, ka mea, “Tēnei tāu pononga hei pononga wahine, hei horoi i ngā waewae o ngā tāngata a tōku ariki.”
1SA 25:42 Nā, hohoro ana a Apikaira, ā, whakatika ana, eke ana ki te kāihe; tokorima hoki āna kōtiro i haere tahi me ia; nā, aru ana ia i ngā karere a Rāwiri, ā, ka waiho hei wahine māna.
1SA 25:43 I tangohia anō e Rāwiri a Ahinoama o Ietereere; ā, ka waiho rāua tokorua hei wāhine māna.
1SA 25:44 Heoi, kua hoatu e Haora a Mikara tāna tamāhine, te wahine a Rāwiri, ki a Parati tama a Raihi, o Karimi.
1SA 26:1 Nā, ka haere ngā Tiwhi ki a Haora ki Kipea, ka mea, “He teka ianei kei te piri a Rāwiri ki Maunga Hakira, ki te wāhi e anga ana ki Hehimono?”
1SA 26:2 Kātahi a Haora ka whakatika, ā, haere ana ki raro, ki te koraha o Tiwhi, e toru hoki mano āna tāngata, he hunga whiriwhiri i roto i a Īharaira, ki te rapu i a Rāwiri i te koraha o Tiwhi.
1SA 26:3 Ā, i noho a Haora ki Maunga Hakira, ki tērā e anga ana ki Hehimono, ki te huarahi; ko Rāwiri ia i noho ki te koraha; ā, ka kite ia kua tae atu a Haora ki te koraha ki te whai i a ia,
1SA 26:4 nā, tonoa ana ētahi tūtei e Rāwiri, ā, ka mōhio ia he tino tika te haerenga mai o Haora.
1SA 26:5 Nā, ka whakatika a Rāwiri, ā, ka haere ki te wāhi i puni ai a Haora. Nā, ka titiro a Rāwiri ki te takotoranga o Haora rāua ko Āpanēre tama a Nere, ko te rangatira o tāna ope. Nā, kei te takoto a Haora i te parepare, i tētahi taha anō hoki ōna, i tētahi taha, te puninga o te iwi.
1SA 26:6 Nā, ka oho a Rāwiri ki a Ahimereke Hiti rāua ko Āpihai tama a Teruia, ko te teina o Ioapa, ka mea, “Ko wai e haere hei hoa mōku ki raro, ki a Haora ki te puni rā?” Ka mea a Āpihai, “Ko tāua e haere.”
1SA 26:7 Nā, ko te haerenga o Rāwiri rāua ko Āpihai ki te iwi i te pō; nā, kei te takoto tērā a Haora i te parepare me tāna tao pou rawa ki te whenua i te taha o tōna urunga; i tētahi taha ōna, i tētahi taha ko Āpanēre hoki rātou ko te iwi e takoto ana.
1SA 26:8 Kātahi a Āpihai ka mea ki a Rāwiri, “Kua tukua pūtia e te Atua tōu hoariri ināianei ki tōu ringa; nā, kia kotahi tāku werohanga i a ia āianei ki te tao, titi pū ki te whenua; e kore anō e tuaruatia.”
1SA 26:9 Anō rā ko Rāwiri ki a Āpihai, “Kaua ia e whakangaromia; ko wai hoki e harakore ki te totoro tōna ringa ki tā Ihowā i whakawahi ai?”
1SA 26:10 I mea anō a Rāwiri, “E ora ana a Ihowā, mā Ihowā ia e patu; tērā e tae mai tōna rā e mate ai; ka uru rānei ia ki te whawhai, ā, ka ngaro.
1SA 26:11 Mā Ihowā e ārai kei totoro tōku ringa ki tā Ihowā i whakawahi ai. Engari, tangohia te tao i tōna urunga, me te ipu wai, ā, kia haere tāua.”
1SA 26:12 Heoi, tangohia ana e Rāwiri te tao me te ipu wai i te urunga o Haora; ā, haere ana rāua; kīhai hoki tētahi i kite, kīhai i mōhio, kīhai hoki i oho, i te moe katoa hoki rātou; nā Ihowā hoki i mea kia au tā rātou moe.
1SA 26:13 Kātahi a Rāwiri ka haere ki tērā taha, ā, tū ana i runga i te tihi o tētahi puke i tawhiti; he nui te takiwā atu ki a rātou.
1SA 26:14 Nā, ka karanga a Rāwiri ki te iwi, ki a Āpanēre hoki tama a Nere, ka mea, “E kore rānei koe e ō mai e Āpanēre?” Kātahi ka whakahokia e Āpanēre, “Ko wai koe e karanga mai nā ki te kīngi?”
1SA 26:15 Nā, ka mea a Rāwiri ki a Āpanēre, “He teka ianei he toa koe, ko wai hoki hei rite mōu i roto i a Īharaira? He aha koe tē tiaki ai i tōu ariki, i te kīngi? I haere atu hoki tētahi o te iwi ki te whakangaro i te kīngi, i tōu ariki.
1SA 26:16 Ehara tēnei i te mea pai i meatia nei e koe. E ora ana a Ihowā, ka tika te mate mō koutou, kīhai hoki i tiaki i tō koutou ariki, i tā Ihowā i whakawahi ai. Nā, tirohia kei hea te tao a te kīngi me te ipu wai i tōna urunga?”
1SA 26:17 Nā, kua mōhio a Haora ki te reo o Rāwiri, ā, ka mea, “Nōu tēnā reo, e tāku tama, e Rāwiri?” Anō rā ko Rāwiri, “Nōku te reo, e tōku ariki, e te kīngi.”
1SA 26:18 I mea anō ia, “Nā te aha tēnei whai a tōku ariki i tāna pononga, i aha hoki ahau? He aha hoki te hē o tōku ringa?
1SA 26:19 Tēnā rā, kia rongo mai tōku ariki te kīngi ki ngā kupu a tāna pononga. Ki te mea nā Ihowā koe i whakaoho kia tahuri mai ki ahau, kia manako mai ia ki te whakahere; tēnā ko tēnei, nā ngā tama a te tangata, kia kangā rātou i te aroaro o Ihowā; mō rātou i pei nei i ahau kei tata ki tō Ihowā wāhi tupu, mō te kī mai, ‘Haere, e mahi ki ngā atua kē.’
1SA 26:20 Tēnā rā, kaua ōku toto e maringi ki te whenua i tawhiti atu i te aroaro o Ihowā; i haere mai hoki te kīngi o Īharaira ki te rapu i tētahi puruhi, me te mea ko tētahi e whai ana i te pātiri i runga i ngā maunga.”
1SA 26:21 Nā, ka mea a Haora, “Kua hara ahau; hoki atu, e tāku tama, e Rāwiri; e kore hoki ahau e mahi i te kino ki a koe ā muri ake nei, nō te mea he taonga nui ki tōu whakaaro tōku wairua ināianei. Nanā, he mahi kūware tāku, nui atu tōku hē.”
1SA 26:22 Nā, whakahoki a Rāwiri, ka mea, “Nanā, te tao nei, e te kīngi! Tukua mai nei tētahi o ngā taitamariki kia haere mai ki te tiki.
1SA 26:23 Ā, mā Ihowā e hoatu ki ia tangata, ki ia tangata tōna tika me tōna pono; kua hōmai nei hoki koe e Ihowā i tēnei rā ki tōku ringa, ā, kīhai ahau i pai kia totoro tōku ringa ki tā Ihowā i whakawahi ai.
1SA 26:24 Nanā, kua nui nei tōu ora ki tāku tirohanga atu i tēnei rā, kia pērā anō hoki te nui o tōku ora ki tā Ihowā titiro, ā, kia whakaorangia ahau e ia i ngā mate katoa.”
1SA 26:25 Kātahi a Haora ka mea ki a Rāwiri, “Kia manaakitia koe, e tāku tama, e Rāwiri; ka oti rā i a koe ngā mahi nunui, ā, he pono ka puta tōu mana.” Heoi, haere ana a Rāwiri i tōna huarahi; ā, hoki ana a Haora ki tōna wāhi.
1SA 27:1 Nā, ka mea a Rāwiri i roto i tōna ngākau, “Kātahi ahau ka ngaro i te ringa o Haora a tētahi rā. Kāhore atu he mea pai mōku i te hohoro o tōku mawhiti atu ki te whenua o ngā Pirihitini, kia ngākaukore ai a Haora ki te rapu anō i ahau i ngā rohe katoa o Īharaira; pēnei ka mawhiti atu ahau i roto i tōna ringa.”
1SA 27:2 Nā, whakatika ana a Rāwiri, ā, haere ana rātou ko ōna hoa e ono rau ki a Ākihi tama a Maoko, ki te kīngi o Kāta.
1SA 27:3 Nā, ka noho a Rāwiri ki a Ākihi ki Kāta, a ia me āna tāngata, me te whare anō o tēnei, o tēnei, a Rāwiri hoki rātou ko āna wāhine tokorua, ko Ahinoama o Ietereere, ko Apikaira o Karamere, wahine a Nāpara.
1SA 27:4 Ā, ka kōrerotia ki a Haora, kua rere a Rāwiri ki Kāta, nā, mutu ake tāna rapu i a ia.
1SA 27:5 Nā, ka mea a Rāwiri ki a Ākihi, “Ki te mea kua manakohia nei ahau e koe, kia hōmai e rātou tētahi wāhi ki ahau i roto i tētahi o ngā pā i te koraha, hei nohoanga mōku; he aha hoki tāu pononga i noho ai ki a koe i roto i te pā kīngi?”
1SA 27:6 Nā, ka hōmai e Ākihi ki a ia i taua rā a Tikiraka; nā reira ngā kīngi o Hūrā i whiwhi ai ki Tikiraka ā mohoa noa nei.
1SA 27:7 Nā, ko te maha o ngā rā i noho ai a Rāwiri ki te whenua o ngā Pirihitini, kotahi tau, e whā marama.
1SA 27:8 Kātahi a Rāwiri ka haere, rātou ko āna tāngata, ka whakaeke i ngā Kehuri, i ngā Kireti, i ngā Amareki; ko ērā hoki ngā iwi kua noho noa ake ki tērā whenua i tōu haerenga ki Huru ā te whenua o Īhipa atu ana.
1SA 27:9 Nā, patua iho e Rāwiri tērā whenua; kīhai hoki i whakaorangia tētahi tāne, wahine rānei; ā, tangohia ana e ia ngā hipi, ngā kau, ngā kāihe, ngā kāmera, me ngā kākahu, ā, hoki ana, haere ana ki a Ākihi.
1SA 27:10 Nā, ka mea a Ākihi, “Ko hea i whakaekea e koutou i tēnei rā?” Anō rā ko Rāwiri, “Ko te tonga o Hūrā, ko te tonga o ngā Ierameeri, ko te taha anō ki te tonga o ngā Keni.
1SA 27:11 Kīhai hoki i whakaorangia e Rāwiri tētahi tāne, wahine rānei, hei kawe i a rātou ki Kāta;” i mea hoki, “Kei kōrero rātou i tā tātou, kei mea, ‘I pēnei a Rāwiri.’ ” Ā, ko tāna hanga anō tēnei i ngā rā katoa i noho ai ia ki te whenua o ngā Pirihitini.
1SA 27:12 Nā, whakapono tonu a Ākihi ki tā Rāwiri, ā, ka mea, “Kua tino mea rawa ia i a ia kia whakariharihangia e tōna iwi, e Īharaira; nā reira hei tangata tūturu ia māku, ake ake.”
1SA 28:1 Nā, i aua rā kua huihuia e ngā Pirihitini ā rātou taua mō te pakanga, hei whawhai ki a Īharaira. Nā, ka mea a Ākihi ki a Rāwiri, “Kia tino mōhio koe me haere tahi tāua ki te whawhai, koutou ko āu tāngata.”
1SA 28:2 Anō rā ko Rāwiri ki a Ākihi, “Mā reira koe ka mōhio ai ki ngā mahi a tāu pononga.” Ā, ka mea a Ākihi ki a Rāwiri, “Koia ahau ka mea nei i a koe hei tiaki mō tōku upoko i ngā rā katoa.”
1SA 28:3 Nā, kua mate a Hamuera, kua uhungatia hoki e Īharaira katoa, kua tanumia ki Rama, ki tōna pā ake. Kua whakakorea atu hoki e Haora i te whenua te hunga i ngā waka atua, i ngā rapa māori hoki.
1SA 28:4 Nā, ka huihui ngā Pirihitini, ā, haere mai ana, puni ana ki Huneme; i huihuia anō e Haora a Īharaira katoa, ā, puni ana ki Kiripoa.
1SA 28:5 Ā, nō te kitenga o Haora i te taua a ngā Pirihitini, ka wehi, tūiri rawa tōna ngākau.
1SA 28:6 Nā, i te uinga a Haora ki a Ihowā, hore rawa he kupu a Ihowā i whakahokia mai ki a ia, e ngā moe, e ngā Urimi, e ngā poropiti rānei.
1SA 28:7 Kātahi a Haora ka mea ki āna tāngata, “Rapua māku tētahi wahine he atua māori tōna kia haere ahau ki a ia ki te rapu tikanga i a ia.” Anō rā ko āna tāngata ki a ia, “Tērā tētahi wahine he atua māori tōna, kei Eneroro.”
1SA 28:8 Nā, ka whakaahua kē a Haora i a ia, ā, kākahu ana i ētahi kākahu kē, haere ana ia me āna tāngata tokorua; ka tae ki taua wahine i te pō, ka mea atu ia, “Tēnā koa, hirihiria te atua māori, ā, whakaputaina ake ki ahau tāku e kī atu ai.”
1SA 28:9 Nā, ka mea taua wahine ki a ia, “Ha, kua mōhio anō koe ki tā Haora i mea ai, ki tāna hautopenga atu i te hunga atua māori, i ngā rapa māori, o te whenua nei. He aha rā koe i mea māhanga mai ai mō tōku wairua, kia mate ai ahau?”
1SA 28:10 Nā, ka oatitia a Ihowā e Haora ki a ia, i mea ia, “E ora ana a Ihowā, e kore tētahi hē e pā ki a koe mō tēnei mea.”
1SA 28:11 Kātahi te wahine ka mea, “Ko wai kia whakaputaina ake e ahau ki a koe?” Anō rā ko ia, “Ko Hamuera tāu e whakaputa ake ai ki ahau.”
1SA 28:12 Ā, nō te kitenga o te wahine i a Hamuera, nui atu tōna reo ki te hāmama; ā, ka kōrero te wahine ki a Haora, ka mea, “He aha koe i tinihanga ai ki ahau? Ko Haora hoki koe.”
1SA 28:13 Nā, ka mea te kīngi ki a ia, “Kaua e wehi; i kite hoki koe i te aha?” Nā, ka mea te wahine ki a Haora, “Kei te kite ahau i tētahi atua e haere ake ana i te whenua.”
1SA 28:14 Anō rā ko tērā ki a ia, “He āhua aha tōna?” Ka mea ia, “He koroheke te haere ake nei; he koroka hoki te kākahu.” Nā, ka mōhio a Haora ko Hamuera. Tuohu ana tōna mata ki te whenua, piko ana ia.
1SA 28:15 Nā, ka mea a Hamuera ki a Haora, “He aha koe i whakaohooho ai i ahau, i mea ai kia haere ake ahau?” Anō rā ko Haora, “Nui atu tōku mate; e whawhai ana hoki ngā Pirihitini ki ahau, ā, kua mahue ahau i te Atua, kāhore ake hoki he kupu āna e whakahokia mai ki ahau e ngā poropiti, e ngā moe rānei; koia ahau i karanga ai ki a koe, hei ako i ahau ki tāku e mea ai.”
1SA 28:16 Kātahi a Hamuera ka mea, “He aha rā koe i ui ai ki ahau, kua mahue nei hoki koe i a Ihowā, hei hoariri anō ia ki a koe?
1SA 28:17 Nā, kua meatia e Ihowā mōna ake tāna i whakapuakina e ahau; kua haea atu hoki te kīngitanga i tōu ringa, kua hoatu ki tōu hoa, arā ki a Rāwiri.
1SA 28:18 Mōu kīhai i rongo ki te reo o Ihowā, kīhai i whakaputa i tōna riri āritarita ki a Amareke; nā reira a Ihowā i mea ai i tēnei mea ki a koe i tēnei rā.
1SA 28:19 Ko tēnei, ka hoatu anō a Īharaira Ihowā me koe hoki ki te ringa o ngā Pirihitini, ā, āpōpō koutou ko āu tama tae ake ai ki ahau. Ā, ka hoatu e Ihowā te taua a Īharaira ki te ringa o ngā Pirihitini.”
1SA 28:20 Kātahi ka hinga tonu iho a Haora, tōna roa katoa ki te whenua, nui rawa hoki tōna wehi mō ngā kupu a Hamuera; kāhore anō he kaha i roto i a ia; kīhai hoki ia i kai taro noa pau noa taua rā, pau noa taua pō.
1SA 28:21 Nā, ka haere taua wahine ki a Haora; ā, ka kite e pororaru rawa ana ōna whakaaro, ka mea ki a ia, “Nanā, kua whakarongo nei tāu pononga ki tōu reo, ā, whakamomori ana ahau ki te mate, whakarongo ana ahau ki āu kupu i kōrerotia e koe ki ahau.
1SA 28:22 Nā, tēnā, whakarongo mai hoki āianei ki te reo o tāu pononga, kia whakatakotoria e ahau tētahi wāhi taro ki tōu aroaro; me kai anō koe, kia whai kaha ai koe ina haere i tōu huarahi.”
1SA 28:23 Otiia i whakakāhore ia, i mea, “E kore ahau e kai.” Heoi, tohea ana ia e āna tāngata rātou ko te wahine; nā, ka rongo ia ki tō rātou reo, ā, whakatika ake ana i te whenua, noho ana ki runga ki te moenga.
1SA 28:24 Nā, he kūao kau tā taua wahine i te whare, he mea whāngai. Nā, hohoro tonu tāna patu, tīkina ana e ia he parāoa, pokepokea ana, tunua iho e ia ētahi keke rēwenakore.
1SA 28:25 Kawea mai ana e ia ki te aroaro o Haora, ki te aroaro anō o āna tāngata. Nā, kai ana rātou, ā, whakatika ana, haere atu ana i taua pō.
1SA 29:1 Nā, ka huihuia e ngā Pirihitini ā rātou taua katoa ki Apeke, i te noho hoki a Īharaira ki te puna i Ietereere.
1SA 29:2 Ā, ka haere ngā rangatira o ngā Pirihitini me ō rātou rau, me ō rātou mano, ka haere atu anō a Rāwiri rātou ko āna tāngata, me Ākihi, i te hiku.
1SA 29:3 Kātahi ngā rangatira o ngā Pirihitini ka mea, “He aha tā ēnei Hiperu i konei?” Anō rā ko Ākihi ki ngā rangatira o ngā Pirihitini, “Ehara ianei tēnei i a Rāwiri, i te tangata a Haora kīngi o Īharaira i noho nei ki ahau i ēnei rā, i ēnei tau rānei, ā, kāhore ahau i kite i tētahi hē ōna, o te rā anō i riro mai ai ia ki ahau ā mohoa noa nei?”
1SA 29:4 Otiia, ka riri ngā rangatira o ngā Pirihitini ki a ia, ā, ka mea ngā rangatira o ngā Pirihitini ki a ia, “Whakahokia tēnei tangata kia hoki ki te wāhi i whakaritea e koe mōna; ā, kaua ia e haere tahi tātou ki te whawhai; kei whawhai ia ki a tātou i te tatauranga; he aha hoki tāna mea hei whakamārie mō tōna rangatira? He teka ianei ko ngā upoko o ēnei tāngata?
1SA 29:5 Ehara ianei tēnei i a Rāwiri i waiata rā rātou tētahi ki tētahi, i ngā kanikani, i mea rā, ‘Nā Haora āna mano i patu, nā Rāwiri ko āna tekau mano’?”
1SA 29:6 Kātahi a Ākihi ka karanga ki a Rāwiri, ka mea ki a ia, “E ora ana a Ihowā, tika tonu tāu, pai tonu hoki ki tāku titiro tōu haerenga atu me tōu haerenga mai i a tāua nei i te ope. Kāhore nei hoki i mau i ahau tētahi hē ōu, o te rā anō i haere mai ai koe ki ahau ā taea noatia tēnei rā. Otiia ki te titiro a ngā rangatira kāhore ōu pai.
1SA 29:7 Nā, hoki atu āianei, haere hoki i runga i te rangimārie; kei kino tāu mahi ki te titiro a ngā rangatira o ngā Pirihitini.”
1SA 29:8 Nā, ka mea a Rāwiri ki a Ākihi, “I aha hoki ahau? Ko te aha hoki a tāu pononga i kitea e koe, o te rā i noho ai ahau ki tōu aroaro ā taea noatia tēnei rā, ka kore ai ahau e haere ki te whawhai ki ngā hoariri o tōku ariki, o te kīngi?”
1SA 29:9 Nā, ka whakahoki a Ākihi, ka mea ki a Rāwiri, “E mōhio ana anō ahau he pai koe ki tāku titiro, rite tonu anō ki te anahera a te Atua. Otiia, ko ngā rangatira o ngā Pirihitini hei kī mai, ‘Kaua tēnei e haere tahi tātou ki te whawhai.’
1SA 29:10 Heoi, maranga wawe i te ata, me ngā tāngata anō a tōu ariki i haere tahi mai nei koutou, ā, ka maranga wawe koutou i te ata, ka mārama, haere.”
1SA 29:11 Heoi, ka maranga wawe a Rāwiri, rātou ko āna tāngata, ā, haere ana i te ata, hoki ana ki te whenua o ngā Pirihitini. Ko ngā Pirihitini ia i haere ki runga, ki Ietereere.
1SA 30:1 Ā, nō ka tae a Rāwiri rātou ko āna tāngata ki Tikiraka i te toru o ngā rā, nā, kua huaki ngā Amareki ki te tonga, ki Tikiraka anō. Patua ana a Tikiraka e rātou, tahuna ake ki te ahi;
1SA 30:2 whakaraua ana hoki e rātou ngā wāhine me ngā mea o reira, te iti, te rahi; kīhai i whakamatea tētahi, engari i kāhakina atu, ā, haere ana i tō rātou ara.
1SA 30:3 Heoi, i te taenga o Rāwiri rātou ko āna tāngata ki te pā, kua oti te tahu ki te ahi, ā, kua whakaraua atu ā rātou wāhine, ā rātou tama, ā rātou tamāhine.
1SA 30:4 Kātahi ka puaki te reo o Rāwiri rātou ko āna tāngata, tangi ana rātou, ā, kāhore noa ō rātou kaha ki te tangi.
1SA 30:5 I riro whakarau anō ngā wāhine tokorua a Rāwiri, a Ahinoama o Ietereere, rāua ko Apikaira wahine a Nāpara o Karamere.
1SA 30:6 Nā, mamae rawa a Rāwiri, nō te mea i kupukupu te nuinga kia ākina ia ki te kōhatu; i mamae hoki te ngākau o te iwi katoa, o tērā, o tērā, ki ā rātou tama, ki ā rātou tamāhine. Ko Rāwiri ia i whakapakari i a ia i roto i a Ihowā, i tōna Atua.
1SA 30:7 Nā, ka mea a Rāwiri ki a Apiātara tohunga, tama a Ahimereke, “Tēnā, maua mai te epora ki ahau.” Nā, maua ana te epora e Apiātara ki a Rāwiri.
1SA 30:8 Nā, ka ui a Rāwiri ki a Ihowā, ka mea, “Ki te whai ahau i tēnei taua e mau rānei rātou i ahau?” Nā, ka mea ia, “Whāia; ka mau pū hoki rātou i a koe, ā, ka riro katoa mai āu i a koe.”
1SA 30:9 Heoi, haere ana a Rāwiri rātou ko āna tāngata e ono rau, kua tae ki te awa, ki Pehoro, ki te wāhi i noho ai te hunga i mahue iho.
1SA 30:10 Otiia whai tonu ana a Rāwiri rātou ko ngā tāngata e whā rau; e rua hoki ngā rau i noho; i ruha rawa hoki, tē whiti ai i te awa, i Pehoro.
1SA 30:11 Nā, ka tūpono atu rātou ki tētahi tangata o Īhipa i te pārae, ā, kawea ana ia ki a Rāwiri. Nā, ka hoatu he taro māna, ā, kai ana ia; i whakainu anō rātou i a ia ki te wai.
1SA 30:12 I hoatu anō e rātou tētahi wāhi o te keke piki me ētahi tautau karepe e rua. Nā, ka kai ia, ā, ka hoki tōna wairua ki a ia; e toru hoki ngā rā, e toru ngā pō ōna kīhai nei ia i kai i te kai, kīhai i inu i te wai.
1SA 30:13 Nā, ka mea a Rāwiri ki a ia, “Nā wai koe? Nō hea hoki koe?” Anō rā ko ia, “He tamaiti ahau nō Īhipa, he pononga nā tētahi Amareki; i whakarērea hoki ahau e tōku ariki, he pānga nōku e te mate ka toru ēnei rā.
1SA 30:14 I huakina e mātou te tonga o ngā Kereti, me te wāhi i a Hūrā, me te tonga o Karepe; i tahuna anō e mātou a Tikiraka ki te ahi.”
1SA 30:15 Nā, ka mea a Rāwiri ki a ia, “E taea rānei ahau te kawe e koe ki raro ki te ope rā?” Anō rā ko ia, “Oati mai ki ahau ki te Atua hoki, e kore ahau e whakamatea e koe, e kore e tukua ki ngā ringa o tōku rangatira, ā, ka kawea koe e ahau ki raro ki taua ope.”
1SA 30:16 Ā, nō tāna kawenga i a ia ki raro, kua wawā noa atu rātou ki te mata o te whenua katoa, e kai ana, e inu ana, e kanikani ana, mō ngā taonga nui katoa, taonga parakete, i riro i a rātou i te whenua o ngā Pirihitini, i te whenua hoki o Hūrā.
1SA 30:17 Nā, patua iho rātou e Rāwiri i te pūaotanga ā taea noatia te ahiahi o te aonga ake. Kīhai hoki tētahi o rātou i mawhiti, heoi anō ko ētahi taitamariki e whā rau i eke ki ngā kāmera, ā, rere ana.
1SA 30:18 I riro anō hoki i a Rāwiri ngā mea katoa i tangohia e ngā Amareki; i riro anō i a Rāwiri āna wāhine tokorua.
1SA 30:19 Kīhai hoki i ngaro tētahi o ā rātou mea; te iti, te rahi, ngā tama, ngā tamāhine, ngā taonga parakete, ngā mea katoa i tangohia e rātou; i hoki katoa mai i a Rāwiri.
1SA 30:20 I mau anō i a Rāwiri ngā hipi katoa me ngā kāhui; ā, ka ārahina e rātou i mua i ērā atu kararehe, i mea, “Ko te taonga parakete tēnei a Rāwiri.”
1SA 30:21 Ā, ka tae a Rāwiri ki ngā tāngata e rua rau i ruha nei, kīhai nei i aru i a Rāwiri, i meinga rā kia noho ki te awa, ki Pehoro. Ka puta rātou ki te whakatau i a Rāwiri, ki te whakatau hoki i te iwi i a ia; ā, ka tata a Rāwiri ki aua tāngata, ka oha ia ki a rātou.
1SA 30:22 Kātahi ka oho ake te hunga kino katoa, ngā tāngata o Periara i roto i te hunga i haere tahi rātou ko Rāwiri, ka mea, “Kīhai rātou i haere tahi tātou, nā, e kore e hoatu ki a rātou ētahi o ngā taonga i riro mai i a tātou. Heoi anō, ko te wahine me ngā tamariki a tēnei, a tēnei, nā, mā rātou e ārahi atu, e haere.”
1SA 30:23 Kātahi a Rāwiri ka mea, “Kaua e pēnā, e ōku tēina, ki tā Ihowā i hōmai ai ki a tātou; nāna nei hoki tātou i tiaki, ā, hōmai ana e ia ki ō tātou ringa taua ope i haere ake rā ki a tātou.
1SA 30:24 Ko wai hoki hei whakarongo ki tēnei mea a koutou? Ko te wāhi hoki a te tangata i haere ki te whawhai kia rite ki te wāhi a te tangata i noho ki ngā mea; kia rite tonu te wāhi mā rātou.”
1SA 30:25 Nā, waiho tonu iho e ia tēnā hei tikanga, hei ritenga mō Īharaira nō taua rangi ā tuku iho ki tēnei rā.
1SA 30:26 Ā, i te taenga o Rāwiri ki Tikiraka, ka tonoa e ia ētahi o ngā taonga ki ngā kaumātua o Hūrā, ki ōna hoa, ā, ka mea, “Tēnā tētahi manaaki mō koutou nō ngā taonga a ngā hoariri o Ihowā”;
1SA 30:27 ki ngā tāngata hoki o Pētēre, ki o Rāmoto ki te tonga, ki ērā hoki i Iatiri;
1SA 30:28 ki o Aroere, ki o Hipimoto, ki o Ehetemoa,
1SA 30:29 ki o Rakara, ki o ngā pā o ngā Ierameeri, ki o ngā pā o ngā Keni;
1SA 30:30 ki o Horema, ki o Korahana, ki o Ataka,
1SA 30:31 ki o Heperona, ki o ngā wāhi katoa i hāereere ai a Rāwiri rātou ko āna tāngata.
1SA 31:1 Nā, kua whawhai ngā Pirihitini ki a Īharaira, ā, ka whati ngā tāngata o Īharaira i te aroaro o ngā Pirihitini, ā, hinga ana, mate rawa, i Maunga Kiripoa.
1SA 31:2 Nā, ka whāia e ngā Pirihitini a Haora rātou ko āna tama, ā, patua iho e ngā Pirihitini a Honatana rātou ko Apinarapa, ko Marikihua, ngā tama a Haora.
1SA 31:3 Nā, ka nui haere te whawhai ki a Haora, ā, ka mau ia i ngā kaikōpere; nui rawa tōna tūnga i ngā kaikōpere.
1SA 31:4 Kātahi a Haora ka mea ki tāna kaimau patu, “Unuhia tāu hoari, werohia hoki ahau; kei haere mai tēnei hunga kokotikore, ā, ka wero i ahau, ka whakatupu kino i ahau.” Otiia kīhai i pai tāna kaimau patu; he nui hoki nō tōna hopohopo. Nā reira ka mau a Haora ki tāna hoari, hinga iho ki runga.
1SA 31:5 Ā, nō te kitenga o tāna kaimau patu, kua mate a Haora, ka hinga hoki ia ki tāna hoari, ā, mate tahi ana rāua.
1SA 31:6 Heoi, kotahi tonu te matenga o Haora rātou ko āna tama tokotoru, ko tāna kaimau patu, me āna tāngata katoa i taua rā anō.
1SA 31:7 Ā, nō te kitenga o ngā tāngata o Īharaira i tērā taha o te raorao, i tāwāhi anō o Horano, kua whati ngā tāngata o Īharaira, ā, kua mate a Haora rātou ko āna tama, whakarērea ake e rātou ngā pā, ā, rere ana; nā, ka haere ngā Pirihitini nohoia iho.
1SA 31:8 Ā, i te aonga ake, i te haerenga o ngā Pirihitini ki te muru i te hunga i patua, nā, ka kitea e rātou a Haora rātou ko āna tama tokotoru e takoto ana i Maunga Kiripoa.
1SA 31:9 Nā, tapahia ana e rātou tōna upoko, murua ana āna patu, ungā ana e rātou kia kawea puta noa i te whenua o ngā Pirihitini ā tawhio noa, kia kauwhautia i roto i te whare o ā rātou whakapakoko, i roto hoki i te iwi.
1SA 31:10 Ā, i whakatakotoria e rātou āna patu ki te whare o Ahataroto, ko tōna tinana ia i titia e rātou ki te taiepa o Petehana.
1SA 31:11 Ā, nō ka rongo ngā tāngata o Iapehe Kireara ki tā ngā Pirihitini i mea ai ki a Haora,
1SA 31:12 ka whakatika ngā mārohirohi katoa, ā, haere ana pau noa taua pō katoa. Nā, tangohia iho e rātou te tinana o Haora, me ngā tinana o āna tama i te taiepa o Petehana, ā, haere ana ki Iapehe, tahuna ana ki reira.
1SA 31:13 I maua hoki ō rātou wheua e rātou, ā, tanumia ana ki raro i tētahi rākau i Iapehe, ā, e whitu ngā rā i nohopuku ai.
2SA 1:1 Nā, i muri iho i te matenga o Haora, te mea kua hoki mai a Rāwiri i te patunga i ngā Amareki, ā, kua rua ngā rā o Rāwiri e noho ana ki Tikiraka.
2SA 1:2 I te toru o ngā rā, nā, ko tētahi tangata e haere mai ana i te puni i a Haora, he mea haehae ōna kākahu, he oneone i runga i tōna mātenga. Ā, nō tōna taenga mai ki a Rāwiri, ka hinga ia ki te whenua, ā, ka piko.
2SA 1:3 Nā, ka mea a Rāwiri ki a ia, “I haere mai koe i hea?” Ka mea tērā ki a ia, “I mawhiti mai ahau i te puni o Īharaira.”
2SA 1:4 Anō rā ko Rāwiri ki a ia, “I pēhea te mea rā? Tēnā, kōrerotia mai ki ahau.” Nā, ka mea ia, “Kua whati te iwi i te whawhai, he tokomaha hoki o te iwi i hinga, i mate. Kua mate hoki a Haora rāua ko tāna tama, ko Honatana.”
2SA 1:5 Anō rā ko Rāwiri ki te tamaiti nāna nei i kōrero ki a ia, “I mōhiotia e koe ki te aha kua mate a Haora rāua ko tāna tama ko Honatana?”
2SA 1:6 Nā, ka mea taua tamaiti nāna nei i kōrero ki a ia, “I tūpono noa ahau ki runga i Maunga Kiripoa, nā, ko Haora e okioki ana ki tāna tao. Nā, e whai tata ana i a ia ngā hāriata me ngā kaieke hōiho.
2SA 1:7 Nā, i tōna tahuritanga ki muri, ka kite i ahau, ā, ka karanga ki ahau. Nā, ka mea ahau, ‘Tēnei ahau.’
2SA 1:8 “Anō rā ko ia ki ahau, ‘Ko wai koe?’ “Anō rā ko ahau ki a ia, ‘He Amareki ahau.’
2SA 1:9 “Nā, ka mea ia ki ahau, ‘Tēnā, e tū ki tōku taha, whakamatea hoki ahau, kua mau pū hoki ahau i te pōuri; nō te mea kei te toitū tonu te ora i roto i ahau.’
2SA 1:10 “Heoi, tū ana ahau ki tōna taha, whakamatea ana ia e ahau; i mōhio hoki ahau e kore rawa ia e ora ake i te mea ka hinga nei ia. Nā, tangohia ana e ahau te karauna i tōna mātenga, me te poroporo i tōna ringa, ā, kawea mai ana e ahau ki konei ki tōku ariki.”
2SA 1:11 Kātahi a Rāwiri ka mau ki ōna kākahu, ā, haehaea ana e ia; ā, i pērā hoki ōna hoa katoa.
2SA 1:12 Nā, ka uhunga rātou, ka tangi, ka nohopuku ā ahiahi noa, mō Haora, mō tāna tama, mō Honatana, mō te iwi anō a Ihowā, mō te whare hoki o Īharaira, i hinga nei i te hoari.
2SA 1:13 Nā, ka mea a Rāwiri ki te tamaiti nāna nei i kōrero ki a ia, “Nō hea koe?” Anō rā ko tērā, “He tama ahau nā tētahi manene, nā tētahi Amareki.”
2SA 1:14 Anō rā ko Rāwiri ki a ia, “He aha koe tē wehi ai? He aha i totoro ai tōu ringa ki te huna i tā Ihowā i whakawahi ai?”
2SA 1:15 Kātahi a Rāwiri ka karanga ki tētahi o āna taitama, ka mea, “Whakatata atu, e rere ki runga ki a ia.” Nā, patua ana ia e ia, mate ake.
2SA 1:16 I mea anō a Rāwiri ki a ia, “Hei runga i tōu mātenga ōu toto; kua whakaatu mai nā hoki tōu waha i tōu hē, kua mea, ‘Nāku i whakamate tā Ihowā i whakawahi ai.’ ”
2SA 1:17 Nā, ka waiatatia e Rāwiri tēnei apakura mō Haora rāua ko tāna tama, ko Honatana;
2SA 1:18 i mea hoki ia kia whakaakona ngā tama a Hūrā ki te waiata o te kōpere; (e mau nā te tuhituhi ki te Pukapuka a Iahera):
2SA 1:19 “Tukitukia ana tōu ātaahua, e Īharaira, ki ōu wāhi teitei. Anō te hinganga o ngā mārohirohi!
2SA 1:20 “Kaua e kōrerotia ki Kāta; kaua e kauwhautia ki ngā huarahi o Ahakerono; kei koa ngā tamāhine a ngā Pirihitini, kei whakamanamana ngā tamāhine a te kokotikore.
2SA 1:21 “E ngā maunga o Kiripoa, kāti rawa he tōmairangi mō koutou, he ua, he māra e tukua ai te whakahere. I ākiritia kinotia hoki ki reira te pukupuku o te mārohirohi, te pukupuku o Haora, me te mea kīhai i whakawahia ki te hinu.
2SA 1:22 He toto tēnā nō te hunga i tū, he ngako tēnā nō ngā mārohirohi, kāhore he whakahokinga mai o te kōpere a Honatana, kīhai anō te hoari a Haora i hoki kau mai.
2SA 1:23 “Ko Haora, ko Honatana, he aroha, he whakaahuareka i tō rāua oranga; kīhai hoki i wehea i tō rāua matenga. Nui atu tō rāua tere i tō ngā ēkara, tō rāua kaha i tō ngā raiona.
2SA 1:24 “E ngā tamāhine a Īharaira, tangihia a Haora, nāna nei ō koutou kākahu ngangana i huatau ai, nāna nei i piri ai ngā whakapaipai kōura ki ō koutou weruweru.
2SA 1:25 “Anō te hinganga o ngā mārohirohi i waenganui o te tatauranga! E Honatana, i werohia nā i runga i ōu wāhi teitei.
2SA 1:26 Mamae ana ahau, he whakaaro ki a koe, e tōku tuakana, e Honatana; nui atu tōku whakaahuareka ki a koe. He hanga whakamīharo tōu aroha ki ahau, nui atu i tō ngā wāhine aroha.
2SA 1:27 “Anō te hinganga o ngā mārohirohi; anō te korenga o ngā patu o te pakanga!”
2SA 2:1 Nā, i muri iho i tēnei, ka ui a Rāwiri ki a Ihowā, ka mea, “Me haere rānei ahau ki runga, ki tētahi o ngā pā o Hūrā?” Ā, ka mea a Ihowā ki a ia, “Haere.” Anō rā ko Rāwiri, “Me haere ahau ki hea?” Ā, ka mea ia, “Ki Heperona.”
2SA 2:2 Heoi, haere ana a Rāwiri ki reira, rātou ko āna wāhine tokorua, ko Ahinoama Ietereere, rāua ko Apikaira wahine a Nāpara Karameri.
2SA 2:3 I mauria anō e Rāwiri ōna hoa, tēnā tangata me tōna whare, tēnā me tōna; ā, noho ana rātou ki ngā pā o Heperona.
2SA 2:4 Nā, ka haere mai ngā tāngata o Hūrā, ā, whakawahia ana a Rāwiri e rātou ki reira hei kīngi mō te whare o Hūrā. Ā, ka kōrerotia ki a Rāwiri te kōrero mō ngā tāngata o Iapehe Kireara, nā rātou i tanu a Haora.
2SA 2:5 Nā, ka unga karere a Rāwiri ki ngā tāngata o Iapehe Kireara hei mea ki a rātou, “Kia manaakitia koutou e Ihowā mō tēnei aroha i whakaputaina e koutou ki tō koutou ariki, arā ki a Haora, mō tā koutou tanumanga i a ia.
2SA 2:6 Nā, kia whakaputaina mai e Ihowā he aroha, he pono, ki a koutou; ka utua anō hoki koutou e ahau mō tēnei mahi pai, mō koutou i mea i tēnei mea.
2SA 2:7 Tēnā rā, kia kaha ō koutou ringa āianei, kia māia; kua mate hoki tō koutou ariki, a Haora, kua oti anō ahau te whakawahi e te whare o Hūrā hei kīngi mō rātou.”
2SA 2:8 Nā, tērā kua mau a Āpanēre tama a Nere, te rangatira o te ope a Haora, ki a Ihipohete tama a Haora, ā, kua kawea mai e ia ki tāwāhi nei, ki Mahanaima;
2SA 2:9 ā, meinga ana e ia hei kīngi mō Kireara, mō ngā Ahuri, mō Ietereere, mō Ēparaima, mō Pineamine, mō Īharaira katoa.
2SA 2:10 E whā tekau ngā tau o Ihipohete tama a Haora, i a ia i meinga ai hei kīngi mō Īharaira, ā, e rua ngā tau i kīngi ai. Ko te whare ia o Hūrā i whai i a Rāwiri.
2SA 2:11 Nā, ko te maha o ngā rā i noho ai a Rāwiri ki Heperona hei kīngi mō te whare o Hūrā, e whitu tau e ono marama.
2SA 2:12 Nā, ka haere atu a Āpanēre tama a Nere, rātou ko ngā tāngata a Ihipohete tama a Haora, i Mahanaima ki Kipeono.
2SA 2:13 Nā, ka puta atu a Ioapa tama a Teruia me ngā tāngata a Rāwiri, ā, tūtaki ana rātou ki te poka wai i Kipeono. Nā, noho ana rātou, ko ēnei i tēnei taha o te poka, ā, ko ērā i tērā taha o te poka.
2SA 2:14 Nā, ka mea a Āpanēre ki a Ioapa, “Tēnā, kia whakatika ngā tamariki ki te tākaro ki tō tāua aroaro.” Anō rā ko Ioapa, “Me whakatika rātou.”
2SA 2:15 Kātahi rātou ka whakatika, ka haere ā-tatau atu; kotahi tekau mā rua mō Pineamine, mō Ihipohete tama a Haora, ā, kotahi tekau mā rua o ngā tāngata a Rāwiri.
2SA 2:16 Nā, hopukia ana e rātou te mātenga o tāna tangata, o tāna tangata, ā, werohia ana ā rātou hoari ki te kaokao o tāna tangata, o tāna tangata; nā, hinga ngātahi ana rātou. Koia i huaina ai te ingoa o taua wāhi, ko Herekata Haturimi; koia tērā i Kipeono.
2SA 2:17 Nā, nui atu te whawhai i taua rā, ā, patua iho a Āpanēre rātou ko ngā tāngata o Īharaira e ngā tāngata a Rāwiri.
2SA 2:18 Nā, tokotoru ngā tama a Teruia i reira, ko Ioapa, ko Āpihai, ko Atahere. He wae māmā hoki a Atahere, koia anō kei tētahi anaterope o te koraha.
2SA 2:19 Nā, ka whai a Atahere i a Āpanēre; kīhai hoki i peka, kīhai i haere ki matau, ki mauī, i a ia e whai ana i a Āpanēre.
2SA 2:20 Kātahi a Āpanēre ka titiro ki muri i a ia, ā, ka mea, “Ko koe tēnā, e Atahere?” Ā, ka mea ia, “Ko ahau tēnei.”
2SA 2:21 Nā, ka mea a Āpanēre ki a ia, “Peka atu koe ki tōu matau, ki tōu mauī rānei, ka hopu ai i tētahi o ngā tamariki māu, ka tango ai i ōna hei kākahu o te riri mōu.” Otirā, kīhai a Atahere i pai ki te peka kē atu i te whai i a ia.
2SA 2:22 Nā, ka mea anō a Āpanēre ki a Atahere, “Peka atu i te whai i ahau; he aha ahau i patu iho ai i a koe ki te whenua? Me pēhea hoki e ara ake ai tōku mata ki tōu tuakana, ki a Ioapa?”
2SA 2:23 Otirā, kīhai ia i pai ki te peka ake; heoi werohia iho ia e Āpanēre ki te take o te tao ki tōna puku, ā, puta rawa te tao i tētahi taha ōna. Nā, hinga iho ia ki taua wāhi, ā, mate tonu iho ki reira. Nā, tū katoa te hunga i tae mai ki te wāhi i hinga ai a Atahere, i mate ai.
2SA 2:24 Otiia ka whai a Ioapa rāua ko Āpihai i a Āpanēre; ā, kua heke te rā i tō rāua taenga ki te puke o Amaha, ki tērā i te ritenga atu o Kia, i te huarahi ki te koraha i Kipeono.
2SA 2:25 Nā, ka huihui ngā tama a Pineamine ki a Āpanēre, kotahi tonu tō rātou ngohi, ā, tū ana rātou i runga i te pukepuke kotahi.
2SA 2:26 Kātahi ka karanga a Āpanēre ki a Ioapa, ka mea, “Me kai tonu koia te hoari? Kāhore anō koe kia mōhio he kino te tukunga iho? Āhea rā koe mea ai ki te iwi rā kia hoki atu i te whai i ō rātou tēina?”
2SA 2:27 Nā, ka mea a Ioapa, “E ora ana te Atua, me i kāhore koe te kī mai nā, inā ko ā te ata anō te iwi hoki ai i te whai i tōna teina, i tōna teina.”
2SA 2:28 Heoi, whakatangihia ana e Ioapa te tētere, ā, tū katoa ana te iwi, kīhai anō i mea ki te whai i a Īharaira, nā, mutu ake tā rātou whawhai.
2SA 2:29 Nā, haere ana a Āpanēre rātou ko āna tāngata i te mānia, ā, pau katoa taua pō, ā, whiti ana i Horano, haere ana ā puta noa i Pitirono, tae tonu atu ki Mahanaima.
2SA 2:30 Nā, hoki ana a Ioapa i te whai i a Āpanēre; ā, nō ka huihuia e ia te iwi katoa, nā, kotahi tekau mā iwa o ngā tāngata a Rāwiri i kore, me Atahere.
2SA 2:31 E toru rau e ono tekau ia ngā tāngata o Pineamine, arā o ngā tāngata a Āpanēre, i patua e ngā tāngata a Rāwiri, i mate.
2SA 2:32 Nā, ka mau rātou ki a Atahere, ā, tanumia iho ki te tanumanga o tōna pāpā ki Pēterehema. Nā, haere ana a Ioapa rātou ko āna tāngata ā pau katoa taua pō, ā, mārama atu i a rātou i Heperona.
2SA 3:1 Nā, he roa te pakanga i waenganui o te whare o Haora me te whare o Rāwiri; ā, ko Rāwiri i kaha haere, ko te whare ia o Haora i ngoikore haere.
2SA 3:2 Ā, i whānau ētahi tama mā Rāwiri ki Heperona: ko Amanono tāna mātāmua, nā Ahinoama Ietereeri;
2SA 3:3 ko Kireapa anō tāna tuarua, nā Apikaira wahine a Nāpara, Karameri; ko Apohārama te tuatoru, he tama nā Maaka tamāhine a Tāramai kīngi o Kehuru;
2SA 3:4 nā, ko Aronia te tuawhā, he tama nā Hākiti; ā, ko Hepatia te tuarima, he tama nā Apitara;
2SA 3:5 ko Itireama te tuaono, nā Ekera wahine a Rāwiri. I whānau ēnei ki a Rāwiri ki Heperona.
2SA 3:6 Ā, i te mea e whawhai ana te whare o Haora ki te whare o Rāwiri, nā, ka mea a Āpanēre i a ia anō kia kaha i roto i te whare o Haora.
2SA 3:7 Nā, he wahine iti tā Haora i mua; ko Rihipa te ingoa, he tamāhine nā Aia, nā, ka mea a Ihipohete ki a Āpanēre, “He aha koe i haere ai ki roto, ki te wahine a tōku pāpā?”
2SA 3:8 Kātahi ka mura rawa te riri o Āpanēre i ngā kupu a Ihipohete, ka mea, “He upoko kurī koia ahau nō Hūrā? E atawhai nei ahau i tēnei rā i te whare o Haora, o tōu pāpā, i ōna tēina, i ōna whanaunga, kīhai hoki i tuku i a koe ki te ringa o Rāwiri, heoi e whakahē nei koe i ahau ināianei mō tēnei wahine.
2SA 3:9 Kia meatia tēnei e te Atua ki a Āpanēre, me ētahi atu mea anō, ki te kāhore ahau e mea i tēnā ki a Rāwiri, pērā i tā Ihowā i oati ai ki a ia;
2SA 3:10 hei whakawhiti atu i te kīngitanga i te whare o Haora, hei whakapūmau hoki i te torōna o Rāwiri i roto i a Īharaira, i roto i a Hūrā, mai i Rāna ā Peerehepa atu ana.”
2SA 3:11 Ā, kīhai i taea e ia te whakahoki kupu ki a Āpanēre, i wehi hoki ia i a ia.
2SA 3:12 Nā, ka unga karere a Āpanēre ki a Rāwiri, he mea nāna ake, hei kī atu, “Nō wai te whenua? Hei mea hoki: Whakaritea tāu kawenata ki ahau, nanā, ko tōku ringa hoki ki a koe hei mea i a Īharaira katoa kia anga ki a koe.”
2SA 3:13 Nā, ka mea tērā, “E pai ana; me whakarite kawenata ahau ki a koe; kotahi anō ia tāku mea e tono ai ahau i a koe, arā e kore koe e kite i tōku mata, ki te kāhore e kawea mai e koe a Mikara tamāhine a Haora, ina haere mai koe kia kite i tōku mata.”
2SA 3:14 I unga karere anō a Rāwiri ki a Ihipohete tama a Haora, hei mea, “Hōmai tāku wahine a Mikara i taumautia e ahau māku ki ngā kiri matamata kotahi rau o ngā Pirihitini.”
2SA 3:15 Nā, ka unga tangata a Ihipohete ki te tango i a ia i tāna tahu i a Paratiere tama a Raihi.
2SA 3:16 I haere tahi anō tāna tahu i a ia, me te tangi haere i muri i a ia, ā tae noa ki Pahurimi. Nā, ka mea a Āpanēre ki a ia, “Haere, e hoki.” Ā, hoki ana ia.
2SA 3:17 Nā, ka kōrero a Āpanēre ki ngā kaumātua o Īharaira, ka mea, “I rapu koutou i a Rāwiri i mua ake nei hei kīngi mō koutou.
2SA 3:18 Nā, tēnā rā, ko tā Ihowā kōrero hoki tēnei mō Rāwiri, i kī ia, ‘Mā te ringa o Rāwiri o tāku pononga e whakaora ai ahau i tāku iwi i a Īharaira i roto i te ringa o ngā Pirihitini, i roto hoki i te ringa o ō rātou hoariri katoa.’ ”
2SA 3:19 Ā, i kōrero anō a Āpanēre ki ngā taringa o Pineamine; i haere anō a Āpanēre, ā, kōrerotia ana e ia ki ngā taringa o Rāwiri i Heperona ngā mea katoa e pai ana ki te titiro a Īharaira, ki te titiro anō a te whare katoa o Pineamine.
2SA 3:20 Heoi, ka haere a Āpanēre ki a Rāwiri ki Heperona, e rua tekau hoki tāngata ōna hoa. Ā, tukua ana e Rāwiri he hākari mā Āpanēre rātou ko ōna hoa.
2SA 3:21 Nā, ka mea a Āpanēre ki a Rāwiri, “Ka whakatika ahau, ka haere, ā, ka huihui mai i a Īharaira katoa ki tōku ariki, ki te kīngi; ā, mā rātou e whakarite kawenata ki a koe, ā, hei kīngi koe mō ngā mea katoa e hiahia ai tōu wairua.” Nā, tukua atu ana a Āpanēre e Rāwiri, ā, haere mārie ana ia.
2SA 3:22 Nā, ko te haerenga mai o ngā tāngata a Rāwiri rātou ko Ioapa i te whai taua, he nui anō ngā taonga i kawea mai e rātou. Ko Āpanēre ia kāhore i a Rāwiri i Heperona; i tukua atu hoki ia, ā, haere mārie ana.
2SA 3:23 Ā, nō te taenga mai o Ioapa rātou ko tāna ope katoa, ka kōrerotia te kōrero ki a Ioapa, “I haere mai a Āpanēre tama a Nere ki te kīngi; ā, tukua atu ana ia e ia, ā, haere mārie ana ia.”
2SA 3:24 Nā, ka haere a Ioapa ki te kīngi, ā, ka mea, “He mahi aha tēnei āu? Nanā, i haere mai a Āpanēre ki a koe; he aha ia i tukua atu ai e koe, ā, kua haere noa atu ia?
2SA 3:25 E mōhio ana koe ki a Āpanēre tama a Nere; i haere mai ia ki te tinihanga i a koe, kia mōhio ai ia ki tōu haerenga atu, ki tōu haerenga mai, kia mōhio ai hoki ki ngā mea katoa e mea ai koe.”
2SA 3:26 Nā, ka puta a Ioapa ki waho i te aroaro o Rāwiri, ā, unga tāngata ana ki te whai i a Āpanēre, ā, whakahokia mai ana ia e rātou i te puna i Hiraha; ko Rāwiri ia kīhai i mōhio.
2SA 3:27 Ā, i te hokinga mai o Āpanēre ki Heperona, i a ia anō i te kūwaha, ka kawea ia e Ioapa ki tahaki; i mea kia āta kōrero ki a ia. Nā, patua ana ia i reira i te kōpū, mate rawa, mō ngā toto hoki o Atahere, o tōna teina.
2SA 3:28 Ā, nō te rongonga o Rāwiri i muri iho, ka mea, “Kāhore he hara ōku, o tōku kīngitanga, i ngā toto o Āpanēre tama a Nere i te aroaro o Ihowā ā ake ake.
2SA 3:29 Waiho kia tau iho ki runga ki te mātenga o Ioapa, ki runga hoki i te whare katoa o tōna pāpā. Kaua hoki e kore i roto i te whare o Ioapa, tētahi i te mate rere, i te repera, i te whakawhirinaki ki te tokotoko, i te hinga i te hoari, i te kore taro rānei.”
2SA 3:30 Heoi, patua iho a Āpanēre e Ioapa rāua ko Āpihai, ko tōna teina, hei utu mō tō rāua teina, mō Atahere, i whakamatea nei e ia ki Kipeono i te tatauranga.
2SA 3:31 Nā, ka mea a Rāwiri ki a Ioapa rātou ko tōna nuinga katoa, “Haea ō koutou kākahu, whītikiria hoki he kākahu taratara ki a koutou, ka tangi ai ki a Āpanēre.” I haere anō a Kīngi Rāwiri i muri i te amo.
2SA 3:32 Nā, ka tanumia a Āpanēre ki Heperona, ā, ka puaki te reo o te kīngi, tangi ana i te urupā o Āpanēre; i tangi anō te iwi katoa.
2SA 3:33 Nā, ka waiata apakura te kīngi ki a Āpanēre, ka mea, “Kia rite koia ki te matenga o te wairangi, te mate o Āpanēre?
2SA 3:34 Kīhai ōu ringa i herea, kīhai ōu waewae i paiherea ki te rāhiri. Rite tonu tōu hinganga ki te hinganga o te tangata i te aroaro o ngā tamariki o te kino.” I tangi anō te iwi katoa ki a ia.
2SA 3:35 Nā, ka haere mai te iwi katoa ki te mea i a Rāwiri kia kai i te mea e awatea ana anō. Nā, ka oati a Rāwiri, ka mea, “Kia meatia mai tēnei e te Atua ki ahau, me ētahi atu mea anō, ki te pā ahau ki te taro, ki tētahi atu mea rānei, i te mea kāhore anō i tō noa te rā.”
2SA 3:36 Nā, ka mōhio te iwi katoa, ā, pai tonu ki tā rātou titiro; pērā tonu me ngā mea katoa i meatia e te kīngi, he pai kau ki te titiro a te iwi katoa.
2SA 3:37 Nā, ka mātau te iwi katoa rātou ko Īharaira katoa i taua rā ehara i te kīngi nāna i mea kia whakamatea a Āpanēre tama a Nere.
2SA 3:38 I mea hoki te kīngi ki āna tāngata, “Kāhore ianei koutou i mātau, he rangatira, he tangata nui, kua hinga nei ināianei i roto i a Īharaira?
2SA 3:39 Ko ahau hoki, ahakoa i whakawahia hei kīngi, iwikore ana i tēnei rā; he mārō rawa mōku ēnei tāngata, ngā tama a Teruia. Kia rite ki tāna kino tā Ihowā utu ki te kaimahi o te kino.”
2SA 4:1 Ā, nō ka rongo a Ihipohete, te tama a Haora kua mate a Āpanēre ki Heperona, nā, ngohe noa iho ōna ringa, ā, raru ana a Īharaira katoa.
2SA 4:2 Nā, tokorua ngā tāngata a Ihipohete, te tama a Haora, he rangatira ngohi, ko te ingoa o tētahi ko Paana, ko te ingoa hoki o tētahi ko Rekapa, he tama nā Rimono Peeroti, nō ngā tama a Pineamine – i kīia hoki a Peeroto nō Pineamine.
2SA 4:3 I rere hoki ngā Peeroti ki Kitaima, ā, noho ana i reira ā taea noatia tēnei rā.
2SA 4:4 Nā, he tama tā Honatana tama a Haora, he kopa ōna waewae. E rima ngā tau o tōna whānautanga i te taenga mai o te rongo o Haora rāua ko Honatana i Ietereere, nā, ka mau tōna kaihiki ki a ia, ā, rere ana. Ā, i a ia e kaikā ana ki te rere, ka hinga ia, kopa tonu iho; ko Mepipohete tōna ingoa.
2SA 4:5 Nā, ka haere ngā tama a Rimono Peeroti, a Rekapa rāua ko Paana, ā, haere ana i te mahanatanga o te rā ki te whare o Ihipohete, i a ia e okioki ana i te poutūmārōtanga.
2SA 4:6 Nā, haere ana rāua ki reira ki waenganui o te whare, me te mea he tiki wīti mai tā rāua. Nā, patua iho ia ki te kōpū, ā, rere ana a Rekapa rāua ko tōna teina, ko Paana.
2SA 4:7 I tō rāua haerenga hoki ki te whare, i te takoto tērā i tōna whare moenga; nā, patua ana ia e rāua, whakamatea iho. Nā, tangohia ana tōna upoko, ā, mauria ana tōna upoko. Nā, pau katoa taua pō i a rāua e haere ana nā te ara o te mānia.
2SA 4:8 Nā, kawea ana e rāua te upoko o Ihipohete ki a Rāwiri ki Heperona, ā, ka mea ki te kīngi, “Nanā, te mātenga o Ihipohete tama a Haora, o tōu hoariri i whai nei kia whakamatea koe. Nā, kua mea nei a Ihowā i tōku ariki, i te kīngi kia whai utu i tēnei rā i a Haora rātou ko ōna uri.”
2SA 4:9 Nā, ka whakahoki a Rāwiri ki tā Rekapa rāua ko tōna teina, ko Paana, ki tā ngā tama a Rimono Peeroti, ka mea ia ki a rāua, “E ora ana a Ihowā i whakaora nei i tōku wairua i roto i ngā hē katoa,
2SA 4:10 i te kōrerotanga mai a tētahi ki ahau, i te meatanga, ‘Nanā, kua mate a Haora,’ tohu noa ia he kaikawe mai ia i ngā kōrero pai, hopukia ana ia e ahau, patua iho ki Tikiraka; ko te utu tērā i hoatu e ahau mō tāna kōrero.
2SA 4:11 Tēnā ko tēnei, ka patu te hunga kino i te tangata tika i roto i tōna whare, i runga anō i tōna moenga, e kore ianei ahau e rapu i ōna toto āianei i ō kōrua ringa, e huna hoki i a kōrua i runga i te whenua?”
2SA 4:12 Nā, whakahaua ana ngā taitamariki e Rāwiri, ā, patua ana rāua e rātou, tapahia ana hoki ō rāua ringa me ō rāua waewae, whakairihia ake ki runga i te poka wai i Heperona. Ko te upoko ia o Ihipohete i tangohia, i tanumia ki te tanumanga o Āpanēre ki Heperona.
2SA 5:1 Kātahi ka haere ngā iwi katoa o Īharaira ki a Rāwiri, ki Heperona, ā, ka kōrero, ka mea, “Tēnei mātou he wheua nōu, he kikokiko nōu.
2SA 5:2 Ā, i mua ake nei, i te mea ko Haora tō mātou kīngi, ko koe te kaikawe atu, te kaikawe mai i a Īharaira. Kua kōrerotia anō koe e Ihowā: ‘Ko koe hei hēpara mō tāku iwi, mō Īharaira; ko koe anō hei rangatira mō Īharaira.’ ”
2SA 5:3 Nā, ka haere ngā kaumātua katoa o Īharaira ki te kīngi, ki Heperona, ā, ka whakaritea he kawenata e te kīngi, e Rāwiri, ki a rātou ki Heperona, ki te aroaro o Ihowā; ā, whakawahia ana e rātou a Rāwiri hei kīngi mō Īharaira.
2SA 5:4 E toru tekau ngā tau o Rāwiri i tōna meatanga hei kīngi, ā, e whā tekau ngā tau i kīngi ai ia.
2SA 5:5 E whitu ngā tau e ono ngā marama i kīngi ai ia i roto i a Hūrā ki Heperona; e toru tekau mā toru ngā tau i kīngi ai ia i roto i a Īharaira katoa rāua ko Hūrā ki Hiruhārama.
2SA 5:6 Nā, ka haere te kīngi rātou ko āna tāngata ki Hiruhārama, ki te tū ki ngā Iepuhi e noho ana i taua whenua, nāna rā te kōrero ki a Rāwiri, te mea, “E kore koe e tae mai ki konei ki te kāhore koe e pei i ngā matapō, i ngā kopa,” hua noa, “e kore e taea atu a reira e Rāwiri.”
2SA 5:7 He ahakoa rā riro ana i a Rāwiri te pourewa i Hiona; ko te pā hoki tērā o Rāwiri.
2SA 5:8 I mea hoki a Rāwiri i taua rā, “Ko te tangata māna e patu ngā Iepuhi, kia taea rawatia e ia te rerenga wai, ka patu ai i ngā kopa me ngā matapō e kinongia nei e te wairua o Rāwiri.” Nō reira i mea ai rātou, “Tērā ngā matapō me ngā kopa; e kore ia e tomo mai ki te whare.”
2SA 5:9 Nā, ka noho a Rāwiri ki te pourewa, ā, huaina ana a reira, ko te pā o Rāwiri. I hangā anō e Rāwiri ā tawhio noa, ō Miro mai anō, ā, haere whakaroto.
2SA 5:10 Nā, ka tino nui haere a Rāwiri; i a ia anō a Ihowā, te Atua o ngā mano.
2SA 5:11 Nā, ka ungā he karere e Hīrama kīngi o Tāira ki a Rāwiri, me ētahi rākau, he hīta, me ngā kaimahi rākau, me ngā kaimahi o ngā kōhatu whare; ā, nā rātou i hanga he whare mō Rāwiri.
2SA 5:12 Nā, ka mōhio a Rāwiri kua whakapūmautia ia e Ihowā hei kīngi mō Īharaira, ā, kua whakanuia e ia tōna kīngitanga, he whakaaro hoki ki tāna iwi, ki a Īharaira.
2SA 5:13 Nā, ka tango anō a Rāwiri i ētahi wāhine iti māna, me ētahi wāhine tupu i Hiruhārama, i muri i tōna haerenga mai i Heperona. Nā, ka whānau anō he tama, he tamāhine mā Rāwiri.
2SA 5:14 Ko ngā ingoa ēnei o āna i whānau ki Hiruhārama; ko Hāmua, ko Hōpapa, ko Nātana, ko Horomona,
2SA 5:15 ko Ipihara, ko Erihua; ko Nepeke, ko Iāpia;
2SA 5:16 ko Erihama, ko Eriara, ko Eriperete.
2SA 5:17 Ā, nō te rongonga o ngā Pirihitini kua whakawahia a Rāwiri hei kīngi mō Īharaira, ka haere ngā Pirihitini katoa ki te rapu i a Rāwiri, ā, ka rongo a Rāwiri, nā, haere ana ia ki te pourewa.
2SA 5:18 Nā, kua tae mai ngā Pirihitini, kua tohatoha i a rātou ki te raorao o Repaima.
2SA 5:19 Nā, ka ui a Rāwiri ki a Ihowā, ka mea, “Me haere rānei ahau ki runga ki ngā Pirihitini? E hōmai rānei rātou e koe ki tōku ringa?” Ka mea a Ihowā ki a Rāwiri, “Haere, ka tino hoatu hoki e ahau ngā Pirihitini ki tōu ringa.”
2SA 5:20 Nā, ko te haerenga o Rāwiri ki Paara-Peratimi, patua iho rātou i reira e Rāwiri. Nā, ka mea ia, “Pakaru ana i a Ihowā ōku hoariri i tōku aroaro, koia anō kei te pākaruhanga wai.” Nā reira i huaina ai te ingoa o taua wāhi, ko Paara Peratimi.
2SA 5:21 I mahue anō i a rātou ā rātou whakapakoko i reira, ā, maua atu ana e Rāwiri rātou ko āna tāngata.
2SA 5:22 Nā, ka haere ake anō ngā Pirihitini, ā, tohatoha ana i a rātou ki te raorao o Repaima.
2SA 5:23 Nā, ka ui a Rāwiri ki a Ihowā, ā, ka mea mai ia, “Kaua e haere ki runga; engari me haere āwhio atu ki muri i a rātou, ka whakaputa ai ki a rātou i te ritenga atu o ngā rākau maperi.
2SA 5:24 Ā, ka rangona e koe he haruru haere i ngā kōuru o ngā maperi, ko reira koe korikori ai; nō te mea ko te haerenga atu tēnā o Ihowā i tōu aroaro ki te patu i te ope o ngā Pirihitini.”
2SA 5:25 Nā, pērātia ana e Rāwiri me tā Ihowā i whakahau ai ki a ia; ā, patua iho e ia ngā Pirihitini i Kepa ā tae noa koe ki Katere.
2SA 6:1 Nā, ka huihuia anō e Rāwiri te hunga whiriwhiri katoa o Īharaira e toru tekau mano.
2SA 6:2 Ā, ka whakatika a Rāwiri rātou ko tōna nuinga katoa, haere ana i Paare o Hūrā, tīkina ana i reira te āka a Ihowā, e huaina nei ki te Ingoa, arā ki te ingoa o Ihowā o ngā mano, e noho nei i waenganui o ngā kerupima.
2SA 6:3 Nā, ka whakanohoia e rātou te āka a te Atua ki runga ki te kāta hou, ā, mauria ana i te whare o Apinarapa i Kipea. Ā, nā Uha rāua ko Ahio, nā ngā tama a Apinarapa, i ārahi te kāta hou.
2SA 6:4 Nā, kawea ana i te whare o Apinarapa i Kipea, me te haere tahi anō rātou ko te āka a te Atua; i haere anō a Ahio i mua i te āka.
2SA 6:5 Nā, ka tākaro a Rāwiri rātou ko te whare katoa o Īharaira ki te aroaro o Ihowā, me te whakatangi anō i ā rātou mea katoa he kauri nei te rākau, i ngā hāpa, i ngā hātere, i ngā timipera, i ngā koronete, i ngā himipora.
2SA 6:6 Ā, ka tae ki te patunga wīti a Nakono, ka totoro a Uha ki te āka a te Atua, ā, puritia ana e ia; i paheke hoki ngā kau.
2SA 6:7 Nā, ka mura te riri o Ihowā ki a Uha, ā, patua iho ia i reira e te Atua mō tōna hē, ā, mate ake i reira i te taha o te āka a te Atua.
2SA 6:8 Nā, ka pōuri a Rāwiri mō tā Ihowā tukitukinga i a Uha; nā, huaina ana taua wāhi e ia, ko Pereteuha; koia anō tēnā ināianei.
2SA 6:9 Nā, ka wehi a Rāwiri i a Ihowā i taua rā, ka mea, “Mā te aha e tae ake ai te āka a Ihowā ki ahau.”
2SA 6:10 Heoi, kīhai a Rāwiri i pai ki te tango i te āka a Ihowā ki a ia, ki te pā o Rāwiri. Nā, kawea kētia ana e Rāwiri ki te whare o Opere-Eroma Kiti.
2SA 6:11 E toru ngā marama i noho ai te āka a Ihowā ki te whare o Opere-Eroma Kiti; ā, ka manaakitia e Ihowā a Opere-Eroma rātou ko tōna whare katoa.
2SA 6:12 Ā, ka kōrerotia te kōrero ki a Kīngi Rāwiri, “Kua manaakitia e Ihowā te whare o Opere-Eroma me āna mea katoa, he whakaaro ki te āka a te Atua.” Nā, ka haere a Rāwiri, ā, kawea ana e ia te āka a te Atua, i te whare o Opere-Eroma ki runga, ki te pā o Rāwiri, me te koa anō ia.
2SA 6:13 Ā, ka ono ngā hīkoinga i hīkoi ai ngā kaiamo i te āka a Ihowā, nā, ka patua e ia ētahi kau me tētahi mea mōmona.
2SA 6:14 Nā, ka whakapaua katoatia tōna kaha e Rāwiri ki te kanikani ki te aroaro o Ihowā; i whītikiria anō he epora rīnena ki a Rāwiri.
2SA 6:15 Heoi, ka kawea te āka a Ihowā e Rāwiri rātou ko te whare katoa o Īharaira, me te hāmama anō rātou, me te tangi anō te tētere.
2SA 6:16 Ā, i te taenga o te āka a Ihowā ki te pā o Rāwiri, nā, ka titiro a Mikara, tamāhine a Haora nā te matapihi, ā, ka kite i a Kīngi Rāwiri e tūpekepeke ana, e kanikani ana i te aroaro o Ihowā, ā, whakahāwea ana ia ki a ia i roto i tōna ngākau.
2SA 6:17 Nā, ka kawea e rātou te āka a Ihowā, ā, whakatūria ana ki tōna wāhi, ki waenganui o te tapenākara i whakaarahia e Rāwiri mōna; nā, ka tāpaea e Rāwiri ētahi tahunga tinana ki te aroaro o Ihowā, me ētahi whakahere mō te pai.
2SA 6:18 Ā, nō ka mutu tā Rāwiri tāpae i ngā tahunga tinana, i ngā whakahere mō te pai, ka manaakitia e ia te iwi runga i te ingoa o Ihowā o ngā mano.
2SA 6:19 I tuwhaina anō e ia mā te iwi katoa, mā te huihui katoa o Īharaira mā te tāne, mā te wahine, kotahi keke taro mā tēnei, mā tēnei, me tētahi wāhi kikokiko, me tētahi keke karepe maroke. Nā, haere ana te iwi katoa ki tōna whare, ki tōna whare.
2SA 6:20 Kātahi a Rāwiri ka hoki ki te manaaki i tōna whare; ā, ka puta a Mikara, tamāhine a Haora ki te whakatau i a Rāwiri, ā, ka mea, “Anō te korōria o te kīngi o Īharaira ināianei, i whakakite kirikau nei i a ia inākuanei ki ngā kanohi o ngā pononga wāhine a āna tāngata, pērā i tētahi o te hunga wairangi e whakakite nui ana i a ia!”
2SA 6:21 Nā, ka mea a Rāwiri ki a Mikara, “I te aroaro rā o Ihowā i whiriwhiri nei i ahau, i kape nei i tōu pāpā, me tōna whare katoa, i whakarite hoki i ahau hei rangatira mō te iwi a Ihowā, mō Īharaira; koia ahau ka tākaro ki te aroaro o Ihowā.
2SA 6:22 Nā, ka nui atu anō i tēnei tōku wairangi, ā, ka iti iho ahau ki tāku titiro; ko ngā pononga wāhine ia i kīia mai nā e koe, ka whakahōnoretia ahau e rātou.”
2SA 6:23 Nā, kāhore he tamariki a Mikara tamāhine a Haora ā taea noatia te rā i mate ai ia.
2SA 7:1 Ā, i te kīngi e noho ana i tōna whare, ā, ka meinga ia e Ihowā kia okioki i ōna hoariri katoa ā tawhio noa,
2SA 7:2 nā, ka mea te kīngi ki a Nātana poropiti, “Nā, titiro, kei te noho nei ahau i te whare hīta, ko te āka ia a te Atua e noho ana i roto i te kākahu.”
2SA 7:3 Nā, ka mea a Nātana ki te kīngi, “Haere meatia ngā mea katoa i tōu ngākau; kei a koe hoki a Ihowā.”
2SA 7:4 Nā, i taua pō anō ka puta te kupu a Ihowā ki a Nātana, ka mea:
2SA 7:5 “Haere, mea atu ki tāku pononga, ki a Rāwiri: ‘Ko te kupu tēnei a Ihowā: Māu koia e hanga he whare hei nohoanga mōku?
2SA 7:6 Kāhore nei hoki ahau i noho whare nō te rā anō i kawea mai ai e ahau ngā tama a Īharaira i Īhipa ā taea noatia tēnei rā; he noho haere ia tōku i roto i te tēneti, i te tapenākara.
2SA 7:7 I ōku hāereerenga katoa i roto i ngā tamariki katoa a Īharaira, i puaki rānei tētahi kupu āku ki tētahi o ngā iwi o Īharaira i whakaritea e ahau hei hēpara mō tāku iwi, mō Īharaira, i mea rānei ahau, “He aha koutou tē hanga ai i tētahi whare hīta mōku?” ’
2SA 7:8 “Nā, tēnā kia pēnei tāu kī āianei ki tāku pononga ki a Rāwiri, ‘Ko te kupu tēnei a Ihowā o ngā mano: Nāku koe i tango mai i te nohoanga hipi, i te whai hipi, hei rangatira mō tāku iwi, mō Īharaira.
2SA 7:9 I a koe anō ahau i ōu haerenga katoa, hautopea atu ana e ahau ōu hoariri katoa i tōu aroaro, ā, meinga ana koe e ahau hei ingoa nui, hei pērā anō me te ingoa o ngā mea nunui o te whenua.
2SA 7:10 “ ‘Nā, māku e whakarite he wāhi mō tāku iwi, mō Īharaira, ā, ka whakatōkia rātou e ahau kia noho ki tō rātou ake wāhi, kia kore e nekehia ā muri ake nei; kia mutu ai te tūkino a ngā tamariki a te kino i a rātou, kei pērā me tō mua,
2SA 7:11 me tō te wā i whakaritea ai e ahau he kaiwhakarite mō tāku iwi, mō Īharaira, i meinga ai hoki koe kia okioki i ōu hoariri katoa. “ ‘Nā, ko tā Ihowā kupu tēnei ki a koe: Mā Ihowā e hanga he whare mōu.
2SA 7:12 Ā, ka tutuki ōu rā, ā, ka moe ki ōu mātua, ā, ka whakaarahia e ahau i muri i a koe tōu whānau e puta mai i roto i ōu whēkau, ā, ka whakapūmautia tōna kīngitanga.
2SA 7:13 Māna e hanga he whare mō tōku ingoa, ā, ka whakapūmautia e ahau te torōna o tōna kīngitanga ā ake ake.
2SA 7:14 Ko ahau hei matua ki a ia, ko ia hei tama ki ahau. “ ‘Ki te ngau kē tāna mahi, ka whiu ahau i a ia ki te whiu a te tangata, ki ngā whakapānga a ngā tama a te tangata.
2SA 7:15 E kore ia e mutu tōku aroha ki a ia, e kore e pērā me tōku ki a Haora i peia atu nā e ahau i tōu aroaro.
2SA 7:16 Ka tūturu tonu hoki tōu whare me tōu kīngitanga ā ake ake, ki tōu aroaro; ka mau tonu tōu torōna ā ake ake.’ ”
2SA 7:17 Rite tonu ki ēnei kupu katoa, ki tēnei kitenga katoa, ngā kupu a Nātana ki a Rāwiri.
2SA 7:18 Kātahi a Kīngi Rāwiri ka haere, ā, noho ana ki te aroaro o Ihowā, ka mea: “Ko wai ahau, e te Ariki, e Ihowā? He aha hoki tōku whare, i kawea mai ai ahau e koe ā mohoa noa nei?
2SA 7:19 He mea iti anō tēnei ki tāu titiro, e te Ariki, e Ihowā, nā, kua kōrerotia nei e koe te whare o tāu pononga mō ngā tau e maha. Ko tā te tangata tikanga rānei tēnei, e te Ariki, e Ihowā?
2SA 7:20 “Nā, ko te aha ake hei kōrerotanga mā Rāwiri ki a koe? E mōhio ana hoki koe, e te Ariki, e Ihowā, ki tāu pononga.
2SA 7:21 He whakaaro ki tāu kupu, nā tōu ngākau anō, i mea ai koe i ēnei mea nunui katoa, kia mōhio ai tāu pononga.
2SA 7:22 “Nā, he nui koe, e Ihowā, e te Atua; kāhore hoki he rite mōu, kāhore atu hoki he Atua; ko koe anake; e rite ana ki ngā mea katoa i rongo ai ō mātou taringa.
2SA 7:23 Ko tēhea iwi kotahi hoki o te whenua hei rite mō tāu iwi, arā mō Īharaira, i haere nei te Atua ki te hoko hei iwi māna ake, hei mea ingoa mōna, ki te mahi anō i ngā mea nunui mōu, i ngā mea whakamataku hoki mō tōu whenua, i te aroaro o tāu iwi i hokona nei e koe māu i Īhipa, i ngā tauiwi, i ō rātou atua anō hoki?
2SA 7:24 Kua whakapūmautia nei hoki e koe māu tāu iwi, a Īharaira, hei iwi māu ā ake ake; ā, ko koe hoki, e Ihowā, hei Atua mō rātou.
2SA 7:25 “Nā, whakamanā hoki āianei, e Ihowā, e te Atua, te kupu i kōrerotia e koe mō tāu pononga rātou ko tōna whare ā ake ake, meatia anō tāu i kōrero ai.
2SA 7:26 Kia whakanuia anō tōu ingoa ā ake ake, kia kōrerotia, ‘Ko Ihowā o ngā mano te Atua o Īharaira.’ Kia tūturu tonu anō te whare o tāu pononga, o Rāwiri, ki tōu aroaro.
2SA 7:27 “Nāu nei hoki, e Ihowā o ngā mano, e te Atua o Īharaira, i whakapuaki mai ki tāu pononga, i mea, ‘Ka hangā e ahau he whare mōu.’ Koia te ngākau o tāu pononga i anga ai ki te īnoi i tēnei īnoi ki a koe.
2SA 7:28 Nā, ko koe hoki, e te Ariki, e Ihowā, taua Atua nei, he pono hoki āu kupu, ā, kua kōrerotia e koe tēnei mea pai ki tāu pononga.
2SA 7:29 Nā reira kia pai koe ki te manaaki i te whare o tāu pononga, kia pūmau tonu ai ki tōu aroaro; nāu hoki e Ihowā, e te Atua, te kupu; ā, hei tāu manaaki te manaaki mō te whare o tāu pononga ā ake ake.”
2SA 8:1 Nā, muri iho ka patua ngā Pirihitini e Rāwiri, ā, hinga ana rātou i a ia; ā, tangohia ana e Rāwiri a Metekeama i te ringa o ngā Pirihitini.
2SA 8:2 I patua anō e ia a Moapa, ā, rūritia ana rātou ki te aho; ā, meinga ana rātou kia takoto ki te whenua; nā, e rua ngā aho i rūritia e ia mō te whakamate, kotahi tino aho mō te whakaora. Nā, ka riro ngā Moapi hei pononga mā Rāwiri, hei kaihōmai hākari.
2SA 8:3 I patua anō e Rāwiri a Hararētere tama a Rehopo kīngi o Topa, i tōna haerenga ki te whakahoki mai i tōna rohe i te awa, i Uparati.
2SA 8:4 Nā, i riro mai i a Rāwiri, kotahi mano e whitu rau hoki ngā hōia eke hōiho, e rua tekau mano ngā tāngata haere i raro. Nā, whakangongea ana e Rāwiri ngā hōiho o ngā hāriata katoa; i whakatoea ia ētahi mō ngā hāriata kotahi rau.
2SA 8:5 Ā, nō te haerenga mai o ngā Hīriani o Ramahiku ki te whakauru ki a Hararētere kīngi o Topa, patua iho e Rāwiri o ngā Hīriani e rua tekau mā rua mano tāngata.
2SA 8:6 I whakanohoia anō e Rāwiri ētahi hōia pupuri ki Hīria o Ramahiku; ā, ka waiho ngā Hīriani hei pononga hōmai hākari mā Rāwiri. Nā, whakaorangia ana a Rāwiri e Ihowā i ōna haerenga katoa.
2SA 8:7 I tangohia anō e Rāwiri ngā pukupuku kōura a ngā tāngata a Hararētere, ā, kawea ana ki Hiruhārama.
2SA 8:8 Ā, nui atu te parāhi i tangohia e Kīngi Rāwiri i Petaha, i Perotai, i ngā pā o Hararētere.
2SA 8:9 Ā, i te rongonga o Toi kīngi o Hāmata kua patua e Rāwiri te ope katoa a Hararētere,
2SA 8:10 kātahi ka tono a Toi i a Iorama, i tāna tama ki a Kīngi Rāwiri ki te oha ki a ia, ki te manaaki hoki i a ia. Mōna i whawhai ki a Hararētere, i patu hoki i a ia; he hoariri hoki a Hararētere nō Toi. I te ringa anō o Iorama ētahi mea hiriwa, mea kōura, mea parāhi.
2SA 8:11 Whakatapua ake ērā e Kīngi Rāwiri mā Ihowā hei tāpiri mō te hiriwa, mō te kōura i whakatapua e ia, ā, ngā iwi katoa i hinga nei i a ia;
2SA 8:12 a Hīria, a Moapa, a ngā tamariki a Āmona, a ngā Pirihitini, a Amareke, me ngā taonga o Hararētere tama a Rehopo, kīngi o Topa.
2SA 8:13 Nā, ka whai ingoa a Rāwiri i tōna hokinga mai i te patu i ngā Hīriani i te Raorao Tote, arā kotahi tekau mā waru mano tāngata.
2SA 8:14 Ā, i whakanohoia e ia ētahi hōia pupuri ki Ēroma; he mea whakanoho puta noa i Ēroma katoa āna hōia pupuri, ā, ka meinga ngā Ēromi katoa hei pononga mā Rāwiri. Ā, whakaorangia ana a Rāwiri e Ihowā i ōna haerenga katoa.
2SA 8:15 Nā, ko Rāwiri te kīngi o Īharaira katoa; ā, i whakarite anō a Rāwiri i te whakawā, i te tika, mō tōna iwi katoa.
2SA 8:16 Ko Ioapa tama a Teruia hoki te rangatira ope, ko Iehohāpata tama a Ahiruru te kaiwhakamahara.
2SA 8:17 Ko Hāroko tama a Ahitupu, rāua ko Ahimereke tama a Apiātara, ngā tohunga; ko Heraia hoki te kaituhituhi;
2SA 8:18 ko Penaia tama a Iehoiara te rangatira mō ngā Kereti, mō ngā Pereti; ko ngā tama ia a Rāwiri ngā tino rangatira.
2SA 9:1 Nā, ka mea a Rāwiri, “Kāhore rānei he mōrehu ināianei o te whare o Haora, kia puta ai tōku aroha ki a ia, he mea hoki nāku ki a Honatana?”
2SA 9:2 Nā, he pononga tērā nō te whare o Haora, ko tōna ingoa ko Tipa. Nā, ka karangatia ia ki a Rāwiri, ā, ka mea te kīngi ki a ia, “Ko Tipa koe?” Ka mea tērā, “Tēnei tāu pononga.”
2SA 9:3 Nā, ka mea te kīngi, “Kāhore ianei tētahi o te whare o Haora, kia whakaputaina ai e ahau tō te Atua aroha ki a ia?” Nā, ka mea a Tipa ki te kīngi, “Tēnei anō tētahi tama a Honatana, he kopa ngā waewae.”
2SA 9:4 Nā, ka mea te kīngi ki a ia, “Kei hea?” Ka mea a Tipa ki te kīngi, “Nā, kei te whare o Makiri, tama a Amiere, kei Rotepara.”
2SA 9:5 Kātahi a Kīngi Rāwiri ka unga tāngata ki te tiki i a ia i te whare o Makiri, tama a Amiere, i Rotepara.
2SA 9:6 Ā, ka tae mai a Mepipohete tama a Honatana tama a Haora ki a Rāwiri, ka tāpapa, ka piko. Nā, ka mea a Rāwiri, “E Mepipohete.” Anō rā ko tērā, “Tēnei tāu pononga.”
2SA 9:7 Nā, ka mea a Rāwiri ki a ia, “Kaua e wehi; ka puta hoki tōku aroha ki a koe, he whakaaro hoki ki a Honatana ki tōu pāpā, me whakahoki anō e ahau ki a koe te māra katoa a Haora, a tōu pāpā; me kai taro tonu anō koe ki tāku tēpu.”
2SA 9:8 Nā, ka piko iho ia, ka mea, “He aha tāu pononga, i titiro mai ai koe ki tēnei kurī mate, i ahau nei?”
2SA 9:9 Kātahi ka karanga te kīngi ki a Tipa, ki te tangata a Haora, ka mea ki a ia, “Ko ngā mea katoa a Haora i mua, a tōna whare katoa hoki, kua hoatu e ahau ki te tama a tōu ariki.
2SA 9:10 Ko koe hoki hei kaimahi māna i te oneone, koutou ko āu tama, ko āu pononga, ka kohi ai i ngā hua; ā, ka whai taro te tama a tōu ariki hei kai māna. Ko Mepipohete ia ko te tama a tōu ariki, me kai taro tonu ia ki tāku tēpu.” (Nā, kotahi tekau mā rima ngā tama a Tipa, e rua tekau ngā pononga.)
2SA 9:11 Kātahi ka mea a Tipa ki te kīngi, “Ka rite tā tāu pononga e mea ai ki ngā mea katoa i whakahaua mai e tōku ariki, e te kīngi, ki tāna pononga.” Ko Mepipohete ia e ai tā te kīngi me kai ki tāku tēpu; ka rite ki tētahi o ngā tama a te kīngi.
2SA 9:12 Nā, he tama tā Mepipohete he mea nohinohi, ko tōna ingoa ko Mika; he pononga anō nā Mepipohete te hunga katoa e noho ana i te whare o Tipa.
2SA 9:13 Heoi, noho ana a Mepipohete ki Hiruhārama; i kai tonu hoki ia ki te tēpu a te kīngi; he kopa anō ōna waewae e rua.
2SA 10:1 Nā, i muri i tēnei, ka mate te kīngi o ngā tamariki a Āmona, ā, ko Hanunu, ko tāna tama te kīngi i muri i a ia.
2SA 10:2 Nā, ka mea a Rāwiri, “Ka puta tōku aroha ki a Hanunu tama a Nahaha, ka rite ki te aroha o tōna pāpā i puta rā ki ahau.” Nā, tonoa ana e Rāwiri āna tāngata hei kawe i tāna whakamārie ki a ia mō tōna pāpā. Nā, ka tae ngā tāngata a Rāwiri ki te whenua o ngā tama a Āmona.
2SA 10:3 Nā, ka mea ngā rangatira o ngā tamariki a Āmona ki a Hanunu, ki tō rātou ariki, “Ki tōu whakaaro he whakahōnore nā Rāwiri i tōu pāpā i tonoa mai e ia ngā kaiwhakamārie ki a koe? He teka ianei he titiro i te pā, he tūtei, he whakangaro te mea i tonoa mai ai e Rāwiri āna tāngata ki a koe?”
2SA 10:4 Heoi, ka mau a Hanunu ki ngā tāngata a Rāwiri, ā, heua ana e ia tētahi taha o ō rātou pāhau, tapahia ana ō rātou kākahu ki waenga ā tae noa ki ō rātou papa, ā, tonoa atu ana rātou.
2SA 10:5 Ā, nō te kōrerotanga o taua mea ki a Rāwiri, ka tono tāngata ia ki te whakatau i a rātou; he nui hoki te whakamā o aua tāngata; i mea anō te kīngi, “Hei Heriko noho ai, kia tupu rā anō ō koutou pāhau, ka hoki mai ai.”
2SA 10:6 Ā, nō te kitenga o ngā tamariki a Āmona e whakahouhou ana rātou ki a Rāwiri, ka tono tāngata ngā tamariki a Āmona hei utu i ngā Hīriani o Peterehopo, i ngā Hīriani anō o Topa, e rua tekau mano, he hunga haere i raro, i te kīngi anō o Maaka, kotahi mano tāngata, i tō Ihitopo, kotahi tekau mā rua mano tāngata.
2SA 10:7 Ā, nō te rongonga o Rāwiri, ka tonoa e ia a Ioapa me te ope katoa o ngā mārohirohi.
2SA 10:8 Nā, ka puta ngā tama a Āmona ki waho, ā, whakatakotoria ana ā rātou ngohi ki te tomokanga atu o te kūwaha; ā, ko ngā Hīriani o Topa, o Rehopo, me o Ihitopo, o Maaka, ko rātou anake i te pārae.
2SA 10:9 Nā, i te kitenga o Ioapa e ākina ana a mua, a muri, ōna e te hoariri, ka whiriwhiria e ia ētahi o ngā tino tāngata katoa o Īharaira, ā, whakaritea ana e ia hei tū ki ngā Hīriani.
2SA 10:10 Ko te nuinga atu hoki o te iwi i tukua e ia ki te ringa o Āpihai, o tōna teina, ā, whakatikaia ana e tērā hei tū ki ngā tama a Āmona.
2SA 10:11 I mea anō ia, “Ki te kaha atu ngā Hīriani i ahau, nā, me āwhina mai ahau e koe; ki te kaha atu ia ngā tama a Āmona i a koe, nā, me haere atu ahau ki te āwhina i a koe.
2SA 10:12 Kia māia, kia whakatangata hoki tātou mō tō tātou iwi, mō ngā pā hoki o tō tātou Atua; ā, mā Ihowā e mea te mea i pai ki a ia.”
2SA 10:13 Nā, ka whakatata atu a Ioapa rātou ko tōna nuinga ki te whawhai ki ngā Hīriani, ā, rere ana rātou i tōna aroaro.
2SA 10:14 Ā, nō te kitenga o ngā tama a Āmona kua rere ngā Hīriani, ka rere anō rātou i te aroaro o Āpihai, ā, haere ana ki te pā. Nā, hoki ana a Ioapa i ngā tama a Āmona, ā, haere ana ki Hiruhārama.
2SA 10:15 Ā, i te kitenga o ngā Hīriani kua patua rātou e Īharaira, ka huihui rātou.
2SA 10:16 Ā, ka tono tāngata a Hararētere ki te tiki i ngā Hīriani i tāwāhi o te awa; ā, haere mai ana rātou ki Herama, ko Hopaka hoki, ko te rangatira o te ope a Hararētere ki mua i a rātou.
2SA 10:17 Ā, ka kōrerotia ki a Rāwiri; ā, ka huihuia e ia a Īharaira katoa, ā, whiti ana ki tērā taha o Horano haere ana ki Herama. Nā, ka whakatikaia e ngā Hīriani ō rātou ngohi hei tū i a Rāwiri, ka whawhai ki a ia.
2SA 10:18 Nā, ka rere ngā Hīriani i te aroaro o Īharaira; ā, patua iho o ngā Hīriani e Rāwiri ngā tāngata o ngā hāriata e whitu rau, e whā tekau mano anō ngā hōia eke hōiho; i patua anō e ia a Hopaka, te rangatira o tō rātou ope, ā, mate iho ia ki reira.
2SA 10:19 Ā, nō ka kite ngā kīngi katoa, ngā apa o Hararētere, kua patua rātou e Īharaira, ka houhia e rātou te rongo ki a Īharaira, ā, ka meinga hei apa mō rātou. Heoi, wehi ana ngā Hīriani, ā mutu ake tā rātou āwhina i ngā tama a Āmona.
2SA 11:1 Ā, i te takanga o te tau, i te wā anō e haere ai ngā kīngi ki te whawhai, nā, ka ungā e Rāwiri a Ioapa rātou ko āna tāngata, ko Īharaira katoa; ā, hunā iho e rātou ngā tama a Āmona, whakapaea ana a Rapa. Ko Rāwiri ia i noho ki Hiruhārama.
2SA 11:2 Ā, i te mea ka ahiahi, nā, ka maranga ake a Rāwiri i tōna moenga, ā, hāereere ana i runga i te tuanui o te whare o te kīngi. Nā, ka kitea iho e ia i te tuanui tētahi wahine e kaukau ana; he ātaahua rawa anō te wahine ki te titiro atu.
2SA 11:3 Nā, ka tono tāngata te kīngi, ā, ka i ui mō taua wahine. Nā, ko te meatanga, “Ehara ianei tēnei i a Patehēpa tamāhine a Eriama, ko te wahine ia a Uria Hiti.”
2SA 11:4 Nā, ka ungā ētahi karere e Rāwiri ki te tiki i a ia; ā, ka haere mai ia ki a ia; ā, takoto tahi ana rāua. (Kua oti hoki tōna poke te pure.) Ā, hoki ana ki tōna whare.
2SA 11:5 Nā, ka hapū te wahine, ā, ka tono tangata ki a Rāwiri, ka mea, “Kua hapū ahau.”
2SA 11:6 Nā, ka tono tangata a Rāwiri ki a Ioapa, ka mea, “Tēnā a Uria Hiti tonoa mai ki ahau.” Nā, tonoa ana e Ioapa a Uria ki a Rāwiri.
2SA 11:7 Ā, i te taenga mai o Uria ki a ia, ka ui a Rāwiri i pēhea a Ioapa, i pēhea, hoki te iwi, ā, i pēhea te whawhai.
2SA 11:8 Nā, ka mea a Rāwiri ki a Uria, “Haere ki raro, ki tōu whare ki te horoi i ōu waewae.” Nā, ka puta a Uria i te whare o te kīngi; ā, i maua i muri i a ia tētahi kai a te kīngi.
2SA 11:9 Otiia moe ana a Uria ki te tatau o te whare o te kīngi i roto i ngā tāngata katoa a tōna ariki, kīhai hoki i haere ki raro, ki tōna whare.
2SA 11:10 Ā, ka kōrerotia te kōrero ki a Rāwiri, “Kīhai a Uria i haere ki raro, ki tōna whare.” Nā, ka mea a Rāwiri ki a Uria, “He teka ianei kātahi anō koe ka tae mai i te haere? He aha koe tē haere ai ki raro, ki tōu whare?”
2SA 11:11 Nā, ka mea a Uria ki a Rāwiri, “Kei roto te āka i te tīhokahoka, me Īharaira, me Hūrā; kei te mata anō o te pārae tōku ariki, a Ioapa rātou ko ngā tāngata a tōku ariki e noho ana. Kia haere koia ahau ki tōku whare ki te kai, ki te inu, ki te takoto ki tāku wahine? E ora ana koe, e ora ana hoki tōu wairua, e kore tēnei mea e meatia e ahau.”
2SA 11:12 Nā, ka mea a Rāwiri ki a Uria, “E noho ki konei i tēnei rā anō, ā, āpōpō ahau unga ai i a koe.” Heoi, noho ana a Uria i taua rā, i te aonga ake anō, ki Hiruhārama.
2SA 11:13 Nā, ka karangatia ia e Rāwiri, ā, kai ana; ā, meinga ana e ia kia haurangi. Ā, i te ahiahi ka puta ki waho ki te takoto ki tōna takotoranga i roto i ngā tāngata a tōna ariki, kīhai hoki i haere ki raro, ki tōna whare.
2SA 11:14 Nā, i te ata ka tuhituhia he pukapuka e Rāwiri ki a Ioapa, ā, tonoa ana kia kawea e Uria.
2SA 11:15 I tuhituhi hoki ia ki te pukapuka, i mea “Me hoatu e koutou a Uria ki mua rawa, ki te wāhi e nui rawa ana te whawhai, ka hoki ai i muri i a ia, kia patua ai ia, kia mate ai.”
2SA 11:16 Nā, i a Ioapa e whakapae ana i te pā, ka hoatu e ia a Uria ki te wāhi i mōhio ai ia kei reira ngā toa.
2SA 11:17 Nā, ko te putanga atu o ngā tāngata o te pā ki te whawhai ki a Ioapa, ka hinga ētahi o te iwi, ētahi o ngā tāngata ake a Rāwiri; i mate anō a Uria Hiti.
2SA 11:18 Kātahi a Ioapa ka tono tāngata hei kōrero ki a Rāwiri i ngā mea katoa o te whawhai.
2SA 11:19 I ako anō ia i te karere, i mea, “E poto i a koe ngā mea katoa o te whawhai te kōrero ki te kīngi;
2SA 11:20 nā, ki te ara te riri o te kīngi, ā, ka mea ia ki a koe, ‘He aha koutou i whakatata rawa ai ki te pā tatau ai? Kāhore ianei koutou i mōhio ka kōpere mai rātou i te taiepa?
2SA 11:21 Nā wai a Apīmereke tama a Ierupehete i patu? He teka ianei nā te wahine i makā te wāhi o runga o te kōhatu huri ki runga ki a ia i te taiepa, ā, mate iho ia ki Tepehe? He aha koutou i whakatata atu ai ki te taiepa?’ Nā, mea atu, ‘Kua mate anō tāu pononga, a Uria Hiti.’ ”
2SA 11:22 Heoi, haere ana te karere, ā, ka tae, kōrerotia ana e ia ki a Rāwiri ngā mea katoa i ungā ai ia e Ioapa.
2SA 11:23 I mea hoki te karere ki a Rāwiri, “I kaha rawa mai aua tāngata ki a mātou, ā, puta mai ana ki a mātou ki te pārae. Nā, whakaekea atu ana e mātou, ā tae noa ki te kūwaha o te kēti.
2SA 11:24 Nā, ko te kōperenga mai a ngā kaikōpere i te taiepa ki āu tāngata, mate iho ētahi o ngā tāngata a te kīngi; ko tāu pononga hoki, ko Uria Hiti kua mate.”
2SA 11:25 Kātahi ka mea a Rāwiri ki te karere, “Kia pēnei tāu kī atu ki a Ioapa, ‘Kei hē tēnei mea ki tōu whakaaro, he kai noa iho hoki tā te hoari i tētahi, i tētahi; kia kaha tāu whawhai ki te pā, whakangaromia.’ Māu anō ia e whakatenatena.”
2SA 11:26 Ā, i te rongonga o te wahine a Uria kua mate tāna tahu a Uria, ka tangihia e ia tāna tahu.
2SA 11:27 Ā, ka pahemo te tangihanga, ka tono tāngata a Rāwiri ki te tiki i a ia ki tōna whare, ā, ka waiho hei wahine māna, ā, ka whānau tā rāua tama. Otiia i kino ki tā Ihowā titiro taua mea i mea ai a Rāwiri.
2SA 12:1 Nā, ka tonoa a Nātana e Ihowā ki a Rāwiri; ā, ka tae atu ia ki a ia, ka mea ki a ia, “Tokorua ngā tāngata i te pā kotahi; he taonga o tētahi, he rawakore tētahi.
2SA 12:2 He tini noa iho ngā hipi, ngā kau a te tangata taonga;
2SA 12:3 hore rawa ia he mea a te rawakore; heoi anō he reme uha kotahi nei, he mea nohinohi nāna i hoko mai i whāngai haere; ā, i tupu tahi ake rātou me āna tamariki. I kai tāna ake taro, i inu hoki i roto i tāna ake kapu, i takoto ki tōna uma; ā, i rite tonu he tamāhine ki a ia.
2SA 12:4 “Nā, ka tae he pahī ki te tangata taonga, ā, ka manawapā tērā ki te tango i tētahi o āna hipi, o āna kau, kia takā mā te manuhiri i haere mai ki a ia; heoi tangohia ana e ia te reme a te tangata rawakore, takā ana e ia mā te tangata i haere nei ki a ia.”
2SA 12:5 Ko te tino muranga o te riri o Rāwiri ki taua tangata, ka mea ki a Nātana, “E ora ana a Ihowā, e tika ana kia mate te tangata nāna tēnei mahi.
2SA 12:6 Ko te reme hoki, kia whā ana e hoatu ai hei utu; mōna i mea i tēnei mea, mōna hoki kīhai i aroha.”
2SA 12:7 Nā, ka mea a Nātana ki a Rāwiri, “Ko taua tangata rā, ko koe. Ko te kupu tēnei a Ihowā, a te Atua o Īharaira: ‘Nāku koe i whakawahi hei kīngi mō Īharaira, nāku hoki koe i whakaora i te ringa o Haora;
2SA 12:8 ā, hoatu ana e ahau te whare o tōu ariki ki a koe, me ngā wāhine a tōu ariki ki tōu uma; i hoatu anō e ahau te whare o Īharaira rāua ko Hūrā ki a koe; ā, mehemea i iti tēnei, kua tāpiritia atu e ahau māu ērā atu mea anō.
2SA 12:9 He aha koe i whakahāwea ai ki te kupu a Ihowā? I mea ai i tēnei kino i tāna tirohanga? Ko Uria Hiti i patua e koe ki te hoari, ā, tangohia ana tāna wahine hei wahine māu; ko ia hoki tukitukia ana e koe ki te hoari a ngā tama a Āmona.
2SA 12:10 Nā reira e kore te hoari e whakakorea atu āianei i roto i tōu whare ā ake ake, mōu i whakahāwea ki ahau, i tango hoki i te wahine a Uria Hiti hei wahine māu.’
2SA 12:11 “Ko te kupu tēnei a Ihowā: ‘Nanā, ka whakaara ahau i te kino mōu i roto i tōu whare, ā, ka tango i āu wāhine i tāu tirohanga, ka hoatu ki tōu hoa, nā, ka takotoria e ia āu wāhine i te tirohanga ā te rā i runga nei.
2SA 12:12 I meatia pukutia hoki tēnei mea e koe; ko ahau ia ka mea i tēnei mea ki mua i a Īharaira katoa, ki mua anō i te rā.’ ”
2SA 12:13 Nā, ka mea a Rāwiri ki a Nātana, “Kua hara ahau ki a Ihowā.” Ā, ka mea a Nātana ki a Rāwiri, “Kua kauparea atu anō tōu hara e Ihowā; e kore koe e mate.
2SA 12:14 Otirā, i te mea nā tēnei mahi āu i whai take nui ai ngā hoariri o Ihowā ki te kohukohu, he pono ka mate te tamaiti ka whānau nei ki a koe.”
2SA 12:15 Nā, haere ana a Nātana ki tōna whare. Ā, ka pākia e Ihowā te tamaiti a Rāwiri i whānau nei i te wahine a Uria; he nui hoki te mate.
2SA 12:16 Nā, ka īnoi a Rāwiri ki te Atua mō te tamaiti; ā, nohopuku ana a Rāwiri, haere ana ki roto, pau noa taua pō e takoto ana i te whenua.
2SA 12:17 Nā, ka whakatika ngā kaumātua o tōna whare ki a ia, ki te whakaara i a ia i te whenua; heoi kīhai ia i pai, kīhai hoki i kai tahi i tā rātou taro.
2SA 12:18 Nā, i te whitu o ngā rā ka mate te tamaiti. Ā, ka wehi ngā tāngata a Rāwiri ki te mea ki a ia kua mate te tamaiti; i mea hoki rātou, “Nā, i te mea e ora ana te tamaiti, i kōrero tātou ki a ia, ā, kīhai ia i whakarongo ki tō tātou reo. Nā, tērā noa ake te kino e mea ai ia ki a ia anō ki te kōrerotia e tātou ki a ia te matenga o te tamaiti.”
2SA 12:19 Otiia i kite a Rāwiri i āna tāngata e kōwhetewhete ana ki a rātou anō, ā, ka mōhio a Rāwiri kua mate te tamaiti. Nā, ka mea a Rāwiri ki āna tāngata, “Kua mate rānei te tamaiti?” Ā, ka mea rātou, “Kua mate.”
2SA 12:20 Kātahi a Rāwiri ka whakatika i te whenua, ka horoi i a ia, ka whakawahi i a ia, ka tango i ētahi kākahu kē mōna; ā, haere ana ki te whare o Ihowā ki te koropiko. Kātahi ka haere ia ki tōna whare. Nā, ka tonoa e ia, ā, ka whakatakotoria he taro māna, ā, kai ana ia.
2SA 12:21 Kātahi ka mea āna tāngata ki a ia, “He aha tēnei mea i mea nei koe? I nohopuku koe, i tangi ki te tamaiti i a ia e ora ana; nō te matenga ia o te tamaiti, nā, whakatika ana koe ki te kai taro.”
2SA 12:22 Anō rā ko ia, “I te tamaiti e ora ana anō, i nohopuku ahau, i tangi; i mea hoki, ‘Ko wai ka tohu, tērā pea a Ihowā ka aroha ki ahau, ā, ka ora te tamaiti?’
2SA 12:23 Ko tēnei, ka mate nei ia, kia nohopuku ahau hei aha? E taea rānei ia e ahau te whakahoki mai? Ko ahau e haere ki a ia, e kore ia e hoki mai ki ahau.”
2SA 12:24 Nā, ka whakamārie a Rāwiri i tāna wahine, i a Patehēpa, ā, haere ana ki roto, ki a ia, ā, takoto tahi ana rāua; ā, ka whānau anō ia, he tama, huaina iho tōna ingoa ko Horomona; i arohaina ia e Ihowā;
2SA 12:25 i tono hoki ia nā te ringa o Nātana poropiti, ā, nāna i hua tōna ingoa ko Teriria; he whakaaro hoki ki a Ihowā.
2SA 12:26 Ā, i whawhai anō a Ioapa ki Rapa o ngā tamariki a Āmona; ā, horo ana i a ia te pā kīngi.
2SA 12:27 Nā, ka tono tāngata a Ioapa ki a Rāwiri, ka mea, “Kua tauria a Rapa e ahau, āe rā, kua horo i ahau te pā o ngā wai.
2SA 12:28 Nā, tēnā, huihuia te nuinga o te iwi ki te whakapae i te pā, kia riro ai i a koe; kei riro mai te pā i ahau, ā, nōku te ingoa e huaina ki reira.”
2SA 12:29 Nā, huihuia ana te iwi katoa e Rāwiri, ā, haere ana ki Rapa; nā, tauria ana a reira e ia, ā, riro ana i a ia.
2SA 12:30 Tangohia ana e ia te karauna o tō rātou kīngi i tōna mātenga, ko tōna taimaha kotahi taranata kōura, ā, i roto ngā kōhatu utu nui; ā, pōtaea iho ki te mātenga o Rāwiri. Ā, i whakaputaina, e ia ngā taonga o te pā, tōna tini.
2SA 12:31 Nā, ko ngā tāngata i roto, whakaputaina ana e ia ki waho, ā, whakamahia ana ki ngā kani, ki ngā harou rino, ki ngā toki rino; i meinga anō rātou kia tīkā nā roto i te tahunga pereki. Ko tāna hoki tēnei i mea ai ki ngā pā katoa o ngā tamariki a Āmona. Nā, hoki ana a Rāwiri me te iwi katoa ki Hiruhārama.
2SA 13:1 Muri iho i ēnei mea, nā, he tuahine tō Apohārama tama a Rāwiri, ko Tāmara te ingoa, he ātaahua; ā, i arohaina ia e Amanono tama a Rāwiri.
2SA 13:2 Nā, ngaua kinotia ana a Amanono, nō ka mate ia mō tōna tuahine, mō Tāmara, he wāhina hoki ia, ā, ki te whakaaro o Amanono he hē rawa ki te meatia tētahi mea ki a ia.
2SA 13:3 He hoa ia tō Amanono, tōna ingoa ko Ionārapa, he tama nā Himea, nā tētahi o ngā tuākana o Rāwiri; he tangata mūrere rawa anō a Ionārapa.
2SA 13:4 Nā, ka mea ia ki a ia, “He aha koe, e te tama a te kīngi, i pēnei ai te kikokore i tēnei ata, i tēnei ata? E kore ianei koe e whakaatu ki ahau?” Anō rā ko Amanono ki a ia, “E aroha ana ahau ki a Tāmara, ki te tuahine o Apohārama, o tōku teina.”
2SA 13:5 Nā, ka mea a Ionārapa ki a ia, “Takoto i runga i tōu moenga, ka whakamatemate hoki i a koe, ā, ka tae mai tōu pāpā kia kite i a koe, nā, ka mea ki a ia, ‘Kia haere mai tōku tuahine, a Tāmara ki te whāngai i ahau ki te kai, ki te taka hoki i te kai i tāku tirohanga, kia kite atu ai ahau, kia kai ai i tā tōna ringa.’ ”
2SA 13:6 Heoi, ka takoto a Amanono, ka whakamatemate; ā, i te taenga mai o te kīngi kia kite i a ia, ka mea a Amanono ki te kīngi, “Tēnā kia haere mai a Tāmara, tōku tuahine ki te hangā i ētahi keke i tāku tirohanga, kia rua, ā, ka kai ahau i tā tōna ringa.”
2SA 13:7 Kātahi ka tono tangata a Rāwiri ki te whare ki a Tāmara, ka mea: “Tēnā, haere ki te whare o tōu tungāne, o Amanono, ki te taka kai māna.”
2SA 13:8 Heoi, haere ana a Tāmara ki te whare o tōna tungāne, o Amanono, ā, i te takoto tērā. Nā, ka mau ia ki te parāoa, ā, pokepokea ana, hanga ana hei keke i tāna tirohanga, nā, tunua ana e ia ngā keke.
2SA 13:9 Nā, kua mau ia ki te parāi, ringihia ana e ia ki tōna aroaro; heoi ka whakaparahako tērā ki te kai. Nā, ka mea a Amanono, “Kia mawehe katoa atu ngā tāngata i ahau.” Nā, ka mawehe katoa ngā tāngata i a ia.
2SA 13:10 Nā, ka mea a Amanono ki a Tāmara, “Maua ake te kai nā ki te whare moenga, ā, mā tōu ringa ahau e whāngai.” Nā, ka mau a Tāmara ki ngā keke i hangā e ia, ā, kawea ana ki a Amanono, ki tōna tungāne, ki te whare moenga.
2SA 13:11 Ā, i tāna kawenga ki a ia kia kainga, nā, ka hopu tērā i a ia, ka mea, “Haere mai, tāua ka takoto tahi, e tōku tuahine.”
2SA 13:12 Nā, ka mea ia ki a ia, “Kauaka, e tōku tungāne, kaua ahau e whakaititia, kāhore hoki he mahi pēnei i roto i a Īharaira; kāti rā tēnei mahi wairangi.
2SA 13:13 Ko ahau hoki, kei hea he hunanga mō tōku whakamā? Ā, ka rite koe ki tētahi o te hunga wairangi o Īharaira. Engari rā kōrero ki te kīngi; e kore hoki ahau e kaiponuhia e ia ki a koe.”
2SA 13:14 Heoi, kīhai ia i pai ki te whakarongo ki tōna reo; nā, he kaha rawa ia i a ia, ā, whakaititia ana ia e ia, ā, takotoria ana e ia.
2SA 13:15 Kātahi ka nui atu te kino i kino ai a Amanono ki a ia; nui atu te kino i kino ai ia ki a ia i te aroha i aroha ai ia ki a ia. Ā, ka mea a Amanono ki a ia, “Whakatika, haere.”
2SA 13:16 Nā, ka mea tērā ki a ia, “Kāhore he rawa; nui atu te kino o tēnei tononga i ahau i tērā i meatia e koe ki ahau.” Otiia kīhai ia i pai ki te whakarongo ki a ia.
2SA 13:17 Kātahi ka karangatia e ia tāna tangata i mahi nei ki a ia, ā, ka mea, “Tonoa atu tēnei wahine i tōku aroaro ki waho, whakarawatia hoki te tatau i muri i a ia.”
2SA 13:18 Nā, he kākahu purepure tō te wāhina, he pērā hoki ngā koroka i kākahuria ai ngā tamāhine wāhina a te kīngi. Kātahi ka kawea ia e tāna tangata ki waho, ā, whakarawatia ana te tatau i muri i a ia.
2SA 13:19 Nā, ka opehia e Tāmara he pungarehu ki runga ki tōna mātenga, ā, haea ana e ia tōna kākahu purepure, taupokina iho ōna ringa ki runga ki tōna mātenga, ā, haere ana, me te auē haere.
2SA 13:20 Nā, ka mea a Apohārama tōna tungāne ki a ia, “I a koe tōu tungāne a Amanono? Tēnā, noho puku, e tōku tuahine; ko tōu tungāne hoki ia, kaua tōu ngākau e mea ki tēnei mea.” Nā, noho ana a Tāmara, whakapouaru ana i te whare o tōna tungāne, o Apohārama.
2SA 13:21 I te rongonga ia o Kīngi Rāwiri i ēnei mea katoa, nui rawa tōna riri.
2SA 13:22 Nā, kāhore a Apohārama kupu ki a Amanono, ahakoa pai, ahakoa kino; e mauāhara ana hoki a Apohārama ki a Amanono, mōna i whakaiti i tōna tuahine i a Tāmara.
2SA 13:23 Ā, e rua rawa tau i muri, nā, he kaikutikuti hipi a Apohārama i Paara-Hatoro, i te taha o Ēparaima, ā, karangatia ana e Apohārama ngā tama katoa a te kīngi.
2SA 13:24 Nā, ka haere a Apohārama ki te kīngi, ā, ka mea, “Nanā, he kaikutikuti ēnei a tāu pononga, nā, kia haere te kīngi rātou ko āna pononga hei hoa mō tāu pononga.”
2SA 13:25 Nā, ka mea te kīngi ki a Apohārama, “Kauaka, e tāku tama, kaua mātou katoa e haere, kei taimaha koe i a mātou.” Nā, tohe ana ia ki a ia; otiia kīhai tērā i pai ki te haere; engari i manaaki i a ia.
2SA 13:26 Kātahi ka mea a Apohārama, “Ki te kore, tukua tōku tuakana a Amanono, kia haere tahi mātou.” Nā, ka mea te kīngi, “Kia haere ia i a koe hei aha?”
2SA 13:27 Ka tohe ia a Apohārama ki a ia, ā, ka tukua e ia a Amanono rātou ko ngā tama katoa a te kīngi hei hoa mōna.
2SA 13:28 Nā, i whakahau a Apohārama i āna tāngata, i mea, “E kite koutou i te ngākau o Amanono e koa ana i te wāina, ā, ka mea ahau ki a koutou, ‘Patua a Amanono,’ nā, me whakamate, kaua e wehi; he teka ianei nāku koutou i whakahau? Kia māia, kia toa.”
2SA 13:29 Ā, rite tonu tā ngā tāngata a Apohārama i mea ai ki a Amanono ki tā Apohārama i whakahau ai. Kātahi ka whakatika katoa ngā tama a te kīngi, ā, eke ana ki tōna muera, ki tōna muera, ā, rere ana.
2SA 13:30 I a rātou anō i te ara, ka tae te rongo ki a Rāwiri, ka kōrerotia, “Kua patua e Apohārama ngā tama katoa a te kīngi, kīhai hoki tētahi o rātou i mahue.”
2SA 13:31 Kātahi ka whakatika te kīngi, ā, haea ana e ia ōna kākahu, takoto ana ki te whenua; me te tū anō āna tāngata katoa, he mea haehae ngā kākahu.
2SA 13:32 Nā, ka oho a Ionārapa tama a Himea, a te tuakana o Rāwiri, ka kī, “Kei mea tōku ariki, ko ngā taitama katoa, ko ngā tama a te kīngi kua whakamatea nei; engari ko Amanono anake i mate. Ko tā Apohārama hoki tēnei i karanga ai, he mea whakatakoto nō te rā anō i whakaiti ai tērā i tōna tuahine, i a Tāmara.
2SA 13:33 Nā, tēnā, kaua te ngākau o tōku ariki, o te kīngi e mea ki taua mea, e whakaaro, ko ngā tama katoa a te kīngi kua mate; kāhore, ko Amanono anake i mate.”
2SA 13:34 Rere ana ia a Apohārama. Nā, ko te marangatanga o ngā kanohi o te tamaiti e tūtei atu ana, ka titiro, nā, he nui te hunga e haere mai ana i te ara i te taha o te puke i tōna tuarā.
2SA 13:35 Nā, ka mea a Ionārapa ki te kīngi, “Nanā, ko ngā tama a te kīngi te haere mai nei; e rite ana ki tā tāu pononga i mea ai.”
2SA 13:36 Mutu kau tāna kōrero, nā, ko te haerenga mai o ngā tama a te kīngi, ā, nui atu tō rātou reo ki te tangi; ā, nui atu te tangi i tangi ai te kīngi rātou ko āna tāngata katoa.
2SA 13:37 Rere ana ia a Apohārama, ā, haere ana ki a Tāramai tama a Amihuru, kīngi o Kehuru. Ko Rāwiri ia, tangihia ana e ia tāna tama i ngā rā katoa.
2SA 13:38 Heoi, rere ana a Apohārama, haere ana ki Kehuru, ā, e toru ōna tau ki reira.
2SA 13:39 Nā, ka kōingo te ngākau o Kīngi Rāwiri kia haere ki a Apohārama; kua mārie hoki ia ki a Amanono, i te mea kua mate ia.
2SA 14:1 Nā, ka kite a Ioapa tama a Teruia e anga ana te ngākau o te kīngi ki a Apohārama.
2SA 14:2 Ka tono tāngata a Ioapa ki Tekoa ki te tiki i tētahi wahine mōhio i reira, ā, ka mea ki a ia, “Me mea koe i a koe he wahine e tangi tūpāpaku ana, me kākahu he kākahu tauā, kaua anō e whakawahi i a koe ki te hinu; engari kia rite ki te wahine kua tangi noa ake ki te tūpāpaku.
2SA 14:3 Ā, haere ki te kīngi, ā, ko ēnei ngā kupu māu ki a ia.” Heoi, hoatu ana e Ioapa ngā kupu ki tōna māngai.
2SA 14:4 Nā, kōrerotia ana e te wahine o Tekoa ki te kīngi, me te tāpapa anō ki te whenua, me te piko anō, i mea hoki, “Whakaorangia, e te kīngi.”
2SA 14:5 Nā, ka mea te kīngi ki a ia, “He aha tōu mate?” Ā, ka kī tērā, “He wahine pouaru nei ahau, kua mate hoki tāku tahu.
2SA 14:6 Nā, tokorua ngā tama a tāu pononga, heoi whawhai ana rāua ki a rāua i te pārae, ā, kāhore he kaiwawao mō rāua. Nā, patua iho tētahi e tētahi, ā, mate iho.
2SA 14:7 Nā, ka whakatika ngā whanaunga katoa ki tāu pononga, e mea ana, ‘Hōmai te kaipatu i tōna teina kia whakamatea hei utu mō te matenga o tōna teina, i patua nei e ia, ā, ka hunā e mātou te tangata mōna te kāinga.’ Nā, ka keto i a rātou tāku ngārahu i te toe, ā, kāhore noa iho e mahue he ingoa mō tāku tahu, he toenga rānei i te mata o te whenua.”
2SA 14:8 Nā, ka mea te kīngi ki te wahine, “Haere ki tōu whare, ā, māku ngā tikanga mō tāu mea.”
2SA 14:9 Nā, ka mea taua wahine o Tekoa ki te kīngi, “Hei runga i ahau te kino, e tōku ariki, e te kīngi, hei runga anō hoki i te whare o tōku pāpā; kia harakore ia te kīngi me tōna torōna.”
2SA 14:10 Nā, ka mea te kīngi, “Ki te kōrero tētahi ki a koe, kawea mai ia ki ahau, ā, e kore ia e pā ki a koe i muri iho.”
2SA 14:11 Kātahi ia ka mea, “Kia mahara rā te kīngi ki a Ihowā, ki tōu Atua, kia kaua te kaitakitaki toto e whakangaro ā mua ake, kei hunā tāku tama.” Nā, ka kī ia, “E ora ana a Ihowā e kore tētahi makawe o tāu tama e taka ki te whenua.”
2SA 14:12 Nā, ka mea taua wahine, “Tēnā, kia kōrerotia e tāu pononga tētahi kupu ki tōku ariki, ki te kīngi.” Anō rā ko ia, “Kōrero.”
2SA 14:13 Nā, ka mea taua wahine, “He aha rā koe i hē ai ki te iwi a te Atua, i whakaaro ai i tēnei mea? I te kīngi hoki e kōrero ana i tēnei mea, e rite ana ia ki te tangata kua hē, i te kīngi e kore nei e whakahoki mai i tāna i peia atu rā.
2SA 14:14 Mō te mate nei hoki tātou, ā, ka rite ki te wai i maringi ki te whenua, kāhore nei e kohikohia ake. Nā, kāhore te Atua e tango atu ana i te ora, engari e whakaaro ana i ngā whakaaro e kore ai e peia rawatia atu i a ia te mea i peia.
2SA 14:15 “Koia ahau i haere mai ai ki te kōrero i tēnei mea ki te kīngi, ki tōku ariki, he wehi nōku i tā te iwi; koia tāu pononga i mea ai, ‘Me kōrero ahau ki te kīngi; tērā pea te kīngi e mea i tā tāna pononga e kōrero ai.
2SA 14:16 Tērā hoki te kīngi e rongo, e whakaora i tāna pononga i te ringa o te tangata e hunā ai māua tahi ko tāku tama i tō te Atua wāhi tupu.’
2SA 14:17 “Koia tāu pononga i mea ai, ‘Ākuanei he whakamārie te kupu a tōku ariki, a te kīngi; e rite ana hoki tōku ariki, te kīngi ki te anahera a te Atua, hei whakarongo ki te pai, ki te kino; hei hoa anō mōu a Ihowā, te Atua.’ ”
2SA 14:18 Nā, ka whakahoki te kīngi, ka mea ki te wahine, “Nā, kaua e hunā ki ahau te kupu e uia e ahau ki a koe.” Nā, ka mea te wahine, “Tēnā, kia kōrero tōku ariki, te kīngi.”
2SA 14:19 Nā, ka mea te kīngi, “Kāhore ianei te ringa o Ioapa i a koe i tēnei mea katoa?” Anō rā ko te wahine, i mea ia, “E ora ana tōu wairua, e tōku ariki, e te kīngi, inā, kāhore he tahuritanga mō tētahi ki matau, ki mauī, i ngā kupu katoa i kōrero ai tōku ariki, te kīngi. Nā tāu pononga hoki, nā Ioapa, nāna ahau i whakahau, nāna hoki i hōmai ēnei kupu katoa ki te māngai o tāu pononga.
2SA 14:20 He whakaahua kē i te tikanga o tēnei kōrero i mea ai tāu pononga, a Ioapa i tēnei mea; ā, he mōhio tōku ariki, he pērā me te mōhio o te anahera a te Atua, he mōhio ki ngā mea katoa o te whenua.”
2SA 14:21 Nā, ka mea te kīngi ki a Ioapa, “Nā, kua meatia nei tēnei mea e ahau; tīkina, whakahokia mai taua tamaiti, a Apohārama.”
2SA 14:22 Nā, ka tāpapa a Ioapa ki te whenua, ka piko, ka whakapai i te kīngi; i mea anō a Ioapa, “Nō tēnei rā tāu pononga i mōhio ai e manakohia ana ahau e koe, e tōku ariki, e te kīngi, nō te kīngi hoki ka whakamana i te kupu a tāna pononga.”
2SA 14:23 Heoi, whakatika ana a Ioapa, ā, haere ana ki Kehuru, ā, kawea ana e ia a Apohārama ki Hiruhārama.
2SA 14:24 Nā, ka mea te kīngi, “Kia tahuri atu ia ki tōna whare, kaua hoki ia e kite i tōku kanohi.” Nā, tahuri ana a Apohārama ki tōna whare, kīhai hoki i kite i te kanohi o te kīngi.
2SA 14:25 Nā, kāhore he rite mō Apohārama, te kōrerotia tōna ātaahua i roto i a Īharaira katoa; kāhore ōna koha i te kapu o tōna waewae ā tae noa ki tōna tumuaki.
2SA 14:26 Ā, ka kutikutia e ia tōna mātenga (i kutikutia hoki e ia i te takanga o te tau; he taimaha hoki nōna koia i kutikutia ai), nā, ka pāunatia e ia ngā makawe o tōna mātenga, e rua rau ngā hekere o tā te kīngi pāuna.
2SA 14:27 Ā, tokotoru ngā tama i whānau mā Apohārama, kotahi hoki te kōtiro, ko tōna ingoa ko Tāmara; he wahine kanohi ātaahua anō ia.
2SA 14:28 Nā, e rua tino tau i noho ai a Apohārama ki Hiruhārama, ā, kīhai i kitea e ia te kanohi o te kīngi.
2SA 14:29 Nā, ka tono tangata a Apohārama ki a Ioapa, he mea kia tonoa ia ki te kīngi; heoi kīhai tērā i pai ki te haere mai ki a ia. Nā, ka tono anō ia, otiia kīhai tērā i pai ki te haere mai.
2SA 14:30 Nā reira ka mea ia ki āna pononga, “Nanā, tata tonu ki tōku tō Ioapa wāhi whenua, he pārei anō tāna kei reira; tīkina tahuna ki te ahi.” Nā, kua tahuna e ngā tāngata a Apohārama ki te ahi.
2SA 14:31 Nā, ka whakatika a Ioapa, ā, haere ana ki a Apohārama ki te whare, ā, ka mea ki a ia, “He aha i tahuna ai tōku wāhi e āu tāngata ki te ahi?”
2SA 14:32 Nā, ka mea a Apohārama ki a Ioapa, “Nanā, i tono tangata ahau ki a koe, i mea: ‘Haere mai ki konei kia tonoa ai koe e ahau ki te kīngi hei mea, “Mō te aha ahau i haere mai ai i Kehuru? He pai kē mōku me i noho tonu ahau ki reira.” ’ Ko tēnei kia kite ahau i te kanohi o te kīngi; ā, ki te mea he kino tōku, me whakamate ahau e ia.”
2SA 14:33 Heoi, haere ana a Ioapa ki te kīngi, ki te kōrero ki a ia. Nā, ka karangatia a Apohārama e ia, ā, haere ana ia ki te kīngi. Nā, piko ana ia ki a ia, ahu ana tōna mata ki te whenua i te aroaro o te kīngi; ā, kihia ana a Apohārama e te kīngi.
2SA 15:1 Nā, muri iho i tēnei ka mea hāriata a Apohārama mōna, me ētahi hōiho, me ngā tāngata e rima tekau hei rere i tōna aroaro.
2SA 15:2 Nā, ka maranga wawe a Apohārama, ā, ka tū ki te taha o te huarahi, ki te kūwaha. Nā, ki te mea he take tā tētahi tangata e tika ana kia tae ki te kīngi kia whakaritea, ka karanga a Apohārama ki a ia, ka mea, “Nō tēhea pā koe?” Ā, ka mea tērā, “Nō tētahi o ngā iwi o Īharaira tāu pononga.”
2SA 15:3 Nā, ka mea a Apohārama ki a ia, “Nanā, he pai āu kōrero, he tika; heoi kāhore he tangata a te kīngi hei whakarongo ki a koe.”
2SA 15:4 I mea anō a Apohārama, “Auē, me i tū ahau hei kaiwhakarite mō te whenua, ā, ka tae mai ki ahau ngā tāngata katoa he take nei tā rātou, he whakawā, ina ka whakarite tika ahau ki a ia!”
2SA 15:5 Nā, ka whakatata mai he tangata ka piko ki a ia, nā, ka totoro tōna ringa ka hopu i a ia, ka kihi i a ia.
2SA 15:6 Pēnei tonu te mahi a Apohārama ki a Īharaira katoa, i haere mai ki te kīngi kia whakaritea he whakawā; nā, tāhaetia ana e Apohārama ngā ngākau o ngā tāngata o Īharaira.
2SA 15:7 Nā, ka pau ngā tau e whā, ka mea a Apohārama ki te kīngi, “Tukua ahau kia haere ki te whakamana i āku kupu taurangi, ki Heperona, i puaki rā i ahau ki a Ihowā.
2SA 15:8 I puaki hoki te kupu taurangi a tāu pononga i ahau e noho ana i Kehuru i Hīria; i mea ahau, ‘Ki te whakahokia ahau e Ihowā ki Hiruhārama, kātahi ahau ka mahi ki a Ihowā!’ ”
2SA 15:9 Nā, ka mea te kīngi ki a ia, “Haere mārie.” Nā, whakatika ana ia, ā, haere ana ki Heperona.
2SA 15:10 Otiia ka tono tūtei a Apohārama puta noa i ngā iwi katoa o Īharaira, hei mea, “Rongo kau koutou i te tangi o te tētere, ko reira koutou ka mea, ‘Ko Apohārama te kīngi kei Heperona.’ ”
2SA 15:11 E rua rau anō ngā tāngata i haere tahi i a Apohārama i Hiruhārama, he hunga i karangatia. Otiia, he haere noa tā rātou, kīhai hoki i mōhio ki tētahi mea.
2SA 15:12 I tīkina anō e Apohārama a Ahitopere Kironi, te kaiwhakatakoto whakaaro a Rāwiri i tōna pā i Kiroho, i a ia anō e patu ana i ngā patunga tapu. Nā, kua kaha te whakapiko; i tini haere hoki ngā tāngata a Apohārama.
2SA 15:13 Nā, ko te taenga o tētahi kaikōrero ki a Rāwiri, ko tāna kupu, “Kei te whai i a Apohārama ngā ngākau o ngā tāngata o Īharaira.”
2SA 15:14 Nā, ka mea a Rāwiri ki āna tāngata katoa i tōna taha i Hiruhārama, “Whakatika, ka rere tātou; kei kore hoki he mawhititanga atu mō tētahi o tātou i te aroaro o Apohārama; hohoro te haere, kei hohoro mai ia, ā, ka mau tātou. Nā, ka ākina mai e ia he kino ki a tātou, ā, ka tukitukia te pā ki te mata o te hoari.”
2SA 15:15 Nā, ka mea ngā tāngata a te kīngi ki te kīngi, “Tēnei āu pononga hei mea i ngā mea katoa e whakarite ai tōku ariki, te kīngi.”
2SA 15:16 Nā, haere ana te kīngi me tōna whare katoa i muri i a ia. Nā, i mahue i te kīngi tekau ngā wāhine, he wāhine iti nāna, hei tiaki i te whare.
2SA 15:17 Ā, haere ana te kīngi rātou ko te iwi katoa i muri i a ia, ā, whanga ana i Petemerehaka.
2SA 15:18 I haere atu anō āna tāngata katoa i tōna taha; i haere atu anō hoki i mua i te kīngi, ngā Kereti katoa, ngā Pereti katoa, me ngā Kiti katoa; ngā rau e ono i whai mai nei i a ia i Kāta.
2SA 15:19 Nā, ka mea te kīngi ki a Itai Kiti, “He aha koe i haere mai ai i a mātou? Hoki atu, e noho i te kīngi; he tangata kē hoki koe, he noho kē i tōu whenua.
2SA 15:20 Nōnanahi noa nei koe i tae mai ai, ā, kia mea ahau i a koe i tēnei rā kia kōpikopiko noa iho i a mātou, i tāku haere noa atu? Hoki atu, whakahokia anō ōu tēina; kia whai tahi te pono me te aroha i a koe.”
2SA 15:21 Nā, ka whakahoki a Itai ki te kīngi, ka mea, “E ora ana a Ihowā, e ora ana hoki tōku ariki te kīngi, nā, ko te wāhi e noho ai tōku ariki, te kīngi, ahakoa i te mate, ahakoa i te ora, ko reira anō tāu pononga.”
2SA 15:22 Anō rā ko Rāwiri ki a Itai, “Hoatu, whiti atu.” Nā, whiti ana a Itai Kiti, rātou ko āna tāngata katoa me ngā tamariki katoa i a ia.
2SA 15:23 Nui atu hoki te reo i tangi ai te whenua katoa, ā, ka whiti atu te iwi katoa; i whiti atu hoki te kīngi i te awaawa o Kitirono, ā, i whiti atu anō te iwi katoa i te huarahi e tika ana ki te koraha.
2SA 15:24 Ko Hāroko anō tērā, me ngā Rīwaiti katoa e amo ana i te āka o te kawenata a te Atua. Nā, ka whakatakotoria te āka a te Atua; nā, ka piki a Apiātara, ā poto noa te iwi katoa te whiti atu i roto i te pā.
2SA 15:25 Nā, ka mea te kīngi ki a Hāroko, “Whakahokia te āka a te Atua ki te pā; ki te manakohia ahau e Ihowā, ka whakahokia ahau, ā, ka whakakitea taua āka me tōna nohoanga ki ahau.
2SA 15:26 Ā, ki te mea ia ki ahau, ‘Kāhore ahau e pai ki a koe,’ tēnei ahau, māna e mea ki ahau te mea e pai ana ki tāna titiro.”
2SA 15:27 I mea anō te kīngi ki a Hāroko tohunga, “Ehara ianei koe i te matakite? Hoki mārie ki te pā, koutou ko ā kōrua tama tokorua, arā tāu tama a Ahimāta, me Honatana tama a Apiātara.
2SA 15:28 Nanā, me tatari ahau ki ngā kauanga i te koraha, kia tae ake rā anō he kōrero i a kōrua hei whakaatu tikanga ki ahau.”
2SA 15:29 Nā, whakahokia ana te āka a te Atua e Hāroko rāua ko Apiātara ki Hiruhārama, ā, noho ana rāua i reira.
2SA 15:30 Nā, piki atu ana a Rāwiri i te pikitanga o Maunga Ōriwa, me te tangi, me te piki haere; hīpoki rawa tōna mātenga, kāhore hoki ōna hū i a ia e haere ana. Nā, ko ngā tāngata katoa i a ia, hīpoki rawa te mātenga o tēnei, o tēnei; heoi piki ana rātou, me te tangi anō i a rātou e piki ana.
2SA 15:31 Nā, ka kōrero tētahi ki a Rāwiri, ka mea, “Kei roto a Ahitopere i ngā kaiwhakatupu i te hē, kei a Apohārama.” Nā, ka mea a Rāwiri, “Tēnā rā, e Ihowā, whakakūwaretia ngā whakaaro o Ahitopere.”
2SA 15:32 Ā, nō te ekenga o Rāwiri ki te tihi, ki te wāhi e koropiko ai ki te Atua, nā, ko Huhai Araki ka whakatau i a ia, he mea haehae tōna kākahu, me te oneone i runga i tōna mātenga.
2SA 15:33 Nā, ka mea a Rāwiri ki a ia, “Ki te haere tahi tātou, hei whakaware kau koe ki ahau.
2SA 15:34 Engari, ki te hoki koe ki te pā, ā, ka mea ki a Apohārama, ‘Hei pononga ahau māu, e te kīngi, he pononga ahau nā tōu pāpā i mua, ināianei hei pononga ahau māu,’ pēnei māu e whakataka te whakaaro o Ahitopere mōku.
2SA 15:35 Kāhore ianei i reira hei hoa mōu a Hāroko rāua ko Apiātara ngā tohunga? Nā, ko ngā mea katoa e rongo ai koe ki te whare o te kīngi, māu e whakaatu ki ngā tohunga, ki a Hāroko rāua ko Apiātara.
2SA 15:36 Nā, kei reira, kei a rāua tonu ā rāua tama tokorua, a Ahimāta, tā Hāroko, a Honatana, tā Apiātara; me unga hei kawe mai ki ahau i ngā mea katoa e rongo ai koutou.”
2SA 15:37 Nā, haere ana a Huhai, te hoa o Rāwiri ki te pā, ā, ka tae hoki a Apohārama ki Hiruhārama.
2SA 16:1 Ā, he iti nei te haerenga atu o Rāwiri i te tihi o te pikitanga, nā, ko Tipa, tangata a Mepipohete kua tūtaki ki a ia, me ngā kāihe e rua, whakanoho rawa. Ko te pīkaunga, he taro e rua rau, he tautau karepe maroke kotahi rau, he hua raumati kotahi rau, he ipu wāina.
2SA 16:2 Nā, ka mea te kīngi ki a Tipa, “Hei aha ēnei māu?” Ā, ka mea a Tipa, “Hei eke mō te whare o te kīngi ngā kāihe; hei kai mā ngā tamariki te taro me ngā hua raumati; hei inu anō te wāina mā te hunga e ngenge ana i te koraha.”
2SA 16:3 Nā, ka mea te kīngi, “Ā, kei hea te tama a tōu ariki?” Anō rā ko Tipa ki te kīngi, “Kei Hiruhārama tērā e noho ana; i mea hoki, ‘Ko āianei te whare o Īharaira whakahoki mai ai i te kīngitanga o tōku pāpā ki ahau.’ ”
2SA 16:4 Kātahi te kīngi ka mea ki a Tipa, “Nanā, māu katoa ngā mea a Mepipohete.” Nā, ka mea a Tipa, “E piko atu nei ahau; kia manakohia ahau e koe, e tōku ariki, e te kīngi.”
2SA 16:5 Ā, nō ka tae a Kīngi Rāwiri ki Pahurimi, nā, ka puta mai ki reira he tangata nō te hapū o te whare o Haora, ko tōna ingoa ko Himei, ko te tama a Kera; ko tōna putanga mai e kanga haere ana.
2SA 16:6 Epaina ana hoki e ia ki te kōhatu a Rāwiri me ngā tāngata katoa a Kīngi Rāwiri; nā, ko te iwi katoa, rātou ko ngā toa katoa kei tōna matau, kei tōna mauī.
2SA 16:7 Ko te kupu hoki tēnei a Himei i a ia e kanga ana, “Puta atu, puta atu, e te tangata toto, e te tangata o Periara.
2SA 16:8 Kua whakahokia e Ihowā ki a koe ngā toto katoa o te whare o Haora; ko koe nā hoki te kīngi i muri i a ia; ā, kua hoatu e Ihowā te kīngitanga ki te ringa o Apohārama, o tāu tama. Nā, kei tōu kino nā anō koe, he tangata toto nā hoki koe.”
2SA 16:9 Kātahi ka mea a Āpihai tama a Teruia ki te kīngi, “He aha tēnei kurī mate i kanga ai ki tōku ariki, ki te kīngi? Tēnā, kia whiti atu ahau ki te pōuto i tōna upoko.”
2SA 16:10 Nā, ka mea te kīngi, “Hei aha māku tā kōrua, e ngā tama a Teruia? He kanganga nāna, he meatanga nā Ihowā ki a ia, ‘Kangā a Rāwiri,’ ko wai tēnā hei mea, ‘He aha koe i pēnā ai?’ ”
2SA 16:11 I mea anō a Rāwiri ki a Āpihai rātou ko āna tāngata katoa, “Nanā, ko tāku tama i puta nei i roto i ōku whēkau te whai nei kia whakamatea ahau; nā, tērā noa ake āianei he mea mā tēnei Pineamini. Waiho atu, tukua ia kia kanga; nā Ihowā hoki i mea ki a ia.
2SA 16:12 Tērā pea a Ihowā e titiro ki tōku mate, e hōmai i te pai ki ahau hei utu mō tāna kanga ki ahau i tēnei rā.”
2SA 16:13 Nā, haere ana a Rāwiri rātou ko āna tāngata i te huarahi; me te haere anō a Himei i te taha o te maunga i tōna ritenga mai; haere ana me te kanga, me te epa i te kōhatu ki tōna ritenga mai, me te ākiri anō i te puehu.
2SA 16:14 Nā, haere ngenge ana te kīngi rātou ko tōna nuinga, ā, okioki ana ki reira.
2SA 16:15 Nā, ka tae mai a Apohārama rātou ko te iwi katoa, ngā tāngata o Īharaira ki Hiruhārama; ko Ahitopere hoki tōna hoa.
2SA 16:16 Nā, i te taenga o Huhai Araki, o te hoa o Rāwiri, ki a Apohārama, nā, ka mea a Huhai ki a Apohārama, “Kia ora te kīngi, kia ora te kīngi!”
2SA 16:17 Nā, ka mea a Apohārama ki a Huhai, “Ko tōu aroha tēnā ki tōu hoa? He aha koe tē haere tahi ai i tōu hoa?”
2SA 16:18 Nā, ka mea a Huhai ki a Apohārama, “Kāhore, engari ko tā Ihowā, ko tā tēnei iwi, ko tā ngā tāngata katoa o Īharaira e whiriwhiri ai, hei a ia he tikanga mōku, ā, me noho ahau ki a ia.
2SA 16:19 Nā, tētahi, kia mahi ahau ki a wai? Kaua ianei ahau e mahi ki te aroaro o tāna tama? Ka rite ki tāku mahi ki te aroaro o tōu pāpā tāku ki tōu aroaro.”
2SA 16:20 Nā, ka mea a Apohārama ki a Ahitopere, “Tēnā koa ōu whakaaro me aha tātou?”
2SA 16:21 Nā, ka mea a Ahitopere ki a Apohārama, “Haere ki ngā wāhine iti a tōu pāpā, i waiho nei e ia hei tiaki i te whare, ā, ka rongo a Īharaira katoa kua piro whakarihariha koe ki tōu pāpā, nā, ka kaha ngā ringa o tōu nuinga katoa.”
2SA 16:22 Nā, whakatūria ana tētahi tēneti e rātou mō Apohārama ki runga ki te tuanui; ā, haere ana a Apohārama ki roto, ki ngā wāhine iti a tōna pāpā i te tirohanga a Īharaira katoa.
2SA 16:23 Nā, ko te whakaaro o Ahitopere i whakaaro ai ia i aua rā, me te mea e uia ana he tikanga ki tā te Atua kupu; pērā tonu ngā whakaaro katoa o Ahitopere ki ā rāua tokorua, ki a Rāwiri, ki a Apohārama.
2SA 17:1 I mea anō a Ahitopere ki a Apohārama, “Tēnā kia whiriwhiria ētahi tāngata e ahau, kia kotahi tekau mā rua mano, kia whakatika ahau ki te whai i a Rāwiri i te pō nei.
2SA 17:2 Ā, ka huakina ia e ahau i a ia e ngenge ana, i ngā ringa e kahakore ana. Nā, ka whakaoho ahau i a ia, ā, ka rere tōna nuinga katoa. Ko reira ahau patu ai i te kīngi, i a ia anake;
2SA 17:3 ā, ka whakahokia mai e ahau te iwi katoa ki a koe. Ko te hokinga mai tēnei o te katoa, ki te mau te tangata e whāia nei e koe, pēnei ka āta noho te iwi katoa.”
2SA 17:4 Nā, tika tonu taua kupu ki te whakaaro o Apohārama, ki te whakaaro hoki o ngā kaumātua katoa o Īharaira.
2SA 17:5 Nā, ka mea a Apohārama, “Tēnā, karangatia anō hoki a Huhai Araki, kia rongo ai tātou ki tāna kupu.”
2SA 17:6 Ā, nō te taenga o Huhai ki a Apohārama, ka kōrero a Apohārama ki a ia, ka mea, “Ko te kupu tēnei i kōrero ai a Ahitopere; me mea rānei e tātou tāna i kōrero ai? Ki te kāhore, kōrero mai?”
2SA 17:7 Nā, ka mea a Huhai ki a Apohārama, “Ko te whakaaro i whakaaro ai a Ahitopere i tēnei wā nei, kāhore i pai.”
2SA 17:8 I mea hoki a Huhai, “E mōhio ana koe ki tōu pāpā, rātou ko āna tāngata, he toa rātou, e mamae ana hoki ō rātou ngākau, e rite tonu ana ki te pea kua tangohia nei āna kūao i te pārae; he tangata whawhai hoki tōu pāpā; e kore e moe i roto i ngā tāngata.
2SA 17:9 Nanā, kei te piri tērā i roto i tētahi rua, i tētahi atu wāhi rānei. Nā, ākuanei, hei te hinganga o ētahi o rātou i te tīmatanga, ā, ka rongo tētahi, ka kī ia, ‘Kua pā te patu ki te hunga e whai ana i a Apohārama.’
2SA 17:10 Ahakoa ko wai tētahi toa, i rite tōna ngākau ki tō te raiona, ka ngohe noa iho; e mōhio ana hoki a Īharaira katoa he mārohirohi tōu pāpā, he toa hoki āna tāngata.
2SA 17:11 “Koia ahau ka mea ai: Me āta kohikohi ki a koe a Īharaira katoa, o Rāna ā tae noa ki Peerehepa; kia rite ki te onepū i te moana te tini; me haere anō hoki koe, a koe nā anō, ki te tatauranga.
2SA 17:12 Nā, ka whakaekea ia e tātou ki tētahi wāhi e kitea ai ia; ā, ka tau iho ki runga ki a ia, ka pērā anō me te tōmairangi e tau ana ki runga ki te oneone. Ā, ko ia me āna tāngata katoa, e kore e mahue tētahi i a tātou ahakoa kia kotahi nei.
2SA 17:13 Ā, ki te tomo ia ki tētahi pā, nā, ka mau taura atu a Īharaira katoa ki taua pā, ka tōia taua pā e tātou ki roto ki te awa, kia kore rā anō e kitea tētahi kōhatu, ahakoa ririki, ki reira.”
2SA 17:14 Nā, ka mea a Apohārama rātou ko ngā tāngata katoa o Īharaira, “Pai atu te whakaaro o Huhai Araki i te whakaaro o Ahitopere.” Nā Ihowā hoki te tikanga kia whakatakā te whakaaro pai o Ahitopere, kia kawea ai he kino e Ihowā ki runga ki a Apohārama.
2SA 17:15 Kātahi a Huhai ka mea ki ngā tohunga, ki a Hāroko rāua ko Apiātara, “Ko ngā whakaaro tēnei o Ahitopere ki a Apohārama rātou ko ngā kaumātua o Īharaira; ko ōku whakaaro hoki ēnei i whakatakoto atu nei.
2SA 17:16 Nā, kia hohoro te tono tāngata ki te whakaatu ki a Rāwiri; mea atu, ‘Kaua e moe i tēnei pō ki ngā kauanga i te koraha; engari kia hohoro te whiti atu, kei horomia ake te kīngi me tōna nuinga katoa.’ ”
2SA 17:17 Nā, i Enerōkere a Honatana rāua ko Ahimāta e tatari ana; kīhai hoki i āhei kia kitea e haere mai ana ki te pā. Nā, ka haere tētahi pononga wahine, ka whakaatu ki a rāua, ā, haere ana rāua ki te whakaatu ki a Kīngi Rāwiri.
2SA 17:18 Otiia i kitea rāua e tētahi taitamariki, ā, kōrerotia atu ana e ia ki a Apohārama; heoi hohoro tonu rāua, ā, ka tae ki te whare o tētahi tangata i Pahurimi. Nā, he poka wai tāna i tōna marae, ā, heke iho ana rāua ki reira.
2SA 17:19 Nā, ka tīkina tētahi hīpoki e te wahine, taupokina ana e ia ki te poka, nā, horahia ana e ia he wīti tuki ki runga, ā, kīhai taua mea i mōhiotia.
2SA 17:20 Nā, ka tae ngā tāngata a Apohārama ki te wahine, ki te whare, ka mea, “Kei hea a Ahimāta rāua ko Honatana?” Nā, ka mea te wahine ki a rātou, “Kua whiti rāua i te awa wai.” Nā, ka rapu rātou, ā, kīhai i kitea, ā, hoki ana ki Hiruhārama.
2SA 17:21 Ā, i muri i tō rātou haerenga, ka piki ake rāua i roto i te poka, ā, haere ana, whakaatu ana ki a Kīngi Rāwiri; i mea ki a Rāwiri, “Whakatika, hohoro koutou te whiti atu i te wai nei; ko te whakaaro hoki tēnei o Ahitopere mō koutou.”
2SA 17:22 Kātahi ka whakatika a Rāwiri rātou ko tōna nuinga katoa, ā, whiti ana i Horano; ao rawa ake te rā, kīhai tētahi i kore te whiti i Horano.
2SA 17:23 Ā, i te kitenga o Ahitopere kīhai i meatia tāna i whakaaro ai, whakanohoia ana e ia tana kāihe, ā, whakatika ana, haere ana ki tōna whare ki tōna pā, nā, kei te whakariterite i ngā mea o tōna whare, tārona ana i a ia, ā, mate ake, tanumia iho ki te tanumanga o tōna pāpā.
2SA 17:24 Kātahi ka haere a Rāwiri ki Mahanaima, ā, i whiti anō a Apohārama i Horano me ngā tāngata katoa o Īharaira.
2SA 17:25 Ā, ka meatia a Amaha e Apohārama hei whakakapi mō Ioapa, hei rangatira mō te ope. Nā, he tama a Amaha nā tētahi tangata, ko Itira tōna ingoa, nō Īharaira, i haere nei ki roto, ki a Apikaira tamāhine a Nahaha, ki te teina o Teruia whaea o Ioapa.
2SA 17:26 Nā, noho ana a Īharaira rātou ko Apohārama ki te whenua o Kireara.
2SA 17:27 Ā, nō te taenga o Rāwiri ki Mahanaima, ka kawea mai e Hopi tama a Nahaha o Rapa o ngā tama a Āmona, e Makiri tama a Amiere o Rotepara, rātou ko Paratirai Kireari o Rokerimi,
2SA 17:28 he moenga, he peihana, he oko oneone, he wīti, he pārei, he parāoa, he kānga pāhūhū, he pīni, he pī, me ētahi atu mea pāhūhū,
2SA 17:29 he honi, he pata, he hipi, me te tīhi, hei kai mā Rāwiri rātou ko tōna nuinga; i mea hoki rātou, “E matekai ana te iwi, e ngenge ana, e matewai ana i te koraha.”
2SA 18:1 Nā, ka taua e Rāwiri tōna nuinga, ā, whakaritea ana e ia he rangatira mano mō rātou, he rangatira rau.
2SA 18:2 Nā, ka tonoa te iwi e Rāwiri; ko tētahi kotahi toru i raro i te ringa o Ioapa, ko tētahi kotahi toru i raro i te ringa o Āpihai tama a Teruia, teina o Ioapa, ā, ko tētahi kotahi toru hoki i raro i te ringa o Itai Kiti. I mea anō te kīngi ki te iwi, “He pono ka haere tahi atu anō hoki ahau i a koutou.”
2SA 18:3 Nā, ka mea te iwi, “Kaua koe e puta ki waho. Ki te rere hoki mātou, e kore rātou e whai whakaaro ki a mātou. Ahakoa ko te hāwhe o mātou i mate, e kore rātou e whai whakaaro ki a mātou; tēnā ko koe, e rite ana koe ki ngā mano kotahi tekau o mātou. Nō reira he pai kē ko koe hei āwhina ake mō mātou i roto i te pā.”
2SA 18:4 Nā, ka mea te kīngi ki a rātou, “Me mea e ahau ngā mea e pai ana ki tā koutou titiro.” Nā, tū ana te kīngi ki te taha o te kūwaha, me te puta atu te iwi, ōna rau, ōna mano.
2SA 18:5 Ā, i ako te kīngi ki a Ioapa, ki a Āpihai, ki a Itai, i mea, “Mahara ki ahau, kia āta hanga hoki ki taua taitama, ki a Apohārama.” I rongo anō te iwi katoa i te kīngi e ako ana i ngā rangatira katoa ki te tikanga mō Apohārama.
2SA 18:6 Nā, ko te putanga o te iwi ki te pārae ki te tū ki a Īharaira; ā, i te ngahere o Ēparaima te whawhai.
2SA 18:7 Nā, patua iho i reira ngā tāngata o Īharaira e ngā tāngata a Rāwiri, nui atu te parekura i reira i taua rā, e rua tekau mano tāngata.
2SA 18:8 Ā, tohatoha noa i reira te whawhai ki te mata katoa o te whenua; tokomaha atu o te iwi i pau i te ngahere i ngā mea i pau i te hoari i taua rā.
2SA 18:9 Nā, ka tūpono a Apohārama ki ngā tāngata a Rāwiri. I runga anō i te muera o Apohārama e noho ana. Nā, ko te haerenga o te muera i raro i ngā peka mātotoru o tētahi oki nui. Kua mau tōna mātenga ki te oki, ā, tārewa ana ia i te takiwā o te rangi, o te whenua; haere atu ana te muera i raro i a ia.
2SA 18:10 Nā, ka kite tētahi tangata, whakaaturia ana e ia ki a Ioapa; i mea hoki, “Nanā, i kite ahau i a Apohārama e iri ana i tētahi oki.”
2SA 18:11 Nā, ka mea a Ioapa ki taua tangata nāna nei i whakaatu ki a ia, “Ha, i kite koe, ā, he aha ia tē patua ai e koe i reira ki te whenua? Pēnei tekau ngā hekere hiriwa kua hoatu e ahau ki a koe, me tētahi whītiki.”
2SA 18:12 Nā, ka mea taua tangata ki a Ioapa, “Ahakoa ka riro mai i tōku ringa ngā pīhi hiriwa kotahi mano, pāuna rawa, e kore e totoro tōku ringa ki te tama a te kīngi; i a tātou hoki e whakarongo ana i ako te kīngi i a koe, i a Āpihai, i a Itai, i mea, ‘Kia tūpato kei pā tētahi ki te taitama rā, ki a Apohārama.’
2SA 18:13 Mehemea hoki i mahi teka ahau, i mea i te mate mōna (e kore hoki tētahi mea e ngaro i te kīngi), i reira ko koe tonu nā e tū kē i ahau.”
2SA 18:14 Kātahi a Ioapa ka mea, “E kore e pai kia roa ahau nei i a koe.” Nā, ka mau tōna ringa ki ētahi tao e toru, werohia atu ana e ia ki te ngākau o Apohārama, i a ia anō e ora ana i waenganui o te oki.
2SA 18:15 Nā, karapotia ana ia e ngā taitama kotahi tekau, e ngā kaimau patu a Ioapa, ā, patua ana a Apohārama e rātou, whakamatea ana.
2SA 18:16 Nā, whakatangihia ana e Ioapa te tētere, ā, hoki ana te iwi i te whai i a Īharaira. Nā Ioapa hoki i pēhi te iwi.
2SA 18:17 Nā, ka mau rātou ki a Apohārama, ka maka i a ia ki tētahi poka nui i te ngahere, ā, nui atu te pūranga kōhatu i haupūria ki runga ki a ia, ā, whati ana a Īharaira katoa ki tōna tēneti, ki tōna tēneti.
2SA 18:18 Nā, i tōna oranga i tīkina e Apohārama, i whakaarahia te pou mōna, ko tērā i te raorao o te kīngi; i mea hoki ia, “Kāhore āku tama e maharatia ai tōku ingoa.” Nā, huaina iho e ia tōna ingoa ki taua pou; e huaina nei anō a reira, ko te tohu a Apohārama ā tae noa ki tēnei rā.
2SA 18:19 Kātahi ka mea a Ahimāta tama a Hāroko, “Tukua ahau kia rere ki te kōrero ki te kīngi i tā Ihowā whakatikanga i tāna whakawā ki ōna hoariri.”
2SA 18:20 Nā, ka mea a Ioapa, “Kaua koe e kawe kōrero i tēnei rā; engari me kawe kōrero koe a tētahi atu rā; i tēnei rā ia e kore koe e kawe kōrero; kua mate hoki te tama a te kīngi.”
2SA 18:21 Kātahi ka mea a Ioapa ki te Kuhi, “Haere, kōrerotia ki te kīngi tāu i kite ai.” Nā, ka piko iho te Kuhi ki a Ioapa, ā, rere ana.
2SA 18:22 Kātahi ka mea anō a Ahimāta tama a Hāroko ki a Ioapa, “He ahakoa pēhea, kia rere anō ahau i muri i te Kuhi.” Ā, ka mea a Ioapa, “Kia rere koe hei aha, e tāku tama? Kāhore nei hoki he painga ki a koe o ngā kōrero.”
2SA 18:23 “He ahakoa rā, e ai kī tāna, me rere anō ahau.” Nā, ka mea tērā ki a ia, “E rere.” Kātahi ka rere a Ahimāta i te ara o te mānia, ā, ka mahue te Kuhi.
2SA 18:24 Nā, e noho ana a Rāwiri i waenganui i ngā kūwaha e rua; i piki anō te kaititiro ki te tuanui i runga i te kūwaha, ki te taiepa; ko te marangatanga ake o ōna kanohi, ka titiro, nā, ko tētahi tangata e rere mai ana, tōna kotahi.
2SA 18:25 Nā, ka karanga te kaititiro, ka whakaatu ki te kīngi. Anō rā ko te kīngi, “Ki te mea ko ia anake, he kōrero kei tōna māngai.” Nā, haere tonu mai ana tērā, ā, ka tata.
2SA 18:26 I kite anō te kaititiro i tētahi atu tangata e rere mai ana, ā, ka karanga iho te kaititiro ki te kaitiaki o te kūwaha, ka mea, “Tērā he tangata e rere mai rā, ko ia anake.” Ā, ka mea te kīngi, “He kōrero anō tā tērā.”
2SA 18:27 Nā, ka mea te kaititiro, “Ki tāku titiro rite tonu te rere a te tuatahi ki te rere a Ahimāta tama a Hāroko.” Ā, ka mea te kīngi, “He tangata pai ia, e haere mai ana me ngā kōrero pai.”
2SA 18:28 Nā, ka karanga a Ahimāta, ka mea ki te kīngi, “Kei te pai katoa.” Nā, ka piko iho tōna mata ki te whenua ki te aroaro o te kīngi, ā, ka mea, “Kia whakapaingia a Ihowā, tōu Atua, nāna nei i tuku mai ngā tāngata i totoro nei tō rātou ringa ki tōku ariki, ki te kīngi.”
2SA 18:29 Nā, ka mea te kīngi, “Kei te pai rānei te taitama a Apohārama?” Anō rā ko Ahimāta, “I te tononga a Ioapa i te tangata a te kīngi, i ahau, i tāu pononga, i kite ahau i te ngangau nui, heoi kīhai i mōhio he aha rānei.”
2SA 18:30 Nā, ka mea te kīngi ki a ia, “Haere ake, e tū ki konei.” Nā, haere ana ia, ā, tū ana.
2SA 18:31 Nā, ko te haerenga mai o te Kuhi; ā, ka mea te Kuhi, “He kōrero, e tōku ariki, e te kīngi; kua whakatikaia hoki e Ihowā tāu whakawā i te hunga i whakatika mai rā ki a koe.”
2SA 18:32 Anō rā ko te kīngi ki te Kuhi, “Kei te pai rānei te taitama, a Apohārama?” Ā, ka mea te Kuhi, “Kia rite ki taua taitama ngā hoariri o tōku ariki, o te kīngi, me te hunga katoa e whakatika ana ki a koe hei mea i te kino mōu.”
2SA 18:33 Nā, oho pū te mauri o te kīngi, ā, piki ana ki te rūma i runga i te kūwaha, tangi ana. Ko tāna kōrero tēnei i a ia e haere ana: “E tāku tama, e Apohārama, e tāku tama, e tāku tama, e Apohārama! He pai mehemea ko ahau i mate, ā, kaua koe, e Apohārama, e tāku tama, e tāku tama.”
2SA 19:1 Nā, ka kōrerotia ki a Ioapa, “Nanā, kei te tangi te kīngi, kei te uhunga mō Apohārama.”
2SA 19:2 Nā, puta kē ana te whakaoranga i taua rā hei tangi mā te iwi katoa; i rongo hoki te iwi i taua rā i te kōrero, e kōingo ana te kīngi ki tāna tama.
2SA 19:3 Nā, haere puku ana te iwi i taua rā ki te pā, ānō he hunga e haere puku ana i te whakamā, ina rere i te whawhai.
2SA 19:4 Ko te kīngi ia, taupoki tonu tōna mata, nui atu te reo o te kīngi ki te tangi, “E Apohārama, e tāku tama, e Apohārama, e tāku tama, e tāku tama.”
2SA 19:5 Nā, ka haere a Ioapa ki te kīngi ki roto ki te whare, ā, ka mea, “Kua whakamā i a koe ināianei ngā mata o āu tāngata katoa i ora ai koe i tēnei rā, i ora ai hoki āu tama, me āu tamāhine, i ora ai āu wāhine, i ora ai anō āu wāhine iti,
2SA 19:6 i a koe ka aroha nei ki ōu hoariri, ka kino nei ki te hunga e aroha ana ki a koe. Kua whakaatu mai nā hoki koe i tēnei rā, he kore noa iho ki a koe ngā rangatira me ngā tāngata; e mōhio ana hoki ahau i tēnei rā, kia ora kau ko Apohārama, ā, kia mate ko mātou katoa i tēnei rā, ka pai rawa ki a koe.
2SA 19:7 “Nā, whakatika, puta atu ki waho, kia puaki tētahi kupu pai ki āu tāngata; tā te mea he oati tēnei nāku i a Ihowā, ki te kāhore koe e puta ake, e kore tētahi tangata e noho ki a koe i tēnei pō; ā, nui atu tēnei kino ki a koe i ngā kino katoa i pā ki a koe o tōu taitamarikitanga ake ā mohoa noa nei.”
2SA 19:8 Nā, ka whakatika te kīngi, ā, noho ana i te kūwaha. Nā, ka kōrerotia te kōrero ki te iwi katoa, “Nanā, ko te kīngi, kei te kūwaha e noho ana.” Nā, haere ana te iwi katoa ki te aroaro o te kīngi. Kua whati hoki tērā a Īharaira ki tōna tēneti, ki tōna tēneti.
2SA 19:9 Nā, ka puta ake he tautohetohe i ngā tāngata katoa o ngā iwi katoa o Īharaira, i kī rātou, “Nā te kīngi tātou i whakaora i roto i te ringa o ō tātou hoariri, nāna hoki tātou i mawhiti ai i te ringa o ngā Pirihitini; heoi kua whati atu nei ia i te whenua i te wehi ki a Apohārama.
2SA 19:10 Ā, ko Apohārama i whakawahia nei e tātou hei kīngi mō tātou, kua mate i te whawhai. Nā, he aha koutou tē whai kupu ai kia whakahokia mai te kīngi?”
2SA 19:11 Nā, ka tono tāngata a Kīngi Rāwiri ki a Hāroko rāua ko Apiātara, ki ngā tohunga, hei kī atu: “Kōrero atu ki ngā kaumātua o Hūrā, mea atu, ‘He aha koutou i tauhiku ai ki te whakahoki i te kīngi ki tōna whare? Kua tae atu nā hoki te kōrero a Īharaira katoa ki te kīngi, ki te whakahoki i a ia ki tōna whare.
2SA 19:12 Ko ōku tēina nei koutou, ko ōku wheua, ko ōku kikokiko, he aha koutou i tauhikuhiku ai ki te whakahoki i te kīngi?’
2SA 19:13 Mā kōrua anō e kī atu ki a Amaha, ‘Ehara ianei koe i te wheua nōku, i te kikokiko nōku? Mā te Atua e mea tēnei mea ki ahau me tētahi atu mea, ki te kāhore koe e meinga hei rangatira ope ki tōku aroaro i ngā rā katoa hei whakakapi mō Ioapa.’ ”
2SA 19:14 Ā, meinga ana e ia kia piko te ngākau o ngā tāngata katoa o Hūrā ānō he tangata kotahi; ā, ka tono tāngata rātou ki te kīngi hei mea, “Hoki mai, me āu tāngata katoa.”
2SA 19:15 Nā, hoki ana te kīngi, ā, ka tae ki Horano. I haere anō a Hūrā ki Kirikara, he haere ki te whakatau i te kīngi, hei whakawhiti i te kīngi i Horano.
2SA 19:16 Nā, hohoro tonu a Himei Pineamini tama a Kera, tērā i Pahurimi rā, haere tahi ana me ngā tāngata o Hūrā ki raro, ki te whakatau i a Kīngi Rāwiri.
2SA 19:17 Nā, kotahi mano ngā tāngata o Pineamine i a ia, me Tipa anō, me te tangata o te whare o Haora, rātou ko āna tama tekau mā rima, me āna pononga e rua tekau; ā, whiti ana rātou i Horano i te aroaro o te kīngi.
2SA 19:18 I whiti anō he perepoti hei whakawhiti mō te whare o te kīngi, hei mea hoki i ngā mea e pai ana ki tōna whakaaro. Nā, ka tāpapa a Himei tama a Kera ki te aroaro o te kīngi, i a ia ka whiti nei i Horano,
2SA 19:19 ā, ka mea ki te kīngi, “Kaua tōku ariki e whakairi hara ki ahau, kaua anō e maharatia te tutū o tāu pononga i te rā i puta mai ai tōku ariki, te kīngi i Hiruhārama; kaua te ngākau o te kīngi e mea ki tēnā.
2SA 19:20 E mōhio ana hoki tāu pononga i hara ahau. Koia ahau i haere mai ai ināianei, ko te tuatahi o te whare katoa o Hōhepa; i haere mai hoki ki raro, ki te whakatau i tōku ariki, i te kīngi.”
2SA 19:21 Otiia ka oho a Āpihai tama a Teruia, ka mea, “E kore ianei a Himei e whakamatea mō tēnei, mōna i kanga i tā Ihowā i whakawahi ai?”
2SA 19:22 Anō rā ko Rāwiri, “Hei aha māku tā kōrua, e ngā tama a Teruia, i mea ai kōrua ki te totohe ki ahau i tēnei rā? Kia mate koia he tangata i roto i a Īharaira i tēnei rā? Kāhore ianei ahau e mōhio ko ahau te kīngi o Īharaira i tēnei rā?”
2SA 19:23 Nā, ka mea te kīngi ki a Himei, “E kore koe e mate.” Nā, oati ana te kīngi ki a ia.
2SA 19:24 Nā, ka haere a Mepipohete tama a Haora ki raro, ki te whakatau i te kīngi. Kīhai ōna waewae i whakapaia, kīhai tōna pāhau i whakapaia, kīhai anō ōna kākahu i horoia, nō te rā i haere ai te kīngi ā taea noatia te rā i hoki mārie mai ai ia.
2SA 19:25 Ā, i tōna taenga ki Hiruhārama ki te whakatau i te kīngi, ka mea te kīngi ki a ia, “He aha koe tē haere ai tātou, e Mepipohete?”
2SA 19:26 Anō rā ko ia, “Nā tāku pononga ahau i tinihanga, e tōku ariki, e te kīngi; i mea hoki tāu pononga, ‘Me whakanoho e ahau tētahi kāihe mōku, hei ekenga atu mōku, ka haere ai i te kīngi.’ He kopa hoki tāu pononga.
2SA 19:27 Nā, kua whakapae teka ia mō tāu pononga ki tōku ariki, ki te kīngi. Otiia, rite tonu tōku ariki, te kīngi ki te anahera a te Atua; nā, māu e mea te mea e pai ana ki tāu titiro.
2SA 19:28 Ko te whare katoa hoki o tōku pāpā me te mea he tūpāpaku i te aroaro o tōku ariki, o te kīngi. Heoi, kua whakanohoia e koe tāu pononga ki te hunga i kai ki tāu tēpu. Nā, he aha ake rā tāku e tika ai kia karanga atu ai anō ahau ki te kīngi?”
2SA 19:29 Nā, ka mea te kīngi ki a ia, “Hei aha ake āu kōrero i kōrerotia tonutia ai? Ko tāku kupu tēnei: me wehe e kōrua ko Tipa te māra.”
2SA 19:30 Nā, ka mea a Mepipohete ki te kīngi, “Engari me tango katoa e ia, he mea hoki kua tae mārie mai tōku ariki, te kīngi ki tōna whare.”
2SA 19:31 I haere mai anō a Paratirai Kireari i Rokerimi; ā, whiti ana rāua ko te kīngi i Horano, he kawe i a ia ki tērā taha o Horano.
2SA 19:32 Nā, he koroheke rawa a Paratirai, e waru tekau ōna tau. Nāna i atawhai te kīngi i tōna nohoanga ki Mahanaima; he tangata nui rawa hoki ia.
2SA 19:33 Nā, ka mea te kīngi ki a Paratirai, “Me whiti koe, tāua, ā, māku koe e atawhai ki tōku taha ki Hiruhārama.”
2SA 19:34 Nā, ka mea a Paratirai ki te kīngi, “E hia ngā rā o ngā tau hei oranga mōku, e haere tahi ai ahau me te kīngi ki runga, ki Hiruhārama?
2SA 19:35 Ka waru tekau ōku tau i tēnei rā; e mōhio rānei ahau he pai tēnei, he kino tērā? E mōhiotia rānei e tāu pononga te reka o tāku e kai ai, o tāku rānei e inu ai? E rongo anō rānei ahau i te reo o ngā tāne waiata, o ngā wāhine waiata rānei? Ā, kia meinga anō tāu pononga hei whakararuraru mō tōku ariki, mō te kīngi hei aha?
2SA 19:36 Ka haere tahi atu rā tāu pononga me te kīngi ki tāwāhi iti atu o Horano; ā, he aha kia whakaarohia tērā ki ahau e te kīngi ki tēnei utu nui?
2SA 19:37 Nā, tukua tāu pononga kia hoki, kia mate ai ahau ki tōku nei pā, ki te taha o te urupā o tōku pāpā, o tōku whaea. Engari ia tāu pononga, a Kimihama; ko ia e whiti tahi me tōku ariki, me te kīngi; meatia ki a ia te mea e pai ana ki tāu titiro.”
2SA 19:38 Nā, ka mea te kīngi, “Me whiti tahi māua ko Kimihama, ā, māku e mea ki a ia ngā mea e pai ana ki tāu titiro; ā, he aha tāu e tono ai ki ahau, ka mahia e ahau māu.”
2SA 19:39 Nā, whiti ana te iwi katoa i Horano. I whiti anō te kīngi, ā, kihia ana e te kīngi a Paratirai, manaakitia ana; ā, hoki ana tērā ki tōna wāhi.
2SA 19:40 Heoi, whiti ana te kīngi ki Kirikara, ā, i haere tahi anō a Kimihama i a ia; ā, nā te iwi katoa o Hūrā, nā te hāwhe o te iwi o Īharaira te kīngi i kawe.
2SA 19:41 Nā, haere ana ngā tāngata katoa o Īharaira ki te kīngi, ka mea ki te kīngi, “He aha ō mātou tēina, ngā tāngata o Hūrā i tāhae ai i a koe, i whakawhiti mai ai i te kīngi, i tōna whare katoa, i ngā tāngata katoa anō a Rāwiri, i Horano?”
2SA 19:42 Nā, ka whakahokia e ngā tāngata katoa o Hūrā ki ngā tāngata o Īharaira, “Nō te mea he whanaunga tata te kīngi ki a mātou. He aha rā koutou i riri ai mō tēnei mea. I kai rānei mātou i tētahi mea a te kīngi? I hōmai rānei e ia tētahi mea ki a mātou?”
2SA 19:43 Nā, ka whakahoki ngā tāngata o Īharaira ki ngā tāngata o Hūrā, ka mea rātou, “Kotahi tekau ngā wāhi o te kīngi kei a mātou, ā, nui atu hoki i tō koutou tō mātou take ki a Rāwiri; ā, he aha mātou i whakahāweatia ai e koutou, tē waiho ai mā mātou te kupu tuatahi mō te whakahoki mai i tō mātou kīngi?” Heoi, i pakari rawa ake ngā kupu a ngā tāngata o Hūrā i ngā kupu a ngā tāngata o Īharaira.
2SA 20:1 Nā, i tūpono ki reira tētahi tangata o Periara, ko tōna ingoa ko Hēpā, he tama nā Pikiri, nō Pineamine. Nā, whakatangihia ana e ia te tētere, ā, ka mea, “Kāhore ō tātou wāhi i a Rāwiri, kāhore he wāhi tūturu mō tātou i te tama a Hehe! Ki ō koutou tēneti, e tērā, e tērā o Īharaira!”
2SA 20:2 Nā, ka tākiritia ngā tāngata katoa o Īharaira i te whai i a Rāwiri, ā, whai ana i a Hēpā tama a Pikiri; ko ngā tāngata ia o Hūrā i piri ki tō rātou kīngi, o Horano mai anō a Hiruhārama atu ana.
2SA 20:3 Nā, haere ana a Rāwiri ki tōna whare ki Hiruhārama, ā, ka mau te kīngi ki ngā wāhine kotahi tekau, ki ngā wāhine iti i waiho rā hei tiaki i te whare, ā, whakanohoia ana ki te whare kia tiakina, atawhaitia iho rātou e ia. Otiia, kīhai ia i haere ki roto, ki a rātou. Nā, tūtakina atu ana rātou, he noho pouaru ā taea noatia te rā i mate ai rātou.
2SA 20:4 Kātahi ka mea te kīngi ki a Amaha, “Huihuia mai ngā tāngata o Hūrā ki ahau i roto i ngā rā e toru, ā, me tae mai anō koe ki konei.”
2SA 20:5 Nā, haere ana a Amaha ki te huihui i ngā tāngata o Hūrā; otiia i roa atu ia i te wā i whakaritea ki a ia.
2SA 20:6 Nā, ka mea a Rāwiri ki a Āpihai, “Ākuanei rahi atu te kino e mahia e Hēpā tama a Pikiri ki a tātou i tā Apohārama; tangohia ngā tāngata a tōu ariki, whāia, kei whiwhi ia ki ngā pā taiepa, ā, ka ora atu i ō tātou kanohi.”
2SA 20:7 Nā, haere ana ngā tāngata a Ioapa i muri i a ia, me ngā Kereti, me ngā Pereti, me ngā mārohirohi katoa; haere atu ana rātou i Hiruhārama ki te whai i a Hēpā tama a Pikiri.
2SA 20:8 I a rātou i te kōhatu nui i Kipeono, ka tae mai a Amaha kia tūtaki ki a rātou. Nā, ko te kākahu i kākahuria e Ioapa, he mea whītiki, ā, i waho ake he whītiki anō, me tētahi hoari, he mea whakamau ki tōna hope, i roto anō i tōna pūkoro; ā, i a ia e haere ana, ka makere.
2SA 20:9 Nā, ka mea a Ioapa ki a Amaha, “Kei te ora rānei koe, e tōku teina?” Nā, ka mau te ringa matau o Ioapa ki te kumikumi o Amaha, kia kihi i a ia.
2SA 20:10 Kīhai ia a Amaha i mahara ki te hoari i te ringa o Ioapa; nā, werohia ana ia e ia ki te kōpū ki taua mea, ā, ka tuakina ōna whēkau ki te whenua, kīhai hoki i tuaruatia e tērā; nā, ka mate ia. Nā, ka whai a Ioapa rāua ko tōna teina, ko Āpihai i a Hēpā tama a Pikiri.
2SA 20:11 Nā, tērā tētahi o ngā taitama a Ioapa i tōna taha e tū ana, ā, ka mea tērā, “Ko te tangata e pai ana ki a Ioapa, ā, ko te tangata e mea ana mō Rāwiri, me whai ia i a Ioapa.”
2SA 20:12 Heoi, takoto ana a Amaha, okeoke ana i roto i ōna toto i waenganui o te huarahi. Ā, ka kite taua tangata e tū ana te iwi katoa, nā, ka amohia atu e ia a Amaha i te huarahi ki te pārae, ā, hīpokina iho ana ki te kākahu, i tōna kitenga e tū ana te hunga katoa e tika ana nā reira.
2SA 20:13 Ka oti ia te neke atu i te huarahi, nā, haere ana te iwi katoa i muri i a Ioapa ki te whai i a Hēpā tama a Pikiri.
2SA 20:14 Nā, hāereerea ana e ia ngā iwi katoa o Īharaira, ki Apere, ā, ki Petemaaka, ki ngā Peri katoa; nā, ka huihui rātou katoa, ā, haere ana hoki i muri i a ia.
2SA 20:15 Nā, haere ana rātou, kei te whakapae i a ia ki Apere o Petemaaka, ā, whakahaupūtia ake ana e rātou tētahi pukepuke ki te pā, nā, kua hāngai ki te pekerangi. Nā, kei te āki te nuinga katoa o Ioapa i te taiepa kia hinga.
2SA 20:16 Nā, ka karanga tētahi wahine mōhio i roto i te pā, “Whakarongo mai, whakarongo mai; tēnā, kī atu ki a Ioapa, ‘Whakatata mai ki konei, kia kōrero ai ahau ki a koe.’ ”
2SA 20:17 Nā, ka whakatata ia ki a ia; ā, ka mea te wahine, “Ko koe ianei a Ioapa?” Ka mea tērā, “Tēnei ahau.” Nā, ko te kīanga a tērā ki a ia, “Whakarongo ki ngā kupu a tāu pononga.” Ka whakahokia e ia, “E whakarongo ana.”
2SA 20:18 Nā, ka mea tērā, “Ko tā rātou nā kupu onamata, i mea, ‘Me ui rawa rātou he kupu ki Apere’; ā, ka mutu tā rātou i tērā.
2SA 20:19 Nō roto ahau i te hunga āta noho, pono hoki i roto i a Īharaira. E whai ana koe kia whakangaromia he pā, he whaea nō Īharaira; he aha ka horomia ai e koe te wāhi tupu a Ihowā?”
2SA 20:20 Nā, ka whakahokia e Ioapa; i mea ia, “Hore rawa, hore rawa i ahau; ā, kore e horomia, e kore e hunā e ahau.
2SA 20:21 Kāhore āku pērā, engari he tangata tērā nō Maunga Ēparaima, ko tōna ingoa ko Hēpā tama a Pikiri, kua ara tōna ringa ki te kīngi, ki a Rāwiri; hōmai tōna kotahi, ā, ka haere atu ahau i te pā.” Kātahi taua wahine ka mea ki a Ioapa, “Nanā, ka ākiritia atu tōna upoko ki a koe rā runga i te taiepa.”
2SA 20:22 Nā, haere ana taua wahine, me tōna whakaaro mōhio, ki te iwi katoa. Nā, pōutoa ana e rātou te upoko o Hēpā tama a Pikiri, makā atu ana ki a Ioapa. Kātahi ia ka whakatangi i te tētere, ā, whakarērea ana e rātou te pā, pakaru noa atu ana ki tōna tēneti, ki tōna tēneti. Ā, hoki ana a Ioapa ki Hiruhārama ki te kīngi.
2SA 20:23 Nā, ko Ioapa te rangatira o te ope katoa o Īharaira; ko Penaia hoki, tama a Iehoiara te rangatira o ngā Kereti rātou ko ngā Pereti;
2SA 20:24 ko Arorama te rangatira takoha; ko Iehohāpata tama a Ahiruru te kaiwhakamahara;
2SA 20:25 ko Hewha te kaituhituhi; ā, ko Hāroko rāua ko Apiātara ngā tohunga;
2SA 20:26 ā, ko Ira Hairi anō hoki he tino kaiwhakahaere nā Rāwiri.
2SA 21:1 Nā, ka pā he matekai i ngā rā o Rāwiri, e toru ngā tau, ko tō tētahi tau āki tonu iho ki tō tētahi tau; ā, ka rapua te tikanga e Rāwiri i te aroaro o Ihowā. Nā, ka mea a Ihowā, “Mō tā Haora rātou ko tōna whare hūtoto; mōna i whakamate i ngā Kipeoni.”
2SA 21:2 Kātahi te kīngi ka karanga ki ngā Kipeoni, ā, ka kōrero ki a rātou. (Nā, ehara ngā Kipeoni i ngā tama a Īharaira; engari nō ngā mōrehu o ngā Amori, nō ērā i oati rā ngā tama a Īharaira; nā, whāia ana e Haora kia patua, he hae nōna, he whakaaro hoki ki ngā tama a Īharaira rātou ko Hūrā.)
2SA 21:3 Nā, ka mea a Rāwiri ki ngā Kipeoni, “Ko te aha tāku e mea ai ki a koutou? He aha hoki tāku whakamārie e manaakitia ai e koutou te kāinga tupu o Ihowā?”
2SA 21:4 Nā, ka mea ngā Kipeoni ki a ia, “Ehara i te kōura i te hiriwa rānei te mea kei waenganui i a mātou me Haora rātou ko tōna whare; kāhore hoki ā mātou mea ki tētahi tangata o Īharaira kia mate.” Anō rā ko ia, “Ka meatia e ahau tā koutou e kī mai ai.”
2SA 21:5 Kātahi rātou ka mea ki te kīngi, “Ko te tangata i whakamōtī nei i a mātou, i whakatakoto whakaaro nei mō mātou kia ngaro, kei waiho ki tētahi o ngā rohe o Īharaira.
2SA 21:6 Kia tokowhitu ngā tāngata o ōna tama e hōmai ki a mātou, ā, mā mātou rātou e tārona, hei mea ki a Ihowā, ki Kipea o Haora, o tā Ihowā i whiriwhiri ai.” Nā, ka mea te kīngi, “Ka hoatu e ahau.”
2SA 21:7 Otiia i tohungia e te kīngi a Mepipohete tama a Honatana tama a Haora, he whakaaro ki te oati a Ihowā i takoto i a rāua, i a Rāwiri rāua ko Honatana tama a Haora.
2SA 21:8 Engari i mau te kīngi ki ngā tama tokorua a Rihipa tamāhine a Aia i whānau nei i a rāua ko Haora, arā ki a Aramoni rāua ko Mepipohete; ki ngā tama tokorima hoki a Merapa tamāhine a Haora i whānau i a rāua ko Atariere tama a Paratirai Mehorati.
2SA 21:9 Ā, hoatu ana e ia ki ngā ringa o ngā Kipeoni, ā, tāronatia ana e rātou ki te maunga, i te aroaro o Ihowā. Nā, hinga ngātahi ana tō rātou tokowhitu katoa. Nō ngā rā o te kotinga rātou i whakamatea ai, nō ngā rā tuatahi, i te tīmatanga o te kotinga pārei.
2SA 21:10 Nā, ka mau a Rihipa tamāhine a Aia ki te kākahu taratara, ā, whārikitia ana hei mea mōna ki runga ki te kāmaka, i te tīmatanga o te kotinga, ā, heke noa he wai i te rangi ki runga ki a rātou; kīhai hoki i tukua e ia he manu o te rangi kia noho ki runga i te awatea, he kīrehe rānei o te pārae i te pō.
2SA 21:11 Ā, i kōrerotia ki a Rāwiri taua meatanga a Rihipa tamāhine a Aia, wahine iti a Haora.
2SA 21:12 Nā, ka haere a Rāwiri, ka tīkina ngā wheua o Haora, ngā wheua o Honatana, o tāna tama, i ngā tāngata o Iapehe Kireara, nā rātou nei hoki aua wheua i tango puku i te waharoa o Petehana i te wāhi i whakairihia ai e ngā Pirihitini i te rā i patua ai a Haora e ngā Pirihitini ki Kiripoa,
2SA 21:13 ā, kawea ana e ia i reira ngā wheua o Haora, me ngā wheua o Honatana, o tāna tama; i kohia anō e rātou ngā wheua o te hunga i whakatarea.
2SA 21:14 Ā, tanumia ana ngā wheua o Haora rāua ko Honatana, ko tāna tama, ki te whenua o Pineamine ki Heraha ki te urupā o Kihi, o tōna pāpā; ā, ka oti i a rātou ngā mea katoa i whakahaua e te kīngi, nā muri iho ka mārie mai te Atua ki te whenua.
2SA 21:15 Nā, ka whawhai anō ngā Pirihitini rātou ko Īharaira, ā, haere ana a Rāwiri ki raro, rātou ko āna tāngata, whawhai ana ki ngā Pirihitini; nā, ka ruha haere a Rāwiri.
2SA 21:16 Nā, ko Ihipipenopo, nō ngā uri o Rapa, ko te taimaha o tāna tao, e toru rau hekere parāhi te taimaha, he mea hou te hoari, whītiki rawa ki a ia; ka mea ia kia patua a Rāwiri.
2SA 21:17 Nā, pikitia ana ia e Āpihai tama a Teruia, ā, patua iho e ia te Pirihitini, whakamatea iho. Nā reira i oati ai ngā tāngata a Rāwiri ki a ia, i mea ai, “Kāti rawa tōu haere tahi tātou ki te whawhai, kei keto i a koe te rama o Īharaira.”
2SA 21:18 Ā muri iho i tēnei ka whawhai anō ki ngā Pirihitini ki Kopo, ā, nā Hipekai Huhati i patu a Hapa, nō ngā uri o Rapa.
2SA 21:19 Nā, ka whawhaitia anō ngā Pirihitini ki Kopo, ā, nā Erehanana tama a Iaare-Orekimio Pēterehema i patu te teina o Koriata Kiti, ko te kakau o tāna taoroa rite tonu ki te kurupae a te kaiwhatu.
2SA 21:20 Ā, i whawhai anō ki Kāta. Nā, ko tētahi tangata roa e ono nei ngā maihao o tētahi ringa, o tētahi ringa, e ono anō hoki ngā matikara o tētahi waewae, o tētahi waewae, e rua tekau mā whā katoa te maha, he uri anō nō Rapa.
2SA 21:21 I tāna whakataranga i a Īharaira, nā, patua ana ia e Honatana tama a Himei tuakana o Rāwiri.
2SA 21:22 He uri ēnei tokowhā nō Rapa i Kāta, ā, hinga ana i te ringa o Rāwiri, i te ringa hoki o āna tāngata.
2SA 22:1 I kōrerotia e Rāwiri ki a Ihowā ngā kupu o tēnei waiata i te rā i whakaorangia ai ia e Ihowā i te ringa o ōna hoariri katoa, i te ringa anō o Haora.
2SA 22:2 I mea ia: “Ko Ihowā tōku teko, tōku pourewa, ko tōku kaiwhakaora hoki ia, āe rā, ko tōku;
2SA 22:3 ko te Atua tōku kāmaka, ka whakawhirinaki ahau ki a ia; ko tōku whakangungu rākau, ko te haona o tōku whakaoranga, ko tōku pā tiketike, ko tōku rerenga atu; e tōku kaiwhakaora, whakaorangia ana ahau e koe i te tutū.
2SA 22:4 Ka karanga ahau ki a Ihowā e tika nei kia whakamoemititia; ā, ka whakaorangia ahau i ōku hoariri.
2SA 22:5 “I karapotia ahau e ngā ngaru o te mate, i whakawehia ahau e ngā waipuke o te kino.
2SA 22:6 I rōritia ahau e ngā taura a te rēinga; pōtaea ana ahau e ngā māhanga a te mate.
2SA 22:7 I karanga ahau ki a Ihowā i tōku pāweratanga, āe rā, i karanga ahau ki tōku Atua. Ā, i whakarongo ia ki tōku reo i roto i tōna temepara, i tae hoki tāku hāmama ki ōna taringa.
2SA 22:8 “Nā, ka ngāueue te whenua, ka rū; wiri ana ngā pūtake o ngā rangi, ngāueue ana, nō te mea e riri ana ia.
2SA 22:9 I kake he paowa i ōna pongaponga, ā, ka kai te kāpura o roto o tōna māngai; ngiha ana ngā waro.
2SA 22:10 I whakapīngoretia e ia ngā rangi, ā, ka heke iho; ā, i raro te pōuri kerekere i ōna waewae.
2SA 22:11 Nā, ka eke ia ki te kerupa, ā, rere ana; inā, i kitea ia i runga i ngā parirau o te hau.
2SA 22:12 I meinga anō e ia te pōuri hei tēneti ā tawhio noa, ngā wai pōuri, ngā kapua mātotoru o te rangi.
2SA 22:13 Ngiha ana ngā waro i te wherikotanga o tōna aroaro.
2SA 22:14 Papā ana te whatitiri a Ihowā ngā rangi; puaki ana te reo o te Runga Rawa.
2SA 22:15 Kōkiritia mai ana e ia ngā pere, ā, marara ana rātou; he uira, ā, ka whati rātou.
2SA 22:16 Nā, ka kitea ngā takere o te moana, ka takoto kau ngā pūtake o te ao i te whakatūpehupehunga a Ihowā, i te whengunga o te manawa o ōna pongaponga.
2SA 22:17 “I tono karere mai ia i runga, ka mau ki ahau; kūmea ake ahau e ia i roto i ngā wai maha.
2SA 22:18 Nāna ahau i whakaora i tōku hoariri kaha, i te hunga e kino ana ki ahau; he kaha rawa hoki rātou i ahau.
2SA 22:19 Huakina tatatia ana ahau e rātou i te rā o tōku matenga; ko Ihowā ia tōku whakawhirinakitanga.
2SA 22:20 Ā, whakaputaina ana ahau e ia ki te wāhi whānui; i whakaorangia ahau e ia, nō te mea i whakaahuareka ia ki ahau.
2SA 22:21 “Rite tonu ki tāku mahi tika tā Ihowā utu ki ahau; rite tonu ki te mā o ōku ringa tāna i whakahoki mai ai ki ahau.
2SA 22:22 I pupuri hoki ahau i ngā ara a Ihowā; ā, kīhai i hē, i whakarere i tōku Atua.
2SA 22:23 Kei mua tonu hoki i ahau āna whakaritenga katoa; ā, ko āna tikanga, kīhai ērā i matara atu i ahau.
2SA 22:24 I tū tika anō ahau ki tōna aroaro; i tiaki anō i ahau kei kino.
2SA 22:25 Nō reira i hōmai ai e Ihowā he utu ki ahau, rite tonu ki tōku tika; rite tonu ki tōku mā ki tāna titiro.
2SA 22:26 “He tangata atawhai, ka atawhai anō koe; he tangata tika, ka tika anō koe.
2SA 22:27 He tangata mā, ka mā anō koe; he tangata whakakeke, he whakakeke hoki tāu mahi.
2SA 22:28 E whakaorangia hoki e koe te iwi e tūkinotia ana; kei runga ia ōu kanohi i te hunga whakakake, kia whakahokia iho rātou e koe ki raro.
2SA 22:29 Ko koe hoki tōku rama, e Ihowā; mā Ihowā e whakamārama tōku pōuri.
2SA 22:30 Nāu hoki ahau i rere ai ki runga ki te rōpū; nā tōku Atua ka peke ahau i te taiepa.
2SA 22:31 “Tēnā ko te Atua, tika tonu tōna ara; he parakore te kupu a Ihowā; he whakangungu rākau ia ki te hunga katoa e whakawhirinaki ana ki a ia.
2SA 22:32 Ko wai oti te Atua, ki te kāhore a Ihowā? Ko wai hoki te kāmaka, ki te kāhore tō tātou Atua?
2SA 22:33 Ko te Atua tōku pā kaha; ko ia hei ārahi i te hunga tika i tōna ara.
2SA 22:34 Ko ia nei hei mea i ōku waewae kia rite ki ō te hāta; māna hoki ahau e whakatū ki runga ki ōku wāhi tiketike.
2SA 22:35 Ko ia hei whakaako i ōku ringa ki te whawhai; hei mea i ōku ringa kia whakapiko i te kōpere parāhi.
2SA 22:36 Kua hōmai hoki e koe ki ahau te whakangungu rākau o tāu whakaoranga; whakanuia ana ahau e tōu whakaaro māhaki.
2SA 22:37 I whakanuia e koe ōku takahanga i raro i ahau, tē paheke ōku waewae.
2SA 22:38 “Kua arumia e ahau ōku hoariri, ā, hunā iho rātou e ahau; kīhai anō ahau i tahuri, ā, mōtī noa rātou.
2SA 22:39 Mōtī iho rātou i ahau, mongamonga noa, tē āhei te whakatika; inā, hinga ana rātou ki raro i ōku waewae.
2SA 22:40 Nāu hoki ahau i whītiki ki te kaha mō te whawhai; piko ana i a koe ki raro i ahau te hunga i whakatika mai ki ahau.
2SA 22:41 Kua meinga hoki e koe kia hurihia mai e ōku hoariri ō rātou tuarā ki ahau, kia hunā e ahau te hunga e kino ana ki ahau.
2SA 22:42 I tirotiro rātou, heoi kāhore he kaiwhakaora; ki a Ihowā rawa, heoi kīhai ia i whakahoki kupu ki a rātou.
2SA 22:43 Nā, tukia ana rātou e ahau, ā, rite noa ki te puehu o te whenua; mōhungahunga noa rātou i ahau, me te mea he paru nō ngā huarahi; ā, tītaritaria ana rātou e ahau.
2SA 22:44 “Nāu hoki ahau i ora ai i ngā ngangautanga a tōku iwi; nāu ahau i tiaki hei upoko mō ngā tauiwi; hei apa mōku te iwi kāhore nei i mātauria e ahau.
2SA 22:45 Ka tuku mai ngā tāngata iwi kē ki raro i ahau; kia rongo kau te taringa, kakama tonu mai rātou ki ahau.
2SA 22:46 Ka memeha haere ngā tāngata iwi kē; ka puta wehi mai hoki i roto i ō rātou kuhunga.
2SA 22:47 “E ora ana a Ihowā, kia whakapaingia tōku kāmaka; kia whakanuia te Atua o te kāmaka o tōku whakaoranga.
2SA 22:48 Arā te Atua e rapu nei i te utu mōku, e pēhi nei i te iwi ki raro i ahau,
2SA 22:49 e whakaputa nei i ahau i roto i ōku hoariri. Āe rā, e mea ana koe i ahau kia teitei ake i te hunga e whakatika mai ana ki ahau, whakaorangia ana ahau e koe i te tangata tutū.
2SA 22:50 Mō konei ka whakawhetai ahau ki a koe, e Ihowā, i roto i ngā tauiwi, ka hīmene ki tōu ingoa.
2SA 22:51 He pourewa whakaora ia ki tāna kīngi; e whakaputa aroha ana ki tāna tangata i whakawahi ai, ki a Rāwiri rātou ko ōna uri ake ake.”
2SA 23:1 Nā, ko ngā kupu whakamutunga ēnei a Rāwiri. “He kupu tēnei nā Rāwiri tama a Hehe, he kupu hoki nā te tangata i whakarewaina ki runga, nā tā te Atua o Hākopa i whakawahi ai, nā te kaihīmene āhuareka o Īharaira:
2SA 23:2 “He kaiwhakapuaki ahau i te kupu a te Wairua o Ihowā; kei tōku arero tāna kōrero.
2SA 23:3 I kōrero te Atua o Īharaira, i mea te Kāmaka o Īharaira ki ahau: ‘Ko ia te kaiwhakatakoto tikanga mō ngā tāngata, e whakatakoto tikanga ana i runga i te wehi ki a Ihowā,
2SA 23:4 ka rite ia ki te mārama o te ata ina whiti te rā, o te ata kāhore nei he kapua; ki te tarutaru tupu hou e pihi ake ana i te whenua i te mea ka whiti te rā i te maonga o te ua.’
2SA 23:5 “He pono ehara tōku whare i te pēnā i te aroaro o te Atua; heoi kua takoto tāna kawenata ū tonu ki ahau, rite rawa ngā aha katoa, mau rawa. Nō te mea ko tōku whakaoranga katoa tēnei, ko tāku hoki e whakaahuareka ai, ahakoa kāhore e meinga ana e ia kia tupu.
2SA 23:6 Ko te hunga atuakore ia ka rite katoa ki te tātarāmoa e āia atu ana, e kore nei e hopukia atu e te ringa.
2SA 23:7 Engari, ko te tangata e whakapā atu, kia kapi ia i te rino, kia mau hoki ki te kakau o te tao; ā, ka tahuna rawatia rātou ki te ahi i tō rātou wāhi.”
2SA 23:8 Ko ngā ingoa ēnei o ngā tāngata mārohirohi a Rāwiri: ko Iohepepahepete Takamoni, ko ia te tino rangatira; ko Arino Eteni anō ia, i ara ake tāna tao ki ngā rau e waru, patua iho i te whakaekenga kotahi.
2SA 23:9 I muri i a ia ko Ereātara tama a Roro Ahohi; ko ia tētahi o ngā mārohirohi, o ngā hoa tokotoru o Rāwiri i tā rātou whakataranga ki ngā Pirihitini i huihui ki reira ki te whawhai, i te mea kua riro ngā tāngata o Īharaira,
2SA 23:10 whakatika ana ia, ā, patua iho ngā Pirihitini ā, ngenge noa tōna ringa, piri noa tōna ringa ki te hoari; ā, nui atu te wikitōria i meinga e Ihowā i taua rā; ā, hoki ana te iwi i muri i a ia, he hui kau i ngā parakete.
2SA 23:11 Ā, i muri i a ia ko Hamaha tama a Ake Harari. Nā, ko te huihuinga o ngā Pirihitini ki te taua, ki tētahi wāhi oneone e kapi ana i te pī; ā, rere ana te iwi i te aroaro o ngā Pirihitini.
2SA 23:12 Heoi, tū ana tērā i waenganui o taua wāhi, nā, ka mau i a ia, patua iho e ia ngā Pirihitini; nā, nui atu te whakaoranga i whakaora ai a Ihowā.
2SA 23:13 Nā, ka haere e toru o ngā rangatira e toru tekau ki raro, ā, ka tae ki a Rāwiri i te kotinga wīti ki te ana i Aturama; ā, i te noho tērā te ope o ngā Pirihitini i te raorao i Repaima.
2SA 23:14 Nā, i roto a Rāwiri i te pourewa i taua wā; i Pēterehema anō ngā hōia pupuri a ngā Pirihitini i taua wā.
2SA 23:15 Nā, ka minamina a Rāwiri, ā, ka mea, “Auē, te ai he tangata hei kawe wai mōku hei inu i te puna i Pēterehema, tērā i te kūwaha!”
2SA 23:16 Nā, wāhi pū ana aua toa tokotoru nā, waenganui o te puni o ngā Pirihitini, ā, utuhia ana he wai i te puna o Pēterehema, i tērā i te kūwaha tangohia ana, mauria ana ki a Rāwiri; otiia kīhai ia i pai ki te inu, nā, ringihia ana e ia hei mea ki a Ihowā.
2SA 23:17 Ā, ka mea, “Auē, kia meatia tēnei e ahau, e Ihowā; kia inu ahau i te toto o ngā tāngata i haere whakamomori nei ki te mate?” Nā, kīhai ia i pai ki te inu. Ko ēnei ngā mahi a aua mārohirohi tokotoru.
2SA 23:18 Nā, ko Āpihai teina o Ioapa tama a Teruia te rangatira o te tokotoru. Ā, i ara ake tāna tao ki ngā rau e toru, patua iho e ia; i whai ingoa hoki ia i roto i te tokotoru.
2SA 23:19 He teka ianei nōna te korōria nui o te tokotoru? Ā, meinga ana ia hei rangatira mō rātou; otiia kīhai ia i uru ki te tokotoru tuatahi.
2SA 23:20 Nā, ko Penaia tama a Iehoiara, ko te tama a tētahi tangata mārohirohi nō Kapateere, he nui āna mahi toa, ā, i patua e ia ngā tama tokorua a Ariere o Moapa. I haere anō hoki ia ki raro, ā, patua ana e ia tētahi raiona i roto i te wā o te hukarere.
2SA 23:21 Nāna hoki tētahi Īhipiana i patu, he tangata pakari. Nā, he tao i te ringa o te Īhipiana; otiia haere atu ana ia ki raro, ki a ia, he tokotoko tāna, kapohia ana e ia te tao i te ringa o te Īhipiana, ā, patua ana ia e ia ki tāna tao anō.
2SA 23:22 Nā Penaia tama a Iehoiara ēnei mahi; ā, i whai ingoa ia i roto i ngā mārohirohi tokotoru.
2SA 23:23 Nui ake tōna korōria i tō te toru tekau; otiia kīhai ia i uru ki te tokotoru tuatahi. Nā, meinga ana ia e Rāwiri hei rangatira mō āna kaitiaki.
2SA 23:24 Ko Atahere teina o Ioapa tētahi o te toru tekau: ko Erehanana tama a Roro o Pēterehema,
2SA 23:25 ko Hamaha Harori, ko Erika Harori,
2SA 23:26 ko Herete Parati, ko Ira tama a Ikehe Tekoi,
2SA 23:27 ko Apiētere Anetoti, ko Mepunai Huhati,
2SA 23:28 ko Taramono Ahohi, ko Maharai Netopati,
2SA 23:29 ko Herepe tama a Paana, he Netopati, ko Itai tama a Ripai, nō Kipea, nō ngā tama a Pineamine,
2SA 23:30 ko Penaia Piratoni, ko Hirai, nō ngā awaawa o Kāha,
2SA 23:31 ko Apiarapono Arapati, ko Ātamawete Parahumi,
2SA 23:32 ko Eriāhapa Haaraponi, nō ngā tama a Iahene, ko Honatana,
2SA 23:33 ko Hamaha Harari, ko Ahiama tama a Harara Harari,
2SA 23:34 ko Eriperete tama a Ahahapai tama a te Maakati, ko Eriama tama a Ahitopere Kironi,
2SA 23:35 ko Heterai Karameri, ko Paarai Ārapi,
2SA 23:36 ko Ikara tama a Nātana o Topa, ko Pani Kari;
2SA 23:37 ko Tereke Āmoni, ko Nahari Peeroti, ko ngā kaimau patu a Ioapa tama a Teruia,
2SA 23:38 ko Ira Ītiri, ko Karepa Ītiri,
2SA 23:39 ko Uria Hiti, ki te huihuia, e toru tekau mā whitu.
2SA 24:1 Nā, ka mura anō te riri o Ihowā ki a Īharaira, ā, ka whakatūtehu ia i a Rāwiri ki te hē mō rātou, ki te mea, “Tīkina, taua a Īharaira rāua ko Hūrā.”
2SA 24:2 Nā, ko te kīanga a te kīngi ki a Ioapa ki te rangatira ope, i reira ia i a ia, “Tēnā, hāereerea ngā iwi katoa o Īharaira mai o Rāna ā tae noa ki Peerehepa, ka tatau i te iwi, kia mōhio ai ahau ki te tōpūtanga o te iwi.”
2SA 24:3 Anō rā ko Ioapa ki te kīngi, “Mā Ihowā, mā tōu Atua e mea te iwi kia tātaki rau noa atu i tō rātou tokomaha i a rātou nei, ā, kia kite hoki ngā kanohi o tōku ariki, o te kīngi; otiia he aha tōku ariki, te kīngi i āhuareka ai ki tēnei mea?”
2SA 24:4 He ahakoa rā, ū tonu te kupu a te kīngi ki a Ioapa rātou ko ngā rangatira ope. Nā, haere atu ana a Ioapa rātou ko ngā rangatira ope i te aroaro o te kīngi ki te tatau i te iwi, i a Īharaira.
2SA 24:5 Nā, ka whiti rātou i Horano, ka noho ki Aroere, ki te taha ki matau o te pā i waenganui o te awaawa o Kara, ā tae noa ki Iatere.
2SA 24:6 Kātahi ka tae rātou ki Kireara, ki te whenua o Tahatimihorohi, ā, ka tae ki Ranaiāna, ā, āwhio haere ana ki Hairona;
2SA 24:7 ā, ka tae ki te pā kaha ki Tāira, ki ngā pā katoa o ngā Hiwi, o ngā Kanaani; ā, puta ana rātou ki te tonga o Hūrā, ki Peerehepa.
2SA 24:8 Nā, ka oti te whenua katoa te hāereere e rātou, ka tae rātou ki Hiruhārama i te paunga o ngā marama e iwa, o ngā rā e rua tekau.
2SA 24:9 Nā, ka hōmai e Ioapa te tōpūtanga o te iwi i taua ki te kīngi; ā, e waru rau mano ngā mārohirohi i roto i a Īharaira, he hunga mau hoari; ā, e rima rau mano ngā tāngata o Hūrā.
2SA 24:10 Nā, ka patu te ngākau o Rāwiri i a ia i muri i tāna tauanga i te iwi. Ā, ka mea a Rāwiri ki a Ihowā, “Nui atu tōku hara i tāku i mea nei; nā, tēnā, kia whakarērea noatia iho, e Ihowā, te hē o tāu pononga; nui atu hoki te kūware o tāku i mea ai.”
2SA 24:11 Nā, i te marangatanga ake o Rāwiri i te ata, ka puta te kupu a Ihowā ki a Kara poropiti, ki tā Rāwiri matakite, i mea ia,
2SA 24:12 “Haere, mea atu ki a Rāwiri, ko te kupu tēnei a Ihowā: ‘E toru ngā mea ka whakaaria e ahau ki a koe; whiriwhiria e koe tētahi o aua mea, ā, ka meatia e ahau ki a koe.’ ”
2SA 24:13 Heoi, ka tae a Kara ki a Rāwiri, ā, ka kōrero ki a ia, ka mea, “Kia tae atu rānei ki a koe ētahi tau matekai e whitu ki tōu whenua? Kia toru rānei ngā marama e rere ai koe i te aroaro o ōu hoariri, me tā rātou whai anō i a koe? Kia toru rānei ngā rā o te mate urutā ki tōu whenua? Nā, whakaaroa e koe kia kitea ai tāku kupu e whakahoki ai ki tōku kaitono mai.”
2SA 24:14 Anō rā ko Rāwiri ki a Kara, “He noa iho ōku whakaaro. Nā, kia taka tātou āianei ki roto ki te ringa o Ihowā, he nui hoki āna mahi tohu; ā, kaua ahau e taka ki te ringa o te tangata.”
2SA 24:15 Heoi, whakapāngia ana e Ihowā he mate urutā ki a Īharaira, o te ata iho anō ā taea noatia te wā i whakaritea; ā, mate ake o te iwi, o Rāna ā tae noa ki Peerehepa, e whitu tekau mano tāngata.
2SA 24:16 Ā, nō te toronga atu o te ringa o te anahera ki Hiruhārama whakangaro ai, ka puta kē tō Ihowā whakaaro mō te kino, ā, ka mea ia ki te anahera e whakangaro ana i te iwi, “Kua nui tēnei! Kati tōu ringa.” Ā, i te patunga wīti a Arauna Iepuhi, te anahera a Ihowā.
2SA 24:17 I kōrero hoki a Rāwiri ki a Ihowā i tōna kitenga i te anahera i patua ai te iwi, i mea, “Inā, kua hara ahau, kua mahi i te mahi hē; ko ēnei hipi ia, i aha rātou? Tēnā, kia pā tōu ringa ki ahau, ki te whare anō o tōku pāpā.”
2SA 24:18 Nā, ka haere a Kara ki a Rāwiri i taua rā, ā, ka mea ki a ia, “Haere ki runga, whakaarahia he āta ki a Ihowā ki te patunga wīti a Arauna Iepuhi.”
2SA 24:19 Nā, whakatika ana a Rāwiri, pērā ana me te kupu a Kara, me tā Ihowā i whakahau ai.
2SA 24:20 Ā, ka titiro atu a Arauna, ka kite i te kīngi rātou ko āna tāngata e haere mai ana ki a ia; nā, ka puta atu a Arauna, piko ana ki te kīngi, ahu ana tōna mata ki te whenua.
2SA 24:21 Nā, ka mea a Arauna, “He aha tōku ariki, te kīngi, i haere mai ai ki tāna pononga?” Nā, ka mea a Rāwiri, “Ki te hoko i tāu patunga wīti, kia hangā ai he āta ki a Ihowā, kia mutu ai te whiunga o te iwi.”
2SA 24:22 Nā, ka mea a Arauna ki a Rāwiri, “Me tango e tōku ariki, e te kīngi, me whakaeke te mea e pai ana ki tāna titiro. Nanā, ngā kau hei tahunga tinana, me ngā patu wīti, me ngā mea o ngā kau hei wahie!”
2SA 24:23 Ko ēnei katoa, e te kīngi, e hoatu ana e Arauna ki te kīngi. I mea anō a Arauna ki te kīngi, “Kia manako a Ihowā, tōu Atua ki a koe.”
2SA 24:24 Nā, ka mea te kīngi ki a Arauna, “Kāhore, engari me āta hoko e ahau tōu wāhi ki te utu, e kore hoki e whakaherea e ahau he tahunga tinana ki a Ihowā, ki tōku Atua, kāhore i utua e ahau.” Heoi, hokona ana e Rāwiri taua patunga wīti me ngā kau ki te hiriwa, e rima tekau hekere.
2SA 24:25 Ā, hangā ana e Rāwiri he āta ki reira mā Ihowā, whakaekea ana e ia ētahi tahunga tinana me ētahi whakahere mō te pai. Heoi, ka mārie a Ihowā ki te whenua, ā, ka mutu te mate urutā ki a Īharaira.
1KI 1:1 Nā, kua koroheketia a Kīngi Rāwiri, kua maha ōna rā; ā, hīpokina ana ia e rātou ki te kākahu; heoi kīhai i mahana.
1KI 1:2 Nō reira ka mea atu āna tāngata ki a ia, “Me rapu tētahi kōtiro, he wāhina, mā tōku ariki, mā te kīngi; ā, me tū ia i mua i te kīngi, māna hoki ia e atawhai; ā, me takoto ia ki tōu uma, kia mahana ai tōku ariki, te kīngi.”
1KI 1:3 Heoi, rapua ana e rātou tētahi kōtiro ātaahua i ngā rohe katoa o Īharaira; ā, kitea ana ko Āpihaka Hunami, ā, kawea ana mai ia ki te kīngi.
1KI 1:4 Nā, he ātaahua rawa taua kōtiro; ā, i atawhai ia i te kīngi, i mahi hoki ki a ia; otirā kīhai te kīngi i mōhio ki a ia.
1KI 1:5 Kātahi a Aronia tama a Hākiti ka whakanui i a ia, ka mea, “Ko ahau hei kīngi;” ā, meatia ana e ia ētahi hāriata māna, me ētahi tāngata noho hōiho, e rima tekau hoki ngā tāngata hei rere i tōna aroaro.
1KI 1:6 Kīhai hoki tōna pāpā i whakapōuri i tōna ngākau ō mua iho, kīhai i mea, “He aha koe i pēnā ai?” He tangata ātaahua rawa hoki ia; ā, i whānau ia i muri i a Apohārama.
1KI 1:7 Nā, ka kōrerorero ia ki a Ioapa tama a Teruia, ki a Apiātara tohunga; ā, i whai rāua i a Aronia, i āwhina i a ia.
1KI 1:8 Ko Hāroko tohunga ia, ko Penaia tama a Iehoiara, ko Nātana matakite, ko Himei, ko Rei, ko ngā tāngata nunui a Rāwiri, kīhai rātou i uru ki tā Aronia.
1KI 1:9 Nā, ka patua e Aronia he hipi, he kau, me ngā mea mōmona, ki te kōhatu ki Toherete, ki tērā i te taha o Enerōkere, ā, karangatia ana e ia ōna tēina katoa, ngā tama a te kīngi, rātou ko ngā tāngata katoa o Hūrā, ngā pononga a te kīngi;
1KI 1:10 ko Nātana matakite ia, ko Penaia, ko ngā tāngata nunui, me tōna teina, me Horomona, kīhai i karangatia e ia.
1KI 1:11 Nā, ka kōrero a Nātana ki a Patehēpa whaea o Horomona, ka mea, “Kāhore anō koe i rongo ko Aronia tama a Hākiti te kīngi, kāhore hoki i te mōhiotia e tō tātou ariki, e Rāwiri?
1KI 1:12 Nā, haere mai, tukua māku e hoatu he whakaaro ki a koe, kia ora ai koe, kia ora ai hoki tāu tama, a Horomona.
1KI 1:13 Haere, ā, ka tae ki a Kīngi Rāwiri, ka mea ki a ia, ‘Kīhai ianei koe i oati mai, e tōku ariki, e te kīngi, ki tāu pononga, i mea: “Ko Horomona tonu ko tāu tama hei kīngi i muri i ahau. Ko ia hoki hei noho i tōku torōna”? Nā, he aha i kīngi ai a Aronia?’
1KI 1:14 Nā, e kōrero ana anō koe i reira ki te kīngi, ka tae atu hoki ahau i muri i a koe, ā, māku e whakakoia ki āu kōrero.”
1KI 1:15 Nā, ko te haerenga o Patehēpa ki te whare moenga, ki te kīngi; he koroheke rawa hoki te kīngi; ko Āpihaka Hunami anō ki te mahi i ngā mea a te kīngi.
1KI 1:16 Nā, ka tuohu a Patehēpa, ka piko ki te kīngi, ā, ka mea te kīngi, “He aha tāu?”
1KI 1:17 Nā, ka mea tērā ki a ia, “E tōku ariki, i oatitia mai a Ihowā, tōu Atua, e koe ki tāu pononga: ‘Ko Horomona tonu, ko tāu tama hei kīngi i muri i ahau, ā, ko ia hei noho ki tōku torōna.’
1KI 1:18 Nā, ināianei, kua kīngi a Aronia; ā, kāhore koe, e tōku ariki, e te kīngi, i te mōhio;
1KI 1:19 ā, kua patua e ia he kau, he mea mōmona, he hipi, tōna tini; kua karangatia hoki ngā tama katoa a te kīngi, me Apiātara tohunga, me Ioapa rangatira ope; ko Horomona ia, ko tāu pononga, kīhai i karangatia e ia.
1KI 1:20 Nā, ko koe, e tōku ariki, e te kīngi – e anga ana ngā kanohi o Īharaira katoa ki a koe, kia whakaaturia ki a rātou ko wai e noho ki te torōna o tōku ariki, o te kīngi, i muri i a ia.
1KI 1:21 Nā tēnei ake, hei te moenga o tōku ariki, o te kīngi, ki ōna mātua, ka kīia māua ko tāku tama, ko Horomona, he hunga hara.”
1KI 1:22 Nā, i a ia anō e kōrero ana ki te kīngi, ka tomo mai a Nātana poropiti.
1KI 1:23 Ā, ka kōrerotia e rātou ki te kīngi, ka mea, “Ko Nātana poropiti tēnei.” Nā, haere ana tērā ki te aroaro o te kīngi, ā, piko ana, tāpapa ana ki te whenua ki te aroaro o te kīngi.
1KI 1:24 Nā, ka mea a Nātana, “E tōku ariki, e te kīngi, i mea rānei koe, ‘Ko Aronia hei kīngi i muri i ahau, ā, ko ia hei noho ki tōku torōna’?
1KI 1:25 Kua haere hoki ia ki raro i tēnei rā, ā, kei te patu tērā i te kau, i te mea mōmona, i te hipi, tōna tini, ā, kua karangatia e ia ngā tama katoa a te kīngi rātou ko ngā rangatira ope, ko Apiātara tohunga; kei te kai rātou, kei te inu i tōna aroaro, e kī ana, ‘Kia ora a Kīngi Aronia.’
1KI 1:26 Ko ahau ia, ko tāu pononga, ko mātou ko Hāroko tohunga, ko Penaia tama a Iehoiara, ko tāu pononga, ko Horomona, kīhai i karangatia e ia.
1KI 1:27 Nā tōku ariki rānei, nā te kīngi tēnei mea, ā, kīhai i whakaaturia e koe ki āu pononga, ko wai e noho ki te torōna o tōku ariki, o te kīngi i muri i a ia?”
1KI 1:28 Nā, ka whakahoki a Kīngi Rāwiri, ka mea, “Karangatia a Patehēpa ki ahau.” Nā, haere ana ia ki te aroaro o te kīngi, ā, tū ana i te aroaro o te kīngi.
1KI 1:29 Nā, ko te oatitanga a te kīngi, ka mea: “E ora ana a Ihowā i whakaora nei i ahau i ngā mate katoa,
1KI 1:30 ko āku oatitanga i a Ihowā, i te Atua o Īharaira ki a koe, i ahau i mea rā: He pono, ko Horomona, ko tāu tama, hei kīngi i muri i ahau, ko ia hoki hei noho ki tōku torōna i muri i ahau, he pono me pēnā anō e ahau i tēnei rā.”
1KI 1:31 Kātahi ka tuohu a Patehēpa, anga tonu tōna mata ki te whenua, piko ana ki te aroaro o te kīngi, ka mea, “Kia ora tōku ariki, a Kīngi Rāwiri, ā ake ake!”
1KI 1:32 Nā, ka mea a Kīngi Rāwiri, “Karangatia a Hāroko tohunga ki ahau, a Nātana poropiti, a Penaia tama a Iehoiara.” Nā, haere ana mai rātou ki te aroaro o te kīngi.
1KI 1:33 Nā, ka mea te kīngi ki a rātou: “Mauria ngā pononga a tō koutou ariki hei hoa mō koutou, ka whakanoho i a Horomona, i tāku tama, ki tōku muera, ki tōku ake, ka kawe i a ia ki raro, ki Kihona;
1KI 1:34 ā, mā Hāroko tohunga rāua ko Nātana poropiti ia e whakawahi ki reira hei kīngi mō Īharaira; me whakatangi hoki te tētere, me mea, ‘Kia ora a Kīngi Horomona.’
1KI 1:35 Nā, ka piki ake koutou i muri i a ia, ā, ka tae mai ia, ka noho ki tōku torōna; ā, hei kīngi ia i muri i ahau; he mea whakarite nāku hei rangatira ia mō Īharaira rāua ko Hūrā.”
1KI 1:36 Nā, ka whakahoki a Penaia tama a Iehoiara ki tā te kīngi, ka mea, “Āmine! Kia pēnā mai hoki te kī a Ihowā, a te Atua o tōku ariki, o te kīngi.
1KI 1:37 I tōku ariki nei, i te kīngi, a Ihowā, kia pēnā anō ia ki a Horomona; ā, kia whakanuia ake tōna torōna ki runga ake i te torōna o tōku ariki, o Kīngi Rāwiri.”
1KI 1:38 Heoi, ka haere a Hāroko tohunga, a Nātana poropiti, a Penaia tama a Iehoiara, me ngā Kereti, me ngā Pereti ki raro, ā, whakanohoia ana e rātou a Horomona ki te muera o Kīngi Rāwiri, ā, kawea ana ki Kihona.
1KI 1:39 Nā, tangohia ana e Hāroko tohunga te haona hinu i roto i te tapenākara, ā, whakawahia ana e ia a Horomona. Nā, ka whakatangihia e rātou te tētere; ā, ka mea katoa te iwi, “Kia ora a Kīngi Horomona!”
1KI 1:40 Nā, piki ake ana te iwi katoa i muri i a ia, me te whakatangi te iwi i ngā pūtōrino; nui atu hoki te koa i koa ai rātou, ngātata ana te whenua i tō rātou hāmama.
1KI 1:41 Nā, ka rongo a Aronia rātou ko āna manuhiri i a rātou e whakamutu ana i tā rātou kai; ā, nō te rongonga o Ioapa i te tangi o te tētere, ka mea ake, “He aha tēnei hāmama o te pā e ngangau mai nei?”
1KI 1:42 I a ia anō e kōrero ana, nā, ko Honatana tama a Apiātara tohunga e haere mai ana; ā, ka mea a Aronia, “Haere mai; he tangata māia hoki koe, ā, he kōrero pai āu.”
1KI 1:43 Nā, ka whakahoki a Honatana, ka mea atu ki a Aronia, “He pono rawa, kua meinga a Horomona e tō tātou ariki, e Kīngi Rāwiri, hei kīngi.
1KI 1:44 Ā, kua ungā e te kīngi hei hoa mōna a Hāroko tohunga, a Nātana poropiti, a Penaia tama a Iehoiara rātou ko ngā Kereti, ko ngā Pereti; ā, kua whakanohoia ia e rātou ki te muera o te kīngi;
1KI 1:45 ā, kua whakawahia ia e Hāroko tohunga, e Nātana poropiti hei kīngi ki Kihona. Nā, kua piki ake rātou i reira me te koa, nā, ngateri ana te pā. Ko te hāmama tēnei i rongo nā koutou.
1KI 1:46 Ā, ko Horomona hoki tēnei te noho mai nei i runga i te torōna o te kīngitanga.
1KI 1:47 Ā, kua tae mai hoki ngā pononga a te kīngi ki te manaaki i tō tātou ariki, i a Kīngi Rāwiri, ki te mea, ‘Kia meinga e tōu Atua te ingoa o Horomona kia pai atu i tōu ingoa, kia whakanuia ake e ia tōna torōna i tōu torōna.’ Nā, piko ana te kīngi i runga i te moenga.
1KI 1:48 Ā, i pēnei hoki te kupu a te kīngi, ‘Kia whakapaingia a Ihowā, te Atua o Īharaira, mōna kua hōmai nei i tētahi hei noho i tōku torōna i tēnei rā, me te kite atu anō ōku kanohi.’ ”
1KI 1:49 Nā, ka pāwera ngā manuhiri a Aronia, whakatika ana, ā, haere ana i tōna ara, i tōna ara.
1KI 1:50 Ā, wehi ana a Aronia i a Horomona, ā, whakatika ana, ka haere, ā, ka hopu i ngā haona o te āta.
1KI 1:51 Nā, ka kōrerotia te kōrero ki a Horomona, “Ko Aronia tērā e wehi ana i a Kīngi Horomona; kei te pupuri anō tērā i ngā haona o te āta; e mea ana, ‘Kia oati a Kīngi Horomona ki ahau āianei, e kore e whakamatea e ia tāna pononga ki te hoari.’ ”
1KI 1:52 Nā, ka mea a Horomona, “Ki te mea he tikanga pai tāna, e kore e taka tētahi makawe ōna ki te whenua; tēnā ki te kitea he hē tōna, ka mate.”
1KI 1:53 Heoi, ka tono tāngata a Kīngi Horomona ki te tiki i a ia i runga i te āta. Ā, haere mai ana ia, piko ana ki a Kīngi Horomona; ā, ka mea a Horomona ki a ia, “Haere ki tōu whare.”
1KI 2:1 Nā, kua tata ngā rā o Rāwiri e mate ai; ā, ka ako ia i tāna tama, i a Horomona, ka mea:
1KI 2:2 “E haere ana tēnei ahau i te ara o te whenua katoa. Nā, kia kaha, whakatāne,
1KI 2:3 ā, kia mau ki te whakahau a Ihowā, a tōu Atua, kia haere i āna ara, kia mau ki āna tikanga, ki āna whakahau, ki āna whakaritenga, ki āna whakaaturanga, ki ngā mea kua oti te tuhituhi ki te ture a Mohi, kia tika ai tāu i ngā mea katoa e mea ai koe, i ngā wāhi katoa e tahuri ai koe.
1KI 2:4 Kia mana ai i a Ihowā tāna kupu i kōrero ai ia mōku, i mea ai: ‘Ki te tūpato āu tamariki ki tō rātou ara, ki te whakapaua katoatia ō rātou ngākau, ō rātou wairua, ki te haere i tōku aroaro i runga i te pono, e kore e whakakorea, e ai ki tāna, tētahi tangata māu mō te torōna o Īharaira.’
1KI 2:5 “Nā, e mōhio ana hoki koe ki tā Ioapa tama a Teruia i mea ai ki ahau, ki tāna i mea ai ki ngā rangatira ope tokorua o Īharaira, ki a Āpanēre tama a Nere, ki a Amaha tama a Iētere, i patua rā e ia, ā, whakahekea ana ngā toto o te whawhai i te wā o te rangimārie, whakahekea ana ngā toto o te whawhai ki tōna whītiki i tōna hope, ki ōna hū i ōna waewae.
1KI 2:6 Nā, kia rite tāu e mea ai ki tāu i mātau ai, ā, kaua e tukua tōna upoko hina kia heke atu ki te rua i runga i te rangimārie.
1KI 2:7 “Kia puta ia tōu aroha ki ngā tama a Paratirai Kireari, kia uru hoki rātou ki te hunga e kai ana ki tāu tēpu; i pērā hoki rātou, i whakatau ki ahau i tōku rerenga i tōu tuakana, i a Apohārama.
1KI 2:8 “Nā, kei a koe nā a Himei tama a Kera o Pineamine, o Pahurimi, tērā i kanga rā ki ahau, kino atu te kanga, i te rā i haere ai ahau ki Mahanaima. Otiia, i haere mai ki ahau ki raro, ki Horano ki te whakatau i ahau, ā, oatitia ana a Ihowā e ahau ki a ia, i mea ahau, ‘E kore ahau e whakamate i a koe ki te hoari.’
1KI 2:9 Nā, kaua ia e meinga he harakore, he tangata mōhio hoki koe, ā, e mātau ana ki tāu e mea ai ki a ia; engari kia heke tōna upoko hina ki te rua i runga i te toto.”
1KI 2:10 Nā, moe ana a Rāwiri ki ōna mātua, ā, tanumia ana ki te pā o Rāwiri.
1KI 2:11 Ko ngā rā i kīngi ai a Rāwiri ki a Īharaira, e whā tekau tau; e whitu ngā tau i kīngi ai ia ki Heperona, e toru tekau mā toru anō ngā tau i kīngi ai ki Hiruhārama.
1KI 2:12 Nā, noho ana a Horomona i runga i te torōna o Rāwiri, o tōna pāpā, ā, ū rawa tōna kīngitanga.
1KI 2:13 Nā, ka haere a Aronia tama a Hākiti ki a Patehēpa whaea o Horomona. Ā, ka mea tērā, “I haere mai rānei koe i runga i te pai?” Ā, ka mea ia, “I runga anō i te pai.”
1KI 2:14 Ā, i mea anō ia, “He kupu tāku ki a koe.” Ā, ka mea tērā, “Kōrero.”
1KI 2:15 Nā, ka mea ia, “E mōhio ana koe, i ahau te kīngitanga, i anga mai anō ngā kanohi o Īharaira katoa ki ahau hei kīngi; heoi kua kauparea kētia nei te kīngitanga, ā, riro ana i tōku teina: nōna hoki, nā Ihowā mai.
1KI 2:16 Nā, kotahi tēnei tono āku ki a koe; kaua e whakakāhoretia tāku.” Ā, ka mea tērā ki a ia, “Kōrero.”
1KI 2:17 Nā, ka mea ia, “Tēnā, kōrero ki a Kīngi Horomona, e kore hoki ia e whakakāhore ki tāu, kia hōmai e ia a Āpihaka Hunami hei wahine māku.”
1KI 2:18 Nā, ka mea a Patehēpa, “E pai ana, me kōrero tāu e ahau ki te kīngi.”
1KI 2:19 Heoi, haere ana a Patehēpa ki a Kīngi Horomona ki te kōrero ki a ia i tā Aronia, ā, whakatika ana te kīngi ki te whakatau ki a ia, piko ana ki a ia, ā, ka noho iho anō ki tōna torōna. Ā, ka meinga e ia kia whakatūria he torōna mō te whaea o te kīngi, ā, noho ana tērā ki tōna ringa matau.
1KI 2:20 Kātahi ka mea ia, “Kotahi tēnei mea iti hei tononga māku ki a koe; kaua tāku e whakakāhoretia.” Ā, ka mea te kīngi ki a ia, “Tonoa, e tōku whaea; e kore hoki ahau e whakakāhore ki tāu.”
1KI 2:21 Ā, ka mea tērā, “Kia hoatu a Āpihaka Hunami hei wahine mā tōu tuakana, mā Aronia.”
1KI 2:22 Nā, ka whakahoki a Kīngi Horomona, ka mea ki tōna whaea, “He aha i tonoa ai e koe a Āpihaka Hunami mā Aronia? Tonoa anō hoki te kīngitanga mōna; ko ia hoki tōku tuakana; mōna, mō Apiātara tohunga, mō Ioapa tama a Teruia.”
1KI 2:23 Kātahi ka oatitia a Ihowā e Kīngi Horomona, ka mea, “Kia meatia mai tēnei e te Atua ki ahau, me tētahi atu mea anō, mehemea ehara i te kupu whakamate mōna anō tēnei i kōrerotia nei e Aronia.
1KI 2:24 Tēnā rā, e ora ana a Ihowā i whakapūmau nei i ahau, i whakanoho nei i ahau ki te torōna o Rāwiri, o tōku pāpā, i mea nei hoki i tētahi whare mōku, i te pērā me tāna i kōrero ai, ko āianei pū mate ai a Aronia.”
1KI 2:25 Nā, ka tonoa e Kīngi Horomona a Penaia tama a Iehoiara, ā, rere ana tērā ki runga ki a ia, nā, kua mate.
1KI 2:26 Nā, ka mea te kīngi ki te tohunga ki a Apiātara, “Haere ki Anatoto, ki āu māra; e tika ana hoki te mate mōu. Otiia, e kore ahau e whakamate i a koe i tēnei rā, nō te mea nāu i mau te āka a te Ariki, a Ihowā, i mua i a Rāwiri, i tōku pāpā, i mate anō hoki koe i ngā mate katoa o tōku pāpā.”
1KI 2:27 Heoi, peia ana a Apiātara e Horomona i te mahi tohunga ki a Ihowā; kia tutuki ai te kupu a Ihowā i kōrero ai ki Hiro mō te whare o Eri.
1KI 2:28 Nā, ka tae te rongo ki a Ioapa; i anga hoki a Ioapa ki te whai i a Aronia, engari kāhore i tahuri ki a Apohārama. Nā, rere ana a Ioapa ki te tapenākara o Ihowā, kei te pupuri i ngā haona o te āta.
1KI 2:29 Ā, ka kōrerotia ki a Kīngi Horomona, “Kua rere a Ioapa ki te tapenākara o Ihowā, nā, kei te taha o te āta.” Kātahi ka ungā a Penaia tama a Iehoiara e Horomona, ā, ka mea ia, “Haere, e rere ki runga i a ia.”
1KI 2:30 Nā, ka tae a Penaia ki te tapenākara o Ihowā; ka mea ki a ia, “Ko te kupu tēnei a te kīngi, ‘Puta mai ki waho!’ ” Anō rā ko tērā, “Kāhore, engari kia mate ahau ki konei.” Nā, ka whakahokia te kōrero e Penaia ki te kīngi; i mea ia, “Ko te kupu tēnei a Ioapa, ko tāna tēnei i whakahoki ai ki ahau.”
1KI 2:31 Anō rā ko te kīngi ki a ia, “Meatia tāna i kōrero ai; rere atu ki runga ki a ia, ka tanu i a ia; kia whakakāhoretia atu ai e koe i ahau, i te whare hoki o tōku pāpā, ngā toto i whakahekea noatia e Ioapa.
1KI 2:32 Ā, ka whakahokia iho e Ihowā ōna toto ki runga anō ki tōna mātenga, nāna hoki i rere ki runga i ngā tāngata tokorua, ki ngā tāngata e tika ake ana, e pai ake ana i a ia, ā, patua iho ki te hoari, kīhai anō hoki tōku pāpā, a Rāwiri i mōhio, arā ki a Āpanēre tama a Nere, ki te rangatira o te ope o Īharaira, rāua ko Amaha tama a Iētere, rangatira o te ope o Hūrā.
1KI 2:33 Heoi, ka hoki iho ō rāua toto ki runga ki te mātenga o Ioapa, ki runga anō ki te mātenga o ōna uri ā ake ake; ki a Rāwiri ia, rātou ko ōna uri, ko tōna whare, ko tōna torōna, ka mau tā Ihowā rongo ā ake ake.”
1KI 2:34 Nā, ko te haerenga o Penaia tama a Iehoiara ki runga, ā, rere ana ki runga ki a ia, whakamatea iho; ā, tanumia iho ia ki tōna whare, ki te koraha.
1KI 2:35 Ā, meinga ana e te kīngi a Penaia tama a Iehoiara hei rangatira ope i muri i a ia; i meinga e te kīngi a Hāroko tohunga hei whakakapi mō Apiātara.
1KI 2:36 Nā, ka tono tāngata te kīngi ki te karanga i a Himei, ā, ka mea ki a ia, “Hangā he whare mōu ki Hiruhārama, hei reira noho ai; kaua hoki e haere atu i reira ki hea, ki hea.
1KI 2:37 Ko ā te rā hoki e puta ai koe ki waho, e whiti ai i te awa i Kitirono, kia tino mōhio koe, ko te mate kau mōu; hei runga anō i tōu mātenga ōu toto.”
1KI 2:38 Nā, ka mea a Himei ki te kīngi, “He pai tēnā kupu; ka pēnā tāu pononga, me tā tōku ariki, me tā te kīngi i kōrero mai nā.” Nā, he maha ngā rā i noho ai a Himei ki Hiruhārama.
1KI 2:39 Ā, i te mutunga o ngā tau e toru ka tahuti ngā pononga tokorua a Himei ki a Ākihi tama a Maaka kīngi o Kāta, ā, ka kōrerotia ki a Himei, “Nanā, ko āu pononga tērā, kei Kāta.”
1KI 2:40 Nā, ko te whakatikanga o Himei, whakanohoia ana tana kāihe, ā, haere ana ki Kāta, ki a Ākihi, ki te rapu i āna pononga; heoi haere ana a Himei, ā, kawea ana mai e ia āna pononga i Kāta.
1KI 2:41 Nā, ka kōrerotia ki a Horomona, i haere atu a Himei i Hiruhārama ki Kāta, ā, kua hoki mai anō.
1KI 2:42 Nā, ka tono tāngata te kīngi ki te karanga i a Himei, ā, ka mea ki a ia, “Kāhore ianei koe i whakaoatitia e ahau ki a Ihowā, me tāku whakaatu anō ki a koe, me tāku kī atu anō, ‘Ko te rā e puta ai koe ki waho, e haere ai ki hea rānei, ki hea rānei, kia tino mōhio koe, ko te mate kau mōu?’ I mea mai anō koe ki ahau, ‘He pai te kupu i rongo ai ahau.’
1KI 2:43 He aha rā koe tē pupuri ai i te oati a Ihowā, i te whakahau i whakahaua ai koe e ahau?”
1KI 2:44 I mea anō te kīngi ki a Himei, “E mōhio ana koe, e mōhio ana anō tōu ngākau, ki te kino katoa, ki tāu i mea ai ki tōku pāpā, ki a Rāwiri. Nā, ka whakahokia nei e Ihowā tōu kino ki runga ki tōu mātenga.
1KI 2:45 Ka manaakitia ia a Kīngi Horomona, ka pūmau tonu anō te torōna o Rāwiri i te aroaro o Ihowā ā ake ake.”
1KI 2:46 Heoi, ka whakahau te kīngi ki a Penaia tama a Iehoiara, haere ana tērā ki waho, rere ana ki runga ki a ia, nā, kua mate. Nā, kua pūmau te kīngitanga i te ringa o Horomona.
1KI 3:1 Nā, ka meinga a Horomona hei hunaonga ki a Parao kīngi o Īhipa; i tangohia hoki e ia te tamāhine a Parao māna, ā, kawea ana ki te pā o Rāwiri, kia oti rā anō te whare mōna te hanga, me te whare mō Ihowā, me te taiepa o Hiruhārama ā tawhio noa.
1KI 3:2 Ko te iwi ia patu whakahere ai i runga i ngā wāhi tiketike; kīanō hoki i hangā noatia te whare mō te ingoa o Ihowā ā tae noa ki aua rā.
1KI 3:3 Nā, i aroha a Horomona ki a Ihowā, i haere i ngā tikanga a tōna pāpā, a Rāwiri; otiia i patu whakahere, i tahu whakakakara ki ngā wāhi tiketike.
1KI 3:4 Nā, ka haere te kīngi ki Kipeono ki te patu whakahere ki reira; ko te tino wāhi tiketike hoki tērā. Kotahi mano ngā tahunga tinana i tāpaea e Horomona ki runga ki taua āta.
1KI 3:5 I puta a Ihowā ki a Horomona ki Kipeono, he mea moemoeā i te pō; ā, ka mea te Atua, “Īnoi mai ko te aha kia hoatu e ahau ki a koe.”
1KI 3:6 Nā, ka mea a Horomona, “Nui atu te aroha i whakaputaina e koe ki tāu pononga, ki a Rāwiri, ki tōku pāpā, i a ia e haere ana i tōu aroaro i runga i te pono, i te tapu, i te ngākau tika ki a koe; i rongoātia anō e koe tēnei aroha nui mōna, i a koe i hōmai nei i tētahi tama ki a ia hei noho ki tōna torōna, hei pēnei me tēnei ināianei.
1KI 3:7 “Nā, kua meinga nei tāu pononga e koe, e Ihowā, e tōku Atua, hei kīngi i muri i a Rāwiri, i tōku pāpā; nā, he tamariki rawa ahau; kāhore e mōhio ki te haere atu, ki te haere mai.
1KI 3:8 Nā, kei waenganui tēnei tāu pononga i tāu iwi i whiriwhiria e koe, he iwi nui, e kore e taea te tatau, te tuhituhi rānei, i te tini.
1KI 3:9 Heoi, hōmai ki tāu pononga he ngākau e mahara ana ki te whakahaere tikanga ki tāu iwi, ki te wehe i te pai, i te kino; ko wai hoki e āhei te whakahaere tikanga mō tēnei iwi nui āu?”
1KI 3:10 Ā, pai tonu taua kupu ki te whakaaro o te Ariki; nō Horomona i tono ki tēnei mea.
1KI 3:11 Nā, ka mea te Atua ki a ia, “Nā, kua tono nei koe ki tēnei mea māu, ā, kīhai i tono kia maha ngā rā mōu; kīhai anō i tono ki te taonga mōu, kīhai hoki i tono kia whakamatea ōu hoariri; heoi tonoa ana e koe he mōhio ki te whakarongo ki ngā whakawā;
1KI 3:12 nanā, kua meatia e ahau tāu i kōrero nā. Nanā, kua hoatu e ahau he ngākau mahara, he ngākau mōhio ki a koe; kāhore he rite mōu i mua atu i a koe; e kore anō e ara ake he rite mōu i muri i a koe.
1KI 3:13 Ā, kua hoatu anō e ahau ki a koe ngā mea kīhai nā i tonoa mai e koe, te taonga, te korōria; ā, kāhore he tangata i roto i ngā kīngi hei rite mōu i ōu rā katoa.
1KI 3:14 Ā, ki te haere koe i āku ara, ki te rongo ki āku tikanga, ki āku whakahau, ki te pērā me te haere a tōu pāpā, a Rāwiri, nā, ka whakaroaina e ahau ōu rā.”
1KI 3:15 Nā, ka oho ake a Horomona, nā, he moemoeā; ā, haere ana ia ki Hiruhārama, ka tū ki mua i te āka o te kawenata a Ihowā, tāpaea ana e ia he tahunga tinana, ā, meatia ana e ia he whakahere mō te pai, i tuku hoki i te hākari mā āna tāngata katoa.
1KI 3:16 Nā, ka haere mai ētahi wāhine tokorua ki reira, ki te kīngi, he wāhine kairau, ā, tū ana i tōna aroaro.
1KI 3:17 Nā, ka mea tētahi o ngā wāhine rā, “E tōku ariki, kotahi anō te whare i noho ai māua ko te wahine nei; ā, whānau ana ahau, ā, i roto anō ia i te whare.
1KI 3:18 Ā, i te toru o ngā rā o tōku whānautanga, ka whānau anō hoki tēnei wahine; i reira tahi anō māua; kāhore he tangata kē i a māua i roto i te whare; ko māua tokorua anake i roto i te whare.
1KI 3:19 “Nā, i te pō ka mate te tamaiti a te wahine nei; i tāmia hoki e ia.
1KI 3:20 Nā, ka whakatika ia i waenganui pō, ka tangohia tāku tamaiti i tōku taha, i tāu pononga e moe ana, ā, hikitia ana ki tōna uma, ko tāna tamaiti mate i whakatakotoria e ia ki tōku uma.
1KI 3:21 Ā, i tōku marangatanga ake i te ata ki te whakangote i tāku tamaiti, nā, kua mate; ā, ka āta tirohia e ahau i te ata, nā, ehara i tāku tamaiti i whānau nei i ahau.”
1KI 3:22 Nā, ka mea tētahi o ngā wāhine, “Kāhore; engari nāku te tamaiti ora, nāu te tamaiti mate.” Ā, ka mea tēnei, “Kāhore; engari nāu te tamaiti mate, nāku hoki te tamaiti ora.” Nā, kōrero pērā ana rāua i te aroaro o te kīngi.
1KI 3:23 Anō rā ko te kīngi, “E mea ana tēnei, ‘Nāku tēnei tamaiti ora, nāu te tamaiti mate’; e mea ana anō tēnei, ‘Kāhore; engari nāu te tamaiti mate, nāku hoki te tamaiti ora.’ ”
1KI 3:24 Nā, ka mea te kīngi, “Tīkina atu he hoari māku.” Ā, ka kawea mai e rātou he hoari ki te aroaro o te kīngi.
1KI 3:25 Nā, ka mea atu te kīngi: “Tapahia te tamaiti ora kia rua, ka hoatu i tētahi hāwhe ki tētahi o ngā wāhine, i tētahi hāwhe ki tētahi.”
1KI 3:26 Nā, ko te kīanga atu a te wahine nāna nei te tamaiti ora ki te kīngi, he ōkaka hoki nō tōna puku aroha ki tāna tamaiti, ko tāna meatanga atu, “Auē, e tōku ariki, hoatu te pōtiki ora ki a ia; kaua rawa hoki e whakamatea!” Ko tētahi ia i mea, “Kauaka māku, kauaka hoki māna; tapahia!”
1KI 3:27 Kātahi ka whakahoki te kīngi, ka mea, “Hoatu te pōtiki ora ki a ia, kaua rawa e whakamatea; ko tōna whaea ia.”
1KI 3:28 Ā, ka rongo a Īharaira katoa ki te whakawā i whakarite ai te kīngi; heoi wehi ana rātou i te kīngi; i kite hoki rātou kei roto i a ia tō te Atua mōhio ki te whakawā.
1KI 4:1 Nā, ko Kīngi Horomona te kīngi o Īharaira katoa.
1KI 4:2 Ā, ko āna rangatira ēnei: Ko Atāria tama a Hāroko te tohunga;
1KI 4:3 ko Erihorepe rāua ko Āhia ngā kaituhituhi, he tama nā Hīhā; ko Iehohāpata tama a Ahiruru te kaiwhakamahara;
1KI 4:4 ko Penaia tama a Iehoiara te rangatira ope; ko Hāroko rāua ko Apiātara ngā tohunga;
1KI 4:5 ko Atāria tama a Nātana te rangatira o ngā kaitohutohu; ko Tapuru tama a Nātana te tohunga, te takahoa o te kīngi;
1KI 4:6 ko Ahihara te rangatira o te whare; ko Aronirama tama a Āpara tō ngā takoha.
1KI 4:7 Nā, kotahi tekau mā rua ngā kaitohutohu a Horomona mō Īharaira katoa, hei mea kai mā te kīngi rātou ko tōna whare; kotahi anō te marama mea kai o tētahi, o tētahi, i te tau.
1KI 4:8 Nā, ko ō rātou ingoa ēnei: ko Penehuru te whenua pukepuke o Ēparaima;
1KI 4:9 ko Penerekara i Makaha, i Haarapimi, i Petehemehe, i Erono Petehanana;
1KI 4:10 ko Penehehere i Arupoto; i a ia Hokoho me te whenua katoa o Hewhere;
1KI 4:11 ko Pene Apinarapa i te taupae katoa o Roro; i a ia a Tapata tamāhine a Horomona hei wahine māna;
1KI 4:12 ko Paana tama a Ahiruru i Tānaka, i Mekiro, i Peteheana katoa, tērā i Taretana i raro i Ietereere, o Peteheana atu ā tae noa ki Āperemehora, ki tua atu o Iokomēama;
1KI 4:13 ko Penekepere i Rāmoto Kireara (a ia ngā pā o Haira tama a Mānahi i Kireara; i a ia ngā wāhi i Ārakopa i Pahana, e ono tekau ngā pā nunui, taiepa rawa, tūtaki rawa ki te parāhi);
1KI 4:14 ko Mahanaima i a Ahinarapa tama a Iro;
1KI 4:15 i Napatari a Ahimāta; (i tangohia anō hoki e ia a Pahemata tamāhine a Horomona hei wahine māna);
1KI 4:16 i Āhera, i Aroto a Paana tama a Huhai;
1KI 4:17 i Ihākara a Iehohāpata tama a Parua;
1KI 4:18 ko Himei tama a Eraha i Pineamine;
1KI 4:19 ko Kēpere tama a Uri i te whenua o Kireara, (i te whenua o Hihona kīngi o ngā Amori rāua ko Oka kīngi o Pahana). Ko ia anake hoki te kaitohutohu o te whenua.
1KI 4:20 Nā, tini iho a Hūrā rāua ko Īharaira, me te onepū i te taha o te moana te tini, kai ana rātou, inu ana, hari ana.
1KI 4:21 Nā, ko Horomona te kīngi o ngā kīngitanga katoa, o te awa ā tae noa ki te whenua o ngā Pirihitini, ki te rohe rā anō o Īhipa; i mau hākari mai anō rātou, ā, mahi ana i ngā mahi a Horomona i ngā rā katoa i ora ai ia.
1KI 4:22 Nā, ko te kai a Horomona o te rā kotahi, e toru tekau mēhua parāoa pai, e ono tekau mēhua parāoa kē;
1KI 4:23 kotahi tekau ngā kau, he mea mōmona, e rua tekau ngā kau o ngā haerenga kau, kotahi rau ngā hipi, āpititia iho ki ngā hāta, ki ngā kahera, ki ngā rōpaka, ki ngā manu whāngai.
1KI 4:24 Ko ia hoki te kīngi i runga i te takiwā i tēnei taha katoa o te awa, o Tipiha, tae noa ki Kaha, i runga anō i ngā kīngi katoa o tēnei taha o te awa; ā, he rongo mau i ōna taha katoa.
1KI 4:25 Ā, noho hū noa iho a Hūrā rāua ko Īharaira, tērā, tērā, i raro i tāna wāina, i tāna piki, nō Rāna mai anō a Peerehepa atu ana, i ngā rā katoa o Horomona.
1KI 4:26 Nā, e whā tekau mano ngā tūranga a Horomona mō ngā hōiho o ōna hāriata, kotahi tekau mā rua mano ngā kaieke hōiho.
1KI 4:27 Ā, nā aua kaitohutohu i mea he kai mā Kīngi Horomona, mā te hunga katoa e haere ana ki te tēpu a Kīngi Horomona, tēnei tangata i tōna marama, tēnei tangata i tōna marama; kāhore he mea i kore i a rātou.
1KI 4:28 I kawea mai anō e rātou he pārei, he kakau wīti, mā ngā hōiho, mā ngā muera, ki te wāhi i reira nei ngā kaitohutohu, ia tangata ki tāna mahi.
1KI 4:29 Nā, hōmai ana e te Atua he mōhio ki a Horomona, me te mahara nui rawa, me te ngākau nui, koia anō kei te onepū i te taha o te moana.
1KI 4:30 Nui atu hoki te mōhio o Horomona i te mōhio o ngā tama katoa o te rāwhiti, i te mōhio katoa o Īhipa.
1KI 4:31 Nui atu hoki tōna mōhio i tō ngā tāngata katoa; i tō Ētana Eterahi, i tō Hēmana, i tō Karakoro, i tō Rarara, arā i tō ngā tama a Mahoro; ā, pakū ana tōna ingoa ki ngā iwi katoa ā tawhio noa.
1KI 4:32 Nā, e toru mano ngā whakatauki i kōrerotia e ia; ā, ko āna waiata kotahi mano mā rima.
1KI 4:33 I kōrerotia anō e ia ngā rākau, te hīta i Repanōna, ā tae iho ana ki te hihopa e tupu nei ki te taiepa; i kōrerotia anō e ia ngā kararehe, ngā manu, ngā mea ngōki, me ngā ika.
1KI 4:34 Ā, ka haere mai ētahi i ngā iwi katoa ki te whakarongo ki te mōhio o Horomona, i ngā kīngi katoa o te whenua i rongo nei ki tōna mōhio.
1KI 5:1 Nā, ka tonoa e Hīrama kīngi o Tāira āna tāngata ki a Horomona; i rongo hoki kua oti ia te whakawahi hei kīngi i muri i tōna pāpā; he aroha mau tonu hoki tō Hīrama ki a Rāwiri.
1KI 5:2 Ā, ka tono tāngata a Horomona ki a Hīrama hei kī atu:
1KI 5:3 “E mōhio ana koe kīhai i taea e tōku pāpā, e Rāwiri, te hanga whare mō te ingoa o Ihowā, o tōna Atua, i ngā whawhai hoki i tētahi taha ōna, i tētahi taha, ā taea noatia te hoatutanga o rātou e Ihowā ki raro i ngā kapu o ōna waewae.
1KI 5:4 Ko tēnei, kua mea nei a Ihowā, tōku Atua, kia okioki ahau i tētahi taha, i tētahi taha; kāhore he hoariri, kāhore hoki he kino e pā mai ana.
1KI 5:5 Nā, e mea ana tēnei ahau kia hangā he whare mō te ingoa o Ihowā, o tōku Atua, kia whakaritea te kupu a Ihowā ki tōku pāpā, ki a Rāwiri, tāna i mea ai, ‘Ko tāu tama e hoatu e ahau i muri i a koe ki runga ki tōu torōna, māna e hanga te whare mō tōku ingoa.’
1KI 5:6 “Tēnā rā, māu e whakahau kia tapahia mai he hīta māku i Repanōna. Ā, ko āku tāngata hei hoa mō āu tāngata; me hoatu anō e ahau ki a koe he utu mō āu tāngata, kia rite ki ngā mea katoa e kī mai ai koe; e mōhio ana hoki koe kāhore ō mātou tāngata hei rite mō ngā Haironi te mōhio ki te tapahi rākau.”
1KI 5:7 Ā, i te rongonga o Hīrama i ngā kupu a Horomona, nui atu tōna koa, ā, ka mea, “Kia whakapaingia a Ihowā i tēnei rā, nāna nei i hōmai ki a Rāwiri he tama mōhio hei rangatira mō tēnei iwi nui.”
1KI 5:8 Nā, ka tono tāngata atu a Hīrama ki a Horomona, hei mea: “Kua rongo atu ahau i te kupu i tukua mai nei e koe ki ahau; ka mahia katoatia e ahau tāu e hiahia ana, arā ngā rākau, te hīta me te kauri.
1KI 5:9 Mā āku tāngata e tari mai i Repanōna ki te moana; ā, māku e whakatere atu i te moana ki te wāhi e whakarite ai koe ki ahau, māku hoki e mea kia rukea ki uta ki reira, ka tiki mai ai e koe; ā, ka meatia e koe tāku e hiahia ai, ki te hōmai he kai mā tōku whare.”
1KI 5:10 Nā, ka hōmai e Hīrama he hīta, he kauri, ki a Horomona, āna rākau i hiahia ai.
1KI 5:11 Ā, hoatu ana e Horomona ki a Hīrama he mēhua wīti e rua tekau mano hei kai mā tōna whare, he mēhua hinu e rua tekau, he mea tuki; ko tā Horomona tēnei i hoatu ai ki a Hīrama i tēnei tau, i tēnei tau.
1KI 5:12 Ā, hōmai ana e Ihowā ki a Horomona he mōhio, he pērā me tāna i kōrero ai ki a ia; ā, mau tonu te rongo i waenganui o Hīrama rāua ko Horomona; ā, i whakarite kawenata rāua tokorua.
1KI 5:13 Nā, ka whakatakā e Horomona ētahi tāngata i roto i a Īharaira katoa; e toru tekau mano tāngata taua whakataka.
1KI 5:14 Ā, ungā ana rātou e ia ki Repanōna, tekau mano i te marama kotahi, he mea whakawhitiwhiti; kotahi tō rātou marama i Repanōna, e rua ngā marama i te kāinga; ko Aronirama hoki te rangatira o taua whakataka.
1KI 5:15 Nā, e whitu tekau mano ngā tāngata a Horomona hei mau kawenga, e waru tekau mano hei tārai i runga i ngā maunga;
1KI 5:16 hāunga ngā rangatira o ngā kaitohutohu a Horomona i whakahau nei i te mahi, e toru mano e toru rau aua kaiwhakahau i ngā kaimahi i te mahi.
1KI 5:17 Nā, ka whakahau te kīngi, ā, ka hāua e rātou he kōhatu nunui, he kōhatu utu nui, hei kōhatu hahau mō te tūranga o te whare.
1KI 5:18 Nā, tāraia ana e ngā kaihanga a Horomona, e ngā kaihanga a Hīrama, e ngā Kipiri, whakapaia ana e rātou ngā rākau me ngā kōhatu hei hanga mō te whare.
1KI 6:1 Nā, i te whā rau e waru tekau o ngā tau o te putanga mai o ngā tama a Īharaira i te whenua o Īhipa, i te whā o ngā tau o te kīngitanga o Horomona ki a Īharaira, i marama Tiwhi, arā i te rua o ngā marama, ka tīmata ia te hanga i te whare o Ihowā.
1KI 6:2 Nā, ko te whare i hangā nei e Kīngi Horomona mō Ihowā, e ono tekau whatīanga te roa, e rua tekau whatīanga te whānui, ā, ko te tiketike e toru tekau whatīanga.
1KI 6:3 Nā, ko te whakamahau i te roro o te temepara o te whare, e rua tekau whatīanga te roa, rite tonu ki te whānui o te whare; kotahi tekau whatīanga te whānui i mua mai i te whare.
1KI 6:4 Nā, i hangā e ia ētahi matapihi mō te whare, he tū arapaki mau tonu.
1KI 6:5 I hangā anō e ia ētahi rūma ki te taha o te whare ā whawhe noa, ki ngā taha o te whare ā whawhe noa, ki ō te temepara, ā, ki ō te ahurewa. Nā, hangā ana e ia ngā rūma ki te taha ā whawhe noa.
1KI 6:6 E rima whatīanga te whānui o tō raro rūma, e ono whatīanga te whānui o tō waenganui, e whitu whatīanga te whānui o te tuatoru. I whakapiritia hoki ētahi pokohiwi ki waho o te whare ā taka noa, kei whakaūkia ngā kurupae ki ngā taha o te whare.
1KI 6:7 Nā, ko te whare, i tōna hanganga, he mea hanga ki te kōhatu kua oti noa ake te whakapai, mai i te rua kōhatu; kāhore hoki he hama, he toki rānei, tētahi mea rino rānei i rangona ki te whare i tōna hanganga.
1KI 6:8 Ko te tatau o te paparanga rūma o waenga i te taha ki matau o te whare; he mea āwhiowhio te arawhata i piki ai ki tō waenga paparanga, mā roto atu i tō waenga ki te tuatoru.
1KI 6:9 Heoi, hangā ana e ia te whare ā oti ake; he hīta ngā kurupae me ngā papa i hīpokina ai e ia te whare.
1KI 6:10 I hangā e ia he rūma ki ngā taha katoa o te whare, e rima whatīanga te tiketike; he hīta ngā rākau i tau iho ai aua rūma ki te whare.
1KI 6:11 Nā, ko te putanga o te kupu a Ihowā ki a Horomona, i mea ia:
1KI 6:12 “Mō te whare e hangā nei e koe, ki te haere koe i runga i āku tikanga, ā, ka mahi i āku whakaritenga, ka mau hoki ki āku whakahau katoa, ka haere i runga i ēnei; kātahi ka whakapūmautia e ahau tāku kupu ki a koe, tāku i kōrero ai ki tōu pāpā, ki a Rāwiri.
1KI 6:13 Ā, ka noho ahau i waenganui i ngā tama a Īharaira, e kore anō e whakarere i tāku iwi, i a Īharaira.”
1KI 6:14 Heoi, hangā ana e Horomona te whare ā oti ake.
1KI 6:15 Ā, i hangā e ia ngā taha o roto o te whare ki te papa hīta; nō raro ake, ā tae noa ki ngā papa hīpoki, i whakapiritia e ia a roto ki te rākau; ā, i whārikitia a raro ki te papa kauri.
1KI 6:16 Ā, e rua tekau ngā whatīanga o ngā taha o te whare ki muri i hangā e ia ki te papa hīta i raro ā tae noa ki ngā taha; i hangā anō ki te pērā a roto, hei ahurewa, arā mō te Wāhi Tino Tapu.
1KI 6:17 Ā, ko te whare, arā ko te temepara i mua o te ahurewa, e whā tekau whatīanga te roa.
1KI 6:18 Ā, he hīta i roto i te whare, he mea whakairo ki te rāpupuku, ki te puāwai kowhera; he hīta katoa; kāhore he kōhatu i kitea.
1KI 6:19 I whakapaia anō e ia he ahurewa i te whare i roto atu, ki reira tū ai te āka o te kawenata a Ihowā.
1KI 6:20 Nā, i roto i te ahurewa ko tētahi wāhi, e rua tekau whatīanga te roa, e rua tekau whatīanga te whānui, e rua tekau whatīanga te tiketike; ā, i whakakikoruatia e ia ki te kōura parakore; i hīpokina hoki te āta ki te hīta.
1KI 6:21 Heoi, whakakikoruatia ana a roto o te whare e Horomona ki te kōura parakore; tātaitia e ia he mekameka kōura ki mua o te ahurewa, whakakikoruatia iho ki te kōura.
1KI 6:22 I whakakikoruatia anō e ia te whare katoa ki te kōura ā oti noa te whare katoa; i whakakikoruatia katoatia anō e ia te āta, tō te ahurewa, ki te kōura.
1KI 6:23 Ā, i hangā e ia mō roto i te ahurewa e rua ngā kerupima, he ōriwa te rākau, kotahi tekau whatīanga te tiketike o tētahi, o tētahi.
1KI 6:24 Ā, e rima whatīanga tētahi parirau o te kerupa kotahi, e rima hoki whatīanga tētahi parirau o taua kerupa; ko te pito o tētahi parirau ā tae noa ki te pito o tētahi, tekau whatīanga.
1KI 6:25 Kotahi tekau whatīanga te rua o ngā kerupima; kotahi te roa, kotahi te āhua o ngā kerupima e rua.
1KI 6:26 Kotahi tekau whatīanga te tiketike o tētahi kerupima; he pērā anō te rua o ngā kerupima.
1KI 6:27 Ā, whakanohoia ana e ia ngā kerupima ki tō roto whare; i roha ngā parirau o ngā kerupima, ā, pā ana te parirau o tētahi ki tētahi taha, pā ana te parirau o tētahi ki tētahi taha; me te pā anō ō rāua parirau ki a rāua i waenganui o te whare.
1KI 6:28 I whakakikoruatia anō e ia ngā kerupima ki te kōura.
1KI 6:29 He mea tuhi anō nāna ngā taha katoa o te whare ā tawhio noa, he kerupima ngā mea i tuhia iho, he nīkau, he puāwai kowhera, ki roto, ki waho.
1KI 6:30 I whakakikoruatia anō e ia ngā papa o raro o te whare ki te kōura, o roto, o waho.
1KI 6:31 Nā, ko ngā tatau mō te kūwaha o te ahurewa, i hangā e ia ki te ōriwa te rākau; i riro i te kōrupe me ngā pou tatau, kotahi o ngā wāhi e rima o te pātū
1KI 6:32 Heoi, hangā ana e ia e rua ngā tatau, he ōriwa te rākau; tuhia iho e ia, he kerupima ngā mea i tuhia, he nīkau, he puāwai kowhera, whakakikoruatia ana e ia ki te kōura; i tohaina iho anō e ia te kōura ki runga ki ngā kerupima, ki ngā nīkau.
1KI 6:33 Pērā tonu tāna hanga i ngā pou mō te tatau o te temepara, he ōriwa te rākau; ko te mātotoru, ko te whā o ngā wāhi o te pātū;
1KI 6:34 ā, e rua ngā tatau, he kauri te rākau; he mea whakakopa ngā taha e rua o tētahi tatau, ā, he mea whakakopa ngā taha e rua o tētahi tatau.
1KI 6:35 I tuhia anō e ia he kerupima ki aua tatau, he nīkau, he puāwai kowhera; ā, whakakikoruatia iho ki te kōura, he mea whakanoho iho ki runga ki te whakairo.
1KI 6:36 I hangā anō e ia tō roto marae, e toru ngā rārangi o te kōhatu tārai; me te rārangi kurupae, he hīta.
1KI 6:37 Nō te whā o ngā tau i whakatakotoria ai te tūranga o te whare o Ihowā, ko Tiwhi te marama.
1KI 6:38 Ā, nō te tekau mā tahi o ngā tau, nō marama Puru, arā nō te waru o ngā marama i oti ai ngā aha katoa o te whare, arā ngā mea katoa i whakaritea mōna. E whitu ngā tau e hanga ana ia i taua whare.
1KI 7:1 Nā, kotahi tekau mā toru ngā tau o Horomona e hanga ana i tōna whare ake, nā, kua oti i a ia tōna whare katoa.
1KI 7:2 Nāna hoki i hanga te Whare o te Ngahere o Repanōna; ko te roa, kotahi rau whatīanga, ko te whānui e rima tekau whatīanga, ko te tiketike e toru tekau whatīanga; ko te tūranga e whā ngā rārangi pou, he mea hīta, he kurupae hīta anō i runga i aua pou.
1KI 7:3 He hīta te hīpoki i runga i ngā kurupae, i runga hoki ērā i ngā pou e whā tekau mā rima, kotahi tekau mā rima ki te rārangi.
1KI 7:4 Ā, e toru ngā rārangi o ngā matapihi; rite tonu tēnei wini ki tēnei wini; e toru ngā rārangi.
1KI 7:5 Nā, he porowhā ngā tatau katoa, ngā pou tatau me ngā matapihi; me te anga anō tēnei matapihi ki tēnei matapihi; e toru ngā rārangi.
1KI 7:6 I hangā anō e ia ētahi pou hei whakamahau; e rima tekau whatīanga te roa, e toru tekau whatīanga te whānui. Nā, he whakamahau i mua i ērā pou; i mua hoki i ērā he pou me ngā kurupae mātotoru.
1KI 7:7 Nā, ka hangā e ia he whakamahau mō te torōna, mō te wāhi e whakarite whakawā ai ia, arā te whakamahau whakawā; he mea hīpoki ki te hīta i tētahi taha o te papa ā tae noa ki tētahi taha.
1KI 7:8 Me tōna whare i noho ai ia, he marae tōna i roto atu i te whakamahau, rite tonu te hanga. I hangā anō e Horomona he whare mō te tamāhine a Parao i mārenatia nei e ia; ko tōna rite ko tēnei whakamahau.
1KI 7:9 He kōhatu utu nui ēnei katoa, he mea tārai rā anō, he mea rūri anō, he mea kani, a roto, a waho, o te tūranga ake anō, ki ngā whakapaipai i runga; pērā tonu i te taha ki waho whaka te marae nui.
1KI 7:10 He kōhatu utu nui anō te tūranga, he kōhatu nunui, he kōhatu kotahi tekau nei ngā whatīanga, he kōhatu e waru nei ngā whatīanga.
1KI 7:11 Nā, a runga, he kōhatu utu nui, ko te rūri, kei tō ngā kōhatu tārai, he hīta anō hoki.
1KI 7:12 Nā, ko te marae nui, ā taka noa, e toru ngā rārangi kōhatu, he mea tārai, kotahi hoki te rārangi o ngā kurupae hīta; i rite ki tō roto marae o te whare o Ihowā, me te whakamahau o te whare.
1KI 7:13 Ā, i tono tāngata a Kīngi Horomona ki te tiki atu i a Hīrama i Tāira.
1KI 7:14 He tama ia nā tētahi pouaru o te iwi o Napatari, ā, ko tōna pāpā he tangata nō Tāira, he kaimahi parāhi; kī tonu ia i te whakaaro nui, i te mōhio, i te tohunga hoki ki te mahi i ngā mahi parāhi katoa. Nā, haere ana ia ki a Kīngi Horomona ki te mahi i āna mahi katoa.
1KI 7:15 Nāna hoki i hanga ngā pou parāhi e rua, tekau mā waru whatīanga te roa o tētahi, o tētahi; tekau mā rua whatīanga o te aho hei pae mō tētahi, mō tētahi.
1KI 7:16 I hangā hoki e ia ētahi pane e rua ki te parāhi whakarewa, hei whakanoho ki runga o ngā pou; e rima whatīanga te tiketike o tētahi pane, e rima whatīanga te tiketike o tētahi pane.
1KI 7:17 Tērā ētahi kupenga, he mea whatu ā-kupenga, me ngā awhiawhi, he mea mekameka, mō ngā pane i runga o ngā pou; e whitu mō tētahi pane, e whitu mō tētahi pane.
1KI 7:18 Heoi, hangā ana e ia ngā pou; e rua ngā rārangi i tētahi kupenga ā taka noa, nō ka kapi ngā pane i runga i ngā pou; i pērā anō ia ki te rua o ngā pane.
1KI 7:19 Nā, ko ngā pane i runga o ngā pou i te whakamahau he mea mahi ki te rengarenga, e whā ngā whatīanga.
1KI 7:20 Ā, tērā anō he pane i runga i ngā pou, ā, haere whakarunga, i tata tonu anō ki te puku i te taha o te kupenga; ā, e rua rau ngā pamekaranete, he mea whakarārangi, ki tētahi o ngā pane ā taka noa.
1KI 7:21 Nā, whakatūria ana e ia ngā pou ki te whakamahau o te temepara; i whakatūria e ia te pou ki te taha ki matau, ā, huaina iho tōna ingoa, ko Iakini; i whakatūria anō e ia te pou ki mauī, ā, huaina iho tōna ingoa, ko Poaha.
1KI 7:22 He rengarenga anō te mahi o te pito ki runga o ngā pou. Nā, ka oti te mahi o ngā pou.
1KI 7:23 I hangā anō e ia tētahi moana, he mea whakarewa, tekau whatīanga o tētahi pareparenga ki tētahi pareparenga, he mea porotaka, e rima whatīanga tōna tiketike; e toru tekau whatīanga o te aho i paea ai.
1KI 7:24 Nā, i raro iho i tōna niao ko ētahi puku nāna i karapoti ā taka noa, kotahi tekau ki te whatīanga kotahi, i karapotia ai te moana: e rua ngā rārangi o ngā puku, i whakarewaina i tōna whakarewanga.
1KI 7:25 I tū taua moana i runga i ngā kau kotahi tekau mā rua, e toru e anga ana ki te raki, e toru e anga ana ki te hauāuru, e toru e anga ana ki te tonga, e toru e anga ana ki te rāwhiti; i runga anō i aua kau te moana e tū ana. Nā, i anga whakaroto a muri katoa o rātou.
1KI 7:26 Nā, he whānuitanga ringaringa tōna mātotoru; rite tonu te hanganga o tōna niao ki tō te niao o te kapu, he puāwai rengarenga ōna; e rua mano ōna pāti ina kī.
1KI 7:27 I hangā anō e ia ētahi tūranga parāhi kotahi tekau, e whā whatīanga te roa o tētahi tūranga, e whā whatīanga te whānui, e toru whatīanga te tiketike.
1KI 7:28 Ā, ko te hanganga tēnei o ngā tūranga; i whai awhi, ā, i ngā takiwā o ngā karapiti ngā awhi.
1KI 7:29 Ā, i ngā awhi i ngā takiwā o ngā karapiti, he raiona, he kau, he kerupima; ā, he tūranga o ngā karapiti i runga: i raro hoki i ngā raiona, i ngā kau, ko ētahi tautau, he mea angiangi.
1KI 7:30 Ā, e whā ngā wīra parāhi o tēnei tūranga, o tēnei tūranga, me ētahi kakau wīra parāhi. I whai pokohiwi anō ōna koki e whā; i raro i te takotoranga wai ngā pokohiwi, he mea whakarewa, he tautau i te taha o tētahi, o tētahi.
1KI 7:31 Nā, ko tōna waha, i roto i te pane, ā, haere whakarunga, kotahi te whatīanga; he porotaka ia tōna waha te mahinga, kei tō te tūranga, kotahi te whatīanga me te hāwhe. Nā, he tuhi kei tōna waha, me ngā awhi anō o aua tuhi, he porowhā, ehara i te mea porotaka.
1KI 7:32 Ā, ko ngā wīra e whā i raro i ngā awhi; he mea hono ki te tūranga ngā kakau o ngā wīra. Nā, ko te ikeike o tētahi wīra, kotahi whatīanga me te hāwhe whatīanga.
1KI 7:33 Ā, ko te mahinga o ngā wīra, kei te mahinga o te wīra hāriata; ko ngā kakau, o waenga, o waho, me ngā tītoko o aua wīra, he mea whakarewa katoa.
1KI 7:34 Ā, e whā ngā pokohiwi i raro i ngā koki e whā o te tūranga kotahi; ko ngā pokohiwi me te tūranga, kotahi tonu.
1KI 7:35 Nā, he hāwhe whatīanga te ikeike o te wāhi porotaka i runga i te tūranga; a runga o te tūranga, ōna karapiti, me ōna awhi, kotahi tonu.
1KI 7:36 Nā, ko ngā papa o ōna karapiti, me ōna awhi, tuhia iho e ia ki te kerupima, ki te raiona, ki te nīkau, he mea whakarite ki te wāhi takoto kau o tētahi, o tētahi, ki ngā mea anō i tāpiritia.
1KI 7:37 Pēnei tonu tāna hanga i ngā tūranga kotahi tekau; kotahi tonu te whakarewanga o te katoa, kotahi te nui, kotahi te āhua.
1KI 7:38 Nā, ka hangā e ia ki te parāhi ētahi oko horoi kotahi tekau; e whā tekau ngā pāti o te oko kotahi, ina kī; e whā ngā whatīanga o tētahi oko, o tētahi oko; kotahi te oko horoi i runga i tētahi, i tētahi, o ngā tūranga kotahi tekau.
1KI 7:39 Ā, i whakatūria e ia aua tūranga, e rima ki te taha ki matau o te whare, e rima ki te taha ki mauī o te whare; i whakatūria anō e ia te moana ki te taha ki matau o te whare, ki te rāwhiti, whaka te tonga.
1KI 7:40 Nā, hangā ana e Hīrama ngā oko horoi, ngā koko pungarehu, me ngā peihana. Ā, mutu ake tā Hīrama mahi i ngā mahi katoa a Kīngi Horomona i hangā e ia mō te whare o Ihowā:
1KI 7:41 i ngā pou e rua; i ngā peihana o ngā pane i te pito ki runga o ngā pou; i ngā kupenga e rua hei kōpaki mō ngā peihana e rua o ngā pane i ngā pito ki runga o ngā pou;
1KI 7:42 i ngā pamekaranete e whā rau mō ngā kupenga e rua, (e rua rārangi pamekaranete mō te kupenga kotahi, hei kōpaki mō ngā peihana e rua o ngā pane i ngā pito ki runga o ngā pou);
1KI 7:43 i ngā tūranga kotahi tekau, i ngā oko horoi kotahi tekau i runga o ngā tūranga;
1KI 7:44 i te moana kotahi, i ngā kau kotahi tekau mā rua i raro i te moana;
1KI 7:45 i ngā pāta, i ngā koko pungarehu, i ngā peihana. Nā, ko ēnei mea katoa i hangā nei e Hīrama mā Kīngi Horomona, ki roto ki te whare o Ihowā, he parāhi kanapa katoa.
1KI 7:46 I whakarewaina aua mea e te kīngi ki te mānia o Horano ki te wāhi onematua i waenganui o Hukota, o Taretana.
1KI 7:47 Ā, i waiho noa iho ngā mea katoa e Horomona, kāhore i pāunatia, he tini rawa hoki; kīhai hoki i kitea te taimaha o te parāhi.
1KI 7:48 Ā, i hangā e Horomona ngā oko katoa o te whare o Ihowā: te āta kōura, me te tēpu, he kōura, i runga nei te taro aroaro;
1KI 7:49 me ngā tūranga rama he parakore nei te kōura (e rima ki te taha ki matau, e rima ki te taha ki mauī, i mua o te ahurewa); me ngā puāwai, me ngā rama, me te kokopi kōura;
1KI 7:50 me ngā kapu, me ngā kuku, me ngā peihana, me ngā koko, me ngā tahu kakara, he parakore te kōura; me ngā īnihi kōura mō ngā tatau o te whare i roto, arā o te Wāhi Tino Tapu, mō ngā tatau o te whare, arā o te temepara.
1KI 7:51 Heoi, ka oti ngā mahi katoa i mahia e Kīngi Horomona mō te whare o Ihowā. Nā, ka kawea e Horomona ngā mea i whakatapua e tōna pāpā, e Rāwiri, te hiriwa, te kōura, ngā oko, hoatu ana e ia ki roto ki ngā takotoranga taonga o te whare o Ihowā.
1KI 8:1 Kātahi ka huihuia e Horomona ngā kaumātua o Īharaira rātou ko ngā upoko katoa o ngā iwi, ko ngā rangatira o ngā whare o ngā mātua o ngā tama a Īharaira ki a Kīngi Horomona, ki Hiruhārama, hei mau ake mō te āka o te kawenata a Ihowā i roto i te pā o Rāwiri, arā i Hiona.
1KI 8:2 Nā, ka huihui ngā tāngata katoa o Īharaira ki a Kīngi Horomona i marama Etanimi, i te hākari, arā i te whitu o ngā marama.
1KI 8:3 Nā, ka tae mai ngā kaumātua katoa o Īharaira, ā, ka mau ngā tohunga ki te āka,
1KI 8:4 ā, kawea ana te āka a Ihowā, me te tapenākara o te whakaminenga, me ngā oko tapu katoa i roto i te tapenākara, kawea ana e ngā tohunga rātou ko ngā Rīwaiti ki runga.
1KI 8:5 Nā, kei te tāpae a Kīngi Horomona, rātou ko te huihui katoa o Īharaira, i huihui nei ki a ia ki te ritenga o te āka, i ngā hipi, i ngā kau, kāhore nei e taea te kōrero, te tatau rānei, i te tini.
1KI 8:6 Nā, kawea ana e ngā tohunga te āka o te kawenata a Ihowā ki tōna wāhi, ki te ahurewa o te whare, ki te Wāhi Tino Tapu, ki raro i ngā parirau o ngā kerupima.
1KI 8:7 I roha hoki ngā parirau e rua o ngā kerupima ki runga ki te wāhi i te āka, ā, taupokina iho a runga o te āka me ōna amo e ngā kerupima.
1KI 8:8 I te roroa rawa o ngā amo, kitea mai ai ngā pito o ngā amo i te wāhi tapu i te ritenga atu o te ahurewa; otiia kīhai i kitea ki waho; kei reira nā anō aua mea ā tae noa mai ki tēnei rā.
1KI 8:9 Kāhore he mea i roto i te āka, ko ngā papa kōhatu e rua anake i whaowhina nei ki reira e Mohi i Horepa i tā Ihowā whakaritenga kawenata ki ngā tama a Īharaira, i tō rātou putanga mai i te whenua o Īhipa.
1KI 8:10 Ā, nō te putanga mai o ngā tohunga i roto i te wāhi tapu, nā, kua kī te whare o Ihowā i te kapua,
1KI 8:11 ā, kīhai i āhei i ngā tohunga te tū ki te mahi, nā te kapua hoki; i kī tonu rā hoki te whare o Ihowā i te korōria o Ihowā.
1KI 8:12 Kātahi ka kōrero a Horomona, “I mea a Ihowā, ka noho ia ki te pōuri nui.
1KI 8:13 Kua oti nei i ahau te hanga he whare hei nohoanga mōu, he kāinga pūmau mōu mō ake tonu atu.”
1KI 8:14 Nā, ka tahuri te aroaro o te kīngi, ā, manaakitia ana e ia te huihui katoa o Īharaira; ā, tū ana te huihui katoa o Īharaira.
1KI 8:15 Nā, ka mea ia: “Kia whakapaingia a Ihowā, te Atua o Īharaira, nā tōna māngai nei te kupu ki tōku pāpā, ki a Rāwiri, ā, kua rite nei i tōna ringa; i mea ia,
1KI 8:16 ‘Mai o te rā i whakaputaina mai ai e ahau tāku iwi a Īharaira i Īhipa, kīhai i whiriwhiria e ahau he pā i roto i ngā iwi katoa o Īharaira e hangā ai he whare hei waihotanga mō tōku ingoa; engari i whiriwhiria e ahau a Rāwiri hei rangatira mō tāku iwi, mō Īharaira.’
1KI 8:17 “Nā, i whai ngākau tōku pāpā, a Rāwiri ki te hanga whare mō te ingoa o Ihowā, o te Atua o Īharaira.
1KI 8:18 Otirā, i mea a Ihowā ki a Rāwiri, ki tōku pāpā, ‘I te mea i roto i tōu ngākau kia hangā he whare mō tōku ingoa, he pai tonu te whakaaro o tōu ngākau;
1KI 8:19 otiia, e kore koe e hanga i taua whare; engari tāu tama e puta mai i tōu hope, māna e hanga te whare mō tōku ingoa.’
1KI 8:20 “Nā, kua mana nei i a Ihowā tāna kupu i kōrero ai ia, ā, kua ara tēnei ahau i muri i a Rāwiri, i tōku pāpā, ā, e noho nei ahau i runga i te torōna o Īharaira, e pērā ana me tā Ihowā i kōrero ai, kua hangā hoki e ahau he whare mō te ingoa o Ihowā, o te Atua o Īharaira.
1KI 8:21 Ā, meinga ana e ahau ki reira he wāhi mō te āka, mō te takotoranga o te kawenata a Ihowā i whakaritea e ia ki ō tātou mātua i tāna whakaputanga mai i a rātou i te whenua o Īhipa.”
1KI 8:22 Nā, ka tū a Horomona ki mua i te āta a Ihowā, i te aroaro o te huihui katoa o Īharaira, whewhera tonu ōna ringa whaka te rangi;
1KI 8:23 ā, ka mea: “E Ihowā, e te Atua o Īharaira, kāhore he atua hei rite mōu i te rangi i runga, i te whenua rānei i raro, e pupuri nei i te kawenata, i te aroha ki āu pononga, ina whakapaua ō rātou ngākau ki te haere i tōu aroaro.
1KI 8:24 Mau tonu hoki i a koe ngā mea i kōrerotia e koe ki tāu pononga, ki tōku pāpā, ki a Rāwiri, i kōrerotia nei e tōu māngai ki a ia, ā, kua rite nei i tōu ringa; koia anō tēnei ināianei.
1KI 8:25 “Nā, kia mau, e Ihowā, e te Atua o Īharaira, āianei tāu i kōrero ai ki tāu pononga, ki tōku pāpā, ki a Rāwiri, i a koe i kī rā, ‘E kore e whakakorea he tangata māu i tōku aroaro hei noho ki te torōna o Īharaira; mehemea rāia ka mahara āu tama ki tō rātou ara, kia haere i tōku aroaro, kia pērā anō me koe i haere nā i tōku aroaro.’
1KI 8:26 Nā, kia mana āianei, e te Atua o Īharaira, āu kupu i kōrero ai koe ki tāu pononga, ki tōku pāpā, ki a Rāwiri.
1KI 8:27 “Engari he pono rānei, tērā te Atua e noho ki te whenua? Nāna, kāhore e nui hei nohoanga mōu te rangi, me te rangi o ngā rangi; ka iti rawa iho te whare kua hangā nei e ahau!
1KI 8:28 He ahakoa rā, kia anga mai koe ki te īnoi a tāu pononga, ki tāna karanga, e Ihowā, e tōku Atua, ka whakarongo ki te karanga, ki te īnoi e īnoi nei tāu pononga ki tōu aroaro i tēnei rā.
1KI 8:29 Kia titiro mai ōu kanohi ki tēnei whare i te pō, i te ao, ki te wāhi i kī ai koe, ‘Ko reira tōku ingoa,’ whakarongo ki te īnoi e īnoi ai tāu pononga ki te ritenga mai o tēnei wāhi.
1KI 8:30 Kia rongo hoki koe ki te karanga a tāu pononga, a tāu iwi hoki, a Īharaira, ina īnoi ki te ritenga mai o tēnei wāhi. Nā, kia rongo koe i te wāhi e noho nā koe i te rangi, ā, ka rongo, murua tō rātou hara.
1KI 8:31 “Ki te hara tētahi tangata ki tōna hoa, ā, ka meinga he oati hei oati māna, ā, ka tae mai ia, ā, ka oati ki mua i tōu āta i tēnei whare;
1KI 8:32 tēnā rā, māu e whakarongo mai i te rangi, e mahi, e whakarite te whakawā a āu pononga, māu e whakahē te tangata hē, e mea iho tōna ara ki runga anō ki tōna māhunga; māu anō e whakatika tā te tika, e hoatu ki a ia ngā mea e rite ana ki tōna tika.
1KI 8:33 “Ki te patua tāu iwi, a Īharaira e te hoariri, mō rātou i hara ki a koe, ā, ka hoki ki a koe, ka whakaae ki tōu ingoa, ka īnoi, ka, karanga ki a koe, i roto i tēnei whare;
1KI 8:34 tēnā rā, māu e whakarongo i te rangi, e muru te hara o tāu iwi, o Īharaira e whakahoki mai rātou ki te whenua i hōmai e koe ki ō rātou mātua
1KI 8:35 “Ki te tūtakina te rangi, ā, kāhore he ua, mō rātou i hara ki a koe; ā, ka īnoi rātou ki te ritenga o tēnei wāhi, ka whakaae ki tōu ingoa, ka tahuri i tō rātou hara, nō rātou ka whakawhiua e koe;
1KI 8:36 tēnā rā, māu e whakarongo i te rangi, e muru te hara o āu pononga, o tāu iwi, o Īharaira, ina whakaako koe i a rātou ki te ara pai e haere ai rātou; ā, hōmai e koe he ua ki tōu whenua, i hōmai nei e koe hei kāinga pūmau mō tāu iwi.
1KI 8:37 “Ki te mea he matekai tō te whenua, he mate urutā, ki te mea he ngingio, he koriri, he māwhitiwhiti rānei, he moka rānei; ki te whakapaea rānei rātou e ō rātou hoariri ki te whenua o ō rātou pā; ki te pā mai tētahi whiu, tētahi mate tūroro rānei;
1KI 8:38 ki te mea he īnoi, he karanga rānei nā tētahi tangata, nā tāu iwi katoa rānei, nā Īharaira, ina mōhio rātou ki te mate o tōna ngākau, o tōna ngākau, ā, ka wherahia ōna ringa ki te ritenga mai o tēnei whare;
1KI 8:39 tēnā rā, māu e whakarongo mai i te rangi, i tōu wāhi e noho nā koe, e muru te hē, e mahi, e hōmai ki ngā tāngata ngā mea e rite ana ki ngā huarahi katoa o tēnei, o tēnei, e mōhio ana hoki koe ki tōna ngākau – ko koe anake nei hoki te mōhio ana ki ngā ngākau o ngā tama katoa a te tangata –
1KI 8:40 kia wehi ai rātou i a koe i ngā rā katoa e ora ai rātou i runga i te mata o te whenua i hōmai nei e koe ki ō mātou mātua.
1KI 8:41 “Nā, ko te tangata iwi kē, ehara nei i tāu iwi, i a Īharaira, ā, ka tae mai i te whenua mamao, he whakaaro ki tōu ingoa;
1KI 8:42 e rongo hoki rātou ki tōu ingoa nui, ki tōu ringa kaha, ki tōu tākakau kua oti te whakamārō, ā, ka haere, ka īnoi ki te ritenga mai o tēnei whare;
1KI 8:43 māu e whakarongo, mai i te rangi, i tōu wāhi e noho nā koe, e mea ngā mea katoa i karanga ai te tangata iwi kē ki a koe. Kia mōhio ai ngā iwi katoa o te whenua ki tōu ingoa, kia wehi ai i a koe, kia pērā ai me tāu iwi, me Īharaira; kia mōhio ai hoki kua oti tōu ingoa te karanga ki runga ki tēnei whare ka oti nei i ahau te hanga.
1KI 8:44 “Ki te haere tāu iwi ki te whawhai ki tōna hoariri, ki ngā wāhi e tonoa ai rātou e koe, ā, ka īnoi ki a Ihowā ki te ritenga mai o te pā kua whiriwhiria nei e koe, o te whare kua hangā nei e ahau mō tōu ingoa;
1KI 8:45 tēnā rā, māu e whakarongo mai i te rangi ki tā rātou īnoi, ki tā rātou karanga, e whakatika hoki tā rātou.
1KI 8:46 “Ki te hara rātou ki a koe – kāhore hoki he tangata i hapa i te hara – ā, ka riri koe ki a rātou, ka tuku i a rātou ki te hoa whawhai, ā, ka whakaraua atu e rātou hei whakarau ki te whenua o te hoa whawhai, ki te wāhi tata, ki te wāhi mamao rānei.
1KI 8:47 Nā, ki te hoki ake tō rātou mahara i te whenua i whakaraua atu ai rātou, ā, ka rīpenetā rātou, ka īnoi ki a koe i te whenua o ō rātou kaiherehere, ka mea, ‘Kua hara mātou, kua parori kē tā mātou mahi, kua mahi mātou i te kino’;
1KI 8:48 ā, ka tahuri ō rātou ngākau katoa, ō rātou wairua katoa, ki a koe i te whenua o ō rātou hoariri i whakaraua atu ai rātou, ā, ka īnoi rātou ki a koe ki te ritenga mai o tō rātou nei whenua hōmai e koe ki ō rātou mātua, ki te pā i whiriwhiria nei e koe, ki tēnei whare kua hangā nei e ahau mō tōu ingoa;
1KI 8:49 tēnā rā, māu e whakarongo mai i te rangi, i tōu wāhi e noho nā koe, ki tā rātou īnoi, ki tā rātou karanga, māu hoki e whakatika tā rātou.
1KI 8:50 Māu anō e muru te hē o tāu iwi i hara nei ki a koe, me ā rātou mahi tutū katoa i tutū ai ki a koe; meinga anō kia arohaina rātou e ō rātou kaiherehere kia tohungia hoki e rātou;
1KI 8:51 ko tāu iwi hoki rātou, ko tōu wāhi tupu i whakaputaina mai nei e koe i Īhipa, i roto i te oumu rino.
1KI 8:52 “Kia titiro mai ai anō ōu kanohi ki te karanga a tāu pononga, ki te karanga anō a tāu iwi, a Īharaira, ka whakarongo ki a rātou i ā rātou karangatanga katoa ki a koe.
1KI 8:53 Nāu hoki rātou i wehe hei taonga tupu mōu i roto i ngā iwi katoa o te whenua, he kupu hoki nāu, nā tāu pononga, nā Mohi i whakapuaki, i tāu whakaputanga mai i ō mātou mātua i Īhipa, e te Ariki, e Ihowā.”
1KI 8:54 Ā, i te mutunga o tā Horomona īnoi i tēnei īnoi katoa, i tēnei karanga ki a Ihowā, ka whakatika ake ia i mua i te āta a Ihowā i a ia i tūturi rā i runga i ōna turi, me te tuwhera tonu anō ōna ringa whaka te rangi.
1KI 8:55 Ā, ka tū ia, ka manaaki i te huihui katoa o Īharaira, he nui te reo, ā, ka mea:
1KI 8:56 “Kia whakapaingia a Ihowā nāna nei i hōmai te okiokinga ki tāna iwi, ki a Īharaira, rite tonu ki ngā mea katoa i kōrerotia e ia; hore rawa tētahi kupu i taka o āna mea pai katoa i kōrerotia e ia, arā e tāna pononga, e Mohi.
1KI 8:57 Hei hoa mō tātou a Ihowā, tō tātou Atua, kia pērā anō me ia i ō tātou mātua; kaua ia e whakarere i a tātou, kaua hoki e mawehe atu i a tātou;
1KI 8:58 māna e whakaanga ō tātou ngākau ki a ia, kia haere i āna ara katoa, kia pupuri i āna whakahau, i āna tikanga, i āna whakaritenga, i whakahaua e ia ki ō tātou mātua.
1KI 8:59 Nā, kia tata ki a Ihowā, ki tō tātou Atua, i te ao, i te pō, ēnei kupu āku i karanga nei ahau ki a Ihowā, kia whakatikaia ai e ia tā tāna pononga, tā tāna iwi hoki, tā Īharaira e tohe ai, i ngā meatanga o tēnei rā, o tēnei rā.
1KI 8:60 Kia mōhio ai ngā iwi katoa o te whenua ki a Ihowā, ko ia te Atua; kāhore kē atu.
1KI 8:61 Nā, kia tapatahi ō koutou ngākau ki a Ihowā ki tō tātou Atua, kia haere i runga i āna tikanga, kia puritia āna whakahau, kia rite ki tō tēnei rā.”
1KI 8:62 Nā, patua iho e te kīngi rātou tahi ko Īharaira katoa he patunga tapu ki te aroaro o Ihowā.
1KI 8:63 I patua hoki e Horomona he patunga mō te pai, he mea patu nāna mā Ihowā, e rua tekau mā rua mano ngā kau, kotahi rau e rua tekau mano ngā hipi. Nā, kua tāia te kawa o te whare o Ihowā e te kīngi rātou ko ngā tama katoa a Īharaira.
1KI 8:64 I whakatapua anō e te kīngi i taua rā a waenganui o te marae i mua i te whare o Ihowā; i tukua hoki e ia ki reira ngā tahunga tinana, me ngā whakahere totokore, me te ngako o ngā whakahere mō te pai; he iti hoki nō te āta parāhi i te aroaro o Ihowā hei meatanga mō ngā tahunga tinana, mō ngā whakahere totokore, mō ngā ngako o ngā whakahere mō te pai.
1KI 8:65 I mahia anō he hākari i taua wā e Horomona rātou ko Īharaira katoa ki te aroaro o Ihowā, o tō tātou Atua, he huihuinga nui, nō te haerenga atu ki Hāmata tae noa ki te awa o Īhipa, e whitu ngā rā, e whitu atu anō ngā rā, kotahi tekau mā whā aua rā.
1KI 8:66 I te waru o ngā rā ka tukua e ia te iwi kia haere; nā, ka manaaki rātou i te kīngi, ā, haere koa ana ki ō rātou tēneti, pai tonu hoki te ngākau i ngā mea pai katoa i meinga e Ihowā ki a Rāwiri, ki tāna pononga, rātou ko tāna iwi, ko Īharaira.
1KI 9:1 Ā, ka oti i a Horomona te whare o Ihowā, me te whare o te kīngi, me ngā mea katoa i hiahia ai a Horomona, i pai ai kia mahia;
1KI 9:2 nā, ko te rua o ngā putanga o Ihowā ki a Horomona, pērā me tōna putanga ki a ia ki Kipeono.
1KI 9:3 Nā, ka mea a Ihowā ki a ia: “Kua rongo ahau i tāu īnoi, i tāu karanga i karanga ai koe i tōku aroaro; kua oti i ahau te whakatapu tēnei whare kua hangā nei e koe, hei waihotanga iho mō tōku ingoa ā ake ake; ka tau anō ōku kanohi, me tōku ngākau, ki reira i ngā rā katoa.
1KI 9:4 “Nā, ko koe, ki te rite tāu haere i tōku aroaro ki te haere a tōu pāpā, a Rāwiri, ā, ka tapatahi, ka tika te ngākau ka mahi koe i ngā mea katoa i whakahau ai ahau ki a koe, ka pupuri i āku tikanga, i āku whakaritenga;
1KI 9:5 kātahi ahau ka whakapūmau i te torōna o tōu kīngitanga ki a Īharaira ā ake ake; ka pērā me tāku i kōrero ai ki tōu pāpā, ki a Rāwiri, i ahau i kī rā, ‘E kore e whakakorea he tangata māu mō te torōna o Īharaira.’
1KI 9:6 “Otiia, ki te anga koutou ko ā koutou tama, ki te tahuri kē, ā, kāhore e whai i ahau, e pupuri i āku whakahau, i āku tikanga, i hoatu e ahau ki tō koutou aroaro, ā, ka haere, ka mahi ki ngā atua kē, ka koropiko ki a rātou,
1KI 9:7 kātahi ka hautopea atu e ahau a Īharaira i te mata o te whenua i hoatu e ahau ki a rātou; ā, ko tēnei whare i whakatapua nei e ahau mō tōku ingoa, ka ākiritia atu e ahau i tōku aroaro, ā, ka waiho a Īharaira hei whakatauki, hei taunutanga i roto i ngā iwi katoa.
1KI 9:8 Nā, ahakoa te tiketike o te whare nei, ka mīharo ia ngā tāngata katoa e haere ana nā konei, ka whakahī, ka mea, ‘Nā te aha tēnei mahi a Ihowā ki tēnei whenua, ki tēnei whare?’
1KI 9:9 Nā, ka whakahoki rātou, ‘Mō rātou i whakarere i a Ihowā, i tō rātou Atua, i whakaputa mai nei i ō rātou mātua i te whenua o Īhipa, ā, ka tango ki ngā atua kē, ka koropiko ki a rātou, ka mahi ki a rātou; nō reira, i hōmai ai e Ihowā tēnei kino katoa ki runga ki a rātou.’ ”
1KI 9:10 Nā, i te mutunga o ngā tau e rua tekau, i te mea ka oti te hanga e Horomona ngā whare e rua, te whare o Ihowā, me te whare o te kīngi;
1KI 9:11 nā, i hōmai e Hīrama kīngi o Tāira he rākau hīta ki a Horomona, he rākau kauri, he kōura, ko āna katoa i pai ai; nā, hoatu ana e Kīngi Horomona ki a Hīrama e rua tekau ngā pā i te whenua o Karirī.
1KI 9:12 Ā, ka haere ake a Hīrama i Tāira kia kite i ngā pā i hoatu nei e Horomona ki a ia, kīhai i rite ki tāna titiro.
1KI 9:13 Ka mea ia, “He aha ēnei pā i hōmai nei e koe ki ahau, e tōku tuakana?” Nā, huaina iho e ia ko te whenua o Kapuru, koia tēnei ināianei.
1KI 9:14 Nā, tukua atu ana e Hīrama ki te kīngi kotahi rau e rua tekau ngā taranata kōura.
1KI 9:15 Nā, ko te pūtake tēnei o te whakataka i whakatakā ai e Horomona; hei hanga i te whare o Ihowā, i tōna ake whare, i Miro, i te taiepa o Hiruhārama, i Hatoro, i Mekiro, i Kētere.
1KI 9:16 (I haere mai hoki a Parao kīngi o Īhipa, ā, horo ana a Kētere i a ia, tahuna ana e ia ki te ahi, patua iho hoki ngā Kanaani e noho ana i te pā, ā, hōmai ana hei kaipākūhā ki tāna tamāhine, ki te wahine a Horomona.
1KI 9:17 Nā, hangā ana e Horomona), a Kētere me Petehorono ki raro,
1KI 9:18 me Paarata, me Taramoro i te koraha, i taua whenua,
1KI 9:19 me ngā pā taonga katoa o Horomona, me ngā pā mō ngā hāriata, me ngā pā mō ngā kaieke hōiho, me tā Horomona i hiahia ai kia hangā ki Hiruhārama, ki Repanōna, ki te whenua katoa hoki o tōna kīngitanga.
1KI 9:20 Ko ngā mōrehu katoa o ngā Amori, o ngā Hiti, o ngā Perihi, o ngā Hiwi, o ngā Iepuhi ehara nei i ngā tama a Īharaira –
1KI 9:21 ko ā rātou tamariki i mahue i muri i a rātou i te whenua, kīhai nei i taea e ngā tama a Īharaira te huna rawa – nā, whakatakohatia ana rātou e Horomona, he mahi te takoha, ā tae noa ki tēnei rā.
1KI 9:22 Ko ngā tama ia a Īharaira, kīhai i meinga e Horomona hei kaimahi; ko rātou hoki hei tāngata whawhai, hei tāngata māna, hei rangatira māna, hei kaiwhakahauhau māna, hei rangatira anō mō ana hāriata, mō āna kaieke hōiho.
1KI 9:23 Ko ngā rangatira ēnei o ngā kaitohutohu, o ngā rangatira o te mahi a Horomona, e rima rau e rima tekau, he rangatira, mō ngā kaimahi i te mahi.
1KI 9:24 Nā, kua riro atu te tamāhine a Parao i te pā o Rāwiri ki runga, ki te whare i hangā e ia mōna; kātahi a Miro ka hangā e ia.
1KI 9:25 Nā, i te tau kotahi, e toru ngā tāpaenga a Horomona i ngā tahunga tinana, i ngā whakahere mō te pai ki runga ki te āta i hangā e ia mā Ihowā, i tahuna anō e ia te whakakakara ki tērā i te aroaro o Ihowā. Heoi, kua oti te whare i a ia.
1KI 9:26 Nā, he maha ngā kaipuke i hangā e Kīngi Horomona ki Ehiono Kēpere, ki tērā i Eroto i te taha o te Moana Whero, i te whenua o Ēroma.
1KI 9:27 Ā, tonoa ana e Hīrama āna tāngata ki runga ki ngā kaipuke, he kaimahi kaipuke, he mōhio ki te moana, hei hoa mō ngā tāngata a Horomona.
1KI 9:28 Nā, ka rere rātou ki Ōpira, ā, utaina ana he kōura i reira, e whā rau e rua tekau taranata, ā, kawea ana ki a Kīngi Horomona.
1KI 10:1 Ā, nō te rongonga o te Kuīni o Hēpā ki te rongo o Horomona, ki tāna i mea ai mō te ingoa o Ihowā, ka haere mai ia ki te whakamātau i a ia ki ngā kupu pakeke.
1KI 10:2 Nā, haere mai ana ia ki Hiruhārama, nui atu hoki te tira, he kāmera e waha ana i ngā mea kakara, i tōna nui o te kōura, i te kōhatu utu nui; nā, i tōna haerenga ki a Horomona, ka kōrerotia e ia ki a ia ngā mea katoa i roto i tōna ngākau.
1KI 10:3 Ā, whakaaturia ana e Horomona ki a ia te tikanga o āna kupu katoa, kāhore he kupu i ngaro i te kīngi, i kore te whakaatu ki a ia.
1KI 10:4 Ā, nō te kitenga o te Kuīni o Hēpā i te mōhio katoa o Horomona, i te whare hoki i hangā e ia,
1KI 10:5 i te kai o tāna tēpu, i te nohoanga o āna tāngata, i te tūranga o āna kaimahi, i ō rātou kākahu, i āna kairiringi wāina, i tōna pikitanga i piki atu ai ki te whare o Ihowā, kore ake he wairua i roto i a ia.
1KI 10:6 Ā, ka mea ia ki te kīngi, “Pono tonu ngā mea i rongo ai ahau i tōku whenua mō āu mahi, mō tōu mōhio.
1KI 10:7 Heoi, kīhai ahau i whakapono ki aua kōrero, ā tae noa mai ahau, kite noa ōku kanohi. Nanā, kīhai te hāwhe i kōrerotia ki ahau; nui atu tōu mōhio, tōu pai, i te rongo i rongo ai ahau.
1KI 10:8 Anō te hari o āu tāngata, anō te hari o ēnei pononga āu e tū tonu nei i tōu aroaro, e whakarongo nei ki tōu mōhio!
1KI 10:9 Kia whakapaingia a Ihowā, tōu Atua i whakaahuareka nei ki a koe, i hōmai nei i a koe ki runga ki te torōna o Īharaira. He aroha mau tonu hoki nō Ihowā ki a Īharaira, nā, meinga ana koe e ia hei kīngi, hei mahi i te whakawā, i te tika.”
1KI 10:10 Nā, hōmai ana e ia ki te kīngi kotahi rau e rua tekau taranata kōura, tōna tini o ngā mea kakara, me ngā kōhatu utu nui; kāhore he mea kakara i tae mai i muri nei hei rite te nui ki ēnei i hōmai nei e te Kuīni o Hēpā ki a Kīngi Horomona.
1KI 10:11 Ā, nā ngā kaipuke o Hīrama nāna nei i mau mai te kōura i Ōpira, nā reira anō i kawe mai ngā rākau aramuka me ngā kōhatu utu nui i Ōpira, tōna tini.
1KI 10:12 Nā, ka hangā aua rākau aramuka e te kīngi hei pou mō te whare o Ihowā, mō te whare anō o te kīngi, hei hāpa, hei hātere, he mea mā ngā kaiwaiata; kāhore anō i tae noa mai he rākau aramuka hei rite, kāhore hoki i kitea i mua, ā taea noatia tēnei rā.
1KI 10:13 Nā, ka hoatu e Kīngi Horomona ki te Kuīni o Hēpā ngā mea katoa i pai ai ia, āna hoki i tono ai, he tāpiri ki runga ki ngā mea i hoatu e te ringa o Kīngi Horomona ki a ia. Heoi, ka tahuri ia, ā, haere ana rātou ko āna tāngata ki tōna whenua.
1KI 10:14 Nā, ko te taimaha o te kōura i tae ki a Horomona i te tau kotahi, e ono rau e ono tekau mā ono taranata kōura;
1KI 10:15 hāunga a ngā kairapu taonga, i mau mai ai me ngā taonga a ngā kaihokohoko, a ngā kīngi katoa o Arāpia, a ngā kāwana o te whenua.
1KI 10:16 Nā, ka hangā e Kīngi Horomona ētahi pukupuku, e rua rau, he mea patu te kōura; e ono rau ngā hekere kōura ki te pukupuku kotahi.
1KI 10:17 Ā, i hangaia e ia ētahi pukupuku iti iho e toru rau, he mea patu te kōura; e toru pāuna kōura ki te pukupuku kotahi; ā, hoatu ana e te kīngi ki te whare o te ngahere o Repanōna.
1KI 10:18 Ā, i hangā e te kīngi tētahi torōna nui ki te rei, whakakikoruatia iho ki te kōura pai rawa.
1KI 10:19 E ono ngā kaupae ki te torōna, he mea porotaka a runga o muri o te torōna; he okiokinga ringa anō kei te wāhi e nohoia ana, i tētahi taha; i tētahi taha, e rua anō ngā raiona e tū ana i te taha o ngā okiokinga.
1KI 10:20 Kotahi tekau mā rua hoki ngā raiona i reira e tū ana i tētahi taha, i tētahi taha, i runga i ngā kaupae e ono; kāhore he mea pērā i hangā i tētahi atu rangatiratanga.
1KI 10:21 Nā, ko ngā oko inu katoa a Kīngi Horomona, he kōura kau; me ngā oko katoa o te whare o te ngahere o Repanōna, he kōura parakore; kāhore he hiriwa; kīhai tērā i kīia he mea nui ngā rā o Horomona.
1KI 10:22 He maha hoki a te kīngi kaipuke ki Tarahihi i te moana, he mea huihui ki ngā kaipuke a Hīrama. Kotahi te ūnga mai i ngā tau e toru o ngā kaipuke o Tarahihi, hei kawe mai i te kōura, i te hiriwa, i te rei, i ngā makimaki, me ngā pīkake.
1KI 10:23 Nā, nui atu a Kīngi Horomona i ngā kīngi katoa o te whenua te whai taonga, te mōhio.
1KI 10:24 I whāia anō a Horomona e ngā whenua katoa, kia rongo ai rātou i tōna mōhio i hōmai nei e te Atua ki tōna ngākau.
1KI 10:25 Me te kawe mai anō rātou i tāna hākari, i tāna hākari, i ngā oko hiriwa, i ngā oko kōura, i ngā kākahu, i ngā mea mō te whawhai, i ngā kakara reka, i ngā hōiho, i ngā muera, he mea tatau ā-tau tonu.
1KI 10:26 Nā, ka āmia e Horomona he hāriata, he kaieke hōiho; kotahi mano e whā rau ana hāriata, tekau mā rua mano ngā kainoho hōiho, he mea wehe nāna ki ngā pā hāriata, ki te kīngi hoki, ki Hiruhārama.
1KI 10:27 Nā, meinga ana te hiriwa e te kīngi ki Hiruhārama kia rite ki te kōhatu; i meinga anō e ia ngā hīta kia rite ki te hikamora i te raorao te tini.
1KI 10:28 Ā, ko ngā hōiho o Horomona, he mea mau mai i Īhipa; nā ngā kaihoko a te kīngi i tango kāhui mai, tēnā kāhui me tōna utu.
1KI 10:29 Nā, e ono rau ngā hekere hiriwa i riro ai te hāriata i puta ai i Īhipa, kotahi rau e rima tekau i riro ai te hōiho; ko rātou hei kawe mō ngā kīngi katoa o ngā Hiti, mō ngā kīngi o Hīria.
1KI 11:1 Otiia he tini ngā wāhine kē i arohaina e Kīngi Horomona: he Moapi, he Āmoni, he Ēromi, he Haironi, he Hiti, me te tamāhine anō a Parao;
1KI 11:2 nō ngā iwi i mea rā a Ihowā ki ngā tama a Īharaira, “Kaua e haere atu ki a rātou, kaua hoki rātou e haere mai ki a koutou; he pono mā rātou ō koutou ngākau e whakaanga kē ki te whai i ō rātou atua”; piri tonu, aroha tonu a Horomona ki ēnei.
1KI 11:3 Nā, e whitu rau āna wāhine rangatira, e toru rau ngā wāhine iti; ā, whakaanga kētia ana tōna ngākau e āna wāhine.
1KI 11:4 Nā, koroheke rawa ake a Horomona, kua whakaanga kētia tōna ngākau e āna wāhine, kua whai i ngā atua kē; kīhai hoki tōna ngākau i tapatahi ki a Ihowā, ki tōna Atua, kīhai i rite ki te ngākau o Rāwiri, o tōna pāpā.
1KI 11:5 I haere hoki a Horomona i whai i a Ahatorete atua o ngā Haironi, i a Mirikomo hoki, i te mea whakarihariha a ngā Āmoni.
1KI 11:6 Nā, kua hē tā Horomona mahi ki te aroaro o Ihowā, kīhai hoki i anga nui ki te whai i a Ihowā, kīhai i pērā me tōna pāpā, me Rāwiri.
1KI 11:7 Nā, ka hangā e Horomona he wāhi tiketike mō tā Moapa mea whakarihariha, mō Kemoho, ki runga ki te maunga e anga ana ki Hiruhārama; mō Moreke hoki, mō te mea whakarihariha a ngā tama a Āmona.
1KI 11:8 Pērā tonu tāna i mea ai mō āna wāhine kē katoa, i tahu whakakakara nei, i patu whakahere hoki ki ō rātou atua.
1KI 11:9 Nā, ka riri a Ihowā ki a Horomona, nō te mea kua anga kē tōna ngākau i a Ihowā, i te Atua o Īharaira, ka rua nei ōna putanga ki a ia,
1KI 11:10 me te ako i tēnei kupu ki a ia kia kaua ia e haere ki te whai i ngā atua kē; otiia kīhai i mau i a ia tā Ihowā i whakahau ai.
1KI 11:11 Nā reira, ka mea a Ihowā ki a Horomona, “I te mea ka pēnei tāu mahi, kāhore nei i mau i a koe tāku kawenata me tāku tikanga i ākona e ahau ki a koe, ka haea rawatia atu e ahau te kīngitanga i a koe, ā, ka hoatu ki tāu tangata.
1KI 11:12 Otiia e kore tēnei e meatia e ahau i ōu rā, he whakaaro hoki ki tōu pāpā, ki a Rāwiri; ka haea atu ia e ahau i te ringa o tāu tama.
1KI 11:13 Otiia e kore e haea atu e ahau te kīngitanga katoa; kotahi te iwi e hoatu e ahau ki tāu tama, he whakaaro ki a Rāwiri, ki tāku pononga, ki Hiruhārama i whiriwhiria nei e ahau.”
1KI 11:14 Nā, ka whakaarahia ake e Ihowā he hoariri mō Horomona, ko Harara Ēromi; he uri ia nō te kīngi i Ēroma.
1KI 11:15 Tērā, i a Rāwiri i Ēroma, ka haere atu a Ioapa rangatira o te ope ki te tanu i te hunga i patua, kua oti hoki ngā tāne katoa o Ēroma te patu e ia;
1KI 11:16 (e ono hoki ngā marama i noho ai a Ioapa rātou ko Īharaira katoa ki reira, ā, poto noa ngā tāne katoa o Ēroma te hautope atu);
1KI 11:17 nā, ka rere a Harara rātou ko ētahi Ēromi, he tāngata nā tōna pāpā, haere ana ki Īhipa; ā, e nohinohi tonu ana a Harara.
1KI 11:18 Ā, ka whakatika atu rātou i Miriana, ā, ka tae ki Parana; nā, tangohia e rātou ētahi tāngata o Parana hei hoa mō rātou ā haere ana ki Īhipa ki a Parao kīngi o Īhipa; ā, nā tērā i hoatu he whare mōna, i whakarite he kai māna; i hoatu anō he whenua ki a ia.
1KI 11:19 Nā, ka manakohia nuitia a Harara e Parao, ā, hoatu ana e ia hei wahine māna te teina o tāna wahine ake, te teina o te Kuīni, o Tahapene.
1KI 11:20 Nā, ka whānau he tama māna i te teina o Tahapene, ko Kenupata, ā, nā Tahapene anō i whakamutu tāna kai ū i roto i te whare o Parao. Nā, noho ana a Kenupata i te whare o Parao i roto ngā tama a Parao.
1KI 11:21 Ā, i te rongonga o Harara i Īhipa, kua takoto a Rāwiri ki ōna mātua, kua mate hoki a Ioapa rangatira ope, ka mea a Harara ki a Parao, “Tukua ahau kia haere ki tōku whenua.”
1KI 11:22 Nā, ka mea a Parao ki a ia, “I hapa koe i te aha i a koe i ahau nei, i whai ai koe kia haere ki tōu whenua?” Nā, ko tāna kīanga, “Kāhore; he ahakoa rā tukua ahau kia haere.”
1KI 11:23 I ara anō i te Atua he hoariri mōna, a Retona tama a Eriara, i rere nei i tōna ariki i a Hararētere kīngi o Topa.
1KI 11:24 Nā, ka huihuia e ia ētahi tāngata, ā, ka meinga ia hei rangatira rōpū, i te mea e patua ana rātou e Rāwiri; nā, haere ana rātou ki Ramahiku, ā, noho ana i reira, ā, ko rātou hei kīngi mō Ramahiku.
1KI 11:25 Ā, he hoariri ia ki a Īharaira i ngā rā katoa o Horomona, hāunga hoki tā Harara kino i mea ai. Heoi, whakarihariha ana ia ki a Īharaira, ko ia anō te kīngi o Hīria.
1KI 11:26 Me Ieropoama anō tama a Nēpata, he Ēparati, nō Terera, he tangata nā Horomona, ko te ingoa o tōna whaea, ko Terua, he wahine pouaru, i ara anō tōna ringa ki te kīngi.
1KI 11:27 Ā, ko te take tēnei i ara ai tōna ringa ki te kīngi; e hanga ana a Horomona i Miro, e tūtaki ana i ngā wāhi pakaru o te pā o tōna pāpā, o Rāwiri.
1KI 11:28 Nā, he mārohirohi a Ieropoama, he toa; ā, ka kite a Horomona i taua taitama he uaua ki te mahi, nā, meinga ana ia e ia hei kaitirotiro mō ngā mahi katoa a te whare o Hōhepa.
1KI 11:29 Nā, i taua wā ka puta a Ieropoama i Hiruhārama, ā, ka tūtaki a Āhia Hironi, te poropiti ki a ia i te ara. Nā, kua kākahuria e Āhia he kākahu hou; ā, ko rāua tokorua anake i te pārae.
1KI 11:30 Nā, ka hopukia e Āhia tōna kākahu hou, haea ana kia tekau mā rua ngā wāhi.
1KI 11:31 Ā, ka mea atu ia ki a Ieropoama: “Kia tekau ngā wāhi e tangohia e koe māu; ko te kupu hoki tēnei a Ihowā, a te Atua o Īharaira, ‘Nanā, ka haea e ahau te kīngitanga i te ringa Horomona, ā, tekau ngā iwi e hoatu ki a koe.
1KI 11:32 Kotahi ia te iwi māna; he whakaaro ki tāku pononga, ki a Rāwiri, he whakaaro ki Hiruhārama, ki te pā i whiriwhiria e ahau i roto i ngā iwi katoa o Īharaira.
1KI 11:33 Mō rātou i whakarere i ahau, ā, koropiko ana ki a Ahatorete atua o ngā Haironi, ki a Kemoho atua o ngā Moapi, ki a Mirikomo atua o ngā tama a Āmona; kīhai hoki i haere i āku ara, mahi i te mea tika ki tāku titiro, pupuri hoki i āku tikanga, i āku whakaritenga, ā, kīhai i pērā me tōna pāpā, me Rāwiri.
1KI 11:34 “ ‘Otiia e kore e tangohia e ahau te kīngitanga katoa i tōna ringa; engari ka whakarangatira ahau i a ia i ngā rā katoa e ora ai ia, he whakaaro ki tāku pononga, ki a Rāwiri, i whiriwhiria nei e ahau, mōna i pupuri i āku whakahau, i āku tikanga.
1KI 11:35 Engari ka tangohia e ahau te kīngitanga i te ringa o tāna tama, ā, ka hoatu ki a koe, arā tekau ngā iwi.
1KI 11:36 Kotahi te iwi e hoatu e ahau ki tāna tama, hei rama mā tāku pononga, mā Rāwiri ki tōku aroaro i ngā rā katoa ki Hiruhārama, ki te pā i whiriwhiria e ahau hei waihotanga iho mō tōku ingoa.
1KI 11:37 Ā, ka tangohia koe e ahau, ā, hei kīngi koe, ka rite ki ngā mea katoa i hiahia ai tōu ngākau, ā, hei kīngi koe mō Īharaira.
1KI 11:38 Nā, tēnei ake, ki te rongo koe i ngā mea katoa e whakahau ai ahau ki a koe, ā, ka haere i āku ara, ka mahi i te mea e tika ana ki tāku titiro, ka pupuri i āku tikanga, i āku whakahau, ka pērā me tā tāku pononga, me tā Rāwiri i mea ai, nā, hei hoa ahau mōu. Ka hangā hoki e ahau tōu whare kia pūmau, ka pērātia me tō Rāwiri i hangā rā e ahau; ā, ka hoatu a Īharaira ki a koe.
1KI 11:39 Ā, ka whakawhiua e ahau ngā uri o Rāwiri mō tēnei mea nei; otiia ehara i te mea mō ake tonu atu.’ ”
1KI 11:40 Nā, ka whai a Horomona kia whakamatea a Ieropoama; otiia i whakatika a Ieropoama, ā, rere ana ki Īhipa, ki a Hīhāka kīngi o Īhipa, ā, i Īhipa ia ā mate noa a Horomona.
1KI 11:41 Nā, ko ērā atu mahi a Horomona, ko ngā mea katoa i mea ai ia, me ōna whakaaro nui, kāhore ianei i tuhituhia ki te pukapuka o ngā mahi a Horomona?
1KI 11:42 Nā, ko te roa o te kīngitanga o Horomona ki Hiruhārama ki a Īharaira katoa, e whā tekau tau.
1KI 11:43 Nā, ka moe a Horomona ki ōna mātua, ā, tanumia ana ki te pā o Rāwiri, o tōna pāpā; ā, ko Rehopoama, ko tāna tama, te kīngi i muri i a ia.
1KI 12:1 Nā, ka haere a Rehopoama ki Hekeme; kua tae hoki a Īharaira katoa ki Hekeme ki te whakakīngi i a ia.
1KI 12:2 Ā, nō te rongonga o Ieropoama tama a Nēpata (i Īhipa nā hoki ia, i rere hoki ia i te aroaro o Kīngi Horomona), nā, noho ana a Ieropoama ki Īhipa.
1KI 12:3 Ā, ka tono tāngata rātou ki te tiki atu i a ia; nā, ka haere a Ieropoama rātou ko te whakaminenga katoa o Īharaira, ka kōrero ki a Rehopoama, ka mea,
1KI 12:4 “He pakeke te ioka i meatia e tōu pāpā ki a mātou. Nā, māu e whakamāmā te mahi pakeke a tōu pāpā, me tāna ioka taimaha i meatia e ia ki a mātou, ā, ka mahi mātou ki a koe.”
1KI 12:5 Nā, ka mea ia ki a rātou, “Haere, kia toru ngā rā, ka hoki mai anō ki ahau.” Nā, haere ana te iwi.
1KI 12:6 Nā, ka rūnanga a Kīngi Rehopoama ki ngā kaumātua i tū rā i te aroaro o tōna pāpā, o Horomona, i a ia i te ora, ka mea, “He aha ki tō koutou whakaaro he kupu hei whakahokinga atu māku ki tēnei iwi?”
1KI 12:7 Nā, ka kōrero rātou ki a ia, ka mea, “Ki te mea hei pononga koe mā tēnei iwi i tēnei rā, ā, ka mahi ki a rātou, ā, ka pai ngā kōrero e kōrerotia e koe ki a rātou, nā, ko rātou hei pononga māu i ngā rā katoa.”
1KI 12:8 Otiia whakarērea ake e ia te whakaaro o ngā kaumātua i hoatu ai ki a ia, ā, rūnanga ana ki ngā taitama i kaumātua ngātahi nei me ia, i tū nei ki tōna aroaro.
1KI 12:9 I mea ia ki a rātou, “Ki tō koutou whakaaro he aha te kupu e whakahoki ai tātou ki tēnei hunga i kōrero nei ki ahau, i mea nei, ‘Whakamāmākia te ioka i meatia mai rā e tōu pāpā ki a mātou’?”
1KI 12:10 Nā, ka kōrero ki a ia ngā taitama i kaumātua ngātahi me ia, ka mea, “Kia pēnei tāu kī atu ki tēnei hunga i kōrero nei ki a koe, i mea nei, ‘I whakataimahatia e tōu pāpā tō mātou ioka, nā, kia māmā tāu ki a mātou’; kia pēnei tāu kī atu ki a rātou, ‘Ko tōku maikara iti nui kē atu i te hope o tōku pāpā.
1KI 12:11 Nā, i whakawahā e tōku pāpā he ioka taimaha ki a koutou; māku ia e tāpiri ki tō koutou ioka. He wepu tā tōku pāpā i whiu ai i a koutou; māku ia koutou e whiu ki te kopiona.’ ”
1KI 12:12 Nā, ka tae a Ieropoama rātou ko te iwi katoa ki a Rehopoama i te toru o ngā rā, i tā te kīngi i whakarite ai, i mea ai, “Hoki mai anō ki ahau i te toru o ngā rā.”
1KI 12:13 Ā, pakeke tonu tā te kīngi i whakahoki ai; i whakarērea hoki e ia te whakaaro i whakaaro ai ngā kaumātua;
1KI 12:14 ā, rite tonu ki tō ngā taitamariki whakaaro tāna i kōrero ai ki a rātou; i mea ia, “I whakataimahatia tō koutou ioka e tōku pāpā, māku ia e tāpiri ki tō koutou ioka; he wepu tā tōku pāpā i whiu ai i a koutou; māku ia koutou e whiu ki te kopiona.”
1KI 12:15 Heoi, kīhai te kīngi i rongo ki te iwi; nā Ihowā hoki te take kia mana ai tāna kupu i kōrero ai a Ihowā, arā tā Āhia Hironi ki a Ieropoama tama a Nēpata.
1KI 12:16 Ā, nō te kitenga o Īharaira katoa kīhai te kīngi i rongo ki tā rātou, ka utua e te iwi tā te kīngi; i mea rātou: “Ko te aha ianei tā tātou wāhi i roto i a Rāwiri? Kāhore nei hoki ō tātou wāhi tupu i roto i te tama a Hehe. Ki ō koutou tēneti, e Īharaira! Nā, kia whai kanohi ki tōu whare, e Rāwiri!” Nā, haere ana a Īharaira ki tōna tēneti, ki tōna tēneti.
1KI 12:17 Ko ngā tama ia a Īharaira e noho ana i ngā pā o Hūrā, ko Rehopoama hei kīngi mō rātou.
1KI 12:18 Nā, ka tono a Kīngi Rehopoama i te rangatira takoha, i a Arorama; ā, ākina ana ia e Īharaira katoa ki te kōhatu, mate rawa. Nā, hohoro tonu te eke o Kīngi Rehopoama ki tōna hāriata, ā, rere ana ki Hiruhārama.
1KI 12:19 Nā, kua tahuri kē a Īharaira i te whare o Rāwiri ā taea noatia tēnei rā.
1KI 12:20 Ā, nō te rongonga o Īharaira katoa kua hoki mai a Ieropoama, nā, ka tono tāngata rātou ki te tiki i a ia ki te huihui, ā, meinga ana ia hei kīngi mō Īharaira katoa; kāhore he mea i whai i te whare o Rāwiri, ko te iwi anake o Hūrā.
1KI 12:21 Nā, kua tae a Rehopoama ki Hiruhārama, ā, huihuia ana e ia te whare katoa o Hūrā, me te iwi o Pineamine, kotahi rau e waru tekau mano, he hunga whiriwhiri, he hunga whawhai, ki te whawhai ki te whare o Īharaira, kia hoki ai te kīngitanga ki a Rehopoama tama a Horomona.
1KI 12:22 Nā, ka puta te kupu a te Atua ki a Hemaia, tangata a te Atua; i mea ia,
1KI 12:23 “Kōrero ki a Rehopoama tama a Horomona kīngi o Hūrā, ki te whare katoa anō o Hūrā rāua ko Pineamine, ki ērā atu hoki o te iwi, mea atu,
1KI 12:24 ‘Ko te kupu tēnei a Ihowā: Kei haere ki runga, kei whawhai ki ō koutou tuākana, ki ngā tama a Īharaira. Hoki atu ki tōna whare, ki tōna whare; nāku hoki tēnei mea.’ ” Nā, rongo tonu rātou ki te kupu a Ihowā, ā, hoki ana, haere ana, pērā ana me tā Ihowā i kī ai.
1KI 12:25 Nā, ka hangā e Ieropoama a Hekeme ki te whenua pukepuke o Ēparaima, ā, noho ana i reira: i haere atu anō ia i reira, ā, hangā ana e ia a Penuere.
1KI 12:26 Ā, ka mea a Ieropoama i tōna ngākau, “Ākuanei hoki ai te kīngitanga ki te whare o Rāwiri.
1KI 12:27 Ki te haere tēnei iwi ki te mea whakahere ki te whare o Ihowā ki Hiruhārama, nā, ka hoki te ngākau o tēnei iwi ki tō rātou ariki, ki a Rehopoama kīngi o Hūrā; nā, ka patu rātou i ahau, ā, ka hoki ki a Rehopoama kīngi o Hūrā.”
1KI 12:28 Nā, ka hanga whakaaro te kīngi, ā, e rua ngā kūao kau i hangā e ia ki te kōura. Nā, ka mea ia ki a rātou, “He pakeke rawa tā koutou haere ki Hiruhārama; nanā, ōu atua nā, e Īharaira, nāna nei koe i kawe mai i te whenua o Īhipa!”
1KI 12:29 Nā, whakatūria ana tētahi e ia ki Pētēre; ko tētahi hoki i waiho ki Rāna.
1KI 12:30 Nā, ka tupu te hara i taua mea; i haere hoki te iwi ki te aroaro o tētahi, ki Rāna, koropiko ai.
1KI 12:31 I hangā anō e ia ngā whare o ngā wāhi tiketike, ā, meinga ana hei tohunga o te iwi katoa noa iho, ehara nei i ngā tama a Rīwai.
1KI 12:32 I whakaritea anō e Ieropoama hākari i te waru o ngā marama i te tekau mā rima o ngā rā o te marama, he pērā me tā Hūrā hākari; i tāpae whakahere anō ia ki runga ki te āta. Ko tāna hanga anō tēnei i Pētēre, he patu whakahere ki ngā kūao kau i hangā e ia; i whakatūria anō e ia ki Pētēre he tohunga mō ngā wāhi tiketike i hangā nei e ia.
1KI 12:33 I tāpae whakahere anō ia ki runga ki te āta i hangā e ia ki Pētēre i te tekau mā rima o ngā rā o te waru o ngā marama, arā i te marama i kitea iho e tōna ngākau anō; ā, whakaritea ana e ia he hākari mā ngā tama a Īharaira. Heoi, tāpae whakahere ana ia ki runga ki te āta, tahu ana i te whakakakara.
1KI 13:1 Nā, ka tae mai tētahi tangata a te Atua i Hūrā ki Pētēre, he mea kī nā Ihowā; ā, i te tū a Ieropoama i taha o te āta, e tahu whakakakara ana.
1KI 13:2 Nā, karangatia ana e ia tā Ihowā kupu ki te āta; i mea ia: “E te āta nā, e te āta nā, ko tā Ihowā kupu tēnei: ‘Nanā, tērā e whānau tētahi tamaiti o te whare o Rāwiri, ko Hōhia tōna; ingoa, ā, ka tāpaea e ia ki runga ki a koe ngā tohunga o ngā wāhi tiketike tahu whakakakara nei ki runga ki a koe; ā, ka tahuna he wheua tāngata ki runga ki a koe.’ ”
1KI 13:3 I hoatu anō e ia he tohu i taua rā, i mea, “Ko te tohu tēnei i kōrerotia e Ihowā: ‘Nanā, ka kōara te āta, ā, ka maringi ngā pungarehu o runga.’ ”
1KI 13:4 Ā, nō te rongonga o te kīngi i te kupu a te tangata a te Atua i karangatia nei e ia ki te āta i Pētēre, ka totoro te ringa o Ieropoama i te āta ka mea ia, “Hopukia ia.” Nā, memenge ake tōna ringa i totoro nei ki a ia, kīhai hoki i taea te whakahoki mai ki a ia.
1KI 13:5 Nā, kua kōara te āta; maringi ake ngā pungarehu i runga i te āta, i rite tonu ki te tohu i hōmai e te tangata a te Atua, ki tā Ihowā i kōrero ai.
1KI 13:6 Nā, ka oho te kīngi, ka mea ki te tangata a te Atua, “Tēnā rā, karanga atu ki te aroaro o Ihowā, o tōu Atua, ka īnoi mōku, kia whakahokia mai tōku ringa ki ahau.” Nā, ka karanga te tangata a te Atua ki te aroaro o Ihowā, ā, ka whakahokia te ringa o te kīngi ki a ia ka pērā me tō mua.
1KI 13:7 Nā, ka mea te kīngi ki te tangata a te Atua, “Haere mai tāua ki te whare ki tētahi oranga mōu, kia hoatu hoki e ahau tētahi mea ki a koe.”
1KI 13:8 Nā, ka mea te tangata a te Atua ki te kīngi, “Ahakoa i hōmai e koe ko te hāwhe o tōu whare, e kore ahau e haere tāua, e kore anō e kai taro, e inu wai ki tēnei wāhi.
1KI 13:9 Ko te ako hoki tēnei ki ahau, ko tā Ihowā hoki i kōrero ai; i mea ai: ‘Kei kai taro, kei inu wai; kaua anō e hoki mai nā te ara e haere atu ai koe.’ ”
1KI 13:10 Nā, haere ana ia he ara kē, kīhai i hoki nā te ara i haere mai nei ia ki Pētēre.
1KI 13:11 Nā, i Pētēre tētahi poropiti e noho ana, he koroheke; ā, ka haere mai tētahi o āna tama, ka kōrerotia ki a ia ngā mea katoa i mea ai te tangata a te Atua i taua rā ki Pētēre; i kōrerotia anō e rātou ki tō rātou pāpā ngā kupu i kōrero ai ia ki te kīngi.
1KI 13:12 Nā, ka mea tō rātou pāpā ki a rātou, “Tēnā koa te ara i haere ai ia?” I kite hoki āna tama i te ara i haere atu ai te tangata a te Atua i haere mai nei i Hūrā.
1KI 13:13 Nā, ka mea ia ki āna tama, “Whakanohoia taku kāihe.” Nā, whakanohoia ana tana kāihe e rātou, ā, eke ana ia ki runga.
1KI 13:14 Nā, whāia ana e ia te tangata a te Atua, mau rawa atu e noho ana i raro i tētahi oki; ā, ka mea ki a ia, “Ko koe ianei te tangata a te Atua i haere mai nei i Hūrā?” Anō rā ko tērā, “Āe, ko ahau.”
1KI 13:15 Kātahi ka mea ia ki a ia, “Haere mai tāua ki te whare ki te kai taro māu.”
1KI 13:16 Anō rā ko ia, “E kore e āhei kia hoki tāua, kia haere tāua; e kore anō tāua e kai taro, e inu wai rānei ki tēnei wāhi.
1KI 13:17 Kua kōrerotia mai hoki tā Ihowā kupu ki ahau: ‘Kei kai taro, kei inu wai ki reira, kei anga, kei haere mai nā te ara ka haere atu nei koe.’ ”
1KI 13:18 Nā, ka mea tērā ki a ia, “He poropiti anō ahau, he pēnā me koe; kua kōrerotia mai anō ki ahau te kupu a Ihowā e tētahi anahera, i kī mai ia: ‘Whakahokia ia ki a koe, ki tōu whare ki te kai taro māna, ki te inu wai.’ ” He teka ia nāna ki a ia.
1KI 13:19 Heoi, hoki ana ia i a ia, ā, kai taro ana i roto i tōna whare, inu wai ana.
1KI 13:20 Nā, i a rāua e noho ana ki te tēpu, ko te putanga mai o te kupu a Ihowā ki te poropiti nāna nei ia i whakahoki;
1KI 13:21 ā, ka karanga ia ki te tangata a te Atua i haere mai nei i Hūrā, ka mea, “Ko tā Ihowā kupu tēnei: ‘Nā, kua tutū nei koe ki te māngai o Ihowā, ā, kāhore i mau i a koe te ako i ako ai a Ihowā, tōu Atua ki a koe.
1KI 13:22 Heoi, hoki mai ana koe, kai taro ana, inu wai ana ki te wāhi i kōrero ai ia ki a koe, “Kei kai taro, kei inu wai, e kore e tae tōu tinana ki te urupā o ōu mātua.” ’ ”
1KI 13:23 Ā, ka mutu tāna kai taro, ka mutu tāna inu, nā, ka whakanohoia e ia te kāihe mōna, arā mō te poropiti i whakahokia mai nei e ia.
1KI 13:24 Nā, i tōna haerenga, ka tūtaki tētahi raiona ki a ia, ka whakamate i a ia; ā, ko tōna tinana i ākiritia ki te ara, me te kāihe ki tōna taha tū ai; ko te raiona anō hoki i tū i te taha o te tinana.
1KI 13:25 Nā, ka haere mai ngā tāngata, ka kite i te tinana i ākiritia rā ki te ara, me te raiona e tū ana i te taha o te tinana. Ka haere, ka kōrero i taua mea i te pā i noho ai te poropiti koroheke.
1KI 13:26 Ā, nō te rongonga o taua poropiti, nāna nei ia i whakahoki mai i te ara, ka mea ia, “Ko te tangata tēnā a te Atua kīhai nei i whakarongo ki te māngai o Ihowā, ā, hoatu ana ia e Ihowā ki te raiona, ā, haea iho e ia, whakamatea iho; ko tā Ihowā kupu hoki tēnā i kōrero ai ki a ia.”
1KI 13:27 Nā, ka kōrero ia ki āna tama, ka mea, “Whakanohoia taku kāihe.” Ā, whakanohoia ana e rātou.
1KI 13:28 Nā, haere ana ia, ā, rokohanga atu ko te tinana, he mea ākiri ki te ara, me te kāihe rāua ko te raiona e tū ana i te taha o te tinana; kīhai te tinana i kainga e te raiona, kīhai anō te kāihe i haea.
1KI 13:29 Nā, hāpainga ana te tinana o te tangata a te Atua e te poropiti, ā, whakatakotoria ana ki runga ki te kāihe, whakahokia ana; haere ana ki te pā o te poropiti koroheke ki te tangi, ki te tanu i a ia.
1KI 13:30 Nā, whakatakotoria ana e ia tōna tinana ki roto ki tōna ake urupā; ā, ko tā rātou tangi mōna, “Auē, e tōku teina.”
1KI 13:31 Ā, ka mutu tāna tanu i a ia, ka kōrero ia ki āna tama, ka mea, “Kia mate ahau, tanumia ahau ki roto ki te urupā tanumia ai te tangata a te Atua; hei te taha o ōna wheua whakatakoto ai ōku wheua.
1KI 13:32 Nō te mea tērā e tino rite tā Ihowā kōrero i karangatia e ia mō tēnei āta i Pētēre, mō ngā whare katoa hoki o ngā wāhi tiketike i ngā pā o Hamaria.”
1KI 13:33 I muri i tēnei kīhai a Ieropoama tahuri i tōna ara kino; engari i tahuri anō ki te mea tohunga nō roto noa iho i te iwi katoa mō ngā wāhi tiketike. Ahakoa ko wai i hiahia, kua whakatohungatia e ia, kia whai tohunga ai mō ngā wāhi tiketike.
1KI 13:34 Nā, meinga ana tēnei mea hei hara mō te whare o Ieropoama, hei mea e hunā ai, e whakamōtītia rawatia ai i te mata o te whenua.
1KI 14:1 I taua wā ka tūrorotia a Apia tama a Ieropoama.
1KI 14:2 Nā, ka mea a Ieropoama ki tāna wahine, “Tēnā, whakatika, whakareretia kētia tōu āhua, kei mōhiotia ko te wahine koe a Ieropoama; ka haere ki Hiro, kei reira a Āhia poropiti, nāna nei te kī ko ahau hei kīngi mō tēnei iwi.
1KI 14:3 Ā, ka mau koe i tōu ringa kia tekau ngā taro, me ētahi keke, me tētahi pounamu honi, ka haere ki a ia; māna e kōrero ki a koe, ka pēhea rānei te tamaiti.”
1KI 14:4 Nā, pērā tonu te wahine a Ieropoama, whakatika ana, haere ana ki Hiro, tae tonu atu ki te whare o Āhia. Nā, kīhai i āhei i a Āhia te titiro, kua mārō hoki ōna kanohi, kua koroheketia hoki ia.
1KI 14:5 Nā, ka mea a Ihowā ki a Āhia, “Nanā, ko te wahine tēnei a Ieropoama te haere mai nei ki te rapu kupu i a koe mō tāna tama; e mate ana hoki. Kia pēnei tāu kī atu ki a ia. Nō te mea, ina tae mai ia, tērā ia e whakaahua i a ia ki tētahi wahine kē.”
1KI 14:6 Heoi, i te rongonga o Āhia i te haruru o ōna waewae, i a ia i tomo mai ai i te kūwaha, ka mea ia, “Tomo mai, e te wahine a Ieropoama; he aha koe i whakaahua kē ai i a koe? He pakeke hoki ngā kōrero i tonoa mai ai ahau ki a koe.
1KI 14:7 Haere, kōrero ki a Ieropoama, ‘Ko te kupu tēnei a Ihowā, a te Atua o Īharaira: Nā, kua whakanuia nā koe e ahau i roto i te iwi, kua meinga hei rangatira mō tāku iwi, mō Īharaira,
1KI 14:8 ā, haea ana e ahau te kīngitanga i te whare o Rāwiri, hoatu ana ki a koe; heoi kīhai koe i rite ki tāku pononga, ki a Rāwiri, i pupuri nei i āku whakahau, ā, whakapaua ana tōna ngākau ki te whai i ahau, ā, ko te tika anake hei mahi māna ki tōku aroaro;
1KI 14:9 otiia, hira ake te kino o āu mahi i ā te katoa i mua atu i a koe; i haere hoki koe, i hanga i ētahi atua kē māu, me ngā whakapakoko whakarewa, hei whakapātaritari i ahau, ā, whiua ana ahau e koe ki muri i a koe, ki tōu tuarā.
1KI 14:10 “ ‘Nā reira ka hoatu e ahau he kino ki runga i te whare o Ieropoama, ā, ka hautopea atu e ahau ngā tamariki tāne katoa i a Ieropoama, te hunga o Īharaira i tūtakina ki roto, i mahue rānei ki waho, ā, ka tahia rawatia atu te whare o Ieropoama, ka pērātia me te paru e tahia ana e te tangata, ā poto noa.
1KI 14:11 Ko te hunga o Ieropoama e mate ki te pā mā ngā kurī e kai; ko ngā mea hoki e mate ki te pārae mā ngā manu o te rangi e kai; he mea kī mai hoki tēnei nā Ihowā.’
1KI 14:12 “Nā reira whakatika koe, haere ki tōu whare; ā, kia tomo ōu waewae ki te pā, ka mate te tamaiti.
1KI 14:13 Ā, mā Īharaira katoa ia e tangi, mā rātou ia e tanu; ko ia anake hoki o Ieropoama e tae ki te urupā, nō te mea nōna tētahi mea pai ki a Ihowā, ki te Atua o Īharaira i kitea i roto i te whare o Ieropoama.
1KI 14:14 “Ka ara anō hoki i a Ihowā he kīngi māna mō Īharaira, hei hautope i te whare o Ieropoama, i taua rā. He aha rā? Āianei nei anō!
1KI 14:15 Ka patua hoki a Īharaira e Ihowā, ka pērātia me te kākaho e whakangāueuetia ana i roto i te wai, ā, ka hūtia atu a Īharaira i tēnei whenua pai i hoatu nei e ia ki ō rātou mātua; ā, ka tītaria ki tāwāhi o te awa; mō rātou i hanga i ā rātou Aherimi hei whakapātaritari i a Ihowā.
1KI 14:16 Nā, ka tukua atu a Īharaira e ia mō ngā hara o Ieropoama i hara nei ia, i hara ai hoki a Īharaira.”
1KI 14:17 Nā, whakatika ana te wahine a Ieropoama, haere ana, kua tae ki Tirita. Ā, tae kau ia ki te paepae o te whare, ka mate te tamaiti.
1KI 14:18 Nā, tanumia ana ia e Īharaira katoa, ā, tangihia iho; ko tā Ihowā kupu tērā i kōrero ai, arā, tā tāna pononga, tā Āhia poropiti.
1KI 14:19 Nā, ko ērā meatanga a Ieropoama, ko āna whawhai, ko tōna kīngitanga, koia tēnā e mau nā i te Pukapuka o Ngā Rā o Ngā Kīngi o Īharaira.
1KI 14:20 Nā, ko ngā rā i kīngi ai a Ieropoama, e rua tekau mā rua tau, ā, moe ana ia ki ōna mātua, ā, ko tāna tama, ko Nātapa te kīngi i muri i a ia.
1KI 14:21 Nā, ko Rehopoama tama a Horomona te kīngi o Hūrā. E whā tekau mā tahi ngā tau o Rehopoama i tōna meatanga hei kīngi; ā, kotahi tekau mā whitu ōna tau i kīngi ai ki Hiruhārama, ki te pā i whiriwhiria e Ihowā i roto i ngā iwi katoa o Īharaira hei waihotanga iho mō tōna ingoa. Ko te ingoa hoki o tōna whaea ko Naama, he Āmoni.
1KI 14:22 Nā, ka kino te mahi a Hūrā ki te titiro a Ihowā, ā, whakapātaritaritia ana ia e rātou ki ō rātou hara i hara ai rātou, ā, hae iho ia; nui atu hoki i a ō rātou mātua katoa i mea ai.
1KI 14:23 I hangā hoki e rātou ētahi wāhi tiketike mā rātou, me ētahi pou, me ētahi Aherimi, ki ngā puke teitei katoa, ki raro hoki i ngā rākau kōuru nui katoa.
1KI 14:24 I taua whenua anō ētahi e whakahoroma ana, e mahi ana i ngā mea whakarihariha katoa a ngā tauiwi i peia nei e Ihowā i te aroaro o ngā tama a Īharaira.
1KI 14:25 Nā, i te rima o ngā tau o Kīngi Rehopoama ka tae mai a Hīhāka kīngi o Īhipa ka whakapaea a Hiruhārama;
1KI 14:26 ā, taria atu ana e ia ngā taonga o te whare o Ihowā, me ngā taonga o te whare o te kīngi, i mauria katoatia atu e ia. Ā, i mauria atu hoki e ia ngā pukupuku kōura katoa i hangā e Horomona.
1KI 14:27 Nā, hangā ana e Kīngi Rehopoama ētahi pukupuku parāhi hei whakakapi mō ērā, ā, tukua ana e ia ki ngā ringa o ngā rangatira o ngā kaitiaki i tiaki nei i te tatau o te whare o te kīngi.
1KI 14:28 Ā, i ō te kīngi haerenga ki te whare o Ihowā, ka maua aua mea e ngā kaitiaki, ka whakahokia anō e rātou ki te whare o ngā kaitiaki.
1KI 14:29 Nā, ko ērā atu meatanga a Rehopoama me āna mahi katoa, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Hūrā?
1KI 14:30 Ā, he whawhai tonu tā Rehopoama rāua ko Ieropoama ki a rāua i ō rāua rā katoa.
1KI 14:31 Nā, ka moe a Rehopoama ki ōna mātua, ā, tanumia iho ki ōna mātua ki te pā o Rāwiri; ā, ko te ingoa hoki o tōna whaea ko Naama, he Āmoni. Ā, ko Āpiama, ko tāna tama te kīngi i muri i a ia.
1KI 15:1 Nā, nō te tekau mā waru o ngā tau o Kīngi Ieropoama tama a Nēpata i kīngi ai a Āpiama ki a Hūrā.
1KI 15:2 E toru ngā tau i kīngi ai ia ki Hiruhārama. Ā, ko te ingoa o tōna whaea ko Maaka, he tamāhine nā Apohārama.
1KI 15:3 Nā, i haere ia i runga i ngā hara katoa i mea ai tōna pāpā i mua atu i a ia; kīhai hoki tōna ngākau i tapatahi ki a Ihowā, ki tōna Atua, kīhai i rite ki te ngākau o tōna tupuna, o Rāwiri.
1KI 15:4 Otiia he whakaaro ki a Rāwiri hōmai ana e Ihowā, e tōna Atua he rama ki a ia i Hiruhārama kia whakaarahia ake ai tāna tama i muri i a ia, kia whakapūmautia ai hoki a Hiruhārama.
1KI 15:5 Mō Rāwiri i mahi tika ki te aroaro o Ihowā, ā, kīhai i peka kē i ngā mea katoa i whakahaua ai ia i ngā rā katoa i ora ai ia, ko te meatanga anake ki a Uria Hiti.
1KI 15:6 Nā, he whawhai tā Rehopoama rāua ko Ieropoama ki a rāua i ngā rā katoa i ora ai ia.
1KI 15:7 Nā, ko ērā atu meatanga a Āpiama me āna mahi katoa, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Hūrā? He whawhai hoki tā Āpiama rāua ko Ieropoama ki a rāua.
1KI 15:8 Nā, kua moe a Āpiama ki ōna mātua, ā, tanumia ana e rātou ki te pā o Rāwiri. Ā, ko tāna tama, ko Aha te kīngi i muri i a ia.
1KI 15:9 Nā, nō te rua tekau o ngā tau o Ieropoama kīngi o Īharaira i kīngi ai a Aha ki a Hūrā.
1KI 15:10 Ā, e whā tekau mā tahi ngā tau i kīngi ai ia ki Hiruhārama. Ko te ingoa hoki o tōna whaea, ko Maaka, he tamāhine nā Apohārama.
1KI 15:11 Ā, tika tonu te mahi a Aha ki te aroaro o Ihowā, rite tonu ki tā tōna tupuna, ki tā Rāwiri.
1KI 15:12 I peia atu hoki e ia te hunga whakahoroma i te whenua, whakakorea atu ana e ia ngā whakapakoko katoa i hangā e ōna mātua.
1KI 15:13 I whakamutua anō e ia te kuīnitanga o Maaka, o tōna whaea, mōna i hanga whakapakoko wehi hei Āhera; tapatapahia iho hoki e Aha tāna whakapakoko, tahuna ake ki te taha o te awa, o Kitirono.
1KI 15:14 Otiia kīhai i whakakorea ngā wāhi tiketike. He ahakoa rā, i tapatahi te ngākau o Aha ki a Ihowā i ōna rā katoa.
1KI 15:15 I kawea hoki e ia ngā mea i whakatapua e tōna pāpā, me āna mea anō i whakatapu ai, ki te whare o Ihowā, te hiriwa, te kōura, me ngā oko.
1KI 15:16 He whawhai hoki tā Aha ki a Paaha kīngi o Īharaira i ō rāua rā katoa.
1KI 15:17 Nā, ka haere a Paaha kīngi o Īharaira ki Hūrā, ā, hangā ana a Rama e ia, kia kaua ai tētahi e tukua kia haere atu, kia haere mai ki a Aha kīngi o Hūrā.
1KI 15:18 Kātahi ka tangohia katoatia e Aha te hiriwa me te kōura i mahue o ngā taonga o te whare o Ihowā, me ngā taonga o te whare o te kīngi, ā, hoatu ana ki ngā ringa o ngā tāngata; ā, hoatu ana e Kīngi Aha kia kawea ki a Pēneharara tama a Taparimono, tama a Hetiono kīngi o Hīria, i Ramahiku nei tōna kāinga; i mea ia,
1KI 15:19 “He kawenata tā tāua, tā tōku pāpā rāua ko tōu pāpā. Tēnā tāku hākari māu te kawea atu nā, he hiriwa, he kōura. Haere mai whakatakā tāu kawenata ki a Paaha kīngi o Īharaira kia haere atu ai ia i tōku taha.”
1KI 15:20 Nā, rongo tonu a Pēneharara ki a Kīngi Aha, ā, ungā ana e ia ngā rangatira o āna ope ki ngā pā o Īharaira, ā, patua iho e ia a Īono, a Rāna, a Apere Petemaaka, me Kinerota katoa, me te whenua katoa o Napatari.
1KI 15:21 Nā, i te rongonga o Paaha, ka mutu tāna hanga i Rama, ā, noho ana ki Tirita.
1KI 15:22 Kātahi ka karanga nui a Kīngi Aha puta noa i Hūrā; kīhai tētahi i tukua noatia atu; ā, taria atu ana e rātou ngā kōhatu o Rama, me ngā rākau o reira i hangā nei e Paaha, hei hanga mā Kīngi Aha i Kepa o Pineamine, i Mihipa hoki.
1KI 15:23 Nā, ko ērā atu meatanga katoa a Aha me āna mahi mārohirohi, me ngā mea katoa i mea ai ia, me ngā pā i hangā e ia, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Hūrā? Otiia, i tōna koroheketanga i mate ōna waewae.
1KI 15:24 Nā, ka moe a Aha ki ōna mātua, ā, tanumia iho ki ōna mātua, ki te pā o tōna tupuna, o Rāwiri; ā, ko Iehohāpata, ko tāna tama te kīngi i muri i a ia.
1KI 15:25 Nā, nō te rua o ngā tau o Aha, kīngi o Hūrā i kīngi ai a Nātapa tama Ieropoama ki a Īharaira; ā, e rua ngā tau i kīngi ai ia ki a Īharaira.
1KI 15:26 Ā, he kino tāna mahi ki te aroaro o Ihowā; i haere hoki ia i te ara o tōna matua, i tōna hara i meinga ai e ia a Īharaira kia hara.
1KI 15:27 Nā, ka whakatupuria he hē mōna e Paaha tama a Āhia o te whare o Ihākara; ā, patua iho ia e Paaha ki Kipetono o ngā Pirihitini; i te whakapae hoki a Nātapa rātou ko Īharaira katoa i Kipetono.
1KI 15:28 Nā, nō te toru o ngā tau o Aha kīngi o Hūrā i patua ai ia e Paaha, ā, ko ia te kīngi i muri i a ia.
1KI 15:29 Ā, kīngi tahanga ia, nā, patua iho e ia te whare katoa o Ieropoama. Kīhai tētahi mea whai manawa o Ieropoama i mahue i a ia, poto rawa te huna; i rite tonu ki tā Ihowā kupu i kōrerotia e tāna pononga, e Āhia Hironi –
1KI 15:30 mō ngā hara i hara ai a Ieropoama, i mea ai i a Īharaira kia hara; mō tāna whakapātaritari i whakapātaritari ai ia i a Ihowā, i te Atua o Īharaira kia riri.
1KI 15:31 Nā, ko ērā atu meatanga a Nātapa me āna mahi katoa, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Īharaira?
1KI 15:32 He whawhai hoki tā Aha rāua ko Paaha kīngi o Īharaira i ō rāua rā katoa.
1KI 15:33 Nō te toru o ngā tau o Aha kīngi o Hūrā i kīngi ai a Paaha tama a Āhia ki a Īharaira katoa ki Tirita, e rua tekau mā whā ngā tau i kīngi ai.
1KI 15:34 Ā, he kino tāna mahi i te aroaro o Ihowā, i haere hoki ia i te ara o Ieropoama, i tōna hara i meinga ai e ia a Īharaira kia hara.
1KI 16:1 Nā, ka puta te kupu a Ihowā ki a Iehu, tama a Hanani mō Paaha; i mea ia:
1KI 16:2 “Nāku nei koe i whakaara ake i roto i te puehu, ā, hoatu ana koe e ahau hei rangatira mō tāku iwi, mō Īharaira. Nā, haere ana koe i te ara o Ieropoama, ā, nāu i hara ai tāku iwi, a Īharaira, hei whakapātaritari i ahau, ki ō rātou hara;
1KI 16:3 nanā, ka mōtī i ahau ngā uri o Paaha, me ngā uri o tōna whare, ā, ka meinga tōu whare kia rite ki te whare o Ieropoama tama a Nēpata.
1KI 16:4 Ko te hunga o Paaha e mate ki te pā mā ngā kurī e kai, ko ngā mea hoki ōna e mate ki te pārae mā ngā manu o te rangi e kai.”
1KI 16:5 Nā, ko ērā atu meatanga a Paaha me āna mahi, me tōna toa, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Īharaira?
1KI 16:6 Nā, ka moe a Paaha ki ōna mātua, ā, tanumia iho ki Tirita; ā, ko Eraha, ko tāna tama te kīngi i muri i a ia.
1KI 16:7 I kawea anō e Iehu poropiti tama a Hanani te kupu a Ihowā mō Paaha rātou ko tōna whare, mō te kino katoa i meatia e ia ki te aroaro o Ihowā, mō tāna whakapātaritari i a ia ki ngā mahi a ōna ringa, mōna i rite ki te whare o Ieropoama, mō tāna patunga hoki i a ia.
1KI 16:8 I te rua tekau mā ono o ngā tau o Aha kīngi o Hūrā ka kīngi a Eraha tama a Paaha ki a Īharaira ki Tirita, e rua ngā tau e kīngi ana.
1KI 16:9 Nā, ka whakatupuria he hē mōna e tāna tangata, e Tīmiri, rangatira o te hāwhe o ana hāriata. Nā, i Tirita ia e inu ana, ā, haurangi iho, i roto i te whare o Arata kaitohutohu o tōna whare i Tirita.
1KI 16:10 Nā, haere ana a Tīmiri, patua iho ia, whakamatea iho i te rua tekau mā whitu o ngā tau o Aha kīngi o Hūrā, ā, ko ia te kīngi i muri i a ia.
1KI 16:11 Ā, ka kīngi nei ia, tōna nohoanga anō ki te torōna, patua iho e ia te whare katoa o Paaha; kīhai tētahi tamaiti tāne i mahue ki a ia, o ōna whanaunga, o ōna hoa aroha rānei.
1KI 16:12 Heoi, hunā ana e Tīmiri te whare katoa o Paaha; ko tā Ihowā kupu ia i kōrerotia e Iehu poropiti mō Paaha –
1KI 16:13 mō ngā hara katoa o Paaha, mō ngā hara o Eraha, o tāna tama i hara nei rāua, i hara ai a Īharaira, he whakapātaritari i a Ihowā, i te Atua o Īharaira ki ā rātou mea horihori.
1KI 16:14 Nā, ko ērā atu meatanga a Eraha me āna mahi katoa, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Īharaira?
1KI 16:15 Nō te rua tekau mā whitu o ngā tau o Aha kīngi o Hūrā i kīngi ai a Tīmiri ki Tirita, e whitu ngā rā. Nā, i te whakapae te iwi i Kipetono o ngā Pirihitini,
1KI 16:16 ā, ka rongo taua iwi i whakapae rā i te kōrero, kua whakatakoto hē a Tīmiri, kua patua hoki e ia te kīngi; heoi meinga ana e Īharaira katoa a Omori rangatira ope hei kīngi mō Īharaira i taua rā, i te puni.
1KI 16:17 Nā, haere atu ana a Omori i Kipetono, rātou ko Īharaira katoa, ā, whakapaea ana e rātou a Tirita.
1KI 16:18 Ā, nō te kitenga o Tīmiri ka horo te pā, nā, haere ana ia ki te wāhi pai rawa o te whare o te kīngi, ā, tahuna ana e ia ki te ahi te whare kīngi ki runga ki a ia, ā, mate iho –
1KI 16:19 mō ōna hara i hara ai, i tāna mahinga i te kino i te aroaro o Ihowā, i tōna haerenga i te ara o Ieropoama, ā, i tōna hara i hara ai, ā, hara iho a Īharaira.
1KI 16:20 Nā, ko ērā atu meatanga a Tīmiri me tāna hē i whakatupu ai ia, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Īharaira?
1KI 16:21 Kātahi ka wāhia te iwi o Īharaira, kia rua ngā wāhi; ko tētahi hāwhe o te iwi i whai i a Tipini tama a Kinata, ko ia hei kīngi; ko tētahi hāwhe i whai i a Omori.
1KI 16:22 Otiia, i kaha ake te hunga i whai i a Omori i te hunga i whai i a Tipini tama a Kinata; heoi mate ana a Tipini, ā, ka kīngi ko Omori.
1KI 16:23 Nō te toru tekau mā tahi o ngā tau o Aha kīngi o Hūrā i kīngi ai a Omori ki a Īharaira, ā, kotahi tekau mā rua ōna tau i kīngi ai; e ono ngā tau i kīngi ai ki Tirita.
1KI 16:24 Nā, ka hokona e ia i a Hemere te pukepuke, a Hamaria, mō ngā taranata hiriwa e rua; ā, hanga ana ia ki runga ki te pukepuke, ā, huaina iho e ia te ingoa o te pā i hangā e ia ko Hamaria, ko te ingoa o Hemere, o te tangata nōna te puke.
1KI 16:25 Nā, kino ana te mahi a Omori ki te aroaro o Ihowā, kino atu i ā te katoa i mua atu i a ia.
1KI 16:26 I haere hoki ia i ngā ara katoa o Ieropoama tama a Nēpata, i ōna hara i mea ai ia i a Īharaira kia hara, kia whakapātaritari i a Ihowā, i te Atua o Īharaira ki ā rātou mea horihori.
1KI 16:27 Nā, ko ērā atu meatanga a Omori i mea ai ia me āna mahi toa, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Īharaira?
1KI 16:28 Nā, ka moe a Omori ki ōna mātua, ā, tanumia iho ki Hamaria; ā, ko tāna tama, ko Āhapa te kīngi i muri i a ia.
1KI 16:29 Nō te toru tekau mā waru o ngā tau o Aha kīngi o Hūrā, i kīngi ai a Āhapa tama a Omori ki a Īharaira; ā, e rua tekau mā rua ngā tau i kīngi ai a Āhapa tama a Omori ki a Īharaira ki Hamaria.
1KI 16:30 Nā, i mahia e Āhapa tama a Omori te kino i te tirohanga a Ihowā, hira atu i ā te katoa i mua atu i a ia.
1KI 16:31 Nā, me te mea nei he mea māmā ki a ia te haere i runga i ngā hara o Ieropoama tama a Nēpata, ka tango ia i a Ietēpere, tamāhine a Etepāra kīngi o ngā Haironi, hei wahine māna; ā, haere ana, mahi ana ki a Paara, koropiko ana ki a ia.
1KI 16:32 I whakaarahia e ia tētahi āta mō Paara i roto i te whare o Paara i hangā nei e ia ki Hamaria.
1KI 16:33 Nā, hangā ana e Āhapa te Āherea, ā, nui atu tā Āhapa i mea ai hei whakapātaritari mō Ihowā, mō te Atua o Īharaira i tā ngā kīngi katoa o Īharaira i mua i a ia.
1KI 16:34 Nō ōna rā ka hangā Heriko e Hiere o Pētēre; ko tāna mātāmua, ko Āpirama, te pāpā i te tīmatanga o te whakatūranga, ā, ko tāna whakaotinga, ko Hekupu, te pāpā i te whakanohoanga o ngā tatau; ko tā Ihowā kupu ia i kōrerotia e Hohua tama a Nunu.
1KI 17:1 Nā, ka mea a Irāia Tihipi, nō ngā tāngata o Kireara, ki a Āhapa, “E ora ana a Ihowā, te Atua o Īharaira, kei tōna aroaro nei ahau e tū ana, e kore ēnei tau e whai tōmairangi, e whai ua; engari mā tāku kupu anake.”
1KI 17:2 Nā, ka puta te kupu a Ihowā ki a ia, ka mea,
1KI 17:3 “Haere atu i konei, anga atu whaka te rāwhiti, ka piri ki te awa ki Keriti, e aro nui atu nā ki Horano.
1KI 17:4 Ā, kei te awa he wai mōu; kua oti hoki ngā raweni te whakahau e ahau hei whāngai i a koe i reira.”
1KI 17:5 Nā, haere ana ia, meatia ana tā Ihowā i kōrero ai; i haere hoki, ā, noho ana ki te taha o te awa, o Keriti, e aro nui nei ki Horano.
1KI 17:6 Ā, nā ngā raweni i kawe mai he taro, he kikokiko māna i te ata, he taro, he kikokiko māna i te ahiahi; nō te awa hoki tōna wai.
1KI 17:7 Nāwai ā kei ētahi rā mai, ka maroke te awa, kāhore hoki he ua o te whenua.
1KI 17:8 Nā, ka puta mai te kupu a Ihowā ki a ia, ka mea:
1KI 17:9 “Whakatika, haere ki Harepata o Hairona, ki reira noho ai. Nanā, kua oti tētahi wahine pouaru o reira te whakahau e ahau hei whāngai i a koe ki reira.”
1KI 17:10 Nā, whakatika ana ia, haere ana ki Harepata. Ā, nō tōna taenga atu ki te kūwaha o te pā, nā, ko tētahi wahine i reira, he pouaru, e kohikohi rākau ana. Ā, ka karanga atu ia ki a ia ka mea, “Mauria mai he wai mōku i roto i te oko, hei inu māku.”
1KI 17:11 Nā, haere ana tērā ki te tiki, ā, ka karanga anō ia ki a ia, “Tēnā tētahi wāhi taro maua mai i tōu ringa māku.”
1KI 17:12 Nā, ka mea ia, “E ora ana a Ihowā, tōu Atua, kāhore āku keke; engari he kutanga parāoa i roto i te oko, me tētahi hinu, he iti nei, i roto i te ipu, e kohikohi ana anō tēnei ahau i ngā rākau e rua, kia haere ai ahau ki te taka i taua mea mā māua ko tāku tama, mō tā māua kai atu, ka mate ai.”
1KI 17:13 Nā, ka mea a Irāia ki a ia, “Kaua e wehi, tīkina, meatia tāu i kī mai nā; otiia, mātua hangā mai tētahi wāhi hei keke māku, kia nohinohi, ka mau mai ai ki ahau; ā muri iho ka hangā mā kōrua ko tāu tama.
1KI 17:14 Ko te kupu hoki tēnei a Ihowā, a te Atua o Īharaira: ‘E kore e pau te oko parāoa, e kore anō te ipu hinu e poto ā taea noatia te rā e hōmai ai e Ihowā he ua ki te mata o te whenua.’ ”
1KI 17:15 Nā, haere ana ia; meatia ana tā Irāia i kī ai, ā, kai ana rāua, me tōna whare anō, i ngā rā maha.
1KI 17:16 Kīhai te oko parāoa i hemo, kīhai hoki te ipu hinu i poto, rite tonu ki te kupu a Ihowā i kōrerotia rā e Irāia.
1KI 17:17 Ā, i muri i ēnei mea ka takoto mate te tama a taua wahine nōna nei te whare; nui atu te kaha o tōna mate, kāhore noa iho he manawa i mahue i roto i a ia.
1KI 17:18 Nā, ka mea ia ki a Irāia, “He aha tāku ki a koe, e te tangata a te Atua? I haere mai nā koe ki ahau kia whakamaharatia mai ōku hē, ki te whakamate hoki i tāku tama!”
1KI 17:19 Nā, ka mea tērā ki a ia, “Hōmai tāu tamaiti ki ahau.” Nā, tangohia ana e ia i tōna uma, ā, kawea ana ki te rūma i runga, ki te wāhi i noho ai ia, whakatakotoria ana e ia ki tōna moenga.
1KI 17:20 Nā, ka karanga ia ki a Ihowā, ka mea, “E Ihowā, e tōku Atua, kua meatia anō hoki e koe he kino ki tēnei pouaru e noho nei ahau ki a ia, i tāna tama ka whakamatea nei?”
1KI 17:21 Nā, whārōrō ana ia, e toru ngā whārōrōtanga ki runga ki te tamaiti, ā, ka karanga ki a Ihowā, ka mea, “E Ihowā, e tōku Atua, kia hoki mai te wairua o tēnei tamaiti ki roto ki a ia.”
1KI 17:22 Nā, rongo tonu a Ihowā ki te reo o Irāia; ā, hoki ana te wairua o te tamaiti ki roto ki a ia, nā, kua ora.
1KI 17:23 Nā, ka mau a Irāia ki te tamaiti, ā, kawea atu ana i taua rūma ki raro, ki te whare, ā, hoatu ana ki tōna whaea; ā, ka mea a Irāia, “Titiro, kei te ora tāu tama.”
1KI 17:24 Nā, ka mea te wahine rā ki a Irāia, “Kātahi rawa ahau ka mōhio he tangata koe nā te Atua, he pono anō te kupu a Ihowā i tōu māngai.”
1KI 18:1 Ā, ka maha ngā rā, ka puta mai te kupu a Ihowā ki a Irāia i te toru o ngā tau; i mea ia, “Haere, whakakitea atu koe ki a Āhapa; ā, māku e hoatu he ua ki te whenua.”
1KI 18:2 Nā, haere ana a Irāia ki te whakakite i a ia ki a Āhapa. Nui atu hoki te matekai o Hamaria.
1KI 18:3 Nā, ka karanga a Āhapa ki a Opāria, kaitohutohu o tōna whare. (Nā, he nui te wehi o Opāria ki a Ihowā;
1KI 18:4 ā, i tā Ietēpere hautopenga atu i ngā poropiti a Ihowā, nā, ka mau a Opāria ki ngā poropiti kotahi rau, ā, hunā ana e ia, takirima tekau ngā tāngata ki te ana kotahi, ā, whāngainga ana rātou e ia ki te taro, ki te wai.)
1KI 18:5 Nā, ka mea a Āhapa ki a Opāria, “Haere puta noa i te whenua ki ngā puna wai katoa; ki ngā awa katoa; tērā pea ka kitea e tātou tētahi tarutaru e ora ai ngā hōiho me ngā muera; kei poto katoa ā tātou kararehe.”
1KI 18:6 Heoi, ka wehea e rāua te whenua hei haerenga mō rāua; haere ana a Āhapa, tōna kotahi i tētahi ara, haere ana a Opāria, tōna kotahi i tētahi ara.
1KI 18:7 Ā, i a Opāria i te ara, nā, ko Irāia kua tūtaki ki a ia; ā, ka mōhio ia ki tērā, ka tāpapa, ka mea, “Ko koe rānei tēnā, e tōku Ariki, e Irāia?”
1KI 18:8 Anō rā ko ia ki a ia, “Ko ahau rā; haere, kōrero atu ki tōu ariki, ‘Ko Irāia tēnei.’ ”
1KI 18:9 Nā, ka mea tērā, “He aha rā tōku hara i hoatu ai tāu pononga ki te ringa o Āhapa kia whakamatea?
1KI 18:10 E ora ana a Ihowā, tōu Atua, kāhore he iwi, he kīngitanga, i kore nei tōku ariki e tono tāngata ki reira ki te rapu i a koe; ā, i tā rātou meatanga mai, ‘Kāhore nei,’ whakaoatitia iho e ia taua kīngitanga, taua iwi rānei, me kāhore rātou i kite i a koe.
1KI 18:11 Nā, kua mea nā koe ināianei, ‘Haere, kōrero atu ki tōu ariki, Ko Irāia tēnei.’
1KI 18:12 “Nā, ākuanei, kei tōku mawehenga atu i a koe, ka kāhakina atu koe e te Wairua o Ihowā ki te wāhi e kore ai ahau e mōhio; ā, i tōku taenga atu ki te whakaatu ki a Āhapa, ā, ka kore ia e kite i a koe, kātahi ahau ka patua e ia; heoi e wehi ana tāu pononga i a Ihowā, nō tōku tamarikitanga ake.
1KI 18:13 Kāhore ianei i kōrerotia ki tōku ariki tāku i mea ai i tā Ietēpere patunga i ngā poropiti a Ihowā, tāku hunanga i ngā poropiti kotahi rau a Ihowā, takirima tekau ngā tāngata ki roto i te ana kotahi, ā, whāngainga ana e ahau ki te taro, ki te wai?
1KI 18:14 Ā, ka mea mai nā koe ināianei, ‘Haere, kōrero atu ki tōu ariki, “Ko Irāia tēnei.” ’ Ka patua hoki ahau e ia.”
1KI 18:15 Anō rā ko Irāia ki a ia, “E ora ana a Ihowā o ngā mano e tū nei ahau i tōna aroaro, ko ā tēnei rā pū ahau puta ai ki a ia.”
1KI 18:16 Heoi, haere ana a Opāria ki te whakatau i a Āhapa, ā, kōrerotia ana ki a ia. Nā, haere ana a Āhapa ki te whakatau i a Irāia.
1KI 18:17 Ā, nō te kitenga o Āhapa i a Irāia, nā, ka mea a Āhapa ki a ia, “Ko koe tēnei, e te kaiwhakararuraru o Īharaira?”
1KI 18:18 Anō rā ko ia, “Kāhore i whakararurarutia e ahau a Īharaira; engari koe me te whare o tōu pāpā i tā koutou whakarerenga nei i ngā whakahau a Ihowā, i a koe ka whai nei i ngā Paara.
1KI 18:19 Nā, tīkina āianei, huihuia mai a Īharaira katoa ki ahau ki Maunga Karamere, me ngā poropiti e whā rau e rima tekau a Paara, me ngā poropiti e whā rau o te Āhera, e kai nā ki te tēpu a Ietēpere.”
1KI 18:20 Heoi, tono tāngata ana a Āhapa puta noa i ngā tama katoa a Īharaira, ā, whakaminea ana aua poropiti ki Maunga Karamere.
1KI 18:21 Nā, ka whakatata a Irāia ki te iwi katoa, ka mea, “Kia pēhea te roa o tō koutou tāhurihuri ki ngā tikanga e rua? Ki te mea ko Ihowā te Atua, me whai ki a ia; ki te mea ia ko Paara, me whai ki a ia.” Nā, kāhore he kupu i whakahokia e te iwi ki a ia.
1KI 18:22 Kātahi ka mea a Irāia ki te iwi, “Ko ahau anake kua mahue nei o ngā poropiti a Ihowā; e whā rau ia e rima tekau tāngata ngā poropiti a Paara.
1KI 18:23 “Nā, me hōmai e rātou ētahi pūru mā mātou, kia rua, mā rātou e whiriwhiri tētahi pūru mā rātou, ka tapatapahi ai, ka whakaeke ai ki runga ki ngā wahie, kaua hoki he ahi e meatia atu. Māku hoki e taka tētahi pūru, e whakatakoto ki runga ki ngā wahie; e kore hoki e meatia atu he ahi.
1KI 18:24 Ā, mā koutou e karanga ki te ingoa o tō koutou atua; māku hoki e karanga ki te ingoa o Ihowā. Nā, ko te Atua e utua ai te karanga ki te ahi, ko ia hei Atua.” Nā, ka whakahoki te iwi katoa, ka mea, “Ka pai tēnā kupu.”
1KI 18:25 Nā, ka mea a Irāia ki ngā poropiti a Paara, “Whiriwhiria tētahi pūru mā koutou, takā; ko tā koutou ki mua, he tokomaha hoki koutou; ka karanga ai ki te ingoa o tō koutou atua; kaua hoki he ahi e meatia atu.”
1KI 18:26 Nā, ka tango rātou i te pūru i hoatu ki a rātou, ā, mahia ana e rātou. Nā, ka karanga ki te ingoa o Paara o te ata iho anō ā taea noatia te poutūmārōtanga; i mea ai, “E Paara utua mai tā mātou karanga.” Otiia kāhore he kupu, kīhai hoki i utua e tētahi. Ā, tūpekepeke ana rātou i te āta i hangā nei.
1KI 18:27 Ā, i te poutūmārōtanga, ka tāwai a Irāia ki a rātou, ka mea, “Karanga, kia nui te reo; he atua hoki ia; kei te pūrākau pea ia, kei tahaki rānei, kei te ara rānei, tēnā rānei kei te moe, ā, me whakaara.”
1KI 18:28 Nā, nui atu tō rātou reo ki te karanga, ka haehae i a rātou ki te māripi, ki te oka, ko tā rātou tikanga hoki ia, ā, tārere noa ngā toto ki runga ki a rātou.
1KI 18:29 Heoi, kua tāwharara te rā, nā, ka poropiti rātou ā tae noa ki te whakaekenga o tō te ahiahi whakahere; otiia kāhore he reo, kīhai i utua te karanga, kāhore tētahi hei whakarongo.
1KI 18:30 Nā, ka mea a Irāia ki te iwi katoa, “Neke mai ki ahau.” Nā, neke ana te iwi katoa ki a ia, Nā, ka whakatikaia e ia te āta a Ihowā i turakina.
1KI 18:31 I mau hoki a Irāia ki ngā kōhatu kotahi tekau mā rua; rite tonu te maha ki ngā iwi o ngā tama a Hākopa, ki a ia nei te kupu a Ihowā, i kī nei, “Ko Īharaira hei ingoa mōu.”
1KI 18:32 Nā, hangā ana e ia aua kōhatu hei āta mō te ingoa o Ihowā; ā, keria ana he awa ki te taha o te āta ā taka noa, kia rua ngā mēhua purapura ka kī.
1KI 18:33 Nā, whakapaia ana e ia ngā wahie, ā, tapatapahia ana te pūru, whakatakotoria ana ki runga ki ngā wahie. Ā, ka mea ia, “Whakakīia ētahi oko, kia whā, ki te wai, ka riringi ki runga ki te tahunga tinana, ki ngā wahie.”
1KI 18:34 I mea anō ia, “Tēnā anō.” Nā, meatia anō e rātou. I mea hoki ia, “Tuatorutia.” Nā, ka tuatorutia e rātou.
1KI 18:35 Nā, ka rere te wai i ngā taha o te āta tawhio noa; whakakīia ana hoki e ia te waikeri ki te wai.
1KI 18:36 Nā, i te whakaekenga o tō te ahiahi whakahere, ka whakatata a Irāia poropiti, ā, ka mea: “E Ihowā, e te Atua o Āperahama, o Īhaka, o Īharaira, kia mōhiotia i tēnei rā ko koe te Atua i roto i a Īharaira, ko ahau tāu pononga, ā, nāu te kupu i mea ai ahau ēnei mea katoa.
1KI 18:37 Whakarongo mai ki ahau, e Ihowā, whakarongo mai ki ahau, kia mōhio ai tēnei iwi ko te Atua koe, e Ihowā, nāu anō i whakahoki ō rātou ngākau ki muri nei.”
1KI 18:38 Nā, ko te tino takanga iho o te ahi a Ihowā, pau ake te tahunga tinana, me ngā wahie, me ngā kōhatu, me te puehu, mitikia ake ana anō hoki te wai i roto i te waikeri.
1KI 18:39 Ā, nō te kitenga o te iwi katoa, tāpapa ana, me te kī ake anō, “Ko Ihowā, ko ia te Atua; ko Ihowā, ko ia te Atua.”
1KI 18:40 Kātahi ka mea a Irāia ki a rātou, “Hopukia ngā poropiti a Paara; kei mawhiti tētahi o rātou.” Nā, hopukia ana e rātou, ā, kawea ana e Irāia ki raro, ki te awa, ki Kihona, patua iho ki reira.
1KI 18:41 Nā, ka mea a Irāia ki a Āhapa, “Haere ki runga, ki te kai, ki te inu; he haruru ua hoki te rarā mai nei.”
1KI 18:42 Heoi, haere ana a Āhapa ki te kai, ki te inu. Ko Irāia ia i piki ki te tihi o Karamere; ā, tāpapa ana ia ki te whenua, ko tōna mata i roto i ōna turi.
1KI 18:43 Nā, ka mea ia ki tāna tangata, “Tēnā, piki atu ināianei, tirohia te ritenga atu o te moana.” Nā, piki ana ia, titiro ana, ā, ka mea, “Kāhore kau he mea.” Nā, ka mea anō tērā, “Hoki atu anō, kia whitu ngā hokinga.”
1KI 18:44 Ā, i te whitu ka mea ia, “Nanā, he kapua nohinohi tērā te haere ake rā i roto i te moana; kei te kapu o te ringa tangata te rite.” Nā, ka mea tērā, “Haere, mea atu ki a Āhapa, ‘Whakanohoia tōu hāriata, ka haere ki raro; kei āraia koe e te ua.’ ”
1KI 18:45 Nā, mea rawa ake kua pōuri pū te rangi i te kapua, i te hau, nui atu hoki te ua. Nā, rere ana tērā a Āhapa i runga i te hāriata, ā, haere ana ki Ietereere.
1KI 18:46 Ā, i runga i a Irāia te ringa o Ihowā; nā, whītikiria ana e ia tōna hope, ā, rere ana i mua i a Āhapa ā tae noa ki Ietereere.
1KI 19:1 Nā, ka kōrerotia e Āhapa ki a Ietēpere ngā mea katoa i mea ai a Irāia, me ngā meatanga katoa i tāna whakamatenga i ngā poropiti katoa ki te hoari.
1KI 19:2 Kātahi a Ietēpere ka tono tangata ki a Irāia hei kī atu, “Kia meatia tēnei ki ahau e ngā atua, me ētahi atu mea, ki te kāhore ahau e mea i a koe i tēnei takiwā āpōpō kia rite te mate ki tētahi o rātou i mate rā.”
1KI 19:3 Ā, ka kite ia, nā whakatika ana, haere ana, he mea kei mate, ā, ka tae ki Peerehepa o Hūrā. Nā, ka whakarērea e ia tāna tangata ki reira.
1KI 19:4 Ko ia ia haere ki te koraha, kotahi te rā ki te ara, ā, ka tae, ka noho i raro i tētahi hunipa; ā, ka īnoi ia mōna kia mate ia; ā, ka mea, “Heoi rā, ināianei, e Ihowā, tangohia atu tōku wairua; kāhore hoki ahau i pai ake i ōku mātua.”
1KI 19:5 Nā, ka takoto ia, ka moe i raro i tētahi hunipa. Nā, ko tētahi anahera e papaki ana i a ia, e mea ana ki a ia, “Maranga ki te kai.”
1KI 19:6 Nā, titiro rawa ake ia, ko tētahi keke, he mea tunu ki te pungarehu, me tētahi ipu wai i tōna urunga. Nā, kai ana ia, inu ana, ā, takoto iho ana anō.
1KI 19:7 Nā, ka hoki mai anō te anahera a Ihowā, ā, ka papaki i a ia, ka mea, “Maranga ki te kai; he roa rawa hoki te ara mōu, e kore e taea e koe.”
1KI 19:8 Nā, maranga ana ia, ā, kai ana, inu ana, ā, haere ana, me te mau anō te mana o taua kai, e whā tekau ngā rā, e whā tekau ngā pō ā tae noa ki Horepa, ki te maunga o te Atua.
1KI 19:9 Nā, haere ana ia ki reira ki tētahi ana, ā, moe ana i reira. Nā, ka puta mai te kupu a Ihowā ki a ia; i mea ia: “E aha ana koe i konei, e Irāia?”
1KI 19:10 Ā, ka mea tērā, “Nui atu tōku hae mō Ihowā, mō te Atua o ngā mano; kua whakarērea hoki tāu kawenata e ngā tama a Īharaira, ā, ko āu āta, wāhia iho e rātou, patua iho hoki e rātou āu poropiti ki te hoari. Ā, ko ahau, ko ahau rawa anake i mahue; ā, kei te rapu rātou i ahau kia whakamatea.”
1KI 19:11 Nā, ka mea ia, “Puta mai, ka tū ki te maunga ki te aroaro o Ihowā.” Nā, ko te haerenga atu o Ihowā, he nui anō te hau, he kaha, e whakakōara ana i ngā maunga, e wāhi ana i ngā kōhatu i te aroaro o Ihowā. Otiia, kāhore a Ihowā i roto i te hau; ā muri iho i te hau ko te rū; otiia kāhore a Ihowā i roto i te rū.
1KI 19:12 Ā, i muri o te rū ko te ahi; otiia kāhore a Ihowā i roto i te ahi; ā, i muri i te ahi ko te reo ngāwari, he mea iti.
1KI 19:13 Ā, nō te rongonga o Irāia ka hīpokina e ia tōna mata ki tōna koroka, ā, haere ana, tū ana i te kūwaha o te ana. Nā, ko te putanga mai o tētahi reo ki a ia, ka mea, “E aha ana koe i konei, e Irāia?”
1KI 19:14 Anō rā ko tērā, “Nui atu tōku hae mō Ihowā, mō te Atua o ngā mano; kua whakarērea hoki tāu kawenata e ngā tama a Īharaira, ko āu āta, wāhia iho e rātou, patua iho e rātou āu poropiti ki te hoari. Ā, ko ahau, ko ahau rawa anake i mahue; ā, kei te rapu rātou i ahau kia whakamatea.”
1KI 19:15 Nā, ka mea a Ihowā ki a ia, “Haere, e hoki i tōu ara ki te koraha o Ramahiku, ā, ka tae koe, whakawahia a Hataere hei kīngi mō Hīria.
1KI 19:16 Ā, whakawahia a Iehu tama a Nimihi hei kīngi mō Īharaira; me whakawahi anō a Eriha tama a Hāpata o Āperemehora hei poropiti i muri i a koe.
1KI 19:17 Nā, ko te hunga e mawhiti i te hoari a Hataere mā Iehu e whakamate; ko te hunga e mawhiti i te hoari a Iehu mā Eriha e whakamate.
1KI 19:18 Otiia ka whakatoea e ahau māku e whitu ngā mano i roto i a Īharaira, ko ngā turi katoa kīhai anō i tūturi ki a Paara, me ngā māngai katoa kīhai i kihi i a ia.”
1KI 19:19 Heoi, haere atu ana ia i reira, ā, ka tūpono ki a Eriha tama a Hāpata, e parau ana ia, me ngā kau i ngā ioka kotahi tekau mā rua i tōna aroaro, ko ia i te tekau mā rua. Nā, haere ana a Irāia i tōna taha, ā, makā ana e ia tōna koroka ki runga ki a ia.
1KI 19:20 Nā, whakarērea ake e tērā ngā kau, ā, rere ana ki te whai i a Irāia, ā, ka mea, “Tukua ahau kia kihi i tōku pāpā, i tōku whaea, ka haere ai ki te whai i a koe.” Anō rā ko tērā ki a ia, “Haere, e hoki; i aha hoki ahau ki a koe?”
1KI 19:21 Nā, hoki ana tērā i te whai i a ia, ā, ka mau ki ngā kau o tētahi ioka, patua iho, kōhuatia iho ō rāua kikokiko ki ngā mea o ngā kau, hoatu ana e ia te kikokiko ki ngā tāngata, ā, kainga ana e rātou. Nā, whakatika ana ia, haere ana ki te whai i a Irāia, ā, mahi ana ki a ia.
1KI 20:1 Nā, ka huihuia tāna ope katoa e Pēneharara kīngi o Hīria; e toru tekau mā rua ngā kīngi ōna hoa, me ngā hōiho, me ngā hāriata; nā, haere ana ia, ā, whakapaea ana a Hamaria, tauria ana e ia.
1KI 20:2 Nā, ka tonoa ētahi karere e ia ki a Āhapa kīngi o Īharaira, ki te pā, ā, ka mea ki a ia, “Ko te kupu tēnei a Pēneharara:
1KI 20:3 ‘Ko tāu hiriwa, ko tāu kōura, nāku ēnā; me āu wāhine, me āu tamariki, ngā mea papai, nāku ēnā.’ ”
1KI 20:4 Nā, ka whakahoki te kīngi o Īharaira, ka mea, “Rite tonu ki tāu i mea nā, e tōku ariki, e te kīngi; nāu ahau me āku mea katoa.”
1KI 20:5 Nā, ka hoki ngā karere, ka mea, “Ko te kupu tēnei a Pēneharara, e kī ana: I tono tāngata anō ahau ki a koe hei mea atu, ‘Me hōmai e koe tāu hiriwa, tāu kōura, āu wāhine, me āu tamariki.’
1KI 20:6 Nā, kia pēnei āpōpō ka tonoa atu e ahau āku tāngata ki a koe, ki te rapu i roto i tōu whare, i ngā whare anō o āu tāngata. Nā, ko ngā mea katoa e minaminatia ana e ōu kanohi, tērā e tangohia mai i ō rātou ringa, ka maua mai.”
1KI 20:7 Kātahi te kīngi o Īharaira ka karanga ki ngā kaumātua katoa o te whenua, ā, ka mea, “Kia āta whakaaro koutou, kia kite kei te rapu tēnei tangata i te kino; i tono tāngata mai hoki ia ki ahau mō āku wāhine, mō āku tamariki, mō tāku hiriwa, ā, mō tāku kōura; ā, kīhai i kaiponuhia e ahau ki a ia.”
1KI 20:8 Nā, ka mea ngā kaumātua katoa, rātou ko te iwi katoa ki a ia, “Kaua e whakarongo, kaua e whakaae.”
1KI 20:9 Kātahi ia ka mea ki ngā karere a Pēneharara, “Mea atu ki tōku ariki, ki te kīngi, ‘Ko ngā mea katoa i tono mai ai koe ki tāu pononga i te tuatahi, ka meatia e ahau; ko tēnei mea ia e kore e taea e ahau te mea.’ ” Nā, haere ana ngā karere ki te whakahoki i te kupu.
1KI 20:10 Nā, ka tono tāngata anō a Pēneharara, ka mea: “Kia meatia mai tēnei e ngā atua ki ahau, me ērā atu mea, ki te rato i te puehu o Hamaria ngā ringa o te hunga katoa e whai ana i ahau.”
1KI 20:11 Nā, ka whakahoki te kīngi o Īharaira, ka mea, “Kī atu ki a ia: ‘Kaua te tangata e whītiki ana i tōna pukupuku, e whakamanamana, e pērā me te tangata e wewete ana.’ ”
1KI 20:12 I te rongonga o Pēneharara i tēnei kupu, i a ia e inu ana, rātou ko ngā kīngi i roto i ngā tēneti, ka mea ia ki āna tāngata: “Whakatikaia ā koutou ngohi!” Nā, whakatikaia ana ā rātou ngohi hei whawhai ki te pā.
1KI 20:13 Nā, ka whakatata mai tētahi poropiti ki a Āhapa kīngi o Īharaira, ka mea, “Ko tā Ihowā kupu tēnei, ‘Ka kite koe i tēnei ope nui katoa? Nanā, ka hoatu rātou e ahau āianei ki tōu ringa, ā, ka mōhio koe ko Ihowā ahau.’ ”
1KI 20:14 Ā, ka mea a Āhapa, “Mā wai?” Anō rā ko tērā, “Ko tā Ihowā kupu tēnei: ‘Mā ngā taitama o ngā rangatira o ngā kāwanatanga.’ ” Ā, ka mea ia, “Mā wai e tīmata te whawhai?” Ā, ka mea tērā, “Māu.”
1KI 20:15 Nā, ka whakaemia e ia ngā taitama a ngā rangatira o ngā kāwanatanga, e rua rau e toru tekau mā rua rātou. I muri i a rātou i whakaemia anō e ia te iwi katoa, arā ngā tama katoa a Īharaira, e whitu mano.
1KI 20:16 Nā, puta ana rātou i te poutūmārōtanga. Ko Pēneharara ia i te inu i roto i ngā tēneti, ā, haurangi iho, a ia me ngā kīngi, arā ko ngā kīngi e toru tekau mā rua, ōna whakauru.
1KI 20:17 Nā, ka puta tuatahi ko ngā taitama a ngā rangatira o ngā kāwanatanga. Nā, ka tono tāngata a Pēneharara; ā, ka kōrero rātou ki a ia, ka mea, “He tāngata ēnei kua puta mai i Hamaria.”
1KI 20:18 Anō rā ko tērā, “Ki te mea he hohou rongo i puta mai ai rātou, hopukia oratia; ki te mea anō he whawhai i puta mai ai, hopukia oratia.”
1KI 20:19 Heoi, puta ana ēnei ki waho o te pā, ngā taitamariki o ngā kāwanatanga, me te ope i muri i a rātou.
1KI 20:20 Nā, patua ana e rātou tāna tangata, tāna tangata; ā, rere ana ngā Hīriani, whāia ana e Īharaira; ko Pēneharara ia kīngi o Hīria, i mawhiti i runga i te hōiho, rātou ko ngā kaieke hōiho.
1KI 20:21 Nā, ka puta te kīngi o Īharaira, ā, patua iho ngā hōiho me ngā hāriata; heoi patua ana ngā Hīriani, nui atu te parekura.
1KI 20:22 Nā, ka haere te poropiti ki te kīngi o Īharaira, ā, ka mea ki a ia, “Haere ki te whakakaha i a koe; kia mōhio hoki, kia mahara ki tāu e mea ai; ka taka hoki te tau, ka whakaekea koe e te kīngi o Hīria.”
1KI 20:23 Nā, ka mea ngā tāngata a te kīngi o Hīria ki a ia, “He atua maunga ō rātou atua; koia rātou i kaha ai i a tātou; kia whawhai ia tātou ki a rātou i te mānia, ka kaha tātou i a rātou.
1KI 20:24 Nā, ko tēnei tāu e mea ai: whakawāteatia atu ngā kīngi, tēnei, tēnei i tōna wāhi; ā, whakaritea ētahi rangatira hei whakakapi mō rātou.
1KI 20:25 Nā, taua tētahi ope, kia rite ki tēnei āu kua hinga nei, he hōiho, he hōiho, he hāriata, he hāriata, ā, ka whawhai tātou ki a rātou ki te mānia; tērā tātou e kaha i a rātou.” Nā, rongo tonu ia ki tō rātou reo, ā, pērātia ana e ia.
1KI 20:26 Nā, i te takanga o te tau, ka whakaemia e Pēneharara ngā Hīriani, ā, haere ana ki Apeke ki te whawhai ki a Īharaira.
1KI 20:27 Nā, ka taua anō ngā tama a Īharaira, ā, ka whai kai, ā, ka haere ki te tū i a rātou. Ā, noho ana ngā tama a Īharaira i tō rātou ritenga atu, koia anō kei ngā kāhui iti e rua o ngā kūao koati; ko ngā Hīriani ia, kapi ana te whenua i a rātou.
1KI 20:28 Nā, ka haere te tangata a te Atua, ā, ka kōrero ki te kīngi o Īharaira, ka mea, “Ko te kupu tēnei a Ihowā: Kua mea nei ngā Hīriani, ‘He atua maunga a Ihowā, ehara ia i te atua raorao,’ nā, ka hoatu e ahau tēnei ope nui katoa ki tōu ringa, ā, ka mōhio koutou ko Ihowā ahau.”
1KI 20:29 Nā, noho ana rātou, tētahi, tētahi, anga atu, anga mai, e whitu ngā rā; ā, i te whitu o ngā rā ka pipiri ki te whawhai. Nā, patua iho o ngā Hīriani e ngā tama a Īharaira kotahi rau mano i taua rā kotahi.
1KI 20:30 Ko ngā mōrehu ia i rere ki Apeke, ki roto ki te pā; ā, horo iho ana te taiepa ki runga ki ngā mano e rua tekau mā whitu o ngā mōrehu; ko Pēneharara ia i rere, ā, haere ana ki roto ki te pā ki tētahi rūma i roto rawa.
1KI 20:31 Nā, ka mea āna tāngata ki a ia, “Nanā, kua rongo mātou he kīngi tohu tāngata ngā kīngi o te whare o Īharaira; tēnā, kia makā iho e mātou he kākahu taratara ki ō mātou hope, me ētahi taura ki ō mātou mātenga, ā, kia haere atu ki te kīngi o Īharaira; tērā pea koe e whakaorangia e ia.”
1KI 20:32 Heoi, whītikiria ana e rātou he kākahu taratara ki ō rātou hope, he taura hoki ki ō rātou mātenga; ā, ka haere ki te kīngi o Īharaira, ka mea: “E mea ana tāu pononga a Pēneharara: ‘Tēnā rā, kia ora ahau.’ ” Ā, ka mea tērā, “Kei te ora anō rānei ia? Ko tōku tuakana ia.”
1KI 20:33 Nā, i āta whakarongo aua tāngata ki tāna, ā, hohoro tonu te hopu i tōna whakaaro, ā, ka mea, “Ko tōu tuakana rā, a Pēneharara.” Anō rā ko ia, “Haere koutou, tīkina atu ia.” Heoi, ka puta mai a Pēneharara ki a ia, ā, ka mea tērā kia eke ia ki te hāriata.
1KI 20:34 Nā, ka mea a Pēneharara ki a ia, “Ko ngā pā i tangohia e tōku pāpā i tōu pāpā me whakahoki atu e ahau; ā, māu e hanga ētahi huanui māu ki Ramahiku kia rite ki a tōku pāpā i hanga ai ki Hamaria.” Anō rā ko Āhapa, “Me tuku koe e ahau i runga i tēnei kawenata.” Nā, whakaritea ana he kawenata e rāua, ā, tukua ana ia.
1KI 20:35 Nā, ka mea tētahi tangata o ngā tama a ngā poropiti ki tōna hoa, he mea ki nā Ihowā, “Tēnā, patua ahau.” Heoi, kīhai taua tangata i pai ki te patu i a ia.
1KI 20:36 Kātahi ka mea tērā ki a ia, “I te mea kīhai koe i whakarongo ki te reo o Ihowā, nā, mawehe atu ana koe i konei, ka patua koe e te raiona.” Ā, nō te haerenga atu i tōna taha, ka tūtaki tētahi raiona ki a ia, patua iho.
1KI 20:37 Kātahi ka tūtaki ia ki tētahi atu tangata, ā, ka mea, “Tēnā, patua ahau.” Nā, ka patu taua tangata i a ia, he patu i motu ai.
1KI 20:38 Heoi, haere ana taua poropiti, ā, tū ana i te ara, he whanga i te kīngi; i whakaahua kē hoki i a ia, ko tōna tīpare ki tōna mata.
1KI 20:39 Ā, i te kīngi e haere ana, ka karanga ia ki te kīngi, ka mea, “I haere tāu pononga ki waenganui o te whawhai; nā, ko te pekanga mai o tētahi tangata, kawea mai ana e ia tētahi tangata ki ahau, ka mea, ‘Tiakina tēnei tangata; ki te mea ka riro ia, ko koe ka mate hei ritenga mō tōna matenga; me utu rānei e koe kia kotahi taranata hiriwa.’
1KI 20:40 Ā, i tāu pononga e mea noa ana i tēnei mea, i tērā mea, kua riro tērā.” Nā, ka mea te kīngi o Īharaira ki a ia, “Me pēnā te tikanga mōu; kua tika mai nā i a koe.”
1KI 20:41 Nā, hohoro tonu te tango a tērā i te tīpare i ōna kanohi, ā, ka mōhio te kīngi o Īharaira ki a ia ko tētahi o ngā poropiti.
1KI 20:42 Nā, ka mea tērā ki a ia, “Ko te kupu tēnei a Ihowā: ‘Kua tukua atu nei i roto i tōu ringa tāku tangata i tukua pūtia atu nei e ahau ki te mate; nā, ko tōu matenga hei ritenga mō tōna matenga, me tōu iwi hei utu mō tōna iwi.’ ”
1KI 20:43 Nā, pōuri ana, riri ana, te kīngi o Īharaira, ā, haere ana ki tōna whare; tae tonu atu ki Hamaria.
1KI 21:1 Ā, i muri i ēnei mea, he māra wāina tā Napoto Ietereeri i Ietereere, i te taha tonu o te whare o Āhapa kīngi o Hamaria.
1KI 21:2 Nā, ka kōrero a Āhapa ki a Napoto, ka mea, “Hōmai tāu māra wāina ki ahau, hei kāri otaota māku, e tata ana hoki ki te taha o tōku whare, ā, me hoatu e ahau tētahi māra wāina, he pai kē atu i tēnei hei utu; ki te pai rānei ki tāu titiro, me utu ki te moni.”
1KI 21:3 Nā, ka mea a Napoto ki a Āhapa, “E! Mā Ihowā ahau e ārai kei hoatu e ahau te kāinga tupu o ōku mātua ki a koe!”
1KI 21:4 Nā, haere ana a Āhapa ki tōna whare; pōuri ana, riri ana, mō te kupu i kōrero ai a Napoto Ietereeri ki a ia; mō tāna i mea rā, “E kore e hoatu, e ahau te kāinga tupu o ōku mātua ki a koe.” Nā, takoto ana ia ki tōna moenga, me te ahu kē anō tōna mata, kīhai hoki i kai taro.
1KI 21:5 Kātahi tāna wahine, a Ietēpere, ka haere mai ki a ia, ka mea ki a ia, “He aha tōu wairua i pōuri ai, tē kai taro ai koe?”
1KI 21:6 Nā, ka mea tērā ki a ia, “I kōrero ahau ki a Napoto Ietereeri, i mea ki a ia, ‘Hōmai tāu māra wāina ki ahau, me utu ki te moni; ki te pai rānei koe, me hoatu e ahau tētahi atu māra ki a koe hei utu.’ Nā, ka mea mai ia, ‘E kore e hoatu e ahau tāku māra wāina ki a koe.’ ”
1KI 21:7 Nā, ka kī atu a Ietēpere, tāna wahine, ki a ia, “Ko koe rānei te kaiwhakahaere o te kīngitanga o Īharaira? Whakatika ki te kai taro māu, kia koa tōu ngākau. Māku e hoatu te māra wāina a taua Ietereeri, a Napoto, ki a koe.”
1KI 21:8 Heoi, tuhituhia ana ētahi pukapuka e ia, nō Āhapa te ingoa, hīri rawa ki tāna hīri; ā, tukua ana aua pukapuka ki ngā kaumātua, ki ngā rangatira i roto i tōna pā, ā, e noho tahi ana me Napoto.
1KI 21:9 I tuhituhi ia ki te pukapuka, i mea: “Karangatia he nohopuku, ka whakanoho i a Napoto ki runga ake i te iwi.
1KI 21:10 Ka whakanoho anō i ētahi tāngata, he tama nā Periara, kia tokorua, ki tōna aroaro, hei whakaatu i tōna hē, hei kī, ‘Nāu i kanga te Atua rāua ko te kīngi.’ Kātahi ka kawe i a ia ki waho, ka āki ki te kōhatu, kia mate.”
1KI 21:11 Nā, ka meatia e ngā tāngata o tōna pā, arā, e ngā kaumātua rātou ko ngā rangatira e noho ana i tōna pā, te mea i tono tāngata ai a Ietēpere ki a rātou, te mea i tuhituhia ki ngā pukapuka i tukua nei e ia ki a rātou.
1KI 21:12 I karangatia he nohopuku, ā, whakanohoia ana a Napoto ki runga ake i te iwi.
1KI 21:13 Nā, ka haere mai ngā tāngata tokorua, ngā tama a Periara, ka noho i tōna aroaro; ā, ka whakaatu aua tāngata a Periara i te hē mōna, arā mō Napoto i te aroaro o te iwi; i mea rāua, “I kangā e Napoto te Atua rāua ko te kīngi.” Nā, kawea ana ia e rātou ki waho o te pā, ā, ākina ana ki te kōhatu, ā, mate noa ia.
1KI 21:14 Kātahi rātou ka tono tāngata ki a Ietēpere, ka mea: “Kua oti a Napoto te āki ki te kōhatu, ā, kua mate.”
1KI 21:15 Ā, i te rongonga o Ietēpere kua oti a Napoto te āki ki te kōhatu, ā, kua mate, nā, ka mea a Ietēpere ki a Āhapa, “Whakatika, tangohia te māra a taua Ietereeri, a Napoto, kīhai nā ia i pai kia hōmai ki a koe hei utu moni; kāhore hoki a Napoto i te ora, kua mate.”
1KI 21:16 Ā, ka rongo a Āhapa kua mate a Napoto, nā, whakatika ana a Āhapa, haere ana ki raro, ki te māra wāina a taua Ietereeri, a Napoto, kia tangohia e ia.
1KI 21:17 Nā, ka puta te kupu a Ihowā ki a Irāia Tihipi; i kī ia:
1KI 21:18 “Whakatika, haere ki raro, ki te whakatau i a Āhapa kīngi o Īharaira i Hamaria; kei te māra wāina ia a Napoto, kua riro hoki ki reira ki te tango.
1KI 21:19 Kōrero ki a ia, mea atu, ‘Ko te kupu tēnei a Ihowā: Kua patu iana koe? Kua riro anō i a koe?’ Kī atu anō ki a ia, mea atu, ‘Ko te kupu tēnei a Ihowā: Ko te wāhi i mitikia ai e ngā kurī ngā toto o Napoto, ka mitikia anō e ngā kurī ki reira ōu toto, āe rā, ōu anō.’ ”
1KI 21:20 Nā, ka mea a Āhapa ki a Irāia, “Kua mau ahau i a koe, e tōku hoariri?” Anō rā ko tērā, “Kua mau anō, nō te mea kua hoko koe i a koe ki te mahi i te kino ki te aroaro o Ihowā.
1KI 21:21 ‘Nanā, tēnei ahau te tari kino atu nei ki runga ki a koe, ā, ka tahia atu ōu uri; ka hautopea atu ngā tamariki tāne katoa i a Āhapa, me ngā mea i tūtakina ki roto, me ngā mea i mahue i roto i a Īharaira.
1KI 21:22 Ka meinga anō e ahau tōu whare kia rite ki te whare o Ieropoama tama a Nēpata, ki te whare o Paaha tama a Āhia mō te whakapātaritari i whakapātaritari ai koe i ahau, mōu i hara ai a Īharaira.’
1KI 21:23 “I kōrerotia anō a Ietēpere e Ihowā, i mea ia: ‘Ka kainga a Ietēpere e ngā kurī ki te parepare o Ietereere.’
1KI 21:24 “Ko te hunga o Āhapa e mate ki te pā mā ngā kurī e kai; ko ngā mea hoki e mate ki te pārae mā ngā manu o te rangi e kai.”
1KI 21:25 (Heoi, kāhore he rite mō Āhapa, i hoko nei i a ia ki te mahi kino ki te aroaro o Ihowā; he mea akiaki nā tāna wahine, nā Ietēpere.
1KI 21:26 Whakarihariha rawa tāna haere ki te whai i ngā whakapakoko; rite tonu tāna ki ngā mea katoa i mea ai ngā Amori i peia nei e Ihowā i te aroaro o ngā tama a Īharaira.)
1KI 21:27 Ā, nō te rongonga o Āhapa i ēnei kupu, nā, haea ana e ia ōna kākahu, meatia ana he kākahu taratara ki tōna kiri, ā, nohopuku ana, takoto ana ko taua mea taratara nei te kākahu, ā, māhaki ana te haere.
1KI 21:28 Nā, ka puta te kupu a Ihowā ki a Irāia Tihipi, i mea ia:
1KI 21:29 “Kua kite koe i tā Āhapa whakangohengohe nei i a ia ki tōku aroaro, nā, e kore e taria e ahau tēnei kino i ōna rā; engari hei ngā rā o tāna tama ahau tari ai i te kino ki tōna whare.”
1KI 22:1 Nā, e toru ō rātou tau e noho ana, ā, kāhore he whawhai a Hīria ki a Īharaira.
1KI 22:2 Nā, i te toru o ngā tau ka haere iho a Iehohāpata kīngi o Hūrā ki raro, ki te kīngi o Īharaira.
1KI 22:3 Nā, ka mea te kīngi o Īharaira ki āna tāngata, “E mōhio ana rānei koutou nō tātou Rāmoto Kireara, ā, e āta noho nei tātou, kāhore e tangohia e tātou i te ringa o te kīngi o Hīria?”
1KI 22:4 Nā, ka mea ia ki a Iehohāpata, “Ka haere rānei koe, tāua ki Rāmoto Kireara ki te whawhai?” Anō rā ko Iehohāpata ki te kīngi o Īharaira, “Ko ahau, ko koe, tāua tāua; ko tōku iwi, ko tōu iwi, rātou rātou; ko ōku hōiho, ko ōu hōiho, rite tonu.”
1KI 22:5 I mea anō a Iehohāpata ki te kīngi o Īharaira, “Tēnā, rapua āianei tētahi kupu i a Ihowā.”
1KI 22:6 Kātahi ka huihuia ngā poropiti e te kīngi o Īharaira, e whā rau aua tāngata. Nā, ka mea ia ki a rātou, “Me haere rānei ahau ki Rāmoto Kireara ki te whawhai, kauaka rānei?” Anō rā ko rātou; “Haere; mā te Ariki hoki e hōmai ki te ringa o te kīngi.”
1KI 22:7 Nā, ka mea a Iehohāpata, “Kāhore rānei tētahi atu i konei, tētahi poropiti a Ihowā, hei rapunga atu mā tātou?”
1KI 22:8 Anō rā ko te kīngi o Īharaira ki a Iehohāpata, “Tēnei anō tētahi, ko Mikaia tama a Imirā hei rapunga atu mā tātou i tā Ihowā. Otiia, e kino ana ahau ki a ia; kāhore hoki āna poropiti pai mōku; engari he kino.” Nā, ka mea a Iehohāpata, “Kaua e pēnā te kupu a te kīngi.”
1KI 22:9 Kātahi te kīngi o Īharaira ka karanga ki tētahi rangatira, ka mea, “Kia hohoro te tiki atu i a Mikaia tama a Imirā.”
1KI 22:10 Nā, ka noho te kīngi o Īharaira rāua ko Iehohāpata kīngi o Hūrā, tēnā i runga i tōna torōna, tēnā i runga i tōna torōna, rākai rawa ki ō rāua kākahu, i te wāhi takoto kau i te tomokanga ki te kūwaha o Hamaria; me te poropiti anō ngā poropiti katoa i tō rāua aroaro.
1KI 22:11 Nā, ka meatia e Terekia tama a Kenāna ētahi haona rino māna, ā, ka mea ia, “Ko te kupu tēnei a Ihowā: ‘Ka panā ngā Hīriani e koe ki ēnei ā poto noa.’ ”
1KI 22:12 Ā, pērā tonu te poropiti a ngā poropiti katoa, i mea rātou, “Haere ki Rāmoto Kireara, kia taea hoki tāu; kua hōmai hoki e Ihowā ki te ringa o te kīngi.”
1KI 22:13 Ā, i kōrero te karere i haere ki te karanga i a Mikaia, i mea ki a ia, “Nanā, ko ngā kupu a ngā poropiti ki te kīngi kotahi tonu te māngai mō te pai. Nā, kia rite tāu kupu ki tā tētahi o rātou, kia pai āu kōrero.”
1KI 22:14 Nā, ka mea a Mikaia, “E ora ana a Ihowā, inā, ko tā Ihowā e kōrero mai ai ki ahau, ko tāku tēnā e kōrero ai.”
1KI 22:15 Ā, nō tōna taenga ki te kīngi, ka mea te kīngi ki a ia, “E Mikaia, me haere rānei mātou ki Rāmoto Kireara ki te whawhai, kaua rānei?” Anō rā ko tērā ki a ia, “Haere, kia taea hoki tāu; kua hoatu hoki e Ihowā ki te ringa o te kīngi.”
1KI 22:16 Nā, ka mea te kīngi ki a ia, “Kia hia ianei āku whakaoati i a koe kia kāti āu e kōrero mai ai ki ahau, ko te mea pono anake, i runga i te ingoa o Ihowā?”
1KI 22:17 Nā, ka kī tērā, “I kite ahau i a Īharaira katoa e marara noa ana i runga i ngā maunga, koia anō kei ngā hipi kāhore nei ō rātou kaitiaki, ā, i mea a Ihowā, ‘Kāhore o ēnei ariki; kia hoki mārie tērā, tērā, ki ō rātou whare.’ ”
1KI 22:18 Nā, ka mea te kīngi o Īharaira ki a Iehohāpata, “Kāhore ianei ahau i kī atu ki a koe, e kore e pai tāna poropiti mōku; engari he kino?”
1KI 22:19 Nā, ka kī tērā, “Mō reira whakarongo mai ki te kupu a Ihowā; i kite ahau i a Ihowā e noho ana i runga i tōna torōna, i te mano katoa anō o te rangi e tū ana i tōna taha ki matau, i tōna taha ki mauī.
1KI 22:20 Nā, ka mea a Ihowā, ‘Ko wai hei whakapati i a Āhapa kia haere ai, kia hinga ai ki Rāmoto Kireara?’ “Nā, puta kē tā tēnei kupu, puta kē tā tēnei kupu.
1KI 22:21 Nā, ka puta tētahi wairua, ka tū ki te aroaro o Ihowā, ka mea, ‘Māku ia e whakapati.’
1KI 22:22 “Ā, ka mea a Ihowā ki a ia, ‘Me pēhea?’ “Anō rā ko tērā, ‘Me haere ahau, ā, hei wairua teka ahau i roto i ngā māngai o āna poropiti katoa.’ “Nā, ka mea ia, ‘Māu ia e whakapati, ka taea anō e koe; haere, meatia tāu nā.’
1KI 22:23 “Nā, kua hoatu ināianei e Ihowā he wairua teka ki te māngai o ēnei poropiti katoa āu, ā, kua kino tā Ihowā kōrero mōu.”
1KI 22:24 Nā, ka whakatata a Terekia tama a Kenāna, ka papaki i te pāpāringa o Mikaia, ka mea, “I nā hea te haerenga atu o te Wairua o Ihowā i ahau ki a koe kōrero ai?”
1KI 22:25 Anō rā ko Mikaia, “Tērā koe e kite i te rā e haere ai koe ki tētahi rūma i roto rawa piri ai.”
1KI 22:26 Nā, ka mea te kīngi o Īharaira, “Kawea atu a Mikaia, whakahokia ki a Amono rangatira o te pā, ki a Ioaha tama a te kīngi;
1KI 22:27 kī atu hoki, ‘Ko te kupu tēnei a te kīngi: Hoatu tēnei ki te whare herehere, whāngaia ki te taro o te tangihanga, ki te wai o te tangihanga, kia hoki mai rā anō ahau i runga i te rangimārie.’ ”
1KI 22:28 Anō rā ko Mikaia, “Ki te hoki mai koe i runga i te rangimārie, ehara ahau i te kaiwhakapuaki i a Ihowā kōrero.” I mea anō ia, “Whakarongo, e ngā iwi, e koutou katoa!”
1KI 22:29 Heoi, haere ana te kīngi o Īharaira rāua ko Iehohāpata kīngi o Hūrā ki runga, ki Rāmoto Kireara.
1KI 22:30 Nā, ka mea te kīngi o Īharaira ki a Iehohāpata, “Me whakaputa kē tōku āhua, ka haere ki te whawhai; ko koe ia kākahuria ōu kākahu.” Nā, whakaputa kē ana te kīngi o Īharaira i tōna āhua, ā, haere ana ki te whawhai.
1KI 22:31 Nā, kua oti i te kīngi o Hīria te whakahau āna rangatira e toru tekau mā rua, ngā kaiwhakahaere o ana hāriata, kua mea, “Kaua e whawhai ki te iti, ki te rahi; engari ki te kīngi anake o Īharaira.”
1KI 22:32 Ā, nō te kitenga o ngā rangatira o ngā hāriata i o Iehohāpata, ka mea rātou, “Koia anō tēnei te kīngi o Īharaira.” Nā, peka ana rātou ki a ia ki te whawhai ki a ia. Nā, ko te hāmamatanga o Iehohāpata;
1KI 22:33 ā, i te kitenga o ngā rangatira o ngā hāriata ehara ia i te kīngi o Īharaira, hoki ana rātou i te whai i a ia.
1KI 22:34 Nā, ka kūmea te kōpere e tētahi tangata, he mea noa iho, tū tonu te kīngi o Īharaira i waenga pū o te hononga iho o te pukupuku. Nā, ka mea ia ki te kaiarataki o tana hāriata, “Tahuri tōu ringa; kawea atu ahau i roto i te ope; kua tū hoki ahau, he tū kino.”
1KI 22:35 Nā, ka rahi haere te whawhai i taua rā; ā, he mea pupuri ake te kīngi i runga i te hāriata kia tū tonu atu ai ia ki ngā Hīriani; ā, i te ahiahi ka mate; nā, rere ana ngā toto o te tūnga ki te riu o te hāriata.
1KI 22:36 Nā, ka pā te karanga puta noa i te ope i te mea ka tō te rā; ko te kupu tēnei, “Ki tōna pā, ki tōna whenua, e tērā tangata, e tērā tangata!”
1KI 22:37 Heoi, ka mate te kīngi, ā, ka kawea ki Hamaria, tanumia iho e rātou te kīngi ki Hamaria.
1KI 22:38 Ā, i horoia te hāriata ki te poka wai i Hamaria; ā, mitikia ana ōna toto e ngā kurī; nā, he wāhi horoinga tērā nō ngā wāhine kairau; ko tā Ihowā ia i kōrero ai.
1KI 22:39 Nā, ko ērā atu mahi a Āhapa me ngā mea katoa i mea ai ia, me te whare rei i hangā e ia, me ngā pā katoa i hangā e ia, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Īharaira?
1KI 22:40 Nā, moe ana a Āhapa ki ōna mātua, ā, ko tāna tama, ko Ahatia, te kīngi i muri i a ia.
1KI 22:41 Nō te whā o ngā tau o Āhapa kīngi o Īharaira i kīngi ai a Iehohāpata tama a Aha ki a Hūrā.
1KI 22:42 E toru tekau mā rima ngā tau o Iehohāpata i tōna kīngitanga, ā, e rua tekau mā rima ngā tau i kīngi ai ia ki Hiruhārama; ko te ingoa hoki o tōna whaea, ko Atupa, he tamāhine nā Hirihi.
1KI 22:43 Ā, i haere ia i ngā ara katoa o tōna pāpā, o Aha; kīhai i peka kē; i mahi ia i te mea e tika ana ki tā Ihowā titiro. Otiia, kīhai ngā wāhi tiketike i whakakāhoretia; i patu whakahere anō te iwi, i tahu whakakakara ki ngā wāhi tiketike.
1KI 22:44 Ā, i houhia te rongo e Iehohāpata ki te kīngi o Īharaira.
1KI 22:45 Nā, ko ērā atu meatanga a Iehohāpata me āna mahi toa, me āna whawhaitanga, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Hūrā?
1KI 22:46 I whakamōtītia atu anō e ia i te whenua ērā atu o te hunga whakahoroma i mahue nei i ngā rā o tōna pāpā, o Aha.
1KI 22:47 Nā, i taua wā kāhore o Ēroma kīngi; he kāwana te kīngi.
1KI 22:48 Ā, i hangā ētahi kaipuke o Tarahihi e Iehohāpata hei tiki kōura ki Ōpira. Otiia kīhai i rere; i pakaru hoki ngā kaipuke ki Ehiono Kēpere.
1KI 22:49 Kātahi a Ahatia tama a Āhapa ka mea ki a Iehohāpata, “Kia eke tahi āku tāngata me āu tāngata ki runga ki ngā kaipuke.” Otiia kīhai a Iehohāpata i pai.
1KI 22:50 Nā, ka moe a Iehohāpata ki ōna mātua, ā, tanumia ana ki ōna mātua ki te pā o tōna tupuna, o Rāwiri; ā, ko tāna tama, ko Iehorama te kīngi i muri i a ia.
1KI 22:51 Nō te tekau mā whitu o ngā tau o Iehohāpata kīngi o Hūrā i kīngi ai a Ahatia tama a Āhapa ki a Īharaira i Hamaria; ā, e rua ngā tau i kīngi ai ia ki a Īharaira.
1KI 22:52 Ā, i kino tāna mahi ki te aroaro o Ihowā, i haere hoki i te ara o tōna pāpā, i te ara o tōna whaea, i te ara anō o Ieropoama tama a Nēpata, i hara ai a Īharaira.
1KI 22:53 I mahi hoki ki a Paara, i koropiko ki a ia; i whakapātaritari i a Ihowā, i te Atua o Īharaira; rite tonu tāna ki ngā mea katoa i mea ai tōna pāpā.
2KI 1:1 Nā, i muri i te matenga o Āhapa ka whakakeke a Moapa ki a Īharaira.
2KI 1:2 Nā, ka taka iho a Ahatia i te taiepa rīpekapeka i tōna rūma i runga, i Hamaria, ā, ka takoto mate. Nā, ka tono tāngata ia, ka mea ki a rātou, “Tīkina, uia ki a Paara-Hepupa atua o Ekerono, e ora rānei ahau i tēnei mate.”
2KI 1:3 Otiia i mea te anahera a Ihowā ki a Irāia Tihipi, “Whakatika, haere ki runga, ki te whakatau i ngā tāngata a te kīngi o Hamaria, mea atu ki a rātou, ‘He kore Atua ianei nō Īharaira i haere ai koutou ki te ui ki a Paara-Hepupa atua o Ekerono?’
2KI 1:4 Nō reira ko te kupu tēnei a Ihowā, ‘Ko te moenga i pikitia nā e koe, e kore koe e heke iho i reira, engari ko te mate kau mōu.’ ” Nā, haere ana a Irāia.
2KI 1:5 Nā, i te hokinga atu o ngā tāngata ki a ia, ka mea ia ki a rātou, “He aha koutou i hoki mai ai?”
2KI 1:6 Nā, ka mea rātou ki a ia, “I haere mai tētahi tangata ki te whakatau i a mātou, ā, ka mea ki a mātou, ‘Haere, hoki atu ki te kīngi i tonoa mai ai koutou, mea atu ki a ia: “Ko te kupu tēnei a Ihowā: He kore Atua nō Īharaira i tono tāngata ai koe ki te ui ki a Paara-Hepupa atua o Ekerono? Nā, ko te moenga i pikitia nā e koe, e kore koe e heke iho i reira; engari ko te mate kau mōu.” ’ ”
2KI 1:7 Nā, ka mea ia ki a rātou, “Tēnā koa te āhua o taua tangata i haere mai nā ki te whakatau i a koutou i kōrero nā i aua kupu ki a koutou?”
2KI 1:8 Nā, ka mea rātou ki a ia, “He tangata pūhuruhuru, he whītiki hiako te whītiki o tōna hope.” Nā, ka mea ia, “Ko Irāia Tihipi tēnā.”
2KI 1:9 Kātahi ia ka unga i tētahi rangatira rima tekau me tāna rima tekau. Nā, haere ana ia ki a ia; nā, i te tihi tērā o te maunga e noho ana. Ā, ka mea ia ki a ia, “E te tangata a te Atua, i mea mai te kīngi, ‘Heke iho!’ ”
2KI 1:10 Nā, ka whakahoki a Irāia, ka mea ki te rangatira rima tekau, “Ki te mea he tangata ahau nā te Atua, kia heke iho he ahi i te rangi hei kai i a koutou ko tāu rima tekau.” Nā, heke iho ana he ahi i te rangi, pau ake ia me tāna rima tekau.
2KI 1:11 Nā, ka ungā anō e ia tētahi atu rangatira rima tekau me tāna rima tekau. Ā, ka oho tērā, ka mea atu ki a ia, “E te tangata a te Atua, ko te kupu tēnei a te kīngi, ‘Hohoro te heke iho!’ ”
2KI 1:12 Nā, ka whakahoki a Irāia, ka mea ki a rātou, “Ki te mea he tangata ahau nā te Atua, kia heke iho he ahi i te rangi hei kai i a koutou ko tāu rima tekau.” Ko te hekenga iho o te ahi a te Atua i te rangi, pau ake ia me tāna rima tekau.
2KI 1:13 Nā, ka ungā anō e ia, ka tuatorutia, he rangatira rima tekau me tāna rima tekau. Nā, haere ana te tuatoru o ngā rangatira rima tekau, ka tae, ka tuku i ngā turi ki raro, ki te aroaro o Irāia, ka tangi ki a ia, ka mea ki a ia, “E te tangata a te Atua, kia nui ki tōu whakaaro tōku wairua me ngā wairua o ēnei pononga e rima tekau āu.
2KI 1:14 Nanā, i heke iho he ahi i te rangi, ā, pau ake ngā rangatira tokorua o ngā rima tekau ō mua ake nei me ā rāua rima tekau; nā, kia nui tōku wairua ki tōu whakaaro.”
2KI 1:15 Nā, ka mea te anahera a Ihowā ki a Irāia, “Heke atu kōrua, kaua e wehi i a ia.” Nā, whakatika ana ia, heke tahi ana rāua ki te kīngi.
2KI 1:16 Nā, ka mea tērā ki a ia, “Ko te kupu tēnei a Ihowā: Nā kua unga tāngata nā koe ki te ui ki a Paara-Hepupa atua o Ekerono, he kore Atua ianei nō Īharaira hei uinga māu i tāna kupu? Nā reira, e kore koe e heke iho i te moenga i pikitia nā e koe, engari ko te mate kau mōu.”
2KI 1:17 Heoi mate iho ia, i rite tonu ki te kupu a Ihowā i kōrerotia e Irāia. Ā, ko Iehorama te kīngi i muri i a ia, i te rua o ngā tau o Iehorama tama a Iehohāpata kīngi o Hūrā; kāhore hoki āna tama.
2KI 1:18 Nā, ko ērā atu mahi a Ahatia i mea ai ia, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Īharaira?
2KI 2:1 Nā, i te meatanga a Ihowā kia tangohia atu a Irāia ki te rangi i roto i te tūkauati, ka haere atu a Irāia rāua ko Eriha i Kirikara.
2KI 2:2 Nā, ka mea atu a Irāia ki a Eriha, “Hei konei koe noho ai, kua ungā hoki ahau e Ihowā ki Pētēre.” Anō rā ko Eriha, “E ora ana a Ihowā, e ora ana hoki tōu wairua, e kore ahau e whakarere i a koe.” Heoi, haere tahi ana rāua ki raro, ki Pētēre.
2KI 2:3 Nā, ka puta mai ngā tama a ngā poropiti i Pētēre ki a Eriha, ā, ka mea ki a ia, “E mōhio ana rānei koe ko āianei tangohia ai e Ihowā tōu ariki i runga i tōu upoko?” Anō rā ko ia, “E mōhio ana anō ahau; whakarongoa.”
2KI 2:4 Nā, ka mea a Irāia ki a ia, “E Eriha, hei konei koe noho ai; kua ungā hoki ahau e Ihowā ki Heriko.” Anō rā ko tērā, “E ora ana a Ihowā, e ora ana hoki tōu wairua, e kore ahau e whakarere i a koe.” Heoi, haere ana rāua ki Heriko.
2KI 2:5 Nā, ka whakatata mai ngā tama a ngā poropiti i Heriko ki a Eriha, ā, ka mea ki a ia, “E mōhio ana rānei koe ko āianei tangohia ai e Ihowā tōu ariki i runga i tōu upoko?” Anō rā ko ia, “E mōhio ana anō ahau; whakarongoa.”
2KI 2:6 Nā, ka mea a Irāia ki a ia, “Hei konei koe noho ai; kua ungā hoki ahau e Ihowā ki Horano.” Anō rā ko tērā, “E ora ana a Ihowā, e ora ana anō hoki tōu wairua, e kore ahau e whakarere i a koe.” Nā, haere ana rāua tokorua.
2KI 2:7 Nā, ka haere ētahi tāngata e rima tekau, he tama nā ngā poropiti, ā, tū atu ana i tawhiti; me te tū anō rāua tokorua i te taha o Horano.
2KI 2:8 Nā, ka mau a Irāia ki tōna koroka, whakakopaia ana e ia, patua ana ki ngā wai, ā, ka wehea ki tētahi taha, ki tētahi taha, ā, whiti ana rāua i te wāhi maroke.
2KI 2:9 Ā, nō tō rāua whitinga, ka mea a Irāia ki a Eriha, “Tonoa mai, ko te aha e meatia e ahau māu i ahau kīanō kia wehea noatia i a koe.” Anō rā ko Eriha, “Kia rereruatia mai ki ahau te wāhi wairua i a koe nā.”
2KI 2:10 Nā, ka mea tērā, “He mea pakeke tāu i tono mai nā; he ahakoa rā, ki te kite koe i ahau e tangohia atu ana i a koe, ka rite ki tāu nā; ki te kāhore, ka kore e pēnā.”
2KI 2:11 Nā, i a rāua e haere ana, me te kōrero haere, ka puta mai tētahi hāriata ahi me ngā hōiho ahi, ā, wehea ana rāua tokorua; ā, kake ana a Irāia i roto i te tūkauati ki te rangi.
2KI 2:12 Ā, ka kite a Eriha, ka karanga ia, “E tōku pāpā, e tōku pāpā, e ngā hāriata o Īharaira, e ōna kaieke hōiho!” Ā, kīhai ia i kite i a ia i muri. Nā, ka mau ia ki ōna kākahu ake, ā, haea iho kia rua ngā wāhi.
2KI 2:13 I tangohia ake hoki e ia te koroka o Irāia i marere i runga i a ia, ā, hoki ana, tū ana i te pareparenga o Horano.
2KI 2:14 Nā, ka mau ia ki te koroka o Irāia i marere nei i runga i a ia, ā, patua iho ki ngā wai, me te kī anō, “Kei hea rā a Ihowā, te Atua o Irāia?” Nā, ka patua e ia ngā wai, wehe ana ki tētahi taha, ki tētahi taha; ā, whiti ana a Eriha.
2KI 2:15 Ā, nō te kitenga o ngā tama a ngā poropiti, o ērā o Heriko i te ritenga mai ki a ia, ka mea rātou, “Kua tau te wairua o Irāia ki runga ki a Eriha.” Nā, haere ana mai rātou ki te whakatau i a ia, piko ana ki tōna aroaro ki te whenua.
2KI 2:16 Nā, ka mea rātou ki a ia, “Nanā, tēnei ētahi tāngata e rima tekau kei āu pononga, he mārohirohi; tukua rātou kia haere ki te rapu i tōu ariki; kei tūpono kua kāhakina atu ia e te Wairua o Ihowā, kua makā ki runga ki tētahi maunga, ki roto rānei ki tētahi awaawa.” Nā, ka mea ia, “Kaua e ungā.”
2KI 2:17 Ā, i tā rātou tohenga ā whakamā noa ia, ka kī atu ia, “Ungā.” Nā, ungā ana e rātou e rima tekau ngā tāngata; ā, e toru ngā rā i rapu ai rātou, heoi kīhai kitea.
2KI 2:18 Nā, hoki ana rātou ki a ia, (i Heriko hoki ia e noho ana); ā, ka mea ia ki a rātou, “Kīhai ianei ahau i kī atu ki a koutou, Kaua e haere?”
2KI 2:19 Nā, ka mea ngā tāngata o te pā ki a Eriha, “Nanā, he pai te tūranga o tēnei pā, e kite nei hoki tōku ariki; engari ko te wai he kino, ā, ko te whenua he whakatahe.”
2KI 2:20 Nā, ka mea ia, “Maua mai he oko hou ki ahau, ka mea he tote ki roto.” Nā, ka kawea mai e rātou ki a ia.
2KI 2:21 Nā, haere ana ia ki te mātāpuna o te wai, ā, makā ana te tote ki roto, me te kī anō, “Ko te kupu tēnei a Ihowā: ‘Kua ora tēnei wai i ahau; heoi anō o konei mate, o konei whakatahe.’ ”
2KI 2:22 Nā, ora tonu ake taua wai ā mohoa noa nei, pērā tonu me tā Eriha kupu i kōrero ai.
2KI 2:23 Nā, ka haere atu ia i reira ki Pētēre; ā, i a ia e haere ana i te ara, ka puta mai ētahi tamariki ririki i te pā, ka taunu ki a ia, ka mea, “Pākira, haere ki runga; pākira, haere ki runga.”
2KI 2:24 Nā, ka tahuri ake ia, ka titiro ki a rātou, ā, kangā iho rātou i runga i te ingoa o Ihowā. Nā, ko te putanga mai o ngā pea uha e rua i te ngahere, ā, haehaea ana ētahi o rātou, e whā tekau mā rua ngā tamariki.
2KI 2:25 Nā, haere atu ana ia i reira ki Maunga Karamere, ā, hoki ana i reira ki Hamaria.
2KI 3:1 Nā, i tīmata a Iehorama tama a Āhapa hei kīngi mō Īharaira i Hamaria i te tekau mā waru o ngā tau o Iehohāpata kīngi o Hūrā, ā, kotahi tekau mā rua ngā tau i kīngi ai ia.
2KI 3:2 Ā, i mahi kino ia i te aroaro o Ihowā; otiia kīhai i rite ki tā tōna pāpā, ki tā tōna whaea; i whakakāhoretia hoki e ia te pou o Paara i hangā e tōna pāpā.
2KI 3:3 Heoi, i piri ia ki ngā hara o Ieropoama tama a Nēpata i hara ai a Īharaira; kīhai ērā i whakarērea e ia.
2KI 3:4 Nā, he kaitiaki hipi a Meha kīngi o Moapa; ā, ko tāna takoha ki te kīngi o Īharaira, ko ngā huruhuru o ngā reme kotahi rau mano, o ngā hipi toa kotahi rau mano.
2KI 3:5 I te matenga ia o Āhapa, ka whakakeke te kīngi o Moapa ki te kīngi o Īharaira.
2KI 3:6 Nā, haere atu ana a Kīngi Iehorama i taua wā i Hamaria, ā, taua ana e ia a Īharaira katoa.
2KI 3:7 Nā, haere ana ia, ā, unga tāngata ana ki a Iehohāpata kīngi o Hūrā, hei kī atu: “Kua whakakeke te kīngi o Moapa ki ahau; tērā rānei koe e haere i ahau ki te whawhai ki a Moapa?” Nā, ka mea tērā, “Ka haere ahau; he rite tonu ahau ki a koe, tōku iwi ki tōu iwi, āku hōiho ki āu hōiho.”
2KI 3:8 I mea anō ia, “Mā tēhea ara tāua?” Ā, ka mea tērā, “Mā te ara i te koraha o Ēroma.”
2KI 3:9 Heoi, haere ana te kīngi o Īharaira, me te kīngi o Hūrā, me te kīngi o Ēroma; ā, i haere taiāwhio rātou, e whitu ngā rā. Nā, kāhore he wai mō te ope, mō ngā kararehe rānei e whai ana i a rātou.
2KI 3:10 Nā, ka mea te kīngi o Īharaira, “Auē, kua karangatia nei e Ihowā ēnei kīngi tokotoru kia hoatu ki te ringa o Moapa!”
2KI 3:11 Nā, ka mea a Iehohāpata, “Kāhore ianei i konei tētahi poropiti a Ihowā hei uinga mā tātou i tā Ihowā?” Nā, ka whakahoki tētahi o ngā tāngata a te kīngi o Īharaira, ka mea, “Kei konei a Eriha tama a Hāpata, nāna rā i riringi te wai ki ngā ringa o Irāia.”
2KI 3:12 Nā, ka mea a Iehohāpata, “Kei a ia te kupu a Ihowā.” Nā, haere ana te kīngi o Īharaira rātou ko Iehohāpata, ko te kīngi o Ēroma ki a ia.
2KI 3:13 Nā, ka mea a Eriha ki te kīngi o Īharaira, “He aha tāku ki a koe? Haere ki ngā poropiti a tōu pāpā, ki ngā poropiti a tōu whaea.” Ā, ka mea te kīngi o Īharaira ki a ia, “Kāti rā; kua karangatia hoki ēnei kīngi e toru e Ihowā kia hoatu ki te ringa o Moapa.”
2KI 3:14 Anō rā ko Eriha, “E ora ana a Ihowā o ngā mano e tū nei ahau ki tōna aroaro, inā, me i kāhore tōku whakaaro ki te mata o Iehohāpata kīngi o Hūrā, e kore ahau e titiro ki a koe, e kore anō e kite i a koe.
2KI 3:15 Otirā, tīkina atu ki ahau āianei tētahi kaiwhakatangi hāpa.” Ā, i te whakatangihanga a te kaiwhakatangi, nā, kua tae mai ki a ia te ringa o Ihowā.
2KI 3:16 Nā, ka mea ia, “Ko te kupu tēnei a Ihowā, ‘Meinga tēnei raorao kia kapi i te waikeri.’
2KI 3:17 Ko te kupu hoki tēnei a Ihowā, ‘E kore koutou e kite i te hau, e kore e kite i te ua, otirā ka kī tēnei raorao i te wai; ā, ka inu koutou, ā, koutou kāhui, me ā koutou kararehe.’
2KI 3:18 Nā, he mea iti noa tēnei ki tā Ihowā titiro; ka hōmai anō hoki e ia ngā Moapi ki tō koutou ringa.
2KI 3:19 Ā, ka patua e koutou ngā pā taiepa katoa, me ngā pā pai katoa, ka tuaina hoki ngā rākau pai katoa, ka tanumia ngā poka wai katoa, ā, ko ngā māra pai hoki ka takakinotia ki te kōhatu.”
2KI 3:20 Nā, i te ata, i te tāpaenga o te whakahere totokore, he wai te puta ana i te ara o Ēroma, ā, kapi ana te whenua i te wai.
2KI 3:21 Ā, nō te rongonga o ngā Moapi katoa kua tae ake aua kīngi ki te whawhai ki a rātou, ka huihui rātou, ngā mea e āhei te whītiki, me te hunga i kaumātua ake, ā, tū ana i te rohe.
2KI 3:22 Ā, ka maranga wawe rātou i te ata ka whiti te rā ki runga ki te wai, ā, ka kite ngā Moapi i te wai i te ritenga atu ki a rātou, ura tonu me he toto.
2KI 3:23 Ā, ka mea rātou, “He toto tēnei; koia rawa anō kua tukitukia ngā kīngi kua patua rātou e rātou anō. Hoatu āianei, e Moapa, ki te muru taonga!”
2KI 3:24 Nā, i tō rātou taenga ki te puni o Īharaira, ko te whakatikanga o Īharaira, patua iho ngā Moapi, ā, rere ana rātou i tō rātou aroaro. Nā, haere tonu rātou ki roto ki te whenua me te patu haere i ngā Moapi.
2KI 3:25 Nā, tukitukia ana e rātou ngā pā; makā ana e rātou tāna kōhatu, tāna kōhatu, ki ngā wāhi pai katoa ā kapi noa. Tanumia ana ngā puna wai katoa; tuaina ana hoki ngā rākau pai katoa; kei Kiriharehete rawa anake ka waiho e rātou ō reira kōhatu; otiia, i taiāwhiotia tērā e ngā kaipiu kōhatu, patua iho.
2KI 3:26 Ā, nō te kitenga o te kīngi o Moapa, kua pakeke rawa te whawhai māna, ka mau ia ki ētahi tāngata e whitu rau, he hunga unu hoari, hei hoa mōna, hei wāhi atu ki te kīngi o Ēroma. Otiia, kīhai i taea.
2KI 3:27 Kātahi ia ka mau ki tāna mātāmua, ko ia nei hei kīngi i muri i a ia, ā, tāpaea ana hei whakahere ki runga ki te taiepa. Ā, nui atu te mōrikarika ki a Īharaira; nā, ka mahue ia i a rātou, ā, hoki ana ki tō rātou whenua.
2KI 4:1 Nā, i tangi tētahi o ngā wāhine a ngā tama a ngā poropiti ki a Eriha, i mea, “Kua mate tāu pononga, tāku tahu; ā, e mōhio ana koe i wehi tāu pononga i a Ihowā. Nā, kua tae mai te kaiwhakatārewa moni ki te tango i āku tama tokorua hei pononga māna.”
2KI 4:2 Nā, ka mea a Eriha ki a ia, “Ko te aha kia meatia e ahau māu? Whakaaturia mai; he aha tāu i roto i te whare?” Anō rā ko tērā, “Kāhore he mea a tāu pononga i roto i te whare, heoti rawa he pāta hinu.”
2KI 4:3 Kātahi ia ka mea, “Haere, tonoa ētahi oko māu i waho, i ōu hoa tata katoa, hei ngā oko tahanga; kei torutoru.
2KI 4:4 Ā, ka haere koe ki roto, ka tūtaki i te tatau ki a koutou ko āu tama, ā, ka riringi ki aua oko katoa; ā, me waiho ake i rahaki te mea kua kī.”
2KI 4:5 Nā, haere ana ia, ā, tūtakina ana te tatau ki a rātou ko āna tama; ā, kawea ana mai ngā oko ki a ia, ā, ko ia hei riringi ki roto.
2KI 4:6 Ā, ka kī ngā oko, ka mea atu ia ki tāna tama, “Mauria mai anō he oko ki ahau.” Ā, ka mea tērā ki a ia, “Kāhore atu he oko.” Nā, mutu ake te hinu.
2KI 4:7 Kātahi ia ka haere, ka kōrero ki te tangata a te Atua. Anō rā ko tērā, “Haere, hokona taua hinu, ka utu i tāu moni tārewa, ā, ko te toenga hei oranga mō koutou ko āu tama.”
2KI 4:8 Nā, i tētahi rā ka haere a Eriha ki Huneme, i reira hoki tētahi wahine nui; ā, tohea ana e tērā kia kai taro ia. Nā reira, i ōna haerenga katoa atu mā reira, peka ai ia ki reira ki te kai taro.
2KI 4:9 Nā, ka mea tērā ki tāna tahu, “Nanā, e mōhio ana ahau he tangata tapu nā te Atua tēnei e kōpikopiko nei mā tō tāua wāhi.
2KI 4:10 Me hanga e tātou tētahi rūma nohinohi ki runga i te taiepa; ā, me whakapai he moenga mōna ki reira, he tēpu, he nohoanga, he tūranga rama; mō tōna haere mai ki a tātou, nā, ka peka ki reira.”
2KI 4:11 Nā, i tētahi rā ka tae mai ia ki reira, ā, peka ana ki taua rūma, takoto ana ki reira.
2KI 4:12 Nā, ka mea ia ki tāna tangata, ki a Kehati, “Karangatia te Hunami nei.” Nā, karangatia ana e ia, ā, tū ana tērā ki tōna aroaro.
2KI 4:13 Nā, ka mea ia ki te tangata, “Mea atu ki a ia, ‘Nanā, nāu katoa ēnei whakaaro i whakaaro mai ki a māua; ko te aha kia meatia māu? E mea ana rānei koe kia kōrerotia koe ki te kīngi, ki te rangatira ope rānei?’ ” Anō rā ko tērā, “Kei waenganui nei ahau i tōku iwi e noho ana.”
2KI 4:14 Nā, ka mea ia, “Ko te aha rā kia meatia māna?” Anō rā ko Kehati, “Hore rawa āna tama, he koroheke anō hoki tāna tahu.”
2KI 4:15 Nā, ka mea ake ia, “Karangatia ia.” Nā, karangatia ana ia e ia, ā, tū ana tērā i te kūwaha.
2KI 4:16 Nā, ka mea ia, “Kei tēnei wā, kia taka mai anō te wā, ka awhi koe i te tama.” Anō rā ko tērā, “Kaua, e tōku ariki, e te tangata a te Atua, kaua e teka ki tāu pononga wahine.”
2KI 4:17 Ā, ka hapū te wahine rā, ā, ka whānau he tama i taua wā, i te takanga mai anō, i tā Eriha i kōrero ai ki a ia.
2KI 4:18 Ā, ka kaumātua te tamaiti, i tētahi rā ka haere ia ki tōna pāpā ki ngā kaikotikoti.
2KI 4:19 Nā, ka mea ia ki tōna pāpā, “Tōku mātenga, tōku mātenga!” Nā, ka mea tērā ki tētahi taitama, “Kawea ki tōna whaea.”
2KI 4:20 Ā, nō tāna mauranga i a ia, ā, ka tae ki tōna whaea, ka noho ia i runga i ōna turi, ā, poutūmārō noa te rā; kātahi ka mate.
2KI 4:21 Nā, haere ana ia ki runga, whakatakotoria ana ia ki te moenga o te tangata a te Atua, ā, tūtakina ana tērā e ia ki roto, puta ana ki waho.
2KI 4:22 Nā, ka karanga ia ki tāna tahu, ka mea, “Tēnā, ungā mai tētahi o ngā taitama nā ki ahau, me tētahi o ngā kāihe, kia rere ai ahau ki te tangata a te Atua, ka hoki mai ai.”
2KI 4:23 Anō rā ko tērā, “He aha koe i haere ai ki a ia ināianei? Ehara nei hoki i te kōwhititanga marama, i te hāpati rānei.” Ka mea ia, “He pai.”
2KI 4:24 Kātahi ka whakanohoia e ia te kāihe, ā, ka mea ki tāna tangata, “Ārahina atu, haere tonu; kaua e whakangāwaritia tāu rere mōku, kia mea atu rā anō ahau ki a koe.”
2KI 4:25 Nā, haere ana ia, ā, ka tae ki te tangata a te Atua, ki Maunga Karamere. Ā, nō te kitenga atu o te tangata a te Atua i a ia i tawhiti, ka mea ia ki tāna tangata ki a Kehati, “Nanā, ko te Hunami rā.
2KI 4:26 Nā, rere atu ki te whakatau i a ia. Ka mea ki a ia, ‘Kei te pai rānei koe? Kei te pai tāu tahu? Kei te pai rānei te tamaiti?’ ” Anō rā ko ia, “Kei te pai.”
2KI 4:27 Ā, nō tōna taenga ki te tangata a te Atua, ki te puke, hopukia ana e ia ōna waewae. Nā, ka haere a Kehati ki te pana i a ia. Otiia ka mea te tangata a te Atua, “Waiho rā, e mamae ana hoki tōna ngākau; i hunā hoki tēnei e Ihowā i ahau, kīhai i whakaaturia ki ahau.”
2KI 4:28 Kātahi ka mea tērā, “I tonoa rānei e ahau tētahi tama i tōku ariki? Kīhai ianei ahau i mea, ‘Kaua ahau e tinihangatia’?”
2KI 4:29 Kātahi ia ka mea ki a Kehati, “Whītikiria tōu hope, maua atu hoki tāku tokotoko i tōu ringa, ā, haere. Ki te tūtaki koe ki te tangata, kaua e owha ki a ia; ki te owha tētahi ki a koe, kaua e whakahoki kupu ki a ia; ā, whakatakotoria tāku tokotoko ki te mata o te tamaiti.”
2KI 4:30 Nā, ka mea te whaea o te tamaiti, “E ora ana a Ihowā, e ora ana hoki tōu wairua, e kore ahau e whakarere i a koe.” Nā, whakatika ana ia, haere ana, i muri i te wahine.
2KI 4:31 Nā, ko Kehati kua pahemo i mua i a rāua, ā, whakatakotoria ana e ia te tokotoko ki te mata o te tamaiti; otiia kāhore he reo, kāhore hoki he ohonga ake. Heoi, hoki ana ia ki te whakatau i a ia, ā, ka kōrero ki a ia, ka mea, “Kīhai i korikori te tamaiti.”
2KI 4:32 Ā, nō te taenga o Eriha ki te whare, nā, kua mate te tamaiti, e takoto ana i tōna moenga.
2KI 4:33 Heoi, haere ana ia ki roto, tūtakina ana mai te tatau ki ā rāua tokorua, kei te īnoi ki a Ihowā.
2KI 4:34 Nā, piki ana ia ki runga, ā, takoto ana ki runga ki te tamaiti, ā, meatia iho ana tōna māngai ki tō tērā, ōna kanohi ki runga ki o tērā kanohi, ōna ringa ki runga ki o tērā ringa; nā, whārōrō ana ia ki runga ki a ia. Nā, kua mahana haere ngā kiko o te tamaiti.
2KI 4:35 Kātahi ia ka hoki iho, ka haere i roto i te whare, kotahi kōpikotanga; ā, ka piki ki runga, ka whārōrō ki runga ki a ia; nā, kua tihe te tamaiti, e whitu ngā tihetanga, kua titiro ngā kanohi o te tamaiti.
2KI 4:36 Kātahi tērā ka karanga ki a Kehati, ka mea, “Karangatia te Hunami nei. Heoi, karangatia ana e ia.” Nō te taenga mai o tērā ki a ia, ka mea ia, “Tangohia tāu tama.”
2KI 4:37 Kātahi ka haere mai tērā, ka hinga ki ōna waewae, piko ana ki te whenua. Nā, hāpainga ana e ia tāna tama, puta atu ana.
2KI 4:38 Nā, ka tae anō a Eriha ki Kirikara; ā, he matekai i te whenua; ā, i tōna aroaro ngā tama a ngā poropiti e noho ana; ā, ka mea ia ki tāna tangata, “Whakaekea te kōhua nui, kōhuatia he kai mā ngā tama a ngā poropiti.”
2KI 4:39 Nā, ka haere tētahi ki te pārae ki te kohi pūwhā, ka kite i te hue māori, ka kohia e ia he hue māori, kī tonu tōna kākahu; haere ana, katokatohia ana ki roto ki te kōhua, ki ngā mea i kōhuatia rā; kīhai hoki i mōhiotia e rātou.
2KI 4:40 Heoi, ringihia ana e rātou hei kai mā ngā tāngata. Heoi, i a rātou e kai ana i te mea i kōhuatia rā, ka karanga rātou, ka mea, “He mate kei roto i te kōhua, e te tangata a te Atua!” Nā, kīhai i taea te kai.
2KI 4:41 Otiia i mea ia, “Tēnā, kawea mai he parāoa.” Nā, makā ana e ia ki roto ki te kōhua; ā, ka mea ia, “Ringihia mā te hunga nei, kia kai rātou.” Nā, kua kore he hē i roto i te kōhua.
2KI 4:42 Nā, ka tae mai tētahi tangata o Paara-Hariha, ka mauria mai he taro mātāmua mā te tangata a te Atua, e rua tekau ngā taro, he mea pārei, me ētahi hua wīti i roto i tāna kōpaki. Ā, ka mea ia, “Hoatu ki te hunga nei, kia kai rātou.”
2KI 4:43 Anō rā ko tāna tuari, “Ha, me hoatu rānei tēnei e ahau mā ngā tāngata kotahi rau?” Anō rā ko ia, “Hoatu mā te iwi, kia kai rātou; ko tā Ihowā kupu hoki tēnei, ‘Ka kai rātou, ā, toe ake.’ ”
2KI 4:44 Heoi, hoatu ana e ia ki tō rātou aroaro, ā, kainga ana e rātou, ā, toe ake; i rite tonu ki tā Ihowā kupu.
2KI 5:1 Nā, ko Naamana, ko te rangatira ope a te kīngi o Hīria, he tangata nui i te aroaro o tōna ariki, e whakanuia ana hoki, nō te mea i waiho ia e Ihowā hei kaihōmai i te wikitōria ki a Hīria. He tangata mārohirohi anō ia, he toa, otiia he repera.
2KI 5:2 Nā, i haere atu ngā torohē a ngā Hīriani, ā, riro pārau ana mai i a rātou tētahi kōtiro iti i te whenua o Īharaira; nā, ka waiho ia hei mahi ki te wahine a Naamana.
2KI 5:3 Nā, ka mea tērā ki tōna rangatira, “Auē! Me i tata tōku ariki ki te poropiti i Hamaria rā! Kātahi anō he kaiwhakaora mō tōna repera.”
2KI 5:4 Nā, kua haere tētahi, kua kōrero ki tōna ariki, kua mea, “Anei ngā kōrero a te kōtiro o te whenua o Īharaira.”
2KI 5:5 Nā, ka mea te kīngi o Hīria, “Haere mai, haere, me tuku pukapuka ahau ki te kīngi o Īharaira.” Nā, haere ana ia, maua ana hoki i tōna ringa tekau ngā taranata hiriwa, e ono mano ngā hekere kōura, tekau ngā whakarua kākahu.
2KI 5:6 Nā, kawea ana e ia te pukapuka ki te kīngi o Īharaira; ko te kōrero tēnei: “Ka tae atu tēnei pukapuka ki a koe, nā, kua ungā atu e ahau tāku tangata a Naamana ki a koe, kia whakaorangia e koe tōna repera.”
2KI 5:7 Ā, i te kōrerotanga a te kīngi o Īharaira i te pukapuka, ka haea e ia ōna kākahu, ka mea, “He atua ianei ahau hei whakamate, hei whakaora, i tono mai ai tēnei tangata ki ahau kia whakaorangia te repera o te tangata?” Nā, kia mōhio koutou, kia kite, e rapu ana ia he take riri ki ahau.
2KI 5:8 Ā, nō te rongonga o Eriha tangata a te Atua kua haea e te kīngi o Īharaira ōna kākahu, nā, ka unga tāngata ia ki te kīngi hei mea: “He aha i haea ai e koe ōu kākahu? Me haere mai ia ki ahau ināianei, ā, ka mōhio ia he poropiti tēnei kei a Īharaira.”
2KI 5:9 Heoi, haere ana mai a Naamana, me ana hōiho, me ana hāriata, ā, tū ana i te tatau o te whare o Eriha.
2KI 5:10 Nā, ka ungā he tangata e Eriha ki a ia hei mea, “Haere, kia whitu ngā horoinga ki Horano, ā, ka hoki ōu kikokiko ki a koe, ka mā koe.”
2KI 5:11 Otirā, ka riri a Naamana, ka haere, ka mea, “Nanā, i mahara ahau, Tērā ia e puta mai ki ahau, e tū, e karanga ki te ingoa o Ihowā, o tōna Atua, ka whakahaere hoki i tōna ringa ki runga ki te wāhi, ā, ka whakaorangia te repera.
2KI 5:12 Ehara ianei a Apāna, a Pārapara, ngā awa o Ramahiku, i te pai atu i ngā wai katoa o Īharaira? Kaua ianei ahau e horoi ki ērā, kia mā ai ahau?” Heoi, tahuri ana ia, ā, haere riri ana.
2KI 5:13 Nā, ka whakatata mai āna tāngata ka kōrero ki a ia, ka mea, “E tōku pāpā mehemea te poropiti i whai kupu ki a koe kia meatia tētahi mea nui, e kore ianei e meatia e koe? Nā tērā noa ake rānei i a ia ka kī mai ki a koe, ‘Horoi, kia mā ai’?”
2KI 5:14 Kātahi ia ka haere ki raro, ā, ka rukuruku i a ia e whitu ngā rukuhanga ki Horano, pērā me tā te tangata a te Atua i kōrero ai; ā, hoki ana ōna kikokiko, ānō he kikokiko nō te tamaiti nohinohi, ā, kua mā ia.
2KI 5:15 Nā, hoki ana ia ki te tangata a te Atua, a ia me tāna huihui katoa, ā, ka tae, ka tū i mua i a ia; ā, ka mea ia, “Nanā, kātahi ahau ka mōhio, kāhore he Atua i te whenua katoa, kei a Īharaira anake. Nā, tēnā, kia tangohia e koe tētahi manaakitanga a tāu pononga.”
2KI 5:16 Anō rā ko tērā, “E ora ana a Ihowā, kei tōna aroaro nei ahau e tū ana, e kore e tangohia e ahau.” Nā, tohe ana tērā ki a ia kia tangohia; otiia whakakāhore tonu ia.
2KI 5:17 Anō rā ko Naamana, “Ki te kāhore, kāti me hōmai ki tāu pononga he oneone, kia rite ki te kawenga mā ngā muera e rua; e kore hoki tāu pononga e mea i te tahunga tinana, i te patunga tapu rānei ā muri ake mā ētahi atua kē, engari mā Ihowā.
2KI 5:18 Mā Ihowā e whakarere noa te hara o tāu pononga i tēnei mea; arā, ina haere tōku ariki ki te whare o Rimono ki te koropiko i reira, ā, ka whirinaki mai ia ki tōku ringa, ā, ka koropiko ahau i roto i te whare o Rimono. Ka koropiko ahau i roto i te whare o Rimono, me whakarere noa iho e Ihowā te hara o tēnei mea a tāu pononga.”
2KI 5:19 Anō rā ko tērā ki a ia, “Haere mārie.” Nā, mawehe atu ana ia i a ia he wāhi iti nei.
2KI 5:20 Otirā, ka mea a Kehati, te kaimahi a Eriha tangata a te Atua, “Nā, kua āta hanga tōku ariki ki tēnei Naamana Hīriani, kīhai nei i tango i tōna ringa i ngā mea i mauria mai nei e ia; e ora ana a Ihowā, ka oma ahau i muri i a ia, ā, ka tango i tētahi mea i a ia.”
2KI 5:21 Heoi, whai ana a Kehati i a Naamana. Ā, nō te kitenga o Naamana i tētahi e whai ana i muri i a ia, ka marere iho ia i te hāriata ki te whakatau i a ia mea, “He pai rānei?”
2KI 5:22 Anō rā ko tērā, “He pai. Nā tōku ariki ahau i unga mai hei mea, ‘Nā, tēnei ētahi taitamariki tokorua kua tae mai ki ahau ināianei nō te whenua pukepuke o Ēparaima, nō ngā tama a ngā poropiti; hoatu koa mā rāua tētahi taranata hiriwa, kia rua hoki ngā whakarua kākahu.’ ”
2KI 5:23 Nā, ka mea a Naamana, “Whakaae mai, ka tango kia rua taranata.” Nā, tohea ana ia e ia, ā, takaia ana e ia ngā taranata hiriwa e rua ki ngā pēke e rua, me ngā whakarua kākahu e rua, ā, whakawahā ana ki āna tāngata tokorua; ā, nā rāua i mau ki tōna aroaro.
2KI 5:24 Ā, nō tōna taenga ki te puke, ka tangohia mai e ia i ō rāua ringa, ā, whakatakotoria ana ki te whare. Nā, tukua atu ana e ia aua tāngata, ā, haere ana rāua.
2KI 5:25 Otiia haere ana ia ki roto, ā, tū ana i te aroaro o tōna ariki. Nā, ka mea a Eriha ki a ia, “I haere mai koe i hea, e Kehati?” Anō rā ko ia, “Kāhore noa iho tāu pononga i te haere.”
2KI 5:26 Nā, ka mea ia ki a ia, “Kīhai ianei tōku ngākau i haere tahi me koe, i te tahuritanga mai o taua tangata i runga i tōna hāriata ki te whakatau i a koe? He wā ianei tēnei mō te tango moni, mō te tango kākahu, māra ōriwa, māra wāina, hipi, kau, pononga tāne, pononga wāhine rānei?
2KI 5:27 Nā reira ka piri ki a koe te repera o Naamana, ki tōu uri hoki, ā ake ake.” Nā, haere atu ana ia i tōna aroaro, he repera, mā tonu me te hukarere.
2KI 6:1 Nā, ka mea ngā tama a ngā poropiti ki a Eriha, “Nanā, ko te wāhi e noho nei mātou i tōu aroaro he kūiti rawa mō tātou.
2KI 6:2 Tēnā, tukua mātou kia haere ki Horano, ki te tango kurupae mai i reira, tēnei, tēnei o mātou, ka hanga ai i tētahi wāhi i reira hei nohoanga mō tātou.” Ā, ka whakahokia e ia, “Haere koutou.”
2KI 6:3 Nā, ka mea tētahi, “Tēnā, whakaae mai kia haere koe i āu pononga.” Anō rā ko ia, “Ka haere anō ahau.”
2KI 6:4 Heoi, haere ana ia i a rātou. I tō rātou taenga ki Horano, kei te topetope rākau.
2KI 6:5 Otiia i tētahi e tua ana i te rākau, ka marere te pane o te toki ki te wai; nā, ka karanga ia, ka mea, “Auē, e tōku ariki! He toki nā te tangata.”
2KI 6:6 Nā, ka mea te tangata a te Atua, “Tēnā koa te wāhi i marere ai?” Ā, ka whakaaturia e ia ki a ia te wāhi. Nā, tapahia ana e ia tētahi rākau, ā, makā ana ki reira, nā, kua mānu taua rino.
2KI 6:7 Nā, ka mea ia, “Tangohia ki a koe.” Nā, ka totoro tōna ringa, ā tangohia ana e ia.
2KI 6:8 Nā, ka whawhai te kīngi o Hīria ki a Īharaira; ā, ka whakatakoto whakaaro ia ki āna tāngata, ka mea, “Ko te wāhi hei puni mōku, kei mea.”
2KI 6:9 Nā, ka tono tāngata te tangata a te Atua ki te kīngi o Īharaira ki te kī atu: “Kia tūpato kei tika koe nā taua wāhi; kei te haere hoki ngā Hīriani ki raro, ki reira.”
2KI 6:10 Nā, ka unga tāngata te kīngi o Īharaira ki te wāhi i kīia rā e te tangata a te Atua ki a ia, i whakatūpato ai ia i a ia; ā, ka hōnea ia i reira, ehara anō i te tuatahi, i te tuarua rānei.
2KI 6:11 Nā, pōhewa noa iho te ngākau o te kīngi o Hīria i tēnei mea; ā, ka karangatia e ia āna tāngata, ka mea ki a rātou, “E kore ianei koutou e whakaatu ki ahau, ko wai o tātou kei te kīngi o Īharaira?”
2KI 6:12 Ka mea tētahi o āna tāngata, “Kāhore, e tōku ariki, e te kīngi. Engari ko Eriha, ko te poropiti kei roto i a Īharaira, kei te whakaatu ki te kīngi o Īharaira i ngā kupu e kōrero ai koe i tōu whare moenga.”
2KI 6:13 Nā, ka mea ia, “Tīkina, tirohia, kei hea ia, kia ungā ai e ahau he tāngata ki te tiki i a ia.” Ā, ka kōrerotia ki a ia: “Nanā, kei Rōtana.”
2KI 6:14 Nā, tonoa ana e ia ki reira he hōiho, he hāriata, me tētahi ope nui; ā, haere pō ana rātou, karapotia ana te pā.
2KI 6:15 Nā, i te marangatanga o te kaimahi a te tangata a te Atua i te atatū, i te putanga ki waho, nā, he taua e karapoti ana i te pā, me ngā hōiho, me ngā hāriata. Nā, ka mea tāna tangata ki a ia, “Auē, e tōku ariki, me aha tātou?”
2KI 6:16 Anō rā ko ia, “Kaua e wehi; hira ake hoki ō tātou hoa i ō rātou hoa.”
2KI 6:17 Nā, ka īnoi a Eriha, ā, ka mea, “E Ihowā, kia titiro ōna kanohi, kia kite ai ia.” Nā, whakatirohia ana ngā kanohi o taua taitamariki; ā, ka kite ia. Nā, kapi tonu te maunga i te hōiho i te hāriata ahi i ngā taha katoa o Eriha.
2KI 6:18 Nā, i tō rātou haerenga ki raro ki a ia, ka īnoi a Eriha ki a Ihowā, ka mea, “Tēnā rā, patua tēnei iwi kia matapō.” Nā, patua ana rātou e ia kia matapō, pērā tonu ia me tā Eriha i kī ai.
2KI 6:19 Nā, ka mea a Eriha ki a rātou, “Ehara tēnei i te huarahi, ehara hoki tēnei i te pā; whai mai i ahau, ā, māku koutou e ārahi ki tā koutou tangata e rapu nei.” Ā, ārahina ana rātou e ia ki Hamaria.
2KI 6:20 Ā, nō te taenga ki Hamaria, ka mea a Eriha, “E Ihowā, whakatirohia ngā kanohi o ēnei, kia kite ai rātou.” Nā, whakatirohia ana e Ihowā ō rātou kanohi, ā, ka kite rātou; nā, i waenganui pū rātou o Hamaria.
2KI 6:21 Nā, ka mea te kīngi o Īharaira ki a Eriha, i tōna kitenga i a rātou, “Kia patua e ahau, e tōku pāpā? Kia patua e ahau?”
2KI 6:22 Anō rā ko ia, “Kaua e patua e koe. E patua rānei e koe āu i hopu ai ki tāu hoari, ki tāu kōpere? Whakatakotoria he taro, he wai ki ō rātou aroaro, kia kai rātou, kia inu, kia hoki ki tō rātou ariki.”
2KI 6:23 Nā, takā ana e ia he kai mā rātou, he nui; ā, ka kai rātou, ka inu, ka tonoa atu rātou e ia, ā, haere ana rātou ki tō rātou ariki. Nā, heoi anō haerenga mai o ngā taua a ngā Hīriani ki te whenua o Īharaira.
2KI 6:24 Nā, muri iho i tēnei, ka huihuia e Pēneharara kīngi o Hīria tāna ope katoa, ā, haere ana, whakapaea ana a Hamaria.
2KI 6:25 Nā, nui atu te matekai o Hamaria; nā, whakapaea ana a reira e rātou, nāwai ā ka hokona te upoko kāihe mō ngā pīhi hiriwa e waru tekau, te wāhi whā hoki o te kapa paru kūkupa mō ngā pīhi hiriwa e rima.
2KI 6:26 Nā, i te kīngi o Īharaira e haere ana nā runga i te taiepa, ka karanga tētahi wahine ki a ia, ka mea, “Whakaorangia, e te ariki, e te kīngi.”
2KI 6:27 Anō rā ko ia, “Ka kore nei a Ihowā e whakaora i a koe, kei hea he mea māku hei whakaora i a koe? Kei te patunga wīti rānei? Kei te poka wāina rānei?”
2KI 6:28 Ā, ka mea te kīngi ki a ia, “He aha tāu?” Anō rā ko ia, “I mea mai te wahine nei ki ahau, ‘Hōmai tāu tama hei kai mā tāua āianei, ā, hei āpōpō ka kai tāua i tāku tama.’
2KI 6:29 Heoi, kōhuatia ana e māua tāku tama, kainga ana e māua. Nā, i te aonga ake ka mea atu ahau ki a ia, ‘Hōmai tāu tama kia kainga e tāua,’ nā, kua hunā e ia tāna tama.”
2KI 6:30 Nā, i te rongonga o te kīngi i ngā kupu a taua wahine, ka haea e ia ōna kākahu – i runga hoki ia i te taiepa e haere ana; ā, ka titiro te iwi, nā, he kākahu taratara tēnā kei roto, kei tōna kiri –
2KI 6:31 kātahi ia ka mea, “Kia meatia mai tēnei ki ahau e te Atua, me tētahi atu mea, ki te ū te mātenga o Eriha tama a Hāpata ki runga ki a ia āianei!”
2KI 6:32 Otiia i noho a Eriha i roto i tōna whare, ā, i noho tahi rātou ko ngā kaumātua; nā, ka unga tangata te kīngi i tōna aroaro. Otiia kīanō te karere i tae noa ki a ia, ka mea ia ki ngā kaumātua, “Kia kite koutou kua unga tangata mai tēnei tama a te kaikōhuru ki te tango i tōku upoko? Kia mōhio, ina tae mai te karere, tūtakina te tatau, kia ū hoki te pupuri atu i te tatau ki a ia. He teka ianei kei muri i a ia te tapuwae o ngā waewae o tōna ariki?”
2KI 6:33 I a ia anō e kōrero ana ki a rātou, nā, ko te karere kua tae iho ki a ia; ā, ka mea ia, “Nanā, nā Ihowā tēnei kino; ko te aha tāku e tatari atu ai anō i a Ihowā?”
2KI 7:1 Ā, ka mea a Eriha, “Whakarongo ki te kupu a Ihowā. Ko te kupu tēnei a Ihowā: Kia pēnei āpōpō ka hokona he mēhua parāoa mō te hekere, ngā mēhua pārei e rua mō te hekere, i te kūwaha o Hamaria.”
2KI 7:2 Nā, ka whakahokia e tētahi rangatira, nōna nei te ringa i okioki ai te kīngi, ki te tangata a te Atua; i mea ia, “Nanā, ki te hangā e Ihowā he matapihi ki te rangi, ka rite rānei tēnei kupu?” Anō rā ko ia, “Nanā, tērā ōu kanohi e kite, otirā e kore koe e kai i tētahi wāhi o taua mea.”
2KI 7:3 Nā, tērā ētahi tāngata tokowhā, he repera, i te kūwaha o te kēti; ā, ka mea rātou tētahi ki tētahi, “He aha tātou i noho ai i konei ā, kia mate rā anō tātou?
2KI 7:4 Ki te mea tātou, ‘Tātou ka tomo ki te pā,’ nā, ko te matekai kei roto i te pā, ā, ka mate tātou ki reira; ā, ki te noho tātou i konei, ka mate anō tātou. Nā, kia haere tātou āianei, kia auraki atu ki te ope o ngā Hīriani; ki te whakaorangia tātou e rātou, ka ora tātou; ki te whakamatea, heoi anō, ka mate.”
2KI 7:5 Nā, maranga ana rātou i te mea ka kākarauri, haere ana ki te puni o ngā Hīriani; ā, nō tō rātou taenga ki te pito o te puni o ngā Hīriani, nā, kāhore ō reira tangata.
2KI 7:6 Nā te Ariki hoki i mea kia rongo te ope o ngā Hīriani i te haruru hāriata, i te haruru hōiho, i te haruru hoki o tētahi ope nui; ā, ka mea rātou tētahi ki tētahi, “Nanā, kua utua ngā kīngi o ngā Hiti me ngā kīngi o ngā Īhipiana e te kīngi o Īharaira hei whawhai ki a tātou, kia huaki mai ki a tātou.”
2KI 7:7 Nā, whakatika ana rātou, rere ana i te mea ka kākarauri, ā, whakarērea ake ō rātou tēneti, ā rātou hōiho, ā rātou kāihe, me ngā aha noa o te puni, ā, rere ana, he wehi kei mate.
2KI 7:8 Nā, i te taenga o aua repera ki te pito o te puni, ka tomo ki tētahi tēneti, kei te kai, kei te inu, ā, mauria atu ana te hiriwa i reira, me te kōura, me te kākahu, ā, haere ana, huna ana. Nā, ka hoki anō, ka tomo ki tētahi atu tēneti, ā, ka tango anō i reira, ā, haere ana, huna ana.
2KI 7:9 Nā, ka mea rātou tētahi ki tētahi, “Kāhore i te pai tā tātou e mea nei. He rā rongo pai tēnei rā, ā, kei te noho wahangū tātou; ki te tatari tātou kia mārama te ata, tērā tātou e rokohanga e te hē; nā reira hoake, ka haere tātou, ka kōrero ki te whare o te kīngi.”
2KI 7:10 Heoi, haere ana rātou, karanga ana ki te kaitiaki o te kūwaha o te pā; ā, ka whakaatu ki a rātou, ka mea, “I tae mātou ki te puni o ngā Hīriani, nā, kāhore he tangata o reira, kāhore he reo tangata, engari ko ngā hōiho anake e here ana, me ngā kāihe e here ana, ā, ko ngā tēneti e tū ana anō.”
2KI 7:11 Nā, karangatia ana e ia ngā kaitiaki o te kūwaha; ā, nā rātou i kōrero ki te whare o te kīngi i roto atu.
2KI 7:12 Nā, ka whakatika te kīngi i te pō, ā, ka mea ki āna tāngata, “Māku e whakaatu ki a koutou tā ngā Hīriani i mea ai ki a tātou. E mōhio ana rātou e mate ana tātou i te kai; koia rātou i haere atu ai i te puni ki te pārae piri ai, e kī ana, ‘Ki te puta mai rātou i te pā ka hopukia oratia rātou e tātou, ā, ka uru tātou ki te pā.’ ”
2KI 7:13 Nā, ka whakahoki tētahi o āna tāngata, ka mea, “Tangohia oti e ētahi kia rima o ngā hōiho e toe nei, i mahue nei ki te pā. Nanā, pēnei tonu rātou me te huihui katoa o Īharaira kua mahue nei ki konei; nanā, rite tonu rātou ki te huihui katoa o Īharaira kua mōtī nei; ā, tonoa atu rātou e tātou kia kite.”
2KI 7:14 Nā, tangohia ana e rātou ētahi hōiho hāriata, e rua, ā, ungā ana e te kīngi ki te whai i te ope o ngā Hīriani, ā, i mea ia, “Tīkina, tirohia.”
2KI 7:15 Nā, haere ana rātou ki te whai i a rātou a Horano rā anō. Nā, kapi tonu te huarahi katoa i te kākahu, i ngā mea i rukea atu e ngā Hīriani i tō rātou pōnānā. Nā, hoki ana aua tāngata ki te kōrero ki te kīngi.
2KI 7:16 Nā, ka puta te iwi ki waho, kei te pāhua i te puni o ngā Hīriani. Heoi, hokona ana te mēhua parāoa mō te hekere, me ngā mēhua pārei e rua mō te hekere, i rite tonu ki tā Ihowā kupu.
2KI 7:17 Ā, i whakaritea e te kīngi ko te rangatira i okioki atu nei ia ki tōna ringa hei rangatira mō te kūwaha; nā, takahia iho ia e te iwi ki te kūwaha, ā, mate ake, i rite tonu ki tā te tangata a te Atua i kōrero ai, ki tāna i kōrero rā i te haerenga iho o te kīngi ki raro ki a ia.
2KI 7:18 I rite tonu anō ki tā te tangata a te Atua i kōrero ai ki te kīngi, i mea ai: “E rua ngā mēhua pārei mō te hekere, kotahi anō hoki mēhua parāoa mō te hekere i te kūwaha o Hamaria i te wā pēnei āpōpō.”
2KI 7:19 Nā, ka utua e taua rangatira ki te tangata a te Atua, i mea ia, “Nanā, ki te hangā e Ihowā he matapihi ki te rangi, ka rite rānei tēnei kupu.” Nā, ka mea tērā, “Nanā, tērā ōu kanohi nā e kite; otiia e kore tētahi wāhi o taua mea e kainga e koe.”
2KI 7:20 I pērā tonu te meatanga ki a ia; i takahia hoki ia e te iwi ki te kūwaha, ā, mate iho ia.
2KI 8:1 Nā, kua kōrero a Eriha ki te wahine nāna nei te tamaiti i whakaorangia e ia, kua mea, “Whakatika, haere koutou ko tōu whare, ā, e noho ki tāu wāhi e noho ai koe; kua karangatia hoki e Ihowā he matekai; ā, ka pā hoki ki te whenua, e whitu tau.”
2KI 8:2 Nā, ka whakatika taua wahine, ka mea i tā te tangata a te Atua i kī ai; ā, haere ana rātou ko tōna whare, noho ana ki te whenua o ngā Pirihitini, e whitu ngā tau.
2KI 8:3 Nā, i te takanga o ngā tau e whitu, ka hoki atu taua wahine i te whenua o ngā Pirihitini; ā, haere ana ia ki te karanga ki te kīngi mō tōna whare, mō tāna māra.
2KI 8:4 Nā, ko te kīngi i te kōrero ki a Kehati, tangata a te tangata a te Atua; i mea hoki ia, “Tēnā, kōrerotia mai ki ahau ngā mahi nunui katoa i mea ai a Eriha.”
2KI 8:5 Ā, i a ia e kōrero ana ki te kīngi i tāna whakaoranga i te tūpāpaku, nā, ko te wahine nāna nei te tamaiti i whakaorangia e ia i te mate, e karanga ana ki te kīngi mō tōna whare, mō tāna māra. Nā, ka mea a Kehati, “E tōku ariki, e te kīngi, koia tēnei te wahine, ā, ko tāna tama tēnei i whakaorangia rā e Eriha.”
2KI 8:6 Ā, i te uinga a te kīngi ki te wahine rā, ka kōrerotia e ia ki a ia. Heoi, ka tukua e te kīngi ki a ia tētahi o ngā rangatira, ka mea, “Whakahokia āna mea katoa, me ngā hua katoa o te māra mai o te rā i mahue ai i a ia te whenua ā mohoa noa nei.”
2KI 8:7 Ā, i haere a Eriha ki Ramahiku; ā, e mate ana a Pēneharara kīngi o Hīria; nā, ka whakaaturia ki a ia, ka kōrerotia, “Kua tae mai te tangata a te Atua ki konei.”
2KI 8:8 Nā, ka mea atu te kīngi ki a Hataere, “Maua atu tētahi hākari i tōu ringa, ka haere ki te whakatau i te tangata a te Atua, ka ui ki tā Ihowā ki a ia, ka mea, ‘E ora rānei ahau i tēnei mate?’ ”
2KI 8:9 Nā, haere ana a Hataere ki te whakatau i a ia, me te mau anō he hākari i tōna ringa, i ētahi o ngā mea papai katoa o Ramahiku, he kawenga nā ngā kāmera e whā tekau, ā, ka tae. Ka tū i tōna aroaro, ka mea, “Nā tāu tama, nā Pēneharara kīngi o Hīria ahau i unga mai ki a koe, hei mea, ‘E ora rānei ahau i tēnei mate?’ ”
2KI 8:10 Anō rā ko Eriha ki a ia, “Haere, mea atu ki a ia, ‘E ora anō koe’; otiia kua oti i a Ihowā te whakakite mai ki ahau, tērā ia e mate.”
2KI 8:11 Nā, ka whakatau ia i tōna mata ki runga ki a ia, ū tonu, ā, whakamā noa ia; ko te tino tangihanga o te tangata a te Atua.
2KI 8:12 Nā, ka mea a Hataere, “Nā te aha tōku ariki i tangi ai?” Anō rā ko ia, “Nō te mea e mōhio ana ahau ki te kino e meatia e koe ki ngā tama a Īharaira; ko ō rātou pā e tahuna e koe ki te ahi, ko ā rātou taitamariki e patua e koe ki te hoari, ko ā rātou kōhungahunga e tāia iho e koe, ā, ko ā rātou wāhine hapū ka ripiripia e koe.”
2KI 8:13 Anō rā ko Hataere, “Ha! He aha tāu pononga, he kurī noa nei, kia meatia e ia tēnei mea nui?” Anō rā ko Eriha, “Kua whakakitea mai e Ihowā ki ahau, ko koe hei kīngi mō Hīria.”
2KI 8:14 Heoi, mawehe atu ana ia i a Eriha, ā, ka tae ki tōna ariki; ā, ka mea tērā ki a ia, “I pēhea mai te kupu a Eriha ki a koe?” Anō rā ko ia, “E kī ana ia, tērā koe e ora.”
2KI 8:15 Nā, i te aonga ake, ka mau ia ki te kākahu mātotoru, ā, tukua ana ki te wai, ā, uhia ana ki tōna mata, nā, kua mate. Ā, ko Hataere te kīngi i muri i a ia.
2KI 8:16 I te rima o ngā tau o Iorama tama a Āhapa kīngi o Īharaira, i a Iehohāpata e kīngi ana ki a Hūrā, ka kīngi a Iehorama tama a Iehohāpata kīngi o Hūrā.
2KI 8:17 E toru tekau mā rua ōna tau i a ia ka kīngi nei, ā, e waru ngā tau i kīngi ai ia i Hiruhārama.
2KI 8:18 Nā, haere ana ia i te ara o ngā kīngi o Īharaira, pērā tonu me ngā mahi a te whare o Āhapa; i a ia hoki te tamāhine a Āhapa hei wahine; ā, i mahia e ia te mea kino ki tā Ihowā titiro.
2KI 8:19 Otiia kīhai a Ihowā i pai ki te whakangaro i a Hūrā, i whakaaro hoki ki tāna pononga, ki a Rāwiri, i kōrero hoki ia ki a ia, ka hoatu e ia ki a ia he rama mā āna tamariki mō ngā rā katoa.
2KI 8:20 I ōna rā ka maunu a Ēroma i raro i te ringa o Hūrā, ā, whakakīngitia ana he kīngi mō rātou.
2KI 8:21 Kātahi ka haere a Iorama ki Tairi, me ana hāriata katoa i a ia; ā, whakatika ana ia i te pō, ā, patua iho e ia ngā Ēromi i karapotia ai ia, rātou ko ngā rangatira o ngā hāriata; ā, rere ana te iwi ki ō rātou tēneti.
2KI 8:22 Heoi, i maunu a Ēroma i raro i te ringa o Hūrā ā tae noa ki tēnei rā. Kātahi ka maunu anō hoki a Rīpina i taua wā.
2KI 8:23 Nā, ko ērā atu meatanga a Iorama, me āna mahi katoa, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Hūrā?
2KI 8:24 Nā, kua moe a Iorama ki ōna mātua, ā, tanumia iho ki ōna mātua ki te pā o Rāwiri; ā, ko Ahatia, ko tāna tama te kīngi i muri i a ia.
2KI 8:25 Nā, i te tekau mā rua o ngā tau o Iorama tama a Āhapa kīngi o Īharaira, ka kīngi a Ahatia tama a Iehorama kīngi o Hūrā.
2KI 8:26 E rua tekau mā rua ngā tau o Ahatia i a ia ka kīngi nei; ā, kotahi ōna tau i kīngi ai i Hiruhārama. Ā, ko te ingoa o tōna whaea ko Atāria tamāhine a Omori kīngi o Īharaira.
2KI 8:27 Nā, haere ana ia i te ara o te whare o Āhapa, ā, mahia ana e ia te kino ki te titiro a Ihowā, pērā tonu me tā te whare o Āhapa; ko ia hoki te hunaonga o te whare o Āhapa.
2KI 8:28 Nā, haere ana ia me Iorama tama a Āhapa ki te whawhai ki a Hataere kīngi o Hīria ki Rāmoto Kireara; nā, tū ana a Iorama i ngā Hīriani.
2KI 8:29 Nā, hoki ana a Kīngi Iorama ki Ietereere kia rongoātia ngā tūnga i tū ai ia i ngā Hīriani ki Rama, i tāna whawhai ki a Hataere kīngi o Hīria. Ā, haere ana a Ahatia tama a Iehorama kīngi o Hūrā ki raro kia kite i a Iorama tama a Āhapa ki Ietereere, nō te mea e mate ana ia.
2KI 9:1 Nā, ka karanga a Eriha poropiti ki tētahi o ngā tama a ngā poropiti, ā, ka mea ki a ia, “Whītikiria tōu hope, ka mau i tēnei pounamu hinu i tōu ringa, ka haere ki Rāmoto Kireara.
2KI 9:2 E tae koe ki reira, tirohia atu i reira a Iehu tama a Iehohāpata tama a Nimihi, ka haere koe, ka mea i a ia: Kia whakatika i roto i ōna tuākana, ā, ka mau i a ia ki tētahi rūma i roto.
2KI 9:3 Kātahi ka mau ki te pounamu hinu, ka riringi ki runga ki tōna mātenga, ka mea, ‘Ko te kupu tēnei a Ihowā: Ka oti koe te whakawahi e ahau hei kīngi mō Īharaira.’ Ko reira koe uaki ai i te tatau, ka rere, ā, kaua e whakaroa.”
2KI 9:4 Heoi, haere ana taua taitama, arā te taitama, te poropiti, ki Rāmoto Kireara.
2KI 9:5 Ā, nō tōna taenga atu, nā, ko ngā rangatira o te ope e noho ana; ā, ka mea ia, “He kupu tāku ki a koe, e te rangatira.” Anō rā ko Iehu, “Ki a wai koia o mātou katoa?” Anō rā ko tērā, “Ki a koe, e te rangatira.”
2KI 9:6 Nā, whakatika ana ia, ā, haere ana ki roto ki te whare; nā, ringihia ana e tērā te hinu ki tōna mātenga, ā, ka mea ki a ia, “Ko te kupu tēnei a Ihowā, a te Atua o Īharaira: ‘Ka oti koe te whakawahi e ahau hei kīngi mō tā Ihowā iwi, mō Īharaira.
2KI 9:7 Ā, māu e patu te whare o Āhapa, o tōu ariki, kia whai utu ai ahau mō ngā toto o āku pononga, o ngā poropiti, mō ngā toto hoki o ngā pononga katoa a Ihowā, i te ringa o Ietēpere.
2KI 9:8 Ka ngaro hoki te whare katoa o Āhapa; ā, ka hautopea atu e ahau i a Āhapa ngā tamariki tāne katoa, me ngā mea i tūtakina atu, i mahue rānei i roto i a Īharaira.
2KI 9:9 Ā, ka meinga e ahau te whare o Āhapa kia rite ki te whare o Ieropoama tama a Nēpata, ki te whare hoki o Paaha tama a Āhia.
2KI 9:10 Nā, mā ngā kurī e kai a Ietēpere ki te wāhi o Ietereere, ā, kāhore he tangata hei tanu i a ia.’ ” Nā, uakina ana e ia te tatau, ā, rere ana.
2KI 9:11 Kātahi a Iehu ka puta mai ki waho, ki ngā pononga a tōna ariki; ā, ka mea tētahi ki a ia, “Kei te pai rānei? He aha tēnei pōauau i haere mai ai ki a koe?” Anō rā ko ia ki a rātou, “E mōhio ana koutou ki te tangata rā, ki āna kōrero hoki.”
2KI 9:12 Anō rā ko rātou, “He teka; kōrerotia mai ki a mātou ināianei.” Nā, ka mea ia, “Koia anō tēnei āna kōrero ki ahau: ‘Ko tā Ihowā kupu tēnei: Ka oti koe te whakawahi e ahau hei kīngi mō Īharaira.’ ”
2KI 9:13 Nā, hohoro tonu rātou, ka mau ki tōna kākahu, ki tōna kākahu, whārikitia iho ki raro i a ia, i runga i te arawhata, ā, whakatangihia ana te tētere, me te kī anō, “Ko Iehu te kīngi.”
2KI 9:14 Heoi, whakatupuria ana e Iehu tama a Iehohāpata tama a Nimihi he hē mō Iorama. Nā, i puritia e Iorama, e rātou ko Īharaira katoa, a Rāmoto Kireara, he whakaaro ki a Hataere kīngi o Hīria;
2KI 9:15 ko Kīngi Iehorama ia kua hoki ki Ietereere kia rongoātia ōna tūnga i tū ai ia i ngā Hīriani i tāna whawhai ki a Hataere kīngi o Hīria. Nā, ka mea a Iehu, “Mehemea ko tō koutou whakaaro tēnei, nā, kei tukua tētahi ki waho, kei puta atu i te pā, ka haere ka kōrero ki Ietereere.”
2KI 9:16 Heoi, eke ana a Iehu ki te hāriata, ā, haere ana ki Ietereere; i reira hoki a Iorama e takoto ana. Ā, ko Ahatia kīngi o Hūrā kua riro ki raro, kia kite i a Iorama.
2KI 9:17 Nā, ko te kaitūtei i runga i te pourewa i Ietereere e tū ana, ā, ka kitea e ia te rōpū a Iehu i a ia e haere mai ana, nā, ka mea, “Kei te kite atu ahau i te ope tāngata.” Nā, ka mea a Iehorama, “Tīkina he tangata eke hōiho, ka ungā ki te whakatūtaki i a rātou, ā, māna e mea atu, ‘He pai rānei?’ ”
2KI 9:18 Heoi, haere ana tētahi i runga i te hōiho ki te whakatau i a ia, ā, ka mea: “Ko te kupu tēnei a te kīngi, ‘He pai rānei?’ ” Anō rā ko Iehu, “Hei aha māu te pai? Haere ake ki muri i ahau.” Ā, ka kōrero te kaitūtei, ka mea: “I tae te karere ki a rātou, otiia kāhore anō kia hoki mai.”
2KI 9:19 Kātahi ka ungā anō e ia tētahi atu kaieke hōiho, ā, ka tae tērā ki a rātou, ka mea, “Ko te kupu tēnei a te kīngi, ‘He pai rānei?’ ” Anō rā ko Iehu, “Hei aha māu te pai? Huri ake koe ki muri i ahau.”
2KI 9:20 Nā, ka kōrero te kaitūtei, ka mea, “I tae ia ki a rātou, heoi kāhore anō kia hoki mai; ā, ko te whiu o te hāriata, rite tonu ki te whiu a Iehu tama a Nimihi; he pōrangi rawa hoki tāna whiu.”
2KI 9:21 Nā, ka mea a Iehorama, “Whakanohoia.” Nā, whakanohoia ana e rātou tōna hāriata. Ā, ka puta a Iehorama kīngi o Īharaira rāua ko Ahatia kīngi o Hūrā i runga i tōna hāriata, i tōna hāriata, ā, haere ana ki te whakatūtaki i a Iehu, ā, tūtaki ana ki a ia ki te wāhi o Napoto Ietereeri.
2KI 9:22 Nā, i te kitenga o Iehorama i a Iehu, ka mea ia, “He pai rānei, e Iehu?” Anō rā ko ia, “He pai aha, i te hanga e hua tonu ana ngā moepuku me ngā mahi mākutu a tōu whaea, a Ietēpere?”
2KI 9:23 Nā, ka huri ngā ringa o Iehorama, ā, rere ana, me te karanga anō ki a Ahatia, “He kōpeka, e Ahatia!”
2KI 9:24 Nā, kūmea ana e Iehu tāna kōpere ki tōna kaha katoa, ā, perea ana a Iehorama ki waenga pū o ōna ringa, ā, puta atu ana te pere i tōna ngākau, ā, hinga iho ana ia i roto i tōna hāriata.
2KI 9:25 Kātahi ka mea a Iehu ki a Pirikara, ki tāna rangatira, “Hikitia ake, makā atu ia ki te wāhi o te māra a Napoto Ietereeri; kia mahara hoki, i tō tāua haerenga i runga hōiho i muri i a Āhapa, i tōna pāpā, ka whakapīkaua e Ihowā tēnei pīkaunga ki runga ki a ia:
2KI 9:26 ‘I kitea pūtia e ahau inanahi ngā toto o Napoto, me ngā toto o āna tama, e ai tā Ihowā; ā, ka utua koe e ahau ki tēnei wāhi, e ai tā Ihowā.’ Nā reira, tīkina, makā ia ki taua wāhi whenua, kia rite ki te kupu a Ihowā.”
2KI 9:27 Otiia, i te kitenga o Ahatia kīngi o Hūrā i tēnei, rere ana ia nā te ara o te whare kāri. Nā, whāia ana ia e Iehu, ā, i mea tērā, “Patua anō hoki ia i runga i te hāriata.” Nā, patua ana ia e rātou i te pikitanga ki Kuru, ki tērā i te taha o Ipereama. Nā, rere ana ia ki Mekiro, ā, mate iho ki reira.
2KI 9:28 Nā, kawea ana ia e āna tāngata i runga i te hāriata ki Hiruhārama, ā, tanumia ana ki tōna urupā, ki ōna mātua i te pā o Rāwiri.
2KI 9:29 Nō te tekau mā tahi o ngā tau o Iorama, tama a Āhapa i kīngi ai a Ahatia ki Hūrā.
2KI 9:30 Nā, i te haerenga o Iehu ki Ietereere, ka rongo a Ietēpere. Nā, ka pania e ia ōna kanohi, ā, ka tino whakapaipaitia tōna māhunga, ā, ka titiro atu ia i te matapihi.
2KI 9:31 Nā, i a Iehu e tomo mai ana i te kūwaha, ka mea tērā, “He rongo mau rānei, e koe, e te Tīmiri, e te kaikōhuru i tōu ariki?”
2KI 9:32 Nā, ka maranga ake tōna mata ki te matapihi, ka mea, “Ko wai tōku? Ko wai rā?” Nā, ka titiro iho ētahi unaka, tokorua, tokotoru, ki a ia.
2KI 9:33 Nā, ka mea ia, “Makā iho ia ki raro.” Heoi, makā iho ana e rātou; ā, paratī ana ētahi o ōna toto ki te pakitara, ā, ki runga hoki ki ngā hōiho; ā, takahia ana ia e ia ki raro ki ōna waewae.
2KI 9:34 Nā, haere ana ia ki roto, kei te kai, kei te inu; ā, ka mea ia, “Tēnā tirohia te wahine kua kangā nei, ā, tanumia ia; he tamāhine kīngi hoki ia.”
2KI 9:35 Nā, haere ana rātou ki te tanu i a ia; otiia kāhore he wāhi ōna i kitea e rātou, ko te angaanga anake, ko ngā waewae, ko ngā kapu o ōna ringa.
2KI 9:36 Nō reira hoki ana rātou, ā, ka kōrero ki a ia. Ā, ka mea ia, “Ko te kupu tēnei a Ihowā, i kōrerotia rā e tāna pononga, e Irāia Tihipi, i mea rā ia: Hei te wāhi o Ietereere kainga ai e ngā kurī ngā kikokiko o Ietēpere;
2KI 9:37 ā, ka waiho te tinana o Ietēpere hei para hamuti ki runga ki te mate o te pārae i te wāhi o Ietereere; ā, kāhore e kīia, ‘Ko Ietēpere tēnei.’ ”
2KI 10:1 Nā, e whitu tekau ngā tama a Āhapa i Hamaria. Nā, ka tuhituhi pukapuka a Iehu, ā, ungā ana e ia kia kawea ki Hamaria ki ngā rangatira o Ietereere, arā ki ngā kaumātua, ā, ki ngā tāngata nāna i atawhai ngā tama a Āhapa. I mea ia,
2KI 10:2 “Nā āianei, i te taenga atu anō o tēnei pukapuka ki a koutou, i te mea kei a koutou nā ngā tama a tō tātou ariki, ā, kei a koutou ngā hāriata me ngā hōiho, me te pā kua oti te taiepa, me ngā mea whawhai;
2KI 10:3 tirohia e koutou te tangata pai, te tangata tika rawa o ngā tama a tō koutou ariki, ka whakanoho i a ia ki te torōna o tōna pāpā, ka whawhai mō te whare o tō koutou ariki.”
2KI 10:4 Otiia i tino nui tō rātou wehi, i mea hoki, “Nanā, kīhai ngā kīngi tokorua rā i tū ki tōna aroaro; nā, me pēhea tātou ka tū ai?”
2KI 10:5 Nā, ka unga tāngata te rangatira o te whare, me te rangatira o te pā, ngā kaumātua hoki, me te hunga nāna i atawhai ngā tamariki, ki a Iehu, hei mea, “Ko mātou āu pononga, ā, ka meinga e mātou ngā mea katoa e whakahaua mai e koe. E kore mātou e whakakīngi i tētahi; māu e mea tā tōu kanohi i whakapai ai.”
2KI 10:6 Nā, ka tuhituhi pukapuka anō ia ki a rātou, ka mea, “Ki te mea kei ahau koutou, ā, ka rongo koutou ki tōku reo, tangohia ngā upoko o aua tāngata, o ngā tama a tō koutou ariki, ka haere mai ki ahau ki Ietereere i tēnei takiwā āpōpō.” Nā, ko ngā tama a te kīngi, ko tōna whitu tekau tāngata, i ngā tāngata nunui o te pā, nāna rā rātou i whakatuputupu.
2KI 10:7 Nā, i te taenga o taua pukapuka ki a rātou, ka mau rātou ki ngā tama a te kīngi, ā, patua iho, arā te whitu tekau tāngata, whaowhina ana ō rātou upoko ki te kete, ā, tukua ana rātou ki a ia ki Ietereere.
2KI 10:8 Nā, ka tae mai tētahi karere, ka kōrero ki a ia, “Kua kawea mai e rātou ngā upoko o ngā tama a te kīngi.” Anō rā ko ia, “Whakatakotoria kia rua ngā pūranga i te tomokanga o te kūwaha, ā te ata rā anō.”
2KI 10:9 Nā, i te ata ka puta ia ki waho, ka tū, ka kōrero ki te iwi katoa, “He tika koutou. Nanā, i whakatupu ahau i te hē mō tōku ariki, ā, patua iho ia e ahau; engari, nā wai ēnei katoa i whakamate?
2KI 10:10 Nā, kia mōhio, e kore e taka ki te whenua tētahi wāhi o te kupu a Ihowā, i kōrero ai a Ihowā mō te whare o Āhapa; kua tutuki hoki i a Ihowā tāna i kōrero ai, nā tāna pononga nā Irāia.”
2KI 10:11 Heoi, patua ana e Iehu ngā mōrehu katoa o te whare o Āhapa i Ietereere, āna tāngata rarahi, ōna hoa i matatau ai ia, me āna tohunga; ā, kore noa iho tētahi mōrehu ōna i waiho e ia.
2KI 10:12 Nā, whakatika ana ia, tūria atu ana, ā, haere ana ki Hamaria. Ā, i a ia i te whare kutikuti o ngā hēpara i te ara,
2KI 10:13 ka tūtaki a Iehu ki ngā tēina o Ahatia kīngi o Hūrā, ā, ka mea, “Ko wai koutou?” Anō rā ko rātou, “He tēina mātou nō Ahatia; ā, e haere ana mātou ki raro, ki te oha ki ngā tama a te kīngi, ki ngā tama hoki a te kuīni.”
2KI 10:14 Anō rā ko ia, “Hopukia oratia rātou.” Nā, hopukia oratia ana e rātou, ā, patua iho ki te rua i te whare kutikuti hipi, tōna whā tekau mā rua tāngata; kīhai hoki tētahi o rātou i waiho e ia.
2KI 10:15 Nā, i tōna haerenga atu i reira, ka tūpono ia ki a Ionārapa, ki te tama a Rekapa, e haere ana mai ki te whakatau i a ia; heoi ka oha ki a ia, ka mea ki a ia, “Kei te tika rānei tōu ngākau, kei te rite rānei ki tōku ngākau e mea nei ki tōu ngākau?” Anō rā ko Ionārapa, “Kei te pēnā.” “Ki te mea ko te tikanga tēnā, hōmai tōu ringa ki ahau.” Nā, hoatu ana e ia tōna ringa; ā, ka meinga e tērā kia eke ki a ia ki runga ki te hāriata.
2KI 10:16 Nā, ka mea tērā, “Haere mai tāua, kia kite ai koe i tōku ngākau nui ki a Ihowā.” Heoi, ka meinga ia kia rere i runga i tōna hāriata.
2KI 10:17 Ā, i tōna taenga ki Hamaria, patua iho e ia te hunga katoa o Āhapa i mahue ki Hamaria, ā poto noa ia i a ia; pērātia ana me tā Ihowā kupu i kōrero ai ki a Irāia.
2KI 10:18 Nā, ka huihuia te iwi katoa e Iehu, ka mea ia ki a rātou, “He iti tā Āhapa mahi ki a Paara; ka nui atu ia tā Iehu mahi ki a ia.
2KI 10:19 Nā, karangatia āianei ki ahau ngā poropiti katoa a Paara, āna tāngata katoa, me āna tohunga katoa; kei ngaro tētahi; he whakahere nui hoki tāku ki a Paara; ko te tangata e ngaro atu ana, e kore e ora.” Otiia he mahi mūrere tā Iehu, kia whakangaromia ai e ia ngā tāngata a Paara.
2KI 10:20 Nā, ka mea a Iehu, “Whakatapua he huihui nui ki a Paara.” Nā, karangatia ana e rātou.
2KI 10:21 Nā, ka unga tāngata a Iehu puta noa i a Īharaira; ā, haere katoa mai ana ngā tāngata a Paara, kīhai tētahi tangata i mahue, i kore te haere mai. Nā, haere ana rātou ki te whare o Paara, ā, kikī ana te whare o Paara i tētahi pito ki tētahi.
2KI 10:22 Nā, ka mea atu ia ki te kaitiaki kākahu, “Mauria mai he kākahu mō ngā tāngata katoa a Paara.” Nā, mauria ana mai e ia he kākahu mō rātou.
2KI 10:23 Nā, haere ana a Iehu rāua ko Ionārapa tama a Rekapa ki te whare o Paara; ā, ka mea atu ia ki ngā tāngata a Paara, “Rapua, tirohia, kei noho ki konei ki a koutou tētahi o ngā tāngata a Ihowā, engari ko ngā tāngata anake a Paara.”
2KI 10:24 Nā, haere ana rātou ki te mea i ngā whakahere, i ngā tahunga tinana. Nā, tērā kua whakaritea e Iehu ki waho ētahi tāngata māna, e waru tekau, ā, i mea ia, “Ki te puta tētahi o ngā tāngata i kawea mai nei e ahau ki ō koutou ringa, ko te tangata nāna ia i tuku, ko tōna matenga hei utu mō tō tērā matenga.”
2KI 10:25 Nā, i te mutunga o tāna whakahere i te tahunga tinana, ka mea a Iehu ki ngā kaitiaki rātou ko ngā rangatira: “Haere ki roto, patua rātou; kei puta tētahi ki waho.” Nā, patua iho e rātou ki te mata o te hoari; ā, makā ana rātou e ngā kaitiaki rātou ko ngā rangatira ki waho, ā, haere ana rātou ki te pā o te whare o Paara.
2KI 10:26 Nā, whakaputaina ana e rātou ngā whakapakoko o te whare o Paara, ā, tahuna ana ki te ahi.
2KI 10:27 I wāhia hoki e rātou te whakapakoko o Paara, i wāhia anō te whare o Paara, ā, meinga ana hei whare paru tae noa ki tēnei rā.
2KI 10:28 Ko te whakamōtītanga tēnei a Iehu i a Paara i roto i a Īharaira.
2KI 10:29 Ko ngā hara ia o Ieropoama tama a Nēpata i hara ai a Īharaira, kīhai ērā i mahue i a Iehu te whai, arā ngā kūao kau kōura i Pētēre, i Rāna.
2KI 10:30 Nā, ka mea a Ihowā ki a Iehu, “Kua pai nei tāu, kua mahia e koe te tika ki tōku aroaro, ā, kua meatia e koe ki te whare o Āhapa rite tonu ki ngā mea katoa i tōku ngākau, nā, e whā ngā whakatupuranga o āu tama e noho ki te torōna o Īharaira.”
2KI 10:31 Otiia kīhai a Iehu i aro nui ki te haere i runga i te ture a Ihowā, a te Atua o Īharaira, kīhai i mahue i a ia ngā hara o Ieropoama i hara ai a Īharaira.
2KI 10:32 I aua rā ka tīmata a Ihowā te tapahi i ngā taha o Īharaira; i patua hoki rātou e Hataere i ngā rohe katoa o Īharaira:
2KI 10:33 i Horano atu whaka te rāwhiti, ko te whenua katoa o Kireara, ko ngā Kari, ko ngā Reupeni, ko ngā Mānahi; i Aroere atu, i te awa o Aranona, arā a Kireara, a Pahana.
2KI 10:34 Nā, ko ērā atu meatanga a Iehu me āna mahi katoa, me āna mahi toa katoa, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Īharaira?
2KI 10:35 Nā, ka moe a Iehu ki ōna mātua, ā, tanumia iho ki Hamaria. Ā, ko tāna tama, ko Iehoahata te kīngi i muri i a ia.
2KI 10:36 Ā, ko ngā rā i kīngi ai a Iehu ki a Īharaira i Hamaria e rua tekau mā waru ngā tau.
2KI 11:1 Nā, i te kitenga o Atāria whaea o Ahatia kua mate tāna tama, whakatika ana ia, whakamōtītia iho ngā uri kīngi katoa.
2KI 11:2 Otiia i mau a Iehōhepa, tamāhine a Kīngi Iorama, tuahine o Ahatia ki a Ioaha tama a Ahatia, kāhakina atu ana e ia i roto i ngā tama a te kīngi i whakamatea rā, rāua ko tōna kaihiki, ā, kawea ana ki te whare moenga; ā, hunā ana ia e rātou i a Atāria, i kore ai ia e whakamatea.
2KI 11:3 Nā, i taua wahine ia i roto i te whare o Ihowā e piri ana, e ono ngā tau; ā, ko Atāria te kuīni o te whenua.
2KI 11:4 Nā, i te whitu o ngā tau ka unga tāngata a Iehoiara ki te tiki i ngā rangatira rau, o ngā Kāriti, o ngā kaitiaki kīngi, ā, mauria ana mai rātou ki a ia ki roto ki te whare o Ihowā. Nā, ka whakarite kawenata ia ki a rātou, ka whakaoati i a rātou i roto i te whare o Ihowā, ā, whakakitea ana e ia te tama a te kīngi ki a rātou.
2KI 11:5 Nā, ka whakahau ia i a rātou, ka mea, “Ko tēnei tā koutou mea e mea ai: Ko te toru o ngā wehenga o koutou, o te hunga e haere ki roto i te hāpati, hei tiaki i te whare o te kīngi
2KI 11:6 (ko tētahi o ngā wehenga e toru hei te Kūwaha o Huru; ā, ko tētahi o ngā wehenga hei te kūwaha i muri i ngā kaitiaki kīngi), mā tēnā koutou e tiaki ai i te whare, hei ārai atu.
2KI 11:7 Nā, kia rua ngā matua o koutou, ko te hunga e haere ana ki waho i te hāpati, hei tiaki i te whare o Ihowā i waho ake o te kīngi.
2KI 11:8 Nā, me karapoti e koutou te kīngi ā tawhio noa, ko ngā patu a tēnā, a tēnā ki tōna ringa; ā, ko te tangata e haere mai ki roto i ngā rārangi, me whakamate. Ā, hei te taha tonu koutou o te kīngi i tōna haerenga atu, i tōna haerenga mai.”
2KI 11:9 Nā, ka meatia e ngā rangatira rau ngā mea katoa i whakahaua e Iehoiara tohunga; ā, ka mau rātou ki āna tāngata, ki āna tāngata, ki ngā mea e haere ana ki roto i te hāpati, ki te hunga hoki e haere ana ki waho i te hāpati, ā, haere ana ki a Iehoiara tohunga.
2KI 11:10 Ā, i hoatu e te tohunga ki ngā rangatira rau ngā tao me ngā whakapuru tao a Kīngi Rāwiri; i roto hoki aua mea i te whare o Ihowā.
2KI 11:11 Nā, tū ana ngā kaitiaki kīngi, me ā rātou patu i te ringa o tēnei, o tēnei i te koki ki matau o te whare, tae noa ki te koki ki mauī o te whare, i ngā taha o te āta, o te whare, ā, karapoti noa i te kīngi.
2KI 11:12 Kātahi ka whakaputaina mai e ia te tama a te kīngi, pōtaea iho te karauna ki a ia, ā, hoatu ana ki a ia te whakaaturanga; nā, whakakīngitia ana ia e rātou, whakawahia ana; nā, kei te pakipaki i ō rātou ringa, me te karanga anō, “Kia ora te kīngi!”
2KI 11:13 Ā, i te rongonga o Atāria i te reo o ngā kaitiaki rātou ko te iwi, ka haere ia ki te iwi ki te whare o Ihowā.
2KI 11:14 Heoi, ka titiro ia, nā, ko te kīngi e tū ana i te taha o te pou, ko te tikanga hoki tērā, me ngā rangatira rātou ko ngā kaiwhakatangi tētere i te taha o te kīngi; ā, ko te iwi katoa o te whenua e koa ana, e whakatangi ana i ngā tētere. Kātahi a Atāria ka haehae i ōna kākahu, ka karanga, “He hē! He hē, te whakatakotoria nei!”
2KI 11:15 Nā, ka whakahau a Iehoiara tohunga ki ngā rangatira rau, ki ngā kaitohutohu i te ope, ka mea ki a rātou: “Kawea mai ia ki waenga i ngā rārangi; ko te tangata hoki e haere ana i muri i a ia me patu ki te hoari.” I kī hoki te tohunga, “Kaua ia e whakamatea i roto i te whare o Ihowā.”
2KI 11:16 Heoi, whakawāteatia ana e rātou he ara mōna; ā, haere ana ia i te huarahi e haere ai ngā hōiho ki te whare o te kīngi; ā, whakamatea iho ki reira.
2KI 11:17 Nā, ka whakaritea e Iehoiara he kawenata, he mea nā Ihowā, ki te kīngi rātou ko te iwi, kia meinga rātou hei iwi mā Ihowā; he mea hoki nā te kīngi ki te iwi.
2KI 11:18 Nā, haere ana te iwi katoa o taua whenua ki te whare o Paara, wāhia iho e rātou; ko āna āta, ko ōna āhua i wāhia e rātou, mongamonga noa, patua iho hoki e rātou a Matana tohunga o Paara ki te ritenga atu o ngā āta. I whakaritea hoki e te tohunga he kaitirotiro mō te whare o Ihowā.
2KI 11:19 I mauria hoki e ia ngā rangatira rau, rātou ko ngā Kāriti, ko ngā kaitiaki kīngi, me te iwi katoa o te whenua; nā, kawea iho ana e rātou te kīngi ki raro i te whare o Ihowā, ā, haere ana nā te huarahi ki te kūwaha o ngā kaitiaki ki te whare o te kīngi. Nā, noho ana ia i runga i te torōna o ngā kīngi.
2KI 11:20 Heoi, koa katoa ana te iwi o te whenua, ā, mārie noa iho te pā; ā, whakamatea ana e rātou a Atāria ki te hoari i te whare o te kīngi.
2KI 11:21 E whitu ngā tau o Iehoaha i a ia ka kīngi nei.
2KI 12:1 Nō te whitu o ngā tau o Iehu i kīngi ai a Iehoaha; ā, e whā tekau ōna tau i kīngi ai ia ki Hiruhārama. Ā, ko te ingoa o tōna whaea, ko Tipia o Peerehepa.
2KI 12:2 Ā, tika tonu ngā mahi a Iehoaha ki te titiro a Ihowā i ōna rā katoa i ākona ai ia e Iehoiara tohunga.
2KI 12:3 Ko ngā wāhi tiketike ia kīhai i whakakāhoretia; i patu whakahere tonu te iwi, i tahu whakakakara ki runga ki ngā wāhi tiketike.
2KI 12:4 Nā, i mea a Iehoaha ki ngā tohunga, “Ko te moni katoa o ngā mea e whakatapua ana, e kawea ana ki te whare o Ihowā, ko te moni o ngā tāngata e haere atu ana i te tauanga, ko te moni e whakaritea ai tērā, tērā, ko ngā moni katoa e puta ake i roto i te ngākau o tētahi kia kawea mai ki roto ki te whare o Ihowā.
2KI 12:5 Me tango mai e ngā tohunga, e tērā, e tērā i tāna tangata i mōhio ai; ā, mā rātou e hangā ngā wāhi pakaru o te whare i ngā wāhi katoa e kitea ai he pakaru.”
2KI 12:6 I te rua tekau mā toru ia o ngā tau o Kīngi Iehoaha kāhore anō i hanga ngā wāhi pakaru o te whare e ngā tohunga.
2KI 12:7 Kātahi ka karanga a Kīngi Iehoaha ki a Iehoiara tohunga, ki ērā atu tohunga hoki, ā, ka mea ki a rātou, “He aha koutou tē hanga ai i ngā wāhi pakaru o te whare? Nā, kāti koutou te tango moni i ā koutou tāngata i mōhio ai, engari me hōmai mō ngā wāhi pakaru o te whare.”
2KI 12:8 Nā, whakaae ana ngā tohunga kia kaua rātou e tango moni mai anō i te iwi, kia kaua hoki e hanga i ngā wāhi pakaru o te whare.
2KI 12:9 Otiia i mau a Iehoiara tohunga ki tētahi pouaka, ā, pokaia ana e ia he kōhao ki tōna taupoki, whakatakotoria ana ki te taha o te āta, ki te taha ki matau, i te mea ka haere tētahi ki te whare o Ihowā; ā, tukua iho ana ki roto e ngā tohunga tiaki o te tatau ngā moni katoa i kawea mai ki te whare o Ihowā.
2KI 12:10 Ā, ka kitea kua nui te moni i roto i te pouaka, nā, ka haere te kaituhituhi a te kīngi rāua ko te tino tohunga, ka whaowhina ki roto ki ngā pēke, ā, taua ana te moni i kitea i roto i te whare o Ihowā.
2KI 12:11 Nā, hoatu ana e rātou te moni i pāunatia rā ki ngā ringa o ngā kaimahi i te mahi, o ngā kaitohutohu i te whare o Ihowā; ā, nā rātou i utu atu ki ngā kāmura, ki ngā kaihanga i mahia ai te whare o Ihowā,
2KI 12:12 ki ngā kaimahi kōhatu, ki ngā kaitārai kōhatu; hei hoko anō i ngā rākau, i ngā kōhatu tārai, hei hanga mō ngā wāhi pakaru o te whare o Ihowā, hei utu hoki mō ngā mea katoa i riro hei hanga mō te whare.
2KI 12:13 Otiia kīhai i hangā mō te whare o Ihowā he kapu hiriwa, he kuku, he peihana, he tētere, he oko kōura, he oko hiriwa, ki te moni i kawea mai ki te whare o Ihowā.
2KI 12:14 I hoatu hoki ki ngā kaimahi i te mahi, hei hanga i ngā wāhi pakaru o te whare o Ihowā.
2KI 12:15 Kīhai hoki i uiuia ngā meatanga a aua tāngata i hoatu nei e rātou te moni ki ō rātou ringa kia hoatu ki ngā kaimahi i te mahi; he pono hoki tā rātou mahi.
2KI 12:16 Ko te moni mō te hē, me te moni mō te hara, kīhai i kawea mai e rātou ki te whare o Ihowā; i ngā tohunga tēnā.
2KI 12:17 Kātahi ka haere a Hataere kīngi o Hīria, whawhai ana ki Kāta, ā, horo ana i a ia. Nā, ka anga te kanohi o Hataere, ka mea ki te haere ki runga, ki Hiruhārama.
2KI 12:18 Nā, ka mau a Iehoaha kīngi o Hūrā ki ngā mea tapu katoa i whakatapua e ōna mātua, e Iehohāpata, e Iehorama, e Ahatia, e ngā kīngi o Hūrā, ki āna mea tapu anō, ki te kōura katoa i kitea i roto i ngā toa taonga o te whare o Ihowā, o te whare hoki o te kīngi, ā, tukua ana ki a Hataere kīngi o Hīria; ā, haere atu ana ia i Hiruhārama.
2KI 12:19 Nā, ko ērā atu meatanga a Ioaha me āna mahi katoa, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Hūrā?
2KI 12:20 Nā, ka whakatika āna tāngata, ā, whakatupuria ana e rātou he hē mōna, ā, patua iho a Ioaha ki te whare o Miro i te heketanga iho ki Hira.
2KI 12:21 Nā āna tāngata hoki, nā Iotaka tama a Himeata rāua ko Iehotāpara tama a Homere ia i patu, ā, mate iho. Nā, tanumia ana ia ki ōna mātua ki te pā o Rāwiri; ā, ko Amatia, ko tāna tama, te kīngi i muri i a ia.
2KI 13:1 Nō te rua tekau mā toru o ngā tau o Ioaha tama a Ahatia kīngi o Hūrā i kīngi ai a Iehoahata tama a Iehu ki a Īharaira ki Hamaria, ā, tekau mā whitu ngā tau i kīngi ai.
2KI 13:2 Ā, he kino tāna mahi ki te titiro a Ihowā, i whai hoki ia i ngā hara o Ieropoama tama a Nēpata i hara ai a Īharaira. Kīhai ēnā i mahue i a ia.
2KI 13:3 Nā, ka mura te riri o Ihowā ki a Īharaira, ā, hoatu ana rātou e ia ki te ringa o Hataere kīngi o Hīria, ki te ringa anō hoki o Pēneharara tama a Hataere i ō rāua rā katoa.
2KI 13:4 Nā, ka īnoi a Iehoahata ki a Ihowā, ā, ka whakarongo a Ihowā ki a ia; i kite hoki ia i te tūkinotanga o Īharaira, tūkinotia ai rātou e te kīngi o Hīria.
2KI 13:5 Nā, hōmai ana e Ihowā he kaiwhakaora ki a Īharaira, ā, ka puta ake rātou i raro i te ringa o ngā Hīriani; ā, noho ana ngā tama a Īharaira ki ō rātou tēneti, he pērā me mua.
2KI 13:6 Otiia kīhai i mahue i a rātou ngā hara o te whare o Ieropoama i hara ai a Īharaira, heoi haere ana i reira; tū tonu anō te Āhera i Hamaria.
2KI 13:7 Kāhore hoki i waiho e ia o te iwi ki a Iehoahata, ko ngā kaieke hōiho anake e rima tekau, tekau ngā hāriata, kotahi tekau mano ngā hōia haere raro; i hunā hoki rātou e te kīngi o Hīria, ā, meinga ana kia rite ki te puehu i te patunga wīti.
2KI 13:8 Nā, ko ērā atu meatanga a Iehoahata me āna mahi katoa, me āna mahi toa, kīhai ianei ēnā i tuhituhia ki te Pukapuka o ngā meatanga o Ngā Rā o Ngā Kīngi o Īharaira?
2KI 13:9 Nā, ka moe a Iehoahata ki ōna mātua, ā, tanumia iho ki Hamaria; ā, ko Ioaha, ko tāna tama te kīngi i muri i a ia.
2KI 13:10 Nō te toru tekau mā whitu o ngā tau o Ioaha kīngi o Hūrā i kīngi ai a Iehoaha tama a Iehoahata ki a Īharaira ki Hamaria, tekau mā ono ngā tau.
2KI 13:11 Ā, he kino tāna mahi ki te titiro a Ihowā; kīhai i mahue i a ia tētahi o ngā hara o Ieropoama tama a Nēpata i hara ai a Īharaira; engari i haere ia i reira.
2KI 13:12 Nā, ko ērā atu meatanga a Ioaha me āna mahi katoa, me āna mahi toa i tāna whawhai ki a Amatia kīngi o Hūrā, kīhai ianei ērā i tuhituhia ki te Pukapuka o ngā meatanga o Ngā Rā o Ngā Kīngi o Īharaira?
2KI 13:13 Nā, ka moe a Ioaha ki ōna mātua, ā, noho ana a Ieropoama ki tōna torōna; i tanumia hoki a Ioaha ki Hamaria, ki ngā kīngi o Īharaira.
2KI 13:14 Nā, i te mate a Eriha i tōna mate e mate rawa ai; ā, haere iho ana a Ioaha kīngi o Īharaira ki raro, ki a ia, ā, tangi ana i runga i a ia, ka mea, “E tōku pāpā, e tōku pāpā, e ngā hāriata o Īharaira, e ōna kaieke hōiho!”
2KI 13:15 Nā, ka mea a Eriha ki a ia, “E mau ki te kōpere, ki ngā pere”; ā, ka mau ia ki te kōpere, ki ngā pere.
2KI 13:16 Nā, ka mea ia ki te kīngi o Īharaira, “Pupuri tōu ringa i te kōpere,” nā, kua puritia e tōna ringa. Nā, ka whakapā a Eriha i ōna ringa ki ngā ringa o te kīngi.
2KI 13:17 Nā, ka kī tērā, “Uakina te matapihi whaka te rāwhiti,” nā, uakina ana e ia. Kātahi a Eriha ka mea, “Kōperea,” nā, kōperea ana e ia. Ā, ka mea tērā, “Ko te pere o tā Ihowā whakaoranga, ko te pere e ora ai i a Hīria! Ka patua hoki e koe ngā Hīriani ki Apeke, ā poto noa.”
2KI 13:18 Ā, ka mea anō ia, “E mau ki ngā pere; ā, kua riro i a ia.” Nā, ka mea tērā ki te kīngi o Īharaira, “Patua ki te whenua; ā, e toru āna patunga, ka tū.”
2KI 13:19 Nā, ka riri te tangata a te Atua ki a ia, ka mea, “Kia rima kē he patunga māu, kia ono rānei; pēnei kua patua e koe a Hīria ā poto noa; ko tēnei kia toru anō patunga māu i a Hīria.”
2KI 13:20 Nā, ka mate a Eriha, ā, tanumia ana e rātou. Ā, ka haere mai ngā taua a ngā Moapi ki te whenua i te aranga o te tau.
2KI 13:21 Nā, i a rātou e tanu ana i tētahi tangata, ka kite rātou i te taua; heoi makā ana e rātou taua tangata ki te rua o Eriha; te pānga o te tangata rā ki ngā wheua o Eriha, kua ora, tū ana ōna waewae ki runga.
2KI 13:22 Ā, i tūkinotia a Īharaira e Hataere kīngi o Hīria i ngā rā katoa o Iehoahata.
2KI 13:23 Otirā, i atawhai a Ihowā ki a rātou, i aroha ki a rātou, i tahuri hoki ki a rātou, he whakaaro ki tāna kawenata ki a Āperahama, ki a Īhaka, ki a Hākopa, kīhai hoki i mea kia hunā rātou, kīanō hoki rātou i makā e ia i tōna aroaro.
2KI 13:24 Nā, ka mate a Hataere kīngi o Hīria; ā, ko Pēneharara, ko tāna tama te kīngi i muri i a ia.
2KI 13:25 Nā, tangohia ana e Iehoaha tama a Iehoahata i te ringa o Pēneharara tama a Hataere ngā pā i tangohia atu i te ringa o Iehoahata, o tōna pāpā i te whawhai. E toru ngā patunga a Ioaha i a ia, ā, whakahokia ana e ia ngā pā o Īharaira.
2KI 14:1 Nō te rua o ngā tau o Ioaha tama a Iehoahata kīngi o Īharaira i kīngi ai a Amatia tama a Ioaha kīngi o Hūrā.
2KI 14:2 E rua tekau mā rima ōna tau i a ia ka kīngi nei, ā, e rua tekau mā iwa ngā tau i kīngi ai ia ki Hiruhārama. Ko te ingoa hoki o tōna whaea ko Iehoarana, nō Hiruhārama.
2KI 14:3 Ā, he tika tāna mahi ki te titiro a Ihowā, otiia kīhai i rite ki tā tōna tupuna, ki tā Rāwiri. Rite tonu tāna mahi ki ngā mea katoa i mea ai tōna pāpā a Ioaha.
2KI 14:4 Ko ngā wāhi tiketike ia kāhore i whakakāhoretia; i patu whakahere tonu anō te iwi, i tahu whakakakara ki ngā wāhi tiketike.
2KI 14:5 Ā, nō te ūnga o te kīngitanga ki tōna ringa, ka patua e ia āna tāngata, nāna rā i patu te kīngi, tōna pāpā.
2KI 14:6 Ko ngā tamariki ia a ngā kaikōhuru kīhai i whakamatea e ia, kia rite ai ki te mea i tuhituhia ki te Pukapuka o te Ture a Mohi, ki tā Ihowā hoki i whakahau ai, i kī ai, “Kaua e whakamatea ngā mātua mō tā ngā tamariki, kaua anō hoki e whakamatea ngā tamariki mō tā ngā mātua; engari mate iho tēnei, tēnei, mō tōna hara ake.”
2KI 14:7 I patua e ia o ngā Ēromi ki te Raorao Tote tekau ngā mano, ā, riro ana i a ia a Hera i te whawhai, ā, huaina iho e ia te ingoa ko Iokoteere, e mau nei ā taea noatia tēnei rā.
2KI 14:8 Kātahi a Amatia ka unga tāngata ki a Iehoaha tama a Iehoahata tama a Iehu kīngi o Īharaira, ka mea, “Haere mai, tāua ka titiro ki a tāua.”
2KI 14:9 Nā, ka unga tāngata a Iehoaha kīngi o Īharaira ki a Amatia kīngi o Hūrā, hei mea: “I unga tāngata te tātarāmoa i Repanōna ki te hīta i Repanōna, i mea, ‘Hōmai tāu tamāhine hei wahine mā tāku tama.’ Nā, ko te haerenga atu o tētahi kararehe o te pārae i Repanōna, takahia iho e ia taua tātarāmoa.
2KI 14:10 He tika i patua e koe a Ēroma, ā, hikitia ana koe e tōu ngākau; ko tēnā hei whakapehapeha māu, ka noho i tōu whare. He aha koe ka whakapātaritari ai, hei kino anō mōu, e hinga ai koe, a koe me Hūrā?”
2KI 14:11 Otiia kīhai a Amatia i rongo. Nā, haere ana a Iehoaha kīngi o Īharaira, ā, titiro ana rāua ko Amatia kīngi o Hūrā ki a rāua ki Petehemehe o Hūrā.
2KI 14:12 Nā, ka patua a Hūrā i te aroaro o Īharaira, ā, rere ana ki tōna tēneti, ki tōna tēneti.
2KI 14:13 Nā, ka hopukia a Amatia kīngi o Hūrā tama a Iehoaha, tama a Ahatia, e Iehoaha kīngi o Īharaira ki Petehemehe. Nā, ka haere tērā ki Hiruhārama, wāhia ana e ia te taiepa o Hiruhārama i te Kūwaha o Ēparaima tae noa ki te Kūwaha o te Koki, e whā rau ngā whatīanga.
2KI 14:14 Tangohia ake hoki e ia te kōura katoa me te hiriwa, me ngā oko katoa i kitea ki te whare o Ihowā, ki ngā taonga o te whare o te kīngi, me ētahi tāngata hei taumau i te āta noho, ā, hoki ana ki Hamaria.
2KI 14:15 Nā, ko ērā atu meatanga i mea ai a Iehoaha me āna mahi toa, me tāna whawhai ki a Amatia kīngi o Hūrā, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Īharaira?
2KI 14:16 Nā, ka moe a Iehoaha ki ōna mātua, ā, tanumia ana ki Hamaria ki ngā kīngi o Īharaira; ā, ko tāna tama, ko Ieropoama te kīngi i muri i a ia.
2KI 14:17 Ā, kotahi tekau mā rima ngā tau i ora ai a Amatia tama a Ioaha kīngi o Hūrā i muri i te matenga o Iehoaha tama a Iehoahata kīngi o Īharaira.
2KI 14:18 Nā, ko ērā atu meatanga a Amatia, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Hūrā?
2KI 14:19 Nā, ka whakatupu rātou i te hē mōna ki Hiruhārama; ā, rere ana ia ki Rakihi. Otiia, i tonoa e rātou he tāngata ki te whai i a ia ki Rakihi, ā, patua iho ia ki reira.
2KI 14:20 Nā, mauria ana ia i runga hōiho, ā, tanumia ana ki Hiruhārama ki ōna mātua ki te pā o Rāwiri.
2KI 14:21 Nā, ka mau te iwi katoa o Hūrā ki a Atāria, tekau mā ono ōna tau, ā, meinga ana ia e rātou hei kīngi i muri i tōna pāpā, i a Amatia.
2KI 14:22 Nāna Erata i hanga, i whakahoki anō ki a Hūrā, i muri iho ka moe te kīngi ki ōna mātua.
2KI 14:23 Nō te tekau mā rima o ngā tau o Amatia tama a Ioaha kīngi o Hūrā i kīngi ai a Ieropoama tama a Ioaha kīngi o Īharaira ki Hamaria, e whā tekau mā tahi ngā tau i kīngi ai ia.
2KI 14:24 Ā, he kino tāna mahi ki te titiro a Ihowā; kīhai i mahue i a ia tētahi hara o Ieropoama tama a Nēpata i hara ai a Īharaira
2KI 14:25 Nāna i whakahoki te rohe o Īharaira, i te haerenga atu ki Hāmata ā tae noa ki te moana o te Arapaha; i rite ai te kupu a Ihowā, a te Atua o Īharaira, arā tā tāna pononga, tā Hona poropiti tama a Amitai o Katahewhere i kōrero ai.
2KI 14:26 I kite hoki a Ihowā i te tūkinotanga o Īharaira, he kino rawa; kīhai tētahi i tūtakina ki roto, i mahue noa atu rānei, kāhore hoki he kaiwhakaora mō Īharaira.
2KI 14:27 Kīhai hoki a Ihowā i kī kia horoia atu te ingoa o Īharaira i raro i te rangi; engari i meinga e ia kia whakaorangia rātou e te ringa o Ieropoama tama a Ioaha.
2KI 14:28 Nā, ko ērā atu meatanga a Ieropoama me āna mahi katoa, me āna mahi toa, āna whawhai, tāna whakahokinga i Ramahiku, i Hāmata, nō Hūrā rā i mua, ki a Īharaira, kīhai ianei i tuhituhia ki te Pukapuka o ngā meatanga o Ngā Rā o Ngā Kīngi o Īharaira?
2KI 14:29 Nā, ka moe a Ieropoama ki ōna mātua, ki ngā kīngi o Īharaira; ā, ko tāna tama, ko Hakaraia, te kīngi i muri i a ia.
2KI 15:1 Nō te rua tekau mā whitu o ngā tau o Ieropoama kīngi o Īharaira i kīngi ai a Atāria tama a Amatia, kīngi o Hūrā.
2KI 15:2 Tekau mā ono ōna tau i a ia ka kīngi nei, ā, e rima tekau mā rua ngā tau i kīngi ai ia ki Hiruhārama. Ā, ko te ingoa o tōna whaea ko Iekoria, nō Hiruhārama.
2KI 15:3 Ā, i tika tāna mahi ki te titiro a Ihowā, i rite ki ngā mea katoa i mea ai a Amatia, tōna pāpā.
2KI 15:4 Otiia kīhai i whakakāhoretia ngā wāhi tiketike; i patu whakahere tonu anō te iwi, i tahu whakakakara ki ngā wāhi tiketike.
2KI 15:5 Nā, pākia ana te kīngi e Ihowā, ā, he repera ia ā mate noa, ā, noho ana ia i te whare wehe kē. Nā, ko Iotama, ko te tama a te kīngi, te rangatira o te whare, hei kaiwhakarite mō te iwi o te whenua.
2KI 15:6 Nā, ko ērā atu meatanga a Atāria me āna mahi katoa, kīhai ianei i tuhituhia ki te Pukapuka o ngā meatanga o Ngā Rā o Ngā Kīngi o Hūrā?
2KI 15:7 Nā, ka moe a Atāria ki ōna mātua, ā, tanumia iho ki ōna mātua ki te pā o Rāwiri; ā, ko Iotama, ko tāna tama, te kīngi i muri i a ia.
2KI 15:8 Nō te toru tekau mā waru o ngā tau o Atāria kīngi o Hūrā i kīngi ai a Hakaraia tama a Ieropoama ki a Īharaira, ki Hamaria, e ono ngā marama.
2KI 15:9 Ā, he kino tāna mahi ki te titiro a Ihowā, i rite ki tā ōna mātua i mea ai; kīhai i mahue i a ia ngā hara o Ieropoama tama a Nēpata i hara ai a Īharaira.
2KI 15:10 Nā, ka whakatupu a Harumu tama a Iapehe i te hē mōna, ā, patua ana e ia i te aroaro o te iwi, whakamatea iho, ā, ko ia te kīngi i muri i a ia.
2KI 15:11 Nā, ko ērā atu meatanga a Hakaraia, nanā, kua oti te tuhituhi ki te Pukapuka o ngā meatanga o Ngā Rā o Ngā Kīngi o Īharaira.
2KI 15:12 Ko te kupu hoki tēnā a Ihowā i kōrero ai ia ki a Iehu, i mea ai, “E whā ngā whakatupuranga o āu tama e noho ki te torōna o Īharaira.” Nā, koia rawa anō ia.
2KI 15:13 Nō te toru tekau mā iwa o ngā tau o Utia kīngi o Hūrā i kīngi ai a Harumu tama a Iapehe, ā, kotahi tino marama i kīngi ai ia ki Hamaria.
2KI 15:14 Nā, haere ake ana a Menaheme tama a Kari i Tirita, tae tonu ki Hamaria, patua iho e ia a Harumu tama a Iapehe ki Hamaria, whakamatea iho; ā, ko ia te kīngi i muri i a ia.
2KI 15:15 Nā, ko ērā atu meatanga a Harumu me tāna hē i whakatupuria e ia, nanā, kua oti te tuhituhi ki te Pukapuka o ngā meatanga o Ngā Rā o Ngā Kīngi o Īharaira.
2KI 15:16 Nā, ka patua e Menaheme a Tipiha me ngā mea katoa i roto, me ōna rohe katoa, o Tirita mai anō; mō rātou kīhai i uaki ki a ia; koia i patua ai. Ripiripia ake hoki e ia ngā wāhine hapū katoa o reira.
2KI 15:17 Nō te toru tekau mā iwa o ngā tau o Atāria kīngi o Hūrā i kīngi ai a Menaheme tama a Kari ki a Īharaira ki Hamaria, ā, kotahi tekau ōna tau i kīngi ai.
2KI 15:18 Ā, he kino tāna mahi ki te titiro a Ihowā. Kīhai i mahue i a ia i ōna rā katoa ngā hara o Ieropoama tama a Nēpata i mea nei i a Īharaira kia hara.
2KI 15:19 Nā, ka whakaekea te whenua e Puru kīngi o Ahiria; ā, ka hoatu e Menaheme ētahi taranata hiriwa kotahi mano ki a Puru, kia ai ai tōna ringa hei āwhina mōna, kia ū ai te kīngitanga ki tōna ringa.
2KI 15:20 Nā, tangohia ana e Menaheme te hiriwa i a Īharaira, i ngā tāngata taonga nui katoa, hei hoatu māna ki te kīngi o Ahiria; e rima tekau hekere a tēnei, a tēnei. Nā, hoki ana te kīngi o Ahiria, kīhai hoki i noho ki taua whenua.
2KI 15:21 Nā, ko ērā atu meatanga a Menaheme me āna mahi katoa, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Īharaira?
2KI 15:22 Nā, ka moe a Menaheme ki ōna mātua, ā, ko tāna tama, ko Pekahia te kīngi i muri i a ia.
2KI 15:23 Nō te rima tekau o ngā tau o Atāria kīngi o Hūrā i kīngi ai a Pekahia tama a Menaheme ki a Īharaira ki Hamaria, ā, e rua ngā tau i kīngi ai.
2KI 15:24 Ā, he kino tāna mahi ki te titiro a Ihowā; kīhai hoki i mahue i a ia ngā hara o Ieropoama tama a Nēpata i hara ai a Īharaira.
2KI 15:25 Nā, ka whakatupuria he hē mōna e tētahi o āna rangatira, e Peka tama a Remaria, patua iho ia ki Hamaria ki te tino wāhi o te whare o te kīngi, rātou ko Ārakopa, ko Arie, me ōna hoa, ngā Kireari, e rima tekau tāngata. Nā, whakamatea ana ia e ia, ko ia anō te kīngi i muri i a ia.
2KI 15:26 Nā, ko ērā atu meatanga a Pekahia me āna mahi katoa, nanā, kua oti te tuhituhi ki te Pukapuka o ngā meatanga o Ngā Rā o Ngā Kīngi o Īharaira.
2KI 15:27 Nō te rima tekau mā rua o ngā tau o Atāria kīngi o Hūrā i kīngi ai a Peka tama a Remaria ki a Īharaira ki Hamaria, ā, e rua tekau ngā tau i kīngi ai.
2KI 15:28 Ā, he kino tāna mahi ki te titiro a Ihowā; kīhai i mahue i a ia ngā hara o Ieropoama tama a Nēpata i hara ai a Īharaira.
2KI 15:29 I ngā rā o Peka kīngi o Īharaira, ka haere mai a Tikirata Pirehere kīngi o Ahiria, ā, riro ana i a ia a Īono, a Apere Petemaaka, a Ianoha, a Kerehe, a Hatoro, a Kireara, a Karirī, te whenua katoa o Napatari, whakahekea atu ana rātou e ia ki Ahiria.
2KI 15:30 Nā, ka whakatupu a Hohea tama a Eraha i te hē mō Peka tama a Remaria, patua iho e ia, whakamatea iho; ā, ko ia te kīngi i muri i a ia, i te rua tekau o ngā tau o Iotama tama a Utia.
2KI 15:31 Nā, ko ērā atu meatanga a Peka me āna mahi katoa, nanā, kua oti te tuhituhi ki te Pukapuka o ngā meatanga o Ngā Rā o Ngā Kīngi o Īharaira.
2KI 15:32 Nō te rua o ngā tau o Peka tama a Remaria kīngi o Īharaira i kīngi ai a Iotama tama a Utia kīngi o Hūrā.
2KI 15:33 E rua tekau mā rima ōna tau i a ia ka kīngi nei, ā, kotahi tekau mā ono ngā tau i kīngi ai ia ki Hiruhārama. Ā, ko te ingoa o tōna whaea ko Ieruha, he tamāhine nā Hāroko.
2KI 15:34 Ā, i tika tāna mahi ki te titiro a Ihowā, i rite āna mahi ki ngā mea katoa a tōna pāpā, a Utia.
2KI 15:35 Ko ngā wāhi tiketike ia kīhai i whakakāhoretia; i patu whakahere tonu te iwi, i tahu whakakakara ki ngā wāhi tiketike. Nāna i hanga te Kūwaha o Runga o te whare o Ihowā.
2KI 15:36 Nā, ko ērā atu meatanga a Iotama me āna mahi katoa, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Hūrā?
2KI 15:37 I aua rā ka tīmata a Ihowā te unga i a Retini kīngi o Hīria rāua ko Peka tama a Remaria ki a Hūrā.
2KI 15:38 Nā, ka moe a Iotama ki ōna mātua, ā, tanumia iho ki ōna mātua ki te pā o tōna tupuna, o Rāwiri; ā ko Ahata, ko tāna tama, te kīngi i muri i a ia.
2KI 16:1 Nō te tekau mā whitu o ngā tau o Peka tama a Remaria, i kīngi ai a Ahata tama a Iotama kīngi o Hūrā.
2KI 16:2 E rua tekau ngā tau o Ahata i a ia ka kīngi nei; ā, kotahi tekau mā ono ngā tau i kīngi ai ia ki Hiruhārama. Nā, kīhai i tika tāna mahi ki te titiro a Ihowā, a tōna Atua, kīhai i rite ki tā tōna tupuna, ki tā Rāwiri.
2KI 16:3 Engari i haere ia i te ara o ngā kīngi o Īharaira, i mea hoki i tāna tama kia tika nā waenganui o te ahi, kia pērā me ngā meatanga whakarihariha a ngā tauiwi i peia nei e Ihowā i te aroaro o ngā tama a Īharaira.
2KI 16:4 Ā, i patu whakahere ia, i tahu whakakakara ki ngā wāhi tiketike, ki ngā pukepuke, ki raro i ngā rākau kōuru nui.
2KI 16:5 Kātahi ka haere mai a Retini kīngi o Hīria rāua ko Peka tama a Remaria, kīngi o Īharaira ki Hiruhārama, whawhai ai. Nā, whakapaea ana a Ahata e rāua, otiia, kīhai i hinga i a rāua.
2KI 16:6 I taua wā ka whakahokia e Retini kīngi o Hīria a Erata ki Hīria, ā, peia ana ngā Hūrai i Erata. Nā, haere mai ana ngā Hīriani ki Erata, ā, nohoia ana a reira ā taea noatia tēnei rā.
2KI 16:7 Heoi, tukua ana e Ahata he karere ki a Tikirata Pirehere kīngi o Ahiria hei kī atu, “He pononga ahau nāu, he tama hoki; haere mai, whakaorangia ahau i te ringa o te kīngi o Hīria, i te ringa anō o te kīngi o Īharaira, kua whakatika mai nei ki ahau.”
2KI 16:8 Nā, ka mau a Ahata ki te hiriwa, ki te kōura i kitea ki te whare o Ihowā, ki ngā taonga hoki o te whare o te kīngi, ā, tukua ana e ia kia kawea hei hākari ki te kīngi o Ahiria.
2KI 16:9 Nā, rongo ana te kīngi o Ahiria ki a ia; ā, haere ana te kīngi o Ahiria ki Ramahiku, ā, riro ana i a ia, whakahekea ana e ia ōna tāngata ki Kiri, ā, patua ana a Retini.
2KI 16:10 Nā, haere ana a Kīngi Ahata ki Ramahiku ki te whakatau i a Tikirata Pirehere kīngi o Ahiria, ā, ka kite i te āta i Ramahiku. Nā, ka tukua e Kīngi Ahata ki a Uria tohunga te āhua o taua āta, me tōna tauira me ōna mahinga katoa.
2KI 16:11 Nā, ka hangā e te tohunga, e Uria, he āta; rite tonu ki ngā mea katoa, i tukua mai nei e Kīngi Ahata i Ramahiku tā te tohunga, tā Uria i mahi ai, mō te tae rawa mai o Kīngi Ahata i Ramahiku.
2KI 16:12 Ā, nō te taenga mai o te kīngi i Ramahiku, ka kite te kīngi i te āta; ā, ka whakatata te kīngi ki te āta, ka tāpae whakahere i runga.
2KI 16:13 Nā, ka tahuna e ia tāna tahunga tinana me tāna whakahere totokore, ka ringihia tāna ringihanga, ā, tāuhiuhia ana ngā toto o āna whakahere mō te pai ki runga ki te āta.
2KI 16:14 Nā, ko te āta parāhi, ko tērā i te aroaro o Ihowā, nekehia mai ana e ia i mua o te whare, i te takiwā o tāna āta, o te whare o Ihowā, ā, whakatūria ana ki te taha tūāraki o tāna āta.
2KI 16:15 Ā, ka whakahau a Kīngi Ahata i te tohunga, i a Uria, ka mea: “Tahuna ki te āta nui te tahunga tinana o te ata, te whakahere totokore o te ahiahi, te tahunga tinana a te kīngi, me tāna whakahere totokore, te tahunga tinana hoki a te iwi katoa o te whenua, me tā rātou whakahere totokore me ā rātou ringihanga; ā, me tāuhiuhi anō ki reira ngā toto katoa o te tahunga tinana, me ngā toto katoa o te patunga tapu; engari, ko te āta parāhi hei mea ui māku.”
2KI 16:16 Nā, rite tonu tā Uria tohunga mea ai ki ngā mea katoa i whakahaua e Kīngi Ahata.
2KI 16:17 I tapahia hoki e Kīngi Ahata ngā awhi o ngā tūranga, tangohia ana e ia te takotoranga wai o runga o aua mea; i tangohia anō e ia te moana i runga i ngā kau parāhi, i ērā i raro i taua moana, ā, whakatakotoria ana ki runga ki te whāriki kōhatu.
2KI 16:18 Ā, ko te taupoki mō te hāpati i hangā nei ki roto ki te whare, me te tomokanga o te kīngi i waho, whakaangahia ana e ia ki te whare o Ihowā, he whakaaro ki te kīngi o Ahiria.
2KI 16:19 Nā, ko ērā atu meatanga i mea ai a Ahata, kīhai ianei i tuhituhia ki te Pukapuka o ngā meatanga o Ngā Rā o Ngā Kīngi o Hūrā?
2KI 16:20 Nā, ka moe a Ahata ki ōna mātua, ā, tanumia iho ki ōna mātua, ki te pā o Rāwiri; ā, ko Hetekia, ko tāna tama, te kīngi i muri i a ia.
2KI 17:1 Nō te tekau mā rua o ngā tau o Ahata kīngi o Hūrā i kīngi ai a Hohea tama a Eraha ki Hamaria, ki a Īharaira, ā, e iwa ngā tau i kīngi ai ia.
2KI 17:2 I kino tāna mahi ki te titiro a Ihowā; otiia, kīhai i rite ki tā ngā kīngi o Īharaira i mua atu i a ia.
2KI 17:3 I whakaekea ia e Hāramanehere kīngi o Ahiria; ā, ka riro a Hohea hei pononga māna, ka mau hākari hoki ki a ia.
2KI 17:4 Nā, ka mau i te kīngi o Ahiria e whakatupu hē ana a Hohea; i tukua hoki e ia he karere ki a Ho kīngi o Īhipa, ā, kīhai i kawe hākari ki te kīngi o Ahiria, pērā i tāna i kawe ai i ērā atu tau. Nā, tūtakina ana ia e te kīngi o Ahiria, hereherea ana ki te whare herehere.
2KI 17:5 Kātahi ka whakaekea te whenua katoa e te kīngi o Ahiria, haere ana ia ki Hamaria, whakapaea ana, e toru tau.
2KI 17:6 I te iwa o ngā tau o Hohea ka horo Hamaria i te kīngi o Ahiria, ā, whakahekea atu ana e ia a Īharaira ki Ahiria, ā, whakanohoia ana ki Haraha, ki Haporo, i te taha o te awa, o Kotana, ā, ki ngā pā o ngā Meri.
2KI 17:7 I pērā ai, mō te hara o ngā tama a Īharaira ki a Ihowā, ki tō rātou Atua, nāna nei rātou i kawe mai i te whenua o Īhipa i raro i te ringa o Parao kīngi o Īhipa, mō rātou i wehi i ngā atua kē,
2KI 17:8 ā, haere ana i runga i ngā tikanga a ngā iwi i peia nei e Ihowā i mua i ngā tama a Īharaira, a ngā kīngi hoki o Īharaira i whakakīngitia nei e rātou.
2KI 17:9 Ā, mahi puku ana ngā tama a Īharaira i ngā mea kīhai i tika ki tā Ihowā, ki tā tō rātou Atua, hangā ana e rātou ētahi wāhi tiketike mā rātou ki ō rātou pā katoa, ki te taumaihi a ngā kaitūtei, ki te pā whai taiepa.
2KI 17:10 Whakatūria ana e rātou he whakapakoko, he Aherimi ki runga ki ngā pukepuke tiketike katoa, ki raro hoki i ngā rākau kōuru nui katoa.
2KI 17:11 Tahuna ana e rātou he whakakakara ki reira, ki ngā wāhi tiketike katoa, pērā ana me ngā iwi i whakahekea atu nei e Ihowā i mua i a rātou; mahia ana e rātou ngā mahi kikino katoa hei whakapātaritari i a Ihowā;
2KI 17:12 mahi ana hoki rātou ki ngā whakapakoko i kī ai a Ihowā ki a rātou, “Kaua e meatia e koutou tēnei mea.”
2KI 17:13 Otiia i whakaaturia e Ihowā te hē o Īharaira, o Hūrā, he mea kōrero nā ngā poropiti katoa, nā ngā matakite katoa; i mea ia, “Hoki mai i ō koutou ara hē, puritia āku whakahau me āku tikanga, kia rite ki te ture katoa i whakahaua e ahau ki ō koutou mātua, ki tāku i unga ai ki a koutou, he mea kōrero nā āku pononga, nā ngā poropiti.”
2KI 17:14 Heoi, kīhai rātou i rongo, engari whakapakeke ana i ō rātou kakī, kia pērā me ngā kakī o ō rātou mātua, kīhai nei i whakapono ki a Ihowā, ki tō rātou Atua.
2KI 17:15 Whākorekore ana rātou ki āna tikanga, ki tāna kawenata hoki i whakaritea e ia ki ō rātou mātua, ki āna whakaaturanga i whakaaturia e ia ki a rātou; i whai rātou i ngā mea tekateka noa, ā, teka noa iho rātou, arumia ana e rātou ngā iwi i tētahi taha o rātou, i tētahi taha, ērā i ako rā a Ihowā ki a rātou, kia kaua e rite te mahi ki tā rātou.
2KI 17:16 Nā, whakarērea ana e rātou ngā whakahau katoa a Ihowā, a tō rātou Atua, ā, hangā ana he whakapakoko whakarewa mā rātou, ko ngā kūao kau e rua; i hangā anō e rātou he Āherea, ā, koropiko ana ki te ope katoa o te rangi, mahi ana ki a Paara.
2KI 17:17 I meinga anō e rātou ā rātou tama me ā rātou tamāhine kia tika nā waenganui i te ahi; i tahuri ki ngā tohu, ki ngā karakia māori; i hoko hoki i a rātou hei mahi i te kino ki te titiro a Ihowā, hei whakapātaritari i a ia.
2KI 17:18 Nā reira nui atu te riri o Ihowā ki a Īharaira, ā, nekehia atu ana rātou e ia i tōna aroaro; kīhai tētahi i mahue, ko te iwi anake o Hūrā.
2KI 17:19 Me Hūrā hoki, kīhai rātou i pupuri i ngā whakahau a Ihowā, a tō rātou Atua, heoi haere ana i runga i ngā tikanga i whakatakotoria e Īharaira.
2KI 17:20 Nā, whakakorekore ana a Ihowā ki ngā uri katoa o Īharaira, whakawhiua ana rātou e ia, hoatu ana ki ngā ringa o ngā kaipāhua, ā, makā noatia atu rātou e ia i tōna aroaro.
2KI 17:21 I tītorehia atu hoki e ia a Īharaira i te whare o Rāwiri, ā, meinga ana e rātou a Ieropoama tama a Nēpata hei kīngi; nā, āia ana a Īharaira e Ieropoama, kia kaua e whai i a Ihowā, ā, nāna rātou i hara ai, he nui te hara.
2KI 17:22 Nā, haere ana ngā tama a Īharaira i ngā hara katoa i hara ai a Ieropoama; kīhai rātou i mawehe atu i reira.
2KI 17:23 Ā, nekehia atu rā anō a Īharaira e Ihowā i tōna aroaro; ko tāna hoki tēnā i kī ai, he mea kōrero nā āna pononga katoa, nā ngā poropiti. Nā, ka whakahekea atu a Īharaira i tō rātou whenua ki Ahiria ā mohoa noa nei.
2KI 17:24 Nā, ka kawea mai e te kīngi o Ahiria he tāngata i Papurōna, i Kuta, i Awa, i Hāmata, i Hēparawaima, ā, whakanohoia ana ki ngā pā o Hamaria, ki ngā wāhi o ngā tama a Īharaira. Nā, kua riro a Hamaria i a rātou, ā, nohoia ana e rātou ngā pā o reira.
2KI 17:25 Nā, i te tīmatanga o tō rātou noho i reira, kīhai rātou i wehi i a Ihowā. Heoi, ungā ana e Ihowā he raiona ki a rātou, ā, whakamatea iho ētahi o rātou.
2KI 17:26 Nā reira ka kōrero ētahi ki te kīngi o Ahiria, ka mea, “Ko ngā iwi i whakahekea rā e koe, i whakanohoia rā ki ngā pā o Hamaria, kāhore e mātau ki ngā ritenga a te Atua o te whenua; nā reira ka ungā e ia he raiona ki a rātou. Nā, ka whakamatea nei rātou, mō rātou kāhore e mātau ki ngā ritenga a te Atua o te whenua.”
2KI 17:27 Kātahi ka whakahau te kīngi o Ahiria, ka mea: “Mauria ki reira tētahi o ngā tohunga i whakahekea mai nei e koutou i reira; ā, mā rātou e haere ki reira noho ai, māna hoki rātou e whakaako ki ngā ritenga a te Atua o te whenua.”
2KI 17:28 Kātahi ka haere tētahi o ngā tohunga i whakahekea atu i Hamaria, ā, noho ana ki Pētēre, ā, nāna rātou i whakaako ki te tikanga mō tō rātou wehi i a Ihowā.
2KI 17:29 Otiia i hangā e tēnei iwi, e tēnei iwi he atua ake mōna, ā, whakanohoia ana ki ngā whare o ngā wāhi tiketike i hangā nei e ngā Hamari; e tēnei iwi, e tēnei iwi, ki ō rātou pā i noho ai rātou.
2KI 17:30 Nā, ka hangaia e ngā tāngata o Papurōna a Hukoto Penoto; nā ngā tāngata o Kutu i hanga a Nerekara; nā ngā tāngata o Hāmata i hanga a Ahima;
2KI 17:31 ā, nā ngā Awi i hanga a Nipihata rāua ko Tarataka. I tahuna hoki e ngā Heparawaimi ā rātou tamariki ki te ahi, hei mea ki a Ataramereke rāua ko Anamereke, atua o Hēparawaima.
2KI 17:32 Heoi, wehi ana rātou i a Ihowā, ā, whakatohungatia ana e rātou nō rātou anō hei tohunga mā rātou mō ngā wāhi tiketike; ā, ko ērā hei kaimahi mā rātou mō ngā mea tapu i ngā whare o ngā wāhi tiketike.
2KI 17:33 I wehi rātou i a Ihowā, me te mahi anō ki ō rātou atua; pērā ana i ngā iwi i whakahekea atu nei rātou i reira.
2KI 17:34 Rite tonu ki ō mua ritenga ā rātou mahi ā taea noatia tēnei rā; kāhore ō rātou wehi i a Ihowā, kāhore hoki ā rātou mahi e rite ki ā rātou tikanga, ki ā rātou whakaritenga, ki te ture, ki te whakahau rānei i whakahau ai a Ihowā i ngā tama a Hākopa, ko tāna ingoa nei mōna ko Īharaira.
2KI 17:35 I whakarite kawenata nei a Ihowā ki a rātou, i whakahau hoki i a rātou, i mea, “Kaua e wehi i ngā atua kē, kaua hoki e koropiko ki a rātou, kaua e mahi ki a rātou, kaua hoki e patu whakahere ki a rātou.
2KI 17:36 Engari a Ihowā, nāna nei koutou i kawe mai i te whenua o Īhipa i runga i te kaha nui, i te ringa mārō, ko ia tā koutou e wehi ai, ko ia tā koutou e koropiko ai; me patu whakahere anō ki a ia.
2KI 17:37 Nā, ko ngā tikanga me ngā whakaritenga, ko te ture me te whakahau, kua oti nā te tuhituhi e ia mō koutou, me pupuri e koutou, me mahi i ngā rā katoa; kaua hoki e wehi i ngā atua kē.
2KI 17:38 Kaua hoki e wareware ki te kawenata i whakaritea e ahau ki a koutou; kaua hoki e wehi ki ngā atua kē;
2KI 17:39 engari, ko Ihowā, ko tō koutou Atua, tā koutou e wehi ai, ā, māna koutou e whakaora i te ringa o ō koutou hoariri katoa.”
2KI 17:40 Otiia kīhai rātou i rongo; nā, rite tonu ki ngā ritenga ō mua tā rātou i mea ai.
2KI 17:41 Heoi, wehi ana aua iwi i a Ihowā, me te mahi anō ki ō rātou whakapakoko; i pērā anō ā rātou tamariki, me ngā tamariki a ā rātou tamariki, me ō rātou mātua, ā taea noatia tēnei rā.
2KI 18:1 Nā, nō te toru o ngā tau o Hohea tama a Eraha kīngi o Īharaira, i kīngi ai a Hetekia tama a Ahata kīngi o Hūrā.
2KI 18:2 E rua tekau mā rima ōna tau i tōna kīngitanga, ā, e rua tekau mā iwa ngā tau i kīngi ai ia ki Hiruhārama; ā, ko te ingoa o tōna whaea ko Api, he tamāhine nā Hakaraia.
2KI 18:3 Nā, he tika tāna mahi ki te titiro a Ihowā, i rite ki ngā mea katoa i mea ai a Rāwiri, tōna tupuna.
2KI 18:4 I whakakāhoretia e ia ngā wāhi tiketike, i tukitukia hoki ngā whakapakoko, tuaina ana e ia te Āhera. Ā, mongamonga ana i a ia te nākahi parāhi, i hangā nei e Mohi; tahu tonu ai hoki ngā tama a Īharaira i te whakakakara ki taua mea ā taea noatia taua rā; ā, tapā ana e ia, ko Nehuhatana.
2KI 18:5 I whakawhirinaki hoki ia ki a Ihowā, ki te Atua o Īharaira; nā, kāhore he rite mōna o ngā kīngi katoa o Hūrā i muri i a ia, o ērā rānei i mua atu i a ia.
2KI 18:6 I piri tonu hoki ia ki a Ihowā, kīhai i mahue te whai i a ia, engari i puritia e ia āna whakahau i whakahau ai a Ihowā ki a Mohi.
2KI 18:7 Nā, i a ia a Ihowā, ā, oti pai ana tāna i ngā wāhi katoa i haere ai ia. Nā, ka whakakeke ia ki te kīngi o Ahiria, ā, kīhai i mahi ki a ia.
2KI 18:8 I patua e ia ngā Pirihitini tae noa ki Kaha, ki ōna rohe, i te taumaihi o ngā kaitūtei ki te pā taiepa.
2KI 18:9 Nā, i te whā o ngā tau o Kīngi Hetekia, arā i te whitu o ngā tau o Hohea tama a Eraha kīngi o Īharaira, ka whakaekea Hamaria e Hāramanehere kīngi o Ahiria, whakapaea ana e ia.
2KI 18:10 Ā, i te mutunga o te toru o ngā tau, ka horo a reira i a rātou; arā nō te ono o ngā tau o Hetekia, koia rā te iwa o ngā tau o Hohea kīngi o Īharaira, ka horo Hamaria.
2KI 18:11 Nā, ka whakahekea e te kīngi o Ahiria a Īharaira ki Ahiria, whakanohoia ana e ia ki Haraha, ki Haporo, ki te taha o te awa o Kotana ki ngā pā anō hoki o ngā Meri.
2KI 18:12 Mō rātou kīhai i rongo ki te reo o Ihowā, o tō rātou Atua, engari takahia ana e rātou tāna kawenata me ngā mea katoa i whakahaua mai e Mohi, e tā Ihowā pononga; kīhai i whakarangona, kīhai i mahia.
2KI 18:13 Nā, nō te tekau mā whā o ngā tau o Kīngi Hetekia ka whakaekea ngā pā taiepa katoa o Hūrā e Henakeripi kīngi o Ahiria, ā, horo ana i a ia.
2KI 18:14 Nā, ka unga tāngata a Hetekia kīngi o Hūrā ki te kīngi o Ahiria ki Rakihi hei mea, “Kua hara ahau; hoki atu i ahau; ko tau e whakapīkau mai ai ki ahau ka pīkaua e ahau.” Nā, whakaritea ana e te kīngi o Ahiria ki a Hetekia kīngi o Hūrā kia toru rau taranata hiriwa, kia toru tekau hoki taranata kōura.
2KI 18:15 Nā, hoatu ana e Hetekia ki a ia te hiriwa katoa i kitea ki te whare o Ihowā, ki ngā taonga anō o te whare o te kīngi.
2KI 18:16 Nō taua wā anō ka tapahia e Hetekia te kōura o ngā tatau o te temepara o Ihowā, o ngā pou hoki i whakakikoruatia nei e Hetekia kīngi o Hūrā, ā, hoatu ana ki te kīngi o Ahiria.
2KI 18:17 Nā, ka ungā e te kīngi o Ahiria a Taratana, a Rapaharihi, a Rapahake i Rakihi ki a Kīngi Hetekia ki Hiruhārama, he nui te ope. Nā, haere ana rātou, ka tae ki Hiruhārama, ā, i tō rātou taenga atu, ka haere rātou, ka tū ki te awakeri o te puna wai o runga, o tērā i te huarahi o te māra a te kaihoroi kākahu.
2KI 18:18 Nā, ka karanga rātou ki te kīngi, ka puta atu ki a rātou a Eriakimi tama a Hirikia, te rangatira o te whare, a Hepena kaituhituhi, a Ioaha tama a Āhapa te kaiwhakamahara.
2KI 18:19 Nā, ka mea a Rapahake ki a rātou, “Kōrero atu āianei ki a Hetekia: “Ko te kupu tēnei a te kīngi nui, a te kīngi o Ahiria: He aha tēnei whakawhirinaki, e whakawhirinaki nā koe?
2KI 18:20 E mea nā koe, otiia he mea ngutu kau, Tēnei te ngārahu tika, te kaha mō te whawhai. Nā, e whakawhirinaki ana koe ki a wai, i whakakeke ai koe ki ahau?
2KI 18:21 Nanā, e whakawhirinaki ana koe ki tēnā kākaho pēpē hei tokotoko, ki a Īhipa; ki te pēhia iho e te tangata, ka ngoto ki roto ki tōna ringa, nā, kua tū. Ka pērā anō a Parao kīngi o Īhipa ki te hunga katoa e okioki ana ki a ia.
2KI 18:22 “Otiia ki te mea mai koutou ki ahau, ‘Ko Ihowā, ko tō mātou Atua tā mātou e whakawhirinaki nei,’ he teka ianei ko ia tēnā, nāna nei ngā wāhi tiketike, me ngā āta i whakakāhoretia atu nei e Hetekia, ā, kua mea ia ki a Hūrā rāua ko Hiruhārama, ‘Hei mua i tēnei āta i Hiruhārama koutou koropiko ai’?
2KI 18:23 “Nā, hōmai āianei he utu pupuri ki tōku ariki, ki te kīngi o Ahiria, ā, ka hoatu e ahau ki a koe ētahi hōiho, kia rua mano, ki te taea e koe te whakanoho kaieke ki runga.
2KI 18:24 Ā, me pēhea e taea ai e koe te pare atu te kanohi o tētahi rangatira kotahi o ngā iti rawa o ngā pononga a tōku ariki, ā, ka whakawhirinaki koe ki Īhipa hei hāriata, hei kaieke hōiho māu?
2KI 18:25 I haere kau mai rānei ahau, kāhore a Ihowā, ki te huna i tēnei wāhi? I mea a Ihowā ki ahau, ‘Haere ki te whenua rā huna ai.’ ”
2KI 18:26 Kātahi ka mea a Eriakimi tama a Hirikia rātou ko Hepena, ko Ioaha, ki a Rapahake, “Kōrero koa ki āu pononga i te reo Hīriani; e mātau ana hoki mātou ki tēnā reo; kaua e kōrero mai ki a mātou i te reo Hūrai i te mea e whakarongo ana te iwi i runga i te taiepa.”
2KI 18:27 Anō rā ko Rapahake ki a rātou, “I ungā mai rānei ahau e tōku ariki ki tōu ariki, ā, ki a koe, hei kōrero i ēnei kupu? He teka ianei i ungā mai ahau e ia ki ngā tāngata e noho ana i runga i te taiepa, kia kainga e rātou tō rātou paru, kia inumia tō rātou mimi, arā e koutou tahi?”
2KI 18:28 Kātahi a Rapahake ka tū, ā, he nui tōna reo ki te karanga i te reo Hūrai; i kōrero ia, i mea: “Whakarongo ki te kupu a te kīngi nui, a te kīngi o Ahiria.
2KI 18:29 Ko te kupu tēnei a te kīngi: Kei tinihangatia koutou e Hetekia; e kore hoki koutou e taea te whakaora e ia i tōna ringa.
2KI 18:30 Kei meinga hoki koutou e Hetekia kia whakawhirinaki ki a Ihowā, i a ia e kī nā, ‘He pono, tērā tātou e whakaorangia e Ihowā, e kore hoki tēnei pā e tukua ki te ringa o te kīngi o Ahiria.’
2KI 18:31 “Kaua e rongo ki a Hetekia; ko te kupu tēnei a te kīngi o Ahiria: ‘Houhia tā koutou rongo ki ahau, ka haere mai ki waho ki ahau; ka kai ai koutou i ngā hua o tāna wāina, o tāna wāina, o tāna piki, o tāna piki, ka inu anō i te wai o tāna puna, o tāna puna;
2KI 18:32 kia tae atu rā anō ahau ki te tiki atu i a koutou ki te whenua pēnei i tō koutou nei whenua, ki te whenua wīti, wāina, ki te whenua taro, māra wāina, ki te whenua hinu ōriwa, honi hoki, kia ora ai koutou, kei mate. “Kaua hoki e whakarongo ki a Hetekia, i a ia e tohe nā ki a koutou, e mea nā, ‘Mā Ihowā tātou e whakaora.’
2KI 18:33 I ora rānei i tētahi o ngā atua o ngā tauiwi tōna whenua i te ringa o te kīngi o Ahiria?
2KI 18:34 Kei hea ngā atua o Hāmata, o Ārapara? Kei hea ngā atua o Hēparawaima, o Hena, o Iwa? I whakaorangia rānei e rātou a Hamaria i tōku ringa?
2KI 18:35 Ko wai o ngā atua katoa o ngā whenua, kua whakaorangia e rātou tō rātou whenua i tōku ringa, e whakaorangia ai e Ihowā a Hiruhārama i tōku ringa?”
2KI 18:36 Otiia whakarongo kau ana tērā te iwi, kīhai i whakahoki kupu ki a ia; ko tā te kīngi hoki tēnā i ako ai, i kī ai, “Kaua e whakahoki kupu atu ki a ia.”
2KI 18:37 Kātahi ka haere a Eriakimi tama a Hirikia, te rangatira o te whare, a Hepena te kaituhituhi, a Ioaha tama a Āhapa te kaiwhakamahara ki a Hetekia, he mea haehae ō rātou kākahu, ā, kōrerotia ana e rātou ki a ia ngā kupu a Rapahake.
2KI 19:1 Nā, i te rongonga o Kīngi Hetekia, ka haea e ia ōna kākahu, ka hīpoki i a ia ki te kākahu taratara, haere ana ki te whare o Ihowā.
2KI 19:2 I ungā hoki e ia a Eriakimi, te rangatira o te whare, rātou ko Hepena kaituhituhi, ko ngā kaumātua o ngā tohunga, he mea hīpoki ki te kākahu taratara, ki a Ihāia poropiti tama a Āmoho.
2KI 19:3 Ā, ka mea rātou ki a ia, “Ko te kupu tēnei a Hetekia, Ko tēnei rā, he rā nō te raruraru, nō te whakatuma, nō te kohukohu; kua tae hoki ngā tamariki ki te whānautanga, heoi kāhore he kaha e whānau ai.
2KI 19:4 Tērā pea ka rongo a Ihowā, tōu Atua ki ngā kupu katoa a Rapahake i ungā mai nei e tōna ariki, e te kīngi o Ahiria, hei whākorekore ki te Atua ora; ā, ka riri ki ngā kupu i rongo ai a Ihowā, tōu Atua. Nā, kia ara tāu īnoi mō ngā toenga e noho nei.”
2KI 19:5 Heoi, kua tae ngā tāngata a Kīngi Hetekia ki a Ihāia,
2KI 19:6 ā, ka mea a Ihāia ki a rātou, “Kia pēnei tā koutou kōrero ki tō koutou ariki, ‘Ko te kupu tēnei a Ihowā: Kaua e wehi i ngā kupu i rongo nā koe, ki ēnā i kohukohu mai nā ngā tāngata a te kīngi o Ahiria ki ahau.
2KI 19:7 Nanā, ka hoatu e ahau he wairua ki roto ki a ia, ā, tērā ia e rongo i tētahi rongo, ka hoki ki tōna whenua, ā, ka meinga ia e ahau kia hinga i te hoari i tōna ake whenua.’ ”
2KI 19:8 Nā, ka hoki a Rapahake, ā, rokohanga atu e whawhai ana te kīngi o Ahiria ki Rīpina; i rongo hoki ia kua maunu mai ia i Rakihi.
2KI 19:9 Ā, nō tōna rongonga ki a Tirihaka, kīngi o Etiopia, ki te kōrero, “Nanā, kei te haere mai ia ki te whawhai ki a koe,” ka unga tāngata anō ia ki a Hetekia, hei mea atu,
2KI 19:10 “Kia pēnei tā koutou kī atu ki a Hetekia kīngi o Hūrā, mea atu: Kei tinihangatia koe e tōu Atua, e okioki atu nā koe, i a ia e kī nā, ‘E kore a Hiruhārama e hoatu ki te ringa o te kīngi o Ahiria.’
2KI 19:11 Nanā, tēnā koe kua rongo ki tā ngā kīngi o Ahiria i mea ai ki ngā whenua katoa, ki tā rātou hunanga i a rātou; ā, e ora rānei koe?
2KI 19:12 I ora rānei i ō rātou atua ngā tauiwi i hunā rā e ōku mātua, a Kotana, a Harana, a Retepe, me ngā tama a Erene, i Terahara rā?
2KI 19:13 Kei hea te kīngi o Hāmata, te kīngi o Ārapara, te kīngi o te pā o Hēparawaima, o Hena, o Iwa?”
2KI 19:14 Nā, ka riro mai i a Hetekia te pukapuka i te ringa o ngā karere, ā, ka kōrerotia e ia. Nā, haere ana a Hetekia ki runga, ki te whare o Ihowā, wherahia ana e ia ki te aroaro o Ihowā.
2KI 19:15 Nā, ka īnoi a Hetekia ki te aroaro o Ihowā, ka mea: “E Ihowā, e te Atua o Īharaira, e noho mai nā i runga o ngā kerupima, ko koe te Atua, ko koe anake, o ngā kīngitanga katoa o te whenua; nāu i hanga te rangi me te whenua.
2KI 19:16 Tahuri mai tōu taringa, e Ihowā, whakarongo mai; titiro mai ōu kanohi, e Ihowā, kia kite koe; whakarongo ki ngā kupu a Henakeripi, i unga mai nei i tēnei hei whākorekore mō te Atua ora.
2KI 19:17 “He tika anō e Ihowā, kua kore i ngā kīngi o Ahiria ngā iwi me ō rātou whenua,
2KI 19:18 kua makaia atu hoki ō rātou atua ki roto ki te ahi; ehara hoki ērā i te atua, engari he mahi nā te ringa tāngata, he rākau, he kōhatu; koia i hunā ai e rātou.
2KI 19:19 Tēnā rā, e Ihowā, e tō mātou Atua, whakaorangia mātou i tōna ringa, kia mōhio ai ngā kīngitanga katoa o te whenua ko Ihowā koe, ko te Atua, ko koe anake.”
2KI 19:20 Kātahi a Ihāia tama a Āmoho ka unga tāngata ki a Hetekia, hei mea: “Ko te kupu tēnei a Ihowā, a te Atua o Īharaira: I īnoi mai nā koe ki ahau mō Henakeripi kīngi o Ahiria, nā, kua rongo ahau ki a koe.
2KI 19:21 Ko tā Ihowā kupu tēnei i kōrero ai mōna: ‘Kua whakahāwea te tamāhine wāhina a Hiona ki a koe, kua kataina koe e ia; kua rūrū te mātenga o te tamāhine a Hiruhārama ki a koe.
2KI 19:22 Ko wai tāu i whākorekore nā, i kohukohu nā? Ki a wai tōu reo i whakarahia nā, tōu mata i kake nā ki runga? Ki te Mea Tapu o Īharaira!
2KI 19:23 Nā āu karere i whākorekore ai koe i te Ariki, kua mea nā koe, “Kake ana ahau, me aku tini hāriata, ki ngā wāhi tiketike o ngā maunga, ki ngā taha rawa o Repanōna; ā, ka tuaina e ahau ngā hīta roroa o reira me ō reira kauri papai; ā, ka tomo ahau ki te whare tira haere o tōna wāhi whakamutunga mai, ki te ngahere o tōna māra hua.
2KI 19:24 Kua keria e ahau, kua inumia anō ngā wai kē, ā, ka maroke i te kapu o tōku waewae ngā awa katoa o Īhipa.”
2KI 19:25 “ ‘Kāhore rānei koe i rongo nāku tēnā i mea i mua noa atu, ā, nāku tēnā i hanga o ngā rā onamata? Nō nāianei kua meinga e ahau, ko koe hei mea i ngā pā taiepa hei pūranga rukerukenga.
2KI 19:26 Koia i iti ai te kaha o ō reira tāngata; wehi ana rātou, pororaru ana. Rite tonu rātou ki te tarutaru o te pārae, ki te otaota matomato, ki te taru i runga i ngā tuanui, ki te wīti i ngingio i te mea kīanō i āta tupu noa.
2KI 19:27 “ ‘Otiia e mātau ana ahau ki tōu nohoanga iho, ki tōu haerenga atu, ki tōu haerenga mai, me tāu nananga ki ahau.
2KI 19:28 Mō tāu nananga ki ahau, ā, mō tāu whakakake kua tae mai nei ki ōku taringa, mō reira ka kuhua e ahau tāku matau ki tōu ihu, tāku paraire ki ōu ngutu, ā, ka whakahokia koe nā te ara i haere mai nā koe.’
2KI 19:29 “Ā, ko te tohu tēnei ki a koe: Ka kai koutou i tēnei tau i ngā mea tupu noa ake, ā, i te rua o ngā tau ko ngā tupu noa ake o te tau. Nā, hei te toru o ngā tau koutou whakatō ai, kokoti ai, whakatō ai i ngā māra wāina, kai iho ai i ngā hua.
2KI 19:30 Nā, tērā e hou anō whakararo ngā pakiaka o ngā mōrehu i mawhiti o te whare o Hūrā, ā, ka hua ngā hua whakarunga.
2KI 19:31 Nō te mea tērā e puta ake he toenga i Hiruhārama, he oranga i maunga Hiona; e taea hoki tēnei e te ngākau nui o Ihowā.
2KI 19:32 “Nā, ko tā Ihowā kupu tēnei mō te kīngi o Ahiria: E kore ia e haere mai ki tēnei pā, e kore anō e perea mai he pere e ia ki konei, e kore anō e maua mai e ia he whakangungu rākau ki mua i tēnei pā, e haupūria rānei he puke hei whawhaitanga ki konei.
2KI 19:33 Ko te ara i haere mai ai ia, ka hoki anō ia mā reira; e kore hoki ia e tae mai ki tēnei pā,
2KI 19:34 Ka tiakina hoki e ahau tēnei pā, kia ora ai; he whakaaro ki ahau, ki tāku pononga anō, ki a Rāwiri.”
2KI 19:35 Nā, i taua pō ka puta te anahera a Ihowā, ā, patua iho e ia i te puni o ngā Ahiriana kotahi rau e waru tekau mā rima mano; ā, i te marangatanga ake i te ata, nanā, ō rātou tinana! He tūpāpaku katoa rātou.
2KI 19:36 Heoi, tūria atu ana e Henakeripi kīngi o Ahiria, haere ana, hoki ana, noho rawa atu kei Ninewe.
2KI 19:37 Ā, i a ia e koropiko ana i roto i te whare o tōna atua, o Nitiroko, ka patua e āna tama, e Ataramereke rāua ko Harētere ki te hoari; ā, mawhiti atu ana rāua ki te whenua o Ararata. Ā, ko Etara Harono, ko tāna tama, te kīngi i muri i a ia.
2KI 20:1 I aua rā ka mate a Hetekia, whano marere. Nā, ka tae mai a Ihāia poropiti tama a Āmoho ki a ia, ka mea ki a ia, “Ko te kupu tēnei a Ihowā: Whakahaua iho tōu whare; nō te mea ka mate koe, kāhore e ora.”
2KI 20:2 Kātahi ka tahuri tōna mata ki te pakitara, ka īnoi ki a Ihowā, ka mea:
2KI 20:3 “Tēnā rā, e Ihowā, kia mahara ki ōku hāereerenga i tōu aroaro i runga i te pono, i te ngākau tapatahi, ki tāku meatanga i te pai ki tāu titiro.” Nā, tangi ana a Hetekia, nui atu te tangi.
2KI 20:4 Nā, kāhore anō a Ihāia kia puta noa ki waenganui o te pā, kua puta mai te kupu a Ihowā ki a ia, kua mea:
2KI 20:5 “Hoki atu, mea atu ki te rangatira o tāku iwi, ki a Hetekia, ‘Ko te kupu tēnei a Ihowā, a te Atua o Rāwiri, o tōu tupuna. Kua whakarangona tāu īnoi e ahau, ā, kua kite ahau i ōu roimata; nanā, me whakaora koe e ahau; hei te toru o ngā rā ka haere koe ki runga, ki te whare o Ihowā.
2KI 20:6 Ka tāpiritia anō e ahau ōu rā ki ngā tau kotahi tekau mā rima; ā, ka whakaorangia koe me tēnei pā e ahau i te ringa o te kīngi o Ahiria; ā, ka tiakina e ahau tēnei pā, he whakaaro ki ahau anō, ki tāku tangata hoki, ki a Rāwiri.’ ”
2KI 20:7 I kī anō hoki a Ihāia, “Tīkina he papa piki.” Nā, tīkina ana e rātou; whakapākia ana ki te whēwhē, nā, kua ora ia.
2KI 20:8 Nā, ka mea a Hetekia ki a Ihāia, “He aha te tohu mōku ka whakaorangia ahau e Ihowā? Mōku ka haere i te toru o ngā rā ki te whare o Ihowā?”
2KI 20:9 Anō rā ko Ihāia, “Ko te tohu tēnei a Ihowā ki a koe, ka oti i a Ihowā tāna kupu i kōrero ai ia: Kia tekau rānei ngā nekehanga e neke atu ai te ātārangi; kia tekau rānei ngā whakahokinga e hoki ai?”
2KI 20:10 Anō rā ko Hetekia, “He mea noa iho kia tekau ngā nekehanga e neke atu ai te ātārangi; erangi kia tekau ngā nekehanga e hoki ai te ātārangi ki muri.”
2KI 20:11 Kātahi a Ihāia poropiti ka karanga ki a Ihowā, ā, whakahokia ana e ia te ātārangi, tekau ngā nekehanga, o ngā nekehanga i heke iho ai i te whakaatu hāora a Ahata.
2KI 20:12 I taua wā ka tukua e Peroraka Pararana, tama a Pararana kīngi o Papurōna he pukapuka me tētahi hākari ki a Hetekia; nō te mea i rongo ia i te mate a Hetekia.
2KI 20:13 Ā, i whakarongo a Hetekia ki a rātou, whakakitea ana e ia ki a rātou te whare katoa o āna mea papai, te hiriwa, te kōura, ngā kīnaki kakara, te hinu utu nui, me te whare o āna mea mō te whawhai, me ngā mea katoa i rokohanga ki roto ki ōna taonga. Kāhore tētahi mea o tōna whare, o tōna kīngitanga katoa, i kore te whakakitea e Hetekia ki a rātou.
2KI 20:14 Kātahi ka haere mai a Ihāia poropiti ki a Kīngi Hetekia, ka mea ki a ia, “I pēhea mai ēnei tāngata? I haere mai hoki rātou ki a koe i hea?” Anō rā ko Hetekia, “I haere mai rātou i te whenua hoi, i Papurōna.”
2KI 20:15 Anō rā ko tērā, “He aha ngā mea i kitea e rātou ki tōu whare?” Ka whakahokia e Hetekia, “Kua kitea e rātou ngā mea katoa i tōku whare. Kāhore tētahi mea o ōku taonga i kore te whakakitea e ahau ki a rātou.”
2KI 20:16 Nā, ka mea a Ihāia ki a Hetekia, “Whakarongo ki te kupu a Ihowā:
2KI 20:17 Nanā, kei te haere mai ngā rā e kawea ai ngā mea katoa o tōu whare, me ngā mea kua rongoātia nei e ōu mātua taea noatia tēnei rā, ki Papurōna. E kore tētahi mea e mahue, e ai tā Ihowā.
2KI 20:18 Ā, ka tangohia e rātou ētahi o āu tama e puta mai i roto i a koe, e whānau māu; ā, hei unaka rātou i roto i te whare o te kīngi o Papurōna.”
2KI 20:19 Anō rā ko Hetekia ki a Ihāia, “He pai te kupu a Ihowā i kōrerotia mai nā e koe.” I mea anō hoki ia, “Ehara oti i te pai ki te mau te rongo me te pono i ōku rā?”
2KI 20:20 Nā, ko ērā atu meatanga a Hetekia me āna mahi toa katoa, me tāna hanganga i te puna, i te awakeri, ā, whakaputaina ana e ia he wai ki te pā, kīhai ianei ēnā i tuhituhia ki te Pukapuka o ngā meatanga o Ngā Rā o Ngā Kīngi o Hūrā?
2KI 20:21 Nā, ka moe a Hetekia ki ōna mātua, ā, ko tāna tama, ko Mānahi, te kīngi i muri i a ia.
2KI 21:1 Kotahi tekau mā rua ngā tau o Mānahi i tōna kīngitanga, ā, e rima tekau mā rima ngā tau i kīngi ai ia ki Hiruhārama; ā, ko te ingoa o tōna whaea ko Hepetipa.
2KI 21:2 Ā, he kino tāna mahi ki te titiro a Ihowā, i rite tonu ki ngā mea whakarihariha a ngā tauiwi i peia nei e Ihowā i te aroaro o ngā tama a Īharaira.
2KI 21:3 I hangā anō hoki e ia ngā wāhi tiketike i whakakorea rā e Hetekia, e tōna pāpā; whakaarahia ake ana e ia he āta ki a Paara, hangā ana e ia he Āhera, pērā ana me tā Āhapa kīngi o Īharaira i mea ai, ā, koropiko ana ki te ope katoa o te rangi, mahi ana ki a rātou.
2KI 21:4 I hangā hoki e ia ētahi āta ki te whare o Ihowā, ki tā Ihowā i kī rā, “Ko Hiruhārama hei waihotanga mō tōku ingoa.”
2KI 21:5 I hangā anō e ia ētahi āta mō te ope katoa o te rangi ki ngā marae e rua o te whare o Ihowā.
2KI 21:6 Ā, meatia ana e ia tāna tama kia tika nā waenganui i te ahi, rapua ana e ia he tohu i ngā kapua, i ngā nākahi, i whai hoki ia ki ngā atua māori, ki ngā mata māori; nui atu tāna kino i mahi ai ki te titiro a Ihowā hei whakapātaritari i a ia.
2KI 21:7 Ā, i whakatūria e ia he whakapakoko nō Āhera, i mahia e ia ki te whare i kī rā a Ihowā ki a Rāwiri rāua ko tāna tama ko Horomona, “Hei tēnei whare, hei Hiruhārama i whiriwhiria nei e ahau i roto i ngā iwi katoa o Īharaira ahau waiho ai i tōku ingoa ā ake ake.
2KI 21:8 Ā, heoi āku whakanekehanga i ngā waewae o Īharaira i te whenua i hoatu e ahau ki ō rātou mātua; ki te mau rāia rātou ki te mahi i ngā mea katoa i whakahaua e ahau ki a rātou, kia rite ki te ture katoa i whakahaua e Mohi, e tāku pononga ki a rātou.”
2KI 21:9 Otiia kīhai rātou i rongo; i tākina kētia rātou e Mānahi kia nui atu tā rātou mahi kino i tā ngā iwi i hunā nei e Ihowā i te aroaro o ngā tama a Īharaira.
2KI 21:10 I kōrero anō a Ihowā, arā āna pononga, ngā poropiti, i mea,
2KI 21:11 “Kua mahi nei a Mānahi kīngi o Hūrā i ēnei mea whakarihariha, kino atu tāna i ngā mea katoa i mea ai ngā Amori i mua i a ia; ā, kua mea nei ia i a Hūrā kia hara ki āna whakapakoko;
2KI 21:12 mō reira ko te kupu tēnei a Ihowā, a te Atua o Īharaira: Tēnei ahau te kawe nei i te kino ki Hiruhārama rāua ko Hūrā, e pāorooro ai ngā taringa e rua o ngā tāngata e rangona ai.
2KI 21:13 Ka whakamārōkia e ahau te aho o Hamaria ki runga ki Hiruhārama, me te parameti o te whare o Āhapa; ā, ka horoia e ahau a Hiruhārama, ka pērātia me tā te tangata horoi i te rīhi; horoia ana e ia, hurihia ana ko tua.
2KI 21:14 Ā, ka rukea atu e ahau te toenga o tōku wāhi tupu, ka hoatu ki ngā ringa o ō rātou hoariri; ā, hei taonga pārau rātou, hei mea parakete mā ō rātou hoariri katoa;
2KI 21:15 mō rātou i mahi i te kino ki tāku titiro, i whakapātaritari hoki i ahau, mai o te rā i puta mai ai ō rātou mātua i Īhipa ā taea noatia tēnei rā.”
2KI 21:16 I whakahekea anō hoki e Mānahi he toto harakore, tōna nui, ā, kī noa i a ia Hiruhārama i tētahi pito ki tētahi; tāpiritia ana tēnei e ia ki tōna hara i hara ai a Hūrā, i mea ai i te kino ki te titiro a Ihowā.
2KI 21:17 Nā, ko ērā atu meatanga a Mānahi me āna mahi katoa, me tōna hara i hara ai ia, kīhai ianei ēnā i tuhituhia ki te Pukapuka o ngā meatanga o Ngā Rā o Ngā Kīngi o Hūrā?
2KI 21:18 Nā, ka moe a Mānahi ki ōna mātua, ā, tanumia ana ki te kāri o tōna whare, ki te kāri a Uha; ā, ko tāna tama, ko Amono, te kīngi i muri i a ia.
2KI 21:19 E rua tekau mā rua ngā tau o Amono i tōna kīngitanga, ā, e rua ngā tau i kīngi ai ia ki Hiruhārama. Ā, ko te ingoa o tōna whaea ko Mehuremete, he tamāhine nā Harutu, nō Iotopa.
2KI 21:20 Ā, he kino tāna mahi ki te titiro a Ihowā, rite tonu tāna mahi ki tā tōna pāpā, ki tā Mānahi.
2KI 21:21 I haere hoki ia i ngā ara katoa i haere ai tōna pāpā, i mahi ki ngā whakapakoko i mahi ai tōna pāpā, ā, koropiko ana ia ki aua mea.
2KI 21:22 I whakarērea e ia a Ihowā, te Atua o ōna mātua, kīhai i haere i te ara o Ihowā.
2KI 21:23 Nā, ka whakatupu ngā tāngata a Amono i te mate mōna, ā, patua iho e rātou te kīngi ki roto anō i tōna whare.
2KI 21:24 Otiia i patua e ngā tāngata o te whenua te hunga katoa nāna i whakatupu te hē mō Kīngi Amono; ā, meinga ana e ngā tāngata o taua whenua a Hōhia, tāna tama, hei kīngi i muri i a ia.
2KI 21:25 Nā, ko ērā atu meatanga i mea ai a Amono, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Hūrā?
2KI 21:26 Ā, i tanumia ia ki tōna tanumanga ki te kāri a Uha, ā, ko Hōhia, ko tāna tama, te kīngi i muri i a ia.
2KI 22:1 E waru ngā tau o Hōhia i tōna kīngitanga, ā, e toru tekau mā tahi ngā tau i kīngi ai ia ki Hiruhārama. Ā, ko te ingoa o tōna whaea ko Ierira, he tamāhine nā Araia, nō Pohokata.
2KI 22:2 Ā, tika tonu tāna mahi ki te titiro a Ihowā; i haere hoki ia i runga i ngā ara katoa o tōna tupuna o Rāwiri, ā, kīhai i peka ki matau, ki mauī.
2KI 22:3 Nā, i te tekau mā waru o ngā tau o Kīngi Hōhia ka ungā e te kīngi a Hapana tama a Atāria tama a Mehūrāma, te kaituhituhi, ki te whare o Ihowā; i mea ia,
2KI 22:4 “Haere ki a Hirikia ki te tino tohunga, kia huihuia e ia te moni e kawea ana mai ki roto ki te whare o Ihowā, tā ngā kaitiaki o te kūwaha i tango ai i te iwi.
2KI 22:5 Ka hoatu ki ngā ringa o ngā kaimahi o te mahi, o ngā kaitohutohu o te whare o Ihowā; ā, mā rātou e hoatu ki ngā kaimahi o te mahi i te whare o Ihowā, hei hanga mō ngā wāhi pakaru o te whare,
2KI 22:6 ki ngā kāmura, ki ngā kaihanga, ki ngā kaimahi kōhatu; ā, hei hoko i ngā rākau, i ngā kōhatu tārai, hei hanga mō te whare.
2KI 22:7 Otiia kīhai i uiuia ā rātou meatanga i te moni i hoatu nei ki ō rātou ringa; he pono hoki tā rātou mahi.”
2KI 22:8 Nā, ka mea a Hirikia tino tohunga ki a Hapana kaituhituhi, “Kua kitea e ahau te Pukapuka o te Ture i te whare o Ihowā.” Nā, ka hoatu e Hirikia te pukapuka ki a Hapana, ā, kōrerotia ana e ia.
2KI 22:9 Nā, ka haere a Hapana kaituhituhi ki te kīngi, whakahokia ana te kōrero e ia ki te kīngi, i mea ia: “Kua ringiringihia e āu pononga te moni i kitea ki te whare, ā, hoatu ana ki ngā ringa o ngā kaimahi i te mahi, o ngā kaitohutohu i te whare o Ihowā.”
2KI 22:10 Nā, ka whakaatu a Hapana kaituhituhi ki te kīngi, ka mea, “Kua hōmai e Hirikia tohunga he pukapuka ki ahau.” Nā, kōrerotia ana e Hapana ki te aroaro o te kīngi.
2KI 22:11 Ā, nō te rongonga o te kīngi i ngā kupu o te Pukapuka o te Ture, ka haea e ia ōna kākahu.
2KI 22:12 Nā, ka whakahau te kīngi ki te tohunga, ki a Hirikia, rātou ko Ahikama tama a Hapana, ko Akaporo tama a Mikaia, ko Hapana kaituhituhi, ko Ahaia tangata a te kīngi, ka mea:
2KI 22:13 “Haere, ui atu ki a Ihowā mōku, mō tēnei iwi, mō Hūrā katoa hoki, he mea nā ngā kupu o tēnei pukapuka kua kitea nei. He nui hoki te riri o Ihowā kua ngiha nei ki a tātou, nō te mea kīhai ō tātou mātua i rongo ki ngā kupu o tēnei pukapuka, kīhai i mahi i ngā mea katoa i tuhituhia hei mea mā tātou.”
2KI 22:14 Heoi, haere ana a Hirikia tohunga rātou ko Ahikama, ko Akaporo, ko Hapana, ko Ahaia ki a Hurura, ki te wahine poropiti, wahine a Harumu kaitiaki kākahu, he tama hoki tērā nā Tikiwa tama a Harahaha; i Hiruhārama hoki taua wahine e noho ana, i te wāhi tuarua. Nā, kōrero ana rātou ki a ia.
2KI 22:15 Nā, ka mea ia ki a rātou, “Ko te kōrero tēnei a Ihowā, a te Atua o Īharaira: Mea atu ki te tangata nāna koutou i unga mai ki ahau,
2KI 22:16 ‘Ko tā Ihowā kupu tēnei: Nanā, ka kawea atu e ahau he kino ki runga ki tēnei wāhi, ki runga anō i ōna tāngata, arā ngā kupu katoa o te pukapuka i kōrerotia nā e te kīngi o Hūrā.
2KI 22:17 Mō rātou i whakarere i ahau, i tahu whakakakara ki ngā atua kē, he whakapātaritari hoki i ahau ki ngā mahi katoa a ō rātou ringa; koia i ngiha ai tōku riri ki tēnei wāhi, ā, e kore e tineia.’
2KI 22:18 Otiia, me kī atu e koutou ki te kīngi o Hūrā nāna nei koutou i unga mai ki te ui ki a Ihowā, ‘Ko te kupu tēnei a Ihowā, a te Atua o Īharaira: Nā, mō ngā kupu i rongo nā koe,
2KI 22:19 nā te mea he ngāwari tōu ngākau, ā, kua whakaiti koe i a koe ki te aroaro o Ihowā, i a koe ka rongo nā ki tāku i mea ai mō tēnei wāhi, mō ōna tāngata hoki, kia meinga rātou hei ururua, hei kanga; ā, kua haehae i ōu kākahu, kua tangi ki tōku aroaro; nā, kua rongo anō hoki ahau i a koe, e ai tā Ihowā.
2KI 22:20 Nanā, ka huihuia atu koe e ahau ki ōu mātua, ka huihuia atu anō koe ki tōu tanumanga i runga i te rangimārie, ā, e kore ōu kanohi e kite i ngā kino katoa e kawea mai e ahau ki tēnei wāhi.’ ” Nā, whakahokia ana te kōrero e rātou ki te kīngi.
2KI 23:1 Nā, ka unga tāngata atu te kīngi, ā, huihuia ana e rātou ngā kaumātua katoa o Hūrā, o Hiruhārama, ki a ia.
2KI 23:2 Nā, ka haere te kīngi ki te whare o Ihowā, rātou ko ngā tāngata katoa o Hūrā, ko ngā tāngata katoa o Hiruhārama, ko ngā tohunga, ko ngā poropiti, ko te iwi katoa hoki, te iti, te rahi. Ā, kōrerotia ana e ia ki ō rātou taringa ngā kupu katoa o te Pukapuka o te Kawenata i kitea nei ki te whare o Ihowā.
2KI 23:3 Nā, tū ana te kīngi ki te taha o te pou, ā, whakaritea ana e ia he kawenata ki te aroaro o Ihowā, arā kia whakapaua tōna ngākau, tōna wairua, ki te whai ki a Ihowā, ki te pupuri i āna whakahau, i āna whakaaturanga, i āna tikanga, ki te whakamana hoki i ngā kupu o tēnei kawenata kua tuhituhia nei ki tēnei pukapuka; ā, tū tonu te iwi katoa ki te kawenata.
2KI 23:4 Nā, ka whakahau te kīngi ki te tino tohunga, ki a Hirikia, ki ngā tohunga tuarua, ki ngā kaitiaki kūwaha, kia whakaputaina ki waho o te temepara o Ihowā ngā oko katoa i hangā mā Paara, mō te Āhera, mā te ope katoa anō hoki o te rangi. Nā, tahuna ana e ia aua mea ki waho o Hiruhārama, ki ngā māra i Kitirono, kawea ana ngā pungarehu ki Pētēre.
2KI 23:5 I whakakāhoretia hoki e ia ngā tohunga whakapakoko i whakaritea rā e ngā kīngi o Hūrā hei tahu whakakakara ki ngā wāhi tiketike i ngā pā o Hūrā, ā, ki ngā taha o Hiruhārama, rātou ko ngā kaitahu whakakakara ki a Paara, ki te rā, ki te marama, ki ngā whetū, ki te ope katoa hoki o te rangi.
2KI 23:6 I mauria anō e ia te Āhera i roto i te whare o Ihowā ki waho o Hiruhārama, ki te awa ki Kitirono, ā, tahuna ana ki te awa ki Kitirono, ā, tukia ana kia ririki, ānō he puehu, makā ana te puehu o taua mea ki runga ki ngā tanumanga o te iwi nui.
2KI 23:7 I tukitukia anō e ia ngā whare o te hunga whakahoroma i te taha o te whare o Ihowā, i te wāhi i whatu ai ngā wāhine i ngā pā mō te Āhera.
2KI 23:8 Ā, i whakaputaina e ia ngā tohunga katoa i ngā pā o Hūrā, whakapokea iho ngā wāhi tiketike i tahu whakakakara ai ngā tohunga, ō Kepa ā tae noa ki Peerehepa; ā, i wāhia e ia ngā wāhi tiketike o ngā kēti, ērā i te kūwaha o te Kēti o Hohua kāwana o te pā, i te taha mauī o te tangata i te kēti o te pā.
2KI 23:9 Otiia kīhai ngā tohunga o ngā wāhi tiketike i haere ki te āta a Ihowā i Hiruhārama; engari i kai rātou i te taro rēwenakore i roto i ō rātou tēina.
2KI 23:10 Ā, i whakapokea e ia a Topete, tērā i te raorao o ngā tama a Hinomo, kei mea tētahi tangata kia tika tāna tama, tāna tamāhine rānei, nā waenganui i te ahi hei mea ki a Moreke.
2KI 23:11 I whakawāteatia atu anō e ia ngā hōiho i hōmai e ngā kīngi o Hūrā hei mea ki te rā, i te tomokanga o te whare o Ihowā, i te rūma o Nātanamereke, o te kaitiaki rūma, i reira i waho ake; tahuna ana hoki e ia ngā hāriata o te rā ki te ahi.
2KI 23:12 Nā, ko ngā āta i te tuanui o te rūma o runga, o Ahata, i hangā rā e ngā kīngi o Hūrā, me ngā āta i hangā e Mānahi ki ngā marae e rua o te whare o Ihowā, i tukitukia e te kīngi, wāhia iho i reira, makā ana te puehu o aua mea ki te awa ki Kitirono.
2KI 23:13 Ā, ko ngā wāhi tiketike, ko ērā i te ritenga atu o Hiruhārama i te taha matau o te maunga o te whakangaromanga, i hangā nei e Horomona kīngi o Īharaira mā Ahatorete, mā te mea whakarihariha a ngā Haironi, mā Kemoho, mā te mea whakarihariha a ngā Moapi, mā Mirikomo, mā te mea whakarihariha a ngā tama a Āmono, whakapokea iho ērā e te kīngi.
2KI 23:14 I wāwāhia hoki e ia ngā pou, i tapahia ki raro ngā Aherimi, ā, whakakīia ana ō rātou wāhi ki ngā wheua tāngata.
2KI 23:15 Ko te āta hoki i Pētēre, ko te wāhi tiketike i hangā nei e Ieropoama tama a Nēpata i hara ai a Īharaira, wāhia iho ana e ia taua āta me te wāhi tiketike; ā, tahuna ana e ia te wāhi tiketike, tukia ana kia ririki, ānō he puehu, ā, tahuna ana e ia te Āhera.
2KI 23:16 Ā, i a Hōhia e tahuri ana, ka kite ia i ngā tanumanga i reira, i te maunga; nā, ka tonoa e ia he tāngata ki te tiki i ngā wheua i roto i ngā tanumanga, nā, tahuna ana e ia ki runga ki te āta, whakapokea iho e ia, hei whakarite mō te kupu a Ihowā i kōrerotia e te tangata a te Atua, i kōrero nei i ēnei kupu.
2KI 23:17 Kātahi ia ka mea, “He aha tēnā tohu e kite atu nei ahau?” Nā, ka mea ngā tāngata o te pā ki a ia, “Ko te tanumanga ia o te tangata a te Atua i haere mai i Hūrā, ā, kōrerotia ana e ia ēnei mea kua meatia nei e koe ki te āta i Pētēre.”
2KI 23:18 Nā, ka mea ia, “Waiho mārie ia; kei whakakorikoria ōna wheua e tētahi.” Nā, kapea ake ana e rātou ōna wheua me ngā wheua o te poropiti i haere mai i Hamaria.
2KI 23:19 Nā, ko ngā whare katoa o ngā wāhi tiketike, ko ērā i ngā pā o Hamaria, i hangā nei e ngā kīngi o Īharaira hei whakapātaritari i a Ihowā, whakakāhoretia ana e Hōhia; rite tonu tāna i mea ai ki aua whare ki ngā mea katoa i mea ai ia ki Pētēre.
2KI 23:20 I patua anō hoki e ia ngā tohunga katoa o ngā wāhi tiketike o reira ki runga ki ngā āta, tahuna ana hoki ngā wheua tāngata ki runga ki aua āta, ā, hoki ana ki Hiruhārama.
2KI 23:21 Nā, ka whakahau te kīngi ki te iwi katoa, ka mea: “Mahia te Kapenga hei mea ki a Ihowā, ki tō koutou Atua; kia rite ki te mea i tuhituhia ki tēnei Pukapuka o te Kawenata.”
2KI 23:22 He pono kāhore he rite mō tēnā mahinga i te Kapenga, mai o ngā rā i ngā kaiwhakawā i whakarite mō Īharaira, o ngā rā katoa i ngā kīngi o Īharaira, i ngā kīngi anō o Hūrā;
2KI 23:23 engari, tō te tekau mā waru o ngā tau o Kīngi Hōhia, arā tēnei Kapenga i mahia nei ki a Ihowā ki Hiruhārama.
2KI 23:24 Nā, ko te hunga i whai ki ngā atua māori, ki ngā mata māori, ki ngā terapimi, ki ngā whakapakoko, ki ngā mea whakarihariha katoa i kitea ki te whenua o Hūrā, ki Hiruhārama, whakakāhoretia iho e Hōhia, kia mana ai i a ia ngā kupu o te ture i tuhituhia ki te pukapuka i kitea e Hirikia tohunga ki te whare o Ihowā.
2KI 23:25 Nā, kāhore he kīngi i mua atu i a ia hei rite mōna te whakapau o tōna ngākau, o tōna wairua, o tōna kaha, ki te tahuri ki a Ihowā, rite tonu ki te ture katoa a Mohi; kāhore hoki kia whakatika tētahi rite mōna i muri i a ia.
2KI 23:26 He ahakoa rā, kīhai a Ihowā i tahuri kē i te muranga o tōna riri nui i mura ai tōna riri ki a Hūrā, mō ngā whakapātaritaringa katoa i whakapātaritari ai a Mānahi i a ia.
2KI 23:27 Nā, ka mea a Ihowā, “Ka whakawāteatia atu e ahau a Hūrā hoki i tōku aroaro, ka pērātia me tāku whakawāteatanga i a Īharaira, ā, ka rukea atu e ahau tēnei pā i whiriwhiria nei e ahau, a Hiruhārama, me te whare i kī rā ahau, Me waiho tōku ingoa ki konei.”
2KI 23:28 Nā, ko ērā atu meatanga a Hōhia me āna mahi katoa, kīhai ianei i tuhituhia ki te Pukapuka o ngā meatanga o Ngā Rā o Ngā Kīngi o Hūrā?
2KI 23:29 I ōna rā ka haere a Parao Neko kīngi o Īhipa ki te kīngi o Ahiria ki te awa ki Uparati. Nā, haere ana a Kīngi Hōhia ki te tū ki a ia; ā, whakamatea iho ia e tērā ki Mekiro, i tōna kitenga i a ia.
2KI 23:30 Nā, ka mauria atu e āna tāngata tōna tinana i Mekiro i runga i te hāriata, ā, kawea ana ki Hiruhārama, tanumia iho ki tōna tanumanga. Nā, ka mau te iwi o tērā whenua ki a Iehoahata tama a Hōhia, ā, whakawahia ana ia, meinga ana hei kīngi i muri i tōna pāpā.
2KI 23:31 E rua tekau mā toru ngā tau o Iehoahata i tōna kīngitanga; ā, e toru ngā marama i kīngi ai ia ki Hiruhārama. Ā, ko te ingoa o tōna whaea ko Hamutara, he tamāhine nā Heremaia o Rīpina.
2KI 23:32 Ā, he kino tāna mahi ki te titiro a Ihowā; rite tonu ki ngā mea katoa i mea ai ōna mātua.
2KI 23:33 Nā, herea ana ia e Parao Neko ki Ripira, ki te whenua o Hāmata, kia kaua ia e kīngi ki Hiruhārama; ā, whakaritea ana e ia he takoha ki te whenua, kotahi rau taranata hiriwa, kotahi taranata kōura.
2KI 23:34 Nā, ka meatia e Parao Neko a Eriakimi tama a Hōhia hei kīngi i muri i tōna pāpā, i a Hōhia. Whakawhitia kētia ake e ia tōna ingoa ko Iehoiakimi; ko Iehoahata ia tangohia ana e ia, kawea ana ki Īhipa, ā, i mate atu ki reira.
2KI 23:35 Nā, ka hoatu e Iehoiakimi ki a Parao te hiriwa me te kōura; otiia i takohatia e ia te whenua kia hoatu ai te moni i kīia nei e Parao. Tohea ana e ia te hiriwa me te kōura ki te iwi o te whenua, te takoha a tēnei, a tēnei, hei hoatu māna ki a Parao Neko.
2KI 23:36 E rua tekau mā rima ngā tau o Iehoiakimi i tōna kīngitanga; ā, kotahi tekau mā tahi ngā tau i kīngi ai ia ki Hiruhārama. Ā, ko te ingoa o tōna whaea ko Tepura, he tamāhine nā Peraia o Rūma.
2KI 23:37 Ā, he kino tāna mahi ki te titiro a Ihowā, i rite ki ngā mea katoa i mea ai ōna mātua.
2KI 24:1 I ōna rā ka haere mai a Nepukaneha kīngi o Papurōna; nā, ka pononga a Iehoiakimi ki a ia, e toru tau. Kātahi tērā ka tahuri, ka whakakeke ki a ia.
2KI 24:2 Nā, ka ngarea mai e Ihowā ki a ia ngā ope o ngā Karari, me ngā ope o ngā Hīriani, me ngā ope o ngā Moapi, me ngā ope o ngā tama a Āmona; ā, ngarea ana mai rātou e ia ki a Hūrā hei huna mō reira, i rite ai te kupu a Ihowā i kōrerotia e āna pononga, e ngā poropiti.
2KI 24:3 He pono, nā te kupu a Ihowā i pā ai tēnei ki a Hūrā, hei whakawātea atu i a rātou i tōna aroaro, mō ngā hara o Mānahi, arā mō āna mea katoa i mea ai ia,
2KI 24:4 mō te toto harakore hoki i whakahekea e ia; i kapi katoa hoki a Hiruhārama i a ia i te toto harakore, ā, kīhai a Ihowā i pai kia whakarērea noatia tēnei.
2KI 24:5 Nā, ko ērā atu meatanga a Iehoiakimi me āna mea katoa i mea ai ia, kīhai ianei i tuhituhia ki te Pukapuka o ngā meatanga o Ngā Rā o Ngā Kīngi o Hūrā?
2KI 24:6 Nā, ka moe a Iehoiakimi ki ōna mātua, ā, ko Iehoiakini, ko tāna tama, te kīngi i muri i a ia.
2KI 24:7 Nā, heoi anō putanga o te kīngi o Īhipa i tōna whenua; kua riro hoki i te kīngi o Papurōna ngā wāhi katoa o te kīngi o Īhipa, nō te awa rā anō o Īhipa tae noa ki te awa ki Uparati.
2KI 24:8 Kotahi tekau mā waru ngā tau o Iehoiakini i tōna kīngitanga, ā, e toru ngā marama i kīngi ai ia ki Hiruhārama. Ā, ko te ingoa o tōna whaea ko Nehuhuta, he tamāhine nā Erenātana o Hiruhārama.
2KI 24:9 Ā, he kino tāna mahi ki te titiro a Ihowā, i rite ki ngā mea katoa i mea ai tōna pāpā.
2KI 24:10 I taua wā ka whakaekea a Hiruhārama e ngā tāngata a Nepukaneha kīngi o Papurōna, ā, whakapaea ana te pā.
2KI 24:11 Nā, ka haere mai a Nepukaneha kīngi o Papurōna ki te pā, i te mea e whakapaea ana a reira e āna tāngata.
2KI 24:12 Nā, ka puta a Iehoiakini kīngi o Hūrā ki te kīngi o Papurōna, a ia, tōna whaea, āna tāngata, āna rangatira, me āna kaiwhakahaere. Nā, kua mau i te kīngi o Papurōna i te waru o ngā tau o tōna kīngitanga.
2KI 24:13 Nā, mauria atu ana e ia i reira ngā taonga katoa o te whare o Ihowā, me ngā taonga o te whare o te kīngi; tapatapahia ana hoki e ia ngā oko kōura katoa i hangā e Horomona kīngi o Īharaira ki te temepara o Ihowā, pērā ana me tā Ihowā i kōrero ai.
2KI 24:14 Whakahekea katoatia ana hoki e ia a Hiruhārama katoa, ngā rangatira katoa, me ngā mārohirohi katoa, tekau mano ngā pārau, me ngā kaimahi katoa, me ngā parakimete; kīhai tētahi i mahue, heoi anō ko te hunga rawakore o te whenua.
2KI 24:15 Ā, i whakahekea e ia a Iehoiakini ki Papurōna; me te whaea o te kīngi, me ngā wāhine a te kīngi, me āna kaiwhakahaere, me te hunga nunui o te whenua; whakahekea ana rātou e ia i Hiruhārama hei pārau ki Papurōna.
2KI 24:16 Me ngā toa, e whitu mano, ngā kaimahi, ngā parakimete, kotahi mano, ngā mārohirohi katoa e pai ana hei whawhai; kawea ana rātou e te kīngi hei pārau ki Papurōna.
2KI 24:17 Nā, meinga ana e te kīngi o Papurōna ko Matania, teina o tōna pāpā, hei kīngi i muri i a ia, whakawhitia kētia ana tōna ingoa ko Terekia.
2KI 24:18 E rua tekau mā tahi ngā tau o Terekia i tōna kīngitanga, ā, kotahi tekau mā tahi ngā tau i kīngi ai ki Hiruhārama. Ā, ko te ingoa o tōna whaea ko Hamutara, he tamāhine nā Heremaia o Rīpina.
2KI 24:19 Ā, he kino tāna mahi ki te titiro a Ihowā; i rite ki ngā mea katoa i mea ai a Iehoiakimi.
2KI 24:20 Nā reira, i a Ihowā ka riri nei, ka puta te aituā ki Hiruhārama, ki a Hūrā, ā makā noatia atu rātou i tōna aroaro; ā, whakakeke ana a Terekia ki te kīngi o Papurōna.
2KI 25:1 Nā, i te iwa o ngā tau o tōna kīngitanga, i te tekau o ngā marama i te tekau o ngā rā o te marama, ka tae mai a Nepukaneha kīngi o Papurōna, a ia me tāna ope katoa, ki Hiruhārama, ā, nohoia ana e ia a reira; ā, hangā ana e rātou ētahi taumaihi mō reira ā tawhio noa.
2KI 25:2 Heoi, ka whakapaea te pā ā tae noa ki te tekau mā tahi o ngā tau o Kīngi Terekia.
2KI 25:3 I te iwa o ngā rā o te whā o ngā marama he nui te matekai o te pā, ā, kāhore he taro mā ngā tāngata o te whenua.
2KI 25:4 Kātahi ka wāhia te pā, ā, rere ana ngā tāngata whawhai katoa i te pō nā te ara o te kūwaha i waenganui o ngā taiepa e rua, nā tērā i te kāri a te kīngi; he mea karapoti hoki te pā e ngā Karari; ko te kīngi i haere nā te Arapa.
2KI 25:5 Otiia i whai te ope a ngā Karari i te kīngi, ā, ka mau ia ki ngā mānia i Heriko; ā, ko tāna ope katoa i marara noa atu i a ia.
2KI 25:6 Nā, ka mau i a rātou te kīngi, ka kawea ki te kīngi o Papurōna ki Ripira; ā, ka kōrerotia te whakawā mōna.
2KI 25:7 Nā, ka whakamatea e rātou ngā tama a Terekia i tōna aroaro, whakamatapōtia iho ngā kanohi o Terekia, ā, herea ana ia ki te mekameka, kawea ana ki Papurōna.
2KI 25:8 I te rima o ngā marama, i te whitu o ngā rā o te marama, arā i te tekau mā iwa o ngā tau o Kīngi Nepukaneha, kīngi o Papurōna, ka haere mai a Neputarārana rangatira o ngā kaitiaki, he tangata nā te kīngi o Papurōna, ki Hiruhārama.
2KI 25:9 Nā, ka tahuna e ia te whare o Ihowā, me te whare o te kīngi, me ngā whare katoa o Hiruhārama, tae noa ki ngā whare nunui katoa; tahuna ana e ia ki te ahi.
2KI 25:10 Wāhia iho hoki ngā taiepa o Hiruhārama ā, whawhe noa e te ope katoa o ngā Karari, i haere mai nei rātou ko te rangatira o ngā kaitiaki.
2KI 25:11 Nā, ko te mōrehu o te iwi i mahue i te pā, me te hunga i papahoro atu, i taka atu rā ki te kīngi o Papurōna, me ngā toenga atu o taua huihui, i whakahekea e Neputarārana rangatira o ngā kaitiaki.
2KI 25:12 I waiho ia e te rangatira o ngā kaitiaki ētahi o ngā rawakore o te whenua hei kaimahi wāina, hei kaimahi whenua.
2KI 25:13 Nā, ko ngā pou parāhi i te whare o Ihowā, me ngā tūranga, me te moana parāhi i te whare o Ihowā, wāwāhia ana e ngā Karari, ā, maua atu ana e rātou te parāhi o aua mea ki Papurōna.
2KI 25:14 I maua atu anō e rātou ngā pāta, me ngā koko pungarehu, me ngā kuku, me ngā koko, me ngā oko parāhi katoa mō ā rātou mahi tapu.
2KI 25:15 Ko ngā oko ngārahu anō, ko ngā peihana; ko ngā mea kōura, ko ngā mea hiriwa, tēnā he kōura, tēnā he hiriwa, tangohia ake e te rangatira o ngā kaitiaki.
2KI 25:16 Ko ngā pou e rua, ko te moana kotahi, me ngā tūranga e rua i hangā e Horomona mō te whare o Ihowā; kāhore he pāunatanga o te parāhi o ēnei oko katoa.
2KI 25:17 Ko te tiketike o tētahi o ngā pou kotahi tekau mā waru ngā whatīanga, he parāhi te whakapaipai o runga; ā, ko te tiketike o te whakapaipai e toru ngā whatīanga; he parāhi katoa te mea i whiria, me ngā pamekaranete o te whakapaipai ā whawhe noa. Rite tonu hoki ki ēnei tō te rua o ngā pou, he mea whiri anō tōna.
2KI 25:18 I tangohia anō e te rangatira o ngā kaitiaki a Heraia, te tino tohunga, rātou ko te tohunga tuarua, ko Tepania, ko ngā kaitiaki tokotoru o te kūwaha.
2KI 25:19 I tangohia anō e ia i te pā tētahi kaiwhakahaere, ko te rangatira o ngā tāngata whawhai; tokorima o ngā tāngata nō te aroaro pū ake o te kīngi, he hunga i rokohanga ki roto ki te pā; me te kaituhituhi, arā te rangatira o te ope, te kaihuihui i ngā tāngata o te whenua; me ngā tāngata e ono tekau o te iwi o te whenua i rokohanga e ia ki roto ki te pā.
2KI 25:20 Nā, ka mau a Neputarārana rangatira o ngā kaitiaki ki a rātou, kawea ana ki te kīngi o Papurōna, ki Ripira.
2KI 25:21 Nā, patua ana rātou e te kīngi o Papurōna, whakamatea ana ki Ripira, ki te whenua o Hāmata. Heoi, whakahekea atu ana a Hūrā i tōna oneone.
2KI 25:22 Nā, ko te hunga i mahue ki te whenua o Hūrā, ko ngā mea i mahue i a Nepukaneha kīngi o Papurōna, meinga ana e ia ko Keraria tama a Ahikama tama a Hapana hei kāwana mō rātou.
2KI 25:23 Nā, i te rongonga o ngā rangatira ope katoa, o rātou ko ā rātou tāngata, kua meinga e te kīngi o Papurōna a Keraria hei kāwana, ka haere mai rātou ki a Keraria ki Mihipa, arā a Ihimaera tama a Netania, a Hohanana tama a Karea, a Heraia tama a Tanahumete Netopati, a Iaatania tama a tētahi Maakati, me ā rātou tāngata.
2KI 25:24 Nā, ka oati a Keraria ki a rātou, ki ā rātou tāngata hoki, ka mea ki a rātou, “Kaua e wehi, he mea mō ngā pononga o ngā Karari; e noho i te whenua, e mahi ki te kīngi o Papurōna, ā, ka whai pai koutou.”
2KI 25:25 Otiia i te whitu o ngā marama ka haere mai a Ihimaera tama a Netania tama a Erihama, he momo kīngi, rātou ko ōna hoa, kotahi tekau tāngata, ā, patua iho a Keraria, mate rawa, rātou ko ōna hoa, ko ngā Hūrai, ko ngā Karari, i Mihipa.
2KI 25:26 Nā, ka whakatika te iwi katoa, te iti me te rahi, rātou ko ngā rangatira ope, ā, haere ana ki Īhipa. I wehi hoki rātou i ngā Karari.
2KI 25:27 Nā, i te toru tekau mā whitu o ngā tau o te whakahekenga atu o Iehoiakini kīngi o Hūrā, i te tekau mā rua o ngā marama, i te rua tekau mā whitu o ngā rā o te marama, ka whakaarahia e Ewiri Meroraka kīngi o Papurōna, i te tau i kīngi ai ia, te matenga o Iehoiakini kīngi o Hūrā i roto i te whare herehere.
2KI 25:28 Ā, he pai āna kōrero ki a ia, nekehia ake ana e ia tōna torōna ki runga ake i ngā torōna o ngā kīngi i tōna taha i Papurōna.
2KI 25:29 Ko ngā kākahu o tōna hereherenga i whakawhitia e ia; ā, kai taro ana ia i tōna aroaro i ngā rā katoa i ora ai ia.
2KI 25:30 Ā, ko te wāhi māna, he mea pūmau, he mea hōmai e te kīngi ki a ia i tēnei rā, i tēnei rā, i ngā rā katoa i ora ai ia.
1CH 1:1 Ko Ārama, ko Heta, ko Ēnoha;
1CH 1:2 ko Kainana, ko Mahararēre, ko Iarere;
1CH 1:3 ko Ēnoka, ko Matuhara, ko Rameka;
1CH 1:4 ko Noa, ko Hema, ko Hama, ko Iapeta.
1CH 1:5 Ko ngā tama a Iapeta: ko Kōmere, ko Makoko, ko Marai, ko Iawana, ko Tūpara, ko Meheke, ko Tīraha.
1CH 1:6 Ko ngā tama a Kōmere: ko Ahekenata, ko Rīpata, ko Tokārama.
1CH 1:7 Nā, ko ngā tama a Iawana: ko Erihaha, ko Tarahihi, ko Kitimi, ko Totanimi.
1CH 1:8 Nā, ko ngā tama a Hama: ko Kuhu, ko Mitiraima, ko Putu, ko Kanāna.
1CH 1:9 Ā, ko ngā tama a Kuhu: ko Tepa, ko Hāwira, ko Hāpata, ko Rāma, ko Hapateka. Nā, ko ngā tama a Rāma: ko Hēpā, ko Rerana.
1CH 1:10 Nā Kuhu ko Nimirota; nāna i tīmata te whakatangata nui ki te whenua.
1CH 1:11 Nā Mitiraima ko Rurimi, ko Anamime, ko Rehapimi, ko Napatuhimi,
1CH 1:12 ko Pataruhimi, ko Kaharuhimi, nāna nei ngā Pirihitini, ko Kapatorimi.
1CH 1:13 Ā, nā Kanāna ko tāna mātāmua, ko Hairona, ko Hete;
1CH 1:14 me te Iepuhi, me te Amori, me te Kirikahi,
1CH 1:15 me te Hiwi, me te Araki, me te Hini;
1CH 1:16 me te Arawari, me te Temari, me te Hāmati.
1CH 1:17 Ko ngā tama a Hema: ko Erama, ko Āhura, ko Arapahata, ko Ruru, ko Arame, ko Uhu, ko Huru, ko Ketere ko Meheke.
1CH 1:18 Nā Arapahata ko Haraha; nā Haraha ko Ēpere.
1CH 1:19 Whānau ake a Ēpere, e rua ngā tama: ko te ingoa o tētahi ko Pereke (nō te mea hoki nō ōna rā i wehea ai te whenua); ā, ko te ingoa o tōna teina ko Iokētana.
1CH 1:20 Nā Iokētana ko Aramotata, ko Herepe, ko Hataramaweta, ko Ieraha;
1CH 1:21 ko Hatorama, ko Utara, ko Tikera;
1CH 1:22 ko Ēpara, ko Apimaera, ko Hēpā;
1CH 1:23 ko Ōpira, ko Hāwira, ko Iopapa. He tama ēnei katoa nā Iokētana.
1CH 1:24 Ko Hema, ko Arapahata, ko Haraha;
1CH 1:25 ko Ēpere, ko Pereke, ko Reu;
1CH 1:26 ko Heruka, ko Nahora, ko Teraha;
1CH 1:27 ko Āperama, arā ko Āperahama.
1CH 1:28 Ko ngā tama a Āperahama: ko Īhaka, ko Ihimaera.
1CH 1:29 Ko ō rātou whakatupuranga ēnei: ko tā Ihimaera mātāmua, ko Nepaioto, muri iho ko Kerara, ko Arapēre, ko Mipihama,
1CH 1:30 ko Mihima, ko Rūma, ko Maha, ko Hatara, ko Tema,
1CH 1:31 ko Ieturu, ko Nāpihi, ko Kerema. Ko ngā tama ēnei a Ihimaera.
1CH 1:32 Nā, ko ngā tama a Ketura wahine iti a Āperahama: whānau ake ana, ko Timirana, ko Iokohana, ko Merana, ko Miriana, ko Ihipaka, ko Huaha. Nā, ko ngā tama a Iokohana: ko Hēpā, ko Rerana.
1CH 1:33 Ko ngā tama a Miriana: ko Epa, ko Ēpere, ko Ēnoka, ko Āpira, ko Ererāha. He tama ēnei katoa nā Ketura.
1CH 1:34 Ā, nā Āperahama ko Īhaka. Ko ngā tama a Īhaka: ko Ēhau, ko Īharaira.
1CH 1:35 Ko ngā tama a Ēhau: ko Eripāta, ko Reuere, ko Ieuhu, ko Iārama, ko Koraha.
1CH 1:36 Ko ngā tama a Eripāta: ko Temana, ko Ōmara, ko Tepi, ko Katama, ko Kenaha, ko Timina, ko Amareke.
1CH 1:37 Ko ngā tama a Reuere: ko Nahata, ko Heraha, ko Hamaha, ko Miha.
1CH 1:38 Nā, ko ngā tama a Heira: ko Rōtana, ko Hopara, ko Tipeona, ko Anaha, ko Rīhona, ko Ētere, ko Rīhana.
1CH 1:39 Nā, ko ngā tama a Rōtana: ko Hori, ko Homama; ā, ko Timina te tuahine o Rōtana.
1CH 1:40 Nā, ko ngā tama a Hopara: ko Ariana, ko Manahata, ko Ēpara, ko Hepi, ko Ōnama. Ā, ko ngā tama a Tipeona: ko Aia, ko Anaha.
1CH 1:41 Ko ngā tama a Anaha: ko Rīhona. Ko ngā tama a Rīhona: ko Āmarama, ko Ehepana, ko Itirana, ko Kerana.
1CH 1:42 Ko ngā tama a Ētere: ko Pirihana, ko Taawana, ko Taakana. Ko ngā tama a Rīhana: ko Uhu, ko Arana.
1CH 1:43 Nā, ko ngā kīngi ēnei i kīngi nei ki te whenua o Ēroma i te mea kāhore noa he kīngi i kīngi ki ngā tama a Īharaira: ko Pera tama a Peoro; ko te ingoa o tōna pā ko Rinihapa.
1CH 1:44 Ā, ka mate a Pera, ko Iopapa tama a Tera o Potora te kīngi i muri i a ia.
1CH 1:45 Ka mate a Iopapa, ko Hūhama o te whenua o ngā Temani te kīngi i muri i a ia.
1CH 1:46 Ā, ka mate a Hūhama, ko Harara tama a Perara, nāna nei i patu a Miriana i te pārae o Moapa, te kīngi i muri i a ia, ā, ko Awiti te ingoa o tōna pā.
1CH 1:47 Ā, ka mate a Harara, (ko Hāmara o Mahareka te kīngi i muri i a ia.)
1CH 1:48 Ā, ka mate a Hāmara, ko Haora o Rehopoto i te taha o te awa te kīngi i muri i a ia.
1CH 1:49 Ā, ka mate a Haora, ko Paara-Hanana tama a Akaporo te kīngi i muri i a ia.
1CH 1:50 Ā, ka mate a Paara-Hanana, ko Harara te kīngi i muri i a ia; ā, ko Pai te ingoa o tōna pā. Ko Mehetapere te ingoa o tāna wahine; he tamāhine nā Matarere tamāhine a Metāhapa.
1CH 1:51 Ā, ka mate a Harara. Nā, ko ngā ariki o Ēroma: ko Ariki Timina, ko Ariki Aria, ko Ariki Ietete,
1CH 1:52 ko Ariki Ahoripama, ko Ariki Eraha, ko Ariki Pinona,
1CH 1:53 ko Ariki Kenaha, ko Ariki Temana, ko Ariki Mipitara,
1CH 1:54 ko Ariki Makatiere, ko Ariki Irama. Ko ngā ariki ēnei o Ēroma.
1CH 2:1 Ko ngā tama ēnei a Īharaira: ko Reupena, ko Himiona, ko Rīwai, ko Hūrā, ko Ihākara, ko Hepurona,
1CH 2:2 ko Rāna, ko Hōhepa, ko Pineamine, ko Napatari, ko Kara, ko Āhera.
1CH 2:3 Ko ngā tama a Hūrā: ko Ere, ko Ōnama, ko Heraha; ā, ko ēnei tama tokotoru āna nā Patehua Kanaani. Nā, i hē a Ere mātāmua a Hūrā i te aroaro o Ihowā; ā, whakamatea ana e ia.
1CH 2:4 Nā, whānau ake tāna, i tāna hunaonga i a Tāmara, ko Parete, ko Tera. Ko ngā tama katoa a Hūrā tokorima.
1CH 2:5 Ko ngā tama a Parete: ko Heterono, ko Hāmuru.
1CH 2:6 Ko ngā tama a Tera: ko Tīmiri, ko Ētana, ko Hēmana, ko Karakoro, ko Rara, huihuia rātou ka tokorima.
1CH 2:7 Nā, ko ngā tama a Karami: ko Ākara ko te kaiwhakararu o Īharaira, i hē nei i te mea i kangā.
1CH 2:8 Ā, ko ngā tama a Ētana: ko Atāria.
1CH 2:9 Ko ngā tama hoki a Heterono, i whānau māna: ko Ierameere, ko Rame, ko Kerupai.
1CH 2:10 Nā Rame ko Aminarapa; nā Aminarapa ko Nāhahona, he rangatira nō ngā tama a Hūrā.
1CH 2:11 Ā, nā Nāhahona ko Hārama, nā Hārama ko Poaha,
1CH 2:12 ā, nā Poaha ko Ōpere, nā Ōpere ko Hehe.
1CH 2:13 Ā, ko te mātāmua a Hehe ko Eriapa, ko Apinarapa hoki te tuarua, ā, ko Himea te tuatoru;
1CH 2:14 ko Netanēre te tuawhā, ko Rara te tuarima;
1CH 2:15 ko Oteme te tuaono, ko Rāwiri te tuawhitu;
1CH 2:16 ā, ko ō rātou tuāhine, ko Teruia rāua ko Apikaira. Ā, ko ngā tama a Teruia: ko Āpihai, ko Ioapa, ko Atahere, tokotoru.
1CH 2:17 Whānau ake tā Apikaira, ko Amaha: nā, ko te pāpā o Amaha, ko Iētere Ihimaeri.
1CH 2:18 Ā, ka whānau he tama mā Karepe, mā te tama a Heterono, i tāna wahine i a Atupa, ā, i a Ierioto; ā, ko ēnei a tēnei tama: ko Tehere, ko Hōpapa, ko Ararono.
1CH 2:19 Nā, ka mate a Atupa, ā, ka tangohia e Karepe māna a Ēparata, ā, whānau ake tā rāua ko Huru.
1CH 2:20 Whānau ake tā Huru, ko Uri; whānau ake tā Uri, ko Petarēre.
1CH 2:21 Nā muri iho ka haere a Heterono ki te tamāhine a Makiri, pāpā o Kireara. E ono tekau ōna tau i tāna tangohanga i a ia; ā, whānau ake tā rāua, ko Hekupu.
1CH 2:22 Whānau ake tā Hekupu, ko Haira. E rua tekau mā toru ōna pā i te whenua o Kireara.
1CH 2:23 Ā, i tangohia e Kehuru rāua ko Arame ngā pā o Haira i a rātou, a Kenata anō hoki, me ōna pā ririki, e ono tekau ngā pā. Ko ēnei katoa he tama nā Makiri, pāpā o Kireara.
1CH 2:24 Ā, nō muri i te matenga o Heterono i Karepe Ēparata, ka whānau a Apia wahine a Heterono, ko tā rāua tama ko Ahuru pāpā o Tekoa.
1CH 2:25 Ko ngā tama a Ierameere mātāmua a Heterono: ko Rame, ko te mātāmua, ko Puna, ko Orene, ko Oteme, ko Āhia.
1CH 2:26 He wahine anō tā Ierameere, ko tōna ingoa ko Atara; ko te whaea ia o Ōnama.
1CH 2:27 Nā, ko ngā tama a Rame, a te mātāmua a Ierameere: ko Maata, ko Iamini, ko Ekere.
1CH 2:28 Nā, ko ngā tama a Ōnama: ko Hamai, ko Iara. Ko ngā tama a Hamai: ko Nātapa, ko Apihuru.
1CH 2:29 Nā, ko te ingoa o te wahine a Apihuru ko Apihaira whānau ake a rāua, ko Ahapana, ko Moriri.
1CH 2:30 Nā, ko ngā tama a Nātapa: ko Herere, ko Apaima; i mate urikore ia a Herere.
1CH 2:31 Nā, ko ngā tama a Apaima: ko Ihi. Ko ngā tama a Ihi: ko Hehana. Ā, ko ngā tama a Hehana: ko Aharai.
1CH 2:32 Ko ngā tama a Iara teina o Hamai: ko Iētere, ko Honatana; i mate urikore anō a Iētere.
1CH 2:33 Nā, ko ngā tama a Honatana: ko Perete, ko Tata. Ko ngā tama ēnei a Ierameere.
1CH 2:34 Nā, kāhore he tama a Hehana; engari he tamāhine. He pononga ia tā Hehana, he Īhipiana, ko tōna ingoa, ko Iaraha.
1CH 2:35 Nā, ka hoatu e Hehana tāna tamāhine ki tāna pononga ki a Iaraha hei wahine māna; ā, whānau ake tā rāua; ko Atai.
1CH 2:36 Whānau ake tā Atai ko Nātana, ā, nā Nātana ko Tāpara;
1CH 2:37 nā Tāpara ko Eperāra, ā, nā Eperara ko Ōpere.
1CH 2:38 Nā Ōpere ko Iehu, ā, nā Iehu ko Atāria.
1CH 2:39 Nā Atāria ko Herete, ā, nā Herete ko Ereaha.
1CH 2:40 Nā Ereaha ko Hīhāmai, ā, nā Hīhāmai ko Harumu.
1CH 2:41 Nā Harumu ko Tekamia, ā, nā Tekamia ko Erihama.
1CH 2:42 Nā, ko ngā tama a Karepe teina o Ierameere: ko Meha tāna mātāmua, ko te pāpā ia o Tiwhi; me ngā tama a Mareha te pāpā o Heperona.
1CH 2:43 Nā, ko ngā tama a Heperona: ko Koraha, ko Tapua, ko Rekeme, ko Hema.
1CH 2:44 Nā Hema ko Rahama, ko te pāpā o Torokoama; ā, nā Rekeme ko Hamai.
1CH 2:45 Nā, ko te tama a Hamai ko Maono; ā, ko Maono te pāpā o Peteturu.
1CH 2:46 Ā, whānau ake tā Epa, tā te wahine iti a Karepe, ko Harana, ko Mota, ko Katete; nā Harana ko Katete.
1CH 2:47 Nā, ko ngā tama a Taharai: ko Rekeme, ko Iotama, ko Kehama, ko Perete, ko Epa, ko Haapa.
1CH 2:48 Whānau ake a Maaka, a te wahine iti a Karepe, ko Hēpere, ko Tirihana.
1CH 2:49 Whānau ake anō āna, ko Haapa, ko te pāpā o Māramana, ko Hewha pāpā o Makapena, pāpā hoki o Kipea. Nā, ko te tamāhine a Karepe, ko Ākaha.
1CH 2:50 Ko ngā tama ēnei a Karepe tama a Huru, mātāmua a Ēparata: ko Hopara pāpā o Kiriata Tearimi,
1CH 2:51 ko Hārama, pāpā o Pēterehema, ko Harepe pāpā o Petekarere.
1CH 2:52 Nā, he tama anō a Hopara pāpā o Kiriata Tearimi: ko Haroe, me tētahi taha o ngā Manaheti,
1CH 2:53 me ngā hapū o Kiriata Tearimi; ngā Ītiri, ngā Puti, ngā Humati, ngā Mihirai; nō ēnei ngā Torati, me ngā Ehetauri.
1CH 2:54 Ko ngā tama a Hārama: ko Pēterehema, ko ngā Netopati, ko Ataroto, ko te whare o Ioapa, ko tētahi taha o ngā Manaheti, ko ngā Tori.
1CH 2:55 Me ngā hapū o ngā kaituhituhi i noho ki Tapete: ngā Tirati, ngā Himeati, ngā Hukati. Ko ngā Keni ēnei, ko ngā uri o Hemata, o te pāpā o te whare o Rekapa.
1CH 3:1 Nā, ko ngā tama ēnei a Rāwiri, āna i whānau ki Heperona: Ko te mātāmua, ko Amanono, nā Ahinoama Ietereeri. Ko te tuarua, ko Raniera, nā Apikaira Karameri.
1CH 3:2 Ko te tuatoru, ko Apohārama, he tama nā Maaka tamāhine a Tāramai kīngi o Kehuru. Ko te tuawhā, ko Aronia ko te tama a Hākiti.
1CH 3:3 Ko te tuarima, ko Hepatia o Apitara. Ko te tuaono, ko Itireama, nā tāna wahine, nā Ekera.
1CH 3:4 Tokoono i whānau māna ki Heperona; ā, e whitu ngā tau e ono ngā marama i kīngi ai ia ki reira. Ā, e toru tekau mā toru ngā tau i kīngi ai ia ki Hiruhārama.
1CH 3:5 Nā, ko ēnei āna i whānau ki Hiruhārama: ko Himea, ko Hōpapa, ko Nātana, ko Horomona, tokowhā nā Patahua tamāhine a Amiere;
1CH 3:6 ko Ipihara, anō hoki, ko Erihama, ko Eriparete;
1CH 3:7 ko Noka, ko Nepeke, ko Iāpia;
1CH 3:8 ko Erihama, ko Eriara, ko Eriperete, tokoiwa.
1CH 3:9 Ko ngā tama katoa ēnei a Rāwiri; tērā anō ētahi, ko ngā tama a ngā wāhine iti; ko Tāmara anō hoki tō rātou tuahine.
1CH 3:10 Nā, ko te tama a Horomona, ko Rehopoama: ko tāna tama ko Apia, ko tāna tama ko Aha, ko tāna tama ko Iehohāpata,
1CH 3:11 ko tāna tama ko Iorama, ko tāna tama ko Ahatia, ko tāna tama ko Ioaha,
1CH 3:12 ko tāna tama ko Amatia, ko tāna tama ko Atāria, ko tāna tama ko Iotama.
1CH 3:13 Ko tāna tama ko Ahata, ko tāna tama ko Hetekia, ko tāna tama ko Mānahi,
1CH 3:14 ko tāna tama ko Amono, ko tāna tama ko Hōhia.
1CH 3:15 Nā, ko ngā tama a Hōhia: ko te tuatahi ko Iohanana, ko te tuarua ko Iehoiakimi, ko te tuatoru ko Terekia, ko te tuawhā ko Harumu.
1CH 3:16 Ā, ko ngā tama a Iehoiakimi: ko tāna tama ko Hekonia, ko tāna tama ko Terekia.
1CH 3:17 Ā, ko ngā tama a Hekonia, a te herehere: ko Haratiera, ko tāna tama,
1CH 3:18 ko Marakirama, ko Peraia, ko Henatara, ko Iekamia, ko Hōhama, ko Nerāpia.
1CH 3:19 Nā, ko ngā tama a Peraia: ko Herupapera, ko Himei; ā, ko ngā tama a Herupapera: ko Mehūrāma, ko Hanania; ā, ko Heromiti tō rāua tuahine;
1CH 3:20 me Hahupa anō, me Ohere, me Perekia, me Hatāria, me Tuhapa Hētere, tokorima.
1CH 3:21 Nā, ko ngā tama a Hanania: ko Peratia, ko Ihāia; ko ngā tama a Repaia, ko ngā tama a Arana, ko ngā tama a Opāria, ko ngā tama a Hekania.
1CH 3:22 Nā, ko ngā tama a Hekania: ko Hemaia. Ko ngā tama a Hemaia: ko Hatuhu, ko Ikara, ko Paria, ko Nearia, ko Hāpata, tokoono.
1CH 3:23 Nā, ko ngā tama a Nearia: ko Erioenai, ko Hetekia, ko Atarikama, tokotoru.
1CH 3:24 Nā, ko ngā tama a Erioenai: ko Horaia, ko Eriahipi, ko Peraia, ko Akupu, ko Iohanana, ko Teraia, ko Anani, tokowhitu.
1CH 4:1 Ko ngā tama a Hūrā: ko Parete, ko Heterono, ko Karami, ko Huru, ko Hopara.
1CH 4:2 Nā, whānau ake tā Reaia, tā te tama a Hopara; ko Iahata. Whānau ake tā Iahata, ko Ahumai, ko Rahara. Ko ngā hapū ēnei o ngā Torati.
1CH 4:3 Nā, ko ngā tama ēnei a te pāpā o Etama: ko Ietereere, ko Ihima, ko Iripaha; ko te ingoa anō o tō rātou tuahine, ko Haterereponi,
1CH 4:4 ko Penuere pāpā o Keroro, me Ētere pāpā o Huhaha. Ko ngā tama ēnei a Huru a te mātāmua a Ēparata pāpā o Pēterehema.
1CH 4:5 Nā, tokorua ngā wāhine a Ahuru pāpā o Tekoa; ko Heraha, ko Nāra.
1CH 4:6 Nā, whānau ake ā rāua ko Naara; ko Ahutama, ko Hewhere, ko Temeni, ko Hatara-arara. Ko ngā tama ēnei a Naara.
1CH 4:7 Nā, ko ngā tama a Heraha: ko Terete, ko Ietoara, ko Etenana.
1CH 4:8 Ā, whānau ake a Koto; ko Anupu, ko Topepa, me ngā hapū o Aharahere tama a Harumu.
1CH 4:9 Nā, nui atu te ingoa o Tapete i tō ōna tuākana, tēina; i huaina anō hoki tōna ingoa e tōna whaea ko Tapete; i mea ia, “Nō te mea i mamae tōku ngākau i a ia i whānau i roto i ahau.”
1CH 4:10 Ā, i karanga a Tapete ki te Atua o Īharaira, i mea, “Auē! Me i pono rawa tāu manaaki mōku, me i whakanuia e koe te wāhi mōku, kia tata mai anō hoki tōu ringa ki ahau, kia āraia atu hoki e koe te kino i ahau, kei mamae tōku ngākau!” Nā, ka hōmai e te Atua tāna i īnoi ai.
1CH 4:11 Nā, whānau ake tā Kerupu, tā te teina o Hua ko Mehiri; ko te pāpā ia o Ehetono.
1CH 4:12 Whānau ake tā Ehetono; ko Peterapa, ko Pahea, ko Tehina pāpā o Irinahaha. Ko ngā tāngata ēnei o Rekaha.
1CH 4:13 Nā, ko ngā tama a Kenaha: ko Otoniere, ko Heraia; nā, ko ngā tama a Otoniere; ko Hatata.
1CH 4:14 Nā, whānau ake tā Meonotai, ko Opora; whānau ake tā Heraia, ko Ioapa matua o Kēharahimi; he hunga mōhio rātou ki te mahi.
1CH 4:15 Nā, ko ngā tama a Karepe tama a Iepune: ko Iru, ko Eraha, ko Naama; me ngā tama a Eraha: arā a Kenaha.
1CH 4:16 Me ngā tama a Ieharerēre: ko Tiwhi, ko Tipaha, ko Tiria, ko Atarēre.
1CH 4:17 Nā, ko ngā tama a Etera: ko Iētere, ko Merere, ko Ēpere, ko Tarono. Ā, whānau ake āna; ko Miriama, ko Hamai, ko Ihīpa, pāpā o Ehetemoa.
1CH 4:18 Ā, whānau ake a tāna wahine, a Iehuria; ko Iarere pāpā o Keroro, ko Hēpere pāpā o Hoko, ko Iekutiere pāpā o Tanoa. Ko ngā tama ēnei a Pitia, tamāhine a Parao i riro nei i a Merere.
1CH 4:19 Ā, ko ngā tama a te wahine a Horīa, tuahine o Nahama: ko te pāpā o Keira Karami, me Ehetemoa Maakati.
1CH 4:20 Nā, ko ngā tama a Himono: ko Amanono, ko Rina, ko Penehanana, ko Tirono. Nā, ko ngā tama a Ihi: ko Tohete, ko Penetohete.
1CH 4:21 Ko ngā tama a Heraha tama a Hūrā: ko Ere pāpā o Reka, ko Rāra pāpā o Mareha, me ngā hapū o te whare o ngā kaimahi rīnena, o te whare o Ahapea;
1CH 4:22 me Tokimi, me ngā tāngata o Kotepa, me Ioaha, me Harapa, ko ngā rangatira nei ēnei o Moapa, me Tahupi Reheme. (Nā, he kōrero nōnamata ēnei).
1CH 4:23 Ko ēnei ngā kaihanga rīhi, me ngā tāngata i noho ki Netaimi, ki Keteraha; i noho rātou ki reira ki te kīngi ki āna mahi.
1CH 4:24 Ko ngā tama a Himiona: ko Nemuere, ko Iamini, ko Iaripi, ko Tera, ko Haora;
1CH 4:25 ko tāna tama ko Harumu; ko tāna tama ko Mipihama; ko tāna tama ko Mihima.
1CH 4:26 Ā, ko ngā tama a Mihima: ko tāna tama ko Hāmuere, ko tāna tama ko Tākuru; ko tāna tama ko Himei.
1CH 4:27 Nā, kotahi tekau mā ono ngā tama a Himei, tokoono ngā tamāhine; kīhai ia i tokomaha ngā tamariki a ōna tuākana, kīhai hoki ō rātou hapū katoa i nui haere, kīhai i rite ki ngā tama a Hūrā.
1CH 4:28 Nā, ko ō rātou nohoanga, i Peerehepa, i Morara, i Hatarahuara,
1CH 4:29 i Piriha, i Ateme, i Torara,
1CH 4:30 i Petuere, i Horema, i Tikiraka,
1CH 4:31 i Petemarakapoto, i Hatarahuhimi, i Petepirei, i Haaraimi. Ko ō rātou pā ēnei, ā tae noa ki te kīngitanga o Rāwiri.
1CH 4:32 Nā, ko ō rātou kāinga, ko Etama, ko Aina, ko Rimono, ko Tokene, ko Ahana, e rima ngā pā,
1CH 4:33 me ō rātou kāinga katoa i ngā taha katoa o aua pā rā anō, tae noa ki Paara. Ko ō rātou nohoanga ēnei, ā, kei a rātou tō rātou whakapapa.
1CH 4:34 Me Mehopapa anō, rātou ko Tamareke, ko Hōha tama a Amatia,
1CH 4:35 ko Hoera, ko Iehu tama a Tohipia, tama a Heraia, tama a Ahiere,
1CH 4:36 ko Erioenai, ko Taakopa, ko Hehohaia, ko Ahaia, ko Ariere, ko Tehimiere, ko Penaia,
1CH 4:37 ko Tita tama a Hipi, tama a Arono, tama a Ieraia, tama a Himiri, tama a Hemaia.
1CH 4:38 Ko ēnei, kua whakahuatia nei ō rātou ingoa, he rangatira nō ō rātou hapū. I nui haere anō ngā whare o ō rātou mātua.
1CH 4:39 I haere hoki rātou ki te tapokoranga atu ki Keroro, ki te rāwhiti rā anō o te raorao, ki te rapu haerenga mō ā rātou kāhui.
1CH 4:40 Ā, ka kitea e rātou he haerenga mōmona, he wāhi pai, he whenua whānui anō, āta takoto rangimārie; nō Hama hoki te hunga i noho ki reira i mua.
1CH 4:41 Nā, ko te haerenga mai o te hunga kua tuhituhia nei ō rātou ingoa i ngā rā o Hetekia kīngi o Hūrā, patua iho e rātou ō rātou tēneti me ngā Meunimi, i kitea ki reira, hunā rawatia iho hoki rātou taea noatia tēnei rā, noho iho ana ki tō rātou wāhi; nō te mea he haerenga i reira mō ā rātou hipi.
1CH 4:42 Nā, ko ētahi o rātou, arā o ngā tama a Himiona, e rima rau tāngata, i haere ki Maunga Heira, ko ō rātou rangatira ko Peratia, ko Nearia, ko Repaia, ko Utiere, he tama ēnei nā Ihi.
1CH 4:43 Ā, patua iho e rātou ngā oranga o ngā Amareki i mawhiti i mua; noho ana i reira ā taea noatia tēnei rā.
1CH 5:1 Nā, ko ngā tama a Reupena mātāmua a Īharaira. (Ko ia hoki te mātāmua. Heoi, i te mea i whakapokea e ia te moenga o tōna pāpā, ka hoatu tōna mātāmuatanga ki ngā tama a Hōhepa, tama a Īharaira; nā, e kore te whakapapa e tīmata i te mātāmua.
1CH 5:2 I nui ake hoki a Hūrā i ōna tuākana, tēina, he uri hoki nōna te tino rangatira; otiia i a Hōhepa te mātāmuatanga.)
1CH 5:3 Ko ngā tama a Reupena mātāmua a Īharaira: ko Ēnoka, ko Paru, ko Heterono, ko Karami.
1CH 5:4 Ko ngā tama a Hoera: ko tāna tama ko Hemaia, ko tāna tama ko Koko, ko tāna tama ko Himei,
1CH 5:5 ko tāna tama ko Mika, ko tāna tama ko Reaia, ko tāna tama ko Paara,
1CH 5:6 ko tāna tama ko Pēraha, ko tērā i riro pārau rā i a Tirikata Pirinehere kīngi o Ahiria; he rangatira ia nō ngā Reupeni.
1CH 5:7 Nā, ko ōna tēina me ō rātou hapū, ki te whakapapatia ō rātou whakatupuranga: ko ngā tino rangatira ko Teiere, ko Hakaraia,
1CH 5:8 ko Pera tama a Atata, tama a Hema, tama a Hoera, i noho nei ki Aroere ā tae noa ki Nepo, ki Paara-Meono.
1CH 5:9 I nohoia anō e ia te taha ki te rāwhiti, tae noa ki te koraha e takoto mai ana i te awa i Uparati; nō te mea i nui haere ā rātou kararehe ki te whenua o Kireara.
1CH 5:10 Nā, i ngā rā o Haora ka whawhaitia e rātou ngā Hākari, hinga iho i ō rātou ringa; noho ana rātou ki ō rātou tēneti i te whenua katoa o Kireara ki te rāwhiti.
1CH 5:11 Nā, ko ngā tama a Kara i noho i te ritenga mai o tō rātou i te whenua o Pahana tae noa ki Hareka:
1CH 5:12 ko Hoera te upoko, muri iho ko Hapama, ko Tānai, ko Hāpata i Pahana.
1CH 5:13 Nā, ko ō rātou tēina o ngā whare o ō rātou mātua: ko Mikaera, ko Mehūrāma, ko Hēpā, ko Torai, ko Takana, ko Tia, ko Ēpere, tokowhitu.
1CH 5:14 Ko ngā tama ēnei a Apihaira tama a Huri, tama a Taroa, tama a Kireara, tama a Mikaera, tama a Tehihai, tama a Taharo, tama a Putu;
1CH 5:15 ko Ahi tama a Apariere, tama a Kuni; ko te upoko ia o ngā whare o ō rātou mātua.
1CH 5:16 Ā, noho ana rātou ki Kireara o Pahana, ki ōna pā ririki, ki ngā taha anō o Harono, ki ō rātou taha ki waho.
1CH 5:17 He mea whakapapa ēnei katoa i ngā rā o Iotama kīngi o Hūrā, i ngā rā anō o Ieropoama kīngi o Īharaira.
1CH 5:18 Ko ngā tama a Reupena, rātou ko ngā Kari, ko tētahi tānga o te hapū o Mānahi, nō te hunga toa, he hunga hāpai i te whakangungu rākau, i te hoari, he hunga kōpere i te kōpere, e mōhio ana hoki ki te whawhai, e whā tekau mā whā mano e whitu rau e ono tekau taua hunga i āhei te haere ki te whawhai.
1CH 5:19 I whawhai hoki rātou ki ngā Hākari, ki Ieturu, ki Nāpihi, ki Norapa;
1CH 5:20 i āwhinatia anō rātou ki te whawhai ki a rātou, ā, ka hōmai ngā Hākari ki ō rātou ringa, rātou ko ō rātou hoa katoa. I karanga hoki rātou ki te Atua i te whawhaitanga, ā, tahuri ana ia ki a rātou; mō rātou i whakawhirinaki ki a ia.
1CH 5:21 I riro anō hoki i a rātou ā rātou kararehe: o ā rātou kāmera e rima tekau mano, o ngā hipi e rua rau e rima tekau mano, o ngā kāihe e rua mano, o ngā tāngata kotahi rau mano.
1CH 5:22 He tokomaha hoki i hinga, mate rawa; nā te Atua hoki te whawhai; ā, noho ana rātou ki tō rātou wāhi ā taea noatia te whakaraunga.
1CH 5:23 I noho anō ngā tama a tētahi tānga o te hapū o Mānahi ki te whenua; i tini haere anō rātou ki Pahana ā tae noa ki Paara-Heremona, ki Heniri, ki Maunga Heremona anō.
1CH 5:24 Nā, ko ngā upoko ēnei o ngā whare o ō rātou mātua; arā ko Ēpere, ko Ihi, ko Eriere, ko Atariere, ko Heremaia, ko Horawia, ko Tahariere, he hunga nunui, he mārohirohi, he hunga ingoa nui, he upoko anō nō ngā whare o ō rātou mātua.
1CH 5:25 Nā, kua hē rātou ki te Atua o ō rātou mātua, kua whai, kua pūremu ki ngā atua o ngā iwi o te whenua i hunā nei e te Atua i tō rātou aroaro.
1CH 5:26 Nā, ka whakaohokia e te Atua o Īharaira te wairua o Puru kīngi o Ahiria, te wairua hoki o Tirikata Pirinehere kīngi o Ahiria, ā, whakaraua ana rātou e ia, arā ngā Reupeni, ngā Kari, me tētahi tānga o te hapū o Mānahi, ā, kawea ana rātou e ia ki Haraha, ki Haporo, ki Hara, ki te awa o Kotana ā taea noatia tēnei rā.
1CH 6:1 Ko ngā tama a Rīwai: ko Kerehona, ko Kohata, ko Merari.
1CH 6:2 Ā, ko ngā tama a Kohata: ko Āmarama, ko Itihara, ko Heperona, ko Utiere.
1CH 6:3 Nā, ko ngā tama a Āmarama: ko Ārona, ko Mohi, ko Miriama. Ā, ko ngā tama a Ārona: ko Nātapa, ko Apihu, ko Ereātara, ko Itamara.
1CH 6:4 Nā Ereātara ko Pinehaha, nā Pinehaha ko Apīhua,
1CH 6:5 nā Apīhua ko Puki, ā, nā Puki ko Uti,
1CH 6:6 nā Uti ko Terahia, ā, nā Terahia ko Meraioto;
1CH 6:7 nā Meraioto ko Amaria, ā, nā Amaria ko Ahitupu;
1CH 6:8 nā Ahitupu ko Hāroko, ā, nā Hāroko ko Ahimāta;
1CH 6:9 nā Ahimāta hoki ko Atāria, ā, nā Atāria ko Iohanana;
1CH 6:10 nā Iohanana ko Atāria, (ko ia nei te tohunga i mahi i roto i te whare i hangā e Horomona ki Hiruhārama).
1CH 6:11 Ā, nā Atāria ko Amaria, nā Amaria ko Ahitupu;
1CH 6:12 nā Ahitupu ko Hāroko, nā Hāroko ko Harumu;
1CH 6:13 nā Harumu ko Hirikia, ā, nā Hirikia ko Atāria,
1CH 6:14 nā Atāria ko Heraia, ā, ko tā Heraia ko Iohereke;
1CH 6:15 i whakaraua atu a Iohereke i te mauranga atu a Ihowā i a Hūrā, i Hiruhārama hoki, nā te ringa o Nepukaneha.
1CH 6:16 Ko ngā tama a Rīwai: ko Kerehoma, ko Kohata, ko Merari.
1CH 6:17 Ā, ko ngā ingoa ēnei o ngā tama a Kerehoma: ko Ripini, ko Himei.
1CH 6:18 Nā, ko ngā tama a Kohata: ko Āmarama, ko Itihara, ko Heperona, ko Utiere.
1CH 6:19 Ko ngā tama a Merari: ko Māhari, ko Muhi. Ko ngā hapū anō ēnei o ngā Rīwaiti i te tikanga iho o ngā whare o ō rātou mātua.
1CH 6:20 Nā Kerehoma ko tāna tama ko Ripini, ko tāna tama ko Iahata, ko tāna tama ko Tima,
1CH 6:21 ko tāna tama ko Ioaha, ko tāna tama ko Iro, ko tāna tama ko Tera, ko tāna tama ko Teaterai.
1CH 6:22 Ko ngā tama a Kohata: ko tāna tama ko Aminarapa, ko tāna tama ko Koraha, ko tāna tama ko Ahiri,
1CH 6:23 ko tāna tama ko Erekana, ko tāna tama ko Epiahapa, ko tāna tama ko Ahiri,
1CH 6:24 ko tāna tama ko Tahata, ko tāna tama ko Uriere, ko tāna tama ko Utia, ko tāna tama ko Haora.
1CH 6:25 Nā, ko ngā tama a Erekana: ko Amahai, ko Ahimoto,
1CH 6:26 nā, mō Erekana, ko ngā tama a Erekana; ko tāna tama ko Towhai, ko tāna tama ko Nahata;
1CH 6:27 ko tāna tama ko Eriapa, ko tāna tama ko Ierohama, ko tāna tama ko Erekana.
1CH 6:28 Nā, ko ngā tama a Hamuera: ko te mātāmua ko Hoera, ā, ko te tuarua ko Apia.
1CH 6:29 Ko ngā tama a Merari: ko Māhari, ko tāna tama ko Ripini, ko tāna tama ko Himei, ko tāna tama ko Uha,
1CH 6:30 ko tāna tama Himeia, ko tāna tama ko Hakia, ko tāna tama ko Ahaia.
1CH 6:31 Ā, ko te hunga tēnei i whakaritea e Rāwiri mō te mahi waiata i te whare o Ihowā, i te mea ka whai okiokinga te āka.
1CH 6:32 I minita anō rātou ki te ritenga atu o te nohoanga o te tapenākara o te whakaminenga, i waiata, ā taea noatia te hanganga a Horomona i te whare o Ihowā ki Hiruhārama; kātahi rātou ka tūturu ki tā rātou mahi i whakaritea mā rātou.
1CH 6:33 Nā, ko te hunga tēnei i tūturu, me ā rātou tama: Nō ngā tama a ngā Kohati: ko Hēmana, he kaiwaiata, he tama nā Hoera, tama a Hamuera,
1CH 6:34 tama a Erekana, tama a Ierohama, tama a Eriere, tama a Toaha,
1CH 6:35 tama a Tupu, tama a Erekana, tama a Mahata, tama a Amahai,
1CH 6:36 tama a Erekana, tama a Hoera, tama a Atāria, tama a Tepania,
1CH 6:37 tama a Tahata, tama a Ahiri, tama a Epiahapa, tama a Koraha,
1CH 6:38 tama a Itihara, tama a Kohata, tama a Rīwai, tama a Īharaira.
1CH 6:39 Ko tōna teina anō hoki ko Āhapa, i tū nei ki tōna ringa matau: arā a Āhapa, tama a Perekia, tama a Himea,
1CH 6:40 tama a Mikaera, tama a Paaheia, tama a Marakia,
1CH 6:41 tama a Eteni, tama a Tera, tama a Araia,
1CH 6:42 tama a Ētana, tama a Tima, tama a Himei,
1CH 6:43 tama a Iahata, tama a Kerehoma, tama a Rīwai.
1CH 6:44 Nā, i te taha ki mauī ko ō rātou tēina, ko ngā tama a Merari: ko Ētana tama a Kihihi, tama a Apari, tama a Maruku,
1CH 6:45 tama a Hahapia, tama a Amatia, tama a Hirikia,
1CH 6:46 tama a Amati, tama a Pani, tama a Hamere,
1CH 6:47 tama a Māhari, tama a Muhi, tama a Merari, tama a Rīwai.
1CH 6:48 I whakaritea anō hoki ō rātou tuākana, tēina, ngā Rīwaiti, ki ngā mahi katoa o te tapenākara o te whare o te Atua.
1CH 6:49 Ko Ārona ia i mea whakahere, rātou ko āna tama, ki runga ki te āta tahunga tinana, ki runga hoki ki te āta tahu whakakakara; ko tā rātou ko ngā mahi katoa o te whare tino tapu, ko te whakamārie mō Īharaira; ko ngā mea katoa i whakahaua e Mohi pononga a te Atua.
1CH 6:50 Nā, ko ngā tama ēnei a Ārona: ko tāna tama ko Ereātara, ko tāna tama ko Pinehaha, ko tāna tama ko Apīhua,
1CH 6:51 ko tāna tama ko Puki, ko tāna tama ko Uti, ko tāna tama ko Terahia,
1CH 6:52 ko tāna tama ko Meraioto, ko tāna tama ko Amaria, ko tāna tama ko Ahitupu,
1CH 6:53 ko tāna tama ko Hāroko, ko tāna tama ko Ahimāta.
1CH 6:54 Nā, ko ō rātou nohoanga ēnei i te tātai o ō rātou puni i roto i ō rātou rohe: i ngā tama a Ārona, o ngā whānau o ngā Kohati, nō rātou nei hoki te rota tuatahi.
1CH 6:55 I hoatu ki a rātou a Heperona i te whenua o Hūrā, me ngā wāhi i waho ake o tērā ā whawhe noa,
1CH 6:56 ko ngā māra ia o te pā, me ōna pā ririki, i hoatu ki a Karepe tama a Iepune.
1CH 6:57 Ā, i hoatu ki ngā tama a Ārona, o ngā pā o Hūrā, ko Heperona, ko te pā whakaora: ko Rīpina me ōna wāhi o waho ake, ko Iatiri, ko Ehetemoa me ngā wāhi o waho ake,
1CH 6:58 ko Hirene me ōna wāhi o waho ake, ko Repiri me ōna wāhi o waho ake,
1CH 6:59 ko Ahana me ōna wāhi o waho ake, ko Petehemehe me ōna wāhi o waho ake.
1CH 6:60 Ā, nō o te iwi o Pineamine, ko Kepa me ōna wāhi o waho ake, ko Aremete me ōna wāhi o waho ake, ko Anatoto me ōna wāhi o waho ake. Ko ō rātou pā katoa i ō rātou hapū katoa, kotahi tekau mā toru pā.
1CH 6:61 Ā, ki te toenga atu o ngā tama a Kohata i hoatu, he mea nā te rota, nō roto i o tētahi hapū o te iwi, nō tētahi tānga o te iwi, te tānga o Mānahi, tekau ngā pā.
1CH 6:62 Ā, ki ngā tama a Kerehoma i ō rātou hapū, tekau mā toru ngā pā, nō te iwi o Ihākara, nō te iwi o Āhera, nō te iwi o Napatari, nō te iwi o Mānahi i Pahana.
1CH 6:63 Ā, ki ngā tama a Merari i ō rātou hapū, i hoatu tekau mā rua ngā pā, he mea rota; nō te iwi o Reupena, nō te iwi o Kara, nō te iwi o Hepurona.
1CH 6:64 Nā, he mea hoatu ēnei pā me ngā wāhi o waho ake e ngā tama a Īharaira ki ngā Rīwaiti.
1CH 6:65 I hoatu anō e rātou, he mea rota, ēnei pā kua huaina nei ngā ingoa, nō roto i ō te iwi o ngā tama a Hūrā, i ō te iwi anō hoki o ngā tama a Himiona, i ō te iwi anō hoki o ngā tama a Pineamine.
1CH 6:66 Nā, ko ētahi o ngā hapū o ngā tama a Kohata i ā rātou ētahi pā i ō rātou rohe, nō o te iwi o Ēparaima.
1CH 6:67 Ā, i hoatu e rātou ki a rātou ngā pā whakaora: a Hekeme i te whenua pukepuke o Ēparaima me ngā wāhi o waho ake ōna, a Kētere hoki me ōna wāhi o waho ake,
1CH 6:68 a Iokomēama me ōna wāhi o waho ake, a Petehorono me ōna wāhi o waho ake,
1CH 6:69 a Atarono, me ōna wāhi o waho ake, a Katarimono me ōna wāhi o waho ake.
1CH 6:70 Ā, nō tētahi tānga o te iwi o Mānahi, ko Anere me ōna wāhi o waho ake, ko Pireama me ōna wāhi o waho ake, mō te hapū o ngā mea i mahue o ngā tama a Kohata.
1CH 6:71 Ā, ki ngā tama a Kerehoma: i hoatu i roto i o tētahi tānga o te iwi o Mānahi: ko Korana i Pahana me ōna wāhi o waho ake, ko Ahataroto me ōna wāhi o waho ake;
1CH 6:72 nō roto i ō te iwi o Ihākara: ko Kerehe me ōna wāhi o waho ake, ko Taperata me ōna wāhi o waho ake,
1CH 6:73 ko Rāmoto me ōna wāhi o waho ake, ko Aneme me ōna wāhi o waho ake;
1CH 6:74 ā, nō o te iwi o Āhera: ko Mahara me ōna wāhi o waho ake, ko Aparono me ōna wāhi o waho ake,
1CH 6:75 ko Hukoko me ōna wāhi o waho ake ko Rehopo me ōna wāhi o waho ake;
1CH 6:76 ā, nō o te iwi o Napatari: ko Kerehe i Karirī me ōna wāhi o waho ake, ko Hamono me ōna wāhi o waho ake, ko Kiriataima me ōna wāhi o waho ake.
1CH 6:77 Ki ērā atu o ngā Rīwaiti, ki ngā tama a Merari, i hoatu: nō o te iwi o Hepurona ko Rimono me ōna wāhi o waho ake, ko Taporo me ōna wāhi o waho ake,
1CH 6:78 ā, i tērā taha o Horano, i te ritenga o Heriko, i te taha ki te rāwhiti o Horano i hoatu ki a rātou ētahi pā nō o te iwi o Reupena: ko Pētere i te koraha me ōna wāhi o waho ake, ko Iahata me ōna wāhi o waho ake,
1CH 6:79 ko Keremoto me ōna wāhi o waho ake, ko Mepaata me ōna wāhi o waho ake;
1CH 6:80 ā, nō o te iwi o Kara: ko Rāmoto i Kireara me ōna wāhi o waho ake, ko Mahanaima me ōna wāhi o waho ake,
1CH 6:81 ko Hehepona me ōna wāhi o waho ake, ko Iatere me ōna wāhi o waho ake.
1CH 7:1 Nā, ko ngā tama a Ihākara: ko Tora, ko Pua, ko Iahupu, ko Himirono, tokowhā.
1CH 7:2 Ā, ko ngā tama a Tora: ko Uti, ko Repaia, ko Teriere, ko Iahamai, ko Tipihama, ko Hemuera, ko ngā upoko o ngā whare o ō rātou pāpā, arā o tō Tora, he hunga māia rātou, he mārohirohi i ō rātou whakatupuranga, ko tō rātou tokomaha i ngā rā o Rāwiri e rua tekau mā rua mano, e ono rau.
1CH 7:3 Ā, ko ngā tama a Uti: ko Itirahia. Ko ngā tama a Itirahia: ko Mikaera, ko Opāria, ko Hoera, ko Ihīa, tokorima, he upoko ēnei katoa.
1CH 7:4 Nā, ka hui ki a rātou, i ō rātou whakatupuranga, i ngā whare o ō rātou mātua, ko ngā rōpū hōia mō te whawhai, e toru tekau mā ono mano: he tokomaha hoki ā rātou wāhine, ā rātou tamariki.
1CH 7:5 Nā, ko ō rātou tēina i roto i ngā hapū katoa o Ihākara, he toa, he mārohirohi, e waru tekau mā whitu mano, ki te whakapapatia rātou katoa.
1CH 7:6 Ko ngā tama a Pineamine: ko Pera, ko Pekere, ko Teriaere, tokotoru.
1CH 7:7 Ā, ko ngā tama a Pera: ko Etepono, ko Uti, ko Utiere, ko Terimoto, ko Iri, tokorima; he upoko ēnei nō ngā whare o ō rātou mātua, he hunga toa, he mārohirohi; taua ana rātou i ō rātou whakapapa e rua tekau mā rua mano e toru tekau mā whā.
1CH 7:8 Ā, ko ngā tama a Pekere: ko Temira, ko Toaha, ko Eriētere, ko Erioenai, ko Omori, ko Teremoto, ko Apia, ko Anatoto, ko Aramete. He tama ēnei katoa nā Pekere,
1CH 7:9 ā, ka taua rātou i ō rātou whakapapa, i ō rātou whakatupuranga, ngā upoko o ngā whare o ō rātou mātua, ngā toa, ngā mārohirohi, e rua tekau mano e rua rau.
1CH 7:10 Ā, ko ngā tama a Teriaere: ko Pirihana. Nā, ko ngā tama a Pirihana: ko Ieuhu, ko Pineamine, ko Ehuru, ko Kenāna, ko Tetana, ko Tarahihi, ko Ahīhāhara.
1CH 7:11 Ko ēnei katoa he tama nā Teriaere, he upoko nō ngā whare o ō rātou mātua, he toa, he mārohirohi, kotahi tekau mā whitu mano rātou e rua rau, he hōia hei haere ki te whawhai, ki te tūranga riri.
1CH 7:12 Ko Tupimi anō, ko Hupimi, ko ngā tama a Iri, ko Huhimi, ko ngā tama a Ahere.
1CH 7:13 Ko ngā tama a Napatari: ko Tahatiere, ko Kuni, ko Iētere, ko Harumu, arā ko ngā tama a Piriha.
1CH 7:14 Ko ngā tama a Mānahi: ko Ahariere, i whānau nei i tāna wahine; nā tāna wahine iti hoki, nā te Arami, a Makiri pāpā o Kireara.
1CH 7:15 Nā, ka tangohia e Makiri hei wahine māna ko te tuahine o Hupimi rāua ko Tupimi, ko te ingoa o tō rāua tuahine ko Maaka. Ko te ingoa o te tuarua o āna tama ko Teropēhara; ā, he tamāhine anō a Teropēhara.
1CH 7:16 Nā, kua whānau a Maaka wahine a Makiri he tama, ā, huaina iho tōna ingoa ko Perehe; ā, ko te ingoa o tōna teina ko Herehe; ko āna tama; ko Urama, ko Rakeme.
1CH 7:17 Nā, ko ngā tama a Urama: ko Perana. Ko ngā tama ēnei a Kireara, tama a Makiri, tama a Mānahi.
1CH 7:18 Nā, whānau ake a tōna tuahine, a Hamorekete, ko Ihihoro, ko Apiētere, ko Mahara.
1CH 7:19 Ā, ko ngā tama a Hemira: ko Ahiana, ko Hekeme, ko Rikihi, ko Aniama.
1CH 7:20 Nā, ko ngā tama a Ēparaima: ko Hutera, ko tāna tama ko Pereke, ko tāna tama ko Tahata, ko tāna tama ko Erara, ko tāna tama ko Tahata,
1CH 7:21 ko tāna tama ko Tāpara, ko tāna tama ko Hutera, ko Ētere, ko Eriara. I patua ēnei e ngā tāngata o Kāta i whānau nei ki taua whenua, mō rātou i haere atu ki te tango i ā rātou kararehe.
1CH 7:22 Ā, he tini ngā rā i tangihia ai rātou e tō rātou pāpā, e Ēparaima, ā, haere ana mai ōna tuākana, tēina, ki te whakamārie i a ia.
1CH 7:23 Ā, i haere atu ia ki tāna wahine, ka hapū, ā, ka whānau he tama, ā, huaina iho tōna ingoa ko Peria, nō te mea kei roto tōna whare i te hē.
1CH 7:24 Ā, ko Heraha tāna tamāhine, nāna nei i hanga a Petehorono, tō raro me tō runga, me Uteneheraha.
1CH 7:25 Nā, ko Repaha tāna tama, ko Rehepe hoki; ko tāna tama ko Teraha, ko tāna tama ko Tahana,
1CH 7:26 ko tāna tama ko Rārana, ko tāna tama ko Amihuru, ko tāna tama ko Erihama,
1CH 7:27 ko tāna tama ko Nunu, ko tāna tama ko Hohua.
1CH 7:28 Nā, ko ō rātou kāinga tupu, me ō rātou nohoanga, ko Pētēre, me ōna pā ririki; ki te taha ki te rāwhiti ko Naarana; ki te taha ki te hauāuru ko Kētere me ōna pā ririki; ko Hekeme anō hoki me ōna pā ririki, tae noa ki Kaha me ōna pā ririki;
1CH 7:29 ā, i ngā taha o ngā tama a Mānahi ko Peteheana me ōna pā ririki, ko Tānaka me ōna pā ririki, ko Mekiro me ōna pā ririki, ko Roro me ōna pā ririki. I noho ki ēnei ngā tama a Hōhepa tama a Īharaira.
1CH 7:30 Ko ngā tama a Āhera: ko Imina, ko Ihua, ko Ihui, ko Peria, me tō rātou tuahine, me Hera.
1CH 7:31 Ā, ko ngā tama a Peria: ko Hēpere, ko Marakiere, ko te pāpā nei ia o Piritawiti.
1CH 7:32 Nā Hēpere ko Taparete, ko Homere, ko Hōtama, me tō rātou tuahine anō, me Hua.
1CH 7:33 Ā, ko ngā tama a Taparete: ko Pahaka, ko Pimihara, ko Ahawata. Ko ngā tama ēnei a Taparete.
1CH 7:34 Nā, ko ngā tama a Homere: ko Ahi, ko Rohoka, ko Tehupa, ko Arame.
1CH 7:35 Ā, ko ngā tama a tōna teina, a Hēreme: ko Topaha, ko Imina, ko Herehe, ko Amara.
1CH 7:36 Ā, ko ngā tama a Topaha: ko Hua, ko Haranēpere, ko Huara, ko Peri, ko Imirā,
1CH 7:37 ko Pētere, ko Horo, ko Hamama, ko Hiriha, ko Itirana, ko Pēra.
1CH 7:38 Ā, ko ngā tama a Iētere: ko Iepune, ko Pihipa, ko Āra.
1CH 7:39 Ko ngā tama a Ura: ko Araha, ko Haniere, ko Retia.
1CH 7:40 Ko ēnei katoa he tama nā Āhera, he upoko nō ngā whare o ngā pāpā, he hunga whiriwhiri, he mārohirohi, he māia, ko ngā rangatira nunui tonu. I tō rātou tauanga i runga i te whakapapa, ko te tokomaha o te hunga hei haere ki te whawhai, ki te tūranga riri, e rua tekau mā ono mano tāngata.
1CH 8:1 Nā, whānau ake a Pineamine, ko tāna mātāmua ko Pera, ko te tuarua ko Ahapere, ko te tuatoru ko Ahara,
1CH 8:2 ko te tuawhā ko Noha, ko te tuarima ko Rapa.
1CH 8:3 Nā, ko ngā tama a Pera: ko Arara, ko Kera, ko Apihuru,
1CH 8:4 ko Apīhua, ko Naamana, ko Ahoa,
1CH 8:5 ko Kera, ko Hepupana, ko Hūrāma.
1CH 8:6 Ā, ko ngā tama ēnei a Ehuru, ko ngā upoko ēnei o ngā whare o ngā mātua o ngā tāngata o Kepa, ā, whakahekea ana rātou e rātou ki Manahata:
1CH 8:7 me Naamana, me Āhia, me Kera, i whakahekea rātou e ia; ā, whānau ake āna ko Uha, ko Ahihuru.
1CH 8:8 I whānau anō hoki he tamariki mā Haharaima i te whenua o Moapa i muri iho i tāna tononga atu i a rātou; ko āna wāhine ko Huhimi, ko Paara.
1CH 8:9 Whānau ake ā rāua ko tāna wahine ko Horehe; ko Iopapa, ko Tipia, ko Meha, ko Marakama,
1CH 8:10 ko Teutu, ko Hakia, ko Mirima. Ko āna tama ēnei, ko ngā upoko o ngā whare o ngā mātua.
1CH 8:11 Ā, whānau ake ā rāua ko Huhimi, ko Apitupu, ko Erepāra.
1CH 8:12 Ko ngā tama a Erepāra: ko Ēpere, ko Mihama, ko Hamere, nāna nei i hanga a Ono, a Roro me ō reira pā ririki,
1CH 8:13 ko Peria hoki rāua ko Hema (ko ngā upoko rāua o ngā whare o ngā mātua o ngā tāngata o Atarono i peia ai ngā tāngata o Kāta);
1CH 8:14 ko Ahio, ko Hahaka, ko Teremoto.
1CH 8:15 Ko Tepāria, ko Arara, ko Arere,
1CH 8:16 ko Mikaera, ko Ihīpa, ko Toha, ko ngā tama a Peria.
1CH 8:17 Ko Tepāria, ko Mehūrāma, ko Heteki, ko Hēpere,
1CH 8:18 ko Ihimerai anō hoki, ko Ieteria, ko Iopapa, ko ngā tama a Erepāra.
1CH 8:19 Ko Iākimi, ko Tīkiri, ko Tapari;
1CH 8:20 ko Erienai, ko Tiretai, ko Eriere;
1CH 8:21 ko Araia, ko Peraia, ko Himirata, ko ngā tama ēnei a Himei.
1CH 8:22 Ko Ihipana, ko Ēpere, ko Eriere,
1CH 8:23 ko Aparono, ko Tīkiri, ko Hanana,
1CH 8:24 ko Hanania, ko Erama, ko Anatotia,
1CH 8:25 ko Ipēreia, ko Penuere, ko ngā tama ēnei a Hahaka.
1CH 8:26 Ko Hamāherai, ko Heharia, ko Atāria,
1CH 8:27 ko Tarehia, ko Īraia, ko Tīkiri, ko ngā tama a Ierohama.
1CH 8:28 Ko ngā upoko ēnei o ngā whare o ngā mātua i ō rātou whakatupuranga, he upoko rātou. I noho ēnei ki Hiruhārama.
1CH 8:29 Ā, i Kipeono e noho ana te pāpā o Kipeono, a Teiere, ā, ko te ingoa o tāna wahine ko Maaka.
1CH 8:30 Ā, ko tāna mātāmua ko Aparono, ko Turu, ko Kihi, ko Paara, ko Nātapa,
1CH 8:31 ko Keroro, ko Ahio, ko Takere.
1CH 8:32 Nā, whānau ake tā Mikiroto, ko Himea. I noho anō ēnei ki ō rātou tuākana ki Hiruhārama, i te wāhi e anga tonu mai ana ki a rātou.
1CH 8:33 Whānau ake tā Nere, ko Kihi; whānau ake tā Kihi, ko Haora; whānau ake tā Haora, ko Honatana, ko Marikihua, ko Apinarapa, ko Ehepaara.
1CH 8:34 Nā, ko te tama a Honatana: ko Meripaara; ā, whānau ake tā Meripaara, ko Mika.
1CH 8:35 Nā, ko ngā tama a Mika: ko Pitono, ko Mereke, ko Tarea, ko Ahata.
1CH 8:36 Nā Ahata ko Tehoara; nā Tehoara ko Aremete, ko Ātamawete, ko Tīmiri; ā, nā Tīmiri ko Mota.
1CH 8:37 Nā Mota ko Pinea; ko Rapa tāna tama, ko Ereaha tāna tama, ko Atere tāna tama.
1CH 8:38 Nā, tokoono ngā tama a Atere; ko ō rātou ingoa ēnei: ko Atarikama, ko Pokeru, ko Ihimaera, ko Hearia, ko Opāria, ko Hanana. He tama ēnei katoa nā Atere.
1CH 8:39 Nā, ko ngā tama a Ēheke, a tōna teina: ko Urama tāna mātāmua, ko Ieuhu te tuarua, ko Eriperete te tuatoru.
1CH 8:40 Nā, he māia, he mārohirohi ngā tama a Urama, he kaikōpere, he tokomaha hoki ā rātou tama, me ngā tama a ngā tama, kotahi rau e rima tekau. He tama ēnei katoa nā Pineamine.
1CH 9:1 Nā, he mea whakapapa a Īharaira katoa; heoi, tēnā kua tuhituhia ki te pukapuka o ngā kīngi o Īharaira. Nā, i whakaraua atu a Hūrā ki Papurōna mō ā rātou mahi hē.
1CH 9:2 Nā, ko ngā tāngata tuatahi i noho ki ō rātou wāhi, ki ō rātou pā, ko Īharaira, ko ngā tohunga, ko ngā Rīwaiti, ko ngā Netinimi.
1CH 9:3 Nā, noho iho ki Hiruhārama o ngā tama a Hūrā, o ngā tama a Pineamine, o ngā tama a Ēparaima rāua ko Mānahi:
1CH 9:4 Ko Utai tama a Amihuru, tama a Omori, tama a Imiri, tama a Pani; nō ngā tama a Parete tama a Hūrā.
1CH 9:5 Ā, o ngā Hironi: ko Ahaia te mātāmua rātou ko āna tama.
1CH 9:6 O ngā tama a Tera: ko Teuere rātou ko ō rātou tēina, e ono rau e iwa tekau.
1CH 9:7 O ngā tama a Pineamine: ko Hāru tama a Mehūrāma, tama a Horawia, tama a Hahenua,
1CH 9:8 ko Ipineia tama a Ierohama, ko Eraha tama a Uti, tama a Mikiri, ko Mehūrāma tama a Hepatia, tama a Reuere, tama a Ipinīa;
1CH 9:9 me ō rātou tēina anō hoki i ō rātou whakatupuranga, e iwa rau e rima tekau mā ono. He upoko ēnei tāngata katoa nō ngā whare o ngā mātua i ngā whare o ō rātou mātua.
1CH 9:10 Ā, o ngā tohunga: ko Ieraia, ko Tehoiaripi, ko Iakini,
1CH 9:11 ko Atāria, tama a Hirikia, tama a Mehūrāma, tama a Hāroko, tama a Meraioto, tama a Ahitupu, ko te rangatira ia o te whare o te Atua.
1CH 9:12 Ko Araia tama a Ierohama, tama a Pahuru, tama a Marakia, ko Māhiai tama a Ariere, tama a Tahatera, tama a Mehūrāma, tama a Mehiremiti, tama a Imere.
1CH 9:13 Me ō rātou tēina, ngā upoko o ngā whare o ō rātou mātua, kotahi mano e whitu rau e ono tekau, he tāngata pakari rawa hei mahi i ngā mahi o te whare o te Atua.
1CH 9:14 Ā, o ngā Rīwaiti: ko Hemaia tama a Hahupu, tama a Atarikama, tama a Hahapia; nō ngā tama a Merari;
1CH 9:15 ko Pakapakakara, ko Herehe, ko Karara, ko Matania, tama a Mika, tama a Tīkiri, tama a Āhapa;
1CH 9:16 ko Opāria tama a Hemaia, tama a Karara, tama a Ierutunu, ko Perekia tama a Aha, tama a Erekana, i noho nei ki ngā kāinga koraha o ngā Netopati.
1CH 9:17 Ko ngā kaitiaki kūwaha: ko Harumu, ko Akupu, ko Taramono, ko Ahimana, me ō rātou tēina; ko Harumu te upoko;
1CH 9:18 ko tō rātou tūranga i mua, kei te kūwaha o te kīngi, kei te rāwhiti. He kaitiaki kūwaha rātou i roto i ngā rōpū o ngā tama a Rīwai.
1CH 9:19 Nā, ko Harumu tama a Kore, tama a Epiahapa, tama a Koraha, rātou ko ōna tēina o te whare o tōna matua, ko ngā Korahi, ko rātou ngā rangatira o ngā mahi e mahia ana, ngā kaitiaki o ngā kūwaha o te tapenākara. Nā, he rangatira ō rātou mātua nō te ope a Ihowā, he kaitiaki anō nō te tomokanga.
1CH 9:20 Nā, ko Pinehaha tama a Ereātara tō rātou rangatira i mua; ā, i a ia anō a Ihowā.
1CH 9:21 Ko Hakaraia tama a Meheremia te kaitiaki o te kūwaha o te tapenākara o te whakaminenga.
1CH 9:22 Ko ēnei katoa i whiriwhiria nei hei kaitiaki mō ngā kūwaha, e rua rau kotahi tekau mā rua. He mea whakapapa ēnei ki ō rātou kāinga ake; nā Rāwiri rāua ko Hamuera matakite rātou i whakarite kia tūturu ki taua mahi.
1CH 9:23 I a rātou ko ā rātou tama te mahi tirotiro i ngā kūwaha o te whare o Ihowā, arā o te whare o te tapenākara i tēnei tiakitanga, i tēnei tiakitanga.
1CH 9:24 He kaitiaki kūwaha i ngā taha e whā, whaka te rāwhiti, whaka te hauāuru, whaka te raki, whaka te tonga.
1CH 9:25 Nā, i whakaritea ō rātou tēina i ō rātou kāinga koraha kia haere mai i te takanga o ngā rā e whitu, i ia wā, i ia wā, hei hoa mō rātou.
1CH 9:26 Ko ngā tino kaitiaki tokowhā hoki o te kūwaha, he Rīwaiti nei rātou, he tūturu tonu tā rātou mahi, ā, ko rātou ngā rangatira o ngā rūma, o ngā takotoranga taonga o te whare o te Atua.
1CH 9:27 He nohoanga hoki tō rātou i ngā taha o te whare o te Atua; mā rātou hoki te tiaki; mā rātou anō te uaki o ngā tatau i tēnei ata, i tēnei ata.
1CH 9:28 Ko ētahi hoki o rātou ki te tiaki i ngā oko mō te mahi, tatau ai ina kawea mai ki roto, tatau ai anō ina mauria ki waho.
1CH 9:29 I whakaritea hoki ētahi o rātou hei tiaki mō ngā oko, mō ngā mea mahi katoa anō o te wāhi tapu, mō te parāoa, mō te wāina, mō te hinu, mō te parakihe, mō ngā mea kakara.
1CH 9:30 Ko ētahi anō o ngā tama a ngā tohunga hei hanga i te hinu o ngā mea kakara.
1CH 9:31 Nā, ko Matitia, ko tētahi o ngā Rīwaiti, ko te mātāmua a Harumu Korahi, ko tāna mahi tūturu ko te tirotiro i ngā mea i tunua ki te rīhi.
1CH 9:32 Nā, ko ētahi o ō rātou tēina, o ngā tama a ngā Kohati, ngā kaiwhakaaro ki te taro aroaro, kia oti te hanga i tēnei hāpati, i tēnei hāpati.
1CH 9:33 Ko ngā kaiwaiata anō ēnei, ko ngā upoko o ngā whare o ngā mātua o ngā Rīwaiti, i noho rātou i roto i ngā rūma, ā, i noho wātea rātou i ērā atu mahi i tā rātou nā mahi hoki rātou i te ao, i te pō.
1CH 9:34 Nā, ko ēnei ngā upoko o ngā whare o ngā mātua o ngā Rīwaiti, ko ngā upoko anō rātou i ō rātou whakatupuranga; i noho ēnei ki Hiruhārama.
1CH 9:35 I noho anō ki Kipeono te pāpā o Kipeono, a Teiere; ko te ingoa o tāna wahine ko Maaka.
1CH 9:36 Nā, ko tāna mātāmua ko Aparono, ko Turu hoki, ko Kihi, ko Paara, ko Nere, ko Nātapa,
1CH 9:37 ko Keroro, ko Ahio, ko Hakaraia, ko Mikiroto.
1CH 9:38 Whānau ake tā Mikiroto, ko Himeana. I noho anō ēnei ki ō rātou tuākana ki Hiruhārama, ki te wāhi e anga tonu ana ki ō rātou tuākana.
1CH 9:39 Whānau ake tā Nere, ko Kihi; whānau ake tā Kihi, ko Haora; whānau ake tā Haora, ko Honatana, ko Marikihua, ko Apinarapa, ko Ehepaara.
1CH 9:40 Ko te tama a Honatana: ko Meripaara; whānau ake tā Meripaara, ko Mika.
1CH 9:41 Nā, ko ngā tama a Mika: ko Pitono, ko Mereke, ko Taharea, ko Ahata.
1CH 9:42 Whānau ake tā Ahata, ko Iaraha; whānau ake tā Iaraha, ko Aremete, ko Ātamawete, ko Tīmiri. Whānau ake tā Tīmiri, ko Mota.
1CH 9:43 Whānau ake tā Mota, ko Pinea; ko tāna tama ko Repaia, ko tāna tama ko Ereaha, ko tāna tama ko Atere.
1CH 9:44 Nā, tokoono ngā tama a Atere, ko ō rātou ingoa ēnei: ko Atarikama, ko Pokeru, ko Ihimaera, ko Hearia, ko Opāria, ko Hanana; ko ngā tama ēnei a Atere.
1CH 10:1 Nā, kua whawhai ngā Pirihitini ki a Īharaira; ā, ka whati ngā tāngata o Īharaira i te aroaro o ngā Pirihitini, ā, hinga ana, mate rawa, i Maunga Kiripoa.
1CH 10:2 Nā, ka whāia e ngā Pirihitini a Haora rātou ko āna tama; ā, patua iho e ngā Pirihitini a Honatana rātou ko Apinarapa, ko Marikihua, ngā tama a Haora.
1CH 10:3 Nā, kua taikaha haere te whawhai ki a Haora, ā, kua mau ia i ngā kaikōpere; ā, kua hē tōna manawa i ngā kaikōpere.
1CH 10:4 Kātahi a Haora ka mea ki tāna kaimau patu, “Unuhia tāu hoari, werohia hoki ahau; kei haere mai tēnei hunga kokotikore, kei whakatupu kino i ahau.” Otiia kīhai i pai tāna kaimau patu; he nui hoki nō tōna hopohopo. Heoi, ka mau a Haora ki tāna hoari, hinga iho ana ki runga.
1CH 10:5 Ā, nō te kitenga o tāna kaimau patu kua mate a Haora, ka hinga hoki ia ki runga ki tāna hoari, ā, ka mate.
1CH 10:6 Heoi, ka mate a Haora me āna tama tokotoru; mate tahi ana tōna whare katoa.
1CH 10:7 Ā, nō te kitenga o ngā tāngata katoa o Īharaira i te raorao kua whati rātou, kua mate hoki a Haora rātou ko āna tama, whakarērea ake e rātou ō rātou pā, ā, rere ana. Nā, ka haere mai ngā Pirihitini, ā, nohoia iho e rātou.
1CH 10:8 Ā, i te aonga ake, i te haerenga mai o ngā Pirihitini ki te muru i te hunga i patua, nā, ka kitea a Haora rātou ko āna tama e takoto ana i runga i Maunga Kiripoa.
1CH 10:9 Nā, huia ana ōna e rātou, tangohia ana tōna upoko me āna patu, tukua ana kia kawea puta noa i te whenua o ngā Pirihitini ā tawhio noa, kia kauwhautia ki ā rātou whakapakoko, ki te iwi.
1CH 10:10 I whakatakotoria hoki e rātou āna patu ki te whare o ō rātou atua, ā, ko tōna upoko titia ake e rātou ki te whare o Rakono.
1CH 10:11 Ā, nō te rongonga o Iapehe Kireara katoa ki ngā mea katoa i mea ai ngā Pirihitini ki a Haora,
1CH 10:12 ka whakatika ngā mārohirohi katoa, tangohia iho e rātou te tinana o Haora, me ngā tinana o āna tama, kawea ana ki Iapehe, tanumia ana ō rātou wheua ki raro i tētahi oki i Iapehe, ā, e whitu ngā rā i nohopuku ai rātou.
1CH 10:13 Heoi, kua mate a Haora mō tōna hē; i hē ai ia ki a Ihowā, mō te kupu a Ihowā kīhai nei i puritia e ia; mōna hoki i ui ki tētahi, i a ia nei te atua māori, he rapu whakaaro,
1CH 10:14 ā, kīhai i rapu whakaaro i a Ihowā. Nō reira, i whakamatea ai ia e ia, ā, hurihia kētia ana te kīngitanga ki a Rāwiri tama a Hehe.
1CH 11:1 Nā, ka huihui a Īharaira katoa ki a Rāwiri ki Heperona, ā, ka mea, “Tēnei mātou, he wheua nōu he kikokiko nōu.
1CH 11:2 I mua ake nei, i te mea anō ko Haora te kīngi, ko koe te kaikawe atu te kaikawe mai, i a Īharaira. Kua kōrerotia anō koe e Ihowā, e tōu Atua: Ko koe hei hēpara mō tāku iwi, mō Īharaira, ko koe anō hei tino tangata mō tāku iwi, mō Īharaira.”
1CH 11:3 Nā, ka haere ngā kaumātua katoa o Īharaira ki te kīngi, ki Heperona, ka whakarite kawenata a Rāwiri ki a rātou ki Heperona ki te aroaro o Ihowā; ā, whakawahia ana e rātou a Rāwiri hei kīngi mō Īharaira, ko tā Ihowā hoki i kī ai, arā ko tā Hamuera.
1CH 11:4 Nā, ka haere a Rāwiri rātou ko Īharaira katoa ki Hiruhārama arā ki Iepuhu; i reira anō ngā Iepuhi, ngā tāngata whenua.
1CH 11:5 Nā, ka mea ngā tāngata o Iepuhu ki Rāwiri, “E kore koe e tae mai ki konei.” Heoi, kua riro i a Rāwiri te pourewa i Hiona; ko te pā ia o Rāwiri.
1CH 11:6 Nā, ka mea a Rāwiri, “Ko te tangata māna te patu tuatahi ki ngā Iepuhi, hei tino tangata ia, hei rangatira.” Nā, ko Ioapa tama a Teruia kua tae wawe, ā, meinga ana ko ia te tino tangata.
1CH 11:7 Nā, ka noho a Rāwiri ki te pourewa; koia i huaina ai e rātou a reira ko te pā o Rāwiri.
1CH 11:8 Ā, i hangā e ia te pā ā tawhio noa, o Miro mai ā taka noa; ā, nā Ioapa i whakaora tērā atu wāhi o te pā.
1CH 11:9 Nā, ka tino nui haere a Rāwiri, i a ia hoki a Ihowā, te Atua o ngā mano.
1CH 11:10 Nā, ko ngā tino tāngata ēnei a Rāwiri, i kaha rawa nei me ia mō tōna rangatiratanga, rātou ko Īharaira katoa, hei whakakīngi i a ia; hei pērā me tā Ihowā i kī ai mō Īharaira.
1CH 11:11 Ā, ko te tokomaha tēnei o ngā mārohirohi a Rāwiri: ko Iahopeama, tama a tētahi Hakamoni, te rangatira o te toru tekau; i ara ake tāna tao ki ngā rau e toru ā patua iho e ia i te whakaekenga kotahi.
1CH 11:12 I muri i a ia ko Ereātara tama a Roro Ahohi; ko ia tētahi o ngā mārohirohi tokotoru.
1CH 11:13 I a Rāwiri ia i Paharamime, ā, i huihui ngā Pirihitini ki reira ki te whawhai, ā, i reira tētahi wāhi whenua e kapi ana i te pārei; nā, kua rere te iwi i te aroaro o ngā Pirihitini.
1CH 11:14 Nā, tū ana rāua i waenganui o taua wāhi, ā, ka mau i a rāua, patua iho e rāua ngā Pirihitini; nā, nui atu te whakaoranga i whakaora ai a Ihowā.
1CH 11:15 Nā, ka haere ngā rangatira tokotoru, nō te toru tekau, ki raro, ki te kāmaka ki a Rāwiri, ki te ana o Aturama; ā, ko te ope o ngā Pirihitini i te raorao i Repaima e noho ā-puni ana.
1CH 11:16 Nā, i roto a Rāwiri i te pourewa i taua wā, ā, ko ngā hōia pupuri a ngā Pirihitini i Pēterehema i taua wā.
1CH 11:17 Nā, ka minamina a Rāwiri, ā, ka mea, “Auē, me he tangata hei mea wai mai mōku i te puna i Pēterehema, i tērā i te kūwaha!”
1CH 11:18 Nā, tika ana taua tokotoru nā waenganui o te puni o ngā Pirihitini, ā, utuhia mai ana he wai i te puna o Pēterehema, i tērā i te kūwaha; tangohia ana e rātou, mauria ana ki a Rāwiri. Otiia kīhai a Rāwiri i pai ki te inu, engari ringihia ana e ia hei mea ki a Ihowā.
1CH 11:19 I mea ia, “Auē, mā tōku Atua ahau e ārai kei mea i tēnei! Kia inumia koia e ahau ngā toto o ēnei tāngata, me i kotahi nei kua mate?” Me i kotahi hoki rātou kua mate i te tikinga atu. Nā reira i kore ai ia i pai ki te inu. Ko ēnei ngā mahi a aua toa tokotoru.
1CH 11:20 Nā, ko Āpihai teina o Ioapa te rangatira o taua tokotoru; i ara ake tāna tao ki ngā rau e toru, patua iho e ia; i whai ingoa ia i roto i te tokotoru.
1CH 11:21 O te tokotoru, nui atu tōna korōria i tō te tokorua, ā, meinga ana ko ia hei rangatira mō rātou. Otiia, kīhai ia i uru ki te tokotoru tuatahi.
1CH 11:22 Me Penaia tama a Iehoiara, he tama nā tētahi tangata toa o Kapateere, he nui āna mahi, nāna i patu ngā tama tokorua a Ariere o Moapa; i haere anō ia ki raro, ā, patua ana e ia tētahi raiona i roto i te rua i te wā o te hukarere.
1CH 11:23 Nāna hoki tētahi Īhipiana i patu, he tangata nui, e rima ngā whatīanga te roa. He tao anō i te ringa o taua Īhipiana koia anō kei te rākau a te kaiwhatu; nā, haere ana ia ki raro, ki a ia, he tokotoko hoki tāna, ā, kapohia ana e ia te tao i roto i te ringa o te Īhipiana, patua iho ia ki tāna tao anō.
1CH 11:24 Nā Penaia tama a Iehoiara ēnei mahi; i whai ingoa anō ia i ngā toa tokotoru.
1CH 11:25 Nā, nōna te korōria nui o te toru tekau; otiia kīhai ia i uru ki te tokotoru tuatahi. Nā, meinga ana ia e Rāwiri hei rangatira mō āna kaitiaki.
1CH 11:26 Me ngā māia hoki o ngā ope: ko Atahere teina o Ioapa, ko Erehanana tama a Roro o Pēterehema,
1CH 11:27 ko Hamoto Harori, ko Herete Peroni;
1CH 11:28 ko Ira tama a Ikehe Tekoi, ko Apiētere Anatoti;
1CH 11:29 ko Hipekai Huhati, ko Irai Ahohi;
1CH 11:30 ko Maharai Netopati, ko Herere tama a Paana, he Netopati;
1CH 11:31 ko Itai tama a Ripai, nō Kipea, nō ngā tama a Pineamine, ko Penaia Piratoni;
1CH 11:32 ko Hūrai, nō ngā awaawa o Kāha, ko Apiere Arapati;
1CH 11:33 ko Ātamawete Paharumi, ko Eriāhapa Haaraponi;
1CH 11:34 ko ngā tama a Hāheme Kitoni, ko Honatana tama a Hake Harari;
1CH 11:35 ko Ahiama tama a Hakara Harari, ko Eripara tama a Uru;
1CH 11:36 ko Hewhere Mekerati, ko Āhia Peroni;
1CH 11:37 ko Hetero Karameri, ko Naarai tama a Etepai;
1CH 11:38 ko Hoera teina o Nātana, ko Mipihara tama a Hakeri;
1CH 11:39 Ko Tereke Āmoni, ko Nahari Peeroti, ko te kaimau o ngā patu a Ioapa tama a Teruia;
1CH 11:40 ko Ira Ītiri, ko Karepa Ītiri;
1CH 11:41 ko Uria Hiti, ko Tāpara tama a Aharai;
1CH 11:42 ko Arina tama a Hiti Reupeni, he rangatira nō ngā Reupeni, e toru tekau ōna hoa;
1CH 11:43 ko Hanana tama a Maaka, ko Iohapata Mitini;
1CH 11:44 ko Utia Ahaterati, ko Hama rāua ko Teiere, ko ngā tama a Hōtama Aroeri;
1CH 11:45 ko Teriaere tama a Himiri, rāua ko tōna teina ko Toha te Titi;
1CH 11:46 ko Eriere Mahawi, rātou ko Teripai, ko Tohawia, he tama nā Erenaama, ko Itima Moapi;
1CH 11:47 ko Eriere, ko Ōpere, ko Taahiere Metopai.
1CH 12:1 Ko te hunga tēnei i haere ki a Rāwiri ki Tikiraka, i a ia anō e pūtiki tonu ana i roto i te pā i te wehi o Haora tama a Kihi; nō ngā mārohirohi rātou, hei tuarā mōna ki te whawhai.
1CH 12:2 He hunga kukume kōpere rātou, ko te mauī, ko te matau, ki te kōtaha kōhatu, ki te kōpere i te pere; nō ngā tēina anō o Haora, nō Pineamine.
1CH 12:3 Ko Ahiētere te upoko, nā ko Ioaha, he tama rāua nā Hemaa Kipeati; ko Ietiere, ko Perete he tama nā Ātamawete; ko Peraka, ko Iehu Anatoti,
1CH 12:4 ko Ihimāia Kipeoni, he mārohirohi ia i roto i te toru tekau, he rangatira anō nō te toru tekau; ko Heremaia, ko Tahatiere, ko Iohanana, ko Iotāpara Kererati,
1CH 12:5 ko Erutai, ko Terimoto, ko Pearia, ko Hemaria, ko Hepatia Harupi;
1CH 12:6 ko Erekana, ko Ihīa, ko Atarēre, ko Toētere, ko Iahopeama, he Korahi rātou;
1CH 12:7 ko Toera, ko Tepāria, he tama nā Ierohama o Keroro.
1CH 12:8 Nā, o ngā Kari i maunu ētahi ki a Rāwiri ki te pourewa i te koraha, he tangata mārohirohi, i rauhangatia mō te whawhai, he hunga hāpai i te whakangungu rākau, i te tao. Ko ō rātou mata me te mea he kanohi raiona, rite tonu ō rātou tere ki tō ngā anaterope i runga i ngā maunga:
1CH 12:9 ko Ētere te upoko, ko Opāria te tuarua, ko Eriapa te tuatoru;
1CH 12:10 ko Mihimana te tuawhā, ko Heremaia te tuarima;
1CH 12:11 ko Atai te tuaono, ko Eriere te tuawhitu;
1CH 12:12 ko Iohanana te tuawaru, ko Eretāpara te tuaiwa;
1CH 12:13 ko Heremaia te tuatekau, ko Makapanai te tekau mā tahi.
1CH 12:14 Ko ēnei o ngā tama a Kara he rangatira ope; ko te mea iti rawa hei rangatira mō te rau, ā, ko te mea nui rawa hei rangatira mō te mano.
1CH 12:15 Ko te hunga tēnei i whiti nei i Horano i te marama tuatahi, i te mea kua ngawhā ki runga i ōna pareparenga katoa; ā, whati ana i a rātou te hunga katoa o ngā raorao whaka te rāwhiti, ā, whaka te hauāuru.
1CH 12:16 I haere mai anō ētahi o ngā tama a Pineamine me ētahi o a Hūrā ki te pourewa ki a Rāwiri.
1CH 12:17 Nā, ka puta a Rāwiri ki te whakatau i a rātou, ā, ka oho, ka mea ki a rātou, “Ki te mea he haere pai mai tā koutou ki ahau, he whakauru, ka kotahi tonu ō tātou ngākau. Tēnā ki te tinihanga, he tuku i ahau ki ōku hoariri, i te mea kāhore nei he tutū a ōku ringa, mā te Atua o ō tātou mātua e titiro mai, e riri.”
1CH 12:18 Nā, kua tau te wairua ki a Amahai, ko ia nei te rangatira o te toru tekau, ā, ka kī ia, “Kei a koe mātou, e Rāwiri! Hei hoa mōu, e te tama a Hehe! Kia mau, kia mau te rongo ki a koe, kia mau anō ki ōu whakauru! Ko tōu Atua hoki hei whakauru mōu.” Nā, kua riro rātou i a Rāwiri, ā, meinga ana rātou e ia hei rangatira rangapū.
1CH 12:19 Nā, o Mānahi hoki i papahoro ētahi ki a Rāwiri, i a ia i haere tahi ai me ngā Pirihitini ki te whawhai ki a Haora. (Otiia, kīhai rātou i uru ki a rātou; i panaia hoki ia e ngā rangatira o ngā Pirihitini, he mea whakaaro anō e rātou, i mea rātou, “Tērā ia e taka atu ki tōna ariki, ki a Haora, ko ō tātou upoko e raru.”)
1CH 12:20 I a ia e haere ana ki Tikiraka, ka papahoro mai ki a ia o Mānahi: ko Arana, ko Iotāpara, ko Teriaere, ko Mikaera, ko Iotāpara, ko Erihu, ko Tiritai, he rangatira nō ngā mano o Mānahi.
1CH 12:21 Ko rātou ngā whakauru mō Rāwiri ki te whawhai ki ngā torohē; he mārohirohi hoki, he toa, rātou katoa, he rangatira ope.
1CH 12:22 I haere hoki rātou i taua wā ki a Rāwiri i tēnā rā, i tēnā rā, hei whakauru mōna, nō kua nui te ope, ānō he ope nā te Atua.
1CH 12:23 Ko te tokomaha tēnei o ngā rangatira, he hunga i rite rawa mō te whawhai, i haere ki a Rāwiri ki Heperona hei whakariro i te kīngitanga o Haora ki a ia, kia rite ai ki tā Ihowā kupu.
1CH 12:24 Ko ngā tama a Hūrā, he hunga hāpai i te whakangungu rākau, i te tao, e ono mano e waru rau, rite rawa i te patu mō te whawhai.
1CH 12:25 O ngā tama a Himiona, he mārohirohi, he toa mō te whawhai, e whitu mano kotahi rau.
1CH 12:26 O ngā tama a Rīwai e whā mano e ono rau.
1CH 12:27 Nā, ko Iehoiara te rangatira o te whare o Ārona, ā, e toru mano e whitu rau ōna hoa;
1CH 12:28 me Hāroko anō, he taitama mārohirohi, he toa, rātou ko te whare o tōna pāpā, e rua tekau mā rua ngā rangatira.
1CH 12:29 Ā, o ngā tama a Pineamine, o ngā tēina o Haora, e toru mano. Ko tō rātou nuinga hoki i mau tonu ki te whare o Haora ā taea noatia taua rā.
1CH 12:30 Nā, o ngā tama a Ēparaima, e rua tekau mano e waru rau, he mārohirohi, he toa, he hunga whai ingoa i roto i ngā whare o ō rātou mātua.
1CH 12:31 Ā, o tētahi tānga o te iwi o Mānahi, kotahi tekau mā waru mano, he mea whakahua ō rātou ingoa, hei haere ki te whakakīngi i a Rāwiri.
1CH 12:32 Nā, o ngā tama a Ihākara, he hunga mōhio ki ngā wā, i mōhio ai ki ngā mahi mā Īharaira; e rua rau ō rātou ariki; kei o ēnei māngai anō he tikanga mō ō rātou tēina.
1CH 12:33 O Hepurona, ko te hunga e āhei te haere ki te whawhai, he mōhio ki te tātai i te riri, e mau ana i ngā mea katoa mō te whawhai, e rima tekau mano. He hunga e taea te whakatika te tātai o te riri, ā, kāhore ō rātou ngākau rua.
1CH 12:34 Ā, o Napatari kotahi mano ngā rangatira, e toru tekau mā whitu mano ō rātou hoa, rite rawa i te whakangungu rākau, i te tao.
1CH 12:35 Nā, o ngā Rāni, he hunga mōhio ki te tatau, e rua tekau mā waru mano e ono rau.
1CH 12:36 O Āhera, he hunga haere ki te whawhai, he mōhio ki te tatau, e whā tekau mano.
1CH 12:37 Nā, o tērā taha o Horano, o ngā Reupeni, o ngā Kari, o tētahi tānga o te hapū o Mānahi, e mau ana i ngā mea whawhai katoa mō te tatau, kotahi rau e rua tekau mano.
1CH 12:38 Ko ēnei, he tangata whawhai katoa, he mōhio ki te tatau, he tapatahi tonu te ngākau i haere ai ki Heperona ki te mea i a Rāwiri hei kīngi mō Īharaira katoa. Nā, ko ērā atu katoa o Īharaira, kotahi tonu te ngākau mō te whakakīngi i a Rāwiri.
1CH 12:39 Ā, i reira rātou i a Rāwiri, e toru ngā rā e kai ana, e inu ana; he mea taka hoki nā ō rātou tuākana, tēina.
1CH 12:40 Nā, ko te hunga tata ki a rātou, tae noa atu ki a Ihākara, ki a Hepurona, ki a Napatari, i kawe taro mai i runga i ngā kāihe, i ngā kāmera, i ngā muera, ā, i ngā kau, he kai, he parāoa, he papa piki, he tautau karepe, he wāina, he hinu, he kau, he hipi, tōna tini; he koa hoki nō Īharaira.
1CH 13:1 Nā, ka rūnanga a Rāwiri ki ngā rangatira o ngā mano, o ngā rau, arā ki ngā rangatira katoa.
1CH 13:2 Ā, i mea a Rāwiri ki te whakaminenga katoa o Īharaira, “Ki te pai koutou, ā, ka tika mai i tō tātou Atua, i a Ihowā, me tuku tāngata tātou ki ia wāhi, ki ia wāhi, ki ō tātou tēina kua mahue nei ki ngā whenua katoa o Īharaira, ki a rātou ko ngā tohunga, ko ngā Rīwaiti, ki ngā pā, ki ngā wāhi o waho ake o aua pā, kia huihui mai rātou ki a tātou.
1CH 13:3 Ā, me whakahoki mai e tātou te āka a tō tātou Atua ki a tātou. Kīhai hoki tātou i rapu tikanga ki reira i ngā rā o Haora.”
1CH 13:4 Nā, ka mea te whakaminenga katoa kia pērā anō rātou; he tika hoki taua mea ki te titiro a te iwi katoa.
1CH 13:5 Heoi, ka huihuia e Rāwiri a Īharaira katoa i Hihoro, i te awa o Īhipa ā tae i noa ki te haerenga atu ki Hāmata, hei mau ake i te āka a te Atua i Kiriata Tearimi.
1CH 13:6 Nā, ko te haerenga o Rāwiri rātou ko Īharaira katoa ki Paaraha, arā ki Kiriata Tearimi o Hūrā, hei mau ake i reira i te āka a te Atua, a Ihowā e noho nei i runga o ngā kerupima, i huaina nei ki te Ingoa.
1CH 13:7 Nā, ka mauria e rātou te āka a te Atua i runga i te kāta hou, ā, tangohia ana mai i te whare o Apinarapa; ā, nā Uha rāua ko Ahio i ārahi te kāta.
1CH 13:8 Nā, ka whakapaua te kaha e Rāwiri rātou ko Īharaira katoa ki te tākaro ki te aroaro o te Atua; he waiata anō tā rātou, he hāpa, he timipera, he himipora, he tētere.
1CH 13:9 Ā, ka tae ki te patunga wīti a Hirono, ka totoro te ringa o Uha ki te pupuri i te āka; i tāpatupatu, hoki ngā kau.
1CH 13:10 Nā, ka mura te riri o Ihowā ki a Uha; patua iho mō tōna ringa i totoro ki te āka; ā mate iho ia i reira i te aroaro o te Atua.
1CH 13:11 Nā, ka pōuri a Rāwiri mō te tōreretanga i tōrere ai a Ihowā ki a Uha. Nā, huaina ana e ia taua wāhi ko Pereteuha; e mau nei anō ā taea noatia tēnei rā.
1CH 13:12 Nā, ka wehi a Rāwiri i a Ihowā i taua rā; ā, ka mea ia, “Me pēhea tāku kawe mai i te āka a Ihowā ki ahau ki tōku whare?”
1CH 13:13 Heoi, kīhai a Rāwiri i tango i te āka ki a ia, ki te pā o Rāwiri; i kawea kētia e ia ki te whare o Opere-Eroma Kiti.
1CH 13:14 Nā, noho ana te āka a te Atua ki te whānau a Opere-Eroma, ki tōna whare hoki, e toru ngā marama, ā, ka manaakitia e Ihowā te whare o Opere-Eroma me āna mea katoa.
1CH 14:1 Nā, ka tonoa ētahi karere e Hīrama kīngi o Tāira ki a Rāwiri, me ētahi rākau, he hīta, me ngā kaimahi kōhatu, me ngā kaimahi rākau, hei hanga whare mōna.
1CH 14:2 Nā, ka mōhio a Rāwiri kua whakapūmautia ia e Ihowā hei kīngi mō Īharaira, kua whakanuia hoki tōna rangatiratanga, he whakaaro ki tāna iwi, ki a Īharaira.
1CH 14:3 Nā, ka tangohia anō e Rāwiri he wāhine māna ki Hiruhārama, ā, ka whānau anō ētahi atu tama, ētahi atu tamāhine mā Rāwiri.
1CH 14:4 Ā, ko ngā ingoa ēnei o āna i whānau ki Hiruhārama: ko Hāmua, ko Hōpapa, ko Nātana, ko Horomona,
1CH 14:5 ko Ipihara, ko Erihua, ko Ereparete;
1CH 14:6 ko Noka, ko Nepeke, ko Iāpia;
1CH 14:7 ko Erihama, ko Pēriara, ko Eriparete.
1CH 14:8 Ā, nō te rongonga o ngā Pirihitini kua oti a Rāwiri te whakawahi hei kīngi mō Īharaira katoa, ka haere ngā Pirihitini katoa ki te rapu i a Rāwiri; ā, ka rongo a Rāwiri, ā, ka puta ia ki te tū i a rātou.
1CH 14:9 Nā, tērā ngā Pirihitini kua haere mai, ā, kua takahi i te raorao o Repaima.
1CH 14:10 Nā, ka ui a Rāwiri ki te Atua, ka mea, “Me haere rānei ahau ki ngā Pirihitini? E hōmai rānei rātou e koe ki tōku ringa?” Nā, ka mea a Ihowā ki a ia, “Haere; ka hoatu hoki rātou e ahau ki tōu ringa.”
1CH 14:11 Heoi, kua tae mai rātou ki Paara-Peratimi; patua iho rātou i reira e Rāwiri. Nā, ka mea a Rāwiri, “Pakaru ana i te Atua ōku hoariri, he mea nā tōku ringa; koia anō kei te pākaruhanga wai.” Nā reira i huaina ai te ingoa o taua wāhi ko Pāraperatimi.
1CH 14:12 Ā, mahue ana i a rātou ō rātou atua ki reira, nā, ka whakahau a Rāwiri, ā, tahuna ana ki te ahi.
1CH 14:13 Nā, ka takahia anō e ngā Pirihitini te raorao.
1CH 14:14 Ā, ka ui anō a Rāwiri ki te Atua, ā, ka mea te Atua ki a ia, “Kaua e haere ki te whai i a rātou; me tahuri i a rātou, ka āwhio haere ki a rātou, ka whakaeke i a rātou i te ritenga o ngā maperi.
1CH 14:15 Ā, ka rangona e koe te tapuwae haruru i runga i ngā maperi, ko reira koe puta ai ki te whawhai; nō te mea kua riro te Atua ki mua i a koe ki te patu i te ope o ngā Pirihitini.”
1CH 14:16 Nā, pērātia ana e Rāwiri me tā te Atua i whakahau ai ki a ia; ā, patua iho e rātou te ope o ngā Pirihitini i Kipeono, ā tae noa ki Katere.
1CH 14:17 Nā, kua pakū te ingoa o Rāwiri ki ngā whenua katoa, ā, ka mea a Ihowā i te wehi ki a ia kia pā ki ngā iwi katoa.
1CH 15:1 Nā, ka hangā e Rāwiri ētahi whare mōna ki te pā o Rāwiri; i whakapaia anō e ia he wāhi, i whakatū tēneti hoki mō te āka a te Atua.
1CH 15:2 Kātahi a Rāwiri ka mea, “E kore e pai kia kawea te āka a te Atua e tētahi atu, engari mā ngā Rīwaiti; ko rātou hoki tā Ihowā i whiriwhiri ai hei mau i te āka a te Atua, hei mahi hoki ki a ia i ngā wā katoa.”
1CH 15:3 Nā, ka huihuia e Rāwiri a Īharaira katoa ki Hiruhārama, ki te kawe i te āka a Ihowā ki tōna wāhi i whakapaia rā e ia mōna.
1CH 15:4 I huihuia anō e Rāwiri ngā tama a Ārona rātou ko ngā Rīwaiti:
1CH 15:5 o ngā tama a Kohata, ko Uriere, ko te rangatira, rātou ko ōna tēina kotahi rau e rua tekau;
1CH 15:6 o ngā tama a Merari, ko Ahaia, ko te rangatira, rātou ko ōna tēina e rua rau e rua tekau;
1CH 15:7 o ngā tama a Kerehoma, ko Hoera, ko te rangatira, rātou ko ōna tēina kotahi rau e toru tekau;
1CH 15:8 o ngā tama a Eritapana, ko Hemaia, ko te rangatira, rātou ko ōna tēina e rua rau;
1CH 15:9 o ngā tama a Heperona, ko Eriere, ko te rangatira, rātou ko ōna tēina e waru tekau;
1CH 15:10 o ngā tama a Utiere, ko Aminarapa, ko te rangatira, rātou ko ōna tēina kotahi rau kotahi tekau mā rua.
1CH 15:11 I karangatia anō e Rāwiri a Hāroko rāua ko Apiātara, ngā tohunga, rātou ko ngā Rīwaiti, ko Uriere, ko Ahaia, ko Hoera, ko Hemaia, ko Eriere, ko Aminarapa,
1CH 15:12 i mea ia ki a rātou, “Ko koutou ngā rangatira o ngā whare o ngā mātua o ngā Rīwaiti. Whakatapua koutou, koutou ko ō koutou tēina; mā koutou hoki e kawe te āka a Ihowā, a te Atua o Īharaira ki te wāhi i whakapaia e ahau mōna.
1CH 15:13 Nō te mea hoki ehara i a koutou i kawe i te tuatahi, nō reira i tōrere mai ai a Ihowā, tō tātou Atua ki a tātou, nō te mea kīhai i rite ki te tikanga tā tātou rapu i a ia.”
1CH 15:14 Heoi, kei te whakatapu ngā tohunga me ngā Rīwaiti i a rātou, kia kawea ai e rātou te āka a Ihowā, a te Atua o Īharaira.
1CH 15:15 Nā, ka amohia e ngā tama a ngā Rīwaiti te āka a te Atua, ka pērā me tā Mohi i whakahau ai, me tā Ihowā i kōrero ai, ko ngā amo i runga i ō rātou pokohiwi.
1CH 15:16 I kōrero anō a Rāwiri ki ngā rangatira o ngā Rīwaiti kia whakaritea ō rātou tēina hei kaiwaiata i runga i ngā mea waiata, i ngā hātere, i ngā hāpa, i ngā himipora, he mea e rangona, he reo koa hoki e whakaarahia ana e rātou.
1CH 15:17 Nā, ka whakaritea e ngā Rīwaiti, ko Hēmana tama a Hoera; o ōna tēina hoki ko Āhapa tama a Perekia; o ō rātou tēina, o ngā tama a Merari ko Ētana tama a Kuhaia;
1CH 15:18 o ō rātou tēina, ngā tuarua, hei hoa mō rātou, ko Hakaraia, ko Pene, ko Taatiere, ko Hemirāmoto, ko Tehiere, ko Uni, ko Eriapa, ko Penaia, ko Maaheia, ko Matitia, ko Eriperehe, ko Mikineia, ko Opere-Eroma, ko Teiere; he kaitiaki kūwaha rātou.
1CH 15:19 Nā, whakaritea ana ko ngā kaiwaiata, ko Hēmana, ko Āhapa, ko Ētana, hei whakatangi i ngā himipora parāhi;
1CH 15:20 nā, ko Hakaraia, ko Atiere, ko Hemirāmoto, ko Tehiere, ko Uni, ko Eriapa, ko Maaheia, ko Penaia, he mea i runga i ngā hātere, he mea Arāmoto;
1CH 15:21 ā, ko Matitia, ko Eriperehe, ko Mikineia, ko Opere-Eroma, ko Teiere, ko Atatia, i runga i ngā hāpa, he mea Heminiti, hei whakarewa.
1CH 15:22 Nā, ko Kenania anō, ko te upoko a ngā Rīwaiti, hei whakahua: i whakaako anō ia ki te whakahua waiata; he mōhio hoki ia.
1CH 15:23 Ko Perekia rāua ko Erekana ngā kaitiaki tatau mō te āka.
1CH 15:24 Ko ngā tohunga anō, ko Hepania, ko Iohapata, ko Netanēre, ko Amahai, ko Hakaraia, ko Penaia, ko Eriētere, hei whakatangi i ngā tētere ki mua i te āka a te Atua; ā, ko Opere-Eroma rāua ko Iahia ngā kaitiaki tatau mō te āka.
1CH 15:25 Nā, haere ana a Rāwiri rātou ko ngā kaumātua o Īharaira, ko ngā rangatira o ngā mano ki te kawe i te āka o te kawenata a Ihowā i te whare o Opere-Eroma i runga i te koa.
1CH 15:26 Ā, ka āwhina te Atua i ngā Rīwaiti, nā rātou nei i amo te āka o te kawenata a Ihowā, nā, ka patua e rātou te whakahere, e whitu ngā pūru, e whitu ngā hipi toa.
1CH 15:27 Nā, he koroka rīnena pai te kākahu o Rāwiri, o ngā Rīwaiti katoa i amohia ai te āka, o ngā kaiwaiata, o Kenania anō, o te rangatira o te waiata, me ngā kaiwaiata hoki. He epora rīnena anō tō Rāwiri.
1CH 15:28 Nā, kei te kawe a Īharaira katoa i te āka o te kawenata a Ihowā, me te hāmama anō rātou, me te tangi anō te koronete, te tētere, te himipora; pakū ana te rongo o ngā hātere, o ngā hāpa.
1CH 15:29 Nā, i te taenga o te āka o te kawenata a Ihowā ki te pā o Rāwiri, ka titiro atu a Mikara tamāhine a Haora i te matapihi, ka kite i a Kīngi Rāwiri e kanikani ana, e tākaro ana; nā, ka whakahāwea ki a ia i roto i tōna ngākau.
1CH 16:1 Heoi, kawea ana e rātou te āka a te Atua, whakatūria ana ki waenganui o te tēneti i whakaarahia e Rāwiri mōna; ā, tāpaea ana e rātou he tahunga tinana, he whakahere mō te pai ki te aroaro o te Atua.
1CH 16:2 Ā, ka mutu tā Rāwiri whakaeke i ngā tahunga tinana, i ngā whakahere mō te pai, ka manaakitia e ia te iwi i runga i te ingoa o Ihowā.
1CH 16:3 I tuwhaina anō e ia mā ngā tāngata katoa o Īharaira, mā te tāne, mā te wahine, kotahi rohi taro mā tēnei, mā tēnei, tētahi wāhi kikokiko, me tētahi keke karepe whakamaroke.
1CH 16:4 I whakaritea anō e ia ētahi o ngā Rīwaiti hei minita ki mua i te āka a Ihowā, hei whakamahara, hei whakawhetai, hei whakamoemiti ki a Ihowā, ki te Atua o Īharaira.
1CH 16:5 Ko Āhapa hei tuatahi; i muri i a ia ko Hakaraia, ko Teiere, ko Hemirāmoto, ko Tehiere, ko Matitia, ko Eriapa, ko Penaia, ko Opere-Eroma, ko Teiere hoki ki ngā hātere, ki ngā hāpa, ko Āhapa hei whakatangi i ngā himipora;
1CH 16:6 ko Penaia hoki rāua ko Tahatiere, ko ngā tohunga, kia tūturu tonu tā rāua mau tētere ki mua i te āka o te kawenata a te Atua.
1CH 16:7 I reira anō i taua rā ka whakaritea tuatahitia e Rāwiri he whakamoemiti mō Ihowā, nā te ringa o Āhapa rātou ko ōna tēina.
1CH 16:8 Whakawhetai atu ki a Ihowā, karanga ki tōna ingoa; whakapuakina āna mahi ki waenganui o ngā iwi.
1CH 16:9 Waiata ki a ia, hīmene ki a ia, kōrerotia āna mahi whakamīharo katoa.
1CH 16:10 Kia whakamanamana koutou ki tōna ingoa tapu; kia hari ngā ngākau o te hunga e rapu ana i a Ihowā.
1CH 16:11 Rapua a Ihowā, me tōna kaha, rapua tonutia tōna mata.
1CH 16:12 Maharatia āna mahi whakamīharo i mahi ai ia; āna merekara, me ngā whakaritenga a tōna māngai;
1CH 16:13 e ngā uri o Īharaira, o tāna pononga, e ngā tama a Hākopa, e āna i whiriwhiri ai.
1CH 16:14 Ko Ihowā ia, ko tō tātou Atua; kei te whenua katoa āna whakaritenga.
1CH 16:15 Maharatia tonutia tāna kawenata, te kupu i kīia iho e ia ki te mano o ngā whakatupuranga;
1CH 16:16 te kawenata i whakarite ai ia ki a Āperahama, tāna oati hoki ki a Īhaka;
1CH 16:17 ā, whakapūmautia iho hei tikanga ki a Hākopa, hei kawenata mau tonu ki a Īharaira,
1CH 16:18 i a ia i mea rā, “Ka hoatu e ahau ki a koe te whenua o Kanaana hei wāhi pūmau mō koutou.”
1CH 16:19 I te mea e torutoru ana anō koutou; āe, e tokoiti rawa ana, he manene hoki ki reira;
1CH 16:20 i a rātou e hāereere ana i tēnei iwi ki tērā atu iwi, i tētahi rangatiratanga ki tētahi iwi kē.
1CH 16:21 Kīhai rātou i tukua e ia kia tūkinotia e te tangata; āe rā, i rīria e ia ngā kīngi, he whakaaro ki a rātou.
1CH 16:22 I mea ia, “Kei pā ki āku i whakawahi ai, kei kino hoki ki āku poropiti.”
1CH 16:23 Waiata, e te whenua katoa ki a Ihowā; kauwhautia tāna mahi whakaora i tēnā rangi, i tēnā rangi.
1CH 16:24 Whakapuakina tōna korōria i waenganui i ngā tauiwi, āna mahi whakamīharo i waenganui i ngā iwi katoa.
1CH 16:25 He nui hoki a Ihowā, kia nui te whakamoemiti ki a ia; kia wehingia nuitia atu hoki ia i ngā atua katoa.
1CH 16:26 He whakapakoko hoki ngā atua katoa o ngā iwi; nā Ihowā ia i hanga ngā rangi.
1CH 16:27 He hōnore, he kīngitanga kei tōna aroaro; kei tōna wāhi te kaha me te koa.
1CH 16:28 Tukua ki a Ihowā, e ngā hapū o ngā iwi, tukua ki a Ihowā te korōria me te kaha.
1CH 16:29 Tukua atu ki a Ihowā te korōria e tika ana mō tōna ingoa; maua mai he whakahere, haere mai ki tōna aroaro. Koropiko ki a Ihowā i roto i te ātaahua o te tapu;
1CH 16:30 kia wehi rā ki tōna aroaro, e te whenua katoa. E ū anō te ao, tē taea te whakanekeneke.
1CH 16:31 Kia hari ngā rangi, kia koa te whenua; kia mea rātou i roto i ngā iwi, “Ko Ihowā te kīngi!”
1CH 16:32 Kia haruru te moana, me ngā mea hua ana i roto; kia koa te māra, me ngā mea katoa i runga!
1CH 16:33 Ko reira ngā rākau o te ngahere waiata ai i te hari i te aroaro o Ihowā, e haere mai ana hoki ia ki te whakarite i runga i te whenua.
1CH 16:34 Whakawhetai ki a Ihowā, he pai hoki ia, he pūmau tonu hoki tāna mahi tohu.
1CH 16:35 Mea atu hoki: “Whakaorangia mātou, e te Atua o tō mātou whakaoranga, kohikohia mātou, whakaorangia mātou i ngā tauiwi, kia whakawhetai ai mātou ki tōu ingoa tapu, kia whakamanamana ai ki tōu whakamoemititanga.
1CH 16:36 Kia whakapaingia a Ihowā, te Atua o Īharaira ake nei, ā ake nei!” Nā, ka mea te iwi katoa, “Āmine!” ā, whakamoemiti ana rātou ki a Ihowā.
1CH 16:37 Heoi, ka waiho e ia i reira, i mua i te āka o te kawenata a Ihowā, a Āhapa rātou ko ōna tēina, hei minita tonu ki mua i te āka, i ngā meatanga o tēnei rā, o tēnei rā,
1CH 16:38 a Opere-Eroma me ō rātou tēina, e ono tekau mā waru; a Opere-Eroma hoki tama a Ierutunu, rāua ko Hōha hei kaitiaki tatau.
1CH 16:39 Ko Hāroko tohunga me ōna tēina, me ngā tohunga, ki mua o te tapenākara o Ihowā i te wāhi tiketike i Kipeono,
1CH 16:40 hei whakaeke tonu i ngā tahunga tinana mā Ihowā ki runga ki te āta tahunga tinana i te ata, i te ahiahi, hei mea i ngā mea katoa i tuhituhia ki te Ture a Ihowā, i whakahaua e ia ki a Īharaira.
1CH 16:41 Ā, hei hoa mō rātou a Hēmana rāua ko Ierutunu, me ērā atu i whiriwhiria, i whakahuatia nei ngā ingoa, hei whakawhetai ki a Ihowā, nō te mea he pūmau tonu tāna mahi tohu.
1CH 16:42 Hei hoa hoki mō rātou a Hēmana rāua ko Ierutunu me ngā tētere me ngā himipora mā ngā kaiwhakatangi kaha, me ngā whakatangi mō ngā waiata a te Atua. Ā, ko ngā tama a Ierutunu hei kaitiaki kūwaha.
1CH 16:43 Nā, haere ana te iwi katoa ki tōna whare, ki tōna whare, ā, hoki ana a Rāwiri ki te manaaki i tōna whare.
1CH 17:1 Ā, i a Rāwiri e noho ana i tōna whare, ka mea a Rāwiri ki a Nātana poropiti, “Nā, kei te noho ahau ki te whare hīta, ko te āka ia o te kawenata a Ihowā kei raro i te ārai kākahu e noho ana.”
1CH 17:2 Anō rā ko Nātana ki a Rāwiri, “Meatia ngā mea katoa i tōu ngākau; kei a koe hoki te Atua.”
1CH 17:3 Nā, i taua pō ka puta te kupu a te Atua ki a Nātana, ka mea:
1CH 17:4 “Haere, mea atu ki tāku pononga, ki a Rāwiri: ‘Ko te kupu tēnei a Ihowā: Kaua e hangā e koe he whare hei nohoanga mōku.
1CH 17:5 Kāhore nei hoki ahau i noho i roto i te whare, nō te rangi i kawea mai ai e ahau a Īharaira ā taea noatia tēnei rā. Heoi, he noho haere tōku i tētahi tēneti ki tētahi tēneti, i tētahi tapenākara ki tētahi tapenākara.
1CH 17:6 I ōku hāereerenga katoa i roto i a Īharaira katoa i puaki rānei tētahi kupu āku ki tētahi o ngā kaiwhakarite o Īharaira i whakaritea e ahau hei hēpara mō tāku iwi, i mea rānei ahau, “He aha koutou tē hanga whare hīta ai mōku?” ’
1CH 17:7 “Nō reira kia pēnei tāu kī atu āianei ki tāku pononga, ki a Rāwiri: ‘Ko te kupu tēnei a Ihowā o ngā mano: Nāku koe i tango i te nohoanga hipi, i te whai hipi, hei rangatira mō tāku iwi, mō Īharaira;
1CH 17:8 ā, i a koe ahau i ōu haerenga katoa; hautopea atu ana e ahau ōu hoariri katoa i tōu aroaro; ā, meinga ana koe e ahau hei ingoa, hei pērā anō me te ingoa o ngā mea nunui o te whenua.
1CH 17:9 Nā, māku e whakarite he wāhi mō tāku iwi, mō Īharaira; ka whakatōkia anō rātou e ahau kia noho ki tō rātou ake, e kore anō rātou e ngāueue ā muri ake nei; e kore anō rātou e pēhia ki raro i muri nei e ngā tama a te kino; e kore e pērā me tō mua,
1CH 17:10 me tō te wā anō i whakaritea ai e ahau ngā kaiwhakarite mō tāku iwi, mō Īharaira; ā, ka pēhia e ahau ki raro ōu hoariri katoa. “ ‘Ko tētahi, e mea atu ana ahau ki a koe, mā Ihowā e hanga he whare mōu.
1CH 17:11 Ā, ka tutuki ōu rā, ka haere koe ki ōu mātua, nā, ka whakaarahia e ahau tōu uri i muri i a koe i roto i āu tama, ka whakapūmautia anō e ahau tōna kīngitanga.
1CH 17:12 Māna e hanga he whare mōku, ā, ka whakapūmautia e ahau tōna torōna ā ake ake.
1CH 17:13 Ko ahau hei matua ki a ia, ko ia hei tama ki ahau, e kore anō e mutu tōku aroha ki a ia, e kore e pērā me tōku i mutu ki tērā i mua atu nā i a koe,
1CH 17:14 ā, ka tūturu ia ki tōku whare, ki tōku kīngitanga ā ake ake; ā, ka mau tonu tōna torōna mō ake tonu atu.’ ”
1CH 17:15 Rite tonu ki ēnei kupu katoa, ki tēnei putanga katoa, ngā kupu a Nātana ki a Rāwiri.
1CH 17:16 Nā, ka haere a Kīngi Rāwiri, ka noho ki te aroaro o Ihowā, ā, ka mea ia: “Ko wai ahau, e Ihowā, e te Atua, he aha hoki tōku whare, i kawea mai ai ahau e koe ki konei?
1CH 17:17 He mea iti anō tēnei ki tāu titiro, e te Atua; kua kōrerotia nei hoki e koe te whare o tāu pononga a tau tini noa atu, ā, kua titiro mai hoki koe ki ahau, ānō ki te tangata nui rawa, e Ihowā, e te Atua.
1CH 17:18 “Ko te aha ake hei kōrerotanga mā Rāwiri ki a koe mō te whakahōnore i tāu pononga? E mōhio ana hoki koe ki tāu pononga.
1CH 17:19 He whakaaro ki tāu pononga, e Ihowā, rite tonu anō ki tā tōu ngākau, i mea ai koe i ēnei mea nunui katoa, i whakaritea mai ai ēnei mea nunui katoa.
1CH 17:20 “Kāhore he rite mōu, e Ihowā, kāhore atu hoki he atua, ko koe anake; rite tonu ki ngā mea katoa i rongo ai ō mātou taringa.
1CH 17:21 Ko tēhea iwi hoki o te whenua hei rite mō tāu iwi, mō Īharaira, i haere nei te Atua ki te hoko hei iwi māna ake, hei mea ingoa mōu, ki ngā hanga nunui, whakamataku hoki, i te peinga atu i ngā tauiwi i te aroaro o tāu iwi i hokona nei e koe i Īhipa?
1CH 17:22 Kua meinga nei hoki e koe tāu iwi, a Īharaira, hei iwi māu ā ake ake; me koe hoki, e Ihowā hei Atua mō rātou.
1CH 17:23 “Nā, whakamanā āianei, e Ihowā, te kupu i kōrerotia e koe mō tāu pononga, mō tōna whare hoki ake ake, meatia hoki tāu i kōrero ai.
1CH 17:24 Kia mana anō, kia whakanuia hoki tōu ingoa ā ake ake, kia kōrerotia ai, ‘Ko Ihowā o ngā mano te Atua o Īharaira, hei Atua anō ki a Īharaira!’ Ā, ka tūturu tonu te whare o tāu pononga, o Rāwiri, ki tōu aroaro.
1CH 17:25 “Nāu nei hoki, e tōku Atua, i whakapuaki mai ki tāu pononga, ka hangā e koe he whare mōna; koia te ngākau o tāu pononga i anga ai ki te īnoi ki tōu aroaro.
1CH 17:26 Nā, ko koe, e Ihowā, te Atua, ā, kua kōrerotia e koe tēnei mea pai ki tāu pononga.
1CH 17:27 Ā, kua pai tēnei koe ki te manaaki i te whare o tāu pononga, kia pūmau tonu ai ki tōu aroaro; ko koe hoki hei manaaki, e Ihowā, ā, ka manaakitia ake ake.”
1CH 18:1 Nā, muri iho i tēnei, ka patua e Rāwiri ngā Pirihitini, ā, pēhia ana e ia ki raro; tangohia ana e ia a Kāta me ōna pā ririki i te ringa o ngā Pirihitini.
1CH 18:2 I patua anō e ia a Moapa, nā, kua waiho ngā Moapi hei pononga mā Rāwiri, ā, hōmai ana he hākari e rātou.
1CH 18:3 I patua anō e Rāwiri a Hararētere kīngi o Topa ā tae noa ki Hāmata, i tōna haerenga ki te whakaū i tōna rohe ki te awa, ki Uparati.
1CH 18:4 Nā, tangohia ana e Rāwiri i a ia kotahi mano ngā hāriata, e whitu mano ngā hōia eke hōiho, e rua tekau mano ngā tāngata haere i raro. Ā, i whakangongea e Rāwiri ngā hōiho katoa o ngā hāriata, engari i whakatoea o rātou ngā mea mō ngā hāriata kotahi rau.
1CH 18:5 Ā, nō te haerenga mai o ngā Hīriani o Ramahiku ki te whakauru i a Hararētere kīngi o Topa, patua iho e Rāwiri o ngā Hīriani e rua tekau mā rua mano tāngata.
1CH 18:6 Kātahi ka whakanohoia e Rāwiri he hōia pupuri ki Hīria o Ramahiku; ā, ka waiho ngā Hīriani hei pononga mā Rāwiri, ā, hōmai ana he hākari e rātou. Nā, hōmai ana e Ihowā kia toa a Rāwiri i ōna haerenga katoa.
1CH 18:7 Ā, tangohia ana e Rāwiri ngā whakangungu rākau kōura o ngā tāngata a Hararētere, ā, kawea ana ki Hiruhārama.
1CH 18:8 Ā, nui atu te parāhi i tangohia e Rāwiri i Tipihata, i Kunu; i ngā pā o Hararētere; nō reira te moana parāhi, ngā pou, me ngā oko parāhi i hangā nei e Horomona.
1CH 18:9 Ā, nō te rongonga o Tohu kīngi o Hāmata kua patua e Rāwiri te ope katoa a Hararētere kīngi o Topa,
1CH 18:10 ka tonoa e ia a Hatorama, tāna tama, ki a Kīngi Rāwiri ki te oha ki a ia, ki te manaaki hoki i a ia, mōna i whawhai ki a Hararētere, i patu hoki i a ia. He hoariri hoki a Hararētere nō Tohu; ā, he taonga ana, te tini o ngā oko kōura, hiriwa, parāhi.
1CH 18:11 Whakatapua ake ērā e Kīngi Rāwiri mā Ihowā hei tāpiri mō te hiriwa, mō te kōura, i maua mai e ia i ngā iwi katoa, i ngā Ēromi, i ngā Moapi, i ngā tama a Āmona, i ngā Pirihitini, i ngā Amareki.
1CH 18:12 Nā, i patua hoki e Āpihai tama a Teruia ētahi o ngā Ēromi ki te Raorao Tote, kotahi tekau mā waru mano.
1CH 18:13 I whakanohoia anō e ia he hōia pupuri ki Ēroma; ā, ka meinga ngā Ēromi katoa hei pononga mā Rāwiri. Nā, hōmai ana e Ihowā kia toa a Rāwiri i ōna haerenga katoa.
1CH 18:14 Nā, ko Rāwiri te kīngi o Īharaira katoa; ā, i mahi i te whakawā, i te tika mō tōna iwi katoa.
1CH 18:15 Ā, ko Ioapa tama a Teruia te rangatira ope, ko Iehohāpata tama a Ahiruru te kaiwhakamahara.
1CH 18:16 Ko Hāroko tama a Ahitupu rāua ko Apīmereke tama a Apiātara ngā tohunga; ko Hawaha hoki te kaituhituhi;
1CH 18:17 ko Penaia tama a Iehoiara te rangatira mō ngā Kereti, mō ngā Pereti; ko ngā tama ia a Rāwiri ngā tino rangatira i te taha o te kīngi.
1CH 19:1 Nā, i muri i tēnei ka mate a Nahaha kīngi o ngā tama a Āmona, ā, ko tāna tama te kīngi i muri i a ia.
1CH 19:2 Nā, ka mea a Rāwiri, “Ka puta tōku aroha ki a Hanunu tama a Nahaha; i puta hoki te aroha o tōna pāpā ki ahau.” Nā, ka ungā e Rāwiri ētahi tāngata ki te whakamārie i a ia mō tōna pāpā. Nā, kua tae ngā tāngata a Rāwiri ki te whenua o ngā tama a Āmona ki a Hanunu, ki te whakamārie i a ia.
1CH 19:3 Otiia ka mea ngā rangatira o ngā tama a Āmona ki a Hanunu, “Ki tōu whakaaro he whakahōnore nā Rāwiri i tōu pāpā i tonoa mai ai e ia ngā kaiwhakamārie ki a koe? He teka ianei he titiro, he whakangaro, he tūtei i te whenua te mea i haere mai ai āna tāngata ki a koe?”
1CH 19:4 Heoi, ka mau a Hanunu ki ngā tāngata a Rāwiri, heua ana e ia, tapahia ana ō rātou kākahu ki waenga, i te ritenga iho o ō rātou papa, ā tonoa atu ana rātou.
1CH 19:5 Kātahi ka haere ētahi, ka kōrero ki a Rāwiri i te meatanga ki aua tāngata. Nā, ka tono tāngata ia ki te whakatau i a rātou; he nui hoki te whakamā o aua tāngata, ā, ka mea te kīngi, “Hei Heriko koutou noho ai, kia tupu rā anō ō koutou pāhau, ko reira hoki mai ai.”
1CH 19:6 Ā, nō te kitenga o ngā tama a Āmona e piro ana rātou ki a Rāwiri ka hoatu e Hanunu rātou ko ngā tama a Āmona ētahi taranata hiriwa kotahi mano kia kawea hei utu hāriata kaieke hōiho, i Mehopotamia, i Āramamāka, i Topa.
1CH 19:7 Heoi, e toru tekau mā rua mano hāriata i utua e rātou, me te kīngi anō o Maaka rātou ko āna tāngata, ā, haere mai ana rātou, noho ana ki mua i Merepa. Nā, ka huihui ngā tama a Āmona i ō rātou pā, haere ana mai ki te whawhai.
1CH 19:8 Ā, i te rongonga o Rāwiri, ka tonoa e ia a Ioapa rātou ko te ope katoa, arā ngā mārohirohi.
1CH 19:9 Nā, ka puta ngā tama a Āmona ki waho, ā, whakatakotoria ana ō rātou ngohi ki te kūwaha o te pā. Nā, ko ngā kīngi i haere nei, he mea motu kē rātou i te pārae.
1CH 19:10 Ā, nō te kitenga o Ioapa e ākina ana a mua, a muri ōna e te hoariri, ka whiriwhiria e ia ētahi i roto i te hunga whiriwhiri katoa o Īharaira, ā, whakaritea ana e ia hei tū i ngā Hīriani.
1CH 19:11 Ko te nuinga atu hoki o te iwi i tukua e ia ki te ringa o Āpihai, o tōna teina, ā, ka whakatikaia rātou e rātou hei tū i ngā tama a Āmona.
1CH 19:12 I mea anō ia, “Ki te kaha ngā Hīriani i ahau, me āwhina mai ahau e koe; ki te kaha ia ngā tama a Āmona i a koe, nā māku koe e āwhina atu.
1CH 19:13 Kia māia, kia whakatāne tātou; me whakaaro ki tō tātou iwi, ki ngā pā o tō tātou Atua, ā, mā Ihowā e mea te mea e pai ana ki tāna titiro.”
1CH 19:14 Heoi, ko te whakatatanga o Ioapa rātou ko tōna nuinga ki te whawhai ki ngā Hīriani, nā, rere ana rātou i tōna aroaro.
1CH 19:15 Ā, nō te kitenga o ngā tama a Āmona kua rere ngā Hīriani, nā, ka rere anō rātou i te aroaro o tōna teina, o Āpihai, ā, haere ana ki roto ki te pā. Kātahi ka haere a Ioapa ki Hiruhārama.
1CH 19:16 Ā, nō te kitenga o ngā Hīriani kua patua rātou e Īharaira, ka tono tāngata, ā, ka tīkina atu ngā Hīriani i tāwāhi o te awa; ā, ko Topaka rangatira o te ope a Hararētere ki mua i a rātou.
1CH 19:17 Nā, ka kōrerotia ki a Rāwiri, ā, ka huihuia e ia a Īharaira katoa, ā, whiti ana ki tāwāhi o Horano, whakaekea ana e ia, whakatikaia ana e ia ngā ngohi hei tū i a rātou. Nā, ka oti ngā ngohi te whakatika e Rāwiri hei tū i ngā Hīriani, ka whawhai rātou ki a ia.
1CH 19:18 Nā, ka rere ngā Hīriani i te aroaro o Īharaira; ā, patua iho o ngā Hīriani e Rāwiri ngā tāngata o ngā hāriata e whitu mano, e whā tekau mano ngā tāngata haere i raro; i patua anō e ia a Topaka te rangatira ope.
1CH 19:19 Ā, i te kitenga o ngā tāngata a Hararētere kua mate rātou i a Īharaira, ka houhia e rātou te rongo ki a Rāwiri, ā, ka meinga rātou hei tāngata māna; kīhai hoki ngā Hīriani i pai ki te āwhina i ngā tama a Āmona i muri atu.
1CH 20:1 Ā, i te takanga o te tau, i te wā e haere ai ngā kīngi ki te whawhai, nā, ka ārahina atu he taua māia e Ioapa, ā, hunā iho e rātou te whenua o ngā tama a Āmona, haere ana, kei te whakapae i Rapa. Ko Rāwiri ia i noho ki Hiruhārama. Nā, ka patua a Rapa e Ioapa, ngaro ana i a ia.
1CH 20:2 Tangohia ana e Rāwiri te karauna o tō rātou kīngi i tōna mātenga, ā, ko tōna taimaha i kitea e ia, kotahi taranata kōura, he kōhatu utu nui anō o taua karauna; pōtaea iho ki te mātenga o Rāwiri. I whakaputaina anō e ia ngā taonga o te pā, tōna tini.
1CH 20:3 Nā, ko ngā tāngata i roto, whakaputaina ana e ia ki waho, poroporoa iho e ia ki te kani, ki te rakaraka rino, ki te toki. Ko tā Rāwiri tēnei i mea ai ki ngā pā katoa o ngā tama a Āmona. Nā, hoki ana a Rāwiri me te iwi katoa ki Hiruhārama.
1CH 20:4 Ā, i muri iho i tēnei ka tupu te whawhai ki ngā Pirihitini ki Kētere; kātahi ka patua e Hipekai Huhati a Hipai o ngā tama a Rapa, nā, pēhia ana rātou ki raro.
1CH 20:5 Ā, ka ara anō he whawhai ki ngā Pirihitini; nā, ka patua e Erehanana, tama a Iāre, a Rahami teina o Koriata o Kāta, ko te kakau o tāna taoroa, rite tonu ki te rākau a te kaiwhatu.
1CH 20:6 Nā, i whawhai anō ki Kāta, ā, i reira tētahi tangata roa, ko ngā maihao o ōna ringa me ōna waewae e rua tekau mā whā, takiono ki ia ringa, ā, takiono ki ia waewae; ā, he uri ia nō Rapa.
1CH 20:7 I tāna whakataranga i a Īharaira, patua ana ia e Honatana tama a Himea tuakana o Rāwiri.
1CH 20:8 I whānau ēnei a Rapa ki Kāta; ā, hinga ana i te ringa o Rāwiri, i te ringa anō o āna tāngata.
1CH 21:1 Nā, ka tū a Hātana hei hoariri mō Īharaira, ā, ka whakakīkī a Rāwiri ki te tatau i a Īharaira.
1CH 21:2 Nā, ka kī a Rāwiri ki a Ioapa rātou ko ngā rangatira o te iwi, “Tīkina taua a Īharaira, o Peerehepa atu ā tae noa ki Rāna, ka kawe mai ai i tō rātou tokomaha ki ahau, kia mōhio ai ahau.”
1CH 21:3 Anō rā ko Ioapa, “Mā Ihowā e mea tāna iwi kia rau noa atu i a rātou e noho nei, otiia, e tōku ariki, e te kīngi, ehara ianei rātou katoa i te pononga nā tōku ariki? He aha rā tēnei i whāia ai e tōku ariki? He aha i waiho ai hei, take hē mō Īharaira?”
1CH 21:4 Otiia kaha tonu tā te kīngi kupu i tā Ioapa. Heoi, ka tūria atu e Ioapa, hāereerea ana e ia a Īharaira katoa, kua tae ki Hiruhārama.
1CH 21:5 Nā, ka hōmai e Ioapa te tokomaha o te iwi i taua ki a Rāwiri. Nā, a Īharaira katoa, he mano ngā mano me ngā mano kotahi rau, he hunga unu hoari; nā, a Hūrā, e whā rau e whitu tekau mano ngā tāngata unu hoari.
1CH 21:6 Ko Rīwai ia rāua ko Pineamine, kīhai i taua e ia i roto i a rātou; he mea whakarihariha hoki ki a Ioapa te kupu a te kīngi.
1CH 21:7 Nā, ka riri te Atua ki tēnei mea; ā, patua ana a Īharaira e ia.
1CH 21:8 Nā, ka mea a Rāwiri ki te Atua, “Nui atu tōku hara i ahau i mea i tēnei mea. Nā, tēnā, kia whakarērea noatia iho te hē o tāu pononga, nui atu hoki tōku kūware.”
1CH 21:9 Nā, ka puta te kupu a Ihowā ki tā Rāwiri matakite, ki a Kara; i kī ia,
1CH 21:10 “Haere, kī atu ki a Rāwiri, mea atu, ‘Ko te kupu tēnei a Ihowā: E toru ēnei mea ka whakaaria atu nei e ahau ki a koe, whiriwhiria tētahi o ēnei māu ā ka meatia e ahau ki a koe.’ ”
1CH 21:11 Heoi, ko te taenga o Kara ki a Rāwiri, ka mea ki a ia, “Ko te kupu tēnei a Ihowā, ‘Whiriwhiria māu:
1CH 21:12 kia toru rānei ngā tau matekai; kia toru rānei ngā marama e whakangaromia ai koe i te aroaro o ōu hoariri, me te hoari a ōu hoa whawhai e hopu ana i a koe? Kia toru rānei ngā rā o te hoari a Ihowā, arā o te mate urutā ki te whenua, me te anahera a Ihowā e whakangaro ana, i ngā rohe katoa o Īharaira.’ Nā, whakaaroa te kupu e whakahokia e ahau ki tōku kaitono mai.”
1CH 21:13 Anō rā ko Rāwiri ki a Kara, “He noa iho ōku whakaaro; nā, kia taka ahau ki te ringa o Ihowā, he nui hoki āna mahi aroha; kaua hoki ahau e taka ki te ringa tangata.”
1CH 21:14 Heoi, whakapāngia ana e Ihowā he mate urutā ki a Īharaira; ā, hinga iho o Īharaira e whitu tekau mano tāngata.
1CH 21:15 I tonoa anō e te Atua he anahera ki Hiruhārama whakangaro ai; ā, i a ia e mea ana ki te whakangaro, ka titiro a Ihowā. Nā, ka puta kē tō Ihowā whakaaro mō te kino, ā, ka mea ki te anahera whakangaro, “Kua nui! Kati tōu ringa.” Nā, tū ana te anahera a Ihowā i te patunga wīti a Oronana Iepuhi.
1CH 21:16 Nā, ka ara ngā kanohi o Rāwiri, ka kite i te anahera a Ihowā e tū ana i te takiwā o te whenua, o te rangi, me tāna hoari, unu rawa, i tōna ringa, e totoro ana ki runga i Hiruhārama. Kātahi ka tāpapa a Rāwiri rātou ko ngā kaumātua, he kākahu taratara te hīpoki.
1CH 21:17 Ka mea a Rāwiri ki te Atua, “He teka ianei nāku i kī kia taua te iwi? Ko ahau tēnei te mea i hara, i mahi nei i te hē; ko ēnei hipi ia, i aha rātou? E Ihowā, e tōku Atua, kia pā rā tōu ringa ki ahau, ki te whare anō o tōku pāpā; kauaka ia ki tāu iwi, hei whiu mō rātou.”
1CH 21:18 Kātahi ka kōrero te anahera a Ihowā ki a Kara kia mea ia ki a Rāwiri, kia haere a Rāwiri ki runga, ki te whakaara i tētahi āta ki a Ihowā ki te patunga wīti a Oronana Iepuhi.
1CH 21:19 Nā, haere ana a Rāwiri i tā Kara kōrero i kōrero ai ia i runga i te ingoa o Ihowā.
1CH 21:20 Nā, ka tahuri ake a Oronana, ka kite i te anahera; ā, piri ana ia, rātou ko āna tama tokowhā. Nā, i te patu wīti a Oronana.
1CH 21:21 Nā, i a Rāwiri e haere ana ki a Oronana, ka titiro a Oronana, ā, ka kite i a Rāwiri, nā, puta ana ia i te patunga wīti, piko ana ki a Rāwiri, tāpapa ana ki te whenua.
1CH 21:22 Kātahi ka mea a Rāwiri ki a Oronana, “Hōmai ki ahau te wāhi i tēnei patunga wīti, kia hangā ai e ahau he āta ki a Ihowā; kia tino rite te utu ka hōmai ai e koe ki ahau, kia mutu ai te whiunga o te iwi.”
1CH 21:23 Nā, ka mea a Oronana ki a Rāwiri, “Me tango māu; ā, mā tōku ariki, mā te kīngi e mea te mea e pai ana ki tāna titiro. Nanā, ka hoatu e ahau ki a koe ngā kau hei tahunga tinana, me ngā patu wīti hei wahie, me te wīti anō hei whakahere totokore; ka hoatu katoa e ahau.”
1CH 21:24 Nā, ka mea a Kīngi Rāwiri ki a Oronana, “Kāhore; engari ka hokona e ahau kia rite anō ngā utu. E kore hoki ahau e tango i tāu mā Ihowā, e kore hoki e whakaeke i ngā mea kīhai i utua hei tahunga tinana.”
1CH 21:25 Heoi, e ono rau ngā hekere kōura, he mea pāuna, i hoatu e Rāwiri ki a Oronana mō taua wāhi.
1CH 21:26 Ā, hangā ana e Rāwiri he āta ki reira mā Ihowā, whakaekea ana he tahunga tinana, he whakahere mō te pai, ā, karanga ana ki a Ihowā. Nā, ka whakahokia tāna i te rangi, he ahi ki runga ki te āta tahunga tinana.
1CH 21:27 Nā, ka kōrero a Ihowā ki te anahera, ā, whakahokia ana e ia tāna hoari ki tōna takotoranga.
1CH 21:28 I taua wā anō, i te kitenga o Rāwiri kua whakarongo a Ihowā ki a ia i te patunga wīti a Oronana Iepuhi, ka mea patunga tapu ia ki reira.
1CH 21:29 Ko te tapenākara hoki o Ihowā i hangā nei e Mohi ki te koraha, me te āta tahunga tinana, i te wāhi tiketike i Kipeono i taua wā.
1CH 21:30 Kīhai ia a Rāwiri i āhei te haere ki mua o taua āta ki te rapu i tā te Atua, i wehi hoki ia i te hoari a te anahera a Ihowā.
1CH 22:1 Kātahi ka kī a Rāwiri, “Ko te whare tēnei o Ihowā, o te Atua, ko te āta tahunga tinana anō tēnei mā Īharaira.”
1CH 22:2 I whakahau anō a Rāwiri kia huihuia ngā tāngata iwi kē o te whenua o Īharaira; i whakaritea e ia he kaihahau hei hahau kōhatu tārai, hei hanga mō te whare o te Atua.
1CH 22:3 I mahia anō e Rāwiri he rino, tōna nui nā, hei whao mō ngā tatau o ngā kūwaha, mō ngā hononga, me te parāhi anō, he nui noa atu, kīhai i pāunatia,
1CH 22:4 me te rākau, he hīta, kīhai i taua – he maha hoki ngā rākau, ngā hīta, i kawea mai e ngā tāngata o Hairona, o Tāira, ki a Rāwiri.
1CH 22:5 Nā, ka mea a Rāwiri, “He taitamariki tāku tama, a Horomona, he ngāwari, ā, ko te whare e hanga mā Ihowā, kia nui rawa te ingoa, te korōria, i ngā whenua katoa; māku e tīmata te mahi mea mō reira.” Nā, he maha ngā mea i pae i a Rāwiri i mua i tōna matenga.
1CH 22:6 Kātahi ka karangatia e ia tāna tama a Horomona, ā, whakahaua ana e ia kia hangā te whare o Ihowā, o te Atua o Īharaira.
1CH 22:7 Nā, ka mea a Rāwiri ki a Horomona, ki tāna tama: “Ko ahau, i whai ngākau ahau ki te hanga i te whare mō te ingoa o Ihowā, o tōku Atua.
1CH 22:8 Otiia i puta mai te kupu a Ihowā ki ahau; i mea ia: ‘He nui ngā toto i whakahekea e koe; he nui ngā whawhai i whawhai ai koe. E kore e hangā e koe he whare mō tōku ingoa; he nui hoki ngā toto i whakahekea e koe ki te whenua ki tōku aroaro.
1CH 22:9 Nanā, ka whānau he tama māu, he tangata āta noho; ka meinga anō ia e ahau kia āta noho i ōna hoariri ā tawhio noa. Ko tōna ingoa ko Horomona, ā, ka hoatu e ahau te rongo mau, me te rangimārie ki a Īharaira i ōna rā.
1CH 22:10 Māna e hanga he whare mō tōku ingoa; ko ia hei tama ki ahau, ko ahau hei pāpā ki a ia. Nā, ka whakapūmautia e ahau te torōna o tōna kīngitanga ki a Īharaira ā ake ake.’
1CH 22:11 “Nā, e tāku tama, kia noho a Ihowā ki a koe, kia kake koe, kia hangā anō e koe te whare o Ihowā, o tōu Atua, kia rite anō ki tāna kupu mōu.
1CH 22:12 Kia hōmai anō ia e Ihowā he ngākau whakaaro, he mōhio, ki a koe, kia whakahaua e ia ki a koe he tikanga mō Īharaira. Kia puritia ai e koe te ture a Ihowā, a tōu Atua.
1CH 22:13 Ko reira koe kake ai, ki te puritia e koe, ki te mahia, ngā tikanga, me ngā whakaritenga i whakahaua e Ihowā ki a Mohi mō Īharaira. Kia kaha, kia māia. Kaua e wehi, kaua e pāwera.
1CH 22:14 “Nanā, i ahau e hē nei, kua pae i ahau he kōura mō te whare o Ihowā, kotahi rau mano taranata, he hiriwa, kotahi mano mano taranata, me te parāhi, me te rino, e kore e taea te pāuna, he nui hoki; me te rākau, me te kōhatu, kua pae i ahau. Māu anō e tāpiri ētahi ki ērā.
1CH 22:15 Kei a koe anō tōna tini o ngā kaimahi: o ngā kaihahau, o ngā kaimahi i te kōhatu, i te rākau, me ngā mea mōhio katoa ki ngā mahi katoa.
1CH 22:16 E kore e taea te tatau te kōura, te hiriwa, te parāhi, te rino. Whakatika, e mahi, ā, hei a koe a Ihowā.”
1CH 22:17 I whakahau anō a Rāwiri i ngā rangatira katoa o Īharaira kia uru ki te mahi a tāna tama, a Horomona, i mea ia,
1CH 22:18 “He teka ianei ko Ihowā, ko tō koutou Atua, hei hoa mō koutou? Ā, kua meinga koutou kia āta noho ā tawhio noa? Kua hōmai hoki e ia ngā tāngata o te whenua ki tōku ringa; ā, kua taea te whenua te pēhi i te aroaro o Ihowā, i te aroaro anō o tāna iwi.
1CH 22:19 Nā, tukua ō koutou ngākau, ō koutou wairua, ki te rapu i a Ihowā, i tō koutou Atua. Whakatika ki te hanga i te wāhi tapu o te Atua, o Ihowā, ki te kawe mai anō i te āka o te kawenata a Ihowā, i ngā oko tapu a te Atua, ki te whare ka hangā nei mō te ingoa o Ihowā.”
1CH 23:1 Nā, kua koroheketia a Rāwiri, kua rite ōna tau; ā, ka meinga e ia tāna tama a Horomona hei kīngi mō Īharaira.
1CH 23:2 Nā, ka huihuia e ia ngā rangatira katoa o Īharaira, rātou ko ngā tohunga, ko ngā Rīwaiti.
1CH 23:3 Nā, ka taua ngā Rīwaiti, ngā mea e toru tekau, he maha atu rānei, ō rātou tau. Nā, ko tō rātou tokomaha, he mea tatau ā-tangata tonu, e toru tekau mā waru mano.
1CH 23:4 “O ēnei, e rua tekau mā whā mano hei whakahaere i te mahi o te whare o Ihowā; nā, ko ngā rangatira, ko ngā kaiwhakarite, e ono mano.
1CH 23:5 Nā, e whā mano hei kaitiaki kūwaha, ā, e whā mano hei whakamoemiti ki a Ihowā i runga i ngā mea whakatangi i hangā e ahau,” e ai tā Rāwiri, “hei mea whakamoemiti.”
1CH 23:6 Ā, wehea ana rātou e Rāwiri, he wehenga, he wehenga, ki ngā tama a Rīwai, a Kerehona, a Kohata, a Merari.
1CH 23:7 O ngā Kerehoni: ko Rārana, ko Himei.
1CH 23:8 Ko ngā tama a Rārana: ko te upoko ko Tehiere, ko Tetama, ko Hoera, tokotoru.
1CH 23:9 Ko ngā tama a Himei: ko Heromoto, ko Hatiere, ko Harana, tokotoru. Ko ngā upoko ēnei o ngā whare o ngā mātua o Rārana
1CH 23:10 Nā, ko ngā tama a Himei: ko Iahata, ko Tīnā, ko Ieuhu, ko Peria. Ko ēnei tokowhā he tama nā Himei.
1CH 23:11 Ko Iahata te upoko, ko Tita te tuarua; nā, kīhai i tokomaha ngā tama a Ieuhu rāua ko Peria, ā, hei whare matua rāua, kotahi anō tauanga.
1CH 23:12 Ko ngā tama a Kohata: ko Āmarama, ko Itihara, ko Heperona, ko Utiere, tokowhā.
1CH 23:13 Ko ngā tama a Āmarama: ko Ārona rāua ko Mohi. Nā, i motuhia a Ārona hei whakatapu i ngā mea tapu rawa, a ia me āna tama, ake ake hei tahu whakakakara ki te aroaro o Ihowā, hei minita ki a ia, hei manaaki i runga i tōna ingoa ā ake ake.
1CH 23:14 Nā, ko Mohi tangata a te Atua, nō te iwi o Rīwai te karangatanga o āna tama.
1CH 23:15 Ko ngā tama a Mohi: ko Kerehoma, ko Eriētere.
1CH 23:16 O ngā tama a Kerehoma: ko Hepuere te upoko.
1CH 23:17 Nā, ko ngā tama a Eriētere: ko Rehāpia te upoko. Ā, kāhore atu he tama a Eriētere. He tokomaha rawa ia ngā tama a Rehāpia.
1CH 23:18 O ngā tama a Itihara: ko Heromiti te upoko.
1CH 23:19 O ngā tama a Heperona: ko Teria te upoko, ko Amaria te tuarua, ko Tahatiere te tuatoru, ko Tekameama te tuawhā.
1CH 23:20 O ngā tama a Utiere: ko Mika te upoko, ko Ihīa te tuarua.
1CH 23:21 Ko ngā tama a Merari: ko Māhari, ko Muhi. Ko ngā tama a Māhari: ko Ereātara, ko Kihi.
1CH 23:22 Nā, ka mate a Ereātara; kāhore āna tama; engari he tamāhine; ā, riro ana rātou hei wāhine i ō rātou tungāne, i ngā tama a Kihi.
1CH 23:23 Ko ngā tama a Muhi: ko Māhari, ko Ērere, ko Teremoto, tokotoru.
1CH 23:24 Ko ngā tama ēnei a Rīwai i ngā whare o ō rātou mātua; arā ngā upoko o ngā whare o ngā mātua, he mea tatau ā-tangata, tēnei ingoa, tēnei ingoa o ngā kaimahi i ngā mea mō te whare o Ihowā, te hunga, e rua tekau, he maha atu hoki ō rātou tau.
1CH 23:25 I mea hoki a Rāwiri, “Kua meinga nei e Ihowā, e te Atua o Īharaira tāna iwi kia okioki, ā, ka noho tonu ia ki Hiruhārama.
1CH 23:26 Me ngā Rīwaiti, heoi anō tā rātou amohanga i te tapenākara, me ōna mea katoa mō ngā mahi ki reira.”
1CH 23:27 Nā ngā kupu whakamutunga hoki a Rāwiri i taua ai ngā Rīwaiti e rua nei tekau, he maha atu hoki, ō rātou tau.
1CH 23:28 Ko te tūranga hoki mō rātou kei te taha o ngā tama a Ārona, mō ngā mahi o te whare o Ihowā, i ngā marae, i ngā rūma, i te purenga o ngā mea tapu katoa, i te meatanga o te mahi o te whare o te Atua;
1CH 23:29 arā, o te taro aroaro, o te parāoa mō te whakahere totokore, o ngā keke rēwenakore, o te mea i tunua ki te pāraharaha, o te mea i parāipanatia, o ngā mea katoa e mēhuatia ana, e rūritia ana.
1CH 23:30 Hei tū i tēnei ata, i tēnei ata, ki te whakawhetai, ki te whakamoemiti ki a Ihowā. Kia pērā hoki i te ahiahi,
1CH 23:31 hei whakaeke mō ngā tahunga tinana katoa mā Ihowā i ngā hāpati, i ngā marama hou, i ngā hākari i whakaritea. He mea tatau tonu rātou, i runga i te tikanga mō rātou, i te aroaro tonu o Ihowā.
1CH 23:32 Ko rātou anō hei tiaki i ngā mea o te tapenākara o te whakaminenga, hei tiaki i te wāhi tapu, hei tiaki hoki i ngā mea o ō rātou tuākana, o ngā tama a Ārona, i te mea e mahi ana i ngā mea o te whare o Ihowā.
1CH 24:1 Nā, ko ngā wehenga o ngā tama a Ārona koia ēnei. Ko ngā tama a Ārona: ko Nātapa, ko Apihu, ko Ereātara, ko Itamara.
1CH 24:2 I mate ia a Nātapa rāua ko Apihu ki te aroaro o tō rāua pāpā, kāhore hoki ā rāua tama; ā, nā Ereātara rāua ko Itamara i mahi ngā mahi a te tohunga.
1CH 24:3 Nā, ka wehea rātou e Rāwiri rātou ko Hāroko o ngā tama a Ereātara, ko Ahimereke o ngā tama a Itamara, he mea whakarite ki ngā tikanga mā rātou mō ā rātou mahi.
1CH 24:4 Nā, ka kitea he tokomaha rawa ngā tino tāngata o ngā tama a Ereātara i o ngā tama a Itamara, ā, ko tō rātou wehenga tēnei; o ngā tama a Ereātara kotahi tekau mā ono ngā tino tāngata o ngā whare o ō rātou mātua; o ngā tama a Itamara, o ngā whare o ō rātou mātua, tokowaru.
1CH 24:5 Ko tō rātou wehenga hoki he mea rota, ko ēnei hui tahi ki ērā; ā, tērā ngā rangatira o te wāhi tapu, me ngā rangatira o te whare o te Atua nō ngā tama a Ereātara, nō ngā tama anō hoki a Itamara.
1CH 24:6 He mea tuhituhi rātou nā Hemaia karaipi, tama a Netanēre, o ngā Rīwaiti, ki te aroaro o te kīngi, o ngā rangatira, o Hāroko tohunga rāua ko Ahimereke tama a Apiātara, ki te aroaro anō o ngā upoko o ngā whare o ngā mātua o ngā tohunga, o ngā Rīwaiti; kotahi whare mātua i riro mō Ereātara, kotahi i riro mō Itamara.
1CH 24:7 Nā, ko te putanga o te rota tuatahi, nō Tehoiaripi; ko te tuarua nō Irāia,
1CH 24:8 ko te tuatoru nō Hārimi, ko te tuawhā nō Heorimi,
1CH 24:9 ko te tuarima nō Marakia, ko te tuaono nō Mīamini,
1CH 24:10 ko te tuawhitu nō Hakoto, ko te tuawaru nō Apia,
1CH 24:11 ko te tuaiwa nō Hehua, ko te tekau nō Hekania,
1CH 24:12 ko te tekau mā tahi nō Eriahipi, ko te tekau mā rua nō Iākimi,
1CH 24:13 ko te tekau mā toru nō Hupa, ko te tekau mā whā nō Iehepeapa,
1CH 24:14 ko te tekau mā rima nō Pirika, ko te tekau mā ono nō Imere,
1CH 24:15 ko te tekau mā whitu nō Hetiri, ko te tekau mā waru nō Apahehe,
1CH 24:16 ko te tekau mā iwa nō Petahia, ko te rua tekau nō Ehekiere,
1CH 24:17 ko te rua tekau mā tahi nō Iakini, ko te rua tekau mā rua nō Kamuru,
1CH 24:18 ko te rua tekau mā toru nō Teraia, ko te rua tekau mā whā nō Maatia.
1CH 24:19 Ko ngā tikanga ēnei mō rātou, mō ā rātou mahi, mō te tomo ki te whare o Ihowā, i runga i te ritenga mō rātou, i whakaritea e tō rātou pāpā, e Ārona, ko tā Ihowā, ko tā te Atua o Īharaira i whakahau ai ki a ia.
1CH 24:20 Nā, ko ērā atu o ngā tama a Rīwai: o ngā tama a Āmarama, ko Hupaere; o ngā tama a Hupaere, ko Iehereia.
1CH 24:21 Nā, ko a Rehāpia: o ngā tama Rehāpia, ko te tuatahi ko Ihīa.
1CH 24:22 O ngā Itihari: ko Heromoto; o ngā tama a Heromoto: ko Iahata.
1CH 24:23 Nā, ko ngā tama a Heperona: ko Teria te tuatahi, ko Amaria te tuarua, ko Tahatiere te tuatoru, ko Tekameama te tuawhā.
1CH 24:24 O ngā tama a Utiere: ko Mika; o ngā tama a Mika, ko Hāmiri.
1CH 24:25 Ko te teina o Mika: ko Ihīa; o ngā tama a Ihīa: ko Hakaraia.
1CH 24:26 Ko ngā tama a Merari: ko Māhari, ko Muhi. Ko ngā tama a Taatia: ko Peno.
1CH 24:27 Ko ngā tama a Merari: arā a Taatia: ko Peno, ko Hōhama, ko Tākuru, ko Ipiri.
1CH 24:28 Nā Māhari: ko Ereātara; ā, kāhore a tēnei tama.
1CH 24:29 Nā, ko a Kihi, ko te tama a Kihi: ko Ierameere.
1CH 24:30 Ko ngā tama anō a Muhi: Māhari, ko Ērere, ko Terimoto. Ko ngā tama ēnei a ngā Rīwaiti, nō ngā whare o ō rātou mātua.
1CH 24:31 I maka rota anō ēnei i pērā me ō rātou tuākana, me ngā tama a Ārona i te aroaro o Kīngi Rāwiri, o Hāroko anō rāua ko Ahimereke, o ngā upoko anō o ngā whare o ngā mātua o ngā tohunga, o ngā Rīwaiti, arā o ngā tino mātua i te ritenga o ō rātou tēina.
1CH 25:1 Nā Rāwiri hoki, rātou ko ngā rangatira ope, i wehe mō te mahi ētahi o ngā tama a Āhapa, a Hēmana, a Ierutunu, hei poropiti i runga i te hāpa, i te hātere, i te himipora. Nā, ko te tokomaha o ngā kaimahi, me tā rātou mahi koia tēnei:
1CH 25:2 Nō ngā tama a Āhapa: ko Tākuru, ko Hōhepa, ko Netania, ko Atarera; ko te kaiwhakamahi mō ngā tama a Āhapa, ko Āhapa; rite tahi ki tā te kīngi tikanga tāna poropiti.
1CH 25:3 Ko a Ierutunu: ko ngā tama a Ierutunu; ko Keraria, ko Teri, ko Ihāia, ko Hahapia, ko Matitia, tokoono. Ko tō rātou pāpā ko Ierutunu tō rātou kaiwhakamahi. I poropiti ia i runga i te hāpa, i whakawhetai, i whakamoemiti ki a Ihowā.
1CH 25:4 Ko a Hēmana; ko ngā tama a Hēmana: ko Pūkia, ko Matania, ko Utiere, ko Hepuere, ko Terimoto, ko Hanania, ko Hanani, ko Eriata, ko Kirarati, ko Romamati Ētere, ko Iohopekaha, ko Maroti, ko Hotiri, ko Mahatioto.
1CH 25:5 Ko ēnei katoa he tama nā Hēmana matakite a te kīngi, mō ngā mea a te Atua, hei hāpai i te haona. Nā, hōmai ana e te Atua ki a Hēmana kotahi tekau mā whā ngā tama, tokotoru ngā tamāhine.
1CH 25:6 Ko ēnei katoa he mea whakamahi nā tō rātou pāpā ki te waiata i te whare o Ihowā i runga i ngā himipora, i te hātere, i te hāpa, hei mahi ki te whare o te Atua, hei pērā anō me tā te kīngi i kī ai ki a Āhapa, ki a Ierutunu, ki a Hēmana.
1CH 25:7 Nā, ko te tokomaha o rātou, o ō rātou tēina, i whakaakona ki ngā waiata a Ihowā, ko te hunga mōhio katoa, e rua rau e waru tekau mā waru.
1CH 25:8 I maka rota anō rātou mō tā rātou e tiaki ai, te iti, te rahi, te kaiwhakaako rāua ko te ākonga.
1CH 25:9 Nā, ko te putanga o te rota tuatahi nō Āhapa, ki a Hōhepa. O te tuarua nō Keraria; tekau mā rua rātou ko ōna tēina, ko āna tama.
1CH 25:10 O te tuatoru nō Tākuru: tekau mā rua rātou ko āna tama, ko ōna tēina.
1CH 25:11 O te tuawhā nō Ītiri; tekau mā rua rātou ko āna tama, ko ōna tēina.
1CH 25:12 O te tuarima nō Netania; tekau mā rua rātou ko āna tama, ko ōna tēina.
1CH 25:13 O te tuaono nō Pūkia; tekau mā rua rātou ko āna tama, ko ōna tēina.
1CH 25:14 O te tuawhitu nō Teharera; tekau mā rua rātou ko āna tama, ko ōna tēina.
1CH 25:15 O te tuawaru nō Ihāia; tekau mā rua rātou ko āna tama, ko ōna tēina.
1CH 25:16 O te tuaiwa nō Matania; tekau mā rua rātou ko āna tama, ko ōna tēina.
1CH 25:17 O te tekau nō Himei; tekau mā rua rātou ko āna tama, ko ōna tēina.
1CH 25:18 O te tekau mā tahi nō Atarēre; tekau mā rua rātou ko āna tama, ko ōna tēina.
1CH 25:19 O te tekau mā rua nō Hahapia; tekau mā rua rātou ko āna tama, ko ōna tēina.
1CH 25:20 O te tekau mā toru nō Hupaere; tekau mā rua rātou ko āna tama, ko ōna tēina.
1CH 25:21 O te tekau mā whā nō Matitia; tekau mā rua rātou ko āna tama, ko ōna tēina.
1CH 25:22 O te tekau mā rima nō Teremoto; tekau mā rua rātou ko āna tama, ko ōna tēina.
1CH 25:23 O te tekau mā ono nō Hanania; tekau mā rua rātou ko āna tama, ko ōna tēina.
1CH 25:24 O te tekau mā whitu nō Iohopekaha; tekau mā rua rātou ko āna tama, ko ōna tēina.
1CH 25:25 O te tekau mā waru nō Hanani; tekau mā rua rātou ko āna tama, ko ōna tēina.
1CH 25:26 O te tekau mā iwa nō Maroti; tekau mā rua rātou ko āna tama, ko ōna tēina.
1CH 25:27 O te rua tekau nō Eriata; tekau mā rua rātou ko āna tama, ko ōna tēina.
1CH 25:28 O te rua tekau mā tahi nō Hotiri; tekau mā rua rātou ko āna tama, ko ōna tēina.
1CH 25:29 O te rua tekau mā rua nō Kirarati; tekau mā rua rātou ko āna tama, ko ōna tēina.
1CH 25:30 O te rua tekau mā toru nō Mahatioto; tekau mā rua rātou ko āna tama, ko ōna tēina.
1CH 25:31 O te rua tekau mā whā nō Romamati Ētere; tekau mā rua rātou ko āna tama, ko ōna tēina.
1CH 26:1 Nā, ko ngā wehenga o ngā kaitiaki kūwaha: Nō ngā Korohi ko Meheremia tama a Kore, nō ngā tama a Āhapa.
1CH 26:2 Nā, ko ngā tama a Meheremia: ko Hakaraia te mātāmua, ko Teriaere te tuarua, ko Tepāria te tuatoru, ko Iataniere te tuawhā,
1CH 26:3 ko Erama te tuarima, ko Iehohanana te tuaono, ko Erioenai te tuawhitu.
1CH 26:4 Ā, ko ngā tama a Opere-Eroma: ko Hemaia te mātāmua, ko Iehotāpara te tuarua, ko Ioaha te tuatoru, ko Hakara te tuawhā, ko Netanēre te tuarima,
1CH 26:5 ko Amiere te tuaono, ko Ihākara te tuawhitu, ko Peurutai te tuawaru; he mea manaaki hoki ia nā Ihowā.
1CH 26:6 Ā, i whānau anō he tama mā tāna tama mā Hemaia, he rangatira rātou mō te whare o tō rātou pāpā; he mārohirohi hoki rātou, he toa.
1CH 26:7 Ko ngā tama a Hemaia: ko Otoni, ko Repaere, ko Ōpere, ko Eretāpara; he mārohirohi anō ō rātou tēina a Erihu rāua ko Hemakia.
1CH 26:8 Ko ēnei katoa o ngā tama a Opere-Eroma, me ā rātou tama, me ō rātou tēina he kaha ki te mahi, e ono tekau mā rua; nā Opere-Eroma.
1CH 26:9 Nā, he tama a Meheremia, he tēina anō, he mārohirohi, tekau mā waru.
1CH 26:10 He tama anō a Hōha o ngā tama a Merari: ko Himiri te upoko (ahakoa ehara ia i te mātāmua, i meinga ia hei upoko e tōna pāpā),
1CH 26:11 ko Hirikia te tuarua, ko Tepāria te tuatoru, ko Hakaraia te tuawhā; ko ngā tama katoa, me ngā tēina o Hōha, tekau mā toru.
1CH 26:12 I roto i ēnei ngā wehenga o ngā kaitiaki kūwaha, arā i roto i ngā tino tāngata, he mahi tiaki pērā i tā ō rātou tuākana, he minita i roto i te whare o Ihowā.
1CH 26:13 I maka rota anō rātou, te iti, te rahi, ngā whare o ō rātou mātua, mō tēnei kūwaha, mō tēnei kūwaha.
1CH 26:14 Nā, i taka te rota whaka te rāwhiti ki a Heremia. Kātahi ka makā te rota a tāna tama a Hakaraia, he mōhio ia ki te whakatakoto whakaaro, ā, ko te rota mō te raki i puta ake māna.
1CH 26:15 Ki a Opere-Eroma ko te rota mō te tonga; ā, ki āna tama ko te whare taonga.
1CH 26:16 Ki a Tupimi rāua ko Hōha ko tō te hauāuru, me te Kūwaha Harekete, i te huarahi e piki atu ai. Tēnei tiakanga i te ritenga mai o tēnei tiakanga.
1CH 26:17 Tokoono ngā Rīwaiti mō tō te rāwhiti, tokowhā mō tō te raki i tēnei rā, i tēnei rā, tokowhā mō tō te tonga i tēnei rā, i tēnei rā, ā, ki te whare taonga tokorua, tokorua.
1CH 26:18 I Parapara whaka te hauāuru tokowhā ki te huarahi, tokorua ki Parapara.
1CH 26:19 Ko ngā wehenga ēnei o ngā kaitiaki kūwaha i roto i ngā tama a Kore, i ngā tama anō a Merari.
1CH 26:20 Nā, o ngā Rīwaiti, ko Āhia ki ngā taonga o te whare o Ihowā, ki ngā taonga hoki kua oti te whakatapu.
1CH 26:21 Ko ngā tama a Rārana; ko ngā tama a ngā Kerehoni nā Rārana, ko ngā upoko o ngā whare o ngā mātua nā Rārana Kerehoni: ko Tehieri.
1CH 26:22 Ko ngā tama a Tehieri; ko Tetama, ko tōna teina ko Hoera, i a rātou ngā taonga o te whare o Ihowā.
1CH 26:23 Nō ngā Amarami ēnei, rātou ko ngā Itihari, ko ngā Heperoni, ko ngā Utieri:
1CH 26:24 Nā, ko Hepuere tama a Kerehoma tama a Mohi te rangatira mō ngā taonga.
1CH 26:25 Me ōna tēina: nā Eriētere, tāna tama a Rehāpia, tāna tama a Ihāia, tāna tama a Iorama, tāna tama a Tīkiri, tāna tama a Heromoto.
1CH 26:26 Ko tēnei Heromoto rātou ko ōna tēina ngā rangatira mō ngā taonga katoa, mō ngā mea i whakatapua, i whakatapua nei e Kīngi Rāwiri rātou ko ngā upoko o ngā whare o ngā mātua, ko ngā rangatira o ngā mano, o ngā rau, ko ngā rangatira ope.
1CH 26:27 Ko ētahi o ngā taonga parakete i riro pārau mai, he mea whakatapu nā rātou kia mau tonu ai te ora o te whare o Ihowā.
1CH 26:28 Nā, ko ngā mea katoa i whakatapua e Hamuera matakite, e Haora tama a Kihi, e Āpanēre tama a Nere, e Ioapa tama a Teruia, e te hunga katoa anō i whakatapua ai tētahi mea, i raro ērā i te ringa o Heromoto rātou ko ōna tēina.
1CH 26:29 O ngā Itihari, ko Kenania rātou ko āna tama mō ngā mahinga o waho ki a Īharaira, hei rangatira, hei kaiwhakawā.
1CH 26:30 O ngā Heperoni, ko Hahapia rātou ko ōna tēina, he mārohirohi, kotahi mano e whitu rau, hei rangatira i roto i te hunga o Īharaira i tēnei taha o Horano whaka te hauāuru, i ngā minitatanga katoa ki a Ihowā, i ngā mahi anō a te kīngi.
1CH 26:31 I roto i ngā Heperoni ko Terīa te upoko, arā i roto i ngā Heperoni, i runga anō i ngā whakatupuranga o ngā whare o ngā mātua. I te whā tekau o ngā tau o te kīngitanga o Rāwiri i rapua rātou, ā, kua kitea ētahi mārohirohi i roto i a rātou, he toa, ki Iatere o Kireara.
1CH 26:32 Me ōna tēina, he toa, e rua mano e whitu rau, he upoko nō ngā whare o ngā mātua, meinga ana rātou e Kīngi Rāwiri hei rangatira mō ngā Reupeni, mō ngā Kari, mō tētahi tānga o te iwi o Mānahi mō ngā mea katoa a te Atua, mō ngā mea anō a te kīngi.
1CH 27:1 Nā, ko ngā tama a Īharaira, tō rātou tokomaha, ngā upoko o ngā whare o ngā mātua, me ngā rangatira o ngā mano, o ngā rau, me ō rātou rangatira i mahi nei ki te kīngi i ngā mea katoa a ngā wehenga i haere mai nei, i haere atu rānei, i tēnei marama, i tēnei marama, i ngā marama katoa o te tau; e rua tekau mā whā mano o te wehenga kotahi.
1CH 27:2 Ko te rangatira o te wehenga tuatahi o te marama tuatahi, ko Iahopeama tama a Tapariere. E rua tekau mā whā mano i tōna wehenga.
1CH 27:3 Nō ngā tama ia a Perete, ko te rangatira o ngā rangatira katoa o te ope mō te marama tuatahi.
1CH 27:4 Ko te rangatira o te wehenga mō te rua o ngā marama, ko Rorai Ahohi, me tōna wehenga; ko Mikiroto te rangatira. E rua tekau mā whā mano i tōna wehenga.
1CH 27:5 Ko te tuatoru o ngā rangatira ope, mō te toru o ngā marama, ko Penaia tama a Iehoiara, he tohunga nui. E rua tekau mā whā mano i tōna wehenga.
1CH 27:6 Ko taua Penaia tēnei i nui nei i roto i te toru tekau, ko ia hoki te rangatira o te toru tekau. I roto tāna tama a Amitāpara i tōna wehenga.
1CH 27:7 Ko te tuawhā, mō te whā o ngā marama, ko Atahere teina o Ioapa, me tāna tama, me Tepāria, i muri i a ia. E rua tekau mā whā mano i tōna wehenga.
1CH 27:8 Ko te tuarima o ngā rangatira, mō te rima o ngā marama, ko Hamahutu Itirahi. E rua tekau mā whā mano i tōna wehenga.
1CH 27:9 Ko te tuaono o ngā rangatira, mō te ono o ngā marama, ko Ira tama a Ikehe Tekoi. E rua tekau mā whā mano i tōna wehenga.
1CH 27:10 Ko te tuawhitu, mō te whitu o ngā marama, ko Herete Peroni, nō ngā tama a Ēparaima. E rua tekau mā whā mano i tōna wehenga.
1CH 27:11 Ko te tuawaru, mō te waru o ngā marama, ko Hipekai Huhati, nō ngā Terahi. E rua tekau mā whā mano i tōna wehenga.
1CH 27:12 Ko te tuaiwa, mō te iwa o ngā marama, ko Apiētere Anatoti, nō ngā Pineamine. E rua tekau mā whā mano i tōna wehenga.
1CH 27:13 Ko te tekau, mō te tekau o ngā marama, ko Maharai Netopati, nō ngā Terahi. E rua tekau mā whā mano i tōna wehenga.
1CH 27:14 Ko te tekau mā tahi, mō te tekau mā tahi o ngā marama, ko Penaia Piratoni, nō ngā tama a Ēparaima. E rua tekau mā whā mano i tōna wehenga.
1CH 27:15 Ko te tekau mā rua, mō te tekau mā rua o ngā marama, ko Hererai Netopati, nō Otoniere. E rua tekau mā whā mano i tōna wehenga.
1CH 27:16 Nā, ko ngā rangatira o ngā iwi o Īharaira: o ngā Reupeni, ko Eriētere tama a Tīkiri te rangatira; o ngā Himioni, ko Hepatia tama a Maaka;
1CH 27:17 o ngā Rīwaiti: ko Hahapia tama a Kemuere; o ngā Āroni, ko Hāroko;
1CH 27:18 o Hūrā: ko Erihu, nō ngā tuākana o Rāwiri; o Ihākara, ko Omori tama a Mikaera;
1CH 27:19 o Hepurona: ko Ihimāia tama a Opāria; o Napatari, ko Terimoto tama a Atariere;
1CH 27:20 o ngā tama a Ēparaima: ko Hohea tama a Atatia; o tētahi tānga o te iwi o Mānahi, ko Hoera tama a Peraia;
1CH 27:21 o tērā tānga o te iwi o Mānahi i Kireara: ko Iro tama a Hakaraia; o Pineamine: ko Taahiere tama a Āpanēre;
1CH 27:22 o Rāna: ko Atarēre tama a Ierohama. Ko ngā rangatira ēnei o ngā iwi o Īharaira.
1CH 27:23 Kīhai ia i taua e Rāwiri te hunga e rua tekau, he iti iho hoki ngā tau; i mea hoki a Ihowā, ka whakanuia e ia a Īharaira kia rite ki ngā whetū o te rangi.
1CH 27:24 Nā Ioapa tama a Teruia i tīmata te tatau. Otiia kīhai i oti i a ia; nō te mea i pā he riri mō tēnei mea ki a Īharaira; kīhai hoki te tokomaha i uru ki roto ki te tauanga o ngā meatanga o ngā rā o Kīngi Rāwiri.
1CH 27:25 Nā, ko te rangatira o ngā taonga o te kīngi, ko Ātamawete tama a Ariere. Ko te rangatira o ngā whare taonga i ngā māra, i ngā pā, i ngā pā koraha, i ngā taumaihi, ko Honatana tama a Utia.
1CH 27:26 Ko te rangatira hoki o ngā kaimahi o te māra, i mahia ai te oneone, ko Eteri tama a Kerupu.
1CH 27:27 Nā, mō ngā māra wāina ko Himei Ramati. Ko te rangatira mō ngā mea o ngā māra wāina e kawea ana ki ngā toa wāina, ko Tapari Hipimi.
1CH 27:28 Mō ngā ōriwa, me ngā hikamora i ngā raorao, ko Paara-Hanana Kereri. Mō ngā toa hinu ko Ioaha.
1CH 27:29 Mō ngā kau e hāereere ana i Harono ko Hitirai Haroni. Mō ngā kau i ngā mānia ko Hāpata tama a Ararai.
1CH 27:30 Mō ngā kāmera ko Ōpiri Ihimaeri. Mō ngā kāihe ko Iehereia Meronoti.
1CH 27:31 Mō ngā hipi, ko Iatiti Hākari. Ko ēnei katoa he rangatira nō ngā taonga o Kīngi Rāwiri.
1CH 27:32 Ko Honatana hoki, ko te matua kēkē o Rāwiri, he kaiwhakatakoto whakaaro ia, he tangata mōhio, he karaipi. Ko Tehiere hoki tama a Hakamoni hei hoa mō ngā tama a te kīngi.
1CH 27:33 Ko Ahitopere te kaiwhakatakoto whakaaro a te kīngi. Ko Huhai Araki he hoa nō te kīngi.
1CH 27:34 I muri i a Ahitopere, ko Iehoiara tama a Penaia, ko Apiātara hoki; ā, ko te rangatira ope a te kīngi, ko Ioapa.
1CH 28:1 Nā, ka whakaminea e Rāwiri ngā rangatira katoa o Īharaira: ngā rangatira o ngā iwi, ngā rangatira o ngā wehenga i mahi nei ki te kīngi, me ngā rangatira mano, me ngā rangatira rau, me ngā rangatira anō o ngā taonga, o ngā kararehe a te kīngi, a āna tama, me ngā kaiwhakahaere, me ngā mārohirohi, me ngā tāngata māia katoa, ki Hiruhārama.
1CH 28:2 Nā, ka tū ngā waewae o Kīngi Rāwiri ki runga, ā, ka kōrero ia: “Whakarongo mai, e ōku tuākana, e ōku tēina, e tōku iwi. He ngākau tōku ki te hanga i tētahi whare hei okiokinga mō te āka o te kawenata a Ihowā, hei tūranga waewae mō tō tātou Atua; nā, kua rite āku mea hei hanga.
1CH 28:3 Otiia, kua kī mai nei te Atua ki ahau, ‘E kore e hangā e koe he whare mō tōku ingoa; he tangata whawhai koe, kua whakaheke toto hoki koe.’
1CH 28:4 “Heoi, kua whiriwhiria nei ahau e Ihowā, e te Atua o Īharaira i roto i te whare katoa o tōku pāpā hei kīngi mō Īharaira ā ake ake. Kua whiriwhiria nei hoki e ia a Hūrā hei rangatira; me te whare anō o tōku pāpā i roto i te whare o Hūrā; i whakapai hoki ia ki ahau i roto i ngā tama a tōku pāpā, ā, meinga ana ahau hei kīngi mō Īharaira katoa.
1CH 28:5 Ā, ko tāna i whiriwhiri ai o āku tama katoa, he tokomaha hoki ngā tama i hōmai nei e Ihowā ki ahau, ko tāku tama, ko Horomona hei noho ki te torōna o te kīngitanga o Ihowā ki a Īharaira.
1CH 28:6 I mea mai anō ia ki ahau, ‘Ko Horomona, ko tāu tama, māna, e hanga tōku whare, me ōku marae; kua oti hoki ia te whiriwhiri e ahau hei tama māku, ko ahau hoki hei pāpā ki a ia.
1CH 28:7 Ka whakapūmautia anō e ahau tōna kīngitanga ake ake, ki te mau tāna mahi i āku whakahau, i āku whakaritenga, ki te pēnei me tēnei ināianei.’
1CH 28:8 “Nā, i te mea e titiro mai nei a Īharaira katoa, arā tā Ihowā whakaminenga, ā, i tō tātou Atua hoki e whakarongo mai nei, puritia, rapua ngā whakahau katoa a Ihowā, a tō koutou Atua, kia riro ai te whenua pai i a koutou, ā, whakarere tonu iho e koutou mō ā koutou tama i muri i a koutou ake ake.”
1CH 28:9 Me koe hoki, “E tāku tama, e Horomona, kia mōhio koe ki te Atua o tōu pāpā, kia tapatahi hoki te ngākau, kia hihiko te wairua e mahi ai koe ki a ia; e rapua ana hoki e Ihowā ngā mea o ngā ngākau katoa, ā, e mōhiotia katoatia ana e ia ngā tokonga ake o ngā whakaaro. Ki te rapua ia e koe, ka kitea, ā, ki te whakarērea ia e koe, ka peia koe e ia ā ake ake.
1CH 28:10 Nā, kia mahara, kua whiriwhiria nei hoki koe e Ihowā hei hanga i te whare mō te wāhi tapu. Kia kaha ki te mahi.”
1CH 28:11 Kātahi ka hoatu e Rāwiri ki tāna tama, ki a Horomona te tauira mō te whakamahau o te temepara, mō ngā whare anō o reira, mō ōna whare taonga, mō ōna rūma o runga, mō ōna rūma anō i roto, mō te wāhi hoki mō te taupoki.
1CH 28:12 Me te tauira mō ngā mea katoa a te wairua i a ia, mō ngā marae o te whare o Ihowā, mō ngā rūma katoa anō ā taka noa, mō ngā whare taonga o te whare o te Atua, mō ngā whare taonga mō ngā mea kua oti te whakatapu.
1CH 28:13 Mō ngā wehenga o ngā tohunga, o ngā Rīwaiti, mō ngā meatanga katoatanga o te mahi mō te whare o Ihowā, mō ngā oko katoa hei mea mahi ki te whare o Ihowā.
1CH 28:14 Me te kōura, he mea pāuna, mō ngā mea kōura, mō ngā mea katoa o tēnei mahi, o tēnei mahi; he hiriwa anō mō ngā mea hiriwa katoa, he mea pāuna, mō ngā mea katoa o tēnei mahi, o tēnei mahi:
1CH 28:15 me te taimaha mō ngā tūranga rama kōura, me ō rātou rama kōura; he mea pāuna mō tēnei tūranga, mō tēnei tūranga, mō ō rātou rama anō; he mea pāuna anō mō ngā tūranga hiriwa, mō te tūranga, mō ōna rama, he mea whakarite ki te mahi mō tēnei tūranga, mō tēnei tūranga;
1CH 28:16 i pāunatia anō e ia te kōura mō ngā tēpu taro aroaro, mō tēnei tēpu, mō tēnei tēpu; me te hiriwa mō ngā tēpu hiriwa.
1CH 28:17 Me te kōura parakore mō ngā mārau, mō ngā peihana, mō ngā kapu: mō ngā pāta kōura hoki, he mea pāuna mō tēnei pāta, mō tēnei pāta; me te hiriwa anō, he mea pāuna mō ngā pāta hiriwa katoa;
1CH 28:18 mō te āta tahu whakakakara anō he kōura parakore, he mea pāuna; he kōura mō te tauira o te hāriata o ngā kerupima e roha nei ngā parirau hei hīpoki mō te āka o te kawenata a Ihowā.
1CH 28:19 “Ko tēnei katoa,” e ai tā Rāwiri, “he mea tuhituhi, he mea whakaatu mai nā Ihowā ki ahau; i runga hoki i ahau tōna ringa; arā, ngā mea katoa o tēnei tauira.”
1CH 28:20 I mea anō a Rāwiri ki tāna tama, ki a Horomona, “Kia kaha, kia māia, mahia, kaua e wehi, kaua e pāwera; kei a koe nā hoki a Ihowā, te Atua, arā tōku Atua. E kore ia e whakarere i a koe, e kore anō koe e mahue i a ia, kia oti rā anō ngā mea katoa mō te mahi ki te whare o Ihowā.
1CH 28:21 Nanā, ngā wehenga o ngā tohunga, o ngā Rīwaiti, kei a koe rātou mō ngā mahi katoa ki te whare o te Atua. Kei a koe anō, mō ngā meatanga katoa, ngā tāngata mōhio katoa e hihiko noa āna, mō ngā mahi katoa; me ngā rangatira, me te iwi katoa; kei a koe tonu te kupu katoa.”
1CH 29:1 I mea anō a Kīngi Rāwiri ki te whakaminenga katoa: “Ko tāku tama, ko Horomona, ko te mea kotahi i whiriwhiria nei e te Atua, he tamariki ia, he mea ngāwari, he nui hoki te mahi; ehara hoki i te whare mō te tangata; engari mō Ihowā, mō te Atua.
1CH 29:2 Nā, kua whakapaua nei e ahau ōku uaua ki te mahi mea mai mō te whare o tōku Atua, te kōura mō ngā mea kōura, te hiriwa mō ngā mea hiriwa, te parāhi mō ngā mea parāhi, te rino mō ngā mea rino, te rākau mō ngā mea rākau, ngā kōhatu onika, ngā kōhatu e whakanohoia ana, ngā kōhatu kanapa, me ngā mea kakano whakauru, ngā kōhatu utu nui katoa, me ngā kōhatu mapere, tōna tini.
1CH 29:3 Tēnei anō ētahi, he pai tonu hoki nōku ki te whare o tōku Atua; nāku ake tēnei, he kōura, he hiriwa ka hoatu nei mō te whare o tōku Atua, hei tāpiri mō ngā mea katoa kua oti nei i ahau te mahi mai mō te whare tapu:
1CH 29:4 arā, e toru mano taranata kōura, nō te kōura o Ōpira, e whitu mano taranata hiriwa, he mea parakore, hei kōpaki mō ngā taha o ngā whare,
1CH 29:5 ko te kōura mō ngā mea kōura, ko te hiriwa mō ngā mea hiriwa, mō ngā mea katoa, e mahia e ngā ringa o ngā kaimahi. Nā, ko wai e hihiko ana ināianei ki te tāpae i a ia mā Ihowā?”
1CH 29:6 Nā, hihiko tonu ngā rangatira o ngā whare o ngā mātua, me ngā rangatira o ngā iwi o Īharaira, ngā rangatira o ngā mano, o ngā rau, rātou ko ngā rangatira o te mahi a te kīngi.
1CH 29:7 Ā, hōmai ana e rātou mō te mahi ki te whare o te Atua he kōura e rima mano taranata, tekau mano tarami, he hiriwa kotahi tekau mano taranata, he parāhi kotahi tekau mā waru mano taranata, he rino kotahi rau mano taranata.
1CH 29:8 Nā, ko te hunga i kitea nei ki a rātou he kōhatu pai, hōmai ana e rātou ki roto ki ngā taonga o te whare o Ihowā, arā ki te ringa o Tehiere Kerehoni.
1CH 29:9 Nā, ka koa te iwi, i a rātou i hihiko nei ki te tāpae noa; he tapatahi hoki te ngākau i hihiko ai rātou ki tā Ihowā mahi; nui atu hoki te koa i koa ai a Kīngi Rāwiri.
1CH 29:10 Nā, ka whakapai a Rāwiri i a Ihowā i te tirohanga a te whakaminenga katoa; i mea a Rāwiri, “Kia whakapaingia koe, e Ihowā, e te Atua o tō mātou matua, o Īharaira, he mea nō tua whakarere ā ake tonu atu.
1CH 29:11 Nōu hoki, e Ihowā, te nui, te mana, te korōria, te wikitōria, te hōnore; nōu ngā mea katoa i te rangi, i te whenua; nōu te rangatiratanga, e Ihowā; he tiketike noa ake hoki koe, hei upoko mō te katoa.
1CH 29:12 Nāu ngā taonga, me te hōnore, ko koe hoki hei kīngi mō te katoa; kei tōu ringa te kaha me te mana; mā tōu ringa anō e hōmai te nui, te kaha, mō te katoa.
1CH 29:13 Nā, tēnei mātou, e tō mātou Atua, te whakawhetai nei ki a koe, te whakamoemiti nei ki tōu ingoa korōria.
1CH 29:14 “Ko wai oti ahau, ā, he aha tōku iwi, i whai kaha ai mātou, i pēnei ai te hihiko? Nāu hoki te katoa, nōu anō hoki tā mātou ka hoatu nei ki a koe.
1CH 29:15 He manene hoki mātou i tōu aroaro, he noho noa iho, he pērā me ō mātou mātua; rite tonu ki te ātārangi ō mātou rā i runga i te whenua; kāhore hoki he tūturutanga.
1CH 29:16 E Ihowā, e tō mātou Atua, ko tēnei pūranga katoa kua pae nei i a mātou hei hanga i tētahi whare mōu, mō tōu ingoa tapu, nā tōu ringa ēnei, nāu hoki te katoa.
1CH 29:17 E mōhio ana hoki ahau, e tōku Atua, e whakamātauria ana te ngākau e koe, e manako ana hoki koe ki te tika. Ko ahau nei, he tika tōku ngākau i meatia noatia mai ai e ahau ēnei mea katoa; ā, tēnei ahau te koa nei i tōku kitenga i tāu iwi i konei e hihiko ana ki tāu mahi.
1CH 29:18 E Ihowā, e te Atua o Āperahama, o Īhaka, o Īharaira, o ō mātou mātua, kia mau tēnei ake nei, ake nei, i roto i ngā tokonga ake o ngā whakaaro o te ngākau o tāu iwi, whakaangahia hoki ō rātou ngākau ki a koe.
1CH 29:19 Ki tāku tama hoki, ki a Horomona, hōmai he ngākau tapatahi, kia puritia ai e ia āu whakahau, āu whakaaturanga, āu tikanga, kia oti katoa i a ia; kia hangā hoki te whare, mō reira nei ngā mea kua pae nei i ahau.”
1CH 29:20 Nā, ka mea a Rāwiri ki te whakaminenga katoa, “Tēnā, whakapaingia a Ihowā, tō koutou Atua.” Nā, kei te whakapai te whakaminenga katoa ki a Ihowā, ki te Atua o ō rātou mātua tuohu ana rātou, piko ana ki a Ihowā, ki te kīngi hoki.
1CH 29:21 I patu whakahere anō rātou ki a Ihowā, i whakaeke i ngā tahunga tinana ki a Ihowā i te aonga ake o taua rā; kotahi mano pūru, kotahi mano hipi toa, kotahi mano reme, me ngā ringihanga, me ngā patunga tapu, tōna tini, hei mea mō Īharaira katoa.
1CH 29:22 Nā, kai ana rātou, inu ana i te aroaro o Ihowā i taua rā, he nui te koa. Ā, ka tuaruatia tā rātou whakakīngi i a Horomona tama a Rāwiri; whakawahia ana ia ki a Ihowā, hei rangatira; ko Hāroko hoki hei tohunga.
1CH 29:23 Kātahi ka noho a Horomona ki te torōna o Ihowā, hei kīngi i muri i tōna pāpā, i a Rāwiri, ā, kake ana; rongo tonu anō ki a ia a Īharaira katoa.
1CH 29:24 Nā, ko ngā rangatira katoa, me ngā mārohirohi, me ngā tama katoa a Kīngi Rāwiri, ngāwari noa iho rātou ki te kīngi, ki a Horomona.
1CH 29:25 Ā, whakanuia rawatia ake a Horomona e Ihowā i te tirohanga a Īharaira katoa, hōmai ana ki a ia he korōria kīngi, kāhore nei he rite i ngā kīngi katoa o Īharaira i mua i a ia.
1CH 29:26 Heoi, ko Rāwiri tama a Hehe te kīngi o Īharaira katoa.
1CH 29:27 Nā, ko ngā rā i kīngi ai ia ki a Īharaira, e whā tekau tau; e whitu ngā tau i kīngi ai ia ki Heperona, e toru tekau mā toru ngā tau i kīngi ai ki Hiruhārama.
1CH 29:28 Nā, ka mate ia, he pai tōna koroheketanga, hira tonu ōna rā, ōna taonga, tōna korōria; ā, ko tāna tama, ko Horomona te kīngi i muri i a ia.
1CH 29:29 Nā, ko ngā mahi a Kīngi Rāwiri, ō mua, ō muri, nanā, kua oti te tuhituhi ki ngā kupu a Hamuera matakite, ki ngā kupu anō a Nātana poropiti, ki ngā kupu anō hoki a Kara matakite,
1CH 29:30 me tōna kīngitanga katoa, me tōna māia, me ngā wā i a ia, i a Īharaira, i ngā rangatiratanga katoa o ngā whenua.
2CH 1:1 Nā, kua ū a Horomona tama a Rāwiri ki tōna rangatiratanga; i a ia anō a Ihowā, tōna Atua, ā, whakanuia rawatia ana ia e ia.
2CH 1:2 Kātahi a Horomona ka kōrero ki a Īharaira katoa, ki ngā rangatira o ngā mano, o ngā rau, ki ngā kaiwhakawā, ki ngā kāwana katoa o Īharaira katoa, ki ngā upoko hoki o ngā whare o ngā mātua.
2CH 1:3 Heoi, haere ana a Horomona rātou ko te whakaminenga katoa ki te wāhi tiketike i Kipeono; i reira hoki te tapenākara o te whakaminenga a te Atua, i hangā nei e Mohi pononga a te Atua ki te koraha.
2CH 1:4 (Ko te āka ia a te Atua, i mauria mai tērā e Rāwiri i Kiriata Tearimi, ki te wāhi i whakapaia e Rāwiri; kua whakatūria hoki e ia he tēneti mō taua āka ki Hiruhārama.)
2CH 1:5 Ko te āta parāhi anō hoki i hangā e Petarēre tama a Uri, tama a Huru, i reira tērā i mua i te tapenākara o Ihowā; ā, rapua ana he tikanga i reira e Horomona rātou ko te whakaminenga.
2CH 1:6 Nā, haere ana a Horomona ki reira ki te āta parāhi i te aroaro o Ihowā, ki tērā i te tapenākara o te whakaminenga, ā, whakaekea ana e ia ki reira kotahi mano ngā tahunga tinana.
2CH 1:7 I taua pō ka puta te Atua ki a Horomona, ā, ka mea ki a ia, “Īnoi mai ki ahau ko te aha kia hoatu e ahau ki a koe.”
2CH 1:8 Nā, ka mea a Horomona ki te Atua, “Nui atu te aroha i whakaputaina e koe ki tōku pāpā, ki a Rāwiri; ā, meinga ana ahau e koe hei kīngi i muri i a ia.
2CH 1:9 Heoi, e Ihowā, e te Atua, whakamanā tāu kupu ki tōku pāpā, ki a Rāwiri; kua meinga nei hoki ahau e koe hei kīngi mō te iwi e rite ana ki te onepū o te whenua te tini.
2CH 1:10 Nā, hōmai ki ahau he ngākau mahara, he mōhio, mō tōku haere atu, haere mai, i te aroaro o tēnei iwi; ko wai hoki hei whakarite mō tēnei iwi nui āu?”
2CH 1:11 Anō rā ko te Atua ki a Horomona, “Nā, i te mea ko tā tōu ngākau tēnei, kīhai hoki koe i tono ki te taonga mōu, ki te rawa, ki te korōria, ki ōu hoariri rānei kia mate, kīhai hoki koe i tono kia maha ōu rā; heoi tāu i tono ai, he ngākau mahara, he mōhio, kia whakarite ai koe mō tāku iwi, kua oti nā koe te mea e ahau hei kīngi mō rātou;
2CH 1:12 tēnei ka hoatu nei ki a koe he ngākau mahara, he mōhio. Ā, ka hoatu e ahau ki a koe he taonga, he rawa, he korōria, kāhore i rite tō ngā kīngi i mua i a koe, e kore anō e rite i muri i a koe.”
2CH 1:13 Heoi, ka tae a Horomona i tāna haere ki te wāhi tiketike i Kipeono, i mua i te tapenākara o te whakaminenga, ki Hiruhārama, ā, kīngi ana ki a Īharaira.
2CH 1:14 Nā, ka huihuia he hāriata e Horomona, he kaieke hōiho; kotahi mano e whā rau ana hāriata, kotahi tekau mā rua mano āna kaieke hōiho, waiho iho e ia ki ngā pā hāriata, ki te kīngi anō ki Hiruhārama.
2CH 1:15 Nā, ka meinga e te kīngi te hiriwa me te kōura o Hiruhārama kia rite ki te kōhatu, i meinga anō e ia ngā hīta kia rite ki te hikamora i te raorao; te tini.
2CH 1:16 Ko ngā hōiho i a Horomona he mea mau ake i Īhipa; i riro rōpū mai i ngā kaihoko a te kīngi, he rōpū me tōna utu.
2CH 1:17 Nā, e ono rau ngā hekere hiriwa i riro mai ai te hāriata, i puta mai ai i Īhipa, kotahi rau e rima tekau i riro ai te hōiho. Ko rātou anō hei kawe hōiho mō ngā kīngi katoa o ngā Hiti, mō ngā kīngi anō o Hīria.
2CH 2:1 Nā, ka mea a Horomona kia hangā he whare mō te ingoa o Ihowā, he whare hoki mō tōna kīngitanga.
2CH 2:2 Nā, ka taua e Horomona e whitu tekau mano tāngata hei kaipīkau, e waru tekau mano hoki hei tua i runga i te maunga, me ngā kaitirotiro i a rātou e toru mano e ono rau.
2CH 2:3 Nā, ka tuku tāngata a Horomona ki a Hūrāma kīngi o Tāira hei kī atu: “Kia rite ki tāu i mea ai ki tōku pāpā, ki a Rāwiri; i tukua mai hoki e koe he hīta kia kawea mai māna, hei hanga i tētahi whare mōna hei nohoanga, kia pērā hoki tāu ki ahau.
2CH 2:4 Nanā, ka hangā e ahau he whare mō te ingoa o Ihowā, o tōku Atua, ka whakatapua mōna, hei tahunga mō te whakakakara reka ki tōna aroaro, mō te taro aroaro tūturu, mō ngā tahunga tinana o te ata, o te ahiahi, o ngā hāpati, o ngā kōwhititanga marama, o ngā hākari o Ihowā, o tō mātou Atua. He tikanga tēnei ake ake mā Īharaira.
2CH 2:5 “Nā, he nui te whare ka hangā nei e ahau; he nui hoki tō mātou Atua i ngā atua katoa.
2CH 2:6 Otiia ko wai e āhei te hanga whare mōna? Kāhore nei hoki e nui te rangi me te rangi o ngā rangi hei nohoanga mōna. Ko wai koia ahau hei hanga whare mōna, heoi nei hei tahu whakakakara ki tōna aroaro?
2CH 2:7 “Tēnā, ungā mai ki ahau tētahi tangata e mōhio ana ki te mahi i te kōura, i te hiriwa, i te parāhi, i te rino, i te mea pāpura, whero, purū, e mōhio ana ki te mahi i ngā āhua whakairo katoa, hei hoa mō te hunga mōhio i ahau nei, i a Hūrā, i Hiruhārama, mō te hunga i whakatūtūria e tōku pāpā, e Rāwiri.
2CH 2:8 “Tukua mai anō hoki ki ahau he rākau hīta, he kauri, he aramuka i Repanōna; e mātau ana hoki ahau he hunga mōhio āu tāngata ki te tapahi rākau i Repanōna. Nā, ko āku tāngata hei hoa mō āu tāngata,
2CH 2:9 hei whakapai rākau māku, kia maha; nō te mea he nui te whare ka hangā nei e ahau, he mea ka mīharotia.
2CH 2:10 Nanā, ko tāku e hoatu ai ki āu tāngata, ki ngā kaitārai, ki ngā kaitapahi i ngā rākau, he wīti, he mea patu e rua tekau mano mēhua, he pārei e rua tekau mano mēhua, he wāina e rua tekau mano pāti, he hinu e rua tekau mano pāti.”
2CH 2:11 Nā, ka whakautua e Hūrāma kīngi o Tāira, he mea tuhituhi, tukua ai e ia ki a Horomona: “He aroha nō Ihowā ki tāna iwi i hōmai ai koe e ia hei kīngi mō rātou.”
2CH 2:12 I mea anō a Hūrāma: “Kia whakapaingia a Ihowā, te Atua o Īharaira, nāna nei i hanga te rangi me te whenua, nāna hoki i hōmai ki a Kīngi Rāwiri he tama ngārahu tika, e hua ana ōna whakaaro, tōna mōhio, hei hanga i te whare mō Ihowā, i te whare anō mō tōna kīngitanga.
2CH 2:13 “Nā, kua ungā atu nei e ahau tētahi tangata whakaaro, e hua ana tōna mōhio, nā tōku pāpā, nā Hūrāma,
2CH 2:14 he tama nā tētahi wahine o ngā tamāhine a Rāna, ko tōna pāpā he tangata nō Tāira, he mōhio ki te mahi kōura, hiriwa, parāhi, rino kōhatu, rākau, pāpura, purū, rīnena pai, whero; ki te whakairo hoki i ngā whakairo katoa, ki te whakatauira i ngā whakaaro katoa e hoatu ki a ia; hei hoa mō āu mea mōhio, mō ngā mea mōhio anō hoki a tōku ariki, a Rāwiri, a tōu pāpā.
2CH 2:15 “Nā, ko te wīti, ko te pārei, ko te hinu, ko te wāina, i kōrerotia mai nā e tōku ariki, māna e hōmai ki āna pononga;
2CH 2:16 ā, mā mātou e tapahi he rākau i Repanōna, kia rite ki āu e mea ai māu; ka whakatere atu ai ki a koe i te moana ki Hopa, ā, māu e taritari ki Hiruhārama.”
2CH 2:17 Nā, ka taua e Horomona ngā tāngata iwi kē i te whenua o Īharaira i muri i te tauanga i taua ai e tōna pāpā e Rāwiri; ā, ka kitea kotahi rau e rima tekau mā toru mano e ono rau.
2CH 2:18 Ā, ka meinga ētahi o rātou, e whitu tekau mano, hei kaipīkau, e waru tekau mano anō hei tārai i runga i te maunga, e toru mano e ono rau hei kaitirotiro, hei whakamahi i te iwi.
2CH 3:1 Kātahi ka tīmata a Horomona te hanga i te whare o Ihowā ki Hiruhārama, ki Maunga Moria, ki te wāhi i puta ai a Ihowā ki tōna pāpā, ki a Rāwiri, ki te wāhi i whakapaia e Rāwiri ki te patunga wīti a Oronana Iepuhi.
2CH 3:2 Nō te rua o ngā rā o te rua o ngā marama i tīmata ai ia te hanga, nō te whā o ngā tau o tōna kīngitanga.
2CH 3:3 Nā, ko ngā tūranga ēnei i whakatakotoria e Horomona mō te hanganga i te whare o te Atua: Ko te roa, i ngā whatīanga i muri o te rūri tuatahi, e ono tekau whatīanga, ā, ko te whānui e rua tekau whatīanga.
2CH 3:4 Ā, ko te whakamahau i te aronga ki mua o te whare, ko tōna roa i te āhua o te whānui o te whare e rua tekau whatīanga, ā, ko te tiketike kotahi rau e rua tekau. Ā, he mea whakakikorua e ia a roto ki te kōura parakore.
2CH 3:5 Nā, ko te whare nui, he mea hīpoki nāna ki te rākau, ki te kauri, whakakikoruatia ana e ia ki te kōura pai, mahia iho hoki e ia ki runga he nīkau, he mekameka.
2CH 3:6 He mea whakapaipai hoki nāna te whare ki te kōhatu utu nui, kia ātaahua ai. He kōura hoki; nō Parawaima te kōura.
2CH 3:7 I whakakikoruatia anō e ia te whare, ngā kurupae, ngā pou, ōna taha, me ōna tatau, ki te kōura; i whakairoa anō he kerupima ki ngā taha.
2CH 3:8 I hangā anō e ia te whare tapu rawa; ko te roa, ko te whānui o te whare, e rua tekau whatīanga; ko tōna whānui e rua tekau whatīanga. Whakakikoruatia iho ki te kōura pai, e ono rau taranata.
2CH 3:9 Nā, ko te taimaha o ngā whao, e rima tekau hekere kōura; ā, i whakakikoruatia ngā rūma o runga ki te kōura.
2CH 3:10 I hangā anō e ia i roto i te whare tino tapu e rua ngā kerupima, he mea whakairo; whakakikoruatia iho ki te kōura.
2CH 3:11 Ko ngā parirau hoki o ngā kerupima, e rua tekau whatīanga te roa; ko te parirau o tētahi, e rima whatīanga, pā tonu ki te taha o te whare; ko tētahi parirau, e rima whatīanga, pā tonu ki te parirau o tērā kerupa.
2CH 3:12 Nā, ko te parirau o tērā kerupa, e rima whatīanga, pā tonu ki te taha o te whare: ko tētahi parirau, e rima anō hoki whatīanga, he mea ūngutu anō ki te parirau o tērā kerupa.
2CH 3:13 Nā, roha tonu ngā parirau o ēnei kerupima, e rua tekau whatīanga. Tū ana ō rāua waewae ki runga; ko ō rāua kanohi i anga ki te whare.
2CH 3:14 I hangā anō e ia te ārai ki te mea purū, pāpura, whero, ki te rīnena pai; mahia iho hoki e ia ki te kerupa.
2CH 3:15 I hangā anō e ia ētahi pou e rua ki mua i te whare, e toru tekau mā rima whatīanga te roa, e rima whatīanga o te whakapaipai i runga i tētahi, i tētahi.
2CH 3:16 I hangā anō e ia he mekameka ki te ahurewa, whakanohoia iho ki ngā pito ki runga o ngā pou. I hangā anō e ia ētahi pamekaranete kotahi rau, whakanohoia iho ki ngā mekameka.
2CH 3:17 Whakatūria ana e ia aua pou ki mua o te temepara, kotahi ki matau, kotahi ki mauī, ā, huaina iho e ia te ingoa o tērā ki matau ko Iakini, te ingoa hoki o tērā ki mauī ko Poaha.
2CH 4:1 I hangā anō e ia te āta parāhi, e rua tekau whatīanga te roa, e rua tekau whatīanga te whānui, kotahi tekau hoki whatīanga te tiketike.
2CH 4:2 I hangā anō te moana, he mea whakarewa, tekau ngā whatīanga o tētahi pareparenga ki tētahi pareparenga, he mea porotaka, e rima whatīanga tōna tiketike. E toru tekau whatīanga o te aho i paea ai.
2CH 4:3 I raro ko ētahi mea e rite ana ki te kau, ā taka noa, kotahi tekau ngā whatīanga, i te taha o te moana, ā taka noa. E rua rārangi o ngā kau i whakarewaina i tōna whakarewanga.
2CH 4:4 I runga i ngā kau kotahi tekau mā rua taua moana e tū ana, e toru e anga ana ki te raki, e toru e anga ana ki te hauāuru, e toru e anga ana ki te tonga, e toru e anga ana ki te rāwhiti; i runga hoki ko te moana; i anga whakaroto a muri katoa o rātou.
2CH 4:5 He whānuitanga ringa te mātotoru; rite tonu te hanganga o tōna niao ki tō te niao o te kapu, ki te puāwai rengarenga. E toru mano pāti o roto o taua moana ina kī.
2CH 4:6 Ā, i hangā e ia ētahi oko horoi kotahi tekau, ā, whakatūria ana e rima ki matau, e rima ki mauī, hei horoinga. Ko ngā mea i whakaekea hei tahunga tinana i horoia ki reira; ko te moana ia hei horoinga mō ngā tohunga.
2CH 4:7 Nā, i hangā e ia ngā tūranga rama kōura kotahi tekau, ki te āhua i whakaritea mō ērā mea; whakatūria ana e ia ki te temepara; e rima ki matau, e rima ki mauī.
2CH 4:8 I hangā anō e ia ngā tēpu kotahi tekau, whakatūria ana ki te temepara, e rima ki matau, e rima ki mauī. I hangā anō ngā peihana kōura kotahi rau.
2CH 4:9 I hangā anō e ia te marae o ngā tohunga, me te marae nui, me ngā tatau mō te marae; i whakakikoruatia ngā tatau o aua wāhi ki te parāhi.
2CH 4:10 Nā, ko te moana, whakatakotoria ana ki matau o te pito ki te rāwhiti, whaka te tonga.
2CH 4:11 I hangā anō e Hūrāma ngā pāta, ngā koko pungarehu, ngā peihana. Nā, kua oti i a Hūrāma te mahi i mahia e ia mā Kīngi Horomona i te whare o te Atua:
2CH 4:12 ngā pou e rua, ngā peihana, ngā whakapaipai e rua i te pito ki runga o ngā pou e rua, ngā kupenga e rua hei kōpaki mō ngā peihana e rua o ngā whakapaipai i te pito ki runga o ngā pou;
2CH 4:13 me ngā pamekaranete e whā rau mō ngā kupenga e rua; (e rua rārangi pamekaranete mō tētahi kupenga hei kōpaki mō ngā peihana e rua o ngā whakapaipai i ngā pou.)
2CH 4:14 I hangā anō e ia ngā tūranga; i hangā anō ngā oko horoi i runga i ngā tūranga.
2CH 4:15 Kotahi te moana, tekau mā rua ngā kau i raro i taua moana.
2CH 4:16 Ko ngā pāta, me ngā koko pungarehu, me ngā mārau, me ō rātou mea katoa. I hangā ērā e tōna pāpā, e Hūrāma, mā Kīngi Horomona mō te whare o Ihowā, kanapa tonu te parāhi.
2CH 4:17 I whakarewaina aua mea e te kīngi ki te mānia o Horano, ki te wāhi onematua i te takiwā o Hukota, o Tererata.
2CH 4:18 Heoi, hangā ana e Horomona ēnei oko katoa, he tini noa iho; kīhai hoki i kitea te taimaha o te parāhi.
2CH 4:19 I hangā anō e Horomona ngā oko katoa mō te whare o te Atua: me te āta kōura, me ngā tēpu hei takotoranga mō te taro aroaro;
2CH 4:20 me ngā tūranga rama, me ō reira rama e tahuna nei ki mua i te ahurewa, ko te tikanga hoki tēnā; he mea parakore te kōura;
2CH 4:21 ko ngā puāwai, ko ngā rama, ko ngā kokopi, he mea kōura, he kōura pai rawa;
2CH 4:22 me ngā kuku, me ngā peihana me ngā koko, me ngā tahu kakara, he parakore te kōura; me te tapokoranga ki te whare, me ōna tatau o roto ki te Wāhi Tino Tapu, me ngā tatau o te whare, arā o te temepara, he kōura.
2CH 5:1 Nā, kua oti katoa te mahi i mahia e Horomona mō te whare o Ihowā. Ā, ka kawea mai e Horomona ngā mea i whakatapua e tōna pāpā, e Rāwiri te hiriwa, te kōura, ngā oko katoa, hoatu ana e ia ki roto ki ngā taonga o te whare o te Atua.
2CH 5:2 Kātahi ka huihuia e Horomona ngā kaumātua o Īharaira, me ngā upoko katoa o ngā iwi, ngā rangatira o ngā whare o ngā mātua o ngā tama a Īharaira, ki Hiruhārama, ki te mau ake i te āka o te kawenata a Ihowā i roto i te pā o Rāwiri, arā i Hiona.
2CH 5:3 Nā, ka huihuia ki te kīngi ngā tāngata katoa o Īharaira, ki te hākari, i te whitu o ngā marama.
2CH 5:4 Nā, ka haere mai ngā kaumātua katoa o Īharaira, ā, ka hāpainga ake te āka e ngā Rīwaiti.
2CH 5:5 Kawea ana e rātou te āka, me te tapenākara o te whakaminenga, me ngā oko tapu katoa i roto i te tapenākara; kawea ana e ngā tohunga, e ngā Rīwaiti.
2CH 5:6 Kātahi a Kīngi Horomona me te huihui katoa o Īharaira i huihui mai nei ki a ia ki mua i te āka, ka patu i te hipi, i te kau, e kore nei e taea te kōrero, te tatau rānei, i te tini.
2CH 5:7 Nā ngā tohunga hoki i mau te āka o te kawenata a Ihowā ki tōna wāhi, ki te ahurewa o te whare, ki te Wāhi Tino Tapu, ki raro i ngā parirau o ngā kerupima.
2CH 5:8 I roha tonu hoki ngā parirau o ngā kerupima ki runga i te wāhi i te āka, ā, hīpokina iho ana a runga o te āka, me ōna amo, e ngā kerupima.
2CH 5:9 Nā, i te roroa o ngā amo, kitea ai ngā pito o ngā amo i te āka, i te ritenga atu o te ahurewa; otiia kīhai i kitea ki waho; nā, kei reira tonu ā tae noa ki tēnei rā.
2CH 5:10 Kāhore he mea i roto i te āka, ko ngā papa e rua anake i whaowhina nei ki reira e Mohi i Horepa i tā Ihowā whakaritenga kawenata ki ngā tama a Īharaira i tō rātou putanga mai i Īhipa.
2CH 5:11 Ā, i te putanga o ngā tohunga i te wāhi tapu (i whakatapua hoki ngā tohunga katoa i kitea ki reira; kīhai hoki ngā tikanga mō ngā wehenga i mau i taua rā.
2CH 5:12 Ko ngā Rīwaiti hoki, ko ngā kaiwaiata, ko rātou katoa, arā ko Āhapa, ko Hēmana, ko Ierutunu, me ā rātou tama, me ō rātou tēina, he rīnena mā ō rātou kākahu; he himipora anō a rātou, he hātere, he hāpa; tū ana rātou ki te taha ki te rāwhiti o te āta, me ngā tohunga kotahi rau e rua tekau e whakatangi ana i ngā tētere).
2CH 5:13 Nā reira, kia hui ngā kaiwhakatangi tētere me ngā kaiwaiata, kia kotahi tonu te reo i rangona, hei whakamoemiti, hei whakawhetai ki a Ihowā; kia whakarewa tahi rātou i ō rātou reo me tō ngā tētere, me tō ngā himipora, me tō ngā mea rangi waiata, he whakamoemiti ki a Ihowā, me te mea, “Nō te mea he pai ia; mau tonu hoki tāna mahi tohu ake ake,” hei reira kua kī te whare i te kapua, arā te whare o Ihowā,
2CH 5:14 nā, kīhai ngā tohunga i āhei te tū ki te minita, i te kapua hoki; kua kī hoki te whare o te Atua i te korōria o Ihowā.
2CH 6:1 Nā, ka mea a Horomona, “I mea a Ihowā, ka noho ia ki te pōuri nui.
2CH 6:2 Otiia, kua oti i ahau te hanga he whare hei nohoanga mōu, he kāinga pūmau mōu mō ake tonu atu.”
2CH 6:3 Nā, ka tahuri te aroaro o te kīngi, ā, manaakitia ana e ia te huihui katoa o Īharaira, me te tū anō tērā te huihui katoa o Īharaira.
2CH 6:4 I mea ia: “Kia whakapaingia a Ihowā, te Atua o Īharaira, nā tōna māngai nei te kupu ki tōku pāpā, ki a Rāwiri, ā, kua rite nei i tōna ringa; i mea hoki ia,
2CH 6:5 ‘Mai o te rā i whakaputaina mai ai e ahau tāku iwi i te whenua o Īhipa, kīhai i whiriwhiria e ahau he pā i roto i ngā iwi katoa o Īharaira e hangā ai he whare hei waihotanga iho mō tōku ingoa ki reira; kīhai hoki i whiriwhiria e ahau tētahi tangata hei rangatira mō tāku iwi, mō Īharaira.
2CH 6:6 Otiia, kua whiriwhiria nei e ahau a Hiruhārama hei waihotanga iho mō tōku ingoa; kua whiriwhiria anō e ahau a Rāwiri hei rangatira mō tāku iwi, mō Īharaira.’
2CH 6:7 “Nā, i whai ngākau tōku pāpā, a Rāwiri, ki te hanga whare mō te ingoa o Ihowā, o te Atua o Īharaira.
2CH 6:8 Otiia i mea a Ihowā ki a Rāwiri, ki tōku pāpā, ‘I te mea i roto i tōu ngākau kia hangā he whare mō tōku ingoa, he pai tāu, arā te whakaaro a tōu ngākau;
2CH 6:9 otiia e kore taua whare e hangā e koe; engari tāu tama e puta mai i tōu hope, māna e hanga te whare mō tōku ingoa.’
2CH 6:10 “Nā, kua mana nei i a Ihowā tāna kupu i kōrero ai ia; ā, kua ara tēnei ahau i muri i a Rāwiri, i tōku pāpā, ā, noho ana i runga i te torōna o Īharaira, pērā ana me tā Ihowā i kōrero ai, ā, hangā ana e ahau he whare mō te ingoa o Ihowā, o te Atua o Īharaira.
2CH 6:11 Nā, kua whakatakotoria e ahau ki reira te āka, kei roto nei tā Ihowā kawenata, i whakaritea e ia ki ngā tama a Īharaira.”
2CH 6:12 Nā, ka tū ia ki mua i te āta a Ihowā, i te aroaro o te huihui katoa o Īharaira, ā, wherahia ana ōna ringa.
2CH 6:13 Kua hangā hoki e Horomona he tūranga parāhi, e rima whatīanga te roa, e rima whatīanga te whānui, e toru whatīanga te tiketike, ā, kua whakatūria e ia ki waenganui o te marae; tū ana ia ki runga ki taua tūranga. Nā, kua tūturi ōna turi i te aroaro o te whakaminenga katoa o Īharaira, wherahia ana ōna ringa whaka te rangi.
2CH 6:14 Nā, ka mea ia: “E Ihowā, e te Atua o Īharaira, kāhore he Atua hei rite mōu i te rangi, i te whenua; e pupuri nei i te kawenata, i te aroha ki āu pononga, ina whakapaua ō rātou ngākau ki te haere i tōu aroaro.
2CH 6:15 I mau tonu rā i a koe ngā mea i kōrerotia e koe ki tāu pononga, ki tōku pāpā, ki a Rāwiri. Āe rā, i kōrerotia e tōu māngai, ā, kua rite nei i tōu ringa; koia anō tēnei ināianei.
2CH 6:16 “Nā, kia mau, e Ihowā, e te Atua o Īharaira, āianei tāu i kōrero ai ki tāu pononga, ki tōku pāpā, ki a Rāwiri, i a koe i kī rā, ‘E kore e whakakorea he tangata māu i tōku aroaro hei noho ki te torōna o Īharaira; ki te mahara rāia āu tama ki tō rātou ara, ki te haere i runga i tāku ture, ki te pērā me koe i haere nā i tōku aroaro.’
2CH 6:17 Nā, kia mana āianei, e Ihowā, e te Atua o Īharaira, āu kupu i kōrero ai koe ki tāu pononga, ki a Rāwiri.
2CH 6:18 “Otiia he pono rānei, tērā rānei te Atua e noho ki ngā tāngata, ki te whenua? Nanā, kāhore e nui hei nohoanga mōu te rangi me te rangi o ngā rangi; ā, he aha rā tēnei whare kua oti nei i ahau te hanga?
2CH 6:19 He ahakoa rā, kia anga mai koe ki te īnoi a tāu pononga, ki tāna karanga, e Ihowā, e tōku Atua, whakarongo ki te karanga, ki te īnoi e īnoi nei tāu pononga ki tōu aroaro.
2CH 6:20 Kia titiro mai ōu kanohi ki tēnei whare i te pō, i te ao, ki te wāhi i kī ai koe, ko reira hei waihotanga iho mō tōu ingoa. Whakarongo hoki ki te īnoi e īnoi ai tāu pononga ki te ritenga mai o tēnei wāhi.
2CH 6:21 Kia rongo hoki koe ki ngā karanga a tāu pononga, a tāu iwi hoki, a Īharaira, ina īnoi ki te ritenga mai o tēnei wāhi; āe rā kia rongo koe i te wāhi e noho nā koe, arā i te rangi; ā, ka rongo, murua tō rātou kino.
2CH 6:22 “Ki te hara tētahi tangata ki tōna hoa, ā, ka meinga he oati hei oati māna, ā, ka tae te oati ki mua i tōu āta i tēnei whare;
2CH 6:23 nā, māu e whakarongo mai i te rangi, e mahi, e whakarite tā āu pononga, māu e utu te tangata hē, e mea iho tōna ara ki runga ki tōna māhunga. Māu anō e whakatika tā te tika, e hoatu ki a ia ngā mea e rite ana ki tōna tika.
2CH 6:24 “Ā, ki te patua tāu iwi, a Īharaira, e te hoariri, mō rātou i hara ki a koe, ā, ka hoki ki a koe, ka whakaae ki tōu ingoa, ka īnoi, ka karanga ki tōu aroaro i roto i tēnei whare;
2CH 6:25 nā, māu e whakarongo i ngā rangi, e muru te hara o tāu iwi, o Īharaira, e whakahoki mai anō rātou ki te whenua i hōmai e koe ki a rātou ko ō rātou mātua.
2CH 6:26 “Ki te tūtakina te rangi, ā, kāhore he ua, mō rātou i hara ki a koe; ā, ka īnoi rātou ki te ritenga mai o tēnei wāhi, ka whakaae ki tōu ingoa, ka tahuri kē i tō rātou hara, nō rātou ka whakawhiua e koe;
2CH 6:27 nā, māu e whakarongo i te rangi, e muru te hara o āu pononga, o tāu iwi hoki, o Īharaira, ina whakaakona rātou e koe ki te ara pai e haere ai rātou. Māu hoki e tuku mai he ua ki tōu whenua i hōmai nei e koe hei kāinga pūmau mō tāu iwi.
2CH 6:28 “Ki te mea he matekai tō te whenua, he mate urutā, ki te mea he ngingio, he koriri, he māwhitiwhiti rānei, he whē rānei; ki te whakapaea rānei rātou e ō rātou hoariri ki te whenua o ō rātou pā; ki te pā mai he whiu, he mate tūroro rānei;
2CH 6:29 ki te mea he īnoi, he karanga rānei nā tētahi tangata, nā tāu iwi katoa rānei, nā Īharaira, ina mōhio tēnei, tēnei, ki tōna pōuri, ki tōna whiu, ā, ka wherahia ōna ringa ki te ritenga mai o tēnei whare.
2CH 6:30 Nā, māu e whakarongo i te rangi, i tōu nohoanga, e muru te hē, e hoatu ki ngā tāngata ngā mea e rite ana ki ngā huarahi katoa o tēnei, o tēnei; e mōhio ana hoki koe ki tōna ngākau. Ko koe anake nei hoki te mōhio ana ki ngā ngākau o ngā tama a te tangata.
2CH 6:31 Kia wehi ai rātou i a koe, kia haere ai i āu ara i ngā rā katoa e ora ai rātou i te whenua i hōmai nei e koe ki ō mātou mātua.
2CH 6:32 “Nā, ko te tangata iwi kē, ehara nei i tāu iwi i a Īharaira, ā, ka tae mai i te whenua mamao, he whakaaro ki tōu ingoa nui, ki tōu ringa kaha, ki tōu tākakau mārō, ā, ka haere mai, ka īnoi ki te ritenga mai o tēnei whare,
2CH 6:33 māu e whakarongo mai i ngā rangi, i tōu wāhi e noho nā koe, e mea ngā mea katoa i karanga ai te tangata iwi kē ki a koe. Kia mōhio ai ngā iwi katoa o te whenua ki tōu ingoa, kia wehi ai i a koe, kia pērā ai me tāu iwi, me Īharaira; kia mōhio ai hoki ka oti tōu ingoa te karanga ki runga ki tēnei whare kua oti nei i ahau te hanga.
2CH 6:34 “Ki te haere tāu iwi ki te whawhai ki ōna hoariri i te ara e tonoa ai rātou e koe, ā, ka īnoi ki a koe ki te ritenga mai o tēnei pā kua whiriwhiria nei e koe, o te whare anō kua hangā nei e ahau mō tōu ingoa.
2CH 6:35 Nā, māu e whakarongo mai i ngā rangi ki tā rātou īnoi, ki tā rātou karanga, e whakatika tā rātou.
2CH 6:36 “Ki te hara rātou ki a koe, kāhore hoki he tangata i hapa i te hara, ā, ka riri koe ki a rātou, ka tuku i a rātou ki te hoa whawhai, ā, ka whakaraua atu rātou hei whakarau ki tētahi whenua e mamao atu ana, e tata ana rānei;
2CH 6:37 otirā, ki te hoki ake tō rātou mahara i te whenua i whakaraua atu ai rātou, ā, ka rīpenetā rātou, ka īnoi ki a koe i te whenua i whakaraua atu ai, ka mea, ‘Kua hara mātou, kua parori kē tā mātou mahi, kua mahi i te kino’;
2CH 6:38 ki te tahuri ō rātou ngākau katoa, ō rātou wairua katoa, ki a koe i te whenua o tō rātou whakaraunga i whakaraua atu ai rātou, ā, ka īnoi ki te ritenga mai o tō rātou nei whenua i hōmai e koe ki ō rātou mātua, o te pā anō i whiriwhiria nei e koe, o tēnei whare anō i hangā nei e ahau mō tōu ingoa;
2CH 6:39 nā, māu e whakarongo mai i ngā rangi, i tōu wāhi e noho nā koe, ki tā rātou īnoi, ki tā rātou karanga, māu hoki e whakatika tā rātou; me muru hoki e koe te hē o tāu iwi i hara nei ki a koe.
2CH 6:40 “Nā, e tōku Atua, kia titiro mai rā ōu kanohi, kia rongo ōu taringa ki te īnoi e īnoia ana i tēnei wāhi.
2CH 6:41 Nā, e ara, e Ihowā, e te Atua, ki tōu okiokinga, a koe anō, me te āka o tōu kaha. Kia whakakākahuria āu tohunga, e Ihowā, e te Atua, ki te whakaoranga; ā, kia koa tāu hunga tapu ki te pai.
2CH 6:42 E Ihowā, e te Atua, kaua e whakahokia te kanohi o tāu i whakawahi ai; maharatia ngā mahi atawhai i tāu pononga, i a Rāwiri.”
2CH 7:1 Nā, i te mutunga o te īnoi a Horomona, ka heke iho te ahi i te rangi, ā, pau ake te tahunga tinana, me ngā patunga tapu; ā, kī tonu te whare i te korōria o Ihowā.
2CH 7:2 Ā, kīhai i āhei i ngā tohunga te tomo ki te whare o Ihowā; kī tonu hoki te whare o Ihowā i te korōria o Ihowā.
2CH 7:3 Ā, ka mātakitaki ngā tama katoa a Īharaira i te hekenga iho o te ahi, i te korōria hoki o Ihowā i runga i te whare; nā, ka piko ō rātou kanohi ki te whenua ki ngā papa, ā, koropiko ana rātou, whakamoemiti ana ki a Ihowā, me te kī anō, “Nō te mea he pai ia; he mau tonu tāna mahi tohu.”
2CH 7:4 Nā, kei te patu te kīngi rātou ko te iwi katoa i ngā patunga tapu ki te aroaro o Ihowā.
2CH 7:5 Nā, patua ana e Kīngi Horomona he patunga tapu, e rua tekau mā rua mano kau, kotahi rau e rua tekau mano hipi. Nā, kua tāia te kawa o te whare o te Atua e te kīngi, e te iwi katoa.
2CH 7:6 Tū ana tērā ngā tohunga i te aronga o ā rātou mahi, ko ngā Rīwaiti hoki me ngā mea rangi waiata a Ihowā, i hangā nei e Kīngi Rāwiri hei whakawhetai ki a Ihowā – he mau tonu nei tāna mahi tohu – i ngā wā i meinga ai rātou e Rāwiri hei whakamoemiti māna. Nā, whakatangi ana ngā tohunga i ngā tētere ki tō rātou aroaro; ā, tū ana a Īharaira katoa.
2CH 7:7 I whakatapua anō e Horomona a waenganui o te marae i mua i te whare o Ihowā; i tukua hoki e ia ki reira he tahunga tinana, me te ngako o ngā whakahere mō te pai. He iti hoki nō te āta parāhi i hangā e Horomona hei meatanga mō ngā tahunga tinana, mō ngā whakahere totokore, mō ngā ngako.
2CH 7:8 Heoi, mahia ana te hākari e Horomona i taua wā, e whitu ngā rā, e rātou ko Īharaira katoa, he nui atu te huihui, nō te haerenga atu ki Hāmata tae noa ki te awa o Īhipa.
2CH 7:9 Nā, i te waru o ngā rā he huihui nui nā rātou. E whitu hoki ngā rā i tāia ai e rātou te kawa o te āta, ā, e whitu ngā rā o te hākari.
2CH 7:10 I te rua tekau mā toru o ngā rā o te whitu o ngā marama ka ungā e ia te iwi ki ō rātou tēneti, koa tonu rātou, pai tonu ngā ngākau i te pai i meinga e Ihowā ki a Rāwiri, ki a Horomona, ki tāna iwi anō, ki a Īharaira.
2CH 7:11 Nā, kua oti i a Horomona te whare o Ihowā, me te whare o te kīngi. Nā, ko ngā mea katoa i puta ki te ngākau o Horomona kia mahia ki te whare o Ihowā, ki tōna whare ake hoki, oti pai ana i a ia.
2CH 7:12 Nā, ka puta a Ihowā ki a Horomona i te pō, ā, ka mea ki a ia: “Kua rongo ahau i tāu īnoi, kua whiriwhiria anō e ahau tēnei wāhi mōku, hei whare patunga tapu.
2CH 7:13 “Ki te tūtakina e ahau te rangi, ā, kāhore he ua, ki te whakahaua rānei e ahau ngā māwhitiwhiti kia kai i te whenua, ki te ungā rānei e ahau tētahi mate urutā ki tāku iwi;
2CH 7:14 heoi ki te whakaiti tāku iwi i a rātou, kua karangatia nei hoki tōku ingoa ki a rātou, ki te īnoi, ā, ka rapu i tōku mata, ka tahuri mai i ō rātou ara hē; ka whakarongo mai ahau i te rangi, ka muru i tō rātou hara, ka whakaora i te mate o tō rātou whenua.
2CH 7:15 Ko tēnei ka titiro ōku kanohi, ka tahuri anō ōku taringa ki ngā mea e īnoia ana ki tēnei wāhi.
2CH 7:16 Kua whiriwhiria nei hoki e ahau, kua whakatapua ināianei tēnei whare, hei waihotanga iho mō tōku ingoa ā ake ake; ko reira anō ōku kanohi, me tōku ngākau, i ngā rā katoa.
2CH 7:17 “Nā, ko koe, ki te rite tāu haere i tōku aroaro ki te haere a tōu pāpā, a Rāwiri, ki te mahia ngā mea katoa i whakahaua e ahau ki a koe, ki te puritia e koe āku tikanga me āku whakaritenga;
2CH 7:18 kātahi ahau ka whakapūmau i te torōna o tōu kīngitanga, ka pērā me tāku kawenata ki tōu pāpā, ki a Rāwiri, i ahau i mea rā, ‘E kore e whakakorea he tangata māu hei kāwana mō Īharaira.’
2CH 7:19 “Tēnā ki te tahuri kē atu koutou, ā, ka whakarere i āku tikanga, i āku whakahau ka hoatu nei e ahau ki tō koutou aroaro, ā, ka haere, ka mahi ki ngā atua kē, ka koropiko ki a rātou;
2CH 7:20 kātahi ō rātou pakiaka ka unuhia ake e ahau i tōku oneone i hoatu nei e ahau ki a rātou; kātahi tēnei whare i whakatapua nei e ahau mō tōku ingoa, ka ākiritia atu e ahau i tōku aroaro, ā, ka meinga hei whakatauki, hei taunutanga i roto i ngā iwi katoa.
2CH 7:21 Nā, ko tēnei whare e tiketike nei, ka ai hei mīharotanga mā ngā tāngata katoa e haere ana i tōna taha; ā, ka mea rātou, ‘Nā te aha tēnei mea i meatia ai e Ihowā ki tēnei whenua, ki tēnei whare?’
2CH 7:22 Nā, ka whakautua e rātou, ‘Mō rātou i whakarere i a Ihowā, i te Atua o ō rātou mātua i whakaputa mai nei i a rātou i te whenua o Īhipa, mō rātou i tango ki ngā atua kē, ā, koropiko ana ki a rātou, mahi ana ki a rātou; nā reira, i kawea ai e ia tēnei hē katoa ki a rātou.’ ”
2CH 8:1 Nā, i te mutunga o ngā tau e rua tekau i hangā ai e Horomona te whare o Ihowā, me tōna whare ake.
2CH 8:2 Ka hangā e Horomona ngā pā i hōmai e Hūrāma ki a Horomona, ā, whakanohoia ana e ia ngā tama a Īharaira ki reira.
2CH 8:3 Nā, haere ana a Horomona ki Hamatatopa, hinga ana a reira i a ia.
2CH 8:4 I hangā anō e ia a Taramoro i te koraha, me ngā pā taonga katoa i hangā nei e ia ki Hāmata.
2CH 8:5 I hangā anō e ia a Petehorono ki runga, me Petehorono anō ki raro he pā kapi tonu i te taiepa, i te kēti, i te tūtaki,
2CH 8:6 me Paarata, me ngā pā taonga katoa a Horomona, me ngā pā hāriata, me ngā pā hōia eke hōiho, me ngā mea katoa i hiahia ai a Horomona kia hangā ki Hiruhārama, ki Repanōna, ki te whenua katoa o tōna kīngitanga.
2CH 8:7 Ko te hunga katoa i mahue o ngā Hiti, o ngā Amori, o ngā Perihi, o ngā Hiwi, o ngā Iepuhi, ehara nei i a Īharaira;
2CH 8:8 ko ā rātou tama i toe i muri i a rātou ki te whenua, he mea kīhai i ngaro i ngā tama a Īharaira, meinga ana rātou e Horomona hei hōmai takoha ā mohoa noa nei.
2CH 8:9 Ko ngā tama ia a Īharaira, kīhai o rātou i meinga e Horomona hei pononga mō tāna mahi; engari hei tāngata whawhai rātou, hei rangatira mō āna rangatira, hei rangatira anō mō ana hāriata, mō āna hōia eke hōiho.
2CH 8:10 Ā, ko ngā rangatira anō ēnei o ngā kaitohutohu a Kīngi Horomona, e rua rau e rima tekau, hei rangatira mō te iwi.
2CH 8:11 I kawea atu hoki e Horomona te tamāhine a Parao i te pā o Rāwiri ki te whare i hangā e ia mōna, i mea hoki ia, “Kaua tāku wahine e noho ki te whare o Rāwiri kīngi o Īharaira; he tapu hoki ngā wāhi i tae ai te āka a Ihowā.”
2CH 8:12 Nā, ka whakaekea e Horomona he tahunga tinana mā Ihowā ki runga ki te āta a Ihowā i hangā nei e ia ki mua i te whakamahau,
2CH 8:13 ko te mea o tēnei rā, o tēnei rā; rite tonu te whakaeke ki tā Mohi i whakahau ai, i ngā hāpati, i ngā kōwhititanga marama, i ngā hākari nunui, e toru ngā meatanga i te tau, arā i te Hākari Taro Rēwenakore, i te Hākari o Ngā Wiki, i te Hākari Whare Tīhokahoka.
2CH 8:14 I whakaritea anō e ia tā tōna pāpā, tā Rāwiri, mō ngā wehenga o ngā tohunga ki tā rātou mahi, mō ngā Rīwaiti ki tā rātou mahi, ki te whakamoemiti, ki te minita ki te aroaro o ngā tohunga, ki ngā meatanga o tēnei rā, o tēnei rā; mō ngā kaitiaki kūwaha anō, mō ō rātou wehenga ki ngā kūwaha; ko te mea hoki tēnā i whakahaua e Rāwiri, e tā te Atua tangata.
2CH 8:15 Kīhai hoki rātou i peka kē i te whakahau a te kīngi ki ngā tohunga, ki ngā Rīwaiti mō ngā mea katoa, mō ngā taonga.
2CH 8:16 Nā, kua rite te mahi katoa a Horomona tae rawa ake te rā i tū ai te whare o Ihowā, taea noatia tōna otinga. Nā, kua tino oti te whare o Ihowā.
2CH 8:17 Kātahi a Horomona ka haere ki Ehiono Kēpere, ki Eroto, ki te taha o te moana i te whenua o Ēroma.
2CH 8:18 Nā, ka ungā mai e Hūrāma āna tāngata ki a ia hei kawe mai i ngā kaipuke me ētahi tāngata e mōhio ana ki te moana. Ā, rere ana rātou ko ngā tāngata a Horomona ki Ōpira, tangohia ana e rātou he kōura e whā rau e rima tekau taranata, kawea ana ki a Kīngi Horomona.
2CH 9:1 Ā, i te rongonga o te kuīni o Hēpā ki te rongo o Horomona, ka haere mai ki te whakamātau i a Horomona ki ngā kupu pakeke ki Hiruhārama. Nui atu hoki te tira, he kāmera anō e waha ana i ngā mea kakara, i tōna nui o te kōura, i te kōhatu utu nui. Ā, nō tōna taenga mai ki a Horomona, ka kōrerotia e ia ki a ia ngā mea katoa i tōna ngākau.
2CH 9:2 Ā, whakaaturia ana e Horomona ki a ia te tikanga o āna kupu katoa; kāhore he kupu i ngaro i a Horomona, i kore te whakaatu ki a ia.
2CH 9:3 Ā, nō te kitenga o te kuīni o Hēpā i te mōhio o Horomona, i te whare hoki i hangā e ia,
2CH 9:4 i te kai o tāna tēpu, i te nohoanga o āna tāngata, i te tūranga o āna kaimahi, i ō rātou kākahu, i āna kairiringi wāina, i ō rātou kākahu; i tōna pikitanga i piki atu ai ia ki te whare o Ihowā; kore ake he wairua i roto i a ia.
2CH 9:5 Nā, ka mea ia ki te kīngi, “Pono tonu ngā mea i rongo ai ahau i tōku whenua mō āu mahi, mō tōu mōhio.
2CH 9:6 Otiia, kīhai ahau i whakapono ki ā rātou kōrero, ā tae noa mai ahau, kite noa ōku kanohi. Nanā, kīhai te hāwhe o te nui o tōu mōhio i kōrerotia mai ki ahau; nui atu tāu i te rongo i rongo ai ahau.
2CH 9:7 Anō te hari o āu tāngata, te hari o ēnei pononga āu e tū tonu nei i tōu aroaro, e whakarongo nei ki tōu mōhio!
2CH 9:8 Kia whakapaingia a Ihowā, tōu Atua, i āhuareka nei ki a koe, i hōmai nei i a koe ki runga ki tōna torōna, hei kīngi mā Ihowā, mā tōu Atua; he aroha nā tōu Atua ki a Īharaira, he mea anō kia whakapūmautia ai rātou ake ake, koia koe i meinga ai e ia hei kīngi mō rātou, hei mahi i te whakawā, i te tika.”
2CH 9:9 Nā, hōmai ana e ia ki te kīngi kotahi rau e rua tekau taranata kōura, tōna tini anō o ngā mea kakara, me ngā kōhatu utu nui. Kāhore anō he mea kakara hei rite mō ēnei i hōmai nei e te kuīni o Hēpā ki a Kīngi Horomona.
2CH 9:10 Nā, ko ngā tāngata a Hūrāma, rātou ko ngā tāngata a Horomona, i kawea mai ai te kōura i Ōpira, i kawea mai anō e rātou he rākau aramuka, he kōhatu utu nui hoki.
2CH 9:11 Nā, ka hangā e te kīngi aua rākau aramuka hei huarahi ki te whare o Ihowā, ki te whare hoki o te kīngi, ā, hei hāpa, hei hātere, hei mea mā ngā kaiwaiata; kāhore i kitea he pērā i mua, i te whenua o Hūrā.
2CH 9:12 Nā, ka hoatu e Kīngi Horomona ki te kuīni o Hēpā ngā mea katoa i pai ai ia, āna hoki i tono ai, hāunga ngā mea i mauria mai e ia ki te kīngi. Nā, ko tōna tahuritanga, ka haere ki tōna ake whenua, rātou ko āna tāngata.
2CH 9:13 Nā, ko te taimaha o te kōura i tae mai ki a Horomona i te tau kotahi, e ono rau e ono tekau mā ono taranata kōura;
2CH 9:14 hāunga ngā mea i mauria mai e ngā kairapu taonga, e ngā kaihokohoko. I kawea mai anō he kōura, he hiriwa, e ngā kīngi katoa o Arāpia, e ngā kāwana o te whenua, ki a Horomona.
2CH 9:15 Nā, ka hangā e Kīngi Horomona ētahi pukupuku, e rua rau, he mea patu te kōura; e ono rau hekere o te kōura patu i meatia ki te pukupuku kotahi;
2CH 9:16 me ētahi pukupuku iti iho, e toru rau, he mea patu anō te kōura. E toru rau hekere kōura i meatia ki te pukupuku kotahi; ā, whakatakotoria ana e te kīngi ki te whare o te ngahere o Repanōna.
2CH 9:17 I hangā anō e te kīngi he torōna nui ki te rei, whakakikoruatia iho ki te kōura parakore.
2CH 9:18 Ā, e ono ngā kurupae ki te torōna, me te tūranga waewae, he mea kōura, he mea hono ki te torōna, me ngā okiokinga anō i te wāhi e nohoia ana, i tētahi taha, i tētahi taha, e rua hoki ngā raiona e tū ana i te taha o ngā okiokinga.
2CH 9:19 Kotahi tekau mā rua ngā raiona i reira e tū ana i tētahi taha, i tētahi taha, i ngā kaupae e ono. Kāhore he mea pērā i hangā i tētahi atu rangatiratanga.
2CH 9:20 Nā, ko ngā oko inu katoa a Kīngi Horomona, he kōura kau; me ngā oko katoa o te whare o te ngahere o Repanōna, he kōura parakore; kāhore he mea hiriwa; kīhai te hiriwa i kīia he mea nui i ngā rā o Horomona.
2CH 9:21 He kaipuke hoki a te kīngi, rere ai ki Tarahihi me ngā tāngata a Hūrāma; kotahi te ūnga mai i ngā tau e toru o ngā kaipuke o Tarahihi, me te mau mai i te kōura, i te hiriwa, i te rei, i te makimaki, i te pīkake.
2CH 9:22 Nā, nui atu a Kīngi Horomona i ngā kīngi katoa o te whenua te whai taonga, te mōhio.
2CH 9:23 Ā, i whai ngā kīngi katoa o te whenua ki a Horomona, kia rongo i tōna mōhio i hōmai nei e te Atua ki tōna ngākau.
2CH 9:24 Ā, ka mauria mai e tēnā tāna hākari, tāna hākari, ngā oko hiriwa, ngā oko kōura, ngā kākahu, ngā mea mō te whawhai, ngā mea kakara, ngā hōiho, ngā muera, he mea tatau ā-tau tonu.
2CH 9:25 Nā, e whā mano ngā tūranga a Horomona mō ngā hōiho, mō ngā hāriata, tekau mā rua mano ngā kaieke hōiho, waiho ana e ia ki ngā pā hāriata, ki te kīngi anō ki Hiruhārama.
2CH 9:26 Nā, ko ia te kīngi mō ngā kīngi katoa, o te awa mai ā tae noa ki te whenua o ngā Pirihitini, ki te rohe rā anō ki Īhipa.
2CH 9:27 Nā, meinga ana e te kīngi te hiriwa o Hiruhārama kia rite ki te kōhatu; i meinga anō hoki e ia ngā hīta kia rite ki te hikamora i te raorao te tini.
2CH 9:28 Ā, mauria ana mai e rātou he hōiho mō Horomona i Īhipa, i ngā whenua katoa anō hoki.
2CH 9:29 Nā, ko ērā atu meatanga a Horomona, ō mua, ō muri, kāhore ianei i tuhituhia ki te pukapuka a Nātana poropiti, ki te poropititanga anō a Āhia Hironi, ki ngā kitenga anō a Iro matakite i ngā mea mō Ieropoama tama a Nēpata?
2CH 9:30 Nā, e whā tekau ngā tau i kīngi ai a Horomona i Hiruhārama ki a Īharaira katoa.
2CH 9:31 Nā, ka moe a Horomona ki ōna mātua, ā, tanumia ana ki te pā o tōna pāpā, o Rāwiri; ā, ka kīngi ko Rehopoama, ko tāna tama i muri i a ia.
2CH 10:1 Nā, ka haere a Rehopoama ki Hekeme; kua tae mai hoki a Īharaira katoa ki Hekeme ki te whakakīngi i a ia.
2CH 10:2 Ā, nō te rongonga o Ieropoama tama a Nēpata (i Īhipa hoki ia, i rere hoki ki reira i te aroaro o Kīngi Horomona), nā, hoki mai ana a Ieropoama i Īhipa.
2CH 10:3 Nā, ka tono tāngata rātou ki te tiki i a ia; ā, ka haere a Ieropoama rātou ko Īharaira katoa, ka kōrero ki a Rehopoama, ka mea,
2CH 10:4 “He pakeke te ioka i meatia e tōu pāpā ki a mātou. Nā, māu e whakamāmā ake te mahi pakeke a tōu pāpā me tāna ioka taimaha i meatia e ia ki a mātou, ā, ka mahi mātou ki a koe.”
2CH 10:5 Nā, ka mea ia ki a rātou, “Kia toru rā, ka hoki mai ki ahau.” Nā, haere ana te iwi.
2CH 10:6 Nā, ka rūnanga a Kīngi Rehopoama ki ngā kaumātua i tū i te aroaro o tōna pāpā, o Horomona, i a ia i te ora, ka mea, “Ki tō koutou whakaaro me pēhea te kupu e whakahokia e ahau ki tēnei iwi?”
2CH 10:7 Nā, ka kōrero rātou ki a ia, ka mea, “Ki te mea ka pai tāu ki tēnei iwi, ā, ka whakamānawareka koe i a rātou, ā, ka pai ngā kōrero e kōrerotia e koe ki a rātou, nā, ko rātou hei pononga māu i ngā rā katoa.”
2CH 10:8 Otiia, whakarērea ake e ia te whakaaro i whakatakotoria māna e ngā kaumātua, ā, rūnanga ana ki ngā taitama i kaumātua ngātahi nei me ia, i tū nei ki tōna aroaro.
2CH 10:9 I mea ia ki a rātou, “Ki tō koutou whakaaro me pēhea te kupu e whakahokia e tātou ki tēnei hunga i kōrero mai nei ki ahau, i mea mai nei, ‘Whakamāmākia ake te ioka i meatia e tōu pāpā ki a mātou’?”
2CH 10:10 Nā, ka kōrero ki a ia ngā taitama i kaumātua ngātahi nei me ia, ka mea, “Kia pēnei tāu kī atu ki tēnei hunga i kōrero mai nei ki a koe, i mea mai nei, ‘I whakataimahatia e tōu pāpā tō mātou ioka, nā, kia māmā tāu ki a mātou’; kia pēnei tāu kī atu ki a rātou, ‘Ko tōku maihao iti, ka nui atu i te hope o tōku pāpā.
2CH 10:11 Nā, i whakawahā e tōku pāpā he ioka taimaha ki a koutou, ka tāpiritia e ahau tētahi atu mea ki tō koutou ioka; he wepu tā tōku pāpā i whiu ai i a koutou, otiia ka whiua koutou e ahau ki te kopiona.’ ”
2CH 10:12 Heoi, kua tae a Ieropoama rātou ko te iwi katoa ki a Rehopoama i te toru o ngā rā; ko tā te kīngi hoki tēnā i kōrero ai, i a ia i mea rā, “Hoki mai ki ahau i te toru o ngā rā.”
2CH 10:13 Ā, pakeke tonu tā te kīngi i whakahoki ai ki a rātou. Whakarērea ake e Rehopoama te whakaaro o ngā kaumātua,
2CH 10:14 ka kōrero ki a rātou i runga i tō ngā taitama whakaaro, ā, ka mea, “I whakataimahatia tō koutou ioka e tōku pāpā, heoi ka tāpiritia atu anō e ahau; i whiua koutou e tōku pāpā ki te wepu, ka whiua ia koutou e ahau ki te kopiona.”
2CH 10:15 Heoi, kīhai i rongo te kīngi ki tā te iwi; nā te Atua hoki te take, kia mana ai tāna kupu i kōrero ai a Ihowā, nā te māngai o Āhia Hironi ki a Ieropoama tama a Nēpata.
2CH 10:16 Ā, nō te kitenga o Īharaira katoa kīhai te kīngi i rongo ki tā rātou, ka utua e te iwi te kīngi; ka mea rātou, “Ko te aha ianei tō mātou wāhi i a Rāwiri? Kāhore nei hoki ō tātou wāhi tupu i te tama a Hehe. Ki ō koutou tēneti, e Īharaira! Nā, kia whai kanohi koe ki tōu whare, e Rāwiri!” Heoi, haere ana a Īharaira katoa ki tōna tēneti, ki tōna tēneti.
2CH 10:17 Ko ngā tama ia a Īharaira e noho ana i ngā pā o Hūrā, ko Rehopoama i kīngi mō rātou.
2CH 10:18 Kātahi ka tono a Kīngi Rehopoama i te rangatira takoha, i a Hatorama; ā, ākina ana ia e ngā tama a Īharaira ki te kōhatu, ā, mate iho. Nā, hohoro tonu te eke o Kīngi Rehopoama ki tōna hāriata, ā, rere ana ki Hiruhārama.
2CH 10:19 Heoi, whakakeke ana a Īharaira ki te whare o Rāwiri, ā taea noatia tēnei rā.
2CH 11:1 Nā, i te taenga o Rehopoama ki Hiruhārama, ka huihuia e ia te whare o Hūrā rāua ko Pineamine, kotahi rau e waru tekau mano; he hunga whiriwhiri, he hunga whawhai, hei whawhai ki a Īharaira, kia hoki ai te kīngitanga ki a Rehopoama.
2CH 11:2 Nā, ka puta te kupu a Ihowā ki a Hemaia tangata a te Atua, i mea ia:
2CH 11:3 Kōrero ki a Rehopoama tama a Horomona, kīngi o Hūrā, ki a Īharaira katoa hoki i a Hūrā, i a Pineamine, mea atu,
2CH 11:4 “Ko te kupu tēnei a Ihowā: Kei haere koutou ki runga, kei whawhai ki ō koutou tuākana. Hoki atu ki tōna whare, ki tōna whare; nāku hoki tēnei mea.” Heoi, rongo tonu rātou ki ngā kupu a Ihowā, ā, hoki ana, kīhai i haere ki te whawhai ki a Ieropoama.
2CH 11:5 Nā, ka noho a Rehopoama ki Hiruhārama, ā, hangā ana e ia ētahi pā tiaki ki Hūrā.
2CH 11:6 Nāna i hanga a Pēterehema, a Etema, a Tekoa,
2CH 11:7 a Peteturu, a Hoko, a Aturama,
2CH 11:8 a Kāta, a Mareha, a Tiwhi,
2CH 11:9 a Aroraima, a Rakihi, a Ateka,
2CH 11:10 a Toraha, a Atarono, a Heperona, i a Hūrā ēnei rāua ko Pineamine, he pā taiepa.
2CH 11:11 I hangā anō e ia kia kaha ētahi pā taiepa, whakawhiwhi rawa ki te rangatira mō roto, ki tōna nui anō hoki o te kai, o te hinu, o te wāina.
2CH 11:12 Ki te pukupuku, ki te tao anō hoki i roto i tēnei pā, i tēnei pā. Nō ka tino kaha rawa; i a ia hoki a Hūrā rāua ko Pineamine.
2CH 11:13 Nā, ko ngā tohunga me ngā Rīwaiti puta noa i a Īharaira, haere ana rātou ki a ia i ō rātou rohe katoa.
2CH 11:14 I whakarērea hoki e ngā Rīwaiti ō rātou wāhi i ngā pā, me ō rātou kāinga ake, ā, haere ana ki Hūrā, ki Hiruhārama; i peia hoki rātou e Ieropoama rātou ko āna tama, kei mahi tohunga rātou ki a Ihowā.
2CH 11:15 I whakaritea anō e ia ētahi tohunga māna ki ngā wāhi tiketike, ki ngā koati toa, ki ngā kūao kau i hangā e ia.
2CH 11:16 Nā, i muri i a rātou ko te hunga o ngā iwi katoa o Īharaira i hōmai nei i ō rātou ngākau ki te rapu i a Ihowā, i te Atua o Īharaira, haere ana rātou ki Hiruhārama ki te mea patunga tapu ki a Ihowā, ki te Atua o ō rātou mātua.
2CH 11:17 Heoi, nā rātou i whakaū te kīngitanga o Hūrā, i whakakaha hoki a Rehopoama tama a Horomona, e toru tau; e toru hoki ngā tau i haere ai rātou i te ara o Rāwiri rāua ko Horomona.
2CH 11:18 Nā, ka tangohia e Rehopoama hei wahine māna a Maharata tamāhine a Terimoto tama a Rāwiri, ā, rāua ko Apihaira tamāhine a Eriapa tama a Hehe.
2CH 11:19 Nā, ko āna tama i whānau i tēnei; ko Ieuhu, ko Hemaria, ko Tahama.
2CH 11:20 Ā, i muri i tēnei wahine ka tangohia e ia ko Maaka tamāhine a Apohārama; nā, ko āna tama i whānau i tēnei; ko Apia, ko Atai, ko Tita, ko Heromiti.
2CH 11:21 Nā, ko Maaka tamāhine a Apohārama tā Rehopoama i matenui ai o āna wāhine katoa, o āna wāhine iti anō hoki (kotahi tekau mā waru ngā wāhine i tangohia e ia, e ono tekau ngā wāhine iti; ā, e rua tekau mā waru āna tama i whānau, e ono tekau ngā tamāhine).
2CH 11:22 Nā, ka meinga e Rehopoama ko Apia tama a Maaka hei upoko, hei rangatira, i roto i ōna tuākana, tēina; ko ia hoki tāna i mea ai hei kīngi.
2CH 11:23 Nā, ka mahi tūpato ia, ā, whakamararatia atu ana e ia āna tama ki ngā whenua katoa o Hūrā, o Pineamine, ki ngā pā taiepa katoa; nui atu hoki te kai i hoatu e ia ki a rātou. He tokomaha hoki ngā wāhine i rapua e ia mā rātou.
2CH 12:1 Nāwai ā, nō te ūnga o te kīngitanga o Rehopoama, ā, ka whai kaha ia, whakarērea ake e ia te ture a Ihowā, e rātou ko Īharaira katoa.
2CH 12:2 Nā, i te rima o ngā tau o Kīngi Rehopoama ka haere mai a Hīhāka kīngi o Īhipa ki Hiruhārama, kua whakakeke nei hoki rātou ki a Ihowā,
2CH 12:3 me ngā hāriata tekau mā rua rau, me ngā hōia eke hōiho e ono tekau mano. Kāhore hoki he tauanga o te hunga i haere tahi mai i a ia i Īhipa; ko ngā Rūpimi, ko ngā Hukīmi, ko ngā Etiopiana.
2CH 12:4 Nā, kua riro i a ia ngā pā taiepa o Hūrā, ā, ka tae ki Hiruhārama.
2CH 12:5 Kātahi a Hemaia poropiti ka haere mai ki a Rehopoama, ki ngā rangatira o Hūrā i huihui nei ki Hiruhārama i te wehi i a Hīhāka, ā, ka mea ki a rātou, “Ko te kupu tēnei a Ihowā, ‘Kua whakarērea ahau e koutou, nō reira kua waiho atu koutou e ahau ki te ringa o Hīhāka.’ ”
2CH 12:6 Kātahi ka whakaiti ngā rangatira o Īharaira me te kīngi i a rātou, ka mea, “He tika a Ihowā.”
2CH 12:7 Ā, nō te kitenga o Ihowā kua whakaiti rātou i a rātou, ka puta te kupu a Ihowā ki a Hemaia; i mea ia, “Kua whakaiti rātou i a rātou; e kore rātou e hunā e ahau; engari ka hoatu e ahau ki a rātou he oranga, he mea iti nei; e kore hoki tōku riri e tāhoroa ki runga ki Hiruhārama e te ringa o Hīhāka.
2CH 12:8 Otiia ka meinga rātou hei pononga māna; kia mōhio ai rātou ki tāku mahi, ki te mahi anō a ngā kīngitanga o ngā whenua.”
2CH 12:9 Heoi, haere ana mai a Hīhāka kīngi o Īhipa ki Hiruhārama, tangohia ana e ia ngā taonga o te whare o Ihowā, me ngā taonga o te whare o te kīngi. Riro katoa ana i a ia; tangohia ana anō e ia ngā pukupuku kōura i hangā nei e Horomona.
2CH 12:10 Nā, ka hangā e Kīngi Rehopoama ētahi pukupuku parāhi hei whakakapi mō ērā, ā, tukua ana e ia ki te ringa o te rangatira o ngā kaitiaki, i tiaki nei i te tatau o te whare o te kīngi.
2CH 12:11 Nā, i te wā i haere ai te kīngi ki te whare o Ihowā, ka haere ngā kaitiaki ki te tiki, ā, whakahokia ana e rātou ki te whare o ngā kaitiaki.
2CH 12:12 Nā, i a ia ka whakaiti i a ia, ka tahuri atu te riri o Ihowā i a ia, kia kaua ia e whakangaromia rawatia e ia; he pai hoki ngā mea i kitea ki a Hūrā.
2CH 12:13 Heoi, kua ū a Kīngi Rehopoama ki Hiruhārama hei kīngi. E whā tekau mā tahi hoki ngā tau o Rehopoama i a ia ka meinga hei kīngi, ā, kotahi tekau mā whitu ngā tau i kīngi ai ia ki Hiruhārama, ki te pā i whiriwhiria e Ihowā i roto i ngā iwi katoa o Īharaira hei waihotanga iho mō tōna ingoa. Ā, ko te ingoa o tōna whaea ko Naama, he Āmoni.
2CH 12:14 He kino tāna mahi; kīhai hoki i whakatikaia e ia tōna ngākau ki te rapu i a Ihowā.
2CH 12:15 Nā, ko ngā meatanga a Rehopoama, ō mua, ō muri, kāhore ianei i tuhituhia ki te pukapuka a Hemaia poropiti, ki tā Iro matakite anō, kei reira nei ngā kōrero whakapapa? Nā, he whawhai tā Rehopoama rāua ko Ieropoama ki a rāua i ngā rā katoa.
2CH 12:16 Nā, kua moe a Rehopoama ki ōna mātua, ā, tanumia iho ki te pā o Rāwiri; ā, ko Apia, ko tāna tama, te kīngi i muri i a ia.
2CH 13:1 Nō te tekau mā waru o ngā tau o Kīngi Ieropoama i kīngi ai a Apia ki a Hūrā.
2CH 13:2 Ā, e toru ngā tau i kīngi ai ia ki Hiruhārama. Ko te ingoa o tōna whaea ko Mikaia, he tamāhine nā Uriere nō Kipea. Ā, he whawhai tā Apia rāua ko Ieropoama ki a rāua.
2CH 13:3 Nā, ka whakatikaia e Apia ngā ngohi o tāna ope, he hunga māia mō te whawhai, e whā rau mano, he hunga whiriwhiri. I whakatikaia anō e Ieropoama āna ngohi hei whawhai ki a ia; e waru rau mano āna, he hunga whiriwhiri, he mārohirohi, he toa.
2CH 13:4 Nā, ka tū a Apia i runga i Maunga Temaraima, i te whenua pukepuke o Ēparaima, ā, ka mea, “Whakarongo mai ki ahau, e Ieropoama, koutou ko Īharaira katoa!
2CH 13:5 Kaua rānei koutou e mōhio, he mea hōmai nā Ihowā, nā te Atua o Īharaira te kīngitanga o Īharaira ki a Rāwiri, he mea oti tonu ki a ia, rātou ko āna tama, i runga anō i te kawenata tote?
2CH 13:6 Otirā, i whakatika ake a Ieropoama tama a Nēpata, pononga a Horomona tama a Rāwiri, kei te whakakeke ki tōna ariki.
2CH 13:7 Nā, ko te huihuinga o ētahi tāngata wairangi, he tama nā Periara, ki a ia, kua whakapakari i a rātou ki a Rehopoama tama a Horomona, i te mea he taitamariki a Rehopoama, he ngāwari hoki tōna ngākau, ā, kīhai i kaha ki a rātou.
2CH 13:8 “Nā, e mea nā koutou ki te whakatenetene ki te kīngitanga o Ihowā kei te ringa nei o ngā tama a Rāwiri; he huihui nui tō koutou, ā, kei a koutou ngā kūao kau kōura i hangā nā e Ieropoama hei atua mō koutou.
2CH 13:9 He teka ianei kua peia e koutou ngā tohunga a Ihowā, ngā tama a Ārona, rātou ko ngā Rīwaiti; ā, whakatohungatia ana e koutou ētahi tohunga, pērā ana koutou me ngā iwi o ērā atu whenua? Nā, ko te tangata e haere ana ki te whakatohunga i a ia ki te pūru, ki te tama a te kau, ki ngā hipi toa e whitu, hei tohunga ia mō ngā mea ehara nei i te atua.
2CH 13:10 “Tēnā ko mātou, ko Ihowā tō mātou Atua, kīhai hoki mātou i whakarere i a ia. Nā, he tohunga a mātou e minita ana ki a Ihowā, ko ngā tama a Ārona, ko ngā Rīwaiti kei tā rātou mahi.
2CH 13:11 Ā, e tahu tinana ana rātou ki a Ihowā, e tahu kakara reka ana i te ata, i te ahiahi; me te taro aroaro e whakatakotoria ana ki te tēpu parakore; me te tūranga rama kōura me ōna rama, hei tahu i ngā ahiahi. E mau ana hoki i a mātou ngā mea a Ihowā, a tō mātou Atua; ko koutou ia kua whakarere i a ia.
2CH 13:12 Nā, tēnā, kei a mātou te Atua hei rangatira, me āna tohunga, me ngā tētere tangi nui, hei whakatangi i te whawhai ki a koutou. E ngā tama a Īharaira, kaua e whawhai ki a Ihowā, ki te Atua o ō koutou mātua; e kore hoki e taea e koutou.”
2CH 13:13 Otirā, i whakatakā e Ieropoama he pehipehi kia haere āwhio atu i muri i a rātou; nā, ko rātou ki te aroaro o Hūrā, ko te pehipehi ki muri i a rātou.
2CH 13:14 Ā, i te tahuritanga o Hūrā, nā, e tauria ana a mua, a muri, o rātou. Nā, karanga ana rātou ki a Ihowā, ā, whakatangi ana ngā tohunga i ngā tētere.
2CH 13:15 Kātahi ka hāmama ngā tāngata o Hūrā. Ā, nō te hāmamatanga o ngā tāngata o Hūrā, nā, patua iho e te Atua a Ieropoama rātou ko Īharaira katoa i te aroaro o Apia rātou ko Hūrā.
2CH 13:16 Nā, rere ana ngā tama a Īharaira i te aroaro o Hūrā, ā, hōmai ana rātou e te Atua ki ō rātou ringa.
2CH 13:17 Patua iho rātou e Apia rātou ko tōna iwi, he nui te parekura. Nā, hinga ana o Īharaira, he mea patu, e rima rau mano, he hunga whiriwhiri.
2CH 13:18 Heoi, kua riro ki raro ngā tama a Īharaira i taua wā; ā, ka kaha ngā tama a Hūrā, nō rātou i okioki ki a Ihowā, ki te Atua o ō rātou mātua.
2CH 13:19 Nā, ka whāia a Ieropoama e Apia, ā, ka riro ētahi o ōna pā i a ia, a Pētēre me ōna pā ririki, a Tehana me ōna pā ririki, a Ēperaina me ōna pā ririki.
2CH 13:20 Ā, kīhai a Ieropoama i whai kaha anō i ngā rā o Apia, ā, patua ana ia e Ihowā, mate ake.
2CH 13:21 Otiia ka kaha haere a Apia. I tangohia anō e ia ētahi wāhine māna kotahi tekau mā whā, ā, whānau ake, e rua tekau mā rua ngā tama, kotahi tekau mā ono ngā kōtiro.
2CH 13:22 Nā, ko ērā atu meatanga a Apia, me ōna ara, me āna kupu, kei te tuhituhi i roto i ngā kōrero a Iro poropiti.
2CH 14:1 Heoi, kua moe a Apia ki ōna mātua, ā, tanumia iho ki te pā o Rāwiri. Nā, ko Aha, ko tāna tama, te kīngi i muri i a ia. I ōna rā i āta takoto te whenua, kotahi tekau tau.
2CH 14:2 Nā, he pai, he tika, ngā mahi a Aha ki te titiro a Ihowā, a tōna Atua.
2CH 14:3 I whakakāhoretia hoki e ia ngā āta o ngā atua kē, me ngā wāhi tiketike, ā, i wāwāhia e ia ngā pou, ā, turakina ana ngā Aherimi;
2CH 14:4 ā, i whakahau ia ki a Hūrā kia rapu i a Ihowā, i te Atua o ō rātou mātua, kia mahi hoki i te ture me te whakahau.
2CH 14:5 I whakakāhoretia atu anō e ia i roto i ngā pā katoa o Hūrā ngā wāhi tiketike, me ngā whakapakoko; ā, i āta takoto te kīngitanga i tōna aroaro.
2CH 14:6 Ā, hangā ana e ia ētahi pā taiepa ki Hūrā; i āta takoto hoki te whenua. Kāhore āna whawhai i aua tau; nā Ihowā hoki ia i mea kia whai tānga manawa.
2CH 14:7 Koia ia i mea ai ki a Hūrā, “Tātou ka hanga i ēnei pā, i te taiepa hoki ā taka noa, i ngā pourewa, i ngā tatau, i ngā tūtaki. Kei tō tātou nei aroaro tonu te whenua, nō te mea i rapua e tātou a Ihowā, tō tātou Atua; rapua ana ia e tātou, nā, kua meinga nei e ia kia tā ō tātou manawa ā tawhio noa.” Nā, hangā ana e rātou, ā, oti pai ana tā rātou.
2CH 14:8 Nā, he hōia anō a Aha, he hunga hāpai i te whakangungu rākau, i te mātia; o Hūrā, e toru rau mano; o Pineamine, he hunga hāpai pukupuku, he hunga kukume kōpere, e rua rau e waru tekau mano; he mārohirohi ēnei katoa, he toa.
2CH 14:9 Nā, ko te haerenga mai o Tera o Etiopia ki a rātou, ko tāna ope kotahi mano mano, e toru rau ngā hāriata. Haere mai ana ia ki Mareha.
2CH 14:10 Kātahi ka puta a Aha ki te tū i a ia, ā, whakatakotoria ana e rāua ā rāua ngohi ki te raorao o Tepata, ki Mareha.
2CH 14:11 Nā, ka karanga a Aha ki a Ihowā, ki tōna Atua, ka mea, “E Ihowā, kāhore he mea kē atu i a koe hei āwhina, ahakoa i te nui, ahakoa i te hunga kāhore he kaha. Āwhinatia mātou, e Ihowā, e tō mātou Atua; ko koe hoki tō mātou okiokinga, ā, nōu te ingoa i haere mai ai mātou ki tēnei ope. E Ihowā, ko koe tō mātou Atua; kei pēhia tāu e te tangata.”
2CH 14:12 Heoi, patua iho ngā Etiopiana e Ihowā i te aroaro o Aha, i te aroaro anō o Hūrā. Nā, rere ana ngā Etiopiana.
2CH 14:13 Nā, ka whāia rātou e Aha rātou ko āna tāngata ā tae noa ki Kerara; ā, ka hinga o ngā Etiopiana tōna tini, kīhai rawa rātou i āhei te hoki ake; i whakangaromia hoki rātou i te aroaro o Ihowā, i te aroaro anō o tāna ope; ā, nui atu ngā taonga parakete i riro i a rātou.
2CH 14:14 Patua iho hoki e rātou ngā pā katoa i Kerara ā tawhio noa; i runga hoki i a rātou te wehi o Ihowā. Pāhuatia ana e rātou ngā pā katoa; nui atu hoki te taonga i roto.
2CH 14:15 I patua anō ngā tēneti o ngā kararehe; tangohia ana ngā hipi, me ngā kāmera, tōna tini; ā, hoki ana ki Hiruhārama.
2CH 15:1 Nā, ka eke te Wairua o te Atua ki runga i a Atāria tama a Orere.
2CH 15:2 Nā, ka haere ia ki te whakatau i a Aha, ka mea ki a ia, “Whakarongo ki ahau, e Aha, koutou ko Hūrā katoa, ko Pineamine; kei a koutou a Ihowā, i te mea i a ia koutou. Ki te rapua hoki ia e koutou, e kitea ia e koutou. Ki te whakarērea ia e koutou ka whakarērea koutou e ia.
2CH 15:3 Nā, ka maha ēnei rā i kore ai i Atua pono i a Īharaira, kāhore he tohunga hei whakaako, kāhore he ture.
2CH 15:4 I a rātou ia i te mate, ka tahuri rātou ki a Ihowā, ki te Atua o Īharaira, rapu ana i a ia, ā, kitea ana ia e rātou.
2CH 15:5 Kāhore hoki he maunga rongo i aua wā, e haere atu ai tētahi, e haere mai ai rānei; he nui hoki ngā whakararuraru o ngā tāngata katoa o ngā whenua.
2CH 15:6 Kua pakaru rikiriki hoki rātou, tētahi iwi i tētahi, tētahi pā i tētahi; nā te Atua hoki rātou i whakararu ki ngā aituā katoa.
2CH 15:7 Ko koutou ia, kia kaha; kaua ō koutou ringa e ngoikore, nō te mea ka, whai utu tā koutou mahi.”
2CH 15:8 Ā, i te rongonga o Aha i ēnei kupu, i te poropititanga a Orere poropiti, ka māia ia, ā, whakakāhoretia ana e ia ngā whakapakoko whakarihariha puta noa i te whenua o Hūrā rāua ko Pineamine, i ngā pā anō hoki o te whenua pukepuke o Ēparaima i riro i a ia. I whakahoutia anō hoki e ia te āta i mua i te whakamahau o Ihowā.
2CH 15:9 I huihuia anō e ia a Hūrā katoa rāua ko Pineamine, me ngā manene e noho ana i a rātou o roto o Ēparaima, o Mānahi, o Himiona; i papahoro hoki ēnei ki a ia, tōna tini, i roto i a Īharaira, i tō rātou kitenga kei a ia a Ihowā, tōna Atua.
2CH 15:10 Heoi, huihui ana rātou ki Hiruhārama i te toru o ngā marama o te tekau mā rima o ngā tau o te kīngitanga o Aha.
2CH 15:11 Patua iho e rātou i taua wā anō hei whakahere mā Ihowā ētahi o ngā mea i riro i a rātou i te parekura, e whitu rau kau, e whitu mano hipi hoki.
2CH 15:12 Nā, ka uru rātou ki te kawenata kia whakapaua ō rātou ngākau, ō rātou wairua ki te rapu i a Ihowā, i te Atua o ō rātou mātua.
2CH 15:13 Ā, ko te tangata e kore e rapu i a Ihowā, i te Atua o Īharaira, kia whakamatea, ahakoa iti, ahakoa rahi, ahakoa tāne, ahakoa wahine.
2CH 15:14 Nui atu tō rātou reo ki te oati ki a Ihowā; hāmama ana, tangi ana ngā tētere me ngā koronete.
2CH 15:15 Nā, koa katoa a Hūrā ki taua oati; kua whakapaua hoki ō rātou ngākau ki te oati; kua riro pū anō tō rātou hiahia ki te rapu i a ia. I kitea anō ia e rātou, ā, ka meinga e Ihowā kia tā ō rātou manawa i tētahi taha, i tētahi taha.
2CH 15:16 Nā, ko Maaka anō, ko te whaea o Kīngi Aha, whakamutua ake e ia tōna kuīnitanga, mōna i hanga i te whakapakoko whakarihariha hei Āhera; tapahia iho hoki e Aha tāna whakapakoko, tukia ana kia ririki, tahuna ake ki te taha o te awa o Kitirono.
2CH 15:17 Otiia kīhai i whakakorea ngā wāhi tiketike i roto i a Īharaira. He ahakoa rā, i tapatahi te ngākau o Aha i ōna rā katoa.
2CH 15:18 I kawea hoki e ia ki te whare o te Atua ngā mea i whakatapua e tōna pāpā, me ngā mea i whakatapua e ia anō, te hiriwa, te kōura, me ngā oko.
2CH 15:19 Nā, kore ake he whawhai, ā tae noa ki te toru tekau mā rima o ngā tau o te kīngitanga o Aha.
2CH 16:1 I te toru tekau mā ono o ngā tau o te kīngitanga o Aha ka haere mai a Paaha kīngi o Īharaira ki a Hūrā, ā, hangā ana a Rama e ia, kia kaua ai tētahi e tukua kia haere atu rānei, kia haere mai rānei ki a Aha kīngi o Hūrā.
2CH 16:2 Kātahi ka tangohia katoatia e Aha te hiriwa me te kōura i roto i ngā taonga o te whare o Ihowā, o te whare anō o te kīngi, ā, hoatu ana kia kawea ki a Pēneharara kīngi o Hīria, i Ramahiku hoki ia e noho ana; i mea ia,
2CH 16:3 “He kawenata tā tāua, he pērā me tā tōku pāpā rāua ko tōu pāpā; nanā, te hiriwa, te kōura i hoatu nā e ahau kia kawea atu ki a koe. Haere, whakatakā tāu kawenata ki a Paaha kīngi o Īharaira, kia haere atu ai ia i tōku taha.”
2CH 16:4 Nā, rongo tonu a Pēneharara ki a Kīngi Aha, ā, tonoa ana e ia ngā rangatira o āna ope ki ngā pā o Īharaira; patua iho e rātou a Īono, a Rāna, a Āperemaima, me ngā pā taonga katoa o Napatari.
2CH 16:5 Ā, nō te rongonga o Paaha, ka mutu tāna hanga i Rama, ā, kore ake tōna mahinga.
2CH 16:6 Nā, ka tīkina e Kīngi Aha a Hūrā katoa; ā, taria atu ana e rātou ngā kōhatu o Rama, me ngā rākau o reira i hangā nei e Paaha; ā, hangaia ana e ia ki aua mea a Kepa me Mihipa.
2CH 16:7 I taua wā ka haere a Hanani matakite ki a Aha kīngi o Hūrā, ā, ka mea ki a ia, “Kua okioki nā koe ki te kīngi o Hīria, ā, kīhai hoki koe i okioki ki a Ihowā, ki tōu Atua, mō reira ka mawhiti atu te ope o te kīngi o Hīria i tōu ringa.
2CH 16:8 Ko ngā Etiopiana, ko ngā Rūpimi, he teka ianei he ope tino nui rātou, he maha noa atu hoki ō rātou hāriata, ā rātou kaieke hōiho? Heoi, i tōu okiokinga ki a Ihowā, hōmai ana rātou e ia ki tōu ringa.
2CH 16:9 E kōpikopiko ana hoki ngā kanohi o Ihowā i te whenua katoa, hei whakaatu i te kaha o tāna āwhina i te hunga e tapatahi ana ō rātou ngākau ki a ia. He mahi kūware tēnei nāu; nā, ka whai pakanga koe i ngā wā e takoto ake nei.”
2CH 16:10 Kātahi ka riri a Aha ki taua matakite, ā, hoatu ana e ia ki te whare herehere; he pukuriri hoki nōna ki a ia mō tēnei mea. I tūkinotia anō e Aha ētahi o te iwi i taua wā.
2CH 16:11 Nā, ko ngā meatanga a Aha, o te tīmatanga, ō muri, kua oti te tuhituhi ki te pukapuka o ngā kīngi o Hūrā, o Īharaira.
2CH 16:12 Nā, i te toru tekau mā iwa o ngā tau o tōna kīngitanga ka mate a Aha i ōna waewae; ā, he tino nui tōna mate; otiia i tōna matenga kīhai ia i rapu i tā Ihowā, engari i tā ngā rata.
2CH 16:13 Nā, kua moe a Aha ki ōna mātua; i mate hoki i te whā tekau mā tahi o ngā tau o tōna kīngitanga.
2CH 16:14 Ā, tanumia iho ia ki ngā urupā i keria e ia mōna ki te pā o Rāwiri, whakatakotoria iho ki tētahi takotoranga e kī tonu ana i ngā mea kakara, i ngā tini mea whakaranu, he mea hanga nā te kaiwhakaranu; ā, nui atu te tahunga i tahuna mōna.
2CH 17:1 Nā, ko Iehohāpata, ko tāna tama, te kīngi i muri i a ia, ā, ka tupu tōna kaha ki te whawhai ki a Īharaira.
2CH 17:2 Ā, i whakanohoia e ia he hōia ki ngā pā taiepa katoa o Hūrā; whakanohoia ana anō e ia he hōia tiaki ki te whenua o Hūrā, ki ngā pā hoki o Ēparaima i tangohia nei e tōna pāpā, e Aha.
2CH 17:3 Nā, i a Iehohāpata a Ihowā; mōna i haere i ngā ara tuatahi o tōna pāpā, o Rāwiri, kīhai hoki i rapu i tā ngā Paara;
2CH 17:4 otiia rapua ana e ia te Atua o tōna pāpā, haere ana i runga i āna whakahau, kīhai tāna i rite ki te mahi a Īharaira.
2CH 17:5 Mō reira ka whakatūturutia e Ihowā te kīngitanga ki tōna ringa, ā, mauria ana mai e Hūrā katoa he hākari ki a Iehohāpata; ā, he nui hoki āna taonga, tōna korōria.
2CH 17:6 I nui anō tōna ngākau i runga i ngā ara a Ihowā; i whakakāhoretia atu hoki e ia ngā wāhi tiketike, me ngā Aherimi i roto i a Hūrā.
2CH 17:7 Nā, i te toru o ngā tau o tōna kīngitanga ka tonoa e ia āna rangatira, a Penehaira, a Opāria, a Tekaria, a Netanēre, a Mikaia kia whakaako i roto i ngā pā o Hūrā.
2CH 17:8 Ā, hei hoa mō rātou ko ngā Rīwaiti, ko Hemaia, ko Netania, ko Tepāria, ko Atahere, ko Hemirāmoto, ko Honatana, ko Aronia, ko Tōpia, ko Topoaronia, he Rīwaiti rātou; hei hoa anō mō rātou ko Erihama, ko Iehorama, he tohunga ēnei.
2CH 17:9 Nā, kei te whakaako rātou i roto i a Hūrā; i a rātou anō te Pukapuka o te Ture a Ihowā; i hāereerea anō hoki e rātou ngā pā katoa o Hūrā ā taka noa, whakaako ai i te iwi.
2CH 17:10 Nā, i runga te wehi o Ihowā i ngā kīngitanga katoa o ngā whenua i tētahi taha o Hūrā i tētahi taha; heoi kīhai rātou i whawhai ki a Iehohāpata.
2CH 17:11 I mauria mai anō e ētahi o ngā Pirihitini he hākari ki a Iehohāpata, me te hiriwa hei takoha. I kawea mai anō hoki e ngā Ārapi he hipi ki a ia, e whitu rau e whitu mano ngā hipi toa, me ngā koati toa e whitu mano e whitu rau.
2CH 17:12 Nā, ka tino nui haere a Iehohāpata; i hangā hoki ētahi taumaihi e ia ki Hūrā, me ētahi pā taonga.
2CH 17:13 Ā, he nui āna mahi i roto i ngā pā o Hūrā, me ngā tāngata whawhai, ngā toa mārohirohi i Hiruhārama.
2CH 17:14 Ā, ko tō rātou tauanga tēnei, i ngā whare o ō rātou mātua: o Hūrā, ko ngā rangatira mano: ko Arana te rangatira, ā, ko ōna hoa e toru rau mano ngā toa mārohirohi.
2CH 17:15 Nā, i tōna taha ko Iehohanana, ko te rangatira; ko ōna hoa e rua rau e waru tekau mano.
2CH 17:16 Nā, i tōna taha ko Amahia tama a Tīkiri; he mea hihiko noa ia ki a Ihowā; ko ōna hoa e rua rau mano ngā toa mārohirohi.
2CH 17:17 Nā, o Pineamine: ko Eriara, he toa mārohirohi; ko ōna hoa he hunga hāpai i te kōpere, i te whakangungu rākau; e rua rau mano.
2CH 17:18 Nā, i tōna taha ko Iehotāpara; ko ōna hoa kotahi rau e waru tekau mano he hunga rite rawa i te patu mō te whawhai.
2CH 17:19 Mō tā te kīngi ake ēnei; hāunga a te kīngi i whakanoho ai ki ngā pā taiepa puta noa i a Hūrā.
2CH 18:1 Heoi, nui atu ngā taonga me te korōria o Iehohāpata; ā, i piri anō rāua ko Āhapa i te ara pākūwhā.
2CH 18:2 Nā, i te mutunga o ētahi tau ka haere atu ia ki a Āhapa, ki Hamaria. Ā, he tini ngā hipi me ngā kau i patua e Āhapa mā rātou ko ōna hoa. Nā, kei te kukume ia i a ia kia haere tahi rāua ki Rāmoto Kireara.
2CH 18:3 Ā, ka mea a Āhapa kīngi o Īharaira ki a Iehohāpata kīngi o Hūrā, “Kia haere tāua ki Rāmoto Kireara?” Anō rā ko tērā ki a ia, “Ko ahau, ko koe, rite tonu tāua; ko tōku iwi, ko tōu iwi, rite tonu; hei hoa anō mātou mōu ki te pakanga.”
2CH 18:4 Ā, ka mea a Iehohāpata ki te kīngi o Īharaira, “Tēnā, rapua āianei tētahi kupu i a Ihowā.”
2CH 18:5 Nā, ka huihuia ngā poropiti e te kīngi o Īharaira, e whā rau tāngata. Nā, ka mea ia ki a rātou, “Me haere rānei mātou ki Rāmoto Kireara ki te whawhai, kauaka rānei ahau e haere?” Anō rā ko rātou, “Haere; mā te Atua hoki e hōmai ki te ringa o te kīngi.”
2CH 18:6 Nā, ka mea a Iehohāpata, “Kāhore rānei i konei tētahi atu, he poropiti nā Ihowā, hei rapunga atu mā tātou?”
2CH 18:7 Anō rā ko te kīngi o Īharaira ki a Iehohāpata, “Tēnei anō tētahi tangata, hei rapunga atu mā tātou i tā Ihowā; otiia e kino ana ahau ki a ia; nō te mea kāhore āna poropiti pai mōku; he kino kau tāna i ngā rā katoa; ko Mikaia tērā, ko te tama a Imirā.” Nā, ka mea a Iehohāpata, “Kaua e pēnā mai te kupu a te kīngi.”
2CH 18:8 Kātahi te kīngi o Īharaira ka karanga ki tētahi o ngā rangatira, ka mea, “Kia hohoro mai a Mikaia tama a Imirā.”
2CH 18:9 Nā, i runga te kīngi o Īharaira rāua ko Iehohāpata kīngi o Hūrā i tōna torōna, i tōna torōna e noho ana, oti rawa ō rāua kākahu te kākahu, ā, noho ana rāua i te wāhi tuwhera, i te kūwaha o te kēti o Hamaria, me te poropiti anō ngā poropiti katoa i tō rāua aroaro.
2CH 18:10 Nā, kua oti i a Terekia tama a Kenāna ētahi haona rino te hanga māna. Ko tāna kupu anō tēnei, “Ko te kupu tēnei a Ihowā: ‘Ka tukia ngā Hīriani e koe ki ēnei ā poto noa.’ ”
2CH 18:11 Me ngā poropiti katoa, pērā tonu tā rātou poropiti, i mea rātou, “Haere ki Rāmoto Kireara, kia taea hoki tāu; kua hōmai hoki e Ihowā ki te ringa o te kīngi.”
2CH 18:12 Ā, i kōrero te karere i haere nei ki te tiki i a Mikaia, i mea ki a ia, “Nanā, ko ngā kupu a ngā poropiti ki te kīngi, kotahi tonu te māngai mō te pai. Nā, kia rite tāu kupu ki tā tētahi o rātou, kia pai āu kōrero.”
2CH 18:13 Nā, ka mea a Mikaia, “E ora ana a Ihowā, inā, ko tā tōku Atua e kōrero mai ai ki ahau, ko tāku tēnā e kōrero ai.”
2CH 18:14 Ā, nō tōna taenga ki te kīngi, ka mea te kīngi ki a ia, “E Mikaia, me haere rānei mātou ki Rāmoto Kireara ki te whawhai, kaua rānei?” Anō rā ko tērā ki a ia, “Haere, kia taea hoki tā koutou; ka hōmai hoki rātou ki tō koutou ringa.”
2CH 18:15 Nā, ka mea te kīngi ki a ia, “Kia hia ianei āku whakaoati i a koe kia kāti āu e kōrero mai ai ki ahau i runga i te ingoa o Ihowā, ko te mea pono anake.”
2CH 18:16 Kātahi tērā ka kī, “I kite ahau i a Īharaira katoa e marara noa ana i runga i ngā maunga, koia anō kei ngā hipi kāhore nei ō rātou kaitiaki; ā, i mea a Ihowā, ‘Kāhore o ēnei ariki; kia hoki mārie rātou ki tōna whare, ki tōna whare.’ ”
2CH 18:17 Nā, ka mea te kīngi o Īharaira ki a Iehohāpata, “Kāhore ianei ahau i kī atu ki a koe, E kore e pai tāna poropiti mōku; engari he kino?”
2CH 18:18 Nā, ka mea tērā, “Mō reira whakarongo ki te kupu a Ihowā: I kite ahau i a Ihowā e noho ana i runga i tōna torōna, i te mano katoa anō o te rangi e tū ana i tōna matau, i tōna mauī.
2CH 18:19 Nā, ka mea a Ihowā, ‘Ko wai hei whakapati i a Āhapa kīngi o Īharaira kia haere ai, kia hinga ai ki Rāmoto Kireara?’ “Nā, puta kē tā tēnei kupu, puta kē tā tēnei kupu.
2CH 18:20 Nā, ko te putanga o tētahi wairua, tū ana i te aroaro o Ihowā, ka mea, ‘Māku ia e whakapati.’ “Ā, ka mea a Ihowā ki a ia, ‘Me pēhea?’
2CH 18:21 “Anō rā ko tērā, ‘Me haere atu ahau, ā, hei wairua teka ahau i roto i ngā māngai o āna poropiti katoa.’ “Nā, ka mea ia, ‘Māu ia e whakapati, ka taea anō e koe. Haere, meatia tāu nā.’
2CH 18:22 “Nā, tēnā, kua hoatu ināianei e Ihowā he wairua teka ki te māngai o ēnei poropiti āu, kua kino anō tā Ihowā kōrero mōu.”
2CH 18:23 Kātahi ka whakatata a Terekia tama a Kenāna, ka patu i te pāpāringa o Mikaia, ka mea, “I nā hea te haerenga atu o te Wairua o Ihowā i ahau ki a koe, kōrero ai?”
2CH 18:24 Anō rā ko Mikaia, “Tērā koe e kite i te rā e haere ai koe ki tētahi rūma i roto rawa piri ai.”
2CH 18:25 Kātahi te kīngi o Īharaira ka mea, “Kawea atu a Mikaia, whakahokia ki a Amono rangatira o te pā, ki a Ioaha hoki tama a te kīngi;
2CH 18:26 kī atu hoki, ‘Ko te kupu tēnei a te kīngi: Hoatu tēnei ki te whare herehere, whāngaia hoki ki te taro o te tangihanga, ki te wai o te tangihanga, kia hoki mai rā anō ahau i runga i te rangimārie.’ ”
2CH 18:27 Anō rā ko Mikaia, “Ki te tūpono koe te hoki mai i runga i te rangimārie, heoi he teka nāku i whakapuaki tā Ihowā kōrero.” I mea anō ia, “Whakarongo mai, e ngā iwi katoa.”
2CH 18:28 Heoi, haere ana te kīngi o Īharaira rāua ko Iehohāpata, kīngi o Hūrā ki runga ki Rāmoto Kireara.
2CH 18:29 Nā, ka mea te kīngi o Īharaira ki a Iehohāpata, “Me whakaputa kē tōku āhua, ka haere ki te whawhai; ko koe ia kākahuria ōu kākahu.” Heoi, whakaputa kē ana te kīngi o Īharaira i tōna āhua, ā, haere ana rāua ki te whawhai.
2CH 18:30 Kua oti anō āna rangatira hāriata te whakahau e te kīngi o Hīria; i mea ia, “Kaua e whawhai ki te iti, ki te rahi; engari ki te kīngi anake o Īharaira.”
2CH 18:31 Nā, i te kitenga o ngā rangatira o ngā hāriata i a Iehohāpata, ka mea rātou, “Ko te kīngi o Īharaira tēnei.” Nā, kua mui ki a ia ki te whawhai. Otiia ko te karangatanga o Iehohāpata, ā, ka āwhinatia ia e Ihowā; ā, nā te Atua rātou i mea kia whakarere i a ia.
2CH 18:32 Nā, i te kitenga o ngā rangatira o ngā hāriata ehara i te kīngi o Īharaira, hoki ana rātou i te whai i a ia.
2CH 18:33 Nā, ka kūmea te kōpere e tētahi tangata, he mea noa iho, tū tonu te kīngi o Īharaira i waenga pū o te hononga iho o te pukupuku. Nā reira tērā i mea ai ki te kaiarataki o tana hāriata, “Tahuri tōu ringa; kawea atu ahau i roto i te ope; kua tū hoki ahau.”
2CH 18:34 Nā, ka rahi haere te whawhai i taua rā; ā, i whakamanawanui te kīngi o Īharaira, i tū atu ki ngā Hīriani i runga i tōna hāriata, ā ahiahi noa. Ā, i te rerenga o te rā; ka mate.
2CH 19:1 Nā, hoki mārie ana a Iehohāpata ki tōna whare, ki Hiruhārama.
2CH 19:2 Ā, ka puta te matakite, a Iehu tama a Hanani, ki te whakatau i a ia, ka mea ki a Kīngi Iehohāpata, “Me āwhina ianei e koe te tangata kino, me aroha ki te hunga e kino ana ki a Ihowā? Nā, he riri tēnei mōu, he mea nō te aroaro o Ihowā.
2CH 19:3 He ahakoa rā kua kitea ētahi mea pai āu. I whakakāhoretia atu hoki e koe te Aheroto i te whenua; i anga anō tōu ngākau ki te rapu i te Atua.”
2CH 19:4 Nā, noho ana a Iehohāpata ki Hiruhārama, ā, ka haere atu anō ia puta noa i te iwi, i Peerehepa ā tae noa ki te whenua pukepuke o Ēparaima, ā, whakahokia ana rātou e ia ki a Ihowā, ki te Atua o ō rātou mātua.
2CH 19:5 I whakaritea anō e ia he kaiwhakawā mō te whenua ki ngā pā taiepa katoa o Hūrā, ki tēnei pā, ki tēnei pā.
2CH 19:6 I mea anō ia ki ngā kaiwhakawā, “Kia whai mahara ki tā koutou e mea ai; ehara hoki tā koutou whakarite whakawā i te mea ki te tangata, engari ki a Ihowā; kei a koutou anō ia ina whakawā.
2CH 19:7 Nā, kia tau te wehi o Ihowā ki a koutou, kia mau hoki ki te mahi; kāhore hoki o tō tātou Atua, o Ihowā whakahaere hē, kāhore he whakapai i te tangata, kāhore he tango utu.”
2CH 19:8 I whakaritea anō e Iehohāpata ki Hiruhārama ētahi o ngā Rīwaiti, o ngā tohunga, o ngā upoko o ngā whare o ngā mātua o Īharaira, mō tā Ihowā whakawā, mō ngā tautohetohe. Ā, hoki ana rātou ki Hiruhārama.
2CH 19:9 I whakahau anō ia i a rātou, i mea: “Meatia tēnei i runga i te wehi o Ihowā, i te pono, i te ngākau tapatahi.
2CH 19:10 Ki te tae mai he tautohetohe ki a koutou, he mea nā ō koutou tēina e noho ana i ō rātou pā, he toto pēnei rānei, he toto pērā rānei, he ture rānei, he whakaritenga rānei, he whakahau rānei, he tikanga rānei, me whakatūpato rātou kia kaua e hara ki a Ihowā, kei takoto he riri mō koutou, mō ō koutou tuākana, tēina. Meatia tēnei, ā, e kore koutou e whai hara.
2CH 19:11 “Nanā, ko Amaria tino tohunga hei upoko mō koutou i ngā mea katoa a Ihowā; ko Tepāria hoki, tama a Ihimaera, rangatira o te whare o Hūrā, mō ngā mea katoa a te kīngi; ko ngā Rīwaiti anō hei rangatira i tō koutou aroaro. Kia māia ki te mahi, ā, ko Ihowā hei hoa mō te pai.”
2CH 20:1 Nā, i muri i tēnei ka haere mai ngā tama a Moapa, rātou ko ngā tama a Āmona, ā, hei hoa mō rātou ko ētahi o ngā Āmoni, ki te whawhai ki a Iehohāpata.
2CH 20:2 Kātahi ka haere mai ētahi, ka kōrero ki a Iehohāpata, ka mea, “He ope nui tēnei te haere mai nei ki a koe i tērā taha o te moana, i Hīria. Nanā, kei Hatetono Tāmara rātou” (arā kei Enekeri).
2CH 20:3 Nā, ka wehi a Iehohāpata, ā, ka tahuri tōna aroaro ki te rapu i a Ihowā; i karangatia anō e ia he nohopuku puta noa i a Hūrā.
2CH 20:4 Nā, ka huihuia a Hūrā ki te rapu i tā Ihowā. I puta rātou i ngā pā katoa o Hūrā ki te rapu i tā Ihowā.
2CH 20:5 Nā, ka tū a Iehohāpata i roto i te huihui o Hūrā, o Hiruhārama, i te whare o Ihowā, i mua i te marae hou,
2CH 20:6 ā, ka mea: “E Ihowā, e te Atua o ō mātou mātua, he teka ianei ko koe te Atua i te rangi, ko koe hoki te kaiwhakahaere tikanga mō ngā kīngitanga katoa mō ngā tauiwi? Kei tōu ringa te kaha me te mārohirohi; kāhore hoki tētahi hei tū atu ki a koe.
2CH 20:7 He teka ianei ko koe tō mātou Atua i peia ai ngā tāngata o tēnei whenua i te aroaro o tāu iwi, o Īharaira, ā, hōmai ana e koe ki ngā uri o Āperahama, o tōu hoa aroha ā ake ake?
2CH 20:8 Nā, noho ana rātou ki konei; hangā ana e rātou ki konei he wāhi tapu mō tōu ingoa; i mea hoki rātou,
2CH 20:9 ‘Ki te puta he aituā ki a mātou, he hoari, he whakawākanga, he mate urutā, he matekai rānei, ā, ka tū mātou ki te aronga o tēnei whare, ki tōu aroaro, kei tēnei whare hoki tōu ingoa, ā, ka karanga ki a koe, i a mātou ka mate nei, nā, māu e whakarongo mai, e whakaora.’
2CH 20:10 “Nā tēnei ngā tama a Āmona, a Moapa, a Maunga Heira, kīhai nei i hōmai e koe ki a Īharaira kia whakaekea e rātou i tō rātou haerenga mai i te whenua o Īhipa; i peka kē hoki rātou i a rātou, kīhai hoki i huna i a rātou.
2CH 20:11 Nanā, ko tā rātou utu tēnei ki a mātou, e haere mai ana ki te pei i a mātou i tōu kāinga tupu i hōmai nei e koe hei kāinga tupu mō mātou.
2CH 20:12 E tō mātou Atua, e kore ianei koe e whakawā ki a rātou? Kāhore hoki ō mātou kaha i te aroaro o tēnei ope nui e haere mai nei ki a mātou; kāhore hoki mātou e mōhio me aha mātou. Otiia e anga ana ō mātou kanohi ki a koe.”
2CH 20:13 Nā, tū tonu a Hūrā katoa ki te aroaro o Ihowā, ā rātou kōhungahunga, ā rātou wāhine, me ā rātou tamariki.
2CH 20:14 I reira ka tau ki a Tahatiere tama a Hakaraia, tama a Penaia, tama a Teiere, tama a Matania, he Rīwaiti, nō ngā tama a Āhapa, te Wairua o Ihowā i waenganui o te whakaminenga.
2CH 20:15 Nā, ka mea ia, “Whakarongo, e Hūrā katoa, koutou ko ngā tāngata o Hiruhārama, me koe anō hoki, e Kīngi Iehohāpata; ko te kupu tēnei a Ihowā ki a koutou, ‘Kaua e wehi, kaua e pāwera ki tēnei ope nui; nō te mea ehara i a koutou te whawhai, engari nā te Atua.
2CH 20:16 Āpōpō ka haere ki raro ki te tū i a rātou; nanā, kei te piki mai rātou i te pikitanga i Titi; ā, ka kite koutou i a rātou i te pito o te awaawa, i te ritenga o te koraha o Ieruere.
2CH 20:17 Kāhore he rawa i whawhai ai koutou i tēnei pakanga. Whakatikatika i a koutou, ka āta tū, ka mātakitaki i tā Ihowā whakaoranga mō koutou, e Hūrā, e Hiruhārama. Kaua e wehi, kaua e pāwera; āpōpō ka haere ki tō rātou aroaro; ā, ko Ihowā hei hoa mō koutou.’ ”
2CH 20:18 Nā, piko tonu te kanohi o Iehohāpata ki te whenua; ā, takoto ana a Hūrā katoa, rātou ko ngā tāngata o Hiruhārama, ki te aroaro o Ihowā, koropiko ana ki a Ihowā.
2CH 20:19 Nā, kua tū ngā Rīwaiti, ngā tama a ngā Kohati, ngā tama a ngā Korahi; kei te whakamoemiti ki a Ihowā, ki te Atua o Īharaira, nui atu te reo.
2CH 20:20 Nā, ka maranga wawe rātou i te ata, ā, ka haere ki te koraha o Tekoa; ā, i a rātou e haere ana, ka tū a Iehohāpata, ka mea, “Whakarongo, e Hūrā, koutou ko ngā tāngata o Hiruhārama, whakapono ki tā Ihowā, ki tā tō koutou Atua, ā, ka ū koutou; whakapono ki tā āna poropiti, ā, ka kake koutou.”
2CH 20:21 Nā, ka whakatakoto whakaaro ia ki te iwi, ā, whakaritea ana e ia ētahi hei waiata ki a Ihowā, hei whakamoemiti ki te ātaahua o te tapu, i a rātou e haere ana i mua i te ope, hei mea: “Whakamoemiti ki a Ihowā, he mau tonu hoki tāna mahi tohu.”
2CH 20:22 Nā, ka tīmata nei rātou te waiata, te whakamoemiti, ka whakatakotoria e Ihowā he pehipehi mō ngā tama a Āmona, a Moapa, mō o Maunga Heira i haere mai nei ki te whawhai ki a Hūrā; ā, ka patua rātou.
2CH 20:23 I whakatika hoki ngā tama a Āmona rāua ko Moapa ki ngā tāngata o Maunga Heira, ki te huna, ki te whakangaro i a rātou; ā, ka poto i a rātou ngā tāngata o Heira, nā, kua piri tēnei ki tēnei, hei whakangaro rātou i a rātou anō.
2CH 20:24 Ā, nō te taenga o Hūrā ki te pourewa i te koraha, te tirohanga ki te ope, nanā, ō rātou tinana e takoto ana i te whenua, kīhai tētahi i ora.
2CH 20:25 Nā, i te haerenga o Iehohāpata rātou ko tōna iwi ki te tango i ō rātou taonga, he tini ngā taonga i kitea ki a rātou, me ngā tūpāpaku, me ngā mea e matenuitia ana; huia ana mō rātou; kīhai i taea te pīkau. Nā, e toru ō rātou rā e tango ana i ngā taonga, i te tini hoki.
2CH 20:26 Ā, i te whā o ngā rā ka huihui rātou ki te raorao o Peraka; i whakapai hoki rātou ki a Ihowā ki reira; koia i tapā ai te ingoa o taua wāhi, ko te raorao o Peraka, ā tae noa ki tēnei rā.
2CH 20:27 Kātahi ka hoki ngā tāngata katoa o Hūrā, o Hiruhārama, me Iehohāpata anō i mua i a rātou; hoki koa ana ki Hiruhārama; nā Ihowā hoki rātou i mea kia koa ki ō rātou hoariri.
2CH 20:28 Nā, ka tae rātou ki Hiruhārama me ngā hātere, me ngā hāpa, me ngā tētere ki te whare o Ihowā.
2CH 20:29 Nā, tau ana te wehi o te Atua ki ngā kīngitanga katoa o ngā whenua i tō rātou rongonga kua whawhai a Ihowā ki ngā hoariri o Īharaira.
2CH 20:30 Heoi, āta takoto ana te kīngitanga o Iehohāpata; kua meinga hoki ia e tōna Atua kia whai tānga manawa ā tawhio noa.
2CH 20:31 Nā, kīngi ana a Iehohāpata ki a Hūrā. E toru tekau mā rima ōna tau i tōna kīngitanga; ā, e rua tekau mā rima ōna tau i kīngi ai ia ki Hiruhārama. Nā, ko te ingoa hoki o tōna whaea ko Atupa, he tamāhine nā Hirihi.
2CH 20:32 I haere anō hoki ia i te ara o tōna pāpā, o Aha, kīhai hoki i peka kē i tērā; i mahia e ia te mea e tika ana ki te titiro a Ihowā.
2CH 20:33 Otiia, kīhai ngā wāhi tiketike i whakakāhoretia; kīanō hoki te iwi i whakaanga i ō rātou ngākau ki te Atua o ō rātou mātua.
2CH 20:34 Nā, ko ērā atu meatanga a Iehohāpata, ō mua, me ō muri, nanā, kei te tuhituhi i roto i te pukapuka a Iehu tama a Hanani, e kōrerotia nā i roto i te pukapuka o ngā kīngi o Īharaira.
2CH 20:35 I muri i tēnei ka huihuia ngā whakaaro o Iehohāpata kīngi o Hūrā rāua ko Ahatia kīngi o Īharaira; he kino rawa anō ngā mahi a tēnei.
2CH 20:36 I huihuia hoki ō rāua whakaaro kia hangā he kaipuke hei rere ki Tarahihi. Nā, hangā ana e rāua ngā kaipuke ki Ehiono Kēpere.
2CH 20:37 Kātahi a Eriētere tama a Rōrawa o Mareha ka poropiti i te hē mō Iehohāpata, ka mea, “Kua huihuia nā ō kōrua whakaaro ko Ahatia, mō reira kua pakaru āu mahi i a Ihowā.” Nā, kua pakaru ngā kaipuke, ā, kīhai i āhei te rere ki Tarahihi.
2CH 21:1 Nā, kua moe a Iehohāpata ki ōna mātua, kua tanumia ki ōna mātua ki te pā o Rāwiri; ā, ko Iehorama, ko tāna tama, te kīngi i muri i a ia.
2CH 21:2 He tēina anō ōna, he tama nā Iehohāpata, ko Atāria, ko Tehiere, ko Hakaraia, ko Atāria, ko Mikaera, ko Hepatia. Ko ēnei katoa he tama nā Iehohāpata kīngi o Īharaira.
2CH 21:3 I hoatu hoki ētahi hākari nui e tō rātou pāpā ki a rātou, he hiriwa, he kōura, he taonga utu nui, he pā taiepa i Hūrā; ko te kīngitanga ia i hoatu e ia ki a Iehorama; nō te mea ko ia te mātāmua.
2CH 21:4 Ā, ka kake a Iehorama ki te kīngitanga o tōna pāpā, ka whai kaha; nā, patua iho e ia ōna tēina katoa ki te hoari, me ētahi o ngā rangatira o Īharaira.
2CH 21:5 E toru tekau mā rua ngā tau o Iehorama i a ia i kīngi ai, ā, e waru ōna tau i kīngi ai ia ki Hiruhārama.
2CH 21:6 Nā, haere ana ia i te ara o ngā kīngi o Īharaira, pērā ana me tā te whare o Āhapa i mea ai; he wahine hoki nāna te tamāhine a Āhapa; heoi he kino tāna mahi ki te titiro a Ihowā.
2CH 21:7 Otiia kīhai i pai a Ihowā ki te whakangaro i te whare o Rāwiri; i whakaaro ki te kawenata i whakaritea e ia ki a Rāwiri, ki tāna hoki i kī ai, ka hoatu he rama ki a ia, ki āna tama, i ngā rā katoa.
2CH 21:8 I ōna rā ka maunu a Ēroma i raro i te ringa o Hūrā, ā, whakakīngitia ake e rātou he kīngi mō rātou.
2CH 21:9 Kātahi ka haere a Iehorama rātou ko āna rangatira, me ana hāriata katoa. Nā, maranga ana ia i te pō, ā, patua iho e ia ngā Ēromi i karapotia ai ia, rātou ko ngā rangatira o ngā hāriata.
2CH 21:10 Heoi, kua maunu a Ēroma i raro i te ringa o Hūrā ā taea noatia tēnei rā. I maunu anō a Rīpina i taua wā i raro i tōna ringa, nōna hoki i whakarere i a Ihowā, i te Atua o ōna mātua.
2CH 21:11 Nā, i hangā e ia he wāhi tiketike ki ngā maunga o Hūrā, ā, meinga ana e ia ngā tāngata o Hiruhārama kia moepuku, i kūmea hoki e ia a Hūrā ki te hē.
2CH 21:12 Nā, kua tae mai ki a ia he mea i tuhituhia e Irāia poropiti, e mea ana: “Ko te kupu tēnei a Ihowā, a te Atua o tōu pāpā, o Rāwiri: ‘Nā, i te mea kīhai koe i haere i ngā ara o tōu pāpā, o Iehohāpata, i ngā ara anō o Aha kīngi o Hūrā;
2CH 21:13 engari, haere ana koe i te ara o ngā kīngi o Īharaira, ā, meinga ana e koe a Hūrā, rātou ko ngā tāngata o Hiruhārama, kia moepuku, kia rite ki ngā moepuku o te whare o Āhapa; ā, patua ana e koe ōu tēina o te whare o tōu pāpā, he hunga i pai ake i a koe.
2CH 21:14 Nanā, he nui te whiu e whiua ai e Ihowā tōu iwi, āu tamariki, āu wāhine, me ōu rawa katoa;
2CH 21:15 ā, tērā e nui ōu mate, he mate nō ōu whēkau, nō ka puta ki waho ōu whēkau i te mate i tēnei rā, i tēnei rā.’ ”
2CH 21:16 Nā, whakaarahia ana e Ihowā hei whawhai ki a Iehorama te wairua o ngā Pirihitini, o ngā Ārapi anō i tata ki ngā Etiopiana.
2CH 21:17 Nā, ka whakaekea a Hūrā e rātou; kua pakaru ki roto, kāhakina ake e rātou ngā taonga katoa i rokohanga ki te whare o te kīngi, āna tama, me āna wāhine, kīhai rawa tētahi tama āna i mahue ki a ia, ko Iehoahata anake, ko te whakaotinga o āna tama.
2CH 21:18 I muri i tēnei katoa ka patua e Ihowā ōna whēkau; he mate kīhai i taea te rongoā.
2CH 21:19 Ā, ka maha ngā rā, ka taea te mutunga o ngā tau e rua, ka puta ōna whēkau ki waho, nā tōna mate hoki, ā, mate iho ia, he kino ōna mate. Kāhore hoki a tōna iwi tahunga mōna pērā me te tahunga mō ōna mātua.
2CH 21:20 E toru tekau mā rua ōna tau i tōna kīngitanga, ā, e waru ōna tau i kīngi ai ia ki Hiruhārama. Nā, kīhai ia i matenuitia i tōna haerenga; ā, tanumia ana ki te pā o Rāwiri, engari kāhore ki ngā tanumanga o ngā kīngi.
2CH 22:1 Ā, meinga ana e ngā tāngata o Hiruhārama a Ahatia tāna tama whakaotinga hei kīngi i muri i a ia; i patua hoki ngā tuākana katoa e te taua i haere mai nei i ngā Ārapi ki te puni. Heoi, ka kīngi a Ahatia, te tama a Iehorama kīngi o Hūrā.
2CH 22:2 E whā tekau mā rua ngā tau o Ahatia i tōna kīngitanga, ā, kotahi te tau i kīngi ai ia ki Hiruhārama. Ā, ko te ingoa o tōna whaea ko Atāria, he tamāhine nā Omori.
2CH 22:3 I haere anō ia i ngā ara o te whare o Āhapa; ko tōna whaea hoki tōna kaiwhakatakoto whakaaro mō te mahi hē.
2CH 22:4 Nā, mahia ana e ia te kino ki te titiro a Ihowā, i pērā me te whare o Āhapa. Ko rātou hoki ōna kaiwhakatakoto whakaaro i muri i te matenga o tōna pāpā, hei ngaromanga mōna.
2CH 22:5 Nā, haere ana ia i runga i tō rātou whakaaro. I haere tahi anō rāua ko Iehorama tama a Āhapa kīngi o Īharaira ki te whawhai ki a Hataere kīngi o Hīria, ki Rāmoto Kireara; nā, kua tū a Iorama i ngā Hīriani.
2CH 22:6 Ā, hoki ana ia ki Ietereere kia rongoātia ngā tūnga i tū ai ia ki Rama, i tāna whawhai ki a Hataere kīngi o Hīria. Nā, ko te haerenga mai o Atāria tama a Iehorama kīngi o Hūrā kia kite i a Iehorama tama a Āhapa ki Ietereere, e mate ana hoki ia.
2CH 22:7 Nā, ko te whakangaromanga i a Ahatia, nā te Atua, nō tōna haerenga ki a Iorama. I tōna taenga hoki, ka puta rāua ko Iehorama ki te tū i a Iehu tama a Nimihi, i whakawahia nei e Ihowā hei hātepe i te whare o Āhapa.
2CH 22:8 Ā, i a Iehu e whakawā ana ki te whare o Āhapa, ka tūtaki ia ki ngā rangatira o Hūrā, rātou ko ngā tama a ngā tuākana o Ahatia, e mahi ana ki a Ahatia; nā, patua iho rātou e ia.
2CH 22:9 Nā, ka rapua a Ahatia e ia, ā, ka mau i a rātou; i te piri hoki i Hamaria. Nā, ka kawea ki a Iehu, ā, whakamatea iho, tanumia iho; i kī hoki rātou, “He tama ia nā Iehohāpata, nā te tangata i whakapaua nei tōna ngākau ki te rapu i a Ihowā.” Nā, kore ake he kaha o te whare o Ahatia ki te pupuri i te kīngitanga.
2CH 22:10 Ā, nō te kitenga o Atāria whaea o Ahatia, kua mate tāna tama, whakatika ana ia, ā, whakangaromia ana e ia ngā uri kīngi katoa o te whare o Hūrā.
2CH 22:11 Otiia tangohia ana e Iehohapeata, tamāhine a te kīngi, a Ioaha tama a Ahatia, he mea mau huna atu i roto i ngā tama a te kīngi i whakamatea rā, kawea atu ana rāua ko tōna kaihiki ki te whare moenga. Nā, hunā ana ia e Iehohapeata tamāhine a Kīngi Iehorama, wahine a Iehoiara tohunga – he tuahine anō ia nō Ahatia – tē kitea e Atāria, i kore ai e whakamatea e ia.
2CH 22:12 Nā, i a rātou ia e huna ana i te whare o te Atua, e ono tau; nā, ko Atāria te kuīni o te whenua.
2CH 23:1 Nā, i te whitu o ngā tau ka whakanuia e Iehoiara he kaha mōna; i riro hoki i a ia ngā rangatira rau, a Atāria tama a Ierohama, a Ihimaera tama a Iehohanana, a Atāria tama a Ōpere, a Maaheia tama a Araia, a Erihapata tama a Tīkiri, hei hoa mōna, mea rawa ki te kawenata.
2CH 23:2 Nā, hāereerea ana e rātou a Hūrā ā taka noa, huihuia ana e rātou ngā Rīwaiti i roto i ngā pā katoa o Hūrā, rātou ko ngā upoko o ngā whare o ngā mātua o Īharaira, ā, haere ana rātou ki Hiruhārama.
2CH 23:3 Nā, ka whakarite kawenata te whakaminenga katoa ki te kīngi i roto i te whare o te Atua. I mea anō ia ki a rātou, “Nanā, hei kīngi te tama a te kīngi, hei pērā me tā Ihowā i kōrero ai mō ngā tama a Rāwiri.
2CH 23:4 Ko tēnei tā koutou e mea ai: ko te tuatoru o ngā wehenga o koutou e haere mai ana i te hāpati, arā o ngā tohunga, o ngā Rīwaiti, hei kaitiaki mō ngā kūwaha;
2CH 23:5 ko tētahi o ngā wehenga e toru hei te whare o te kīngi; ko tētahi o ngā wehenga e toru hei te Kūwaha o te Tūranga; ko te iwi katoa hoki hei ngā marae o te whare o Ihowā.
2CH 23:6 Kaua ia tētahi e tomo ki te whare o Ihowā, ko ngā tohunga anake, rātou ko te hunga o ngā Rīwaiti e minita ana; ko rātou e haere ki roto, nō te mea he tapu rātou. Ko te iwi katoa ia hei tiaki i ngā mea a Ihowā.
2CH 23:7 Nā, me karapoti te kīngi e ngā Rīwaiti ā tawhio noa; hei tōna ringa anō te patu a tēnei, a tēnei; ā, ki te tomo tētahi ki te whare, me whakamate. Hei te taha tonu koutou o te kīngi i tōna haerenga mai, i tōna haerenga atu.”
2CH 23:8 Nā, ka meatia e ngā Rīwaiti, e Hūrā katoa ngā mea katoa i whakahaua e Iehoiara tohunga; ā, ka mau rātou ki āna tāngata, ki āna tāngata, ki ngā mea e haere ana ki roto i te hāpati, ki te hunga anō e haere atu ana ki waho i te hāpati; kīhai hoki a Iehoiara tohunga i tuku i ngā wehenga kia haere.
2CH 23:9 Ā, i hōmai e Iehoiara tohunga ki ngā rangatira rau ngā tao, ngā pukupuku, me ngā whakapuru tao a Kīngi Rāwiri; i roto hoki ērā i te whare o te Atua.
2CH 23:10 I whakatūria anō e ia te iwi katoa, me ā rātou patu i te ringa o tēnei, o tēnei, i te koki ki matau o te whare, tae noa ki te koki ki mauī o te whare, ki ngā taha o te āta, o te whare, hei karapoti mō te kīngi.
2CH 23:11 Kātahi ka whakaputaina e rātou te tama a te kīngi, pōtaea iho ki a ia te karauna; ā, hōmai ana te whakaaturanga ki a ia, nā, whakakīngitia ana ia e rātou; ā, nā Iehoiara rātou ko āna tama ia i whakawahi, me tā rātou karanga, “Kia ora te kīngi!”
2CH 23:12 Ā, nō te rongonga o Atāria i te ngē o te iwi e rere ana, e whakamoemiti ana ki te kīngi, ka haere ia ki te iwi, ki te whare o Ihowā.
2CH 23:13 Ā, ka titiro ia, nā, ko te kīngi e tū ana i te taha o tōna pou i te tomokanga ko ngā rangatira anō me ngā tētere i te taha o te kīngi; ā, ko te iwi katoa o te whenua e koa ana, e whakatangi ana i ngā tētere; ko ngā kaiwaiata hoki e whakatangi ana i ngā mea rangi waiata, e ārahi ana i te waiata whakamoemiti. Kātahi ka haehae a Atāria i ōna kākahu, ka karanga, “He hē, he hē, te whakatakotoria nei!”
2CH 23:14 Nā, ka whakaputaina e Iehoiara tohunga ngā rangatira rau, ngā kaitohutohu ope ki waho, ā, ka mea ia ki a rātou, “Mauria mai ia ki waenganui i ngā rārangi; ā, ko te tangata e whai i muri i a ia, whakamatea ki te hoari.” I mea hoki te tohunga, “Kaua ia e whakamatea i roto i te whare o Ihowā.”
2CH 23:15 Heoi, whakawāteatia ana he haerenga mōna; nā, ka tae ia ki te tomokanga o te Kūwaha Hōiho i te taha o te whare o te kīngi, whakamatea iho ki reira.
2CH 23:16 Nā, ka whakaritea e Iehoiara he kawenata, he mea nāna, nā te iwi katoa rātou ko te kīngi, kia meinga rātou hei iwi mā Ihowā.
2CH 23:17 Nā, haere ana te iwi katoa ki te whare o Paara, wāhia iho e rātou; mongamonga noa i a rātou āna āta, ōna āhua; patua iho hoki e rātou a Matana tohunga o Paara ki mua i ngā āta.
2CH 23:18 I whakarite kaitirotiro anō a Iehoiara mō te whare o Ihowā, he mea tuku ki ngā tohunga, ki ngā Rīwaiti, i wehea nei e Rāwiri ki roto ki te whare o Ihowā hei whakaeke i ngā tahunga tinana a Ihowā, ko te mea hoki ia i tuhituhia i roto i te ture a Mohi; me te koa anō rātou, me te waiata; ko tā Rāwiri hoki ia i whakarite ai.
2CH 23:19 I whakatūria anō e ia he kaitiaki kūwaha mō ngā kūwaha o te whare o Ihowā, kei haere ki roto te tangata e poke ana i tētahi mea.
2CH 23:20 Nā, tīkina ana e ia ngā rangatira rau, ngā tāngata nunui, rātou ko ngā kāwana o te iwi, ko te iwi katoa anō hoki o te whenua, ā mauria iho ana e rātou te kīngi i te whare o Ihowā ki raro. Nā, haere ana rātou nā tō Runga Kūwaha ki te whare o te kīngi, ā, whakanohoia ana te kīngi ki te torōna o te kīngitanga.
2CH 23:21 Heoi, koa tonu te iwi katoa o te whenua, ā, mārire noa iho te pā; ā, patua ana e rātou a Atāria ki te hoari.
2CH 24:1 E whitu ngā tau o Ioaha i a ia i kīngi ai; ā, e whā tekau ngā tau i kīngi ai ia ki Hiruhārama. Ā, ko te ingoa o tōna whaea, ko Tipia, nō Peerehepa.
2CH 24:2 Nā, he tika ngā mahi a Ioaha ki te titiro a Ihowā i ngā rā katoa o te tohunga, o Iehoiara.
2CH 24:3 Ā, i tangohia e Iehoiara he wahine māna, tokorua; ā, ka whānau āna tama, āna tamāhine.
2CH 24:4 I muri i tēnei ka whai ngākau a Ioaha ki te whakahou i te whare o Ihowā.
2CH 24:5 Ā, ka oti ngā tohunga me ngā Rīwaiti te huihui e ia, ka mea ia ki a rātou, “Haere ki ngā pā o Hūrā, ki te kohikohi moni mai i a Īharaira katoa hei whakahou i te whare o tō koutou Atua, i tēnei tau, i tēnei tau; mā koutou hoki e whakahohoro taua mahi.” Heoi, kīhai i hohoro i ngā Rīwaiti.
2CH 24:6 Nā, ka karanga te kīngi ki a Iehoiara, ko te upoko hoki ia, ā, ka mea ki a ia, “He aha koe tē mea ai ki ngā Rīwaiti kia mauria mai i a Hūrā, i Hiruhārama, te mea i kohikohia, tā Mohi pononga a Ihowā me tā te whakaminenga o Īharaira mō te tapenākara o te whakaaturanga?”
2CH 24:7 Nā ngā tama hoki a taua wahine kino a Atāria i wāhi te whare o te Atua; ā, ko ngā mea tapu katoa o te whare o Ihowā, meinga ana e rātou mō ngā Paara.
2CH 24:8 Heoi, ka kōrero te kīngi, ā, ka hangā he pouaka e rātou, whakatūria ana ki waho, ki te kūwaha o te whare o Ihowā.
2CH 24:9 Nā, ka pā te karanga puta noa i a Hūrā, i Hiruhārama, kia kawea mai ki a Ihowā te kohikohi i whakaritea e Mohi, e tā te Atua pononga, ki a Īharaira i te koraha.
2CH 24:10 Nā, koa tonu ngā rangatira katoa me te iwi katoa, ā, kawea ana mai e rātou, makā ana ki roto ki te pouaka ā rite noa.
2CH 24:11 Ā, i ngā wā e kawea mai ai e ngā Rīwaiti te pouaka ki te whare takoha o te kīngi, ā, ka kitea kua rahi te moni, ka haere mai te kaituhituhi a te kīngi rāua ko te tangata a te tino tohunga, ka ringihia e rāua ngā mea i roto i te pouaka, nā, ka tango rāua, ka whakahoki anō ki tōna wāhi. Pēnā tonu rātou i ia rā, i ia rā, ā, nui atu te moni i kohikohia.
2CH 24:12 Ā, hoatu ana e te kīngi rāua ko Iehoiara ki ngā tāngata i te mahi o ngā mea mō te whare o Ihowā; ā, nā rātou i utu ngā kaimahi kōhatu, ngā kāmura, hei whakahou i te whare o Ihowā, ngā kaimahi hoki i te rino, i te parāhi, hei whakaora mō te whare o Ihowā.
2CH 24:13 Heoi, ka mahi ngā kaimahi, ā, ka oti te mahi i a rātou; nā, kua meinga e rātou kia rite ki tō mua āhua te tū o te whare o te Atua, kia kaha hoki.
2CH 24:14 Ā, ka oti i a rātou, ka kawea te toenga o te moni ki te aroaro o te kīngi rāua ko Iehoiara, ā, ka waiho hei hanga i ētahi oko mō te whare o Ihowā, i ngā oko minita, i ngā mea mō ngā patunga tapu, i ngā koko, i ngā oko kōura, hiriwa. Ā, he whakaeke tonu tā rātou i te tahunga tinana i te whare o Ihowā i ngā rā katoa o Iehoiara.
2CH 24:15 Otiia, kua koroheketia a Iehoiara, kua maha ōna rā, ā, ka mate; kotahi rau e toru tekau ōna tau i tōna matenga.
2CH 24:16 Ā, tanumia ana ia ki te pā o Rāwiri ki te taha o ngā kīngi; he pai hoki nō tāna mahi ki a Īharaira, ki te Atua hoki, ā, ki tōna whare.
2CH 24:17 Nā, i muri i te matenga o Iehoiara ka haere mai ngā rangatira o Hūrā, ā, ka piko ki te kīngi. Nā, rongo tonu te kīngi ki a rātou.
2CH 24:18 Nā, whakarērea ake e rātou te whare o Ihowā, o te Atua o ō rātou mātua, mahi ana rātou ki ngā Aherimi, ki ngā whakapakoko. Nā, kua pā he riri ki a Hūrā, ki Hiruhārama, mō tēnei hē ō rātou.
2CH 24:19 Heoi, ungā ana e ia ngā poropiti ki a rātou hei whakahoki i a rātou ki a Ihowā, ā, whakawā ana rātou i a rātou; otiia kīhai i rongo.
2CH 24:20 Nā, kua tau te Wairua o te Atua ki te tohunga, ki a Hakaraia tama a Iehoiara; ā, ka tū ia ki runga ake i te iwi, ka mea ki a rātou, “Ko te kupu tēnei a te Atua: ‘He aha koutou ka takahi ai i ngā whakahau a Ihowā? Mā konei hoki ka kore ai koutou e kake. Kua whakarērea nei e koutou a Ihowā, nā, kua whakarērea hoki koutou e ia.’ ”
2CH 24:21 Nā, ka whakatupuria e rātou he hē mōna, ā, ākina ia ki te kōhatu, nā te kīngi i whakahau, ki te marae o te whare o Ihowā.
2CH 24:22 Heoi, kīhai a Kīngi Ioaha i mahara ki te aroha i whakaputaina e tōna pāpā, e Iehoiara, ki a ia; heoi patua ana e ia tāna tama. Ā, i tōna matenga, ka mea ia, “Mā Ihowā e titiro, e rapu utu.”
2CH 24:23 Nā, taka rawa ake te tau, ka whakaekea ia e te taua o Hīria; ā, haere ana mai rātou ki a Hūrā, ki Hiruhārama, whakangaromia ana e rātou ngā rangatira katoa o te iwi i roto i te iwi, tukua ana e rātou ō rātou taonga katoa kia kawea ki te kīngi o Ramahiku.
2CH 24:24 He tokoiti hoki ngā tāngata o te taua o ngā Hīriani i haere mai nei; ā, hoatu ana e Ihowā te ope nui rawa ki ō rātou ringa, mō rātou i whakarere i a Ihowā, i te Atua o ō rātou mātua. Heoi, tutuki ana i a rātou he whakawā mō Ioaha.
2CH 24:25 Ā, nō tō rātou haerenga atu i a ia, i mahue iho hoki ia i a rātou he nui ōna mate, ka whakatupuria e āna tāngata he hē mōna, mō ngā toto o ngā tama a Iehoiara tohunga, ā, patua ana ia e rātou, ki runga ki tōna moenga, ā, mate iho. Nā, tanumia ana ia e rātou ki te pā o Rāwiri, otiia kāhore ki ngā tanumanga o ngā kīngi.
2CH 24:26 Nā, ko ngā tāngata nāna i whakatupu te hē mōna; ko Tāpara, tama a tētahi wahine o Āmona, a Himeata, ko Iehotāpara, tama a tētahi wahine o Moapa, a Timiriti.
2CH 24:27 Nā, ko āna tama, me te nui o ngā taimaha i utaina ki runga ki a ia, me te hanganga i te whare o te Atua, nanā, kei te tuhituhi ēnā i roto i ngā kōrero o te pukapuka o ngā kīngi; ā, ko tāna tama, ko Amatia, te kīngi i muri i a ia.
2CH 25:1 E rua tekau mā rima ngā tau o Amatia i tōna kīngitanga, ā, e rua tekau mā iwa ngā tau i kīngi ai ia ki Hiruhārama, ā, ko te ingoa hoki o tōna whaea, ko Iehoarana, nō Hiruhārama.
2CH 25:2 Nā, he tika tāna mahi ki te titiro a Ihowā, engari kīhai i tapatahi te ngākau.
2CH 25:3 Ā, ka pūmau tōna kīngitanga, kātahi ka whakamatea e ia āna tāngata, nāna nei i patu tōna pāpā, te kīngi.
2CH 25:4 Ko ā rāua tama ia kīhai i whakamatea; engari i rite tāna ki te mea i tuhituhia i te ture i te Pukapuka a Mohi, ki tā Ihowā i whakahau rā, “Kaua ngā mātua e mate mō tō ngā tamariki; kaua hoki ngā tamariki e mate mō tō ngā mātua; engari me mate tēnei mō tōna hara, tēnei mō tōna hara.”
2CH 25:5 Nā, i huihuia hoki e Amatia a Hūrā, ā, whakaritea ana he rangatira mano, he rangatira rau mō ngā whare o ō rātou mātua, puta noa i a Hūrā katoa rāua ko Pineamine. Ā, taua ana rātou e ia te hunga e rua tekau, he maha ake hoki, ngā tau, ā, ka kitea e toru rau mano, whiriwhiri rawa, he hunga haere ki te whawhai, he hunga hāpai i te tao, i te whakangungu rākau.
2CH 25:6 I utua anō hoki e ia ētahi o Īharaira, kotahi rau mano, he mārohirohi, he māia, kotahi rau taranata hiriwa.
2CH 25:7 Nā, ko te taenga mai o tētahi tangata a te Atua ki a ia, ka mea, “E te kīngi, kaua te taua a Īharaira e haere tahi koutou, nō te mea kāhore a Ihowā i a Īharaira, arā, i ngā tama katoa a Ēparaima.
2CH 25:8 Otiia ki te haere koe, kia toa, kia kaha ki te whawhai; mā Ihowā anō koe e turaki i te aroaro o te hoariri; he kaha hoki tō te Atua ki te āwhina, ki te turaki.”
2CH 25:9 Nā, ka mea atu a Amatia ki te tangata a te Atua, “Ha, me pēhea ngā taranata kotahi rau i hoatu e ahau ki te taua a Īharaira?” Anō rā ko te tangata a te Atua, “E āhei ana i te Atua te hōmai ki a koe kia rahi noa ake i tēnei.”
2CH 25:10 Kātahi rātou ka wehea atu e Amatia, arā te taua i haere mai ki a ia i Ēparaima, kia hoki ki tō rātou nā wāhi. Nā, mura rawa tō rātou riri ki a Hūrā, ā, hoki ana ki tō rātou wāhi, mura tonu te riri.
2CH 25:11 Nā, ka whakapakari a Amatia i a ia, ā, ārahina ana e ia tōna iwi, haere ana ki Raorao Tote, patua iho e ia ngā tama a Heira, kotahi tekau mano.
2CH 25:12 Nā, ko ērā atu mano, kotahi tekau, ora nei, whakaraua ana e ngā tama a Hūrā, kawea ana ki te tihi o te kāmaka, makā atu ana i te tihi o te kāmaka ā mongamonga noa rātou katoa.
2CH 25:13 Otiia, ko ngā tāngata o te taua i whakahokia nei e Amatia, kei haere tahi rātou ki te whawhai, whakaekea ana e rātou ngā pā o Hūrā, o Hamaria mai anō ā tae noa ki Petehorono, patua iho ētahi o rātou, e toru mano, nui atu hoki te taonga i pāhuatia e rātou.
2CH 25:14 Ā, i muri i te taenga mai o Amatia i te patunga i ngā Ēromi, ka mauria mai e ia ngā atua o ngā tama a Heira, nā, ka whakatūria e ia hei atua mōna, koropiko ana ia ki mua i a rātou, tahuna ana e ia he whakakakara ki a rātou.
2CH 25:15 Nā reira ka mura te riri o Ihowā ki a Amatia, ā, ungā ana mai e ia he poropiti ki a ia, hei kōrero ki a ia, “He aha koe i rapu ai i tā ngā atua o te iwi nā? Kīhai nā hoki tō rātou iwi i whakaorangia e rātou i tōu ringa.”
2CH 25:16 Nā, i a ia e kōrero ana ki a ia, ka mea te kīngi ki a ia, “Kua waiho rānei koe hei kaiwhakatakoto whakaaro mō te kīngi? Kāti tāu; mō te aha koe kia patua?” Nā, mutu ake tā te poropiti; otiia i kī anō ia, “E mōhio ana anō ahau kua takoto tō te Atua whakaaro mōu kia ngaro, mō tāu meatanga i tēnei, mōu hoki kīhai i rongo ki tōku whakaaro.”
2CH 25:17 Kātahi a Amatia kīngi o Hūrā ka whakatakoto whakaaro, ā, unga tāngata ana ki a Ioaha tama a Iehoahata tama a Iehu kīngi o Īharaira, hei kī atu, “Tēnā, tāua ka titiro tētahi ki te kanohi o tētahi.”
2CH 25:18 Nā, ka unga tāngata a Ioaha kīngi o Īharaira ki a Amatia kīngi o Hūrā, hei kī atu: “I tono karere te tātarāmoa i Repanōna ki te hīta i Repanōna, hei kī atu, ‘Hōmai tāu tamāhine hei wahine mā tāku tama.’ Nā, ko te haerenga atu o tētahi kīrehe i Repanōna, takahia iho e ia taua tātarāmoa.
2CH 25:19 E kī ana koe, ‘Nā, kua patua e koe Ēroma,’ ā, kua whakanekehia ake koe e tōu ngākau kia whakapehapeha. E noho rā ki tōu whare; he aha koe ka whakapātaritari ai, e kino ai koe, e hinga ai koe, a koe nā, koutou tahi ko Hūrā?”
2CH 25:20 Otiia kīhai a Amatia i rongo; nā te Atua hoki tēnā, kia hoatu ai rātou e ia ki te ringa o ō rātou hoariri, mō rātou i rapu tikanga i ngā atua o Ēroma.
2CH 25:21 Heoi, haere ana a Ioaha kīngi o Īharaira, ā, ka titiro rāua ko Amatia kīngi o Hūrā, tētahi ki te kanohi o tētahi, ki Petehemehe o Hūrā.
2CH 25:22 Nā, kua patua a Hūrā i te aroaro o Īharaira, ā, rere ana rātou, tēnā ki tōna tēneti, tēnā ki tōna tēneti.
2CH 25:23 I mau anō a Amatia kīngi o Hūrā tama a Ioaha tama a Iehoahata i a Ioaha kīngi o Īharaira ki Petehemehe, ā, kawea ana ia ki Hiruhārama, wāwāhia ana e ia te taiepa o Hiruhārama, i te Kūwaha mai anō o Ēparaima taea noatia te Kūwaha o te koki, e whā rau whatīanga.
2CH 25:24 Nā, ko te kōura katoa, ko te hiriwa, me ngā oko katoa i kitea ki te whare o te Atua, ki a Opere-Eroma, me ngā taonga o te whare o te kīngi, me ētahi tāngata hei taumau, tangohia ake e ia, ā, hoki ana ki Hamaria.
2CH 25:25 Ā, tekau mā rima ngā tau i ora ai a Amatia tama a Ioaha kīngi o Hūrā i muri i te matenga o Ioaha tama a Iehoahata kīngi o Īharaira.
2CH 25:26 Nā, ko ērā atu meatanga a Amatia, ō mua, me ō muri, nanā, kāhore ianei i tuhituhia ki te pukapuka o ngā kīngi o Hūrā, o Īharaira?
2CH 25:27 Nā, nō muri i te wā i mahue ai i a Amatia te whai i a Ihowā, ka whakatupuria he hē mōna ki Hiruhārama, ā, rere ana ia ki Rakihi. Otiia ka unga tāngata rātou ki te whai i a ia ki Rakihi, ā, whakamatea iho ia ki reira.
2CH 25:28 Ā, mauria ana mai i runga hōiho, tanumia ana ki te taha o ōna mātua, ki te pā o Hūrā.
2CH 26:1 Kātahi te iwi katoa o Hūrā ka mau ki a Utia, kotahi tekau mā ono nei ōna tau, ā, meinga ana hei kīngi i muri i tōna pāpā, i a Amatia.
2CH 26:2 Nā, tēnei i hanga Eroto, ā, whakahokia ana ki a Hūrā, i muri i te moenga o te kīngi ki ōna mātua.
2CH 26:3 Kotahi tekau mā ono ngā tau o Utia i tōna kīngitanga, ā, e rima tekau mā rua ōna tau i kīngi ai ia ki Hiruhārama; ā, ko te ingoa o tōna whaea, ko Iekoria, nō Hiruhārama.
2CH 26:4 I tika tāna mahi ki te titiro a Ihowā, i rite ki ngā mea katoa i mea ai tōna pāpā, a Amatia.
2CH 26:5 I rapua e ia tā te Atua i ngā rā o Hakaraia, he tangata mōhio tērā i ngā whakakitenga mai a te Atua. Nā, i ngā rā i rapua ai e ia tā Ihowā, ka meinga ia e te Atua kia kake.
2CH 26:6 I haere anō ia ki te whawhai ki ngā Pirihitini, ā, wāwāhia ana e ia te taiepa o Kāta, me te taiepa o Iapane, me te taiepa o Aharoro; ā, hangā ana e ia ētahi pā ki te whenua o Aharoro, ki roto hoki i ngā Pirihitini.
2CH 26:7 Ā, i āwhinatia ia e te Atua i te whawhai ki ngā Pirihitini, ki ngā Ārapi i noho ki Kurupaara, rātou ko ngā Meunimi.
2CH 26:8 Ā, hōmai ana e ngā Āmoni he hākari ki a Utia; pakū ana hoki tōna ingoa ā tae noa ki te tomokanga ki Īhipa; nā, ka nui atu tōna kaha.
2CH 26:9 I hangā anō e Utia ētahi pourewa ki Hiruhārama, ki te Kūwaha i te Kokonga, ki te Kūwaha i te Raorao, ki te koki o te taiepa, hangā ana e ia kia kaha.
2CH 26:10 I hangā anō e ia ētahi pourewa ki te koraha, ā, keria ana ētahi poka wai, he maha, he tini hoki āna kararehe; i te raorao anō, ā, i te mānia. Ā, he kaimahi whenua āna, he kaimahi wāina i ngā maunga, i ngā māra whai hua hoki; he tangata ahu whenua hoki ia.
2CH 26:11 He ope anō tā Utia, he hunga whawhai; i haere ā-rōpū ki te whawhai; ko te tokomaha, kei tō rātou tauanga e Teiere kaituhituhi rāua ko te kaiwhakahaere, ko Maaheia. Ko te kaiārahi, ko Hanania, ko tētahi o ngā rangatira a te kīngi.
2CH 26:12 Ko te tokomaha katoa o ngā upoko o ngā whare o ngā mātua o ngā toa mārohirohi, e rua mano e ono rau.
2CH 26:13 Nā, ko te ope hei ārahi mā rātou, he mea i rākaia, e toru rau e whitu mano e rima rau, he hunga i kaha rawa tā rātou whawhai, hei tuarā mō te kīngi ki te hoariri.
2CH 26:14 Kua pae noa ake i a Utia he whakangungu rākau mō rātou puta noa i te ope, te tao, he pōtae, he pukupuku, he kōpere, he kōtaha piu kōhatu.
2CH 26:15 I hangā anō e ia ētahi mea ki Hiruhārama, he mea whakaaro nā ngā tāngata mōhio, hei uta ki runga i ngā pourewa, i ngā pou koki, hei kōpere i ngā pere, i ngā kōhatu nunui hoki. Ā, pakū ana tōna ingoa ki tawhiti; he hanga whakamīharo hoki tōna āwhinatanga ā kaha noa ake ia.
2CH 26:16 Otiia i a ia ka kaha nei, ka whakakake tōna ngākau, ka mahi i te kino, ā, takahia ana e ia tā Ihowā, tā tōna Atua; i tomo hoki ia ki te temepara o Ihowā, ki te tahu whakakakara ki runga ki te āta whakakakara.
2CH 26:17 Nā, ka haere atu i muri i a ia a Atāria tohunga, rātou ko ētahi tohunga o Ihowā, e waru tekau, he hunga māia.
2CH 26:18 Nā, ka tūria atu e rātou a Utia, te kīngi, ā, ka mea rātou ki a ia, “E kore e tika māu, e Utia, te tahu whakakakara ki a Ihowā; engari mā ngā tohunga, mā ngā tama a Ārona, i whakatapua nei hei tahu whakakakara. Haere atu i te wāhi tapu; kua hē hoki koe; ehara hoki i te mea e whai korōria ai koe i te Atua, i a Ihowā.”
2CH 26:19 Kātahi ka riri a Utia; i tōna ringa anō he tahu kakara hei tahu whakakakara; ā, i a ia e riri ana ki ngā tohunga, ka puta ake te repera i tōna rae i te aroaro o ngā tohunga i roto i te whare o Ihowā, i te taha o te āta tahu whakakakara.
2CH 26:20 Ā, ko te tahuritanga o te tino tohunga, o Atāria, rātou ko ngā tohunga katoa ki a ia, nanā, he repera tērā kei tōna rae, peia ana ia e rātou i reira. Ko ia anō i hohoro te haere, nō te mea kua pākia ia e Ihowā.
2CH 26:21 Nā, he repera a Utia te kīngi ā taea noatia te rā i mate ai, ā, noho ana i te whare motuhake, he repera hoki, he mea momotu atu hoki i te whare o Ihowā; ā, ko tāna tama ko Iotama, te rangatira mō te whare o te kīngi, hei kaiwhakarite mō te iwi o te whenua.
2CH 26:22 Nā, ko ērā atu meatanga a Utia, ō mua, ō muri, kua oti te tuhituhi e Ihāia poropiti tama a Āmoho.
2CH 26:23 Heoi, kua moe a Utia ki ōna mātua, ā, tanumia iho ki ōna mātua ki te māra i tō ngā kīngi tanumanga; i mea hoki rātou, “He repera ia.” Ā, ko tāna tama, ko Iotama, te kīngi i muri i a ia.
2CH 27:1 E rua tekau mā rima ngā tau o Iotama i tōna kīngitanga, ā, kotahi tekau mā ono ngā tau i kīngi ai ia ki Hiruhārama; ā, ko te ingoa hoki o tōna whaea ko Ieruha, he tamāhine nā Hāroko.
2CH 27:2 Ā, he tika tāna mahi ki tā Ihowā titiro, i rite ki ngā mea katoa i mea ai a Utia, tōna pāpā. Otiia, kīhai ia i tomo ki te temepara o Ihowā, i mahi tonu te iwi i te hē.
2CH 27:3 Nāna i hanga te Kūwaha o Runga o te whare o Ihowā, ā, he nui te wāhi i hangā e ia ki runga ki te taiepa i Ōpere.
2CH 27:4 I hangā anō e ia ētahi pā ki ngā maunga o Hūrā; hangā ana anō e ia ētahi taumaihi, ētahi pourewa ki ngā ngahere.
2CH 27:5 I whawhai anō ia ki te kīngi o ngā tama a Āmona, ā taea ana rātou e ia. Ā, hōmai ana e ngā tama a Āmona ki a ia i taua tau kotahi rau taranata hiriwa, tekau mano mēhua wīti, he pārei hoki tekau ngā mano. Ko ngā utu ēnei i hōmai e ngā tama a Āmona ki a ia, i te rua anō o ngā tau, ā, i te toru anō hoki.
2CH 27:6 Heoi, ka kaha haere a Iotama, nō te mea i whakatikaia e ia ōna huarahi i te aroaro o Ihowā, o tōna Atua.
2CH 27:7 Nā, ko ērā atu meatanga a Iotama, me āna whawhai katoa, me ōna huarahi, nanā, kua oti te tuhituhi ki te pukapuka o ngā kīngi o Īharaira rāua ko Hūrā.
2CH 27:8 E rua tekau mā rima ōna tau i tōna kīngitanga, ā, tekau mā ono ngā tau i kīngi ai ia ki Hiruhārama.
2CH 27:9 Nā, kua moe a Iotama ki ōna mātua, ā, tanumia iho ki te pā o Rāwiri, ā, ko tāna tama, ko Ahata, te kīngi i muri i a ia.
2CH 28:1 E rua tekau ngā tau o Ahata i tōna kīngitanga, ā, tekau mā ono ngā tau i kīngi ai ia ki Hiruhārama. Kīhai hoki ia i mahi i te tika ki tā Ihowā titiro, kīhai i pērā me tōna pāpā, me Rāwiri.
2CH 28:2 I haere hoki ia i ngā ara o ngā kīngi o Īharaira, i hanga anō i ētahi whakapakoko whakarewa mō ngā Paara.
2CH 28:3 I tahu whakakakara anō ia ki te raorao o te tama a Hinomo, tahuna ana anō e ia āna tamariki ki te ahi; rite tonu tāna ki ngā mea whakarihariha a ngā iwi i peia nei e Ihowā i te aroaro o ngā tama a Īharaira.
2CH 28:4 I patu whakahere anō ia, i tahu whakakakara ki ngā wāhi tiketike, ki ngā pukepuke, ki raro i ngā rākau kōuru nui katoa.
2CH 28:5 Nā reira i tukua ai ia e Ihowā, e tōna Atua ki te ringa o te kīngi o Hīria; ā, patua ana ia e rātou, he tini anō hoki ngā pārau o rātou i whakaraua atu, kawea ana ki Ramahiku. I tukua atu anō ia ki te ringa o te kīngi o Īharaira, patua iho e ia, he nui te parekura.
2CH 28:6 Kotahi hoki te rau e rua tekau mano i patua e Peka tama a Remaria ki Hūrā i te rā kotahi, he hunga māia katoa; mō rātou i whakarere i a Ihowā, i te Atua o ō rātou mātua.
2CH 28:7 Nā, i patua e tētahi mārohirohi o Ēparaima, e Tīkiri, a Maaheia tama a te kīngi, a Atarikama, rangatira o te whare, me Erekana, tō muri i te kīngi.
2CH 28:8 Whakaraua atu ana e ngā tama a Īharaira e rua rau mano o ō rātou tuākana, tēina, ngā wāhine, ngā tamariki, ngā tamāhine, nui atu hoki ō rātou taonga i pāhuatia e rātou; kawea atu ana e rātou ngā taonga ki Hamaria.
2CH 28:9 Otiia he poropiti tā te Atua i reira, ko Orere tōna ingoa; ā, ka puta ia ki te whakatau i te taua e haere ana mai ki Hamaria, ka mea ki a rātou, “Nanā, he riri nō Ihowā, nō te Atua o ō koutou mātua, ki a Hūrā i hōmai ai rātou e ia ki ō koutou ringa; patua iho e koutou, tutuki noa te riri ki te rangi.
2CH 28:10 Heoi, kei te mea koutou kia pēhia ki raro ngā tama o Hūrā, o Hiruhārama hei pononga tāne, hei pononga wāhine mā koutou; engari kāhore rānei i a koutou nā ō koutou hē hoki ki a Ihowā ki tō koutou Atua?
2CH 28:11 Tēnā, whakarongo ki ahau, whakahokia ngā whakarau i whakaraua mai koutou i ō koutou tuākana, tēina; nō te mea kei te mura te riri o Ihowā, o tō koutou Atua, ki a koutou.”
2CH 28:12 Kātahi ka whakatika ētahi o ngā upoko o ngā tama a Ēparaima, a Atāria tama a Iehohanana, a Perekia tama a Mehiremoto, a Hetekia tama a Harumu, rātou ko Amaha tama a Hararai, ka tū atu ki te hunga i haere mai nei i te whawhai.
2CH 28:13 Ā, ka mea ki a rātou, “Kei kawea mai e koutou ngā whakarau nā ki konei; ko tā koutou hoki e mea nā hei hōmai ki a tātou he hē ki a Ihowā, e whakanekehia ake ai ō tātou hara me tō tātou hē. He nui hoki tō tātou hē, ā, he riri tēnei te mura nei ki a Īharaira.”
2CH 28:14 Heoi, whakarērea iho e ngā tāngata i ngā patu ngā whakarau, me ngā taonga i te aroaro o ngā rangatira rātou ko te huihui katoa.
2CH 28:15 Nā, ka whakatika ngā tāngata i whakahuatia ō rātou ingoa, ka mau ki ngā whakarau, whakakākahuria ana e rātou ki ngā taonga ngā mea kākahukore o rātou. Whakakākahuria ana e rātou, whakawhiwhi rawa ki te hū, hoatu ana he mea hei kai, hei inu, whakawahia ana, kawea ana ngā mea kahakore katoa o rātou i runga i te kāihe, ā tae noa ki Heriko, ki te pā nīkau ki ō rātou tuākana, tēina. Nā, hoki ana rātou ki Hamaria.
2CH 28:16 I taua wā ka unga tāngata a Kīngi Ahata ki ngā kīngi o Ahiria hei āwhina mōna.
2CH 28:17 Nō te mea kua tae mai anō ngā Ēromi; patua iho e rātou a Hūrā, whakaraua atu ana ētahi whakarau.
2CH 28:18 Kua whakaekea hoki e ngā Pirihitini ngā pā o te raorao, o te taha ki te tonga o Hūrā, ā, riro ana i a rātou a Petehemehe, a Atarono, a Kereroto, a Hoko me ōna pā ririki, a Timina me ōna pā ririki, a Kimito me ōna pā ririki; nohoia iho e rātou.
2CH 28:19 Nā Ihowā hoki i whakaiti a Hūrā, mō tā Ahata, mō tā te kīngi o Īharaira; mō tāna mahi wairangi i roto i a Hūrā, nui atu hoki tōna hē ki a Ihowā.
2CH 28:20 Nā, ka haere a Tirikata Pirinehere kīngi o Ahiria ki a ia, ka whakararuraru i a ia, kīhai hoki i whakakaha i a ia.
2CH 28:21 I tangohia hoki e Ahata tētahi wāhi i roto i te whare o Ihowā, i te whare anō o te kīngi rātou ko ngā rangatira, ā, hoatu ana ki te kīngi o Ahiria; kīhai anō tērā i āwhina i a ia.
2CH 28:22 Nā, i te wā i hē ai ia, ka tohe anō ia ki te hē ki a Ihowā, taua kīngi a Ahata.
2CH 28:23 I patu whakahere hoki ia ki ngā atua o Ramahiku i patu nei i a ia; i kī hoki ia, “Ko ngā atua o ngā kīngi o Hīria kei te āwhina i a rātou, nā, me patu whakahere ahau ki a rātou, kia āwhina ai rātou i ahau.” Otiia, ko rātou anō hei whakangoikore i a ia, i a Īharaira katoa anō hoki.
2CH 28:24 Nā, ka huihuia e Ahata ngā oko o te whare o te Atua, tapatapahia ana e ia ngā oko o te whare o te Atua, ā, tūtakina ana e ia ngā tatau o te whare o Ihowā. I hangā anō e ia ētahi āta māna ki ngā koki katoa o Hiruhārama.
2CH 28:25 I hangā anō e ia ki ngā pā o Hūrā ētahi wāhi tiketike hei tahu whakakakara ki ngā atua kē, whakapātaritaria ana e ia a Ihowā, te Atua o ōna mātua.
2CH 28:26 Nā, ko ērā meatanga atu ana, ko āna meatanga katoa ō mua, ō muri, nanā, kua oti te tuhituhi ki te pukapuka o ngā kīngi o Hūrā rāua ko Īharaira.
2CH 28:27 Nā, kua moe a Ahata ki ōna mātua, ā, tanumia iho ki te pā, ki Hiruhārama; otiia kīhai i kawea ki ngā tanumanga o ngā kīngi o Īharaira; ā, ko Hetekia, ko tāna tama, te kīngi i muri i a ia.
2CH 29:1 E rua tekau mā rima ngā tau o Hetekia i tōna kīngitanga, ā, e rua tekau mā iwa ngā tau i kīngi ai ia ki Hiruhārama. Ko te ingoa hoki o tōna whaea ko Apia, he tamāhine nā Hakaraia.
2CH 29:2 Ā, he tika tāna mahi ki tā Ihowā titiro, i rite ki ngā mea katoa i mea ai tōna pāpā, a Rāwiri.
2CH 29:3 I te tuatahi o ngā tau o tōna kīngitanga, i te marama tuatahi, ka uakina e ia ngā tatau o te whare o Ihowā, hangā ana e ia kia pai.
2CH 29:4 Nā, ka mauria mai e ia ki roto ngā tohunga rātou ko ngā Rīwaiti, ā, ka huihuia rātou ki te marae i te taha rāwhiti,
2CH 29:5 ā, ka mea ia ki a rātou: “Whakarongo mai, e ngā Rīwaiti, whakatapua koutou āianei, whakatapua hoki te whare o Ihowā, o te Atua o ō koutou mātua, maua atu hoki te mea poke i roto i te wāhi tapu.
2CH 29:6 I hē hoki ō tātou mātua, i mahi i te kino i te titiro a Ihowā, a tō tātou Atua. Whakarērea ake ia e rātou, tahuri kē ana ō rātou aroaro i te tapenākara o Ihowā; hurihia ake e rātou ko ō rātou tuarā.
2CH 29:7 Ko ngā tatau anō o te whakamahau, i tūtakina e rātou; tineia iho ngā rama, kīhai hoki he whakakakara i tahuna e rātou; ā, kāhore he tahunga tinana i whakaekea i te wāhi tapu ki te Atua o Īharaira.
2CH 29:8 Koia te riri o Ihowā i anga ai ki a Hūrā, ki Hiruhārama, ā, tukua ana rātou e ia kia whiuwhiua, hei mīharotanga, hei whakahītanga, hei pēnei me tā ō koutou kanohi e kite nei.
2CH 29:9 Nanā, kua hinga nei ō tātou mātua i te hoari; ko te mea anō tēnei i whakaraua ai ā tātou tama, ā tātou tamāhine, ā tātou wāhine.
2CH 29:10 Nā, ko tā tōku ngākau tēnei, kia whakaritea he kawenata ki a Ihowā, ki te Atua o Īharaira, kia tahuri atu ai i a tātou tōna riri e mura nei.
2CH 29:11 E āku tama, kaua koutou e māngere; he mea whiriwhiri nei hoki koutou nā Ihowā hei tū ki tōna aroaro, hei mahi ki a ia, hei minita ki a ia, hei tahu whakakakara.”
2CH 29:12 Kātahi ka whakatika ngā Rīwaiti: a Mahata tama a Amahai, a Hoera tama a Atāria, nō ngā tama a ngā Kohati; ā, o ngā tama a Merari, ko Kihi tama a Apari, ko Atāria tama a Ieharerēre; o ngā Kerehoni hoki, ko Ioaha tama a Tima, ko Erene tama a Ioaha;
2CH 29:13 ā, o ngā tama a Eritapana, ko Himiri, ko Teiere; o ngā tama a Āhapa, ko Hakaraia, ko Matania;
2CH 29:14 o ngā tama a Hēmana, ko Tehiere, ko Himei; o ngā tama a Ierutunu, ko Hemaia, ko Utiere.
2CH 29:15 Nā, huihuia ana e rātou ō rātou tuākana, tēina, kei te whakatapu rātou i a rātou, ā, haere ana ki roto ki tā te kīngi i whakahau ai, arā ki tā Ihowā i kī ai, ki te pure i te whare o Ihowā.
2CH 29:16 Nā, haere ana ngā tohunga ki roto rawa i te whare o Ihowā ki te tahi i te poke, ā, whakaputaina ana e rātou ki waho ngā mea poke katoa i kitea i roto i te temepara o Ihowā ki te marae o te whare o Ihowā. Nā, tangohia ana e ngā Rīwaiti, kawea ana ki waho ki te awa ki Kitirono.
2CH 29:17 Nō te rā tuatahi o te marama tuatahi i tīmata ai rātou te whakatapu, ā, nō te waru o ngā rā o te marama i tae ai rātou ki te whakamahau o Ihowā. Nā, whakatapua ana e rātou te whare o Ihowā, e waru ngā rā; ā, nō te tekau mā ono o ngā rā o te marama tuatahi i oti ai.
2CH 29:18 Kātahi ka haere rātou ki roto, ki te kīngi, ki a Hetekia, ā, ka mea, “Kua tahia e mātou te poke o te whare o Ihowā, o te āta tahunga tinana, o ōna mea katoa, o te tēpu taro aroaro, o ōna mea katoa.
2CH 29:19 Ko ngā oko katoa hoki i ākiritia atu e Kīngi Ahata i tōna kīngitanga, i a ia i hē rā, kua oti i a mātou te whakapai, te whakatapu. Nanā, ko aua mea rā kei te aronga o te āta a Ihowā.”
2CH 29:20 Kātahi ka maranga wawe a Kīngi Hetekia i te ata, huihuia ana e ia ngā rangatira o te pā, haere ana ia ki runga, ki te whare o Ihowā.
2CH 29:21 Ā, ka kawea mai e rātou e whitu ngā pūru, e whitu ngā hipi toa, e whitu ngā reme, e whitu ngā koati toa, hei whakahere hara mō te kīngitanga, mō te wāhi tapu, ā, mō Hūrā. Nā, whakahaua atu ana e ia kia whakaekea e ngā tohunga, e ngā tama a Ārona ki runga ki te āta a Ihowā.
2CH 29:22 Heoi, patua ana e rātou ngā kau, ā, ka riro ngā toto i ngā tohunga, tāuhiuhia atu ana e rātou ki te āta. I patua anō e rātou ngā hipi toa, tāuhiuhia atu ana ngā toto ki te āta. Patua ana anō e rātou ngā reme, ā, tāuhiuhia ana ngā toto ki te āta.
2CH 29:23 Nā, ka whakatātaia mai e rātou ngā koati toa hei whakahere hara i te aroaro o te kīngi rātou ko te whakaminenga; pōkia iho ana ō rātou ringa ki runga ki a rātou.
2CH 29:24 Nā, ka patua e ngā tohunga, whakaherea ana ō rātou toto mō ngā hara ki runga ki te āta, hei whakamārie mō Īharaira katoa. Nā te kīngi hoki i kī mō Īharaira katoa te tahunga tinana me te whakahere hara.
2CH 29:25 I whakatūria anō e ia ngā Rīwaiti ki te whare o Ihowā, he himipora a rātou, he hātere, he hāpa; ko tā Rāwiri hoki ia i whakahau ai, rātou ko Kara matakite a te kīngi, ko Nātana poropiti; nā Ihowā hoki te whakahau, arā nā āna poropiti.
2CH 29:26 Tū ana tērā ngā Rīwaiti, me ngā mea whakatangi a Rāwiri, me ngā tohunga anō, mau tētere ana.
2CH 29:27 Nā, ka whakahau a Hetekia kia whakaekea te tahunga tinana ki runga ki te āta. Nā, i te wā i tīmata ai te tahunga tinana, ka tīmataia anō te waiata a Ihowā, me ngā tētere, me ngā mea whakatangi a Rāwiri kīngi o Īharaira.
2CH 29:28 Nā, koropiko katoa ana te whakaminenga, waiata ana ngā kaiwaiata, whakatangihia ana ngā tētere; i mahia katoa tēnei ā mutu noa te tahunga tinana.
2CH 29:29 Ā, nō te mutunga o te whakaeke, ka tuohu te kīngi me ōna hoa katoa i reira, ā, koropiko ana.
2CH 29:30 I whakahau anō a Kīngi Hetekia me ngā rangatira ki ngā Rīwaiti kia whakamoemiti ki a Ihowā; hei ngā kupu anō a Rāwiri rāua ko Āhapa matakite. Nā, kei te whakamoemiti rātou; me te koa; tuohu ana rātou, koropiko ana anō.
2CH 29:31 Kātahi a Hetekia ka oho, ka mea, “Nā, kua whakatapua nei koutou ki a Ihowā, neke mai, kawea mai ngā patunga tapu, me ngā whakawhetai ki te whare o Ihowā.” Nā, kei te kawe mai te whakaminenga i ngā patunga tapu, i ngā whakawhetai, ā, he tahunga tinana anō tā ngā ngākau hihiko katoa.
2CH 29:32 Nā, ko te maha o ngā tahunga tinana i kawea nei e te whakaminenga, e whitu tekau kau, kotahi rau hipi toa, e rua rau reme. Ko ēnei katoa hei tahunga tinana ki a Ihowā.
2CH 29:33 Nā, ko ngā mea i whakatapua, e ono rau kau, e toru mano hipi.
2CH 29:34 Otiia he torutoru rawa ngā tohunga, kīhai i kaha ki te tīhore i ngā tahunga tinana katoa. Nā, ka pikitia rātou e ō rātou tēina, e ngā Rīwaiti, ā, oti noa te mahi, kia oti rā anō te whakatapu a ngā tohunga i a rātou. Engari hoki ngā Rīwaiti i ngā tohunga, i tika ō rātou ngākau ki te whakatapu i a rātou.
2CH 29:35 Ā, he tini ngā tahunga tinana, me te ngako o ngā whakahere mō te pai, me ngā ringihanga anō mō ngā tahunga tinana. Heoi, kua oti te mahi o te whare o Ihowā te whakatika.
2CH 29:36 Nā, koa tonu a Hetekia rātou ko te iwi katoa, mō tā te Atua i whakarite ai mā te iwi; he mea oho tata hoki tēnei.
2CH 30:1 Nā, ka tono tāngata a Hetekia ki a Īharaira katoa rāua ko Hūrā; i tuhituhia anō e ia he pukapuka ki a Ēparaima rāua ko Mānahi kia haere mai ki te whare o Ihowā ki Hiruhārama, ki te mahi i te Kapenga a Ihowā, a te Atua o Īharaira.
2CH 30:2 Kua oti hoki te whakaaro te whakatakoto e te kīngi, rātou ko āna rangatira, ko te whakaminenga katoa i Hiruhārama, kia mahia te Kapenga i te rua o ngā marama.
2CH 30:3 Kīhai hoki i āhei te mahi i taua wā, nō te mea kīanō i āta rite te tokomaha o ngā tohunga i whakatapua; kīanō hoki te iwi i huihui ki Hiruhārama.
2CH 30:4 Ā, tika tonu taua mea ki te titiro a te kīngi, ki te titiro anō a te whakaminenga katoa.
2CH 30:5 Heoi, ka whakatakotoria te kōrero kia karangatia nuitia puta noa i a Īharaira i Peerehepa atu ā tae noa ki Rāna, kia haere mai ki te mahi i te Kapenga a Ihowā, a te Atua o Īharaira ki Hiruhārama; kīhai anō hoki i mahia pērātia e te nui tāngata me te mea i tuhituhia.
2CH 30:6 Heoi, haere ana ngā kaikawe i ngā pukapuka a te kīngi rātou ko āna rangatira puta noa i a Īharaira rāua ko Hūrā, pērā ana me tā te kīngi i whakahau ai; hei kī atu: “E ngā tama a Īharaira, hoki mai ki a Ihowā ki te Atua o Āperahama, o Īhaka, o Īharaira, ā, ka hoki mai ia ki ngā mōrehu o koutou i mawhiti nei i te ringa o ngā kīngi o Ahiria.
2CH 30:7 Kei rite hoki ki ō koutou mātua, ki ō koutou tuākana, tēina, i hē nei ki a Ihowā, ki te Atua o ō rātou mātua; nā, tukua ana rātou e ia ki te whakangaro; koia anō tēnā ka kitea nā e koutou.
2CH 30:8 Nā, kaua e whakapakeketia ō koutou kakī, kei rite ki ō koutou mātua; engari e tuku i a koutou ki a Ihowā, ka tomo ki tōna wāhi tapu i whakatapua nei e ia mō ake tonu atu; e mahi ki a Ihowā, ki tō koutou Atua, ā, ka tahuri atu i a koutou tōna riri e mura nei.
2CH 30:9 Ki te tahuri hoki koutou ki a Ihowā, ka tohungia ō koutou tuākana, tēina, me ā koutou tamariki e ngā tāngata nāna rātou i whakarau, ā, ka hoki mai rātou ki tēnei whenua; he atawhai hoki, he mahi tohu tā Ihowā, tā tō koutou Atua; e kore hoki tōna mata e tahuri kē i a koutou, ki te hoki koutou ki a ia.”
2CH 30:10 Heoi, haere ana ngā kaikawe pukapuka i tēnei pā ki tēnei pā puta noa i te whenua o Ēparaima, o Mānahi, ā tae noa ki Hepurona. Otiia kataina iho rātou, tāwaia iho.
2CH 30:11 I whakaiti ia ētahi tāngata o Āhera, o Mānahi, o Hepurona, i a rātou, ā, haere ana ki Hiruhārama.
2CH 30:12 I runga anō hoki i a Hūrā te ringa o te Atua hei hōmai i te ngākau kotahi ki a rātou, e mahi ai rātou i tā te kīngi rātou ko ngā rangatira i whakahau ai, arā i tā Ihowā i kī ai.
2CH 30:13 Nā, he nui te iwi i huihui ki Hiruhārama ki te mahi i te Hākari o te Taro Rēwenakore i te rua o ngā marama, nui atu te whakaminenga.
2CH 30:14 Nā, whakatika ana rātou, kei te tango i ngā āta i Hiruhārama, kei te tango anō i ngā āta tahu whakakakara, ā, makā ana ki te awa ki Kitirono.
2CH 30:15 Kātahi ka patua te Kapenga i te tekau mā whā o te rua o ngā marama. Ā, i whakamā ngā tohunga rātou ko ngā Rīwaiti, ā, whakatapua ana rātou e rātou anō, kawea ana e rātou he tahunga tinana ki te whare o Ihowā.
2CH 30:16 Ā, tū ana rātou i tō rātou tūranga, i te wāhi i whakaritea mō rātou, pērā ana me tā te ture a Mohi, ā, tā te Atua tangata; ko ngā tohunga hei tāuhi i ngā toto, ko ngā Rīwaiti hei hōmai.
2CH 30:17 He tokomaha hoki i roto i te whakaminenga kīhai nei i whakatapu i a rātou; heoi ko ngā Rīwaiti hei patu i ngā Kapenga mā te hunga katoa kīhai i purea, hei whakatapu i a rātou ki a Ihowā.
2CH 30:18 He tokomaha hoki o te iwi, arā he tokomaha nō Ēparaima, nō Mānahi, nō Ihākara, nō Hepurona, kīhai i pure i a rātou, heoi kai ana rātou i te Kapenga he mea kīhai i rite ki tā te tuhituhi. Otiia i īnoi a Hetekia mō rātou, i mea, “Mā Ihowā, mā te Mea pai e muru te hē o ngā tāngata katoa,
2CH 30:19 e whakapai ana i ō rātou ngākau ki te rapu i te Atua, i a Ihowā, i te Atua o ō rātou mātua, ko tō rātou purenga ia kīhai i rite ki tō te wāhi tapu.”
2CH 30:20 Nā, ka whakarongo a Ihowā ki a Hetekia, ā, whakaorangia ana e ia te iwi.
2CH 30:21 Ā, mahia ana e ngā tama a Īharaira i kitea ki Hiruhārama te Hākari Taro Rēwenakore, e whitu ngā rā, nui atu te koa; whakamoemititia ana a Ihowā e ngā Rīwaiti rātou ko ngā tohunga i tēnei rā, i tēnei rā, me te waiata anō i runga i ngā mea tangi nui, he mea ki a Ihowā.
2CH 30:22 Ā, i whakamārie a Hetekia i ngā ngākau o ngā Rīwaiti katoa i mōhio pai nei ki te ritenga o te mahi ki a Ihowā, ā, kai ana rātou i te kai o taua hākari, e whitu ngā rā, patua ana e rātou ngā whakahere mō te pai, whāki ana ki a Ihowā, ki te Atua o ō rātou mātua.
2CH 30:23 Nā, ka whakatakotoria te whakaaro e te whakaminenga katoa, kia mahia ētahi atu rā e whitu; ā, koa ana rātou i a rātou e mahi ana i aua rā e whitu.
2CH 30:24 I hōmai hoki e Hetekia kīngi o Hūrā ki te whakaminenga hei whakahere ētahi pūru kotahi mano, ētahi hipi e whitu mano; i hōmai anō e ngā rangatira ki te whakaminenga ētahi pūru kotahi mano, ētahi hipi tekau mano. He tokomaha anō hoki ngā tohunga i whakatapu i a rātou.
2CH 30:25 Nā, koa tonu te whakaminenga katoa o Hūrā, rātou ko ngā tohunga, ko ngā Rīwaiti, me te whakaminenga katoa i haere mai nei i a Īharaira me ngā manene i haere mai nei i te whenua o Īharaira ki Hūrā noho ai.
2CH 30:26 Heoi, he nui te koa i Hiruhārama, nō te mea nō ngā rā anō o Horomona tama a Rāwiri kīngi o Īharaira kāhore he pēnei me tēnei i Hiruhārama.
2CH 30:27 Kātahi ka whakatika ngā tohunga, ngā Rīwaiti, ā, manaakitia ana e rātou te iwi, ā, i rangona tō rātou reo, i tae atu anō hoki tā rātou īnoi ki tōna nohoanga tapu, ki te rangi.
2CH 31:1 Nā, i te otinga o tēnei katoa, ka haere atu a Īharaira katoa i reira ki ngā pā o Hūrā, ā, pākarua rikirikitia ana e rātou ngā pou karakiatanga, tuaina ana ngā Aherimi, whakahoroa ana ngā wāhi tiketike me ngā āta puta noa i Hūrā, i Pineamine, i Ēparaima, i Mānahi ā poto noa. Nā, hoki ana ngā tama katoa a Īharaira ki tōna kāinga, ki tōna kāinga, ki ō rātou pā.
2CH 31:2 I whakaritea anō e Hetekia ngā wehenga o ngā tohunga rātou ko ngā Rīwaiti, arā ō rātou wehenga, mō te mahi a tēnei, a tēnei, ko ngā tohunga rātou ko ngā Rīwaiti ki ngā tahunga tinana, ki ngā whakahere mō te pai, hei minita, hei whakawhetai, hei whakamoemiti i ngā kūwaha o ngā nohoanga o Ihowā.
2CH 31:3 I whakaritea anō e ia tā te kīngi wāhi i roto i ōna taonga mō ngā tahunga tinana, arā mō ngā tahunga tinana o te ata, o te ahiahi, mō ngā tahunga tinana mō ngā hāpati, mō ngā kōwhititanga marama, ā, mō ngā hākari i whakaritea; mō ngā mea i tuhituhia ki te Ture a Ihowā.
2CH 31:4 I mea anō ia ki te iwi, ki ngā tāngata o Hiruhārama, kia hōmai te wāhi mā ngā tohunga rātou ko ngā Rīwaiti, kia tuku ai rātou i a rātou ki te Ture a Ihowā.
2CH 31:5 Puaki kau te kupu, ka kawea nuitia mai e ngā tama a Īharaira ngā mātāmua o te wīti, o te wāina, o te hinu, o te honi, o ngā hua katoa o te māra; tōna nui hoki o te whakatekau o ngā mea katoa i kawea mai e rātou.
2CH 31:6 Nā, ko ngā tama a Īharaira rāua ko Hūrā e noho ana i ngā pā o Hūrā, i kawea mai e rātou te whakatekau o ngā kau, o ngā hipi, me te whakatekau o ngā mea tapu i whakatapua nei mā Ihowā, mā tō rātou Atua, whakatakotoria ana e rātou tēnei pūranga, tēnei pūranga.
2CH 31:7 Nō te toru o ngā marama i tīmata ai tā rātou whakatū i ngā pūranga, nō te whitu o ngā mārama i oti ai.
2CH 31:8 Nā, nō te taenga mai o Hetekia rātou ko ngā rangatira ka kite i ngā pūranga, whakapai ana rātou i a Ihowā, i tāna iwi hoki, i a Īharaira.
2CH 31:9 Kātahi ka uia ngā tohunga me ngā Rīwaiti e Hetekia mō ngā pūranga.
2CH 31:10 Nā, ka kōrero a Atāria te tino tohunga, nō te whare o Hāroko, ki a ia ka mea, “Nō te tīmatanga o tā rātou kawe mai i ngā whakahere ki te whare o Ihowā, ka kai mātou, ka mākona, nui atu hoki te toenga; e manaakitia ana hoki tāna iwi e Ihowā. Nā, ko te toenga, ko tēnei haupū nui nei.”
2CH 31:11 Kātahi a Hetekia ka kī kia whakapaia ētahi rūma ki te whare o Ihowā. Nā, ka whakapaia,
2CH 31:12 ā, kawea ana e rātou ki roto ngā whakahere, ngā whakatekau, ngā mea i whakatapua; pono tonu tā rātou. Ko te kaitiaki o aua mea, ko Konania Rīwaiti; ko tōna tuarua, ko tōna teina, ko Himei,
2CH 31:13 ko Tehiere hoki, ko Atatia, ko Nahata, ko Atahere, ko Terimoto, ko Iotāpara, ko Eriere, ko Ihimakia, ko Mahata, ko Penaia hei kaitirotiro, i raro anō i a Konania rāua ko tōna teina ko Himei, he mea whakarite nā Kīngi Hetekia rāua ko Atāria rangatira o te whare o te Atua.
2CH 31:14 Nā, ko Kore tama a Imina Rīwaiti kaitiaki ki te kūwaha ki te rāwhiti, hei kaitiaki mō ngā mea hōmai noa ki te Atua, hei tuwha i ngā whakahere, o Ihowā, i ngā mea tapu rawa.
2CH 31:15 Nā, i raro i a ia ko Erene, ko Miniamini, ko Hehua, ko Hemaia, ko Amaria, ko Hekania, i ngā pā o ngā tohunga, ki tā rātou mahi tūturu, hei tuwha mā ō rātou tuākana, tēina, mā ngā wehenga, mā te rahi, mā te iti;
2CH 31:16 hāunga ērā i te whakapapa, ngā tāne e toru nei, maha atu rānei ngā tau, mā te hunga katoa e tomo ana ki te whare o Ihowā, te mea mō tēnei rā, mō tēnei rā, mō tā rātou mahi, i a rātou e mahi ana, arā i a rātou i wehea rā hei tiaki.
2CH 31:17 Mā ngā tohunga anō i te whakapapa, mā ngā whare o ō rātou mātua rātou ko ngā Rīwaiti, mā te hunga e rua tekau, maha atu rānei ngā tau, i a rātou i wehea rā hei tiaki;
2CH 31:18 mā ā rātou kōhungahunga katoa anō i te whakapapa, mā ā rātou wāhine, mā ā rātou tama, mā ā rātou tamāhine, i te whakaminenga katoa; i runga hoki i te tapu tā rātou whakatapunga i a rātou ki tā rātou mahi tūturu.
2CH 31:19 Mā ngā tama anō a Ārona, mā ngā tohunga i ngā māra i waho ake o ō rātou pā; kei tēnei pā, kei tēnei pā ētahi tāngata, he mea whakahua ō rātou ingoa, hei tuwha mā ngā tāne katoa i roto i ngā tohunga, mā te hunga katoa anō i roto i ngā Rīwaiti kua oti te whakapapa.
2CH 31:20 Ko tā Hetekia mahi tēnei puta noa i a Hūrā; mahia ana e ia te pai, te tika, me te pono i te aroaro o Ihowā, o tōna Atua.
2CH 31:21 I ngā meatanga katoa, i a ia ka anga nei ki ngā mahi o te whare o te Atua, ki te ture, ki ngā whakahau, ā, ka rapu i tōna Atua, i whakapaua tōna ngākau ki te mahi, ā, oti pai tāna.
2CH 32:1 I muri i ēnei mea, i te mea ka āta takoto, ka haere mai a Henakeripi kīngi o Ahiria, tae tonu mai ki Hūrā, whakapaea ana e ia ngā pā taiepa; i mea hoki ia kia riro atu i a ia.
2CH 32:2 Ā, nō te kitenga o Hetekia kua tae mai a Henakeripi, e anga ana hoki ki te whawhai ki Hiruhārama,
2CH 32:3 ka whakatakoto whakaaro ki āna rangatira, ki āna mārohirohi, kia purua ngā wai o ngā puna i waho o te pā; ā, ko rātou ōna hoa mahi.
2CH 32:4 Heoi, nui atu te iwi i huihui mai, ā, purua ana e rātou ngā puna katoa, me te awa e rere ana i waenganui o te whenua; i kī hoki rātou, “He aha kia haere mai ngā kīngi o Ahiria, kia nui te wai e kitea e rātou?”
2CH 32:5 Nā, ka whakapakari ia, ā, hangā ana e ia te taiepa katoa i pakaru, ā, eke noa ki ngā pourewa; me tētahi atu taiepa anō i waho, i whakakahangia anō e ia a Miro i te pā o Rāwiri; ā, he tini ngā pere me ngā whakangungu rākau i hangā e ia.
2CH 32:6 I whakaritea anō e ia he rangatira whawhai mō te iwi; ā, ka huihui i a rātou ki a ia ki te wāhi whānui i te kūwaha o te pā. Nā, ka kōrero whakamārie ia ki a rātou, ka mea,
2CH 32:7 “Kia kaha, kia māia, kaua e wehi, kaua e pāwera ki te kīngi o Ahiria, ki tāna ope katoa; hira ake hoki tō tātou i tōna.
2CH 32:8 Ko tōna he ringa kikokiko; ko tō tātou ia, ko Ihowā, ko tō tātou Atua hei āwhina mō tātou, hei whawhai i tā tātou whawhai.” Nā, okioki tonu te iwi ki ngā kupu a Hetekia kīngi o Hūrā.
2CH 32:9 I muri i tēnei ka ungā mai āna tāngata e Henakeripi kīngi o Ahiria ki Hiruhārama; ko ia hoki i te whakapae i Rakihi, ā, ko tōna kīngitanga katoa i a ia; hei mea ki a Hetekia kīngi o Hūrā, ki a Hūrā katoa anō i Hiruhārama:
2CH 32:10 “Ko te kupu tēnei a Henakeripi kīngi o Ahiria: E whakawhirinaki ana koutou ki te aha, i a koutou e whakapaea nā i Hiruhārama?
2CH 32:11 He teka ianei he whakapati tā Hetekia i a koutou, he mea kia tukua ai koutou ki te mate i te kore kai, i te kore wai, i a ia e kī rā, ‘Tērā tātou e whakaorangia e Ihowā, e tō tātou Atua i te ringa o te kīngi o Ahiria’?
2CH 32:12 He teka ianei nā taua Hetekia nei i whakakore ōna wāhi tiketike, me āna āta, ā, kī ana ia ki a Hūrā, ki Hiruhārama, mea ana, ‘Hei mua i te āta kotahi koutou koropiko ai, ki runga anō i tēnei koutou tahu ai i te whakakakara’?
2CH 32:13 “Kāhore rānei koutou e mōhio ki ngā mea i mea ai ahau me ōku mātua ki ngā iwi katoa o ngā whenua nei? I taea rānei e ngā atua o ngā iwi o aua whenua te whakaora tō rātou whenua i tōku ringa?
2CH 32:14 Ko wai o ngā atua o ēnei iwi i hunā nei e ōku mātua i kaha ki te whakaora i tāna iwi i roto i tōku ringa, e kaha ai tō koutou Atua ki te whakaora i a koutou i roto i tōku ringa?
2CH 32:15 Nā, kei tinihangatia koutou e Hetekia, kei whakapati hoki ia i a koutou, kei pērā me tāna nā. Kaua hoki e whakapono ki a ia; nō te mea kīhai i kaha te atua o tētahi iwi, o tētahi kīngitanga rānei ki te whakaora i tāna iwi i roto i tōku ringa, i te ringa anō o ōku mātua. E kore rawa tō koutou Atua e whakaora i a koutou i roto i tōku ringa!”
2CH 32:16 Tērā atu anō tā āna tāngata i kōrero kino ai mō te Atua, mō Ihowā, mō tāna tangata anō, mō Hetekia.
2CH 32:17 I tuhituhia anō e ia ētahi pukapuka hei whākorekore mō Ihowā, mō te Atua o Īharaira, hei kōrero kino mōna; i kī ia, “Kīhai nei ngā atua o ngā iwi o ngā whenua i kaha ki te whakaora i ō rātou iwi i roto i tōku ringa, e kore anō hoki te Atua o Hetekia e whakaora i tāna iwi i roto i tōku ringa.”
2CH 32:18 Nā, nui atu tā rātou karanga i te reo Hūrai ki te iwi o Hiruhārama i runga i te taiepa hei whakawehi i a rātou, hei whakararuraru i a rātou, he mea kia riro ai i a rātou te pā.
2CH 32:19 Nā, ko tā rātou kōrero mō te Atua o Hiruhārama, rite tonu ki tā rātou mō ngā atua o ngā iwi o te whenua, mō ngā mahi a te ringa tangata.
2CH 32:20 Nā, kei te īnoi, kei te karanga ki te rangi a Kīngi Hetekia rāua ko te poropiti, ko Ihāia tama a Āmoho, mō tēnei mea.
2CH 32:21 Nā, ko te tukunga mai a Ihowā i te anahera, hautopea atu ana e ia ngā toa mārohirohi katoa rātou ko ngā rangatira, ko ngā tāngata nunui, i te puni o te kīngi o Ahiria. Heoi, hoki ana ia ki tōna whenua; whakamā ana tōna mata. Haere ana ia ki te whare o tōna atua, nā, patua iho ia i reira ki te hoari e te hunga i puta i ōna whēkau.
2CH 32:22 Heoi, whakaorangia ake a Hetekia me ngā tāngata o Hiruhārama e Ihowā i te ringa o Henakeripi kīngi o Ahiria, i te ringa anō o ērā katoa, ā, ārahina ana rātou e ia i tētahi taha, i tētahi taha.
2CH 32:23 Ā, he tokomaha ki te kawe i te hākari ki a Ihowā, ki Hiruhārama, i ngā mea utu nui anō ki a Hetekia kīngi o Hūrā. Nā, kake tonu ake ia i reira i te tirohanga a ngā iwi katoa.
2CH 32:24 I aua rā ka mate a Hetekia, whano marere. Nā, ko tāna īnoinga ki a Ihowā, ka kōrero tērā ki a ia, ka hōmai anō i te tohu ki a ia.
2CH 32:25 Otiia kīhai i rite ki te atawhainga ki a ia tā Hetekia utu. I whakakake hoki tōna ngākau; nā, kua takoto he riri mōna, mō Hūrā, mō Hiruhārama.
2CH 32:26 Otiia i whakaiti a Hetekia i a ia, mō tōna ngākau i whakakake rā, a ia, me ngā tāngata anō o Hiruhārama, ā, kīhai te riri o Ihowā i puta ki a rātou i ngā rā o Hetekia.
2CH 32:27 Nā, nui atu te taonga me te korōria i a Hetekia; ā, hangā ana e ia he toa taonga mō te hiriwa, mō te kōura, mō ngā kōhatu utu nui, mō ngā mea kakara, mō ngā whakangungu rākau, mō ngā mea katoa e matenuitia ana;
2CH 32:28 he toa anō mō ngā hua o te wīti, o te wāina, o te hinu, me ngā tūnga mō ia kararehe, mō ia kararehe, me ngā taiepa mō ngā kāhui hipi.
2CH 32:29 I hangā anō e ia ētahi pā mōna, ā, he tini anō ngā kāhui hipi, kau hoki; nui atu hoki te taonga i hōmai e te Atua ki a ia.
2CH 32:30 Nā, taua Hetekia anō i puru tō runga putanga o te wai o Kihona; whakatikaia tonutia iho e ia ki te taha ki te hauāuru o te pā o Rāwiri. Oti pai ana hoki i a Hetekia āna mahi katoa.
2CH 32:31 I ngā karere ia a ngā rangatira o Papurōna i unga mai nei ki a ia ki te ui ki te merekara i puta ki te whenua, i mahue ia i te Atua, kia whakamātauria ai ia, kia mōhiotia ai ngā mea katoa i tōna ngākau.
2CH 32:32 Nā, ko ērā atu meatanga a Hetekia, me āna mahi atawhai, nanā, kua oti te tuhituhi ki te kite a Ihāia poropiti tama a Āmoho, ki te pukapuka o ngā kīngi o Hūrā, o Īharaira.
2CH 32:33 Nā, kua moe a Hetekia ki ōna mātua, ā, tanumia iho ki tō runga rawa o ngā urupā o ngā tama a Rāwiri; ā, i tōna matenga ka whakakorōriatia ia e Hūrā katoa, rātou ko ngā tāngata o Hiruhārama. Ā, ko tāna tama, ko Mānahi, te kīngi i muri i a ia.
2CH 33:1 Tekau mā rua ngā tau o Mānahi i tōna kīngitanga, ā, e rima tekau mā rima ōna tau i kīngi ai ia ki Hiruhārama.
2CH 33:2 Ā, he kino tāna mahi ki te titiro a Ihowā, i rite ki ngā mea whakarihariha a ngā iwi i peia nei e Ihowā i te aroaro o ngā tama a Īharaira.
2CH 33:3 I hangā anō hoki e ia ngā wāhi tiketike i wāhia e tōna pāpā, e Hetekia; i whakaara i ngā āta ki ngā Paara, i hangā Aherimi; koropiko ana ia ki te ope o te rangi, mahi ana ki a rātou.
2CH 33:4 I hangā anō e ia ētahi āta ki te whare o Ihowā, ki tā Ihowā i kī rā, “Ko Hiruhārama hei waihotanga mō tōku ingoa ake ake.”
2CH 33:5 I hangā anō e ia ētahi āta mā te ope katoa o te rangi ki ngā marae e rua o te whare o Ihowā.
2CH 33:6 Meatia ana e ia āna tamariki kia tika nā waenganui i te ahi i te aroaro o te tama a Hinomo, rapua ana e ia he tohu i ngā kapua, i ngā nākahi. Kei te mākutu anō ia, kei te whai ki ngā atua māori, ki ngā mata māori. Nui atu tāna kino i mahi ai ki te titiro a Ihowā, hei whakapātaritari mōna.
2CH 33:7 I whakatūria anō e ia te whakapakoko, te āhua i hangā e ia, ki te whare o te Atua, ki tā te Atua i kī rā ki a Rāwiri rāua ko tāna tama, ko Horomona, “Hei tēnei whare, hei Hiruhārama i whiriwhiria nei e ahau i roto i ngā iwi katoa o Īharaira, ahau waiho ai i tōku ingoa ā ake ake;
2CH 33:8 ā, heoi āku whakanekehanga i te waewae o Īharaira i te whenua i whakaritea e ahau mō ō koutou mātua kia mau rāia rātou ki te mahi i ngā mea katoa i whakahaua e ahau ki a rātou, kia rite ki te ture katoa, ki ngā tikanga, ki ngā whakaritenga i whakapuakina nei e Mohi.”
2CH 33:9 Heoi, whakakotititia ana e Mānahi a Hūrā me ngā tāngata o Hiruhārama kia nui atu tā rātou mahi kino i tā ngā iwi i hunā nei e Ihowā i te aroaro o ngā tama a Īharaira.
2CH 33:10 I kōrero hoki a Ihowā ki a Mānahi rātou ko tōna iwi; heoi kīhai rātou i rongo.
2CH 33:11 Nā reira i kawea mai ai e Ihowā ki runga ki a rātou ngā rangatira o te ope o te kīngi o Ahiria; ā, ka mau i a rātou a Mānahi i te taura maitai; herea iho ki te mekameka, kawea ana ki Papurōna.
2CH 33:12 Nā, i a ia i te hē, ka īnoi ia ki a Ihowā, ki tōna Atua, ka whakaiti rawa i a ia i te aroaro o te Atua o ōna mātua,
2CH 33:13 īnoi ana ki a ia; ā, ka tahuri tērā ki a ia, ka rongo ki tāna īnoi. Nā, ka whakahokia ia ki Hiruhārama, ki tōna kīngitanga. Kātahi ka mōhio a Mānahi ko Ihowā te Atua.
2CH 33:14 I muri i tēnei ka hangā e ia he taiepa i waho o te pā o Rāwiri, i te taha ki te hauāuru o Kihona, ki te awaawa, ā tae noa ki te tomokanga i te Kūwaha Ika; ā, taiepatia ana a Ōpere ā whawhe noa, hangā ana e ia kia tiketike rawa. I whakanohoia anō e ia ētahi rangatira māia ki ngā pā taiepa katoa o Hūrā.
2CH 33:15 I whakakāhoretia anō e ia ngā atua kē, me te whakapakoko i roto i te whare o Ihowā, me ngā āta katoa i hangā e ia ki te maunga o te whare o Ihowā ki Hiruhārama; ākiritia atu ana e ia ki waho o te pā.
2CH 33:16 I hangā anō e ia te āta a Ihowā; patua iho e ia ki runga he patunga mō te pai, ā, mō te whakawhetai, i kī atu anō ki a Hūrā kia mahi ki a Ihowā, ki te Atua o Īharaira.
2CH 33:17 I patu whakahere anō ia te iwi i runga i ngā wāhi tiketike; otiia ki a Ihowā, ki tō rātou Atua anake.
2CH 33:18 Nā, ko ērā atu meatanga a Mānahi, me tāna īnoi ki tōna Atua, me ngā kōrero a ngā matakite i kōrero nei ki a ia i runga i te ingoa o Ihowā, o te Atua o Īharaira, nanā, kei ngā pukapuka o ngā mahi a ngā kīngi o Īharaira.
2CH 33:19 Nā, ko tāna īnoi, me tō te Atua tahuritanga ki a ia, me tōna hara katoa, me tōna hē, me ngā wāhi i hangā ai e ia ngā wāhi tiketike, i whakatūria ai e ia ngā Aherimi, me ngā whakapakoko i te mea kīanō ia i whakaiti i a ia, nanā, kei te tuhituhi i roto i ngā kōrero a Hohai.
2CH 33:20 Heoi, kua moe a Mānahi ki ōna mātua, ā, tanumia iho ki tōna whare, ā, ko tāna tama, ko Amono, te kīngi i muri i a ia.
2CH 33:21 E rua tekau mā rua ngā tau o Amono i tōna kīngitanga, ā, e rua ngā tau i kīngi ai ia ki Hiruhārama.
2CH 33:22 Ā, he kino tāna mahi ki tā Ihowā titiro, i rite ki tā tōna pāpā, ki tā Mānahi i mea ai. I patu whakahere hoki a Amono ki ngā whakapakoko katoa i hangā e tōna pāpā, e Mānahi, ā, mahi ana ki a rātou.
2CH 33:23 Kīhai hoki i whakaiti i a ia ki te aroaro o Ihowā, kīhai i pērā me tōna pāpā, me Mānahi i whakaiti nei; heoi nui noa atu te hē o taua Amono nei.
2CH 33:24 Nā, kua whakatupuria he hē mōna e āna tāngata; patua iho ia ki roto ki tōna ake whare.
2CH 33:25 Otiia, i patua e te iwi o te whenua ngā tāngata katoa i whakatupuria ai te hē mō Kīngi Amono; ā, ka meinga e te iwi o te whenua tāna tama, a Hōhia, hei kīngi i muri i a ia.
2CH 34:1 E waru ngā tau o Hōhia i tōna kīngitanga, ā, e toru tekau mā tahi ngā tau i kīngi ai ia ki Hiruhārama.
2CH 34:2 Ā, tika tonu tāna mahi ki te titiro a Ihowā; i haere hoki ia i runga i ngā ara o tōna tupuna, o Rāwiri; kīhai hoki i peka ki matau, ki mauī.
2CH 34:3 I te waru hoki o ngā tau o tōna kīngitanga, i te mea he taitamariki anō ia, ka tīmata ia te rapu i te Atua o tōna tupuna, o Rāwiri; ā, i te tekau mā rua o ngā tau ka tīmata ia te tahi i te poke o Hūrā, o Hiruhārama, arā i ngā wāhi tiketike, i ngā Aherimi, i ngā whakapakoko whaowhao, i ngā whakapakoko whakarewa.
2CH 34:4 I wāhia anō e rātou ngā āta a ngā Paara i tōna aroaro; tapahia ana e ia ngā whakapakoko rā i runga ake o aua āta, mongamonga noa i a ia ngā Aherimi, ngā whakapakoko whaowhao, me ngā whakapakoko whakarewa, tukia ana e ia kia puehu, ruia atu ana ki runga ki ngā urupā o te hunga i patu whakahere ki a rātou.
2CH 34:5 I tahuna anō e ia ngā wheua o ngā tohunga ki runga ki ā rātou āta, ā, tahia ana e ia te poke o Hūrā, o Hiruhārama.
2CH 34:6 Pērā ana anō ia i ngā pā o Mānahi, o Ēparaima, o Himiona, ā tae noa ki Napatari, i roto i tō rātou ururua, ā puta noa, puta noa.
2CH 34:7 Nā, ka wāhia iho e ia ngā āta, ā, ka tukia ngā Aherimi me ngā whakapakoko kia puehu, ā poto noa i a ia te tapatapahi ngā whakapakoko rā puta noa i te whenua o Īharaira. Nā, hoki ana ia ki Hiruhārama.
2CH 34:8 Nā, i te tekau mā waru o ngā tau o tōna kīngitanga, i te mea ka oti nei te poke o te whenua, o te whare, te tahi, ka ungā e ia a Hapana tama a Atāria rātou ko Maaheia kāwana o te pā, ko te kaiwhakamahara, ko Ioaha tama a Iehoahata, ki te hanga i te whare o Ihowā, o tōna Atua, kia pai.
2CH 34:9 Nā, haere ana rātou ki a Hirikia tohunga nui, ā, hoatu ana e rātou te moni i kawea ki te whare o te Atua, tā ngā Rīwaiti, tā ngā kaitiaki o ngā tatau i kohikohi ai i te ringa o Mānahi, o Ēparaima, i ngā mōrehu katoa o Īharaira, i a Hūrā katoa, i a Pineamine, i ngā tāngata anō o Hiruhārama.
2CH 34:10 Ā, nā rātou i hoatu ki te ringa o ngā kaimahi i tohutohu nei i te whare o Ihowā; ā, hoatu ana e ēnei ki ngā kaimahi i mahi nei i te whare o Ihowā hei hanga i ngā pakaru, hei whakapai i te whare.
2CH 34:11 Arā i hoatu e rātou ki ngā kāmura, ki ngā kaihanga, hei hoko i ngā kōhatu tārai, i ngā rākau mō ngā hononga, hei whakanoho rākau anō ki ngā whare i kore nei i ngā kīngi o Hūrā.
2CH 34:12 Ā, pono tonu te mahinga a aua tāngata i te mahi. Nā, ko ngā kaitohutohu i a rātou, ko Iahata, ko Opāria, he Rīwaiti, nō ngā tama a Merari; ko Hakaraia, ko Mehūrāma, nō ngā tama a ngā Kohati, hei whakahohoro; me ētahi atu anō o ngā Rīwaiti katoa i mōhio ki ngā mea whakatangi.
2CH 34:13 Ko rātou anō hei rangatira mō ngā kaipīkau, hei kaitirotiro anō mō te hunga katoa e mahi ana i tēnei mahi rānei, i tērā mahi rānei; ko ētahi anō o ngā Rīwaiti hei karaipi, hei kaitohutohu, hei kaitiaki kūwaha.
2CH 34:14 Nā, i tā rātou maunga atu i te moni i kawea nei ki te whare o Ihowā, ka kitea e te tohunga, e Hirikia te Pukapuka o te Ture a Ihowā i hōmai nei e Mohi.
2CH 34:15 Nā, ka oho a Hirikia, ka mea ki a Hapana karaipi, “Kua kitea e ahau te Pukapuka o te Ture i roto i te whare o Ihowā.” Ā, hōmai ana te pukapuka e Hirikia ki a Hapana.
2CH 34:16 Ā, nā Hapana i kawe te pukapuka ki te kīngi. I whakahokia anō e ia te kōrero ki te kīngi; i mea ia: “Ko ngā mea katoa i hōmai ki te ringa o āu pononga, e meatia ana e rātou.
2CH 34:17 Kua ringihia hoki e rātou te moni i kitea i roto i te whare o Ihowā, ā, hoatu ana ki te ringa o ngā kaitirotiro, ki te ringa anō o ngā kaimahi.”
2CH 34:18 Nā, ka kōrero a Hapana karaipi ki te kīngi, ka mea, “Kua hōmai he pukapuka ki ahau e Hirikia tohunga.” Ā, kōrerotia ana e Hapana i te aroaro o te kīngi.
2CH 34:19 Ā, nō te rongonga o te kīngi i ngā kupu o te Ture, haea ana e ia ōna kākahu.
2CH 34:20 Nā, ka whakahau te kīngi ki a Hirikia, ki a Ahikama tama a Hapana, ki a Aparono tama a Mika, ki a Hapana karaipi, ki a Ahaia tangata a te kīngi, ka mea:
2CH 34:21 “Haere, ui atu ki a Ihowā mōku; mō ngā mōrehu anō o Īharaira, o Hūrā, arā i te tikanga o ngā kupu o te pukapuka kua kitea nei; he nui hoki te riri o Ihowā kua ringihia nei ki a tātou, nō te mea kīhai ō tātou mātua i pupuri i te kupu a Ihowā, kīhai i mahi i ngā mea katoa i tuhituhia ki tēnei pukapuka.”
2CH 34:22 Heoi, haere ana a Hirikia rātou ko ā te kīngi i whakarite ai, ki a Hurura ki te wahine poropiti, he wahine ia nā Harumu, tama a Tokohata, tama a Haharaha, kaitiaki kākahu (i Hiruhārama hoki taua wahine e noho ana, i te wāhi tuarua) nā, kōrerotia ana ēnei mea e rātou ki a ia.
2CH 34:23 Nā, ka mea ia ki a rātou, “Ko te kōrero tēnei a Ihowā, a te Atua o Īharaira: Mea atu ki te tangata nāna koutou i tono mai ki ahau,
2CH 34:24 ‘Ko tā Ihowā kupu tēnei: Tēnei ahau te kawe nei i te kino mō tēnei wāhi, mō ngā tāngata anō o konei, arā ngā kanga katoa kua oti te tuhituhi ki te pukapuka i kōrerotia rā i te aroaro o te kīngi o Hūrā.
2CH 34:25 Mō rātou i whakarere i ahau, i tahu whakakakara hoki ki ngā atua kē, hei whakapātaritari i ahau ki ngā mahi katoa a ō rātou ringa; koia tōku riri ka ringihia ai ki tēnei wāhi; e kore anō e tineia.
2CH 34:26 Otiia, kia pēnei tā koutou kī atu ki te kīngi o Hūrā, nāna nei koutou i tono mai ki te ui ki a Ihowā: Ko te kupu tēnei a Ihowā, a te Atua o Īharaira: Nā, ngā kupu i rongo nā koe,
2CH 34:27 nā, i te mea i ngāwari tōu ngākau, ā, kua whakaiti koe i a koe i te aroaro o te Atua, i tōu rongonga ki āna kupu mō tēnei wāhi, mō ōna tāngata anō, ā, kua whakaiti koe i a koe ki tōku aroaro, kua haehae i ōu kākahu, ā, kua tangi ki tōku aroaro; kua rongo ahau, e ai tā Ihowā.
2CH 34:28 Nanā, ka huihuia atu koe e ahau ki ōu mātua, ka huihuia atu koe ki tōu tanumanga i runga i te rangimārie; e kore anō ōu kanohi e kite i ngā kino katoa e kawea mai e ahau ki tēnei wāhi, ki ngā tāngata anō o konei.’ ” Nā, whakahokia ana e rātou te kōrero ki te kīngi.
2CH 34:29 Kātahi te kīngi ka tono tāngata, ā, huihuia ana e ia ngā kaumātua katoa o Hūrā, o Hiruhārama.
2CH 34:30 Nā, haere ana te kīngi ki te whare o Ihowā, rātou ko ngā tāngata katoa o Hūrā, ko ngā tāngata o Hiruhārama, ko ngā tohunga, ko ngā Rīwaiti, ko te iwi katoa, te rahi, te iti. Nā, ka kōrerotia e ia ki ō rātou taringa ngā kupu katoa o te Pukapuka o te Kawenata i kitea nei ki te whare o Ihowā.
2CH 34:31 Nā, tū ana te kīngi ki tōna tūranga, ā, whakaritea ana e ia he kawenata ki te aroaro o Ihowā, arā kia whakapaua tōna ngākau, tōna wairua ki te whai ki a Ihowā, ki te pupuri i āna whakahau, i āna whakaaturanga, i āna tikanga, ki te whakamana anō i ngā kupu o te kawenata kua tuhituhia nei ki tēnei pukapuka.
2CH 34:32 Nā, meinga ana e ia te hunga katoa i kitea ki Hiruhārama, ki Pineamine, kia tū ki tāna. Nā, mahi ana ngā tāngata o Hiruhārama i ngā mea o te kawenata a te Atua, a te Atua o ō rātou mātua.
2CH 34:33 I whakakāhoretia anō e Hōhia ngā mea whakarihariha katoa o ngā whenua katoa i ngā tama a Īharaira; ā, whakamahia ana e ia ngā tāngata katoa i kitea ki a Īharaira, kia mahi ki a Ihowā, ki tō rātou Atua. I ōna rā katoa kīhai i mahue i a rātou te whai i a Ihowā, i te Atua o ō rātou mātua.
2CH 35:1 Nā, ka mahia e Hōhia te Kapenga ki Hiruhārama hei mea ki a Ihowā; patua ana e rātou te Kapenga i te tekau mā whā o te marama tuatahi.
2CH 35:2 I whakatūria anō e ia ngā tohunga ki tā rātou mahi, i whakatenatena anō i a rātou ki ngā mahi o te whare o Ihowā.
2CH 35:3 Ā, i mea ia ki ngā Rīwaiti, ki ngā kaiwhakaako o Īharaira katoa, arā ki te hunga i tapu ki a Ihowā: “Whakatakotoria te āka tapu ki te whare i hangā e Horomona tama a Rāwiri, kīngi o Īharaira; ā, kore ake e tau he pīkaunga ki runga ki ō koutou pokohiwi; me mahi koutou āianei ki a Ihowā, ki tō koutou Atua, ki tāna iwi anō, ki a Īharaira.
2CH 35:4 Kia āta rite koutou, tēnei whare, tēnei whare o ō koutou mātua, i ō koutou wehenga, kia rite ki te mea i tuhituhia e Rāwiri kīngi o Īharaira, ki te mea anō i tuhituhia e tāna tama, e Horomona.
2CH 35:5 “Me tū hoki ki te wāhi tapu; kia rite anō ngā wehenga o ngā whare o ngā mātua o ō koutou tuākana, tēina, o ngā tama a te iwi, ā, mā tēnei, mā tēnei, he wehenga o tētahi o ngā whare mātua o ngā Rīwaiti.
2CH 35:6 Ka patu ai i te Kapenga, ka whakatapu ai i a koutou, ka whakapai anō i ō koutou tuākana, tēina, kia rite ai tā rātou mahi ki tā Ihowā kupu, i kōrerotia rā e Mohi.”
2CH 35:7 I hōmai anō e Hōhia ki ngā tama a te iwi ētahi reme, ētahi kūao koati i te kāhui, ēnei katoa mō ngā Kapenga, hei mea mā te hunga katoa i reira, e toru tekau mano te maha, e toru mano ngā pūru; nō ngā taonga ēnei a te kīngi.
2CH 35:8 I hōmai anō e āna rangatira, he mea tāpae noa ki te iwi, ki ngā tohunga, ki ngā Rīwaiti. I hōmai e Hirikia, e Hakaraia, e Tehiere, arā e ngā rangatira o te whare o te Atua ki ngā tohunga ētahi kararehe hei mea Kapenga, e rua mano e ono rau, he pūru hoki e toru rau.
2CH 35:9 Nā, ko ōna tēina, ko Konania, ko Hemaia, ko Netanēre, me ngā rangatira o ngā Rīwaiti, me Hahapia, rātou ko Teiere, ko Iotāpara, hōmai ana e rātou ki ngā Rīwaiti hei mea Kapenga, e rima mano o ētahi kararehe anō, e rima rau ngā pūru.
2CH 35:10 Heoi, kua rite ngā mea mō te mahi, ā, kua tū ngā tohunga ki ō rātou tūranga, me ngā Rīwaiti, tēnei wehenga, tēnei wehenga o rātou, ko tā te kīngi hoki i whakahau ai.
2CH 35:11 Nā, ka patua te Kapenga, tāuhiuhia ana e ngā tohunga te toto i hōmai nei ki ō rātou ringa, ā, nā ngā Rīwaiti i tīhore.
2CH 35:12 I wehea hoki e rātou ngā tahunga tinana, hei hoatu ki ngā wehenga o ngā whare o ngā mātua o te iwi, hei whakahere ki a Ihowā, kia rite ai ki te mea i tuhituhia ki te Pukapuka a Mohi. Pēnā ana anō rātou ki ngā kau.
2CH 35:13 Ā, tunua ana e rātou te Kapenga ki te ahi, rite tonu tā rātou ki te tikanga. Ko ērā atu mea tapu ia i kōhuatia ki te kōhua, ki te pāta, ki te hōpane, ā, hohoro tonu te tuwha mā te iwi katoa.
2CH 35:14 Ā muri iho ka takā mā rātou ake ko ngā tohunga; i te mahi tonu hoki ngā tohunga, ngā tama a Ārona, i te whakaeke i ngā tahunga tinana, i te ngako ā pō noa; nō reira ko ngā Rīwaiti hei taka mā rātou ko ngā tohunga, ko ngā tama a Ārona.
2CH 35:15 Nā, ko ngā kaiwaiata, ko ngā tama a Āhapa i tō rātou nā tūranga, ko tā Rāwiri hoki ia i whakahau ai, rātou ko Āhapa, ko Hēmana, ko Ierutunu matakite a te kīngi. Nā, ko ngā kaitiaki kūwaha i tēnei kūwaha, i tēnei kūwaha rātou; kāhore he tikanga kia mahue tā rātou mahi, ko ō rātou tuākana hoki, ko ngā Rīwaiti, hei taka mā rātou.
2CH 35:16 Heoi, oti ake te mahi katoa ki a Ihowā i taua rā anō, arā te mahi i te Kapenga, me te whakaeke anō i ngā tahunga tinana ki runga ki te āta a Ihowā, ko tā Kīngi Hōhia hoki i whakahau ai.
2CH 35:17 Nā, i mahia i taua wā e ngā tama a Īharaira i kitea ki reira te Kapenga me te Hākari Taro Rēwenakore, e whitu rā.
2CH 35:18 Kāhore hoki he Kapenga hei rite mō tērā i mahia i roto i a Īharaira, nō ngā rā anō o Hamuera poropiti; kāhore hoki he Kapenga i mahia e ngā kīngi katoa o Īharaira hei rite mō tā Hōhia i mahi ai, rātou ko ngā tohunga, ko ngā Rīwaiti, ko Hūrā katoa, me te hunga o Īharaira i reira, me ngā tāngata anō o Hiruhārama.
2CH 35:19 Nō te tekau mā waru o ngā tau o te kīngitanga o Hōhia i mahia ai tēnei Kapenga.
2CH 35:20 I muri i tēnei katoa, i te mea ka oti i a Hōhia te temepara te whakapai ka haere a Neko kīngi o Īhipa ki te tatau ki Karakemihi ki te taha o Uparati, ā, puta ana a Hōhia ki te tū i a ia.
2CH 35:21 Otiia ka tono tāngata mai tērā ki a ia, hei mea, “Ko te aha tā tāua, e te kīngi o Hūrā? Ehara tāku ināianei i te mea ki a koe; engari ki te whare whawhaitia nei e ahau; kua mea hoki te Atua ki ahau kia hohoro tāku. Kei pokanoa koe ki tā te Atua; kei ahau hoki ia, kei whakangaro ia i a koe.”
2CH 35:22 Kīhai ia te mata o Hōhia i tahuri atu i a ia. Whakaahua kē ana ia i a ia, he mea kia whawhai rāua; kīhai anō i rongo ki ngā kupu a Neko, nō te māngai o te Atua; ā, haere ana ki te whawhai ki te raorao i Mekiro.
2CH 35:23 Nā, ka kōpere ngā kaikōpere ki a Kīngi Hōhia. Ā, ka mea te kīngi ki āna tāngata, “Kawea atu ahau; he nui rawa hoki tōku tūnga.”
2CH 35:24 Nā, ka tangohia ia e āna tāngata i te hāriata, ā, utaina ana ki te tuarua o ana hāriata, kawea atu ana ki Hiruhārama, ā, mate iho ia. Nā, tanumia ana ia ki ngā urupā o ōna mātua. Ā, tangihia ana a Hōhia e Hūrā katoa, e Hiruhārama.
2CH 35:25 Ā, i waiatatia anō e Heremaia he apakura mō Hōhia; i kōrerotia anō a Hōhia e ngā kaiwaiata, e ngā tāne, e ngā wāhine, i ā rātou apakura, ā taea noatia tēnei rā; ā, waiho iho e rātou hei tikanga mā Īharaira. Nanā, kei roto nā i ngā Waiata Tangi.
2CH 35:26 Nā, ko ērā atu meatanga a Hōhia, me āna mahi atawhai, rite tonu ki ngā mea i tuhituhia ki te Ture a Ihowā,
2CH 35:27 ko āna meatanga ō mua, ō muri, nanā, kei te tuhituhi i te pukapuka o ngā kīngi o Īharaira, o Hūrā.
2CH 36:1 Kātahi ka mau te iwi o te whenua ki a Iehoahata tama a Hōhia, ā, meinga ana ia e rātou hei kīngi i muri i tōna pāpā ki Hiruhārama.
2CH 36:2 E rua tekau mā toru ngā tau o Iehoahata i tōna kīngitanga, ā, e toru ngā marama i kīngi ai ia ki Hiruhārama.
2CH 36:3 Nā, ka whakatakā ia e te kīngi o Īhipa i Hiruhārama; ā, tangohia ana e tērā i te whenua, hei utu hē, kotahi rau taranata hiriwa me te taranata kōura.
2CH 36:4 I meinga anō tōna tuakana a Eriakimi e te kīngi o Īhipa hei kīngi mō Hūrā, mō Hiruhārama; whakawhitia kētia ake tōna ingoa ko Iehoiakimi. Nā, tangohia ana tō tēnei teina, a Iehoahata, e Neko, mauria ana e ia ki Īhipa.
2CH 36:5 E rua tekau mā rima ngā tau o Iehoiakimi i tōna kīngitanga, ā, kotahi tekau mā tahi ngā tau i kīngi ai ia ki Hiruhārama. He kino anō hoki tāna mahi ki te titiro a Ihowā, a tōna Atua.
2CH 36:6 Whakaekea ana ia e Nepukaneha kīngi o Papurōna, herea iho ki te mekameka, hei kawe i a ia ki Papurōna.
2CH 36:7 I mauria anō e Nepukaneha ngā oko o te whare o Ihowā ki Papurōna, hoatu ana e ia ki roto ki tōna temepara i Papurōna.
2CH 36:8 Nā, ko ērā atu meatanga a Iehoiakimi, me āna mea whakarihariha i mea ai, me āna tikanga i kitea, nanā, kei te tuhituhi i roto i te pukapuka o ngā kīngi o Īharaira, o Hūrā; ā, ko tāna tama, ko Iehoiakini, te kīngi i muri i a ia.
2CH 36:9 E waru ngā tau o Iehoiakini i tōna kīngitanga, ā, e toru ngā marama tekau ngā rā i kīngi ai ia ki Hiruhārama. Ā, he kino tāna mahi ki tā Ihowā titiro.
2CH 36:10 Nā, i te takanga o te tau, ka tono tāngata a Kīngi Nepukaneha, ā, mauria ana ia ki Papurōna, me ngā oko papai o te whare o Ihowā; ā, meinga ana e ia tōna tuakana a Terekia hei kīngi mō Hūrā, mō Hiruhārama.
2CH 36:11 E rua tekau mā tahi ngā tau o Terekia i tōna kīngitanga, ā, kotahi tekau mā tahi ngā tau i kīngi ai ia ki Hiruhārama.
2CH 36:12 Ā, he kino tāna mahi ki te titiro a Ihowā, a tōna Atua; kīhai hoki ia i whakaiti i a ia i te aroaro o te poropiti, o Heremaia, e kōrero ana i tā te māngai o Ihowā.
2CH 36:13 I whakakeke anō hoki ia ki a Kīngi Nepukaneha, nāna nei ia i whakaoati ki te Atua; heoi whakamārōkia ana e ia tōna kakī, whakapakeketia ana e ia tōna ngākau, kīhai i tahuri ki a Ihowā, ki te Atua o Īharaira.
2CH 36:14 Me ngā rangatira o ngā tohunga, o te iwi, nui atu tō rātou kino; i rite tonu ki ngā mea whakarihariha katoa o ngā tauiwi; whakapokea iho e rātou te whare o Ihowā i whakatapua nei e ia, ki Hiruhārama.
2CH 36:15 Ā, i unga tāngata a Ihowā, te Atua o ō rātou mātua, arā āna karere ki a rātou; maranga wawe ana ia ki te tono, he tohu hoki nāna i tāna iwi, i tōna nohoanga.
2CH 36:16 Otiia tāwaia iho e rātou ngā karere a te Atua, whakahāweatia ana āna kupu, tūkinotia ana āna poropiti, ā, ara noa te riri o Ihowā ki tāna iwi; ā, kāhore noa iho he whakaoranga.
2CH 36:17 Nā reira i kawea ai e ia te kīngi o ngā Karari ki a rātou, ā, patua iho e ia ā rātou taitama ki te hoari i roto i te whare o tō rātou wāhi tapu; kīhai i tohungia e ia te taitama, te kōtiro, te kaumātua, te koroheke tuarā piko; hoatu katoa ana e ia ki tōna ringa.
2CH 36:18 Nā, ko ngā oko o te whare o te Atua, ko ngā mea nunui, ko ngā mea ririki, ko ngā taonga o te whare o Ihowā, me ngā taonga o te kīngi rātou ko ōna rangatira; kawea katoatia ana e ia ēnei ki Papurōna.
2CH 36:19 Tahuna ake e rātou te whare o te Atua, wāhia iho te taiepa o Hiruhārama, tahuna ana ngā whare papai katoa ki te ahi, ngaro rawa i a rātou ngā oko papai katoa o reira.
2CH 36:20 Whakahekea atu ana hoki e ia te hunga i toe i te hoari ki Papurōna, ā, he pononga rātou māna, mā āna tama, ā taea noatia te kīngitanga o Pahia.
2CH 36:21 Hei whakaritenga mō te kupu a Ihowā, i kōrerotia e Heremaia, kia koa rā anō te whenua i ōna hāpati. He hāpati hoki ōna i ngā rā katoa o te ngaromanga; kia rite rā anō ngā tau e whitu tekau.
2CH 36:22 Nā, i te tuatahi o ngā tau o Hairuha kīngi o Pahia, ka whakamanā te kupu a Ihowā, i kōrerotia e Heremaia, ka whakaohokia e Ihowā te wairua o Hairuha kīngi o Pahia. Nā, ka tukua e tērā tāna karanga puta noa i tōna kīngitanga; he mea tuhituhi nāna, i mea ia:
2CH 36:23 Ko te kupu tēnei a Hairuha kīngi o Pahia: “ ‘Kua oti ngā kīngitanga katoa o te whenua te hōmai ki ahau e Ihowā, e te Atua o ngā rangi; kua whakahaua mai anō ahau e ia kia hangā i te whare mōna ki Hiruhārama, ki tērā i Hūrā. Ko wai tēnei o koutou o tāna iwi katoa, hei a ia a Ihowā, tōna Atua, kia haere ake hoki ia.’ ”
EZR 1:1 Nā, i te tau tuatahi o Hairuha kīngi o Pahia, he mea kia whakamanā ai te kupu a Ihowā, i whakapuakina e Heremaia, ka whakaohokia e Ihowā te wairua o Hairuha kīngi o Pahia, ā, tukua ana e tērā tāna karanga puta noa i tōna kīngitanga, i tuhituhia hoki e ia, i mea ia:
EZR 1:2 Ko te kupu tēnei a Hairuha kīngi o Pahia: Kua oti ngā kīngitanga katoa o te whenua te hōmai ki ahau e Ihowā, e te Atua o ngā rangi; kua whakahaua mai hoki ahau e ia kia hangā he whare mōna ki Hiruhārama, ki tērā i Hūrā.
EZR 1:3 Ahakoa ko wai o koutou o tāna iwi katoa – hei a ia tōna Atua – ā, me haere ake ia ki Hiruhārama, ki tērā i Hūrā, ki te hanga i te whare o Ihowā, o te Atua o Īharaira – ko ia nei te Atua, kei Hiruhārama anō ia.
EZR 1:4 Nā, ko te tangata ka mahue ki te wāhi e noho ai ia, mā ngā tāngata o tōna wāhi ia e āwhina ki te hiriwa, ki te kōura, ki te taonga, ki te kararehe, hei tāpiri mō ngā mea hoatu noa mō te whare o te Atua i Hiruhārama.
EZR 1:5 Kātahi ka whakatika ngā upoko o ngā whare o ngā mātua o Hūrā, o Pineamine, me ngā tohunga, me ngā Rīwaiti – me te hunga katoa i whakaohokia nei ō rātou wairua e te Atua – ka mea ki te haere ki te hanga i te whare o Ihowā i Hiruhārama.
EZR 1:6 Nā, ko ngā tāngata katoa i ō rātou taha, kei te whakakaha i ō rātou ringa ki te oko hiriwa, ki te kōura, ki te taonga, ki te kararehe, ki te mea utu nui, he mea tāpiri ki ngā mea hōmai noa katoa.
EZR 1:7 Ā, i whakaputaina e Kīngi Hairuha ngā oko o te whare o Ihowā i kawea atu nei e Nepukaneha i Hiruhārama, i hoatu nei e ia ki roto ki te whare o ōna atua.
EZR 1:8 I whakaputaina ēnei e Hairuha kīngi o Pahia, arā e Mitirerata kaitiaki taonga, taua atu ana e ia ki a Hehepātara rangatira o Hūrā.
EZR 1:9 Ko te maha tēnei o aua mea: e toru tekau peihana kōura, kotahi mano peihana hiriwa, e rua tekau mā iwa māripi;
EZR 1:10 e toru tekau ngā hāka kōura, ko ngā hāka hiriwa, he āhua kē, e whā rau kotahi tekau; ko ētahi oko kē, kotahi mano.
EZR 1:11 Ko ngā oko katoa, ko ngā mea kōura, ko ngā mea hiriwa, e rima mano e whā rau. Ko ēnei katoa i kawea atu e Hehepātara i te kawenga o ngā whakarau i Papurōna ki Hiruhārama.
EZR 2:1 Nā, ko ngā tama ēnei o te kāwanatanga i maunu atu nei i roto i ngā whakarau, i te hunga i whakahekea, i ērā i whakahekea e Nepukaneha kīngi o Papurōna ki Papurōna, ā, i hoki nei ki Hiruhārama, ki Hūrā, ki tōna pā, ki tōna pā.
EZR 2:2 I haere tahi nei me Herupapera; ko Hehua, ko Nehemia, ko Heraia ko Rēraia, ko Mororekai, ko Pirihana, ko Mitipara, ko Pikiwai, ko Rehumu, ko Paana. Ko te tokomaha o ngā tāngata o te iwi o Īharaira:
EZR 2:3 Ko ngā tama a Paroho, e rua mano kotahi rau e whitu tekau mā rua.
EZR 2:4 Ko ngā tama a Hepatia, e toru rau e whitu tekau mā rua.
EZR 2:5 Ko ngā tama a Araha, e whitu rau e whitu tekau mā rima.
EZR 2:6 Ko ngā tama a Pahata Moapa, nō ngā tama a Hehua, a Ioapa, e rua mano e waru rau kotahi tekau mā rua.
EZR 2:7 Ko ngā tama a Erama, kotahi mano e rua rau e rima tekau mā whā.
EZR 2:8 Ko ngā tama a Tatu, e iwa rau e whā tekau mā rima.
EZR 2:9 Ko ngā tama a Takai, e whitu rau e ono tekau.
EZR 2:10 Ko ngā tama a Pani, e ono rau e whā tekau mā rua.
EZR 2:11 Ko ngā tama a Pepai, e ono rau e rua tekau mā toru.
EZR 2:12 Ko ngā tama a Atakara, kotahi mano e rua rau e rua tekau mā rua.
EZR 2:13 Ko ngā tama a Aronikama, e ono rau e ono tekau mā ono.
EZR 2:14 Ko ngā tama a Pikiwai, e rua mano e rima tekau mā ono.
EZR 2:15 Ko ngā tama a Ārini, e whā rau e rima tekau mā whā.
EZR 2:16 Ko ngā tama a Atere, a Hetekia, e iwa tekau mā waru.
EZR 2:17 Ko ngā tama a Pētai, e toru rau e rua tekau mā toru.
EZR 2:18 Ko ngā tama a Ioraha, kotahi rau kotahi tekau mā rua.
EZR 2:19 Ko ngā tama a Hahumu, e rua rau e rua tekau mā toru.
EZR 2:20 Ko ngā tama a Kipara, e iwa tekau mā rima.
EZR 2:21 Ko ngā tama a Pēterehema, kotahi rau e rua tekau mā toru.
EZR 2:22 Ko ngā tāngata o Netopa, e rima tekau mā ono.
EZR 2:23 Ko ngā tāngata o Anatoto, kotahi rau e rua tekau mā waru.
EZR 2:24 Ko ngā tama a Ātamawete, e whā tekau mā rua.
EZR 2:25 Ko ngā tama a Kiriatārimi, a Kepira, a Peeroto, e whitu rau e whā tekau mā toru.
EZR 2:26 Ko ngā tama a Rama, a Kapa, e ono rau e rua tekau mā tahi.
EZR 2:27 Ko ngā tama a Mikimaha, kotahi rau e rua tekau mā rua.
EZR 2:28 Ko ngā tāngata o Pētēre, o Hai, e rua rau e rua tekau mā toru.
EZR 2:29 Ko ngā tama a Nepo, e rima tekau mā rua.
EZR 2:30 Ko ngā tama a Makapihi, kotahi rau e rima tekau mā ono.
EZR 2:31 Ko ngā tama a tētahi atu Erama, kotahi mano e rua rau e rima tekau mā whā.
EZR 2:32 Ko ngā tama a Hārimi, e toru rau e rua tekau.
EZR 2:33 Ko ngā tama a Roro, a Hariri, a Ono, e whitu rau e rua tekau mā rima.
EZR 2:34 Ko ngā tama a Heriko, e toru rau e whā tekau mā rima.
EZR 2:35 Ko ngā tama a Henaa, e toru mano e ono rau e toru tekau.
EZR 2:36 Ko ngā tohunga: arā ko ngā tama a Ieraia, o te whare o Hehua, e iwa rau e whitu tekau mā toru.
EZR 2:37 Ko ngā tama a Imere, kotahi mano e rima tekau mā rua.
EZR 2:38 Ko ngā tama a Pahuru, kotahi mano e rua rau e whā tekau mā whitu.
EZR 2:39 Ko ngā tama a Hārimi, kotahi mano kotahi tekau mā whitu.
EZR 2:40 Ko ngā Rīwaiti: arā ko ngā tama a Hehua, a Karamiēre; nō ngā tama a Horawia, e whitu tekau mā whā.
EZR 2:41 Ko ngā kaiwaiata: arā ko ngā tama a Āhapa, kotahi rau e rua tekau mā waru.
EZR 2:42 Ko ngā tama a ngā kaitiaki kūwaha: arā ko ngā tama a Harumu, ko ngā tama a Atere, ko ngā tama a Taramono, ko ngā tama a Akupu, ko ngā tama a Hatita, ko ngā tama a Hopai: huihuia kotahi rau e toru tekau mā iwa.
EZR 2:43 Ko ngā Netinimi: arā ko ngā tama a Tiha, ko ngā tama a Hahupa, ko ngā tama a Tapaoto,
EZR 2:44 ko ngā tama a Keroho, ko ngā tama a Hiaha, ko ngā tama a Parono,
EZR 2:45 ko ngā tama a Repana, ko ngā tama a Hakapa, ko ngā tama a Akupu,
EZR 2:46 ko ngā tama a Hakapa, ko ngā tama a Haramai, ko ngā tama a Hanana,
EZR 2:47 ko ngā tama a Kirere, ko ngā tama a Kahara, ko ngā tama a Reaia,
EZR 2:48 ko ngā tama a Retini, ko ngā tama a Nekora, ko ngā tama a Katama,
EZR 2:49 ko ngā tama a Uha, ko ngā tama a Pahea, ko ngā tama a Pehai,
EZR 2:50 ko ngā tama a Ahana, ko ngā tama a Meunimi, ko ngā tama a Nepuhimi,
EZR 2:51 ko ngā tama a Pakapuku, ko ngā tama a Hakupa, ko ngā tama a Harahuru,
EZR 2:52 ko ngā tama a Patarutu, ko ngā tama a Mehira, ko ngā tama a Haraha,
EZR 2:53 ko ngā tama a Parakoho, ko ngā tama a Hihera, ko ngā tama a Tāmaha,
EZR 2:54 ko ngā tama a Netia, ko ngā tama a Hatipa.
EZR 2:55 Ko ngā tama a ngā tāngata a Horomona: 1 arā ko ngā tama a Hotai, ko ngā tama a Hoperete, ko ngā tama a Perura, 1
EZR 2:56 ko ngā tama a Taara, ko ngā tama a Tarakono, ko ngā tama a Kirere; 1
EZR 2:57 ko ngā tama a Hepatia, ko ngā tama a Hatiri, ko ngā tama a Pokerete o Tepaimi, ko ngā tama a Āmi.
EZR 2:58 Ko ngā Netinimi katoa, rātou ko ngā tama a ngā tāngata a Horomona, e toru rau e iwa tekau mā rua.
EZR 2:59 Nā, ko ngā mea ēnei i haere mai i Teremera, i Terehareha, i Kerupu, i Ārana, i Imere; otiia kīhai i taea e rātou te whakaatu te whare o ō rātou pāpā, me tō rātou kāwai, nō Īharaira rānei: 1
EZR 2:60 ko ngā tama a Teraia, ko ngā tama a Tōpia, ko ngā tama a Nekora, e ono rau e rima tekau mā rua.
EZR 2:61 Nā, o ngā tama a ngā tohunga: 1 ko ngā tama a Hapaia, 2 (ko ngā tama a Koto, ko ngā tama a Paratirai; i tangohia hoki e ia tētahi o ngā tamāhine a Paratirai Kireari hei wahine māna, nā, kua huaina tō rātou ingoa ki a ia.)
EZR 2:62 I rapua e ēnei tō rātou pukapuka whakapapa, arā tō te hunga whakapapa tūpuna, heoi kīhai i kitea. Nā reira i kīia ai rātou he poke, i mutu ake ai tō rātou tohungatanga.
EZR 2:63 Kātahi te kāwana ka mea ki a rātou, kia kaua rātou e kai i ngā mea tapu rawa, kia ara ake rā anō tētahi tohunga kei a ia ngā Urimi me ngā Tumime.
EZR 2:64 Ko te huihui katoa, rūpeke, rūpeke, e whā tekau mā rua mano e toru rau e ono tekau;
EZR 2:65 hāunga ā rātou pononga tāne, ā rātou pononga wāhine, e whitu mano ēnei e toru rau e toru tekau mā whitu; i a rātou anō he kaiwaiata, he tāne, he wāhine, e rua rau.
EZR 2:66 Ko ō rātou hōiho e whitu rau e toru tekau mā ono; ko ō rātou muera e rua rau e whā tekau mā rima;
EZR 2:67 ko ō rātou kāmera e whā rau e toru tekau mā rima; ko ngā kāihe e ono mano e whitu rau e rua tekau.
EZR 2:68 Nā, ko ētahi o ngā upoko o ngā whare o ngā mātua, i tō rātou haerenga ki te whare o Ihowā i Hiruhārama, hihiko tonu rātou ki te hōmai mea hei whakatū mō te whare o te Atua ki tōna wāhi.
EZR 2:69 Rite tonu ki ō rātou rawa ngā mea i hōmai e rātou ki roto ki ngā taonga mō te mahi, e ono tekau mā tahi mano ngā moni kōura, e rima mano ngā pāuna hiriwa, me ngā kākahu mō ngā tohunga kotahi rau.
EZR 2:70 Nā, noho ana ngā tohunga me ngā Rīwaiti, me ētahi o te iwi, me ngā kaiwaiata, me ngā kaitiaki kūwaha, me ngā Netinimi ki ō rātou pā, me Īharaira katoa anō hoki ki ō rātou pā.
EZR 3:1 Nā, i te takanga mai o te whitu o ngā marama, ā, i ngā pā ngā tama a Īharaira, me te mea he tangata kotahi te iwi ki te huihui ki Hiruhārama.
EZR 3:2 Kātahi ka tū a Hehua tama a Iohereke ki runga, me ōna tēina, ngā tohunga, me Herupapera tama a Haratiera, me ōna tēina, ā, hangā ana e rātou te āta a te Atua o Īharaira, hei whakaekenga mō ngā tahunga tinana kia rite ai ki te mea i tuhituhia ki te ture a Mohi, a tā te Atua tangata.
EZR 3:3 Nā, whakatūria ana e rātou te āta ki tōna tūranga; i wehi hoki rātou i ngā tāngata o aua whenua. Ā, whakaekea atu ana e rātou ki runga ngā tahunga tinana ki a Ihowā, ngā tahunga tinana o te ata, o te ahiahi.
EZR 3:4 I mahia anō e rātou te Hākari Tīhokahoka, tērā i tuhituhia rā; i whakaekea anō ngā tahunga tinana o tēnei rā, o tēnei rā, rite tonu te maha; rite tonu ngā tikanga, ko ngā mea mō tēnei rā i tēnei rā.
EZR 3:5 Ā muri iho ko ngā tahunga tinana tūturu, ko o ngā kōwhititanga marama ko o ngā wā katoa i whakaritea e Ihowā, he mea whakatapu nāna, me a te hunga katoa i tāpae noa i te whakahere ki a Ihowā.
EZR 3:6 Nō te rā tuatahi o te whitu o ngā marama i tīmata ai te whakaeke i ngā tahunga tinana ki a Ihowā; otiia, kāhore anō te tūranga mō te temepara o Ihowā kia takoto noa.
EZR 3:7 Nā, i hoatu e rātou he hiriwa ki ngā kaimahi katoa, ki ngā kāmura; ā, me ētahi mea hei kai; hei inu, me te hinu mā ngā Haironi, mā ngā Tāirani, hei mea mō ētahi rākau hīta kia kawea mai i Repanōna ki te moana, ki Hopa, kia rite ai ki te kupu hōmai a Hairuha kīngi o Pahia ki a rātou.
EZR 3:8 Nā, i te rua o ngā tau o tō rātou taenga ki te whare o te Atua, ki Hiruhārama, i te rua o ngā marama, ka tīmata a Herupapera tama a Haratiera, me Hehua tama a Iohereke, me ērā atu o ō rātou tēina, o ngā tohunga o ngā Rīwaiti, me te hunga katoa i maunu mai i te whakarau ki Hiruhārama; i whakaritea anō e rāua ngā Rīwaiti, te hunga e rua tekau, maha atu rānei, ō rātou tau, hei kaitirotiro i te mahinga o te whare o Ihowā.
EZR 3:9 Kātahi ka tū a Hehua me āna tama me ōna tēina, a Karamiēre me āna tama, me ngā tama hoki a Hūrā, ānō he tangata kotahi, hei kaitirotiro i ngā kaimahi o te whare o te Atua. Ko ngā tama a Henarara, rātou ko ā rātou tama, ko ō rātou tēina, ko ngā Rīwaiti.
EZR 3:10 Nā, i te whakatakotoranga a ngā kaimahi i te tūranga o te temepara o Ihowā, ka whakatūria ngā tohunga, kākahu rawa ngā kākahu, he tētere anō kei a rātou, me ngā Rīwaiti, ngā tama a Āhapa e mau himipora ana, hei whakamoemiti mō Ihowā, hei pērā me tā Rāwiri kīngi o Īharaira i whakarite ai.
EZR 3:11 Nā, ka waiata rātou tētahi ki tētahi, ka whakamoemiti, ka whakawhetai ki a Ihowā, me te mea: “He pai hoki ia, ā, he mau tonu tāna mahi tohu ki a Īharaira.” Nā, hāmama katoa ana te iwi, he nui te hāmama; ka whakamoemiti ki a Ihowā, nō te mea ka takoto te tūranga o te whare o Ihowā.
EZR 3:12 Nā, he tokomaha o ngā tohunga, o ngā Rīwaiti, o ngā upoko o ngā whare o ngā mātua, he koroheke, i kite i te whare tuatahi, nō tō rātou kitenga i te tūranga mō tēnei whare i tō rātou aroaro, ka tangi, he nui te reo; ā, he tokomaha i hāmama te reo i te koa.
EZR 3:13 Nā, kīhai te reo o te hāmama koa i taea e te iwi te wehe i roto i te reo o te iwi e tangi ana; he nui hoki te hāmama i hāmama ai te iwi, ka rangona te reo i tawhiti.
EZR 4:1 Nā, i te rongonga o ngā hoariri o Hūrā rāua ko Pineamine e hangā ana e te hunga i whakaraua nei te temepara o Ihowā, o te Atua o Īharaira,
EZR 4:2 kātahi ka haere ki a Herupapera, ki ngā upoko o ngā whare o ngā mātua, ka mea ki a rātou, “Kia hanga tahi tātou; e rapu ana hoki mātou i tō koutou Atua, e pēnā ana me koutou; he patu whakahere tonu hoki tā mātou ki a ia, nō ngā rā o Etara Harono kīngi o Ahiria, i kawea mai ai mātou ki konei.”
EZR 4:3 Otiia ko Herupapera rātou ko Hehua, ko ērā atu o ngā upoko o ngā whare o ngā mātua o Īharaira ka mea ki a rātou, “Kāhore he ahatanga a koutou ki a mātou e hangā ai e koutou te whare mō tō mātou Atua; engari mā mātou tonu e hanga, hei mea ki a Ihowā, ki te Atua o Īharaira; ko tā Kīngi Hairuha, kīngi o Pahia tēnā i whakahau ai ki a mātou.”
EZR 4:4 Nā, ka whakawarea ngā ringa o te iwi o Hūrā e te iwi o te whenua, whakararurarua ana rātou kei hanga;
EZR 4:5 ā, i utua e rātou ētahi kaiwhakapuaki kōrero hei whakakāhore mō tō rātou whakaaro i ngā rā katoa o Hairuha kīngi o Pahia, ā tae noa ki te kīngitanga o Tariuha kīngi o Pahia.
EZR 4:6 Nā, i te kīngitanga o Ahahueruha, i te tīmatanga o tōna kīngitanga, ka tuhituhia e rātou he kupu whakahē mō ngā tāngata o Hūrā, o Hiruhārama.
EZR 4:7 Nā, i ngā rā o Arataherehe ka tuhituhi a Pihirama, a Mitirerata, a Tapēre me ērā atu o ō rātou hoa ki a Arataherehe kīngi o Pahia. Nā, ko te tuhituhinga o te pukapuka, nō Hīria ngā reta; nō Hīria anō te reo.
EZR 4:8 Nā Rehumu kaitiaki ture rāua ko Himihai kaituhituhi i tuhituhi te pukapuka whakahē mō Hiruhārama ki a Arataherehe, ki te kīngi, koia tēnei.
EZR 4:9 Nā, kei te tuhituhi a Rehumu kaitiaki ture, a Himihai kaituhituhi, rātou ko ērā atu o ō rāua hoa, ko ngā Rinai, ko ngā Aparahataki, ko ngā Taraperi, ko ngā Aparahi, ko ngā Arakewi, ko ngā tāngata o Papurōna, ko ngā Huhanaki, ko ngā Rehawi, ko ngā Erami,
EZR 4:10 me ērā atu anō o ngā iwi i whakahekea mai e Ahanapere, e taua tangata nui, ingoa nui, ā, whakanohoia ana e ia ki ngā pā o Hamaria, me ērā atu wāhi i tērā taha o te awa, ā, tērā atu ngā kupu.
EZR 4:11 Ko ngā kupu tēnei o te pukapuka i tukua e rātou ki a Kīngi Arataherehe: Nā āu pononga, nā ngā tāngata i tērā taha o te awa, ā, tērā atu ngā kupu.
EZR 4:12 Kia mōhiotia tēnei e te kīngi, ko ngā Hūrai i haere mai i tōu taha, kua tae mai ki a mātou ki Hiruhārama; kei te hanga rātou i taua pā tutū, kino; kua whakatūria e rātou ngā taiepa, kua oti anō ngā tūranga te honohono.
EZR 4:13 Nā, kia mōhiotia tēnei e te kīngi, ki te hangā tēnei pā, ki te whakatūria te taiepa, e kore e hōmai e rātou ngā takoha taonga, ngā takoha tāngata, ngā takoha huarahi; pēnei ka pā he raru ki ngā kīngi.
EZR 4:14 Nā, i te mea e kai ana mātou i te tote o te whare o te kīngi, ā, e kore e tika kia titiro mātou ki te kīngi e whakaititia ana, koia i ungā ai e mātou he tāngata kia mōhio ai te kīngi;
EZR 4:15 kia rapua ai i roto i te pukapuka whakamahara a ōu mātua. Ā, ka kitea e koe i roto i te pukapuka whakamahara, ā, ka mōhio koe he pā tutū tēnei pā, he kino ki ngā kīngi me ngā whenua, ā, he whakaoho whakakeke tā rātou i reira i mua. Ko te mea hoki tērā i whakangaromia ai tēnei pā.
EZR 4:16 E whakaatu ana tēnei mātou ki te kīngi, ki te hangā tēnei pā, ā, ka oti ōna taiepa te whakatū, mā reira ka kore he wāhi mōu i tērā taha o te awa.
EZR 4:17 Kātahi ka tukua he kupu e te kīngi: Ki a Rehumu kaitiaki ture, ki a Himihai kaituhituhi, ki ērā atu hoki o ō rāua hoa e noho ana i Hamaria, i ērā atu wāhi anō o te whenua i tērā taha o te awa, kia ora, ā, tērā atu ngā kupu.
EZR 4:18 Ko te pukapuka i tukua mai nei e koutou ki a mātou kua āta kōrerotia ki tōku aroaro.
EZR 4:19 Nā, kua whakahau nei ahau, ā, kua rapua, kua kitea he pā whakakeke tēnā i mua ki ngā kīngi; he mahi tutū, he mahi whakakeke tā reira.
EZR 4:20 He kīngi nunui anō hoki o Hiruhārama i kīngi ki ngā whenua katoa i tēnā taha o te awa; i hoatu anō he takoha taonga, he takoha tāngata, he takoha huarahi ki a rātou.
EZR 4:21 Nā, kīia e koutou kia whakamutua te mahi a ēnā tāngata, kia kaua hoki tēnā pā e hangā, kia hoatu rā anō e ahau tētahi atu ture.
EZR 4:22 Nā, kia tūpato kei māngere ki tēnei mea; me tuku koia te hē kia tupu hei hē mō ngā kīngi?
EZR 4:23 Heoi, i te kōrerotanga o ngā kupu o te pukapuka a Kīngi Arataherehe ki te aroaro o Rehumu, o Himihai kaituhituhi rātou ko ō rāua hoa, hohoro tonu rātou ki Hiruhārama ki ngā Hūrai, nā, uaua tonu te ringa i whakamutua ai tā rātou.
EZR 4:24 Kātahi ka mutu te mahi o te whare o te Atua i Hiruhārama. Mutu ake ā taea noatia te rua o ngā tau o te kīngitanga o Tariuha kīngi o Pahia.
EZR 5:1 Kātahi ngā poropiti, a Hākai poropiti, rāua ko Hakaraia, tama a Iro, ka poropiti ki ngā Hūrai i Hūrā, i Hiruhārama; i poropiti rātou ki a rātou i runga i te ingoa o te Atua o Īharaira.
EZR 5:2 Kātahi ka maranga a Herupapera tama a Haratiera, rāua ko Hehua tama a Iohereke, tīmataia ana e rāua te hanga i te whare o te Atua i Hiruhārama; i a rāua anō ngā poropiti a te Atua hei hoa mō rāua.
EZR 5:3 I taua wā anō ka tae mai ki a rātou a Tatenai kāwana o tēnei taha o te awa, rāua ko Hetara Potenai, me ō rāua hoa, ā, ka mea ki a rātou, “Nā wai koutou i whakahau kia hangā tēnei whare, kia whakaotia tēnei taiepa?”
EZR 5:4 Kātahi ka pēnei tā mātou kupu ki a rātou, “Ko wai ngā ingoa o ngā tāngata e hanga nei i tēnei whare?”
EZR 5:5 Otiia, i runga i ngā kaumātua o ngā Hūrai te kanohi o tō rātou Atua, i kore ai tā rātou e whakamutua kia tae atu rā anō taua mea ki a Tariuha; kātahi ka whakahokia mai ai he kupu mō tēnei mea, he mea tuhituhi.
EZR 5:6 Ko ngā kupu o te pukapuka i tukua e Tatenai kāwana o tērā taha o te awa, e Hetara Potenai, e ōna hoa, e ngā Aparahaki i tērā taha o te awa, ki a Kīngi Tariuha;
EZR 5:7 i tukua e rātou he pukapuka ki a ia, ā, i tuhituhia ki roto: Ki a Tariuha, ki te kīngi, kia tau te rangimārie katoa!
EZR 5:8 Kia mōhiotia tēnei e te kīngi, i haere mātou ki te whenua o Hūrā, ki te whare o te Atua nui e hangā nei ki ngā kōhatu nunui, e whakatakotoria ana hoki he rākau ki ngā taha; ā, kei te hohoro, kei te pai hoki te haere a tēnei mahi a ō rātou ringa.
EZR 5:9 Kātahi mātou ka ui ki aua kaumātua; he pēnei tā mātou kupu ki a rātou, Nā wai koutou i whakahau kia hanga tēnei whare, kia whakaotia ēnei taiepa?
EZR 5:10 I uia anō e mātou ō rātou ingoa, kia whakaaturia ai ki a koe, kia tuhituhia ai e mātou ngā ingoa o ō rātou tino tangata.
EZR 5:11 Nā, ko tā rātou kupu tēnei i whakahoki ai ki a mātou: He pononga mātou nā te Atua o te rangi, o te whenua, e hanga ana hoki i te whare i hangā i mua noa atu, ka maha nei ngā tau; ā, he kīngi nui te kīngi o Īharaira nāna nei i hanga, i whakaoti.
EZR 5:12 Otiia, i te whakapātaritaringa a ō mātou mātua ki te Atua o te rangi, ka hoatu rātou e ia ki te ringa o Nepukaneha Karari kīngi o Papurōna; nāna tēnei whare i tukituki, ā, whakaraua ana e ia te iwi ki Papurōna.
EZR 5:13 I te tuatahi ia o ngā tau o Hairuha kīngi o Papurōna, ka puaki he tikanga i a Kīngi Hairuha kia hangā tēnei whare o te Atua.
EZR 5:14 Nā, ko ngā oko, ko ngā mea kōura, hiriwa, o te whare o te Atua, i tangohia nei e Nepukaneha i te temepara i Hiruhārama, i kawea ki te temepara o Papurōna, i tangohia ērā e Kīngi Hairuha i te temepara o Papurōna. Ā, hōmai ana ki tētahi tangata, tōna ingoa ko Hehepātara, i meinga nei e ia hei kāwana,
EZR 5:15 ā, i mea ia ki a ia, “Tangohia ēnei mea, haere, kawea ki te temepara i Hiruhārama; ka hanga hoki i te whare o te Atua ki tōna wāhi.”
EZR 5:16 Kātahi ka haere mai taua Hehepātara, whakatakotoria ana e ia te tūranga mō te whare o te Atua i Hiruhārama; ko te hanganga anō tēnei o te temepara, o reira rā anō ā mohoa noa nei; heoi kāhore anō kia oti noa.
EZR 5:17 Nā, ki te pai te kīngi, me rapu i roto i te whare taonga o te kīngi i konā, i Papurōna, koia rānei i whakatakotoria e Kīngi Hairuha he tikanga kia hangā tēnei whare o te Atua ki Hiruhārama? Ā, kia meatia mai hoki e te kīngi tāna e pai ai mō tēnei mea ki a mātou.
EZR 6:1 Kātahi ka puaki tā Tariuha tikanga, ā, ka rapua i roto i te whare pukapuka, kei reira nei ngā taonga e rongoā ana i Papurōna.
EZR 6:2 Nā, kua kitea ki Akameta, i roto i te whare kīngi i te whenua o ngā Meri, he pukapuka, me tētahi kupu whakamahara i tuhituhia ki roto; koia tēnei:
EZR 6:3 I te tuatahi o ngā tau o Kīngi Hairuha i puaki tā Kīngi Hairuha tikanga; Mō te whare o te Atua i Hiruhārama, me hanga te whare, te wāhi e patua ai ngā patunga tapu, kia ū anō hoki te whakatakoto o ngā tūranga; kia ono tekau whatīanga te tiketike, kia ono tekau whatīanga te whānui.
EZR 6:4 Kia toru ngā rārangi o ngā kōhatu nunui, kia kotahi hoki rārangi o te rākau hou. Me hoatu anō ngā utu i roto i te whare o te kīngi;
EZR 6:5 me whakahoki anō ngā oko kōura, hiriwa, o te whare o te Atua, i tangohia nei e Nepukaneha i roto i te temepara i Hiruhārama, i kawea nei ki Papurōna; me kawe anō ki te temepara i Hiruhārama, ki tōna wāhi, ki tōna wāhi, me whakatakoto e koe ki te whare o te Atua.
EZR 6:6 Nā, e Tatenai, e Te Kāwana i tērā taha o te awa, e Hetara Potenai, me ō koutou hoa, me ngā Aparahaki, i tērā taha o te awa, kia matara mai koutou i reira.
EZR 6:7 Waiho noa atu te mahi o tēnā whare o te Atua. Waiho atu te kāwana o ngā Hūrai, rātou ko ngā kaumātua o ngā Hūrai, kia mahi ana i tēnā whare o te Atua i tōna wāhi.
EZR 6:8 Tēnei anō tētahi tikanga āku mō tā koutou e mea ai ki aua kaumātua o ngā Hūrai, hei mea mō te hanganga o tēnei whare o te Atua, kia hohoro te hoatu i ētahi o ngā taonga o te kīngi, arā o te takoha i tērā taha o te awa, ki ēnā tāngata, hei utu mea, kei whakawarea rātou.
EZR 6:9 Nā, ko ngā mea e kore ana i a rātou – ngā kūao pūru, ngā hipi toa, ngā reme hei tahunga tinana mā te Atua o te rangi, te wīti, te tote, te wāina, te hinu, ngā mea e whakaritea e ngā tohunga i Hiruhārama – kei mahue te hoatu ki a rātou i tēnā rā, i tēnā rā.
EZR 6:10 Kia whakaherea ai e rātou ētahi whakahere kakara ki te Atua o te rangi, kia īnoi ai mō te kīngi, mō āna tama, kia ora.
EZR 6:11 Kua hangā anō hoki e ahau he tikanga, ki te whakaputaia kētia tēnei kupu e tētahi, kia unuhia he kurupae i tōna whare, ā, ka whakairi i a ia, ka tārona ai ki runga; kia meinga anō tōna whare hei pūranga paru, hei utu mō tēnā.
EZR 6:12 Nā, mā te Atua, nāna nei i mea kia noho tōna ingoa ki reira, e huna ngā kīngi katoa, me ngā iwi, ina totoro ō rātou ringa ki te whakaputa kē, ki te whakangaro i tēnā whare o te Atua i Hiruhārama. Nāku, nā Tariuha te tikanga i whakatakoto; kia hohoro te meatanga.
EZR 6:13 Kātahi a Tatenai, te kāwana o tērā taha o te awa, a Hetara Potenai me ō rāua hoa, i te mea nā Kīngi Tariuha i tono mai, ka hohoro tonu tā rātou pērā.
EZR 6:14 Nā, kei te hanga ngā kaumātua o ngā Hūrai; tika tonu tā rātou, he mea nā te poropititanga a Hākai poropiti rāua ko Hakaraia tama a Iro. Nā, hanga ana rātou, ā, oti ake; i rite tonu ki te whakahau a te Atua o Īharaira, ki te whakahau a Hairuha, a Tariuha, a Arataherehe kīngi o Pahia.
EZR 6:15 Nō te toru o ngā rā o te marama Arara i oti ai tēnei whare, nō te ono anō tērā o ngā tau o te kīngitanga o Kīngi Tariuha.
EZR 6:16 Nā, i tāia e ngā tama a Īharaira, e ngā tohunga, e ngā Rīwaiti, me ērā atu o ngā tama a te whakarau, te kawa o tēnei whare o te Atua i runga i te koa.
EZR 6:17 Tāpaea ana hoki e rātou i te tāinga o te kawa o tēnei whare o te Atua, kotahi rau pūru, e rua rau hipi toa, e whā rau reme; ā, hei whakahere hara mō Īharaira katoa, kotahi tekau mā rua koati toa, ko te maha hoki ia o ngā iwi o Īharaira.
EZR 6:18 I whakatūria anō e rātou ngā tohunga, tēnei wehenga, tēnei wehenga, me ngā Rīwaiti, tēnei rōpū, tēnei rōpū, mō ngā mahi ki te Atua i Hiruhārama; ko te mea hoki i tuhituhia ki te Pukapuka a Mohi.
EZR 6:19 I te tekau mā whā o te marama tuatahi ka mahi ngā tama o te whakarau i te Kapenga.
EZR 6:20 I purea hoki ngā tohunga rātou ko ngā Rīwaiti, he mea pure huihui rātou, ā, patua ana e rātou te Kapenga mā ngā tama katoa o te whakarau, mā ō rātou tuākana, mā ngā tohunga, mā rātou anō hoki.
EZR 6:21 Nā, ka kai ngā tama a Īharaira i hoki mai nei i te whakarau, me te hunga katoa i mawehe mai nei ki a rātou i roto i te poke o ngā iwi o te whenua, ki te rapu i a Ihowā, i te Atua o Īharaira.
EZR 6:22 Ā, ka mahia e rātou te Hākari o te Taro Rēwenakore, e whitu ngā rā, i runga i te koa; nā Ihowā hoki rātou i mea kia koa, nāna hoki i whakaanga mai te ngākau o te kīngi o Ahiria ki a rātou, i whakakaha ai ia i ō rātou ringa ki te mahi i te whare o te Atua, o te Atua o Īharaira.
EZR 7:1 I muri i ēnei mea, i te kīngitanga o Arataherehe kīngi o Pahia, nā, ko Etera tama a Heraia, tama a Atāria, tama a Hirikia,
EZR 7:2 tama a Harumu, tama a Hāroko, tama a Ahitupu,
EZR 7:3 tama a Amaria, tama a Atāria, tama a Meraioto,
EZR 7:4 tama a Terahia, tama a Uti, tama a Puki,
EZR 7:5 tama a Apīhua, tama a Pinehaha, tama a Ereātara, tama a Ārona tino tohunga –
EZR 7:6 i haere mai tēnei Etera i Papurōna. Nā, he karaipi kakama ia ki te ture a Mohi i hōmai nei e Ihowā, e te Atua o Īharaira. I runga anō i a ia te ringa o Ihowā, o tōna Atua, ā, hōmai ana e te kīngi ki a ia ngā mea katoa i tonoa e ia.
EZR 7:7 Nā, i haere mai anō ētahi o ngā tama a Īharaira, nō ngā tohunga hoki o ngā Rīwaiti, o ngā kaiwaiata, o ngā kaitiaki kēti, o ngā Netinimi, ki Hiruhārama i te whitu o ngā tau o Kīngi Arataherehe.
EZR 7:8 Nā, kua tae ia ki Hiruhārama i te rima o ngā marama o te whitu o ngā tau o te kīngi.
EZR 7:9 Nō te tuatahi hoki o ngā rā o te marama tuatahi i tīmata ai ia te haere mai i Papurōna, ā, nō te tuatahi o ngā rā o te rima o ngā marama i tae mai ai ki Hiruhārama, i runga hoki i a ia te ringa pai o tōna Atua.
EZR 7:10 I whakatikaia hoki e Etera tōna ngākau ki te rapu i te Ture a Ihowā, ki te mahi anō hoki, ā, ki te whakaako i a Īharaira ki ngā tikanga, ki ngā whakaritenga.
EZR 7:11 Nā, ko ngā kupu tēnei o te pukapuka i hōmai e Kīngi Arataherehe ki te tohunga, ki te karaipi ki a Etera; he karaipi ia nō ngā kupu o ngā whakahau a Ihowā, nō āna tikanga hoki ki a Īharaira:
EZR 7:12 Nā Arataherehe kīngi o ngā kīngi ki te tohunga, ki a Etera, ki te karaipi o te ture a te Atua o te rangi, he tino tika, he aha atu.
EZR 7:13 Ko tāku tikanga tēnei ka whakatakotoria nei; nā, ko te hunga katoa o te iwi o Īharaira, o ōna tohunga hoki, o ngā Rīwaiti i tōku kīngitanga e whai ngākau ana kia haere ki Hiruhārama, me haere tahi me koe.
EZR 7:14 He mea unga nā hoki koe nā te kīngi rātou ko āna kaiwhakatakoto whakaaro tokowhitu, ki te ui i ngā mea o Hūrā, o Hiruhārama, kia rite ai ki te ture a tōu Atua i tōu ringa nā.
EZR 7:15 Ki te kawe anō i te hiriwa, i te kōura i hoatu noa nei e te kīngi, rātou ko āna kaiwhakatakoto whakaaro ki te Atua o Īharaira, kei Hiruhārama nei tōna nohoanga,
EZR 7:16 i te hiriwa katoa anō, i te kōura e kitea e koe i te kāwanatanga katoa o Papurōna, i ngā mea hōmai noa anō a te iwi, a ngā tohunga, a te hunga e hōmai noa ana mō te whare o tō rātou Atua i Hiruhārama.
EZR 7:17 Nā, kia hohoro koe te hoko ki tēnei moni he pūru, he hipi toa, he reme, he whakahere totokore, me ngā ringihanga, ka whakaeke ai ki runga ki te āta o te whare o tō koutou Atua i Hiruhārama.
EZR 7:18 Nā, ko tā koutou ko ōu tēina e pai ai mō te toenga o te hiriwa, o te kōura, meatia, kia rite ki tā tō koutou Atua e pai ai.
EZR 7:19 Ā, ko ngā oko ka hoatu nei ki a koe mō ngā mahi o te whare o tōu Atua, me hoatu e koe ki te aroaro o te Atua i Hiruhārama.
EZR 7:20 Ā, ko ērā atu mea e meatia ana e koe mō te whare o tōu Atua, e tika ana kia hoatu e koe, hoatu i roto i te whare taonga o te kīngi.
EZR 7:21 Nā, tēnei ahau, a Kīngi Arataherehe te whakatakoto nei i te tikanga ki ngā kaitiaki taonga katoa i tāwāhi o te awa: Nā, ko ngā mea katoa e tonoa i a koutou e Etera tohunga, e te karaipi o te ture a te Atua o te rangi, kia hohoro te mea,
EZR 7:22 ahakoa kotahi rau taranata hiriwa, ahakoa kotahi rau mēhua wīti, ahakoa kotahi rau pāti wāina, ahakoa kotahi rau pāti hinu; me te tote anō, e kore tōna taimaha e tuhituhia.
EZR 7:23 Ko ngā mea katoa e kīia mai ana e te Atua o te rangi, me mahi kia tino rite mō te whare o te Atua o te rangi; he aha oti kia ai ai he riri mai ki te kīngitanga o te kīngi rātou ko āna tama?
EZR 7:24 Kia mōhio anō koutou; ko ngā tohunga katoa, ko ngā Rīwaiti, ko ngā kaiwaiata, ko ngā kaitiaki kēti, ko ngā Netinimi, ko ngā kaimahi o tēnei whare o te Atua, e kore e tika kia tangohia he takoha taonga, he takoha tāngata, he takoha huarahi i a rātou.
EZR 7:25 Nā māu, e Etera, kei a koe nā hoki te mōhio o te Atua, māu e whakarite ngā kaiwhakarite, ngā kaiwhakarongo totohe, hei whakarite mō ngā iwi katoa i tērā taha o te awa, hei te hunga katoa e mōhio ana ki ngā ture a tōu Atua; nā, ko te hunga kāhore e mōhio, mā koutou e whakaako.
EZR 7:26 Ā, ko te tangata e kore e mahi i te ture a tōu Atua, i te ture anō a te kīngi, kia hohoro te whakapā o te whiu ki a ia, te whakamate rānei, te pei rānei he whenua kē, me tango rānei āna taonga, me here rānei.
EZR 7:27 Kia whakapaingia a Ihowā, te Atua o ō tātou mātua, nāna nei i hōmai te whakaaro pēnei ki te ngākau o te kīngi, arā kia whakapaia te whare o Ihowā i Hiruhārama;
EZR 7:28 nāna hoki i whakaputa aroha mai ki ahau i te aroaro o te kīngi rātou ko āna kaiwhakatakoto whakaaro, o ngā rangatira rarahi anō a te kīngi. Nā, kua whai kaha ahau; i runga hoki i ahau te ringa o Ihowā, o tōku Atua, nā, ka huihuia e ahau ētahi tino tāngata i roto i a Īharaira, hei hoa haere mōku ki runga.
EZR 8:1 Nā, ko ngā upoko ēnei o ngā whare o ō rātou mātua, ko ngā whakapaparanga anō ēnei o te hunga i haere atu hei hoa mōku i Papurōna, i te kīngitanga o Kīngi Arataherehe:
EZR 8:2 O ngā tama a Pinehaha, ko Kerehoma. O ngā tama a Itamara, ko Raniera. O ngā tama a Rāwiri, ko Hatuhu
EZR 8:3 o ngā tama a Hekania. O ngā tama a Paroho, ko Hakaraia; nā, ko ngā tāne i taua ngātahitia me ia, he mea whakapapa, kotahi rau e rima tekau.
EZR 8:4 O ngā tama a Pahata Moapa, ko Erihoenai tama a Terahia; nā, ko ōna hoa, e rua rau ngā tāne.
EZR 8:5 O ngā tama a Hekania, ko te tama a Tahatiere; nā, ko ōna hoa, e toru rau ngā tāne.
EZR 8:6 O ngā tama anō hoki a Ārini: ko Ēpere tama a Honatana; nā, ko ōna hoa, e rima tekau ngā tāne.
EZR 8:7 Nā, o ngā tama a Erama, ko Ihāia tama a Atāria; nā, ko ōna hoa, e whitu tekau ngā tāne.
EZR 8:8 O ngā tama a Hepatia, ko Tepāria tama a Mikaera; nā, ko ōna hoa, e waru tekau ngā tāne.
EZR 8:9 O ngā tama a Ioapa, ko Opāria tama a Tehiere; nā, ko ōna hoa, e rua rau kotahi tekau mā waru ngā tāne.
EZR 8:10 O ngā tama a Heromiti, ko te tama a Tohipia; nā, ko ōna hoa, kotahi rau e ono tekau ngā tāne.
EZR 8:11 O ngā tama a Pepai, ko Hakaraia tama a Pepai; nā, ko ōna hoa, e rua tekau mā waru ngā tāne.
EZR 8:12 Nā, o ngā tama a Atakara, ko Iohanana tama a Hakatana; nā, ko ōna hoa, kotahi rau kotahi tekau ngā tāne.
EZR 8:13 Nā, o ngā tama whakamutunga a Aronikama, ko ō rātou ingoa ēnei; ko Eriperete, ko Teiere, ko Hemaia; nā, ko ō rātou hoa, e ono tekau ngā tāne.
EZR 8:14 O ngā tama anō a Pikiwai, ko Utai, ko Tapuru; nā, ko ō rātou hoa, e whitu tekau ngā tāne.
EZR 8:15 Nā, ka huihuia rātou e ahau ki te awa e rere ana ki Ahawa, ā, noho ana mātou i reira e toru ngā rā; ā, i tāku tirohanga i te iwi, i ngā tohunga. Nā, kīhai tētahi o ngā tama a Rīwai i kitea e ahau ki reira.
EZR 8:16 Kātahi ahau ka tono kia tīkina a Eriētere, a Ariere, a Hemaia, a Erenātana, a Iaripi, a Erenātana, a Nātana, a Hakaraia, a Mehūrāma, he upoko ēnei; a Toiaripi anō, a Erenātana, he kaiwhakaako rāua.
EZR 8:17 Nā, ka ungā rātou e ahau ki a Iro; ki te upoko o te kāinga, o Kahipia; ā, i hoatu anō e ahau he kupu hei kōrero mā rātou ki a Iro rātou ko ōna tēina, ko ngā Netinimi, i te kāinga, i Kahipia, kia kawea mai ai e rātou he minita ki a mātou mō te whare o tō tātou Atua.
EZR 8:18 Nā, i runga i a mātou te ringa pai o tō mātou Atua, ā, ka kawea mai e rātou ki a mātou he tangata whai whakaaro, nō ngā tama a Māhari, tama a Rīwai, tama a Īharaira; a Herepia anō rātou ko āna tama, ko ōna tuākana, tēina, kotahi tekau mā waru;
EZR 8:19 ā, Hahapia hoki me Ihāia, nō ngā tama a Merari, rātou ko ōna tuākana, tēina, me ā rātou tama, e rua tekau;
EZR 8:20 o ngā Netinimi anō i whakaritea nei e Rāwiri, e ngā rangatira, mō ngā mahi a ngā Rīwaiti, e rua rau e rua tekau ngā Netinimi. He mea whakahua katoa ō rātou ingoa.
EZR 8:21 Kātahi ka karangatia e ahau he nohopuku ki reira ki te taha o te awa o Ahawa, kia whakaiti ai mātou i a mātou ki te aroaro o tō mātou Atua, kia rapua ai e mātou i a ia te ara tika mō mātou, mō ā mātou tamariki, mō ō mātou taonga katoa.
EZR 8:22 I whakamā hoki ahau ki te tono ki te kīngi i tētahi rōpū hōia me ētahi kaieke hōiho hei tuarā mō mātou ki te hoariri i te ara; i kōrero hoki mātou ki te kīngi, i mea, “Kei runga te ringa o tō mātou Atua i te hunga katoa e rapu ana i a ia, hei pai mō rātou; otiia, ka whawhai tōna kaha, me tōna riri, ki te hunga katoa e whakarere ana i a ia.”
EZR 8:23 Nā, nohopuku ana mātou, rapua ana e mātou he tikanga i tō mātou Atua mō tēnei mea, ā, tahuri mai ana ia ki a mātou.
EZR 8:24 Nā, ka motuhia e ahau ētahi o ngā tohunga kotahi tekau mā rua, a Herepia, a Hahapia, me ō rātou tēina kotahi tekau.
EZR 8:25 Nā, pāunatia ana e ahau te hiriwa, te kōura, me ngā oko, arā te whakahere ki te whare o tō mātou Atua i hōmai nei e te kīngi rātou ko āna kaiwhakatakoto whakaaro, ko āna rangatira, e Īharaira katoa anō i reira.
EZR 8:26 I pāunatia anō e ahau ki ō rātou ringa, te hiriwa e ono rau e rima tekau taranata, ngā oko hiriwa kotahi rau taranata; te kōura kotahi rau taranata.
EZR 8:27 Me ngā peihana kōura e rua tekau, kotahi mano tarami te taimaha; me ngā oko e rua, he parāhi pai, kanapa tonu, rite tonu ki te kōura te utu nui.
EZR 8:28 I mea anō ahau ki a rātou, “He tapu koutou ki a Ihowā, he tapu hoki ngā oko; he mea whakahere noa ake anō hoki te hiriwa me te kōura mā Ihowā, mā te Atua o ō koutou mātua.
EZR 8:29 Matapoporetia iho, tiakina, kia pāunatia rā anō e koutou ki te aroaro o ngā rangatira, o ngā tohunga, o ngā Rīwaiti, o ngā rangatira o ngā whare o ngā mātua o Īharaira, ki Hiruhārama, i roto i ngā rūma o te whare o Ihowā.”
EZR 8:30 Heoi, riro ana i ngā tohunga, i ngā Rīwaiti, te taimaha o te hiriwa, o te kōura, o ngā oko, hei mau ki Hiruhārama, ki te whare o tō tātou Atua.
EZR 8:31 Nā, ka tūria e mātou i te awa o Ahawa i te tekau mā rua o te marama tuatahi, ka haere ki Hiruhārama; i runga hoki i a mātou te ringa o tō mātou Atua, ā, whakaorangia ana mātou e ia i te ringa o te hoariri, o te kaiwhanga i te ara.
EZR 8:32 Nā, kua tae mātou ki Hiruhārama, ā, noho ana i reira, e toru ngā rā.
EZR 8:33 I te whā o ngā rā, nā, ko taua hiriwa, kōura, me ngā oko, ka pāunatia i roto i te whare o tō tātou Atua e te ringa o Meremoto tama a Uria tohunga. I a ia anō a Ereātara tama a Pinehaha; i a rāua hoki a Iotāpara tama a Hehua, rāua ko Noaria tama a Pinui, nō ngā Rīwaiti.
EZR 8:34 He mea tatau, he mea pāuna, tēnei, tēnei; i tuhituhia hoki ngā taimaha katoa i taua wā anō.
EZR 8:35 Nā, ko te hunga i haere mai nei i te whakarau, ngā tama a te hunga i whakaraua atu, tāpaea ana e rātou he tahunga tinana mā te Atua o Īharaira, kotahi tekau mā rua pūru, he mea mō Īharaira katoa, e iwa tekau mā ono hipi toa, e whitu tekau mā whitu reme, tekau mā rua koati toa, hei whakahere hara; ko tēnei katoa hei tahunga tinana ki a Ihowā.
EZR 8:36 Nā, ka hoatu ngā ture a te kīngi ki ngā kāwana nui a te kīngi, ki ngā kāwana iti i tērā taha o te awa; ā, ko rātou hei whakaneke ake i tā te iwi, i te whare anō o te Atua.
EZR 9:1 Ā, ka oti ēnei mea, ka haere mai ngā rangatira ki ahau, ka mea, “Kīhai te iwi o Īharaira rātou ko ngā tohunga, ko ngā Rīwaiti, i momotu i a rātou i roto i ngā iwi o ngā whenua; rite tonu tā rātou mahi ki ngā mea whakarihariha a ērā, arā a ngā Kanaani, a ngā Hiti, a ngā Perihi, a ngā Iepuhi, a ngā Āmoni, a ngā Moapi, a ngā Īhipiana, a ngā Amori.
EZR 9:2 Kua tangohia hoki e rātou ētahi o ā rātou tamāhine mā rātou, mā ā rātou tama. Nā, kua whakawhenumitia te momo tapu ki roto ki ngā iwi o aua whenua. Āe rā, nui noa ake te ringa o ngā rangatira, o ngā tino tāngata, ki tēnei hē.”
EZR 9:3 Nā, i tōku rongonga i tēnei, haea ana e ahau tōku kākahu me tōku koroka, hutihutia ana e ahau ngā huruhuru o tōku mātenga, o ōku pāhau, ā, noho ana, mīharo ana.
EZR 9:4 Kātahi ka huihui mai ki ahau te hunga katoa i wehi i ngā kupu a te Atua o Īharaira, he mea mō te hē o te hunga i whakaraua; ā, ko ahau i noho me te mīharo, ā taea noatia te whakahere o te ahiahi.
EZR 9:5 Nā, i te whakahere o te ahiahi, ka maranga ake ahau i tōku whakamā, me tōku kākahu anō me tōku koroka i haehaea; piko ana ōku turi, ā, ka wherahia atu ōku ringa ki a Ihowā, ki tōku Atua,
EZR 9:6 nā, ka mea ahau: E tōku Atua, he whakamā ahau, numinumi kau ana ahau, te ara ai tōku mata ki a koe, e tōku Atua. Kua tetere rawa hoki ō mātou hē ki runga ake i ō mātou māhunga; nui atu tō mātou poka kē, ā, tutuki noa ki te rangi.
EZR 9:7 Nui atu tō mātou poka kē, nō ngā rā anō o ō mātou mātua ā taea noatia tēnei rā, nā, ō mātou hē hoki i hoatu ai mātou, ō mātou kīngi, ō mātou tohunga, ki te ringa o ngā kīngi o ngā whenua, ki te hoari, ki te whakarau, hei pāhuatanga, ā, whakamā iho te mata, koia anō tēnei ināianei.
EZR 9:8 Nā, he iti nei tēnei wāhi i whakaputaina ai he atawhai e Ihowā, e tō mātou Atua, kia toe ai ētahi mōrehu o mātou; kia hōmai ai ki a mātou he titi ki tōna wāhi tapu, kia whakamāramatia ai ō mātou kanohi e tō mātou Atua, kia hōmai ai ki a mātou he oranga ngākau, he mea iti, i a mātou nei i te herehere.
EZR 9:9 He pononga hoki mātou; heoi i a mātou i te herehere kīhai mātou i mahue i tō mātou Atua; nā, whakaputaina ana e ia he aroha ki a mātou i te aroaro o ngā kīngi o Pahia, i hōmai ai he oranga ngākau ki a mātou, i whakaarahia ai te whare o tō mātou Atua, i hangā ai ōna wāhi kua ururuatia, i hōmai ai he taiepa ki a mātou ki Hūrā, ki Hiruhārama.
EZR 9:10 Nā, kia pēhea he kupu mā mātou, e tō mātou Atua, i muri i tēnei? Kua whakarērea hoki e mātou āu whakahau,
EZR 9:11 i whakahaua e koe, arā e āu pononga, e ngā poropiti, i kī mai hoki koe: Ko te whenua ka haere nei koutou ki reira tango ai, he whenua poke tērā i ngā poke o ngā iwi o ngā whenua, i ā rātou mea whakarihariha, kī tonu hoki i tētahi pito ki tētahi i tō rātou poke.
EZR 9:12 Nā, tēnā, kaua ā koutou tamāhine e hoatu mā ā rātou tama, kaua anō ā rātou tamāhine e tangohia mai mā ā koutou tama. Kaua anō e whai kia mau te rongo ki a rātou, kia whai pai rānei rātou ā ake ake; kia kaha ai koutou, kia kai ai hoki i ngā mea pai o te whenua, ā, waiho iho hei kāinga mō ā koutou tama ake tonu atu.
EZR 9:13 Nā, kua pā nei ēnei mea katoa ki a mātou mō ā mātou mahi hē, mō te nui o tō mātou poka kē, ā, i te mea he iti iho i ō mātou hē āu whiu, e tō mātou Atua, ā, hōmai ana e koe tēnei wāhi whakaoranga.
EZR 9:14 Kia takahi anō rānei mātou i āu tikanga, kia mārena ki ngā iwi nāna ēnei whakarihariha? E kore ianei koe e riri ki a mātou ā poto noa mātou i a koe, kore noa he mōrehu, he oranga?
EZR 9:15 E Ihowā, e te Atua o Īharaira, he tika tāu; e toe nei hoki mātou, he mōrehu, koia anō tēnei ināianei. Nanā, tēnei mātou kei tōu aroaro, me ō mātou hē; nā tēnei hoki tē tū ai he tangata ki tōu aroaro.
EZR 10:1 Nā, i a Etera e īnoi ana, e whāki hara ana, me te tangi, me te rutu i a ia ki mua i te whare o te Atua, nā, nui atu te hui i rūpeke ki a ia i roto i a Īharaira, ngā tāne, ngā wāhine, ngā tamariki, nui atu hoki te tangi i tangi ai te iwi.
EZR 10:2 Nā, ka oho a Hekania tama a Tehiere, ko tētahi nei ia o ngā tama a Erama, ka mea ki a Etera, Kua hē mātou ki tō tātou Atua, kua tango i ngā wāhine kē, i a ngā iwi o te whenua. Tēnei anō ia he mea e mārama ai ngā whakaaro o Īharaira ki tēnei mea.
EZR 10:3 Nā, kia whakaritea he kawenata ki tō tātou Atua, kia whakarērea aua wāhine katoa me ā rātou tamariki, kia rite ai ki te whakaaro i whakatakotoria e tōku ariki, e te hunga anō e wehi ana i te whakahau a tō tātou Atua; kia rite anō te meatanga ki tā te ture.
EZR 10:4 Whakatika, mau hoki te mahi; ā, ko mātou hei hoa mōu; kia uaua, meatia.
EZR 10:5 Kātahi ka whakatika a Etera, ā, whakaoatitia ana e ia ngā rangatira o ngā tohunga, o ngā Rīwaiti, o Īharaira katoa, kia meatia tēnei mea e rātou. Ā, oati ana rātou.
EZR 10:6 Kātahi a Etera ka whakatika i mua i te whare o te Atua, ā, haere ana ki te rūma o Iehohanana tama a Eriahipi. Ā, nō tōna taenga ki reira, kīhai ia i kai taro, kīhai i inu wai; e pōuri ana hoki ki te hē o te hunga i whakaraua.
EZR 10:7 Nā, ka karanga nui, puta noa i Hūrā, i Hiruhārama, ki ngā tama katoa o te whakarau, kia huihui ki Hiruhārama.
EZR 10:8 Nā, ko te tangata e kore e tae mai i ngā rā e toru, i tā ngā rangatira rātou ko ngā kaumātua i whakaaro ai, ka murua pūtia ōna rawa katoa, ā, ka motuhia ia i roto i te whakaminenga o ngā whakarau.
EZR 10:9 Nā, ko te huihuinga mai o ngā tāngata katoa o Hūrā, o Pineamine ki Hiruhārama i roto i aua rā e toru; ko te iwa tēnei o ngā marama, i te rua tekau o te marama. Nā, noho ana te iwi katoa i te marae o te whare o te Atua, wiri ana rātou, he whakaaro ki tēnei mea, he nui anō hoki te ua.
EZR 10:10 Nā, ka whakatika a Etera tohunga, ka mea ki a rātou, “Kua hē koutou, kua mārenatia ki ngā wāhine kē, nā, kua neke ake te hē o Īharaira.
EZR 10:11 Nā, whākina atu ngā hē ki a Ihowā, ki te Atua o ō koutou mātua, meatia hoki tāna i pai ai; motuhia mai hoki koutou i roto i ngā iwi o te whenua, i ngā wāhine kē hoki.”
EZR 10:12 Nā, ka whakahokia e te iwi katoa, he nui ō rātou reo ki te mea: “Ka rite ki tāu kupu tā mātou e mea ai.
EZR 10:13 Otiia, he tokomaha te iwi, he wā ua nui hoki tēnei; e kore anō mātou e kaha ki te tū i waho, ehara hoki tēnei i te mahi mō te rā kotahi, mō ngā rā e rua rānei, he nui rawa hoki tō mātou hē i tēnei mea.
EZR 10:14 Nā, me whakarite ō tātou rangatira mō te huihui katoa, ā, me haere mai i ngā wā e whakaritea te hunga katoa kua mārena ki ngā wāhine kē i ō tātou pā, rātou ko ngā kaumātua o tēnei pā, o tēnei pā, me ngā kaiwhakawā o reira, kia tahuri atu rā anō i a tātou te riri kaha o tō tātou Atua, ā, kia tutuki rā anō tēnei mea.
EZR 10:15 Ko Honatana anake tama a Atahere rāua ko Tahatia tama a Tikiwa i tū atu ki tēnei mea, ā, ko ō rāua hoa ko Mehūrāma rāua ko Hapetai Rīwaiti.”
EZR 10:16 Nā, i pēnā hoki ngā tama o te whakarau. Ā, ka wehea a Etera tohunga me ētahi upoko o ngā whare o ngā mātua nō tēnei whare, nō tēnei whare, o ō rātou mātua, he mea karanga katoa ō rātou ingoa; ā, noho ana rātou i te rā tuatahi o te tekau o ngā marama hei rapu i te tikanga o tēnei mea.
EZR 10:17 Poto rawa ake ngā tāngata katoa i mārena ki ngā wāhine kē, ko te rā tuatahi o te tuatahi o ngā marama.
EZR 10:18 Nā, kua mau ētahi o ngā tama a ngā tohunga he mea mārena ki ngā wāhine kē: arā nō ngā tama a Hehua tama a Iohereke rātou ko ōna tēina; ko Maaheia, ko Eriētere, ko Iaripi, ko Keraria.
EZR 10:19 Nā, ka tukua mai ō rātou ringa, mō ā rātou wāhine kia whakarērea, ā, ka hē nei rātou, ka tāpaea he hipi toa o te kāhui mō tō rātou hē. 1
EZR 10:20 Nā, o ngā tama a Imere: 2 ko Hanani, ko Tepāria. 1
EZR 10:21 Ā, o ngā tama a Hārimi: 2 ko Maaheia, ko Irāia, ko Hemaia, ko Tehiere, ko Utia. 1
EZR 10:22 O ngā tama a Pahuru: 2 ko Erioenai, ko Maaheia, ko Ihimaera, ko Netanēre, ko Hotapara, ko Ereaha.
EZR 10:23 O ngā Rīwaiti: 2 ko Hotapara, ko Himei, ko Keraia, (arā ko Kerita), ko Petahia, ko Hūrā, ko Eriētere. 1
EZR 10:24 O ngā kaiwaiata: 2 ko Eriahipi. 1 O ngā kaitiaki kūwaha: 2 ko Harumu, ko Tereme, ko Uri.
EZR 10:25 Nā, o Īharaira: O ngā tama a Paroho: ko Ramia, ko Tetia, ko Marakia, ko Miamini, ko Ereātara, ko Marakia, ko Penaia.
EZR 10:26 O ngā tama a Erama: ko Matania, ko Hakaraia, ko Tehiere, ko Apari, ko Teremoto, ko Irāia.
EZR 10:27 O ngā tama a Tatu: ko Erioenai, ko Eriahipi, ko Matania, ko Teremoto, ko Tāpara, ko Atita.
EZR 10:28 O ngā tama a Pepai: ko Iehohanana, ko Hanania, ko Tapai, ko Atarai.
EZR 10:29 Ā, o ngā tama a Pani: ko Mehūrāma, ko Maruku, ko Araia, ko Iahupu, ko Heara, ko Rāmoto.
EZR 10:30 O ngā tama a Pahata Moapa: ko Arana, ko Kerara, ko Penaia, ko Maaheia, ko Matania, ko Petarēre, ko Pinui, ko Mānahi.
EZR 10:31 O ngā tama a Hārimi: ko Eriētere, ko Ihīa, ko Marakia, ko Hemaia, ko Himiona,
EZR 10:32 ko Pineamine, ko Maruku, ko Hemaria.
EZR 10:33 O ngā tama a Hahumu: ko Matenai, ko Matata, ko Tāpara, ko Eriperete, ko Teremai, ko Mānahi, ko Himei.
EZR 10:34 O ngā tama a Pani: ko Maarai, ko Āmarama, ko Uere,
EZR 10:35 ko Penaia, ko Pereia, ko Keru,
EZR 10:36 ko Wania, ko Meremoto, ko Eriahipi,
EZR 10:37 ko Matania, ko Matenai, ko Taahau,
EZR 10:38 ko Pani, ko Pinui, ko Himei,
EZR 10:39 ko Heremia, ko Nātana, ko Araia,
EZR 10:40 ko Makanarepai, ko Hahai, ko Harai,
EZR 10:41 ko Atarēre, ko Heremia, ko Hemaria,
EZR 10:42 ko Harumu, ko Amaria, ko Hōhepa.
EZR 10:43 O ngā tama a Nepo: ko Teiere, ko Matitia, ko Tāpara, ko Tepina, ko Iarau, ko Hoera, ko Penaia.
EZR 10:44 Ko ēnei katoa, he hunga kua tango i te wāhine kē, kei ētahi hoki o rātou he wāhine kua whānau tamariki.
NEH 1:1 Ko ngā kupu a Nehemia tama a Hakaria: Nā, i te marama Kihireu, i te rua tekau o ngā tau, i ahau i Huhana, i te whare kīngi,
NEH 1:2 ka tae mai a Hanani, tētahi o ōku tēina, rātou ko ētahi tāngata o Hūrā; ā, ka ui ahau ki a rātou ki ngā Hūrai i mawhiti, i mahue o ngā whakarau, ki Hiruhārama hoki.
NEH 1:3 Ā, ka mea rātou ki ahau, “Ko ngā oranga i mahue o ngā whakarau i reira i taua kāwanatanga he nui te hē, te whakahāweatia; kua pakaru hoki te taiepa o Hiruhārama, ā, kua wera ōna kēti i te ahi.”
NEH 1:4 Ā, nō tōku rongonga i ēnei kupu, ka noho ahau, ka tangi, ka pōuri hoki ā taka noa ētahi rā, nā, nohopuku ana ahau, īnoi ana hoki ki te aroaro o te Atua o ngā rangi,
NEH 1:5 ā, ka mea ahau: “Auē, e Ihowā, e te Atua o te rangi, ko te Atua nui ia e wehingia ana, e pupuri ana i te kawenata, i te atawhai mō te hunga e aroha ana ki a ia, e pupuri ana i āna whakahau;
NEH 1:6 tēnā, kia tahuri mai tōu taringa, kia titiro mai anō ōu kanohi, kia whakarongo mai ai koe ki te īnoi a tāu pononga, e īnoi atu nei ki tōu aroaro i te ao, i te pō, mō āu pononga, mō ngā tama a Īharaira, i ahau e whāki nei i ngā hara o ngā tama a Īharaira i hara ai mātou ki a koe. Āe rā, kua hara ahau me te whare o tōku pāpā.
NEH 1:7 He rawa tā mātou mahi ki a koe, kīhai hoki i pupuri i ngā whakahau, i ngā tikanga, i ngā whakaritenga i whakahaua e koe ki tāu pononga ki a Mohi.
NEH 1:8 “Tēnā, maharatia te kupu i whakahaua e koe ki tāu pononga, ki a Mohi, i mea rā koe, ‘Ki te poka kē tā koutou, ka whakamararatia atu koutou e ahau ki roto ki ngā iwi;
NEH 1:9 otiia, ki te tahuri mai anō koutou ki ahau, ā, ka pupuri, ka mahi i āku whakahau, ahakoa i peia ētahi o koutou ki te pito whakamutunga o te rangi, ka kohikohia mai rātou e ahau i reira, ka kawea mai anō ki te wāhi i whiriwhiria e ahau kia noho tōku ingoa ki reira.’
NEH 1:10 “Nā, ko āu pononga ēnei, ko tāu iwi i hokona e koe, arā e tōu kaha nui, e tōu ringa kaha.
NEH 1:11 Tēnā, e te Ariki, tahuri mai tōu taringa ki te īnoi a tāu pononga, ki te īnoi hoki a āu pononga e mea nei kia wehi i tōu ingoa. Kia tika rā tā tāu pononga āianei, hōmai hoki ki a ia kia atawhaitia e tēnei tangata.” Ko ahau hoki te kaiwhakainu a te kīngi.
NEH 2:1 Heoi, i te marama Nihana i te rua tekau o ngā tau o Kīngi Arataherehe, i te mea he wāina i tōna aroaro, ka hāpainga ake e ahau te wāina, hoatu ana ki te kīngi. Kāhore hoki ahau i pōuri i mua atu i tōna aroaro.
NEH 2:2 Nā, ka mea te kīngi ki ahau, “He aha tōu kanohi i pōuri ai, kāhore nei hoki ōu mate? Ehara tēnei i te mea kē atu i te pōuri o te ngākau.” Nā, nui atu tōku wehi.
NEH 2:3 Anō rā ko ahau ki te kīngi, “Kia ora tonu te kīngi; he aha tōku mata i kore ai e pōuri, i te mea kua ururuatia te pā, te whare o ngā tanumanga o ōku mātua, ā, kua pau ōna kēti i te ahi?”
NEH 2:4 Anō rā ko te kīngi ki ahau, “He aha te mea ka tonoa nei e koe?” Heoi, ko tāku īnoinga ki te Atua o te rangi.
NEH 2:5 Nā, ka kī atu ahau ki te kīngi, “Ki te pai te kīngi, ki te mea hoki e paingia ana tāu pononga i tōu aroaro, kia ungā ahau e koe ki Hūrā, ki te pā o ngā tanumanga o ōku mātua, kia hangā ai e ahau.”
NEH 2:6 Nā, ka mea te kīngi ki ahau (i tōna taha anō hoki te kuīni e noho ana), “Kia pēhea te roa ōu ka haere nei, ā, hei āhea koe hoki mai ai?” Nā, kua pai ki te kīngi kia ungā ahau, ā, whakaritea ana e ahau he wā ki a ia.
NEH 2:7 I mea anō ahau ki te kīngi, “Ki te pai te kīngi, me hōmai he pukapuka ki ahau ki ngā kāwana i tāwāhi o te awa, kia tukua ahau e rātou kia puta atu ā tae noa ki Hūrā;
NEH 2:8 he pukapuka anō hoki ki a Āhapa, kaitiaki o te ngahere a te kīngi, kia hōmai e ia ētahi rākau ki ahau hei hanga mō ngā kurupae o ngā kēti o te nohoanga rangatira i te whare, mō te taiepa hoki o te pā, mō te whare hoki e haere atu ai ahau.” Nā, ka hōmai e te kīngi ki ahau; i rite tonu ki tā te ringa pai o tōku Atua i runga i ahau.
NEH 2:9 Kātahi ka haere ahau ki ngā kāwana i tērā taha o te awa, hoatu ana e ahau ngā pukapuka a te kīngi ki a rātou. I ungā anō e te kīngi ētahi rangatira hōia, me ētahi hōia eke hōiho hei hoa mōku.
NEH 2:10 Ā, nō te rongonga o Hanaparata Horoni rāua ko te pononga, ko Tōpia Āmoni, nui rawa te kino i kino ai ki a rāua, nō te mea kua tae he tangata hei rapu i te pai mō ngā tama a Īharaira.
NEH 2:11 Heoi, kua tae ahau ki Hiruhārama, ā, e toru ōku rā ki reira.
NEH 2:12 Nā, ka maranga ahau i te pō, mātou ko ētahi tāngata torutoru hei hoa mōku; kīhai hoki i kōrerotia e ahau ki tētahi tā tōku Atua i hōmai ai ki tōku ngākau kia meatia ki Hiruhārama. Kāhore hoki ōku kararehe; heoi anō ko te kararehe i eke ai ahau.
NEH 2:13 I haere anō ahau i te pō i te Kūwaha o te Raorao, ki te ritenga o te puna tarakona, ki te Kūwaha Paru anō hoki, ā, tirotirohia iho e ahau ngā taiepa o Hiruhārama kua pakaru nei me ōna kēti kua pau nei i te ahi.
NEH 2:14 Kātahi ahau ka haere ki te Kūwaha o te Puna, ki te poka wai anō a te kīngi; heoi kāhore he wāhi e haere atu ai te kararehe e waha ana i ahau.
NEH 2:15 Nā, piki ana ahau i te awaawa i te pō, tirotirohia ana e ahau te taiepa. Nā, tahuri ana ahau, tomo ana nā te Kūwaha o te Raorao, hoki ana.
NEH 2:16 Heoi, kīhai ngā rangatira i mōhio e haere ana rānei ahau ki hea, he aha rānei tāku e mea nei; kāhore anō kia kōrerotia noatia e ahau ki ngā Hūrai, ki ngā tohunga, ki ngā tino tāngata, ki ngā rangatira, ki tērā atu hunga rānei i mahi nei i ngā mahi.
NEH 2:17 Kātahi ka mea ahau ki a rātou, “Ka kite koutou i te nui o tō tātou aituā, ko Hiruhārama kua ururuatia, ko ōna kēti kua wera i te ahi. Haere mai, tātou ka hanga i te taiepa o Hiruhārama; kei waiho tonu tātou hei tāwainga.”
NEH 2:18 Nā, ka kōrerotia e ahau ki a rātou te ringa o tōku Atua i pai nei ki runga i ahau, me ngā kupu a te kīngi i kōrerotia ki ahau. Nā, ka mea rātou, “Tātou ka whakatika, ka hanga.” Heoi, kei te whakakaha rātou i ō rātou ringa mō tēnei mahi pai.
NEH 2:19 I te rongonga ia o Hanaparata Horoni, rātou ko te pononga, ko Tōpia Āmoni, ko Keheme Ārapi, ka whakahī mai rātou ki a mātou, ka whakahāwea ki a mātou, ka mea, “He aha tēnei mea ka meatia nei e koutou? Ka whakakeke rānei koutou ki te kīngi?”
NEH 2:20 Kātahi ka whakahoki ahau ki a rātou, ka mea ki a rātou, “Ko te Atua o te rangi, māna e tika ai tā mātou. Nā, ka whakatika mātou, āna tāngata, ka hanga. Ko koutou ia, kāhore he wāhi, he tikanga, he maharatanga rānei, i Hiruhārama.”
NEH 3:1 Kātahi ka whakatika a Eriahipi, tino tohunga, rātou ko ōna tēina ko ngā tohunga, kei te hanga i te Kūwaha Hipi; whakatapua ana e rātou, whakatūria ana e rātou ōna tatau tae noa ki te Pourewa o Meaha, whakatapua ana e rātou tae noa ki te Pourewa o Hananēre.
NEH 3:2 I tōna taha ko ngā tāngata o Heriko e hanga ana, ā, i te taha o ērā ko Tākuru tama a Imiri.
NEH 3:3 Nā, ko te Kūwaha Ika, nā ngā tama a Hahenaa i hanga; nā rātou i whakanoho ōna rākau, i whakatū hoki ōna tatau, ōna raka, me ōna tūtaki.
NEH 3:4 I kō atu i a rātou ko Meremoto tama a Uria, tama a Koto ki te hanga. Ā, i kō atu i a rātou ko Mehūrāma tama a Perekia, tama a Mehetapēre ki te hanga. Ā, i kō atu i ēnā ko Hāroko tama a Paana ki te hanga.
NEH 3:5 I tō rātou taha ko ngā Tekoi ki te hanga; otirā kīhai ō rātou tāngata nunui i tuku i ō rātou kakī ki te mahi a tō rātou Ariki.
NEH 3:6 Nā, ko te Kūwaha Tawhito i hangā e Ioiara tama a Pahea, rāua ko Mehūrāma tama a Pehoreia. Nā rāua ōna rākau i whakanoho, nā rāua anō i whakatū ōna tatau, me ōna raka, me ōna tūtaki.
NEH 3:7 I tō rāua taha e hanga ana a Meratia Kipeoni, a Tarono Meronoti – me ngā tāngata o Kipeono, o Mihipa – he wāhi ērā nō te torōna o te kāwana o tērā taha o te awa.
NEH 3:8 I tōna taha e hanga ana a Utiere tama a Harahaia, nō ngā kaimahi kōura. I tōna taha e hanga ana a Hanania tama a tētahi kaiwhakaranu. Nā, oti ake i a rātou a Hiruhārama, tae noa ki te taiepa nui.
NEH 3:9 I tō rātou taha e hanga ana a Repaia tama a Huru, rangatira o te hāwhe o ngā wāhi o Hiruhārama.
NEH 3:10 I tō rātou taha e hanga ana a Ieraia tama a Harumapa, ki te ritenga atu anō o tōna whare. I tōna taha e hanga ana a Hatuhu tama a Hahapania.
NEH 3:11 Ko Marakia tama a Hārimi, ko Hahupu tama a Pahata Moapa, ki te hanga i tērā atu wāhi, i te Pourewa anō hoki i Ngā Oumu.
NEH 3:12 I tōna taha e hanga ana a Harumu tama a Harohehe rangatira o te hāwhe o ngā wāhi o Hiruhārama, a ia me āna tamāhine.
NEH 3:13 Ko te Kūwaha o te Raorao he mea hanga nā Hanunu rātou ko ngā tāngata o Tanoa. Nā rātou i hanga, nā rātou anō i whakatū ōna tatau, ōna rākau, me ōna tūtaki, kotahi mano anō hoki ngā whatīanga o te taiepa, ā tae noa ki te Kūwaha Paru.
NEH 3:14 Ko te Kūwaha Paru nā Marakia tama a Rekapa rangatira o tētahi wāhi o Petehakereme i hanga; nāna i hanga, nāna anō i whakatū ōna tatau, ōna raka, me ōna tūtaki.
NEH 3:15 Ko te Kūwaha i te Puna, he mea hanga tērā nā Harunu tama a Korohote rangatira o tētahi wāhi o Mihipa; nāna i hanga, nāna anō i hīpoki, nāna i whakatū ōna tatau, ōna raka, ōna tūtaki, me te taiepa i te poka wai i Hiroa i te taha o te kāri a te kīngi, ā tae noa ki ngā kaupae e heke iho ana i te pā o Rāwiri.
NEH 3:16 I muri i a ia e hanga ana a Nehemia tama a Atapuku, rangatira o te hāwhe o ngā wāhi o Peteturu, tae noa ki te ritenga o ngā tanumanga o Rāwiri, ki te poka wai i hangā, ki te whare anō o te hunga nunui.
NEH 3:17 I muri i a ia ka hanga ko ngā Rīwaiti, ko Rehumu tama a Pani. I tōna taha e hanga ana a Hahapia rangatira o te hāwhe o ngā wāhi o Keira, i tōna wāhi anō.
NEH 3:18 I muri i a ia e hanga ana ō rātou tēina, ko Pāwai tama a Henarara, rangatira o te hāwhe o ngā wāhi o Keira.
NEH 3:19 I tōna taha e hanga ana a Ētere tama a Hehua, rangatira o Mihipa, i tētahi wāhi i te ritenga atu o te haerenga ki runga ki te takotoranga mea whawhai i te koki o te taiepa.
NEH 3:20 I muri i a ia ko Paruku tama a Tapai, uaua rawa tāna hanga i tētahi atu wāhi, i te koki o te taiepa, ā tae noa ki te tatau o te whare o Eriahipi, o te tino tohunga.
NEH 3:21 I muri i a ia ka hanga ko Meremoto, tama a Uria, tama a Koto, i tētahi atu wāhi, i te tatau atu anō o te whare o Eriahipi, ā tae noa ki te pito o te whare o Eriahipi.
NEH 3:22 I muri i a ia ka hanga ko ngā tohunga, ko ngā tāngata o te mānia.
NEH 3:23 I muri i a ia e hanga ana a Pineamine rāua ko Hahupu, i te ritenga mai anō o tō rāua whare. I muri i a ia e hanga ana a Atāria tama a Maaheia tama a Anania i te taha anō ki tōna whare.
NEH 3:24 I muri i a ia ka hanga ko Pinui tama a Henarara i tētahi atu wāhi, i te whare atu anō o Atāria, ā tae noa ki te koki o te taiepa, ā, ki te pikonga.
NEH 3:25 Ko Parara tama a Utai i te ritenga atu o te koki o te taiepa, o te pourewa hoki e kōkiri ana ki waho i te whare o te kīngi i runga, i te taha o te marae o te whare herehere. I muri i a ia ko Peraia tama a Paroho,
NEH 3:26 ā, i noho ngā Netinimi ki Ōpere, ā tae noa ki te ritenga atu o te Kūwaha Wai, whaka te rāwhiti, ki te pourewa anō hoki e uaki ana ki waho.
NEH 3:27 I muri i a ia ka hanga ko ngā Tekoi i tētahi atu wāhi, i te ritenga anō o te pourewa nui e kōkiri ana ki waho, ā tae noa ki te taiepa o Ōpere.
NEH 3:28 Ko tō runga ake o te Kūwaha Hōiho tā ngā tohunga i hanga ai, i te ritenga anō o te whare o tēnei tangata, o tēnei tangata.
NEH 3:29 I muri i a rātou ka hanga ko Hāroko tama a Imere i te ritenga anō o tōna whare. I muri anō hoki i a ia ka hanga ko Hemaia tama a Hekania, kaitiaki o te Kūwaha ki te Rāwhiti.
NEH 3:30 I muri i a ia ka hanga ko Hanania tama a Heremia, rāua ko Hanunu, ko te tama tuaono a Tarapa, i tētahi atu wāhi. I muri i a ia ka hanga ko Mehūrāma tama a Perekia i te ritenga anō o tōna rūma.
NEH 3:31 I muri i a ia ka hanga ko Marakia tētahi o ngā kaimahi kōura, ā tae noa ki te wāhi i ngā Netinimi, i ngā kaihokohoko, i te ritenga atu anō o te Kūwaha Mipikara, ki te pikitanga atu anō hoki i te koki.
NEH 3:32 Nā, ko te takiwā o te pikitanga i te koki tae noa ki te Kūwaha Hipi, he mea hanga tērā nā ngā kaimahi kōura, nā ngā kaihokohoko.
NEH 4:1 Nō te rongonga ia o Hanaparata kei te hanga mātou i te taiepa, ka riri, nui atu te riri, ka whakahī ki ngā Hūrai.
NEH 4:2 Nā, ka kōrero ia i te aroaro o ōna tēina, o te ope anō o Hamaria, ka mea; “E aha ana ēnei Hūrai ngoikore? E hanga pā rānei rātou? E mea patunga tapu rānei rātou? E oti rānei i a rātou i te rā kotahi? E whakaorangia ake rānei e rātou ngā kōhatu i roto i ngā pūranga paru kua oti nā te tahu?”
NEH 4:3 Nā, i tōna taha a Tōpia Āmoni, ā, ka mea ia, “Ko taua mea e hangā nā e rātou, ki te piki atu he pokiha, ka pakaru tā rātou taiepa kōhatu.”
NEH 4:4 Whakarongo, e tō mātou Atua, e whakahāweatia ana hoki mātou; whakahokia iho anō tā rātou taunu ki runga ki tō rātou upoko; hoatu hoki rātou hei taonga parakete ki te whenua e whakaraua ai.
NEH 4:5 Ā, kei hīpokina tō rātou hē, kaua anō tō rātou hara e murua i tōu aroaro; mō rātou i whakapātaritari i a koe i te aroaro o ngā kaihanga.
NEH 4:6 Nā, hangā ana e mātou te taiepa; ā, ka honoa te taiepa katoa, kia tae ki te hāwhe anō o tōna tiketike; he ngākau hoki tō te iwi ki te mahi.
NEH 4:7 I te rongonga ia o Hanaparata, o Tōpia, o ngā Ārapi, o ngā Āmoni, o ngā Aharori, kua neke haere te hanga o ngā taiepa o Hiruhārama, ā, kua tīmata ngā wāhi pakaru te kapi, nā, nui atu tō rātou riri.
NEH 4:8 Nā, ka whakatupu ngātahi rātou i te hē, kia haere mai ki te whawhai ki Hiruhārama, whakaware ai.
NEH 4:9 Heoi, īnoi ana mātou ki tō mātou Atua, whakatūria ana e mātou he atiati mō rātou, i te ao, i te pō, i te wehi hoki i a rātou.
NEH 4:10 Nā, ka mea a Hūrā, “Kua hemo te kaha o ngā kaipīkau, e nui ana hoki te paru; nā, e kore mātou e kaha ki te hanga i te taiepa.”
NEH 4:11 I mea anō ō mātou hoariri, “E kore rātou e mōhio, e kore e kite, kia tae atu rā anō tātou ki waenganui i a rātou, ko reira tātou tukituki ai i a rātou, whakamutu ai hoki i te mahi.”
NEH 4:12 Ā, nō te taenga mai o ngā Hūrai e noho ana i tō rātou taha, tekau ā rātou meatanga mai ki a mātou, “I ngā wāhi katoa, me hoki mai koutou ki a mātou.”
NEH 4:13 Nā reira, i whakatūria ai e ahau ki ngā wāhi o raro, ki tua mai o te taiepa, ki ngā wāhi tuwhera anō hoki, whakatūria ana e ahau te iwi, tēnei hapū, tēnei hapū, o rātou, i a rātou anō ā rātou hoari, ā rātou tao, ā rātou kōpere.
NEH 4:14 Nā, ka titiro ahau, ka whakatika ki runga, ka mea ki ngā rangatira, ki ngā tāngata nunui, ki ērā atu anō o te iwi, “Kaua e wehi ki a rātou. Kia mahara ki te Ariki, ki te mea nui e wehingia ana, ka whawhai kia ora ai ō koutou tuākana, tēina, ā koutou tama, ā koutou tamāhine, ā koutou wāhine, me ō koutou whare.”
NEH 4:15 Ā, ka rongo ō mātou hoariri ka mōhiotia tērā e mātou, ā, kua whakatakā nei e te Atua ō rātou whakaaro, nā, hoki ana mātou katoa ki te taiepa ki tāna mahi, ki tāna mahi.
NEH 4:16 Nō taua rā anō ko tētahi tānga o āku tāngata hei mahi i te mahi, ā, ko tētahi tānga o rātou hei pupuri i ngā tao, i ngā whakangungu rākau, i ngā kōpere, i ngā pukupuku; ko ngā rangatira, i muri rātou i te whare katoa o Hūrā.
NEH 4:17 Ko ngā kaihanga i te taiepa, me ngā kaiwaha i ngā pīkaunga, whakawaha ana rātou, ā, kotahi te ringa o tēnei, o tēnei, ki te mahi i te mahi, kotahi hei pupuri i te patu.
NEH 4:18 Nā, ko ngā kaihanga, whītiki rawa tāna hoari ki tōna taha, ki tōna taha; nā, hanga ana rātou. I tōku taha anō hoki ko te kaiwhakatangi tētere.
NEH 4:19 I mea anō ahau ki ngā rangatira, ki ngā tāngata nunui, ki ērā atu anō o te iwi, “He nui te mahi, he tātahi, kua tohatoha noa atu anō tātou ki te taiepa, matara noa tētahi i tētahi.
NEH 4:20 Ko te wāhi e rongo ai koutou i te tangi o te tētere, me huihui ki a mātou ki reira. Mā tō tātou Atua tā tātou pakanga.”
NEH 4:21 Heoi, mahia ana e mātou te mahi; nā, ko tētahi tānga ki te pupuri tao, nō te huakanga ake anō o te ata ā puta noa ngā whetū.
NEH 4:22 I mea anō ahau ki te iwi i taua wā, “Kia moe tēnei tangata, tēnei tangata, me tāna pononga anō, ki roto ki Hiruhārama, ā, ka ai rātou hei kaitiaki mō tātou i te pō, hei mahi anō i te awatea.”
NEH 4:23 Heoi, ko ahau, ko ōku tēina, ko āku pononga, me ngā kaitiaki i whai mai nei i ahau, kīhai i whakarērea atu ō mātou kākahu. Mau tonu te patu a tēnei, a tēnei, i te haerenga ki te wai.
NEH 5:1 Kātahi ka nui atu te karanga a te iwi, rātou ko ā rātou wāhine, he whakahē mō ō rātou tuākana, tēina, mō ngā Hūrai.
NEH 5:2 I reira hoki ētahi e mea ana, “Ko mātou, ko ā mātou tama, me ā mātou tamāhine, he tokomaha; tātou ki te hoko wīti, kia kai ai tātou, kia ora ai.”
NEH 5:3 I reira hoki ētahi e kī ana, “Kua waiho ō mātou whenua, ā mātou māra wāina, ō mātou whare hei taunaha; tātou ki te hoko wīti mō te matekai.”
NEH 5:4 Me ētahi hoki e kī ana, “Kua riro mai he moni tārewa i a mātou hei takoha me te kīngi; ko ō mātou whenua, ko ā mātou māra wāina te tarewatanga.
NEH 5:5 Nā, rite tonu ō mātou kikokiko ki ngā kikokiko o ō mātou tuākana; rite tonu ā mātou tamariki ki ā rātou tamariki. Nanā, e whakaponongatia ana e mātou ā mātou tama me ā mātou tamāhine hei pononga, kua oti anō ētahi o ā mātou tamāhine te mea hei pononga, kāhore hoki ā mātou mea hei whakahoki mai; nō te mea kei ngā tāngata kē ō mātou whenua, ā mātou māra wāina.”
NEH 5:6 Nā, nui atu tōku riri i tōku rongonga i tā rātou karanga, i ēnei kupu.
NEH 5:7 Kātahi ka whakaaroaroa e tōku ngākau i roto i ahau, ā, ka totohe ahau ki ngā rangatira me ngā tāngata rarahi; i kī atu hoki ahau ki a rātou, “E tangohia ana e koutou he moni whakatupu i tōna teina, i tōna teina.” Nā, tū ana i ahau he hui nui hei whakahē mō rātou;
NEH 5:8 i mea anō ahau ki a rātou, “Kua poto tā mātou hei whakahoki mai i ō tātou tēina, i ngā Hūrai, kua oti nei te hoko ki ngā tauiwi, ā, ka hokona atu anō rānei e koutou ō koutou tuākana, tēina? Ka hokona rānei rātou ki a tātou?” Kātahi ka whakarongo kau rātou, kīhai hoki i kitea he kupu mā rātou.
NEH 5:9 I mea anō ahau, “Ehara tēnā i te mea pai e mea nā koutou. Kaua ianei koutou e haere i runga i te wehi ki tō tātou Atua? Kaua rānei e whakaaro ki te tāwai mai a ō tātou hoariri, a ngā tauiwi?
NEH 5:10 Nā, ko ahau, ko ōku tēina, me āku tāngata, e tuku ana he moni, he wīti ki a rātou mō te moni whakatupu. Tēnā rā, kia whakarērea atu e tātou tēnei mahi tango i te moni whakatupu.
NEH 5:11 Tēnā, whakahokia atu ki a rātou i tēnei rā nei anō ō rātou whenua, ā rātou māra wāina, māra ōriwa, me ō rātou whare, me te wāhi whakarau o te moni, o te wīti, o te wāina, o te hinu, e tangohia nei e koutou i a rātou.”
NEH 5:12 Kātahi rātou ka kī mai, “Me whakahoki atu e mātou, e kore anō e tonoa e mātou he mea i a rātou. Ka rite tā mātou e mea ai ki tāu i kī mai nā.” Kātahi ka karangatia e ahau ngā tohunga, ā, ka meinga e ahau kia oati, mō tēnei kupu kia mahia.
NEH 5:13 I ruperupea anō e ahau te uma o tōku, me tāku kī anō, “Ko te tangata e kore e whakamana i tēnei kupu, kia pēnei tā Ihowā ruperupe i a ia i roto i tōna whare, i tāna mahi; kia rite anō ia ki tēnei te ruperupe, te takoto kau.” Ā, ka kī mai te huihui katoa, “Āmine,” ka whakamoemiti anō rātou ki a Ihowā. Nā, pērā tonu te mahi a te iwi.
NEH 5:14 Nō te rā anō i kīia ai ahau hei kāwana mō rātou ki te whenua o Hūrā, nō te rua tekau o ngā tau, ā tae noa ki te toru tekau mā rua o ngā tau o Kīngi Arataherehe, arā kotahi tekau mā rua tau, kāhore ahau, ōku tēina rānei, i kai i te taro kāwana.
NEH 5:15 Otiia ko ngā kāwana ō mua, ko ērā i mua i ahau, he taimaha tā rātou ki te iwi; i tangohia hoki e rātou he taro, he wāina, i a rātou, me ētahi hekere hiriwa e whā tekau. Āe rā, i whakatupu rangatira anō ā rātou tāngata ki te iwi. Kīhai ia ahau i pērā, i wehi hoki ki te Atua.
NEH 5:16 I uaua tonu anō ahau ki te mahi i tēnei taiepa, kīhai hoki mātou i hoko whenua mō mātou; i huihuia atu anō hoki āku tāngata katoa ki reira ki te mahi.
NEH 5:17 Nā, kotahi rau e rima tekau i tāku tēpu, nō ngā Hūrai, nō ngā rangatira, hāunga ērā atu i haere mai nei ki a mātou i roto i ngā iwi i tētahi taha o mātou, i tētahi taha.
NEH 5:18 Nā, ko ngā mea i takā māku i te rā kotahi, kotahi pūru, e ono hipi, he mea pai; i takā anō ētahi manu māku, ā, kotahi i roto i ngā rā kotahi tekau, ko ngā tū wāina katoa, tōna nui; ahakoa ko tēnei katoa, kīhai ahau i mea ki te taro kāwana, nō te mea he taimaha rawa te hereherenga o tēnei iwi.
NEH 5:19 Kia mahara mai ki ahau, e tōku Atua, mō te pai, kia rite ki āku mea katoa i mea ai ahau ki tēnei iwi.
NEH 6:1 Ā, nō te rongonga o Hanaparata, o Tōpia, o Keheme Ārapi, o ērā atu o ō mātou hoariri, kua hangā e ahau te taiepa, kāhore hoki he wāhi pakaru i mahue (kāhore anō ia kia oti noa i ahau ngā tatau te whakatū ki ngā kūwaha),
NEH 6:2 nā, ka unga tāngata mai a Hanaparata rāua ko Keheme ki ahau, ka mea, “Haere mai, tātou ka rūnanga ki tētahi o ngā pā ririki i te mānia i Ono.” Otiia i whakaaro rāua ki te mahi kino ki ahau.
NEH 6:3 Nā, ka unga tāngata ahau ki a rāua hei kī atu, “He nui te mahi e mahi nei ahau; e kore e āhei kia heke atu. Kia whakamutua hei aha te mahi? Ko whakarērea nei hoki e ahau, ki te heke atu ahau ki a kōrua.”
NEH 6:4 Nā, e whā ā rāua tononga tāngata mai ki ahau, ko taua tikanga anō, heoi whakahokia ana e ahau ko aua kupu rā anō.
NEH 6:5 Kātahi a Hanaparata ka unga mai i tāna tangata ki ahau, ko te rima o ngā ngarenga mai, ko taua tikanga anō, he pukapuka tuwhera i tōna ringa.
NEH 6:6 Ko te mea tēnei i tuhituhia ki reira: “Kua pakū te rongo ki ngā tauiwi – e kī ana anō hoki a Kahamu – tēnei koutou ko ngā Hūrai te mea nei kia whakakeke; koia i hangā ai e koe te taiepa; ā, e mea ana koe ko koe hei kīngi mō rātou; ko tā ngā kōrero hoki tēnei.
NEH 6:7 Kua whakatūria anō e koe ētahi poropiti hei karanga mōu ki Hiruhārama, hei kī, ‘Kua whai kīngi a Hūrā!’ Nā, ka whakaaturia ēnei kupu ki te kīngi. Heoi, haere mai, kia kōrerorero tāua.”
NEH 6:8 Kātahi ahau ka unga tāngata ki a ia, hei kī atu, “Ehara kau ēnei mea e kōrero nei koe; he mea tito noa hoki nā tōu ngākau ake.”
NEH 6:9 Ko tā rātou katoa hoki, he whakawehi i a mātou, i mea rātou, “Tērā ō rātou ringa e whakawarea ki te mahi, e kore ai e mahia.” Tēnā, e te Atua, whakakahangia ōku ringa.
NEH 6:10 Kātahi ahau ka haere ki te whare o Hemaia tama a Teraia tama a Mehetapēre, he mea tūtaki hoki ia ki roto; ā, ka mea ia, “Me rūnanga tātou ki te whare o te Atua, ki roto ki te temepara, me tūtaki hoki e tātou ngā tatau o te temepara; tērā hoki rātou e haere mai ki te patu i a koe; inā, ko ā te pō rātou haere mai ai ki te patu i a koe.”
NEH 6:11 Nā, ka mea ahau, “Me oma rānei te tangata pēnei i ahau nei? Ko wai te tangata o tōku rite e haere ki roto ki te temepara kia ora ai? E kore ahau e haere ki roto!”
NEH 6:12 Nā, ka mahara ahau ehara ia i te mea ungā mai nā te Atua; heoi hei hē mōku tāna kupu i poropiti ai. He mea utu hoki ia nā Tōpia rāua ko Hanaparata.
NEH 6:13 I utua ai ia, kia wehi ai ahau, kia mahi pērā, ā, ka hara; kia whai mea ai rātou hei whakaingoa kino, hei tāwai mā rātou ki ahau.
NEH 6:14 Kia mahara, e tōku Atua, ki a Tōpia rāua ko Hanaparata, ki ēnei mahi a rāua, ki a Noaria poropiti wahine, ki ērā atu anō o ngā poropiti i mea nei ki te whakawehi i ahau.
NEH 6:15 Heoi, kua oti te taiepa i te rua tekau mā rima o ngā rā o te marama o Eruru; e rima tekau mā rua ngā rā.
NEH 6:16 Ā, i te rongonga o ō mātou hoariri katoa, i taua mea, ka wehi ngā tauiwi katoa i tētahi taha o mātou, i tētahi taha, ā, ko te tino hokinga iho o ō rātou whakaaro; i kite hoki rātou he mea mahi tēnei mahi e tō mātou Atua.
NEH 6:17 He tini anō ngā pukapuka a ngā rangatira o Hūrā i aua rā i tae ki a Tōpia, me a Tōpia hoki i tae ki a rātou.
NEH 6:18 He tokomaha hoki o Hūrā i oati ki a ia, he hunaonga hoki ia nā Hekania tama a Araha; i tango anō tāna tama a Iehohanana i te tamāhine a Mehūrāma tama a Perekia hei wahine.
NEH 6:19 I kōrerotia anō e rātou āna mahi pai ki tōku aroaro; i kawea anō e rātou āku kupu ki a ia. Heoi, tukua mai ana e Tōpia ētahi pukapuka hei whakawehi i ahau.
NEH 7:1 Nāwai ā, kua oti te taiepa te hanga, kua whakatūria ngā tatau, kua whakaritea anō ngā kaitiaki kūwaha, ngā kaiwaiata, me ngā Rīwaiti.
NEH 7:2 Nā, ka tukua e ahau ngā tikanga mō Hiruhārama ki tōku teina, ki a Hanani rāua ko Hanania rangatira o te whare rangatira – he tangata pono hoki ia, ā, nui atu i tō te tokomaha tōna wehi ki te Atua.
NEH 7:3 I kī atu ahau ki a rāua, “Kaua e whakatuwheratia ngā kūwaha o Hiruhārama, kia mahana rā anō te rā; i a rāua e tū ana, e tiaki ana, me tūtaki e rāua ngā tatau, ka whakaū hoki. Me whakatū anō he kaitiaki i roto i ngā tāngata o Hiruhārama, ki tāna wāhi e tiaki ai, ki te ritenga o tōna whare, o tōna whare.”
NEH 7:4 Nā, he whārahi, he nui te pā, he torutoru ia ngā tāngata o roto; kāhore hoki ngā whare kia hangā.
NEH 7:5 Nā, ka hōmai e tōku Atua ki roto ki tōku ngākau kia huihuia ngā rangatira, me ngā tāngata rarahi, me te iwi, kia whakapapa ai rātou. I kitea hoki e ahau te pukapuka whakapapa o te hunga i haere mai i te tīmatanga. I kitea anō kua tuhituhia ki roto:
NEH 7:6 Ko ngā tama ēnei o te kāwanatanga i haere mai i te whakarau, nō te hunga i whakahekea, nō ērā i whakahekea atu e Nepukaneha kīngi o Papurōna, ā, hoki ana ki Hiruhārama, ki Hūrā; ki tōna pā, ki tōna pā.
NEH 7:7 I haere mai rātou ko Herupapera, ko Hehua, ko Nehemia, ko Atāria, ko Raamia, ko Nahamani, ko Mororekai, ko Pirihana, ko Mihiperete, ko Pikiwai, ko Nehumu, ko Paana. Ko te tokomaha tēnei o ngā tāngata o te iwi o Īharaira:
NEH 7:8 Ko ngā tama a Paroho, e rua mano kotahi rau e whitu tekau mā rua.
NEH 7:9 Ko ngā tama a Hepatia, e toru rau e whitu tekau mā rua.
NEH 7:10 Ko ngā tama a Araha, e ono rau e rima tekau mā rua.
NEH 7:11 Ko ngā tama a Pahata Moapa, (nō ngā tama a Hehua rāua ko Ioapa), e rua mano e waru rau kotahi tekau mā waru.
NEH 7:12 Ko ngā tama a Erama, kotahi mano e rua rau e rima tekau mā whā.
NEH 7:13 Ko ngā tama a Tatu, e waru rau e whā tekau mā rima.
NEH 7:14 Ko ngā tama a Takai, e whitu rau e ono tekau.
NEH 7:15 Ko ngā tama a Pinui, e ono rau e whā tekau mā waru.
NEH 7:16 Ko ngā tama a Pepai, e ono rau e rua tekau mā waru.
NEH 7:17 Ko ngā tama a Atakara, e rua mano e toru rau e rua tekau mā rua.
NEH 7:18 Ko ngā tama a Aronikama, e ono rau e ono tekau mā whitu.
NEH 7:19 Ko ngā tama a Pikiwai, e rua mano e ono tekau mā whitu.
NEH 7:20 Ko ngā tama a Ārini, e ono rau e rima tekau mā rima.
NEH 7:21 Ko ngā tama a Atere, (a Hetekia), e iwa tekau mā waru.
NEH 7:22 Ko ngā tama a Hahumu, e toru rau e rua tekau mā waru.
NEH 7:23 Ko ngā tama a Pētai, e toru rau e rua tekau mā whā.
NEH 7:24 Ko ngā tama a Haripi, kotahi rau kotahi tekau mā rua.
NEH 7:25 Ko ngā tama a Kipeono, e iwa tekau mā rima.
NEH 7:26 Ko ngā tāngata o Pēterehema, o Netopa, kotahi rau e waru tekau mā waru.
NEH 7:27 Ko ngā tāngata o Anatoto, kotahi rau e rua tekau mā waru.
NEH 7:28 Ko ngā tāngata o Pete Ātamawete, e whā tekau mā rua.
NEH 7:29 Ko ngā tāngata o Kiriata Tearimi, o Kepira, o Peeroto, e whitu rau e whā tekau mā toru.
NEH 7:30 Ko ngā tāngata o Rama, o Kapa, e ono rau e rua tekau mā tahi.
NEH 7:31 Ko ngā tāngata o Mikimaha, kotahi rau e rua tekau mā rua.
NEH 7:32 Ko ngā tāngata o Pētēre, o Hai, kotahi rau e rua tekau mā toru.
NEH 7:33 Ko ngā tāngata o tērā atu Nepo, e rima tekau mā rua.
NEH 7:34 Ko ngā tama a tērā atu Erama, kotahi mano e rua rau e rima tekau mā whā.
NEH 7:35 Ko ngā tama a Hārimi, e toru rau e rua tekau.
NEH 7:36 Ko ngā tama a Heriko, e toru rau e whā tekau mā rima.
NEH 7:37 Ko ngā tama a Roro, a Hariri, a Ono, e whitu rau e rua tekau mā tahi.
NEH 7:38 Ko ngā tama a Henaa, e toru mano e iwa rau e toru tekau.
NEH 7:39 Ko ngā tohunga: ko ngā tama a Ieraia, (nō te whare o Hehua), e iwa rau e whitu tekau mā toru.
NEH 7:40 Ko ngā tama a Imere, kotahi mano e rima tekau mā rua.
NEH 7:41 Ko ngā tama a Pahuru, kotahi mano e rua rau e whā tekau mā whitu.
NEH 7:42 Ko ngā tama a Hārimi, kotahi mano kotahi tekau mā whitu.
NEH 7:43 Ko ngā Rīwaiti: ko ngā tama a Hehua, a Karamiēre, (nō ngā tama anō hoki a Horewa), e whitu tekau mā whā.
NEH 7:44 Ko ngā kaiwaiata: ko ngā tama a Āhapa, kotahi rau e whā tekau mā waru.
NEH 7:45 Ko ngā kaitiaki kūwaha: ko ngā tama a Harumu, ko ngā tama a Atere, ko ngā tama a Taramono, ko ngā tama a Akupu, ko ngā tama a Hatita, ko ngā tama a Hopai, kotahi rau e toru tekau mā waru.
NEH 7:46 Ko ngā Netinimi: ko ngā tama a Tiha, ko ngā tama a Hahupa, ko ngā tama a Tapaoto,
NEH 7:47 ko ngā tama a Keroho, ko ngā tama a Hia, ko ngā tama a Parono,
NEH 7:48 ko ngā tama a Repana, ko ngā tama a Hakapa, ko ngā tama a Haramai,
NEH 7:49 ko ngā tama a Hanana, ko ngā tama a Kirere, ko ngā tama a Kahara,
NEH 7:50 ko ngā tama a Reaia, ko ngā tama a Retini, ko ngā tama a Nekora,
NEH 7:51 Ko ngā tama a Katama, ko ngā tama a Uha, ko ngā tama a Pahea,
NEH 7:52 ko ngā tama a Pehai, ko ngā tama a Meunimi, ko ngā tama a Nepihehimi,
NEH 7:53 ko ngā tama a Pakapuku, ko ngā tama a Hakupa, ko ngā tama a Harahuru,
NEH 7:54 ko ngā tama a Patariti, ko ngā tama a Mehira, ko ngā tama a Haraha,
NEH 7:55 ko ngā tama a Parakoho, ko ngā tama a Hihera, ko ngā tama a Tāmaha,
NEH 7:56 ko ngā tama a Netia, ko ngā tama a Hatipa.
NEH 7:57 Ko ngā tama a ngā pononga a Horomona: ko ngā tama a Hotai, ko ngā tama a Hoperete, ko ngā tama a Perira,
NEH 7:58 ko ngā tama a Taara, ko ngā tama a Tarakono, ko ngā tama a Kirere,
NEH 7:59 ko ngā tama a Hepatia, ko ngā tama a Hatiri, ko ngā tama a Pokerete o Tepaimi, ko ngā tama a Amono.
NEH 7:60 Ko ngā Netinimi katoa, rātou ko ngā tama a ngā pononga a Horomona, e toru rau e iwa tekau mā rua.
NEH 7:61 Ko ēnei i haere mai i Teremera, i Terehareha, i Kerupu, i Arono, i Imere, otiia kīhai i taea e rātou te whakaatu te whare o ō rātou pāpā, tō rātou kāwei, nō Īharaira rānei rātou:
NEH 7:62 arā ko ngā tama a Teraia, ko ngā tama a Tōpia, ko ngā tama a Nekora, e ono rau e whā tekau mā rua.
NEH 7:63 O ngā tohunga hoki: ko ngā tama a Hapaia, ko ngā tama a Koto, ko ngā tama a Paratirai, (i tango nei i tētahi o ngā tamāhine a Paratirai Kireari hei wahine māna, ā, ka huaina tō rātou ingoa ki a ia.)
NEH 7:64 I rapua e ēnei te whakapapa o ō rātou tūpuna i roto i te hunga kua oti te whakapapa; heoi kīhai i kitea. Nā reira i kīia ai rātou he poke, i mutu ake ai tō rātou tohungatanga.
NEH 7:65 Nā, ka mea te kāwana ki a rātou, kia kaua rātou e kai i ngā mea tapu rawa, kia ara ake rā anō tētahi tohunga, kei a ia ngā Urimi me ngā Tumime.
NEH 7:66 Ko te whakaminenga katoa, ki te huihuia, e whā tekau mā rua mano, e toru rau e ono tekau,
NEH 7:67 Hāunga ā rātou pononga tāne, ā rātou pononga wāhine, e whitu mano o ēnei e toru rau e toru tekau mā whitu. I a rātou anō he kaiwaiata, he tāne, he wāhine, e rua rau e whā tekau mā rima.
NEH 7:68 Ko ō rātou hōiho, e whitu rau e toru tekau mā ono; ko ō rātou muera, e rua rau e whā tekau mā rima.
NEH 7:69 E whā rau e toru tekau mā rima ngā kāmera: ko ngā kāihe, e ono mano e whitu rau e rua tekau.
NEH 7:70 Nā, i hōmai anō e ētahi o ngā ariki o ngā whare o ngā mātua he mea mō te mahi. Tā te kāwana i hōmai ai ki roto ki ngā taonga, kotahi mano tarami kōura, e rima tekau peihana, e rima rau e toru tekau kākahu tohunga.
NEH 7:71 I hōmai anō e ētahi o ngā ariki o ngā whare o ngā mātua ki roto ki ngā taonga mō te mahi e rua tekau mano tarami kōura, e rua mano e rua rau pāuna hiriwa.
NEH 7:72 Nā, ko ngā mea i hōmai e te nuinga o te iwi, e rua tekau mano tarami kōura, e rua mano pāuna hiriwa, e ono tekau mā whitu kākahu tohunga.
NEH 7:73 Heoi, noho ana ngā tohunga i ō rātou pā, me ngā Rīwaiti anō, rātou ko ngā kaitiaki kūwaha, ko ngā kaiwaiata, ko ētahi o te iwi, ko ngā Netinimi, ko Īharaira katoa. Ā, i te takanga mai o te whitu o ngā marama, e noho ana ngā tama a Īharaira i ō rātou pā.
NEH 8:1 Nā, ka huihui te iwi katoa ānō he tangata kotahi, ki te marae i te Kūwaha Wai, ā, ka mea ki a Etera karaipi kia mauria mai te Pukapuka o te Ture a Mohi, o tērā i whakahaua e Ihowā ki a Īharaira.
NEH 8:2 Nā, ka mauria mai e Etera tohunga te ture ki te aroaro o te whakaminenga, o te tāne, o te wāhine, o te hunga katoa e mōhio ana ki te whakarongo, i te rā tuatahi o te whitu o ngā marama.
NEH 8:3 Ā, ka kōrerotia e ia i te marae i te Kūwaha Wai, i te ata iho ā taea noatia a waenganui o te rā, i te aroaro o ngā tāne, o ngā wāhine, o te hunga whai whakaaro. Nā, tau tonu mai ngā taringa o te iwi katoa ki te Pukapuka o te Ture.
NEH 8:4 I tū anō a Etera karaipi i runga i te tūranga rākau i hangā nei hei mea pērā, me te tū anō a Matitia, a Hema, a Anaia, a Uria, a Hirikia, a Maaheia ki tōna taha ki matau, ā, ki tōna taha ki mauī ko Peraia, ko Mihāera, ko Marakia, ko Hahumu, ko Hahaparana, ko Hakaraia, ko Mehūrāma.
NEH 8:5 Nā, wherahia ana e Etera te pukapuka i te aroaro o te iwi katoa; i runga ake hoki ia i te iwi katoa, ā, i tāna wherahanga, tū ana te iwi katoa.
NEH 8:6 Nā, ka whakapai a Etera ki a Ihowā, ki te Atua nui, ā, ka whakahokia e te iwi katoa, “Āmine, āmine.” Me te ara anō ō rātou ringa, nā, tuohu ana rātou, koropiko ana ki a Ihowā, me te ahu anō ngā kanohi ki te whenua.
NEH 8:7 Ko Hehua anō, ko Pani, ko Herepia, ko Iamini, ko Akupu, ko Hapetai, ko Horīa, ko Maaheia, ko Kerita, ko Atāria, ko Iotāpara, ko Hanana, ko Peraia, me ngā Rīwaiti, kei te whakamārama i te iwi ki te ture; tū tonu hoki tērā te iwi.
NEH 8:8 Ā, mārama tonu tā rātou kōrero i te Pukapuka o te Ture, me te whakaatu anō i ngā tikanga, me te whakamārama anō i a rātou i te kōrerotanga.
NEH 8:9 Nā, ka mea a Nehemia, ko ia nei te kāwana, a Etera tohunga, te karaipi, me ngā Rīwaiti i whakaako nei i te iwi, ki te iwi katoa, “He rā tapu tēnei nā Ihowā, nā tō koutou Atua; kaua e tangi, kaua e pōuri.” I te tangi hoki te iwi katoa i tō rātou rongonga i ngā kupu o te ture.
NEH 8:10 Kātahi ia ka mea ki a rātou, “Haere, kainga ngā mea mōmona, inumia ngā mea reka, hoatu anō ētahi wāhi kia kawea mā te hunga kāhore nei i takā he mea mā rātou. He rā tapu hoki tēnei nā tō tātou Ariki; kaua hoki e pōuri; kei te koa hoki ki a Ihowā he kaha mō koutou.”
NEH 8:11 Heoi, i whakamārie ngā Rīwaiti i te iwi katoa, i mea, “Whakarongoa; he tapu hoki te rā nei, kaua hoki e pōuri.”
NEH 8:12 Nā, haere ana te iwi katoa ki te kai, ki te inu, ki te hoatu i ētahi wāhi mā ētahi, ki te whakanui i te hari, nō rātou ka mōhio ki ngā kupu i whakapuakina nei ki a rātou.
NEH 8:13 Nā, i te rua o ngā rā ka huihui ngā ariki o ngā whare o ngā mātua o te iwi katoa, rātou ko ngā tohunga, ko ngā Rīwaiti, ki a Etera karaipi, kia mōhiotia ai ngā kupu o te ture.
NEH 8:14 Nā, ka kitea he mea i tuhituhia ki te ture i whakahaua e Ihowā, arā e Mohi, mō ngā tama a Īharaira kia noho ki ngā tīhokahoka i te hākari i te whitu o ngā marama,
NEH 8:15 kia karanga nui hoki, kia pakū te reo ki ō rātou pā katoa, ki Hiruhārama hoki, kia mea, “Haere ki te maunga, tīkina he rau ōriwa, he rau rākau hinu, he rau ramarama, he rau nīkau, he rau rākau rau maha, hei hanga mō ngā tīhokahoka, kia rite ai ki te mea i tuhituhia.”
NEH 8:16 Heoi, kua puta te iwi ki waho, kei te tiki, hangā ana e rātou he tīhokahoka mō rātou ki te tuanui o te whare o tēnei, o tēnei, ki ō rātou marae, ki ngā marae anō o te whare o te Atua, ki te marae i te Kūwaha Wai, ki te marae i te Kūwaha o Ēparaima.
NEH 8:17 Nā, kua hangā he tīhokahoka e te whakaminenga katoa o te hunga i hoki mai i te whakarau, ā, noho ana i raro i ngā tīhokahoka; kīhai hoki ngā tama a Īharaira i pērā, o ngā rā anō i a Hohua tama a Nunu ā taea noatia taua rā, ā, nui atu te koa.
NEH 8:18 I kōrerotia anō e ia te Pukapuka o te Ture a te Atua i tēnei rā, i tēnei rā, i te rā tuatahi ā tae noa ki te rā whakamutunga. Nā, e whitu ngā rā i mahi ai rātou i te hākari, ā, i te waru o ngā rā ko te huihuinga nui, ko te mea i whakaritea.
NEH 9:1 I te rua tekau mā whā o ngā rā o tēnei marama ka huihui ngā tama a Īharaira, nohopuku ana, he taratara anō ngā kākahu, he oneone kei runga i a rātou.
NEH 9:2 Nā, ka wehea ngā uri o Īharaira i roto i ngā tāngata kē katoa; tū ana rātou, whākina ana e rātou ō rātou hara, me ngā kino o ō rātou mātua.
NEH 9:3 Tū ana rātou i tō rātou wāhi, ā, i tētahi o ngā wehenga e whā o te rā ka kōrerotia te Pukapuka o te Ture a Ihowā, a tō rātou Atua; ā, i tētahi o ngā wehenga e whā o te rā ka whāki, ka koropiko ki a Ihowā, ki tō rātou Atua.
NEH 9:4 Nā, ka tū ki runga ki te pikinga o ngā Rīwaiti, a Hehua, a Pani, a Karamiēre, a Hepania, a Puni, a Herepia, a Pani, a Kenani; nui atu tō rātou reo ki te karanga ki a Ihowā, ki tō rātou Atua.
NEH 9:5 Kātahi ka mea ngā Rīwaiti, a Hehua, a Karamiēre, a Pani, a Hahapania, a Herepia, a Horīa, a Hepania, a Petahia: “Whakatika, whakapai ki a Ihowā, ki tō koutou Atua ā ake ake.” “Kia whakapaingia anō tōu ingoa korōria e whakanuia nei ki runga ake i ngā whakapai, i ngā whakamoemiti katoa.”
NEH 9:6 Ko koe, inā, ko koe anake a Ihowā; nāu i hanga te rangi, te rangi o ngā rangi, me ō reira tini mea, te whenua me ngā mea katoa i runga, ngā moana; me ngā mea katoa i roto. Ko koe hoki te kaiwhakaora o aua mea katoa; e koropiko ana hoki te ope o te rangi ki a koe.
NEH 9:7 Ko Ihowā koe, ko te Atua; nāu i whiriwhiri a Āperama, ā, kawea mai ana e koe i Uru o ngā Karari, huaina iho e koe tōna ingoa ko Āperahama.
NEH 9:8 I kitea hoki e koe he ngākau pono tōna ki tōu aroaro, nā, whakaritea ana e koe he kawenata ki a ia, he mea kia hōmai te whenua o ngā Kanaani, o ngā Hiti, o ngā Amori, o ngā Perihi, o ngā Iepuhi, o ngā Kirikahi, kia hōmai ki ōna uri. Nā, kua mana nei i a koe āu kupu; he tika hoki koe.
NEH 9:9 “I kitea anō e koe te tūkinotanga o ō mātou mātua i Īhipa, i rongo anō ki tā rātou karanga i te Moana Whero.
NEH 9:10 Nā, hōmai ana e koe he tohu, he merekara, ki a Parao, ki āna tāngata katoa, ki te iwi katoa o tōna whenua; i mōhio hoki koe ki tā rātou whakakake ki a rātou. Nā, kua whai ingoa koe; koia anō tēnei ināianei.
NEH 9:11 I wāhia anō e koe te moana ki tō rātou aroaro, ā, whiti ana rātou i te wāhi maroke, i waenganui o te moana. Tēnā ko ngā kaiaru i a rātou, makā ana e koe ki ngā rire, ānō he kōhatu ki roto ki ngā wai kaha.
NEH 9:12 Ā, ārahina ana rātou e koe ki te pou kapua i te awatea; ki te pou ahi i te pō, hei whakamārama i tō rātou ara e haere ai rātou.
NEH 9:13 “I heke iho anō koe ki Maunga Hinai, ā, kōrero ana ki a rātou i runga i te rangi; hōmai ana e koe ki a rātou he whakaritenga tika, he ture pono, he tikanga pai, he whakahau.
NEH 9:14 Ko tōu hāpati tapu nāu i whakaatu ki a rātou; me ngā whakahau, me ngā tikanga, me te ture, nāu i whakahau ki a rātou, arā nā tāu pononga, nā Mohi.
NEH 9:15 I hōmai anō e koe he taro i te rangi mō tō rātou matekai; i whakaputaina he wai i te kōhatu mō tō rātou matewai; i kī anō ki a rātou kia haere ki te tango i te whenua i oati ai koe ka hoatu ki a rātou.
NEH 9:16 “Otiia, ka whakakake rātou ko ō mātou mātua, ka whakapakeke i ō rātou kakī, kīhai hoki i rongo ki āu whakahau.
NEH 9:17 Kīhai i whakaae kia rongo, kīhai i mahara ki āu merekara i mahia e koe i roto i a rātou; otiia kua pakeke ō rātou kakī, whakakeke ana rātou, whakaritea ana e rātou he rangatira, kia hoki ai rātou ki tā rātou mahi pononga. Ko koe ia he Atua muru hara he tohu tangata, he atawhai, he pūhoi ki te riri, he nui te aroha, ā, kīhai i whakarere i a rātou.
NEH 9:18 Āe rā, i tā rātou hanganga anō i te kūao kau, i te mea whakarewa, i tā rātou kīanga, ‘Ko tōu Atua tēnei i kawea mai ai koe i Īhipa,’ ā, nui atu ā rātou whakapātaritaringa.
NEH 9:19 “Otiia, i te maha o āu mahi aroha, kīhai koe i whakarere i a rātou i te koraha; kīhai rātou i mahue i te pou kapua i te awatea, hei ārahi i a rātou i te ara, i te pou ahi i te pō, hei whakamārama i a rātou, i te ara anō e haere ai rātou.
NEH 9:20 I hōmai anō e koe tōu wairua pai hei whakaako i a rātou, kīhai hoki tāu mana i kaiponuhia ki ō rātou māngai; i hōmai anō e koe he wai ki a rātou mō tō rātou matewai.
NEH 9:21 Āe rā, e whā tekau ngā tau i atawhaitia ai rātou e koe i te koraha, ā, kīhai i hapa ki tētahi mea. Kīhai ō rātou kākahu i tawhitotia, kīhai anō ō rātou waewae i pupuhi.
NEH 9:22 “I hōmai anō e koe ngā kīngitanga me ngā iwi ki a rātou, ā, wehewehea ana rātou ki ngā wāhi mō rātou. Heoi, kua riro i a rātou te whenua o Hihona, te whenua o te kīngi o Hehepona, me te whenua o Oka kīngi o Pahana.
NEH 9:23 I whakanuia anō e koe ā rātou tamariki kia rite ki ngā whetū o te rangi, ā, kawea mai ana rātou ki te whenua i kī ai koe ki ō rātou mātua ka haere rātou ki reira tango ai.
NEH 9:24 Heoi, haere ana ngā tamariki, riro ana te whenua i a rātou, ā, pēhia ana e koe ki tō rātou aroaro ngā tāngata whenua, ngā Kanaani, hōmai ana e koe ki ō rātou ringa, rātou, ō rātou kīngi, me ngā iwi o te whenua, kia meatia ki a rātou tā rātou i pai ai.
NEH 9:25 Nā, kua riro i a rātou ngā pā kaha, me te oneone mōmona, kua whiwhi anō ki ngā whare e kī tonu ana i ngā mea papai katoa, ki ngā poka wai kua oti te keri, ki ngā māra wāina, ōriwa, ki ngā rākau hei kai, tōna tini; ā, kai ana rātou, ka mākona, kua whai kiko, ā, koa ana rātou ki te nui o āu mea pai.
NEH 9:26 “Otiia ka tutū rātou, ā, ka whakakeke ki a koe, makā ana e rātou tāu ture ki muri ki ō rātou tuarā. Patua iho e rātou āu poropiti i whakaatu tikanga nei ki a rātou, kia tahuri ai rātou ki a koe; nui atu ā rātou whakapātaritaringa.
NEH 9:27 Nā reira i hoatu ai rātou e koe ki te ringa o ō rātou hoariri, ā, whakatoia iho rātou e rātou. Heoi, i ngā wā i mate ai rātou, ka karanga rātou ki a koe, ka whakarongo koe i te rangi, ā, i te maha o āu mahi aroha, hōmai ana e koe he kaiwhakaora ki a rātou, i ora ai rātou i te ringa o ō rātou hoariri.
NEH 9:28 “Otiia ka whai tānga manawa nei rātou, kei te mahi anō rātou i te kino ki tōu aroaro. Nā, whakarērea atu ana rātou e koe ki te ringa o ō rātou hoariri, ā, ko ērā hei rangatira mō rātou. Nā, ka hoki rātou, ā, ka karanga ki a koe, ka whakarongo koe i te rangi; he maha ngā wā i whakaorangia ai rātou e koe, rite tonu ki āu mahi aroha.
NEH 9:29 “I whakaatu tikanga anō koe ki a rātou, kia hoki ai ki tāu ture. Otiia whakakake ana rātou, kīhai hoki i rongo ki āu whakahau. Nā, ka hara ki āu whakaritenga, he mea hoki ēnei e ora ai te tangata, ki te mahia e ia. Whakahokia ana e rātou te pokohiwi, whakapakeketia ana ō rātou kakī, kīhai hoki i rongo.
NEH 9:30 He maha anō ngā tau i kukume roa ai koe ki a rātou, i whakaatu tikanga ai ki a rātou, he mea nā tōu wairua i roto i āu poropiti. Heoi, kīhai i tahuri ō rātou taringa; nā, hoatu ana rātou e koe ki te ringa o ngā iwi o ngā whenua.
NEH 9:31 He nui ia nō tōu aroha, tē whakapotoa rawatia ai rātou e koe, tē whakarērea ai rātou; he Atua atawhai hoki koe, he Atua aroha.
NEH 9:32 “Nā, tēnā, e tō mātou Atua, e te Atua nui, e te Atua kaha, e wehingia ana, e pupuri nei i te kawenata, i te mahi tohu kei iti ki tāu titiro te hē katoa i pā mai nei ki a mātou, ki ō mātou kīngi, ki ō mātou rangatira, ki ō mātou tohunga, ki ō mātou poropiti, ki ō mātou mātua, ki tāu iwi katoa, o ngā rā o ngā kīngi o Ahiria ā tae noa mai ki tēnei rā.
NEH 9:33 Otirā, tika tonu tāu i ngā mea katoa i tākina mai nei ki a mātou; he pono hoki tāu mahi, ko tā mātou ia he kino.
NEH 9:34 Ko ō mātou kīngi, ko ō mātou rangatira, ko ō mātou tohunga, ko ō mātou mātua, kīhai i mahia e rātou tāu ture. Kīhai hoki i tahuri ki āu whakahau, ki āu whakaaturanga i whakaaturia e koe ki a rātou.
NEH 9:35 Kīhai rātou i mahi ki a koe i tō rātou kīngitanga, ā, i tāu pai nui i hōmai e koe ki a rātou, me te whenua nui, whenua mōmona, i hōmai e koe ki tō rātou aroaro, kīhai rātou i tahuri i ā rātou mahi kino.
NEH 9:36 “Nanā, he pononga mātou i tēnei rā; nā, ko te whenua i hōmai nei e koe ki ō mātou mātua, kia kainga ōna hua, ōna pai, nanā, he pononga mātou i reira.
NEH 9:37 Nui atu hoki ōna hua mā ngā kīngi i meinga nei e koe hei kīngi mō mātou, nō te mea i hara mātou. Kei tā rātou i pai ai te tikanga mō ō mātou tinana, mō ā mātou kararehe, ā, he nui atu te hē i a mātou nei.”
NEH 9:38 “Ahakoa tēnei katoa, ka whakarite mātou i te kawenata pono, tuhituhi rawa; ka hīritia iho e ō mātou rangatira, e ō mātou Rīwaiti, e ō mātou tohunga.”
NEH 10:1 Nā, ko te hunga nāna i hīri: Ko te kāwana, ko Nehemia tama a Hakaria. Ko Terekia,
NEH 10:2 ko Heraia, ko Atāria, ko Heremaia,
NEH 10:3 ko Pahuru, ko Amaria, ko Marakia,
NEH 10:4 ko Hatuhu, ko Hepania, ko Maruku,
NEH 10:5 ko Hārimi, ko Meremoto, ko Opāria,
NEH 10:6 ko Raniera, ko Kinetono, ko Paruku,
NEH 10:7 ko Mehūrāma, ko Apia, ko Mīamini,
NEH 10:8 ko Maatia, ko Pirikai, ko Hemaia; ko ngā tohunga ēnei.
NEH 10:9 Me ngā Rīwaiti: ko Hehua tama a Atania, ko Pinui, nō ngā tama a Henarara, ko Karamiēre;
NEH 10:10 me ō rātou tēina: ko Hepania, ko Horīa, ko Kerita, ko Peraia, ko Hanana,
NEH 10:11 ko Mika, ko Rehopo, ko Hahapia,
NEH 10:12 ko Tākuru, ko Herepia, ko Hepania,
NEH 10:13 ko Horīa, ko Pani, ko Peninu.
NEH 10:14 Ko ngā rangatira o te iwi: ko Paroho, ko Pahata Moapa, ko Erama, ko Tatu, ko Pani,
NEH 10:15 ko Puni, ko Atakara, ko Pepai,
NEH 10:16 ko Aronia, ko Pikiwai, ko Ārini,
NEH 10:17 ko Atere, ko Hetekia, ko Aturu,
NEH 10:18 ko Horīa, ko Hahumu, ko Pētai,
NEH 10:19 ko Haripi, ko Anatoto, ko Nepai,
NEH 10:20 ko Makapiaha, ko Mehūrāma, ko Hetiri
NEH 10:21 ko Mehetapēre, ko Hāroko, ko Tarua,
NEH 10:22 ko Peratia, ko Hanana, ko Anaia,
NEH 10:23 ko Hohea, ko Hanania, ko Hahupu,
NEH 10:24 ko Harohehe, ko Pireha, ko Hopeke,
NEH 10:25 ko Rehumu, ko Hahapana, ko Maaheia,
NEH 10:26 ko Āhia, ko Hanana, ko Ānana,
NEH 10:27 ko Maruku, ko Hārimi, ko Paana.
NEH 10:28 “Nā, ko ērā atu o te iwi, ko ngā tohunga, ko ngā Rīwaiti, ko ngā kaitiaki kūwaha, ko ngā kaiwaiata, ko ngā Netinimi, me te hunga katoa i wehea i roto i ngā iwi o ngā whenua ki te ture a te Atua, ko ā rātou wāhine, ko ā rātou tama, ko ā rātou tamāhine, ko te hunga katoa i mōhio, i whai whakaaro;
NEH 10:29 piri tonu rātou ki ō rātou tuākana, tēina, ki ō rātou rangatira, ā, uru ana ki te kanga, ki te oati, kia haere i runga i te ture a te Atua i hōmai nei e ia arā e Mohi, e te pononga a te Atua, kia puritia hoki, kia mahia ngā whakahau katoa a Ihowā, a tō mātou Ariki, āna whakaritenga, me āna tikanga.
NEH 10:30 “Kia kaua hoki e hoatu ā mātou tamāhine mā ngā iwi o te whenua, kia kaua e tangohia ā rātou tamāhine mā ā mātou tama.
NEH 10:31 “Ā, ki te kawea mai e ngā iwi o te whenua ētahi taonga, tētahi kai rānei i te rā hāpati hei hoko, kia kaua e hokona tā rātou mea i te hāpati, i te rā tapu rānei; ā, me whakarere noa iho te whitu o ngā tau, kaua hoki e tohea te moni tārewa.
NEH 10:32 “I hangā anō e mātou he tikanga mā mātou kia hoatu e mātou te toru o ngā wāhi o te hekere i te tau mō te mahi o te whare o tō mātou Atua:
NEH 10:33 mō te taro aroaro, mō te whakahere totokore tūturu, mō ngā tahunga tinana tūturu o ngā hāpati, o ngā kōwhititanga marama, mō ngā hākari tūturu, mō ngā mea tapu, mō ngā whakahere hara, hei whakamārie mō Īharaira; mō te mahi katoa anō o te whare o tō mātou Atua.
NEH 10:34 “I maka rota anō mātou, ngā tohunga, ngā Rīwaiti, te iwi, mō te whakahere rākau kia kawea ki te whare o tō mātou Atua i runga i ngā whare o ō mātou mātua, i ngā wā i whakaritea o tēnei tau, o tēnei tau, hei tahu ki runga ki te āta a Ihowā, a tō mātou Atua, kia rite ai ki te mea i tuhituhia ki te ture.
NEH 10:35 “Mō ngā mātāmua o tō mātou oneone, mō ngā mātāmua anō o ngā hua katoa o ngā rākau katoa, kia kawea i tēnei tau, i tēnei tau, ki te whare o Ihowā.
NEH 10:36 “Mō ngā mātāmua anō o ā mātou tama, o ā mātou kararehe, kia pērātia me te mea i tuhituhia ki te ture, mō ngā mātāmua anō o ā mātou kau, o ā mātou hipi, kia kawea ki te whare o tō mātou Atua, ki ngā tohunga e minita nei i te whare o tō mātou Atua.
NEH 10:37 “Kia kawea anō e mātou ngā mātāmua o ā mātou parāoa pokepoke, me ā mātou whakahere hapahapai, me ngā hua o ngā rākau katoa, o te wāina, o te hinu, ki ngā tohunga, ki ngā rūma o te whare o tō mātou Atua; me ngā whakatekau o ngā hua o tō mātou oneone ki ngā Rīwaiti, e riro ana hoki i a rātou, i ngā Rīwaiti ngā whakatekau i ngā pā katoa e ngaki ai mātou.
NEH 10:38 Nā, ko te tohunga, ko te tama a Ārona, hei hoa mō ngā Rīwaiti, ina tango ngā Rīwaiti i ngā whakatekau; ā, me mau e ngā Rīwaiti ngā whakatekau o ngā whakatekau ki te whare o tō mātou Atua, ki ngā rūma, ki te whare taonga.
NEH 10:39 Me mau hoki e ngā tama a Īharaira, e ngā tama a Rīwai, ngā whakahere hapahapai, arā te wīti, te wāina, te hinu, ki ngā rūma; kei reira hoki ngā oko o te wāhi tapu, me ngā tohunga hei minita, me ngā kaitiaki kūwaha, me ngā kaiwaiata. “E kore hoki e whakarērea e mātou te whare o tō mātou Atua.”
NEH 11:1 Nā, i noho ngā rangatira o te iwi ki Hiruhārama; ā, i maka rota te nuinga atu o te iwi mō te tangata takikotahi i te tekau kia kawea ki Hiruhārama, ki te pā tapu, noho ai, ā, ko te tokoiwa ki ērā atu pā.
NEH 11:2 Ā, he mea manaaki nā te iwi ngā tāngata katoa i hihiko noa ake ki te noho ki Hiruhārama.
NEH 11:3 Nā, ko ngā ariki ēnei o te kāwanatanga i noho ki Hiruhārama; i ngā pā ia o Hūrā i noho rātou i tōna wāhi, i tōna wāhi, i ō rātou pā, arā a Īharaira, ngā tohunga, ngā Rīwaiti, ngā Netinimi, rātou ko ngā tama a ngā pononga a Horomona.
NEH 11:4 Nā, i noho ki Hiruhārama ētahi o ngā tama a Hūrā, o ngā tama anō a Pineamine. Nō ngā tama a Hūrā: ko Ataia tama a Utia, tama a Hakaraia, tama a Amaria, tama a Hepatia, tama a Mahararēre, nō ngā tamariki a Perete.
NEH 11:5 Ko Maaheia tama a Paruku, tama a Korohote, tama a Hātaia, tama a Araia, tama a Toiaripi, tama a Hakaraia, tama a te Hironi.
NEH 11:6 Ko ngā tama katoa a Perete i noho ki Hiruhārama e whā rau e ono tekau mā waru, he hunga māia.
NEH 11:7 Nā, ko ngā tama ēnei a Pineamine: ko Hāru tama a Mehūrāma, tama a Toere, tama a Peraia, tama a Koraia, tama a Maaheia, tama a Itiere, tama a Ihāia.
NEH 11:8 Nā, i muri i a ia, ko Kapai, ko Harai, e iwa rau e rua tekau mā waru.
NEH 11:9 Nā, ko Hoera tama a Tīkiri tō rātou kaitirotiro; ko Hūrā hoki tama a Henua te tuarua o ngā rangatira o te pā.
NEH 11:10 O ngā tohunga: ko Ieraia tama a Toiaripi, ko Iakini;
NEH 11:11 ko Heraia tama a Hirikia, tama a Mehūrāma, tama a Hāroko, tama a Meraioto, tama a Ahitupu, te rangatira mō te whare o te Atua,
NEH 11:12 me ō rātou tēina i mahi nei i te mahi o te whare, e waru rau e rua tekau mā rua. Me Araia anō tama a Ierohama, tama a Peraria, tama a Amati, tama a Hakaraia, tama a Pahuru, tama a Marakia,
NEH 11:13 me ōna tēina, me ngā ariki o ngā whare o ngā mātua; e rua rau e whā tekau mā rua. Ko Amahai tama a Atarēre, tama a Ahatai, tama a Mehiremoto, tama a Imere,
NEH 11:14 me ō rātou tēina, he mārohirohi, he māia, kotahi rau e rua tekau mā waru; ā, ko tō rātou kaitirotiro, ko Tapariere tama a Haketorimi.
NEH 11:15 O ngā Rīwaiti anō: ko Hemaia tama a Hahupu, tama a Atarikama, tama a Hahapia, tama a Puni;
NEH 11:16 ko Hapetai, ko Itopara, nō ngā ariki o ngā Rīwaiti, ngā kaitirotiro o te mahi i waho o te whare o te Atua;
NEH 11:17 ko Matania tama a Mika, tama a Tapari, tama a Āhapa, te tino tangata hei tīmata i te whakamoemiti i te mea e karakia ana. Ko Pakapukia anō hoki ko te tuarua i roto i ōna tēina; ko Āpara tama a Hāmua, tama a Karara, tama a Ierutunu.
NEH 11:18 Ko ngā Rīwaiti katoa i te pā tapu, e rua rau e waru tekau mā whā.
NEH 11:19 Ko ngā kaitiaki kūwaha hoki: ko Akupu, ko Taramono, me ō rātou tēina i tiakina ai ngā kūwaha, kotahi rau e whitu tekau mā rua.
NEH 11:20 Nā, ko ērā atu o Īharaira, o ngā tohunga, o ngā Rīwaiti, kei ngā pā katoa rātou o Hūrā, kei tōna wāhi, kei tōna wāhi.
NEH 11:21 I noho ia ngā Netinimi ki Ōpere; ko Tiha hoki rāua ko Kihipa ngā kaitirotiro o ngā Netinimi.
NEH 11:22 Ko te kaitirotiro hoki o ngā Rīwaiti i Hiruhārama, ko Uti tama a Pani, tama a Hahapia, tama a Matania, tama a Mika, o ngā tama a Āhapa, ngā kaiwaiata, mō te mahi i te whare o te Atua.
NEH 11:23 Nā te kīngi hoki te tikanga mō rātou, kia tūturu te wāhi mā ngā kaiwaiata, he mea tatau ā-rangi tonu.
NEH 11:24 Nā, ko Petahia tama a Mehetapēre, nō ngā tama a Tera tama a Hūrā, i tō te kīngi taha ia i ngā mea katoa a te iwi.
NEH 11:25 Nā, ko ngā kāinga me ō rātou māra, i noho ētahi o ngā tama a Hūrā ki Kiriata Arapa, ki ōna pā ririki, ki Ripono, ki ōna pā ririki, ki Tekapateere, ki ōna kāinga koraha,
NEH 11:26 ki Hehua, ki Morara, ki Peteparete,
NEH 11:27 ki Hatarahuara, ki Peerehepa, ki ōna pā ririki,
NEH 11:28 ki Tikiraka, ki Mekona, ki ōna pā ririki,
NEH 11:29 ki Enerimono, ki Toraha, ki Iaramuta;
NEH 11:30 ko Tanoa, ko Aturama me ō rāua kāinga, ko Rakihi, me ō reira māra, ko Ateka, me ōna pā ririki. Nā, ko tō rātou nohoanga, kei Peerehepa, ā tae noa ki te raorao o Hinomo.
NEH 11:31 Ko ngā tama hoki a Pineamine, ko ērā i Kepa, i noho rātou ki Mikimaha, ki Aīa, ki Pētēre, ki ō rātou pā ririki;
NEH 11:32 ki Anatoto, ki Nopo, ki Anania,
NEH 11:33 ki Hatoro, ki Rama, ki Kitaima,
NEH 11:34 ki Hariri, ki Tepoimi, ki Neparata;
NEH 11:35 ki Roro, ki Ono, ki te raorao o ngā tohunga mahi.
NEH 11:36 Nā, kei a Hūrā, kei a Pineamine, ētahi tānga o ngā Rīwaiti.
NEH 12:1 Nā, ko ngā tohunga ēnei, me ngā Rīwaiti, i haere tahi i a Herupapera tama a Haratiera rāua ko Hehua: arā ko Heraia, ko Heremaia, ko Etera,
NEH 12:2 ko Amaria, ko Maruku, ko Hatuhu,
NEH 12:3 ko Hekania, ko Rehumu, ko Meremoto,
NEH 12:4 ko Iro, ko Kinetoto, ko Apia,
NEH 12:5 ko Mīamini, ko Maaria, ko Pirika,
NEH 12:6 ko Hemaia, ko Toiaripi, ko Ieraia,
NEH 12:7 ko Hāru, ko Āmoko, ko Hirikia, ko Ieraia. Ko ngā ariki ēnei o ngā tohunga, o ō rātou tēina hoki, i ngā rā o Hehua.
NEH 12:8 Nā, ko ngā Rīwaiti: ko Hehua, ko Pinui, ko Karamiēre, ko Herepia, ko Hūrā, ko Matania, kei a ia nei te tikanga mō te whakawhetai, kei a ia, rātou ko ōna tēina.
NEH 12:9 Nā, ko Pakapukia rāua ko Uni, ō rātou tēina, kei tō rātou aroaro i ngā tiakanga.
NEH 12:10 Nā, ka whānau ake tā Hehua; ko Ioiakimi; whānau ake tā Ioiakimi, ko Eriahipi; whānau ake tā Eriahipi, ko Ioiara.
NEH 12:11 Whānau ake tā Ioiara, ko Honatana; whānau ake tā Honatana, ko Tarua.
NEH 12:12 Nā, i ngā rā o Ioiakimi, tērā ngā tohunga, ko ngā ariki o ngā whare o ngā mātua: tā Heraia, ko Meraia; tā Heremaia, ko Hanania;
NEH 12:13 tā Etera, ko Mehūrāma; tā Amaria, ko Iehohanana;
NEH 12:14 tā Meriku, ko Honatana; tā Hepania, ko Hōhepa;
NEH 12:15 tā Hārimi, ko Arana; tā Meraioto, ko Herekai;
NEH 12:16 tā Iro, ko Hakaraia; tā Kinetono, ko Mehūrāma;
NEH 12:17 tā Apia, ko Tīkiri; tā Miniamini, tā Moaria, ko Piritai;
NEH 12:18 tā Pirika, ko Hāmua; tā Hemaia, ko Honatana;
NEH 12:19 tā Toiaripi, ko Matenai; tā Ieraia, ko Uti;
NEH 12:20 tā Harai, ko Karai; tā Āmoko, ko Ēpere;
NEH 12:21 tā Hirikia, ko Hahapia; tā Ieraia, ko Netanēre.
NEH 12:22 Ko ngā Rīwaiti i ngā rā i a Eriahipi, i a Ioiara, i a Iohanana, i a Tarua, he mea tuhituhi hei ariki mō ngā whare o ngā mātua; me ngā tohunga anō i te wā e kīngi ana a Tariuha o Pahia.
NEH 12:23 Ko ngā tama a Rīwai, ko ngā ariki o ngā whare o ngā mātua, he mea tuhituhi ki te Pukapuka o Ngā Rā, ā tae noa ki ngā rā o Iohanana tama a Eriahipi.
NEH 12:24 Ā, ko ngā ariki o ngā Rīwaiti; ko Hahapia, ko Herepia, ko Hehua tama a Karamiēre, me ō rātou tēina anō i te ritenga mai o rātou, hei whakamoemiti, hei whakawhetai; ko te mea hoki ia i whakahaua e tā te Atua tangata, e Rāwiri, tēnei tiakanga i te ritenga mai o tēnei tiakanga.
NEH 12:25 Ko Matania, ko Pakapukia, ko Opāria, ko Mehūrāma, ko Taramono, ko Akupu ngā kaitiaki kūwaha, hei tiaki i ngā whare taonga i ngā kūwaha.
NEH 12:26 Nō ngā rā ēnei i a Ioiakimi tama a Hehua tama a Iohereke, nō ngā rā anō hoki i a Nehemia kāwana, i a Etera tohunga, i te karaipi rā.
NEH 12:27 Nā, i te tāinga o te kawa o te taiepa o Hiruhārama, i rapua ngā Rīwaiti i ō rātou wāhi katoa, i meatia kia kawea ki Hiruhārama, kia tāia hoki te kawa i runga i te koa, i te whakawhetai, i te waiata, i te himipora, i te hātere, i te hāpa.
NEH 12:28 I huihui mai anō ngā tama a ngā kaiwaiata i te mānia i ngā taha katoa o Hiruhārama, i ngā kāinga anō hoki o ngā Netopati;
NEH 12:29 i Petekirikara anō, i ngā māra hoki o Kepa, o Ātamawete; i hangā hoki e ngā kaiwaiata he kāinga mō rātou ki ngā taha katoa o Hiruhārama.
NEH 12:30 Nā, kei te pure ngā tohunga rātou ko ngā Rīwaiti i a rātou; kei te pure hoki i te iwi, i ngā kūwaha, i te taiepa.
NEH 12:31 Kātahi ka kawea e ahau ngā rangatira o Hūrā ki runga ki te taiepa, ā, whakaritea ana e ahau kia rua ngā rōpū nui hei whakawhetai, hei haere ā-mātua. Kotahi hei haere ki matau i runga i te taiepa whaka te Kēti Pūranga Paru;
NEH 12:32 ā, i muri i a rātou ka haere ko Hōhaia me tētahi tānga o ngā rangatira o Hūrā,
NEH 12:33 a Atāria, a Etera, a Mehūrāma,
NEH 12:34 a Hūrā, a Pineamine, a Hemaia, a Heremaia,
NEH 12:35 me ētahi o ngā tama a ngā tohunga e mau tētere ana; me Hakaraia tama a Honatana, tama a Hemaia, tama a Matania, tama a Mikaia, tama a Tākuru, tama a Āhapa;
NEH 12:36 me ōna tēina, arā a Hemaia, a Atarēre, a Mirarai, a Kirarai, a Maai, a Netanēre, a Hūrā, a Hanani, e mau ana i ngā mea whakatangi a tā te Atua tangata, a Rāwiri; ā, ko Etera karaipi kei tō rātou aroaro.
NEH 12:37 Nā, i te Kēti o te Puna Wai, i te ritenga mai anō o rātou, ka haere atu rātou i ngā kaupae o te pā o Rāwiri, i te pīnakitanga o te taiepa i runga i te whare o Rāwiri, tae noa ki te Kēti Wai ki te rāwhiti.
NEH 12:38 Nā, ko tērā atu rōpū o ngā kaiwhakawhetai i haere ki te whakatūtaki i a rātou, me ahau i muri i a rātou, me tētahi tānga o te iwi i runga i te taiepa, i runga o te Taumaihi Oumu tae noa ki te taiepa whānui;
NEH 12:39 i runga hoki i te Kēti o Ēparaima, i te Kēti Tawhito, i te Kēti Ika, i te Taumaihi o Hananēre, i te Taumaihi anō o Meaha tae noa ki te Kēti Hipi; ā, tū tonu rātou ki te Kēti i te Whare Herehere.
NEH 12:40 Nā, tū ana ngā rōpū e rua o ngā kaiwhakawhetai ki te whare o te Atua, mātou tahi ko tētahi tānga o ngā rangatira;
NEH 12:41 ko ngā tohunga; ko Eriakimi, ko Maaheia, ko Miniamini, ko Mikaia, ko Erioenai, ko Hakaraia, ko Hanania, e mau tētere ana;
NEH 12:42 ko Maaheia, ko Hemaia, ko Ereātara, ko Uti, ko Iehohanana, ko Marakia, ko Erama, ko Ētere. Nā nui atu te waiata a ngā kaiwaiata rātou ko Itirahia, ko te kaitohutohu.
NEH 12:43 He nui anō ngā patunga tapu i patua e rātou i taua rangi, ā, koa ana rātou; he nui hoki te koa i meinga ai rātou e te Atua kia koa. I koa hoki ngā wāhine me ngā tamariki, nō, ka rangona mai te koa o Hiruhārama i tawhiti.
NEH 12:44 I whakaritea anō i taua wā ētahi kaitirotiro i ngā rūma mō ngā taonga, mō ngā whakahere hapahapai, mō ngā hua mātāmua, mō ngā whakatekau; mā rātou e kohikohi ki reira i ngā māra o ngā pā, ngā wāhi i whakaritea e te Ture mā ngā tohunga rātou ko ngā Rīwaiti; i koa hoki a Hūrā ki ngā tohunga, ki ngā Rīwaiti, ki ngā mea e minita ana.
NEH 12:45 Nā, kei te tiaki rātou i ngā mea o tō rātou Atua, kei te tiaki hoki i te purenga, ā, i pērā anō ngā kaiwaiata, me ngā kaitiaki kūwaha; rite tonu ki te whakahau a Rāwiri rāua ko tāna tama, ko Horomona.
NEH 12:46 Nō ngā rā hoki o Rāwiri rāua ko Āhapa, nōnamata iho, tērā anō te rangatira mō ngā kaiwaiata, me ngā waiata whakamoemiti, me ngā whakawhetai ki te Atua.
NEH 12:47 I ngā rā hoki i a Herupapera, i ngā rā anō i a Nehemia, i hōmai e Īharaira katoa ngā wāhi mā ngā kaiwaiata, mā ngā kaitiaki kūwaha, te wāhi mō tēnei rā, mō tēnei rā. I whakatapua anō e rātou ngā mea tapu mā ngā Rīwaiti; ā, ko ngā Rīwaiti hei whakatapu mā ngā tama a Ārona.
NEH 13:1 I taua rā i kōrerotia i te Pukapuka a Mohi, me te whakarongo anō te iwi, ā, ka kitea te mea i tuhituhia ki reira kia kaua te Āmoni me te Moapi e tapoko ki te whakaminenga a te Atua ā ake ake;
NEH 13:2 nō te mea kīhai i maua mai e rātou he taro, he wai, hei tukunga mai mō ngā tama a Īharaira; engari, utua ana e rātou a Paraama hei hoariri mō rātou, hei kanga mō rātou. Heoi, whakaputaina kētia ake e tō tātou Atua te kanga hei manaaki.
NEH 13:3 Nā, i tō rātou rongonga i te ture, ka wehea atu e rātou ngā whakauru katoa i roto i a Īharaira.
NEH 13:4 Nā, i mua ake o tēnei ko Eriahipi, tohunga, kaitiaki i ngā rūma o te whare o tō tātou Atua, he whanaunga nō Tōpia,
NEH 13:5 whakapaia ana e tēnei he rūma nui mōna, ko te wāhi i whakatakotoria nei i mua ngā whakahere totokore, te parakihe, ngā oko, me te whakatekau o te wīti, o te wāina hou, o te hinu, ko te mea i kīia iho mā ngā Rīwaiti, rātou ko ngā kaiwaiata, ko ngā kaitiaki tatau, me ngā whakahere hapahapai mā ngā tohunga.
NEH 13:6 Otiia i tēnei wā katoa kāhore ahau i Hiruhārama; nō te toru tekau mā rua nei hoki o ngā tau o Arataherehe kīngi o Papurōna i tae ai ahau ki te kīngi, ā, maha noa ngā rā, ka īnoitia e ahau i te kīngi.
NEH 13:7 Nā, ka tae mai ahau ki Hiruhārama, ā, ka mōhio ki tā Eriahipi mahi kino, ki tāna mō Tōpia, i a ia i whakapai i tētahi rūma mōna i ngā marae o te whare o te Atua.
NEH 13:8 Nā, kino rawa ki ahau; ākiritia atu ana e ahau ngā mea katoa o te whare o Tōpia i roto i taua rūma.
NEH 13:9 Kātahi ahau ka kōrero, ā, tahia ana e rātou ngā rūma. Nā, whakahokia ana e ahau ki reira ngā oko o te whare o te Atua, ngā whakahere totokore me te parakihe.
NEH 13:10 I kite anō ahau kīhai ngā wāhi mā ngā Rīwaiti i hoatu, nā, oma ana rātou ki tāna māra, ki tāna māra, ngā Rīwaiti, ngā kaiwaiata i mahia ai te mahi.
NEH 13:11 Kātahi ka whawhaitia e ahau ngā rangatira, i mea ahau, “He aha i whakarērea ai te whare o te Atua?” Nā, huihuia ana rātou e ahau, whakatūria ana ki tō rātou tūranga.
NEH 13:12 Kātahi ka kawea mai e Hūrā katoa ngā whakatekau o te wīti, o te wāina hou, o te hinu, ki ngā whare taonga.
NEH 13:13 Nā, ka whakaritea e ahau he kaitiaki mō ngā taonga, ko Heremia tohunga, ko Hāroko karaipi, ā, o ngā Rīwaiti ko Peraia; i tō rātou taha ko Hanana tama a Tākuru tama a Matania; i kīia hoki rātou he hunga pono; ā, ko tā rātou, he tuwha mā ō rātou tuākana, tēina.
NEH 13:14 Kia mahara, e tōku Atua, ki tēnei mea āku, kaua hoki e horoia atu tēnei tikanga pai āku i puta nei ki te whare o tōku Atua, ki ngā ritenga mahi anō mō reira.
NEH 13:15 I aua rā ka kitea e ahau ētahi i roto i a Hūrā e takahi ana i ngā takahanga wāina i te hāpati, e kawe ana mai i ngā paihere wīti, e whakawaha ana i ngā kāihe; me te wāina anō, me ngā karepe, me ngā piki, me ngā pīkaunga katoa, e kawea mai ana e rātou ki Hiruhārama i te rā o te hāpati. Nā, whakaaturia ana e ahau tō rātou hē i te rā i hoko ai rātou i te kai.
NEH 13:16 I reira anō e noho ana ētahi tāngata o Tāira, he ika te kawenga, me ngā mea hoko katoa, ā, hokona ana e rātou i te hāpati ki ngā tama a Hūrā, i roto anō i Hiruhārama.
NEH 13:17 Kātahi ka whawhaitia e ahau ngā rangatira o Hūrā, i mea ahau ki a rātou, “He aha tēnei mea kino e mea nei koutou, i a koutou ka whakapoke nei i te rā hāpati?
NEH 13:18 Kāhore ianei ō koutou mātua i pēnei, ā, kawea mai ana e tō tātou Atua tēnei kino katoa ki runga ki a tātou, ki runga anō i tēnei pā? Nā, ko koutou hei whakaneke ake i te riri mō Īharaira, i te mea ka whakapokea nei te hāpati.”
NEH 13:19 Nā, pōuriuri kau ngā kūwaha o Hiruhārama i mua ake o te hāpati, ka mea ahau, kia tūtakina ngā kēti; i mea anō ahau kia kaua e whakatuwheratia, kia taka rā anō te hāpati. I whakatūria anō e ahau ētahi o āku tāngata ki ngā kūwaha, kei kawea mai ki roto he pīkaunga i te rā o te hāpati.
NEH 13:20 Heoi, kotahi, e rua ngā moenga i waho o Hiruhārama, o ngā tāngata i ngā taonga, o ngā kaihoko i ngā tini mea.
NEH 13:21 Kātahi ahau ka whakaatu i tō rātou hē, ā, ka mea ki a rātou, “He aha koutou i moe ai i te aronga o te taiepa? Ki te pēnā anō koutou, ka totoro atu tōku ringa ki a koutou.” Nō taua rā anō i kore ai tō rātou haere mai i te hāpati.
NEH 13:22 I kī atu anō ahau ki ngā Rīwaiti kia purea rātou, kia haere hoki ki te tiaki i ngā kūwaha hei whakatapu mō te rā hāpati. Maharatia anō tēnei āku, e tōku Atua; tohungia hoki ahau, kia rite ki te nui o tōu atawhai.
NEH 13:23 I aua rā anō ka kite ahau i ngā Hūrai kei a rātou e noho ana ētahi wāhine o Aharoro, o Āmona, o Moapa;
NEH 13:24 ko ā rātou tama hoki, ko tētahi wāhi o te reo nō Aharoro, kīhai rātou i mōhio ki tō ngā Hūrai reo; heoi i rite ki te reo o tētahi iwi, o tētahi iwi.
NEH 13:25 Nā, whawhaitia iho e ahau, kangā iho, patua ana ētahi o rātou, hutihutia ana ō rātou makawe, whakaoatitia ana ki te Atua: “Kaua e hoatu ā koutou tamāhine ki ā rātou tama, kaua anō hoki e tangohia mai ā rātou tamāhine mā ā koutou tama, mā koutou rānei.
NEH 13:26 He teka ianei nā ēnei mea i hara ai a Horomona kīngi o Īharaira? He maha ngā iwi, kāhore rawa ō rātou kīngi hei rite mōna, he mea aroha ia nā tōna Atua, ā, meinga ana e te Atua hei kīngi mō Īharaira katoa; ahakoa ko ia, i meinga ia e ngā wāhine kē kia hara.
NEH 13:27 Nā, kia rongo rānei mātou ki a koutou, kia mahi i tēnei hē nui katoa, kia tutū ki tō tātou Atua, kia mārena ki ngā wāhine kē?”
NEH 13:28 Nā, he hunaonga nā Hanaparata Horoni tētahi o ngā tama a Ioiara tama a Eriahipi tino tohunga; nā, peia ana ia e ahau i tōku taha.
NEH 13:29 Kia mahara ki a rātou, e tōku Atua, mō rātou i whakapoke i te tohungatanga, i te kawenata anō o te tohungatanga, o ngā Rīwaiti anō hoki.
NEH 13:30 Heoi, kua mā rātou i ahau i te poke o ngā tāngata kē, whakaritea ana hoki e ahau te mahi tiaki a ngā tohunga, a ngā Rīwaiti, te mahi a tēnei, a tēnei,
NEH 13:31 me te tikanga anō mō te whakahere wahie i ngā wā i whakaritea; mō ngā mātāmua anō. Maharatia ahau e tōku Atua mō te pai.
EST 1:1 Nā, i ngā rā i a Ahahueruha, arā a Ahahueruha i kīngi nei i Inia, ā tae noa ki Etiopia, kotahi rau e rua tekau mā whitu ngā kāwanatanga.
EST 1:2 I aua rā, i te mea e āta noho ana a Kīngi Ahahueruha i runga i te torōna o tōna kīngitanga i Huhana, i te whare kīngi.
EST 1:3 I te toru o ngā tau o tōna kīngitanga, ka tukua e ia he hākari mā āna rangatira katoa rātou ko āna tāngata. I tōna aroaro anō te hunga nunui o Pahia, o Meria, ngā tāngata rarahi, me ngā rangatira o ngā kāwanatanga,
EST 1:4 i a ia e whakakite ana i te taonga me te korōria o tōna kīngitanga, i tōna hōnore, i tōna ātaahua nui, he maha ngā rā, kotahi rau e waru tekau ngā rā.
EST 1:5 Nā, ka taka aua rā, ka tukua e te kīngi he hākari mā te iwi katoa i reira i Huhana, i te whare kīngi, mā te rahi, mā te iti, e whitu ngā rā, i te marae i te kāri i te whare o te kīngi.
EST 1:6 Ko ngā hīpoki he mea mā, he kākāriki, he purū; ko ngā aho he rīnena pai, he mea pāpura, ko ngā mōwhiti i mau ai, he hiriwa; ko ngā pou he mapere; ko ngā takotoranga he kōura, he hiriwa; ā, ko te papa o raro he mapere whero, mā, kōwhai, mangu hoki.
EST 1:7 Ko ngā kapu inu i hoatu mā rātou he oko kōura; rerekē tonu te āhua o tēnei oko, o tēnei oko; tōna nui anō o te wāina kīngi, rite tonu ki tā te kīngi tikanga.
EST 1:8 I rite anō te inu ki tā te ture, kāhore he tohe; nā te kīngi taua tikanga i whakatakoto ki ngā rangatira katoa o tōna whare, ko tā te tangata i pai ai ko tāna tērā e mea ai.
EST 1:9 I tukua anō e te kuīni, e Wahati, he hākari mā ngā wāhine i roto i te whare kīngi o Kīngi Ahahueruha.
EST 1:10 I te whitu o ngā rā, i te mea e koa ana te ngākau o te kīngi i te wāina, ka mea ia ki a Mehumana rātou ko Pitita, ko Harapona, ko Pikita, ko Apākata, ko Tetara, ko Karakaha, ki ngā rangatira rūma tokowhitu i mahi i te aroaro o Kīngi Ahahueruha,
EST 1:11 kia kawea mai te kuīni, a Wahati, ki te aroaro o te kīngi, me te karauna kuīni, kia whakakitea atu ai tōna ātaahua ki ngā iwi, ki ngā rangatira; he pai hoki tōna āhua.
EST 1:12 Otiia kīhai a Kuīni Wahati i pai kia haere mai i tā te kīngi kupu i kōrerotia e āna rangatira rūma. Nā reira i riri rawa ai te kīngi, ā, mura ana tōna riri i roto i a ia.
EST 1:13 Kātahi te kīngi ka kōrero ki ngā tāngata whai whakaaro i mōhio nei ki ngā tāima, ko tā te kīngi tikanga hoki ia, ki te hunga katoa e mōhio ana ki te ture, ki te whakarite tikanga;
EST 1:14 ko Karahena hoki i tata ki a ia, ko Hetara, ko Aramata, ko Tarahihi, ko Merehe, ko Marahena, ko Memukana, arā ko ngā rangatira tokowhitu o Pahia, o Meria, i kite nei i te mata o te kīngi, ā, i noho hei tuatahi i te kīngitanga.
EST 1:15 “Ki tā te ture, ko te aha kia meatia ki te kuīni, ki a Wahati, mōna kīhai i whakarite i te kupu a Kīngi Ahahueruha i kawea atu e ngā rangatira rūma?”
EST 1:16 Nā, ka mea a Memukana i te aroaro o te kīngi rātou ko ngā rangatira, “Ehara i te mea ki te kīngi anake tā Kuīni Wahati hē; engari ki ngā rangatira katoa anō, ki ngā iwi katoa o ngā kāwanatanga katoa a Kīngi Ahahueruha.
EST 1:17 Ka haere hoki te rongo o tēnei mahi a te kuīni ki ngā wāhine katoa, ā, ka whakahāwea ō rātou kanohi ki ā rātou tāne, ina ka kōrerotia, ‘I mea a Kīngi Ahahueruha kia kawea mai a Kuīni Wahati ki tōna aroaro, ā, kīhai tērā i haere mai.’
EST 1:18 Ka pēnā anō āianei te kupu a ngā wāhine rangatira o Pahia, o Meria, kua rongo nei ki te mahi a te kuīni, ki ngā rangatira katoa a te kīngi. Nā, tērā e nui atu te whakahāwea me te riri.
EST 1:19 “Ki te pai te kīngi, kia puta he kupu kīngi māna, me tuhituhi hoki ki roto ki ngā ture o ngā Pahi, o ngā Meri, kei taka, arā kia kaua a Wahati e haere mai ki te aroaro o Kīngi Ahahueruha; ko tōna kuīnitanga hoki kia hoatu e te kīngi ki tētahi atu e pai ake ana i a ia.
EST 1:20 Ā, ka rangona tā te kīngi tikanga e whakatakoto ai ia puta noa i tōna kīngitanga nui nei, kātahi ngā wāhine katoa ka whakahōnore i ā rātou tāne, i te iti, i te rahi.”
EST 1:21 Nā, pai tonu te kupu ki te whakaaro o te kīngi, o ngā rangatira; ā, rite tonu ki te kupu a Memukana tā te kīngi i mea ai.
EST 1:22 I tukua hoki e ia he pukapuka ki ngā kāwanatanga katoa a te kīngi, ki tēnei kāwanatanga, ki tēnei kāwanatanga, he mea whakarite ki tō reira tikanga mō te tuhituhi, ki tēnei iwi, ki tēnei iwi, he mea whakarite ki tō reira reo, arā ko ngā tāne katoa hei rangatira i roto i ō rātou whare; ā, kia kōrerotia i te reo o tō reira iwi.
EST 2:1 I muri iho i ēnei mea, i te mea kua mārie te riri o Kīngi Ahahueruha, ka mahara ia ki a Wahati, ki tāna i mea ai, ki te mea hoki i whakaritea mōna.
EST 2:2 Nā, ka mea ngā tāngata a te kīngi i mahi nei ki a ia, “Kia rapua mai ētahi kōtiro ātaahua mā te kīngi.
EST 2:3 Kia whakaritea hoki e te kīngi ētahi kaititiro puta noa i ngā kāwanatanga o tōna kīngitanga, ā, mā rātou e huihui mai ngā kōtiro ātaahua, he wāhina, ki Huhana, ki te whare kīngi, ki te whare wāhine, ki a Hēkai, ki tā te kīngi rangatira rūma, ko ia nei te kaitiaki o ngā wāhine; ā, kia hoatu ngā mea hei tahi mō tō rātou poke.
EST 2:4 Nā, ko te kōtiro e pai ki tā te kīngi titiro, ko ia hei kuīni i te wāhi o Wahati.” Nā, pai tonu taua mea ki te whakaaro o te kīngi, ā, pērā ana anō ia.
EST 2:5 I Huhana, i te whare kīngi tētahi tangata, he Hūrai, ko tōna ingoa ko Mororekai, he tama nā Haira, tama a Himei, tama a Kihi, he tangata nō Pineamine.
EST 2:6 He mea whakaheke mai i Hiruhārama i roto i te whakahekenga i whakahekea ai a Hekonia kīngi o Hūrā, i tērā i whakahekea rā e Nepukaneha kīngi o Papurōna.
EST 2:7 Nā, he mea atawhai nāna a Haraha, arā a Ehetere, te tamāhine a tōna matua kēkē; nō te mea kāhore ōna pāpā, i ōna whaea, ā, he ātanga taua kōtiro, he ātaahua; i te matenga hoki o tōna pāpā, o tōna whaea, ka tangohia ia e Mororekai hei tamāhine māna.
EST 2:8 Heoi, ka rangona te kupu a te kīngi, me tāna ture, ā, ka tokomaha anō ngā kōtiro ka huihuia ki Huhana, ki te whare kīngi, ki te ringa o Hēkai, nā, ka mauria anō hoki a Ehetere ki te whare o te kīngi, ki te ringa o Hēkai kaitiaki wāhine.
EST 2:9 Nā, he pai taua kōtiro ki tāna titiro, ka atawhaitia hoki e ia; i hohoro hoki tāna hōmai i ngā mea hei tahi mō tōna poke, me ērā atu mea anō māna, me ngā kōtiro tokowhitu i tika nei kia hoatu ki a ia, nō roto i te whare o te kīngi. I nekehia atu hoki ia, rātou ko āna kōtiro ki te wāhi pai rawa o te whare wāhine.
EST 2:10 Kīhai i whakaaturia e Ehetere tōna iwi me ōna whanaunga; nā Mororekai hoki i ako ki a ia kia kaua e whakaaturia.
EST 2:11 Nā, haere ai a Mororekai i tēnei rā, i tēnei rā, ki mua i te marae o te whare wāhine, kia mōhio ai ia kei te pēhea a Ehetere, ā, ka pēheatia rānei ia.
EST 2:12 Ā, nō ka rite te wā mō tēnei kōtiro, mō tēnei kōtiro, e haere ai ki a Kīngi Ahahueruha, i te mea ka taka ōna marama kotahi tekau mā rua, ko te ritenga hoki ia mō ngā wāhine, ko reira hoki rite ai ngā rā mō te tahi o tō rātou poke, arā e ono ngā marama o te hinu maira, ā, e ono ngā marama o ngā mea kakara, o ērā atu mea anō e tahia ai te poke o ngā wāhine.
EST 2:13 Ko te tikanga tēnei mō te haerenga atu o tētahi kōtiro ki te kīngi; ko ngā mea katoa i hiahia ai ia, i hoatu ki a ia, ā, ka riro i a ia i roto i te whare wāhine ki te whare o te kīngi.
EST 2:14 I haere mai ia i te ahiahi, ā, i te ata ka hoki ki tō ngā wāhine whare tuarua, ki te ringa o Haahakata, o tā te kīngi rangatira rūma, ko ia nei te kaitiaki o ngā wāhine iti; heoi anō ōna haerenga mai ki te kīngi, kia hiahia rā anō te kīngi ki a ia, kia whakahuatia anō hoki tōna ingoa.
EST 2:15 Ā, ka rite te wā e haere ai ki te kīngi a Ehetere tamāhine a Apihaira, a te matua kēkē o Mororekai, he mea tango nei hoki ia nā tēnei hei tamāhine māna, kīhai tērā i mea ki tētahi mea māna, heoi anō ko tā Hēkai i whakarite ai, ko ia nei tā te kīngi rangatira rūma, te kaitiaki o ngā wāhine. Nā, āhuareka rawa a Ehetere ki te titiro a te hunga katoa i kite i a ia.
EST 2:16 Heoi, ka mauria a Ehetere ki a Kīngi Ahahueruha, ki tōna whare kīngi, i te tekau o ngā marama, ko Tepete hoki taua marama, i te whitu o ngā tau o tōna kīngitanga.
EST 2:17 Nā, nui atu te aroha o te kīngi ki a Ehetere i tōna ki ngā wāhine katoa, āhuareka tonu ia, manakohia rawatia ana ia e ia i ngā wāhina katoa, pōtaea ana e ia te karauna kuīni ki tōna māhunga, meinga ana ia e ia hei kuīni i te wāhi o Wahati.
EST 2:18 Kātahi ka tukua e te kīngi he hākari nui mā āna rangatira katoa rātou ko āna tāngata, arā te Hākari o Ehetere. I whakangāwaritia anō hoki e ia ngā mea ki ngā kāwanatanga, ā, hoatu ana ētahi hākari e ia, he mea i rite ki tā te kīngi tikanga.
EST 2:19 Nā, i te rua o ngā huihuinga o ngā wāhine, kei te noho a Mororekai i te kūwaha o te kīngi.
EST 2:20 Kīhai anō i whakaaturia e Ehetere ōna whanaunga me tōna iwi; ko tā Mororekai hoki tērā i ako ai ki a ia; i whakarite hoki a Ehetere i te kupu a Mororekai, i pērā me ia e whakatupuria ake ana i tōna whare.
EST 2:21 I aua rā, i te mea e noho ana a Mororekai i te Kūwaha o te Kīngi, ka riri a Pikitana rāua ko Terehe, tokorua o ngā rangatira rūma a te kīngi, he kaitiaki i te tatau, ā, ka whai kia pā te ringa ki a Kīngi Ahahueruha.
EST 2:22 Nā, kua mōhiotia taua mea e Mororekai, ā, ka whakaaturia e ia ki a Ehetere, ki te kuīni; kōrerotia ana e Ehetere ki te kīngi i runga anō i te ingoa o Mororekai.
EST 2:23 Nā, ka oti taua mea te uiui, ā, ka kitea he tika, ka tāronatia rāua tokorua ki runga ki te rākau, ā, ka tuhituhia taua mea ki te pukapuka o ngā meatanga o ngā rā i te aroaro o te kīngi.
EST 3:1 I muri i ēnei mea ka whakanuia e Kīngi Ahahueruha a Hāmana tama a Hamerata Akaki, hāpainga ana ia ki runga, whakanekehia ake ana tōna torōna ki runga ake i o ngā rangatira katoa e noho ana i a ia.
EST 3:2 Nā, kei te tuohu, kei te koropiko ki a Hāmana ngā tāngata katoa a te kīngi i te Kūwaha o te Kīngi; ko tā te kīngi whakahau hoki tēnā mōna. Ko Mororekai ia kīhai i tuohu, kīhai i piko.
EST 3:3 Kātahi ka mea ngā tāngata a te kīngi i te Kūwaha o te Kīngi ki a Mororekai, “He aha koe i takahi ai i tā te kīngi whakahau?”
EST 3:4 Kōrero noa rātou ki a ia i ia rā, i ia rā, heoi kīhai ia i rongo ki a rātou. Nā, kōrerotia ana e rātou ki a Hāmana, kia kitea ai e ū rānei ngā mea a Mororekai; kua whakaaturia hoki e ia ki a rātou he Hūrai ia.
EST 3:5 Ā, nō te kitenga o Hāmana kīhai a Mororekai i tuohu, kīhai i piko ki a ia, nā, kī tonu a Hāmana i te riri.
EST 3:6 Otiia i whakahāwea tōna whakaaro ki te whakapā ringa ki a Mororekai anake, kua oti hoki te kōrero ki a ia te iwi o Mororekai. Nā reira i whai ai a Hāmana kia whakangaromia ngā Hūrai katoa i te kīngitanga katoa o Ahahueruha, arā te iwi o Mororekai.
EST 3:7 I te marama tuatahi, arā i te marama Nihana, i te tekau mā rua o ngā tau o Kīngi Ahahueruha, ka makā te Puri, arā te rota ki te aroaro o Hāmana i tēnei rā, i tēnei rā, i tēnei marama, i tēnei marama ā te tekau mā rua rā anō, arā te marama Arara.
EST 3:8 Nā, ka mea a Hāmana ki a Kīngi Ahahueruha, “Tēnei tētahi iwi kei te tohatoha haere, kei te marara noa atu i roto i ngā iwi o ngā kāwanatanga katoa o tōu kīngitanga; ā, ko ā rātou ture he rerekē i a ngā iwi katoa; kāhore hoki rātou e mahi i ā te kīngi ture. Nā, ehara i te mea pai mō te kīngi kia tukua tā rātou.
EST 3:9 Ki te pai te kīngi, me tuhituhi kia whakangaromia rātou, ā, māku e pāuna atu kia tekau mano taranata hiriwa ki ngā ringa o te hunga mahi i tā te kīngi mahi, kia kawea ki ngā whare taonga o te kīngi.”
EST 3:10 Nā, ka unuhia e te kīngi tōna mōwhiti i tōna ringa, ā, hoatu ana ki a Hāmana tama a Hamerata Akaki, ki te hoariri o ngā Hūrai.
EST 3:11 Ā, ka mea te kīngi ki a Hāmana, “Ka hoatu te hiriwa ki a koe, te iwi anō hoki, kia meatia ki a rātou tāu e pai ai.”
EST 3:12 Kātahi ka karangatia ngā karaipi a te kīngi i te marama tuatahi, i te tekau mā toru o ngā rā o taua marama, ā, ka tuhituhia ngā mea katoa i whakahaua e Hāmana ki ngā kāwana a te kīngi, rātou ko ngā kāwana iti o tēnei kāwanatanga, o tēnei kāwanatanga, ki ngā rangatira hoki o tēnei iwi, o tēnei iwi; ki tēnei kāwanatanga, ki tēnei kāwanatanga, he mea whakarite ki tō reira reo; i tuhituhia i runga i te ingoa o Kīngi Ahahueruha, hīri rawa ki te mōwhiti o te kīngi.
EST 3:13 Nā, ka tukua ngā pukapuka kia kawea e ngā kaikawe pukapuka ki ngā kāwanatanga katoa a te kīngi, kia whakangaromia, kia patua, kia hunā ngā Hūrai katoa, te taitama, me te koroheke, ngā kōhungahunga, me ngā wāhine, kia kotahi tonu te rā, i te tekau mā toru o ngā rā i te tekau mā rua o ngā marama, arā o te marama Arara, kia pāhuatia hoki ō rātou taonga.
EST 3:14 Ko ngā kōrero i tuhituhia, mō te ture kia hoatu ki ngā kāwanatanga katoa, i whakakitea nuitia ki ngā iwi katoa, kia tatanga ai rātou i taua rā.
EST 3:15 Haere ana ngā kaikawe pukapuka, he mea whakahohoro e te kupu a te kīngi, i hoatu anō te ture i Huhana, i te whare kīngi. Nā, noho ana te kīngi rāua ko Hāmana ki te inu; raruraru tonu ia te pā, a Huhana.
EST 4:1 Nō te mōhiotanga o Mororekai ki ngā mea katoa i meatia, haehaea ana e Mororekai ōna kākahu, kei te kākahu i te kākahu taratara, kei te mea i te pungarehu ki a ia, haere ana ki waenganui o te pā, he nui, he tīwerawera tāna tangi.
EST 4:2 Nā, haere ana ia ki mua i te Kūwaha o te Kīngi, e kore hoki e āhei kia haere ki roto i te Kūwaha o te Kīngi ki te mea he taratara te kākahu.
EST 4:3 Nā, i ngā kāwanatanga katoa, i ngā wāhi i tae atu ai te kupu a te kīngi me tāna ture, nui atu te tangi o ngā Hūrai, te nohopuku, te auē, me te uhunga; ā, he tokomaha he kākahu taratara tō rātou whāriki, he pungarehu.
EST 4:4 Nā, kua tae ngā kōtiro a Ehetere me āna rangatira rūma, kei te whakaatu ki a ia. Nā, tino mamae rawa te kuīni; hoatu ana e ia he kākahu kia kawea hei kākahu mō Mororekai, kia tangohia hoki ōna kākahu taratara i a ia; otiia kīhai ia i tango atu.
EST 4:5 Kātahi a Ehetere ka karanga ki a Hataka, ki tētahi o ngā rangatira rūma a te kīngi i whakaritea nei e ia kia tū ki tōna aroaro, ā, ka whakahau i a ia kia haere ki a Mororekai, kia mōhiotia he aha rā tēnei mea, ā, nā te aha hoki.
EST 4:6 Heoi, haere ana a Hataka ki a Mororekai, ki te waharoa o te pā, arā ki te aronga o te Kūwaha o te Kīngi.
EST 4:7 Ā, whakaaturia ana e Mororekai ki a ia ngā mea katoa i pā ki a ia, me te tūturu o te moni i kīia e Hāmana kia pāunatia e ia ki roto ki ngā whare taonga o te kīngi hei mea mō ngā Hūrai kia whakangaromia.
EST 4:8 I hōmai anō e ia ki a ia ngā kupu o te ture i tuhituhia, i hōmai nei i Huhana, kia whakangaromia rātou, ā, māna e whakakite ki a Ehetere, e whakaatu ki a ia, māna hoki ia e whakahau kia haere ki te kīngi wawao ai; kia rapua hoki i tōna aroaro he mea mō tōna iwi.
EST 4:9 Nā, haere ana a Hataka, whakaaturia ana e ia ki a Ehetere ngā kupu a Mororekai.
EST 4:10 Kātahi a Ehetere ka kōrero ki a Hataka, ā, hoatu ana e ia he kupu ki a Mororekai, hei mea,
EST 4:11 “E mōhio ana ngā tāngata katoa a te kīngi, me te iwi o ngā kāwanatanga a te kīngi, ko ngā tāngata katoa, ahakoa tāne, ahakoa wahine, e haere ana ki tō roto marae, ki te kīngi, i te mea kīhai i karangatia, kotahi tonu tāna ture kia whakamatea, ki te kāhore ia e torona atu e te kīngi te hēpeta kōura ki a ia kia ora ai. Engari ko ahau, ka toru tekau ēnei rā ōku kīhai i karangatia kia haere ki te kīngi.”
EST 4:12 Nā, kōrerotia ana e rātou ki a Mororekai ngā kupu a Ehetere,
EST 4:13 kātahi a Mororekai ka kī atu kia whakahokia tēnei kupu ki a Ehetere, “Kei mahara koe nā ka ora koe i te whare o te kīngi, i ngā Hūrai katoa.
EST 4:14 Ki te wahangū rawa hoki koe i tēnei wā, tērā e puta ake he tānga manawa, he whakaoranga mō ngā Hūrai i tētahi atu wāhi. Nā, ko koe, ko te whare hoki o tōu pāpā, ka ngaro; ko wai hoki ka mōhio mō te wā pēnei pea i tae mai ai koe ki te kīngitanga?”
EST 4:15 Kātahi ka kī a Ehetere kia whakahokia tēnei kupu ki a Mororekai:
EST 4:16 “Tīkina, huihuia ngā Hūrai katoa e kitea ki Huhana, ka nohopuku ai koutou, hei mea mōku; kaua hoki e kai, kaua e inu, kia toru ngā rā, pō, ao, ko ahau hoki, ko mātou ko āku kōtiro ka nohopuku anō; ko reira ahau haere ai ki te kīngi; he mea kāhore nei e rite ki te ture. Ā, ki te mea ka huna ahau, ka huna ahau.”
EST 4:17 Heoi, haere ana a Mororekai, meatia ana e ia ngā mea katoa i whakahaua ki a ia e Ehetere.
EST 5:1 Nā, i te toru o ngā rā ka kākahuria e Ehetere ōna kākahu kuīni, ā, tū ana ia i te marae o roto o te whare o te kīngi, i te ritenga atu o te whare o te kīngi; ko te kīngi hoki e noho ana i runga i te torōna o tōna kīngitanga i te whare kīngi, i te ritenga mai o te tatau o te whare.
EST 5:2 Ā, i te kitenga atu o te kīngi i a Ehetere, i te kuīni, e tū ana i te marae ka manakohia ia e ia, ā, ka torona mai e te kīngi te hēpeta kōura i tōna ringa ki a Ehetere. Heoi, ka whakatata atu a Ehetere, ā, ka pā ki te pito o te hēpeta.
EST 5:3 Kātahi ka mea te kīngi ki a ia, “He aha tāu mea, e te kuīni, e Ehetere? He aha hoki te mea e tonoa nei e koe? Ahakoa ko te hāwhe o te kīngitanga, ka hoatu ki a koe.”
EST 5:4 Anō rā ko Ehetere, “Ki te mea he pai ki tā te kīngi, kia haere mai te kīngi rāua ko Hāmana āianei ki te hākari kua oti i ahau te taka māna.”
EST 5:5 Anō rā ko te kīngi, “Whakahohorotia a Hāmana hei mea i tā Ehetere i kī ai.” Nā, haere ana te kīngi rāua ko Hāmana ki te hākari kua oti nei te takā e Ehetere.
EST 5:6 Ā, ka mea te kīngi ki a Ehetere i te mea e inu wāina ana, “He aha tāu e mea nei māu? Ka hoatu anō ki a koe. He aha hoki tāu e tono nei? Ahakoa ko te hāwhe o te kīngitanga, ka meatia.”
EST 5:7 Kātahi ka whakautu a Ehetere, ka mea, “Ko tāku i mea ai māku, ko tāku i tono ai.
EST 5:8 Ki te mea kua manakohia ahau e te kīngi, ki te pai te kīngi kia hōmai tāku i mea ai māku, kia meatia tāku i tono ai, me haere mai te kīngi rāua ko Hāmana ki te hākari e takā e ahau mā rāua; ā, āpōpō ka whakaritea e ahau te kupu a te kīngi.”
EST 5:9 Nā, ka puta atu a Hāmana ki waho i taua rā, me te koa, me te pai o te ngākau. Kei te kitenga ia o Hāmana i a Mororekai i te Kūwaha o te Kīngi, ā, kīhai tērā i whakatika, i oraora ki a ia, kī tonu a Hāmana i te riri ki a Mororekai.
EST 5:10 Otiia i whakamanawanui a Hāmana, ā, hoki ana ki tōna whare. Ā, ka tonoa e ia he tangata ki te tiki i ōna hoa, i tāna wahine hoki, i a Herehe.
EST 5:11 Ā, kōrerotia ana e Hāmana ki a rātou te korōria o ōna taonga, te tokomaha o āna tamariki, me a te kīngi whakanuinga katoa i a ia, me tāna whakanekehanga i a ia ki runga ake i ngā rangatira, i ngā tāngata a te kīngi.
EST 5:12 I mea anō a Hāmana, “He pono kīhai tētahi i tukua mai e te kuīni, e Ehetere hei hoa mō te kīngi ki te hākari i takā e ia, ko ahau anake; kua kīia mai anō ahau hei hoa atu mō te kīngi ki a ia āpōpō.
EST 5:13 Heoi, kāhore he pai o tēnei katoa ki ahau, i ahau e kite tonu ana i te Hūrai, i a Mororekai, e noho ana i te Kūwaha o te Kīngi.”
EST 5:14 Kātahi ka kī atu tāna wahine, a Herehe, rātou ko ōna hoa katoa ki a ia, “Me hanga he tārawa, kia rima tekau whatīanga te tiketike, ā, i te ata māu e kī atu ki te kīngi kia tāronatia a Mororekai ki runga; kātahi koe ka haere koa ai, kōrua ko te kīngi ki te hākari.” Nā, pai tonu taua kupu ki a Hāmana, ā, ka meinga e ia kia hangā taua tārawa.
EST 6:1 I taua pō kīhai i moe te kīngi, ā, ka mea kia kawea mai te pukapuka whakamahara ki ngā meatanga o ngā rā. Nā, ka kōrerotia ki te aroaro o te kīngi.
EST 6:2 Nā, ka kitea, kua oti te tuhituhi te whakaatu a Mororekai mō Pikitana rāua ko Terehe, mō ngā rangatira rūma tokorua a te kīngi, he kaitiaki tatau, i whai rāua kia pā te ringa ki a Kīngi Ahahueruha.
EST 6:3 Nā, ka mea te kīngi, “He aha te hōnore, te korōria, i whiwhi ai a Mororekai mō tēnei?” Anō rā ko ngā tāngata a te kīngi i mahi nei ki a ia, “Kīhai tētahi mea i meatia ki a ia.”
EST 6:4 Nā, ka mea te kīngi, “Ko wai kei te marae?” Nā, tērā a Hāmana kua tae mai ki te marae o waho o te whare o te kīngi, ki te kōrero ki te kīngi, kia tāronatia a Mororekai ki runga ki te tārawa kua oti te hanga mōna.
EST 6:5 Nā, ka mea ngā tāngata a te kīngi ki a ia, “Ko Hāmana tēnei e tū mai nei i te marae.” Anō rā ko te kīngi, “Kia haere mai ia.”
EST 6:6 Heoi, ka haere mai a Hāmana. Nā, ka mea te kīngi ki a ia, “Ko te aha kia meatia ki tā te kīngi tangata e pai ai kia whakahōnoretia?” Nā, ko te meatanga ake a Hāmana i roto i tōna ngākau, “Ko wai atu i ahau tā te kīngi e pai ai kia whakahōnoretia?”
EST 6:7 Nā, ka mea a Hāmana ki te kīngi, “Mō tā te kīngi tangata e pai ai kia whakahōnoretia,
EST 6:8 me kawe mai ngā kākahu kīngi, e kākahu nei te kīngi, me te hōiho anō e ekengia ana e te kīngi, pōtae rawa he karauna kīngi ki tōna mātenga.
EST 6:9 Nā, ka hoatu taua kākahu me te hōiho ki te ringa o tētahi o ngā tino rangatira a te kīngi, kia whakakākahuria atu ki te tangata e pai ai te kīngi kia whakahōnoretia; nā, ka mea i a ia kia eke i runga i te hōiho i te waharoa o te pā, ka karanga haere ai i mua i a ia, ‘Ka pēneitia te tangata e pai ai te kīngi kia whakahōnoretia.’ ”
EST 6:10 Kātahi ka mea te kīngi ki a Hāmana, “Kia hohoro tāu tiki atu i te kākahu, i te hōiho, i tāu i kī nā, ka pērā ai ki a Mororekai, ki te Hūrai, e noho nei i te Kūwaha o te Kīngi. Kei taka tētahi kupu o ngā mea katoa i kōrerotia e koe.”
EST 6:11 Kātahi ka tīkina e Hāmana te kākahu, me te hōiho, ā, whakakākahuria ana e ia a Mororekai, ārahina ana i runga i te hōiho i te waharoa o te pā, me te karanga anō i tōna aroaro, “Ka pēneitia te tangata e pai ai te kīngi kia whakahōnoretia.”
EST 6:12 Nā, hoki ana a Mororekai ki te Kūwaha o te Kīngi; ko Hāmana ia i hohoro ki tōna whare, pōuri tonu, hīpoki rawa te māhunga.
EST 6:13 Nā, ka kōrerotia e Hāmana ki tāna wahine, ki a Herehe, ki ōna hoa katoa ngā mea katoa i pā ki a ia. Kātahi āna tāngata mōhio, rātou ko tāna wahine, ko Herehe, ka mea ki a ia, “Ki te mea nō ngā uri o ngā Hūrai a Mororekai, kua tīmata nā koe te hinga i tōna aroaro, e kore koe e kaha i a ia, engari, ka hinga rawa koe i tōna aroaro.”
EST 6:14 I a rātou e kōrero ana ki a ia, ka tae mai ngā rangatira rūma a te kīngi, pōrangi tonu, hei ārahi mō Hāmana ki te hākari i takā e Ehetere.
EST 7:1 Heoi, kua tae te kīngi rāua ko Hāmana ki te hākari, ki te kuīni, ki a Ehetere,
EST 7:2 ā, ka mea anō te kīngi ki a Ehetere i te rua o ngā rā, i te mea e inu wāina ana, “He aha tāu e mea nei māu, e Kuīni Ehetere? Ka hoatu hoki ki a koe. He aha hoki tāu e tono ai? Ahakoa ko te hāwhe o te kīngitanga, ka meatia.”
EST 7:3 Kātahi ka whakautu a Kuīni Ehetere, ka mea, “Ki te mea kua manakohia ahau e koe, e te kīngi, ā, ki te pai te kīngi; ko tāku e mea ai māku, ko ahau kia whakaorangia, ko tāku e tono nei māku, ko tōku iwi.
EST 7:4 Kua oti hoki mātou, ahau me tōku iwi, te hoko kia whakangaromia, kia whakamatea, kia hunā. Otiia me i hokona mātou hei pononga tāne, hei pononga wāhine, kua whakarongo puku ahau. E kore anō ia e rite i te hoariri ngā mea a te kīngi ka maumauria nei.”
EST 7:5 Kātahi ka utua e Kīngi Ahahueruha, ka mea ki a Kuīni Ehetere, “Ko wai rā? Kei hea rā te tangata i pokanoa nei tōna ngākau ki te mea i tēnei mea?”
EST 7:6 Anō rā ko Ehetere, “He hoariri, he hoa whawhai, anei ko te Hāmana kino nei.” Kātahi ka mataku a Hāmana i te aroaro o te kīngi rāua ko te kuīni.
EST 7:7 Nā, whakatika ana te kīngi, i te inumanga wāina, he riri hoki nōna, ā, haere ana ki te kāri o te whare. Ko Hāmana hoki, tū tonu ki te īnoi ki a Kuīni Ehetere mōna kia whakaorangia; i kite hoki ia kua takoto te hē mōna i te kīngi.
EST 7:8 Kātahi ka hoki te kīngi i te kāri o te whare ki te whare inu wāina, nā, ko Hāmana kua takoto ki te takotoranga o Ehetere. Kātahi ka mea te kīngi, “E takotoria anō rānei e ia te kuīni i tōku aroaro i te whare?” Puta ana te kupu i te māngai o te kīngi, ka hīpokina e rātou te mata o Hāmana.
EST 7:9 Kātahi ka mea a Harapona, tētahi o ngā rangatira rūma i te aroaro o te kīngi, “Nanā, te tārawa e rima tekau whatīanga te tiketike, i hangā e Hāmana mō Mororekai, nāna nei te kupu pai mō te kīngi, e tū rā i te whare o Hāmana.” Anō rā ko te kīngi, “Tāronatia ia ki runga.”
EST 7:10 Heoi, tāronatia ana a Hāmana ki runga ki te tārawa i oti rā i a ia mō Mororekai, ā, ka māriri iho te riri o te kīngi.
EST 8:1 Nō taua rā ka hōmai e Kīngi Ahahueruha ki a Kuīni Ehetere te whare o Hāmana, hoariri o ngā Hūrai. Ā, ka haere a Mororekai ki te aroaro o te kīngi, nā Ehetere hoki i whakaatu he whanaunga ia nōna.
EST 8:2 Ā, unuhia ana e te kīngi tōna mōwhiti i tangohia mai nei e ia i a Hāmana, ā, hoatu ana ki a Mororekai. Ā, i whakanohoia a Mororekai e Ehetere ki te whare o Hāmana.
EST 8:3 Ā, i kōrero anō a Ehetere ki te aroaro o te kīngi, me te takoto anō ki ōna waewae, me te tangi anō, i īnoi ki a ia kia karohia te kino a Hāmana Akaki, me te whakaaro i whakaaro ai ia mō ngā Hūrai.
EST 8:4 Kātahi ka torona atu e te kīngi te hēpeta kōura ki a Ehetere. Heoi, ka whakatika a Ehetere, ka tū ki te aroaro o te kīngi.
EST 8:5 Ā, ka mea, “Ki te pai te kīngi, ki te manakohia hoki ahau e ia, ki te mea he tika tēnei mea ki tō te kīngi whakaaro, ki te mea he pai ahau ki tāna titiro, me tuhituhi kia whakatakā ngā pukapuka i whakaaroa e Hāmana tama a Hamerata Akaki, āna i tuhituhi ai kia hunā ngā Hūrai i ngā kāwanatanga katoa a te kīngi.
EST 8:6 Me pēhea hoki e āhei ai ahau te titiro ki te hē e pā ki tōku iwi? Me pēhea hoki e āhei ai ahau te titiro ki te hunanga o ōku whanaunga?”
EST 8:7 Anō rā ko Kīngi Ahahueruha ki a Kuīni Ehetere rāua ko Mororekai Hūrai, “Nanā, kua oti te hoatu e ahau ki a Ehetere te whare o Hāmana; kua oti anō tērā te tārona ki runga ki te rākau mō tōna ringa i totoro ki ngā Hūrai.
EST 8:8 Mā kōrua anō e tuhituhi tā kōrua e pai ai mō ngā Hūrai, i runga i te ingoa o te kīngi, hīri rawa ki te mōwhiti o te kīngi; he tuhituhi hoki i tuhituhia i runga i te ingoa o te kīngi, ā, i hīritia ki te mōwhiti o te kīngi, e kore e whakatakā.”
EST 8:9 Kātahi ka karangatia ngā karaipi a te kīngi i taua wā, i te toru o ngā marama, arā i te marama Hiwana, i te rua tekau mā toru o ngā rā o taua marama; ā, ka tuhituhia ngā mea katoa i whakahau ai a Mororekai ki ngā Hūrai, ki ngā kāwana, rātou ko ngā kāwana iti, ko ngā rangatira anō o ngā kāwanatanga, o Inia mai anō ā tae noa ki Etiopia, kotahi rau e rua tekau mā whitu ngā kāwanatanga; ki tēnei kāwanatanga, ki tēnei kāwanatanga, he mea whakarite ki tā rātou tuhituhi; ki tēnei iwi, ki tēnei iwi, he mea whakarite anō ki tō rātou reo, ki ngā Hūrai anō, he mea whakarite ki tā rātou tuhituhi, ki tō rātou reo.
EST 8:10 Tuhituhia ana e ia i runga i te ingoa o Kīngi Ahahueruha, hīri rawa ki te mōwhiti o te kīngi, ā, tukua ana ngā pukapuka kia maua e ngā kaikawe pukapuka i runga hōiho, i eke i runga i ngā kararehe tere o ngā mahi a te kīngi, he momo.
EST 8:11 E mea ana i roto te tukunga a te kīngi i ngā Hūrai o ngā pā katoa kia huihui, kia tū ki runga, kia ora ai rātou, kia whakangaro, kia whakamate, kia huna i ngā ope katoa o te iwi o te kāwanatanga e tauria ai rātou ko ā rātou kōhungahunga, ko ā rātou wāhine kia pāhua hoki i ō rātou taonga hei mea parakete.
EST 8:12 I taua rā kotahi i ngā kāwanatanga katoa a Kīngi Ahahueruha, arā i te tekau mā toru o ngā rā o te tekau mā rua o ngā marama, koia nei te marama Arara.
EST 8:13 I whakapuakina ki ngā iwi katoa ngā kupu i tuhituhia mō te ture kia whakatakotoria i ngā kāwanatanga katoa kia mataara ai ngā Hūrai i taua rā ki te rapu utu i ō rātou hoariri.
EST 8:14 Heoi, haere ana ngā kaikawe pukapuka, he mea waha e ngā kararehe tere o ngā mahi a te kīngi, he mea whakahohoro, he mea akiaki e te kupu a te kīngi. I hōmai anō te ture i Huhana, i te whare kīngi.
EST 8:15 Nā, haere ana a Mororekai i te aroaro o te kīngi, ko tōna kākahu he kākahu kīngi, he purū, he mā, me te karauna kōura nui, me tētahi kākahu hoki he rīnena pai, he pāpura. Nā, hāmama ana, hari ana te pā, a Huhana.
EST 8:16 Nā, ko ngā Hūrai i māha, i koa, me te hari me te hōnore.
EST 8:17 I ngā kāwanatanga katoa anō, i ngā pā katoa i ngā wāhi i tae ai te kupu a te kīngi me tāna ture, he hari, he koa tō ngā Hūrai, he kai hākari, he rā pai. Ā, he tokomaha o ngā iwi o te whenua i mea i a rātou hei Hūrai; i tau hoki te wehi o ngā Hūrai ki a rātou.
EST 9:1 Nā, i te tekau mā rua o ngā marama, arā i te marama Arara, i te tekau mā toru o ngā rā, i te mea ka tata te mahia te kupu a te kīngi, me tāna ture, i te rā anō i hua ai ngā hoariri o ngā Hūrai ka taea e rātou. Otiia, i puta kē anō, nō te mea i taea e ngā Hūrai te hunga i kino ki a rātou.
EST 9:2 Ka huihui ngā Hūrai ki ō rātou pā i ngā kāwanatanga katoa a Kīngi Ahahueruha, he mea kia pā ai ngā ringa ki te hunga e whai ana kia mate rātou; ā, kīhai tētahi i tū ki tō rātou aroaro; kua tau hoki tō rātou wehi ki ngā iwi katoa.
EST 9:3 Ā, ko ngā rangatira katoa o ngā kāwanatanga, me ngā kāwana, me ngā kāwana iti, me ngā kaimahi i te mahi a te kīngi, i āwhina i ngā Hūrai; nō te mea kua tau te wehi o Mororekai ki a rātou.
EST 9:4 He nui hoki a Mororekai i roto i te whare o te kīngi, ā, i pakū tōna rongo ki ngā kāwanatanga katoa; kua nui haere hoki taua tangata, a Mororekai.
EST 9:5 Nā, patua iho e ngā Hūrai ō rātou hoariri katoa ki te hoari, he parekura, he whakangaromanga; meatia ana e rātou tā rātou i pai ai ki te hunga i kino ki a rātou.
EST 9:6 I Huhana anō, i te whare kīngi, e rima rau ngā tāngata i patua, i whakangaromia e ngā Hūrai.
EST 9:7 Ko Parahanarata anō, ko Rarapono, ko Ahapata,
EST 9:8 ko Porata, ko Araria, ko Arirata,
EST 9:9 ko Paramahata, ko Arihai, ko Arirai, ko Waietata,
EST 9:10 ko ngā tama kotahi tekau a Hāmana tama a Hamerata, a te hoariri o ngā Hūrai, patua iho e rātou; kīhai ia ō rātou ringa i pā ki ngā taonga.
EST 9:11 I taua rā ka kawea ki te kīngi te tokomaha o te hunga i patua ki Huhana, ki te whare kīngi.
EST 9:12 Nā, ka mea te kīngi ki a Kuīni Ehetere, “E rima rau ngā tāngata kua patua nei e ngā Hūrai, huna rawa ki Huhana, ki te whare kīngi, me ngā tama kotahi tekau a Hāmana; i pēhea rā rātou i ērā kāwanatanga a te kīngi? He aha hoki tāu e mea nei māu? Ka hoatu hoki ki a koe. He aha ake tāu e tono ai? Ā, ka meatia.”
EST 9:13 Anō rā ko Ehetere, “Ki te pai te kīngi, tukua ngā Hūrai i Huhana, āpōpō kia mea i ngā mea o te ture o tēnei rā, kia whakairihia ngā tama kotahi tekau a Hāmana ki runga ki te rākau.”
EST 9:14 Nā, ka mea te kīngi kia meatia tēnei, ā, ka hōmai te ture i Huhana, nā, whakairihia ana ngā tama kotahi tekau a Hāmana.
EST 9:15 Ā, i huihui ngā Hūrai i Huhana, i te tekau mā whā anō o ngā rā o te marama Arara, ā, e toru rau ngā tāngata i patua e rātou i Huhana; kīhai ia ō rātou ringa i pā ki ngā taonga.
EST 9:16 Nā, ko ērā atu Hūrai o ngā kāwanatanga a te kīngi, i huihui rātou, ā, tū ana ki runga, kia ora ai rātou. Nā, ka tā ō rātou manawa i ō rātou hoariri, ā, patua iho e rātou o te hunga i kino ki a rātou e whitu tekau mā rima mano; kīhai anō ia ō rātou ringa i pā ki ngā taonga.
EST 9:17 I meinga tēnei i te tekau mā toru anō o ngā rā o te marama Arara; i te tekau mā whā hoki ka tā te manawa, waiho iho e rātou hei rā mō te kai hākari, mō te hari.
EST 9:18 Engari ko ngā Hūrai i Huhana, i huihui i te tekau mā toru o ngā rā o taua marama, i te tekau mā whā anō, ā, nō te tekau mā rima ka whakatā; waiho iho e rātou hei rā mō te kai hākari, mō te hari.
EST 9:19 Nā reira ngā Hūrai e noho ana i ngā pā koraha, i ngā pā taiepakore, i mea ai ko te tekau mā whā o ngā rā o te marama Arara hei rā mō te hari, mō te kai hākari, hei rā pai, e tuku tahua ai tētahi ki tētahi.
EST 9:20 Nā, ka tuhituhia e Mororekai ēnei mea katoa, ā, tukua ana e ia ngā pukapuka ki ngā Hūrai katoa o ngā kāwanatanga katoa a Kīngi Ahahueruha, ki ngā mea e tata ana, ki ngā mea i tawhiti,
EST 9:21 kia whakapūmautia te tikanga mā rātou, kia whakaritea te tekau mā whā o ngā rā o te marama Arara, me te tekau mā rima anō o ngā rā o taua marama, i ia tau, i ia tau,
EST 9:22 kia rite ki ngā rā i tā ai te manawa o ngā Hūrai i ō rātou hoariri, ki te marama anō i puta kē ai tō rātou tangi hei hari, tō rātou pōuri hei rā pai, kia meinga hei rā kai hākari, hei rā hari, e tukua ai ētahi wāhi mā tētahi, mā tētahi, me ētahi mea anō mā ngā rawakore.
EST 9:23 Nā, whakaae ana ngā Hūrai kia mahia ngā mea i tīmataia nei e rātou, ngā mea anō i tuhituhia e Mororekai ki a rātou.
EST 9:24 He mea mō tā Hāmana tama a Hamerata Akaki, ko te hoariri nei ia o ngā Hūrai katoa; whakaaroa ana e ia he hē mō ngā Hūrai, kia hunā rātou; ā, makā ana e ia he Puri – arā he rota – mō rātou kia whakamōtītia, kia hunā.
EST 9:25 Nō te taenga ia o taua mea ki te aroaro o te kīngi, ka whakahau ia, nā te pukapuka, kia hoki te whakaaro kino i whakaaroa e ia mō ngā Hūrai ki runga ki tōna pane ake, ā, tāronatia ana ia, rātou ko āna tama, ki runga ki te tārawa.
EST 9:26 Nā reira i huaina ai aua rā ko Purimi, nō te ingoa nei, nō Puri. Nā reira anō, nō ngā kupu katoa o tēnei pukapuka, nō tā rātou anō i kite ai o tēnei mea, nō ngā mea anō i pā ki a rātou,
EST 9:27 i whakapūmau ai ngā Hūrai i te tikanga, i whakaae ai hei mea mā rātou, mā ō rātou uri, mā te hunga anō hoki e honoa ki a rātou, hei mea e kore e whakatakā, kia whakaritea ēnei rā e rua, kia pērā anō me te mea i tuhituhia, i te wā anō e tika ai i tēnei tau, i tēnei tau.
EST 9:28 Kia maharatia anō ēnei rā, kia mahia e ngā whakatupuranga katoa e ngā hapū katoa, e ngā kāwanatanga katoa, e ngā pā katoa, kia kaua anō ēnei rā o Purimi e ngaro i roto i ngā Hūrai, me te maharatanga ki aua rā kia kaua e mahue i ō rātou uri.
EST 9:29 Kātahi ka tuhituhi a Kuīni Ehetere, tā Apihaira tamāhine, a Mororekai Hūrai anō, whakapau rawa tō rāua mana, kia whakapūmautia tēnei pukapuka tuarua o Purimi.
EST 9:30 Ā, i tukua e ia he pukapuka ki ngā Hūrai katoa, ki ngā kāwanatanga kotahi rau e rua tekau mā whitu o te kīngitanga o Ahahueruha, nō te rangimārie ngā kupu, nō te pono
EST 9:31 kia whakapūmautia ēnei rā o Purimi i ngā wā e tika ai, kia pērā me tā Mororekai Hūrai rāua ko Kuīni Ehetere i whakatakoto ai mā rātou; me tā rātou anō i whakatakoto ai hei tikanga mā rātou, mā ō rātou uri, arā ngā nohopuku, me tā rātou tangi.
EST 9:32 Nā, whakapūmautia ana ēnei meatanga Purimi e te kupu a Ehetere; tuhituhia iho ki te pukapuka.
EST 10:1 I whakaritea anō e Kīngi Ahahueruha he takoha mā te whenua, mā ngā motu o te moana.
EST 10:2 Nā, ko ngā meatanga katoa o tōna kaha, o tōna nui, me te kōrero katoa o te nui o Mororekai i whakanuia nei e te kīngi, kīhai ianei i tuhituhia ki te Pukapuka o ngā meatanga o Ngā Rā o Ngā Kīngi o Meria, o Pahia?
EST 10:3 Ko Mororekai Hūrai hoki te tuarua o Kīngi Ahahueruha, he nui anō ia i roto i ngā Hūrai, he matenuitanga nā te mano tini o ōna tuākana, tēina; he rapu tonu tāna i te pai mō tōna iwi, he kōrero anō i te āta noho ki ōna uri katoa.
JOB 1:1 Tērā tētahi tangata i te whenua o Uhu, ko Hopa tōna ingoa. Ā, ko taua tangata he tangata tapatahi, he tika, he tangata wehi ki te Atua, mawehe i te kino.
JOB 1:2 Nā, ka puta ōna uri, tokowhitu ngā tama, tokotoru ngā tamāhine.
JOB 1:3 Ko āna rawa hoki, e whitu mano ngā hipi, e toru mano ngā kāmera, ko ngā kau, e rima rau ngā ioka, e rima rau ngā kāihe uha, ā, ko āna pononga he tini noa atu. Nā reira, nui atu taua tangata i ngā tāngata katoa o te rāwhiti.
JOB 1:4 Nā, ka haere āna tama, ka takā he hākari ki ō rātou whare, he rā ki tō tēnei, he rā ki tō tēnei; ā, ka tukua he karere hei karanga i ō rātou tuāhine tokotoru kia kai tahi, kia inu tahi rātou.
JOB 1:5 Ā, ka taka ngā rā o tā rātou kai hākari, ka unga tāngata a Hopa, ā, whakatapua ana rātou, maranga wawe ana ia i te ata, whakaekea ana e ia he tahunga tinana, rite tonu ki a rātou katoa te maha; i mea hoki a Hopa, “Tērā pea kua hara āku tama, kua kanga ki te Atua i roto i ō rātou ngākau.” Ko tā Hopa mahi tonu tēnei i ngā rā katoa.
JOB 1:6 Nā, i tētahi o aua rā ka haere mai ngā tama a te Atua, kia tū ai rātou i te aroaro o Ihowā, ā, haere ana mai a Hātana i roto i a rātou.
JOB 1:7 Nā, ka mea a Ihowā ki a Hātana, “I haere mai koe i hea?” Anō rā ko Hātana ki a Ihowā, ka mea, “I te kōpikopiko, i te hāereere i te whenua.”
JOB 1:8 Anō rā ko Ihowā ki a Hātana, “Kua mahara rānei tōu ngākau ki tāku pononga, ki a Hopa, kāhore hoki he rite mōna i te whenua, he tangata ngākau tapatahi, he tika, e wehi ana i te Atua, e mawehe ana i te kino?”
JOB 1:9 Anō rā ko Hātana ki a Ihowā, ka mea, “He wehi noa ianei tō Hopa i te Atua?
JOB 1:10 He teka ianei kua oti ia te karapoti e koe ki te taiepa, me tōna whare, me āna mea katoa? Kua manaakitia e koe te mahi a ōna ringa, kua nui haere hoki āna kararehe i runga i te whenua.
JOB 1:11 Engari totoro tōu ringa, pā atu ki āna mea katoa; inā, ka kanga ia i a koe ki tōu aroaro.”
JOB 1:12 Anō rā ko Ihowā ki a Hātana, “Nanā, ko āna mea katoa kei tōu ringa, kaua ia tōu ringa e totoro ki a ia.” Heoi, haere atu ana a Hātana i te aroaro o Ihowā.
JOB 1:13 Nā, i tētahi o ngā rā i te mea e kai ana āna tama, āna tamāhine, e inu wāina ana i roto i te whare o tō rātou tuakana,
JOB 1:14 ka haere mai tētahi karere ki a Hopa, ka mea, “I te parau ngā kau, me te kai anō ngā kāihe i tō rātou taha,
JOB 1:15 nā, ka kōkiri mai ngā Hapeana, kāhakina ana rātou; ko ngā tāngata hoki, patua iho ki te mata o te hoari; ko ahau anake kua mawhiti mai, tōku kotahi, hei kōrero ki a koe.”
JOB 1:16 I tēnei anō e kōrero ana, ka tae mai anō tētahi, ka mea, “Kua taka iho he ahi nā te Atua i te rangi, ā, toro ana i roto i ngā hipi, i ngā tāngata, ā, pau noa, ko ahau anake kua mawhiti mai, tōku kotahi, hei kōrero ki a koe.”
JOB 1:17 I tēnei anō e kōrero ana, ka tae mai anō tētahi, ka mea, “Wehea ake e ngā Karari e toru ngā matua, huaki ana ki ngā kāmera, kāhakina ana e rātou; ko ngā tāngata patua iho ki te mata o te hoari, ā, ko ahau anake kua mawhiti mai, tōku kotahi, hei kōrero ki a koe.”
JOB 1:18 I tēnei anō e kōrero ana, ka tae mai anō tētahi, ka mea, “Ko āu tama, ko āu tamāhine, i te kai, i te inu wāina i roto i te whare o tō rātou tuākana,
JOB 1:19 nā, ko te putanga mai o tētahi hau nui i te koraha, patu pū ki ngā koki e whā o te whare, hinga ana ki runga ki ngā taitamariki; mate ake rātou; ā, ko ahau anake kua mawhiti mai, tōku kotahi, hei kōrero ki a koe.”
JOB 1:20 Kātahi ka whakatika a Hopa; haea ana e ia tōna koroka; heua ana tōna māhunga; takoto ana ki te whenua; koropiko ana,
JOB 1:21 ā, ka mea ia, “I puta tahanga mai ahau i te kōpū o tōku whaea, ā, ka hoki tahanga atu anō ahau ki reira. Nā Ihowā i hōmai, nā Ihowā i tango; kia whakapaingia te ingoa o Ihowā.”
JOB 1:22 I tēnei katoa kīhai a Hopa i hara, kīhai anō i whakakūware ki tā te Atua.
JOB 2:1 He rā anō ka haere mai ngā tama a te Atua, kia tū i te aroaro o Ihowā, ā, ka haere mai hoki a Hātana i roto i a rātou ki te aroaro o Ihowā tū ai.
JOB 2:2 Nā, ka mea a Ihowā ki a Hātana, “I haere mai koe i hea?” Anō rā ko Hātana ki a Ihowā, “I te kōpikopiko, i te hāereere i te whenua.”
JOB 2:3 Nā, ka mea a Ihowā ki a Hātana, “Kua mahara rānei tōu ngākau ki tāku tangata, ki a Hopa? Kāhore he rite mōna i te whenua, he tangata ngākau tapatahi, he tika, e wehi ana i te Atua, e mawehe ana i te kino; ū tonu anō hoki tōna tapatahitanga, ahakoa e whakaoho ana koe i ahau ki te hē mōna, kia whakangaromia noatia ia.”
JOB 2:4 Nā, ka utua e Hātana tā Ihowā, ka mea ia, “He kiri mō te kiri; āe rā, ko ngā mea katoa hoki a te tangata ka hoatu hei utu mōna kia ora.
JOB 2:5 Engari kia totoro atu tōu ringa, kia pā ki tōna wheua, ki ōna kikokiko, inā, ka kanga ia i a koe ki tōu aroaro.”
JOB 2:6 Nā, ka mea a Ihowā ki a Hātana, “Nanā, kei tōu ringa ia; otiia kia tūpato kei mate rawa ia.”
JOB 2:7 Heoi, ka haere atu a Hātana i te aroaro o Ihowā; patua iho e ia a Hopa ki te whēwhē kino i te kapu o tōna waewae, ā tae noa ki tōna tumuaki.
JOB 2:8 Nā, ka mau ia ki tētahi maramara rīhi hei waru i a ia, ā, noho ana i roto i te pungarehu.
JOB 2:9 Kātahi tāna wahine ka mea ki a ia, “Ka ū tonu koia koe ki tōu tapatahitanga? Kangā te Atua, ka mate ai.”
JOB 2:10 Anō rā ko ia ki a ia, “Rite tonu tō kupu ki te kupu a tētahi o ngā wāhine kūware. Ha! Kia whiwhi tātou ki te pai i te Atua, ā, kia kaua e whiwhi ki te kino?” I tēnei katoa kīhai i hara ngā ngutu o Hopa.
JOB 2:11 Nā, i te rongonga o ngā hoa tokotoru o Hopa ki tēnei aituā katoa i pā nei ki a ia, ka haere mai rātou i tōna wāhi, i tōna wāhi, a Eripāta Temani, a Pirirara Huhi, a Topara Naamati. He mea whakarite hoki nā rātou ki a rātou anō kia haere mai ki te tangi ki a ia, ki te whakamārie i a ia.
JOB 2:12 Nā, i te marangatanga o ō rātou kanohi i tawhiti, ā, kīhai rātou i mōhio ki a ia, nā, kua ara tō rātou reo, tangi ana; haea ana tōna koroka, tōna koroka, ruia iho e rātou he puehu ki runga ki ō rātou māhunga, he mea ākiri atu whaka te rangi.
JOB 2:13 Heoi, noho ana rātou i tōna taha ki te whenua, e whitu ngā rā, e whitu ngā pō, kīhai hoki i puaki he kupu a tētahi ki a ia; i kite hoki rātou he nui rawa tōna pōuri.
JOB 3:1 I muri i tēnei, ka puaki te māngai o Hopa, ā, ka kangā e ia tōna rā.
JOB 3:2 Nā, ka oho a Hopa, ka mea:
JOB 3:3 “Kia ngaro te rā i whānau ai ahau, te pō, i kōrerotia ai, ‘He tamāroa kei roto i te kōpū.’
JOB 3:4 Waiho taua rā mō te pōuri; kaua e tirohia iho e te Atua i runga; kaua hoki e whitingia e te mārama.
JOB 3:5 Kia poke ia i te pōuri, i te ātārangi hoki o te mate; kia tauria iho e te kapua; kia whakawehia anō hoki e te whakapōuritanga o te rā.
JOB 3:6 Nā, ko taua pō – kia mau pū i te pōuri kerekere; kei honoa ki ngā rā o te tau; kei huihuia atu ina taua ngā marama.
JOB 3:7 Nanā, kia mokemoke taua pō, kaua te reo koa e uru ki roto.
JOB 3:8 Kia kangā hoki e te hunga kanga i te rā, e te hunga mōhio ki te whakaara rewiatana.
JOB 3:9 Kia pōuri ngā whetū o tōna kākarauritanga; kia tatari ki te mārama, ā, kāhore noa iho; kei kite hoki i te tākiritanga ata –
JOB 3:10 mōna kīhai i tūtaki i ngā tatau o te kōpū o tōku whaea, kīhai i huna i te māuiui kei kitea e ahau.
JOB 3:11 “He aha ahau tē mate ai i te kōpū? He aha tē hemo ai i tōku putanga mai i te kōpū?
JOB 3:12 He aha i rite wawe ai ngā turi mōku, me ngā ū hei ngote māku?
JOB 3:13 Me i pēnā, kua āta takoto ahau, te ai he whakaohooho; moe ana ahau; kātahi ahau ka whai okiokinga,
JOB 3:14 i roto i ngā kīngi, i ngā kaiwhakatakoto whakaaro o te whenua i hanga nei i ngā wāhi mokemoke mō rātou,
JOB 3:15 i roto rānei i ngā rangatira whai kōura, ō rātou nei whare kī tonu i te hiriwa.
JOB 3:16 Kua kāhore noa iho rānei, kua pērā me te materoto e ngaro nei me ngā kōhungahunga kāhore nei e kite i te mārama.
JOB 3:17 Mutu ake i reira te whakararuraru a te hunga kino; okioki ana i reira, te hunga kua māuiui ngā uaua.
JOB 3:18 Āta noho ana ngā herehere i reira tē rongo i te reo o te kaitūkino.
JOB 3:19 Kei reira te iti, te rahi, kāhore hoki he rangatira o te pononga.
JOB 3:20 “He aha te mārama i hōmai ai ki te tangata kei roto nei i te mate, te ora ki te tangata kua kawa te wairua?
JOB 3:21 E kōingo nei ki te mate, heoi kāhore noa iho; e keri ana kia taea ia, nui atu i te keri i ngā taonga huna.
JOB 3:22 Hari pū rātou, koa ana, ina kitea te urupā.
JOB 3:23 He aha anō te mārama i hōmai ai ki te tangata kua huna nei tōna ara, kua oti nei te tūtakitaki mai e te Atua?
JOB 3:24 Kīanō hoki ahau i kai, kua tae mai tāku mapu; ānō he wai ōku hāmama e ringihia ana.
JOB 3:25 Nō te mea kua tae mai ki ahau te mea whakawehi e wehi nei ahau; ko tāku e pāwera nei kua pā ki ahau.
JOB 3:26 Kāhore ōku hūmārie, kāhore ōku āta noho, ehara i te mea e okioki ana; nā, kua puta te raruraru.”
JOB 4:1 Kātahi a Eripāta Temani ka oho, ka mea:
JOB 4:2 “Ki te anga mātou ki te kōrero ki a koe, e pōuri rānei koe? Otirā, e taea e wai te pēhi te kupu?
JOB 4:3 Nanā, he tokomaha i whakaakona e koe; nāu hoki i whakakaha ngā ringa kahakore.
JOB 4:4 Ara ana i āu kupu te tangata e hinga ana; nāu hoki i kaha ai ngā turi kua piko.
JOB 4:5 Ināianei kua tae mai ki a koe, ā, e hemo ana koe; e pā ana ki a koe, ohorere ana koe.
JOB 4:6 He teka ianei kei tōu wehi ki te Atua he okiokinga whakaaro mōu? Kei te tapatahi o ōu huarahi he tūmanakohanga, mōu?
JOB 4:7 “Maharatia rā, ko wai o ngā tāngata harakore i huna? I ngaro rānei ki hea te hunga tika?
JOB 4:8 Ko tāku hoki tēnei i kite ai, ko te hunga e parau ana i te hē, e rui ana i te raruraru, ko ia rā anō tā rātou e kokoti ai.
JOB 4:9 Hunā ana rātou e te hā o te Atua, mōtī iho rātou i te hau o tōna riri.
JOB 4:10 Ko te hāmama o te raiona, ko te reo o te raiona tutū, ko ngā niho o ngā kūao raiona, whati ana.
JOB 4:11 Ngaro ana te raiona kātua i te kore kai, ā, marara noa atu ngā kūao a te raiona.
JOB 4:12 “Nā, i kawea pukutia mai he kōrero ki ahau, ā, kapohia ana e tōku taringa he kōmuhumuhu.
JOB 4:13 I ngā whakaaroaronga, nō ngā kite o te pō, i te mea ka au iho te moe a te tangata,
JOB 4:14 ka pā te wehi ki ahau, me te ihiihi, ā, wiri ana ōku wheua katoa.
JOB 4:15 Nā, ka tika atu he wairua i tōku aroaro, tutū ana ngā huruhuru o tōku kikokiko.
JOB 4:16 Tū ana ia, otiia kīhai ahau i mōhio ki tōna mata. He āhua te mea i tōku aroaro; tū puku ana; nā, ka rongo ahau i te reo e kī ana:
JOB 4:17 ‘He nui atu rānei te tika o te tangata i tō te Atua? He nui atu rānei i tō tōna Kaihanga te mā o te tangata?
JOB 4:18 Nanā, kāhore rawa ia e whakawhirinaki ki āna pononga; ā, ki tāna, he hē kei āna anahera.
JOB 4:19 Tērā atu tō te hunga e noho ana i roto i ngā whare uku, he puehu tō rātou tūranga; mongamonga kau rātou i te aroaro o te pūrehurehu.
JOB 4:20 I waenganui o te ata, o te ahiahi, ka whakangaromia rātou; hunā ana rātou ake tonu atu, tē ai tētahi hei whakaaro atu.
JOB 4:21 Kāhore rānei tō rātou taura here tēneti i motuhia i roto i a rātou? Mate ana rātou, kāhore hoki he mātauranga.’ ”
JOB 5:1 “Tēnā rā, karanga; ka whakaō rānei tētahi ki a koe? Ā, ka anga atu koe ki a wai o te hunga tapu?
JOB 5:2 E patua ana hoki te kūware e te āritarita, e whakamatea ana te whakaarokore e te hae.
JOB 5:3 I kite ahau i te kūware e hou ana ōna pakiaka; kitea rawatia ake kua kangā e ahau tōna nohoanga.
JOB 5:4 Kei tawhiti atu āna tama i te ora, mongamonga noa rātou i te kūwaha, kāhore hoki he kaiwhakaora.
JOB 5:5 Ko āna hua ka kainga e te tangata matekai, ka riro i a ia ahakoa i roto i te tātarāmoa, ā, ka hāmama te māhanga ki ō rātou rawa.
JOB 5:6 Nā, e kore te hē e puta ake i te puehu, e kore anō te raruraru e tupu ake i te oneone;
JOB 5:7 i whānau te tangata ki te raruraru, tōna rite kei ngā korakora e rere nei whakarunga.
JOB 5:8 “Ko ahau ia ka rapu i tā te Atua; me tuku atu tāku kōrero ki te Atua.
JOB 5:9 E mahi nei i ngā mea nunui e kore nei e taea te rapu atu, i ngā mea whakamīharo e kore nei e taea te tatau.
JOB 5:10 E hōmai nei i te ua ki te mata o te whenua, e unga nei i te wai ki te mata o ngā pārae;
JOB 5:11 e whakanoho nei i te hunga iti ki te wāhi tiketike, ā, whakanekehia ake ana te hunga pōuri ki te ora.
JOB 5:12 E haukoti nei i ngā whakaaro o te hunga tinihanga, tē taea e ō rātou ringa tā rātou i mea ai.
JOB 5:13 Mau ake i a ia te hunga whakaaro i tō rātou tinihanga: pororaru iho ngā whakaaro o te hunga kotiti kē.
JOB 5:14 I te awatea nei, tūtaki ana rātou ki te pōuri; whāwhā ana rātou i te poutūmārōtanga, ānō ko te pō.
JOB 5:15 Otiia, e whakaorangia ana e ia te rawakore i te hoari, i tō rātou māngai, i te ringa anō o te tangata kaha.
JOB 5:16 Ka ai anō he tūmanakohanga atu mō te ware; kokopi tonu ia te māngai o te kino.
JOB 5:17 “Nanā, ka hari te tangata e ākona ana e te Atua; nā, kaua e whakahāwea ki te papaki a te Kaha Rawa.
JOB 5:18 He whakamamae hoki tāna, he takai anō; e patu ana ia, ā, ko ōna ringa anō hei whakaora.
JOB 5:19 E ono ngā matenga e whakaora ai ia i a koe; ahakoa e whitu, e kore te hē e pā ki a koe.
JOB 5:20 I te matekai ka hokona koe e ia kei mate; i te tatauranga anō, kei pāngia e te hoari.
JOB 5:21 Ka huna koe i te whiu a te arero, e kore anō koe e wehi i te whakangaromanga ina tae mai.
JOB 5:22 E kata anō koe ki te whakangaromanga rāua ko te hemokai; e kore hoki koe e wehi i ngā kīrehe o te whenua.
JOB 5:23 Nō te mea ka takoto tāu kawenata ki ngā kōhatu o te pārae; ka mau anō tā koutou rongo ko ngā kīrehe o te pārae.
JOB 5:24 Ka mōhio anō koe e tū ana tōu tēneti i te āionuku, ka hāereere anō koe ki tōu nohoanga, tē ai he hara.
JOB 5:25 Ka mōhio anō koe he nui ōu uri, he pērā anō tōu whānau me te tarutaru o te whenua.
JOB 5:26 Ka āta rite ōu tau ina tae koe ki te urupā, ka pērā anō me te pūranga wīti e hikitia ake ana i tōna wā e rite ai.
JOB 5:27 “Nanā, tēnei, he mea rapu nā mātou, ko te mea tika hoki ia; whakarangona mai, ka mōhio iho hei pai mōu.”
JOB 6:1 Nā, ka whakautu a Hopa, ka mea:
JOB 6:2 “Auē, me i āta pāunatia tōku mamae, me i huihuia, me i whakairihia tōku aituā ki te pāuna!
JOB 6:3 Nā, ināianei taimaha ake i te onepū o te moana: heoi he ohorere rawa āku kupu.
JOB 6:4 Kei roto hoki i ahau ngā pere a te Kaha Rawa, inumia ake e tōku wairua tō rātou paihana; rārangi tonu mai ngā whakawehi a te Atua hei hoariri mōku.
JOB 6:5 E tangi anō rānei te kāihe mohoao te mea kei te tarutaru ia? E tangi anō rānei te kau i te mea e kai ana?
JOB 6:6 E taea rānei te kai, te mea kāhore nei ōna hā, ki te kāhore he tote? He reka rānei te whakakahukahu o te hua manu?
JOB 6:7 Hore rawa tōku wairua e mea kia pā atu ki ēnā; tō rātou rite ki ahau kei te kai whakarihariha.
JOB 6:8 “Auē, me i riro mai tāku i tono ai, me i hōmai e te Atua tāku e tūmanako nei!
JOB 6:9 Me i pai hoki te Atua kia whakangaromia ahau, kia tukua mai tōna ringa hei hātepe i ahau!
JOB 6:10 Pēnei kua ai anō he whakamārie mōku. Āe, ka tino hari ahau ki te mamae, kāhore nei e tohu i ahau; kīhai hoki ngā kupu a te Mea Tapu i hunā e ahau.
JOB 6:11 “He aha tōku kaha, e tatari ai ahau? He aha hoki tōku mutunga, e whakamanawanui ai ahau?
JOB 6:12 He kaha kōhatu rānei tōku kaha? He parāhi rānei ōku kikokiko?
JOB 6:13 Ehara rānei i te mea kāhore he āwhina mōku i roto i ahau, ā, kua oti te ngoi te pei i roto i ahau?
JOB 6:14 “Ko te tangata e ngoikore ana te ngākau kia puta mai te aroha o tōna hoa ki a ia, ahakoa kua mahue i a ia te wehi i te Kaha Rawa.
JOB 6:15 He mahi tinihanga a ōku tēina, he pērā me tā te awa; rere ana rātou ānō he waipuke awaawa,
JOB 6:16 kua mangu nei i te hukapapa, ngaro ana te hukarere i roto.
JOB 6:17 I te wā e mahana ai, ka memeha atu; i te weraweratanga, mōtī iho rātou i tō rātou wāhi.
JOB 6:18 Ka peka kē ngā tira e haere ana rā reira; riro ana ki te kore, ā, ngaro iho.
JOB 6:19 Tirotirohia ana e ngā tira o Tema; tāria atu ana e ngā tāngata haere o Hēpā.
JOB 6:20 Whakamā ana rātou mō rātou i whakamanawa atu ki reira; te taenga ki aua awa, kanakana kau ana.
JOB 6:21 Nā, he kāhore noa iho koutou; ka kite koutou i te mea whakamataku, ā, ka wehi.
JOB 6:22 I mea rānei ahau, ‘Hōmai ki ahau? He hākari rānei māku e hōmai i ō koutou rawa’?
JOB 6:23 I mea rānei, ‘Whakaorangia ahau i te ringa o te hoariri’? ‘Hokona ahau i roto i te ringa o te kaitūkino’?
JOB 6:24 “Whakaakona ahau, ā, ka whakarongo puku ahau; whakaaturia ki ahau te mea i hē ai ahau.
JOB 6:25 Anō te kaha o ngā kupu tika! Ko te aha ia te rīria ana e ā koutou kupu?
JOB 6:26 E mea ana rānei koutou kia rīria ngā kupu? He hau kau nei hoki ngā kōrero a te tangata kua pau ōna whakaaro.
JOB 6:27 Āe rā, e mea ana koutou ki te maka rota mō ngā pani, ki te mea i tō koutou hoa hei taonga hokohoko.
JOB 6:28 “Nā, whakaae mai, titiro mai ki ahau; he pono hoki e kore ahau e kōrero teka ki tō koutou kanohi.
JOB 6:29 Tēnā rā, tahuri mai; kaua hoki te hē e waiho; inā, tahuri mai, he tika hoki tāku take.
JOB 6:30 He hē koia kei tōku arero? E kore rānei tōku hinengaro e mōhio ki ngā mea whanokē?”
JOB 7:1 “He teka rānei, kua takoto he pakanga mō te tangata i runga i te whenua, he rite anō ōna rā ki ngā rā o te kaimahi?
JOB 7:2 E rite ana ki te pononga, e matenui nei ki te ātārangi, ki te kaimahi, e tūmanako nei ki te utu mō tāna mahi;
JOB 7:3 koia tōku rite, ka whiwhi nei ki ngā marama horihori, ā, he māuiui ngā pō kua whakaritea mōku.
JOB 7:4 Ka takoto ahau, ka mea ahau, ‘Āhea ahau ara ai?’ He roa ia te pō; heoi ka tāhurihuri kau ahau ā ao noa.
JOB 7:5 Ko te kākahu mō ōku kikokiko he kutukutu, he pōkuru oneone; ka kukuti tōku kiri, ā, ka ngātata anō.
JOB 7:6 Ko ōku rā hohoro atu i te rākau a te kaiwhatu; pau ake, tē ai he tūmanakohanga atu.
JOB 7:7 “Kia mahara he hau ōku rā; heoi anō kitenga o tōku kanohi i te pai.
JOB 7:8 Ko te kanohi o te tangata e kite ana i ahau, heoi anō tōna tirohanga mai ki ahau; kei runga i ahau ōu kanohi, heoi kāhore iho ahau.
JOB 7:9 Memeha atu te kapua, ngaro atu; he pērā anō te tangata e haere ana ki te urupā; e kore e hoki ake.
JOB 7:10 E kore ia e hoki mai anō ki tōna whare, e kore anō tōna wāhi e mahara ki a ia i muri.
JOB 7:11 “Nā, e kore e kaiponuhia e ahau tōku māngai; ka kōrero ahau i tōku wairua e mamae nei; ka tangi i te kawa i tōku ngākau.
JOB 7:12 He moana rānei ahau, he tohorā, i mea ai koe i te kaitirotiro mōku?
JOB 7:13 Ki te mea ahau, ‘Kei tōku moenga ahau te mārie ai, mā tōku takotoranga e whakamāmā tāku tangi.’
JOB 7:14 Nā, ka whakahaehaetia ahau e koe ki ngā moe, ka whakawehia ahau ki ngā mea e whakakitea mai.
JOB 7:15 Ā, ki tā tōku wairua he pai te tārona; pai ake te mate i ēnei wheua ōku.
JOB 7:16 E whakarihariha ana ahau ki tōku ora; kāhore ōku hiahia kia ora tonu ahau. Waiho noa iho ahau, he mea teka noa hoki ōku rā.
JOB 7:17 “He aha te tangata, i whakanuia ai e koe? I anga ai tōu ngākau ki a ia?
JOB 7:18 I titiro ai koe i a ia i tēnei ata, i tēnei ata, i honohono ai tāu whakamātautau i a ia?
JOB 7:19 Kia pēhea ake te roa ōu kāhore nei e tahuri atu i ahau, ōku kāhore nei e waiho noa iho e koe, kia horomia ai tōku hūware?
JOB 7:20 Mehemea kua hara ahau, kia aha atu ahau ki a koe, e te kaitiaki o ngā tāngata? He aha ahau i waiho ai e koe hei patunga māu, i taimaha iho ai ahau ki ahau anō.
JOB 7:21 He aha koe tē whakarere noa ai i tōku hē, tē whakapahemo ai i tōku kino? Ākuanei hoki ahau moe ai ki te puehu, ā, ka āta rapu koe i ahau, otiia kāhore noa iho ahau.”
JOB 8:1 Nā, ka whakautu a Pirirara Huhi, ka mea:
JOB 8:2 “Kia pēhea ake te roa o tāu kōrero i ēnei mea? Kia pēhea ake te roa o ngā kupu a tōu māngai e rite ai ki te hau kaha?
JOB 8:3 E whakaparori kē rānei te Atua i te whakawā? E whakaparori kē rānei te Kaha Rawa i te tika?
JOB 8:4 Ki te mea i hara āu tamariki ki a ia, ā, kua makā atu rātou e ia hei utu mō tō rātou hē.
JOB 8:5 Ki te rapu wawe koe i te Atua, ā, ka īnoi ki te Kaha Rawa;
JOB 8:6 ki te mea he mā koe, he tika, inā, ka ara ake ia ki a koe āianei, ka manaakitia anō e ia te nohoanga o tōu tika.
JOB 8:7 Ahakoa i iti tōu tīmatanga, e nui noa atu tōu whakamutunga.
JOB 8:8 “Tēnā rā, ui atu ki tō mua whakatupuranga; anga atu hoki ki te mea kua rapua e ō rātou mātua.
JOB 8:9 Nōnanahi nei hoki tātou, kāhore hoki e mōhio; he ātārangi nei hoki ō tātou rā i runga i te whenua.
JOB 8:10 E kore rānei rātou e whakaako i a koe, e kōrero ki a koe, e puaki mai rānei he kupu i ō rātou ngākau?
JOB 8:11 “E tupu rānei te wīwī i te mea kāhore he repo? E nui rānei te raupō ki te kāhore he wai?
JOB 8:12 I te mea he kaiota tonu, ā, kīhai i tapahia, kua maroke i mua ake i ngā otaota katoa.
JOB 8:13 Ka pērā anō ngā ara o te hunga katoa e wareware ana ki te Atua, ā, ka riro ki te kore tā te tangata whakapono kore i tūmanako ai.
JOB 8:14 Ka motuhia atu tāna i whakamanawa atu ai, ko te whare hoki o te pūngāwerewere hei tūmanakohanga mōna.
JOB 8:15 Ka okioki atu ia ki tōna whare; heoi e kore e tū; ū tonu tāna pupuri atu, otiia e kore e mau.
JOB 8:16 E matomato ana i te mea kāhore nei te rā, ā, e wana ana ōna peka i tāna kāri.
JOB 8:17 Kapi tonu te pūranga i ōna pakiaka, e kitea ana e ia te wāhi kāmaka.
JOB 8:18 Ki te whakamōtītia iho ia i tōna wāhi, ka whakakāhore taua wāhi ki a ia, ka mea, ‘Kāhore ahau i kite i a koe.’
JOB 8:19 Nanā, ko te hari tēnei o tōna ara, ā, ka tupu ake ētahi atu i roto i te puehu.
JOB 8:20 “Nanā, e kore te Atua e whakakāhore ki te tangata tika, e kore anō e puritia e ia te ringa o ngā tāngata kino.
JOB 8:21 Tērā anō tōu māngai ka whakakīia e ia ki te kata, ōu ngutu ki te hāmama.
JOB 8:22 He whakamā te kākahu mō te hunga e kino ana ki a koe, ā, ka kāhore noa iho te tapenākara o te hunga kino.”
JOB 9:1 Nā, ka whakahoki a Hopa, ka mea:
JOB 9:2 “E mōhiotia ana anō tēnei e ahau; engari mā te aha ka tika ai te tangata ki te Atua?
JOB 9:3 Ki te pai ia ki te totohe ki a ia, kāhore he kupu kotahi o roto i te mano e taea e ia te whakahoki ki a ia.
JOB 9:4 He ngākau mōhio ia, he pakari tōna kaha; ko wai e whakauaua ki a ia, ā, e whiwhi i te pai?
JOB 9:5 E nekehia ana e ia ngā maunga, tē mōhio rātou; hurihia ake e ia i a ia e riri ana.
JOB 9:6 E whakangāueuetia ana e ia te whenua, e nekehia atu ana i tōna wāhi, wiri ana ōna pou.
JOB 9:7 E kōrero nei ki te rā, ā, kore ake e whiti; hīritia pūtia iho e ia ngā whetū,
JOB 9:8 ko ia nei anake hei hora i ngā rangi, hei takahi i runga i ngā ngaru o te moana.
JOB 9:9 Nāna nei i hanga a Aketura, a Tautoru, a Matariki, me ngā rūma i te tonga.
JOB 9:10 Nāna nei i mahi ngā mea nunui, e kore nei e taea te rapu atu, āe rā ngā mea whakamīharo, e kore nei e taea te tatau.
JOB 9:11 Inā tonu ia e haere atu nei, ā, kāhore ahau i kite; ka pahemo atu hoki ia, ā, kāhore ahau e mātau ki a ia.
JOB 9:12 Nanā, ka hopu ia i tāna i aru ai, mā wai ia e ārai? Ko wai hei kī atu ki a ia, ‘E aha ana koe?’
JOB 9:13 “E kore te Atua e whakahoki iho i tōna riri; e piko ana ki raro i a ia ngā kaiāwhina o Rahapa.
JOB 9:14 Ā, kia whakahoki kupu anō ahau ki a ia, kia whiriwhiri kupu anō māku ki a ia?
JOB 9:15 Ahakoa he tika ahau, e kore ahau e whakahoki kupu atu; engari ka īnoi ahau ki tōku kaiwhakawā.
JOB 9:16 Me i karanga atu ahau, ā, whakahokia mai ai e ia te kupu ki ahau, kīhai ahau i whakaae tērā kua whakarongo mai ia ki tōku reo.
JOB 9:17 E āki ana hoki ia i ahau ki te tūpuhi, e whakanui takekore ana hoki i ōku mate.
JOB 9:18 Kāhore ahau e tukua e ia kia tā tōku manawa; otiia whakakīia ana e ia tōku wairua ki te kawa.
JOB 9:19 Ki te kōrero tātou mō te kaha o te hunga pakari, nanā, kei reira ia! Ā, ki te mea he whakawā, ko wai rā hei whakatakoto i te tāima mōku?
JOB 9:20 “Ahakoa he tika ahau mā tōku māngai anō ahau e whakahē; ahakoa he tikanga tapatahi tāku, mā reira anō e whakaatu tōku ngaunga kētanga.
JOB 9:21 He tapatahi ahau; kāhore ahau e whakaaro ki ahau anō; e whakahāwea ana ahau ki tōku ora.
JOB 9:22 He kotahi tonu ēnā; koia ahau ka mea, e whakamōtītia ana e ia te tapatahi rāua ko te kino.
JOB 9:23 Nā, ka whakamate tata nei te whiu, he kata tāna ki te whakamātautauranga o te hunga harakore.
JOB 9:24 Kua hoatu te whenua ki te ringa o te tangata kino; e taupokina ana e ia ngā mata o ngā kaiwhakawā; ki te mea ehara i a ia, tēnā ko wai?
JOB 9:25 “Nā, ko te hohoro o ōku rā, nui atu i tō te kaikawe pukapuka; e rere ana, kāhore hoki e kite i te pai.
JOB 9:26 Kua pahemo, kua pērā me ngā kaipuke tere, me te ēkara anō e topa iho ana ki tāna kai.
JOB 9:27 Ki te mea ahau, ‘Ka wareware ahau ki tāku tangi, ka unuhia atu e ahau te pōuri o tōku mata, ā, ka mārama,’
JOB 9:28 e wehi ana ahau i ōku mamae katoa, e mōhio ana ahau e kore ahau e meinga e koe he harakore.
JOB 9:29 Tērā hoki ahau e whakahēngia; he aha ahau i whakangenge kau ai i ahau?
JOB 9:30 Ki te horoi ahau i ahau ki te hukarere, ā, ka meinga ōku ringa kia mā rawa;
JOB 9:31 kātahi ahau ka rumakina e koe ki te poka, ā, whakarihariha mai ana ōku kākahu ki ahau.
JOB 9:32 “Ehara hoki ia i te tangata, i te pēnei me ahau nei, e whakahoki kupu ai ahau ki a ia, e haere tahi ai māua ki te whakawā.
JOB 9:33 Kāhore he kaiwhakatikatika mō tā māua, kāhore he tangata hei whakapā i tōna ringa ki a māua tahi.
JOB 9:34 Me tango atu e ia tāna patu i ahau, ā, kaua hoki tana whakamataku e whakawehi i ahau.
JOB 9:35 Hei reira ahau ka kōrero, ā, kāhore e wehi i a ia; kāhore hoki ahau e pērā roto i ahau.”
JOB 10:1 “Kua hōhā tōku wairua ki tōku ora; ka tukua e ahau tāku tangi kia rere ana; ka kōrero ahau i te kikiwatanga o tōku ngākau.
JOB 10:2 Ka mea ahau ki te Atua, Kaua ahau e whakahēngia; whakakitea ki ahau te take i totohe ai koe ki ahau.
JOB 10:3 He mea pai rānei ki a koe kia tūkino koe, kia whakahāwea ki te mahi a ōu ringa, ā, kia whiti tōu mārama ki te whakaaro o te hunga kino?
JOB 10:4 He kanohi kikokiko rānei ōu? He pēnei rānei tāu titiro me tā te tangata titiro?
JOB 10:5 He rite rānei ōu rā ki ō te tangata rā? He rite rānei ōu tāu ki ō te tangata rā?
JOB 10:6 I uiuia ai e koe tōku kino, i rapua ai e koe tōku hara?
JOB 10:7 Ahakoa e mōhio ana anō koe ehara ahau i te mea hē, kāhore anō tētahi hei whakaora i roto i tōu ringa?
JOB 10:8 “Nā ōu ringa ahau i mahi, i hanga, he mea hono mārie i tētahi taha, i tētahi taha; otiia, e whakangaromia ana ahau e koe.
JOB 10:9 Kia mahara rā, nāu ahau i hanga, ānō he paru; tērā rānei koe e whakahoki anō i ahau ki te puehu?
JOB 10:10 He teka ianei he mea riringi ahau nāu ānō he waiū, meinga ana ahau e koe kia tetepe ānō he tīhi?
JOB 10:11 Nāu ahau i whakakākahu ki te kiri, ki te kikokiko, ā, nāu anō ahau i hohou ki te wheua, ki te uaua.
JOB 10:12 Whakawhiwhia ana ahau e koe ki te ora, ki te atawhai, ā, he tirotirohanga mai nāu i mau ai tōku wairua.
JOB 10:13 “Heoi, hunā ana anō ēnei mea e koe i roto i tōu ngākau; e mōhio ana hoki ahau kei a koe anō tēnei.
JOB 10:14 Ki te hara ahau, ka mātauria e koe; e kore anō koe e whakakāhore ki tōku hē.
JOB 10:15 Ki te hē ahau, auē tōku mate! Ki te tika ahau, e kore tonu e ara tōku māhunga; he kī hoki nōku i te whakamā me te titiro iho ki tōku mate.
JOB 10:16 Ā, ki te whakarewa ake tōku māhunga i a ia, ka whāia ahau e koe ānō he raiona; ā, ka whakakite anō koe i a koe, i tōu mīharo, ki ahau.
JOB 10:17 E whakahoutia ana e koe āu kaiwhakaatu i ōku hē, e whakanuia ana hoki e koe tōu riri ki ahau; ko ngā putanga kētanga, ko te whawhai hei pēhi i ahau.
JOB 10:18 “He aha rā ahau i whakaputaina mai ai e koe i roto i te kōpū? Te hemo noa atu ai ahau, ā, kīhai tētahi kanohi i kite i ahau.
JOB 10:19 Pēnei kua rite ahau, ānō kua kāhore noa iho; kua mauria atu ahau i te kōpū ki te urupā.
JOB 10:20 He teka rānei he torutoru ōku rā? Kāti rā, waiho ake koa ahau, kia āhua mākoha ana i tēnei wā iti,
JOB 10:21 keiwhā haere ahau ki te wāhi e kore nei ahau e hoki mai, ki te whenua o te pōuri, o te ātārangi o te mate;
JOB 10:22 ki te whenua o te pōuri kerekere, o te tino o te pōuri; he whenua nō te ātārangi o te mate, kāhore nei ō reira tikanga, ā, ko tōna mārama, koia anō te pōuri.”
JOB 11:1 Anō rā ko Topara Naamati, i mea ia:
JOB 11:2 “Kaua rānei hei whakautua te tini o ngā kupu, ā, e whakatikaia rānei te tangata ngutu hohoro?
JOB 11:3 Mā āu kupu whakapehapeha rānei e nohopuku ai ngā tāngata, ā, ina tāwai koe, kaua rānei he tangata e mea i a koe kia whakamā?
JOB 11:4 E mea ana hoki koe, ‘He tino tika tāku whakaako, ā, he mā ahau ki ōu kanohi.’
JOB 11:5 Auē, me i kōrero te Atua, me i puaki mai ōna ngutu ki te whakahē i a koe!
JOB 11:6 Me i whakaaturia mai e ia ki a koe ngā mea ngaro o te mātauranga, te huhua o ngā ara o tāna mahi! Nā, kia mātau koe: he iti iho i ōu hē tā te Atua e tango nei i a koe.
JOB 11:7 “Ina whakatakina e koe, e kitea rānei e koe te Atua? E tino kitea rawatia rānei e koe te Kaha Rawa?
JOB 11:8 Kei te rangi te tiketike; ka pēhea koe? Hōhonu iho i te rēinga; ko te aha e mōhiotia e koe?
JOB 11:9 Ko tōna takoto, roa atu i te whenua, whānui atu i te moana.
JOB 11:10 “Ki te mea ka haukotia e ia, ka hereherea rānei, ka whakawākia rānei, mā wai ia e ārai?
JOB 11:11 E mōhio ana hoki ia ki ngā tāngata teka noa; ā, e kite ana ia i te hē, ahakoa e kore e whakaaroa e ia.
JOB 11:12 Otiia, ko te mea whakaarokore nei, ko te tangata kāhore rawa ōna hinengaro, āe rā, tō te tangata rite i tōna whānautanga kei te kūao kāihe mohoao.
JOB 11:13 “Ki te whakatikaia e koe tōu ngākau, ā, ka wherahia ōu ringa ki a ia;
JOB 11:14 ki te mea he hē kei tōu ringa, whakamataratia atu, kaua hoki te kino e noho ki ōu tapenākara.
JOB 11:15 He pono ko reira ara ai tōu mata, tē ai he ira; āe, ka ū hoki koe, tē ai he wehi.
JOB 11:16 Tērā hoki koe e wareware ki tōu māuiui; ā, e maharatia e koe ānō ko ngā wai kua rere atu.
JOB 11:17 Ā, ko tōu ora tērā e mārama kē atu i tō te poutūmārōtanga o te rā; ā, ahakoa e pōuri anō, ka rite ki te ata.
JOB 11:18 Ka tatū ōu whakaaro, nō te mea ka whai tūmanakohanga atu; āe, ka rapu koe i tētahi taha ōu, i tētahi taha, ā, ka takoto mārire koe.
JOB 11:19 E takoto iho anō koe, tē ai he kaiwhakawehi; he tokomaha anō hoki e whai kia paingia e koe.
JOB 11:20 Ka poko ia ngā kanohi o te hunga kino, kore ake he rerenga mō rātou; ko tā rātou e tūmanako atu ai ko te hemonga.”
JOB 12:1 Nā, ka whakautu a Hopa, ka mea:
JOB 12:2 “He tika rawa ko koutou ngā tāngata, ā, ka mate tahi atu te whakaaro nui me koutou.
JOB 12:3 Otirā, kei ahau anō hoki he ngākau he pērā anō me o koutou, kīhai ahau i hoki iho i a koutou. Ko wai rā te hē ana ki ēnei mea?
JOB 12:4 “Tōku rite kei te tangata e waiho ana hei kata mā tōna hoa, he tangata e karanga ana ki te Atua, ā, whakarongo mai ana tērā ki a ia; e waiho ana te mea tika, te mea tapatahi, hei kata.
JOB 12:5 Kei roto i te whakaaro o te tangata, e tau ana tāna noho, te whakahāwea ki te aituā; e tauwhanga ana tēnā ki te hunga e paheke ana te waewae.
JOB 12:6 Kei te rangatira ngā tēneti o ngā kaipāhua, ā, noho kore wehi ana te hunga e whakapātaritari ana ki te Atua; he ope noa mai hoki tā te Atua ki ō rātou ringa.
JOB 12:7 “Tēnā rā, ui atu ki ngā kararehe mā rātou koe e whakaako; ki ngā manu o te rangi, mā rātou e kōrero ki a koe;
JOB 12:8 kōrero atu rānei ki te whenua, ā, māna koe e whakaako; ka whakaaturia mai anō hoki ki a koe e ngā ika o te moana.
JOB 12:9 Ko wai i kore te mōhio ki ēnei mea katoa, he mea mahi tēnei nā te ringa o Ihowā?
JOB 12:10 Kei tōna ringa nei te wairua o ngā mea ora katoa, te manawa hoki o ngā kikokiko tāngata katoa.
JOB 12:11 He teka ianei e whakamātauria ana ngā kupu e te taringa, pērā hoki i te waha e whakarongo nei ki te reka o tāna kai?
JOB 12:12 Kei ngā kaumātua ngā whakaaro nui; kei te roa o ngā rā te mātau.
JOB 12:13 “Kei a ia te whakaaro nui me te kaha; kei a ia te tohutohu me te mātauranga.
JOB 12:14 Nanā, e wāwāhia ana e ia, kore iho e hangā anō; e kopia ana e ia te tangata, kāhore rawa he putanga.
JOB 12:15 Nanā, e unuhia atu ana e ia ngā wai, ā, kua maroke; e tukua mai ana anō e ia, ā, ka hurihia te whenua.
JOB 12:16 Kei a ia te kaha me te mahi tōtika; ko te tangata tinihanga, me te tangata e tinihangatia ana, nāna.
JOB 12:17 E kāhakina atu ana e ia ngā kaiwhakatakoto whakaaro, he mea pāhua; whakakūwaretia iho e ia ngā kaiwhakawā.
JOB 12:18 Ko te mana o ngā kīngi, wetekina ake e ia, herea iho e ia ō rātou hope ki te whītiki.
JOB 12:19 E ārahina atu ana e ia ngā tohunga, he mea pāhua, hurihia iho e ia te hunga kaha.
JOB 12:20 Whakakorea ake e ia he kupu mā te hunga ngākau pono, riro ana i a ia ngā mahara o ngā kaumātua.
JOB 12:21 E ringihia ana e ia te whakahāwea ki runga ki ngā rangatira, e wetekina ana e ia te whītiki o te hunga kaha.
JOB 12:22 E hurahia mai ana e ia ngā mea hōhonu i roto i te pōuri, whakaputaina mai ana e ia te ātārangi o te mate ki te mārama.
JOB 12:23 E whakanuia ana e ia ngā iwi, ā, e hunā ana e ia; e tohatohaina atu ana e ia ngā iwi, ā, e whakawhāititia mai ana anō rātou e ia.
JOB 12:24 E tangohia atu ana e ia te ngākau o ngā rangatira o te iwi o te whenua, ā, e meinga ana e ia kia kōpikopiko noa i te wāhi ururua kāhore nei he ara.
JOB 12:25 Whāwhā noa rātou i roto i te pōuri, kāhore hoki he mārama, ā, meinga ana rātou e ia kia hūrori haere ānō he tangata haurangi.”
JOB 13:1 “Nanā, kua kitea katoatia tēnei e tōku kanohi, kua rongo tōku taringa, kua mōhio.
JOB 13:2 Ko tā koutou e mōhio nā, ko tāku anō tēnā e mōhio nei; kāhore hoki ahau i hoki iho i a koutou.
JOB 13:3 Inā, e whai kupu anō ahau ki te Kaha Rawa; ā, e hiahia ana ahau ki te kōrerorero ki te Atua.
JOB 13:4 Ko koutou ia, he hunga tito i te teka, he rata horihori noa koutou katoa.
JOB 13:5 Te pai nā, me i mutu rawa ā koutou kōrero! Ko tō koutou whakaaro nui hoki tēnā.
JOB 13:6 Tēnā rā, whakarongo mai ki tāku tautohe, maharatia ngā whawhai a ōku ngutu.
JOB 13:7 Me tautoko tā te Atua ki te kupu kino, me tautoko rānei tāna ki te tinihanga?
JOB 13:8 Ka whakapai kanohi koia koutou ki a ia? Mā koutou rānei tā te Atua tautohe?
JOB 13:9 He pai rānei kia rapua tā koutou e ia? E māminga rānei koutou ki a ia, e pērā me tētahi ka māminga nei ki te tangata?
JOB 13:10 He pono ka whakahē ia ki a koutou ki te whakapai puku koutou i te kanohi.
JOB 13:11 E kore rānei koutou e mataku ki tōna nui? E kore rānei te wehi ki a ia e tau ki a koutou?
JOB 13:12 Ko ā koutou pepeha nunui he whakatauki nō te pungarehu, ko ō koutou parepare he parepare paru.
JOB 13:13 “Kāti te kōrero, waiho noa iho ahau, kia kōrero ai ahau, ahakoa pā mai te aha ki ahau.
JOB 13:14 He aha ōku kikokiko i ngaua ai e ōku niho? He aha tōku wairua i waiho ai e ahau i roto i tōku ringa?
JOB 13:15 Ahakoa whakamate noa ia i ahau, ka tatari tonu ahau ki a ia; otiia, ka mau tonu ahau ki ōku ara i tōna aroaro.
JOB 13:16 Ko tēnei hoki hei oranga mōku; e kore hoki te tangata atuakore e tae mai ki tōna aroaro.
JOB 13:17 Āta whakarongo ki āku kōrero; kia anga mai ō koutou taringa ki tāku e whakapuaki nei.
JOB 13:18 Nā, kua takoto tāku mō te whakawā; e mōhio ana ahau he tika ahau.
JOB 13:19 Ko wai ia hei totohe ki ahau? Ka whakarongo puku hoki ahau āianei, ā, ka hemo ahau.”
JOB 13:20 “Engari kaua ngā mea e rua e meatia mai ki ahau; kātahi ahau ka kore e huna i ahau i tōu mata.
JOB 13:21 Kia matara atu tōu ringa ki tawhiti i ahau; ā, kaua ahau e whakawehia e te mataku ki a koe.
JOB 13:22 Ko reira, māu e karanga, ā, māku e whakaō atu; māku rānei e kōrero, ā, māu e whakahoki kupu mai ki ahau.
JOB 13:23 Ka hia rā ōku kino, ōku hara? Meinga ahau kia mātau ki tōku hē me tōku hara.
JOB 13:24 He aha tōu mata i hunā ai e koe? He aha ahau i kīia ai e koe he hoariri?
JOB 13:25 E kapokapohia rānei e koe te pakawhā e pūhia haeretia ana? E whāia rānei e koe te pāpapa maroke?
JOB 13:26 Kei te tuhituhi nā hoki koe i ngā mea kawa mōku, e mea ana hoki kia riro mai i ahau ngā hē o tōku taitamarikitanga.
JOB 13:27 Karapitia iho e koe ōku waewae ki te rākau, he mea tohu nāu ōku ara katoa, ā, he mea tuhi nāu ōku takahanga waewae tawhio noa.
JOB 13:28 “Ahakoa tōku rite kei te mea pirau, e memeha noa ana, kei te kākahu e kainga ana e te pūrehurehu.”
JOB 14:1 “Ko te tangata i whānau i te wahine, he torutoru ōna rā; kī tonu anō i te raruraru,
JOB 14:2 ānō he puāwai ia e puta mai ana, e kotia iho ana; rere ana ia, ānō he ātārangi, kāhore hoki he tūmautanga.
JOB 14:3 E titiro mai anō rānei ōu kanohi ki te pēnei? E mea rānei koe i ahau kia whakawā tāua ki a tāua?
JOB 14:4 Ko wai hei hōmai i te mea mā i roto i te mea poke? Hore rawa.
JOB 14:5 Kua rite nā hoki ngā rā mōna; kei a koe te maha o ōna marama. Takoto rawa i a koe te tikanga mōna, ā, e kore ia e whiti ki tua.
JOB 14:6 Tahuri kē atu te titiro i a ia, kia ai ōna pārīrātanga, kia āta tutuki ai tōna rā, kia rite ai ki ō te kaimahi.
JOB 14:7 “Ka ai hoki he whakaaronga ki te rākau i tapahia, tērā anō e pariri, e kore anō hoki e mutu te wana o tōna pihi.
JOB 14:8 Ahakoa kua tawhitotia tōna pakiaka ki te whenua, ā, kua mate tōna tinana i roto i te oneone;
JOB 14:9 heoi, mā te haunga o te wai ka pihi, ka kōkiri ōna peka ānō ko tā te mea tupu.
JOB 14:10 Ko te tangata ia, mate iho, marere noa iho; āe, ka hemo te tangata, ā, kei hea ia?
JOB 14:11 Pērā i ngā wai e hē mai nei i te moana, i te awa e mimiti ana, ka maroke;
JOB 14:12 e pērā ana anō te tangata, e takoto ana, ā, kāhore he whakatikanga ake. Kāhore he marangatanga ake mō rātou, ā kia kore rā anō ngā rangi; e kore anō rātou e ara i tō rātou moe.
JOB 14:13 “Auē, kia hunā noatia oti ahau e koe ki te pō, kia waihotia noatia iho ahau e koe kia ngaro ana, kia hoki rā anō tōu riri; kia rohea noatia mai e koe tētahi wā mōku, ā, ka mahara mai ai anō ki ahau!
JOB 14:14 Ki te mate te tangata, e ora anō rānei ia? Ka tatari ahau i ngā rā katoa o tōku ngananga, kia tae mai rā anō he whakaputanga mōku.
JOB 14:15 Māu e karanga, kia whakaō atu ai ahau; kāhore hoki e kore ka matenui koe ki te mahi a ōu ringa.
JOB 14:16 Ināianei hoki e taua ana e koe ōku hīkoinga; he teka ianei e matatau tonu mai ana koe ki tōku hara?
JOB 14:17 Hīri rawa tōku hē ki roto ki te pūtea, tuitui rawa e koe tōku kino.
JOB 14:18 “He pono ko te maunga e horo ana e memeha noa ake ana, e nekehia ana te toka i tōna wāhi.
JOB 14:19 E ngau ana te wai i ngā kōhatu; mā tōna puhaketanga e horoi atu te puehu o te whenua; ā, whakangaromia iho e koe te tūmanako a te tangata.
JOB 14:20 Taea ana ia e koe ake tonu atu, ā, pahure ana ia; puta kē ana i a koe tōna mata, ā, tonoa atu ana ia kia haere.
JOB 14:21 Ko te whakahōnoretanga o āna tama, kāhore e mōhiotia e ia; ka hoki iho rātou hei ware, heoi kāhore tētahi aha o rātou e maharatia e ia.
JOB 14:22 E mamae anō ia te kikokiko o tōna tinana, ā, ka tangi tōna wairua i roto i a ia.”
JOB 15:1 Nā, ka whakautua e Eripāta Temani, i mea ia:
JOB 15:2 “He horihori kau koia te mātauranga e whakapuakina e te tangata whakaaro, kia whakakīia e ia tōna kōpū ki te hau marangai?
JOB 15:3 Me kōrero rānei ia ko ngā kupu kore hua hei ako, ko ngā whaikōrero rānei kāhore nei e whai tikanga?
JOB 15:4 Āe, kua whakakorea atu nā e koe te wehi, kei te pupuri mai koe i te īnoi i te aroaro o te Atua.
JOB 15:5 Nā, kei te whakaakona tōu māngai e tōu kino, ā, kei te whiriwhiria e koe ko te arero o te hunga tinihanga.
JOB 15:6 Ehara i ahau, nā tōu māngai anō i hopu tōu kino; ko ōu ngutu anō hei whakaatu i tōu hē.
JOB 15:7 “Ko koe ianei te tangata tuatahi kua whānau? He mea hanga rānei koe nō mua atu i ngā pukepuke?
JOB 15:8 Kua rongo rānei koe i tō te Atua whakaaro puku? Kei te kaiponu rānei koe i te whakaaro ki a koe anake?
JOB 15:9 Ko te aha te mōhiotia ana e koe, ā, kāhore e mōhiotia e mātou? Ko tēhea whakaaro anō hoki ōu kāhore nei i a mātou?
JOB 15:10 Kei a mātou ngā upoko hina rātou tahi ko ngā tino koroheke, kaumātua rawa ake i tōu pāpā.
JOB 15:11 He iti rawa rānei mōu ngā whakamārie a te Atua, te kupu ngāwari e hoatu ana ki a koe?
JOB 15:12 He aha koe i kāhakina atu ai e tōu ngākau? He aha hoki ōu kanohi i kimokimo ai,
JOB 15:13 i tahuri ai tōu wairua ki te whakahē i te Atua, i puaki ai ēnā kupu i tōu māngai?
JOB 15:14 “He aha te tangata, e mā ai ia, te whānau rānei a te wahine, e tika ai?
JOB 15:15 Nanā, kāhore ia e whakawhirinaki ki āna mea tapu; kāhore hoki ngā rangi e mā ki tāna titiro.
JOB 15:16 Kātahi ia te hē rawa ko te mea whakarihariha, ko te mea poke, ko te tangata e inu nei i te kino ānō he wai.
JOB 15:17 “Māku e whakaatu ki a koe, whakarongo mai ki ahau; ko te mea kua kitea e ahau, māku e kōrero atu –
JOB 15:18 he mea kōrero mai nā ngā mōhio, he whakarerenga iho nā ō rātou mātua; kīhai hoki i hunā e rātou,
JOB 15:19 ki a rātou nei anake te hōmaitanga o te whenua; kīhai hoki te tangata kē i tika i waenganui i a rātou.
JOB 15:20 E whakamamae ana te tangata kino i ōna rā katoa, arā i te maha o ngā tau e haupū nei mō te kaitūkino.
JOB 15:21 He reo whakawehi kei roto i ōna taringa; i te wā whai rawa ka tae mai te kaipāhua ki a ia.
JOB 15:22 Kāhore āna whakaaetanga ake tērā ia ka hoki ake i te pōuri, e whanga ana anō hoki te hoari ki a ia.
JOB 15:23 E kōpikopiko noa ana ia ki te taro māna, e mea ana, ‘Kei hea rā?’ E mōhio ana ia kua tata ki tōna ringa te rā o te pōuri.
JOB 15:24 Ko te ngākau mamae, me te tūmatatenga, hei whakawehi i a ia; ka kaha ake rāua i a ia, me te mea he kīngi kua rite ana mea mō te whawhai.
JOB 15:25 Kua totoro nei ōna ringa ki te whawhai ki te Atua, kua whakatoatoa nei i a ia ki te whawhai ki te Kaha Rawa;
JOB 15:26 kua rere ki a ia me te kakī mārō, me ngā puku mātotoru o āna whakangungu rākau.
JOB 15:27 “Kua kōpakina hoki tōna mata e tōna ngako, ā, kua tupu te ngako o tōna hope.
JOB 15:28 Nā, i noho ia ki ngā pā mahue, ki ngā whare kāhore i nohoia e te tangata, meāke nei waiho hei pūranga.
JOB 15:29 E kore ia e whai taonga, e kore anō ōna rawa e mau, e kore anō hoki tō rātou hua e tāupe ki te whenua.
JOB 15:30 E kore ia e puta i te pōuri, ōna peka ka maroke i te mura, ka riro atu anō ia i te manawa o tōna māngai.
JOB 15:31 Kei whakawhirinaki ia ki te mea teka noa, kei tinihanga ki a ia anō; nō te mea ko te teka noa hei utu ki a ia.
JOB 15:32 E kore tōna rā e taea, kua rite; e kore anō tōna peka e whai rau.
JOB 15:33 Ka ruiruia e ia āna karepe kaiota ānō ko te wāina, ā, ka makā tāna puāwai me te mea ko te ōriwa.
JOB 15:34 Ka pakoko hoki te whakaminenga o te hunga atuakore, ka pau hoki i te ahi ngā tēneti o ngā utu whakapati.
JOB 15:35 He mahi nanakia te mea i hapū ki roto ki a rātou, whānau ake he teka noa; ko ō rātou kōpū anō hei hanga i te tinihanga.”
JOB 16:1 Kātahi a Hopa ka whakautu, ka mea:
JOB 16:2 “Ka maha ngā mea pēnā kua rangona nei e ahau; he kaiwhakamārie haumaruru rawa koutou katoa.
JOB 16:3 E whai mutunga rānei ngā kupu tikangakore? Nā te aha rānei koe i whakaoho ki te whakahoki kupu mai?
JOB 16:4 E taea anō e ahau te kōrero pēnā i a koutou; me i pēnei tō koutou wairua me tōku wairua; hono tonu āku kupu ki a koutou, ka rūrū anō tōku upoko ki a koutou.
JOB 16:5 E whakakaha anō ia tōku māngai i a koutou, ka ai anō hoki te whakamārie a ōku ngutu hei pēhi i tō koutou mamae.
JOB 16:6 “Ahakoa kōrero ahau, kāhore tōku pōuri e iti iho; ki te mutu tāku, ko tēhea wāhi o tōku mamae ka tāharahara iho?
JOB 16:7 Ināianei anō kua meinga ahau e ia kia ruha; mōtī iho i a koe tōku whakaminenga katoa.
JOB 16:8 Nā, kua mau kita koe ki ahau, hei kaiwhakaatu i tōku hē; e whakatika ana mai hoki tōku hīrokitanga ki ahau, hei whakapuaki i tōku hē.
JOB 16:9 Haehaea ana ahau e ia i a ia e riri ana, e tūkino ana ia i ahau; pakiri ana ōna niho ki ahau; e whakakoi mai ana tōku hoariri i ōna kanohi ki ahau.
JOB 16:10 Hāmama mai ana ō rātou māngai ki ahau; whakahāwea mai ana, kei te papaki rātou i tōku pāpāringa; huihui ana rātou kia kotahi hei whawhai ki ahau.
JOB 16:11 Kua tukua ahau e te Atua ki te hunga hē, whakarērea pūtia ana ahau ki ngā ringa o te hunga kino.
JOB 16:12 Hūmārie ana tāku noho, heoi kua wāwāhi ia i ahau; kua mau ia ki tōku kakī, tātātia ake ahau kia pakaru rikiriki; whakatūria ana ahau e ia hei kōperenga pere māna.
JOB 16:13 Karapotia ana ahau e āna kaikōpere, motumotuhia ana e ia ōku whatumanawa, kāhore hoki e tohungia; ringihia ana e ia tōku au ki te whenua.
JOB 16:14 He mea wāwāhi ahau nāna, he wāhanga, he wāhanga; ānō he tangata kaha ia e rere mai ana ki runga ki ahau.
JOB 16:15 “Tuituia ana e ahau he kākahu taratara mō tōku kiri, whakaititia iho e ahau tōku haona ki te puehu.
JOB 16:16 Paruparu noa iho tōku mata i te tangihanga, kei runga i ōku kamo te ātārangi o te mate;
JOB 16:17 ahakoa kāhore he tutū i ōku ringa, ā, he mā tāku īnoi.
JOB 16:18 “Kaua, e te whenua, e hīpokina ōku toto, kei whai wāhi tānga anō hoki tāku karanga.
JOB 16:19 Kei te rangi nei anō ināianei te kaiwhakaatu o tāku, kei te wāhi i runga tōku kaititiro.
JOB 16:20 E tāwai mai ana ōku hoa ki ahau, māturuturu tonu ia ngā roimata o tōku kanohi ki te Atua.
JOB 16:21 Kia tohe koa ia i tō te tangata tika ki te Atua, i tō te tama hoki a te tangata ki tōna hoa!
JOB 16:22 “Kia taka mai hoki ngā tau torutoru nei, ka haere ahau i te ara e kore ai ahau e hoki mai anō.”
JOB 17:1 “Kua pau tōku manawa, mōtī rawa ōku rā, kua rite te urupā mōku.
JOB 17:2 He pono he hunga tāwai ēnei kei ahau, ā, kei roto tonu tōku kanohi i ā rātou whakakārangitanga.
JOB 17:3 “Tēnā rā, hōmai he punga, ko koe tonu hei whakakapi tūranga mōku; ko wai hei papaki ringa ki ahau?
JOB 17:4 Kua hunā hoki e koe tō rātou ngākau kei mōhio; nā reira e kore koe e whakaneke ake i a rātou.
JOB 17:5 Ko te tangata e whāki ana i ōna hoa, he mea mō te utu, ko ngā kanohi tonu o āna tamariki e hemo.
JOB 17:6 “Kua meinga hoki ahau e ia hei hahani mā ngā iwi; ā, kua waiho mārakerake ahau hei whakaetietinga.
JOB 17:7 Kua atarua tōku kanohi i te tangi, rite tonu ki te ātārangi ōku wāhi katoa.
JOB 17:8 Ka mīharo te hunga tika ki tēnei, ā, ka whakaoho te tangata harakore i a ia anō hei whakahē i te atuakore.
JOB 17:9 Otiia, ka mau te tangata tika ki tōna ara, ā, ko te tangata ringa mā ka neke haere ake te kaha.
JOB 17:10 “Ko koutou katoa ia, tahuri, anga mai nei, e kore hoki tētahi tangata mahara e kitea e ahau i roto i a koutou.
JOB 17:11 Kua pahemo ōku rā, motumotuhia ake ōku whakaaro i whakatakoto ai, tae noa ki ngā whakaaro o tōku ngākau.
JOB 17:12 Ko te pō kua meinga e rātou hei ao; ‘Ko te mārama,’ e kī ana rātou, ‘e tata tonu ana ki te pōuri.’
JOB 17:13 Ki te titiro ahau i te rēinga hei whare mōku; mehemea kua whārikitia, e ahau tōku moenga ki te pōuri;
JOB 17:14 mehemea kua karanga ahau ki te pirau, ‘Ko koe tōku pāpā’; ki te iro rānei, ‘Ko koe tōku whaea, tōku tuahine!’
JOB 17:15 Kei hea rā he tūmanakohanga atu mōku? Ā, ko tāku e tūmanako atu ai ko wai e kite?
JOB 17:16 Ka riro ki raro ki ngā taha o te rēinga, ina whai okiokinga i roto i te puehu.”
JOB 18:1 Anō rā ko Pirirara Huhi, i mea ia:
JOB 18:2 “Kia pēhea te roa o tā koutou whakatakoto māhanga mō ngā kupu? Kia whai mahara mai, muri iho ka kōrero mātou.
JOB 18:3 He aha mātou i kīia ai he kararehe, i waiho ai hei mea poke ki tā koutou titiro mai?
JOB 18:4 Haea iho koe e koe anō, i a koe e riri ana – māu koia ka mahue ai te whenua, ka nekehia ai te toka i tōna wāhi?
JOB 18:5 “E pirau anō hoki te rama a te hunga kino, ā, e kore te mura o tāna ahi e mārama.
JOB 18:6 Ka pōuri te mārama i roto i tōna tēneti, ka pirau anō hoki tāna rama i runga i a ia.
JOB 18:7 Ka whakakīkītia ngā takahanga o tōna kaha, ka kōkiritia iho anō ia ki raro e tōna whakaaro ake.
JOB 18:8 Nō te mea ka makā ia e ōna waewae ake ki te kupenga, ka haere hoki ia i runga i te reti.
JOB 18:9 Ka mau tōna rekereke i te tawhiti, ā, ka hopukia ia e te māhanga.
JOB 18:10 Kei te huna ki te whenua te aho mōna, te rore hoki mōna ki te huarahi.
JOB 18:11 He whakamataku i ngā taha katoa hei mea i a ia kia wehi, hei aruaru hoki i a ia i ōna hikitanga rekereke.
JOB 18:12 Ko tōna kaha ka hemo i te kai, ā, kei te whanga tonu te aituā ki tōna tatunga.
JOB 18:13 Ka pau i tērā ngā wāhi o tōna tinana, āe, ka pau ōna wāhi i te mātāmua o te mate.
JOB 18:14 Ka hūtia atu ia i roto i tōna tēneti, i whakamanawa ai ia, ā, ka kawea atu ia ki te kīngi o ngā whakamataku.
JOB 18:15 Nā, ka noho ki tōna tēneti te mea ehara nei i a ia; ā, ka ruia iho te whānāriki ki runga ki tōna kāinga.
JOB 18:16 Ka maroke ake ōna pakiaka i raro, ā, i runga ka tapahia atu tōna manga.
JOB 18:17 Ka ngaro atu te maharatanga ki a ia i runga i te whenua; e kore anō ia e whai ingoa i te huanui.
JOB 18:18 Ka peia atu anō ia i roto i te mārama ki te pōuri, ka atiatia atu hoki i te ao.
JOB 18:19 E kore ia e whai tama, e whai tama rānei a te tama, i roto i tōna iwi, he mōrehu rānei i te wāhi i noho ai ia.
JOB 18:20 Mīharo ana ki tōna rā te hunga i muri i a ia, pērā i te hunga i haere rā i mua, mau ana tō rātou wehi.
JOB 18:21 He pono ko ngā nohoanga ēnei o te tangata kino, ko te wāhi hoki tēnei o te tangata kāhore e mōhio ki te Atua.”
JOB 19:1 Nā, ka whakautua e Hopa, ka mea:
JOB 19:2 “Kia pēhea ake te roa o tā koutou whakapōrearea i tōku wairua, o tā koutou wāwāhi i ahau ki te kupu?
JOB 19:3 Ka tekau ēnei tāwainga a koutou ki ahau, kāhore ō koutou whakamā i a koutou ka āki tonu nei i ahau.
JOB 19:4 Ki te mea anō hoki kua hē ahau, kei ahau anō tōku hē e noho ana.
JOB 19:5 Ki te mea ka whakanui mai koutou i a koutou ki ahau, ā, ka kauwhau mai ki ahau i tōku tāwainga;
JOB 19:6 kia mōhio koutou nā te Atua ahau i whakaparori i tāku take, he mea hao mai ahau nāna ki tāna kupenga.
JOB 19:7 “Nanā, e tangi ana ahau i te mahi nanakia, heoi kāhore ahau e whakarangona; e karanga āwhina ana ahau, otiia kāhore he whakawā.
JOB 19:8 Kua tūtakina e ia tōku ara, tē puta ahau; tukua iho ana e ia te pōuri ki ōku ara.
JOB 19:9 Ko tōku korōria huia atu ana e ia; tangohia ana e ia te karauna i tōku māhunga.
JOB 19:10 Wāwāhia ana ahau e ia i ngā taha katoa, ā, riro ana ahau; ko tāku i tūmanako atu ai huaranga atu ana e ia ānō he rākau.
JOB 19:11 Kua mura mai hoki tōna riri ki ahau; e kīia ana ahau e ia ko tētahi o ōna hoariri.
JOB 19:12 E haere huihui mai ana āna taua, e whakaneke ake ana i tō rātou ara ki ahau, kei te whakapae i tōku tēneti i tētahi taha, i tētahi taha.
JOB 19:13 “Kua meinga e ia ōku tēina kia matara atu i ahau; ko āku i mōhio ai kua tāngata kē ki ahau.
JOB 19:14 Ko ōku whanaunga, mutu pū tā rātou; ko ōku hoa ake, kua wareware rātou ki ahau.
JOB 19:15 Ko te hunga e noho ana i tōku whare, me āku pononga wāhine, kīia iho ahau e rātou he tangata kē; he tangata nō ngā whenua ahau ki tā rātou titiro mai.
JOB 19:16 I karanga atu ahau ki tāku pononga, heoi kīhai ia i whakaō mai; ahakoa e īnoi ana tōku māngai ki a ia.
JOB 19:17 Ko tōku hā tauhou ana ki tāku wahine, me tāku īnoi hoki ki ngā tamariki o te kōpū o tōku whaea.
JOB 19:18 Ko ngā tamariki nonohi anō hoki, whakahāwea mai ana ki ahau; ki te whakatika ahau, ka kōrero whakahē rātou mōku.
JOB 19:19 E whakarihariha mai ana ki ahau ōku takahoa katoa, ā, ko āku i aroha ai kua tahuri mai ki ahau.
JOB 19:20 Piri tonu tōku iwi ki tōku kiri, ki ōku kikokiko, ā, ora ake ōku, ko te kiri kau o ōku niho.
JOB 19:21 “Tohungia mai ahau, tohungia mai ahau e koutou, e ōku hoa; kua pā mai hoki te ringa o te Atua ki ahau.
JOB 19:22 He aha koutou i tūkino ai i ahau, i pērā ai me te Atua, tē mākona koutou i ōku kikokiko?
JOB 19:23 “Auē, me i tuhituhia āku kupu! Auē, me i tāia ki te pukapuka!
JOB 19:24 Me i whaoa ki te kāmaka, ki te pene rino, ki te matā, hei mea mō ā mua noa atu!
JOB 19:25 Otiia, e mōhio ana ahau kei te ora tōku kaihoko, ā, i ngā wā i muri nei ka tū ia ki runga ki te whenua.
JOB 19:26 Ā, ahakoa i muri i te paunga o tōku kiri, ka titiro tonu ahau i roto i tōku kikokiko ki te Atua;
JOB 19:27 e titiro anō ahau ki a ia, ahau nei anō; ā, mā ōku kanohi e mātakitaki, kāhore mā o tētahi atu. Pau rawa ōku whatumanawa i roto i ahau!
JOB 19:28 “Ki te kī koutou, ‘Nā, tā tātou hanga ki te tūkino i a ia! Kua kitea hoki te take o te mea i roto i ahau’;
JOB 19:29 kia wehi koutou kei mate i te hoari; nō te mea ko te whiunga ki te hoari kei roto i te riri, e mōhio ai koutou he whakawā anō tēnei.”
JOB 20:1 Kātahi ka whakautua e Topara Naamati, i mea ia:
JOB 20:2 “Nā konā ōku whakaaro i whakahoki kupu ake ai i roto i ahau; nā reira anō ahau i hohoro ai.
JOB 20:3 Kua rongo ahau i te whakahē mōku, e pā ai te whakamā ki ahau, ā, nā te wairua o tōku ngākau mahara te kupu whakahoki ki ahau.
JOB 20:4 “Kāhore rānei koe i mōhio ki tēnei i mua noa atu, i te wā rā anō i whakanohoia ai te tangata ki runga ki te whenua;
JOB 20:5 he poto te wā e whakamanamana ai te tangata kino, ā, ko te hari o te tangata atuakore he wheriko kau?
JOB 20:6 Ahakoa eke noa tōna nui ki ngā rangi, ā, pā atu tōna māhunga ki ngā kapua;
JOB 20:7 ka memeha atu anō ia ā ake ake, ka pērā anō me tōna paru; ko te hunga kua kite i a ia, ka mea, ‘Kei hea ia?’
JOB 20:8 Ka rere atu ia ānō he moemoeā, e kore anō hoki e kitea; āe ka āia atu ia, ānō he rekanga kanohi nō te pō.
JOB 20:9 Ko te kanohi i kite i a ia e kore e kite anō; ā, heoi anō tirohanga a tōna wāhi ki a ia.
JOB 20:10 E whakamānawareka āna tamariki i ngā rawakore, mā ōna ringa anō e whakahoki ōna rawa.
JOB 20:11 E kī ana ōna wheua i te tamarikitanga; engari ka takoto tahi me ia i roto i te puehu.
JOB 20:12 “Ahakoa reka te kino i roto i tōna māngai, ahakoa hunā e ia i raro i tōna arero;
JOB 20:13 ahakoa manawapātia noatia e ia, ā, kāhore e mahue i a ia, heoi pupuri tonu i roto i tōna māngai;
JOB 20:14 otirā, ka puta kē tāna kai i roto i ōna whēkau, ko te au o ngā ahipi i roto i a ia.
JOB 20:15 I horomia e ia te taonga, ka ruakina mai anō e ia; mā te Atua e ākiri mai i roto i tōna kōpū.
JOB 20:16 Ka ngotea e ia te hūware whakamate o ngā ahipi; ka mate anō ia i te arero o te waipera.
JOB 20:17 E kore ia e kite i ngā awa, i ngā wai rere o te honi, o te pata.
JOB 20:18 Ko tāna i uaua ai ka whakahokia e ia, e kore anō e horomia; ko tāna utu ka rite ki ōna taonga; e kore anō e koa ki reira.
JOB 20:19 Nāna hoki i tūkino ngā rawakore, whakarērea iho; murua ana e ia he whare, ā, e kore e hangā anō e ia.
JOB 20:20 “I te mea kāhore ia i kite i te tatūtanga i roto i a ia, e kore anō ētahi o ngā mea e matea nuitia ana e ia e mau ki a ia.
JOB 20:21 Kāhore tētahi mea i toe i kore te horomia e ia; nō reira, e kore tētahi mea pai ōna e mau tonu.
JOB 20:22 I a ia e whiwhi nui nei i te rawa, e rawakore anō ia; ka tae mai ki a ia ngā ringa katoa o te hunga kei roto i te mate.
JOB 20:23 I a ia ka mea ki te whakakī i tōna kōpū, ka makā mai e te Atua te kaha o tōna riri ki runga ki a ia, ā, ka ringihia iho ki a ia, i a ia anō e kai ana.
JOB 20:24 Ka rere atu ia i te patu rino, ka tū ia i te kōpere parāhi, puta pū.
JOB 20:25 E unuhia ana, kua puta mai i roto i te tinana, inā, puta mai ana te mata wheriko i roto i tōna au; kua tau ngā wehi ki a ia.
JOB 20:26 Ko te pōuri katoa kei te takoto mai mō āna taonga; ka kainga ia e te ahi, kīhai i pūhia e te tangata; mā reira e pau ai te toenga i roto i tōna tēneti.
JOB 20:27 Ka whakakitea mai tōna hē e ngā rangi ka whakatika mai anō te whenua ki a ia.
JOB 20:28 Ko ngā hua o tōna whare ka riro, ka rere, ānō he wai, ōna mea i te rā e riri ai ia.
JOB 20:29 Ko tā te Atua wāhi tēnei mā te tangata kino, ko te taonga tupu i kīia e te Atua mōna.”
JOB 21:1 Anō rā ko Hopa, i mea ia:
JOB 21:2 “Āta whakarongo mai ki tāku kupu, ā, hei tēnei he kupu whakamārie mai mā koutou.
JOB 21:3 Tukua ahau, ā, ka kōrero hoki ahau; ā, ka mutu āku kōrero, haere tonu tā koutou tāwai.
JOB 21:4 “Ahau nei, ki te tangata koia tāku amuamu? Ā, he aha ahau tē manawanui ai?
JOB 21:5 Titiro mai ki ahau, mīharo ai; kōpania atu te ringa ki te māngai.
JOB 21:6 Mahara kau ahau, ka wehi, mau pū te wehi o ōku kikokiko.
JOB 21:7 He aha te hunga kino i ora ai, i koroheke ai, āe, i mārohirohi ai tō rātou kaha?
JOB 21:8 Pūmau tonu ō rātou uri ki tō rātou taha ki tō rātou aroaro, ā, ko ā rātou whānau kei tā rātou tirohanga atu.
JOB 21:9 Ō rātou whare kei runga i te rangimārie, kāhore he wehi, kāhore hoki a te Atua patu ki a rātou.
JOB 21:10 E kaha ana tāna pūru ki te ekeeke, kāhore hoki e hē; ka whānau tāna kau, kāhore hoki he whakatahe.
JOB 21:11 E tukua mai ana e rātou ā rātou kōhungahunga ānō he kāhui hipi, e pekepeke ana ā rātou tamariki.
JOB 21:12 He hunga hāpai rātou i te timipera, i te hāpa, e koa ana ki te tangi o te ōkana.
JOB 21:13 Ō rātou rā pau tonu i runga i te āhuareka, kitea rawatia ake kua heke ki te pō.
JOB 21:14 Koia rātou i mea ai ki te Atua, ‘Mawehe atu i a mātou; kāhore hoki ō mātou hiahia kia mātau ki ōu ara.
JOB 21:15 He aha rā te Runga Rawa e mahi ai mātou ki a ia? He aha hoki te rawa ki a mātou ki te īnoi ki a ia?’
JOB 21:16 Nanā, kāhore he pai mō rātou i ō rātou ringa ake: matara atu i ahau te whakaaro o te hunga kino.
JOB 21:17 “Pēhea te maha o ngā matenga o te rama a te hunga kino? O ngā pānga mai anō hoki o tō rātou aituā ki a rātou? O te tūwhanga mai a te Atua i ngā mamae i a ia e riri ana?
JOB 21:18 E rite ai rātou ki te kakau wīti i mua i te hau, ki te pāpapa e kāhakina atu ana e te paroro?
JOB 21:19 E mea ana koutou, ‘E rongoātia ana e te Atua tōna kino hei mea mō āna tamariki.’ Māna e utu tērā ki a ia tonu, kia mōhio ai ia.
JOB 21:20 Tukua kia kite ōna ake kanohi i tōna hunanga, ā, tukua ia kia inu i te riri o te Kaha Rawa.
JOB 21:21 He aha hoki tana manako ki tōna whare i muri i a ia, ka poroa hoki ōna marama i waenga?
JOB 21:22 “E whakaako ianei tētahi i te Atua ki te mātauranga? Ko te kaiwhakawā hoki ia mō te hunga whakakake.
JOB 21:23 Tēnei tangata, mate iho ia, pakari rawa anō hoki ōna kaha, āta takoto ana āna mea katoa, kāhore hoki he raruraru.
JOB 21:24 Kī tonu ōna ū i te waiū, ā, e mākūkū ana ōna wheua i te hinu.
JOB 21:25 Mate iho hoki tērā tangata, kawa tonu tōna wairua, kāhore hoki he pai hei kai māna.
JOB 21:26 Ka takoto ngātahi rāua ki te puehu, ā, ko te iro hei hīpoki mō rāua.
JOB 21:27 “Nanā, e mōhio ana ahau ki ō koutou whakaaro, ki tā koutou ngārahu nanakia anō hoki mōku.
JOB 21:28 E kī ana hoki koutou, ‘Kei hea te whare o te rangatira? Kei hea hoki te tēneti i noho ai te hunga kino?’
JOB 21:29 Kāhore ianei koutou i ui ki te hunga e haere atu ana i te ara? Kāhore rānei koutou i mōhio ki ā rātou tohu?
JOB 21:30 Kei te rongoā nei hoki te tangata kino mō te rā o te whakangaro; ka whakaputaina rātou i te rā o te riri.
JOB 21:31 Ko wai e whakaatu i tōna ara ki tōna aroaro? Ko wai hoki hei hoatu i te utu mō tāna mahi ki a ia?
JOB 21:32 Heoi, ka kawea ia ki te urupā; kei te pūranga he wāhi mōna.
JOB 21:33 Ka reka ki a ia ngā pōkuru o te awaawa, ka whai mai anō hoki ngā tāngata katoa i a ia; e kore nei hoki e taea te tatau te hunga i mua i a ia.
JOB 21:34 “He pēhea rā tā koutou whakamārie tinihanga i ahau, e toe nā hoki te hē i roto i ā koutou kupu e whakahoki mai nā?”
JOB 22:1 Anō rā ko Eripāta Temani, i mea ia:
JOB 22:2 “E whai pai anō rānei te Atua i te tangata? He pono e whai pai te tangata i a ia anō ki te mea he ngākau mōhio tōna.
JOB 22:3 He oranga ngākau rānei ki te Kaha Rawa tōu tika? Hei taonga rānei ki a ia, ki te meinga e koe ōu ara kia tino tika?
JOB 22:4 “He wehi rānei nōu i a ia i whakahē ai ia i a koe, i whakawā ai i a koe?
JOB 22:5 He teka ianei he nui tōu hē? Kāhore hoki he pito whakamutunga o ōu kino.
JOB 22:6 I tangohia noatia hoki e koe ngā mea a tōu teina hei taunaha, huia ana e koe ngā kākahu o te hunga e noho tahanga ana.
JOB 22:7 Kīhai i whakainumia e koe ki te wai te hunga ngenge; kaiponuhia ana e koe he taro ki te hunga e matekai ana.
JOB 22:8 Ko te tangata mārohirohi, i a ia te whenua; ko te tangata hōnore, noho ana ia i reira.
JOB 22:9 Ko ngā pouaru, ungā rawakoretia atu ana e koe, whatiwhatiia ana ngā ringa o ngā pani.
JOB 22:10 Nā reira, karapotia pūtia ana koe e ngā māhanga, raruraru ana koe i te wehi pā whakarere;
JOB 22:11 i te pōuri rānei, e kore ai koe e kite; ā, nui atu te wai e taupoki nā i a koe.
JOB 22:12 “He teka ianei kei te wāhi tiketike o te rangi te Atua? Tirohia atu anō hoki a runga o ngā whetū, tō rātou teitei!
JOB 22:13 Ā, e mea nā koe, ‘He aha tā te Atua e mōhio ai?’ E puta mai rānei tāna whakawā i roto i te kapua pōuri?
JOB 22:14 Ko tōna wāhi ngaro ko ngā kapua mātotoru, tē kite ia; kei te taiāwhio anō ia i ngā rangi.
JOB 22:15 Ka mau tonu rānei koe ki te ara ō mua, i haerea rā e ngā tāngata kikino?
JOB 22:16 I kapohia atu nei i te mea kāhore anō i rite ō rātou rā; tāhoroa ana tō rātou tūranga anō he awa.
JOB 22:17 I mea nei ki te Atua, ‘Mawehe atu i a mātou’; ā, ‘He aha e taea e te Kaha Rawa mō mātou?’
JOB 22:18 Heoi, i whakakīia e ia ō rātou whare ki ngā mea papai, ko te whakaaro ia o te hunga kino e matara atu ana i ahau.
JOB 22:19 “E kite ana te hunga tika, ā, koa ana; kataina iho rātou e te hunga harakore,
JOB 22:20 me te kī, ‘He pono kua haukotia te hunga i tahuri mai ki a tātou, pau ake i te ahi te toenga o rātou.’
JOB 22:21 “Waiho ia hei hoa mōu, kātahi koe ka āta noho; mā reira ka tae mai ai te pai ki a koe.
JOB 22:22 Tahuri mai rā ki te ture a tōna māngai, rongoātia hoki āna kupu ki roto ki tōu ngākau.
JOB 22:23 Ki te hoki koe ki te Kaha Rawa, tērā koe e hangā; ki te nekehia atu e koe te kino kia mamao i ōu tēneti.
JOB 22:24 Ā, ka whakapūranga koe i tāu taonga ki te puehu, te kōura o Ōpira ki waenga i ngā kōhatu o ngā awa;
JOB 22:25 ā, ko te Kaha Rawa hei taonga mōu, hei hiriwa utu nui ki a koe.
JOB 22:26 Ko reira hoki koe āhuareka ai ki te Kaha Rawa, ā, ka ara ake tōu mata ki te Atua.
JOB 22:27 Ka īnoi anō koe ki a ia, ā, ka whakarongo mai ia ki a koe; ka whakamanā anō e koe āu kupu taurangi.
JOB 22:28 Ka whakatakotoria hoki e koe he tikanga, ā, ka whakapūmautia ki a koe; ka whiti anō te mārama ki runga ki ōu ara.
JOB 22:29 Ki te makā koe e rātou ki raro, ka kī koe, ‘Tēnei anō he whakaarahanga ake’; ka whakaorangia anō e ia te ngākau whakaiti.
JOB 22:30 Ka whakaorangia e ia te tangata ahakoa ehara i te harakore; āe rā, ka whakaorangia ia e te mā o ōu ringa.”
JOB 23:1 Kātahi ka whakautua e Hopa, i mea ia:
JOB 23:2 “I tēnei rā nei anō e amuamu ana tāku tangi. Nui noa atu i tāku auē te taimaha o te patunga i ahau.
JOB 23:3 Auē, me i mōhio ahau ki te wāhi e kite ai ahau i a ia, kia tae rawa atu ai ahau ki tōna nohoanga!
JOB 23:4 Ka āta whakatakotoria e ahau āku kōrero ki tōna aroaro, ka whakakīia hoki tōku māngai ki ngā kupu tautohetohe.
JOB 23:5 Ka mōhio ahau ki ngā kupu e whakahokia mai e ia ki ahau, ka mārama hoki tāna e mea ai ki ahau.
JOB 23:6 E whakaputaina mai rānei tōna kaha nui ina tautohetohe ki ahau? Kāhore; engari ka whai whakaaro ia ki ahau.
JOB 23:7 Ko reira te tangata tika tautohetohe ai ki a ia; ā, ora tonu ake ahau i tōku kaiwhakawā ake tonu atu.
JOB 23:8 “Nanā, haere ana ahau ki mua, ā, kāhore ia i reira; ki muri, heoi kāhore ahau e kite i a ia;
JOB 23:9 ki mauī, ina ka mahi ia, heoi kāhore ahau e kite i a ia; e huna ana ia i a ia anō i te taha ki matau, tē kite ahau i a ia.
JOB 23:10 Otiia, e mōhio ana ia ki te ara e anga atu ai ahau. Kia oti ahau te titiro iho e ia, ānō he kōura ahau i tōku putanga mai.
JOB 23:11 Mau pū ōna takahanga i tōku waewae; ū pū ahau ki tōna ara, kīhai hoki i peka kē.
JOB 23:12 Kīhai hoki i mahue i ahau te whakahau a ōna ngutu; ko ngā kupu a tōna māngai rongoā rawa ki ahau, nui atu i te kai i rite māku.
JOB 23:13 “Ko ia, kotahi tonu tōna whakaaro, ā, mā wai ia e whakatahuri kē? Ko tā tōna ngākau hoki i hiahia ai e meatia ana e ia.
JOB 23:14 E whakaotia ana hoki e ia ngā mea i whakaritea mōku; he maha anō hoki āna mahi pērā.
JOB 23:15 Koia ahau i ohorere ai i tōna aroaro; ka whakaaroaro ahau, ka wehi i a ia.
JOB 23:16 Ngohe noa hoki tōku ngākau i te Atua, ohorere ana ahau i te Kaha Rawa.
JOB 23:17 Kīhai nei hoki ahau i whakangaromia i mua o te pōuri, kīhai hoki i hīpokina e ia te pōuri i tōku aroaro.”
JOB 24:1 “He aha ngā wā te whakapūrangatia ai e te Kaha Rawa? Ā, he aha hoki te hunga e mōhio ana ki a ia tē kite ai i ōna rā?
JOB 24:2 Tērā ētahi e whakaneke atu ana i ngā rohe; e kāhakina ana e rātou ngā kāhui, whāngaia iho e rātou.
JOB 24:3 E āia atu ana e rātou te kāihe a ngā pani, e tangohia ana hei taunaha te kau a te pouaru.
JOB 24:4 Whakapekaia kētia ana e rātou ngā rawakore i te ara; huihui ana ngā ware o te whenua, piri ana.
JOB 24:5 Nanā, rite tonu rātou ki te kāihe mohoao i te koraha, haere atu ana ki tā rātou mahi, e whai ana ki te kai; hei kai te koraha mā rātou, mā ā rātou tamariki.
JOB 24:6 E kotia ana e rātou tā rātou wīti i te māra; e kohia ana e rātou ngā wāina a te hunga tutū.
JOB 24:7 E takoto tahanga ana rātou i te pō roa, kāhore he kākahu, kāhore hoki he hīpoki i te māeke.
JOB 24:8 Mākū iho rātou i te āwhā o ngā maunga, ā, ka kore he rerenga, ka awhi i te kāmaka.
JOB 24:9 “Tērā te hunga, e tangohia mai ana e rātou te pani i te ū, e tango ana i tā te rawakore taunaha.
JOB 24:10 Koia ka haere tahanga rātou, kāhore he kākahu, ā, i te matekai ka hari i ngā paihere wīti;
JOB 24:11 e mahi nei i te hinu i roto i ngā taiepa a aua tāngata; e takahi nei i ā rātou poka wāina, me te mate i te wai.
JOB 24:12 E auē ana ngā tāngata i roto i te pā, e karanga ana hoki te wairua o te hunga i patua; kāhore anō ia a te Atua whakakūware ki a rātou.
JOB 24:13 “Nō te hunga rātou e whakakeke ana ki te mārama; kāhore ō rātou mōhio ki ōna ara, e kore anō rātou e noho ki ōna huarahi.
JOB 24:14 E maranga ana te kaikōhuru i te mea ka mārama, patua iho e ia te ware me te rawakore; ā, i te pō ka pēnā ia i te tāhae.
JOB 24:15 E tatari ana te kanohi o te tangata pūremu kia nehunehu iho, e mea ana, ‘E kore te kanohi e kite i ahau’; e huna ana ia i tōna mata.
JOB 24:16 E keri ana rātou i ngā whare i te pōuri; i te awatea e pā ana rātou i a rātou; kāhore rātou e mōhio ki te mārama.
JOB 24:17 Ki a rātou katoa hoki e rite ana te ata ki te ātārangi o te mate; e mātau ana hoki rātou ki ngā whakamataku o te ātārangi o te mate.
JOB 24:18 “Tere tonu ia ki runga ki te mata o ngā wai; he mea kanga tō rātou wāhi i runga i te whenua; e kore ia e anga mai ki te ara ki ngā māra wāina.
JOB 24:19 Ka riro ngā wai o te hukarere i te tauraki, i te wera; te hunga hara anō hoki i te rēinga.
JOB 24:20 Ka wareware te kōpū ki a ia; he kai reka ia mā te iro; e kore ia e maharatia i muri iho; ka whati hoki te kino ānō he rākau.
JOB 24:21 “E tūkinotia ana e ia te pākoko kīhai nei i whānau; kāhore hoki āna mahi pai ki te pouaru.
JOB 24:22 E kūmea atu ana hoki e ia ngā mārohirohi ki tōna kaha; ka whakatika ake ia, kāhore he tangata e ū ki te ora.
JOB 24:23 I hōmai anō e te Atua ki a rātou kia au te noho, ā, ka whakawhirinaki rātou ki reira; kei runga hoki i ō rātou huarahi ōna kanohi.
JOB 24:24 E whakanekehia ake ana rātou; otiia wāhi iti nei, kua kāhore noa iho rātou; āe rā, ka whakaitia rātou, ka whakawāteatia atu pērā i ērā atu katoa, ā, ka tapahia atu ānō ko ngā kāuru o ngā puku wīti.
JOB 24:25 “Ki te mea he teka tēnei, ko wai hei whakateka ki ahau, hei whakakāhore i tāku kōrero?”
JOB 25:1 Anō rā ko Pirirara Huhi, i mea ia:
JOB 25:2 “Kei a ia te kīngitanga me te wehi: ko ia hei hohou i te rongo i ōna wāhi tiketike.
JOB 25:3 E taea rānei āna ope te tatau? Ko wai hoki i kore te whitingia e tōna mārama?
JOB 25:4 Ā, mā te aha rā te tangata ka whakatikaia mai ai e te Atua? Mā te aha ka mā ai te whānau a te wahine?
JOB 25:5 Nanā, ko te marama, kāhore ōna tīahotanga, kāhore hoki ngā whetū kia mā ki tāna titiro;
JOB 25:6 kia iti rawa iho tō te tangata, he kutukutu nei! Tō te tama ā te tangata, he iro nei!”
JOB 26:1 Anō rā ko Hopa, i mea ia:
JOB 26:2 “He hāpai pēhea tāu i te kahakore? He whakaora pēhea tāu i te ringa ngoikore?
JOB 26:3 Ka tae tāu whakatakoto whakaaro mā te whakaarokore, te nui o tāu whakaatu tikanga!
JOB 26:4 I puaki ki a wai āu kupu? Nō wai te wairua i puta mai rā i a koe?”
JOB 26:5 “E wiri ana ngā tūpāpaku i raro i te wai, me ngā mea anō e noho ana i reira.
JOB 26:6 E takoto kau ana te rēinga i tōna aroaro, kāhore hoki he hīpoki mō te whakangaro.
JOB 26:7 E horahia atu ana e ia te raki ki runga ki te wāhi takoto kau, whakairihia ana e ia te whenua ki runga ki te kāhore noa iho.
JOB 26:8 E takaia ana e ia ngā wai ki roto ki āna kapua mātotoru; ā, kāhore te kapua e pakaru i raro i a rātou.
JOB 26:9 E kaiponuhia ana e ia a mua o tōna torōna, horahia ana e ia tāna kapua ki runga.
JOB 26:10 He mea karapoti nāna ngā wai, rohe rawa, ā tae noa ki te mutunga mai o te mārama me te pōuri.
JOB 26:11 Wiri ana ngā pou o te rangi, mīharo ana ki tāna whakatūpehupehu.
JOB 26:12 Ko tōna kaha hei whakakorikori i te moana, marū ana te whakakake i tōna mātauranga.
JOB 26:13 Nā tōna wairua i whakapaipai ngā rangi; nā tōna ringa i wero te nākahi tere.
JOB 26:14 Nā, he pito ēnei nō ōna ara; anō te iti o te wāhi ōna e rangona ana! Ko te whatitiri ia o tōna kaha, ko wai ka mātau?”
JOB 27:1 Nā, i kōrero tonu anō a Hopa i tāna pepeha, i mea:
JOB 27:2 “E ora ana te Atua, nāna nei i whakakāhore tōku tika; te Kaha Rawa nāna nei i whakakawa tōku wairua;
JOB 27:3 kei te toitū tonu hoki tōku ora i roto i ahau, ā, kei roto i ōku pongaponga te Wairua o te Atua;
JOB 27:4 e pono, e kore ōku ngutu, e kōrero kino, e kore te hīanga e puaki i tōku arero.
JOB 27:5 Auē kia whakatikaia tā koutou e ahau! E kore e whakarērea e ahau tōku ngākau tapatahi, ā mate noa.
JOB 27:6 Ka mau tāku pupuri ki tōku tika, e kore e tukua atu e ahau; e kore tōku ngākau e whakahē ki ahau i ahau anō e ora nei.
JOB 27:7 “Ko tōku hoariri, kia rite ia ki te tangata kino; ko te tangata e whakatika mai ana ki ahau, kia rite ia ki te tangata hara.
JOB 27:8 He aha oti tā te whakapono kore e tūmanako ai, ahakoa whiwhi ia i te rawa, ki te mea ka tangohia atu tōna wairua e te Atua?
JOB 27:9 E rongo rānei te Atua ki tāna tangi ina pā te hē ki a ia?
JOB 27:10 E āhuareka rānei ia ki te Kaha Rawa, e karanga rānei ki te Atua i ngā wā katoa?
JOB 27:11 “Ka whakaakona koutou e ahau ki te ringa o te Atua; e kore e hunā e ahau ngā mea e takoto mai nei i te Kaha Rawa.
JOB 27:12 Nanā, kua kite koutou katoa; ā, nā te aha koutou i wairangi rawa ai?
JOB 27:13 “Ko tā te Atua wāhi tēnei mā te tangata kino, ko te mea e whakarērea iho mā ngā kaitūkino, ko tā te Kaha Rawa e riro i a rātou.
JOB 27:14 Ki te mea ka tokomaha āna tamariki, hei mea mā te hoari; e kore anō hoki ōna uri e mākona i te taro.
JOB 27:15 Ko ōna mōrehu ka tanumia ki te mate; e kore anō hoki āna pouaru e tangi.
JOB 27:16 Ahakoa āmene ia i te hiriwa ānō he puehu, ā, pae tonu te kākahu mōna ānō he paru –
JOB 27:17 e pae anō i a ia, otiia ka kākahuria e te tangata tika, ka wehewehea hoki te hiriwa e te harakore.
JOB 27:18 Ka rite tāna hanga i tōna whare ki tā te pūrehurehu; tōna rite kei te whare tīhokahoka e hangā ana e te kaitiaki.
JOB 27:19 Ka takoto ia, he tangata taonga, otiia e kore e kohia ki te urupā; ko te tirohanga ake a ōna kanohi, nā, kua kāhore noa iho ia.
JOB 27:20 Rite tonu ki te wai ngā whakawehi e mau ai ia; tāhaetia ana ia e te paroro i te pō.
JOB 27:21 Ka kāhakina atu ia e te marangai, ā, riro ana ia; ka āia atu anō ia i tōna wāhi.
JOB 27:22 Ka āki mai hoki te Atua ki a ia, e kore anō ia e tohungia; mea noa ia kia rere mai i roto i tōna ringa.
JOB 27:23 Ka papaki te tangata i ō rātou ringa ki a ia, ā, ka whakahī, ka ā atu i a ia i tōna wāhi.”
JOB 28:1 “He rua hoki tō te hiriwa e puta mai ai, he wāhi anō tō te kōura e whakarewaina ai.
JOB 28:2 He mea tango mai te rino nō roto i te whenua; nō te kāmaka te parāhi, he mea whakarewa.
JOB 28:3 E whakatakotoria ana e te tangata he mutunga mai mō te pōuri, e rapua ana e ia ki te tino tutukitanga atu ngā kōhatu o te pōuri, o te ātārangi o te mate.
JOB 28:4 E pākaruhia mai ana e ia he rua i kō ake o ngā nohoanga tāngata; kua wareware rātou i te waewae e haere ana; he tawhiti i te tangata tō rātou tārenga, e piu atu ana, e piu ana mai.
JOB 28:5 Ko te whenua, e puta mai ana he taro i roto i a ia: ā, e hurihia ake ana a raro iho ānō he ahi.
JOB 28:6 Hei wāhi mō ngā hāpira ōna kōhatu, he puehu kōura anō tōna.
JOB 28:7 “He ara tēnā kāhore i mōhiotia e te manu, kīanō i kitea e te kanohi o te whatura.
JOB 28:8 Kāhore ngā kīrehe whakahī kia takahi i taua ara, kāhore hoki a reira kia haerea e te raiona tutū.
JOB 28:9 “E pā atu ana tōna ringa ki te kiripaka; hurihia ake e ia ngā take o ngā maunga.
JOB 28:10 E tapahia ana e ia he awa i roto i ngā kāmaka, ā, e kite ana tōna kanohi i ngā mea utu nui katoa.
JOB 28:11 E herea ana e ia ngā awa kei māturuturu; e whakaputa mai ana hoki i ngā mea ngaro ki te mārama.
JOB 28:12 “E kitea ia ki hea te whakaaro nui, kei hea hoki te wāhi o te mōhio?
JOB 28:13 E kore te tangata e mōhio ki tōna utu, e kore anō taua hanga e kitea ki te whenua o te ora.
JOB 28:14 E kī ake ana te rire, ‘Kāhore i ahau,’ e kī mai ana hoki te moana, ‘Kāhore i ahau.’
JOB 28:15 E kore e hokona ki te kōura, e kore anō hoki e taea te pāuna te hiriwa hei utu mōna.
JOB 28:16 E kore e taea te whakarite ki te kōura o Ōpira, ki te onika utu nui, ki te hāpira.
JOB 28:17 E kore e rite te kōura, te kōhatu pīata ki a ia; e kore e hokona ki ngā oko kōura parakore.
JOB 28:18 E kore e whakahuatia te kaoa, ngā peara rānei; hira ake hoki te utu o te whakaaro nui i tō te rupi.
JOB 28:19 E kore te tōpaha o Etiopia e rite ki a ia, e kore e tau te kōura parakore hei utu.
JOB 28:20 “Ka haere mai rā i hea te whakaaro nui? Kei hea te wāhi o te mātau?
JOB 28:21 He mea huna atu nā hoki i ngā kanohi o ngā mea ora katoa, ngaro rawa i ngā manu o te rangi.
JOB 28:22 E kī ake ana te whakangaromanga rāua ko te mate, ‘I hakiri ō māua taringa ki tōna rongo.’
JOB 28:23 “E mōhio ana te Atua ki tōna ara, kua kite anō ia i tōna wāhi.
JOB 28:24 E titiro ana hoki ia ki ngā pito o te whenua, e kite ana ia i ngā mea i raro i te rangi, ā puta noa.
JOB 28:25 E mea ana i te whakataimaha mō te hau; āe, e mēhua ana ia i ngā wai ki te mēhua.
JOB 28:26 I a ia e whakatakoto ana i te tikanga mō te ua, i te huarahi mō te uira o te whatitiri,
JOB 28:27 ka kitea e ia i reira, ā, whakapuakina mai ana; i whakaūkia e ia, ā, āta rapua ana e ia.
JOB 28:28 Ā, ka mea ia ki te tangata, ‘Nā, ko te wehi ki te Ariki, ko te whakaaro nui tēnā; ā, ko te mawehe atu i te kino, koia te mātauranga.’ ”
JOB 29:1 Ā, i kōrero tonu a Hopa i tāna pepeha, i mea:
JOB 29:2 “Auē, me i rite ki ngā marama ō mua, ki ngā rā i tiaki ai te Atua i ahau!
JOB 29:3 I tīaho mai ai tāna rama ki tōku mātenga, ā, nā tāna whakamārama i haere ai ahau i te pōuri;
JOB 29:4 me i pērā anō me ahau i ngā rā o tōku taiohitanga, i te mea nei kei runga tō te Atua whakaaro puku i tōku tēneti;
JOB 29:5 i te mea e noho ana anō te Kaha Rawa i ahau, ā, kei tētahi taha ōku āku tamariki, kei tētahi taha;
JOB 29:6 i horoia ai ōku takahanga ki te pata, ā, rere mai ana ngā awa hinu ki ahau i roto i te kōhatu!
JOB 29:7 “I tōku haerenga atu ki te kūwaha ki te pā, ā, whakapai ana i te nohoanga mōku i te waharoa,
JOB 29:8 ka kite ngā taitamariki i ahau, ā, piri ana rātou; whakatika ana ngā koroheke, tū ana ki runga;
JOB 29:9 mutu pū te kōrero a ngā tino tāngata, kua kōpania te ringa ki ō rātou māngai;
JOB 29:10 ngaro ana te reo o ngā rangatira, piri ana ō rātou arero ki ō rātou ngao.
JOB 29:11 Nō te rongonga hoki o te taringa i ahau, manaaki ana i ahau; te kitenga o te kanohi i ahau, whakaae mai ana ki āku mahi;
JOB 29:12 nō te mea nāku i whakaora te rawakore i a ia e karanga ana, te pani me te tangata hoki kāhore nei ōna kaiāwhina.
JOB 29:13 I tau ki runga ki ahau te manaaki a te tangata e tata ana ki te whakangaromanga; harakoa ana i ahau te ngākau o te pouaru.
JOB 29:14 I kākahuria e ahau te tika, ā, ko tērā tōku kākahu; e rite ana tāku whakarite whakawā he koroka, he karauna.
JOB 29:15 He kanohi ahau ki te matapō, he waewae ki te kopa.
JOB 29:16 He matua ahau ki ngā rawakore; ā, i āta rapua e ahau te tikanga o te totohe a te tangata kīhai nei ahau i mōhio.
JOB 29:17 Wāwāhia ana e ahau ngā kauae o te tangata kino, ā, tākiritia mai ana e ahau tāna mea pāhua i roto i ōna niho.
JOB 29:18 “Kātahi ahau ka mea, ‘Tērā ahau e mate i roto i tōku ōhanga; ka whakanuia ōku rā kia rite ki te onepū te maha.
JOB 29:19 Ko tōku pakiaka tautoro tonu ki ngā wai, ā, i te pō tau ana te tōmairangi ki runga ki tōku peka;
JOB 29:20 ko tōku korōria hou tonu i roto i ahau, ā, hoki ake ana te kaha o tāku kōpere i tōku ringa.’
JOB 29:21 “I whakarongo mai ngā tāngata ki ahau, i tatari, whakarongo puku ana rātou i ahau e whakatakoto whakaaro ana.
JOB 29:22 I muri i āku kupu kore ake rātou kōrero anō; māturuturu iho ana āku kupu ki runga ki a rātou.
JOB 29:23 I tāria mai ahau e rātou ānō ko te ua; hāmama mai ana ō rātou māngai ānō e tatari ana ki te ua ō muri.
JOB 29:24 Ka kata ahau ki a rātou, kīhai i whakaponohia e rātou; kīhai hoki rātou i whakataka i te mārama o tōku mata.
JOB 29:25 Nāku tō rātou ara i whiriwhiri, ā, noho ana ahau hei rangatira, noho ana hoki ahau ānō he kīngi i roto i te ope i rite ahau ki te kaiwhakamārie o te hunga e tangi ana.
JOB 30:1 “Ināianei ia e kataina mai ana ahau e te hunga tamariki rawa i ahau, e te hunga kīhai nei ahau i whakaae kia uru ō rātou mātua ki roto ki ngā kurī o tāku kāhui.
JOB 30:2 Āe rā, hei aha māku te kaha o ō rātou ringa? He hanga pirau nei hoki tō rātou koroheketanga.
JOB 30:3 Tūpuhi ana rātou i te rawakore, i te hemokai; e ngau ana rātou i te oneone pakapaka, i roto i te pōuritanga o te tūhea, o te ururua.
JOB 30:4 E whawhaki ana rātou i ngā marou i roto o ngā rākau ririki; ā, ko ngā pakiaka hunipa hei kai mā rātou.
JOB 30:5 He mea pei atu rātou i roto i ngā tāngata; e kārangarangatia ana rātou ānō he tāhae.
JOB 30:6 Me noho rawa atu rātou i ngā kapiti o ngā awaawa, i ngā waro o te whenua, i ngā kāmaka.
JOB 30:7 Tangi ā-kāihe ana rātou i roto i ngā rākau ririki; huihuia ana rātou ki raro i ngā ongaonga.
JOB 30:8 He tamariki rātou nā ngā kūware, āe rā, he tamariki nā te hunga ingoakore; he hunga i patua atu i runga i te whenua.
JOB 30:9 “Ināianei ia kua waiho ahau hei waiata mā rātou, āe, hei whakatauki mā rātou.
JOB 30:10 E whakarihariha mai ana rātou ki ahau, e neke rawa atu ana i ahau, ā, kāhore e kaiponuhia e rātou te hūware ki tōku mata.
JOB 30:11 Kua oti hoki tāna aho te wewete e ia, ā e whakatupuria kinotia ana ahau e ia, ā, kua tukua e rātou te paraire i tōku aroaro.
JOB 30:12 I te taha ki matau ka ara te marea; tāia ana e rātou ōku waewae, ā, ākina ana ngā ara o ā rātou whakangaromanga ki ahau.
JOB 30:13 E taka kino ana rātou i tōku ara, e whakatupu ana i te hē mōku, ā, kāhore he hoa mahi mō rātou.
JOB 30:14 Rite tonu ki te wai nui e pakaru mai ana tō rātou haerenga mai; i taua whakangaromanga nei, huri mai ana rātou ki runga ki ahau.
JOB 30:15 Kua tahuri mai ngā whakawehi ki ahau, e aru ana rātou i tōku whakaaro rangatira ānō he hau; ko te whakahauora mōku, pahemo kē ana ānō he kapua.
JOB 30:16 “Nā, ināianei kua maringi tōku wairua i roto i ahau; mau pū ahau i ngā rā o te tangi.
JOB 30:17 I te pō e werohia ana ōku wheua i roto i ahau; kāhore hoki he okiokinga o ngā mamae e ngau nei i ahau.
JOB 30:18 He kaha nui nō tōku mate i āhua kē ai tōku kākahu; e awhi nei i ahau, e pēnei ana me te whiri o tōku koti.
JOB 30:19 Kua makā ahau e ia ki te paru kua rite ahau ki te puehu, ki te pungarehu.
JOB 30:20 “E tangi ana ahau ki a koe, heoi kāhore koe e whakaō mai ki ahau; e tū ana, heoi ka titiro kau mai koe ki ahau.
JOB 30:21 Kua huri kē, kua kino tāu mahi ki ahau; ko te kaha o tōu ringa kei te tūkino i ahau.
JOB 30:22 Kua hāpainga ake ahau e koe ki te hau, ā, meinga ana tērā e koe hei hōiho mōku; ā, whakamōtītia iho ahau e koe i roto i te tūpuhi.
JOB 30:23 E mōhio ana hoki ahau tērā ahau e kawea e koe ki te mate, ki te whare hoki i whakaritea mō te hunga ora katoa.
JOB 30:24 “E kore anō ia tōna ringa e totoro iho ki te urupā; ahakoa hei mate mōna ka mea ia ki te karanga, he whakaaro ki ēnei mea.
JOB 30:25 Kīhai ianei ahau i tangi ki te tangata he mate nei tōna? Kīhai rānei tōku wairua i pōuri ki te rawakore?
JOB 30:26 I ahau i tatari ai ki te pai, heoi kua tae mai te kino; tūmanako atu ana ahau ki te mārama, heoi kua tae mai te pōuri.
JOB 30:27 Ko ōku whēkau, me te mea e koropupū ana, tē āta takoto; haukotia mai ana ahau e ngā rā o te tangi.
JOB 30:28 E hāereere pōuri ana ahau, kāhore he rā; ko tāku whakatikanga ake i roto i te whakaminenga, ka karanga āwhina.
JOB 30:29 Hei teina ahau ki ngā tarakona, hei hoa mō ngā ruru.
JOB 30:30 Ko tōku kiri mangu tonu, e ngahoro ana i ahau, kāia ana ōku wheua i te wera.
JOB 30:31 Nō reira i tahuri kē ai tāku hāpa ki te tangi, me tāku ōkana ki te reo o te hunga e uhunga ana.
JOB 31:1 “Kua oti tāku kawenata ki ōku kanohi; kia whakaaroaro ahau hei aha ki te kōtiro?
JOB 31:2 He aha tā te Atua wāhi e tuwha mai ai i runga? He aha tā te Kaha Rawa taonga tupu i te wāhi tiketike?
JOB 31:3 He teka ianei he whakangaromanga mō te tangata kino, he whiu mō ngā kaimahi o te hē?
JOB 31:4 He teka ianei e kitea ana e ia ōku ara, e taua ana e ia ōku hīkoinga katoa?
JOB 31:5 “Ki te mea i haere ahau i runga i te tekateka noa, ā, i hohoro tōku waewae ki te tinihanga –
JOB 31:6 kia pāunatia ahau i runga i te pāuna tika, kia mōhio ai te Atua ki tōku tapatahi –
JOB 31:7 ki te mea i kotiti kē tōku hīkoinga i te ara, ā, i whai tōku ngākau i ōku kanohi; ā, ki te mea i mau te tongi ki ōku ringa;
JOB 31:8 kāti, ko ahau hei whakatō, ā, mā tētahi atu e kai; āe rā, tukua ngā hua o tāku māra kia hūtia atu.
JOB 31:9 “Ki te mea i whakawairangitia tōku ngākau e te wahine, ā, i whanga ahau i te tatau o tōku hoa;
JOB 31:10 heoi kia huri parāoa tāku wahine mā tētahi atu, kia piko iho anō hoki ngā tāngata kē ki runga i a ia.
JOB 31:11 He kino rawa hoki tērā; āe rā, he hē e tika ana kia whiua e ngā kaiwhakawā.
JOB 31:12 He ahi hoki tērā e kai ana ki te whakangaromanga rawa, poto noa āku hua katoa.
JOB 31:13 “Ki te mea i whakahāweatia e ahau te whakawā a tāku pononga tāne, a tāku pononga wahine, i a rāua e totohe ana ki ahau;
JOB 31:14 ka pēhea rā ahau ina whakatika te Atua? He aha tāku kupu e whakahoki ai ki a ia ina tae mai ia ki te titiro?
JOB 31:15 He teka rānei nā tōku kaihanga ia i hanga i roto i te kōpū? Ā, nāna, nā te kotahi, i whai āhua ai māua i roto i te puku?
JOB 31:16 “Ki te mea i kaiponuhia e ahau tā ngā rawakore i hiahia ai, ā, meinga ana e ahau ngā kanohi o te pouaru kia pau i te minamina;
JOB 31:17 ki te mea rānei i kainga tāku maramara e tōku kotahi, ā, kīhai te pani i kai i tētahi wāhi –
JOB 31:18 he mea whakatupu ia nāku nō tōku taitamarikitanga rā anō me te mea ko tōna pāpā ahau; ko te pouaru he mea ārahi nāku nō te kōpū rā anō o tōku whaea –
JOB 31:19 ki te mea i kite ahau i tētahi e tata ana ki te mate, he kore nō te kākahu, ā, kāhore he uhi mō te rawakore;
JOB 31:20 ki te mea kīhai tōna hope i whakapai ki ahau, ā, kīhai ia i mahana i ngā huruhuru o tāku kāhui;
JOB 31:21 ki te mea i ara tōku ringa hei pēhi i te pani, i tōku kitenga he āwhina tērā mōku kei te kūwaha;
JOB 31:22 nā, kia marere atu tōku pokohiwi i roto i te peke, kia whati te tākakau o tōku ringa.
JOB 31:23 Ko te whiu hoki a te Atua tāku i wehi ai; kīhai hoki i taea e ahau te aha i tōna nui.
JOB 31:24 “Ki te mea i ū tōku whakaaro ki te kōura, ā, i mea ahau ki te kōura parakore, ‘Ko koe tāku e whakawhirinaki atu ai’;
JOB 31:25 ki te mea i koa ahau ki te maha o ōku rawa, ā, ki te nui o tā tōku ringa i whiwhi ai;
JOB 31:26 ki te mea i kite ahau i te rā e whiti ana, i te marama rānei e haere ana i tōna tīahotanga;
JOB 31:27 ā, ka kūmea pukutia atu tōku ngākau, ka kihia tōku ringa e tōku māngai;
JOB 31:28 nā, he kino tēnei hei whiunga mā ngā kaiwhakawā: he teka hoki nāku ki te Atua i runga.
JOB 31:29 “Ki te mea i koa ahau ki te whakangaromanga o te tangata i kino ki ahau, i whakaara ake rānei i ahau i te pānga o te hē ki a ia –
JOB 31:30 āe, kīhai ahau i tuku i tōku māngai kia hara, kīhai i whai kia kangā tōna wairua –
JOB 31:31 ki te mea kāhore ngā tāngata o tōku tēneti i mea, ‘Tēnā koa te tangata kīhai nei i mākona i tōna kikokiko?’
JOB 31:32 Kīhai te manene i moe i waho; i whakatuwheratia anō e ahau ōku tatau ki te tangata haere;
JOB 31:33 ki te mea i pērā ahau me Ārama, i hīpoki i ōku hē, i huna i tōku kino ki roto ki tōku uma;
JOB 31:34 i wehi hoki ahau i te huihui nui, i mataku ki te whakahāwea a ngā hapū, ā, whakarongo kau ana, kīhai hoki i puta ki waho –
JOB 31:35 auē, me i whakarongo mai tētahi ki ahau! Nanā, tēnei tāku tohu, mā te Kaha Rawa e whakahoki mai he kupu ki ahau! Me i ahau noa te pukapuka i tuhituhia e tōku hoariri!
JOB 31:36 Inā, kua amohia e ahau i runga i tōku pokohiwi; kua herea e ahau hei karauna mōku.
JOB 31:37 Kua whakaaturia e ahau ki a ia te maha o ōku hīkoinga; rite tonu ki tā te rangatira tāku whakatata atu ki a ia.
JOB 31:38 “Ki te tangi tāku oneone, he whakahē ki ahau, ki te uru anō ōna moa ki te auē,
JOB 31:39 ki te mea i kainga e ahau ōna hua he mea kīhai i utua, ā, nāku rānei ōna ariki i mate ai,
JOB 31:40 nā, kia riro pū te wīti i te tātarāmoa, te pārei i te taru kino.” Heoi anō ngā kōrero a Hopa.
JOB 32:1 Heoi, mutu ake te whakahoki kupu a ēnei tāngata tokotoru ki a Hopa, nō te mea he tika ia ki tōna nei whakaaro.
JOB 32:2 Nā, kua mura te riri o Erihu tama a Parakere Puti, nō te whānau i a Rame. Mura ana tōna riri ki a Hopa, nō te mea ki tāna tika rawa ia i te Atua.
JOB 32:3 I mura anō tōna riri ki ōna hoa tokotoru, nō te mea kīhai i kitea e rātou he kupu hei whakahokinga atu, heoi kei te whakahē anō rātou i a Hopa.
JOB 32:4 Nā, i tatari a Erihu kia kōrero ia ki a Hopa, nō te mea he kaumātua ake rātou i a ia.
JOB 32:5 Ā, nō te kitenga o Erihu kāhore he kupu i ngā māngai o aua tāngata tokotoru hei whakahokinga atu, mura ana tōna riri.
JOB 32:6 Nā, ka oho a Erihu tama a Parakere Puti, ka mea: “He taitamariki ahau, ko koutou ia he koroheke rawa; koia ahau i hopohopo ai, i wehi ai ki te whakaatu i tōku whakaaro ki a koutou.
JOB 32:7 I mea ahau, ‘Mā ngā rā te kōrero, mā ngā tau kua maha e whakaatu te whakaaro nui.’
JOB 32:8 Otiia, he wairua anō tō te tangata, nā te manawa anō o te Kaha Rawa rātou i whai mahara ai.
JOB 32:9 Ko ngā tāngata nunui, kāhore ō rātou whakaaro nui, ko ngā kaumātua, kāhore e mātau ki te whakawā.
JOB 32:10 Koia ahau i mea ai, ‘Whakarongo ki ahau; ka whakakite hoki ahau i tōku whakaaro.’
JOB 32:11 “Nanā, i tatari ahau ki ā koutou kupu; i whai taringa atu ki ō koutou whakaaro mōhio i a koutou e rapu kupu ana.
JOB 32:12 Nanā, mahara tonu atu ahau ki a koutou, ā, kīhai tētahi o koutou i whakaatu i te hē o Hopa, i whakahoki kupu rānei ki āna kōrero.
JOB 32:13 Kei mea koutou, ‘Kua kitea e mātou te mōhio, nā te Atua ia i turaki, ehara i te tangata.’
JOB 32:14 Nā, kīhai āna kupu i anga mai ki ahau; e kore anō tāna e utua e ahau ki ā koutou kupu.
JOB 32:15 “Pōrahurahu kau ana rātou, kore ake ā rātou kupu whakahoki; mutu ake ā rātou kōrero.
JOB 32:16 Kia tatari ahau, nō te mea kāhore rātou e kōrero, nō te mea e tū kau ana rātou, kāhore e whakahoki atu?
JOB 32:17 Me kōrero atu hoki e ahau āku kupu, māku anō e whakaatu tōku whakaaro.
JOB 32:18 Kī tonu hoki ahau i te kōrero; e akiakina ana ahau e te wairua i roto i ahau.
JOB 32:19 Nanā, ko tōku kōpū rite tonu ki te wāina kāhore nei ōna putanga; ki te ipu hou e tata ana ia te pakaru.
JOB 32:20 Me kōrero ahau, kia tā ai tōku manawa; ka puaki tōku māngai, ka whakahoki kupu ahau.
JOB 32:21 Nā, kaua ahau e whakapai ki te kanohi tangata; e kore hoki ahau e hoatu ingoa whakapaipai ki te tangata.
JOB 32:22 Kāhore hoki ahau e mōhio ki te whakapati – pēnei kua riro wawe ahau i tōku Kaihanga.”
JOB 33:1 “Tēnā rā, whakarongo, e Hopa, ki āku kōrero, kia whai taringa ki āku kupu katoa.
JOB 33:2 Nanā, kua puaki nei tōku māngai, kei te kōrero tōku arero i roto i tōku māngai.
JOB 33:3 Mā āku kupu e whakapuaki te tika o tōku ngākau; ka kōrero pono ōku ngutu i tā rātou e mātau ana.
JOB 33:4 He mea hanga ahau nā te Wairua o te Atua, ā, nā te manawa o te Kaha Rawa ahau i whai ora ai.
JOB 33:5 Ki te taea e koe, whakahokia mai e koe he kupu ki ahau; whakatikaia āu kōrero ki tōku aroaro; e tū ki runga.
JOB 33:6 Nanā, ko tōku anga ki te Atua he pēnā hoki i tāu; he mea hanga nei anō hoki ahau ki te paru.
JOB 33:7 Nanā, e kore te wehi ki ahau e whakawehi i a koe; e kore anō hoki tōku ringa e taimaha iho ki a koe.
JOB 33:8 “He pono kua hakiri ōku taringa ki āu kupu, ā, kua rongo atu ahau i te reo o āu kupu, e mea ana,
JOB 33:9 ‘He mā ahau, kāhore ōku hē; he harakore ahau, kāhore hoki he kino i roto i ahau.
JOB 33:10 Nā, e rapu ana ia i te take riri ki ahau, e kīia ana ahau e ia he hoariri nōna;
JOB 33:11 e karapitia ana e ia ōku waewae ki te rākau, e āta titiro ana ia ki ōku hīkoinga katoa.’
JOB 33:12 “Nanā, māku e whawhati tāu kupu, ehara tēnei mea āu i te mea tika; nui atu hoki te Atua i te tangata.
JOB 33:13 He aha koe i totohe ai ki a ia? E kore hoki e kōrerotia e ia te tikanga o tētahi o āna mea.
JOB 33:14 Kotahi hoki, āe rā, e rua kōrerotanga a te Atua, otiia kāhore e maharatia e te tangata.
JOB 33:15 I te moe, i te putanga moemoeā mai o te pō, ina au iho te moe o te tangata, i ngā moenga i runga i te takotoranga;
JOB 33:16 ko reira ia whakapuare ai i ngā taringa o ngā tāngata, hīri ai hoki i te ako mō rātou;
JOB 33:17 kia whakanekehia ai te tangata i tāna whakaaro, kia hīpokina ai hoki te whakapehapeha o te tangata;
JOB 33:18 e puritia ana e ia tōna wairua kei tae ki te rua, tōna ora kei riro i te hoari.
JOB 33:19 E whiua ana hoki ia ki te mamae i runga i tōna moenga, ki te ngau tonu hoki o ōna wheua;
JOB 33:20 ā, whakarihariha ana tōna ora ki te taro, tōna wairua ki te kai whakaminamina.
JOB 33:21 E honia ana ōna kiko, ā, kore noa e kitea; ā, pūrero mai ana ōna wheua kīhai nei i kitea i mua.
JOB 33:22 Heoi, e whakatata ana tōna wairua ki te rua, tōna ora ki ngā kaiwhakamate.
JOB 33:23 “Ki te mea he karere tērā kei a ia, he kaiwhakaatu tikanga tētahi i roto i te mano, hei whakaatu i tōna tika ki te tangata:
JOB 33:24 Nā, ka tohu tērā i a ia, ā, ka mea, ‘Whakaorangia ia kei heke ki te rua, kua kitea hoki e ahau he utu.’
JOB 33:25 Ko tōna kiri ka ngāwari atu i tō te tamaiti; ka hoki iho ia ki ngā rā o tōna tamarikitanga.
JOB 33:26 Ka īnoi ia ki te Atua, ā, ka manako tērā ki a ia; heoi ka kite ia i tōna mata i runga i te koa; ā, ka utua e ia te tika o te tangata.
JOB 33:27 E waiata ana ia i te aroaro o ngā tāngata, e mea ana, ‘Kua hara ahau, whakaparoritia ake e ahau te tika, ā, kāhore he pai ki ahau.
JOB 33:28 Kua whakaorangia e ia tōku wairua kei riro ki te rua, ā, e kite tōku wairua i te mārama.’
JOB 33:29 “Nanā, e meatia ana ēnei mea katoa e te Atua, e tuaruatia ana, āe, e tuatorutia ana, ki te tangata,
JOB 33:30 hei whakahoki mai i tōna wairua i roto i te rua, kia whakamāramatia ai ki te mārama o te ora.
JOB 33:31 “Kia whai whakaaro mai, e Hopa, whakarongo mai ki ahau; kāti tāu, ā, ka kōrero ahau.
JOB 33:32 Ki te mea he kupu tāu, utua mai tāku: kōrero, ko tāku hoki i pai ai kia whakatikaia tāu.
JOB 33:33 Ki te kāhore, whakarongo ki ahau; noho puku koe, ā, māku koe e whakaako ki te whakaaro nui.”
JOB 34:1 I kōrero anō hoki a Erihu, i mea:
JOB 34:2 “Whakarongo ki āku kupu, e te hunga whakaaro nui; kia whai taringa ki ahau, e te hunga mōhio.
JOB 34:3 E whakamātau ana hoki te taringa i te kupu, e pērā ana me tā te māngai ki te reka o te kai.
JOB 34:4 Ko tā tātou e whiriwhiri ai mā tātou ko te mea tika; kia mōhiotia hoki e tātou, e tēnei, e tēnei, ko te aha te mea pai.
JOB 34:5 “Kua mea nei hoki a Hopa, ‘He tika tāku, ā, kua whakapeaua kētia e te Atua te whakawā mōku;
JOB 34:6 ahakoa kei ahau te tika ka kīia ahau he tangata teka; e kore e mahu tōku werohanga, ahakoa kāhore ōku hē.’
JOB 34:7 Ko wai te tangata e rite ki a Hopa, me te mea he wai te tāwai e inumia ana e ia?
JOB 34:8 Kua uru nei ki te tira o ngā kaimahi i te hē, ā, e haere tahi ana me ngā tāngata kikino.
JOB 34:9 Kua mea hoki ia, ‘Kāhore he painga ki te tangata ki te āhuareka atu ia ki te Atua.’
JOB 34:10 “Nō reira whakarongo mai ki ahau, e ngā tāngata ngākau mōhio; e kore rawa te Atua e mahi i te kino; e kore, rawa hoki te Kaha Rawa e mahi i te hē.
JOB 34:11 Ka utua hoki e ia te tangata mō tāna mahi, ka rite hoki ki tō te tangata ara ngā mea e whakawhiwhia e ia ki a ia.
JOB 34:12 Tika rawa, e kore te Atua e kino, e kore anō hoki te Kaha Rawa e whakaputa kē i te whakawā.
JOB 34:13 Nā wai ia i mea hei kaitirotiro mō te whenua? Nā wai hoki i whakatakoto ngā tikanga mō te ao katoa?
JOB 34:14 Ki te anga mai tōna ngākau ki te tangata, ki te kohia atu e ia ki a ia tōna wairua me tōna manawa;
JOB 34:15 ka hemo ngātahi ngā kikokiko katoa, ā, ka hoki anō te tangata ki te puehu.
JOB 34:16 “Nā, ki te mea he ngākau mōhio tōu, whakarongo ki tēnei; kia whai taringa mai ki te reo o āku kupu.
JOB 34:17 E whai kīngitanga rānei tētahi kotahi e kino ana ki te tika? E whakakino rānei koe ki te tangata tika, kaha hoki?
JOB 34:18 E tau ana rānei te mea atu ki te kīngi, ‘He weriweri koe’? ki ngā rangatira rānei, ‘He kino koutou’?
JOB 34:19 Kia iti rawa iho ki a ia e kore nei e whakapai ki te kanohi o ngā rangatira, e kore nei e hira ake tōna pai ki te hunga whai rawa i ngā rawakore? Nō te mea he mahi rātou katoa nā ōna ringa.
JOB 34:20 Kīhai i aha kua mate rātou; kua mate i waenganui pō; ka wiri te iwi, ka pahemo atu, ka riro te hunga nunui, kāhore hoki he ringa.
JOB 34:21 “Kei runga hoki i ngā ara o te tangata ōna kanohi, ā, kitea ana e ia ōna hīkoinga katoa.
JOB 34:22 Kāhore he pōuri, kāhore he ātārangi o te mate e piri ai ngā kaimahi i te kino.
JOB 34:23 E kore hoki e nui atu i te tika te mea e whakawahā e ia ki te tangata, e haere ai ia ki te aroaro o te Atua ki te whakawā.
JOB 34:24 Ka wāwāhia e ia ngā tāngata nunui, tē mōhiotia ngā ara, ā, whakatūria ake ētahi atu i muri i a rātou.
JOB 34:25 Nā, e mōhio ana ia ki ā rātou mahi, ā, hurihia ake rātou e ia i te pō, ā, mongamonga noa rātou.
JOB 34:26 He hunga kino rātou, pākia iho e ia i te tirohanga a te tangata;
JOB 34:27 mō rātou i tahuri kē i te whai i a ia, kīhai hoki i whakaaro ki tētahi o ōna ara –
JOB 34:28 nā rātou hoki i puta ai te tangi a te rawakore ki a ia, ā, rongo ana ia ki te tangi a te hunga e tūkinotia ana.
JOB 34:29 Ki te meinga e ia kia āta noho, ko wai hei whakararuraru? Ā, ki te hunā e ia tōna kanohi, ko wai e kite i a ia? Ahakoa i meatia ki te iwi, ki te tangata rānei, rite tonu.
JOB 34:30 Kore ake te whakapono kore e whai kīngitanga, kore ake te iwi e māhangatia.
JOB 34:31 “Kua mea atu rānei ki te Atua, ‘Kua pēhia ahau e te whiu; e kore ahau e mahi i te hē ā muri nei?
JOB 34:32 Ko te mea kīhai i kitea e ahau māu e whakaatu mai ki ahau; ki te mea i mahi ahau i te hē, ka mutu tāku.’
JOB 34:33 Kia rite rānei tāna utu ki tāu e mea ai, i whakakāhoretia ai e koe? Māu te whiriwhiri, kāhore māku; nā, māu e kōrero mai tāu i mōhio ai.
JOB 34:34 “Ka kōrero mai ngā tāngata ngākau mahara ki ahau, āe rā, ngā tāngata whakaaro nui e whakarongo ana ki ahau,
JOB 34:35 ‘Kāhore he mātauranga o Hopa i a ia i kōrero rā, kāhore hoki he mahara i roto i āna kupu.’
JOB 34:36 He pai me i whakamātauria a Hopa ā te mutunga rā anō, mō āna kupu i whakahokia mai nei e ia, he mea i rite ki ā ngā tāngata kikino.
JOB 34:37 E tāpiritia ana hoki e ia te tutū ki runga ki tōna hara, kei te pakipaki ia i ōna ringa i waenganui i a tātou, ā, whakanuia ana e ia āna kupu ki te Atua.”
JOB 35:1 I kōrero anō a Erihu, i mea:
JOB 35:2 “Ki tōu whakaaro he tika tēnei māu, e mea ana rānei koe, ‘Nui atu tōku tika i tō te Atua?’
JOB 35:3 I mea ai koe, ‘He aha te rawa ki a koe?’ ā, ‘He aha te painga ki ahau, hira ake i te painga me i hara ahau?’
JOB 35:4 “Māku e whakahoki he kupu ki a koe, ki a koutou ko ōu hoa.
JOB 35:5 Kia matatau atu tāu titiro ki ngā rangi; mātakitakina atu hoki ngā kapua e tiketike ake nā i a koe.
JOB 35:6 Mehemea kua hara koe, ka ahatia ia e tāu mahi? Ā, ki te whakanuia āu mahi tutū, e aha ana rānei koe ki a ia?
JOB 35:7 Ki te mea he tika tōu, ko te aha e hoatu ana e koe ki a ia? Ko te aha rānei a tōu ringa e riro ana i a ia?
JOB 35:8 Ka mamae pea tētahi tangata pēnā i a koe nā i tōu kino; ka whai painga pea ki tētahi tama a te tangata tōu tika.
JOB 35:9 “He maha nō ngā tūkinotanga i tangi ai rātou; nā te ringaringa o te hunga nui i auē ai rātou kia āwhinatia.
JOB 35:10 Kāhore ia tētahi e mea ana, ‘Kei hea tōku Kaihanga, te Atua, e hōmai nei i ngā waiata i te pō?
JOB 35:11 E nui atu nei tāna whakaako ki a tātou i tāna ki ngā kararehe o te whenua, nāna hoki i nui ai ō tātou mahara i o ngā manu o te rangi?’
JOB 35:12 Karanga ana rātou i reira, heoi kāhore he kupu e whakahokia mai, he mea nā te whakapehapeha o te hunga kino.
JOB 35:13 He pono e kore te tekateka noa e whakarangona mai e te Atua, e kore anō hoki e tirohia mai e te Kaha Rawa.
JOB 35:14 Ka iti rawa iho ki te mea koe, kāhore koe e kite i a ia, kei tōna aroaro te whakarite whakawā; nā, ka tatari koe ki a ia!
JOB 35:15 Nā, kīhai nei ia i tae mai i runga i tōna riri, kīhai anō hoki i aro nui mai ki te whakamanamana;
JOB 35:16 koia i puaki ai te māngai o Hopa, he mea horihori kau nei; kāhore he mātauranga o ngā kupu e whakamahatia nei e ia.”
JOB 36:1 I kōrero anō a Erihu, i mea:
JOB 36:2 “Tukua ahau, kia iti nei, ā, ka whakaatu ahau ki a koe; he kupu anō hoki āku mō tā te Atua.
JOB 36:3 Ka tīkina atu e ahau tōku mōhio i tawhiti, ka whakatikaia e ahau tā tōku Kaihanga.
JOB 36:4 E kore rawa hoki; āku kupu e teka; tēnei kei a koe te tangata kua tino nui tōna mātauranga.
JOB 36:5 “Nanā, he pakari te Atua, e kore anō ia e whakahāwea; pakari tonu te kaha o tōna mātauranga.
JOB 36:6 E kore te tangata kino e whakaorangia e ia; māna te hunga mate e whiwhi ai ki ngā mea e tika ana mā rātou.
JOB 36:7 E kore e mutu tāna titiro ki te tangata tika; engari ka whakanohoia ngātahitia rātou e ia me ngā kīngi ki runga ki te torōna ake ake, ā, ka whakanekehia ake hoki rātou.
JOB 36:8 Ki te mea kua herea rātou ki te mekameka, mau pū i te rāhiri, arā i ngā mate,
JOB 36:9 ā, ka whakakitea e ia ki a rātou tā rātou mahi, me ō rātou hē, i mea ai rātou i ngā mea whakapehapeha.
JOB 36:10 Ka whakapuaretia anō e ia ō rātou taringa ki te ako, ā, ka kī kia hoki i te kino.
JOB 36:11 Ki te rongo rātou, ā, ka mahi ki a ia, ka pau ō rātou rā i runga i te pai, ō rātou tau i runga i ngā āhuareka.
JOB 36:12 Otirā, ki te kore rātou e rongo, ka ngaro rātou i te hoari, hemo iho rātou, kāhore hoki he mātauranga.
JOB 36:13 “Ko te hunga whakapono kore ō rātou ngākau, pūranga rawa i a rātou te riri; kāhore ā rātou karanga āwhina ina herea rātou e ia.
JOB 36:14 Ka mate rātou i te taitamarikitanga, ā, ka ngaro tō rātou ora i roto i te hunga poke.
JOB 36:15 Ko tāna he whakaora i te rawakore ina mate, e whakapuaretia ana e ia ō rātou taringa ina tūkinotia.
JOB 36:16 Āe rā, me koe anō, tērā koe e riro i a ia i roto i te kūititanga ki te wāhi whānui; ā, kī tonu i te ngako te mea e whakatakotoria ki runga ki tāu tēpu.
JOB 36:17 “Otiia kī tonu koe i te tikanga a te tangata kino; ā, mau pū koe i ngā tikanga, i te whakarite whakawā.
JOB 36:18 Nā, i te mea he riri tēnei, kia tūpato kei riro koe i te nui o āu rawa; aua hoki koe e whakapeautia e te nui o te utu.
JOB 36:19 E ranea rānei ōu rawa, e kore ai koe e taka hē? Ngā uaua katoa rānei o tōu kaha?
JOB 36:20 Kaua e hiahiatia te pō, te wā e riro ai ngā tāngata i runga i tō rātou wāhi.
JOB 36:21 Kia tūpato, kaua e tahuri ki te kino; ki tāu hoki he pai ake tēnei i ngā mate.
JOB 36:22 Nanā, ko te Atua, ko tōna kaha hei whakanui, ko wai te kaiwhakaako hei rite mōna?
JOB 36:23 Ko wai te kaitohutohu i te ara mōna? Ko wai hei mea, ‘Kua hē tāu mahi’?”
JOB 36:24 “Kia mahara kia whakanuia e koe tāna mahi, e waiatatia nei e te tangata.
JOB 36:25 Kua tirohia nei e ngā tāngata katoa e mātakitakina mai nei e te tangata i tawhiti.
JOB 36:26 Nanā, he nui te Atua, e kore anō e mōhiotia e tātou; e kore anō hoki te maha o ōna tau e taea te rapu atu.
JOB 36:27 “Ko ia nei hei ngongo ake i ngā pata wai, ka tauia i tōna kohu hei āwhā;
JOB 36:28 ka ringihia iho nei e ngā kapua, ā, ka māturuturu nui ki runga ki te tangata.
JOB 36:29 Āe rā, e mōhiotia ana rānei e tētahi ngā horahanga o ngā kapua, te ngangau o tōna tapenākara?
JOB 36:30 Nanā, e horahia ana e ia tōna mārama ā tawhio noa i a ia; e hīpokina ana hoki e ia te takere o te moana.
JOB 36:31 Ko āna mea hoki ēnā hei whakawā mō ngā iwi, nui tonu te kai e hōmai ana e ia.
JOB 36:32 E hīpokina ana e ia ōna ringa ki te uira, ā, whakahaua iho e ia te wāhi e pā atu ai.
JOB 36:33 Hei kaiwhakaatu i a ia tōna haruru, e waitohu ana hoki ki ngā kararehe i te tūpuhi meāke puta mai.
JOB 37:1 “Nā konei anō wiri ana tōku ngākau, maunu atu ana i tōna wāhi.
JOB 37:2 Āta whakarangona tōna reo e papā ana, te pakūtanga hoki e puta mai ana i tōna māngai.
JOB 37:3 E whakatikaia atu ana e ia ki ngā wāhi katoa i raro i te rangi, ko tōna uira hoki ki ngā pito o te whenua.
JOB 37:4 I muri iho ko te reo e hāmama ana; papā ana te whatitiri o te reo o tōna nui; e kore anō ērā e tauhikuhiku ina rangona tōna reo.
JOB 37:5 Ko tā te Atua whatitiri he reo whakamīharo; nui atu āna mahi, e kore hoki e mōhiotia.
JOB 37:6 E kī ana hoki ia ki te hukarere, ‘Hei runga koe i te whenua’; ki te ua pūnehunehu anō hoki, rāua ko te ua tā o tōna kaha;
JOB 37:7 hīritia ake e ia te ringa o ngā tāngata katoa; kia mōhio ai ngā tāngata katoa nāna nei i hanga ki tāna mahi.
JOB 37:8 Haere ana ngā kīrehe ki ngā piringa noho ana i ō rātou nohoanga.
JOB 37:9 Puta mai ana te tūpuhi i te whare o te tonga; te mātao hoki i te hauraro.
JOB 37:10 Nā te manawa o te Atua i hōmai te huka; ā, kūiti iho te whānuitanga o ngā wai.
JOB 37:11 Āe rā, e utaina ana e ia te kapua mātotoru ki te haukū; tohatohaina ana e ia te kohu o tāna uira.
JOB 37:12 E whakakōpikopikoa ana anō ā tawhio noa, he mea hoki nā ōna whakaaro; hei mea i ngā mea katoa e whakahaua atu ana e ia ki te mata o te ao.
JOB 37:13 E whakaputaina ana e ia hei whiu, hei mea rānei mō tōna whenua, hei atawhai rānei.
JOB 37:14 “Kia whai taringa mai ki tēnei, e Hopa; tū mārie, ka whakaaro ki ngā mea whakamīharo a te Atua.
JOB 37:15 E mōhio ana rānei koe ki tā te Atua whakahautanga ki a rātou i tāna, i puta ai te mārama o tāna kapua?
JOB 37:16 E mōhio ana rānei koe ki ngā pāunatanga o ngā kapua, ki ngā mahi whakamīharo a te tino o te mātauranga?
JOB 37:17 Ki ōu kākahu nei ka mahana, ina whakamārietia e ia te whenua ki te hau tonga?
JOB 37:18 Ka taea rānei e koe te whakatakoto ngātahi me ia te rangi hei papatupu, ānō he whakaata whakarewa?
JOB 37:19 “Whakaaturia mai ki a mātou tā mātou e kōrero ai ki a ia; e kore hoki e tika i te pōuri tā mātou whakatakoto o te kōrero.
JOB 37:20 E kōrerotia rānei ki a ia kei te mea ahau ki te kōrero? Kia hiahia rānei te tangata kia horomia ia?
JOB 37:21 Nā, ināianei e kore ngā tāngata e kite ana i te mārama e wheriko mai nei i te rangi; otiia ka tika atu te hau, ka whakawāteatia rātou.
JOB 37:22 E ahu mai ana i te hauraro te aho ānō he kōura; kei te Atua te korōria whakawehi.
JOB 37:23 Ko te Kaha Rawa – e kore ia e taea te whakataki e tātou; hira rawa tōna kaha; ā, e kore ia e tūkino i tāna whakarite whakawā, i te nui o te tika.
JOB 37:24 Koia ka wehi ngā tāngata i a ia; e kore ia e whai whakaaro ki te hunga ngākau mōhio.”
JOB 38:1 Kātahi a Ihowā ka whakahoki kupu ki a Hopa i roto i te tūkauati, ā, ka mea:
JOB 38:2 “Ko wai tēnei e whakapōuri nei i ngā whakaaro ki ngā kupu kāhore ōna mātauranga?
JOB 38:3 Tēnā rā, whītikiria tōu hope, whakatāne; ka ui hoki ahau ki a koe, ā, māu e whakaatu mai ki ahau.
JOB 38:4 “I hea koia koe i ahau e whakatakoto ana i te tūranga o te whenua? Whakaaturia mai, ki te mea e mōhio ana koe ki te whakaaro.
JOB 38:5 Nā wai i whakarite ōna rūri? Ki te mea e mōhio ana koe; nā wai hoki i whakamārō te aho ki runga?
JOB 38:6 I whakaūkia ōna tūranga ki runga ki te aha? Nā wai hoki i whakatakoto tōna kōhatu kokonga;
JOB 38:7 i te mea i waiata ngātahi ngā whetū o te ata, ā, i hāmama ngā tama katoa a te Atua i te koa?
JOB 38:8 “Nā wai hoki i tūtaki te moana ki te tatau, i a ia e puta mai ana, me te mea e whānau mai ana i roto i te kōpū?
JOB 38:9 I ahau rā i mea ai i te kapua hei kākahu mōna, i te pōuri kerekere hei tākai mōna.
JOB 38:10 Ā, whakapuakina ana e ahau tāku tikanga mōna, mea rawa ki ngā tūtaki, ki ngā tatau,
JOB 38:11 me tāku kī atu anō, ‘Ka taea mai e koe a konei, kāti; hei konei ōu ngaru whakakake mau ai’?
JOB 38:12 “Ko koe koia, i ōu rā nei, te kaiwhakahau i te ata; nāu rānei te pūaotanga i mōhio ai ki tōna wāhi;
JOB 38:13 kia rurukutia e ia ngā pito o te whenua, ā, ruperupea ake ngā tāngata kikino i roto?
JOB 38:14 Kua whiti kē, kua pērā anō me te paru i te hīri; tū ake ana ngā mea katoa ānō he kākahu.
JOB 38:15 Ā, e kaiponuhia ana tō rātou mārama ki te hunga kino, whati iho te ringa whakakake.
JOB 38:16 “Kua tae atu rānei koe ki ngā mātāpuna o te moana? Kua whakatakina haeretia rānei e koe te rire?
JOB 38:17 Kua whakapuaretia rānei ki a koe ngā kūwaha o te mate? Kua kite rānei koe i ngā kūwaha o te ātārangi o te mate?
JOB 38:18 Kua oti rānei te whakaaro e koe te whānuitanga o te whenua? Kōrero mai, ki te mea e mōhiotia katoatia ana e koe.
JOB 38:19 “Kei hea te ara ki te nohoanga o te mārama? Te pōuri hoki, kei hea tōna wāhi?
JOB 38:20 Kia kawea atu ai e koe ki tōna rohe, ā, mōhio iho koe ki ngā huarahi ki tōna whare?
JOB 38:21 I mōhio pea koe nō te mea i whānau koe i taua wā, ā, he maha ōu rā!
JOB 38:22 “Kua tomo rānei koe ki ngā takotoranga o te hukarere, kua kite rānei koe i ngā takotoranga o te whatu,
JOB 38:23 i āku i rongoā ai mō te wā o te hē, mō te rā o te tatauranga, o te pakanga?
JOB 38:24 Tēnā koa, te ara i marara atu ai te mārama, i pakaru atu ai te marangai ki runga ki te whenua?
JOB 38:25 “Nā wai i wehe he awa mō te waipuke, he ara mō te uira o te whatitiri;
JOB 38:26 kia ua ai ki te whenua, ki te wāhi kāhore nei he tangata; ki te koraha, kāhore nei ō reira tangata;
JOB 38:27 hei whakamākona i te tūhea, i te ururua; hei mea kia pariri te tupu o te otaota hou?
JOB 38:28 “He matua tāne anō rānei tō te ua? I whānau rānei i a wai ngā pata o te tōmairangi?
JOB 38:29 I puta mai i roto i tō wai kōpū te huka tio? Ko te huka o te rangi, he whānau tēnā nā wai?
JOB 38:30 Me te mea he kōhatu e huna ana i te wai; ā, whakatotoka ana te mata o te rire.
JOB 38:31 “E taea rānei e koe te here te huihui o Matariki, e wewete rānei ngā here o Tautoru?
JOB 38:32 E taea rānei e koe te ārahi mai te Mataroto i tōna wā, te taki mai rānei a Aketura rātou ko tāna rōpū?
JOB 38:33 E mōhio ana rānei koe ki ngā tikanga o te rangi? Māu rānei e whai mana ai ki runga ki te whenua?
JOB 38:34 “E ara rānei i a koe tōu reo ki ngā kapua, kia nui ai ngā wai hei taupoki i a koe?
JOB 38:35 E taea rānei e koe ngā uira te unga atu, e haere ai rātou, me tā rātou kī anō ki a koe, ‘Tēnei mātou’?
JOB 38:36 Nā wai i whakanoho ngā whakaaro nunui ki ngā wāhi o roto? Nā wai i hōmai ngā mahara ki te ngākau?
JOB 38:37 Ko wai te mea whakaaro nui hei tatau i ngā kapua? Ko wai hei tāhoro i ngā ipu o te rangi?
JOB 38:38 Ina ka papatupu te puehu anō he mea whakarewa, ā, ka piri ngā pōkuru ki a rātou anō?
JOB 38:39 “Māu rānei e hopu he kai mā te raiona? Māu e nui ai he oranga mō ngā kūao raiona,
JOB 38:40 ina tāpapa iho rātou i ō rātou nohoanga, ina noho i te piringa whanga ai?
JOB 38:41 Nā wai i rite ai tāna kai mā te raweni, ina tangi āna pī ki te Atua, ina kōpikopiko rātou i te kore kai?”
JOB 39:1 “E mōhiotia ana rānei e koe te wā e whānau ai ngā koati mohoao o te kāmaka? E kitea pūtia ana rānei e koe te wā e whakamamae ai ngā hāta?
JOB 39:2 E taua anō rānei e koe ngā marama e rite ana i a rātou? E mōhio ana rānei koe ki te wā e whānau ai rātou?
JOB 39:3 Tuohu ana rātou, kua puta mai ā rātou kūao, ākiritia mai ana e rātou ō rātou mea whakapōuri.
JOB 39:4 E pai ana te āhua o ā rātou kūao, e tupu ana i te pārae; ka haere atu rātou, ā, kāhore e hoki mai anō.
JOB 39:5 “Nā wai i tuku te kāihe mohoao kia haere noa atu; ngā here o te kāihe mohoao, nā wai i wewete?
JOB 39:6 Ko te whare i whakaritea nei e ahau mōna, ko te koraha; ko ōna nohoanga ko te wāhi tītōhea.
JOB 39:7 Whakahāweatia iho e ia te ngangau o te pā; e kore ia e rongo ki te reo o te kaiakiaki.
JOB 39:8 Ko tōna wāhi kai kei te tuahiwi o ngā maunga, e rapua ana e ia ngā mea matomato katoa.
JOB 39:9 “E pai rānei te unikanga kia mahi ki a koe? Kei tāu takotoranga kai rānei he moenga mōna?
JOB 39:10 E herea rānei e koe te unikanga ki tōna taura i te awa parautanga? E rakarakatia rānei e ia ngā raorao me tāna whai anō i a koe?
JOB 39:11 E whakawhirinaki atu rānei koe ki a ia, nō te mea e nui ana tōna kaha? E whakarērea atu rānei e koe tāu mahi māna?
JOB 39:12 E whakapono atu rānei koe māna āu hua e whakahoki mai; māna e kohikohi mai ki tāu patunga wīti?
JOB 39:13 “E whakamanamana ana te parirau o te otereti; otirā he atawhai anō rānei tā ōna hou, tā ōna raukura?
JOB 39:14 E whakarērea ana e ia ōna hua ki te whenua, whakamahanatia iho e ia ki te puehu,
JOB 39:15 wareware ake ia tērā pea e pēpē i te waewae, e takahia rānei e te kīrehe o te pārae.
JOB 39:16 He mea pakeke ia ki āna pī, me te mea ehara i a ia; ahakoa ka maumauria tāna mahi, kāhore ōna manawapā;
JOB 39:17 nō te mea i whakakāhoretia e te Atua he ngākau mahara mōna, kīhai hoki i hōmai he whakaaro ki a ia.
JOB 39:18 I te wā e maranga ai ia ki runga, whakahāweatia iho e ia te hōiho rāua ko tōna kaieke.
JOB 39:19 “Nāu rānei i hoatu tōna kaha ki te hōiho? Nāu rānei tōna kakī i whakakākahu ki te huruhuru?
JOB 39:20 Nāu rānei ia i mea kia pekepeke, kia pērā me te māwhitiwhiti? He hanga whakawehi te korōria o tōna whewhengu.
JOB 39:21 E hūkari ana ia i te raorao, me te koa anō ki tōna kaha; tika tonu ia ki te hunga mau patu.
JOB 39:22 Whakahāwea ana ia ki te wehi, kāhore ōna mataku; e kore anō ia e nunumi mai i te hoari.
JOB 39:23 Papā ana te papa pere ki tōna taha, te tao e rarapa ana, me te tīmata.
JOB 39:24 E horomia ana e ia te whenua, me te ngangau me te riri; kāhore ia i te whakapono ko te reo tērā o te tētere.
JOB 39:25 Ka tangi ana te tētere ka mea ia, ‘Ha, ha!’ I tawhiti anō ka hongia e ia te pakanga, te whatitiri o ngā rangatira, me te hāmama.
JOB 39:26 “He mōhio nōu i rere ai te kāhu, i roha ai i ōna parirau, i anga ai whaka te tonga?
JOB 39:27 Nāu te kupu i kake ai te ēkara? I hangā ai e ia tāna ōhanga ki te wāhi tiketike?
JOB 39:28 Noho ana ia i runga i te kāmaka, kei reira tōna kāinga, kei te kāmaka keokeo, kei te pā kaha.
JOB 39:29 Ā, rapua ana e ia he kai i reira; e kite atu ana ōna kanohi i tawhiti.
JOB 39:30 Horomititia ake ana hoki ngā toto e āna pī; ā, ko te wāhi i ngā tūpāpaku, kei reira anō ia.”
JOB 40:1 I kōrero mai anō a Ihowā ki a Hopa, i mea:
JOB 40:2 “E tohe ana rānei ki te Kaha Rawa te tangata whakatohutohu? Mā te tangata e whakatūpehupehu ana ki te Atua, māna e kōrero mai.”
JOB 40:3 Anō rā ko Hopa ki a Ihowā, i mea ia:
JOB 40:4 “Nanā, ehara noa iho ahau; ko te aha tāku e whakahoki atu ai ki a koe? Ka kōpania tōku ringa ki tōku māngai.
JOB 40:5 Kua kotahi tāku kōrerotanga, ā, e kore ahau e whakahoki kupu atu; ā, tuarua rawa, otirā kāhore atu āku.”
JOB 40:6 Kātahi ka whakahokia mai e Ihowā ki a Hopa i roto i te tūkauati, ka mea:
JOB 40:7 “Tēnā rā, whakatāne, whītikiria tōu hope, ā, ka ui atu ahau ki a koe, māu anō e whakaatu mai ki ahau.
JOB 40:8 Me whakakāhore anō rānei e koe tāku whakawā? Me whakahē ki ahau kia whakatikaia ai tāu?
JOB 40:9 He ringa pērā rānei tōu i tō te Atua? He reo whatitiri rānei tōu, he pērā i tōna?
JOB 40:10 “Tēnā rā, rākai i a koe ināianei ki te rangatiratanga, ki te korōria; tātai i a koe ki te hōnore, ki te mana.
JOB 40:11 Ringihia atu te puhaketanga o tōu riri; tirohia atu ngā mea whakakake katoa, whakaititia iho.
JOB 40:12 Titiro atu ki ngā mea whakakake katoa, whakapikoa iho; takahia iho anō hoki te hunga kino i te wāhi e tū nā rātou.
JOB 40:13 Huihuia atu rātou, hunā ki te puehu, herea ō rātou mata ki te wāhi ngaro.
JOB 40:14 Nā, ko reira ahau whakaae ai ki a koe, mā tōu ringa matau anō koe e whakaora.
JOB 40:15 “Nā, whakaaroa a Pehemoto, he mea hanga ngātahi kōrua nāku; e kai rā i te tarutaru, ānō he kau.
JOB 40:16 Nanā, ko tōna kaha kei tōna hope, ko tōna pakaritanga kei ngā uaua o tōna kōpū.
JOB 40:17 Ko tōna hiawero, ānō he hīta e tāwhiria ana e ia; pōwhiwhiwhi tonu ngā uaua o tōna hūhā.
JOB 40:18 Ko ōna wheua, ānō he kōrere parāhi; ko ōna rara, he poro rino.
JOB 40:19 “Ko ia te tino mea nui o ngā ara o te Atua – ko tōna kaihanga anake hei whakapā i tāna hoari ki a ia.
JOB 40:20 He pono ko ngā maunga hei hōmai kai māna; kei reira anō e tākaro ana ngā kīrehe katoa o te pārae.
JOB 40:21 Ko tōna takotoranga ko raro i ngā rākau kōuru nui, i te rake kākaho, i te repo.
JOB 40:22 Hei taupoki mōna te whakamarumaru o ngā rākau kōuru nui, kei tētahi taha ōna, kei tētahi taha, ngā wirou o te awa.
JOB 40:23 Nanā, ki te āki mai te waipuke, e kore ia e tūiri; ū tonu tōna whakaaro, ahakoa kōkiri noa mai a Horano ki tōna māngai.
JOB 40:24 E hopukia rānei ia e tētahi i a ia e mataara ana, e poka rānei i tōna ihu ki te rore, puta noa?
JOB 41:1 “E taea rānei a Rewiatana te kukume mai e koe ki te matau? Te pēhi rānei i tōna arero ki te aho?
JOB 41:2 E whakanohoia rānei e koe he aho ki tōna ihu? E pokaia rānei e koe tōna kauae ki te matau?
JOB 41:3 E maha rānei āna īnoi ki a koe? E kōrero ngāwari rānei ia ki a koe?
JOB 41:4 E whakarite kawenata rānei ia ki a koe? E riro ai ia i a koe hei pononga oti tonu mai?
JOB 41:5 Ka rite rānei ia ki te manu hei mea tākaro māu? E herea rānei ia e koe hei mea mā āu kōtiro?
JOB 41:6 E waiho rānei ia hei taonga hokohoko mā ngā rōpū tāngata hī ika? E wehewehea atu rānei mā ngā kaihokohoko?
JOB 41:7 E kapi rānei tōna kiri i o tao? Tōna pane i ngā wero ika?
JOB 41:8 Kia pā tōu ringa ki a ia; maharatia te whawhai, ā, kei pēnā ā mua.
JOB 41:9 Nanā, he hori kau te manako ki a ia; e kore rānei tētahi e hinga noa ki te kite kau atu i a ia?
JOB 41:10 Kāhore he tangata e māia rawa hei whakaoho i a ia; nā, ko wai e tū ki tōku aroaro?
JOB 41:11 Ko wai te tangata nāna te mea kua takoto wawe ki ahau, e whakautu ai ahau ki a ia? Ahakoa he aha te mea i raro i ngā rangi, puta noa, nāku katoa.
JOB 41:12 “E kore e hunā e ahau te kōrero mō ōna wāhi, mō tōna kaha, mō te ātaahua hoki o tōna hanganga.
JOB 41:13 Mā wai e tīhore a waho o tōna kākahu? Ko wai e tae ki tāna paraire rererua?
JOB 41:14 Mā wai e whakatuwhera ngā tatau o tōna mata? He wehi kei ōna niho ā taka noa.
JOB 41:15 Ko tāna e whakamanamana ai ko ōna unahi pakari; tūtaki rawa pērā i te hīri piri tonu.
JOB 41:16 Nā, i te tata tonu o tētahi ki tētahi, e kore te hau e puta i waenga.
JOB 41:17 Piri tonu rātou ki a rātou anō, mau tonu, e kore anō e taea te wehe.
JOB 41:18 Ka tihe ia, ka kōwhā mai te mārama; ā, ko te rite i ōna kanohi kei ngā kamo o te ata.
JOB 41:19 E puta ana mai i tōna māngai he rama mura, mokowhiti ana ngā kora ahi.
JOB 41:20 Puta ana te paowa i ōna pongaponga, me te mea nō te kōhua e koropupū ana, nō te otaota e kāia ana.
JOB 41:21 Ngiha ana ngā waro i tōna hā, rere atu ana te mura i tōna māngai.
JOB 41:22 Kei tōna kakī te kaha e noho ana, e tuapa ana te pāwera i tōna aroaro.
JOB 41:23 Ko ōna kikokiko tāwerewere piri tonu; mārō tonu ki runga ki a ia, e kore e taea te whakakorikori.
JOB 41:24 Pakari tonu tōna ngākau ānō he kāmaka; āe rā, mārō tonu ānō ko tō raro kōhatu huri.
JOB 41:25 Ka whakarewa ia i a ia ki runga ka wehi ngā tāngata nunui; nā te pororaru ka pōrangi noa iho rātou.
JOB 41:26 Ki te whai tētahi i a ia ki te hoari, e kore e taea; ahakoa e te tao, e te pere, e te koikoi rānei.
JOB 41:27 Ki tōna whakaaro he kakau wīti te rino, he rākau popopopo te parāhi.
JOB 41:28 E kore ia e tahuti i te pere; ki a ia ka meinga noatia ngā kōhatu o te kōtaha hei pāpapa.
JOB 41:29 Kīia ake e ia ngā patu hei pāpapa e kataina ana e ia te huhū o te tao.
JOB 41:30 Ko raro ōna e rite ana ki te kōhatu koikoi; e whārikitia ana e ia a runga o te paru ānō he patunga wīti.
JOB 41:31 E meinga ana e ia te rire kia koropupū ānō he kōhua, me te moana kia rite ki te hinu.
JOB 41:32 E hangaia ana e ia he huarahi mārama i muri i a ia; tērā e maharatia he hina te moana.
JOB 41:33 I te whenua nei kāhore he mea hei rite mōna, he mea i hangā nei kāhore ōna wehi.
JOB 41:34 E titiro ana ia ki ngā mea tiketike katoa; he kīngi ia mō ngā tama katoa a te whakapehapeha.”
JOB 42:1 Anō rā ko Hopa ki a Ihowā, i mea ia:
JOB 42:2 “E mōhio ana ahau e taea e koe ngā mea katoa, ā, e kore tētahi whakaaro ōu e taea te pēhi.
JOB 42:3 ‘Ko wai tēnei e huna nei i te whakaaro, ā, kāhore nei he mātauranga?’ Nō reira kōrerotia ana e ahau he mea kīhai i mōhiotia e ahau, he mea whakamīharo rawa, e kore nei e taea e ahau, ā, kīhai i mōhiotia e ahau.
JOB 42:4 ‘Tēnā rā, whakarongo, ā, ka kōrero ahau; ka ui ahau ki a koe, ā, māu e whakaatu mai ki ahau.’
JOB 42:5 I rongo ahau ki a koe, he rongo nā te taringa; tēnā ko tēnei, ka kite ā-kanohi nei ahau i a koe.
JOB 42:6 Nā, whakarihariha ana ahau ki ahau anō, ā, ka rīpenetā i roto i te puehu, i te pungarehu.”
JOB 42:7 Heoi, i te mutunga o tā Ihowā kōrero i ēnei kupu ki a Hopa, nā, ka mea a Ihowā ki a Eripāta Temani, “Kua mura tōku riri ki a koe, ki a koutou ko ōu hoa tokorua; nō te mea kīhai koutou i kōrero i te mea tika mōku, kīhai i rite ki tā tāku pononga, ki tā Hopa.
JOB 42:8 Nā, tīkina ētahi pūru mā koutou kia whitu, kia whitu hoki ngā hipi toa, ā, ka haere ki tāku pononga, ki a Hopa, ka whakaeke ai i ētahi tahunga tinana mā koutou; ā, mā tāku pononga, mā Hopa, e īnoi mō koutou. Ka manako hoki ahau ki a ia, kia kore ai ahau e mea ki a koutou kia rite ki tā koutou mahi wairangi. Kīhai hoki koutou i kōrero i te mea tika mōku, kīhai i rite ki tā tāku pononga, ki tō Hopa.”
JOB 42:9 Heoi, haere ana a Eripāta Temani, a Pirirara Huhi, a Topara Naamati, a meatia ana e rātou tā Ihowā i kōrero ai ki a rātou; ā, ka manako a Ihowā ki a Hopa.
JOB 42:10 Ā, whakahokia ana a Hopa e Ihowā i te whakarau, i a ia i īnoi rā mō ōna hoa. Nā, ko ngā mea katoa i a Hopa i mua, whakanekehia ake āna e Ihowā kia pērā atu anō te maha.
JOB 42:11 Kātahi ka haere mai ōna tuākana, ōna tēina katoa, rātou ko ōna tuāhine katoa, me te hunga katoa i mōhio ki a ia i mua, hei hoa mōna, ki te kai taro i roto i tōna whare; tangi ana ki a ia, whakamārie ana i a ia mō te hē katoa i whakaekea nei e Ihowā ki a ia; ā, hōmai ana ki a ia e tēnei, e tēnei, tētahi moni me tētahi whakakai kōura.
JOB 42:12 Heoi, manaakitia ana a Hopa e Ihowā i te whakamutunga, nui atu i tō te tīmatanga; ā, kotahi tekau mā whā mano āna hipi, e ono mano ngā kāmera, kotahi mano tōpū ngā kau, kotahi mano ngā kāihe uha.
JOB 42:13 Tokowhitu anō āna tama, tokotoru ngā tamāhine.
JOB 42:14 Ā, tapā iho e ia te ingoa o te tuatahi ko Hemaima, ko te ingoa o te tuarua ko Ketia, ā, ko te ingoa o te tuatoru ko Kerēnehāpuku.
JOB 42:15 Ā, kīhai i kitea he wāhine hei rite mō ngā tamāhine a Hopa te ātaahua i te whenua katoa; ā, i hoatu hoki e tō rātou pāpā he wāhi mō rātou i waenganui i ō rātou tungāne.
JOB 42:16 Ā, i ora a Hopa i muri i tēnei kotahi rau e whā tekau ngā tau, i kite anō ia i āna tamariki, i ngā tamariki anō hoki a āna tamariki, e whā ngā whakatupuranga.
JOB 42:17 Heoi, ka mate a Hopa, he koroheke, he maha hoki ōna rā.
PSA 1:1 Ka hari te tangata kāhore nei, e haere i te whakaaro o te tangata kino, ā, kāhore e tū i te ara o te hunga hara, kāhore anō e noho i te nohoanga o te hunga whakahī.
PSA 1:2 Engari ko te Ture a Ihowā tāna e whakaahuareka ai; kei tōna ture ōna whakaaro i te ao, i te pō.
PSA 1:3 E rite hoki ia ki te rākau i whakatōkia ki te taha o ngā awa wai, e whai hua nei i te pō e hua ai; e kore tōna rau e memenge; ā, ka pono āna mea katoa e mea ai ia.
PSA 1:4 E kore e pērā ngā tāngata kino; engari, ka rite ki te pāpapa e āia ana e te hau.
PSA 1:5 Āe rā, e kore e tū te hunga kino i te whakawākanga, me te hunga hara i te whakaminenga o te hunga tika.
PSA 1:6 E mātau ana hoki a Ihowā ki te ara o te hunga tika; ko te ara ia o te hunga kino e ngaro.
PSA 2:1 He aha ka nana ai ngā tauiwi, ka whakaaro horihori ai ngā iwi?
PSA 2:2 Whakatika mai ana ngā kīngi o te whenua, rūnanga tahi ana ngā ariki, ki te whawhai ki a Ihowā, ki tāna tangata hoki i whakawahi ai; me te kī anō,
PSA 2:3 “Kia motumotuhia e tātou ā rāua here, kia ākiritia ā rāua taura i a tātou.”
PSA 2:4 Ko ia kei te rangi e noho ana, ka kata ia; ka whakahī te Ariki ki a rātou.
PSA 2:5 Nā, ka kōrero ia ki a rātou me te riri anō; ka tino weriweri hoki, ka whakaohorere i a rātou,
PSA 2:6 “Ahakoa rā ka whakawahia e ahau tāku kīngi ki runga ki tāku maunga tapu, ki Hiona.”
PSA 2:7 Māku e whakapuaki te kupu: Kua mea a Ihowā ki ahau, “Ko koe tāku tama, nōnāianei koe i whakatupuria ai e ahau.
PSA 2:8 Īnoi ki ahau, ā, ka hoatu e ahau ki a koe ngā tauiwi hei kāinga mōu, me ngā tōpito o te whenua hei nohoanga tupu mōu.
PSA 2:9 Ka wāwāhi koe i a rātou ki te whiu rino, mongamonga noa rātou i a koe, ānō he oko nā te kaihanga rīhi.”
PSA 2:10 Nā, kia mahara rā, e ngā kīngi; kia ākona, e ngā kaiwhakawā o te whenua.
PSA 2:11 Mahi atu ki a Ihowā i runga i te wehi, kia hari me te wiri.
PSA 2:12 Kihia te tama kei riri ia, ā, ka mate koutou i te ara, ka hohoro tonu hoki te mura o tōna riri. Ka hari katoa te hunga e whakawhirinaki ana ki a ia.
PSA 3:1 He hīmene nā Rāwiri, i tōna omanga atu i tāna tama i a Apohārama. E Ihowā, anō te tini o ōku hoariri, he tokomaha te hunga e whakatika mai ana ki ahau.
PSA 3:2 He tokomaha te mea ana ki tōku wairua, “Hore rawa he whakaoranga mōna i te Atua.” Hera
PSA 3:3 Ko koe ia, e Ihowā, hei whakangungu rākau mōku, hei korōria mōku, hei kaiwhakaara i tōku mātenga.
PSA 3:4 I karanga, tōku reo ki a Ihowā; ā, whakahoki kupu mai ana ia ki ahau i tōna maunga tapu. Hera
PSA 3:5 I takoto ahau, i moe; i ara ake anō; nā Ihowā hoki ahau i whakamau ake.
PSA 3:6 E kore ahau e mataku i ngā mano tini o te iwi, kua whakatika mai nei ki ahau karapoti noa.
PSA 3:7 Whakatika, e Ihowā; whakaorangia ahau, e tōku Atua! Nāu hoki i patu te kauae o ōku hoariri katoa; mangungu noa i a koe ngā niho o te hunga kino.
PSA 3:8 Nā Ihowā te whakaoranga. Kei runga i tāu iwi tāu manaaki. Hera
PSA 4:1 Ki te tino kaiwhakatangi Nekinoto. He hīmene nā Rāwiri. Whakahokia mai he kupu ki ahau, e te Atua o tōku tika, ina karanga ahau. I ahau i te pōuri i whakaputaina ahau e koe; kia atawhai ki ahau, whakarongo ki tāku īnoi.
PSA 4:2 E ngā tama a te tangata, kia pēhea te roa o tā koutou mea i tōku korōria hei whakamā, o tā koutou aroha ki te horihori, o tā koutou whai i te teka? Hera
PSA 4:3 Otiia kia mōhio koutou he mea momotu kē nā Ihowā te tangata tapu māna; e whakarongo a Ihowā ua karanga ahau ki a ia.
PSA 4:4 Kia oho koutou, ā, kaua e hara; kōrerorero ki ō koutou ngākau i runga i ō koutou moenga, me te āta takoto anō. Hera
PSA 4:5 Patua ngā whakahere o te tika, me te okioki anō ki a Ihowā.
PSA 4:6 He tokomaha te mea ana, “Mā wai e whakakite te pai ki a mātou? Kia ara, e Ihowā, te mārama o tōu mata ki runga ki a mātou.”
PSA 4:7 Hira ake te hari i hōmai e koe ki roto ki tōku ngākau i tō rātou i te wā i hua ai ā rātou wīti, tā rātou wāina.
PSA 4:8 Ka takoto mārire ahau, ā, moe tonu iho; ko koe anake hoki, e Ihowā, hei mea kia au tōku noho.
PSA 5:1 Ki te tino kaiwhakatangi Nehiroto. He hīmene nā Rāwiri. Tahuri tōu taringa, e Ihowā, ki āku kupu, kia mōhio koe ki tōku whakaaroaronga.
PSA 5:2 Whakarongo ki te reo o tāku karanga, e tōku Kīngi, e tōku Atua, he īnoi hoki tāku ki a koe.
PSA 5:3 E rongo koe ki tōku reo, e Ihowā, i te ata; i te ata ka whakatikaia atu e ahau tāku īnoi ki a koe, ā, ka titiro matatau atu.
PSA 5:4 Ehara hoki koe i te Atua e pai ana ki te hara, e kore te kino e noho ki a koe.
PSA 5:5 E kore te hunga wairangi e tū ki tōu aroaro; e kinongia ana e koe ngā kaimahi katoa i te kino.
PSA 5:6 E ngaro i a koe te hunga kōrero teka; e whakarihariha ana a Ihowā ki te tangata toto, ki te tangata hīanga.
PSA 5:7 Ko ahau ia ka haere i runga i te tini o āu atawhai ki tōu whare; ka koropiko ki te ritenga o tāu temepara tapu, me te wehi anō ki a koe.
PSA 5:8 E Ihowā, ārahina ahau i runga i tōu tika, he hoariri hoki ōku; whakatikaia tāu ara i mua i ahau.
PSA 5:9 Kāhore hoki he pono i ō rātou māngai; he kino kau a roto i a rātou; he urupā puare noa ō rātou korokoro; e patipati ana ō rātou arero.
PSA 5:10 Whakataua te hara ki a rātou, e te Atua; kia hinga rātou i ō rātou whakaaro. Peia atu rātou me ā rātou tini mahi tutū; mō rātou i whakakeke ki a koe.
PSA 5:11 Nā, kia hari katoa te hunga e whakawhirinaki ana ki a koe. Kia hāmama tonu rātou i te koa, mō rātou e hīpokina nei e koe; ā, kia whakamanamana ki a koe te hunga e aroha ana ki tōu ingoa.
PSA 5:12 Nō te mea ka manaakitia e koe, e Ihowā, te tangata tika; me he whakangungu rākau te manako e karapotia ai ia e koe.
PSA 6:1 Ki te tino kaiwhakatangi: Nekinoto, he mea Heminiti. He hīmene nā Rāwiri. E Ihowā, kaua e whakatūpehupehu mai ki ahau, ina riri koe, kaua anō ahau e pākia ina ārita mai koe.
PSA 6:2 E Ihowā, tohungia ahau, he ngoikore hoki ahau; rongoātia ahau, e Ihowā, e ohooho ana hoki ōku wheua.
PSA 6:3 E ohooho noa iho ana hoki tōku wairua; ko koe ia, e Ihowā, kia pēhea atu te roa?
PSA 6:4 Hoki mai, e Ihowā, kia mawhiti atu tōku wairua; kia mahara ki tōu aroha, ā, whakaorangia ahau.
PSA 6:5 Kāhore hoki he mahara ki a koe ina mate; ko wai hei whakawhetai ki a koe i roto i te rēinga?
PSA 6:6 Māuiui iho ahau i tōku auētanga; e manu ana tōku moenga i ahau ā pau noa te pō; e whakamākūkūria ana e ahau tōku takotoranga ki ōku roimata.
PSA 6:7 Pakoko kau tōku kanohi i te tangi; kua koroheke haere i ōku hoariri katoa.
PSA 6:8 Mawehe atu i ahau, e ngā kaimahi katoa i te kino; kua rongo nei hoki a Ihowā i te reo o tāku tangi.
PSA 6:9 Kua rongo a Ihowā ki tāku īnoi; ka manako a Ihowā ki tāku karakia.
PSA 6:10 Ka whakamā, ka pōkaikaha noa iho ōku hoariri katoa; ka hoki rātou, ka pā whakarere atu te whakamā.
PSA 7:1 He Hikaiono nā Rāwiri, tāna i waiata ai ki a Ihowā mō ngā kupu a Kuhu Pineamine. E Ihowā, e tōku Atua, kei a koe tōku whakawhirinakitanga; kia ora ahau i te hunga katoa e aru ana i ahau, kia mawhiti atu hoki ahau;
PSA 7:2 kei haehae ia i tōku wairua, ānō he raiona, ā, tītaritari noa, i te mea kāhore he kaiārai.
PSA 7:3 E Ihowā, e tōku Atua, ki te mea nāku tēnā mahi, ki te mea he hara kei ōku ringa;
PSA 7:4 ki te mea i whakahokia e ahau he kino ki te tangata kua mau nei tā māua rongo; i whakaora nei hoki ahau i te tangata i kino noa mai ki ahau;
PSA 7:5 kia arumia tōku wairua e te hoariri, ā, kia mau; kia takahia hoki tōku ora e ia ki te whenua, kia whakatakotoria anō tōku korōria ki te puehu. Hera
PSA 7:6 E Ihowā, whakatika, kia riri koe, ara ake, e nanā nei hoki ōku hoa whawhai; kia oho ake hoki koe mōku; kua kīia e koe te whakawā.
PSA 7:7 Tukua kia karapotia koe e te whakaminenga o ngā iwi; mā runga atu i a rātou tōu hokinga atu ki runga.
PSA 7:8 Ko Ihowā e whakarite whakawā ana mō ngā iwi; kia rite, e Ihowā, tāu whakawā mōku ki tāku mahi tika, ki te tapatahi hoki o ōku whakaaro.
PSA 7:9 Kia whakamutua te kino o te hunga kino; whakaūkia hoki te tangata tika; e whakamātautau ana hoki te Atua tika i ngā ngākau, i ngā whatumanawa.
PSA 7:10 Kei te Atua tōku whakangungu rākau, māna e whakaora te hunga ngākau tika.
PSA 7:11 He kaiwhakawā tika te Atua, āe rā, he Atua e riri ana i tēnei rā, i tēnei rā.
PSA 7:12 Ki te kore tētahi e tahuri, ka whakakoia e ia tāna hoari; kua whakapikoa e ia tāna kōpere, ā, oti rawa te whakapai.
PSA 7:13 Oti rawa anō āna mea whakamate te whakapai e ia; kua meinga e ia āna pere ānō he ahi.
PSA 7:14 Nanā, he kino te mea e whakamamae nei ia; he whanokē te mea i hapū ki roto ki a ia, ā, whānau ake he teka.
PSA 7:15 I pokaia e ia he poka, he mea keri nāna, taka iho ia ki roto ki te rua i mahia e ia.
PSA 7:16 Ka hoki tōna whanokē ki tōna mātenga, ā, ka tau iho tāna tūkino ki tōna tumuaki.
PSA 7:17 Ka rite ki tōna tika tāku whakamoemiti ki a Ihowā, ka hīmene atu hoki ahau ki te ingoa o Ihowā, o te Runga Rawa.
PSA 8:1 Ki te tino kaiwhakatangi: Kititi. He hīmene nā Rāwiri. E Ihowā, e tō mātou Ariki, anō te nui o tōu ingoa i te whenua katoa! Pakū ana i a koe tōu korōria ki runga ake i ngā rangi!
PSA 8:2 Ū pū i a koe te kaha o te māngai o ngā kōhungahunga, o ngā mea ngote ū hei mea mō ōu hoariri, hei pēhi mō te hoariri, mō te kairapu utu.
PSA 8:3 Ka titiro ahau ki āu rangi, ki te mahi a ōu maihao, ki te marama, ki ngā whetū, i hangā nei e koe;
PSA 8:4 he aha te tangata i maharatia ai e koe, te tama rānei a te tangata i tirohia ai ia e koe?
PSA 8:5 Nohinohi nei te wāhi i whakaititia iho ai ia e koe i te Atua, karaunatia ana ia e koe ki te korōria, ki te hōnore.
PSA 8:6 Waiho iho e koe hei kīngi mō ngā mahi a ōu ringa; kua waiho e koe ngā mea katoa i raro i ōna waewae;
PSA 8:7 ngā hipi katoa, ngā pūru, me ngā kīrehe katoa o te pārae;
PSA 8:8 te manu o te rangi, me te ika o te moana, e tere nei i ngā ara o ngā moana.
PSA 8:9 E Ihowā, e tō mātou Ariki, anō te nui o tōu ingoa i te whenua katoa!
PSA 9:1 Ki te tino kaiwhakatangi: Muturapena. He hīmene nā Rāwiri. Ka whakapaua tōku ngākau ki te whakamoemiti ki a Ihowā, ka kōrerotia e ahau āu mahi whakamīharo katoa.
PSA 9:2 Ka koa ahau, ka whakamanamana ki a koe, ka hīmene atu ki tōu ingoa, e te Runga Rawa.
PSA 9:3 I te hokinga whakamuri o ōku hoariri, tūtuki ana rātou, ngaro iho i tōu aroaro.
PSA 9:4 Nāu hoki i whakatika āku kōrero me tōku whakawā; i runga koe i te torōna e noho ana, e whakarite tika ana.
PSA 9:5 Kua whakatūpehupehu koe ki ngā tauiwi, hunā ana e koe te tangata kino, horoia atu ana tō rātou ingoa ake ake.
PSA 9:6 Ko te hoariri, mutu pū rātou, he ngaromanga oti tonu iho; ā, ko ngā pā i hunā e koe, ngaro whakarere tō rātou whakamaharatanga.
PSA 9:7 Ko Ihowā ia noho tonu hei kīngi, ake, ake; kua whakapaia e ia tōna torōna mō te whakawā.
PSA 9:8 Ā, e whakarite ia mō te ao i runga i te tika, ka whakatakoto tikanga mō ngā iwi i runga i te pono.
PSA 9:9 Hei pā teko anō a Ihowā mō te tangata e tūkinotia ana, hei pā teko i ngā wā o te hē.
PSA 9:10 Ā, ka whakawhirinaki ki a koe te hunga e mātau ana ki tōu ingoa; nō te mea e kore e whakarērea e koe, e Ihowā, te hunga e rapu ana i a koe.
PSA 9:11 Hīmene ki a Ihowā e noho nei i Hiona. Whakapuakina i waenganui ngā iwi āna mahi.
PSA 9:12 Ka whakataki toto ia, ka mahara ia ki a rātou; kāhore e wareware i a ia te karanga a te hunga iti.
PSA 9:13 Tohungia ahau, e Ihowā; titiro ki tōku mate i te hunga e kino ana ki ahau, e te kaiwhakaara i ahau i ngā tatau o te mate;
PSA 9:14 kia whakakitea katoatia ai e ahau ōu whakamoemiti i ngā tatau o te tamāhine o Hiona; ka hari ahau ki tāu whakaoranga.
PSA 9:15 Kua tapoko ngā tauiwi ki te rua i keria e rātou; kua mau tō rātou waewae i roto i te kupenga i hunā e rātou.
PSA 9:16 Kua mātauria a Ihowā ki te whakawā e whakaritea ana e ia; he māhanga mō te tangata kino te mahi a ōna ringa. Hikaiono. Hera.
PSA 9:17 Ka hoki ngā tāngata kino ki te rēinga, arā ngā iwi katoa e wareware ana ki te Atua.
PSA 9:18 E kore hoki e warewarea tonutia te tangata rawakore; e kore e taka tonu tā te hunga iti i tūmanako atu ai.
PSA 9:19 E ara, e Ihowā, kei riro i tā te tangata; kia whakawākia ngā tauiwi i tōu aroaro.
PSA 9:20 E Ihowā, meinga rātou kia wehi; kia mātau ngā tauiwi he tangata nei anō rātou. Hera
PSA 10:1 He aha koe ka tū mai ai i tawhiti, e Ihowā? Ka whakangarongaro ai i ngā wā o te hē?
PSA 10:2 E whakakake ana te tangata kino, e tūkino ana i te tangata iti – kia hopukina rātou ki ngā whakaaro i whakaaro ai rātou.
PSA 10:3 E whakapehapeha ana hoki te tangata kino ki te hiahia o tōna ngākau, ā, ko te hunga apo taonga, e whakakāhore ana, āe rā, e whakahāwea ana ki a Ihowā.
PSA 10:4 Ka mea te tangata kino, i te whakapehapeha o tōna mata, “E kore e hiahiatia e ia.” Kei roto i ōna whakaaro katoa e mea ana, “Kāhore he Atua.”
PSA 10:5 Whanokē tonu ōna ara i ngā wā katoa; kei runga noa ake āu whakaritenga tē kitea e ia, he mea whakatūpererū e ia ōna hoariri katoa.
PSA 10:6 E mea ana i roto i tōna ngākau, “E kore ahau e whakakorikoria. Kāhore hoki he hē mōku ā ngā whakatupuranga katoa.”
PSA 10:7 Kī tonu tōna māngai i te kanga, i te hīanga, i te tūkino; kei raro i tōna arero te whanokē me te teka.
PSA 10:8 E noho ana ia, e whanga ana i ngā pā koraha; e kōhurutia ana e ia te hunga harakore i ngā wāhi ngaro. E matatau ana ōna kanohi ki te hunga rawakore.
PSA 10:9 E whanga puku ana ia me he raiona i tōna kuhunga; e whanga ana kia hopukia te tangata iti; e hopukia ana e ia te tangata iti, ua kūmea ki tāna kupenga.
PSA 10:10 Kūpapa ana ia, piko ana, hinga ana te hunga rawakore i āna mea kaha.
PSA 10:11 E mea ana i roto i tōna ngākau, “Ka wareware te Atua, e huna ana ia i tōna mata e kore ia e kite ake tonu atu.”
PSA 10:12 Whakatika, e Ihowā, e te Atua, tākiritia tōu ringa; kaua e wareware ki te hunga iti.
PSA 10:13 He aha te tangata kino ka whakahāwea ai ki te Atua. Kua mea ia i roto i tōna ngākau, “E kore tēnei e whakatakina e koe”?
PSA 10:14 Kua kite koe; e tirohia nei hoki e koe te whanokē me te whakatoi, ā, ka utua e tōu ringa. E tuku ana te rawakore i a ia anō ki a koe; ko koe hei tuarā mō te pani.
PSA 10:15 Whatia e koe te ringa o te tangata kino; tēnā ko te tangata nanakia, whakatakina tōna kino, kia kāhore rā anō e kitea e koe.
PSA 10:16 Ko Ihowā te Kīngi ake ake kua kāhore kē ngā tauiwi i tōna whenua.
PSA 10:17 E Ihowā, kua whakarongo koe ki te hiahia o te hunga whakaiti; māu anō ō rātou ngākau e whakapai, ka tahuri anō tōu taringa ki te whakarongo;
PSA 10:18 ki te whakawā mō te pani, mō te tangata e tūkinotia ana, kei whakamataku ā mua ake te tangata o te whenua.
PSA 11:1 Ki te tino kaiwhakatangi. Nā Rāwiri. Ko Ihowā tāku e whakawhirinaki ai; he aha koutou ka mea ai ki tōku wairua, “Rere ā-manu atu ki tō koutou maunga?
PSA 11:2 Nanā, kua whakapikoa te kōpere e te hunga kino, e whakatikaia ana ā rātou pere ki te aho, hei perenga pukutanga mā rātou ki te hunga ngākau tika.
PSA 11:3 Ki te wāwāhia ngā tūranga ake, me pēhea te tangata tika?”
PSA 11:4 Kei tōna temepara tapu a Ihowā, kei te rangi te torōna o Ihowā. E titiro ana ōna kanohi, e whakamātautau ana ōna kamo i ngā tama a te tangata.
PSA 11:5 E whakamātautau ana a Ihowā i te tangata tika; ā, e kinongia ana e tōna wairua te tangata kino me te tangata e aroha ana ki te tutū.
PSA 11:6 Ka uaina e ia ki runga ki te hunga kino he māhanga, he ahi, he whānāriki, he āwhā tuai kerekere; ko te wāhi tēnā mō tō rātou kapu.
PSA 11:7 Nō te mea he tika a Ihowā, e aroha ana ki te tika; ka kite te hunga tika i tōna kanohi.
PSA 12:1 Ki te tino kaiwhakatangi: Heminiti. He hīmene nā Rāwiri. Whakaorangia, e Ihowā; ka mutu hoki ngā tāngata tapu; ka taweke atu te hunga pono i roto i ngā tama a te tangata.
PSA 12:2 E kōrero teka ana rātou tētahi ki tētahi; he ngutu patipati, he ngākau rua ō rātou ina kōrero.
PSA 12:3 Ka hātepea e Ihowā ngā ngutu patipati katoa, me te arero e kōrero whakapehapeha ana;
PSA 12:4 e mea nei, “Mā ō tātou arero tātou ka kake ai; nō tātou anō ō tātou ngutu, ko wai hei ariki mō tātou?”
PSA 12:5 “Mō te tūkinotanga i te hunga iti, mō te auē a te hunga rawakore, ka whakatika ahau āianei,” e ai tā Ihowā, “Ka whakanohoia ia e ahau ki te wāhi e ora ai ia i ngā tāngata e whakatūpererū ana ki a ia.”
PSA 12:6 He kupu parakore ngā kupu a Ihowā; he hiriwa i whakakorea nei te para i roto i te oumu whenua, he mea tuku whitu.
PSA 12:7 Ka tiakina rātou e koe, e Ihowā, ka whakaorangia rātou i tēnei whakatupuranga ake tonu atu.
PSA 12:8 E hāereere noa ana ngā tāngata kino i tētahi taha, i tētahi taha, i te mea e whakateiteitia ana te kino i roto i ngā tama a te tangata.
PSA 13:1 Ki te tino kaiwhakatangi. He hīmene nā Rāwiri. Kia pēhea te roa o tōu wareware ki ahau, e Ihowā? Mō ake tonu atu rānei? Kia pēhea te roa o tāu hunanga i tōu mata ki ahau?
PSA 13:2 Kia pēhea te roa o tōku whakaaroaronga i roto i tōku wairua, o te pōuri i roto i tōku ngākau i tēnei rā, i tēnei rā? Kia pēhea te roa o te whakakake mai a tōku hoariri ki ahau?
PSA 13:3 Titiro mai, whakahokia mai he kupu ki ahau, e Ihowā, e tōku Atua; whakamāramatia ōku kanohi, kei moe ahau i te moe o te mate.
PSA 13:4 Kei mea mai tōku hoariri, “Kua taea ia e ahau,” kei whakamanamana ōku hoariri, ina whakakorikoria ahau.
PSA 13:5 Ko ahau ia e whakawhirinaki ana ki tāu mahi tohu; ka whakamanamana tōku ngākau ki tāu whakaoranga.
PSA 13:6 Ka waiata ahau ki a Ihowā, mōna i atawhai mai ki ahau.
PSA 14:1 Ki te tino kaiwhakatangi. Nā Rāwiri. Kua kī te wairangi i tōna ngākau, “Kāhore he Atua.” Kua pirau rātou, he whakahouhou ā rātou mahi, kāhore tētahi e mahi ana i te pai.
PSA 14:2 I titiro iho a Ihowā i te rangi ki ngā tama a te tangata, kia kite me kāhore tētahi e mahara ana, e rapu ana i te Atua.
PSA 14:3 Kua peka kē rātou katoa kua pirau tahi; kāhore tētahi e mahi ana i te pai, kāhore kia kotahi.
PSA 14:4 E kore rānei e mōhio ngā kaimahi katoa o te kino? E kai nei i tōku iwi, me te mea e kai taro ana, ā, kāhore e karanga ki a Ihowā.
PSA 14:5 Nā, i reira rātou e tūiri noa ana; kei roto hoki te Atua i te whakatupuranga o te hunga tika.
PSA 14:6 Meinga ana e koutou te whakaaro o te hunga iti hei whakamā, nō te mea ko Ihowā tōna piringa.
PSA 14:7 Auē, me i puta mai te whakaoranga o Īharaira i Hiona! Kia whakahokia e Ihowā tāna iwi i te whakarau, ka whakamanamana a Hākopa, ka hari a Īharaira.
PSA 15:1 He hīmene nā Rāwiri. E Ihowā, ko wai e noho ki tōu tapenākara? Ko wai e noho ki tōu maunga tapu?
PSA 15:2 Ko ia he tapatahi nei te haere, he tika te mahi, he kōrero pono anō i roto i tōna ngākau.
PSA 15:3 Kāhore nei e ngautuarā tōna arero, kāhore e kino te mahi ki tōna hoa, kāhore āna ingoa kino mō tōna hoa.
PSA 15:4 E whakahēngia ana te tangata kino e ōna kanohi, e whakahōnoretia ana ia e ia te hunga e wehi ana ki a Ihowā. Ahakoa mate i tāna oati, kāhore e whakapaheketia e ia.
PSA 15:5 Kāhore e tuku i tāna moni hei moni whakatupu; kāhore hoki e tango i te moni hei utu mate mō te tangata harakore. Ki te pēnei te mahi a tētahi, e kore ia e whakakorikoria ake ake.
PSA 16:1 He Mikitama nā Rāwiri. Tiakina ahau, e te Atua; e whakawhirinaki nei hoki ahau ki a koe.
PSA 16:2 Kua mea ahau ki a Ihowā, “Ko koe tōku Ariki, kāhore ōku pai i tua atu i a koe.”
PSA 16:3 Ko te hunga tapu i runga i te whenua, te hunga pai rawa, kua ahu katoa tōku āhuareka ki a rātou.
PSA 16:4 Ka whakanuia ngā mamae o te hunga e whakawhiti ana i a Ihowā mō tētahi atua kē; e kore e ringihia e ahau ā rātou ringihanga toto, e kore anō ō rātou ingoa e whakahuatia e ōku ngutu.
PSA 16:5 Ko Ihowā te wāhi i wehea mai mōku, tāku kapu hoki; ko koe te kaiwhakapūmau i te wāhanga māku.
PSA 16:6 Kua takoto ōku aho ki ngā wāhi āhuareka, inā, he wāhi pai tōku.
PSA 16:7 Ka whakapaingia e ahau a Ihowā, i whakamahara nei i ahau; ka whakaako anō hoki ōku whatumanawa i ahau i te pō.
PSA 16:8 Kua waiho tonu e ahau a Ihowā ki tōku aroaro; kei tōku ringa matau nei ia, e kore ahau e whakakorikoria.
PSA 16:9 Koia i koa ai tōku ngākau, i whakamanamana ai tōku korōria, i takoto tūmanako ai anō ōku kikokiko.
PSA 16:10 Nō te mea e kore e waiho e koe tōku wairua i te rēinga, e kore e tukua tāu Mea Tapu kia kite i te pirau.
PSA 16:11 Ka whakakitea mai e koe ki ahau te huarahi o te ora; kei tōu aroaro te hari nui, kei tōu matau ngā āhuareka e kore e mutu.
PSA 17:1 He īnoi nā Rāwiri. Whakarongo ki te tika, e Ihowā, tahuri mai ki tāku karanga, kia tītaha mai tōu taringa ki tāku īnoi, arā ki tā te ngutu tinihangakore.
PSA 17:2 Kia puta mai te whakaritenga o tāku whakawā i tōu aroaro; tirohia mai e ōu kanohi te mea rite.
PSA 17:3 Kua whakamātauria e koe tōku ngākau; kua tirotirohia iho ahau e koe i te pō; kua whakamātau koe i ahau, ā, kāhore he mea i kitea e koe; e mea ana ahau kia kaua e hara tōku māngai.
PSA 17:4 Ko ngā mahi ia a te tangata, ko ngā kupu a tōu māngai tāku mea hei pā mai i ahau i ngā ara o te kaiwhakangaro.
PSA 17:5 I whakaūkia ōku hīkoinga ki āu ara, kīhai i paheke ōku waewae.
PSA 17:6 Kua karanga nei ahau ki a koe, nō te mea ka whakahoki kupu mai koe, e te Atua, ki ahau; whakatītahatia mai tōu taringa ki ahau, whakarongo ki tāku kupu.
PSA 17:7 Whakaaturia tōu aroha whakamīharo, ko koe hoki, ko tōu matau, te kaiwhakaora mō te hunga e whakawhirinaki ana ki a koe, i te hunga e whakatika mai ana.
PSA 17:8 Tiakina ahau, ānō ko te whatu o te kanohi, hunā ahau ki raro i te taumarumarutanga o ōu pākau,
PSA 17:9 i te hunga kino e tūkino nei i ahau, i ōku hoariri whakamate e karapoti nei i ahau.
PSA 17:10 E kōpakia ana rātou e ō rātou ngako; e kōrero whakapehapeha ana ō rātou māngai.
PSA 17:11 Tēnei ō mātou hīkoinga te karapotia nei e rātou; matatau tonu iho ō rātou kanohi ki te tuku iho i a mātou ki te whenua.
PSA 17:12 Kei te raiona e hiahia ana ki te hopu kai te rite, kei te kūao raiona e piri ana i ngā wāhi ngaro.
PSA 17:13 E ara, e Ihowā, haukotia tōna aroaro, turakina ia ki raro; whakaorangia tōku wairua ki tāu hoari i te tangata kino;
PSA 17:14 i ngā tāngata, mā tōu ringa, e Ihowā, i ngā tāngata o te ao. Kei tēnei ora nei tō rātou wāhi, ā, e whakakīia ana ō rātou kōpū e koe ki tāu taonga. E kikī ana rātou i te tamariki, whakarērea iho ngā toenga o ā rātou taonga ki ā rātou kōhungahunga.
PSA 17:15 Ko ahau, e kite ahau i tōu mata i runga i te tika, ā, ka tatū tōku ngākau, ina oho ake ahau, kia kite i tōu āhua.
PSA 18:1 Ki te tino kaiwhakatangi. He hīmene nā te pononga a Ihowā nā Rāwiri. Nāna i whakahua ngā kupu o tēnei waiata ki a Ihowā i te rā i whakaorangia ai ia i te ringa o ōna hoariri katoa, i te ringa anō o Haora. I mea ia: Ka aroha ahau ki a koe, e Ihowā, e tōku kaha.
PSA 18:2 Ko Ihowā tōku kāmaka, tōku pā, tōku kaiwhakaora; tōku Atua, tōku tino kāmaka, e whakawhirinaki ai ahau; tōku whakangungu rākau, te haona o tōku whakaoranga, tōku pourewa tiketike.
PSA 18:3 Ka karanga ahau ki a Ihowā, e tika nei kia whakamoemititia; ā, ka ora i ōku hoariri.
PSA 18:4 I karapotia ahau e ngā whakawiringa a te mate, ā, whakawehia ana ahau e ngā waipuke o te kino.
PSA 18:5 I karapotia ahau e ngā whakawiringa a te rēinga, i haukotia e ngā māhanga a te mate.
PSA 18:6 I karanga ahau ki a Ihowā i tōku pāweratanga; i hāmama ki tōku Atua. I whakarongo ia ki tōku reo i roto i tōna temepara, i tae anō tāku hāmama ki tōna aroaro, ki ōna taringa.
PSA 18:7 Nā, ka ngāueue te whenua, ka rū, wiri ana ngā pūtake o ngā maunga, ngāueue ana i tōna riri.
PSA 18:8 I kake he paowa i ōna pongaponga, ā, kai ana te kāpura a tōna māngai, ngiha ana ngā waro.
PSA 18:9 I whakapīngoretia e ia ngā rangi, ā, heke iho ana, ā, i raro te pōuri mātotoru i ōna waewae.
PSA 18:10 I eke ia ki runga ki te kerupa, ā, rere ana; āe, i rere omaki ia i runga i ngā parirau o te hau.
PSA 18:11 I meinga e ia te pōuri hei wāhi ngaro mōna, hei tēneti i tētahi taha ōna, i tētahi taha; ko te pōuritanga o ngā wai, ko ngā kapua mātotoru o te rangi.
PSA 18:12 I rere atu ōna kapua mātotoru i te wherikotanga o tōna aroaro; te whatu, me ngā waro kāpura.
PSA 18:13 I papā anō te whatitiri a Ihowā i ngā rangi, ā, puaki ana te reo o te Runga Rawa; he whatu, he waro kāpura.
PSA 18:14 I kōkiritia e ia āna pere, ā, marara ana rātou; āe, i kōperea hoki e ia te tini uira, ā, whati ana rātou.
PSA 18:15 Kātahi ka kitea ngā takere o ngā wai, ā, ka takoto kau ngā pūtake o te ao i tāu whakatūpehupehutanga, e Ihowā, i te whengunga o te manawa o ōu pongaponga.
PSA 18:16 I tono karere mai ia i runga, ka mau ki ahau; tōia ake ahau e ia i roto i ngā wai maha.
PSA 18:17 Nāna ahau i ora ai i tōku hoariri kaha, i te hunga e kino ana ki ahau; he kaha rawa hoki rātou i ahau.
PSA 18:18 I huakina tatatia ahau e rātou i te rā o tōku matenga; ko Ihowā ia tōku whakawhirinakitanga.
PSA 18:19 I whakaputaina ahau e ia ki te wāhi nui, i whakaorangia ahau e ia; he āhuareka nōna ki ahau.
PSA 18:20 Rite tonu ki tāku mahi tika tā Ihowā utu ki ahau; rite tonu ki te mā o ōku ringa tāna i whakahoki ai ki ahau.
PSA 18:21 Mōku i pupuri i ngā ara o Ihowā, ā, kīhai i hē, i whakarere i tōku Atua.
PSA 18:22 Kei mua tonu hoki i ahau āna whakaritenga katoa, kīhai anō i whakamataratia atu i ahau āna tikanga.
PSA 18:23 Tapatahi tonu hoki tōku whakaaro ki tōna aroaro, ā, i tiaki ahau i ahau kei kino.
PSA 18:24 Nā, ka hōmai e Ihowā he utu ki ahau, rite tonu ki tōku tika, ki te mā o ōku ringa i tōna aroaro.
PSA 18:25 He tangata atawhai, ka atawhai hoki koe; he tangata tika, ka tika hoki koe.
PSA 18:26 He tangata mā, ka mā hoki koe; he tangata whakakeke, ka whakakeke hoki koe.
PSA 18:27 E whakaorangia hoki e koe te iwi ngākau mamae; ka whakahokia anō e koe ki raro ngā kanohi whakakake.
PSA 18:28 Māu hoki e whakaū tāku rama; mā Ihowā, mā tōku Atua, e whakamārama tōku pōuri.
PSA 18:29 Nāu hoki ahau i rere ai nā waenganui atu i te rōpū; nā tōku Atua hoki i pekea ai e ahau te taiepa.
PSA 18:30 Tēnā ko te Atua, tika tonu tōna ara; kua oti tāna kupu te whakamātau; he whakangungu rākau ia ki te hunga katoa e whakawhirinaki ana ki a ia.
PSA 18:31 Ko wai oti te Atua, ki te kāhore a Ihowā? Ko wai hoki he kāmaka, ki te kāhore tō tātou Atua?
PSA 18:32 Ko te Atua, nāna ahau i whītiki ki te kaha, i mea kia tino tika tōku ara.
PSA 18:33 Ko ia hei mea i ōku waewae kia rite ki ō te hāta; māna hoki ahau e whakatū ki runga ki ōku wāhi tiketike.
PSA 18:34 Ko ia hei whakaako i ōku ringa ki te whawhai, ā, whati ana te kōpere parāhi i ōku ringa.
PSA 18:35 Kua hōmai anō e koe ki ahau te whakangungu rākau o tāu whakaoranga; puritia ana ahau e tōu ringa matau, whakanuia ana e tōu whakaaro māhaki.
PSA 18:36 I whakanuia e koe ōku takahanga i raro i ahau; tē paheke ōku waewae.
PSA 18:37 Ka arumia e ahau ōku hoariri, mau iho i ahau; e kore ahau e tahuri mai, ā ngaro noa rātou.
PSA 18:38 Marū ana rātou i ahau, tē kaha te whakatika; hinga ana ki raro i ōku waewae.
PSA 18:39 Nāu hoki ahau i whītiki ki te kaha mō te whawhai; piko ana i a koe ki raro i ahau te hunga e whakatika mai ana ki ahau.
PSA 18:40 Kua meinga e koe kia tahuri mai ngā tuarā o ōku hoariri ki ahau, kia hautopea ai e ahau te hunga e kino ana ki ahau.
PSA 18:41 I karanga rātou, heoi kāhore he kaiwhakaora; ki a Ihowā, otirā kīhai i whakahoki kupu ki a rātou.
PSA 18:42 Nā, ka tukia rātou e ahau ā rite noa rātou ki te puehu e pūhia ana e te hau; ākiritia atu ana rātou ki waho, ānō he paru nō te huarahi.
PSA 18:43 Kua whakaorangia ahau e koe i ngā ngangautanga a te iwi; kua meinga e koe hei rangatira mō ngā tauiwi; hei apa mōku te iwi kāhore i mātauria e ahau.
PSA 18:44 Kia rongo kau te taringa ki ahau, ka kakama tonu mai rātou ki ahau; ko ngā tāngata iwi kē ngohe kau ki ahau.
PSA 18:45 Ka memeha haere ngā tāngata iwi kē; ka puta wehi mai hoki i roto i ō rātou kuhunga.
PSA 18:46 E ora ana a Ihowā; kia whakapaingia hoki tōku kāmaka, kia whakanuia te Atua o tōku whakaoranga;
PSA 18:47 ko te Atua, māna nei e rapu he utu mōku, māna e pēhi ngā iwi ki raro i ahau.
PSA 18:48 Māna ahau e mawhiti ai i ōku hoariri, āe rā, māu ahau e mea kia teitei ake i te hunga e whakatika mai ana ki ahau; ka whakaorangia ahau e koe i te tangata tutū.
PSA 18:49 Mō konei ka whakawhetai ahau ki a koe, e Ihowā, i waenganui i ngā tauiwi; ka hīmene ki tōu ingoa.
PSA 18:50 He nui nei tāna whakaora i tāna kīngi; e whakaputa aroha ana ki tāna tangata i whakawahi ai, ki a Rāwiri rātou ko ōna uri ake ake.
PSA 19:1 Ki te tino kaiwhakatangi. He hīmene nā Rāwiri. E kōrerotia ana e ngā rangi te korōria o te Atua; ā, e whakaaturia ana e te kikorangi te mahi a ōna ringa.
PSA 19:2 E puaki ana te reo o tēnā rangi, o tēnā rangi, e whakaatu mōhiotanga ana hoki tēnā pō, tēnā pō.
PSA 19:3 Kāhore he hamumu, kāhore he kupu, kāhore e rangona tō rātou reo.
PSA 19:4 Kua puta tā rātou aho ki te whenua katoa, ā rātou kupu, ā te pito rā anō o te ao. Whakatūria ana e ia ki reira te tapenākara mō te rā;
PSA 19:5 ā, e puta ana ia me he tāne mārena hou i tōna whare moenga, whakaī ana ia, pērā ana me te tangata kaha e mea ana ki te oma whakataetae.
PSA 19:6 Ko tōna putanga kei tētahi pito o te rangi, ā, whawhe noa ki tētahi pito; kāhore hoki tētahi mea e ngaro i tōna mahana.
PSA 19:7 Tapatahi tonu te Ture a Ihowā, he mea whakatahuri i te wairua; pono tonu ngā whakaatu a Ihowā, e whakawhaiwhakaaro ana i te kūare.
PSA 19:8 He tika ngā ako a Ihowā, e whakahari ana i te ngākau, he mā te whakahau a Ihowā, e whakamārama ana i ngā kanohi.
PSA 19:9 He mā te wehi ki a Ihowā, pūmau tonu ake ake, he pono ngā whakaritenga a Ihowā, tika kau anō.
PSA 19:10 Engari ēnā e hiahiatia ana i te kōura, āe, i te tino kōura ahakoa maha; reka atu i te honi, i te māturuturutanga iho o ngā honikoma.
PSA 19:11 Nā ēnā anō tāu pononga i whakatūpato; he nui te utu ki te puritia.
PSA 19:12 Ko wai e mātau ana ki ōna hē? Whakamākia ōku hara puku.
PSA 19:13 Puritia anō tāu pononga kei riro i ngā hara whakakake hei rangatira mōku; ko reira ahau tū tika ai, ā, ka wātea i te hē nui.
PSA 19:14 Kia manakohia ngā kupu a tōku māngai; me ngā whakaaro o tōku ngākau i tōu aroaro, e Ihowā, e tōku kāmaka, e tōku kaihoko.
PSA 20:1 Ki te tino kaiwhakatangi. He hīmene nā Rāwiri. Mā Ihowā e whakahoki he kupu ki a koe i te rā o te hē; mā te ingoa o te Atua o Hākopa koe e tiaki.
PSA 20:2 Māna e tono mai he āwhina mōu i te wāhi tapu, e whakaū hoki koe i Hiona.
PSA 20:3 Māna e mahara ki āu whakahere katoa, e manako ki āu tahunga tinana. Hera
PSA 20:4 Māna e hōmai ki a koe tā tōu ngākau e mea ai, e whakamana katoa hoki tāu e wawata ai.
PSA 20:5 Ka hari mātou ki tāu whakaoranga, ka whakatū hoki i ō mātou kara i runga i te ingoa o tō mātou Atua. Mā Ihowā e whakarite āu īnoi katoa.
PSA 20:6 Kātahi ahau ka mātau e whakaora ana a Ihowā i tāna tangata i whakawahi ai, ka whakahoki kupu ia ki a ia i tōna rangi tapu, me te kaha anō tōna ringa matau ki te whakaora.
PSA 20:7 Ko tā ētahi he hāriata, ko tā ētahi he hōiho; ko tātou ia ka whakahua i te ingoa o Ihowā, o tō tātou Atua.
PSA 20:8 Kua piko rātou, kua hinga ko tātou ia kua ara, kua tū ki runga.
PSA 20:9 Whakaorangia, e Ihowā; kia whakahoki kupu mai te Kīngi ina karanga mātou.
PSA 21:1 Ki te tino kaiwhakatangi. He hīmene nā Rāwiri. Ka hari te kīngi ki tōu kaha, e Ihowā; anō te nui o tōna whakamanamana ki tāu whakaoranga!
PSA 21:2 Kua hōmai e koe ki a ia tā tōna ngākau i hiahia ai; kīhai anō i kaiponuhia e koe tā ōna ngutu i īnoi ai. Hera
PSA 21:3 Kei mua nei hoki koe i a ia e hōmai ana i ngā manaakitanga o te pai; karaunatia ana e koe tōna mātenga ki te tino kōura.
PSA 21:4 He ora tāna i īnoi ai i a koe, ā, kua hōmai e koe ki a ia, he roa noa atu ngā rā ake ake.
PSA 21:5 Te nui tōna korōria i tāu whakaoranga; uhia ana ia e koe ki te hōnore, ki te korōria.
PSA 21:6 Nāu hoki ia i mea kia manaakitia rawatia ake ake; whakaharitia ana ia e koe ki te koa o tōu mata.
PSA 21:7 E whakawhirinaki ana hoki te kīngi ki a Ihowā; e kore anō ia e whakangāueuetia, he atawhai hoki nō te Runga Rawa.
PSA 21:8 Ka mau i tōu ringa ōu hoariri katoa; ka mau i tōu ringa matau te hunga e kino ana ki a koe.
PSA 21:9 Ka meinga rātou e koe, kia rite ki te oumu kāpura i te wā e riri ai koe; e horomia rātou e Ihowā ina weriweri ia, ā, mā te kāpura rātou e kai.
PSA 21:10 Ka whakamōtītia e koe ō rātou hua i runga i te whenua, ō rātou uri i waenganui o ngā tama a te tangata.
PSA 21:11 He kino hoki tā rātou i whakatakoto ai mōu, he mahi nanakia tā rātou i whakaaro ai, kīhai nei i taea e rātou.
PSA 21:12 Mō reira ka meinga e koe kia tahuri ō rātou tuarā, ina whakatikaia e koe āu pere i runga i āu aho ki ō rātou mata.
PSA 21:13 Kia whakanuia koe, e Ihowā, i runga i tōu kaha! Ka waiata mātou, ka hīmene ki tōu nui.
PSA 22:1 Ki te tino kaiwhakatangi: Airete Hahara. He hīmene nā Rāwiri. E tōku Atua, e tōku Atua, he aha koe i whakarere ai i ahau? He aha koe i matara atu ai ki te whakaora i ahau, i ngā kupu hoki o tāku hāmama?
PSA 22:2 E tōku Atua, e karanga nei ahau i te awatea, heoi kāhore koe e rongo, i te pō anō kāhore ahau e wahangū.
PSA 22:3 Otiia he tapu koe, kei ngā whakamoemiti a Īharaira tōu nohoanga.
PSA 22:4 I whakawhirinaki ō mātou mātua ki a koe, i whakawhirinaki, ā, whakaorangia ana e koe.
PSA 22:5 I karanga rātou ki a koe, ā, kua ora; i whakawhirinaki ki a koe, ā, kīhai i whakamā.
PSA 22:6 Ko ahau ia he toke, ehara i te tangata; e tāwaia ana e te tangata, e whakahāweatia ana e te iwi.
PSA 22:7 Kataina iho ahau e te hunga katoa e kite ana i ahau, kō ana ō rātou ngutu, rūrū ana ō rātou mātenga, e kī mai ana,
PSA 22:8 “Tukua atu koe ki a Ihowā, māna ia e whakaora; māna ia e whakaora, e pai ana hoki ia ki a ia.”
PSA 22:9 Nāu ia ahau i whakawhānau mai i roto i te kōpū, i mea hoki kia tūmanako, i ahau i ngā ū o tōku whaea.
PSA 22:10 He mea whakarere atu ahau ki runga ki a koe nō te kōpū mai; ko koe tōku Atua nō te kōpū mai anō o tōku whaea.
PSA 22:11 Kei mamao atu i ahau, e tata ana hoki te hē, kāhore hoki he kaiāwhina.
PSA 22:12 He tini ngā pūru e karapoti nei i ahau; e whakapaea ana ahau e ngā mea kaha o Pahana.
PSA 22:13 E hāmama ana ō rātou māngai ki ahau, ānō he raiona e haehae ana, e hāmama ana.
PSA 22:14 Kua ringihia ahau, ānō he wai, kua takoki katoa ōku iwi; me te ware pī tōku ngākau, e rewa ana i waenganui i ōku whēkau.
PSA 22:15 Kua maroke tōku kaha, ānō he maramara rīhi, piri tonu tōku arero ki ōku kauae. Kua whakatakotoria anō ahau e koe ki te puehu o te mate.
PSA 22:16 Kua karapotia nei hoki ahau e te kīrehe, kua muia e te whakaminenga o ngā tāngata hara; kua pokaia e rātou ōku ringa me ōku waewae.
PSA 22:17 E taea e ahau te tatau ōku iwi katoa; e titiro mai ana rātou, e mātakitaki ana ki ahau.
PSA 22:18 E wehewehea ana ōku kākahu mō rātou, e maka rota ana mō tōku weruweru.
PSA 22:19 Kaua rā ia koe e matara atu, e Ihowā; e tōku kaha, hohoro mai hei āwhina mōku.
PSA 22:20 Whakaorangia tōku wairua i te hoari, tāku hoki e matenui nei i te kurī.
PSA 22:21 Whakaorangia ahau i te māngai o te raiona. Āe, i ngā haona o ngā kau mākā kua whakahokia mai e koe he kupu ki ahau.
PSA 22:22 Ka kōrerotia e ahau tōu ingoa ki ōku tēina, ka whakamoemititia koe e ahau i waenganui i te whakaminenga.
PSA 22:23 E te hunga e wehi ana ki a Ihowā, whakamoemiti ki a ia; whakakorōriatia ia, e te uri katoa o Hākopa, kia wehi hoki ki a ia, e te uri katoa o Īharaira.
PSA 22:24 Kīhai hoki ia i whakahāwea, kīhai i whakarihariha ki te auē o te ngākau mamae; kīhai anō i huna i tōna mata ki a ia, engari i tāna karangatanga ki a ia i whakarongo ia.
PSA 22:25 Ko koe tāku e whakamoemiti ai i waenganui o te whakaminenga nui, ka whakamanā e ahau āku kupu taurangi ki te aroaro o te hunga e wehi ana ki a ia.
PSA 22:26 Ka kai te hunga māhaki, ā, ka mākona; ka whakamoemiti ki a Ihowā te hunga e rapu ana ki a ia. Kia ora tonu ō koutou ngākau, ake, ake!
PSA 22:27 E mahara ngā pito katoa o te whenua, ā, ka tahuri ki a Ihowā; ka koropiko anō ngā hapū katoa o ngā iwi ki tōu aroaro.
PSA 22:28 Nō Ihowā hoki te rangatiratanga, ko ia anō te kāwana i waenganui o ngā iwi.
PSA 22:29 Ka kai, ā, ka koropiko ngā tāngata tetere katoa o te whenua; ka tuohu ki tōna aroaro te hunga katoa e heke ana ki te puehu; tae noa ki te tangata kāhore e ora i a ia tōna wairua.
PSA 22:30 Tērā e mahi tētahi uri ki a ia; ka waiho ki te Ariki hei whakatupuranga.
PSA 22:31 E haere mai rātou, e kauwhau i tōna tika ki te iwi e whānau ā mua, he meatanga tēnei nāna.
PSA 23:1 He hīmene nā Rāwiri. Ko Ihowā tōku hēpara; e kore ahau e hapa.
PSA 23:2 Ko ia hei mea kia takoto ahau ki ngā wāhi tarutaru hou; e ārahi ana ia i ahau ki te taha o ngā wai āta rere.
PSA 23:3 Ko ia hei whakahoki ake i tōku wairua; e ārahi ana ia i ahau i ngā ara o te tika, he whakaaro ki tōna ingoa.
PSA 23:4 Āe, ahakoa haere ahau i te awaawa o te ātārangi o te mate, kāhore he kino e wehi ai ahau; nō te mea kei tōku taha koe; ko tāu rākau, ko tāu tokotoko, ko ēnā hei oranga ngākau mōku.
PSA 23:5 E takā ana e koe he tēpu ki tōku aroaro i te tirohanga a ōku hoariri, e whakawahia ana e koe tōku mātenga ki te hinu, pūrena tonu tāku kapu.
PSA 23:6 He pono e aru i ahau te pai me te atawhai i ngā rā katoa e ora ai ahau, ā, ka noho ahau ki te whare o Ihowā ake tonu atu.
PSA 24:1 He hīmene nā Rāwiri. Nō Ihowā te whenua, me ōna tini mea, te ao, me ngā tāngata e noho ana i runga.
PSA 24:2 He mea whakatū hoki nāna ki runga ki ngā moana, he mea whakaū ki runga ki ngā roma.
PSA 24:3 Ko wai e eke ki te maunga o Ihowā? Ko wai e tū ki tōna wāhi tapu?
PSA 24:4 Ko te tangata he mā nei ngā ringa, he harakore tōna ngākau, kāhore nei i ara tōna wairua ki te horihori, ā, kāhore i oati teka.
PSA 24:5 Ka riro i a ia te manaaki a Ihowā, me te tika a te Atua o tōna whakaoranga.
PSA 24:6 Ko te whakatupuranga tēnei o te hunga e rapu ana ki a ia, e rapu nei i tōu mata, e Hākopa. Hera
PSA 24:7 Kia ara ō koutou mātenga, e ngā tatau, ara ake, e ngā tatau onamata; ā, ka tomo te Kīngi o te korōria.
PSA 24:8 Ko wai tēnei Kīngi korōria? Ko Ihowā, ko te kaha, ko te mārohirohi, ko Ihowā, ko te mārohirohi ki te whawhai.
PSA 24:9 Kia ara ō koutou mātenga, e ngā tatau, kia ara ake, e ngā tatau onamata, ā, ka tomo te Kīngi o te korōria.
PSA 24:10 Ko wai tēnei Kīngi korōria? Ko Ihowā o ngā mano, ko ia te Kīngi korōria. Hera
PSA 25:1 Nā Rāwiri. Ka ara nei tōku wairua ki a koe, e Ihowā;
PSA 25:2 e tōku Atua, ko koe tōku whakawhirinakitanga; kei whakamā ahau, aua ōku hoariri e tukua kia whakaputa ki ahau.
PSA 25:3 Āe, aua tētahi o te hunga e tatari ana ki a koe e tukua kia whakamā; kia whakamā te hunga e tinihanga noa ana.
PSA 25:4 Whakakitea ki ahau āu ara, e Ihowā; whakaakona ahau ki āu huarahi.
PSA 25:5 Ārahina ahau i tōu pono, whakaakona hoki ahau; ko koe hoki te Atua o tōku whakaoranga; pau noa te rā i ahau e tatari nei ki a koe.
PSA 25:6 E Ihowā, kia mahara ki āu mahi tohu, ki āu mahi aroha; nōnamata riro hoki ēnā.
PSA 25:7 Kaua e maharatia ngā hara o tōku tamarikitanga, me ōku kino; mahara mai koe ki ahau, e Ihowā, kia rite ki tāu mahi tohu, kia whakaaro ki tōu pai.
PSA 25:8 He pai, he tika a Ihowā, ā, ka whakaakona e ia te hunga hara ki te huarahi.
PSA 25:9 Ka ārahina e ia te hunga māhaki i runga i te whakawā; ka ākona hoki e ia te hunga māhaki ki tāna ara.
PSA 25:10 He mahi tohu, he pono ngā ara katoa o Ihowā ki te hunga e pupuri ana i tāna kawenata, i āna whakaaturanga.
PSA 25:11 Kia mahara ki tōu ingoa, e Ihowā, ā, murua tōku kino, he nui nei hoki.
PSA 25:12 Ko wai te tangata e wehi ana ki a Ihowā? Ka whakaako ia i a ia ki te ara e pai ai ia.
PSA 25:13 Ka noho tōna wairua i runga i te pai, ā, ka riro te whenua i tōna uri.
PSA 25:14 Kei te hunga e wehi ana i a ia te mea ngaro a Ihowā; ā, māna e whakakite ki a rātou tāna kawenata.
PSA 25:15 E tau tonu ana ōku kanohi ki a Ihowā; māna hoki e unu ake ōku waewae i te kupenga.
PSA 25:16 Tahuri mai ki ahau, tohungia hoki ahau; he mokemoke hoki ahau, e mamae ana te ngākau.
PSA 25:17 Kua whakanuia ngā whakapāwera o tōku ngākau; whakaputaina ahau i roto i ngā mea e pēhi nei i ahau.
PSA 25:18 Tirohia tōku mate me tōku mamae, ā, murua katoatia ōku hara.
PSA 25:19 Tirohia mai ōku hoariri, he tokomaha hoki rātou; ā, he nanakia te kino e kino nei rātou ki ahau.
PSA 25:20 Tiakina tōku wairua, ā, whakaorangia ahau; kei whakamā ahau; e whakawhirinaki ana hoki ahau ki a koe.
PSA 25:21 Tukua mā te ngākau tapatahi, mā te tika ahau e tiaki; e tūmanako ana hoki ahau ki a koe.
PSA 25:22 Hokona, e te Atua, a Īharaira i roto i ōna whakapāwera katoa.
PSA 26:1 Nā Rāwiri. Whakawākia ahau, e Ihowā, kua haere nei hoki ahau i te tapatahitanga o tōku ngākau; kua whakawhirinaki anō ki a Ihowā, nā, e kore e paheke.
PSA 26:2 Tirohia iho ahau, e Ihowā, whakamātauria ahau, kia kitea ōku whatumanawa me tōku ngākau.
PSA 26:3 Kei mua hoki tōu atawhai i ōku kanohi; kua haere nei ahau i tōu pono.
PSA 26:4 Kāhore ahau i noho tahi ki ngā tāngata horihori; e kore anō ahau e tomo tahi me ngā tāngata tinihanga.
PSA 26:5 Kino tonu ahau ki te whakaminenga o ngā kaimahi i te hē, e kore anō ahau e noho tahi ki te hunga kino.
PSA 26:6 Ka horoia e ahau ōku ringa ki te harakore, ka taiāwhio ai i tāu āta, e Ihowā;
PSA 26:7 ā, ka rangona tōku reo e whakamoemiti ana, e whakapuaki ana i āu mahi whakamīharo katoa.
PSA 26:8 E Ihowā, kua aroha nei ahau ki tōu whare nohoanga, ki te wāhi e nohoia ana e tōu korōria.
PSA 26:9 Kei huia tōku wairua ki roto ki te hunga hara, me tōku ora ki roto ki te hunga toto.
PSA 26:10 He mahi nanakia hoki tā ō rātou ringa; kī tonu ō rātou matau i te utu whakapati.
PSA 26:11 Ko ahau ia, ka haere i runga i tōku tapatahi; hokona ahau, tohungia hoki ahau.
PSA 26:12 E tū ana tōku waewae i te wāhi tika; ka whakapaingia a Ihowā e ahau i roto i ngā whakaminenga.
PSA 27:1 Nā Rāwiri. Ko Ihowā tōku mārama, tōku whakaoranga; kia wehi ahau i a wai? Ko Ihowā te kaha o tōku ora; ko wai e mataku ai ahau?
PSA 27:2 I te whakatatanga mai o te hunga kino, o ōku hoariri, o ōku hoa whāinga, ki te kai i ōku kikokiko, tūtuki ana rātou, hinga ana.
PSA 27:3 Ahakoa whakapae noa te ope i ahau e kore tōku ngākau e wehi; ahakoa ara noa te pakanga ki ahau, ka au tonu ia ahau.
PSA 27:4 Kotahi tāku mea i īnoi ai i a Ihowā, ko tāku tēnā e rapu ai: kia noho i te whare o Ihowā i ngā rā katoa e ora ai ahau, kia kite ai i te ātaahua o Ihowā, kia ui ai i roto i tōna temepara.
PSA 27:5 Ka hunā hoki ahau e ia ki tōna tēneti i te rā o te hē, ka hunā ki te wāhi ngaro i tōna tapenākara, ka hāpainga ahau ki runga ki te kōhatu.
PSA 27:6 Nā āianei, ka teitei tōku māhunga ki runga ake i ōku hoariri, e karapoti nei i ahau; ā, ka patua e ahau i roto i tōna tapenākara he whakahere hari; ka waiata ahau, āe ka hīmene ki a Ihowā.
PSA 27:7 Whakarongo mai ki tōku reo, e Ihowā, ua karanga ahau, tohungia ahau, whakahokia mai hoki he kupu ki ahau.
PSA 27:8 I a koe i mea, “Rapua e koutou tōku mata.” Ka mea tōku ngākau ki a koe, “Ka rapu ahau i tōu mata, e Ihowā.”
PSA 27:9 Kaua tōu mata e hunā ki ahau. Kaua tāu pononga e peia atu ua riri koe; ko koe tōku kaiāwhina, kei mahue ahau i a koe, kei whakarērea e koe, e te Atua o tōku whakaoranga.
PSA 27:10 Ki te whakarērea ahau e tōku pāpā, e tōku whaea, ko Ihowā hei tukunga atu mōku.
PSA 27:11 E Ihowā, whakaakona ahau ki tāu ara; ārahina ahau i te ara tika, he hoariri hoki ōku.
PSA 27:12 Kaua ahau e tukua ki te hiahia o ōku hoariri; kua whakatika mai hoki ki ahau he kaiwhakapae teka, me te hunga manawa nanakia.
PSA 27:13 Kua ngohe ahau, me i kaua ahau i whakapono, tērā ahau e kite i te pai o te Atua i te whenua o te ora.
PSA 27:14 Tāria a Ihowā; kia māia, ā, kia kaha tōu ngākau; inā, tāria a Ihowā.
PSA 28:1 Nā Rāwiri. Ka karanga ahau ki a koe, e Ihowā, e tōku kōhatu, kaua e wahangū ki ahau. Ki te wahangū hoki koe ki ahau, ka rite ahau ki te hunga e heke atu ana ki te poka.
PSA 28:2 Whakarongo ki tōku reo īnoi, ua karanga ahau ki a koe, ina totoro ōku ringa ki tōu ahurewa tapu.
PSA 28:3 Kaua ahau e kūmea tahitia me te hunga hē; me ngā kaimahi i te kino, he mārie ā rātou kupu ki ō rātou hoa, he kino ia kei roto i ō rātou ngākau.
PSA 28:4 Kia rite ki ā rātou mahi tāu e hoatu ai ki a rātou, ki te kino anō o ā rātou hanga; kia rite ki ngā mahi a ō rātou ringa tāu e hoatu ai ki a rātou, whakahokia tā rātou utu ki a rātou.
PSA 28:5 Nā, kāhore nei rātou e whakaaro ki ngā mahi a Ihowā, ki ngā meatanga a ōna ringa, mō reira ka whakahoroa iho rātou e ia, e kore anō e whakatūria ake.
PSA 28:6 Kia whakapaingia a Ihowā mōna i whakarongo mai ki tōku reo īnoi.
PSA 28:7 Ko Ihowā tōku kaha, tōku whakangungu rākau; i whakawhirinaki tōku ngākau ki a ia, ā, āwhinatia ana ahau; koia i hari ai tōku ngākau, i whakamoemiti ai hoki tāku waiata ki a ia.
PSA 28:8 Ko Ihowā tō rātou kaha, ko ia anō te kaha whakaora o tāna tangata i whakawahi ai.
PSA 28:9 Whakaorangia tāu iwi, manaakitia tōu kāinga tupu; whāngainga rātou, whakaarahia ake ake.
PSA 29:1 He hīmene nā Rāwiri. Hoatu ki a Ihowā, e ngā tama a te hunga nunui, hoatu ki a Ihowā te korōria me te kaha.
PSA 29:2 Hoatu ki a Ihowā te korōria e rite ana mō tōna ingoa, koropiko ki a Ihowā i roto i te ātaahua o te tapu.
PSA 29:3 Kei runga te reo o Ihowā i ngā wai; e papā ana te whatitiri a te Atua o te korōria; kei runga a Ihowā i ngā wai maha.
PSA 29:4 Kaha tonu te reo o Ihowā; korōria tonu te reo o Ihowā.
PSA 29:5 Mongamonga noa ngā hīta i te reo o Ihowā; inā, mongamonga noa i a Ihowā ngā hīta o Repanōna.
PSA 29:6 Ko ia hei mea i a rātou kia mokowhiti, ānō he kūao; a Repanōna rāua ko Hiriona, ānō he kūao kau mākā.
PSA 29:7 E wehewehe ana te reo o Ihowā i ngā mura ahi.
PSA 29:8 Wiri ana te koraha i te reo o Ihowā; wiri ana i a Ihowā te koraha o Karehe.
PSA 29:9 Whānau ana ngā hāta i te reo o Ihowā, tīhorea ana ngā ngahere kia tahanga; i tōna temepara ko te kupu a te katoa, “Korōria!”
PSA 29:10 I noho a Ihowā hei kīngi i runga i te waipuke; āe, ka noho a Ihowā hei kīngi, ake ake.
PSA 29:11 Ka hōmai e Ihowā he kaha ki tāna hunga; he rongo mau tā Ihowā manaaki mō tāna hunga.
PSA 30:1 He hīmene. He waiata mō te tāinga o te kawa o te whare. Nā Rāwiri. Ka whakanui ahau i a koe, e Ihowā; nāu hoki ahau i hāpai ake, ā, kīhai i tukua ōku hoariri kia hari ki ahau.
PSA 30:2 E Ihowā, e tōku Atua, i karanga ahau ki a koe, ā, kore ake tōku mate i a koe.
PSA 30:3 E Ihowā, nāu i whakaputa ake tōku wairua i te rēinga; nāu ahau i whakaora kei heke ki te poka.
PSA 30:4 Hīmene ki a Ihowā, e tāna hunga tapu, whakawhetai hoki ki tōna ingoa tapu.
PSA 30:5 He iti hoki te wāhi e riri ai ia; he oranga ki te manakohia e ia. E tau iho te tangi i te ahiahi, ā, i te ata he hari.
PSA 30:6 I mea ahau i tōku wā i kake ai, “E kore ahau e whakangāueuetia ā muri ake nei.”
PSA 30:7 He manakohanga nāu, e Ihowā, i ū ai i a koe te tū o tōku maunga; i hunā e koe tōu mata, ā, raru iho ahau.
PSA 30:8 E Ihowā, i karanga ahau ki a koe, i īnoi hoki ki a Ihowā.
PSA 30:9 “He aha te pai o ōku toto ina heke ahau ki te poka? Mā te puehu koia koe e whakamoemiti? Māna oti e whakapuaki tōu pono?
PSA 30:10 Whakarongo, e Ihowā, tohungia hoki ahau; e Ihowā, ko koe hei āwhina mōku.”
PSA 30:11 Kua puta kē i a koe tāku tangi hei kanikani; kua wewete i tōku kākahu taratara, ā, whītikiria ana ahau e koe ki te koa;
PSA 30:12 hei mea e hīmene ai tōku korōria ki a koe, kore ake e wahangū. E Ihowā, e tōku Atua, ka whakawhetai ahau ki a koe ake ake.
PSA 31:1 Ki te tino kaiwhakatangi. He hīmene nā Rāwiri. E Ihowā, ko koe tāku e whakawhirinaki nei; kei whakamā ahau ake ake; whakaorangia ahau, he tika nei hoki koe.
PSA 31:2 Anga mai tōu taringa ki ahau; hohoro te whakaora i ahau. Kia ai koe hei kōhatu kaha mōku, hei whare tiaki mōku.
PSA 31:3 Ko koe hoki tōku kōhatu, tōku pā; nā, kia mahara ki tōu ingoa, ā, ārahina ahau, tohutohungia hoki ahau.
PSA 31:4 Kapohia ahau i roto i te kupenga i hunā e rātou mōku; ko koe hoki tōku kaha.
PSA 31:5 Tēnei tōku wairua te tukua atu nei e ahau ki tōu ringa; nāu ahau i hoko e Ihowā, e te Atua o te pono.
PSA 31:6 E kino ana ahau ki te hunga e whakaaro ana ki ngā mea tekateka noa; e whakawhirinaki ana hoki ahau ki a Ihowā.
PSA 31:7 Ka whakamanamana ahau, ka hari ki tōu atawhai; mōu i titiro ki tāku tangi; i mātau hoki ki tōku wairua i ngā wā o te hē;
PSA 31:8 kāhore ahau i kopia e koe ki roto ki te ringa o te hoariri; kua whakatūria e koe ōku waewae ki te wāhi nui.
PSA 31:9 Tohungia ahau, e Ihowā, kei te hē hoki ahau, pakoko kau tōku mata i te pōuri, tōku wairua me tōku kōpū.
PSA 31:10 Ka hemo nei hoki tōku ora i te tangi, me ōku tau i te auē; poto iho tōku kaha i tōku hē, kurupopo ana ōku iwi.
PSA 31:11 He tāwainga ahau nā ōku hoariri katoa; ko te tino mahi ia tēnā a ōku hoa noho tata, he mea wehi ahau nā ngā tāngata i mōhio ki ahau; ko te hunga i kite i ahau i waho, rere ana i ahau.
PSA 31:12 Kua warewaretia ahau me te tūpāpaku kua ngaro atu i te ngākau; kua rite ki te oko pakaru.
PSA 31:13 I rongo hoki ahau i te ngautuarā a te tini; i karapotia ahau e te wehi; i a rātou e rūnanga ana ki te hē mōku, i mea kia whakamatea ahau.
PSA 31:14 Ko ahau ia i whakawhirinaki ki a koe, e Ihowā; i mea, “Ko koe tōku Atua.”
PSA 31:15 Kei tōu ringa ōku tāima, whakaorangia ahau i ngā ringa o ōku hoariri, i te hunga e tūkino ana i ahau.
PSA 31:16 Kia whiti tōu mata ki tāu pononga; whakaorangia ahau, he mahi tohu hoki tāu.
PSA 31:17 Kei whakamā ahau, e Ihowā; kua karanga hoki ahau ki a koe; kia whakamā te hunga kino, kia takoto puku i te rēinga.
PSA 31:18 Whakamutua te kōrero a ngā ngutu teka, he kino nei ā rātou kōrero mō te tangata tika, nā tō rātou whakapehapeha hoki, nā tō rātou whakahīhī.
PSA 31:19 Anō te nui o tāu pai kua rongoātia nei e koe mō te hunga e wehi ana ki a koe; i mahia nei e koe mō te hunga e whakawhirinaki ana ki a koe i te aroaro o ngā tama a te tangata!
PSA 31:20 Ka hunā rātou e koe ki te wāhi ngaro i tōu aroaro i ngā rauhanga a te tangata; ka hunā rātou e koe ki roto ki te tēneti, kei taea e te ngangau a ngā arero.
PSA 31:21 Kia whakapaingia a Ihowā, mōna i mea kia mīharotia tāna mahi tohu ki ahau i te pā kaha.
PSA 31:22 I kī hoki ahau i tōku pōtatutatunga, “Kua motuhia mai ahau i mua i ōu kanohi.” Ahakoa rā i rongo koe ki tōku reo īnoi i tāku karangatanga ki a koe.
PSA 31:23 Arohaina a Ihowā, e tāna hunga tapu katoa; e tiakina ana e Ihowā te hunga pono, ā, he nui tāna utu ki te kaimahi whakapehapeha.
PSA 31:24 Kia māia, kia kaha ō koutou ngākau, e te hunga katoa e tūmanako ana ki a Ihowā.
PSA 32:1 Nā Rāwiri: he Makiri. Ka hari te tangata kua oti tāna hē te muru, tōna hara te hīpoki.
PSA 32:2 Ka hari te tangata kāhore nei e whakairia e Ihowā he hara ki a ia, ā, kāhore he hīanga i tōna wairua.
PSA 32:3 I ahau kīhai i kuihi, ngahengahe kau ōku iwi i tāku auētanga i te rā roa.
PSA 32:4 Nō tōu ringa i taimaha ki ahau i te ao, i te pō; kua whakaputaina kētia tōku mākūkūranga, ānō nā te maroketanga o te raumati. Hera
PSA 32:5 I whākina e ahau tōku hara ki a koe, kīhai hoki i huna i tōku kino; i mea ahau, “Ka whākina āku mahi tutū ki a Ihowā,” ā, murua ana e koe te kino o tōku hara. Hera
PSA 32:6 Mō konei ka īnoi ki a koe ngā tāngata tapu katoa i te wā e kitea ai koe; he pono ka ngawhā ngā wai nui, e kore e tata ki a ia.
PSA 32:7 Ko koe tōku piringa; māu ahau e whakaora i te pōuri, māu ahau e karapoti ki ngā waiata whakaora. Hera
PSA 32:8 Ka tohutohungia koe e ahau, ka whakaakona koe ki te ara e haere ai koe; mā tōku kanohi koe e ārahi.
PSA 32:9 Kei rite koutou ki te hōiho, ki te muera rānei, kāhore nei he mātauranga; he mea kuku nei ō rāua kauae ki te paraire, ki te mōkā hei pupuri mai; ki te kore hoki, e kore e tata ki a koe.
PSA 32:10 He tini ngā mea whakapōuri mō te tangata hara; ko te tangata ia e whakawhirinaki ana ki a Ihowā, ka karapotia e te atawhai.
PSA 32:11 Kia koa ki a Ihowā, whakamanamana, e te hunga tika; kia hari, hāmama, e te hunga ngākau tika katoa.
PSA 33:1 Kia hari ki a Ihowā, e te hunga tika; he mea ātaahua te whakamoemiti mā te hunga kore hē.
PSA 33:2 Whakamoemiti ki a Ihowā i runga i te hāpa; hīmene ki a ia i runga i te hātere kotahi tekau nei ngā aho.
PSA 33:3 Waiatatia ki a ia he waiata hou; kia tika te whakatangi, kia nui te reo.
PSA 33:4 Nō te mea he tika te kupu a Ihowā, ā, kei runga i te pono āna mahi katoa.
PSA 33:5 E paingia ana e ia te tika me te whakawā; kī tonu te whenua i te atawhai a Ihowā.
PSA 33:6 Nā te kupu a Ihowā ngā rangi i hanga; ko ngā mano katoa hoki o reira nā te hā o tōna māngai.
PSA 33:7 He mea huihui e ia ngā wai o te moana, ānō he pūranga; he mea whawhao e ia te rire ki ngā pākoro.
PSA 33:8 Kia wehi te whenua katoa ki a Ihowā; kia ohooho ngā tāngata katoa o te ao ki a ia.
PSA 33:9 I kī hoki ia, ā, kua oti; i whakahau, ā, tū tonu iho.
PSA 33:10 E whakatakā ana e Ihowā te whakaaro o ngā tauiwi; e whakakāhoretia ana e ia ngā meatanga a ngā iwi.
PSA 33:11 Ko te whakaaro o Ihowā, tū tonu ake ake; ko ngā meatanga a tōna ngākau kei tēnā whakatupuranga, kei tēnā whakatupuranga.
PSA 33:12 Ka hari te iwi nō rātou nei Atua a Ihowā, te iwi kua whiriwhiria e ia hei taonga tupu mōna.
PSA 33:13 E titiro iho ana a Ihowā i te rangi; e kite ana ia i ngā tama katoa a te tangata.
PSA 33:14 Kei tōna wāhi nohoanga ia e mātakitaki iho ana ki ngā tāngata katoa o te whenua.
PSA 33:15 Nāna i hanga ngā ngākau o rātou katoa, e mōhiotia ana e ia ā rātou mahi katoa.
PSA 33:16 E kore tētahi kīngi e ora i te nui o te ope, e kore e ora te mārohirohi i te nui o te kaha.
PSA 33:17 He mea teka te hōiho hei whakaora; ehara anō tōna kaha nui i te mea e mawhiti ai.
PSA 33:18 Nanā, kei runga i te hunga e wehi ana i a ia te kanohi o Ihowā, kei te hunga e tūmanako ana ki tāna mahi tohu;
PSA 33:19 hei whakaora i ō rātou wairua kei mate, hei mea i a rātou kia ora i te wā o te hemokai.
PSA 33:20 Kua tatari nei ō tātou wairua ki a Ihowā; ko ia tō tātou kaiāwhina, tō tātou whakangungu rākau.
PSA 33:21 Hari tonu tō tātou ngākau ki a ia; nō tātou hoki i whakawhirinaki ki tōna ingoa tapu.
PSA 33:22 E Ihowā, hei runga i a mātou tāu mahi tohu; kia rite hoki ki tā mātou tūmanako ki a koe.
PSA 34:1 Nā Rāwiri, i tōna āhua i rerekē rā i te aroaro o Apīmereke; nā peia ana ia, ā, haere ana. Ka whakapaingia e ahau a Ihowā i ngā wā katoa; he whakamoemiti tonu tā tōku māngai ki a ia.
PSA 34:2 Ka whakamanamana tōku wairua ki a Ihowā; ka rongo te hunga māhaki, ā, ka hari.
PSA 34:3 Kia whakanui tahi tātou i a Ihowā, kia whakateitei tahi hoki i tōna ingoa.
PSA 34:4 I rapu ahau i a Ihowā, ā, rongo mai ana ia ki ahau, whakaorangia ana ahau e ia i ōku wehi katoa.
PSA 34:5 I titiro rātou ki a ia, ā, kua mārama; ā, kāhore rawa he whakamā o ō rātou mata.
PSA 34:6 I karanga tēnei tangata iti, ā, whakarongo ana a Ihowā, whakaora ana i a ia i ōna whakapāwera katoa.
PSA 34:7 E noho ana te anahera a Ihowā i tētahi taha, i tētahi taha, o te hunga e wehi ana i a ia, ā, e whakaora ana i a rātou.
PSA 34:8 Whakamātauria, kia kite ai koutou i te pai o Ihowā; ka hari te tangata e whakawhirinaki ana ki a ia.
PSA 34:9 Kia wehi ki a Ihowā, e tōna hunga tapu; e kore hoki e hapa ngā tāngata e wehi ana i a ia.
PSA 34:10 E hapa ana ngā kūao raiona, e mate ana i te kai; ko te hunga ia e rapu ana ki a Ihowā, e kore e hapa i tētahi mea pai.
PSA 34:11 Haere mai, e ngā tamariki, whakarongo ki ahau; māku koutou e ako kia wehi ki a Ihowā.
PSA 34:12 Ko wai te tangata e hiahia ana ki te ora, e whai ana kia maha ngā rā, kia kite i te pai?
PSA 34:13 Tiakina tōu arero kei kino, ōu ngutu kei kōrero hīanga.
PSA 34:14 Mawehe atu i te kino, mahia te pai; rapua te āta noho, whāia hoki.
PSA 34:15 E tau ana ngā kanohi o Ihowā ki te hunga tika; me ōna taringa ki tā rātou karanga.
PSA 34:16 E hē ana te mata o Ihowā ki ngā kaimahi i te kino, hei hātepe i a rātou i te whenua kei maharatia.
PSA 34:17 I karanga te hunga tika, ā, i whakarongo a Ihowā, whakaorangia ana rātou e ia i ō rātou whakapāwera katoa.
PSA 34:18 E tata ana a Ihowā ki te hunga ngākau marū; ka whakaorangia anō e ia te hunga wairua iro.
PSA 34:19 He tini ngā mate o te tangata tika; otiia, e whakaorangia ana ia e Ihowā i roto i ērā katoa.
PSA 34:20 E tiakina ana e ia ōna wheua katoa; e kore tētahi e whati.
PSA 34:21 Ka mate i te kino te tangata hara, ā, ka hē te hunga e kino ana ki te tangata tika.
PSA 34:22 E hokona ana e Ihowā te wairua o āna pononga; e kore anō e hē tētahi o te hunga e whakawhirinaki ana ki a ia.
PSA 35:1 Nā Rāwiri. E ngana, e Ihowā, ki te hunga e tohe ana ki ahau; whawhaitia te hunga e whawhai nei ki ahau.
PSA 35:2 Kia mau ki te whakangungu rākau, ki te puapua; whakatika hei āwhina mōku.
PSA 35:3 Unuhia te tao, āraia te ara o te hunga e whai nei i ahau; kī mai ki tōku wairua, “Ko ahau tōu whakaoranga.”
PSA 35:4 Kia whakamā, kia numinumi te hunga e whai ana kia whakamatea ahau; kia whakahokia ki muri, kia whakapōauautia te hunga e whakatakoto ana i te kino mōku.
PSA 35:5 Kia rite rātou ki te pāpapa e pūhia ana e te hau; kia āia haeretia e te anahera a Ihowā.
PSA 35:6 Kia pōuri tō rātou ara, kia pāhekeheke; kia whāia rātou e te anahera a Ihowā.
PSA 35:7 Kāhore hoki he rawa i hunā ai e rātou te poka o tā rātou kupenga mōku; he mea keri takekore kia mate ai ahau.
PSA 35:8 Kia rokohanga pōauautia ia e te ngaromanga; kia mau anō ko ia i tāna kupenga i huna ai, kia taka ia ki taua tino ngaromanga.
PSA 35:9 Ā, ka koa tōku wairua ki a Ihowā, ka hari ki tāna whakaoranga.
PSA 35:10 Ka kī katoa ōku wheua, “E Ihowā, ko wai te rite mōu, mō te kaiwhakaora o te iti i te tangata e kaha ake ana i a ia, āe, o te iti, o te rawakore i tōna kaipāhua?”
PSA 35:11 Whakatika ana ngā kaiwhakapae teka; whakawākia ana ahau mō ngā mea kīhai nei ahau i mātau atu.
PSA 35:12 Utua ana e rātou tāku pai ki te kino, ā, whakatupu pani ana tōku wairua.
PSA 35:13 Tēnā ko ahau, i a rātou e mate ana, he kahu taratara tōku, waikauwere ana tōku wairua, kīhai i kai; ā, hoki mai ana tāku īnoi ki tōku uma.
PSA 35:14 Ko tōku āhua me te mea he hoa ia, he teina nōku; kūpapa noa iho ahau, ānō he tangata e tangi ana ki tōna whaea.
PSA 35:15 I tōku paheketanga ia koa ana rātou, huihui ana; huihui ana ngā tāngata kino noa iho hei hoariri mōku, kīhai anō ahau i mōhio, haehae ana rātou i ahau, kīhai hoki i mutu.
PSA 35:16 Rite tonu ki ngā kaiwhakakata o ngā hākari, tetēā ana ō rātou niho ki ahau.
PSA 35:17 E te Ariki, kia pēhea te roa o tāu titiro kau mai? Whakaorangia tōku wairua i ā rātou whakangaromanga, tāku e aroha nei, i ngā raiona.
PSA 35:18 Ka whakawhetai ahau ki a koe i roto i te whakaminenga nui, ka whakamoemiti ki a koe i roto i te iwi maha.
PSA 35:19 Kei hari pokanoa ki ahau ōku hoariri; kei whakakini te kanohi o te hunga e kino noa ana ki ahau.
PSA 35:20 Ehara hoki tā rātou i te kōrero mō te rangimārie; heoi kei te whakatakoto kupu tinihanga rātou mō te hunga āta noho o te whenua.
PSA 35:21 Inā, hāmama ana ō rātou māngai ki ahau, e kī ana, “Ha, ha, kua kite tō mātou kanohi!”
PSA 35:22 Kua kite koe, e Ihowā; kaua rā e wahangū, e te Ariki, kei matara i ahau.
PSA 35:23 Oho ake, e ara ki te whakarite i tōku whakawā, ki tāku tautohe, e tōku Atua, e tōku Ariki.
PSA 35:24 Kia rite ki tōu tika te whakarite mōku, e Ihowā, e tōku Atua: kei koa anō rātou ki ahau.
PSA 35:25 Kei mea rātou i roto i ō rātou ngākau, “Ha, ko tā mātou tēnā i pai ai.” Kei mea rātou, “Kua horomia ia e tātou.”
PSA 35:26 Kia whakamā, kia numinumi ngātahi, te hunga e koa ana ina hē ahau; kia whakakākahuria ki te whakamā, ki te numinumi, te hunga e whakakake ana ki ahau.
PSA 35:27 Kia hāmama i te hari, kia koa te hunga e pai ana ki tāku mahi tika; āe, kia mea tonu, “Kia whakanuia a Ihowā e whakapai nei ki te ora o tāna pononga.”
PSA 35:28 Ā, ka kōrerotia e tōku arero tāu mahi tika, me te whakamoemiti ki a koe i te rā roa.
PSA 36:1 Ki te tino kaiwhakatangi. Nā te pononga a Ihowā, nā Rāwiri. E mea ana te mahi kino a te tangata hara i roto i tōku ngākau, kāhore he wehi ki te Atua i mua i ōna kanohi.
PSA 36:2 E whakapai ana hoki ōna kanohi ake ki a ia anō, e kore e kitea tōna hara, e kore e kinongia.
PSA 36:3 He kino ngā kupu a tōna māngai, he rauhanga hoki, kua mahue i a ia te mahara, te mahi i te pai.
PSA 36:4 He mahi nanakia tāna e whakaaro ai i runga i tōna moenga; ehara i te pai te ara e tūria ana e ia, kāhore ōna whakarihariha ki te kino.
PSA 36:5 Kei ngā rangi, e Ihowā, tāu mahi tohu; tutuki noa atu tōu pono ki ngā kapua.
PSA 36:6 Rite tonu tōu tika ki ngā maunga o te Atua; he rire nui āu whakaritenga; ko koe, e Ihowā, te kaiwhakaora i te tangata, i te kararehe.
PSA 36:7 Anō te pai o tōu aroha, e te Atua; ka okioki ngā tama a te tangata i raro i te taumarumarutanga iho o ōu pākau.
PSA 36:8 Ka mākona rātou i ngā mea mōmona o tōu whare; ka whakainumia anō e koe ki te awa o āu mea whakahari.
PSA 36:9 Kei a koe hoki te puna o te ora; mā tōu mārama ka kite ai mātou i te mārama.
PSA 36:10 Kia roa tōu aroha ki te hunga e mātau ana ki a koe, tōu tika hoki ki te hunga ngākau tika.
PSA 36:11 Kei puta mai ki ahau te waewae whakapakari; kei āia atu ahau e te ringa o te hunga hara.
PSA 36:12 Hinga iho i reira ngā kaimahi i te kino; kua turakina iho, tē āhei te ara ake.
PSA 37:1 Nā Rāwiri. Kaua e mamae ki te hunga kino, kaua e hae ki ngā kaimahi i te hē,
PSA 37:2 nō te mea ka hohoro rātou te kotia, te pērātia me te tarutaru, ā, ka memenge me he otaota hou.
PSA 37:3 Whakawhirinaki ki a Ihowā, mahia te pai; e noho ki te whenua, ā, e aru i muri i te pono.
PSA 37:4 Whakaahuareka ki a Ihowā, ā, ka hōmai e ia ki a koe tā tōu ngākau i hiahia ai.
PSA 37:5 Tukua tōu ara ki a Ihowā; whakawhirinaki hoki ki a ia, ā, māna e mahi.
PSA 37:6 Māna hoki e whakaputa tōu tika, ānō he mārama, ōu ritenga me te mea ko te rā e tū ana.
PSA 37:7 Okioki ki a Ihowā, tatari mārie ki a ia; kei mamae ki te tangata e tere ana i tōna ara, ki te tangata e taea ana e ia ngā whakaaro kino.
PSA 37:8 Kāti te riri, whakarērea hoki te ārita. Kei mamae koe, kei tākina kia mahi i te kino.
PSA 37:9 Nō te mea ka hātepea atu te hunga kino; ko te hunga ia e tatari ana ki a Ihowā, ka riro i a rātou te whenua.
PSA 37:10 Kia potopoto ake nei hoki, ā, ka kore noa iho te hunga kino; āe rā, ka āta tirohia e koe tōna wāhi, ā, kore kau noa iho ia.
PSA 37:11 Nā, ka riro te whenua i te hunga māhaki; ā, ka hari rātou i te roa o te āta noho.
PSA 37:12 E whakangārahu ana te tangata kino mō te tangata tika; pakiri ana ōna niho ki a ia.
PSA 37:13 Ka kata te Ariki ki a ia, nō te mea ka kite ia e tata ana tōna rā.
PSA 37:14 Kua unuhia te hoari e te hunga kino, kua piko tā rātou kōpere, hei turaki i te ware, i te rawakore, hei kōhuru i te hunga e tika ana, i te ara.
PSA 37:15 Ka tapoko tā rātou hoari ki ō rātou ngākau; ā, ka whatia ā rātou kōpere.
PSA 37:16 Engari te wāhi iti a te tangata tika i ngā taonga o ngā tāngata kino tokomaha.
PSA 37:17 Ka whatia hoki ngā ringa o te hunga kino; ū tonu ia i a Ihowā te hunga tika.
PSA 37:18 E mātau ana a Ihowā ki ngā rā o te hunga tika; ā, ka pūmau tō rātou kāinga ake ake.
PSA 37:19 E kore rātou e whakamā i te wā o te hē, ka mākona anō rātou i ngā rā o te hemokai.
PSA 37:20 Ka ngaro ia te hunga kino, ā, ka rite ngā hoariri o Ihowā ki te mōmona o te tarutaru; ka mahea atu rātou – ka mahea atu me he paowa.
PSA 37:21 E tango ana te tangata kino i te taonga tārewa, kāhore hoki āna utu; ko te tangata tika ia he aroha tōna, he hōmai.
PSA 37:22 Ka riro hoki te whenua i āna e manaaki ai; ka hātepea anō āna e kanga ai.
PSA 37:23 Ka ū i a Ihowā ngā hīkoinga o te tangata tika; e paingia ana hoki e ia tōna ara.
PSA 37:24 Ahakoa hinga, e kore e tino takoto rawa; ka ū hoki ia i te ringa o Ihowā.
PSA 37:25 He tamariki ahau i mua, ā, kua koroheke nei, heoi, kāhore ahau i kite i te tangata tika e whakarērea ana, i ōna uri hoki e pīnono taro ana.
PSA 37:26 I te rā roa he atawhai tonu tāna, he ohaoha; ka manaakitia hoki ōna uri.
PSA 37:27 Whakarērea te kino, mahia te pai, ka noho tonu ai.
PSA 37:28 E aroha ana hoki a Ihowā ki te ritenga pai; e kore anō e whakarere i tāna hunga tapu. E tiakina tonutia ana rātou ake ake; ka hātepea atu ia ngā uri o te hunga kino.
PSA 37:29 Ka riro te whenua i te hunga tika, ka nohoia hoki a reira e rātou ake ake.
PSA 37:30 He kupu mōhio tā te māngai o te tangata tika; he ritenga pai tā tōna arero e kōrero ai.
PSA 37:31 Kei tōna ngākau te ture a tōna Atua; e kore e paheke tētahi o ōna hīkoinga.
PSA 37:32 E tau ana te titiro a te tangata kino ki te tangata tika, ā, e whai ana kia whakamatea ia.
PSA 37:33 E kore a Ihowā e whakarere i a ia ki tōna ringa; e kore anō ia e whakatau hē ki a ia ina whakawākia.
PSA 37:34 Tāria a Ihowā, kia mau ki tāna ara, ā, ka whakanuia koe e ia, ka whakawhiwhia hoki ki te whenua; e hātepea atu te hunga kino, ka kite koe.
PSA 37:35 I kite ahau i te tangata kino e kake ana, e tautorotoro ana me te rākau matomato i tōna oneone tupu.
PSA 37:36 Heoi, pahure noa ake tētahi, ā, kore kau noa iho; āe, i rapua ia e ahau, ā, kīhai i kitea.
PSA 37:37 Waitohutia te tangata tika, tirohia iho te tangata kore hē; nō te mea he mārie te tukunga iho ki taua tangata.
PSA 37:38 Tēnā ko te hunga kino, ka ngaro ngātahi atu rātou; te tukunga iho ki te hunga kino, ka hātepea atu rātou.
PSA 37:39 Nā Ihowā ia te whakaoranga o te hunga tika; ko ia tō rātou pā kaha i te wā o te hē.
PSA 37:40 Mā Ihowā rātou e āwhina, ko ia hoki hei tauārai mō rātou; ko ia hei tauārai mō rātou i te hunga kino, ka whakaorangia rātou e ia, mō rātou ka whakawhirinaki ki a ia.
PSA 38:1 He hīmene nā Rāwiri, hei whakamahara. E Ihowā, kaua e whakatūpehupehu mai ki ahau ina riri koe, kaua anō ahau e pākia ina ārita koe.
PSA 38:2 Titi tonu hoki āu pere ki ahau; kaha rawa te pēhi a tōu ringa i ahau.
PSA 38:3 Kāhore he wāhi ora o ōku kikokiko, nā tōu riri hoki; kāhore anō e āta takoto ōku wheua, nōku i hara nei.
PSA 38:4 Kua taupokina iho hoki tōku mātenga e ōku kino; ānō he pīkaunga taimaha e pēhi rawa ana i ahau.
PSA 38:5 E piro ana ōku whiunga, kua pirau i tāku mahi pōauau.
PSA 38:6 E whakawiria ana ahau, piko rawa; e tangi haere ana i te roa o te rā.
PSA 38:7 Kei te tahuna hoki tōku hope, kapi tonu; kāhore hoki he wāhi ora o ōku kikokiko.
PSA 38:8 Kua kore ōku kaha, marū rawa ahau; hāmama ana tāku auē i te mamae o tōku ngākau.
PSA 38:9 E te Ariki, kei tōu aroaro ōku hiahia katoa; kāhore hoki e ngaro i a koe tāku auē.
PSA 38:10 Kihakiha kau tōku ngākau, kua hemo tōku kaha; me te mārama o ōku kanohi, kua kore hoki ēnā ōku.
PSA 38:11 Matara noa atu i tōku mate te tūranga mai o ngā tāngata i aroha mai ki ahau, o ōku hoa hoki; i tawhiti anō ōku whanaunga e tū kē mai ana.
PSA 38:12 E whakatakoto māhanga ana mōku te hunga e whai ana i ahau kia whakamatea; he nanakia anō ngā kupu a te hunga e rapu ana i te hē mōku; he whakaaro tinihanga anō ā rātou ā pau noa te rā.
PSA 38:13 Ko ahau ia, i rite ki te turi, kīhai i rongo, ki te tangata wahangū, kāhore nei e hamumu tōna māngai.
PSA 38:14 Nā, rite tonu ahau ki te tangata kāhore nei e rongo, kāhore nei he whakatūpehupehu i tōna māngai.
PSA 38:15 E tūmanako nei hoki ahau ki a koe, e Ihowā; ka whakahoki kupu mai anō koe, e te Ariki, e tōku Atua.
PSA 38:16 I mea hoki ahau, “Kei koa mai rātou ki ahau; ka paheke tōku waewae, ka whakahīhī rātou ki ahau.”
PSA 38:17 Ko ahau hoki, meāke kopa, ā, kei mua tonu i ahau tōku pōuri.
PSA 38:18 Ka whāki hoki ahau i tōku kino, ka pōuri mō tōku hara.
PSA 38:19 Ko ōku hoariri ia hauhau tonu, kaha tonu; kua tokomaha anō te hunga e kino noa ana ki ahau.
PSA 38:20 He hoariri anō ki ahau te hunga e utu ana i te pai ki te kino; mōku e whai ana i te pai.
PSA 38:21 Kaua ahau e whakarērea, e Ihowā, e tōku Atua; kei mamao atu koe i ahau.
PSA 38:22 Hohoro ki te āwhina i ahau, e te Ariki, e tōku whakaoranga.
PSA 39:1 Ki te tino kaiwhakatangi: ki a Ierutunu. He hīmene nā Rāwiri. I mea ahau, “Ka āta whakaaro ahau ki ōku ara, kei hara tōku arero; ka tiakina tōku māngai, paraire rawa, i te mea kei tōku aroaro te tangata kino.
PSA 39:2 I whakamoroki ahau, i wahangū, kīhai i puaki tāku kupu, ahakoa pai; ā, ka oho tōku mamae.
PSA 39:3 Werawera ana tōku ngākau i roto i ahau; i ahau e whakaaro ana ka kā te ahi, ā, ka kōrero tōku arero:
PSA 39:4 “E Ihowā, meinga ahau kia mātau ki tōku mutunga, ki te maha hoki o ōku rā, e hia rānei; kia mātau ai ahau he mea memeha noa ahau.
PSA 39:5 Nanā, he whānuitanga ringa ōku rā kua hōmai nei e koe; he kāhore noa iho anō ōku tau i tōu aroaro. Ahakoa ū noa te tū o ngā tāngata katoa, he mea memeha kau. Hera
PSA 39:6 He pono kei roto i te ātārangi te tangata e kōpikopiko noa ana; he pono e ohorere noa ana rātou; e āmi ana ia i te taonga, ā, kāhore e mātau mā wai rānei e kohi.
PSA 39:7 “Nā, he aha tāku e tatari atu nei, e te Ariki? Ko koe tāku e tūmanako ai.
PSA 39:8 Whakaorangia ahau i āku mahi tutū katoa; kaua ahau e waiho hei tāwainga mā te wairangi.
PSA 39:9 Wahangū ana ahau; kīhai i kuihi tōku māngai; he meatanga hoki tēnei nāu.
PSA 39:10 Nekehia atu i ahau tāu whiu; ka ngaro ahau i te pakinga a tōu ringa.
PSA 39:11 “Ka pākia e koe te tangata, ka whakatūpehupehutia mō te hara, ka meinga e koe tōna ātaahua kia memeha, kia pērā me te pūrehurehu. He pono he mea teka noa ngā tāngata katoa. Hera
PSA 39:12 “Whakarongo ki tāku īnoi e Ihowā, kia tītaha mai tōu taringa ki tāku karanga; kei wahangū koe ki ōku roimata. He heke hoki ahau nāu, he manene, he pērā me ōku mātua katoa.
PSA 39:13 Kia āta hanga ki ahau, kia tā ai tōku manawa, keiwhā haere atu ahau, i konei, ā, ka kāhore noa iho.”
PSA 40:1 Ki te tino kaiwhakatangi. He hīmene nā Rāwiri. I tatari mārie ahau ki a Ihowā; ā, anga ana ia ki ahau, whakarongo ana ki tāku karanga.
PSA 40:2 Nā, kei te tango ake ia i ahau i te poka whakamataku, i te paru tāoruoru; kei te whakatū i ōku waewae ki runga ki te kōhatu, kei te whakaū i ōku hīkoinga.
PSA 40:3 Ā, hōmai ana e ia he waiata hou ki tōku māngai, he whakamoemiti ki tō tātou Atua. He tokomaha e kite, ā, ka wehi, ka whakawhirinaki ki a Ihowā.
PSA 40:4 Ka hari te tangata kua waiho nei e ia a Ihowā hei whakawhirinakitanga mōna; ā, kāhore e tahuri ki te hunga whakakake, ki te hunga hoki e peka ana ki te teka.
PSA 40:5 E Ihowā, e tōku Atua, he tini āu mahi whakamīharo i mahia e koe, me ōu whakaaro ki a mātou. E kore e taea te kōrero whakatepe atu ki a koe; me i mea ahau kia whakakitea, kia kōrerotia, e kore e taea te tatau.
PSA 40:6 Kīhai i matenuitia e koe te patunga tapu, me te whakahere; pokaia ana e koe ōku taringa. Kīhai koe i mea mai ki te tahunga tinana, ki te whakahere hara.
PSA 40:7 Nā, ko tāku meatanga atu, “Nā, kua tae mai ahau; kei roto i te pukapuka te tuhituhi mōku.
PSA 40:8 Ko taku pai ko te mea i tāu e pai ai, e tōku Atua; āe rā, kei tōku ngākau tāu ture.”
PSA 40:9 Kua kauwhautia e ahau te tika i roto i te whakaminenga nui; nanā, kīhai i kopia ōku ngutu, tēnā koe te mātau ana, e Ihowā.
PSA 40:10 Kīhai i hunā e ahau tōu tika i roto i tōku ngākau; kua kōrerotia e ahau tōu pono me tāu whakaoranga; kīhai, i hunā e ahau tōu aroha me tōu pono i te whakaminenga nui.
PSA 40:11 Kei kaiponuhia tōu aroha ki ahau, e Ihowā; mā tōu atawhai me tōu pono ahau e tiaki i ngā wā katoa.
PSA 40:12 Tā te mea kua karapotia ahau e ngā kino e kore e taea te tatau; mau pū ahau i ōku kino, tē āhei te titiro ake; he tini kē i ngā makawe o tōku mātenga; ā, hemo iho tōku ngākau.
PSA 40:13 Kia pai, e Ihowā, ki te whakaora i ahau; e Ihowā, hohoro ki te āwhina i ahau.
PSA 40:14 Kia whakamā, kia pororaru ngātahi te hunga e rapu ana i tōku wairua kia whakamatea; kia whakahokia ki muri, kia whakamā te hunga e hiahia ana kia hē ahau.
PSA 40:15 Kia hunā, hei utu mō tō rātou whakamā te hunga e mea mai ana ki ahau, “Ha, ha!”
PSA 40:16 Kia hari, kia koa ki a koe te hunga katoa e rapu ana i a koe; kia mea tonu te hunga e pai ana ki tāu whakaoranga, “Kia whakanuia a Ihowā.”
PSA 40:17 Ko ahau ia, he iti, he rawakore; heoi e whakaaro ana te Ariki ki ahau. Ko koe tōku āwhina, tōku kaiwhakaora; kaua rā e whakaroa, e tōku Atua.
PSA 41:1 Ki te tino kaiwhakatangi. He hīmene nā Rāwiri. Ka hari te tangata e whakaaro ana ki te rawakore; e whakaorangia ia e Ihowā i te rā o te hē.
PSA 41:2 Mā Ihowā ia e tiaki, e whakaora; ka whakaharitia ia i runga i te whenua. E kore anō e tukua e koe ki ngā hiahia o ōna hoariri.
PSA 41:3 Mā Ihowā ia e whakakaha, i a ia e whakaruhi ana i runga i te moenga: māu anō e whakapai katoa tōna moenga i a ia e mate ana.
PSA 41:4 I mea ahau, “E Ihowā, tohungia ahau; rongoātia tōku wairua; kua hara hoki ahau ki a koe.”
PSA 41:5 He kino te kōrero a ōku hoariri mōku, e mea ana, “Āhea rānei ia mate ai, pirau ai tōna ingoa?”
PSA 41:6 Ā, ki te haere mai ia kia kite i ahau, ka kōrero horihori ia; e āmi ana tōna ngākau i te kino māna; i tōna putanga ki waho, kōrerotia ana e ia.
PSA 41:7 E kōmuhumuhu ana mōku te hunga katoa e kino ana ki ahau; e whakatakoto ana i te kino mōku.
PSA 41:8 E ai tā rātou, “E piri ana te mate kino ki a ia; ā, ka takoto nei ia, heoi anō tōna aranga ake.”
PSA 41:9 Āe, ko tōku hoa ake anō, i whakawhirinaki ai ahau, i kai nei i tāku taro, kua hiki ake tōna rekereke ki ahau.
PSA 41:10 Ko koe ia, e Ihowā, kia aroha ki ahau; ā, whakaarahia ahau, kia utua ai rātou e ahau.
PSA 41:11 Nā konei ahau i mātau ai e pai ana koe ki ahau, nō te mea kāhore tōku hoariri e whakamanamana ki ahau.
PSA 41:12 Ko ahau ia, ko koe e whakamau ake ana i ahau i runga i tōku ngākau tapatahi; e whakatū ake ana hoki i ahau ki tōu aroaro ake tonu atu.
PSA 41:13 Kia whakapaingia a Ihowā, te Atua o Īharaira inamata riro anō, ake tonu atu anō hoki. Āmine, āe Āmine.
PSA 42:1 Ki te tino kaiwhakatangi. He Makiri, mā ngā tama a Koraha. Rite tonu ki te hāta e kihakiha nei ki ngā manga wai tōku ngākau e kihakiha nei ki a koe, e te Atua.
PSA 42:2 E hiainu ana tōku wairua ki te Atua, ki te Atua ora; āhea ahau tae ai, puta ai ki te aroaro o te Atua?
PSA 42:3 Ko ōku roimata tāku kai i te ao, i te pō, i a rātou e mea tonu mai nei ki ahau, “Kei hea tōu Atua?”
PSA 42:4 Ka mahara ahau ki ēnei mea; me te wai tōku ngākau e maringi ana i roto i ahau: i haere hoki ahau i roto i te huihui, i haere tahi mātou ki te whare o te Atua, he hari te reo, he whakamoemiti, me te huihui e mea hākari ana.
PSA 42:5 He aha koe i piko ai, e tōku wairua? I ohorere ai i roto i ahau? Tūmanako ki te Atua; tērā anō ahau e whakawhetai ki a ia, mō te ora o tōna mata,
PSA 42:6 e tōku Atua. Kua piko tōku wairua i roto i ahau; koia ahau ka mahara ai ki a koe i te whenua o Horano, o ngā Heremoni, i Maunga Mitara.
PSA 42:7 Rarā ana tētahi rire ki tētahi rire i te haruru o āu āwhiowhio wai; tika ana āu ngaru katoa me āu tūātea i runga i ahau.
PSA 42:8 Ahakoa rā e whakahaua mai anō e Ihowā tōna atawhai i te awatea; ā, he waiata tāku ki a ia i te pō, he īnoi ki te Atua o tōku ora.
PSA 42:9 Ka mea ahau ki te Atua, “E tōku kōhatu, he aha koe i wareware ai ki ahau? He aha ahau ka haere pōuri ai i te tūkino a te hoariri?”
PSA 42:10 Ānō he hoari i roto i ōku wheua te tāwai a ōku hoariri; i a rātou e mea mai nei ki ahau i ngā rā katoa, “Kei hea tōu Atua?”
PSA 42:11 He aha koe i piko ai, e tōku wairua? He aha koe i ohorere ai i roto i ahau? Tūmanako ki te Atua; tērā anō ahau e whakawhetai ki a ia, ko te ora nei ia o tōku mata, ko tōku Atua.
PSA 43:1 E te Atua, whakaritea tāku whakawā, whakatikaia āku kōrero ki te iwi atuakore; whakaorangia ahau i te tangata tinihanga e mahi nei i te hē.
PSA 43:2 Ko koe hoki te Atua o tōku kaha; he aha ahau ka pangā nei e koe? He aha ahau ka haere pōuri ai i te tūkino a te hoariri?
PSA 43:3 Tukua mai tōu mārama me tōu pono hei ārahi i ahau; hei kawe i ahau ki tōu maunga tapu, ki ōu tapenākara.
PSA 43:4 Ā, ka haere ahau ki te āta a te Atua, ki te Atua, ki tōku hari nui; āe, ka whakamoemiti ki a koe, e te Atua, e tōku Atua, i runga i te hāpa.
PSA 43:5 He aha koe i piko ai, e tōku wairua? He aha koe i ohorere ai i roto i ahau? Tūmanako ki te Atua; tērā anō ahau e whakawhetai ki a ia, ko te ora nei ia o tōku mata, ko tōku Atua.
PSA 44:1 Ki te tino kaiwhakatangi, mā ngā tama a Koraha. He Makiri. E te Atua, kua rongo ō mātou taringa, kua kōrerotia ki a mātou e ō mātou mātua, ngā mahi i mahia e koe i ō rātou rā, i ngā rā ō mua:
PSA 44:2 nāu ngā tauiwi i pana ki tōu ringa, nāu rātou i whakatō; nāu ngā iwi i whiu, ā, whakamararatia ana rātou.
PSA 44:3 Ehara hoki i te mea, nā tā rātou hoari i whiwhi ai rātou ki te whenua, ehara tō rātou tākakau i te mea i ora ai rātou; engari nā tōu matau, nā tōu tākakau hoki, nā te mārama anō o tōu mata, he pai hoki nōu ki a rātou.
PSA 44:4 E te Atua, ko koe tōku Kīngi; whakahaua he whakaora mō Hākopa.
PSA 44:5 Māu ka turaki ai mātou i ō mātou hoariri; mā tōu ingoa ka takahia ai e mātou te hunga e whakatika ana ki a mātou.
PSA 44:6 E kore hoki ahau e whakawhirinaki ki tāku kōpere; e kore anō tāku hoari e whakaora i ahau.
PSA 44:7 Nāu hoki mātou i ora ai i ō mātou hoariri; nāu anō i whakamā ai te hunga i kino ki a mātou.
PSA 44:8 Ko te Atua tā mātou e whakamanamana ai i te roa o te rā; ka whakamoemiti anō mātou ki tōu ingoa ake ake. Hera
PSA 44:9 Otirā, kua pangā nei mātou e koe, kua meinga kia whakamā; kāhore hoki koe kia haere tahi me ā mātou taua.
PSA 44:10 Kua meinga mātou kia hoki whakamuri mai i te hoariri; kei te pāhua anō i ētahi mā rātou te hunga e kino ana ki a mātou.
PSA 44:11 Kua hoatu mātou e koe, ānō he hipi e kainga ana; kua marara ki roto ki ngā tauiwi.
PSA 44:12 E hokona ana e koe tāu iwi, ā, hore he utu; kāhore hoki koe e whiwhi rawa i te utu mō rātou.
PSA 44:13 E meinga ana mātou e koe hei tāwainga mā ō mātou hoa kāinga; hei whakahāweatanga, hei whakakatanga mai mā te hunga i tētahi taha, i tētahi taha o mātou.
PSA 44:14 E meinga ana mātou e koe hei whakatauki mā ngā tauiwi; hei rurutanga mātenga mā ngā iwi.
PSA 44:15 Kei mua tonu i ahau tōku whakamā; kua taupokina ahau e te pāwera o tōku mata;
PSA 44:16 i te reo o te kaitāwai, o te kaikohukohu; i te hoariri, i te kairapu utu.
PSA 44:17 Kua pā katoa tēnei ki a mātou; heoi kāhore mātou i wareware ki a koe, kīhai anō i teka ki tāu kawenata.
PSA 44:18 Kāhore tō mātou ngākau i tahuri whakamuri; kīhai anō ō mātou hīkoinga i peka kē i tāu ara.
PSA 44:19 I marū ai mātou i a koe i te wāhi o ngā tarakona; ā, taupoki rawa ki te ātārangi o te mate.
PSA 44:20 Mehemea kua wareware mātou ki te ingoa o tō mātou Atua, kua totoro rānei ō mātou ringa ki te atua kē;
PSA 44:21 e kore rānei tēnei e āta tirohia e te Atua? E mātau ana hoki ia ki ngā mea ngaro o te ngākau.
PSA 44:22 Mōu nei hoki mātou i patua ai i te rā roa nei; kīia iho mātou he hipi e patua ana.
PSA 44:23 E ara, he aha koe ka moe ai, e te Ariki? Whakatika, kaua mātou e pangā tonutia.
PSA 44:24 He aha koe ka huna ai i tōu mata? Ka wareware ai ki tō mātou mamae, ki tō mātou tūkinotanga?
PSA 44:25 Kua piko nei hoki tō mātou wairua ki raro ki te puehu; piri rawa tō mātou kōpū ki te whenua.
PSA 44:26 E ara, hei āwhina i a mātou; kia mahara ki tōu aroha, ā, hokona mātou.
PSA 45:1 Ki te tino kaiwhakatangi. He Hohanimi mā ngā tama a Koraha. He Makiri, he waiata aroha. E pupuke ake ana te mea pai i roto i tōku ngākau; ka kōrerotia e ahau āku i tito ai mō te kīngi; he pene tōku arero nā te kaituhituhi hohoro.
PSA 45:2 Engari koe he ātaahua i ngā tama a te tangata; kua ringihia ōu ngutu ki te āhuareka; nā reira i manaakitia ai koe e te Atua ake ake.
PSA 45:3 Whītikiria tāu hoari ki tōu hūwhā, e te Nui Rawa, tōu korōria me tōu hōnore.
PSA 45:4 Aratakina hoki tōu hōiho i runga i tōu hōnore, i te kaha, hei mea hoki mō te pono, mō te māhaki, mō te tika, ā, mā tōu matau koe e whakaako ki ngā mea whakamataku.
PSA 45:5 He koi āu pere; ka hinga ngā iwi ki raro i a koe; kei roto rātou i te ngākau o ngā hoariri o te kīngi.
PSA 45:6 He pūmau, e te Atua, tōu torōna ake ake; he hēpeta tika te hēpeta o tōu kīngitanga.
PSA 45:7 Kua aroha koe ki te tika, kua kino ki te hara; nā reira, nui atu i tō ōu hoa te whakawahinga a te Atua, a tōu Atua i a koe ki te hinu o te hari.
PSA 45:8 Ko tōu kākahu katoa he kakara maira, he aroe, he kahia. Ko ngā mea aho, whakatangitangi o ngā whare rei nāna koe i whakaahuareka.
PSA 45:9 Kei roto i āu wāhine hōnore ngā tamāhine kīngi; kei tōu matau te kuīni e tū ana, nō Ōpira te kōura.
PSA 45:10 Whakarongo, e kō, titiro, tahuri iho tōu taringa; ā, kia wareware koe ki tōu iwi, ki te whare anō o tōu pāpā.
PSA 45:11 Pēnei ka matenuitia e te kīngi tōu ātaahua; ko ia hoki tōu Ariki; ā, me koropiko ki a ia.
PSA 45:12 Ko reira anō te tamāhine o Tāira me te ohaoha; ka whai anō ngā tāngata taonga o te iwi kia manakohia e koe.
PSA 45:13 Kei roto te tamāhine a te kīngi, he korōria kau, he mea whakairo ki te kōura tōna kākahu.
PSA 45:14 He mea whakapaipai ki te ngira tōna kākahu e kawea ai ia ki te kīngi; ka ārahina ki a koe ngā wāhina, ōna takahoa e whai ana i a ia.
PSA 45:15 He hari, he koa ina kawea mai rātou; ka tomo ki te whare o te kīngi.
PSA 45:16 Ko āu tamariki hei whakakapi mō ōu mātua; ka meinga anō rātou e koe hei kāwana mō te whenua katoa.
PSA 45:17 Ka meinga e ahau tōu ingoa kia maharatia e ngā whakatupuranga katoa; e whakamoemititia ai koe e ngā iwi ā ake ake.
PSA 46:1 Ki te tino kaiwhakatangi, mā ngā tama a Koraha. He waiata Arāmoto. Ko te Atua tō tātou piringa, tō tātou kaha; he kaiāwhina e tino tata ana i ngā wā o te hē.
PSA 46:2 Nā reira kore ake tō tātou wehi, ahakoa nekehia te whenua, ahakoa kāhakina ngā maunga ki waenga moana;
PSA 46:3 ahakoa rarā, taupatupatu noa ōna wai, ahakoa wiri ngā maunga i tōna huamo. Hera
PSA 46:4 He awa tēnā ko ōna manga hei whakahari i te pā o te Atua, i te wāhi tapu o ngā tapenākara o te Runga Rawa.
PSA 46:5 Kei waenganui ōna te Atua, e kore ia e whakakorikoria; mā te Atua ia e āwhina i te putanga anō o te ata.
PSA 46:6 I nanā ngā tauiwi, i whakakorikoria ngā rangatiratanga; puaki ana tōna reo, rewa ana te whenua.
PSA 46:7 Kei a tātou a Ihowā o ngā mano, ko te Atua o Hākopa tō tātou piringa. Hera
PSA 46:8 Haere mai, tirohia ngā mahi a Ihowā, ngā whakangaromanga i whakaputaina e ia ki te whenua.
PSA 46:9 E whakamutua ana e ia ngā whāinga ā te pito rā anō o te whenua; whati ana i a ia te kōpere, poro pū te tao, tahuna ake e ia te hāriata ki te kāpura.
PSA 46:10 “Kia āta noho, ā, kia mātau ko ahau te Atua; e whakanuia ahau i waenganui i ngā tauiwi, e whakanuia ahau i te whenua.”
PSA 46:11 Kei a tātou a Ihowā o ngā mano; ko te Atua o Hākopa tō tātou piringa. Hera
PSA 47:1 Ki te tino kaiwhakatangi. He hīmene mā ngā tama a Koraha. Pākia ō koutou ringa, e ngā iwi katoa; hāmama ki te Atua, kia hari te reo.
PSA 47:2 Nō te mea he wehi a Ihowā, te Runga Rawa, he kīngi nui ia nō te whenua katoa.
PSA 47:3 Māna e riro ai ngā iwi ki raro i a tātou, me ngā tautāngata ki raro ki ō tātou waewae.
PSA 47:4 Māna e whiriwhiri tō tātou nohoanga mō tātou, te mea pai rawa o Hākopa, o tāna i aroha ai. Hera
PSA 47:5 Kua kake atu te Atua i roto i te hāmama, a Ihowā i roto i te tangi o te tētere.
PSA 47:6 Hīmene ki te Atua, hīmene atu; hīmene ki tō tātou Kīngi, hīmene atu.
PSA 47:7 Ko te Atua hoki te Kīngi o te whenua katoa; hīmene atu i runga i te mōhio.
PSA 47:8 Ko te Atua te Kīngi o ngā tauiwi; e noho ana te Atua i runga i te torōna o tōna tapu.
PSA 47:9 Kua huihui ngā rangatira o ngā iwi, hei iwi mō te Atua o Āperahama. Nā te Atua hoki ngā whakangungu rākau o te whenua; kua whakanuia rawatia ia.
PSA 48:1 He waiata, he hīmene mā ngā tama a Koraha. He nui a Ihowā, kia nui hoki te whakamoemiti ki a ia i te pā o tō tātou Atua, i te maunga o tōna tapu;
PSA 48:2 ātaahua ana te tairanga o Maunga Hiona, ko tā te ao katoa e koa ai; kei te taha ki te raki te pā o te Kīngi nui.
PSA 48:3 E mātauria ana te Atua i roto i ōna whare papai hei piringa.
PSA 48:4 Nā, huihui tahi mai ana ngā kīngi, haere tahi atu ana rātou.
PSA 48:5 I kite rātou, mīharo iho; raruraru ana, hohoro tonu atu.
PSA 48:6 Pā ana te wehi ki a rātou i reira, te mamae, ānō he wahine e whānau ana.
PSA 48:7 E wāhia ana e koe ngā kaipuke o Tarahihi ki te marangai.
PSA 48:8 Rite tonu ki tā mātou i rongo ai, tā mātou i kite ai i roto i te pā o Ihowā o ngā mano, i te pā o tō tātou Atua; mā te Atua e whakapūmau ake ake. Hera
PSA 48:9 I whakaaroaro mātou ki tōu atawhai, e te Atua, i waenganui o tōu temepara.
PSA 48:10 E te Atua, rite tahi ki tōu ingoa te whakamoemiti mōu, tae noa atu ki ngā pito o te whenua; kī tonu tōu matau i te tika.
PSA 48:11 Kia hari a Maunga Hiona, kia koa ngā tamāhine a Hūrā i āu whakaritenga.
PSA 48:12 Taiāwhiotia a Hiona, haere, ā kōpiko noa mai; taua ōna pourewa,
PSA 48:13 maharatia ōna pekerangi, tirohia ōna whare papai; hei kōrerotanga mā koutou ki ēnei ake whakatupuranga.
PSA 48:14 Ko tēnei Atua hoki te Atua mō tātou ake ake. Ko ia hei kaiārahi i a tātou ā mate noa.
PSA 49:1 Ki te tino kaiwhakatangi. He hīmene mā ngā tama a Koraha. Whakarongo ki tēnei, e ngā iwi katoa; tahuri mai ō koutou taringa, e ngā tāngata katoa o te ao.
PSA 49:2 E ngā tāngata iti, koutou ko ngā tāngata rahi, e te tangata taonga kōrua ko te rawakore.
PSA 49:3 Ka whakapuakina he mātauranga e tōku māngai; ā, he āta ngārahu te whakaaro o tōku ngākau.
PSA 49:4 Ka tītaha tōku taringa ki te kupu whakarite; ka puaki tāku pepeha i runga i te hāpa.
PSA 49:5 Kia wehi ahau ki te aha i ngā rā o te kino, ina karapotia ahau e te kino kei ōku rekereke?
PSA 49:6 Ko te hunga e whakawhirinaki ana ki ō rātou taonga, e whakamanamana ana ki te nui o ō rātou rawa.
PSA 49:7 E kore tētahi o rātou e āhei te hoko i tōna teina, te hoatu rānei i tētahi utu mōna ki te Atua.
PSA 49:8 He nui hoki te utu mō tō rātou wairua, ā, me whakarere atu ake ake;
PSA 49:9 kia ora tonu ai ia ake ake, kia kaua e kite i te pirau.
PSA 49:10 E kite ana hoki ia e matemate ana ngā tāngata whakaaro nui, e ngaro ngātahi ana te pōauau me te whakaarokore, ā, mahue iho ō rātou taonga ki ētahi atu.
PSA 49:11 Ki tō rātou whakaaro puku, tērā e pūmau tonu ō rātou whare me ō rātou nohoanga, ki ngā whakatupuranga katoa; huaina iho ō rātou whenua ki ō rātou ingoa.
PSA 49:12 Heoi, kāhore te tangata e noho tonu i roto i te hōnore; ko tōna rite kei ngā kararehe ka mōtī nei.
PSA 49:13 Ko tō rātou ara tēnei, arā ko tō rātou pōauau; heoi e whakapai ana tō rātou uri ki ā rātou kōrero. Hera
PSA 49:14 Kei te hipi te rite; ko te wāhi mō rātou ko te rēinga; ko te mate hei hēpara mō rātou, hei rangatira anō te hunga tika mō rātou i te ata; ko tō rātou ātaahua mā te rēinga e whakamōtī, kia kore ai he whare mōna.
PSA 49:15 Mā te Atua ia tōku wairua e hoko mai i te rēinga; ko ia hoki hei tukunga atu mōku. Hera
PSA 49:16 Kaua e wehi ua whai taonga te tangata, ina nui haere te korōria o tōna whare.
PSA 49:17 Kāhore hoki āna mea e mau atu ai ia ina mate; e kore tōna korōria e tuku iho i muri i a ia.
PSA 49:18 Whakapai noa ia i tōna wairua i a ia e ora ana; ā, ka whakamoemititia koe ua pai āu mahi ki a koe anō.
PSA 49:19 Ka haere ia ki te whakatupuranga o ōna tūpuna; e kore rawa rātou e kite i te mārama.
PSA 49:20 Ko te tangata e whakahōnoretia ana, ā, kāhore e whai whakaaro, kei ngā kararehe ka mōtī nei tōna rite.
PSA 50:1 He hīmene nā Āhapa. Kua puaki te kupu a te Atua, a te Atua tonu, a Ihowā, ā, karangatia ana e ia te whenua i te putanga mai o te rā, tae noa ki tōna torengitanga.
PSA 50:2 Kua tīaho mai te Atua i roto i Hiona, i te tino o te ātaahua.
PSA 50:3 Ka haere mai tō tātou Atua, e kore anō e wahangū; ka kai te kāpura i tōna aroaro, ā, ka hūkerikeri te āwhā ki tētahi taha ōna, ki tētahi taha.
PSA 50:4 Ka karangatia e ia ngā rangi i runga, me te whenua hoki, ki te whakaritenga mō tōna iwi.
PSA 50:5 “Huihuia mai ki ahau tāku hunga tapu, te hunga i whakarite kawenata ki ahau i runga i te patunga tapu.”
PSA 50:6 Ā, mā ngā rangi e whakakite tōna tika; ko te Atua ake nei hoki te kaiwhakawā. Hera
PSA 50:7 “Whakarongo, e tōku iwi, ā, ka kōrero ahau; e Īharaira, ka whakaatu ahau ki a koe; ko ahau te Atua, ko tōu Atua.
PSA 50:8 E kore ahau e riri ki a koe mō āu patunga tapu; ā, kei tōku aroaro tonu āu tahunga tinana.
PSA 50:9 E kore ahau e tango i tētahi pūru i roto i tōu whare, i ētahi koati toa rānei i roto i āu taiepa.
PSA 50:10 Nāku nei hoki ngā kīrehe katoa o te ngahere, ngā kararehe i runga i te mano o ngā pukepuke.
PSA 50:11 E mātau ana ahau ki ngā manu katoa o ngā maunga; nāku anō ngā kīrehe o te pārae.
PSA 50:12 “Me he matekai tōku, e kore ahau e kōrero ki a koe; nāku nei hoki te ao, me ōna tini mea.
PSA 50:13 E kai koia ahau i te kikokiko o ngā pūru, e inu rānei i te toto o ngā koati?
PSA 50:14 Ko te whakawhetai hei patunga tapu māu ki te Atua; whakamanā hoki āu kupu taurangi ki te Runga Rawa.
PSA 50:15 Ā, karanga ki ahau i te rā o te hē; māku koe e whakaora, ā, ka whakakorōriatia ahau e koe.”
PSA 50:16 Ki te tangata hara ia ka mea te Atua: “He aha māu te whakapuaki i āku tikanga, te whakahua rānei i tāku kawenata e tōu māngai?
PSA 50:17 Kua kino nei hoki koe ki te ako, ā, e ākiri ana i āku kupu ki muri i a koe.
PSA 50:18 I tōu kitenga i te tāhae, nā, whakaae ana koe ki a ia; ā, whai tahi ana me te hunga pūremu.
PSA 50:19 “Kua tukua e koe tōu māngai ki te kino; ā, e tito hīanga ana tōu arero.
PSA 50:20 Noho ana koe, ka kōrero kino ki tōu teina; ngautuarā tonu iho koe ki te tama a tōu whaea.
PSA 50:21 Ko āu mahi ēnei, ā, wahangū tonu ahau; i mea koe he pēnā pū ahau me koe. Otirā, ka rīria koe e ahau, ka whakarārangitia anō aua mea ki tōu aroaro.
PSA 50:22 “Nā, whakaaroa tēnei, e te hunga kua wareware ki te Atua; kei haehaea koutou e ahau, ā, kāhore he kaiwhakaora.
PSA 50:23 Ko te whakamoemiti te patunga tapu e whai korōria ai ahau; ko te tangata hoki he tika nei tōna ara ka whakakitea e ahau ki a ia te whakaoranga a te Atua.”
PSA 51:1 Ki te tino kaiwhakatangi. He hīmene nā Rāwiri, i te taenga o Nātana poropiti ki a ia, mō tōna haerenga ki a Patehēpa. Tohungia ahau, e te Atua, kia rite ki tōu atawhai; kia rite ki tōu aroha nui te murunga o ōku hē.
PSA 51:2 Horoia rawatia tōku kino; kia mā hoki tōku hara.
PSA 51:3 E whāki ana hoki ahau i āku mahi tutū; kei tōku aroaro tonu tōku hara.
PSA 51:4 He hara ki a koe, ki a koe anake, tōku; i meatia anō tēnei hē ki tōu aroaro; kia tika ai koe i tāu kōrerotanga, kia mā ai hoki ina whakawā.
PSA 51:5 Nā, i whakaahuatia ahau i roto i te kino, i runga anō i te hara tōku whakahapūtanga ki roto ki tōku whaea.
PSA 51:6 Nā, ko tāu e matenui ai ko te pono i ngā wāhi o roto, ā, ka whakaakona ōku wāhi ngaro e koe ki te whakaaro nui.
PSA 51:7 Purea ahau ki te hihopa, ā, ka mā ahau; horoia ahau, ā, ka mā kē atu i te hukarere.
PSA 51:8 Meinga kia rongo ahau i te hari, i te koa, ā, ka whakamanamana ngā iwi i whatia nei e koe.
PSA 51:9 Hunā tōu mata ki ōku hara; ā, murua katoatia ōku kino.
PSA 51:10 Hangā, e te Atua, he ngākau mā ki roto ki ahau; whakahoutia hoki ki roto ki ahau he wairua tika.
PSA 51:11 Kaua ahau e makā i tōu aroaro; kaua hoki tōu Wairua Tapu e tangohia i ahau.
PSA 51:12 Whakahokia mai ki ahau te hari o tāu whakaoranga; tautokona hoki ahau ki te wairua kakama.
PSA 51:13 Ko reira ahau whakaako ai i āu ara ki te hunga tutū; ā, ka tahuri te hunga hara ki a koe.
PSA 51:14 Whakaorangia ahau i te hara toto, e te Atua, e te Atua o tōku whakaoranga, ā, ka waiatatia āu mahi tika e tōku arero.
PSA 51:15 Whakatuwheratia ōku ngutu, e te Ariki; ā, ka puaki i tōku māngai te whakamoemiti ki a koe.
PSA 51:16 Kāhore nei hoki koe e aro ki te patunga tapu, pēnei kua hoatu e ahau. Kāhore koe e āhuareka ki te tahunga tinana.
PSA 51:17 Ko ngā patunga tapu mā te Atua he wairua marū; e kore koe e whakahāwea e te Atua, ki te ngākau marū, ki te ngākau iro.
PSA 51:18 Kia pai koe ki te atawhai i Hiona; hangā ngā taiepa o Hiruhārama.
PSA 51:19 Ko reira koe pai ai ki ngā patunga tapu o te tika, ki ngā tahunga tinana, he mea whakaeke katoa; ko reira rātou whakaeke ai i ngā pūru ki runga ki tōu āta.
PSA 52:1 Ki te tino kaiwhakatangi. He Makiri nā Rāwiri, i a Roeke Ēromi i haere, i whakaatu ki a Haora, i mea ki a ia, “Kua tae a Rāwiri ki te whare o Ahimereke.” He aha koe ka whakapakari ai ki te kino, e te tangata nui? He pūmau tonu te atawhai o te Atua.
PSA 52:2 E whakatakoto ana tōu arero i ngā mea nanakia, e mahi hīanga ana, ānō he heu koi.
PSA 52:3 E arohaina rawatia ana e koe te kino i te pai, te teka i te kōrero tika. Hera
PSA 52:4 E te arero hīanga, e arohaina ana e koe ngā kupu horomiti katoa.
PSA 52:5 Ka whakangaro hoki te Atua i a koe ake tonu atu; ka tangohia atu koe e ia, ka tākiritia atu i tōu nohoanga, ka hūtia atu hoki koe i te whenua o te ora. Hera
PSA 52:6 E kite hoki te hunga tika, ā, ka wehi; ka kata hoki ki a ia, ka mea,
PSA 52:7 “Inanā, ko te tangata tēnei kīhai nei i waiho e ia te Atua hei kaha mōna; otiia, whakawhirinaki ana ki te tini o āna taonga, whakapakari ana i runga i tāna mahi kino.”
PSA 52:8 Ko ahau ia, e rite ana ki te ōriwa matomato i roto i te whare o te Atua; ka whakawhirinaki ahau ki te mahi tohu a te Atua ake ake.
PSA 52:9 Ka whakamoemiti tonu ahau ki a koe, nāu hoki tēnei i mea; ka tūmanako anō ki tōu ingoa; he mea pai hoki, ki te aroaro o tāu hunga tapu.
PSA 53:1 Ki te tino kaiwhakatangi: Maharata. He Makiri, nā Rāwiri. Kua kī te wairangi i roto i tōna ngākau, “Kāhore he Atua.” Kua pirau rātou, he kino whakahouhou tā rātou mahi; kāhore tētahi e mahi ana i te pai.
PSA 53:2 I titiro iho te Atua i te rangi ki ngā tama a te tangata, kia kite me kāhore tētahi e mahara ana, e rapu ana i te Atua.
PSA 53:3 Kua hoki ki muri rātou katoa, kua pirau tahi; kāhore tētahi e mahi ana i te pai, kāhore kia kotahi.
PSA 53:4 E kore rānei e mōhio ngā kaimahi i te kino, e kai nei i tōku iwi, me te mea e kai taro ana; ā, kāhore e karanga ki te Atua?
PSA 53:5 Wehi noa iho rātou i reira, i te wāhi kāhore he wehi. Nō te mea kua tītaria e te Atua ngā wheua o te tangata i whakapaea ai koe; kua whakamā rātou i a koe, nō te mea kua whakahāweatia rātou e te Atua.
PSA 53:6 Auē, me i puta mai te whakaoranga o Īharaira i Hiona! Kia whakahokia mai e te Atua tāna iwi i te whakarau, ka whakamanamana a Hākopa, ka hari a Īharaira.
PSA 54:1 Ki te tino kaiwhakatangi: Nekinoto. He Makiri, nā Rāwiri i te haerenga o ngā Tiwhi ki a Haora, kī ai, “He teka ianei kei a mātou a Rāwiri e piri ana?” E te Atua, kia whakaorangia ahau e tōu ingoa; kia whakawākia hoki ahau e tōu kaha.
PSA 54:2 E te Atua, whakarongo ki tāku īnoi, tahuri mai tōu taringa ki ngā kupu a tōku māngai.
PSA 54:3 Nō te mea kua whakatika mai ngā tāngata iwi kē ki ahau, ā, e whāia ana tōku wairua e te hunga tūkino; kāhore i waiho e rātou te Atua ki tō rātou aroaro. Hera
PSA 54:4 Tēnei te Atua hei kaiāwhina mōku; kei roto te Ariki i te hunga e tautoko ake ana i tōku wairua.
PSA 54:5 Māna e utu te kino o ōku hoariri; hunā rātou, he pono nei hoki koe.
PSA 54:6 Ka kakama ahau ki te mea patunga tapu ki a koe, ka whakamoemiti ki tōu ingoa, e Ihowā, he mea pai hoki.
PSA 54:7 Kua whakaorangia hoki ahau e ia i roto i ngā hē katoa; ā, kua titiro tōku kanohi ki te mea e hiahia ana ahau ki ōku hoariri.
PSA 55:1 Ki te tino kaiwhakatangi Nekinoto. He Makiri nā Rāwiri. E te Atua, tahuri mai tōu taringa ki tāku īnoi; kei whakangaro atu koe, ina tangi ahau.
PSA 55:2 Anga mai ki ahau, whakahokia mai he kupu ki ahau; pōkaikaha noa iho ahau i ahau e tangi nei, e hāmama nei;
PSA 55:3 i te reo hoki o te hoariri, i te tūkino a te tangata kino. Nō te mea e utaina ana e rātou he hara ki runga ki ahau, ā, e kino ana ki ahau, e riri ana.
PSA 55:4 Mamae pū tōku ngākau i roto i ahau; kua taka ki runga ki ahau ngā wehi whakamate.
PSA 55:5 Kua pā ki ahau te wehi me te wiri; ā, pōkia iho ahau e te whakamataku.
PSA 55:6 Nā, ko tāku meatanga, “Auē, te whai pākau ahau me he kūkupa; pēnei ka rere atu ahau, ā, ka whai okiokinga.
PSA 55:7 Kātahi ahau ka rere ki tawhiti; ā, noho rawa atu i te koraha. Hera
PSA 55:8 Ka hohoro tōku rere atu i te hau, i te āwhā.”
PSA 55:9 Whakangaromia, e te Ariki, wehea ō rātou arero; kua kitea hoki e ahau te tūkino me te tutū o roto o te pā.
PSA 55:10 Hāereere ana rātou i te ao, i te pō, i runga i ōna taiepa, ā tawhio noa; he kino kei roto, he hīanga.
PSA 55:11 He hara kei waenganui ōna; kāhore ōna ara e mahue i te tinihanga, i te hīanga.
PSA 55:12 Ehara hoki i te hoariri nāna ahau i tāwai; pēnei e taea e ahau te whakaririka; ehara hoki i te hoa whawhai nōku i whakakake ki ahau; pēnei kua piri ahau, kei kitea e ia.
PSA 55:13 Nāu ia, nā te tangata i rite ki ahau, nā tōku takahoa, nā tāku i mōhio ai.
PSA 55:14 Āhuareka tonu tā tāua kōrerorero; haere tahi ana hoki tāua i roto i te rōpū ki te whare o te Atua.
PSA 55:15 Kia mau ohorere rātou i te mate, kia heke ora ki te rēinga; he hara hoki kei ō rātou nohoanga, kei waenganui i a rātou.
PSA 55:16 Ko ahau, ka karanga ahau ki te Atua; ā, mā Ihowā ahau e whakaora.
PSA 55:17 I te ahiahi, i te ata, i te poutūmārōtanga, ka īnoi ahau, ka tangi; ā, ka whakarongo ia ki tōku reo.
PSA 55:18 Whakaorangia ana e ia tōku wairua i runga i te rangimārie i ahau e whakaekea ana; he tokomaha hoki ōku hoa whawhai.
PSA 55:19 Ka whakarongo te Atua, nō tua iho nei tōna nohoanga, ā, ka whakahoki i tā rātou. Hera Ko te hunga kāhore ō rātou whakawhitiwhitinga, ā, kāhore ō rātou wehi ki te Atua.
PSA 55:20 Kua totoro ōna ringa ki te hunga kua mau nei tā rātou rongo ki a ia; kua whakatakā e ia tāna kawenata.
PSA 55:21 Māeneene atu tōna māngai i te pata, he whawhai ia kei roto i tōna ngākau; ngāwari atu āna kupu i te hinu, kāhore, he hoari kua oti te unu.
PSA 55:22 Makā ki runga ki a Ihowā tāu pīkaunga, ā, māna koe e whakaū ake; e kore e tukua e ia te hunga tika kia whakangāueuetia ake ake.
PSA 55:23 Māu ia rātou e mea, e te Atua, kia heke ki te poka o te pirau; e kore ngā tāngata toto, ngā tāngata hīanga e tutuki ki te hāwhe o ō rātou rā. Ko ahau ia, ka whakawhirinaki ki a koe.
PSA 56:1 Ki te tino kaiwhakatangi: Ionata Ēreme Rehokime. Nā Rāwiri. He Mikitama, i a ia ka mau i ngā Pirihitini ki Kāta. Tohungia ahau e te Atua, ka horomia hoki ahau e te tangata; e tūkino ana ia ki ahau i te rā roa nei, i a ia e ngangare tonu nei.
PSA 56:2 E whai ana ōku hoariri i te rā roa nei, kia horomia ahau; he tokomaha nei hoki e whakahī ana, e whawhai mai ana ki ahau.
PSA 56:3 Ka whakawhirinaki ahau ki a koe i te wā e mataku ai ahau.
PSA 56:4 Mā te Atua ahau ka whakamoemiti ki tāna kupu; e whakawhirinaki ana ahau ki te Atua, e kore ahau e wehi. He aha tā te kikokiko e mea ai ki ahau?
PSA 56:5 E whakariroia kētia ana e rātou āku kupu i ngā rā katoa; heoi anō tā rātou e whakaaro ai ko te kino mōku.
PSA 56:6 E huihui ana rātou, e piri ana; e titiro matatau ana ki ōku hīkoinga, i a rātou e whanga nei ki tōku wairua.
PSA 56:7 Mā te hē koia rātou ka mawhiti ai? Kia riri koe, e te Atua, whakatakā iho hoki ngā iwi.
PSA 56:8 E taua ana e koe ōku kōpikopikotanga; rongoātia ōku roimata ki roto ki tāu ipu; kāhore ianei i tāu pukapuka?
PSA 56:9 I te rā e karanga ai ahau ka hoki whakamuri ōku hoariri; e mātau ana ahau ki tēnei, kei ahau hoki te Atua.
PSA 56:10 Mā te Atua ahau ka whakamoemiti ai ki tāna kupu; mā Ihowā ahau ka whakamoemiti ai ki tāna kupu.
PSA 56:11 E whakawhirinaki ana ahau ki te Atua; e kore ahau e wehi. He aha tā te tangata e mea ai ki ahau?
PSA 56:12 Kei ahau ngā kupu taurangi ki a koe, e te Atua; me tuku e ahau ngā whakamoemiti ki a koe.
PSA 56:13 Nāu hoki tōku wairua i whakaora kei mate; e kore ianei koe e whakaū i ōku waewae kei paheke, kia haere ai ahau i te aroaro o te Atua i roto i te mārama o te hunga ora.
PSA 57:1 Ki te tino kaiwhakatangi: Aratakiti. He Mikitama. Nā Rāwiri, i tōna rerenga i a Haora i a ia nei i roto i te ana. Tohungia ahau, e te Atua, tohungia ahau, e whakawhirinaki ana hoki tōku wairua ki a koe; āe, ka piri ahau ki raro ki te taumarumarutanga o ōu pākau, kia pahemo rā anō ēnei mate.
PSA 57:2 Ka karanga ahau ki te Atua, ki te Runga Rawa, ki te Atua e oti ai āku mea katoa.
PSA 57:3 Ka ungā mai e ia he kaiwhakaora mōku i te rangi, ina tāwai te tangata e mea ana kia horomia ahau. Hera Ka ungā mai e te Atua tāna mahi tohu me tōna pono.
PSA 57:4 Kei waenganui tōku wairua i ngā raiona; e takoto ana ahau i waenganui i te hunga e kāia ana e te ahi; i ngā tama hoki a te tangata, he tao nei ō rātou niho, he pere, he hoari koi anō ō rātou arero.
PSA 57:5 Kia whakanuia koe, e te Atua, ki runga ake i ngā rangi; hei runga atu i te whenua katoa tōu korōria.
PSA 57:6 Kua whakatakotoria e rātou he kupenga mō ōku takahanga, kua piko tōku wairua; kua keria e rātou he poka ki tōku aroaro, ā, taka iho ko rātou anō ki roto. Hera
PSA 57:7 Pūmau tonu tōku ngākau, e te Atua, pūmau tonu tōku ngākau; ka waiata ahau, āe, ka hīmene ahau.
PSA 57:8 E ara, e tōku korōria! E ara, e te hātere, e te hāpa; ka ara wawe anō ahau.
PSA 57:9 Ka whakamoemiti ahau ki a koe, e te Ariki, i waenganui i ngā iwi; ka hīmene ki a koe i waenganui i ngā tauiwi.
PSA 57:10 He nui hoki tāu mahi tohu, ā tutuki noa ki ngā rangi, me tōu pono ā tutuki noa ki ngā kapua.
PSA 57:11 Kia whakanuia koe, e te Atua, ki runga i ngā rangi; hei runga i te whenua katoa tōu korōria.
PSA 58:1 Ki te tino kaiwhakatangi: Aratakiti. He Mikitama. Nā Rāwiri. He kōrero puku rānei tā koutou i te pono? He tika rānei tā koutou whakarite, e ngā tama a te tangata?
PSA 58:2 He pono, e mahia ana e koutou te hē i roto i te ngākau, e pāunatia ana e koutou te tutū a ō koutou ringa i runga i te whenua.
PSA 58:3 He tangata kē te hunga hara nō te kōpū mai anō; whānau kau kua kotiti kē, kua kōrero teka.
PSA 58:4 Ko tō rātou paihana he rite ki tō te nākahi, kei te neke turi e puru nei i tōna taringa;
PSA 58:5 e kore nei e whakarongo ki te reo o te kaiwhakawai, ahakoa tino mātau ia ki te whakawai.
PSA 58:6 Whatia, e te Atua, ō rātou niho i roto i ō rātou māngai; kōwhakia, e Ihowā, ngā niho nunui o ngā kūao raiona.
PSA 58:7 Kia mimiti rātou, ānō he wai e heke atu ana; ka whakatikaia āna pere, kia rite ki te mea kua pōutoa.
PSA 58:8 Kia memeha haere, ā, kia pahure, ānō he ngata; kia rite ki te mea mate roto a te wahine, kāhore nei i kite i te rā.
PSA 58:9 E kore e tukua kia rongo ā koutou kōhua i ngā tātarāmoa, ka kāhakina rātou e ia i roto i te āwhiowhio, te mea kaiota, te mea e wera ana.
PSA 58:10 Ka hari te tangata tika ua kite i te utu; ka horoia e ia ōna waewae ki ngā toto o te tangata hara.
PSA 58:11 Ā, ka mea te tangata, “Koia, ka whai utu te tangata tika; inā, he Atua anō tēnei e whakawā ana i te whenua.”
PSA 59:1 Ki te tino kaiwhakatangi: Aratakiti. He Mikitama nā Rāwiri, i a Haora i tono tāngata hei tiaki mō te whare, hei whakamate mōna. Whakaorangia ahau, e tōku Atua, i ōku hoariri; whakateiteitia ake ahau i te hunga e whakatika ana ki ahau.
PSA 59:2 Whakaorangia ahau i ngā kaimahi i te kino; kia ora ahau i te hunga toto.
PSA 59:3 Kei te whanga nei hoki rātou mō tōku wairua; e whakamine ana te hunga kaha ki te whawhai ki ahau; kāhore nei ōku tutū, kāhore ōku hara, e Ihowā.
PSA 59:4 Hore ōku kino, oma ana rātou, kei te takatū; e ara hei āwhina mōku, titiro mai hoki.
PSA 59:5 Āe rā, maranga, e Ihowā, e te Atua o ngā mano, e te Atua o Īharaira, tirohia iho ngā tauiwi katoa: kaua e tohungia tētahi o te hunga kino, e poka kē nei. Hera
PSA 59:6 Ka hoki mai rātou i te ahiahi, kei te tau, ānō he kurī, taiāwhiotia ana e rātou te pā.
PSA 59:7 Nanā, kei te kūpā ō rātou māngai, he hoari kei ō rātou ngutu; ki tā rātou, “Ko wai e rongo?”
PSA 59:8 Ko tāu ia, e Ihowā, he kata ki a rātou; hei tāwainga māu ngā tauiwi katoa.
PSA 59:9 E tōku kaha, ka tatari ahau ki a koe; ko te Atua hoki tōku pā.
PSA 59:10 Kei mua i ahau tōku Atua aroha; mā te Atua ahau ka kite i tāku i hiahia ai ki ōku hoariri.
PSA 59:11 Kaua rātou e whakamatea, kei wareware tōku iwi; kia whakamararatia rātou e tōu kaha; whakatakā iho rātou, e te Ariki, e tō mātou whakangungu rākau.
PSA 59:12 Mō te hara o tō rātou māngai, mō ngā kupu a ō rātou ngutu, hopukia rātou i runga i tō rātou whakakake, mō tā rātou kōrero, he kanga, he teka.
PSA 59:13 Whakamōtītia i runga i te riri, kia kāhore ai rātou; ā, kia mātau rātou ko te Atua te Kāwana o Hākopa puta noa ki ngā pito o te whenua. Hera
PSA 59:14 I te ahiahi tukua rātou kia hoki, tukua rātou kia tau, ānō he kurī, kia taiāwhio rātou i te pā.
PSA 59:15 Ka kōpikopiko noa rātou ki te rapu kai, ā, ka tauwhanga i te pō roa ina kore rātou e mākona.
PSA 59:16 Ko ahau ia, ka waiatatia e ahau tōu kaha; āe, i te ata ka hāmamatia e ahau tāu mahi tohu. Ko koe hoki tōku pā, tōku piringa i te rā o tōku pōuri.
PSA 59:17 Ka hīmene ahau ki a koe, e tōku kaha; ko te Atua nei hoki tōku pā, tōku Atua aroha.
PSA 60:1 Ki te tino kaiwhakatangi: Huhana Erutu. He Mikitama nā Rāwiri, hei whakaako. Nō tāna whawhaitanga ki a Aramanaharaima rāua ko Aramatopa. Nā, hoki ana a Ioapa, ā, patua ana e ia a Ēroma ki te Raorao Tote, kotahi tekau mā rua mano. E te Atua, kua panga mātou e koe, kua oti mātou te whakamarara e koe, kua riri koe; tahuri mai anō ki a mātou!
PSA 60:2 Wiri ana te whenua i a koe, kua ngātata i a koe; whakakapia ōna wāhi pakaru, e rū ana hoki.
PSA 60:3 He mea pakeke kua whakakitea e koe ki tāu iwi, kua oti mātou te whakainu e koe ki te wāina e wiri ai.
PSA 60:4 Kua hōmai e koe he kara ki te hunga e wehi ana i a koe; kia whakakitea hei mea mō te pono. Hera
PSA 60:5 Hei mea e mawhiti ai āu e aroha ai; mā tōu matau e whakaora, whakahokia mai hoki he kupu ki ahau.
PSA 60:6 Kua kōrero te Atua i runga i tōna tapu; “Ka hari ahau, ka kotikoti i Hekeme, ka roherohe hoki i te raorao o Hukota.
PSA 60:7 Nōku Kireara, nōku anō a Mānahi, ko Ēparaima anō hoki te kaha o tōku mātenga; ko Hūrā tāku kaiwhakatakoto ture;
PSA 60:8 ko Moapa tāku oko horoi; ka makā e ahau tōku hū ki runga ki Ēroma; e Pirihitia, ko ahau hei whakamanamana māu.”
PSA 60:9 Mā wai ahau e kawe ki te pā kaha? Nā wai ahau i ārahi ki Ēroma?
PSA 60:10 He teka rānei, e te Atua, kua pangā mātou e koe? Kāhore hoki koe, e te Atua, e haere tahi me ā mātou taua.
PSA 60:11 Hōmai he āwhina mō mātou ki ō mātou hoariri; he teka noa hoki te āwhina a te tangata.
PSA 60:12 Mā te Atua tātou ka toa ai; māna hoki e takahi ki raro ō tātou hoa whawhai.
PSA 61:1 Ki te tino kaiwhakatangi: Nekina. Nā Rāwiri. Whakarongo, e te Atua, ki tāku karanga; tahuri mai ki tāku īnoi.
PSA 61:2 Ka karanga ahau ki a koe i te pito o te whenua, ina pēhia tōku ngākau. Ārahina ahau ki te kōhatu e tiketike ake ana i ahau.
PSA 61:3 He piringa hoki koe mōku; he pā kaha i te hoariri.
PSA 61:4 Ka noho ahau ki tōu tapenākara ake ake, ka okioki ki ōu pākau hei piringa. Hera
PSA 61:5 Kua rongo nei hoki koe, e te Atua i āku kupu taurangi, kua hōmai e koe te wāhi o te hunga e wehi ana ki tōu ingoa.
PSA 61:6 Ka whakaraneatia e koe ngā rā o te kīngi; ōna tau ki ngā whakatupuranga katoa.
PSA 61:7 E noho ia i te aroaro o te Atua ake ake; whakaritea mai he aroha, he pono, hei tiaki i a ia.
PSA 61:8 Pēnei ka hīmene ahau ki tōu ingoa ake ake; ka whakamanā e ahau āku kupu taurangi i tēnei rā, i tēnei rā.
PSA 62:1 Ki te tino kaiwhakatangi: ki a Ierutunu. He hīmene nā Rāwiri. Ko te Atua anake tāku e tatari nei; kei a ia te whakaoranga mōku.
PSA 62:2 Ko ia anake tōku kōhatu, tōku whakaoranga, tōku pā hoki, e kore e nui tōku ngāueuetanga.
PSA 62:3 Kia pēhea te roa o tā koutou tatau ki te tangata, kia whakamatea ai e koutou, e koutou katoa, ka rite ki te taiepa e tūngou ana, ki te wāwā ka tata te hinga?
PSA 62:4 Heoi anō tā rātou e rūnanga ai ko te turaki i a ia i tōna wāhi teitei; E āhuareka ana ki te teka; e manaaki ana ō rātou māngai, ā, e kanga ana a roto i a rātou. Hera
PSA 62:5 Tatari, e tōku wairua, ki te Atua anake; ko ia tāku e tūmanako nei.
PSA 62:6 Ko ia anake tōku kōhatu, tōku whakaoranga, tōku pā hoki; e kore ahau e whakangāueuetia.
PSA 62:7 Kei te Atua te whakaoranga mōku, te korōria anō mōku; kei te Atua te kōhatu o tōku kaha, tōku piringa.
PSA 62:8 Whakawhirinaki ki a ia i ngā wā katoa, e te iwi, ringihia tō koutou ngākau ki tōna aroaro; hei piringa mō tātou te Atua. Hera
PSA 62:9 He pono he mea memeha noa ngā ware, he teka noa ngā rangatira; ki te pāunatia rātou, māmā noa ake rātou tahi i te horihori.
PSA 62:10 Kaua e whakawhirinaki ki te tūkino, kei wairangi hoki ki te pāhua; ki te tini haere ngā taonga, kei whakamanawa tō koutou ngākau ki reira.
PSA 62:11 Kotahi kōrerotanga a te Atua, ka rua ōku rongonga i tēnei: nō te Atua te kaha,
PSA 62:12 nāu anō, e te Ariki, te mahi tohu; rite tonu hoki ki tāna mahi tāu utu ki te tangata.
PSA 63:1 He hīmene nā Rāwiri, i a ia i te koraha o Hūrā. E te Atua, nōku koe Atua; ka moata tāku rapu i a koe. E hiainu ana tōku wairua ki a koe, e hiahia ana ōku kikokiko ki a koe, i te whenua maroke, ruha noa, kāhore nei he wai.
PSA 63:2 Koia i titiro atu ai ahau ki a koe i te wāhi tapu, kia kite ai i tōu kaha, i tōu korōria.
PSA 63:3 Pai atu tōu aroha i te ora; mō reira ka whakamoemiti ōku ngutu ki a koe.
PSA 63:4 Inā, ka whakapai ahau ki a koe i ahau anō e ora nei; ka totoro atu ōku ringa i runga i tōu ingoa.
PSA 63:5 Ka mākona tōku wairua, ānō i te hinu wheua, i te ngako, ā, ka hari ōku ngutu ina whakamoemiti tōku māngai ki a koe.
PSA 63:6 Ina mahara ahau ki a koe i runga i tōku moenga, ina whakaaro ki a koe i ngā mataaratanga o te pō.
PSA 63:7 Ko koe hoki tōku kaiāwhina; nā, ka hari ahau ki te taumarumarutanga iho o ōu pākau.
PSA 63:8 Piri tonu tōku wairua ki a koe e tautoko ake ana tōu matau i ahau.
PSA 63:9 Ko te hunga e whai ana i tōku wairua kia whakangaromia, ka riro rātou ki ngā wāhi o raro rawa o te whenua.
PSA 63:10 Ka tukua atu rātou ki te kaha o te hoari; hei wāhi rātou mā ngā pokiha.
PSA 63:11 Tēnā ko te kīngi, ka hari ia ki te Atua; ka whakamanamana ngā tāngata katoa ko ia nei tā rātou oati; ā, ka purua te māngai o te hunga katoa e kōrero teka ana.
PSA 64:1 Ki te tino kaiwhakatangi. He hīmene nā Rāwiri. Whakarongo ki tōku reo, e te Atua, ina īnoi atu ahau; tiakina tōku ora i te wehi o te hoariri.
PSA 64:2 Hunā ahau i te whakaaro ngaro o te hunga kino, i te ngangau a ngā kaimahi i te hē.
PSA 64:3 Kua whakakoi nei i ō rātou arero, ānō he hoari, kua whakatika nei i ā rātou pere, arā i ngā kupu kikino.
PSA 64:4 Hei kōperenga pukutanga mā rātou ki te tangata tika; kitea rawatia ake kua kōpere ki a ia, kāhore hoki he wehi.
PSA 64:5 E whakamāia ana rātou i a rātou anō ki te mea kino; e rūnanga ana kia whakatakotoria pukutia he rore, e mea ana, “Ko wai e kite i a rātou?”
PSA 64:6 E rapu hara ana rātou; e mea ana, “Kua āta rapu mārie tātou.” Taea noatia te hōhonutanga o te whakaaro o ia tangata, ā, ko te ngākau he hōhonu.
PSA 64:7 Mā te Atua ia e kōpere he pere ki a rātou kitea rawatia ake kua tū rātou.
PSA 64:8 Heoi, ka meinga rātou kia tapatu, ko tō rātou arero ake anō ka tū atu ki a rātou; ā, ka rūrū i tō rātou mātenga te hunga katoa e kite i a rātou.
PSA 64:9 Ka wehi anō hoki ngā tāngata katoa, ka whakapuaki i te mahi a te Atua; ka āta maharatia hoki e rātou tāna mahi.
PSA 64:10 Ka koa te tangata tika ki a Ihowā, ka whakawhirinaki hoki ki a ia; ka whakamanamana anō te hunga ngākau tika katoa.
PSA 65:1 Ki te tino kaiwhakatangi. He hīmene, he waiata nā Rāwiri. E tāria ana koe, e te Atua, e te whakamoemiti i Hiona; ā, ka whakamanā te kupu taurangi ki a koe.
PSA 65:2 E te kaiwhakarongo īnoi, e haere ngā kikokiko katoa ki a koe.
PSA 65:3 E kaha ake ana i ahau ngā kino; ā mātou mahi tutū, māu ēnā e hīpoki.
PSA 65:4 Ka hari te tangata e whiriwhiria e koe, e meatia e koe kia tata atu ki a koe, kia noho i roto i ōu marae. Ka mākona mātou i te pai o tōu whare, o tōu temepara tapu.
PSA 65:5 He mea whakawehi, he tapu, tāu utu kupu ki a mātou, e te Atua o tō mātou whakaoranga, e te okiokinga o ngā pito katoa o te whenua, o te hunga hoki i tawhiti i runga o te moana;
PSA 65:6 e whakaū nei i ngā maunga, he kaha hoki nōna; tōna whītiki nei he kaha.
PSA 65:7 E whakamārie nei i te haruru o ngā moana, i te haruru o ō rātou ngaru, i te ngangau hoki o ngā iwi.
PSA 65:8 Ka wehi anō ki āu tohu te hunga e noho ana i ngā pito rawa; hari ana i a koe ngā pūtake o te ata, o te ahiahi.
PSA 65:9 E tirotirohia ana e koe te whenua, e whakamākūkūria ana, e whakamōmonatia nuitia ana e koe; kī tonu te awa o te Atua i te wai; oti rawa ake te whakapai e koe, kua rite mai i a koe he wīti mō aua wāhi.
PSA 65:10 Mākūkū rawa i a koe ōna moa, pē ana i a koe ōna tupuke; e whakangāwaritia ana e koe ki ngā ua; e manaakitia ana e koe tōna pihinga ake.
PSA 65:11 E karaunatia ana e koe te tau ki tōu pai; e māturuturu ana hoki te mōmonatanga o ōu ara.
PSA 65:12 E māturuturu ana ki ngā wāhi kai o te koraha; ā, whītikiria ana ngā pukepuke ki te koa.
PSA 65:13 He hipi te kākahu o ngā wāhi kai; ngaro ana ngā raorao i te wīti. Hāmama ana rātou i te hari, waiata ana.
PSA 66:1 Ki te tino kaiwhakatangi. He hīmene, he waiata. Hāmama, e te whenua katoa, ki te Atua!
PSA 66:2 Hīmenetia te korōria o tōna ingoa, kia whai korōria te whakamoemiti ki a ia.
PSA 66:3 Mea atu ki te Atua, “Anō te wehi o āu mahi! Mā te nui o tōu kaha e ngohengohe ai ōu hoariri ki a koe.
PSA 66:4 E koropiko katoa te whenua ki a koe; ka hīmene ki a koe; ka hīmene rātou ki tōu ingoa.” Hera
PSA 66:5 Haere mai kia kite i ngā mahi a te Atua: mataku rawa tāna mahi ki ngā tama a te tangata.
PSA 66:6 Nāna i mea te moana hei tuawhenua; haere ā-waewae ana rātou rā roto i te awa; hari ana mātou ki a ia i reira.
PSA 66:7 Ko tōna kāwanatanga tūturu tonu i runga i tōna kaha; e titiro ana ōna kanohi ki ngā tauiwi; kei whakakake te hunga tutū. Hera
PSA 66:8 Whakapaingia tō tātou Atua, e ngā iwi; kia rangona te reo whakamoemiti ki a ia.
PSA 66:9 Nāna nei hoki i mau ai tō tātou wairua ki te ora, kāhore hoki e tukua e ia ō tātou waewae kia nekehia.
PSA 66:10 Kua whakamātauria hoki mātou e koe, e te Atua; whakarewaia ana mātou e koe, ānō he hiriwa e whakarewaia ana.
PSA 66:11 Kua kawea nei mātou e koe ki roto ki te kupenga; whakapīkaua ana e koe te mea whakamamae ki ō mātou hope.
PSA 66:12 I meinga anō e koe ō mātou upoko kia ekengia hōihotia e te tangata; i rā roto mātou i te kāpura, i te wai; heoi whakaputaina mai ana mātou e koe ki te wāhi mōmona.
PSA 66:13 Ka tomo ahau me ngā tahunga tinana ki tōu whare; ka whakamana ahau i āku kupu taurangi ki a koe,
PSA 66:14 ērā i puaki i ōku ngutu, i kōrerotia e tōku māngai i ahau e pōuri ana.
PSA 66:15 Ka whakaekea e ahau māu ngā mea mōmona hei tahunga tinana, ngātahi anō me te mea kakara o ngā hipi toa; ka tukua e ahau he pūru, he koati. Hera
PSA 66:16 Haere mai, whakarongo, e koutou katoa e wehi ana ki te Atua, ā, māku e whakapuaki tāna i mea ai ki tōku wairua.
PSA 66:17 I tangi tōku māngai ki a ia; i whakanuia anō ia e tōku arero.
PSA 66:18 Ki te whakaaroa e tōku ngākau te hē, e kore te Ariki e whakarongo mai.
PSA 66:19 Nei rā he pono kua whakarongo te Atua, kua tahuri ia ki tōku reo īnoi.
PSA 66:20 Kia whakapaingia te Atua, kīhai nei i whakapeau kē i tāku īnoi, i tāna atawhai hoki ki ahau.
PSA 67:1 Ki te tino kaiwhakatangi: Nekinoto. He hīmene, he waiata. Mā te Atua tātou e atawhai, māna tātou e manaaki; māna e mea kia tīaho tōna mata ki a tātou; Hera
PSA 67:2 kia mātauria ai tāu ara ki runga ki te whenua, tāu whakaoranga i roto i ngā tauiwi katoa.
PSA 67:3 Kia whakamoemiti ngā iwi ki a koe, e te Atua, kia whakamoemiti ngā iwi katoa ki a koe.
PSA 67:4 Kia koa ngā tauiwi, kia waiata i te hari; nō te mea ka tika tāu whakawā mō ngā iwi, ā, ka kāwana koe i ngā tauiwi o te whenua. Hera
PSA 67:5 Kia whakamoemiti ngā iwi ki a koe, e te Atua, kia whakamoemiti ngā iwi katoa ki a koe.
PSA 67:6 Kua tuku mai nei te whenua i ōna hua; ā, ka manaaki te Atua, tō tātou Atua, i a tātou.
PSA 67:7 Ka manaaki te Atua i a tātou; ā, ka wehi ngā pito katoa o te whenua i a ia.
PSA 68:1 Ki te tino kaiwhakatangi. He hīmene, he waiata nā Rāwiri. Kia ara te Atua, kia marara ōna hoariri; kia whati hoki i tōna aroaro te hunga e kino ana ki a ia.
PSA 68:2 Āia atu rātou, pērātia me te paowa e āia ana; kia rite ki te ware pī e rewa ana i te kāpura te ngaromanga o te hunga kino i te aroaro o te Atua.
PSA 68:3 Kia koa ia te hunga tika kia hari i te aroaro o te Atua; āe rā, kia tino hari pū rātou.
PSA 68:4 Waiata ki te Atua, hīmenetia tōna ingoa; opehia ake he huanui mō tana hāriata i ngā koraha – tōna ingoa ko IHA – kia hari hoki ki tōna aroaro.
PSA 68:5 Hei matua mō ngā pani, hei kaiwhakarite mō ngā pouaru, te Atua i tōna nohoanga tapu.
PSA 68:6 E whakanohoia ana e te Atua te mokemoke ki te whare, e whakaputaina ana e ia ngā herehere ki te ora; ko te hunga tutū ia e noho i te wāhi waikore.
PSA 68:7 E te Atua, i tōu haerenga atu i mua i tāu iwi; i tōu haerenga i te koraha; Hera
PSA 68:8 i wiri te whenua, i tūturu iho anō ngā rangi i te aroaro o te Atua; me taua Hinai anō i te aroaro o te Atua, o te Atua o Īharaira.
PSA 68:9 I tāia mai, e koe, e te Atua, he ua nui; ā, i tōu kāinga e ruwha ana ka whakaūkia e koe.
PSA 68:10 I noho tāu whakaminenga ki reira; nā tōu pai, e te Atua, i mea kai ai koe mā ngā rawakore.
PSA 68:11 Ka hōmai e Ihowā te kupu; he ope nui ngā wāhine whakapuaki:
PSA 68:12 “Whati rawa ngā kīngi o ngā taua!” Ā, ko te wahine i noho i te whare, kei te tuwha i ngā parakete.
PSA 68:13 I a koutou ka takoto noa i ngā takotoranga hipi, he rite ki ngā pākau o te kūkupa kua paparuatia nei ki te hiriwa, ōna hou ki te kōura whero.
PSA 68:14 I te whakamararatanga a te Kaha Rawa i ngā kīngi i reira, koia anō kei te hukarere o Taramono te mā.
PSA 68:15 He maunga Atua a Maunga Pahana; he maunga tiketike a Maunga Pahana.
PSA 68:16 He aha koutou ka titiro tītaha ai, e ngā maunga tiketike, ki te maunga i hiahiatia nei e te Atua kia nohoia e ia, āe, ka nohoia e Ihowā ake ake?
PSA 68:17 Ko ngā hāriata a te Atua, e rua tekau mano, mano mano iho; kei roto i a rātou te Ariki, me te mea ko Hinai, ko te wāhi tapu.
PSA 68:18 Kua kake koe ki runga, kua whakaraua e koe te whakarau; kua riro i a koe he ohaoha mō te tangata; āe, mō te hunga tutū anō, kia noho ai a Ihowā, te Atua ki a rātou.
PSA 68:19 Kia whakapaingia te Ariki, e whakawaha nei i tā tātou pīkaunga i tēnei rā, i tēnei rā, te Atua o tō tātou whakaoranga. Hera
PSA 68:20 Ko tō tātou Atua te Atua o te whakaoranga; nā Ihowā anō, nā te Ariki, ngā putanga ake i te mate.
PSA 68:21 Ka marū ia i te Atua te mātenga o ōna hoariri; me te tumuaki huruhuru o te tangata e haere tonu ana i āna kino.
PSA 68:22 I mea te Ariki, “Ka whakahokia mai e ahau i Pahana, ka whakahokia mai e ahau tāku iwi i ngā rire o te moana;
PSA 68:23 kia toua ai tōu waewae ki te toto, kia whiwhi ai te arero o āu kurī ki tāna wāhi o ōu hoariri.”
PSA 68:24 I kite rātou, e te Atua, i ōu haerenga, i ngā haerenga o tōku Atua, o tōku Kīngi, i te wāhi tapu.
PSA 68:25 Ko ngā kaiwaiata i haere i mua, i muri ko ngā kaiwhakatangi, i waenganui ko ngā kōtiro e patupatu ana i ngā timipera.
PSA 68:26 “Whakapaingia te Atua i roto i ngā whakaminenga, te Ariki hoki, e ngā mea i puta mai i te mātāpuna o Īharaira!”
PSA 68:27 Kei reira a Pineamine, te whakaotinga, tō rātou ariki, ngā rangatira o Hūrā, me tō rātou rōpū, ngā rangatira o Hepurona, me ngā rangatira o Napatari.
PSA 68:28 Kua oti he kaha mōu te whakahau iho e tōu Atua; whakaūkia, e te Atua, tāu i mea ai mō mātou.
PSA 68:29 Ka maua mai e ngā kīngi he hākari ki a koe, mō tōu temepara i Hiruhārama.
PSA 68:30 Rīria te kīrehe o ngā kākaho, te huinga pūru, me ngā kūao kau a ngā iwi, me te takahi i ngā pīhi hiriwa ki raro; whakamararatia ngā iwi e āhuareka ana ki te whāinga.
PSA 68:31 E puta mai ngā rangatira i Īhipa; meāke hohoro te totoro o ngā ringa o Etiopia ki te Atua.
PSA 68:32 Waiata ki te Atua, e ngā rangatiratanga o te whenua; hīmene ki te Ariki; Hera
PSA 68:33 ki a ia, ko tōna hāriata nei ko ngā rangi o ngā rangi, nōnamata; nā, ka puaki tōna reo, he reo kaha.
PSA 68:34 Waiho te kaha i te Atua, kei runga nei i a Īharaira tāna mahi rangatira; kei ngā kapua hoki tōna kaha.
PSA 68:35 Ka wehingia koe, e te Atua, i roto i ōu wāhi tapu; ko te Atua o Īharaira te kaihōmai i te kaha, i te mana, ki tōna iwi. Whakapaingia te Atua!
PSA 69:1 Ki te tino kaiwhakatangi. Hohanimi. Nā Rāwiri. Whakaorangia ahau e te Atua, ka tae mai hoki ngā wai ki roto ki tōku wairua.
PSA 69:2 Ka tapoko ahau ki te oru hōhonu, ki te wāhi kāhore nei he tūnga; kua tae ahau ki ngā wai hōhonu, ngaro iho ahau i ngā waipuke.
PSA 69:3 Kua ruwha ahau i tāku tangi; kua maroke tōku korokoro. Pakoko kau ōku kanohi i ahau e tatari nei ki tōku Atua.
PSA 69:4 Tini kē i ngā makawe o tōku mātenga te hunga e kino noa ana ki ahau; he kaha rawa te hunga e mauāhara noa ana ki ahau, e mea nei kia whakamatea ahau. Utua ana e ahau i reira ngā mea kīhai i tangohia e ahau.
PSA 69:5 E te Atua, e mātau ana koe ki tōku kūware; kāhore hoki ōku hē e ngaro i a koe.
PSA 69:6 E te Ariki, e Ihowā o ngā mano kaua te hunga e tatari ana ki a koe e whakamā i ahau; e te Atua o Īharaira, kei numinumi kau i ahau te hunga e rapu ana i a koe.
PSA 69:7 Mōu hoki ahau i waiho ai hei tāwainga; ngaro iho tōku mata i te whakamā.
PSA 69:8 He tangata kē ahau ki ōku hoa ake; hei tautangata ki ngā tama a tōku whaea.
PSA 69:9 Ka pau hoki ahau i te aroha ki tōu whare; kua tau anō ki ahau ngā tāwai a te hunga e tāwai ana ki a koe.
PSA 69:10 I ahau i tangi, i whakatiki hei whiu i tōku wairua, ka waiho tēnā hei tāwainga mōku.
PSA 69:11 I kākahu hoki ahau i te kākahu taratara mōku, ā, i waiho hei whakatauki mā rātou.
PSA 69:12 Kei te kōrero kino mōku te hunga e noho ana i te kūwaha; waiatatia ana ahau e te hunga haurangi wāina.
PSA 69:13 Ko ahau ia, ki a koe tāku īnoi, e Ihowā, i te wā e manakohia ai; whakahokia mai he kupu ki ahau, e te Atua, i runga i te nui o tōu aroha, o te pono o tāu whakaoranga.
PSA 69:14 Whakaorangia ahau i roto i te oru, kei toremi; kia ora ahau i te hunga e kino ana ki ahau, i ngā wai hōhonu anō hoki.
PSA 69:15 Kei ngaro ahau i te waipuke, kei horomia e te rire; kei kopia anō te waha o te poka ki runga ki ahau.
PSA 69:16 E Ihowā whakahokia mai he kupu ki ahau; he pai hoki tōu atawhai: tahuri mai ki ahau, kia rite ki te nui o āu arohatanga.
PSA 69:17 Ā, kaua e hunā tōu mata ki tāu pononga; e pōuri ana hoki ahau: hohoro te whakahoki kupu mai ki ahau.
PSA 69:18 Whakatata mai ki tōku wairua, hokona; whakaorangia ahau, e mahi nei ōku hoariri.
PSA 69:19 E mātau ana koe ki tōku tāwainga, ki tōku whakamā, ki tōku numinumi; tōu aroaro ōku hoariri katoa.
PSA 69:20 Marū noa tōku ngākau i te tāwai; ā, kī tonu ahau i te pōuri; i titiro ahau ki tētahi hei aroha mai, ā, kore ake; ki ētahi hei whakamārie, ā, kīhai i kitea.
PSA 69:21 I hōmai he au hei kai māku; i tōku matewaitanga anō i whakainumia ahau ki te winika.
PSA 69:22 Kia meinga tā rātou tēpu i tō rātou aroaro hei māhanga; hei rore hoki i tō rātou wā rangimārie.
PSA 69:23 Kia whakapōuritia ō rātou kanohi, kei kite rātou; kia wiri tonu hoki ō rātou hope.
PSA 69:24 Ringihia atu tōu riri ki runga ki a rātou, kia mau hoki rātou i tōu ārita, i tōu weriweri.
PSA 69:25 Kia ururuatia tō rātou nohoanga; kaua tētahi e noho ki ō rātou tēneti.
PSA 69:26 Mō rātou i tūkino i te tangata i whiua nei e koe; ā, kōrerotia ana e rātou te pōuri o te hunga i werohia e koe.
PSA 69:27 Tāpiritia he kino ki runga ki tō rātou kino; kaua hoki rātou e tukua kia tomo ki tōu tika.
PSA 69:28 Kia murua atu rātou i te pukapuka o te ora, kaua anō e tuhituhia ki roto ki te hunga tika.
PSA 69:29 Ko ahau ia, he rawakore, he pōuri; kia whakateiteitia ake ahau, e te Atua, e tāu whakaoranga.
PSA 69:30 Ka whakamoemiti tāku waiata ki te ingoa o te Atua, ka whakanui anō tāku whakawhetai i a ia.
PSA 69:31 Pai rawa tēnei ki a Ihowā i te pūru, i te kau, i te mea whai haona, whai maikuku.
PSA 69:32 Kua kite te hunga māhaki, kua hari; ka ora anō ō koutou ngākau, e te hunga e rapu nei i te Atua.
PSA 69:33 Nō te mea ka rongo a Ihowā ki ngā rawakore, e kore anō e whakahāwea ki āna herehere.
PSA 69:34 Kia whakamoemiti te rangi me te whenua ki a ia, ngā moana, me ngā mea katoa e tere ana i roto.
PSA 69:35 Nō te mea tērā e whakaorangia e te Atua a Hiona, ka hangā anō e ia ngā pā o Hūrā; ā, ka noho rātou ki reira, ka riro hoki a reira i a rātou;
PSA 69:36 ā, ka nohoia a reira e ngā uri o āna pononga; hei kāinga tupu anō a reira mō te hunga e aroha ana ki tōna ingoa.
PSA 70:1 Ki te tino kaiwhakatangi. Nā Rāwiri, hei whakamahara. Kia hohoro, e te Atua, ki te whakaora i ahau; e Ihowā, hohoro ki te āwhina i ahau.
PSA 70:2 Kia whakamā, kia pororaru ngātahi te hunga e rapu ana i tōku wairua. Kia whakahokia ki muri, kia whakamā te hunga e hiahia ana kia hē ahau.
PSA 70:3 Kia whakahokia ki muri mō tō rātou whakamā, te hunga e mea ana ki ahau, “Ha, ha!”
PSA 70:4 Kia hari, kia koa, ki a koe te hunga katoa e rapu ana i a koe. Kia mea tonu te hunga e pai ana ki tāu whakaoranga, “Kia whakanuia te Atua!”
PSA 70:5 Ko ahau ia, he iti, he rawakore; hohoro mai, e te Atua, ki ahau. Ko koe tōku āwhina, tōku kaiwhakaora; kaua rā e whakaroa, e Ihowā.
PSA 71:1 Ko koe tāku e whakawhirinaki ai, e Ihowā; kei whakamā ahau ake ake.
PSA 71:2 Whakaorangia ahau, i runga i tōu tika, kia mawhiti anō ahau; tahuri mai tōu taringa ki ahau, whakaorangia hoki ahau.
PSA 71:3 Kia ai koe hei teko e noho ai ahau, hei hokihokinga tonutanga atu mōku; kua kīia iho ahau e koe kia whakaorangia, ko koe nei hoki tōku kōhatu, tōku pourewa.
PSA 71:4 Whakaorangia ahau, e tōku Atua, i te ringa o te tangata kino, i te ringa o te whanokē, o te nanakia.
PSA 71:5 Ko koe nei hoki, e te Ariki, e Ihowā, tāku e tūmanako atu nei, tāku e whakawhirinaki nei nō tōku tamarikitanga ake anō.
PSA 71:6 Nāu ahau i tautoko ake nō te kōpū mai anō; nāu ahau i tango mai i roto i ngā whēkau o tōku whaea. Ko koe tāku e whakamoemiti tonu ai.
PSA 71:7 He mīharotanga ahau nā te tini; ko koe ia tōku piringa kaha.
PSA 71:8 Kia kī tōku māngai i te whakamoemiti ki a koe, i tōu hōnore i te roa o te rā.
PSA 71:9 Kaua ahau e pangā ā te wā o te koroheketanga, kaua ahau e whakarērea ina hemo tōku kaha.
PSA 71:10 E kōrerotia ana hoki ahau e ōku hoariri, ā, e rūnanga tahi ana te hunga e whanga ana ki tōku wairua.
PSA 71:11 E mea ana, “Kua whakarērea ia e te Atua; whāia, hopukia; kāhore hoki tētahi hei whakaora.”
PSA 71:12 E te Atua, kei matara atu koe i ahau; e tōku Atua, hohoro ki te āwhina i ahau.
PSA 71:13 Kia whakamā, kia pau ngā hoariri o tōku wairua; kia hīpokina ki te tāwai, ki te whakamā, te hunga e rapu ana i te hē mōku.
PSA 71:14 Ko ahau ia, ka tūmanako tonu; ka hono tonu anō te whakamoemiti ki a koe.
PSA 71:15 Mā tōku māngai e whakakite tōu tika, tāu whakaoranga i te roa o te rā; kāhore hoki ahau e mōhio e hia rānei.
PSA 71:16 Ka haere ahau i runga i te kaha o te Ariki, o Ihowā, ka whakahuatia e ahau tōu tika, tōu anake.
PSA 71:17 E te Atua, he mea whakaako ahau nāu, nō tōku tamarikitanga ake; ā, he whakapuaki tāku i āu mahi whakamīharo ā mohoa noa nei.
PSA 71:18 Nā, kaua ahau e whakarērea, e te Atua, ā koroheke noa, hina noa ahau, kia whakakitea rā anō e ahau tōu kaha ki tēnei whakatupuranga, tōu nui ki ngā tāngata katoa e puta mai ā mua.
PSA 71:19 Kei runga rawa anō tōu tika, e te Atua, he nui nei hoki āu mahi; e te Atua, ko wai te rite ki a koe?
PSA 71:20 He nui, he kino ngā pōuritanga ngākau i whakakitea mai e koe ki a mātou; tērā anō koe ka whakahauora i a mātou, ka whakahoki ake anō i a mātou i ngā wāhi hōhonu o te whenua.
PSA 71:21 Whakaraneatia e koe tōku nui, ā, tahuri mai anō ka whakamārie i ahau.
PSA 71:22 Ka whakamoemiti ahau ki a koe i runga i te hātere, arā ki tōu pono, e tōku Atua; ka hīmene ahau ki a koe i runga i te hāpa, e te Mea Tapu o Īharaira.
PSA 71:23 Ka tino hari ōku ngutu ua hīmene ahau ki a koe; me tōku wairua anō i hokona nei e koe.
PSA 71:24 Ka kōrerotia hoki e tōku arero tōu tika i te roa o te rā; kua whakamā nei hoki, kua numinumi kau te hunga i rapu i te hē mōku.
PSA 72:1 Nā Horomona. Hōmai e te Atua, āu whakaritenga ki te kīngi, me tōu tika ki te tama a te kīngi.
PSA 72:2 Māna e whakawā tōu iwi i runga i te tika, āu rawakore i runga i te whakawā tika.
PSA 72:3 Ka kawea mai e ngā maunga te rongo mau ki te iwi, e ngā pukepuke i runga i te tika.
PSA 72:4 Ka whakawā ia mō ngā ware o te iwi; ka whakaorangia e ia ngā tamariki a te rawakore; mongamonga noa i a ia te kaitūkino.
PSA 72:5 I te rā e mau ana, i te marama hoki, ka pērā te mau o tō rātou wehi ki a koe i ngā whakatupuranga katoa.
PSA 72:6 E heke iho ia ānō he ua ki runga ki te kotinga tarutaru, me ngā ua e whakamākūkū nei i te whenua.
PSA 72:7 Ka tupu te tangata tika i ōna rā; tōna roa anō o te āta noho, ā, kore noa te marama.
PSA 72:8 Ka kīngi ia i tēnei moana, ā tae noa ki tētahi moana, i te awa, ā ngā pito atu anō o te whenua.
PSA 72:9 Ka piko ki tōna aroaro te hunga o te koraha; ā, ka mitimiti ōna hoariri i te puehu.
PSA 72:10 Ka maua mai he hākari e ngā kīngi o Tarahihi, o ngā motu; ka kawea mai he tahua e ngā kīngi o Hēpā, o Tepa.
PSA 72:11 Āe, ka koropiko ngā kīngi katoa ki a ia; ka mahi ngā iwi katoa ki a ia.
PSA 72:12 Ka ora hoki i a ia te rawakore ua tangi atu, te ware hoki me te tangata kāhore nei ōna kaiāwhina.
PSA 72:13 E tohu ia i te tangata iti, i te rawakore; ka ora anō i a ia ngā wairua o ngā rawakore.
PSA 72:14 Ka hokona e ia tō rātou wairua i roto i te tūkino, i te tutū, he mea utu nui hoki ō rātou toto ki tāna titiro.
PSA 72:15 Ā, e ora rātou! Ka hoatu anō ki a ia he kōura nō Hēpā. Ka tukua tonutia hoki te īnoi mōna; ka whakapaingia ia i tēnei rā, i tēnei rā.
PSA 72:16 He kutanga wīti tērā i runga i te whenua, i te tihi o ngā maunga; ngarue ana ōna hua, ānō ko Repanōna, ā, ka rite te tupu o ngā tāngata o te pā ki tō te tarutaru o te whenua.
PSA 72:17 Ka mau tonu tōna ingoa ake ake; ka rite tōna ingoa ki te rā te pūmau. Kei roto i a ia te manaaki mō te tangata; ka kōrerotia tōna koa e ngā iwi katoa.
PSA 72:18 Kia whakapaingia a Ihowā, te Atua, te Atua o Īharaira; ko ia nei anake hei mahi i ngā mahi whakamīharo.
PSA 72:19 Kia whakapaingia anō tōna ingoa korōria mō ake tonu atu; kia kī katoa hoki te whenua i tōna korōria.
PSA 72:20 Ko te mutunga tēnei o ngā īnoi a Rāwiri, a te tama a Hehe.
PSA 73:1 He hīmene nā Āhapa. He pono, he pai te Atua ki a Īharaira; ki te hunga ngākau mā.
PSA 73:2 Ko ahau ia, wāhi iti kua tapepa ōku waewae; me i kotahi kua paheke ōku takahanga.
PSA 73:3 I hae hoki ahau ki te hunga whakahī, i tōku kitenga i te tangata hara e kake ana.
PSA 73:4 Kāhore hoki he whakawiringa a te mate i a rātou; he mārō anō ō rātou uaua.
PSA 73:5 Kāhore ngā mea whakapōuri tāngata e pā ki a rātou; kāhore anō rātou e whiua tahitia me te mano tāngata.
PSA 73:6 Nā reira, ānō he hei te whakakake e awhi nei i a rātou, ānō he kākahu te tutū e hīpokina nei rātou.
PSA 73:7 Pupuhi ana ō rātou kanohi i te ngako; nui ake ngā mea i a rātou i a ō rātou ngākau i hiahia ai.
PSA 73:8 E whakahī ana rātou, e kōrero kino ana mō te whakatoi; kei runga noa ake ā rātou kōrero.
PSA 73:9 Tutuki tonu tō rātou māngai ki ngā rangi; e kōpikopiko ana hoki tō rātou arero i runga i te whenua.
PSA 73:10 Koia tōna iwi i hoki mai ai ki konei; ā, e whakawiria ana he wai mō rātou, kī tonu te kapu.
PSA 73:11 E mea ana rātou, “Mā te aha e mātau ai te Atua? He mātauranga koia tō te Runga Rawa?”
PSA 73:12 Nanā, ko te hunga kino tēnei, kei runga tonu i te whenua rangatira, e hua ana ō rātou taonga.
PSA 73:13 He pono he maumau tāku mea i tōku ngākau kia mā, tāku horoi hoki i ōku ringa ki te harakore.
PSA 73:14 E whiua ana hoki ahau i te roa o te rā, e pākia ana i ngā ata katoa.
PSA 73:15 Me i kī ahau, “Ka pēnei tāku kōrero,” nā, e tinihanga ana ahau ki te whakatupuranga o āu tamariki.
PSA 73:16 I tāku meatanga kia mātauria tēnei, ka kite ahau he mahi whakauaua rawa;
PSA 73:17 tae noa ahau ki te wāhi tapu o te Atua, kātahi ahau ka mōhio ki tō rātou mutunga.
PSA 73:18 He pono i whakatūria rātou e koe ki ngā wāhi pāhekeheke; ā, whakatakā ana e koe ki te ngaromanga.
PSA 73:19 Anō te pānga whakareretanga o tō rātou hunanga, kua pau rawa i ngā wehi!
PSA 73:20 Ka rite ki te rekanga kanohi, ina ara ake te tangata, tāu whakahāwea ki tō rātou āhua, e te Ariki, ina ara ake koe.
PSA 73:21 Nā, mamae noa iho tōku ngākau, ā, hukihuki ana ōku whatumanawa.
PSA 73:22 He whakaarokore hoki ahau, he kūware; me te mea he kīrehe ahau i tōu aroaro.
PSA 73:23 Ahakoa rā kei a koe tonu ahau; e puritia ana e koe tōku ringa matau.
PSA 73:24 Mā tōu whakaaro ahau e ārahi; muri iho ka riro ahau i a koe ki te korōria.
PSA 73:25 Ko wai hoki tōku i te rangi ko koe anake? Kāhore atu hoki ōku i te whenua e hiahia ai, ko koe anake.
PSA 73:26 Hemo iho ōku kikokiko me tōku ngākau; ko te Atua ia te kaha o tōku ngākau, tōku wāhi ake ake.
PSA 73:27 Nā, ko te hunga e mamao atu ana i a koe ka mate; ka ngaro i a koe te hunga pūremu katoa e whakarere nei i a koe.
PSA 73:28 Ko ahau ia, he pai ki ahau te whakatata ki te Atua; kua waiho e ahau te Ariki, a Ihowā, hei whakawhirinakitanga mōku, kia whakapuakina ai e ahau āu mahi katoa.
PSA 74:1 He Makiri nā Āhapa. E te Atua, he aha i pangā ai mātou e koe ake ake? He aha i pongere ai tōu riri ki ngā hipi o tāu māra?
PSA 74:2 Mahara ki tāu whakaminenga i hokona e koe i mua, i utua e koe hei iwi mō tōu kāinga tupu; ā, ki tēnei Maunga Hiona i nohoia nei e koe.
PSA 74:3 Hiki ake ōu waewae ki ngā whakangaromanga e mau tonu nei, ki ngā mahi kino katoa a te hoariri ki te wāhi tapu.
PSA 74:4 Kua hāmama nei ōu hoariri i waenganui i āu whakaminenga; kua whakatūria e rātou ā rātou kara hei tohu.
PSA 74:5 E rite ana rātou ki ngā tāngata e hāpai ana i te tītaha ki te puia rākau.
PSA 74:6 Ināianei ia e tukitukia ana e rātou ōna mea whakairo, pākaruhia iho ana ki te tītaha, ki te hama.
PSA 74:7 Kua toua tōu wāhi tapu ki te kāpura, kua noa i a rātou te nohoanga o tōu ingoa, kei te whenua e takoto ana.
PSA 74:8 I mea tō rātou ngākau, “Me whakangaro rātou ā poto ake.” Kua tahuna e rātou ngā whare huihui katoa o te Atua i te whenua.
PSA 74:9 Kāhore mātou e kite i ō mātou tohu, kāhore atu he poropiti, kāhore hoki tētahi o mātou e mātau ana kia pēhea ake te roa.
PSA 74:10 E te Atua, kia pēhea ake te roa o te tāwai a te hoariri? Ka kohukohu tonu rānei te hoariri ki tōu ingoa ake ake?
PSA 74:11 He aha i pēpeke ai tōu ringa, tōu matau? Unuhia i roto i tōu uma, whakamōtītia rātou.
PSA 74:12 Ko te Atua ia tōku Kīngi o tua iho, e mahi whakaora ana i waenganui i te whenua.
PSA 74:13 Nāu, nā tōu kaha i wawae te moana; pakaru ana i a koe ngā mātenga o ngā tarakona i ngā wai.
PSA 74:14 Mongamonga noa i a koe ngā mātenga o rewiatana; ā, hoatu ana ia e koe hei kai mā te iwi o te koraha.
PSA 74:15 I wāhia e koe te puna me te roma; mimiti ake i a koe ngā awa nunui.
PSA 74:16 Nāu te ao, nāu hoki te pō; nāu i whakarite te marama me te rā.
PSA 74:17 Nāu i whakatū ngā rohe katoa o te whenua; te raumati me te hōtoke, he mea whakarite ēnā nāu.
PSA 74:18 Kia mahara ki tēnei, kua tāwai te hoariri, e Ihowā; kua kohukohu te hunga pōauau ki tōu ingoa.
PSA 74:19 Kaua e tukua te wairua o tāu kūkupa ki te kīrehe; kei wareware ake ake ki te whakaminenga o āu rawakore.
PSA 74:20 Whakaaroa te kawenata; kua kikī hoki ngā wāhi pōuri o te whenua i ngā nohoanga nanakia.
PSA 74:21 Kei hoki whakamā mai te tangata e tūkinotia ana; kia whakamoemititia tōu ingoa e te ware, e te rawakore.
PSA 74:22 E ara, e te Atua, tohea tāu tohe; mahara ki tā te tangata pōauau tāwai ki a koe ā pau noa te rā.
PSA 74:23 Kei wareware ki te reo o ōu hoariri; e kake tonu ana te ngangau a te hunga e whakatika ana ki a koe.
PSA 75:1 Ki te tino kaiwhakatangi: Aratakiti. He hīmene, he waiata nā Āhapa. Ka whakawhetai tonu mātou ki a koe, e te Atua, ka whakawhetai tonu mātou; kei te tata mai hoki tōu ingoa. E kōrerotia ana e te tangata āu mahi whakamīharo.
PSA 75:2 “Ka kitea e ahau te wā e rite ana, ka tika tāku whakawā.
PSA 75:3 Kūteretere noa iho te whenua me ōna tāngata katoa; nāku i whakatū ōna pou. Hera
PSA 75:4 I mea ahau ki te hunga whakakake, ‘Kāti rā te whakakake,’ ki te hunga hara anō, ‘Kaua e whakaarahia te haona;
PSA 75:5 kaua tō koutou haona e whakaarahia ki runga, kāti te whakamārō i te kakī ina kōrero.’ ”
PSA 75:6 Nō te mea kāhore he aranga i te rāwhiti, kāhore i te hauāuru, kāhore hoki i te tonga.
PSA 75:7 Ko te Atua ia te kaiwhakawā; ko tēnei e whakaititia iho ana e ia, ko tērā e whakaarahia ake ana.
PSA 75:8 Kei te ringa hoki o Ihowā he kapu, pāhuka tonu te wāina; kī tonu, whakananu rawa, hei ringihanga māna; ko ngā nganga ia, mā te hunga kino katoa o te whenua e tatau, e inu.
PSA 75:9 Ko ahau ia, ka kauwhau tonu; ka hīmene ki te Atua o Hākopa.
PSA 75:10 Ā, ka kotia e ahau ngā haona katoa o te hunga kino; ka whakaarahia ake ia ngā haona o te tangata tika.
PSA 76:1 Ki te tino kaiwhakatangi: Nekinoto. He hīmene, he waiata nā Āhapa. E mātauria ana te Atua i roto i a Hūrā, he nui tōna ingoa i roto i a Īharaira.
PSA 76:2 Kei Harema hoki tōna tapenākara; kei Hiona tōna nohoanga.
PSA 76:3 I whati i a ia i reira ngā pere o te kōpere, te whakangungu rākau, te hoari, me ngā mea mō te whawhai. Hera
PSA 76:4 Tērā atu tōu korōria, tōu nui, i tō ngā maunga kīrehe.
PSA 76:5 Kua pāhuatia te hunga ngākau toa, moe ana rātou i tā rātou moe; kīhai anō i whai ringa tētahi o ngā mārohirohi.
PSA 76:6 Nā tāu whakatūpehupehu, e te Atua o Hākopa, i parangia ai te hāriata me te hōiho e te moe.
PSA 76:7 Ko koe, inā, ko koe e wehingia; ko wai hoki e tū ki tōu aroaro ina riri koe?
PSA 76:8 Nāu i rangona iho ai te whakawā i te rangi; wehi ana te whenua, whakaririka kau ana,
PSA 76:9 i te aranga ake o te Atua ki te whakawā, ki te whakaora i te hunga māhaki katoa o te whenua. Hera
PSA 76:10 He pono ka whai korōria koe i te riri o te tangata; mau anō e whītiki te toenga o te riri.
PSA 76:11 Whakapuakina te kupu taurangi ki a Ihowā, ki tō koutou Atua, whakamanā hoki; e te hunga katoa i tētahi taha ōna, i tētahi taha, mauria he hākari ki a ia, ka tika hoki te wehi ki a ia.
PSA 76:12 Māna e poro atu te wairua o ngā rangatira; e matakuria ana ia e ngā kīngi o te whenua.
PSA 77:1 Ki te tino kaiwhakatangi, ki a Ierutunu. He hīmene nā Āhapa. Ki te Atua tōku reo, e karanga nei ahau, ki te Atua tōku reo, ā, tērā e tahuri mai tōna taringa ki ahau.
PSA 77:2 I rapu ahau ki te Ariki i te rā o tōku pōuri; mārō tonu tōku ringa i te pō, kīhai anō i pēpeke; kīhai tōku wairua i pai kia whakamārietia.
PSA 77:3 E mahara ana ahau ki te Atua, ā, e pōuri ana; kei te whakaaroaro, ā, ngaro iho tōku wairua. Hera
PSA 77:4 E puritia ana e koe ōku kanohi kia mataara tonu; he pōuri ahau, tē āhei te kōrero.
PSA 77:5 Ka hoki ōku whakaaro ki ngā rā onamata, ki ngā tau o tua iho.
PSA 77:6 E whakamahara ana ahau ki tāku waiata i te pō, e kōrerorero ana ki tōku ngākau, e rapurapu ana tōku wairua.
PSA 77:7 “Tērā rānei te Ariki e panga tonu ake ake, ā, heoi anō rānei āna manakohanga mai?
PSA 77:8 Kua kāhore rānei tāna mahi tohu mō ake tonu atu? Kua whati rānei tāna kupu ā ake ake?
PSA 77:9 Kua wareware rānei te Atua ki te atawhai? Kua riri rānei ia, ā, tūtakina atu ana e ia tōna aroha?” Hera
PSA 77:10 Nā, ka mea ahau, “Ko tōku ngoikore tēnei: otirā ka mahara ahau ki ngā tau o te ringa matau o te Runga Rawa.”
PSA 77:11 Ka mahara ahau ki ngā mahi a Ihowā; āe rā, ka mahara ahau ki āu mea whakamīharo o tua iho.
PSA 77:12 Ka whakaaro hoki ahau ki āu meatanga katoa, ka pūrākau ki āu mahi.
PSA 77:13 E te Atua, kei te wāhi tapu tōu ara. Ko wai te atua nui hei rite ki te Atua?
PSA 77:14 Ko koe te Atua e mahi nei i ngā mea whakamīharo; kua whakapuakina e koe tōu kaha i waenganui o ngā iwi.
PSA 77:15 Hokona ana e tōu ringa tāu iwi, ngā tama a Hākopa rāua ko Hōhepa. Hera
PSA 77:16 I kite ngā wai i a koe, e te Atua, i kite ngā wai i a koe, mataku ana; i oho anō ngā rire.
PSA 77:17 Ringihia ana he wai e ngā kapua, puaki ana te haruru o ngā rangi; rererere ana āu pere.
PSA 77:18 I roto i te āwhiowhio te haruru o tāu whatitiri; mārama noa te ao i ngā uira; wiri ana te whenua, oioi ana.
PSA 77:19 I te moana tōu ara, i ngā wai nui tōu huarahi, e kore anō e kitea ōu takahanga.
PSA 77:20 He mea ārahi e koe tāu iwi ānō he kāhui, arā e te ringa o Mohi rāua ko Ārona.
PSA 78:1 He Makiri nā Āhapa. Kia anga mai te taringa, e tōku iwi, ki tāku ture; tahuri mai ō koutou taringa ki ngā kupu a tōku māngai.
PSA 78:2 Ka puaki te kupu whakarite i tōku māngai, ka kōrerotia e ahau ngā mea ngaro onamata –
PSA 78:3 i rongo nei, i mātau nei tātou, kōrero ai hoki ō tātou mātua ki a tātou.
PSA 78:4 E kore e hunā e mātou i ā rātou tamariki; me whakaatu ki tō muri whakatupuranga ngā whakamoemiti ki a Ihowā, me tōna kaha, me āna mahi whakamīharo i mea ai ia.
PSA 78:5 Kua pūmau hoki i a ia he whakaaturanga i roto i a Hākopa, kua takoto he ture i roto i a Īharaira; ā, whakahaua mai ana e ia ō tātou tūpuna, kia whakaakona ki ā rātou tamariki;
PSA 78:6 kia mātauria ai e tō muri whakatupuranga, e ngā tamariki e whānau, e ara ake ā mua, mō tā rātou whakaatu ki ā rātou tamariki.
PSA 78:7 Kia ū ai tā rātou tūmanako ki te Atua, kei wareware hoki ki ngā mahi a te Atua; engari kia mau ki āna whakahau.
PSA 78:8 Kei rite hoki ki ō rātou tūpuna, ki te whakatupuranga whakakeke, tutū, ki te whakatupuranga kīhai nei i whakatikatika i tō rātou ngākau, kīhai hoki i ū tō rātou wairua ki te Atua.
PSA 78:9 He hunga mau patu ngā tama a Ēparaima, he hunga hāpai kōpere, heoi tahuri ana rātou i te rā o te tatauranga.
PSA 78:10 Kīhai i puritia e rātou te kawenata a te Atua; kīhai anō i pai ki te haere i tāna ture.
PSA 78:11 Heoi, kua wareware ki āna mahi, me āna mea whakamīharo i whakakitea e ia ki a rātou.
PSA 78:12 He mea whakamīharo āna mahi i te aroaro o ō rātou tūpuna, i te whenua o Īhipa, i te pārae o Toana.
PSA 78:13 Tapahia ana e ia te moana, ā, meinga ana rātou kia whiti; tū ake i a ia ngā wai ānō he pūranga.
PSA 78:14 He mea ārahi rātou e ia i te awatea ki te kapua; i te roa hoki o te pō ki te mārama o te ahi.
PSA 78:15 I wāhia e ia ngā kōhatu i te koraha; ā, me te mea nō ngā rire nui tana wai hei inu mā rātou.
PSA 78:16 Puta mai ana i a ia he awa i roto i te kāmaka; meinga ana ngā wai kia heke, ānō he waipuke.
PSA 78:17 Heoi, ka hara anō rātou ki a ia; whakatoi ana ki te Runga Rawa i te koraha.
PSA 78:18 Nā, kei te whakamātautau tō rātou ngākau i te Atua, kei te īnoi kai mā tō rātou hiahia.
PSA 78:19 I kōrero kino anō rātou ki te Atua, i mea; “E āhei rānei i te Atua te taka he tēpu ki te koraha?
PSA 78:20 Nanā, ko tāna patunga i te kōhatu, ka pakaru mai te wai, ā, puke ana ngā awa; e taea anō rānei e ia te hōmai taro, e pae rānei i a ia he kikokiko mā tāna iwi?”
PSA 78:21 Nā, ko te rongonga o Ihowā, nā, ka riri; ā, toro ana te kāpura ki a Hākopa, puta ake ana te riri ki a Īharaira;
PSA 78:22 mō rātou kīhai i whakapono ki te Atua, kīhai anō i whakawhirinaki ki tāna whakaoranga.
PSA 78:23 Nāna nei hoki i whakahau ngā kapua i runga, i whakatuwhera ngā tatau o te rangi;
PSA 78:24 ā, whakauaina iho te mana ki runga ki a rātou hei kai; hōmai ana hoki e ia te wīti o te rangi mā rātou.
PSA 78:25 Kai ana te tangata i tā te anahera kai; i tukua e ia he kai mā rātou, ā mākona noa.
PSA 78:26 I whakaohokia e ia te marangai i te rangi; i tākina anō te tonga e tōna kaha.
PSA 78:27 Ā, whakauaina iho e ia te kikokiko ki a rātou ānō he puehu; he manu whai pākau ānō he one nō te moana.
PSA 78:28 Ā, whakangahorotia iho e ia ki waenganui i tō rātou puni; ki ō rātou nohoanga ā tawhio noa.
PSA 78:29 Nā, kai ana rātou, tino mākona; i tukua hoki e ia ki a rātou tā rātou i hiahia ai.
PSA 78:30 Kīhai rātou i ngaruru ki tā rātou i hiahia ai; ā, i roto tonu tā rātou kai i ō rātou māngai,
PSA 78:31 nā, ka pā te riri o te Atua ki a rātou, ā, patua iho e ia te hunga tetere o rātou; piko ana i a ia ngā taitamariki o Īharaira.
PSA 78:32 Ahakoa pā katoa tēnei, i hara anō rātou; kīhai anō i whakapono ki āna mahi whakamīharo.
PSA 78:33 I whakapaua ai e ia ō rātou rā ki te horihori, ō rātou tau ki te pōtatutatu.
PSA 78:34 Ka patua rātou e ia, nā, ka rapu rātou i a ia, ā, ka hoki, ka ui wawe ki te Atua.
PSA 78:35 Ka mahara hoki ko te Atua tō rātou kōhatu, ko te Atua, ko te Runga Rawa, tō rātou kaihoko.
PSA 78:36 Otiia kei te patipati ō rātou māngai ki a ia, ā, teka ana ō rātou arero ki a ia.
PSA 78:37 Kīhai hoki tō rātou ngākau i tika ki a ia; kīhai anō rātou i ū ki tāna kawenata.
PSA 78:38 Ko tāna ia, he aroha; hīpokina ana e ia te hē, kīhai anō i whakangaro. Āe rā, he maha āna whakahokinga iho i tōna riri, ā, kīhai i oho katoa tōna riri.
PSA 78:39 I mahara hoki ia he kikokiko nei rātou; he hau e pahure atu ana, ā, e kore e hoki mai.
PSA 78:40 Anō te tini o ā rātou whakatoinga i a ia i te koraha, o ā rātou whakapōuritanga i a ia i te tahora!
PSA 78:41 Hoki whakamuri ana rātou, whakamātautau ana i te Atua; whakatoia ana e rātou te Mea Tapu o Īharaira.
PSA 78:42 Kīhai rātou i mahara ki tōna ringa, ki te rā i whakaorangia ai rātou e ia i te hoariri;
PSA 78:43 ki tāna meatanga i āna tohu ki Īhipa, i āna merekara ki te pārae o Toana.
PSA 78:44 I puta kē ai i a ia ō rātou awa hei toto, me ō rātou manga wai, tē inu ai rātou.
PSA 78:45 I tonoa ai e ia he huihuinga namu ki a rātou, ā, pau iho rātou; he poroka, i hunā ai rātou.
PSA 78:46 Ā, hoatu ana e ia ō rātou hua ki te moka; me tō rātou māuiui ki te māwhitiwhiti.
PSA 78:47 Whakamatea ana e ia ā rātou wāina ki te whatu, ā rātou rākau hikamora ki te haupapa.
PSA 78:48 Tukua ana e ia ā rātou kararehe mā te whatu, ā rātou kāhui mā ngā uira.
PSA 78:49 I tukua whakareretia e ia ki a rātou tōna riri, āritarita, weriweri, me te raruraru; he whakaeke nā ngā anahera kino.
PSA 78:50 Ā, whakatikaia ana e ia he ara mō tōna riri; kīhai i tohungia tō rātou wairua kei mate, otiia, tukua ana e ia tō rātou ora ki te mate urutā.
PSA 78:51 Nā, patua iho e ia ngā mātāmua i Īhipa, te muanga o tō rātou kaha i ngā tēneti o Hama.
PSA 78:52 Otirā, ārahina ana e ia āna ake tāngata ānō he hipi; whakahaerea ana rātou e ia i te koraha anō he kāhui.
PSA 78:53 Nā, ka ārahina mārietia rātou e ia, tē wehi rātou; ko ō rātou hoariri ia taupokina iho e te moana.
PSA 78:54 Nā, ka kawea rātou e ia ki te rohe o tōna wāhi tapu, ki tēnei maunga, i hokona nei e tōna matau.
PSA 78:55 Peia ana e ia ngā tauiwi i tō rātou aroaro; ā, wehea ana e ia he kāinga mō rātou ki te aho, whakanohoia iho ngā hapū o Īharaira ki ō rātou tēneti.
PSA 78:56 Heoi, ka whakamātauria, ka whakatoia e rātou te Atua, te Runga Rawa; kīhai hoki i mau ki āna whakaaturanga;
PSA 78:57 ā, hoki whakamuri ana, mahi hīanga ana, pērā ana me ō rātou mātua; parori kē ana rātou, he pērā me te kōpere tinihanga.
PSA 78:58 Nā, ko ō rātou wāhi tiketike hei whakapātaritari i a ia; ko ō rātou whakapakoko hei mea i a ia kia hae.
PSA 78:59 I te rongonga o te Atua, ka riri, ka tino whakarihariha hoki ki a Īharaira.
PSA 78:60 Ā, mahue ake i a ia te tapenākara o Hiro, te tēneti i whakatūria e ia ki waenganui i ngā tāngata;
PSA 78:61 ā, tukua ana e ia tōna kaha hei whakarau, tōna korōria ki te ringa o te hoariri.
PSA 78:62 I tukua atu anō e ia tāna iwi mā te hoari; ā, i riri ki tōna kāinga tupu.
PSA 78:63 Pau ake ā rātou taitama i te ahi; kīhai anō ā rātou kōtiro i mārenatia.
PSA 78:64 I hinga ō rātou tohunga i te hoari; kīhai hoki i tangi ā rātou pouaru.
PSA 78:65 Nā, ka maranga te Ariki ānō ko tētahi i te moe, me te tangata kaha e hāmama ana i te wāina.
PSA 78:66 Ā, patua iho e ia a muri o ōna hoariri, meinga ana rātou e ia hei taunutanga mō ake tonu atu.
PSA 78:67 I whakakāhore anō ia ki te tēneti o Hōhepa; ā, kīhai i whiriwhiri i te hapū o Ēparaima;
PSA 78:68 heoi, ko te hapū o Hūrā tāna i whiriwhiri ai, ko Maunga Hiona tāna i aroha ai.
PSA 78:69 Ā, whakatūria ana e ia tōna wāhi tapu kia pērā me ngā wāhi teitei; me te whenua i whakapūmautia e ia mō ake tonu atu.
PSA 78:70 I whiriwhiria anō e ia a Rāwiri, tāna pononga, he mea tango nāna i ngā kāinga hipi;
PSA 78:71 mauria ana mai e ia i te whai i ngā hipi whāereere, hei whāngai i a Hākopa, i tāna iwi, i a Īharaira hoki, i tōna kāinga tupu.
PSA 78:72 Ā, rite tonu ki te tapatahi o tōna ngākau tāna whāngai i a rātou; he ārahi mōhio hoki tā tōna ringa i a rātou.
PSA 79:1 He hīmene nā Āhapa. E te Atua, kua tae mai ngā tauiwi ki tōu kāinga tupu; kua noa i a rātou tōu temepara tapu, kua waiho a Hiruhārama kia pūranga kau ana.
PSA 79:2 Ko ngā tinana mate o āu pononga kua hoatu e rātou hei kai mā ngā manu o te rangi, ko te kikokiko o tāu hunga tapu mā ngā kīrehe o te whenua.
PSA 79:3 Ko ō rātou toto, ringihia ake e rātou ānō he wai, ki ngā taha o Hiruhārama; kāhore hoki he tangata hei tanu i a rātou.
PSA 79:4 Kua waiho mātou hei tāwainga mā ō mātou hoa, hei katanga mā te hunga i tētahi taha, i tētahi taha o mātou.
PSA 79:5 Kia pēhea te roa, e Ihowā? E riri tonu rānei koe ake ake? E ngiha tonu rānei tōu hae me he kāpura?
PSA 79:6 Ringihia tōu riri ki ngā tauiwi kāhore nei e mātau ki a koe, ki ngā rangatiratanga kāhore nei e karanga ki tōu ingoa.
PSA 79:7 Kua pau hoki a Hākopa i a rātou, kua ururua i a rātou tōna nohoanga.
PSA 79:8 Kaua rā e maharatia ngā kino o ō mātou tūpuna; kia hohoro tōu aroha ki mua i a mātou; kua whakaititia rawatia hoki mātou.
PSA 79:9 Āwhinatia mātou, e te Atua o tō mātou whakaoranga, kia whakakorōriatia ai tōu ingoa; whakaorangia mātou, hīpokina hoki ō mātou hara, he mahara ki tōu ingoa.
PSA 79:10 Kia mea koia ngā tauiwi, “Kei hea tō rātou Atua?” Kia kite atu mātou e mātau ana ngā tauiwi ki te whakatakinga i te toto o āu pononga i whakahekea nei.
PSA 79:11 Kia tae atu ki tōu aroaro te auē a te herehere; kia rite ki te nui o tōu kaha tāu whakaora i te hunga e meatia ana kia mate.
PSA 79:12 Takiwhitutia atu te utu e hoatu e koe ki ngā uma o ō mātou hoa mō tā rātou tāwai, e tāwai nei rātou ki a koe, e te Ariki.
PSA 79:13 Pēnei ka whakawhetai mātou, tāu iwi, ngā hipi hoki e hēpara nei koe, ki a koe ake ake; ka whakakitea e mātou te whakamoemiti ki a koe, ki ngā whakatupuranga katoa.
PSA 80:1 Ki te tino kaiwhakatangi: Hohanimi Erutu. He hīmene nā Āhapa. Tahuri mai tōu taringa, e te Hēpara o Īharaira, e ārahi nei i a Hōhepa ānō he kāhui hipi! Whiti mai koe e noho mai nā i waenganui i ngā kerupima;
PSA 80:2 whakaohoohokia tōu kaha i te aroaro o Ēparaima, o Pineamine, o Mānahi; ā, haere mai ki te whakaora i a mātou.
PSA 80:3 Whakahokia ake mātou, e te Atua; kia mārama mai tōu mata, ā, ka ora mātou.
PSA 80:4 E Ihowā, e te Atua o ngā mano, kia pēhea ake te roa o tōu riri ki te īnoi a tāu iwi?
PSA 80:5 Kua whāngaia mai e koe he roimata hei taro mā rātou, he nui hoki te mēhua roimata kua hōmai nei e koe kia inumia e rātou.
PSA 80:6 Kua meinga mātou e koe hei totohetanga mā ō mātou hoa, ā, e kataina ana mātou e ō mātou hoariri.
PSA 80:7 Whakahokia ake mātou, e te Atua o ngā mano; kia mārama mai tōu mata, ā, ka ora mātou.
PSA 80:8 I maua mai e koe he wāina i Īhipa; ka oti i a koe ngā tauiwi te panga, nā whakatōkia iho e koe.
PSA 80:9 I whakapaia e koe he tūnga mōna; nā, ka hou ōna pakiaka, ā, ka kapi te whenua.
PSA 80:10 Taumarumaru ana tōna ata ki runga ki ngā pukepuke; ko ōna manga rite tonu ki ngā hīta a te Atua.
PSA 80:11 I tautotoro atu ōna manga ki te moana, ōna rārā ki te awa.
PSA 80:12 He aha i pākaruhia ai e koe ōna taiepa ki raro, kia kōwhakiwhakia ai ia e ngā tāngata katoa e tika ana i te ara?
PSA 80:13 Mongamonga noa i te poaka toa o te ngahere, e kainga ana e te kīrehe mohoao o te pārae.
PSA 80:14 Tahuri mai anō, e te Atua o ngā mano, e īnoi atu nei mātou; titiro iho i te rangi, kia kite mai koe, ka toro mai i tēnei wāina,
PSA 80:15 i te rākau i whakatōkia e tōu matau, i te manga hoki i meinga e koe kia pakari māu.
PSA 80:16 Kua pau i te ahi, kua tuaina ki raro; ngaro iho rātou i te riri o tōu mata.
PSA 80:17 Waiho tōu ringa i runga i te tangata o tōu matau, i te tama a te tangata i whakakahangia e koe māu.
PSA 80:18 Pēnei e kore mātou e hoki atu i a koe; whakahauorangia mātou, ā, ka karanga mātou ki tōu ingoa.
PSA 80:19 Whakahokia ake mātou, e Ihowā, e te Atua o ngā mano; kia mārama mai tōu mata, ā, ka ora mātou.
PSA 81:1 Ki te tino kaiwhakatangi: Kititi. Nā Āhapa. Kia kaha te waiata ki te Atua, ki tō tātou kaha; kia hari te hāmama ki te Atua o Hākopa.
PSA 81:2 Whakahuatia te hīmene, maua mai ki konei te timipera, te hāpa reka me te hātere.
PSA 81:3 Whakatangihia te tētere i te kōwhititanga marama, i te kīnga o te mārama, i tō tātou rā hākari.
PSA 81:4 Ko te tikanga hoki tēnei mā Īharaira, he mea whakarite nā te Atua o Hākopa.
PSA 81:5 I whakatakotoria tēnei e ia mā Hōhepa hei whakaaturanga, i tōna haerenga puta noa i te whenua o Īhipa. I rongo ai ahau ki reira i tētahi reo, kāhore ahau i mātau:
PSA 81:6 “I tangohia mai e ahau tōna pokohiwi i te pīkaunga; whakarērea ake e ōna ringa te kete.
PSA 81:7 I karanga koe ki ahau i te pōuritanga, ā, kua ora koe i ahau; i whakahoki kupu ahau ki a koe i te wāhi ngaro o te whatitiri; i whakamātau i a koe ki ngā wai o Meripa. Hera
PSA 81:8 “Whakarongo, e tāku iwi, ā, ka whakaatu ahau ki a koe; e Īharaira, ki te whakarongo koe ki ahau!
PSA 81:9 Aua tētahi atua kē i roto i a koe; kaua anō e koropiko ki te atua kē.
PSA 81:10 Ko Ihowā ahau, ko tōu Atua, i ārahina mai ai koe i te whenua o Īhipa. Kia nui te kowhera o tōu māngai, ā, māku e whakakī.
PSA 81:11 “Otiia, kīhai tāku iwi i pai ki te whakarongo ki tōku reo; kīhai anō a Īharaira i aro ki ahau.
PSA 81:12 Nā, tukua atu ana rātou e ahau ki te mārō o ō rātou ngākau; ā, haere ana rātou i runga i ō rātou whakaaro.
PSA 81:13 “Auē, te whakarongo tāku iwi ki ahau, te haere a Īharaira i āku ara!
PSA 81:14 Pēnei e kore e aha kua whati i ahau te tara o ō rātou hoariri; kua tahuri anō tōku ringa ki ō rātou hoariri.
PSA 81:15 Ko te hunga e kino ana ki a Ihowā kua ngohengohe ki a ia, ko tō rātou tāima ia kua mau tonu.
PSA 81:16 Kua whāngainga hoki rātou e ia ki te wīti pai rawa, kua whakamākonatia anō koe e ahau ki te honi i roto i te kōhatu.”
PSA 82:1 He hīmene nā Āhapa. E tū ana te Atua i roto i te whakaminenga o te Atua, e whakawā ana i waenganui i ngā atua:
PSA 82:2 “Kia pēhea ake te roa o tā koutou whakawā hē, o tā koutou whakapai ki ngā kanohi o te hunga kino. Hera
PSA 82:3 Whakatikaia tā te ware, tā te pani; kia tika te whakawā mō te ngākau mamae, mō te rawakore.
PSA 82:4 Whakaorangia te ware me te rawakore; tangohia mai rātou i te ringa o te tangata kino.
PSA 82:5 “Kāhore ō rātou mātauranga, kāhore hoki e mahara; e kōpikopiko noa ana rātou i te pōuri; e oioi ana ngā tūranga katoa o te whenua.
PSA 82:6 “I mea ahau, ‘He atua koutou, he tama katoa nā te Runga Rawa.’
PSA 82:7 Heoi, ka pērā koutou me te tangata, ka mate; ka hinga, ka pērā me tētahi o ngā piriniha.”
PSA 82:8 E ara, e te Atua, whakawākia te whenua; mōu hoki ngā tauiwi katoa!
PSA 83:1 He waiata, he hīmene, nā Āhapa. E te Atua, kei wahangū koe, kei whakarongo puku, kei āta noho, e te Atua.
PSA 83:2 He mea hoki, tēnei ōu hoariri te ngangau nei, ā, kua ara ngā mātenga o te hunga e kino ana ki a koe.
PSA 83:3 Kua āta ngārahu rātou ki tāu iwi, e whakatakoto kōrero ana hoki rātou mō āu mea huna.
PSA 83:4 Kua mea nei rātou, “Tēnā, tātou ka huna i a rātou, kia kore ai tēnā iwi; kia kaua ai hoki e maharatia te ingoa o Īharaira ā muri ake nei.”
PSA 83:5 Kua kotahi tō rātou ngākau i a rātou e rūnanga ana; kua whakatakoto rātou he tikanga kino ki a koe –
PSA 83:6 ko ngā tēneti o Ēroma, o ngā Ihimaeri, o Moapa, o ngā Hakarini,
PSA 83:7 a Kepara, a Āmona, a Amareke, ngā Pirihitini, me ngā tāngata o Tāira.
PSA 83:8 Kua uru hoki a Ahiria ki roto ki a rātou; kua āwhinatia e rātou ngā tamariki a Rota. Hera
PSA 83:9 Pērātia rātou me Miriana; me Hihera, me Iapini, i te awa i Kihona;
PSA 83:10 i mate nei ki Eneroro, i waiho nei hei whakawairākau mō te whenua.
PSA 83:11 Kia rite ō rātou rangatira ki a Orepe rāua ko Teepe, āe, ō rātou ariki katoa hoki ki a Tepa rāua ko Taramuna;
PSA 83:12 mō rātou i mea, “Tātou ka tango i ngā kāinga o te Atua mō tātou.”
PSA 83:13 E tōku Atua, meinga rātou kia rite ki te āwhiowhio puehu, ki te pāpapa e pūhia ana e te hau.
PSA 83:14 Kia rite ki te ahi e kai ana i te ngahere, ki te mura hoki e toro ai ngā maunga;
PSA 83:15 kia pērā te whai o tāu āwhā i a rātou, tāu whakaohorere hoki i a rātou ki tāu paroro.
PSA 83:16 Whakakīia ō rātou kanohi ki te whakamā; kia rapu ai rātou ki tōu ingoa, e Ihowā.
PSA 83:17 Kia whakamā, kia ohorere rātou ake ake; āe, kia numinumi rātou, kia ngaro hoki.
PSA 83:18 Kia mātau ai rātou, ko koe anake, ko Ihowā nei tōu ingoa, te Runga Rawa i te whenua katoa.
PSA 84:1 Ki te tino kaiwhakatangi. Kititi. He hīmene mā ngā tama a Koraha. Anō te ātaahua o ōu tapenākara, e Ihowā o ngā mano!
PSA 84:2 E hiahia ana tōku wairua, āe, e hemo ana ki ngā marae o Ihowā; e tangi ana tōku ngākau me ōku kikokiko ki te Atua ora.
PSA 84:3 Me te pīhoihoi hoki kua kite i tētahi whare, me te warou anō hoki i tētahi ōhanga mōna, hei takotoranga mō āna pī, arā i āu āta, e Ihowā o ngā mano, e tōku Kīngi, e tōku Atua.
PSA 84:4 Ka hari te hunga e noho ana i tōu whare; he whakamoemiti tonu tā rātou ki a koe. Hera
PSA 84:5 Ka hari te tangata ko tōna kaha nei kei a koe; kei roto i ō rātou ngākau ngā huarahi ki reira.
PSA 84:6 Ka haere rātou rā te Raorao o Paka, ka meinga e rātou hei puna; ngaro iho anō hoki ngā poka i te ua.
PSA 84:7 Ka haere atu rātou i te kaha ki te kaha; ka kitea rātou ki te aroaro o te Atua i Hiona.
PSA 84:8 E Ihowā, e te Atua o ngā mano, whakarongo ki tāku īnoi; tahuri mai tōu taringa, e te Atua o Hākopa. Hera
PSA 84:9 Titiro mai, e te Atua, e tō mātou whakangungu rākau; tirohia iho hoki te mata o tāu tangata i whakawahi ai.
PSA 84:10 Nō te mea, he rā kotahi i ōu whare, pai atu i ngā rā kotahi mano. Te tiaki tatau i te whare o tōku Atua, pai atu ki ahau i te noho ki ngā tēneti o te kino.
PSA 84:11 He rā hoki a Ihowā te Atua, he whakangungu rākau; ka hōmai e Ihowā te atawhai me te korōria. E kore e kaiponuhia e ia tētahi mea pai ki te hunga e tapatahi ana te haere.
PSA 84:12 E Ihowā o ngā mano, ka hari te tangata e whakawhirinaki ana ki a koe.
PSA 85:1 Ki te tino kaiwhakatangi. He hīmene mā ngā tama a Koraha. E Ihowā, kua aro mai koe ki tōu whenua, kua whakahokia mai e koe a Hākopa i te whakarau.
PSA 85:2 Kua murua e koe te kino o tāu iwi, kua hīpokina e koe ō rātou hara katoa. Hera
PSA 85:3 Kua mutu katoa tōu weriweri; kua tahuri kē koe i te āritarita o tōu riri.
PSA 85:4 Whakahokia ake mātou, e te Atua o tō mātou whakaoranga; meinga hoki kia mutu tōu riri ki a mātou.
PSA 85:5 E riri rānei koe ki a mātou ake ake? E mauāhara tonu rānei, ki ngā whakatupuranga katoa?
PSA 85:6 E kore ianei koe e whakahoki ake i a mātou ki te ora; kia hari ai tāu iwi ki a koe?
PSA 85:7 E Ihowā, whakakitea mai tāu mahi tohu ki a mātou; tukua mai ki a mātou tāu whakaoranga.
PSA 85:8 Ka whakarongo ahau ki tā te Atua, ki tā Ihowā, e kōrero ai; nō te mea mō te rongo mau āna kōrero ki tāna iwi, ki tāna hunga tapu hoki; kaua ia rātou e hoki ki te wairangi.
PSA 85:9 Inā, he tata tonu tāna whakaoranga ki te hunga e wehi ana ki a ia kia noho ai te korōria ki tō tātou whenua.
PSA 85:10 Kua tūtaki te mahi tohu rāua ko te pono; kua kihi ki a rāua te tika me te rongo mau.
PSA 85:11 Ka tupu ake te pono i te whenua, ā, ka titiro iho te tika i te rangi.
PSA 85:12 Āe, ka hōmai e Ihowā te pai, ā, ka tukua mai ōna hua e tō tātou whenua.
PSA 85:13 Ka haere te tika i mua i a ia, hei whakatū i a tātou ki te ara o ōna hīkoinga.
PSA 86:1 He īnoi nā Rāwiri. Whakatītahatia iho tōu taringa, e Ihowā, whakahokia mai he kupu ki ahau; he ware hoki ahau, he rawakore.
PSA 86:2 Tiakina tōku wairua; he tapu hoki ahau. Māu, e tōku Atua, e whakaora tāu pononga e whakawhirinaki atu nei ki a koe.
PSA 86:3 Tohungia ahau, e te Ariki; e karanga nei hoki ahau ki a koe i te rā roa nei.
PSA 86:4 Whakaharitia te wairua o tāu pononga; ka ara atu nei hoki tōku wairua, e te Ariki, ki a koe.
PSA 86:5 He pai hoki koe, e te Ariki, he ngāwari; e ranea ana hoki tāu mahi tohu ki te hunga katoa e karanga ana ki a koe.
PSA 86:6 Tahuri mai tōu taringa, e Ihowā, ki tāku īnoi; whakarongo ki tōku reo unene.
PSA 86:7 Ka karanga ahau ki a koe i te rā o tōku pōuri; e whakahoki kupu mai hoki koe ki ahau.
PSA 86:8 Kāhore he rite mōu, e te Ariki, i roto i ngā atua; kāhore hoki he rite mō āu mahi.
PSA 86:9 Ka haere mai ngā iwi katoa i hangā e koe, ā, ka koropiko ki tōu aroaro, e te Ariki; ka whakakorōria hoki i tōu ingoa.
PSA 86:10 He nui hoki koe, e mahi ana i ngā mea whakamīharo; ko koe anake te Atua.
PSA 86:11 Whakaakona ahau ki tāu ara, e Ihowā; ka haere ahau i runga i tōu pono; whakatapatahitia tōku ngākau ki te wehi i tōu ingoa.
PSA 86:12 Ka whakamoemiti katoa tōku ngākau ki a koe, e te Ariki, e tōku Atua; ka whakakorōria anō i tōu ingoa ake ake.
PSA 86:13 He nui hoki tāu mahi tohu ki ahau; ā, kua whakaorangia e koe tōku wairua i te rēinga i raro riro.
PSA 86:14 E te Atua, kua whakatika ki ahau te hunga whakakake; kua whāia anō tōku wairua e te huihuinga o te hunga tutū; kāhore hoki koe e waiho i tō rātou aroaro.
PSA 86:15 Ko koe ia, e te Ariki, he Atua atawhai, he tohu tangata; he pūhoi ki te riri, e hua ana te mahi tohu me te pono.
PSA 86:16 Tahuri mai ki ahau, tohungia hoki ahau; hōmai tōu kaha ki tāu pononga, whakaorangia te tama a tāu pononga wahine.
PSA 86:17 Whakakitea mai ki ahau he tohu mō te pai; kia kite ai te hunga e kino ana ki ahau, kia whakamā ai; nōu e Ihowā i āwhina i ahau, i whakamārie i ahau.
PSA 87:1 He hīmene, he waiata mā ngā tama a Koraha. Kei ngā maunga tapu tōna tūranga;
PSA 87:2 e arohaina rawatia ana e Ihowā ngā kūwaha o Hiona i ngā nohoanga katoa o Hākopa.
PSA 87:3 He mea korōria ngā mea e kōrerotia ana mōu, e te pā o te Atua. Hera
PSA 87:4 Ka kōrerotia e ahau a Rahapa rāua ko Papurōna ki roto i te hunga e mātau ana ki ahau; tirohia atu a Pirihitia, a Tāira, a Etiopia – “I whānau tēnei ki reira.”
PSA 87:5 Āe rā, ko te kupu tēnei mō Hiona, “I whānau tēnei me tērā ki reira; mā te Runga Rawa pū anō ia e whakapūmau.”
PSA 87:6 Ka kōrerotia e Ihowā, ina tuhituhia ngā iwi, “I whānau tēnei ki reira.” Hera
PSA 87:7 Nā, ka mea te hunga waiata, me te hunga kanikani, “Kei a koe ōku puna katoa.”
PSA 88:1 He waiata, he hīmene mā ngā tama a Koraha. Ki te tino kaiwhakatangi: Maharata Reanoto. He Makiri nā Hemana Eterahi. E Ihowā, e te Atua o tōku whakaoranga, he tangi tāku ki tōu aroaro i te ao, i te pō,
PSA 88:2 kia tae atu tāku īnoi ki tōu aroaro; whakatītahatia mai tōu taringa ki tāku tangi.
PSA 88:3 Kua kī hoki tōku wairua i te pōuri, ā, e whakatata ana tōku ora ki te rēinga.
PSA 88:4 Kua taua tahitia ahau me te hunga e heke ana ki te rua; e rite ana ahau ki te tangata kāhore ōna āwhina!
PSA 88:5 I makā ki waenga i ngā tūpāpaku, me he tangata i patua e takoto ana i te urupā, kāhore nei e maharatia e koe i muri; he mea momotu kē rātou nā tōu ringa.
PSA 88:6 Kua whakatakotoria ahau e koe ki te rua i raro riro, ki te pōuri, ki ngā rire.
PSA 88:7 E pēhia ana ahau e tōu riri, e pākia ana hoki e koe ki āu ngaru katoa. Hera
PSA 88:8 Kua whakamataratia atu e koe ōku hoa kia tawhiti i ahau; kua meinga ahau e koe hei mea whakarihariha ki a rātou; kua uakina mai ahau, ā, kāhore e puta ki waho;
PSA 88:9 kua hē tōku kanohi i te tangihanga. E karanga ana ahau ki a koe, e Ihowā, i ngā rā katoa, kua totoro hoki ōku ringa ki a koe.
PSA 88:10 Tērā rānei koe e mahi merekara ki ngā tūpāpaku? E ara koia te hunga kua mate ki te whakamoemiti ki a koe? Hera
PSA 88:11 Ka kauwhautia rānei tōu aroha i roto i te urupā? Tōu pono i roto i te ngaromanga?
PSA 88:12 E mātauria koia āu mea whakamīharo i roto i te pōuri, tōu tika i te whenua o te warewaretanga?
PSA 88:13 Ko ahau ia kua karanga ki a koe, e Ihowā; ā, i te ata ka tae atu tāku īnoi ki tōu aroaro.
PSA 88:14 He aha, e Ihowā, i pangā ai tōku wairua e koe? He aha i huna ai tōu mata ki ahau?
PSA 88:15 Nō tōku tamarikitanga ake anō i pākia ai ahau, i whakahemohemo ai; i ahau e pēhia ana e āu whakawehi, ka pororaru noa iho.
PSA 88:16 I tika tōu riri nui mā runga i ahau; kua haukotia ahau e āu mea whakawehi.
PSA 88:17 Ānō he wai rātou ki te karapoti i ahau i te rā roa nei; hui tahi rātou ki te taiāwhio i ahau.
PSA 88:18 Kua wehea e koe kia tawhiti atu i ahau te hoa hei aroha mai, me ōku hoa ki roto ki te pōuri.
PSA 89:1 He Makiri nā Ētana Eterahi. Ka waiatatia e ahau ngā mahi tohu a Ihowā ake ake; ka whakapuakina e tōku māngai tōu pono ki ngā whakatupuranga katoa.
PSA 89:2 I mea hoki ahau, “Ka hangā ake te mahi tohu mō ake tonu atu; ka whakapūmautia e koe tōu pono ki ngā tino rangi rā anō.
PSA 89:3 “Kua whakarite kawenata ahau ki tāku i whiriwhiri ai; kua oati ki tāku pononga ki a Rāwiri;
PSA 89:4 ‘Ka pūmau i ahau ōu uri ake ake; ka hangā tōu torōna ki ngā whakatupuranga katoa.’ ” Hera
PSA 89:5 Ka whakamoemiti anō ngā rangi, e Ihowā, ki āu mahi whakamīharo, ki tōu pono hoki i roto i te whakaminenga o te hunga tapu.
PSA 89:6 Ko wai oti i ngā rangi hei rite mō Ihowā? Ko wai i roto i ngā tama a te hunga nunui e rite ana ki a Ihowā,
PSA 89:7 he Atua whakamataku rawa i roto i te whakaminenga o te hunga tapu, e wehingia ana i runga ake i a rātou katoa i tētahi taha, i tētahi taha ōna?
PSA 89:8 E Ihowā, e te Atua o ngā mano ko wai te mea kaha hei rite mōu, e IHA? Hei rite rānei mō tōu pono i tētahi taha ōu, i tētahi taha?
PSA 89:9 Ko koe te kīngi o te huamo o te moana; ka oho ōna ngaru, ko koe hei whakamarino.
PSA 89:10 Mongamonga noa i a koe a Rahapa ānō he tangata i patua; marara ana i a koe, i tōu ringa kaha ōu hoariri.
PSA 89:11 Nāu ngā rangi, nāu te whenua; te ao me ōna mea e hua ana i runga nāu ēnā i pūmau ai.
PSA 89:12 Ko te raki me te tonga nāu ēnā i hanga; ka hari a Taporo rāua ko Heremona ki tōu ingoa.
PSA 89:13 He tākakau mārohirohi tōu; he pakari tōu ringa, rewa tonu tōu matau ki runga.
PSA 89:14 Ko te tika me te whakawā te tūranga o tōu torōna; e haere ana te mahi tohu me te pono i mua i tōu aroaro.
PSA 89:15 Ka hari te iwi e mōhio ana ki te tangi whakahari; e haere ana rātou, e Ihowā, i te mārama o tōu mata;
PSA 89:16 e hari ana rātou ki tōu ingoa i te roa o te rā; ā, mā tōu tika ka kake ai rātou.
PSA 89:17 Ko koe hoki te korōria o tō rātou kaha; mā tāu manako anō ka ara ai tō mātou haona.
PSA 89:18 Nā Ihowā hoki tō mātou whakangungu rākau; ā, nā te Mea Tapu o Īharaira tō tātou kīngi.
PSA 89:19 I kōrero moemoeā koe i reira ki tāu Mea Tapu, i mea: “Kua hoatu e ahau he kaha ki runga ki tētahi mārohirohi; kua whakanuia e ahau tētahi i whiriwhiria i roto i te iwi.
PSA 89:20 Kua kitea e ahau tāku pononga, a Rāwiri; kua whakawahia ia e ahau ki tāku hinu tapu.
PSA 89:21 Ka ū atu tōku ringa hei āwhina mōna; mā tōku tākakau anō ia e whakakaha.
PSA 89:22 E kore te hoariri e whai wāhi ki a ia; e kore anō hoki te tama a te kino e tūkino i a ia.
PSA 89:23 Māku e tukituki ōna hoariri ki tōna aroaro; ka whiua e ahau te hunga e kino ana ki a ia.
PSA 89:24 Otirā, ka mau ki a ia tōku pono me tāku mahi tohu; ā, mā tōku ingoa ka ara ai tōna haona.
PSA 89:25 Māku anō tōna ringa ka pā ai ki te moana; tōna matau ki ngā awa.
PSA 89:26 Ka karanga ia ki ahau, ‘Ko koe tōku Pāpā, tōku Atua, te kōhatu o tōku whakaoranga.’
PSA 89:27 Ka waiho anō ia hei mātāmua māku ki runga ake i ngā kīngi o te whenua.
PSA 89:28 Ka rongoātia e ahau tāku mahi i tohu mōna ake tonu atu; ka mau tonu tāku kawenata ki a ia.
PSA 89:29 Ka meinga hoki e ahau ōna uri kia mau tonu ake ake, tōna torōna ānō ko ngā rā o te rangi.
PSA 89:30 “Ki te whakarērea e āna tamariki tāku ture, ā, kāhore e haere i āku whakaritenga;
PSA 89:31 ki te takahi rātou i āku tikanga; ā, kāhore e pupuri i āku whakahau;
PSA 89:32 kātahi ka whāia tā rātou mahi tutū e tāku rākau, ō rātou kino e te whiu.
PSA 89:33 Otirā, e kore e tangohia rawatia e ahau tāku mahi tohu i a ia, e tuku rānei i tōku pono kia hē.
PSA 89:34 E kore tāku kawenata e takahia e ahau, e kore anō e whakarerekētia te mea i puta i ōku ngutu.
PSA 89:35 Kotahi āku oatitanga i tōku tapu; e kore ahau e teka ki a Rāwiri.
PSA 89:36 Ka mau tonu tōna uri ake ake; ā, ka rite tōna torōna ki te rā i tōku aroaro.
PSA 89:37 Ka rite tōna pūmau ki tō te marama ake ake; hei kaiwhakaatu pono anō i runga i te rangi.” Hera
PSA 89:38 Nā, kua panga nei koe, kua whakarihariha, kua riri ki tāu i whakawahi ai.
PSA 89:39 Kua weriweri koe ki te kawenata ki tāu pononga; kua whakanoaia e koe tōna karauna, taka noa ki te whenua.
PSA 89:40 Kua pākaruhia e koe ōna taiepa katoa; whakamōtītia iho e koe ōna pā kaha.
PSA 89:41 E pāhua ana i a ia ngā tāngata katoa e tika ana i te ara; he tāwainga ia nā ōna hoa tata.
PSA 89:42 Kua whakarewaina e koe te ringa matau o ōna hoa whawhai; kua meinga e koe kia hari ōna hoa whawhai katoa.
PSA 89:43 Āe, e ngore ana i a koe te mata o tāna hoari; kīhai anō koe i tautoko i a ia ki te tatauranga.
PSA 89:44 Kua whakamutua e koe tōna korōria, kua makā tōna torōna ki raro ki te whenua.
PSA 89:45 Kua poroa e koe ngā rā o tōna taitamarikitanga; kua hīpokina ia e koe ki te whakamā. Hera
PSA 89:46 Kia pēhea te roa, e Ihowā, e whakangaro ai koe i a koe, ake tonu atu? Kia pēhea te roa e toro ana tōu riri ānō he ahi?
PSA 89:47 Kia mahara ki te poto rawa o tōku tāima; he aha i hangā ai e koe ngā tāngata katoa hei kore noa iho?
PSA 89:48 Ko wai tēnā tangata e ora nei, ā, e kore e kite i te mate? E mawhiti koia i a ia tōna wairua i te kaha o te rēinga? Hera
PSA 89:49 E te Ariki, kei hea āu arohatanga ō mua i oatitia ai e koe ki a Rāwiri i runga i tōu pono?
PSA 89:50 Maharatia, e te Ariki, te tāwai ki āu pononga; e mau nei ki tōku uma te tāwai a ngā iwi nunui katoa;
PSA 89:51 te tāwai a ōu hoariri, e Ihowā, tā rātou tāwai nei ki ngā hīkoinga o tāu i whakawahi ai.
PSA 89:52 Kia whakapaingia a Ihowā ake ake.
PSA 90:1 He īnoi nā Mohi, nā te tangata a te Atua. E te Ariki, ko koe tō mātou nohoanga i ngā whakatupuranga katoa.
PSA 90:2 Kāhore anō i whānau noa ngā maunga, kāhore i hangā e koe te whenua me te ao, ko koe te Atua nō tua whakarere ā ake tonu atu.
PSA 90:3 E whakahokia ana e koe te tangata kia mongamonga noa, ā, e mea ana, “E hoki, e ngā tama a te tangata.”
PSA 90:4 Ki tāu titiro hoki, he rite ngā tau kotahi mano ki te rā onanahi, kua pahure atu nei, ki te mataaratanga hoki i te pō.
PSA 90:5 Me te mea nā te waipuke tāu kāhakinga i a rātou, he moe rātou; i te ata ānō he tarutaru e tupu ana;
PSA 90:6 i te ata e tupu ana, e pihi ana; i te ahiahi kua kotia, kua maroke.
PSA 90:7 Kua hemo nei hoki mātou i tōu riri; ka ohorere hoki i tōu āritatanga.
PSA 90:8 Kua makā e koe ō mātou kino ki tōu aroaro, ō mātou mea huna ki te mārama o tōu mata.
PSA 90:9 Ka pau ō mātou rā katoa, me te riri anō koe; hemo ake ō mātou tau ānō he kōrero e kōrerotia ana.
PSA 90:10 Ko ngā rā o ō mātou tau e whitu tekau tau; ā, ki te whai kaha, ka waru tekau tau; heoi he mahi māuiui, he pōuri tō rātou kaha; ka hohoro hoki te hātepea atu, ā, ka rere atu mātou.
PSA 90:11 Ko wai te mātau ana ki te kaha o tōu riri? Rite pū ki te wehi ki a koe tōu riri.
PSA 90:12 Ākona mātou ki te tatau i ō mātou rā, kia anga ai te ngākau ki te whakaaro.
PSA 90:13 Hoki mai, e Ihowā, kia pēhea ake te roa? Ā, kia puta kē he whakaaro mōu ki āu pononga.
PSA 90:14 Kia nā mātou i te ata i tāu mahi tohu; kia hari ai mātou, kia koa ai, i ō mātou rā katoa.
PSA 90:15 Whakaharitia mātou, kia rite ki ngā rā i whakawhiua ai mātou e koe, ki ngā tau i kite ai mātou i te kino.
PSA 90:16 Kia puta mai tāu mahi ki āu pononga, me tōu korōria ki ā rātou tamariki.
PSA 90:17 Ā, hei runga i a mātou te ātaahua o Ihowā, o tō mātou Atua; whakapūmautia anō ki a mātou te mahi a ō mātou ringa, āe rā, te mahi a ō mātou ringa, whakapūmautia e koe.
PSA 91:1 Ko te tangata kei te wāhi ngaro o te Runga Rawa tōna kāinga, ka noho ia i raro i te taumarumarutanga o te Kaha Rawa.
PSA 91:2 Ka kīia e ahau a Ihowā, “Ko ia tōku piringa, tōku pā, tōku Atua, ka whakawhirinaki ahau ki a ia.”
PSA 91:3 Māna hoki koe e whakaora i te māhanga a te kaihopu manu, i te mate nanakia.
PSA 91:4 Ka hīpokina koe e ia ki ōna hou, ā, ka piri koe ki raro i ōna pākau; ko tōna pono hei whakangungu rākau, hei puapua mōu.
PSA 91:5 E kore koe e wehi i te mea whakamataku i te pō; i te pere e rere ana i te awatea.
PSA 91:6 I te mate urutā e rere ana i te pōuri; i te whakangaromanga e whakangaro ana i te poutūmārōtanga.
PSA 91:7 He mano te hinga ki tōu taha, tekau hoki ngā mano ki tōu matau; otiia e kore e tata ki a koe.
PSA 91:8 Ka titiro kau ōu kanohi, ka mātakitaki ki te utu mō te hunga kino.
PSA 91:9 Ko koe hoki, e Ihowā, tōku piringa! Kua waiho e koe te Runga Rawa hei nohoanga mōu;
PSA 91:10 kāhore he kino e pā ki a koe, kāhore anō he whiu e tata ki tōu tēneti.
PSA 91:11 Ka kōrerotia iho hoki koe e ia ki āna anahera kia tiakina koe i ōu ara katoa.
PSA 91:12 Mā rātou koe e hiki ake ki ō rātou ringa, kei tūtuki tōu waewae ki te kōhatu.
PSA 91:13 Ka haere koe i runga i te raiona, i te neke; ka takahia e koe ki raro te kūao raiona me te nākahi.
PSA 91:14 “Ka whakaora ahau i a ia, mōna i aroha ki ahau; māku ia e whakateitei ake, mōna i mātau ki tōku ingoa.
PSA 91:15 Ka karanga ia ki ahau, ā, ka whakahoki kupu ahau ki a ia; ka tata ahau ki a ia i te wā o te hē; māku ia e whakaora, māku anō ia e whakahōnore.
PSA 91:16 Ka whakaroaina e ahau ōna rā, ā, nā noa ia; ka whakakitea hoki tāku whakaoranga ki a ia.”
PSA 92:1 He hīmene, he waiata mō te rā Hāpati. He mea pai te whakawhetai ki a Ihowā, te hīmene atu ki tōu ingoa, e te Runga Rawa;
PSA 92:2 te whakakite i tōu atawhai i te ata, i tōu pono i ngā pō katoa;
PSA 92:3 i runga i te aho tekau, i te hātere; i te tangi huatau a te hāpa.
PSA 92:4 Nāu hoki ahau, e Ihowā, i whakahari ki tāu mahi; ka whakamanamana ahau ki ngā meatanga a ōu ringa.
PSA 92:5 Anō te nui o āu mahi, e Ihowā! Hōhonu rawa ōu whakaaro.
PSA 92:6 Ko te tangata pōauau, kāhore ia e mātau; kāhore hoki tēnei e mōhiotia e te kūware.
PSA 92:7 Kia pihi ake ngā whakaarokore ānō he tarutaru, ā, kia tupu ngā kaimahi katoa i te kino; he ngaromanga tēnā nō rātou ake ake.
PSA 92:8 Ko koe ia, e Ihowā, kei runga rawa ake ake.
PSA 92:9 Nā, ko ōu hoa whawhai, e Ihowā, nā, ko ōu hoa whawhai, ka ngaro; ka marara katoa ngā kaimahi i te kino.
PSA 92:10 Otirā, ka ara i a koe tōku haona, ka pērā i tō te kau mākā; ka whakawahia ahau ki te hinu hou.
PSA 92:11 Ka kite hoki tōku kanohi i tāku i hiahia ai ki runga ki ōku hoariri, ka rongo ōku taringa i tāku i hiahia ai o te hunga kino e whakatika ana mai ki ahau.
PSA 92:12 Ka rite te tupu o te tangata tika ki tō te nīkau; ka rite tōna nui ki tō te hīta i Repanōna.
PSA 92:13 Ko te hunga i whakatōkia ki te whare o Ihowā ka tupu ki ngā marae o tō tātou Atua.
PSA 92:14 Ka whai hua tonu rātou ua hina; kī tonu i te wai, matomato tonu;
PSA 92:15 hei whakakite i te tika o Ihowā; ko ia tōku kōhatu, kāhore hoki ōna hē.
PSA 93:1 E kīngi ana a Ihowā, he korōria tōna kākahu; he kākahu tō Ihowā, he mea whītiki ia ki te kaha. Kua ū hoki te ao, tē taea te nekeneke.
PSA 93:2 Nō mua iho tōu torōna i whakapūmautia ai; nōnamata riro koe.
PSA 93:3 Ko ngā roma, e Ihowā, kua ara, ngā roma nei, kua ara tō rātou reo; ka ara ngā ngaru o ngā roma.
PSA 93:4 I runga ake i ngā reo o ngā wai maha, i ngā tūātea nunui o te moana, ko Ihowā i runga, te mea kaha.
PSA 93:5 Pono atu āu whakaaturanga; he huatau te tapu mō tōu whare, e Ihowā, mō ake tonu atu.
PSA 94:1 E Ihowā, e te Atua, e te kairapu utu; e te Atua, e te kairapu utu, tīaho mai!
PSA 94:2 E ara, e te Kaiwhakawā o te whenua; hoatu te utu e rite ana ki te hunga whakakake.
PSA 94:3 Kia pēhea te roa, e Ihowā, o te hunga kino nei, kia pēhea te roa o te hunga kino e whakamanamana ana?
PSA 94:4 Kei te kōrero whakatū rātou, kei te kōrero whakahī; kei te kōrero whakapehapeha ki a rātou ngā kaimahi katoa i te kino.
PSA 94:5 Mongamonga noa tāu iwi i a rātou e Ihowā; e tūkinotia ana e rātou tōu kāinga tupu.
PSA 94:6 E patua ana e rātou te pouaru, te manene; e kōhuru ana i te pani,
PSA 94:7 ā, e mea ana, “E kore a Ihowā e kite; e kore e maharatia e te Atua o Hākopa.”
PSA 94:8 Kia mātau, e ngā pōauau o te iwi; āhea anō koutou whai mahara ai, e ngā kūware?
PSA 94:9 Ko te kaiwhakatō o te taringa, e kore rānei ia e rongo? Ko te kaihanga o te kanohi, e kore ianei ia e kite?
PSA 94:10 Ko te kaipapaki o ngā iwi e kore rānei ia e papaki, arā ko te kaiwhakaako nei i te tangata kia mōhio?
PSA 94:11 E mātau ana a Ihowā ki ngā whakaaro o te tangata, he mea teka noa.
PSA 94:12 Ka hari te tangata e pākia ana e koe, e Ihowā; e whakaakona ana i roto i tāu ture.
PSA 94:13 Kia mārie ai tōna ngākau i a koe i ngā rā o te hē, ā, keria noatia iho te poka mō te tangata kino.
PSA 94:14 E kore hoki a Ihowā e panga i tāna iwi, e kore anō e whakarere i tōna kāinga tupu.
PSA 94:15 Engari e hoki te whakawā ki te tika; ā, e arumia e ngā tāngata ngākau tika katoa.
PSA 94:16 Ko wai tōku hei whakatika ake ki te hunga kino? Ko wai tōku hei tū ake ki ngā kaimahi i te hara?
PSA 94:17 Mehemea kaua a Ihowā hei āwhina mōku, pēnei kua noho kupukore noa atu tōku wairua.
PSA 94:18 I tāku meatanga, “Ka paheke tōku waewae,” nā tāu mahi tohu, e Ihowā, ahau i tautoko ake.
PSA 94:19 I ōku whakaaronga maha i roto i tōku ngākau ko āu whakamārie tōku oranga ngākau.
PSA 94:20 Tērā rānei e whakahoa ki a koe te torōna o te kino, e whakatakoto nei i te mahi nanakia hei ture?
PSA 94:21 Kei te whakahuihui rātou ki te poke i te wairua o te tangata tika, e mea ana kia heke te toto harakore.
PSA 94:22 Ko Ihowā ia tōku pā teko; ko tōku Atua hei kōhatu piringa mōku.
PSA 94:23 Ā, nāna i whakahoki tō rātou kino ki runga ki a rātou, ā, tērā ia e whakangaro i a rātou i roto i ō rātou kino; mā Ihowā, mā tō tātou Atua rātou e whakangaro.
PSA 95:1 Tēnā, kia waiata tātou ki a Ihowā; kia hari te hāmama ki te kāmaka o tō tātou whakaoranga.
PSA 95:2 Kia haere tātou me te whakawhetai atu ki tōna aroaro; kia ngahau hoki ā tātou hīmene ki a ia.
PSA 95:3 Nō te mea he Atua nui hoki a Ihowā, he Kīngi nui i ngā atua katoa.
PSA 95:4 Kei tōna ringa ngā wāhi hōhonu o te whenua; ā, nāna ngā maunga teitei.
PSA 95:5 Nāna te moana, nāna anō i hanga, ā, nā ōna ringa i whai āhua ai te whenua maroke.
PSA 95:6 Haere mai tātou, kia koropiko, kia tuohu; kia tukua ngā turi ki te aroaro o Ihowā, o tō tātou Kaihanga.
PSA 95:7 Ko ia hoki tō tātou Atua; ko tātou tāna iwi e hēpara ai, ngā hipi a tōna ringa. Ki te rongo koutou ki tōna reo āianei!
PSA 95:8 Kaua e whakapakeketia ō koutou ngākau, kei pērā me o te whakatoinga, me o te rā o te whakamātautauranga i te koraha;
PSA 95:9 i ahau i whakamātautauria e ō koutou mātua, i āta mōhiotia, i tō rātou kitenga anō hoki i āku mahi.
PSA 95:10 E whā tekau ngā tau i hōhā ai ahau ki tēnei whakatupuranga, nā, ka mea ahau; “He iwi ngākau kotiti kē rātou, kāhore hoki rātou e mōhio ki āku ara.”
PSA 95:11 Nā reira i riri ai ahau, i oati ai hoki; “E kore rātou e tae ki tōku okiokinga.”
PSA 96:1 Waiatatia he waiata hou ki a Ihowā; waiata, e te whenua katoa, ki a Ihowā.
PSA 96:2 Waiata ki a Ihowā, whakapaingia tōna ingoa; whakakitea tāna whakaoranga i tēnei rā, i tēnei rā.
PSA 96:3 Whakapuakina tōna korōria i waenganui i ngā tauiwi, āna mahi whakamīharo i waenganui i ngā iwi katoa.
PSA 96:4 He nui hoki a Ihowā, he tika anō kia nui te whakamoemiti ki a ia; kia wehingia nuitia ai i ngā atua katoa.
PSA 96:5 He whakapakoko hoki ngā atua katoa o ngā iwi; nā Ihowā ia i hanga ngā rangi.
PSA 96:6 He hōnore, he korōria kei tōna aroaro; kei tōna wāhi tapu te kaha me te ātaahua.
PSA 96:7 Waiho atu i a Ihowā, e ngā hapū katoa o ngā iwi; waiho atu i a Ihowā te korōria me te kaha.
PSA 96:8 Waiho atu i a Ihowā te korōria e tika ana mō tōna ingoa; maua mai he whakahere, haere mai hoki ki ōna marae.
PSA 96:9 Koropiko ki a Ihowā i roto i te ātaahua o te tapu; kia wehi rā ki tōna aroaro, e te whenua katoa.
PSA 96:10 Mea atu i waenganui o ngā tauiwi, “E kīngi ana a Ihowā!” Ka ū te whenua, tē taea te whakangāueue; ka tika āna whakawā mō ngā iwi.
PSA 96:11 Kia hari ngā rangi, kia koa te whenua, kia haruru te moana, me ngā mea e hua ana i roto;
PSA 96:12 kia hari te māra, me ngā mea katoa i runga. Ko reira anō koa ai ngā rākau katoa o te ngahere;
PSA 96:13 ki te aroaro o Ihowā, e haere mai ana hoki ia; e haere mai ana ia ki te whakawā mō te whenua. Ka whakawā ia mō te ao i runga i te tika, mō ngā iwi hoki i runga i tōna pono.
PSA 97:1 Ko Ihowā te Kīngi! Kia hari te whenua, koa ngā tini moutere!
PSA 97:2 Ko te kapua me te pōuri kei ōna taha katoa; ko te tika, ko te whakawā, te tūranga o tōna torōna.
PSA 97:3 He kāpura e haere ana i mua i a ia, ā, pau ake ōna hoariri ā taka noa.
PSA 97:4 Mārama tonu te ao i āna uira; i kite te whenua, ā, wiri ana.
PSA 97:5 Rewa noa ngā maunga, ānō he ware pī, i te aroaro o Ihowā, i te aroaro o te Ariki o te whenua katoa.
PSA 97:6 E whakapuakina ana e ngā rangi tōna tika; ā, e kitea ana e ngā iwi katoa tōna korōria.
PSA 97:7 Kia whakamā katoa te hunga e mahi ana ki ngā whakapakoko, e whakamanamana ana ki ngā atua horihori; koropiko ki a ia, e ngā atua katoa.
PSA 97:8 I rongo a Hiona, ā, koa ana; whakamanamana ana ngā tamāhine o Hūrā, e Ihowā, ki āu whakaritenga.
PSA 97:9 Ko koe hoki, e Ihowā, kei runga noa ake i te whenua katoa; kua whakanuia koe ki runga noa ake i ngā atua katoa.
PSA 97:10 E te hunga e aroha ana ki a Ihowā, e kino ki te hē; e tiakina ana e ia ngā wairua o tāna hunga tapu; e whakaorangia ana rātou e ia i ngā ringa o te hunga kino.
PSA 97:11 Kua oti te mārama te whakatō mō te hunga tika; me te koa mō te hunga ngākau tapatahi.
PSA 97:12 Kia hari ki a Ihowā, e te hunga tika; whakamoemiti ki tōna ingoa tapu!
PSA 98:1 He hīmene. Waiatatia ki a Ihowā he waiata hou; he mahi whakamīharo hoki āna. Nā tōna ringa matau, nā tōna ringa tapu, i taea ai e ia te whakaora.
PSA 98:2 Kua whakakitea e Ihowā tāna whakaoranga, kua whakapuakina e ia tōna tika ki te aroaro o ngā tauiwi.
PSA 98:3 Kua mahara ia ki tāna mahi tohu, ki tōna pono ki te whare o Īharaira; ā, kua kite ngā pito katoa o te whenua i te whakaoranga a tō tātou Atua.
PSA 98:4 Kia hari te hāmama, e te whenua katoa, ki a Ihowā; hāmama, kia hari, āe rā, hīmene atu.
PSA 98:5 Hīmene ki a Ihowā i runga i te hāpa; i runga i te hāpa, me te hīmene anō te reo.
PSA 98:6 I runga i te tētere, i te tangi anō o te koronete; kia hari te hāmama ki te aroaro o Ihowā, o te Kīngi.
PSA 98:7 Kia haruru te moana me ngā mea e hua ana i roto; te ao me ōna tāngata e noho ana i runga.
PSA 98:8 Kia papaki ngā ringa o ngā roma, kia hari tahi ngā pukepuke.
PSA 98:9 Ki te aroaro o Ihowā, e haere mai ana hoki ia ki te whakawā mō te whenua. Ka whakawā ia mō te ao i runga i te tika, mō ngā iwi hoki i runga i te pono.
PSA 99:1 Ko Ihowā te Kīngi; kia wiri ngā iwi; E noho ana ia i waenganui i ngā kerupima; kia ngāueue te whenua.
PSA 99:2 He nui a Ihowā i Hiona; kei runga ake ia i ngā iwi katoa.
PSA 99:3 Kia whakamoemiti rātou ki tōu ingoa nui, whakamataku. He tapu ia!
PSA 99:4 E matenui ana hoki te kaha o te kīngi ki te whakawā tika; ko koe hei whakapūmau i te pono; he whakawā tika, he hēkore tāu mahi i roto i a Hākopa.
PSA 99:5 Whakanuia a Ihowā, tō tātou Atua; koropiko ki tōna tūranga waewae. He tapu ia!
PSA 99:6 Ko Mohi rāua ko Ārona i roto i āna tohunga, me Hamuera i roto i te hunga e karanga ana ki tōna ingoa. I karanga rātou ki a Ihowā, ā, whakahoki kupu ana mai ia ki a rātou.
PSA 99:7 I kōrero ia ki a rātou i roto i te pou kapua; i pupuri rātou i āna whakaaturanga, i te tikanga i whakatakotoria e ia ki a rātou.
PSA 99:8 E Ihowā, e tō mātou Atua, i whakahoki kupu koe ki a rātou; he Atua tohu koe i a rātou, otiia, i rapu utu anō koe mō ā rātou mahi.
PSA 99:9 Whakanuia ā Ihowā, tō tātou Atua, koropiko atu i tōna maunga tapu; he tapu hoki ā Ihowā, tō tātou Atua.
PSA 100:1 He hīmene whakamoemiti. Kia hari te hāmama ki a Ihowā, e ngā whenua katoa.
PSA 100:2 Mahi atu ki a Ihowā i runga i te koa; waiata haere ki tōna aroaro.
PSA 100:3 Kia mātau ki a Ihowā, ko ia te Atua. Nāna tātou i hanga, ehara hoki i a tātou; ko tāna iwi tātou, ko āna hipi e hēpara ai.
PSA 100:4 Tomokia ōna tatau i runga i te whakawhetai, ōna marae i runga i te whakamoemiti. Whakawhetai atu ki a ia, whakapaingia tōna ingoa.
PSA 100:5 He pai hoki a Ihowā; pūmau tonu tāna mahi tohu; ā, kei tēnā whakatupuranga, kei tēnā whakatupuranga, tōna pono.
PSA 101:1 He hīmene nā Rāwiri. Ka waiatatia e ahau te mahi tohu me te whakawā tika; ka hīmene atu ahau ki a koe, e Ihowā.
PSA 101:2 Ka āta whakahaere ahau i ahau i runga i te ara tika. Āhea koe haere mai ai ki ahau? Ka hāereere ahau i roto i tōku whare i runga i te ngākau tapatahi.
PSA 101:3 E kore te mea tūtūā e waiho e ahau i mua i ōku kanohi. E kino ana ahau ki te mahi a te hunga peka kē; e kore e piri ki ahau.
PSA 101:4 Ka mawehe atu i ahau te ngākau parori kē; e kore ahau e mōhio ki te mea kino.
PSA 101:5 Ko te tangata e ngautuarā puku ana ki tōna hoa ka whakangaromia e ahau. E kore ahau e aro ki te tangata kanohi whakakake, ki te tangata ngākau whakapakari.
PSA 101:6 Kei runga i ngā mea pono o te whenua ōku kanohi, kia noho ai rātou ki ahau; ko te tangata e haere ana i te ara tika, ka mahi tēnā ki ahau.
PSA 101:7 E kore e noho ki tōku whare te kaimahi i te hīanga; e kore e tū ki tōku aroaro te tangata kōrero teka.
PSA 101:8 I tēnei ata, i tēnei ata, ka whakangaromia e ahau ngā tāngata kikino katoa o te whenua; kia hātepea atu ai i te pā o te Atua te hunga katoa e mahi ana i te kino.
PSA 102:1 He īnoi nā te ngākau mamae, i a ia e pēhia ana, ā, maringi a wai ana tāna tangi ki te aroaro o Ihowā. Whakarongo ki tāku īnoi, e Ihowā, kia puta atu tāku tangi ki a koe.
PSA 102:2 Kaua e hunā tōu mata ki ahau i te rā e pōuri ai ahau. Whakatītahatia mai tōu taringa ki ahau; hohoro te whakahoki kupu mai ki ahau i te rā e karanga ai ahau.
PSA 102:3 Ka memeha hoki ōku rā ānō he paoa; ka kāia ōku wheua ānō he motumotu.
PSA 102:4 Kua pākia tōku ngākau, kua memenge, ānō he tarutaru; i wareware ai ahau ki te kai i tāku taro.
PSA 102:5 Piri tonu ōku iwi ki tōku kiri i tōku reo auē.
PSA 102:6 He rite ahau ki te matuku i te koraha, ki te koukou i te wāhi mokemoke.
PSA 102:7 Mataara tonu ahau; tōku rite kei te pīhoihoi mokemoke i runga i te tuanui.
PSA 102:8 E tāwai ana ōku hoariri ki ahau i te rā roa; ko te hunga e pōrangirangi ana mai ki ahau, ko ahau tā rātou oati.
PSA 102:9 Kainga ana e ahau te pungarehu ānō he taro; whakananua iho tōku wai inu ki te roimata.
PSA 102:10 I tōu riri hoki, i tōu weriweri; nāu hoki ahau i hāpai ake, ā, tāia atu anō ahau e koe.
PSA 102:11 He rite ōku rā ki te ātārangi e whakawairua kau ana; ā, kua memenge ahau ānō he tarutaru.
PSA 102:12 Ko koe ia, e Ihowā, ka mau tonu ake ake, ka maharatia anō koe e ngā whakatupuranga katoa.
PSA 102:13 Tērā koe e whakatika, e aroha ki a Hiona; kua taka mai hoki te wā, āe rā, te tino wā, hei atawhainga i a ia.
PSA 102:14 E manakohia ana hoki e āu pononga ōna kōhatu, e āwangawanga ana ki tōna puehu.
PSA 102:15 Pēnei ka wehingia te ingoa o Ihowā e ngā tauiwi, tōu korōria hoki e ngā kīngi katoa o te whenua.
PSA 102:16 Nā Ihowā hoki i hanga a Hiona, kua kitea ia i tōna korōria.
PSA 102:17 Kua tahuri ia ki te īnoi a te rawakore; kīhai i whakahāwea ki tā rātou īnoi.
PSA 102:18 Ka tuhituhia tēnei mō tō muri whakatupuranga; ā, ka whakamoemiti ki a Ihowā te iwi meāke hangā:
PSA 102:19 mōna i titiro iho i te tiketike o tōna wāhi tapu; i titiro iho a Ihowā i te rangi ki te whenua;
PSA 102:20 ki te whakarongo ki te auē a te herehere, ki te wewete i te hunga kua motuhia mō te mate;
PSA 102:21 kia whakapuakina ai te ingoa o Ihowā i Hiona, me te whakamoemiti ki a ia i Hiruhārama;
PSA 102:22 i te huihuinga o ngā iwi, o ngā kīngitanga, ki te mahi ki a Ihowā.
PSA 102:23 Whakangoikoretia iho e ia tōku kaha i te ara; kua torutoru i a ia ōku rā.
PSA 102:24 I mea ahau, “E tōku Atua, kaua ahau e tangohia i waenganui o ōku rā; kei ngā whakatupuranga katoa ōu tau.”
PSA 102:25 Nōnamata te whenua i whakatūria ai e koe, ā, he mahi ngā rangi nā ōu ringa.
PSA 102:26 Ko ērā e hemo atu, ko koe ia e mau tonu; āe rā, ka tawhitotia katoatia me he weweru. Ka whakaputaia kētia rātou e koe ānō he kākahu, ā, ka whakaputaia kētia.
PSA 102:27 Ko koe ia, ko koe tonu, kāhore hoki he mutunga o ōu tau.
PSA 102:28 Ka whai nohoanga ngā tama a āu pononga, ka pūmau ō rātou uri ki tōu aroaro.
PSA 103:1 Nā Rāwiri. Whakapaingia a Ihowā, e tōku wairua; e ngā mea katoa i roto i ahau, whakapaingia tōna ingoa tapu.
PSA 103:2 Whakapaingia a Ihowā, e tōku wairua, kei wareware hoki ki āna painga katoa –
PSA 103:3 ko ia te muru nei i ōu kino katoa, te rongoā nei i ōu mate katoa;
PSA 103:4 ko ia te hoko nei i tōu ora kei ngaro, te karauna nei i a koe ki te atawhai, ki te aroha;
PSA 103:5 nāna nei i mākona ai tōu māngai i ngā mea papai; i hou ai tōu taitamarikitanga, i rite ai ki tō te ēkara.
PSA 103:6 Ka puta i a Ihowā ngā mahi tika, me te whakawā tika ki te hunga katoa e tūkinotia ana.
PSA 103:7 I whakaakona e ia āna ara ki a Mohi, āna mahi ki ngā tama a Īharaira.
PSA 103:8 Kī tonu a Ihowā i te aroha me te atawhai, he pūhoi ki te riri, he nui hoki tāna mahi tohu.
PSA 103:9 E kore ia e whakatūpehupehu tonu, e kore anō e mauāhara ake ake.
PSA 103:10 Kīhai i rite ki ō tātou hara āna meatanga ki a tātou; kīhai anō i rite ki ō tātou kino āna utu mai ki a tātou.
PSA 103:11 He rite hoki ki te rangi e tiketike ake ana i te whenua, pērā tonu te nui o tāna mahi tohu ki te hunga e wehi ana ki a ia.
PSA 103:12 Pērā i te matara o te rāwhiti i te uru, pērā tonu tāna whakamataratanga atu i ā tātou mahi tutū i a tātou.
PSA 103:13 E aroha ana te matua ki āna tamariki, pērā tonu tō Ihowā aroha ki te hunga e wehi ana ki a ia.
PSA 103:14 E mātau ana hoki ia ki tō tātou āhua, e mahara ana he puehu tātou.
PSA 103:15 Ko te tangata ia, rite tonu ōna rā ki ō te tarutaru; kei te puāwai o te māra, ko tōna ngawhātanga.
PSA 103:16 E rārungatia ana hoki e te hau, ā, kua kāhore; kāhore hoki e mōhiotia ā muri e tōna wāhi.
PSA 103:17 Tēnā ko te mahi tohu a Ihowā nō tua whakarere, ā ake tonu ake, ki te hunga e wehi ana ki a ia, tōna tika hoki ki ngā uri o ngā tamariki;
PSA 103:18 ki te hunga e pupuri ana i tāna kawenata, ki te hunga hoki e mahara ana ki āna ako kia mahia.
PSA 103:19 Kua oti i a Ihowā tōna torōna te whakatū ki ngā rangi, ā, e kāwanatia ana ngā mea katoa e tōna kīngitanga.
PSA 103:20 Whakapaingia a Ihowā, e āna anahera, e hira nei te kaha, e whakarite nei i tāna kupu, e whakarongo nei ki tōna reo ina kōrero.
PSA 103:21 Whakapaingia a Ihowā, e āna mano katoa, e āna minita e mahi nei i tāna e pai ai.
PSA 103:22 Whakapaingia a Ihowā, e āna mahi katoa i ngā wāhi katoa o tōna kīngitanga. Whakapaingia a Ihowā, e tōku wairua.
PSA 104:1 Whakapaingia a Ihowā, e tōku wairua. E Ihowā, e tōku Atua, he nui rawa koe. He hōnore, he korōria ōu kākahu,
PSA 104:2 e roropi nei i te mārama ki a koe ānō he kākahu. E hora nei i ngā rangi ānō he kākahu tauārai,
PSA 104:3 e whakanoho nei i ngā kurupae o ōna rūma ki ngā wai, e mea nei i ngā kapua hei hāriata mōna, e haere nei i runga i ngā pākau o te hau.
PSA 104:4 E mea nei i ngā hau hei karere māna, i te mura ahi hei kaimahi māna.
PSA 104:5 Nāna nei i whakatū te whenua ki runga ki ōna tūranga, kei nekenekehia ake ake.
PSA 104:6 Nāu anō i hīpoki ki te rire hei kākahu; tū ana ngā wai i runga i ngā maunga.
PSA 104:7 Rere ana rātou i tāu riri; tahuti tonu atu i te reo o tāu whatitiri.
PSA 104:8 Puke ake ana rā ngā maunga, heke iho ana mā ngā whāwhārua ki te wāhi i whakaritea e koe mō rātou.
PSA 104:9 Kua whakatakotoria e koe he rohe kei koni mai rātou, kei hoki mai hei taupoki mō te whenua.
PSA 104:10 Nāna i tono ngā puna ki roto ki ngā awaawa, e rere nei i waenga o ngā puke.
PSA 104:11 Hei wai mō ngā kīrehe katoa o te pārae; nā noa te matewai o ngā kāihe mohoao.
PSA 104:12 Kei reira ngā nohoanga o ngā manu o te rangi, e korihi nei i roto i ngā manga.
PSA 104:13 He mea whakamākūkū nāna ngā puke i ōna rūma; ka mākona te whenua i ngā hua o āu mahi.
PSA 104:14 Ko ia hei whakatupu i te tarutaru mā te kararehe, i te otaota hei mea mā te tangata, kia whakaputaina ake ai he taro i te whenua,
PSA 104:15 he wāina hei whakahari i te ngākau o te tangata, he hinu e pīata ai tōna mata, me te taro hei whakakaha i te ngākau o te tangata.
PSA 104:16 Kī tonu i te wai ngā rākau a Ihowā, ngā hīta o Repanōna i whakatōkia e ia.
PSA 104:17 Hangā ake e ngā manu he ōhanga ki reira; te tāka, ko ngā kauri tōna whare.
PSA 104:18 Hei piringa ngā puke tiketike mō ngā koati mohoao; ngā kōhatu mō ngā rāpeti.
PSA 104:19 I hangā e ia te marama hei tohu tāima; e mātau ana te rā ki tōna torengitanga.
PSA 104:20 Ko koe hei whakapōuri, ā, kua pō; nā ngōki mai ana ngā kīrehe katoa o te ngahere.
PSA 104:21 Ko ngā kūao raiona ngengere ana rātou, he mea kai, he rapu kai mā rātou i te Atua.
PSA 104:22 Ko te putanga mai o te rā ka poto atu rātou, takoto ana i ō rātou kuhunga.
PSA 104:23 Ko te tangata ka haere ki āna hanga, ki tāna mahi, ā ahiahi noa.
PSA 104:24 Anō te tini o āu mahi, e Ihowā! He mōhio rawa tāu mahi i aua mea katoa; kī tonu te whenua i āu taonga.
PSA 104:25 Kei kō rā ko te moana, tōna nui tuauriuri; kei reira ngā mea ngōkingōki e kore e taea te tatau, ngā kīrehe hoki, āna nonohi, āna nunui.
PSA 104:26 Kei reira ngā kaipuke e teretere ana; kei reira taua rewiatana i hangā e koe hei tākaro ki reira.
PSA 104:27 E tatari katoa ana ēnei ki a koe, kia hoatu e koe te kai mā rātou i te wā e tika ai;
PSA 104:28 ko tāu e hoatu ai mā rātou, kohikohia ana e rātou; te wherahanga o tōu ringa, mākona tonu rātou i te pai.
PSA 104:29 Ko te hunanga o tōu mata, pororaru ana rātou; ka kapohia e koe tō rātou manawa, ka marere rātou, ā, ka hoki anō ki tō rātou puehu.
PSA 104:30 Ko tāu tononga mai i tōu wairua, kua hangā rātou; ā, whakahoutia ana e koe te mata o te whenua.
PSA 104:31 Kia whai korōria a Ihowā ake ake, kia hari a Ihowā ki āna mahi –
PSA 104:32 tāna tirohanga iho ki te whenua, rū ana; kua pā ki ngā puke, nā, pongere ana.
PSA 104:33 Ka waiata ahau ki a Ihowā i ahau e ora ana; ka hīmene ki tōku Atua i ahau anō i te ao nei.
PSA 104:34 Kia reka tōku whakaaronga ki a ia, ka hari ahau ki a Ihowā.
PSA 104:35 Kia mōtī ngā tāngata hara i runga i te whenua, ko te hunga kino kia poto katoa atu. Whakapaingia a Ihowā, e tōku wairua! Whakamoemititia a Ihowā!
PSA 105:1 Whakawhetai ki a Ihowā, karanga atu ki tōna ingoa; whakapuakina āna mahi ki waenganui o ngā iwi.
PSA 105:2 Waiata ki a ia, hīmene ki a ia; kōrerotia āna mahi whakamīharo katoa.
PSA 105:3 Whakamanamana ki tōna ingoa tapu; kia hari te ngākau o te hunga e rapu ana i a Ihowā.
PSA 105:4 Rapua a Ihowā me tōna kaha; rapua tonutia tōna mata, ake ake.
PSA 105:5 Maharatia āna mahi whakamīharo i mahia e ia, āna merekara me ngā whakaritenga a tōna māngai,
PSA 105:6 e ngā uri o Āperahama, o tāna pononga, e ngā tama a Hākopa, e āna i whiriwhiri ai.
PSA 105:7 Ko Ihowā ia, ko tō tātou Atua; kei te whenua katoa āna whakaritenga.
PSA 105:8 Mahara tonu ia ki tāna kawenata ake ake, ki te kupu i kīia iho e ia ki te mano o ngā whakatupuranga.
PSA 105:9 Ki tāna i whakarite ai ki a Āperahama, ki tāna oati hoki ki a Īhaka,
PSA 105:10 ā, whakapūmautia iho e ia hei tikanga ki a Hākopa, hei kawenata mau tonu ki a Īharaira.
PSA 105:11 I a ia rā i mea, “Ka hoatu e ahau ki a koe te whenua o Kanaana hei wāhi pūmau mō koutou.”
PSA 105:12 I te mea he hunga torutoru rātou; āe rā, he iti rawa, he manene anō ki reira.
PSA 105:13 I a rātou e hāereere ana i tēnei iwi ki tērā atu iwi, i tētahi rangatiratanga ki tētahi iwi kē,
PSA 105:14 kīhai rātou i tukua e ia kia tūkinotia e te tangata; he whakaaro anō ki a rātou i rīria ai e ia ngā kīngi,
PSA 105:15 i mea ia, “Kei pā ki āku i whakawahi ai; kei kino ki āku poropiti.”
PSA 105:16 I karangatia e ia te matekai ki te whenua; whati katoa i a ia te tokotoko, arā te taro.
PSA 105:17 I tonoa e ia he tangata i mua i a rātou; i hokona a Hōhepa hei pononga.
PSA 105:18 I whakamamaetia ōna waewae ki te mekameka; takoto ana ia i te rino;
PSA 105:19 ā puta noa tāna kupu, whakamātautauria ana ia e te kupu a Ihowā.
PSA 105:20 I tono te kīngi, ā, wetekina ana ia; arā te kīngi o ngā iwi, ā, tukua ana ia.
PSA 105:21 Ā, meinga ana ia e ia hei ariki mō tōna whare, hei rangatira mō ōna taonga katoa;
PSA 105:22 hei herehere i āna rangatira ua pai ia, hei ako i āna kaumātua ki te whakaaro.
PSA 105:23 I haere mai anō a Īharaira ki Īhipa; ā, noho ana a Hākopa ki te whenua o Hama.
PSA 105:24 Nā, ka tino whakanuia e ia tāna iwi; ā, ka meinga rātou kia kaha ake i ō rātou hoariri.
PSA 105:25 I whakakoarotia e ia tō rātou ngākau kia kino ki tāna iwi, kia mahi hīanga ki āna pononga.
PSA 105:26 I tonoa e ia a Mohi, tāna pononga, rāua ko Ārona, ko tāna i whiriwhiri ai.
PSA 105:27 Whakaputaina ana e rāua āna tohu i waenganui i a rātou, he merekara i te whenua o Hama.
PSA 105:28 I tukua e ia te pōuri, ā, kua pōuri; kīhai anō rātou i whakakeke ki āna kupu.
PSA 105:29 I whakaputaia kētia e ia ō rātou wai hei toto; ā, mate ake i a ia ā rātou ngohi.
PSA 105:30 I whakangahue ake tō rātou whenua i te poroka, i roto i ngā whare moenga o ō rātou kīngi.
PSA 105:31 I whai kupu ia, ā, puta ana mai ngā pōkai namu; me te kutu i ō rātou kāinga.
PSA 105:32 I tukua iho e ia ki a rātou te whatu hei ua, me te ahi mura ki tō rātou whenua.
PSA 105:33 I pākia anō e ia ā rātou wāina me ā rātou piki; ā, whatiwhatiia ana e ia ngā rākau o ō rātou kāinga.
PSA 105:34 I kōrero ia, ā, puta ana mai te māwhitiwhiti me te moka, tē taea te tatau,
PSA 105:35 ā, kainga katoatia āna ngā otaota o tō rātou whenua; pau ake ngā hua o tō rātou oneone.
PSA 105:36 I whakamatea katoatia anō hoki e ia ngā mātāmua o tō rātou whenua, te muanga o tō rātou kaha.
PSA 105:37 Ā, whakaputaina mai ana rātou e ia, me te hiriwa, me te kōura, kāhore hoki he mea tūoi i roto i āna iwi.
PSA 105:38 Nā, hari ana a Īhipa i tō rātou haerenga; i mau hoki tō rātou wehi ki a rātou.
PSA 105:39 I horahia e ia te kapua hei hīpoki, me te ahi hei whakamārama i te pō.
PSA 105:40 I īnoi rātou, ā, hōmai ana e ia te koitareke; ā, ka mākona rātou i te taro o te rangi.
PSA 105:41 I wāhia e ia te kōhatu, ā, ka pakaru mai ngā wai; rere ana i ngā wāhi maroke, koia anō kei te awa.
PSA 105:42 I mahara hoki ia ki tāna kupu tapu, ki a Āperahama anō, ki tāna pononga.
PSA 105:43 Ā, whakaputaina mai ana e ia tāna iwi i runga i te hari, āna i whiriwhiri ai i runga i te koa.
PSA 105:44 Ā, hōmai ana e ia ki a rātou ngā whenua o ngā tauiwi; ā, riro ana i a rātou ngā māuiuitanga o te iwi,
PSA 105:45 kia puritia ai e rātou āna tikanga, kia mau ai ki āna ture. Whakamoemititia a Ihowā!
PSA 106:1 Whakamoemititia a Ihowā! Whakawhetai ki a Ihowā; he pai hoki ia; he pūmau tonu hoki tāna mahi tohu.
PSA 106:2 Mā wai e kōrero ngā mahi nunui a Ihowā; e whakakite katoa ngā whakamoemiti ki a ia?
PSA 106:3 Ka hari te hunga e mau ana ki te whakarite tika; me te kaimahi i te tika i ngā wā katoa.
PSA 106:4 Maharatia mai ahau, e Ihowā, kia rite ki tāu manako ki tāu iwi; tirotirohia mai ahau i runga i tāu whakaoranga;
PSA 106:5 kia kite ai ahau i te pai o āu i whiriwhiri ai, kia koa ai, koa tahi me tāu iwi, kia whakamanamana tahi ai me tōu kāinga tupu.
PSA 106:6 Kua hara tahi mātou me ō mātou mātua, kua mahi mātou i te kino, i te mea hē.
PSA 106:7 Kīhai ō mātou mātua i mōhio ki āu mea whakamīharo i Īhipa, kīhai hoki i mahara ki te tini o āu arohatanga; engari ia i whakatoi rātou ki a koe i te moana, āe, i te Moana Whero.
PSA 106:8 Otirā, whakaorangia ana rātou e ia, he whakaaro ki tōna ingoa, kia mātauria ai tōna kaha.
PSA 106:9 I rīria anō e ia te Moana Whero, ā, kua maroke; nā, ārahina ana rātou e ia i ngā rire, ānō ko waenga koraha.
PSA 106:10 Nā, whakaorangia ake rātou e ia i te ringa o te tangata i kino ki a rātou; ā, hokona ana rātou i roto i te ringa o te hoariri.
PSA 106:11 Ā, taupokina ana e ngā wai ō rātou hoariri, hore rawa tētahi mōrehu.
PSA 106:12 Nā, whakapono ana rātou ki āna kupu; ā, waiata ana i te whakamoemiti ki a ia.
PSA 106:13 Hohoro tonu tō rātou wareware ki āna mahi; kīhai i tāria e rātou tōna whakaaro.
PSA 106:14 Engari, i whakaputa nui i ō rātou hiahia i te tahora, whakamātautau ana rātou i te Atua i te koraha.
PSA 106:15 Nā, ka hoatu e ia tā rātou i īnoi ai, otirā, i tukua atu e ia te hīroki ki tō rātou wairua.
PSA 106:16 I hae hoki rātou ki a Mohi i te puni, ki a Ārona anō, ki te tangata tapu a Ihowā.
PSA 106:17 Ko te hāmamatanga o te whenua, nā, horomia ana a Ratana; ā, taupokina iho te rōpū o Āpirama.
PSA 106:18 Ā, mura ana te ahi i tō rātou rōpū; wera ana i te mura te hunga kino.
PSA 106:19 I hangā e rātou he kūao kau ki Horepa, ā, koropiko ana ki te whakapakoko i whakarewaina.
PSA 106:20 Koia i whitia ai e rātou tō rātou korōria mō te mea i rite ki te pūru kai tarutaru.
PSA 106:21 Wareware ake i a rātou te Atua, tō rātou kaiwhakaora, i mahi nei i ngā mea nunui ki Īhipa,
PSA 106:22 i ngā mahi whakamīharo ki te whenua o Hama, i ngā mea whakamataku ki te Moana Whero.
PSA 106:23 Nā, ka mea ia, kia whakangaromia rātou – me i kaua a Mohi, tāna i whiriwhiri ai, te tū ki tōna aroaro i te takiwā, hei papare ake i tōna riri, kei hunā rātou e ia.
PSA 106:24 Āe rā, i whakahāwea rātou ki te whenua āhuareka; kīhai rātou i whakapono ki tāna kupu.
PSA 106:25 Heoi, amuamu ana i roto i ō rātou tēneti, kīhai i whakarongo ki te reo o Ihowā.
PSA 106:26 Nā reira ka ara tōna ringa ki a rātou, ki te turaki i a rātou i te koraha;
PSA 106:27 ki te turaki i ō rātou uri i roto i ngā iwi, ki te whakamarara i a rātou ki ngā whenua.
PSA 106:28 I whakauru atu hoki rātou ki a Paara-Peoro, ā, kai ana i ngā patunga tapu mā ngā mea mate.
PSA 106:29 Koia i whakapātaritari ai rātou i a ia ki ā rātou hanga kia riri, ā, pakaru ana mai te mate urutā ki a rātou.
PSA 106:30 Nā, ko te whakatikanga ake o Pinehaha, ki te whakaputa whakawā; ā, mutu iho te mate.
PSA 106:31 I kīia ai ia he tika i ngā whakatupuranga katoa ake ake.
PSA 106:32 I whakapātaritari anō rātou i a ia ki ngā wai o Meripa; nā, hēmanawa ana a Mohi mō rātou;
PSA 106:33 nā rātou hoki i whakatoi tōna wairua, i hē ai te kupu a ōna ngutu.
PSA 106:34 Kīhai rātou i whakangaro i ngā iwi i kīia nei e Ihowā ki a rātou,
PSA 106:35 heoi uru ana ki roto ki ngā tauiwi, ā, ako ana i ā rātou mahi.
PSA 106:36 I mahi hoki rātou ki ā rātou whakapakoko, i māhangatia ai rātou.
PSA 106:37 Āe, i patua e rātou ā rātou tama me ā rātou tamāhine mā ngā atua māori;
PSA 106:38 i whakahekea hoki te toto harakore, ngā toto o ā rātou tama, o ā rātou tamāhine, i patua nei e rātou mā ngā whakapakoko o Kanaana; ā, poke iho te whenua i te toto.
PSA 106:39 Nā, poke iho rātou i ā rātou mahi, ā, pūremu ana ki ā rātou mahi.
PSA 106:40 Koia i mura ai te riri o Ihowā ki tāna iwi, ā, whakarihariha ana ia ki tōna kāinga tupu;
PSA 106:41 ā, tukua ana rātou e ia ki te ringa o ngā tauiwi; waiho ana te hunga i kino ki a rātou hei rangatira mō rātou.
PSA 106:42 Nā, ka tūkinotia rātou e ō rātou hoariri; ka pēhia ki raro i ō rātou ringa.
PSA 106:43 He maha āna whakaoranga i a rātou, ko rātou ia i whakatoi ki a ia i ō rātou whakaaro, ā, whakaititia ana i tā rātou kino.
PSA 106:44 Ahakoa rā, i titiro ia ki tō rātou matenga, i tōna rongonga i tā rātou tangi.
PSA 106:45 I mahara hoki ia ki tāna kawenata ki a rātou, ā, rite tonu ki te tini o āna mahi aroha te putanga kētanga o ōna whakaaro.
PSA 106:46 I meinga hoki rātou e ia kia arohaina e te hunga katoa i whakaraua atu ai rātou.
PSA 106:47 Whakaorangia mātou, e Ihowā, e tō mātou Atua, kohikohia mātou i roto i ngā tauiwi, kia whakawhetai ai ki tōu ingoa tapu, kia whakamanamana ai ki tōu whakamoemiti.
PSA 106:48 Kia whakapaingia a Ihowā, te Atua o Īharaira, i tua whakarere anō, ā ake ake. Ā, kia mea katoa te iwi, “Āmine.” Whakamoemititia a Ihowā!
PSA 107:1 Whakawhetai ki a Ihowā, he pai hoki ia; he pūmau tonu hoki tāna mahi tohu.
PSA 107:2 Kia pēnā anō te kōrero a te hunga i hokona e Ihowā, i hokona nei e ia i roto i te ringa o te hoariri;
PSA 107:3 i kohikohia nei i ngā whenua, i te rāwhiti, i te uru, i te raki, i te tonga.
PSA 107:4 I hāereere rātou i te koraha i te wāhi mokemoke, tē kitea tētahi pā hei nohoanga.
PSA 107:5 I matekai rātou, i matewai; hemo noa tō rātou wairua i roto i a rātou.
PSA 107:6 Nā, ka tangi rātou ki a Ihowā i tō rātou pōuri; ā, whakaorangia ana rātou e ia i ō rātou mate;
PSA 107:7 ā, ārahina ana e ia rā te ara tika; kia haere ai ki te pā hei nohoanga.
PSA 107:8 Auē! Me i whakapaingia e te tangata a Ihowā mō tōna atawhai, mō āna mahi whakamīharo ki ngā tama a te tangata!
PSA 107:9 E whakamākonatia ana hoki e ia te wairua hiahia; ko te wairua hiakai, whakakīia ana e ia ki te pai.
PSA 107:10 Ko te hunga i noho i te pōuri, i te ātārangi o te mate, he mea here ki te mamae, ki te rino;
PSA 107:11 mō rātou i tutū ki ngā kupu a te Atua, i whakahāwea ki te whakaaro o te Runga Rawa.
PSA 107:12 Koia i pēhia iho ai e ia ō rātou ngākau ki te mahi; hinga iho rātou, kāhore hoki he kaiāwhina.
PSA 107:13 Nā, ka tangi rātou ki a Ihowā i tō rātou pōuri; ā, ka whakaorangia rātou e ia i ō rātou mate.
PSA 107:14 Whakaputaina mai ana rātou e ia i te pōuri, i te ātārangi o te mate; motumotuhia ana ō rātou here.
PSA 107:15 Auē! Me i whakapaingia e te tangata a Ihowā mō tōna atawhai, mō āna mahi whakamīharo ki ngā tama a te tangata!
PSA 107:16 Kua tukitukia hoki e ia ngā tatau parāhi; kua tapahia e ia ngā tūtaki rino, motu rawa.
PSA 107:17 Ko ngā kūware, nā ā rātou mahi tutū, nā ō rātou kino, i pākia ai rātou.
PSA 107:18 Ka wetiweti tō rātou wairua ki ngā kai katoa, ā, ka whakatata rātou ki ngā kūwaha o te mate.
PSA 107:19 Nā, ka tangi ki a Ihowā i tō rātou pōuri, ā, ka whakaorangia rātou e ia i ō rātou mate.
PSA 107:20 Tukua mai ana e ia tāna kupu, ā, rongoātia ana rātou; ā, whakaputaina ana rātou i ō rātou ngaromanga.
PSA 107:21 Auē! Me i whakapaingia e te tangata a Ihowā mō tōna atawhai, mō āna mahi whakamīharo ki ngā tama a te tangata.
PSA 107:22 Kia tukua anō e rātou te whakahere, arā te whakamoemiti; kia whakapuaki i āna mahi i runga i te hari.
PSA 107:23 Ko te hunga e haere ana ki raro, ki te moana, i runga kaipuke, ā, e whai mahi ana i ngā wai nunui,
PSA 107:24 ko rātou e kite i ngā mahi a Ihowā, i āna mahi whakamīharo i te rire.
PSA 107:25 Puta kau tāna kupu, kua maranga te tūpuhi, māna e whakatūtū ōna ngaru.
PSA 107:26 Ka kake rātou ki runga ki te rangi, ka heke anō ki raro ki te rire; ngohe noa ō rātou wairua i te pāwera;
PSA 107:27 ka tiu rātou, ka hūrorirori ānō he tangata e haurangi ana; ā, kāhore he mahara i toe.
PSA 107:28 Heoi, ka tangi ki a Ihowā i tō rātou hēmanawa; ā, whakaorangia ana rātou i ō rātou mate.
PSA 107:29 Meinga ana e ia te tūpuhi kia marino, ōna ngaru kia māriri.
PSA 107:30 Nā, ka koa rātou, nō te mea ka mārie, ā, ka kawea rātou e ia ki te tauranga i hiahia ai rātou.
PSA 107:31 Auē! Me i whakapaingia e te tangata a Ihowā mō tōna atawhai, mō āna mahi whakamīharo ki ngā tama a te tangata!
PSA 107:32 Kia whakanui hoki rātou i a ia i roto i te whakaminenga o te iwi, kia whakamoemiti ki a ia i roto i te nohoanga kaumātua.
PSA 107:33 Ko ia hei mea i ngā awa hei koraha, i ngā pupūtanga wai hei oneone maroke,
PSA 107:34 i te whenua whai hua, kia tītōhea, mō te hara o te hunga e noho ana i reira.
PSA 107:35 Ko ia hei mea i te koraha hei hārotoroto wai, i te whenua maroke hei pupūtanga wai.
PSA 107:36 Ā, whakanohoia iho e ia te hunga matekai ki reira, hanga ai i tētahi pā hei nohoanga;
PSA 107:37 hei rui māra, hei whakatō māra wāina, e tupu ai, e maha ai ngā hua.
PSA 107:38 Ko ia anō hei manaaki i a rātou, nō ka nui rawa; kāhore hoki e tukua kia torutoru haere ā rātou kararehe.
PSA 107:39 Nā, kua iti haere anō rātou, kua piko i te tūkino, i te hē, i te pōuri,
PSA 107:40 e ringihia ana e ia te whakahāwea ki runga ki ngā rangatira; e meinga ana kia hēhē i te ururua, i te wāhi kāhore nei he ara;
PSA 107:41 otirā, kei te whakateitei ia i te rawakore ki runga i te mamae, kei te mea i ōna hapū kia rite ki te kāhui hipi.
PSA 107:42 Ka kite ngā tāngata tika, ā, ka hari; ko ngā hē katoa hoki, kopia ake te māngai.
PSA 107:43 Ko te tangata whakaaro nui ka mahara ki ēnei mea, ā, ka mōhio rātou ki te aroha o Ihowā.
PSA 108:1 He waiata, he hīmene nā Rāwiri. Pūmau tonu tōku ngākau, e te Atua; ka waiata ahau, āe rā, ka hīmene ahau, me tōku korōria anō.
PSA 108:2 E ara, e te hātere, e te hāpa! Ka ara wawe anō ahau.
PSA 108:3 Ka whakamoemiti ahau ki a koe, e Ihowā, i waenganui i ngā iwi, ka hīmene ki a koe i waenganui i ngā tauiwi.
PSA 108:4 He nui atu hoki tāu mahi tohu i ngā rangi, ā, ko tōu pono tutuki noa atu ki ngā kapua.
PSA 108:5 Kia whakanuia koe, e te Atua, ki runga atu i ngā rangi, hei runga atu i te whenua katoa tōu korōria.
PSA 108:6 Kia puta tāu i aroha ai, mā tōu ringa matau mātou e whakaora, ā, whakahokia mai he kupu ki a mātou.
PSA 108:7 Kua kōrero te Atua i runga i tōna tapu: “Ka hari ahau, ka kotikoti i Hekeme, ka roherohe i te raorao o Hukota.
PSA 108:8 Nōku Kireara; nōku a Mānahi; ko Ēparaima anō hoki te kaha o tōku mātenga; ko Hūrā tāku hēpeta.
PSA 108:9 Ko Moapa tāku oko horoi; ka makā e ahau tōku hū ki runga ki Ēroma; ka whakamanamana ahau ki Pirihitia.”
PSA 108:10 Mā wai ahau e kawe ki te pā tūwatawata? Ko wai nāna ahau i ārahi ki Ēroma?
PSA 108:11 He teka ianei kua pangā mātou e koe, e te Atua? Kāhore hoki koe, e te Atua, e haere tahi me ō mātou taua.
PSA 108:12 Hōmai ki a mātou he āwhina ki te hoariri; he teka kau noa hoki te āwhina a te tangata.
PSA 108:13 Mā te Atua tātou ka toa ai; māna hoki e takahi ki raro ō tātou hoa whawhai.
PSA 109:1 Ki te tino kaiwhakatangi. He hīmene nā Rāwiri. E te Atua, e whakamoemiti nei ahau, kei wahangū koe.
PSA 109:2 Kua puaki hoki te māngai o te tangata kino me te māngai o te tangata tinihanga, ki te hē mōku; he teka ō rātou arero, e kōrero nei mōku.
PSA 109:3 I karapotia hoki ahau e rātou ki ngā kupu mauāhara, ā, i whawhai takekore ki ahau.
PSA 109:4 Mō tōku aroha he riri tā rātou whakautu; ko ahau ia, he īnoi tāku.
PSA 109:5 E hōmai ana e rātou ki ahau he kino mō te pai, he mauāhara mō tōku aroha.
PSA 109:6 “Meinga he tangata kino hei rangatira mōna; kia tū he hoariri ki tōna ringa matau.
PSA 109:7 Kia tau te hē ki a ia, ina whakawākia; kia waiho anō tāna īnoi hei hara.
PSA 109:8 Kia torutoru ōna rā; kia riro tāna mahi tirotiro i tētahi atu.
PSA 109:9 Kia pania āna tamariki, kia pouarutia hoki tāna wahine.
PSA 109:10 Kia kōpikopiko noa āna tamariki, pīnono ai; kia rapu kai hoki mā rātou i ō rātou wāhi mokemoke.
PSA 109:11 Kia haoa e te kaituku moni āna mea katoa; kia pāhuatia hoki e ngā tāngata iwi kē āna māuiuitanga.
PSA 109:12 Kaua tētahi hei hoatu noa i te aroha ki a ia; kaua hoki tētahi hei atawhai i āna pani.
PSA 109:13 Kia hātepea pūtia ōna uri; ā, i tō muri whakatupuranga kia horoia rawatia atu ō rātou ingoa.
PSA 109:14 Kia maharatia e Ihowā te kino o ōna mātua; kei murua hoki te hara o tōna whaea.
PSA 109:15 Kia mau tonu ki te aroaro o Ihowā; kia hātepea atu ai e ia te maharatanga ki a rātou i runga i te whenua.
PSA 109:16 Mōna kīhai i mahara ki te mahi tohu; heoi, tūkino ana ia i te ware, i te rawakore, i te hunga ngākau marū, kia patua ai rātou.
PSA 109:17 Āe rā, i pai ia ki te kanga, ā, kua tae mai ki a ia; kīhai ia i aro ki te manaaki, heoi kua mamao tērā i a ia.
PSA 109:18 I kākahu ia i te kanga ki a ia, ānō ko tōna kākahu; nā, kua tae tērā ki roto ki a ia ānō he wai, me he hinu hoki ki roto ki ōna wheua.
PSA 109:19 Waiho ki a ia hei kākahu hīpoki mōna, hei whītiki hoki e whītikiria tonutia ai ia.”
PSA 109:20 Nā, hei utu tēnā mā Ihowā ki ōku hoariri, ki te hunga hoki e kōrero kino nei ki tōku wairua.
PSA 109:21 Kia puta tāu mahi mōku, e te Atua, e te Ariki, he whakaaro ki tōu ingoa; nā te mea he pai tāu mahi tohu, whakaorangia ahau.
PSA 109:22 He ware hoki ahau, he rawakore, kua mamae hoki tōku ngākau i roto i ahau.
PSA 109:23 Ka riro ahau me te ātārangi e whakawairua kau ana; e peipeia ana ahau me he māwhitiwhiti.
PSA 109:24 Hūrorirori kau ōku turi i te nohopuku; ā, e kohia ana te ngako o ōku kikokiko.
PSA 109:25 Kua waiho ahau hei tāwainga mā rātou; ka kite rātou i ahau, ka rūrū ō rātou mātenga.
PSA 109:26 Āwhinatia ahau, e Ihowā, e tōku Atua; kia rite ki tōu aroha tāu whakaora i ahau.
PSA 109:27 Kia mātau ai rātou ko tōu ringa tēnei; ā, nāu tēnei, e Ihowā, i mea.
PSA 109:28 Mā rātou e kanga, māu ia e manaaki; kia whakamā rātou ina whakatika; ko tāu pononga ia kia hari.
PSA 109:29 Kia whakakākahuria ōku hoariri ki te whakamā, ā, ko tō rātou numinumi hei koroka hīpoki mō rātou.
PSA 109:30 Ka tino whakawhetai tōku māngai ki a Ihowā; āe rā, ka whakamoemiti ahau ki a ia i waenganui o te mano.
PSA 109:31 E tū hoki ia ki te ringa matau o te rawakore, hei whakaora i a ia i te hunga e whakahē ana i tōna wairua.
PSA 110:1 He hīmene nā Rāwiri. I mea a Ihowā ki tōku Ariki, “Hei tōku matau koe noho ai, kia meinga rā anō e ahau ōu hoariri hei tūranga waewae mōu.”
PSA 110:2 Mā Ihowā e tono mai te tokotoko o tōu kaha i Hiona; hei rangatira koe i waenganui i ōu hoariri.
PSA 110:3 Ka kakama tōu iwi ki te tāpae atu i a rātou i te rā o tōu kaha, i te ātaahua o ngā mea tapu. Nō te kōpū mai o te ata, kei a koe te tōmairangi o tōu whanaketanga.
PSA 110:4 Kua oati a Ihowā, e kore anō tāna e puta kē; “Hei tohunga koe ake ake, nō te tikanga o Merekihereke.”
PSA 110:5 Kei tōu matau te Ariki; ka marū i a ia ngā kīngi i te rā e riri ai ia.
PSA 110:6 E whakawā ia i waenganui i ngā tauiwi; e whakakīia e ia ngā whenua ki te tūpāpaku; ka marū i a ia ngā upoko i ngā whenua maha.
PSA 110:7 Ka inu wai ia i te awa i te ara, ā, ka ara tōna mātenga.
PSA 111:1 Whakamoemititia a Ihowā! Ka whakapaua tōku ngākau ki te whakawhetai ki a Ihowā, i te rūnanga o te hunga tika, i te whakaminenga.
PSA 111:2 He nui ngā mahi a Ihowā, e whakatakina ana e te hunga katoa e manako ana ki aua mea.
PSA 111:3 He mea hōnore, he mea korōria tāna mahi; tū tonu tōna tika ake ake.
PSA 111:4 Kua meinga e ia kia maharatia āna mahi whakamīharo; he atawhai a Ihowā, he aroha.
PSA 111:5 E hōmai ana e ia he kai mā te hunga e wehi ana ki a ia; ka mahara tonu ia ki tāna kawenata.
PSA 111:6 Kua whakakitea e ia ki tāna iwi te kaha o āna mahi, i tāna hoatutanga i tō ngā tauiwi hei kāinga tupu mō rātou.
PSA 111:7 Ko ngā mahi a ōna ringa he pono, he whakawā tika; pono tonu āna akoranga katoa.
PSA 111:8 Ū tonu ake ake, e mahia ana i runga i te pono, i te tika.
PSA 111:9 I tonoa mai e ia he whakaoranga mō tāna iwi; kua kīia iho e ia tāna kawenata mō ake tonu atu; he tapu tōna ingoa, e wehingia ana.
PSA 111:10 Ko te tīmatanga o te whakaaro nui he wehi ki a Ihowā; he ngārahu pai tō te hunga katoa nāna ērā mahi. Ka mau te whakamoemiti ki a ia, ake ake.
PSA 112:1 Whakamoemititia a Ihowā! Ka hari te tangata e wehi ana i a Ihowā, e aro nui ana ki āna whakahau.
PSA 112:2 Ka nui ōna uri ki runga ki te whenua; ka manaakitia te whakatupuranga o te hunga tika.
PSA 112:3 Kei tōna whare te rawa, te taonga; ka pūmau tonu tōna tika, ake ake.
PSA 112:4 Ka maea ake te mārama i roto i te pōuri ki te hunga tika; he atawhai ia, he aroha, he tika.
PSA 112:5 He pono ka whiwhi painga te tangata he atawhai, he ohaoha tāna mahi; ka ū āna kupu i te whakawākanga.
PSA 112:6 E kore hoki ia e whakangāueuetia ake ake; ka maharatia tonutia te tangata tika ake ake.
PSA 112:7 E kore ia e mataku i te rongo kino; e ū ana tōna ngākau, e whakawhirinaki ana ki a Ihowā.
PSA 112:8 Ka ū tōna ngākau, e kore ia e wehi; kia kite rā anō ia i tāna i hiahia ai ki ōna hoariri.
PSA 112:9 Kua tuwhaina e ia, kua hoatu ki te hunga rawakore; pūmau tonu tōna tika ake ake; ka ara tōna haona i runga i te korōria.
PSA 112:10 Ka kite te tangata kino, ā, ka pōuri; ka pakiri ōna niho, memeha iho; pirau iho te hiahia o te hunga kino.
PSA 113:1 Whakamoemititia a Ihowā! Whakamoemititia, e ngā pononga a Ihowā; whakamoemititia te ingoa o Ihowā.
PSA 113:2 Kia whakapaingia te ingoa o Ihowā āianei ā ake ake.
PSA 113:3 Kia whakamoemititia te ingoa o Ihowā i te putanga mai o te rā, ā tae noa ki tōna torengitanga.
PSA 113:4 Kei runga rawa a Ihowā i ngā iwi katoa; kei runga ake i ngā rangi tōna korōria.
PSA 113:5 Ko wai te rite ana ki a Ihowā, ki tō tātou Atua, kei runga nei tōna nohoanga,
PSA 113:6 e whakaiti nei i a ia ki te titiro iho ki ngā mea kei te rangi, kei te whenua?
PSA 113:7 E whakaara ake ana ia i te iti i roto i te puehu, e whakateitei ake ana i te rawakore i roto i te pūranga paru,
PSA 113:8 kia whakanohoia ai e ia ki roto ki ngā rangatira, ki ngā rangatira o tāna iwi.
PSA 113:9 Nāna hoki te pākoko i whai whare ai, hei whāereere e koa ana ki āna tamariki. Whakamoemititia a Ihowā!
PSA 114:1 I te putanga mai o Īharaira i Īhipa, o te whare o Hākopa i te iwi reo kē,
PSA 114:2 ko Hūrā tōna wāhi tapu, ko Īharaira tōna rangatiratanga.
PSA 114:3 I kite te moana, ā, whati ana; i whakahokia ki muri a Horano.
PSA 114:4 Pekepeke ana ngā maunga ānō he hipi toa, ngā pukepuke ānō he reme.
PSA 114:5 I ahatia koe, e te moana, i whati ai koe e Horano, i whakahokia ai koe ki muri?
PSA 114:6 E ngā maunga, i pekepeke ai koutou ānō he hipi toa, e ngā pukepuke, ānō he reme?
PSA 114:7 E wiri, e te whenua, i te aroaro o te Ariki, i te aroaro o te Atua o Hākopa,
PSA 114:8 i meinga ai te toka, hei hōpua wai, te kiripaka hei puna wai.
PSA 115:1 Aua ki a mātou, e Ihowā, aua ki a mātou, engari me hoatu te korōria ki tōu ingoa; whakaaroa tōu aroha, tōu pono.
PSA 115:2 Kia mea koia ngā tauiwi; “Kei hea ianei tō rātou Atua?”
PSA 115:3 Kei te rangi ia tō mātou Atua; kua meatia e ia ngā mea katoa i pai ai ia.
PSA 115:4 He hiriwa ā rātou whakapakoko, he kōura, he mahi nā te ringa tāngata.
PSA 115:5 He māngai ō rātou, ā, kāhore e kōrero; he kanohi ō rātou, ā, kāhore e kite.
PSA 115:6 He taringa ō rātou, ā, kāhore e rongo: he ihu ō rātou, ā, kāhore e hongi.
PSA 115:7 He ringa ō rātou, ā, kāhore e whāwhā; he waewae ō rātou, ā, kāhore e haere; kāhore hoki ō rātou korokoro e kōrero.
PSA 115:8 Ka rite ki a rātou ō rātou kaihanga; āe rā, te hunga katoa anō e whakawhirinaki ana ki a rātou.
PSA 115:9 E Īharaira, whakawhirinaki ki a Ihowā! Ko ia tō rātou āwhina, tō rātou whakangungu rākau.
PSA 115:10 E te whare o Ārona, whakawhirinaki ki a Ihowā! Ko ia tō rātou āwhina, tō rātou whakangungu rākau.
PSA 115:11 E te hunga e wehi ana i a Ihowā, whakawhirinaki ki a Ihowā! Ko ia tō rātou āwhina, tō rātou whakangungu rākau.
PSA 115:12 Kua mahara a Ihowā ki a tātou; māna tātou e manaaki; māna e manaaki te whare o Īharaira; māna e manaaki te whare o Ārona;
PSA 115:13 ka manaakitia e ia te hunga e wehi ana ki a Ihowā, te iti, te rahi.
PSA 115:14 Ka tāpiritia anō e Ihowā ki a koutou, ki a koutou tahi ko ā koutou tamariki.
PSA 115:15 He manaakitanga koutou nā Ihowā, nā te kaihanga o te rangi, o te whenua.
PSA 115:16 Ko ngā rangi, he rangi nō Ihowā; ko te whenua ia, he mea hōmai nāna ki ngā tama a te tangata.
PSA 115:17 E kore ngā tūpāpaku e whakamoemiti ki a Ihowā; me te hunga katoa anō e heke ana ki te wahangūtanga.
PSA 115:18 Ko mātou ia ka whakapai ki a Ihowā āianei, ā ake ake. Whakamoemititia a Ihowā!
PSA 116:1 E aroha ana ahau ki a Ihowā; mōna i whakarongo ki tōku reo, ki āku īnoi.
PSA 116:2 I tahuri mai tōna taringa ki ahau; mō reira ka karanga ahau ki a ia i ahau e ora ana.
PSA 116:3 I karapotia ahau e ngā whakawiringa a te mate; mau pū ahau i ngā mamae o te rēinga, i kite ahau i te pāwera, i te pōuri.
PSA 116:4 Nā, ko tāku karangatanga ki te ingoa o Ihowā: “Tēnā rā, e Ihowā, whakaorangia tōku wairua!”
PSA 116:5 He atawhai a Ihowā, he tika; āe, he aroha tō tātou Atua.
PSA 116:6 E tiakina ana e Ihowā te hunga kūware; i whakaititia ahau, ā, nāna ahau i whakaora.
PSA 116:7 E hoki, e tōku wairua, ki tōu okiokinga; kua atawhaitia hoki koe e Ihowā.
PSA 116:8 Nāu hoki tōku wairua i whakaora kei mate, ōku kanohi kei whai roimata, ōku waewae kei paheke.
PSA 116:9 Tērā ahau e hāereere i te aroaro o Ihowā i te whenua o te ora.
PSA 116:10 I whakapono ahau, koia ahau i kōrero ai; “He nui tōku whakawhiunga.”
PSA 116:11 I mea ahau i tōku ohoreretanga, “He teka kau ngā tāngata katoa.”
PSA 116:12 He aha tāku e whakahoki ai ki a Ihowā mō āna atawhainga katoa i ahau?
PSA 116:13 Ka mau ahau ki te kapu o te whakaoranga, ka karanga ki te ingoa o Ihowā.
PSA 116:14 Ka whakamanā e ahau āku kupu taurangi ki a Ihowā i te aroaro o tāna iwi katoa.
PSA 116:15 He mea utu nui ki tā Ihowā titiro te matenga o tāna hunga tapu.
PSA 116:16 E Ihowā, he pono ko ahau tāu pononga; ko ahau tāu pononga, ko te tama a tāu pononga wahine; nāu i wewete ōku here.
PSA 116:17 Ka tukua e ahau te patunga tapu, arā te whakawhetai; ka karanga ki te ingoa o Ihowā.
PSA 116:18 Ka whakamanā e ahau āku kupu taurangi ki a Ihowā, āe, ki te aroaro o tāna iwi katoa,
PSA 116:19 ki ngā marae o te whare o Ihowā, ki waenganui ōu, e Hiruhārama. Whakamoemititia a Ihowā!
PSA 117:1 Whakamoemititia a Ihowā, e ngā tauiwi katoa! Whakamoemititia ia, e ngā iwi katoa!
PSA 117:2 He nui hoki tāna mahi tohu ki a tātou; e mau ana hoki te pono o Ihowā ake ake. Whakamoemititia a Ihowā!
PSA 118:1 Whakawhetai ki a Ihowā, he pai hoki ia; he pūmau tonu hoki tāna mahi tohu!
PSA 118:2 Kia mea a Īharaira, “He pūmau tonu tāna mahi tohu.”
PSA 118:3 Kia mea te whare o Ārona, “He pūmau tonu tāna mahi tohu.”
PSA 118:4 Kia mea te hunga e wehi ana i a Ihowā, “He pūmau tonu tāna mahi tohu.”
PSA 118:5 I karanga ahau ki a Ihowā i roto i te pōuri; i whakahoki kupu mai a Ihowā ki ahau, i whakatū hoki i ahau ki te wāhi whānui.
PSA 118:6 Kei ahau a Ihowā; e kore ahau e wehi. He aha tā te tangata e mea ai ki ahau?
PSA 118:7 Kei ahau a Ihowā kei roto i ōku kaiāwhina; nō reira tērā ahau e kite i tāku i hiahia ai ki te hunga e kino ana ki ahau.
PSA 118:8 Ko te whakawhirinaki ki a Ihowā, pai atu i te whakaaro ki te tangata.
PSA 118:9 Ko te whakawhirinaki ki a Ihowā, pai atu i te okioki ki ngā rangatira.
PSA 118:10 I karapotia ahau e ngā iwi katoa; ka ngaro rātou i ahau i runga i te ingoa o Ihowā!
PSA 118:11 I karapotia ahau e rātou, āe, i karapotia ahau e rātou; ka ngaro rātou i ahau i runga i te ingoa o Ihowā!
PSA 118:12 Me te mea he pī rātou e mui ana ki ahau; kua pirau rātou ānō he ahi tātarāmoa; i ngaro hoki rātou i ahau i runga i te ingoa o Ihowā!
PSA 118:13 Kaha pū tāu turaki i ahau, kia hinga ai ahau, nā Ihowā ia ahau i āwhina mai.
PSA 118:14 Ko Ihowā tōku kaha, tāku hīmene; ko ia anō tōku whakaoranga.
PSA 118:15 He reo hari, he reo whakaoranga, kei ngā tapenākara o te hunga tika; “He māia ngā mahi a te ringa matau o Ihowā.
PSA 118:16 Kua whakanuia te matau o Ihowā; he māia ngā mahi a te ringa matau o Ihowā.”
PSA 118:17 E kore ahau e mate, engari tērā ahau e ora, hei whakapuaki i ngā mahi a Ihowā.
PSA 118:18 I pākia rawatia ahau e Ihowā, otiia, kīhai ahau i tukua e ia kia mate.
PSA 118:19 Whakatuwheratia ki ahau ngā kūwaha o te tika, ka tomo ahau ki roto, ka whakamoemiti ki a Ihowā.
PSA 118:20 Ko te kūwaha tēnei o Ihowā; ka tomo te hunga tika ki reira.
PSA 118:21 Ka whakamoemiti ahau ki a koe, mōu i whakahoki kupu mai ki ahau, kua meinga hoki ko koe hei whakaora mōku.
PSA 118:22 Ko te kōhatu i kapea e ngā kaihanga, kua meinga hei upoko mō te kokonga.
PSA 118:23 Nā Ihowā tēnei; he mea mīharo ki ō tātou kanohi.
PSA 118:24 Ko te rā tēnei i hangā e Ihowā kia whakamanamana, kia koa tātou i reira.
PSA 118:25 Whakaorangia rā āianei, e Ihowā! Tēnā rā, e Ihowā, hōmai he ngahuru ki a mātou.
PSA 118:26 Kia whakapaingia te tangata e haere mai ana i runga i te ingoa o Ihowā. Kua whakapaingia koutou e mātou i roto i te whare o Ihowā.
PSA 118:27 Ko Ihowā te Atua, ā, nāna i hōmai te mārama ki a tātou. Herea te patunga tapu ki ngā aho, ki ngā haona rā anō o te āta.
PSA 118:28 Ko koe tōku Atua, māku koe e whakamoemiti; tōku Atua, māku koe e whakanui.
PSA 118:29 Whakawhetai ki a Ihowā; he pai hoki ia, he pūmau tonu tāna mahi tohu.
PSA 119:1 Ka hari te hunga he tapatahi nei i te ara, e haere nei i te Ture a Ihowā.
PSA 119:2 Ka hari te hunga e mau ana ki āna whakaaturanga; e whakapaua ana ō rātou ngākau ki te rapu i a ia,
PSA 119:3 āe, e kore rātou e mahi i te kino; e haere ana rātou i āna ara.
PSA 119:4 Kua oti mātou te whakahau ki āu akoranga, kia āta puritia e mātou.
PSA 119:5 Auē, me i whakatikaia tōku ara ki te pupuri i āu akoranga!
PSA 119:6 Ko reira ahau ka kore ai e whakamā; i ahau ka whai whakaaro nei ki āu whakahau katoa.
PSA 119:7 Ka whakamoemiti ahau ki a koe i runga i te ngākau tika, ina ako ahau i āu whakaritenga tika.
PSA 119:8 Ka puritia e ahau āu tikanga; kaua ahau e whakarērea rawatia.
PSA 119:9 He aha te mea e mā ai i te taitamariki tōna ara? Kia rite ki tāu kupu tāna whakamaharatanga iho.
PSA 119:10 Kua whakapaua e ahau tōku ngākau ki te rapu i a koe; kaua ahau e tukua kia kotiti kē i āu whakahau.
PSA 119:11 Kua whakatakotoria e ahau tāu kupu ki roto ki tōku ngākau, kei hara ahau ki a koe.
PSA 119:12 E Ihowā, ka whakapaingia koe; whakaakona ahau ki āu tikanga.
PSA 119:13 Kua whakapuakina e ōku ngutu ngā whakaritenga katoa a tōu māngai.
PSA 119:14 Ko tōku koa i te ara o āu whakaaturanga, me te mea mō ngā taonga katoa.
PSA 119:15 Ka whakaaroaro ahau ki āu ako, ā, ka whai mahara ki āu huarahi.
PSA 119:16 He oranga ngākau ki ahau āu tikanga; e kore ahau e wareware ki tāu kupu.
PSA 119:17 Kia atawhai ki tāu pononga, kia ora ai ahau; kia puritia ai hoki tāu kupu.
PSA 119:18 Whakatirohia ōku kanohi kia kite ai ahau i ngā mea whakamīharo i roto i tāu ture.
PSA 119:19 He manene ahau i runga i te whenua; kaua āu whakahau e hunā ki ahau.
PSA 119:20 Ka ngawhā tōku wairua i te matenui atu ki āu whakaritenga i ngā wā katoa.
PSA 119:21 Kua rīria e koe te hunga whakakake kua oti nei te kanga, e kotiti kē nei i āu whakahau,
PSA 119:22 parea atu i ahau te tāwai me te whakahāwea, kua mau hoki ahau ki āu whakaaturanga.
PSA 119:23 I noho anō hoki ngā rangatira ki te kōrero kino mōku; otirā e whakaaro ana tāu pononga ki āu tikanga.
PSA 119:24 Ko āu whakaaturanga anō tōku oranga ngākau, ōku hoa whakatakoto whakaaro.
PSA 119:25 Piri tonu tōku wairua ki te puehu; whakahauoratia ahau kia rite ki tāu kupu.
PSA 119:26 I whakaaturia e ahau ōku ara, ā, whakahoki kupu ana koe ki ahau; whakaakona ahau ki āu tikanga.
PSA 119:27 Meinga ahau kia mātau ki te ara o āu ako, kia whakaaroaro ai ahau ki āu mahi whakamīharo.
PSA 119:28 E māturuturu iho ana tōku wairua i te pōuri; kia rite ki tāu kupu tāu whakaū ake i ahau.
PSA 119:29 Whakamataratia atu i ahau te ara o te teka; kia atawhai mai hoki, ā, hōmai tāu ture.
PSA 119:30 Kua whiriwhiria e ahau te ara o te pono; ka waiho e ahau āu whakaritenga ki tōku aroaro.
PSA 119:31 Piri tonu ahau ki āu whakaaturanga, e Ihowā; kei whakamā ahau.
PSA 119:32 Ka oma ahau i te ara o āu whakahau, ina whakanuia e koe tōku ngākau.
PSA 119:33 E Ihowā, whakaakona ahau ki te ara o āu tikanga; ā, ka mau i ahau taea noatia te mutunga.
PSA 119:34 Hōmai he mātauranga ki ahau, ā, ka mau i ahau tāu ture; ka whakapaua tōku ngākau ki te pupuri.
PSA 119:35 Meinga ahau kia haere i te ara o āu whakahau; ko tāku hoki tēnā e whakaahuareka nei.
PSA 119:36 Whakaangahia tōku ngākau ki āu whakaaturanga; kaua hoki ki te apo.
PSA 119:37 Whakatahuritia kētia ōku kanohi kei kite i te horihori; whakahauorangia ahau i tāu ara.
PSA 119:38 Whakapūmautia tāu kupu ki tāu pononga, e wehi nei ki a koe.
PSA 119:39 Parea atu tōku tāwainga, e wehi nei ahau, he pai hoki āu whakaritenga.
PSA 119:40 Nanā, kua matenui ahau ki āu ako; whakahauorangia ahau i runga i tōu tika.
PSA 119:41 Kia puta anō āu mahi tohu ki ahau, e Ihowā, arā tāu whakaoranga, kia rite ki tāu kupu.
PSA 119:42 Pēnei ka whai kupu māku ki tōku kaitāwai; nōku ka whakawhirinaki ki tāu kupu.
PSA 119:43 Kaua e tangohia rawatia i tōku māngai te kupu o te pono, e tūmanako nei hoki ahau ki āu whakaritenga.
PSA 119:44 Pēnei ka puritia e ahau tāu ture ake ake.
PSA 119:45 Ā, ka hāereere noa ahau, kua rapua hoki e ahau āu akoranga.
PSA 119:46 Ka kōrerotia anō e ahau āu whakaaturanga ki te aroaro o ngā kīngi, e kore anō e whakamā.
PSA 119:47 Ā, ka waiho e ahau hei oranga ngākau mōku āu whakahau e aroha nei ahau.
PSA 119:48 Ka toro atu hoki ōku ringa ki āu whakahau e aroha nei ahau, ka whakaaroaro anō ki āu tikanga.
PSA 119:49 Maharatia te kupu ki tāu pononga, nō te mea kua meinga ahau e koe kia tūmanako atu.
PSA 119:50 Ko tōku oranga ngākau tēnei i ahau e tangi nei; nā tāu kupu nei hoki ahau i whakahauora.
PSA 119:51 Nui rawa te whakahī ki ahau o te hunga whakakake, heoi, kīhai ahau i peka kē i tāu ture.
PSA 119:52 I mahara ahau ki āu whakaritenga, e Ihowā, o tua iho; ā, mārie ana tōku ngākau.
PSA 119:53 Mau pū ahau i te pāwera, mō te hunga kino kua whakarere nei i tāu ture.
PSA 119:54 Ko āu tikanga āku e hīmene ai i te whare i noho manene ai ahau.
PSA 119:55 I mahara ahau ki tōu ingoa i te pō, e Ihowā, ā, puritia ana e ahau tāu ture.
PSA 119:56 I ahau tēnei, he mau nōku ki āu ako.
PSA 119:57 Ko Ihowā tōku wāhi; kua mea nei ahau, ka pupuri ahau i āu kupu.
PSA 119:58 I whakapaua tōku ngākau ki te īnoi ki a koe kia pai mai; kia rite ki tāu kupu tāu mahi tohu ki ahau.
PSA 119:59 I whakaaro ahau ki ōku ara, ā, anga ana ōku waewae ki āu whakaaturanga;
PSA 119:60 i hohoro ahau, ā, kīhai i whakaroa ki te pupuri i āu whakahau.
PSA 119:61 Karapotia pūtia ana ahau e ngā here a te hunga kino, kīhai ia ahau i wareware ki tāu ture.
PSA 119:62 I waenganui pō ka ara ahau ki te whakawhetai ki a koe mō āu whakaritenga tika.
PSA 119:63 He hoa ahau nō te hunga katoa e wehi ana i a koe, nō te hunga anō e pupuri ana i āu ako.
PSA 119:64 Kī tonu, e Ihowā, te whenua i tāu mahi tohu; whakaakona ahau ki āu tikanga.
PSA 119:65 Pai rawa tāu hanga ki tāu pononga, e Ihowā, rite tonu ki tāu kupu.
PSA 119:66 Whakaakona ahau ki te ngārahu pai, ki te mātauranga; kua whakapono hoki ahau ki āu whakahau.
PSA 119:67 I ahau kīanō i whakawhiua, i hē ahau; tēnā ko tēnei, ka puritia e ahau tāu kupu.
PSA 119:68 He pai koe, he pai hoki āu mahi; whakaakona ahau ki āu tikanga.
PSA 119:69 Kua titoa e te hunga whakakake he teka mōku; ka whakapaua tōku ngākau ki te pupuri i āu ako.
PSA 119:70 He ngako rawa tō rātou ngākau, koia anō kei te taupā; ko ahau ia, he oranga ngākau ki ahau tāu ture.
PSA 119:71 Mārie anō ahau kia pēhia e te pōuri; i ako ai ahau i āu tikanga.
PSA 119:72 Ko te ture a tōu māngai pai kē atu ki ahau i ngā mano o te kōura, o te hiriwa.
PSA 119:73 Nā ōu ringa ahau i hanga, i whakawhaiahua; hōmai he mātauranga ki ahau, kia ako ai ahau ki āu whakahau.
PSA 119:74 Ka hari te hunga e wehi ana i a koe ina kite i ahau; nōku i tūmanako ki tāu kupu.
PSA 119:75 E mātau ana ahau, e Ihowā, he tika āu whakaritenga, ā, he pono nōu i pēhia ai tōku ngākau e koe.
PSA 119:76 Tēnā rā, waiho tāu mahi tohu hei whakamārie mōku, kia rite ki tāu kupu ki tāu pononga.
PSA 119:77 Kia puta ki ahau āu mahi aroha, kia ora ai ahau; ko tāu ture hoki tōku oranga ngākau.
PSA 119:78 Kia whakamā te hunga whakakake, nō te mea kāhore he take i hē ai tā rātou hanga ki ahau; ko ahau ia ka whakaaroaro ki āu akoranga.
PSA 119:79 Ko te hunga e wehi ana ki a koe me anga ki ahau, ā, ka mōhio rātou ki āu whakaaturanga.
PSA 119:80 Kia tapatahi tōku ngākau ki āu tikanga; kei whakamā ahau.
PSA 119:81 E matenui ana tōku wairua ki tāu whakaoranga; otiia ka tūmanako ahau ki tāu kupu.
PSA 119:82 Matawaia ana ōku kanohi he meatanga ki tāu kupu; i ahau e mea ana, “Āhea koe whakamārie ai i ahau?”
PSA 119:83 Kua rite nei hoki ahau ki te kōkī i roto i te paoa; he ahakoa e kore ahau e wareware ki āu tikanga.
PSA 119:84 E hia ngā rā o tāu pononga? Āhea koe whakarite whakawā ai mō te hunga e tūkino nei i ahau?
PSA 119:85 Kua keri poka te hunga whakakake mōku; he mea kāhore e rite ki tāu ture.
PSA 119:86 Pono tonu āu whakahau katoa; e tūkino takekore ana rātou i ahau; āwhinatia mai ahau.
PSA 119:87 Wāhi iti kua mōtī ahau i a rātou i runga i te whenua; otirā kīhai i mahue i ahau āu akoranga.
PSA 119:88 Kia rite ki tōu aroha tāu whakahauora i ahau; ā, ka puritia e ahau ngā whakaaturanga a tōu māngai.
PSA 119:89 Pūmau tonu tāu kupu, e Ihowā, ake ake i runga i te rangi.
PSA 119:90 Kei ngā whakatupuranga katoa tōu pono; whakaūngia ana e koe te whenua, ā, e tū nei anō.
PSA 119:91 E tū nei anō ināianei, pērā tonu me tāu i whakarite ai, he pononga hoki ngā mea katoa nāu.
PSA 119:92 Me kaua tāu ture hei oranga mō tōku ngākau, kua ngaro ahau i reira i tōku auētanga.
PSA 119:93 E kore rawa ahau e wareware ki āu ako, he mea whakahauora hoki nāu ēnā i ahau.
PSA 119:94 Nāu ahau; māu ahau e whakaora, kua rapua hoki e ahau āu ako.
PSA 119:95 Kua tatari te hunga kino ki ahau kia whakamatea, ka whakaaro ia ahau ki āu whakaaturanga.
PSA 119:96 Kua kitea e ahau te mutunga o ngā mea tino tika katoa, he whānui rawa ia tāu whakahau.
PSA 119:97 Anō tōku aroha ki tāu ture! Ko tāku tēnā e whakaaroaro ai i te roa o te rā.
PSA 119:98 Nāu i hira ake ai ōku whakaaro i o ōku hoariri, nā āu whakahau, e piri tonu nei ki ahau.
PSA 119:99 Nui atu ōku mahara i o ōku kaiwhakaako katoa, nōku i whakaaroaro tonu ki āu whakaaturanga.
PSA 119:100 Tērā atu tōku mōhio i tō ngā kaumātua, nō te mea i pupuri ahau i āu ako.
PSA 119:101 Kua kaiponuhia mai e ahau ōku waewae i ngā ara kino katoa, kia pupuri ai ahau i tāu kupu.
PSA 119:102 Kīhai ahau i tītaha i āu whakaritenga; nāu hoki ahau i ako.
PSA 119:103 Anō te reka o āu kupu ki tōku ngao, āe rā, reka atu i te honi ki tōku māngai.
PSA 119:104 Nā āu ako ahau i whai mōhio ai; nā reira ahau i kino ai ki ngā ara teka katoa.
PSA 119:105 He rama tāu kupu ki ōku waewae, he mārama ki tōku ara.
PSA 119:106 Kua oati ahau, ā, ka whakamanā anō e ahau, kia puritia e ahau āu whakaritenga tika.
PSA 119:107 He nui te mamae o tōku ngākau; whakahauorangia ahau, e Ihowā, kia rite ki tāu kupu.
PSA 119:108 Manakohia, e Ihowā, ngā ohaohatanga a tōku māngai, whakaakona hoki ahau ki āu whakaritenga.
PSA 119:109 Kei tōku ringa tonu tōku wairua, heoi kāhore ahau e wareware ki tāu ture.
PSA 119:110 Kua whakatakotoria e te hunga kino he māhanga mōku, heoi, kāhore ahau i peka kē i āu ako.
PSA 119:111 Ka waiho e ahau āu whakaaturanga hei kāinga tupu mōku ake ake; ko tōku koanga ngākau hoki ēnā.
PSA 119:112 Kua whakaanga e ahau tōku ngākau ki te mahi tonu i āu tikanga; ā te mutunga rā anō.
PSA 119:113 E kino ana ahau ki te hunga whakaaro ruarua, ko tāu ture ia tāku e aroha ai.
PSA 119:114 Ko tōku piringa koe, ko tōku whakangungu rākau; e tūmanako ana ahau ki tāu kupu.
PSA 119:115 Mawehe atu i ahau, e te hunga kino, ka whakaritea hoki e ahau ngā whakahau a tōku Atua.
PSA 119:116 Kia rite ki tāu kupu tāu tautoko ake i ahau, kia ora ai ahau, kaua hoki ahau e tukua kia whakamā ki tāku e tūmanako atu nei.
PSA 119:117 Tautokona ake ahau, kia ora ai ahau, ā, ka whai whakaaro tonu ahau ki āu tikanga.
PSA 119:118 Kua whakahāweatia e koe te hunga katoa e kotiti kē ana i āu tikanga; he horihori hoki tō rātou tinihanga.
PSA 119:119 Ka whakakāhoretia e koe te hunga kino katoa o te whenua, ānō he para mata; koia ahau i aroha ai ki āu whakaaturanga.
PSA 119:120 Wiri ana ōku kikokiko i te wehi ki a koe, e mataku ana hoki ahau ki āu whakaritenga.
PSA 119:121 He whakawā tika, he tika tāku mahi; kaua ahau e tukua ki ōku kaitūkino.
PSA 119:122 Ko koe hei tuarā mō tāu pononga mō te pai; kei tūkinotia ahau e te hunga whakakake.
PSA 119:123 Matawaia ana ōku kanohi i te meatanga ki tāu whakaora, ki te kupu hoki o tāu tika.
PSA 119:124 Kia rite ki tōu aroha tāu mahi ki tāu pononga; whakaakona hoki ahau ki āu tikanga.
PSA 119:125 He pononga ahau nāu; hōmai he mahara ki ahau, kia mātau ai ki āu whakaaturanga.
PSA 119:126 Kua rite te wā hei mahinga mā Ihowā; kua whakakāhoretia hoki e rātou tāu ture.
PSA 119:127 Nā reira i arohaina rawatia ai e ahau āu whakahau i te kōura, āe, i te tino kōura.
PSA 119:128 Nā reira tika tonu ki ahau āu ako katoa mō ngā mea katoa; kino iho anō ahau ki ngā ara teka katoa.
PSA 119:129 He mea whakamīharo āu whakaaturanga; i mau ai tōku wairua ki reira.
PSA 119:130 Ko te whakapuakanga o āu kupu he hōmai mārama; nā reira i hōmai he mahara ki ngā kūware.
PSA 119:131 I hāmama tōku māngai, i kihakiha; he matenui nōku ki āu whakahau.
PSA 119:132 Tahuri mai ki ahau, tohungia hoki ahau; kia rite ki tāu hanga ki te hunga e aroha ana ki tōu ingoa.
PSA 119:133 Whakatikaia ōku hīkoinga ki runga i tāu kupu; kaua hoki tētahi hē e tukua hei rangatira mōku.
PSA 119:134 Whakaorangia ahau i te tūkino a te tangata; ā, ka puritia e ahau āu ako.
PSA 119:135 Kia mārama mai tōu mata ki tāu pononga; whakaakona hoki ahau ki āu tikanga.
PSA 119:136 Heke noa ngā awa wai o ōku kanohi; mō rātou kāhore i pupuri i tāu ture.
PSA 119:137 He tika koe, e Ihowā, he tika anō āu whakaritenga.
PSA 119:138 He tika, he pono rawa āu whakaaturanga i whakahaua mai e koe.
PSA 119:139 Ka ngaro ahau i tōku ngākau whakapuke, mō āu kupu ka wareware nei i ōku hoariri.
PSA 119:140 Hore rawa he para o tāu kupu; koia i arohaina ai e tāu pononga.
PSA 119:141 He iti ahau, e whakahāweatia ana; heoi, kāhore ahau e wareware ki āu ako.
PSA 119:142 He tika pūmau tonu tōu tika; he pono hoki tāu ture.
PSA 119:143 Kua pā mai ki ahau te pōuri me te mamae; ko āu whakahau ia tōku oranga ngākau.
PSA 119:144 Pūmau tonu te tika o āu whakaaturanga; hōmai he mahara ki ahau, ā, ka ora ahau.
PSA 119:145 I whakapaua tōku ngākau ki te karanga; whakahokia mai he kupu ki ahau, e Ihowā. Ka mau i ahau āu tikanga.
PSA 119:146 I karanga ahau ki a koe; whakaorangia ahau, ā, ka puritia e ahau āu whakaaturanga.
PSA 119:147 Kīanō te ata i pūao noa, kua karanga ahau; i tūmanako ahau ki āu kupu.
PSA 119:148 I hohoro ōku kanohi i ngā mataaratanga ki te whakaaroaro ki tāu kupu.
PSA 119:149 Whakarongo ki tōku reo, kia rite ki tōu aroha; kia rite, e Ihowā, ki tāu i whakarite ai tāu whakahauora i ahau.
PSA 119:150 E whakatata mai ana te hunga e whai ana i te whanokē; kei tawhiti atu rātou i tāu ture.
PSA 119:151 E tata ana mai koe, e Ihowā; he pono katoa āu whakahau.
PSA 119:152 Nōnamata ahau i mātau ai ki āu whakaaturanga, he mea whakapūmau nāu nō tua whakarere.
PSA 119:153 Whakaaro mai ki tōku mate, ā, whakaorangia ahau; kāhore hoki ahau e wareware ki tāu ture.
PSA 119:154 Tohea tāku tohe, whakaorangia hoki ahau; kia rite ki tāu kupu tāu whakahauoranga i ahau.
PSA 119:155 Kei tawhiti atu i te hunga kino te whakaoranga; kāhore hoki rātou e rapu ki āu tikanga.
PSA 119:156 E Ihowā, he nui āu mahi tohu; kia rite ki āu whakaritenga tāu whakahauora i ahau.
PSA 119:157 He tokomaha ōku kaitūkino, ōku hoariri, heoi, kāhore ahau i peka kē i āu whakaaturanga.
PSA 119:158 I kite ahau i ngā kaimahi i te kino, ā pōuri iho, nō rātou kāhore e pupuri i tāu kupu.
PSA 119:159 Tirohia mai tōku aroha ki āu ako; kia rite ki tōu aroha, e Ihowā, tāu whakahauora i ahau.
PSA 119:160 Ko te huinga katoatanga o tāu kupu he pono; pūmau katoa anō āu whakaritenga tika ake ake.
PSA 119:161 Hore he rawa i tūkinotia ai ahau e ngā rangatira, otiia, e wehi ana tōku ngākau i tāu kupu.
PSA 119:162 E hari ana ahau ki tāu kupu, ānō he tangata kua whiwhi ki te taonga nui.
PSA 119:163 E kino ana ahau, e whakarihariha ana ki te kōrero teka; ko tāu ture ia tāku i aroha ai.
PSA 119:164 Takiwhitu āku whakamoemiti ki a koe i te rā tahi mō āu whakaritenga tika.
PSA 119:165 He rangimārie nui tō te hunga e aroha ana ki tāu ture; e kore hoki ō rātou waewae e tūtuki.
PSA 119:166 Ā, kua tūmanako ahau ki tāu whakaora, e Ihowā, kua mahi ahau i āu whakahau.
PSA 119:167 Kua puritia e tōku wairua āu whakaaturanga, āe, e arohaina nuitia ana e ahau.
PSA 119:168 Kua puritia e ahau āu ako me āu whakaaturanga; kei tōu aroaro hoki ōku ara katoa.
PSA 119:169 Tukua atu tāku tangi kia tata atu ki tōu aroaro, e Ihowā; hōmai he mahara ki ahau, kia rite ki tāu kupu.
PSA 119:170 Kia tae atu tāku īnoi ki tōu aroaro; kia rite ki tāu kupu whakaora i ahau.
PSA 119:171 Kia whakapuaki ōku ngutu i te whakamoemiti; e whakaako ana hoki koe i ahau ki āu tikanga.
PSA 119:172 Mā tōku arero e kōrero tāu kupu; he tika hoki āu whakahau katoa.
PSA 119:173 Kia rite tōu ringa ki te āwhina i ahau; kua whiriwhiria hoki e ahau ko āu ako.
PSA 119:174 Kua matenui ahau ki tāu whakaora, e Ihowā; ko tāu ture hoki tōku oranga ngākau.
PSA 119:175 Kia ora tōku wairua, ā, ka whakamoemiti ia ki a koe; kia āwhinatia hoki ahau e āu whakaritenga.
PSA 119:176 Kua kotiti kē ahau me he hipi ngaro; rapua tāu pononga, kāhore hoki ahau e wareware ki āu whakahau.
PSA 120:1 He waiata; he pikitanga. I tangi ahau ki a Ihowā i tōku matenga, ā, i whakahoki kupu mai ia ki ahau:
PSA 120:2 “E Ihowā, whakaorangia tōku wairua i te ngutu teka, i te arero hīanga.”
PSA 120:3 Ko te aha e hoatu ki a koe? Ko te aha hoki e tāpiritia atu māu, e te arero hīanga?
PSA 120:4 Ko ngā pere koi a te hunga nunui, me ngā waro hunipa.
PSA 120:5 Auē, tōku mate, tō te manene i Meheke, tōku hoki e noho nei i ngā tēneti o Kerara.
PSA 120:6 Kua roa te nohoanga tahitanga o tōku wairua ki te tangata e kino ana ki te āta noho.
PSA 120:7 Mō te āta noho ahau; engari ka kōrero ahau, ka anga rātou ka whawhai.
PSA 121:1 He waiata; he pikitanga. Ka anga atu ōku kanohi ki ngā maunga – nō reira nei te āwhina mōku.
PSA 121:2 Nō Ihowā te āwhina mōku, nō te kaihanga o te rangi, o te whenua.
PSA 121:3 E kore ia e tuku i tōu waewae kia nekehia; e kore tōu kaitiaki e moe.
PSA 121:4 Inā, e kore te kaitiaki o Īharaira e parangia, e moe.
PSA 121:5 Ko Ihowā tōu kaitiaki; ko Ihowā tōu whakamarumaru i tōu matau.
PSA 121:6 E kore koe e pākia e te rā i te awatea, e te marama rānei i te pō.
PSA 121:7 Mā Ihowā koe e tiaki i roto i ngā kino katoa; māna e tiaki tōu wairua.
PSA 121:8 Mā Ihowā e tiaki tōu haerenga atu, me tōu haerenga mai āianei ā ake tonu atu.
PSA 122:1 He waiata; he pikitanga. Nā Rāwiri. I koa ahau i tā rātou meatanga mai ki ahau, “Tātou ka haere ki te whare o Ihowā!”
PSA 122:2 E tū ana ō mātou waewae ki ōu tatau, e Hiruhārama.
PSA 122:3 Ko te hanganga o Hiruhārama, rite tonu ki tō te pā kua tūhonohonoa ki a ia anō.
PSA 122:4 Hāereere ana ki reira ngā iwi, ngā iwi o Ihowā, ki tō Īharaira whakaaturanga, ki te whakawhetai ki te ingoa o Ihowā.
PSA 122:5 Kua whakatūria hoki ki reira ngā torōna whakawā, ngā torōna o te whare o Rāwiri.
PSA 122:6 Īnoia he āta noho mō Hiruhārama: “Ka whiwhi ki te pai te hunga e aroha ana ki a koe.
PSA 122:7 Kia mau te rongo ki ōu taiepa, me te pai ki ōu whare kīngi.”
PSA 122:8 He mea mō ōku tēina, mō ōku hoa, tāku e mea nei, “Kia mau te rongo ki roto ki a koe.”
PSA 122:9 He whakaaro ki te whare o Ihowā, o tō tātou Atua, ka rapu ahau i te pai mōu.
PSA 123:1 He waiata; he pikitanga. Ka anga atu ōku kanohi ki a koe, e koe e noho mai nei i ngā rangi.
PSA 123:2 Inā, pērā tonu ngā kanohi o ngā pononga e titiro nei ki te ringa o tō rātou rangatira, ngā kanohi hoki o te kōtiro ki te ringa o tōna rangatira wahine; me ō mātou kanohi e titiro nei ki a Ihowā, ki tō mātou Atua, kia tohu rā anō ia i a mātou.
PSA 123:3 Tohungia mātou, e Ihowā, tohungia mātou; kua tino kapi hoki mātou i te whakahāwea.
PSA 123:4 Kapi tonu tō mātou wairua i te whakahī a te hunga e noho noa ana, i te whakahāwea a te hunga whakakake.
PSA 124:1 He waiata; he pikitanga. Nā Rāwiri. Me kaua a Ihowā i a tātou – he kī tēnei mā Īharaira –
PSA 124:2 me kaua a Ihowā i a tātou, i te whakatikanga mai o te tangata ki a tātou;
PSA 124:3 pēnei kua horomia oratia tātou e rātou, i te muranga o tō rātou riri ki a tātou.
PSA 124:4 Kua ngaro tātou i ngā wai, kua taupokina ō tātou wairua e te ia;
PSA 124:5 pēnei kua taupokina ō tātou wairua e ngā wai whakakake.
PSA 124:6 Kia whakapaingia a Ihowā, kīhai nei i tuku i a tātou hei ngaunga mā ō rātou niho.
PSA 124:7 Kua mawhiti ō tātou wairua, me he manu i roto i te māhanga a ngā kaihopu; kua motu te māhanga, ā, mawhiti ana tātou.
PSA 124:8 Kei te ingoa o Ihowā he āwhina mō tātou, kei te kaihanga i te rangi, i te whenua.
PSA 125:1 He waiata; he pikitanga. Ko te hunga e whakawhirinaki ana ki a Ihowā ka rite ki Maunga Hiona, e kore nei e taea te whakangāueue, pūmau tonu ake ake.
PSA 125:2 Me ngā maunga e taiāwhio nei i Hiruhārama, te karapoti a Ihowā i tōna iwi, āianei ā ake tonu atu.
PSA 125:3 E kore hoki te tokotoko a te whakaarokore e waiho tonu i runga i te wāhi o te hunga tika, kei totoro te ringa o te hunga tika ki te kino.
PSA 125:4 Kia pai tāu mahi, e Ihowā, ki te, hunga pai, ki te hunga he tika nei ō rātou ngākau.
PSA 125:5 Ko te hunga ia e peka kē ana ki ō rātou ara kōpikopiko, mā Ihowā rātou e ārahi tahi atu me ngā kaimahi i te kino. Kia mau te rongo ki a Īharaira!
PSA 126:1 He waiata; he pikitanga. I tā Ihowā whakahokinga mai i ngā pononga o Hiona i rite mātou ki te hunga e moehewa ana.
PSA 126:2 Kātahi tō mātou māngai ka kī i te kata, tō mātou arero hoki i te waiata; kātahi ka kōrerotia i roto i ngā tauiwi, “He nui ngā mahi a Ihowā ki a rātou.”
PSA 126:3 He mea nunui a Ihowā i mea ai mō tātou, ā, e koa ana tātou.
PSA 126:4 E Ihowā, whakahokia mātou i te whakarau; kia pērā me ngā awa o te tonga.
PSA 126:5 Ko te hunga e rui ana i runga i te roimata, ka kokoti i runga i te hari.
PSA 126:6 Ahakoa haere tangi atu ia me te kawe i āna purapura hei whakatōkanga, tērā ia e haere hari mai anō me te mau mai i āna paihere.
PSA 127:1 He waiata; he pikitanga. Nā Horomona. Ki te kore e hangā e Ihowā te whare, he maumau mahi tā ngā kaihanga. Ki te kore e tiakina e Ihowā te pā, maumau mataara noa te kaitiaki.
PSA 127:2 He maumau tō koutou ara wawe, tō koutou noho roa i te pō, tā koutou kai i te taro o te māuiui; ko tāna moe tēnā ka hōmai nei ki tāna e aroha ai.
PSA 127:3 Nā, he taonga pūmau nā Ihowā ngā tamariki, ko ngā hua anō o te kōpū tāna utu.
PSA 127:4 E rite ana ki ngā pere i te ringaringa o te tangata kaha te whānau o te taitamarikitanga.
PSA 127:5 Ka hari te tangata kua kī nei tāna papa pere i a rātou. E kore rātou e whakamā, ina kōrero ki ō rātou hoariri i te kūwaha.
PSA 128:1 He waiata; he pikitanga. Ka hari ngā tāngata katoa e wehi ana i a Ihowā, e haere ana i āna ara.
PSA 128:2 E kai hoki koe i te mahinga a ōu ringa; e hari koe, ā, ka tau te pai ki a koe.
PSA 128:3 E rite tāu wahine ki te wāina hua i roto rawa i tōu whare; āu tamariki ki ngā māhuri ōriwa, i ngā taha o tāu tēpu.
PSA 128:4 Nā, he pērā te manaaki mō te tangata e wehi ana i a Ihowā.
PSA 128:5 Ka manaakitia koe e Ihowā i Hiona; ā, e kite koe i te pai o Hiruhārama i ngā rā katoa e ora ai koe.
PSA 128:6 Āe, e kite koe i ngā tamariki a āu tamariki. Kia mau te rongo ki a Īharaira!
PSA 129:1 He waiata; he pikitanga. He kī tēnei mā Īharaira – “Ka maha ā rātou tūkinotanga i ahau o tōku tamarikitanga ake;
PSA 129:2 ka maha ā rātou tūkinotanga i ahau o tōku tamarikitanga ake, heoi, kīhai ahau i taea e rātou.
PSA 129:3 I parautia tōku tuarā e ngā kaiparau; he roa ā rātou parautanga.”
PSA 129:4 He tika tā Ihowā; motu pū i a ia ngā aho a te hunga kino.
PSA 129:5 Kia whakamā, kia whakahokia ki muri, te hunga katoa e kino nei ki Hiona.
PSA 129:6 Kia rite rātou ki te tarutaru i ngā tuanui, e memenge nei i te mea kīanō i tupu ake,
PSA 129:7 e kore nei e kī te ringa o te kaikoti, te uma hoki o te kaipaihere,
PSA 129:8 e kore anō te hunga e haere ana i te taha e mea, “Kia tau ki a koutou te manaaki a Ihowā! Ko tā mātou manaaki tēnei ki a koutou i runga i te ingoa o Ihowā!”
PSA 130:1 He waiata; he pikitanga. I karanga ahau ki a koe, e Ihowā, i roto i ngā hōhonu.
PSA 130:2 E te Ariki, whakarongo mai ki tōku reo! Kia anga mai ōu taringa ki tōku reo īnoi!
PSA 130:3 Me i maharatia e koe ngā kino, e Ihowā, ko wai, e te Ariki, e tū?
PSA 130:4 Otirā, he muru hara tāu, e wehingia ai koe.
PSA 130:5 E tatari ana ahau ki a Ihowā, e tatari ana tōku wairua; e tūmanako ana hoki ahau ki tāna kupu.
PSA 130:6 Ko te tāringa o tōku wairua i te Ariki nui atu i tō te hunga e whanga ana ki te ata, āe, i tō te hunga e whanga ana ki te ata.
PSA 130:7 E Īharaira, kia tūmanako ki a Ihowā! Kei a Ihowā hoki te mahi tohu, ā, kei a ia te hokonga nui.
PSA 130:8 Ā, māna a Īharaira e hoko i roto i ōna hē katoa.
PSA 131:1 He waiata; he pikitanga. Nā Rāwiri. E Ihowā, ehara tōku i te ngākau whakapehapeha, ehara anō ōku i te kanohi whakakake; kāhore hoki ahau e rahurahu ki ngā mea nunui, e kore nei e taea e ahau.
PSA 131:2 He pono kua meinga e ahau tōku wairua kia tau, ā, kia māhaki, pērā i tō te tamaiti kua wehea i te ū o tōna whaea; he rite tōku wairua ki te tamaiti kātahi nei ka wehe i te ū.
PSA 131:3 E Īharaira, kia tūmanako ki a Ihowā, āianei, ā ake tonu atu.
PSA 132:1 He waiata; he pikitanga. E Ihowā, maharatia a Rāwiri, me ōna mamaetanga ngākau katoa;
PSA 132:2 tāna oati ki a Ihowā, tāna kupu taurangi ki te Mea Nui o Hākopa,
PSA 132:3 “E kore rawa ahau e tae ki tōku whare e noho ai ahau, e eke rānei ki runga ki tōku moenga;
PSA 132:4 e kore ahau e tuku i ōku kanohi kia moe, i ōku kamo kia nenewha,
PSA 132:5 kia kitea rā anō e ahau he wāhi mō Ihowā, he nohoanga mō te Mea Nui o Hākopa.”
PSA 132:6 Nā, i rangona e mātou ki Ēparata, i kitea ki ngā māra o te ngahere.
PSA 132:7 “Ka haere mātou ki roto ki ōna tapenākara; ka koropiko ki tōna tūranga waewae.”
PSA 132:8 E ara, e Ihowā, ki tōu okiokinga, a koe, me te āka o tōu kaha.
PSA 132:9 Kia whakakākahuria āu tohunga ki te tika, kia hāmama tāu hunga tapu i te hari.
PSA 132:10 Whakaaro ki a Rāwiri, ki tāu pononga, kaua e whakapeaua atu te mata o tāu i whakawahi ai.
PSA 132:11 Kua oati pono a Ihowā ki a Rāwiri, e kore ia e tahuri kē i tēnā: “Ka whakanohoia e ahau tētahi hua o tōu kōpū ki tōu torōna.
PSA 132:12 Ki te puritia e āu tama tāku kawenata, me tāku whakaaturanga e ako ai ahau ki a rātou, ka noho anō ā rātou tama ki tōu torōna ake ake.”
PSA 132:13 Kua whiriwhiria hoki e Ihowā a Hiona; kua hiahiatia e ia hei nohoanga mōna:
PSA 132:14 “Ko tōku okiokinga tēnei ake ake; ko konei ahau noho ai, kua hiahiatia hoki e ahau.
PSA 132:15 Ka manaakitia rawatia e ahau tāna kai; ka whakamākonatia e ahau ōna rawakore ki te taro.
PSA 132:16 Ka whakakākahuria hoki e ahau ōna tohunga ki te whakaoranga, ā, ka hāmama tōna hunga tapu i te hari.
PSA 132:17 “Ka meinga e ahau kia pihi ki reira te haona o Rāwiri; kua whakapaia e ahau he rama mō tāku i whakawahi ai.
PSA 132:18 Ka whakakākahuria e ahau ōna hoariri ki te whakamā, ā, ka matomato tōna karauna i runga i a ia.”
PSA 133:1 He waiata; he pikitanga. Nā Rāwiri. Nā, anō te pai, anō te āhuareka o te nohoanga o ngā tēina, o ngā tuākana i runga i te whakaaro kotahi!
PSA 133:2 Tōna rite kei te hinu utu nui i runga i te upoko, i heke iho nei ki te pāhau, āe, ki te pāhau o Ārona, i heke iho nei ki te remu o ōna kākahu.
PSA 133:3 Kei te tōmairangi anō o Heremona, kei tērā i heke iho ki ngā maunga o Hiona. I whakahaua iho hoki e Ihowā te manaaki mō reira, te ora mō ake tonu atu.
PSA 134:1 He waiata; he pikitanga. Nā, whakapaingia a Ihowā, e ngā pononga katoa a Ihowā, e tū nei i te whare o Ihowā i te pō!
PSA 134:2 Totoro ake ō koutou ringa ki te wāhi tapu, whakapaingia hoki a Ihowā.
PSA 134:3 Mā Ihowā koe e manaaki i roto i Hiona, māna, mā te kaihanga o te rangi, o te whenua.
PSA 135:1 Whakamoemititia a Ihowā! Whakamoemititia te ingoa o Ihowā; whakamoemititia ia, e ngā pononga a Ihowā,
PSA 135:2 e koutou e tū nei i roto i te whare o Ihowā, i ngā marae o te whare o tō tātou Atua.
PSA 135:3 Whakamoemititia a Ihowā; he pai hoki a Ihowā; hīmene atu ki tōna ingoa; he mea āhuareka hoki tēnā.
PSA 135:4 Kua whiriwhiria hoki e Ihowā a Hākopa māna, a Īharaira hei tino taonga mōna.
PSA 135:5 E mātau ana hoki ahau he nui a Ihowā; kei runga atu hoki tō tātou Ariki i ngā atua katoa.
PSA 135:6 Ko ngā mea katoa i pai ai a Ihowā, kua oti i a ia, i te rangi, i te whenua, i ngā moana, i ngā wāhi hōhonu katoa.
PSA 135:7 Nāna i pupū ake ai ngā kohu i ngā pito o te whenua; i hangā e ia ngā uira mō te ua; e whakaputaina mai ana e ia te hau i roto i ōna whare taonga.
PSA 135:8 Nāna nei i patu ngā mātāmua o Īhipa, a te tangata, a te kararehe;
PSA 135:9 i tonoa e ia he tohu, he merekara ki waenganui ōu, e Īhipa; ki runga ki a Parao rātou ko āna pononga katoa.
PSA 135:10 Nāna i patu ngā iwi maha, i whakamate ngā kīngi rarahi –
PSA 135:11 a Hihona kīngi o ngā Amori, a Oka kīngi o Pahana, me ngā rangatiratanga katoa o Kanaana –
PSA 135:12 ā, hōmai ana e ia tō rātou whenua hei kāinga pūmau, hei kāinga pūmau mō Īharaira, mō tāna iwi.
PSA 135:13 E Ihowā, pūmau tonu tōu ingoa, me tōu maharatanga, e Ihowā, ki ngā whakatupuranga katoa.
PSA 135:14 Ka whakawā hoki a Ihowā mō tāna iwi; ā, ka puta kē tōna whakaaro ki āna pononga.
PSA 135:15 He hiriwa, he kōura ngā whakapakoko a ngā tauiwi, he mahi nā te ringa tāngata.
PSA 135:16 He māngai ō rātou, ā, kāhore e kōrero; he kanohi ō rātou, ā, kāhore e kite;
PSA 135:17 he taringa ō rātou, ā, kāhore e rongo, kāhore anō he manawa i ō rātou māngai.
PSA 135:18 Ka rite ki a rātou te hunga nāna rātou i hanga; āe, me ngā tāngata katoa e whakawhirinaki ana ki a rātou.
PSA 135:19 Whakapaingia a Ihowā, e te whare o Īharaira! Whakapaingia a Ihowā, e te whare o Ārona!
PSA 135:20 Whakapaingia a Ihowā, e te whare o Rīwai! Whakapaingia a Ihowā, e te hunga katoa e wehi ana i a Ihowā!
PSA 135:21 Kia whakapaingia a Ihowā i roto i Hiona, e noho nei i Hiruhārama. Whakapaingia a Ihowā!
PSA 136:1 Whakawhetai ki a Ihowā, he pai hoki ia;
PSA 136:2 Whakawhetai ki te Atua o ngā atua;
PSA 136:3 Whakawhetai ki te Ariki o ngā ariki;
PSA 136:4 E mahi nei tōna kotahi i ngā merekara nunui,
PSA 136:5 i tohunga rawa nei ki te hanga i ngā rangi,
PSA 136:6 i whakatakoto nei i te whenua ki runga ki ngā wai,
PSA 136:7 ki te kaihanga i ngā whakamārama nunui,
PSA 136:8 i te rā hei tohutohu i te awatea,
PSA 136:9 i te marama me ngā whetū hei tohutohu i te pō,
PSA 136:10 Ki te kaipatu i Īhipa, arā i ā rātou mātāmua,
PSA 136:11 ā, ārahina mai ana a Īharaira i waenganui i a rātou,
PSA 136:12 nā te ringa kaha me te tākakau mārō,
PSA 136:13 i tapahi nei i te Moana Whero ā motu rawa,
PSA 136:14 ā, meinga ana a Īharaira kia haere rā waenganui,
PSA 136:15 ā, hurihia ana a Parao me āna mano ki te Moana Whero,
PSA 136:16 i ārahi nei i tāna iwi rā te koraha,
PSA 136:17 i patu nei i ngā kīngi nunui,
PSA 136:18 i whakamate nei i ngā kīngi rongo nui,
PSA 136:19 i a Hihona kīngi o ngā Amori,
PSA 136:20 i a Oka kīngi o Pahana,
PSA 136:21 ā, hōmai ana tō rātou whenua hei kāinga pūmau,
PSA 136:22 hei kāinga pūmau mō Īharaira, mō tāna pononga,
PSA 136:23 I mahara nei ki a tātou i tō tātou itinga,
PSA 136:24 ā, whakaorangia ana tātou i ō tātou hoariri,
PSA 136:25 ko ia te kaihōmai i te kai mā ngā kikokiko katoa,
PSA 136:26 Whakawhetai ki te Atua o te rangi,
PSA 137:1 I te taha o ngā wai o Papurōna – noho ana tātou i reira, āe, tangi ana tātou, i a tātou i mahara ai ki Hiona.
PSA 137:2 Whakairia ake e tātou ā tātou hāpa ki runga ki ngā wirou i waenganui o reira.
PSA 137:3 Nō te mea i tono i reira te hunga nāna tātou i herehere ki ētahi waiata i a tātou, me te hunga nāna tātou i tūkino i tono mai he hari i a tātou, i mea mai, “Waiatatia mai ki a mātou tētahi o ngā waiata o Hiona!”
PSA 137:4 Me pēhea mātou ka waiata ai i te waiata a Ihowā i te whenua tauhou?
PSA 137:5 Ki te wareware ahau ki a koe, e Hiruhārama, kia wareware tōku ringa matau ki tāna mahi.
PSA 137:6 Ki te kore ahau e mahara ki a koe, kia piri tōku arero ki tōku ngao, ki te kore ahau e whakanui i Hiruhārama ki runga ake i tāku mea i tino hari ai.
PSA 137:7 E Ihowā, maharatia ngā tama a Ēroma i te rā o Hiruhārama, tā rātou meatanga, “Whakahoroa! Whakahoroa, ā taea rawatia anō tōna tūranga!”
PSA 137:8 E te tamāhine o Papurōna, meāke nei whakangaromia, ka hari te tangata e utua ai koe mō tāu i mea ai ki a mātou!
PSA 137:9 Ka hari te tangata e hopu ana, e tā ana i āu mea nohinohi ki runga ki te kōhatu!
PSA 138:1 Nā Rāwiri. Ka whakapaua tōku ngākau ki te whakawhetai ki a koe; ka hīmene atu ahau ki a koe i te aroaro o ngā atua.
PSA 138:2 Ka koropiko atu ahau ki te ritenga o tōu temepara tapu, ā, ka whakamoemiti ki tōu ingoa, mō tōu aroha me tōu pono; kua whakanuia hoki e koe tāu kupu ki runga ake i tōu ingoa katoa.
PSA 138:3 I whakahoki kupu mai koe ki ahau i te rā i karanga ai ahau, ā, whakahirihiritia ana e koe tōku wairua ki te kaha.
PSA 138:4 Ka whakamoemiti ngā kīngi katoa o te whenua ki a koe, e Ihowā, kua rongo hoki rātou ki ngā kupu a tōu māngai.
PSA 138:5 Āe, e waiata rātou mō ngā ara o Ihowā; he nui hoki te korōria o Ihowā.
PSA 138:6 Ahakoa hoki kei runga rawa a Ihowā, e titiro iho ana anō ia ki te hunga pāpaku; tēnā ko te tangata whakakake, i tawhiti anō kua mātauria e ia.
PSA 138:7 Ahakoa haere ahau i waenganui o te hē, māu ahau e whakahauora; ka totoro tōu ringa ki te riri o ōku hoa whawhai, mā tōu ringa matau anō ahau e whakaora.
PSA 138:8 Mā Ihowā e whakaoti āku mea; e Ihowā, e mau ana tāu mahi tohu ake ake. Kaua e whakarērea ngā mahi a ōu ringa.
PSA 139:1 Ki te tino kaiwhakatangi. He hīmene nā Rāwiri. E Ihowā, kua tirotirohia ahau e koe, kua mōhiotia anō e koe.
PSA 139:2 E mātau ana koe ki tōku nohoanga iho, ki tōku whakatikanga ake; e mōhio ana koe ki ōku whakaaro i tawhiti.
PSA 139:3 E kitea pūtia ana e koe tōku ara me tōku takotoranga iho; e matatau ana hoki koe ki ōku ara katoa.
PSA 139:4 Kāhore rawa hoki he kupu i tōku arero, i toe i a koe te mōhio, e Ihowā.
PSA 139:5 Kua hangā a muri, a mua, ōku e koe; kua pā anō tōu ringa ki ahau.
PSA 139:6 He mea whakamīharo rawa, kei tawhiti atu hoki i ahau, tēnei mātauranga; kei runga noa atu, e kore e taea e ahau.
PSA 139:7 Me haere ahau ki hea i tōu wairua? Me oma rānei ahau ki hea i tōu aroaro?
PSA 139:8 Ki te kake ahau ki te rangi, kei reira koe; ki te whārikitia e ahau tōku moenga i roto i te rēinga, kei reira anō koe.
PSA 139:9 Ki te tango ahau ki ngā pākau o te ata, ā, ka noho ki ngā tōpito o te moana;
PSA 139:10 kei reira anō tōu ringa hei ārahi i ahau, tōu matau hei pupuru i ahau.
PSA 139:11 Ki te mea ahau, “He pono, tērā ahau e hīpokina e te pōuri, ā, ko te mārama i tētahi taha ōku, i tētahi taha, ka meinga he pō,”
PSA 139:12 ahakoa te pōuri kāhore e huna mai i a koe, engari ka mārama te pō ānō ko te ao, ki a koe rite tahi te pōuri me te mārama.
PSA 139:13 I a koe hoki ōku whatumanawa; nāu hoki ahau i hīpoki i roto i te kōpū o tōku whaea.
PSA 139:14 Ka whakawhetai ahau ki a koe; he mea whakawehi, he mea whakamīharo tōku hanganga; he mahi whakamīharo āu mahi, mōhio rawa anō tōku wairua ki tēnā.
PSA 139:15 Kīhai i hunā ōku wāhi i a koe, i ahau e hangā ngarotia ana, e āta whakairohia ana i ngā wāhi hōhonu rawa o te whenua.
PSA 139:16 I kite ōu kanohi i ahau, kāhore anō kia āhua noa. I tuhituhia katoatia anō hoki ōku wāhi ki tāu pukapuka, i ngā rangi i whakaahua ai, i te mea kāhore anō tētahi i oti noa.
PSA 139:17 Kia pēhea mai hoki te matenui o ōu whakaaro ki ahau, e te Atua; koia anō te ranea, ina huihuia!
PSA 139:18 Ki te taua e ahau – maha atu i te onepū; ka oho ake ahau – kei a koe tonu ahau.
PSA 139:19 He pono ka patua e koe, e te Atua, te tangata kino; mawehe koia atu i ahau, e ngā tāngata toto.
PSA 139:20 He kino hoki ā rātou kupu mōu; e whakahua noa ana ōu hoariri i tōu i ingoa.
PSA 139:21 Kāhore ianei ahau, e Ihowā, e kino ki te hunga e kino ana ki a koe? E whakarihariha hoki ki te hunga e whakatika ana ki a koe?
PSA 139:22 He tino kino tāku kino ki a rātou; waiho iho rātou e ahau hei hoariri mōku.
PSA 139:23 Tirohia iho ahau, e te Atua, kia mātau hoki koe ki tōku ngākau; whakamātautauria ahau, kia mātau hoki koe ki ōku whakaaro.
PSA 139:24 Kia kite mehemea kei ahau tētahi ara o te kino, ka ārahi ai i ahau i te ara pūmau.
PSA 140:1 Ki te tino kaiwhakatangi. He hīmene nā Rāwiri. Whakaorangia ahau, e Ihowā, i te tangata kino; āraia atu i ahau te tangata tutū,
PSA 140:2 e whakaaro kino nei i ō rātou ngākau, e whakamine nei i a rātou i ngā wā katoa ki te whawhai.
PSA 140:3 Kua whakakoia tō rātou arero, ānō he nākahi; kei raro i ō rātou ngutu te wai whakamate o te neke. Hera
PSA 140:4 Tiakina ahau, e Ihowā, i ngā ringa o te hunga kino; āraia atu i ahau te tangata tutū, kua mea nei kia tutea ōku hīkoinga.
PSA 140:5 Kua hunā e te hunga whakakake te māhanga mōku, me ngā aho; kua horahia e rātou he kupenga ki te taha o te ara; kua whakapikoa e rātou he rore mōku. Hera
PSA 140:6 I mea ahau ki a Ihowā, “Ko koe tōku Atua.” Whakarongo, e Ihowā, ki tōku reo īnoi.
PSA 140:7 E Ihowā, e te Ariki, e te kaha o tōku whakaoranga, nāu i hīpoki tōku upoko i te rā o te tatauranga.
PSA 140:8 Aua e whakaaetia, e Ihowā, ngā hiahia o te tangata kino; kei taea tōna whakaaro korokē; kei whakakake rātou. Hera
PSA 140:9 Tēnā ko te upoko o te hunga e whakapae nei i ahau, kia hīpokina rātou e te kino o ō rātou ngutu!
PSA 140:10 Kia taka he waro mura ki runga ki a rātou; kia pangā rātou ki te ahi, ki roto ki ngā poka hōhonu, kei whakatika ake anō rātou.
PSA 140:11 E kore te tangata kōrero kino e whakapūmautia ki runga ki te whenua; mā te kino e aruaru te tangata tutū, kia turakina atu ia ki raro.
PSA 140:12 E mātau ana anō ahau mā Ihowā e tohe te whakawā a te tangata e tūkinotia ana, te mea hoki e rite ana mā ngā rawakore.
PSA 140:13 He pono ka whakawhetai te hunga pai ki tōu ingoa; ka noho te hunga tika ki tōu aroaro.
PSA 141:1 He hīmene nā Rāwiri. E Ihowā, kua tangi nei ahau ki a koe; hohoro mai ki ahau; whakarongo ki tōku reo ua karanga ahau ki a koe.
PSA 141:2 Kia whakatikaia tāku īnoi ki tōu aroaro, hei whakakakara; te toronga atu hoki o ōku ringa ānō ko te whakahere o te ahiahi.
PSA 141:3 Hōmai he kaitiaki mō tōku māngai, e Ihowā; tiakina te kūwaha o ōku ngutu.
PSA 141:4 Kaua e whakaangahia tōku ngākau ki te mea kino, ki te mahi i ngā mahi hīanga i roto i ngā kaimahi i te kino; kaua anō ahau e kai i ā rātou mea papai.
PSA 141:5 Mā te tangata tika ahau e patu; he mahi aroha tēnā; māna ahau e riri. He hinu tēnā ki runga ki te upoko, kaua ia e paopaongia e tōku upoko. Ahakoa hoki i roto i tō rātou kino ka īnoi tonu ahau.
PSA 141:6 E turakina ana ō rātou kaiwhakawā ki te taha o te kōhatu, ā, ka rongo rātou i āku kupu, he reka hoki.
PSA 141:7 “Pera i tētahi e haehae ana, e wāwāhi ana i te whenua, e tītaritaria ana ō mātou wheua ki te waha o te rēinga.”
PSA 141:8 Otiia, e tau ana ōku kanohi, e Ihowā, e te Ariki, ki a koe; ko koe tōku whakawhirinakitanga; kaua tōku wairua e waiho pani.
PSA 141:9 Tiakina ahau kei mau i ngā māhanga i whakatakotoria e rātou mōku, i ngā rore hoki a ngā kaimahi i te kino.
PSA 141:10 Kia taka te hunga kino ki roto ki ā rātou kupenga anō; ko ahau ia kia mawhiti.
PSA 142:1 He Makiri nā Rāwiri; he īnoi i a ia i roto i te ana. He karanga tā tōku reo ki a Ihowā; he īnoi tā tōku reo ki a Ihowā.
PSA 142:2 Horahia ana tāku īnoi ki tōna aroaro; whakaaturia ana e ahau tōku mate ki tōna aroaro.
PSA 142:3 I te ngaromanga o tōku wairua i roto i ahau i mātau koe ki tōku ara. Kua whakatakotoria pukutia e rātou te māhanga mōku i te ara i haere ai ahau.
PSA 142:4 Titiro ki tōku taha matau, kia kite – kāhore hoki tētahi tangata e mōhio ana ki ahau; kāhore he piringa mōku; kāhore tētahi e mahara ana ki tōku wairua.
PSA 142:5 I karanga ahau ki a koe, e Ihowā; i mea, “Ko koe tōku piringa, tōku wāhi i te whenua o te hunga ora.”
PSA 142:6 Tahuri mai ki tāku karanga, kua whakaititia rawatia hoki ahau. Whakaorangia ahau i ōku kaitūkino, he kaha rawa hoki rātou i ahau.
PSA 142:7 Whakaputaina tōku wairua i te herehere, kia whakamoemiti ai ahau ki tōu ingoa. Ka karapotia ahau e te hunga tika; nōu ka atawhai nei i ahau.
PSA 143:1 He hīmene nā Rāwiri. E Ihowā, whakarongo ki tāku īnoi, kia tītaha mai tōu taringa ki āku īnoi; whakahokia mai he kupu ki ahau i runga i tōu pono, i runga i tōu tika.
PSA 143:2 Ā, kaua e anga e whakawā ki tāu pononga; ki tāu titiro hoki kāhore tētahi mea ora e tika.
PSA 143:3 Kua tūkinotia hoki tōku wairua e te hoariri, patua iho e ia tōku ora ki raro ki te whenua; meinga ana ahau e ia kia noho i ngā wāhi pōuri, kia rite ki ngā tūpāpaku onamata.
PSA 143:4 Nā reira i ngaro ai tōku wairua i roto i ahau; mōtī rawa tōku ngākau i roto i ahau.
PSA 143:5 E mahara ana ahau ki ngā rā onamata; e whakaaro ana ki āu mahi katoa, e whakaaroaro ana ahau ki ngā meatanga a ōu ringa.
PSA 143:6 Totoro tonu atu ōku ringa ki a koe; e hiainu ana tōku wairua ki a koe, ānō he whenua māuiui. Hera
PSA 143:7 Hohoro te whakahoki kupu mai ki ahau, e Ihowā; ka hemo tōku wairua. Kei hunā tōu mata ki ahau; kei rite ahau ki te hunga e heke ana ki te poka.
PSA 143:8 Meinga kia rongo ahau ki tōu aroha i te ata; e whakawhirinaki ana hoki ahau ki a koe. Meinga kia mātau ahau ki te ara e haere ai ahau; kua ara nei hoki tōku wairua ki a koe.
PSA 143:9 Whakaorangia ahau, e Ihowā, i ōku hoariri; ka kuhu nei ahau ki roto ki a koe.
PSA 143:10 Whakaakona ahau ki te mea i tāu e pai ai; ko koe hoki tōku Atua. He pai tōu wairua; ārahina ahau ki te whenua o te tika.
PSA 143:11 Whakahauorangia ahau, e Ihowā, he whakaaro ki tōu ingoa. Whakaarohia tōu tika, ka whakaputa ake i tōku wairua i roto i te pōuri.
PSA 143:12 Aroha mai hoki, ā, hunā ōku hoariri; whakangaromia katoatia anō ngā kaitūkino o tōku wairua; he pononga hoki ahau nāu.
PSA 144:1 Nā Rāwiri. Kia whakapaingia a Ihowā, tōku kāmaka, e whakaako nei i ōku ringa ki te whawhai, i ōku maihao ki te tatau;
PSA 144:2 ko te atawhai mōku, ko tōku pā, ko tōku pourewa me tōku kaiwhakaora, ko tōku whakangungu rākau, ko tāku e whakawhirinaki ai, ko te kaipēhi hoki o tōku iwi ki raro i ahau.
PSA 144:3 E Ihowā, he aha te tangata i maharatia ai ia e koe, te tama rānei a te tangata i whakaaroa ai ia e koe?
PSA 144:4 Ko te rite o te tangata kei te mea memeha noa; ōna rā me te mea he ātārangi e rere atu ana.
PSA 144:5 Whakapikoa iho ōu rangi e Ihowā, ā, heke iho; pā ki ngā maunga, ā, ka pongere.
PSA 144:6 Kōkiritia mai he uira hei whakamarara i a rātou; kōperea mai āu pere, kia whati ai rātou.
PSA 144:7 Totoro iho tōu ringa i runga; tangohia ahau, whakaorangia ahau i ngā wai nunui, i te ringa o ngā tāngata kē;
PSA 144:8 e kōrero teka nei tō rātou māngai, ā, he ringa matau teka tō rātou ringa matau.
PSA 144:9 Ka waiatatia e ahau he waiata hou ki a koe, e te Atua; ka hīmene atu ahau ki a koe i runga i te hātere aho tekau.
PSA 144:10 Ko ia te kaihōmai i te whakaoranga ki ngā kīngi, te kaiwhakaora i a Rāwiri, i tāna pononga, i te hoari whakamate.
PSA 144:11 Tangohia ahau, whakaorangia hoki i ngā ringa o ngā tāngata kē, e kōrero teka nei ō rātou māngai, ā, he ringa matau teka tō rātou ringa matau.
PSA 144:12 Ā, kia rite ā mātou tama i tō rātou taitamarikitanga ki ngā māhuri e tupu ake ana; ā mātou tamāhine hoki ki ngā kōhatu kokonga, whakapaipai rawa, nō te whare rangatira te tauira.
PSA 144:13 Kia kī ā mātou pākoro, mō te tiki noa atu i tēnā mea, i tēnā mea; kia mano, kia tini ngā hua o ā mātou hipi i ō mātou pārae;
PSA 144:14 kia taimaha ā mātou kau i ngā pīkaunga. Kia kāhore he pākarutanga mai ki roto, he whatinga atu hoki ki waho, ā, kia kāhore he auē i ō mātou huarahi.
PSA 144:15 Ka hari te iwi e pēnā ana; āe, ka hari te iwi ko Ihowā nei tō rātou Atua.
PSA 145:1 Nā Rāwiri, he whakamoemiti. Ka whakanui ahau i a koe, e tōku Atua, e te Kīngi; ka whakapai ki tōu ingoa ake ake.
PSA 145:2 Ka whakapai ahau ki a koe i ngā rā katoa; ka whakamoemiti ki tōu ingoa ake ake.
PSA 145:3 He nui a Ihowā, kia nui anō te whakamoemiti ki a ia; e kore e taea tōna nui te rapu.
PSA 145:4 Mā tētahi whakatupuranga e whakamoemiti āu mahi, tae noa atu ki tētahi whakatupuranga; e kōrero hoki āu mahi nunui.
PSA 145:5 Ka kōrerotia e ahau te korōria, te hōnore o tōu nui, me āu mahi whakamīharo.
PSA 145:6 Ka kōrerotia anō e te tangata te kaha o āu mahi whakamataku; māku anō e kōrero tōu nui.
PSA 145:7 Ka whakapuakina e rātou te mahara ki te nui o tōu pai; ka waiatatia anō tōu tika.
PSA 145:8 He atawhai a Ihowā, he aroha; he pūhoi ki te riri, he nui tāna mahi tohu.
PSA 145:9 He pai a Ihowā ki ngā mea katoa; kei runga anō tōna aroha i āna mahi katoa.
PSA 145:10 E whakamoemititia koe, e Ihowā, e āu mahi katoa; e whakapaingia e tōu hunga tapu.
PSA 145:11 Mā rātou e kōrero te korōria o tōu kīngitanga, e kauwhau hoki tōu kaha;
PSA 145:12 kia mōhiotia ai e ngā tama a te tangata āna mahi nunui, me te korōria o te maruwehi o tōna kīngitanga.
PSA 145:13 He kīngitanga mutungakore tōu kīngitanga; kei ngā whakatupuranga katoa tōu rangatiratanga.
PSA 145:14 E tautokona ana e Ihowā te hunga katoa e hinga ana; e whakaarahia ake ana hoki e ia te hunga katoa kua whakapikoa iho.
PSA 145:15 E tatari ana ki a koe ngā kanohi o te katoa; ā, e hoatu ana e koe ki a rātou tā rātou kai i te wā e tika ai.
PSA 145:16 E whakatuwhera ana koe i tōu ringa, ā, mākona iho i a koe te hiahia o ngā mea ora katoa.
PSA 145:17 He tika ngā ara katoa o Ihowā; he tapu hoki āna mahi katoa.
PSA 145:18 E tata ana a Ihowā ki te hunga katoa e karanga ana ki a ia; ki te hunga katoa e karanga pono ana ki a ia.
PSA 145:19 Ka whakamanā e ia te hiahia o te hunga e wehi ana i a ia; e whakarongo hoki ia ki tā rātou tangi, ā, ka whakaora i a rātou.
PSA 145:20 Ko Ihowā hei tiaki i te hunga katoa e aroha ana ki a ia; ko te hunga kino katoa ia e ngaro i a ia.
PSA 145:21 Mā tōku māngai e kōrero te whakamoemiti ki a Ihowā; kia whakapai anō hoki ngā kikokiko katoa ki tōna ingoa tapu ake ake.
PSA 146:1 Whakamoemititia a Ihowā! E tōku wairua, whakamoemititia a Ihowā!
PSA 146:2 I ahau e ora nei ka whakamoemiti ahau ki a Ihowā; ka hīmene ahau ki tōku Atua i ahau i te ao nei.
PSA 146:3 Kei whakawhirinaki ki ngā rangatira, ki te tama rānei a te tangata, kāhore nei he āwhina.
PSA 146:4 Ko te putanga atu o tōna wairua, hoki ana ia ki tōna oneone; kore iho ōna whakaaro i taua rā pū anō.
PSA 146:5 Ka hari te tangata ko te Atua nei o Hākopa tōna kaiāwhina; ko tāna e tūmanako ai ko Ihowā, ko tōna Atua;
PSA 146:6 ko te kaihanga o te rangi, o te whenua, o te moana, o ngā mea katoa o reira; e pupuri nei i te pono ake ake;
PSA 146:7 e tohe nei i te whakawā a te hunga e tūkinotia ana; e whāngai nei i te hunga mate hiakai. Ko Ihowā hei wewete i ngā herehere;
PSA 146:8 ko Ihowā hei whakatitiro i ngā matapō. Ko Ihowā hei whakaara i te hunga kua whakapikoa iho; e aroha ana a Ihowā ki te hunga tika.
PSA 146:9 Ko Ihowā hei tiaki i ngā manene; ko ia hei tautoko i te pani, i te pouaru; ko te ara ia o te hunga kino, ka huripokitia e ia.
PSA 146:10 Ko Ihowā hei kīngi ake ake, āe, ko tōu Atua, e Hiona, tae noa ki ngā whakatupuranga katoa. Whakamoemititia a Ihowā!
PSA 147:1 Whakamoemititia a Ihowā! He pai hoki te hīmene ki tō tātou Atua; āhuareka rawa, ātaahua tonu te whakamoemiti.
PSA 147:2 Ko Ihowā hei hanga i Hiruhārama; māna hoki ngā whati o Īharaira e kohikohi.
PSA 147:3 Ko ia hei rongoā i te hunga ngākau marū; māna e takai ō rātou wāhi mamae.
PSA 147:4 E taua ana e ia ngā whetū, te maha; e huaina ana hoki e ia ō rātou ingoa katoa.
PSA 147:5 He nui tō tātou Ariki, he nui hoki tōna kaha; e kore e taea tōna mātauranga te whakaaro.
PSA 147:6 Ko Ihowā te kaitautoko mō te hunga māhaki; ka turakina e ia te hunga kino ki te whenua.
PSA 147:7 Waiata, whakawhetai ki a Ihowā; hīmene i runga i te hāpa ki tō tātou Atua.
PSA 147:8 Ko ia nei te kaiuwhi i te rangi ki ngā kapua, te kaihanga i te ua mō te whenua; e whakatupu ana ia i te tarutaru ki runga ki ngā maunga.
PSA 147:9 E hōmai ana e ia he kai mā te kīrehe; mā ngā pī raweni hoki ina tangi.
PSA 147:10 E kore ia e āhuareka ki te kaha o te hōiho; e kore ia e manako ki ngā waewae o te tangata.
PSA 147:11 E manako ana a Ihowā ki te hunga e wehi ana i a ia, ki te hunga e tūmanako ana ki tōna aroha.
PSA 147:12 Whakamoemititia a Ihowā, e Hiruhārama! Whakamoemititia tōu Atua, e Hiona!
PSA 147:13 Nāna nei hoki i whakakaha ngā tūtaki o ōu tatau; manaakitia ana e ia āu tamariki i roto i a koe.
PSA 147:14 Nāna anō i mau ai te rongo i roto i ōu rohe; nāna koe i mākona ai i te wīti pai rawa.
PSA 147:15 E tukua ana e ia tāna kupu ki te whenua; tere rawa te rere o tāna kupu.
PSA 147:16 E hōmai ana e ia te hukarere ānō he huruhuru hipi; e whakatītaritaria ana te haupapa ānō he pungarehu.
PSA 147:17 Makā mai ana e ia tāna hauhunga ānō he maramara – ko wai e tū i mua i tāna mātao?
PSA 147:18 E tukua ana e ia tāna kupu, ā, whakarewaina ana aua mea; ka meinga tāna hau kia pupuhi, rere ana ngā wai.
PSA 147:19 E whakakitea ana e ia tāna kupu ki a Hākopa; āna tikanga, me āna whakaritenga ki a Īharaira.
PSA 147:20 Kāhore i pērā tāna hanga ki tētahi iwi; kīhai anō āna whakaritenga i mōhiotia e rātou. Whakamoemititia a Ihowā!
PSA 148:1 Whakamoemititia a Ihowā! Whakamoemititia a Ihowā i runga i ngā rangi; whakamoemititia ia i ngā wāhi tiketike!
PSA 148:2 Whakamoemititia ia, e āna anahera katoa; whakamoemititia ia, e āna mano whāioio!
PSA 148:3 Whakamoemititia ia, e te rā, e te marama; whakamoemititia ia, e ngā whetū whakamārama katoa!
PSA 148:4 Whakamoemititia ia, e ngā rangi o ngā rangi, e ngā wai hoki o runga atu i ngā rangi!
PSA 148:5 Kia whakamoemititia e rātou te ingoa o Ihowā; nāna hoki i whakahau, ā, kua hangā rātou.
PSA 148:6 Nāna hoki aua mea i whakapūmau ake ake; i whakatakotoria e ia he tikanga e kore e taka.
PSA 148:7 Whakamoemititia a Ihowā, i runga i te whenua, e ngā tarakona, e ngā rire katoa;
PSA 148:8 e te kāpura, e te whatu; e te hukarere, e te kohu; e te tūpuhi, e mahi nei i tāna kupu!
PSA 148:9 E ngā maunga, e ngā puke katoa; e ngā rākau hua, e ngā hīta katoa;
PSA 148:10 e ngā kīrehe, e ngā kararehe katoa; e ngā mea ngōkingōki, e ngā manu whai pākau!
PSA 148:11 E ngā kīngi o te whenua, e ngā iwi katoa, e ngā rangatira, e ngā kaiwhakawā katoa o te whenua,
PSA 148:12 e ngā taitama, e ngā taitamāhine, e ngā koroheke rātou ko ngā tamariki!
PSA 148:13 Kia whakamoemititia e rātou te ingoa o Ihowā; nōna anake hoki te ingoa e nui ana; kei runga ake i te whenua, i te rangi, tōna korōria.
PSA 148:14 Ko ia hoki te kaiwhakaara o te haona o tāna iwi; e whakamoemititia ana e āna tāngata tapu katoa; e ngā tama a Īharaira, e te iwi e tata ana ki a ia. Whakamoemititia a Ihowā!
PSA 149:1 Whakamoemititia a Ihowā! Waiatatia ki a Ihowā he waiata hou, me te whakamoemiti ki a ia i te whakaminenga o te hunga tapu.
PSA 149:2 Kia hari a Īharaira ki tōna kaihanga; kia koa ngā tama a Hiona ki tō rātou Kīngi.
PSA 149:3 Kia whakamoemiti rātou ki tōna ingoa me te kanikani anō; kia hīmene rātou ki a ia i runga i te timipera, i te hāpa.
PSA 149:4 E manako ana hoki a Ihowā ki tāna iwi; māna e whakaataahua te hunga māhaki ki te whakaoranga.
PSA 149:5 Kia koa te hunga tapu i runga i te korōria; kia hāmama rātou i te hari i runga i ō rātou moenga.
PSA 149:6 Kia whai whakamoemiti ō rātou māngai ki te Atua, kia whai hoari matarua tō rātou ringa;
PSA 149:7 hei rapu utu i ngā tauiwi, hei whiu i ngā iwi;
PSA 149:8 hei herehere i ō rātou kīngi ki te mekameka, i ō rātou tāngata nunui ki ngā here rino;
PSA 149:9 hei whakaputa ki a rātou i te whakaritenga kua oti te tuhituhi. Nō tōna hunga tapu katoa tēnei hōnore. Whakamoemititia a Ihowā!
PSA 150:1 Whakamoemititia a Ihowā! Whakamoemititia te Atua i tōna wāhi tapu; whakamoemititia ia i te kikorangi o tōna kaha.
PSA 150:2 Whakamoemititia ia mō āna mahi nunui; kia rite ki te hira o tōna nui te whakamoemiti ki a ia.
PSA 150:3 Whakamoemititia ia i runga i te tangi o te tētere; whakamoemititia ia i runga i te hātere, i te hāpa!
PSA 150:4 Whakamoemititia ia i runga i te timipera, i te kanikani; whakamoemititia ia i runga i ngā mea aho, i ngā ōkana!
PSA 150:5 Whakamoemititia ia i runga i te himipora tangi nui; whakamoemititia ia i runga i te himipora tangi tiori!
PSA 150:6 E ngā mea katoa e whai manawa ana, whakamoemititia a Ihowā! Whakamoemititia a Ihowā!
PRO 1:1 Ko ngā whakatauki a Horomona tama a Rāwiri, kīngi o Īharaira.
PRO 1:2 E mōhiotia ai te whakaaro nui, te ako, e kitea ai ngā kupu o te mātauranga,
PRO 1:3 e riro mai ai te ako a te ngākau mahara, te tika, te whakawā, te mea anō e rite ana.
PRO 1:4 Hei hoatu i te ngākau tūpato ki ngā kūware, i te mātauranga, i te ngārahu pai ki te taitamariki.
PRO 1:5 Kia whakarongo ai te tangata whakaaro nui, kia nui ake ai tōna mōhio; kia whiwhi ai te tangata tūpato ki ngā whakaaro mōhio;
PRO 1:6 e mōhio ai ia ki te whakatauki, ki te kupu whakarite, ki ngā kupu a ngā whakaaro nui, ki ā rātou kōrero whakapeka.
PRO 1:7 Ko te wehi ki a Ihowā te tīmatanga o te mātauranga; e whakahāwea ana te whakaarokore ki te whakaaro nui, ki te ako.
PRO 1:8 Whakarongo, e tāku tama, ki te ako a tōu pāpā, kaua hoki e whakarērea te ture a tōu whaea;
PRO 1:9 ka waiho hoki ēnā hei pare ātaahua mō tōu mātenga, hei mekameka whakapaipai mō tōu kakī.
PRO 1:10 E tāku tama, ki te whakawaia koe e te hunga hara, kaua e whakaae.
PRO 1:11 Ki te mea rātou, “Tātou ka haere, ka whakapapa atu, ka whakaheke toto; kia whanga puku tātou, he mea takekore, mō te tangata harakore;
PRO 1:12 horomia oratia rātou e tātou, pērātia me tā te rua tūpāpaku; ka riro tinana rātou, ka pērā me te hunga e heke atu ana ki te poka.
PRO 1:13 Ka kitea e tātou ngā taonga utu nui katoa; ka whakakīia ō tātou whare ki tā tātou e pāhua ai.
PRO 1:14 Makā mai tōu wāhi ki roto ki tō mātou; kia kotahi te pūtea mā tātou katoa” –
PRO 1:15 e tāku tama, kaua e haere tahi i te ara me rātou, kaiponuhia tōu waewae i tō rātou huarahi;
PRO 1:16 e rere ana hoki ō rātou waewae ki te kino, e hohoro ana rātou ki te whakaheke toto.
PRO 1:17 He maumau hoki te hora o te kupenga ki te tirohanga a tētahi manu;
PRO 1:18 ko rātou, he whakaheke i ō rātou toto anō i whakapapa ai rātou; he whakamate i a rātou anō i piri ai rātou.
PRO 1:19 Ka pēnā ngā huarahi o te hunga apo taonga; ko te ora anō o ōna rangatira e tangohia.
PRO 1:20 E hāmama ana te whakaaro nui i te huarahi; e puaki ana tōna reo i ngā waharoa.
PRO 1:21 E karanga ana ia i te tino wāhi whakaminenga; i te wāhi tuwhera o ngā kūwaha, i roto i te pā, e puaki ana āna kupu:
PRO 1:22 “E te hunga kūware, kia pēhea ake te roa o tō koutou aroha ki te kūwaretanga? O te hiahia rānei o te hunga whakahī ki tō rātou whakahī? O te whakakino rānei a te hunga wairangi ki te mātauranga?
PRO 1:23 Tahuri mai ki tāku ako; nā, ka ringihia e ahau tōku wairua ki a koutou, ka whakaaturia āku kupu ki a koutou.
PRO 1:24 I karanga atu hoki ahau, heoi kīhai koutou i pai mai; i totoro atu tōku ringa, ā, kīhai tētahi i whai whakaaro mai;
PRO 1:25 heoi, whakakāhoretia iho e koutou tōku whakaaro katoa, kīhai hoki i aro ki tāku ako.
PRO 1:26 Mō reira ka kata ahau i te rā o tō koutou aituā; ka tāwai ina pā te pāwera ki a koutou;
PRO 1:27 ina tae mai tō koutou pāwera ānō he tūpuhi, ā, ka pā mai tō koutou aituā ānō he paroro; ina tae mai te pōuri me te ngākau mamae ki a koutou.
PRO 1:28 “Ko reira rātou karanga ai ki ahau, ā, e kore ahau e whakahoki kupu atu; ka rapu nui rātou i ahau, otiia e kore ahau e kitea e rātou.
PRO 1:29 Mō rātou i kino ki te mātauranga; kīhai hoki i whiriwhiria e rātou te wehi ki a Ihowā;
PRO 1:30 kīhai i aro mai ki ōku whakaaro; whakahāwea ana rātou ki tāku kupu riri katoa,
PRO 1:31 nā reira ka kai rātou i ngā hua o tō rātou nei ara, ka whakakīia anō hoki ki ngā mea i titoa e rātou.
PRO 1:32 Ko te tahuritanga atu hoki o ngā kūware hei patu i a rātou; ko te ngākau warea anō hoki o ngā wairangi hei huna i a rātou.
PRO 1:33 Ko te tangata ia e rongo ana ki ahau, ka au tōna noho, ka ātea hoki i te wehi ki te kino.”
PRO 2:1 E tāku tama, ki te tango koe i āku kupu, ki te huna i āku whakahau ki roto ki a koe,
PRO 2:2 ā, ka tahuri tōu taringa ki te whakaaro nui, ka anga anō tōu ngākau ki te mātauranga;
PRO 2:3 āe rā, ki te mea ka kārangarangatia e koe te mātauranga, ā, ka puaki tōu reo ki te ngākau mōhio;
PRO 2:4 ki te rapua hoki ia e koe ānō he hiriwa, ki te kimihia ānō he taonga huna –
PRO 2:5 ko reira koe mātau ai ki te wehi o Ihowā, kite ai i te mōhio ki te Atua.
PRO 2:6 Mā Ihowā hoki e hōmai te whakaaro nui; nō tōna māngai te mātauranga me te ngākau mōhio.
PRO 2:7 E rongoātia ana e ia te whakaaro nui mā te hunga tika; he whakangungu rākau ia mō te hunga he tapatahi nei te haere,
PRO 2:8 kia tiakina ai e ia ngā ara o te whakawā, kia tohungia ai te ara o tāna hunga tapu.
PRO 2:9 Ko reira koe mōhio ai ki te tika, ki te whakawā, ki te mea anō e rite ana, āe rā, ki ngā ara pai katoa.
PRO 2:10 Ka uru hoki te whakaaro nui ki roto ki tōu ngākau, ā, ka reka te mātauranga ki tōu wairua;
PRO 2:11 ka ai te ngārahu pai hei tiaki i a koe, te ngākau mōhio hei pupuri i a koe;
PRO 2:12 hei kukume mai i a koe i te ara o te kino, i te tangata e puta kē ana āna kōrero;
PRO 2:13 i te hunga e whakarere nei i ngā ara o te tika, e haere ana i ngā ara o te pōuri;
PRO 2:14 e koa ana, i a rātou e mahi ana i te kino, e hari ana ki ngā tikanga parori kē o te kino;
PRO 2:15 he ara kōpikopiko ō rātou, he whanokē rātou i ō rātou huarahi;
PRO 2:16 hei whakaora i a koe i te wahine tauhou, i te wahine tauhou e whakapati nei ki āna kupu.
PRO 2:17 Kua whakarērea nei e ia te hoa o tōna tamāhinetanga, kua wareware ki te kawenata o tōna Atua.
PRO 2:18 E heke atu ana hoki tōna whare ki te mate, ōna ara ki ngā tūpāpaku.
PRO 2:19 Ko te hunga katoa e haere atu ana ki a ia e kore e hoki mai; e kore anō e mau i a rātou ngā ara o te ora.
PRO 2:20 Ā, ka haere koe i ngā ara o ngā tāngata pai, ka mau anō ki ngā ara o te hunga tika.
PRO 2:21 Ka noho hoki te hunga tika ki te whenua; ka mau te hunga ngākau tapatahi ki reira.
PRO 2:22 Ka hātepea atu ia te hunga kino i runga i te whenua, ka hūtia atu i reira te hunga he kōpeka tā rātou mahi.
PRO 3:1 E tāku tama, kei wareware ki tāku ture; kia puritia hoki āku whakahau e tōu ngākau.
PRO 3:2 Kātahi ka nui ake ngā rā roa mōu, ngā tau e ora ai, me te āta noho.
PRO 3:3 Kei whakarērea koe e te atawhai, e te pono; heia ki tōu kakī; tuhituhia iho ko tōu ngākau ānō hei papa.
PRO 3:4 Pēnei ka whiwhi koe ki te atawhai, ki te mātauranga pai i te aroaro o te Atua, o te tangata.
PRO 3:5 Whakapaua tōu ngākau ki te whakawhirinaki ki a Ihowā, kaua hoki e okioki ki tōu mātauranga ake.
PRO 3:6 I ōu ara katoa whakaaro ki a ia, ā, māna e whakatika ōu huarahi.
PRO 3:7 Kei whakaaro ki a koe he mōhio koe; e wehi ki a Ihowā, kia mawehe i te kino;
PRO 3:8 hei ora tēnā ki tōu pito, hei mākūkū ki ōu wheua.
PRO 3:9 Kia whai korōria a Ihowā i ōu rawa, i ngā mātāmua anō hoki o āu hua katoa;
PRO 3:10 ā, ka kī āu toa i ngā mea maha, ka pakaru anō hoki āu rua wāina i te wāina.
PRO 3:11 E tāku tama, kaua e whakahāwea ki tā Ihowā papaki; kei ngākaukore anō koe ina ākona e ia.
PRO 3:12 Ka ākona hoki e Ihowā tāna e aroha ai, ka pērā tāna me tā te matua ki te tamaiti e matenuitia ana e ia.
PRO 3:13 Ka hari te tangata kua kitea nei e ia te whakaaro nui, me te tangata anō kua whiwhi ki te mātauranga,
PRO 3:14 pai atu hoki te hokohoko o tērā i tō te hiriwa e hokohokona nei, ōna hua i te kōura parakore.
PRO 3:15 Nui atu ōna utu i o ngā rupi; e kore anō hoki ngā mea katoa e minaminatia e koe e rite ki a ia.
PRO 3:16 Kei tōna ringa matau ngā rā roa; kei tōna mauī ngā taonga me te korōria.
PRO 3:17 Ko ōna ara he ara āhuareka, ko ōna ara katoa he rangimārie.
PRO 3:18 He rākau ia nō te ora ki te hunga e ū ana ki a ia; ka hari te tangata e pupuri ana i a ia.
PRO 3:19 Nā te whakaaro nui o Ihowā i whakatūria ai e ia te whenua; nā tōna mōhio tāna whakapūmautanga i ngā rangi.
PRO 3:20 He mōhio nōna i pakaru ai ngā rire, i māturuturu ai te tōmairangi o ngā kapua.
PRO 3:21 E tāku tama, kei kotiti kē ēnā i ōu kanohi: puritia te whakaaro nui me te ngārahu pai,
PRO 3:22 kei ēnā he oranga mō tōu wairua, he whakapaipai mō tōu kakī.
PRO 3:23 Pēnei ka haere koe i tōu ara, tē ai he wehi, e kore anō tōu waewae e tūtuki.
PRO 3:24 Ka takoto koe, e kore e wehi, inā, ka takoto koe, ka reka anō tāu moe.
PRO 3:25 Kaua e wehi i te mataku huaki tata, i te whakangaromanga rānei o te hunga kino ina pā mai.
PRO 3:26 Ko Ihowā hoki hei okiokinga mōu, ā, māna e tiaki tōu waewae kei mau.
PRO 3:27 Kaua e kaiponuhia te pai ki te hunga i tika nei mā rātou, i ngā wā e taea ai e tōu ringa.
PRO 3:28 Kaua e mea ki tōu hoa, “Haere, ka hoki mai ai, ā, āpōpō ka hoatu e ahau,” i te mea kei a koe anō te mea e takoto ana.
PRO 3:29 Kei whakatakoto i te kino mō tōu hoa, kei te noho hū noa nā hoki ia i tōu taha.
PRO 3:30 Kei ngangau pokanoa ki te tangata, ki te mea kāhore āna mahi kino ki a koe.
PRO 3:31 Kei hae ki te tangata nanakia, kaua hoki e whiriwhiria tētahi o ōna ara.
PRO 3:32 He mea whakarihariha hoki te whanokē ki a Ihowā; kei te hunga tika ia tōna whakaaro ngaro.
PRO 3:33 He kanga nā Ihowā kei roto i te whare o te tangata kino, he mea manaaki ia nāna te nohoanga o te hunga tika.
PRO 3:34 He pono ka whakahī ia ki te hunga whakahī, ka puta ia tōna atawhai ki te hunga whakaiti.
PRO 3:35 Ka whiwhi te hunga whakaaro nui ki te korōria; he whakamā ia te whakanui o ngā wairangi.
PRO 4:1 Whakarongo, e āku tamariki, ki te whakaako a te matua, tahuri mai hoki kia mātauria ai ngā whakaaro mōhio.
PRO 4:2 He pai hoki te kupu mōhio ka hoatu nei e ahau ki a koutou, kaua tāku ture e whakarērea.
PRO 4:3 He tama anō hoki ahau ki tōku pāpā, ā, he ngāwari, he mea kotahi e matenuitia ana e tōku whaea,
PRO 4:4 i whakaako anō ia i ahau, i mea ki ahau, “Puritia āku kupu e tōu ngākau; kia mau ki āku whakahau, ā, e ora koe.
PRO 4:5 Whāia mōu te whakaaro nui, whāia mōu te mātauranga; kaua e wareware ki tērā, kaua hoki e neke atu i ngā kupu a tōku māngai.
PRO 4:6 Kaua ia e whakarērea, ā, māna koe e tiaki; arohaina ia, ā, māna koe e mau ai.
PRO 4:7 Ko te whakaaro nui te tino mea: Nō reira whāia mōu te whakaaro nui, ā, i ōu whiwhinga katoa, kia whiwhi koe ki te mātauranga.
PRO 4:8 Whakanuia ia, ā, māna koe ka kake ai; ka whakahōnore ia i a koe ki te awhitia e koe.
PRO 4:9 Ka hōmai e ia he pare ātaahua ki tōu māhunga, ka pōtaea anō koe e ia ki te karauna whakapaipai.”
PRO 4:10 Whakarongo, e tāku tama, maharatia āku kupu, ā, he maha ngā tau e ora ai koe.
PRO 4:11 He mea whakaako koe nāku ki te ara o te whakaaro nui; he mea ārahi koe nāku i ngā ara o te tika.
PRO 4:12 Ka haere koe, e kore ōu takahanga e whakakikītia mai; ki te rere koe, e kore koe e tūtuki.
PRO 4:13 Kia mau ki te ako, kaua e tukua atu; matapoporetia iho, ko tōu oranga hoki ia.
PRO 4:14 Kaua e haere i te ara o te hunga kino, kaua hoki e takahia te huarahi o te hunga hē.
PRO 4:15 Anga kē ake; kaua e tika nā reira; peka ake i taua ara, haere tonu atu.
PRO 4:16 E kore hoki rātou e moe ki te kore e oti tētahi mahi hē mā rātou; riro rawa tō rātou moe, ki te kāhore tētahi tangata e hinga i a rātou.
PRO 4:17 Nō te kino hoki te taro e kainga ana e rātou, nō te nanakia te wāina e inumia ana e rātou.
PRO 4:18 Ko te huarahi ia o te hunga tika, koia anō kei te mārama e whiti ana, ā, ka neke haere tonu ake tōna mārama, ā taea noatia te tino rā.
PRO 4:19 Ko te ara o te hunga kino, me he pōuri, e kore rātou e mōhio ki te mea i tūtuki ai rātou.
PRO 4:20 E tāku tama, tahuri ki āku kupu; anga mai tōu taringa ki āku kōrero.
PRO 4:21 Kei kotiti kē ēnei i ōu kanohi; puritia i waenganui o tōu ngākau.
PRO 4:22 He oranga ēnei mō te hunga e kitea ai, he rongoā mō ō rātou kikokiko katoa.
PRO 4:23 Kia pau ōu mahara ki te tiaki i tōu ngākau, nō reira hoki ngā putanga o te ora.
PRO 4:24 Whakarērea te māngai whanokē, kia matara rawa i a koe ngā ngutu tutū.
PRO 4:25 Kia hāngai tonu te titiro whakamua a ōu kanohi, kia titiro ōu kamo ki mua tonu i a koe.
PRO 4:26 Whakatikaia te huarahi o ōu waewae, kia ū anō hoki ōu ara katoa.
PRO 4:27 Kaua e peka ki matau, ki mauī; kia anga kē tōu waewae i te kino.
PRO 5:1 E tāku tama, tahuri ki ōku whakaaro nui; kia anga tōu taringa ki tōku mātauranga,
PRO 5:2 kia ū ai koe ki te ngārahu pai, mau ai te mātauranga i ōu ngutu.
PRO 5:3 Ko ngā ngutu hoki o te wahine kē, kei te māturuturunga iho o te honikoma, ngāwari iho tōna māngai i te hinu;
PRO 5:4 he kawa rawa hoki tōna mutunga i te taru kawa, he koi, ānō he hoari matarua.
PRO 5:5 Ko ōna waewae e heke ana ki te mate; mau pū te rēinga i ōna takahanga.
PRO 5:6 Heoi, kāhore i kitea e ia te ara tōtika ki te ora; he kotiti kē ōna ara, ā, kāhore ia i tē mātau.
PRO 5:7 Nā reira, e āku tamariki, whakarongo mai ki ahau, kei mahue hoki ngā kupu a tōku māngai.
PRO 5:8 Kia matara tōu ara i a ia, kaua hoki e tata ki te tatau o tōna whare;
PRO 5:9 kei hoatu tōu hōnore ki ngā tāngata kē, ōu tau ki te hunga nanakia.
PRO 5:10 Kei mākona ngā tāngata kē i tōu kaha, kei riro ōu māuiui ki te whare o te tangata kē;
PRO 5:11 ā, ka tangi koe i tōu whakamutunga, ina poto ōu kikokiko me tōu tinana,
PRO 5:12 ā, ka mea, “Kātae tōku kino ki te ako; kātae te māuiui o tōku ngākau ki te tohutohu!
PRO 5:13 Kīhai hoki ahau i whakarongo ki te reo o ōku kaiwhakaako, kīhai tōku taringa i anga ki te hunga e tohutohu ana i ahau.
PRO 5:14 Wāhi iti kei ngā kino katoa ahau i waenganui o te whakaminenga, o te huihui.”
PRO 5:15 Inumia he wai i roto i tāu ake rua, me ngā wai rere anō i roto i tāu ake poka.
PRO 5:16 Kia tohatoha noa atu koia āu puna wai, ngā awa wai i ngā huarahi?
PRO 5:17 Waiho ēnā māu anake, kauaka mā koutou tahi ko ngā tāngata kē.
PRO 5:18 Kia manaakitia tāu puna wai; kia koa anō koe ki te wahine o tōu taitamarikitanga.
PRO 5:19 Kia rite ia ki taua mea āhuareka, ki te hāta, ki te mea ātaahua ki te anaterope. Kia mākona koe i ōna ū i ngā wā katoa, kia matenuitia tonutia e koe tōna aroha.
PRO 5:20 He aha oti koe, e tāku tama, ka matenui ai ki te wahine kē, i awhi ai i te uma o te wahine kē?
PRO 5:21 Kei mua hoki i ngā kanohi o Ihowā ngā ara o te tangata, ā, e meinga ana e ia kia papatairite ōna ara katoa.
PRO 5:22 Ko ōna kino anō hei hopu i te tangata kino, hei taura ōna hara e mau ai ia.
PRO 5:23 Ka mate ia, he mea kīhai i whakaakona, ka pōhēhē i te nui o tōna wairangi.
PRO 6:1 E tāku tama, ki te mea ko tāu hei whakakapi mō tā tōu hoa, ki te mea kua papaki tōu ringa mō te tangata kē,
PRO 6:2 kua oti koe te māhanga e ngā kupu a tōu māngai, kua mau koe i ngā kupu a tōu māngai.
PRO 6:3 Meinga tēnei ināianei, e tāku tama, kia ora ai koe, he mea hoki kua taka koe ki roto ki te ringa o tōu hoa: haere, whakaiti i a koe, ā, ka tohe ki tōu hoa.
PRO 6:4 Kei tukua iho te moe ki ōu kanohi; kei tunewha ōu kamo.
PRO 6:5 Whakaora i a koe ānō he anaterope i roto i te ringa o te kaiwhai, ānō he manu i roto i te ringa o te kaihopu.
PRO 6:6 Haere ki te pōpokorua, e te tangata māngere, mātakitakina iho ōna ara, kia nui ai ōu whakaaro.
PRO 6:7 Kāhore nei ōna kaitohutohu, ōna kaitirotiro, ōna rangatira,
PRO 6:8 heoi, e mahi kai ana māna i te raumati, e kohikohi ana i te kai māna i te kotinga wīti.
PRO 6:9 Kia pēhea ake te roa o tāu takoto, e te tangata māngere? Āhea koe maranga ai i tāu moe?
PRO 6:10 Kia iti ake nei te wāhi e parangia ai, kia iti ake nei te moe, kia iti ake te kōtuinga o ngā ringa i a koe e takoto nā;
PRO 6:11 nā, ka rite ki te kaipāhua te putanga mai o te mūhore ki a koe, tōu rawakore, ānō he tangata he patu nei tāna.
PRO 6:12 Ko te tangata kāhore ōna painga, ko te tangata hara, e hāereere ana me te māngai tū kē;
PRO 6:13 e whakakini ana ōna kanohi, e kōrero ana ōna waewae, e tuhi ana ōna maihao;
PRO 6:14 kei roto te whanokē i tōna ngākau, e whakatakoto ana ia i te kino i ngā wā katoa; e rui ana ia i te ngangare.
PRO 6:15 Mō reira ka huaki tata te aituā ki a ia; e kore e aha ka whatia ia, tē taea te rongoā.
PRO 6:16 E ono ngā mea e kino ana ki a Ihowā; āe rā, e whitu ngā mea e whakariharihangia ana e ia:
PRO 6:17 ko te kanohi whakakake, ko te arero teka, ko ngā ringa whakaheke i te toto harakore,
PRO 6:18 he ngākau e whakatakoto ana i ngā whakaaro kikino, he waewae e hohoro ana te rere ki te hīanga,
PRO 6:19 he kaiwhakaatu teka e kōrero teka ana, ko te tangata hoki e rui ana i te ngangare ki waenganui i ngā tuākana, i ngā tēina.
PRO 6:20 E tāku tama, puritia te whakahau a tōu pāpā, kaua hoki e whakarērea te ture a tōu whaea.
PRO 6:21 Kia mau tonu te tākai ki tōu ngākau, heia ki tōu kakī.
PRO 6:22 Ko tōu kaiārahi anō tērā ina haere koe; māna koe e tiaki ina takoto koe; ka kōrero mai anō ki a koe, ina ara koe.
PRO 6:23 He rama hoki te whakahau, ā, he mārama te ture; ko ngā riringa hoki, e whakaako ana, he ara ki te ora.
PRO 6:24 Hei tiaki i a koe kei hē i te wahine kino, i te whakapati a te arero o te wahine kē.
PRO 6:25 Kei hiahia koe ki tōna ātaahua i roto i tōu ngākau; kei mau anō koe i ōna kamo.
PRO 6:26 Ko te tukunga iho o te tangata he wāhi taro, he mea mō te wahine kairau; ko tā te wahine pūremu e whai ana ko te wairua utu nui.
PRO 6:27 E taea rānei e te tangata te tango i te ahi ki roto ki tōna uma, ā, e kore ōna kākahu e wera?
PRO 6:28 E taea rānei e tētahi te haere i runga i ngā waro ratarata, ā, e kore ōna waewae e hunua?
PRO 6:29 Ka pērā anō te tangata e haere ana ki te wahine a tōna hoa; e kore e kore ka whiua te tangata e pā ana ki a ia.
PRO 6:30 E kore e whakahāweatia e te tangata te tāhae, ki te tāhaetia e ia he mea e mākona ai tōna wairua ina hiakai ia.
PRO 6:31 Otiia ki te kitea ia, kia takiwhitu āna e whakautu ai; me hōmai e ia ngā rawa katoa o tōna whare.
PRO 6:32 Ko te tangata e pūremu ana ki te wahine, kāhore ōna mōhio; ko te tangata e pērā ana, kei te whakangaro ia i tōna wairua.
PRO 6:33 He kaiākiko, he whakamā te wāhi mōna; e kore anō tōna ingoa kino e horoia atu.
PRO 6:34 He riri nui hoki nā te tangata te hae; e kore anō e tohungia e ia i te rā rapu utu.
PRO 6:35 E kore ia e manako ki tētahi utu; e kore hoki e tatū tōna ngākau, ahakoa he nui āu hākari e tāpae ai.
PRO 7:1 E tāku tama, puritia āku kupu, hunā āku whakahau ki roto ki a koe.
PRO 7:2 Puritia āku whakahau, ā, ka ora; tāku ture, ānō ko te whatupango o tōu kanohi.
PRO 7:3 Herea ki ōu maihao; tuhituhia, ko tōu ngākau ānō hei papa.
PRO 7:4 Kī atu ki te whakaaro nui, “He tuahine koe nōku,” kīia hoki te mātauranga ko tōu whanaunga wahine.
PRO 7:5 Kia ai ēnei hei tiaki i a koe kei hē i te wahine kē, i te wahine kē, he kōrero whakapati nei āna.
PRO 7:6 I titiro atu hoki ahau i te matapihi o tōku whare i roto i tōku whakakahokaho,
PRO 7:7 ā, i mātakitaki ahau i roto i ngā kūware, i kite i roto i ngā taitama, i tētahi tamaiti kāhore rawa he whakaaro,
PRO 7:8 e haere ana i te ara i te wāhi tata e piko atu ai ki a ia, ā, haere ana ia i te ara ki tōna whare,
PRO 7:9 i te kākarauritanga, i te ahiahi o te rā, i te titiwhatanga o te pō, i te pōuri kerekere.
PRO 7:10 Nā, kua tūtaki tētahi wahine ki a ia, he kākahu pūremu tōna, he ngākau hīanga.
PRO 7:11 He māngai korokī tōna, he tohetohe; ko ōna waewae, kāhore e tau ki tōna whare;
PRO 7:12 ināianei kei ngā ara ia, inamata kei ngā waharoa, e tauwhanga ana i ngā kokinga katoa.
PRO 7:13 Koia i hopukia ai ia e ia, kei te kihi i a ia, ā, ka mea atu ki a ia, me te whakatoi anō i tōna mata:
PRO 7:14 “He patunga mō te pai kei ahau; nō tēnei rā nei ahau i whakamana ai i āku kupu taurangi;
PRO 7:15 koia ahau i haere mai ai ki te whakatau i a koe, ki te āta rapu i tōu mata, ā, ka kitea nei koe e ahau.
PRO 7:16 Ko tōku moenga kua horahia e ahau, whakapaipai rawa ki te kaitaka, ki ngā kākahu purepure nō te rīnena o Īhipa.
PRO 7:17 Kua ruia e ahau tōku moenga ki ngā mea whakakakara, ki te maira, ki te aroe, ki te hinamona.
PRO 7:18 Haere mai, kia whaowhina tāua ki te aroha, ā ao noa; kia ora ō tāua ngākau i te aroha.
PRO 7:19 Kāhore hoki tāku tāne i te whare; kua riro ia, he haere tawhiti.
PRO 7:20 I maua atu e ia he pūtea moni i tōna ringa; ka hoki mai anō ia i te kōwhititanga o te marama.”
PRO 7:21 He maha nō āna kōrero whakawai, riro ana ia i a ia ki tāna; nā te whakapati a ōna ngutu ka kūmea atu ia e ia.
PRO 7:22 Haere tonu ia i muri i a ia, ānō he kau e haere ana kia patua, he kūware rānei e haere ana ki ngā rākau here waewae e whiua ai te hē,
PRO 7:23 ā, tū noa te tao ki tōna ate puta rawa. Rite tonu ia ki te manu e hohoro ana ki te māhanga, tē mōhio he matenga tērā mōna.
PRO 7:24 Nō reira, e āku tamariki, whakarongo ki ahau, maharatia ngā kupu a tōku māngai.
PRO 7:25 Kei peau kē tōu ngākau ki ōna ara, kei kotiti kē ki ōna huarahi.
PRO 7:26 He tokomaha hoki ngā tāngata i tū, i hinga i a ia, āe rā, he ope nui rawa tāna i patu ai.
PRO 7:27 He huarahi tōna whare ki te rēinga, e anga ana ki raro ki ngā rūma o te mate.
PRO 8:1 He teka ianei kei te karanga te whakaaro nui, e puaki ana anō te reo o te mātauranga?
PRO 8:2 I runga i ngā wāhi tiketike tōna tūranga, i te ara i te tūtakitanga o ngā huarahi;
PRO 8:3 hāmama ana ia i te taha o ngā kūwaha, i te ngutu o te pā, i te tomokanga atu i ngā tatau:
PRO 8:4 “Ki a koutou, e ngā tāngata, tāku karanga; ki ngā tama anō a te tangata tōku reo.
PRO 8:5 E ngā kūware, kia mātau koutou ki te ngārahu tūpato; e ngā wairangi, kia mōhio te ngākau.
PRO 8:6 Whakarongo mai, ka kōrerotia hoki e ahau ngā mea pai rawa; ko tā ōku ngutu e whakapuaki ai ko ngā mea e rite ana.
PRO 8:7 He pono hoki te kōrero a tōku māngai; he mea whakarihariha anō te kino ki ōku ngutu.
PRO 8:8 Kei runga i te tika ngā kupu katoa a tōku māngai; kāhore he whakapeka, he whanokē rānei, i roto.
PRO 8:9 Ko ēnei katoa he mārama ki te tangata e mātau ana, he tika ki te hunga i kitea ai te mōhio.
PRO 8:10 Manakohia mai tāku ako, kaua te hiriwa; ko te mātauranga, nui atu i te kōura pai rawa.
PRO 8:11 Pai atu hoki te whakaaro nui i ngā rupi; e kore hoki ngā mea katoa e minaminatia nei e tau hei whakarite mōna.
PRO 8:12 “Kua meinga e ahau, e te whakaaro nui, ko te ngārahu pai hei nohoanga mōku, e kitea ana e ahau te mōhio me te āta whakaaro.
PRO 8:13 Ko te wehi ki a Ihowā koia tēnā ko te kino ki te hē. E kino ana ahau ki te whakapehapeha, ki te whakakake, ki te ara hē, ki te māngai whanokē.
PRO 8:14 Ko te whakaaro tika, ko te whakaaro nui, nāku; ko ahau te mātauranga, kei ahau te kaha.
PRO 8:15 Nāku ngā kīngi i kīngi ai, nāku ngā rangatira i whakatakoto ai i te tika.
PRO 8:16 Nāku i whai rangatiratanga ai ngā rangatira, ngā tāngata nunui, arā ngā kaiwhakawā katoa o te whenua.
PRO 8:17 E arohaina ana e ahau te hunga e aroha ana ki ahau; ko te hunga hoki e āta rapu ana i ahau, e kite rātou i ahau.
PRO 8:18 He taonga, he korōria kei ahau, āe rā, he rawa mau tonu, he tika.
PRO 8:19 Pai atu ōku hua i te kōura, āe rā, i te kōura parakore; ko ngā mea e puta ana i ahau, pai atu i te hiriwa kōwhiri.
PRO 8:20 Kei ngā ara o te tika ahau e haere ana, kei waenganui i ngā huarahi o te whakawā;
PRO 8:21 kia meinga ai e ahau te hunga e aroha ana ki ahau kia whiwhi ki te rawa, kia whakakīia ai e ahau ā rātou takotoranga taonga.”
PRO 8:22 “I a Ihowā ahau, nō te tīmatanga rā anō o ōna ara, nō mua atu i āna mahi o neherā.
PRO 8:23 Nōnamata riro ahau i whakaritea ai, nō te tīmatanga, nō mua atu i te whenua.
PRO 8:24 I te mea kāhore anō ngā rire, kua whānau ahau; i te mea kīanō he puna whai wai.
PRO 8:25 Nō mua atu i te whakaūnga o ngā maunga, nō mua i ngā pukepuke tōku whānautanga;
PRO 8:26 i te mea kāhore anō i hangā noatia e ia te whenua, me ngā pārae, me te tīmatanga o te puehu o te ao.
PRO 8:27 I tāna whakatūranga i ngā rangi, i reira anō ahau; i tāna whakaritenga i te awhi mō te mata o te rire;
PRO 8:28 i tāna whakapūmautanga i ngā rangi i runga; i te totōtanga o ngā puna o te rire;
PRO 8:29 i tāna rohenga mai i te moana, kei takahia tāna kupu e ngā wai; i tāna waitohutanga i ngā tūranga o te whenua,
PRO 8:30 i reira ahau i tōna taha, he tohunga ki ngā mahi; he ahau nōna i ia rā, i ia rā, e koa ana i ngā wā katoa i tōna aroaro;
PRO 8:31 e koa ana ki tāna ao, ā, ko tāku i āhuareka ai ko ngā tama a te tangata.
PRO 8:32 “Nō reira, e āku tamariki, whakarongo mai ki ahau; ka hari hoki te hunga e pupuri ana i ōku ara.
PRO 8:33 Whakarongo mai ki te ako, kia whai whakaaro ai koutou; kaua hoki e paopaongia.
PRO 8:34 Ka hari te tangata e whakarongo ana ki ahau, e tatari ana i ōku tatau i tēnei rā, i tēnei rā, e whanga ana i ngā pou o ōku kūwaha.
PRO 8:35 Ko te tangata hoki e kite ana i ahau, e kite ana i te ora, ka whiwhi anō ia ki tā Ihowā manako mai.
PRO 8:36 Ko te tangata ia e hara ana ki ahau, he mahi nanakia tāna ki tōna wairua ake; ko te hunga katoa e kino ana ki ahau, e aroha ana ki te mate.”
PRO 9:1 Kua oti i te whakaaro nui tētahi whare mōna te hanga, e whitu ngā pou kua oti te tārai e ia.
PRO 9:2 Kua oti āna kararehe te patu e ia, whakananu rawa tāna wāina; kua oti anō tāna tēpu te whakapai.
PRO 9:3 Kua ungā e ia āna kōtiro, e karanga ana ia i runga i ngā wāhi tiketike rawa o te pā.
PRO 9:4 “Ki te mea he kūware tētahi, me peka mai ia ki konei!” Ko te tangata maharakore, ko tāna kupu tēnei ki a ia,
PRO 9:5 “Haere mai, kainga tāku taro, inumia hoki te wāina kua oti nei te whakananu e ahau.
PRO 9:6 Kāti rā, e te hunga kūware, kia ora ai koutou; haere hoki i te ara o te mātauranga.”
PRO 9:7 Ko ia e papaki ana i te tangata whakahīhī, ka whakamā; ā, ko ia e riri ana i te tangata kino, ka piri mai he hē ki a ia.
PRO 9:8 Kaua e rīria te tangata whakahī, kei kino ia ki a koe; rīria ko te tangata whakaaro nui, ā, ka aroha ia ki a koe.
PRO 9:9 Hoatu te mōhio ki te tangata whakaaro nui, ā, ka neke ake ōna whakaaro; whakaakona te tangata tika, ā, ka nui ake tōna mōhio.
PRO 9:10 Ko te tīmatanga o te whakaaro nui ko te wehi ki a Ihowā; ko te mātauranga, ko te mōhio ki te Mea Tapu.
PRO 9:11 Māku hoki ka maha ai ōu rā, māku ka neke ake ai ngā tau e ora ai koe.
PRO 9:12 Ki te nui ōu whakaaro, mōu anō ōu whakaaro nui; ki te whakahī koe, māu anake tāu pīkaunga.
PRO 9:13 Ko te wahine wairangi, he māngai nui ia; he kūware ia, kāhore ōna mōhio ki te aha, ki te aha.
PRO 9:14 Noho ana ia i te kūwaha o tōna whare i runga i te nohoanga i ngā wāhi tiketike o te pā;
PRO 9:15 kia karanga atu ai ia ki ngā tāngata e haere ana i te ara, e mārō tonu ana ō rātou huarahi,
PRO 9:16 “Ko te kūware, peka mai ki konei!” Tēnā ko te tangata whakaarokore, ko tāna kupu tēnei ki a ia,
PRO 9:17 “He reka te wai tāhae, ā, he āhuareka te taro kai huna.”
PRO 9:18 Tē mōhio ia kei reira ngā tūpāpaku; kei te rēinga riro ana i karanga ai.
PRO 10:1 Ko ngā whakatauki a Horomona. He tama whakaaro nui, ka koa te pāpā; tēnā he tama kūware, he utanga nui mō tōna whaea.
PRO 10:2 Kāhore he rawa o ngā taonga o te kino; mā te tika ia te oranga ake i te mate.
PRO 10:3 E kore a Ihowā e tuku i te wairua o te tangata tika kia hemokai; ka panā atu ia e ia te hiahia o te hunga kino.
PRO 10:4 He rawakore te tukunga iho o te ringa ngehe; mā te ringa kakama ia ka hua te taonga.
PRO 10:5 He kohi raumati tā tama ngākau mahara; he whakamā ia te rawa a tama moe ngahuru.
PRO 10:6 He manaaki kei te tumuaki o te tangata tika; he ārita ia kei te waha o te tangata kino, taupoki ai.
PRO 10:7 Ka manaakitia te maharatanga ki te tangata tika; ka pirau ia te ingoa o te hunga kino.
PRO 10:8 He ngākau whakaaro, ka tahuritia te whakahau; he ngutu wairangi, ka hinga.
PRO 10:9 Ko te tangata haere tika, e haere ora ana; ko te tangata parori kē ōna ara, ka mōhiotia ia.
PRO 10:10 Mā te whakakini o te kanohi ka puta ai te pōuri; ko te ngutu wairangi ia, ka hinga.
PRO 10:11 He puna ora te māngai o te tangata tika; tēnā ko te māngai o te hunga kino, ka taupokina tērā e te mahi nanakia.
PRO 10:12 Ko tō te mauāhara he whakaoho i ngā totohe; ko tō te aroha he hīpoki i ngā hē katoa.
PRO 10:13 E kitea te whakaaro nui ki ngā ngutu o te tangata mātau; ko te rākau ia te mea mō te tuarā o te ngākaukore.
PRO 10:14 Rongoā ai te hunga whakaaro nui i te mātauranga; he whakangaromanga ia kei te hori tonu, te māngai o te wairangi.
PRO 10:15 Ko ōna rawa te pā kaha o te tangata taonga; tēnā ko te hunga kore taonga, hei whakangaromanga tō rātou rawakore.
PRO 10:16 Ko te mahi a te tangata tika e ahu ana ki te ora; ko ngā hua o te kino ki te hara.
PRO 10:17 Kei te ara ki te ora te tangata e pupuri ana i te kupu ako; ko te tangata ia e kore e pai kia rīria tōna hē, ka kotiti kē.
PRO 10:18 Ko te tangata e huna ana i te mauāhara he ngutu teka; ā, he kūware te tangata e whakapuaki ana i te ngautuarā.
PRO 10:19 E kore ngā kupu maha e hapa i te kino; he mahara nui ia te tangata he ngutu kokopi nei ōna.
PRO 10:20 He hiriwa pai rawa te arero o te tangata tika; ko te ngākau o te hunga kino, he hauwarea rawa.
PRO 10:21 He tokomaha e whāngaia ana e ngā ngutu o te tangata tika; ka mate ia te hunga kūware, he kore nō te ngākau mahara.
PRO 10:22 Ka hua te taonga i tā Ihowā manaaki; kāhore hoki e kīnakitia e ia ki te pōuri.
PRO 10:23 Hei tākaro mā te wairangi te mahi hē; mā te tangata mātau ia ko te whakaaro nui.
PRO 10:24 Ko tā te tangata kino i wehi ai ka tae anō ki a ia; ā, ko tā te hunga tika i hiahia ai, ka hōmai.
PRO 10:25 Pahure rawa ake te tūkauati kua kore te hunga kino; tēnā ko te tangata tika he tūranga pūmau tērā.
PRO 10:26 He winika ki ngā niho, he paowa ki ngā kanohi; koia anō te māngere ki ōna kaiunga.
PRO 10:27 Ko te wehi ki a Ihowā e whakaroa ana i ngā rā; ka whakapotoa mai ia ngā tau o te hunga kino.
PRO 10:28 Tūmanako atu te hunga tika, koa iho; tūmanako atu te hunga kino, ngaro iho.
PRO 10:29 He kaha mō te tangata tika tā Ihowā ara; he whakangaromanga ia mō ngā kaimahi i te kino.
PRO 10:30 E kore te tangata tika e whakangāueuetia ā ake ake; e kore ia e nohoia e te hunga kino te whenua.
PRO 10:31 Ko te māngai o te tangata tika hua ana te whakaaro nui; ka tapahia ia te arero whanokē.
PRO 10:32 E mōhio ana ngā ngutu o te tangata tika ki ngā mea ka manakohia; he whanokē ia e whakapuakina ana e te māngai o te hunga kino.
PRO 11:1 He mea whakarihariha ki a Ihowā te pāuna hē; engari te taimaha tika tāna i pai ai.
PRO 11:2 Ka tae te whakapehapeha, ka tae anō te whakamā; kei te hunga whakaiti ia te whakaaro nui.
PRO 11:3 Ko tō rātou ngākau tapatahi hei ārahi i te hunga tika; ka ai anō ko te whanokē ia o te hunga poka kē hei whakangaro mō rātou.
PRO 11:4 E kore te taonga e whai mana i te rā o te riri; kei te tika ia he oranga ake i te mate.
PRO 11:5 Mā te tika o te ngākau tapatahi ka tika ai tōna ara; ka hinga ia te tangata kino i runga i tōna kino.
PRO 11:6 Mā te tika o te hunga tika ka mawhiti ai rātou; ka mau ia ngā poka kē i runga i tō rātou kino.
PRO 11:7 I te matenga o te tangata kino, kore iho āna mea i tūmanako atu ai; kāhore noa iho he tūmanakohanga mā te hunga hē.
PRO 11:8 Ka mawhiti te tangata tika i roto i te raru, ā, ka riro te tangata kino hei whakakapi mō tōna tūranga.
PRO 11:9 Hei huna mō tōna hoa te māngai o te tangata whakapono kore; nā, mā te mōhio te hunga tika ka mawhiti ai.
PRO 11:10 Ka pai te hunga tika, ka hari te pā; ka whakangaromia te hunga kino, ka tangi te umere.
PRO 11:11 Mā te manaaki o te hunga tika ka kake ai te pā; ka pakaru ia i te māngai o te hunga kino.
PRO 11:12 Ko te tangata e whakahāwea ana ki tōna hoa he maharakore; tēnā ko te tangata mātau, whakarongo puku ana.
PRO 11:13 Ko te tangata haere, ka kawekawe kōrero e whāki ana i ngā mea ngaro; ko te tangata i te wairua pono, e hīpoki ana i te kōrero.
PRO 11:14 Ki te kāhore he mōhio hei ārahi, ka hinga te iwi; he ora ia kei ngā kaiwhakatakoto whakaaro tokomaha.
PRO 11:15 Ko te tangata ko tāna nei hei whakakapi mō tā te tangata kē, ka mamae; kei te ora ia te tangata e kino ana ki te tikanga whakakapi tūranga.
PRO 11:16 Ka mau te korōria i te wahine tikanga pai; ka mau hoki te taonga i ngā tāngata taikaha.
PRO 11:17 He atawhai i tōna wairua tā te tangata atawhai; ā, he whakararu i ōna kikokiko tā te tangata nanakia.
PRO 11:18 Ko te mahi a te tangata kino e utua ana ki te teka; ko te utu ia mō te kaiwhakatakoto i te tika, ū rawa.
PRO 11:19 Ko te tangata ū ki te tika, ka whiwhi ki te ora; ā, ko te tangata e whai ana i te kino e mea ana i te mate mōna.
PRO 11:20 Ko tā Ihowā e whakarihariha ai he ngākau whanokē; ko tāna e āhuareka ai ko te hunga e tika ana tō rātou ara.
PRO 11:21 Ahakoa awhi ngā ringa ki a rāua, e kore te tangata kino e waiho kia kore e whiua; ka mawhiti ia te uri o te hunga tika.
PRO 11:22 Rite tonu ki te whakakai kōura i te ihu o te poaka te wahine ātaahua kāhore nei ōna ngārahu pai.
PRO 11:23 Ko tā te hunga tika e minamina ai, ko te pai anake; ko te tūmanako ia a te hunga kino, ko te riri.
PRO 11:24 Tērā tētahi kei te rui, ā, tāpiritia mai ana anō; tērā tētahi kei te kaiponu i te mea e tika ana, heoi rawakore noa iho.
PRO 11:25 Ko te wairua ohaoha ka mōmona; ko te tangata e whakamākūkū ana, ka whakamākūkūria anō ia.
PRO 11:26 Ko te tangata e kaiponu ana i te wīti, ka kangā tērā e te nuinga; ka tau ia te manaaki ki runga ki te māhunga o te tangata e hoko atu ana.
PRO 11:27 Ko te tangata e āta rapu ana i te pai, e rapu ana i te whakapai; ko te tangata ia e rapu ana i te hē, ka tae tērā ki a ia.
PRO 11:28 Ko te tangata e whakawhirinaki ana ki ōna taonga, ka taka; nā, ko te hunga tika ka rite tō rātou tupu ki tō te rau matomato.
PRO 11:29 Ko te tangata e whakararu ana i tōna whare, he hau te taonga e whakarērea iho mōna; hei pononga anō te kūware mā te ngākau whakaaro nui.
PRO 11:30 Ko ngā hua o te tangata tika he rākau nō te ora; ka hopu wairua anō te tangata whakaaro tika.
PRO 11:31 Nanā, he utu anō tō te tangata tika i runga i te whenua; nui atu ia tō te tangata kino rāua ko te tangata hara.
PRO 12:1 Ko te tangata e aroha ana ki te kupu ako e aroha ana ki te mātauranga; nā, ko te tangata e kore e pai kia rīria tōna hē, he pōauau tērā.
PRO 12:2 Ko te tangata pai ka whiwhi ki tā Ihowā whakapai; otiia ka whakahēngia e ia te tangata ngārahu kino.
PRO 12:3 E kore tā te tangata e ū i te kino; nā, ko te pakiaka o te hunga tika, e kore tērā e whakakorikoria.
PRO 12:4 He wahine e ū ana tōna pai, hei karauna tērā ki tāna tāne; tēnā ko te wahine i whakamā ai ia, hei pirau tērā i roto i ōna wheua.
PRO 12:5 Ko ngā whakaaro o te hunga tika he tika; ko ngā whakaaro ia o te hunga kino he tinihanga.
PRO 12:6 Ko ngā kupu a te hunga kino e mea ana kia tauwhanga i te toto; mā te māngai ia o te hunga tika rātou ka ora ai.
PRO 12:7 Ka hurihia iho te hunga kino, ā, kore iho; ko te whare ia o te hunga tika ka tū tonu.
PRO 12:8 Ka rite ki tōna ngārahu te whakamoemiti mō te tangata; ko te ngākau parori kē ia ka whakahāweatia.
PRO 12:9 Ko te tangata e whakahāweatia ana, he pononga nei tāna, pai ake ia i te tangata e whakanui ana i a ia anō, ā, kāhore āna kai.
PRO 12:10 Ko te tangata tika e whakaaro ana ia ki te ora o tāna kararehe; he nanakia ia ngā mahi atawhai a te hunga kino.
PRO 12:11 Ko te tangata e mahi ana i tōna oneone ka mākona ia i te taro; tēnā ko te tangata e whai ana i te hunga tekateka noa, kāhore ōna ngākau mahara.
PRO 12:12 Ko tā te tangata kino e minamina ai ko te kupenga a te hunga kino; e whai hua ana ia te pakiaka o te hunga tika.
PRO 12:13 Ka mau te tangata kino i te pokanga kētanga o ōna ngutu; ka puta mai ia te tangata tika i roto i te raru.
PRO 12:14 Mā ngā hua o tōna māngai ka mākona ai te tangata i te pai; ka riro mai anō i te tangata ngā utu o tā ōna ringa.
PRO 12:15 He tika tonu ki ōna kanohi ake te ara o te kūware; e whakarongo ana ia te tangata whakaaro nui ki te kupu whakatūpato.
PRO 12:16 Ko te kūware, e mōhiotia wawetia ana tōna riri; e hīpokina ana ia te whakamā e te tangata ngārahu tūpato.
PRO 12:17 Ko tā te tangata kōrero pono he whakapuaki i te tika; ko tā te kaiwhakaatu teka ia he tinihanga.
PRO 12:18 He tangata anō ko āna kōrero maka noa, me te mea ko ngā werohanga a te hoari; he rongoā ia te arero o te hunga whakaaro nui.
PRO 12:19 Ka ū tonu te ngutu pono ā ake ake; mō nāianei kau ia te arero teka.
PRO 12:20 He tinihanga kei roto i te ngākau o ngā kaitito i te kino; he koa ia tō ngā kaiwhakatakoto kōrero e mau ai te rongo.
PRO 12:21 E kore tētahi kino e pā ki te tangata tika; engari te hunga kino ka kī i te kino.
PRO 12:22 He mea whakarihariha ki a Ihowā ngā ngutu teka; ko tāna e āhuareka ai ko ngā kaimahi i te pono.
PRO 12:23 Hīpoki ai te tangata tūpato i te mātauranga; e karanga nui ana ia te ngākau o ngā kūware i te kūwaretanga.
PRO 12:24 Mō te ringa o ngā uaua te kīngitanga; hei hōmai takoha ia te māngere.
PRO 12:25 Mā te pōuri i roto i te ngākau o te tangata e piko ai ia; mā te kupu pai ia ka mārama ai.
PRO 12:26 Hira ake te tangata tika i tōna hoa; te hunga kino ia ka whakapōhēhētia e tō rātou ara anō.
PRO 12:27 Kāhore te tangata māngere e tunu i tāna mea i hopu ai; mā te tangata uaua ia te taonga utu nui a ngā tāngata.
PRO 12:28 He ora kei te ara o te tika; kāhore hoki he mate i tōna ara.
PRO 13:1 Ko te tama whakaaro nui ka rongo ki tā tōna pāpā ako; ko te tangata whakahī ia e kore e rongo ki te riri.
PRO 13:2 E kai te tangata i te pai i te hua o tōna māngai; ka kai ia te wairua o te hunga whanokē i te tutū.
PRO 13:3 Ko te tangata e tiaki ana i tōna māngai e pupuri ana i tōna ora; ko te tangata ia e hāmama nui ana ōna ngutu, ko te whakangaromanga mōna.
PRO 13:4 E hiahia ana te wairua o te tangata māngere, ā, kāhore he mea māna; ka meinga ia kia mōmona te wairua o te hunga uaua.
PRO 13:5 E kino ana te tangata tika ki te kōrero teka; he mea whakarihariha ia te tangata kino, ā, whakamā noa iho.
PRO 13:6 Ko te tika hei kaitiaki mō te tangata e tapatahi ana te ara; ka whakatakā anō te tangata kino e te hara.
PRO 13:7 Tērā tētahi kei te āmene taonga mōna, heoi kāhore rawa he mea i a ia; tērā tētahi kei te whakarawakore i a ia, heoi nui atu ōna rawa.
PRO 13:8 Ko ngā utu mō te tangata kia ora, ko ōna rawa; tēnā ko te rawakore, e kore e rongo i te riri.
PRO 13:9 E koa ana te mārama o te hunga tika; ka keto ia te rama o te hunga kino.
PRO 13:10 He totohe anake i ahu mai i te whakapehapeha; he whakaaro nui ia kei te hunga i ngā kupu tika.
PRO 13:11 Ko ngā taonga i puta mai i te whakamanamana ka iti haere; ko tā te tangata i whakaemi ai, he mea mahi, ka tupu haere.
PRO 13:12 He manako tāringa roa, he patu ngākau; ka tae te koronga, ko te rākau ia o te ora.
PRO 13:13 Ko te tangata e whakahāwea ana ki te kupu, ka ngaro i a ia anō; ko te tangata ia e wehi ana i te whakahau, ka whiwhi ki te utu.
PRO 13:14 Ko te ture o te hunga whakaaro nui, he puna nō te ora, e puta ai i ngā reti o te mate.
PRO 13:15 Ko tō te ngārahu pai he hōmai atawhai; he taikaha ia te ara o te hunga nanakia.
PRO 13:16 He mahi mōhio tā te tangata tūpato; ko tā te wairangi he hora i te kūwaretanga.
PRO 13:17 Ka hinga te karere kino ki te kino; ko te karere pono ia, ānō he rongoā.
PRO 13:18 Ko te tangata kāhore e pai ki te papaki, māna te rawakore, te whakamā; engari ko te tangata e whai mahara ana ki te ako, ka whakahōnoretia.
PRO 13:19 Ko te hiahia kua rite, he reka ki te wairua; he whakarihariha ia ki ngā kūware te whakarere i te kino.
PRO 13:20 Haere i te taha o te hunga whakaaro nui, ā, ka whai whakaaro koe; ko te takahoa ia o ngā kūware, ka mamae.
PRO 13:21 Ka whai te kino i te hunga hara; ko te utu ia ki te hunga tika, he pai.
PRO 13:22 He whakarerenga iho tā te tangata pai mō ngā tamariki a ngā tamariki; kei te rongoā mō te tangata tika ngā taonga o te tangata hara.
PRO 13:23 He nui te kai kei te ngakinga a ngā rawakore; tērā ia te mea e ngaro ana i te kore o te tikanga pai.
PRO 13:24 Ko te tangata e kaiponu ana i tāna whiu, e kino ana ia ki tāna tama; ko te tangata ia e aroha ana ki a ia, ka papaki wawe i a ia.
PRO 13:25 Kai ana te tangata tika, mākona ana tōna wairua; ka hapa ia te kōpū o te tangata kino.
PRO 14:1 Ko tā te wahine whakaaro nui he hanga i tōna whare; ko tā te wahine wairangi, ko ōna ringa hei wāhi iho.
PRO 14:2 Ko te tangata e haere ana i runga i tōna tika, e wehi ana i a Ihowā; ko te tangata he parori kē ōna ara e whakahāwea ana ki a ia.
PRO 14:3 Kei te māngai o te wairangi he patu whakapehapeha; mā ngā ngutu ia o te hunga whakaaro nui rātou ka ora ai.
PRO 14:4 Ki te kāhore he kau, ka mā te takotoranga kai; mā te kaha ia o te kau ka nui ai ngā hua.
PRO 14:5 E kore te kaiwhakaatu pono e teka; ka puaki ia te teka i te kaiwhakaatu teka.
PRO 14:6 E rapu ana te tangata whakahī i te whakaaro nui, heoi kāhore e kitea e ia; ki te tangata mātau ia he māmā noa te mātauranga.
PRO 14:7 Haere atu ki te aroaro o te kūware, ina kāhore e kitea e koe he ngutu mātau ōna.
PRO 14:8 Ko te whakaaro nui o te tangata tūpato, he mātau ki tōna ara; ko te wairangi o ngā kūware, he tinihanga.
PRO 14:9 Ko tā ngā wairangi he kata ki te hē; nā, kei te hunga tika te whakaaro pai.
PRO 14:10 E mōhio ana te ngākau ki tōna ake mamae, e kore anō hoki tōna koa e pikitia e te tangata kē.
PRO 14:11 Ka whakangaromia te whare o te hunga kino; ka tupu ia te tēneti o te hunga tika.
PRO 14:12 He huarahi anō tērā e tika ana ki tā te tangata titiro, ko tōna mutunga ia ko ngā huarahi ki te mate.
PRO 14:13 Ahakoa e kata ana, e mamae ana te ngākau; ā, ko te mutunga o te koa, he pōuri.
PRO 14:14 Ko te tangata i te ngākau tahuri kē, ka mākona i ōna ara ake; ā, ko te tangata pai ka mākona i tāna ake anō.
PRO 14:15 Ko tā te kūware he whakapono ki ngā kupu katoa; tēnā ko te tangata tūpato, ka āta titiro ki tāna hīkoi.
PRO 14:16 E wehi ana te tangata whakaaro nui, ka neke atu i te kino; ko te kūware ia ka whakahī, ka tohe.
PRO 14:17 Ko te tangata riri wawe ka mahi i te wairangi; ka kinongia anō hoki te tangata i ngā rauhanga kino.
PRO 14:18 He wairangi te whakarerenga iho mō ngā kūware; ko te tangata tūpato ia ka karaunatia ki te mātauranga.
PRO 14:19 E piko ana te hunga kino ki te aroaro o te hunga pai; ā, ko te hunga hē ki ngā kūwaha o te tangata tika.
PRO 14:20 E kinongia ana te rawakore e tōna hoa ake nei anō; he tokomaha ia ngā tāngata e aroha ana ki te tangata taonga.
PRO 14:21 Ko te tangata e whakahāwea ana ki tōna hoa, e hara ana; ko te tangata ia e atawhai ana ki ngā rawakore, ka hari.
PRO 14:22 He teka ianei e kotiti kē ana ngā kaiwhakatakoto i te kino? He atawhai ia, he pono, kei ngā kaihanga i te pai.
PRO 14:23 He hua tō ngā māuiuitanga katoa; tēnā ko te kōrero o ngā ngutu e ahu ana ki te rawakore.
PRO 14:24 Hei karauna mō ngā whakaaro nui ō rātou taonga; ko te wairangi ia o ngā kūware, he wairangi kau.
PRO 14:25 Ka ora ngā wairua i te kaiwhakaatu pono; ko te tangata kōrero teka ia e mea ana kia tinihanga.
PRO 14:26 Ū tonu, kaha tonu te whakaaro ina wehi ki a Ihowā; ka whai rerenga atu anō hoki āna tamariki.
PRO 14:27 He puna ora te wehi ki a Ihowā, e mahue ai ngā reti o te mate.
PRO 14:28 Mā te nui o te iwi ka whai hōnore ai te kīngi; mā te kore o te iwi ka taka ai te rangatira.
PRO 14:29 He mātauranga nui tō te tangata manawanui; ko te tangata riri wawe ia, e whakaneke ake ana ia i te wairangi.
PRO 14:30 He ora ki ngā kikokiko te ngākau ora; ko te hae ia, he pirau ki ngā wheua.
PRO 14:31 Ko te tangata e tūkino ana i te ware, he tāwai tāna ki tōna Kaihanga; ko te tangata ia e atawhai ana i te rawakore, e whakahōnore ana i a ia.
PRO 14:32 E uakina iho ana te tangata kino i runga i tōna hē; ko te tangata tika ia ka whai tūmanakohanga i tōna matenga.
PRO 14:33 Ka noho te whakaaro nui ki te ngākau o te tangata mātau; engari ko te mea kei te wāhi ki roto o ngā kūware e whakaaturia ana.
PRO 14:34 Mā te tika ka kake ai te iwi; mā te hara ia ka ingoa kino ai ngā iwi.
PRO 14:35 Ka manako te kīngi ki te pononga mahara; ā, ka riri ki te tangata i takea ai te whakamā.
PRO 15:1 Mā te kupu ngāwari e kaupare te riri; mā te kupu taimaha ia e whakaoho te riri.
PRO 15:2 Ko te arero o te tangata whakaaro nui e whakahua tika ana i te mātauranga; e whakapuaki ana ia te māngai o ngā kūware i te wairangi.
PRO 15:3 Kei ngā wāhi katoa ngā kanohi o Ihowā, e titiro ana ki te hunga kino, ki te hunga pai.
PRO 15:4 Ko te arero reka he rākau nō te ora; tēnā ki te whanokē a roto he wāwāhi wairua.
PRO 15:5 E whakahāwea ana te wairangi ki te papaki a tōna pāpā; ko te tangata ia e mahara ana ki te ako ka mōhio ki te tūpato.
PRO 15:6 He nui te taonga kei te whare o te tangata tika; he raruraru ia kei roto i ngā mea hua ki te tangata kino.
PRO 15:7 E ruia ana te mātauranga e ngā ngutu o ngā whakaaro nui; kāhore ia he pēnā a te ngākau o ngā kūware.
PRO 15:8 He mea whakarihariha ki a Ihowā te whakahere a te hunga kino; engari, e manako ana ia ki te īnoi a te hunga tika.
PRO 15:9 He mea whakarihariha ki a Ihowā te huarahi o te tangata kino; ko te tangata ia e whai ana i te tika tāna e aroha ai.
PRO 15:10 He kino te papaki ki te tangata e whakarere ana i te ara; ā, ko te tangata e kino ana ki te ako, ka mate.
PRO 15:11 Kei te aroaro o Ihowā te rēinga me te whakangaromanga; engari rawa hoki ngā ngākau o ngā tama a te tangata.
PRO 15:12 E kore te tangata whakahī e aroha ki te kaipapaki; e kore hoki e haere ki te hunga whakaaro nui.
PRO 15:13 Mā te koa o te ngākau ka pai ai te mata; mā te pōuri ia o te ngākau ka marū ai te wairua.
PRO 15:14 E rapu ana te ngākau mōhio i te mātauranga; ko te kūware ia tā te māngai o ngā wairangi e kai ai.
PRO 15:15 He kino ngā rā katoa o te hunga pōuri; he hākari tonu tā te tangata i te ngākau mārama.
PRO 15:16 He pai kē te iti i kīnakitia ki te wehi ki a Ihowā, i te nui taonga i kīnakitia ki te raruraru.
PRO 15:17 He pai ake te tina pūwhā ko te aroha hei kīnaki, i te kau whāngai e kīnakitia ana ki te mauāhara.
PRO 15:18 He whakaoho tautohe tā te tangata pukuriri; he pēhi pakanga ia tā te tangata manawanui.
PRO 15:19 Ko te ara o te tangata māngere, ānō he taiepa tātarāmoa; he ara nui ia tō te tangata tika.
PRO 15:20 He tama whakaaro nui, ka koa te pāpā; tēnā ko te tama kūware, he whakahāwea ki tōna whaea.
PRO 15:21 Ki te tangata maharakore he mea whakahari te wairangi; he tika ia te haere a te tangata mātau.
PRO 15:22 Ki te kāhore he rūnanga, ka pororaru ngā tikanga; mā te tokomaha ia o ngā kaiwhakatakoto whakaaro ka mau ai.
PRO 15:23 Kei tā tōna māngai i whakahoki ai he koa mō te tangata; ko te kupu i te wā i tika ai, ānō te pai!
PRO 15:24 Ki te tangata whakaaro nui e ahu whakarunga ana te ara ki te ora, he mea kia mahue ai i a ia te rēinga o raro.
PRO 15:25 Ka hūtia ake e Ihowā te whare o te tangata whakakake; engari ka whakapūmautia e ia te rohe o te pouaru.
PRO 15:26 He mea whakarihariha ki a Ihowā ngā whakaaro nanakia; he mea kohakore ia ngā kupu āhuareka.
PRO 15:27 Ko te tangata apo taonga, raruraru ana i a ia tōna whare; ka ora ia te tangata e kino ana ki ngā mea hōmai noa.
PRO 15:28 Ko te ngākau o te tangata tika e āta whakaaro ana ki te kupu hei whakahokinga; ko te māngai ia o te tangata kino e tāhoro ana i ngā mea kikino.
PRO 15:29 E matara ana a Ihowā i te hunga kino; otiia e rongo ana ia ki te īnoi a te hunga tika.
PRO 15:30 Mā te mārama o ngā kanohi ka koa ai te ngākau; ā, mā te rongo pai ka mōmona ai ngā wheua.
PRO 15:31 Ko te taringa e whakarongo ana ki te whakatūpato e ora ai, ka noho i waenga i te hunga whakaaro nui.
PRO 15:32 Ko te tangata e whakakāhore ana ki te papaki, e whakahāwea ana ki tōna wairua; engari ko te tangata e rongo ana ki te ako, ka whiwhi ki te ngākau mahara.
PRO 15:33 Ko te wehi ki a Ihowā te ako o te whakaaro nui; ko te ngākau whakaiti hoki e haere ana i mua i te hōnore.
PRO 16:1 Ko ngā whakatakataka a te ngākau nā te tangata; engari, ko te kupu whakahoki a te arero nā Ihowā.
PRO 16:2 Ko ngā ara katoa o te tangata he mā ki ōna ake kanohi; ko Ihowā ia ki te pāuna i ngā wairua.
PRO 16:3 Utaina āu mahi ki runga ki a Ihowā, ā, ka whakapūmautia ōu whakaaro.
PRO 16:4 He mea hanga nā Ihowā ngā mea katoa mō tōna tutukitanga, mō tōna; āe rā, ko te tangata kino hoki mō te rā o te kino.
PRO 16:5 He mea whakarihariha nā Ihowā te hunga ngākau whakakake katoa; ahakoa pupuri te ringa ki te ringa, e kore ia e kore te whiua.
PRO 16:6 Ko te mahi tohu tangata me te pono hei pure mō te kino; mā te wehi hoki ki a Ihowā ka mawehe atu ai te tangata i te kino.
PRO 16:7 Ki te pai a Ihowā ki ngā ara o te tangata, ka meinga e ia ōna hoariri nei anō kia mau te rongo ki a ia.
PRO 16:8 He pai ake te mea iti i runga i te tika, i ngā hua maha ki te kāhore he tika.
PRO 16:9 Ko te ngākau o te tangata hei whakaaro i tōna ara; ko Ihowā ia hei whakatika i tōna hīkoi.
PRO 16:10 He kupu atua kei ngā ngutu o te kīngi; e kore tōna māngai e poka kē ina whakawā.
PRO 16:11 Ko te taimaha tika, ko te pāuna tika, nā Ihowā; he mahi nāna ngā kōhatu katoa o te pūtea.
PRO 16:12 He mea whakarihariha ki ngā kīngi te mahi i te kino; nā te tika hoki i ū ai te torōna.
PRO 16:13 He mea āhuareka ki ngā kīngi ngā ngutu tika; e aroha ana hoki rātou ki te tangata e kōrero tika ana.
PRO 16:14 Ko te riri o te kīngi ānō he karere mō te mate; engari ka whakamārietia e te tangata whakaaro nui.
PRO 16:15 He ora kei te mārama o te mata o te kīngi; ā, ko tana manako he rite ki te kapua o tō muri ua.
PRO 16:16 Ko te whiwhi ki te whakaaro nui, ānō te pai! Pai atu i te whiwhi ki te kōura; ko te whiwhi hoki ki te mātauranga te mea e hiahiatia nuitia atu i te hiriwa.
PRO 16:17 Ko te huanui o te hunga tika he mawehe atu i te kino, ko te tangata e whai whakaaro ana ki tōna ara, ka mau tōna wairua.
PRO 16:18 Haere ai te whakakake i mua o te whakangaromanga, te wairua whakapehapeha i mua i te hinganga.
PRO 16:19 Ko te ngākau whakaiti i waenga i te hunga rawakore, pai atu i te uru ki te tūwhanga taonga a te hunga whakakake.
PRO 16:20 Ko te tangata e tahuri ana ki te kupu, ka kite i te pai; ā, ko te tangata e whakawhirinaki ana ki a Ihowā, ka hari.
PRO 16:21 Ka kīia te whakaaro nui he mātau; mā te reka hoki o ngā ngutu ka neke ai te mōhio.
PRO 16:22 Ko te mātauranga te puna o te ora mō te tangata i whiwhi ki tērā; ko te ako ia mō te hunga wairangi ko tō rātou wairangi anō.
PRO 16:23 Mā te ngākau o te tangata whakaaro nui e tohutohu tōna māngai, e āpiti hoki he kupu mōhio ki ōna ngutu.
PRO 16:24 Ko ngā kupu matareka ānō kei te honikoma, he reka ki te wairua, he rongoā ki ngā wheua.
PRO 16:25 Tērā he ara e tika ana ki te titiro a te tangata; ko tōna mutunga ia ko ngā ara ki te mate.
PRO 16:26 Ko te hiahia o te tangata e mahi ana, e mahi ana mōna; nō te mea e akiakina ana ia e tōna māngai.
PRO 16:27 E whakatakoto ana te tangata tikangakore i te kino, ā, kei ōna ngutu ānō he ahi e kā ana.
PRO 16:28 Ko tā te tangata whanokē he tītaritari i te raruraru; ko tā te tangata kawekawe kōrero he wehewehe i ngā hoa tupu.
PRO 16:29 Whakawai ai te tangata nanakia i tōna hoa, kawe ai i a ia ki te huarahi kāhore i pai.
PRO 16:30 Ko te tangata e whakamoe ana i ōna kanohi, e mea ana kia whakaaroa ai e ia ngā mea whanokē; ko te tangata e kokopi ana i ōna ngutu e whakatutuki ana i te kino.
PRO 16:31 He karauna korōria te māhunga hina, e ka kitea i runga i te ara o te tika.
PRO 16:32 Engari rawa te tangata manawanui i te tangata kaha, te tangata e pēhia ana e ia tōna wairua i te tangata i horo ai te pā.
PRO 16:33 E makā ana te rota ki roto ki te kokorutanga o te kākahu; kei a Ihowā ia te tikanga katoa.
PRO 17:1 Ko te maramara kai, ko te mea maroke me te āta noho hei kīnaki, pai atu i te whare kī i ngā hākari a te ngangare.
PRO 17:2 Hei rangatira te pononga mahara mō te tama i whakamā ai; ka whai wāhi anō ia i roto i tō ngā tēina.
PRO 17:3 Ko te oko tahu para mō te hiriwa, ko te oumu mō te kōura; ko Ihowā ia hei whakamātau mō ngā ngākau.
PRO 17:4 Ko te kaimahi i te hē ka tahuri ki tā te ngutu kino; ā, ka whai taringa te teka ki tā te arero whanokē.
PRO 17:5 Ko te taunu ki te rawakore he tāwai ki tōna Kaihanga; ko te tangata e koa ana ki ngā aituā, e kore e kore te whiua.
PRO 17:6 Hei karauna mō ngā koroheke ngā tamariki a ngā tamariki; nā, ko te korōria o ngā tamariki ko ō rātou mātua.
PRO 17:7 E kore te reo rangatira e tau ki te kūware; hore rawa anō hoki te ngutu teka ki te rangatira.
PRO 17:8 Ko te tangata i te mea hōmai noa, he kōhatu whakapaipai tērā ki tāna titiro; tōna tahuritanga ake ki hea, ki hea, ka whiwhi ki te pai.
PRO 17:9 Ko te tangata e hīpoki ana i te hē, e whai ana i te aroha; tēnā ko te tangata kōrerorero, e wehewehe ana i ngā hoa tupu.
PRO 17:10 Ko te ngotonga o te kupu riri ki roto ki te tangata mātau, nui atu i tō ngā whiu kotahi rau ki roto ki te whakaarokore.
PRO 17:11 He whakakeke kau tā te tangata kino e whai ai; nō reira ka tukua atu he karere nanakia ki a ia.
PRO 17:12 Kia tūtaki ki te tangata te pea kua tangohia āna kūao; pai atu i te whakaarokore i a ia e wairangi ana.
PRO 17:13 Ko te tangata e hōmai ana i te kino hei utu mō te pai, e kore te kino e neke atu i tōna whare.
PRO 17:14 Ko te tīmatanga o te totohe i rite ki te tangata e tuku ana i te wai kia rere; nā reira waiho atu te totohe i te mea kīanō i oho te ngangare.
PRO 17:15 Ko te tangata e whakatika ana i tā te tangata kino, me ia e whakahē ana i tā te tangata tika, he rite tahi taua rua, he mea whakarihariha ki a Ihowā.
PRO 17:16 Hei aha te utu i te ringa o te kūware, hei hoko i te whakaaro nui, kāhore nei hoki ōna mātauranga?
PRO 17:17 E aroha ana te hoa i ngā wā katoa; nā, ko te teina, ko te tuakana, i whānau tērā mō ngā aituā.
PRO 17:18 Ko tā te tangata ngākaukore he papaki ringa; kua waiho hei whakakapi tūranga i te aroaro o tōna hoa.
PRO 17:19 Ko te tangata e aroha ana ki te ngangare e aroha ana ki te kino; ko te tangata e whakarewa ana i tōna kūwaha e rapu ana i te whakangaromanga.
PRO 17:20 Ko te ngākau parori kē e kore e kite i te pai; ko te tangata he whanokē tōna arero ka taka ki te kino.
PRO 17:21 Ka whānau he whakaarokore mā tētahi tangata, hei whakapōuri tērā mōna; e kore anō hoki e koa te pāpā o te pōauau.
PRO 17:22 He rongoā pai te ngākau koa; ki te marū ia te wairua, ka maroke ngā wheua.
PRO 17:23 E tango ana te tangata kino i te mea whakapati i te uma, hei whakapeau kē i ngā ara o te whakarite whakawā.
PRO 17:24 Kei te aroaro o te tangata mātau ngā whakaaro nui; kei ngā pito ia o te whenua ngā kanohi o te whakaarokore.
PRO 17:25 Ko te tamaiti whakaarokore he mea whakapōuri i tōna pāpā, he mea whakakawa i te ngākau o tōna whaea.
PRO 17:26 Ehara anō hoki i te mea pai kia whiua te tangata tika, kia patua rānei ngā rangatira mō te tika.
PRO 17:27 He mātauranga tō te tangata e tohu ana i āna kupu; ā, he whakaaro tō te tangata i te wairua manawanui.
PRO 17:28 Ko te wairangi nei anō, ki te whakarongo puku, ka kīia he whakaaro nui; ki te kokopi ōna ngutu, ka kīia ia he tūpato.
PRO 18:1 Ko te tangata tū kē, e whai ana i tā tōna ake hiahia, e ngangau ana ki ngā whakaaro tōtika katoa.
PRO 18:2 Kāhore o te whakaarokore āhuareka ki te mātauranga; engari kia whakakitea e ia tōna ngākau.
PRO 18:3 I te taenga mai o te tangata kino ka tae mai anō te whakahāwea, me te tāwai hei hoa mō te whakamā.
PRO 18:4 He wai hōhonu ngā kupu a te māngai o te tangata; he awa e rere ana te puna o te whakaaro nui.
PRO 18:5 Ehara i te mea pai te whakapai ki te kanohi o te tangata kino, te whakapeau kē rānei i tā te tangata tika ina whakawā.
PRO 18:6 E uru ana ngā ngutu o te whakaarokore ki te totohe, e karanga ana tōna māngai ki ngā whiu.
PRO 18:7 Hei huna anō mōna te māngai o te whakaarokore; ā, ko ōna ngutu hei rore mō tōna wairua.
PRO 18:8 Ānō he kai reka ngā kupu a te kawe kōrero; tae tonu iho ki ngā wāhi o roto rawa o te kōpū.
PRO 18:9 Ko te tangata anō hoki e māngere ana ki tāna mahi, hei teina ia ki te tangata maumau.
PRO 18:10 Hei pourewa kaha te ingoa o Ihowā; rere ana te tangata tika ki reira, ā, ora ake.
PRO 18:11 Ko ngā rawa o te tangata taonga hei pā kaha mōna, hei pā tiketike ki tōna whakaaro.
PRO 18:12 I mua ake o te whakangaromanga ka whakakake te ngākau o te tangata; i mua ake anō hoki o te hōnore ko te ngākau pāpaku.
PRO 18:13 Ko te tangata e whakahoki kupu ana i te mea kāhore anō ia i rongo noa, he mahi wairangi tērā nāna, he hanga whakamā.
PRO 18:14 E whakamanawanui te wairua o te tangata ki tōna mate; tēnā ko te wairua marū, ko wai e kaha ki tērā?
PRO 18:15 Ka whiwhi te ngākau o te tangata mātau ki te mōhio; e rapu ana hoki te taringa o ngā whakaaro nui ki te mōhio.
PRO 18:16 Mā te mea tuku noa a te tangata ka wātea ai he wāhi mōna, ka kawea hoki ia e tērā ki te aroaro o ngā tāngata nunui.
PRO 18:17 Ko te tangata nāna te kupu tuatahi i te whakawā me te mea kei a ia te tika; nā, ka haere mai tōna hoa, kei te rapu i te tikanga o tāna.
PRO 18:18 Mā te rota e mutu ai ngā tautohe, ā, ko tērā hei tauārai i waenganui o te hunga kaha.
PRO 18:19 Ko te tuakana, teina rānei, i whakatakariritia, pakeke atu i te pā kaha; ā, ko aua tū ngangare me he tūtaki tatau nō te whare rangatira.
PRO 18:20 Ka kī te kōpū o te tangata i ngā hua o tōna māngai, ka mākona ia i ngā hua o ōna ngutu.
PRO 18:21 Ko te mate, ko te ora kei te arero; ko te hunga e aroha ana ki tērā ka kai i ōna hua.
PRO 18:22 Ko te tangata kua kite i te wahine māna, kua kite i te mea pai, kua whiwhi hoki ki tā Ihowā whakapai.
PRO 18:23 He īnoi tā te rawakore hanga he taikaha ia te whakahoki a te tangata taonga.
PRO 18:24 Ko te tangata tini ngā hoa aroha e whai ana i te hē mōna; tērā anō ia te hoa aroha, nui atu i tō te tuakana, i tō te teina, tōna piri mai.
PRO 19:1 He pai kē te rawakore e haere ana i runga i tōna tapatahi, i te ngutu whanokē, i te whakaarokore.
PRO 19:2 Nā, ehara hoki i te mea pai kia kaua he mātauranga mō te wairua; ā, ko te tangata e hohoro ana ōna waewae, ka hara.
PRO 19:3 E whakaparoritia ana te ara o te tangata e tōna wairangi; e amuamu ana hoki tōna ngākau ki a Ihowā.
PRO 19:4 Mā te rawa ka tokomaha atu ai ngā hoa aroha; e wehea atu ana ia, te rawakore i tōna hoa aroha.
PRO 19:5 E kore te kaiwhakapae teka e whakaharakoretia; e kore hoki e mawhiti te tangata kōrero teka.
PRO 19:6 He tokomaha e whai kia manakohia e te tangata ringa mahora; he hoa aroha hoki ngā tāngata katoa nō te tangata e hōmai mea ana.
PRO 19:7 E kino ana ngā tēina katoa o te rawakore ki a ia; nā, nui kē atu te mataratanga atu o ōna hoa i a ia! Whai noa āna kupu i a rātou, heoi kua riro rātou.
PRO 19:8 Ko te tangata e mea ana ki te whakaaro nui mōna, e aroha ana ki tōna wairua ake; ko te tangata e pupuri ana i te mātauranga, ka tūtaki ki te pai.
PRO 19:9 E kore te kaiwhakapae teka e whakaharakoretia; ka hunā hoki te tangata kōrero teka.
PRO 19:10 E kore e tau te noho rangatira ki te whakaarokore; he makere rawa te noho ko te pononga hei rangatira mō ngā rangatira.
PRO 19:11 Ko te ngārahu tūpato ka pupuri i tōna riri; ā, hei whakakorōria mōna te whakarere noa iho i te hē.
PRO 19:12 Ko te riri o te kīngi rite tonu ki te hāmama o te raiona; ko tana manako ia ānō he tōmairangi i runga i te tarutaru.
PRO 19:13 He aituā mō tōna pāpā te tamaiti whakaarokore; ā, ko ngā ngangare a te wahine, me te māturuturu pūputu tonu.
PRO 19:14 He whare, he taonga i tuku iho i ngā mātua; ko te hoa wahine mahara i a Ihowā.
PRO 19:15 Mā te māngere e mea kia moe i te moe reka; ka matekai hoki te wairua o te rōrā.
PRO 19:16 Ko te tangata e pupuri ana i te whakahau e pupuri ana i tōna wairua; engari, ko te tangata kore whakaaro ki ōna ara ka mate.
PRO 19:17 Ko te tangata e ohaoha ana ki te rawakore e whakatārewa moni ana ki a Ihowā, ā, ka utua ki a ia tāna mahi atawhai.
PRO 19:18 Pākia tāu tama, i te mea kua whai manakohanga; kaua hoki tōu ngākau e whai tonu i te whakangaromanga mōna.
PRO 19:19 Ko te tangata riri nui māna e waha tōna hē; ki te whakaora hoki koe i a ia, ka waiho tonu tēnā hei mahi māu.
PRO 19:20 Whakarongo ki te kupu tohutohu, tahuri mai hoki ki te ako, kia whai whakaaro ai koe i tōu mutunga iho.
PRO 19:21 He maha ngā whakaaro i roto i te ngākau o te tangata; e tū tonu ana ia tā Ihowā tikanga.
PRO 19:22 Ko te hiahia o te tangata te aronga o tana atawhai; engari te rawakore i te tangata teka.
PRO 19:23 Ko te wehi ki a Ihowā te ara ki te ora; ā, ko te tangata kei a ia tērā, ka noho mākona; e kore tētahi hē e pā ki a ia.
PRO 19:24 E kuhua ana e te māngere tōna ringa ki te rīhi, e kore rawa nei e whakahokia e ia ki tōna māngai.
PRO 19:25 Pākia te tangata whakahī, ā, ka tūpato ngā kūware; ākona hoki te tangata mahara, ā, ka mōhio ia ki te mātauranga.
PRO 19:26 Ko te tangata e pāhua ana i tōna pāpā, e pei atu ana hoki i tōna whaea, he tama ia e whakamā ai, e ingoa kino ai hoki.
PRO 19:27 Kāti, e tāku tama, te whakarongo ki te ako hei mea kau e kotiti atu ai i ngā kupu o te mātauranga.
PRO 19:28 E whakahī ana te kaiwhakaatu hē ki te whakawā; e horomia ana hoki te kino e te māngai o te hunga kino.
PRO 19:29 Kua rite he whakawā mō ngā whakahī, he whiu mō te tuarā o ngā whakaarokore.
PRO 20:1 Ko tā te wāina he whakahī, ko tā te wai kaha he ngangau; ā, ko te hunga katoa e whakapōhēhētia ana e tērā, kāhore ō rātou whakaaro nui.
PRO 20:2 Ānō he raiona e hāmama ana te wehi o te kīngi; ko te tangata e whakaoho ana i a ia kia riri, e hara ana ki tōna wairua ake.
PRO 20:3 He whakahōnore mō te tangata te noho wātea mai i te ngangare; engari ko ngā wairangi he kōwhetewhete tonu.
PRO 20:4 Kāhore te māngere e parau, he mea ki te hōtoke; nō reira ka pākiki kai māna i te kotinga wīti, ā, kāhore e whiwhi.
PRO 20:5 He wai hōhonu te whakaaro i roto i te ngākau o te tangata; e utuhia anō ia e te tangata mātau.
PRO 20:6 Ko tā te tini o te tangata he kauwhau i tōna atawhai ake; ko wai ia e kite i te tangata pono?
PRO 20:7 Ko te tangata tika, e haere ana i runga i tōna tapatahi, ka manaakitia āna tamariki i muri i a ia.
PRO 20:8 Ko te kīngi e noho ana i runga i te torōna whakawā, tītaritaria ana e ōna kanohi ngā hē katoa.
PRO 20:9 Ko wai e mea, “Kua mā i ahau tōku ngākau, kua tahia atu ōku hara”?
PRO 20:10 Ko ngā pāuna huhua, ko ngā mēhua huhua, he rite tahi taua rua, he mea whakarihariha anake ki a Ihowā.
PRO 20:11 He tamariki nei anō ka mōhiotia ki āna hanga, he mā rānei, he tika rānei tāna mahi.
PRO 20:12 Ko te taringa rongo, ko te kanohi titiro, nā Ihowā rāua ngātahi i hanga.
PRO 20:13 Kaua e matenuitia te moe, kei rawakoretia koe; titiro ōu kanohi, ā, ka mākona koe i te taro.
PRO 20:14 “Ehara ehara,” e ai tā te kaihoko; tōna haerenga atu ia, kei te whakamanamana.
PRO 20:15 He kōura tēnā me te tini o te rupi; engari he taonga utu nui ngā ngutu o te mātauranga.
PRO 20:16 Tangohia te kākahu o te kaiwhakakapi mō te tangata kē; puritia hoki te tangata i taunahatia hei whakakapi mō ngā tāngata kē.
PRO 20:17 He reka ki te tangata te taro o te teka; muri iho ka kī tōna māngai i te kirikiri.
PRO 20:18 Mā te rūnanga ka ū ai ngā whakaaro; kia pai hoki te ngārahu ina anga ki te whawhai.
PRO 20:19 Ko te tangata e kōpikopiko ana ki te kawekawe kōrero, ka whākina e ia ngā kōrero ngaro; nā reira kaua e raweke atu ki te tangata ngutu hāmama.
PRO 20:20 Ko te tangata e kanga ana i tōna pāpā, i tōna whaea, ka tineia tōna rama i roto i te pōuri kerekere.
PRO 20:21 I te tīmatanga e hohoro mai pea te taonga; e kore ia tōna mutunga e whakapaingia.
PRO 20:22 Kaua e mea, “Ka utua e ahau te kino”; tāria tā Ihowā, ā, kei a ia he oranga mōu.
PRO 20:23 He mea whakarihariha ki a Ihowā ngā taimaha rerekē; ā, e kore hoki te pāuna tinihanga e pai.
PRO 20:24 Nā Ihowā ngā hāereerenga o te tangata; nā, mā te aha te tangata ka mātau ai ki tōna ara?
PRO 20:25 Hei rore ki te tangata te oho noa ake ki te mea, “He tapu!” ā, i muri i ngā kī taurangi, kia uiui.
PRO 20:26 Ka tītaritaria e te kīngi whakaaro nui te hunga kino, ā, ka hurihia hoki e ia te wīra patu wīti ki runga ki a rātou.
PRO 20:27 He rama nā Ihowā te manawa o te tangata, e rapu ana i ngā mea katoa i roto rawa i te kōpū.
PRO 20:28 Hei kaitiaki mō te kīngi te atawhai me te pono; e tautokona ake ana hoki tōna torōna e te atawhai.
PRO 20:29 Ko te korōria o ngā taitama ko tō rātou kaha; ā, ko te ātaahua o ngā kaumātua ko te upoko hina.
PRO 20:30 E tahia atu ana te kino e ngā kārawarawa o te patunga; ā, e tae rawa ana ngā whiu ki ngā wāhi o roto rawa o te kōpū.
PRO 21:1 Kei roto te ngākau o te kīngi i te ringa o Ihowā ānō he awa rerenga wai; e whakaangahia ana e ia ki ngā wāhi katoa e pai ai ia.
PRO 21:2 Ko ngā ara katoa o te tangata, tika kau ki ōna kanohi ake; ko Ihowā ia hei pāuna i ngā ngākau.
PRO 21:3 Ko te mahi i te tika, i te whakawā, ki tā Ihowā, pai atu i te patunga tapu.
PRO 21:4 He kanohi whakakake, he ngākau whakapehapeha, ā, ko te rama hoki o te hunga kino, he hara kau.
PRO 21:5 Ko ngā whakaaro o te tangata uaua e ahu anake ana ki te hua o te taonga; ko te hunga tākare katoa ia e whawhai kau ana ki te mūhore.
PRO 21:6 E rite ana tā te arero teka āmi i te taonga ki te mamaoa e āia noatia ana; ko te hunga e rapu ana i ērā e rapu ana i te mate.
PRO 21:7 Mā te pāhua a te hunga kino e tahi atu rātou; mō rātou kāhore e pai ki te whakawā.
PRO 21:8 He ara tino kōpikopiko tō te tangata e waha ana i te hara; tēnā ko te tangata mā, he tika tāna mahi.
PRO 21:9 He pai kē te noho i te kokonga o te tuanui, i te noho tahi me te wahine ngangare i roto i te whare māhorahora.
PRO 21:10 Ko tā te wairua o te tangata kino he hiahia ki te kino; e kore ōna kanohi e manako ki tōna hoa.
PRO 21:11 Ki te whiua te tangata whakahī, ka whai whakaaro te kūware; ā, ki te whakaakona te tangata whakaaro nui, ka whiwhi ia ki te mātauranga.
PRO 21:12 Ka āta whakaaroa e te tangata tika te whare o te tangata kino; te pēheatanga e whakatakā ai te hunga kino ki te mate mō rātou.
PRO 21:13 Ko te tangata e puru ana i ōna taringa ki te karanga a te rawakore, tērā hoki ia e karanga, heoi e kore e whakarangona.
PRO 21:14 Mā te mea hōmai puku ka mārie ai te riri, mā te moni whakapati hoki i roto i te uma ka mārie ai te āritarita kaha.
PRO 21:15 He mahi koa nā te tangata tika te whakawā; mō ngā kaimahi ia i te kino, ko te whakangaromanga.
PRO 21:16 Ko te tangata e kotiti kē ana i te huarahi o te mahara, ka noho ia i te whakaminenga o ngā tūpāpaku.
PRO 21:17 Ko te tangata matenui ki ngā āhuareka, ka rawakore; ā, ko te tangata e matenui ana ki te wāina, ki te hinu, e kore e whai taonga.
PRO 21:18 Hei utu te tangata kino mō te tangata tika; ā, ka haere mai te tangata kōpeka hei whakakapi mō te tangata tū tika.
PRO 21:19 He pai kē te noho i te koraha, i te noho tahi me te wahine tohetohe, wahine pukukino.
PRO 21:20 Kei te nohoanga o te tangata whakaaro nui te taonga mōmōhanga me te hinu; heoi maumauria ake e te wairangi.
PRO 21:21 Ko te tangata e whai ana i te tika, i te atawhai, ka whiwhi ki te ora, ki te tika, ki te hōnore.
PRO 21:22 Ka pikitia e te tangata whakaaro nui te pā o ngā mārohirohi, ka taka hoki i a ia te kaha i whakawhirinaki ai rātou.
PRO 21:23 Ko te tangata e tiaki ana i tōna māngai, i tōna arero, e tiaki ana i tōna wairua kei raru.
PRO 21:24 Ko te tangata whakakake, whakapehapeha, ko te tangata whakahī tōna ingoa, e mahi ana ia i runga i te whakahirahira o tōna whakamanamana.
PRO 21:25 Ka mate te tangata māngere i tōna hiahia anō; e kore hoki ōna ringa e pai ki te mahi.
PRO 21:26 Tērā te hanga he kaiapo tonu ā pau noa te rā; ko tā te tangata tika ia he hōmai, kāhore hoki āna kaiponu.
PRO 21:27 He mea whakarihariha te whakahere a te tangata kino; tērā noa ake ina hē te whakaaro i kawea mai ai e ia.
PRO 21:28 Ka mate te kaiwhakaatu teka; nā, ko te tangata whakarongo, ka kōrero, kāhore he kaiwhakahē.
PRO 21:29 Ka whakamārō te tangata kino i tōna mata; tēnā ko te tangata tika, ka whakapai i ōna ara.
PRO 21:30 I tō Ihowā aroaro kāhore he whakaaro nui, kāhore he mātauranga, kāhore he kupu mōhio, e tū.
PRO 21:31 Kua rite noa ake he hōiho mō te rā o te whawhai; kei a Ihowā ia te whakaoranga.
PRO 22:1 Engari te ingoa pai e whiriwhiria rawatia i ngā taonga nui, me te manakohanga aroha i te hiriwa, i te kōura.
PRO 22:2 Ka tūtataki te tangata taonga rāua ko te rawakore; ko Ihowā te kaihanga ō rātou katoa.
PRO 22:3 Ko te tangata tūpato, ka kitea atu e ia te hē, ka huna i a ia; ko ngā kūware, haere tonu atu, mamae tonu atu.
PRO 22:4 Ko te hua o te māhaki, ā, ko te wehi ki a Ihowā, he taonga, he hōnore, he ora.
PRO 22:5 He tātarāmoa, he māhanga kei te ara o te whanokē; ko te tangata ia e tiaki ana i tōna wairua, ka matara atu i ēnā.
PRO 22:6 Whakatupuria ake te tamaiti i te ara e haere ai ia, ā, ka kaumātua, e kore e mahue i a ia.
PRO 22:7 E whakatakoto tikanga ana te tangata taonga mō ngā rawakore; ā, ko te tangata i te nama, hei pononga ia mā te tangata nāna i whakatārewa mai.
PRO 22:8 Ko te kairui o te kino, ka kokoti i te hē; ā, ka kāhore noa iho te patu o tōna riri.
PRO 22:9 Ko te kanohi ohaoha, ka manaakitia tērā; e hoatu ana hoki e ia tētahi wāhi o tāna taro mā te rawakore.
PRO 22:10 Peia atu te tangata whakahī, ā, ka riro te ngangare; ka mutu anō hoki te totohe me te whakahāwea.
PRO 22:11 Ko te tangata e matenui ana ki te ngākau mā, ko te kīngi he hoa mōna, mō te āhuareka o ōna ngutu.
PRO 22:12 Mā ngā kanohi o Ihowā e tiaki te tangata whai mātauranga, e whakatakā ana hoki e ia ngā kupu a te tangata kōpeka.
PRO 22:13 E mea ana te māngere, “He raiona kei waho; ka whakamatea ahau ki ngā huarahi!”
PRO 22:14 He poka hōhonu te māngai o ngā wāhine kē; ka taka ki roto tā Ihowā tangata e whakarihariha ai.
PRO 22:15 Paihere rawa te wairangi ki roto ki te ngākau o te tamaiti, otiia, mā te rākau o te whiu e pei kia matara atu i a ia.
PRO 22:16 Ko te tangata e tūkino ana i te rawakore kia maha atu ai he taonga māna, me te tangata hoki e hoatu mea ana ki te tangata taonga, ka tutuki rāua ki te mūhore kau.
PRO 22:17 Anga mai tōu taringa, whakarongo mai hoki ki ngā kupu a te hunga whakaaro nui, kia tahuri mai hoki tōu ngākau ki tōku mātauranga.
PRO 22:18 He mea āhuareka hoki, mehemea ka puritia e koe i roto i tōu kōpū, ki te ū ngātahi rāua ki runga ki ōu ngutu.
PRO 22:19 Kia okioki ai koe ki a Ihowā, koia i whakakitea ai e ahau aua mea ki a koe i tēnei rā – ki a koe nā anō.
PRO 22:20 He teka ianei hira rawa ngā mea kua tuhituhia atu nei e ahau ki a koe, he kupu ako, he kupu mōhio;
PRO 22:21 kia mōhio ai koe ki te tūturutanga o ngā kupu o te pono, kia whakahokia ai e koe he kupu pono ki te hunga e ngare ana i a koe?
PRO 22:22 Kaua e pāhuatia te rawakore, nō te mea he rawakore ia, kaua hoki e whakatupuria kinotia te tangata iti i te kūwaha.
PRO 22:23 Nō te mea ka tohea e Ihowā tā rātou tohe, ka pāhuatia anō hoki e ia te wairua o te hunga e pāhua ana i a rātou.
PRO 22:24 Kaua e whakahoa ki te tangata pukuriri; kei haere tahi hoki koe i te tangata āritarita;
PRO 22:25 kei ākona e koe ōna ara, ā, ka riro i a koe he māhanga mō tōu wairua.
PRO 22:26 Kei uru koe ki roto ki te hunga papaki ringa, ki ngā kaiwhakakapi tūranga rānei mō te moni tārewa;
PRO 22:27 ki te kāhore āu mea hei utu, hei aha i tangohia ai e ia tōu moenga i raro i a koe?
PRO 22:28 Kaua e whakanekehia atu te rohe tawhito i whakatakotoria e ōu mātua.
PRO 22:29 Kei te kite rānei koe i tētahi tangata e uaua ana ki tāna mahi? Ka tū ia ki te aroaro o ngā kīngi; e kore ia e tū ki te aroaro o ngā ware.
PRO 23:1 Ki te noho tahi kōrua ko te rangatira ki te kai, āta whakaaroa mārietia tērā i tōu aroaro;
PRO 23:2 whakapākia he māripi ki tōu korokoro, ki te mea he tangata kakai koe.
PRO 23:3 Kaua e hiahia ki āna mea reka; he kai tinihanga hoki ērā.
PRO 23:4 Kaua e tāruke ki te mea taonga; kāti tāu mea ki tōu mātauranga.
PRO 23:5 E anga mai rānei ōu kanohi ki taua mea korekore nei? He pono hoki ka whai parirau te taonga, koia ānō kei te ēkara, rere ana whaka te rangi.
PRO 23:6 Kaua e kainga te kai a te tangata kanohi kino, kei minamina hoki koe ki āna mea reka.
PRO 23:7 Ko tāna hoki e mea ai i roto i a ia, pērā tonu ia, “E kai, e inu!” koia tāna kupu ki a koe; kāhore ia ōna ngākau ki a koe.
PRO 23:8 Ko te kongakonga i kainga e koe, ka ruakina e koe, ka maumauria anō hoki āu kupu reka.
PRO 23:9 Kaua e kōrero ki ngā taringa o te kūware; ka whakahāwea hoki ia ki te whakaaro nui o āu kupu.
PRO 23:10 Kei whakanekehia e koe te rohe tawhito; kei haere koe ki ngā māra a te pani;
PRO 23:11 nō te mea he kaha tō rātou kaiwhakaora; ka tohea e ia tā rātou tohe ki a koe.
PRO 23:12 Anga atu tōu ngākau ki te ako, me ōu taringa ki ngā kupu o te mātauranga.
PRO 23:13 Kaua e tohungia te whiu ki te tamaiti; ki te patua hoki ia e koe ki te rākau, e kore ia e mate.
PRO 23:14 Tātātia ia e koe ki te rākau, ā, ka whakaorangia e koe tōna wairua i te rēinga.
PRO 23:15 E tāku tama, ki te whakaaro nui tōu ngākau, ka koa hoki tōku ngākau, āe rā, tōku nei anō;
PRO 23:16 āe rā, ka hari ōku whatumanawa, ina kōrero ōu ngutu i ngā mea tika.
PRO 23:17 Kei hae tōu ngākau ki te hunga hara; engari kia wehi koe ki a Ihowā, ā pau noa te rā.
PRO 23:18 He pono hoki tērā ānō he whakautu; e kore anō hoki tāu i tūmanako ai e hātepea atu.
PRO 23:19 Whakarongo rā, e tāku tama, kia whai whakaaro hoki koe, ā, whakatikaia tōu ngākau i te ara.
PRO 23:20 Kei uru ki te hunga kakai wāina; ki te hunga pukukai kikokiko;
PRO 23:21 nō te mea ka tutuki tahi te tangata inuinu rāua ko te tangata kakai ki te rawakore; he tawhetawhe hoki te kākahu a te momoe mō te tangata.
PRO 23:22 Whakarongo ki tōu pāpā nāna koe; kaua hoki e whakahāwea ki tōu whaea ina rūruhi ia.
PRO 23:23 Hokona te pono, kaua hoki e whakawhitiwhitia; āe rā, te whakaaro nui, te ako hoki, me te mātauranga.
PRO 23:24 Nui atu hoki te koa o te pāpā o te tangata tika; ā, ko te tangata e whānau he tama whakaaro nui māna, ka hari ia ki a ia.
PRO 23:25 Kia hari tōu pāpā rāua ko tōu whaea, inā, kia koa te wahine i whānau ai koe.
PRO 23:26 E tāku tama, hōmai tōu ngākau ki ahau, kia manako anō hoki ōu kanohi ki āku ara.
PRO 23:27 Nō te mea he rua hōhonu te wahine kairau; he poka kūiti te wahine kē.
PRO 23:28 Āe rā, ka whanga ia ānō he kaipāhua, ā, ka whakatokomahatia e ia ngā tāngata poka kē.
PRO 23:29 Ko wai e auē? Ko wai e tangi? Ko wai e totohe? Ko wai e ngangautia? Ko wai e marū, he mea takekore? Ko wai e whero tonu ōna kanohi?
PRO 23:30 Ko te hunga e noho roa ana ki te wāina; ko te hunga e haere ana ki te rapu i te wāina whakaranu.
PRO 23:31 Kaua e titiro ki te wāina i te mea e whero ana, ina puta tōna kara i roto i te kapu, ina mania tōna heke.
PRO 23:32 Tōna tukunga iho ānō he nākahi e ngau ana, koia anō kei te wero a te neke.
PRO 23:33 E kite hoki ōu kanohi i ngā mea rerekē, ā, ka puta he kupu rerekē i tōu ngākau.
PRO 23:34 Āe rā, ka rite koe ki te tangata e takoto ana i waenga moana, ki te tangata rānei e takoto ana i te tihi o te rewa.
PRO 23:35 Ā, ka mea koe, “Patua ana ahau e rātou, ā, kīhai ahau i mamae; tātātia ana ahau e rātou, ā, kīhai ahau i mōhio. Āhea ahau ara ake ai? Ka rapua anō e ahau.”
PRO 24:1 Kei hae koe ki te hunga kino, kaua hoki e hiahia hei hoa mō rātou.
PRO 24:2 Ko tā tō rātou ngākau hoki e whakaaro ai, he tūkino, ko tā ō rātou ngutu e kōrero ai, he whanokē.
PRO 24:3 Mā te whakaaro nui ka hangā ai te whare, ā, mā te mātauranga ka ū ai.
PRO 24:4 Mā te mōhio hoki ka kī ai ngā rūma i ngā taonga utu nui katoa, i ngā mea āhuareka.
PRO 24:5 He kaha te tangata whakaaro nui; āe, e whakanuia ana e te tangata mōhio te kaha.
PRO 24:6 Nā, kia pai te ngārahu ina anga koe ki te whawhai; kei te tokomaha hoki o ngā kaiwhakatakoto whakaaro te ora.
PRO 24:7 He tiketike rawa te whakaaro nui mō te wairangi; e kore e kuihi tōna māngai i te kūwaha.
PRO 24:8 Ko te tangata e whakaaro ana ki te kino, ka kīia he whanokē.
PRO 24:9 He hara te whakaaro wairangi; he mea whakarihariha anō ki te tangata te tangata whakahī.
PRO 24:10 Ki te ngoikore koe i te rā o te hē, he iti tōu kaha.
PRO 24:11 Whakaorangia te hunga e kawea atu ana ki te mate, ā, puritia mai hoki e koe te hunga e meatia ana kia whakamatea.
PRO 24:12 Ki te mea koe, “Nanā, kīhai tēnei i mōhiotia e mātou”; kāhore ianei te kaipāuna ngākau i te whakaaro ki tērā? Ā, ko te kaitiaki o tōu wairua, kāhore rānei ia e mōhio, e kore rānei e hōmai e ia ki te tangata kia rite ki tāna mahi?
PRO 24:13 Kainga, e tāku tama, te honi, he pai hoki; me te honikoma, he mea reka hoki ki tōu māngai.
PRO 24:14 Ka mōhio ai koe ki te whakaaro nui, he mea ki tōu wairua; ki te kitea e koe, he tukunga iho anō tōna, e kore hoki tāu i tūmanako ai e hātepea.
PRO 24:15 Kaua, e te tangata kino, e whanga ki te nohoanga o te tangata tika; kei tūkino koe ki tōna takotoranga.
PRO 24:16 E hinga ana hoki te tangata tika, e whitu hinganga, ka ara ake anō; ka whakatakā ia te hunga kino e te hē.
PRO 24:17 Kaua e harakoa ki te hinga tōu hoariri, kaua hoki tōu ngākau e hari ina taka ia;
PRO 24:18 kei kite a Ihowā, ā, ka hē ki tāna titiro, ā, ka tahuri atu tōna riri i a ia.
PRO 24:19 Kei mamae koe, he mea mō ngā kaimahi i te kino, kei hae hoki ki te hunga kino.
PRO 24:20 Kāhore hoki he mutunga pai ki te tangata kino; ka keto hoki te rama a te hunga kino.
PRO 24:21 E tāku tama, e wehi ki a Ihowā, ki te kīngi hoki; ā, kaua e whakauru noa atu ki te hunga e mea ana ki te whakaputa kē.
PRO 24:22 Nō te mea ka puta tata te aituā mō rātou; ā, ko wai ka mōhio ki te whakangaromanga ō rāua tokorua?
PRO 24:23 He whakatauki anō hoki ēnei nā te hunga whakaaro nui: Ehara i te mea pai kia whakaaro ki te kanohi tāngata ina whakawā.
PRO 24:24 Ko te tangata e mea ana ki te tangata kino, “He tika koe,” ka kanga ngā iwi ki a ia, ka whakarihariha ngā tauiwi ki a ia.
PRO 24:25 Otiia ka koa ngā ngākau o te hunga e rīria ai tōna hē, ka tau iho anō hoki te manaaki pai ki runga ki a rātou.
PRO 24:26 Ka kihia e ia ngā ngutu e whakahoki ana i ngā kupu tika.
PRO 24:27 Meinga kia takoto pai tāu mahi i waho, kia rite hoki hei meatanga māu i te māra; muri iho ka hanga i tōu whare.
PRO 24:28 Kaua koe e tū hei kaiwhakaatu hē mō tōu hoa, i te mea kāhore he take; ā, kaua e tinihanga ki ōu ngutu.
PRO 24:29 Kaua e kī, “Ka meatia anō e ahau ki a ia tāna i mea ai ki ahau; ka rite ki tā te tangata mahi tāku e whakahoki ai ki a ia.”
PRO 24:30 I haere ahau i te taha o te māra a te māngere, i te taha hoki o te māra wāina a te tangata kāhore ōna mahara;
PRO 24:31 nā, kua tupuria katoatia e te tātarāmoa, kapi tonu te mata o te māra i te ongaonga, ā, ko tō reira taiepa kōhatu kua oti te wāhi.
PRO 24:32 Kātahi ahau ka titiro, ka āta whakaaroaro; ka kite ahau, ā, ka hopu mai hei ako mōku.
PRO 24:33 Kia iti ake nei te wāhi e parangia ai, kia iti ake nei te moe, kia iti ake te kōtuituitanga o ngā ringa ka moe ai.
PRO 24:34 Ka pērā te haerenga mai o tōu mūhore ānō he kaipāhua; o tōu rawakore hoki ānō he tangata mau patu.
PRO 25:1 He whakatauki anō ēnei nā Horomona, he mea tuhi e ngā tāngata a Hetekia kīngi o Hūrā.
PRO 25:2 Ko tō te Atua whakakorōria, he huna mea; ko tō ngā kīngi whakakorōria he rapu mea.
PRO 25:3 Ko te rangi mō te tiketike, ko te whenua mō te hōhonu, ā, ko te ngākau o ngā kīngi, tē taea te rapu.
PRO 25:4 Tahia atu te para i te hiriwa, ā, ka puta mai he oko mā te kaitahi para;
PRO 25:5 tangohia atu te tangata kino i te aroaro o te kīngi, ā, ka ū tōna torōna i runga i te tika.
PRO 25:6 Kei whakaputa i a koe ki mua i te aroaro o te kīngi, kei tū hoki ki te wāhi o ngā metararahi.
PRO 25:7 He pai kē hoki kia kīia mai ki a koe, “Haere mai ki runga nei,” i te mea kia whakahokia iho koe ki raro i te aroaro o te rangatira. I kitea nei e ōu kanohi
PRO 25:8 kei hohoro te haere ki te ngangare, kei kore e kitea e koe tāu e mea ai i tōna mutunga iho, ina meinga koe e tōu hoa kia whakamā.
PRO 25:9 Tohea tāu tohe ki tōu hoa tonu, ā, kaua e whākina te mea huna a tētahi:
PRO 25:10 kei kohukohutia koe e te tangata i rongo, ā, kore ake tōu ingoa kino e tahuri atu.
PRO 25:11 He kupu i tika te kōrero, ko tōna rite kei ngā āporo kōura i roto i ngā kete hiriwa.
PRO 25:12 He pērā i te whakakai kōura, i te whakapaipai kōura parakore koia anō te ako a te whakaaro nui ki te taringa rongo.
PRO 25:13 Rite tonu ki te mātao o te hukarere i te kotinga wīti te karere pono ki ōna kaingare; ka ora hoki i a ia te ngākau o ōna ariki.
PRO 25:14 He pērā i ngā kapua me te hau uakore, koia anō te rite o te tangata e whakamanamana ana ki āna hākari horihori.
PRO 25:15 Mā te roa e whakamanawanui ana ka whakaae mai ai te kīngi, ā, mā te arero ngāwari ka mangungu ai te wheua.
PRO 25:16 Kua kitea e koe he honi, kainga ko te wāhi e mākona ai koe; kei kī rawa koe i taua mea, ka ruakina e koe.
PRO 25:17 Kia takitahi tōu waewae ki te whare o tōu hoa; kei hōhā ia ki a koe, ā, ka kino ki a koe.
PRO 25:18 Ko te tangata e whakaatu teka ana mō tōna hoa, he patu ia, he hoari, ā, he pere koi.
PRO 25:19 Ko te whakawhirinaki ki te tangata tinihanga i te wā o te raru, e rite ana ki te niho whati, ki te waewae kua takoki.
PRO 25:20 Ko te tangata e waiata ana ki te ngākau pōuri, e rite ana ki te tangata e whakarere ana i te kākahu i te rangi māeke, ki te winika hoki i runga i te hōura.
PRO 25:21 Ki te matekai tōu hoariri whāngaia ki te taro; ki te matewai whakainumia ki te wai;
PRO 25:22 ka pūrangatia hoki e koe he waro kāpura ki tōna māhunga, ā, ka utua tāu e Ihowā.
PRO 25:23 E mauria ana mai e te hauraro he ua; e pērātia ana hoki e te arero ngautuarā, he kanohi pukuriri.
PRO 25:24 He pai kē te noho i te kokonga o te tuanui, i te noho tahi me te wahine ngangare i roto i te whare māhorahora.
PRO 25:25 He rongo pai nō te whenua tawhiti, tōna rite kei ngā wai mātao ki te wairua matewai.
PRO 25:26 Me te manawa-whenua i takatakahia, me te puna i whakaparuparutia, koia anō te tangata tika e hinga ana i te aroaro o te tangata kino.
PRO 25:27 Ehara i te mea pai te kai nui i te honi; waihoki ko ā te tangata rapu i tō rātou ake korōria ehara i te korōria.
PRO 25:28 Ko te tangata e kore nei e pēhi i tōna wairua, e rite ana ki te pā kua pakaru, kāhore ōna taiepa.
PRO 26:1 He pērā i te hukarere i te raumati, i te ua hoki i te kotinga wīti, te kore e tau o te hōnore mō te wairangi.
PRO 26:2 He pērā i te manu e rererere noa ana, i te warou i ōna rerenga te kanga pokanoa; e kore e whakatau.
PRO 26:3 He whiu mō te hōiho, he paraire mō te kāihe, ā, he rākau mō te tuarā o ngā wairangi.
PRO 26:4 Kei rite ki tōna whakaarokore tāu whakautu ki te wairangi, kei rite hoki a koe nā ki a ia.
PRO 26:5 Kia rite ki tōna whakaarokore tāu whakautu ki te wairangi, kei mea ia he whakaaro nui ia.
PRO 26:6 Ko te tangata e tuku kōrero ana mā te ringa o te wairangi, e tapahi ana i ōna waewae anō, e inumia ana hoki te hē.
PRO 26:7 E tautau noa ana ngā waewae o te kopa; he pērā hoki te whakatauki i te māngai o te wairangi.
PRO 26:8 Ko te takai mea whakapaipai i roto i te pūranga kōhatu, ko tōna rite kei te tangata e whakakorōria ana i te wairangi.
PRO 26:9 E rite ana ki te tātarāmoa e wero nei i te ringa o te haurangi, koia anō te whakatauki i te māngai o ngā wairangi.
PRO 26:10 Ka rite ki te kaikōpere i tū ai te katoa, te tangata e utu ana i te wairangi me te tangata hoki e utu ana i ngā tira haere.
PRO 26:11 Ka rite ki te kurī e hoki nei ki tōna ruaki, te wairangi e tuarua ana i tōna pōauau.
PRO 26:12 Ka kite koe i te tangata e mea ana ki a ia he whakaaro nui? Ki tā te whakaaro tērā e rahi ake tā te wairangi i tāna.
PRO 26:13 E kī ana te māngere, “He raiona kei te ara; he raiona kei ngā waharoa.”
PRO 26:14 He pērā i te tatau e tāhurihuri rā i runga i ōna īnihi, koia anō te māngere i runga i tōna moenga.
PRO 26:15 E kuhua ana e te māngere tōna ringa ki te rīhi; he mahi ngenge rawa ki a ia te whakahoki mai ki tōna māngai.
PRO 26:16 He nui kē ake te whakaaro nui o te māngere, ki tāna nei whakaaro, i tō ngā tāngata tokowhitu e whakaatu ana i te tikanga.
PRO 26:17 Ko te tangata e haere atu ana, e pokanoa ana ki te whawhai ehara nei i a ia, ko tōna rite kei te tangata e hopu ana i te kurī ki ōna taringa.
PRO 26:18 Rite tonu ki te haurangi e makamaka ana i ngā mea mura, i ngā pere, i te mate,
PRO 26:19 te tangata e tinihanga ana ki tōna hoa, e mea ana, “He teka ianei he tākaro tāku?”
PRO 26:20 Ki te kāhore he wahie, ka mate te ahi; ki te kore hoki he tangata kawekawe kōrero, ka mutu te ngangare.
PRO 26:21 He waro ki ngā ngārahu wera, he wahie ki te ahi; he pērā te tangata totohe ki te tahu i te ngangare.
PRO 26:22 He rite ngā kupu a te kaikawekawe kōrero ki te maramara reka, tae tonu iho ki ngā wāhi o roto rawa o te kōpū.
PRO 26:23 He ngutu pukā me te ngākau kino, ko te rite kei te oko oneone i whakakikoruatia ki te para hiriwa.
PRO 26:24 Ko te tangata mauāhara e whakaware ana ki ōna ngutu, otiia e rongoātia ana e ia te tinihanga ki roto ki a ia;
PRO 26:25 ki te pai tōna reo, kaua e whakapono ki a ia; e whitu hoki ngā mea whakarihariha kei roto i tōna ngākau.
PRO 26:26 Ahakoa hīpoki tōna mauāhara i a ia ki te tinihanga, ka whakakitea nuitia tōna kino ki te aroaro o te whakaminenga.
PRO 26:27 Ko te tangata e keri ana i te rua, ka taka anō ki roto; ā, ko te tangata e huri ana i te kōhatu, ka hoki mai anō ki runga ki a ia.
PRO 26:28 E kino ana te arero teka ki āna i kuru ai, ā, ko tā te māngai whakapati, he mahi kia ngaro.
PRO 27:1 Kei whakamanamana koe ki te rā āpōpō; kāhore hoki koe e mōhio ko te aha e puta mai i roto i te rā.
PRO 27:2 Mā tētahi atu tangata te whakamoemiti mōu, kaua mā tōu māngai ake; mā te tangata kē, kaua mā ōu ngutu ake.
PRO 27:3 He taimaha te kōhatu, he taimaha anō te kirikiri; he taimaha atu ia i ā rāua tahi te pukuriri o te wairangi.
PRO 27:4 He mea nanakia te riri, he rūtaki te āritarita; ko wai ia e tū i mua i te hae?
PRO 27:5 He pai kē te riri matanui i te aroha huna.
PRO 27:6 Ko ngā patu a te hoa aroha he mea nā te pono; ko ngā kihi ia a te hoariri auau rawa.
PRO 27:7 E ngaruru ana te wairua mākona ki te honikoma; engari ki te wairua hiakai, reka kau ngā mea kawa katoa.
PRO 27:8 Rite tonu ki te manu e ātiutiu noa atu ana i tōna kōhanga te tangata e ātiutiu noa atu ana i tōna wāhi.
PRO 27:9 He whakahari ngākau te hinu me te whakakakara; he pērā anō ngā āhuareka o tō te tangata hoa aroha i ahu mai i ngā tikanga mateoha i whakatakotoria e tōna ngākau.
PRO 27:10 Ko tōu hoa aroha ake, ā, ko te hoa hoki o tōu pāpā, kaua e whakarērea; kaua hoki e haere ki te whare o tōu tuakana i te rā e mate ai koe. He pai kē hoki te hoa e tata ana i te tuakana i tawhiti.
PRO 27:11 E tāku tama, kia whakaaro nui, kia koa ai tōku ngākau, kia whakahoki kupu ai hoki ahau ki te hunga e tāwai ana ki ahau.
PRO 27:12 E kite atu ana te tangata tūpato i te hē, ā, ka huna i a ia; tēnā ko te kūware, haere tonu atu, mamae tonu atu.
PRO 27:13 Tangohia te kākahu o te kaiwhakakapi mō te tangata kē; tōna taunaha anō hoki mō tā te wahine kē.
PRO 27:14 Ko te tangata e maranga ana i te atatū, he nui hoki tōna reo ki te manaaki i tōna hoa, ka kīia tāna he kanga.
PRO 27:15 He māturuturu e pūputu tonu ana i te rā nui te ua, he wahine ngangare, rite tonu rāua;
PRO 27:16 ko te tangata e mea ana ki te pēhi i a ia, e mea ana ki te pēhi i te hau, ā, ka tūtaki tōna ringa matau ki te hinu.
PRO 27:17 Ko te rino hei whakakoi mō te rino; waihoki ko te tangata anō hei whakakoi i te mata o tōna hoa.
PRO 27:18 Ko te kaitiaki o te piki, ka kai i ōna hua; ka whakahōnoretia te tangata e whakaaro ana ki tōna rangatira.
PRO 27:19 He pērā i te wai, tiro atu, tiro mai he kanohi, ka pēnā anō tō te tangata ngākau ki te tangata.
PRO 27:20 Ko te rēinga, ko te whakangaromanga, e kore e mākona; e kore anō hoki e mākona ngā kanohi o te tangata.
PRO 27:21 Ko te oko tahu para mō te hiriwa, ko te oumu mō te kōura; ā, ko te whakanui i a ia, hei whakamātautau mō te tangata.
PRO 27:22 Ahakoa i tukua e koe te wairangi ki te tuki i roto i te kumete i waenga i ngā wīti pēpē, e kore tōna whakaarokore e riro.
PRO 27:23 Kia anga nui koa kia mōhio ki te āhua o āu hipi, ā, kia pai te tiaki i āu kāhui kau;
PRO 27:24 e kore hoki te taonga e mau tonu; e mau ianei te karauna ki ngā whakatupuranga katoa?
PRO 27:25 Kua whāiti te hei, e kitea ana te tupu hou, ā, e kohikohia ana ngā otaota o ngā maunga.
PRO 27:26 Hei mea kākahu mōu ngā reme, ā, ko ngā koati hei utu mō te māra.
PRO 27:27 Ā tērā te waiū koati, he nui noa atu hei kai māu, hei kai hoki mā tōu whare, hei oranga anō hoki mō āu kōtiro.
PRO 28:1 E rere ana te hunga kino i te mea kāhore he kaiwhai; ko te tangata tika anō ia, ānō he raiona te māia.
PRO 28:2 He hē nō tētahi whenua i tokomaha ai ōna rangatira; nā, kia ai he tangata e mahara ana, e mātau ana, ka mau roa ai tōna āhua.
PRO 28:3 Ko te tangata rawakore e tūkino ana i ngā ware, ko tōna rite kei te ua tā e kore ai te kai.
PRO 28:4 Ko te hunga e whakarere ana i te ture, he whakamoemiti tā rātou ki te tangata kino; ko tā ngā kaipupuri ia o te ture he ngangare ki a rātou.
PRO 28:5 E kore te hunga kino e mōhio ki te whakawā: ko te hunga ia e rapu ana i a Ihowā, ka mōhio rātou ki ngā mea katoa.
PRO 28:6 He pai kē te rawakore e haere ana i runga i tōna tapatahi, i te tangata he parori kē ōna ara, ahakoa he whai taonga ia.
PRO 28:7 Ko te tangata e pupuri ana i te ture, he tamaiti mōhio ia; engari ko te tangata whakahoa ki te hunga kakai, ka whakamā tōna pāpā i a ia.
PRO 28:8 Ko te tangata e whakanui ana i ōna rawa ki te moni whakatupu, ki te whakapiki utu, e kohia ana e ia ērā mā te tangata e atawhaitia ai te rawakore.
PRO 28:9 Ko te tangata e tahuri kē ana tōna taringa, ā, kāhore e rongo ki te ture, ko tāna īnoi nei ānō he mea whakarihariha.
PRO 28:10 Ko te tangata i meinga ai te hunga tika, kia kotiti kē ki te ara hē, ka taka a ia anō ki tāna ake poka; ka whiwhi ia te hunga ngākau tapatahi ki te pai.
PRO 28:11 Ki te whakaaro a te tangata taonga he nui tōna whakaaro mōhio; otiia e rapua ana tāna e te rawakore whai whakaaro.
PRO 28:12 Nui atu te ātaahua, ina koa te hunga tika; engari ki te ara te hunga kino, ka huna ngā tāngata i a rātou.
PRO 28:13 Ko te tangata e hīpoki ana i ōna hē, e kore tāna e kake; ko te tangata ia e whāki ana, ā, e whakarere ana, ka tohungia.
PRO 28:14 Ka hari te tangata e wehi tonu ana; ko te tangata ia e whakapakeke ana i tōna ngākau, ka taka ki te kino.
PRO 28:15 E rite ana ki te raiona e hāmama ana, ki te pea e kōpikopiko ana, te tangata kino e kīngi ana ki te iwi rawakore.
PRO 28:16 Ko te rangatira kore whakaaro he nui anō tāna tūkino; ko te tangata ia e kino ana ki te apo ka roa ōna rā.
PRO 28:17 Ko te tangata e waha ana i te toto o te tangata, ka rere ia ki roto ki te rua; kaua tētahi e pupuri i a ia.
PRO 28:18 Ko te tangata he tapatahi nei te haere, ka ora; ko te tangata ia he parori kē ōna ara, hinga tonu iho.
PRO 28:19 Ko te tangata e ngaki ana i tōna oneone, ka mākona i te taro; ko te tangata ia e whai ana i te hunga wairangi, ka whiwhi nui ki te rawakore.
PRO 28:20 Ko te tangata pono, ka nui ngā manaaki mōna; ko te tangata ia e hīkaka ana ki te mea taonga, e kore ia e kore te whiwhi i te hē.
PRO 28:21 Ko te whakapai kanohi ehara i te mea pai – ehara anō hoki i te mea pai kia hē te tangata mō te kongakonga taro.
PRO 28:22 Ko te tangata he kino tōna kanohi e tākare tonu ana ki te taonga; kāhore hoki ia e whakaaro ka tae mai te kore o te rawa ki a ia.
PRO 28:23 Ko te tangata i rīria ai te hē o tētahi, ka nui atu te manako ki a ia i muri iho, i te manako ki te tangata i whakapati nei tōna arero.
PRO 28:24 Ko te tangata e pāhua ana i tōna pāpā, i tōna whaea, ā, e kī ana, “Ehara i te hē,” he hoa ia nō te kaiwhakangaro.
PRO 28:25 Ko tā te tangata ngākau apo he whakapātari pakanga; ko te tangata ia e okioki ana ki a Ihowā ka tetere.
PRO 28:26 He kūware te tangata e whakawhirinaki ana ki tōna ake ngākau; ko te tangata ia e haere ana i runga i te whakaaro nui, ka mawhiti.
PRO 28:27 Ko te tangata e hoatu ana ki te rawakore, e kore ia e hapa; ko te tangata ia e kaupare ana i ōna kanohi, ka maha ngā kanga mōna.
PRO 28:28 Ka ara te hunga kino, ka huna ngā tāngata i a rātou; nā, ki te ngaro rātou, ka tupu te hunga tika.
PRO 29:1 Ko te tangata he maha nei ngā riringa i tōna hē, ā, ka whakapakeke i tōna kakī ka whatia ohoreretia ia – tē taea te rongoā.
PRO 29:2 Ka whakanuia te hunga tika, ka koa te iwi; ka kīngi te tangata kino, ka auē te iwi.
PRO 29:3 Ko te tangata e matenui ana ki te whakaaro nui e whakahari ana i tōna pāpā; ko te tangata ia e piri ana ki ngā wāhine kairau, he maumau taonga tāna.
PRO 29:4 Mā te whakawā a te kīngi e mau ai te whenua; ka whakatakā ia e te tangata e tango ana i ngā mea hōmai noa.
PRO 29:5 Ko te tangata e whakapati ana ki tōna hoa, e whakatakoto kupenga ana mō ōna waewae.
PRO 29:6 He rore kei roto i te hē o te tangata kino; ko te tangata tika ia he waiata tāna, he koa.
PRO 29:7 E mahara ana te tangata tika ki te take a te rawakore; kāhore o te tangata kino whakaaro kia mōhiotia e ia.
PRO 29:8 Mā ngā tāngata whakahī e tahu te pā kia mura; ko tā te hunga whakaaro nui ia he whakatahuri atu i te riri.
PRO 29:9 Ki te totohe te tangata whakaaro nui ki te tangata wairangi, ahakoa riri ia, kata rānei, kāhore he tānga.
PRO 29:10 E mauāhara ana te tangata whakaheke toto ki te tangata i te ngākau tapatahi; tēnā ko te hunga tika, ka whai rātou kia whakaorangia ia.
PRO 29:11 E puakina ana e te wairangi tōna riri katoa ki waho; e puritia mai ana ia e te tangata whakaaro nui, e pēhia ana.
PRO 29:12 Ki te whakarongo te rangatira ki te teka, he kino katoa āna tāngata.
PRO 29:13 E tūtaki ana te rawakore rāua ko te kaitūkino ki a rāua; ko Ihowā te kaiwhakamārama o ngā kanohi ō rāua tokorua.
PRO 29:14 Ko te kīngi e pono ana tāna whakawā mō ngā rawakore, ka whakapūmautia tōna torōna ake ake.
PRO 29:15 Ko te whiu, ko te riri i te hē, he mea hōmai ērā i te whakaaro nui; tēnā ko te tamaiti mahue noa, ka whakamā a ia tōna whaea.
PRO 29:16 Ka tokomaha te hunga kino, ka nui te hē; ka kite ia te hunga tika i tō rātou hinganga.
PRO 29:17 Pākia tāu tama, ā, ka whai okiokinga koe i a ia; āe rā, he āhuareka tāna e hōmai ai ki tōu wairua.
PRO 29:18 Ki te kāhore he whakakitenga, ka kore te iwi e tūpato; ko te kaipupuri ia i te ture, ka hari ia.
PRO 29:19 Ehara te kupu i te papaki mō te pononga; ahakoa hoki ia mātau, e kore ia e rongo.
PRO 29:20 Ka kite rānei koe i te tangata kaikā ki te kōrero? Engari, te wairangi ka tōtika ake i a ia.
PRO 29:21 Ko te tangata e penapena ana i tāna pononga mai o te tamarikitanga, ka waiho ia e ia i te mutunga hei tama tupu.
PRO 29:22 He whakaoho whawhai tā te tangata pukuriri; he nui rawa hoki te hē o te tangata āritarita.
PRO 29:23 Ka whakaititia iho te tangata e tōna whakapehapeha; ka whai hōnore ia te tangata ngākau pāpaku.
PRO 29:24 Ko te tangata e whakauru ana ki tā te tāhae, e kino ana ki tōna ake wairua; e rongo ana ia i te kanga, kāhore e kīkī.
PRO 29:25 He rore e hōmai ana e te wehi ki te tangata; ko te tangata ia e whakawhirinaki ana ki a Ihowā ka mawhiti.
PRO 29:26 He tokomaha e whai ana kia paingia e te rangatira; otiia i ahu mai i a Ihowā te whakawā mō te tangata.
PRO 29:27 He mea whakarihariha ki te hunga tika te tangata whakahaere hē; ā, he mea whakarihariha hoki ki te tangata kino te tangata he tika tōna ara.
PRO 30:1 Ko ngā kupu a Akuru tama a Iakehe; ko te poropititanga. I kōrero taua tangata ki a Itiere, ki a Itiere rāua ko Ukara:
PRO 30:2 He pono ko ahau te mea pōauau rawa o ngā tāngata, kāhore hoki he mātauranga tangata i roto i ahau.
PRO 30:3 Kīhai hoki ahau i whakaakona ki te whakaaro nui, kīhai anō i mōhio ki te Mea Tapu.
PRO 30:4 Ko wai kua piki atu ki te rangi, ā, heke mai ai anō? Ko wai kua pūpū i te hau ki roto ki ōna ringa? Nā wai i takai ngā wai ki roto ki tōna kākahu? Nā wai i whakapūmau ngā pito katoa o te whenua? Ko wai tōna ingoa, ā, ko wai hoki te ingoa o tāna tama? Ki te mōhiotia e koe!
PRO 30:5 Ko ngā kupu katoa a te Atua he mea whakamātau; he whakangungu rākau ia ki te hunga katoa e whakawhirinaki ana ki a ia.
PRO 30:6 Kaua e tāpiritia ētahi kupu ki āna, kei rīria e ia tōu hē, ā, ka kitea koe he tangata kōrero teka.
PRO 30:7 E rua ngā mea kua īnoia e ahau i a koe; kaua ēnā e kaiponuhia i ahau i mua i tōku matenga:
PRO 30:8 Whakamataratia atu i ahau te horihori me te kōrero teka; kaua e hōmai te rawakore ki ahau, te taonga rānei; whāngaia ahau ki te kai e rite ana māku.
PRO 30:9 Kei mākona ahau, ā, ka whakakāhore ki a koe, ka mea, “Ko wai a Ihowā?” Kei rawakore rānei ahau, ā, ka whānako, ka whakahua noa hoki i te ingoa o tōku Atua.
PRO 30:10 Kaua e kōrerotia te pononga ki tōna ariki, kei kanga ia i a koe, ā, ko koe e hē.
PRO 30:11 Tērā te whakatupuranga, he kanga tā rātou i tō rātou pāpā, kāhore hoki e manaaki i tō rātou whaea.
PRO 30:12 Tērā te whakatupuranga, he mā ki tā rātou nā titiro, otirā kāhore anō kia horoia atu tō rātou paru.
PRO 30:13 Tērā te whakatupuranga, nā, te whakakake o ō rātou kanohi. Kua whakarewaina ake hoki ō rātou kamo!
PRO 30:14 Tērā te whakatupuranga, ko ō rātou niho ānō he hoari, ko ō rātou niho pūrākau ānō he māripi, hei horo i te hunga iti i runga i te whenua, i ngā rawakore hoki i roto i ngā tāngata.
PRO 30:15 E rua ngā tamāhine a te ngata, ko tā rāua karanga, “Hōmai, hōmai.” E toru ngā mea e kore rawa e mākona, āe rā, e whā ngā mea e kore e kī, “Kāti”:
PRO 30:16 ko te rua tūpāpaku; ko te kōpū pakoko; ko te whenua kīhai i pukuwaitia, ā, ko te ahi e kore nei e kī, “Kāti!”
PRO 30:17 Ko te kanohi e whakahī ana ki te pāpā, e whakahāwea ana ki te whakarongo ki tōna whaea, mā ngā raweni o te awaawa ia e tīkaro, ā, mā ngā pī ēkara e kai.
PRO 30:18 E toru ngā mea he whakamīharo rawa, e kore e taea e ahau, āe rā, e whā kāhore e mōhiotia e ahau:
PRO 30:19 ko te huarahi o te ēkara i te rangi; ko te huarahi o te nākahi i runga i te kāmaka; ko te huarahi o te kaipuke i waenga moana; ā, ko te huarahi o te tangata ki te kōtiro.
PRO 30:20 He pērā anō te huarahi o te wahine pūremu: ka kai ia, ā, ka horoi i tōna māngai, ā, ka kī, “Kāhore āku mahi hē.”
PRO 30:21 E toru ngā mea e korikori ai te whenua; ā, e whā, he mea e kore e manawanuitia e ia:
PRO 30:22 ko te pononga ina whakakīngitia ia; ko te wairangi hoki ina mākona i te taro;
PRO 30:23 ko te wahine whakarihariha ina whiwhi i te tāne; ā, ko te pononga wahine ina tuku iho māna ngā mea a tōna rangatira.
PRO 30:24 E whā ngā mea ririki i runga i te whenua, he nui noa atu ia ngā whakaaro:
PRO 30:25 ko ngā pōpokorua ehara i te iwi kaha, heoi e mea ana i te kai mā rātou i te raumati;
PRO 30:26 ko ngā koni, he iwi ngoikore, heoi e hanga ana i ō rātou whare ki te kāmaka;
PRO 30:27 ko ngā māwhitiwhiti, kāhore ō rātou kīngi, heoi haere rōpū ana rātou katoa;
PRO 30:28 ko te mokomoko, ko ōna peke hei pupuri māna; otiia kei roto ia i ngā whare kīngi.
PRO 30:29 E toru ngā mea, he tau tā rātou hīkoi, āe rā, e whā he huatau ki te haere:
PRO 30:30 ko te raiona, ko te mea kaha rawa o ngā kararehe, e kore nei e tahuri mai i te aroaro o tētahi;
PRO 30:31 ko te kurī horo; ko te koati toa anō hoki; ā, ko te kīngi, kāhore nei tētahi e maranga ake ki a ia.
PRO 30:32 Ki te mea he mahi kūware tau i a koe i whakaneke ake ai i a koe, ki te mea rānei i whakaaro kino koe, kōpania tōu ringa ki tōu māngai.
PRO 30:33 He pono hoki ki te hurihia te waiū ka puta mai he pata, ā, ki te kōwiria te ihu ka puta mai he toto; waihoki ki te ākina te riri ka puta he whawhai.
PRO 31:1 Ko ngā kupu a Kīngi Remuera; ko te poropititanga i whakaakona ai ia e tōna whaea:
PRO 31:2 He aha, e tāku tama? He aha, e te tama a tōku kōpū? Ā, he aha, e te tama a āku kupu taurangi?
PRO 31:3 Kaua e hoatu tōu kaha ki ngā wāhine, ōu ara hoki ki te mea whakangaro o ngā kīngi.
PRO 31:4 Ehara mā ngā kīngi, e Remuera, ehara mā ngā kīngi te inu wāina; ehara hoki mā ngā rangatira te mea, “Kei hea he wai kaha?”
PRO 31:5 Kei inu rātou, ā, ka wareware ki te ture, ā, ka whakapeau kē i te whakawā o te tangata e tūkinotia ana.
PRO 31:6 Hoatu he wai kaha mā te tangata e tata ana te marere, he wāina hoki ki ngā wairua pōuri;
PRO 31:7 tukua ia kia inu, kia wareware ai ki tōna rawakore, ā, kore ake he mahara ki ōna mate.
PRO 31:8 Kia puaki tōu māngai mō te wahangū, i te whakawākanga o te hunga katoa kua waiho mō te mate.
PRO 31:9 Kia puaki tōu māngai, whakaritea te whakawā i runga i te tika, tohea te tohe a te ware, a te rawakore.
PRO 31:10 Ko wai e kite i te wahine e ū ana tōna pai? Ko tōna utu hoki kei runga noa atu i tō ngā rupi.
PRO 31:11 Ka whakapono te ngākau o tāna tāne ki a ia, ā, kāhore ōna hapanga i te taonga.
PRO 31:12 He pai tāna e mea ai ki a ia, kāhore hoki he kino, i ngā rā katoa e ora ai ia.
PRO 31:13 E kimi ana ia i te huruhuru hipi, i te muka, ā, ka ngākau nui te mahi a ōna ringa.
PRO 31:14 Ko tōna rite kei ngā kaipuke o ngā kaihokohoko; e mauria mai ana e ia tāna kai i tawhiti.
PRO 31:15 E maranga ana hoki ia i te mea e pō tonu ana, ā, hoatu ana e ia he kai mā tōna whare, he mahi hoki e rite ana mā āna kōtiro.
PRO 31:16 E whakaaroaro ana ia ki tētahi māra, ā, ka hokona e ia; whakatōkia ana e ia he māra wāina, he hua nā ōna ringa.
PRO 31:17 E whītiki ana ia i tōna hope ki te kaha, e mea ana i ōna tākakau kia pakari.
PRO 31:18 Ka kite ia he pai tāna i hokohoko ai; e kore tāna rama e mate i te pō.
PRO 31:19 Ka totoro atu ōna ringa ki te mea tākai miro, ka pupuri ōna ringa ki te pou muka.
PRO 31:20 Ka wherahia tōna ringa ki te ware; āe rā, ka totoro atu ōna ringa ki te rawakore.
PRO 31:21 E kore ia e wehi i te hukarere mō tōna whare; nō te mea kua kākahuria tōna whare katoa ki te ngangana.
PRO 31:22 Oti ake i a ia te whatuwhatu he whāriki mōna; he rīnena pai, he pāpura ōna kākahu.
PRO 31:23 E mōhiotia ana tāna tāne i ngā kūwaha, ina noho tahi ia ki ngā kaumātua o te whenua.
PRO 31:24 E hangā ana e ia he rīnena pai, ā, hokona atu ana; e hoatu ana e ia he whītiki ki ngā kaihoko.
PRO 31:25 He kaha, he hōnore ōna kākahu; ā, e kata ana ia ki ngā rā ō muri atu.
PRO 31:26 He nui ōna whakaaro ina puaki tōna māngai; kei tōna arero te ture o te atawhai.
PRO 31:27 Ka āta tirohia e ia ngā ara o tōna whare, e kore anō ia e kai i te taro o te māngere.
PRO 31:28 Ka whakatika āna tamariki, ā, he kupu manaaki tā rātou mōna; tāna tāne hoki, ka whakamoemiti anō ia ki a ia, ka mea:
PRO 31:29 “He tokomaha ngā tamāhine i ū te pai o tā rātou mahi, otiia, hira ake tāu i ā rātou katoa.”
PRO 31:30 He mea teka noa te manako, he mea horihori te ātaahua; tēnā ko te wahine e wehi ana i a Ihowā, ko ia e whakamoemititia.
PRO 31:31 Hoatu ki a ia o ngā hua o ōna ringa; ā, mā āna mahi ia e whakamoemiti i ngā kūwaha.
ECC 1:1 Ko ngā kupu a te Kaikauwhau, arā a te tama a Rāwiri, i kīngi nei ki Hiruhārama:
ECC 1:2 “He tino horihori rawa,” e ai tā te Kaikauwhau, “he tino horihori rawa; he horihori katoa!”
ECC 1:3 He aha te pai ki te tangata o tōna māuiui katoa e māuiui ai ia i raro i te rā?
ECC 1:4 Ko tēnei whakatupuranga e haere atu ana, ko tērā whakatupuranga e haere mai ana; ko te whenua ia, mau tonu.
ECC 1:5 E whiti ana hoki te rā, e heke atu ana te rā, hohoro tonu atu ki tōna wāhi i whiti mai ai.
ECC 1:6 E anga ana te hau ki te tonga, nā, ka taka ki te raki; he hanga takataka tonu tāna i tōna ara, ā, ka hoki mai anō te hau ki ōna takatakanga.
ECC 1:7 E rere ana ngā awa katoa ki te moana, heoi kāhore e kī te moana; ko te wāhi i rere mai ai ngā awa, ka hoki atu anō rātou ki reira.
ECC 1:8 Māuiui rawa ngā mea katoa, e kore e taea e te tangata te kōrero; e kore te kanohi e ngata i te mātakitaki, e kore te taringa e kī i te whakarongo.
ECC 1:9 Ko tō mua mea koia anō hei mea āianei, ā, ko te mea i mahia i mua ka mahia anō āianei; kāhore hoki he mea hou i raro i te rā.
ECC 1:10 Tērā anō rānei he mea e kī ai tētahi, “Titiro, he mea hou tēnei”? He mea ia nō ngā wā ō mua, nō ērā i mua atu i a tātou.
ECC 1:11 Kāhore he mahara ki ngā whakatupuranga o mua; kāhore hoki e maharatia ngā whakatupuranga e haere mai ā muri nei e te hunga ō muri atu.
ECC 1:12 Ko ahau, ko te Kaikauwhau, te kīngi o Īharaira i Hiruhārama.
ECC 1:13 Nā, ka whakaangahia e ahau tōku ngākau ki te whakaaro nui hei rapu, hei kimi i ngā mea katoa e mahia ana i raro i te rangi. Nā te Atua tēnei whakararuraru kino i hōmai ki ngā tama a te tangata hei whakararu i a rātou.
ECC 1:14 Kua kite ahau i ngā mea katoa e mahia ana i raro i te rā; nanā, he horihori katoa, he whai hoki i te hau.
ECC 1:15 Ko te mea piko e kore e taea te whakahāngai; ko te mea koha e kore e taea te tatau.
ECC 1:16 I kōrerorero ahau ki tōku ngākau, i mea, “Nanā, kua whiwhi rawa ahau i te whakaaro nui ki runga ake i ō te hunga katoa i mua atu i ahau i Hiruhārama; āe rā, he maha ngā mea kua kitea e tōku ngākau o te whakaaro nui, o te mātauranga.”
ECC 1:17 Nā, ka whakaangahia e ahau tōku ngākau kia mōhio ki te whakaaro nui, kia mōhio ki te haurangi, ki te wairangi; ā, kua kite ahau he whai anō hoki tēnei i te hau.
ECC 1:18 Mā te nui hoki o te whakaaro ka nui ai te pōuri, ā, ko te tangata e whakaneke ake ana i te mātauranga e whakaneke ake ana i te mamae.
ECC 2:1 I mea ahau i roto i tōku ngākau, “Tēnā rā, ka whakamātauria koe e ahau ki te koa; nā, te āhuareka māu.” Heoi, he horihori anō hoki tēnei.
ECC 2:2 Ko te kata, kīia iho e ahau “He haurangi;” ko te koa, “He mahi aha tāna?”
ECC 2:3 I whai ahau i roto i tōku ngākau me pēhea te whakaahuareka i tōku kikokiko ki te wāina – me te whakahaere anō ia a tōku ngākau i ahau i runga i te whakaaro nui – ā, me pēhea tāku hopu i te wairangi, kia kitea rā anō e ahau he aha rā tēnā mea pai a ngā tama a te tangata e mahia nei i raro i te rangi i ngā rā katoa e ora nei rātou.
ECC 2:4 I mahia e ahau ētahi mahi nunui māku; i hangā e ahau ētahi whare mōku; i whakatōkia e ahau ētahi māra wāina māku.
ECC 2:5 I hangā e ahau ētahi kāri māku, me ētahi māra rākau, whakatōkia iho e ahau ki reira ngā tū rākau katoa e whai hua ana.
ECC 2:6 I hangā e ahau he poka wai māku hei whakamākūkū mai i reira i te ngahere, i te wāhi i whakatupuria ai ngā rākau.
ECC 2:7 I hokona e ahau he pononga tāne, he pononga wāhine, ā, he pononga anō i whānau ki tōku whare; he tini hoki āku kāhui kau, āku kāhui hipi, maha atu i ā te hunga katoa i mua atu i ahau i Hiruhārama.
ECC 2:8 I āmenea mai anō e ahau he hiriwa, he kōura, me te taonga i rawe ki ngā kīngi, ki ngā kāwanatanga; i meatia anō e ahau he kaiwaiata, tāne, he kaiwaiata wāhine, me ngā āhuareka anō a ngā tama a te tangata, te tini o te wāhine iti.
ECC 2:9 Heoi, kua nui ahau, neke noa ake ana āku i ā te hunga katoa i mua ake i ahau i Hiruhārama, me te mau anō hoki tōku whakaaro nui.
ECC 2:10 Ko ngā mea katoa anō hoki i hiahiatia e ōku kanohi, kīhai i kaiponuhia e ahau i a rāua, kīhai anō i pēhia e ahau tōku ngākau i te meatanga atu ki tētahi whakahari; i hari hoki tōku ngākau i ōku ruhatanga katoa; ā, ko te wāhi tēnei māku o ōku ruhatanga katoa.
ECC 2:11 Kātahi ahau ka titiro ki ngā mahi katoa i mahia e ōku ringa, ki te ruhatanga hoki i ruha ai ahau i te mahinga; nanā, he horihori katoa, he whai kau i te hau, ā, kāhore he hua pai i raro i te rā.
ECC 2:12 I anga anō ahau ki te mātakitaki ki te whakaaro nui, ki te haurangi, ki te wairangi; he aha koia te mea e taea e te tangata e haere mai ana i muri i te kīngi? Heoi anō ko te mea kua oti noa ake.
ECC 2:13 Kātahi ahau ka kite, hira ake te whakaaro nui i te wairangi; he pērā hoki me te mārama e hira ake ana i te pōuri.
ECC 2:14 Ko te tangata whakaaro nui, kei tōna māhunga ōna kanohi, ā, kei te pōuri te wairangi e haere ana. Otiia, i kite anō ahau kotahi tonu te mea e pā ana ki a rātou katoa.
ECC 2:15 Kātahi ahau ka kī ake i roto i tōku ngākau, “Ko te mea i pā ki te wairangi ka pā anō ki ahau nei anō hoki; he aha hoki ōku whakaaro i nui ake ai?” Nā, ko tāku kīanga ake i roto i tōku ngākau, “He horihori anō hoki tēnei.”
ECC 2:16 Nō te mea kāhore he maharatanga ki te tangata whakaaro nui, pērā anō i te kore ki te wairangi ā ake ake; inā hoki i ngā rā e haere ake nei kua wareware noa ake ngā mea katoa. Nā, ko tō te tangata whakaaro nui tōna matenga, pērā anō i tō te wairangi!
ECC 2:17 Nā, kua kino ahau ki te ora; nō te mea he hē ki ahau te mahi e mahia ana i raro i te rā; he horihori katoa hoki, he whai kau i te hau.
ECC 2:18 I kino anō hoki ahau ki tōku māuiui i māuiui ai ahau i raro i te rā; inā hoki me waiho iho e ahau mā te tangata i muri i ahau.
ECC 2:19 Ko wai hoki e mōhio ana hei tangata whakaaro nui rānei ia, hei wairangi rānei? Otiia, hei a ia te tikanga mō ōku māuiui katoa i māuiui ai ahau, i nui ai anō hoki ōku whakaaro i raro i te rā. He horihori anō hoki tēnei.
ECC 2:20 Nā, ka anga ahau, ka mea kia whakaparahako tōku ngākau ki te māuiui katoa i māuiui ai ahau i raro i te rā.
ECC 2:21 Tēnei hoki tētahi tangata kei runga nei i te whakaaro nui tāna mahi, kei runga i te mātauranga, kei runga i te mōhio; otiia ka waiho e ia hei wāhi mā te tangata kīhai nei i mahi. He horihori anō tēnei, he hē nui.
ECC 2:22 He aha oti te tukunga iho ki te tangata o tōna māuiui katoa, o te ngana o tōna ngākau i māuiui ai ia i raro i te rā?
ECC 2:23 He pōuri kau hoki ōna rā katoa, he ngākau mamae tōna raruraru, e kore anō hoki tōna ngākau e okioki i te pō. Nā, he horihori anō hoki tēnei.
ECC 2:24 Kāhore he mea pai mā te tangata i tua atu i te kai, i te inu, i te mea kia whiwhi tōna wairua i te pai i roto i tōna māuiui. I kite anō hoki ahau i tēnei, nō te ringa o te Atua tēnei.
ECC 2:25 Ko wai oti e nui atu tāna kai, ko wai e reka ake i ahau?
ECC 2:26 Ki te tangata hoki e pai ana ki tō te Atua aroaro e hōmai ana e ia he whakaaro nui, he mātauranga, he koa; ki te tangata hara ia e hōmai ana e ia he raruraru, ki te kohikohi, ki te āmene mea mai, hei hoatutanga māna ki te tangata e pai ana ki tō te Atua aroaro. He horihori anō hoki tēnei, he whai i te hau.
ECC 3:1 He tāima anō kua takoto mō ngā mea katoa, me te wā mō ngā meatanga katoa i raro i te rangi:
ECC 3:2 he wā e whānau ai, he wā e mate ai; he wā e whakatō ai, he wā e hūtia ai te mea i whakatōkia;
ECC 3:3 he wā e patu ai, he wā e rongoā ai; he wā e wāwāhi iho ai, he wā e hanga ake ai;
ECC 3:4 he wā e tangi ai, he wā e kata ai; he wā e auē ai, he wā e kanikani ai;
ECC 3:5 he wā e ākiritia atu ai ngā kōhatu, he wā e kohikohia ai ngā kōhatu, he wā e awhi ai, he wā e kore ai e awhi;
ECC 3:6 he wā e rapu ai, he wā e ngaro ai; he wā e tiaki ai, he wā e ākiri atu ai;
ECC 3:7 he wā e haehae ai, he wā e tuitui ai; he wā e whakarongo puku ai, he wā e kōrero ai;
ECC 3:8 he wā e aroha ai, he wā e mauāhara ai; he wā e whawhai ai, he wā e mau ai te rongo.
ECC 3:9 He aha te pai ki te kaimahi i tāna mea i māuiui ai ia?
ECC 3:10 Kua kite ahau i te raruraru e hōmai ana e te Atua ki ngā tama a te tangata hei whakararu i a rātou.
ECC 3:11 I hangā e ia ngā mea katoa kia ātaahua i tōna wā anō; ā, i whakanohoia e ia te ao ki ō rātou ngākau, engari kia kaua te tangata e kite i tā te Atua mahi i mahi ai, mai i te tīmatanga ā taea noatia te mutunga.
ECC 3:12 E mōhio ana ahau kāhore he mea pai atu mō rātou i te ngākau hari, i te mahi i te pai i a rātou e ora ana;
ECC 3:13 ā, he mea hoki nā te Atua kia kai ngā tāngata katoa, kia inu, kia kite anō hoki i te pai o tō rātou māuiui katoa.
ECC 3:14 E mōhio ana ahau ko ngā mea katoa e hangā ana e te Atua, ka mau tonu ā ake ake; e kore tētahi mea e honoa mai, e kore anō hoki tētahi wāhi e tangohia atu. I meatia hoki e te Atua kia wehi ai ngā tāngata i tōna aroaro.
ECC 3:15 Ko tō mua mea koia anō tēnei ināianei; nā, ko te mea e puta mai ā mua kua puta noa ake; e rapua ana anō e te Atua te mea onamata.
ECC 3:16 Nā, i kitea anō e ahau i raro i te rā, ko te wāhi o te whakawā i reira ia te kino, ā, ko te wāhi o te tika ko te kino i reira.
ECC 3:17 Ka mea ahau i roto i tōku ngākau, “Tērā e whakawākia e te Atua te tangata tika rāua ko te tangata kino; nō te mea kua takoto te wā i reira mō ngā meatanga katoa, mō ngā mahi katoa.”
ECC 3:18 I mea ahau i roto i tōku ngākau, “Nā te mea mō ngā tama a te tangata, he mea nā te Atua hei whakaatu i a rātou, kia kite ai rātou he pērā noa iho rātou i te kararehe.”
ECC 3:19 Ko te mea hoki e pā ana ki ngā tama a te tangata, e pā ana ki ngā kararehe; kotahi tonu te mea e pā ana ki a rātou; ko te matenga o tētahi rite tonu ki te matenga o tētahi. Āe rā, kotahi tonu anō manawa ō rātou katoa; kīhai hoki te tangata i hipa ake i te kararehe; he horihori hoki te katoa.
ECC 3:20 E haere ana te katoa ki te wāhi kotahi; nō te puehu nei te katoa, ka hoki anō te katoa ki te puehu.
ECC 3:21 Ko wai e mātau ana ki te wairua o te tangata, e haere ana rānei ki runga, ki te wairua rānei o te kararehe, mehemea rānei e heke iho ana ki raro ki te whenua?
ECC 3:22 Nā, ka kite ahau kāhore he pai nui atu i tēnei, arā kia koa te tangata ki āna mahi; ko te wāhi hoki tērā māna; mā wai ia e whakahoki mai, e mea kia kite i ngā mea e puta mai i muri i a ia?
ECC 4:1 Nā, ka tahuri ahau, ā, ka titiro ki ngā tūkinotanga katoa e mahia nei i raro i te rā. Nā, ko ngā roimata o te hunga i tūkinotia, kāhore hoki ō rātou kaiwhakamārie; ā, he kaha kei te ringa o ō rātou kaitūkino, otiia kāhore ō rātou kaiwhakamārie.
ECC 4:2 Nā, ko tāku whakamoemiti ki te hunga mate kua mate noa ake, nui atu i tāku ki te hunga ora e ora nei.
ECC 4:3 Engari ia pai atu i a rāua te tangata kāhore anō i whānau noa, kāhore anō i kite noa i te mahi hē e mahia nei i raro i te rā.
ECC 4:4 Nā, ka kite ahau i te māuiui katoa, i ngā mahi tohunga katoa, he mea hoki tēnei e hae ai te tangata ki tōna hoa. He horihori anō hoki tēnei, ā, he whai kau i te hau.
ECC 4:5 Ko te wairangi, kei te kōtui i ōna ringa, ā, kainga ana e ia ōna kikokiko ake.
ECC 4:6 He pai kē te ringa kī i runga i te āta noho, i ngā ringa kī e rua, ki te mea he ruha, he whai noa i te hau.
ECC 4:7 Kātahi ahau ka tahuri, ā, ka kite i te horihori i raro i te rā:
ECC 4:8 he tangata tērā, ko ia anake, kāhore hoki ōna tokorua; āe rā, kāhore anō hoki āna tama, ōna tuākana, tēina rānei; heoi kāhore he mutunga o tāna mahi katoa, e kore anō hoki ōna kanohi e mākona i ngā taonga. Nā, ka mea ia, “Ki a wai tōku whakaaro i ahau ka mahi nei, ka whakatiki nei i tōku wairua ki te pai?” He horihori anō tēnei, he raruraru kino.
ECC 4:9 Erangi te tokorua i te kotahi; nō te mea ka whiwhi rāua ki te utu pai i tā rāua mahi.
ECC 4:10 Ki te hinga hoki tētahi, mā tōna hoa ia e whakaara; auē te mate mō te kotahi, ina hinga, ki te kāhore te whakatokorua hei whakaara i a ia!
ECC 4:11 Ki te takoto tahi anō ngā tokorua, ka mahana rāua; he tangata kotahi ia, mā te aha ka mahana ai tōna kotahi?
ECC 4:12 Ki te kaha tētahi i a ia kotahi nei, ka māia te tokorua ki a ia. E kore hoki te aho takitoru e motu wawe.
ECC 4:13 Pai ake te tamaiti rawakore, whakaaro nui i te kīngi kua koroheketia, kua wairangi, kua kore nei ōna mōhio ki te whakarongo ina whakatūpatoria.
ECC 4:14 I puta mai hoki tērā i roto i te whare herehere, hei kīngi; āe rā, ahakoa i roto i tōna whenua i kīngi ai, i whānau rawakore mai ia.
ECC 4:15 I kite ahau i te hunga ora katoa e haere nei i raro i te rā, kei te tama rātou, kei te tuarua, kua tū nei i te tūnga o tērā.
ECC 4:16 Kāhore he mutunga o te iwi katoa, arā o te hunga ko ia nei tō rātou ariki; nā, e kore ō muri iho i a ia e koa ki a ia. He pono, he horihori anō hoki tēnei, ā, he whai kau i te hau.
ECC 5:1 Tiakina tōu waewae ina haere koe ki te whare o te Atua; he pai kē te whakatata ki te whakarongo i te hoatu i te patunga tapu a ngā wairangi; kāhore hoki rātou e mōhio he mahi kino tā rātou.
ECC 5:2 Kei pōrahurahu tōu māngai, kei hohoro hoki te puaki o tētahi kupu a tōu ngākau i te aroaro o te Atua; nō te mea kei te rangi te Atua, ā, ko koe kei runga i te whenua; mō reira kia torutoru āu kupu.
ECC 5:3 Ka puta mai hoki te rekanga kanohi ina nui te raruraru; me te reo o te wairangi ki te maha o ngā kupu.
ECC 5:4 Ki te kīia taurangitia e koe tētahi mea mā te Atua, kei whakaroa koe ki te whakamana. E kore hoki ia e pai ki ngā wairangi; whakamanā e koe tāu i kī taurangi ai.
ECC 5:5 He pai kē ki te kore āu kī taurangi, i te puta i a koe o te kupu taurangi, ā, kāhore i whakamana e koe.
ECC 5:6 Kei tukua e koe tōu māngai kia mea hara mō ōu kikokiko; kaua hoki e kī ki te aroaro o te anahera, “He pōhēhē.” Kia riri te Atua ki tōu reo hei aha, ā, hē iho i a ia te mahi a ōu ringa?
ECC 5:7 Nā konei tēnei mea, nā te maha o ngā rekanga kanohi, o ngā horihori, o ngā kōrero maha; ko koe ia kia wehi i te Atua.
ECC 5:8 Ki te kite koe i te rawakore e tūkinotia ana, ā, e kāhakina kētia ana te whakawā rāua ko te tika i te kāwanatanga, kaua e mīharo ki taua mea; nō te mea e maharatia ana e tētahi, he tiketike ake nei i te mea tiketike; tēnei anō hoki tētahi e tiketike ake ana i a rātou.
ECC 5:9 Mā te katoa anō hoki ngā hua o te whenua; ā, ko te kīngi hoki, nā, e mahia ana e te māra he mea māna.
ECC 5:10 Ko te tangata e aroha ana ki te hiriwa e kore e mākona i te hiriwa; ā, e kore hoki te tangata e whai ana ki ngā mea maha, ki ngā hua. He horihori anō tēnei.
ECC 5:11 Ki te maha ngā rawa, ka tokomaha anō ngā tāngata hei kai; he aha hoki te pai ki te tangata nāna aua mea? Ko te mātakitaki kau atu a ōna kanohi.
ECC 5:12 Ka reka tonu te moe a te tangata mahi, ahakoa iti tāna kai, nui rānei; ko te tangata taonga ia, e kore e tukua e āna mea maha kia moe.
ECC 5:13 Tērā tētahi he ngau kino i kitea e ahau i raro i te rā, arā, he taonga e puritia ana e te tangata nāna, hei whakamamae anō i a ia;
ECC 5:14 ā, ka pau aua taonga i te raruraru kino. Nā, ka whānau he tama māna, kāhore he mea i tōna ringa.
ECC 5:15 Ka rite ki tōna haerenga mai i te kōpū o tōna whaea, ka hoki tahanga atu anō ia, ka pērā i tōna haerenga mai, e kore anō e riro i a ia tētahi wāhi mō tāna mahi hei maunga atu mā tōna ringa.
ECC 5:16 Ā, he hē ngau kino anō hoki tēnei: arā ko tōna haerenga atu ka rite i ngā mea katoa ki tōna haerenga mai; he aha oti te pai ki a ia? Ko tāna i mahi ai mā te hau.
ECC 5:17 Ā, i ōna rā katoa ka kai ia i roto i te pōuri, ka pororaru tōna ngākau ka pāngia e te mate, ka pukuriri.
ECC 5:18 Nanā, ko tāku i kite ai, he mea pai, he mea ātaahua, kia kai te tangata, kia inu, kia kite hoki i te pai o tōna māuiui katoa i māuiui ai ia i raro i te rā i ngā rā katoa e ora ai ia, e hōmai nei e te Atua ki a ia; nāna hoki tēnā wāhi.
ECC 5:19 Ko ngā tāngata katoa hoki i hōmai ai e te Atua he taonga, he rawa, i tukua mai ai ki a rātou te tikanga mō te kai i tētahi wāhi o aua mea, mō te tango i te wāhi mā rātou, ā, kia koa rātou i tō rātou māuiui – he mea hōmai tēnei nā te Atua.
ECC 5:20 E kore hoki e nui tōna mahara ki ngā rā i ora ai ia; nō te mea he koa mō tōna ngākau tā te Atua i whakahoki ai ki a ia.
ECC 6:1 Tērā tētahi hē i kitea e ahau i raro i te rā, he mea taimaha anō ki runga ki ngā tāngata.
ECC 6:2 He tangata i hōmai nei e te Atua ki a ia he taonga, he rawa, he korōria, ā, kīhai tōna wairua i hapa ki tētahi mea i hiahia ai ia, otiia kīhai i tukua e te Atua ki a ia te tikanga mō te kai i tētahi wāhi o aua mea, engari kainga ana e te tangata kē. He horihori tēnei, he mate kino.
ECC 6:3 Ki te kotahi rau ngā tamariki a tētahi tangata, ā, he maha ngā tau e ora ai ia, maha atu ngā rā o ōna tau, ā, kāhore tōna wairua i ngata i te pai, kāhore hoki ia e whai tanumanga; e mea ana ahau tērā noa atu te pai o te materoto i a ia.
ECC 6:4 I haere mai hoki tērā i runga i te horihori, ā, haere atu ana i runga i te pōuri, ā, ka taupokina tōna ingoa e te pōuri.
ECC 6:5 Kīhai hoki ia i kite i te rā, kīhai anō i mōhio ki a ia; nui atu tō tēnei okioki i tō tērā.
ECC 6:6 Āe, ahakoa kotahi mano tōpū ngā tau i ora ai ia, heoi kāhore he pai i kitea e ia. He teka ianei e haere ana te katoa ki te wāhi kotahi?
ECC 6:7 Ko ngā mea katoa i māuiui ai te tangata, hei mea anō mō tōna māngai, otiia e kore tōna wairua e mākona.
ECC 6:8 He aha oti tā te tangata whakaaro nui e hira ake ana i tā te wairangi? He aha hoki tā te ware, e mōhio nei ki te haere i te aroaro o te hunga ora?
ECC 6:9 He pai kē te kite o ngā kanohi i te kaipaowe o te hiahia; he horihori anō tēnei, ā, he whai i te hau.
ECC 6:10 Ko ngā mea katoa ō mua kua oti noa ake te hua ki te ingoa, ā, e mōhiotia ana ko te tangata; e kore hoki ia e tau hei totohe ki te mea e kaha atu ana i a ia.
ECC 6:11 Ka maha nei ngā mea hei whakanui i te horihori, he aha te painga ki te tangata?
ECC 6:12 Ko wai hoki e mōhio ana he aha te mea pai ki te tangata i a ia nei i te ora, i ngā rā katoa o tōna oranga horihori, e rite nei ki te ātārangi i a ia e mahi nei? Ko wai hoki hei whakaatu ki te tangata ko te aha e puta mai i muri i a ia i raro i te rā?
ECC 7:1 Ko te ingoa pai, pai atu i te hinu utu nui; ko te rā o te matenga, pai atu i te rā o tō te tangata whānautanga.
ECC 7:2 Ko te haere ki te whare tangihanga, pai atu i te haere ki te whare hākari; ko te mutunga hoki ia o ngā tāngata katoa; ā, ka rongoātia e te tangata ora ki roto ki tōna ngākau.
ECC 7:3 Ko te ngākau mamae, pai atu i te kata; mā te pōuri hoki o te mata ka pai ai te ngākau.
ECC 7:4 Kei te whare tangihanga te ngākau o te hunga whakaaro nui; kei te whare ia o te kata te ngākau o ngā wairangi.
ECC 7:5 Ko te whakarongo, ina rīria te hē e te tangata whakaaro nui, pai atu i tā te tangata whakarongo ki te waiata a ngā wairangi.
ECC 7:6 Rite tonu hoki ki te papātanga o ngā tātarāmoa i raro i te kōhua te kata a te wairangi. He horihori anō tēnei.
ECC 7:7 He pono mā te pāhua ka wairangi ai te tangata whakaaro nui, mā te mea hōmai noa hoki ka kore ai te ngākau mahara.
ECC 7:8 Ko te mutunga o te mea, pai atu i tōna tīmatanga; pai atu te wairua manawanui i te wairua whakakake.
ECC 7:9 Kei hohoro tōu wairua ki te riri; kei te uma hoki o ngā wairangi te riri e noho ana.
ECC 7:10 Kaua e mea, “He aha ngā rangi ō mua i pai ake ai i ēnei?” Kāhore hoki he whakaaro nui ōu i ui ai koe ki tēnā.
ECC 7:11 He pai tonu te whakaaro nui, ānō he taonga tuku iho; āe rā, he pai rawa ake ki te hunga e kite ana i te rā.
ECC 7:12 Hei whakamarumaru iho te whakaaro nui, hei pērā hoki i te moni te whakamarumaru; ko te pai ia o te mātauranga koia tēnei, ka ora i te whakaaro nui ngā tāngata nāna.
ECC 7:13 Whakaaroa tā te Atua mahi; ko wai hoki hei mea kia tika tāna i mea ai kia hape?
ECC 7:14 I te rā pai kia koa, ā, i te rā kino whakaaro; kua mahia nei hoki e te Atua tētahi kia takoto tahi me tētahi, he mea kia kaua ai e kitea e te tangata tētahi mea i muri i a ia.
ECC 7:15 Kua kite ahau i tēnei katoa i ngā rā ōku i te horihori; he tangata tika tētahi, ngaro iho ia i runga i tōna tika; he tangata kino tētahi, roa noa iho ia i te ao i runga i tōna kino.
ECC 7:16 Kaua e whakanuia rawatia tōu tika; kaua hoki e whakanuia rawatia ōu whakaaro; he aha koe i whakangaro ai i a koe?
ECC 7:17 Kaua e whakanuia rawatia tōu kino, kaua anō hoki e wairangi; kia mate koe hei aha, i te mea kāhore anō tōu wā kia rite noa?
ECC 7:18 He pai ki te puritia tēnei kupu e koe; kaua hoki tōu ringa e unuhia mai i tērā; ko te tangata hoki e wehi ana i te Atua ka puta mai i roto i ērā katoa.
ECC 7:19 Ko te whakaaro nui rahi ake tōna kaha mō te tangata whakaaro i tō ngā rangatira kotahi tekau i roto i te pā.
ECC 7:20 Kāhore hoki he tangata tika i te whenua e mahi ana i te pai, ā, kāhore ōna hara.
ECC 7:21 Kaua anō e whakarongo ki ngā mea katoa e kōrerotia ana; kei rongo koe ki tāu pononga e kanga ana i a koe;
ECC 7:22 he maha hoki ngā wā, e mōhio ana tōu ngākau, i kanga ai koe anō i ētahi.
ECC 7:23 I whakamātauria e ahau tēnei katoa, he mea whakaaro mārie; i mea ahau, “Ka whakaaro nui ahau,” otiia i matara noa atu tēnei i ahau.
ECC 7:24 Ko te mea onāianei he tawhiti rawa, he hōhonu rawa hoki; ko wai hei kite?
ECC 7:25 I anga tōku ngākau, i mea kia mōhio, kia kimihia, kia rapua ngā whakaaro nui me ngā tikanga, kia mōhio anō hoki he wairangi te kino, he pōrangi te wairangi.
ECC 7:26 Ā, ka kite ahau i te mea kawa atu i te mate, arā i te wahine, he rore nei, he kupenga tōna ngākau, he rāhiri hoki ōna ringa. Ko te tangata e paingia ana e te Atua ka mawhiti i a ia; ko te tangata hara ia ka mau i a ia.
ECC 7:27 “Nanā, kua kitea tēnei e ahau,” e ai tā te Kaikauwhau, “he mea whakarite tētahi mea ki tētahi, kia kitea ai te tikanga.
ECC 7:28 He mea e rapua nei anō e tōku wairua, ā, kāhore anō i kitea; kotahi te tangata i kitea e ahau i roto i te mano. Nā, i roto i ēnei katoa kāhore ahau i kite i tētahi wahine.
ECC 7:29 Nanā, ko tēnei anake i kitea e ahau, arā i tika te tangata i tā te Atua hanganga; engari he maha ngā tikanga i rapua e rātou.”
ECC 8:1 Ko wai hei rite mō te tangata whakaaro nui? Ko wai hoki e mōhio ana ki te tikanga o tētahi mea? Ka ai te whakaaro nui o te tangata hei mea kia tīaho tōna mata, ka puta kē anō hoki te taikaha o tōna mata.
ECC 8:2 Ko tāku tēnei ki a koe, Puritia te kupu a te kīngi, me whakaaro anō hoki ki tā te Atua oati.
ECC 8:3 Kei mea wawe koe ki te haere atu i tōna aroaro. Kaua anō hoki e tohe tonu ki te mea kino; ka oti hoki i a ia ngā mea katoa e pai ai ia.
ECC 8:4 Nō te mea he mana tō te kupu a te kīngi, ā, ko wai hei mea atu ki a ia, “E aha ana koe?”
ECC 8:5 Ko te kaipupuri o te whakahau, e kore rawa e mōhio ki te mea hē. E mōhio ana te ngākau o te whakaaro nui ki te wā, ki te tikanga.
ECC 8:6 He wā hoki tō ngā meatanga katoa, he tikanga anō; he nui hoki nō te hē o te tangata i runga i a ia.
ECC 8:7 Kāhore hoki ia e mōhio, ko te aha e puta ā mua, mā wai hoki e whakaatu ki a ia te pēheatanga o te putanga?
ECC 8:8 Kāhore he tangata e whai mana ana ki te wairua, ki te pupuri i te wairua; kāhore hoki he mana ki te rā o te mate. I taua pakanga hoki e kore tētahi e tukua atu; e kore anō te kino e whakaora i te mea e tukua atu ki a ia.
ECC 8:9 I kite ahau i tēnei katoa, i anga anō tōku ngākau ki ngā meatanga katoa e meatia ana i raro i te rā; he wā anō ka whai mana tētahi tangata ki tētahi tangata hei hē mōna.
ECC 8:10 I kite anō ahau i reira i te hunga kino e tanumia ana, ā, i haere mai rātou ki te wāhi o te tanumanga; ā, ko te hunga i mahi i te tika i haere atu i te wāhi o te tapu, ā, warewaretia ana rātou e te pā; he horihori anō hoki tēnei.
ECC 8:11 He kore i hohoro te whakaoti i te kupu whiu mō te mahi hē, koia i kī tonu ai ngā ngākau o ngā tama a te tangata i roto i a rātou ki te tohe ki te mahi i te kino.
ECC 8:12 Ahakoa he rau ngā mahi hē a te tangata hara, ā, ka roa ōna rā; heoi e mōhio ana anō ahau, ka pai te tukunga iho ki te hunga e wehi ana i te Atua, e wehi nei i tōna aroaro.
ECC 8:13 E kore ia e pai te tukunga iho ki te tangata kino, e kore anō e whakaroaina e ia ōna rā, he ātārangi nei te rite; mōna kīhai i wehi i te aroaro o te Atua.
ECC 8:14 He horihori tēnei e mahia nei i runga i te whenua; arā he hunga tika ēnei, ā, ko te mea e pā ana ki a rātou pērā tonu i te mea e pā ana ki te mahi a te hunga kino; ā, he hunga kino ēnei, ā, ko te mea e pā ana ki a rātou pērā tonu i te mea e pā ana ki te mahi a te hunga tika; i kī ahau he horihori anō hoki tēnei.
ECC 8:15 Kātahi ahau ka whakamoemiti ki te koa; nō te mea kāhore he mea pai ake mā te tangata i raro i te rā, ko te kai anake, ko te inu, ko te harakoa. Ko tērā hoki e mau ki a ia i roto i tōna māuiui i ngā rā o tōna oranga, i hōmai nei e te Atua ki a ia i raro i te rā.
ECC 8:16 I tāku tukunga i tōku ngākau kia mōhio ki te whakaaro nui, kia kite i te raruraru e mahia nei i runga i te whenua; i te ao nei hoki, i te pō kāhore ōna kanohi e kite i te moe.
ECC 8:17 Kātahi ahau ka kite i te mahi a te Atua, arā, e kore e kitea e te tangata te mahi e mahia ana i raro i te rā; ahakoa māuiui noa te tangata i te rapunga, e kore e kitea e ia. Āe rā, ahakoa mea noa te tangata whakaaro nui kia mōhiotia e ia, e kore e taea kia kitea e ia.
ECC 9:1 Nā, ko tēnei katoa he mea whakaaro nā tōku ngākau, arā kia āta tirotirohia tēnei katoa; ko te hunga tika, ko te hunga whakaaro nui, me ā rātou mahi, kei roto i te ringa o te Atua. E kore te tangata e mōhio he aroha rānei, he kino rānei; kei tō rātou aroaro ngā mea katoa.
ECC 9:2 He rite tonu te pānga mai o ngā mea katoa ki ngā tāngata katoa; kotahi tonu te mea e pā ana ki te tangata tika, ki te tangata kino; ki te pai, ki te mā, ki te poke; ki te tangata i te patunga tapu, ki te tangata kāhore nei āna patunga tapu. Ko te tangata pai rite tonu ki te tangata hara, ko te tangata e oati ana, ki te tangata e wehi ana i te oati.
ECC 9:3 He hē tēnei i roto i ngā mea katoa e meatia ana i raro i te rā, kotahi tonu te mea e pā ana ki te katoa. Ko te ngākau anō hoki o ngā tama a te tangata kī tonu i te kino; kei roto hoki te haurangi i ō rātou ngākau i a rātou e ora ana; ā muri iho ka riro rātou ki ngā tūpāpaku.
ECC 9:4 Ko te tangata hoki e tūhono ana ki te hunga ora katoa ka whai tūmanakohanga; pai atu hoki te kurī ora i te raiona mate.
ECC 9:5 E mōhio ana hoki te hunga ora tērā rātou e mate; ko ngā tūpāpaku ia, kāhore ō rātou mōhio ki tētahi mea, kāhore ake hoki he utu i a rātou; ka warewaretia hoki te mahara ki a rātou.
ECC 9:6 Ko tō rātou aroha hoki, ko tō rātou riri, ko tō rātou hae, kua kore noa ake; kāhore hoki he wāhi i a rātou ā ake ake, o ngā mea katoa e meatia ana i raro i te rā.
ECC 9:7 Haere, kainga tāu kai i runga i te hari, inumia hoki tāu wāina i runga i te ngākau hari; nō te mea kua manako noa kē te Atua ki āu mahi.
ECC 9:8 I ngā wā katoa kia mā ōu kākahu; kaua hoki e whakakāhoretia te hinu mō tōu māhunga.
ECC 9:9 Kia ora tōu ngākau i tōu hoa wahine e aroha nā koe i ngā rā katoa o tōu oranga horihori, i hōmai nei ki a koe i raro i te rā, i ngā rā katoa o tōu horihori. Ko te wāhi hoki tēnā mōu i tēnei ao, i tōu māuiui anō hoki e māuiui nā koe i raro i te rā.
ECC 9:10 Ko ngā mea katoa e kitea e tōu ringa kia mahia, kia puta tōu uaua ki te mahi; kāhore hoki he mahi, kāhore he tikanga, kāhore he mātauranga, kāhore he whakaaro nui i te rēinga, i te wāhi ka haere atu nā koe ki reira.
ECC 9:11 I hoki ahau, ā, i kite ahau i raro i te rā, ehara i te mea ko te hunga tere e puta i te oma, ko te hunga mārohirohi rānei e toa i te pakanga, ko te hunga whakaaro nui rānei e whiwhi i te taro, ko te hunga mōhio rānei e whiwhi i te taonga, ko te hunga tohunga rānei e manakohia, engari nā te wā, nā te tūpono noa, i hōmai ki a rātou katoa.
ECC 9:12 Kāhore hoki te tangata e mōhio ki te wā mōna; he rite ki ngā ika e haoa ana ki te kupenga nanakia, ki ngā manu hoki e mau ana i te māhanga, he pērā anō hoki ngā tama a te tangata, e māhangatia ana i te wā whakarihariha, ina puta whakarere mai ki a rātou.
ECC 9:13 I kitea anō e ahau te whakaaro nui pēnei i raro i te rā, ā, he mea nui ki ahau.
ECC 9:14 Tērā tētahi pā iti, me ōna tāngata torutoru i roto. Nā, ka haere mai tētahi kīngi nui ki te tū i reira, whakapaea ana e ia, hangā ana e ia ētahi pourewa nunui hei tatau atu ki reira.
ECC 9:15 Nā, i kitea tētahi tangata rawakore, whakaaro nui, i roto, ā, nāna, nā tōna whakaaro nui, ka ora te pā. Otiia, kīhai tētahi tangata i mahara ki taua tangata rawakore.
ECC 9:16 Nā, ko tāku kīanga ake, “Engari rawa te whakaaro nui i te kaha; heoi whakahāweatia iho ngā whakaaro nui o te rawakore, kīhai hoki āna kupu i whakarangona.”
ECC 9:17 Ko ngā kupu a te hunga whakaaro nui, he mea āta kōrero, e rangona nuitia ake ana i te hāmama a te rangatira o ngā wairangi.
ECC 9:18 Pai ake te whakaaro nui i ngā rākau o te riri; otiia kotahi noa te tangata hara, he nui tāna pai e takakino ai.
ECC 10:1 Mā ngā ngaro mate ka piro whakahouhou ai te hinu a te kaiwhakananu; ka pērā anō te whakaaro nui me te ingoa nui, he iti noa te wairangi māna e tāmi.
ECC 10:2 Kei tōna ringa matau te ngākau o te tangata whakaaro nui; kei tōna mauī ia te ngākau o te wairangi.
ECC 10:3 Āe rā hoki, ka haere te wairangi i te ara, ka taka ōna mahara, ā, ka kōrero ia ki ngā tāngata katoa he wairangi ia.
ECC 10:4 Ki te ara te wairua o te rangatira, he riri ki a koe, kaua tōu wāhi e whakarērea; ka ai hoki te whakangāwari hei whakamārie mō ngā hara nui.
ECC 10:5 Tēnei tētahi kino i kitea e ahau i raro i te rā, e rite tonu ana ki te hē i puta mai i te rangatira:
ECC 10:6 ko te wairangi e whakanohoia ana ki runga ki ngā wāhi tiketike rawa, ā, ko ngā tāngata taonga e noho ana i te wāhi i raro.
ECC 10:7 I kite ahau i ngā kaimahi i runga i te hōiho, ā, ko ngā rangatira e haere ana, ānō he kaimahi, i runga i te whenua.
ECC 10:8 Ko te tangata e keri ana i te rua, ka taka anō ki roto; ko te tangata e wāhi ana i te taiepa, ka ngaua e te nākahi.
ECC 10:9 Ko te tangata e tārai ana i ngā kōhatu, ka mamae anō i reira; ko te tangata e tata ana i te rākau, ka ora noa anō i reira.
ECC 10:10 Ki te pūhuki te rino, ā, kāhore e whakakoia te mata, kia nui ake anō tōna kaha; he pai ia ngā whakaaro nui hei whakatikatika.
ECC 10:11 Ki te ngau te nākahi i te mea kīanō i whakawaia, kāhore hoki he painga o te kaiwhakawai.
ECC 10:12 He ātaahua ngā kupu a te māngai o te tangata whakaaro nui; tēnā ko te wairangi ka horomia a ia anō e ōna ngutu.
ECC 10:13 Ko te tīmatanga o ngā kupu a tōna māngai he wairangi; ko te mutunga o tāna kōrero, he haurangi, he hē.
ECC 10:14 He maha anō hoki ngā kupu a te wairangi; engari e kore te tangata e mōhio ko te aha e puta mai. Nā, ko ngā mea e puta mai i muri i a ia, mā wai rā e whakaatu ki a ia?
ECC 10:15 Hōhā iho ngā wairangi i tāna mahi, i tāna mahi; e kore nei hoki ia e mātau ki te haere ki te pā.
ECC 10:16 Auē te mate mōu, e te whenua he tamaiti nei tōu kīngi, ā, e kai ana ōu rangatira i te ata!
ECC 10:17 Ka hari koe, e te whenua, he tamaiti nei nō ngā rangatira tōu kīngi, ā, e kai ana ōu rangatira i te wā e tika ai – hei mea whakakaha, ehara i te mea hei whakahaurangi.
ECC 10:18 Mā te māngere ka totohu iho ai te tuanui o te whare; mā te ngoikore anō o ngā ringa ka tūturu ai te whare.
ECC 10:19 Hei mea mō te kata te hākari i tukua ai, he mea whakahari anō te wāina; ā, mā te hiriwa ka rite ai ngā mea katoa.
ECC 10:20 Kaua e kangā te kīngi, kaua rawa i roto i tōu whakaaro; kaua hoki e kangā te tangata taonga i roto i tōu whare moenga; nō te mea ka kawea te reo e tētahi manu o te rangi, ka kōrerotia hoki taua mea e tētahi mea whai parirau.
ECC 11:1 Makā tāu taro ki te mata o ngā wai; kia maha hoki ngā rā ka kitea anō e koe.
ECC 11:2 Hoatu tētahi wāhi mā te tokowhitu, āe mā te tokowaru anō hoki; e kore hoki koe e mōhio ko tēhea kino e puta mai ki te whenua.
ECC 11:3 Ki te kī ngā kapua i te ua, ka ringihia ki te whenua. Ki te hinga hoki te rākau ki te tonga, ki te raki rānei, ko te wāhi e hinga ai te rākau, ko reira anō ia takoto ai.
ECC 11:4 Ko te tangata e whai mahara ana ki te hau, e kore e rui; ko te tangata titiro kapua e kore e kokoti.
ECC 11:5 Nā, ka kore anō koe e mōhio ki te huarahi o te hau, ki te tupu rānei o ngā wheua i roto i te kōpū o te wahine hapū; e kore anō hoki e mōhiotia e koe te mahi a te Atua, a te kaimahi o ngā mea katoa.
ECC 11:6 I te ata ruia tāu purapura, ā, i te ahiahi kaua e pēpeke tōu ringa; kāhore hoki koe e mōhio ko tēnei rānei e tika, ko tērā rānei, ko rāua rānei e rua ka pai ngātahi.
ECC 11:7 He pono he āhuareka te mārama, ā, he mea pai ki ngā kanohi te titiro ki te rā.
ECC 11:8 Āe rā, ki te maha ngā tau e ora ai te tangata, kia hari ia ki aua tau katoa; engari kia mahara ia ki ngā tau o te pōuri, tērā hoki e maha. Ko ngā mea e haere ake ana he horihori katoa.
ECC 11:9 Kia koa, e te taitamariki, ki tōu taitamarikitanga; kia whakahari anō hoki tōu ngākau i a koe i ngā rā o tōu taitamarikitanga. Haere hoki i ngā ara o tōu ngākau, i te tirohanga anō a ōu kanohi; otiia kia mōhio anō koe, he mea ēnei katoa e riro ai koe i te Atua ki te whakawā.
ECC 11:10 Nō reira whakawāteatia atu te riri i tōu ngākau, ā, whakanekehia atu te kino i tōu kikokiko; he mea horihori nei hoki te taitamarikitanga, me te houkuratanga.
ECC 12:1 Kia mahara rā ki tōu Kaihanga i ngā rā o tōu tamarikitanga, i te mea kāhore anō kia tae noa mai ngā rā o te kino, ā, kāhore anō kia tata mai ngā tau e kī ai koe, “Kāhore ōku āhuareka ki ēnei tau”;
ECC 12:2 i te mea kāhore anō kia pōuri noa te rā, te mārama, te marama, me ngā whetū, ā, kāhore anō kia hoki mai ngā kapua i muri i te ua;
ECC 12:3 i te rā e wiri ai ngā kaitiaki o te whare, ā, ka piko iho ngā tāngata mārohirohi, ka mutu anō hoki tā ngā kaihuri, nō te mea he torutoru rātou, ka pōuri anō hoki ngā mea e titiro mai nei i ngā matapihi.
ECC 12:4 Ā, ka tūtakina ngā tatau i te huarahi; ā, ka iti te haruru o te huri, ā, ka ara ake tētahi i te tangi o te manu, ka whakahokia iho hoki ki raro ngā kōtiro katoa o te waiata.
ECC 12:5 Āe rā, ka wehi rātou i te mea tiketike, kei te huarahi hoki ngā mea whakamataku; ā, ka puāwai te aramona, ka taimaha anō hoki te māwhitiwhiti, ka iti haere te hiahia. Ka haere nei hoki te tangata ki tōna whare tūturu, ā, ka hāereere ngā kaitangi i ngā huarahi.
ECC 12:6 I te mea kāhore anō kia mawheto noa te aho hiriwa, kia pakaru noa rānei te oko kōura, kia pakaru rānei te hāka ki te puna, kia pakaru te wīra ki te poka wai,
ECC 12:7 ā, ka hoki te puehu ki te whenua, ki tōna āhua ō mua, ā, ka hoki te wairua ki te Atua nāna nei i hōmai.
ECC 12:8 “He horihori, he tino horihori,” e ai tā te Kaikauwhau; “he horihori te katoa.”
ECC 12:9 Nā, nō te mea he tangata whakaaro nui te Kaikauwhau, koia i whakaakona tonutia ai e ia te iwi ki te mātauranga; āe rā, i whakaaroaro ia, i rapu, ā, i āta whakatakotoria e ia ngā whakatauki maha.
ECC 12:10 I whai te Kaikauwhau kia kitea ngā kupu huatau; he mea tika anō te mea i tuhituhia, he kupu pono.
ECC 12:11 Ko ngā kupu a te hunga whakaaro nui koia anō kei ngā werowero, ā, ko ngā kupu a ngā kaihuihui o ngā whakaminenga kei ngā whao i titia kia mau, he mea i hōmai e te hēpara kotahi.
ECC 12:12 Ā, kia ai ēnei hei whakatūpato i a koe, e tāku tama. Ko te tuhi i ngā pukapuka maha kāhore he mutunga; ki te nui hoki te ako ka māuiui te kikokiko.
ECC 12:13 Ko te whakamutunga tēnei o te mea katoa; kua rangona katoatia. E wehi ki te Atua, puritia āna whakahau; ko ngā mea katoa hoki ēnei hei mahi mā te tangata.
ECC 12:14 Nō te mea ka whakawākia ngā mahi katoa e te Atua, te mea huna anō hoki, ahakoa pai, ahakoa kino.
SOL 1:1 Ko te waiata o ngā waiata, ko tā Horomona.
SOL 1:2 Kia kihia ahau e ia ki ngā kihi a tōna māngai! He pai atu hoki tōu aroha i te wāina.
SOL 1:3 He kakara pai tō ōu hinu; ko tōu ingoa ānō he hinu kua oti te riringi; nā reira i aroha ai ngā wāhina ki a koe.
SOL 1:4 Kūmea ahau; ka rere atu mātou, ka whai i a koe; kua oti ahau te kawe e te kīngi ki ōna rūma. Ngā Hoa Ka koa mātou, ka hari ki a koe; engari tōu aroha i te wāina hei maharatanga atu mā mātou. E tika ana tō rātou aroha ki a koe!
SOL 1:5 He mangu ahau, otiia he ātaahua anō, e ngā tamāhine o Hiruhārama, rite tonu anō ki ngā tēneti o Kerara, ki ngā kākahu tauārai o Horomona.
SOL 1:6 Kaua e titiro mai ki ahau, nō te mea he parauri ahau, nō te mea kua tahuna ahau e te rā. I riri ngā tama a tōku whaea ki ahau, meinga ana ahau e rātou hei kaitiaki mō ngā māra wāina; ko tāku māra ia, ko tāku ake, kīhai i tiakina e ahau.
SOL 1:7 Whakaaturia mai ki ahau, e tā tōku wairua e aroha nei, ko hea koe whāngai ai, ko hea koe mea ai i tāu kāhui kia takoto i te poutūmārōtanga. Kia rite ahau hei aha ki te māhunga taupoki i te taha o ngā kāhui a ōu hoa?
SOL 1:8 Ki te kore koe e mōhio, e te mea ātaahua rawa o ngā wāhine, haere atu i runga i ngā takahanga o ngā hipi, ka whāngai i āu kūao koati i te taha o ngā nohoanga o ngā hēpara.
SOL 1:9 Kua whakaritea koe e ahau, e tāku e aroha nei, ki tētahi o ngā hōiho o ngā hāriata o Parao.
SOL 1:10 He ātaahua ōu pāpāringa i ngā whiri o ngā makawe, tōu kakī i ngā tautau o ngā mea whakapaipai.
SOL 1:11 Ka hangā e mātou ētahi mekameka kōura mōu, he mea tia ki te hiriwa.
SOL 1:12 I te kīngi e noho ana i tōna tēpu, ka puta te kakara o tōku nara.
SOL 1:13 Ko te rite ki ahau o tāku e aroha nei kei te paihere maira, e takoto nei i waenganui i ōku ū.
SOL 1:14 He tautau hena ki ahau tāku e aroha nei, i ngā māra wāina o Enekeri.
SOL 1:15 Nanā, he ātaahua koe, e tāku e aroha nei; nanā, he purotu koe; ko ōu kanohi kei te kūkupa.
SOL 1:16 Nanā, he ātaahua koe, e tāku kaingākau, āe rā, he āhuareka. Matomato tonu anō hoki tō tāua moenga;
SOL 1:17 he hīta ngā kurupae o tō tāua whare, he kauri ngā heke.
SOL 2:1 He puāwai ahau nō Harono, he rengarenga nō ngā awaawa.
SOL 2:2 He rengarenga i roto i ngā tātarāmoa, ko tāku e aroha nei i waenga i ngā tamāhine.
SOL 2:3 Kei te āporo i roto i ngā rākau o te ngahere te rite o tāku kaingākau i roto i ngā taitamariki. Āhuareka ana tāku noho iho i raro i tōna taumarumarutanga, ā, he reka āna hua ki tōku ngao.
SOL 2:4 I kawea ahau e ia ki te whare hākari, ā, ko tōna kara i runga i ahau he aroha.
SOL 2:5 Whakakahangia ake ahau ki te karepe whakamaroke, whakahauorangia ahau ki te āporo; e mate ana hoki ahau i te aroha.
SOL 2:6 Kei raro i tōku māhunga tōna mauī, e awhi ana tōna matau i ahau.
SOL 2:7 He kī tēnei nāku ki a koutou, e ngā tamāhine o Hiruhārama, i te aroaro anō o ngā anaterope, o ngā hāta o te pārae: kaua e whakaohokia, kaua e whakaarahia tāku e aroha nei, ā kia pai rā anō ia.
SOL 2:8 Ko te reo rā o tāku e aroha nei! Nanā, te haere mai nei ia, e tūpekepeke ana i runga i ngā maunga, e mokowhiti ana i runga i ngā pukepuke.
SOL 2:9 Rite tonu tāku e aroha nei ki te anaterope, ki te kūao hāta rānei. Tēnei ia te tū mai nei i muri o tō mātou taiepa, e mātakitaki mai ana i ngā matapihi, e whakaata mai ana rā roto i te mea rīpekapeka.
SOL 2:10 I kōrero mai tāku e aroha nei, i mea mai ki ahau: “E ara, e tāku ipo, e tāku mea ātaahua, ka haere mai.
SOL 2:11 Nanā, kua pahemo te hōtoke, kua mutu te ua, kua kore.
SOL 2:12 Kua puta ngā puāwai ki te whenua; kua tata te wā e korihi ai ngā manu, ā, e rangona ana te reo o te kūkupa ki tō tātou whenua.
SOL 2:13 Kua kōpuku ngā hua hou o te piki, kua puaka ngā wāina, e kakara mai nei. Maranga, e tōku hoa, e tāku mea ātaahua, haere mai hoki.”
SOL 2:14 E tāku kūkupa i roto i ngā kapiti o te kāmaka, i te wāhi ngaro o te pikitanga, kia kite ahau i tōu āhua, kia rongo ahau i tōu reo; he reka hoki tōu reo, he ātaahua tōu mata.
SOL 2:15 Hopukia mai mā tāua ngā pokiha, ngā pokiha ririki e takakino nei i ā tāua māra wāina; kua puāwai hoki ā tāua wāina.
SOL 2:16 Nāku tāku kaingākau, nāna hoki ahau; kei waenga ia i ngā rengarenga e whāngai ana i tāna kāhui.
SOL 2:17 I te mea kīanō i mātao te rā, ā, kīanō i rere noa ngā ātārangi, tahuri mai, e tāku e aroha nei, kia rite koe ki te anaterope, ki te kūao hāta, i ngā maunga o Pētere.
SOL 3:1 I te pō, i runga i tōku moenga, i rapua e ahau tā tōku wairua i aroha ai; i rapua e ahau, heoi kīhai i kitea.
SOL 3:2 Ka mea ahau, “Ka whakatika ahau āianei, ka kōpikopiko i roto i te pā, i ngā huarahi, i ngā waharoa, ka rapu i tā tōku wairua i aroha ai.” Rapua ana ia e ahau, heoi kīhai i kitea.
SOL 3:3 I tūtaki ki ahau ngā kaitiaki e kōpikopiko nei i roto i te pā. “Anō rā ko ahau ki a rātou, i kite rānei koutou i tā tōku wairua e aroha nei?”
SOL 3:4 Pahemo kau atu rātou, kua tūtaki ahau ki tā tōku wairua e aroha nei. Kei te pupuri ahau i a ia, kīhai hoki ia i tukua atu e ahau, ā kawea noatia atu ia e ahau ki te whare o tōku whaea, ki te rūma o te wahine i whānau ai ahau.
SOL 3:5 He kī tēnei nāku ki a koutou, e ngā tamāhine o Hiruhārama, i te aroaro o ngā anaterope, o ngā hāta o te pārae: kaua e whakaoho, kaua e whakaara i tāku e aroha nei, kia pai rā anō ia.
SOL 3:6 Ko wai tēnei e whakaputa mai nei i te koraha, ānō ko ngā pou paowa, kakara tonu i te maira, i te parakihe, i ngā puehu katoa a te kaihoko?
SOL 3:7 Nanā, ko te amo o Horomona; e toru tekau ngā tāngata mārohirohi i tētahi taha, i tētahi taha, nō ngā mārohirohi o Īharaira.
SOL 3:8 He hunga mau hoari rātou katoa, he mea whakaako ki te whawhai; kei tōna hūwhā anō te hoari a tēnei, a tēnei, i te wehi hoki i te pō.
SOL 3:9 I hangā e Kīngi Horomona he amo mōna, nō Repanōna te rākau.
SOL 3:10 Ko ōna pou i hangā e ia ki te hiriwa, he kōura a raro, he pāpura tōna nohoanga, he mea whāriki a waenganui ki te aroha, nō ngā tamāhine o Hiruhārama.
SOL 3:11 Haere, e ngā tamāhine o Hiona, ka mātakitaki i a Kīngi Horomona, me te karauna anō i karaunatia ai ia e tōna whaea i te rā o tōna mārenatanga, i te rā hoki i koa ai tōna ngākau.
SOL 4:1 Nanā, he ātaahua koe, e tōku hoa; nanā, he ātaahua koe! Nō ngā kūkupa ōu kanohi i muri i tōu ārai. Ko ōu makawe, koia anō kei te kāhui koati e takoto haere ana i te taha o Maunga Kireara.
SOL 4:2 Ko ōu niho, ānō he kāhui hipi uha kātahi tonu ka oti te kutikuti, i haere mai i te horoi; rite katoa rātou i te māhanga, kāhore hoki he mea pakoro i roto i a rātou.
SOL 4:3 Ko ōu ngutu, ānō he aho ngangana, āhuareka ana tōu māngai. Rite tonu ki tētahi wāhi o te pamekaranete ōu rahirahinga i muri i tōu ārai.
SOL 4:4 Rite tonu tōu kakī ki te Pourewa o Rāwiri, he mea i hangā hei iringa mō ngā patu, kei reira nei ngā whakangungu rākau kotahi mano e iri ana, ko ngā whakapuru tao katoa a te hunga mārohirohi.
SOL 4:5 Ko ōu ū e rua rite tonu ki ngā kūao e rua, he māhanga nā ngā anaterope, e kai ana i waenga i ngā rengarenga.
SOL 4:6 I te mea kīanō i mātao noa te rā, ā, kīanō i rere noa ngā ātārangi, ka haere ahau ki te maunga maira, ki te pukepuke parakihe.
SOL 4:7 He ātaahua katoa koe, e tōku hoa; kāhore hoki ōu koha.
SOL 4:8 Tāua ka haere atu i Repanōna, e tōku hoa, tāua atu i Repanōna. Mātakitaki ai i te tihi o Amana, i te tihi o Heniri rāua ko Heremona, i te nohoanga o ngā raiona, i ngā maunga o ngā reparo.
SOL 4:9 Riro pū tōku ngākau i a koe, e tōku tuahine, e tōku hoa; riro pū tōku ngākau i tētahi o ōu kanohi, i tētahi o ngā mekameka whakapaipai o tōu kakī.
SOL 4:10 Anō te ātaahua o tōu aroha, e tōku tuahine, e tōku hoa, Anō te pai o tōu aroha, nui atu i te wāina! Ko te kakara hoki o ōu hinu, nui atu i ngā kīnaki kakara katoa.
SOL 4:11 He honi kei ōu ngutu, e tōku hoa, e māturuturu ana; he honi, he waiū kei raro i tōu arero; ko te kakara hoki o ōu kākahu, koia anō kei te kakara o Repanōna!
SOL 4:12 He kāri kua oti te tūtaki tōku tuahine, tōku hoa; he manawa-whenua kua oti te pāpuni, he puna kua oti te hīri.
SOL 4:13 Ko ngā mea e wana ana i a koe he kāri pamekaranete, he pai whakarere ngā hua; he hena, he rākau nara,
SOL 4:14 he nara, he hapirone, he karamu, he hinamona, me ngā rākau parakihe katoa; he maira, he aroe, me ngā mea nui katoa o ngā kīnaki kakara.
SOL 4:15 He puna koe nō ngā kāri, he poka wai ora, he awa totō mai hoki nō Repanōna.
SOL 4:16 E ara, e te hauraro; haere mai hoki, e te tonga! Pupuhi mai ki tāku kāri, kia rere ai ngā kīnaki kakara ki waho. Tukua tāku e aroha nei kia haere mai ki tāna kāri, ki te kai i āna hua pai.
SOL 5:1 Kua tae mai ahau ki tāku kāri, e tōku tuahine, e tōku hoa; kua oti tāku maira me tāku kīnaki kakara te kohi, kua kainga e ahau tāku honikoma me tāku honi; kua inumia e ahau tāku wāina me tāku waiū. Ngā Hoa E kai, e ōku hoa; e inu, inā, kia nui te inu, e tāku e aroha nei.
SOL 5:2 I te moe ahau, ko tōku ngākau ia i te oho. Ko te reo tēnei o tāku e aroha nei e pātuki ana, e mea ana, “Te tatau ki ahau, e tōku tuahine, e tōku hoa, e tāku kūkupa, e tāku mea pokekore; kī tonu hoki tōku māhunga i te tōmairangi, ōku makawe anō hoki i ngā kōpata o te pō.”
SOL 5:3 Kua oti tōku koti te unu e ahau; me pēhea e kākahuria ai anō? Kua oti ōku waewae te horoi; kia whakaparua anō koia e ahau?
SOL 5:4 I kuhua mai tōna ringa e tāku e aroha nei i te kōhao o te tatau, ā, oho ana tōku manawa mōna.
SOL 5:5 I ara atu ahau ki te uaki i te tatau ki tāku i aroha ai; māturuturu ana te maira i ōku ringa, te maira waiwai i ōku maihao ki ngā puritanga o te tūtaki.
SOL 5:6 Uakina ana e ahau ki tāku i aroha ai; heoi kua maunu atu tāku i aroha ai, ā, kua riro. Tōku wairua riro pū i tāna kupu. I rapu ahau i a ia, heoi kīhai i kitea; i karangatia atu ia e ahau, kīhai anō ia i whakahoki kupu mai.
SOL 5:7 I tūtaki ki ahau ngā kaitiaki e kōpikopiko nei i te pā; patua ana ahau e rātou, mamae ana ahau i a rātou; tangohia ana tōku hīpoki i ahau e ngā kaitiaki o ngā taiepa.
SOL 5:8 He kī atu tēnei nāku ki a koutou, e ngā tamāhine o Hiruhārama, ki te tūtaki koutou ki tāku e aroha nei, kī atu ki a ia: “E mate ana ahau i te aroha.”
SOL 5:9 E te wahine ātaahua rawa o ngā wāhine, he aha te nuinga ake o tāu i aroha ai i tētahi atu e arohaina ana? He aha te nuinga ake o tāu i aroha ai i tētahi atu e arohaina ana, i pēnā ai tāu kī mai ki a mātou?
SOL 5:10 He mā tāku i aroha ai, he kiri wherowhero, ko te mea nui rawa o ngā mano kotahi tekau.
SOL 5:11 Ko tōna māhunga kei te tino kōura, he mea parakore, ko ōna makawe he māwhatu, ā, mangu tonu, ānō he raweni.
SOL 5:12 Ko ōna kanohi kei o ngā kūkupa i te taha o ngā awa wai, he mea horoi ki te waiū, pai rawa te whakanoho.
SOL 5:13 Ko ōna pāpāringa, ānō he tupuranga kīnaki kakara, ānō he rārangi tarutaru reka. Ko ōna ngutu, me te mea he rengarenga e whakamāturu iho ana i te wai maira.
SOL 5:14 Ko ōna ringa, ānō he mōwhiti kōura i whakanohoia he perira ki roto. Ko tōna tinana, kei te rei pai rawa, he mea whakakikorua ki te hāpira.
SOL 5:15 Ko ōna waewae, rite tonu ki te pou mapere, he mea whakatū ki ngā tūranga kōura pai rawa. Ko tōna āhua koia anō kei Repanōna, me te hīta te tino pai rawa.
SOL 5:16 Ko tōna māngai he tino reka; āe rā, he āhuareka katoa ia. Ko tāku tēnei i aroha ai, ko tōku hoa anō tēnei, e ngā tamāhine o Hiruhārama.
SOL 6:1 Kua riro ki hea tāu e aroha nā, e te wahine ātaahua rawa o ngā wāhine? I anga ki hea tāu e aroha nā, kia rapu tahi ai mātou me koe?
SOL 6:2 Kua riro tāku e aroha nei ki raro, ki tāna kāri, ki ngā tupuranga o ngā kīnaki kakara, ki ngā kāri kai ai, ki te kato i ngā rengarenga.
SOL 6:3 Nā tāku e aroha nei ahau, ā, nāku tāku e aroha nei; kei ngā rengarenga ia e whāngai ana i tāna kāhui.
SOL 6:4 He ātaahua koe, e tōku hoa he pērā me Tirita; he āhuareka koe, pērā me Hiruhārama, he whakamataku pērā me te taua e tare ana ngā kara.
SOL 6:5 Tahuri atu ōu kanohi i ahau, ka riro hoki ahau i a rāua. Ko ōu makawe koia anō kei te kāhui koati e takoto ana i te taha o Kireara.
SOL 6:6 Ko ōu niho ānō he kāhui hipi uha e haere mai ana i te horoi, rite katoa i te māhanga, kāhore hoki he pakoro i roto i a rātou.
SOL 6:7 Rite tonu ki tētahi wāhi o te pamekaranete ōu rahirahinga i muri i tōu ārai.
SOL 6:8 E ono tekau ēnei kuīni, e waru tekau ngā wāhine iti, me ngā wāhina e kore e taea te tatau.
SOL 6:9 Ko tāku kūkupa, ko tāku mea pokekore, he mea kotahi noa; ko ia anake tā tōna whaea; ko ia te mea i paingia rawatia e te wahine i whānau ai ia. I kite ngā tamāhine i a ia, kei te manaaki i a ia; āe rā, ko ngā kuīni me ngā wāhine iti, whakamoemiti ana rātou ki a ia.
SOL 6:10 “Ko wai tēnei e mātakitaki mai nei, ānō ko te ata, ātaahua tonu ānō ko te marama, mārama rawa, koia anō kei te rā, whakawehi rawa, me te mea he taua e tare ana ngā kara?”
SOL 6:11 I haere atu ahau ki te kāri nati, kia kite i ngā taru matomato o te awaawa; kia kite e tupu ana rānei te wāina, e kōpuku ana rānei ngā pamekaranete.
SOL 6:12 Mōhio rawa ake ahau kua meinga ahau e tōku wairua kia tau ki waenga ki ngā hāriata o tōku iwi rangatira.
SOL 6:13 Hoki mai, hoki mai, e te Hurami! Hoki mai, hoki mai, kia mātakitaki ai mātou ki a koe. Te Tāne He aha tā koutou e titiro ai ki te Hurami, me te mea ko te haka o Mahanaima?
SOL 7:1 Anō te ātaahua o ōu waewae i roto i ōu hū, e te tamāhine a te rangatira! Ko ngā hononga o ōu hūhā, koia anō kei o ngā peara, he mea hanga nā ngā ringa o te kaimahi mōhio.
SOL 7:2 Ko tōu pito, koia anō kei te oko porotaka, kīhai i hapa i te wāina whakaranu; ko tōu kōpū, ānō he pūranga wīti kua oti te karapoti ki ngā rengarenga.
SOL 7:3 Nō ōu ū e rua, ānō ko ngā kūao e rua, he māhanga nā te anaterope.
SOL 7:4 Ko tōu kakī ānō he pourewa rei. Ko ōu kanohi, ānō ko ngā roto wai i Hehepona, i te Kūwaha o Peterapimi. Ko tōu ihu, ānō ko te Pourewa o Repanōna, e titiro atu nei ki Ramahiku.
SOL 7:5 Ko tōu māhunga, i runga i a koe rite tonu ki Karamere, ā, ko te makawe o tōu māhunga, ki te pāpura; e mau herehere ana te kīngi i roto i ōna uru.
SOL 7:6 Anō te ātaahua, anō te pai ōu, e te mea e arohaina ana, āhuareka tonu!
SOL 7:7 Rite tonu koe ki te nīkau i a koe e tū nei, ā, ko ōu ū ki ngā tautau karepe.
SOL 7:8 I mea ahau, “Ka pikitia e ahau te nīkau, ka hopukia atu e ahau ōna manga.” Kia rite ōu ū ki ngā tautau o te wāina, te kakara o tōu hā ki te āporo;
SOL 7:9 ā, ko tōu māngai kia rite ki te wāina tino pai e mania nei tāna heke mā tāku e aroha nei, e rere ana nā ngā ngutu o te hunga e moe ana.
SOL 7:10 Kei tāku e aroha nei ahau; ko ahau anō tāna e hiahia ai.
SOL 7:11 Haere mai, e tāku e aroha nei, tāua ka haere ki te pārae, ka moe tāua ki ngā pā ririki.
SOL 7:12 Kia moata tō tāua maranga ki ngā māra wāina; kia kite ai, e tupu ana rānei te wāina, kua puta rānei te karepe hou, e kōpuku ana rānei ngā pamekaranete. Ko reira hoatu ai e ahau tōku aroha ki a koe.
SOL 7:13 Kei te patu te kakara o ngā manitareki, kei ō tāua kūwaha anō ngā momo hua papai katoa, ngā mea hou, ngā mea tawhito, he mea rongoā nāku māu, e tāku e aroha nei.
SOL 8:1 Auē me i rite koe ki tōku tungāne i ngote nei i ngā ū o tōku whaea! Ka kite ahau i a koe i waho, ka kihia koe e ahau, āe, e kore tētahi e whakahāwea ki ahau.
SOL 8:2 Ka aratakina koe e ahau, ka kawea ki te whare o tōku whaea, ko ia anō hei whakaako i ahau. Ka whakainumia koe e ahau ki te wāina whakaranu, ki te wai o tāku pamekaranete.
SOL 8:3 Ko tōna mauī ki raro i tōku mātenga, ko tōna matau ki te awhi i ahau!
SOL 8:4 He kī atu tēnei nāku ki a koutou, e ngā tamāhine o Hiruhārama, kaua e whakaohokia, kaua e whakaarahia tāku e aroha nei, kia pai rā anō ia!
SOL 8:5 Ko wai tēnei e haere mai nei i te koraha e taupuhipuhi nei ki tāna i aroha ai? Te Wahine Nāku koe i whakaara ake i raro i te āporo; ko te wāhi tēnā i puta mai ai koe i roto i tōu whaea; i puta mai anō koe i reira i roto i te wahine i whānau ai koe.
SOL 8:6 Waiho ahau hei hīri ki tōu ngākau, hei hīri ki tōu ringa; rite tahi hoki ki tō te mate te kaha o te aroha; nanakia tonu te hae, ānō ko te urupā, ko ōna hiko, he hiko ahi, he mura pū nā Ihowā.
SOL 8:7 Nui te wai, e kore te aroha e taea te tinei, e kore anō e ngaro i ngā awa. Ahakoa i hoatu e te tangata ngā rawa katoa o tōna whare mō te aroha, ka whakahāweatia rawatia.
SOL 8:8 He teina nohinohi tō mātou, kāhore hoki ōna ū. Me pēhea mātou ki tō mātou teina i te rā e kōrerotia ai ia?
SOL 8:9 Ki te mea he taiepa ia, ka hangā e tātou he pourewa ki runga ki a ia, he mea hiriwa. Ki te mea he tatau ia, ka whakakōpakina ia e tātou ki ngā papa hīta.
SOL 8:10 He taiepa ahau, ko ōku ū, ānō ko ōna pourewa; nō reira, ki tāna titiro mai, i rite ahau ki tētahi kua kite i te āta noho.
SOL 8:11 He māra wāina tā Horomona i Paara-Hamono, tukua atu ana e ia te māra ki ngā kaitiaki; kotahi mano ngā hiriwa hei kawenga mai mā tēnei, mā tēnei hei utu mō ōna hua.
SOL 8:12 Ko tāku māra, ko tāku ake, kei tōku aroaro; māu, e Horomona, te kotahi mano, ā, mā ngā kaitiaki o ōna hua e rua rau.
SOL 8:13 E koe e noho nei i ngā kāri, e whakarongo ana ngā hoa ki tōu reo; meinga kia rongo ahau.
SOL 8:14 Kia hohoro, e tāku e aroha nei, kia rite koe ki te anaterope, ki te kūao hāta rānei i runga i ngā maunga kīnaki kakara!
ISA 1:1 Ko te kite a Ihāia, a te tama a Āmoho, i kite ai ia mō Hūrā, mō Hiruhārama, i ngā rā o ngā kīngi o Hūrā, o Utia, o Iotama, o Ahata, o Hetekia.
ISA 1:2 Whakarongo, e ngā rangi, kia whai taringa anō; e te whenua, kua kōrero hoki a Ihowā: “Kua atawhai tamariki ahau, kua whakatupu hoki, nā, kua tahuri mai rātou ki ahau.
ISA 1:3 E mōhio ana te kau ki tōna ariki, te kāihe ki te takotoranga kai a tōna rangatira; ko Īharaira ia kāhore e mōhio, kāhore tāku iwi e whakaaro.”
ISA 1:4 Auē, e te iwi hara, he hunga taimaha i te kino, he uri nō ngā kaimahi i te hē, he tamariki whakangau kē. Kua whakarērea e rātou a Ihowā, kua whakahāwea ki te Mea Tapu o Īharaira, kua tāngata kē rātou, ā, kua hoki whakamuri.
ISA 1:5 Kia patua tonutia hoki koutou hei aha, i tutū tonu ai koutou? Kei te mate katoa te māhunga, kei te ruhi katoa hoki te ngākau.
ISA 1:6 Kāhore ōna wāhi ora, ake i te kapu o tōna waewae ā tae noa ki te māhunga; he kaiākiko kau, he kārawarawa, he whiunga kua pirau; kīhai ēnā i romia, kīhai i takaia, kīhai anō hoki i whakangāwaritia ki te hinu.
ISA 1:7 Ko tō koutou whenua kua ururuatia; ko ō koutou pā kua wera i te ahi; he tangata kē kei te kai i tō koutou oneone i tō koutou aroaro, ururua ana, koia anō kei tā te tangata kē raupatutanga.
ISA 1:8 Ā, ka mahue iho te tamāhine a Hiona, ānō he tīhokahoka i te māra wāina, ānō he wharau i te māra kūkamo, he pā e whakapaea ana.
ISA 1:9 Me i kāhore a Ihowā o ngā mano te waiho i tētahi toenga nohinohi rawa nei ki a tātou, kua pērā tātou me Horoma, kua rite tātou ki Komora.
ISA 1:10 Whakarongo ki te kupu a Ihowā e ngā rangatira o Horoma! Kia whai taringa mai, e te iwi o Komora, ki te ture a tō tātou Atua!
ISA 1:11 “Hei aha māku ā koutou patunga maha?” e ai tā Ihowā. “Kua mākona ahau i ngā tahunga o ngā tinana o ngā hipi toa, i te ngako o ngā kararehe whāngai; kāhore hoki aku manakohanga atu ki te toto o ngā pūru, o ngā reme, o ngā koati toa rānei.
ISA 1:12 “Ka haere mai koutou, ka whakakite mai ki tōku aroaro, ko wai i kī atu ki tēnei mea a ō koutou ringa, kia takahia ōku marae?
ISA 1:13 Kāti te mau mai i ngā whakahere horihori; he mea whakarihariha ki ahau te whakakakara – te kōwhititanga marama, te hāpati, te karangatanga o ngā whakaminenga, e kore ahau e manawanui ki te kino, ki te huihui nui.
ISA 1:14 Ko ā koutou kōwhititanga marama, ko ā koutou hākari whakarite, e kino ana tōku ngākau. He mea pōrearea ki ahau, he hanga whakahōhā.
ISA 1:15 Nā, ka wherahia mai ō koutou ringa, ka hunā e ahau ōku kanohi ki a koutou; āe rā, ka whakanuia e koutou te īnoi e kore ahau e rongo, kapi tonu ō koutou ringa i te toto.
ISA 1:16 Horoi i a koutou; kia mā; whakarērea atu te kino o ā koutou hanga i mua i ōku kanohi; kāti te mahi i te kino;
ISA 1:17 ākona te mahi pai; rapua te whakawā; whakatikaia tā te tangata e tūkinotia ana; whakawākia tā te pani; tohea tā te pouaru.
ISA 1:18 “Tēnā rā, tātou ka kōrerorero,” e ai tā Ihowā. “Ahakoa i rite ō koutou hara ki te mea ngangana, ka pērā me te hukarere te mā; ahakoa i whero me te mea whakawhero, ka rite ki te huruhuru hipi.
ISA 1:19 Ki te mea ka pai koutou, ā, ka rongo, ka kai koutou i ngā mea pai o te whenua;
ISA 1:20 ki te whakakāhore koutou, ā, ka tutū, ka pau koutou i te hoari.
ISA 1:21 Auē! Tōna kairautanga o te pā pono! I kī nei ia i te whakawā, he nohoanga nō te tika – ināianei ia nō ngā kaikōhuru!
ISA 1:22 Ko tāu hiriwa kua meinga hei para, ko tāu wāina, kua whakaranua ki te wai.
ISA 1:23 Ko ōu rangatira kei te whakakeke, ā, he hoa rātou nō te hunga tāhae. E whakapai ana rātou ki te moni whakapati, e whai ana i te utu. Kāhore rātou e whakawā ana mō te pani, ā, kāhore te tohe a te pouaru e tae ana ki a rātou.
ISA 1:24 Nō reira ka mea te Ariki, a Ihowā o ngā mano, te Mea Nui o Īharaira: “Nā! Ka whai mamatanga ahau i ōku hoariri, ka whai utu ahau i ōku hoariri.
ISA 1:25 Ka tahuri atu hoki tōku ringa ki a koe, ā, ka tahia rawatia tōu para, ka wehea katoatia atu anō tōu tine.
ISA 1:26 Ā, ka whakahokia mai e ahau ōu kaiwhakawā kia rite ki ō mua, me ōu kaiwhakatakoto whakaaro, kia rite ki ō te tīmatanga; muri iho ka kīia koe, Ko te pā o te tika, ko te pā piripono.”
ISA 1:27 Ka hokona a Hiona i runga i te whakawā, āna tāngata hoki, e tahuri mai ana, i runga i te tika.
ISA 1:28 Ka huihuia ia kia kotahi tonu te whakangaromanga o te hunga poka kē, o te hunga hara, ā, ka whakamōtītia te hunga e whakarere ana i a Ihowā.
ISA 1:29 Ka whakamā hoki rātou i ngā oki i matenuitia e koutou, numinumi kau koutou i ngā kāri i whiriwhiria e koutou.
ISA 1:30 Ka rite hoki koutou ki te oki kua memenge ōna rau, ki te kāri anō hoki kāhore nei ōna wai.
ISA 1:31 Ā, hei muka te mea kaha, hei korakora anō tāna mahi; nā, ka ngiha ngātahi rāua, kāhore hoki he tangata hei tinei.
ISA 2:1 Ko te kupu i kitea e Ihāia tama a Āmoho mō Hūrā rāua ko Hiruhārama.
ISA 2:2 Nā tēnei ake, kei ngā rā whakamutunga, ka whakapūmautia te maunga i tō Ihowā whare ki te tihi o ngā maunga, ka whakanekehia ake anō ki runga i ngā pukepuke; ā, ka rere ngā iwi katoa ki reira.
ISA 2:3 Ka haere hoki ngā iwi maha, ka mea, “Haere mai, tātou ka haere ki runga ki te maunga o Ihowā, ki te whare o te Atua o Hākopa; ka whakaakona tātou e ia ki āna ara, ka haere hoki tātou i āna huarahi.” Nō te mea ka puta mai te ture i Hiona, me te kupu a Ihowā i Hiruhārama.
ISA 2:4 Ka whakarite hoki ia i ngā whakawā a ngā iwi, ka rīria anō e ia ngā iwi maha; nā, ka patupatua e rātou ā rātou hoari hei hea parau, ā rātou tao hei mea tapahi manga. E kore tētahi iwi e hāpai hoari ki tētahi iwi, mutu pū tā rātou ako ki te whawhai.
ISA 2:5 E te whare o Hākopa, haere mai, tēnā tātou ka haere i tō Ihowā mārama!
ISA 2:6 Kua whakarērea nei e koe tāu iwi, te whare o Hākopa. Nō te mea kei te kī rātou i ngā tikanga mai nō te rāwhiti, ā, he tohunga māori rātou, he pērā me ngā Pirihitini, e papaki ringa ana hoki rātou me ngā tamariki a rau o iwi.
ISA 2:7 Kī tonu hoki tō rātou whenua i te hiriwa, i te kōura, ā, kāhore he mutunga o ō rātou taonga; kapi tonu hoki tō rātou whenua i te hōiho, ā, kāhore he mutunga o ō rātou hāriata.
ISA 2:8 Ko tō rātou whenua kī tonu i te whakapakoko; e koropiko ana rātou ki te mahi a ō rātou ringa, ki tā ō rātou maihao i hanga ai.
ISA 2:9 Ā, e whakapikoa ana te tangata ware, e whakaititia ana te tangata nui – mō reira kaua rātou e tohungia.
ISA 2:10 E tomo ki roto ki te kāmaka, e huna ki roto ki te puehu, i te wehi ki a Ihowā, i te korōria o tōna nui.
ISA 2:11 Ka whakaititia ngā kanohi whakapehapeha o te tangata, ka whakapikoa iho anō hoki te whakakake o ngā tāngata, ā, ko Ihowā anake e whakanuia i taua rā.
ISA 2:12 Nō te mea ka tae iho he rā nō Ihowā o ngā mano ki te hunga whakapehapeha, ki te hunga whakakake katoa, ki te hunga katoa kua neke ake, ā, ka whakaititia iho;
ISA 2:13 ki ngā hīta katoa anō o Repanōna kua tiketike, kua neke ake, ki ngā oki katoa anō o Pahana;
ISA 2:14 ki ngā maunga tiketike katoa, ki ngā pukepuke katoa kua pūrero ki runga;
ISA 2:15 ki ngā pourewa tiketike katoa, ki ngā taiepa kaha katoa anō hoki;
ISA 2:16 ki ngā kaipuke katoa o Tarahihi, ki ngā whakaahua katoa e minaminatia ana.
ISA 2:17 Ā, e whakapikoa iho tō te tangata whakapehapeha, e whakaititia iho ana anō hoki te whakakake o ngā tāngata, ko Ihowā anake e whakanuia i taua rā.
ISA 2:18 Ā, ka ngaro whakarere ngā whakapakoko.
ISA 2:19 Ā, ka haere ngā tāngata ki ngā ana o ngā kāmaka, ki ngā rua o te whenua, i te wehi ki a Ihowā, i te korōria o tōna nui, ina whakatika ia ki te rure kaha i te whenua.
ISA 2:20 Ā taua rā ka ākiritia atu e te tangata āna whakapakoko hiriwa me āna whakapakoko kōura i hangā e rātou hei koropikotanga māna, ki ngā kiore, ki ngā pekapeka;
ISA 2:21 haere ai ki ngā ana o ngā kōhatu, ki ngā kapiti o ngā kāmaka, i te wehi ki a Ihowā, i te korōria o tōna nui, ina whakatika ia ki te rurerure i te whenua.
ISA 2:22 Kāti tā koutou mea ki te tangata kei ōna pongaponga nei tōna manawa; kia pēhea hoki te whakaaro ki a ia?
ISA 3:1 Nō te mea tēnei te Ariki, a Ihowā o ngā mano, te tango atu nei i Hiruhārama, i a Hūrā, i te tītoko me te tokotoko – i te tītoko taro katoa, i te tītoko wai katoa –
ISA 3:2 i te mārohirohi, i te tangata whawhai; i te kaiwhakawā, i te poropiti, i te tohunga, i te tautahito;
ISA 3:3 i te rangatira rima tekau, i te tangata nui, i te kaiwhakatakoto whakaaro, i te kaimahi mōhio, i te mea mātau ki te taki.
ISA 3:4 Ka hoatu anō e ahau he tamariki hei rangatira mō rātou, he kōhungahunga hoki hei kīngi mō rātou.
ISA 3:5 Ka tūkinotia anō te iwi, tētahi e tētahi, te tangata e tōna hoa tata; ka whakahīhī hoki te tamariki ki te kaumātua, te mea e whakahāweatia ana ki te tangata e whakahōnoretia ana.
ISA 3:6 E mau hoki te tangata ki tōna tuakana, i te whare o tōna pāpā, ā, ka mea, “He kākahu tōu; hei rangatira koe mō mātou, ā, hei raro i tōu ringa tēnei whakatakanga.”
ISA 3:7 Ā taua rā ka karanga nui ia, ka mea, “E kore ahau e pai hei kaiwhakaora; kāhore hoki he taro i tōku whare, kāhore he kākahu; kaua ahau e meinga e koutou hei rangatira mō te iwi.”
ISA 3:8 Kua taka hoki a Hiruhārama, kua hinga a Hūrā; kua whawhai nei hoki tō rātou arero, me ā rātou mahi, ki a Ihowā, whakapātaritari ai i ngā kanohi o tōna korōria.
ISA 3:9 Ko te titiro hoki a ō rātou kanohi hei kaiwhakaatu mō tō rātou hē; e pērā ana me Horoma e whakapuaki ana i ō rātou hara, kāhore e huna. Auē te mate mō tō rātou wairua! Ko tā rātou utu hoki ki a rātou anō, ko te kino.
ISA 3:10 Mea atu ki te tangata tika, ko te pai mōna; ka kainga hoki e rātou ngā hua o ā rātou mahi.
ISA 3:11 Auē te mate mō te tangata kino! Ko te hē mōna; ka riro hoki i a ia te utu o tā ōna ringa.
ISA 3:12 Tēnā ko tāku iwi – he tamariki ō rātou kaitūkino, he wāhine hoki e kīngi ana mō rātou. E tāku iwi, ko ōu kaiārahi kei te whakapōhēhē i a koe, kei te whakakāhore hoki i te tikanga o ōu huarahi.
ISA 3:13 E whakatika ake ana a Ihowā ki te tohe; e tū ana ia ki te whakawā i ngā iwi.
ISA 3:14 Ka tīmata tā Ihowā whakawā i ngā kaumātua o tāna iwi, i ōna rangatira anō hoki: “Ko koutou nāna i pau ai te māra wāina; ko ngā taonga a ngā rawakore i pāhuatia kei roto i ō koutou whare.
ISA 3:15 He aha tā koutou tikanga i kuru ai koutou i tāku iwi, i orohina ai e koutou ngā mata o ngā rawakore?”
ISA 3:16 Nā, i mea anō a Ihowā: “Nā, i te mea e whakapehapeha ana ngā tamāhine o Hiona, e haere ana me te uatoko o ngā kakī, me te takataka o ngā karu, ka whakameamea, me te tatangi anō ngā waewae;
ISA 3:17 mō reira ka whakangaua e te Ariki ki te pātito te tumuaki o ngā tamāhine o Hiona, ka takoto kau anō hoki i a Ihowā ō rātou wāhi ngaro.”
ISA 3:18 I taua rā ka kore i te Ariki te ātaahua o ngā mea tatangi o ngā waewae, o ngā whakapaipai rīpekapeka, o ngā heitiki;
ISA 3:19 ngā mekameka, ngā poroporo me ngā ārai kanohi,
ISA 3:20 ngā pōtae, ngā whakapaipai o ngā waewae, ngā pākawe, ngā pouaka hongihongi me ngā whakakai;
ISA 3:21 ngā mōwhiti, ngā whakapaipai a te ihu;
ISA 3:22 ngā kākahu whakapaipai, ngā koroka, ngā hōro me ngā pūkoro;
ISA 3:23 ngā whakaata me te rīnena pai, ngā pōtae me ngā ārai whakapaipai.
ISA 3:24 Nā, he kakara pai i mua, tērā e puta ake he piro; he whītiki, tuku iho he tawhetawhe; he koukou huatau, tau iho he pākira kau; he tātua whakapaipai, kōpakina iho ki te kākahu taratara; he ātaahua, hunuhunua ake.
ISA 3:25 Ka hinga ōu tāngata i te hoari, ōu mārohirohi i te whawhaitanga.
ISA 3:26 Ka tangi, ka auē ōna kūwaha; ā, ka mokemoke ia, ka tau ki te whenua.
ISA 4:1 E mau anō ngā wāhine tokowhitu ki te tangata kotahi i taua rā, ā, ka mea, “Ko tā mātou taro anō hei kai mā mātou, ko ō mātou kākahu anō hei kākahu mō mātou; ko tōu ingoa noa kia whakahuatia mō mātou; tangohia atu e koe tō mātou ingoa kino.”
ISA 4:2 I taua rā tērā e ātaahua te peka o Ihowā, e korōria rawa, ā, ka mamaru te hua o te whenua, ka whakapaipai, hei mea mā ngā mōrehu o Īharaira.
ISA 4:3 Nā, ko te tangata i toe ki Hiona, i mahue ki Hiruhārama, ka kīia he tapu, arā, ngā tāngata katoa kua oti te tuhituhi ki roto ki te hunga ora i Hiruhārama.
ISA 4:4 Ina oti te paru o ngā tamāhine o Hiona te horoi e te Ariki, ina purea e ia ngā toto o Hiruhārama i roto i a ia, ki te wairua o te whakawā, ki te wairua tahutahu.
ISA 4:5 Ā, ka hangā e Ihowā ki runga ki te nohoanga katoa o Maunga Hiona, ki runga anō hoki i ōna huihuinga, he kapua me te paowa i te awatea, he aho nō te ahi murara i te pō. Nō te mea ka horahia he hīpoki ki runga katoa o te korōria.
ISA 4:6 Ā, ka ai he tīhokahoka hei whakamarumaru i te awatea mō te werawera, hei rerenga atu hoki, hei whakaruru mō te tūpuhi, mō te ua.
ISA 5:1 Nā, me waiata e ahau he waiata nā tāku i aroha nei mō tāku i kaingākau ai, he mea mō tāna māra wāina: He māra wāina tā tāku kaingākau i tētahi pukepuke mōmona.
ISA 5:2 Nā, taiepatia ana e ia, kohikohia ana e ia ngā kōhatu o reira, whakatōkia ana e ia ki te wāina pai rawa; hangā ana e ia he pourewa ki waenganui, keria ana anō e ia he poka wāina ki reira; ā, ka tatari ia kia whai karepe, nā, ka hua mai he karepe māori.
ISA 5:3 Nā, e te hunga e noho nei i Hiruhārama, me ngā tāngata o Hūrā, whakaritea tā māua whakawā ko tāku māra wāina.
ISA 5:4 Ko te aha ake anō rā i āhei kia mahia ki tāku māra, kīhai i mahia e ahau ki reira? He aha rā, i ahau i tatari ai kia hua mai he karepe, i puta kē mai ai he karepe māori?
ISA 5:5 Nā ināianei, māku e whakaatu ki a koutou tāku e mea ai ki tāku māra wāina. Ka tangohia atu e ahau tōna pā whakaruru hau, ā, ka pau ia te kai; ka tukitukia hoki e ahau tōna taiepa, ā, ka takatakahia.
ISA 5:6 Ā, ka meinga e ahau kia ururua; e kore e tapatapahia, e kore e ngakia, engari, ka huaranga ake te tātarāmoa me te tūmatakuru; ka ako atu hoki ahau ki ngā kapua kia kaua te ua e uaina ki reira.
ISA 5:7 Ko te māra wāina hoki a Ihowā o ngā mano, ko te whare o Īharaira, ā, ko ngā tāngata o Hūrā tāna mea āhuareka i whakatō ai; ka tatari ia ki te whakawā, nā, ko te tūkino; ki te tika, nā, he auē.
ISA 5:8 Auē te mate mō te hunga e hono ana i te whare ki te whare, e whakapiri nei i te māra ki te māra, ā, kore noa iho he wāhi, ā, ka meinga koutou kia noho, ko koutou anake, i waenganui i te whenua!
ISA 5:9 Ko tā Ihowā o ngā mano tēnei i hamumu ai ki ōku taringa: “He pono, he tini ngā whare ka mokemoke, tōna nunui, tōna ātaahua, ka noho tahanga kau.
ISA 5:10 Nō te mea kotahi tekau ngā eka o te māra wāina, ka maea ake kotahi tonu te pāti; i kī te homa i te purapura, ka maea ake kotahi te epa.”
ISA 5:11 Auē te mate mō te hunga e maranga wawe ana i te ata ki te whai i te wai kaha; e kawe ana i te roa o te pō, nāwai ā, ka tahuna e te wāina,
ISA 5:12 ko te hāpa me te hātere, ko te timipera me te pūtōrino, ko te wāina, kei ā rātou hākari ēnā, heoi, kāhore ā rātou mahara ki te mahi a Ihowā, kāhore hoki he whakaaro ki te mahi a ōna ringa!
ISA 5:13 Koia i riro ai tōku iwi i te pārau, he kore mātauranga; ko ō rātou tāngata ingoa nui hoki kua hemo i te kai, ā, ko tō rātou mano tini kua pakapaka rawa i te matewai.
ISA 5:14 Nā reira te rēinga i whakanui ai i tōna hiahia, i whewhera noa atu ai i tōna māngai; ā, heke atu ana ki reira tō rātou korōria, ō rātou mano tini, tō rātou whakahī, me te tangata e whakamanamana ana i roto i a rātou.
ISA 5:15 Ka whakapikoa anō hoki te tangata ware, ā, ka whakaititia te tangata nui, ka whakahokia iho hoki ngā kanohi o te hunga whakakake.
ISA 5:16 Otiia ka whakanekehia ake a Ihowā o ngā mano i runga i te whakawā, ka whakatapua anō te Atua, te Mea Tapu, i runga i te tika.
ISA 5:17 Ko reira ngā reme kai ai, ānō kei tō rātou wāhi, ā, ka kainga e ngā mea haere noa ngā wāhi kua ururuatia o te hunga tetere.
ISA 5:18 Auē te mate mō te hunga e kūmea ana e rātou te hē ki ngā aho o te horihori, te hara hoki me te mea ki te taura o te kāta;
ISA 5:19 e mea nei, “Kia hihiko ia, kia hohoro tāna mahi, kia kite ai mātou; kia whakatata mai hoki, kia tae mai te whakaaro o te Mea Tapu o Īharaira, kia mōhio ai mātou!”
ISA 5:20 Auē te mate mō te hunga e mea nei ki te kino, he pai, ki te pai hoki, he kino; e mea nei i te pōuri hei mārama, i te mārama hoki hei pōuri; e mea nei i te kawa hei reka, i te reka hei kawa!
ISA 5:21 Auē te mate mō te hunga he nui nei ō rātou whakaaro ki tā rātou titiro, e mahara ana hoki he hunga mōhio rātou!
ISA 5:22 Auē te mate mō te hunga kaha ki te inu wāina, he hunga uaua anō ki te whakaranu i te wai kaha;
ISA 5:23 e whakatika nei i tā te tangata hē, he whakaaro ki te utu; e tango atu nei i te tika o te tangata tika.
ISA 5:24 Mō reira ka rite ki te kainga a te arero o te ahi i te kakau wīti, ki te hinganga o te otaota maroke ki roto ki te mura; ka pērā tō rātou pakiaka te pirau, ka rere tō rātou puāwai ki runga, ānō he puehu; mō rātou i whakakāhore ki te Ture a Ihowā o ngā mano, i whakahāwea anō hoki ki te kupu a te Mea Tapu o Īharaira.
ISA 5:25 Nā reira te riri o Ihowā i mura ai ki tāna iwi, ā, kua torona e ia tōna ringa ki te whawhai ki a rātou, ā, patua iho rātou e ia; i ngāueue ngā maunga, ā, ko ō rātou tinana mate me te mea he paru i waenganui o ngā huarahi. Nā, ahakoa tēnei katoa, kāhore tōna riri i te tahuri atu, mārō tonu tōna ringa.
ISA 5:26 Ka whakaarahia anō hoki e ia he kara ki ngā iwi i tawhiti; ka whiowhio anō ki a rātou ki te pito o te whenua. Nanā, ka hohoro, ka tere tonu tā rātou haere mai!
ISA 5:27 E kore tētahi o rātou e ngenge, e kore e tapepa te waewae; e kore tētahi e parangia, e kore e moe; e kore te whītiki o ō rātou hope e mawheto, e kore anō te here o ō rātou hū e motu;
ISA 5:28 ko ā rātou pere, koi tonu, he piko katoa ā rātou kōpere; ko ngā pāua o ō rātou hōiho ka kīia he matā, ā, ko ō rātou wīra he āwhiowhio.
ISA 5:29 Ko tā rātou hāmama, koia anō kei tā te raiona, ka hāmama rātou ānō he kūao raiona; āe rā, ka ngengere rātou, ka hopukina tā rātou tūpāpaku, kāwhakina tonutia atu, kāhore hoki he tangata hei whakaora.
ISA 5:30 Nā, ka hāmama rātou ki a rātou i taua rā, me te mea ko te moana e haruru ana; ā, ki te titiro tētahi ki te whenua – nanā, he pōuri me te tuatea, ā, kua pōuri te mārama i ōna kapua.
ISA 6:1 I te tau i mate ai a Kīngi Utia i kite ahau i te Ariki e noho ana i runga i te torōna, he tiketike, he mea whakarewa ake ki runga, kī tonu anō hoki te temepara i te remu o tōna.
ISA 6:2 E tū ana ngā herapima i runga ake i a ia; e ono ngā parirau o tētahi, o tētahi: i hīpokina e ia tōna mata ki tētahi rua, ōna waewae hoki ki tētahi rua, ā, ko tētahi rua hei rere māna.
ISA 6:3 Ā, i karanga rātou tētahi ki tētahi, i mea: “He tapu, he tapu, he tapu, a Ihowā o ngā mano; kī katoa te whenua i tōna korōria.”
ISA 6:4 I oioi anō ngā pou o ngā tatau i te reo o tērā i karanga rā, kī tonu te whare i te paowa.
ISA 6:5 Nā, ko tāku kīanga ake: “Auē te mate mōku! Ka ngaro hoki ahau; he tangata ngutu poke hoki ahau, e noho ana i waenganui i te iwi ngutu poke; kua kite nei hoki ōku kanohi i te kīngi, i a Ihowā o ngā mano!”
ISA 6:6 Nā, ko te rerenga mai o tētahi o ngā herapima ki ahau, he waro mura i tōna ringa, he mea tango mai e ia i te āta ki te kokopi.
ISA 6:7 Whakapāngia mai ana e ia ki tōku māngai, me tāna kī mai, “Nanā, kua pā tēnei ki ōu ngutu; nā, kua riro tōu hē, kua murua tōu hara.”
ISA 6:8 Nā, ka rongo ahau i te reo o te Ariki e mea ana, “Ko wai tāku e unga ai, ko wai tā tātou hei haere?” Anō rā ko ahau, “Tēnei ahau, ngarea ko ahau.”
ISA 6:9 Anō rā ko ia, “Haere, mea atu ki tēnei iwi: ‘Rongo noa koutou, e kore e mātau; titiro noa koutou, e kore e kite.’
ISA 6:10 Meinga te ngākau o tēnei iwi kia ngako, ō rātou taringa kia taimaha, whakamoea ō rātou kanohi; kei kite ō rātou kanohi, kei rongo ō rātou taringa, kei mātau ō rātou ngākau, ā, ka tahuri, ka whakaorangia.”
ISA 6:11 Anō rā ko ahau, “E te Ariki, kia pēhea te roa?” Nā, ka mea ia: “Kia ururuatia rā anō ngā pā, ā, kore noa he tangata hei noho, kia kore rā anō he tangata mō roto i ngā whare, kia tino ururuatia rawatia anō hoki te whenua;
ISA 6:12 kia whakamataratia e Ihowā ngā tāngata ki tawhiti, ā, ka nui te whakarerenga i waenganui i te whenua.
ISA 6:13 Ā, ki te mau anō he whakatekau i roto i a ia, ka kainga tuaruatia anō ia; ka rite ki te terepini, ki te oki, e mau tonu nei tōna uho, i te mea kua tuaina.” Nā, hei uho mōna te uri tapu.
ISA 7:1 Nā, i ngā rā o Ahata tama a Iotama, tama a Utia, kīngi o Hūrā ka haere mai a Retini kīngi o Hīria rāua ko Peka tama a Remaria kīngi o Īharaira ki Hiruhārama tatau ai ki reira; kīhai ia a reira i taea e rāua.
ISA 7:2 Ā, ka kōrerotia ki te whare o Rāwiri, ko Hīria kei te whakapiri ki a Ēparaima. Nā, ka kapakapa tōna ngākau, me te ngākau o tōna iwi, ānō ko ngā rākau o te ngahere e ngarue ana i te hau.
ISA 7:3 Kātahi a Ihowā ka mea ki a Ihāia, “Tēnā, haere ki te whakatau i a Ahata, kōrua ko tāu tama, ko Hearatahupu ki te pito o te awakeri o te puna wai i runga, ki te ara i te māra a te kaihoroi kākahu.
ISA 7:4 Ka mea ki a ia, ‘Kia mahara, kia āta noho; kaua e wehi, kaua, hoki tōu ngākau e pāwera ki ngā pito e rua o ēnei ngotungotu e paowa nei, ki te riri nui o Retini rātou ko Hīria, o te tama hoki a Remaria.
ISA 7:5 Nā, kua whakaaroa nei e Hīria, rātou ko Ēparaima, ko te tama a Remaria, he kino mōu, kua mea nei rātou,
ISA 7:6 “Tātou ka haere ki a Hūrā whakatupu kino ai i a ia, ā, ka wāhi mai ai tātou i tētahi wāhi mā tātou, ka whakakīngi ai hoki i tētahi kīngi i waenganui i a ia, arā i te tama a Tapeara.”
ISA 7:7 Ko te kupu tēnei a te Ariki, a Ihowā: E kore e tū, e kore anō e taea.
ISA 7:8 Ko te upoko hoki o Hīria ko Ramahiku, ā, ko te upoko o Ramahiku ko Retini. Nā, i ēnei tau e ono tekau mā rima ka pākarukaru a Ēparaima, kore ake tēnā iwi.
ISA 7:9 Nā, ko te upoko o Ēparaima ko Hamaria, ko te upoko hoki o Hamaria ko te tama a Remaria. Ki te kore koutou e whakapono, he pono e kore tā koutou e ū.’ ”
ISA 7:10 Ā, i kōrero anō a Ihowā ki a Ahata, i mea,
ISA 7:11 “Īnoia tētahi tohu māu i a Ihowā, i tōu Atua; īnoia he mea i te hōhonu, i te wāhi tiketike rānei i runga.”
ISA 7:12 Anō rā ko Ahata, “E kore ahau e īnoi, e kore anō e whakamātautau i a Ihowā.”
ISA 7:13 Nā, ka kī tērā, “Tēnā, whakarongo e te whare o Rāwiri; he mea iti ianei ki a koutou kia hōhā ngā tāngata i tā koutou, i mea ai koutou kia hōhā anō hoki tōku Atua?
ISA 7:14 Mō reira mā te Ariki anō e hoatu he tohu ki a koutou. Nanā, ka hapū he wāhina, ka whānau hoki he tama, ā, ka huaina e ia tōna ingoa ko Emānuera.
ISA 7:15 He pata, he honi, hei kai māna, ina mōhio ia ki te paopao ki te kino, ki te whiriwhiri i te pai.
ISA 7:16 Mōhio rawa hoki te tamaiti ki te paopao ki te kino, ki te whiriwhiri i te pai, ka mahue te whenua e whakariharihangia nei e koe ōna kīngi e rua.
ISA 7:17 Tērā e kawea mai e Ihowā ki a koe, ki tōu iwi hoki, ā, ki te whare o tōu pāpā, he rā kīhai nei i tae mai, nō te rā i mawehe ai a Ēparaima i roto i a Hūrā – arā te kīngi o Ahiria.”
ISA 7:18 Nā, i taua rā ka whiowhio a Ihowā ki te ngaro i te wāhi whakamutunga mai o ngā awa o Īhipa, ki te pī anō hoki i te whenua o Ahiria.
ISA 7:19 Ā, ka rere mai rātou, ka tau katoa ki ngā awaawa ka ururuatia nei, ki ngā rua o ngā kāmaka, ki ngā tātarāmoa katoa, ki ngā wāhi tarutaru katoa.
ISA 7:20 I taua rā ka heua e te Ariki ki te heu i utua, ki ngā wāhi i tērā taha o te awa – arā ki te kīngi o Ahiria – te māhunga me te huruhuru o ngā waewae; ka pau anō hoki i a ia te pāhau.
ISA 7:21 Nā, i taua rā ka atawhaitia e te tangata he kūao kau me ngā hipi e rua,
ISA 7:22 ā, he nui te waiū e tukua e rātou, nō ka kai pata ia. Ka kainga hoki he pata, he honi e te hunga katoa ka mahue ki te whenua.
ISA 7:23 Ā, i taua rā, ko ngā wāhi katoa i reira nei ngā wāina kotahi mano, ko te utu kotahi mano hiriwa, ka waiho ērā mō ngā tātarāmoa, mō ngā tūmatakuru.
ISA 7:24 He pere, he kōpere a ngā tāngata ina haere mai ki reira; ka riro katoa hoki te whenua i te tātarāmoa, i te tūmatakuru.
ISA 7:25 Nā, ko ngā puke katoa e ngakia ana ki te karaone, e kore koe e tae ki reira i te wehi o te tātarāmoa, o te tūmatakuru; engari he wāhi tērā e tukua ai ngā kau, e takahi ai ngā hipi.
ISA 8:1 I kī mai anō a Ihowā ki ahau, “Tīkina atu tētahi papa nui māu, ka tuhituhi ki runga, ki te pene a te tangata, mō Mahereharara Hapaha.
ISA 8:2 Nā, māku e mea ētahi kaiwhakaatu pono hei whakaatu mō tāku, arā a Uria tohunga rāua ko Tekaria tama a Teperekia.”
ISA 8:3 Nā, ko tāku haerenga atu ki te poropiti wahine, kua hapū, whānau ake he tama. Kātahi a Ihowā ka kī mai ki ahau, “Huaina tōna ingoa ko Mahereharara Hapaha.
ISA 8:4 Nō te mea mōhio rawa ake te tamaiti ki te karanga, ‘E tōku pāpā, e tōku whaea,’ ka riro ngā taonga o Ramahiku, me ngā mea parakete o Hamaria i te aroaro o te kīngi o Ahiria.”
ISA 8:5 I kōrero mai anō a Ihowā ki ahau, i mea:
ISA 8:6 “Nā, kua paopao nei tēnei iwi ki ngā wai āta rere o Hiroa, ā, e koa ana ki a Retini rāua ko te tama a Remaria;
ISA 8:7 nā, tēnei te tākina mai nei e te Ariki ngā wai o te awa ki runga ki a rātou, he kaha, he nui, arā te kīngi o Ahiria, me tōna korōria katoa. Ka ngawhā anō ia ki runga i ōna pareparenga katoa, ka pari anō hoki ki runga i ōna tahatika katoa.
ISA 8:8 Ka rere tonu atu ia ki a Hūrā; ka puhake atu, ā, ka puta; ka pā ki te kakī rawa; ā, ka kapi i te rohanga o ōna parirau te whānuitanga o tōu whenua, e Emānuera!”
ISA 8:9 E anga, ka whakatupu raruraru, e ngā iwi, ā, ka pakaru rikiriki koutou; kia whai taringa hoki, e te hunga katoa o ngā whenua i tawhiti; whītiki, ā, ka pakaru rikiriki koutou; whītiki, ā, ka mongamonga noa koutou.
ISA 8:10 Whakatakotoria he whakaaro, ā, ka taka noa iho; kōrerotia te kupu, e kore anō e tū; kei a mātou nei hoki te Atua.
ISA 8:11 Ko tā Ihowā kōrero hoki tēnei ki ahau i runga i te ringa kaha, me tāna whakaako anō i ahau kia kaua e haere i te ara o tēnei iwi; i kī mai:
ISA 8:12 “Kaua e kī, ‘He hē te whakatakotoria nei;’ i ngā mea katoa e kī atu ai tēnei iwi, he hē te whakatakotoria nei; kaua hoki e wehi i tā rātou e wehi ai, kaua anō e pāwera ki reira.
ISA 8:13 Ko Ihowā o ngā mano, ko ia tā koutou e whakatapu ai; ko ia hei wehi mā koutou, ko ia hei pāwera mā koutou.
ISA 8:14 Ā, ka ai ia hei wāhi tapu; hei kōhatu tūtukitanga waewae ia, hei kāmaka e hinga ai ngā whare e rua o Īharaira, hei rore anō hoki, hei māhanga ki ngā tāngata o Hiruhārama.
ISA 8:15 He tokomaha anō hoki o rātou e tūtuki te waewae ki reira; e hinga, pakaru iho, e māhangatia, mau tonu iho.”
ISA 8:16 Takaia te whakaaturanga, hīritia te ture i roto i āku ākonga.
ISA 8:17 Ā, ka tatari ahau ki a Ihowā e huna nei i tōna mata ki te whare o Hākopa, ka tūmanako atu ki a ia.
ISA 8:18 Nanā, ko mātou ko ngā tamariki hōmai nei e Ihowā ki ahau hei tohu, hei mea whakamīharo i roto i a Īharaira, he mea nā Ihowā o ngā mano e noho nei i Maunga Hiona.
ISA 8:19 Nā, ki te mea mai rātou ki a koutou, “Me rapu tikanga koutou i te hunga he atua māori nei ō rātou, i ngā matakite, i te hunga e kōwhetewhete ana, e ngunguru ana. Kaua ianei tētahi iwi e rapu tikanga ki tō rātou Atua? Me rapu atu rānei rātou ki ngā mea mate mō ngā mea ora,
ISA 8:20 ki te ture, ki te whakaaturanga?” Ki te kore e rite tā rātou kōrero ki tēnei kupu, inā, kāhore he ata mō rātou.
ISA 8:21 Ā, ka tika anō rātou nā reira, ruha noa iho, e mate ana i te kai. I a rātou ka mate nei i te kai, ka tupu te riri, ā, ka kangā e rātou tō rātou kīngi, me tō rātou Atua. Ā, ka tahuri ō rātou kanohi whakarunga;
ISA 8:22 ā, ka titiro rātou ki te whenua, nā, he whakapāwera, he pōuri, ko te pōruru o te mamae; ā, ka āia atu rātou ki roto ki te pōuri kerekere.
ISA 9:1 Otiia, e kore e pōuri tonu ia i mamae nei. I te wā i mua i whakaititia e ia te whenua o Hepurona me te whenua o Napatari; i te wā ia i muri nei ka whakakorōriatia e ia, i te ara o te moana, i tāwāhi o Horano, i Karirī o ngā tauiwi.
ISA 9:2 Ko te hunga i hāereere i te pōuri, kua kite i te mārama nui; ko ngā tāngata e noho ana i te whenua o te ātārangi o te mate; kua whiti te mārama ki a rātou.
ISA 9:3 Kua whakatokomahatia e koe te iwi, kua whakanuia e koe tō rātou koa; koa noa iho rātou ki tōu aroaro, me te mea e koa ana ki te kotinga wīti, e whakamanamana ana rānei ki ngā taonga parakete e wehewehea ana.
ISA 9:4 Whati pū hoki i a koe te ioka o tāna kawenga, te rākau whiu mō tōna pokohiwi, te rākau o tōna kaiwhakatupu kino, koia anō kei tō te rā i a Miriana.
ISA 9:5 Ko ngā mea whawhai katoa hoki a te tangata whawhai mō te ngangau, ko ngā kākahu i okeokea ki te toto, hei tahunga ēnā, hei kai mā te ahi.
ISA 9:6 Kua whānau nei hoki he tamaiti mā tātou, kua hōmai he tama ki a tātou; ā, ki runga ki tōna pokohiwi te rangatiratanga; nā, ko te ingoa e huaina ki a ia ko Whakamīharo, ko Kaiwhakatakoto Whakaaro, ko te Atua Kaha Rawa, ko te Matua Mutungakore, ko te Rangatira o te Rongomau.
ISA 9:7 Kāhore he mutunga o te nui haere o tōna kīngitanga, o te mau o tana rongo, ki runga ki te torōna o Rāwiri, ki runga hoki i tōna rangatiratanga. Kia ū ai, kia mau ai hoki i runga i te whakawā, i runga i te tika āianei ā ake tonu atu. Ka oti tēnei i te ngākau whakapuke o Ihowā o ngā mano.
ISA 9:8 I ungā e te Ariki he kupu ki a Hākopa, kua tau anō ki a Īharaira;
ISA 9:9 ā, ka mōhio te iwi katoa – a Ēparaima rātou ko te tangata o Hamaria – he whakapehapeha nei, he ngākau nui nei tō rātou ki te kī mai,
ISA 9:10 “Kua horo ngā pereki, ā, mā tātou e hanga ki te kōhatu tārai; kua oti ngā hikamora te tapahi, ka puta kē i a tātou he hīta.”
ISA 9:11 Nō reira ka whakaarahia e Ihowā ngā hoariri o Retini ki a ia, ā, ka oho i a ia ōna hoa whawhai;
ISA 9:12 ko ngā Hīriani ki mua, ko ngā Pirihitini ki muri, hāmama tonu ki te kai i a Īharaira. Ahakoa ko tēnei katoa e kore tōna riri e tahuri kē, engari mārō tonu tōna ringa.
ISA 9:13 Nā, kīhai anō te iwi i tahuri ki tō rātou kaiwhiu, kīhai anō hoki i rapu i a Ihowā o ngā mano.
ISA 9:14 Mō reira ka tapahia e Ihowā te upoko o Īharaira me te hiawero, te nīkau me te wīwī, i te rā kotahi –
ISA 9:15 ko te kaumātua me te tangata ingoa nui, ko ia te upoko; ko te poropiti whakaako teka, ko ia te hiawero.
ISA 9:16 Ko ngā kaiārahi hoki o tēnei iwi hei whakapōhēhē i a rātou, ā, pau ake a rātou i ārahi ai.
ISA 9:17 Mō reira kāhore o te Ariki koa ki ā rātou taitamariki, e kore anō e tohungia ā rātou pani, ā rātou pouaru; nō te mea he noa rātou katoa, he kaimahi i te kino, he wairangi te kōrero a ngā māngai katoa. Ahakoa ko tēnei katoa, e kore tōna riri e tahuri kē, engari mārō tonu tōna ringa.
ISA 9:18 Kei te toro nei hoki te kino, ānō he ahi; pau ake i a ia ngā tātarāmoa me ngā tūmatakuru; nā, ka kā ki ngā rākau pūruru o te ngahere, ka pupū ake ngā kapua pongere o te paowa whakarunga.
ISA 9:19 Nā te riri o Ihowā o ngā mano i toro ai te whenua; ā, ko te iwi, ānō he kai mā te ahi; e kore tōna tuakana, tōna teina e tohungia e tētahi.
ISA 9:20 Ā, ka kapohia e tētahi māna i te taha ki matau, ā, ka matekai anō; ā, ka kai ia i te taha ki mauī, ā, e kore rātou e mākona. Ka kainga e rātou, e tēnā, e tēnā o rātou te kikokiko o tōna ake ringa;
ISA 9:21 a Mānahi ki a Ēparaima; a Ēparaima ki a Mānahi; ā, ko rāua tokorua ki a Hūrā. Ahakoa ko tēnei katoa, e kore tōna riri e tahuri kē, engari mārō tonu tōna ringa.
ISA 10:1 Auē te mate mō te hunga e whakatakoto ana i ngā tikanga hē, mō ngā kaituhituhi anō hoki e tuhituhi nei i te mea nanakia;
ISA 10:2 hei whakakotiti kē i te whakawā mō ngā rawakore, hei tango noa iho i te mea e tika ana mā ngā ware o tōku iwi, kia waiho ai ngā mea a te pouaru hei taonga mā rātou, kia pāhuatia ai e rātou ngā pani!
ISA 10:3 Ka pēhea rā koutou i te rā o te tirohanga mai, o te whakangaromanga ka pā mai i tawhiti? Ka rere koutou ki a wai hei āwhina, ā, ka waiho tō koutou korōria ki hea?
ISA 10:4 Ka piko noa iho rātou ki raro i ngā herehere, ka hinga ki raro i te iwi i patua. Ahakoa ko tēnei katoa, e kore tōna riri e tahuri kē, engari mārō tonu tōna ringa.
ISA 10:5 “Auē, e te Ahiriana, te rākau o tōku riri, te whiu kei tōna ringa ko tōku āritarita!
ISA 10:6 Ka ungā ia e ahau ki te iwi ngutukau; he hē mō te iwi o tōku riri tāku e whakahau ai ki a ia, ki te taonga parakete māna, ki te pāhua, ki te mea i a rātou hei takahanga, hei pērā me te paru o ngā ara.
ISA 10:7 Kāhore ia ōna whakaaro pēnei, kīhai hoki tōna ngākau i mea ki te pēnei; engari he whakangaro tā tōna ngākau, kia kaua anō hoki e torutoru ngā iwi e hātepea e ia.
ISA 10:8 E kī ana hoki ia: ‘He teka ianei he kīngi katoa āku rangatira?
ISA 10:9 He teka ianei he rite a Karano ki Karakemihi, he rite a Hāmata ki Ārapara, he rite a Hamaria ki Ramahiku?
ISA 10:10 Ka rite ki ngā kīngitanga o ngā whakapakoko i tūpono mai ki tōku ringa; nui atu nei hoki ō rātou whakapakoko i o Hiruhārama, i o Hamaria;
ISA 10:11 e kore ianei tāku e mea ai ki Hiruhārama, ki ōna whakapakoko, e rite ki tāku i mea ai ki Hamaria, ki ōna whakapakoko?’ ”
ISA 10:12 Nā, tēnei ake, kia oti i te Ariki tāna mahi katoa ki Maunga Hiona, ki Hiruhārama, “Ka whiua e ahau ngā hua o te ngākau nui o te kīngi o Ahiria, me te korōria anō o ōna kanohi whakakake.
ISA 10:13 Kua kī nā hoki ia: ‘Nā te kaha o tōku ringa i oti ai tēnei i ahau, nā tōku whakaaro nui, he tangata whai mahara hoki ahau. Kua whakanekehia hoki e ahau ngā rohe o ngā iwi, kua pāhuatia anō e ahau ō rātou taonga, ā, kua riro i ahau, i te mārohirohi, ki raro te hunga noho o ngā torōna.
ISA 10:14 Nā, kua kitea e tōku ringa ngā taonga o ngā iwi, ānō he kōhanga; i rite hoki ki te kohikohinga a tētahi i ngā hua manu i mahue, tāku kohikohinga i te whenua katoa; ā, kīhai i oraora te parirau o tētahi, kīhai i hāmama te māngai, kīhai hoki i pīpī.’ ”
ISA 10:15 E whakahīhī rānei te tītaha ki te tangata nāna nei ia i whakamahi ki te hahau? E whakakake rānei te kani ki te tangata nāna nei ia i kani ai? Me te mea nei ko te patupatu hei whakakorikori i tōna kaihāpai, ko te tokotoko rānei hei hāpai i te tangata ehara nei i te rākau.
ISA 10:16 Mō reira ka ungā mai e te Ariki, e te Ariki o ngā mano, te hīroki ki ōna mea mōmona; ā, ka kā ake a raro o tōna korōria, he mea whakaū, koia anō kei te kā o te ahi.
ISA 10:17 Ā hei ahi te mārama o Īharaira, ā, ko tana Mea Tapu anō hoki hei mura; ā, ka wera ōna tūmatakuru, ōna tātarāmoa, pau ake i te rā kotahi.
ISA 10:18 Ka pau anō hoki i a ia te korōria o tōna ngahere, o tāna māra mōmona, te wairua rāua ko te tinana; ā, hei te otinga, me te mea kua ngohe te ngākau o te kaihāpai kara.
ISA 10:19 Nā, ko te toenga o ngā rākau o tōna ngahere, he torutoru, mā te tamaiti noa e tuhituhi.
ISA 10:20 I taua rā ka whakamutua e ngā toenga o Īharaira rātou ko ngā mōrehu o te whare o Hākopa, tā rātou okioki ki tō rātou kaiwhiu; engari ka okioki pono rātou ki a Ihowā, ki te Mea Tapu o Īharaira.
ISA 10:21 He toenga anō e hoki mai, ko te toenga o Hākopa, ki te Atua kaha rawa.
ISA 10:22 Nō te mea ahakoa i rite tōu iwi, a Īharaira ki te onepū o te moana, he toenga kau o rātou e hoki mai; ko te whakaotinga i whakaritea, me te mea e puhake ana i te tika.
ISA 10:23 Ka oti rā hoki, ka mahia anō hoki e te Ariki, e Ihowā o ngā mano, te mea i whakaritea ki waenganui i te whenua katoa.
ISA 10:24 Nā reira tēnei kupu a te Ariki, a Ihowā o ngā mano: “E tāku iwi e noho nei i Hiona kaua e wehi i te Ahiriana; ahakoa patu ia i a koe ki te rākau, hāpainga mai rānei e ia tōna tokotoko ki a koe, pērā me tā Īhipa.
ISA 10:25 He wāhi iti rawa nei, ā, ka whakatutukitia te weriweri, tōku riri hoki, i a rātou ka hunā.”
ISA 10:26 Ka oho anō i a Ihowā o ngā mano he whiu mōna, he pērā me te patunga o Miriana ki te kāmaka ki Orepe; ā, ka iri tōna tokotoko i runga i te moana, ā, ka hāpainga e ia, pērā i tāna i Īhipa.
ISA 10:27 Nā, i taua rā ka makere atu tāna pīkaunga i tōu pokohiwi, me tāna ioka i tōu kakī, ā, ka kore noa iho anō hoki te ioka i te whakawahinga.
ISA 10:28 Kua tae ki Aiata; kua pahemo ki Mikirono; ko āna mea rongoātia ake e ia ki Mikimaha.
ISA 10:29 Kei tēnei taha rātou o te whakawhitinga, “Kua noho ā-puni rātou ki Kepa.” Pāwera noa iho a Rama: kua rere a Kipea o Haora.
ISA 10:30 Kia nui tōu reo, e te tamāhine a Karimi! Whakarongo e Raihi! He mate tōu, e Anatoto!
ISA 10:31 He whati a Maramena; kei te huihui ngā tāngata o Kepimi, he tahuti.
ISA 10:32 Hei tēnei rā anō ka tū ia ki Nopo; kei te rūrū tōna ringa ki te maunga o te tamāhine a Hiona, ki te pukepuke i Hiruhārama.
ISA 10:33 Nanā, ka tapahia e te Ariki, e Ihowā o ngā mano, ngā peka, nui atu hoki te wehi; ā, ka tuaina ki raro ngā mea he tiketike nei te āhua, ka whakaititia anō hoki ngā mea whakakake.
ISA 10:34 Ka tuaina anō e ia ngā rākau pūruru o te ngahere ki te rino, ka hinga anō hoki a Repanōna i te mea nui.
ISA 11:1 Ā, tērā e puta ake he wana i te take i a Hehe, ā, ka whai hua tētahi peka e tupu ake i roto i ōna pakiaka.
ISA 11:2 Ka noho hoki te Wairua o Ihowā ki runga ki a ia, te wairua o te whakaaro nui, o te mātauranga, te wairua o te whakatakoto whakaaro, o te kaha, te wairua o te mōhio, o te wehi ki a Ihowā;
ISA 11:3 ā, ko tāna e āhuareka ai ko te wehi ki a Ihowā. E kore anō ia e whakawā i runga i tā ōna kanohi e kite ai, e kore anō e whakaaro ki tā ōna taringa e rongo ai, ina rīria e ia te hē.
ISA 11:4 Engari ka whakawā ia mō ngā rawakore i runga i te tika; i runga anō i te tika tōna riri i te hē, he whakaaro nōna ki te hunga māhaki o te whenua; he whiu nā tōna māngai tāna patu mō te whenua, ka whakamatea anō e ia te tangata kino ki te manawa o ōna ngutu.
ISA 11:5 Ā hei whītiki te tika mō tōna hope, hei whītiki anō te pono mō ōna whatumanawa.
ISA 11:6 Ka noho tahi anō te wuruhi rāua ko te reme, ka takoto tahi te reparo rāua ko te kūao koati; ko te kūao kau, ko te kūao raiona, ko te mea mōmona, kotahi anō rōpū; ā, mā te tamaiti iti rātou e ārahi.
ISA 11:7 Ā, ka kai te kau rāua ko te pea, ka takoto tahi anō hoki ā rāua kūao; ā, ka rite te raiona ki te kau, ka kai i te kakau wīti.
ISA 11:8 Ka tākaro hoki te tamaiti ngote ū i runga i te rua o te ahipi, ā, ka pā atu te ringa o te tamaiti kua whakamutua te kai ū ki te nohoanga o te neke.
ISA 11:9 E kore rātou e tūkino, e kore anō e whakamate puta noa i tōku maunga tapu; nō te mea ka kapi te whenua i te mātauranga ki a Ihowā, ānō ko ngā wai e taupoki nei i te moana.
ISA 11:10 Nā, i taua rā ko tētahi pakiaka o Hehe, ka tū hei kara ki ngā iwi, ka rapua mai e ngā tauiwi; ko tōna okiokinga hoki, korōria rawa.
ISA 11:11 I taua rā ka anga anō te ringa o te Ariki, ā, ka tuaruatia te whakahoki mai o ngā mōrehu o tāna iwi e mahue i Ahiria, i Īhipa, i Pātoro, i Kuhu, i Erama, i Hinara, i Hāmata, i ngā motu anō o te moana.
ISA 11:12 Ka whakatūria anō e ia he kara ki ngā iwi, ā, ka huihuia mai te hunga o Īharaira i peia atu, ka whakaminea mai anō ngā mea o Hūrā i marara atu, i ngā pito e whā o te whenua.
ISA 11:13 Ka haere atu hoki te hae o Ēparaima, ka hātepea atu anō hoki ngā hoariri o Hūrā; e kore a Ēparaima e hae ki a Hūrā, e kore anō a Hūrā e whakatoi ki a Ēparaima.
ISA 11:14 Engari, ka rere iho rātou i runga i te pokohiwi o ngā Pirihitini i te taha ki te hauāuru, ka pāhuatia ngātahitia e rātou te hunga o te rāwhiti. Ka pā ō rātou ringa ki runga ki a Ēroma rāua ko Moapa; ka whakarongo hoki ngā tama a Āmona ki a rātou.
ISA 11:15 Ā, ka whakangaromia rawatia e Ihowā te arero o te moana i Īhipa; ā, he hau hunuhunu tāna e rūrū ai i tōna ringa ki runga ki te awa, e patu ai kia whitu ōna rerenga, ā, ka meinga ngā tāngata kia whiti maroke noa atu.
ISA 11:16 Ā, ka takoto he ara haerenga mai i Ahiria mō ngā mōrehu o tāna iwi ka mahue; ka rite anō ki tō Īharaira i te rā i haere mai ai ia i te whenua o Īhipa.
ISA 12:1 Ā, i taua rā ka mea koe: “Ka whakamoemiti atu ahau ki a koe, e Ihowā; ahakoa hoki i riri koe ki ahau, kua tahuri atu tōu riri, ā, kei te whakamārie koe i ahau.
ISA 12:2 Nanā, ko te Atua tōku whakaoranga; ka whakawhirinaki ahau, e kore anō e wehi. Ko te Ariki hoki, ko IHOWĀ tōku kaha, tāku waiata; ko ia anō hei whakaoranga mōku.
ISA 12:3 Nā, ka utu wai koutou i runga i te koa i roto i ngā puna o te whakaoranga.”
ISA 12:4 Ka mea anō hoki i taua rā: “Whakamoemitia a Ihowā, karanga atu ki tōna ingoa; whakaaturia āna mahi ki roto i ngā iwi; kauwhautia atu kua oti tōna ingoa te whakaneke ake.
ISA 12:5 Waiata ki a Ihowā, he nui noa atu hoki āna mahi; meinga kia mōhiotia tēnei puta noa i te ao.
ISA 12:6 Hāmama kia nui te reo, e te wahine e noho ana i Hiona, he nui hoki te Mea Tapu o Īharaira i waenganui i a koe.”
ISA 13:1 Ko te poropititanga mō Papurōna i kitea e Ihāia tama a Āmoho.
ISA 13:2 Whakaarahia he kara ki runga ki te maunga horehore, kia rahi te reo ki a rātou; tāwhiritia atu te ringa kia haere mai ai rātou ki roto ki ngā kūwaha o ngā rangatira.
ISA 13:3 Kua oti āku i whakatapu ai te whakahau, kua karangatia anō hoki e ahau āku mārohirohi ki tōku riri, arā āku e whakamanamana nui nei.
ISA 13:4 Ko te haruru o te huihui i runga i ngā maunga, tōna rite kei tō te iwi nui! He haruru, he ngangau nō te huihui o ngā kīngitanga o ngā iwi! E whakatakā ana e Ihowā o ngā mano te ope mō te whawhai.
ISA 13:5 E haere mai nei rātou i tawhiti, i te pito o te rangi, a Ihowā me ngā patu a tōna riri, ki te whakangaro i te whenua katoa!
ISA 13:6 Auē koutou, kua tata hoki te rā o Ihowā; tērā e puta mai, ānō he whakangaromanga nā te Kaha Rawa!
ISA 13:7 Nō reira ka ngoikore ngā ringa katoa, ka ngohe noa iho ngā ngākau katoa o ngā tāngata.
ISA 13:8 Ka ohorere anō rātou, mau pū i te mamae, i te whakapōuri; ko tō rātou mamae koia anō kei tō te wahine e whakawhānau ana. Ka mīharo rātou tētahi ki tētahi, ā, ko ō rātou mata, ānō he mura ahi.
ISA 13:9 Nanā, e haere mai nei te rā o Ihowā, he kino, he riri, he whakatakariri e mura ana; hei whakaururua i te whenua, hei whakangaro atu hoki i reira i ōna tāngata hara.
ISA 13:10 Ko ngā whetū hoki o te rangi, ko ngā kāhui whetū anō hoki o reira, kāhore e hōmai i tō rātou mārama. Ka pōuri noa iho te rā i tōna haerenga mai, kore ake hoki e titi te atarau.
ISA 13:11 Ka whiua anō e ahau te ao mō tō rātou kino, te hunga kino hoki, mō tō rātou hē; ka whakamutua hoki e ahau te whakapehapeha o te hunga whakakake, ka whakahokia iho anō ki raro te whakapehapeha o te hunga kino.
ISA 13:12 Ka meinga anō e ahau kia nui atu te utu mō te tangata i tō te kōura pai; āe rā, he tangata, kia nui atu i tō te kōura parakore o Ōpira.
ISA 13:13 Nā reira ka meinga e ahau ngā rangi kia wiri, ka ruperupea atu anō te whenua i tōna wāhi, he riri nō Ihowā o ngā mano, he rā anō e mura ai tōna riri.
ISA 13:14 Ā, ka rite ki te anaterope e whāia ana, ki ngā hipi kāhore nei ō rātou kaihuihui, ka tahuri rātou ki tōna iwi, ki tōna iwi, ka rere ki tōna whenua, ki tōna whenua.
ISA 13:15 Ko te hunga katoa e kitea ana, ka werohia; ko te hunga katoa e hopukia ana, ka hinga i te hoari.
ISA 13:16 Ka tāia iho hoki ā rātou kōhungahunga i tā rātou tirohanga; ka pāhuatia ō rātou whare, ka moea anō ā rātou wāhine.
ISA 13:17 Tēnei ahau te whakaoho atu nei i ngā Meri ki a rātou, he hunga e kore nei e whakaaro ki te hiriwa; nā, ko te kōura, e kore e matenuitia e rātou.
ISA 13:18 Ka tāia iho anō hoki ngā taitamariki e ā rātou kōpere, mongamonga noa; e kore anō e tohungia ngā hua o te kōpū; e kore ō rātou kanohi e manawapā ki ngā tamariki.
ISA 13:19 Ā, ko Papurōna, ko te korōria o ngā kīngitanga, ko te mea ātaahua whakahirahira a ngā Karari, tērā ia e rite ki tā te Atua hurihanga i Horoma, i Komora.
ISA 13:20 E kore e nohoia ā ake ake, e kore e waiho hei kāinga ā tēnā whakatupuranga, tēnā whakatupuranga; e kore anō e whakatūria e te Ārapi tōna tēneti ki reira; e kore anō a reira e waiho e ngā hēpara hei takotoranga mō ā rātou kāhui.
ISA 13:21 Engari, hei takotoranga a reira mō ngā kurī mohoao o te koraha; ka kī hoki ō rātou whare i ngā kararehe pōuri; ā, ka nohoia a reira e ngā otereti, ka waiho hoki hei tūpekepeketanga mō ngā mea āhua koati.
ISA 13:22 Ka tangi anō hoki ngā wuruhi i roto i ō rātou whare kīngi, me ngā kurī mohoao i roto i ō rātou whare ātaahua; kua tata mai hoki tōna wā, e kore anō ōna rā e roa.
ISA 14:1 Nō te mea ka aroha a Ihowā ki a Hākopa, ka whiriwhiria anō a Īharaira e ia; ka meinga hoki rātou kia āta noho ki tō rātou ake oneone; ka piri anō te tangata kē ki a rātou, ka uru anō hoki ki roto ki te whare o Hākopa.
ISA 14:2 E tango anō ngā iwi i a rātou, e kawe i a rātou ki tō rātou wāhi, riro tonu iho rātou i te whare o Īharaira hei pononga tāne, hei pononga wāhine i te oneone a Ihowā; ā, hei whakarau mō rātou ō rātou kaiwhakarau, ko rātou anō hei rangatira mō ō rātou kaitūkino.
ISA 14:3 Nā, i te rā e meinga ai koe e Ihowā kia okioki i tōu pōuri, i tōu pāwera, i te mahi pakeke anō hoki i whakamahia ai koe,
ISA 14:4 ko reira maranga ai tēnei pepeha āu mō te kīngi o Papurōna, ka mea hoki koe: Ananā! Mutu pū tā te kaitūkino, mutu pū tā te pā kōura!
ISA 14:5 Whati ana i a Ihowā te tokotoko o te hunga kino, te hēpeta o ngā kīngi;
ISA 14:6 nāna i patu ngā iwi, me te riri, me te patu kīhai i tāmutu, nāna i whakahaere ngā iwi i runga i te riri, me te whakatupu kino, kāhore he kaiaraarai.
ISA 14:7 Kua whai okiokinga, kua āta noho te whenua katoa; pakaru mai ana tā rātou waiata.
ISA 14:8 Āe, kei te koa ngā kauri ki a koe, rātou ko ngā hīta o Repanōna, e kī ana, “Nō tōu taunga anō ki raro i kore ai te kaitapahi e tae mai ki a mātou.”
ISA 14:9 Ko te rēinga i raro, oho ana i a koe, he tūtakitanga ki a koe i tōu taenga atu; he meatanga ki a koe i whakaarahia ai e ia ngā tūpāpaku, ngā mea nunui o te whenua; maranga ana i a ia ngā kīngi katoa o ngā iwi i runga i ō rātou torōna.
ISA 14:10 Ka kōrero rātou katoa ki a koe, ka mea, “Ko koe anō hoki, kua ngoikore pēnei me mātou? Kua rite koe ki a mātou?”
ISA 14:11 Kua oti tōu korōria te whakahoki iho ki te rēinga, me te rangi anō o āu hātere; ko te whāriki mōu ko te kutukutu, ko te hīpoki mōu ko ngā toke.
ISA 14:12 Ananā! Tōu takanga iho i te rangi, e Tāwera, e te tama a te ata! Te tapahanga iho i a koe ki raro, nāu nei i tuku ngā iwi ki raro!
ISA 14:13 I mea hoki tōu ngākau, “Ka piki ahau ki te rangi, ka whakanekehia ake e ahau tōku torōna ki runga i ngā whetū a te Atua, ka noho anō ahau ki te maunga o te whakaminenga, ki ngā taha rawa ki te raki.
ISA 14:14 Ka pikitia e ahau a runga ake o ngā wāhi tiketike o ngā kapua; kia rite ahau ki te Runga Rawa.”
ISA 14:15 Otirā, ka whakahokia iho koe ki te rēinga, ki ngā pito rawa o te rua.
ISA 14:16 Ko te hunga e kite i a koe, matatau tonu tā rātou titiro ki a koe, me tā rātou āta whakaaroaro anō: “Ko te tangata ianei tēnei i wiri ai te whenua, i ngāueue ai ngā rangatiratanga,
ISA 14:17 i mea nei i te ao hei koraha, wāhia ana e ia ōna pā; kīhai i tuku i āna herehere ki tō rātou wāhi?”
ISA 14:18 Ko ngā kīngi katoa o ngā iwi, ko rātou katoa, takoto ana i tōna whare, i tōna whare, i runga i te korōria.
ISA 14:19 Ko koe ia he mea maka mai i tōu urupā, ānō he peka e whakariharihangia ana, he mea whakakākahu ki te hunga i patua, i werohia ki te hoari, e haere ana ki raro ki ngā kōhatu o te rua. Ānō he tinana i takatakahia e te waewae.
ISA 14:20 E kore te tanumanga mōu e huihuia ki tō rātou, mōu i whakangaro i tōu whenua, i patu i tōu iwi. E kore te uri o ngā kaimahi i te kino e whai ingoa, ake ake!
ISA 14:21 Kia tere te patu mō āna tamariki, mō te hē o ō rātou mātua; kei kake, kei riro anō i a rātou te whenua, kei kapi te mata o te ao i ō rātou pā.
ISA 14:22 “Ka whakatika hoki ahau ki a rātou,” e ai tā Ihowā o ngā mano, “ka tapahia atu anō e ahau i Papurōna te ingoa me te toenga, te tama me te mokopuna,”
ISA 14:23 “Ka meinga anō a reira e ahau hei kāinga mō te matuku, hei hārotoroto wai; ka purumatia anō e ahau ki te puruma o te whakangaromanga,” e ai tā Ihowā o ngā mano.
ISA 14:24 Kua oati a Ihowā o ngā mano, kua mea: “Inā, ū tonu tāku i whakaaro ai; ko tāku i whakatakoto ai, mau tonu.
ISA 14:25 Mō te Ahiriana kia whati i ahau ki tōku whenua, kia takatakahia ki runga ki ōku maunga. Ko reira tāna ioka marere ai i runga i a rātou; ā, ka marere tāna pīkaunga i runga i ō rātou pokohiwi.”
ISA 14:26 Ko te whakaaro tēnei kei te takoto mō te whenua katoa. Ko te ringa anō tēnei e totoro atu nei ki ngā iwi katoa.
ISA 14:27 Kua takoto hoki i a Ihowā o ngā mano, ā, mā wai e whakataka? Kua totoro tōna ringa, ā, ko wai hei mea kia pēpeke?
ISA 14:28 Nō te tau i mate ai a Kīngi Ahata tēnei poropititanga:
ISA 14:29 Kei koa, e Pirihitia katoa, ki te whatinga o te rākau a te kaiwhiu i a koe; tērā hoki e puta ake he neke i roto i te pakiaka o te nākahi, ā, ko tōna hua he nākahi e rere ana me he ahi.
ISA 14:30 Nā, ka kai ngā mātāmua o ngā ware, ka takoto ngā rawakore, tē ai he wehi; ka whakamatea anō e ahau tōu pakiaka ki te hemokai, ā, ka patua ōu mōrehu.
ISA 14:31 Auē, e te kūwaha; hāmama, e te pā; harotu kau koe, e Pirihitia katoa! E puta mai hoki te paowa i te raki; e kore tētahi e tū kē mai i te wā i whakaritea mōna.
ISA 14:32 Ā, he aha te kupu e whakahokia ki ngā karere o te iwi? “Inā rā, nā Ihowā a Hiona i whakatū, ā, ka ai a reira hei rerenga atu mō ngā mea o tāna iwi i tūkinotia.”
ISA 15:1 Ko te poropititanga mō Moapa: He pō kotahi ka ngaro a Ara o Moapa, ā, kore iho! He pō anō hoki, ka ngaro a Kiri o Moapa, ā, kore iho!
ISA 15:2 Kua riro ia ki runga ki Paiti, ki Ripono, ki ngā wāhi tiketike tangi ai; ka auētia e Moapa a Nepo rāua ko Merepa. He mea moremore katoa ō rātou māhunga, tapahi rawa ngā kumikumi katoa.
ISA 15:3 Ko ō rātou whītiki i ō rātou ara he kākahu taratara; ka auē rātou katoa i runga i ō rātou whare, i ō rātou waharoa, nui atu te tangi.
ISA 15:4 Ka hāmama hoki a Hehepona rāua ko Ereare; ka rangona tō rātou reo i Iahata rawa. Nō reira hāmama ana ngā mau patu o Moapa; ka wiri tōna wairua i roto i a ia.
ISA 15:5 E tangi ana tōku ngākau ki a Moapa; rere ana ōna rangatira ki Toara, ki Ekarata Herihia. He tangi nei hoki tā rātou i te pikitanga ki Rūhiti, i te mea e piki ana i reira; i te ara hoki ki Horonaimi ka pā tā rātou karanga o te ngaromanga.
ISA 15:6 Ka takoto kau noa ngā wai o Nimirimi; kua maroke hoki te tarutaru, kua mate te otaota, kāhore he mea e tupu ana.
ISA 15:7 Nā, ko ā rātou mea maha, me ā rātou mea i te rongoā, ka kawea e rātou ki te awa i ngā wirou.
ISA 15:8 Kua taiāwhiotia hoki ngā rohe o Moapa e te karanga; kua tae tōna auē ki Ekeraima, tōna auē ki Peererimi.
ISA 15:9 Kei te kī hoki ngā wai o Rimono i te toto; tērā atu tāku e whakapā ai ki Rimono – he raiona ki ngā oranga o Moapa, ki ngā mōrehu anō o te whenua.
ISA 16:1 Ungā e koutou ngā reme ki te rangatira o te whenua, i Hera i te koraha, ki te maunga o te tamāhine a Hiona.
ISA 16:2 Kei te manu hāereere noa hoki, kei te mea i makā mai i te kōhanga, i te rite o ngā tamāhine a Moapa i ngā kauanga i Aranona.
ISA 16:3 “Kia takoto te whakaaro, whakaritea te whakawā. Ko tōu whakamarumaru i te poutūmārōtanga kia rite ki te pō; hunā te hunga i peia; kaua te ātiutiu noa e whakaaturia.
ISA 16:4 Tukua āku whati kia noho ki a koe; tēnā ko Moapa, ko koe hei piringa mō rātou kei mate i te kaipāhua.” Kua kore hoki te kaiwhakatē, mutu pū tā te kaipāhua, kua poto atu ngā kaiwhakatupu kino i runga i te whenua,
ISA 16:5 ā, ka whakapūmautia he torōna i runga i te tohu tangata; ka nohoia e tētahi i runga i te pono, i roto anō i te tēneti o Rāwiri; me te whakawā, me te rapu i te tikanga o te whakawā, he hohoro hoki ki te mahi i te tika.
ISA 16:6 Kua rongo tātou ki te whakakake o Moapa – nui atu tōna whakakake, ki tōna whakapehapeha, ki tōna whakakake, ki tōna pukuriri – kāhore he tikanga o āna whakamanamana.
ISA 16:7 Mō reira ka auē a Moapa ki a Moapa, ka auē katoa. Ka tangi koutou ki ngā keke karepe o Kiriharehete, kua mōtī rawa.
ISA 16:8 Kua kahakore hoki ngā māra o Hehepona, me te wāina o Hipima; he mea whatiwhati nā ngā rangatira o ngā iwi ōna wāina pai rawa, i tae nei ki Iatere rawa, i toro haere atu ki te koraha. I toha haere ōna peka, i whiti ki tērā taha o te moana.
ISA 16:9 Mō reira ka tangihia e ahau te wāina o Hipima, kei te tangi mō Iatere te rite. Ka whakamākūkū ahau i a koe ki ōku roimata, e Hehepona, e Ereare; kua tau hoki te hāmama o te pakanga ki runga ki āu hua raumati, ki runga ki tāu tapahanga wīti.
ISA 16:10 Kua tangohia atu te hari, me te koa i te māra mōmona; kāhore hoki he waiata i ngā māra wāina, kāhore he iere harakoa; e kore ngā kaitakahi e takahi wāina i ā rātou poka wāina; kua whakamutua e ahau te hāmama o te mahinga wāina.
ISA 16:11 Nā reira, ānō he hāpa ōku whēkau e tangi ana ki a Moapa, a roto i ahau ki Kiriharehe.
ISA 16:12 Nā, ka puta mai a Moapa, ka māuiui i runga i te wāhi tiketike, ā, ka haere ki tōna wāhi tapu īnoi ai, heoi e kore e taea e ia.
ISA 16:13 Ko te kupu tēnei i kōrerotia e Ihowā mō Moapa i mua.
ISA 16:14 Engari kua kōrero a Ihowā ināianei, kua mea: “Kia toru ngā tau, kia rite ki ngā tau o te kaimahi, ka whakahāweatia te korōria o Moapa, me tōna mano tini; ā, ko te toenga he iti rawa, he kāhore noa iho.”
ISA 17:1 Ko te poropititanga mō Ramahiku: “Nanā, kua kore a Ramahiku hei pā; ka pūranga kau.
ISA 17:2 Kua mahue ngā pā o Aroere; mō ngā kāhui ērā, ka takoto rātou, tē ai he kaiwhakawehi.
ISA 17:3 Ka kore anō he pā kaha mō Ēparaima, he kīngitanga mō Ramahiku, he toenga rānei o Hīria; ka rite rātou ki te korōria o ngā tama a Īharaira,”
ISA 17:4 “Nā, i taua rā ka meinga te korōria o Hākopa kia tūpuhi, ka hīroki haere hoki te ngako o ōna kikokiko.
ISA 17:5 Ā, ka rite ki tā te kaitapahi kohikohinga i te wīti, ki te tapahanga hoki a ōna ringa i ngā hua wīti; āe, ka rite ki te hamunga o ngā hua wīti i te raorao i Repaima.
ISA 17:6 Otiia, e toe anō ētahi karepe hei hamunga; ka rite ki te ruiruinga o te ōriwa – e rua, e toru ngā ōriwa i te pito o tō runga rawa peka, e whā, e rima i te peka i waho rawa, i te mea whai hua,”
ISA 17:7 I taua rā ka titiro he tangata ki tōna Kaihanga, ka anga ōna kanohi ki te Mea Tapu o Īharaira;
ISA 17:8 e kore anō e titiro ki ngā āta i hangā nei e ōna ringa, e kore e anga ki te mea i mahia e ōna maihao, ki ngā Aherimi rānei, ki ngā whakapakoko rānei.
ISA 17:9 I taua rā ka rite ōna pā kaha ki te wāhi i whakarērea i te ngahere, i te tihi anō o te maunga, i whakarērea rā i te aroaro o ngā tama a Īharaira; nā, ko te ngaromanga.
ISA 17:10 Kua wareware hoki koe ki te Atua o tōu whakaoranga, ā, kua kāhore i mahara ki te kāmaka o tōu kaha, mō reira ka whakatupuria e koe he mea ātaahua, ka whakatōkia anō ki te peka kē.
ISA 17:11 I te rā e whakatō ai koe, ka taiepatia e koe, ā, i te ata matomato tonu tāu i whakatō ai; i te rā ia o te pōuri, o te mamae ngau kino, ka memeha atu te kotinga.
ISA 17:12 Ananā, te ngangau o ngā iwi maha, e ngē ana ānō he haruru nō ngā moana! Me te rere o ngā iwi, e wawā ana, koia anō kei te turituri o ngā wai nunui!
ISA 17:13 Ānō ko te tāheke o ngā wai maha te haruru o ngā iwi; otiia ka rīria rātou e ia, ā, ka rere ki tawhiti, ka whāia, ānō he pāpapa nō ngā maunga i te upoko o te hau, ānō he puehu āwhiowhio e āia ana e te tūpuhi.
ISA 17:14 I te ahiahi, nā, ko te pāwera! Kīanō i pūao kua kore rātou. Ko te wāhi tēnei mā te hunga e pāhua ana i a tātou, ko te mea tēnei e wehea mā te hunga e muru ana i a tātou.
ISA 18:1 Ha, ko te whenua e kapakapa nei ngā parirau i tērā taha o ngā wai o Etiopia!
ISA 18:2 E unga karere nei i runga i te moana, ā, ko ō rātou kaipuke he kākaho i runga i ngā wai, e kī ana, Haere, e ngā karere tere, ki tētahi iwi roroa, maheni hoki, ki te iwi i wehingia i tō rātou tīmatanga iho ā mohoa noa nei; ki te iwi he mahi rūri nei, he takatakahi nei tāna, ko tōna whenua wāhia iho e ngā awa.
ISA 18:3 E ngā tāngata katoa o te ao, e te hunga e noho ana i te whenua, titiro mai, ina whakaarahia te kara ki runga i ngā maunga; whakarongo mai, ina whakatangihia te tētere.
ISA 18:4 Ko tā Ihowā kupu hoki tēnei ki ahau: “Ka āta noho ahau, ka titiro hoki i tōku nohoanga; ka rite ahau ki te mahana i te mea ka mahea, ka rite ki te kapua tōmairangi i te mahana o te kotinga.”
ISA 18:5 Hei mua hoki i te kotinga, kia ngahoro te puāwai, kia puta ki te puāwai he karepe e maoa haere ana, nā, ka hātepea atu e ia ngā peka ririki ki te tapahi peka, ā, ko ngā manga ka tangohia, ka tapahia ki raro.
ISA 18:6 Ka waiho ngātahi atu rātou mā ngā manu tokokai o ngā maunga, mā ngā kararehe hoki o te whenua. Ka whakatau ngā manu tokokai ki runga ki a rātou i te raumati, ka whakakainga hoki ngā kararehe katoa o te whenua ki reira i te hōtoke.
ISA 18:7 I taua wā ka maua mai he hākari ki a Ihowā o ngā mano, o te iwi roroa, maheni hoki, nā te iwi i wehingia i tō rātou tīmatanga iho, ā mohoa noa nei, nā te iwi he mahi rūri nei, he takatakahi nei tāna, ā, ko tōna whenua wāhia iho e ngā awa – ki te wāhi o te ingoa o Ihowā o ngā mano, ki Maunga Hiona.
ISA 19:1 Ko te poropititanga mō Īhipa: Tēnei a Ihowā te rere mai nei i runga i te kapua tere, tae tonu ki Īhipa, ā, ka oho ngā whakapakoko o Īhipa i tōna aroaro, ngohe noa iho te ngākau o Īhipa i waenganui ōna.
ISA 19:2 “Ka whakaangahia anō e ahau ngā Īhipiana ki ngā Īhipiana, ā, ka whawhai rātou ki tōna teina, ki tōna tuakana, ki tōna hoa, ki tōna hoa, te pā ki te pā, te kīngitanga ki te kīngitanga.
ISA 19:3 Nā, ka meinga te wairua o Īhipa kia kāhore noa iho i waenganui i a ia; ka whakangaromia hoki e ahau ōna whakaaro; ā, ka rapua e rātou he tikanga i ngā whakapakoko, i ngā tohunga whakawai, i te hunga he atua māori nei ō rātou, i ngā matakite.
ISA 19:4 Ka tukua pūtia atu anō e ahau ngā Īhipiana ki te ringa o te rangatira pakeke; he kīngi taikaha anō te kīngi mō rātou,” e ai tā te Ariki, tā Ihowā o ngā mano.
ISA 19:5 Ka kore haere hoki ngā wai o te moana, ka mimiti, ka maroke te awa;
ISA 19:6 ā, ka piro ngā awa; ka mimiti, ā, ka maroke ngā awa o Īhipa; ka mate ngā kākaho me ngā raupō.
ISA 19:7 Ko ngā otaota i te taha o te Naera, i te pareparenga o te Naera, me ngā mea katoa i whakatōkia ki te taha o te Naera, ka maroke, ka āia noatia atu, ka kore noa iho.
ISA 19:8 Ka tangi anō ngā kaihī ika; ka auē te hunga katoa e maka ana i te matau ki roto ki te Naera, ka pōuri anō ngā kaihora o ngā kupenga ki runga ki ngā wai.
ISA 19:9 Ka whakamā hoki ngā kaimahi o te muka pai, rātou ko ngā kaiwhatu o ngā kākahu mā.
ISA 19:10 Ko ōna tūranga, mongamonga noa, ka pōuri hoki ngā wairua o ngā kaimahi katoa e utua ana.
ISA 19:11 He tino wairangi ngā rangatira o Toana; he tino pōauau hoki ngā whakaaro o ngā kaiwhakatakoto whakaaro mōhio a Parao. He pēhea rā tā koutou kī atu ki a Parao, “He tama ahau nā te hunga whakaaro nui, he tama nā ngā kīngi onamata”?
ISA 19:12 Tēnā, kei hea rātou, āu tāngata whakaaro nui? Mā rātou e whakaatu ki a koe ināianei; meinga kia mōhio rātou ki tā Ihowā o ngā mano i whakatakoto ai mō Īhipa.
ISA 19:13 Kua whakakūaretia ngā rangatira o Toana, kua tinihangatia ngā rangatira o Nopo; pōhēhē iho a Īhipa i a rātou, ko rātou nā anō te kōhatu o te kokonga o ngā iwi o reira.
ISA 19:14 Kua oti i a Ihowā te wairua whanokē te konatu ki waenganui ōna; ā, kua whakapōhēhētia e rātou a Īhipa i āna mahi katoa, koia anō kei te tangata haurangi e kotiti kē ana, e hūrori ana i roto i tōna ruaki.
ISA 19:15 Ka kāhore noa iho anō he mahi mā Īhipa, hei mahinga mā te upoko, mā te hiawero, mā te nīkau, mā te wīwī.
ISA 19:16 I taua rā ka rite a Īhipa ki te wahine, ka wehi ka pāwera i te rurutanga o te ringa o Ihowā o ngā mano, e rūrū ai ia ki tērā wāhi.
ISA 19:17 Ā, ka ai te whenua o Hūrā hei whakawehi mō Īhipa, ā, ko ngā tāngata katoa e whakahuatia atu ai ia, ka wehi, i te tikanga hoki kua takoto i a Ihowā o ngā mano mō reira.
ISA 19:18 I taua rā e rima ngā pā i te whenua o Īhipa, ko tō rāua reo ko te reo o Kanaana, ā, ko Ihowā o ngā mano tā rātou e oati ai; ko tētahi e huaina, “Ko te Pā o te Ngaromanga.”
ISA 19:19 I taua rā ka tū he āta mā Ihowā i waenganui o te whenua o Īhipa, me te pou i te taha o tō reira rohe, he mea ki a Ihowā.
ISA 19:20 Ā hei tohu tērā, hei kaiwhakaatu mō Ihowā o ngā mano i te whenua o Īhipa; ka karanga hoki rātou ki a Ihowā, he mea mō ngā kaitūkino, ā, ka ungā e ia he kaiwhakaora ki a rātou, he kaiwawao; ā, māna rātou e whakaora.
ISA 19:21 Ā, ka mōhiotia a Ihowā e Īhipa, ka mōhiotia hoki a Ihowā e ngā Īhipiana i taua rā; āe rā ka mahia e rātou te patunga tapu me te whakahere; ka puaki hoki tā rātou kupu taurangi ki a Ihowā, ā, ka mana anō i a rātou.
ISA 19:22 Ka whiua anō a Īhipa e Ihowā, ka whiua, ka rongoātia anō e ia; ā, ka hoki mai rātou ki a Ihowā, ka tahuri anō ia ki tā rātou īnoi, ka rongoā i a rātou.
ISA 19:23 I taua rā ka takoto he ara i Īhipa ki Ahiria, ā, ka tae te Ahiriana ki Īhipa te Īhipiana anō ki Ahiria, ā, ka koropiko tahi te Īhipiana rāua ko te Ahiriana.
ISA 19:24 I taua rā hei tuatoru a Īharaira mō Īhipa, mō Ahiria, hei manaaki i waenganui o te whenua.
ISA 19:25 E manaakitia anō rātou e Ihowā o ngā mano, e kī ia, “Kia manaakitia a Īhipa, tāku iwi, a Ahiria, te mahi a ōku ringa, a Īharaira hoki, tōku kāinga tupu.”
ISA 20:1 I te tau i haere mai ai a Taratana ki Aharoro, i a ia i ungā rā e Harakono kīngi o Ahiria, i tāna whawhaitanga ki Aharoro, ā, horo ana a reira i a ia –
ISA 20:2 i taua wā ka kōrero a Ihowā, arā a Ihāia tama a Āmoho, ka kī, “Wetekina atu te kākahu taratara i tōu hope, whakarērea atu anō tōu hū i tōu waewae.” Nā, pērā ana ia, haere tahanga ana, kāhore hoki he hū.
ISA 20:3 Nā, ka mea a Ihowā, “Ka rite ki tāku pononga, ki a Ihāia, ka toru nei ōna tau e haere tahanga ana, kāhore hoki he hū, hei tohu, hei mea whakamīharo ki a Īhipa rāua ko Etiopia,
ISA 20:4 ka pēnā anō tā te kīngi o Ahiria ārahi i ngā Īhipiana hei pārau, i ngā Etiopiana hei whakarau, i te taitamariki, i te kaumātua, kāhore he kākahu, kāhore he hū, takoto kau ana ngā papa, whakamā iho a Īhipa.
ISA 20:5 Ka pororaru anō rātou, ka whakamā ki a Etiopia, ki tā rātou i tūmanako ai, ki a Īhipa anō, ki tō rātou korōria.
ISA 20:6 Ā, e mea te tangata o taua takutai i taua rā, ‘Nanā, ko tā tātou tēnei i tūmanako ai, ko tā tātou i rere atu ai kia ora ai i te kīngi o Ahiria, ā, me pēhea tātou ka mawhiti ai?’ ”
ISA 21:1 Ko te poropititanga mō te koraha o te moana: Ka rite ki ngā āwhiowhio i te tonga e pupuhi ana, tōna haerenga mai i te koraha i te whenua e wehingia ana.
ISA 21:2 He kino rawa te kitenga kua whakaaturia nei ki ahau; kei te tinihanga te tangata tinihanga, kei te pāhua te kaipāhua. Whakaekea, e Erama whakapaea, e Meria mutu pū i ahau ngā auētanga katoa o reira.
ISA 21:3 Nā reira kī tonu tōku hope i te mamae, whakawiri rawa ngā mea e ngau nei i ahau, ānō ko te whakawiringa o te wahine e whakawhānau ana; mamae ana ahau, kore ake e rongo; ohorere ana, kore ake e kite.
ISA 21:4 Kahekahe ana tōku manawa, wehi ana i te whakamataku; ko te ahiahi pō i hiahiatia e ahau, puta ake ana hei mea e tūiri ai ahau.
ISA 21:5 Kei te whakapai rātou i te tēpu, kua whakaritea he kaitūtei; kei te kai rātou, kei te inu. Whakatika, e ngā rangatira, pania te whakangungu rākau.
ISA 21:6 Ko tā te Ariki kupu hoki tēnei ki ahau: “Tīkina, whakatūria he kaitūtei, māna e whakaatu tāna e kite ai.
ISA 21:7 Nā, ka kitea e ia te ope, ngā kaieke hōiho tātaki rua, he rōpū kāihe, he rōpū kāmera, kia āta whakarongo mārie ia.”
ISA 21:8 Kātahi tērā ka karanga, ānō he raiona: “E tōku Ariki, kei runga ahau i te wāhi tūtei e tū tonu ana i te awatea; pau katoa anō ngā pō i ahau e tū nei i tāku mahi tiaki.
ISA 21:9 Nanā, tēnei te haere mai nei he rōpū tāngata, me ngā kaieke hōiho, he tātaki rua! Nā, ka oho ia, ka mea, ‘Kua horo a Papurōna, kua horo; ko ngā whakapakoko katoa anō o ōna atua, wāwāhia iho ki te whenua.’ ”
ISA 21:10 E tāku patunga wīti, e te wīti o tāku patunga; ko tāku i rongo ai ki a Ihowā o ngā mano, ki te Atua o Īharaira, e whakaaturia nei e ahau ki a koutou.
ISA 21:11 Ko te poropititanga mō Rūma. E karanga mai ana tētahi ki ahau i Heira, “E te kaitūtei, ko te aha i te pō? E te kaitūtei, ko te aha i te pō?”
ISA 21:12 Ka kī mai te kaitūtei: “Kei te haere mai te ata rāua ko te pō. Ki te uia e koutou, e ui; hoki mai, haere mai.”
ISA 21:13 Ko te poropititanga mō Arāpia. Kei te ngahere i Arāpia he nohoanga mō koutou i te pō, e ngā tira haere o Reranimi.
ISA 21:14 I kawea e rātou he wai mō te tangata e matewai ana; i haere ngā tāngata o te whenua o Tema ki te whakatau i ngā tāngata e rere ana, me tā rātou taro.
ISA 21:15 Ka rere mai hoki rātou i ngā hoari, i te hoari kua oti te unu, i te kōpere kua oti te whakapiko, i te pākaha anō o te whawhai.
ISA 21:16 Ko tā te Ariki kupu hoki tēnei ki ahau: Kia kotahi tau, ko te tau hoki o te kaimahi, ā, ka poto katoa te korōria o Kerara.
ISA 21:17 Nā, ko ngā mōrehu o ngā kaikōpere, ko ngā mārohirohi o ngā tama a Kerara, ka torutoru. Ko te kupu hoki tēnei a Ihowā, a te Atua o Īharaira.
ISA 22:1 Ko te poropititanga mō te raorao o te whakakitenga: He aha rā nōu, i piki katoa ai koe ki ngā tuanui?
ISA 22:2 E koe, e kī tonu nei koe i te ngē, he pā turituri, he pā koa. Ko ōu tāngata i patua ehara i te mea patu nā te hoari, ehara i te hunga i mate i te whawhai.
ISA 22:3 Rere ngātahi ana ōu rangatira katoa, herea ana rātou e ngā kaikōpere. Te hunga katoa i kitea i roto i a koe, herea ngātahitia ana rātou, te hunga i rere mai i tawhiti.
ISA 22:4 Koia ahau i mea ai: “Kāti te titiro ki ahau, ka nui tōku tangi; kaua e tohe ki te whakamārie i ahau mō te pāhuatanga o te tamāhine a tōku iwi.”
ISA 22:5 He rā hoki tēnei nō te raruraru, nō te takahanga, nō te pōkaikaha, he mea nā te Ariki, nā Ihowā o ngā mano, i te raorao o te whakakitenga; he pākaruhanga i ngā taiepa, he karangatanga ki ngā maunga.
ISA 22:6 Ko tā Erama, he mau i te papa pere, me ngā hāriata tāngata me ngā kaieke hōiho; ko tā Kiri he whakaputa mai i te whakangungu rākau ki waho.
ISA 22:7 Nā, kapi ana ōu raorao whakapaipai i te hāriata, tū ana ngā rārangi o ngā kaieke hōiho ki te kūwaha.
ISA 22:8 Nā, mauria atu ana e ia te hīpoki o Hūrā. Ā, ka titiro koe i taua rā ki ngā patu i roto i te whare o te ngahere.
ISA 22:9 Ā, ka kite koutou i ngā pakaru o te Pā o Rāwiri, he maha; ka huia hoki e koutou ngā wai o te poka o raro.
ISA 22:10 Ā, taua ana e koutou ngā whare o Hiruhārama; wāwāhia ana e koutou ngā whare hei hanga mō te taiepa.
ISA 22:11 Ka hangā anō e koutou he awa ki waenganui i ngā taiepa e rua mō ngā wai o te poka tawhito. Kāhore ia ō koutou whakaaro ki te kaimahi o tēnā mea, kāhore hoki e titiro ki tōna kaihanga ō mua noa atu.
ISA 22:12 Heoi, ko te karangatanga a te Ariki, a Ihowā o ngā mano, i taua rā ki te tangi, ki te auē, ki te moremore, ki te whītiki i te kākahu taratara.
ISA 22:13 Nā, ko te koa, ko te hari, ko te patu kau, ko te patu hipi, ko te kai kikokiko, ko te inu wāina. “Kia kai tātou, kia inu; āpōpō hoki tātou mate ai.”
ISA 22:14 Nā, ka whakaatu a Ihowā o ngā mano ki ōku taringa: “He pono, e kore rawa tēnei hē o koutou e murua, ā mate noa koutou,” e ai tā te Ariki, tā Ihowā o ngā mano.
ISA 22:15 Ko te kupu tēnei a te Ariki, a Ihowā o ngā mano: “Haere mai, haere ki tēnei kaitiaki o ngā moni, ki a Hepena, ki te rangatira o te whare, mea atu:
ISA 22:16 He aha tāu i konei? Ko wai hoki tāu i konei, i haua ai e koe he tanumanga mōu ki konei? E hahau ana koe he tanumanga mōna i te wāhi tiketike, e tārai ana he nohoanga mōna ki te kāmaka!
ISA 22:17 “Nanā, ka makā kinotia atu koe e Ihowā, ka pērātia i tā te tangata kaha. Āe rā, ka kōpakina rawatia koe e ia.
ISA 22:18 He pono ka tahuri ia, ka whiua koe, ānō he mea porotaka ki tētahi whenua nui; hei reira koe mate ai, ki reira anō hoki ngā hāriata o tōu korōria, e koe, e te whakamā o te whare o tōu ariki.
ISA 22:19 Ka peia atu hoki koe e ahau i tōu tūranga, ka turakina iho anō koe e ia i tōu wāhi.
ISA 22:20 “I taua rā ka karangatia e ahau tāku pononga, e Eriakimi tama a Hirikia.
ISA 22:21 Ka whakakākahuria anō ia e ahau ki tōu kākahu, ka whakakahangia hoki ki tōu whītiki, ka hoatu anō tōu kāwanatanga ki tōna ringa, ā, hei matua ia ki ngā tāngata o Hiruhārama, ki te whare anō o Hūrā.
ISA 22:22 Ka waiho anō e ahau te kī o te whare o Rāwiri ki runga ki tōna pokohiwi; nā, māna e whakatuwhera, ā, kāhore he tangata hei tūtaki, māna e tūtaki, ā, kāhore he tangata hei whakatuwhera.
ISA 22:23 Ka titia hoki ia e ahau ānō he titi ki te wāhi mau, ā, hei torōna korōria ia ki te whare o tōna pāpā.
ISA 22:24 Ka whakairihia anō e rātou ki runga ki a ia te korōria katoa o te whare o tōna pāpā, ngā uri, ngā whānau, ngā oko ririki katoa, arā ngā oko hei peihana, me ngā oko katoa anō hei hāka.
ISA 22:25 “I taua rā, e ai tā Ihowā o ngā mano, ka taui te titi i titia nei ki te wāhi māu, ka tapahia, ka marere ki raro; ka motuhia atu anō te mea e iri ana i runga.” Nā Ihowā hoki te kupu.
ISA 23:1 Ko te poropititanga mō Tāira: Auē, e ngā kaipuke o Tarahihi; kua mōtī hoki ia, i kore ai he whare, i kore ai he tapokoranga. Nō te whenua o Kitimi te whakaaturanga ki a rātou.
ISA 23:2 Whakarongoa, e ngā tāngata o te motu; kua kī nā koe i tā ngā kaihokohoko o Hairona e rere nei i te moana.
ISA 23:3 Kei ngā wai nui, kei ngā purapura o Hihoro, kei te tapahanga wīti o te Naera, ōna hua; ko ia anō te kaihokohoko ki ngā iwi.
ISA 23:4 Kia whakamā koe, e Hairona, kua kōrero hoki te moana, te pā kaha o te moana kua mea, “Kāhore ōku mamae hapū, kāhore hoki ahau i whānau, kāhore i atawhai tamariki, kāhore i whakatupu kōtiro.”
ISA 23:5 Ka tae te rongo ki Īhipa, ka tino mamae rātou, ki te rongo o Tāira.
ISA 23:6 Whakawhiti atu ki Tarahihi – auē, e ngā tāngata o te motu.
ISA 23:7 Ko tō koutou pā koa ianei tēnei, ko tōna tawhito nei nō ngā rā anō onamata? Nā ōna waewae hoki ia i kawe ki tawhiti noho ai.
ISA 23:8 Nā wai i whakatakoto tēnei whakaaro mō Tāira, mō te pā whakakarauna, he rangatira nei ōna kaihokohoko; ko ōna kaiwhakawhitiwhiti taonga, ko ngā metararahi o te whenua?
ISA 23:9 Nā Ihowā o ngā mano i whakatakoto – hei whakapoke i te whakapehapeha o ngā mea ātaahua katoa, hei mea kia whakahāweatia ngā metararahi o te whenua.
ISA 23:10 Tika atu nā waenganui i tōu whenua, ānō ko te Naera, e te tamāhine a Tarahihi; kua kore he whītiki mōu ā mua ake.
ISA 23:11 Kua totoro tōna ringa ki runga ki te moana, whakangāueuetia ana e ia ngā rangatiratanga. Nā Ihowā te whakahau mō Kanaana, kia ngaro ōna pā kaha.
ISA 23:12 I mea anō ia, “Kāti rawa tōu koa, e te wāhina e tūkinotia nei, e te tamāhine a Hairona. “Whakatika, whakawhiti atu ki Kitimi – ahakoa i reira kāhore he okiokinga mōu.”
ISA 23:13 Nanā, te whenua o ngā Karari, kua kāhore tēnā iwi; kua whakaritea a reira e ngā Ahiriana mō ngā kīrehe o te koraha. Nā rātou i whakaara ā rātou pourewa, kua horo i a rātou ōna whare kīngi; kua meinga e ia hei ururua.
ISA 23:14 Auē, e ngā kaipuke o Tarahihi, kua kore hoki tō koutou pā kaha.
ISA 23:15 I taua rā ka warewaretia a Tāira, e whitu tekau tau, ko ngā rā hoki o te kīngi kotahi; i te mutunga o ngā tau e whitu tekau ka rite tā Tāira ki te waiata a te wahine kairau:
ISA 23:16 “E mau ki te hāpa, taiāwhiotia te pā, e te wahine kairau i warewaretia nei! Kia pai te waiata, kia maha ngā waiata, kia maharatia ai koe.”
ISA 23:17 Nā, i te mutunga o ngā tau e whitu tekau ka tirohia a Tāira e Ihowā, ā, ka hoki ia ki tāna utu, ka kairau anō ki ngā kīngitanga katoa o te whenua i runga i te mata o te oneone.
ISA 23:18 Nā, ko āna mea hokohoko, me ōna utu, he tapu ki a Ihowā; e kore e whaowhina ki te toa, e kore anō e rongoātia. Engari, mā te hunga e noho ana i te aroaro o Ihowā āna mea hokohoko, ā, ka mākona rātou i te kai, ka roa anō te mau o te kākahu.
ISA 24:1 Nanā, kua meinga e Ihowā te whenua kia noho tahanga, kia takoto kau, kua porohurihia ake e ia, ā, kua whakamararatia ōna tāngata.
ISA 24:2 Ā, ka rite te iwi ki te tohunga, te pononga ki tōna ariki, te pononga wahine ki tōna rangatira wahine, te tangata i utua ai te taonga ki te tangata i a ia nei te utu, te kaiwhakatārewa mai ki te tangata i te nama, te tangata i te moni whakatupu ki te tangata nāna nei i hōmai ki a ia.
ISA 24:3 Ka mōtī rawa tā te whenua, pāhua rawa.
ISA 24:4 E tangi ana te whenua, ngohe noa iho; kahakore kau te ao, ngohe noa iho; harotu kau te hunga rarahi o te whenua.
ISA 24:5 Kua poke anō te whenua i raro i ōna tāngata; kua takahia hoki ngā ture, whakaputaia kētia ake e rātou te tikanga i whakatakotoria, whakatakā ana e rātou te kawenata onamata.
ISA 24:6 Nā reira i kainga ai te whenua e te kanga, kitea iho te hara o ōna tāngata; nā reira i wera ai ngā tāngata o te whenua, ā, he torutoru te hunga i toe.
ISA 24:7 E tangi ana te wāina hou; kua kahakore te wāina; kei te mapu te hunga ngākau koa katoa.
ISA 24:8 Ka mutu te koa o ngā timipera kua kore te ngē o te hunga e hari ana; mutu ake te koa o te hāpa.
ISA 24:9 Kore ake tā rātou waiata i te mea e inu wāina ana; ka kawa te wai kaha ki te hunga e inu ana.
ISA 24:10 Kua pakaru te pā o te pororaru, tūtaki rawa ngā whare katoa, tē ai he tomokanga atu.
ISA 24:11 He karanga kei ngā ara, he mea mō te wāina; kua pōuri katoa te koa, kua riro te harakoa o te whenua.
ISA 24:12 Mahue iho ki te pā ko te ururua; ko te kūwaha, he mea whiu ki te whakangaromanga.
ISA 24:13 Ka pēnei te hanga i waenganui i te whenua i roto i ngā iwi; kei te ruiruinga o te ōriwa te rite, kei te hamunga o ngā karepe ina mutu te whawhaki.
ISA 24:14 Ka ara tō rātou reo, ka waiata rātou; mō te nui hoki o Ihowā, ka hāmama mai rātou i te moana.
ISA 24:15 Nā, whakakorōriatia a Ihowā i te rāwhiti, te ingoa o Ihowā, o te Atua o Īharaira, i ngā motu o te moana.
ISA 24:16 I te pito rawa o te whenua kua rangona ngā waiata e tātou: “He korōria ki te tangata tika.” Otiia, ka kī ake ahau, “Kei te whakaheke ahau! Kei te whakaheke! Auē te mate i ahau! He mahi tinihanga tā te hunga tinihanga; nui atu te tinihanga o te hunga tinihanga!”
ISA 24:17 Ko te wehi, ko te rua, ko te rore, kei a koe, e te tangata o te whenua.
ISA 24:18 Nā, ko te tangata e rere mai i te ngangau o te wehi, ka taka ki te rua; ā, ko te tangata e puta ake ana i roto i te rua, ka mau i te rore. Kua puare hoki ngā matapihi o runga, ā, e rū ana ngā tūranga o te whenua.
ISA 24:19 Ngakongako kau te whenua, memeha kau noa iho te whenua, ngāueue kau te whenua.
ISA 24:20 Hūrorirori kau te whenua ānō he haurangi, nekenekehia ana, me te mea he whare tira; ka taimaha iho hoki tōna hē ki runga ki a ia, ka hinga, heoi anō ōna aranga ake.
ISA 24:21 I taua rā ka whiua e Ihowā te ope o te hunga kua neke ake, me ngā kīngi o te whenua i runga i te whenua.
ISA 24:22 Ā, ka huihuia rātou, ka pērātia me ngā herehere e huihuia ana ki te rua, ka tūtakina hoki ki te whare herehere, ā, ka maha ngā rā ka tirohia iho rātou.
ISA 24:23 Ko reira te marama numinumi kau ai, ka whakamā anō hoki te rā; ka kīngi hoki a Ihowā o ngā mano ki Maunga Hiona, ki Hiruhārama, ki te aroaro anō o āna kaumātua i runga i te korōria.
ISA 25:1 E Ihowā, ko koe tōku Atua; ka whakanuia koe e ahau, ka whakamoemititia e ahau tōu ingoa; he mahi whakamīharo hoki āu, arā ko ngā whakaaro i takoto nei i mua, i runga i te pono, i te tika.
ISA 25:2 Kua meinga hoki e koe te pā hei pūranga; te pā kaha, hei ururua; te whare kīngi o ngā tāngata kē, kore iho tērā pā; e kore e hangā ā ake ake.
ISA 25:3 Nā, ka whakakorōriatia koe e te iwi kaha, ka wehi te pā o ngā iwi nanakia i a koe.
ISA 25:4 Hei pā kaha hoki koe mō te ware, hei pā kaha mō te rawakore i tōna hēnga, hei whakaruru kei mate i te tūpuhi, hei whakahauhau mō te werawera. Ina rite te hau o te hunga nanakia ki te tūpuhi e āki mai ana ki te taiepa.
ISA 25:5 Ka rite ki te mahana i te wāhi maroke te ngangau o ngā tāngata kē ka whakahokia iho nei e koe. Ka rite ki te mahana i ngā wā e whakamarumarua ana e te kapua, ka iti iho te waiata a te hunga nanakia.
ISA 25:6 Ā, ka tukua e Ihowā o ngā mano he hākari mā ngā iwi katoa ki runga ki tēnei maunga, he mea mōmona, he wāina nganga hei hākari, he mea mōmona, kī tonu i te hinu wheua, he wāina nganga, tatari rawa.
ISA 25:7 Ka whakakāhoretia anō e ia i runga i tēnei maunga te mata o te hīpoki e hīpoki nei i ngā iwi katoa, me te taupoki e taupoki nei i ngā tauiwi katoa.
ISA 25:8 Kua horomia e ia te mate ake ake; ā, ka horoia e te Ariki, e Ihowā, ngā roimata o ngā kanohi katoa, ka whakakāhoretia anō e ia te whakahāwea ki tāna iwi puta noa i te whenua;
ISA 25:9 Ko te kupu anō tēnei i taua rā, “Nanā, ko tō tātou Atua tēnei; i tatari tātou ki a ia, ka ora anō tātou i a ia. Ko Ihowā tēnei; i tatari tātou ki a ia; ka hari tātou, ka koa ki tāna whakaoranga.”
ISA 25:10 Nō te mea ka okioki te ringa o Ihowā ki tēnei maunga, ā, ka takahia a Moapa ki raro i tōna wāhi, me te kakau wīti e takahia ana ki te wai o te pūranga paru.
ISA 25:11 Ā, ka totoro ōna ringa i waenganui o reira pērā me te kaikauhoe e toro ana i ōna ringa ina kauhoe ia; ka tukua hoki ki raro tōna whakapehapeha me ngā mahi a ōna ringa.
ISA 25:12 Nā, ko te wāhi kaha o te pourewa tiketike o ōu taiepa, kua tukua iho e ia, takoto rawa, pā rawa ki te whenua, ki te puehu rawa.
ISA 26:1 I taua rā ka waiatatia tēnei waiata i te whenua o Hūrā: He pā kaha tō tātou: ka whakaritea e ia te whakaora hei taiepa, hei pekerangi.
ISA 26:2 Whakatuwheratia ngā kūwaha, kia tomo mai ai te iwi tika e pupuri ana i te pono.
ISA 26:3 Māu e pupuri i runga i te rangimārie rawa – te tangata e ū ana te whakaaro ki a koe; nāna hoki i whakawhirinaki ki a koe.
ISA 26:4 Whakawhirinaki ki a Ihowā ā ake ake, nō te mea kei te Ariki, kei a Ihowā, he kāmaka mau tonu.
ISA 26:5 Kua whakahokia iho hoki e ia te hunga e noho ana i runga, te pā tiketike; takoto rawa i a ia, takoto rawa ki te whenua, pā rawa ki te puehu.
ISA 26:6 Takahia iho e te waewae, e ngā waewae o ngā rawakore, e ngā takahanga o ngā ware.
ISA 26:7 Ko te ara o te tangata tika, he tika; e whakatikaia ana e koe, e te mea tika, te ara o te tangata tika.
ISA 26:8 Kei te ara nei anō mātou o āu whakaritenga e tatari ana ki a koe, e Ihowā; ko tōu ingoa, ko te mahara ki a koe tā ō mātou wairua e minamina nei.
ISA 26:9 Minamina tonu ahau, tōku ngākau, ki a koe i te pō; āe rā, ka moata ahau, tōku wairua, ki te rapu i a koe. Nō te mea i ngā wā e puta ai āu whakaritenga ki te whenua, ka ākona te tika e ngā tāngata o te ao.
ISA 26:10 Atawhaitia iho te tangata kino, e kore ia e ako i te tika; i te whenua o te tika ka hē tāna mahi, e kore anō ia e kite i te nui o Ihowā.
ISA 26:11 E Ihowā, kua ara tōu ringa ki runga, heoi kāhore rātou e kite. Otiia, ka kite rātou i tōu hae mō te iwi, ā, ka whakamā; āe rā, mā te ahi e kai ōu hoariri.
ISA 26:12 Ka whakaritea e koe, e Ihowā, he rangimārie mō mātou, nāu nei hoki i mahi ā mātou mahi katoa mā mātou.
ISA 26:13 E Ihowā, e tō mātou Atua, he ariki kē anō, i tua ake i a koe, i noho hei rangatira mō mātou; māu anake ia mātou ka mahara ai ki tōu ingoa.
ISA 26:14 Kua mate rātou, e kore e ora; he tūpāpaku rātou, e kore e ara – nā, kua tirohia nei rātou e koe, ngaro iho i a koe, hunā katoatia ana e koe te mahara ki a rātou.
ISA 26:15 Kua whakaraneatia e koe te iwi, e Ihowā, kua whakaraneatia e koe te iwi. Kua whai korōria koe; nāu i whakanui ngā rohe katoa o te whenua.
ISA 26:16 E Ihowā, i te rarurarutanga i haere atu rātou ki a koe, ā, i ringihia atu e rātou he īnoi, i te mea e papaki ana koe i a rātou.
ISA 26:17 He pērā i te wahine hapū, ka tata ia te whānau, e whakamamae ana, e auē ana i ōna mamae; ko tō mātou rite tērā i tōu aroaro, e Ihowā;
ISA 26:18 i te hapū mātou, i te mamae mātou, kua whānau tā mātou me te mea he hau. Kīhai i oti i a mātou he whakaora i runga i te whenua; kīhai anō hoki i hinga ngā tāngata o te ao.
ISA 26:19 Ka ora ōu tāngata mate; ka ara ōku tinana mate, Maranga, waiata, e te hunga kei te puehu nei tō koutou kāinga; nō te mea kei te tōmairangi o ngā otaota te rite o tōu tōmairangi; ā, ka makā mai ngā tūpāpaku e te whenua.
ISA 26:20 Haere, e tōku iwi, e tomo ki roto ki ōu rūma, tūtakina ōu tatau i muri i a koe; e piri, he wāhi iti kau nei, kia pahemo rā anō te riri.
ISA 26:21 Nō te mea tēnei a Ihowā te puta nei i tōna wāhi ki te whiu i te hē o ngā tāngata o te whenua; ā, ka whakakitea ōna toto e te whenua; e kore anō e hīpokina e ia i muri nei tōna hunga i patua.
ISA 27:1 I taua rā, ka patua e Ihowā ki tāna hoari mārō, hoari nui, hoari kaha a Rewiatana, te nākahi tere, a Rewiatana, te nākahi korohape; ka tukitukia hoki e ia te tarakona i te moana.
ISA 27:2 I taua rā: “He māra wāina, waiata atu koutou ki reira!
ISA 27:3 Ko ahau, ko Ihowā hei tiaki i a ia; hono tonu tāku whakamākūkū; ka tiakina e ahau i te pō, i te ao, kei tūkinotia.
ISA 27:4 Kāhore he riri i roto i ahau. He kore noa nō ngā tātarāmoa, nō ngā tūmatakuru hei whawhai mai ki ahau! Pēnei kua haere tonu atu ahau ki runga ki a rātou, tahuna ngātahitia ake e ahau.
ISA 27:5 Kia hopukia mai rānei e ia tōku kaha, kia houhia ai te rongo ki ahau; āe rā, kia houhia anō tana rongo ki ahau.”
ISA 27:6 Ā ngā rā e haere mai nei ka whai pakiaka ngā uri o Hākopa; ka whai puāwai, ka kōpuku a Īharaira; ā, ka kapi i a rātou te mata o te ao katoa i te hua.
ISA 27:7 I rite rānei tāna patu i a ia ki tāna patunga i ōna kaipatu? I rite rānei tōna whakamatenga ki te whakamatenga o āna i whakamate ai?
ISA 27:8 He mea mēhua tāu ngangare ki a ia i tōna tukunga atu e koe; kāwhakina ana ia e ia ki tāna hau pākaha i te rā o te marangai.
ISA 27:9 Nā, ko tēnei hei muru i te hē o Hākopa; ko ngā hua katoa ēnei o te tāhinga i tōna hara: kia meinga e ia ngā kōhatu katoa o te āta kia rite ki te kōhatu taioma, kurukuru rawa, ā, kore ake ngā Aherimi me ngā whakapakoko e ara ake ake.
ISA 27:10 Kei te mokemoke hoki te pā taiepa, he kāinga mahue, he mea whakarere, he pērā i te koraha; kai ana te kūao kau i reira, takoto ana i reira, pau ake i a ia ōna manga.
ISA 27:11 Ka memenge ōna peka, ka whatia atu; ka haere mai ngā wāhine, tahuna ana e rātou ki te ahi. Ehara hoki ia i te iwi e whai mahara ana; nō reira e kore rātou e tohungia e tō rātou kaihanga, e kore anō tō rātou kaiwhakaahua e aroha ki a rātou.
ISA 27:12 I taua rā ka tāia ngā hua e Ihowā i te waipuke o te awa, ā tae noa ki te awa o Īhipa, ā, ka kohikohia takitahitia koutou, e ngā tama a Īharaira.
ISA 27:13 I taua rā ka whakatangihia he tētere nui, ā, ka haere mai te hunga i tata te ngaro i te whenua o Ahiria, me te hunga i te whenua o Īhipa i peia atu; ā, ka koropiko rātou ki a Ihowā ki te maunga tapu, ki Hiruhārama.
ISA 28:1 Auē te hē mō te karauna whakapehapeha o te hunga haurangi o Ēparaima, ki te puāwai memenge hoki o tōna ātaahua whakakorōria, tērā i te wāhi ki runga o te awaawa mōmona o te hunga kua hinga i te wāina!
ISA 28:2 Nanā, he mea kaha, he mea pakari tā te Ariki; koia anō kei te āwhā whatu, kei te tūpuhi e wāwāhi ana, kei te waipuke, he wai nui e ngawhā atu ana, ka tāia iho anō e tōna ringa ki te whenua.
ISA 28:3 Ka takahia e ngā waewae te karauna whakapehapeha o te hunga haurangi o Ēparaima.
ISA 28:4 Ā, ko te puāwai memenge o tōna ātaahua whakakorōria, kei te wāhi nei ki runga o te awaawa mōmona, ka rite ki te hua mātāmua o te piki i te mea kāhore anō te raumati; ā, ka kite te mea i titiro atu, ka horomia e ia i te mea kei tōna ringa anō.
ISA 28:5 I taua rā ko Ihowā o ngā mano hei karauna korōria, hei pōtae ātaahua ki ngā mōrehu o tāna iwi;
ISA 28:6 hei wairua whakawā ki te tangata e noho ana ki te whakawā, hei kaha mō te hunga e whakahoki ana i te whawhai i te kūwaha.
ISA 28:7 Otiia kua pōhēhē anō ēnei i te wāina, ā, kua kotiti kē i te wai kaha; ko te tohunga, ko te poropiti, kua pōhēhē i te wai kaha, kua horomia rāua e te wāina, ā, kua kotiti kē i te wai kaha; he titiro hē tā rāua, e tapepa ana tā rāua whakawā.
ISA 28:8 Kī tonu hoki ngā tēpu katoa i te ruaki, i te paru, kāhore he wāhi mā.
ISA 28:9 “Ko wai e whakaakona e ia ki te mātauranga? Ko wai e meinga e ia kia mōhio ki te kupu? Ko te hunga kua whakamutua tā rātou kai waiū, kua tangohia mai i te ū?
ISA 28:10 He whakahau nei hoki tēnei i runga i te whakahau, he whakahau i runga i te whakahau; he ako i runga i te ako, he ako i runga i te ako; he iti ki konei, he iti ki kō rā.”
ISA 28:11 Engari mā ētahi tāngata rerekē ngā ngutu, he reo kē te reo e kōrero ai ia ki tēnei iwi;
ISA 28:12 i kī atu ia ki a rātou, “Ko te okiokinga tēnei, hoatu e koutou he okiokinga ki te tangata māuiui; ko te tānga manawa hoki tēnei”; nā, kīhai rātou i pai ki te whakarongo.
ISA 28:13 Nō reira, ko tā Ihowā kupu ki a rātou: “He whakahau i runga i te whakahau, he whakahau i runga i te whakahau; he ako i runga i te ako, he ako i runga i te ako; he wāhi iti ki konei, he wāhi iti ki kō rā;” kia haere ai rātou, ka hinga whakamuri, ka wāwāhia, ka māhangatia, ka mau.
ISA 28:14 Mō reira whakarongo ki te kupu a Ihowā, e te hunga whakahī, e ngā rangatira o tēnei iwi i Hiruhārama.
ISA 28:15 Kua mea nā hoki koutou, “Kua whakarite kawenata mātou ki te mate; kua rite ā mātou whakarite ko te rēinga; ki te pāha i waenga te whiu i rite nei ki te waipuke, e kore e tae mai ki a mātou; nō te mea kua oti te teka te mea e mātou hei whakawhirinakitanga, ka piri mātou ki roto ki te horihori.”
ISA 28:16 Nā, ko te kupu tēnei a te Ariki, a Ihowā: “Nanā, tēnei ahau te whakatakoto nei i te kōhatu ki Hiona hei tūranga, he kōhatu kua oti te whakamātautau, mō te kokonga, he mea utu nui, he tūranga ū; ko te tangata e whakapono ana e kore e pōtatutatu.
ISA 28:17 Ka whakatakotoria anō e ahau te tikanga o te whakawā, mea rawa ki te aho, me te tika anō, paramu rawa; ā, ka tahia atu te whakawhirinakitanga teka e te whatu, ka huri anō ngā wai ki runga ki te piringa.
ISA 28:18 Ka whakatakā hoki tā koutou kawenata ki te mate; e kore anō e tū tā koutou i whakarite ai ki te rēinga; ko te whiu i rite nei ki te waipuke, ki te tika atu i waenga, ka waiho koutou hei takahanga māna.
ISA 28:19 I ōna wā e haere atu ai taua whiu, ka riro koutou i a ia; ka haere atu hoki i tēnei ata, i tēnei ata, i te ao, i te pō; ā, he whakamataku anake te mea kia mōhio ki te kupu.”
ISA 28:20 He poto hoki te moenga, e kore e whārōrō te tangata; he whāiti te hīpoki, e kore e taea te roropi mai.
ISA 28:21 Nō te mea ka rite ki tērā i Maunga Peratimi tō Ihowā whakatikanga ake, kei tērā i te raorao i Kipeono te rite o tōna riri; kia mahi ai ia i tāna mahi, i tāna mahi rerekē, kia whakatutuki ai i tāna hanga, i tāna hanga rerekē.
ISA 28:22 Nā, kāti rā tā koutou whakahī, kei whakaūkia ō koutou here; kua rongo nei hoki ahau ki te Ariki, ki a Ihowā o ngā mano, ki te whakaotinga, ki te mea i whakaritea mō te whenua katoa.
ISA 28:23 Kia whai taringa mai, whakarongo hoki ki tōku reo; mahara mai, whakarongo ki tāku kōrero.
ISA 28:24 Ko tā te kaiparau koia i ngā rā katoa he parau, hei whakatōkanga? He whakatuwhera tonu rānei tāna, he wāwāhi i ngā pōkurukuru o tōna oneone?
ISA 28:25 Ka oti i a ia te mata o taua māra te mea kia rite, e kore ianei ia e maka atu i te pī, e whakatō i te kumine, e rui i te wīti, rārangi rawa, i te pārei ki te wāhi i whakaritea, me te rai anō ki tōna tapa?
ISA 28:26 Ko tōna Atua hoki hei whakaako i a ia ki te tikanga pai, hei tohutohu anō i a ia.
ISA 28:27 E kore hoki ngā pī e patua ki te mea koi, e kore anō te wīra kāta e hurihia ki runga ki te kumine; engari e patua ana ngā pī ki te rākau, ngā kumine ki te patupatu.
ISA 28:28 Ko te wīti hei taro e kurua ana; e kore hoki e patua tonutia e ia. Nā, ahakoa tohaina e te wīra o tāna kāta, e ana hōiho rānei, kāhore e tukia e ia kia ririki.
ISA 28:29 E puta mai ana hoki tēnei i a Ihowā o ngā mano, he mea whakamīharo nei ōna whakaaro, he nui anō āna tikanga.
ISA 29:1 Auē te mate mō Ariere, mō Ariere, mō te pā i noho ai a Rāwiri! Tāpiritia iho tētahi tau ki tētahi tau; mahia ngā hākari i ngā wā e rite ai.
ISA 29:2 Hei reira raru ai i ahau a Ariere, ā, ka pōuri, ka tangi; ā, ka rite ia ki ahau ānō ko Ariere.
ISA 29:3 Ka nohoia atu anō koe e ahau, ā karapoi noa; ka whakapaea koe ki te parepare, ka ara anō i ahau he taiepa hei tatau ki a koe.
ISA 29:4 Ā, ka whakahokia iho koe, ka kōrero ake i te whenua; ka iti anō tāu kupu i roto i te puehu; ka rite tōu reo ki tō te tangata i te atua māori, he mea puta ake i te whenua, ka kohimu ake tāu kupu i roto i te puehu.
ISA 29:5 Ko te huihuinga ia o ōu hoariri ka rite ki te puehu ririki, ā, ko te huihuinga o te hunga nanakia ki te pāpapa e rere atu ana. Āe rā, ka hemorere tonu,
ISA 29:6 ka pā tā Ihowā o ngā mano ki a ia, he whatitiri, he rū, he reo nui, he tūkauati, he tūpuhi, he mura ahi e kā ana.
ISA 29:7 Ā, ka rite ki te moe, ki te rekanga kanohi o te pō ngā iwi maha katoa e whawhai ana ki Ariere, arā te hunga katoa e ngangare ana ki a ia, ki tōna pā kaha, e whakatupu kino ana hoki i a ia.
ISA 29:8 Ka rite anō ki te tangata matekai e moe ana, nā, kei te kai ia; heoi, kei te ohonga ake, e takoto kau ana tōna wairua; ka rite hoki ki te tangata matewai e moe ana, nā, kei te inu ia; te ohonga ake, kāhore he kaha, kei te hiahia anō tōna wairua; ko te rite tērā o te hui o ngā iwi katoa e whawhai ana ki Maunga Hiona.
ISA 29:9 E tū koutou, e mīharo; e hari, ā, ka matapō; e haurangi ana rātou, ehara ia i te wāina; e hūrori ana, engari ehara i te wai kaha.
ISA 29:10 Nō te mea kua ringihia e Ihowā te wairua o te moe au tonu ki runga ki a koutou, kua oti anō i a ia te whakamoe ō koutou kanohi, ngā poropiti; ko ō koutou rangatira, ko ngā matakite, kua taupokina e ia.
ISA 29:11 Ā, ka rite ki a koutou te kitenga katoa ki ngā kupu o tētahi pukapuka i hīritia, e hoatu ana e ngā tāngata ki tētahi tangata mātau ki te kōrero pukapuka, ka mea atu, “Tēnā, kōrerotia tēnei”, ā, ka mea mai ia, “E kore e taea e ahau, e hīri nā hoki.”
ISA 29:12 Nā, ka hoatu taua pukapuka ki te mea kāhore nei e mātau ki te kōrero pukapuka; nā, ko te kīanga atu, “Tēnā, kōrerotia tēnei,” anō rā ko ia, “Kāhore ahau e mātau ki te kōrero.”
ISA 29:13 Nā, ka mea te Ariki: “I te mea e whakatata ana mai te iwi nei ki ahau, ā, e whakahōnore ana i ahau ki tō rātou māngai, ki ō rātou ngutu, otiia e matara noa atu ana i ahau ō rātou ngākau, ā, ko tō rātou wehi ki ahau he mea whakaako e tā te tangata tohutohu.
ISA 29:14 Nā, ka tahuri ahau ki te mahi i tētahi mahi whakamīharo ki waenganui i tēnei iwi, he mahi whakamīharo rawa, he mīharo whakaharahara; ka whakamōtītia hoki ngā whakaaro o ō rātou mea whakaaro nui, ka ngaro te mātauranga o ō rātou mea mōhio.”
ISA 29:15 Auē te mate mō te hunga e whai ana i te wāhi hōhonu, kia ngaro ai tō rātou whakaaro i a Ihowā; ā, kei te pōuri ā rātou mahi, e mea ana hoki, “Ko wai e kite ana i a tātou? Ko wai e mātau ana ki a tātou?”
ISA 29:16 Tā koutou whakaputa kē! E kīia rānei te kaihanga rīhi he rite ki te paru? E kī ake rānei te mea i hangā ki tōna kaihanga, “Kīhai ahau i hangā e ia”? E mea ake rānei te mea i mahia ki tōna kaimahi, “Kāhore ōna mātauranga”?
ISA 29:17 He teka rānei he iti rawa nei te takiwā, ā, ka puta kē a Repanōna hei māra whai hua, ā, ka kīia te māra whai hua hei ngahere?
ISA 29:18 I taua rā ka rongo ngā turi i ngā kupu o te pukapuka, ka kite anō ngā kanohi o ngā matapō i roto i te kākarauri, i te pōuri.
ISA 29:19 Ka neke ake anō te hari o te hunga māhaki ki a Ihowā, ka koa anō ngā tāngata rawakore ki te Mea Tapu o Īharaira.
ISA 29:20 Kua mōtī hoki te tangata nanakia; ā, ko te tangata whakahī, kua poto; kua hātepea atu anō te hunga katoa i whanga ki te kino –
ISA 29:21 e whakatau hē nei ki te tangata e kōrero ana, e whakatakoto rore nei mō te kairiri o te hē i te kūwaha; ā, kāhore he rawa i whakapeaua kētia ai e rātou te tangata tika.
ISA 29:22 Nā, ko te kupu tēnei a Ihowā, nāna nei a Āperahama i hoko, mō te whare o Hākopa: “E kore a Hākopa e whakamā āianei, e kore anō e kōmā tōna mata āianei.
ISA 29:23 Engari, kia kite ia i āna tamariki, i te mahi a ōku ringa, i roto i a ia, ka whakatapua e rātou tōku ingoa; āe rā, ka whakatapua anō e rātou te Mea Tapu o Hākopa, ā, ka wehi ki te Atua o Īharaira.
ISA 29:24 Ka mōhiotia anō te mātauranga e ngā wairua kotiti kē, ā, ka ako te hunga amuamu ki te kupu mōhio.”
ISA 30:1 “Auē te mate mō ngā tamariki whakakeke,” e ai tā Ihowā, “e hanga whakaaro nei, otiia ehara i te mea nāku; e hīpoki nei i te hīpoki, ehara ia i te mea nā tōku wairua, he mea kia taparua iho ai e rātou he hara ki runga ki te hara;
ISA 30:2 e haere nei ki raro ki Īhipa, kāhore hoki e ui tikanga ki tōku māngai; hei kaha hoki mō rātou te kaha o Parao, ā, e mea ana kia whakawhirinaki ki te taumarumarunga iho o Īhipa.
ISA 30:3 Mō reira hei mea whakamā ki a koutou te kaha o Parao, hei mea anō e numinumi ai koutou te whakawhirinaki ki te taumarumarunga iho o Īhipa.
ISA 30:4 I Toana hoki āna rangatira, i tae anō āna karere ki Hanahe,
ISA 30:5 whakamā katoa rātou ki te iwi kāhore nei ā rātou pai mō rātou, kāhore he āwhina, kāhore he pai; engari he whakamā, he ingoa kino.”
ISA 30:6 Ko te poropititanga mō ngā kararehe o te tonga. I te whenua o te raruraru, o te ngākau mamae, nō reira nei te raiona uha me te raiona toa, te waipera me te nākahi e rere nei me he ahi, ka kawea atu e rātou ō rātou rawa i runga i ngā pokohiwi o ngā kūao kāihe, ō rātou taonga i runga i ngā koropuku o ngā kāmera ki te iwi kāhore nei ā rātou pai mō rātou.
ISA 30:7 Ko tā Īhipa āwhina hoki he horihori, he kore noa iho; koia i huaina ai e ahau, “Ko Rahapa noho tonu.”
ISA 30:8 Nā, haere, tuhituhia ki te papa ki tō rātou aroaro, tāia iho hoki ki te pukapuka; me waiho anō tēnā i ngā rā i muri hei kaiwhakaatu ā ake ake.
ISA 30:9 He tutū hoki tēnei iwi, he tamariki kōrero teka, he tamariki kāhore e pai ki te whakarongo ki te Ture a Ihowā;
ISA 30:10 ko tā rātou nei kupu ki ngā matakite, “Kaua e kite!” ki ngā poropiti, “Kaua e poropititia ki a mātou ngā mea tika; kōrero ki a mātou i ngā mea ngāwari; hei ngā mea tinihanga he poropititanga mā koutou;
ISA 30:11 peka atu i te ara, whakarērea te huarahi, kāti tā te Mea Tapu o Īharaira te mea mai ki tō mātou aroaro.”
ISA 30:12 Nā, ko te kupu tēnei a te Mea Tapu o Īharaira: “Kua paopao nā koutou ki tēnei kupu, kua okioki anō ki te tūkino, ki te whanokē, ū tonu atu ki reira;
ISA 30:13 nā, ko te tukunga iho o tēnei hē ki a koutou, ka rite ki te pakaru o te taiepa, meāke nei hinga, kua ngawhā haere i te wāhi tiketike, kitea rawatia ake, kua puta whakarere tōna pakaru.
ISA 30:14 Ka wāhia hoki e ia, pērā i te oko a te kaihanga rīhi e wāhia ana, mongamonga noa, e kore e tohungia; nā, e kore e kitea i roto i ōna kongakonga he maramara hei tango ahi mai i te kānga ahi, hei utu wai ake rānei i te poka.”
ISA 30:15 Ko te kupu hoki tēnei a te Ariki, a Ihowā, a te Mea Tapu o Īharaira: “Mā te tahuri mai, mā te hūmārie ka ora ai koutou; kei te āta noho, kei te whakawhirinaki he kaha mō koutou; heoi kīhai koutou i pai.
ISA 30:16 Nā, i kī nā koutou, ‘Kāhore, engari me rere mātou i runga i te hōiho.’ Mō reira ka rere koutou; ā, ‘Ka eke mātou ki runga ki te mea tere.’ Mō reira ka tere anō te hunga e whai ana i a koutou.
ISA 30:17 Ko te mano kotahi, ka rere i te riri a te tangata kotahi; ka rere koutou i te riri a te tokorima; ā, ka mahue koutou ānō he pou kara i te tihi o te maunga, ānō he kara i runga i te pukepuke.”
ISA 30:18 Nā konei anō a Ihowā ka tatari, he mea kia atawhaitia ai koutou e ia, nā konei anō ia ka whakanekehia ake, kia tohungia ai koutou e ia. He Atua whakawā hoki a Ihowā, ka hari te hunga katoa e tatari ana ki a ia.
ISA 30:19 Tērā hoki te iwi e noho ki Hiona, ki Hiruhārama; mutu ake tōu tangi. He pono ka aroha ia ki a koe, ki tōu reo e tangi ana; ka rongo ia ki a koe, ka whakahoki kupu ia ki a koe.
ISA 30:20 Ahakoa hōmai e te Ariki hei taro mā koutou ko te ngākau mamae, hei wai anō ko te tūkino, e kore ōu kaiwhakaako e hunā ā muri; engari ka kite ōu kanohi i ōu kaiwhakaako.
ISA 30:21 Ā, ka rongo ōu taringa i te kupu i muri i a koe e mea ana, “Ko te ara tēnei; nā konei atu, ina tahuri koutou ki matau, ina tahuri ki mauī.”
ISA 30:22 Ka whakapokea hoki e koutou te kōpaki o āu whakapakoko hiriwa, me te mea whakakikorua o āu whakapakoko kōura whakarewa; ka rukerukea atu e koe, ānō he mea poke, ā, ka mea ki taua mea, “Haere atu!”
ISA 30:23 Ā, ka hōmai e ia he ua ki tāu purapura e whakatōkia e koe ki te oneone, he taro anō, he hua nō te oneone, ā, ka whai ngako, ka nui taua mea; i taua rā anō he nunui ngā pārae e kai ai āu kararehe.
ISA 30:24 Ā, ko ngā kau, me ngā kūao kāihe e mahi ana i te oneone, ka kai i te kai pai, he mea i whakarererea ki te koko, ki te whakarerere wīti;
ISA 30:25 ā, i runga i ngā maunga tiketike katoa, i ngā pukepuke ikeike katoa, ka rere he awa, he manga wai – i te rā o te parekura nui, ina hinga ngā pourewa.
ISA 30:26 Ko te mārama hoki o te marama ka rite ki te mārama o te rā, ā, ko te mārama o te rā, e whitu ōna whakanekehanga ake, ka rite ki te mārama o ngā rā e whitu, i te rā e takaia ai e Ihowā te kaiākiko o tāna iwi, ina rongoātia e ia te patunga i patua ai rātou.
ISA 30:27 Nanā, kei te haere mai te ingoa o Ihowā i tawhiti, kā tonu tōna riri, pongere tonu te paowa e kake ana; kī tonu ōna ngutu i te riri, ko tōna arero koia anō kei te ahi e kai ana.
ISA 30:28 Ko tōna manawa, ānō he awa e ngawhā ana, tae ana ki te kakī rawa – hei tātari i ngā iwi ki te tātari o te horihori; ā, mau rawa ki ngā kauae o ngā iwi he paraire, hei whakapōhēhē i a rātou.
ISA 30:29 Ka waiata koutou, me te mea ko te pō e mahia ai te hākari tapu; ka koa te ngākau, ānō he tangata e haere ana me tāna pūtōrino, e haere ana ki te maunga o Ihowā, ki te Kāmaka o Īharaira.
ISA 30:30 Ka meinga hoki e Ihowā tōna reo korōria kia rangona, kia kitea te tautanga iho o tōna ringa, me te weriweri o tōna riri, te mura o te ahi e kai ana, te apū hau, te tūpuhi, me te nganga kōhatu.
ISA 30:31 Mā te reo hoki o Ihowā ka pakaru ai te Ahiriana i whiu nei ki te rākau.
ISA 30:32 Ā, ko ngā whakapānga katoa o te tokotoko i whakaritea, ko tā Ihowā hoki e whakapā ai ki a ia, ka meinga ki ngā timipera, ki ngā hāpa; he whawhai whakangāueue hoki tāna whawhai ki a rātou.
ISA 30:33 Nō mua iho hoki a Topete i whakaritea ai; āe rā, kua rite mō te kīngi; kua oti te whakahōhonu, te whakanui; ko tōna pūranga he ahi, nui atu hoki te wahie; ko te manawa o Ihowā, ānō he awa whānāriki, hei whakangiha.
ISA 31:1 Auē te mate mō te hunga e haere ana ki raro, ki Īhipa ki te tiki whakauru, e okioki ana ki te hōiho; e whakawhirinaki ana ki te hāriata, nō te mea he maha, ki te kaieke hōiho anō, nō te mea he nui te kaha; kāhore ia e titiro ki te Mea Tapu o Īharaira, kāhore hoki e rapu tikanga ki a Ihowā!
ISA 31:2 Otiia he whakaaro nui anō ia, ka tākina mai anō te kino e ia, e kore anō āna kupu e unuhia e ia; engari ka whakatika ia ki te whare o ngā kaimahi i te kino, ki ngā whakauru o ngā kaimahi i te hē.
ISA 31:3 Nā, he tangata nei ngā Īhipiana, ehara hoki i te Atua; he kikokiko anō hoki ō rātou hōiho, ehara i te wairua. Te whakamārōkanga mai o tō Ihowā ringa, ka hinga te kaiāwhina, taka tonu atu te tangata e āwhinatia ana, ā, ka hē ngātahi rātou.
ISA 31:4 Ko tā Ihowā kupu hoki tēnei ki ahau: “Ka rite ki te raiona, ki te kūao raiona e hāmama ana ki tāna tūpāpaku, i te mea ka kārangarangatia ngā hēpara tokomaha ki a ia, kāhore ōna wehi ki tō rātou reo, e kore anō ia e whakaririka ki tō rātou ngangau; ka pērā anō te haerenga iho o Ihowā o ngā mano ki te whawhai ki runga ki Maunga Hiona me tō reira pukepuke.
ISA 31:5 Ka rite ki ngā manu e rere ana tā Ihowā o ngā mano tiaki i Hiruhārama, ka tiakina, ka whakaorangia, ka tika atu ia nā runga, ka araaraia e ia.”
ISA 31:6 Tahuri ki a ia, kua hōhonu rawa nei tā koutou tutū ki a ia, e ngā tama a Īharaira.
ISA 31:7 Ā taua rā hoki ka whakahāwea te tangata ki āna whakapakoko hiriwa, ki āna whakapakoko kōura, i hangā e ō koutou ringa mā koutou hei hara.
ISA 31:8 “Hei reira te Ahiriana ka hinga i te hoari, ehara nā te tangata; ā, ka pau ia i te hoari, ehara i te tangata; ā, ka rere atu ia i te hoari, ka meinga hoki āna taitamariki kia utu takoha.
ISA 31:9 Ā, ka memeha tōna kāmaka, he wehi hoki, ā, ka mataku ōna rangatira i te kara,” e ai tā Ihowā, kei Maunga Hiona nei tāna ahi, kei Hiruhārama tāna oumu.
ISA 32:1 Nanā, ka kīngi te kīngi i runga i te tika, ka whakahaere tikanga anō ngā rangatira i runga i te whakawā.
ISA 32:2 Ā, ka ai he tangata hei kuhunga ina pā te hau, hei piringa kei mate i te tūpuhi; ka rite ki ngā awa wai i te wāhi maroke, ki te ata o te kōhatu nui i te whenua ngaunga rā.
ISA 32:3 Nā, e kore e atarua ngā kanohi o te hunga kite; ka whakarongo anō te hunga i te taringa rongo.
ISA 32:4 Ka mātauria anō te mātauranga e te ngākau o te hunga pōnānā, ā, ka hohoro te arero o ngā reo kīkiki ki te kōrero mārama.
ISA 32:5 E kore te wairangi e kīia i muri he ohaoha, e kore anō te kaiponu e kīia he atawhai.
ISA 32:6 Ka kōrero hoki te tangata nanakia i te nanakia, ā, ka mahi tōna ngākau i te kino, kia whakahāwea ai ki te tapu, kia puta kē ai tāna kōrero ki a Ihowā, kia noho tahanga ai i a ia te wairua o te tangata matekai, kia mōtī ai hoki he wai mō te tangata matewai.
ISA 32:7 He kino hoki ngā hanga a te kaiponu; e whakatakotoria ana e ia he whakaaro kino, he kōrero teka e hē ai te hunga iti, ahakoa e tika ana anō ngā kōrero a te rawakore.
ISA 32:8 He ohaoha ia ngā tikanga a te ohaoha; ā, ka ū ia ki ngā mahi ohaoha.
ISA 32:9 Whakatika e ngā wāhine e noho pai ana, whakarongo ki tōku reo; e ngā tamāhine whakaarokore, kia whai taringa, ki āku kupu.
ISA 32:10 He maha ngā rā i tua atu i te tau e raruraru ai koutou, e ngā wāhine maharakore; nō te mea ka kore te whakinga wāina, e kore hoki e tae mai te kohikohinga.
ISA 32:11 E wiri, e ngā wāhine e noho hūmārie ana; pōkaikaha noa iho, e te hunga maharakore; whakarērea ngā kākahu, noho tahanga, whītikiria he kākahu taratara ki ō koutou hope.
ISA 32:12 Ka papaki rātou ki ngā uma mō ngā māra ātaahua, mō te wāina hua,
ISA 32:13 ka puta ake te tātarāmoa me te tūmatakuru ki te oneone o tāku iwi, inā, ki runga ki ngā whare koa katoa o te pā hari.
ISA 32:14 Nō te mea ka mahue te whare kīngi, ka whakarērea te pā tokomaha; ko te puke me te pourewa ka waiho hei ana ā ake ake, hei mea e koa ai ngā kāihe mohoao, hei wāhi kai mā ngā kāhui;
ISA 32:15 kia ringihia mai rā anō i runga te wairua ki a tātou, kia meinga rā anō te koraha hei māra whai hua, kia kīia anō te māra whai hua he ngahere.
ISA 32:16 Ko reira te whakawā noho ai ki te koraha, ā, hei kāinga te māra hua mō te tika.
ISA 32:17 Ā, ko te mahi a te tika he rongo mau; ko te whakaotinga o te tika he āta noho, he ngākau ū ā ake ake.
ISA 32:18 Ka noho hoki tāku iwi ki te nohoanga o te rongo mau, ki ngā kāinga e ū ai te ngākau, ki ngā okiokinga hūmārie.
ISA 32:19 Ka tārere iho ia te whatu i te hinganga o te ngahere; ā, ka whakahoroa rawatia te pā ki raro.
ISA 32:20 Anō te hari o koutou, o te hunga e whakatō ana ki te taha o ngā wai katoa, e tuku atu ana i ngā waewae o te kau, o te kāihe.
ISA 33:1 Auē te mate mōu e pāhua nei, ā, kīhai koe i pāhuatia; e tinihanga nei, ā, kīhai anō koe i tinihangatia! Kia mutu tāu pāhua, ka pāhuatia anō koe; kia mutu tāu tinihanga, ka tinihangatia koe.
ISA 33:2 Kia atawhai, e Ihowā, ki a mātou; kua tatari nei mātou ki a koe. Ko koe hei ringa mō rātou i tēnei ata, i tēnei ata, hei whakaora mō mātou i ngā wā o te raru.
ISA 33:3 I te rongonga i te ngangau, whati ana ngā iwi; i tōu aranga ki runga, marara ana ngā iwi.
ISA 33:4 Ko te kohikohinga o ō koutou taonga ānō he moka e kohi ana; kei te tarapeke o te māwhitiwhiti te rite ina kōkiritia e rātou.
ISA 33:5 Ka whakanuia a Ihowā; kei runga hoki tōna nohoanga; nāna a Hiona i kī ai i te whakawā, i te tika;
ISA 33:6 ā, ka ū ngā wā i a koe; hua tonu te whakaora, te whakaaro nui, te mātauranga; ko te wehi ki a Ihowā hei taonga mōna.
ISA 33:7 Nanā, he tangi ō rātou māia i waho; ko ngā karere hohou rongo, tīwerawera ana te tangi.
ISA 33:8 Kua ururuatia ngā ara, kua kore e haerea e te tangata. Kua paheke i a ia te kawenata, whakahāwea ana ia ki ngā pā; kāhore te tangata e whakaaroa e ia.
ISA 33:9 E tangi ana te whenua, ngohe noa iho; kua whakamā a Repanōna, kua memenge; a Harono, rite tonu ki te koraha; ko ngā rau o Pahana, o Karamere, ruirui rawa.
ISA 33:10 “Kātahi ahau ka whakatika,” e ai tā Ihowā; “kātahi ahau ka whakarewa ake i ahau, kātahi ahau ka neke ake.
ISA 33:11 Ko tō koutou hapū he pāpapa, whānau ake he kakau wīti; ko tō koutou manawa, ka rite ki te ahi, ka kai i a koutou.
ISA 33:12 Ka rite hoki ngā iwi ki ngā tahunga kotakota; ki te tātarāmoa kua tapahia, e tahuna ana ki te ahi.”
ISA 33:13 Whakarongo, e koutou o tawhiti ki tāku i mea ai; e te hunga e tata ana, kia mōhio mai ki tōku kaha.
ISA 33:14 Pawera noa iho ngā tāngata hara i Hiona, mau pū te hunga atuakore i te tūiri. “Ko wai o tātou e noho ki te ahi e kai ana? Ko wai o tātou e noho ki ngā tahunga e kore nei e mutu?”
ISA 33:15 Ko te tangata e haere ana i runga i te tika, he tika anō āna kōrero; ko te tangata e whakahāwea ana ki ngā taonga o te tūkino, e rukerukea ana e tōna ringa te utu whakapati; e punia ana ōna taringa kei rangona he kōrero toto, e whakamoe ana i ōna kanohi kei kite i te kino;
ISA 33:16 ko te nohoanga mō tērā kei runga rawa; ko tōna wāhi ārai riri ko ngā kaha o ngā kāmaka; ka hōmai he taro māna, ka pūmau te wai mōna.
ISA 33:17 Ka kite ōu kanohi i te kīngi, i tōna ātaahua; ka mātakitaki anō ki te whenua e hora mai ana i tawhiti.
ISA 33:18 Ka whakaaroaroa te wehi e tōu ngākau: “Kei hea te kaitatau? Kei hea te kaipāuna takoha? Kei hea te kaitatau o ngā pourewa?”
ISA 33:19 E kore koe e kite i te iwi nanakia, he hōhonu nei tō rātou reo, kāhore e rangona e koe; he rerekē te reo, e kore e mātauria e koe.
ISA 33:20 Titiro ki Hiona, ki te pā o ā tātou hākari; ka kitea e ōu kanohi a Hiruhārama, he nohoanga hūmārie, he tēneti, e kore e nekehia; ā, kore tētahi o ōna titi e unuhia ā ake ake, e kore anō tētahi o ōna taura e motu.
ISA 33:21 Engari, ki reira a Ihowā ki a tātou me tōna nui, hei wāhi mō ngā awa whānui mō ngā wai nunui; kāhore hoki he waka e hoehoea ki reira, kāhore he kaipuke nui e tika nā reira.
ISA 33:22 Nō te mea ko Ihowā tō tātou kaiwhakawā, ko Ihowā tō tātou kaiwhakatakoto tikanga, ko Ihowā tō tātou kīngi; māna tātou e whakaora.
ISA 33:23 Kua tangoro kau ōu pūwhenua, tē taea te tūranga o tō rātou rewa te whakaū, tē taea te rā te whewhera. Nā, nui atu te taonga parakete e wehewehea ana, pāhuatia ana ngā taonga pārau e ngā kopa.
ISA 33:24 Kāhore hoki he kīanga ake a te tangata whenua, “He mate tōku”; ko te iwi e noho ana i reira, ka murua tō rātou hē.
ISA 34:1 Whakatata mai, e ngā iwi, kia rongo ai; kia whai taringa mai, e ngā iwi! Kia rongo te whenua, me ngā mea e hua ana i runga, te ao, me ngā mea katoa e puta ana i roto i a ia.
ISA 34:2 Kei runga hoki i ngā iwi katoa te riri o Ihowā, tōna weriweri kei runga i ō rātou ope katoa; ngaro rawa i a ia, tukua ana kia patua.
ISA 34:3 Ka ākiritia atu anō ō rātou tūpāpaku i patua, ka puta ake hoki te piro o ō rātou tinana; ā, ka rewa ngā maunga i ō rātou toto.
ISA 34:4 Nā, ka memeha ngā ope katoa o te rangi, ko ngā rangi, koia anō kei te pukapuka i pōkaia. Ko ō rātou ope katoa ka whakangaro haere, koia anō kei te rau wāina ka marere nei, kei te rau piki e marere ana i runga i te rākau piki.
ISA 34:5 Kua inu hoki tāku hoari, mākona ana, i te rangi; nanā, ka tae iho ki a Ēroma, ki te iwi i kangā e ahau, ki te whakarite whakawā.
ISA 34:6 Kī tonu te hoari a Ihowā i te toto; kua mōmona i te ngako, i te toto o ngā reme, o ngā koati, i te ngako o ngā whatukuhu o ngā hipi toa; he patunga tapu hoki tā Ihowā i Potora, he parekura nui i te whenua o Ēroma.
ISA 34:7 Ā, ka haere tahi mai i roto i a rātou ngā kau mākā, ngā kau ōkiha rātou ko ngā pūru; ā, ka haurangi tō rātou whenua i te toto, ka mōmona tō rātou puehu i te ngako.
ISA 34:8 Ko te rā hoki ia o tā Ihowā rapu utu, ko te tau whakautu mō tā Hiona totohe.
ISA 34:9 Ā, ka puta kē ōna awa hei kāpia, ko tōna puehu hei whānāriki; nā, ko tōna whenua, he kāpia e kā ana!
ISA 34:10 E kore e tineia i te pō, i te ao; ka kake tōna paowa ake ake. I tērā whakatupuranga, i tērā whakatupuranga ka takoto he ururua kau; e kore tētahi tangata e tika nā reira ā ake tonu atu.
ISA 34:11 Ka riro anō a reira hei kāinga mō te kawau, mō te matuku; ka noho anō te ruru rāua ko te raweni ki reira. Ka whakamārōkia anō hoki e ia te taura o te pororaru ki runga, me te kōhatu whakatika o te kore noa iho.
ISA 34:12 Ka karangatia ōna rangatira kia whakakīngitia, kāhore tētahi e tae mai; ā, ka kore noa iho ōna rangatira katoa.
ISA 34:13 Ā, ka tupu te tātarāmoa ki ōna whare kīngi, he ongaonga, he tūmatakuru ki ōna pā kaha, ā, ka waiho hei nohoanga mō te kīrehe mohoao, hei marae mō te otereti.
ISA 34:14 Ko ngā kurī mohoao o te koraha ka tūtaki ki ngā wuruhi, ka karanga te mea āhua koati ki tōna hoa; ka takoto anō te ngārara haere pō ki reira, ka kitea he okiokinga mōna ki reira.
ISA 34:15 Ka hangā anō e te ruru nui tōna kōhanga ki reira, whānau iho, pao iho ngā hua, whakamine anō ki raro i tōna taumarumarunga iho; ka huihui anō ki reira ngā whatura, rātou ko tāna tāne, ko tāna tāne.
ISA 34:16 Rapua i roto i tā Ihowā pukapuka, kōrerotia hoki: E kore tētahi o ēnei e ngaro, e kore tētahi o ēnei e hapa i te tāne māna. Nā tōku māngai nei hoki te whakahau, ko tōna wairua anō tō rātou kaiwhakamine.
ISA 34:17 Nāna hoki i maka te rota mō tā rātou, nā tōna ringa anō i wehewehe taua wāhi mō rātou, mea rawa ki te aho; hei kāinga a reira mō rātou ā ake ake, ka nohoia a reira e rātou i tēnā whakatupuranga, i tēnā whakatupuranga.
ISA 35:1 Ka koa te koraha me te wāhi mokemoke, ka hari te koraha, koia anō kei te rōhi te whai puāwai.
ISA 35:2 Nui atu te tupu, ka koa, āe rā, koa ana, waiata ana. Ka hoatu te korōria o Repanōna ki reira, te nui o Karamere, o Harono. Ka kite rātou i te korōria o Ihowā, i te nui o tō tātou Atua.
ISA 35:3 Whakakahangia ngā ringa ngoikore, whakaūngia ngā turi ngonge.
ISA 35:4 Mea atu ki te hunga ngākau pōtatutatu, “Kia kaha, kaua e wehi! Nanā, ka haere mai tō koutou Atua, me te rapu utu, me te whakautu a te Atua; ka haere mai anō ia ki te whakaora i a koutou.”
ISA 35:5 Ko reira ngā kanohi o ngā matapō kite ai, ā, ka puare ngā taringa o ngā turi.
ISA 35:6 Ko reira te kopa tūpeke ai, ānō he hāta, ka waiata te arero o te whango. Nō te mea ka pakaru mai ngā wai i te koraha, ngā awa i te wāhi tītōhea.
ISA 35:7 Nā, ka meinga te kirikiri mumura hei hārotoroto, te whenua maroke hei pupūtanga wai; ā, i te nohoanga i takoto ai ngā kīrehe mohoao, ko te tarutaru, ko te kākaho, ko te wīwī.
ISA 35:8 Ka whai huanui anō a reira, me tētahi ara, ka kīia hoki, Ko te Ara o te Tapu. E kore te poke e haere i reira; engari, ka waiho mō rātou, ā, ko te tangata haere ara, ahakoa he wairangi, e kore e hē ki reira.
ISA 35:9 Kāhore o reira raiona, e kore anō tētahi kararehe kai kino e tika nā reira; e kore e kitea ki reira; engari ka hāereerea e te hunga i hokona.
ISA 35:10 Nā, ko ā Ihowā i hoko ai ka hoki mai, ka haere mai i runga i te waiata ki Hiona; i runga i ō rātou māhunga ko te haringa e kore e mutu; ka whiwhi rātou ki te koa, ki te hari, ā, rere atu ana te pōuri me te auē.
ISA 36:1 Nā, nō te tekau mā whā o ngā tau o Kīngi Hetekia ka whakaekea mai ngā pā taiepa katoa o Hūrā e Henakeripi kīngi o Ahiria, ā, riro ana i a ia.
ISA 36:2 Nā, ka tonoa mai e te kīngi o Ahiria a Rapahake i Rakihi ki a Kīngi Hetekia, ki Hiruhārama; he nui te ope. Nā, tū ana ia ki te awakeri o tō runga puna wai, ki te ara i te māra o te kaihoroi kākahu.
ISA 36:3 Nā, ka puta atu ki a ia a Eriakimi, tama a Hirikia, rangatira o te whare, rātou ko Hepena, kaituhituhi, ko Ioaha, tama a Āhapa, kaiwhakamahara.
ISA 36:4 Nā, ka mea a Rapahake ki a rātou, “Tēnā, mea atu ki a Hetekia: “ ‘Ko te kupu tēnei a te kīngi nui, a te kīngi o Ahiria: He aha tēnei whakawhirinaki e whakawhirinaki nā koe?
ISA 36:5 Ki tāku, ko tāu ngārahu, me tōu kaha mō te whawhai he kupu noa iho. Ko wai tōu whakawhirinakitanga, i whakakeke ai koe ki ahau?
ISA 36:6 Nā, e whakawhirinaki nā koe ki tēnā kākaho whati hei tokotoko, ki Īhipa; ki te whakahinga atu te tangata ki reira, ka ngoto ki tōna ringa, nā, kua tū. Ka pērā anō a Parao kīngi o Īhipa ki te hunga katoa e okioki ana ki a ia.
ISA 36:7 Nā, ki te mea koe ki ahau, “Ko Ihowā, ko tō mātou Atua tā mātou e whakawhirinaki nei,” he teka ianei nāna ngā wāhi tiketike, me ngā āta e whakakāhoretia nā e Hetekia, i mea i nā ki a Hūrā rāua ko Hiruhārama, “Hei mua i tēnei āta koutou koropiko ai”?
ISA 36:8 “ ‘Nā, tēnā rā, hōmai āianei he utu pupuri ki tōku ariki, ki te kīngi o Ahiria, ā, ka hoatu e ahau ētahi hōiho ki a koe, kia rua mano, ki te taea e koe te whakanoho he kaieke ki runga ki a rātou.
ISA 36:9 Ā, me pēhea e hoki ai i a koe te kanohi o tētahi rangatira o ngā mea ririki rawa o ngā pononga a tōku ariki; i a koe ka whakawhirinaki ki Īhipa ki te hāriata, ki te kaieke hōiho māu?
ISA 36:10 I ngaro rānei a Ihowā i tōku haerenga mai ki te huna i tēnei whenua? I mea mai a Ihowā ki ahau, Haere ki tērā whenua huna ai.’ ”
ISA 36:11 Nā, ka mea a Eriakimi rātou ko Hepena, ko Ioaha, ki a Rapahake, “Tēnā, kōrero Hīriani mai ki āu pononga; e mōhiotia ana hoki tēnā reo e mātou, kaua hoki e kōrero reo Hūrai mai ki a mātou, i te mea e whakarongo ana te iwi nei i runga i te taiepa.”
ISA 36:12 Anō rā ko Rapahake, “I tonoa mai rānei ahau e tōku ariki ki tōu ariki, ki a koe rānei, hei kōrero i ēnei kupu? He teka ianei ki ngā tāngata e noho ana i runga i te taiepa, kia kainga e rātou tō rātou paru, kia inumia anō tō rātou mimi, arā e koutou tahi?”
ISA 36:13 Nā, tū ana a Rapahake, ā, nui atu tōna reo ki te karanga i te reo o ngā Hūrai; ka mea, “Whakarongo ki ngā kupu a te kīngi nui, a te kīngi o Ahiria!
ISA 36:14 Ko te kupu tēnei a te kīngi: Kei tinihangatia koutou e Hetekia; e kore hoki koutou e taea e ia te whakaora.
ISA 36:15 Kei meinga koutou e Hetekia kia whakawhirinaki ki a Ihowā, i a ia e kī nā, ‘Tērā tātou ka whakaorangia e Ihowā; e kore tēnei pā e tukua ki te ringa o te kīngi o Ahiria.’
ISA 36:16 “Kaua e rongo ki a Hetekia; ko te kupu hoki tēnei a te kīngi o Ahiria: ‘Houhia tāu rongo ki ahau, haere mai hoki ki waho, ki ahau; ka kai ai koutou i ngā hua o tāna wāina, o tāna wāina, o tāna piki, o tāna piki, ka inu anō i te wai o tāna puna, o tāna puna;
ISA 36:17 kia tae atu rā anō ahau ki te tiki atu i a koutou ki te whenua e pēnei ana me tō koutou nei whenua, ki te whenua wīti, wāina, ki te whenua taro, māra wāina.
ISA 36:18 “Kei whakapatia koutou e Hetekia, ki te mea ia, ‘Mā Ihowā tātou e whakaora.’ I whakaorangia rānei e tētahi o ngā atua o ngā tauiwi tōna whenua i te ringa o te kīngi o Ahiria?
ISA 36:19 Kei hea ngā atua o Hāmata, o Ārapara? Kei hea ngā atua o Hēparawaima? I whakaorangia rānei e rātou a Hamaria i tōku ringa?
ISA 36:20 Nā wai o ngā atua katoa o ēnei whenua i whakaora tō rātou whenua i tōku ringa, e whakaorangia ai e Ihowā a Hiruhārama i tōku ringa?”
ISA 36:21 Heoi, whakarongo kau ana rātou, kīhai i utua tāna; ko tā te kīngi hoki tēnā i ako ai; i kī ia, “Kaua e utua tāna.”
ISA 36:22 Nā, haere ana a Eriakimi, tama a Hirikia, rangatira o te whare, rātou ko Hepena kaituhituhi, ko Ioaha, tama a Āhapa, kaiwhakamahara, ki a Hetekia, he mea haehae ō rātou kākahu, ā, kōrerotia ana e rātou ki a ia ngā kupu a Rapahake.
ISA 37:1 Nā, ka rongo a Kīngi Hetekia, haea ana e ia ōna kākahu, kei te hīpoki i a ia ki te kākahu taratara, ā, haere ana ki te whare o Ihowā.
ISA 37:2 I tonoa anō e ia a Eriakimi rangatira o te whare, a Hepena kaituhituhi, me ngā kaumātua o ngā tohunga, he mea hīpoki ki te kākahu taratara, ki a Ihāia poropiti, tama a Āmoho;
ISA 37:3 hei mea ki a ia, “Ko te kupu tēnei a Hetekia: Ko tēnei rā, he rā nō te hē, nō te whakatuma, nō te whakamā; kua taea hoki te whānautanga tamariki, heoi kāhore he kaha e whānau ai.
ISA 37:4 Tērā pea a Ihowā, tōu Atua, ka rongo ki ngā kupu a Rapahake i tonoa mai nei e tōna ariki, e te kīngi o Ahiria, hei whākorekore ki te Atua ora, ā, ka riri ki ngā kupu i rongo ai a Ihowā, tōu Atua. Nā, kia ara tāu īnoi mō ngā toenga e noho nei.”
ISA 37:5 Nā, ko te haerenga atu o ngā tāngata a Kīngi Hetekia ki a Ihāia,
ISA 37:6 ka mea a Ihāia ki a rātou, “Kī atu ki tō koutou ariki, ‘Ko te kupu tēnei a Ihowā: Kaua e wehi i ngā kupu i rongo rā koe, ki ērā i kohukohu mai rā ngā tāngata a te kīngi o Ahiria ki ahau.
ISA 37:7 Nā, ka tonoa e ahau he wairua ki a ia, ā, ka rongo ia i tētahi rongo, ka hoki ki tōna whenua; ka meinga anō hoki ia e ahau kia hinga i te hoari i tōna whenua.’ ”
ISA 37:8 Nā, hoki ana a Rapahake, ā, rokohanga atu e ia e whawhai ana te kīngi o Ahiria ki Rīpina; i rongo hoki ia kua hāpainga mai e ia i Rakihi.
ISA 37:9 Ā, ka rongo ia ki a Tirihaka kīngi o Etiopia, ki te kōrero, “Kei te haere mai ki te whawhai ki a koe.” Nā, ka rongo ia, ka tono tāngata anō ki a Hetekia, ka mea:
ISA 37:10 “Kī atu ki a Hetekia kīngi o Hūrā, mea atu: Kei tinihangatia koe e tōu Atua, e tāu e okioki nā koe, i a ia e kī nā, ‘E kore a Hiruhārama e hoatu ki te ringa o te kīngi o Ahiria.’
ISA 37:11 Nanā, kua rongo nā koe ki tā ngā kīngi o Ahiria i mea ai ki ngā whenua katoa, ki tā rātou hunanga rawatanga i a rātou, ā, e ora rānei koe?
ISA 37:12 I whakaora rānei ngā atua o ngā tauiwi i ngā wāhi i hunā e ōku mātua; i Kotana, i Harana, i Retepe, i ngā tama a Erene, i ērā i Terahara?
ISA 37:13 Kei hea te kīngi o Hāmata, te kīngi o Ārapara, te kīngi o te pā o Hēparawaima, o Hena, o Iwa?”
ISA 37:14 Nā, ka tangohia mai e Hetekia te pukapuka i te ringa o ngā karere, kōrerotia ana e ia. Nā, haere ana a Hetekia ki runga, ki te whare o Ihowā, wherahia ana e ia ki te aroaro o Ihowā.
ISA 37:15 Nā, ka īnoi a Hetekia ki a Ihowā, ka mea:
ISA 37:16 “E Ihowā o ngā mano, e te Atua o Īharaira, e noho nā i runga o ngā kerupima, ko koe te Atua, ko koe anake, o ngā kīngitanga katoa o te whenua; nāu i hanga te rangi me te whenua.
ISA 37:17 Tahuri mai tōu taringa, e Ihowā, whakarongo mai; titiro mai ōu kanohi e Ihowā, kia kite koe; kia rongo ki ngā kupu katoa a Henakeripi, ki tāna i tuku mai ai hei whākorekore mō te Atua ora.
ISA 37:18 “He tika anō, e Ihowā, kua kore i ngā kīngi o Ahiria ngā iwi katoa, me tō rātou whenua.
ISA 37:19 Kua makā anō e rātou ō rātou atua ki te ahi, nō te mea ehara rātou i te atua, engari, he mahi nā te ringa tāngata – he rākau, he kōhatu – koia i hunā ai e rātou.
ISA 37:20 Tēnā rā, whakaorangia mātou āianei, e Ihowā, e tō mātou Atua, i tōna ringa, kia mōhio ai ngā kīngitanga katoa o te whenua ko koe a Ihowā, ko koe anake.”
ISA 37:21 Katahi a Ihāia tama a Āmoho ka tono tāngata ki a Hetekia, hei mea: “Ko te kupu tēnei a Ihowā, a te Atua o Īharaira: I te mea i īnoi koe ki ahau mō Henakeripi kīngi o Ahiria;
ISA 37:22 nā, ko tā Ihowā kupu tēnei i kōrero ai mōna: Kua whakahāwea te wāhina, te tamāhine a Hiona ki a koe; kataina iho koe e ia – rūrū ana te māhunga o te tamāhine a Hiruhārama ki a koe.
ISA 37:23 Ko wai tāu i whākorekore nā, i kohukohu nā? Ki a wai tōu reo i whakarahia nā, tōu kanohi i kake nā ki runga? Ki te Mea Tapu o Īharaira!
ISA 37:24 Meatia ana e koe āu karere hei whākorekore mō te Ariki; kua mea nā koe, ‘Kua kake ahau, me aku tini hāriata, ki runga ki ngā wāhi tiketike o ngā maunga, ki roto rawa o Repanōna; ka tuaina anō e ahau ngā hīta roroa o reira, me ō reira kauri papai; ka tae anō ahau ki te wāhi tiketike o tōna wāhi whakamutunga mai, ki te ngahere o tōna māra whai hua.
ISA 37:25 Keria ana e ahau, inu wai ana ahau, maroke ake i te kapu o tōku waewae ngā awa katoa o Īhipa.’
ISA 37:26 “Kāhore rānei koe i rongo i mua noa atu, nāku tēnā i mea? I ngā rā onamata nāku tēnā i hanga? Katahi nei ka whakaputaina e ahau, ā, ka waiho nā koe hei mea i ngā pā taiepa hei pūranga rukerukenga.
ISA 37:27 Koia i iti ai te kaha o ō reira tāngata; wehi ana rātou, pōrahurahu kau ana; rite tonu ki te tarutaru o te pārae, ki te otaota matomato, ki te taru i runga i ngā tuanui, ki te wīti i ngingio i te mea kīanō i tupu noa.
ISA 37:28 “Otirā, e mātau ana ahau ki tōu nohoanga iho, ki tōu haerenga atu, ki tōu haerenga mai, me tōu nananga ki ahau.
ISA 37:29 Nā, mō tāu nananga ki ahau, mō te mea kua tae ake nei tāu whakamanamana ki ōku taringa, mō reira ka kuhua e ahau tāku matau ki tōu ihu, tāku paraire ki ōu ngutu; ā, ka whakahokia koe nā te ara i haere mai nā koe.
ISA 37:30 “Ā, ko te tohu tēnei ki a koe: I tēnei tau ka kai koutou i ngā mea tupu noa ake, ā, i te rua o ngā tau ko ngā tupu noa ake o te tau. Nā, hei te toru o ngā tau koutou whakatō ai, kokoti ai, whakatō ai i ngā māra wāina, kai ai i ngā hua o aua māra.
ISA 37:31 Nā, tērā e hou anō whakararo ngā pakiaka o ngā oranga i mawhiti o te whare o Hūrā, ka hua anō ngā hua whakarunga.
ISA 37:32 E puta ake hoki he toenga i Hiruhārama, he oranga i Maunga Hiona. E taea tēnei e te ngākau nui o Ihowā o ngā mano.
ISA 37:33 “Nā, ko tā Ihowā kupu tēnei mō te kīngi o Ahiria: E kore ia e haere mai ki tēnei pā, e kore anō e perea he pere e ia ki konei, e kore anō e maua e ia he whakangungu rākau ki mua i tēnei pā, e opehia rānei he puke hei whawhaitanga ki konei.
ISA 37:34 Ko te ara i haere mai ai ia, ka hoki ia mā reira; e kore anō ia e tae ki tēnei pā,”
ISA 37:35 “Ka tiakina hoki e ahau tēnei pā, ka whakaorangia; he whakaaro ki ahau, ki tāku pononga anō, ki a Rāwiri.”
ISA 37:36 Nā, ka puta atu te anahera a Ihowā, ā, patua iho e ia i te puni o ngā Ahiriana kotahi rau e waru tekau mā rima mano; ā, te marangatanga ake i te ata, nanā, ō rātou tinana! He tūpāpaku katoa rātou.
ISA 37:37 Nā, tūria atu ana e Henakeripi kīngi o Ahiria, haere ana, hoki ana, noho rawa atu kei Ninewe.
ISA 37:38 Ā, i a ia e koropiko ana i te whare o tōna atua, o Nitiroko, patua iho ia e āna tama, e Ataramereke rāua ko Harētere, ki te hoari; mawhiti tonu atu rāua ki te whenua o Ararata, ā, ko tāna tama ko Etara Harono, te kīngi i muri i a ia.
ISA 38:1 I aua rā ka tūroro a Hetekia, me kāhore ka marere. Nā, ka haere a Ihāia poropiti, tama a Āmoho ki a ia, ka mea ki a ia, “Ko te kupu tēnei a Ihowā: Whakahaua iho tōu whare, nō te mea ka mate koe, e kore e ora.”
ISA 38:2 Nā, ka tahuri te mata o Hetekia ki te pakitara, ā, ka īnoi ki a Ihowā,
ISA 38:3 ka mea, “Tēnā rā, e Ihowā kia mahara ki ōku hāereerenga i tōu aroaro i runga i te pono, i te ngākau tapatahi, ki tāku meatanga i te pai ki tāu titiro.” Nā, tangi ana a Hetekia; nui atu te tangi.
ISA 38:4 Nā, ka puta te kupu a Ihowā ki a Ihāia, ka mea:
ISA 38:5 “Haere, mea atu ki a Hetekia, ‘Ko te kupu tēnei a Ihowā, a te Atua o Rāwiri, o tōu tupuna: Kua rangona tāu īnoi e ahau, kua kitea e ahau ōu roimata; nanā, ka tāpiritia e ahau ōu rā ki ngā tau kotahi tekau mā rima.
ISA 38:6 Ka whakaorangia koe me tēnei pā e ahau i te ringa o te kīngi o Ahiria; ka tiakina anō e ahau tēnei pā.
ISA 38:7 “ ‘Ko te tohu anō tēnei a Ihowā ki a koe, ka oti i a Ihowā tēnei mea i kōrerotia nei e ia:
ISA 38:8 Nanā, ka whakahokia ake e ahau te ātārangi i ngā nekehanga i heke atu ai i runga i te whakaatu hāora a Ahata; kia tekau ngā nekehanga whakamuri.’ ” Nā, kotahi tekau ngā nekehanga i hoki ake ai te rā, nō ngā nekehanga anō i heke iho ai.
ISA 38:9 Ko te tuhituhi a Hetekia kīngi o Hūrā, i a ia i mate rā, ā ora ake ana i tōna mate:
ISA 38:10 I mea ahau: “I te poutūmārōtanga o ōku rā, tērā ahau e tomo ki ngā kūwaha o te rēinga; kua tangohia atu i ahau te toenga o ōku tau.”
ISA 38:11 I kī ahau, “E kore ahau e kite i a Ihowā, arā i a Ihowā i runga i te whenua o te hunga ora; heoi anō āku tirohanga ki te tangata, ki te hunga e noho ana i te ao.
ISA 38:12 Ko te wā i ahau nei kua riro, mauria atu ana i ahau, ānō he tēneti nō te hēpara; kei tā te kaiwhatu kākahu tāku kōpaki i tōku ora; ka tapahia mai ahau e ia i roto i ngā miro; i te ao, i te pō, mutu pū tāku i a koe.
ISA 38:13 I whakamārie ahau i ahau ā taea noatia te ata; tērā tāna e rite ki tā te raiona, ka wāwāhia e ia ōku iwi katoa; i te ao, i te pō, mutu pū tāku i a koe.
ISA 38:14 I korokī ahau, pērā i tā te warou, i tā te kareni; i tangi ahau me te kūkupa. Matawaia ana ōku kanohi i te tirohanga whakarunga. E Ihowā, e tūkinotia ana ahau, pikitia tōku tūranga!”
ISA 38:15 Kia pēhea he kupu māku? Nāna i kōrero ki ahau, nāna anō i mahi; i ōku tau katoa ka āta haere ahau i runga i te kawa o tōku wairua.
ISA 38:16 E te Ariki, kei ēnei mea te ora o te tangata, kei ēnei mea katoa anō te ora o tōku wairua; mō reira whakahokia ake ahau e koe ki te ora, kia ora ai ahau.
ISA 38:17 Nanā, he mea kia rangimārie ai ahau i pā ai te pōuri kino ki ahau; otiia he aroha nōu ki tōku wairua i ora ai ahau i roto i te rua o te ngaromanga. Kua oti nei hoki ōku hara katoa te maka e koe ki muri i tōu tuarā.
ISA 38:18 E kore hoki e taea e te rēinga te whakawhetai ki a koe, e kore te mate e āhei te whakamoemiti ki a koe; ko te hunga e heke ana ki te rua kāhore ō rātou tūmanako ki tōu pono.
ISA 38:19 Ko te tangata ora, ko te tangata ora, māna te whakawhetai ki a koe, te pēnei me tāku nei i tēnei rā; tērā tōu pono ka whakakitea e te matua ki ngā tamariki.
ISA 38:20 I tata mai a Ihowā ki te whakaora i ahau, mō reira ka waiatatia e mātou āku waiata i runga i ngā aho whakatangi i ngā rā katoa e ora ai mātou i roto i te whare o Ihowā.
ISA 38:21 I kī hoki a Ihāia, “Tīkina he papa piki, whakapiritia ki te whēwhē, ā, ka ora ia.”
ISA 38:22 I kī anō a Hetekia, “He aha te tohu tērā ahau ka haere ki runga ki te whare o Ihowā?”
ISA 39:1 I taua wā ka tukua mai he pukapuka me tētahi hākari ki a Hetekia e Meroraka Pararana, tama a Pararana kīngi o Papurōna; i rongo hoki i te mate ia, ā, kua ora.
ISA 39:2 Ā, koa tonu a Hetekia ki a rātou, whakakitea ana e ia ki a rātou te whare o āna mea papai, te hiriwa, te kōura, ngā kīnaki kakara, te hinu pai, me te whare katoa o āna mea mō te whawhai, me ngā mea katoa i rokohanga ki roto ki ōna taonga; kāhore tētahi mea o tōna whare, o tōna kīngitanga katoa, i kore te whakakitea e Hetekia ki a rātou.
ISA 39:3 Kātahi a Ihāia poropiti ka haere ki a Kīngi Hetekia, ka mea ki a ia, “I pēhea mai ēnei tāngata? I haere mai hoki rātou i hea ki a koe?” Anō rā ko Hetekia, “I haere mai rātou ki ahau, i te whenua hoi, i Papurōna.”
ISA 39:4 Anō rā ko tērā, “Ko ēhea mea i kitea e rātou i roto i tōu whare?” Ka mea a Hetekia, “Kua kitea e rātou ngā mea katoa i tōku whare. Kāhore tētahi mea i roto i ōku taonga i kore te whakakitea e ahau ki a rātou.”
ISA 39:5 Nā, ka mea a Ihāia ki a Hetekia, “Whakarongo ki te kupu a Ihowā o ngā mano:
ISA 39:6 Nanā, kei te haere mai ngā rā e kawea ai ki Papurōna ngā mea katoa o tōu whare, me ngā mea kua rongoātia nei e ōu mātua ā taea noatia tēnei rā. E kore tētahi mea e mahue, e ai tā Ihowā.
ISA 39:7 Ka tangohia anō e rātou ētahi o āu tama e puta mai i a koe, e whānau nei māu, ā, hei unaka rātou ki te whare o te kīngi o Papurōna.”
ISA 39:8 Anō rā ko Hetekia ki a Ihāia, “Pai tonu te kupu a Ihowā i kōrerotia nā e koe.” I mea hoki ia, “Ka mau hoki te rongo me te pono i ōku rā.”
ISA 40:1 Whakamārietia, whakamārietia tāku iwi, e ai tā tō koutou Atua.
ISA 40:2 Kōrero i runga i te whakamārie ki Hiruhārama, karanga ki a ia, kua mutu tāna whawhai, kua murua tōna hē; i haere rua hoki tā te ringa o Ihowā ki a ia hei utu mō ōna hara katoa.
ISA 40:3 He reo nō tētahi e karanga ana: “Whakapaia e koutou i te koraha te huarahi o Ihowā, whakatikaia i te tītōhea he ara nui mō tō tātou Atua.
ISA 40:4 Ko ngā raorao katoa ka whakarewaina ake, ko ngā maunga katoa me ngā pukepuke, ka whakapāpakutia iho; ko ngā wāhi kōpikopiko ka meinga kia tika, ko ngā wāhi taratara kia papatairite.
ISA 40:5 Ka whakapuakina anō te korōria o Ihowā, ā, ka kite ngātahi ngā kikokiko katoa;
ISA 40:6 I mea mai te reo o tētahi, “Karanga!” Ā, ka mea tētahi, “Ko te aha kia karangatia e ahau?” “He tarutaru ngā kikokiko katoa, ā, ko tōna pai katoa, rite tonu ki te puāwai o te pārae.
ISA 40:7 Ko te tarutaru ka maroke, ko te puāwai ka memenge, nō te mea e hāngia ana e te Wairua o Ihowā; he pono, he tarutaru te iwi.
ISA 40:8 Ko te tarutaru e maroke, ko te puāwai e memenge; ko te kupu ia a tō tātou Atua, tū tonu.”
ISA 40:9 E koe, e te kaikawe o te rongo pai ki Hiona, e piki ki te maunga tiketike. E koe, e te kaikawe o te rongo pai ki Hiruhārama, whakaarahia tōu reo, kia kaha; whakaarahia, kaua hei wehi; kōrero atu ki ngā pā o Hūrā, “Nanā, tō koutou Atua!”
ISA 40:10 Nanā, ka haere mai te Ariki, a Ihowā, i runga i te kaha, ka whakahaerea anō tōna kīngitanga e tōna ringa; nā, ko te utu mōna kei a ia anō, kei tōna aroaro te wāhi māna.
ISA 40:11 Ka rite ki tā te hēpara tāna whāngai i tāna kāhui, ka whakaminea ngā reme e tōna ringa, ka hikitia ki tōna uma, ka āta ārahina ngā mea e whakangote ana.
ISA 40:12 Nā wai i mēhua ngā wai ki te kapu o tōna ringa, he whanganga ringaringa anō tāna rūri mō ngā rangi. Whaowhina ake e ia te puehu o te whenua ki te mēhua, ko ngā maunga, pāunatia ana e ia ki te pāuna ringaringa, ko ngā pukepuke ki te pāuna papa?
ISA 40:13 Nā wai tā te Wairua o Ihowā i tika ai? Ko wai rānei tāna kaiwhakatakoto whakaaro hei whakaako i a ia?
ISA 40:14 Ko wai tōna hoa whakatakoto whakaaro hei tohutohu i a ia ki te ara o te whakawā, hei whakaako i a ia ki te mātauranga, hei whakakite i te ara o te mōhio ki a ia?
ISA 40:15 Nanā, ko ngā iwi, ānō he pata wai i roto i te pere! Ki tā te whakaaro he puehu ririki rātou i te pāuna; nanā, ko ngā motu, maua ake e ia, he mea ririki rawa te rite.
ISA 40:16 E kore anō e ranea a Repanōna mō te ahi, me ngā kararehe hoki o reira, e kore e ranea hei tahunga tinana.
ISA 40:17 Ko ngā iwi katoa, he kore noa iho i tōna aroaro; iti iho rātou i te kāhore, he horihori kau i tōna whakaaro.
ISA 40:18 Nā, ka whakaritea e koutou te Atua ki a wai? He aha hoki te āhua e whakaahuatia ai ia e koutou?
ISA 40:19 Ko te whakapakoko, nā te kaimahi ia i whakarewa, nā te kaitahu i whakakikorua ki te kōura, ā, hangā ana mō reira he mekameka hiriwa.
ISA 40:20 Ko te tangata, he rawakore rawa ia ki te hoatu whakahere pērā, whiriwhiria ana e ia he rākau e kore e pirau; rapua ana e ia he kaimahi mōhio māna, hei hanga i tētahi whakapakoko e kore e nekenekehia.
ISA 40:21 Kāhore ianei koutou i mōhio? Kāhore koutou i rongo? Kāhore ianei i kōrerotia ki a koutou i te tīmatanga? Kāhore ianei koutou i mātau i ngā whakatūranga rā anō o te whenua?
ISA 40:22 Ko ia te noho ana i runga i te porohita o te whenua, ā, ko ō reira tāngata, ānō he māwhitiwhiti; ko ngā rangi, horahia ana e ia ānō he kākahu tauārai, horahia ana e ia ānō he tēneti hei nohoanga;
ISA 40:23 ko ngā rangatira, whakahokia iho e ia ki te kāhore; ko ngā kaiwhakawā o te whenua, meinga ana e ia hei mea horihori noa iho.
ISA 40:24 Āe rā, kāhore rātou i whakatōkia; āe rā, kāhore rātou i ruia; āe rā, kāhore tō rātou take i whai pakiaka ki te whenua; ka pupuhi hoki ia ki a rātou, ā, ka maroke rātou; ka rite ki te kakau wīti, ka kāwhakina e te paroro.
ISA 40:25 “Nā, ki tā koutou, kei tō wai he āhua mōku? Ka rite rānei ahau ki a wai?” e ai tā te Mea Tapu.
ISA 40:26 E ara ō koutou kanohi ki runga titiro ai: Nā wai ēnei mea i hanga? Nā wai ō rātou mano i whakaputa mai he mea tatau tonu; karangatia ana e ia ngā ingoa o rātou katoa, māroro rawa, pakari tonu te kaha; e kore tētahi e ngaro.
ISA 40:27 He aha koe i kōrero ai, e Hākopa, i mea ai, e Īharaira, “Kua hunā tōku ara ki a Ihowā, kua mahue i tōku Atua tōku whakawā”?
ISA 40:28 Kāhore koe i mōhio? Kāhore koe i rongo, ko te Atua onamata, ko Ihowā, ko te Kaihanga o ngā pito o te whenua. E kore ia e ngenge, e kore ia e māuiui? E kore tōna mātauranga e taea te rapu.
ISA 40:29 E hōmai ana e ia he kaha ki te hunga ngenge; ā, whakanuia ana e ia te pakari o te mea ngoikore.
ISA 40:30 Ahakoa ko ngā taitamariki, ka ngenge tonu, ka māuiui, ā, ko ngā taitama, ka hinga rawa.
ISA 40:31 Tēnā ko te hunga e tatari ana ki a Ihowā, puta hou ana he kaha mō rātou; kake ana rātou ki runga; ko ngā parirau, koia ānō kei o ngā ēkara; ka rere rātou, ā, e kore e māuiui; ka haere, ā, e kore e ngenge.
ISA 41:1 “Whakarongoa i tōku aroaro, e ngā motu; ā, kia puta hou mai he kaha mō ngā iwi; me neke mai rātou, ā, me kōrero rātou; tātou tahi me whakatata ki te whakawā.
ISA 41:2 “Nā wai i whakaara ake tētahi i te rāwhiti, i karangatia e ia i runga i te tika ki tōna waewae? Hōmai ana e ia ngā iwi ki tōna aroaro, meinga ana ia e ia hei rangatira mō ngā kīngi; hōmai ana rātou e ia ānō he puehu ki tāna hoari, ānō he kakau wīti e āia ana, ki tāna kōpere.
ISA 41:3 Whāia ana rātou e ia, haere ora atu ana ia; āe rā, i te ara kīhai i haerea e ōna waewae.
ISA 41:4 Nā wai oti tēnei i mahi, kārangaranga ai i ngā whakatupuranga mai i te tīmatanga! Ko ahau, ko Ihowā, ko te tīmatanga, ā, kei ngā whakamutunga, ko ahau nei.”
ISA 41:5 I kite ngā motu, ā, wehi ana, pairi noa iho ngā pito o te whenua, whakatata ana, haere mai ana.
ISA 41:6 Uru ana rātou ki te mahi a tōna hoa, a tōna hoa, me tā rātou kī ki tōna tuakana, ki tōna teina, “Kia māia!”
ISA 41:7 Nā, kei te whakatenatena te kāmura i te kaitahu kōura, te kaiwhakamāeneene ki te hama, i te tangata e patu ana ki te paepae, ko tāna kupu mō te whakapiringa, “Kei te pai”; nā, whakaūkia ana e ia ki te whao, tē taea te whakanekeneke.
ISA 41:8 “Ko koe, e Īharaira, ko tāku pononga, ko Hākopa, ko tāku i whiriwhiri ai, ko te uri o tāku i aroha ai, o Āperahama;
ISA 41:9 ko tāku anō i tango mai ai i ngā pito o te whenua; he mea karanga nei hoki koe nāku i roto i ōna tōpito; ko tāku kupu hoki ki a koe, ‘Ko koe tāku pononga; he mea whiriwhiri koe nāku, kāhore koe e makā atu e ahau.’
ISA 41:10 Kaua e wehi; kei a koe nei hoki ahau; kaua anō e tirotiro; ko ahau nei hoki tōu Atua. Māku koe e whakakaha, āe rā, māku koe e āwhina, ka tautokona ake anō koe e te ringa matau o tōku tika.
ISA 41:11 “Nanā, ka whakamā, ka numinumi kau te hunga katoa e riri ana ki a koe; ka rite ki te kāhore; ka ngaro te hunga e ngangare ana ki a koe.
ISA 41:12 Ka rapua rātou, ōu hoariri, e koe, ā, e kore e kitea; ko te hunga i whawhai ki a koe, ka rite ki te kāhore, ki te mōtī noa iho.
ISA 41:13 Nō te mea ko ahau, ko Ihowā, ko tōu Atua, kei te pupuri i tōu matau, kei te mea ki a koe, ‘Kaua e wehi; ko ahau hei whakauru mōu.’
ISA 41:14 Kaua e wehi, e te kutukutu, e Hākopa, e ngā tāngata o Īharaira; māku koe e āwhina, e ai tā Ihowā, tā tōu kaihoko,” tā te Mea Tapu o Īharaira.
ISA 41:15 “Nanā, kua meinga koe e ahau hei patu wīti, koi tonu, hou tonu, he whai niho; ka patua e koe ngā maunga, ā, ngotangota noa; ko ngā pukepuke, ka meinga e koe kia rite ki te pāpapa.
ISA 41:16 Rererere ana rātou i a koe, kāhakina tonutia atu e te hau, tītaritaria ake rātou e te paroro. Ko koe ia ka hari ki a Ihowā, ka whakamanamana, ki te Mea Tapu o Īharaira.
ISA 41:17 “E rapu ana ngā ware, ngā rawakore i te wai, ā, kāhore kau, hē ake ō rātou arero i te matewai; ka rongo ahau, a Ihowā, ki tā rātou; e kore ahau, te Atua o Īharaira, e whakarere i a rātou.
ISA 41:18 Ka whakapuaretia e ahau he awa ki ngā wāhi tiketike, he puna wai i waenganui i ngā raorao; ka meinga e ahau te koraha hei hārotoroto wai, te whenua maroke hei pupūtanga wai.
ISA 41:19 Ka whakatōkia e ahau te koraha ki te hīta, ki te kōwhai, ki te ramarama, ki te rākau hinu; ka tū i ahau te kauri ki te tītōhea, te rimu, rātou tahi anō ko te ake;
ISA 41:20 kia kite ai rātou, kia mōhio ai, kia mahara ai, kia mātau ngātahi ai, he mea mahi tēnei nā te ringa o Ihowā; nā te Mea Tapu o Īharaira tēnei i hanga.”
ISA 41:21 “Kawea mai tā koutou totohe,” e ai tā Ihowā. “Whakaputaina mai ā koutou kupu kaha,” e ai tā te Kīngi o Hākopa.
ISA 41:22 “Me whakaputa mai e rātou, ā, me whakaatu mai ki a tātou ngā mea meāke pono mai. Whakaaturia mai e koutou ngā mea o te tuatahi, he pēhea rānei, kia whakaaroarohia ai e tātou, kia mōhiotia ai tō rātou mutunga iho; kōrerotia rānei ki a tātou ngā mea e puta ā mua.
ISA 41:23 Whakaaturia ngā mea e haere ake ana i muri, kia mōhio ai mātou he atua koutou; tēnā rā, mahia he pai, he kino rānei, kia wehi ai mātou, kia kite ngātahi ai.
ISA 41:24 Nanā, nō te kāhore koutou, ko ā koutou mahi nō te kāhore rawa; he mea whakarihariha te tangata nāna koutou i whiriwhiri.
ISA 41:25 “Kua oho mai i ahau tētahi i te raki, ā, kua tae mai ia; nō te rerenga mai o te rā tētahi e karanga ana ki tōku ingoa. Ko tōna taenga mai ki ngā rangatira, ānō e eke ana ki te paru pokepoke, ānō ko te kaihanga rīhi e takatakahi ana i te paru.
ISA 41:26 Nā wai i whakaatu mai i te tīmatanga, kia mōhio ai tātou? Nā wai i ngā wā onamata, mō tā tātou kī ake, ‘He tika tāna?’ Āe rā, kīhai i whakaaturia e tētahi, āe rā, kīhai i kōrerotia e tētahi, kīhai anō tētahi i rongo i ā koutou kōrero.
ISA 41:27 Māku te kupu tuatahi ki Hiona, ‘Nanā, tēnei rātou’; ā, ka hoatu e ahau ki Hiruhārama he kaikawe i te rongo pai.
ISA 41:28 I titiro anō ahau, ā, kāhore he tangata; nā, i roto i ēnei katoa kāhore he kaiwhakatakoto whakaaro hei whakahoki kupu mai i tāku uinga ki a rātou.
ISA 41:29 Nanā, ko rātou katoa he horihori kau; he kore noa iho ā rātou mahi; ko ā rātou whakapakoko whakarewa he hau, he mea tikangakore.”
ISA 42:1 “Nanā, tāku pononga e tautokona ake nei e ahau, tāku i whiriwhiri ai, āhuareka tonu tōku ngākau ki a ia; ka waiho e ahau tōku wairua ki runga ki a ia; māna e whakapuaki te whakawā ki ngā tauiwi.
ISA 42:2 E kore ia e hāmama, e kore anō tōna reo e ara, e kore e rangona i te ara.
ISA 42:3 Ko te kākaho kōpē e kore e whatia porokeretia e ia; e kore hoki te muka whakapaowa e tineia e ia; ka whakapuakina e ia te whakawā i runga i te pono.
ISA 42:4 E kore ia e ngoikore, e kore e ngākaukore, kia takoto rā anō i a ia te whakawā ki te whenua; ka tatari anō ngā motu ki tāna ture.”
ISA 42:5 Ko te kupu tēnei a te Atua, a Ihowā, nāna nei ngā rangi i hanga, i hora; nāna nei i takoto ai te whenua me ngā mea anō e puta mai ana i reira; nāna nei i hōmai he manawa ki ō reira tāngata, me te wairua anō ki te hunga e hāereere ana i reira:
ISA 42:6 “He mea karanga koe nāku, nā Ihowā, i runga i te tika, māku anō tōu ringa e pupuri, māku koe e tiaki, ka hoatu anō koe e ahau hei kawenata ki te iwi, hei mārama mō ngā tauiwi;
ISA 42:7 hei whakatitiro i ngā kanohi matapō, hei whakaputa mai i ngā herehere i roto i te whare e tūtaki tonu ana, i te hunga e noho ana i te pōuri, i roto i te whare herehere.
ISA 42:8 “Ko Ihowā ahau; ko tōku ingoa tēnā; e kore anō e tukua e ahau tōku korōria ki tētahi atu, tōku whakamoemiti ki te whakapakoko.
ISA 42:9 Nanā, kua puta mai ngā mea ō mua, he mea hou ēnei e whakaaturia nei e ahau; i te mea kāhore anō kia pihi noa ka kōrerotia nei e ahau ki a koutou.”
ISA 42:10 Waiatatia ki a Ihowā he waiata hou, me te whakamoemiti ki a ia i te pito o te whenua, e te hunga e haere ana ki raro, ki te moana, e ō reira tini mea, e ngā motu, e ngā tāngata e noho ana i reira.
ISA 42:11 Nō reira kia nui te reo o te koraha, o ngā pā anō o reira, o ngā kāinga, e nohoia ana e Kerara; kia waiata ngā tāngata o Hera, kia hāmama rātou i runga i te tihi o ngā maunga.
ISA 42:12 Kia whakakorōriatia a Ihowā e rātou, kia kauwhautia te whakamoemiti ki a ia i ngā motu.
ISA 42:13 Ka puta mai a Ihowā, ko te āhua kei tō te tangata mārohirohi; ka whakaoho i te hae ka pērā i te tangata whawhai; ka karanga, āe rā, ka hāmama; ka kaha noa atu i ōna hoariri.
ISA 42:14 “Ka roa nei tāku whakamorokitanga, i whakarongo puku ahau, whakakoromaki tonu; kātahi nei ahau ka auē, ka pērā me te wahine e whānau ana; ka whakahotu ahau, ka kahekahe ngātahi.
ISA 42:15 Ka whakaururuatia e ahau ngā maunga me ngā pukepuke, ka maroke i ahau ngā otaota katoa o reira; ka meinga ngā awa hei motu, ka maroke anō i ahau ngā hārotoroto.
ISA 42:16 Ka kawea anō e ahau ngā matapō mā te ara kīhai nei rātou i mōhio; ka meinga te pōuri hei mārama ki tō rātou aroaro, me ngā wāhi kōpikopiko kia tika. Ka meatia ēnei mea e ahau ki a rātou, e kore anō ahau e whakarere i a rātou.
ISA 42:17 Ka hoki rātou ki muri, nui atu tō rātou whakamā, tō te hunga e whakawhirinaki ana ki ngā whakapakoko, e mea ana ki te mea whakarewa, ‘Ko koutou ō mātou atua.’
ISA 42:18 “Whakarongo, e ngā turi; titiro, e ngā matapō, kia kite ai koutou!
ISA 42:19 Ko wai atu te matapō? Ko tāku pononga nei anake; ko wai te turi hei rite mō tāku pononga i ungā nei e ahau? Ko wai te matapō hei rite mō te tangata e mau nei tana rongo ki ahau? Ko wai te matapō hei rite mō tā Ihowā pononga?
ISA 42:20 He maha ngā mea e kitea ana e koe, heoi kāhore e mahara; e puare ana ōna taringa, heoi kāhore e rongo.”
ISA 42:21 Pai tonu mai a Ihowā, he whakaaro ki tōna tika; ka whakanuia e ia te ture, ka whakahōnoretia.
ISA 42:22 Ko tēnei iwi ia he pāhuatanga, he taonga pārau; he mea māhanga rātou katoa i roto i ngā rua, ngaro tonu i roto i te whare herehere, hei pāhuatanga rātou, kāhore hoki he kaiwhakaora; hei taonga pārau; kāhore hoki he tangata e kī ana, “Whakahokia!”
ISA 42:23 Ko wai i roto i a koutou e whai taringa ki tēnei? Ko wai e mahara mai, e whakarongo mai, mō ngā wā hoki ō muri?
ISA 42:24 Nā wai a Hākopa i tuku hei taonga pārau, a Īharaira hoki hei meatanga mā ngā kaipāhua? He teka ianei nā Ihowā? Kua hara nei hoki tātou ki a ia, kīhai hoki rātou i pai kia haere i āna ara, kīhai i whakarongo ki tāna ture.
ISA 42:25 Nā reira ringihia ana e ia te āritarita o tōna riri ki a ia, me te pakanga kaha; wera ana ia i tētahi taha, i tētahi taha, tē mōhio ia; tahuna ana ia, heoi kīhai tōna ngākau i mahara.
ISA 43:1 Nā ināianei, ko te kupu tēnei a Ihowā, a tōu kaihanga, e Hākopa, a tōu kaiwhakaahua, e Īharaira: “Kaua e wehi kua oti nei hoki koe te hoko e ahau; kua karangatia e ahau tōu ingoa; nāku koe.
ISA 43:2 Ka haere koe i roto i te wai, ko ahau hei hoa mōu; i ngā awa anō, e kore e huri mai ki runga i a koe; ki te haere koe i roto i te ahi, e kore koe e wera, e kore anō te mura e kā ki a koe.
ISA 43:3 Ko Ihowā hoki ahau, ko tōu Atua, ko te Mea Tapu o Īharaira, ko tōu kaiwhakaora; i hoatu e ahau a Īhipa hei utu mōu, a Etiopia rāua ko Tepa hei wāhi mōu.
ISA 43:4 I te mea he taonga nui koe ki tāku titiro, he mea e whakahōnoretia ana, ā, i arohaina koe e ahau; mō reira ka hoatu e ahau he tangata mō tōu tūranga, he iwi hoki hei utu mōu kia ora.
ISA 43:5 Kaua e wehi; kei a koe nei hoki ahau: ka kawea mai e ahau ōu uri i te rāwhiti, ka kohikohia mai koe i te uru.
ISA 43:6 Ka mea ahau ki te raki, ‘Hōmai’; ki te tonga, ‘Kaua e kaiponuhia’; kawea mai āku tama i tawhiti, āku tamāhine i te pito o te whenua –
ISA 43:7 te hunga katoa i huaina nei tōku ingoa mō rātou; nāku hoki rātou i hanga hei whakakorōria mōku: nāku ia i whakaahua, nāku hoki ia i mahi.”
ISA 43:8 Whakaputaina mai ngā matapō he kanohi nei ō rātou, ngā turi he taringa nei ō rātou.
ISA 43:9 Kia huihui ngā iwi katoa, kia rūpeke tahi ngā tauiwi; ko wai i roto i a rātou hei whakaatu i tēnei, hei kōrero i ngā mea ō mua ki a tātou? Kia hōmai e rātou ō rātou kaiwhakaatu, kia whakatikaia atu ai tā rātou; mā rātou rānei e whakarongo, e mea mai, “He pono.”
ISA 43:10 “Ko koutou hei whakaatu mō tāku,” e ai tā Ihowā, “me tāku pononga i whiriwhiria e ahau, kia mōhio ai koutou, kia whakapono ai ki tāku, kia mātau ai ko ahau ia, kāhore he Atua i whakaahuatia i mua i ahau, kāhore hoki tētahi i muri i ahau.
ISA 43:11 Ko ahau, ko ahau nei anō, a Ihowā, kāhore atu hoki he kaiwhakaora, ko ahau anake.
ISA 43:12 Nāku i whakaatu, nāku hoki i whakaora, nāku anō i kōrero, i te mea kāhore he atua kē i roto i a koutou; nā, ko koutou hei kaiwhakaatu mōku,” e ai tā Ihowā, “ā, ko te Atua ahau.
ISA 43:13 Āe rā, i te mea kāhore anō he rā ko ahau tēnei; e kore hoki tētahi e whakaora ake i roto i tōku ringa; māku e mahi, ko wai hoki hei whakakāhore?”
ISA 43:14 Ko te kupu tēnei a Ihowā, a tō koutou kaihoko, a te Mea Tapu o Īharaira: “He whakaaro ki a koutou i unga tāngata ai ahau ki Papurōna, ā, ka mauria mai e ahau rātou katoa, he mawhiti mai, arā ngā Karari i runga i ngā kaipuke i harakoa ai rātou.
ISA 43:15 Ko Ihowā ahau, ko tō koutou Mea Tapu, ko te kaihanga o Īharaira, ko tō koutou Kīngi.”
ISA 43:16 Ko te kupu tēnei a Ihowā, nāna nei i hōmai te ara i te moana, he huarahi i roto i ngā wai kaha.
ISA 43:17 Nāna nei i whakaputa mai te hāriata, te hōiho, te ope, me te kaha; takoto tahi ana rātou, tē ara ki runga; kua keto rātou, kua tineia, ānō he muka.
ISA 43:18 “Kaua e mahara ki ngā mea ō mua; ko ngā mea onamata kaua e whakaaroa.
ISA 43:19 Tēnei ahau te mahi nei i te mea hou; ākuanei te tupu ai; e kore rānei e mōhiotia e koutou? Ka oti i ahau he ara i te koraha, he awa i te tītōhea.
ISA 43:20 Ka whakakorōriatia ahau e ngā kararehe o te pārae, e ngā kīrehe mohoao, e ngā otereti; nō te mea ka hoatu e ahau he wai i te koraha, he awa i te tītōhea, hei inu mā tāku iwi, mā tāku i whiriwhiri ai;
ISA 43:21 mā te iwi i whakaahuatia e ahau māku, mā rātou e kauwhau te whakamoemiti mōku.
ISA 43:22 “Nā, kīhai nei koe i karanga ki ahau, e Hākopa; kua hōhā koe ki ahau e Īharaira.
ISA 43:23 Kīhai i kawea mai e koe ki ahau āu hipi hei tahunga tinana; kīhai anō ahau i whakakorōriatia ki āu patunga tapu. Kāhore āku whakamahi i a koe ki te whakahere, kīhai anō koe i ngenge, i te meatanga i te whakakakara.
ISA 43:24 Kīhai i hokona e koe he kākaho reka māku ki te moni, kīhai hoki ahau i mākona i te ngako o āu patunga tapu. Engari, i whakamahia ahau e koe ki ōu hara, māuiui ana ahau i āu mahi hē.
ISA 43:25 “Ko ahau, ko ahau nei anō, te kaimuru atu i ōu hē, he whakaaro anō ki ahau; e kore anō ōu hara e maharatia e ahau.
ISA 43:26 Whakamaharatia ahau; tātou ka whakawā ki a tātou anō; kōrerotia e koe tāu, kia whakatikaia ai koe.
ISA 43:27 Ko tōu pāpā tuatahi, i hara; ko ōu kaiwhakaako, whakakeke ana ki ahau.
ISA 43:28 Nā reira whakapokea iho e ahau ngā rangatira o te wāhi tapu, ā, hoatu ana e ahau a Hākopa ki te kanga, a Īharaira ki te tāwai.”
ISA 44:1 “Nā, whakarongo, e tāku pononga, e Hākopa, e Īharaira, e tāku i whiriwhiri ai.
ISA 44:2 Ko te kupu tēnei a Ihowā, a tōu kaihanga, nāna nei koe i whakaahua i roto i te kōpū, māna nei koe e āwhina, Kaua e wehi, e Hākopa, e tāku pononga, e Iēhuruna, e tāku i whiriwhiri ai.
ISA 44:3 Nō te mea ka ringihia e ahau he wai ki runga ki te tangata matewai, he awa ki te wāhi maroke; ka ringihia e ahau tōku wairua ki ōu uri, tāku manaaki ki tāu whānau.
ISA 44:4 Ā, ka tupu rātou i waenga taru, ānō he wirou i te taha o ngā rerenga wai.
ISA 44:5 Ka kī ake tēnei, ‘Nā Ihowā ahau,’ ko tētahi atu, karangatia ana e ia ko Hākopa hei ingoa mōna; ko tētahi atu, tuhituhi ana tōna ringa ‘Ki a Ihowā,’ whakahuatia ake e ia ko Īharaira hei ingoa mōna.
ISA 44:6 “Ko te kupu tēnei a Ihowā, a te Kīngi o Īharaira, a tōna kaihoko anō, a Ihowā o ngā mano: Ko ahau te tuatahi ko ahau anō te mutunga; kāhore atu hoki he Atua, ko ahau anake.
ISA 44:7 Ko wai hoki hei rite mōku, hei karanga, hei whakaatu, hei whakarite kia noho rārangi, mai o tōku whakaritenga i te iwi onamata? Ā, mā rātou e whakaatu ngā mea meāke puta mai, me ngā mea anō e puta ā mua.
ISA 44:8 Kaua e wehi, kaua e pāwera; kīhai ianei i kōrerotia e ahau ki a koe ngā mea onamata, i whakaaturia hoki? Ko koutou anō hei kaiwhakaatu mōku! Tērā atu rānei tētahi atua kē? Āe rā, kāhore he kāmaka; kāhore ahau e mōhio ki tētahi.”
ISA 44:9 Ko ngā kaiwhakaahua o te whakapakoko, he horihori katoa rātou; kāhore hoki he pai o ā rātou mea āhuareka. Ko ō rātou kaiwhakaatu kāhore e kite, kāhore e mōhio; e whakamā ai rātou.
ISA 44:10 Ko wai te kaiwhakaahua o tētahi atua, te kaiwhakarewa rānei o te whakapakoko kāhore nei ōna pai?
ISA 44:11 Nanā, ko ōna hoa katoa, ka whakamā; ko ngā kaimahi anō, he tāngata nei rātou; kia huihui mai rātou katoa, tū ai. Ka wehi, ka whakamā ngātahi.
ISA 44:12 E hangaia ana e te parakimete he toki, ka mahi i roto i ngā waro, whakaahuatia ana e ia ki te hama, puta ana te kaha o tōna ringa ki te mahi i taua mea; ka hemo anō ia i te kai, kore noa iho he kaha; kāhore e inu i te wai, māuiui noa iho.
ISA 44:13 Ko te kāmura, whakamārōkia mai ana e ia te aho, tuhia iho e ia ki te pene, mahia ana e ia ki te waru; tohungia ana e ia ki te kāpehu, mahia ana e ia kia rite ki te āhua o te tangata, ki te ātaahua anō o te tangata; hei mea mō roto i te whare.
ISA 44:14 Tuaina ana e ia he hīta māna, tīkina ana e ia te kaiperi, me te oki, ā, whakapakaritia ana e ia māna tētahi i roto i ngā rākau o te ngahere; whakatōkia ana e ia te ahe hei whakatupu mā te ua.
ISA 44:15 Kātahi ka waiho hei wahie mā te tangata; ka tangohia hoki e ia tētahi wāhi hei whakamahana i a ia; inā, whakaūngia ana e ia, hei tunu taro; ia kei te hanga anō ia i tētahi atua, koropikoria atu ana e ia; mahia ana e ia hei whakapakoko, tāpapa tonu atu ki reira.
ISA 44:16 Ko tētahi wāhi o taua rākau, e tahuna ana e ia ki te ahi, ko tētahi wāhi, hei mea i te kikokiko hei kai māna; tunua ana e ia tāna e tunu ai, ā, ka mākona. Āe rā, ka mahana anō ia, ā, ka mea, “Ha, kua mahana ahau, kua kite i te ahi.”
ISA 44:17 Ko te toenga, hangā ake e ia hei atua, hei whakapakoko māna; tāpapa ana ia, koropiko ana, īnoi ana ki taua mea, ka mea, “Whakaorangia ahau; ko koe nei hoki tōku atua.”
ISA 44:18 Kāhore rātou e mōhio, kāhore e mahara; nō te mea kua āraia e ia ō rātou kanohi kei kite, ō rātou ngākau kei mātau.
ISA 44:19 Kāhore hoki e anga ake te ngākau o tētahi, kāhore e mōhio, kāhore e mātau, e kī ake ai ia, “Ko tētahi wāhi o tēnei i tahuna e ahau ki te ahi; i tunua anō e ahau he taro ki ōna ngārahu, tunua ana e ahau he kikokiko, kainga ake e ahau; ā, kia meinga e ahau te toenga o taua rākau hei mea whakarihariha? Me tāpapa rānei ahau ki te take rākau?”
ISA 44:20 Ko tāna kai, he pungarehu; kua tinihangatia tōna ngākau, ā, ngau kē ana ia, tē whakaora ia i tōna wairua, tē kī ake rānei, “Kāhore rānei he kōrero teka i tōku matau?”
ISA 44:21 “Kia mahara ki ēnei, e Hākopa, e Īharaira; he pononga hoki koe nāku; nāku koe i whai āhua ai, he pononga hoki koe nāku; e Īharaira, e kore koe e wareware i ahau.
ISA 44:22 Ko ōu hē, murua ake e ahau, me te mea he kapua mātotoru; ko ōu hara, me te mea he kapua; hoki mai ki ahau; nāku hoki koe i hoko.”
ISA 44:23 Waiata, e ngā rangi, he mahi hoki tēnei nā Ihowā. Hāmama, e ngā wāhi o raro rawa o te whenua. Kia pakaru mai tā koutou waiata, e ngā maunga, e te ngahere, e ngā rākau katoa o reira; nō te mea kua oti a Hākopa te hoko e Ihowā, kua whai korōria ia i a Īharaira.
ISA 44:24 “Ko te kupu tēnei a Ihowā, a tōu kaihoko, nāna nei koe i whai āhua ai, nō roto mai anō i te kōpū: “Ko Ihowā ahau, ko te kaihanga o ngā mea katoa, nāku anake ngā rangi i hora, nāku i takoto ai te whenua; ko wai tōku hoa?
ISA 44:25 “Ko ngā tohu a te hunga kōrero teka hē ana i a ia, ko ngā tohunga tūāhu whakahaurangitia ana e ia; ko te hunga whakaaro nui, whakahokia ana e ia ki muri, ko tō rātou mātauranga, whakapōauautia iho.
ISA 44:26 Mana pū i a ia te kupu a tāna pononga, te whakaaro a āna karere rite rawa i a ia. “Ko tāna kupu ki Hiruhārama, ‘Ka nohoia koe,’ ki ngā pā o Hūrā, ‘Ka hangā koutou, māku anō e whakaara ōna wāhi kua ururuatia.’
ISA 44:27 Ko tāna kupu ki te rire, ‘Kia mimiti; māku anō e whakamaroke ōu awa.’
ISA 44:28 Ko tāna kupu mō Hairuha, ‘He hēpara ia nāku, ka rite anō i a ia tāku katoa i pai ai’; māna hoki e kī ki Hiruhārama, ‘Ka hangā koe,’ ā, ki te temepara, ‘Ka whakatakotoria ōu tūranga.’ ”
ISA 45:1 “Ko te kupu tēnei a Ihowā ki tāna i whakawahi ai, ki a Hairuha, he mea pupuri nei nāku tōna ringa matau, kia pēhia ai e ia ngā iwi ki raro i a ia; māku anō e wewete tō ngā hope o ngā kīngi; ko ngā tatau ka whakapuaretia ki tōna aroaro; e kore anō ngā kūwaha e tūtakina:
ISA 45:2 Ko ahau e haere i mua i a koe, ki te whakatikatika i ngā wāhi tāpokopoko; ko ngā tatau parāhi ka pakaru i ahau; ka tapahia anō e ahau ngā tūtaki rino.
ISA 45:3 Ka hoatu anō e ahau ki a koe ngā taonga o te pōuri, me ngā mea huna o ngā wāhi ngaro, kia mōhio ai koe ko Ihowā ahau, e whakahua atu nei i tōu ingoa, ko te Atua o Īharaira.
ISA 45:4 He whakaaro nāku ki tāku pononga, ki a Hākopa, ki a Īharaira, ki tāku i whiriwhiri ai, nā reira koe, tōu ingoa, i karangatia ai e ahau; whakahuatia ana e ahau tōu ingoa i te mea kāhore anō koe kia mōhio ki ahau.
ISA 45:5 Ko Ihowā ahau, kāhore atu hoki; kāhore kē atu he Atua, ko ahau anake; māku koe e whītiki, ahakoa kāhore koe i mōhio ki ahau;
ISA 45:6 kia mōhio ai te hunga i te rāwhiti me o te uru, kāhore atu, ko ahau anake. Ko Ihowā ahau, kāhore kē atu.
ISA 45:7 Nāku te mārama i whai āhua ai, nāku i hanga te pōuri; ko ahau te kaihohou rongo, te kaihanga anō o te kino; ko ahau, ko Ihowā, te kaimahi o ēnei mea katoa.
ISA 45:8 “Māturuturu iho, e ngā rangi i runga; kia ringihia mai anō he tika e ngā kapua; kia puare te whenua, kia hua te whakaora, kia wana ngātahi te tika; nāku, nā Ihowā, taua mea i hanga.
ISA 45:9 “Auē te mate mō te tangata e totohe ana ki tōna Kaiwhakaahua! He maramara rīhi i roto i ngā maramara rīhi o te oneone! E mea ake rānei te paru ki tōna kaiwhakaahua, ‘He aha tāu e mahi nā’? E mea rānei tāu i hanga ai, ‘Kāhore ōna ringa?’
ISA 45:10 Auē te mate mō te tangata e mea ana ki tōna pāpā, ‘He aha tāu kua whānau nei?’ ki te wahine rānei, ‘He aha te mea ka whakamamae nā koe?’ ”
ISA 45:11 Ko te kupu tēnei a Ihowā, a te Mea Tapu o Īharaira, a tōna Kaiwhakaahua anō: “Uia mai ki ahau ngā mea e puta mai ā mua, ko ngā meatanga ki āku tamariki, ki te mahi hoki a ōku ringa, whakahaua mai ahau e koe.
ISA 45:12 Nāku i mahi te whenua, i hanga hoki ngā tāngata o runga; nāku, nā ōku ringa i hora ngā rangi; ko ō rātou mano katoa he mea whakahau nāku.
ISA 45:13 Nāku ia i whakaara ake i runga i te tika, māku anō e whakatikatika ōna ara katoa; ko ia hei hanga i tōku pā, hei tuku i āku pārau kia haere, kāhore hoki he utu, kāhore he moni whakapati, e ai tā Ihowā o ngā mano.”
ISA 45:14 Ko te kupu tēnei a Ihowā: “Ko ngā māuiui o Īhipa, ko ngā taonga hokohoko o Etiopia, ko ngā Tapeani, he tāngata roroa, ka tae mai ki a koe, ā, ka riro i a koe; ka whai rātou i a koe; ka tae mekameka mai, ka piko ki a koe, ka mea, ‘He pono kei roto i a koe te Atua, kāhore atu hoki, kāhore he Atua.’ ”
ISA 45:15 He pono he Atua koe e whakangaro ana i a koe, e te Atua o Īharaira, e te Kaiwhakaora.
ISA 45:16 Ka whakamā, āe rā, ka numinumi kau rātou katoa; ka riro ngātahi ki te whakamā ngā kaimahi o ngā whakapakoko.
ISA 45:17 Ko Īharaira ia, ka ora i roto i a Ihowā, he whakaoranga pūmau tonu; e kore koutou e whakamā, e kore e numinumi ā ake ake.
ISA 45:18 Ko te kupu hoki tēnei a Ihowā, a te kaihanga o ngā rangi; ko ia te Atua; nāna i whakawhaiahua te whenua, nāna i mahi; nāna i whakapūmau, kīhai i hangā e ia hei takoto kau, i whakaahuatia e ia hei nohoanga: “Ko Ihowā ahau, kāhore kē atu.
ISA 45:19 Kīhai ahau i kōrero i te wāhi ngaro, i te wāhi pōuri o te whenua; kīhai ahau i mea ki te uri o Hākopa, ‘Rapua ahau, he mea noa iho.’ Ko tāku kōrero, ko tā Ihowā, kei te tika, e whakaatu ana i ngā mea e rite ana.”
ISA 45:20 “Huihui, haere mai, whakatata ngātahi mai, e ngā oranga o ngā iwi. Kāhore he mōhio o te hunga e mau ana i te rākau o tā rātou whakapakoko, e īnoi ana ki te atua e kore nei e whakaora.
ISA 45:21 Whakaaturia, kawea mai kia tata, kia whakatakoto whakaaro ngātahi rātou. Nā wai tēnei i kōrero i mua riro, nā wai i whakaatu i ngā wā onamata? He teka ianei nāku, nā Ihowā? Kore atu hoki he atua, ko ahau anake; he Atua tika, he kaiwhakaora; kāhore kē atu, ko ahau anake.
ISA 45:22 “Tahuri mai ki ahau, kia ora ai koutou, e ngā pito katoa o te whenua; ko te Atua hoki ahau, kāhore kē atu.
ISA 45:23 Kua waiho ahau e ahau anō hei oati; kua puta atu te kupu i tōku māngai i runga i te tika, e kore anō e hoki mai, arā: ‘Ka tūturi ngā turi katoa ki ahau, ka oati mai anō ngā arero katoa.’
ISA 45:24 “Ka mea mai tētahi ki ahau, ‘Kei a Ihowā anake te tika, te kaha.’ Ka haere mai ki a ia ngā tāngata, ā, ko ngā tāngata katoa i riri ki a ia ka whakamā.
ISA 45:25 Mā Ihowā ka tika ai, ka whakamanamana ai te uri katoa o Īharaira.”
ISA 46:1 Kua piko a Pere, kua tuohu a Nepo; kei runga i te kīrehe, i te kararehe ā rātou whakapakoko; ko ngā mea e haria haeretia ana e koutou ka meinga hei kawenga, hei taimaha ki te kararehe māuiui rā.
ISA 46:2 Tuohu ana rātou, piko ngātahi ana; kīhai i taea te pīkaunga te pupuri, heoi ko rātou nei anō ka riro hei pārau.
ISA 46:3 “Whakarongo ki ahau, e te whare o Hākopa, e ngā mōrehu katoa o te whare o Īharaira, he mea waha nei koutou nāku nō te kōpū mai anō, he mea pīkau nō roto mai rā anō i te puku;
ISA 46:4 tae noa atu ki tō koutou koroheketanga ko ahau tēnei, ka pīkaua anō koutou e ahau ā hina noa. Nāku i mahi, māku anō e mau; māku anō e pīkau, māku anō e whakaora.
ISA 46:5 “Ki tā koutou kei tō wai he āhua mōku? Ko wai e rite ana ki ahau? Me whakarite ahau ki a wai, e kotahi ai tō māua āhua?
ISA 46:6 Ko te hunga e tāhoro ana i te kōura i te pēke, e pāuna ana i te hiriwa ki te pāuna – kei te utu i te kaitahu kōura, hangā ake e ia hei atua; tāpapa ana rātou, koropiko ana.
ISA 46:7 Amohia ana ia e rātou i runga i te pokohiwi, pīkaua ana, kua waiho e rātou ki tōna wāhi, tū ana ia; tē taea e ia te nekeneke atu i tōna wāhi. Ka karanga anō hoki tētahi ki a ia, heoi e kore ia e whakahoki kupu, e kore e whakaora i a ia i roto i tōna mate.
ISA 46:8 “Mahara ki tēnei, whakatāne, whakahokia ki te ngākau, e te hunga poka kē.
ISA 46:9 Maharatia ngā mea tuatahi onamata; ko ahau hoki te Atua, kāhore kē atu; ko ahau te Atua, kāhore hoki tētahi hei rite mōku.
ISA 46:10 I te tīmatanga e whakaatu ana i ngā mea o te mutunga, ā, i ngā wā onamata ko ngā mea kāhore anō i meatia; i kī ahau: Ko te whakaaro i whakatakotoria e ahau mau tonu, ka oti anō i ahau tāku katoa i pai ai.
ISA 46:11 Ka karangatia hoki e ahau he manu kai kino i te rāwhiti, ko te tangata kei a ia tōku whakaaro i te whenua tawhiti. Inā, kua kōrerotia nei e ahau, ka whakaputaina anō e ahau; kua takoto i ahau, ka oti anō i ahau.
ISA 46:12 “Whakarongo ki ahau, e te hunga ngākau pakari, e matara atu ana i te tika.
ISA 46:13 Ka kawea mai e ahau tōku tika kia tata; e kore e matara atu; e kore anō tāku whakaora e roa; ka whakawhiwhia anō e ahau a Hiona ki te whakaora, mō Īharaira, mō tōku korōria.”
ISA 47:1 “Haere iho, e noho ki te puehu, e te tamāhine wāhina a Papurōna! E noho ki te whenua, kāhore he torōna, e te tamāhine a ngā Karari! E kore hoki koe e kīia i muri he kiri angiangi, he whakatarapī.
ISA 47:2 E mau ki ngā kōhatu mira, hurihia he parāoa; tangohia ake tōu ārai, huhua ake te waewae, kia takoto kau te hūhā; e whiti i ngā awa.
ISA 47:3 Ka kitea ōu wāhi e takoto tahanga ana, āe rā, ka kitea tōu mea e whakamā ai koe. Ka rapu utu ahau, e kore anō e whakaae ki tētahi tangata.
ISA 47:4 Ko tō tātou kaihoko – ko Ihowā o ngā mano tōna ingoa – ko te Mea Tapu o Īharaira.
ISA 47:5 “Noho kupukore, haere ki te pōuri, e te tamāhine a ngā Karari; e kore hoki koe e kīia i muri, ko te wahine rangatira o ngā kīngitanga.
ISA 47:6 I riri ahau ki tāku iwi, i whakapokea tōku kāinga tupu; tukua ana e ahau ki tōu ringa; kīhai i puta tōu aroha ki a rātou, whakataimahatia rawatia iho e koe tāu ioka ki te kaumātua.
ISA 47:7 I mea anō koe, ‘Hei wahine rangatira ahau ake ake,’ nā, kīhai noa iho tōu ngākau i mea ki ēnei mea; kīhai koe i mahara ki tōna mutunga.
ISA 47:8 “Nā, whakarongo āianei ki tēnei, e te wahine e whai nā ki ngā āhuareka, e noho kore wehi nā, e mea nā i roto i tōu ngākau, ‘Tēnei ahau, kāhore atu hoki, ko ahau anake; e kore ahau e noho pouaru, e kore ahau e mōhio ki te matenga o ngā tamariki.’
ISA 47:9 Otirā, ka pā whakarere ēnei e rua ki a koe i te rā kotahi: te matenga o ngā tamariki, te pouarutanga; ka pā ēnei ki a koe i tōna tōnuitanga, ahakoa te nui o āu mahi mākutu, te maha rawa o āu whaiwhaiā.
ISA 47:10 I whakawhirinaki hoki koe ki tōu kino, i mea, ‘Kāhore he kaititiro mōku.’ Ko ōu whakaaro nui me tōu mōhio, nā ēnā koe i whakangau kē; i mea ai koe i tōu ngākau, ‘Ko ahau tēnei, kāhore kē atu, ko ahau anake.’
ISA 47:11 Mō reira ka tae mai te kino ki a koe, e kore tōna putanga e mōhiotia e koe, ka taka anō te hē ki a koe, e kore e taea e koe te karo; ka tae hohoro mai anō ki a koe te whakangaro, e kore e mōhiotia e koe.
ISA 47:12 “Tēnā rā, e tū, me āu whaiwhaiā, me āu mākutu maha, i mahia rā e koe i tōu tamarikitanga ake, me kāhore koe e whai pai, me kāhore tāu e taea.
ISA 47:13 Kua hōhā koe i te maha o ngā whakaaro i whakatakotoria e koe. Tēnā rā, kia tū ngā kaiwhakaaro ki ngā rangi, ngā kaititiro ki ngā whetū, ngā mea mōhio ki ngā marama, kia whakaorangia koe e rātou i ngā mea meāke tūpono ki a koe.
ISA 47:14 Nanā, ka rite rātou ki te kakau wīti, ka wera i te ahi; e kore rātou e ora i te ngaunga a te ahi; ehara i te ngārahu hei whakamahanatanga, ehara hoki i te ahi hei painatanga.
ISA 47:15 Nā, ka pērā ngā mea ki a koe, i mahi ai koe ki reira; ko te hunga i hokohoko ki a koe mai i tōu taitamarikitanga, ka kotiti atu rātou ki tōna wāhi, ki tōna wāhi; kāhore he kaiwhakaora mōu.”
ISA 48:1 “Whakarongo ki tēnei, e te whare o Hākopa, e te hunga kua huaina nei ko Īharaira hei ingoa mō koutou, kua puta ake nei i roto i ngā wai o Hūrā; e whakaoati ana i te ingoa o Ihowā, e whakahua ana i te Atua o Īharaira, ehara ia i te mea i runga i te pono, i te tika.
ISA 48:2 Ki tā rātou karanga hoki, nō te pā tapu rātou, e okioki ana hoki ki te Atua o Īharaira; ko Ihowā o ngā mano tōna ingoa.
ISA 48:3 “He mea whakaatu nāku nōnamata ngā mea ō mua; āe rā, i puta anō hoki aua mea i tōku māngai, he mea kōrero nāku; kitea rawatia ake kua mahia e ahau, kua puta.
ISA 48:4 I mōhio hoki ahau he pakeke koe, he uaua rino hoki tōu kakī, he parāhi tōu rae.
ISA 48:5 Nā reira nāku i whakaatu ki a koe inamata; kīanō i puta kua kōrerotia e ahau ki a koe; kei kī koe, ‘Nā tāku whakapakoko ēnā mahi, he mea whakahau ēnei nā te mea i whaowhaoa e ahau, nā te mea i whakarewaina e ahau.’
ISA 48:6 “Kua rongo koe; tirohia tēnei katoa; ā, e kore ianei e whakaaturia e koutou? Kua kōrerotia nei e ahau ki a koe he mea hou, he mea i muri i tēnei wā, he mea huna, kīhai i mōhiotia e koe.
ISA 48:7 He mea hanga nōnāianei, kāhore hoki inamata; i mua i tēnei rā kīhai i rangona e koutou; kei kī koe, ‘Nanā, i mōhiotia e ahau.’
ISA 48:8 Āe rā, kīhai koe i rongo, kīhai i mōhio; āe rā, mai ō mua kīhai tōu taringa i whakapuaretia. I mōhio hoki ahau i mahi tinihanga koe, ā, nō te kōpū anō koe i huaina ai he poka kē.
ISA 48:9 “Ka whakaaro ahau ki tōku ingoa, ā, ka pūhoi tōku riri; ka whakaaro ki te whakamoemiti ki ahau, ā, ka pēhi i tāku ki a koe, kei hātepea atu koe.
ISA 48:10 Kua oti ōu para te tahi e ahau, ehara ia i te mea hei hiriwa; he mea whiriwhiri koe nāku i roto i te oumu, i te tangi.
ISA 48:11 He whakaaro ki ahau, he whakaaro ki ahau, i meatia ai tēnei e ahau. Kia whakapokea koia tōku ingoa? E kore anō tōku korōria e hoatu e ahau ki tētahi atu.
ISA 48:12 “Whakarongo ki ahau, e Hākopa, e Īharaira, e tāku i karanga ai: Ko ahau ia, ko ahau te tuatahi, ko ahau anō te mutunga.
ISA 48:13 Āe rā, nā tōku ringa i whakatakoto ngā tūranga o te whenua, nā tōku matau i hora ngā rangi; ki te karangatia rātou e ahau, ka tū ngātahi rātou.
ISA 48:14 “Huihui mai, e koutou katoa, whakarongo hoki! Nā wai o rātou ēnei mea i whakaatu? He mea aroha ia nā Ihowā; ka oti i a ia tāna i pai ai ki Papurōna, ka pā anō tōna ringa ki ngā Karari.
ISA 48:15 Nāku, nāku te kupu, āe rā, he mea karanga ia nāku, nāku ia i kawe mai, ka tika anō i a ia tōna ara.
ISA 48:16 “Whakatata mai ki ahau, whakarongo ki tēnei! “Ko tāku, nō te tīmatanga rā anō ehara i te kōrero puku; i ngā wā o aua mea, i reira ahau.” Nā ināianei, nā te Ariki, nā Ihowā ahau i unga mai, nā tōna wairua anō.
ISA 48:17 Ko te kupu tēnei a Ihowā, a tōu kaihoko, a te Mea Tapu o Īharaira: “Ko Ihowā ahau, ko tōu Atua e whakaako nei i a koe ki te pai mōu, e ārahi nei i a koe i te ara e haere ai koe.
ISA 48:18 Auē, me i rongo koe ki āku whakahau, inā, kua rite ki te awa te mau o te rongo ki a koe; ko tōu tika, koia anō kei ngā ngaru o te moana.
ISA 48:19 Kua rite anō ōu uri ki te onepū, ngā whānau o ōu whēkau ki te kirikiri o reira; ko tōna ingoa kīhai i hātepea atu, kīhai i whakangaromia i tōku aroaro.”
ISA 48:20 Haere atu i Papurōna, e rere i roto i ngā Karari; kia waiata te reo i a koutou e whakaatu ana; kōrerotia tēnei, whakapuakina ki te pito o te whenua; kī atu, “Kua oti i a Ihowā tāna pononga, a Hākopa te hoko.”
ISA 48:21 Kīhai anō rātou i matewai i a ia e ārahi ana i a rātou i ngā koraha; i meinga e ia te wai mō rātou kia rere i roto i te kāmaka; i wāhia e ia te kāmaka, ā, pupū mai ana te wai.
ISA 48:22 “Kāhore he maunga rongo ki te hunga kino,” e ai tā Ihowā.
ISA 49:1 Whakarongo, e ngā motu, ki ahau; kia whai whakaaro, e ngā iwi o tawhiti! Nā Ihowā ahau i karanga, nō te kōpū mai anō; nō ngā whēkau o tōku whaea i whakahua ai ia i tōku ingoa.
ISA 49:2 Ā, meinga iho e ia tōku māngai hei hoari koi; hunā ana ahau e ia ki te taumarumarunga iho o tōna ringa; ā, meinga ana ahau e ia hei pere kua oti te oro; kuhua ana ahau e ia ki tāna papa pere.
ISA 49:3 I mea anō ia ki ahau, “Ko koe tāku pononga; ko Īharaira, māu ka whai korōria ai ahau.”
ISA 49:4 Ko ahau ia i mea, “Maumau māuiui noa ahau, he kore noa iho, he tekateka noa i whakapaua ai e ahau tōku kaha; rāia, kei a Ihowā he whakawā mōku, kei tōku Atua hoki he wāhi māku.”
ISA 49:5 Nā ākuanei, e ai tā Ihowā, nāna nei ahau i whakaahua i te kōpū hei tangata māna, hei whakahoki mai i a Hākopa ki a ia, kia kohikohia ai a Īharaira ki a ia; ka nui hoki ahau ki te aroaro o Ihowā, ko tōku Atua hoki hei kaha mōku –
ISA 49:6 āe rā, i mea ia, “He mea nohinohi kia waiho koe hei tangata māku, hei whakaara i ngā iwi o Hākopa, hei whakahoki mai i ngā oranga o Īharaira; ka hoatu anō koe e ahau hei mārama ki ngā tauiwi, kia ai koe hei whakaoranga māku, ā te pito rā anō o te ao.”
ISA 49:7 Ko te kupu tēnei a Ihowā, a te kaihoko o Īharaira, a tōna Mea Tapu hoki, ki tā te tangata e whakahāwea nei, ki tā te iwi e whakarihariha nei, ki te pononga a ngā ariki, “Ka kite ngā kīngi, ka whakatika anō, ka koropiko hoki ngā rangatira; he mea hoki nā Ihowā, he pono hoki ia, nā te Mea Tapu o Īharaira; nāna hoki koe i whiriwhiri.”
ISA 49:8 Ko te kupu tēnei a Ihowā: “Nō te rā manakohanga atu i whakahoki kupu ai ahau ki a koe, nō te rā whakaora hoki i āwhinatia ai koe e ahau; māku anō koe e tiaki, ka hoatu anō koe e ahau hei kawenata mō te iwi, hei whakaara i te whenua, hei mea kia nohoia ngā kāinga tupu kua ururuatia;
ISA 49:9 hei mea ki ngā herehere, ‘Haere,’ ki te hunga i te pōuri, ‘Whakaatu i a koutou.’ “Ka kai rātou ki ngā ara, ka ai hoki he wāhi kai mā rātou ki ngā pukepuke katoa.
ISA 49:10 E kore rātou e matekai, e kore anō e matewai, e kore hoki te werawera, te rā rānei, e pakakinakina ki a rātou; nō te mea ko tō rātou kaiatawhai hei ārahi i a rātou; māna hoki rātou e ārahi ki ngā puna wai.
ISA 49:11 Ā, ka waiho e ahau ōku maunga katoa hei ara, ka whakateiteitia hoki ōku huanui.
ISA 49:12 Nanā, ka haere mai ēnei i tawhiti; nanā, ko ēnā i te raki, i te taha hoki ki te uru, ko ēnā hoki i te whenua o Hinimi.”
ISA 49:13 Waiata, e ngā rangi, kia hari hoki, e te whenua; kia pakaru mai tā koutou waiata, e ngā maunga! Ka whakamārie hoki a Ihowā i tāna iwi, ka aroha hoki ki āna kua tūkinotia nei.
ISA 49:14 Otiia i mea a Hiona, “Kua whakarērea ahau e Ihowā, kua wareware ahau i tōku Ariki.”
ISA 49:15 “Tērā rānei e wareware i te wahine tāna kōhungahunga, ā, kore ake ōna aroha ki te tamaiti a tōna kōpū? E wareware anō rātou; ko ahau nei, e kore ahau e wareware ki a koe.
ISA 49:16 Nanā, kua tāia koe e ahau ki ngā kapu o ōku ringa; kei tōku aroaro tonu ōu taiepa.
ISA 49:17 Ka hohoro āu tamariki; ka haere atu i roto i a koe ōu kaiwāwāhi, ōu kaiwhakamōtī.
ISA 49:18 Tahuri ake ōu kanohi ā karapoi noa, titiro hoki; ka huihui katoa ēnā, ka haere mai ki a koe. E ora ana ahau,” e ai tā Ihowā, “inā, ka kākahu koe i a rātou, ānō he mea whakapaipai, ka herehere hoki i a rātou ki a koe, kei ngā mea o te wahine mārena hou te rite.
ISA 49:19 “Nā, ko ōu wāhi ururua, ko ōu wāhi kua tūheatia me tōu whenua kua hunā – he pono ka kōpiri rawa koe mō ngā kainoho, ā, ka matara atu ōu kaiwhakamōtī.
ISA 49:20 Ko ngā tamariki i whakapania ai koe, tērā anō rātou e mea ki ōu taringa, ‘E kikī ana te wāhi nei mōku; whakawāteatia atu, kia noho ai ahau.’
ISA 49:21 Ā, ka mea koe i tōu ngākau, ‘Nā wai ēnei i whānau ai ki ahau, kua whakakorea nei āku tamariki i ahau, he moke, he pārau, he kōpikopiko nei ahau? Nā wai rā ēnei i whakatupu ake? Nanā, i waiho mokemoke ahau – ko ēnei, i hea rā ēnei?’ ”
ISA 49:22 Ko te kupu tēnei a te Ariki, a Ihowā: “Nanā, ka ara atu tōku ringa ki ngā tauiwi, ka tū hoki tāku kara ki ngā iwi; ā, ka maua mai e rātou āu tama, awhi rawa ki ō rātou uma, ka kawea mai hoki āu tamāhine i runga i ō rātou pokohiwi.
ISA 49:23 Ā, hei mātua atawhai mōu ngā kīngi, ko ā rātou kuīni hoki hei kaiwhakangote mōu. Ka piko iho rātou ki a koe, tāpapa rawa ki te whenua, ka mitimiti hoki i te puehu o ōu waewae. Ā, ka mōhio koe ko Ihowā ahau; e kore hoki te hunga e tatari ana ki ahau e whakamā.”
ISA 49:24 Tērā rānei e tangohia ngā taonga pārau i te tangata kaha, e mawhiti rānei te tangata kua tika nei tōna hereherenga?
ISA 49:25 Nā, ko te kupu tēnei a Ihowā: “Inā, ka tangohia mai ngā herehere a te tangata kaha, ka whakahokia mai anō ngā taonga pārau a te nanakia; ka ngangare anō ahau ki te tangata e ngangare ana ki a koe, ka whakaora hoki i āu tamariki.
ISA 49:26 Ā, ka whāngaia atu e ahau tō rātou kikokiko ake mā ōu kaiwhakatupu kino; ka haurangi anō rātou i ō rātou ake toto, me te mea nā te wāina reka. Ā, ka mōhio ngā kikokiko katoa ko ahau, ko Ihowā, e whakaora nei i a koe, ko tōu kaihoko hoki, ko te Mea Nui o Hākopa.”
ISA 50:1 Ko te kupu tēnei a Ihowā: “Kei hea ianei te pukapuka whakarere o tō koutou whaea, i whakarērea ai ia e ahau? Ko wai rānei te tangata, i ahau āna moni, i hokona atu ai koutou e ahau ki a ia? Nanā, he kino nō koutou i hokona atu ai koutou, nā ā koutou mahi whanokē anō i whakarērea ai tō koutou whaea.
ISA 50:2 Nā te aha i tāku haerenga mai i kore ai he tangata? He aha i tāku karangatanga i kore ai tētahi e oho ake? Kua mutua koia tōku ringa, tē tau ai te araarai? Kua kore rānei he kaha mōku hei whakaora? Nanā, māku, mā tāku kupu riri, ka maroke ai te moana, ka meinga ai ngā awa hei koraha; piro ana ō rātou ika i te waikore, ka mate hoki i te matewai.
ISA 50:3 E whakakākahu ana ahau i ngā rangi ki te mangu, uhia iho te taratara hei hīpoki mō rātou.”
ISA 50:4 Kua hōmai ki ahau e te Ariki, e Ihowā, he arero mātau, kia mōhio ai ahau ki te āta ngārahu atu i te kōrero ki te tangata e māuiui ana. E whakaara ana ia i tēnei ata, i tēnei ata, e whakaara ana i tōku taringa ki te whakarongo kia pērā me tā te hunga mōhio.
ISA 50:5 Kīia oti te whakatuwhera e te Ariki, e Ihowā tōku taringa, kīhai hoki ahau i tutū, kīhai i hoki whakamuri.
ISA 50:6 Tukua atu ana e ahau tōku tuarā ki ngā kaiwhiu, ōku pāpāringa ki ngā kaihutihuti; ko tōku kanohi kīhai i huna kei whakamā, kei tuwhaina.
ISA 50:7 Nō te mea ka āwhinatia mai ahau e te Ariki, e Ihowā; koia ahau tē whakamā ai; koia i whakamārōtia ai e ahau tōku kanohi ānō he kiripaka; e mōhio ana hoki ahau e kore ahau e whakamā;
ISA 50:8 e tata ana te kaiwhakatikatika mōku. Ko wai hei whawhai ki ahau? Kia tū ngātahi tāua. Ko wai he hoariri mōku? Kia tata mai ia ki ahau.
ISA 50:9 Nanā, ko te Ariki, ko Ihowā, hei āwhina mōku; ko wai hei whakahē i ahau? Nanā, ka tawhitotia katoatia rātou ānō he kākahu, ka pau rātou i te pūrehurehu.
ISA 50:10 Ko wai o koutou e wehi ana i a Ihowā, e rongo ana ki te reo o tāna pononga; ko te tangata e haere ana i te pōuri, kāhore hoki he whakamārama, kia okioki ia ki te ingoa o Ihowā, kia taupuhipuhi atu ki tōna Atua.
ISA 50:11 Nanā, e koutou katoa e tahu nā i te ahi, e whītiki nā i a koutou ki ngā rama muramura. Haere i te mārama o tā koutou ahi, i ngā rama muramura hoki i whakangihaia nā e koutou! Tēnei tā tōku ringa mō koutou: ka takoto iho koutou me te tangi anō.
ISA 51:1 “Whakarongo ki ahau, e koutou e whai nā i te tika, e rapu nā i a Ihowā. Titiro ki te kōhatu i hāua mai ai koutou, ki te poka i te rua i keria mai ai koutou.
ISA 51:2 Titiro ki a Āperahama, ki tō koutou matua, ki a Hera hoki i whānau ai koutou; he kotahi hoki ia, karangatia ana ia e ahau, manaakitia ana, whakanuia ana.
ISA 51:3 Tā te mea kua whakamārie a Ihowā i Hiona; kua whakamārie ia i ōna wāhi katoa ka ururuatia, kua mea hoki i tōna wāhi koraha kia rite ki Erene, i tōna wāhi tītōhea kia rite ki te kāri a Ihowā; he koa, he hari, ka kitea i roto, he whakawhetai, me te reo hoki e waiata ana.
ISA 51:4 “Whakarongo ki ahau, e āku tāngata, kia whai taringa ki ahau, e tāku iwi; ka puta atu hoki he ture i roto i ahau, ka takoto anō i ahau tāku whakawā hei whakamārama mō ngā iwi.
ISA 51:5 Kei te tata mai tōku tika; kua puta tāku whakaora, mā ōku ringa e whakawā mō ngā iwi; ka tatari ki ahau ngā motu, ka okioki ki tōku ringa.
ISA 51:6 Anga ake ō koutou kanohi ki ngā rangi, tirohia iho te whenua i raro; ka memeha atu hoki ngā rangi, ānō he paowa, ka tawhitotia te whenua, me he kākahu, ko te hunga hoki e noho ana i reira ka pēnā te mate; ko tāku whakaoranga ia ka mau tonu; e kore anō tōku tika e heke.
ISA 51:7 “Whakarongo ki ahau, e koutou e mōhio nā ki te tika, e te hunga kei ō koutou ngākau nei tāku ture; kei wehi i te tāwai a te tangata, kei numinumi i ā rātou taunu.
ISA 51:8 Ka kai hoki te pūrehurehu i a rātou, ānō he kākahu, ka pau rātou, ānō he huruhuru hipi i te huhu; ka mau tonu ia tōku tika, tāku whakaora ki ngā whakapaparanga katoa.”
ISA 51:9 Maranga, maranga, kākahuria te kaha, e te ringa o Ihowā! Maranga, kia rite ki ngā rā ō mua rā, ki ngā whakatupuranga onamata. Ehara oti i a koe nāna i kotikoti a Rahapa, i wero te tarakona?
ISA 51:10 Ehara oti i a koe nāna i whakamaroke te moana, ngā wai o te rire nui, ko ngā wai hōhonu o te moana waiho ake e koe hei huarahi haerenga mō te hunga kua oti te hoko?
ISA 51:11 Nā, ko ā Ihowā i hoko ai ka hoki mai, ka haere mai ki Hiona, me te waiata anō rātou; i runga i ō rātou māhunga he hari e kore e mutu; ka whiwhi rātou ki te koa, ki te hari; ā, rere ana te pōuri me te auē.
ISA 51:12 “Ko ahau, inā, māku koutou e whakamārie; ko wai koe, e wehi nā i te tangata e matemate nei, i te tama a te tangata ka meinga nei hei tarutaru?
ISA 51:13 Ka wareware nei hoki ki a Ihowā, ki tōu kaihanga, nāna ngā rangi i hora, nāna i whakatakoto te tūranga mō te whenua. Ka pāwera tonu koe i ngā rā katoa i te riri o te kaiwhakawhiu, i te mea e anga mai ana ia ki te whakamate, ā, kei hea te riri o te kaiwhakawhiu?
ISA 51:14 Hohoro tonu te wetekina o te herehere i whakaraua; e kore hoki ia e mate, e heke ki te poka, e kore hoki e whakakorea he taro māna.
ISA 51:15 Ko Ihowā ia ahau, ko tōu Atua, i whakakorikori nei i te moana, ā, hāmama ana ōna ngaru – ko Ihowā o ngā mano tōna ingoa.
ISA 51:16 Ā, kua hoatu e ahau āku kupu ki tōu māngai; kua hīpokina koe ki te marumaru o tōku ringa, kia whakatōkia ai ngā rangi, kia takoto ai te tūranga mō te whenua, hei mea hoki ki Hiona, ‘Ko koe tāku iwi.’ ”
ISA 51:17 Maranga, maranga! Whakatika, e Hiruhārama, i whakainumia nei e te ringa o Ihowā ki te kapu o tōna riri; kua inu koe i ngā nganga o te kapu wiri, he mea tatau nāu.
ISA 51:18 Kāhore kau tētahi hei tautītī i a ia o ngā tama katoa i whānau i roto i a ia; kāhore hoki tētahi o ngā tama i atawhaitia e ia hei pupuri i tōna ringa.
ISA 51:19 Ka rua ēnei mea ka pono nei ki a koe – ko wai hei tangi ki a koe? Ko te whakangaromanga, ko te wawāhanga, ko te matekai, ko te hoari me pēhea tāku whakamārie i a koe?
ISA 51:20 Kua hemo āu tama; e takoto ana i te ahunga mai o ngā ara katoa, ānō he anaterope i roto i te kupenga; kī tonu rātou i te riri o Ihowā, i te whakatūpehupehu o tōu Atua.
ISA 51:21 Mō reira, whakarongo ki tēnei, e koe kua tūkinotia nei; e haurangi ana, rāia, ehara i te haurangi wāina.
ISA 51:22 Ko te kupu tēnei a tōu Ariki, a Ihowā, arā a tōu Atua, e tohe nei i tā tōna iwi: “Nanā, ka tangohia e ahau te kapu wiri i tōu ringa, ngā nganga o te kapu o tōku riri; e kore e inumia anō e koe ā muri ake nei.
ISA 51:23 Ā, ka hoatu e ahau ki te ringa o te hunga e whakatupu kino nei i a koe, i mea rā ki tōu wairua, ‘Piko iho nei, kia haere atu ai mātou.’ Nā, kua whakatakotoria e koe tōu tuarā hei whenua, hei huarahi mō te hunga i haere atu rā.”
ISA 52:1 Maranga, maranga; kākahuria tōu kaha, e Hiona! Kākahuria ōu kahu whakapaipai, e Hiruhārama, e te pā tapu; nō te mea heoi anō haerenga mai ki a koe o te mea kokotikore, o te mea poke.
ISA 52:2 Ruperupea atu te puehu i a koe, whakatika, noho iho, e Hiruhārama! Wetekina ngā here i tōu kakī, e te tamāhine herehere a Hiona!
ISA 52:3 Ko te kupu hoki tēnei a Ihowā: Kua hokona kautia atu koutou; nā, ehara i te moni māna koutou e whakahoki mai.
ISA 52:4 Ko te kupu hoki tēnei a te Ariki, a Ihowā: “Haere atu tāku iwi ki Īhipa i mua, ki reira noho ai; nā, kāhore he rawa i whakatupuria kinotia ai rātou e te Ahiriana.
ISA 52:5 “Nā, he aha rā tāku i konei,” e ai tā Ihowā; “ka kāhakina kautia atu nei hoki tāku iwi? Tangi auē ana i ō rātou rangatira,” e ai tā Ihowā, “e whakahāweatia tonutia ana tōku ingoa i tēnei rā, i tēnei rā.
ISA 52:6 Mō konei ka mōhio tāku iwi ki tōku ingoa; mō konei ka mōhio rātou i taua rā ko ahau te kōrero nei; nanā, ko ahau tēnei.”
ISA 52:7 Anō te āhuareka o ngā waewae i runga i ngā maunga o te kaikawe i te rongo pai, e kauwhau ana i te maunga rongo; e kawe mai ana i te rongo whakahari o te pai, e kauwhau ana i te ora; e mea ana ki a Hiona, “E kīngi ana tōu Atua.”
ISA 52:8 Te reo o āu tūtei! Ka maranga i a rātou te reo, ka waiata ngātahi; nō te mea ka kite rātou he kanohi, he kanohi, ua whakahoki a Ihowā i Hiona.
ISA 52:9 Hāmama, waiata ngātahi, e ngā wāhi o Hiruhārama kua ururuatia; kua whakamārie hoki a Ihowā i tāna iwi, kua hoko i Hiruhārama.
ISA 52:10 Kua huhua te ringa tapu o Ihowā ki te aroaro o ngā tauiwi katoa, ā, ka kite ngā pito katoa o te ao i te whakaora a tō tātou Atua.
ISA 52:11 Maunu, maunu, haere atu i reira! Kaua e pā ki te mea poke; haere atu i roto i a ia; kia mā, e ngā kaimau o ngā oko a Ihowā.
ISA 52:12 E kore hoki koutou e haere kaikā, e kore hoki e haere pērā i te whati; nō te mea ka haere a Ihowā i tō koutou aroaro; ko te Atua hoki o Īharaira hei hiku mō koutou.
ISA 52:13 Nanā, ka mahi tūpato tāku pononga, ka whakatiketiketia ia, ka hāpainga ki runga, ā, ka tiketike rawa atu.
ISA 52:14 Pērā i te tini i mīharo ki a koe – i kino iho hoki tōna kanohi i tō te tangata, tōna āhua i tō ngā tama a te tangata –
ISA 52:15 waihoki he maha ngā iwi ka tāuhiuhia e ia; ā, ka kopi te māngai o ngā kīngi ki a ia. Nō te mea ko ngā mea kīhai i kōrerotia ki a rātou ka kitea, ko ngā mea kīhai i rangona ka mōhiotia.
ISA 53:1 Ko wai i whakapono ki tā mātou kōrero; i whakaaturia rānei ki a wai te ringaringa o Ihowā?
ISA 53:2 Ka tupu ake hoki ia ki tōna aroaro ānō he rākau wana, me te pakiaka hoki i te oneone maroke. Kāhore ōna āhuareka, kāhore hoki he pai; ā, ka titiro tātou ki a ia, tē ai he ātaahua e minamina ai tātou ki a ia.
ISA 53:3 I whakahēngia, i whakakāhoretia ia e te tangata; he tangata pōuri, kua mōhio hoki ki te tangi; ā, i āhua huna ngā kanohi ki a ia; i whakakāhoretia, kīhai hoki tātou i whakaaro ki a ia.
ISA 53:4 He pono, nāna ō tātou mate i pīkau, nāna hoki i waha ō tātou pōuri; ko tātou ia i mea, i tukitukia, i patua ia e te Atua, i whakawhiua.
ISA 53:5 Kāhore, i werohia ia mō ō tātou hē, i kurua mō ō tātou kino; nōna te whiunga i mau ai tō tātou rongo, kei ōna kārawarawa hoki he rongoā mō tātou.
ISA 53:6 Ko tātou katoa, ānō he hipi, kua marara kē, kua anga atu tātou ki tōna ara, ki tōna ara; nā Ihowā ia i mea kia tau iho ki a ia te kino o tātou katoa.
ISA 53:7 I tūkinotia ia, i whakawhiua; heoi kīhai i kuihi tōna māngai; ānō he reme i ārahina ia kia patua, me te hipi hoki i te aroaro o ōna kaikutikuti e wahangū ana, kīhai i kuihi tōna waha.
ISA 53:8 Nā te tūkino, nā te whakawā, tangohia atu ana ia. Tēnā ko tōna whakatupuranga, ko wai o rātou i whakaaro kua wehea atu ia i te ao ora? He mahi hē hoki nā tāku iwi i patua ai ia.
ISA 53:9 Ā, ka whakaritea hei te hunga kino he urupā mōna; i te tangata taonga ia i tōna matenga; ahakoa kāhore āna mahi tutū, kāhore anō he tinihanga i tōna māngai.
ISA 53:10 Otiia, i pai hoki a Ihowā kia kurua ia; nāna ia i mea kia mamae. Ina meinga e koe tōna wairua hei whakahere mō te hē, ka kite ia i tōna uri, ka whakaroa i ōna rā, ā, ko tā Ihowā i pai ai ka āta oti i a ia.
ISA 53:11 Ka kite ia i tā tōna wairua i uaua ai, ā, tatū ana te ngākau; mā te mōhio ki a ia ka whakatikaia ai te tini e tāku pononga tika; māna hoki ō rātou kino e waha.
ISA 53:12 Mō reira ka hoatu e ahau he wāhi mōna i roto i ō te hunga nui, ā, ka tū ngātahi ia me te hunga kaha i te taonga; mō tōna wairua i ringihia e ia ki te mate, ā, i taua ngātahitia me ngā poka kē; nāna hoki ngā hara o te tini i waha, nāna i wawao ngā poka kē.
ISA 54:1 “Waiata, e te pākoko, e koe kāhore anō nei i whānau; kia pakaru mai te waiata, hāmama, e koe kāhore anō kia whakamamae! He tini hoki ngā tamariki a te noho kau i ngā tamariki a te mea whai hoa,”
ISA 54:2 “Kia rahi atu te tūranga mō tōu tēneti; kia mārō hoki ngā uhi o ōu nohoanga; aua e kaiponuhia; kia roa ōu taura, kia ū hoki ōu poupou.
ISA 54:3 Ka tohatoha noa atu hoki koe ki matau, ki mauī; ā, ka riro ngā tauiwi i ōu uri; mā rātou anō ka nohoia ai ngā pā kua ururuatia.
ISA 54:4 “Kaua e wehi; tā te mea e kore koe e whakamā; kaua anō e numinumi, tā te mea e kore koe e whakamā; nō te mea ka wareware i a koe te whakamā o tōu tamāhinetanga; ā, heoi anō maharatanga ki te ingoa kino o tōu pouarutanga.
ISA 54:5 Ko tōu Kaihanga tāu tahu, ko Ihowā o ngā mano tōna ingoa; ko te Mea Tapu hoki o Īharaira tōu kaiwhakaora, ko te Atua o te whenua katoa ka huaina ki a ia.
ISA 54:6 Nō te mea kua karanga a Ihowā ki a koe, ānō he wahine kua whakarērea, kua pōuri te ngākau, ānō he hoa wahine o te taitamarikitanga, i te mea kua mahue, e ai tā tōu Atua.
ISA 54:7 He iti te wāhi i mahue ai koe i ahau; he nui ia ngā atawhainga e kohikohi ai ahau i a koe.
ISA 54:8 He riri puhake, i huna ahau i tōku kanohi i a koe, he wāhi iti; he aroha mau tonu ia tōku e aroha ai ki a koe,” e ai tā Ihowā, tā tōu kaiwhakaora.
ISA 54:9 “He pēnei hoki tēnei ki ahau me ngā wai i a Noa, i ahau i oati rā, e kore e hurihia anō te whenua e ngā wai i a Noa. Waihoki ka oati nei ahau, e kore ahau e riri ki a koe, e kore anō e whakatūpehupehu ki a koe.
ISA 54:10 Ko ngā maunga hoki ka riro kē, ko ngā pukepuke ka nekehia atu, tēnā ko tōku aroha e kore e rerekē i a koe, e kore anō e nekehia kētia te kawenata e mau ai taku rongo,” e ai tā Ihowā e atawhai nei i a koe.
ISA 54:11 “E koe, kua whakawhiua nei, kua pūhia nei e te āwhā, kāhore anō i whakamārietia, nanā, māku ōu kōhatu e whakatakoto, he pai hoki te kakano; ka hangā anō e ahau ōu tūranga ki te hāpira.
ISA 54:12 Ka hangā anō e ahau ōu tihi ki te rupi, ōu tatau ki te karapanaka, ōu rohe katoa anō ki ngā kōhatu whakapaipai.
ISA 54:13 Ā, ka whakaakona e Ihowā āu tamariki katoa; ka nui hoki te rangimārie ki āu tamariki.
ISA 54:14 Ka whakatūria koe ki runga ki te tika; ka whakamataratia atu i a koe te tūkino; e kore hoki koe e wehi; e kore anō te pāwera e tata ki a koe.
ISA 54:15 Nanā, huihui noa rātou, ehara ia i te mea nāku; ko te tangata e huihui ana ki te whawhai ki a koe ka papahoro, he mea mōu.
ISA 54:16 “Nanā, nāku i hanga te parakimete e pupuhi nei i te ahi waro, e mau nei i te mea hei mahi māna; nāku hoki te kaihuna i hanga hei whakamōtī.
ISA 54:17 E kore tētahi patu e hangā ana mōu e mārohirohi; ko ngā arero katoa e whakatika mai ana ki a koe ki te whakawā, māu anō e whakahē. Ko tā ngā pononga a Ihowā tēnei, tuku iho, tuku iho; nāku hoki rātou i tika ai,”
ISA 55:1 “Ē! E ngā tāngata katoa e matewai ana, haere mai ki ngā wai; me te tangata kāhore āna moni; haere mai, hokona, kainga! Haere mai, hokona he wāina, he waiū; kaua he moni, kaua he utu.
ISA 55:2 He aha rā i hokona ai e koutou te moni mō ngā mea ehara i te taro, tō koutou uaua mō ngā mea e kore ai koutou e mākona? Āta whakarongo mai ki ahau, ā, kainga te mea pai; kia ora hoki ō koutou wairua i ngā mea mōmona.
ISA 55:3 Tahuri mai ō koutou taringa, haere mai ki ahau; whakarongo mai, ā, ka ora ō koutou wairua. Ā, māku e whakarite ki a koutou he kawenata mau tonu, arā ngā atawhainga pono i a Rāwiri.
ISA 55:4 Nanā, kua waiho ia e ahau hei kaiwhakaatu ki ngā iwi, hei rangatira, hei kaiwhakahau mō ngā tauiwi.
ISA 55:5 Nanā, ka karanga koe i te iwi kīhai i mōhiotia e koe; ka rere mai anō ki a koe ngā iwi kāhore i mōhio ki a koe; mō Ihowā hoki, mō tōu Atua, mō te Mea Tapu o Īharaira; nāna hoki koe i whakanui.
ISA 55:6 Rapua a Ihowā, kei kitea ana ia, karangatia atu, kei tata ana mai ia;
ISA 55:7 kia whakarere te tangata kino i tōna ara, te tangata mahi hē i ōna whakaaro; kia hoki ki a Ihowā, ā, ka aroha ia ki a ia; ki tō tātou Atua hoki he nui rawa hoki tāna mahi tohu.
ISA 55:8 “Ehara hoki ōku whakaaro i ō koutou whakaaro, ō koutou huarahi i ōku huarahi,”
ISA 55:9 “Tā te mea e ikeike ake ana te rangi i te whenua, waihoki ko ōku huarahi e ikeike ake ana i ō koutou huarahi, ko ōku whakaaro i ō koutou whakaaro.
ISA 55:10 Ka rite hoki ki te ua rāua ko te hukarere e rere iho ana i te rangi, ā, e kore e hoki ki reira; engari e whakamākūkū ana i te whenua, e mea ana kia whai hua, kia pihi ake, kia hōmai anō he purapura mā te kaiwhakatō, he taro mā te tangata e kai ana;
ISA 55:11 ka pēnā anō tāku kupu e puta ana i tōku māngai; e kore e hoki kau mai ki ahau; engari ka meatia tāku i pai ai, ka taea hoki tāku i unga atu ai.
ISA 55:12 Tā te mea ka haere atu koutou me te hari anō, ka ārahina i runga i te rangimārie; ka pakaru mai te waiata a ngā maunga, a ngā pukepuke, i tō koutou aroaro, ā, ka papaki ringa ngā rākau katoa o te whenua.
ISA 55:13 He tātarāmoa i mua, ka puta ake he kauri; he tūmatakuru i mua, ka puta ake he ramarama; ā, ka waiho hei ingoa ki a Ihowā, hei tohu mō ā mua tonu atu, e kore e motuhia.”
ISA 56:1 Ko te kupu tēnei a Ihowā: “Puritia te whakawā, mahia te tika; nō te mea ka tata he putanga mō tāku whakaora, he whakakitenga mō tōku tika.
ISA 56:2 Ka hari te tangata nāna tēnei mahi, te tama a te tangata e pupuri nei i a ia, mau tonu; e pupuri ana, ā, kāhore e whakapoke i te hāpati, e tiaki ana i tōna ringa kei mahi i tētahi hē.”
ISA 56:3 Kaua hoki te tama a te tangata kē, kua honoa nei ki a Ihowā, e kōrero, e mea, “He pono ka wehea rawatia mai ahau e Ihowā i roto i tāna iwi.” Kaua anō te unaka e kī, “Nanā, he rākau maroke ahau.”
ISA 56:4 Ko tā Ihowā kupu hoki tēnei: “Mō ngā unaka e pupuri ana i āku hāpati, e whiriwhiri ana i ngā mea e paingia ana e ahau, ā, e hopu ana i tāku kawenata;
ISA 56:5 ka hoatu e ahau he wāhi ki a rātou i roto i tōku whare, i roto anō i ōku taiepa, he ingoa anō e pai ake ana i o ngā tama, i o ngā tamāhine; he ingoa mau tonu tāku e hoatu ai ki a rātou, he mea e kore e hātepea atu.
ISA 56:6 Ko ngā tamariki hoki a te tangata kē, kua oti te hono ki a Ihowā, he mea kia mahi ai rātou ki a ia, kia aroha ki te ingoa o Ihowā, kia waiho hei pononga māna, ko te hunga katoa e pupuri ana, ā, kāhore e whakapoke i te hāpati, ā, e hopu ana i tāku kawenata –
ISA 56:7 ka kawea rātou e ahau ki tōku maunga tapu, ka whakahari anō ahau i a rātou i roto i tōku whare īnoi; ka manakohia ā rātou tahunga tinana, me ā rātou patunga tapu i runga i tāku āta; nō te mea ka kīia tōku whare, he whare īnoi mō ngā iwi katoa.”
ISA 56:8 He kupu tēnei nā te Ariki, nā Ihowā, nā te kaikohikohi mai o te hunga o Īharaira i peia atu, “Kua kohikohia ērā ki a ia; ka kohikohi anō ahau i ētahi atu ki a ia.”
ISA 56:9 E ngā kīrehe katoa o te pārae, haere mai ki te kai, e ngā kīrehe katoa o te ngahere!
ISA 56:10 Ko ōna tūtei, he matapō katoa, kāhore e mōhio; he kurī reokore katoa rātou, e kore e tau; he momoe, he takoto, e matenui ana ki te moe.
ISA 56:11 Āe rā, he kurī apo kai rātou; kāhore rawa e mākona. He hēpara ēnei e kore e ngoto te mātauranga; anga katoa ana rātou ki tōna ara, ki tōna ara, ki te mea taonga mōna i tōna wāhi, i tōna wāhi.
ISA 56:12 Ko tā rātou kī, “Haere mai, māku e tiki he wāina, kia nui anō tā tātou inu i te wai kaha; ā, ka rite te rā āpōpō ki tēnei rā, he rā kei runga noa atu tōna nui.”
ISA 57:1 Ka riro ki te kore te tangata tika, ā, kāhore e maharatia iho e te ngākau o tētahi tangata; e tangohia atu anō hoki te hunga tohu tāngata; tē mahara tētahi. E tangohia atu ana te tangata tika kei kite i te hē.
ISA 57:2 Ka haere ia ki te rangimārie, ka okioki rātou ki ō rātou takotoranga, ka haere tēnā, tēnā, i runga i tōna whakaaro tapatahi.
ISA 57:3 “Ko koutou ia, awhi mai ki konei, e ngā tama a te wahine mākutu, e ngā uri o te tangata pūremu, o te wahine kairau.
ISA 57:4 He tākaro tā koutou ki a wai? Ki a wai te hāmama nui o ō koutou māngai, te whētero roa o te arero? He teka ianei he whānau koutou nā te poka kē, he uri nō te teka –
ISA 57:5 koutou, e tahu nā i ō koutou hiahia i waenga i ngā oki, i raro i ngā rākau kōuru nui katoa; e patu nā i ngā tamariki i ngā awaawa, i raro i ngā pari kōhatu?
ISA 57:6 Kei ngā kōhatu māeneene o te awa tōu wāhi; ko ēnā, ko ēnā te rota i a koe; ringihia ana e koe he ringihanga ki ēnā, whakaekea atu ana he whakahere. E mārie rānei ahau ki ēnā?
ISA 57:7 I runga i te maunga tiketike, aua noa atu ki runga, i hangā e koe tōu takotoranga, piki ai ki reira ki te mea patunga tapu.
ISA 57:8 Kua oti anō tōu whakamahara te whakatū e koe ki tua i te tatau, i ngā pou; kua hura hoki koe i a koe ki tētahi atu, ehara i ahau, kua piki ki runga; kei te whakanui i tōu takotoranga, whakaritea ana e koe he kawenata ki a rātou; i matenuitia anō e koe tō rātou takotoranga i te wāhi i kite ai koe.
ISA 57:9 I haere atu anō koe ki te kīngi, mea rawa ki te hinu, whakanuia ana e koe āu hinu whakaranu; ungā ana e koe āu karere ki tawhiti, whakaititia ana koe e koe anō ki raro rawa ki te rēinga.
ISA 57:10 Māuiui ana koe i te roa o tōu ara; otiia kāhore koe i mea, ‘Kāhore he manakohanga.’ Kua kitea e koe e nui haere ana tōu kaha; koia koe tē ruha ai.
ISA 57:11 “I pāwera koe, i wehi i a wai, i teka ai koe, i kore ai e mahara ki ahau, i kore ai tōu ngākau e mea mai? Kīhai ianei ahau i whakarongo puku he wā roa i mua rā anō, nā, kāhore ōu wehi ki ahau?
ISA 57:12 Māku e whakaatu tōu tika; tēnā ko āu mahi, e kore koe e whai pai i ēnā.
ISA 57:13 Ka tangi koe, mā ōu huihui koe e whakaora! Otiia, ka kāhakina rātou e te hau ka riro katoa atu i te ngā. Ko te tangata ia e whakawhirinaki ana ki ahau, mōna te whenua, ka riro hoki i a ia tōku maunga tapu.”
ISA 57:14 Ka kī anō ia: “Opehia ake, opehia ake, whakapaia te ara, hāpainga atu te tūtukitanga waewae i te ara o tāku iwi.”
ISA 57:15 Ko te kupu hoki tēnei a te Mea Tiketike o Runga Rawa, ko tōna kāinga nei kei ngā wā onamata, ko tōna ingoa ko Tapu: “Ko te wāhi e noho nei ahau kei te tiketike, kei te tapu, i te tangata he marū rawa tōna ngākau, he pāpaku, hei whakahauora i te wairua o te hunga pāpaku, hei whakahauora i te ngākau o ngā mea kua marū.
ISA 57:16 E kore hoki ahau e whawhai ā ake ake, e kore anō e mau tonu tōku riri; pēnā ka pēhia rawatia te wairua i tōku aroaro, me ngā manawa i hangā e ahau.
ISA 57:17 He hē nō tōna apo taonga i riri ai ahau, i patu ai i a ia; i huna ahau i tōku mata, i riri, ā, haere kotiti kē ana ia i runga i te ara o tōna ngākau.
ISA 57:18 Kua kite ahau i ōna ara, ka rongoātia anō ia e ahau; ka ārahi anō ahau i a ia, ka whakahoki anō i ngā whakamārietanga ki a ia, ki ōna tāngata anō hoki e tangi ana;
ISA 57:19 ko ahau te kaihanga o ngā hua o ngā ngutu. Ka mau, ka mau te rongo ki te hunga i tawhiti, ki te hunga i tata,” e ai tā Ihowā; “māku anō ia e rongoā.”
ISA 57:20 Ko te hunga kino ia rite tonu ki te moana ngarungaru; e kore e marino, heoi kei te āia ake e ōna wai te puehu, te paru.
ISA 57:21 “Kāhore he maunga rongo ki te hunga kino,” e ai tā tōku Atua.
ISA 58:1 “Kia rahi te karanga, kaua e kaiponuhia! Kia rite ki te tētere te nui o tōu reo! Whakaaturia ki tāku iwi tō rātou poka kē, ō rātou hara ki te whare o Hākopa.
ISA 58:2 He rapu anō ia tā rātou i ahau i tēnei rā, i tēnei rā, e āhuareka ana hoki ki te mōhio ki āku ara; me te mea he iwi e mahi ana i te tika, ā, kīhai i whakarere i te whakaritenga a tōna Atua, e ui ana rātou ki ahau ki ngā whakaritenga o te tika, e āhuareka ana ki te awhi ki te Atua.
ISA 58:3 Ko tā rātou kī, ‘He aha mātou i nohopuku ai, ā, kāhore koe e titiro mai? He aha mātou i whakapōuri ai i ō mātou wairua, tē mōhio mai koe?’ “Nanā, i te rā e nohopuku ai koutou e kitea ana e koutou te āhuareka mō koutou anō; e akiakina ana hoki e koutou ā koutou whakamāuiui katoa.
ISA 58:4 Nanā, ko tā koutou nohopuku; hei mea totohe, hei mea ngangare, kia moto ai ki te ringa o te kino. Kāhore koutou i nohopuku i tēnei rā hei mea kia rangona ai tō koutou reo i runga.
ISA 58:5 Ko tāku nohopuku ianei tēnei, i whiriwhiri ai? He rā e whakapōuri ai te tangata i tōna wairua? He tuohu koia nō te māhunga o te tangata, ānō he kākaho? He whāriki i te kākahu taratara, i te pungarehu, ki raro i a ia? E kīia rānei tēnei e koe he nohopuku, he rā e manakohia ana e Ihowā?
ISA 58:6 “He teka ianei ko te nohopuku tēnei i whiriwhiria e ahau? Kia whakatangorotia ngā here a te kino, kia wetekina ngā paihere o te ioka, kia tukua te hunga e tūkinotia ana kia haere noa atu, kia wāwāhia e koutou ngā ioka katoa?
ISA 58:7 He teka ianei ko te tuwha i tāu taro mā te tangata e mate ana i te kai, ko te mau mai ki tōu whare i ngā rawakore i peia atu? Kia hīpokina hoki te tangata e tū tahanga ana, ina kitea e koe; kia kaua hoki e huna i a koe i ōu kikokiko ake?
ISA 58:8 Ko reira tōu mārama puta ai, ānō ko te pūaotanga, ka hohoro anō ōu mate te mahu; ka haere tōu tika ki mua i a koe, ko te korōria anō o Ihowā hei hiku mōu.
ISA 58:9 Ko reira koe karanga ai, ā, ka whakahoki kupu mai a Ihowā; ka tangi koe, ā, ka mea ia: Tēnei ahau. “Ki te whakarērea atu e koe te ioka i waenganui i a koe, te kōkirihanga atu o te maihao, me te kōrero kino;
ISA 58:10 ki te mea anō ka whai ngākau koe ki te tangata matekai, ā, ka mākona i a koe te wairua e pēhia ana e te mamae; ko reira tōu mārama puta ai i roto i te pōuri, ka rite hoki tōu pōuri ki te poutūmārō.
ISA 58:11 Ka ārahina tonutia anō koe e Ihowā, ka mākona anō tōu wairua i a ia i ngā wāhi kore wai, ka whakakahangia anō ōu wheua; ā, ka rite koe ki te kāri kua oti te whakamākūkū ki te wai, ki te puna hoki e pupū ake ana, e kore nei ōna wai e poto.
ISA 58:12 Ka hangā anō e ōu uri ngā wāhi kua ururuatia noatia ake; ka ara anō i a koe ngā tūranga o ngā whakapaparanga maha; ā, ka huaina koe, Ko te kaihanga o te taiepa pakaru, Ko te kaiwhakahou o ngā wāhi i ngā ara hei nohoanga.
ISA 58:13 “Ki te tahuri atu tōu waewae i te hāpati, i te mea i tāu i pai ai i tāku rā tapu, ā, ka kīia e koe te hāpati he āhuareka, he tapu nō Ihowā, he mea hōnore, ā, ka whakahōnoretia ia e koe, ka kore hoki e mahi i ōu ara ake, e kite i āu ake e āhuareka ai, e kōrero i āu kōrero ake;
ISA 58:14 kātahi koe ka whai oranga ngākau i roto i a Ihowā; ka meinga anō e ahau ngā wāhi tiketike o te whenua hei hōiho mōu; ka whāngaia hoki koe ki te wāhi tupu a tōu pāpā, a Hākopa.”
ISA 59:1 Nanā, kīhai i mutua te ringa o Ihowā, tē tau ai te whakaora; kīhai anō i taimaha tōna taringa, tē rongo ai ia.
ISA 59:2 Engari nā ō koutou hē i wehe koutou ko tō koutou Atua, nā ō koutou hara anō i hunā ai tōna mata ki a koutou, tē whakarongo ai ia.
ISA 59:3 Kua poke hoki ō koutou ringa i te toto, ō koutou maihao i te hē; ko ō koutou ngutu kua kōrero teka, ko ō koutou arero kei te whakapuaki i te whanokē.
ISA 59:4 Kāhore he karanga ki te tika, kāhore he tohe ki te pono; ko te horihori tō rātou okiokinga, e kōrero teka ana rātou; ko tō rātou hapū he nanakia, whānau ake he kino.
ISA 59:5 E paoa ana e rātou ngā hua o te neke, e hangā ana e rātou te whare pūngāwerewere. Ko te tangata e kai ana i ā rātou hua ka mate, ā, ki te kōpēngia tētahi, ka puta he waipera.
ISA 59:6 E kore ō rātou whare pūngāwerewere e tau hei kākahu, e kore anō rātou e whai hīpoki i ā rātou mahi. Ko ā rātou mahi he mahi nā te kino, he mahi nanakia kei ō rātou ringa.
ISA 59:7 E rere ana ō rātou waewae i te kino, hohoro tonu hoki rātou ki te whakaheke i te toto harakore. Ko ō rātou whakaaro he whakaaro ki te kino, he whakamōtī, he wāwāhi kei ō rātou ara.
ISA 59:8 Kāhore ō rātou mātauranga ki te ara o te rangimārie, kāhore hoki he whakawā i ō rātou ara. Ko ō rātou huarahi, whakakōpikopikoa ake e rātou; ko te hunga katoa e haere ana nā reira, e kore e mōhio ki te rangimārie.
ISA 59:9 Nā reira matara noa atu te whakawā i a tātou, tē mau tātou i te tika. E tāria atu ana e tātou te mārama, nā, ko te pōuri; te tīaho, nā, kei te haere nei tātou i te pōuri.
ISA 59:10 E whāwhā ana tātou ki te taiepa ānō he matapō, āe rā, me te mea ko te hunga kāhore he kanohi; e tūtuki ana ō tātou waewae i te poutūmārōtanga me te mea i te ahiahi; he rite tātou ki te tūpāpaku i roto i ngā tāngata pakari.
ISA 59:11 Kei te ngengere tātou katoa ānō he pea; ko tō tātou rite kei te kūkupa e tumutumu tonu ana. E tatari ana tātou ki te whakawā, heoi kua kāhore; ki te whakaora, otiia kei tawhiti atu i a tātou.
ISA 59:12 Kua nui hoki ō mātou poka kē i tōu aroaro, e whakaatu ana hoki ō mātou hara i tō mātou hē. Kei a mātou nei hoki ō mātou poka kē, ā, ko ō mātou kino, e mōhiotia ana ērā e mātou:
ISA 59:13 he poka kē, he whakakāhore ki a Ihowā, he peka atu i te whai i tō mātou Atua, he whanokē ngā kōrero, he whakakeke; kua hapū, kua puaki i te ngākau he kupu teka.
ISA 59:14 Kua tahuri atu nei ki muri te whakawā, ko te tika tū mai ana i tawhiti; kua hinga hoki te pono i te waharoa, ā, kāhore he tomokanga mō te tika.
ISA 59:15 Āe rā, kua kore te pono; ā, ko te tangata e whakarere ana i te kino ka waiho hei taonga pārau. Nā, ka kite a Ihowā, ka kino ki tāna titiro, nō te mea kāhore he whakawā.
ISA 59:16 Nā, titiro rawa mai ia, kāhore he tangata, mīharo ana ia nō te mea kāhore he kaiwawao; nā, kei tōna ringa he whakaora mōna; ko tōna tika, nā tērā ia i tautoko ake.
ISA 59:17 I kākahuria hoki e ia te tika hei pukupuku, ko te whakaora hei pōtae ki tōna māhunga; kākahuria ana e ia ngā kākahu o te rapu utu hei kākahu, ropia mai ana te hae hei koroka.
ISA 59:18 Ko tāna utu ka rite ki ā rātou mahi, he riri ki ōna hoa whawhai, he utu ki ōna hoariri; ki ngā motu hoki ka hōmai e ia he utu.
ISA 59:19 Nā, ka wehingia te ingoa o Ihowā i te uru, tōna korōria i te rāwhiti. Ka haere mai hoki ia ānō he awa e tāheke ana, e āia ana e te manawa o Ihowā.
ISA 59:20 “Ā, ka haere mai te kaihoko ki Hiona, ki te hunga o Hākopa e tahuri atu ana i te poka kē,”
ISA 59:21 “Ko ahau nei, ko tāku kawenata tēnei ki a rātou,” e ai tā Ihowā. “Ko tōku wairua i a koe nā, me āku kupu i hoatu e ahau ki tōu māngai, e kore e neke atu i tōu māngai, i te māngai o ōu uri, i te māngai anō o ngā uri o ōu uri,” e ai tā Ihowā, “āianei ā ake tonu atu.”
ISA 60:1 “E ara, kia mārama; kua tae mai hoki tōu mārama, kua whiti te korōria o Ihowā ki a koe.
ISA 60:2 Tērā hoki e hīpokina te whenua e te pōuri, ngā iwi e te pōuri kerekere; ka whiti ia a Ihowā ki a koe, ka kitea hoki ki a koe tōna korōria.
ISA 60:3 Ā, ka haere mai ngā tauiwi ki tōu mārama, ngā kīngi ki ōu hihi, ina whiti mai.
ISA 60:4 “Kia ara ōu kanohi i tētahi taha, i tētahi taha, titiro atu hoki; kei te huihui rātou katoa, e haere mai ana ki a koe; ka haere mai āu tama i tawhiti, ka hikitia hoki āu tamāhine ki ngā ringa.
ISA 60:5 Ka kite koe i reira, ka whakamāramatia, ka wehi anō tōu ngākau, ka nui; nō te mea ka tahuri ki a koe ngā mea maha o te moana, ka tae anō ki a koe ngā taonga o ngā tauiwi.
ISA 60:6 Ka kapi koe i te kāmera, he tini; i ngā kāmera tere o Miriana, o Epa. Ka haere mai ērā katoa i Hēpā, me te mau mai anō i te kōura, i te whakakakara; ka kauwhautia anō e rātou ngā whakamoemiti ki a Ihowā.
ISA 60:7 Ka huihuia ngā hipi katoa o Kerara ki a koe, hei kaimahi māu ngā hipi toa o Nepaiota; ka manakohia rātou ina eke ki runga ki tāku āta, ā, ka whakakorōriatia e ahau te whare o tōku korōria.
ISA 60:8 “Ko wai ēnei e rere nei ānō he kapua, me he kūkupa nei, ki ō rātou matapihi?
ISA 60:9 He pono ka tatari ngā motu ki ahau, me ngā kaipuke o Tarahihi i te tuatahi, ki te kawe mai i āu tama i tawhiti; i a rātou, i tā rātou hiriwa, i tā rātou kōura hoki, hei mea ki te ingoa o Ihowā, o tōu Atua, ki te Mea Tapu o Īharaira, nō te mea ka oti koe te whakakorōria e ia.
ISA 60:10 “Ka hangā anō ōu taiepa e ngā tāngata kē, ko ō rātou kīngi anō hei kaimahi māu. He riri hoki nōku i patu ai ahau i a koe, he manako ia nāku i atawhai ai ahau i a koe.
ISA 60:11 Ka tuwhera tonu anō ōu kūwaha; e kore e tūtakina i te ao, i te pō, kia kawea mai ai ngā taonga o ngā tauiwi ki a koe, kia ārahina mai ai hoki ō rātou kīngi me rātou.
ISA 60:12 Ko te iwi hoki, me te kīngitanga e kore e mahi ki a koe, ka ngaro; inā, ka mōtī rawa aua iwi.
ISA 60:13 “Ka tae mai te korōria o Repanōna ki a koe, te kauri, te rimu, me te ake ngātahi hei whakapaipai, mō te wāhi i tōku kāinga tapu, ā, ka whakakorōriatia e ahau te wāhi o ōku waewae.
ISA 60:14 Ka haere mai anō, ka piko ki a koe ngā tama a ōu kaitūkino, ā, ko te hunga katoa i whakahāwea ki a koe, ka piko ki ngā kapu o ōu waewae; ā, ka kīia koe, Ko te pā o Ihowā, Ko te Hiona o te Mea Tapu o Īharaira.
ISA 60:15 “He mea whakarere nei koe i mua, he mea i kinongia, kāhore hoki tētahi kia haere i waenganui i a koe, nā, ka meinga koe e ahau hei mea nui e mau tonu ana, he koanga ngākau ki ngā whakatupuranga maha.
ISA 60:16 Ka ngotea anō e koe te waiū o ngā tauiwi, ka ngotea te ū o ngā kīngi; ā, ka mōhio koe ko ahau, ko Ihowā, tōu kaiwhakaora, tōu kaihoko, te Mea Nui o Hākopa.
ISA 60:17 “Ko te parāhi ka whakaputaia kētia e ahau hei kōura, ko te rino ka whakaputaia kētia hei hiriwa. Ka puta kē te rākau hei parāhi, ka puta kē ngā kōhatu hei rino. Ko ōu kaitohutohu ka meinga he rongo e mau ana, ko ōu kaiakiaki he tika.
ISA 60:18 E kore e rangona i muri te mahi nanakia ki tōu whenua; te whakamōtī, te wāwāhi, ki ōu rohe; engari ka kīia ōu taiepa, ko te Whakaoranga, ōu kūwaha ko te Whakamoemiti.”
ISA 60:19 “E kore te rā e waiho i muri hei whakamārama mōu i te awatea; nā, ko te marama e tīaho nei, e kore tērā e whakamārama i a koe; ko Ihowā hoki hei whakamārama mōu ake ake, ko tōu Atua hoki hei whakakorōria i a koe.
ISA 60:20 Heoi anō hekenga o tōu rā, e kore anō tōu marama e pewa; nō te mea ko Ihowā hei whakamārama pūmau mōu, ā, ka mutu ngā rā o tōu tangihanga.
ISA 60:21 Ko tōu iwi hoki, tika katoa, ka pūmau tonu ki a rātou te whenua. Te peka whakatō nāku, he mahi nā ōku ringa, kia whai korōria ai ahau.
ISA 60:22 Tō te mea nohinohi putanga ake, he mano, tō te mea iti, he iwi kaha; māku, mā Ihowā, e whakahohoro i tōna wā e rite ai.”
ISA 61:1 Kei runga i ahau te Wairua o te Ariki, o Ihowā; nā Ihowā nei hoki ahau i whakawahi hei kauwhau i te rongo pai ki te hunga māhaki. Kua ungā mai ahau e ia ki te takai i te hunga ngākau marū, ki te kauwhau ki ngā whakarau kia haere noa, ki ngā herehere, kua tuwhera te whare herehere;
ISA 61:2 kia karangatia te tau manako mai o Ihowā, te rā rapu utu o tō tātou Atua; kia whakamārietia te hunga katoa e tangi ana;
ISA 61:3 kia whakatakotoria he tikanga mō te hunga katoa o Hiona e tangi ana, kia whakaputaia kētia ō rātou pungarehu hei ātaahua, te tangihanga, hei hinu koa, te wairua pōuri hei kākahu whakamoemiti; ā, ka kīia rātou he rākau nā te tika, he mea whakatō nā Ihowā, kia whai korōria ai ia.
ISA 61:4 Ka hangā anō e rātou ngā wāhi kua ururuatia noatia ake, ka ara i a rātou ngā wāhi kua kore rawa i mua, ka whakahoutia e rātou ngā pā kua ururuatia, ngā mea kua kore i ērā whakatupuranga noa atu.
ISA 61:5 Ā, ka tū te tangata kē, ka whāngai i ā koutou hipi, ko ngā tama anō a te tangata kē hei kaiparau mā koutou, hei kaitiaki wāina mā koutou.
ISA 61:6 Ko koutou ia ka kīia ko ngā tohunga a Ihowā, ka kīia koutou ko ngā minita a tō tātou Atua; ko ngā taonga o ngā tauiwi hei kai mā koutou, ko tō rātou korōria hei whakamanamana mā koutou.
ISA 61:7 Mō tō koutou whakamā e rua ngā whakautu; mō te numinumi kau ka koa rātou ki tā rātou wāhi; āe rā, i tō rātou whenua ka haere rua mai ngā mea mā rātou, ka mau tonu hoki tō rātou koa.
ISA 61:8 “E aroha ana hoki ahau, a Ihowā, ki te whakawā, e kino ana ki te pāhua, ki te whakahaere hē. Ka hoatu anō e ahau i runga i te pono tā rātou i mahi ai, ka whakaritea he kawenata mau tonu ki a rātou.
ISA 61:9 Ka mātauria anō tō rātou uri i roto i ngā tauiwi, ō rātou whānau i roto i ngā iwi. Ko te hunga katoa e kite ana i a rātou ka mōhio ki a rātou he uri nō tā Ihowā i manaaki ai.”
ISA 61:10 Ka nui tōku koa ki a Ihowā, ka whakamanamana tōku wairua ki tōku Atua. Kua whakakākahuria hoki ahau e ia ki ngā kākahu o te whakaoranga, ropia mai ana e ia te tika ki ahau hei koroka; ka rite ki tā te tāne mārena hou e kōpare nei i te whakapaipai ki a ia, ki tā te wahine mārena hou whakapaipai i a ia ki āna mea whakapaipai.
ISA 61:11 Ka rite hoki ki tā te whenua e mea nei i tōna tupu kia kōkiri ake, ki tā te kāri e mea nei i ngā mea kua whakatōkia ki reira kia tupu, ka pēnā anō tā te Ariki, tā Ihowā, ka meinga e ia te tika me te whakamoemiti kia tupu ki te aroaro o ngā iwi katoa.
ISA 62:1 He whakaaro ki Hiona i kore ai ahau e noho hū, he whakaaro ki Hiruhārama tē āta noho ai ahau, kia puta rā anō tōna tika ānō he tīahotanga, tōna whakaoranga ānō he rama e kā ana.
ISA 62:2 Ā, ka kite ngā tauiwi i tōu tika, ngā kīngi katoa i tōu korōria; ā, he ingoa hou e whakahuatia ki a koe, he mea whakahua nā te māngai o Ihowā.
ISA 62:3 Hei karauna ātaahua anō koe i te ringa o Ihowā, hei pōtae kīngi i te ringa o tōu Atua.
ISA 62:4 E kore koe e kīia ā muri ake nei, He Mea Whakarere; heoi anō kīanga o tōu whenua, He Ururua; engari ka huaina koe, ko Hepetipa; tōu whenua, ko Peura; nō te mea ka āhuareka a Ihowā ki a koe, ā, ka whai tahu tōu whenua.
ISA 62:5 Kei te mārenatanga hoki o te taitamariki ki te wāhina te rite o te mārenatanga o āu tamariki ki a koe; kei te koa hoki o te tāne mārena hou ki te wahine mārena hou te rite o te koa o tōu Atua ki a koe.
ISA 62:6 Kua oti he kaitiaki te whakarite e ahau ki ōu taiepa, e Hiruhārama; e kore e kopia te māngai i te ao, i te pō. E ngā kaiwhakahua o tō Ihowā ingoa, kei āta noho,
ISA 62:7 kaua hoki e whakamutua tā koutou ki a ia, kia whakapūmautia rā anō a Hiruhārama e ia, kia meinga rā anō hei whakamoemiti i runga i te whenua.
ISA 62:8 Kua oatitia e Ihowā tōna ringa matau, tōna tākakau kaha: “E kore e hoatu e ahau tāu wīti ā muri hei kai mā ōu hoariri; e kore anō ngā tāngata kē e inu i tāu wāina i māuiui ai koe;
ISA 62:9 engari, ko ngā tāngata nāna i whawhaki mā rātou e kai, whakamoemiti tonu atu ki a Ihowā; ā, ko ngā tāngata nāna i kohikohi mai, ka inumia e rātou ki ngā marae o tōku wāhi tapu.”
ISA 62:10 Tika atu, tika atu mā ngā kūwaha; whakapaia te ara o te iwi; opehia ake, opehia ake te huanui; kohikohia atu ngā kāmaka, whakaarahia he kara ki ngā iwi.
ISA 62:11 Nanā, kua kōrero a Ihowā ki te pito o te whenua: “Mea atu ki te tamāhine a Hiona, ‘Nanā, ko tōu whakaoranga te haere mai nei! Nanā, kei a ia tōna utu, kei tōna aroaro anō tāna mahi.’ ”
ISA 62:12 Ā, ka huaina rātou, Ko te Iwi Tapu, Ko tā Ihowā i Hoko ai; ka huaina anō hoki koe, He Mea i Rapua, He Pā Kāhore i Mahue.
ISA 63:1 Ko wai tēnei e haere mai nei i Ēroma, he mea rongoā mai ngā kākahu i Potora? Tēnei he korōria rawa nei ōna kākahu, e haere ana i runga i te nui o tōna kaha? “Ko ahau e kōrero atu nei i runga i te tika, ko te mea kaha ki te whakaora.”
ISA 63:2 He aha i whero ai ōu kākahu, i rite ai ōu weweru ki ō te kaitakahi i te takahanga wāina?
ISA 63:3 “Nā tōku kotahi te takahanga wāina i takahi, kāhore hoki he tangata o te iwi hei hoa mōku. Takahia iho rātou e ahau, he riri nōku; takatakahia ana rātou e ahau ki raro, i ahau e weriweri ana; patī ana ō rātou toto ki ōku weruweru, whakapokea iho e ahau tōku kākahu katoa.
ISA 63:4 Kei roto hoki i tōku ngākau te rā o te rapu utu; kua tae mai anō te tau o āku i hoko ai.
ISA 63:5 Nā, ka titiro atu ahau, ā, kāhore he kaiāwhina, mīharo ana ahau nō te mea kāhore he kaitautoko ake; nā, kua meatia e tōku tākakau, he whakaoranga mōku; ko tōku weriweri, nā tērā ahau i tautoko ake.
ISA 63:6 Nā, takahia ana e ahau ngā iwi, i ahau e riri nei; i ahau anō e weriweri ana ka whakahaurangitia rātou e ahau, ā, ringihia ana e ahau tō rātou toto ki te whenua.”
ISA 63:7 Ka whakahuatia e ahau ngā mahi aroha a Ihowā, ngā whakamoemiti ki a Ihowā, ka rite ki ngā mea i hōmai e Ihowā ki a tātou; ki te nui hoki o te pai ki te whare o Īharaira i hōmai nei e ia ki a rātou; he mea i rite tonu ki āna mahi tohu tangata, ki te nui anō o āna mahi aroha.
ISA 63:8 I mea hoki ia, “He pono, ko tāku iwi rātou, he tamariki e kore e kōrero teka”; nā, ko ia tō rātou kaiwhakaora.
ISA 63:9 I ō rātou pōuritanga ngākau katoa i pōuri anō ia, ā, whakaorangia ake rātou e te anahera o tōna aroaro. He aroha nōna, he mahi tohu tangata i hoko ai ia i a rātou, hikitia ana rātou, whakahāereerea ana i ngā rā katoa onamata.
ISA 63:10 Heoi, whakakeke ana rātou whakapōuritia iho e rātou tōna Wairua Tapu. Nā, ka puta kē ia hei hoariri mō rātou; kei te whawhai anō ia ki a rātou.
ISA 63:11 Kātahi ia ka mahara ki ngā rā o mua, ki a Mohi, ki tāna iwi, i mea ia, Kei hea ia nāna rātou i kawe ake i te moana me ngā hēpara o tāna kāhui? Kei hea te kaiwhakanoho o tōna Wairua Tapu ki waenganui i a rātou?
ISA 63:12 I ārahi nei i a rātou, he meatanga nā te ringa matau o Mohi, nā tōna tākakau korōria? I wāhi nei i ngā wai i tō rātou aroaro, hei mea i tētahi ingoa mōna e mau tonu ana?
ISA 63:13 I ārahi nei i a rātou i waenganui o te moana, ānō he hōiho i te koraha, tē hinga rātou?
ISA 63:14 Kei te kararehe e haere ana ki raro ki te awaawa te rite, pērā tonu tā te Wairua o Ihowā meatanga i a rātou kia okioki. Pērā tonu tāu arahanga i tāu iwi, i whai ingoa korōria ai koe.
ISA 63:15 Titiro mai i runga i te rangi, mātakitaki mai i runga i te nohoanga o tōu tapu, o tōu korōria. Kei hea tōu ngākau nui, me āu mahi nunui? Ko te ohoohonga o ōu whēkau, ko āu mahi tohu ka pēhia iho ki ahau.
ISA 63:16 He pono ko koe tō mātou pāpā, kāhore nei hoki a Āperahama e mōhio ki a mātou, kāhore anō hoki a Īharaira e mahara ki a mātou; ko koe, e Ihowā, tō mātou pāpā; ko tō mātou kaihoko, nōnamata mai tōu ingoa.
ISA 63:17 He aha koe, e Ihowā, i mea ai i a mātou kia kotiti atu i āu ara, whakapakeketia iho e koe ō mātou ngākau kia kaua e wehi ki a koe? Hoki mai, kia mahara ki āu pononga, ki ngā hapū o tōu kāinga pūmau.
ISA 63:18 He iti nei te wā i mau ai taua kāinga ki te iwi o tōu tapu; e takatakahia ana tōu wāhi tapu e ō mātou hoariri.
ISA 63:19 Kua meinga mātou kia rite ki te hunga kīhai nei koe i kīngi mō rātou; ki te hunga kīhai nei i huaina ki tōu ingoa.
ISA 64:1 Auē me i haehae koe i ngā rangi, me i heke iho, me i rere ā-wai ngā maunga i tōu aroaro!
ISA 64:2 Kia rite ki te ngiha o te ahi tahu rārā, ki te ahi e koropupū ai ngā wai – kia mōhiotia ai tōu ingoa e ōu hoariri, kia wiri ai ngā iwi i tōu aroaro!
ISA 64:3 I tāu meatanga i ngā mea wehi kīhai nei i whakaaroa e mātou, i heke iho koe, rere ā-wai ana ngā maunga i tōu aroaro.
ISA 64:4 Kāhore hoki kia rangona noatia i mua, kīhai i mōhiotia e te taringa, kīhai hoki te kanohi i kite i te Atua, ko koe anake, e mahi nei i ngā mea mō te tangata e tatari ana ki a ia.
ISA 64:5 Ko tāu, he whakatau ki te tangata e koa ana, e mahi ana i te tika, ki te hunga e mahara ana ki a koe i āu ara. Nanā, i riri nā koe, he hara hoki nō mātou; kua roa noa atu mātou ki aua ara, ā, ka ora rānei mātou?
ISA 64:6 Ko mātou katoa hoki kua rite ki te tangata poke, ā, ko ō mātou tika ki te kākahu kua paru; e memenge ana mātou katoa ānō he rau rākau; kei te hau te rite o ō mātou kino e kāhaki nei i a mātou.
ISA 64:7 Kāhore hoki he tangata e karanga ana ki tōu ingoa, e whakaoho ana i a ia ki te hopu i a koe; kua hunā nei hoki e koe tōu mata ki a mātou, ā, kua hunā mātou e koe nā ō mātou hē.
ISA 64:8 Nā ināianei, e Ihowā, ko koe tō mātou pāpā; ko mātou te paru, ko koe tō mātou kaipokepoke; he mahi hoki mātou katoa nā tōu ringa.
ISA 64:9 Kaua, e Ihowā, e whakanuia rawatia te riri, kaua hoki e mahara tonu ki te kino. Nanā, titiro mai rā, he iwi mātou katoa nāu.
ISA 64:10 He koraha kau ōu pā tapu, he koraha a Hiona, kua ururuatia a Hiruhārama.
ISA 64:11 Ko tō mātou whare tapu, ko tō mātou whare ātaahua, ko te wāhi i whakamoemiti ai ō mātou mātua ki a koe, kua waiho hei kānga mā te ahi, mōtī iho ā mātou mea matenui katoa.
ISA 64:12 Ka whakamanawanui rānei koe, e Ihowā, ki ēnei mea? Ka whakarongo puku rānei koe? Ka nui rawa rānei tāu whakatupukino i a mātou?
ISA 65:1 “E rapua ana ahau e te hunga kīhai nei i ui ki ahau; e kitea ana ahau e te hunga kīhai nei i kimi i ahau. I mea ahau, ‘Tēnei ahau, tēnei ahau,’ ki te iwi kīhai nei i karangatia tōku ingoa ki a rātou.
ISA 65:2 Tuwhera tonu ōku ringa i te rā roa nei ki te iwi tutū e haere nei i te ara kāhore i pai, e whai ana i ō rātou whakaaro ake,
ISA 65:3 ki te iwi he whakapātaritari tonu nei tā rātou ki ahau ki tōku aroaro, he patu whakahere i roto i ngā kāri, he tahu whakakakara ki runga ki ngā āta pereki;
ISA 65:4 e noho nei i ngā urupā, e moe ana i roto i ngā wāhi ngaro; e kai ana i te kikokiko poaka, ā, he hupa nō ngā mea whakarihariha kei roto i ā rātou oko.
ISA 65:5 Ko tā rātou kupu, ‘Tū atu, kaua e whakatata ki ahau; he tapu rawa hoki ahau i a koe!’ He paowa ēnei ki tōku ihu, he ahi e kā ana, ā pau noa te rā.
ISA 65:6 Nanā, kua oti te tuhituhi ki tōku aroaro: E kore ahau e whakarongo puku; āe rā, ka utua e ahau, ka utua ki roto ki ō rātou uma,
ISA 65:7 arā ō koutou kino, hui atu ki ngā kino o ō koutou mātua,” e ai tā Ihowā. “I tahu whakakakara nei ki runga ki ngā maunga, i whakaiti nei i ahau i runga i ngā pukepuke; mō reira ka mātua mēhuatia atu e ahau tā rātou mahi ki tō rātou uma.”
ISA 65:8 Ko te kupu tēnei a Ihowā: “Ka rite ki te wāina hou e kitea ana i roto i te tautau, ā, ka kīia, ‘Kaua e whakakorea, he manaaki hoki kei roto,’ ka pērā anō tāku e mea ai, he whakaaro ki āku pononga, kei kore rātou katoa.
ISA 65:9 Ka whakaputaina ake anō e ahau he uri i roto i a Hākopa, i roto hoki i a Hūrā, he tangata mōna nei āku maunga; ka riro anō a reira i āku i whiriwhiri ai, ka noho āku pononga ki reira.
ISA 65:10 Ā, hei puninga hipi a Harono, hei tāpapatanga te raorao i Ākoro mō ngā kau a tāku iwi i rapu nei i ahau.
ISA 65:11 “Ko koutou ia kua whakarere i a Ihowā, kua wareware ki tōku maunga tapu, kua whakapaia e koutou he tēpu mā Kara, whakakīia ana e koutou he ringihanga ki a Meni;
ISA 65:12 ka tukua atu koutou e ahau mā te hoari, ka tuohu koutou katoa, ka tukitukia; nō te mea i karanga ahau, ā, kīhai koutou i whakaō mai. I kōrero ahau, ā, kīhai koutou i whakarongo. Heoi, mahia ana e koutou te kino ki tāku tirohanga, whiriwhiria ana e koutou te mea kīhai i paingia e ahau.”
ISA 65:13 Nā, ko te kupu tēnei a te Ariki, a Ihowā: “Nanā, ko āku pononga, ka kai rātou, ko koutou ia ka matekai; nanā, ko āku pononga, ka inu rātou, ko koutou ia ka matewai; nanā, ko āku pononga, ka koa rātou, ko koutou ia ka whakamā.
ISA 65:14 Nanā, ko āku pononga, ka waiata rātou he koa nō te ngākau, ko koutou ia ka tangi i te pōuri o te ngākau, ka auē i te marū o te wairua.
ISA 65:15 Ā, ka waiho anō e koutou tō koutou ingoa hei kanga mā āku i whiriwhiri ai, ā, ka whakamatea koutou e te Ariki, e Ihowā, ka huaina hoki e ia he ingoa kē ki āna pononga.
ISA 65:16 Kia waiho te tangata e manaaki ana i a ia anō i te whenua, māna ia e manaaki i runga i te Atua o te pono; ko te tangata hoki e oati ana i te whenua, ko te Atua o te pono hei oati māna. Nō te mea ka warewaretia ngā raru o mua, ā, nō te mea kei te huna atu i ōku kanohi.”
ISA 65:17 “Tēnei hoki ahau kei te hanga ngā rangi hou, i te whenua hou. E kore anō ō mua e maharatia, e kore anō puta ake ki te ngākau.
ISA 65:18 Engari kia koa koutou, kia whakamanamana ki tāku e hanga nei ake ake; nō te mea tēnei ahau te hanga nei i Hiruhārama hei whakamanamananga, i tōna iwi anō hei koanga ngākau.
ISA 65:19 Ka whakamanamana anō ahau ki Hiruhārama, ka koa ki tāku iwi; e kore anō e rangona i muri te reo e tangi ana, te reo e auē ana i roto i a ia.
ISA 65:20 “Kāhore ō reira kōhungahunga he torutoru nei ōna rā ake ake, kāhore he koroheke kīhai i rite ōna rā; nō te mea kotahi rau ngā tau o te taitamariki tōna matenga; ko te tangata hara ia, kotahi rau nei ōna tau, he mea kanga.
ISA 65:21 Ka hanga whare anō rātou, nohoia iho; ka whakatōkia he māra wāina, ka kainga anō ngā hua.
ISA 65:22 E kore e hangā e rātou hei nohoanga iho mō te tangata kē, e kore e whakatōkia hei kai mā tētahi atu tangata. Nō te mea ka rite ngā rā o tāku iwi ki ngā rā o te rākau, ā, ka roa āku i whiriwhiri ai e āhuareka ana ki te mahi a ō rātou ringa.
ISA 65:23 E kore rātou e māuiui noa, e kore e whānau hei mate; nō te mea he uri rātou nō a Ihowā i manaaki ai, rātou tahi anō ko tā rātou whānau.
ISA 65:24 Kāhore anō rātou kia karanga noa, kua whakaō atu ahau; i a rātou anō e kōrero ana, ka rongo ahau.
ISA 65:25 Ko te wuruhi, ko te reme, ka kai tahi rāua; ko te raiona, ka rite ki te kau, ka kai kakau wīti; ko te nākahi, ko te puehu hei kai māna. E kore rātou e tūkino, e whakamate, puta noa i tōku maunga tapu,”
ISA 66:1 Ko te kupu tēnei a Ihowā: “Ko te rangi tōku torōna, ko te whenua tōku tūranga waewae. Kei hea te whare ka hangā nei e koutou mōku? Kei hea hoki te wāhi hei okiokinga mōku?
ISA 66:2 Ko ēnei mea katoa hoki he mea hanga nā tōku ringa, ā, nā konā ēnei mea katoa i oti ai,” e ai tā Ihowā; “Ko tēnei ia tāku e titiro ai, ko te tangata e iti ana, kua marū te wairua, ā, e wiri ana ki tāku kupu.
ISA 66:3 “Ko te tangata e patu ana i te kau, me te mea e tukituki ana i te tangata; te tangata he reme nei tāna patunga tapu, me te mea he kakī kurī e pōutoa ana e ia; te tangata e whakaeke ana i te whakahere, me te mea e whakaeke ana i te toto poaka; te tangata e tahu ana i te whakakakara, me te mea e manaaki ana i te whakapakoko. Āe rā, kua whiriwhiria e rātou ō rātou ara, e āhuareka ana hoki tō rātou wairua ki ā rātou mea whakarihariha.
ISA 66:4 Ka whiriwhiria anō e ahau ō rātou whakaaro horihori, ā, ka kawea a rātou i wehi ai ki runga ki a rātou. Nō te mea i karanga ahau, ā, kīhai tētahi i whakaō mai, i kōrero ahau, ā, kīhai rātou i rongo; heoi mahia ana e rātou te kino i tāku tirohanga, ā, whiriwhiria ana e rātou te mea kīhai i paingia e ahau.”
ISA 66:5 Whakarongo ki te kupu a Ihowā, e te hunga e wiri ana ki tāna kupu: “Ko ō koutou tuākana i kino rā ki a koutou, i pei rā i a koutou, he whakaaro ki tōku ingoa i mea, ‘Kia whakakorōriatia a Ihowā, kia kite hoki mātou i tō koutou koa!’ Nā, ka whakamā rātou.
ISA 66:6 He reo, he ngangau, kei te pā, he reo kei te temepara, ko te reo o Ihowā e whakautu ana i ōna hoariri.
ISA 66:7 “Kīanō ia i whakamamae, kua whānau; kīanō i pā ōna mamae, kua whānau he tāne.
ISA 66:8 Ko wai i rongo i te pēnei? Ko wai i kite i ngā mea pēnei? E whakamamae rānei te whenua i te rā kotahi? E whānau rānei te iwi i te meatanga kotahi? Whakamamae kau hoki a Hiona, kua whānau āna tama.
ISA 66:9 Tērā rānei e meinga e ahau kia taka te ara, ā, kia kaua e whānau?” e ai tā Ihowā. “Ka meinga rānei e ahau kia whānau, ā, kopia iho te kōpū?” e ai tā tōu Atua.
ISA 66:10 “Kia koa tahi me Hiruhārama, whakamanamana ki a ia, e te hunga katoa e aroha ana ki a ia; kia hari tahi me ia, kia hari, e te hunga katoa e tangi ana ki a ia.
ISA 66:11 He mea hoki ka ngote koutou, ā, ka mākona i te ū, arā i āna whakamārie, he mea hoki ka whakatete koutou, ā, ka ora te ngākau i te nui o tōna korōria.”
ISA 66:12 Ko te kupu hoki tēnei a Ihowā: “Nanā, ānō he awa te rangimārie ka horahia atu e ahau ki a ia; ānō he waipuke te korōria o ngā tauiwi; ko reira koutou ngote ai; ka hikitia koutou ki ōna kaokao, ka poipoia ki ōna turi.
ISA 66:13 Ka rite anō hoki ki te tangata e whakamārietia ana e tōna whaea, ka whakamārie anō ahau ki a koutou; ka whai whakamārietanga anō koutou i roto i Hiruhārama.”
ISA 66:14 Ka kite koutou i tēnei, ka koa ō koutou ngākau; ko ō koutou wheua, koia anō kei te otaota te tupu; ā, ka mōhiotia te ringa o Ihowā ki āna pononga, tōna riri ki ōna hoariri.
ISA 66:15 Nanā, ka haere mai a Ihowā me te ahi, ko ōna hāriata koia anō kei te tūkauati; ki te tuku i tōna riri i runga i te weriweri, i tāna whakatūpehupehu i roto i ngā mura ahi.
ISA 66:16 Nō te mea he ahi tā Ihowā, me tāna hoari anō, ina totohe ia ki ngā kikokiko katoa, ka tokomaha anō ngā tūpāpaku a Ihowā.
ISA 66:17 “Ko te hunga e whakatapu ana i a rātou, e pure ana i a rātou i ngā kāri, e whai ana i tētahi i waenganui, ko te hunga e kai ana i te kikokiko poaka, i te mea whakarihariha, i te kiore, ka pau ngātahi rātou, e ai tā Ihowā.
ISA 66:18 “E mōhio ana hoki ahau ki ā rātou mahi, ki ō rātou whakaaro. Tēnei ake ka huihuia e ahau ngā iwi katoa, ngā reo, ā, ka haere mai rātou, ka kite i tōku korōria.
ISA 66:19 “Ka meinga anō e ahau he tohu ki roto i a rātou, ka ungā anō e ahau ō rātou mōrehu ki ngā iwi, ki Tarahihi, ki Puru, ki Ruru, ki te hunga kukume kōpere, ki Tūpara, ki Iawana, ki ngā motu i tawhiti kīhai nei i rongo ki tōku rongo, kīhai anō i kite i tōku korōria; ā, ka whakaaturia e rātou tōku korōria i roto i ngā tauiwi.
ISA 66:20 Ka kawea mai anō e rātou ō koutou tēina katoa i roto i ngā iwi katoa hei whakahere ki a Ihowā, i runga i te hōiho, i te hāriata, i te amo, i te muera, i te kāmera tere, ki tōku maunga tapu ki Hiruhārama,” e ai tā Ihowā; “ka rite ki tā ngā tama a Īharaira e kawe nei i te whakahere i roto i te oko mā ki te whare o Ihowā.
ISA 66:21 Ka tango hoki ahau i ētahi o rātou hei tohunga, hei Rīwaiti,” e ai tā Ihowā.
ISA 66:22 “Ka rite hoki ki te rangi hou, ki te whenua hou, ka hangā nei e ahau, ā, ka pūmau tonu ki tōku aroaro, e ai tā Ihowā; ka pērā te pūmau o tō koutou uri, o tō koutou ingoa.
ISA 66:23 Ā tēnei ake ka haere mai ngā kikokiko katoa i tēnei marama, i tēnei marama, i tēnei hāpati, i tēnei hāpati, ki te koropiko ki tōku aroaro,” e ai tā Ihowā.
ISA 66:24 “Ā, ka haere atu rātou, ka mātakitaki ki ngā tinana o ngā tāngata i hē nei ki ahau; e kore hoki tō rātou kutukutu e mate, e kore anō tō rātou ahi e tineia, ā, hei mea whakarihariha rātou ki ngā kikokiko katoa.”
JER 1:1 Ko ngā kupu a Heremaia tama a Hirikia, ko ia nei tētahi o ngā tohunga i Anatoto i te whenua o Pineamine.
JER 1:2 I puta nei ki a ia te kupu a Ihowā i ngā rā o Hōhia tama a Amono, kīngi o Hūrā, i te tekau mā toru o ngā tau o tōna kīngitanga.
JER 1:3 I puta anō hoki i ngā rā o Iehoiakimi tama a Hōhia kīngi o Hūrā, ā taka noa te tekau mā tahi o ngā tau o Terekia tama a Hōhia kīngi o Hūrā, taea noatia te whakaraunga o Hiruhārama i te rima o ngā marama.
JER 1:4 Nā, i puta te kupu a Ihowā ki ahau, i mea,
JER 1:5 “Kīanō koe i hangā e ahau i roto i te kōpū, kua mōhio ahau ki a koe, ā, kīanō koe i puta mai i te puku, kua whakatapua koe e ahau; kua whakaritea koe e ahau hei poropiti ki ngā iwi.”
JER 1:6 Nā, ka mea ahau, “Auē, e Ihowā, e te Atua, nanā, kāhore e taea e ahau te kōrero, he tamariki nei hoki ahau.”
JER 1:7 Anō rā ko Ihowā ki ahau, “Kaua e mea, ‘He tamariki ahau.’ Nō te mea, ahakoa ko wai te hunga e ungā atu ai koe e ahau, me haere tonu koe, me kōrero hoki e koe ngā mea katoa e whakahaua e ahau ki a koe.
JER 1:8 Kaua e wehi i a rātou; kei a koe hoki ahau hei whakaora i a koe,” e ai tā Ihowā.
JER 1:9 Nā, ka totoro mai te ringa o Ihowā, ā, ka pā ki tōku māngai; ā, ka mea a Ihowā ki ahau, “Nanā, kua hoatu nei e ahau āku kupu ki tōu māngai.
JER 1:10 Titiro, nō tēnei rā i meinga ai koe e ahau hei whakatakoto tikanga ki ngā iwi, ki ngā kīngitanga, hei unu atu, hei wāhi iho, hei whakangaro, hei turaki iho, hei hanga, hei whakatō.”
JER 1:11 I puta mai anō te kupu a Ihowā ki ahau, i mea, “He aha te mea e kite nā koe, e Heremaia?” Anō rā ko ahau, “He peka aramona tāku e kite nei.”
JER 1:12 Anō rā ko Ihowā ki ahau, “Ka pai tāu tirohanga atu; nō te mea ka tirohia e ahau tāku kupu, ka mahia.”
JER 1:13 Nā, ko te rua o ngā putanga mai o te kupu a Ihowā ki ahau; i mea ia, “He aha te mea e kite nā koe?” Anō rā ko ahau, “He kōhua e koropupū ana tāku e kite nei, ā, ko tōna mata e anga mai ana i te raki.”
JER 1:14 Nā, ka mea a Ihowā ki ahau: “Ka puta mai i te raki he kino mō ngā tāngata katoa o te whenua.
JER 1:15 Tēnei hoki ahau te karanga nei ki ngā hapū katoa o ngā kīngitanga o te raki,” e ai tā Ihowā. “Ā, ka haere mai rātou, ka whakatū i tōna torōna, i tōna torōna, ki te tomokanga i ngā kūwaha o Hiruhārama, ki ōna taiepa katoa, ā, karapoi noa, ki ngā pā katoa anō o Hūrā.
JER 1:16 Ka puaki anō i ahau āku whakawākanga ki a rātou mō ō rātou kino katoa; mō rātou i whakarere i ahau, i tahu whakakakara ki ngā atua kē, i koropiko ki ngā mahi a ō rātou ringa.
JER 1:17 “Nā, ko koe, whītikiria tōu hope, whakatika, kōrerotia ki a rātou ngā mea katoa e whakahaua e ahau ki a koe. Aua e wehi i a rātou, kei meinga koe e ahau kia numinumi kau ki tō rātou aroaro.
JER 1:18 Nō te mea hoki kua meinga koe e ahau i tēnei rā hei pā taiepa, hei pou rino, hei taiepa parāhi ki te whenua katoa, ki ngā kīngi o Hūrā, ki ōna rangatira, ki ōna tohunga, ki te iwi anō o te whenua.
JER 1:19 Ā, ka whawhai rātou ki a koe, otirā e kore koe e taea e rātou; nō te mea kei a koe ahau,” e ai tā Ihowā, “hei whakaora i a koe.”
JER 2:1 I puta anō te kupu a Ihowā ki ahau, i mea:
JER 2:2 “Haere, karanga ki ngā taringa o Hiruhārama, mea atu, Ko te kupu tēnei a Ihowā: E mahara ana ahau ki a koe, ki te mahi pai a tōu tamarikitanga, ki te aroha i tōu mārenatanga, i a koe i aru i ahau i te koraha, i te whenua kīhai i whakatōkia.
JER 2:3 He tapu a Īharaira ki a Ihowā, ko ngā mātāmua ia o ōna hua. Ko te hunga katoa e kai ana i a ia, ka kīia he hē tā rātou; ka pā te kino ki a rātou,”
JER 2:4 Whakarongo ki te kupu a Ihowā, e te whare o Hākopa, e ngā hapū katoa o te whare o Īharaira.
JER 2:5 Ko te kupu tēnei a Ihowā: “He aha tāku kino i mau i ō koutou mātua, i matara atu ai rātou i ahau, i whai ai rātou i te horihori, ā, horihori iho rātou?
JER 2:6 Kāhore hoki ā rātou kīanga ake, ‘Kei hea a Ihowā, nāna nei tātou i kawe mai i te whenua o Īhipa, nāna nei tātou i ārahi i te koraha, i te whenua tītōhea, he maha nei ngā rua, i te whenua o te matewai, o te ātārangi o te mate, i te whenua kīhai i haerea e te tangata, kīhai anō i nohoia e te tangata?’
JER 2:7 Ā, nāku koutou i kawe mai ki te whenua maha ōna hua, ki te kai i ōna hua, i ōna mea papai. Nā, i tō koutou taenga mai, kei te whakapoke i tōku whenua, meinga ana e koutou tōku wāhi tupu hei mea whakarihariha.
JER 2:8 Kāhore ngā tohunga i kī, ‘Kei hea a Ihowā?’ Ko ngā kairahurahu o te ture, kāhore i mātau ki ahau; kua hē hoki ngā rangatira ki ahau; ko ngā poropiti, nā Paara ngā tikanga i poropiti ai rātou, whāia ana e rātou ngā mea kāhore nei he pai.
JER 2:9 “Mō reira ka totohe anō ahau ki a koutou,” e ai tā Ihowā, “ka totohe hoki ahau ki ngā tama a ā koutou tama.
JER 2:10 Tēnā rā, whiti atu ki ngā motu o Kitimi titiro ai; unga tāngata anō ki Kerara, ka whakaaroaro mārie; tirohia hoki mehemea tērā anō te rite o tēnei mea i mua.
JER 2:11 I whakaputaia kētia rānei ōna atua e tētahi iwi, ehara nei anō i te atua? Nā, ko tōku iwi, kua whakaputaina kētia e rātou tō rātou korōria hei mea kāhore ōna pai.
JER 2:12 Mīharo mai, e ngā rangi, ki tēnei, kia nui hoki te wehi, kia ngaro noa iho,”
JER 2:13 “Ka rua hoki ngā hē kua mahia nei e tāku iwi: Ko ahau, ko te puna o ngā wai ora kua mahue i a rātou, haua iho e rātou ētahi poka, he poka pakaru, e kore nei e mau te wai ki roto.
JER 2:14 He pononga rānei a Īharaira? He pononga i whānau ki te whare? He aha ia i waiho ai hei pāhuatanga?
JER 2:15 Kua ngengere ngā raiona kūao ki a ia, kua hāmama; ā, kua meinga e rātou tōna whenua kia ururua; kua tahuna ōna pā, kāhore hoki he tangata noho i reira.
JER 2:16 I pakaru anō tōu tumuaki i ngā tamariki o Nopo, o Tahapanehe.
JER 2:17 He teka ianei nāu anō tēnei i mahi ki a koe, i te mea nāu i whakarere a Ihowā, tōu Atua, i a ia e ārahi ana i a koe i te ara?
JER 2:18 Tēnā rā ko te aha māu i te ara ki Īhipa i inu ai koe i ngā wai o Hihoro? He aha rānei māu i te ara ki Ahiria, i inu ai koe i ngā wai o te awa?
JER 2:19 Ko tōu hē anō hei riri i tāu, ko ōu tahuritanga kētanga anō hei papaki i a koe. Kia mōhio koe, kia kite hoki, he mea kino, he mea kawa, kei tāu whakarerenga i a Ihowā, i tōu Atua, kāhore hoki ōu wehi ki ahau,”
JER 2:20 “I wāhia hoki tōu ioka e ahau i mua, motumotuhia ana e ahau ōu here; ā, kī mai ana koe, ‘E kore ahau e mahi!’ Heoi, i runga koe i ngā pukepuke tiketike katoa, i raro hoki i ngā rākau kōuru nui katoa, e koropiko ana, e kairau ana.
JER 2:21 He wāina pai anō koe i tāku whakatōkanga i a koe, he momo pai katoa. Nā te aha koe i puta kē ai ki ahau, he mea kua heke te tupu, he wāina kē?
JER 2:22 Ahakoa i horoi koe i a koe ki te hōura, ā, nui noa tāu hopi, e mau ana anō tōu hē ki tōku aroaro,”
JER 2:23 “He pēhea tāu kī, ‘Kāhore ōku poke, kīhai ahau i whai i a Paarimi’? Tirohia iho ōu ara i te raorao, kia mōhio ki āu mahi – tōu rite, kei te kāmera tere, kōpikopiko tonu ōna ara;
JER 2:24 kei te kāihe mohoao kua mōhio ki te koraha, e hongi ana i te hau mō tōna hiahia; ka matenui ia ko wai hei whakahoki i a ia? Ko te hunga katoa e rapu ana i a ia e kore e whakangenge noa i a rātou; i tōna marama anō ka kitea ia e rātou.
JER 2:25 Kaiponuhia tōu waewae, kei kore te hū, tōu korokoro hoki kei mate i te wai. Nā, kei te mea koe, ‘Kua hē! Kāhore; he tāngata kē hoki āku i aroha ai, ā, ko rātou tāku e whai ai.’
JER 2:26 “Ka whakamā te tāhae ina mau, ka pēnā anō te whare o Īharaira, ka whakamā – rātou ko ō rātou kīngi, ko ō rātou rangatira, ko ō rātou tohunga, ko ō rātou poropiti.
JER 2:27 I a rātou e mea nā ki te rākau, ‘Ko koe tōku pāpā,’ ki te kāmaka, ‘I whānau ahau i roto i a koe.’ Hurihia ake e rātou ko te kōhamo ki ahau, kāhore hoki te aroaro; heoi i te wā e hē ai rātou, ka kī mai rātou, ‘Whakatika ki te whakaora i a mātou.’
JER 2:28 Kei hea rā ōu atua i hangā e koe mōu? Kia whakatika rātou, ki te mea ka ora koe i a rātou i te wā e hē ai koe. Rite tonu hoki ki ōu pā te maha o ōu atua, e Hūrā.
JER 2:29 “He aha te mea e totohe ai koutou ki ahau? Kua mahi kē koutou katoa i te kino ki ahau,”
JER 2:30 “Maumau whiu noa ahau i ā koutou tamariki; kīhai rātou i ākona. Ko tā koutou hoari nāna i kai ō koutou poropiti, i pērā anō me tā te raiona kai kino.
JER 2:31 “E te whakatupuranga nei, whakaaroa te kupu a Ihowā! He koraha rānei ahau ki a Īharaira, he whenua pōuri kerekere? He aha tāku iwi i mea ai, ‘Kua matara mātou; heoi anō ō mātou taenga atu ki a koe’?
JER 2:32 E wareware rānei te kōtiro ki āna whakapaipai, te wahine mārena hou ki ōna whītiki? Ko tāku iwi ia kua wareware ki ahau, e kore ngā rā e taea te tatau.
JER 2:33 Tāu mahi ki te whakapai i tōu ara hei rapunga i te aroha! Nā, kei te whakaako koe i ngā wāhine kikino anō hoki ki ōu ara.
JER 2:34 Kua kitea anō ki ngā remu o ōu kākahu te toto o ngā wairua o ngā ware harakore. Kīhai i kitea e ahau i te wāhi i pakaru ai, engari i runga i ēnei katoa.
JER 2:35 Heoi, kei te kī nā koe, ‘He harakore nei ahau; he pono e tahuri kē atu ana tōna riri i ahau.’ Nanā, ka whakawā ahau i a koe, mō tāu kīanga, ‘Kāhore ōku hara.’
JER 2:36 He aha koe i kōpikopiko rawa ai, i mea ai kia pōkaia kētia he ara mōu? Ka whakamā anō koe ki Īhipa, ka pērā me koe i whakamā rā ki Ahiria.
JER 2:37 Inā, ka haere atu anō koe i reira, i runga anō ōu ringa i tōu mātenga, nō te mea kua paopao a Ihowā ki ōu whakawhirinakitanga, e kore anō koe e whai wāhi i ēnā.”
JER 3:1 “E kōrerotia ana, ki te whakarērea e te tangata tāna wahine, ā, ka haere atu ia i tōna taha, ka riro i te tāne kē, e hoki anō rānei ia ki a ia? E kore ianei taua whenua e poke rawa? Ko koe ia kua kairau ki ngā hoa tokomaha; nā, hoki mai ki ahau,”
JER 3:2 “Kia ara ōu kanohi ki ngā pukepuke moremore, tirohia! Ko tēhea te wāhi i kore ai koe e pūremutia? Nohoia atu ana rātou e koe i ngā ara, pērā ana me te Arāpi i te koraha; ā, poke iho i a koe te whenua i ōu kairautanga, i tāu mahi kino.
JER 3:3 Nā reira i kaiponuhia ai ngā ua, kāhore hoki he ua ō muri. Engari, he rae tōu nō te wahine kairau, e whakakāhore ana ki te whakamā.
JER 3:4 E kore ianei koe e karanga ki ahau i ngā wā ā muri nei, ‘E tōku pāpā, ko koe te kaiārahi o tōku taitamarikitanga,
JER 3:5 e mau rānei tōna riri ā ake ake? E whakapūmautia tonutia rānei e ia?’ Nanā, kua kōrerotia e koe, kua mahia ngā mea kino, kua rite ki tāu.”
JER 3:6 I kī mai anō a Ihowā ki ahau i ngā rā o Kīngi Hōhia, “Kua kite rānei koe i ngā mahi a Īharaira tahuri kē? Kua haere ia ki runga ki ngā maunga tiketike katoa, ki raro i ngā rākau kōuru nui katoa, ki reira kairau ai.
JER 3:7 I mea anō ahau i muri i tāna meatanga i ēnei mea katoa, ‘Ka hoki mai ia ki ahau’; heoi kīhai ia i hoki mai, me te titiro anō tōna tuakana tinihanga, a Hūrā.
JER 3:8 Ā, i kite ahau, i tāku peinga atu i a Īharaira tahuri kē mō taua take nei anō, mō tōna pūremutanga, ā, i tāku hoatutanga he pukapuka whakarere ki a ia, nā, kīhai tōna tuakana, a Hūrā tinihanga i wehi; heoi haere ana anō ia, kairau ana.
JER 3:9 Nā, ko te otinga, kua poke te whenua i te rongo o tōna pūremutanga, pūremu ana ia ki te kōhatu, ki te rākau.
JER 3:10 Nā, ahakoa ko tēnei katoa, kīhai i whakapaua te ngākau o tōna tuakana tinihanga, o Hūrā, ki te hoki ki ahau; he hoki teka kau ia,” e ai tā Ihowā.
JER 3:11 Nā, ka mea a Ihowā ki ahau, “Ā Īharaira tahuri kē, nui atu tāna whakatika i a ia i tā Hūrā, i tā te mea tinihanga.
JER 3:12 Haere, karangatia ēnei kupu whaka te raki, mea atu: ‘Hoki mai, e Īharaira tahuri kē,’ e ai tā Ihowā. ‘E kore ahau e mea i tōku riri kia tau ki a koutou; he atawhai hoki ahau,’ e ai tā Ihowā; ‘e kore ahau e mauāhara tonu.
JER 3:13 Whākina kautia tōu hē, arā kua kino koe ki a Ihowā, ki tōu Atua, kua whakamararatia atu e koe ōu ara ki ngā tāngata kē i raro i ngā rākau kōuru nui katoa, kīhai anō i rongo ki tōku reo,’ ”
JER 3:14 “Hoki mai, e ngā tamariki tahuri kē,” e ai tā Ihowā; “kua mārenatia hoki koutou e ahau; ā, ka tangohia koutou e ahau, tētahi i roto i te pā, tokorua hoki i roto i te hapū, ka kawea anō koutou e ahau ki Hiona.
JER 3:15 Ā, ka hoatu e ahau he hēpara mō koutou, ko āku i pai ai, ka whāngaia anō koutou e rātou ki te mātauranga, ki te whakaaro pai.
JER 3:16 Ā tēnei ake, ina nui, ina hua koutou ki te whenua i aua rā,” e ai tā Ihowā, “heoi anō ā rātou kīanga ake, ‘Ko te āka o te kawenata a Ihowā.’ E kore anō e puta ake ki te ngākau; e kore hoki e maharatia taua mea e rātou, e kore anō rātou e hāereere ki reira, kāhore hoki he mahinga pērā i muri iho.
JER 3:17 I taua wā ka kīia e rātou a Hiruhārama, ko te torōna o Ihowā; ā, ka huihuia ngā iwi katoa ki reira, ki te ingoa o Ihowā, ki Hiruhārama; ā, heoi anō tō rātou haere i runga i te mārō o ō rātou ngākau kino.
JER 3:18 I aua rā ka haere tahi te whare o Hūrā rāua ko te whare o Īharaira, ka huihuia anō tō rātou haere mai i te whenua i te raki, ki te whenua i hoatu e ahau hei kāinga tupu ki ō koutou mātua.
JER 3:19 “I mea anō ahau, ‘Me pēhea e oti ai koe te whakauru e ahau ki ngā tamariki, e hoatu ai e ahau ki a koe he whenua e minaminatia ana, he kāinga tupu, he wāhi ātaahua nō ngā mano o ngā iwi?’ I mea anō ahau, ka karangatia ahau e koe, ‘E tōku pāpā,’ e kore anō koe e tahuri atu i te whai i ahau.
JER 3:20 Rite rawa ki tā te wahine i whakarere tinihanga i tāna tahu tā koutou mahi tinihanga ki ahau, e te whare o Īharaira,”
JER 3:21 E rangona ana he reo i runga i ngā puke moremore, ko te tangi, ko ngā īnoi hoki a ngā tama a Īharaira; mō rātou i whakaparori kē i tō rātou ara, wareware ake i a rātou a Ihowā, tō rātou Atua.
JER 3:22 “Hoki mai, e ngā tamariki tahuri kē, māku e rongoā ō koutou tahuritanga kētanga. “Tēnei mātou te haere atu nei ki a koe; ko koe hoki a Ihowā, tō mātou Atua.
JER 3:23 He pono, he hori kau te āwhina e tāria ana mai i ngā pukepuke, te ngē i runga i ngā maunga. Tika rawa kei a Ihowā, kei tō tātou Atua te whakaora mō Īharaira.
JER 3:24 Kua pau hoki i te mea whakamā te māuiui o ō tātou mātua, nō tō tātou tamarikitanga ake anō; ā rātou hipi, ā rātou kau, ā rātou tama, me ā rātou tamāhine.
JER 3:25 Takoto tātou i roto i tō tātou whakamā, mā tō tātou matangerengere tātou e hīpoki. Kua hara hoki tātou ki a Ihowā, ki tō tātou Atua, tātou ko ō tātou mātua, nō tō tātou tamarikitanga ake anō ā mohoa noa nei; kīhai hoki tātou i rongo ki te reo o Ihowā, o tō tātou Atua.
JER 4:1 “Ki te mea ka hoki mai koe e Īharaira,” e ai tā Ihowā, “hoki mai ki ahau; ki te whakarērea anō e koe āu mea whakarihariha i tōku aroaro, e kore koe e riro kē,
JER 4:2 ka oati anō koe, ‘Kei te ora a Ihowā,’ i runga i te pono, i te whakawā pai, i te tika, māna hoki ngā iwi ka whakapai ai ki a rātou anō, ka whakamanamana anō rātou ki a ia.”
JER 4:3 Ko te kupu hoki tēnei a Ihowā ki ngā tāngata o Hūrā, ā, ki Hiruhārama: “Ngakia tā koutou pātohe; kaua hoki e whakatō ki roto ki ngā tātarāmoa.
JER 4:4 Kotia hoki koutou, hei mea ki a Ihowā, whakarērea hoki ngā kiri matamata o ō koutou ngākau, e ngā tāngata o Hūrā, e te hunga anō e noho ana i Hiruhārama; kei puta tōku riri ānō he ahi, kei mura, ā, kāhore e tineia, mō te kino hoki o ā koutou mahi.”
JER 4:5 “Karangatia i roto i a Hūrā, kia rongo a Hiruhārama, mea atu: ‘Whakatangihia te tētere ki te whenua!’ Karanga, mea atu; ‘Whakamine mai, tātou ka haere ki ngā pā taiepa!’
JER 4:6 Whakaarahia te kara ki te ritenga o Hiona, pūtere atu koutou, kaua e tū; nō te mea ka kawea mai e ahau he kino i te raki, he whatīanga nui.”
JER 4:7 Kei te haere mai he raiona i tōna urupuia rākau, kei te ara anō he kaiwhakangaro mō ngā tauiwi; kei te ara ia, kua puta mai ia i tōna wāhi; hei whakangaro i tōu whenua, hei mea i ōu pā kia ururua; kāhore he tangata hei noho.
JER 4:8 Mō konei whītikiria he kākahu taratara ki a koutou, e tangi, auē: Nō te mea kāhore te muranga o tō Ihowā riri e tahuri atu i a tātou.
JER 4:9 “I taua rā,” e ai tā Ihowā, “ka pirau te ngākau o te kīngi, me te ngākau o ngā rangatira; ā, ka mīharo ngā tohunga, ā, ko ngā poropiti ketekete kau ana.”
JER 4:10 Anō rā ko ahau, “Auē, e te Ariki, e Ihowā, kua pōhēhē rawa i a koe tēnei iwi, a Hiruhārama anō, i te kupu nei, ‘Ka mau te rongo ki a koutou.’ Tēnā ia, kua pā te hoari ki te wairua.”
JER 4:11 I taua wā ka kōrerotia ki tēnei iwi, ki Hiruhārama anō, “He hau wera nō ngā wāhi tiketike i te koraha e tika mai ana ki te tamāhine a tāku iwi, ehara i te mea hei pōwhiriwhiri, hei tahi rānei –
JER 4:12 he hau tōtōpū nō aua wāhi ka tae mai ki ahau. Ākuanei ahau whakapuaki ai i te whakawā mō rātou.”
JER 4:13 Nanā, ko tōna haerenga mai ka rite ki ngā kapua, rite tonu anō ōna hāriata ki te tūkauati; he tere rawa ōna hōiho i te ēkara – auē, te mate mō tātou, kei te pāhuatia hoki tātou!
JER 4:14 Horoia atu te kino o tōu ngākau e Hiruhārama, kia ora ai koe. Kia pēhea te roa o te noho o ōu whakaaro kino i roto i a koe?
JER 4:15 Nō te mea e whakaatu mai ana he reo i Rāna, e mea ana hoki i te kino kia rangona i Maunga Ēparaima.
JER 4:16 “Kōrero ki ngā iwi; nanā, kia rangona te hē mō Hiruhārama: ‘Kei te haere mai he kaitiaki i te whenua tawhiti, ka puaki tō rātou reo mō ngā pā o Hūrā.
JER 4:17 Ko tā rātou ki a ia rite tonu ki tā ngā kaitiaki o te māra i tētahi taha, i tētahi taha, mōna i tutū ki ahau,’ ”
JER 4:18 “Nā tōu ara, nā āu mahi, ēnei i pā ai ki a koe; nōu tēnei hē; he kawa hoki, kua pā hoki ki tōu ngākau.”
JER 4:19 Ōku whēkau, ōku whēkau! Mamae pū a roto o tōku ngākau, oho ana tōku ngākau i roto i ahau; e kore ahau e whakarongo puku; kua rongo hoki koe, e tōku wairua, ki te tangi o te tētere, ki te hāmama o te whawhai.
JER 4:20 He ngaromanga hono iho ki te ngaromanga te karangatia nei; kua pāhuatia katoatia hoki te whenua; kitea rawatia ake kua pāhuatia ōku tēneti, mea kau iho ko ōku kākahu ārai.
JER 4:21 Kia pēhea ake te roa ōku ka titiro nei ki te kara, ka rongo nei ki te tangi o te tētere?
JER 4:22 “He wairangi hoki tāku iwi, kāhore e mōhio ki ahau. He tamariki kūware, kāhore ō rātou mātauranga; e mōhio ana rātou ki te mahi kino, ki te mahi pai ia kāhore he mātauranga.”
JER 4:23 I titiro ahau ki te whenua, nā, kāhore he āhua, e takoto kau ana, ki ngā rangi anō, nā, kāhore ō reira mārama.
JER 4:24 I titiro ahau ki ngā maunga, nā, e ngāueue ana, ā, ko ngā pukepuke katoa e nekeneke haere ana.
JER 4:25 I titiro ahau, ā, kāhore he tangata, ā, ko ngā manu katoa o te rangi kua rere atu.
JER 4:26 I titiro ahau, nā, he koraha kau te māra mōmona, kua pakaru ōna pā katoa i te aroaro o Ihowā, i te muranga o tōna riri.
JER 4:27 Ko te kupu hoki tēnei a Ihowā: “Ka ururua katoa te whenua, otiia e kore e whakapaua rawatia e ahau.
JER 4:28 Mō konei ka tangi te whenua, ka mangu anō te rangi i runga; nō te mea kua kōrero nei ahau, kua takoto tōku whakaaro, ā, kāhore anō i puta kē tāku, e kore hoki ahau e tahuri atu i tēnā.”
JER 4:29 Ka whati katoa te pā i te ngangau o ngā hōia eke hōiho, o ngā kaikōpere; ka haere rātou ki roto ki ngā urupuia rākau, ka piki ki ngā kāmaka; ka mahue katoa ngā pā, kāhore hoki tētahi tangata e noho ki roto.
JER 4:30 Ā, ko koe, kia oti koe te pāhua, ka pēhea koe? Ahakoa kākahu noa koe i te ngangana, ahakoa whakapaipai noa koe i a koe ki ngā whakapaipai kōura. Ahakoa haehae noa koe i ōu kanohi, mea rawa ki te pukepoto, maumau mea noa koe i a koe kia ātaahua. Ka whakahāwea ki a koe te hunga i aroha ki a koe, ka whai kia mate koe.
JER 4:31 Kua rongo hoki ahau i te reo, me te mea nō te wahine e whānau ana, he mamae, me te mea ko tāna mātāmua e puta ana, ko te reo o te tamāhine a Hiona e whakahotuhotu ana, whewhera tonu ōna ringa, me te karanga, “Auē te mate i ahau! Kua hemo hoki tōku wairua i mua i ngā kaiwhakamate!”
JER 5:1 “E oma, kōpikopiko koutou i ngā ara o Hiruhārama, tirohia kia mōhio ai koutou. Rapua i ngā waharoa o reira, me kāhore e kite i tētahi tangata, mehemea tērā he tangata e whakarite pai ana, e rapu ana i te pono; ā, ka murua e ahau ngā hē o reira.
JER 5:2 Nā, ahakoa mea noa rātou, ‘Kei te ora a Ihowā,’ he pono he oati teka tā rātou.”
JER 5:3 He teka ianei, e Ihowā, kei runga ōu kanohi i te pono? I whiua rātou e koe, heoi kīhai i pōuri; mōtī iho rātou i a koe, heoi kāhore i pai kia anga mai ki te ako. Kua meinga e rātou ō rātou mata kia mārō atu i te kōhatu, kua kore e pai ki te hoki mai.
JER 5:4 Koia ahau i mea ai, “He pono he rawakore ēnei, he kūware, kāhore hoki rātou e mōhio ki te ara a Ihowā, ki te whakarite a tō rātou Atua.
JER 5:5 Ka haere ahau ki ngā tāngata rarahi, ka kōrero ki a rātou; e mōhio ana hoki rātou ki te ara a Ihowā, ki te whakarite a tō rātou Atua.” Heoi, ko ēnei, kotahi tonu rātou tahi nāna i wāwāhi te ioka, i motumotu hoki ngā here.
JER 5:6 “Mō reira ka whakamatea rātou e te raiona i roto i te ngahere, ka pāhuatia e te wuruhi o ngā ahiahi, ka tūteia ō rātou pā e te reparo, ko te hunga katoa e puta mai ki waho ka haehaea; he maha hoki ō rātou pokanga kētanga, nui haere ō rātou tahuritanga kētanga.
JER 5:7 “Me pēhea e murua ai e ahau tēnei hē ōu? Kua whakarere nei āu tama i ahau, oatitia ana e rātou ngā mea ehara nei i te atua. I tō rātou mākonatanga i tāku kai, nā, kei te pūremu, rōpū tonu rātou i roto i ngā whare o ngā wāhine kairau.
JER 5:8 Ko tō rātou rite kei te hōiho whāngai i te ata; e tangi ana ki te wahine a tōna hoa, a tōna hoa.
JER 5:9 E kore ianei ahau e whiu mō ēnei mea?” e ai tā Ihowā; “e kore ianei tōku wairua e rapu utu i te iwi pēnei?
JER 5:10 “Haere koutou ki runga ki ōna taiepa wāwāhi ai; otiia kaua e whakapaua rawatia; whakakāhoretia ōna pekerangi; ehara hoki ēnā i a Ihowā.
JER 5:11 He nui hoki te tinihanga o te whare o Īharaira rāua ko te whare o Hūrā ki ahau,”
JER 5:12 Kua whakakāhore rātou ki tā Ihowā, kua mea, “Ehara i a ia. E kore hoki te hē e tae mai ki a tātou; e kore anō tātou e kite i te hoari, i te hemokai.
JER 5:13 Ko ngā poropiti he hau kau, kāhore hoki he kupu i a rātou; ko ēnei mea ka pā ki a rātou.”
JER 5:14 Nā reira tēnei kupu a Ihowā, a te Atua o ngā mano: “Mō tā koutou kōrerotanga i tēnā kupu, tēnei ahau te mea nei i āku kupu i roto i tōu māngai hei ahi, ko tēnei iwi hoki hei rākau, ā, ka pau rātou.
JER 5:15 Tēnei ahau te kawe nei i tētahi iwi o tawhiti ki a koutou, e te whare o Īharaira,” e ai tā Ihowā. “He iwi kaha, he iwi nōnamata riro, he iwi kāhore nei koe e mōhio ki tōna reo, kāhore anō hoki e mārama ki tāna e kōrero ai.
JER 5:16 Ko tāna papa pere he urupā tuwhera, he tāngata mārohirohi katoa rātou.
JER 5:17 Ā, ka pau i a rātou āu hua e kotia ana, me tāu taro, ngā kai hei kainga mā āu tama, mā āu tamāhine; ka pau i a rātou āu hipi me āu kau; ka pau i a rātou āu wāina me āu piki; ka hautopea iho ki te hoari ōu pā taiepa, āu i whakawhirinaki ai.
JER 5:18 “Ahakoa i aua rā anō,” e ai tā Ihowā, “e kore e whakapaua rawatia tāku ki a koutou.
JER 5:19 Nā, ki te kī mai koutou ā mua, ‘He aha a Ihowā, tō tātou Atua i mea ai i ēnei mea katoa ki a tātou?’ Ko reira koe kī atu ai ki a rātou, ‘Ka pēnā i a koutou kua whakarere nā i ahau, kua mahi nā ki ngā atua kē i tō koutou whenua, waihoki ka mahi koutou ki ngā tāngata kē i te whenua ehara nei i a koutou.’
JER 5:20 Whakaaturia tēnei i roto i te whare o Hākopa, kia rangona anō i roto i a Hūrā; mea atu:
JER 5:21 Tēnā, whakarongo ki tēnei, e te iwi wairangi kāhore nei he ngākau, he kanohi nei ō rātou, heoi kāhore e kite, he taringa ō rātou, ā, kāhore e rongo.
JER 5:22 Kāhore rānei ō koutou wehi ki ahau? e ai tā Ihowā. E kore ianei koutou e hopohopo ki tōku aroaro? Nāku nei hoki i mea te onepū hei rohe ki te moana, he tikanga mau tonu, e kore anō e koni mai. Ahakoa ngana noa ōna ngaru, e kore e taea tā rātou; hāmama noa, e kore anō e koni mai.
JER 5:23 Ko tēnei iwi ia, he tutū, he whakakeke ō rātou ngākau; kua peka kē atu rātou, kua riro.
JER 5:24 Kāhore hoki ā rātou kīanga ake i roto i ō rātou ngākau, ‘Tēnā, kia wehi tātou ki a Ihowā, ki tō tātou Atua, ko ia nei te kaihōmai i te ua; i tō mua, i tō muri, i te wā e tika ai; nāna nei i mau ai ki a tātou ngā wiki i whakaritea mō te kotinga.’
JER 5:25 Nā ō koutou hē ēnei i puta kē ai, ko ō koutou hara anō hei kaiponu atu i te pai i a koutou.
JER 5:26 “E kitea ana hoki he hunga kino i roto i tāku iwi; titiro matatau mai ana rātou, me te mea he kaihopu manu e kūpapa ana; kei te whakatakoto māhanga rātou, kei te hopu tāngata.
JER 5:27 Kei te whare manu e kī ana i ngā manu te rite o ō rātou whare e kī tonu nei i te tinihanga; nā reira rātou i nui ai, i whai taonga ai,
JER 5:28 tetere tonu rātou, tōwahiwahi ana. Kua neke rawa ake tā rātou i ngā mahi a te hunga kino; ko te whakawā, ko te whakawā a te pani, kāhore i whakaritea e rātou, heoi kake tonu rātou; kāhore hoki e whakatikaia e rātou te whakawā a ngā rawakore.
JER 5:29 E kore rānei ahau e whai mahara ki ēnei mea?” e ai tā Ihowā. “E kore rānei tōku wairua e rapu utu i te iwi pēnei?
JER 5:30 “Whakamīharo rawa, whakawehi rawa te mea e meatia ana ki te whenua:
JER 5:31 e poropiti teka ana ngā poropiti; ā, e whakahaere ana ngā tohunga, ko tā rātou te tikanga; ā, pai tonu tāku iwi ki te pēnā. Nā, ka pēhea rā koutou i tōna tukunga iho?”
JER 6:1 “Putere atu, e ngā tama a Pineamine, i roto i Hiruhārama! Whakatangihia te tētere ki Tekoa, kōkiritia ake he ahi tohu ki Petehakereme. He kino hoki te titiro mai nei i te raki, he whakangaromanga nui.
JER 6:2 Ka tapahia atu e ahau te wahine ātaahua, te wahine whakatarapī, te tamāhine a Hiona.
JER 6:3 Ka haere mai ngā hēpara, me ā rātou kāhui ki a ia; ka whakatūria ō rātou tēneti ki tētahi taha ōna, ki tētahi taha; ka kai rātou ki tōna wāhi, ki tōna wāhi.
JER 6:4 “Kia rite ngā mea mō te whawhai ki a ia; whakatika, kia whakaekea i te poutūmārōtanga. Auē te mate mō tātou! Kua tāwharara hoki te rā, kua whakawairua kau anō ngā ātārangi o te ahiahi.
JER 6:5 Maranga, kia whakaekea e tātou te pō, kia wāwāhia anō ōna whare kīngi.”
JER 6:6 Ko te kupu hoki tēnei a Ihowā o ngā mano: “Tuaina he rākau, haupūria ake he pukepuke hei whawhai ki Hiruhārama. Ko te pā tēnei e whiua; he tūkino kau tāna i roto i a ia.
JER 6:7 Rite tonu ki te pukenga ake o te wai o te puna te pukenga ake o tōna kino. He tūkino, he pāhua te rangona ana i roto i a ia; kei tōku aroaro tonu te mamae me te patunga.
JER 6:8 E ako, e Hiruhārama, kei puta kē tōku ngākau ki a koe, kei meinga koe e ahau kia ururuatia, he whenua kāhore e nohoia.”
JER 6:9 Ko te kupu tēnei a Ihowā o ngā mano: “Ka āta hamua mārietia ngā toenga o Īharaira, ānō he wāina; kia rite tāu ki tā te kaikohi karepe, whakahokia iho tōu ringa ki roto ki ngā kete.”
JER 6:10 Ki a wai rā tāku kōrero, tāku whakaatu tikanga, e rongo ai rātou? Nanā, he mea kokotikore tō rātou taringa, tē whakarongo ai rātou. Nanā, hei tāwainga mā rātou te kupu a Ihowā, kāhore e arongia e rātou.
JER 6:11 Nā, kī tonu ahau i te riri o Ihowā; ruha iho ahau i te koromaki. “Ringihia ki runga ki te kōhungahunga i te ara, ki te whakaminenga anō o ngā taitamariki, hui katoa; nō te mea ka hopukia te tāne rāua ko te wahine, te koroheke rāua ko te tangata kua maha ōna rā.
JER 6:12 Ka riro kē ō rātou whare i ētahi atu, ngā māra ngātahi anō ko ngā wāhine; nō te mea ka totoro tōku ringa ki ngā tāngata o te whenua,”
JER 6:13 “Ko te mea iti ō rātou, ko te mea nui hoki kei runga i te apo; ko te poropiti, ko te tohunga, rātou katoa kei te mahi teka.
JER 6:14 Ko tā rātou rongoātanga hoki i te mamae o tāku iwi he hanga noa iho; e kī ana, ‘Ka mau te rongo, ka mau te rongo’; i te mea kāhore nei he maunga rongo.
JER 6:15 I whakamā rānei rātou i a rātou e mahi ana i ngā mea whakarihariha? Hore rawa ō rātou whakamā, kāhore hoki i mōhio ki te numinumi. Mō reira ka hinga rātou i roto i te hunga e hinga ana; i te wā e whiu ai ahau i a rātou, ka whakatakā rātou,”
JER 6:16 Ko te kupu tēnei a Ihowā: “E tū ki ngā ara, tirohia atu, uia ngā ara tawhito kei hea te ara pai, ka haere i reira, ā, ka kite koutou i te tānga manawa mō ō koutou wairua. Heoi, e kī mai ana rātou, ‘E kore mātou e haere i reira.’
JER 6:17 I whakatūria anō e ahau ētahi kaitūtei mō koutou, i mea ahau, ‘Whakarongo ki te tangi o te tētere.’ Heoi, e kī ana rātou, ‘E kore mātou e whakarongo.’
JER 6:18 Mō reira, whakarongo, e ngā iwi, kia mōhio anō koe, e te huihui, ki ngā mea kei roto i a rātou.
JER 6:19 Whakarongo, e te whenua; tēnei ahau te kawe mai nei i te kino mō tēnei iwi, i ngā hua o ō rātou whakaaro; mō rātou kīhai i whakarongo ki āku kōrero; ko tāku ture, paopaongia ake e rātou.
JER 6:20 Hei aha te whakakakara i tae mai ai ki ahau i Hēpā, te kākaho kakara i te whenua tawhiti? E kore ā koutou tahunga tinana e arongia, e kore anō ā koutou patunga tapu e reka ki ahau.
JER 6:21 Mō reira ko te kupu tēnei a Ihowā: Tēnei ahau te whakatakoto nei i ngā tūtukitanga waewae ki mua i tēnei iwi, e tūtuki ngātahi ai ngā mātua, ngā tamariki; ka ngaro te tangata noho tata rāua ko tōna hoa.”
JER 6:22 Ko te kupu tēnei a Ihowā: “Tēnei te haere mai nei he iwi i te whenua ki te raki, ka whakaarahia mai anō he iwi nui i ngā pito o te whenua.
JER 6:23 Ka mau rātou ki te kōpere, ki te tao; he nanakia rātou, e kore hoki e tohu tāngata. Ko tō rātou reo, ānō kei te moana e haruru ana, ā, eke ai rātou i runga i te hōiho; rārangi rawa rātou, me te mea he tāngata e mea ana ki te whawhai ki a koe, e te tamāhine a Hiona.”
JER 6:24 Kua rongo mātou ki tōna rongo; ngoikore iho ō mātou ringa. Mau pū mātou i te pāwera, i te mamae, me te mea he wahine e whānau ana.
JER 6:25 Kei puta atu ki te māra, kaua hoki e haere i te ara; kei reira hoki te hoari a te hoariri, ā, kei ngā taha katoa te wehi.
JER 6:26 E te tamāhine a tāku iwi, whītikiria te kākahu taratara, ka takaoriori ki te pungarehu, hei te tangi ki te huatahi tāu tangi ki a koe, kia tīwerawera te tangi; nō te mea kīhai i aha kua tae mai te kaipāhua ki a tātou.
JER 6:27 “Kua oti koe te mea e ahau hei pourewa, hei pā kaha, i roto i tōku iwi; kia mōhio ai koe, kia whakamātau ai i tō rātou ara.
JER 6:28 He tino nui tō rātou tutū, ā, ko tā rātou i a rātou e hāereere ana he ngau tuarā. He parāhi rātou, he rino; he hunga whakangau kē rātou katoa.
JER 6:29 Kei te kakā te hau o te pupuhi ahi; kua pau te matā i te ahi, maumau whakarewa noa te kaitahi para; kāhore nei hoki te hunga kino kia unuhia atu.
JER 6:30 E huaina rātou e te tangata he hiriwa i paopaongia, nō te mea kua paopao nei a Ihowā ki a rātou.”
JER 7:1 Ko te kupu i a Heremaia, he mea nā Ihowā, i kī mai ia:
JER 7:2 “E tū ki te kūwaha o te whare o Ihowā, ka karanga i tēnei kupu ki reira, ka mea: ‘Whakarongo ki te kupu a Ihowā, e Hūrā katoa e tomo nei ki ēnei kūwaha ki te koropiko ki a Ihowā.
JER 7:3 Ko te kupu tēnei a Ihowā o ngā mano, a te Atua o Īharaira: Whakapaia ō koutou ara me ā koutou mahi, ā, ka meinga e ahau kia noho koutou ki tēnei wāhi.
JER 7:4 Kei whakawhirinaki ki ngā kupu teka noa, kei kī: “Ko te temepara o Ihowā, ko te temepara o Ihowā, ko te temepara o Ihowā ēnei.”
JER 7:5 Ki te whakapaia rawatia hoki ō koutou ara, me ā koutou mahi; ki te mea ka tika rawa tā koutou whakarite whakawā i waenganui i te tangata rāua ko tōna hoa;
JER 7:6 ki te kore koutou e tūkino i te manene, i te pani, i te pouaru, ā, kāhore e whakaheke i ngā toto o te harakore ki tēnei wāhi, kāhore hoki e haere, e whai i ngā atua kē hei hē mō koutou;
JER 7:7 kātahi ahau ka mea i a koutou kia noho ki tēnei wāhi, ki te whenua i hoatu e ahau ki ō koutou mātua inamata ake ake.
JER 7:8 “ ‘Nanā, kei te whakawhirinaki nā koutou ki ngā kupu teka, kāhore nei he pai.
JER 7:9 E tāhae rānei koutou, e patu tangata, e pūremu? E oati teka rānei? E tahu whakakakara rānei ki a Paara, e whai rānei i ngā atua kē kīhai i mātauria e koutou,
JER 7:10 ā, ka haere mai, ka tū ki tōku aroaro i tēnei whare kua huaina nei ki tōku ingoa, ka mea, “Kua ora mātou!” – kia mahi ai koutou i ēnei mea whakarihariha katoa?
JER 7:11 Ki tā koutou titiro kua waiho koia hei ana mō ngā kaipāhua tēnei whare kua huaina nei ki tōku ingoa? Nanā, kua kite ahau, ahau nei anō, e ai tā Ihowā.
JER 7:12 “ ‘Engari, haere rā ki tōku wāhi i Hiro, ki te wāhi i whakanohoia mataatitia ai e ahau tōku ingoa, tirohia tāku mea ai ki reira mō te kino o tāku iwi, o Īharaira.
JER 7:13 Nā, ināianei, i tā koutou meatanga i ēnei mea katoa, e ai tā Ihowā, i kōrero anō ahau ki a koutou; maranga wawe ana ahau, kōrero ana, heoi kīhai koutou i rongo mai; karanga ana ahau ki a koutou, ā, kīhai i utua tāku.
JER 7:14 Nā, ko tāku e mea ai ki tēnei whare i huaina nei ki tōku ingoa, ki tā koutou e whakawhirinaki nei, ki te wāhi anō i hoatu nei e ahau ki a koutou, ki ō koutou mātua, ka rite ki tāku i mea ai ki Hiro.
JER 7:15 Ka ākiritia atu anō koutou e ahau i tōku aroaro, ka pērātia me tāku ākiritanga i ō koutou tēina katoa, i ngā uri katoa o Ēparaima.’ ”
JER 7:16 “Heoi, kaua koe e īnoi mō tēnei iwi; kei ara hoki tētahi tangi, tētahi kupu wawao āu mō rātou, kaua hoki ahau e whakamārietia, nō te mea e kore ahau e rongo ki a koe.
JER 7:17 Kāhore ianei koe i te kite i tā rātou e mea nei i ngā pā o Hūrā, i ngā ara anō o Hiruhārama?
JER 7:18 Ko ngā tamariki kei te kohikohi wahie, ko ngā mātua kei te whakaū i te ahi, ko ngā wāhine kei te pokepoke i te parāoa hei hanga i ētahi keke, he mea ki te kuīni o te rangi, riringi tonu iho i te ringihanga ki ngā atua kē, hei whakapātaritari i ahau.
JER 7:19 He whakapātaritari rānei tā rātou ki ahau? e ai tā Ihowā. He teka ianei ki a rātou anō, ā, whakamā iho ō rātou mata?
JER 7:20 “ ‘Nā, ko te kupu tēnei a te Ariki, a Ihowā: Nanā, ka ringihia tōku riri, tōku āritarita, ki runga ki tēnei wāhi, ki runga ki te tangata, ki te kararehe, ki te rākau o te māra, ki ngā hua o te oneone; ā, ka ngiha, e kore anō e tineia.
JER 7:21 “ ‘Ko te kupu tēnei a Ihowā o ngā mano, a te Atua o Īharaira: Ko ā koutou tahunga tinana tāpiritia iho ki runga ki ā koutou patunga tapu, kainga hoki he kikokiko.
JER 7:22 Kāhore hoki āku kōrero ki ō koutou mātua, kāhore āku whakahau ki a rātou i te rā i kawea mai ai rātou e ahau i te whenua o Īhipa, mō ngā tahunga tinana, mō ngā patunga tapu.
JER 7:23 Engari ko te kupu tēnei i whakahaua e ahau ki a rātou; i kī ahau: Whakarongo ki tōku reo, ā, hei Atua ahau mō koutou, ko koutou hoki hei iwi māku, me haere anō koutou i runga i te ara katoa ka whakahaua nei e ahau ki a koutou, kia whiwhi ai ki te pai.
JER 7:24 Otiia, kīhai rātou i rongo, kīhai anō tahuri tō rātou taringa; nā, haere ana rātou i runga i ō rātou ake whakaaro, i ngā tikanga pakeke o ō rātou ngākau kino; ko tā rātou he anga ki muri, kīhai hoki i anga ki mua.
JER 7:25 Nō te rā i haere mai ai ō koutou mātua i te whenua o Īhipa tae mai ki tēnei rā tāku tononga atu i āku pononga katoa, i ngā poropiti, ki a koutou, maranga wawe ana ahau i tēnei rā, i tēnei rā, ungā ana rātou e ahau.
JER 7:26 Heoi, kīhai rātou i rongo ki ahau, kīhai anō i tahuri tō rātou taringa. Nā, whakapakeketia ana e rātou tō rātou kakī; kino iho tā rātou i tā ō rātou mātua.’
JER 7:27 “Nā, māu e kōrero ēnei kupu katoa ki a rātou, e kore ia rātou e rongo ki a koe; karanga ki a rātou, e kore anō e utua tāu.
JER 7:28 Ā, me kī atu ki a rātou: Ko te iwi tēnei kīhai nei i rongo ki te reo o Ihowā, o tō rātou Atua, kīhai hoki i pai ki te ako. Kua kore te pono kua tapahia atu i tō rātou māngai.
JER 7:29 Waruhia ōu makawe, e Hiruhārama, makā atu; anga atu ki te tangi ki runga ki ngā wāhi tiketike; kua paopaongia nei hoki e Ihowā, kua whakarērea te whakatupuranga i riri ai ia.
JER 7:30 “ ‘He kino hoki te mahi a ngā tama a Hūrā ki tāku titiro, e ai tā Ihowā; whakatūria ake e rātou ā rātou mea whakarihariha ki te whare kua huaina nei ki tōku ingoa, whakapokea iho e rātou.
JER 7:31 Hangā ake e rātou ngā wāhi tiketike o Topete, o tērā i te raorao o te tama a Hinomo, hei tahunga mō ā rātou tama, mō ā rātou tamāhine ki te ahi – he mea kīhai nei i whakahaua e ahau, kīhai anō i puta ake i roto i tōku ngākau.
JER 7:32 Mō reira, nā, kei te haere mai ngā rā, e ai tā Ihowā, e kore ai e kīia i muri, Ko Topete, Ko te Raorao o te Tama a Hinomo, rānei; engari Ko te Raorao i te Parekura. Ka tanu tāngata hoki rātou ki Topete, ā, kia kore rā anō he wāhi hei tanumanga.
JER 7:33 Ā, ka waiho ngā tinana o tēnei iwi hei kai mā ngā manu o te rangi, mā ngā kararehe o te whenua; kāhore hoki he kaiwhakawehi atu.
JER 7:34 Ka whakamutua anō e ahau i roto i ngā pā o Hūrā, i ngā ara anō o Hiruhārama, te reo koa, te reo hari, te reo o te tāne mārena hou, te reo o te wahine mārena hou; nō te mea ka ururuatia te whenua.
JER 8:1 “ ‘I taua wā, e ai tā Ihowā, ka whakaputaina mai ki waho ngā wheua o ngā kīngi o Hūrā, me ngā wheua o ōna rangatira, me ngā wheua o ngā tohunga, mā ngā wheua o ngā poropiti, me ngā wheua o ngā tāngata o Hiruhārama i roto i ō rātou tanumanga.
JER 8:2 Ā, ka tohatohaina e rātou ki mua i te rā, i te marama, i te mano katoa o te rangi, i a rātou i aroha ai, i mahi ai, i whai ai, i rapu ai, i koropiko ai. E kore e kohikohia, e kore e tanumia; ka waiho hei whakawairākau ki te mata o te oneone.
JER 8:3 Ā, pai ake te mate i te ora ki tā ngā mōrehu katoa, ki tā ngā toenga o tēnei hapū kino e toe ki ngā wāhi katoa e peia atu ai rātou e ahau, e ai tā Ihowā o ngā mano.’ ”
JER 8:4 “Mea atu anō ki a rātou, ‘Ko te kupu tēnei a Ihowā: Ka hinga rānei, ā, kore ake e ara? Ka tahuri atu rānei ia, ā, kore ake e tahuri mai?
JER 8:5 He aha tēnei iwi o Hiruhārama i tahuri kē ai, ā, mau tonu iho te tahuri kē? E hopukia atu ana e rātou te tinihanga, kāhore e pai ki te hoki mai.
JER 8:6 I whakarongo ahau, i rongo anō, kīhai i tika ā rātou kōrero. Kīhai tētahi i rīpenetā ki tōna kino, kīhai i mea, “He aha tāku i mea ai?” Anga ana te katoa ki tāna oma, ki tāna oma, pērā ana me te hōiho e kōkiri atu ana ki te tatauranga.
JER 8:7 Āe rā, ko te tāka i te rangi, e mōhio ana ki ngā wā i whakaritea mōna, ko te kūkupa anō, ko te kareni, me te warou, mahara tonu rātou ki te wā e haere mai ai rātou; ko tāku iwi ia, kāhore e mōhio ki tā Ihowā i whakarite ai.
JER 8:8 “ ‘He pēhea tā koutou e kī, “He hunga whakaaro nui tātou, kei a tātou te Ture a Ihowā”? Nanā, he horihori te mahi a te pene horihori a ngā kaituhituhi.
JER 8:9 Ko te hunga whakaaro nui, whakamā ana rātou, wehi noa iho rātou, hopukia iho. Nanā, kua paopao nei rātou ki te kupu a Ihowā, ā, he pēhea te whakaaro nui i roto i a rātou?
JER 8:10 Mō reira ka hoatu e ahau ā rātou wāhine mā te tāngata kē, ā rātou māra ki ngā tāngata mōna te wāhi; ko rātou katoa, i te iti ki te rahi, kei te apo mea mā rātou; ko te poropiti, ko te tohunga, ko rātou katoa, kei te mahi teka.
JER 8:11 Kua rongoātia e rātou te pakaru o te tamāhine a tāku iwi, he mea panga noa iho, e mea ana, “Ka mau te rongo, ka mau te rongo,” i te mea kāhore he maunga rongo.
JER 8:12 I whakamā rānei rātou i tā rātou mahinga i te mea whakarihariha? Hore rawa ō rātou whakamā; kāhore hoki rātou i mōhio ki te numinumi. Mō reira ka hinga rātou i roto i te hunga e hinga ana; i te wā e whiua ai rātou, ka tūtuki ō rātou waewae,
JER 8:13 “ ‘Ka mōtī rawa rātou i ahau, e ai tā Ihowā, kāhore he karepe mō te wāina, kāhore he piki mō te piki; ka memenge anō te rau; ā, ko ngā mea i hoatu e ahau ki a rātou, ka pahemo atu.’
JER 8:14 “He aha tātou i noho tonu ai? Huihui! Kia haere tātou ki ngā pā kaha, ki reira whakamoroki kau ai; kua kore hoki i a Ihowā, i tō tātou Atua he kupu mā tātou, whakainumia ana tātou e ia ki te wai kawa; nō te mea kua hara tātou ki a Ihowā.
JER 8:15 Tatari noa ki te rongo mau; heoi kāhore he pai; ki te wā e ora ai ngā mate, nā, ko te raruraru.
JER 8:16 I rangona ki Rāna te whengu o ōna hōiho; ngateri ana te whenua katoa i te reo o āna mea kaha e hāmama ana. Kua haere mai hoki rātou, pau ake i a rātou te whenua me ōna mea maha, te pā me ngā tāngata o roto.
JER 8:17 “Nanā, ka ngarea atu e ahau he nākahi, he neke, e kore nei e whakawaia, ki a koutou; ā, ka ngau rātou i a koutou,”
JER 8:18 Auē, tē taea te whakamārie te pōuri i ahau, e ngohe nei te ngākau i roto i ahau.
JER 8:19 Nanā, he reo tangi nō te tamāhine a tāku iwi, i ahu mai i te whenua tawhiti: “He teka ianei kei roto a Ihowā i Hiona? He teka ianei kei roto tōna kīngi i a ia? “He aha rātou i whakapātaritari ai i ahau ki ā rātou whakapakoko, ki ngā horihori rerekē?
JER 8:20 “Kua pahemo te kotinga, kua taka te raumati; ko tātou, kāhore he whakaoranga mō tātou.”
JER 8:21 He mamae ki te tamāhine a tāku iwi i mamae ai ahau, mangu iho ahau, mau pū ahau i te mīharo.
JER 8:22 Kāhore ianei he hinu whakaora i Kireara? Kāhore ianei ō reira rata? He aha rā tē hoki mai ai te ora ki te tamāhine a tāku iwi?
JER 9:1 Auē, me he wai tōku māhunga, me he puna roimata ōku kanohi, kia tangihia ai e ahau ngā tūpāpaku o te tamāhine a tāku iwi i te ao, i te pō!
JER 9:2 Auē, me he tīhokahoka tōku, he mea nā te tira haere i te koraha! Kia whakarērea ai e ahau tāku iwi, kia mawehe ai i roto i a rātou, he hunga pūremu katoa nei hoki rātou, he huihuinga nō te hunga tinihanga.
JER 9:3 “Me te mea he kōpere nā rātou ō rātou arero e whakapikoa ana hei kōrero teka; kua tupu kaha ake rātou i runga i te whenua, kāhore ia mō te pono; engari e koni atu ana i te kino ki te kino, kāhore hoki ō rātou mōhio ki ahau,” e ai tā Ihowā.
JER 9:4 “Kia tūpato i ō koutou hoa, e tēnei, e tēnei, kaua e whakawhirinaki ki te tuakana, ki te teina. Nō te mea he māminga rawa tā ngā tuākana, tā ngā tēina katoa; kei runga anō i te ngautuarā te haere o ngā hoa katoa.
JER 9:5 Ka tinihangatia e rātou tōna hoa, tōna hoa, kāhore hoki he pono o te kōrero; kua whakaakona e rātou ō rātou arero ki te kōrero teka; ruha noa rātou i te mahinga i te hē.
JER 9:6 Kei waenga tinihanga koe e noho ana; nā te tinihanga rātou te pai ai ki te mōhio ki ahau,”
JER 9:7 Heoi, ko te kupu tēnei a Ihowā o ngā mano: “Nanā, ka whakarewa ahau i a rātou, ka whakamātau i a rātou; me pēhea hoki ahau, ko te tamāhine nei ia a tāku iwi?
JER 9:8 Ko te rite i tō rātou arero kei te kōpere whakamate; he kōrero tinihanga tāna. He kōrero pai tā te māngai o tētahi ki tōna hoa, kei roto ia i tōna ngākau e whanga ana mōna.
JER 9:9 E kore ianei ahau e whiu i a rātou mō ēnei mea? e ai tā Ihowā; e kore ianei tōku wairua e rapu utu i te iwi pēnei?”
JER 9:10 He whakaaro ki ngā maunga i ara ai tāku tangi, tāku auē, he whakaaro ki ngā puninga o te koraha tāku uhunga; nō te mea kua wera, kāhore tētahi tangata e tika nā reira, kāhore e rangona te reo o ngā kararehe; ko ngā manu o te rangi, ko ngā kararehe, pūtere atu ana, kua riro.
JER 9:11 “Ka meinga hoki e ahau a Hiruhārama hei pūranga, hei nohoanga kurī mohoao, ka meinga anō e ahau ngā pā o Hūrā kia ururuatia, tē ai he tangata.”
JER 9:12 Ko wai te tangata whakaaro nui e mātau ana ki tēnei? I kōrerotia anō ki a wai e te māngai o Ihowā, māna e whakaatu? He aha rā te whenua i whakangaromia ai, i wera ai, ānō ko te koraha, kāhore he tangata e tika ana i reira?
JER 9:13 Anō rā ko Ihowā: “Mō rātou i whakarere i tāku ture i hoatu e ahau ki tō rātou aroaro, ā, kīhai i whakarongo ki tōku reo, kīhai i haere i taua ara.
JER 9:14 Nā, haere ana rātou i ngā tikanga mārō o ō rātou ngākau; kei te whai i ngā Paarimi i whakaakona nei e ō rātou mātua ki a rātou.”
JER 9:15 Heoi, ko te kupu tēnei a Ihowā o ngā mano, a te Atua o Īharaira: “Tēnei ahau te whāngai nei i a rātou, i tēnei iwi, ki te taru kawa, te whakainu nei i a rātou ki te wai kawa.
JER 9:16 Ka whakamararatia anō rātou e ahau ki roto ki ngā iwi kīhai nei i mōhiotia e rātou, e ō rātou mātua; ka ungā anō e ahau te hoari hei whai i a rātou ā poto noa rātou i ahau.”
JER 9:17 Ko te kupu tēnei a Ihowā o ngā mano: “Whakaaroa e koutou, karangatia hoki ngā wāhine tangi kia haere mai; unga tāngata ki ngā wāhine whakaaro nui kia haere mai.
JER 9:18 Kia hohoro anō te ara o tā rātou tangi mō tātou, kia tārere ai ngā roimata o ō tātou kanohi, kia maringi iho ai ngā wai o ō tātou kamo.
JER 9:19 Nō te mea e rangona ana te reo tangi i Hiona: ‘Anō tō tātou pāhuatanga! Nui atu tō tātou whakamā, nō te mea kua mahue i a tātou te whenua, nō te mea kua turakina mai e rātou ō tātou nohoanga.’ ”
JER 9:20 Whakarongo rāia, e ngā wāhine, ki te kupu a Ihowā, kia riro anō i ō koutou taringa te kupu a tōna māngai. Whakaakona ā koutou tamāhine ki te tangi, ngā hoa hoki o tēnei, o tēnei, ki te uhunga.
JER 9:21 Nō te mea kua tae ake te mate ki roto ki ō tātou matapihi, kua tomo ki ō tātou whare kīngi, hautope atu ai i ngā kōhungahunga i waho, i ngā taitamariki anō hoki i ngā huanui.
JER 9:22 Kōrero! “Ko te kupu tēnei a Ihowā: ‘Tērā ngā tinana o ngā tāngata e hinga ānō he whakawairākau ki te mata o te māra, ānō he kutanga wīti i muri i te kaitapahi, ā, kāhore he kaikohi.’ ”
JER 9:23 Ko te kupu tēnei a Ihowā: “Kaua te tangata whakaaro nui e whakamanamana ki tōna whakaaro nui, kaua hoki te mārohirohi e whakamanamana ki tōna mārohirohi; kaua te tangata taonga e whakamanamana ki ōna taonga;
JER 9:24 engari, ko tēnei hei whakamanamananga mā te tangata whakamanamana, arā kua whai whakaaro ia, kua mōhio ki ahau, ko Ihowā ahau, ko te kaimahi o te mahi tohu, o te whakawā, o te tika i runga i te whenua; ko āku hoki ēnei e whakaahuareka ai,”
JER 9:25 “Nanā, kei te haere mai ngā rā,” e ai tā Ihowā, “e whiua ai e ahau te hunga katoa i kotia i roto i tō rātou kotingakore:
JER 9:26 ko Īhipa, ko Hūrā, ko Ēroma, ko ngā tama a Āmona, ko Moapa, ko te hunga katoa e noho ana i te koraha, e whakaihoa nei ngā tapa o ō rātou makawe. He mea kokotikore hoki ngā iwi katoa; ko te whare katoa anō o Īharaira, he mea kokotikore te ngākau.”
JER 10:1 Whakarongo ki te kupu kua kōrerotia nei e Ihowā ki a koutou, e te whare o Īharaira;
JER 10:2 ko te kupu tēnei a Ihowā: “Kaua e ākona te ara o ngā tauiwi, kaua anō e wehi i ngā tohu o te rangi; e wehi ana hoki ngā tauiwi i aua mea.
JER 10:3 He mea teka noa hoki ngā tikanga a ngā iwi: e tapahia ana hoki e tētahi he rākau i roto i te ngahere, he mahi nā ngā ringa o te kaimahi, ki te tītaha.
JER 10:4 Kei te whakapaipai i taua mea ki te hiriwa, ki te kōura, whakamau rawa ki ngā titi, ki ngā hama, tē taea te whakakorikori.
JER 10:5 He rite aua mea ki te nīkau, i āta mahia, kāhore ia he kupu; me amo, he kore nō rātou e haere. Kaua e wehi i a rātou, nō te mea e kore e taea e rātou te kino, kāhore hoki e āhei i a rātou te mea i te pai.”
JER 10:6 Kāhore rawa he rite mōu, e Ihowā; he nui koe, he nui anō tōu ingoa i runga i te kaha.
JER 10:7 Ko wai e kore e wehi i a koe, e te Kīngi o ngā iwi? He tika hoki tēnā ki a koe. Nō te mea i roto i ngā tāngata whakaaro nui katoa o ngā iwi, i roto i ō rātou kīngitanga katoa, kāhore he rite mōu.
JER 10:8 Huihuia rātou, he pōauau rawa, he wairangi; ko tā ngā whakapakoko e whakaako ai, he rākau tonu ia!
JER 10:9 E maua mai ana he hiriwa pāraharaha i Tarahihi, he kōura i Upata. He mahi nā te kaimahi nā ngā ringa anō o te kaiwhakarewa kōura: he purū, he pāpura ō rātou kākahu; he mea mahi katoa nā te hunga tohunga.
JER 10:10 Ko Ihowā ia te Atua pono; ko ia te Atua ora, he kīngi pūmau tonu. Ka riri ia, ka wiri te whenua, e kore anō ngā iwi e kaha ake ina āritarita ia.
JER 10:11 “Kia pēnei tā koutou kī atu ki a rātou: ‘Ko ngā atua kīhai nei i hanga i te rangi, i te whenua, ka ngaro i runga i te whenua, i raro atu anō hoki i ngā rangi.’ ”
JER 10:12 Nāna i hanga te whenua, nā tōna kaha hoki; ko te ao he mea whakapūmau nā ōna whakaaro nui; ko ngā rangi he mea hora nā tōna mātauranga.
JER 10:13 Ka puaki tōna reo, he haruru wai kei ngā rangi, e meinga ana e ia ngā kohu kia pupū ake i ngā pito o te whenua. E hangā ana e ia ngā uira mō te ua, e whakaputaina mai ana te hau i roto i ōna whare taonga.
JER 10:14 Pōauau kau ngā tāngata katoa, ā, kāhore he mōhio; ko ngā kaiwhakarewa kōura katoa whakamā iho i te whakapakoko. He mea teka hoki tāna i whakarewa ai, kāhore hoki he wairua i roto.
JER 10:15 He horihori kau rātou, he mahi pōhēhē; i te wā e pā ai ia ki a rātou ka ngaro.
JER 10:16 Kāhore e rite ki ērā te wāhi i a Hākopa; ko ia hoki te kaiwhakaahua o ngā mea katoa; ko Īharaira hoki te iwi o tōna kāinga tupu, ko Ihowā o ngā mano tōna ingoa.
JER 10:17 Kohikohia āu mea i te whenua, e koe e noho nā i te pā e whakapaea ana.
JER 10:18 Ko te kupu hoki tēnei a Ihowā: “Tēnei ahau te piupiu atu nei i ngā tāngata o te whenua i tēnei wā, te whakatupu kino nei hoki i a rātou, kia kitea ai e rātou.”
JER 10:19 Auē te mate i ahau, mamae rawa tōku marūtanga. Otiia, kua mea nei ahau, “He pono nōku tēnei mate, me whakamanawanui.”
JER 10:20 Kua pāhuatia tōku tēneti, ko āku aho motumotu katoa. Kua riro atu āku tamariki i tōku taha, kua kore; kāhore ake he tangata hei whakamārō i tōku tēneti, hei whakaara i ōku kākahu ārai.
JER 10:21 Kua pōauau nei hoki ngā hēpara; kīhai a Ihowā i rapua e rātou; nā reira i kore ai e tika tā rātou, ka marara hoki ā rātou kāhui katoa.
JER 10:22 Nanā, te haere mai nei te reo o ngā kōrero, nui atu te whakaohooho nō te whenua ki te raki, hei mea i ngā pā o Hūrā hei ururua, hei nohoanga, mō ngā kīrehe mohoao.
JER 10:23 E mōhio ana anō ahau, e Ihowā, kāhore o te tangata ara i a ia ake anō; kāhore hoki i te tangata e hāereere nei māna e whakatikatika ōna hīkoinga.
JER 10:24 Pākia ahau, e Ihowā, me te whakariterite anō ia; kauaka ina riri koe, kei kāhore ahau i a koe.
JER 10:25 Ringihia atu tōu riri ki ngā tauiwi kāhore nei e mātau ki a koe, ki ngā hapū kāhore nei e karanga ki tōu ingoa. Kua pau hoki a Hākopa i a rātou, āe rā, pau rawa, mōtī rawa, ko tōna nohoanga hoki whakaururuatia ana e rātou.
JER 11:1 Ko te kupu i pā mai ki a Heremaia he mea nā Ihowā, i kī ia:
JER 11:2 “Whakarongo koutou ki ngā kupu o tēnei kawenata, kōrero hoki ki ngā tāngata o Hūrā rātou ko te hunga e noho ana i Hiruhārama.
JER 11:3 Mea atu ki a rātou, Ko te kupu tēnei a Ihowā, a te Atua o Īharaira: ‘Ka kangā te tangata e kore e whakarongo ki ngā kupu o tēnei kawenata,
JER 11:4 i whakahaua nei e ahau ki ō koutou mātua i te rā i kawea mai ai rātou e ahau i te whenua o Īhipa, i roto i te oumu rino.’ I ahau i kī rā, ‘Whakarongo ki tōku reo, mahia hoki aua mea; kia rite ki ngā mea katoa i whakahaua e ahau ki a koutou; ā, ka waiho koutou hei iwi māku, ko ahau hoki hei Atua mō koutou.
JER 11:5 Kia whakamanā ai e ahau te oati i oatitia e ahau ki ō koutou mātua, kia hoatu ki a rātou he whenua e rerengia ana e te waiū, e te honi,’ pēnei me tēnei rā.” Kātahi ka whakahoki ahau, ka mea, “Koia anō tēnā, e Ihowā.”
JER 11:6 Nā, ka kī mai a Ihowā ki ahau, “Karangatia ēnei kupu katoa ki ngā pā o Hūrā, ki ngā ara anō o Hiruhārama, mea atu: ‘Whakarongo ki ngā kupu o tēnei kawenata, mahia hoki.
JER 11:7 I tino whakatūpato hoki ahau i ō koutou mātua i te rā i kawea mai ai rātou e ahau i te whenua o Īhipa, ā taea noatia tēnei rā, maranga wawe ana ahau, whakatūpato ana; mea ana, Whakarongo ki tōku reo.
JER 11:8 Heoi, kīhai rātou i rongo, kīhai i tahuri ō rātou taringa; otiia haere ana rātou, ia tangata, ia tangata, i runga i ngā tikanga pakeke a tōna ngākau kino. Mō reira, ka tākina e ahau ki a rātou ngā kupu katoa o tēnei kawenata i whakahaua nei e ahau kia mahia, ā, kīhai nei i mahia e rātou.’ ”
JER 11:9 I mea anō a Ihowā ki ahau, “Kua kitea te hē e whakatakotoria ana e ngā tāngata o Hūrā, e te hunga e noho ana i Hiruhārama.
JER 11:10 Kua hokia e rātou ngā hē o ō rātou mātua ō mua, kīhai nei i pai ki te whakarongo ki āku kupu, haere ana rātou ki te whai i ngā atua kē, mahi ana ki a rātou. Kua whakatakā e te whare o Īharaira rātou ko te whare o Hūrā tāku kawenata i whakaritea e ahau ki ō rātou mātua.
JER 11:11 Mō reira ko te kupu tēnei a Ihowā: ‘Tēnei te tākina nei e ahau ki a rātou, he hē; e kore anō rātou e mawhiti; ka karanga anō rātou ki ahau, otiia e kore ahau e rongo ki a rātou.
JER 11:12 Ā, ka haere ngā pā o Hūrā me ngā tāngata o Hiruhārama, ka karanga ki ngā atua e tahu whakakakara nei rātou ki a rātou; hore rawa ia ā rātou whakaora mō rātou i te wā e raru ai.
JER 11:13 I rite hoki ōu atua, e Hūrā, ki ōu pā te maha; me ngā āta i hangā e koutou mā taua mea whakamā, rite tonu ki ngā ara o Hiruhārama te maha, arā ngā āta tahu whakakakara ki a Paara.’
JER 11:14 “Heoi, kaua e īnoi mō tēnei iwi; kei ara hoki tētahi tangi, tētahi kupu wawao mō rātou; nō te mea e kore ahau e rongo i te wā e karanga ai rātou ki ahau, ina raru rātou.
JER 11:15 Ko te aha mā tāku wahine aroha i roto i tōku whare, kua mahi hē nei hoki ia, he tini ngā hoa, ā, kua kore te kikokiko tapu i a koe? I tāu mahinga i te kino, nā, kei te whakamanamana koe.”
JER 11:16 I huaina e Ihowā tōu ingoa, ko te ōriwa matomato, ātaahua, hua papai. Nui atu te reo ngangau i tahuna ai e ia te ahi mōna, kua whatiwhatiia ōna manga.
JER 11:17 Kua kōrerotia nei hoki e Ihowā o ngā mano, e tōu kaiwhakatō, he hē mōu, hei utu mō te kino o te whare o Īharaira rāua ko te whare o Hūrā, i mahia nei e rātou hei hē mō rātou, hei whakapātari i ahau, i a rātou ka tahu whakakakara nei ki a Paara.
JER 11:18 I meinga anō ahau e Ihowā kia mōhio ki taua mea, ā, mōhio ana ahau; i whakakitea mai anō e koe ki ahau ā rātou mahi.
JER 11:19 Ko ahau ia i rite ki te reme, e ārahina ana kia patua; kīhai i mōhio, e hanga whakaaro ana rātou mōku, e mea ana, “Kia kore i a tātou te rākau me ōna hua, kia tapahia atu ia i runga i te whenua o te hunga ora, kia kore ai he maharatanga ki tōna ingoa.”
JER 11:20 Tēnā, e Ihowā o ngā mano, kei runga nei hoki i te tika tāu whakawā, e whakamātau ana koe i ngā whatumanawa, i te ngākau, kia kite ahau i tāu rapunga utu i a rātou. Kua whakakitea atu nei hoki e ahau tāku totohe ki a koe.
JER 11:21 “Heoi, ko te kupu tēnei a Ihowā mō ngā tāngata o Anatoto e whai nei kia whakamatea koe, e mea nei, ‘Kaua e poropiti i runga i te ingoa o Ihowā, kei mate koe i tō mātou ringa’ –
JER 11:22 mō reira ko te kupu tēnei a Ihowā o ngā mano: ‘Tēnei ahau te whiu nei i a rātou; ka mate ngā taitamariki i te hoari; ko ā rātou tama, ko ā rātou tamāhine, ka mate i te hemokai.
JER 11:23 E kore rātou e whai mōrehu; nō te mea ka kawea e ahau he kino ki ngā tāngata o Anatoto, arā ko te tau e whiua ai rātou.’ ”
JER 12:1 Tika tonu koe, e Ihowā, ina totohe ahau ki a koe; otiia, kia kōrerotia e ahau ki a koe ngā whakaritenga. He aha i whai pai ai te ara o te hunga kino? He aha i noho hūmārie ai te hunga katoa he nui rawa nei tō rātou tinihanga?
JER 12:2 Whakatōkia ana rātou e koe, āe rā kua whai pakiaka rātou; kei te tupu ake, āe rā kua whai hua; i ō rātou māngai e tata ana koe; i ō rātou whatumanawa ia kei tawhiti koe.
JER 12:3 Otiia e mōhio ana koe ki ahau, e Ihowā, kua kite koe i ahau, e whakamātautau ana hoki koe i tōku ngākau ki a koe. Tōia mai rātou ānō he hipi e patua ana, motuhia atu rātou mō te rā o te parekura.
JER 12:4 Kia pēhea te roa o te whenua ka tangi nei, o te otaota o ngā māra katoa ka maroke nei? Hei mea mō te kino o ōna tāngata, kua pau ōna kararehe me ngā manu; nō te mea i kī rātou, “E kore ia e kite i tō tātou mutunga iho.”
JER 12:5 “Nā, mehemea i rere koe i roto i te hunga haere i raro, ā, ka ngenge i a rātou, ka pēhea rā tāu whakataetae ki ngā hōiho? Nā, ahakoa ū tōu noho i te whenua rangatira, ka pēhea rā koe i te whakapehapeha o Horano?
JER 12:6 Ko ōu tuākana nei hoki, ko ōu tēina, me te whare o tōu pāpā, kei te tinihanga ki a koe, ko rātou anō kei te karanga nui i muri i a koe. Kaua e whakapono ki tā rātou, ina kōrero pai ki a koe.
JER 12:7 “Kua mahue i ahau tōku whare, whakarērea ake tōku kāinga pūmau; tukua ana e ahau te wahine i arohaina e tōku wairua ki te ringa o ōna hoariri.
JER 12:8 Ko tōku kāinga tupu, tōna rite ki ahau kei te raiona i roto i te ngahere. Hāmama ana ia ki ahau; nā reira kino iho ahau ki a ia.
JER 12:9 Ko tōku kāinga tupu, ki ahau he rite ki te manu kōtingotingo; hei hoariri mōna ngā manu i tētahi taha, i tētahi taha. Haere mai koutou, huihuia mai ngā kīrehe katoa o te pārae, mauria mai ki te horo kai.
JER 12:10 Mōtī ake tāku māra wāina i ngā hēpara tokomaha, kua takatakahia e rātou tōku wāhi, kua meinga hoki e rātou tāku wāhi i matenui ai hei koraha, ururua rawa.
JER 12:11 Kua meinga e rātou hei ururua, ā, i a ia e ururua nei, tangi ana ia ki ahau. Kua ururua katoa te whenua, nō te mea kāhore he tangata e mahara ake ana tōna ngākau.
JER 12:12 Kua tae ngā kaipāhua ki ngā wāhi tiketike katoa o te koraha; ka kai hoki te hoari a Ihowā i tētahi pito o te whenua ā tae noa ki tētahi pito o te whenua; ki ngā kikokiko katoa kāhore he maunga rongo.
JER 12:13 He wīti tā rātou i rui ai, he tātarāmoa tā rātou i kokoti ai; kua whakamamae rātou i a rātou, ā, kāhore he pai ki a rātou. Ka whakamā anō koutou ki ā koutou hua i te riri o Ihowā ka mura nei.”
JER 12:14 Ko te kupu tēnei a Ihowā: “Mō ōku hoa tata katoa e kino nei, kua pā nei ki te wāhi tupu i hoatu e ahau mō tāku iwi, mō Īharaira: Tēnei ahau te huhuti atu nei i a rātou i runga i tō rātou whenua, ka hūtia atu anō e ahau te whare o Hūrā i waenganui i a rātou.
JER 12:15 Ā tēnei ake, kua mutu tāku huhuti atu i a rātou, ka hoki ahau, ka aroha ki a rātou, ka whakahoki anō i a rātou ki tōna wāhi, ki tōna wāhi, ki tōna whenua, ki tōna whenua.
JER 12:16 Ā tēnei ake, ki te ako mārie rātou ki ngā ara o tāku iwi, ā, ka oatitia tōku ingoa, arā, ‘E ora ana a Ihowā,’ ki te pērā rātou me rātou i whakaako rā i tāku iwi kia oatitia a Paara; kātahi ka hanga rātou ki waenganui i tāku iwi.
JER 12:17 Tēnā ko tēnei, e kore rātou e rongo, kātahi taua iwi ka hūtia rawatia atu e ahau, ka whakangaromia,” e ai tā Ihowā.
JER 13:1 Ko te kupu tēnei a Ihowā ki ahau: “Tīkina, hokona he whītiki rīnena mōu, ka whītiki ai ki tōu hope; kaua hoki e tukua ki te wai.”
JER 13:2 Heoi, kua hokona e ahau tētahi whītiki, ko tā Ihowā i kī ai, whītikiria iho e ahau ki tōku hope.
JER 13:3 Nā, ko te rua o ngā putanga mai o te kupu a Ihowā ki ahau; i mea ia:
JER 13:4 “E mau ki te whītiki i hokona e koe, ki tērā i tōu hope, ka whakatika, ka haere ki Uparati, ka huna ki tētahi rua i te kāmaka.”
JER 13:5 Heoi, haere ana ahau, huna ana i taua mea ki Uparati, pērā tonu me tā Ihowā i whakahau ai ki ahau.
JER 13:6 Ā, ka maha ngā rā, ka kī mai a Ihowā ki ahau, “Whakatika, haere ki Uparati, tīkina i reira te whītiki i whakahau ai ahau ki a koe kia huna ki reira.”
JER 13:7 Kātahi ka haere ahau ki Uparati, kei te keri, tangohia mai ana e ahau te whītiki i te wāhi i hunā ai e ahau. Nā, kua kino te whītiki, kīhai i pai mō tētahi mea.
JER 13:8 Kātahi ka puta mai te kupu a Ihowā ki ahau, i mea ia:
JER 13:9 “Ko te kupu tēnei a Ihowā: ‘Ka pēnā anō tāku whakakino i te whakapehapeha o Hūrā, i te whakapehapeha nui o Hiruhārama.
JER 13:10 Ko tēnei iwi kino e kore nei e pai ki te whakarongo ki āku kupu, e haere ana i runga i ngā tikanga pakeke o ō rātou ngākau, e whai ana i ngā atua kē, e mahi ana, e koropiko ana ki a rātou, ka rite rātou ki tēnei whītiki e kore nei e pai mō tētahi mea.
JER 13:11 He pēnei i te whītiki e piri nei ki te hope o te tangata, pēnā tonu tāku meatanga i te whare katoa o Īharaira, i te whare katoa o Hūrā, kia piri ki ahau,’ e ai tā Ihowā, ‘kia waiho ai rātou hei iwi māku, hei ingoa, hei whakamoemiti, hei korōria; heoi kīhai rātou i rongo.’ ”
JER 13:12 “Nā, me kōrero tēnei kupu ki a rātou: ‘Ko te kupu tēnei a Ihowā, a te Atua o Īharaira: Ka whakakīia katoatia ngā pounamu ki te wāina.’ Ā, e mea anō rātou ki a koe, ‘Kīhai ianei mātou i tino mōhio ka whakakīia katoatia ngā pounamu ki te wāina?’
JER 13:13 Ko reira koe mea ai ki a rātou: ‘Ko te kupu tēnei a Ihowā: Tēnei ahau te whakakī nei i ngā tāngata katoa o tēnei whenua, arā i ngā kīngi e noho ana i runga i te torōna o Rāwiri, rātou ko ngā tohunga, ko ngā poropiti, ko ngā tāngata katoa anō o Hiruhārama ki te haurangi.
JER 13:14 Ka ākina atu anō rātou e ahau tētahi ki tētahi, ngā mātua ngātahi anō ko ngā tamariki, e ai tā Ihowā. E kore e tohungia e ahau, e kore e manawapātia, e kore e arohaina, kia kore ai rātou e ngaro i ahau.’ ”
JER 13:15 Whakarongo, tahuri mai ngā taringa; kaua e whakapehapeha; nā Ihowā hoki te kupu.
JER 13:16 Whakakorōriatia tō koutou Atua, a Ihowā, i te mea kīanō ia i whakapōuri noa, i te mea kīanō ō koutou waewae i tūtuki i runga i ngā maunga pōuri, i te mea hoki e tatari ana koutou ki te mārama; nā, kua puta kē i a ia ko te ātārangi o te mate, kua meinga kia pōuri kerekere.
JER 13:17 Tēnā ki te kore koutou e rongo, ka tangi tōku wairua i ngā wāhi ngaro ki tō koutou whakapehapeha; nui atu anō te tangi o tōku kanohi, tārere iho anō ngā roimata; nō te mea ka whakaraua te kāhui a Ihowā.
JER 13:18 Mea atu ki te kīngi rāua ko te kuīni, “Whakaititia kōrua, e noho; nō te mea ka riro iho ō kōrua whakapaipai māhunga, te karauna o tō kōrua korōria.”
JER 13:19 Ka tūtakina ngā pā o te tonga, kāhore he kaiwhakatuwhera. Ka whakaraua katoatia a Hūrā, poto rawa ki te whakarau.
JER 13:20 E ara ō koutou kanohi, tirohia te hunga e haere mai ana i te raki. Kei hea te kāhui i hoatu ki a koe, tāu kāhui ātaahua nā?
JER 13:21 Ka pēhea tāu kupu ina whakanohoia e ia ōu hoa ki runga ake i a koe hei māhunga, nāu nā hoki rātou i ako hei rangatira, hei ariki mōu? E kore ianei koe e mau pū i te mamae, ānō he wahine e whakawhānau ana?
JER 13:22 Nā, ki te mea koe i roto i tōu ngākau, “He aha ēnei mea i pā ai ki ahau?” Nā te nui o tōu kino i hurahia ai te remu o tōu, i whakatupuria kinotia ai ōu rekereke.
JER 13:23 E taea rānei e te Etiopiana te whakaputa kē tōna kiri, e te reparo rānei tōna kōtingotingo? Me kore noa e taea te mahi pai e koutou kua taunga nei ki te mahi kino.
JER 13:24 “Ka tītaritaria anō rātou e ahau, ānō he pāpapa e rere ana i runga i te hau o te koraha.
JER 13:25 Ko te rota tēnā māu, ko te wāhi i rūritia atu e ahau mōu,” e ai tā Ihowā; “mōu i wareware ki ahau, i whakawhirinaki ki te teka.
JER 13:26 Ka hurahia hoki e ahau ngā remu o tōu ki runga ki tōu kanohi, ā, ka kitea tōu mea e whakamā ai koe.
JER 13:27 Kua kite ahau i ōu whakarihariha, i ōu pūremutanga, tāu tangi ā-hōiho, te weriweri o tōu moepuku, i runga i ngā pukepuke i te pārae. Auē te mate mōu, e Hiruhārama! E kore nei koe e meinga kia mā; āhea rawa rā anō?”
JER 14:1 Ko te kupu a Ihowā i puta mai ki a Heremaia, he mea mō te tauraki:
JER 14:2 “Kei te tangi a Hūrā, ngehe kau ōna kūwaha; kua noho ki te whenua he mangu ōna kākahu, kua kake te auē o Hiruhārama ki runga.
JER 14:3 Nā, ka unga ō rātou ariki i ā rātou tamariki ririki ki ngā awa; ka tae rātou ki ngā poka, kāhore e kite wai; ka hoki me ā rātou oko, tahanga kau. Ka whakamā rātou, ka numinumi, ka hīpoki i ō rātou māhunga.
JER 14:4 I te ngātata o te oneone, kāhore anō nei hoki he ua ki runga ki te whenua, ka whakamā ngā kaiparau ka hīpoki i ō rātou māhunga.
JER 14:5 Āe rā, ko te hāta anō, whānau ana ia i waenga pārae, ā, whakarērea ake e ia tāna kūao, nō te mea kāhore he tarutaru.
JER 14:6 Nā, ka tū ngā kāihe mohoao i runga i ngā wāhi tiketike, ka kihakiha ānō he kīrehe mohoao; matawaia ana ō rātou kanohi, kāhore hoki he otaota.”
JER 14:7 Ahakoa whakaatu noa ō mātou kino i tō mātou hē, e mahi koe, e Ihowā, kia mahara hoki ki tōu ingoa; kua tini nei hoki ō mātou tahuritanga kētanga, kua hara mātou ki a koe.
JER 14:8 E koe, e te tūmanako a Īharaira, e tōna kaiwhakaora i te wā o te raru, he aha koe i noho ai i te whenua ānō he manene, i rite ai ki te tangata haere e peka ana ki tētahi moenga mōna i te pō?
JER 14:9 He aha koe i rite ai ki te tangata e ketekete kau ana, ki te mārohirohi e kore nei e kaha ki te whakaora? Kei waenganui anō ia koe i a mātou, e Ihowā, kua huaina tōu ingoa mō mātou; kaua hoki mātou e whakarērea.
JER 14:10 Ko te kupu tēnei a Ihowā ki tēnei iwi: “He pēnā tonu tō rātou matenui ki te taihaere, kīhai i kaiponuhia ō rātou waewae; nō reira kāhore a Ihowā e manako ki a rātou; ka mahara ia āianei ki ō rātou hē, ā, ka whiu i ō rātou hara.”
JER 14:11 Ā, ka mea a Ihowā ki ahau, “Kaua e īnoi mō tēnei iwi ki te pai mō rātou.
JER 14:12 Ka nohopuku rātou, e kore ahau e rongo ki tā rātou karanga; ka whakaekea e rātou te tahunga tinana me te whakahere, e kore ahau e manako ki a rātou; engari ka poto rātou i ahau, i te hoari, i te hemokai, i te mate urutā.”
JER 14:13 Anō rā ko ahau, “Auē, e te Ariki, e Ihowā! Nanā, ko ngā poropiti te mea nei ki a rātou, ‘E kore koutou e kite i te hoari, e kore anō te hemokai e pā ki a koutou; engari māku e mea kia tūturu rawa te mau o te rongo ki a koutou i tēnei wāhi.’ ”
JER 14:14 Anō rā ko Ihowā ki ahau: “Kei te poropiti teka ngā poropiti i runga i tōku ingoa; kīhai rātou i ungā e ahau, kīhai rātou i whakahaua e ahau, kīhai hoki ahau i kōrero ki a rātou. He kitenga teka tā rātou e poropiti nā ki a koutou he whakaaro ki ngā tohu, he mea horihori, he mea tinihanga nā ō rātou ngākau.
JER 14:15 Mō reira ko te kupu tēnei a Ihowā mō ngā poropiti e poropiti nei i runga i tōku ingoa, he hunga kīhai i ungā, e ahau, i a rātou e mea nei, ‘E kore te hoari, te hemokai rānei e pā ki tēnei whenua.’ Ka poto ēnā poropiti i te hoari, i te hemokai.
JER 14:16 Nā, ko te iwi ki a ia nei tā rātou poropititanga, ka ākiritia ki ngā ara o Hiruhārama i te ngaunga a te hemokai, a te hoari; kāhore hoki he tangata hei tanu i a rātou, i a rātou, i ā rātou wāhine, i ā rātou tama, i ā rātou tamāhine. Nō te mea ka ringihia e ahau tō rātou kino ki runga ki a rātou.
JER 14:17 “Nā, me kōrero e koe tēnei kupu ki a rātou: ‘Kia hīrere iho te roimata o ōku kanohi i te pō, i te ao, kaua hoki e mutu, nō te mea he nui te pakaru i pakaru ai te tamāhine a tāku iwi, mamae rawa te patunga.
JER 14:18 Ki te haere ahau ki te pārae, nanā, ko ngā tūpāpaku a te hoari! Ki te tomo ahau ki te pā, nanā, ko te hunga e mate ana i te hemokai! Ko te poropiti hoki rāua tahi ko te tohunga kei te hāereere noa iho i te whenua, ā, kāhore e mōhio.’ ”
JER 14:19 Kua paopao rawa rānei koe ki a Hūrā? Kua whakarihariha rānei tōu wairua ki Hiona? He aha koe i patu ai i a mātou, tē ai he māhunga mō ō mātou mate? I tatari mātou ki te rongo mau, heoi kāhore he pai; ki te wā e mahu ai, nā, ko te raruraru.
JER 14:20 Tēnei mātou, e Ihowā, te whāki nei i tō mātou kino, i te hē o ō mātou mātua, kua hara hoki mātou ki a koe.
JER 14:21 Kaua e whakarihariha ki a mātou, whakaaro ki tōu ingoa; kaua e whakaititia te torōna o tōu korōria; kia mahara, kaua e whakatakā tāu kawenata ki a mātou.
JER 14:22 Kei roto rānei i ngā mea horihori a ngā tauiwi tētahi hei mea kia ua? Mā ngā rangi rānei e hōmai ngā ua nehu? He teka ianei ko koe ia, e Ihowā, e tō mātou Atua? Nā reira mātou ka tatari ki a koe, nāu hoki i hanga ēnei mea katoa.
JER 15:1 Nā, ka mea a Ihowā ki ahau: “Ahakoa i tū a Mohi rāua ko Hamuera ki tōku aroaro, e kore ahau e whai ngākau ki tēnei iwi. Makā atu rātou i tōku aroaro, kia haere atu rātou.
JER 15:2 Nā, ki te mea rātou ki a koe, ‘Me haere mātou ki hea?’ kātahi koe ka mea ki a rātou, ‘Ko te kupu tēnei a Ihowā: Ko ngā mea mō te mate, ki te mate, ā, ko ngā mea mā te hoari, ki te hoari; ko ngā mea hoki mō te hemokai, ki te hemokai; ā, ko ngā mea mō te whakarau, ki te whakarau.’
JER 15:3 “E whā hoki ngā tū mea e whakaritea e ahau mō rātou,” e ai tā Ihowā, “ko te hoari hei whakamate, ko ngā kurī hei haehae, ā, ko ngā manu o te rangi, ko ngā kararehe hoki o te whenua hei kai, hei whakamōtī.
JER 15:4 Ka tukua hoki rātou e ahau kia poipoia haeretia i waenga i ngā kīngitanga katoa o te whenua, mō tā Mānahi tama a Hetekia kīngi o Hūrā, mō tāna i mea ai ki Hiruhārama.
JER 15:5 Ko wai oti e tohu i a koe, e Hiruhārama, ko wai rānei e tangi ki a koe? Ko wai e peka atu ki te ui, kei te ora rānei koe?
JER 15:6 Kua whakarērea ahau e koe,” e ai tā Ihowā, “kua hoki whakamuri koe. Koia i totoro atu ai tōku ringa ki a koe, i whakamōtītia ai koe; kua hōhā ahau ki te rīpenetā.
JER 15:7 Kua pōwhiriwhiritia rātou e ahau ki te mea pōwhiriwhiri i ngā kūwaha o te whenua; kua whakapania rātou e ahau i te tamariki, kua ngaro i ahau tāku iwi; kāhore rātou i tahuri mai i ō rātou ara.
JER 15:8 Ko ā rātou pouaru i tōku aroaro kua tokomaha atu i te onepū o ngā moana; kua kawea e ahau ki a rātou, hei hoariri mō te whaea o ngā taitama, he kaipāhua i te poutūmārōtanga; kua meinga e ahau kia pā whakarere ki a ia te pāwera me te tūmatatenga.
JER 15:9 Ngohe kau te wahine ka tokowhitu nei āna tamariki; kua hemo tōna wairua; kua rere tōna rā i te mea ko te awatea nei anō; kua whakamā hoki ia, kua numinumi kau. Ka tukua atu hoki e ahau ō rātou mōrehu ki te hoari i te aroaro o ō rātou hoariri,”
JER 15:10 Auē, tōku mate, e tōku whaea, i whānau mai ahau i roto i a koe he tangata totohe, he tangata ngangare ki te whenua katoa! Kīhai ahau i whakatārewa atu i te moni whakatupu, kīhai anō te moni whakatupu i whakatārewaina mai ki ahau; otiia kei te kanga rātou katoa ki ahau.
JER 15:11 I mea a Ihowā: “He pono ka whakakahangia koe e ahau mō te pai; he pono ka meinga e ahau te hoariri kia īnoi ki a koe i te wā o te hē, i te wā o te mamae.
JER 15:12 “E taea rānei e tētahi te wāhi te rino, te rino o te raki, te parāhi rānei?
JER 15:13 Ka hoatu e ahau ōu rawa me ōu taonga hei taonga parakete, kāhore hoki he utu, ā, hei mea tērā mō ōu hara katoa, arā i ōu rohe katoa.
JER 15:14 Ā, ka meinga rātou e ahau kia haere tahi me ōu hoariri ki te whenua kīhai i mōhiotia e koe; nō te mea kei te ngiha he ahi i ahau e riri nei, kā tonu atu ki a koutou.”
JER 15:15 E Ihowā, e mōhio ana koe; mahara ki ahau, tirohia ahau, rapua he utu mō tōku matenga i ōku kaitūkino. Kaua ahau e tangohia atu i a koe ka pūhoi nei ki te riri; kia mōhio koe, mōu ahau i tāwaia ai.
JER 15:16 I kitea āu kupu, ā, kainga ake e ahau, ā, ki ahau hei whakakoa, hei whakahari āu kupu mō tōku ngākau; kua huaina hoki tōu ingoa mōku, e Ihowā, e te Atua o ngā mano.
JER 15:17 Kīhai ahau i noho i roto i te whakaminenga o te hunga whakahī, kīhai i whakamanamana atu; i noho mokemoke ahau, he whakaaro ki tōu ringa; kua whakakīia nei hoki ahau e koe ki te riri.
JER 15:18 He aha tōku mamae i mau tonu ai, tōku patunga tē mahu ai, tē pai ai ki te rongoā? Ka rite rawa rānei koe ki ahau me te awa pāremoremo, me ngā wai e kore e mau?
JER 15:19 Mō reira ko te kupu tēnei a Ihowā: “Ki te hoki koe nā ka whakahokia koe e ahau, kia tū ai koe ki tōku aroaro, ā, ki te tangohia atu e koe te mea utu nui i te mea kino, ka rite koe ki tōku māngai. Ko rātou e hoki ki a koe, kaua ia koe e hoki ki a rātou.
JER 15:20 Ka meinga hoki koe e ahau ki tēnei iwi hei taiepa parāhi; ā, ka whawhai rātou ki a koe, otiia e kore rātou e kaha ki a koe; nō te mea kei a koe ahau hei whakaora i a koe, e mawhiti ai koe,”
JER 15:21 “Ka meinga anō koe e ahau kia mawhiti i roto i te ringa o te hunga kino, ka hokona anō koe e ahau i roto i te ringa o te hunga nanakia.”
JER 16:1 I puta mai anō te kupu a Ihowā ki ahau, i mea ia:
JER 16:2 “Kaua koe e moe hoa, kauaka hoki he tama, he tamāhine māu i tēnei wāhi.”
JER 16:3 Ko te kupu hoki tēnei a Ihowā mō ngā tama, mō ngā tamāhine ka whānau ki tēnei wāhi, mō ō rātou whaea hoki i whānau ai rātou, mō ō rātou pāpā anō nā rātou nei aua tamariki i tēnei whenua:
JER 16:4 “He kino rawa ngā mate e mate ai rātou; e kore rātou e tangihia, e kore hoki e tanumia; ka waiho rātou hei whakawairākau i runga i te mata o te oneone. Ka poto atu rātou i te hoari, i te hemokai; ko ō rātou tinana hei kai mā ngā manu o te rangi, mā ngā kararehe o te whenua.”
JER 16:5 Ko te kupu hoki tēnei a Ihowā: “Kaua e tomo ki te whare tangihanga, kaua hoki e haere ki te tangi, ki te uhunga i a rātou; kua tangohia atu hoki e ahau tāku rangimārie i tēnei iwi,” e ai tā Ihowā, “arā te aroha noa me ngā mahi tohu.
JER 16:6 Ka mate ngā mea nunui rātou ko ngā mea ririki ki tēnei whenua; e kore rātou e tanumia, e kore hoki te tangata e tangi ki a rātou, e kore e haehae i a rātou, e kore e whakamoremore i ō rātou māhunga mō rātou.
JER 16:7 E kore hoki e tuwhaina mai te taro mā rātou i te tangihanga, hei whakamārie i a rātou mō te tūpāpaku; e kore hoki e hōmai ki a rātou te kapu whakamārie kia inumia, ina mea ki tōna pāpā, ki tōna whaea.
JER 16:8 “Kaua anō hoki koe e tomo ki te whare hākari noho tahi ai me rātou, kai ai, inu ai rānei.
JER 16:9 Ko te kupu hoki tēnei a Ihowā o ngā mano, a te Atua o Īharaira: Nanā, ka whakamutua e ahau i tēnei wāhi, i mua i ō koutou kanohi, ā, i ō koutou rā, te reo o te harakoa, te reo o te hari, te reo o te tāne mārena hou, te reo o te wahine mārena hou.
JER 16:10 “Nā, ka kōrerotia e koe ēnei kupu katoa ki tēnei iwi, ā, ka mea rātou ki a koe, ‘Nā te aha tēnei kino nui katoa i kōrerotia mai ai e Ihowā ki a mātou? He aha hoki tō mātou hē? He aha anō tō mātou hara i hara ai mātou ki a Ihowā, ki tō mātou Atua?’
JER 16:11 Kātahi koe ka mea ki a rātou: ‘Nō te mea i whakarērea ahau e ō koutou mātua,’ e ai tā Ihowā, ‘ā, haere ana rātou ki te whai i ngā atua kē, mahi ana ki a rātou, koropiko ana ki a rātou, whakarērea ana ahau e rātou, kīhai hoki rātou i pupuri i tāku ture;
JER 16:12 me koutou anō, kino atu tā koutou mahi i tā ō koutou mātua; nō te mea, nanā, kei te whai koutou i ngā tikanga pakeke o tōna ngākau kino, o tōna ngākau kino, nāwai ā, kāhore koutou e rongo ki ahau.
JER 16:13 Nā reira ka ākiritia atu koutou e ahau i tēnei whenua ki tētahi whenua kīhai i mōhiotia e koutou, e ō koutou mātua rānei; ā, ki reira koutou mahi ai ki ngā atua kē i te ao, i te pō; e kore hoki e puta tōku aroha ki a koutou.’ ”
JER 16:14 “Nanā, kei te haere ake nei hoki ngā rā, e ai tā Ihowā, e kore ai e kōrerotia, ‘E ora ana a Ihowā nāna nei i kawe mai ngā tama a Īharaira i te whenua o Īhipa,’
JER 16:15 engari, ‘E ora ana a Ihowā nāna nei i kawe mai ngā tama a Īharaira i te whenua ki te raki, i ngā whenua katoa anō i peia atu ai rātou e ia.’ Ā, ka whakahokia mai rātou e ahau ki tō rātou whenua i hoatu rā e ahau ki ō rātou mātua.
JER 16:16 “Nanā, ka tīkina atu e ahau ētahi kaihī ika tokomaha,” e ai tā Ihowā, “ā, ka hīa rātou e rātou. Muri iho ka tīkina e ahau he tangata whai kīrehe mohoao, he tokomaha, ā, ka whāia rātou i runga i ngā maunga katoa, i runga i ngā pukepuke katoa, i roto hoki i ngā rua o ngā kāmaka.
JER 16:17 Nō te mea kei runga ōku kanohi i ō rātou ara katoa; kāhore hoki e huna atu i tōku mata, kāhore anō tō rātou hē e huna i ōku kanohi.
JER 16:18 Nā, ka mātua rite i ahau ngā utu mō tō rātou hē, mō tō rātou hara, kia rua; mō rātou i whakapoke i tōku whenua ki ngā tinana o ā rātou mea anuanu, i whakakī hoki i tōku wāhi tupu ki ā rātou mea whakarihariha.”
JER 16:19 E Ihowā, e tōku kaha, e tōku pā kaha, e tōku rerenga atu i te wā o te raru, tērā e haere mai ngā iwi i ngā pito o te whenua ki a koe, ā, ka mea: “Koia anō! He teka kau ngā taonga tupu o ō tātou mātua, he horihori, he mea huakore.
JER 16:20 E hanga rānei te tangata i ētahi atua mōna, ehara nei i te atua?”
JER 16:21 “Mō reira ka meinga rātou e ahau kia mōhio, ka meinga rātou e ahau kia mōhio i tēnei wā kotahi nei ki tōku ringa, ki tōku kaha hoki; ā, ka mōhio rātou, ko Ihowā tōku ingoa.”
JER 17:1 “Kua oti te hara o Hūrā te tuhituhi ki te pene rino, ki te mata hoki o te taimana; he mea whaowhao rawa ki te papa o tō rātou ngākau, ki runga hoki ki ngā haona o ā koutou āta,
JER 17:2 i ā rātou tamariki e mahara ana ki ā rātou āta, ki ā rātou Aherimi hoki i te taha o ngā rākau kōuru nui i runga i ngā pukepuke tiketike.
JER 17:3 E tōku maunga i te pārae, ka hoatu e ahau ōu rawa, ōu taonga katoa kia pāhuatia, me ōu wāhi tiketike, he mea mō te hara, puta noa i ōu rohe katoa.
JER 17:4 Ā, ko koe, nāu ake anō, ka mutu ki tōu kāinga tupu i hoatu nā e ahau ki a koe; ā, ka meinga koe e ahau kia mahi ki ōu hoariri ki te whenua kīhai i mōhiotia e koe. Nō te mea kua tahuna e koutou he ahi i ahau e riri ana, ko tōna kā mō ake tonu atu.”
JER 17:5 Ko te kupu tēnei a Ihowā: “Ka kangā te tangata e whakawhirinaki ana ki te tangata, e mea ana hoki i te kikokiko hei ringa mōna, e kotiti kē ana hoki tōna ngākau i a Ihowā.
JER 17:6 Ka rite hoki ia ki te manoao i te koraha, e kore hoki e kite i te putanga mai o te pai. Engari, ko ngā wāhi waikore o te koraha hei kāinga mōna, he whenua tote, e kore nei e nohoia.
JER 17:7 “Ka manaakitia te tangata e whakawhirinaki ana ki a Ihowā, ko Ihowā tāna e tūmanako ai.
JER 17:8 Ka rite hoki ia ki te rākau i whakatōkia ki te taha o ngā wai, e toro nei ōna pakiaka ki te awa, ā, kāhore e wehi i te tīkākātanga mai o te rā, engari, ka matomato tonu tōna rau. E kore e mānukanuka i te tāu raki, e kore anō hoki e mutu tōna whai hua.”
JER 17:9 Ko te ngākau, he mea tinihanga atu i ngā mea katoa, ā, he tino mate rawa – e mōhiotia rānei e wai?
JER 17:10 “Ko tāku, ko tā Ihowā, he rapu i te ngākau, he whakamātautau i ngā whatumanawa, kia hoatu ai ki tēnei, ki tēnei kia rite ki tōna ara ake, kia rite hoki ki ngā hua o āna mahi.”
JER 17:11 Ka rite ki te pātiri, e whakawhāiti nei i ngā pī, ehara i a ia i whakawhānau, he pērā te tangata e whiwhi ana ki te taonga, ā, kāhore i tika māna; i waenganui o ōna rā ka mahue ia i a rātou, ā, wairangi noa iho ia i tōna mutunga iho.
JER 17:12 Ko tō tātou wāhi tapu he torōna korōria, he mea whakanoho ki te wāhi tiketike mai i te tīmatanga.
JER 17:13 E Ihowā, e tā Īharaira e tūmanako nei, ka whakamā te hunga katoa e whakarere ana i a koe; ka tuhituhia ki te whenua te hunga e kotiti ana i ahau, mō rātou i whakarere i a Ihowā, i te puna wai ora.
JER 17:14 Rongoātia ahau, e Ihowā, ā, ka mahu tōku mate; whakaorangia ahau, ā, ka ora ahau; ko koe hoki tāku e whakamoemiti ai.
JER 17:15 Nanā, kei te kī mai rātou ki ahau, “Kei hea te kupu a Ihowā? Tēnā rā, kia puta mai.”
JER 17:16 Nā, ko ahau nei, kīhai ahau i hohoro atu i te mahi hēpara i muri i a koe, kīhai hoki i hiahia ki te rā o te mamae. E mōhio ana anō koe, i mua i tōu kanohi te mea i puta mai i ōku ngutu.
JER 17:17 Kei waiho koe hei whakawehi mōku; ko koe tāku e whakamanawa atu ai i te rā o te hē.
JER 17:18 Kia whakamā te hunga e tūkino ana i ahau, kaua ia ahau e whakamā; kia wehi rātou, kaua ia ahau e wehi; kawea te rā o te kino ki runga ki a rātou, kia rua hoki ngā whakangaromanga e whakangaro ai koe i a rātou.
JER 17:19 I pēnei mai tā Ihowā kupu ki ahau: “Haere, e tū ki te kūwaha o ngā tama a te iwi, e tomo ai ngā kīngi o Hūrā, e haere atu ai hoki, ā, ki ngā kūwaha katoa o Hiruhārama,
JER 17:20 ā, ka mea ki a rātou, ‘Whakarongo ki te kupu a Ihowā, e ngā kīngi o Hūrā, e Hūrā katoa, e ngā tāngata katoa hoki o Hiruhārama, e tomo nei mā ēnei kūwaha.
JER 17:21 Ko te kupu tēnei a Ihowā, tūpato ki a koutou, ā, kaua he kawenga e waha i te rā hāpati, kaua anō e maua mai ki roto mā ngā kūwaha o Hiruhārama.
JER 17:22 Kaua hoki he kawenga e maua atu i ō koutou whare i te rā hāpati, kaua hoki koutou e mahi i tētahi mahi; engari me whakatapu e koutou te rā hāpati, kia rite ki tāku i whakahau ai ki ō koutou mātua.
JER 17:23 Otiia, kīhai rātou i rongo, kīhai hoki i tahuri tō rātou taringa, engari i whakapakeke i tō rātou kakī, kei rongo rātou, kei manako hoki ki te ako.
JER 17:24 “ ‘Nā, ki te āta whakarongo koutou ki ahau, e ai tā Ihowā, kia kaua e mau kawenga mā ngā kūwaha o tēnei pā i te rā hāpati, engari kia whakatapu i te rā hāpati, kia kaua e mahi i tētahi mahi i reira;
JER 17:25 kātahi ka tomo ki ngā kūwaha o tēnei pā he kīngi, he rangatira, e noho ana i runga i te torōna o Rāwiri, e eke ana ki te hāriata, ki te hōiho, rātou, ā rātou rangatira, me ngā tāngata o Hūrā, me te hunga e noho ana i Hiruhārama; ā, ka tūturu tēnei pā ā ake ake.
JER 17:26 Ā, ka haere mai ngā tāngata i ngā pā o Hūrā, i ngā wāhi i ngā taha o Hiruhārama, i te whenua o Pineamine, i te mānia, i ngā maunga, i te tonga hoki, me te mau mai he tahunga tinana, he patunga tapu, he whakahere, he whakakakara, ā, ka maua mai hoki he whakawhetai, ki te whare o Ihowā.
JER 17:27 Ki te kore ia koutou e whakarongo ki tāku kia whakatapua te rā hāpati, kia kaua hoki e maua he kawenga, ā, ka tomo ki ngā kūwaha o Hiruhārama i te rā hāpati; kātahi ka ngiha i ahau he ahi i ngā kūwaha o reira, ā, ka pau ngā whare kīngi o Hiruhārama, e kore anō e tineia.’ ”
JER 18:1 Ko te kupu i puta mai ki a Heremaia, he mea nā Ihowā, i kī ia:
JER 18:2 “Whakatika, haere ki raro, ki te whare o te kaihanga rīhi, ā, ki reira ahau mea ai kia rongo koe i āku kupu.”
JER 18:3 Kātahi ahau ka haere ki raro, ki te whare o te kaihanga rīhi, nā, kei te mahi ia i tāna mahi i runga i ngā wīra.
JER 18:4 Nā, i te hēnga i roto i te ringa o te kaihanga rīhi o te oko i hangā e ia ki te paru, ka hangā anō e ia tētahi atu oko ki taua mea, ko tā te kaihanga rīhi i kite ai e tika ana kia hangā.
JER 18:5 Nā, ka puta mai te kupu a Ihowā ki ahau, i mea ia:
JER 18:6 “E kore ianei e āhei i ahau te mea i tā tēnei kaihanga rīhi ki a koutou, e te whare o Īharaira?” e ai tā Ihowā. “Nanā, ko te paru i roto i te ringa o te kaihanga rīhi, ko tō koutou rite tēnā i roto i tōku ringa, e te whare o Īharaira.
JER 18:7 I te wā tonu e kōrero ai ahau mō tētahi iwi, mō tētahi kīngitanga, kia hūtia ake, kia wāhia iho, kia whakangaromia;
JER 18:8 ki te tahuri taua iwi i kōrerotia rā e ahau i tō rātou kino, ka puta kē tōku whakaaro mō te kino i whakaaro ai ahau kia meatia ki a rātou.
JER 18:9 Ā, i te wā tonu e kōrerotia ai e ahau tētahi iwi, tētahi kīngitanga rānei, kia hangā, kia whakatōkia,
JER 18:10 ki te mahi taua iwi, i te kino ki tāku titiro, e kore ai e rongo ki tōku reo, kātahi ka puta kē tōku whakaaro mō te pai, i mea nei ahau hei pai mō rātou.
JER 18:11 “Nā, tēnā, kōrero ki ngā tāngata o Hūrā, ki te hunga hoki e noho ana i Hiruhārama, mea atu: ‘Ko te kupu tēnei a Ihowā: Nanā, tēnei ahau te hanga nei i te kino mō koutou, te whakatakoto whakaaro nei mō koutou. Tēnā rā, hoki mai āianei i tōna ara kino, i tōna ara kino, whakatikaia hoki ō koutou ara, ā koutou mahi.’ ”
JER 18:12 “Otiia ka kī rātou, ‘Kāhore he painga. Ka haere tonu hoki mātou i ā mātou nei i whakaaro ai, ā, ka mahi mātou i ngā tikanga pakeke a te ngākau kino o tēnā, o tēnā.’ ”
JER 18:13 Nā reira tēnei kupu a Ihowā: “Tēnā, uia atu ki ngā iwi: Ko wai i rongo ki ngā mea pēnei? He hanga whakawehi rawa te mahi a te wāhina o Īharaira.
JER 18:14 E whakarere rānei te hukarere o Repanōna i te kōhatu o te pārae? Ka maroke rānei ngā wai mātao e rere iho ana i tawhiti?
JER 18:15 Kua wareware hoki tāku iwi ki ahau, kua tahu whakakakara ki te horihori; ā, kua meinga kia tūtuki rātou i ō rātou ara, i ngā huarahi onamata, haere ai i ngā huarahi i rahaki, i te ara kīhai i opehia ake.
JER 18:16 Kia meinga tō rātou whenua hei mīharotanga, hei mea e whakatoia mai ai ā ake ake. Ka oho katoa ngā tāngata e tika ana nā reira, ka rūrū i tōna māhunga.
JER 18:17 Ka tītaritaria rātou e ahau ānō nā te hau marangai i te aroaro o te hoariri; ka titiro ahau ki tō rātou tuarā, kāhore ki tō rātou kanohi, i te rā o tō rātou aituā.”
JER 18:18 Kātahi rātou ka mea, “Haere mai, tātou ka whakatakoto whakaaro mō Heremaia – e kore hoki e ngaro te ture i te tohunga, te whakaaro rānei i te tangata whakaaro nui, te kupu rānei i te poropiti. Haere mai, tātou ka patu i a ia ki te arero; kaua hoki e whakarongo ki tētahi o āna kupu.”
JER 18:19 Kia whai whakaaro koe ki ahau, e Ihowā; whakarongo hoki ki te reo o te hunga e totohe ana ki ahau.
JER 18:20 E utua rānei te pai ki te kino? Kua keria nei hoki e rātou he rua mō tōku wairua. Kia mahara ki tōku tūnga ki tōu aroaro ki te kōrero i te pai mō rātou, ki te whakatahuri atu hoki i tōu āritarita i a rātou.
JER 18:21 Mō reira hoatu ā rātou tamariki ki te hemokai, tukua atu ki te kaha o te hoari; whakapania ā rātou wāhine i te tamariki, whakapouarutia. Tukua ō rātou tāngata kia whakamatea, ā rātou taitamariki kia patua ki te hoari i te whawhai.
JER 18:22 Kia rangona he tangi i roto i ō rātou whare, ina kawea e koe he ope huaki tata ki a rātou. Kua keria hoki e rātou he rua hei hopu i ahau, kua huna hoki he rore mō ōku waewae.
JER 18:23 Otiia, e Ihowā, e mōhio ana koe ki ō rātou whakaaro katoa mōku kia whakamatea; kaua he whakamārie mō tō rātou hē, kaua anō tō rātou hara e murua atu i tōu aroaro. Engari, kia whakatakā atu rātou i tōu aroaro; māu e mea ki a rātou i te wā e riri ai koe.
JER 19:1 Ko te kupu tēnei a Ihowā: “Haere, hokona mai tētahi pounamu oneone a te kaihanga rīhi. Ka tango mai hoki i ētahi o ngā kaumātua o te iwi, i ētahi o ngā kaumātua o ngā tohunga;
JER 19:2 ka haere ki te raorao o te tama a Hinomo, ki tērā i te tomokanga ki te Kūwaha Hahiti, ā, ka karanga i reira i ngā kupu e kōrerotia e ahau ki a koe;
JER 19:3 kī atu: ‘Whakarongo ki te kupu a Ihowā, e ngā kīngi o Hūrā, e te hunga e noho ana i Hiruhārama. Ko te kupu tēnei a Ihowā o ngā mano, a te Atua o Īharaira: Tēnei ahau te kawe nei i te kino ki tēnei wāhi, ā, ko ngā tāngata katoa e rongo ana, ka tīorooro ōna taringa.
JER 19:4 Kua whakarere nei rātou i ahau, kua whakarerekētia e rātou tēnei wāhi, kua tahu whakakakara ki konei ki ngā atua kē, kīhai nei i mōhiotia e rātou, e rātou ko ō rātou mātua, e ngā kīngi hoki o Hūrā; ā, kua whakakīia e rātou tēnei wāhi ki te toto o te hunga kore hara.
JER 19:5 Kua hangā hoki e rātou ngā wāhi tiketike o Paara, kia tahuna ai e rātou ā rātou tamariki ki te ahi hei tahunga tinana ki a Paara; he mea kīhai i whakahaua e ahau, kīhai i kōrerotia e ahau, kīhai anō hoki i puta ake i tōku ngākau.
JER 19:6 Mō reira, nanā, kei te haere mai ngā rā, e ai tā Ihowā, e kore ai tēnei wāhi e huaina, ko Topete, Ko te Raorao o te tama a Hinomo rānei; engari, Ko te Raorao o te Parekura.
JER 19:7 “ ‘Nā, ka meinga e ahau kia hē te whakaaro o Hūrā rāua ko Hiruhārama ki tēnei wāhi, ā, ka meinga rātou e ahau kia hinga i te hoari i te aroaro o ō rātou hoariri, i te ringa anō o te hunga e whai ana kia whakamatea rātou; ā, ko ō rātou tinana ka hoatu e ahau hei kai mā ngā manu o te rangi, mā ngā kararehe hoki o te whenua.
JER 19:8 Ā, ka meinga e ahau tēnei pā hei mīharotanga, hei whakahīanga; ko ngā tāngata katoa e haere i konei ka oho, ka whakahī ki ōna mate urutā katoa.
JER 19:9 Ka meinga anō rātou e ahau kia kai i ngā kikokiko o ā rātou tama, i ngā kikokiko o ā rātou tamāhine, ā, ka kai rātou i ngā kikokiko o tōna hoa tata, o tōna hoa tata, i te whakapaenga, i te kōpaninga e kōpania ai rātou e ō rātou hoariri, e te hunga hoki e whai ana kia whakamatea rātou.’
JER 19:10 “Kātahi koe ka wāhi i te pounamu i te tirohanga a ngā tāngata ka haere tahi atu nā koutou,
JER 19:11 ā, ka mea atu ki a rātou: ‘Ko te kupu tēnei a Ihowā o ngā mano: Ka rite tāku wāwāhi i tēnei iwi, i tēnei pā, ka pēnei me te wāhanga o te oko a te kaihanga rīhi, e kore nei e taea te tapitapi kia ora anō. Ā, ka tanu hoki rātou ki Topete, kia kore rā anō he wāhi hei tanumanga.
JER 19:12 Ko tāku tēnei e mea ai ki tēnei wāhi, e ai tā Ihowā, ki ōna tāngata hoki, kia meinga rā anō tēnei pā kia rite ki Topete.
JER 19:13 Ā, ko ngā whare o Hiruhārama, me ngā whare o ngā kīngi o Hūrā, kua whakapokea nei, ka rite ki tēnei wāhi, ki Topete, arā ko ngā whare katoa i tahu whakakakara ai rātou i runga i ngā tuanui ki te ope katoa o te rangi, i ringihia ai hoki e rātou he ringihanga ki ngā atua kē.’ ”
JER 19:14 Kātahi ka haere mai a Heremaia i Topete, i te wāhi i ungā ai ia e Ihowā ki te poropiti, ā, tū ana ia i te marae o te whare o Ihowā, ā, ka mea ki te iwi katoa,
JER 19:15 “Ko te kupu tēnei a Ihowā o ngā mano, a te Atua o Īharaira: ‘Nanā, ka kawea mai e ahau ki runga ki tēnei pā, ā, ki runga hoki i ōna pā katoa, te kino katoa i kōrerotia rā e ahau mō konei; nō te mea kua whakapakeketia e rātou ō rātou kakī, kia kore ai rātou e rongo ki āku kupu.’ ”
JER 20:1 Nā, ka rongo a Pahuru tama a Imere tohunga, tino kāwana i roto i te whare o Ihowā, i a Heremaia e poropiti ana i ēnei mea.
JER 20:2 Kātahi a Pahuru ka patu i a Heremaia poropiti, kuhuna ana e ia ki te here waewae i te Kūwaha o Runga o Pineamine, ki tērā i te whare o Ihowā.
JER 20:3 Nā, i te aonga ake ka whakaputaina mai a Heremaia e Pahuru i te here waewae. Kātahi a Heremaia ka mea ki a ia, “Ehara a Pahuru i te ingoa i huaina e Ihowā mōu, engari ko Mākoro Mihapipi.
JER 20:4 Nō te mea ko te kupu tēnei a Ihowā: ‘Nanā, ka meinga koe e ahau hei whakawehi mōu anō, mō ōu hoa katoa anō hoki; ka hinga rātou i te hoari a ō rātou hoariri, me te titiro anō ōu kanohi. Ka hoatu anō e ahau a Hūrā katoa ki te ringa o te kīngi o Papurōna, ā, māna rātou e whakarau ki Papurōna, e patu ki te hoari.
JER 20:5 Ka hoatu anō e ahau ngā rawa katoa o tēnei pā, me āna mea katoa i hua mai, me āna mea utu nui katoa, āe rā, me ngā taonga katoa o ngā kīngi o Hūrā, ka hoatu e ahau ki te ringa o ō rātou hoariri, ā, ka pāhuatia e rātou, ka tangohia, ka maua hoki ki Papurōna.
JER 20:6 Nā, ko koe, e Pahuru, koutou ko ngā tāngata katoa e noho ana i tōu whare, ka riro koutou ki te whakarau; ā, ka tae koe ki Papurōna, mate atu ki reira, tanumia atu ki reira, a koe me ōu hoa aroha katoa, i poropiti teka atu nā koe ki a rātou.’ ”
JER 20:7 E Ihowā, nāu ahau i hangarau, ā, raru ana ahau; he kaha rawa koe i ahau, ā, kua taea tāu. Kua waiho ahau hei whakakatanga i te rā katoa, kei te whakatoia ahau e te katoa.
JER 20:8 I ōku kōrerotanga katoa hoki, ka hāmama ahau; ka karanga ahau, “He mahi nanakia, he pāhua!” Nō te mea kua waiho te kupu a Ihowā hei tāwainga mōku, hei whakatoinga, i te rā katoa.
JER 20:9 Ā, ki te kī ahau, “E kore ahau e whakahua i a ia, e kore anō hoki e kōrero i runga i tōna ingoa ā muri ake nei,” nā, ka kā i roto i tōku ngākau me te mea he ahi e ngiha ana, tūtaki iho ki roto ki ōku wheua; ā, ka ruha ahau i te koromaki, ā, kāhore e taea e ahau te pupuri.
JER 20:10 Kua rongo hoki ahau i te hahani a te tini: “He whakawehi i ngā taha katoa! Whakahēngia, ā, ka whakahēngia ia e mātou!” E ai tā ōku hoa tāpui katoa, te hunga e whanga ana i ahau kia tatū; “Tērā pea ia e taea te whakawai, ā, ka kaha tātou ki a ia, ā, ka whiwhi tātou ki te utu i a ia.”
JER 20:11 Otiia kei ahau a Ihowā, ānō he mārohirohi, he mea whakamataku. Nā reira, ka tūtuki ngā waewae o ōku kaitūkino, e kore hoki tā rātou e taea. Tērā e nui tō rātou whakamā, he whakamā mau tonu, ā, e kore e warewarea, nō te mea kīhai i mahia tā rātou i runga i te whakaaro nui.
JER 20:12 Otiia, e Ihowā o ngā mano, e whakamātautau nei i te tangata tika; e kite nei i ngā whatumanawa, i te ngākau, tukua ahau kia kite i tāu utu ki a rātou; kua whakakitea nei hoki e ahau ki a koe tāku totohe.
JER 20:13 Waiata ki a Ihowā! Whakamoemititia a Ihowā! Kua whakaorangia nei hoki e ia te wairua o te rawakore i te ringa o ngā kaimahi i te kino.
JER 20:14 Kia kangā te rangi i whānau ai ahau; kaua e whakapaingia te rā i puta, mai ai ahau i roto i tōku whaea.
JER 20:15 Kia kangā te tangata nāna i kawe te kōrero ki tōku pāpā, i mea, “Kua whānau he tamaiti māu, he tāne,” meinga ana kia nui tōna koa.
JER 20:16 Kia rite taua tangata ki ngā pā i hurihia e Ihowā, kīhai nei i rīpenetātia e ia. Kia rangona e ia te karanga i te ata, te hāmama i te poutūmārōtanga;
JER 20:17 he kore nōna kīhai i whakamate i ahau i te putanga mai anō i te kōpū; ā, kia waiho ai tōku whaea hei urupā mōku, kia mau tonu ai te hapū o tōna kōpū.
JER 20:18 He aha ahau i puta mai ai i te kōpū, kia kite i te raruraru, i te māuiui, kia poto anō ōku rā i te whakamā?
JER 21:1 Ko te kupu i puta mai ki a Heremaia, he mea nā Ihowā, i te ngarenga a Kīngi Terekia i a Pahuru tama a Merekia, i a Tepania hoki, tama a Maaheia tohunga, ki a ia, hei kī,
JER 21:2 “Rapua koa tētahi tikanga i a Ihowā mō tātou, kei te whawhai nei hoki a Nepukareha kīngi o Papurōna ki a tātou; tērā pea tā Ihowā mahi ki a tātou e rite ki āna mea whakamīharo katoa, ā, ka haere atu ia i tō tātou wāhi.”
JER 21:3 Kātahi a Heremaia ka mea atu ki a rātou: “Ko tā koutou tēnei e kōrero ai ki a Terekia:
JER 21:4 ‘Ko te kupu tēnei a Ihowā, a te Atua o Īharaira: Nanā, ka whakahokia atu e ahau ngā patu mō te whawhai i ō koutou ringa, mō tā koutou whawhai ki te kīngi o Papurōna, ki ngā Karari, e whakapae nei i a koutou i waho o te taiepa, ka huihuia hoki rātou e ahau ki waenganui o tēnei pā.
JER 21:5 Ā, ko ahau nei anō hei whawhai ki a koutou ki te ringa mārō, ki te tākakau kaha, i runga i te riri, i te weriweri, i te āritarita nui.
JER 21:6 Ā, ka patua e ahau ngā tāngata o tēnei pā, te tangata, te kararehe; ka mate rātou i te mate urutā nui.
JER 21:7 Nā muri iho, e ai tā Ihowā, ka hoatu e ahau a Terekia kīngi o Hūrā rātou ko āna tāngata, ko te iwi – arā ko te hunga o tēnei pā e toe i te mate urutā – i te hoari, i te hemokai, ki te ringa o Nepukareha kīngi o Papurōna, ki te ringa o ō rātou hoa whawhai, ki te ringa hoki o te hunga e whai ana kia whakamatea rātou. Ā, ka patua rātou e ia ki te mata o te hoari; e kore rātou e tohungia e ia, e kore e manawapātia, e kore e arohaina.’
JER 21:8 “Kōrero atu anō hoki koe ki tēnei iwi: ‘Ko te kupu tēnei a Ihowā: Nanā, kua takoto i ahau ki tō koutou aroaro te ara ki te ora, me te ara ki te mate.
JER 21:9 Ko te tangata ka noho i tēnei pā, ka mate i te hoari, i te hemokai, i te mate urutā; ko te tangata ia e haere atu ana, ā, ka taka atu ki ngā Karari e whakapae nei i a koutou, ka ora ia, ā, ko tōna oranga hei taonga parakete ki a ia.
JER 21:10 Nō te mea kua whakamau atu tōku mata ki tēnei pā hei kino, kāhore hoki hei pai, e ai tā Ihowā: ka hoatu ki te ringa o te kīngi o Papurōna, ā, ka tahuna e ia ki te ahi.’ ”
JER 21:11 “Nā, ko te mea mō te whare o te kīngi o Hūrā: ‘Whakarongo koutou ki te kupu a Ihowā,
JER 21:12 e te whare o Rāwiri! Ko te kupu tēnei a Ihowā: Whakaritea te whakawā i te ata, whakaorangia ake hoki te tangata e pāhuatia ana i roto i te ringa o te kaitūkino, kei puta tōku riri ānō he ahi, ā, ka kā, tē taea te tinei, mō te kino hoki o ā koutou mahi.
JER 21:13 Nanā, hei hoariri ahau mōu, e te wahine e noho nā i te raorao, i te kāmaka hoki o te wāhi papatairite, e ai tā Ihowā; koutou nāna nā te kupu, “Ko wai e haere mai ki a tātou ko wai rānei e tomo ki ō tātou nohoanga?”
JER 21:14 Ā, ka rite ki ngā hua o ā koutou mahi tāku whiu i a koutou, e ai tā Ihowā; ā, ka ngiha i ahau he ahi i tōna ngahere, e pau ai ngā mea katoa ā taka noa, taka noa i a ia.’ ”
JER 22:1 Ko te kupu tēnei a Ihowā: “Haere ki raro, ki te whare o te kīngi o Hūrā, ka kōrero i tēnei kupu ki reira,
JER 22:2 mea atu: ‘Whakarongo ki te kupu a Ihowā, e te kīngi o Hūrā, e noho nā i runga i te torōna o Rāwiri – a koe, koutou ko ōu tāngata, ko tōu iwi e tomo ana ki ēnei kūwaha.
JER 22:3 Ko te kupu tēnei a Ihowā: Whakaritea te whakawā me te tika, whakaorangia te tangata e pāhuatia ana i te ringa o te kaitūkino. Kaua e mauria kinotia, kaua e whakatupuria kinotia te manene, te pani, te pouaru, kaua hoki e whakahekea te toto harakore ki tēnei wāhi.
JER 22:4 Nō te mea ki te mahia mārietia tēnei e koutou, kātahi ka tomo mai ki ngā kūwaha o tēnei whare he kīngi e noho ana i runga i te torōna o Rāwiri, e eke ana ki te hāriata, ki te hōiho, a ia, me āna tāngata, me tōna iwi.
JER 22:5 Engari, ki te kore koutou e whakarongo ki ēnei kupu, hei oati tēnei māku ki ahau anō, e ai tā Ihowā, tērā tēnei whare e takoto kau.’ ”
JER 22:6 Ko te kupu hoki tēnei a Ihowā mō te whare o te kīngi o Hūrā: “Ko Kireara koe ki ahau, ā, ko te tihi o Repanōna; otiia he pono ka meinga koe e ahau hei koraha, hei pā hoki e kore e nohoia.
JER 22:7 Ā, ka whakaritea e ahau he kaiwhakangaro mōu, rite rawa i tāna patu, i tāna patu; ā, ka tuaina e rātou ōu hīta papai, ka makā hoki ki te ahi.
JER 22:8 “Ā, he maha ngā iwi e haere mā te taha o tēnei pā, ā, ka mea tēnā ki tōna hoa, ki tōna hoa, ‘He aha tēnei i meatia e Ihowā ki tēnei pā nui?’
JER 22:9 Kātahi rātou ka kī ake: ‘Mō rātou i whakarere i te kawenata a Ihowā, a tō rātou Atua, ā, koropiko ana ki ngā atua kē, mahi atu ana ki a rātou.’ ”
JER 22:10 Kaua koutou e tangi ki te tūpāpaku, e uhunga rānei ki a ia; engari kia nui te tangi mō te tangata e haere atu ana; nō te mea e kore ia e hoki mai ā muri, e kore anō e kite i te whenua i whānau ai ia.
JER 22:11 Ko te kupu hoki tēnei a Ihowā mō Harumu tama a Hōhia, kīngi o Hūrā, i kīngi nei i muri i tōna pāpā, i a Hōhia, i haere atu nei hoki i tēnei wāhi: “E kore ia e hoki mai ki konei ā ake ake.
JER 22:12 Engari, hei te wāhi i whakaraua atu ai ia, ka mate ia ki reira, ā, e kore ia e kite i tēnei whenua ā ake ake.
JER 22:13 Auē te mate mō te tangata e hanga nei i tōna whare ki te hē, i ngā rūma hoki o reira ki te whakawā hē; e whakamahi nei i tōna hoa, kāhore e utua, kāhore hoki e hoatu tō tāna mahi ki a ia;
JER 22:14 e mea ana, ‘Ka hangā e ahau he whare māhorahora mōku, he rarahi ngā rūma.’ Pokaia ana he matapihi mōna i roto; ā, ko te hīpoki he hīta, pania ake ki te whero ngangana.
JER 22:15 “E kīngi rānei koe, nō te mea e whai ana koe kia pērā rawa atu te hīta? Kīhai ianei tōu pāpā i kai, i inu, i whakarite i te whakawā, i te tika? Ā, he pai i reira ki a ia.
JER 22:16 I whakaritea e ia te whakawā a te ware a te rawakore; ā, he pai i reira. He teka ianei ko te mōhio tēnei ki ahau?” e ai tā Ihowā.
JER 22:17 “Kāhore hoki ōu kanohi, ōu ngākau mō tētahi mea kē atu, heoi mō tōu apo anake, mō te whakaheke i te toto harakore, mō te tūkino, mō te tutū, hei mahi māu.”
JER 22:18 Mō reira ko tā Ihowā kupu tēnei mō Iehoiakimi tama a Hōhia kīngi o Hūrā: “Kāhore he tangi mōna, he mea: ‘Auē, e tōku tuakana!’ ko tēnei rānei, ‘Auē, e te tuahine!’ Kāhore rātou e tangi mōna, e mea, ‘Auē, te ariki! Auē, tōna korōria!’
JER 22:19 Ka tanumia ia ki te tanu o te kāihe – ka tōia, ka makā ki waho i ngā kūwaha o Hiruhārama.
JER 22:20 “E piki ki Repanōna tangi ai, kia puaki hoki tōu reo i Pahana; tangi mai hoki i Aparimi, kua mongamonga katoa hoki te hunga i aroha ki a koe.
JER 22:21 I kōrero ahau ki a koe i te wā o tōu rangatiratanga; engari i mea koe, ‘E kore ahau e rongo.’ Ko tāu tikanga tēnei nō tōu tamarikitanga ake, kīhai koe i rongo ki tōku reo.
JER 22:22 Mā te hau e whāngai āu hēpara katoa, ka riro hoki te hunga i aroha ki a koe ki te whakarau. Kātahi rawa koe ka whakamā, ka numinumi kau ki tōu kino katoa.
JER 22:23 E te wahine e noho nā i Repanōna, e hanga nā i tōu kōhanga ki ngā hīta, anō te nui o te manawapā mōu ina tae ngā mamae ki a koe, te mamae e rite ana ki tō te wahine e whānau ana!”
JER 22:24 “E ora ana ahau,” e ai tā Ihowā, “ahakoa a Konia tama a Iehoiakimi kīngi o Hūrā, ko te mōwhiti i runga i tōku ringa matau, ka unuhia tonutia atu koe e ahau i reira;
JER 22:25 ā, ka hoatu koe e ahau ki te ringa o te hunga e whai ana kia whakamatea koe, ki te ringa anō o te hunga e wehi nā koe, arā ki te ringa o Nepukareha kīngi o Papurōna, ki te ringa hoki o ngā Karari.
JER 22:26 Ka ākiritia atu anō koe e ahau me tōu whaea i whānau ai koe ki tētahi atu whenua ehara nei i te wāhi i whānau ai kōrua; ā, mate atu kōrua ki reira.
JER 22:27 Engari ko te whenua i ōkaka tonu ai ō rāua ngākau kia hoki ki reira, e kore rāua e hoki ki reira.”
JER 22:28 Ko tēnei tangata, ko Konia, he oko pakaru rānei ia e whakahāweatia ana? He oko kāhore e matenuitia ana? He aha i ākiritia atu ai, rātou ko ōna uri, i makā atu ai ki te whenua kīhai i mōhiotia e rātou?
JER 22:29 E te whenua, te whenua, te whenua, whakarongo ki te kupu a Ihowā.
JER 22:30 Ko te kupu tēnei a Ihowā: “Tuhituhia e koutou tēnei tangata, he urikore, he tangata e kore e oti pai tāna i ōna rā e ora ai; e kore hoki e tōtika tā tētahi o ōna uri e noho ana i runga i te torōna o Rāwiri, e kīngi ana ā muri ake nei i roto i a Hūrā.”
JER 23:1 “Auē te mate mō ngā hēpara e whakakorekore nei, e whakamarara nei i āku hipi i hēpara ai!” e ai tā Ihowā.
JER 23:2 Mō reira ko te kupu tēnei a Ihowā, a te Atua o Īharaira mō ngā hēpara e whāngai nei i tāku iwi: “Kua whakamararatia e koutou āku hipi, āia atu ana rātou, kīhai hoki i tirotirohia e koutou. Nanā, ka whiua koutou e ahau mō te kino o ā koutou mahi,” e ai tā Ihowā.
JER 23:3 “Ā, ka huihuia mai e ahau ngā toenga o āku hipi i ngā whenua katoa i peia atu ai rātou e ahau, ka whakahokia mai hoki rātou ki ō rātou puninga, ā, ka hua rātou, ka tini.
JER 23:4 Ā, ka whakaarahia ake e ahau ētahi hēpara mō rātou, māna rātou e whāngai; ā, e kore rātou e wehi ā muri ake nei, e kore e pāwera, e kore hoki tētahi e ngaro atu,” e ai tā Ihowā.
JER 23:5 “Nanā, kei te haere mai ngā rā,” e ai tā Ihowā, “e whakaarahia ai e ahau he Manga tika mō Rāwiri, ā, ka kīngi ia, he kīngi, ā, ka mahi i runga i te whakaaro nui, ka whakarite hoki i te whakawā, i te tika ki te whenua.
JER 23:6 I ōna rā ka whakaorangia a Hūrā, ka noho hūmārie a Īharaira; ā, ko tōna ingoa tēnei e karangatia ai ia: Ko Ihowā Tō Tātou Tika.
JER 23:7 Nō reira, nā, kei te haere mai ngā rā,” e ai tā Ihowā, “e kore ai e kōrerotia, ‘E ora ana a Ihowā nāna nei i kawe mai ngā tama a Īharaira i te whenua o Īhipa,’
JER 23:8 engari, ‘E ora ana a Ihowā nāna nei i kawe mai, nāna nei i ārahi mai ngā uri o te whare o Īharaira i te whenua ki te raki, i ngā whenua katoa anō i peia atu ai rātou e ahau.’ Ā, ka noho rātou ki tō rātou oneone.”
JER 23:9 Nā, mō ngā poropiti: Kei te marū tōku ngākau i roto i ahau, ngāueue ana ōku wheua katoa; e rite ana ahau ki te tangata haurangi, ki te tangata kua mate i te wāina; he whakaaro hoki ki a Ihowā, he whakaaro ki āna kupu tapu.
JER 23:10 Kei te kapi hoki te whenua i te tangata pūremu; kei te tangi hoki te whenua, he mea mō te kanga; kua maroke ngā wāhi kai o te koraha; ā, ko tō rātou rerenga he kino, ko tō rātou kaha, kāhore i tika.
JER 23:11 “Nō te mea ko te poropiti, ko te tohunga, kua poke ngātahi rāua; āe rā, kua kitea e ahau tō rātou kino i roto i tōku whare,”
JER 23:12 “Mō reira ka rite tō rātou ara ki a rātou ki ngā wāhi pāhekeheke i roto i te pōuri, ka āia atu rātou, ā, ka taka ki reira. Ka kawea atu hoki e ahau he kino ki runga ki a rātou, ko te tau hoki e tirotirohia ai rātou,”
JER 23:13 “Ā, kua kite ahau i te wairangi i roto i ngā poropiti o Hamaria: nā Paara tā rātou poropititanga, ā, whakapōhēhētia ana e rātou tāku iwi, a Īharaira.
JER 23:14 Kei ngā poropiti anō hoki o Hiruhārama, kua kitea e ahau tētahi mea whakahouhou rawa: e pūremu ana rātou, ā, ka haere i runga i te teka, ā, e whakakahangia ana e rātou ngā ringa o ngā kaimahi o te kino, e kore rawa ai tētahi e tahuri mai i tōna kino. Ki ahau kua rite rātou katoa ki Horoma, ā, ko ngā tāngata o reira, koia anō kei o Komora.”
JER 23:15 Mō reira ko te kupu tēnei a Ihowā o ngā mano mō ngā poropiti: “Nanā, ka whāngaia rātou e ahau ki te taru kawa, ā, ka whakainumia rātou ki te wai kawa; nō te mea i ahu atu i ngā poropiti o Hiruhārama te takahi tapu puta noa i te whenua katoa.”
JER 23:16 Ko te kupu tēnei a Ihowā o ngā mano: “Kei whakarongo ki ngā kupu a ngā poropiti e poropiti nā ki a koutou; e ako ana rātou i a koutou ki te wairangi. E kōrero ana rātou i te kite a tō rātou ake ngākau, ā, ehara i te mea nā te māngai o Ihowā.
JER 23:17 E mea tonu ana rātou ki te hunga e whakahāwea ana ki ahau, ‘kua kī mai a Ihowā: Ka mau te rongo ki a koutou’; ā, ki te hunga katoa e haere ana i runga i ngā tikanga pakeke o ō rātou ngākau, e mea ana rātou, ‘E kore te kino e tae mai ki a koutou.’
JER 23:18 Ko wai oti i tū i runga i tō Ihowā whakaaro, e kite ai, e rongo ai rānei ki tāna kupu? Ko wai i mahara ki tāku kupu, i rongo hoki?
JER 23:19 Nanā, kua puta te tūkauati i a Ihowā, koia anō ko tōna riri, āe rā, he tūkauati pōwaiwai; tērā e pakaru ki runga ki te upoko o te hunga kino.
JER 23:20 E kore e hoki tō Ihowā riri, kia oti rā anō, kia whakapūmautia rā anō e ia ngā whakaaro o tōna ngākau. I ngā rā whakamutunga ka tino mārama koutou.
JER 23:21 Kīhai ahau i unga i ēnei poropiti, heoi rere ana rātou; kīhai ahau i kōrero ki a rātou, heoi kei te poropiti rātou.
JER 23:22 Otiia me i tū rātou i runga i tōku whakaaro, kua meinga e rātou tāku iwi kia rongo ki āku kupu, kua whakahokia mai e rātou i tō rātou ara kino, i te kino hoki o ā rātou mahi.
JER 23:23 “He Atua tata ianei ahau,” e ai tā Ihowā, “ā, ehara i te Atua i tawhiti?
JER 23:24 E taea rānei e tētahi te huna i a ia ki ngā wāhi ngaro, e kore ai ia e kitea e ahau?” e ai tā Ihowā. “He teka ianei kapi tonu i ahau te rangi me te whenua?”
JER 23:25 “Kua rongo ahau i ngā kupu a ngā poropiti, e poropiti teka nā i runga i tōku ingoa, e mea nā, ‘He moe nāku, he moe nāku.’
JER 23:26 Kia pēhea te roa o te mau o tēnei i roto i te ngākau o ngā poropiti, e poropiti teka nā; arā o ngā poropiti, e poropiti nā i te tinihanga o tō rātou ngākau?
JER 23:27 E whakaaro nā, mā ā rātou moe e kōrerotia nā e rātou ki tōna hoa, ki tōna hoa, ka meinga ai tāku iwi kia wareware ki tōku ingoa, kia pērā me ō rātou mātua i wareware nei ki tōku ingoa, i mea nei ki a Paara.
JER 23:28 Ko te poropiti he moe nei tāna, me kōrero e ia te moe, ā, ko te tangata i a ia tāku kupu, kia pono tāna kōrero i tāku kupu. He aha oti tā te pāpapa ki te wīti?” e ai tā Ihowā.
JER 23:29 “He teka ianei e rite ana tāku kupu ki te ahi?” e ai tā Ihowā; “ki te hama e wāhi nei i te kāmaka ā mongamonga noa?”
JER 23:30 “Mō reira, nā, hei hoariri ahau mō ngā poropiti,” e ai tā Ihowā, “e tāhae nei i āku kupu i tōna hoa, i tōna hoa.
JER 23:31 Nanā, hei hoariri ahau mō ngā poropiti,” e ai tā Ihowā, “mō te hunga e whakamahi nei i ō rātou arero, e kī nei, ‘E mea ana ia.’
JER 23:32 Nanā, hei hoariri ahau,” e ai tā Ihowā, “mō te hunga e poropiti ana i ngā moe teka, ā, kōrerotia ana e rātou, whakapōhēhētia ana e rātou tāku iwi ki ā rātou kōrero teka, ki tā rātou whakapehapeha wairangi. Otiia, ehara rātou i ahau i unga, i whakahau rānei; e kore rawa hoki tēnei iwi e whai pai i a rātou,” e ai tā Ihowā.
JER 23:33 “Ā, ki te ui tēnei iwi ki a koe, te poropiti, te tohunga rānei, ki te mea, ‘Tēnā koa tā Ihowā pīkaunga?’ Kātahi koe ka kī atu ki a rātou, ‘E tae te pīkaunga! Ka makā atu koutou e ahau, e ai tā Ihowā.’
JER 23:34 Nā, ko te poropiti, ko te tohunga, ko te iwi rānei, e mea ana, ‘Ko te pīkaunga a Ihowā,’ ka whiua e ahau taua tangata, rātou ko tōna whare.
JER 23:35 Ko te kupu tēnei mā koutou ki tōna hoa, ki tōna hoa, ki tōna teina, ki tōna tuakana, ‘Tēnā koa te kupu i whakahokia mai e Ihowā?’ ā, ‘I pēhea mai a Ihowā?’
JER 23:36 Kāti hoki tā koutou whakahua i te pīkaunga a Ihowā; nō te mea ko te kupu ake a tēnei, a tēnei hei pīkaunga māna; kua whakarerekētia hoki, koutou ngā kupu a te Atua ora, a Ihowā o ngā mano, a tō tātou Atua.
JER 23:37 “Ko tāu tēnei e kōrero atu ai ki te poropiti, ‘He aha te whakautu a Ihowā ki a koe?’ Ko tēnei hoki, ‘I pēhea mai a Ihowā?’
JER 23:38 Engari ki te mea koutou, ‘Ko te pīkaunga a Ihowā.’ Nā, ko te kupu tēnei a Ihowā: Mō tā koutou kōrero i tēnā kupu, ‘ko te pīkaunga a Ihowā,’ ā, kua unga tangata ahau ki a koutou, hei mea, Kaua koutou e kī, ‘ko te pīkaunga a Ihowā.’
JER 23:39 Mō reira, nā, ka wareware rawa ahau ki a koutou, ka ākiritia atu anō koutou i tōku aroaro, me te pā i hoatu e ahau ki a koutou ko ō koutou mātua.
JER 23:40 Ka utaina hoki e ahau he ingoa kino ki runga ki a koutou, he mea mau tonu, he whakamā hoki e mau tonu ana, ā, e kore e wareware.”
JER 24:1 I whakakite a Ihowā ki ahau, nā, e rua ngā kete piki i whakatūria ki mua i te temepara o Ihowā. I muri iho i te whakaraunga a Nepukareha kīngi o Papurōna i a Hekonia tama a Iehoiakimi kīngi o Hūrā, rātou ko ngā rangatira o Hūrā, ko ngā kāmura, ko ngā parakimete i Hiruhārama, i tāna kawenga hoki i a rātou ki Papurōna.
JER 24:2 He pai rawa ngā piki o tētahi o ngā kete, he rite tonu ki ngā piki mātāmua; ā, he kino rawa ngā piki o tētahi o ngā kete, kāhore e taea te kai, i te kino rawa.
JER 24:3 Kātahi a Ihowā ka mea ki ahau, “He aha tāu e kite nā, e Heremaia?” Anō rā ko ahau, “He piki; ko ngā piki pai, he tino pai; ā, ko ngā mea kino, he tino kino, kāhore e taea te kai, i te kino rawa.”
JER 24:4 Nā, ka puta mai te kupu a Ihowā ki ahau, i mea ia:
JER 24:5 “Ko te kupu tēnei a Ihowā, a te Atua o Īharaira: ‘Ka pēnei i ngā piki pai nei tōku mōhio ki te hunga o Hūrā i whakaraua nei, i ungā atu nei e ahau i tēnei wāhi ki te whenua o ngā Karari, hei pai mō rātou.
JER 24:6 Ka whakamau tonu atu hoki ōku kanohi ki a rātou mō te pai, ā, ka whakahokia mai anō rātou e ahau ki tēnei whenua. Ka hangā anō rātou e ahau, e kore hoki e wāhia iho; ka whakatōkia rātou e ahau, e kore anō e hūtia atu.
JER 24:7 Ka hoatu hoki e ahau he ngākau ki a rātou kia mōhio ki ahau, ko Ihowā ahau; ā, ka waiho rātou hei iwi māku, ā, ko ahau hei Atua mō rātou. Nō te mea ka whakapaua ō rātou ngākau ki te hoki mai ki ahau.
JER 24:8 “ ‘Nā, mō ngā piki kino, e kore nei e taea te kai, i te kino rawa’; he pono ko te kupu tēnei a Ihowā: ‘Ka pēnā tāku hoatutanga i a Terekia kīngi o Hūrā, rātou ko āna rangatira, ko ngā mōrehu o Hiruhārama e mahue ki tēnei whenua, e noho ana hoki i te whenua o Īhipa.
JER 24:9 Ka tino hoatu hoki rātou e ahau kia poipoia haeretia i roto i ngā kīngitanga katoa o te whenua, hei hē mō rātou; hei hahani, hei whakatauki, hei taunu, hei kanga, i ngā wāhi katoa e peia atu ai rātou e ahau.
JER 24:10 Ka ungā atu anō e ahau te hoari, te hemokai, te mate urutā ki a rātou, kia poto rā anō rātou i runga i te whenua i hoatu e ahau ki a rātou ko ō rātou mātua.’ ”
JER 25:1 Ko te kupu i puta mai ki a Heremaia mō te iwi katoa o Hūrā i te whā o ngā tau o Iehoiakimi tama a Hōhia kīngi o Hūrā (ko te tau tuatahi tērā o Nepukareha kīngi o Papurōna).
JER 25:2 I kōrerotia taua mea e Heremaia, e te poropiti, ki te iwi katoa o Hūrā, ki ngā tāngata katoa hoki o Hiruhārama, i kī ia:
JER 25:3 Nō te tekau mā toru o ngā tau o Hōhia tama a Amono kīngi o Hūrā, ā tae noa mai ki tēnei rā, ka rua tekau mā toru ēnei ngā tau, te putanga mai o te kupu a Ihowā ki ahau, me tāku kōrero anō ki a koutou, moata ai i te ata, ā, ka kōrero; heoi kīhai koutou i rongo.
JER 25:4 Nā, kua ungā e Ihowā āna pononga katoa, ngā poropiti ki a koutou, moata ai i ngā ata, ā, ka unga i a rātou; heoi kīhai koutou i rongo, kīhai anō ō koutou taringa i anga ki te whakarongo;
JER 25:5 i mea rātou, “Tahuri mai koutou, e tērā, e tērā i tōna ara kino, i te kino hoki o ā koutou mahi, ā, e noho ki te oneone i hōmai e Ihowā ki a koutou ko ō koutou mātua, onamata ā ake ake.
JER 25:6 Kaua hoki e whāia he atua kē, kaua e mahi ki a rātou, kaua e koropiko ki a rātou, kaua hoki ahau e whakapātaritaria ki te mahi a ō koutou ringa; ā, e kore koutou e hē i ahau.”
JER 25:7 “Heoi, kīhai koutou i rongo ki ahau,” e ai tā Ihowā; “he mea kia whakapātaritaria ai ahau ki te mahi a ō koutou ringa, hei hē anō mō koutou.”
JER 25:8 Mō reira ko te kupu tēnei a Ihowā o ngā mano: “Nā, kīhai nā koutou i rongo ki āku kupu,
JER 25:9 nanā, ka unga tāngata ahau ki te tiki i ngā hapū katoa o te raki,” e ai tā Ihowā, “ā, ka unga tāngata ahau ki tāku pononga, ki a Nepukareha kīngi o Papurōna, ā, ka kawea mai rātou ki tēnei whenua, ki ōna tāngata hoki, ā, ki ngā iwi katoa nei ā tawhio noa; ka tino whakangaromia rātou e ahau, ka meinga hei mīharotanga, hei whakahīanga atu, hei ururua tūturu.
JER 25:10 Ka tangohia atu hoki e ahau i a rātou te reo o te koa, te reo o te hari, te reo o te tāne mārena hou, te reo o te wahine mārena hou, te haruru o ngā kōhatu mira, te mārama hoki o te rama.
JER 25:11 Ā, ka waiho tēnei whenua katoa hei ururua, hei keteketenga; ā, ka mahi ēnei iwi ki te kīngi o Papurōna, e whitu tekau tau.
JER 25:12 “Ā, ka rite ngā tau e whitu tekau, ka whiua e ahau te kīngi o Papurōna me taua iwi,” e ai tā Ihowā, “mō tō rātou kino, me te whenua hoki o ngā Karari; ka meinga a reira e ahau kia ururua ā ake ake.
JER 25:13 Ka kawea hoki e ahau ki runga ki taua whenua āku kupu katoa i kōrerotia e ahau mō reira, ngā mea katoa kua oti te tuhituhi ki tēnei pukapuka, kua poropititia nei e Heremaia mō aua iwi katoa.
JER 25:14 Ka whakamahia hoki rātou, āe rā, rātou e ngā iwi maha, e ngā kīngi nunui hoki; ā, ka rite ki ā rātou hanga, ki te mahi hoki a ō rātou ringa tāku utu ki a rātou.”
JER 25:15 Ko te kupu hoki tēnei a Ihowā, a te Atua o Īharaira ki ahau: “Tangohia te kapu wāina o tēnei riri i tōku ringa, whakainumia mā ngā iwi katoa ka ungā nei koe e ahau ki a rātou.
JER 25:16 Ā, ka inu rātou, hūrori atu, hūrori mai, ka haurangi, i te hoari e ungā e ahau ki waenganui i a rātou.”
JER 25:17 Kātahi ahau ka tango i te kapu i te ringa o Ihowā, whakainumia ana mā ngā iwi katoa i ungā nei ahau e Ihowā ki a rātou:
JER 25:18 arā mā Hiruhārama, mā ngā pā o Hūrā, mā ōna kīngi, ā, mā ōna rangatira, kia meinga ai rātou hei ururua, hei mīharotanga, hei whakahīanga, hei kanga; hei pēnei me tō tēnei rā;
JER 25:19 mā Parao kīngi o Īhipa, rātou ko āna tāngata, ko āna rangatira, ko tōna iwi katoa;
JER 25:20 mā ngā iwi i whakaranua, mā ngā kīngi katoa o te whenua o Uhu, mā ngā kīngi katoa o te whenua o ngā Pirihitini – mā Ahakerono, mā Kaha, mā Ekerono, mā ngā mōrehu anō o Aharoro;
JER 25:21 mā Ēroma, mā Moapa, mā ngā tama a Āmona;
JER 25:22 mā ngā kīngi katoa o Tāira, mā ngā kīngi katoa o Hairona, mā ngā kīngi o te motu i tērā taha o te moana;
JER 25:23 mā Rerana, mā Tema, mā Putu, mā te hunga katoa e tapahia ana ngā tapa o ō rātou makawe;
JER 25:24 mā ngā kīngi katoa o Arāpia, mā ngā kīngi katoa o te iwi i whakaranua, e noho ana i te koraha;
JER 25:25 mā ngā kīngi katoa o Tīmiri, mā ngā kīngi katoa o Erama, mā ngā kīngi katoa o ngā Meri.
JER 25:26 Mā ngā kīngi katoa o te raki, mā ngā mea e tata ana, mā ngā mea, i tawhiti, mā tētahi, mā tētahi; mā ngā kīngitanga katoa hoki o te ao, i te mata o te oneone. Ā, ka inu te kīngi o Hehaka i muri i a rātou.
JER 25:27 “Me kī anō e koe ki a rātou, ‘Ko te kupu tēnei a Ihowā o ngā mano, a te Atua o Īharaira: E inu koutou, ā, haurangi iho, ruaki, e hinga ki raro, kaua e ara mai anō ki runga, i te hoari hoki e ungā e ahau ki waenganui i a koutou.’
JER 25:28 Nā, ki te kore rātou e pai ki te tango i te kapu i roto i tōu ringa kia inumia, kātahi koe ka mea ki a rātou, ‘Ko te kupu tēnei a Ihowā o ngā mano: Me inu rawa nei e koutou.
JER 25:29 Nō te mea, nanā, ka tīmata ahau ki te whakatupu kino i te pā i huaina nei tōku ingoa mō reira; ā, kia tukua koutou kia kāhore rawa e whiua? E kore rā koutou e kore te whiua; nō te mea ka karangatia e ahau he hoari ki runga ki ngā tāngata katoa o te whenua, e ai tā Ihowā o ngā mano.’
JER 25:30 “Mō reira me poropiti e koe ēnei kupu katoa ki a rātou, mea atu ki a rātou: ‘Ka hāmama mai a Ihowā i te wāhi tiketike, ka puaki mai tōna reo i tōna kāinga tapu; ka tino nui tāna hāmama ki tāna taiepa hipi; ka umere ia, ka pērā i tā ngā kaitakahi karepe, ki ngā tāngata katoa o te whenua.
JER 25:31 Ka pakū te ngangau ki te pito rā anō o te whenua; nō te mea he totohe tā Ihowā ki ngā iwi, ka whakawākia e ia ngā kikokiko katoa; ko te hunga kino, ka tukua e ia ki te hoari,’ ”
JER 25:32 Ko te kupu tēnei a Ihowā o ngā mano: “Ka puta atu he kino i tētahi iwi ki tētahi iwi, ā, ka whakatutūtia he tūkauati nui i ngā pito rawa o te whenua!”
JER 25:33 Nā, ko ngā tūpāpaku a Ihowā ka takoto i taua rā i tētahi pito o te whenua tae noa ki tētahi pito o te whenua. E kore hoki rātou e tangihia, e kore anō e kohikohia, e tanumia rānei; hei whakawairākau rātou ki te mata o te whenua.
JER 25:34 Auē, e ngā hēpara, hāmama; okeoke i roto i te pungarehu, e ngā metararahi o te kāhui. Kua tae mai hoki ngā rā mō koutou kia patupatua, ā, ka tukitukia koutou e ahau mongamonga noa, ā, ka taka koutou ānō he oko i matenuitia.
JER 25:35 Ā, ka kore he wāhi hei rerenga mō ngā hēpara, kāhore he mawhititanga mō ngā metararahi o te kāhui.
JER 25:36 He reo nō te tangi o ngā hēpara, he auē nō ngā metararahi o te kāhui! Nō te mea e pāhuatia ana e Ihowā tō rātou haerenga hipi,
JER 25:37 ā, ka meinga kia nohopuku ngā nohoanga hipi hūmārie; nō te mea ka mura te riri o Ihowā.
JER 25:38 Ka whakarērea e ia tōna kuhunga, ka pērā i te raiona; ka waiho hoki tō rātou whenua hei mīharotanga i te taikaha o te hoari tūkino, i te muranga o tōna riri.
JER 26:1 I te tīmatanga o te kīngitanga o Iehoiakimi tama a Hōhia kīngi o Hūrā, ka puta mai tēnei kupu i a Ihowā, i mea ia:
JER 26:2 “Ko te kupu tēnei a Ihowā: E tū ki te marae o te whare o Ihowā, kōrerotia hoki ki ngā pā katoa o Hūrā e haere mai ana ki te koropiko i roto i te whare o Ihowā, ngā kupu katoa e whakahau nei ahau ki a koe kia kōrerotia ki a rātou; kaua tētahi kupu e kaiponuhia.
JER 26:3 Tērā pea ka rongo rātou, ā, ka tahuri ia tangata, ia tangata, i ō rātou ara kino; kia puta kē ai tōku whakaaro mō te kino, e mea nei ahau kia meatia ki a rātou mō te kino o ā rātou mahi.
JER 26:4 Ā, ka kī atu koe ki a rātou: ‘Ko te kupu tēnei a Ihowā: Ki te kāhore koutou e rongo ki ahau, ka haere i runga i tāku ture kua hoatu nei e ahau ki tō koutou aroaro,
JER 26:5 e rongo ki ngā kupu a āku pononga, a ngā poropiti e ungā nei e ahau ki a koutou, maranga wawe ai i te ata, ā, ka unga i a rātou – otiia, kīhai koutou i rongo –
JER 26:6 nā, ka meinga e ahau tēnei whare kia rite ki Hiro, ka meinga hoki tēnei pā hei kanga mā ngā iwi katoa o te whenua.’ ”
JER 26:7 Ā, ka rongo ngā tohunga, ngā poropiti, me te iwi katoa i a Heremaia, e kōrero ana i ēnei kupu i te whare o Ihowā.
JER 26:8 Nā, i te mutunga o te kōrero a Heremaia i ngā mea katoa i whakahaua ai ia e Ihowā kia kōrerotia ki te iwi katoa, ka hopukia ia e ngā tohunga, e ngā poropiti, e te iwi katoa hoki, me te kī, “Ko te mate kau mōu!
JER 26:9 He aha koe i poropiti ai i runga i te ingoa o Ihowā, i kī ai, ‘Ka rite tēnei whare ki Hiro, ka ururuatia tēnei pā, tē ai he tangata hei noho’?” Nā, i te huihui te iwi katoa ki a Heremaia, ki te whare o Ihowā.
JER 26:10 Ā, nō te rongonga o ngā rangatira o Hūrā ki ēnei mea, ka haere atu rātou i te whare o te kīngi ki te whare o Ihowā, ā, noho ana i te kūwaha o te Kēti Hou o te whare o Ihowā.
JER 26:11 Kātahi ka kōrero ngā tohunga rātou ko ngā poropiti ki ngā rangatira, ki te iwi katoa hoki, ka mea, “Ka tika te mate mō tēnei tangata; kua poropiti hoki ia i te hē mō tēnei pā; kua rongo nā hoki ō koutou taringa.”
JER 26:12 Kātahi a Heremaia ka kōrero ki ngā rangatira katoa, ki te iwi katoa, ka mea: “Nā Ihowā ahau i unga mai ki te poropiti mō tēnei whare, mō tēnei pā, i ngā kupu katoa i rongo nā koutou.
JER 26:13 Nā reira whakatikatikaia ō koutou ara, ā koutou mahi, whakarongo hoki ki te reo o Ihowā, o tō koutou Atua; ā, ka rīpenetā a Ihowā ki te kino i kōrerotia e ia mō koutou.
JER 26:14 Tēnā ko ahau, kei roto ahau i tō koutou ringa; mā koutou e mea ki ahau te mea e pai ana, e rite ana ki tā koutou titiro.
JER 26:15 Otiia, kia tino mōhio koutou, ki te whakamatea ahau e koutou, e kawe ana koutou i te toto harakore ki runga i a koutou anō, ki runga ki tēnei pā, ki ōna tāngata anō hoki; nō te mea he pono, nā Ihowā ahau i ngare atu ki a koutou ki te kōrero i ēnei kupu katoa ki ō koutou taringa.”
JER 26:16 Kātahi ngā rangatira rātou ko te iwi katoa ka kī atu ki ngā tohunga rātou ko ngā poropiti, “Kāhore he take e mate ai tēnei tangata; kua kōrero mai hoki ia ki a tātou i runga i te ingoa o Ihowā, o tō tātou Atua.”
JER 26:17 Nā, ka whakatika ētahi o ngā kaumātua o te whenua, ka kōrero ki te huihui katoa o te iwi, ka mea,
JER 26:18 “I poropiti a Mika Morahati i ngā rā o Hetekia kīngi o Hūrā, i kōrero ki te iwi katoa o Hūrā, i mea: ‘Ko te kupu tēnei a Ihowā o ngā mano: Ka parautia a Hiona, ka rite ki te māra, ā, hei pūranga a Hiruhārama, ka rite hoki te maunga o te whare ki ngā wāhi tiketike o te ngahere.’
JER 26:19 “I anga rānei a Hetekia kīngi o Hūrā rātou ko Hūrā katoa, i mea rawa ki te whakamate i a ia? He teka ianei i wehi ia i a Ihowā, ā, īnoi ana ki te mata o Ihowā, ā, rīpenetā ana a Ihowā ki te kino i kōrerotia e ia mō rātou? Nā, ko tātou, mā konei tātou e mea ai i te kino nui ki ō tātou nei wairua!”
JER 26:20 Nā, tērā anō hoki tētahi tangata i poropiti i runga i te ingoa o Ihowā, ko Urīa tama a Hemaia o Kiriata Tearimi; i poropiti ia i te hē mō tēnei pā, mō tēnei whenua hoki, he pēnei anō me ngā kupu katoa a Heremaia.
JER 26:21 Nā, nō te rongonga o Kīngi Iehoiakimi rātou ko āna metararahi, ko ngā rangatira katoa, i āna kupu, ka whai te kīngi kia whakamatea ia. Nō te rongonga ia o Urīa ka wehi, ka rere, ā, haere ana ki Īhipa.
JER 26:22 Nā, ka ungā e Iehoiakimi he tāngata ki Īhipa, arā a Erenātana tama a Akaporo, rātou ko ōna hoa ki Īhipa.
JER 26:23 Nā, tīkina atu ana a Urīa e rātou i Īhipa, kawea mai ana ki a Kīngi Iehoiakimi; patua iho e ia ki te hoari, makā ana e ia tōna tinana ki ngā tanumanga o ngā tamariki a te iwi.
JER 26:24 Otiia i a Heremaia te ringa o Ahikama tama a Hapana, i kore ai ia e tukua ki te ringa o te iwi kia whakamatea.
JER 27:1 I te tīmatanga o te kīngitanga o Iehoiakimi tama a Hōhia kīngi o Hūrā ka puta mai tēnei kupu a Ihowā ki a Heremaia, i mea ia:
JER 27:2 Ko te kupu tēnei a Ihowā ki ahau: “Hangā he here, he ioka mōu, ka whakanoho ai ki tōu kakī.
JER 27:3 Nā, tukua ki te kīngi o Ēroma, ki te kīngi o Moapa, ki te kīngi o ngā tama a Āmona, ki te kīngi o Tāira, ki te kīngi hoki o Hairona. Mā te ringa o ngā karere e haere mai ana ki Hiruhārama, ki a Terekia kīngi o Hūrā, e māu.
JER 27:4 Me whakahau anō rātou e koe kia kī atu ki ō rātou ariki: ‘Ko te kupu tēnei a Ihowā o ngā mano, a te Atua o Īharaira: Kia pēnei tā koutou kī atu ki ō koutou ariki:
JER 27:5 Nāku i hanga te whenua, te tangata me te kararehe i runga i te mata o te whenua, nā tōku kaha nui, nā tōku ringa mārō tonu; nā, e hoatu ana e ahau ki tāku e pai ai.
JER 27:6 Nā ināianei, kua oti te hoatu e ahau ēnei whenua katoa ki te ringa o Nepukaneha kīngi o Papurōna, ki tāku pononga; ā, kua hoatu anō e ahau ngā kīrehe o te pārae ki a ia kia whakamahia e ia.
JER 27:7 Ā, ka mahi ngā iwi katoa ki a ia, ki tāna tama, ki te tama anō hoki a tāna tama, kia taka rā anō te wā o tōna ake whenua; ā, hei reira ia whakamahia ai e ngā iwi maha, e ngā kīngi nunui hoki.
JER 27:8 “ ‘Nā, ko te iwi, ā, ko te kīngitanga, e kore e mahi ki taua Nepukaneha kīngi o Papurōna, e kore hoki e tuku i ō rātou kakī ki raro ki te ioka a te kīngi o Papurōna, ka whiua e ahau taua iwi, e ai tā Ihowā, ki te hoari, ki te hemokai, ki te mate urutā, kia mōtī rā anō rātou i ahau ki tōna ringa.
JER 27:9 Tēnā ko koutou, kaua koutou e rongo ki ō koutou poropiti, ki ō koutou tohunga tūāhu, ki ō koutou moemoeā, ki ō koutou tohunga kapua, ki ō koutou tohunga mākutu, e kōrero nā ki a koutou, e mea nā, “E kore koutou e mahi ki te kīngi o Papurōna.”
JER 27:10 Nō te mea e poropiti ana rātou i te teka ki a koutou, he mea kia matara atu ai koutou i tō koutou oneone; kia peia ai hoki koutou e ahau, kia ngaro ai.
JER 27:11 Engari ko te iwi e tuku ana i ō rātou kakī ki raro ki te ioka a te kīngi o Papurōna, ā, ka mahi ki a ia, ka waiho rātou e ahau ki tō rātou oneone, e ai tā Ihowā; ā, ka ngakia e rātou, ka noho hoki rātou ki reira.’ ”
JER 27:12 Nā, rite tonu ki ēnei kupu katoa tāku i kōrero ai ki a Terekia kīngi o Hūrā, i mea ahau: “Tukua atu ō koutou kakī ki raro ki te ioka a te kīngi o Papurōna; e mahi ki a ia, ki a rātou ko tōna iwi, ā, ka ora koutou.
JER 27:13 Kia mate koutou hei aha, koutou ko tōu iwi i te hoari, i te hemokai, i te mate urutā, i tā Ihowā i kī ai mō te iwi e kore nei e mahi ki te kīngi o Papurōna?
JER 27:14 Kaua hoki e rongo ki ngā kupu a ngā poropiti e kōrero nā ki a koutou, e mea nā, ‘E kore koutou e mahi ki te kīngi o Papurōna,’ e poropiti teka ana hoki rātou ki a koutou.
JER 27:15 ‘Ehara hoki rātou i ahau i unga atu,’ e ai tā Ihowā, ‘otiia kei te poropiti teka rātou i runga i tōku ingoa. He mea kia peia ai koutou e ahau, ā, kia ngaro ai koutou, me ngā poropiti e poropiti nā ki a koutou.’ ”
JER 27:16 I kōrero anō ahau ki ngā tohunga, ki tēnei iwi katoa, i mea, “Ko te kupu tēnei a Ihowā: Kei rongo koutou ki ngā kupu a ō koutou poropiti e poropiti nā ki a koutou, e mea nā, ‘Nanā, ka tata te whakahokia mai ngā oko o te whare o Ihowā i Papurōna.’ He poropiti teka hoki tā rātou ki a koutou.
JER 27:17 Kei whakarongo ki a rātou; e mahi ki te kīngi o Papurōna, kia ora ai koutou. Kia ururuatia tēnei pā hei aha?
JER 27:18 Otirā, ki te mea he poropiti rātou, ki te mea kei a rātou te kupu a Ihowā, me īnoi rātou ināianei ki a Ihowā o ngā mano, kia kaua ngā oko e toe nei ki te whare o Ihowā, ki te whare o te kīngi o Hūrā, ki Hiruhārama, e tae ki Papurōna.
JER 27:19 Ina hoki te kupu a Ihowā o ngā mano mō ngā pou, mō te moana, mō ngā tūranga, ā, mō ngā toenga o ngā oko kua mahue nei ki tēnei pā,
JER 27:20 kīhai nei i riro i a Nepukaneha kīngi o Papurōna i tāna whakaraunga atu i a Hekonia tama a Iehoiakimi; kīngi o Hūrā i roto i Hiruhārama ki Papurōna, rātou ko ngā rangatira katoa o Hūrā, o Hiruhārama –
JER 27:21 āe rā, ko te kupu tēnei a Ihowā o ngā mano, a te Atua o Īharaira, mō ngā oko e toe nei ki te whare o Ihowā, ki te whare hoki o te kīngi o Hūrā, ki Hiruhārama:
JER 27:22 ‘Ka kawea aua mea ki Papurōna, ka takoto hoki ki reira, taea noatia te rā e pā ai ahau ki a rātou,’ e ai tā Ihowā. ‘Hei reira ka maua mai e ahau, ka whakahokia mai ki tēnei wāhi.’ ”
JER 28:1 I taua tau, i te tīmatanga o te kīngitanga o Terekia kīngi o Hūrā, i te whā o ngā tau, i te rima o ngā marama, ka kōrero a Hanania poropiti tama a Āturu, he tangata nō Kipeono, ki ahau i roto i te whare o Ihowā, i te aroaro o ngā tohunga rātou ko te iwi katoa, i mea ia,
JER 28:2 “Ko te kupu tēnei a Ihowā o ngā mano, a te Atua o Īharaira, e kī ana ia: ‘Kua whati i ahau te ioka a te kīngi o Papurōna.
JER 28:3 E kore e tutuki rawa ngā tau e rua, ka whakahokia mai e ahau ki tēnei wāhi ngā oko katoa o te whare o Ihowā i maua atu e Nepukaneha kīngi o Papurōna i tēnei wāhi, i kawea atu e ia ki Papurōna,
JER 28:4 ā, ka whakahokia mai e ahau ki tēnei wāhi a Hekonia tama a Iehoiakimi kīngi o Hūrā, rātou ko ngā whakarau katoa o Hūrā i haere nei ki Papurōna,’ e ai tā Ihowā, ‘nō te mea ka whati i ahau te ioka a te kīngi o Papurōna.’ ”
JER 28:5 Kātahi ka mea atu a Heremaia poropiti ki a Hanania poropiti i te aroaro o ngā tohunga, i te aroaro anō o te iwi katoa e tū ana i te whare o Ihowā,
JER 28:6 i mea taua Heremaia poropiti, “Āmine! Kia pēnā mai anō a Ihowā. Kia mahia hoki e Ihowā āu kupu i poropititia nā e koe mō ngā oko o te whare o Ihowā, mō ngā whakarau katoa hoki, ka whakahokia mai i Papurōna ki tēnei wāhi.
JER 28:7 Otiia kia rongo mai koe ināianei ki tēnei kupu e kōrerotia nei e ahau ki ōu taringa, ki ngā taringa anō o te iwi katoa.
JER 28:8 Ko ngā poropiti i mua atu i ahau, i mua atu hoki i a koe, i mua noa atu, i poropititia e rātou he hē mō ngā whenua maha, mō ngā kīngitanga nunui, he whawhai, he kino, he mate urutā.
JER 28:9 Ko te poropiti e poropiti ana i te rongo mau, ki te tutuki te kupu a te poropiti, hei reira ka mōhiotia taua poropiti, he pono nā Ihowā ia i unga mai.”
JER 28:10 Kātahi ka mau a Hanania poropiti ki te ioka i te kakī o Heremaia poropiti, wāhia ana e ia.
JER 28:11 Ā, ka kōrero a Hanania poropiti i te aroaro o te iwi katoa, ka mea, “Ko te kupu tēnei a Ihowā: ‘Ka pēneitia e ahau te wāhi atu i te ioka a Nepukaneha kīngi o Papurōna i roto i ngā rā o ngā tau e rua i te kakī o ngā iwi katoa.’ ” Nā, haere ana a Heremaia poropiti i tōna ara.
JER 28:12 Kātahi ka puta mai te kupu a Ihowā ki a Heremaia i muri i te wawāhanga a Hanania poropiti i te ioka i te kakī o Heremaia poropiti, ā, ka mea ia:
JER 28:13 “Haere, kōrero ki a Hanania, mea atu, ‘Ko te kupu tēnei a Ihowā: Kua wāhia e koe ngā ioka rākau; otirā me hanga e koe ētahi ioka rino hei whakakapi mō ēnā.
JER 28:14 Ko te kupu hoki tēnei a Ihowā o ngā mano, a te Atua o Īharaira: Kua whakanohoia e ahau he ioka rino ki te kakī o ēnei iwi katoa, kia mahi ai rātou ki a Nepukaneha kīngi o Papurōna; inā, ka mahi rātou ki a ia. Kua hoatu anō e ahau ngā kīrehe o te pārae ki a ia.’ ”
JER 28:15 Kātahi ka mea te poropiti, a Heremaia, ki te poropiti, ki a Hanania, “Whakarongo mai, e Hanania; ehara koe i a Ihowā i unga; kua mea ia koe i tēnei iwi kia whakawhirinaki ki te teka.
JER 28:16 Mō reira ko te kupu tēnei a Ihowā: ‘Nanā, ka peia atu koe e ahau i te mata o te oneone. I tēnei tau anō ka mate koe, nō te mea kua kōrero koe i te tutū ki a Ihowā.’ ”
JER 28:17 Nā, i taua tau anō ka mate a Hanania i te whitu o ngā marama.
JER 29:1 Ko ngā kupu ēnei o te pukapuka i tukua e Heremaia poropiti i Hiruhārama ki ngā mōrehu o ngā kaumātua i whakaraua atu nei, ki ngā tohunga, ki ngā poropiti, ki te iwi katoa i whakaraua atu e Nepukaneha i Hiruhārama ki Papurōna;
JER 29:2 i muri tēnei i te haerenga atu o Kīngi Hekonia, i Hiruhārama, rātou ko te kuīni, ko ngā unaka, ko ngā rangatira o Hūrā, o Hiruhārama, me ngā kāmura rātou ko ngā parakimete.
JER 29:3 He mea kawe nā Eraha tama a Hapana, rāua ko Kemaria tama a Hirikia; he mea unga anō ēnei nā Terekia kīngi o Hūrā ki Papurōna, ki a Nepukaneha kīngi o Papurōna; i mea ia:
JER 29:4 Ko te kupu tēnei a Ihowā o ngā mano, a te Atua o Īharaira, ki ngā whakarau katoa, i meinga nei e ahau kia whakaraua atu i Hiruhārama ki Papurōna:
JER 29:5 “Hangā he whare mō koutou, ka noho i roto; whakatōkia he kāri, ka kai i ō rātou hua.
JER 29:6 Mārenatia he wahine, kia whānau he tama, he tamāhine mā koutou; meatia he wahine mā ā koutou tama, tukua hoki ā koutou tamāhine ki te tāne, kia whānau ai he tama, he tamāhine mā rātou; ā, kia tini koutou ki reira, kaua hei torutoru.
JER 29:7 Rapua hoki te rongo mau mō te pā kua meinga nā koutou e ahau kia whakaraua ki reira, īnoi hoki ki a Ihowā mō reira; mā te mau hoki o tōna rongo ka whiwhi ai koutou ki te rangimārie.”
JER 29:8 Ko te kupu hoki tēnei a Ihowā o ngā mano, a te Atua o Īharaira: “Kei tinihangatia koutou e ā koutou poropiti, e ā koutou tohunga tūāhu e noho nā i roto i a koutou, kaua hoki e rongo ki ā koutou moe e meinga nā e koutou kia moea.
JER 29:9 Nō te mea e poropiti teka ana rātou ki a koutou i runga i tōku ingoa. Ehara rātou i te mea nāku i unga,” e ai tā Ihowā.
JER 29:10 Ko te kupu hoki tēnei a Ihowā: “Kia rite ngā tau e whitu tekau ki Papurōna, ka tirohia koutou e ahau; ā, ka whakatutukitia e ahau tāku kupu pai ki a koutou, mō koutou kia whakahokia mai ki tēnei wāhi.
JER 29:11 Kei te mōhio hoki ahau ki ngā whakaaro e whakaaro nei ahau ki a koutou,” e ai tā Ihowā, “he whakaaro mō te rongo mau, ehara mō te kino, kia hoatu he tūmanako ki a koutou i ō koutou rā whakamutunga.
JER 29:12 Ā tērā koutou e karanga ki ahau, ā, ka haere koutou ka īnoi ki ahau, ā, ka rongo ahau ki a koutou.
JER 29:13 Ka rapua anō ahau e koutou, ā, ka kitea e koutou, ina whakapaua ō koutou ngākau ki te rapu i ahau.
JER 29:14 Ā, ka kitea ahau e koutou,” e ai tā Ihowā, “ā, whakahokia hoki e ahau tō koutou whakaraunga, ā, ka kohikohia koutou e ahau i roto i ngā iwi katoa, i ngā wāhi katoa i peia atu ai koutou e ahau, e ai tā Ihowā; ā, ka whakahokia mai koutou e ahau ki te wāhi i whakaraua atu ai koutou e ahau.”
JER 29:15 Kua kī hoki koutou, “Kua ara i a Ihowā ētahi poropiti mō tātou i Papurōna.”
JER 29:16 Ko te kupu hoki tēnei a Ihowā mō te kīngi e noho ana i runga i te torōna o Rāwiri, mō te iwi katoa hoki e noho ana i tēnei pā, mō ō koutou tēina kīhai nei i haere tahi koutou i te whakaraunga:
JER 29:17 Ko te kupu tēnei a Ihowā o ngā mano: “Nanā, ka ungā atu e ahau ki runga ki a rātou te hoari, te hemokai, te mate urutā, ā, ka meinga rātou e ahau kia rite ki ngā piki kikino, e kore nei e taea te kai i te kino rawa.
JER 29:18 Ā, ka whāia rātou e ahau ki te hoari, ki te hemokai, ki te mate urutā, ka tukua hoki rātou kia poipoia i waenganui i ngā kīngitanga katoa o te whenua, hei kanga, hei mīharotanga, hei whakahīanga atu, ā, hei hahani, i roto i ngā iwi katoa e peia atu ai rātou e ahau.
JER 29:19 Nō te mea kīhai rātou i rongo ki āku kupu,” e ai tā Ihowā, “ki āku kupu i ungā rā e ahau kia kawea ki a rātou e āku pononga, e ngā poropiti, moata ai i te ata ki te unga i a rātou; heoi kīhai koutou i rongo,” e ai tā Ihowā.
JER 29:20 Mō reira whakarongo mai ki te kupu a Ihowā, koutou katoa o te whakaraunga, kua ungā atu nei e ahau i Hiruhārama ki Papurōna:
JER 29:21 Ko te kupu tēnei a Ihowā o ngā mano, a te Atua o Īharaira, mō Āhapa tama a Koraia, mō Terekia tama a Maaheia, e poropiti teka nā ki a koutou i runga i tōku ingoa: “Nanā, ka hoatu rāua e ahau ki te ringa o Nepukareha kīngi o Papurōna; ā, māna rāua e whakamate i ō koutou aroaro.
JER 29:22 Ā, ka ai rāua hei kanga mā ngā whakarau katoa o Hūrā i Papurōna, ka kōrerotia: ‘Kia meinga koe e Ihowā kia rite ki a Terekia rāua ko Āhapa, i tunua nei e te kīngi o Papurōna ki te ahi.’
JER 29:23 Kua mahi pōauau hoki rāua i roto i a Īharaira, kua pūremu ki ngā wāhine a ō rāua hoa, kua kōrero hoki i ngā kupu teka i runga i tōku ingoa, he mea kīhai i whakahaua atu e ahau ki a rāua; ko ahau tēnei e mōhio ana, ko ahau te kaiwhakaatu,” e ai tā Ihowā.
JER 29:24 Nā, mō Hemaia Neherami me kōrero koe, me kī atu:
JER 29:25 “Ko te kupu tēnei a Ihowā o ngā mano, a te Atua o Īharaira, e mea ana ia: I te mea kua tukua e koe ētahi pukapuka i runga i tōu ake ingoa ki te iwi katoa i Hiruhārama, ki te tohunga, ki a Tepania tama a Maaheia, rātou ko ngā tohunga katoa, kua mea atu:
JER 29:26 ‘Kua oti koe te mea e Ihowā hei tohunga i muri i a Iehoiara tohunga, kia waiho ai ko koutou hei kaitirotiro i roto i te whare o Ihowā mō te tāngata katoa e haurangi ana, e whakaporopiti ana i a ia, kia makā e koe ki ngā here waewae, ki ngā here ringa.
JER 29:27 Nā, he aha rā tē rīria ai e koe a Heremaia Anatoti, e whakaporopiti nā i a ia ki a koutou?
JER 29:28 Kua tukua mai nei hoki e ia he kupu ki a mātou ki Papurōna, e mea ana: Ka roa te whakaraunga. Hangā he whare mō koutou, ka noho i roto; whakatōkia he kāri, kainga ō rātou hua.’ ”
JER 29:29 Nā, i kōrerotia tēnei pukapuka e Tepania tohunga ki ngā taringa o Heremaia poropiti.
JER 29:30 Kātahi ka puta mai te kupu a Ihowā ki a Heremaia, i mea ia:
JER 29:31 “Tukua he kupu ki ngā whakarau katoa, mea atu, ‘Ko te kupu tēnei a Ihowā mō Hemaia Neherami: Kua poropiti nā a Hemaia ki a koutou, ā, kīhai hoki ia i ungā e ahau, ā, kua meinga koutou e ia kia whakawhirinaki ki te teka,
JER 29:32 mō reira ko te kupu tēnei a Ihowā: Nanā, ka whiua e ahau a Hemaia Neherami rātou ko ōna uri; kore iho he tangata mōna hei noho i roto i tēnei iwi, e kore hoki ia e kite i te pai e mahia e ahau ki tāku iwi, e ai tā Ihowā; nō te mea kua kōrero ia i te tutū mō Ihowā.’ ”
JER 30:1 Ko te kupu i puta mai ki a Heremaia, he mea nā Ihowā, i mea ia:
JER 30:2 “Ko te kupu tēnei a Ihowā, a te Atua o Īharaira, e mea ana: Tuhituhia ki te pukapuka ngā kupu katoa i kōrerotia e ahau ki a koe.
JER 30:3 Tēnei ake hoki ngā rā,” e ai tā Ihowā, “e whakahokia mai ai e ahau tāku iwi, a Īharaira rāua ko Hūrā, i te whakarau,” e ai tā Ihowā; “ā, ka whakahokia mai rātou e ahau ki te whenua i hoatu e ahau ki ō rātou mātua, ā, ka riro a reira i a rātou.”
JER 30:4 Ā, ko ngā kupu ēnei i kōrerotia e Ihowā mō Īharaira rāua ko Hūrā:
JER 30:5 Ko te kupu hoki tēnei a Ihowā: “Kua rongo tātou i te reo o te tūiri, o te wehi, ehara i te rongo mau.
JER 30:6 Tēnā rā, ui atu, kia kite ai koutou? He whānau tamariki rānei tā te tāne? He aha ahau i kite ai i ngā tāngata katoa ko ō rātou ringa kei ō rātou hope, koia anō kei te wahine e whānau ana, kua puta kē anō ngā kanohi katoa, kua kōmā?
JER 30:7 Auē! He rā nui hoki taua rā, kāhore he rite mōna. Ko te wā hoki ia o tō Hākopa mamae; otiia ka whakaorangia ia i taua mamae.
JER 30:8 “Nā, i taua rā,” e ai tā Ihowā o ngā mano, “ka wāhia e ahau tāna ioka i tōu kakī, ka motuhia hoki ōu here; e kore hoki ia e whakamahia e ngā tāngata kē i muri iho.
JER 30:9 Engari, ka mahi rātou ki a Ihowā, ki tō rātou Atua, ki a Rāwiri hoki, ki tō rātou kīngi e whakaarahia ake e ahau mō rātou.
JER 30:10 “Nā reira kaua e wehi, e tāku pononga, e Hākopa,” e ai tā Ihowā, “kaua hoki e pāwera, e Īharaira. Nanā, ka whakaora hoki ahau i a koe i tawhiti, i ōu uri anō i te whenua i whakaraua atu ai rātou; ā, ka hoki mai a Hākopa, ka āta noho, ka whai tānga manawa, tē ai he kaiwhakawehi mōna.
JER 30:11 Nō te mea hei hoa ahau mōu,” e ai tā Ihowā, “hei whakaora i a koe; ka poto rawa hoki i ahau ngā iwi katoa kua whakamararatia atu nā koe ki reira, otiia e kore koe e poto rawa i ahau; engari ka pākia koe e ahau, he mea whakarite mārie atu, e kore anō hoki koe e tukua kia kāhore rawa e whiua.”
JER 30:12 Ko te kupu hoki tēnei a Ihowā: “Ko tōu pakaru e kore e mahu, he mamae rawa tōu marūtanga.
JER 30:13 Kāhore he tangata hei tohe i tāu, kia takaia ai koe; kāhore ōu rongoā whakamahu.
JER 30:14 Ko te hunga katoa i aroha ki a koe kua wareware ki a koe; kāhore rātou e rapu i a koe; nō te mea i patua koe e ahau ki te patu a te hoariri, ki te whiu hoki a te tangata nanakia; he nui hoki nō tōu kino, he maha nō ōu hara.
JER 30:15 He aha koe i tangi ai ki tōu pakaru? E kore tōu mamae e taea te rongoā. Mō te nui hoki o tōu kino, he maha nō ōu hara, i meinga ai e ahau ēnei mea ki a koe.
JER 30:16 “Nā reira ko te hunga katoa e kai ana i a koe, ka kainga rātou; ko ōu hoariri katoa, ko rātou katoa, ka riro ki te whakarau; ko te hunga e pāhua ana i a koe ka pāhuatia rātou, ā, ka tukua e ahau hei taonga pārau te hunga katoa e muru ana i a koe.
JER 30:17 Ka whakahokia atu hoki e ahau te ora ki a koe, ka rongoātia e ahau ōu marūtanga,” e ai tā Ihowā; “nō te mea kua kīia koe e rātou, he peinga, kua mea: ‘Ko Hiona tēnei e kore nei e rapua e te tangata.’ ”
JER 30:18 Ko te kupu tēnei a Ihowā: “Nanā, ka whakahokia mai e ahau i te whakarau ngā tēneti o Hākopa, ka aroha ki ōna nohoanga; ā, ka hangā te pā ki runga ki tōna pūranga anō, ka whakapūmautia anō ngā tikanga o te whare kīngi.
JER 30:19 Ka puta mai anō i reira te whakamoemiti, me te reo o te hunga e kata ana: ā, ka whakanuia rātou e ahau, e kore rātou e torutoru; ka whakakorōriatia hoki rātou e ahau, ā, e kore rātou e iti.
JER 30:20 Ā, ka rite ā rātou tamariki ki ō mua; ka whakapūmautia hoki tō rātou whakaminenga ki tōku aroaro, ā, ka whiua e ahau te hunga katoa e tūkino ana i a rātou.
JER 30:21 Ā, ko tō rātou metararahi ko tētahi anō o rātou, ka puta ake hoki tō rātou kāwana i roto i a rātou; ā, ka meinga ia e ahau kia whakatata mai, ā, ka haere mai ia ki ahau; ko wai oti tēnei kua toa nei ki te haere mai ki ahau?”
JER 30:22 “Ā, hei iwi koutou māku, ko ahau hoki hei Atua mō koutou.”
JER 30:23 Nanā, ko te tūkauati a Ihowā, arā ko tōna riri mura tonu, te paoho atu nā, he tūkauati e tahi ana: tērā e āki ki runga ki te māhunga o te hunga kino.
JER 30:24 E kore e tahuri atu te riri kino o Ihowā, kia oti rā anō i a ia, kia whakapūmautia rā anō e ia ngā whakaaro o tōna ngākau. I ngā rā whakamutunga ka mātau koutou.
JER 31:1 “I taua wā,” e ai tā Ihowā, “ka waiho ahau hei Atua mō ngā hapū katoa o Īharaira, ko rātou hoki hei iwi māku.”
JER 31:2 Ko te kupu tēnei a Ihowā: “Ko te iwi i toe i te hoari, i kite i te manako ki te koraha; arā a Īharaira, i ahau i haere atu ai ki te mea tānga manawa mōna.”
JER 31:3 I puta mai a Ihowā ki ahau i mua noa atu, i mea mai: “Āe rā, he aroha pūmau tōku i aroha ai ahau ki a koe; nā reira, te atawhai i kukume ai ahau i a koe.
JER 31:4 Ka hangā anō koe e ahau, ā, ka oti koe te hanga, e te wāhina o Īharaira. Tērā anō koe ka whakapaipaia ki āu timipera, ā, ka haere atu i roto i ngā kanikani a te hunga harakoa.
JER 31:5 Tērā koe e whakatō anō he māra wāina ki runga ki ngā maunga o Hamaria. Ka whakatō ngā kaiwhakatō, ā, ka kai i ōna hua.
JER 31:6 Nō te mea tēnā anō te rā, e karanga ai ngā kaitiaki i runga i ngā pukepuke o Ēparaima, ‘Whakatika, tātou ka haere ki runga, ki Hiona, ki a Ihowā, ki tō tātou Atua.’ ”
JER 31:7 Ko te kupu hoki tēnei a Ihowā: “Waiata i runga i te koa ki a Hākopa, hāmama mō te metararahi o ngā iwi; kōrerotia atu, whakamoemititia, mea atu, ‘E Ihowā, whakaorangia tāu iwi, te mōrehu o Īharaira.’
JER 31:8 Nanā, ka kawea mai rātou e ahau i te whenua ki te raki, ka kohikohia mai i ngā tōpito o te whenua, me ngā matapō, me ngā kopa, me te wahine e hapū ana, me te wahine hoki e whakamamae ana, i ō rātou taha; he hui nui tonu rātou e hoki mai ai ki konei.
JER 31:9 Ka haere mai rātou me te tangi, ā, ka ārahina rātou e ahau i runga i te īnoi. Ka meinga rātou e ahau kia haere i te taha o ngā awa wai, mā te ara tika e kore ai ō rātou waewae e tūtuki i reira; nō te mea he pāpā ahau ki a Īharaira, ā, ko Ēparaima tāku mātāmua.
JER 31:10 “Whakarongo ki te kupu a Ihowā, e ngā iwi, kōrerotia hoki ki ngā motu o tawhiti, mea atu, ‘Ko te kaitītaritari o Īharaira, māna rātou e whakawhāiti, māna rātou e tiaki, ka rite ki tā te hēpara i tāna kāhui.’
JER 31:11 Kua hokona nei hoki a Hākopa e Ihowā, utua ana e ia, tangohia mai ana i roto i te ringa o te mea i kaha rawa i a ia.
JER 31:12 Nā, ka haere mai rātou ka waiata i te wāhi tiketike o Hiona, ka rere huihui ki te pai o Ihowā, ki te wīti, ki te wāina, ki te hinu, ā, ki ngā kūao hipi, kūao kau: ā, ka rite ō rātou wairua ki te kāri kua oti te whakamākūkū; ā, ka tino mutu rawa tā rātou tangi.
JER 31:13 Kātahi te wāhina ka koa ki te kanikani, me ngā taitama ngātahi ko ngā kaumātua. Ka meinga hoki e ahau tā rātou tangi hei koa, ka whakamārietia rātou, ā, ka meinga rātou kia hari i ō rātou mamae.
JER 31:14 Ka whakatinaia e ahau te wairua o ngā tohunga ki te ngako, ka mākona anō tōku iwi i tōku pai,”
JER 31:15 Ko te kupu tēnei a Ihowā: “I rangona he reo ki Rama, he uhunga, he tangi, tīwerawera ana, ko Rahera e tangi ana ki āna tamariki, ā, kīhai i pai kia whakamārietia mō āna tamariki, kua kāhore nei.”
JER 31:16 Ko te kupu tēnei a Ihowā: “Whakamutua te tangi o tōu reo, ngā roimata hoki i ōu kanohi; nō te mea ka whai utu tāu mahi,” e ai tā Ihowā: “ā, ka hoki mai anō rātou i te whenua o te hoariri.
JER 31:17 Ka whai tūmanakohanga hoki tōu mutunga,” e ai tā Ihowā: “ā, ka hoki mai āu tamariki ki tō rātou ake rohe.
JER 31:18 “He pono kua rongo ahau i a Ēparaima e tangi ana ki a ia anō, pēnei: ‘Kua pākia ahau e koe, ā, i pākia ahau, pērā i te kūao kau kīhai i whakaakona ki te ioka. Whakatahuritia ahau, ā, ka tahuri ahau; ko koe nei hoki a Ihowā, tōku Atua.
JER 31:19 He pono i muri i tōku tahuritanga, i rīpenetā ahau; ā, i muri i tōku whakaakoranga i papaki ahau ki tōku hūhā. I whakamā ahau, āe rā, i numinumi kau, nō te mea e waha ana e ahau te ingoa kino o tōku taitamarikitanga.’
JER 31:20 He tamaiti matenui ianei a Ēparaima nāku? He tamaiti āhuareka ianei? Nō te mea ka kōrero ana ahau i te hē mōna, mau tonu tōku māharahara ki a ia. Nō reira ōku whēkau i oho ai ki a ia; he pono ka tohungia ia e ahau,”
JER 31:21 “Whakatūria ake ētahi tohu ara māu; hangā he pou waitohu. E anga tōu ngākau ki te huanui, ki te ara i haere ai koe. Hoki mai, e te wāhina o Īharaira, hoki mai anō ki ēnei pā ōu.
JER 31:22 Kia pēhea te roa o tōu kōpikopiko, e te tamāhine tāhurihuri kē? Kua hangā hoki e Ihowā he mea hou ki runga ki te whenua – ka karapoti te wahine i te tāne.”
JER 31:23 Ko te kupu tēnei a Ihowā o ngā mano, a te Atua o Īharaira: “Tēnei ake ka kōrerotia anō tēnei kupu ki te whenua o Hūrā, ki ōna pā hoki, ina whakahokia mai rātou e ahau i te whakarau: ‘Kia manaaki a Ihowā i a koe, e te nohoanga o te tika, e te maunga o te tapu!’
JER 31:24 Ā, ka noho tahi a Hūrā me ōna pā katoa ki reira; te hunga ngaki i te whenua me te hunga anō e haere tahi ana me ngā kāhui.
JER 31:25 Kua tino whakamākonatia hoki e ahau te wairua ruha, kua whakakīia anō ngā wairua katoa e pōuri ana.”
JER 31:26 I konei ka maranga ahau, ā, ka titiro; nā, he reka ki ahau tāku moe.
JER 31:27 “Nanā, kei te haere mai ngā rā,” e ai tā Ihowā, “e whakatōkia ai e ahau te whare o Īharaira me te whare o Hūrā ki te purapura tangata, ki te purapura kararehe.
JER 31:28 Nā, ka pērā i ahau i tiaki ai i a rātou i mua, he mea kia hūtia ake, kia wāhia iho, kia turakina ki raro, kia whakangaromia, kia tūkinotia; ka pērā anō tāku tiaki i a rātou, he mea kia hangā, kia whakatōkia,” e ai tā Ihowā.
JER 31:29 “I aua rā ka mutu tā rātou kī: ‘Kua kai ngā mātua i ngā karepe kaiota, ā, mōniania ana ngā niho o ngā tamariki.’
JER 31:30 Engari, ka mate tēnei, tēnei, i runga i tōna kino, i tōna kino; ko ngā tāngata katoa e kai ana i te karepe kaiota, ko ōna niho anō e mōniania.”
JER 31:31 “Nanā, kei te haere mai ngā rā,” e ai tā Ihowā, “e whakaritea ai e ahau he kawenata hou ki te whare o Īharaira, ki te whare hoki o Hūrā.
JER 31:32 E kore anō ia e rite ki te kawenata i whakaritea e ahau ki ō rātou mātua i te rā i pupuri ai ahau ki ō rātou ringa, ā, kawea mai ana rātou i te whenua o Īhipa – whakatakā ana e rātou taua kawenata āku, ahakoa i waiho ahau hei tahu mārena mā rātou,” e ai tā Ihowā.
JER 31:33 “Engari ko te kawenata tēnei e whakaritea e ahau ki te whare o Īharaira i muri i aua rā,” e ai tā Ihowā. “Ka hoatu e ahau tāku ture ki ō rātou wāhi i roto, ka tuhituhia anō ki tō rātou ngākau; ā, ko ahau hei Atua mō rātou, ko rātou hei iwi māku.
JER 31:34 I muri nei kāhore he whakaako a tētahi i tōna hoa tata, a tētahi i tōna teina, kāhore he kī atu, ‘Kia mōhio ki a Ihowā,’ ka mōhio hoki rātou katoa ki ahau, i te iti o rātou tae noa ki te mea rahi rawa,” e ai tā Ihowā. “Nō te mea ka whakarērea noatia e ahau tō rātou kino, ā, heoi anō ōku mahara ki tō rātou hara.”
JER 31:35 Ko te kupu tēnei a Ihowā, nāna nei i hōmai te rā hei whakamārama i te awatea, me ngā tikanga o te marama, o ngā whetū, hei whakamārama i te pō, nāna hoki i whakatūtehu te moana, i nganga ai ōna ngaru – ko Ihowā o ngā mano tōna ingoa:
JER 31:36 “Ki te mawehe atu ēnei tikanga i tōku aroaro,” e ai tā Ihowā, “ko reira anō ka kore te uri o Īharaira hei iwi i tōku aroaro ā ake ake.”
JER 31:37 Ko te kupu tēnei a Ihowā: “Mehemea e taea ana te rūri te rangi i runga, te rapu hoki ngā tūranga o te whenua i raro, kātahi hoki ahau ka paopao ki ngā uri katoa o Īharaira mō ngā mea katoa kua mahia e rātou,”
JER 31:38 “Nanā, kei te haere mai ngā rā,” e ai tā Ihowā, “e hangā ai te pā hei mea ki a Ihowā, i te Pourewa atu o Hananēre tae noa ki te Kūwaha o te Koki.
JER 31:39 Ā, ka tae tonu atu te aho rūri, tika tonu atu ki te pukepuke ki Karepe, taiāwhio tonu atu ki Koata.
JER 31:40 Nā, ko te raorao katoa i ngā tūpāpaku, i ngā pungarehu, ā, ko ngā māra katoa hoki, ā tae noa ki te awa, ki Kitirono, ki te koki i te Kūwaha Hōiho whaka te rāwhiti, ka tapu katoa ki a Ihowā. E kore e hūtia ake, e kore anō e wāhia iho ā ake ake.”
JER 32:1 Ko te kupu i puta mai ki a Heremaia, he mea nā Ihowā, i te tekau o ngā tau o Terekia kīngi o Hūrā, arā i te tekau mā waru o ngā tau o Nepukareha.
JER 32:2 Nā, i taua wā e whakapaea ana a Hiruhārama e te taua a te kīngi o Papurōna, ā, ko Heremaia poropiti kua oti te tūtaki ki roto ki te marae o te whare herehere i te whare o te kīngi o Hūrā.
JER 32:3 Nā, Terekia hoki, nā te kīngi o Hūrā ia i tūtaki; i mea tērā, “He aha koe i poropiti ai, i kī ai: ‘Ko te kupu tēnei a Ihowā: Nanā, ka hoatu e ahau tēnei pā ki te ringa o te kīngi o Papurōna, ā, ka horo i a ia.
JER 32:4 Ā, ko Terekia kīngi o Hūrā, e kore e mawhiti i te ringa o ngā Karari, engari, ka tukua pūtia ia ki te ringa o te kīngi o Papurōna, ā, ka kōrero ia ki a ia he māngai ki te māngai, ā, e kite hoki ōna kanohi i ōna kanohi.
JER 32:5 Ā, ka ārahina e ia a Terekia ki Papurōna, ā, ki reira ia noho ai, kia tae atu rā anō ahau ki te tirotiro i a ia, e ai tā Ihowā; ahakoa whawhai koutou ki ngā Karari, e kore e taea e koutou?’ ”
JER 32:6 Nā, ka mea a Heremaia, “I puta mai te kupu a Ihowā ki ahau, i mea ia:
JER 32:7 Nanā, tērā e tae mai ki a koe a Hanamēre tama a Harumu, a tōu matua kēkē, ā, ka mea, ‘Māu e hoko tāku māra i Anatoto; kei a koe nā hoki te tikanga o te utu whakahoki.’
JER 32:8 “Nā, ka haere mai ki ahau a Hanamēre tama a tōku matua kēkē, ka pērā me tā Ihowā i kī ai, ki te marae o te whare herehere, ā, ka mea ki ahau, ‘Tēnā koa, hokona tāku māra i Anatoto, i te whenua o Pineamine; kei a koe hoki te tikanga o taua wāhi, māu anō te utu e hoki ai; hokona māu.’ “Kātahi ahau ka mōhio, he kupu tēnei nā Ihowā,
JER 32:9 nā, ka hokona e ahau te māra a Hanamēre tama a tōku matua kēkē, tērā i Anatoto, ā, pāunatia atu ana e ahau te moni māna, arā tekau mā whitu ngā hekere hiriwa.
JER 32:10 Nā, ka tuhituhi ahau ki te pukapuka, hīri rawa, karangatia ana ngā kaititiro, ā, pāunatia atu ana e ahau te moni māna ki te pāuna.
JER 32:11 Nā, ka mau ahau ki te pukapuka o te hoko, ki te mea hīri i rite nei ki tā te ture, ki tā ngā tikanga, ā, ki te mea hīrikore;
JER 32:12 ā, hoatu ana e ahau te pukapuka o te hoko ki a Paruku tama a Neria, tama a Maaheia i te tirohanga anō a Hanamēre tama a tōku matua kēkē, i te tirohanga hoki a ngā kaititiro i tuhituhia ai te pukapuka o te hoko, i te tirohanga anō hoki a ngā Hūrai katoa e noho ana i te marae o te whare herehere.
JER 32:13 “Nā, ka whakahau ahau ki a Paruku i ō rātou aroaro, i mea atu ahau:
JER 32:14 ‘Ko te kupu tēnei a Ihowā o ngā mano, a te Atua o Īharaira: Maua atu ēnei pukapuka, tēnei pukapuka o te hoko, te mea hīri me tēnei pukapuka hīrikore, whaowhina ki te oko oneone; kia maha ai ngā rā e mau ai.
JER 32:15 Ko te kupu hoki tēnei a Ihowā o ngā mano, a te Atua o Īharaira: Tērā ngā whare, ngā māra, me ngā māra wāina ka hokohokona anō ā muri nei ki tēnei whenua.’ ”
JER 32:16 “Nā, i muri i tāku hoatutanga i te pukapuka o te hoko ki a Paruku tama a Neria, ka īnoi ahau ki a Ihowā, ka mea:
JER 32:17 “Auē, e te Ariki, e Ihowā! Nanā, kua hangā e koe te rangi me te whenua, nā tōu kaha nui, nā tōu ringa mārō. Kāhore he mea e pakeke ki a koe.
JER 32:18 He mahi aroha nei tāu ki ngā mano, e utua ana e koe te kino o ngā mātua ki roto ki te uma o ā rātou tamariki i muri i a rātou; ko tōna ingoa ko te Atua nui, ko te Atua mārohirohi, ko Ihowā o ngā mano.
JER 32:19 He nui ki te whakaaro, he kaha ki te mahi. E tuwhera ana hoki ōna kanohi ki ngā ara katoa o ngā tama a te tangata; he mea kia rite ai ki tōna ara ake, ki ngā hua o āna mahi, ngā mea e hoatu ai ki tēnei, ki tēnei.
JER 32:20 Nāu nei i hōmai ngā tohu me ngā mea whakamīharo ki te whenua o Īhipa, ā taea noatia tēnei rā, i roto i a Īharaira, i ērā atu hoki; ā, meinga ana e koe he ingoa mōu, pēnei i tēnei ināianei.
JER 32:21 Nāu nei hoki i kawe mai tāu iwi, a Īharaira, i te whenua o Īhipa i runga i ngā tohu, i ngā mea whakamīharo, i te ringa kaha, i te tākakau mārō hoki, i te wehi nui;
JER 32:22 ā, hōmai ana e koe ki a rātou tēnei whenua i oati ai koe ki ō rātou mātua ka hōmai ki a rātou, he whenua e rerengia ana e te waiū, e te honi.
JER 32:23 Nā, haere mai ana rātou, ā, riro ana a konei i a rātou; heoi kīhai rātou i rongo ki tōu reo, kīhai hoki i haere i runga i tāu ture; kīhai rawa i mahia e rātou tētahi o ngā mea i whakahaua e koe ki a rātou kia mahia. Koia i meinga ai e koe tēnei kino katoa kia pā ki a rātou.
JER 32:24 “Nanā, ngā puke, kua tae mai rātou ki te pā, kia horo ai; ā, ka hoatu te pā ki te ringa o ngā Karari e whawhai nei ki konei, nā te hoari hoki, nā te hemokai, nā te mate urutā; ā, ko tāu i kōrero rā, kua rite; nanā, e kite nei koe.
JER 32:25 Heoi, kua mea mai nā koe, e te Ariki, e Ihowā, ki ahau, ‘Hokona te māra māu ki te moni, whakatūria anō ngā kaititiro’ – kāhore ia, kua tukua te pā ki te ringa o ngā Karari.”
JER 32:26 Kātahi ka puta mai te kupu a Ihowā ki a Heremaia; i mea ia:
JER 32:27 “Nanā, ko Ihowā ahau, ko te Atua o ngā kikokiko katoa. Tērā rānei tētahi mea e pakeke rawa ki ahau?
JER 32:28 Heoi, ko te kupu tēnei a Ihowā: Nanā, ka hoatu e ahau tēnei pā ki te ringa o ngā Karari, ki te ringa o Nepukareha kīngi o Papurōna, ā, ka horo i a ia,
JER 32:29 ā, ka haere mai ngā Karari e whawhai nei ki tēnei pā, ka tahu i tēnei pā ki te ahi, ka wera hoki i a rātou, me ngā whare i tahu whakakakara ai rātou i runga i ngā tuanui ki a Paara, i ringihia ai hoki ngā ringihanga ki ngā atua kē, hei whakapātaritari i ahau.
JER 32:30 “Nō te mea ko ngā tamariki a Īharaira rātou ko ngā tamariki a Hūrā, he kino kau tā rātou i mahi ai i tāku tirohanga, nō tō rātou tamarikitanga ake anō; he whakapātaritari kau hoki tā ngā tamariki a Īharaira i ahau ki te mahi a ō rātou ringa, e ai tā Ihowā.
JER 32:31 Ko te āhua hoki o tēnei pā ki ahau he mea whakaoho i tōku riri, i tōku weriweri, nō te rā i hangā ai e rātou ā tae noa mai ki tēnei rā; kia nekehia i atu rā anō e ahau i tōku aroaro;
JER 32:32 mō te kino katoa a ngā tamariki a Īharaira rātou ko ngā tamariki a Hūrā, i mahia nei e rātou hei whakapātaritari i ahau – e rātou, e ō rātou kīngi, e ō rātou rangatira, e ō rātou tohunga, e ō rātou poropiti, e ngā tāngata o Hūrā, e ngā tāngata hoki o Hiruhārama.
JER 32:33 Ā, kua parea mai e rātou te kōhamo, kāhore te kanohi ki ahau; ā, ahakoa nāku rātou i whakaako, moata ai i te ata me te ako i a rātou, kīhai rātou i rongo, i manako ki te ako.
JER 32:34 Heoi, whakatūria ana e rātou ā rātou mea whakarihariha ki te whare i huaina nei tōku ingoa mō reira, whakapokea iho.
JER 32:35 Ā, hangā ana e rātou ngā wāhi tiketike o Paara, ērā i te raorao o te tama a Hinomo, kia meinga ai ā rātou tama, me ā rātou tamāhine, kia tika i roto i te ahi ki a Moreke; he mea kīhai i whakahaua e ahau, kīhai hoki i puta ake i tōku ngākau, kia mahia e rātou tēnei mea whakarihariha e hara ai a Hūrā.
JER 32:36 “Mō reira ko te kupu tēnei ināianei a Ihowā, a te Atua o Īharaira mō tēnei pā, e kī nā koutou, ‘Ka tukua ki te ringa o te kīngi o Papurōna’; mā te hoari, mā te hemokai, mā te mate urutā:
JER 32:37 Nanā, ka kohikohia mai rātou e ahau i ngā whenua katoa i peia atu nei rātou e ahau ki reira, i tōku riri, i tōku weriweri, i te āritarita nui; ka whakahokia mai anō rātou e ahau ki tēnei wāhi, ā, ka meinga kia noho hūmārie.
JER 32:38 Ā, ko rātou hei iwi māku, ko ahau hoki hei Atua mō rātou.
JER 32:39 Ā, ka hoatu e ahau he ngākau kotahi ki a rātou, he ara kotahi, kia wehi ai rātou i ahau ā ake ake; hei pai mō rātou, mō ā rātou tamariki hoki i muri i a rātou.
JER 32:40 Ka whakaritea anō e ahau he kawenata mau tonu ki a rātou: he mea kore e whakatahuritia atu e ahau i a rātou, kia mahia he pai ki a rātou; ā, ka hoatu e ahau tōku wehi ki ō rātou ngākau, kei whakarere rātou i ahau.
JER 32:41 Āe rā, ka koa ahau ki a rātou hei mea i te pai ki a rātou, ā, he pono ka whakapaua tōku ngākau, ka whakapaua hoki tōku wairua ki te whakatō a rātou ki tēnei whenua i runga i te pono.
JER 32:42 “Nō te mea ko te kupu tēnei a Ihowā: Ka pērā i tāku kawenga i tēnei kino nui katoa ki runga ki tēnei iwi, waihoki ka kawea e ahau ki runga ki a rātou te pai katoa i kōrerotia e ahau mō rātou.
JER 32:43 Ka hokohokona anō he māra ki tēnei whenua, e kī nā koutou mō reira, ‘He ururua, tē ai he tangata, he kararehe rānei; kua hoatu ki te ringa o ngā Karari.’
JER 32:44 Ka hokona e te tangata he māra ki te moni, ka tuhituhia anō he pukapuka, ka hīritia, ka whakatūria ngā kaititiro, i te whenua o Pineamine, i ngā taha o Hiruhārama, i ngā pā hoki o Hūrā, i ngā pā o te whenua pukepuke, i ngā pā o ngā raorao, i ngā pā hoki o te tonga; nō te mea ka whakahokia mai rātou e ahau i te whakarau, e ai tā Ihowā.”
JER 33:1 Nā, ko te rua o ngā putanga mai o te kupu a Ihowā ki a Heremaia, i a ia anō e tūtaki ana ki te marae o te whare herehere, i kī ia:
JER 33:2 “Ko te kupu tēnei a Ihowā nāna nei tēnei i mahi, a Ihowā nāna nei i whakaahua, i pūmau ai; ko Ihowā tōna ingoa:
JER 33:3 ‘Karanga ki ahau, ā, ka whakahoki kupu ahau ki a koe, ka whakakitea hoki e ahau ki a koe ngā mea nunui, ngā mea pakeke, he mea kīhai i mōhiotia e koe.’
JER 33:4 Ko te kupu hoki tēnei a Ihowā, a te Atua o Īharaira, mō ngā whare o tēnei pā, mō ngā whare hoki o ngā kīngi Hūrā, ka oti nei te wāhi iho hei ārai atu i ngā puke, i te hoari,
JER 33:5 e haere mai ana rātou ki te whawhai ki ngā Karari: ‘Engari ia ki te whakakī i aua wāhi ki ngā tinana o ngā tāngata i patua e ahau i tōku riri, i tōku weriweri, o te hunga nō rātou ngā kino katoa i hunā ai e ahau tōku mata ki tēnei pā.
JER 33:6 “ ‘Nanā, ka kawea mai e ahau he ora, he rongoā ki tēnei pā, ā, ka rongoātia rātou e ahau; ā, ka whakakitea e ahau ki a rātou te nui o te rangimārie me te pono.
JER 33:7 Ka whakahokia mai anō e ahau a Hūrā i te whakarau, a Īharaira hoki i te whakarau, ā, ka hangā rātou e ahau, koia anō kei tō te tīmatanga.
JER 33:8 Ka purea anō e ahau tō rātou kino katoa i hara ai rātou ki ahau; ā, ka murua e ahau ō rātou kino katoa i hara ai rātou ki ahau, i poka kē ai tā rātou mahi ki ahau.
JER 33:9 Ā, ka waiho tēnei pā hei ingoa koa ki ahau, hei whakamoemiti, hei korōria, i te aroaro o ngā iwi katoa o te whenua, ka rongo nei rātou ki ngā pai katoa e meatia e ahau ki a rātou, ā, ka wehi rātou, ka wiri i te pai katoa, i te rangimārie katoa, e meatia e ahau ki konei.’
JER 33:10 “Ko te kupu tēnei a Ihowā: ‘Tērā anō ka rangona ki tēnei wāhi, e kī nei koutou mō reira, “He ururua, kāhore he tangata, kāhore he kararehe,” arā ki ngā pā o Hūrā, ki ngā ara o Hiruhārama e mokemoke nei, tē ai he tangata, tē ai he kainoho, tē ai he kararehe,
JER 33:11 te reo o te koa, te reo o te hari, te reo o te tāne mārena hōu me te reo o te wahine mārena hou, te reo hoki o te hunga e kī ana: “Whakawhetai ki a Ihowā o ngā mano, he pai hoki a Ihowā, he mau tonu anō tāna mahi tohu; o te hunga hoki e kawe mai ana i ngā whakahere whakawhetai ki roto ki te whare o Ihowā.” Nō te mea ka whakahokia mai anō e ahau te whenua i te whakarau, ka rite anō ki tō te tīmatanga,’ e ai tā Ihowā.
JER 33:12 “Ko te kupu tēnei a Ihowā o ngā mano: ‘Tērā anō te wāhi e ururua nei, kāhore nei he tangata, kāhore he kararehe, me ōna pā katoa, ka nohoia anō e ngā hēpara, e mea ana i ā rātou hipi kia takoto.
JER 33:13 I ngā pā o te whenua pukepuke, i ngā pā o te mānia, i ngā pā o te tonga, i te whenua o Pineamine, i ngā taha o Hiruhārama, i ngā pā hoki o Hūrā, ka haere atu ngā hipi i raro i ngā ringa o te kaitatau,’ e ai tā Ihowā.”
JER 33:14 “ ‘Nanā, kei te haere mai ngā rā,’ e ai tā Ihowā, ‘e whakamanā ai e ahau te kupu pai i kōrerotia rā e ahau mō te whare o Īharaira, mō te whare hoki o Hūrā.
JER 33:15 I aua rā, ā, i taua wā, ka meinga e ahau tētahi Manga o te tika kia tupu ake mō Rāwiri; ā, ka mahia e ia te whakawā me te tika ki te whenua.
JER 33:16 I aua rā ka whakaorangia a Hūrā, ka noho hūmārie hoki a Hiruhārama. Ā, ko te ingoa tēnei e huaina mōna: Ko Ihowā tō tātou tika.’
JER 33:17 “Ko te kupu hoki tēnei a Ihowā: ‘E kore e whakakorea he tangata mō Rāwiri hei noho ki te torōna o te whare o Īharaira;
JER 33:18 e kore anō e whakakorea atu he tangata mō ngā tohunga, mō ngā Rīwaiti i tōku aroaro, hei whakaeke i ngā tahunga tinana, hei tahu i ngā whakahere, hei mahi i te patunga tapu i ngā rā katoa.’ ”
JER 33:19 I puta mai anō te kupu a Ihowā ki a Heremaia, i kī ia:
JER 33:20 “Ko te kupu tēnei a Ihowā: ‘Ki te taea e koutou te whakataka tāku kawenata o te awatea, me tāku kawenata o te pō, kia kore ai he ao, he pō, i ō rāua wā e tika ai;
JER 33:21 kātahi ka taka tāku kawenata ki tāku pononga, ki a Rāwiri, e kore ai he tama māna, hei kīngi ki tōna torōna; me tāku hoki ki āku minita, ki ngā Rīwaiti, ki ngā tohunga.
JER 33:22 E kore nei te ope o te rangi e taea te tatau, e kore anō te onepū o te moana e taea te mēhua, ka pēnā anō tāku whakanui i ngā uri o tāku pononga, o Rāwiri, i ngā Rīwaiti hoki e minita nei ki ahau.’ ”
JER 33:23 Ā, ka puta mai te kupu a Ihowā ki a Heremaia, i mea ia:
JER 33:24 “Kāhore rānei koe e mahara ki tā tēnei iwi i kōrero ai, i mea ai, ‘Ko ngā hapū e rua i whiriwhiria rā e Ihowā, kua paopaongia e ia.’ Ko tā rātou whakahāwea tēnā ki tāku iwi, kia kaua rātou e kīia anō he iwi i tō rātou aroaro.
JER 33:25 Ko te kupu tēnei a Ihowā: ‘Ki te kāhore e tū tāku kawenata o te ao, o te pō, ā, ehara ngā tikanga o te rangi, o te whenua, i te mea whakatakoto nāku;
JER 33:26 kātahi ka paopaongia e ahau ngā uri o Hākopa rāua ko tāku pononga, ko Rāwiri, e kore ai e tangohia tētahi o ōna uri hei kaiwhakahaere tikanga mō ngā uri o Āperahama, o Īhaka, o Hākopa. Nō te mea ka whakahokia mai rātou e ahau i te whakarau, ka tohungia hoki rātou e ahau.’ ”
JER 34:1 Ko te kupu i puta mai ki a Heremaia nā Ihowā, i a Nepukaneha kīngi o Papurōna rātou ko tāna ope katoa, ko ngā kīngitanga katoa o te whenua i raro i tōna mana, me ngā iwi katoa, i whawhai ai ki Hiruhārama me ōna pā katoa, i mea ia:
JER 34:2 “Ko te kupu tēnei a Ihowā, a te Atua o Īharaira: Haere, kōrero ki a Terekia kīngi o Hūrā, mea atu ki a ia: ‘Ko te kupu tēnei a Ihowā: Nanā, ka hoatu e ahau tēnei pā ki te ringa o te kīngi o Papurōna, ā, ka tahuna e ia ki te ahi.
JER 34:3 Ā, e kore koe e mawhiti i roto i tōna ringa, engari ka mau pū koe, ka tukua hoki ki tōna ringa; ā, ka kite ōu kanohi i ngā kanohi o te kīngi o Papurōna, ā, ka kōrero ia ki a koe he māngai ki te māngai, ka tae anō hoki koe ki Papurōna.
JER 34:4 “ ‘Whakarongo anō hoki ki te kupu a Ihowā, e Terekia kīngi o Hūrā; ko te kupu tēnei a Ihowā mōu: E kore koe e mate i te hoari;
JER 34:5 engari, ka mate koe i runga i te rangimārie. Nā, ko ngā tahunga o ōu mātua, o ngā kīngi o mua, i mua atu i a koe, ka pēnā anō he tahunga mōu; ā, ka tangi rātou ki a koe, ka mea, “Auē, e te Ariki!” Nāku nei hoki te kupu i kōrero, e ai tā Ihowā.’ ”
JER 34:6 Kātahi a Heremaia poropiti ka kōrero i ēnei kupu katoa ki a Terekia kīngi o Hūrā i Hiruhārama.
JER 34:7 I te mea e whawhai ana te ope o te kīngi o Papurōna ki Hiruhārama, ki ngā pā katoa o Hūrā i mahue, ki Rakihi, ki Ateka. Ko ēnei anake hoki o ngā pā o Hūrā i mahue, he pā taiepa.
JER 34:8 Ko te kupu i puta mai ki a Heremaia nā Ihowā, i muri i te whakaritenga kawenata a Kīngi Terekia ki te hunga katoa i Hiruhārama, kia karangatia ki a rātou te haere noa;
JER 34:9 kia tukua e tērā, e tērā, tāna pononga tāne, tāna pononga wahine, ki te mea he tāne, he wahine rānei nō ngā Hiperu, kia haere noa atu; kia kaua tētahi e whakamahi i a rātou, arā i tōna teina, i te Hūrai.
JER 34:10 Ā, ka rongo ngā rangatira katoa rātou ko te iwi katoa i uru nei ki te kawenata, kia tukua e tērā, e tērā, tāna pononga tāne, tāna pononga wahine kia haere noa atu, kia kaua e whakamahia rātou i muri atu. Nā rongo tonu rātou, ā, tukua atu ana e rātou.
JER 34:11 Engari, i muri iho ka tahuri anō rātou, ā, meinga ana e rātou kia hoki mai ngā pononga tāne, me ngā pononga wāhine i tukua rā e rātou kia haere noa atu, whakataurekarekatia iho rātou hei pononga tāne, hei pononga wāhine.
JER 34:12 Nā reira, ka puta mai te kupu a Ihowā ki a Heremaia, he mea nā Ihowā, i kī ia:
JER 34:13 “Ko te kupu tēnei a Ihowā, a te Atua o Īharaira: I whakaritea e ahau he kawenata ki ō koutou mātua i te rā i kawea mai ai rātou e ahau i te whenua o Īhipa, i te whare pononga; i mea ahau,
JER 34:14 ‘I te mutunga o ngā tau e whitu me tuku e koutou tōna tuakana, tōna teina, ki te mea he Hiperu i hokona ki a koe, ā, kua mahi ki a koe e ono ngā tau, me tuku e koe kia haere noa atu i tōu taha.’ Otirā, kīhai ō koutou mātua i rongo ki ahau, kīhai anō ō rātou taringa i anga mai.
JER 34:15 Nā, i tahuri nei koutou i tēnei rā, i mahi i te mea e tika ana ki tāku titiro, i te karangatanga ai he haere noa atu e tērā, e tērā, ki tōna hoa, ki tōna hoa; ā, i whakaritea e koutou he kawenata ki tōku aroaro i roto i te whare kua huaina nei tōku ingoa ki reira.
JER 34:16 Otiia, tahuri ana koutou, whakapokea ana e koutou tōku ingoa, whakahokia ana e koutou tāna pononga tāne, tāna pononga wahine i tukua rā e koutou kia haere noa atu ki tā rātou i pai ai, whakataurekarekatia iho rātou e koutou hei pononga tāne, hei pononga wāhine mā koutou.
JER 34:17 “Mō reira ko te kupu tēnei a Ihowā: Kīhai koutou i rongo ki ahau, ki te karanga i te haere noa atu ki tōna teina, ki tōna tuakana, ki tōna hoa, ki tōna hoa. Nanā, māku e karanga ki a koutou he haere noa atu, e ai tā Ihowā, mā te hoari, mā te mate urutā, mā te matekai; ā, ka meinga koutou e ahau kia poipoia haeretia i waenganui i ngā kīngitanga katoa o te whenua.
JER 34:18 Ka hoatu hoki e ahau ngā tāngata i whakataka nei i tāku kawenata, ā, kīhai i whakamana i ngā kupu o te kawenata i whakaritea e rātou i tōku aroaro, i a rātou i tapahi ai i te kūao kau kia rua, ā, haere ana i waenganui i ōna wāhi:
JER 34:19 ngā rangatira o Hūrā, ngā rangatira hoki o Hiruhārama, ngā unaka, ngā tohunga, me te iwi katoa o te whenua i haere nei i waenganui o ngā wāhi o te kūao kau.
JER 34:20 Ka tino hoatu rātou e ahau ki te ringa o ō rātou hoariri, ki te ringa hoki o te hunga e whai ana kia whakamatea rātou; ā, hei kai ō rātou tinana mā te manu o te rangi, mā te kararehe o te whenua.
JER 34:21 “Ka hoatu anō e ahau a Terekia kīngi o Hūrā rātou ko āna rangatira, ki te ringa o ō rātou hoariri, ki te ringa hoki o te hunga e whai ana kia whakamatea rātou, ki te ringa anō o te ope o te kīngi o Papurōna i haere atu nei i a koutou.
JER 34:22 Nanā, māku e whakahau, e ai tā Ihowā, ā, ka meinga rātou kia hoki mai ki tēnei pā. Ā, ka whawhai rātou ki reira, ka horo hoki i a rātou, ā, ka tahuna ki te ahi. Ā, ka meinga e ahau ngā pā o Hūrā kia ururuatia, tē ai he tāngata hei noho.”
JER 35:1 Ko te kupu i puta mai ki a Heremaia nā Ihowā, i ngā rā o Iehoiakimi tama a Hōhia kīngi o Hūrā, i mea ia:
JER 35:2 Haere ki te whare o ngā Rekapi, kōrero atu ki a rātou, ka kawe i a rātou ki te whare o Ihowā, ki tētahi o ngā rūma, ka whakainu i a rātou ki te wāina.
JER 35:3 Nā, ka tīkina e ahau a Iaatania tama a Heremaia, tama a Hapatinia, rātou ko ōna tēina, ko āna tama katoa, ko te whare katoa hoki o ngā Rekapi;
JER 35:4 ā, kawea ana rātou e ahau ki te whare o Ihowā, ki te rūma o ngā tama a Hanana tama a Ikiraria, he tāngata nā te Atua, ki tērā i te taha o te rūma o ngā rangatira, i runga ake i te rūma o te kaitiaki tatau, o Maaheia tama a Harumu.
JER 35:5 Ā, whakatūria ana e ahau ētahi oko, kī tonu i te wāina, me ētahi kapu ki te aroaro o ngā tama o te whare o ngā Rekapi. Nā, ka mea atu ahau ki a rātou, “Inumia e koutou he wāina.”
JER 35:6 Anō rā ko rātou, “E kore mātou e inu wāina; i ako hoki tō mātou pāpā, a Ionārapa, tama a Rekapa, ki a mātou, i mea: ‘Kei inu wāina koutou ko ā koutou tamariki ā ake ake.
JER 35:7 Kaua hoki koutou e hanga whare, e whakatō purapura, e whakatō māra wāina rānei, kaua hoki he pēnā mā koutou. Engari, i ō koutou rā katoa, me noho tēneti. Kia maha ai ngā rā e ora ai koutou ki te mata o te oneone e noho manene nei koutou.’
JER 35:8 Nā, rongo tonu mātou ki te reo o tō mātou pāpā, o Ionārapa tama a Rekapa, ki ngā mea katoa i whakahau ai ia ki a mātou, kia kaua e inu wāina i ō mātou rā katoa, mātou, ā mātou wāhine, ā mātou tama, ā mātou tamāhine;
JER 35:9 kia kaua anō e hanga whare hei nohoanga mō mātou. Kāhore hoki ā mātou māra wāina, māra kē rānei, purapura rānei.
JER 35:10 Engari, ko ō mātou nohoanga he tēneti, rongo tonu mātou, mahi tonu i ngā mea katoa i whakahaua e tō mātou pāpā, e Ionārapa, ki a mātou.
JER 35:11 Otiia, i te whakaekenga a Nepukareha kīngi o Papurōna i te whenua, ka mea mātou, ‘Haere mai, haere tātou ki Hiruhārama, kei mate i te ope a ngā Karari, i te ope hoki a ngā Hīriani.’ Nā, noho ana mātou i Hiruhārama.”
JER 35:12 Kātahi ka puta mai te kupu a Ihowā ki a Heremaia, ka mea ia:
JER 35:13 “Ko te kupu tēnei a Ihowā o ngā mano, a te Atua o Īharaira: Haere, mea atu ki ngā tāngata o Hūrā, ki te hunga hoki e noho ana i Hiruhārama: ‘E kore ianei koutou e manako ki te ako, e rongo ki āku kupu?’ e ai tā Ihowā.
JER 35:14 ‘Kua tutuki ngā kupu a Ionārapa tama a Rekapa i whakahau ai ia ki āna tamariki kia kaua e inu wāina; kīhai hoki rātou i inu ā taea noatia tēnei rā, nō te mea e whakarongo ana rātou ki te ako a tō rātou pāpā. Ko ahau ia, i kōrero ahau ki a koutou, moata ai i te ata ka kōrero; heoi kīhai koutou i rongo ki ahau.
JER 35:15 I ungā atu anō e ahau āku pononga katoa, ngā poropiti, maranga wawe ana ahau, unga ana i a rātou, ki a koutou, me te kī atu, “Tahuri mai koutou, e tērā, e tērā o koutou i ō koutou ara kino, ka whakapai i ā koutou mahi, kaua hoki e whai ki ngā atua kē, kaua e mahi ki a rātou, ā, ka noho koutou ki te whenua i hoatu e ahau ki a koutou ko ō koutou mātua.” Heoi, kīhai i anga mai ō koutou taringa, kīhai hoki i rongo ki ahau.
JER 35:16 Nā, kua whakamanā nei e ngā tama a Ionārapa tama a Rekapa te ako a tō rātou pāpā i ako ai ia ki a rātou, engari ko tēnei iwi, kīhai i rongo ki ahau.’
JER 35:17 “Mō reira ko te kupu tēnei a Ihowā, a te Atua o ngā mano, a te Atua o Īharaira: ‘Nanā, ka kawea mai e ahau ki a Hūrā, ki ngā tāngata katoa hoki o Hiruhārama, ngā kino katoa i kōrerotia e ahau mō rātou. Nō te mea i kōrero ahau ki a rātou, ā, kīhai i rongo; i karanga ahau ki a rātou, ā, kīhai rātou i whakahoki kupu mai.’ ”
JER 35:18 Nā, ka mea a Heremaia ki te whare o ngā Rekapi, “Ko te kupu tēnei a Ihowā o ngā mano, a te Atua o Īharaira: ‘I te mea i rongo koutou ki te ako a tō koutou pāpā, a Ionārapa, i pupuri hoki i āna ako katoa, i mahi i ngā mea katoa i ākona e ia ki a koutou.
JER 35:19 Mō reira ko te kupu tēnei a Ihowā o ngā mano, a te Atua o Īharaira: E kore e kore he tangata mā Ionārapa tama a Rekapa, hei tū ki tōku aroaro i ngā rā katoa.’ ”
JER 36:1 Nā, i te whā o ngā tau o Iehoiakimi tama a Hōhia kīngi o Hūrā, ka puta mai tēnei kupu ki a Heremaia nā Ihowā, i mea ia:
JER 36:2 “Tīkina tētahi pukapuka māu, ka tuhituhi ki reira i ngā kupu katoa i kōrerotia e ahau ki a koe mō Īharaira, mō Hūrā, mō ngā iwi katoa hoki, o te rā anō i kōrero ai ahau ki a koe, o ngā rā i a Hōhia ā tae noa ki tēnei rā.
JER 36:3 Tērā pea te whare o Hūrā e rongo ki te kino katoa e whakaaro nei ahau kia meatia ki a rātou; kia tahuri rātou, ia tangata, ia tangata, i ō rātou ara kino; ā tērā e murua e ahau tō rātou hē, tō rātou hara.”
JER 36:4 Kātahi a Heremaia ka karanga ki a Paruku, tama a Neria; nā, ka tuhituhia e Paruku, ki te pukapuka nō te māngai o Heremaia, ngā kupu katoa a Ihowā i kōrero ai ki a ia.
JER 36:5 Nā, ka whakahau a Heremaia i a Paruku, ka mea, “Kua tūtakina ahau; e kore e āhei i ahau te haere ki te whare o Ihowā.
JER 36:6 Nō reira haere koe, ka kōrero i te pukapuka i tuhituhia e koe, ko tāku i kōrero ai, ko ngā kupu a Ihowā, ki ngā taringa o te iwi i te whare o Ihowā i te rā nohopuku. Me kōrero anō e koe ki ngā taringa o Hūrā katoa e haere mai ana i ō rātou pā.
JER 36:7 Tērā pea ka takoto tā rātou īnoi ki te aroaro o Ihowā, ā, ka hoki rātou i tōna ara kino, i tōna ara kino; he nui hoki te riri, he nui te weriweri i kōrerotia e Ihowā mō tēnei iwi.”
JER 36:8 Nā, meatia ana e Paruku tama a Neria ngā mea katoa i whakahaua ai ia e Heremaia poropiti, kōrerotia ana e ia i roto i te pukapuka ngā kupu a Ihowā i te whare o Ihowā.
JER 36:9 Nā, i te rima o ngā tau o Iehoiakimi tama a Hōhia kīngi o Hūrā, i te iwa o ngā marama, ka karangatia e rātou he nohopuku ki te aroaro o Ihowā mō te iwi katoa i Hiruhārama, mō te iwi katoa hoki i haere mai i ngā pā o Hūrā ki Hiruhārama.
JER 36:10 Kātahi ka kōrerotia e Paruku i roto i te pukapuka ngā kupu a Heremaia i roto i te whare o Ihowā, i te rūma o te kaituhituhi, o Kemaria tama a Hapana, i te marae o runga, i te kūwaha o te Kēti Hou o te whare o Ihowā, me te whakarongo anō te iwi katoa.
JER 36:11 Ā, nō te rongonga o Mikaia tama a Kemaria, tama a Hapana, ki ngā kupu katoa a Ihowā i roto i te pukapuka,
JER 36:12 ka haere ia ki raro, ki te whare o te kīngi, ki te rūma o te kaituhituhi, nā, i reira ngā rangatira katoa e noho ana, a Erihama kaituhituhi, rātou ko Teraia tama a Hemaia, ko Erenātana tama a Akaporo, ko Kemaria tama a Hapana, ko Terekia tama a Hanania, ko ngā rangatira katoa anō hoki.
JER 36:13 Kātahi a Mikaia ka whakaatu ki a rātou i ngā kupu katoa i rongo ai ia, i te kōrerotanga a Paruku i te pukapuka ki ngā taringa o te iwi.
JER 36:14 Nā reira ka ungā atu e ngā rangatira katoa a Iehuri, tama a Netania, tama a Heremia, tama a Kūhi, ki a Paruku, hei kī atu, “Mauria mai e koe i tōu ringa te pukapuka i kōrerotia nā e koe ki ngā taringa o te iwi, ā, ka haere mai.” Nā, mauria ana e Paruku tama a Neria te pukapuka i tōna ringa, ā, haere ana ki a rātou.
JER 36:15 Nā, ka mea rātou ki a ia, “Tēnā, e noho, kōrerotia hoki ki ō mātou taringa.” Heoi, kōrerotia ana e Paruku ki ō rātou taringa.
JER 36:16 Nā, i tō rātou rongonga ki ngā kupu katoa, ka wehi rātou, ka tahuri tētahi ki tētahi, ā, ka mea atu ki a Paruku, “Ka kōrerotia mārietia e mātou ēnei kupu katoa ki te kīngi.”
JER 36:17 Ā, ka ui rātou ki a Paruku, ka mea, “Tēnā koa, whakaaturia mai ki a mātou, i pēhea tāu tuhituhi i ēnei kupu katoa a tōna māngai?”
JER 36:18 Anō rā ko Paruku ki a rātou, “Nā tōna māngai ēnei kupu katoa i kōrero ki ahau, ā, tuhituhia iho e ahau ki te mangumangu ki te pukapuka.”
JER 36:19 Kātahi ngā rangatira ka mea ki a Paruku, “Haere, e huna i a koe, kōrua ko Heremaia, kaua hoki tētahi e mōhio kei hea kōrua.”
JER 36:20 Nā, haere ana rātou ki te kīngi ki te marae; otiia i waiho e rātou te pukapuka i te rūma o Erihama kaituhituhi; ā, kōrerotia ana e rātou ngā kupu katoa ki ngā taringa o te kīngi.
JER 36:21 Heoi, ka ungā e te kīngi a Iehuri ki te tiki i te pukapuka. Nā, tīkina ana e ia i te rūma o Erihama kaituhituhi; ā, kōrerotia ana e Iehuri ki ngā taringa o te kīngi, ki ngā taringa hoki o ngā rangatira katoa e tū ana i te taha o te kīngi.
JER 36:22 Nā, i te noho te kīngi i te whare hōtoke (i te iwa o ngā marama), ā, he ahi i te kānga ahi e kā ana i tōna aroaro.
JER 36:23 Nā, ka toru, ka whā ngā whārangi i kōrerotia e Iehuri, ka tapahia e te kīngi ki te māripi a te kaituhituhi, makā atu ana ki te ahi i te kānga ahi, ā pau noa te pukapuka katoa i te ahi i roto i te kānga ahi.
JER 36:24 Nā, kāhore rātou i wehi, kāhore hoki i haehae i ō rātou kākahu, te kīngi rānei, tētahi rānei o āna pononga i rongo i ēnei kupu katoa.
JER 36:25 Nā tērā a Erenātana rātou ko Teraia, ko Kemaria, kua tohe ki te kīngi kia kaua e tahuna te pukapuka; otiia, kīhai ia i rongo ki a rātou.
JER 36:26 Nā, ka whakahaua e te kīngi a Ierameere tama a te kīngi, rātou ko Heraia tama a Atariere, ko Heremia tama a Aparēre ki te hopu i a Paruku kaituhituhi, rāua ko Heremaia poropiti. Otirā, i hunā rāua e Ihowā.
JER 36:27 Kātahi ka puta mai te kupu a Ihowā ki a Heremaia, i muri i te tahunga a te kīngi i te pukapuka, i ngā kupu hoki i tuhituhia rā e Paruku i te māngai o Heremaia, i mea ia:
JER 36:28 “Tīkina anō tētahi atu pukapuka, tuhituhia ki reira ngā kupu katoa ō mua rā, o te pukapuka tuatahi i tahuna rā e Iehoiakimi kīngi o Hūrā.
JER 36:29 Nā, ko te kupu māu mō Iehoiakimi kīngi o Hūrā: ‘Ko te kupu tēnei a Ihowā: I tahuna e koe te pukapuka nei, i kī koe, “He aha i tuhituhia ai e koe ki konei, i kī ai, Ka tino haere mai te kīngi o Papurōna, ka whakangaro i tēnei whenua, ka mōtī anō i a ia te tangata me te kararehe o konei?”
JER 36:30 Mō reira ko te kupu tēnei a Ihowā mō Iehoiakimi kīngi o Hūrā: E kore ia e whai tangata hei noho ki te torōna o Rāwiri, ā, ka makā atu tōna tinana ki te werawera i te awatea, ki te huka i te pō.
JER 36:31 Ka whiua hoki ia e ahau, rātou ko ōna uri, ko āna tāngata mō tō rātou hē; ā, ka kawea mai e ahau ki a rātou, ki ngā tāngata o Hiruhārama, ki ngā tāngata hoki o Hūrā, te kino katoa i kōrerotia e ahau mō rātou, ā, kīhai nei rātou i whakarongo.’ ”
JER 36:32 Nā, ka tangohia e Heremaia tētahi atu pukapuka, ā, hoatu ana e ia ki te kaituhituhi, ki a Paruku tama a Neria; nāna i tuhituhi ki reira nō te māngai o Heremaia ngā kupu katoa o te pukapuka i tahuna rā e Iehoiakimi kīngi o Hūrā ki te ahi, ā, tāpiritia atu ana ki ērā ētahi atu kupu maha pērā.
JER 37:1 Nā, kua kīngi a Terekia tama a Hōhia, i muri i a Konia tama a Iehoiakimi, i whakakīngitia nei e Nepukareha kīngi o Papurōna ki te whenua o Hūrā.
JER 37:2 Otiia kīhai ia i whakarongo, rātou ko āna tāngata, ko te iwi anō hoki o te whenua, ki ngā kupu a Ihowā i kōrerotia e Heremaia poropiti.
JER 37:3 Nā, ka ungā e Terekia, e te kīngi, a Iehukara tama a Heremia rāua ko Tepania tama a Maaheia tohunga ki a Heremaia poropiti, hei kī atu: “Tēnā koa, īnoi mō tātou ki a Ihowā, ki tō tātou Atua.”
JER 37:4 Nā, ko Heremaia, i te haere mai, i te haere atu i roto i te iwi; kāhore hoki ia i makā ki te whare herehere.
JER 37:5 Nā, kua puta mai te taua a Parao i Īhipa, ā, nō te rongonga o ngā Karari i whakapae rā i Hiruhārama i tō rātou rongo, ka maunu atu rātou i Hiruhārama.
JER 37:6 Kātahi ka puta mai te kupu a Ihowā ki a Heremaia poropiti, i mea ia:
JER 37:7 “Ko te kupu tēnei a Ihowā, a te Atua o Īharaira: Kia pēnei tā kōrua kōrero atu ki te kīngi o Hūrā, nāna nei kōrua i unga mai ki te rapu tikanga i ahau; ‘Nanā, ko te ope a Parao i puta mai rā hei āwhina mō koutou, ka hoki ki tōna whenua, ki Īhipa.
JER 37:8 Ā, ka hoki mai ngā Karari, ka tatau ki tēnei pā, ka horo hoki i a rātou, ka tahuna ki te ahi.’
JER 37:9 “Ko te kupu tēnei a Ihowā: Kei tinihanga i a koutou anō, kei mea, ‘Ka haere rawa atu ngā Karari i a tātou.’ Nō te mea e kore rātou e haere.
JER 37:10 Ahakoa me i patua e koutou te ope katoa o ngā Karari e tatau nā ki a koutou, ā, toe ake o rātou ko ētahi tāngata taotū, ka whakatika anō rātou i tōna tēneti, i tōna tēneti, ā, ka tahu i tēnei pā ki te ahi.”
JER 37:11 Nā, i te whatinga atu o te ope o ngā Karari i Hiruhārama i te wehi ki te ope a Parao,
JER 37:12 kātahi a Heremaia ka puta atu i Hiruhārama, he haere ki te whenua o Pineamine, kia riro mai te wāhi māna i reira, i roto i te iwi.
JER 37:13 Ā, i a ia i te Kūwaha o Pineamine, i reira tētahi rangatira tiaki, ko tōna ingoa ko Irīa, he tama nā Heremia tama a Hanania; heoi hopukia ana a Heremaia poropiti e ia, me te kī anō, “E tahuti atu ana koe ki ngā Karari.”
JER 37:14 Kātahi ka mea a Heremaia, “He teka; kāhore āku tahuti ki ngā Karari.” Otiia, kīhai ia i rongo ki tāna; nā, hopukia ana a Heremaia e Irīa, kawea ana ki ngā rangatira.
JER 37:15 Nā, riri ana ngā rangatira ki a Heremaia, whiua ana ia e rātou, tukua ana ki te whare herehere, ki te whare o Honatana kaituhituhi; kua waiho hoki tērā e rātou hei whare herehere.
JER 37:16 I te taenga o Heremaia ki roto ki te whare herehere, ki roto ki ngā rūma, ā, ka maha ngā rā e noho ana a Heremaia ki reira.
JER 37:17 Kātahi a Kīngi Terekia ka unga tāngata ki te tiki i a ia. Nā, ka ui puku te kīngi ki a ia, i roto i tōna whare, ka mea, “He kupu anō rānei tā Ihowā?” Ā, ka mea a Heremaia, “Tēnei anō.” I mea anō ia, “Ka hoatu koe ki te ringa o te kīngi o Papurōna.”
JER 37:18 Nā, i mea atu anō a Heremaia ki a Kīngi Terekia, “He aha tōku hara ki a koe, ki āu tāngata rānei, ki tēnei iwi rānei, i tukua ai ahau e koutou ki te whare herehere?
JER 37:19 Kei hea ā koutou poropiti i poropiti rā ki a koutou, i mea rā, ‘E kore te kīngi o Papurōna e tae mai ki a koutou, ki tēnei whenua rānei’?
JER 37:20 Nā, whakarongo āianei, e tōku ariki, e te kīngi. Tukua atu koa tāku īnoi kia manaakitia ki tōu aroaro. Kia kaua ahau e whakahokia ki te whare o Honatana kaituhituhi, kei mate ahau ki reira.”
JER 37:21 Nā, ka whakahaua e Kīngi Terekia, ā, ka kawea a Heremaia ki te marae o te whare herehere, ā, ka hoatu e rātou māna he rohi taro i tēnei rā, i tēnei rā, nō te ara o ngā kaitunu taro, ā pau noa te taro katoa o te pā. Nā, noho ana a Heremaia i te marae o te whare herehere.
JER 38:1 Ā, i rongo a Hepatia tama a Matana, rātou ko Keraria tama a Pahuru, ko Iukara tama a Heremia, ko Pahuru tama a Marakia, i ngā kupu i kōrerotia e Heremaia ki te iwi katoa, i a ia i kī rā,
JER 38:2 “Ko te kupu tēnei a Ihowā: ‘Ko te tangata e noho ana i tēnei pā ka mate i te hoari, i te hemokai, i te mate urutā. Ko te tangata ia e haere atu ana ki ngā Karari, ka ora; ā, ka waiho tōna wairua hei taonga pārau ki a ia, ā, ka ora ia.’
JER 38:3 Ko te kupu tēnei a Ihowā: ‘Ka tino hoatu tēnei pā ki te ringa o te ope a te kīngi o Papurōna, ā, ka horo i a ia.’ ”
JER 38:4 Nā, ka mea atu ngā rangatira ki te kīngi, “Me whakamate tēnei tangata; mā tāna pēnei hoki ka ngoikore ai ngā ringa o ngā tāngata whawhai e toe ana ki te pā nei, me ngā ringa o te iwi katoa, mā tāna kōrero i ēnei tū kupu ki a rātou. Kāhore hoki tēnei tangata i te rapu i te pai mō tēnei iwi, engari i te kino.”
JER 38:5 Nā, ka mea a Kīngi Terekia, “Nanā, kei tō koutou ringa ia. Ehara hoki te kīngi i te mea e āhei te whakahē ki tā koutou.”
JER 38:6 Kātahi rātou ka mau ki a Heremaia, makā ana e rātou ki te poka a Marakia tama a te kīngi, ki tērā i te marae o te whare herehere; ā, tukua ana a Heremaia e rātou ki raro, ki te taura. Nā, kāhore he wai i roto i te poka, engari he oru; ā, tapoko ana a Heremaia ki te oru.
JER 38:7 Nā, i te rongonga o Eperemereke Etiopiana, he unaka nō te whare o te kīngi, kua tukua a Heremaia ki te poka; e noho ana hoki te kīngi i te Kūwaha o Pineamine i taua wā.
JER 38:8 Kātahi a Eperemereke ka haere atu i te whare o te kīngi, ka kōrero ki te kīngi, ka mea,
JER 38:9 “E tōku ariki, e te kīngi, he kino ngā mea kua mahia e ēnei tāngata i a rātou katoa i mahi ai ki a Heremaia poropiti, kua makā nei e rātou ki te poka; ā tērā ia e mate ki te wāhi kei reira nei ia i te hemokai; kāhore atu hoki he taro i te pā.”
JER 38:10 Kātahi te kīngi ka whakahau ki a Eperemereke Etiopiana, ka mea, “Mauria atu ētahi tāngata i konei, kia toru tekau, ka tango ake i a Heremaia poropiti i roto i te poka, keiwhā mate ia.”
JER 38:11 Heoi, kua mau a Eperemereke ki ngā tāngata hei hoa mōna, ā, haere ana ki te whare o te kīngi ki raro i te whare taonga, tangohia ana mai e ia i reira ētahi karukaru tawhito me ētahi tawhetawhe pirau, tukua iho ana e ia ki ngā taura ki a Heremaia ki roto ki te poka.
JER 38:12 Kātahi a Eperemereke Etiopiana ka mea iho ki a Heremaia, “Tēnā, kuhua ngā karukaru tawhito nei me ngā tawhetawhe pirau nei ki raro i ōu peke, ki raro atu i ngā taura.” Nā, pērātia ana e Heremaia.
JER 38:13 Heoi, ka hūtia ake e rātou a Heremaia ki ngā taura, whakaputaina ake ana ia i roto i te poka; ā, noho tonu iho a Heremaia ki te marae o te whare herehere.
JER 38:14 Kātahi a Kīngi Terekia ka unga tāngata atu ki te tiki i a Heremaia poropiti ki a ia, ki te tuatoru o ngā tomokanga, i te whare o Ihowā; ā, ka mea te kīngi ki a Heremaia, “Me ui e ahau tētahi mea i a koe; kaua e hunā tētahi mea i ahau.”
JER 38:15 Anō rā ko Heremaia ki a Terekia, “Ki te whakaaturia e ahau ki a koe, he teka ianei ko te whakamate kau tāu mōku? Ā, ki te whakatakotoria e ahau he whakaaro ki a koe, e kore koe e whakarongo ki ahau.”
JER 38:16 Heoi, ka oati puku a Kīngi Terekia ki a Heremaia, ka mea, “E ora ana a Ihowā nāna nei tēnei wairua i hanga mō tātou, e kore ahau e whakamate i a koe, e kore anō koe e tukua e ahau ki te ringa o ēnei tāngata e whai nei kia whakamatea koe.”
JER 38:17 Kātahi a Heremaia ka mea atu ki a Terekia, “Ko te kupu tēnei a Ihowā, a te Atua o ngā mano, a te Atua o Īharaira: ‘Ki te haere atu koe ki ngā rangatira o te kīngi o Papurōna, ka ora tōu wairua, e kore hoki tēnei pā e tahuna ki te ahi; engari ka ora koe me tōu whare.
JER 38:18 Tēnā ki te kore koe e haere ki ngā rangatira a te kīngi o Papurōna, kātahi tēnei pā ka hoatu ki te ringa o ngā Karari, ā, ka tahuna e rātou ki te ahi, ā, e kore koe e mawhiti i ō rātou ringa.’ ”
JER 38:19 Nā, ka mea a Kīngi Terekia ki a Heremaia, “E wehi ana ahau i ngā Hūrai i papahoro atu nei ki ngā Karari, kei tukua ahau ki ō rātou ringa, ka tāwaitia ahau e rātou.”
JER 38:20 Otiia ka mea a Heremaia, “E kore koe e tukua e rātou. Whakarongo oti ki te reo o Ihowā e kōrerotia nei e ahau ki a koe. Nā, ka whiwhi koe ki te pai, ā, ka ora tōu wairua.
JER 38:21 Tēnā ki te kore koe e pai ki te haere atu, ko te kupu tēnei i whakakitea e Ihowā ki ahau:
JER 38:22 Inana, ko ngā wāhine katoa e mahue ana ki te whare o te kīngi o Hūrā ka whakaputaina ki waho ki ngā rangatira a te kīngi o Papurōna, ā, ka mea aua wāhine, ‘I tohea koe e ōu hoa aroha, ā, riro ana koe i tā rātou. Nā, ka totohu nei ōu waewae ki te paru, kua hoki kē atu rātou ki muri.’
JER 38:23 “Nā, ka whakaputaina e rātou āu wāhine katoa, me āu tamariki, ki waho ki ngā Karari; ā, e kore e mawhiti i ō rātou ringa, engari ka mau koe i te ringa o te kīngi o Papurōna; ā, māu e tahuna ai tēnei pā ki te ahi.”
JER 38:24 Kātahi a Terekia ka mea ki a Heremaia, “Kei mōhiotia ēnei kupu e tētahi, ā, e kore koe e mate.
JER 38:25 Otiia, ki te rongo ngā rangatira kua kōrero ahau ki a koe, ā, ka tae rātou ki a koe, ka mea ki a koe, ‘Tēnā, whakaaturia mai ki a mātou, he aha tāu i kōrero ai ki te kīngi; kaua e hunā ki a mātou, ā, e kore mātou e whakamate i a koe. I pēhea hoki te kōrero a te kīngi ki a koe?’
JER 38:26 Kātahi koe ka mea ki a rātou, ‘I te kawe ahau i tāku īnoi ki te kīngi, kia kaua ahau e whakahokia ki te whare o Honatana, ki reira mate ai.’ ”
JER 38:27 Ko te haerenga mai tērā o ngā rangatira katoa ki a Heremaia, ka ui ki a ia; ā, kōrerotia ana e ia i runga i ngā kupu katoa i whakahaua rā e te kīngi. Heoi, mutu tonu tā rātou kōrero ki a ia; nō te mea kāhore taua mea i mōhiotia.
JER 38:28 Heoi, noho ana a Heremaia i te marae o te whare herehere, ā taea noatia te rā i horo ai a Hiruhārama. Nā, i te horonga o Hiruhārama.
JER 39:1 I te iwa o ngā tau o Terekia kīngi o Hūrā, i te tekau o ngā marama, ka haere mai a Nepukareha kīngi o Papurōna rātou ko tāna ope katoa ki Hiruhārama, ā, whakapaea ana a reira e rātou;
JER 39:2 i te tekau mā tahi o ngā tau o Terekia, i te whā o ngā marama, i te iwa o ngā rā o te marama, ka pakaru te pā.
JER 39:3 Nā, ka haere mai ngā rangatira katoa a te kīngi o Papurōna, ā, noho ana i te Kūwaha o Waenganui, a Nerekara Harētere, a Hamakara Nepo, a Harehekimi, a Rapahari, a Nerekara Harētere, a Rapamaka, rātou ko ērā atu rangatira a te kīngi o Papurōna.
JER 39:4 Nā, i te kitenga o Terekia kīngi o Hūrā rātou ko ngā tāngata whawhai katoa, rere ana rātou, puta atu ana ki waho o te pā i te pō, mā te ara i te kāri a te kīngi, mā te kūwaha i waenganui i ngā taiepa e rua; ā, puta atu ana ia i te ara o te Arapa.
JER 39:5 Otiia, i whāia rātou e te ope o ngā Karari, ā, ka mau a Terekia ki ngā mānia i Heriko. Nā, hopukia ana ia, kawea ana ki a Nepukareha kīngi o Papurōna, ki Ripira i te whenua o Hāmata; ā, whakawākia ana ia e ia.
JER 39:6 Kātahi ka tukitukia e te kīngi o Papurōna ngā tama a Terekia ki tōna aroaro ki Ripira; ā, i tukitukia anō e te kīngi o Papurōna ngā rangatira katoa o Hūrā.
JER 39:7 I whakamatapōtia hoki e ia ngā kanohi o Terekia, herea iho ia ki te mekameka, kawea ana ki Papurōna.
JER 39:8 Nā, tahuna ana e ngā Karari te whare o te kīngi, me ngā whare o te iwi, ki te ahi, wāwāhia iho e rātou ngā taiepa o Hiruhārama.
JER 39:9 Kātahi ka whakaraua e Neputarārana, rangatira o ngā kaitiaki, ka mauria ki Papurōna te toenga o te iwi i mahue ki te pā, me te hunga i papahoro atu, i taka atu ki a ia, me ērā atu o te iwi i mahue ki te pā.
JER 39:10 Otiia i mahue iho i a Neputarārana, rangatira o ngā kaitiaki, ngā ware o te iwi, kāhore nei ō rātou rawa, ki te whenua o Hūrā, ā, hoatu ana e ia he māra wāina me ētahi atu māra ki a rātou i taua rā.
JER 39:11 Nā, i tohutohu a Nepukareha kīngi o Papurōna ki a Neputarārana, rangatira o ngā kaitiaki, mō Heremaia i mea ia:
JER 39:12 “Tīkina ia, kia pai hoki te tiaki i a ia, ā, kaua ia e tūkinotia; engari ko tāna e kī mai ai, ko tāu tēnā e mea ai ki a ia.”
JER 39:13 Heoi, ka unga tāngata a Neputarārana rangatira o ngā kaitiaki, rātou ko Nepuhahapana, ko Rapahari, ko Nerekara Harētere, ko Rapamaka, rātou ko ngā rangatira katoa a te kīngi o Papurōna;
JER 39:14 unga tāngata ana rātou, ā, tīkina atu ana a Heremaia i te marae o te whare herehere, ā, tukua atu ana ia e rātou ki a Keraria tama a Ahikama, tama a Hapana kia kawea ki te kāinga. Nā, noho ana ia i waenganui i te iwi.
JER 39:15 Nā, i puta mai te kupu a Ihowā ki a Heremaia, i a ia e here ana i te marae o te whare herehere, i mea ia:
JER 39:16 “Haere, kōrero ki a Eperemereke Etiopiana, mea atu: ‘Ko te kupu tēnei a Ihowā o ngā mano, a te Atua o Īharaira: Nanā, ka tākina mai e ahau āku kupu ki runga ki tēnei pā, hei kino, ehara anō hoki i te pai; ā, ka tutuki ki tōu aroaro i taua rā.
JER 39:17 Otiia, ka whakaorangia koe e ahau i taua rā, e ai tā Ihowā; e kore hoki koe e tukua ki te ringa o te hunga e wehi nā koe.
JER 39:18 Ka tino whakaorangia hoki koe e ahau, ā, e kore koe e hinga i te hoari, engari ka waiho tōu wairua hei taonga parakete ki a koe; mōu i whakawhirinaki ki ahau, e ai tā Ihowā.’ ”
JER 40:1 Ko te kupu i puta mai ki a Heremaia, he mea nā Ihowā, i muri i te tukunga a Neputarārana rangatira o ngā kaitiaki i a ia kia haere atu i Rama, i tāna tikinga i a ia, i te mea kei te here ia, he mea mekameka, i roto i ngā whakarau katoa o Hiruhārama, o Hūrā, e whakaraua ana ki Papurōna.
JER 40:2 Nā, ka mau te rangatira o ngā kaitiaki ki a Heremaia, ā, ka mea ki a ia, “Nā Ihowā, nā tōu Atua tēnei kino i kōrero mō tēnei wāhi.
JER 40:3 Nā, kua tākina nei e Ihowā, kua oti i a ia tāna i kōrero ai; nō te mea kua hara koutou ki a Ihowā, ā, kīhai i whakarongo ki tōna reo, koia tēnei mea i pā ai ki a koutou.
JER 40:4 Nā, ināianei, ka wetekina koe e ahau i tēnei rā i ngā mekameka i runga i ōu ringa nā. Ki te pai koe ki te haere tahi i ahau ki Papurōna, haere mai, ā, māku koe e āta tirotiro; ki te kino ki a koe te haere tahi mai i ahau ki Papurōna, kauaka. Nanā, kei tōu aroaro te whenua katoa; nā, ko tāu wāhi e kite ai koe he pai, he āta tāu hei haerenga atu mōu, haere ki reira.”
JER 40:5 Kīanō ia i hoki noa, ka mea tērā, “Kāti, hoki atu ki a Keraria tama a Ahikama, tama a Hapana, kua meinga hoki ia e te kīngi o Papurōna hei kāwana mō ngā pā o Hūrā, ā, ka noho ki a ia i roto i te iwi; māu rānei e haere ki te wāhi e tau ana ki tāu titiro, kia haere ki reira.” Nā, ka hōmai e te rangatira o ngā kaitiaki he ō mōna, me tētahi hākari, ā, tukua ana ia kia haere.
JER 40:6 Kātahi a Heremaia ka haere ki a Keraria tama a Ahikama ki Mihipa; ā, noho ana ki a ia i roto i te iwi i mahue iho ki te whenua.
JER 40:7 Nā, i te rongonga o ngā rangatira katoa o ngā ope i ngā pārae, rātou ko ā rātou tāngata, kua oti a Keraria tama a Ahikama te mea hei kāwana mō te whenua e te kīngi o Papurōna, ā, kua tukua ki a ia ngā tikanga mō ngā tāne, mō ngā wāhine, mō ngā tamariki, mō ngā rawakore o te whenua, mō te hunga hoki kīhai i whakaraua ki Papurōna;
JER 40:8 kātahi rātou ka haere mai ki a Keraria, ki Mihipa – arā a Ihimaera tama a Netania, a Hohanana rāua ko Honatana, ngā tama a Karea, a Heraia tama a Tanahumete, ngā tama a Ēpai Netopati, a Hetania tama a tētahi Maakati, ēnei, me ā rātou tāngata.
JER 40:9 Ā, ka oati a Keraria tama a Ahikama, tama a Hapana, ki a rātou ko ā rātou tāngata, ka mea, “Kaua e wehi ki te mahi ki ngā Karari; e noho ki te whenua, e mahi ki te kīngi o Papurōna, ā, ka whai pai koutou.
JER 40:10 Ko ahau nei ia, nanā, ka noho ahau i Mihipa, hei tū atu i mua i ngā Karari e haere mai ana ki a tātou. Tēnā ko koutou, kohikohia e koutou ngā wāina me ngā hua raumati, me te hinu, whaowhina ki ā koutou oko, ā, ka noho i roto i ō koutou pā i riro rā i ā koutou.”
JER 40:11 Waihoki, i te rongonga o ngā Hūrai katoa i Moapa, i roto i ngā tama a Āmona, i Ēroma, i roto hoki i ngā whenua katoa, kua waiho e te kīngi o Papurōna he mōrehu o Hūrā, ā, kua meinga e ia a Keraria tama a Ahikama, tama a Hapana, hei kāwana mō rātou;
JER 40:12 kātahi ngā Hūrai katoa i ngā wāhi katoa i peia atu ai rātou ka hokihoki mai, ā, haere mai ana ki te whenua o Hūrā, ki a Keraria, ki Mihipa, ā, kohikohia ana e rātou he wāina, he hua raumati, tōna nui.
JER 40:13 I haere mai anō a Hohanana tama a Karea, rātou ko ngā rangatira katoa o ngā ope i ngā pārae ki a Keraria, ki Mihipa,
JER 40:14 i mea ki a ia, “E mōhio ana rānei koe, kua ungā mai e Paarihi kīngi o ngā tama a Āmona a Ihimaera tama a Netania ki te whakamate i a koe?” Otiia kīhai a Keraria tama a Ahikama i whakapono ki a rātou.
JER 40:15 Kātahi a Hohanana tama a Karea ka kōrero puku ki a Keraria, i Mihipa, ka mea, “Tēnā, tukua ahau kia haere, ā, māku e patu a Ihimaera tama a Netania, ā, e kore e mōhiotia e tētahi tangata. Kia patua koe e ia hei aha? Pēnā ka marara noa iho ngā Hūrai katoa kua huihui mai nei ki a koe, mōtī iho ngā mōrehu o Hūrā.”
JER 40:16 Otiia, i mea a Keraria tama a Ahikama ki a Hohanana tama a Karea, “Kaua tēnei e meatia e koe; he teka hoki tāu kōrero mō Ihimaera.”
JER 41:1 Nā, i te whitu o ngā marama ka haere mai a Ihimaera tama a Netania, tama a Erihama, he uri kīngi, ko ia tētahi o ngā tino rangatira a te kīngi, me ōna hoa kotahi tekau, ki a Keraria tama a Ahikama, ki Mihipa. Nā, kei te kai taro rātou tahi ki reira, ki Mihipa.
JER 41:2 Kātahi ka whakatika ake a Ihimaera tama a Netania, rātou ko ōna hoa kotahi tekau, ā, patua ana a Keraria tama a Ahikama, tama a Hapana ki te hoari, mate rawa, ā, ia i meinga nei e te kīngi o Papurōna hei kāwana mō te whenua.
JER 41:3 Nā, i patua anō e Ihimaera ngā Hūrai katoa i a ia, i a Keraria, i Mihipa, rātou ko ngā Karari i kitea ki reira, arā ngā tāngata whawhai.
JER 41:4 Nā, i te rua o ngā rā i muri i tāna whakamatenga i a Keraria, ā, kīhai i mōhiotia e tētahi tangata,
JER 41:5 ka haere mai ētahi tāngata i Hekeme, i Hiro, i Hamaria, e waru tekau ngā tāngata, heu rawa ō rātou pāhau, haehae rawa ngā kākahu, he mea haehae anō hoki rātou, me ngā whakahere, me te whakakakara anō i ō rātou ringa hei tāpaenga ki te whare o Ihowā.
JER 41:6 Nā, ka haere atu a Ihimaera tama a Netania i roto i Mihipa ki te whakatau i a rātou, me te tangi haere anō i a ia e haere ana. Ā, i tōna tūtakitanga ki a rātou, ka mea ia ki a rātou, “Haere mai ki a Keraria tama a Ahikama.”
JER 41:7 Heoi, i tō rātou taenga ki roto ki te pā, ka patua rātou e Ihimaera tama a Netania, ā, makā ana e rātou ko ōna hoa ki roto ki te poka.
JER 41:8 Otiia, tērā anō ētahi kotahi tekau i kitea i roto i a rātou, i kī atu ki a Ihimaera, “Kaua mātou e whakamatea; he taonga hoki a mātou kei te pārae, he wīti, he pārei, he hinu, he honi, kei te hunā.” Nā, ka mutu tāna, ā, kīhai rātou i whakamatea e ia i roto i ō rātou tēina.
JER 41:9 Nā, ko te poka i makā ai e Ihimaera ngā tinana katoa o ngā tāngata i patua nei e ia ki te taha o Keraria, ko tērā i hangā e Kīngi Aha i te wehi ki a Paaha, kīngi o Īharaira, whakakīia ana taua poka e Ihimaera tama a Netania ki te hunga i patua.
JER 41:10 Kātahi ka whakaraua e Ihimaera ngā mōrehu katoa o te iwi i Mihipa, ngā tamāhine a te kīngi, me ngā mōrehu katoa i Mihipa, ko te hunga i meinga nei e Neputarārana rangatira o ngā kaitiaki, a Keraria tama a Ahikama hei kāwana mō rātou; whakaraua ana rātou e Ihimaera tama a Netania, ā, haere ana ia, whiti ana ki ngā tama a Āmona.
JER 41:11 I te rongonga ia o Hohanana tama a Karea, rātou ko ngā rangatira katoa o ngā ope i a ia, ki te kino katoa i mahia e Ihimaera tama a Netania,
JER 41:12 kātahi ka tango rātou i ngā tāngata katoa, ā, haere ana ki te whawhai ki a Ihimaera tama a Netania, ā, rokohanga atu ia i te taha o ngā wai nunui i Kipeono.
JER 41:13 Ā, nō te kitenga o te hunga katoa i a Ihimaera i a Hohanana tama a Karea, i ōna hoa hoki, i ngā rangatira katoa o ngā ope, nā, ka koa rātou.
JER 41:14 Ko te tino tahuritanga o te hunga katoa i whakaraua e Ihimaera i Mihipa, hoki ana, haere ana ki a Hohanana tama a Karea.
JER 41:15 Engari ko Ihimaera tama a Netania i mawhiti atu i a Hohanana, rātou ko ngā tāngata tokowaru, ā, haere ana ki ngā tama a Āmona.
JER 41:16 Kātahi ka mau a Hohanana tama a Karea, rātou ko ōna hoa, ko ngā rangatira katoa o ngā ope, i ngā mōrehu katoa o te iwi, i ērā o Mihipa i whakahokia mai e ia i a Ihimaera tama a Netania, i muri i tāna patunga i a Keraria tama a Ahikama – arā ngā tāngata whawhai, ngā wāhine, ngā tamariki, ngā unaka hoki i whakahokia mai e ia i Kipeono.
JER 41:17 Ā, haere ana, noho ana i Kerutu Kimihama, i te taha o Pēterehema, he mea kia haere ai rātou ki Īhipa,
JER 41:18 i te wehi ki ngā Karari; i wehi hoki rātou i a rātou, mō te patunga a Ihimaera tama a Netania i a Keraria tama a Ahikama, i meinga nei e te kīngi o Papurōna hei kāwana mō te whenua.
JER 42:1 Kātahi ngā rangatira katoa o ngā ope, rātou ko Hohanana tama a Karea, ko Tetania tama a Hōhaia, ko te iwi katoa hoki, i te iti ki te rahi, ka haere mai,
JER 42:2 ā, ka mea ki a Heremaia poropiti, “Tēnā, tukua atu tā mātou īnoi kia manaakitia ki tōu aroaro; māu hoki e īnoi mō mātou ki a Ihowā, ki tōu Atua, arā mō ēnei mōrehu katoa. He torutoru noa hoki mātou o te tokomaha i toe iho, e kite nā ōu kanohi i a mātou.
JER 42:3 Kia whakaaturia mai e Ihowā, e tōu Atua, ki a mātou te ara e haere ai mātou, te mea e mahi ai mātou.”
JER 42:4 Anō rā ko Heremaia poropiti ki a rātou, “Kua rongo ahau ki a koutou; nanā, ka īnoi ahau ki a Ihowā, ki tō koutou Atua, ka rite ki ā koutou kupu nā; ā, ko ngā kupu katoa e whakahokia mai e Ihowā ki a koutou, ka whakaaturia e ahau ki a koutou; e kore tētahi kupu e kaiponuhia e ahau ki a koutou.”
JER 42:5 Anō rā ko rātou ki a Heremaia, “He pono, he tika hoki a Ihowā hei kaiwhakaatu mō tā tātou, ki te kāhore e rite tā mātou e mea ai ki ngā kupu katoa e ungā mai ai koe e Ihowā, e tōu Atua, ki a mātou.
JER 42:6 Ahakoa pai, ahakoa kino, ka rongo mātou ki te reo o Ihowā, o tō tātou Atua, ka ungā nei koe e mātou ki a ia; kia whai pai ai mātou, ki te rongo mātou ki te reo o Ihowā, o tō tātou Atua.”
JER 42:7 Nā, i te mutunga o ngā rā kotahi tekau ka puta mai te kupu a Ihowā ki a Heremaia.
JER 42:8 Kātahi ia ka karanga ki a Hohanana tama a Karea, rātou ko ōna hoa, ko ngā rangatira katoa o ngā ope, ki te iwi katoa hoki, ki te iti, ki te rahi,
JER 42:9 ā, ka mea ki a rātou, “Ko te kupu tēnei a Ihowā, a te Atua o Īharaira, i ungā nei ahau e koutou ki te whakatakoto i tā koutou īnoi ki tōna aroaro:
JER 42:10 ‘Ki te noho tonu koutou ki tēnei whenua, kātahi ahau ka hanga i a koutou, ā, kāhore e wāhi iho i a koutou, ka whakatōkia hoki koutou e ahau, ā, kāhore e hūtia ake. Nō te mea e rīpenetā ana ahau ki te kino kua oti nei i ahau te mea ki a koutou.
JER 42:11 Kaua e wehi i te kīngi o Papurōna, e wehingia nā e koutou. Kaua e wehi i a ia, e ai tā Ihowā; nō te mea kei a koutou ahau hei whakaora i a koutou, hei tango i a koutou i roto i tōna ringa.
JER 42:12 Ā, ka tukua atu āku mahi atawhai ki a koutou, kia atawhai ai ia i a koutou, ā, ka whakahoki i a koutou ki tō koutou oneone.’
JER 42:13 “Tēnā ki te mea koutou, ‘E kore mātou e noho ki tēnei whenua,’ ā, ka kore koutou e rongo ki te reo o Ihowā, o tō koutou Atua
JER 42:14 ka mea, ‘Kāhore; engari ka haere mātou ki te whenua o Īhipa, ki te wāhi e kore ai mātou e kite i te whawhai, e kore ai hoki e rongo i te tangi o te tētere, ā, e kore ai e hiakai ki te taro; ā, hei reira tātou noho ai.’
JER 42:15 Nā, kia rongo koutou āianei, e ngā mōrehu o Hūrā, ki te kupu a Ihowā, Ko te kupu tēnei a Ihowā o ngā mano, a te Atua o Īharaira: ‘Ki te mārō tonu ō koutou kanohi ki te haere ki Īhipa, ā, ka haere koutou ki reira noho ai;
JER 42:16 nā, ka mau koutou i te hoari, e wehingia nei e koutou, ki reira, ki te whenua o Īhipa, ā, ka whāia tatatia koutou e te hemokai, e wehi nā koutou, ki reira, ki Īhipa; ā, ka mate koutou ki reira.
JER 42:17 Nā, ka pēnā ngā tāngata katoa e mārō ana ō rātou kanohi ki te haere ki Īhipa ki reira noho ai; ka mate rātou i te hoari, i te hemokai, i te mate urutā; ā, e kore tētahi o rātou e toe, e mawhiti i te kino e tākina mai e ahau ki runga ki a rātou.’
JER 42:18 “Ko te kupu hoki tēnei a Ihowā o ngā mano, a te Atua o Īharaira: ‘Ka rite ki tāku ringihanga i tōku riri, i tōku weriweri, ki runga ki ngā tāngata o Hiruhārama, ka pēnā anō tāku ringihanga i tōku weriweri ki runga ki a koutou, ina tae koutou ki Īhipa. Ā, hei kanga koutou, hei mīharotanga, hei kohukohutanga, hei hahanitanga; ā, e kore koutou e kite i tēnei wāhi ā muri atu.’
JER 42:19 “Kua puaki tā Ihowā kupu mō koutou, e ngā mōrehu o Hūrā, ‘Kaua e haere ki Īhipa.’ Kia tino mōhio koutou kua oti te whakaatu e ahau ki a koutou i tēnei rā.
JER 42:20 Kua tinihanga hoki koutou ki ō koutou nā wairua anō; i unga hoki koutou i ahau ki a Ihowā, ki tō koutou Atua, i kī mai, ‘Īnoi mō mātou ki a Ihowā, ki tō tātou Atua; ā, ko ngā mea katoa e kōrerotia e Ihowā, e tō tātou Atua, māu e whakaatu ki a mātou, ā, ka mahia e mātou.’
JER 42:21 Nā, kua whakaaturia nei e ahau ki a koutou i tēnei rā; otirā kīhai koutou i rongo ki te reo o Ihowā, o tō koutou Atua, i ngā mea katoa i unga ai ahau e ai ki a koutou.
JER 42:22 Ko tēnei, kia tino mōhio koutou, tērā koutou e mate i te hoari, i te hemokai, i te mate urutā, ki te wāhi i hiahia ai koutou kia haere ki reira noho ai.”
JER 43:1 Ā, ka mutu te kōrero a Heremaia ki te iwi katoa i ngā kupu katoa a Ihowā, a tō rātou Atua, i unga ai ia ki a rātou e Ihowā, e tō rātou Atua, arā ēnei kupu katoa,
JER 43:2 kātahi ka kōrero a Atāria tama a Hōhaia, rātou ko Hohanana tama a Karea, ko ngā tāngata whakapehapeha katoa anō hoki, ka mea ki a Heremaia, “E kōrero teka ana koe! Kīhai a Ihowā, tō tātou Atua, i unga mai i a koe hei mea, ‘Kaua koutou e haere ki Īhipa, ki reira noho ai.’
JER 43:3 Engari nā Paruku, nā te tama a Neria koe i whakakīkī ki te hē mō mātou, kia tukua ai mātou ki te ringa o ngā Karari, kia whakamatea ai mātou e rātou, kia whakaraua ai hoki ki Papurōna.”
JER 43:4 Nā, kīhai a Hohanana tama a Karea, rātou ko ngā rangatira katoa o ngā ope, ko te iwi katoa hoki, i rongo ki te reo o Ihowā, kia noho ki te whenua o Hūrā.
JER 43:5 Engari, i mau a Hohanana tama a Karea, rātou ko ngā rangatira katoa o ngā ope, ki ngā mōrehu katoa o Hūrā i peia nei rātou ki ngā iwi katoa, ā, i hoki mai ki te whenua o Hūrā noho ai –
JER 43:6 ki ngā tāne, ki ngā wāhine, ki ngā tamariki, ki ngā tamāhine hoki a te kīngi, ki ngā tāngata katoa i waiho e Neputarārana rangatira o ngā kaitiaki ki a Keraria tama a Ahikama, tama a Hapana, ki a Heremaia poropiti, ki a Paruku, hoki tama a Neria.
JER 43:7 Ā, haere ana rātou ki te whenua o Īhipa; kīhai hoki rātou i rongo ki te reo o Ihowā. Nā, ka tae rātou ki Tahapanehe.
JER 43:8 Kātahi ka puta mai te kupu a Ihowā ki a Heremaia ki Tahapanehe, i mea ia:
JER 43:9 “Maua atu ētahi kōhatu nunui i tōu ringa, ā, ka huna ki roto ki te paru ki te papa pereki, ki tērā i te kūwaha o te whare o Parao i Tahapanehe, ā, kia kite hoki ngā tāngata o Hūrā;
JER 43:10 ā, ka mea ki a rātou, ‘Ko te kupu tēnei a Ihowā o ngā mano, a te Atua o Īharaira: Nanā, ka unga tāngata ahau ki te tiki i tāku pononga, i a Nepukareha kīngi o Papurōna, ā, ka whakatūria e ahau tōna torōna ki runga ki ēnei kōhatu kua hunā nei e ahau; ā, ka horahia e ia tōna tēneti kīngi ki runga.
JER 43:11 Nā, ka tae mai ia, ā, ka patu i te whenua o Īhipa; ko te hunga mō te mate ka tukua ki te mate, ko te hunga mō te whakarau ki te whakarau, ā, ko te hunga mō te hoari ki te hoari.
JER 43:12 Ka ngiha anō i ahau he ahi i roto i ngā whare o ngā atua o Īhipa; ka tahuna rātou e ia, ā, ka whakaraua atu. Ā, ka kākahuria e ia te whenua o Īhipa ānō he hēpara e kākahu ana i tōna kākahu; ā, ka haere atu ia i reira i runga i te rangimārie.
JER 43:13 Ka wāwāhia hoki e ia ngā whakapakoko o Petehemehe, o tērā i te whenua o Īhipa, ka tahuna ki te ahi ngā whare o ngā atua o Īhipa.’ ”
JER 44:1 Ko te kupu i puta mai ki a Heremaia mō ngā Hūrai katoa e noho ana i te whenua o Īhipa, e noho ana i Mikitoro, i Tahapanehe, i Nopo, i te whenua hoki o Pātoro, i mea ia:
JER 44:2 “Ko te kupu tēnei a Ihowā o ngā mano, a te Atua o Īharaira: Kua kite koutou i te kino katoa i tākina mai nei e ahau ki runga ki Hiruhārama, ki ngā pā katoa hoki o Hūrā. Nā, i tēnei rā he ururua rātou; kāhore hoki he tangata e noho ana i reira,
JER 44:3 mō tā rātou kino i mahia e rātou hei whakapātaritari i ahau, i tō rātou haerenga ki te tahu whakakakara, ā, ki te mahi ki ngā atua kē, kīhai nei rātou i mōhio, rātou, koutou rānei, ō koutou mātua rānei.
JER 44:4 He ahakoa rā, i ungā atu e ahau āku pononga katoa, ngā poropiti, ki a koutou, maranga wawe ana ahau ki te unga i a rātou; i mea ahau, ‘Kaua rā e mahia tēnei mea whakarihariha e kino nei ahau.’
JER 44:5 Otiia, kīhai rātou i rongo, kīhai hoki i tahuri mai ō rātou taringa, kīhai i hoki mai i tō rātou kino, arā i te tahu whakakakara ki ngā atua kē.
JER 44:6 Koia i ringihia atu ai tōku weriweri, tōku riri, ngiha tonu ki ngā pā o Hūrā, ki ngā ara hoki o Hiruhārama; nā, he ururua rātou, he tūhea, koia anō tēnei ināianei.
JER 44:7 “Mō reira ko te kupu tēnei ināianei a Ihowā, a te Atua o ngā mano, a te Atua o Īharaira: He aha koutou i mahi ai i tēnei kino nui mō ō koutou wairua, ka hātepe atu i a koutou, i ngā tāne, i ngā wāhine, i te kōhungahunga, i te mea ngote ū, i roto i a Hūrā, ā, kore iho he toenga o koutou e mahue?
JER 44:8 I a koutou i whakapātaritari nā i ahau ki ngā mahi a ō koutou ringa, i a koutou ka tahu whakakakara nei ki ngā atua kē i te whenua o Īhipa, kua haere atu nā koutou ki reira noho ai, e hātepea atu ai koutou, e waiho ai koutou hei kanga, hei ingoa kino roto i ngā iwi katoa o te whenua.
JER 44:9 Kua wareware rānei koutou ki te kino o ō koutou mātua, ki te kino o ngā kīngi o Hūrā, ki te kino hoki o ā rātou wāhine, ki ō koutou nā kino, ki te kino hoki o ā koutou wāhine i mahia nei e rātou ki te whenua o Hūrā, ki ngā ara hoki o Hiruhārama?
JER 44:10 Taea noatia tēnei rā kāhore anō rātou i whakaiti i a rātou, kāhore anō i wehi, kāhore i haere i runga i tāku ture, i runga i āku tikanga i hoatu e ahau ki tō koutou aroaro, ki te aroaro hoki o ō koutou mātua.
JER 44:11 “Mō reira ko te kupu tēnei a Ihowā o ngā mano, a te Atua o Īharaira: Nanā, ka anga kē atu tōku mata i a koutou mō te kino, he hātepe i a Hūrā katoa.
JER 44:12 Nā, ka mau ahau ki ngā mōrehu o Hūrā, kua mārō nei ō rātou mata ki te haere ki te whenua o Īhipa, ki reira noho ai, ā, ka poto rātou katoa; ka hinga rātou ki te whenua o Īhipa; ka pau rātou i te hoari, i te hemokai. Ka mate rātou, mai i te iti ki te rahi, i te hoari, i te hemokai; ā, ka waiho rātou hei kanga, hei mīharotanga, hei kohukohutanga, hei ingoa kino.
JER 44:13 Nō te mea ka whiua e ahau te hunga e noho ana i te whenua o Īhipa, ka rite ki tāku whiunga i Hiruhārama ki te hoari, ki te hemokai, ki te mate urutā.
JER 44:14 Nā, ka kore tētahi o ngā mōrehu o Hūrā i haere nei ki te whenua o Īhipa noho ai e mawhiti, e toe, hei hoki ki te whenua o Hūrā, ki te wāhi e hiahia nei rātou kia hoki ki reira noho ai. Nā, e kore tētahi e hoki, ko te hunga anake e mawhiti atu.”
JER 44:15 Nā, kātahi ngā tāngata katoa i mōhio kua tahu whakakakara ā rātou wāhine ki ngā atua kē, ngā wāhine katoa hoki e tū mai ana, he nui te huihui, me te iwi katoa hoki e noho ana i te whenua o Īhipa, i Pātoro, ka whakahoki ki a Heremaia, ka mea,
JER 44:16 “Nā, mō te kupu kua kōrerotia nei e koe ki a mātou i runga i te ingoa o Ihowā, e kore mātou e rongo ki a koe.
JER 44:17 Engari, ka tino mahi mātou i ngā mea katoa i puaki i ō mātou māngai, ka tahu whakakakara ki te kuīni o te rangi, ka riringi anō i ngā ringihanga ki a ia, ka pērā me tā mātou, me tā ō mātou mātua, me tā ō mātou kīngi, me tā ō mātou rangatira i ngā pā o Hūrā, i ngā ara o Hiruhārama. I mākona hoki mātou i reira i te kai, i pai hoki mātou, ā, kīhai i kite i te hē.
JER 44:18 Otiia, nō te mutunga o tā mātou tahu whakakakara ki te kuīni o te rangi, o tā mātou ringihanga i ngā ringihanga ki a ia, kua kore ngā mea katoa i a mātou, ā poto iho mātou i te hoari, i te hemokai.
JER 44:19 “Ā, i a mātou i tahu whakakakara ai ki te kuīni o te rangi, i riringi ai hoki i ngā ringihanga ki a ia, e ngaro ana rānei ā mātou tāne i a mātou e hanga ana i ngā keke māna, hei karakia ki a ia, i a mātou hoki i riringi ai i ngā ringihanga māna?”
JER 44:20 Kātahi a Heremaia ka kōrero ki te iwi katoa, ki ngā tāne, ki ngā wāhine, ki te iwi katoa anō nāna taua kupu whakautu ki a ia, ka mea,
JER 44:21 “Ko te whakakakara i tahuna rā e koutou ki ngā pā o Hūrā, ki ngā ara hoki o Hiruhārama, e koutou, e ō koutou mātua, e ō koutou kīngi, e ō koutou rangatira, e te iwi hoki o te whenua, kīhai ianei ēnā mea i maharatia e Ihowā, kīhai ianei i puta ake ki tōna ngākau?
JER 44:22 Ā, tē āhei a Ihowā te whakamanawanui tonu i te kino o ā koutou hanga, i ngā mea whakarihariha i mahia e koutou; heoi kua ururua tō koutou whenua, kua waiho hei mīharotanga, hei kohukohutanga, tē ai he tangata hei noho, koia anō tēnei ināianei.
JER 44:23 Nō te mea kua tahu koutou i te whakakakara, kua hara hoki ki a Ihowā, ā, kīhai i rongo ki te reo o Ihowā, kīhai hoki i haere i runga i tāna ture, i runga i āna tikanga, i runga i āna whakaatu; mō reira i tūtaki ai tēnei hē ki a koutou, koia anō tēnei ināianei.”
JER 44:24 I mea atu anō a Heremaia ki te iwi katoa, ki ngā wāhine katoa hoki, “Whakarongo ki te kupu a Ihowā, e Hūrā katoa i te whenua o Īhipa nei.
JER 44:25 Ko te kupu tēnei a Ihowā o ngā mano, a te Atua o Īharaira; e kī ana ia: Ko koutou, me ā koutou wāhine, kua kōrero ō koutou māngai, kua rite anō i ō koutou ringa te kupu, ‘Ka mahia mārietia e mātou ā mātou kupu taurangi i kōrerotia e mātou, kia tahu whakakakara ki te kuīni o te rangi, kia riringi i ngā ringihanga ki a ia.’ “Tēnā whakaūngia ā koutou kupu taurangi, mahia hoki ā koutou kupu taurangi.
JER 44:26 Mō reira whakarongo ki te kupu a Ihowā, e Hūrā katoa e noho nei i te whenua o Īhipa: ‘Nanā, kua oatitia e ahau tōku ingoa nui,’ e ai tā Ihowā, ‘e kore tōku ingoa e whakahuatia ā muri ake nei e te māngai o tētahi tangata o Hūrā i te whenua katoa o Īhipa, e kore e kīia, “E ora ana te Ariki, a Ihowā.”
JER 44:27 Nanā, kei te tirotiro ahau i a rātou mō te kino, ehara i te mea hei pai; ā, ko ngā tāngata katoa o Hūrā i te whenua o Īhipa, ka poto i te hoari, i te hemokai hoki, ā mōtī noa rātou.
JER 44:28 Ā, ko ngā mōrehu i te hoari, ka hoki atu i te whenua o Īhipa ki te whenua o Hūrā, he hunga torutoru; ā, ka mōhio ngā mōrehu katoa o Hūrā i haere nei ki te whenua o Īhipa noho ai, ko tā wai kupu e tū, ko tāku rānei, ko tā rātou rānei.
JER 44:29 “ ‘Ā, ko te tohu tēnei ki a koutou,’ e ai tā Ihowā, ‘ka whiua koutou e ahau ki tēnei wāhi, kia mōhio ai koutou ka mau tonu āku kupu ki te kino mō koutou.’
JER 44:30 Ko te kupu tēnei a Ihowā: ‘Nanā, ka hoatu e ahau a Parao Hopara kīngi o Īhipa ki te ringa o ōna hoariri, ki te ringa hoki o te hunga e whai ana kia whakamatea ia; ka rite anō ki tāku hoatutanga i a Terekia kīngi o Hūrā ki te ringa o Nepukareha kīngi o Papurōna, o tōna hoariri i whai nei kia whakamatea ia.’ ”
JER 45:1 Ko te kupu i kōrerotia e Heremaia poropiti ki a Paruku tama a Neria, i tāna tuhituhinga i ēnei kupu ki te pukapuka, nā Heremaia i kōrero, i te whā o ngā tau o Iehoiakimi kīngi o Hūrā, i kī ia:
JER 45:2 “Ko te kupu tēnei a Ihowā, a te Atua o Īharaira mōu, e Paruku:
JER 45:3 I mea koe, ‘Auē, tōku mate nei hoki! Kua tāpiritia hoki e Ihowā tōku mamae ki te tangi; māuiui noa ahau i tōku auētanga, tē ai he pārīrātanga.’
JER 45:4 “Ko tāu tēnei e kī atu ai ki a ia, ‘Ko te kupu tēnei a Ihowā: Nanā, ko tāku i hanga ai ka wāhia iho anō e ahau, ā, ko tāku i whakatō ai ka hūtia atu anō e ahau; ā, ko tēnei ki te whenua katoa.
JER 45:5 Ā, e rapu ana koe i ngā mea nunui māu? Kaua e rapua; nō te mea kei te kawea atu e ahau he kino mō ngā kikokiko katoa, e ai tā Ihowā, engari, ka hoatu e ahau tōu wairua ki a koe hei taonga parakete i ngā wāhi katoa e haere atu ai koe.’ ”
JER 46:1 Ko te kupu a Ihowā i puta mai ki a Heremaia poropiti mō ngā iwi.
JER 46:2 Mō Īhipa, mō te ope a Parao Neko kīngi o Īhipa, mō tērā i te awa, i Uparati, i Karakemihi, i patua rā e Nepukareha kīngi o Papurōna i te whā o ngā tau o Iehoiakimi tama a Hōhia kīngi o Hūrā:
JER 46:3 “Whakapaia te whakangungu rākau me te puapua, whakatata ki te whawhai!
JER 46:4 Whakanohoia ngā hōiho, e eke, e ngā kaieke hōiho! Ā, tū atu me ō koutou pōtae; whakakanapatia ngā tao, kākahuria ngā pukupuku!
JER 46:5 He aha ahau i kite ai i tēnei? Kei te pāwera rātou, kua hoki ki muri; kua tukitukia ō rātou mārohirohi, kua whati noa atu, kīhai hoki i titiro whakamuri – kei ngā taha katoa te wehi,”
JER 46:6 “Kaua te tangata tere e rere atu, kaua hoki te mārohirohi e mawhiti; kei te raki, kei te awa, kei Uparati, kua tūtuki ō rātou waewae, kua hinga.
JER 46:7 “Ko wai tēnei e puhake ake nei me te mea ko te Naera, e tutū nei ōna wai me te mea ko ngā awa?
JER 46:8 I puhake mai a Īhipa ānō ko te Naera, i tutū ōna wai ānō ko ngā awa; ā, ka mea ia, Ka puhake atu ahau, ā, ka taupokina te whenua; ka ngaro i ahau te pā me ōna tāngata.
JER 46:9 Haere atu, e ngā hōiho; e ngana, e ngā hāriata! Tukua atu ngā mārohirohi; a Kuhu, a Putu, e rahurahu nei i te whakangungu rākau; ngā Rurimi, e rahurahu nei, e whakapiko nei i te kōpere.
JER 46:10 Ko taua rā hoki he rā nā te Ariki, nā Ihowā o ngā mano, he rā rapu utu, e whai utu ai ia i ōna hoariri. Ā, ka horomi te hoari, ā, ka mākona, ka inu hoki, ki rawa i ō rātou toto. Nō te mea he patunga tapu tā te Ariki, tā Ihowā o ngā mano i te whenua ki te raki, i te taha o te awa o Uparati.
JER 46:11 “Haere ki runga, ki Kireara, e te tamāhine wāhina a Īhipa, ka tiki he pama; ka maumau tāu mahi i ngā rongoā maha; kāhore he ora mōu.
JER 46:12 Kua rongo ngā iwi ki tōu whakamā, kua pakū tāu karanga ki ngā whenua. Kua tūtuki nei hoki te waewae o te mārohirohi ki te mārohirohi, kua hinga ngātahi tautokorua.”
JER 46:13 Ko te kupu i kōrerotia e Ihowā ki a Heremaia poropiti, tērā ka haere mai a Nepukareha kīngi o Papurōna ki te patu i Īhipa:
JER 46:14 “Kauwhautia e koutou ki Īhipa, pānuitia ki Mikitoro, pānuitia ki Nopo, ki Tahapanehe, mea atu, ‘E tū, kia tūmatohi; kua kai hoki te hoari i tētahi taha ōu, i tētahi taha.’
JER 46:15 He aha ōu māia i tahia atu ai? Kīhai rātou i tū, nā Ihowā hoki rātou i ā atu.
JER 46:16 He tini ngā mea nāna i tukoki ai, āe rā, i hinga rātou tētahi ki runga ki tētahi. I mea anō, ‘Whakatika, tātou ka haere ki tō tātou nei iwi, ki te whenua i whānau ai tātou, i te hoari tūkino.’
JER 46:17 I karanga rātou i reira, ‘He turituri kau a Parao kīngi o Īhipa; kua tukua e ia kia pahemo te wā i whakaritea.’
JER 46:18 “E ora ana ahau,” e ai tā te Kīngi, ko Ihowā o ngā mano nei tōna ingoa, “Kei Taporo i roto i ngā maunga, kei Karamere hoki i te moana he rite mō tōna haerenga mai.
JER 46:19 E koe, e te tamāhine e noho nei i Īhipa, mahia ngā mea mōu mō te whakaraunga; nō te mea ka ururuatia a Nopo, ka wera, tē ai he tangata hei noho.
JER 46:20 “He kūao kau ātaahua rawa a Īhipa – otiia, kua tae mai te whakangaro i te raki, tēnei kua tae mai.
JER 46:21 Ko āna tāngata hoki i utu ai, rite tonu i roto i a ia ki te kūao whāngai; kua tahuri atu anō hoki rātou, kua oma ngātahi atu, kīhai hoki i tū; nō te mea kua tae mai te rā o tō rātou aituā ki a rātou, te wā e whiua ai.
JER 46:22 Ko tōna reo ka rite te puaki ki tō te nākahi; nō te mea he taua tā rātou ina haere, ka haere mai rātou ki a ia me ngā toki, ka rite ki ngā kaitapahi rākau.
JER 46:23 Ka tuaina e rātou tōna ngahere,” e ai tā Ihowā, “ahakoa e kore tōna mutunga e taea te rapu. He tini kē hoki rātou i te māwhitiwhiti, e kore e taea te tatau.
JER 46:24 Ka whakamā te tamāhine a Īhipa; ka tukua ia ki te ringa o te iwi ki te raki.”
JER 46:25 E mea ana a Ihowā o ngā mano, te Atua o Īharaira: “Nanā, ka whiua e ahau a Amono o Nō, a Parao, a Īhipa hoki, me ō reira atua, me ō reira kīngi; a Parao rawa, rātou ko te hunga e whakawhirinaki ana ki a ia.
JER 46:26 Ka tukua hoki rātou e ahau ki te ringa o te hunga e whai ana kia whakamatea rātou, ki te ringa anō o Nepukareha kīngi o Papurōna, ki te ringa o āna tāngata. Ā muri iho ka nohoia, ka pērā me ngā rā o mua,” e ai tā Ihowā.
JER 46:27 “Ko koe ia, kaua e wehi, e tāku pononga, e Hākopa, kaua e pāwera, e Īharaira. Nō te mea, nanā, māku koe e whakaora i tawhiti, ōu uri hoki i te whenua i whakaraua ai rātou; ā, ka hoki mai a Hākopa, ka āta noho, ka whai tānga manawa, tē ai he kaiwhakawehi mōna.
JER 46:28 Kaua koe e wehi, e tāku pononga, e Hākopa,” e ai tā Ihowā, “kei a koe nei hoki ahau. Ka poto rawa hoki i ahau ngā iwi katoa kua peia nei koe e ahau ki reira, otiia e kore koe e poto rawa i ahau. Engari, ka pākia koe e ahau, he mea whakarite mārie, e kore ia koe e tukua kia kore e whiua.”
JER 47:1 Ko te kupu a Ihowā i puta mai ki a Heremaia poropiti mō ngā Pirihitini i te mea kāhore anō a Parao i patu noa i Kaha:
JER 47:2 Ko te kupu tēnei a Ihowā: “Nanā, te puta mai nei ngā wai i te raki, ka meinga hei waipuke e ngawhā ana, ā, ka pōkia te whenua me ōna mea katoa, te pā me ngā tāngata e noho ana i roto. Ā, ka hāmama ngā tāngata, ka auē hoki ngā tāngata katoa o te whenua.
JER 47:3 Hei te haruru o te takahi o ngā pāua o ōna hōiho kaha, hei te rorohū o ōna hāriata, hei te ngaehe o ōna wīra. Kore iho ngā mātua e tahuri ki muri ki ā rātou tamariki i te ngoikore hoki o ngā ringa.
JER 47:4 Nā, mō te rā e haere mai nei, e pāhuatia ai ngā Pirihitini katoa, e hātepea atu ai i Tāira, i Hairona ngā kaiāwhina katoa e toe nei. Ka pāhuatia hoki e Ihowā ngā Pirihitini, ngā mōrehu o te motu, o Kapatoro.
JER 47:5 Kua tae te pākira ki runga ki Kaha; kua whakamōtītia a Ahakerono me te toenga anō o tō rātou awaawa; kia pēhea te roa o tāu haehae i a koe?
JER 47:6 “ ‘E te hoari a Ihowā! Kia pēhea te roa ka āta takoto ai koe? Hoki atu ki roto ki tōu kōpaki; okioki, kāti hoki tāu!’
JER 47:7 Me pēhea koe e āta takoto ai, kua hoatu nei hoki e Ihowā he whakahau ki a koe? He hē mō Ahakerono, mō te tahatika hoki o te moana – kua whakaritea e ia ki reira.”
JER 48:1 Mō Moapa: Ko te kupu tēnei a Ihowā o ngā mano, a te Atua o Īharaira: “Auē te mate mō Nepo, kua pāhuatia hoki! Kua meinga a Kiriataima kia whakamā, kua riro: kua meinga a Mihikapa kia whakamā, kua wāwāhia iho ia.
JER 48:2 Kua kāhore te whakamoemiti mō Moapa; i Hehepona rātou e whakatakoto ana i te kino mōna, ‘Haere mai, tātou ka hātepe atu i a ia, kia kore ai tēnā iwi.’ Ko koe anō hoki, e Maramene, ka whakanohopukutia koe; ka aru te hoari i a koe.
JER 48:3 Ka puta te reo auē i Horonaimi, ‘He pāhua, he whakangaromanga nui!’
JER 48:4 Ka oti a Moapa te tukituki! He auē ka rangona, nā āna mea ririki.
JER 48:5 Ka haere hoki rātou mā te pikinga atu ki Rūhiti me te tangi haere tonu; nō te mea i te heketanga ki Horonaimi kua rongo rātou i te mamae kino o te auē ki te whakangaromanga.
JER 48:6 E rere! Kāhaki i a koutou kia ora ai! Kia rite ai ki te manoao i te koraha!
JER 48:7 “Nō te mea, nāu i whakawhirinaki ki āu mahi, ki āu taonga, koia anō koe ka horo ai; ā, ka riro a Kemoho i te whakarau, rātou tahi ko ōna tohunga, ko ōna rangatira.
JER 48:8 Ka tae te kaipāhua ki ngā pā katoa, e kore hoki tētahi pā e puta; ka ngaro te raorao, ka hunā hoki te mānia; ka pērā me tā Ihowā i kōrero ai.
JER 48:9 Hoatu he parirau mō Moapa, kia rere atu ai, kia puta ai: ā, ka ururuatia ōna pā, tē ai he tangata hei noho ki reira.
JER 48:10 “Ka kangā te tangata e mahi whakaparahako ana i tā Ihowā mahi, ā, ka kangā hoki te tangata e kore nei e tuku i tāna hoari ki te toto.
JER 48:11 “I runga a Moapa i te rangimārie nō tōna tamarikitanga ake, ā, i āta takoto ia i runga i ōna nganga, kīhai i ringihia atu i tētahi oko ki tētahi oko, kīhai anō hoki ia i riro i te whakarau. Heoi, mau tonu tōna reka ki a ia, ā, kīhai tōna kakara i rerekē.
JER 48:12 Mō reira, nanā, kei te haere mai ngā rā,” e ai tā Ihowā, “e ungā ai e ahau ki a ia te hunga ringiringi, ā, ka ringihia atu ia e rātou; ā, ka noho tahanga i a rātou āna oko, ka pakaru rikiriki hoki ā rātou pounamu.
JER 48:13 Nā, ka whakamā a Moapa ki a Kemoho, ka pērā me te whare o Īharaira i whakamā rā ki Pētēre, ki tā rātou i whakawhirinaki ai.
JER 48:14 “He pēhea tā koutou e kī nā, ‘He mārohirohi tātou, he uaua ki te whawhai’?
JER 48:15 Kua pāhuatia a Moapa, ā, kua piki atu rātou ki ōna pā, kua heke iho hoki āna taitama, he mea whiriwhiri, kei raro, he parekura, e ai tā te Kīngi, ko Ihowā nei o ngā mano tōna ingoa.
JER 48:16 Ka tata te aituā o Moapa te puta, ā, kei te tino kaikā mai te hē mōna.
JER 48:17 Tangihia ia, e koutou katoa i tētahi taha ōna, i tētahi taha, e koutou e mōhio ana ki tōna ingoa; kī ake, ‘Anō te whatinga o te rākau kaha, o te tokotoko ātaahua!’
JER 48:18 “E te tamāhine e noho mai nei i Ripono, makere mai i tōu korōria, e noho ki te matewai; nō te mea kua tae te kaipāhua o Moapa ki a koe, kua kore i a ia ōu wāhi kaha.
JER 48:19 E te wahine e noho ana i Aroere, e tū ki te ara titiro ai. Ui atu ki te tangata e rere ana, ki te wahine e mawhiti ana; mea atu, ‘He aha kua meatia?’
JER 48:20 Kua whakamā a Moapa, kua pakaru; auē, e tangi! Kōrerotia ki Aranona, kua oti a Moapa te pāhua.
JER 48:21 “Kua tae atu anō te whakawā ki te mānia; ki Horono, ki Iahata, ki Mepaata,
JER 48:22 ā, ki Ripono, ki Nepo, ki, Pēteripirataima,
JER 48:23 ki Kiriataima, ki Petekamuru, Petemeono,
JER 48:24 ki Kerioto, ki Potora, ki ngā pā katoa o te whenua o Moapa, ki ngā mea i tawhiti, ki ngā mea e tata ana.
JER 48:25 Kua oti te haona o Moapa te pōuto atu, kua whati tōna ringa,”
JER 48:26 “Meinga ia e koutou kia haurangi; mōna i whakakake ki a Ihowā; ā, ka okeoke a Moapa i roto i tōna ruaki, ā, waiho anō ia hei katanga.
JER 48:27 He teka ianei i waiho a Īharaira hei katanga māu? I kitea rānei ia i roto i ngā tāhae? Nō te mea i āu kōrerotanga katoa mōna, e oraora ana te māhunga.
JER 48:28 E ngā tāngata o Moapa, whakarērea ngā pā, e noho ki te kāmaka; ā, kia rite ki te kūkupa e hanga nei i tōna ōhanga ki ngā taha o te kūwaha o te rua.
JER 48:29 “Kua rongo tātou i te whakahīhī o Moapa – nui atu hoki tōna whakahīhī – i tōna whakakake, i tōna whakamanamana, i tōna whakapehapeha, i te whakahirahira hoki o tōna ngākau.
JER 48:30 E mōhio ana ahau ki tōna riri,” e ai tā Ihowā, “otiia kāhore he tikanga; kāhore he rawa o āna whakapehapeha.
JER 48:31 Mō reira ka tangi ahau mō Moapa; āe rā, ka auē ahau mō Moapa katoa. Ka uhunga rātou mō ngā tāngata o Kiriherehe.
JER 48:32 E te wāina o Hipima, ka tangihia koe e ahau, nui atu i te tangihanga, mō Iatere. Kua whiti ōu peka ki tērā taha o te moana, kua tae rawa ki te moana o Iatere. Kua kōkiri atu te kaipāhua ki āu hua raumati, ki tāu kohikohinga wāina.
JER 48:33 Ā, kua whakakāhoretia atu te koa me te hari i te māra mōmona, i te whenua hoki o Moapa; ā, kua mutu i ahau he wāina mō ngā takahanga wāina; e kore tētahi e hāmama i te takahanga; ko tō rātou hāmama ehara i te hāmama.
JER 48:34 “Nō te auētanga i Hehepona tae noa ki Ereare, ki Iahata, te puakanga o tō rātou reo, nō Toara tae noa ki Horonaimi, ki Ekerata Herihia, nō te mea ka mokemoke anō hoki ngā wai o Nimirimi.
JER 48:35 Ka meinga anō hoki e ahau kia mutu i roto i a Moapa,” ai tā Ihowā, “te tangata whakaeke whakahere ki te wāhi tiketike, me te tangata tahu whakakakara ki ōna atua.
JER 48:36 Nā reira kei te tangi tōku ngākau ki a Moapa ānō he pūtōrino, kei te tangi hoki tōku ngākau ānō he pūtōrino ki ngā tāngata o Kiriherehe; nā reira kua mōtī ngā mea maha i mahia e ia.
JER 48:37 He mea moremore katoa hoki ngā māhunga, ko ngā kumikumi katoa tapahi rawa; he haehaenga kei ngā ringa katoa, he kākahu taratara kei ngā hope.
JER 48:38 Kei runga i ngā tuanui katoa o Moapa a kei ōna ara he uhunga kei ngā wāhi katoa; nō te mea kua pakaru i ahau a Moapa, ānō he oko e kore e manakohia,”
JER 48:39 “Anō tōna wawāhanga! Tā rātou auē! Inā, te tahuritanga mai o te tuarā o Moapa i te whakamā! Nā, ka waiho a Moapa hei katanga, hei whakawehi ki te hunga i tētahi taha ōna, i tētahi taha.”
JER 48:40 Nō te mea ko te kupu tēnei a Ihowā: “Nanā, ka rere ia ānō he ēkara, ka roha hoki ōna parirau ki runga ki Moapa.
JER 48:41 Kua horo Kerioto, kua riro ngā wāhi kaha, ā, ka rite te ngākau o ngā mārohirohi o Moapa i taua rā ki te ngākau o te wahine e whakamamae ana.
JER 48:42 Ā, ka hunā a Moapa, ka kore tēnā iwi, mōna i whakakake ki a Ihowā.
JER 48:43 Ko te wehi, ko te poka, ko te rore, kei a koe, e te tangata o Moapa,”
JER 48:44 “Ko te tangata e rere ana i te wehi, ka taka ki te poka; ā, ko te tangata e puta ake ana i te poka, ka mau i te rore. Ka tākina hoki e ahau ki runga ki a ia, arā ki a Moapa, te tau e tirotirohia ai rātou,”
JER 48:45 “Ko te hunga i rere, tū ana rātou i raro i te ata o Hehepona, kāhore he kaha; kua puta atu hoki he ahi i Hehepona, he mura i waenganui o Hihona, ā, kua pau te koki o Moapa, te tumuaki hoki o ngā tama a te ngangau.
JER 48:46 Auē te mate mōu, e Moapa! Kua hunā te iwi o Kemoho; kua riro hoki āu tama hei whakarau, āu tamāhine hoki hei whakarau.
JER 48:47 “Otiia, ka whakahokia mai anō e ahau a Moapa i te whakarau i ngā rā whakamutunga,” e ai tā Ihowā. Heoi anō te whakawā mō Moapa.
JER 49:1 Mō ngā tamariki a Āmona. Ko te kupu tēnei a Ihowā: “Kāhore ianei a Īharaira tamariki? Kāhore āna tāngata hei whakarerenga iho mō āna taonga? Nā, he aha a Kara i riro ai i a Marakomo, i noho ai tōna iwi ki roto ki ōna pā?
JER 49:2 Mō reira, tēnei ngā rā te haere mai nei, e ai tā Ihowā, e meinga ai e ahau te whakaoho o te riri kia rangona ki Rapa o ngā tama a Āmona; ā, ka waiho hei pūranga kua ururuatia, ka tahuna āna tamāhine ki te ahi; ā, ka riro i a Īharaira te hunga i a rātou nei ia i mua,”
JER 49:3 “Auē, e Hehepona, kua pāhuatia hoki a Hai! E tangi, e ngā tamāhine a Rapa! Whītikiria koutou ki te kākahu taratara; e tangi, ka omaoma noa i waenga i ngā taiepa; nō te mea ka riro a Marakomo i te whakarau, ōna tohunga me ōna rangatira ngātahi anō.
JER 49:4 He aha koe i whakamanamana ai ki ngā raorao, ki tōu raorao tāheke, e te tamāhine tāhurihuri kē? E whakawhirinaki nei ki ōna taonga, e mea nei, ‘Ko wai e haere mai ki ahau?’
JER 49:5 Nanā, ka tākina e ahau he wehi ki runga ki a koe,” e ai tā te Ariki, tā Ihowā o ngā mano, “He mea nā te hunga katoa i tētahi taha ōu, i tētahi taha; ā, ka āia rawatia atu koutou, tērā, tērā, ki waho, ā, kāhore he kaitāwhiu mai mō te mea i marara atu.
JER 49:6 Hei muri ia ka whakahokia e ahau ngā tama a Āmona i te whakarau,”
JER 49:7 Mō Ēroma. Ko te kupu tēnei a Ihowā o ngā mano: “Kua kāhore rānei te whakaaro nui i Temana? Kua mōtī ianei te whakatakoto kōrero a te hunga mōhio? Kua memeha rānei tō rātou whakaaro nui?
JER 49:8 E rere koutou, tahuri atu, hei roto riro noho ai, e ngā tāngata o Rerana! Nō te mea ka tākina mai e ahau te aituā o Ēhau ki runga ki a ia, i te wā e tirotiro ai ahau i a ia.
JER 49:9 Ki te tae atu he kaikohikohi karepe ki a koe, e kore ianei e mahue i a rātou ētahi karepe hei hamunga? Ki te mea he tāhae i te pō, e kore ianei rātou e tukituki kia mākona rawa rātou?
JER 49:10 Kua takoto kau ia i ahau a Ēhau, kua hurahia e ahau ōna wāhi ngaro, tē āhei ia te huna i a ia. Kua oti ōna uri te pāhua, ōna tēina me ōna hoa tata, ā, kua kore hoki ia.
JER 49:11 Waiho āu pani, māku e whakaora; ko ōu pouaru, kia whakawhirinaki rātou ki ahau.”
JER 49:12 Ko te kupu hoki tēnei a Ihowā: “Nanā, ko te hunga i takoto nei te tikanga kia kaua e inu i te kapu, he pono ka inumia e rātou; ā, ko koe rānei te mea e kore rawa e whiua? E kore e kore ka whiua koe, engari ka tino inu nei koe.
JER 49:13 Nō te mea kua waiho ahau e ahau anō hei oati, e ai tā Ihowā, ka waiho a Potora hei mīharotanga, hei ingoa kino, hei ururua, hei kanga anō hoki; ā, ka waiho ōna pā katoa hei koraha ake ake.”
JER 49:14 Kua rangona e ahau he kōrero i a Ihowā, kua oti hoki te karere te tuku ki ngā iwi, hei kī atu: “Whakahuihui i a koutou, haere mai hoki ki a ia, ā, ka whakatika atu ki te whawhai!
JER 49:15 “Nō te mea, nā, kua meinga koe e ahau kia iti i roto i ngā tauiwi, he mea whakahāwea i roto i ngā tāngata.
JER 49:16 Tēnā ko tōu whakamataku, he whakakake nō tōu ngākau i pōhewa ai koe, e koe e noho nā i ngā kapiti o te kāmaka, e pupuri nā i te wāhi tiketike o te pukepuke. Ahakoa hangā e koe tōu ōhanga kia rite ki tō te ēkara te tiketike, ka whakahokia iho koe e ahau i reira,”
JER 49:17 “Ā, ka meinga a Ēroma hei mīharotanga; ko ngā tāngata katoa e tika ana nā reira, ka mīharo, ka hī mai ki ōna whiunga katoa.
JER 49:18 Ka rite ki te hurihanga o Horoma, o Komora, o ngā pā hoki i tata ki reira,” e ai tā Ihowā, “e kore tētahi tangata e whai kāinga ki reira, e kore hoki tētahi tama a te tangata e noho ki reira.
JER 49:19 “Nanā, ka rite ia ki te raiona e haere ake ana i te whakamanamana o Horano ki te nohoanga kaha; otiia, ka meinga ohoreretia ai e ahau kia rere atu i a ia; ā, ko wai te mea e whiriwhiria e ahau ko ia hei rangatira mōna? Ko wai hoki e rite ana ki ahau? Ko wai hei whakarite he wā mōku? Ko wai anō tēnei hēpara hei tū ki tōku aroaro?”
JER 49:20 Mō reira whakarongo ki te tikanga a Ihowā kua whakatakotoria e ia mō Ēroma; ki ōna whakaaro hoki, kua whakaaroa e ia mō ngā tāngata o Temana: He pono ka tōia atu rātou, arā ngā mea ririki o te kāhui; he pono ka meinga e ia tō rātou nohoanga rātou hoki kia ngaro.
JER 49:21 Oho ana te whenua i te haruru o tō rātou hinganga; tērā te hāmama rangona ana mai tōna ngangau i te Moana Whero.
JER 49:22 Nanā, ka haere mai ia, ā, ka rere ānō he ēkara, ā, ka roha atu ōna parirau ki runga ki Potora; ā, ka rite te ngākau o ngā mārohirohi o Ēroma i taua rā ki te ngākau o te wahine e whakamamae ana.
JER 49:23 Mō Ramahiku. “Kua whakamā a Hāmata, rāua ko Ārapara; nō te mea kua tae he rongo kino ki a rātou, harotu kau rātou; tērā te tangi kei te moana; kāhore e marino.
JER 49:24 Kua ngoikore a Ramahiku, kua anga ki te rere, mau pū hoki i te wehi; kua rokohanga hoki ia e te raru, e te mamae, me te mea he wahine e whānau ana.
JER 49:25 Taukiri e! Kīhai i mahue te pā e whakamoemititia ana, te pā i koa ai ahau!
JER 49:26 Heoi, hinga ana āna taitama i ōna waharoa, mōtī pū ngā tāngata whawhai katoa i taua rā,”
JER 49:27 “Nā, ka tahuna anō e ahau he ahi i roto i te taiepa o Ramahiku, ā, ka pau i reira ngā whare kīngi o Pēneharara.”
JER 49:28 Mō Kerara, mō ngā kīngitanga hoki o Hatoro i patua nei e Nepukareha kīngi o Papurōna. Ko te kupu tēnei a Ihowā: “Whakatika koutou, whakaekea a Kerara, pāhuatia hoki ngā tama o te rāwhiti.
JER 49:29 Ka tangohia e rātou ō rātou tēneti, ā rātou hipi; ā, ka mauria atu e rātou mā rātou ō rātou kākahu ārai, ā rātou oko katoa, me ā rātou kāmera; ā, tērā rātou e karanga ki a rātou, ‘He wehi kei ngā taha katoa!’
JER 49:30 E rere koutou, haere atu ki tawhiti, nohoia a roto riro, e ngā tāngata o Hatoro!” e ai tā Ihowā. “Kua takoto hoki te tikanga a Nepukareha kīngi o Papurōna mō koutou, kua whakaaroa hoki e ia he whakaaro mō koutou.
JER 49:31 “Whakatika, whakaekea te iwi e noho ana i te rangimārie, e noho kore wehi nā,” e ai tā Ihowā; “kāhore nā ō rātou kēti, kāhore he tūtaki, e noho takitahi ana.
JER 49:32 Ā, ka pāhuatia ā rātou kāmera, ā, hei taonga pārau hoki te tini o ā rātou kararehe. Ā, ka whakamararatia e ahau ki ngā hau katoa te hunga i tapahia ngā tapa o ō rātou makawe; ā, ka tākina mai e ahau te aituā mō rātou i ngā taha katoa o rātou,”
JER 49:33 “Ā hei nohoanga a Hatoro mō ngā kurī mohoao, hei ururua ake ake. E kore tētahi tangata e whai kāinga ki reira, e kore anō hoki tētahi tama a te tangata e noho ki reira.”
JER 49:34 Ko te kupu a Ihowā i puta mai ki a Heremaia poropiti mō Erama i te tīmatanga o te kīngitanga o Terekia kīngi o Hūrā, i mea ia:
JER 49:35 Ko te kupu tēnei a Ihowā o ngā mano: “Nanā, ka whatia e ahau te kōpere a Erama, te mea nui rawa o tō rātou kaha.
JER 49:36 Ā, ka tākina atu e ahau ngā hau e whā i ngā pito e whā o te rangi ki runga ki Erama, ā, ka tītaritaria atu rātou e ahau ki aua hau katoa; kāhore hoki he iwi e kore te taea atu e te hunga o Erama ka peia atu nei.
JER 49:37 Ā, ka meinga e ahau a Erama kia wehi i te aroaro o ōna hoariri, i te aroaro hoki o te hunga e whai ana kia whakamatea rātou; ka tākina hoki e ahau he kino ki runga ki a rātou, ko tōku riri e mura ana, e ai tā Ihowā; ā, ka ungā e ahau te hoari ki muri i a rātou, ā, kia poto rā anō rātou i ahau.
JER 49:38 Nā, ka whakatūria e ahau tōku torōna ki Erama, ā, ka whakakāhoretia atu tō reira kīngi, rātou ko ngā rangatira,” e ai tā Ihowā.
JER 49:39 “Otiia hei ngā rā whakamutunga ka whakahokia e ahau a Erama i te whakarau,” e ai tā Ihowā.
JER 50:1 Ko te kupu i kōrerotia e Ihowā mō Papurōna, mō te whenua o ngā Karari, i puaki i a Heremaia poropiti:
JER 50:2 “Kauwhautia i roto i ngā tauiwi, pānuitia, ā, ka whakaara he kara; pānuitia atu, kaua e hunā, mea atu: ‘Kua horo a Papurōna, kua whakamā a Pere, kua pororaru a Meroraka. Kua whakamā āna whakapakoko, kua wehi āna whakaahua.’
JER 50:3 Nō te mea kei te haere mai he iwi ki a ia i te raki, māna e ururua ai tōna whenua. E kore anō tētahi e noho ki reira; kua rere rātou, kua heke, te tangata, te kararehe.
JER 50:4 “I aua rā, i taua wā hoki,” e ai tā Ihowā, “ka haere mai ngā tama a Īharaira, rātou tahi ko ngā tama a Hūrā; ka haere rātou me te tangi haere, ā, ka rapu i a Ihowā, i tō rātou Atua.
JER 50:5 Tērā rātou e ui mō Hiona, me te anga anō ō rātou kanohi ki reira, me te kī, Haere mai koutou, ka hono i a koutou ki a Ihowā, i runga i te kawenata mau tonu, e kore e wareware.
JER 50:6 “Ko tāku iwi he hipi ngaro; nā ō rātou hēpara rātou i kotiti kē ai, nā rātou hoki rātou i tahuri kē ai i runga i ngā maunga. Kua haere atu rātou i te maunga ki te pukepuke, kua wareware ki tō rātou takotoranga.
JER 50:7 Kua kainga rātou e te hunga katoa i kite i a rātou; ā, kua mea ō rātou hoariri, ‘Kāhore ō tātou hē, kua hara nei hoki rātou ki a Ihowā, ki te nohoanga o te tika, arā ki a Ihowā, ki tā ō rātou mātua i tūmanako ai.’
JER 50:8 “Rere atu i roto i Papurōna, heke atu i te whenua o ngā Karari, ā, kia rite ki ngā koati toa i mua i ngā kāhui.
JER 50:9 Nō te mea, nanā, ka whakaarahia e ahau, ka whakaekea hoki ki Papurōna he huihuinga o ngā iwi nunui nō te whenua ki te raki; ā, ka takoto ō rātou matua hei whawhai ki a ia; ka horo ia i reira. Ka rite ā rātou pere ki ā te mārohirohi mōhio; e kore tētahi e hoki kau mai.
JER 50:10 Ā, ka pāhuatia a Karari; ka tatū ngā ngākau o te hunga katoa e pāhua ana i a ia,”
JER 50:11 “Nō te mea e koa ana koutou, nō te mea e whakamanamana ana koutou, e te hunga e pāhua nei i tōku kāinga tupu, nō te mea e tākarokaro ana koutou, pērā i te kau kūao e takahi ana i te wīti, e tangi ana pērā i ngā hōiho kaha;
JER 50:12 ka nui rawa te whakamā o tō koutou whaea; matangerengere ana te wahine i whānau ai koutou. Nanā, ko ia hei muri rawa o ngā iwi, hei koraha, hei whenua waikore, hei ururua.
JER 50:13 He riri nō Ihowā e kore ai e nohoia, engari, ka waiho hei ururua katoa a reira. Ko ngā tāngata katoa e tika ana nā Papurōna ka mīharo, ka hī ki ōna whiunga katoa.
JER 50:14 Whakatakoto i ō koutou matua hei whawhai ki Papurōna, ki tētahi taha, ki tētahi taha, e te hunga whakapiko kōpere katoa; kōpere atu ki a ia, kaua e kaiponuhia ngā pere; kua hara hoki ia ki a Ihowā.
JER 50:15 Hāmama ki a ia i tētahi taha, i tētahi taha! Kua whakangāwari ia i a ia; kua hinga ōna parepare, kua oti ōna taiepa te wāhi iho. He rapunga utu hoki nā Ihowā; he rapua he utu i a ia; kia rite ki tāna i mea ai tā koutou e mea ai ki a ia.
JER 50:16 Hātepea atu te kairui i roto i Papurōna, me te kairahurahu o te toronaihi i te wā e kotia ai te wīti. He wehi nō rātou i te hoari tūkino, ka tahuri ki tōna iwi, ki tōna iwi, rere ana rātou ki tōna whenua, ki tōna whenua.
JER 50:17 “He hipi a Īharaira i marara atu; kua āia atu ia e ngā raiona. I te tuatahi nā te kīngi o Ahiria ia i kai. I te whakamutunga nā tēnei Nepukareha kīngi o Papurōna ōna wheua i wāhi.”
JER 50:18 Mō reira ko te kupu tēnei a Ihowā o ngā mano, a te Atua o Īharaira: “Nanā, ka whiua e ahau te kīngi o Papurōna me tōna whenua, ka pērā me tāku whiunga i te kīngi o Ahiria.
JER 50:19 Ā, ka whakahokia e ahau a Īharaira ki tōna takanga, ā, ka kai ia ki runga ki Karamere, ki Pahana, ka mākona hoki tōna wairua ki runga ki ngā pukepuke o Ēparaima, ki Kireara.
JER 50:20 I aua rā, ā, i taua wā,” e ai tā Ihowā, “ka rapua te hē o Īharaira, ā, kāhore noa iho; ngā hara hoki o Hūrā, ā, e kore e kitea. Ka murua hoki e ahau te kino o te hunga ka whakatoea nei e ahau.
JER 50:21 “Haere atu ki te whenua o Merataimi, ki reira tatau ai, ā, ki ngā tāngata hoki o Pekoro. Whakamōtītia, whakangaromia rawatia, whāia rātou,” e ai tā Ihowā, “mahia hoki ngā mea katoa i whakahaua e ahau ki a koe.
JER 50:22 He ngangau nō te whawhai kei te whenua, he whakangaromanga nui.
JER 50:23 Tōna poroporonga rawatanga, wāwāhia ana te hama o te ao katoa! Tōna ururuatanga o Papurōna i roto i ngā tauiwi!
JER 50:24 I whakatakotoria e ahau he māhanga mōu, ā, kua mau koe, e Papurōna, kīhai hoki koe i mōhio; kua kitea koe, kua hopukia hoki, mōu i totohe ki a Ihowā.
JER 50:25 Kua whakapuaretia e Ihowā tōna whare taonga, kua whakaputaina mai e ia ki waho ngā patu o tōna riri: he mahi hoki tā te Ariki, tā Ihowā o ngā mano, hei mahinga ki te whenua o ngā Karari.
JER 50:26 Haere mai ki a ia i te pito rawa rā anō, whakapuaretia ōna toa; opehia ake hei pūranga, whakangaromia rawatia; kaua rawa he wāhi ōna e mahue.
JER 50:27 Patua ana pūru katoa; tukua rātou kia haere ki raro ki te patunga. Auē te mate mō rātou! Kua tae mai hoki tō rātou rā, te wā e whiua ai rātou.
JER 50:28 Ko te reo o te hunga e rere ana, e mawhiti ana i te whenua o Papurōna, hei kōrero ki te whenua o Hiona i te rapu utu a Ihowā, a tō tātou Atua, i te rapu utu mō tōna temepara.
JER 50:29 “Kārangarangatia kia hui ngā kaikōpere ki te tatau ki Papurōna, te hunga katoa e whakapiko ana i te kōpere. Whakapaea tēnā pā, karapoi noa; kaua rawa tētahi ōna e mawhiti; utua tāna mahi; kia rite ki ngā mea katoa i mea ai ia tā koutou e mea ai ki a ia; nō te mea kua whakapehapeha ia ki a Ihowā, ki te Mea Tapu o Īharaira.
JER 50:30 Mō reira ka hinga āna taitama ki ōna huarahi, ā, ka whakamōtītia āna tāngata whawhai katoa i taua rā,”
JER 50:31 “Nanā, hei hoariri ahau mōu, e te mea whakakake,” e ai tā te Ariki, tā Ihowā o ngā mano, “nō te mea kua tae mai tōu rā, te rā e whiua ai koe e ahau.
JER 50:32 Ā, ka tūtuki ngā waewae o te mea whakapehapeha, ka hinga, ā, kāhore he kaiwhakaara mōna: ā, ka ngiha i ahau he ahi ki roto ki ōna pā, ā, ka pau i tērā ngā mea katoa i tētahi taha ōna, i tētahi taha.”
JER 50:33 Ko te kupu tēnei a Ihowā o ngā mano: Kei te tūkinotia ngātahitia ngā tamariki a Īharaira, rātou ko ngā tamariki a Hūrā; ā, kei te puritia rātou, mau rawa, e ō rātou kaiwhakarau; e kore rātou e pai ki te tuku i a rātou.
JER 50:34 He kaha tō rātou kaihoko; ko Ihowā o ngā mano tōna ingoa. Ka whakapaua e ia te tohe i tā rātou tohe, kia hoatu ai e ia he tānga manawa ki te whenua, ā, he ohooho ki ngā tāngata o Papurōna.
JER 50:35 “Kei runga i ngā Karari te hoari,” e ai tā Ihowā, “kei runga anō i ngā tāngata o Papurōna, kei runga i ōna rangatira, kei runga hoki i ōna tāngata whakaaro nui.
JER 50:36 Kei runga te hoari i te hunga whakapehapeha, ā, ka wairangi rātou. He hoari kei runga i āna mārohirohi, ā, ka pāwera rātou.
JER 50:37 Kei runga te hoari i ō rātou hōiho, kei runga i ō rātou hāriata, kei runga hoki i ngā whakauru katoa i roto i a ia, ā, ka rite rātou ki te wahine; kei runga te hoari i ōna taonga, ā, ka pāhuatia.
JER 50:38 He mimiti kei runga i ōna wai, ā, ka maroke. He whenua whakapakoko hoki ia, ā, e pōrangi ana rātou ki ngā atua whakawehi.
JER 50:39 “Mō reira ka nohoia a reira e ngā kīrehe mohoao o te koraha rātou ngātahi ko ngā wuruhi, ā, ka noho anō hoki ngā otereti ki reira; ā, e kore a reira e nohoia ā ake ake. Kāhore hoki e whai kāinga a reira i tētahi whakatupuranga ki tētahi whakatupuranga.
JER 50:40 Ka rite ki tā te Atua hurihanga i Horoma, i Komora, i ngā pā anō hoki e tata ana ki reira,” e ai tā Ihowā; “ka pērā te kore o te tangata e noho ki reira, e kore anō hoki tētahi tama a te tangata e whai kāinga ki reira.
JER 50:41 “Nanā, kei te haere mai he iwi i te raki; ā, he iwi nui, he tokomaha hoki ngā kīngi e maranga mai i ngā tōpito o te whenua.
JER 50:42 Ka rarau rātou ki te kōpere, ki te tao; he iwi nanakia rātou, e kore e tohu tangata; ā, pararā ana tō rātou reo pērā i te haruru o te moana, kei runga hōiho hoki e eke ana; rārangi rawa katoa, ānō he tangata e mea ana ki te whawhai, hei tatau ki a koe, e te tamāhine a Papurōna.
JER 50:43 Kua rongo te kīngi o Papurōna i tō rātou rongo, ā, kei te ngohe ōna ringa. Kua mau ia i te pāwera, i te mamae hoki, me te mea he wahine e whānau ana.
JER 50:44 Nanā, ka haere ake ia ānō he raiona i te ngawhātanga o Horano ki te nohoanga kaha. Otiia, e kore e rokohanga tāku meatanga i a rātou kia rere atu i reira; ā, ko wai te mea e whiriwhiria kia whakaritea e ahau hei rangatira mōna? Ko wai oti e rite ana ki ahau? Ko wai hoki hei whakarite wā mai ki ahau? Ko wai hoki te hēpara hei tū ki tōku aroaro?
JER 50:45 Mō reira whakarongo ki te tikanga a Ihowā, kua whakatakotoria e ia mō Papurōna; ki ōna whakaaro hoki i whakaaroa e ia mō te whenua o ngā Karari: He pono ka tōia atu rātou e rātou, arā ngā mea ririki o te kāhui. He pono ka whakangaromia rātou ko ō rātou nohoanga e ia.
JER 50:46 Ngateri ana te whenua i te haruru o te horonga o Papurōna, rangona ana te hāmama i roto i ngā iwi.”
JER 51:1 Ko te kupu tēnei a Ihowā: “Nanā, ka whakaarahia e ahau he hau whakamōtī mō Papurōna, mō te hunga hoki e noho ana i Repekamai.
JER 51:2 Ka ungā anō e ahau he kaitītaritari ki Papurōna, ā, ka tītaria e rātou; ka meinga tōna whenua kia takoto kau. Nō te mea i te rā o te hē ka tatau rātou ki a ia i tētahi taha, i tētahi taha.
JER 51:3 Kaua te kaikōpere e whakapiko i tāna kōpere, kaua anō hoki ia e whakarewa ake i a ia me te pukupuku ki runga i a ia. Kaua āna taitama e tohungia; whakangaromia rawatia e koutou tāna ope katoa.
JER 51:4 Nā, ka hinga ngā tūpāpaku ki te whenua o ngā Karari, he mea wero ki ōna ara.
JER 51:5 Kāhore hoki a Īharaira i whakarērea, kāhore anō hoki a Hūrā, e tōna Atua, e Ihowā o ngā mano; ahakoa kei te kapi tō rātou whenua i te hara ki te Mea Tapu o Īharaira.
JER 51:6 “Rere atu i roto o Papurōna, e kuhu he tangata i tōna wairua, i tōna. Kei hātepea atu koutou i roto i tōna hē; nō te mea ko te wā tēnei o tā Ihowā rapu utu; ka rite tāna utu ki a ia.
JER 51:7 He kapu kōura a Papurōna i roto i te ringa o Ihowā, nāna i haurangi ai te whenua katoa. Kua inumia tōna wāina e ngā iwi; nā reira ka haurangi ngā iwi.
JER 51:8 Inamata kua taka a Papurōna, kua pakaru. E tangi ki a ia! E mau i te pama mō tōna mamae; me kore noa ia e taea te rongoā.
JER 51:9 “ ‘Tērā e rongoātia e mātou a Papurōna, heoi kīhai ia i ora; whakarērea ia, ka haere tātou ki tōna whenua, ki tōna whenua; nō te mea kua tutuki atu tōna whakawā ki te rangi, kua rewa ake ki ngā kapua rā anō.
JER 51:10 “ ‘Kua whakaputaina e Ihowā tō tātou tika; haere mai, kia kōrerotia e tātou te mahi a Ihowā, a tō tātou Atua ki Hiona.’
JER 51:11 “Whakakoia ngā pere! Puritia ngā whakangungu rākau, kia mau! Kua whakaohongia e Ihowā te wairua o ngā kīngi o ngā Meri; he tikanga hoki tāna mō Papurōna kia whakangaromia. Nō te mea he rapunga utu tēnei nā Ihowā, he rapunga utu mō tōna temepara.
JER 51:12 Whakaarahia he kara ki ngā taiepa o Papurōna; whakakahangia ngā kaitiaki; whakaritea ngā kaitiaki; whakatakotoria ngā pehipehi! Kua takoto hoki i a Ihowā, kua oti anō i a ia tāna i kōrero ai mō ngā tāngata o Papurōna.
JER 51:13 E te wahine e noho nā i runga i ngā wai maha, he maha nei ōu taonga, kua tae mai tōu whakamutunga, te rūri mō tōu apo taonga.
JER 51:14 Kua oatitia e Ihowā o ngā mano tōna oranga, kua mea: He pono ka whakakīia koe e ahau ki te tangata, kei te huhu te rite; ā, ka hāmama rātou ki a koe.
JER 51:15 “Nāna i hanga te whenua, nā tōna kaha; ko te ao nāna i whakapūmau, nā ōna whakaaro nui; ko ngā rangi nā tōna mātauranga i hora.
JER 51:16 Kia puaki tōna reo, ka haruru ngā wai i ngā rangi, ka meinga e ia ngā kohu kia piki ake i ngā pito o te whenua. E hangā ana e ia ngā uira me te ua, e whakaputaina mai ana te hau i roto i ōna whare taonga.
JER 51:17 “Ka pōauau katoa te tangata, ka kore he mōhio; whakamā iho ngā kaiwhakarewa kōura katoa i tāna whakapakoko. He mea teka hoki tāna i whakarewa ai, kāhore he manawa i roto i a rātou.
JER 51:18 He horihori kau rātou, he mea pōhēhē; ka ngaro rātou i te wā e tirotirohia ai rātou.
JER 51:19 Kāhore e rite ki ērā te wāhi i a Hākopa; ko ia hoki te kaiwhakaahua o ngā mea katoa; ā, ko Īharaira te iwi o tōna kāinga tupu. Ko Ihowā o ngā mano tōna ingoa.”
JER 51:20 “Ko koe tāku toki poutangata, ko āku patu mō te whawhai; hei wāwāhi koe māku mō ngā iwi, hei whakamōtī māku mō ngā kīngitanga;
JER 51:21 hei wāwāhi anō koe māku mō te hōiho rāua ko tōna kaieke; hei wāwāhi koe māku mō te hāriata, mō te tangata anō i runga;
JER 51:22 hei wāwāhi koe māku mō te tangata, mō te wahine; hei wāwāhi koe māku mō te koroheke, mō te tamariki; hei wāwāhi koe māku mō te taitama mō te taitamāhine;
JER 51:23 hei wāwāhi koe māku mō te hēpara, mō tāna kāhui; hei wāwāhi koe māku mō te kaiparau, mō āna kau hoki kua oti te ioka; hei wāwāhi koe māku mō ngā rangatira, mō ngā ariki.”
JER 51:24 “Ka utua hoki e ahau a Papurōna, me ngā tāngata katoa o Karari mō tā rātou kino katoa i mea ai rātou ki Hiona i tā koutou tirohanga,” e ai tā Ihowā.
JER 51:25 “Nanā, hei hoariri ahau mōu, e te maunga whakamōtī,” e ai tā Ihowā, “e huna nā koe i te whenua katoa; ā, ka totoro atu tōku ringa ki a koe, ka hurihia iho koe i runga i ngā toka, ā, ka meinga koe hei maunga kua oti te tahu.
JER 51:26 Ā, e kore tētahi kōhatu e tangohia mai e rātou i a koe mō te kokonga, tētahi kōhatu rānei mō ngā tūranga; engari ka ururua koe ā ake ake,”
JER 51:27 “Whakaarahia e koe he kara ki te whenua, whakatangihia te tētere i roto i ngā iwi, kia rite mai ngā iwi hei whawhai ki a ia, kārangarangatia hei whawhai ki a ia ngā kīngitanga o Ararata, o Mini, o Ahakenaha. Whakaritea he rangatira hei mea ki a ia; meinga ngā hōiho kia kōkiri ake ānō he tātarakihi pūhuruhuru.
JER 51:28 Kia rite mai ngā iwi, ngā kīngi o ngā Meri, ō rātou rangatira, ō rātou ariki, me te whenua katoa anō o tōna kīngitanga hei whawhai ki a ia.
JER 51:29 Nā, kei te wiri te whenua, kei te mamae; nō te mea kei te tū tonu ngā whakaaro katoa o Ihowā mō Papurōna, kia meinga te whenua o Papurōna hei ururua, tē ai he tangata.
JER 51:30 Kua kāhore ngā mārohirohi o Papurōna e whawhai, kei te noho rātou i roto i ō rātou wāhi kaha; kua kore tō rātou kaha; kua rite rātou ki te wahine; kua wera ōna nohoanga; kua whati ōna tūtaki.
JER 51:31 Ka rere tētahi kaikōrero kia tūtaki ki tētahi, tētahi karere hoki kia tūtaki ki tētahi, hei whakaatu ki te kīngi o Papurōna kua horo tōna pā i ngā taha katoa;
JER 51:32 kua riro anō ngā whitinga, kua wera ngā kākaho i te ahi, ā, kua mataku ngā tāngata whawhai.”
JER 51:33 Ko te kupu hoki tēnei a Ihowā o ngā mano, a te Atua o Īharaira: “Ko te rite i te tamāhine a Papurōna kei te patunga wīti i te wā e takahia ai; he wā iti ake, ka tae ki te wā o tōna kotinga.
JER 51:34 “Kua pau ahau i a Nepukareha kīngi o Papurōna, kua pēpē ahau i a ia, kua meinga ahau e ia hei oko tahanga, kua horomia ahau e ia ānō nā te tarakona, whakakīia ana hoki e ia tōna kōpū ki āku kai reka; kua makā ahau e ia ki waho.
JER 51:35 Hei runga i Papurōna te tūkinotanga ki ahau, ki ōku kikokiko hoki,” e ai tā te wahine o Hiona; “Ā, hei runga i ngā tāngata o Karari ōku toto,” e ai tā Hiruhārama.
JER 51:36 Mō reira ko te kupu tēnei a Ihowā: “Nanā, ka tohe ahau i tāu tohe, ā, ka rapu ahau i ngā utu mōu; ā, ka mimiti i ahau tōna moana, ka maroke hoki ōna puna.
JER 51:37 Ā, ka waiho a Papurōna hei pūranga, hei nohoanga mō ngā kīrehe mohoao, hei mīharotanga, hei whakahīanga atu, tē ai he tangata.
JER 51:38 Ka hāmama ngātahi rātou, ānō he raiona; ka ngangara rātou ānō he kūao raiona.
JER 51:39 Kia werawera rātou, ka takā e ahau he hākari mā rātou, ā, ka whakahaurangitia rātou e ahau, kia whakamanamana ai rātou, kia moe ai i te moe roa, tē korikori,” e ai tā Ihowā.
JER 51:40 “Ka riro rātou i ahau ki raro, ānō he reme ki te patunga; ānō he hipi toa i huihuia atu ki ngā koati toa.
JER 51:41 “Taukiri e, kua horo a Hehaka, kua huakina tatatia te whakamoemiti a te whenua katoa! Taukiri e, kua waiho a Papurōna hei ururua i roto i ngā iwi!
JER 51:42 Kua tae ake te moana ki Papurōna; kua taupokina ia e ōna ngaru maha.
JER 51:43 Kua mōtī ōna pā, he whenua waikore, he ururua, e kore e nohoia e tētahi tangata, e kore hoki tētahi tama a te tangata e tika nā reira.
JER 51:44 Ka whiua hoki e ahau a Pere i Papurōna, ka whakaputaina mai e ahau i roto i tōna māngai te mea i horomia e ia. E kore anō ngā iwi e rere ā-wai mai ki a ia ā mua; āe rā, ka hinga anō te taiepa o Papurōna.
JER 51:45 “E tāku iwi, puta atu i roto i a ia! Kāhaki koutou i a koutou, i tērā, i tērā, i te mura o tō Ihowā riri.
JER 51:46 Kei hopī ō koutou ngākau, kei wehi hoki koutou ki te rongo meāke nei rangona ki te whenua – nō te mea ka tae mai he rongo i tētahi tau, ā, i muri i tēnā i tētahi atu tau ka tae mai anō he rongo, he tūkino ki te whenua, he rangatira e whakatika ana ki te rangatira.
JER 51:47 Mō reira, nanā, kei te haere mai ngā rā e whiua ai e ahau ngā whakapakoko o Papurōna, ā, ka whakamā tōna whenua katoa; ā, ka hinga ōna tūpāpaku i roto i a ia.
JER 51:48 Nā, kātahi ka waiata te rangi me te whenua, me ngā mea katoa i reira ki Papurōna, he hari hoki; nō te mea ka haere mai ngā kaipāhua ki a ia i te raki,”
JER 51:49 “I te mea nā Papurōna i mea ngā tūpāpaku o Īharaira kia hinga, waihoki ka hinga ki Papurōna ngā tūpāpaku o te whenua katoa.
JER 51:50 E koutou kua mawhiti atu nā i te hoari, haere koutou, kaua e tū noa; mahara ki a Ihowā i tawhiti, tukua mai hoki a Hiruhārama ki roto ki ō koutou ngākau.
JER 51:51 “Whakamā ana mātou, mō mātou i rongo i te tāwai; kua taupokina ō mātou mata e te pōrahurahu; kua tae mai hoki ngā tautāngata ki ngā wāhi tapu o te whare o Ihowā.”
JER 51:52 “Mō reira, nanā, kei te haere mai ngā rā,” e ai tā Ihowā, “e whiua ai e ahau āna whakapakoko; ā tērā e ngunguru te hunga i werohia ā puta noa i tōna whenua katoa.
JER 51:53 Ahakoa i kake atu a Papurōna ki runga ki te rangi, ahakoa i hangā e ia tōna wāhi tiketike kaha kia kaha rawa, e tae atu anō i ahau ngā kaipāhua ki a ia,”
JER 51:54 “He reo te hāmama mai nei i Papurōna, he wawāhanga nui kei te whenua o ngā Karari!
JER 51:55 Nō te mea kei te pāhua a Ihowā i Papurōna, ā, kei te whakakore atu i te reo nui i roto i a ia; ā, ka haruru ō rātou ngaru, ānō ko ngā wai maha, ka puta te tuki o tō rātou reo.
JER 51:56 Kua tae mai hoki te kaipāhua ki a ia, ki Papurōna, kua mau hoki ōna mārohirohi, kua mongamonga ā rātou pere. Nō te mea he Atua a Ihowā nō te whakahoki utu, ā, he pono ka tino takoto tāna utu.
JER 51:57 Nā, ka whakahaurangitia e ahau ōna rangatira, ōna tāngata whakaaro nui, ōna kāwana, ōna ariki, ōna mārohirohi hoki; ā, ka moe rātou i te moe roa, tē korikori,” e ai tā te Kīngi, ko tōna ingoa nei ko Ihowā o ngā mano.
JER 51:58 Ko te kupu tēnei a Ihowā o ngā mano: “Ka pakaru rawa ngā taiepa whārahi o Papurōna, ā, ka wera ōna kūwaha tiketike i te ahi; ā, ka māuiui ngā iwi mō te kore noa iho, ngā iwi hoki mō te ahi, ā, ruha noa rātou.”
JER 51:59 Ko te kupu i whakahaua e Heremaia poropiti ki a Heraia tama a Neria tama a Maaheia i tō rāua haerenga tahitanga atu ko Terekia kīngi o Hūrā ki Papurōna i te whā o ngā tau o tōna kīngitanga. Nā, ko Heraia te tino rangatira o te whare kīngi.
JER 51:60 Nā, tuhituhia iho e Heremaia ki te pukapuka te kino katoa meāke puta ki Papurōna, arā ēnei kupu katoa kua tuhituhia nei mō Papurōna.
JER 51:61 Ā, i mea a Heremaia ki a Heraia, “E tae koe ki Papurōna, me tino kōrero e koe ēnei kupu katoa,
JER 51:62 ā, ka mea, ‘E Ihowā, kua kōrerotia e koe tēnei wāhi kia hātepea atu, kia kaua hoki tētahi e noho ki konei, tangata rānei, kararehe rānei, engari kia waiho tonu hei ururua ake ake.’
JER 51:63 Nā, ka mutu tāu kōrero i tēnei pukapuka, herea e koe ki reira tētahi kōhatu, ka maka atu ai ki waenganui o Uparati,
JER 51:64 ā, ka mea atu koe, ‘Ka pēnei te totohutanga o Papurōna, e kore hoki e puea ake anō, i te kino e tākina mai e ahau ki runga ki a ia; ā, ka ruha rātou.’ ” I mutu ki konei ngā kupu a Heremaia.
JER 52:1 E rua tekau mā tahi ngā tau o Terekia i a ia i kīngi ai; ā, kotahi tekau mā tahi ngā tau i kīngi ai ia ki Hiruhārama. Ā, ko te ingoa o tōna whaea ko Hamutara, he tamāhine nā Heremaia o Rīpina.
JER 52:2 Ā, i kino tāna mahi ki te titiro a Ihowā, i rite ki ngā mea katoa i mea ai a Iehoiakimi.
JER 52:3 Nā reira i a Ihowā ka riri nei, ka puta mai te aituā ki Hiruhārama, ki a Hūrā, ā makā noatia atu rātou i tōna aroaro. Ā, i whakakeke a Terekia ki te kīngi o Papurōna.
JER 52:4 Nā, i te iwa o ngā tau o tōna kīngitanga, i te tekau o ngā marama, i te tekau o ngā rā o te marama, ka tae mai a Nepukareha kīngi o Papurōna, a ia me tāna ope katoa ki Hiruhārama, ā, whakapaea ana e ia; ā, hangā ana e rātou ētahi taumaihi ā taka noa, hei whawhai atu ki reira.
JER 52:5 Heoi, ka whakapaea te pā, ā tae noa ki te tekau mā tahi o ngā tau o Kīngi Terekia.
JER 52:6 I te whā o ngā marama, i te iwa o ngā rā o te marama, ka tino nui te matekai o te pā, nā, kāhore he taro mā ngā tāngata o te whenua.
JER 52:7 Kātahi ka pakaru te pā, rere ana ngā tāngata whawhai katoa, puta ana i roto i te pā i te pō, nā te ara o te kūwaha i waenganui o ngā taiepa e rua, nā tērā i te kāri a te kīngi, i karapotia hoki te pā e ngā Karari; ā, haere ana rātou nā te ara o te Arapa.
JER 52:8 Otiia, i whāia te kīngi e te ope o ngā Karari, ā, hopukia ana a Terekia ki ngā mānia i Heriko; ā, i marara noa atu tāna ope katoa i tōna taha.
JER 52:9 Nā, ka mau rātou ki te kīngi, ā, kawea ana ki te kīngi o Papurōna, ki Ripira i te whenua o Hāmata; ā, whakaputaia ana e ia te whakawā mōna.
JER 52:10 Nā, tukitukia ana e te kīngi o Papurōna ngā tama a Terekia i tāna tirohanga; i tukitukia anō e ia ngā rangatira katoa o Hūrā ki Ripira.
JER 52:11 Nā, tīkarohia ana e ia ngā kanohi o Terekia; ā, herea ana ia e te kīngi o Papurōna ki te mekameka, kawea ana ki Papurōna, makā ana ki te whare herehere, ā taea noatia te rā i mate ai ia.
JER 52:12 Nā, i te rima o ngā marama, i te tekau o ngā rā o te marama – ko te tekau mā iwa hoki ia o ngā tau o Kīngi Nepukareha kīngi o Papurōna – ka haere mai a Neputarārana rangatira o ngā kaitiaki, he tangata tū i te aroaro o te kīngi o Papurōna, ki Hiruhārama.
JER 52:13 Nā, tahuna ake e ia te whare o Ihowā, me te whare o te kīngi; ā, tahuna ana e ia ki te ahi ngā whare katoa o Hiruhārama, ngā whare katoa hoki o te hunga nunui.
JER 52:14 Nā, ka wāwāhia e te ope katoa o ngā Karari, e tā te rangatira o ngā kaitiaki, ngā taiepa katoa o Hiruhārama a whawhe noa.
JER 52:15 Kātahi ka whakahekea atu e Neputarārana rangatira o ngā kaitiaki ētahi o ngā tino rawakore o te iwi, me ērā atu anō o te iwi i mahue ki te pā, me te iwi i papahoro atu, i taka atu ki te kīngi o Papurōna, me ngā mōrehu anō o taua huihui.
JER 52:16 Engari i waiho e Neputarārana rangatira o ngā kaitiaki ētahi o ngā tino rawakore o te whenua hei kaimahi wāina, hei paruauru.
JER 52:17 Nā, ko ngā pou parāhi i te whare o Ihowā, ko ngā tūranga me te moana parāhi i te whare o Ihowā, wāwāhia ana e ngā Karari, ā, maua atu ana e rātou te parāhi katoa o aua mea ki Papurōna.
JER 52:18 I maua atu anō e rātou ngā pāta, ngā koko pungarehu, ngā kutikuti rama, ngā peihana, ngā koko, me ngā oko parāhi katoa mō ā rātou mahi tapu.
JER 52:19 Ko ngā kapu, ko ngā paepae ngārahu, ko ngā peihana, ko ngā pāta, ko ngā tūranga rama, ko ngā koko, ko ngā oko, ko ngā mea i hangā ki te kōura, he kōura, ko ngā mea i hangā ki te hiriwa, he hiriwa, i maua katoatia atu e te rangatira o ngā kaitiaki.
JER 52:20 Nā, ko ngā pou e rua, ko te moana kotahi, ko ngā pūru parāhi kotahi tekau mā rua i raro i ngā tūranga, i hangā nei e Kīngi Horomona mō te whare o Ihowā; kāhore he pāunatanga o te parāhi o ēnei oko katoa.
JER 52:21 Nā, ko ngā pou, kotahi tekau mā waru whatīanga te tiketike o te pou kotahi; tekau mā rua hoki ngā whatīanga o te aho hei pae mōna; nā, ko te mātotoru, e whā ngā ringa; he tuwhera a roto.
JER 52:22 Ā, ko te whakapaipai o runga he parāhi; ko te tiketike o te whakapaipai kotahi, e rima ngā whatīanga, he parāhi katoa te mea i whiria me ngā pamekaranete i tētahi taha o te whakapaipai, i tētahi taha. Rite tonu hoki ki ēnei o te rua o ngā pou, me ngā pamekaranete anō.
JER 52:23 Nā, e iwa tekau mā ono ngā pamekaranete o ngā taha; ā, ko ngā pamekaranete katoa i te mea i whiria, kotahi te rau, ā whawhe noa.
JER 52:24 Nā, tangohia ana e te rangatira o ngā kaitiaki a Heraia, te tino tohunga, me te tohunga tuarua, me Tepania, me ngā kaitiaki tokotoru o te kūwaha.
JER 52:25 I tangohia hoki e ia i roto i te pā tētahi rangatira o ngā tāngata whawhai, tokowhitu hoki nō te aroaro pū ake o te kīngi, he hunga i rokohanga ki roto ki te pā; me te kaituhituhi a te rangatira ope, ko ia nei te kaihuihui i ngā tāngata o te whenua; e ono tekau hoki ngā tāngata o te iwi o te whenua, he hunga i rokohanga e ia ki roto ki te pā.
JER 52:26 Nā, ka mau a Neputarārana rangatira o ngā kaitiaki ki a rātou, kawea ana ki te kīngi o Papurōna ki Ripira.
JER 52:27 Nā, patua iho rātou e te kīngi o Papurōna, whakamatea iho ki Ripira, ki te whenua o Hāmata. Heoi, whakahekea atu ana a Hūrā i tōna oneone.
JER 52:28 Ko te hunga tēnei i whakaraua atu e Nepukareha; i te whitu o ngā tau, e toru mano e rua tekau mā toru ngā Hūrai;
JER 52:29 i te tekau mā waru o ngā tau o Nepukareha, e waru rau e toru tekau mā rua ngā tāngata i whakaraua atu e ia i Hiruhārama;
JER 52:30 i te rua tekau mā toru o ngā tau o Nepukareha, e whitu rau e whā tekau mā rima ngā tāngata o ngā Hūrai i whakaraua atu e Neputarārana, e te rangatira o ngā kaitiaki. Ko aua tāngata katoa e whā mano e ono rau.
JER 52:31 Nā, i te toru tekau mā whitu o ngā tau o te whakahekenga atu o Iehoiakini kīngi o Hūrā, i te tekau mā rua o ngā marama, i te rua tekau mā rima o ngā rā o te marama, ka whakaarahia e Ewiri Meroraka kīngi o Papurōna, i te tau tuatahi i kīngi ai ia, te māhunga o Iehoiakini kīngi o Hūrā whakaputaina ana ia e ia i roto i te whare herehere;
JER 52:32 ā, kōrero pai ana ia ki a ia, nekehia ake ana e ia tōna torōna ki runga ake i te torōna o ngā kīngi i tōna taha i Papurōna.
JER 52:33 Kākahuria ana e ia he kākahu kē i ōna kākahu o te herehere, ā, kai taro ana ia i tōna aroaro i ngā rā katoa i ora ai ia.
JER 52:34 Nā, ko tāna kai he kai i hōmai tonu e te kīngi o Papurōna māna, he mea mō tēnei rā, mō tēnei rā, ā taea noatia te rā o tōna matenga, i ngā rā katoa i ora ai ia.
LAM 1:1 Taukiri e! Noho mokemoke ana te pā i kī nei i te tangata! Ānō tōna rite he pouaru! Kua waiho hei hoatu takoha te mea i nui nei i roto i ngā iwi, te rangatira i roto i ngā kāwanatanga!
LAM 1:2 Nui atu tāna tangi i te pō, ā, kei ōna pāpāringa ōna roimata; i roto i te hunga katoa i aroha ki a ia, kāhore he kaiwhakamārie mōna; kua tinihanga ōna hoa ki a ia, kua meinga rātou hei hoariri mōna.
LAM 1:3 Kua haere a Hūrā ki te whakarau, he tangi hoki, he whakamahinga nui; kei te noho ia i roto i ngā tauiwi, kāhore e kitea e ia he tānga manawa. Kua hopukia ia e ōna kaiwhai katoa i roto i ngā wāhi kūiti.
LAM 1:4 Kei te tangi ngā ara o Hiona, nō te mea kāhore he tangata e haere mai ana ki te huihuinga nui. Kua ururuatia ōna kūwaha katoa, e auē ana āna tohunga, ko āna wāhina kei te pōuri, ā, ko ia, kei roto ia i te mamae.
LAM 1:5 Kua waiho ōna hoariri hei upoko, kei te noho hūmārie ōna hoa whawhai. Nō te mea kua whiua ia e Ihowā mō ōna hē maha. Kua riro āna tamariki hei pārau i te aroaro o te hoariri.
LAM 1:6 Kua wehe atu i te tamāhine a Hiona tōna nui katoa. Kua rite ōna rangatira ki ngā hāta kīhai i pono ki te wāhi kai, haere kahakore ana rātou i te aroaro o te kaiwhai.
LAM 1:7 E mahara ana a Hiruhārama i ngā rā o tōna tangi, o ōna wherūtanga, ki āna mea āhuareka katoa o ngā rā ō mua. I te takanga o tōna iwi ki roto ki te ringa o te hoariri, ā, kāhore he kaiāwhina mōna, ka kite ngā hoariri i a ia, ka kata ki ōna mutunga.
LAM 1:8 Nui atu te hara o Hiruhārama; nā reira ia i meinga ai, anō hei mea poke. Ko te hunga katoa i whakahōnore i a ia, whakahāwea ana ki a ia, nō te mea kua kite rātou i tōna tahangatanga; āe rā, kei te auē ia, kei te hoki ki muri.
LAM 1:9 Kei ōna kurupatu tōna poke, kāhore ōna mahara ki tōna whakamutunga; nā reira he hanga whakamīharo tōna tukunga iho ki raro; kāhore he kaiwhakamārie mōna. “E Ihowā, titiro mai ki tōku mate, kua whakahirahira hoki te hoariri i a ia!”
LAM 1:10 Kua wherahia atu te ringa o te hoariri ki runga ki āna mea āhuareka katoa; kua kite nei ia i ngā iwi e tomo mai ana ki tōna wāhi tapu, ērā i ako rā koe kia kaua rātou e uru ki tāu whakaminenga.
LAM 1:11 Kei te auē tōna iwi katoa, kei te rapu taro rātou; e hoatu ana e rātou ā rātou mea āhuareka hei utu kai, hei whakahauora ake mō te wairua. “Titiro mai, e Ihowā, whakaaro mai, kua whakahouhou hoki ahau.”
LAM 1:12 “He kāhore noa iho tēnei ki a koutou, e koutou e haere nei i te ara? Whakaaro mai, titiro mai, e rite ana rānei tētahi mamae ki tōku mamae, e mahia nei mōku, ki tā Ihowā nei whiu mōku i te rā i mura ai tōna riri?
LAM 1:13 “Kua tukua iho nei e ia i runga, he ahi ki ōku wheua, ā, e wera ana i tērā. Kua horahia e ia he kupenga mō ōku waewae, kua whakahokia ahau ki muri. Kua tukua ahau e ia ki te kāhore, ki te whakaruhi, ā pau noa te rā.
LAM 1:14 “Ko te ioka o ōku hē herea iho e tōna ringa, whiri rawa, kua eke ake ki runga ki tōku kakī; kua hē i a ia tōku kaha, kua tukua ahau e te Ariki ki te ringa tāngata, ā, kāhore ōku kaha ki te whakatika ake.
LAM 1:15 “Kua kore noa iho i te Ariki ōku mārohirohi katoa i roto i ahau; kua karangatia e ia he huihui ki ahau hei wāwāhi i āku taitama. Kua takatakahia e te Ariki te tamāhine wāhina a Hūrā, ānō he takahanga wāina.
LAM 1:16 “Nā ēnei mea ahau i tangi ai; ko tōku kanohi, tārere ana te wai o tōku kanohi. Nō te mea kei tawhiti atu i ahau te kaiwhakamārie hei whakahauora ake i tōku wairua. Ko āku tamariki kei te noho kau noa iho, nō te mea kua kaha te hoariri.”
LAM 1:17 Kua wherahia e Hiona ōna ringa; kāhore he kaiwhakamārie mōna. Nā Ihowā te whakahau mō Hākopa, hei hoariri mōna te hunga e karapoti ana i a ia; kua rite a Hiruhārama i roto i a rātou ki te wahine e paheke ana.
LAM 1:18 “He tika hoki a Ihowā; i whakakeke hoki ahau ki tāna kupu. Tēnā whakarongo mai, e ngā iwi katoa, titiro mai hoki ki tōku mamae; kua riro āku wāhina, āku taitama, i te whakarau.
LAM 1:19 “I karanga ahau ki te hunga i aroha ki ahau, heoi kei te tinihanga ki ahau; ko ōku tohunga, ko ōku kaumātua, hemo noa iho rātou i roto i te pā, i a rātou e rapu kai ana mā rātou hei whakahauora ake i ō rātou wairua.
LAM 1:20 “Titiro mai, e Ihowā, he mamae hoki tōku, e ohooho ana ōku whēkau; ko tōku ngākau hurikiko ana i roto i ahau; he nui noa atu hoki tōku whakakeke. I waho ko te hoari ki te whakamōtī, i roto kei te mate te rite.
LAM 1:21 “Kua rongo rātou kei te auē ahau, tē ai he kaiwhakamārie mōku. Kua rongo ōku hoariri katoa ki tōku matenga, koa ana rātou ki tāu i mea ai. Ka kawea mai e koe te rā i karangatia e koe, ā, ka rite rātou ki ahau.
LAM 1:22 “Kia tae tō rātou kino katoa ki tōu aroaro; meatia anō ki a rātou tāu i mea mai ai ki ahau mō ōku hē katoa. Ka maha nei hoki ōku auētanga; ko tōku ngākau whakaruhi rawa.”
LAM 2:1 Taukiri e! Te taupokinga a Ihowā i te tamāhine a Hiona ki te kapua, i a ia e riri ana! Kua makā iho e ia te ātaahua o Īharaira i runga i te rangi ki te whenua; kīhai anō i mahara ki tōna tūranga waewae i te rā i riri ai ia.
LAM 2:2 Kua horomia e te Ariki ngā nohoanga katoa o Hākopa, kīhai i tohungia; i a ia i riri rā, wāhia iho e ia ngā pā kaha o te tamāhine a Hūrā; tae tonu ki te whenua; poke iho i a ia te kīngitanga me ōna rangatira.
LAM 2:3 Pōutoa katoatia atu ana e ia te haona o Īharaira i tōna riri e mura ana. Whakahokia mai ana e ia ki muri tōna ringa matau i te aroaro o te hoariri. Ngiha mai ana ia ki a Hākopa, ānō he mura ahi e kai ana i tētahi taha, i tētahi taha.
LAM 2:4 Kua piko i a ia tāna kōpere, koia anō kei tā te hoariri; ko tōna ringa matau i a ia i tū rā, rite tonu ki tō te hoa whawhai, tukitukia ana e ia te hunga katoa i āhuareka mai ki te titiro atu; i roto i te tapenākara o te tamāhine a Hiona, ānō he ahi tōna riri e ringihia mai ana e ia.
LAM 2:5 Kua rite te Ariki ki te hoariri, kua horomia e ia a Īharaira; kua horomia e ia ōna whare kīngi katoa, kua whakamōtītia e ia ōna pā taiepa. Ā, kua whakanuia e ia te tangi me te auē o te tamāhine a Hūrā.
LAM 2:6 Kua tākiritia e ia tōna tīhokahoka, ānō nō te kāri; mōtī iho i a ia tōna wāhi whakaminenga. Kua meinga e Ihowā te huihui nui me te hāpati kia warewaretia i roto i Hiona, whakahāweatia iho e ia te kīngi rāua ko te tohunga i tōna riri e āritarita ana.
LAM 2:7 Kua pangā atu e te Ariki tāna āta, kua weriweri ia ki tōna wāhi tapu. Tukua atu ana e ia ngā taiepa o ō reira whare kīngi ki roto ki te ringa o te hoariri; kua hāmama rātou i roto i te whare o Ihowā, me te mea ko te rā o te hākari nui.
LAM 2:8 He whakaaro tō Ihowā mō te whakamōtī i te taiepa o te tamāhine a Hiona; kua oti te aho te whakamārō atu e ia, kāhore anō tōna ringa i pēpeke, whakangaro tonu ia. Nā reira, tangi ana i a ia te pekerangi me te taiepa; rāua ngātahi, ngohe kau.
LAM 2:9 Kua totohu ōna kēti ki roto ki te whenua; kua kore i a ia, kua whati hoki ōna tūtaki; kei roto tōna kīngi me ōna rangatira i ngā tauiwi, kāhore nei o reira ture; āe rā, kāhore āna poropiti e whiwhi ki te kite nā Ihowā.
LAM 2:10 Kei runga i te whenua ngā kaumātua o te tamāhine a Hiona e noho ana, whakarongo kau ana. Opehia ake e rātou he puehu ki runga ki ō rātou māhunga; whītiki rawa te kākahu taratara. Ko ngā wāhina o Hiruhārama, tuohu tonu ō rātou māhunga ki te whenua.
LAM 2:11 Matawaia rawa ōku kanohi i te roimata, e ohooho ana ōku whēkau, kua maringi tōku ate ki runga ki te whenua, he meatanga ki te wawāhanga o te tamāhine a tōku iwi; nō te mea hemo ana ngā kōhungahunga me ngā mea ngote ū i ngā huarahi o te pā.
LAM 2:12 Kei te kī atu rātou ki ō rātou whaea, “Kei hea he wīti, he wāina?” i a rātou e hemo ana, e pērā ana me te hunga kua patua ki ngā huarahi o te pā, e maringi ana ō rātou wairua ki ngā uma o ō rātou whaea.
LAM 2:13 Ko te aha tāku hei whakaatu ki a koe? Ko te aha e waiho e ahau hei āhua mōu, e te tamāhine a Hiruhārama? Ko wai e waiho e ahau hei rite ki a koe, e whakamārie ai ahau i a koe, e te tamāhine wāhina a Hiona? He nui hoki tōu pakaru, koia anō kei te moana; ko wai hei rongoā i a koe?
LAM 2:14 Ko ngā mea i kitea e ōu poropiti mōu, he teka, he mea horihori; kīhai anō i hurahia e rātou tōu hē, e hoki ai koe i te whakarau. Heoi anō tā rātou i kite ai mōu he poropititanga wairangi, he mea hei pana atu i a koe.
LAM 2:15 Kei te papaki ringa ki a koe te hunga katoa e tika ana i te ara, e hī ana, rūrū ana ō rātou māhunga ki te tamāhine a Hiruhārama; ko tā rātou kupu, “Ko te pā ianei tēnei i kōrerotia nei, ko te tino o te ātaahua, ko te whakahari o te whenua katoa?”
LAM 2:16 Hāmama tonu ki a koe ngā māngai o ōu hoariri katoa; e hī ana, tetē ana ō rātou niho, e mea ana: “Kua horomia ia e tātou. Ko te rangi pū anō tēnei tāria atu e tātou, kua tūpono mai ki a tātou, kua kitea e tātou.”
LAM 2:17 Kua oti i a Ihowā tāna i whakaaro ai; kua whakaritea tāna kupu i whakahaua e ia i ngā rā ō mua. Wāhia iho e ia, kīhai hoki i tohungia; kua meinga e ia te hoariri kia koa ki a koe, kua ara i a ia te haona o ōu hoariri.
LAM 2:18 I karanga ō rātou ngākau ki te Ariki! E te taiepa o te tamāhine a Hiona! Kia rere iho ngā roimata ānō he awa, i te ao, i te pō; kei whakatā koe, kei mutu tā te whatu o tōu kanohi!
LAM 2:19 Maranga, hāmama i te pō, i te tīmatanga o ngā mataaratanga: ringihia atu tōu ngākau ānō he wai ki tō te Ariki aroaro. Kia ara ake ōu ringa ki a ia, kia ora ai āu kōhungahunga e hemo nei i te kai i te ahunga mai o ngā huarahi katoa.
LAM 2:20 “Titiro mai, e Ihowā, whakaaroa ko wai i pēneitia e koe! E kai rānei ngā wāhine i ō rātou hua, i ngā kōhungahunga e hikihikitia ana? Kia patua koia te tohunga me te poropiti ki te wāhi tapu o te Ariki?
LAM 2:21 “Kei te takoto te taitama rāua ko te koroheke i runga i te whenua i ngā huarahi; kua hinga āku wāhina, āku taitamariki, i te hoari; he mea whakamate nāu i te rā i riri ai koe; tukitukia ana e koe, kīhai hoki i tohungia.
LAM 2:22 “Kua karanga koe ki ōku whakawehi i ngā taha katoa, pērā i te rā o te huihuinga nui, ā, kāhore tētahi i mawhiti, i mahue rānei i te rā i riri ai a Ihowā; ko āku i hikihiki ai, i whakatuputupu ai, poto ake i tōku hoariri.”
LAM 3:1 Ko ahau te tangata kua kite i te pōuri, he mea nā te rākau o tōna riri.
LAM 3:2 I ārahina e ia, i meinga kia haere i te pōuri, kāhore i te mārama.
LAM 3:3 He pono kua tahuri mai ia ki ahau, kua anga mai tōna ringa ki ahau, ā pau noa te rā.
LAM 3:4 Kua meinga nei e ia ōku kikokiko me tōku kiri kia rite ki ō te koroheke, mangungu kau i a ia ōku wheua.
LAM 3:5 Kua hangā e ia he patu mōku; karapotia ana ahau ki te wai kawa, ki te raruraru.
LAM 3:6 Kua meinga ahau e ia kia noho ki ngā wāhi pōuri, kia pērā me te hunga kua mate noa ake.
LAM 3:7 Kua oti ahau te taiepa mai e ia, tē puta atu ahau; kua meinga e ia tōku mekameka kia taimaha.
LAM 3:8 Āe rā, i ahau e karanga ana, e hāmama ana kia āwhinatia, ka āraia mai e ia tāku īnoi.
LAM 3:9 Kua oti anō ōku ara te taiepa mai e ia ki te kōhatu tārai, whakakōpikopikoa ake e ia ōku ara.
LAM 3:10 Ko tōna rite ki ahau kei te pea e whanga ana, kei te raiona i ngā wāhi ngaro.
LAM 3:11 Whakangaua kētia ana e ia ōku ara, haehaea pūtia iho ahau; meinga ana ahau e ia kia noho kau noa iho.
LAM 3:12 Kua whakapikoa e ia tāna kōpere, ā, whakatūria ake ahau e ia hei kōperenga pere.
LAM 3:13 Kua meinga e ia ngā pere o tāna papa pere kia ngoto ki ōku whatumanawa.
LAM 3:14 Kua waiho ahau hei katanga mā tōku iwi katoa; hei waiata mā rātou ā pau noa te rā.
LAM 3:15 Kua whakakīia ahau e ia ki ngā mea kawa, whakainumia rawatia ana ahau e ia ki te taru kawa.
LAM 3:16 Kua whatiwhatiia anō hoki e ia ōku niho ki te kirikiri, hīpokina ana ahau e ia ki te pungarehu.
LAM 3:17 Kua nekehia atu e koe tōku wairua kei tata ki te rangimārie; i wareware ahau ki te pai.
LAM 3:18 Kī tonu ake ahau, “Kua pirau tōku kaha, kāhore he tūmanakohanga māku ki a Ihowā.”
LAM 3:19 Mahara ki tōku ngākau mamae, ki tōku pōuri, ki te taru kawa, ki te wai kawa!
LAM 3:20 Māharahara tonu tōku wairua ki a rātou, piko tonu iho i roto i ahau.
LAM 3:21 E whakahokia ake ana tēnei e ahau ki tōku ngākau, koia i tūmanako ai ahau.
LAM 3:22 He mahi tohu nā Ihowā tē poto ai tātou, he kore nō āna mahi aroha e mutu.
LAM 3:23 E hou tonu ana rātou i tēnei ata, i tēnei ata; he nui tōu pono.
LAM 3:24 “Ko Ihowā te wāhi mōku,” e ai tā tōku wairua; “nō reira ka tūmanako ahau ki a ia.”
LAM 3:25 He pai a Ihowā ki te hunga e tūmanako ana ki a ia, ki te wairua e rapu ana i a ia.
LAM 3:26 He pai anō kia tūmanako te tangata, kia tatari mārie hoki ki tā Ihowā whakaora.
LAM 3:27 He pai anō mō te tangata kia amohia e ia te ioka i tōna tamarikitanga.
LAM 3:28 Me noho ia, tōna kotahi, me whakarongo puku hoki, nō te mea nāna i uta ki a ia.
LAM 3:29 Me tuku e ia tōna māngai ki te puehu; mehemea pea tērā he tūmanakohanga.
LAM 3:30 Me hoatu e ia tōna pāpāringa ki te tangata e papaki ana i a ia; kia kī tonu ia i te tāwai.
LAM 3:31 E kore hoki e mau tonu tā Ihowā panga.
LAM 3:32 Ahakoa whakapōuri ia, ka aroha anō ia, ka rite ki te nui o tāna mahi tohu.
LAM 3:33 Kāhore hoki ōna ngākau whiu, whakapōuri rānei, i ngā tama a te tangata.
LAM 3:34 Ko te kuru i ngā herehere katoa o te whenua ki raro i ōna waewae;
LAM 3:35 ko te whakapeau kē i te tika o te tangata ina whakawākia i te aroaro o te Runga Rawa;
LAM 3:36 ko te whakariro kē i tā te tangata ina totohe, e kore tēnā e whakapaingia e te Ariki.
LAM 3:37 Ko wai tēnei hei kī mai, ā, ka oti, i te mea kīhai i whakahaua e te Ariki?
LAM 3:38 He teka ianei e puta mai ana te kino me te pai i roto i te māngai o te Runga Rawa?
LAM 3:39 He aha te tangata ora i amuamu ai, te tangata ina whiua mō ōna hara?
LAM 3:40 E rapu tātou, e kimi i ō tātou ara, ā, ka tahuri anō ki a Ihowā.
LAM 3:41 Kia ara atu ō tātou ngākau me ō tātou ringa ki te Atua i te rangi.
LAM 3:42 I hē mātou, i whakakeke; kīhai anō koe i muru i tō mātou hē.
LAM 3:43 Kua hīpokina nei e koe ki te riri, tūkinotia ana mātou e koe; tukitukia ana e koe, kīhai anō i tohungia e koe.
LAM 3:44 Hīpokina ana e koe he kapua ki a koe, kei puta atu tā mātou īnoi.
LAM 3:45 Kua meinga mātou e koe hei paru tāhinga, hei mea ākiri i waenga i ngā iwi.
LAM 3:46 Kua hāmama mai ngā māngai o ō mātou hoariri katoa ki a mātou.
LAM 3:47 Ko te wehi, ko te rua, kua tae mai kei a mātou, te whakamōtī me te wāwāhi.
LAM 3:48 Kei te tārere nei ngā awa wai i tōku kanohi, mō te wawāhanga o te tamāhine a tōku iwi.
LAM 3:49 Māturuturu ana te wai i tōku kanohi, kāhore hoki e mutu, tē ai he pārīrātanga,
LAM 3:50 kia titiro mai rā anō a Ihowā, kia kite mai rā anō ia i runga i te rangi.
LAM 3:51 E meatia iho ana tōku ngākau e tōku kanohi, mō ngā tamāhine katoa o tōku pā.
LAM 3:52 Kua whāia kinotia ahau ānō he manu e rātou, e te hunga e hoariri ana ki ahau, kāhore he take.
LAM 3:53 Ngaro iho i a rātou tōku ara i roto i te poka, kua makā e rātou he kōhatu ki runga ki ahau.
LAM 3:54 I rere ngā wai i runga i tōku māhunga; i mea ahau, “Kua motuhia kētia ahau.”
LAM 3:55 I karanga ahau ki tōu ingoa, e Ihowā, i roto i te poka i raro rawa.
LAM 3:56 I rongo koe ki tōku reo; “Kaua e hunā tōu taringa ki te tānga o tōku manawa, ki tāku karanga.”
LAM 3:57 I whakatata mai koe i te rā i karanga ai ahau ki a koe; i kī mai koe, “Kaua e wehi.”
LAM 3:58 Kua tohea e koe, e te Ariki, ngā tohe a tōku wairua; kua hokona e koe tōku ora.
LAM 3:59 Kua kite koe, e Ihowā, i te hē i mahia ki ahau. Māu e whakarite tāku whakawā.
LAM 3:60 Kua kite koe i tō rātou mauāhara katoa, i ō rātou whakaaro katoa mōku.
LAM 3:61 Kua rongo koe ki tā rātou tāwai, e Ihowā, ki ō rātou whakaaro katoa mōku;
LAM 3:62 ki ngā ngutu o te hunga i whakatika mai ki ahau, ki tā rātou tikanga mōku, ā pau noa te rā.
LAM 3:63 Tirohia mai tō rātou nohoanga iho, tō rātou whakatikanga ake; ko ahau te waiatatia nei e rātou.
LAM 3:64 Hoatu he utu ki a rātou, e Ihowā, kia rite ki te mahi a ō rātou ringa.
LAM 3:65 Hoatu ki a rātou he ngākau pakeke, tāu kanga ki a rātou.
LAM 3:66 Whāia rātou i runga i te riri, whakangaromia atu rātou i raro i ngā rangi o Ihowā.
LAM 4:1 Taukiri e! Tōna haumarurutanga o te kōura! Tōna putanga kētanga o te kōura parakore, tino pai! Kua ringihia ngā kōhatu o te wāhi tapu ki te ahunga mai o ngā ara katoa.
LAM 4:2 Ko ngā tamariki a Hiona ko ngā mea papai, i rite nei ki te kōura parakore, taukiri e! Kua kīia rātou he hāka oneone, he mea hanga nā ngā ringa o te kaipokepoke.
LAM 4:3 Ko ngā kīrehe mohoao nei hoki, e tukua iho ana te ū e rātou, e whakangotea ana e rātou ā rātou kūao; kua taikaha te tamāhine a tōku iwi, kua rite ki ngā otereti o te koraha.
LAM 4:4 Piri ana te arero o te tamaiti ngote ū ki te ngao o tōna māngai i te hiainu; e tono ana ngā kōhungahunga i te taro mā rātou, heoi kāhore he tangata hei whatiwhati atu mā rātou.
LAM 4:5 Ko te hunga i kai i ngā mea papai kei te noho mokemoke i ngā ara. Ko te hunga i whakatupuria i roto i ngā kākahu ngangana, kei te awhi i ngā pūranga paru.
LAM 4:6 Nō te mea ko te hē o te tamāhine a tōku iwi nui atu i te hara o Horoma, i hurihia ohoreretia rā i mua, kāhore hoki he ringa i ū ki a ia.
LAM 4:7 Ko ōna rangatira pai atu i te hukarere te pokekore, mā atu hoki rātou i te waiū, pūwhero ake ō rātou tinana i ngā rupi, orohina ake rātou ki te oro o te hapaira.
LAM 4:8 Mangu iho tō rātou mata i tētahi ngārahu; kāhore rātou e mōhiotia i ngā ara. Piri tonu ō rātou kiri ki ō rātou wheua; kua memenge, kua rite ki te rākau.
LAM 4:9 Ko te hunga i patua e te hoari, pai ake tō rātou i tō te hunga i patua e te hemokai; nō te mea ka honia noatia ēnei, ka werohia, he kore hoki nō ngā hua o te māra.
LAM 4:10 Ko ngā wāhine, ko te hunga aroha, kei te kōhua i ā rātou tamariki ki ō rātou ringa; he kai ērā mā rātou i te wawāhanga o te tamāhine a tōku iwi.
LAM 4:11 Kua whakapaua e Ihowā tōna riri nui, kua ringihia mai e ia tōna riri nui; kua tahuna hoki e ia he ahi ki Hiona, nā reira i pau ai ōna tūranga.
LAM 4:12 Kīhai i whakapono mai ngā kīngi o te whenua, kīhai anō hoki ngā tāngata o te ao, tērā te hoariri rāua ko te hoa whawhai e tomo mai ki ngā kūwaha o Hiruhārama.
LAM 4:13 I pērā ai he hara nō ōna poropiti, he hē nō ōna tohunga kua whakaheke nei i ngā toto o te hunga tika ki waenganui ōna.
LAM 4:14 E kōpikopiko ana rātou ānō he matapō i ngā ara; Kua poke rātou i te toto, tē pā ai te tangata ki ō rātou kākahu.
LAM 4:15 I karanga rātou ki a rātou; “Haere atu, e poke ana! Haere atu, haere atu, kei pā!” I tō rātou whatinga, i a rātou e ātiutiu noa atu ana, i kī ngā tāngata i roto i ngā tauiwi, “Kāhore he nohoanga iho mō rātou ki konei.”
LAM 4:16 Kua wehewehea rātou e te riri o Ihowā; e kore ia e titiro ki a rātou i muri nei. Kīhai rātou i whakaaro ki ngā kanohi o ngā tohunga, kīhai i manako ki ngā kaumātua.
LAM 4:17 E matawaia tonu ana ō tātou kanohi i a tātou e titiro ana ki te āwhina tekateka noa mō tātou; i a tātou e tiaki atu ana, i whanga noa tātou ki te iwi e kore e whakaora.
LAM 4:18 E whāia ana e rātou ō tātou hīkoinga, tē haere ai tātou i ō tātou waharoa. Kua tata tō tātou whakamutunga, kua rite ō tātou rā; nō te mea kua tae mai tō tātou whakamutunga.
LAM 4:19 Nui atu te tere o ō tātou kaiwhai i tō ngā ēkara o te rangi; i arumia tātou e rātou i runga i ngā maunga; i whanga mai anō rātou ki a tātou i te koraha.
LAM 4:20 Ko te manawa o ō tātou pongaponga, ko tā Ihowā i whakawahi ai, i mau ki roto ki ā rātou rua; i kī rā tātou mōna, “Mā tōna taumarumarunga iho ka ora ai tātou i roto i ngā tauiwi.”
LAM 4:21 Kia hari, kia koa, e te tamāhine a Ēroma e noho nā i te whenua o Uhu; ka tae atu anō te kapu ki a koe; ka haurangi koe, ka whakarere anō koe i ōu kākahu.
LAM 4:22 Kua rite te whiu mō tōu hē, e te tamāhine a Hiona; heoi anō tāna whakaraunga i a koe. Ka whiua e ia tōu hē, e te tamāhine a Ēroma, ka hurahia anō e ia ōu hara.
LAM 5:1 Kia mahara, e Ihowā, ki te mea kua pā nei ki a mātou; tirohia mai, kia kite ai koe i tō mātou ingoa kino.
LAM 5:2 Kua riro tō mātou wāhi tupu i ngā tāngata kē, ō mātou whare i ngā tautāngata.
LAM 5:3 He pani mātou, kāhore he matua, ko ō mātou whaea ānō he pouaru.
LAM 5:4 Nā te moni i inu wai ai mātou; ko ā mātou wahie he mea hoko.
LAM 5:5 Kei runga kei ō mātou kakī ō mātou kaiwhai; e māuiui ana mātou, kāhore he tānga manawa mō mātou.
LAM 5:6 Kua hoatu e mātou te ringa ki ngā Īhipiana, ki ngā Ahiriana, kia mākona ai mātou i te taro.
LAM 5:7 I hara ō mātou mātua, ā, kua kore; ā, kua whakawahā e mātou ō rātou hē.
LAM 5:8 Ko ngā pononga ō mātou rangatira; kāhore he kaiwhakaora mō mātou i ō rātou ringa.
LAM 5:9 E tata mate mātou ka whiwhi ai i te taro, i te hoari hoki o te koraha.
LAM 5:10 Mangu ana ō mātou kiri ānō he oumu, i te wera ngau kino o te hemokai.
LAM 5:11 Taea ana e rātou ngā wāhine o Hiona, ngā wāhina i ngā pā o Hūrā.
LAM 5:12 Ko ngā rangatira, tāronatia ake e tō rātou ringa; kīhai ngā kanohi o ngā kaumātua i whakahōnoretia.
LAM 5:13 Ko ngā taitama kei te waha i te huri, hinga ana ngā tamariki i te pīkaunga wahie.
LAM 5:14 Ko ngā kaumātua i ngā kūwaha kua kore, me te waiata hoki a ngā taitama.
LAM 5:15 Kua mutu te koa o ō mātou ngākau, kua puta kē tā mātou kanikani hei uhunga.
LAM 5:16 Kua taka te karauna o tō mātou māhunga; auē te mate mō mātou kua hara hoki mātou.
LAM 5:17 Nā reira, whakaruhi noa iho ō mātou ngākau; nā ēnei mea pōuriuri ana ō mātou kanohi.
LAM 5:18 Nā te maunga hoki o Hiona kua ururuatia nei, e hāereerea nei e ngā pokiha.
LAM 5:19 Pūmau tonu koe, ake ake, e Ihowā; ko tōu torōna kei tērā whakatupuranga, kei tērā whakatupuranga.
LAM 5:20 He aha koe i wareware tonu ai ki a mātou? He aha koe i whakarere ai i a mātou, ā roa noa iho ngā rā?
LAM 5:21 Whakatahuritia atu mātou ki a koe, e Ihowā, ā, ka tahuri mātou; whakahoutia ō mātou rā, kia rite ki ō mua.
LAM 5:22 Otiia, kua tino whakakāhore rawa koe ki a mātou, e tino nui ana tōu riri ki a mātou.
EZE 1:1 Nā, i te toru tekau o ngā tau, i te whā o ngā marama, i te rima o ngā rā o te marama, i ahau i roto i ngā whakarau o te awa, o Kepara, nā, ka puare ngā rangi, ā, ka kite ahau i ngā putanga Atua.
EZE 1:2 I te rima o ngā rā o te marama, (arā i te rima o ngā tau o tō Kīngi Iehoiakini whakaraunga),
EZE 1:3 ka haere tika tonu mai te kupu a Ihowā ki a Ehekiera tohunga, tama a Puti, i te whenua o ngā Karari, i te taha o te awa, o Kepara; ā, i runga te ringa o Ihowā i a ia i reira.
EZE 1:4 Ā, ka titiro atu ahau, nā, he tūkauati e puta mai ana i te raki – he kapua nui, he ahi e hoki iho ana ki roto ki a ia anō, wheriko tonu i tētahi taha, ā, i waenganui, i rite ki te kara o te amipere, i waenganui anō i te ahi.
EZE 1:5 Nā, ka puta mai i waenganui o taua ahi ko te āhua o ngā mea ora e whā. Ko tō rātou āhua anō tēnei; i rite rātou ki te tangata.
EZE 1:6 Nā, e whā ngā mata o tētahi, o tētahi o rātou, e whā ngā parirau o tētahi, o tētahi.
EZE 1:7 Ko ō rātou waewae, he waewae tika tonu; ko te kapu anō o ō rātou waewae rite tonu ki te kapu o te waewae o te kūao kau; wheriko tonu, rite tonu ki te kānapatanga o te parāhi kua oti te oro.
EZE 1:8 He ringa tangata anō ō rātou i raro i ō rātou parirau, i ō rātou taha e whā. Nā, ko rātou tokowhā, ko ō rātou mata, ko ō rātou parirau, koia tēnei.
EZE 1:9 He mea hono ō rātou parirau tētahi ki tētahi; kīhai rātou i tahuri i a rātou e haere ana; i haere tika tonu atu tētahi, tētahi.
EZE 1:10 Nā, ko te āhua o ō rātou mata: he mata tangata ō rātou, he mata raiona ō rātou tokowhā i te taha ki matau, he mata kau ō rātou tokowhā i te taha ki mauī, he mata ēkara anō ō rātou tokowhā.
EZE 1:11 Nā, ko ō rātou mata, ko ō rātou parirau he mea wehe a runga; ko o te mea kotahi e rua ngā parirau e piri ana tētahi ki tētahi, e rua hei hīpoki mō ō rātou tinana.
EZE 1:12 I haere tika tonu atu hoki rātou tētahi, tētahi. Ko te wāhi hei haerenga atu mō te wairua, haere ana rātou ki reira; kīhai rātou i tahuri i a rātou e haere ana.
EZE 1:13 Nā, ko te rite o aua mea ora, ko tō rātou āhua, koia anō kei te ngārahu ahi i te mea e kā ana, kei te āhua anō o te rama, i hāereere taua ahi i roto i aua mea ora, mura tonu, i puta mai ānō he uira i roto i te ahi.
EZE 1:14 Nā, ko te oma, ko te hokinga o aua mea ora, rite tonu te āhua ki tō te hikonga uira.
EZE 1:15 Nā, i tāku tirohanga ki ngā mea ora, nanā, ko tētahi wīra i runga i te whenua, i te taha o ngā mea ora, kotahi mō te mea kotahi o ōna mata e whā.
EZE 1:16 Ko te āhua o ngā wīra, me tō rātou mahinga, rite tonu te kara ki tō te perira: rite tonu aua wīra e whā; ko tō rātou āhua, ko tō rātou mahinga, me te mea he wīra i roto i te wīra.
EZE 1:17 I tō rātou haerenga i haere i runga i ō rātou taha e whā; kīhai i tahuri i a rātou e haere ana.
EZE 1:18 Nā, ko ō rātou awhi, tiketike rawa, he hanga whakawehi, kapi tonu anō i te kanohi ō rātou awhi i tētahi taha, i tētahi taha, o rātou e whā.
EZE 1:19 Nā, i te haerenga o ngā mea ora i haere anō ngā wīra i tō rātou taha, ā, ka ara ngā mea ora i runga i te whenua, ka ara anō ngā wīra.
EZE 1:20 Ko te wāhi hei haerenga atu mō te wairua, i haere rātou ki reira; ko reira hei haerenga mō te wairua; i ara anō ngā wīra ki runga i tō rātou ritenga atu. Nō te mea i roto i ngā wīra te wairua o te mea ora.
EZE 1:21 I haere ērā, ka haere ēnei; i tū ērā, ka tū ēnei; ā, ka ara ake ērā i runga i te whenua, ka ara anō ngā wīra i tō rātou ritenga atu; nō te mea kei roto te wairua o te mea ora i ngā wīra.
EZE 1:22 Nā, i runga ake i te māhunga o te mea ora ko te āhua o te kikorangi, rite tonu te kara ki tō te karaihe e wehingia ana, he mea hora atu i runga i ō rātou māhunga i te taha ki runga.
EZE 1:23 Nā, i raro i te kikorangi, ko ō rātou parirau, torotika tonu, anga tonu mai tētahi ki tētahi; o te mea kotahi e rua hei hīpoki i tētahi taha, o te mea kotahi anō e rua hei hīpoki i tērā taha o ō rātou tinana.
EZE 1:24 Ā, i a rātou e haere ana, i rongo ahau i te haruru o ō rātou parirau me te mea ko te haruru o ngā wai maha, me te mea anō ko te reo o te Kaha Rawa, he reo e turituri ana, ānō he ngē nō tētahi ope. I ngā wā i tū ai rātou i tukua iho ō rātou parirau.
EZE 1:25 I puta iho anō he reo i te kikorangi i runga i ō rātou māhunga; i te mea ka tū rātou, ka tukua iho ō rātou parirau.
EZE 1:26 Nā, i runga i te kikorangi i runga ake i ō rātou māhunga ko te āhua o tētahi torōna, he mea rite ki te kōhatu hapaira; ā, i runga i te āhua o te torōna ko tētahi āhua e rite ana ki tō te tangata i runga i taua torōna, i te taha ki runga.
EZE 1:27 I kite atu anō ahau me te mea nō te amipere te kara, he mea rite ki te āhua o te ahi i roto ā taka noa, taka noa, i te āhua o tōna hope, ā, haere whakarunga, i te āhua anō o tōna hope, ā, haere whakararo, i kite atu ahau me te mea ko te āhua o te ahi, ā, wheriko tonu te mārama i tētahi taha, i tētahi taha ōna.
EZE 1:28 Rite tonu ki te āhua o te kōpere i te kapua i te rā ua te āhua o te wherikotanga ā taka noa. Ko te āhua tēnā, ko te ritenga o te korōria o Ihowā. Nō tōku kitenga, tāpapa ana ahau ki raro. Nā, ka rongo ahau i te reo o tētahi e kōrero ana.
EZE 2:1 Nā, ka mea ia ki ahau, “E te tama a te tangata, e tū ōu waewae ki runga, ā, ka kōrero ahau ki a koe.”
EZE 2:2 Nā, kua tae mai te wairua ki roto ki ahau i tāna kōrerotanga ki ahau, i tāna meatanga kia tū ōku waewae ki runga; ā, ka rongo ahau i a ia e kōrero ana ki ahau.
EZE 2:3 Nā, ka mea ia ki ahau, “E te tama a te tangata, ka ungā koe e ahau ki ngā tama a Īharaira, ki ngā iwi whakakeke, kua whakakeke nei ki ahau; ko rātou ko ō rātou mātua kua tutū ki ahau ā taea noatia tēnei rā nei anō.
EZE 2:4 Ā, ko ngā tamariki he whakatoi, he kakī mārō. Nā, ka ungā koe e ahau ki a rātou, ā, me kī atu e koe ki a rātou, ‘Ko te kupu tēnei a te Ariki, a Ihowā.’
EZE 2:5 Nā, ko rātou, mā rātou e rongo, mā rātou e kore e rongo, (he whare whakakeke hoki rātou), ka mōhio, nā, i roto i a rātou te poropiti e noho ana.
EZE 2:6 Nā, ko koe, e te tama a te tangata, kaua e wehi i a rātou, kaua e wehi i ā rātou kupu, ahakoa he tātarāmoa, he tūmatakuru i tōu taha, ā, e noho ana koe i roto i ngā kopiona; kaua e wehi i ā rātou kupu, kaua hoki e pairi ina titiro mai rātou, ahakoa he whare whakakeke rātou.
EZE 2:7 Me kōrero anō e koe āku kupu ki a rātou, mā rātou e whakarongo, mā rātou rānei e kore e whakarongo; nui atu hoki tō rātou whakakeke.
EZE 2:8 Ko koe ia, e te tama a te tangata, whakarongo ki tāku e mea nei ki a koe. Kaua koe e whakakeke, kei rite ki taua whare whakakeke. Hāmama tōu māngai, kainga hoki te mea ka hoatu nei e ahau ki a koe.”
EZE 2:9 Nā, i tāku tirohanga atu, nanā, ko tētahi ringa e totoro mai ana ki ahau. Nanā, ko tētahi pukapuka i roto i te ringa.
EZE 2:10 Nā, wherahia ana e ia taua pukapuka ki tōku aroaro, he mea tuhituhi a roto, a waho. Ko te mea i tuhituhia ki reira he tangi, he uhunga, he auē.
EZE 3:1 Nā, ka kī mai ia ki ahau, “E te tama a te tangata, ko tāu i kite ai kainga; kainga tēnei pukapuka, ka haere, ka kōrero ki te whare o Īharaira.”
EZE 3:2 Nā, kua hāmama tōku māngai, ā, meinga ana ahau e ia kia kai i taua pukapuka.
EZE 3:3 I mea anō ia ki ahau, “E te tama a te tangata, kia kai tōu kōpū, kia kī anō hoki tōu puku i tēnei pukapuka ka hoatu nei e ahau ki a koe.” Kātahi ka kainga e ahau. Nā, me te honi taua mea i roto i tōku māngai te reka.
EZE 3:4 Nā, ka mea ia ki ahau: “E te tama a te tangata, whakatika, haere ki te whare o Īharaira, kōrerotia āku kupu ki a rātou.
EZE 3:5 Ehara hoki i te mea e unga ana koe ki te iwi he tauhou tōna reo, he pakeke rānei; engari ki te whare o Īharaira.
EZE 3:6 Ehara i te mea ki ngā iwi maha he rerekē nei, he pakeke hoki tō rātou reo, e kore nei koe e mōhio ki ā rātou kupu. He pono, ki te ungā koe e ahau ki a rātou, kua whakarongo rātou ki a koe.
EZE 3:7 E kore ia te whare o Īharaira e pai ki te whakarongo ki a koe; nō te mea e kore rātou e pai ki te whakarongo ki ahau; he rae pakeke hoki tō te whare katoa o Īharaira, he ngākau pakeke.
EZE 3:8 Nanā, kua oti tōu mata te mea e ahau kia pakeke ki ō rātou mata; tōu rae kia pakeke ki ō rātou rae.
EZE 3:9 Kua oti tōu rae te mea e ahau kia rite ki te kōhatu tino mārō, mārō atu i te matā. Kaua e wehi i a rātou, kaua hoki e pairi ina titiro rātou, ahakoa he whare whakakeke rātou.”
EZE 3:10 I mea anō ia ki ahau: “E te tama a te tangata, ko āku kupu katoa ka kōrerotia e ahau ki a koe rongoātia ki tōu ngākau, whakarangona mai anō e ōu taringa.
EZE 3:11 Nā, whakatika, haere ki ngā whakarau, ki ngā tama a tōu iwi, kōrero ki a rātou, mea atu, ‘Ko te kupu tēnei a te Ariki, a Ihowā’; mā rātou e rongo, mā rātou rānei e kore e rongo.”
EZE 3:12 Kātahi ka hāpainga ake ahau e te wairua, ā, ka rangona e ahau i muri i ahau he reo, he haruru nui e mea ana, Kia whakapaingia te korōria o Ihowā i tōna wāhi.
EZE 3:13 I rongo anō ahau i te haruru o ngā parirau o ngā mea ora e pā ana tētahi ki tētahi, i te haruru anō o ngā wīra i tō rātou taha, he haruru nui e ngateri haere ana.
EZE 3:14 Heoi, ka hāpainga ahau e te wairua, kāhakina ana ahau e ia; ā, haere pōuri ana ahau, me te pāwera o tōku wairua; ā, i kaha te ringa o Ihowā ki runga ki ahau.
EZE 3:15 Kātahi ahau ka tae ki ngā whakarau i Tereapipi, e noho rā i te awa, i Kepara, ki te wāhi hoki i noho ai rātou; ā, e whitu ngā rā ōku e noho ketekete ana i roto i a rātou.
EZE 3:16 Nā, i te mutunga o ngā rā e whitu, ka puta mai te kupu a Ihowā ki ahau, i mea ia:
EZE 3:17 “E te tama a te tangata, kua oti koe te mea e ahau hei kaitūtei mā te whare o Īharaira. Nā, whakarongo ki te kupu i tōku māngai, ā, ko koe hei kaiwhakatūpato māku i a rātou.
EZE 3:18 Ki te mea ahau ki te tangata kino, ‘Ko te mate kau mōu,’ ā, ka kore koe e whakatūpato i a ia, ka kore e kōrero, e whakatūpato i taua tangata kino ki tōna ara kino kia ora ai ia; ka mate taua tangata kino i runga i tōna hē. Otiia, ka rapua e ahau he utu mō ōna toto i tōu ringa.
EZE 3:19 Engari, ki te whakatūpato koe i taua tangata kino, ā, ka kore ia e tahuri mai i tōna kino, i tōna ara kino, ka mate ia i runga i tōna hē; otiia kua ora i a koe tōu wairua.
EZE 3:20 “Nā, ki te tahuri atu te tangata tika i tōna tika, ā, ka mahia e ia te kino, ā, ka hoatu e ahau he tūtukitanga waewae ki tōna aroaro, ka mate ia. I te mea kīhai koe i whakatūpato i a ia, ka mate ia i runga i tōna hara, e kore anō āna mahi tika i mahia e ia e maharatia; otiia ka rapua e ahau he utu mō ōna toto i tōu ringa.
EZE 3:21 Nā, ki te whakatūpato koe i te tangata tika kia kaua te tangata tika e hara, ā, ka kore ia e hara, he pono ka ora ia, nōna hoki i rongo ki te whakatūpato, ā, ka ora tōu wairua i a koe.”
EZE 3:22 Nā, kua tae mai te ringa o Ihowā ki runga ki ahau; ā, ka mea ia ki ahau, “Whakatika, haere ki te mānia, ā, ka kōrero ahau ki a koe ki reira.”
EZE 3:23 Kātahi ahau ka whakatika, ā, haere ana ki te mānia. Nā, ko te korōria o Ihowā i reira e tū ana, rite tonu ki te korōria i kitea e ahau ki te awa, ki Kepara, ā, tāpapa ana ahau.
EZE 3:24 Kātahi ka uru te wairua ki roto ki ahau, ā, ka meinga e ia ōku waewae kia tū ki runga. Nā, ka kōrero mai ia ki ahau, ka mea ki ahau: “Haere, tūtakina atu koe ki roto ki tōu whare.
EZE 3:25 Ko koe ia, e te tama a te tangata, nanā, ka meatia iho e rātou he here ki a koe, ā, ka herea koe ki aua here, e kore anō koe e puta ki roto ki a rātou.
EZE 3:26 Ka meinga anō e ahau tōu arero kia piri ki tōu ngao, ā, ka wahangū koe, e kore anō koe e waiho hei kairiri mō tō rātou hē; nō te mea he whare whakakeke rātou.
EZE 3:27 Otiia, i te wā e kōrero ai ahau ki a koe ka whakatuwheratia e ahau tōu māngai, ā, ka mea koe ki a rātou, ‘Ko te kupu tēnei a te Ariki, a Ihowā.’ Ko te tangata e rongo ana, māna e whakarongo; ko te tangata e kore e rongo kaua ia e whakarongo; he whare whakakeke hoki rātou.”
EZE 4:1 “Nā, ko koe hoki, e te tama a te tangata, tīkina tētahi pereki māu, whakatakotoria ki tōu aroaro, ka tuhituhi ai he pā, ko Hiruhārama, ki runga.
EZE 4:2 Whakapaea anō taua mea, hangā he taumaihi hei whakapae mōna; haupūria ake he pukepuke hei whakapae mōna, hangā he nohoanga taua, hei whawhai ki reira, hangā hoki ngā mea wāwāhi mōna, ā taka noa.
EZE 4:3 Tīkina anō tētahi rino pāraharaha māu whakatūria ake hei taiepa rino ki waenganui ōu, o te pā; kia anga atu anō tōu mata ki reira, ā, ka whakapaea a reira, me whakapae hoki e koe. Hei tohu tēnei ki te whare o Īharaira.
EZE 4:4 “Me takoto anō hoki koe ki tōu taha mauī, ka uta ai i te kino o te whare o Īharaira ki runga ki taua taha. Ko tāu wahanga i tō rātou kino ka rite ki te maha o ngā rā i takoto ai koe ki taua taha.
EZE 4:5 Kua oti hoki i ahau ngā tau o tā rātou kino te uta ki runga ki a koe, kei te maha o ngā rā te ritenga, arā e toru rau e iwa tekau ngā rā; nā, ka waha e koe te hē o te whare o Īharaira.
EZE 4:6 “Ā, ka poto ēnei i a koe, me takoto hoki koe ki tōu taha matau, ā, ka waha koe i te hē o te whare o Hūrā. Ko tāku i whakarite ai ki a koe, e whā tekau ngā rā; he rā mō te tau, he rā mō te tau.
EZE 4:7 Whakaangahia atu hoki tōu kanohi ki te whakapaenga o Hiruhārama, tahanga kau tōu ringa; ā, ka poropiti koe i te hē mō reira.
EZE 4:8 Nanā, ka meatia koe e ahau ki te here, ā, e kore koe e huri i tētahi taha ōu ki tētahi taha ōu, kia poto rā anō i a koe ōu rā whakapae.
EZE 4:9 “Tīkina hoki he wīti māu, he pārei, he pīni, he mirete, he rai, ka maka ki roto ki te oko kotahi, ka hanga i tētahi taro māu; kia rite ki te maha o ngā rā e takoto ai koe ki tōu taha, e toru rau e iwa tekau ngā rā e kainga ai taua mea e koe.
EZE 4:10 Me pāuna anō tāu kai e kainga ai e koe, kia rua tekau ngā hekere i te rā kotahi; me kai e koe i tēnei wā, i tēnei wā.
EZE 4:11 Me mēhua anō te wai e inumia e koe; ko te wāhi whakaono o te hine, me inu e koe i tēnei wā, i tēnei wā.
EZE 4:12 Ā, me kai e koe te kai ānō he keke pārei, ā, me tunu taua mea i tā rātou tirohanga ki te paru e puta mai ana i te tangata.”
EZE 4:13 Ā, i kī mai a Ihowā, “Ka pēnā anō te kai a ngā tama a Īharaira, i tā rātou taro poke i roto i ngā tauiwi e peia atu ai rātou e ahau.”
EZE 4:14 Nā, ko tāku kīanga ake, “Auē, e te Ariki, e Ihowā! Nanā, kīhai tōku wairua i poke; kīhai anō ahau i kai i te mea mate māori, i te mea i haea e te kīrehe, o tōku tamarikitanga anō ā mohoa noa nei; kīhai anō tētahi kikokiko whakarihariha i tapoko ki roto ki tōku māngai.”
EZE 4:15 Kātahi ka mea ia ki ahau, “Titiro, kua hoatu e ahau ki a koe te paru kau hei whakarite mō te paru tangata, ā, ka tunu koe i tāu taro ki aua mea.”
EZE 4:16 Nā, ka mea ia ki ahau: “E te tama a te tangata, kua oti te whawhati e ahau te tokotoko, arā te taro i Hiruhārama; ā, ko tā rātou taro e kai ai he mea pāuna, i runga anō i te mānukanuka; he mea mēhua anō te wai, ka inumia e rātou i runga i te ketekete.
EZE 4:17 He mea kia kore ai he taro, he wai, mā rātou, ketekete iho tētahi ki tētahi, memeha noa iho i runga i tō rātou hē.”
EZE 5:1 “Nā, ko koe, e te tama a te tangata, tīkina he hoari koi māu, tīkina hei heu māu. Ko te heu a te kaiheu, ka whakahaere ai ki runga ki tōu māhunga, ki tōu pāhau anō. Kātahi ka tiki i ētahi pāuna hei pāuna māu, ka wehe ai i ngā makawe.
EZE 5:2 Ko tētahi whakatoru o ngā wāhi me tahu e koe ki te ahi ki waenganui o te pā, ina rite ngā rā o te whakapaenga. Nā, ka mau ki tētahi whakatoru, ka hahau ki te hoari i tētahi taha ōna, i tētahi taha; ā, ko tētahi whakatoru me tītari atu ki te hau. Ka maunu hoki i ahau te hoari hei whai i a rātou.
EZE 5:3 Me tango anō e koe ētahi o aua makawe, kia torutoru, ka takai ki roto ki ngā pito o tōu.
EZE 5:4 Me tango ētahi o aua makawe, ka maka ki waenganui o te ahi, ka tahu ai ki te ahi; ka puta mai i reira he ahi ki te whare katoa o Īharaira.
EZE 5:5 “Ko te kupu tēnei a te Ariki, a Ihowā: Ko Hiruhārama tēnei; he mea whakatū ia nāku ki waenga o ngā iwi, ā, ko ngā whenua e karapoi ana i a ia.
EZE 5:6 Ā, kua whakakeke ia ki āku whakaritenga, nui atu hoki tāna mahi kino i tā ngā iwi, ki āku tikanga hoki, nui atu i tā ngā whenua i tētahi taha ōna, i tētahi taha. Kua paopao nei hoki rātou ki āku whakaritenga, ā, kīhai i waiho e rātou āku tikanga hei ara mō rātou.
EZE 5:7 “Nō reira ko te kupu tēnei a te Ariki, a Ihowā: I te mea kua nui ake tō koutou tutū i tō ngā iwi i tētahi taha o koutou, i tētahi taha, kīhai hoki koutou i haere i runga i āku tikanga, kīhai i mahi i āku whakaritenga, kīhai anō i rite tā koutou mahi ki ngā ritenga a ngā iwi i tētahi taha o koutou, i tētahi taha.
EZE 5:8 “Nō reira ko te kupu tēnei a te Ariki, a Ihowā: Nanā ko ahau, ko ahau rawa nei, hei hoariri mōu; ā, ka whakaritea e ahau he whakaritenga i waenganui ōu i te tirohanga a ngā iwi.
EZE 5:9 Ka mahia anō e ahau i roto i a koe he mea kīhai i mahia e ahau i mua, e kore he pēnā e mahia e ahau ā muri; mō āu mea whakarihariha katoa hoki.
EZE 5:10 Ā, ka kai ngā mātua i ngā tamariki i roto i a koe, ka kai anō ngā tamariki i ō rātou mātua; ka mahia anō e ahau he whakaritenga i roto i a koe, ka tītaria atu anō e ahau ōu mōrehu katoa ki ngā hau katoa.
EZE 5:11 Mō reira, e ora ana ahau, e ai tā te Ariki, tā Ihowā, kua whakapokea nei e koe tōku wāhi tapu ki āu mea whakarihariha katoa, ki āu mea anuanu katoa, mō reira ka tino whakaititia anō koe e ahau; e kore tōku kanohi e manawapā, e kore anō ahau e tohu.
EZE 5:12 Ka mate tētahi whakatoru ōu i te mate urutā, ka poto atu hoki i te hemokai i roto i a koe; ā, ka hinga tētahi whakatoru ōu i te hoari i tētahi taha ōu, i tētahi taha. Nā, ko tētahi whakatoru, ka tītaria e ahau ki ngā hau katoa, ka maunu anō i ahau te hoari hei whai i a rātou.
EZE 5:13 “Nā, ka whakapaua atu tōku riri, ka meinga anō e ahau kia tutuki tōku weriweri ki runga ki a rātou, ka whai whakamārietanga anō ahau; ā, ka mōhio rātou ko Ihowā ahau te kōrero nei i runga i tōku hae, ina whakapaua e ahau tōku weriweri ki runga ki a rātou.
EZE 5:14 “Ka meinga anō koe e ahau hei ururua, hei ingoa kino i roto i ngā iwi i tētahi taha ōu, i tētahi taha, i te tirohanga a ngā tāngata katoa e haere atu ana.
EZE 5:15 Heoi, ka waiho a konā hei ingoa kino, hei tāwainga, hei mea e ako ai e mīharo ai ngā iwi i tētahi taha ōu; i tētahi taha, ina mahia e ahau ngā whakaritenga ki a koe i runga i te riri, i te weriweri, i ngā whakatūpehupehu, āritarita rawa. Nāku, nā Ihowā te kupu.
EZE 5:16 Ina tukua e ahau ki a rātou ngā pere kino o te hemokai, hei whakamōtī, ko āku e tuku atu ai hei whakamōtī i a koutou; ka whakanuia anō e ahau tō koutou hemokai, whati iho tō koutou tokotoko, arā te taro.
EZE 5:17 Ka tukua atu anō e ahau te hemokai ki a koutou, me ngā kīrehe kikino, ā, ka poto i a rātou āu tamariki; ka tika atu anō te mate urutā me te whakaheke toto i waenganui i a koe; ka kawea atu anō e ahau te hoari ki a koe. Nāku nā Ihowā te kupu.”
EZE 6:1 I puta anō te kupu a Ihowā ki ahau, i mea:
EZE 6:2 “E te tama a te tangata, anga atu tōu mata ki ngā maunga o Īharaira, ka poropiti ki a rātou,
EZE 6:3 ka mea atu: E ngā maunga o Īharaira, whakarongo ki te kupu a te Ariki, a Ihowā. Ko te kupu tēnei a te Ariki, a Ihowā ki ngā maunga, ki ngā pukepuke, ki ngā awa, ki ngā raorao: Tēnei ahau, ahau nei anō, te kawe nei i te hoari ki runga ki a koutou, ā, ka kore i ahau ō koutou wāhi tiketike.
EZE 6:4 Ka whakaururuatia ā koutou āta, ka tukitukia ā koutou whakapakoko; ā, ka makā e ahau ki mua i ā koutou whakapakoko ō koutou tāngata i whakamatea.
EZE 6:5 Ka takoto anō i ahau ngā tinana o ngā tama a Īharaira ki mua i ā rātou whakapakoko; ka tītaria anō e ahau ō koutou wheua ki ā koutou āta ā taka noa.
EZE 6:6 I ō koutou nohoanga katoa ka ururuatia ngā pā, ka mokemoke anō ngā wāhi tiketike, he mea kia ururuatia ai ā koutou āta, kia mokemoke ai; kia tukitukia ai anō ā koutou whakapakoko, mutu ake tā rātou; ka pōutoa anō ā koutou whakapakoko, kia whakakāhoretia ai hoki ā koutou mahi.
EZE 6:7 Ka hinga anō te parekura i roto i a koutou; ā, ka mōhio koutou ko Ihowā ahau.
EZE 6:8 “Ka toe anō ia i ahau ētahi, kia mawhiti ai ētahi o koutou i te hoari i roto i ngā iwi, ina tītaria atu koutou ki ngā whenua.
EZE 6:9 Nā, ko te hunga o koutou e mawhiti, ka mahara rātou ki ahau i roto i ngā iwi e whakaraua atu ai rātou, ki tāku pākaruhanga i tō rātou ngākau pūremu, kua mawehe atu nei i ahau, me ō rātou kanohi hoki, e haere nei ki te pūremu ki ō rātou whakapakoko; ā, anuanu iho rātou ki a rātou anō mō ngā kino i mahia nei e rātou, mō ā rātou mea whakarihariha katoa.
EZE 6:10 Ka mōhio hoki rātou ko Ihowā ahau; ehara anō tāku i te mea noa iho i tāku kīanga ka mahia tēnei kino ki a rātou.
EZE 6:11 “Ko te kupu tēnei a te Ariki, a Ihowā: Papaki tōu ringa, takahi iho tōu waewae, me te kī ake anō, Auē te mate mō ngā kino whakarihariha katoa o te whare o Īharaira! Ka hinga hoki rātou i te hoari, i te hemokai, i te mate urutā.
EZE 6:12 Ko te tangata i tawhiti ka mate i te mate urutā; ko te tangata e tata ana ka hinga i te hoari; ko te tangata e toe ana, e whakapaea ana, ka mate i te hemokai. Nā, ka whakapaua e ahau tōku riri ki a rātou.
EZE 6:13 Ā, ka mōhio koutou ko Ihowā ahau, ina takoto ō rātou tāngata i patua i waenganui o ā rātou whakapakoko i tētahi taha o ā rātou āta, i tētahi taha, i runga i ngā pukepuke tiketike katoa, i runga i ngā tihi katoa o ngā maunga, i raro anō i ngā rākau kōuru nui katoa, i raro i ngā oki pūruru katoa i te wāhi i tukua atu ai e rātou te kakara reka ki ā rātou whakapakoko katoa.
EZE 6:14 Ka totoro atu hoki tōku ringa ki a rātou, ā, ka meinga te whenua kia ururua, kia takoto kau, i te koraha e anga ana ki Ripirata, puta noa i ō rātou nohoanga; ā, ka mōhio rātou ko Ihowā ahau.”
EZE 7:1 I puta mai anō te kupu a Ihowā ki ahau; i mea:
EZE 7:2 “Nā, e koe, e te tama a te tangata, ko te kupu tēnei a te Ariki, a Ihowā, ki te whenua o Īharaira: He whakamutunga! Kua tae mai te whakamutunga ki ngā pito e whā o te whenua.
EZE 7:3 Ko āianei te whakamutunga mōu, ka tukua atu e ahau tōku riri ki runga ki a koe, ka rite anō ki ōu ara tāku whakarite mōu; ka hoatu anō e ahau āu mea whakarihariha katoa ki runga ki a koe.
EZE 7:4 E kore anō tōku kanohi e manawapā ki a koe, e kore ahau e tohu. Engari, ka hoatu e ahau te utu o ōu ara ki a koe; ka mau hoki āu mea whakarihariha ki roto i a koe. Ā, ka mōhio koutou ko Ihowā ahau.
EZE 7:5 “Ko te kupu tēnei a te Ariki, a Ihowā: He kino! He kino kotahi! Nanā, te haere mai nei.
EZE 7:6 He whakamutunga kua tae mai, kua tae mai te whakamutunga, kei te oho ki a koe; nanā, e haere mai nei.
EZE 7:7 Ko te mea kua rite mōu, tēnei kua tae mai, e te tangata o te whenua. Kua tae mai te wā, kua tata te rā – he rā nō te ngangau, ehara i te rā o te umere harakoa i runga o ngā maunga.
EZE 7:8 Ākuanei ka tata te ringihia e ahau tōku weriweri ki runga ki a koe, ka whakapaua e ahau tōku riri ki a koe, ka rite anō ki ōu ara tāku whakarite mōu; ka hoatu anō e ahau he utu ki a koe mō āu mea whakarihariha katoa.
EZE 7:9 E kore anō tōku kanohi e manawapā; e kore ahau e tohu. Ka rite ki ōu ara tāku e hoatu ai ki a koe, ka mau anō āu mea whakarihariha ki waenganui i a koe. Ā, ka mōhio koutou e whiu ana anō ahau, a Ihowā.
EZE 7:10 “Nanā, te rā! Nanā, kua tae mai! Kua puta te mea kua rite mōu. Kua puāwai te tokotoko, kua kōpuku te whakapehapeha.
EZE 7:11 Kua ara te tutū hei tokotoko mō te kino; e kore e toe tētahi o rātou, tētahi rānei o tō rātou mano, o ō rātou taonga rānei; kāhore anō hoki he arikitanga i roto i a rātou.
EZE 7:12 Kua tae mai te wā, kua tata te rā; kaua te kaihoko mai e koa; kaua anō te kaihoko atu e pōuri, nō te mea ka pā te riri ki tōna mano katoa.
EZE 7:13 Nō te mea ahakoa i te ora rāua, e kore te tangata i te utu e hoki atu ki te mea i hokona; mō ōna mano katoa hoki te whakakitenga, e kore rātou e hoki; e kore anō tētahi e whakakaha i a ia i runga i tōna hē i āna mahi i a ia e ora ana.
EZE 7:14 Kua whakatangihia e rātou te tētere, ā, kua whakaritea ngā mea katoa; heoi kāhore he tangata e haere ana ki te whawhai; nō te mea kei runga tōku riri i ōna mano katoa.
EZE 7:15 “I waho ko te hoari, i roto ko te mate urutā, ko te hemokai; ko te tangata i te pārae ka mate i te hoari; ko te tangata i te pā ka pau i te hemokai, i te mate urutā.
EZE 7:16 Ko ngā mōrehu o rātou e mawhiti, ka mawhiti, ā, ka noho ki ngā maunga, ka rite ki ngā kūkupa o ngā awaawa, tumutumu katoa rātou i runga i tōna hē, i tōna hē.
EZE 7:17 Ka ngoikore katoa ngā ringa, ā, ka ngonge ngā turi ānō he wai.
EZE 7:18 Ka whītikiria anō he kākahu taratara ki a rātou, ka taupokina rātou e te wehi. He whakamā kei ngā mata katoa, ā, i runga i ō rātou māhunga katoa ko te pākira.
EZE 7:19 Ka makā e rātou tā rātou hiriwa ki ngā ara, ka waiho tā rātou kōura hei mea poke. E kore tā rātou hiriwa, tā rātou kōura, e tau hei whakaora i a rātou i te rā o tō Ihowā riri. E kore e ngata ō rātou wairua, e kore anō e kī ō rātou puku i ērā. Ko te tūtukitanga waewae hoki tērā i hē ai rātou.
EZE 7:20 Nā, ko te ātaahua o tōna whakapaipai, nāna i whakawhiwhi ki te korōria. Heoi, hangā ana e rātou ngā āhua o ā rātou mea anuanu, o ā rātou mea whakarihariha ki reira; nō reira meinga iho e ahau hei mea poke ki a rātou.
EZE 7:21 Ka tukua anō e ahau hei taonga parakete ki te ringa o ngā tāngata kē, ki ngā tāngata kino o te whenua, hei taonga pārau; ā, ka whakapokea e rātou.
EZE 7:22 Ka tahuri atu anō tōku mata i a rātou, ā, ka whakapokea e rātou tōku wāhi ngaro; ka tae mai anō ngā kaipāhua ki reira whakapoke ai.
EZE 7:23 “Hangā he mekameka! Kua kī hoki te whenua i ngā hē whakaheke toto; kī tonu hoki te pā i te tutū.
EZE 7:24 Mō reira ka kawea mai e ahau ngā tauiwi kino rawa, ā, ka riro ō rātou whare i a rātou. Ka mutu anō i ahau te whakapehapeha o te hunga kaha ka whakapokea ō rātou wāhi tapu.
EZE 7:25 Kei te haere mai te whakangaromanga; ka rapua e rātou te rangimārie; heoi kāhore noa iho.
EZE 7:26 Ka tae mai te aituā ki runga ki te aituā, te rongo ki runga ki te rongo; ā, ka rapua e rātou tā te poropiti whakakitenga; heoi ka whakakāhoretia te ture i te tohunga, te whakaaro i ngā kaumātua.
EZE 7:27 Ka tangi te kīngi, ko te ngaromanga hoki he kākahu mō te rangatira, ka ohooho anō ngā ringa o te iwi o te whenua. Ka rite ki ō rātou ara tāku e mea ai ki a rātou, kei ā rātou ritenga anō hoki he ritenga mō tāku whakawā i a rātou; ā, ka mōhio rātou ko Ihowā ahau.”
EZE 8:1 Nā, i te ono o ngā tau, i te ono o ngā marama, i te rima o ngā rā o te marama, e noho ana ahau i roto i tōku whare, me te noho anō ngā kaumātua o Hūrā i tōku aroaro, nā, ka tau iho te ringa o te Ariki, o Ihowā, ki runga ki ahau i reira.
EZE 8:2 Nā, ka titiro atu ahau, nanā, ko tētahi āhua me te mea he ahi ki te titiro atu; i tōna hope ā whakararo, he ahi ki te titiro atu; i tōna hope anō ā whakarunga, he wherikotanga ki te titiro atu, he mea rite te kara ki tō te amipere.
EZE 8:3 Nā, ka totoro mai te āhua o te ringa, ā, hopukia ana ahau e ia i tētahi o ngā makawe o tōku mātenga. Kātahi ahau ka hāpainga atu e te wairua ki waenganui o te whenua, o te rangi, ā, kawea ana ahau e ia ki Hiruhārama, he whakakitenga hoki nā te Atua, ki te kūwaha o te kēti o tō roto marae e anga ana ki te raki; kei reira nei te nohoanga o te whakapakoko o te hae, e puta ai te hae.
EZE 8:4 Nā, i reira anō te korōria o te Atua o Īharaira, he pērā me te kitenga i kitea e ahau ki te mānia.
EZE 8:5 Kātahi ka mea ia ki ahau, “E te tama a te tangata, tēnā rā, anga atu ōu kanohi rā te ara ki te raki.” Heoi, ka anga ōku kanohi rā te ara ki te raki, nanā, i te taha ki te raki, i te kūwaha o te āta, ko tēnei whakapakoko o te hae i te tomokanga atu.
EZE 8:6 Ā, ka mea ia ki ahau, “E te tama a te tangata, ka kite rānei koe i tā rātou e mea nei? Arā, i ngā mea whakarihariha nui e mahia nei e te whare o Īharaira ki konei, e matara ai ahau i tōku wāhi tapu? Otiia, tērā koe e kite anō i ētahi atu mea whakarihariha nunui.”
EZE 8:7 Nā, ka kawea ahau e ia ki te kūwaha o te marae; ā, nō tāku tirohanga atu, nanā, ko tētahi puta i te taiepa.
EZE 8:8 Kātahi ia ka mea ki ahau, “E te tama a te tangata, tēnā, keria te taiepa.” Ā, i tāku keringa i te taiepa, nā, ko tētahi kūwaha.
EZE 8:9 Ā, ka mea tērā ki ahau, “Haere ki roto, kia kite ai koe i ngā mea whakarihariha, i ngā mea kino e mahia nei e rātou ki konei.”
EZE 8:10 Heoi, haere ana ahau ki roto, ā, ka kite; nā, ko ngā āhua katoa o ngā mea ngōkingōki, o ngā kararehe whakarihariha, me ngā whakapakoko katoa o te whare o Īharaira, he mea tuhituhi ki te taha o te whare ā taka noa, taka noa.
EZE 8:11 Ā, i ō rātou aroaro e tū ana e whitu tekau ngā tāngata, nō ngā kaumātua o te whare o Īharaira, ā, i waenganui o rātou e tū ana ko Iaatania tama a Hapana, he tahu whakakakara i te ringa o tēnei, o tēnei; ā, i kake whakarunga te kakara o te kapua o te whakakakara.
EZE 8:12 Kātahi ia ka mea ki ahau, “Kua kite rānei koe, e te tama a te tangata, i tā ngā kaumātua o te whare o Īharaira e mea nei i te pōuri, ia tangata, ia tangata, i ōna whare whakaahua? E kī ana hoki rātou, ‘E kore a Ihowā e kite i a tātou; kua mahue te whenua i a Ihowā.’ ”
EZE 8:13 I mea mai anō ia ki ahau, “Tērā koe e kite anō i ētahi atu mea whakarihariha nunui e mahia ana e rātou.”
EZE 8:14 Kātahi ahau ka kawea e ia ki te kūwaha o te kēti o te whare o Ihowā, e anga ana whaka te raki; nā, ko ngā wāhine e noho ana i reira, e tangi ana ki a Tāmutu.
EZE 8:15 Kātahi ia ka mea ki ahau, “Ka kite rānei koe i tēnei, e te tama a te tangata? Tērā koe e kite anō i ētahi mea whakarihariha nunui atu i ēnei.”
EZE 8:16 Nā, ka kawea ahau e ia ki tō roto marae o te whare o Ihowā; nanā, i te kūwaha o te temepara o Ihowā, i te takiwā o te whakamahau, o te āta, ko ētahi tāngata, ki te whakaaro iho e rua tekau mā rima, ko ō rātou tuarā e anga ana ki te temepara o Ihowā, ko ō rātou mata ki te rāwhiti; e koropiko ana rātou ki te rā whaka te rāwhiti.
EZE 8:17 Kātahi ka mea ia ki ahau, “Ka kite rānei koe i tēnei, e te tama a te tangata? He mea māmā noa ake ianei tēnei ki te whare o Hūrā kia mahia e rātou ngā mea whakarihariha e mahia nei e rātou ki konei? Nā rātou hoki i kapi ai te whenua i te tutū, ā, hoki mai ana rātou ki te whakapātaritari i ahau. Nanā, kei te whakapā anō rātou i te manga ki tō rātou ihu.
EZE 8:18 Nā, ka mahi anō ahau i runga i te weriweri; e kore tōku kanohi e manawapā, e kore anō ahau e tohu; ahakoa nui tō rātou reo e karanga ai ki ōku taringa, e kore ahau e rongo ki a rātou.”
EZE 9:1 I karanga anō ia ki ōku taringa, he nui te reo, i mea, “Kia whakatata mai ngā kaitirotiro o te pā, me tāna patu whakangaro i te ringa o tēnei, o tēnei.”
EZE 9:2 Nā, tokoono ngā tāngata e haere mai ana i te ara o tō runga kūwaha e anga ana ki te raki, me tāna patu whakamate anō i te ringa o tēnei, o tēnei. Ko tētahi tangata anō i roto i a rātou he rīnena tōna kākahu, he pounamu anō nā te kaituhituhi i tōna taha. Nā, tomo ana rātou, tū ana i te taha o te āta parāhi.
EZE 9:3 Nā, kua kake atu te korōria o te Atua o Īharaira i te kerupa, ko tōna taunga nei tērā, ki te paepae o te whare. Nā, ka karanga tērā ki te tangata, he rīnena nei tōna kākahu, ki tērā kei tōna taha nei te pounamu a te kaituhituhi;
EZE 9:4 ā, ka mea a Ihowā ki a ia, “E tika nā waenganui i te pā, nā waenga i Hiruhārama, ka whakapiri i tētahi tohu ki ngā rae o ngā tāngata e auē ana, e tangi ana, mō ngā mea whakarihariha katoa e mahia ana i waenganui o konei.”
EZE 9:5 I mea anō ia ki ērā atu, me te whakarongo anō ahau, “E tika koutou nā waenganui o te pā i muri i a ia patu ai. Kaua ō koutou kanohi e manawapā, kaua e tohu.
EZE 9:6 Patua kia ngaro te kaumātua, te taitama, te kōtiro, me ngā kōhungahunga, me ngā wāhine; kaua ia e tata ki tētahi tangata i a ia nei te tohu; me tīmata ki tōku wāhi tapu.” Nā, kua tīmata rātou ki ngā kaumātua i te aronga o te whare.
EZE 9:7 I mea anō ia ki a rātou, “Whakapokea te whare, whakakīia ngā marae ki te tūpāpaku. Haere koutou!” Heoi, haere ana rātou, nā, kei te patu i roto i te pā.
EZE 9:8 Nā, i a rātou e patu ana, ā, ka mahue ahau, ka tāpapa ahau, ka karanga, ka mea, “Auē, e te Ariki, e Ihowā! Ka ngaro ianei i a koe ngā mōrehu katoa o Īharaira, i te mea ka ringihia nei e koe tōu weriweri ki runga ki Hiruhārama?”
EZE 9:9 Anō rā ko ia ki ahau, “He nui rawa te hē o te whare o Īharaira rāua ko Hūrā, kua kī hoki te whenua i te toto, kua kī anō te pā i te whakariroinga o te whakawā. E mea ana hoki rātou, ‘Kua mahue te whenua i a Ihowā, e kore a Ihowā e kite.’
EZE 9:10 Nā, ko ahau nei hoki, e kore tōku kanohi e manawapā, e kore ahau e tohu; ka hoatu e ahau te utu o tō rātou ara ki runga ki tō rātou māhunga.”
EZE 9:11 Nā, ko te tangata i te kākahu rīnena, tērā kei tōna taha rā te pounamu mangumangu, kōrerotia ana e ia taua mea, i kī ia, “Kua oti i ahau tāu i whakahau rā ki ahau.”
EZE 10:1 Kātahi ahau ka titiro atu, nanā, i te kikorangi, i runga ake i te māhunga o ngā kerupima, ka kitea i runga i a rātou me te mea he kōhatu hapaira, rite tonu ki te āhua o te torōna ki te titiro.
EZE 10:2 Nā, ka kōrero ia ki te tangata i te kākahu rīnena, i mea ia, “Tomo atu ki waenganui o ngā wīra e hurihuri nā, arā ki raro i te kerupa, whakakīia ōu ringa e rua ki ngā waro ahi i waenganui i ngā kerupima, ka rui ki runga ki te pā.” Nā, haere ana ia me te titiro anō ahau.
EZE 10:3 Nā, i tū ngā kerupima ki te taha ki matau o te whare, i te tomonga o taua tangata; kī tonu hoki tō roto marae i te kapua.
EZE 10:4 Kātahi ka kake te korōria o Ihowā te kerupa, ā, ka tū i runga ake i te paepae o te whare; kī tonu iho te whare i te kapua, kī tonu hoki te marae i te kānapatanga o tō Ihowā korōria.
EZE 10:5 Nā, ko te haruru o ngā parirau, o ngā kerupima, i rangona ki te marae rā anō o waho, me te mea ko te reo o te Atua Kaha Rawa ina kōrero.
EZE 10:6 Nā, i tāna whakahaunga i te tangata i te kākahu rīnena, i tāna meatanga, “Tīkina he ahi i waenganui o ngā wīra hurihuri, i waenganui o ngā kerupima,” kātahi tērā ka haere ki roto, ka tū ki te taha o tētahi wīra.
EZE 10:7 Nā, ka totoro te ringa o te kerupa i waenganui o ngā kerupima ki te ahi i waenganui o ngā kerupima, hāpainga ana e ia i reira, hoatu ana ki ngā ringa o tērā i te kākahu rīnena. Nā, tangohia ana e tērā, ā, puta atu ana.
EZE 10:8 I kitea anō te āhua o te ringa tangata i ngā kerupima i raro i ō rātou parirau.
EZE 10:9 Ā, i kite ahau, nā, e whā ngā wīra i te taha o ngā kerupima, kotahi te wīra i te taha o te kerupa kotahi, ko tētahi wīra i te taha o tētahi atu kerupa. Nā, ko te āhua o ngā wīra koia anō kei te kara o te kōhatu perira.
EZE 10:10 Nā, ki te tirohia atu aua mea, kotahi anō te āhua o rātou e whā, me te mea kotahi te wīra i roto i te wīra.
EZE 10:11 I tō rātou haerenga i haere i ō rātou taha e whā; kīhai i tahuri i a rātou i haere rā, engari, ko te wāhi i anga atu ai te mātenga, whai tonu atu rātou ki reira; kīhai i tahuri i a rātou i haere rā.
EZE 10:12 Nā, ko tō rātou tinana katoa, ko ō rātou tuarā, ko ō rātou ringa, ko ō rātou parirau, ā, ko ngā wīra hoki, kapi tonu i te kanohi ā taka noa, arā ngā wīra i ā rātou tokowhā.
EZE 10:13 Nā, ko ngā wīra rā, i karangatia i ahau anō e whakarongo ana, ko “ngā wīra hurihuri.”
EZE 10:14 Nā, e whā ngā mata o tētahi, o tētahi: ko te mata tuatahi he mata kerupa, ko te mata tuarua he mata tangata, ko te tuatoru he mata raiona, ko te tuawhā he mata ēkara.
EZE 10:15 Nā, ka maiangi ngā kerupima ki runga. Ko te mea ora tēnei i kitea e ahau ki te awa, ki Kepara.
EZE 10:16 Nā, i te haerenga o ngā kerupima, i haere anō ngā wīra i tō rātou taha, ā, ka ara ake ngā parirau o ngā kerupima, he mea kia maiangi ake ai i te whenua, kīhai aua wīra i tahuri kē i tō rātou taha.
EZE 10:17 Ka tū ērā, ka tū ēnei; ka maiangi ērā ki runga, ka maiangi anō ēnei ki runga; nō te mea i roto i a rātou te wairua o te mea ora.
EZE 10:18 Nā, kua riro atu te korōria o Ihowā i runga i te paepae o te whare, tau ana ki runga ki ngā kerupima.
EZE 10:19 Nā, ka ara ngā parirau o ngā kerupima, maiangi ana i te whenua, i ahau e titiro atu ana i tō rātou haerenga atu, me ngā wīra anō i tō rātou taha. Ā, tū ana rātou i te kūwaha o te kēti ki te rāwhiti o te whare o Ihowā; ā, i runga i a rātou te korōria o te Atua o Īharaira, i te taha ki runga.
EZE 10:20 Ko te mea ora tēnei i kitea e ahau i raro i te Atua o Īharaira, i te awa, i Kepara; i mōhio anō ahau he kerupima ērā.
EZE 10:21 E whā ngā mata o tēnei, o tēnei, e whā anō ngā parirau o tēnei, o tēnei; i raro anō i ō rātou parirau ko te āhua o te ringa tangata.
EZE 10:22 Nā, ko te āhua o ō rātou mata ko aua mata i kitea rā e ahau ki te awa, ki Kepara, ō rātou āhua me rātou anō; i tika tonu atu rātou tētahi, tētahi.
EZE 11:1 I hāpainga ake anō ahau e te wairua, ā, kawea ana e ia ki te kēti ki te rāwhiti o te whare o Ihowā, ki tērā e anga rā ki te rāwhiti. Nā, i te kūwaha o te kēti e rua tekau mā rima ngā tāngata; ā, i kite ahau i roto i a rātou i a Iaatania tama a Āturu rāua ko Peratia tama a Penaia, he rangatira nō te iwi.
EZE 11:2 Nā, ka mea ia ki ahau, “E te tama a te tangata, ko ngā tāngata ēnei e whakaaro ana i te kino, e whakatakoto ana i te tikanga hē i roto i tēnei pā.
EZE 11:3 E kī ana, ‘Kāhore anō i tata te wā e hanga whare ai. Ko tēnei pā te kōhua, ko tātou te kikokiko.’
EZE 11:4 Mō reira poropititia te hē mō rātou; poropititia, e te tama a te tangata.”
EZE 11:5 Nā, ka tau te Wairua o Ihowā ki ahau, ā, ka mea ki ahau, kī atu: “Ko te kupu tēnei a Ihowā: Ko tā koutou kōrero tēnei, e te whare o Īharaira. Nā, ko ngā mea e puta ake ana i ō koutou wairua, mōhio tonu ahau.
EZE 11:6 Kua whakatokomahatia e koutou ā koutou tūpāpaku ki tēnei pā, kua whakakīia anō e koutou ōna huarahi ki te tūpāpaku.
EZE 11:7 “Mō reira ko te kupu tēnei a te Ariki, a Ihowā: Ko ā koutou tūpāpaku kua hinga nei i a koutou ki waenganui o tēnei pā, ko rātou te kikokiko, ko tēnei pā te kōhua. Ko koutou ia ka whakaputaina atu i waenganui o konei.
EZE 11:8 I wehi koutou i te hoari; ka kawea mai anō e ahau te hoari ki a koutou, e ai tā te Ariki, tā Ihowā.
EZE 11:9 Ka whakaputaina atu anō koutou e ahau i waenganui o konei, ka hoatu ki te ringa o te tangata kē, ka mahia anō e ahau he whakawā i waenganui i a koutou.
EZE 11:10 Ka hinga koutou i te hoari; ka whakawākia koutou e ahau ki te rohe o Īharaira, ā, ka mōhio koutou ko Ihowā ahau.
EZE 11:11 E kore tēnei pā e waiho hei kōhua mō koutou, e kore anō hoki koutou e waiho hei kikokiko mō roto; ka whakawākia koutou e ahau ki te rohe o Īharaira.
EZE 11:12 Ā, ka mōhio koutou ko Ihowā ahau; kīhai hoki koutou i haere i runga i āku tikanga, ā, kīhai i mahia e koutou āku whakaritenga, engari i rite tonu ā koutou mahi ki ngā ritenga a ngā iwi i tētahi taha, i tētahi taha o koutou.”
EZE 11:13 Nā, i ahau e poropiti ana, ka mate a Peratia tama a Penaia. Kātahi ahau ka tāpapa ki raro, he nui tōku reo ki te karanga, i mea ahau, “Auē, e te Ariki, e Ihowā! Ka poto rawa rānei i a koe ngā mōrehu o Īharaira?”
EZE 11:14 I puta mai anō te kupu a Ihowā ki ahau, i mea ia,
EZE 11:15 “E te tama a te tangata, ko ōu tuākana, ko ōu tēina, ko ōu whanaunga, ko te whare katoa anō o Īharaira, rūpeke, rūpeke, ko rātou ēnei, kua kī mai nei ngā tāngata o Hiruhārama ki a rātou, ‘Kia matara atu i a Ihowā; kua hōmai tēnei whenua ki a mātou hei kāinga tupu.’
EZE 11:16 “Mō reira me kī atu: Ko te kupu tēnei a te Ariki, a Ihowā: Ahakoa i makā atu rātou e ahau ki tawhiti, ki roto ki ngā iwi, ahakoa i whakamararatia rātou e ahau ki ngā whenua, ka ai anō ia ahau hei wāhi tapu mō rātou i ngā whenua e tae ai rātou mō te wā nohinohi nei.
EZE 11:17 “Mō reira me kī atu: Ko te kupu tēnei a te Ariki, a Ihowā: Ka kohikohia koutou e ahau i roto i ngā iwi, ka huihuia anō i ngā whenua i whakamararatia ai koutou, ka hoatu anō e ahau te oneone o Īharaira ki a koutou.
EZE 11:18 “Ka tae anō rātou ki reira, ka whakakāhoretia anō e rātou ngā mea whakarihariha katoa o reira, me ngā mea anuanu o reira.
EZE 11:19 Ka hoatu anō e ahau he ngākau kotahi ki a rātou, ka hoatu anō he wairua hou ki a koutou; ka tangohia anō e ahau te ngākau kōhatu i ō rātou kikokiko, ā, ka hoatu he ngākau kikokiko ki a rātou.
EZE 11:20 Kia haere ai rātou i runga i āku tikanga, kia puritia ai āku whakaritenga, mahia iho; ā, waiho tonu iho rātou hei iwi māku, ko ahau anō hei Atua mō rātou.
EZE 11:21 Ko te hunga ia kei te whai nei ō rātou ngākau i te ngākau o ā rātou mea whakarihariha, o ā rātou mea anuanu, ka utua e ahau ō rātou ara ki runga ki ō rātou māhunga, e ai tā te Ariki, tā Ihowā.”
EZE 11:22 Kātahi ka ara ngā parirau o ngā kerupima, ā, ko ngā wīra i tō rātou taha; i runga anō hoki te korōria o te Atua o Īharaira i a rātou, i te taha ki runga.
EZE 11:23 Nā, ka kake te korōria o Ihowā i roto i te pā, tū rawa ki runga ki te maunga ki te taha ki te rāwhiti o te pā.
EZE 11:24 Muri iho ka hāpainga ahau e te Wairua, he mea i roto i te whakakitenga, nā te Wairua o te Atua, ki Karari, ki ngā whakarau. Heoi, ka kake atu i ahau te kitenga i kitea e ahau.
EZE 11:25 Nā, kōrerotia ana e ahau ki ngā whakarau ngā mea katoa i whakakitea ki ahau e Ihowā.
EZE 12:1 I puta mai anō te kupu a Ihowā ki ahau, i mea:
EZE 12:2 “E te tama a te tangata, kei te noho koe i waenganui i te whare whakakeke. He kanohi nei ō rātou hei titiro, heoi kāhore e titiro, he taringa ō rātou e rongo ai, heoi kāhore e rongo; nō te mea he whare whakakeke rātou.
EZE 12:3 “Mō reira whakapaingia ētahi mea māu, e te tama a te tangata, mō te heke, ka heke i te awatea i tā rātou tirohanga; me heke atu i tōu wāhi ki tētahi atu wāhi i tā rātou tirohanga. Tērā pea rātou e mahara iho, ahakoa he whare whakakeke rātou.
EZE 12:4 Whakaputaina mai anō āu mea ki waho i te awatea i tā rātou tirohanga, kia rite ki ngā mea a te heke. Me haere atu koe i te ahiahi i tā rātou tirohanga, kia rite ki te haerenga o te heke.
EZE 12:5 Pokaia e koe te taiepa i tā rātou tirohanga, ā, maua atu tāu kawenga mā reira.
EZE 12:6 I a rātou e titiro ana, amohia e koe i runga i tōu pokohiwi, me mau atu i te pōuri; ko tōu mata hīpoki rawa, kei kite koe i te whenua. Nō te mea kua whakatūria koe e ahau hei tohu ki te whare o Īharaira.”
EZE 12:7 Nā, mahia ana e ahau ngā mea i whakahaua mai ai ahau; whakaputaina ana e ahau āku mea i te awatea, ngā mea a te heke, ā, i te ahiahi ka pokaia e ahau te taiepa he mea, mea nā tōku ringa; i whakaputaina e ahau i te pōuri, amohia ana e ahau i runga i tōku pokohiwi i tā rātou tirohanga.
EZE 12:8 Nā, i te ata ka puta mai te kupu a Ihowā ki ahau, i mea ia:
EZE 12:9 “E te tama a te tangata, kīhai ianei te whare o Īharaira, te whare whakakeke, i mea ki a koe, ‘E aha ana koe?’
EZE 12:10 “Kī atu ki a rātou, ‘Ko te kupu tēnei a te Ariki, a Ihowā: Mō te rangatira i Hiruhārama tēnei pīkaunga, mō te whare katoa o Īharaira e noho nei rātou i reira.’
EZE 12:11 Kī atu, ‘Hei tohu ahau ki a koutou.’ Ka pēnei i tāku i mea nei, ka pērātia anō ki a rātou; ka heke atu rātou, ka riro i te whakarau.
EZE 12:12 “Ko te rangatira i roto i a rātou ka amo te pokohiwi i te pōuri, ka haere atu. Ka pokaia te taiepa hei whakaputanga atu; ko tōna mata hīpoki rawa, nō te mea e kore ia e kite i te whenua ki ōna kanohi.
EZE 12:13 Ka taupokina anō ia e ahau ki tāku kupenga, ka mau i tāku rore; ka kawea anō ia e ahau ki Papurōna, ki te whenua o ngā Karari; otiia e kore ia e kite i reira, ahakoa ka mate ia ki reira.
EZE 12:14 Ā, ka tītaritaria atu e ahau ki ngā hau katoa te hunga katoa i tētahi taha ōna, i tētahi taha, hei āwhina i a ia, rātou ko ōna rōpū katoa; ka maunu anō i ahau te hoari hei whai i a rātou.
EZE 12:15 “Ā, ka mōhio rātou ko Ihowā ahau ina whakamararatia rātou e ahau ki roto ki ngā tauiwi, ina tītaritaria ki ngā whenua.
EZE 12:16 Ka whakatoea anō ia ētahi o rātou e ahau, he hunga torutoru, i te hoari, i te hemokai, i te mate urutā; kia kōrero ai rātou i ā rātou mea whakarihariha katoa i roto i ngā iwi ka haere atu nei rātou ki reira, ā, ka mōhio rātou ko Ihowā ahau.”
EZE 12:17 I puta mai anō te kupu a Ihowā ki ahau, i mea:
EZE 12:18 “E te tama a te tangata, e wiri koe ina kai i tāu taro, inumia hoki tōu wai i runga i te ohooho, i te mānukanuka.
EZE 12:19 Kī atu hoki ki te iwi o te whenua: Ko te kupu tēnei a te Ariki, a Ihowā mō ngā tāngata o Hiruhārama, mō te oneone o Īharaira: Ka kainga e rātou tā rātou taro i runga i te mānukanuka, ka inumia hoki tō rātou wai i runga i te mīharo, he mea kia takoto kau ai tōna whenua i ōna mea maha, mō te tutū o ngā tāngata katoa e noho ana i reira.
EZE 12:20 Nā, ko ngā pā e nohoia ana, ka waiho hei koraha, ka ururuatia anō te whenua; ā, ka mōhio koutou ko Ihowā ahau.”
EZE 12:21 I puta mai anō te kupu a Ihowā ki ahau, i mea:
EZE 12:22 “E te tama a te tangata, he aha tēnā whakatauki a koutou i te whenua o Īharaira, e mea nā, ‘Ka roa nei ngā rā, kua kore anō he kitenga’?
EZE 12:23 Mō reira kī atu ki a rātou: Ko te kupu tēnei a te Ariki, a Ihowā: Ka mutu i ahau tēnei whakatauki, e kore anō e whakataukitia e rātou ā muri ake nei i roto i a Īharaira. Mea atu ia ki a rātou, ‘Ka tata ngā rā, me te meatanga anō o ngā kitenga katoa.’
EZE 12:24 Nō te mea i muri nei kāhore he kitenga teka, kāhore he poropititanga tinihanga i roto i te whare o Īharaira.
EZE 12:25 Ko Ihowā hoki ahau; ka kōrero ahau, ā, ko te kupu e kōrerotia e ahau, ka oti; e kore e kūmea kia roa i muri nei. Nō te mea i ō koutou rā nei, e te whare whakakeke, ka kōrerotia e ahau, ka mahia anō te kupu, e ai tā te Ariki, tā Ihowā.”
EZE 12:26 I puta mai anō te kupu a Ihowā ki ahau, i mea:
EZE 12:27 “E te tama a te tangata, nanā, e kī ana te whare o Īharaira, ‘Mō ngā rā maha te kitenga e kitea nei e ia, ko ngā wā i tawhiti rawa tāna e poropiti nei.’
EZE 12:28 “Mō reira kī atu ki a rātou: Ko te kupu tēnei a te Ariki, a Ihowā: E kore tētahi o āku kupu e kūmea kia roa ā muri nei; engari, ko te kupu e kōrerotia e ahau ka oti, e ai tā te Ariki, tā Ihowā.”
EZE 13:1 I puta mai anō te kupu a Ihowā ki ahau, i mea:
EZE 13:2 “E te tama a te tangata, poropititia he hē mō ngā poropiti o Īharaira e poropiti nei, mea atu hoki ki te hunga nō ō rātou ngākau tā rātou e poropiti nei: ‘Whakarongo ki te kupu a Ihowā!
EZE 13:3 Ko te kupu tēnei a te Ariki, a Ihowā: Auē te mate mō ngā poropiti wairangi, e whai nei i ō rātou wairua ake, ā, kīhai i kite i tētahi mea!
EZE 13:4 I rite tonu ōu poropiti, e Īharaira, ki ngā pokiha i ngā wāhi koraha.
EZE 13:5 Kīhai koutou i haere ki ngā wāhi pakaru, kīhai anō i hangā i te taiepa mō te whare o Īharaira, hei tūranga i te tatauranga i te rā o Ihowā.
EZE 13:6 He kitenga teka, he tūāhu horihori tā rātou e kī rā, “E ai tā Ihowā,” ehara rātou i a Ihowā i unga; ā, kua meinga e rātou te tangata kia tūmanako, tērā e mana te kupu.
EZE 13:7 He teka ianei he kitenga teka tā koutou kitenga, he horihori te tūāhu i kōrero ai koutou, i kī ai, “E kī ana a Ihowā,” ā, kīhai nei ahau i kōrero?
EZE 13:8 “ ‘Mō reira ko te kupu tēnei a te Ariki, a Ihowā: Kua kōrero nā koutou i te teka, kua kite i te horihori, mō reira he hoariri tēnei ahau mō koutou, e ai tā te Ariki, tā Ihowā.
EZE 13:9 Ka pā anō tōku ringa ki ngā poropiti he horihori nei tā rātou kitenga, ki ngā tohunga tūāhu teka. E kore rātou e noho ki te rūnanga o tāku iwi, e kore e tuhituhia ki te tuhituhinga o te whare o Īharaira, e kore anō e tae ki te whenua o Īharaira; ā, ka mōhio koutou ko te Ariki ahau, ko Ihowā.
EZE 13:10 “ ‘Mō rātou, āe rā, mō rātou i whakapōhēhē i tāku iwi, i mea, “Ka mau te rongo,” i te mea kāhore he maunga rongo; nā, ko tētahi kei te hanga i te pakitara, ā, ko rātou hei pani ki te paru kīhai i kōnatunatua.
EZE 13:11 Mea atu ki ngā kaipani o te paru kīhai i kōnatunatua, tērā e hinga; ka puta te ua, he waipuke; ka taka iho anō koutou, e ngā nganga o te whatu; ka wāhia anō hoki e te hau, e te paroro.
EZE 13:12 Nanā, ka hinga te pakitara, kāhore rānei he kī ki a koutou, “Kei hea te paninga i pania rā e koutou?”
EZE 13:13 “ ‘Mō reira ko te kupu tēnei a te Ariki, a Ihowā: Inā, ka wāhia e ahau ki te hau, ki te paroro, i tōku weriweri; ka puta anō te ua, te waipuke, i tōku riri, me ngā nganga anō o te whatu i tōku weriweri, hei whakapoto rawa.
EZE 13:14 Ka pakaru pērā i ahau te pakitara i pania rā e koutou ki te paru kīhai i kōnatunatua, pā tonu iho ki te whenua, ka whakakitea anō ōna tūranga. Ā, ka hinga, ka poto anō koutou ki waenganui o taua pakitara; ā, ka mōhio koutou ko Ihowā ahau.
EZE 13:15 Ka whakapaua pērātia e ahau tōku weriweri ki te pakitara, ki te hunga anō nāna i pani ki te paru kīhai i kōnatunatua; ka mea hoki ahau ki a koutou, “Kua kore te pakitara, kua kore anō te hunga nāna i pani –
EZE 13:16 arā ngā poropiti o Īharaira mō Hiruhārama nei tā rātou e poropiti ai, e kite nei i te kitenga mōna, i te rongo mau, i te mea kāhore he rongo mau, e ai tā te Ariki, tā Ihowā.” ’
EZE 13:17 “Nā, ko koe, e te tama a te tangata, anga atu tōu mata ki ngā tamāhine a tōu iwi e poropiti nei, he mea nō ō rātou ngākau ake; poropititia anō he hē mō rātou,
EZE 13:18 mea atu: Ko te kupu tēnei a te Ariki, a Ihowā: Auē te mate mō ngā wāhine e tuitui urunga ana ki ngā tuke katoa; e hanga ārai ana mō ngā māhunga o te roa, o te poto, hei whai wairua! Ka whai rānei koutou i ngā wairua o tāku iwi? Ka whakaora rānei i ētahi he wairua mā koutou?
EZE 13:19 Kua whakapokea ahau e koutou i waenga i tāku iwi hei utu mō ngā kutanga pārei, mō ngā kongakonga taro, hei whakamate i ngā wairua e kore e tika kia whakamatea, hei whakaora i ngā wairua e kore e tika kia ora, i a koutou ka kōrero teka nā ki tāku iwi e whakarongo nei ki ā koutou kōrero teka.
EZE 13:20 “Mō reira ko te kupu tēnei a te Ariki, a Ihowā: Nanā, e hē ana ahau ki ō koutou urunga i whāia ai ngā wairua e koutou i reira, i meinga ai kia rere, ka haea atu anō e ahau i ō koutou ringa. Ka tukua anō e ahau ngā wairua kia haere, ā koutou wairua e whai nā, e mea nā kia rere.
EZE 13:21 Ka haea atu anō e ahau ō koutou ārai, ka whakaorangia hoki tāku iwi i roto i ō koutou ringa; e kore anō e waiho i ō koutou ringa hei whāinga atu; ā, ka mōhio koutou ko Ihowā ahau.
EZE 13:22 Nō te mea kua whakapōuritia e koutou ki te kupu teka te ngākau o te tangata tika, kīhai nei i whakapōuritia e ahau; ā, whakaūngia ana ngā ringa o te tangata kino, i kore ai e tahuri mai i tōna ara kino, kia ora ai.
EZE 13:23 Mō reira e kore koutou e kite i te horihori ā muri ake nei, i ngā tikanga rānei ki ngā tūāhu; ā, ka whakaorangia hoki e ahau tāku iwi i roto i ō koutou ringa; ā, ka mōhio koutou ko Ihowā ahau.”
EZE 14:1 Kātahi ka haere mai ētahi o ngā kaumātua o Īharaira ki ahau, noho ana i tōku aroaro.
EZE 14:2 Nā, ka puta mai te kupu a Ihowā ki ahau, i mea ia:
EZE 14:3 “E te tama a te tangata, kua oti i ēnei tāngata ā rātou whakapakoko te whakaara ki ō rātou ngākau, kua waiho e rātou te tūtukitanga waewae, tō rātou hē, ki mua i ō rātou mata; kia rapua koia e rātou he tikanga i ahau?
EZE 14:4 Mō reira kōrero ki a rātou, mea atu ki a rātou: Ko te kupu tēnei a te Ariki, a Ihowā: Ko te tangata o te whare o Īharaira e whakaara ana i āna whakapakoko ki tōna ngākau, e whakatakoto ana i te tūtukitanga waewae, i tōna hē, ki mua i tōna mata, ā, e haere mai ana ki te poropiti; ko tāku, ko tā Ihowā, e whakahoki ai ki taua tangata i haere mai rā, ka rite ki te maha o āna whakapakoko.
EZE 14:5 Kia hopukia ai te whare o Īharaira i roto i ō rātou ngākau; kua tangata kē hoki rātou katoa ki ahau, nā ā rātou whakapakoko hoki.
EZE 14:6 “Mō reira mea atu ki te whare o Īharaira: Ko te kupu tēnei a te Ariki, a Ihowā: Rīpenetā, tahuri mai i ā koutou whakapakoko; tahuri mai anō ō koutou mata i ā koutou mea whakarihariha katoa.
EZE 14:7 “Ā, ko te tangata o te whare o Īharaira, ko te tautangata anō e noho ana i roto i a Īharaira, e whakatangata kē ana ki ahau, e whakaara ana i āna whakapakoko ki tōna ngākau, e whakatakoto ana i te tūtukitanga waewae, i tōna hē, ki mua i tōna mata, ā, e haere mai ana ki te poropiti ki te rapu i tāku tikanga i a ia; māku ake anō, mā Ihowā, e whakahoki kupu ki a ia.
EZE 14:8 Ka ū atu hoki tōku mata ki taua tangata, ka meinga ia e ahau he mīharotanga hei tohu, hei whakatauki, ka hātepea atu anō ia e ahau i roto i tāku iwi; ā, ka mōhio koutou ko Ihowā ahau.
EZE 14:9 “Nā, ki te hē te poropiti i tāna kōrerotanga i tētahi kupu, nāku, nā Ihowā, taua poropiti i hē ai, ka pā tōku ringa ki a ia, ā, ka ngaro ia i ahau i roto i tāku iwi, i a Īharaira.
EZE 14:10 Ka waha anō e rātou tō rātou hē – ko te hē o te poropiti ka rite ki te hē o te tangata e rapu tikanga ana i a ia –
EZE 14:11 he mea kia kore ai te whare o Īharaira e kotiti atu i te whai i ahau ā muri ake nei, kei poke anō rātou ā muri ake nei i ō rātou pokanga kētanga katoa. Engari, kia waiho ai rātou hei iwi māku, ko ahau hoki hei Atua mō rātou, e ai tā te Ariki, tā Ihowā.”
EZE 14:12 I puta mai anō te kupu a Ihowā ki ahau, i mea:
EZE 14:13 “E te tama a te tangata, ki te hara te whenua ki ahau, ki te nui rawa te hē, ā, ka totoro tōku ringa ki reira, ā, ka whati i ahau tōna tokotoko, te taro; ka ungā anō e ahau te hemokai ki reira, ka hātepea anō e ahau te tangata me te kararehe o reira.
EZE 14:14 Ahakoa ko ēnei tāngata tokotoru, ko Noa, ko Raniera, ko Hopa, i reira, ko ō rātou wairua ake e ora i a rātou i tō rātou tika, e ai tā te Ariki, tā Ihowā.
EZE 14:15 “Ki te meinga e ahau he kīrehe kino kia tika nā waenganui i te whenua, ā, ka kore i a rātou, ka whakamōtītia, ā, kāhore he tangata e haere ana i reira i te wehi o ngā kīrehe;
EZE 14:16 ahakoa ko ēnei tāngata tokotoru i reira, e ora ana ahau, e ai tā te Ariki, tā Ihowā, e kore e ora ngā tama, ngā tamāhine, i a rātou. Ko rātou anake e ora, ka whakamōtītia ia te whenua.
EZE 14:17 “Ki te kawea atu rānei e ahau te hoari ki runga ki taua whenua, ā, ka mea, ‘E tika, e te hoari, nā waenganui i te whenua,’ ā, ka hātepea atu e ahau te tangata me te kararehe o reira;
EZE 14:18 ahakoa ko ēnei tāngata tokotoru i reira, e ora ana ahau, e ai tā te Ariki, tā Ihowā, e kore e ora ngā tama, ngā tamāhine i a rātou. Ko rātou anake e ora.
EZE 14:19 “Ki te tukua rānei e ahau te mate urutā ki taua whenua, ā, ka ringihia e ahau tōku weriweri ki runga ki taua wāhi, he mea toto, kia hātepea atu ai te tangata me te kararehe o reira;
EZE 14:20 ahakoa ko Noa, ko Raniera, ko Hopa, i reira, e ora ana ahau, e ai tā te Ariki, tā Ihowā, e kore te tama, te tamāhine rānei e ora i a rātou; ko rātou anake e ora i tō rātou tika.
EZE 14:21 “Nō te mea ko te kupu tēnei a te Ariki, a Ihowā: Tērā noa ake ina tukua e ahau āku whakawā kino e whā, te hoari, te hemokai, te kīrehe kino, te mate urutā ki Hiruhārama, hei hātepe atu i te tangata, i te kararehe o reira.
EZE 14:22 Otiia, nanā, ka toe ētahi mōrehu ki reira, ā, ka whakaputaina he tama, he tamāhine. Nanā, ka puta rātou ki a koutou, ā, ka kite koutou i tō rātou ara, i ā rātou mahi; ka whai whakamārietanga anō koutou mō te kino i kawea e ahau ki Hiruhārama, arā mō ngā mea katoa i kawea e ahau ki taua wāhi.
EZE 14:23 Ka whai whakamārietanga anō koutou i a rātou, ina kite koutou i tō rātou ara, i ā rātou mahi; ā, ka mōhio koutou, nā, ko tāku mahinga i ngā mea katoa i mahia e ahau ki reira, ehara i te mea kore take, e ai tā te Ariki, tā Ihowā.”
EZE 15:1 I puta mai anō te kupu a Ihowā ki ahau, i mea:
EZE 15:2 “E te tama a te tangata, he aha te nuinga ake o te wāina i ngā rākau katoa – o te manga wāina i roto i ngā rākau o te ngahere?
EZE 15:3 E tangohia mai rānei tētahi wāhi o reira, hei mahinga i tētahi mahi? E tangohia rānei tētahi titi i reira hei whakairi mō tētahi mea?
EZE 15:4 Nanā, e makā ana ki te ahi hei wahie; pau ake i te ahi ōna pito e rua, wera iho a waenganui; he pai rānei mō tētahi mahi?
EZE 15:5 Nanā, i tōna toitūtanga, kīhai i pai mō tētahi mahi; kātahi ka hē rawa mō tētahi mahi ā muri ake nei, i te mea ka kāia nei e te ahi, ā, ka wera?
EZE 15:6 “Mō reira ko te kupu tēnei a te Ariki, a Ihowā: Ka rite ki taua rākau, ki te wāina i roto i ngā rākau o te ngahere, i tukua rā e ahau ki te ahi hei wahie, ka pērā tāku tukunga atu i ngā tāngata o Hiruhārama.
EZE 15:7 Ka ū atu anō tōku mata hei hē mō rātou. Ka puta mai rātou i te ahi, otiia mā te ahi anō rātou e kai; ā, ka mōhio koutou ko Ihowā ahau, ina ū atu tōku mata ki te hē mō rātou.
EZE 15:8 Ka meinga anō e ahau te whenua hei ururua mō te hē i hē ai rātou, e ai tā te Ariki, tā Ihowā.”
EZE 16:1 I puta mai anō te kupu a Ihowā ki ahau, i mea:
EZE 16:2 “E te tama a te tangata, meinga a Hiruhārama kia mōhio ki āna mea whakarihariha,
EZE 16:3 mea atu: Ko te kupu tēnei a te Ariki, a Ihowā, ki Hiruhārama: Ko tōu take, ko tōu wāhi i whānau ai koe, ko te whenua o te Kanaani; ko te Amori tōu pāpā, ā, ko tōu whaea he Hiti.
EZE 16:4 Nā, ko tōu whānautanga, i te rā i whānau ai koe, kīhai tōu uho i tapahia, kīhai anō koe i horoia ki te wai kia mā ai; kīhai rawa anō koe i meatia ki te tote, kīhai rawa i takaia.
EZE 16:5 Kīhai tētahi kanohi i aroha ki a koe, kīhai i meatia ki a koe tētahi o ēnei mea, he mahi tohu ki a koe. Heoi, he mea makā atu koe ki te mata o te pārae, he mea whakarihariha hoki tōu tinana i te rā i whānau ai koe.
EZE 16:6 “Nā, i tōku haerenga atu mā tōu taha, ā, ka kite ahau i a koe e oke ana i roto i ōu toto, ka mea atu ahau ki a koe, ahakoa kei roto koe i ōu toto, ‘E ora’; āe rā, i mea atu ahau ki a koe, ahakoa kei roto koe i ōu toto, ‘E ora.’
EZE 16:7 I meinga anō koe e ahau kia tini, kia rite ki ngā tupu o te māra; heoi kua tokomaha koe, kua nui, kua tae anō koe ki ngā whakapaipai ātaahua. Kua pupuku ōu ū, kua tupu ōu makawe; i mua hoki e noho tahanga ana koe, kāhore he kākahu.
EZE 16:8 “Nā, i tōku haerenga atu i tōu taha, ka kite ahau i a koe, nā, he wā nō te aroha te wā i a koe. Nā, hīpokina iho e ahau te remu o tōku ki runga ki a koe, uhia ana koe e ahau, i a koe e noho tahanga ana: Āe rā, oati ana ahau ki a koe, uru ana tāua ki te kawenata, e ai tā te Ariki, tā Ihowā, ā, riro mai ana koe i ahau.
EZE 16:9 Kātahi ka horoia koe e ahau ki te wai; āe rā, āta horoia atu ana e ahau ōu toto i a koe; ā, pania ana koe e ahau ki te hinu.
EZE 16:10 Ko tāku kākahu mōu he mea whakairo; ko āku hū mōu he hiako kekeno; ko tāku whītiki mōu he rīnena pai; hīpokina ana koe e ahau ki te hiraka.
EZE 16:11 He mea whakapaipai anō koe nāku ki te whakapaipai, whakanohoia ana e ahau he poroporo ki ōu ringa, he hei ki tōu kakī.
EZE 16:12 I kuhua anō e ahau he mōwhiti ki tōu ihu, he whakakai ki ōu taringa, he karauna ātaahua ki tōu māhunga.
EZE 16:13 Heoi, kua oti koe te whakapaipai ki te kōura, ki te hiriwa; he rīnena pai anō hoki tōu kākahu, he hiraka, he mea whakairo hoki; i kai koe i te parāoa pai, i te honi, i te hinu; nui atu tōu ātaahua, kake ana koe hei kīngitanga.
EZE 16:14 Pakū ana tōu ingoa ki ngā iwi he ātaahua nōu; i tino pai rawa hoki. He hōnore hoki nōku i tukua atu e ahau ki a koe, e ai tā te Ariki, tā Ihowā.
EZE 16:15 “Otiia whakawhirinaki ana koe ki tōu ātaahua, kairau ana koe, he whakaaro hoki nōu ki tōu ingoa, ringihia ana e koe ōu kairautanga ki te tangata e haere atu ana i tōu taha; i a ia tēnā.
EZE 16:16 I tīkina atu anō e koe ētahi o ōu kākahu, ā, mahia ana e koe āu wāhi tiketike, kōtingotingo rawa, hei kairautanga mōu. E kore he pēnā e puta ā mua, e kore anō e pēnā.
EZE 16:17 I tīkina anō e koe āu mea whakapaipai, he kōura nāku, he hiriwa nāku, ko āku i hoatu rā ki a koe, ā, hangā ana e koe ētahi whakapakoko tāne māu, hei kairautanga mōu.
EZE 16:18 I tīkina anō e koe ōu kākahu whakairo, hei hīpoki mō rātou, hoatu ana e koe tāku hinu, me tāku whakakakara ki tō rātou aroaro.
EZE 16:19 Ko tāku kai hoki, i hoatu e ahau ki a koe, ko te parāoa pai, ko te hinu, ko te honi i whāngaia ai koe e ahau, hoatu ana anō tērā e koe ki tō rātou aroaro hei kakara reka, ā, koia anō tērā; e ai tā te Ariki, tā Ihowā.
EZE 16:20 “I tīkina anō e koe āu tama me āu tamāhine, ā tāua whānau, patua iho e koe hei kai mā rātou. He iti ianei ōu kairautanga,
EZE 16:21 i patua ai e koe āku tamariki, i tukua atu ai rātou, i meatia rātou kia haere nā roto i te ahi ki a rātou?
EZE 16:22 Nā, i āu mea whakarihariha katoa, i ōu kairautanga, kīhai koe i mahara ki ngā rā o tōu tamāhinetanga, i a koe e noho tahanga ana, kāhore he kākahu, i a koe i oke rā i roto i ōu toto.
EZE 16:23 “Nā, i muri i tōu hē katoa; auē te mate mōu, auē, te mate mōu, e ai tā te Ariki, tā Ihowā,
EZE 16:24 kei te hanga koe i te whare tairanga mōu, mahia ana e koe he wāhi tiketike mōu i ngā waharoa katoa.
EZE 16:25 Kua hangā anō e koe tāu wāhi tiketike ki ngā ahunga katoa o ngā ara, meinga ana e koe tōu ātaahua kia whakariharihangia, whewhera tonu ōu waewae ki ngā tāngata e haere ana i tōu taha, whakamaha ana e koe tōu kairautanga.
EZE 16:26 Kua kairau anō koe ki ngā Īhipiana, ki ōu hoa tata, he hunga kikokiko nui; whakamaha ana e koe tōu kairautanga, hei whakapātaritari i ahau.
EZE 16:27 Nā reira, nanā, kua totoro atu tōku ringa ki runga ki a koe, kua whakaititia anō e ahau ngā kai i rite māu, ā, hoatu ana koe e ahau ki tā ōu hoariri i pai ai, ki ngā tamāhine a ngā Pirihitini, e whakamā nei ki tōu ara pūremu.
EZE 16:28 I kairau anō koe ki ngā Ahiriana, he kore hoki nōu e ngata; inā, kairau ana koe ki a rātou, otiia kīhai koe i ngata.
EZE 16:29 Kua whakamaha anō e koe ōu kairautanga ki te whenua o Kanaana a Karari atu ana; heoi kīhai anō i ngata i tēnei.
EZE 16:30 “Anō te ngoikore o tōu ngākau, e ai tā te Ariki, tā Ihowā, i tāu mahinga i ēnei mea katoa, he mahi nā te wahine kairau, nā te mea taikaha;
EZE 16:31 i tāu hanganga i tōu whare tairanga ki te ahunga mai o ngā ara katoa, i tāu mahinga i tāu wāhi tiketike ki ngā waharoa katoa. Kīhai tāu i rite ki tā te wahine kairau, e whakahāwea ana hoki koe ki te utu!
EZE 16:32 He wahine moe hoa, i pūremu! E tuku mai ana i ngā tāngata kē ehara nei i te hoa nōna!
EZE 16:33 E hoatu ana e rātou he mea ki ngā wāhine kairau katoa; ko koe ia e hoatu ana i ōu taonga ki te hunga katoa e hiahia ana ki a koe, ā, utua ana rātou e koe, he mea kia haere mai ai rātou ki a koe i ngā taha katoa ki ōu kairautanga.
EZE 16:34 He rerekē hoki tāu i tā ētahi wāhine i ōu kairautanga, inā kāhore tētahi e aru ana i a koe, kairau ai. I te mea hoki ka hoatu e koe he utu, ā, kāhore he utu e hōmai ki a koe, nā, ka rerekē tāu.
EZE 16:35 “Mō reira whakarongo, e te wahine kairau, ki te kupu a Ihowā:
EZE 16:36 Ko te kupu tēnei a te Ariki, a Ihowā, Nā, kua ringihia atu nā tōu weriweri, kua kitea anō koe e noho tahanga ana i ōu kairautanga ki te hunga i hiahia ki a koe; ā, he mea ki āu whakapakoko whakarihariha katoa, ki te toto hoki o āu tamariki i hoatu nā e koe ki a rātou;
EZE 16:37 mō reira, ka huihuia katoatia e ahau te hunga katoa i hiahia ki a koe āu i āhuareka ai, rātou ko te hunga katoa i aroha ai koe, ko te hunga katoa hoki i kino ai koe; inā, ka huihuia rātou e ahau ki a koe i tētahi taha, i tētahi taha ka whakakitea anō koe e ahau ki a rātou e noho tahanga ana, kia kite ai rātou i ōu wāhi katoa e takoto kau ana.
EZE 16:38 Nā, ko tāku whakawā i a koe ka rite ki te whakawā o ngā wāhine kua takahi i te ture mārena, o ngā wāhine kua whakaheke toto; ā, ka hoatu e ahau ki a koe te toto o te weriweri, o te hae.
EZE 16:39 Ka tukua anō koe e ahau ki tō rātou ringa, ā, ka whakahoroa e rātou tōu whare tairanga, ka wāhia āu wāhi tiketike; ka huia atu anō ōu kākahu, ka tangohia āu mea whakapaipai, ā, ka waiho koe kia noho tahanga ana, kāhore he kākahu.
EZE 16:40 Ka kawea mai anō e rātou he rōpū hei whawhai ki a koe, ā, ka ākina koe ki te kōhatu, ka werohia ki ā rātou hoari, puta rawa.
EZE 16:41 Ka tahuna anō e rātou ōu whare ki te ahi, ka mahia anō he whakaritenga ki a koe i te tirohanga a ngā wāhine tokomaha; ā, ka meinga e ahau kia mutu ōu kairautanga, e kore anō he utu e hoatu e koe ā muri ake nei.
EZE 16:42 Heoi, ka ngata i konā tōku riri ki a koe, ka tahuri atu tōku hae i a koe, ā, ka āta noho ahau, e kore anō e riri ki a koe ā muri ake nei.
EZE 16:43 “Nō te mea kīhai koe i mahara ki ngā rā o tōu taitamāhinetanga, heoi whakapōreareatia ana ahau e koe ki ēnei mea katoa; mō reira tēnei ahau te hoatu nei i tōu tikanga ki runga ki tōu māhunga, e ai tā te Ariki, tā Ihowā. E kore anō tēnei weriweri e honoa iho e koe ki āu mea whakarihariha katoa.
EZE 16:44 “Nanā, ko te hunga katoa e kōrero ana i ngā whakatauki, ko tā rātou whakatauki tēnei mōu, e mea nei: ‘Kei te whaea tonu te rite o tāna tamāhine.’
EZE 16:45 Ko koe te tamāhine a tōu whaea, e anuanu rā ki tāna tahu, ki āna tamariki hoki; ā, ko koe te teina o ōu tuākana, i whakarihariha nei ki ā rāua tahu, ki ā rāua tamariki hoki. He Hiti tō koutou whaea, he Amori tō koutou pāpā.
EZE 16:46 Nā, ko Hamaria tōu tuakana, e noho nei i tōu taha mauī, rātou ko āna tamāhine; ā, ko tōu teina, e noho nā i tōu taha matau, ko Horoma rātou ko āna tamāhine.
EZE 16:47 Heoi, kīhai koe i haere i runga i ō rāua ara, kīhai anō tāu mahi i rite ki ā rāua mea whakarihariha; engari, me te mea nei he mea iti rawa tērā, neke noa atu tōu tūtūā i tō rātou i ōu ara katoa.
EZE 16:48 E ora ana ahau, e ai tā te Ariki, tā Ihowā, kīhai te mahi a tōu teina, a Horoma, rātou ko āna tamāhine i rite ki tāu mahi, ki tāu, ki tā āu tamāhine.
EZE 16:49 “Nanā, ko te hē tēnei o tōu teina, o Horoma: he whakapehapeha i roto i a ia, i a rātou ko āna tamāhine, he takapū kī i te taro, he ngākau warea i te nui taonga; kīhai hoki ia i whakaū ake i ngā ringa o te ware, o te rawakore.
EZE 16:50 Ā, i whakakake rātou, i mahi hoki i te mea whakarihariha ki tōku aroaro; nō reira i unuhia atu ai rātou e ahau, kei tāku i kite ai he pai.
EZE 16:51 Kīhai hoki o Hamaria i rite ki te hāwhe o ōu hara; engari i whakanuia atu e koe āu mea whakarihariha i a rātou, ka ai hoki āu mea whakarihariha katoa i mahia e koe hei whakatika mō tā tōu tuakana, mō tā tōu teina.
EZE 16:52 Nā, ko koe, whakawahā e koe tōu nā whakamā, nāu nā i whakatika tōu teina, tōu tuakana; nā ōu hara i hara ai koe, he nui atu nei te whakarihariha i o rāua, ka nui atu tō rāua tika i tōu. Āe rā, kia numinumi hoki koe, kia waha i tōu whakamā, kua whakatikaia nā hoki e koe tā tōu teina, tā tōu tuakana.
EZE 16:53 “Nā, ka whakahokia rāua e ahau i te whakarau, a Horoma, me āna tamāhine i te whakarau, a Hamaria me āna tamāhine i te whakarau, ko ōu whakarau i te whakarau, i roto i a rātou.
EZE 16:54 Kia mau ai ki a koe tōu whakamā, kia numinumi kau ai mō ngā mea katoa i mea ai koe, i a koe ka waiho nā hei whakamānawatanga mō rātou.
EZE 16:55 Ka hoki tōu teina, a Horoma rātou ko āna tamāhine, ki tō rātou tū ō mua, ā, ka hoki a Hamaria rātou ko āna tamāhine ki tō rātou tū ō mua, ka hoki anō koutou ko āu tamāhine ki tō koutou tū ō mua.
EZE 16:56 Kīhai nā hoki tōu teina, a Horoma, i rangona i roto i tōu māngai i te rā i tōu whakakake,
EZE 16:57 i te mea kīanō tōu hē i hurahia, i te wā iara o te tāwainga a ngā tamāhine a Hīria, a te hunga katoa i tētahi taha ōna, i tētahi taha, a ngā tamāhine a ngā Pirihitini e whakahāwea nā ki a koe i tētahi taha, i tētahi taha.
EZE 16:58 Kua mau ki a koe tōu hē, me āu mea whakarihariha, e ai tā Ihowā.”
EZE 16:59 “Ko te kupu hoki tēnei a te Ariki a Ihowā: Ko tāku mahi ki a koe ka rite ki tāu mahi; kua whakahāwea nā hoki koe ki te oati, whakatakā ana e koe te kawenata.
EZE 16:60 Otiia, ka mahara anō ahau ki tāku kawenata ki a koe i ngā rā o tōu taitamāhinetanga, ka pūmau anō i ahau he kawenata ki a koe ā ake ake.
EZE 16:61 Hei reira ka mahara koe ki ōu ara, ka whakamā, ina riro i a koe ōu tuākana, tōu teina; ā, ka hoatu rāua e ahau ki a koe hei tamāhine, otiia ehara i te mea nā tāu kawenata.
EZE 16:62 Ka pūmau anō i ahau tāku kawenata ki a koe, ā, ka mōhio koe ko Ihowā ahau;
EZE 16:63 kia mahara ai, kia numinumi kau ai koe, kia kaua ai hoki e puaki tōu māngai i muri iho, mō tōu whakamā hoki; ina mārie ahau ki a koe, ki ngā mea katoa i mea ai koe,” e ai tā te Ariki, tā Ihowā.
EZE 17:1 I puta mai anō te kupu a Ihowā ki ahau, i mea:
EZE 17:2 “E te tama a te tangata, whakaaria atu he paki, kōrerotia atu he kupu whakarite ki te whare o Īharaira.
EZE 17:3 Mea atu: Ko te kupu tēnei a te Ariki, a Ihowā: He ēkara nui, he nui ngā parirau, he roroa ngā hou, kapi tonu i te huruhuru, he mea kōtingotingo, i haere mai ia ki Repanōna, tangohia ana e ia te kāuru rawa o te hīta.
EZE 17:4 Katohia ana e ia te pito o ōna manga ngāwari, kawea ana ki te whenua hokohoko, waiho iho e ia i te pā o ngā kaihokohoko.
EZE 17:5 “I tīkina anō e ia ētahi o ngā purapura o te whenua, whakatōkia iho e ia ki te māra hua, kawea ana e ia ki te taha o ngā wai maha, whakatōkia ana ānō he wirou.
EZE 17:6 Ā, ka tupu taua mea, he wāina pāpaku e torotoro ana, ko ōna manga i anga atu ki a ia, ā, ko ōna pakiaka i raro i a ia. Nā, ka whakawāina, ka tupu ōna manga, ā, ka totoro ōna peka.
EZE 17:7 “Nā tērā anō tētahi atu ēkara nui, he nunui ngā parirau, ā, he maha ngā huruhuru. Nā, i piko atu ngā pakiaka o te wāina nei ki a ia, i toro atu ōna manga ki a ia i ngā wāhi i whakatōkia ai, kia whakamākūkūtia ai e ia.
EZE 17:8 He mea whakatō ia ki te māra pai ki te taha o ngā wai maha, kia tupu ai he manga, kia hua ai he hua, kia tino pai ai taua wāina.
EZE 17:9 “Mea atu koe: Ko te kupu tēnei a te Ariki, a Ihowā: E tupu rānei? E kore ianei e hūtia atu e ia ōna pakiaka? E kore ianei e tapahia ōna hua, e maroke ai, e maroke anō ai ōna rau katoa e pihi ana? Ahakoa kāhore e nui te ringa, e nui rānei te iwi hei huaranga.
EZE 17:10 Āe rā, nā, i te mea kua whakatōkia, e tupu rānei? E kore ianei e maroke rawa ina pā te hau marangai ki a ia? Ka maroke anō i te tupuranga i pihi ai.”
EZE 17:11 I puta mai anō te kupu a Ihowā ki ahau, i mea:
EZE 17:12 “Tēnā, mea atu ki te whare whakakeke: Kāhore rānei koutou e mōhio ki te tikanga o ēnei mea? Mea atu: Nanā, i tae mai te kīngi o Papurōna ki Hiruhārama, ā, tangohia ana e ia tō reira kīngi, ō reira rangatira, kawea ana ki Papurōna.
EZE 17:13 Nā, i mau ia ki te uri kīngi, whakaritea ana he kawenata ki a ia; i whakaoatitia anō ia e ia, (ā, mauria atu ana anō e ia te hunga nunui o te whenua),
EZE 17:14 kia tūtūā ai tōna kīngitanga, kia kaua ai e ara ake ki runga, engari he tūranga mōna ko te pupuri i tāna kawenata.
EZE 17:15 Heoi, whakakeke ana ia ki a ia, ungā ana e ia āna karere ki Īhipa kia hōmai ētahi hōiho ki a ia, me ētahi tāngata, he tini. E tika rānei tāna? E mawhiti rānei te kaimahi o ēnei mea? E whakatakā rānei e ia te kawenata, ā, mawhiti ake?
EZE 17:16 “E ora ana ahau, e ai tā te Ariki, tā Ihowā, inā, i te wāhi anō o te kīngi nāna nei ia i whakakīngi, nāna nei te oati i whakahāweatia e ia, nāna nei te kawenata i whakatakā e ia, i tōna taha anō i waenganui o Papurōna ka mate ia.
EZE 17:17 Nā, e kore a Parao me tāna ope nui, me tōna huihui nui, e whai wāhi ki a ia i te whawhai, ina whakahaupūtia ake e rātou he pukepuke, hangā rānei he taumaihi, e hātepea atu ai ngā tāngata tokomaha.
EZE 17:18 Kua whakahāweatia hoki e ia te oati, i tāna whakatakanga i te kawenata; nanā, kua hoatu e ia tōna ringa, otiia kua mahia e ia ēnei mea katoa; e kore ia e mawhiti.
EZE 17:19 “Mō reira ko te kupu tēnei a te Ariki, a Ihowā: E ora ana ahau, inā ka utua e ahau ki runga ki tōna mātenga tāku oati i whakahāweatia e ia, me tāku kawenata i whakatakā e ia.
EZE 17:20 Ka horahia anō e ahau tāku kupenga ki runga ki a ia, ā, ka mau ia i tāku rore, ka kawea anō ia e ahau ki Papurōna, ka whakawākia e ahau ki reira mō tōna hē i hē ai ia ki ahau.
EZE 17:21 Nā, ko ōna whati katoa, i roto i ōna rōpū katoa, ka hinga i te hoari, ka whakamararatia atu hoki ngā mōrehu ki ngā hau katoa; ā, ka mōhio koutou nāku, nā Ihowā, te kupu.”
EZE 17:22 “Ko te kupu tēnei a te Ariki, a Ihowā: Ka tangohia anō e ahau tētahi wāhi o te kāuru o te hīta tiketike, ā, ka whakatupuria. Ka katohia mai e ahau tētahi mea ngāwari i te matamata o ōna rārā hou, ā, ka whakatōkia ki runga ki te maunga tiketike e pūrero ana ki runga.
EZE 17:23 Ka whakatōkia e ahau ki te maunga tiketike o Īharaira; ā, ka wana ōna manga, ka hua ngā hua, ā, ko te putanga, he hīta pai; ka noho hoki ngā manu katoa, ia parirau, ia parirau, ki raro i a ia; ka noho rātou ki te taumarumarunga iho o ōna manga.
EZE 17:24 Ā, ka mōhio ngā rākau katoa o te pārae, nāku, nā Ihowā. I whakaiti te rākau tiketike, nāku i tiketike ai te rākau pāpaku. Nāku i whakamaroke te rākau kaiota, nāku hoki i tupu ai te rākau maroke. “Nāku, nā Ihowā, te kupu, nāku anō i mahi.”
EZE 18:1 I puta mai anō te kupu a Ihowā ki ahau, i mea:
EZE 18:2 “He aha rā tēnei whakatauki i whakataukitia ai e koutou mō te oneone o Īharaira? E kī nā hoki koutou: ‘I kai ngā mātua i ngā karepe kaiota, ā, māniania ana ngā niho o ngā tamariki.’
EZE 18:3 “E ora ana ahau, e ai tā te Ariki, tā Ihowā, e kore koutou e whai take ā muri ake nei, ki te whakahua i tēnei whakatauki i roto i a Īharaira.
EZE 18:4 Nanā, ko ngā wairua katoa, nāku; he pērā i te wairua o te pāpā, nāku anō hoki te wairua o te tama. Ko te wairua e hara ana, ka mate tērā.
EZE 18:5 Ki te mea ia he tika tētahi tangata, ā, ka mahia e ia te mea e rite ana, e tika ana –
EZE 18:6 ki te mea kīhai ia i kai ki runga ki ngā maunga, kīhai ōna kanohi i anga ake ki ngā whakapakoko o te whare o Īharaira, ki te mea kīhai i poke i a ia te wahine a tōna hoa, ā, kīhai ia i whakatata ki te wahine e paheke ana.
EZE 18:7 Ki te mea kīhai tētahi tangata i tūkinotia e ia, engari, i whakahokia e ia tāna taunaha ki te tangata i a ia nei āna moni, ki te mea kīhai ia i tūkino i tētahi, i pāhua, ki te mea i hōmai e ia tāna taro mā te tangata e hemokai ana i hīpokina e ia ki te kākahu te tangata e noho tahanga ana.
EZE 18:8 Ko te tangata kāhore āna mea i hoatu hei moni whakatupu, kāhore hoki he hua i riro i a ia, ko te tangata i whakahokia e ia tōna ringa i te kino, he pono anō tāna whakawā mō tētahi, mō tētahi,
EZE 18:9 i haere i runga i āku tikanga, i pupuri tonu i āku whakaritenga, i pono tonu te mahi; he tika tērā, ka ora ia,
EZE 18:10 “Ki te whānau tētahi tama māna, he tāhae, he kaiwhakaheke toto, ā, ka mahia e ia tētahi o ēnei mea,
EZE 18:11 ka kore anō e mahi i tētahi o ēnei mea pai: Engari, kua kai ki runga ki ngā maunga, kua whakapoke i te wahine a tōna hoa,
EZE 18:12 kua tūkino i te ware rāua ko te rawakore, kua pāhua kino, ā, kīhai i whakahokia e ia te taunaha, kua anga ōna kanohi ki ngā whakapakoko, kua mahi hoki i te mea whakarihariha,
EZE 18:13 kua hoatu i te moni whakatupu, kua tango i te hua. E ora rānei ia? E kore ia e ora; kua mahia e ia ēnei mea whakarihariha katoa. Ko te mate kau mōna; ki runga anō i a ia ōna toto.
EZE 18:14 “Nā, ki te whānau tētahi tama a tēnei, ā, ka kite ia i ngā hara katoa i mahia e tōna pāpā, ā, ka mahara, ka kore e mahi i te pēnā:
EZE 18:15 Kāhore ia e kai ki runga ki ngā maunga, kāhore hoki ōna kanohi e anga ki ngā whakapakoko o te whare o Īharaira, kāhore e whakapokea e ia te wahine a tōna hoa,
EZE 18:16 kāhore āna tūkino i te tangata, kāhore e pupuri i te taunaha, kāhore hoki āna pāhua. Engari, e hoatu ana e ia tāna taro mā te hemokai, e hīpokina ana e ia ki te kākahu te tangata e noho tahanga ana,
EZE 18:17 e whakahokia ana e ia tōna ringa i te ware, kāhore hoki e tango i te moni whakatupu, i ngā hua rānei e mahi ana i āku whakaritenga, e haere ana i runga i āku tikanga. E kore tērā e mate mō te hē o tōna pāpā; he pono ka ora ia.
EZE 18:18 Ko tōna pāpā, i te mea i nui tāna tūkino, pāhua rawa i tōna teina, kīhai hoki i pai ngā mea i mahia e ia i roto i tōna iwi, nā, ka mate ia i runga i tōna kino.
EZE 18:19 “Otirā, kei te mea koutou, ‘He aha rā te tama tē waha ai i te kino o te pāpā?’ Ki te mahia e te tama te mea e rite ana, e tika ana, ā, ka puritia e ia āku tikanga, ka mahia anō e ia, inā, ka ora ia.
EZE 18:20 Ko te wairua e hara ana, ko tērā e mate. E kore te tama e waha i te kino o te pāpā, e kore anō te pāpā e waha i te kino o te tama. Ko runga anō i a ia te tika o te tangata tika, ā, ko te kino o te tangata kino hei runga anō i a ia.
EZE 18:21 “Ki te tahuri ia te tangata kino i ōna hara katoa i mahia e ia, ā, ka puritia e ia āku tikanga katoa, ka mahia anō e ia te mea e rite ana, e tika ana, inā, ka ora ia, e kore ia e mate.
EZE 18:22 E kore tētahi o ōna hē i mahia e ia e maharatia ki a ia; ka ora ia i tōna tika i mahia e ia.
EZE 18:23 He koanga ngākau rānei ki ahau te matenga o te tangata kino? e ai tā te Ariki, tā Ihowā. He teka rānei ko ia kia tahuri mai i ōna ara, kia ora?
EZE 18:24 “Ki te tahuri atu ia te tangata tika i tōna tika, ki te mahia e ia te hē, ā, ka rite tāna mahi ki ngā mea whakarihariha katoa i mahia e te tangata kino, e ora rānei ia? E kore āna mahi tika katoa e maharatia; ka mate ia i runga i tōna kino i kino ai ia, i runga anō i tōna hara i hara ai ia.
EZE 18:25 “Heoi, kei te mea nā koutou, ‘Kāhore e taurite tonu te ara o te Ariki.’ Tēnā rā, whakarongo mai, e te whare o Īharaira: Kāhore rānei tōku ara e taurite? He teka ianei nō koutou ngā ara kāhore e taurite?
EZE 18:26 Ki te tahuri atu te tangata tika i tōna tika, ā, ka mahi i te kino, mate iho ki reira; e mate ia mō tāna kino i mahia e ia.
EZE 18:27 Tēnei anō, ki te tahuri mai te tangata kino i tāna kino i mahia e ia, ā, ka mahia e ia te mea e rite ana, e tika ana, ka ora anō i a ia tōna wairua.
EZE 18:28 Nāna hoki i whakaaro, ā, tahuri mai ana i ōna hē katoa i mahia e ia; inā, ka ora ia, e kore e mate.
EZE 18:29 Heoi, kei te mea te whare o Īharaira, ‘Kāhore e taurite te ara o te Ariki.’ Kāhore rānei ōku ara e taurite, e te whare o Īharaira? He teka ianei nō koutou ngā ara kāhore e taurite?
EZE 18:30 “Āe rā, ka rite ki tōna ara, ki tōna ara, tāku whakawā i a koutou, e te whare o Īharaira, e ai tā te Ariki, tā Ihowā. Rīpenetā, tahuri mai hoki i ō koutou hē katoa, ā, e kore te hē e waiho hei whakataka mō koutou.
EZE 18:31 Makā atu, kia matara atu i a koutou ō koutou hē katoa i hē ai koutou; mahia hoki he ngākau hou, he wairua hou mō koutou; kia mate hoki koutou hei aha, e te whare o Īharaira?
EZE 18:32 Kāhore hoki ahau e āhuareka ki te matenga o te tangata e mate ana, e ai tā te Ariki, tā Ihowā. Heoi, tahuri mai koutou, kia ora ai.”
EZE 19:1 “Nā, whakahuatia he tangi mō ngā rangatira o Īharaira,
EZE 19:2 mea atu hoki: ‘He aha tōu whaea? He raiona uha; i roto ia i ngā raiona e takoto ana, ko āna kūao he mea whakatupu nāna i roto i ngā raiona.
EZE 19:3 Nā, atawhaitia ake ana e ia tētahi o āna kūao; kua rahi. Kua ako ki te hopu tūpāpaku māna; kua kai tāngata.
EZE 19:4 I rongo anō ngā iwi ki a ia; i mau ia ki roto ki tā rātou poka. Nā, kawea ana e rātou, mekameka rawa, ki te whenua o Īhipa.
EZE 19:5 “ ‘Nā, i tōna kitenga he tatari kau tāna ā, kua kore tāna i tūmanako ai, nā, ka mau ki tētahi atu o āna kūao, meinga ana e ia hei kūao rahi.
EZE 19:6 Nā, kei te hāereere tērā i roto i ngā raiona, kua rahi. Kua ako ki te hopu tūpāpaku māna; kua kai tāngata.
EZE 19:7 I mōhio anō ia ki ō rātou whare kīngi, whakaururuatia ana e ia ō rātou pā; mōtī iho te whenua me ōna tini mea i te haruru o tōna hāmama.
EZE 19:8 Kātahi ia ka whakaekea e ngā iwi o ngā kāwanatanga i tētahi taha, i tētahi taha; horahia ana e rātou he kupenga ki runga ki a ia; kua mau ia ki roto ki tā rātou poka.
EZE 19:9 Nā, ka tūtakina atu ia, mea rawa ki te mekameka, ka kawea ki te kīngi o Papurōna. I kawea ia ki ngā pā kaha, kia kore ai tōna reo e rangona i muri ki runga ki ngā maunga o Īharaira.
EZE 19:10 “ ‘I rite tōu whaea ki te wāina, ōu toto nā anō, he mea whakatō ki te taha o ngā wai. He mea whai hua, he mea whai manga, he maha hoki nō ngā wai.
EZE 19:11 He peka kaha anō ōna hei hēpeta mō ngā kīngi; pūrero tonu rātou, roa tonu, i roto i ngā manga pūruru, i kitea atu rātou e pūrero ana, me ōna manga maha.
EZE 19:12 Otiia, i hūtia ia i runga i te āritarita, makā iho ki te whenua, maroke ake ōna hua i te hau marangai; i whatiwhatiia ōna peka kaha, maroke ake; kainga ake e te ahi.
EZE 19:13 Nā ināianei, kua oti ia te whakatō ki te koraha, ki te whenua maroke, waikore.
EZE 19:14 Ā, kua puta atu he ahi i roto i ngā peka o ōna manga, pau ake ōna hua; kore ake ōna peka kaha hei hēpeta kīngi.’ He tangi tēnei, ka waiho anō hei tangi.”
EZE 20:1 Nā, i te whitu o ngā tau, i te rima o ngā marama, i te tekau o ngā rā o te marama, ka haere mai ētahi o ngā kaumātua o Īharaira ki te rapu tikanga i a Ihowā, ā, noho ana i tōku aroaro.
EZE 20:2 Nā, ka puta mai te kupu a Ihowā ki ahau, i mea:
EZE 20:3 “E te tama a te tangata, kōrero ki ngā kaumātua o Īharaira; mea atu ki a rātou: Ko te kupu tēnei a te Ariki, a Ihowā: I haere mai rānei koutou ki te rapu tikanga i ahau? E ora ana ahau, e kore ahau e pai kia rapua e koutou he tikanga i ahau, e ai tā te Ariki, tā Ihowā.
EZE 20:4 “E whakawā rānei koe i a rātou, e te tama a te tangata, e whakawā rānei koe? Meinga kia mōhio rātou ki ngā mea whakarihariha a ō rātou mātua,
EZE 20:5 mea atu hoki ki a rātou: Ko te kupu tēnei a te Ariki, a Ihowā: I te rā i whiriwhiria ai e ahau a Īharaira, i tōku ringa i ara rā ki ngā uri o te whare o Hākopa – i mōhiotia ai ahau e rātou i te whenua o Īhipa – i tōku ringa i ara atu rā ki a rātou, i ahau i mea rā, ‘Ko Ihowā ahau, ko tō koutou Atua.’
EZE 20:6 I taua rā anō i ara ai tōku ringa ki a rātou ki te tango mai i a rātou i te whenua o Īhipa ki te whenua i tirohia e ahau mō rātou, e rerengia ana e te waiū, e te honi, ki te wāhi ātaahua rawa o ngā whenua katoa.
EZE 20:7 I mea ahau ki a rātou, ‘Makā e tērā, e tērā, ngā mea whakarihariha o ōna kanohi; kaua hoki koutou e whakapokea ki ngā whakapakoko o Īhipa; ko Ihowā ahau, ko tō koutou Atua.’
EZE 20:8 “Otiia, kei te whakakeke rātou ki ahau, kīhai hoki i pai ki te whakarongo ki ahau, kīhai i makā atu e rātou ngā mea whakarihariha o ngā kanohi o tērā, o tērā, kīhai i whakarērea e rātou ngā whakapakoko o Īhipa. Kātahi ahau ka mea, Ka ringihia e ahau tōku weriweri ki a rātou, ka whakapaua e ahau tōku riri ki a rātou i waenganui o te whenua o Īhipa.
EZE 20:9 Otiia, mahi ana ahau mō tōku ingoa kei poke i te tirohanga a ngā iwi i noho tahi rātou, i meinga nei e ahau kia mōhio ki ahau, i ā rātou rā i kite i tō rātou whakaputanga mai i te whenua o Īhipa.
EZE 20:10 Heoi, whakaputaina ana rātou e ahau i te whenua o Īhipa, kawea ana ki te koraha.
EZE 20:11 I hoatu anō e ahau āku tikanga ki a rātou, i whakakitea atu anō ki a rātou āku whakaritenga e ora ai te tangata ki te mahia e ia.
EZE 20:12 I hoatu anō e ahau āku hāpati ki a rātou hei tohu ki ahau, ki a rātou, kia mōhio ai rātou ko Ihowā ahau, ko tō rātou kaiwhakatapu.
EZE 20:13 “Otiia, i whakakeke te whare o Īharaira ki ahau i te koraha; kīhai rātou i haere i runga i āku tikanga, paopao ana rātou ki āku whakaritenga e ora ai te tangata ki te mahia e ia; whakapokea rawatia ana e rātou āku hāpati. Kātahi ahau ka mea kia ringihia tōku weriweri ki a rātou i te koraha, kia mōtī rā anō rātou.
EZE 20:14 Otiia mahi ana ahau mō tōku ingoa, kei poke i te tirohanga a ngā iwi i kite nei i tāku tangohanga mai i a rātou.
EZE 20:15 I ara anō hoki tōku ringa ki a rātou i te koraha kia kaua rātou e kawea ki te whenua e rerengia ana e te waiū, e te honi, ki tāku i hoatu ai, he wāhi ātaahua rawa i ngā whenua katoa;
EZE 20:16 mō rātou i paopao ki āku whakaritenga, ā, kīhai i haere i runga i āku tikanga; ko āku hāpati hoki whakapokea iho e rātou. He whai nō ō rātou ngākau i ā rātou whakapakoko.
EZE 20:17 Heoi, i tohungia rātou e tōku kanohi, kīhai i whakangaromia, kīhai anō ahau i whakamōtī i a rātou i te koraha.
EZE 20:18 Ā, i mea ahau ki ā rātou tamariki i te koraha, Kaua e haere i runga i ngā tikanga a ō koutou mātua, kaua anō e puritia ā rātou whakaritenga, kei poke hoki koutou i ā rātou whakapakoko.
EZE 20:19 Ko Ihowā ahau, ko tō koutou Atua; haere i runga i āku tikanga, puritia āku whakaritenga, mahia;
EZE 20:20 whakatapua hoki āku hāpati; ā, ka waiho ērā hei tohu ki ahau, ki a koutou, kia mōhio ai koutou ko Ihowā ahau, ko tō koutou Atua.
EZE 20:21 “Otiia kei te whakakeke ngā tamariki ki ahau: Kīhai i haere i runga i āku tikanga, kīhai hoki i pupuri i āku whakaritenga hei mahi mā rātou; ki te mahia hoki ēnā e te tangata, ka ai hei oranga mōna; ko āku hāpati hoki, whakapokea iho e rātou. Nā, ko tāku kīanga ake, kia ringihia tōku weriweri ki a rātou, kia whakapaua tōku riri ki a rātou i te koraha.
EZE 20:22 Engari, ia i whakahokia iho e ahau tōku ringa, ā, mahi ana mō tōku ingoa, kei poke i te tirohanga mai a ngā iwi i kite nei i tāku whakaputanga i a rātou.
EZE 20:23 I ara anō tōku ringa ki a rātou i te koraha, mō rātou kia whakamararatia ki roto ki ngā tauiwi, kia tītaria atu ki ngā whenua;
EZE 20:24 mō rātou kīhai i mahi i āku whakaritenga; mō rātou anō i paopao ki āku tikanga, nā, whakapokea iho e rātou āku hāpati, anga tonu ana ō rātou kanohi ki ngā whakapakoko a ō rātou mātua.
EZE 20:25 Nā, hoatu ana e ahau ki a rātou he tikanga kāhore i pai, he whakaritenga e kore ai rātou e ora.
EZE 20:26 I whakapokea anō rātou e ahau ki ā rātou mea hōmai noa, mō tā rātou meatanga i ngā tamariki katoa e oroko puta mai ana i te kōpū kia tika i roto i te ahi, he mea e meinga ai rātou e ahau kia noho kau noa iho, kia mōhio ai rātou ko Ihowā ahau.
EZE 20:27 “Mō reira kōrero ki te whare o Īharaira, e te tama a te tangata, mea atu ki a rātou: Ko te kupu tēnei a te Ariki, a Ihowā: Tēnei anō tētahi kohukohu a ō koutou mātua ki ahau, i a rātou i mahi nei i te hē ki ahau.
EZE 20:28 Ka oti rātou te kawe e ahau ki te whenua i ara ai tōku ringa kia hoatu a reira ki a rātou, nā, ka kite rātou i tēnā pukepuke tiketike, i tēnā, i tēnā rākau pūruru, i tēnā, nā, patua ana e rātou ki reira ā rātou patunga tapu, tāpaea ana e rātou ki reira te mea whakapātaritari, tā rātou whakahere. Mahia ana e rātou tā rātou whakakakara reka ki reira, ringihia ana e rātou ki reira ā rātou ringihanga.
EZE 20:29 Kātahi ahau ka mea ki a rātou: He aha te pukepuke tiketike e hāereere atu nā koutou?” (Heoi, huaina ana te ingoa o reira ko Pāma ā mohoa noa nei.)
EZE 20:30 “Mō reira mea atu ki te whare o Īharaira: Ko te kupu tēnei a te Ariki, a Ihowā: Ka whakapoke rānei koutou i a koutou, ka pērā me ō koutou mātua? Ka whai rānei koutou i ā rātou mea whakarihariha moepuku ai?
EZE 20:31 I te mea hoki ka tāpaea e koutou ā koutou mea hoatu noa, ā, ka meinga ā koutou tamariki kia tika nā roto i te ahi, e whakapoke ana rānei koutou i a koutou anō ki ā koutou whakapakoko katoa ā mohoa noa nei? Ā, me rapu tikanga mai rānei i ahau mā koutou, e te whare o Īharaira? E ora ana ahau, e ai tā te Ariki, tā Ihowā, e kore ahau e pai kia uia e koutou.”
EZE 20:32 “Nā, ko te mea i puta ake ki ō koutou wairua e kore rawa e taea, tā koutou e kī rā, ‘Ka rite tātou ki ngā tauiwi, ki ngā hapū o ngā whenua, ka mahi ki te rākau, ki te kōhatu.’
EZE 20:33 E ora ana ahau, e ai tā te Ariki, tā Ihowā, inā, he ringa kaha tōku, he tākakau mārō, he weriweri kua oti te riringi atu, i ahau ka kāwana nei i a koutou.
EZE 20:34 Ka tangohia mai anō koutou e ahau i roto i ngā iwi, ka huihuia i ngā whenua i whakamararatia atu ai koutou, he meatanga nā te ringa kaha, nā te tākakau mārō, nā te weriweri kua oti te riringi atu.
EZE 20:35 Ā, ka kawea koutou e ahau ki te koraha o ngā iwi, ā, ki reira ahau whakawā ai i a koutou, he kanohi ki te kanohi.
EZE 20:36 Ka rite ki tāku whakawā i ō koutou mātua i te koraha o te whenua o Īhipa; ka pēnā anō tāku whakawā i a koutou, e ai tā te Ariki, tā Ihowā.
EZE 20:37 Ka meinga anō koutou e ahau kia tika i raro i te tokotoko, kia uru ki roto ki te here o te kawenata.
EZE 20:38 Ka tahia atu hoki e ahau i roto i a koutou te hunga whakakeke, te hunga hoki e tutū ana ki ahau. Ka tangohia mai rātou e ahau i te whenua e noho nei rātou, engari, e kore rātou e tae ki te oneone o Īharaira; ā, ka mōhio koutou ko Ihowā ahau.
EZE 20:39 “Nā, ko koutou, e te whare o Īharaira, ko te kupu tēnei a te Ariki, a Ihowā: Haere, e mahi ki tāna whakapakoko, ki tāna whakapakoko, i ngā wā e takoto ake nei, ki te kore koutou e rongo ki ahau; kaua ia tōku ingoa tapu e whakapokea i muri ki ā koutou mea hōmai noa, ki ā koutou whakapakoko.
EZE 20:40 “Hei tōku maunga tapu hoki, hei te maunga o te tairangatanga o Īharaira, e ai tā te Ariki, tā Ihowā, hei reira te whare katoa o Īharaira, rātou katoa i te whenua, mahi ai ki ahau. Ko te wāhi tērā e manako ai ahau ki a rātou, ko te wāhi anō tērā e mea ake ai ahau ki ā koutou whakahere māku, ki ngā mātāmua o ā koutou mea e tāpae mai ai, ki ā koutou mea tapu katoa.
EZE 20:41 Ka manako ahau ki a koutou, ānō he whakakakara reka, ina tangohia mai koutou e ahau i roto i ngā iwi, ina huihuia mai i ngā whenua i whakamararatia atu ai koutou; ā, ka ai koutou hei whakatapu mōku i te tirohanga a ngā iwi.
EZE 20:42 Nā, ka mōhio koutou ko Ihowā ahau, ina kawea koutou e ahau ki te oneone o Īharaira, ki te whenua i ara ai tōku ringa kia hoatu a reira ki ō koutou mātua.
EZE 20:43 Ka mahara anō koutou i reira ki ō koutou ara, ki ā koutou mahi katoa i poke ai koutou; ā, ka whakarihariha koutou ki a koutou, ki tā koutou ake titiro, mō ngā mea kikino katoa i mahia e koutou.
EZE 20:44 Ā, ka mōhio koutou ko Ihowā ahau, ina ngana ahau ki a koutou, he mea mō tōku ingoa, kāhore anō ia e rite ki ō koutou ara kino, ki ā koutou mahi hē rānei, e te whare o Īharaira, e ai tā te Ariki, tā Ihowā.”
EZE 20:45 I puta mai anō te kupu a Ihowā ki ahau, i mea:
EZE 20:46 “E te tama a te tangata, anga atu tōu mata whaka te tonga, kia māturuturu atu anō tāu kupu whaka te tonga, poropititia he hē mō te ngahere o te pārae ki te tonga.
EZE 20:47 Mea atu hoki ki te ngahere i te tonga: Whakarongo ki te kupu a Ihowā; Ko te kupu tēnei a te Ariki, a Ihowā: Ka whakaūngia e ahau he ahi i roto i a koe, ā, ka pau ngā rākau matomato katoa i roto i a koe, me ngā rākau maroke katoa; e kore te mura e tineia, ka mura tonu, ka wera anō ngā kanohi katoa i reira, i te tonga tae noa ki te raki.
EZE 20:48 Ā, ka kite ngā kikokiko katoa, nāku, nā Ihowā i whakaū; e kore e tineia.”
EZE 20:49 Anō rā ko ahau, “Auē, e te Ariki, e Ihowā! E mea ana rātou ki ahau, ‘He teka ianei he kōrero whakatauki āna e kōrero nei?’ ”
EZE 21:1 I puta mai anō te kupu a Ihowā ki ahau, i mea:
EZE 21:2 “E te tama a te tangata, anga atu tōu mata ki Hiruhārama, kia māturuturu iho tāu kupu ki ngā wāhi tapu, poropititia he hē mō te whenua o Īharaira;
EZE 21:3 mea atu hoki ki te whenua o Īharaira: ‘Ko te kupu tēnei a Ihowā: Nanā, hei hoariri ahau mōu, ka maunu anō i ahau tāku hoari i roto i tōna takotoranga, ka hātepea atu e ahau te tangata tika rāua ko te tangata hē i roto i a koe.
EZE 21:4 Nā, ka hātepea atu nei e ahau i roto i a koe te tangata tika rāua ko te tangata hē, ka maunu anō tāku hoari i roto i tōna takotoranga ki ngā kikokiko katoa i te tonga tae noa ki te raki.
EZE 21:5 Ā, ka mōhio ngā kikokiko katoa, nāku, nā Ihowā, i unu tāku hoari i roto i tōna takotoranga; e kore anō e hoki ā muri iho.’
EZE 21:6 “Nā reira, auē, e te tama a te tangata. Auē ki tō rātou aroaro, me te whati tōu hope, me te tangi tīwerawera.
EZE 21:7 Ā, ki te mea rātou ki a koe, ‘He aha koe i auē ai?’ kātahi koe ka mea, ‘Mō te rongo; kei te haere mai hoki; ā, ngohe iho ngā ngākau katoa, ngoikore katoa ngā ringa, ka hē anō ngā wairua katoa, ko ngā turi katoa kei te wai te rite.’ Nanā, te haere mai nei, ka oti anō hoki, e ai tā te Ariki, tā Ihowā.”
EZE 21:8 I puta mai anō te kupu a Ihowā ki ahau, i mea:
EZE 21:9 “E te tama a te tangata, poropiti atu, kī atu: Ko te kupu tēnei a Ihowā; kī atu: ‘He hoari, he hoari, whakakoi rawa, oro rawa –
EZE 21:10 I whakakoia ai kia nui ai te parekura; i orohia ai kia uira ai! “ ‘Kia koa koia tātou? Ko te tokotoko ia o tāku tama e whakahāwea ana ki ngā rākau katoa.
EZE 21:11 I hoatu anō e ia kia orohia, hei mea e maua e te ringa. Ko te hoari, āe, kua oti te whakakoi, kua oti te oro, kia hoatu ai ki te ringa o te kaipatu.
EZE 21:12 E tangi, auē, e te tama a te tangata; nō te mea kei runga i tāku iwi, kei runga i ngā rangatira katoa o Īharaira; kua tukua atu rātou ki te hoari me tāku iwi. Mō reira papaki ki tōu hūhā.
EZE 21:13 “ ‘He whakamātautau hoki ia; ā, ka pēhea rā mehemea ka kore te tokotoko whakahāwea, e ai tā te Ariki, tā Ihowā.’
EZE 21:14 Ko koe nā, e te tama a te tangata, poropiti atu; pakipaki i ōu ringa. Tukua kia tuatoru whakakoromeketanga o te hoari, o te hoari nāna ngā tūpāpaku. Ko te hoari ia nāna te tangata rahi – tērā e tūpāpaku nei i ōna patunga, tae tonu atu ki ō rātou rūma o roto rawa.
EZE 21:15 Kua oti te mata o te hoari te whakatika atu e ahau ki ō rātou kūwaha katoa, kia ngohengohe ai ō rātou ngākau, kia maha ai ō rātou tūtukitanga. Ananā! Kua oti te whakakanapa, koi tonu, hei mea mō te patu.
EZE 21:16 Huihui i a koe, ka anga ki matau, tātai i a koe, ka anga ki mauī, ki te wāhi e ū atu ai tōu mata.
EZE 21:17 Ka papaki anō ahau i ōku ringa, ka whakarite i tōku weriweri. Nāku, nā Ihowā, te kupu.”
EZE 21:18 I puta mai anō hoki te kupu a Ihowā ki ahau, i mea:
EZE 21:19 “Ko koe hoki, e te tama a te tangata, whakaritea ētahi ara mōu kia rua, hei haerenga mai mō te hoari a te kīngi o Papurōna. Ka puta mai rāua e rua i te whenua kotahi; waitohungia hoki tētahi wāhi, waitohungia i te ahunga mai o te ara ki te pā.
EZE 21:20 Whakaritea he ara e haere mai ai te hoari ki Rapa o ngā tama a Āmona, ki a Hūrā, ki ērā i Hiruhārama, i te pā taiepa.
EZE 21:21 I tū hoki te kīngi o Papurōna ki te pekanga o te ara, ki te ahunga mai o ngā ara e rua, ki te ui ki ngā tūāhu. I rurutia hoki e ia āna pere, i uia he tikanga ki ngā whakapakoko, i titiro ki te ate.
EZE 21:22 I tōna ringa matau ko te tūāhu mō Hiruhārama, hei whakarite i ngā mea wāwāhi, hei mea e hāmama ai te māngai i te parekura, e ara ai te reo i te hāmamatanga, hei whakarite i ngā mea wāwāhi mō ngā kūwaha, kia haupūria ake anō he pukepuke, kia hangā he taumaihi.
EZE 21:23 Ā, ki tā rātou, hei tūāhu teka tēnā ki tā rātou titiro, ki tā te hunga rā i oati i ngā oati; otiia ka maharatia e ia te kino, kia mau ai rātou.
EZE 21:24 “Nā reira ko te kupu tēnei a te Ariki, a Ihowā: ‘Nā, kua meinga nā e koutou tō koutou kino kia maharatia, i tō koutou hē ka hurahia, i ō koutou hara ka kitea i roto i ā koutou mahi katoa – nā, ka maharatia nā koutou, ka mau koutou i te ringa.
EZE 21:25 “ ‘Nā, ko koe, e te mea kino kua tūpāpaku nā, e te rangatira o Īharaira, nōu nei te rā kua tae mai, i te wā o te hē i te mutunga;
EZE 21:26 ko te kupu tēnei a te Ariki, a Ihowā. Whakarērea atu te pōtae, waiho atu te karauna; e kore tēnei e pēnei tonu ā muri ake. Ko te iti whakanuia ake, ko te nui whakaititia iho.
EZE 21:27 Ka porohurihia e ahau, ka porohurihia, ka porohurihia. (E kore noa iho anō tēnei.) Kia tae mai rā anō te tangata māna; ā, māku e hoatu ki a ia.’
EZE 21:28 “Ko koe hoki, e te tama a te tangata, poropiti atu, mea atu: Ko te kupu tēnei a te Ariki, a Ihowā mō ngā tama a Āmona, mō tā rātou tāwai; mea atu anō: ‘Ko te hoari, ko te hoari, kua oti te unu; oro rawa mō te patu, kia kai ai, koia i uira ai.
EZE 21:29 Me te teka mai a aua matakite ki a koe, me te hōmai teka a te tūāhu ki a koe, kia hoatu ai koe ki runga ki ngā kakī o te hunga i patua, o te hunga kino kua tae mai nei tō rātou rā, i te wā o te hē i te mutunga.
EZE 21:30 Meinga kia hoki atu ia ki tōna takotoranga. Hei te wāhi i hangā ai koe, hei te whenua i whānau ai koe, hei reira ahau whakawā ai i a koe.
EZE 21:31 Ka ringihia anō e ahau tōku riri ki runga ki a koe; ka pupuhi anō ahau ki runga ki a koe ki te ahi o tōku riri; ka hoatu anō koe e ahau ki te ringa o ngā tāngata pōauau, e mōhio ana ki te whakangaro.
EZE 21:32 Ka waiho koe hei wahie mō te ahi; ka heke ōu toto ki waenganui o te whenua. Heoi anō maharatanga ki a koe; nāku hoki, nā Ihowā te kupu.’ ”
EZE 22:1 I puta mai anō te kupu a Ihowā ki ahau, i mea:
EZE 22:2 “E whakawā rānei koe, e te tama a te tangata, e whakawā rānei koe i te pā whakaheke toto? Nā, whakakitea anō āna mea whakarihariha katoa ki a ia.
EZE 22:3 Ā, mea atu koe: Ko te kupu tēnei a te Ariki, a Ihowā: He pā e whakaheke ana i te toto i waenganui ōna, he mea e tae mai ai te wā mōna, e hanga whakapakoko ana hei hē mōna, hei whakapoke i a ia!
EZE 22:4 Kua hē koe i ōu toto i whakahekea e koe, kua poke i āu whakapakoko i hangā e koe; ā, kua meinga e koe ōu rā kia tata, kua tae anō koe ki ōu tau. Nā reira koe i meinga ai e ahau hei tāwainga mā ngā tauiwi, hei taunutanga mā ngā whenua katoa.
EZE 22:5 Ko te hunga e tata ana, ko te hunga hoki e matara atu ana i a koe, ka taunu ki a koe, e te tangata ingoa poke, kikī tonu i te tutū.
EZE 22:6 “Nanā, ngā rangatira o Īharaira, puta ana ngā uaua o tētahi, o tētahi i roto i a koe ki te whakaheke toto.
EZE 22:7 E whakahāwea ana rātou ki te pāpā, ki te whaea, i roto i a koe; he mahi whakatupu kino tā rātou ki te tautangata i roto i a koe. E tūkinotia ana e rātou te pani me te pouaru i roto i a koe.
EZE 22:8 Ko āku mea tapu whakahāweatia iho e koe, ko āku hāpati whakanoatia ana e koe.
EZE 22:9 I roto i a koe ngā tāngata ngautuarā, he mea kia whakahekea ai he toto; i roto i a koe te kai ki runga ki ngā maunga; i roto i a koe te mahi pūremu.
EZE 22:10 I roto i a koe te hura i tō te pāpā e takoto tahanga ai; i roto i a koe te whakaiti i te wahine poke i a ia e noho wehe ana.
EZE 22:11 He mahi whakarihariha anō tā tētahi ki te wahine a tōna hoa; ko tā tētahi whakapokea iho, pūremutia iho tāna hunaonga; ko tā tētahi i roto i a koe, he whakaiti i tōna tuahine, i te tamāhine a tōna pāpā.
EZE 22:12 I roto i a koe i tango rātou i te utu whakapati e whakahekea ai he toto; kua tango koe i te moni whakatupu, i ngā hua anō hoki, kua haoa mai anō e koe ngā taonga a ōu hoa, he mea tūkino, kua wareware anō koe ki ahau, e ai tā te Ariki, tā Ihowā.
EZE 22:13 “Nanā, kua pākia e ahau tōku ringa ki tāu hao taonga i hao ai koe, ki ōu toto anō kua heke nā i waenganui i a koe.
EZE 22:14 E ū rānei tōu ngākau, e pakari rānei ōu ringa, i ngā rā e mahi ai ahau ki a koe? Nāku, nā Ihowā te kupu, māku anō e mahi.
EZE 22:15 Ka whakamararatia atu anō koe e ahau ki roto ki ngā tauiwi, ka tītaria hoki koe ki ngā whenua, ā, ka poto i ahau tōu poke i roto i a koe.
EZE 22:16 Ka whakanoatia anō hoki koe e koe anō i te tirohanga a ngā iwi, ā, ka mōhio koe ko Ihowā ahau.”
EZE 22:17 I puta mai anō te kupu a Ihowā ki ahau, i mea:
EZE 22:18 “E te tama a te tangata, ki ahau, kua rite te whare o Īharaira ki te para; he parāhi rātou katoa, he tine, he rino, he matā i waenga oumu; he para hiriwa rātou katoa.
EZE 22:19 Nā reira tēnei kupu a te Ariki, a Ihowā: Nā, he para nei koutou katoa, nā, tēnei ahau te kohikohi nei i a koutou ki waenganui o Hiruhārama.
EZE 22:20 Ka rite ki te kohikohinga o te hiriwa, o te parāhi, o te rino, o te matā, o te tine ki waenganui o te oumu, pūhia tonutia atu te ahi ki runga hei whakarewa; ka pēnā anō tāku kohikohi i a koe i runga i tōku riri, i tōku weriweri, ka waiho anō koutou e ahau ki reira, ka whakarewaina anō koutou.
EZE 22:21 Inā, ka whakaminea koutou e ahau, ka pupuhi atu anō ahau ki a koutou i runga i te ahi, arā i tōku riri, ā, ka rewa koutou i waenganui.
EZE 22:22 Ka rite ki te whakarewanga o te hiriwa i roto i te oumu; ka pēnā anō tō koutou whakarewanga i waenganui o taua oumu, ā, ka mōhio koutou kua oti tōku weriweri te riringi e ahau, e Ihowā, ki runga ki a koutou.”
EZE 22:23 I puta mai anō te kupu a Ihowā ki ahau, i mea:
EZE 22:24 “E te tama a te tangata, mea atu ki a ia: ‘He whenua koe kīhai i purea, kīhai anō i whai ua i te rā o te riri.’
EZE 22:25 E whakatakotoria ana he hē e āna poropiti i waenganui i a ia, koia anō kei te raiona māngai nui e haehae ana i te tūpāpaku; kua pau ngā wairua i a rātou; kua riro i a rātou ngā taonga me ngā mea utu nui; kua tini i a rātou ōna pouaru i roto i a ia.
EZE 22:26 Kua tūkinotia e āna tohunga tāku ture, whakanoatia ana e rātou āku mea tapu; kīhai i wehea e rātou te tapu i te noa, kīhai anō i whakakitea e rātou te wehenga o te poke, o te mā; ko ō rātou kanohi hunā ake e rātou ki āku hāpati, ā, whakapokea ana ahau i roto i a rātou.
EZE 22:27 Ko ōna rangatira i roto i a ia, rite tonu ki te wuruhi e haehae ana i te tūpāpaku; he whakaheke toto, he whakangaro wairua, kia riro mai ai he taonga whānako.
EZE 22:28 I pania anō e āna poropiti he mea mō rātou ki te paru kīhai i kōnatunatua; he moemoeā horihori a rātou; he teka ngā kōrero a aua tohunga tūāhu ki a rātou, i a rātou ka mea nei, ‘Ko te kupu tēnei a te Ariki, a Ihowā,’ i te mea kīhai a Ihowā i kōrero.
EZE 22:29 Ko tā te iwi o te whenua, he whakatupu kino, he pāhua; āe rā, e tūkinotia ana e rātou te ware me te rawakore; e whakatupuria kinotia ana e rātou te tautangata i te mea kāhore nei he take.
EZE 22:30 “I te rapu anō ahau i te tangata i roto i a rātou hei hanga i te taiepa, hei tū ki te wāhi pakaru ki tōku aroaro mō te whenua, hei mea kei whakangaromia e ahau; heoi kīhai i kitea.
EZE 22:31 Nā reira i ringihia ai e ahau tōku riri ki runga ki a rātou; kua whakapotoa rātou e ahau ki te ahi o tōku riri; kua hoatu e ahau te utu o tō rātou ara ki runga ki ō rātou māhunga, e ai tā te Ariki, tā Ihowā.”
EZE 23:1 I puta mai anō te kupu a Ihowā ki ahau, i mea:
EZE 23:2 “E te tama a te tangata, tokorua ngā wāhine i mua, he tamāhine nā te whaea kotahi.
EZE 23:3 Heoi, moepuku ana ki Īhipa; moepuku ana i tō rāua tamarikitanga. I romia ō rāua ū ki reira, i mirimiria ki reira ngā matamata o tō rāua wāhinatanga.
EZE 23:4 Nā, ko ō rāua ingoa, ko Ohora tō te tuakana, ko Ohoripa tō te teina. Ā, i riro rāua i ahau, i whānau hoki he tama, he tamāhine mā rāua. Nā, mō ō rāua ingoa, ko Hamaria a Ohora, ko Hiruhārama a Ohoripa.
EZE 23:5 “Nā, kua kairau a Ohora i te mea i ahau anō ia, minamina atu ana ki āna i aroha ai, ki ōna hoa tata, ki ngā Ahiriana,
EZE 23:6 he purū nei ō rātou kākahu, he ariki, he kāwana, he taitamariki, e minaminatia rātou katoa, he tāngata hōiho, e eke ana ki te hōiho.
EZE 23:7 Heoi, kei te mahi kairau ia ki a rātou, ki ngā tāngata papai rawa o ngā tama o Ahiria, ki a rātou katoa; ā, ahakoa ko wai i minaminatia e ia, whakapoke ana ia i a ia anō ki ā rātou whakapakoko katoa.
EZE 23:8 Kīhai anō i mahue i a ia āna moepuku mai o ngā rā o Īhipa; i takoto hoki rātou ki a ia i tōna tamarikitanga, ā, mirimiria ana e rātou ngā matamata o tōna wāhinatanga, ringihia ana e rātou ā rātou moepuku ki runga ki a ia.
EZE 23:9 “Nā reira ia i tukua ai e ahau ki te ringa o te hunga i arohaina e ia, ki te ringa o ngā tamariki o Ahiria, o āna i minamina ai.
EZE 23:10 Ā, hurahia ana ia e rātou kia noho tahanga; tangohia ana e rātou āna tama, āna tamāhine, patua iho ia e rātou ki te hoari; ā, whai ingoa ana ia i roto i ngā wāhine; i mahia hoki e rātou he whakawā ki a ia.
EZE 23:11 “Ā, ka kite tōna teina, a Ohoripa, i tēnei, otiia i nui atu te kino o tōna minamina i tō tērā, ōna moepuku hoki i nui atu i o tōna tuakana.
EZE 23:12 Minamina ana ia ki ngā Ahiriana, ki ōna hoa tata, ki ngā ariki, ki ngā kāwana, he pai rawa nei ngā kākahu, he tāngata hōiho e eke ana ki te hōiho, ko rātou katoa he tamariki e minaminatia.
EZE 23:13 Nā, ka kite ahau kua poke ia, kotahi tonu te ara ō rāua tokorua.
EZE 23:14 “Kua neke ake anō ōna moepuku; i kite hoki ia i ngā tāngata kua oti te tuhituhi ki te pakitara, i ngā whakaahua o ngā Karari, he mea tuhituhi ki te whero pai,
EZE 23:15 he mea whītiki ō rātou hope ki te whītiki, ō rātou māhunga mea rawa ki te kākahu kua oti te rongoā, he rangatira katoa ki te titiro; ko te āhua kei tō ngā tama o Papurōna, o Karari, o te whenua i whānau ai rātou.
EZE 23:16 Ā, nō te kitenga o ōna kanohi i a rātou, minamina tonu ki a rātou, tukua ana e ia he karere ki a rātou, ki Karari.
EZE 23:17 Nā, ka haere mai ki a ia o ngā tamariki o Papurōna ki te moenga aroha, whakapokea ana ia e rātou ki ā rātou moepuku. Heoi, ka whakapokea nei e rātou, nā, ngākaukore noa iho ia ki a rātou.
EZE 23:18 Heoi, ka whakakitea e ia ōna moepuku, ka whakakitea anō ia e noho tahanga ana; nā, ngākaukore noa iho ahau ki a ia, pērā tonu me ahau i ngākaukore rā ki tōna tuakana.
EZE 23:19 Heoi, whakanuia ana e ia ōna moepuku, me te mahara anō ia ki ngā rā o tōna tamarikitanga i a ia i kairau rā ki te whenua o Īhipa.
EZE 23:20 I minamina hoki ia ki ō rātou hoa moepuku, he kikokiko kāihe nei ō rātou kikokiko; ā, ko te mea e tārere mai ana i roto i a rātou rite tonu ki te mea e tārere mai ana i roto i te hōiho.
EZE 23:21 Nā, kua hokia nei e koe ngā hē o tōu tamarikitanga i ngā matamata o ōu ū i mirimiria rā e ngā Īhipiana, he meatanga ki ngā ū o tōu tamarikitanga.
EZE 23:22 “Mō reira, e Ohoripa, ko te kupu tēnei a te Ariki, a Ihowā: Nanā, ka ara i ahau ōu hoa aroha hei hoariri mōu, ērā kua ngākaukore nā koe ki a rātou, ka kawea mai anō rātou e ahau ki a koe ki ngā taha katoa –
EZE 23:23 ko ngā tāngata o Papurōna, rātou ko ngā Karari katoa, a Pekoro, a Hoa, a Koa, rātou ko ngā Ahiriana katoa: he taitamariki rātou katoa e minaminatia, he ariki, he kāwana, he rangatira, he rongo nui, he eke hōiho katoa.
EZE 23:24 Ā, ka haere mai rātou ki te whawhai ki a koe, me ngā mea mō te whawhai, he hāriata anō ō rātou, he kāta, he whakaminenga iwi; rite rawa i a rātou te puapua, te whakangungu rākau, te pōtae, hei whawhai ki a koe i tētahi taha, i tētahi taha. Ka tukua anō e ahau te whakawā ki tō rātou aroaro, ā, ka rite ki ā rātou whakaritenga tā rātou whakarite mōu.
EZE 23:25 Ka whakataua anō e ahau tōku hae ki a koe, ā, ka mahi weriweri rātou ki a koe. Ka riro anō tōu ihu i a rātou, me ōu taringa; ka hinga anō hoki ōu mōrehu i te hoari. Ka tangohia atu e rātou āu tama me āu tamāhine; ka pau anō ōu mōrehu i te ahi.
EZE 23:26 Ka huia atu anō e rātou ōu kākahu, ka tangohia anō ōu mea ātaahua.
EZE 23:27 Heoi, ka meinga e ahau tōu hē kia mutu, me tōu moepuku i tīmata mai rā i te whenua o Īhipa; kia kore ai ōu kanohi e ara ki aua mea, kia kore ai anō koe e mahara ki Īhipa ā muri ake nei.
EZE 23:28 “Nō te mea ko te kupu tēnei a te Ariki, a Ihowā: Tēnei ahau ka hoatu nei i a koe ki te ringa o te hunga e kinongia nā e koe, ki roto ki te ringa o te hunga kua ngākaukore nā koe ki a rātou.
EZE 23:29 Ka mahi anō rātou i runga i te mauāhara ki a koe, ā, ka riro ōu māuiui katoa i a rātou, mahue iho koe i a rātou kāhore he kākahu, noho tahanga ana. Ka kitea hoki e takoto kau ana ōu moepuku, tōu hē me ōu moepuku.
EZE 23:30 Ka meatia ēnei mea e ahau ki a koe mō tōu whāinga atu ki ngā tauiwi moepuku ai, mōu i poke i ā rātou whakapakoko.
EZE 23:31 I haere koe i te ara o tōu tuakana; nā, ka hoatu e ahau tāna kapu ki tōu ringa.
EZE 23:32 “Ko te kupu tēnei a te Ariki, a Ihowā: Ka inumia e koe te kapu a tōu tuakana, aua noa iho ki raro, nui noa atu; ka ai koe hei whakakatanga, hei taunutanga; ranea rawa taua kapu.
EZE 23:33 Ka kī koe i te haurangi, i te pōuri, i te kapu o te ketekete, o te whakangaromanga, i te kapu a tōu tuakana, a Hamaria.
EZE 23:34 Ka inumia anō rā e koe, tatau rawa, wāwāhi rawa i ngā maramara, ka haea anō e koe ōu ū. Nāku hoki te kōrero, e ai tā te Ariki, tā Ihowā.
EZE 23:35 “Inā, ko te kupu tēnei a te Ariki, a Ihowā: Nā, kua wareware nā koe ki ahau, kua makā anō ahau e koe ki muri i tōu tuarā, nā, pīkaua anō e koe tōu hē me ōu moepuku.”
EZE 23:36 I mea anō a Ihowā ki ahau: “E te tama a te tangata, e whakawā rānei koe i a Ohora rāua ko Ohoripa? Whakakitea ā rāua mea whakarihariha ki a rāua.
EZE 23:37 Nō te mea kua moepuku rāua, he toto kei ō rāua ringa. Kua moepuku anō rāua ki ā rāua whakapakoko; kua meinga e rāua ā rāua tamariki, āku i whānau nei i roto i a rāua kia tika i roto i te ahi, ki aua whakapakoko, pau tonu atu.
EZE 23:38 Ko tēnei anō tā rāua i mea ai ki ahau; i taua rā kotahi, whakapokea iho e rāua tōku wāhi tapu, ko āku hāpati kua noa i a rāua.
EZE 23:39 I tā rāua patunga hoki i ā rāua tamariki hei mea ki ā rāua whakapakoko, haere ana rāua i taua rā anō ki tōku wāhi tapu whakanoa ai. Nā, ko tā rāua tēnā i mea ai i roto i tōku whare.
EZE 23:40 “I unga tāngata anō koutou ki te hunga haere mai i tawhiti, he hunga i ungā atu nei he karere ki a rātou. Nā, kua tae mai rātou; mō rātou tāu horoi i a koe, mea rawa i ōu kanohi ki te pukepoto, whakapaipai rawa i a koe ki ngā whakapaipai.
EZE 23:41 Nā, noho ana koe, he mea korōria te moenga, i tōna taha ko te tēpu rite rawa; i runga ko tāku whakakakara, ko tāku hinu, he mea whakatakoto nāu.
EZE 23:42 “Ā, i taua wahine te ngē o te mano tini e noho mākohakoha ana; ā, i kawea mai i roto i te mano o te tāngata ngā haurangi o te koraha; ā, nā rātou i whakanoho he poroporo ki ō rāua ringa, he karauna ātaahua ki ō rāua māhunga.
EZE 23:43 Kātahi ahau ka mea mō taua wahine kua rūruhi nei e moepuku ana. ‘E moepuku anō rānei rātou ki a ia, me ia anō ki a rātou?’
EZE 23:44 Heoi, haere ana rātou ki a ia, he pērā i tā rātou haere ki te wahine moepuku; pērā tonu tā rātou haere ki a Ohora, ki a Ohoripa, ki ngā wāhine hē.
EZE 23:45 Nā, ko ngā tāngata tika, mā rātou rāua e whakawā, he whakawā i ngā wāhine moepuku, he whakawā i ngā wāhine whakaheke toto; he wāhine moepuku hoki rāua, he toto kei ō rāua ringa.
EZE 23:46 “Ko te kupu hoki tēnei a te Ariki, a Ihowā: Ka kawea mai e ahau he hui ki a rāua, ā, ka meinga rāua e ahau kia makamaka, kia pāhuatia.
EZE 23:47 Ā, ka ākina rāua e te hui ki te kōhatu, ka tapahia ki ā rātou hoari; ka whakamatea ā rāua tama ā rāua tamāhine, ka tahuna anō ō rāua whare ki te ahi.
EZE 23:48 “Heoi, ka meinga e ahau te pūremu kia mutu i te whenua; kia ako ai ngā wāhine katoa kia kaua ā rātou mahi e rite ki ō kōrua hē.
EZE 23:49 Ka hoatu anō e rātou ngā utu o tō kōrua hē ki a kōrua, ā, ka pīkaua e kōrua ngā hara o ā kōrua whakapakoko; ka mōhio ko te Ariki ahau, ko Ihowā.”
EZE 24:1 I puta mai anō te kupu a Ihowā ki ahau, i te iwa o ngā tau, i te tekau o ngā marama, i te tekau o ngā rā o te marama, i mea:
EZE 24:2 “E te tama a te tangata, tuhituhia te ingoa o tēnei rā, o tēnei rā kotahi rawa nei; ko te tino rā tēnei i anga nui ai te kīngi o Papurōna ki Hiruhārama.
EZE 24:3 Kōrerotia hoki tētahi kupu whakarite ki te whare whakakeke, mea atu ki a rātou: Ko te kupu tēnei a te Ariki, a Ihowā: Whakaekea te kōhua, whakaekea, ringihia anō he wai ki roto.
EZE 24:4 Kohikohia anō ōna wāhi ki roto, ngā wāhi pai katoa, te hūhā, te peke; whakakīia ki ngā wheua pai rawa.
EZE 24:5 Tīkina te hipi pai rawa, me haupū ngā wheua ki raro i a ia; kia nui te koropupūtanga; āe rā, kōhuatia ōna wheua ki roto.
EZE 24:6 “Mō reira ko te kupu tēnei a te Ariki, a Ihowā: Auē te mate mō te pā toto, me te kōhua he waikura nei tōna, kīhai nei tōna waikura i tahia! Whakaputaina ki waho tēnei wāhi ōna, tēnei wāhi ōna; kāhore tētahi rota i tau ki runga i a ia.
EZE 24:7 Nō te mea kei roto i a ia ōna toto, kua waiho e ia ki runga ki te kāmaka; kīhai i ringihia e ia ki te whenua, kia hīpokina ai ki te puehu.
EZE 24:8 He mea kia puta ake ai te weriweri ki te rapu utu, kua waiho e ahau ōna toto ki runga ki te kāmaka, kei hīpokina.
EZE 24:9 “Nā reira tēnei kupu a te Ariki, a Ihowā: Auē te mate mō te pā toto! Māku anō e whakanui tōna pūranga wahie.
EZE 24:10 Pūrangatia te wahie, whakaūngia te ahi, kia pai rawa te kōhua i ngā kiko; meatia mārietia kia pupuru ngā kai, kia wera hoki ngā wheua.
EZE 24:11 Ka tū kau, whakatūria ki runga ki ōna ngārahu, kia mahana ai, kia wera ai tōna parāhi, kia rewa ai tōna poke i roto, kia poto ai te waikura.
EZE 24:12 Kua hōhā ia i te mahi; otiia kīhai tōna waikura nui i puta atu i roto i a ia; kāhore tōna waikura i kore i te ahi.
EZE 24:13 “He hē kei roto i tōu poke. Nā, mea noa ahau i a koe kia mā, ā, kīhai koe i mā; mō reira e kore tōu poke e whakamākia ā muri ake nei, kia mākona rā anō tōku riri ki a koe.
EZE 24:14 “Nāku, nā Ihowā te kupu. Ka rite, ka mahia anō e ahau, e kore tāku e taka, e kore anō ahau e manawapā, e kore e rīpenetā. Ka rite ki ōu ara, ka rite ki āu mahi tā rātou whakawā mōu, e ai tā te Ariki, tā Ihowā.”
EZE 24:15 I puta mai anō te kupu a Ihowā ki ahau, i mea:
EZE 24:16 “E te tama a te tangata, ka tangohia mai e ahau i tōu taha tā ōu kanohi i hiahia ai, ka whakapāngia ki te mate; kaua anō ia e uhungatia, kaua e tangihia, kaua ōu roimata e puta.
EZE 24:17 E tangi, engari kia ngāwari; kauaka he uhunga tūpāpaku, herea tōu tūpare ki runga ki a koe, kuhua anō ōu hū ki ōu waewae, kaua anō ōu ngutu e āraia, kaua anō e kainga te taro tāngata.”
EZE 24:18 Heoi, i kōrero ahau ki te iwi i te ata; ā, i te ahiahi ka mate tōku hoa wahine. Nā, i te ata ka meatia e ahau te mea i whakahaua ki ahau.
EZE 24:19 Nā, ka mea te iwi ki ahau, “E kore ianei e kōrerotia e koe ki a mātou, he aha mō mātou ēnā mea e meatia nā e koe?”
EZE 24:20 Anō rā ko ahau ki a rātou, “I puta mai te kupu a Ihowā ki ahau, i mea:
EZE 24:21 Mea atu ki te whare o Īharaira: Ko te kupu tēnei a te Ariki, a Ihowā: Tēnei ahau te whakapoke nei i tōku wāhi tapu, i tā koutou i whakaī ai, i tā koutou kanohi e hiahia nei, i te mea e manawapātia ana e tō koutou wairua. Nā, ko ā koutou tama, ko ā koutou tamāhine, i mahue nei ki a koutou, ka hinga i te hoari.
EZE 24:22 Ā, ko tā koutou e mea ai ka rite ki tāku i mea nei; e kore ō koutou ngutu e āraia, e kore anō koutou e kai i te taro tāngata.
EZE 24:23 E mau anō ō koutou tūpare ki ō koutou māhunga, ō koutou hū ki ō koutou waewae. E kore koutou e uhunga, e kore e tangi; engari ka memeha atu i runga i ō koutou hē, ka kōingo ki tētahi, ki tētahi.
EZE 24:24 Ā hei tohu a Ehekiera ki a koutou; ka rite ki ngā mea katoa i mea ai ia tā koutou e mea ai. Ka pā mai tēnei, ka mōhio koutou ko te Ariki ahau, ko Ihowā.
EZE 24:25 “Nā, ko koe, e te tama a te tangata, he teka ianei i te rā e tangohia atu ai e ahau tō rātou kaha, tō rātou koa whakakorōria, tā ō rātou kanohi e hiahia ai, tā ō rātou ngākau e ōkaka tonu ai, ā rātou tama, ā rātou tamāhine,
EZE 24:26 i taua rā ka haere mai te mea i mawhiti ki a koe kia rongo ai ōu taringa?
EZE 24:27 I taua rā ka puaki tōu māngai ki te tangata i mawhiti, ā, ka kōrero, kore ake ōu wahangū; hei tohu hoki koe ki a rātou; ā, ka mōhio rātou ko Ihowā ahau.”
EZE 25:1 I puta mai anō te kupu a Ihowā ki ahau, i mea:
EZE 25:2 “E te tama a te tangata, anga atu tōu mata ki ngā tama a Āmona, ka poropiti i te hē mō rātou.
EZE 25:3 Mea atu hoki ki ngā tama a Āmona, ‘Whakarongo ki te kupu a te Ariki a Ihowā; Ko te kupu tēnei a te Ariki, a Ihowā: Nā, kua mea mai nā koe, “Ha!” ki tōku wāhi tapu i te mea e whakapokea ana; ki te oneone anō o Īharaira i te mea ka ururuatia, ki te whare anō o Hūrā i a rātou ka riro ki te whakarau;
EZE 25:4 mō reira tēnei ahau te hoatu nei i a koe hei kāinga ki ngā tamariki o te rāwhiti, ā, ka whakatūria e rātou ō rātou puni ki a koe, ka hangā anō ō rātou kāinga ki a koe. Ka pau i a rātou āu hua, ka inumia e rātou tāu waiū.
EZE 25:5 Ka meinga anō e ahau a Rapa hei kāinga kāmera, me ngā tama anō a Āmona hei tāpapatanga hipi; ā, ka mōhio koutou ko Ihowā ahau.
EZE 25:6 Ko te kupu hoki tēnei a te Ariki, a Ihowā: Nā, kua papaki nā ōu ringa, kua takahi ōu waewae, pau katoa tōu ngākau ki te koa, he kino nōu ki te whenua o Īharaira;
EZE 25:7 mō reira, nā, kua totoro atu tōku ringa ki a koe, ā, kua tukua koe e ahau hei pāhuatanga mā ngā iwi. Ka hātepea atu koe e ahau i roto i ngā iwi, ka hunā anō koe e ahau i roto i ngā whenua. Ka whakangaromia koe e ahau; ā, ka mōhio koe ko Ihowā ahau.’ ”
EZE 25:8 “Ko te kupu tēnei a te Ariki, a Ihowā: ‘Kua mea nei a Moapa rāua ko Heira: Nanā, kua rite te whare o Hūrā ki ngā iwi katoa,
EZE 25:9 mō reira tēnei ahau te mea nei kia takoto kau te taha o Moapa i ngā pā, i ōna pā i ōna rohe, te korōria o te whenua, i Peteiehimoto, i Paara-Meono, i Kiriataima,
EZE 25:10 tae noa ki ngā tama o te rāwhiti kia haere ki te whawhai ki ngā tama a Āmona, ā, ka tukua rātou e ahau hei kāinga tupu, e kore ai e maharatia ngā tama a Āmona i roto i ngā iwi.
EZE 25:11 Ka mahia anō e ahau he whakawā ki a Moapa; ā, ka mōhio rātou ko Ihowā ahau.’ ”
EZE 25:12 “Ko te kupu tēnei a te Ariki, a Ihowā: ‘Nā, kua mahia nā e Ēroma he hē mō te whare o Hūrā, kua rapu utu kua nui tō rātou kino, kua rapu utu i a rātou;
EZE 25:13 mō reira ko te kupu tēnei a te Ariki, a Ihowā: Ka totoro anō tōku ringa ki a Ēroma, ka hātepea atu ngā tāngata me ngā kararehe o reira. Ka meinga anō e ahau te ritenga atu o Temana hei ururua, ka hinga anō ngā tāngata, ā tae atu ana ki Rerana, i te hoari.
EZE 25:14 Ka tukua atu anō e ahau tāku rapu utu ki a Ēroma, mā tāku iwi, mā Īharaira e mahi; ka meatia anō e rātou i roto i a Ēroma ngā mea e rite ana ki tōku riri, ki tōku weriweri; ā, ka mōhio rātou ki tāku rapu utu, e ai tā te Ariki, tā Ihowā.’ ”
EZE 25:15 “Ko te kupu tēnei a te Ariki, a Ihowā: ‘He rapu utu nei te mahi a ngā Pirihitini, he kino nei te ngākau i rapu utu ai rātou, he mea kia ngaro, he mauāhara tūturu;
EZE 25:16 mō reira ko te kupu tēnei a te Ariki, a Ihowā: Nanā, ka totoro tōku ringa ki ngā Pirihitini, ā, ka hātepea atu e ahau ngā Keretimi, ka hunā anō e ahau ngā mōrehu o te tahatai.
EZE 25:17 He nui hoki ngā rapunga utu e mahia e ahau ki a rātou, weriweri rawa ngā whakatūpehupehunga; ā, ka mōhio rātou ko Ihowā ahau, ina tukua e ahau tāku rapu utu ki a rātou.’ ”
EZE 26:1 Nā, i te tekau mā tahi o ngā tau, i te tahi o ngā rā o te marama, i puta mai te kupu a Ihowā ki ahau, i mea:
EZE 26:2 “E te tama a te tangata, kua mea nā a Tāira ki Hiruhārama: ‘Ha, kua pakaru ia, te kūwaha o ngā iwi; kua anga mai ia ki ahau; ka whakakīia ahau, i a ia ka ururua nei!’
EZE 26:3 Mō reira ko te kupu tēnei a te Ariki, a Ihowā: Nanā, hei hoariri tēnei ahau mōu, e Tāira, ā, ka meinga e ahau ngā iwi maha kia eke ake ki a koe, kia pērā anō me te moana e mea nei i ōna ngaru kia eke ake.
EZE 26:4 Ā, ka kore i a rātou ngā taiepa o Tāira, ka pakaru anō ōna pourewa i a rātou. Ka tahia atu anō e ahau tōna puehu i runga i a ia, ka meinga ia kia rite ki te kāmaka moremore.
EZE 26:5 Ka waiho ia hei horahanga kupenga i waenga moana. Nāku hoki te kupu, e ai tā te Ariki, tā Ihowā. Ka waiho hoki ia hei pāhuatanga mā ngā iwi.
EZE 26:6 Nā, ko āna tamāhine i te māra, ka tukitukia e te hoari; ā, ka mōhio rātou ko Ihowā ahau.
EZE 26:7 “Nō te mea ko te kupu tēnei a te Ariki, a Ihowā: Tēnei te kawea atu nei e ahau i te raki ki Tāira a Nepukareha kīngi o Papurōna, kīngi o ngā kīngi, me ngā hōiho, me ngā hāriata, me ngā kaieke hōiho, me te huihui, me te iwi nui.
EZE 26:8 Ka patua e ia ki te hoari āu tamāhine i te māra. Ka hangā anō e ia he taumaihi hei tatau ki a koe, ka haupūria ake anō he pukepuke hei tatau ki a koe, ka ara anō i a ia te puapua ki a koe.
EZE 26:9 Ka whakatūria anō e ia ngā mea whawhai ki ōu taiepa, ka wāhia anō e ia ōu pourewa ki āna tītaha.
EZE 26:10 I te tini o ana hōiho, ka taupokina koe e tō rātou puehu; ka ngarue ōu taiepa i te haruru o ngā kaieke hōiho, o ngā kāta, o ngā hāriata, ina tomokia e ia ōu kūwaha, ina pērā ia me te hunga e tomo ana ki roto ki te pā kua pakaru.
EZE 26:11 Ka takatakahia ōu ara katoa e ngā pāua o ana hōiho; ka tukitukia e ia tōu iwi ki te hoari, ka riro iho anō ngā pou o tōu kaha ki te whenua.
EZE 26:12 Ka pāhuatia e rātou ōu taonga, ā, hei taonga parakete āu mea hokohoko. Ka wāhia iho ōu taiepa, ka pakaru ōu whare e matenuitia ana e koe; ka makā anō e rātou ōu kōhatu, ōu rākau, me tōu puehu, ki te wai.
EZE 26:13 Ka mutu anō i ahau te ngahau o āu waiata, e kore anō te tangi o āu hāpa e rangona ā muri ake nei.
EZE 26:14 Ā, ka meinga koe e ahau kia rite ki te kāmaka moremore; ka waiho koe hei horahanga kupenga. E kore koe e hangā ā muri ake nei; nāku hoki, nā Ihowā te kupu, e ai tā te Ariki, tā Ihowā.
EZE 26:15 “Ko te kupu tēnei a te Ariki, a Ihowā ki a Tāira: E kore ianei ngā motu e wiri i te haruru o tōu hinganga, ina auē te tangata i werohia, ina hinga te parekura i roto i a koe?
EZE 26:16 Ko reira hoki ngā rangatira katoa o te moana heke iho ai i runga i ō rātou torōna; ko ō rātou koroka whakarere rawa, ko ō rātou kākahu whakairo unu rawa. Ko te kākahu mō rātou ko te wiri; ka noho ki te whenua, hono tonu te wiri, ketekete tonu ki a koe.
EZE 26:17 Ā, ka maranga tā rātou tangi mōu, ka mea rātou ki a koe: ‘Taukiri e, kua ngaro koe, e te pā o te hunga rere moana! E te pā ingoa nui i kaha nei i runga i te moana, ā, ia me ōna tāngata anō, e mea nei i tō rātou wehi kia pā ki ngā tāngata katoa e takataka ana i reira!
EZE 26:18 Ākuanei ngā motu wiri ai i te rā e hinga ai koe; inā, ka ohorere ngā motu o te moana i a koe ka riro.’
EZE 26:19 “Nō te mea ko te kupu tēnei a te Ariki, a Ihowā: I te wā e meinga ai koe e ahau hei pā kua ururuatia, kia rite ki ngā pā kāhore e nohoia; i te wā e kawea atu ai e ahau te rire ki runga ki a koe, ā, ka taupokina koe e ngā wai nunui;
EZE 26:20 ko reira whakahokia iho ai koe e ahau ki raro, koutou ko te hunga e heke ana ki te rua, ki ngā tāngata onamata, ā, ka meinga koe kia noho ki ngā wāhi o raro o te whenua, ki ngā wāhi mokemoke onamata, i roto i te hunga e heke ana ki te poka, kore iho koe e nohoia; ā, ka hoatu e ahau he korōria ki te whenua o te hunga ora.
EZE 26:21 Ka meinga koe e ahau hei wehi, ā, mōtī iho koe; ka rapua anō koe, ā, kore noa iho e kitea ā ake ake, e ai tā te Ariki, tā Ihowā.”
EZE 27:1 I puta mai anō te kupu a Ihowā ki ahau, i mea:
EZE 27:2 “Kia anga atu ākuanei tāu tangi, e te tama a te tangata, ki a Tāira;
EZE 27:3 mea atu hoki ki a Tāira: E koe e noho nei i te tapokoranga mai o te moana, ko koe nei te kaihokohoko a ngā iwi ki ngā motu maha: Ko te kupu tēnei a te Ariki, a Ihowā: E Tāira, kua mea nā koe, ‘Ko ahau te mea ātaahua rawa.’
EZE 27:4 Kei waenga moana ōu rohe, oti rawa koe te whakaataahua e ōu kaihanga.
EZE 27:5 Nō ngā kauri o Heniri ngā papa katoa i hangā ai ōu kaipuke; i tīkina anō he hīta i Repanōna hei hanga rewa māu.
EZE 27:6 Nō ngā oki o Pahana ngā hoe i hangā māu, ōu taumanu he mea hanga ki te rei, he mea kua oti te whakanoho ki te ake o ngā motu o Kitimi.
EZE 27:7 He rīnena pai, he mea whakairo nō Īhipa te mea i wherahia e koe hei kōmaru mōu, hei kara māu; ko te hīpoki mōu, he purū, he pāpura nō ngā motu o Eriha.
EZE 27:8 Ko āu kaihoe ko ngā tāngata o Hairona, o Arawara; ko āu kaiurungi ko ngā tāngata whakaaro nui i roto i a koe, e Tāira.
EZE 27:9 I roto ngā kaumātua o Kepara i a koe, me ngā tāngata whakaaro nui o reira hei kaimono māu. I a koe ngā kaipuke katoa o te moana, me ō rātou kaiwhakatere, hei hoko i ōu taonga.
EZE 27:10 “I roto i tōu ope ko Pahia, ko Ruru, ko Putu, he hōia nāu. Whakairihia ake ana e rātou te puapua me te pōtae i roto i a koe; he mea whakahōnore koe nā rātou.
EZE 27:11 I runga i ōu taiepa ngā tāngata o Arawara me tōu ope anō ā tawhio noa, i roto i ōu pourewa ngā Kamarimi. Whakairihia ana e rātou ā rātou whakangungu rākau ki ōu taiepa ā tawhio noa; oti rawa koe te whakaataahua e rātou.
EZE 27:12 “He kaihokohoko a Tarahihi ki a koe, he nui hoki nō ōu taonga katoa; ko tā rātou i tuku ai i āu hokohokonga he hiriwa, he rino, he tine, he matā.
EZE 27:13 “Ko Iawana, ko Tūpara, ko Meheke, he kaihokohoko rātou nāu; ko tā rātou i tuku ai i ōu kāinga hoko, he tāngata, he oko parāhi.
EZE 27:14 “Ko ngā tāngata o te whare o Tokārama, ko tā rātou i tuku ai i āu hokohokonga he hōiho, he hōiho nō te whawhai, he muera.
EZE 27:15 “He kaihokohoko nāu ngā tāngata o Rerana; he maha ngā motu i hokohokona ai ngā taonga e koe. Kawea mai ana e rātou hei whakawhiti ki a koe, he haona rei, he eponi.
EZE 27:16 “He kaihokohoko nāu a Hīria, i te nui hoki o ngā mahi a ōu ringa; ko tā rātou i tuku ai mō āu taonga he emerara, he pāpura, he mea whakairo, he rīnena pai, he kaoa, he rupi.
EZE 27:17 “Ko Hūrā, ko te whenua o Īharaira ko rātou āu kaihokohoko. Ko tā rātou i tuku ai i ōu kāinga hoko he wīti nō Miniti, he panaka, he honi, he hinu, he pama.
EZE 27:18 “He kaihokohoko nāu a Ramahiku he nui nō ngā mahi a ōu ringa, he nui nō ngā taonga katoa; ko tā rātou, he wāina nō Herepono, he huruhuru hipi mā.
EZE 27:19 “I tuku taonga a Rāna, a Iawana, he miro huruhuru, i roto i āu hokohokonga. I āu taonga hokohoko ko te rino kua oti te mahi, ko te kahia, ko te kākaho kakara.
EZE 27:20 “Ko Rerana tāu kaihokohoko i ngā kākahu utu nui mō ngā hāriata.
EZE 27:21 “Ko Arāpia, ko ngā rangatira katoa o Kerara, i hokohokona ō rātou taonga e koe, ngā reme, ngā hipi toa, ngā koati. Ko ngā mea ēnā i hokohoko ai rātou ki a koe.
EZE 27:22 “Ko ngā kaihokohoko o Hēpā, o Rāma, he kaihokohoko anō rātou nāu; ko tā rātou i tuku ai i āu hokohokonga ko ngā mea pai rawa o ngā kīnaki reka katoa, ko ngā kōhatu utu nui katoa, ko te kōura.
EZE 27:23 “Ko Harana, ko Kane, ko Erene, ko ngā kaihokohoko o Hēpā, ko Ahuru, ko Kirimara, he kaihokohoko nāu.
EZE 27:24 Ko rātou hei hoko i ngā mea pai rawa ki a koe, i ngā kākahu purū, i te mea whakairo, i ngā pouaka kākahu pai, he mea paihere ki te aho, he hīta, i roto i ōu taonga hoko.
EZE 27:25 Ko ngā kaipuke o Tarahihi ngā waka harihari i ōu taonga. Ā, ka whakakīia koe, ka meinga kia nui rawa tōu korōria i waenga moana.
EZE 27:26 I kawea koe e ōu kaihoe ki ngā wai maha; i pākarua koe e te hau marangai ki waenga moana.
EZE 27:27 Ko ōu taonga, ko āu hokohokonga, ko āu whakawhitiwhitinga, ko āu kaiwhakatere kaipuke, ko āu kaiurungi, ko āu kaimono, me ngā kaiwhakawhitiwhiti i āu taonga, me āu hōia katoa i roto i a koe, i roto anō i tōu hui katoa i waenganui i a koe, ka taka rātou ki waenga moana i te rā e hinga ai koe.
EZE 27:28 Ka ngateri a waho o te pā i te ngangau, i te hāmama o āu kaiurungi.
EZE 27:29 Nā, ko ngā kaihāpai hoe katoa, ko ngā kaiwhakatere, ko ngā kaiurungi katoa o te moana, ka mahuta mai i runga i ō rātou kaipuke, ka tū ki te tuawhenua,
EZE 27:30 ā, ka meinga e rātou tō rātou reo mōu kia rangona, tīwerawera ana tā rātou tangi, ka opehia anō e rātou he puehu ki ō rātou māhunga, ka takaoriori ki te pungarehu.
EZE 27:31 Moremore rawa rātou i te whakaaro ki a koe, he kākahu taratara te whītiki, mamae rawa te ngākau, tīwerawera te tangi e tangi ai rātou ki a koe.
EZE 27:32 I a rātou anō e tangi ana, ka maranga tā rātou tangi apakura mōu, ā, ka uhunga rātou ki a koe, ka mea, ‘Ko tēhea pā i rite ki Tāira, ki tēnei i whakawahangūtia nei i waenga moana?
EZE 27:33 I te putanga atu o ōu taonga i ngā moana, he maha ngā iwi i mākona i tāu; i whai taonga ngā kīngi o te whenua i a koe, i te nui hoki o ōu taonga, o ōu rawa.
EZE 27:34 I te wā i pakaru ai koe i ngā moana, ki ngā wāhi hōhonu o te moana, i taka ōu rawa, me tōu hui katoa i waenganui i a koe.
EZE 27:35 Ko ngā tāngata katoa o ngā motu, ketekete ana ki a koe, nui atu te wehi o ō rātou kīngi, ko ō rātou mata kōhukihuki ana.
EZE 27:36 Ka whakahī mai ki a koe ngā kaihokohoko i roto i ngā iwi; ka ai koe hei whakawehi; ā, kore tonu ake koe ake ake.’ ”
EZE 28:1 I puta mai anō te kupu a Ihowā ki ahau, i mea:
EZE 28:2 “E te tama a te tangata, mea atu ki te rangatira o Tāira: Ko te kupu tēnei a te Ariki, a Ihowā; Kua whakakake nā tōu ngākau, kua mea, ‘He atua ahau; e noho ana i te nohoanga o te Atua, i waenga moana.’ Nā, he tangata nei anō koe, ehara i te atua, ahakoa ki tau ko tōu ngākau e rite ana ki tō te Atua ngākau.
EZE 28:3 Nanā, nui atu ōu whakaaro i o Raniera; kāhore he mea ngaro e taea te huna i a koe.
EZE 28:4 He nui nō ōu whakaaro, he mātauranga nōu i mahia ai e koe he taonga mōu, i mahia ai e koe he kōura, he hiriwa ki roto ki ōu whare taonga.
EZE 28:5 He nui noa atu nō ōu whakaaro, he hokohoko nāu, i whakaraneatia ai e koe ōu rawa, ā, whakakake ana tōu ngākau i ōu rawa.
EZE 28:6 Mō reira ko te kupu tēnei a te Ariki, a Ihowā: Kua whai ake nā tōu ngākau ki tō te Atua ngākau;
EZE 28:7 mō reira tēnei ahau te kawe nei i ngā tautāngata ki a koe, te hunga nanakia rawa o ngā iwi; ā, ka unuhia e rātou ā rātou hoari hei whawhai ki te ātaahua o ōu whakaaro nui, ka whakapokea anō e rātou tōu kānapatanga.
EZE 28:8 Ka whakahokia iho koe e rātou ki te poka, ā, ko te mate mōu, ko ngā mate o te hunga e patua ana i waenga moana.
EZE 28:9 E mea ake anō rānei koe ki te aroaro o tōu kaipatu, ‘Ko te Atua ahau,’ otiia he tangata anō koe, ehara koe i te Atua i roto i te ringa o tōu kaipatu?
EZE 28:10 Ko tōu matenga, ko ngā matenga o te hunga kokotikore i te ringa o ngā tautāngata. Nāku hoki te kupu, e ai tā te Ariki, tā Ihowā.”
EZE 28:11 I puta mai anō te kupu a Ihowā ki ahau, i mea:
EZE 28:12 “E te tama a te tangata, kia ara tāu tangi mō te kīngi o Tāira, mea atu hoki ki a ia: Ko te kupu tēnei a te Ariki, a Ihowā: Kei te tino o te pai tāu hīri, kī tonu koe i ngā whakaaro nunui, pai rerehua te ātaahua.
EZE 28:13 I Erene koe, i te kāri a te Atua e noho ana; ko tōu hīpoki ko ngā kōhatu utu nui katoa, ko te harariu, ko te tōpaha, ko te taimana, ko te perira, ko te onika, ko te hahapa, ko te hapaira, ko te emerara, ko te kapakara, ko te kōura. I whakapaia anō te mahi o āu timipera, o āu pūtōrino i roto i a koe i te rā i hangā ai koe.
EZE 28:14 Ko koe te kerupa hīpoki, te mea i whakawahia; nāku anō koe i mea hei pēnā, i noho ai koe i runga i te maunga tapu o te Atua; i hāereere anō koe i roto i ngā kōhatu ahi.
EZE 28:15 Tapatahi tonu koe i ōu ara, i te rā, rā anō i hangā ai koe, ā taea noatia te kitenga o te hē i roto i a koe.
EZE 28:16 He nui nō āu hokohokonga i kī ai a roto i a koe i te tutū, ā, hara iho koe; mō reira ka makā atu koe, te mea poke, e ahau i te maunga o te Atua. Ka ngaro anō koe, e te kerupa hīpoki, i roto i ngā kōhatu ahi.
EZE 28:17 Kua whakakake tōu ngākau ki tōu ātaahua, nā tōu kānapatanga i hē ai ōu whakaaro nui. Kua pangā koe e ahau ki te whenua, kua tukua koe e ahau ki te aroaro o ngā kīngi, hei mātakitakinga mā rātou.
EZE 28:18 Kua whakapokea e koe ōu wāhi tapu ki te maha o ōu kino, ki te hē i a koe i hokohoko rā; mō reira i whakaputaina mai ai e ahau he ahi i roto i a koe, hei kai i a koe, ā, kua meinga anō koe e ahau hei pungarehu ki runga ki te whenua i te tirohanga a te hunga katoa e kite ana i a koe.
EZE 28:19 Ko te hunga katoa e mōhio ana ki a koe i roto i ngā iwi ka mīharo ki a koe. Ka ai koe hei whakawehi, kore tonu ake koe, ake ake.”
EZE 28:20 I puta mai anō te kupu a Ihowā ki ahau, i mea:
EZE 28:21 “E te tama a te tangata, anga atu tōu mata ki Hairona, poropititia hoki te hē mō reira,
EZE 28:22 mea atu: Ko te kupu tēnei a te Ariki, a Ihowā: Nanā, hei hoariri ahau mōu, e Hairona; ka whai korōria anō hoki ahau i roto i a koe; ā, ka mōhio rātou ko Ihowā ahau, ina mahia e ahau he whakawā i roto i a ia, ina whakatapua ahau i roto i a ia.
EZE 28:23 Ka ungā atu hoki e ahau te mate urutā ki a ia, me te toto ki ōna ara; ka hinga hoki te hunga i werohia i waenga ōna, mea rawa ki te hoari i runga i a ia ā tawhio noa; ā, ka mōhio rātou ko Ihowā ahau.
EZE 28:24 “Kāhore hoki he tātarāmoa ngau ā muri ake nei ki te whare o Īharaira, kāhore he tūmatakuru whakamamae a te hunga katoa i tētahi taha o rātou, i tētahi taha, a te hunga rā i whakahāwea ki a rātou; ā, ka mōhio rātou ko te Ariki ahau, ko Ihowā.”
EZE 28:25 “Ko te kupu tēnei a te Ariki, a Ihowā: Ka oti te whare o Īharaira te kohikohi e ahau i roto i ngā iwi i whakamararatia atu ai rātou, ā, ka oti ahau te whakatapu i runga i a rātou i te tirohanga a ngā iwi, ko reira rātou noho ai ki tō rātou oneone i hoatu e ahau ki tāku pononga, ki a Hākopa.
EZE 28:26 Ka noho anō rātou ki reira, tē ai he wehi; āe rā, ka hanga whare anō rātou, ka whakatō māra wāina, ka āta noho anō hoki, ina mahia e ahau he whakawā ki te hunga katoa i whakahāwea ki a rātou i tētahi taha o rātou, i tētahi taha; ā, ka mōhio rātou ko Ihowā ahau, ko tō rātou Atua.”
EZE 29:1 I te tekau o ngā tau, i te tekau o ngā marama, i te tekau mā rua o ngā rā o te marama, ka puta mai te kupu a Ihowā ki ahau, i mea:
EZE 29:2 “E te tama a te tangata, anga atu tōu mata ki a Parao kīngi o Īhipa; poropititia he hē mōna, mō Īhipa katoa hoki.
EZE 29:3 Kōrero, mea atu: Ko te kupu tēnei a te Ariki, a Ihowā: Hei hoariri tēnei ahau mōu, e Parao kīngi o Īhipa, e te tarakona nui e takoto nā i waenganui i ōna awa; nāna nei te kupu, ‘Nāku tāku awa, nāku anō i hanga hei mea māku.’
EZE 29:4 Ā, ka makā e ahau he matau ki ōu kauae, ka meinga anō e ahau ngā ika o ōu awa kia piri ki ōu unahi. Ka tangohia mai anō koe e ahau i waenganui o ōu awa, me ngā ika katoa o ōu awa e piri ana ki ōu unahi.
EZE 29:5 Ka waiho anō koe e ahau, he mea kua makā atu ki te koraha, a koe me ngā ika katoa o ōu awa; ka hinga koe ki runga ki te mata o te pārae; e kore koe e kohikohia, e kore e huihuia. Kua tukua atu koe e ahau hei kai mā te kīrehe o te whenua, mā te manu o te rangi.
EZE 29:6 Ā, ka mōhio ngā tāngata katoa o Īhipa ko Ihowā ahau. “He kākaho hoki rātou kua waiho nei hei tokotoko mō te whare o Īharaira.
EZE 29:7 Nō te hopukanga atu a tō rātou ringa i a koe, whati pū koe, haea ana e koe ō rātou pokohiwi katoa. I tō rātou okiokinga ki runga ki a koe, whati pū koe, wiri ana i a koe ō rātou hope katoa.
EZE 29:8 “Mō reira ko te kupu tēnei a te Ariki, a Ihowā: Tēnei ahau te kawe nei i te hoari ki runga ki a koe, ka hātepea atu anō e ahau te tangata me te kararehe i roto i a koe.
EZE 29:9 Ka ururuatia anō te whenua o Īhipa, ka tūheatia; ā, ka mōhio rātou ko Ihowā ahau. “Mōna hoki i kī, ‘Nāku te awa, nāku anō i hanga.’
EZE 29:10 Mō reira hei hoariri tēnei ahau mōu, mō ōu awa, ka meinga anō e ahau te whenua o Īhipa kia ururua rawa, hei tūhea, i te Taumaihi o Hewene tae noa atu ki te rohe o Etiopia.
EZE 29:11 E kore tētahi waewae tangata e tika nā reira, e kore anō te waewae kararehe e tika nā reira, e whā tekau ngā tau e kore ai a reira e nohoia.
EZE 29:12 Ka meinga anō e ahau te whenua o Īhipa kia tūheatia i waenganui o ngā whenua tūhea, me ōna pā i roto i ngā pā kua ururuatia, e whā tekau ngā tau e tūhea ai. Ka marara anō i ahau ngā Īhipiana ki roto ki ngā iwi, ka tītaria ki ngā whenua.
EZE 29:13 “Ko te kupu hoki tēnei a te Ariki, a Ihowā: I te mutunga o ngā tau e whā tekau ka huihuia mai e ahau ngā Īhipiana i roto i ngā iwi i whakamararatia atu ai rātou.
EZE 29:14 Ka whakahokia mai e ahau a Īhipa i te whakarau, ka whakahokia rātou ki te whenua o Pātoro, ki te whenua i tupu mai ai rātou, ā, hei kīngitanga iti rātou ki reira.
EZE 29:15 Ko te iti rawa ia i roto i ngā kīngitanga, e kore anō e neke ake i muri nei ki runga ake i ngā iwi. Māku hoki rātou e whakaiti, e kore ai rātou e whakahaere tikanga i roto i ngā iwi.
EZE 29:16 E kore anō e waiho hei okiokinga mō te whare o Īharaira, hei whakamahara ki te hē, i a rātou ka anga nei, ka whai i a rātou; ā, ka mōhio rātou ko te Ariki ahau, ko Ihowā.”
EZE 29:17 Nā, i te rua tekau mā whitu o ngā tau, i te tuatahi o ngā marama, i te tuatahi o ngā rā o te marama, ka puta mai te kupu a Ihowā ki ahau, i mea:
EZE 29:18 E te tama a te tangata, he nui te mahi i whakamahia ai tāna ope e Nepukareha kīngi o Papurōna ki Tāira. Pākira katoa ngā mātenga, pahore katoa ngā pokohiwi, kāhore hoki he utu i a ia, rātou ko tāna ope mō Tāira, mō te mahi i mahi ai ia ki reira.
EZE 29:19 Mō reira ko te kupu tēnei a te Ariki, a Ihowā: Nanā, ka hoatu e ahau te whenua o Īhipa ki a Nepukareha kīngi o Papurōna, ā, ka riro i a ia ōna mano, ka pāhuatia ōna taonga. Ka murua hoki āna mea, ā, ko tēnā hei utu ki tāna ope.
EZE 29:20 Kua hoatu e ahau te whenua o Īhipa ki a ia hei utu mō tāna mahi i mahi ai ia; ko tā rātou hoki i mahi ai, he mea māku, e ai tā te Ariki, tā Ihowā.
EZE 29:21 “Ā taua rā ka meinga e ahau he haona kia wana mō te whare o Īharaira, ka hoatu anō e ahau ki a koe he kuihitanga mō te māngai i waenganui i a rātou; ā, ka mōhio rātou ko Ihowā ahau.”
EZE 30:1 I puta mai anō te kupu a Ihowā ki ahau, i mea:
EZE 30:2 “E te tama a te tangata, poropiti, mea atu, Ko te kupu tēnei a te Ariki, a Ihowā: Auē koutou, ‘Taukiri e, taua rā nei!’
EZE 30:3 Kua tata mai hoki te rā, te rā o Ihowā kua tata mai, he rangi tukupū, ko te wā ia o ngā iwi.
EZE 30:4 Ā, ka tae mai te hoari ki Īhipa, ka nui anō te mamae o Etiopia, ina hinga ngā tūpāpaku ki Īhipa; ā, ka riro atu i ā rātou ōna mano, ka wāhia hoki ōna tūranga.
EZE 30:5 Ko Etiopia, ko Putu, ko Ruru, ko te iwi whakauru katoa, ko Kupu, ko ngā tāngata anō o te whenua o te kawenata, ka hinga ngātahi rātou i te hoari.
EZE 30:6 Ko te kupu tēnei a Ihowā: Ka hinga anō ngā kaiāwhina o Īhipa; ka riro iho anō te whakapehapeha o tōna kaha; ka hinga rātou i te hoari i reira, i te taumaihi atu o Hewene, e ai tā te Ariki, tā Ihowā.
EZE 30:7 “Ka noho kau noa iho rātou i waenganui o ngā whenua tūhea, ka tū anō ōna pā i waenganui i ngā pā kua ururuatia.
EZE 30:8 Ā, ka mōhio rātou ko Ihowā ahau, ina tukua e ahau he ahi ki Īhipa, ina whakamōtītia ōna kaiāwhina katoa.
EZE 30:9 “I taua rā ka haere atu ngā karere i tōku aroaro i runga i ngā kaipuke, ki te whakawehi i ngā Etiopiana kāhore nei e ohooho. Ka nui anō tō rātou mamae, ka rite ki tō te rā o Īhipa; nanā, te haere mai nei!
EZE 30:10 “Ko te kupu tēnei a te Ariki, a Ihowā: Ka meinga anō e ahau te ringa o Nepukareha kīngi o Papurōna hei whakamutu i ngā mano tini o Īhipa.
EZE 30:11 Ka kawea mai ia, rātou anō ko tōna iwi, ko te hunga nanakia o ngā iwi, ki te huna i te whenua. Ka maunu anō ā rātou hoari ki Īhipa, ā, ka kapi te whenua i te tūpāpaku.
EZE 30:12 Ka maroke anō ngā awa i ahau, ka hokona atu anō te whenua ki te ringa o te hunga kino. Ka ururua anō i ahau te whenua, me ōna tini mea, mea rawa ki te ringa o ngā tautāngata; nāku, nā Ihowā te kupu.
EZE 30:13 “Ko te kupu tēnei a te Ariki, a Ihowā: Ka ngaro i ahau ngā whakapakoko, ka mutu anō i ahau ngā whakaahua o Nopo. Kore ake e mea mai he rangatira i te whenua o Īhipa; ka tukua anō e ahau he wehi ki te whenua o Īhipa.
EZE 30:14 Ka ururua anō i ahau a Pātoro, ka tukua he ahi ki Toana, ka mahia anō e ahau he whakawā ki Nō.
EZE 30:15 Ka ringihia anō e ahau tōku weriweri ki Hini, ki tō Īhipa kaha; ka hātepea atu anō e ahau ngā mano tini o Nō.
EZE 30:16 Ka tukua anō e ahau he ahi ki Īhipa; ka nui noa atu te mamae o Hini, ka haehaea pūtia a Nō; ka whai hoariri anō a Nopo i ia rā, i ia rā.
EZE 30:17 Ka hinga ngā taitama o Āwene, o Pipehete i te hoari; ā, ka riro ēnei pā i te whakarau.
EZE 30:18 Ka whakapōuritia anō te rā ki Tehapanehe ina pakaru i ahau ngā ioka o Īhipa ki reira; ā, ka mutu i roto i a ia te whakapehapeha o tōna kaha. Ko ia anō ka taupokina e te kapua, ka riro āna tamāhine i te whakarau.
EZE 30:19 Heoi, ka mahia e ahau he whakawā ki Īhipa; ā, ka mōhio rātou ko Ihowā ahau.”
EZE 30:20 Nā, i te tekau mā tahi o ngā tau, i te marama tuatahi, i te whitu o ngā rā o te marama, ka puta te kupu a Ihowā ki ahau, i mea:
EZE 30:21 “E te tama a te tangata, kua whati i ahau te ringa o Parao kīngi o Īhipa; nanā, kāhore i takaia hei meatanga iho mō te rongoā, kāhore i meatia iho te tākai hei takai, e kaha ai ki te pupuri hoari.
EZE 30:22 Mō reira ko te kupu tēnei a te Ariki, a Ihowā: Nanā, hei hoariri ahau mō Parao kīngi o Īhipa, ka whati anō i ahau ōna ringa, te mea kaha, te mea anō i whati; ka meinga anō e ahau te hoari kia marere i tōna ringa.
EZE 30:23 Ka marara anō i ahau ngā Īhipiana ki roto ki ngā tauiwi, ka tītaria ki ngā whenua.
EZE 30:24 Ka kaha anō i ahau ngā ringa o te kīngi o Papurōna, ka hoatu anō e ahau tāku hoari ki tōna ringa; ka whati ia i ahau ngā ringa o Parao, ā, nō te tangata i werohia ngā auē e auē ai ia ki tōna aroaro.
EZE 30:25 Ā, ka kaha i ahau ngā ringa o te kīngi o Papurōna, ā, ka tukua iho ngā ringa o Parao; ā, ka mōhio rātou ko Ihowā ahau, ina hoatu e ahau tāku hoari ki te ringa o te kīngi o Papurōna, ā, ka whakatorona atu e ia ki runga ki te whenua o Īhipa.
EZE 30:26 Ka marara anō i ahau ngā Īhipiana ki roto ki ngā iwi, ka tītaria ki ngā whenua; ā, ka mōhio rātou ko Ihowā ahau.”
EZE 31:1 I te tekau mā tahi o ngā tau, i te toru o ngā marama, i te tuatahi o ngā rā o te marama, ka puta mai te kupu a Ihowā ki ahau, i mea:
EZE 31:2 “E te tama a te tangata, mea atu ki a Parao kīngi o Īhipa, rātou ko āna mano tini: I a koe e nui nā ko wai tōu rite?
EZE 31:3 Nanā, he hīta i Repanōna te Ahiriana, he pai ngā manga, pūruru tonu, marumaru tonu, he roa rawa, pūrero rawa; i roto anō tōna kōuru i ngā manga pūruru.
EZE 31:4 Nui tonu ia, nā te wai hoki roa tonu, he mea nā te wai hōhonu; i rere hoki ōna awa i tētahi taha o ōna māhuri, i tētahi taha; i tukua atu anō ōna awa ririki ki ngā rākau katoa o te pārae.
EZE 31:5 Nā reira roa rawa ia, pūrero rawa ki runga ake i ngā rākau katoa o te pārae; kua maha anō ōna peka, kua roroa ōna manga, he maha hoki nō ngā wai, i a ia e kōkiri ake ana.
EZE 31:6 I hangā ō rātou ōhanga e ngā manu katoa o te rangi ki ōna peka, i whānau anō ngā kīrehe katoa o te pārae ki raro i ōna manga, i noho anō ngā iwi nunui katoa ki raro i tōna taumarumarunga iho.
EZE 31:7 Heoi, ātaahua tonu ia, i a ia i nui rā, i te roa hoki o ōna manga; i te taha hoki o ngā wai nui tōna pakiaka.
EZE 31:8 Kīhai ia i ngaro i ngā hīta o tā te Atua kāri; kīhai ngā kauri i rite ki ōna peka, kīhai anō ngā rākau pereni i rite ki ōna manga; kāhore he rākau o te kāri a te Atua hei rite mōna; i a ia i ātaahua tonu rā.
EZE 31:9 I meinga ia e ahau kia ātaahua tonu i te maha o ōna manga; ā, hae ana ngā rākau katoa o Erene, i te kāri a te Atua, ki a ia.
EZE 31:10 “Nā reira ko te kupu tēnei a te Ariki, a Ihowā: Kua tiketike nā koe, kua roa, ā, kōkiri atu ana tōna kōuru ki roto ki ngā manga pūruru, ā, neke ake ana tōna ngākau i a ia i tiketike rā;
EZE 31:11 mō reira ka tukua ia e ahau ki te ringa o te mea kaha o ngā tauiwi. Ka nui tā tērā mahi ki a ia; he kino nōna i peia ai ia e ahau.
EZE 31:12 Nā, kua hātepea atu ia e ngā tautāngata, e ngā mea nanakia o ngā iwi, ā, kua whakarērea iho. Kua taka ōna rārā ki runga ki ngā maunga, ki ngā awaawa katoa; kua whatiwhatiia ōna manga ki te taha o ngā awa katoa o te whenua; kua heke mai anō ngā iwi katoa o te whenua i tōna taumarumarutanga iho, whakarērea ake e rātou.
EZE 31:13 Kei runga i a ia, ina hinga, he kāinga mō ngā manu katoa o te rangi, ā, ka noho ngā kīrehe katoa o te pārae ki ōna manga.
EZE 31:14 He mea kei neke ake, kei pūrero ki runga tētahi o ngā rākau i te taha o ngā wai, kei kōkiri ake ō rātou kōuru ki roto ki ngā manga pūruru, kei tū hoki, kei teitei ngā rākau katoa e inu wai ana. Kua tukua katoatia hoki ki te mate, ki ngā wāhi o raro rawa o te whenua, ki roto ki ngā tama a te tangata, ki te hunga e heke ana ki te rua.
EZE 31:15 “Ko te kupu tēnei a te Ariki, a Ihowā: I te rā i heke ai ia ki te rua i meinga ia e ahau kia tangihia, he whakaaro ki a ia i hīpokina ai e ahau te rire, i puritia ai ōna awa, ā, ko ngā wai nunui mau rawa. Ā, meinga ana e ahau a Repanōna kia tangi ki a ia, ā, ko ngā rākau katoa o te pārae ngohe kau ki a ia.
EZE 31:16 Meinga ana e ahau kia rurea ngā iwi e te haruru o tōna hinganga, i tāku makanga i a ia ki raro i te rēinga, rātou tahi ko te hunga e heke ana ki te rua; ko ngā rākau katoa anō hoki o Erene, ko ngā mea whiriwhiri, ko ngā mea papai o Repanōna, ko ngā mea katoa e inu ana i te wai, ka whai whakamārietanga i ngā wāhi o raro rawa o te whenua.
EZE 31:17 I heke tahi anō rātou me ia ki te rēinga, ki te hunga kua patua ki te hoari; āe rā, me te hunga anō i waiho nei hei ringa mōna, i noho nei i raro i tōna taumarumarunga iho i waenganui o ngā tauiwi.
EZE 31:18 “Ko wai hei rite mōu, te korōria, te nui, i roto i ngā rākau o Erene? Heoi, ka tukua ngātahitia iho koutou ko ngā rākau o Erene ki ngā wāhi o raro rawa o te whenua. Ka takoto koe i roto i te hunga kokotikore, i roto i te hunga i patua ki te hoari. “Ko Parao tēnei, rātou ko āna mano tini katoa, e ai tā te Ariki, tā Ihowā.”
EZE 32:1 Nā, i te tekau mā rua o ngā tau, i te tekau mā rua o ngā marama, i te tuatahi o ngā rā o te marama, ka puta mai te kupu a Ihowā ki ahau, i mea:
EZE 32:2 “E te tama a te tangata, kia ara tōu tangi mō Parao kīngi o Īhipa, mea atu hoki ki a ia: Ko tōu rite kei te kūao raiona o ngā iwi; otiia, e rite ana koe ki te tarakona o ngā moana; i kōkiri mai anō koe me ōu awa, pōkarekare ana ngā wai i ōu waewae, poke ana i a koe ō rātou awa.”
EZE 32:3 Ko te kupu tēnei a te Ariki, a Ihowā: “Ka horahia e ahau tāku kupenga ki runga ki a koe, he huihuinga hoki nō ngā iwi maha; ā, ka riro ake koe i a rātou i tāku kupenga.
EZE 32:4 Ka waiho anō koe e ahau ki runga ki te whenua, ka ākiritia atu anō koe ki te mata o te pārae, māku anō e mea kia nohoia koe e ngā manu katoa o te rangi, kia mākona anō ngā kīrehe o te whenua katoa i a koe.
EZE 32:5 Ka takoto anō i ahau ōu kikokiko ki runga ki ngā maunga, ka whakakīia anō ngā awaawa ki a koe e tiketike nā.
EZE 32:6 Ka whakamākūkūria anō e ahau ki ōu toto te whenua e kau nā koe, ā, tutuki noa ki ngā maunga; ka kī anō hoki ngā awa i a koe.
EZE 32:7 Ā, ka oti koe te tinei e ahau, ka hīpokina e ahau te rangi, ka whakapōuritia anō hoki ngā whetū o reira; ka hīpokina e ahau te rā ki te kapua, e kore anō e titi te atarau.
EZE 32:8 Nā, ko ngā whakamārama katoa e mārama nei te rangi, ka whakapōuritia e ahau ki runga ki a koe, ka hoatu anō e ahau he pōuri ki runga ki tōu whenua,
EZE 32:9 He maha anō ngā iwi e mamae ō rātou ngākau i ahau, ina meinga e ahau kia tae atu tōu whakangaromanga ki ngā iwi, ki ngā whenua kīhai i mōhiotia e koe.
EZE 32:10 Inā, he maha ngā iwi e meinga e ahau kia ketekete ki a koe, ka nui anō te wehi o ō rātou kīngi, ina whakaaro ki a koe. Ua wherikoriko tāku hoari ki tō rātou aroaro, hono tonu anō tō rātou wiri, ia tangata, ia tangata, i te wehi mō tōna oranga anō, i te rā e hinga ai koe.
EZE 32:11 “Nō te mea ko te kupu tēnei a te Ariki, a Ihowā: Tērā e tae atu te hoari a te kīngi o Papurōna ki a koe.
EZE 32:12 Ka meinga e ahau ōu mano tini, te hunga nanakia o ngā iwi, rātou katoa kia hinga i ngā hoari a ngā mārohirohi. Ā, ka pāhuatia e rātou ngā mea whakaī o Īhipa, ka ngaro anō ō reira mano tini katoa.
EZE 32:13 Ka ngaro anō i ahau ō reira kararehe katoa i te taha o ngā wai maha; e kore anō e pōkarekare i te wae tangata ā muri ake nei, e kore anō e ngarungaru i te wae kararehe.
EZE 32:14 Ko reira ahau mea ai i ō rātou wai kia purata, ka meinga anō e ahau ō rātou awa kia rite ki te hinu te rere, e ai tā te Ariki, tā Ihowā.
EZE 32:15 Kia meinga e ahau te whenua o Īhipa hei ururua, ā, kore iho ngā tini mea o te whenua, kia patua anō e ahau te hunga katoa e noho ana i reira, kātahi rātou ka mōhio ko Ihowā ahau.
EZE 32:16 “Ko te tangi tēnei e tangihia ai ia e rātou, ka tangihia ia e ngā tamāhine a ngā iwi. Ka tangihia ia e rātou, arā a Īhipa rātou ko ōna mano tini, e ai tā te Ariki, tā Ihowā.”
EZE 32:17 Nā, i te tekau mā rua o ngā tau, i te tekau mā rima o ngā rā o te marama, ka puta mai te kupu a Ihowā ki ahau, i mea:
EZE 32:18 “E te tama a te tangata, auē ki te mano tini o Īhipa, makā iho rātou, a ia, me ngā tamāhine a ngā iwi nunui, ki ngā wāhi o raro rawa o te whenua, rātou ko te hunga e heke ana ki te rua.
EZE 32:19 ‘He ātaahua rawa koe i a wai? Heke iho, takoto tahi koutou ko te hunga kokotikore.’
EZE 32:20 Ka hinga rātou ki waenga i te hunga i patua ki te hoari. Kua tukua atu ia ki te hoari; tōia atu me ōna mano tini katoa.
EZE 32:21 Ka kōrero mai ngā tāngata kaha o ngā mārohirohi ki a ia i roto i te rēinga, rātou ko ōna kaiāwhina: ‘Kua heke rātou ki raro, kei te takoto rātou, te korikori, arā ngā kokotikore, he mea patu ki te hoari.’
EZE 32:22 “Kei reira anō a Ahuru rātou ko tōna hui katoa; ko ōna urupā, kei tētahi taha ōna, kei tētahi taha; he mea patu katoa, kua hinga i te hoari.
EZE 32:23 Ko ōna urupā, he mea mahi ki ngā pito rawa o te rua. Ko tōna rōpū anō kei tētahi taha o tōna urupā, kei tētahi taha; he mea patu katoa rātou, kua hinga i te hoari, te hunga i puta ai te wehi ki te whenua o te hunga ora.
EZE 32:24 “Kei reira a Erama, rātou ko ōna mano tini i tētahi taha o tōna urupā, i tētahi taha. Ko rātou katoa he mea patu, kua hinga i te hoari, he hunga kua heke kokotikore atu ki ngā wāhi o raro rawa o te whenua, he hunga i mea i tō rātou wehi kia puta ki te whenua o te hunga ora. Heoi, kei te mau te whakamā o rātou, o te hunga anō e heke ana ki te rua.
EZE 32:25 Kua hangā te takotoranga mōna ki roto ki te hunga i patua, mō rātou anō ko ōna mano tini katoa. Ko ōna urupā kei tētahi taha ōna, kei tētahi taha; he kokotikore rātou katoa, he mea patu ki te hoari. I puta hoki tō rātou wehi ki te whenua o te hunga ora, heoi kua mau te whakamā o rātou, o te hunga anō e heke ana ki te rua; kua tukua atu ia ki roto ki te hunga i patua.
EZE 32:26 “Kei reira a Meheke, a Tūpara, rātou ko ōna mano tini katoa; ko ōna urupā kei tētahi taha ōna kei tētahi taha, he mea kokotikore rātou katoa, he mea patu ki te hoari; i puta anō tō rātou wehi i mua ki te whenua o te hunga ora.
EZE 32:27 E kore anō rātou e takoto i roto i ngā mārohirohi o ngā kokotikore kua hinga, kua heke ki te rēinga me ā rātou patu anō o te whawhai. I whakatakotoria anō e rātou ā rātou hoari ki raro i ō rātou māhunga, ā, kei te mau ō rātou kino ki ō rātou wheua; ko te hunga hoki tēnā i wehi ai ngā mārohirohi o te whenua o te ora.
EZE 32:28 “Otiia, ka whatia koe i roto i te hunga kokotikore, ka takoto tahi hoki koutou ko te hunga i patua ki te hoari.
EZE 32:29 “Kei reira a Ēroma, ōna kīngi, ōna rangatira katoa i tukua nei i runga i tō rātou mārohirohi ki roto ki te hunga i werohia e te hoari. Ka takoto tahi rātou ko ngā kokotikore, rātou anō ko te hunga e heke ana ki te rua.
EZE 32:30 “Kei reira ngā ariki o te raki, rātou katoa, me ngā Haironi katoa i heke nei i roto i te hunga i patua; whakamā iho rātou i te wehi i tupu mai i tō rātou mārohirohi, ā, takoto kokotikore ana rātou i roto i te hunga i patua ki te hoari, me te mau te whakamā o rātou, o te hunga anō e heke ana ki te rua.
EZE 32:31 “E kite a Parao i a rātou, ā, ka whai whakamārietanga ki āna mano tini katoa i patua ki te hoari – a Parao rātou ko tāna ope katoa, e ai tā te Ariki, tā Ihowā.
EZE 32:32 Nō te mea kua tukua e ahau tōna wehi ki te whenua o te hunga ora; ā, ka whakatakotoria ia ki roto ki te hunga kokotikore, rātou ko te hunga i patua ki te hoari – a Parao rātou ko āna mano tini, e ai tā te Ariki, tā Ihowā.”
EZE 33:1 I puta mai anō te kupu a Ihowā ki ahau, i mea:
EZE 33:2 “E te tama a te tangata, kōrero ki ngā tamariki a tōu iwi, mea atu ki a rātou: Ki te kawea e ahau te hoari ki tētahi whenua, ā, ka mau ngā tāngata o te whenua ki tētahi tangata o rātou, ka whakaritea e rātou hei tūtei;
EZE 33:3 mehemea, i tōna kitenga i te hoari e puta ana ki te whenua, ka whakatangihia e ia te tētere, hei whakatūpato i te iwi.
EZE 33:4 Nā, ko te tangata e rongo i te tangi o te tētere, ā, kāhore ia e tūpato, ki te tae mai te hoari, ā, ka riro ia, hei runga anō i tōna māhunga ōna toto.
EZE 33:5 I rongo ia i te tangi o te tētere, ā, kīhai i tūpato; ki runga anō i a ia ōna toto. Tēnā ia, mehemea ia i tūpato, ka mawhiti i a ia tōna wairua.
EZE 33:6 Engari, ki te kite te tūtei i te hoari e puta ana, ā, kīhai i whakatangi i te tētere, kīhai i whakatūpato i te iwi, ā, ka tae mai te hoari, ka riro tētahi o rātou; ka riro ia i runga i tōna kino, otiia ka rapua e ahau ōna toto i te ringa o te tūtei.
EZE 33:7 “Inā, ko koe, e te tama a te tangata, kua waiho koe e ahau hei tūtei mō te whare o Īharaira; ā, me whakarongo koe ki te kupu a tōku māngai, ko koe anō tāku hei whakatūpato i a rātou.
EZE 33:8 Ki te mea ahau ki te tangata kino, ‘E te tangata kino, ko te mate kau mōu,’ ki te kore koe e kōrero, e whakatūpato i te tangata kino ki tōna ara; ka mate taua tangata kino i runga i tōna hē, ka rapua ia e ahau ōna toto i tōu ringa.
EZE 33:9 Tēnā ko tēnei, ka whakatūpato koe i te tangata kino ki tōna ara, kia tahuri mai ia i reira, ā, e kore ia e tahuri mai i tōna ara; ka mate ia i runga i tōna kino, ka ora ia i a koe tōu wairua.”
EZE 33:10 “Nā, ko koe e te tama a te tangata, kōrero ki te whare o Īharaira, ‘Ko tā koutou kī tēnei, e mea nā koutou: “Kei runga i a mātou ō mātou hē, ō mātou hara, ā, ka memeha atu mātou i runga i aua hē; mā te aha rā mātou ka ora ai?” ’
EZE 33:11 Mea atu ki a rātou, ‘E ora ana ahau, e ai tā te Ariki, tā Ihowā, kāhore ōku ngākau koa ki te matenga o te tangata kino; engari kia tahuri te tangata kino i tōna ara, kia ora; tahuri mai, tahuri mai koutou i ō koutou ara kino; kia mate hoki koutou hei aha, e te whare o Īharaira?’
EZE 33:12 “Nā, ko koe, e te tama a te tangata, me kī atu ki ngā tamariki a tōu iwi, ‘E kore te tika o te tangata tika e whakaora i a ia i te rā e poka kē ai ia; me te kino anō o te tangata kino e kore tērā e whakahinga i a ia i te rā e tahuri mai ai ia i tōna kino; e kore anō te tangata tika e ora i tōna tika i te rā e hara ai ia.’
EZE 33:13 Ki te mea ahau ki te tangata tika, ka ora ia; ā, ka whakawhirinaki ia ki tōna tika, ka mahi hoki i te hē, e kore āna mahi tika katoa e maharatia; engari ka mate ia i runga i tōna hē i mahia e ia.
EZE 33:14 Ki te mea anō ahau ki te tangata kino, ‘Ko te mate kau mōu,’ ā, ka tahuri mai ia i tōna hara, ka mahi i te mea e tika ana, e rite ana –
EZE 33:15 ki te whakahokia te taunaha e te tangata kino, ki te utua te mea i pāhuatia e ia, ki te haere ia i runga i ngā tikanga o te ora, ā, ka kore e mahi i te hē – he pono ka ora ia, e kore ia e mate.
EZE 33:16 E kore tētahi o ōna hara i hara ai ia e maharatia ki a ia. Kua mahia e ia te mea e tika ana, e rite ana; he pono ka ora ia.
EZE 33:17 “Heoi, kei te mea ngā tamariki a tōu iwi, ‘Kāhore e rite te ara o te Ariki.’ Nā, ko rātou nei, kāhore tō rātou ara e rite.
EZE 33:18 Ki te tahuri atu te tangata tika i tōna tika, ā, ka mahia e ia te hē, ka mate ia i aua hē.
EZE 33:19 Ki te tahuri mai anō te tangata kino i tōna kino, ā, ka mahia e ia te mea e tika ana, e rite ana, ka ai ēnā hei whakaora i a ia.
EZE 33:20 Heoi, kei te mea nā koutou, ‘Kāhore e rite te ara o te Ariki.’ E te whare o Īharaira, ka rite ki tōna ara, ki tōna ara, tāku whakawā mō koutou.”
EZE 33:21 Nā, i te tekau mā rua o ngā tau o tō mātou whakaraunga, i te tekau o ngā marama, i te rima o ngā rā o te marama, ka tae mai ki ahau tētahi o ngā oranga o Hiruhārama, ā, ka mea, “Kua patua te pā.”
EZE 33:22 Nā, kua pā te ringa o Ihowā ki ahau i te ahiahi i mua ake o te taenga mai o taua oranga nei; meinga ana e ia kia kuihi tōku māngai, ā tae noa mai ia ki ahau i te ata. Nā, kua meinga e ia kia kuihi tōku māngai, ā, kore ake tōku wahangū.
EZE 33:23 Nā, ka puta mai te kupu a Ihowā ki ahau, i kī ia:
EZE 33:24 “E te tama a te tangata, ko te hunga e noho ana i ēnei ururua i te whenua o Īharaira, e kōrero ana, e mea ana, ‘He kotahi a Āperahama, ā, riro ana i a ia te whenua; ko tātou ia he tokomaha; kua hōmai te whenua ki a tātou hei kāinga tupu.’
EZE 33:25 Mō reira kī atu ki a rātou, Ko te kupu tēnei a te Ariki, a Ihowā: Ko tā koutou kai, he mea kīnaki ki te toto, e anga ana hoki ō koutou kanohi ki ā koutou whakapakoko, e whakaheke toto ana hoki koutou; ā, e mau rānei te whenua i a koutou?
EZE 33:26 Ko tō koutou tūranga ko ā koutou hoari, e mahia ana e koutou te mea whakarihariha, e whakapokea ana e koutou te wahine a tōna hoa, a tōna hoa; ā, e mau rānei te whenua i a koutou?
EZE 33:27 “Kia pēnei tāu kī atu ki a rātou: Ko te kupu tēnei a te Ariki, a Ihowā: E ora ana ahau, inā, ka hinga i te hoari te hunga i ngā ururua, ā, ko te tangata i te mata o te pārae, ka hoatu ia e ahau hei kai mā ngā kīrehe, ā, ko te hunga i ngā taumaihi, i ngā ana, ka mate rātou i te mate urutā.
EZE 33:28 Ka ururua rawa i ahau te whenua, ka waiho hei keteketenga, ā, ka mutu te whakapehapeha o tōna kaha; ka ururua anō ngā maunga o Īharaira, e kore e haerea e te tangata.
EZE 33:29 Ā, ka mōhio rātou ko Ihowā ahau, ina meinga e ahau te whenua hei ururua, hei keteketenga, mō ā rātou mea whakarihariha katoa i mea ai rātou.
EZE 33:30 “Nā, ko koe, e te tama a te tangata, e kōmuhumuhua ana koe e ngā tama a tōu iwi i te taha o ngā pakitara, i ngā tatau anō o ngā whare, e kōrerorero ana tētahi ki tētahi, ki tōna hoa, ki tōna hoa, e mea ana, ‘Tēnā, kia haere tātou, kia rongo ai tātou i te kupu e puta mai ana i a Ihowā.’
EZE 33:31 Ā, ko tā rātou haere mai ki a koe rite tonu ki te haerenga mai o te iwi; ko tā rātou noho i tōu aroaro rite tonu anō ki tō tāku iwi; e rongo ana hoki rātou ki āu kupu, kāhore ia e mahi. Ko ō rātou māngai hoki hei whakaahuareka mai, ko ō rātou ngākau kei te whai i tā rātou apo taonga.
EZE 33:32 Nanā, ki a rātou, e rite ana koe ki te waiata rōreka a te reo pai, a te tangata he pai te rangi o tāna mea whakatangi; e rongo ana hoki rātou ki āu kupu, kāhore ia e mahi.
EZE 33:33 “Ā, ina puta tēnei – nanā, tēnei te haere mai nei – kātahi rātou ka mōhio tēnei tonu he poropiti i roto i a rātou e noho ana.”
EZE 34:1 I puta mai anō te kupu a Ihowā ki ahau, i mea:
EZE 34:2 “E te tama a te tangata, poropititia he hē mō ngā hēpara o Īharaira, poropititia, mea atu ki a rātou, arā ki ngā hēpara: Ko te kupu tēnei a te Ariki, a Ihowā mō ngā hēpara: Auē te mate mō ngā hēpara o Īharaira, e whāngai nei i a rātou anō! He teka ianei me whāngai te kāhui e ngā hēpara?
EZE 34:3 E kainga ana te ngako e koutou, e kākahuria ana e koutou te huruhuru, e patua ana e koutou ngā mea mōmona; ko ngā hipi ia, kāhore rātou e whāngaia e koutou.
EZE 34:4 Kīhai i whakakahangia e koutou ngā tūroro, kīhai ngā mea mate i rongoātia e koutou, te mea i whati kīhai i takaia e koutou, kīhai anō i whakahokia mai e koutou te mea i āia atu, kīhai i rapua te mea i ngaro; heoi he taikaha, he nanakia, tā koutou whakahaere tikanga ki a rātou.
EZE 34:5 Nā, marara noa atu rātou i te kore hēpara. Riro ana hei kai mā ngā kīrehe katoa o te pārae, ā, i marara noa atu rātou.
EZE 34:6 I ātiutiu noa atu āku hipi i runga i ngā maunga katoa, i runga i ngā pukepuke tiketike katoa. I marara noa atu āku hipi i runga i te mata katoa o te whenua, kāhore hoki he tangata hei rapu, hei whakataki i a rātou.
EZE 34:7 “Mō reira, e ngā hēpara, whakarongo ki te kupu a Ihowā;
EZE 34:8 e ora ana ahau, e ai tā te Ariki, tā Ihowā, nā, kua waiho nei āku hipi hei taonga pārau, kua waiho anō āku hipi hei kai mā ngā kīrehe katoa o te pārae, i te kore hēpara, kīhai nei hoki āku hēpara i rapu i āku hipi, heoi whāngaia ana ko rātou anō e ngā hēpara, kīhai i whāngai i āku hipi.
EZE 34:9 Mō reira, e ngā hēpara, whakarongo ki te kupu a Ihowā.
EZE 34:10 Ko te kupu tēnei a te Ariki, a Ihowā: Hei hoariri tēnei ahau mō ngā hēpara; ā, ka rapu utu ahau mō āku hipi i ō rātou ringa, ka whakamutua anō e ahau tā rātou whāngai hipi. E kore hoki ngā hēpara e whāngai i a rātou anō i muri nei; ā, ka whakaorangia e ahau āku hipi i roto i ō rātou māngai, kei waiho hei kai mā rātou.”
EZE 34:11 “Ko te kupu hoki tēnei a te Ariki, a Ihowā: Nanā, ka rapu ahau, ahau tonu nei, i āku hipi, ka kimihia mārietia.
EZE 34:12 Ka rite ki te kimi a te hēpara i tāna kāhui i te rā e tae ai ia ki roto ki āna hipi kua tohatoha noa atu, ka pēnā anō tāku kimi i āku hipi; ka whakaorangia anō rātou e ahau i ngā wāhi katoa i marara atu ai rātou i te rā tukupū, i te rā pōuri.
EZE 34:13 Ka whakaputaina anō rātou e ahau i roto i ngā iwi, ka whakaminea mai i ngā whenua, ka kawea hoki ki tō rātou oneone; ā, ka whāngaia rātou e ahau ki runga ki ngā maunga o Īharaira, ki te taha o ngā awa, ki ngā wāhi katoa o te whenua e nohoia ana.
EZE 34:14 Ka whāngaia rātou e ahau i te wāhi tarutaru pai, ā, hei runga i ngā maunga tiketike o Īharaira he puninga mō rātou; ka takoto rātou ki reira ki te puninga pai, ka kai anō rātou i runga i ngā maunga o Īharaira i ngā wāhi mōmona te tarutaru.
EZE 34:15 Ko ahau tonu hei whāngai i āku hipi, ko ahau anō hei mea i a rātou kia takoto, e ai tā te Ariki, tā Ihowā.
EZE 34:16 Māku e rapu te mea i ngaro, māku anō e whakahoki mai te mea i āia atu, māku e takai te mea i whati, māku anō e whakakaha te mea tūroro. Nā, ko te mea mōmona, ko te mea kaha, ka ngaro i ahau; ka whāngaia rātou e ahau i runga i te whakawā.
EZE 34:17 “Nā, ko koutou, e āku hipi, ko te kupu tēnei a te Ariki, a Ihowā: Nanā, ka whakaritea e ahau te whakawā a tētahi hipi ki tētahi hipi, a ngā hipi toa anō rātou ko ngā koati toa.
EZE 34:18 He mea iti ianei ki a koutou tā koutou kai i ngā wāhi tarutaru pai, i takahia ai e koutou te toenga o tā koutou kai ki ō koutou waewae? Tā koutou inu hoki i ngā wai purata, ā, whakapokea ake e koutou te toenga ki ō koutou waewae?
EZE 34:19 Nā, ko āku hipi, ka kai rātou i ngā takahanga a ō koutou waewae, ka inu hoki i tā ō koutou waewae i whakapoke ai.
EZE 34:20 “Mō reira ko te kupu tēnei a te Ariki, a Ihowā, ki a rātou: Nanā, māku, māku tonu nei e whakarite te whakawā a te hipi mōmona rāua ko te hipi hīroki.
EZE 34:21 Nō te mea kua tute koutou ki ō koutou kaokao, ki ō koutou peke, ā, kua ākina e koutou ngā mea mate ki ō koutou haona, ā, marara ake rātou i a koutou ki waho noa atu.
EZE 34:22 Nā reira ka whakaora ahau i āku hipi; e kore anō rātou e waiho i muri nei hei pāhuatanga; ka whakaritea anō e ahau te whakawā a tētahi hipi ki tētahi hipi.
EZE 34:23 Ā, ka whakaritea e ahau kotahi te hēpara mō rātou, māna rātou e whāngai, arā tāku pononga a Rāwiri; māna rātou e whāngai, ā, ko ia hei hēpara mō rātou.
EZE 34:24 Ko ahau, ko Ihowā, hei Atua mō rātou, ā, ko tāku pononga, ko Rāwiri, hei rangatira i roto i a rātou; nāku, nā Ihowā, te kupu.
EZE 34:25 “Ka whakaritea anō e ahau he kawenata mō te rongo mau ki a rātou, ka whakamutua hoki te noho o ngā kīrehe kikino ki te whenua; ā, ka noho rātou ki te koraha, tē ai he wehi, ka moe anō ki ngā ngahere.
EZE 34:26 Ā, ka meinga rātou e ahau, me ngā wāhi anō i tōku pukepuke a karapoi noa, hei manaakitanga; ā, ka meinga e ahau te ua kia heke iho i te wā i tika ai; ā, ka uaina iho ngā manaaki.
EZE 34:27 Nā, ka hua ngā hua o te rākau o te pārae, ka tukua mai anō ōna mau e te whenua, ka noho hūmārie hoki rātou ki tō rātou whenua. Ka mōhio anō rātou ko Ihowā ahau, ina motu i ahau ngā here o tō rātou ioka, ā, ka riro rātou i ahau i roto i te ringa o ō rātou kaiwhakamahi.
EZE 34:28 Ā, e kore rātou e waiho i muri nei hei pāhuatanga mā ngā iwi, e kore hoki e kainga e te kīrehe o te whenua; engari ka noho hūmārie rātou, tē ai he kaiwhakawehi.
EZE 34:29 Ā, ka ara i ahau he māhuri whai ingoa mā rātou, e kore hoki rātou e riro i te hemokai i runga i te whenua e kore anō e mau ki a rātou te numinumi i ngā tauiwi ā muri ake nei.
EZE 34:30 Nā, ka mōhio rātou ko ahau, ko Ihowā, ko tō rātou Atua, kei a rātou, ā, ko rātou, ko te whare o Īharaira, he iwi nāku, e ai tā te Ariki, tā Ihowā.
EZE 34:31 Nā, ko koutou, ko āku hipi, ko ngā hipi e whāngaia ana e ahau, he tāngata koutou, ko ahau hoki tō koutou Atua, e ai tā te Ariki, tā Ihowā.”
EZE 35:1 I puta mai anō te kupu a Ihowā ki ahau, i mea:
EZE 35:2 “E te tama a te tangata, anga atu tōu mata ki Maunga Heira, poropititia te hē mō reira,
EZE 35:3 mea atu hoki ki a ia, Ko te kupu tēnei a te Ariki, a Ihowā: Nanā, hei hoariri ahau mōu, e Maunga Heira; ā, ka totoro atu tōku ringa ki a koe, ka ururua rawa koe i ahau, ka meinga hoki hei mīharotanga.
EZE 35:4 Ko ōu pā ka tūhea i ahau, ā hei ururua koe, ā, ka mōhio koe ko Ihowā ahau.
EZE 35:5 “Nō te mea he mauāhara mau tonu tōu, ā, kua tukua e koe ngā tama a Īharaira ki te kaha o te hoari i te wā o tō rātou aituā, i te wā o te hē i te mutunga.
EZE 35:6 Mō reira, e ora ana ahau, e ai tā te Ariki, tā Ihowā, ka mahia koe e ahau hei mea mō te toto, ka whāia anō koe e te toto; kīhai nā koe i kino ki te toto, nā ka whāia koe e te toto.
EZE 35:7 Heoi, ka meinga e ahau a Maunga Heira hei mātakitakinga, hei ururua; ā, ka hātepea atu e ahau te tangata e tika ana nā reira, te tangata anō e hoki mai ana.
EZE 35:8 Ā, ka whakakīia e ahau ōna maunga ki ōna tūpāpaku; ā, ko te hunga e patua ki te hoari, ka hinga ki ōu pukepuke, ki ōu awaawa, ki ōu rerenga wai katoa.
EZE 35:9 Ka ururua koe i ahau ā ake ake; e kore anō ōu pā e nohoia, ā, ka mōhio koutou ko Ihowā ahau.
EZE 35:10 “Nā, kua mea nā koe, ‘Ko ēnei iwi e rua, ko ēnei whenua e rua mōku, mō tātou tonu hoki,’ – i te mea kei reira nei anō a Ihowā –
EZE 35:11 mō reira, e ora ana ahau, e ai tā te Ariki, tā Ihowā, ko tāku mahi ka rite ki tōu riri, ki tōu hae, i hae ai koe i a koe i mauāhara rā ki a rātou; ā, ka whakakitea atu ahau ki a rātou, ina rite i ahau te whakawā mōu.
EZE 35:12 Nā, ka mōhio koe ko Ihowā ahau, ā, kua rangona e ahau āu kohukohu katoa i kōrerotia e koe mō ngā maunga o Īharaira, i a koe i kī rā, ‘Kua ururua, kua hōmai hei kai mā tātou.’
EZE 35:13 Ā, kua whakakake mai ō koutou māngai ki ahau, kua whakamaha i ā koutou kupu mōku; kua rongo ahau.
EZE 35:14 Ko te kupu tēnei a te Ariki, a Ihowā: Ā te wā e koa ai te whenua katoa, ka ururua koe i ahau.
EZE 35:15 I koa nā koe ki te kāinga o te whare o Īharaira, kua ururua nā, ka pēnā anō ahau ki a koe. Ka ururua koe, e Maunga Heira, e Ēroma katoa, āe rā, katoa; ā, ka mōhio rātou ko Ihowā ahau.”
EZE 36:1 “Nā, ko koe e te tama a te tangata, poropiti atu ki ngā maunga o Īharaira, mea atu: E ngā maunga o Īharaira, whakarongo ki te kupu a Ihowā.
EZE 36:2 Ko te kupu tēnei a te Ariki, a Ihowā: Nā, kua mea nei te hoariri ki a koutou, ‘Ha! Nā, kua riro mai hoki mō tātou ngā pukepuke onamata!’
EZE 36:3 Mō reira, poropiti atu, mea atu: Ko te kupu tēnei a te Ariki, a Ihowā: Nā, kua meinga nā koutou e rātou kia tū kau, kua horomia i tētahi taha, i tētahi taha, i riro ai koutou mā ngā toenga o ngā iwi, i hāpainga ake ai e ngā ngutu o ngā arero kapetau, i kōrerotia kinotia ai e te iwi.
EZE 36:4 Mō reira, e ngā maunga o Īharaira whakarongo ki te kupu a te Ariki, a Ihowā: Ko te kupu tēnei a te Ariki, a Ihowā, ki ngā maunga, ki ngā pukepuke, ki ngā awa, ki ngā awaawa, ki ngā ururua kua takoto kau, ki ngā pā kua mahue, kua riro nei hei pāhuatanga, hei katanga mā ngā toenga o ngā iwi ā tawhio noa.
EZE 36:5 Nā reira ko te kupu tēnei a te Ariki, a Ihowā: He pono he ahi tōku hae, i ahau i kōrero ai i te hē mō ngā toenga o ngā iwi, mō Ēroma katoa anō; mō tā rātou meatanga i tōku whenua hei kāinga mō rātou, pau katoa te ngākau ki te koa, kino tonu te hinengaro, mō tērā kia peia atu, kia waiho hei taonga pārau.
EZE 36:6 “Nā reira, poropititia te whenua o Īharaira, kī atu ki ngā maunga, ki ngā pukepuke, ki ngā awa, ki ngā awaawa: Ko te kupu tēnei a te Ariki, a Ihowā: Nanā, kua kōrero ahau i runga i tōku hae, i tōku weriweri, nō te mea e mau ana ki a koutou te whakamā o ngā tauiwi.
EZE 36:7 Nā reira ko te kupu tēnei a te Ariki, a Ihowā: Kua ara tōku ringa kua mea, He pono, ko ngā iwi i tētahi taha o koutou, i tētahi taha, ka mau ki a rātou tō rātou whakamā.
EZE 36:8 “Ko koutou ia, e ngā maunga o Īharaira, ka wana ō koutou manga, ka whai hua koutou mā tāku iwi, mā Īharaira; ka tata hoki rātou te puta.
EZE 36:9 Nō te mea, nanā, ka aro ahau ki a koutou, ka tahuri ki a koutou, ā, ka ngakia koutou, ka whakatōkia.
EZE 36:10 Ka tini anō i ahau ngā tāngata ki a koutou, te whare katoa o Īharaira, rātou katoa, ā, ka nohoia ngā pā, ka hangā anō ngā ururua.
EZE 36:11 Ka tini anō i ahau ngā tāngata ki a koutou, me ngā kararehe; ā, ka tini rātou, ka hua; ka meinga hoki koutou e ahau kia nohoia, kia pērā me tō mua, ā, ka pai atu tāku e mea ai ki a koutou i tō ō koutou tīmatanga; ā, ka mōhio koutou ko Ihowā ahau.
EZE 36:12 Āe rā, ka meinga koutou e ahau kia hāereerea e te tāngata, e tāku iwi, e Īharaira; ka riro koe i a rātou, ka waiho hoki koe hei kāinga tupu mō rātou, ā, heoi anō matenga o ā rātou tamariki i a koe.
EZE 36:13 “Ko te kupu tēnei a te Ariki, a Ihowā: Nā, kua kōrerotia nei ki a koutou, ‘He kai tāngata koe, e te whenua, e whakamate ana i ngā tamariki a tōu iwi.’
EZE 36:14 Nā reira e kore koe e kai tāngata ā muri ake nei, e kore anō e hinga i a koe ōu iwi ā muri nei, e ai tā te Ariki, tā Ihowā.
EZE 36:15 Heoi anō āku meatanga kia rangona ki a koe te numinumi i ngā iwi, e kore anō e mau ki a koe i ngā wā i muri te tāwai a ngā iwi; e kore anō koe e mea i ngā waewae o ōu iwi kia tūtuki ā ake ake, e ai tā te Ariki, tā Ihowā.”
EZE 36:16 I puta mai anō te kupu a Ihowā ki ahau, i mea:
EZE 36:17 “E te tama a te tangata, i te nohoanga o te whare o Īharaira i tō rātou oneone, i whakapokea a reira e rātou ki tō rātou ara, ki ā rātou mahi. Ko tō rātou ara i tōku aroaro, rite tonu ki te poke o te wahine e paheke ana.
EZE 36:18 Heoi, ringihia ana e ahau tōku weriweri ki runga ki a rātou, mō te toto i tāhoroa e rātou ki runga ki te whenua, mō ā rātou whakapakoko hoki i whakapokea ai a reira e rātou.
EZE 36:19 Ā, whakamararatia atu ana rātou e ahau ki roto ki ngā iwi, tītaria atu ana ki ngā whenua; rite tonu ki tō rātou ara, ki ā rātou mahi tāku whakarite mō rātou.
EZE 36:20 Ā, i tō rātou taenga ki ngā iwi i haere atu ai rātou, whakanoatia ana e rātou tōku ingoa tapu, i a rātou i kī rā mō rātou, ‘Ko te iwi tēnei a Ihowā, ā, kua puta atu rātou i tōna whenua.’
EZE 36:21 Otiia, i whai whakaaro ahau ki tōku ingoa tapu i whakanoatia nei e te whare o Īharaira i roto i ngā tauiwi i haere atu ai rātou.
EZE 36:22 “Mō reira kī atu ki te whare o Īharaira: Ko te kupu tēnei a te Ariki, a Ihowā: Ehara i te mea he whakaaro ki a koutou i mahi ai ahau i tēnei, e te whare o Īharaira; engari ki tōku ingoa tapu i whakanoatia nei e koutou i roto i ngā tauiwi i haere atu ai koutou.
EZE 36:23 Ka whakatapua anō e ahau tōku ingoa nui i whakanoatia nei i roto i ngā tauiwi, ko tā koutou rā i whakanoa ai i roto i a rātou; ā, ka mōhio ngā tauiwi ko Ihowā ahau, e ai tā te Ariki, tā Ihowā, ina whakatapua ahau i roto i a koutou i tō rātou aroaro.
EZE 36:24 “Ka tangohia mai hoki koutou e ahau i roto i ngā tauiwi, ka whakaminea i ngā whenua katoa, ka kawea mai anō ki tō koutou oneone.
EZE 36:25 Ka tāuhiuhia anō koutou e ahau ki te wai mā, ā, ka mā koutou. Ka purea koutou e ahau, ā, kore iho ō koutou poke katoa, ā koutou whakapakoko katoa.
EZE 36:26 Ka hoatu anō e ahau he ngākau hou ki a koutou, ka hoatu anō e ahau he wairua hou ki roto ki a koutou; ka tangohia anō e ahau te ngākau kōhatu i roto i ō koutou kikokiko, ā, ka hoatu he ngākau kikokiko ki a koutou.
EZE 36:27 Nā, ka hoatu e ahau tōku wairua ki roto ki a koutou, ā, ka meinga koutou e ahau kia haere i runga i āku tikanga, ka puritia anō e koutou āku ritenga, ka mahia.
EZE 36:28 Ā, ka noho koutou ki te whenua i hoatu e ahau ki ō koutou mātua, ko koutou hoki hei iwi māku, ko ahau hei Atua mō koutou.
EZE 36:29 Ka whakaorangia anō koutou e ahau i ō koutou poke katoa. Ka karangatia hoki e ahau te wīti, ka whakanuia hoki e ahau, e kore anō te hemokai e tukua e ahau ki a koutou.
EZE 36:30 Ā, ka meinga e ahau kia maha ngā hua o te rākau me ngā mau o te māra, ā, heoi anō te tāwai hemokai mō koutou i roto i ngā tauiwi.
EZE 36:31 Kātahi koutou ka mahara ki ō koutou ara kino, ki ā koutou mahi kāhore nei e pai; ā, ka anuanu koutou ki a koutou anō i ō koutou aroaro mō ō koutou kino, mō ā koutou mea whakarihariha hoki.
EZE 36:32 Ehara i te mea he whakaaro ki a koutou i mahi ai ahau i tēnei, e ai tā te Ariki, tā Ihowā, kia mōhio koutou. Kia whakamā koutou, kia numinumi kau ki ō koutou ara, e te whare o Īharaira.
EZE 36:33 “Ko te kupu tēnei a te Ariki, a Ihowā: I te rā e purea ai e ahau ō koutou hē katoa, ka meinga e ahau ngā pā kia nohoia, ā, ka hangā ngā ururua.
EZE 36:34 Nā, ko te whenua i takoto kau rā, ka ngakia; he ururua rā hoki i mua ki te titiro a te hunga katoa e tika ana nā reira.
EZE 36:35 Ā, ka kōrerotia, ‘Ko tēnei whenua i takoto kau rā, kua rite ki te kāri o Erene. Nā, ko ngā pā kua ururuatia, ko ērā i takoto kau rā, ko ngā mea pakaru, kua oti te taiepa, e nohoia ana.’
EZE 36:36 Kātahi ka mōhio ngā iwi kua mahue i tētahi taha o koutou, i tētahi taha, kua hangā e ahau, e Ihowā, ngā wāhi i pakaru, ā, kua whakatōkia e ahau ngā wāhi kua ururuatia. Nāku, nā Ihowā te kupu, māku anō e mahi.
EZE 36:37 “Ko te kupu tēnei a te Ariki, a Ihowā: Tēnei ake ka uia tēnei ki ahau e te whare o Īharaira, kia meatia ki a rātou; ka tokomaha rātou i ahau, me te mea he kāhui te tangata.
EZE 36:38 Ka rite ki te kāhui mō te whakahere, ki te kāhui o Hiruhārama i ōna hākari nunui; ka pēnā anō ngā pā kua ururuatia, ka kapi i ngā kāhui tāngata; ā, ka mōhio rātou ko Ihowā ahau.”
EZE 37:1 I pā te ringa o Ihowā ki ahau, ā, kawea ana ahau, arā e tō Ihowā Wairua, tukua iho ana ahau e ia ki waenganui o te raorao; nā, kapi tonu a reira i te wheua.
EZE 37:2 Nā, ka whakahāereerea ahau e ia ki te taha o aua wheua ā taka noa, taka noa; nā, he tini kē i runga i te mata o te raorao; nanā, he maroke rawa aua mea.
EZE 37:3 Nā, ka mea ia ki ahau, “E te tama a te tangata, e ora rānei ēnei wheua?” Anō rā ko ahau, “E mōhio ana koe, e te Ariki, e Ihowā.”
EZE 37:4 Nā, ka mea ia ki ahau, “Poropiti ki ēnei wheua, mea atu ki a rātou, ‘E ngā wheua maroke nei, whakarongo ki te kupu a Ihowā.
EZE 37:5 Ko te kupu tēnei a te Ariki, a Ihowā ki ēnei wheua: Nanā, ka meinga e ahau he manawa kia tomo ki roto ki a koutou, ā, ka ora koutou.
EZE 37:6 Ā, ka hoatu e ahau he uaua ki runga ki a koutou, ka whakaputaina ake he kikokiko ki a koutou, ka hīpokina koutou ki te kiri, ka hoatu anō e ahau he manawa ki roto ki a koutou, nā, ka ora koutou; ā, ka mōhio koutou ko Ihowā ahau.’ ”
EZE 37:7 Heoi, poropititia ana e ahau te mea i whakahaua ki ahau; ā, i ahau e poropiti ana. Nā, he haruru, nā he rū, ā, whakatata ana ngā wheua, tōna wheua ki tōna wheua.
EZE 37:8 Ā, ka titiro atu ahau, nanā, he uaua i runga i a rātou, kua puta ake he kikokiko, ā, he kiri e hīpoki ana i waho ake i a rātou. Otiia, kāhore he manawa i roto i a rātou.
EZE 37:9 Kātahi ia ka mea ki ahau, “Poropiti ki te hau, poropiti, e te tama a te tangata, mea atu hoki ki te hau: Ko te kupu tēnei a te Ariki, a Ihowā: Haere mai i ngā hau e whā, e te manawa, e hā ki runga ki tēnei hunga kua oti nei te patu, kia ora ai rātou.”
EZE 37:10 Heoi, ka poropititia e ahau te mea i whakahaua e ia ki ahau. Nā, ko te taenga mai o te manawa ki roto ki a rātou, kua ora, tū ana i runga i ō rātou waewae, he ope tino nui.
EZE 37:11 Kātahi ia ka mea ki ahau, “E te tama a te tangata, ko ēnei wheua ko te whare katoa o Īharaira. Nanā, kei te kī ake rātou, ‘Kua maroke ō tātou wheua, kua ngaro tā tātou i tūmanako ai; kua motuhia kētia tātou.’
EZE 37:12 Mō reira poropiti, kī atu ki a rātou: Ko te kupu tēnei a te Ariki, a Ihowā: Nanā, e tāku iwi, ka huakina ake e ahau ō koutou urupā, ka meinga kia puta ake hoki koutou i ō koutou urupā, ka kawea ki te oneone o Īharaira.
EZE 37:13 Ā, ka mōhio koutou ko Ihowā ahau, ina huakina e ahau ō koutou urupā, e tāku iwi, ā, ka meinga koutou e ahau kia puta ake i ō koutou urupā.
EZE 37:14 Ā, ka hoatu e ahau tōku wairua ki roto ki a koutou, ā, ka ora koutou, ā, ka whakanohoia koutou e ahau ki tō koutou ake oneone. Ko reira koutou mōhio ai, nāku, nā Ihowā, i kōrero, ā, nāku anō i mahi, e ai tā Ihowā.”
EZE 37:15 I puta mai anō te kupu a Ihowā ki ahau, i mea:
EZE 37:16 “Nā, ko koe, e te tama a te tangata, tīkina tētahi rākau māu, tuhituhia iho, ‘He mea mō Hūrā, mō ōna hoa anō, mō ngā tama a Īharaira.’ Nā, tīkina atu anō tētahi rākau, tuhituhia iho, ‘He mea mō Hōhepa, ko te rākau o Ēparaima, mō ōna hoa hoki, mō te whare katoa o Īharaira.’
EZE 37:17 Nā, me hono rāua, tētahi ki tētahi; ā hei rākau kotahi rāua i roto i tōu ringa.
EZE 37:18 “Nā, ki te kōrero ngā tamariki a tōu iwi ki a koe, ki te mea, ‘E kore ianei e whakaaturia e koe ki a mātou he aha te tikanga o ēnei mea āu?’
EZE 37:19 Mea atu ki a rātou: ‘Ko te kupu tēnei a te Ariki, a Ihowā: Nanā ka mau ahau ki te rākau o Hōhepa, ki tērā i te ringa o Ēparaima, ki ōna hoa anō, ki ngā iwi o Īharaira; ā, ka whakatakotoria rātou e ahau ki tērā, arā ki te rākau o Hūrā, ka meinga hoki rāua hei rākau kotahi, ā, ka kotahi tonu rāua i roto i tōku ringa.’
EZE 37:20 Nā, ko ngā rākau e tuhituhi ai koe ki runga, hei roto i tōu ringa i tō rātou aroaro.
EZE 37:21 Ā, ka mea atu koe ki a rātou, Ko te kupu tēnei a te Ariki, a Ihowā: Nanā, ka tangohia e ahau ngā tama a Īharaira i roto i ngā iwi i haere atu nei rātou, ka kohikohia i tētahi taha, i tētahi taha, ka kawea ki tō rātou oneone.
EZE 37:22 Ka meinga hoki rātou e ahau hei iwi kotahi ki te whenua, ki ngā maunga o Īharaira; ā, kotahi tonu he kīngi hei kīngi mō rātou katoa; kore ake ō rātou iwi e rua i muri nei, heoi rawa ō rātou wehenga kia rua kīngitanga.
EZE 37:23 Kore ake anō ō rātou poke i ā rātou whakapakoko, i ā rātou mea whakarihariha, i ō rātou kino katoa. Engari, ka whakaorangia rātou e ahau i ō rātou nohoanga katoa, i ngā wāhi i hara ai rātou, ka purea. Ko rātou hoki hei iwi māku, ko ahau hei Atua mō rātou.
EZE 37:24 “Ko tāku pononga hoki, ko Rāwiri hei kīngi mō rātou; ā, kotahi tonu te hēpara mō rātou katoa. Ka haere hoki rātou i runga i āku ritenga, ka pupuri i āku tikanga, ka mahi.
EZE 37:25 Ā, ka noho rātou i te whenua i hoatu e ahau ki tāku pononga, ki a Hākopa, ki te wāhi i noho ai ō koutou mātua; ka noho anō rātou ki reira, rātou, ā rātou tama, me ngā tama anō a ā rātou tama ā ake ake; ā, ko tāku pononga, ko Rāwiri hei rangatira mō rātou ā ake ake.
EZE 37:26 Ka whakaritea anō e ahau te kawenata mō te rongo mau ki a rātou; hei kawenata mau tonu tēnā ki a rātou; ka whakanohoia anō rātou e ahau, ka whakanuia, ka whakatūria anō e ahau tōku wāhi tapu ki waenganui i a rātou ā ake ake.
EZE 37:27 Nā, ki a rātou tōku tapenākara; ā, ko ahau hei Atua mō rātou, ko rātou anō hei iwi māku.
EZE 37:28 Ā, ka mōhio ngā tauiwi ko ahau a Ihowā e whakatapu nei i a Īharaira, i te mea kei waenganui nei tōku wāhi tapu i a rātou ā ake ake.”
EZE 38:1 I puta mai anō te kupu a Ihowā ki ahau, i mea:
EZE 38:2 “E te tama a te tangata, anga atu tōu mata ki Koko, o te whenua o Makoko, ki te rangatira o Roho, o Meheke, o Tūpara, ka poropiti atu he hē mōna;
EZE 38:3 mea atu hoki: Ko te kupu tēnei a te Ariki, a Ihowā: Nanā, hei hoariri tēnei ahau mōu, e Koko, e te rangatira o Roho, o Meheke, o Tūpara.
EZE 38:4 Ka whakatahuritia anō koe e ahau, ka whakamaua he matau ki ōu kauae, ā, ka whakaputaina koe ki waho, me tōu ope katoa, ngā hōiho, me ngā kaieke hōiho, he mea whakakākahu rātou katoa ki ngā kākahu o te whawhai, he ope nui me te puapua, me te whakangungu rākau, ā, he hāpai hoari rātou katoa.
EZE 38:5 Ko Pahia, ko Etiopia, ko Putu ō rātou hoa; rite katoa rātou i te whakangungu rākau, i te pōtae whawhai;
EZE 38:6 ā, Kōmere, me ōna rōpū katoa; te whare o Tokārama, o ngā pito rawa ki te raki, rātou ko ōna ope katoa, arā, ko ngā iwi maha i tōu taha.
EZE 38:7 “Kia noho rite koe, āe rā, whakatikatika i a koe, i a koe me ōu rōpū katoa kua huihui nei ki a koe, ā, ko koe hei kaitiaki mō rātou.
EZE 38:8 Kia maha ngā rā ka tirohia koe, i ngā tau whakamutunga ka tae koe ki te whenua i whakahokia mai i te hoari, i kohikohia mai i roto i ngā iwi maha, ki ngā maunga o Īharaira kua ururua noa ake. Heoi, kua oti te whakaputa mai i roto i ngā iwi, ā, ka noho hūmārie rātou katoa.
EZE 38:9 Ā, ka kake koe, ka haere mai koe me te paroro, ā, ka rite koe ki te kapua e taupoki ana i te whenua, a koe, me ōu rōpū katoa, koutou tahi ko ngā iwi maha.
EZE 38:10 “Ko te kupu tēnei a te Ariki, a Ihowā: Nā, i taua rā ka puta ake he mea i tōu ngākau, ā, ka whakaaroa e koe he whakaaro nanakia.
EZE 38:11 Ā, ka mea koe, ‘Ka haere ahau ki te whenua i ngā pā kore taiepa; ka tae ahau ki te hunga e āta noho ana, e noho wehikore ana, e noho ana rātou katoa kāhore he taiepa, kāhore he tūtaki, kāhore he kēti;
EZE 38:12 ki te pāhua i ngā taonga, ki te tango mea parakete; tahuri tonu tōu ringa ki ngā wāhi ururua kua nohoia, ki te iwi kua oti te kohikohi mai i roto i ngā tauiwi, ā, kua whiwhi ki te kararehe, ki te taonga, e noho ana i waenganui o te whenua.’
EZE 38:13 Nā, ka mea a Hēpā, a Rerana, rātou ko ngā kaihokohoko o Tarahihi, me ngā kūao raiona katoa o reira ki a koe, ‘Kua tae mai rānei koe ki te pāhua taonga? Kua whakaminea rānei e koe tāu hui ki te tango i ngā mea parakete? Ki te mau atu i te hiriwa, i te kōura, ki te tango i ngā kararehe, i ngā taonga, ki te pāhua i ngā taonga maha?’
EZE 38:14 “Mō reira, e te tama a te tangata, poropiti, mea atu ki a Koko: Ko te kupu tēnei a te Ariki, a Ihowā: I te rā e noho hūmārie ai tāku iwi a Īharaira, e kore ianei e mōhiotia e koe?
EZE 38:15 Ā, tērā koe e haere mai i tōu wāhi i ngā pito rawa ki te raki, koutou ko ngā iwi maha, ko rātou katoa i runga i te hōiho, he hui nui, he ope nui.
EZE 38:16 Ā, ka whakaekea e koe tāku iwi a Īharaira, me te mea he kapua e taupoki ana i te whenua; ā, i ngā rā whakamutunga ka kawea koe e ahau ki te whawhai ki tōku whenua, kia mōhio ai ngā tauiwi ki ahau, ina ka whakatapua ahau i runga i a koe, e Koko, i tā rātou tirohanga.”
EZE 38:17 “Ko te kupu tēnei a te Ariki, a Ihowā: Ko koe rānei tērā i kōrerotia rā e ahau, arā e āku pononga, e ngā poropiti o Īharaira, i ngā rā onamata, i poropititia hoki e rātou i aua rā, he maha ngā tau, tāku kawenga i a koe ki a rātou?
EZE 38:18 Nā, ā taua rā, ā te rā e haere mai ai a Koko ki te whenua o Īharaira, e ai tā te Ariki, tā Ihowā, ka puta ake tōku weriweri ki ōku pongāihu.
EZE 38:19 Kua kōrero hoki ahau i runga i tōku hae, i runga i te ahi o tōku riri: He pono i taua rā ka nui te rū ki te whenua o Īharaira;
EZE 38:20 ā, ka wiri ngā ika o te moana ki tōku aroaro, ngā manu anō o te rangi, ngā kīrehe o te pārae, ngā mea ngōkingōki katoa e ngōkingōki ana i runga i te whenua, me ngā tāngata katoa i runga i te mata o te whenua, ka turakina iho hoki ngā maunga, ka hinga ngā wāhi poupou, ka hinga anō ngā taiepa katoa ki te whenua.
EZE 38:21 Ā, ka karangatia e ahau he hoari hei patu mōna, puta noa i ōku maunga katoa, e ai tā te Ariki, tā Ihowā; ā, ko te hoari a tēnā tangata, a tēnā tangata, ka anga atu ki tōna hoa, ki tōna hoa.
EZE 38:22 Ā, ko tāku mea hei totohe ki a ia, he mate urutā, he toto; ka uaina iho anō e ahau he ua, he waipuke, he whatu nui, he ahi, he whānāriki, ki a ia, ki ōna rōpū, ki ngā iwi maha e whai ana i a ia.
EZE 38:23 Nā, ka whakanui ahau i ahau, ka whakatapu anō ahau i ahau; ā, ka mōhiotia ahau i te tirohanga a ngā iwi maha, ā, ka mōhio rātou ko Ihowā ahau.”
EZE 39:1 “Nā, ko koe, e te tama a te tangata, poropititia he hē mō Koko, mea atu: Ko te kupu tēnei a te Ariki, Ihowā: Nanā, hei hoariri ahau mōu, e Koko, e te tino rangatira o Roho, o Meheke, o Tūpara;
EZE 39:2 ā, ka whakatahuritia koe e ahau, ka ārahina atu koe, ka meinga hoki kia puta ake koe i ngā pito rawa ki te raki, ā, ka kawea mai koe e ahau ki runga ki ngā maunga o Īharaira.
EZE 39:3 Ka patua atu anō e ahau tāu kōpere i roto i tōu mauī, ka meinga hoki āu pere kia marere i roto i tōu matau.
EZE 39:4 Ka hinga koe ki runga ki ngā maunga o Īharaira, a koe, me ōu rōpū katoa, me ngā iwi i a koe. Ka hoatu koe e ahau hei kai mā ngā manu kai kino o ia āhua, o ia āhua, mā ngā kīrehe anō o te pārae.
EZE 39:5 Ka hinga koe ki te mata o te pārae; nāku hoki te kupu, e ai tā te Ariki, tā Ihowā.
EZE 39:6 Ka tukua atu anō e ahau he ahi ki a Makoko, rātou ko te hunga e noho hūmārie ana i ngā motu, ā, ka mōhio rātou ko Ihowā ahau.
EZE 39:7 “Ā, ka meinga e ahau tōku ingoa tapu kia mōhiotia i roto i tāku iwi, i a Īharaira, e kore anō e tukua e ahau kia whakapokea tōku ingoa tapu ā muri ake nei. Ā, ka mōhio ngā tauiwi ko Ihowā ahau, ko te Mea Tapu i roto i a Īharaira.
EZE 39:8 Nanā, kua tae mai, kua oti, e ai tā te Ariki, tā Ihowā: Ko te rā tēnei i kōrerotia rā e ahau.
EZE 39:9 “Ka puta anō ngā tāngata o ngā pā o Īharaira, ā, ka tahuna e rātou, ka wera anō i a rātou ngā patu – ngā whakangungu rākau, ngā puapua, ngā kōpere, ngā pere, ngā hani, ngā tao – ko ngā tau e tahuna ai aua mea e rātou, e whitu.
EZE 39:10 E kore hoki e maua e rātou he wahie i te pārae, e kore anō e tapahia i ngā ngahere; nō te mea ka tahuna e rātou ngā patu ki te ahi. Ka pāhuatia e rātou ō rātou kaipāhua, ka murua ngā taonga o ō rātou kaimuru, e ai tā te Ariki, tā Ihowā.”
EZE 39:11 “Nā, ā taua rā ka hoatu e ahau ki a Koko he wāhi tanumanga ki reira, ki a Īharaira, ko te raorao o ngā tira haere i te taha ki te rāwhiti o te moana; kūtia iho ki reira ngā ihu o ngā tira haere; ka tanumia hoki ki reira a Koko rātou ko āna mano tini; ā, ka huaina a reira, ‘Ko te raorao o Hamono Koko.’
EZE 39:12 “Ā, e whitu ngā marama o te whare o Īharaira e tanu ana i a rātou kia wātea ai te whenua.
EZE 39:13 Inā, ka tanumia rātou e te iwi katoa o te whenua; ā, hei ingoa nui ki a rātou i te rā e whakakorōriatia ai ahau, e ai tā te Ariki, tā Ihowā.
EZE 39:14 “Ka wehea anō e rātou ētahi tāngata, he mea tūturu, hei haere i runga i te whenua, hei tanu i ngā tira haere, i te hunga e toe ana i runga i te mata o te whenua, kia wātea ai; i te mutunga o ngā marama e whitu ka rapu rātou.
EZE 39:15 Ā, ka haere ngā tira haere, ka tika i te whenua; ka kite tētahi i te wheua tangata, ka whakatūria e ia he tohu ki tōna taha, kia tanumia rā anō e ngā kaitanu ki te raorao o Hamono Koko.
EZE 39:16 (Ā, ko Hāmona hoki hei ingoa mō tētahi pā.) Nā, ka wātea te whenua.
EZE 39:17 “Nā, ko koe, e te tama a te tangata, ko te kupu tēnei a te Ariki, a Ihowā: Mea atu ki ngā manu o ia āhua, o ia āhua, ki ngā kīrehe katoa o te pārae: Huihui mai, haere mai; whakamine mai koutou i tētahi taha, i tētahi taha, ki tāku patunga e patua nei e ahau mā koutou, he patunga nui ki runga ki ngā maunga o Īharaira, kia kai kikokiko ai, kia inu toto ai koutou.
EZE 39:18 Ka kai koutou i ngā kikokiko o te hunga mārohirohi, ka inu i ngā toto o ngā rangatira o te whenua, o ngā hipi toa, o ngā reme, o ngā koati, o ngā pūru, he mea mōmona katoa nō Pahana.
EZE 39:19 Ā, ka kai koutou i te ngako ā mākona noa, ka inu hoki i te toto ā haurangi noa, he mea nō tāku patunga e patua e ahau mā koutou.
EZE 39:20 Nā, ka mākona koutou i ngā hōiho o tāku tēpu, i ngā hōiho hāriata, i ngā mārohirohi, i ngā tāngata whawhai katoa, e ai tā te Ariki, tā Ihowā.”
EZE 39:21 “Ka whakatūria e ahau tōku korōria ki roto ki ngā tauiwi, ā, ka kite ngā tauiwi katoa i tāku whakawā e whakaritea e ahau, i tōku ringa anō ka pā nei ki a rātou.
EZE 39:22 Nā, ka mōhio te whare o Īharaira, ko Ihowā ahau, ko tō rātou Atua, i taua rā ā ake ake.
EZE 39:23 Ka mōhio anō ngā tauiwi, he hē nō te whare o Īharaira i whakaraua ai rātou. He pokanga kētanga nō tā rātou ki ahau i hunā ai e ahau tōku mata ki a rātou, heoi tukua ana rātou e ahau ki te ringa o ō rātou hoariri; ā, hinga katoa ana i te hoari.
EZE 39:24 Ko tāku i mea ai ki a rātou rite tonu ki tō rātou poke, ki ō rātou pokanga kētanga, ā, hunā ana e ahau tōku mata ki a rātou.
EZE 39:25 “Mō reira ko te kupu tēnei a te Ariki, a Ihowā: Ka whakahokia mai e ahau āianei a Hākopa i te whakarau, ka aroha ahau ki te whare katoa o Īharaira; ka hae hoki ahau, he whakaaro ki tōku ingoa tapu.
EZE 39:26 Ā, ka whakawahā e rātou tō rātou whakamā, ō rātou pokanga kētanga katoa hoki i poka kē ai tā rātou ki ahau, ina noho hūmārie rātou i tō rātou whenua, ā, kāhore he tangata hei whakawehi i a rātou.
EZE 39:27 Ina oti rātou te whakahoki mai e ahau i roto i ngā iwi, ina kohikohia mai rātou i ngā whenua o ō rātou hoariri, ā, ka whakatapua ahau i runga i a rātou i te tirohanga a ngā iwi maha.
EZE 39:28 Kātahi rātou ka mōhio ko Ihowā ahau, ko tō rātou Atua, i mea nei kia whakaraua rātou ki roto ki ngā tauiwi, i kohikohi anō i a rātou ki tō rātou oneone; ā, kāhore noa iho tētahi o rātou e mahue i ahau ki reira.
EZE 39:29 E kore anō e hunā e ahau tōku mata ā muri ake nei ki a rātou. Kua ringihia hoki e ahau tōku wairua ki runga ki te whare o Īharaira, e ai tā te Ariki, tā Ihowā.”
EZE 40:1 I te rua tekau mā rima o ngā tau o tō mātou whakaraunga, i te tīmatanga o te tau, i te tekau o ngā rā o te marama, i te tekau mā whā o ngā tau o te horonga o te pā, i taua tino rā ka pā te ringa o Ihowā ki ahau, ā, kawea ana ahau e ia ki reira.
EZE 40:2 Kawea ana ahau e ia, he whakakitenga nā te Atua, ki te whenua o Īharaira, whakanohoia ana ahau e ia ki tētahi maunga tiketike rawa, i reira tētahi mea, he rite tōna hanga ki tō te pā i te tonga.
EZE 40:3 Ā, kawea ana ahau e ia ki reira; nā, ko tētahi tangata, ko tōna āhua, ānō he parāhi ki te titiro atu, he aho muka i tōna ringa, he kākaho ānō hei whanganga; i te kūwaha ia e tū ana.
EZE 40:4 Nā, ka mea taua tangata ki ahau, “E te tama a te tangata, titiro mai ōu kanohi, whakarongo ōu taringa, tahuri mai anō tōu ngākau ki ngā mea katoa e whakakitea e ahau ki a koe; i kawea mai hoki koe ki konei kia whakakitea ai ēnei mea ki a koe. Whakaaturia ki te whare o Īharaira ngā mea katoa e kite ai koe.”
EZE 40:5 Nā, he taiepa kei waho o te whare ā taka noa, i te ringa hoki o taua tangata he kākaho hei whanganga, e ono whatīanga te roa; kotahi whatīanga me te whānui ringa o tētahi, o tētahi. Nā, kei te whanganga ia i te whānui o taua mea i hangā rā, kotahi te kākaho; ko te tiketike hoki kotahi te kākaho.
EZE 40:6 Kātahi ia ka tae ki te kūwaha e anga ana ki te rāwhiti, kei te piki i ōna kaupae; kei te whanganga i te paepae o te kūwaha, ko te whānui, kotahi kākaho; i tētahi atu paepae anō, kotahi kākaho te whānui.
EZE 40:7 Nā, ko te roa o te rūma kotahi, kotahi kākaho; ko te whānui, kotahi kākaho; i te takiwā o ngā rūma, e rima whatīanga; nā, ko te paepae o te kūwaha i te whakamahau o te kūwaha i te taha ki roto, kotahi kākaho.
EZE 40:8 Kātahi ia ka whanganga anō i te whakamahau o te kūwaha, te taha ki te whare, kotahi kākaho.
EZE 40:9 Kātahi ia ka whanganga i te whakamahau o te kūwaha, e waru whatīanga; me ōna pou, e rua whatīanga; nā, ko te whakamahau o te kūwaha e anga ana ki te whare.
EZE 40:10 Nā, ko ngā rūma o te kūwaha whaka te rāwhiti, e toru i tēnei taha, e toru i tērā taha; ko ngā mea e toru, kotahi tonu te nui; kotahi tonu anō te nui o ngā pou i tēnei taha, i tērā taha.
EZE 40:11 I whanganga anō ia i te whānui o te tapokoranga i te kūwaha, kotahi tekau whatīanga; ko te roa o te kūwaha kotahi, tekau mā toru whatīanga.
EZE 40:12 Nā, ko te taha ki mua i ngā rūma, kotahi te whatīanga; ko tētahi atu taha hoki kotahi te whatīanga. Nā, ko ngā rūma, e ono whatīanga o tēnei taha, e ono whatīanga o tērā taha.
EZE 40:13 I whanganga anō ia i te kūwaha i te tuanui o tētahi rūma, tae noa ki te tuanui o tētahi, e rua tekau mā rima whatīanga te whānui; ko tētahi tatau anga tonu mai ki tētahi tatau.
EZE 40:14 Ā, i hangā e ia ētahi pou, e ono tekau whatīanga; ā, ko te marae i tae atu ki te pou, ko te kūwaha i tētahi taha, i tētahi taha.
EZE 40:15 Nā, ko te takiwā i te aronga o te kūwaha e tapoko ai, tae noa ki te aronga o te whakamahau o tō roto kūwaha, e rima tekau whatīanga.
EZE 40:16 Nā, he matapihi kūiti o ngā rūma, o ngā pou anō i roto i te kūwaha ā taka noa, o ngā haurangi anō; he matapihi anō o ngā taha ki roto ā taka noa; he nīkau anō kei tēnei pou, kei tēnei pou.
EZE 40:17 Kātahi ahau ka kawea e ia ki tō waho marae, nā, he rūma i reira, he papa kōhatu hoki, he mea i hangā mō te marae ā taka noa. E toru tekau ngā rūma i runga i te papa kōhatu.
EZE 40:18 Nā, ko te papa kōhatu i te taha o ngā kūwaha i te ritenga atu o te taha roa o ngā kūwaha, ko tō raro papa tērā.
EZE 40:19 Kātahi ia ka whanganga i te whānui i te aronga o tō raro kūwaha tae noa ki te aronga o tō roto marae, ki te taha ki waho, kotahi rau whatīanga, ki te rāwhiti, ki te raki.
EZE 40:20 Nā, ko te kūwaha o tō waho marae e anga ana ki te raki, i whanganga anō e ia te roa, te whānui.
EZE 40:21 Nā, ko ōna rūma, e toru i tēnei taha, e toru i tērā taha, ko ōna pou, ko ōna haurangi rite tonu te nui ki tō te kūwaha tuatahi; e rima tekau whatīanga te roa, e rua tekau mā rima whatīanga te whānui.
EZE 40:22 Nā, ko ngā matapihi, ko ngā haurangi, ko ngā nīkau, he mea whakarite ki te nui o te kūwaha e anga ana ki te rāwhiti, e whitu anō ngā kaupae i pikitia ai a reira; i mua hoki i aua rūma ngā haurangi.
EZE 40:23 Nā, he kūwaha anō kei tō roto marae e anga ana ki tērā kūwaha ki te raki, ki te rāwhiti hoki; i whanganga anō ia i te takiwā o tētahi kūwaha, o tētahi kūwaha, kotahi rau whatīanga.
EZE 40:24 Nā, ka ārahina ahau e ia ki te tonga, nā, ko tētahi kūwaha ki te tonga. Nā, ka whanganga ia ki ōna pou me ōna haurangi, rite tonu ki ēnei kua oti nei te whanganga.
EZE 40:25 He matapihi anō o reira, i ōna haurangi anō hoki ā taka noa, he pērā me ērā matapihi; e rima tekau ngā whatīanga te roa, e rua tekau mā rima whatīanga te whānui.
EZE 40:26 E whitu ngā kaupae i pikitia ai; i mua ko ngā haurangi; he nīkau anō ōna, ko tētahi i tētahi taha, ko tētahi i tētahi taha i runga i ōna pou.
EZE 40:27 Nā, he kūwaha anō kei tō roto marae i te taha ki te tonga; i whanganga anō ia i te takiwā o tētahi kūwaha, o tētahi kūwaha ki te tonga, kotahi rau whatīanga.
EZE 40:28 Kātahi ka kawea ahau e ia nā te kūwaha ki te tonga ki tō roto marae, ā, whanganga ana ia i te kūwaha ki te tonga, rite tonu ki ēnei kua oti nei te whanganga.
EZE 40:29 Me ngā rūma anō o reira, me ngā pou, me ōna haurangi, rite tonu ki ēnei kua oti nei te whanganga; he matapihi anō o reira, o ōna haurangi anō ā taka noa. E rima tekau whatīanga te roa, e rua tekau mā rima whatīanga te whānui.
EZE 40:30 Nā, ko ngā haurangi ā taka noa, e rua tekau mā rima whatīanga te roa, e rima whatīanga te whānui.
EZE 40:31 Ā, i anga ōna haurangi ki tō waho marae; he nīkau anō o ōna pou. E waru anō ngā kaupae o te pikitanga ki reira.
EZE 40:32 I kawea anō ahau e ia ki tō roto marae whaka te rāwhiti, ā, whanganga ana ia i te kūwaha; rite tonu ki ēnei kua oti nei te whanganga.
EZE 40:33 Nā, ko ngā rūma o reira, ko ōna pou, ko ōna haurangi, rite tonu ki ēnei kua oti nei te whanganga; he matapihi anō o reira, o ngā haurangi anō ā taka noa; e rima tekau whatīanga te roa, e rua tekau mā rima whatīanga te whānui.
EZE 40:34 I anga anō ōna haurangi ki tō waho marae, he nīkau anō kei ōna pou i tēnei taha, i tērā taha; e waru ngā kaupae o te pikitanga ki reira.
EZE 40:35 I kawea anō ahau e ia ki te kūwaha ki te raki, ā, whanganga ana ia; rite tonu ki ēnei kua oti nei te whanganga.
EZE 40:36 Ko ōna rūma, ko ōna pou, ko ōna haurangi, me ōna matapihi anō ā taka noa; e rima tekau whatīanga te roa, e rua tekau mā rima whatīanga te whānui.
EZE 40:37 Ā, ko ōna pou kei te taha ki tō waho marae; he nīkau anō kei ōna pou i tēnei taha, i tērā taha. E waru ngā kaupae o te pikitanga ki reira.
EZE 40:38 Nā tērā tētahi rūma, he tapokoranga anō ki reira, i ngā pou o ngā kūwaha; ko te wāhi tērā i horoia ai te tahunga tinana.
EZE 40:39 Nā, i te whakamahau o te kūwaha e rua ngā tēpu i tēnei taha, e rua ngā tēpu i tērā taha, hei patunga ki runga mō te tahunga tinana, mō te whakahere hara, mō te whakahere mō te hē.
EZE 40:40 I te taha anō ki waho e rua ngā tēpu i te wāhi e piki ai ki te tapokoranga o te kūwaha ki te raki; e rua ngā tēpu i tērā taha, i te whakamahau o te kūwaha.
EZE 40:41 E whā ngā tēpu i tēnei taha, e whā anō ngā tēpu i tērā taha, i te taha o te kūwaha; e waru ngā tēpu i patua ai ngā patunga tapu.
EZE 40:42 Nā, he kōhatu tārai ngā tēpu e whā mō te tahunga tinana, kotahi whatīanga me te hāwhe te roa, kotahi whatīanga me te hāwhe te whānui, kotahi whatīanga te tiketike; ko te takotoranga ēnā o ngā patu mō te tahunga tinana, mō te patunga tapu.
EZE 40:43 Kua oti anō ētahi matau te whakanoho ki te taha ki roto ā taka noa, kotahi ringa te whānui; ā, i runga i ngā tēpu ko te kikokiko o te whakahere.
EZE 40:44 Nā, i waho o tō roto kūwaha ko ngā rūma o ngā kaiwaiata i tō roto marae, arā i tērā ki te taha o te kūwaha o te raki. I anga aua rūma ki te tonga; i anga anō ki te raki tētahi i te taha o te kūwaha ki te rāwhiti.
EZE 40:45 Nā, ka mea ia ki ahau, “Ko tēnei rūma e anga nei ki te tonga, mō ngā tohunga, mō ngā kaitiaki o ngā mea o te whare.
EZE 40:46 Nā, ko te rūma e anga nei ki te raki, mō ngā tohunga, mō ngā kaitiaki o ngā mea o te āta. Ko ngā tama ēnei a Hāroko i roto i ngā tama a Rīwai, e whakatata ana ki a Ihowā ki te minita ki a ia.”
EZE 40:47 Nā, ka whanganga ia i te marae, kotahi rau whatīanga te roa, kotahi rau whatīanga te whānui, he tapawhā; ā, ko te āta hoki i mua i te whare.
EZE 40:48 Kātahi ahau ka kawea e ia ki te whakamahau o te whare. Kei te whanganga ia i tēnei pou, i tēnei pou o te whakamahau, e rima whatīanga i tēnei taha, e rima whatīanga i tērā taha. Nā, ko te whānui o te kūwaha, e toru whatīanga i tēnei taha, e toru whatīanga i tērā taha.
EZE 40:49 Ko te roa o te whakamahau e rua tekau whatīanga; ko te whānui kotahi tekau mā tahi whatīanga; arā mā ngā kaupae i pikitia atu ai a reira; ā, he pou anō ērā i te taha o ngā pou, ko tētahi i tēnei taha, ko tētahi i tērā taha.
EZE 41:1 Nā, ka kawea ahau e ia ki te temepara kei te whanganga i ngā pou, e ono whatīanga te whānui i tētahi taha e ono whatīanga te whānui i tētahi taha, ko te whānui tērā o te tapenākara.
EZE 41:2 Nā, ko te whānui o te tatau, kotahi tekau whatīanga. Ko ngā taha o te tatau, e rima ngā whatīanga i tētahi taha, e rima ngā whatīanga i tētahi taha; i whanganga anō ia i tō reira roa, e whā tekau whatīanga; ko te whānui e rua tekau whatīanga.
EZE 41:3 Kātahi ia ka haere ki roto, kei te whanganga i te pou o te kūwaha, e rua whatīanga; ko te kūwaha, e ono whatīanga; ko te whānui o te kūwaha e whitu whatīanga.
EZE 41:4 Heoi, whanganga ana ia i tō reira roa, e rua tekau whatīanga te whānui, e rua tekau whatīanga i mua i te temepara. Nā, ka mea ia ki ahau, “Ko te Wāhi Tino Tapu tēnei.”
EZE 41:5 Muri iho ka whanganga ia i te taha o te whare, e ono whatīanga; me te whānui anō i ngā rūma o te taha, e whā whatīanga, i ngā taha o te whare ā taka noa.
EZE 41:6 Nā, e toru ngā whakapaparanga o ngā rūma i te taha, ko tētahi i runga i tētahi, e toru tekau ki te rārangi, i ngoto ki te pakitara, ki tō te whare, hei rūma mō ngā taha ā taka noa, kia ū ai ki reira, kāhore ia he ūnga i te pakitara o te whare.
EZE 41:7 Nā, ka nui haere a whawhe noa whakarunga ngā rūma o te taha; i haere tonu hoki whakarunga te karapotinga o te whare ā taka noa. Nō reira, haere tonu te whānui o te whare whakarunga, nui haere atu ana i tō raro rawa tae noa ki tō runga, mā waenga.
EZE 41:8 I kite anō ahau i te tiketike o te whare ā whawhe noa. Ko ngā tūranga o ngā rūma, kotahi tino kākaho e ono nei ōna whatīanga nui.
EZE 41:9 Ko te mātotoru o te pakitara, o tērā mō ngā rūma i ngā taha, i waho, e rima whatīanga; ā, ko te mea i mahue, ko te wāhi o ngā rūma o te taha, nō te whare ērā.
EZE 41:10 Nā, he takiwā kei waenganui i ngā rūma, e rua tekau whatīanga, i ngā taha katoa o te whare ā taka noa.
EZE 41:11 Ā, i anga ngā tatau o ngā rūma ki te wāhi i mahue, ko tētahi tatau ki te raki, ko tētahi tatau ki te tonga. Ā, ko te whānui o te wāhi i mahue e rima whatīanga ā tawhio noa.
EZE 41:12 Nā, ko te whare i mua i te wāhi motuhake i te pito ki te hauāuru, e whitu tekau whatīanga te whānui; ā, e rima whatīanga te mātotoru o te pakitara o taua whare ā tawhio noa; tōna roa e iwa tekau whatīanga.
EZE 41:13 Heoi, ka whanganga ia i te whare, kotahi rau whatīanga te roa; me te wāhi motuhake, me taua whare, me ōna taha, kotahi rau whatīanga te roa.
EZE 41:14 Me te whānui o te aroaro o te whare, o te wāhi motuhake anō whaka te rāwhiti, kotahi rau whatīanga.
EZE 41:15 I whanganga anō ia i te roa o te whare i te ritenga mai o te wāhi motuhake, i muri hoki tērā i tēnei; me ōna ara i tētahi taha, i tētahi taha, kotahi rau whatīanga. Me te temepara i roto, me ngā whakamahau o te marae;
EZE 41:16 ko ngā pou tatau, ko ngā matapihi kūiti, me ngā ara i ngā whakapaparanga e toru ā taka noa i te ritenga atu o te tatau, he mea paparua ki te rākau ā taka noa, he mea pērā anō i te whenua ā tae noa ki ngā matapihi; (he mea hīpoki anō ngā matapihi),
EZE 41:17 tae noa ki te wāhi i runga ake i te tatau, ki te whare i roto, ki tō waho, i te pakitara katoa ā tawhio noa, i roto, i waho, he mea whanganga.
EZE 41:18 I mahia anō ki reira he kerupima, he nīkau; he nīkau i te takiwā o tētahi kerupa, o tētahi kerupa, e rua hoki ngā mata o te kerupa kotahi.
EZE 41:19 I anga te mata tangata ki te nīkau i tētahi taha, te mata o te raiona ki te nīkau i tētahi taha; i pērātia te mahinga puta noa i te whare, ā tawhio noa.
EZE 41:20 I te whenua ā tae noa ki runga ake i te tatau i hangā he kerupima, he nīkau, he pēnei te pakitara o te temepara.
EZE 41:21 He tapawhā ngā pou o te temepara. Nā, ko te aronga mai o te wāhi tapu, ko te āhua, rite tonu ki te āhua o te temepara.
EZE 41:22 Ko te āta he rākau, e toru whatīanga te tiketike, ā, ko te roa e rua whatīanga. Nā, ko ngā koki, ko tōna roanga, ko ōna pakitara, he rākau. Nā, ko tāna kīanga mai ki ahau, “Ko te tēpu tēnei i te aroaro o Ihowā.”
EZE 41:23 Ā, e rua ngā tatau o te temepara, o te wāhi tapu.
EZE 41:24 Ko ngā tatau he aparua, huri ai ngā apa; e rua ngā apa mō tētahi o ngā tatau, e rua ngā apa mō tētahi.
EZE 41:25 I mahia anō ki aua tatau o te temepara ētahi kerupima me ētahi nīkau, he mea rite tonu ki ērā i mahia ki ngā pakitara; he papa mātotoru hoki i te aronga o te whakamahau i te taha ki waho.
EZE 41:26 Ā, he matapihi kūiti, he nīkau hoki, i tētahi taha, i tētahi taha, i ngā taha hoki o te whakamahau. Koia ērā, ko ngā rūma o te taha o te whare, me ngā papa mātotoru hoki.
EZE 42:1 Kātahi ahau ka kawea e ia ki tō waho marae, ki te ara ki te raki; kawea ana ahau e ia ki te rūma ki te ritenga atu o te wāhi motuhake, ki tērā i te aronga mai o te whare e anga ana ki te raki.
EZE 42:2 I te ritenga atu o ngā whatīanga kotahi rau ko te tatau ki te raki, e rima tekau whatīanga te whānui.
EZE 42:3 I te ritenga atu o ngā whatīanga e rua tekau o tō roto marae, i te ritenga atu anō o te papa kōhatu i tō waho marae, ko tētahi ara e anga mai ana ki tētahi ara, i te toru o ngā whakapaparanga.
EZE 42:4 Nā, i mua i ngā rūma ko tētahi wāhi hāereerenga kotahi tekau whatīanga, he mea e anga ana whakaroto, kotahi te whatīanga o te ara; i anga ō rāua tatau ki te raki.
EZE 42:5 Nā, i poto iho ngā rūma o runga; nā ngā ara hoki i tango tētahi wāhi o ēnei, nui atu i te tangohanga mai i o raro, i o waenganui, o te whare.
EZE 42:6 E toru hoki ngā whakapaparanga, kāhore ia he pou pērā me ngā pou o ngā marae. Nā reira i kūiti ai o runga rawa i o raro, i o waenganui, i te mea ka anga ake i te whenua.
EZE 42:7 Nā, ko te taha i waho e anga ana ki ngā rūma, ki tō waho marae i te taha ki mua o ngā rūma, ko tōna roa e rima tekau whatīanga.
EZE 42:8 E rima tekau whatīanga hoki te roa o ngā rūma i tō waho marae. Nā, i mua i te temepara kotahi rau whatīanga.
EZE 42:9 I raro anō i ēnei rūma te tapokoranga atu i te rāwhiti, i te mea ka tapoko atu i tō waho marae.
EZE 42:10 He rūma anō i te wāhi mātotoru o te pakitara i te marae ki te rāwhiti, i te ritenga atu o te wāhi motuhake, i te ritenga ake anō o te whare.
EZE 42:11 Nā, ko te ara i mua i ērā, rite tonu te āhua ki tō ngā rūma i anga ki te raki; rite tonu te roa, rite tonu te whānui. Ko ngā putanga atu rite tonu ki ngā tikanga, rite tonu ki ngā tatau.
EZE 42:12 Rite tonu anō ki ngā tatau o ngā rūma e anga ana ki te tonga te tatau i te ahunga mai o te ara, o te ara i mua tonu i te taiepa ki te rāwhiti i te mea ka tomo tētahi ki roto.
EZE 42:13 Kātahi ia ka mea ki ahau, “Ko ngā rūma ki te raki, ko ngā rūma ki te tonga i mua i te wāhi motuhake, he rūma tapu ēnā, ka kainga ngā mea tapu rawa ki reira e ngā tohunga e whakatata ana ki a Ihowā. Me waiho i reira ngā mea tapu rawa, me te whakahere totokore, me te whakahere hara, me te whakahere mō te hē – he tapu hoki taua wāhi.
EZE 42:14 Ka tae ngā tohunga ki roto, kaua e haere atu i roto i te wāhi tapu ki tō waho marae; engari, me waiho i reira ō rātou kākahu e minita ai, he tapu hoki; me kākahu anō ētahi atu kākahu, ka whakatata ai ki ngā mea mā te iwi.”
EZE 42:15 Nā, ka mutu tāna whanganga i tō roto whare, ka kawea ahau e ia ki te kūwaha e anga ana ki te rāwhiti, whanganga ana ia i tētahi taha, i tētahi taha.
EZE 42:16 I whanganga e ia ki te kākaho whanganga te taha ki te rāwhiti, e rima rau kākaho, he mea whanganga ki te kākaho whanganga, i tētahi taha, i tētahi taha.
EZE 42:17 I whanganga ia ki te taha i te raki, e rima rau kākaho, he mea whanganga ki te kākaho whanganga, i tētahi taha, i tētahi taha.
EZE 42:18 I whanganga ia ki te taha ki te tonga e rima rau kākaho, he mea whanganga ki te kākaho whanganga.
EZE 42:19 I tahuri atu ia ki te taha ki te hauāuru, whanganga ana e ia, e rima rau kākaho, ki te kākaho whanganga.
EZE 42:20 Whanganga ana a reira e ia i ngā taha e whā. He taiepa tōna ā tawhio noa, e rima rau kākaho te roa, e rima rau te whānui, hei wehe i te wāhi tapu i te wāhi noa.
EZE 43:1 Muri iho ka kawea ahau e ia ki te kūwaha, arā ki te kūwaha e anga ana ki te rāwhiti.
EZE 43:2 Nā, ko te korōria o te Atua o Īharaira e puta mai ana, i te ara ki te rāwhiti; ko tōna reo rite tonu ki te haruru o ngā wai maha; mārama tonu te whenua i tōna korōria.
EZE 43:3 Ko tōna rite kei te āhua o tāku kite i kite ai, ki tērā i kite rā ahau i ahau e haere ana ki te whakangaro i te pā; rite tonu hoki ngā kite ki tāku i kite ai ki te awa, ki Kepara; ā, takoto tāpapa ana ahau.
EZE 43:4 Nā, kua tae te korōria o Ihowā ki roto ki te whare; i tika nā te ara o te kūwaha e anga ana ki te rāwhiti.
EZE 43:5 Nā, ka hāpainga ake ahau e te wairua, kawea ana e ia ki tō roto marae. Nā, kua kī te whare i te korōria o Ihowā.
EZE 43:6 I rongo anō ahau i tētahi e kōrero ana ki ahau i roto i te whare; me te tū anō tētahi tangata ki tōku taha.
EZE 43:7 Nā, ka mea ia ki ahau: E te tama a te tangata, Ko te wāhi tēnei i tōku torōna, ko te wāhi anō i ngā kapu o ōku waewae, ko te wāhi e noho nei ahau i waenganui i ngā tama a Īharaira ā ake ake. E kore anō tōku ingoa tapu e whakapokea ā muri nei e te whare o Īharaira, e rātou, e ō rātou kīngi, ki ā rātou moepuku, ki ngā tinana rānei o ō rātou kīngi i ō rātou wāhi tiketike.
EZE 43:8 I tā rātou whakanohoanga i tō rātou paepae ki te taha o tōku paepae, i tō rātou pou tatau i te taha o tōku pou tatau, ā, ko te taiepa anake hei wehe i ahau i a rātou; i whakapokea e rātou tōku ingoa tapu ki ā rātou mea whakarihariha i mahia nei e rātou; nō reira pau ake rātou i ahau, i ahau e riri ana.
EZE 43:9 Nā, me wehe atu e rātou ō rātou moepuku me ngā tinana o ō rātou kīngi, kia matara atu i ahau, ā, ka noho ahau ki waenganui i a rātou ā ake ake.
EZE 43:10 “Ko koe, e te tama a te tangata whakakitea e koe te whare ki te whare o Īharaira, kia whakamā ai rātou ki ō rātou hē; me whanganga hoki e rātou te tauira.
EZE 43:11 Ā, ki te whakamā rātou ki ngā mea katoa i mea ai rātou, whakakitea ki a rātou te āhua o te whare, tōna whai hanga, ōna putanga atu, ōna tapokoranga ki roto, ōna āhua katoa, ōna ritenga katoa, me ōna āhua katoa, me ōna ture katoa, tuhituhia anō ki tō rātou aroaro, kia mau ai i a rātou tōna āhua katoa me ōna ritenga katoa, kia mahia ai e rātou.
EZE 43:12 “Ko te ture tēnei o te whare; ko ngā taha katoa i runga i te tihi o te maunga, tapu rawa ā tawhio noa. Nanā, ko te ture tēnei o te whare.”
EZE 43:13 “Ko ngā roroa ēnei o te āta, arā ko ngā whatīanga (he whatīanga me te whānui ringa kei roto i te whatīanga): ā, raro he whatīanga, ko te whānui he whatīanga, ko te taha i te niao he whanganga ringa ā tawhio noa; ko te kaupapa tēnei o te āta.
EZE 43:14 Nā, ko te tūranga i runga i te whenua, haere ake ki tō raro papa, e rua whatīanga; ko te whānui kia kotahi whatīanga; ko tō te papa i raro tae noa ki te papa nui, e whā whatīanga; ko te whānui, kotahi whatīanga.
EZE 43:15 Nā, ko tō runga āta, e whā whatīanga; i te takuahi o te āta whakarunga kia whā ngā haona.
EZE 43:16 Kia tekau mā rua whatīanga te roa o te takuahi o te āta, kia tekau mā rua whatīanga te whānui, he tapawhā, e whā hoki ngā taha.
EZE 43:17 Nā, ko te papa, kia tekau mā whā whatīanga te roa, kia tekau mā whā anō te whānui o ngā taha e whā. Ko te niao i te taha hei te hāwhe whatīanga; ko te tūranga, kia kotahi te whatīanga ā tawhio noa; kia anga anō te pikitanga ki te rāwhiti.”
EZE 43:18 I kī mai anō ia ki ahau, “E te tama a te tangata, ko te kupu tēnei a te Ariki, a Ihowā: Ko ngā tikanga tēnei o te āta i te rā e hangā ai hei whakaekenga mō te tahunga tinana, hei tāuhiuhi mō te toto.
EZE 43:19 Me hoatu e koe he pūru, he kūao, hei whakahere hara ki ngā tohunga, ki ngā Rīwaiti, ki ngā uri o Hāroko e whakatata ana ki ahau minita ai, e ai tā te Ariki, tā Ihowā.
EZE 43:20 Me tango anō e koe tētahi wāhi o ōna toto, ka pani ki ōna haona e whā, ki ngā koki e whā o te papa, ki te taha ā tawhio noa. Nā, ka purea taua āta e koe, ka meinga kia mā.
EZE 43:21 Me tiki anō te pūru, te whakahere hara, ā, māna e tahu ki te wāhi o te whare i whakaritea i waho o te wāhi tapu.
EZE 43:22 “Nā, i te rua o ngā rā me whakahere he koati toa, he mea kohakore, hei whakahere hara, ā, ka purea te āta, ka pērātia me tā rātou purenga ki te kau.
EZE 43:23 Ka oti te pure e koe, me whakahere he kūao pūru, he mea kohakore, me tētahi hipi toa o te kāhui, hei te mea kohakore.
EZE 43:24 Me whakahere e koe ki te aroaro o Ihowā, me maka anō e ngā tohunga he tote ki runga, ka whakaeke ai hei tahunga tinana ki a Ihowā.
EZE 43:25 “E whitu ngā rā e mahia ai e koe he hipi hei whakahere hara i tēnei rā, i tēnei rā; me mahi anō e rātou he kūao pūru me tētahi hipi toa o te kāhui, he mea kohakore.
EZE 43:26 E whitu ngā rā e tahia ai e rātou te poke o te āta, e purea ai; ka pēnā tā rātou whakatapu i te āta.
EZE 43:27 Ā, ka poto ēnei rā, nā, i te waru o ngā rā, i ō muri iho anō, ka mahia e ngā tohunga ā koutou tahunga tinana ki runga ki te āta, me ā koutou whakahere mō te pai; ā, ka manako ahau ki a koutou, e ai tā te Ariki, tā Ihowā.”
EZE 44:1 Kātahi ahau ka whakahokia e ia nā te ara o te kūwaha o waho o te wāhi tapu e anga ana ki te rāwhiti; nā, kua oti te tūtaki.
EZE 44:2 Nā, ka mea a Ihowā ki ahau, “Ko tēnei kūwaha me tūtaki tonu, e kore e whakatuwheratia, e kore anō tētahi tangata e tomo mā konei. Nō te mea i nā konei atu a Ihowā, te Atua o Īharaira; nā reira i tūtakina ai.
EZE 44:3 Tēnā ko te rangatira, me noho ia ki konei, he rangatira, ki te kai taro i te aroaro o Ihowā, ko tōna ara ki roto kei te whakamahau o taua kūwaha; ko tōna ara anō tēnā ki waho.”
EZE 44:4 Kātahi ahau ka kawea e ia nā te ara o te kūwaha ki te raki, ki te aronga o te whare. Nā, i tāku tirohanga atu, nanā, kua kī te whare o Ihowā i te korōria o Ihowā, ā, tāpapa ana ahau.
EZE 44:5 Nā, ka mea a Ihowā ki ahau, “E te tama a te tangata anga mai tōu ngākau, titiro hoki ōu kanohi, whakarongo anō ōu taringa ki ngā mea katoa e kōrero ai ahau ki a koe mō ngā tikanga katoa o te whare o Ihowā, mō ngā ture katoa anō o reira; āta mahara anō ki te tomokanga atu ki te whare, ki ngā putanga katoa hoki i te wāhi tapu.
EZE 44:6 Me kī atu anō e koe ki te hunga whakakeke, ki te whare o Īharaira: Ko te kupu tēnei a te Ariki, a Ihowā: Kāti rā ā koutou mea whakarihariha, e te whare o Īharaira.
EZE 44:7 Kua kawea mai nā hoki e koutou he tautāngata, he hunga kīhai i kotia te ngākau, kīhai i kotia te kikokiko, ki tōku wāhi tapu noho ai, hei whakapoke mō reira, arā mō tōku whare, i te mea e whakaherea ana e koutou tāku taro, te ngako, me te toto, ā, hē iho tāku kawenata i a rātou, hei āpiti ki ā koutou mea whakarihariha katoa.
EZE 44:8 Kīhai anō i mau i a koutou te tiaki i āku mea tapu; heoi whakaritea ana e koutou ā koutou ake kaitiaki mō āku mea i roto i tōku wāhi tapu.
EZE 44:9 Ko te kupu tēnei a te Ariki, a Ihowā: Kaua tētahi tautangata kīhai i kotia te ngākau, kīhai i kotia te kikokiko, e tomo ki tōku wāhi tapu, o ngā tautāngata katoa i roto i ngā tama a Īharaira.
EZE 44:10 “Engari, ko ngā Rīwaiti i mawehe atu rā i ahau, i te kotititanga kētanga o Īharaira, i a rātou i kotiti atu ai i ahau, i whai ai i ā rātou whakapakoko; ka mau ki a rātou tō rātou kino.
EZE 44:11 Otiia, hei minita anō rātou i roto i tōku wāhi tapu, hei tiaki i ngā kūwaha o te whare, hei minita ki te whare. Mā rātou e patu te tahunga tinana me te patunga tapu a te iwi, me tū anō rātou ki tō rātou aroaro minita ai ki a rātou.
EZE 44:12 Nō te mea i minita rātou ki a rātou i te aroaro o ā rātou whakapakoko, ā, meinga ana e rātou te whare o Īharaira kia taka ki te kino. Nā reira i ara ai tōku ringa ki a rātou, e ai tā te Ariki, tā Ihowā; ka mau ki a rātou tō rātou kino.
EZE 44:13 E kore anō rātou e whakatata ki ahau, hei tohunga māku, e kore anō e whakatata ki tētahi o āku mea tapu i te Wāhi Tapu Rawa. Engari, ka mau tō rātou whakamā ki a rātou, me ā rātou mea whakarihariha i mahia e rātou.
EZE 44:14 Otirā, ka meinga rātou e ahau hei kaitiaki mō ngā mea o te whare, mō ngā mahi katoa o reira, mō ngā mea katoa anō e meatia ki reira.”
EZE 44:15 “Engari ērā tohunga, ngā Rīwaiti, ngā tama a Hāroko, i tiaki nei i ngā mea o tōku wāhi tapu, i ngā tama a Īharaira i kotiti kē atu rā i ahau, ko rātou e whakatata ki ahau ki te minita ki ahau, ka tū anō rātou i tōku aroaro hei whakahere i te ngako, i te toto, ki ahau, e ai tā te Ariki, tā Ihowā.
EZE 44:16 Ko rātou e tomo ki roto ki tōku wāhi tapu, ko rātou anō e whakatata ki tāku tēpu hei minita ki ahau, mā rātou anō āku mea e tiaki.
EZE 44:17 “Ā, ka tomo rātou ki roto ki ngā kūwaha o tō roto marae, hei te kākahu rīnena he kākahu mō rātou; kaua hoki tētahi mea huruhuru e mau ki a rātou, i a rātou e minita ana i roto i ngā kūwaha o tō roto marae, i roto anō i te whare.
EZE 44:18 He pōtae rīnena mō ō rātou māhunga, he tarautete rīnena anō hoki mō ō rātou hope; kaua e whītikiria e rātou he mea e heke ai te werawera.
EZE 44:19 Nā, ka haere atu rātou ki tō waho marae, arā ki te marae i waho, ki te iwi, me unu ō rātou kākahu i minita ai rātou, ka waiho ki ngā rūma tapu, ā, me kākahu ētahi atu kākahu; kei tapu te iwi i ō rātou kākahu.
EZE 44:20 “Kaua anō rātou e heu i ō rātou māhunga, kaua ngā makawe e whakatupuria kia roa; ko te kutikuti anake mō ō rātou māhunga.
EZE 44:21 Kaua anō tētahi tohunga e inu wāina, ina haere rātou ki tō roto marae.
EZE 44:22 Kaua anō rātou e tango i te pouaru, i te mea rānei i whakarērea, hei wahine mā rātou; engari, ko tā rātou e tango ai hei ngā wāhina o ngā uri o te whare o Īharaira, hei te pouaru rānei a tētahi tohunga.
EZE 44:23 Ā, me whakaako e rātou tōku iwi ki te wehe i te tapu, i te noa; me mea kia mōhio ki te poke, ki te mā.
EZE 44:24 “I te tautohetohenga hoki me tū rātou hei whakawā; kia rite anō ā rātou whakawā ki āku whakawā. Me pupuri e rātou āku ture, me āku tikanga i roto i āku hākari whakarite katoa; me whakatapu anō e rātou āku hāpati.
EZE 44:25 “Kaua anō rātou e tae ki te tūpāpaku, whakapoke ai i a rātou; e whakapoke anō ia rātou i a rātou anō mō te pāpā, mō te whaea, mō te tama, mō te tamāhine, mō te tuakana, teina rānei, mō te tuahine kāhore nei āna tahu.
EZE 44:26 Ā, ka oti ia te pure, me tatau kia whitu ngā rā mōna.
EZE 44:27 Nā, ā te rā e tomo ai ia ki te wāhi tapu, ki tō roto marae, ki te minita i roto i te wāhi tapu, me whakahere e ia tāna whakahere hara, e ai tā te Ariki, tā Ihowā.
EZE 44:28 “Ā, ka whai kāinga tupu rātou: Ko ahau hei kāinga tupu mō rātou. Kaua hoki tētahi kāinga e hoatu ki a rātou i roto i a Īharaira; ko ahau hei kāinga mō rātou.
EZE 44:29 Ko te whakahere totokore, ko te whakahere hara, ko te whakahere mō te hē, hei kai mā rātou; mā rātou anō ngā mea katoa i oti rawa mai i roto i a Īharaira.
EZE 44:30 Nā, ko te tuatahi o ngā mātāmua katoa o ngā mea katoa, me ngā whakahere katoa o ā koutou tini whakahere katoa, mā ngā tohunga; me te tuatahi anō o tā koutou parāoa pokepoke, me hoatu e koutou ki te tohunga, kia tau ai he manaaki ki tōu whare.
EZE 44:31 Kaua te tohunga e kai i te mea mate māori, i te mea rānei i haea, ahakoa manu, ahakoa kararehe.”
EZE 45:1 “I ngā wā anō e wehea ai e koutou te whenua hei wāhi tupu, me whakahere he whakahere mā Ihowā, me whakatapu tētahi wāhi o te whenua. Ko tōna roa ko te roa o ngā kākaho e rua tekau mā rima mano; ko te whānui kotahi tekau mano. Ka tapu tēnei, ōna taha katoa ā tawhio noa.
EZE 45:2 Waiho tētahi wāhi o tēnei kia rima rau te roa mō te wāhi tapu, kia rima rau te whānui, he tapawhā ā tawhio noa, kia rima tekau anō ngā whatīanga mō waho ake ā tawhio noa.
EZE 45:3 Me whanganga anō e koe tētahi wāhi o tēnei ka oti nei te whanganga kia rua tekau mā rima mano te roa, kia tekau mano te whānui; ā, hei reira te wāhi tapu, te Wāhi Tapu Rawa.
EZE 45:4 He wāhi tapu ia nō te whenua; mō ngā tohunga tērā, mō ngā minita o te wāhi tapu e whakatata ana ki te minita ki a Ihowā. Hei wāhi anō tērā mō ō rātou whare, hei wāhi tapu anō mō te wāhi tapu.
EZE 45:5 Ko te rua tekau mā rima mano nei te roa, tekau mano te whānui, mō ngā Rīwaiti, mō ngā minita o te whare, hei wāhi mō rātou, mō ngā rūma e rua tekau.
EZE 45:6 “Me whakarite anō e koutou te wāhi mō te pā, e rima mano te whānui, e rua tekau mā rima mano te roa, ki te taha o te wāhi tapu ka whakaherea nei; mō te whare katoa o Īharaira tērā.
EZE 45:7 “Ā, he aha he wāhi mō te rangatira, hei tētahi taha, hei tētahi taha o te wāhi tapu ka whakaherea nei, o te wāhi anō i te pā, ki mua o te wāhi tapu ka whakaherea nei, o te wāhi hoki i te pā, i te taha ki te hauāuru whaka te hauāuru, i te taha hoki ki te rāwhiti, whaka te rāwhiti, kia rite anō te roa ki tētahi o aua wāhi, me tīmata i te rohe ki te hauāuru ā tae noa ki te rohe ki te rāwhiti.
EZE 45:8 Kei te whenua te wāhi mōna i roto i a Īharaira! E kore anō āku rangatira e whakatupu kino i tāku iwi ā muri ake nei; engari me hoatu e rātou te whenua ki te whare o Īharaira, ki tēnei hapū, ki tēnei hapū.
EZE 45:9 “Ko te kupu tēnei a te Ariki, a Ihowā: Kāti tā koutou, e ngā rangatira o Īharaira; whakarērea atu te tūkino, te pāhua, mahia te whakawā, me te tika, whakamutua ā koutou peinga i tāku iwi, e ai tā te Ariki, tā Ihowā.”
EZE 45:10 “Kia tika ā koutou pāuna, kia tika te epa, kia tika te pāti.
EZE 45:11 Kia kotahi te mēhua mō te epa, mō te pāti. Ko te pāti he whakatekau nō te homa, ko te epa hoki he whakatekau nō te homa. Ko te mēhua mō taua mea ko te homa.
EZE 45:12 Ā, ko te hekere kia rua tekau ngā kera; ko tā koutou mane kia rua tekau hekere, kia rua tekau mā rima hekere, kia kotahi tekau mā rima hekere.”
EZE 45:13 “Ko te whakahere tēnei e whakaherea e koutou; he wīti, ko te wāhi tuaono o te epa o te homa; ā, me hōmai e koutou he pārei, hei te wāhi tuaono o te epa o te homa.
EZE 45:14 Nā, ko te tikanga mō te hinu, mō te pāti hinu, hei te whakatekau o te pāti i roto i te koro, he homa nei tāna, arā tekau ngā pāti; kotahi tekau hoki ngā pāti o te homa.
EZE 45:15 Kia kotahi anō reme i roto i te kāhui, i roto i ngā rau e rua, he mea nō ngā hāereerenga mākūkū o Īharaira; hei whakahere totokore, hei tahunga tinana, hei whakahere mō te pai, hei mea whakamārie mō rātou, e ai tā te Ariki, tā Ihowā.
EZE 45:16 Me hoatu tēnei whakahere e te iwi katoa o te whenua ki te rangatira i roto i a Īharaira.
EZE 45:17 Nā, ko tēnei tā te rangatira, he hōmai i ngā tahunga tinana, i ngā whakahere totokore, i ngā ringihanga, mō ngā hākari, mō ngā kōwhititanga marama, mō ngā hāpati, mō ngā huihuinga nui katoa o te whare o Īharaira. Kia rite mai anō i a ia te whakahere hara, te whakahere totokore, te tahunga tinana, ngā whakahere mō te pai, hei whakamārie mō te whare o Īharaira.”
EZE 45:18 “Ko te kupu tēnei a Ihowā, a te Atua: I te marama tuatahi, i te tuatahi o ngā rā o te marama, me tiki e koe he pūru kūao, hei te mea kohakore, ka pure i te wāhi tapu.
EZE 45:19 Me tango anō e te tohunga tētahi wāhi o te toto o te whakahere hara, ka pani ki ngā pou o te whare, ki ngā koki e whā anō o te papa o te āta, ki ngā pou anō o te kūwaha o tō roto marae.
EZE 45:20 Ko tāu anō tērā e mea ai i te whitu o ngā rā o te marama hei mea mō te tangata i te hē, mō te kūware; ā, ka oti te whakamārie mō te whare.
EZE 45:21 “Hei te marama tuatahi, hei te tekau mā whā o ngā rā o te marama, tā koutou Kapenga, he hākari, e whitu ngā rā; ko te taro hei kai, he mea rēwenakore.
EZE 45:22 Kia rite mai anō hoki i te rangatira i taua rā, he pūru hei whakahere hara mōna, mō te iwi katoa o te whenua.
EZE 45:23 Kia rite mai anō i a ia i ngā rā e whitu o te hākari te tahunga tinana mā Ihowā, e whitu ngā pūru, e whitu ngā hipi toa, he mea kohakore i tēnei rā, i tēnei rā, i ngā rā e whitu; me tētahi kūao koati i tēnei rā, i tēnei rā, hei whakahere hara.
EZE 45:24 Kia rite mai anō i a ia he whakahere totokore, kotahi te pūru kia kotahi anō te epa, kotahi te hipi toa kia kotahi anō te epa, kotahi te epa kia kotahi hine hinu.
EZE 45:25 “I te whitu o ngā marama, i te tekau mā rima o ngā rā o te marama, i te hākari, ka mahia mai e ia ēnei mea, kia whitu ngā rā; kia rite ki te whakahere hara, ki te tahunga tinana, ki te whakahere totokore, ki te hinu hoki.”
EZE 46:1 “Ko te kupu tēnei a te Ariki, a Ihowā: Me tūtaki te kūwaha o tō roto marae e anga ana ki te rāwhiti i ngā rā mahi e ono; kia tuwhera ia i te hāpati, kia tuwhera anō i te rā e kōwhiti ai te marama.
EZE 46:2 Ā, ka tomo te rangatira mā te ara o te whakamahau o te kūwaha i waho, ka tū ai ki te pou o te kūwaha. Kātahi ka mahia e ngā tohunga tāna tahunga tinana, me āna whakahere mō te pai hei te paepae anō o te kūwaha he koropikotanga mōna. Kātahi ia ka puta atu ki waho; kauaka ia te kūwaha e tūtakina ā ahiahi noa.
EZE 46:3 Hei te tatau anō o taua kūwaha he koropikotanga mō te iwi o te whenua i ngā hāpati, i ngā kōwhititanga marama, ki te aroaro o Ihowā.
EZE 46:4 “Nā, ko te tahunga tinana e whakaherea e te rangatira ki a Ihowā hei te rā hāpati, e ono ngā reme he mea kohakore, he hipi toa, he mea kohakore.
EZE 46:5 Ko te whakahere totokore, kia kotahi te epa mō te hipi toa, me tō ngā reme whakahere totokore, ko tāna e taea te hōmai; kotahi te epa, kia kotahi anō hine hinu.
EZE 46:6 Nā, i te rā e kōwhiti ai te marama ko tētahi kūao pūru, he mea kohakore, e ono ngā reme, kotahi te hipi toa, he mea kohakore katoa.
EZE 46:7 Kia rite anō i a ia he whakahere totokore, mō te pūru, kia kotahi epa; mō te hipi toa, kia kotahi epa; ko tō ngā reme, ko tā tōna ringa e tae atu ai; kotahi te epa, kia kotahi anō hine hinu.
EZE 46:8 Nā, e tomo te rangatira ki roto, me haere ia nā te ara o te whakamahau o te kūwaha; hei tō reira ara anō he putanga mōna.
EZE 46:9 “Nā, e tomo te iwi o te whenua ki te aroaro o Ihowā i ngā hākari nunui, ko te tangata i tomo nā te ara o te kūwaha ki te raki ki te koropiko, hei te ara o te kūwaha ki te tonga he putanga mōna; ā, ko te tangata i tomo nā te ara o te kūwaha ki te tonga, hei te ara o te kūwaha ki te raki he putanga mōna. Kaua ia e hoki nā te ara o te kūwaha i tomo ai ia; engari me haere hāngai atu.
EZE 46:10 Nā, ko te rangatira, ina tomo rātou ki roto, hei waenganui ia i a rātou; ā, ina puta rātou ki waho, me puta tahi rātou.
EZE 46:11 “Nā, ko te whakahere totokore i ngā hākari, i ngā whakanuinga, kotahi te epa ki te pūru, kotahi te epa ki te hipi toa; ko tō ngā reme anō, ko te mea e taea e ia te hōmai; kia kotahi te hine hinu ki te epa.
EZE 46:12 Nā, e mahia mai e te rangatira he tahunga tinana, he mea tuku noa mai, he whakahere rānei mō te pai, he mea tuku noa mai, hei mea ki a Ihowā, me whakatuwhera e ētahi te kūwaha e anga ana ki te rāwhiti ki a ia, ā, ka mahia e ia tāna tahunga tinana, me āna whakahere mō te pai, kia rite ki tāna mahinga i te rā o te hāpati. Kātahi ia ka puta ki waho, ā, ka tūtakina te kūwaha ina puta ia.
EZE 46:13 “Me mahi e koe he tahunga tinana ki a Ihowā i tēnei rā, i tēnei rā, he reme, hei te tau tahi, hei te kohakore; me mahi e koe i tēnei ata, i tēnei ata.
EZE 46:14 Me mahi anō e koe he whakahere totokore hei kīnaki i tēnei ata, i tēnei ata, te whakaono o te epa, me te whakatoru o te hine hinu, hei whakamākūkū i te parāoa; he whakahere totokore ki a Ihowā, he mea e tūturu ana tōna tikanga, ā ake ake.
EZE 46:15 Inā, me mahi te reme, me te whakahere totokore, me te hinu i tēnei ata, i tēnei ata, hei tahunga tinana e tūturu tonu ana.
EZE 46:16 “Ko te kupu tēnei a te Ariki, a Ihowā: Ki te hōmai e te rangatira tētahi mea hōmai noa ki tētahi o āna tamariki, ka riro tērā i āna tamariki; mō rātou tērā, ā, tuku iho, tuku iho.
EZE 46:17 Tēnā, ki te hoatu tētahi wāhi o tōna kāinga tupu ki tētahi o āna pononga, māna tērā, ā taea noatia te tau haere noa; kātahi ka hoki ki te rangatira. Mō āna tamariki anō ia tōna wāhi tupu hei wāhi mō rātou.
EZE 46:18 Kaua anō te rangatira e tango i tētahi wāhi o tō te iwi kāinga tupu, he pei i a rātou i ō rātou wāhi. Me hōmai e ia he wāhi mō āna tamariki i roto i tōna wāhi ake; kei marara noa atu tāku iwi i tōna wāhi, i tōna wāhi.”
EZE 46:19 Kātahi ahau ka kawea e ia ki roto, i tika nā te tomokanga i te taha o te kūwaha ki ngā rūma tapu o ngā tohunga, ki ērā e anga ana whaka te raki. Nā, ko tētahi wāhi i reira i muri whaka te hauāuru.
EZE 46:20 Nā, ka mea ia ki ahau, “Ko te wāhi tēnei e kōhuatia ai e ngā tohunga te whakahere mō te hē, me te whakahere hara, ka tunua anō e rātou ki konei te whakahere totokore; kei whakaputaina mai ki tō waho marae whakatapu ai i te iwi.”
EZE 46:21 Kātahi ahau ka kawea e ia ki tō waho marae; ā, ka meinga e ia kia tika nā ngā kokonga e whā o te marae; nā, ko tētahi marae i tētahi kokonga, i tētahi kokonga o te marae.
EZE 46:22 He marae kei ngā kokonga e whā o te marae, he mea karapoti mai, e whā tekau ngā whatīanga te roa, e toru tekau te whānui. Ko ēnei e whā i ngā kokonga, rite tonu te nui.
EZE 46:23 Nā, he rārangi whare kei aua marae ā taka noa, i aua marae e whā ā taka noa; i mahia anō ētahi wāhi mō ngā kōhua i raro i ngā rārangi, ā taka noa.
EZE 46:24 Nā, ka mea ia ki ahau, “Ko ngā wāhi ēnei o ngā kōhua, e kōhuatia ai e ngā minita o te whare te patunga tapu a te iwi.”
EZE 47:1 Ā, ka whakahokia ahau e ia ki te tatau o te whare. Nā, he wai e pupū mai ana i raro i te paepae o te whare whaka te rāwhiti, (e anga ana hoki te aronga o te whare ki te rāwhiti); ā, i heke mai ngā wai i raro i te taha ki matau o te whare, i te taha ki te tonga o te āta.
EZE 47:2 Kātahi ahau ka ārahina e ia i te ara o te kūwaha ki te raki, ā, ārahina āwhiotia ana nā te ara o waho ki tō waho kūwaha, nā te ara o te kūwaha e anga ana ki te rāwhiti; ā, ko ngā wai e rere ana i te taha ki matau.
EZE 47:3 Nō te haerenga atu o te tangata, i tōna ringa nei te aho, whaka te rāwhiti, kotahi mano ngā whatīanga i whanganga e ia, ā, ka meinga ahau e ia kia tika nā roto i ngā wai; i ngā ponapona te wai.
EZE 47:4 I whanganga anō he mano e ia, ā, meinga ana ahau e ia kia tika nā roto i ngā wai; i ngā turi te wai. I whanganga anō e ia he mano, ā, meinga ana ahau e ia kia tika i waenga; i ngā hope te wai.
EZE 47:5 Muri iho i whanganga e ia he mano; nā, he awa kīhai i taea te whiti; kua neke ake hoki ngā wai e kauhoea, he awa e kore e whitingia.
EZE 47:6 Nā, ka mea ia ki ahau, “Ka kite rānei koe i tēnei e te tama a te tangata?” Kātahi ahau ka ārahina e ia, ka whakahokia ki te pareparenga o te awa.
EZE 47:7 Hoki rawa atu ahau, nā, i te pareparenga o te awa tōna tini o te rākau i tētahi taha, i tētahi taha.
EZE 47:8 Kātahi ia ka mea ki ahau, “E puta atu ana ēnei wai ki te wāhi ki te rāwhiti, ka rere anō ki raro, ki te Arapa tae tonu atu ki te moana. Ko te moana he rerenga atu mō ngā wai i meinga kia puta mai, ka ai hei rongoā mō ngā wai.
EZE 47:9 Nā, ko ngā mea ora katoa e muimui ana, i ngā wāhi katoa e tae atu ai ngā awa, ka ora. Ka tini noa atu hoki ngā ika, nō te mea ka tae ēnei wai ki reira, ā, ka rongoātia ngā wai o te moana, ā, ka ora ngā mea katoa e tae atu ai te awa.
EZE 47:10 Nā, ka tū ngā kaihao ki tōna taha; ā, ka waiho he wāhi i Enekeri ā tae noa ki Ene-Ekeraima hei horahanga mō ngā kupenga; ā, ko ngā ika o aua wāhi ka rite ki ō rātou āhua, ka rite ki ngā ika o te Moana Nui, he tini noa iho.
EZE 47:11 Otiia, e kore e waimāori ngā wāhi oru o reira, me ngā repo o reira; ka tukua atu ki te tote.
EZE 47:12 Nā, ka tupu ki te taha o te awa, ki tōna pareparenga, ki tētahi taha, ki tētahi taha, ngā rākau kai katoa; e kore ngā rau e memenge, e kore anō ngā hua e kore. Ko ōna hua, hou tonu i ō rātou marama anō, nō te mea i puta mai ō rātou wai i te wāhi tapu. Nā, hei kai tōna hua, hei rongoā tōna rau.”
EZE 47:13 Ko te kupu tēnei a te Ariki, a Ihowā: Hei konei te rohe, e wehewehe ai koutou i te whenua hei kāinga tupu, he mea whakarite ki ngā hapū kotahi tekau mā rua o Īharaira; kia rua ngā wāhi mā Hōhepa.
EZE 47:14 Ka riro hoki a reira i a koutou, tā tētahi, tā tētahi, rite tonu; he wāhi hoki ia i ara ai tōku ringa kia hoatu a reira ki ō koutou mātua. Inā, ka taka mai anō tēnei whenua ki a koutou hei kāinga tupu.
EZE 47:15 “Ko te rohe tēnei o te whenua: I te taha ki te raki, kei te Moana Nui, kei te ara ki Heterono, i te mea ka haere ki Terara;
EZE 47:16 kei Hāmata, kei Perota, (kei Hipiraima i te takiwā o te rohe ki Ramahiku, o te rohe ki Hāmata), kei Hatara Hatikono i te taha o te rohe ki Haurana.
EZE 47:17 Nā, ko te rohe i te moana, kei Hataraenana, kei te rohe ki Ramahiku, me te taha anō ki te raki whaka te raki, kei te rohe ki Hāmata. Ko te taha ki te raki hoki tēnei.
EZE 47:18 “Ko te taha ki te rāwhiti, i waenganui o Haurana, o Ramahiku, o Kireara, me te whenua o Īharaira, ko Horano; me whanganga mai i te rohe ki te raki tae noa ki te moana i te rāwhiti. Ko te taha ki te rāwhiti tēnei.
EZE 47:19 “Nā, ko te taha ki te tonga whaka te tonga ka takoto atu i Tāmara tae noa ki ngā wai o Meripoto Karehe, ki te awa o Īhipa, ki te Moana Nui. Nā, ko te taha tēnei ki te tonga whaka te tonga.
EZE 47:20 “Nā, ko te rohe ki te hauāuru ko te Moana Nui, ka takoto atu i te rohe ki te tonga ā tae noa ki te ritenga atu o Hāmata. Ko te taha tēnei ki te hauāuru.
EZE 47:21 “Nā, me wehe tēnei whenua mō koutou, he mea whakarite ki ngā hapū o Īharaira.
EZE 47:22 Inā, me wehe tēnei whenua, hei kāinga tupu mō koutou, mō ngā tautāngata e noho ana i roto i a koutou, e whānau tamariki i roto i a koutou; ā, kia rite rātou ki tā koutou, ki tā te tangata whenua i roto i a Īharaira; kia taka mai he wāhi mō rātou i roto i a koutou, i roto i ngā hapū o Īharaira.
EZE 47:23 Nā, ko te hapū e noho ai te tautangata, me hoatu e koutou he wāhi mōna ki reira,” e ai tā te Ariki, tā Ihowā.
EZE 48:1 “Nā, ko ngā ingoa ēnei o ngā hapū: Kei te pito i te raki ki te taha o te ara ki Heterono, i te mea ka haere ki Hāmata, kei Hataraenana, kei te rohe ki Ramahiku ki te taha ki te raki, tae noa ki te taha o Hāmata, ko ōna taha ēnei ki te rāwhiti, ki te hauāuru; he wāhi mō Rāna.
EZE 48:2 “Nā, hei te taha o te rohe ki a Rāna, hei te taha ki te rāwhiti tae noa ki te taha ki te hauāuru, he wāhi mō Āhera.
EZE 48:3 “Ā hei te taha i te rohe ki a Āhera hei te taha ki te rāwhiti tae noa ki te taha ki te hauāuru, he wāhi mō Napatari.
EZE 48:4 “Hei te taha anō i te rohe ki a Napatari, hei te taha ki te rāwhiti tae noa ki te taha ki te hauāuru, he wāhi mō Mānahi.
EZE 48:5 “Hei te taha anō o te rohe ki a Mānahi, hei te taha ki te rāwhiti tae noa ki te hauāuru, he wāhi mō Ēparaima.
EZE 48:6 “Hei te taha anō o te rohe ki a Ēparaima, hei te taha i te rāwhiti tae noa ki te hauāuru, he wāhi mō Reupena.
EZE 48:7 “Hei te taha anō o te rohe ki a Reupena, hei te taha ki te rāwhiti tae noa ki te hauāuru, he wāhi mō Hūrā.
EZE 48:8 “Nā, ko te whakahere e hōmai e koutou, hei te taha o tā Hūrā, hei te taha i te rāwhiti tae noa ki te hauāuru, kia rua tekau mā rima mano kākaho te whānui, kia rite te roa ki tō tētahi o ngā wāhi, i te rāwhiti tae noa ki e hauāuru; ā hei waenganui o reira te wāhi tapu.
EZE 48:9 “Ko te whakahere e hōmai e koutou ki a Ihowā, kia rua tekau mā rima mano kākaho te roa, kia kotahi tekau mano te whānui.
EZE 48:10 Nā mō rātou, mō ngā tohunga, tēnei whakahere tapu; whaka te raki, e rua tekau mā rima mano te roa, whaka te hauāuru kotahi tekau mano te whānui, whaka te rāwhiti kotahi tekau mano te whānui, whaka te tonga e rua tekau mā rima mano te roa; ā, ki waenganui o reira te wāhi tapu o Ihowā.
EZE 48:11 Mō ngā tohunga tērā, mō ngā tama a Hāroko kua oti te whakatapu, mō te hunga i tiaki i āku mea, ā, kīhai i kotiti kē i te kotititanga kētanga o ngā tama a Īharaira, kīhai i pērā me ngā Rīwaiti i kotiti kē rā.
EZE 48:12 Nā, hei whakahere tēnei mā rātou nō te whakahere o te whenua, he mea tino tapu rawa, i te taha o te rohe o ngā Rīwaiti.
EZE 48:13 “Nā, i te ritenga ake o te rohe o tō ngā tohunga, kia rua tekau mā rima mano te roa o tō ngā Rīwaiti; kia kotahi tekau mano te whānui, ko te roa katoa e rua tekau mā rima mano; ko te whānui kotahi tekau mano.
EZE 48:14 Kaua hoki tētahi wāhi o reira e hokona, kaua anō e whakawhititia, kaua hoki ngā hua mātāmua o te whenua e whakariroia kētia rānei: he tapu hoki ki a Ihowā.
EZE 48:15 “Nā, ko ngā mano e rima o te whānui i mahue i te ritenga ake o ngā mano e rua tekau mā rima, hei wāhi noa tērā mō te pā, hei nohoanga, hei wāhi i waho ake o te pā; hei waenganui anō o reira te pā.
EZE 48:16 Ko ōna roa anō ēnei; ko te taha ki te raki e whā mano e rima rau, ko te taha ki te tonga e whā mano e rima rau, ko te taha ki te rāwhiti e whā mano e rima rau, ko te taha ki te e whā mano e rima rau.
EZE 48:17 Ā, kia whai wāhi a waho ake o te pā: whaka te raki e rua rau e rima tekau, whaka te tonga e rua rau e rima tekau, whaka te rāwhiti e rua rau e rima tekau, whaka te hauāuru e rua rau e rima tekau.
EZE 48:18 Nā, ko te toenga o te roa i te taha o te wāhi tapu i whakaherea, kotahi tekau mano ki te rāwhiti, kotahi tekau mano ki te hauāuru. Nā, ko tērā wāhi hei te taha i te wāhi tapu i whakaherea; hei kai ōna hua mā ngā kaimahi o te pā.
EZE 48:19 Nā, ko ngā kaimahi katoa i roto i te pā, nō ngā hapū katoa o Īharaira, mā rātou e mahi a reira.
EZE 48:20 Kia rua tekau mā rima mano tētahi taha o te whakahere katoa, kia rua tekau mā rima mano anō tētahi taha. Kia whā ngā taha o te whakahere tapu e whakaherea e koutou, he mea huihui atu ki te wāhi mō te pā.
EZE 48:21 “Nā, mō te rangatira te toenga i tētahi taha, i tētahi taha, o te whakahere tapu, o te wāhi anō i te pā, i te ritenga ake anō o ngā mano e rua tekau mā rima i whakaherea nei, i te rohe ki te rāwhiti, whaka te hauāuru hoki, i te ritenga ake anō o ngā mano e rua tekau mā rima i te rohe ki te hauāuru, i te ritenga ake anō o ngā wāhi mō te rangatira. Nā, ko te whakahere tapu me te wāhi tapu o te whare hei waenganui o reira.
EZE 48:22 Nā, ka takoto atu i te wāhi i ngā Rīwaiti, i te wāhi anō i te pā, arā tērā i waenganui o te wāhi a te rangatira, i waenganui o te rohe ki a Hūrā, o te rohe hoki ki a Pineamine, mō te rangatira tērā.
EZE 48:23 “Nā, mō ērā atu o ngā hapū; i te taha ki te rāwhiti, tae noa ki te taha ki te hauāuru, kia kotahi te wāhi mō Pineamine.
EZE 48:24 “Hei te rohe o tā Pineamine hei te taha ki te rāwhiti, tae noa ki te taha ki te hauāuru, kia kotahi te wāhi mō Himiona.
EZE 48:25 “Hei te rohe anō o tā Himiona, hei te taha ki te rāwhiti, tae noa ki te taha ki te hauāuru, he wāhi mō Ihākara.
EZE 48:26 “Hei te rohe anō o tā Ihākara, hei te taha ki te rāwhiti, tae noa ki te taha ki te hauāuru, he wāhi mō Hepurona.
EZE 48:27 “Hei te rohe anō o tā Hepurona, hei te taha ki te rāwhiti, tae noa ki te taha ki te hauāuru, he wāhi mō Kara.
EZE 48:28 “Hei te rohe anō o tā Kara, hei te taha ki te tonga whaka te tonga, ka takoto atu te rohe i Tāmara, tae noa ki ngā wai o Meripata Karehe, ki te awa o Īhipa, ki te Moana Nui.
EZE 48:29 “Ko te whenua tēnei e wehea e koutou hei wāhi tupu mō ngā hapū o Īharaira, ko ō rātou wāhi anō ēnei,” e ai tā te Ariki, tā Ihowā.
EZE 48:30 “Ko ngā putanga atu anō ēnei o te pā i te taha ki te raki, e whā mano e rima rau kākaho te roa,
EZE 48:31 ko ngā kūwaha o te pā me tapa he ingoa ki ngā ingoa o ngā hapū o Īharaira; e toru ngā kūwaha whaka te raki. Ko tētahi ko te Kūwaha o Reupena; ko tētahi ko te Kūwaha o Hūrā; ko tētahi ko te Kūwaha o Rīwai.
EZE 48:32 “Nā, i te taha ki te rāwhiti e whā mano e rima rau kākaho: e toru anō ngā kūwaha; ko tētahi ko te kūwaha o Hōhepa, ko tētahi ko te kūwaha o Pineamine, ko tētahi ko te kūwaha o Rāna.
EZE 48:33 “Nā, i te taha ki te tonga e whā mano e rima rau kākaho te roa, he mea whanganga; e toru anō ngā kūwaha; ko tētahi ko te Kūwaha o Himiona, ko tētahi ko te Kūwaha o Ihākara, ko tētahi ko te Kūwaha o Hepurona.
EZE 48:34 “I te taha ki te hauāuru e whā mano e rima rau kākaho, me ngā kūwaha e toru anō; ko tētahi ko te Kūwaha o Kara, ko tētahi ko te Kūwaha o Āhera, ko tētahi ko te Kūwaha o Napatari.
EZE 48:35 “Kotahi tekau mā waru mano kākaho ki te taiāwhiotia. “Nā, ko te ingoa o te pā ā taua rā tonu iho: Ko Ihowā Kei Reira.”
DAN 1:1 I te toru o ngā tau o te kīngitanga o Iehoiakimi kīngi o Hūrā ka tae mai a Nepukaneha kīngi o Papurōna ki Hiruhārama, whakapaea ana e ia.
DAN 1:2 Nā, ka hoatu e te Ariki a Iehoiakimi kīngi o Hūrā ki tōna ringa, me ētahi o ngā oko o te whare o te Atua, ā, kawea ana e ia ki te whenua o Hinara, ki te whare o tōna atua; i mauria atu anō ngā oko e ia ki te whare taonga o tōna atua.
DAN 1:3 Nā, ka kī atu te kīngi ki a Ahapenata rangatira o āna unaka, kia tīkina ētahi o ngā tama a Īharaira, arā o ngā uri o te kīngi, o ngā rangatira hoki;
DAN 1:4 ētahi tama kāhore nei ō rātou koha, he pai anō te āhua, e mātau ana ki ngā whakaaro nui katoa, e mōhio ana ki ngā tikanga, e mātau ana ki ngā whakaaro mōhio, he hunga e pai ana hei tū ki te whare o te kīngi; ā, māna rātou e whakaako ki te mātauranga, ki te reo hoki o ngā Karari.
DAN 1:5 I whakaritea anō e te kīngi tētahi wāhi o tā te kīngi kai mā rātou, he mea mō ia rā, mō ia rā, me tētahi wāhi o te wāina i inumia e ia, ā, kia toru ngā tau e whāngaia ai rātou; kia taka ai aua tau, ka tū rātou ki te aroaro o te kīngi.
DAN 1:6 Nā, i roto i ēnei ko ētahi o ngā tama a Hūrā, ko Raniera, ko Hanania, ko Mihāera, ko Atāria.
DAN 1:7 Nā, ka tapā he ingoa mō rātou e te rangatira unaka: ko tāna ingoa mō Raniera, ko Peretehatara; mō Hanania, ko Hataraka; mō Mihāera, ko Mehaka; mō Atāria, ko Apereneko.
DAN 1:8 Otiia, kua takoto tō Raniera whakaaro i roto i tōna ngākau, kia kaua ia e poke i tā te kīngi kai, i te wāina rānei i inumia e ia. Nā, ka tono ia ki te rangatira unaka kia kaua ia e whakapoke i a ia.
DAN 1:9 Nā, kua mea te Atua kia manakohia a Raniera, kia arohaina e te rangatira unaka.
DAN 1:10 Nā, ka mea te rangatira unaka ki a Raniera, “E wehi ana ahau i tōku ariki, i te kīngi, nāna nei i whakarite tā koutou e kai ai, tā koutou e inu ai. Hei aha hoki i tirohia mai ai e ia ō koutou mata he kino iho i o ngā tamariki pēnā me koutou te kaumātua? Mā konā ka meinga ahau e koutou kia hopohopo ki tōku upoko i te kīngi.”
DAN 1:11 Anō rā ko Raniera ki a Meretara, ki tā te rangatira unaka i whakarite ai hei kaitirotiro mō Raniera, rātou ko Hanania, ko Mihāera, ko Atāria:
DAN 1:12 “Tēnā rā, whakamātauria āu pononga, kia tekau ngā rā; me hōmai e rātou he pīni hei kai mā mātou, he wai hoki hei inu mā mātou.
DAN 1:13 Hei reira ka mea kia tirohia ō mātou mata i tōu aroaro, me te mata anō o ngā taitamariki e kai ana i te kai a te kīngi; nā, kia rite ki tāu e kite ai tāu e mea ai ki āu pononga.”
DAN 1:14 Heoi, ka whakaaetia e ia tēnei mea a rātou, ā, kotahi tekau ngā rā i whakamātauria ai rātou e ia.
DAN 1:15 Nā, i te mutunga o ngā rā kotahi tekau, ka kitea ō rātou mata, ātaahua atu, tetere atu i o ngā tamariki katoa i kai i tā te kīngi kai.
DAN 1:16 Heoi, ka tangohia atu e Meretara te wāhi kai mā rātou, me te wāina anō hei inu mā rātou, ā, hōmai ana e ia he pīni mā rātou.
DAN 1:17 Nā, ko aua tama tokowhā, i hōmai e te Atua ki a rātou he mātauranga, he mōhio ki ngā pukapuka katoa, ki ngā whakaaro nunui; ā, i a Raniera te mōhio ki ngā kite katoa, ki ngā moemoeā.
DAN 1:18 Nā, i te takanga o ngā rā i kī ai te kīngi kia kawea atu rātou, ka kawea atu rātou e te rangatira unaka ki te aroaro o Nepukaneha.
DAN 1:19 Nā, ka kōrerorero te kīngi ki a rātou; ā, kīhai i kitea i roto i a rātou katoa tētahi e rite ana ki a Raniera rātou ko Hanania, ko Mihāera, ko Atāria; nā, tū ana rātou i te aroaro o te kīngi.
DAN 1:20 Nā, i ngā mea katoa o te whakaaro nui, o te mātauranga i ui ai te kīngi ki a rātou, ka kitea e ia tekau noa atu tō rātou pai i tō ngā tohunga māori katoa, i tō ngā kaititiro whetū puta noa i tōna kīngitanga.
DAN 1:21 I tutuki anō a Raniera ā tae noa ki te tuatahi o ngā tau o Kīngi Hairuha.
DAN 2:1 Nā, i te rua o ngā tau o te kīngitanga o Nepukaneha ka moea ētahi moe e Nepukaneha; raruraru tonu iho tōna wairua, rere atu ana te moe i a ia.
DAN 2:2 Kātahi te kīngi ka kī atu kia karangatia ngā tohunga māori, ngā kaititiro whetū, ngā tohunga mākutu, ngā Karari, hei whakaatu i āna moe ki te kīngi. Nā, haere ana mai rātou, tū ana i te aroaro o te kīngi.
DAN 2:3 Nā, ka mea te kīngi ki a rātou, “Kua moea e ahau he moe, ā, raruraru ana tōku wairua, e mea ana kia mōhio ki taua moe.”
DAN 2:4 Kātahi ka kōrero Hīriani mai ngā Karari ki te kīngi, “E te kīngi, kia ora tonu koe. Kōrerotia mai te moe ki āu pononga, ā, mā mātou e whakaatu tōna tikanga.”
DAN 2:5 Ka whakahoki te kīngi, ka mea ki ngā Karari, “Kua ngaro taua mea i ahau; ki te kore e whakakitea mai e koutou ki ahau te moe me tōna tikanga hoki, ka haehaea koutou, ā, ka meinga ō koutou whare hei pūranga paru.
DAN 2:6 Ki te whakaaturia mai ia e koutou te moe me tōna tikanga, ka riro āku hākari mā koutou, ngā utu, me te hōnore nui; nā, whakaaturia mai te moe ki ahau, me tōna tikanga anō.”
DAN 2:7 Nā, ka whakahoki tuarua rātou, ka mea, “Mā te kīngi e kōrero te moe ki āna pononga, ā, mā mātou e whakaatu tōna tikanga.”
DAN 2:8 Ka whakautua e te kīngi, ka mea ia, “E mōhio rawa ana ahau e whai ana koutou kia roa, nō te mea ka kite koutou kua ngaro taua mea i ahau.
DAN 2:9 Ki te kore ia e whakaaturia mai e koutou te moe ki ahau, kotahi tonu te ture mō koutou. Nō te mea he teka, he tinihanga ngā kupu kua rite nā i a koutou hei kōrero mai ki tōku aroaro, ā, kia puta kē rā anō te wā. Nā reira kōrerotia mai te moe ki ahau, ā, ka mōhio ahau e taea ana anō e koutou te whakaatu tōna tikanga ki ahau.”
DAN 2:10 Nā, ka whakahoki ngā Karari ki te aroaro o te kīngi, ka mea, “Kāhore he tangata i runga i te whenua hei whakaatu i te mea a te kīngi. Kāhore anō hoki he kīngi, kāhore he rangatira, kāhore he ariki, i ui i ngā mea pēnei ki tētahi tohunga māori, ki tētahi kaititiro whetū, ki tētahi Karari rānei.
DAN 2:11 He mea tupua rawa hoki tēnei e uia nei e te kīngi, kāhore atu hoki he kaiwhakaatu ki te kīngi, ko ngā atua anake, ehara nei ki te kikokiko tō rātou nohoanga.”
DAN 2:12 Nā reira i riri ai te kīngi, nui atu te riri, kīia iho e ia ngā tāngata whakaaro nui katoa o Papurōna kia whakangaromia.
DAN 2:13 Heoi, kua puta te ture kia patua ngā tāngata whakaaro nui; ā, ka rapua a Raniera rātou ko ōna hoa kia patua.
DAN 2:14 Nā, he mōhio, he nui te whakaaro, i oho ai a Raniera ki a Arioko, ki te rangatira o ngā kaitiaki a te kīngi, i puta nei ki te patu i ngā tāngata whakaaro nui o Papurōna.
DAN 2:15 I oho ia, i mea ki a Arioko, ki tā te kīngi rangatira, “He aha i hohoro ai te ture i te kīngi?” Kātahi taua mea ka whakaaturia e Arioko ki a Raniera.
DAN 2:16 Nā, ka haere a Raniera ki roto, ka mea ki te kīngi kia whakaritea he wā ki a ia, ā, ka whakaaturia e ia te tikanga ki te kīngi.
DAN 2:17 Kātahi ka haere a Raniera ki tōna whare, ka whakakite i taua mea ki ōna hoa ki a Hanania, ki a Mihāera, ki a Atāria.
DAN 2:18 Kia īnoia ai e rātou he mahi tohu i te Atua o te rangi, he mea mō tēnei mea ngaro; kei mate tahi a Raniera rātou ko ōna hoa, me ērā atu tāngata whakaaro nui o Papurōna.
DAN 2:19 Kātahi ka whakakitea mai taua mea ngaro ki a Raniera, he mea moemoeā i te pō. Nā, whakapai ana a Raniera ki te Atua o te rangi.
DAN 2:20 I oho a Raniera, i mea: “Kia whakapaingia te ingoa o te Atua ā ake ake; nōna hoki te whakaaro nui me te kaha.
DAN 2:21 E whakaputaia kētia ana hoki e ia ngā wā me ngā rā, e whakakāhoretia ana e ia ngā kīngi. E whakatūria ana anō ngā kīngi e ia, e hōmai ana e ia te whakaaro nui ki te hunga whakaaro nui, te mātauranga anō ki te hunga e mātau ana ki te whakaaro.
DAN 2:22 E whakapuakina ana e ia ngā mea hōhonu, ngā mea ngaro; e mātau ana ia ki ngā mea o te pōuri; kei a ia te nohoanga o te mārama.
DAN 2:23 Whakawhetai tonu ahau ki a koe, whakamoemiti tonu ki a koe, e te Atua o ōku mātua, nāu nei hoki i hōmai he whakaaro nui, he kaha ki ahau, ā, kua whakaatu mai nei koe ki ahau i ngā mea i īnoi ai mātou ki a koe, kua whakaaturia nei hoki e koe te mea a te kīngi ki a mātou.”
DAN 2:24 Nā reira i haere ai a Raniera ki roto, ki a Arioko, ki tā te kīngi i whakarite ai hei whakangaro mō ngā tāngata whakaaro nui o Papurōna; haere ana ia, ā, ko tāna kupu tēnei ki a ia, “Kaua e whakangaromia ngā tāngata whakaaro nui o Papurōna; kawea ahau ki te aroaro o te kīngi, ā, māku e whakakite te tikanga ki te kīngi.”
DAN 2:25 Kātahi ka hohoro tonu a Arioko ka kawe i a Raniera ki te aroaro o te kīngi; ko tāna kupu anō tēnei ki a ia: “Kua kitea e ahau he tangata i roto i ngā whakarau o Hūrā hei whakakite i te tikanga ki te kīngi.”
DAN 2:26 Ka oho te kīngi, ka mea ki Raniera, ko tōna ingoa nei ko Peretehatara, “E taea rānei e koe te whakaatu mai te moe i kitea e ahau, me tōna tikanga anō ki ahau?”
DAN 2:27 Ka whakahoki a Raniera i te aroaro o te kīngi, ka mea, “E kore taua mea ngaro i uia rā e te kīngi e taea te whakaatu ki te kīngi e te hunga whakaaro nui, e ngā kaititiro whetū, e ngā tohunga māori, e ngā tohunga tūāhu rānei;
DAN 2:28 engari, tērā te Atua kei te rangi hei whakaatu i ngā mea ngaro; ā, kua whakakitea e ia ki a Kīngi Nepukaneha ngā mea e puta mai i ngā rā whakamutunga. Ko tāu moe tēnei, me ngā mea i kitea e tōu māhunga, i runga i tōu moenga:
DAN 2:29 “Ko koe ia e te kīngi, i puta ake ōu whakaaro ki tōu ngākau i runga i tōu moenga mō ngā mea e puta mai ā mua. E whakakitea ana ki a koe e te kaiwhakaatu o ngā mea ngaro, ngā mea e puta ā mua.
DAN 2:30 Ko ahau nei ia, ehara i te mea he nui atu ōku whakaaro i o tētahi tangata ora, i whakapuakina ai tēnei mea ngaro ki ahau; engari kia whakakitea ai tōna tikanga ki te kīngi, kia mōhio ai hoki koe ki ngā whakaaro o tōu ngākau.
DAN 2:31 “Nā, i titiro koe, e te kīngi, nā, ko tētahi whakapakoko nui. Nā, ko taua whakapakoko, he mea nui, he nui atu tōna kanapa, i tū i tōu aroaro; ā, ko tōna āhua he hanga whakamataku rawa.
DAN 2:32 Ko taua whakapakoko, he kōura parakore tōna pane, ko tōna uma, ko ōna ringa, he hiriwa, ko tōna kōpū, ko ōna hūhā he parāhi,
DAN 2:33 ko ōna waewae he rino, ko ōna raparapa he rino tētahi wāhi, he uku tētahi wāhi.
DAN 2:34 “Titiro tonu atu koe, nā, ko tētahi kōhatu, he mea tapahi mai, kāhore hoki he ringa, āki tonu ki te whakapakoko, ki ōna raparapa, he rino nei tētahi wāhi, he uku tētahi wāhi, wāhia pūtia iho.
DAN 2:35 Kātahi ka mongamonga ngātahi te rino, te uku, te parāhi, te hiriwa, te kōura; kua rite ki te pāpapa o ngā patunga wīti i te raumati; kāhakina ana e te hau, ā, kāhore noa iho i kitea he wāhi mō aua mea. Nā, ko te kōhatu i ākina ai te whakapakoko, kua meinga hei maunga nui, kapi ana te whenua katoa i a ia.
DAN 2:36 “Ko te moe tēnei; nā, me kōrero tōna tikanga e mātou ki te aroaro o te kīngi.
DAN 2:37 Ko koe, e te kīngi, te kīngi o ngā kīngi, kua hōmai hoki e te Atua o te rangi he kīngitanga ki a koe, he kaha, he mana, he korōria.
DAN 2:38 Nā, ko ngā wāhi katoa e nohoia ana e ngā tama a te tangata, ko ngā kararehe o te pārae, ko ngā manu o te rangi, hōmai ana e ia ki tōu ringa, kua oti anō koe te mea e ia hei rangatira mō rātou katoa. Ko koe taua pane kōura.
DAN 2:39 “Nā, ka puta ake tētahi atu kīngitanga i muri i a koe; iti iho i a koe, me tētahi atu, arā te tuatoru o ngā kīngitanga, he parāhi, ā, ka kāwana tērā i te whenua katoa.
DAN 2:40 Nā, ko te whā o ngā kīngitanga ka rite ki te rino te kaha; he mea wāwāhi hoki te rino, e taea anō e ia ngā mea katoa. Ka rite ki tā te rino e wāwāhi nei i ēnei katoa tāna wāwāhi, tāna kuru.
DAN 2:41 “Nā, i kite nā koe i ngā raparapa, i ngā matimati, he uku nā te kaipokepoke tētahi wāhi, he rino tētahi wāhi, ka wehea te kīngitanga; ka mau anō ia he kaha rino i roto, ka pērā anō me te rino i kitea e koe e whakauruuru ana ki te uku paru nā.
DAN 2:42 Nā, ko ngā matimati o ngā raparapa rā, he rino nei tētahi wāhi, he uku tētahi wāhi, ka pēnā anō te kīngitanga, he kaha tētahi wāhi, ko tētahi wāhi he pākarukaru.
DAN 2:43 Nā, i kite atu nā koe i te rino e whakauru ana ki te uku paru nā, ka whakauru anō rātou ki roto ki ngā uri tāngata. E kore ia e piri tētahi ki tētahi, ka rite ki te rino e kore nei e uru ki te uku.
DAN 2:44 “Nā, i ngā rā o ēnei kīngi, ka whakatūria e te Atua o te rangi he kīngitanga e kore e ngaro, e kore anō hoki tōna mana e waiho ki tētahi atu iwi; engari ko tērā hei wāhi, hei whakamōtī i ēnei kīngitanga katoa, ko ia anō ka tū tonu ā ake ake.
DAN 2:45 Nā, i kite nā koe he mea tapahi mai te kōhatu i roto i te maunga, kāhore hoki he ringa, ā, mongamonga noa i a ia te rino, te parāhi, te uku, te hiriwa, te kōura. E whakapuakina ana e te Atua nui ki te kīngi ngā mea e puta ā mua. Nā, tūturu rawa te moe, pūmau tonu tōna tikanga.”
DAN 2:46 Ko te tino tāpapatanga iho o Kīngi Nepukaneha, koropiko ana ki a Raniera, whakahaua tonutia iho e ia kia whakaherea he whakahere, he whakakakara reka ki a ia.
DAN 2:47 I oho te kīngi ki a Raniera, i mea, “Tika rawa, ko tōu Atua te Atua o ngā atua, te Ariki o ngā kīngi, te kaiwhakapuaki o ngā mea ngaro, ka taea nei hoki e koe te whakapuaki tēnei mea ngaro.”
DAN 2:48 Kātahi ka meinga e te kīngi a Raniera hei tangata rahi, he maha anō ngā hākari nui i hōmai e ia ki a ia, ā, meinga ana ia hei kāwana mō te kāwanatanga katoa o Papurōna, hei tino kāwana mō ngā tāngata whakaaro nui katoa o Papurōna.
DAN 2:49 Nā, ka tono a Raniera ki te kīngi, ā, whakaritea ana e ia a Hataraka, a Mehaka, a Apereneko hei kaitirotiro mō ngā mea o te kāwanatanga o Papurōna. Ko Raniera ia i noho ki te kūwaha o te kīngi.
DAN 3:1 I hangā e Kīngi Nepukaneha he whakapakoko kōura, ko tōna roa e ono tekau whatīanga, ā, ko tōna whānui e ono whatīanga; ā, whakatūria ana e ia ki te mānia o Rura i te kāwanatanga o Papurōna.
DAN 3:2 Kātahi a Kīngi Nepukaneha ka tono tāngata ki te huihui i ngā ariki, i ngā kāwana, i ngā rangatira, i ngā kaiwhakawā, i ngā kaitiaki taonga, i ngā kaiwhakatakoto whakaaro, i ērā atu rangatira, i ngā kāwana katoa o ngā kāwanatanga, kia haere mai ki te tāinga o te kawa o te whakapakoko i whakatūria e Kīngi Nepukaneha.
DAN 3:3 Kātahi ngā ariki, ngā kāwana, ngā rangatira, ngā kaiwhakawā, ngā kaitiaki taonga, ngā kaiwhakatakoto whakaaro, ērā atu rangatira, me ngā kāwana katoa o ngā kāwanatanga ka huihui ki te tāinga o te kawa o te whakapakoko kua whakatūria nei e Kīngi Nepukaneha. Nā, tū ana rātou ki te aronga o te whakapakoko kua whakatūria nei e Nepukaneha.
DAN 3:4 Kātahi ka nui atu te karanga a te kaikaranga, “He whakahau tēnei ki a koutou, e ngā tāngata, e ngā iwi, e ngā reo;
DAN 3:5 ā te wā e rongo ai koutou i te tangi o te koronete, o te pūtōrino, o te hāpa, o te hakaputa, o te hātere, o te taratimere, o ngā mea tangi katoa, me takoto koutou, me koropiko ki te whakapakoko kōura kua whakatūria nei e Kīngi Nepukaneha.
DAN 3:6 Nā, ki te kāhore tētahi e takoto, e koropiko, ka makā ia i taua hāora anō ki waenganui o te oumu he mura rawa nei te ngiha.”
DAN 3:7 Nā reira, i taua wā, i te rongonga o te iwi katoa i te tangi o te koronete, o te pūtōrino, o te hāpa, o te hakaputa, o te hātere, o ngā mea tangi katoa, takoto tonu iho ngā tāngata katoa, ngā iwi, ngā reo, koropiko ana ki te whakapakoko kōura kua tū nei i a Kīngi Nepukaneha.
DAN 3:8 Heoi, i taua wā ka haere mai ētahi Karari, ka whakahē ki ngā Hūrai.
DAN 3:9 I kōrero rātou, i mea ki a Kīngi Nepukaneha, “E te kīngi, kia ora tonu koe.
DAN 3:10 I whakatakotoria e koe he ture, e te kīngi, nā, ko ngā tāngata katoa e rongo ana i te tangi o te koronete, o te pūtōrino, o te hāpa, o te hakaputa, o te hātere, o te taratimere, o ngā mea tangi katoa, kia takoto, kia koropiko ki te whakapakoko kōura;
DAN 3:11 ā, ki te kāhore tētahi e takoto, e koropiko, kia makā ia ki te oumu he mura rawa te ngiha.
DAN 3:12 Tēnei ētahi Hūrai, he hunga i whakaritea e koe hei kaitirotiro mō ngā mea o te kāwanatanga o Papurōna: ko Hataraka, ko Mehaka, ko Apereneko. Kīhai ēnei tāngata i whakaaro ki a koe, e te kīngi; kāhore rātou e mahi ki ōu atua, kāhore e koropiko ki te whakapakoko kōura ka oti nei te whakatū e koe.”
DAN 3:13 Kātahi a Nepukaneha i runga i tōna riri me te weriweri ka whakahau kia mauria mai a Hataraka, a Mehaka, a Apereneko. Kātahi ka kawea mai e rātou aua tāngata ki te aroaro o te kīngi.
DAN 3:14 I kōrero a Nepukaneha, i mea ki a rātou, “He mea āta whakaaro rānei, e Hataraka, e Mehaka, e Apereneko, e kore nei koutou e mahi ki ōku atua, e kore nei e koropiko ki te whakapakoko kōura kua tū nei i ahau?
DAN 3:15 Nā, ki te hihiko koutou i te wā e rongo ai koutou i te tangi o te koronete, o te pūtōrino, o te hāpa, o te hakaputa, o te hātere, o te taratimere o ngā mea tangi katoa, ā, ka takoto ka koropiko, ki te whakapakoko i hangā e ahau, he pai. Tēnā ki te kāhore koutou e koropiko, ka makā koutou i taua hāora ki te oumu he mura rawa tōna ngiha; ā, ko wai te atua hei whakaora i a koutou i roto i ōku ringa?”
DAN 3:16 I whakahoki a Hataraka a Mehaka, a Apereneko, i mea ki te kīngi, “E Nepukaneha, kāhore ā mātou māharahara ki te whakahoki kupu ki a koe mō tēnei mea.
DAN 3:17 Ki te pēnātia, e taea anō e tō mātou Atua, e karakiatia nei e mātou, te whakaora i a mātou i roto i te oumu he mura rawa nei te ngiha, inā, ka whakaorangia anō mātou e ia i tōu ringa, e te kīngi.
DAN 3:18 Otiia ka kore, kia mōhio koe, e te kīngi, e kore mātou e mahi ki ōu atua, e kore anō e koropiko ki te whakapakoko kōura kua tū nā i a koe.”
DAN 3:19 Kī tonu i reira a Nepukaneha i te riri, rerekē ana te āhua o tōna mata ki a Hataraka, ki a Mehaka, ki a Apereneko. Kōrero ana ia, whakahau ana kia whitu ngā whakanekehanga ake o te hana o te oumu i tō mua hana.
DAN 3:20 I whakahau anō ia i ngā tāngata kaha rawa o tāna ope kia herea a Hataraka, a Mehaka, a Apereneko, kia makā ki roto ki te oumu he mura rawa nei te ngiha.
DAN 3:21 Kātahi ka herea ngā tāngata nei i roto tonu i ō rātou tarau, i ō rātou koti, i ō rātou koroka me ērā atu ō rātou kākahu, ā, ka makā ki roto ki te oumu he mura rawa nei tōna ngiha.
DAN 3:22 Nā reira, i te akiaki rawa o te whakahau a te kīngi, i te nui rawa hoki o te hana o te ahi, mate iho i te mura o te ahi ngā tāngata nāna i kawe a Hataraka, a Mehaka, a Apereneko.
DAN 3:23 Nā, ka taka ngā tāngata tokotoru nei, a Hataraka, a Mehaka, a Apereneko, he mea here, ki waenganui o te oumu he mura rawa nei tōna ngiha.
DAN 3:24 Ko te tino mīharotanga o Nepukaneha, hohoro tonu tōna whakatika, kei te kōrero, kei te mea ki āna kaiwhakatakoto whakaaro, “He teka ianei tokotoru ngā tāngata i makā e tātou, he mea here, ki waenganui o te ahi?” Ka whakahoki rātou, ka mea ki te kīngi, “He tika anō, e te kīngi.”
DAN 3:25 Ka whakahoki ia, ka mea, “Nanā, tokowhā ngā tāngata e kitea nei e ahau, kāhore he here, e hāereere ana i waenganui o te ahi, kāhore hoki e ahatia; nā, ko te āhua o te tuawhā kei tō te Tama a te Atua.”
DAN 3:26 Kātahi ka whakatata a Nepukaneha ki te waha o te oumu he mura rawa nei te ngiha, kei te kōrero, kei te mea, “E Hataraka, e Mehaka, e Apereneko, e ngā pononga a te Atua, a te Runga Rawa, puta mai, haere mai hoki.” Kātahi a Hataraka rātou ko Mehaka, ko Apereneko ka puta mai i waenganui o te ahi.
DAN 3:27 Nā, ko te huihuinga o ngā ariki, o ngā kāwana, o ngā rangatira, o ngā kaiwhakatakoto whakaaro a te kīngi, ka kite rātou i ēnei tāngata, kīhai nei te ahi i whai kaha ki ō rātou tinana, kīhai anō ngā makawe o ō rātou māhunga i hunua, kīhai anō ō rātou koti i puta kē, kīhai anō te haunga ahi i rere i runga i a rātou.
DAN 3:28 Ka kōrero a Nepukaneha, ka mea, “Kia whakapaingia te Atua o Hataraka, o Mehaka, o Apereneko, nāna nei i unga mai tāna anahera, ā, whakaorangia ana e ia āna pononga i whakawhirinaki nei ki a ia, i whakaputa kē nei i te kupu a te kīngi, ā, tukua ana e rātou ō rātou tinana, he mea kei mahi rātou, kei koropiko ki tētahi atu atua, engari ki tō rātou Atua anake.
DAN 3:29 Nā, ko tāku ture tēnei e whakatakoto nei, nā, ko ngā tāngata, ko te iwi, ko te reo, he kupu kino nei tāna mō te Atua o Hataraka, o Mehaka, o Apereneko, ka haehaea rātou, ā, ka meinga ō rātou whare hei pūranga paru. Nō te mea kāhore atu he atua he rite tāna whakaora ki tā tēnei.”
DAN 3:30 Kātahi ka whakanekehia ake anō a Hataraka, a Mehaka, a Apereneko e te kīngi i te kāwanatanga o Papurōna.
DAN 4:1 Nā Nepukaneha, nā te kīngi ki ngā tāngata katoa, ki ngā iwi, ki ngā reo e noho ana i te whenua katoa: Kia whakanuia tō koutou rangimārie.
DAN 4:2 I mea ahau e pai ana kia whakakitea ngā tohu me ngā mea whakamīharo i mahia nei e te Atua, e te Runga Rawa ki ahau.
DAN 4:3 Anō te nui o āna tohu! Anō te nui o āna mea whakamīharo! Ko tōna kīngitanga he kīngitanga mau tonu, ko tōna kāwanatanga kei tērā whakatupuranga, kei tērā whakatupuranga.
DAN 4:4 I te āta noho ahau, a Nepukaneha, i roto i tōku whare, koa tonu i roto i tōku whare kīngi.
DAN 4:5 Ka kite ahau i tētahi moe i wehi ai ahau; raruraru ana ahau i ngā whakaaro i runga i tōku moenga, i ngā mea anō hoki i kitea e tōku māhunga.
DAN 4:6 Nā reira i puaki ai tāku ture kia kawea mai ngā tāngata whakaaro nui katoa o Papurōna ki tōku aroaro, kia whakakitea ai e rātou te tikanga o te moe ki ahau.
DAN 4:7 Nā, ko te haerenga mai o ngā tohunga māori, o ngā kaititiro whetū, o ngā Karari, rātou ko ngā tohunga tūāhu, kōrerotia ana e ahau te moe ki tō rātou aroaro. Heoi, kīhai i whakaaturia mai e rātou tōna tikanga ki ahau.
DAN 4:8 Nāwai ā kua tae mai ki tōku aroaro a Raniera, ko tōna ingoa nei ko Peretehatara, ko te ingoa o tōku atua, he tangata kei a ia nei te wairua o ngā atua tapu; ā, kōrerotia ana e ahau te moe ki tōna aroaro. I mea ahau,
DAN 4:9 “E Peretehatara, e te rangatira o ngā tohunga māori, e mōhio ana hoki ahau kei a koe te wairua o ngā atua tapu, e kore koe e hē ki tētahi mea ngaro, whakaaturia mai ki ahau ngā mea i puta mai, te moemoeā i kitea e ahau, me te tikanga o aua mea.
DAN 4:10 Ko ngā mea ēnei i kitea e tōku māhunga, i runga i tōku moenga; titiro rawa atu ahau, nā, ko tētahi rākau i waenganui o te whenua, nui atu tōna tiketike.
DAN 4:11 Kua tupu taua rākau, kua kaha, roa tonu, tutuki tonu ki te rangi, he mea hoki i kitea mai i ngā pito o te whenua katoa.
DAN 4:12 Ātaahua tonu ngā rau, he maha ngā hua, ā, i runga i a ia he kai mā te katoa. I whai taumarumarunga iho ngā kīrehe o te pārae i raro i a ia, i noho anō ngā manu o te rangi i runga i ōna manga, i reira hoki ngā kikokiko katoa e kai ana.
DAN 4:13 “I kite ahau i roto i ngā mea i kitea e tōku māhunga i runga i tōku moenga, nā, he tūtei, he mea tapu, e heke iho ana i te rangi.
DAN 4:14 Nui atu tāna karanga; i mea ia: ‘Tuaina te rākau, pōutoutoa ōna manga, whakahoroa ōna rau, tītaria ōna hua. Kia haere atu ngā kararehe i raro i a ia, me ngā manu i ōna manga.
DAN 4:15 Me waiho anō ia te take o ōna pakiaka i te whenua, here rawa ki te rino, ki te parāhi, i roto i te taru hou o te pārae; kia mākū anō i te tōmairangi o te rangi. “ ‘Nā, ko te wāhi mōna kei tō ngā kararehe, kei te tarutaru o te whenua.
DAN 4:16 Kia puta kē tōna ngākau tangata, kia hoatu he ngākau kararehe ki a ia, kia whitu hoki ōna wā e taka.
DAN 4:17 “ ‘Ko tēnei mea he mea whakatakoto nā ngā tūtei; he mea kī mai anō nā te kupu a ngā mea tapu. Kia mōhio ai te hunga ora kei te kāwana te Runga Rawa ki te kīngitanga o ngā tāngata, ā, e hoatu ana e ia ki tāna e pai ai, e meinga ana hoki e ia ngā ware rawa o ngā tāngata hei rangatira mō reira.’
DAN 4:18 “Ko tēnei moe, he mea kite nāku, nā Kīngi Nepukaneha. Nā, māu, e Peretehatara, e whakaatu mai tōna tikanga, kāhore nei hoki i taea e ngā tāngata whakaaro nui katoa o tōku kīngitanga te whakaatu te tikanga ki ahau; e taea ia e koe, kei roto nā hoki i a koe te wairua o ngā atua tapu.”
DAN 4:19 Kātahi a Raniera, ko tōna ingoa nei ko Peretehatara, ka ketekete, he wā poto anō, ā, raruraru ana ia i ōna whakaaro. Ka whakahoki te kīngi, ka mea, “Kei raruraru koe, e Peretehatara, i te moe, i tōna tikanga rānei.” Ka whakahoki a Peretehatara, ka mea, “E tōku ariki, waiho tēnei moe mō te hunga e kino ana ki a koe, me tōna tikanga anō mō ōu hoariri.
DAN 4:20 Ko te rākau i kite nā koe, ko tērā i tupu rā, ā, kua kaha, ko tōna tiketike nei i tutuki atu ki te rangi, ā, i kitea hoki e te whenua katoa.
DAN 4:21 Ko ōna rau he ātaahua, he maha ōna hua, ā, he kai i runga mā te katoa; ā, i noho ngā kararehe o te pārae i raro i a ia, he nohoanga hoki a runga i ōna manga nō ngā manu o te rangi.
DAN 4:22 Ko koe, e te kīngi, kua tupu nā, kua kaha nā. Kua tupu nā hoki tōu nui, kua tutuki atu ki te rangi, me tōu kīngitanga ki te pito o te whenua.
DAN 4:23 “Nā, i kite nā te kīngi i te tūtei, i te mea tapu hoki e heke iho ana i te rangi, e mea ana, ‘Tuaina te rākau, whakangaromia; me waiho anō ia te take o ōna pakiaka ki te whenua, here rawa ki te rino, ki te parāhi, i te taru hou o te pārae. Kia māku anō i te tōmairangi o te rangi; ā, ko te wāhi mōna, hei tō ngā kararehe o te pārae, kia taka rā anō ōna wā e whitu.’
DAN 4:24 “Ko te tikanga tēnei, e te kīngi, ko te ture anō tēnei a te Runga Rawa ka tae iho nei ki runga ki tōku ariki, ki te kīngi:
DAN 4:25 Arā, kia āia atu koe i roto i ngā tāngata, ki ngā kararehe o te pārae he nohoanga mōu, kia meinga anō koe kia kai tarutaru, kia pērā me ngā kau, kia mākū anō i te tōmairangi o te rangi, ā, e whitu ngā wā ōu ka taka. Kia mōhio rā anō koe kei te kāwana te Runga Rawa ki te kīngitanga o ngā tāngata, ā, e hoatu ana e ia ki tāna e pai ai.
DAN 4:26 Nā, ko te kīanga mai rā kia waiho te take o ngā pakiaka o te rākau. Ka pūmau ki a koe tōu kīngitanga, ina mōhio koe ko ngā rangi hei kāwana.
DAN 4:27 Mō reira kia manakohia mai tōku whakaaro e koe, e te kīngi, kia whatia atu anō ōu hara e te tika, kia whatia anō ōu kino e te mahi tohu ki ngā rawakore; ā tērā pea e roa tōu āta noho.”
DAN 4:28 I pā katoa mai tēnei ki a Kīngi Nepukaneha.
DAN 4:29 I te mutunga o ngā marama kotahi tekau mā rua e hāereere ana ia i te whare kīngi o Papurōna.
DAN 4:30 Ka kōrero te kīngi, ka mea, “He teka ianei ko Papurōna nui tēnei i hangā nei e ahau hei whare mō te kīngitanga; he nui nō tōku kaha, hei whakahōnore anō mō tōku korōria?”
DAN 4:31 I te kupu anō i te māngai o te kīngi ka pā he reo nō te rangi: “E Kīngi Nepukaneha, he kupu tēnei ki a koe. Ka riro tōu kīngitanga.
DAN 4:32 Ka āia atu anō koe i roto i ngā tāngata, ā, ko te kāinga mōu kei ngā kararehe o te pārae. Ka meinga koe kia kai tarutaru, kia pērā me ngā kau, ā, e whitu ngā wā ōu ka taka; kia mōhio rā anō koe kei te kāwana te Runga Rawa ki te kīngitanga o ngā tāngata, ā, e hoatu ana e ia ki tāna e pai ai.”
DAN 4:33 I taua hāora anō ka rite taua mea ki a Nepukaneha. Nā, ka āia atu ia i roto i ngā tāngata, ā, kai tarutaru ana ia, pērā ana me ngā kau, i mākū anō tōna tinana i te tōmairangi o te rangi, tupu noa iho ōna huruhuru, kei ngā huruhuru ēkara te rite, ōna matikuku rite tonu ki ō te manu.
DAN 4:34 Nā, i te mutunga o ngā rā ka anga ake ngā kanohi ōku, o Nepukaneha, ki te rangi, ā, hoki mai ana tōku ngākau mahara ki ahau. Ā, whakapaingia ana e ahau te Runga Rawa, whakamoemiti atu ana ahau, Whakahōnore ana i a ia, e ora tonu ana hoki ia, he rangatiratanga mau tonu tōna rangatiratanga. Ko tōna kīngitanga anō kei tērā whakatupuranga, kei tērā whakatupuranga.
DAN 4:35 Ki tā te whakaaro he kāhore noa iho ngā tāngata katoa o te whenua; ā, e mahia ana e ia tāna e pai ai i roto i te ope o te rangi, i waenga anō o ngā tāngata o te whenua. E kore anō tōna ringa e taea te pupuri e tētahi, kāhore hoki he kīanga ki a ia: “E aha ana koe?”
DAN 4:36 I taua wā anō ka hoki mai ōku mahara ki ahau; i hoki mai anō tōku hōnore me tōku āhua rangatira ki ahau, hei whakakorōria mō tōku kīngitanga; i rapua mai anō ahau e āku kaiwhakatakoto whakaaro, e āku ariki. Nā, ka ū ahau ki tōku kīngitanga, ā, nui atu te korōria i whakanekehia ake mōku.
DAN 4:37 Nā, tēnei ahau, a Nepukaneha, te whakamoemiti, te whakanui, te whakahōnore nei i te Kīngi o te rangi; he pono hoki āna mahi katoa, ko ōna ara he whakarite whakawā. Ko te hunga anō e haere ana i runga i te whakapehapeha, ka taea e ia te whakaiti.
DAN 5:1 I tukua he hākari nui e Kīngi Perehatara mā ētahi o āna ariki, kotahi te mano, ā, inu wāina ana ia i te aroaro o te mano.
DAN 5:2 I te mea e inu wāina ana a Perehatara, ka whakahau ia kia kawea mai ngā oko, ngā mea kōura, ngā mea hiriwa, i tangohia e tōna pāpā, e Nepukaneha, i roto i te temepara i Hiruhārama; hei mea inu mā te kīngi, mā āna rangatira, mā āna wāhine, mā āna wāhine hoahoa.
DAN 5:3 Kātahi ka kawea mai e rātou ngā oko kōura i tangohia i roto i te temepara o te whare o te Atua i Hiruhārama; ā, inu ana ki aua mea te kīngi, āna ariki, āna wāhine, me āna wāhine hoahoa.
DAN 5:4 Inu wāina ana rātou, whakamoemiti ana ki ngā atua, ki ngā mea kōura, hiriwa, parāhi, rino, rākau, kōhatu.
DAN 5:5 I taua hāora ka puta mai ngā maihao o tētahi ringa tangata, kei te tuhituhi ki te ritenga ake o te tūranga rama, ki te paninga i te taha o te whare o te kīngi. Ā, ka kite te kīngi i te wāhi o te ringa nāna te tuhituhi.
DAN 5:6 Kātahi ka puta kē te mata o te kīngi, raruraru ana ia i ōna whakaaro, ā, tangoro iho ngā hononga o tōna hope, kei te āki mai anō ōna turi ki a rāua.
DAN 5:7 Nā, nui atu te karanga a te kīngi kia kawea mai ngā kaititiro whetū, ngā Karari, ngā tohunga tūāhu. Ā, i kōrero te kīngi, i mea ki ngā tāngata whakaaro nui o Papurōna, “Ko te tangata e kōrerotia ai tēnei tuhituhi, ā, ka whakaaturia mai e ia tōna tikanga ki ahau, he ngangana te kākahu mōna, he mekameka kōura anō mō tōna kakī, ā, ko ia anō hei rangatira tuatoru i te kīngitanga.”
DAN 5:8 Kātahi ka haere mai ngā tāngata whakaaro nui katoa e te kīngi. Heoi, kīhai i āhei te kōrero i te tuhituhi, kīhai anō i whakaatu i tōna tikanga ki te kīngi.
DAN 5:9 Kātahi ka nui atu te raruraru o Kīngi Perehatara, ka puta kē tōna mata, ā, tāhurihuri ana āna ariki.
DAN 5:10 Nā, ka haere te kuīni ki te whare hākari, nā ngā kupu hoki a te kīngi rātou ko āna ariki. Nā, ka kōrero te kuīni, ka mea, “E te kīngi, kia ora tonu koe! Kei raruraru koe i ōu whakaaro, kei puta kē tōu mata.
DAN 5:11 He tangata tēnei kei tōu kīngitanga, kei a ia nei te wairua o ngā atua tapu; i ngā rā hoki o tōu pāpā i kitea te mārama, te mōhio, me ngā whakaaro nui i roto i a ia, he mea rite tonu ki ngā whakaaro nui o ngā atua, ā, meinga ana ia e tōu pāpā, e Kīngi Nepukaneha, āe rā, e tōu pāpā, e te kīngi, hei rangatira mō ngā tohunga māori rātou ko ngā kaititiro whetū, ko ngā Karari, ko ngā tohunga tūāhu.
DAN 5:12 Nā, pai atu te wairua i kitea i roto i taua Raniera, i huaina nei e te kīngi ko Peretehatara, te mātau, te mōhio, te whakaatu moe, te whakakite i ngā kupu pakeke; tareka ana i a ia ngā mea e mau ana. Nā, kia karangatia a Raniera, ā, māna e whakakite te tikanga.”
DAN 5:13 Kātahi ka kawea mai a Raniera ki te aroaro o te kīngi; ā, ka kōrero te kīngi, ka mea ki a Raniera, “Ko taua Raniera rānei koe, nō ngā tamariki whakarau o Hūrā, i kawea mai nei e te kīngi, e tōku pāpā, i Hūrā?
DAN 5:14 Kua rongo ahau ki a koe, kei roto i a koe te wairua o ngā atua, ā, e kitea ana te mārama i roto i a koe, te mātauranga, me te mōhio pai rawa.
DAN 5:15 Nā, kua kawea mai nei ngā tāngata whakaaro nui, ngā kaititiro whetū, ki tōku aroaro, kia kōrerotia ai e rātou tēnei tuhituhi, kia whakaaturia ai tōna tikanga ki ahau. Heoi, kīhai i taea e rātou te whakaatu te tikanga o taua mea.
DAN 5:16 Kua rongo ia ahau ki a koe, ka taea e koe te whakaatu tikanga, ā, ka tareka i a koe ngā mea e mau ana. Nā, ki te taea e koe te tuhituhi te kōrero, ā, ka whakaaturia tōna tikanga ki ahau, he ngangana te kākahu mōu, he mekameka kōura anō tēnei mō tōu kakī, ko koe hoki hei rangatira tuatoru i te kīngitanga.”
DAN 5:17 Kātahi ka whakahoki a Raniera, ka mea ki te aroaro o te kīngi, “Māu āu hākari, hoatu āu utu ki tētahi atu; me kōrero ia e ahau te tuhituhi ki te kīngi, me whakaatu te tikanga ki a ia.
DAN 5:18 “E te kīngi, i hōmai e te Atua, e te Runga Rawa, te kīngitanga ki tōu pāpā, ki a Nepukaneha, me te nui, me te korōria, me te hōnore.
DAN 5:19 Ā, nā taua nui, i hōmai rā e ia ki a ia, i wiri ai ngā tāngata katoa, ngā iwi, ngā reo, i wehi ai i tōna aroaro; ko āna i pai ai whakamatea ana e ia, ko āna i pai ai whakaorangia ana e ia, ko āna i pai ai whakatūria ana e ia, ā, ko āna i pai ai whakaititia iho e ia.
DAN 5:20 Otiia, ka whakakake tōna ngākau, ka pakeke tōna hinengaro i runga i te whakapehapeha, nā, kua whakatakā ia i runga i tōna torōna kīngi, whakakāhoretia iho tōna korōria.
DAN 5:21 Ā, āia atu ana ia i roto i ngā tama a te tangata, i meinga anō tōna ngākau kia rite ki o ngā kararehe; i ngā kāihe mohoao anō hoki tōna nohoanga. He mea whāngai ia ki te tarutaru, ānō he kau; i mākū anō tōna tinana i te tōmairangi o te rangi, ā mōhio noa ia kei te kāwana te Atua, te Runga Rawa, ki te kīngitanga tāngata, e whakaritea ana hoki e ia mā tāna e pai ai.
DAN 5:22 “Nā, ko koe, ko tāna tama, e Perehatara, kīhai i whakaititia e koe tōu ngākau, me te mōhio anō koe ki tēnei katoa.
DAN 5:23 Heoi, whakakake ana koe ki te Ariki o te rangi, kua oti anō ngā oko o tōna whare te kawe mai ki tōu aroaro hei oko inu wāina, māu, mā āu ariki, mā āu wāhine, mā āu wāhine iti. Kua whakamoemiti anō koe ki ngā atua, ki ngā mea hiriwa, kōura, parāhi, rino, rākau, kōhatu, e kore nei e kite, e rongo, e mōhio. Nā, ko te Atua, kei tōna ringa nei tōu manawa, nāna nei ōu ara katoa, kīhai ia i whakakorōriatia e koe.
DAN 5:24 Kātahi ka ungā atu te wāhi o te ringa i tōna aroaro; nā, kua oti tēnei mea te tuhituhi.
DAN 5:25 “Nā, ko te mea tēnei i tuhituhia: MENE, MENE, TEKERE, UPARAHINI.
DAN 5:26 “Ko te tikanga tēnei o te mea: Mene; kua oti tōu kīngitanga te tatau e te Atua, mutu pū i a ia.
DAN 5:27 Tekere; kua oti koe te pāuna ki te pāuna, ā, kua kitea tōu koha.
DAN 5:28 Perehe; kua oti tōu kīngitanga te wāhi, kua hoatu ki ngā Meri, ki ngā Pahi.”
DAN 5:29 Kātahi a Perehatara ka whakahau, ā, whakakākahuria ana a Raniera ki te mea ngangana, whakanohoia ana he mekameka kōura ki tōna kakī, kārangarangatia ana ia ko ia te rangatira tuatoru o te kīngitanga.
DAN 5:30 I taua pō anō ka patua a Perehatara kīngi o ngā Karari.
DAN 5:31 Ā, riro ana te kīngitanga i a Tariuha Meri; ko ōna tau kei te ono tekau mā rua.
DAN 6:1 I pai a Tariuha kia whakaritea ētahi ariki kotahi rau e rua tekau mō te kīngitanga, hei kāwana mō te kīngitanga katoa,
DAN 6:2 e toru hoki ngā rangatira nui mō ēnei, ā, ko Raniera tētahi o rātou; mā ngā ariki rā ngā kōrero e hōmai ki ēnei, kei hē ngā mea a te kīngi.
DAN 6:3 Kātahi ka whakanuia tēnei Raniera ki runga ake i ngā rangatira nui, i ngā ariki, nō te mea he pai rawa te wairua i roto i a ia, ā, i whakaaro te kīngi kia meinga ia hei rangatira mō te kīngitanga katoa.
DAN 6:4 Kātahi ngā rangatira nunui rātou ko ngā ariki ka rapu take mō Raniera i roto i ngā mea o te kīngitanga. Heoi, kīhai i kitea tētahi take, tētahi hē; he mahi pono hoki tāna, kāhore ōna kino, ōna hē.
DAN 6:5 Kātahi ka mea aua tāngata, “E kore e kitea e tātou he take mō tēnei Raniera, ki te kāhore e kitea he mea mōna i roto i te ture a tōna Atua.”
DAN 6:6 Kātahi ēnei rangatira nunui rātou ko ngā ariki ka huihui ki te kīngi; ko tā rātou kōrero tēnei ki a ia, “E Kīngi Tariuha, kia ora tonu koe!
DAN 6:7 Kua kōrerorero ngā rangatira nunui katoa o te kīngitanga, ngā kāwana, ngā ariki, ngā kaiwhakatakoto whakaaro, ngā rangatira, kia whakatakotoria he tikanga kīngi, kia whakapūmautia he ture kaha, arā ki te īnoia he mea e tētahi ki tētahi atua, tangata rānei, ā, kia toru tekau rā anō ngā rā, he mea ehara i te īnoi ki a koe, e te kīngi, me maka ia ki te ana o ngā raiona.
DAN 6:8 Nā, māu e whakapūmau te ture, e te kīngi, whaitohungia hoki te mea i tuhituhia, kei puta kē, kia rite ai ki te ture a ngā Meri, a ngā Pahi, e kore nei e puta kē.”
DAN 6:9 Mō reira whaitohungia ana e Kīngi Tariuha te mea i tuhituhia me te ture.
DAN 6:10 Nā, ka mōhio a Raniera ka oti taua mea i tuhituhia te whaitohu, haere ana ia ki tōna whare; nā, ko ōna matapihi tuwhera tonu ai i roto i tōna rūma ki te ritenga atu o Hiruhārama. E toru ngā tukunga o ōna turi i te rā, īnoi ana ia, whakawhetai ana ki te aroaro o tōna Atua, pērā ana me tāna i mua.
DAN 6:11 Kātahi ka huihui aua tāngata, ka kite i a Raniera e karakia ana, e īnoi ana ki te aroaro o tōna Atua.
DAN 6:12 Kātahi rātou ka whakatata, ā, ka kōrero i te ture a te kīngi ki te aroaro o te kīngi; “Kīhai ianei i whaitohungia e koe he ture, nā, ko ngā tāngata katoa e īnoi ana ki tētahi atua, tangata rānei, i ēnei rangi e toru tekau, he mea ehara i te īnoi ki a koe, e te kīngi, ka makā ki te ana raiona?” Ka whakahoki te kīngi, ka mea, “He pono taua mea nā, e rite ana ki te ture a ngā Meri, a ngā Pahi, e kore nei e puta kē.”
DAN 6:13 Kātahi rātou ka whakahoki, ka mea ki te aroaro o te kīngi, “Ko te Raniera rā, ko tērā o ngā tama o ngā whakarau o Hūrā, kāhore ōna mahara ki a koe, e te kīngi, ki te ture anō i whaitohungia e koe, heoi e toru āna īnoinga i te rā.”
DAN 6:14 Ā, nō te rongonga o te kīngi ki ēnei kupu, kātahi ka nui tōna kino, ā, ka anga tōna ngākau ki a Raniera kia whakaorangia ia. Whai ana ia ki te whakaora i a ia ā tō noa te rā.
DAN 6:15 Kātahi ka huihui ngā tāngata nei ki te kīngi, ā, ka mea ki te kīngi, “Kia mōhio koe, e te kīngi, ko te ture tēnei a ngā Meri, a ngā Pahi, kia kaua e whakaputaia kētia tētahi ture, tikanga rānei, kua oti te whakapūmau e te kīngi.”
DAN 6:16 Kātahi te kīngi ka whakahau, ā, kawea ana mai a Raniera, makā ana ki te ana raiona. I kōrero anō te kīngi, i mea ki a Raniera, “Ko tōu Atua e mahi tonu nā koe ki a ia, māna koe e whakaora.”
DAN 6:17 Nā, ka maua mai he kōhatu, ka whakatakotoria ki te kūwaha o te ana; hīritia iho e te kīngi ki tāna ake hīri, ki te hīri anō a āna ariki; kei puta kē tētahi tikanga mō Raniera.
DAN 6:18 Kātahi te kīngi ka haere ki tōna whare, ā pau noa taua pō kīhai i kai, kīhai anō ngā mea whakatangi i kawea mai ki tōna aroaro; ā, tūrere atu ana tōna moe i a ia.
DAN 6:19 Kātahi te kīngi ka maranga i te atatū tonu, ā, hohoro tonu te haere ki te ana raiona.
DAN 6:20 Ā, nō tōna tatanga atu ki te ana, ki a Raniera, ka karanga ia, he reo tangi te reo; i kōrero te kīngi, i mea ki a Raniera, “E Raniera, e te pononga a te Atua ora, he kaha rānei tōu Atua e mahi tonu nā koe ki a ia, ki te whakaora i a koe kei mate i ngā raiona?”
DAN 6:21 Nā, ka mea a Raniera ki te kīngi, “E te kīngi, kia ora tonu koe!
DAN 6:22 Kua tukua mai e tōku Atua tāna anahera, ā, tūtakina ana e ia ngā māngai o ngā raiona, ā, kīhai rātou i pā ki ahau. Nō te mea kua kitea tōku kore hara i tōna aroaro; kāhore anō āku mahi hē i tōu aroaro, e te kīngi.”
DAN 6:23 Nā, nui atu te koa o te kīngi, ā, whakahaua ana e ia kia tangohia ake a Raniera i roto i te ana. Nā, kua tangohia ake a Raniera i roto i te ana, kīhai rawa anō i kitea tētahi ahatanga ki a ia, nō te mea i whakapono ia ki tōna Atua.
DAN 6:24 Nā, ka whakahau te kīngi, ā, ka maua aua tāngata i whakapae rā ki a Raniera, ka makā ki te ana raiona, rātou, ā rātou tamariki, ā rātou wāhine, riro pū rātou i ngā raiona, ā, wāwāhia ana e rātou ō rātou wheua katoa i te mea kīanō i tatū noa ki raro o te ana.
DAN 6:25 Kātahi a Kīngi Tariuha ka tuhituhi ki ngā tāngata katoa, ki ngā iwi, ki ngā reo, e noho ana i te whenua katoa: “Kia whakanuia te rangimārie ki a koutou.
DAN 6:26 “Tēnei ahau te whakatakoto tikanga nei; nā, i ngā kāwanatanga katoa o tōku kīngitanga, kia wiri ngā tāngata, kia wehi ki te aroaro o te Atua o Raniera. “Ko ia hoki te Atua ora, pūmau tonu ā ake ake. E kore tōna kīngitanga e ngaro, tōna kāwanatanga hoki ā te mutunga rā anō.
DAN 6:27 Māna e whakaora, māna e mawhiti ai; e mahia ana hoki e ia he tohu, he mea whakamīharo i te rangi, i te whenua; nāna hoki a Raniera i ora ai i te kaha o ngā raiona.”
DAN 6:28 Nā, ka kake tēnei Raniera i te kīngitanga o Tariuha, i te kīngitanga anō hoki o Hairuha Pahi.
DAN 7:1 I te tuatahi o ngā tau o Perehatara kīngi o Papurōna he moe tā Raniera, he kite nā tōna māhunga, i runga i tōna moenga. Nā, tuhituhia ana e ia te moe, ā, kōrerotia ana ngā upoko o ngā kōrero.
DAN 7:2 I kōrero a Raniera, i mea: He putanga ki ahau i te pō, ka kite ahau, nā, ko ngā hau e whā o te rangi e ngangare ana i runga i te Moana Nui.
DAN 7:3 Nā, ka puta ake e whā ngā kararehe nunui i te moana, rerekē tonu tētahi i tētahi.
DAN 7:4 Ko te tuatahi i rite ki te raiona, he parirau ēkara ōna. Titiro tonu atu ahau ā hūtia noatia atu ōna parirau, ā, ka whakarewaina atu ia i te whenua, ka meinga kia tū i runga i ngā waewae e rua, ānō he tangata, ā, i hōmai hoki he manawa tangata ki a ia.
DAN 7:5 Nā, ko tētahi atu kararehe, ko te tuarua, kei te pea te rite, ara ana ia ko tētahi taha ōna, e toru anō ngā rara i tōna māngai, i ōna niho; ā, ka mea ake rātou ki a ia, “Whakatika, kia nui te kikokiko e kainga e koe.”
DAN 7:6 I muri i tēnei ka titiro atu ahau nā, ko tētahi anō, kei te reparo te rite. E whā ngā parirau manu i tōna tuarā; e whā ngā pane o taua kararehe; kua tukua anō te rangatiratanga ki a ia.
DAN 7:7 I muri i tēnei ka kite ahau i roto i ngā moemoeā o te pō, nā, ko te tuawhā o ngā kararehe, he hanga whakawehi he mea whakamataku, he kaha noa atu; he niho rino ōna, he mea nunui; kei te kai, kei te wāwāhi ā mongamonga noa, ko te toenga takatakahia ana e ōna waewae; ā, he rerekē ia i ērā atu kararehe katoa i mua i a ia; ā, kotahi tekau ōna haona.
DAN 7:8 I whakaaroa e ahau ngā haona, nā, kua puta ake tētahi atu haona, he mea iti, i roto i ērā, nā, unuhia ake ana i tōna aroaro, he mea unu ake i ngā pūtake, e toru o ngā haona tuatahi rā. Nā, he kanohi i roto i taua haona nei, he mea rite ki ngā kanohi tangata, me te māngai hoki e kōrero ana i ngā mea nunui.
DAN 7:9 I titiro ahau, ā whakaritea mai rā anō ngā torōna, kua noho te Tuaiho Onamata. Ko tōna kākahu mā tonu me he hukarere, ko ngā makawe o tōna māhunga; me te huruhuru hipi kua oti te whakamā; ko tōna torōna he mura ahi, ā, ko ōna wīra he ahi e kā ana.
DAN 7:10 I pupū mai he awa ahi, i rere mai i tōna aroaro. Mano iho, mano iho āna kaimahi, tini, tini whāioio e tū ana i tōna aroaro. Kua noho te whakawā, kua tuwhera ngā pukapuka.
DAN 7:11 I titiro anō ahau i reira, he reo hoki nō ngā kupu nunui i kōrerotia e te haona. Titiro tonu ahau, ā, whakamatea noatia iho te kararehe, ko tōna tinana whakangaromia iho, ā, tukua ana ia kia tahuna ki te ahi.
DAN 7:12 Ko ērā atu o ngā kararehe, i whakakāhoretia tō rātou kāwanatanga. Otiia, i whakaroaina atu tō rātou ora mō tētahi wā, mō tētahi tāima.
DAN 7:13 I kite ahau i roto i ngā moemoeā o te pō, nā, ko tētahi e rite ana ki te Tama a te tangata e haere mai ana me ngā kapua anō o te rangi. Kua tae mai ki te Tuaiho Onamata, kua kawea anō ki tōna aroaro.
DAN 7:14 I tukua anō ki a ia he kāwanatanga, he korōria, he kīngitanga, kia mahi ai ngā tāngata katoa, ngā iwi, ngā reo, ki a ia. Ko tōna kāwanatanga he kāwanatanga mau tonu, e kore e pahemo; e kore anō tōna kīngitanga e ngaro.
DAN 7:15 Nā, ko ahau, ko Raniera, i pōuri tōku wairua i waenganui i tōku tinana, raruraru ana ahau i ngā mea i kitea e tōku māhunga.
DAN 7:16 I whakatata ahau ki tētahi o te hunga e tū ana i reira, i ui ki a ia ki te tika o tēnei katoa. Heoi, ka kōrerotia e ia ki ahau, ā, ka meinga ahau kia mōhio ki te tikanga o ngā mea:
DAN 7:17 “Ko ēnei kararehe nunui, ko ngā mea e whā nei, he kīngi, e whā, tērā e puta ake i te whenua.
DAN 7:18 Otiia ka riro te kīngitanga i te hunga tapu a te Runga Rawa, ka mau anō hoki te kīngitanga ki a rātou ā ake ake.”
DAN 7:19 Kātahi ahau ka mea kia mōhio ki te tika o te tuawhā o ngā kararehe i rerekē nei i ērā atu katoa, he nui rawa nei te wehi, ko ōna niho he rino, ko ōna maikuku he parāhi, o tērā i kai rā, i wāwāhi rā ā mongamonga noa, ā, takatakahia ana te toenga ki ōna waewae;
DAN 7:20 o ngā haona kotahi tekau hoki i tōna pane, o tērā atu hoki i puta ake rā, ā, taka ana ētahi e toru i tōna aroaro – arā taua haona he kanohi nei ōna, he māngai, he nui atu nei ngā kōrero, ko tōna āhua māia atu i tō ōna hoa.
DAN 7:21 I titiro ahau, nā, kua whawhai taua haona ki te hunga tapu, ā, taea ana rātou e ia,
DAN 7:22 ā tae noa ki te taenga mai o te Tuaiho Onamata, ki te hōmaitanga hoki o te whakawā ki te hunga tapu a te Runga Rawa; ā, ka tae mai te wā i riro ai te kīngitanga i te hunga tapu.
DAN 7:23 Ko tāna kupu tēnei: “Ko te tuawhā o ngā kararehe, he tuawhā tērā nō ngā kīngitanga i runga i te whenua, ka rerekē i ngā kīngitanga katoa, ka pau i a ia te whenua katoa, ka takatakahia e ia, ka wāwāhia, ā mongamonga noa.
DAN 7:24 Nā, ko ngā haona kotahi tekau, tērā e ara ake i tēnei kīngitanga kotahi tekau ngā kīngi; ā, ka ara ake anō tētahi i muri i a rātou, ka rerekē anō ia i ō mua, ā, e toru ngā kīngi e taea e ia.
DAN 7:25 Tērā e nui āna kupu mō te Runga Rawa, ā, ka tau i a ia te māuiui ki te hunga tapu a te Runga Rawa; ka mea hoki ia kia whakariroia kētia ngā wā me te ture; ka tukua anō ēnei ki tōna ringa, kia taka rā anō he wā, me ētahi wā, me te hāwhe wā.
DAN 7:26 Otiia ka noho te whakawā, ā, ka whakakāhoretia tōna kīngitanga, mōtī iho, ngaro iho ā taea noatia te mutunga.
DAN 7:27 Ā, ka hoatu te kīngitanga me te kāwanatanga me te nui o te kīngitanga i raro i te rangi katoa ki ngā tāngata o te hunga tapu a te Runga Rawa; ko tōna kīngitanga he kīngitanga mutungakore, ā, ka mahi ngā kāwanatanga katoa, ka whakarongo ki a ia.”
DAN 7:28 “I konei te mutunga o te mea. Nā, ko ahau, ko Raniera, nui atu tōku raruraru i ōku whakaaro, puta kē ana tōku mata; heoi, puritia iho e ahau taua mea i roto i tōku ngākau.”
DAN 8:1 I te toru o ngā tau o te kīngitanga o Kīngi Perehatara ka puta mai he kite ki ahau, arā ki ahau, ki a Raniera, i muri i tērā i puta rā ki ahau i te tīmatanga.
DAN 8:2 I kite moemoeā ahau, nā, i tōku kitenga, i Huhana ahau, i te kāinga kīngi, i tērā i te kāwanatanga o Erama. Nā, ka kite moemoeā ahau, ā, i te taha ahau o te awa o Urai.
DAN 8:3 Nā, ko te marangatanga ake o ōku kanohi, ka kite ahau. Nā, ko tētahi hipi toa e tū ana i te ritenga o te awa, e rua ōna haona, roa noa atu ngā haona ki runga, kei runga atu ia tētahi i tētahi. Nā, ko tērā i pūrero rā, nō muri rawa i puta ai.
DAN 8:4 I kite anō ahau i te hipi toa e āki ana whaka te hauāuru, whaka te raki, whaka te tonga; ā, kore noa iho tētahi kararehe i tū ki tōna aroaro, kāhore hoki he tangata hei whakaora i roto i tōna ringa. Heoi, mahia ana e ia tāna i pai ai, ā, nui haere ana ia.
DAN 8:5 Nā, i ahau e whakaaroaro ana, nā, ko te putanga mai o tētahi koati toa i te hauāuru, i te mata o te whenua katoa, kīhai anō ia i pā ki te whenua. Ā, he haona tō te koati i waenganui i ōna kanohi, he mea e whakamaua e te titiro.
DAN 8:6 Nā, ka haere mai ia ki te hipi toa e rua nei ōna haona, i kitea atu rā e ahau e tū ana i te ritenga o te awa, rere atu ana ki a ia, me te weriweri katoa o tōna kaha.
DAN 8:7 I kite anō ahau i a ia e whakatata ana ki te hipi toa, riri tonu ki a ia, patua iho e ia te hipi toa, whatia ana e ia ōna haona e rua, kāhore hoki he kaha o te hipi toa ki te tū ki tōna aroaro. Kei te turaki ia i a ia ki te whenua, takatakahia ana ia e ia; kāhore hoki he kaiwhakaora mō te hipi toa i roto i tōna ringa.
DAN 8:8 Nā, kua nui noa atu te koati toa, kua kaha, nā, ka whati te haona nui, ā, e whā ngā mea e whakamaua atu e te titiro i puta ake i tōna tūranga, he mea e anga ana ki ngā hau e whā o te rangi.
DAN 8:9 Nā, kua puta ake i roto i tētahi o ērā tētahi haona iti; kua nui noa atu whaka te tonga, whaka te rāwhiti, whaka te whenua āhuareka.
DAN 8:10 I nui haere anō ā tae tonu ki te ope o te rangi, whakatakā ana e ia ki te whenua ētahi o te ope, o ngā whetū hoki, takatakahia ana e ia.
DAN 8:11 Āe rā, i tae anō tāna whakanui i a ia ki te rangatira o te ope, whakakorea iho e ia i a ia te patunga tapu, te mea tūturu, turakina iho tōna wāhi tapu.
DAN 8:12 I hōmai anō te ope ki a ia me te patunga tapu tūturu, nā te kino hoki, nā, turakina iho e ia te pono ki te whenua; ā, mahi ana, kake ana.
DAN 8:13 Kātahi ka rongo ahau i tētahi anahera tapu e kōrero ana, ā, ka mea tētahi atu anahera tapu ki tērā i kōrero rā, “Kia pēhea te roa o te kitenga mō te patunga tapu tūturu, mō te hē whakangaro e tukua ai te wāhi tapu me te ope kia takatakahia?”
DAN 8:14 Nā, ka mea ia ki ahau, “Kia taka ngā ahiahi me ngā ata e rua mano e toru rau, ko reira te wāhi tapu purea ai.”
DAN 8:15 Nā, ka kite ahau, a Raniera, i taua kite; ka rapua e ahau te tikanga, nā, me te mea he āhua tangata e tū ana i tōku aroaro.
DAN 8:16 I rongo anō ahau i te reo tangata i te takiwā o ngā tahatika o Urai e karanga ana, e mea ana, “E Kapariera, kia mōhio te tangata nei ki te tikanga o te kite.”
DAN 8:17 Heoi, ka haere mai tērā ki te wāhi i tū ai ahau; ā, i tōna taenga mai ka wehi ahau, tāpapa ana ahau. Nā, ka mea ia ki ahau, “Kia mōhio koe, e te tama a te tangata. Mō ngā wā hoki o te mutunga te kite rā.”
DAN 8:18 Nā, i a ia e kōrero ana ki ahau, ka riro ahau i te moe, he moe reka me tōku mata e anga ana ki te whenua. Otiia, i pā ia ki ahau, ā, whakatūria ana ahau ki runga.
DAN 8:19 Nā, ka mea ia, “Nanā, ka meinga e ahau kia mōhio koe ki ngā mea e puta mai i te mutunga o te riri. Nō te wā hoki tērā i whakaritea o te mutunga.
DAN 8:20 Ko te hipi toa i kitea rā e koe i ngā haona e rua, ko ngā kīngi ērā o Meria, o Pahia.
DAN 8:21 Ko te koati toa pūhuruhuru, ko te kīngi tērā o Kariki; ā, ko te haona nui i waenganui i ōna kanohi, ko te kīngi tuatahi tērā.
DAN 8:22 Nā, mō te mea i whati rā, i puta ake rā e whā ki tōna tūranga, tērā e ara ake e whā ngā kīngitanga i roto i te iwi, e kore ia e rite te kaha ki tōna.
DAN 8:23 “Nā, i te mutunga o tō rātou kīngitanga, i te mea ka tae tā ngā poka kē ki te tutukitanga, ka ara ake he kīngi he kanohi hīnana tōna, e mātau ana ki ngā kupu ngaro.
DAN 8:24 Ā tērā e nui tōna kaha, otiia ehara i te mea nā tōna kaha ake. He hanga whakamīharo tāna whakangaro; ka kake anō ia, ka mahi i tāna e pai ai, ka whakangaro i ngā tāngata nunui rātou ko te iwi tapu.
DAN 8:25 Mā tāna ngārahu mōhio anō ka meinga ai e ia te tinihanga o tōna ringa kia kake; ka whakanui anō ia i a ia i roto i tōna ngākau, he tokomaha hoki e ngaro i a ia i runga i tō rātou noho warea; ka whakatika anō ia ki te rangatira o ngā rangatira. Otiia, ka wāwāhia ia, ehara anō i te mea nā te ringa.
DAN 8:26 “Nā, ko te kite o ngā ahiahi, o ngā ata, ko tērā i kōrerotia rā, pono tonu. Engari, kopia atu e koe te kite; he mea hoki ia mō ngā rā maha kei te haere mai.”
DAN 8:27 Nā, kua iwikore noa iho ahau, a Raniera, he maha ngā rā ōku e mate ana; muri iho ka maranga ahau, ā, mahia ana e ahau te mahi a te kīngi. Mīharo tonu anō ki taua kite, kīhai ia i mātauria e tētahi.
DAN 9:1 I te tuatahi o ngā tau o Tariuha tama a Ahahueruha, nō ngā uri o ngā Meri, i kīngi nei ia ki te kīngitanga o ngā Karari.
DAN 9:2 I tōna tau tuatahi i kīngi ai, ka kitea e ahau, e Raniera, ki ngā pukapuka te maha o ngā tau i puta mai ai te kupu a Ihowā ki a Heremaia poropiti, hei whakatutukitanga i te ururua o Hiruhārama, arā ka tae ki te whitu tekau tau.
DAN 9:3 Nā, ka anga tōku mata ki te Ariki, ki te Atua; rapua ana e ahau i runga i te karakia, i te īnoi, i te nohopuku, i te kākahu taratara, i te pungarehu.
DAN 9:4 Nā, ka īnoi atu ahau ki te Ariki, ki tōku Atua, ka whāki, ka mea, “E te Ariki, e te Atua nui, e te Atua whakamataku, e pupuri nei i te kawenata, i te atawhai mō te hunga e aroha ana ki a ia, e pupuri ana i āna whakahau.
DAN 9:5 Kua hara mātou, kua poka kē, kua mahi i te kino, kua whakakeke hoki, i a mātou i tahuri kē nei i āu whakahau, i āu tikanga.
DAN 9:6 Kīhai anō mātou i whakarongo ki āu pononga, ki ngā poropiti i kōrero nei i runga i tōu ingoa ki ō mātou kīngi, ki ō mātou rangatira, ki ō mātou mātua, ki te iwi katoa anō o te whenua.
DAN 9:7 “Kei a koe, e te Ariki, te tika, kei a mātou ia te whakamā o te mata, koia anō tēnei ināianei; kei ngā tāngata anō o Hūrā, kei ngā tāngata o Hiruhārama, kei a Īharaira katoa, kei ngā mea e tata ana, kei ngā mea i tawhiti, i ngā whenua katoa i peia atu ai rātou e koe, mō tō rātou hē i hē ai rātou ki a koe.
DAN 9:8 E te Ariki, kei a mātou nei ko te whakamā o te mata, kei ō mātou kīngi hoki, kei ō mātou rangatira, kei ō mātou mātua hoki, nō te mea i hara mātou ki a koe.
DAN 9:9 Nā te Ariki, nā tō mātou Atua, ngā mahi tohu me ngā murunga hara, ko mātou ia kua whakakeke ki a ia;
DAN 9:10 kīhai anō i whakarongo ki te reo o Ihowā, o tō mātou Atua, kīhai i haere i āna ture i whakatakotoria e ia, arā e āna pononga, e ngā poropiti, ki tō mātou aroaro.
DAN 9:11 “Āe rā, kua takahia e Īharaira katoa tāu ture, kua whakarērea e rātou, kia kore ai rātou e rongo ki tōu reo; koia i ringihia ai te kanga ki runga ki a mātou, me te oati i tuhituhia ki te ture a Mohi pononga a te Atua; kua hara hoki mātou ki a ia.
DAN 9:12 Nā, kua pūmau i a ia āna kupu i kōrerotia e ia mō mātou, mō ō mātou kaiwhakawā i whakarite nei i ō mātou whakawā, nā te kino nui hoki kua kawea mai nei e ia ki runga ki a mātou. Kāhore hoki he rite mō te mea kua meatia nei ki Hiruhārama i raro i te rangi katoa.
DAN 9:13 Ka rite ki te mea i tuhituhia ki te ture a Mohi tēnei kino katoa kua tae mai nei ki a mātou. Heoi, kāhore ā mātou īnoi ki te aroaro o Ihowā, o tō mātou Atua, mō mātou kia tahuri atu i ō mātou kino, kia mātau hoki ki tōu pono.
DAN 9:14 Nā reira te kino i tirotirohia mai ai e Ihowā, ā, kawea mai ana e ia ki runga ki a mātou; tika tonu hoki tā Ihowā, tā tō mātou Atua, i āna mahi katoa e mahia ana e ia, ā, kīhai mātou i whakarongo ki tōna reo.
DAN 9:15 “Nā āianei, e te Ariki, e tō mātou Atua, nāu nei i kawe mai tāu iwi i te whenua o Īhipa i runga i te ringa kaha, ā, mahia ana e koe he ingoa mōu, pēnei anō me tēnei ināianei; hara ana mātou, mahi ana i te kino.
DAN 9:16 E te Ariki, kia rite ki āu mahi tika katoa, whakatahuritia atu tōu riri, tōu weriweri, i tāu pā, i Hiruhārama, i tōu maunga tapu. He hara nei hoki nō mātou, he kino nō ō mātou mātua i ingoa kino ai a Hiruhārama me tāu iwi ki te hunga katoa i tētahi taha o mātou, i tētahi taha.
DAN 9:17 Nā, whakarongo āianei, e tō mātou Atua, ki te īnoi a tāu pononga, ki āna tangi, kia mārama anō tōu mata ki tōu wāhi tapu kua ururua nei, me whakaaro ki te Ariki.
DAN 9:18 Kia anga mai, e tōku Atua, tōu taringa, whakarongo hoki, titiro mai hoki ōu kanohi, kia kitea ai e koe ō mātou matenga, me te pā anō kua huaina nei tōu ingoa mō reira. Ehara hoki i te mea he tika nō mātou i tukua atu ai e mātou ā mātou īnoi ki tōu aroaro, engari he nui nō āu mahi tohu.
DAN 9:19 Whakarongo, e te Ariki! E te Ariki, murua te hē! E te Ariki, whakarongo mai, e mahi! Kaua e whakaroa; kia mahara anō ki a koe, e tōku Atua, kua oti hoki tōu ingoa te whakahua mō tāu pā, mō tāu iwi.”
DAN 9:20 Nā, i ahau e kōrero ana, e karakia ana, e whāki ana i tōku hara, i te hara anō o tōku iwi, o Īharaira, e tuku ana i tāku īnoi ki te aroaro o Ihowā, o tōku Atua, mō te maunga tapu o tōku Atua –
DAN 9:21 āe rā, i ahau e kōrero ana, e karakia ana, nā, ko Kapariera, ko te tangata i kitea e ahau i te whakakitenga i te tīmatanga, ko tōna rere he mea whakahohoro, kua pā mai ki ahau i te wā o tō te ahiahi whakahere.
DAN 9:22 Nā, ka ako ia i ahau, ka kōrero ki ahau, ka mea, “E Raniera, kua puta mai nei ahau kia mōhio ai koe, kia mātau ai.
DAN 9:23 I te tīmatanga o āu īnoi i puta te kupu, ā, kua tae mai ahau ki te whakaatu; e arohaina nuitia ana hoki koe, nā, kia mōhio koe ki te mea, whakaaroa anō te kite.
DAN 9:24 “E whitu tekau ngā wiki kua oti te whakarite mō tōu iwi, mō tōu pā tapu hoki, e whakaotia ai te poka kē, e whakamutua ai ngā hara, e oti ai te whakamārie mō te kino, e kawea mai ai te tika mau tonu, e hīritia ai te kite, me te poropititanga, e whakawahia ai te Tapu Rawa.
DAN 9:25 “Nā, kia mōhio, ā, kia mārama hoki, e whitu ngā wiki o te putanga o te kupu, kia whakahoutia, kia hangā a Hiruhārama ā tae noa ki te mea i whakawahia, ki te rangatira. Ā, e ono tekau mā rua ngā wiki, ka oti anō te hanga, me te waharoa, me te awakeri, ahakoa i roto i ngā wā raruraru.
DAN 9:26 Ā, ka taka aua wiki e ono tekau mā rua, ka hātepea atu te mea i whakawahia, ā, kāhore he mea māna; ā, ka whakangaromia te pā me te wāhi tapu e te iwi o te rangatira ka haere mai nei; ā, he waipuke kei tōna mutunga, ā, he whawhai taea noatia te mutunga; kua takoto hoki ngā whakangaromanga.
DAN 9:27 Ā, ka hangā e ia he kawenata pūmau ki ētahi tokomaha, kotahi te wiki; ka tae ki te hāwhe o te wiki e meinga ana e ia kia mutu te patunga tapu me te whakahere. Nā, ka haere mai tētahi i runga i te parirau o ngā mea whakarihariha, māna e whakaururua; ā, ka ringihia he riri ki runga ki te kaiwhakangaro, ā taea rawatia anō te whakaotinga, he mea kua oti te whakarite.”
DAN 10:1 I te toru o ngā tau o Hairuha kīngi o Pahia, i whakakitea he mea ki a Raniera, i huaina nei ko Peretehatara, ā, he tika taua mea, he mea mō tētahi whawhai nui. Ā, i mātau ia ki taua mea, i mōhio anō hoki ki te tikanga o te kite.
DAN 10:2 I aua rā i te tangi ahau, a Raniera, e toru ngā tino wiki.
DAN 10:3 Kīhai tētahi kai e minaminatia ana i kainga e ahau, kīhai anō te kikokiko, te wāina rānei, i tapoko ki tōku māngai, ā, kīhai rawa ahau i whakawahi i ahau ā taka noa ngā tino wiki e toru.
DAN 10:4 Nā, i te rua tekau mā whā o ngā rā o te marama tuatahi, i ahau i te taha o te awa nui, arā o Hirekere,
DAN 10:5 ka ara ake ōku kanohi, ā, ka titiro, ka kite ahau, nā, ko tētahi tangata he kākahu rīnena tōna, ko tōna hope he mea whītiki ki te kōura parakore o Upuhata.
DAN 10:6 Ko tōna tinana hoki rite tonu ki te perira, ko tōna mata rite tonu ki te āhua o te uira, ko ōna kanohi kei ngā rama ahi te rite, ko ōna ringa, ko ōna waewae, rite tonu te kara ki tō te parāhi kua oti te whakakanapa, ā, ko te reo o āna kupu, ānō ko te reo o te mano.
DAN 10:7 Nā, ko ahau anake, ko Raniera, i kite i taua whakakitenga. Kīhai hoki ōku hoa i kite i taua whakakitenga; engari i tau te wiri nui ki a rātou, ā, rere ana ki te piri;
DAN 10:8 ā, mahue iho ko ahau anake. Nā, ka kite ahau i tēnei mea nui; kīhai anō hoki i mahue he kaha i roto i ahau. I puta kē hoki tōku ātaahua, kore iho, kāhore hoki he kaha i mau i ahau.
DAN 10:9 I rongo anō ia ahau i te reo o āna kupu; ā, i tōku rongonga i te reo o āna kupu, nā, ka riro ahau i te moe au tonu, me tōku tāpapa anō, tōku mata anga tonu ki te whenua.
DAN 10:10 Nā, kua pā he ringa ki ahau, nā reira ahau i whakaara ki runga ki ōku turi, ki runga hoki i ngā kapu o ōku ringa.
DAN 10:11 Nā, ka mea ia ki ahau, “E Raniera, e te tangata e arohaina nuitia ana, kia mōhio koe ki ngā kupu ka kōrerotia nei e ahau ki a koe; e tū ki runga; kua ungā mai hoki ahau ināianei ki a koe.” Nā, i tāna kōrerotanga i tēnei kupu ki ahau, ka tū ahau, me te wiri.
DAN 10:12 Kātahi tērā ka kī mai ki ahau, “Kaua e wehi, e Raniera, nō te mea nō te rā tuatahi anō i anga ai tōu ngākau ki te mātau, ki te whakaiti i a koe ki te aroaro o tōu Atua, i rangona ai āu kupu; ā, nā āu kupu hoki ahau i haere mai ai.
DAN 10:13 Otiia i tūria mai ahau e te rangatira o te kīngitanga, o Pahia, e rua tekau mā tahi ngā rā. Nā, kua tae mai a Mikaera, tētahi o ngā tino rangatira, hei āwhina mōku, ā, noho ana ahau i reira i ngā kīngi o Pahia.
DAN 10:14 Nā, kua tae mai nei ahau kia mātau ai koe ki ngā mea e pā ki tōu iwi i ngā rā whakamutunga. Ko te kite hoki mō ngā rā maha e takoto ake nei.”
DAN 10:15 Nā, i tāna kōrerotanga mai i ēnei kupu ki ahau, ka anga tōku mata ki te whenua, kāhore hoki āku kupu.
DAN 10:16 Nā, kua pā tētahi ki ōku ngutu, ko tōna āhua kei tō ngā tama a te tangata. Nā, ka puaki tōku māngai, ā, ka kōrero ahau, ka mea ki tērā i tū rā ki tōku aroaro, “E tōku ariki, nā te kite rā, kua tahuri iho ōku pōuritanga ngākau ki ahau, kāhore hoki he kaha e mau ana ki ahau.
DAN 10:17 Mā te aha hoki e āhei ai i te pononga a tēnei ariki ōku te kōrero ki tēnei ariki ōku? Ko ahau nei hoki, kore tonu iho he maunga o te kaha i roto i ahau, kīhai anō i mahue he manawa i roto i ahau.”
DAN 10:18 Kātahi ka pā anō tētahi ki ahau, ko tōna āhua rite tonu ki tō te tangata, ā, whakakahangia ana ahau e ia.
DAN 10:19 I mea ia, “Kaua e wehi e te tangata e arohaina nuitia ana; kia mau te rongo ki a koe, kia kaha, āe rā, kia kaha.” Nā, i tāna kōrerotanga ki ahau, kua kaha ahau. Nā, ka mea ahau, “Mā tōku ariki e kōrero mai; kua oti nei hoki ahau te whakakaha e koe.”
DAN 10:20 Kātahi tērā ka kī mai, “E mōhio ana rānei koe ki te mea i haere mai ai ahau ki a koe? Nā, ākuanei ahau hoki ai ki te whawhai ki te rangatira o Pahia. Ka puta atu ahau, nā, ka haere mai te rangatira o Kariki.
DAN 10:21 Me whakaatu anō ia e ahau ki a koe te mea i tuhituhia ki te karaipiture pono. Kāhore hoki tētahi e whakakaha ana i a ia anō hei hoa mōku ki ēnei mea, ko tō koutou rangatira anake, ko Mikaera.”
DAN 11:1 “Ko ahau, i tū ake ahau i te tau tuatahi o Tariuha Meri, ki te whakaū, ki te whakakaha i a ia.
DAN 11:2 “Nā, ka whakaatu ahau ināianei ki a koe i te pono. Nanā, tērā e ara ake anō ētahi atu kīngi e toru i Pahia; ā, ko te tuawhā, ka nui noa atu ngā taonga i ō te katoa. Nā, kia kaha ia i ōna taonga, ka whakaohokia e ia te katoa ki te whawhai ki te kīngitanga o Kariki.
DAN 11:3 Nā tērā e tū ake tētahi kīngi mārohirohi, he nui tōna kīngitanga e kīngi ai ia, ā, ka mahia e ia tāna e pai ai.
DAN 11:4 Ā, ina tū ake ia, ka pakaru tōna kīngitanga, ka wehewehea atu ki ngā hau e whā o te rangi. Kāhore ia ki ō muri i a ia, e kore anō e rite ki tōna kīngitanga i kīngi ai ia; nō te mea ka hūtia atu tōna kīngitanga, mō ētahi atu anō ia ehara nei i ēnei.
DAN 11:5 “Nā, ka kaha te kīngi o te tonga, me tētahi o āna rangatira; ka neke ake anō tōna kaha ki runga ake i tō tērā, ā, ka kīngi; hei kīngitanga nui tōna kīngitanga.
DAN 11:6 Nā, i te mutunga o ngā tau ka honoa rāua, ka haere mai hoki te tamāhine a te kīngi o te tonga, ki te kīngi o te raki ki te whakarite tikanga. Otiia, e kore e mau i taua wahine te kaha o tōna ringa; e kore anō e tū te tāne me tōna ringa. Heoi, ka tukua atu te wahine, me te hunga nāna ia i kawe mai, me te matua tāne nāna nei ia, me tōna kaiwhakakaha i aua wā.
DAN 11:7 “Otiia tērā e tū ake tētahi i tōna wāhi, he manga nō ngā pakiaka o te wahine, ā, ka haere mai ki te taua, ka tomo ki te pā o te kīngi o te raki, ā, ka mahi i roto i a rātou, ka kaha anō.
DAN 11:8 Ka whakaraua anō e ia ō rātou atua, ā rātou whakapakoko whakarewa, ā rātou oko anō hoki e matenuitia ana, ngā mea hiriwa, ngā mea kōura, ka kawea ki Īhipa; ā, ka mutu tāna whawhai ki te kīngi o te raki mō ētahi tau.
DAN 11:9 Ā, ka haere ia ki te kīngitanga o te kīngi o te tonga, engari ka hoki anō ia ki tōna ake whenua.
DAN 11:10 “Nā, ka whawhai āna tama, ā, ka huihuia e rātou he ope, he maha ngā taua. Nā, ka haere mai aua ope, kei te waipuke te rite, ā, puta rawa atu. Ā, ka hoki rātou, ka whawhai, ā tae tonu ki tō tērā pā.
DAN 11:11 Nā, ka riri te kīngi o te tonga, ā, ka puta mai, ka whawhai ki a ia, arā, ki te kīngi o te raki; ā, he nui te ope e ara i tēnei, ā, ka hoatu te ope ki tō tērā ringa.
DAN 11:12 Ā, ka whakaarahia te ope, ka kake tōna ngākau; ā, ka whakatakā e ia ngā mano tini, otiia e kore ia e whai kaha.
DAN 11:13 Nā, ka hoki mai te kīngi o te raki, maha atu hoki i ō mua te ope e ara i a ia; ā, ka tae mai ia i te mutunga o ētahi wā, arā o ngā tau, he nui tāna ope, he nui ngā taonga.
DAN 11:14 “I aua wā he tokomaha e whakatika ki te kīngi o te tonga. Ka whakakake anō ngā tama tutū o tōu iwi, kia tutuki ai te kite rā; otiia ka taka rātou.
DAN 11:15 Heoi, ka haere mai te kīngi o te raki; ka haupūria ake anō he pukepuke e ia, ā, ka riro i a ia te pā he nui rawa nei te taiepa. E kore anō ngā ringa o te tonga e ū, e kore anō tāna iwi i whiriwhiri ai, kāhore he kaha e ū ai.
DAN 11:16 Otiia, ko tēnei ka haere mai nei ki a ia, ka mahia e ia tāna e pai ai, e kore anō tētahi e tū ki tōna aroaro. Nā, ka tū ia ki te whenua ātaahua, ā, kei tōna ringa te whakangaromanga.
DAN 11:17 Ka anga anō tōna mata, ka mea kia haere mai ia i runga i te kaha o tōna kīngitanga katoa, me te hunga tika anō hei hoa mōna; nā, ka mahi ia i tāna e pai ai. Ka hōmai anō e ia ki a ia te tamāhine a ngā wāhine, hei takakino māna. Otiia, e kore tērā e tū, e kore hoki e mahi mōna.
DAN 11:18 I muri i tēnei ka tahuri tōna mata ki ngā motu, ā, he maha e riro i a ia. Otiia, mā tētahi rangatira e mea kia mutu te ingoa kino e tāpaea ana e ia. Āe rā, ka meinga e ia tāna whakaingoa kino kia hoki ki a ia anō.
DAN 11:19 Kātahi tōna mata ka tahuri atu ki ngā pā o tōna whenua; otiia ka tūtuki ōna waewae, ā, ka hinga ia, kore ake e kitea.
DAN 11:20 “Kātahi ka tū ake i tōna wāhi tētahi māna e mea he kaitono takoha kia takahi i roto i te korōria o te kīngitanga. Otiia, kia torutoru ake ngā rā ka whakangaromia ai, kāhore he riri, kāhore hoki he whawhai.
DAN 11:21 Ka whakatika ake anō ki runga ki tōna wāhi tētahi tangata e whakahāweatia ana, ehara nei te korōria o te rangatiratanga i te mea hoatu ki a ia. Ka haere mai ia i te wā āta noho, ā, ka riro i a ia te kīngitanga, nā te patipati.
DAN 11:22 Ā, ka taupokina rātou e ngā ringa o te waipuke i tōna aroaro, mongamonga noa rātou; me te rangatira anō hoki o te kawenata.
DAN 11:23 I muri anō i tāna whakaaetanga kōrero ka mahi tinihanga ia. Ka haere mai hoki ia, ā, ka kaha, he torutoru anō hoki āna tāngata.
DAN 11:24 Hei te wā āta noho ka tae mai ia ki ngā wāhi mōmona rā anō o te kāwanatanga; ka mahia e ia ngā mea kīhai i mahia e ōna mātua, e ngā mātua o ōna mātua; ka tītaria anō e ia ngā mea parakete, ngā mea pāhua, ngā taonga, ki roto ki a rātou. Āe rā, ka whakaaroa anō e ia ōna whakaaro mō ngā pā, ā, kia taka rā anō tētahi tāima.
DAN 11:25 “Ka whakaohokia anō e ia tōna kaha me tōna māia ki te whawhai ki te kīngi o te tonga, he nui te ope; ka oho anō hoki te kīngi o te tonga, ka whawhai, he ope nui atu, he kaha atu; otiia e kore ia e tū. Nō te mea ka whakaaroa e rātou he whakaaro kino mōna.
DAN 11:26 Inā, ka pakaru ia i te hunga i kai i tāna wāhi kai, ko te taua hoki a tērā kei te waipuke te rite. He tokomaha anō e hinga, mate rawa.
DAN 11:27 Nā, ko ēnei kīngi tokorua, ko ō rāua ngākau ka mea mō te kino, ā, ka kōrero teka rāua i te tēpu kotahi; otiia kāhore he painga; ka noho tonu mai hoki te mutunga, hei te wā i whakaritea.
DAN 11:28 Hei reira ia ka hoki ki tōna whenua me ngā taonga maha; ā, ko tōna ngākau ka mea ki te takahi i te kawenata tapu; ka mahi ia i tāna e pai ai, ā, ka hoki atu ki tōna whenua.
DAN 11:29 “I te wā i whakaritea ka hoki ia, ā, ka haere mai ki te tonga; otiia e kore e rite tō muri nei ki tō mua rā.
DAN 11:30 Nō te mea ka rere mai ngā kaipuke o Kitimi ki te whawhai ki a ia. Nā, ka pōuri ia, ā, ka hoki, ka riri ki te kawenata tapu, ā, ka mahi ia i tāna e pai ai; ā, ka tino hoki ia, ka whai whakaaro ki te hunga i whakarērea ai te kawenata tapu.
DAN 11:31 “Ka ara anō ētahi ringa hei whakauru mōna, ā, ka whakapokea te wāhi tapu, arā te wāhi kaha, ka whakakāhoretia anō e rātou te patunga tapu, te mea tūturu, ka tū anō i a rātou te mea whakarihariha, te mea whakangaro.
DAN 11:32 Nā, ko te hunga e mahi kino ana ki te kawenata ka whakangaua kētia e ia, he mea whakapati nāna; ko te hunga ia e mōhio ana ki tō rātou Atua, ka kaha rātou, ka mahi i ngā mahi.
DAN 11:33 “Nā, ko te hunga whakaaro nui i roto i te iwi, he tokomaha a rātou e whakaako ai. Otiia, he maha ngā rā e hinga ai rātou i te hoari, i te mura, i te whakarau, i te pāhua.
DAN 11:34 Ā, ka hinga rātou, ka āwhinatia mai rātou, he iti ia te āwhina. He tokomaha ia e piri ki a rātou, he mea whakapati.
DAN 11:35 Ka hinga anō ētahi o te hunga mātau, he mea e tahia ai tō rātou para, e pokekore ai, e mā ai rātou, ā taea noatia te wā a te whakamutunga. Nō te mea ko taua mea mō te wā rā anō i whakaritea.
DAN 11:36 “Ka mahia anō e te kīngi tāna e pai ai; ka whakaneke ake anō i a ia, ka whakanui i a ia ki runga ake i ngā atua katoa, he whakamīharo anō āna whakapehapeha mō te Atua o ngā atua. Ka kake anō ia, taea noatia te whakapōtonga o te riri. Ka mahia hoki te mea i whakaritea.
DAN 11:37 E kore anō ia e whai whakaaro ki ngā atua o ōna mātua, e hiahia rānei ki te wahine, e kore anō e whai whakaaro ki tētahi atua. Nō te mea ko ia tāna e whakanui ai ki runga ake i te katoa.
DAN 11:38 Otiia, i tōna wāhi anō ka whakahōnoretia e ia te atua o ngā wāhi kaha; he atua kīhai i mōhiotia e ōna mātua tāna e whakahōnore ai ki te kōura, ki te hiriwa, ki te kōhatu utu nui, ki ngā mea e matenuitia ana.
DAN 11:39 Ko tāna tēnei e mea ai i ngā wāhi tino kaha, ā, ko tōna hoa ko tētahi atua kē. Ko te tangata e whakaae ana ki a ia ka whakanuia e ia ki te korōria. Ā, ka meinga rātou e ia hei kāwana mō ngā tāngata tokomaha ka wehewehea anō hoki e ia te whenua mō tētahi utu.”
DAN 11:40 “Ā, i ngā wā o te mutunga ka whawhai te kīngi o te tonga ki a ia; ā, ka kōkiri mai te kīngi o te raki ānō he paroro te rite, me ngā hāriata, me ngā kaieke hōiho, me ngā kaipuke maha; ā, ka tomo ia ki ngā whenua, ka pāha me te waipuke, ā, tika tonu atu.
DAN 11:41 Ka tae anō ia ki te whenua ātaahua, ā, he maha ngā whenua e hinga. Ko ēnei ia e mawhiti i roto i tōna ringa, ko Ēroma, ko Moapa, ko ngā upoko o ngā tama a Āmona.
DAN 11:42 Ka totoro anō tōna ringa ki ngā whenua; e kore anō te whenua o Īhipa e mawhiti.
DAN 11:43 Otiia, ka noho ko ia hei rangatira mō ngā taonga, arā mō te kōura, mō te hiriwa, mō ngā mea katoa o Īhipa e matenuitia ana; ā, ka whai ngā Rūpimi me ngā Etiopiana i ōna takahanga.
DAN 11:44 Otiia, ka raruraru ia i ngā kōrero i te rāwhiti, i te raki; nā, he nui te riri e puta mai ai ia, ā, he tokomaha ana e whakangaro ai, e huna ai.
DAN 11:45 Ā, ka whakatūria e ia ngā tēneti o tōna whare kīngi, ki waenganui o te moana, o te maunga tapu ātaahua; otiia ka tae ia ki tōna mutunga, kāhore hoki he āwhina mōna.”
DAN 12:1 “Ā, i taua wā ka whakatika a Mikaera, te rangatira nui e tū nei hei hoa mō ngā tama a tōu iwi. Nā, he wā raruraru taua wā, kāhore mai i mua i te wā i whai iwi ai ā taea noatia taua wā nei; hei taua wā ka mawhiti tōu iwi, te hunga katoa e kitea kua oti te tuhituhi ki te pukapuka.
DAN 12:2 Nā, he tokomaha o te hunga e moe ana i te puehu o te oneone e ara ake, ko ētahi ki te ora tonu, ko ētahi ki te whakamā, ki te whakarihariha, mutungakore.
DAN 12:3 Ā, ka tīaho te hunga whakaaro nui ānō kei te tīaho o te kikorangi. Me te hunga hoki nāna i anga ai ngā tāngata tokomaha ki te tika, ka rite rātou ki ngā whetū ā ake ake.
DAN 12:4 Ko koe ia, e Raniera, kopia ngā kupu, hīritia anō te pukapuka ā taea noatia te mutunga. He tokomaha e kōpikopiko, ka nui haere anō te mātauranga.”
DAN 12:5 Kātahi ahau, a Raniera, ka titiro, nā, ko ētahi atu tokorua e tū ana, ko tētahi i tēnei taha o te parenga o te awa, ko tētahi i tērā taha o te parenga o te awa.
DAN 12:6 Nā, ko te meatanga a tētahi ki te tangata i te kākahu rīnena, ki tērā i runga i ngā wai o te awa, “Ko āhea rā anō te mutunga o ēnei mea whakamīharo?”
DAN 12:7 Ā, i rongo ahau i tā te tangata i te kākahu rīnena, i tā tērā i runga i ngā wai o te awa, i te aranga o tōna matau, o tōna mauī whaka te rangi. Ā, oatitia ana e ia mā tērā e ora tonu ana ake ake, kia taka rā anō tētahi wā, ngā wā, me te hāwhe; ā, kia oti tā rātou tukituki i te kaha o te iwi tapu, kātahi ka oti ēnei katoa.
DAN 12:8 Ā, ka rongo ahau, engari kīhai i mātau; kātahi ahau ka mea, “E tōku Ariki, he aha rā te mutunga o ēnei mea?”
DAN 12:9 Kātahi tērā ka kī mai, “Haere, e Raniera, kua oti hoki ngā kupu te kokopi atu, hīri rawa ā taea noatia te wā o te mutunga.
DAN 12:10 He tokomaha e mea i a rātou kia pokekore, kia mā, kia parakore; engari ko te hunga kino ka mahi i te kino, ā, e kore tētahi o te hunga kino e mātau; ko te hunga whai whakaaro ia ka mātau.
DAN 12:11 “Nā, mai o te wā e whakakāhoretia ai te patunga tapu tūturu, e tū ai te mea whakarihariha, te mea whakangaro kotahi mano e rua rau e iwa tekau ngā rā.
DAN 12:12 Ka hari te tangata e tatari ana, ā, ka tutuki ki ngā rā kotahi mano e toru rau e toru tekau mā rima.
DAN 12:13 “Nā, haere kia taea rā anō te mutunga; ka okioki hoki koe, ā, ka tū ki tōu wāhi i te mutunga o ngā rā.”
HOS 1:1 Ko te kupu a Ihowā i puta ki a Hōhea tama a Peeri i ngā rā o ngā kīngi o Hūrā, arā o Utia, o Iotama, o Ahata, o Hetekia, i ngā rā hoki o Ieropoama, tama a Ioaha kīngi o Īharaira.
HOS 1:2 I te kōrerotanga ai a Ihowā i te tuatahi, he mea kōrero nā Hōhea, i mea a Ihowā ki a Hōhea, “Haere, tangohia tētahi wahine māu, he mea kairau, ētahi tamariki anō, he mea nā te kairau. He nui hoki te kairautanga i kairau ai te whenua i te mea ka whakarērea nei a Ihowā.”
HOS 1:3 Nā, haere ana ia, tīkina ana e ia a Kōmere tamāhine a Ripiraima; nā, kua hapū tērā, kua whānau tā rāua tama.
HOS 1:4 Nā, ka mea a Ihowā ki a ia, “Huaina tōna ingoa, ko Ietereere; nō te mea tēnei ake, he wā poto nei, ka rapu utu ahau mō te toto o Ietereere i te whare o Iehu, ka whakamutua anō e ahau te kīngitanga o te whare o Īharaira.
HOS 1:5 I taua rā, ka whati i ahau te kōpere a Īharaira ki te raorao o Ietereere.”
HOS 1:6 Nā, kua hapū anō ia, whānau ake he tamāhine. Ā, ka mea a Ihowā ki a ia, “Huaina tōna ingoa, ko Roruhama; nō te mea e kore e atawhaitia e ahau te whare o Īharaira ā muri ake nei, e murua rānei e ahau tētahi wāhi a rātou.
HOS 1:7 Engari te whare o Hūrā ka atawhaitia e ahau, ka meinga anō e ahau a Ihowā, tō rātou Atua, hei whakaora i a rātou; e kore e meinga e ahau te kōpere, te hoari, te whawhai, ngā hōiho, ngā kaieke hōiho rānei hei whakaora i a rātou.”
HOS 1:8 Ā, ka whakamutua e ia tā Roruhama kai ū, ka hapū ia, ā, whānau ake he tama.
HOS 1:9 Nā, ka mea a Ihowā, “Huaina tōna ingoa ko Roami; ehara hoki koutou i te iwi nāku, ehara anō hoki ahau i te Atua nō koutou.”
HOS 1:10 “Ka rite anō ia te tokomaha o ngā tama a Īharaira ki te onepū o te moana e kore nei e mēhuatia, e kore e tāua. Nā, i te wāhi i kōrerotia ai ki a rātou, ‘Ehara koutou i te iwi nāku,’ ko reira anō te kupu ki a rātou, ‘He tama koutou nā te Atua ora.’
HOS 1:11 Ko reira anō ngā tama a Hūrā rātou ko ngā tama a Īharaira huihui ngātahi ai, whiriwhiri ai i te upoko kotahi mō rātou, ka haere mai anō rātou i te whenua; nō te mea he nui te rā o Ietereere.”
HOS 2:1 “Mea atu koutou ki ō koutou tuākana, ‘Ami,’ ki ō koutou tuāhine, ‘Ruhama.’ ”
HOS 2:2 “Whakawākia tō koutou whaea, whakawākia, ehara hoki ia i te wahine nāku, ehara anō ahau i te tahu nāna. Nā, kia whakarērea e ia ōna moepuku i tōna aroaro, ōna pūremu i waenga ōna ū.
HOS 2:3 Kei tangohia ōna e ahau, ā, ka noho tahanga ia, kei meinga anō ia kia rite ki te rā i whānau ai ia; kei meinga ia e ahau kia rite ki te koraha, kei waiho ia hei whenua waikore, ā, ka mate i te matewai.
HOS 2:4 Āe rā, e kore āna tamariki e tohungia e ahau; nō te mea he tamariki rātou nā te moepuku.
HOS 2:5 Kua kairau nei hoki tō rātou whaea; he mahi whakamā tā te wahine i whānau ai rātou. I mea hoki ia, ‘Ka whāia e ahau te hunga i aroha ki ahau, i hōmai nei i te taro māku, i te wai mōku, i te huruhuru hipi māku, i te muka māku, i te hinu māku, i te mea hei inu māku.’
HOS 2:6 “Mō reira tēnei ahau te tūtaki nei i tōu ara ki te tātarāmoa, te hanga nei i te taiepa e kore ai ia e kite i ōna ara.
HOS 2:7 Ka whāia anō e ia āna i aroha ai, heoi, e kore e mau i a ia; ka rapua rātou e ia, otiia e kore e kitea. Kātahi ia ka mea ake, ‘Ka haere ahau ka hoki ki tāku tahu tuatahi; nui ake hoki tō reira pai ki ahau i tō nāianei.’
HOS 2:8 Kīhai rā hoki ia i mōhio nāku i hoatu te wīti ki a ia, te wāina, me te hinu, nāku anō i whakanui te hiriwa māna, me te kōura, tā rātou i mahi nei hei mea mā Paara.
HOS 2:9 “Mō reira ka hoki ahau, ka tango i tāku wīti i tōna wā anō, i tāku wāina i tōna wā anō, ka riro anō i ahau tāku huruhuru hipi me tāku muka i hīpokina ai ia i a ia e noho tahanga ana.
HOS 2:10 Nā, ākuanei ka whakakitea e ahau tāna mahi wairangi ki ngā kanohi o āna i aroha ai, e kore anō tētahi tangata e whakaora i a ia i roto i tōku ringa.
HOS 2:11 Ka mutu katoa anō i ahau tōna koa, ōna rā hākari, ōna kōwhititanga marama, ōna hāpati, me āna huihui nunui katoa.
HOS 2:12 Ka ururua anō i ahau āna wāina, me āna piki, ngā mea i kī ai ia, ‘Ko ōku utu ēnei, he mea hōmai nā āku i aroha ai.’ Ā, ka meinga e ahau hei ngahere, ā, ka kainga e ngā kīrehe o te pārae.
HOS 2:13 Ka whiua anō ia e ahau mō ngā rā o ngā Paarimi, mō ērā i tahu whakakakara ai ia ki a rātou; ā, whakapaipai ana i a ia ki ōna whakakai, ki āna whakapaipai, haere ana ki te whai i āna i aroha ai, ā, wareware ake ki ahau,” e ai tā Ihowā.
HOS 2:14 “Mō reira, nanā, ka whakawai ahau i a ia, ka kawe i a ia ki te koraha, ka kōrero whakamārie anō ki a ia.
HOS 2:15 Ka hoatu anō e ahau ētahi māra wāina ki a ia i reira, me te raorao o Ākoro hei kūwaha mō te tūmanako. Ā, ka whakahoki kupu ia ki reira, ka pērā me tō ngā rā o tōna tamarikitanga, me tō te rā hoki i haere mai ai ia i te whenua o Īhipa.
HOS 2:16 “Nā, i taua rā,” e ai tā Ihowā, “ka karangatia ahau e koe, ‘E Ihi,’ e kore hoki ahau e karangatia e koe, ‘E Paari,’ ā muri ake nei.
HOS 2:17 Nō te mea ka tangohia e ahau ngā ingoa o ngā Paarimi i roto i tōna māngai, e kore anō rātou, ō rātou ingoa, e maharatia ā muri ake nei.
HOS 2:18 Ka whakaritea anō e ahau i taua rā he kawenata, he pai mō rātou, ki ngā kīrehe o te pārae, ki ngā manu o te rangi, ki ngā mea ngōkingōki o te oneone. Ka whati anō i ahau te kōpere, te hoari, te whawhai i runga i te whenua, ā, ka meinga rātou e ahau kia au te takoto.
HOS 2:19 Ka taumautia anō koe e ahau ā ake ake; inā, ka taumautia koe e ahau māku i runga i te tika, i te whakarite whakawā, i te aroha, i te atawhai.
HOS 2:20 Ka taumautia anō koe māku i runga i te pono, ā, ka mōhio koe ki a Ihowā.
HOS 2:21 “I taua rā ka whakarongo ahau,” e ai tā Ihowā, “ka whakarongo ahau ki ngā rangi, ka whakarongo rātou ki te whenua.
HOS 2:22 Ka whakarongo anō te whenua ki te wīti, ki te wāina, ki te hinu; ā, ka whakarongo ērā ki a Ietereere;
HOS 2:23 ka whakatō anō ahau i a ia māku ki te whenua. Ka tohu i tēnei kīhai nei i tohungia, ka kī atu anō ki te hunga ehara nei i te iwi nāku, ‘ko koe tāku iwi,’ ā, ka mea ērā, ‘Ko koe tōku Atua.’ ”
HOS 3:1 I mea anō a Ihowā ki ahau, “Tēnā anō haere, arohaina tētahi wahine e arohaina ana e te tangata, he wahine pūremu; kia rite ki te aroha o Ihowā ki ngā tama a Īharaira, ahakoa e anga atu ana ki ngā atua kē, ā, e matenui ana ki ngā keke karepe maroke.”
HOS 3:2 Nā, hokona ana ia e ahau māku ki ngā pīhi hiriwa kotahi tekau mā rima ki te homa pārei, me te hāwhe homa pārei.
HOS 3:3 Ā, ka kī atu ki a ia, “Kia maha ngā rā e noho ai koe he mea taumau māku; kaua e kairau, kaua anō e riro i te tangata; ka pēnā anō ahau ki a koe.”
HOS 3:4 He maha hoki ngā rā e noho ai ngā tama a Īharaira, kāhore he kīngi, kāhore he rangatira, kāhore he patunga tapu, kāhore hoki he pou, kāhore he epora, kāhore he terapimi.
HOS 3:5 Muri iho ka hoki mai ngā tama a Īharaira, ka rapu i a Ihowā, i tō rātou Atua, i a Rāwiri anō, i tō rātou kīngi. Ka haere mai i runga i te wehi ki a Ihowā, ki tōna pai anō i ngā rā whakamutunga.
HOS 4:1 Whakarongo ki te kupu a Ihowā, e ngā tama a Īharaira; he tautohe hoki tā Ihowā ki ngā tāngata o te whenua. “Nō te mea kāhore he pono, kāhore he tohu tangata, kāhore he mātauranga ki te Atua i te whenua.
HOS 4:2 Te oati, te kōrero teka, te kōhuru, te tāhae, te pūremu, pakaru mai ana rātou; te toto, pā tonu ki te toto.
HOS 4:3 Mō reira te whenua ka pōuri, ko ōna tāngata katoa ka tangi, me ngā kīrehe o te pārae, me ngā manu o te rangi; ka whakakorea anō ngā ika o te moana.
HOS 4:4 “Kaua ia te tangata e whakawā, e whakahē i tētahi tangata: e rite ana hoki tōu iwi ki te hunga e totohe ana ki te tohunga.
HOS 4:5 Nā, ka hinga koe i te awatea, me te poropiti, ka hinga ngātahi kōrua i te pō; ka whakangaromia anō hoki e ahau tōu whaea.
HOS 4:6 Ka ngaro tāku iwi i te kore mātauranga; kua paopao nā koe ki te mātauranga, nā, ka paopao anō ahau ki a koe hei tohunga māku. Kua wareware nā koe ki te ture a tōu Atua, ka wareware anō ahau ki āu tamariki.
HOS 4:7 “I te mea ka nui rātou, kātahi rātou ka hara ki ahau; whakaputaina kētia ana e ahau tō rātou korōria hei whakamā.
HOS 4:8 Ko te hara o tāku iwi kainga ake e rātou, ko tō rātou ngākau anga tonu ki tō rātou hē.
HOS 4:9 “Ko te tukunga iho: rite iwi, rite tohunga; ā, ka whiua rātou e ahau mō ō rātou ara, ka utua ā rātou mahi.
HOS 4:10 Ka kai hoki rātou, ā, e kore e mākona; ka moepuku, ā, e kore e tokomaha; mō tā rātou whakarere i ngā mahara ki a Ihowā.
HOS 4:11 Riro pū te hinengaro i te moepuku, i te wāina, i te wāina hou.”
HOS 4:12 “E ui tikanga ana tāku iwi ki ā rātou rākau, ko tō rātou tokotoko anō hoki hei whakaatu tikanga ki a rātou. Kua pōhēhē hoki rātou i te wairua o te moepuku, kua maunu atu i raro i tō rātou Atua ki te pūremu.
HOS 4:13 E patu ana rātou i ngā patunga tapu i runga i ngā tihi o ngā maunga, e tahu whakakakara ana i runga i ngā pukepuke, i raro i ngā oki, i ngā pāpara, i ngā terepini, he pai hoki nō te taumarumarunga iho. Mō reira ka moepuku ā koutou tamāhine, ka pūremu ā koutou wāhine.
HOS 4:14 “E kore ahau e whiu i ā koutou tamāhine ina moepuku, i ā koutou wāhine ina pūremu; ko ngā tāne nei hoki he mea wehe atu ki ngā wāhine moepuku, ko rātou tahi ko ngā wāhine kairau kei te mea patunga tapu. Mō reira ka hinga te iwi kāhore nei ō rātou mātauranga.
HOS 4:15 “Ahakoa koe, e Īharaira, kairau noa, kaua a Hūrā e hē; ā, kaua hoki koutou e haere mai ki Kirikara, kaua hoki e haere ki runga ki Peteawene, ā, kaua e oati, ‘Kei te ora a Ihowā.’
HOS 4:16 Kua whakangutungutu hoki a Īharaira, tōna rite kei te kūao kau e whakatotoi ana; ākuanei rātou whāngaia ai e Ihowā, pērātia ai me te reme i te wāhi whānui.
HOS 4:17 “Kua honoa a Ēparaima ki ngā whakapakoko – tukua atu ki tāna.
HOS 4:18 Ko te mea e inumia ana e rātou kua kawa; he moepuku tonu tā rātou; ā, he whakamā tā ō rātou rangatira e matenui ana.
HOS 4:19 Kua oti ia te kōpaki e te hau ki roto ki ōna parirau; ka whakamā hoki rātou ki ā rātou patunga tapu.”
HOS 5:1 “Whakarongo ki tēnei, e ngā tohunga! Mahara mai, e te whare o Īharaira! Kia whai taringa mai hoki, e te whare o te kīngi! Mō koutou hoki te whakawā; nō te mea kua waiho koutou hei rore ki Mihipa, hei kupenga horahora ki runga ki Taporo,
HOS 5:2 ā, hōhonu ana te hounga o te patu a te hunga tutū; ko ahau ia te kairiri i te hē ō rātou katoa.
HOS 5:3 “E mōhio ana ahau ki a Ēparaima, kāhore a Īharaira e ngaro i ahau; kei te moepuku nei hoki koe ināianei, e Ēparaima, kua poke a Īharaira.
HOS 5:4 E kore hoki rātou e tukua e ā rātou mahi kia hoki ki tō rātou Atua. Kei roto hoki i a rātou te wairua moepuku, kāhore ō rātou mōhio ki a Ihowā.
HOS 5:5 “E whakaaturia ana tā Īharaira e tōna whakapehapeha ki tōna aroaro anō. Nā, ka hinga a Īharaira rāua ko Ēparaima i runga i tō rāua hē, me Hūrā, ka hinga ngātahi rātou.
HOS 5:6 Ka haere rātou me ā rātou hipi, me ā rātou kau, ki te rapu i a Ihowā. Heoi, e kore e kitea; kua mawehe atu ia i roto i a rātou.
HOS 5:7 Kua tinihanga rātou ki a Ihowā; he tamariki tangata kē hoki ā rātou tamariki. Ākuanei ka pau rātou me ā rātou wāhi i te marama kōhiti.
HOS 5:8 “Whakatangihia te koronete ki Kipea, te tētere ki Rama; whakatangihia he whakaoho ki Peteawene; i muri i a koe, e Pineamine.
HOS 5:9 Ka ururua a Ēparaima i te rā e rīria ai te hē; takoto rawa te mea kua whakaaturia nei e ahau i roto i ngā hapū o Īharaira.
HOS 5:10 E rite ana ngā rangatira o Hūrā ki te hunga e whakaneke atu ana i te rohe; ka tāhoroa e ahau tōku riri ki runga ki a rātou ānō he wai.
HOS 5:11 “E tūkinotia ana, e whakapetia ana a Ēparaima i te whakawākanga, mōna i pai ki te whai i te whakahau.
HOS 5:12 Nā reira, ka rite tāku ki a Ēparaima ki tā te pūrehurehu, ka rite hoki ki te pirau tāku ki te whare o Hūrā.
HOS 5:13 “I te wā i kite ai a Ēparaima i tōna mate, a Hūrā hoki i tōna marūtanga. Nā, haere ana a Ēparaima ki Ahiria, tuku tāngata ana ia ki a Kīngi Iarepe. Heoi, e kore koutou e taea e ia te rongoā, e kore hoki e ora i a ia tō koutou marūtanga.
HOS 5:14 Ka rite hoki tāku ki a Ēparaima ki tā te raiona, tāku ki te whare o Hūrā ka rite ki tā te kūao raiona. Ka haehae ahau, inā, ahau anō, ā, ka haere; ka maua atu e ahau, ā, kāhore he kaiwhakaora.
HOS 5:15 Ka haere ahau ka hoki ki tōku wāhi, kia whakaae rā anō rātou ki tō rātou hē, kia rapua rā anō tōku mata e rātou. Ā, i a rātou e mate ana, kaha tonu tā rātou rapu i ahau.”
HOS 6:1 “Haere mai, tātou ka hoki ki a Ihowā: nāna hoki i haehae, ā, māna tātou e rongoā; nāna i patu, māna anō tātou e takai.
HOS 6:2 Kia rua ngā rā ka whakaorangia tātou e ia; i te toru o ngā rā ka whakaarahia tātou e ia, ā, ka ora tātou ki tōna aroaro.
HOS 6:3 Nā, kia mōhio tātou, kia whai atu tātou kia mōhio ai ki a Ihowā; ko tōna putanga tūturu tonu, koia anō kei tō te ata, ko tōna taenga mai ki a tātou rite tonu ki tō te ua, ka rite ki tō muri ua e mākūkū ai te whenua.”
HOS 6:4 “Me pēhea koe e ahau, e Ēparaima? Me pēhea koe e ahau, e Hūrā? Rite tonu hoki tō koutou pai ki te kapua o te ata, ki te tōmairangi o te atatū, e riro wawe atu ana.
HOS 6:5 Nā reira tāku hahau i a rātou ki ngā poropiti; tukitukia ana rātou e ahau ki ngā kupu a tōku māngai; rite tonu anō āu whakaritenga ki te putanga ake o te mārama.
HOS 6:6 Ko tāku hoki i pai ai ko te tohu tangata, hāunga te patunga tapu. Ko te mātau ki te Atua, pai ake i ngā tahunga tinana.
HOS 6:7 “Otiia, kua pērā tā rātou i tā Ārama, kua whakatakā e rātou te kawenata; kua tinihanga rātou ki ahau i reira.
HOS 6:8 He pā a Kireara nō ngā kaimahi i te hē, poke tonu i te toto.
HOS 6:9 Rite tonu hoki ki tā ngā taua pāhua e whanga ana ki te tangata, tā te rōpū o ngā tohunga, kōhuru i te ara ki Hekeme; āe rā, kua mahi rātou i te hē.
HOS 6:10 He hanga whakawehi tāku i kite ai ki te whare o Īharaira; he pūremu e kitea ana ki Ēparaima, kua poke a Īharaira.
HOS 6:11 “Kua rite hoki he kotinga māu, e Hūrā. “Ina whakahokia mai e ahau tāku iwi i te whakarau.”
HOS 7:1 “I ahau e mea ana ki te rongoā i a Īharaira, ka kitea te hē o Ēparaima, te kino hoki o Hamaria. Nō te mea e mahi ana rātou i te teka, e tomo ana hoki te tāhae ki roto, e pāhua ana te taua i waho.
HOS 7:2 Ā, kāhore ā rātou meatanga ake i roto i ō rātou ngākau, kei te mahara tēnei ahau ki tō rātou kino katoa. Kua karapotia rātou ināianei e ā rātou mahi; tēnei anō kei tōku aroaro.
HOS 7:3 “Ka meinga e rātou te kīngi kia koa ki tā rātou kino, ngā rangatira hoki ki ā rātou teka.
HOS 7:4 He hunga pūremu katoa rātou; ko tō rātou rite kei te oumu kua oti te tahu e te kaipokepoke. Ka mutu tāna tūtaki i te ahi, i muri iho i te pokepokenga i te parāoa ā kia rēwenatia rā anō.
HOS 7:5 I te rā o tō tātou kīngi i mate ngā rangatira i a rātou anō, nā te tahu a te wāina; ko tōna ringa mārō tonu i roto i te hunga taunu.
HOS 7:6 Ānō he oumu ō rātou ngākau, i a rātou e whakatata ana, e whanga ana. Pau ake te pō i tā rātou kaipokepoke e moe ana; i te ata kā tonu taua oumu, ānō he mura ahi.
HOS 7:7 Werawera katoa rātou me he oumu, pau ake i a rātou ō rātou kaiwhakawā. Kua hinga katoa ō rātou kīngi; kāhore tētahi o rātou e karanga ana ki ahau.
HOS 7:8 “Ko Ēparaima, kei te hanumi ia ki roto ki ngā iwi; he keke a Ēparaima kīhai i hurihia.
HOS 7:9 Kua pau tōna kaha i ngā tautāngata, heoi kāhore ia e mōhio; inā, kua wero te hina i konei, i ko ōna, ā, kāhore ia e mōhio.
HOS 7:10 Ko te whakapehapeha o Īharaira e whakaatu ana ki tōna aroaro. Heoi, kīhai rātou i hoki ki a Ihowā, ki tō rātou Atua, ā, ahakoa ko tēnei katoa, kāhore rātou i rapu i a ia.”
HOS 7:11 “E rite ana hoki a Ēparaima ki te kūkupa wairangi, kāhore nei ōna ngākau; e karanga ana rātou ki Īhipa, e haere ana rātou ki Ahiria.
HOS 7:12 Ka haere rātou, ka pōtaea e ahau tāku kupenga ki runga ki a rātou; ka riro rātou i ahau ki raro, ka pērā i ngā manu o te rangi; ka whiua rātou e ahau, ka pērātia me tā ō rātou whakaminenga i rongo ai.
HOS 7:13 Auē te mate mō rātou, kua rere atu nei hoki rātou i ahau! Ko te ngaromanga mō rātou, mō tā rātou takahi i tāku i hokona anō rātou e ahau, heoi kei te kōrero rātou i ngā kupu teka mōku.
HOS 7:14 “Kāhore hoki rātou i karanga ki ahau, he mea nā ō rātou ngākau, engari e auē ana rātou i runga i ō rātou moenga; e huihui ana rātou, he whakaaro ki te wīti, ki te wāina, ā, e whakakeke ana rātou ki ahau.
HOS 7:15 Ako noa ahau, whakakaha noa i ō rātou ringa, heoi kino tonu tō rātou whakaaro mōku.
HOS 7:16 E hoki ana rātou, ehara ia i te mea ki a ia i runga rawa; ko tō rātou rite kei te kōpere tinihanga. Ka hinga ō rātou rangatira i te hoari, he āritarita hoki nō tō rātou arero. Hei mea tēnei e kataina ai rātou ki te whenua o Īhipa.”
HOS 8:1 “Meinga te tētere ki tōu māngai! Ka rite ia ki te ēkara, ina whakaekea e ia te whare o Ihowā; mō rātou i whakataka i tāku kawenata, i takahi i tāku, ture.
HOS 8:2 Tērā rātou e karanga ki ahau, ‘E tōku Atua, e mōhio ana mātou, a Īharaira, ki a koe!’
HOS 8:3 Kua ākiritia e Īharaira te mea pai; ka whāia ia e te hoariri.
HOS 8:4 “Ko tā rātou whakarite kīngi ehara i te mea nāku, ko tā rātou whakarite rangatira ehara i te mea i mōhiotia e ahau. Kua hangā e rātou tā rātou hiriwa, ko tā rātou kōura hei whakapakoko mā rātou, he mea e hātepea ai rātou.
HOS 8:5 Kua ākiritia e ia tāu kūao kau, e Hamaria. Kua mura tōku riri ki a rātou. Kia pēhea ake te roa ka tae ai rātou ki te harakore?
HOS 8:6 Nā Īharaira nei hoki taua kūao nā, he mea hanga nā te kaimahi; nā ehara ia i te Atua. Āe rā, ka pakaru rikiriki te kūao o Hamaria.
HOS 8:7 “Nā, ko tā rātou i whakatō ai ko te hau, ko tā rātou e kokoti ai ko te paroro. Kāhore ōna wīti e tupu ana; e kore te kōpuku e whai parāoa. Ki te whai parāoa, ka horomia e ngā tautāngata.
HOS 8:8 “Kua horomia a Īharaira; kua rite rātou ināianei i roto i ngā tauiwi ki te oko kīhai i manakohia.
HOS 8:9 Kua riro hoki rātou ki Ahiria, anō he kāihe mohoao, he moke, ko ia anake; kua utua e Ēparaima ētahi hei whaiāipo.
HOS 8:10 Āe rā, ahakoa utu noa rātou i roto i ngā iwi, ka kohikohia anō rātou e ahau āianei; ā, ka tīmata rātou te iti haere, i te pīkaunga a te kīngi o ngā rangatira.
HOS 8:11 “Kua maha nei ngā āta a Ēparaima hei mea hara, nā, ka waiho ngā āta hei hara mōna.
HOS 8:12 Ahakoa tuhituhia e ahau māna tāku ture kia tekau mano ngā tikanga, kei te kīia aua mea he mea rerekē.
HOS 8:13 Nā, ko ngā patunga tapu hei whakahere ki ahau, e patu kikokiko ana rātou, kainga iho; otiia kāhore e manakohia ana e Ihowā. Ākuanei ia mahara ai ki tō rātou hē, whiu ai i ō rātou hara; ka hoki rātou ki Īhipa.
HOS 8:14 “Kua wareware hoki a Īharaira ki tōna kaihanga, ā, kei te hanga temepara; kua meinga e Hūrā kia maha ngā pā taiepa; otiia ka tukua atu e ahau he ahi ki runga ki ōna pā, ā, ka kainga e tērā ōna whare kīngi.”
HOS 9:1 Kei koa koe, e Īharaira! Kei whakamanamana, kei pērā me ērā atu iwi; kua whakarērea nā hoki e koe tōu Atua, kua pūremu. Arohaina ana e koe te utu i ngā wāhi katoa e patua ai te wīti.
HOS 9:2 E kore rātou e whāngaia e te patunga wīti, e te poka wāina, ā, ka tinihanga tāna wāina hou.
HOS 9:3 E kore rātou e noho ki te whenua o Ihowā; engari ka hoki a Ēparaima ki Īhipa; ā, ka kai rātou i te mea poke ki Ahiria.
HOS 9:4 E kore e ringihia e rātou he ringihanga wāina ki a Ihowā, e kore anō aua mea e arongia e ia. Ko ā rātou patunga tapu ka pērā ki a rātou me te taro tangi tūpāpaku; ka poke katoa te hunga e kai ana. Ko tā rātou taro hoki hei mea mō tō rātou hiakai; e kore e tae ki roto ki te whare o Ihowā.
HOS 9:5 Ka pēhea koutou i te rā o te huihui nui, ā, i te rā o tā Ihowā hākari?
HOS 9:6 Nanā, kua riro rātou, kei ngaro, otiia ka kohikohia rātou e Īhipa, ka tanumia e Memepihi. Ko ā rātou mea āhuareka, hiriwa, ka riro i te ongaonga; ka tupu te tātarāmoa ki ō rātou tēneti.
HOS 9:7 Kua tae mai ngā rā o te tirotiro, kua tae mai ngā rā whakautu; ka mōhio a Īharaira, “He wairangi te poropiti, he haurangi te tangata i te wairua.” He nui hoki nō tōu kino, he nui nō te mauāhara.
HOS 9:8 He kaitūtei a Ēparaima, i tōku Atua ia; ko te poropiti, he māhanga ia nā te kaiāhere manu i ōna ara katoa, he mauāhara i roto i te whare o tōna Atua.
HOS 9:9 Kua heke tō rātou tupu, ā, aua noa iho ki raro, e rite ana ki ngā rā i Kipea. Ka mahara ia ki tō rātou hē, ka tirotirohia e ia ō rātou hara.
HOS 9:10 “I tōku tūtakina ki a Īharaira, i rite rātou ki te karepe i te koraha. I tōku kitenga i ō koutou mātua i rite rātou ki te mātāmua o te piki i te mea kātahi nei ka hua. Heoi, haere ana rātou ki a Paara-Peoro, nā, wehe ana rātou i a rātou ki taua hanga whakamā, mea ana kia whakarihariha rātou kia rite ki tā rātou i matenui ai.
HOS 9:11 “Tēnā ko Ēparaima, ka rere ā-manu atu tō rātou korōria – kāhore he mea e whānau, kāhore he tamaiti i te kōpū, ā, kāhore he hapūtanga.
HOS 9:12 Ahakoa whakatupu noa rātou i ā rātou tamariki, ka kore i ahau, ā, kore iho he tangata e mahue. Inā, auē te mate mō rātou ua mahue rātou i ahau!
HOS 9:13 Ko Ēparaima, rite tonu ki tōku kitenga i Tāira, he mea whakatō ki te wāhi pai. Otiia, ka kawea āna tama e Ēparaima ki waho, ki te kaikōhuru.”
HOS 9:14 Hoatu ki a rātou, e Ihowā – ko te aha e hoatu e koe ki a rātou? Hoatu ki a rātou he kōpū whakatahe, he ū maroke.
HOS 9:15 “Kei Kirikara tō rātou kino katoa; ā, kino iho ahau ki a rātou ki reira. Ka hē nei ā rātou mahi, ka peia rātou e ahau i roto i tōku whare. Heoi anō ōku aroha ki a rātou; he hunga whakakeke ō rātou rangatira katoa.
HOS 9:16 “Kua patua a Ēparaima, kua maroke tō rātou pakiaka, kore ake ō rātou hua. Āe rā, ahakoa whānau noa rātou, ka mate anō i ahau te mea e matenuitia ana, te hua o tō rātou kōpū.”
HOS 9:17 Ka paopao tōku Atua ki a rātou, mō rātou kīhai i rongo ki a ia; ā, ka waiho rātou hei kōpikopiko i roto i ngā tauiwi.
HOS 10:1 He wāina tupu wana a Īharaira, e whakaputa ana i ōna hua. Kua meinga e ia kia maha āna āta kia rite ki te maha o ōna hua; kua hangā e rātou he whakapakoko whakapaipai rite tonu ki te pai o tōna whenua.
HOS 10:2 Kua wehe rua ō rātou ngākau, ākuanei ka kitea tō rātou hē; ka wāhia e ia ā rātou āta, ka pāhuatia ā rātou whakapakoko.
HOS 10:3 He pono ākuanei rātou kī ai, “Kāhore ō tātou kīngi; kāhore hoki tātou i te wehi ki a Ihowā, ā, ko te kīngi – ko te aha tāna mō tātou?”
HOS 10:4 E kōrero ana rātou i ngā kōrero horihori, e oati teka ana i te mea e whakarite whakawā ana; nā reira e rite ana te tupu o te whakawā ki tō te hemoreke i ngā moa o te māra.
HOS 10:5 Mānukanuka tonu ngā tāngata o Hamaria ki ngā kūao kau o Peteawene. Ka tangihia hoki e tōna iwi, e ōna tohunga i whakamanamana nei ki a ia; mō tōna korōria kua memeha atu nei i reira.
HOS 10:6 Ka kawea anō hoki taua kūao ki Ahiria hei hākari ki a Kīngi Iarepe. Ka pā te whakamā ki a Ēparaima, ka whakamā anō a Īharaira ki tāna whakaaro i whakatakoto ai.
HOS 10:7 Nā, ko Hamaria, kua kore tōna kīngi, ānō he pāhuka i runga i te wai.
HOS 10:8 Ka whakakāhoretia anō ngā wāhi tiketike o Āwene, te hara o Īharaira. Ka puta ake te tātarāmoa me te tūmatakuru ki runga ki ā rātou āta, ā, ka mea rātou ki ngā maunga, “Taupokina mātou,” ki ngā pukepuke, “E hinga ki runga ki a mātou.”
HOS 10:9 “E Īharaira, he hara tōu, mai anō i ngā rā i Kipea; tū ana rātou i reira. Kia kore ai rātou e mau ki Kipea i te whawhai ki ngā tama a te kino.
HOS 10:10 Kia hiahia ahau, ka whiua rātou e ahau; ka huihui anō ngā iwi ki te whawhai ki a rātou, i a rātou ka herea nei ki ō rātou hē e rua.
HOS 10:11 “He kūao kau anō a Ēparaima kua oti te whakaako, pai tonu ia ki te takahi wīti; kua tika atu ia ahau i runga i tōna kakī pai. Ka meinga e ahau he kaieke mō Ēparaima; ko Hūrā ki te parau, ko Hākopa ki te wāwāhi i āna pōkuru.
HOS 10:12 Whakatōkia tā koutou i runga i te tika, tapahia i runga i te mahi tohu; mahia tā koutou pātohe. Ko te wā hoki tēnei e rapua ai a Ihowā, kia tae mai rā anō ia, kia ringihia rā anō e ia te tika ki runga ki a koutou.
HOS 10:13 “Ko tā koutou i parau ai ko te kino, ko tā koutou i kokoti ai ko te hē; ko tā koutou kai ko ngā hua o te teka. Nāu hoki i whakawhirinaki ki tōu ara, ki te tini o ōu tāngata mārohirohi;
HOS 10:14 mō reira ka ara he ngangau i roto i ōu iwi, ā, ka pāhuatia ōu pā taiepa katoa, ka rite ki tā Haramana pāhuatanga i Petearapere i te rā o te whawhai; ko te whaea, tāia iho rātou ko ngā tamariki, mongamonga ana.
HOS 10:15 Ko tā Pētēre tēnei e mea ai ki a koutou, he nui nō tō koutou kino. Ka whakangaromia rawatia te kīngi o Īharaira i te atatū.”
HOS 11:1 “I a Īharaira e tamariki ana i aroha ahau ki a ia i reira, ā, karangatia ana e ahau tāku tama i Īhipa.
HOS 11:2 E karanga ana rātou i a rātou, e haere kē atu ana i a rātou. I patu whakahere rātou ki ngā Paarimi, i tahu whakakakara anō ki ngā whakapakoko.
HOS 11:3 “Otiia nāku a Ēparaima i ako ki te haere; i hikitia rātou e ahau ki runga ki ōku ringa; heoi, kīhai rātou i mōhio e rongoā ana ahau i a rātou.
HOS 11:4 He taura tangata āku ki te kukume i a rātou, he here aroha. Ko tāku hoki ki a rātou ko tā te hunga e tango ana i te ioka i ō rātou kauae; i hoatu anō e ahau he kai ki mua i a rātou.
HOS 11:5 “E kore ia e hoki atu ki te whenua o Īhipa; engari ko te Ahiriana hei kīngi mōna, mō rātou kīhai i pai ki te hoki.
HOS 11:6 Ka hāua iho te hoari ki runga ki ōna pā, whakamōtī ai i ōna tūtaki ā pau ake; nā ō rātou whakaaro hoki.
HOS 11:7 Ā, kei te tohe tāku iwi ki te tahuri kē i ahau; ahakoa karangatia rātou ki te mea i Runga Rawa, kāhore tētahi o rātou e whakanui i a ia.
HOS 11:8 “Me pēhea koe ka hoatu whakarere ai e ahau, e Ēparaima? Me pēhea ka tukua ai koe e ahau, e Īharaira? Me pēhea ka meinga ai koe e ahau kia rite ki Arema? Me pēhea ka waiho ai koe kia rite ki Tepoimi? Kua puta kē tōku ngākau i roto i ahau, ngiha tahi anō ōku kōnohinohitanga.
HOS 11:9 E kore tōku riri e mura nei e puta, e kore ahau e hoki ki te whakangaro i a Ēparaima. Ko te Atua hoki ahau, ehara i te tangata, ko te Mea Tapu i waenganui i a koe; kore anō ahau e tomo ki te pā.
HOS 11:10 “Ka whāia e rātou a Ihowā, ā, ka hāmama ia ānō he raiona. Ka hāmama hoki ia, ā, ka haere wiri mai ngā tamariki i te hauāuru.
HOS 11:11 Ka rere wiri mai rātou i Īhipa ānō he manu, i te whenua o Ahiria ānō he kūkupa; ka whakanohoia anō hoki rātou e ahau ki ō rātou whare,” e ai tā Ihowā.
HOS 11:12 Kua oti ahau te karapoti e Ēparaima ki te teka, e te whare o Īharaira ki te tinihanga. Engari, a Hūrā kei runga i tā te Atua tāna tikanga; kei te Mea Tapu ia, pono tonu.
HOS 12:1 Ko tā Ēparaima kai ko te hau, e whāia ana ia te hau marangai; i ngā rā katoa e whakanuia ana e ia te teka me te whakangaro; e whakarite kawenata ana rātou ki te Ahiriana, ā, e kawea ana he hinu ki Īhipa.
HOS 12:2 Nā, he whakawā tā Ihowā ki a Hūrā, ka utaina anō e ia ki runga ki a Hākopa ngā mea rite ki ōna ara; ka rite ki āna mahi tāna utu ki a ia.
HOS 12:3 I roto i te kōpū i hopukia e ia tōna tuakana ki te rekereke; ā, i a ia ka tangata i kaha ia ki te Atua.
HOS 12:4 Āe rā, i kaha ia ki te anahera, ā, taea ana e ia; i tangi ia, i īnoi ki a ia. I tūtaki ia ki a ia ki Pētēre; ā, kōrero ana ia ki a tātou i reira.
HOS 12:5 Arā a Ihowā, te Atua o ngā mano; ko Ihowā tōna maharatanga.
HOS 12:6 Nā reira tahuri koe ki tōu Atua; puritia te mahi tohu me te tika, tatari tonu ki tōu Atua.
HOS 12:7 He kaihokohoko ia, kei tōna ringa ngā pāuna tinihanga; e aroha ana ia ki te tūkino.
HOS 12:8 I mea anō a Ēparaima, “He pono kua whai taonga ahau, kua kitea e ahau he rawa mōku. I āku mahi katoa e kore e kitea e rātou he kino, arā he hara ki ahau.”
HOS 12:9 “Nā, ko Ihowā ahau, ko tōu Atua, nō te whenua o Īhipa mai rā anō; tēnei ake ka meinga anō koe e ahau kia noho tēneti; kia pērā me tō ngā rā o te hākari nui.
HOS 12:10 Kua kōrero anō ahau ki ngā poropiti, ā, kua whakamahangia e ahau ngā whakakitenga; nā te mahi minita a ngā poropiti i kōrero ai ahau i ngā kupu whakarite.”
HOS 12:11 Ko te hara rānei a Kireara? Inā, he mea teka kau rātou; e patu kau ana rātou ki Kirikara hei whakahere. Āe rā, he rite ā rātou āta ki ngā pūranga i ngā moa o ngā māra.
HOS 12:12 I rere anō a Hākopa ki te māra a Arame, ā, mahi ana a Īharaira hei utu wahine; hei utu wahine i tiaki hipi ai ia.
HOS 12:13 I kawea mai anō e Ihowā, arā e te poropiti, a Īharaira i Īhipa, nā te poropiti anō ia i ora ai.
HOS 12:14 I whakapātaritari a Ēparaima ki a ia, kawa rawa; mō reira ka waiho e ia tōna toto i runga i a ia, ka meinga anō tōna ingoa kino e tōna Ariki kia hoki atu ki a ia.
HOS 13:1 I te kōrerotanga a Ēparaima, tērā te tūiri; i whakanui ake ia i a ia i roto i a Īharaira. Engari, kei tōna hēnga i roto i a Paara, ka mate ia.
HOS 13:2 Nā ināianei, kua neke ake tō rātou hara, kua hangā e rātou tā rātou hiriwa hei whakapakoko whakarewa mā rātou, hei whakapakoko e rite ana ki tā rātou i mātau ai, ā, ko taua mea katoa he mahi nā ngā kaimahi: e kōrerotia ana aua mea e rātou, “Me kihi e ngā tāngata e mea patunga tapu ana, ngā kūao kau.”
HOS 13:3 Mō reira ka rite rātou ki te kapua o te ata, ki te tōmairangi hoki e ngaro wawe atu nei, ki te pāpapa hoki e āia atu ana e te paroro i te patunga wīti, ā, ki te paowa hoki o te tumere.
HOS 13:4 “Ko Ihowā anō ia ahau, ko tōu Atua, o te whenua mai rā anō o Īhipa; kaua anō koe e mōhio ki tētahi atua, ko ahau anake, kāhore atu hoki he kaiwhakaora, ko ahau anake.
HOS 13:5 I mōhiotia tonutia koe e ahau i te koraha, i te whenua kāhore rawa nei he wai.
HOS 13:6 Ko tō rātou mākonatanga rite tonu ki te wāhi i kai ai rātou; i mākona rātou, ā, whakakake ana ō rātou ngākau; nā, wareware tonu iho ki ahau.
HOS 13:7 Nā, ko tāku ki a rātou, ka rite ki te raiona; ka tiaki ahau i te ara ānō he reparo.
HOS 13:8 Ko tōku tūtakitanga ki a rātou ka rite ki tō te pea kua tangohia nei āna kūao, ka haea hoki e ahau te taupā o ō rātou ngākau; ā, hei reira ka kainga rātou e ahau ki te kai a te raiona; ka haehaea rātou e te kīrehe o te pārae.
HOS 13:9 “Ko tōu whakangaromanga ia, e Īharaira, he hoariri koe ki ahau, ki tōu kaiāwhina.
HOS 13:10 Kei hea ināianei tōu kīngi, hei whakaora i a koe i roto i ōu pā katoa, ōu kaiwhakawā hoki, ērā i kī rā koe, ‘Hōmai he kīngi me ētahi rangatira ki ahau’?
HOS 13:11 Kua hoatu e ahau he kīngi ki a koe i ahau e riri ana, ā, kua tangohia atu ia e ahau i ahau e āritarita ana.
HOS 13:12 “Ko te hē o Ēparaima, takai rawa; ko tōna hara, rongoā rawa.
HOS 13:13 Ka pā ki a ia ngā mamae o te wahine e whakamamae ana; he tamaiti whakaarokore ia. He wā hoki tēnei kia kaua ia e whakaroa ki te wāhi e pakaru mai ai ngā tamariki.
HOS 13:14 “Ka hokona rātou e ahau ki te kaha o te rēinga, ka utua e ahau kei mate. E te mate, kei hea ōu mate urutā? E te urupā, kei hea tāu whakangaro? Ka hunā atu te rīpenetā i ōku kanohi.
HOS 13:15 “Ahakoa whai hua ia i roto i ōna tēina, ka puta mai te hau, he marangai, ko te manawa o Ihowā e pā mai ana i te koraha, ā, ka maroke tōna mātāpuna, ka mimiti tōna manawa-whenua. Ka pāhuatia e ia ngā taonga o ngā oko katoa e matenuitia ana.
HOS 13:16 Ka whakawahā e Hamaria tōna hara; kua whakakeke hoki ia ki tōna Atua. Ka hinga rātou i te hoari; ka tāia iho ā rātou tamariki, mongamonga ana, ka haehaea hoki ā rātou wāhine e hapū ana.”
HOS 14:1 Hoki mai, e Īharaira, ki a Ihowā, ki tōu Atua; kua taka hoki koe i tōu hē.
HOS 14:2 Tīkina ētahi kupu mā koutou, tahuri mai hoki ki a Ihowā; mea atu ki a ia, “Whakakāhoretia katoatia atu te hē, kia manako mai ki te mea pai; ā, ka hoatu e mātou anō he pūru te whakahere, arā ō mātou ngutu.
HOS 14:3 E kore mātou e ora i a Ahuru; e kore mātou e eke hōiho, ā, heoi anō ā mātou kīanga atu ki te mahi a ō mātou ringa, ‘Ko koutou ō mātou atua,’ e arohaina ana hoki te pani e koe.”
HOS 14:4 “Ka rongoātia e ahau tō rātou tahuri kē, ka aroha ahau ki a rātou, he mea utukore; nō te mea kua tōku riri i a ia.
HOS 14:5 Ko tāku ki a Īharaira ka rite ki te tōmairangi; ka rite tōna tupu ki tō te rengarenga, te totoro o ōna pakiaka ka rite ki tō Repanōna.
HOS 14:6 Ka tautoro ōna manga, ka rite tōna ātaahua ki tō te ōriwa, tōna kakara ki tō Repanōna.
HOS 14:7 Ko te hunga e noho ana i raro i tōna marumaru ka hoki mai; ka ora ake rātou, ka pērā me te wīti, ka rite tō rātou tupu ki tō te wāina. Ko tōna kakara ka rite ki tō te wāina o Repanōna.
HOS 14:8 Tērā a Ēparaima e kī, ‘Hei aha ake māku ngā whakapakoko?’ Kua rongo ahau ki a ia, kua kite i a ia; ko tōku rite kei te kauri matomato; ka kitea ki ahau he hua mōu.”
HOS 14:9 Ko wai te mea whakaaro nui hei mātau ki ēnei mea? Ko wai te mea tūpato e mōhiotia ai? Tika tonu hoki ngā ara a Ihowā, ā, ka haere te hunga tika i reira, ka taka ia te hunga hē i reira.
JOE 1:1 Ko te kupu a Ihowā i puta mai ki a Hoera tama a Petuere.
JOE 1:2 Whakarongo ki tēnei, e ngā kaumātua, kia whai taringa, e ngā tāngata katoa o te whenua. I ō koutou rā rānei tēnei, i ngā rā rānei o ō koutou mātua?
JOE 1:3 Kōrerotia taua mea ki ā koutou tamariki, mā ā koutou tamariki anō hoki e kōrero ki ā rātou tamariki, ā, mā ā rātou tamariki e kōrero ki tētahi atu whakatupuranga.
JOE 1:4 Ko te toenga a te whangawhanga pau ake i te māwhitiwhiti; ko te toenga a te māwhitiwhiti pau ake i te tātarakihi; ā, ko te toenga a te tātarakihi pau ake i te moka.
JOE 1:5 E ara, e te hunga haurangi, e tangi; auē, e ngā kaiinu wāina katoa, ki te wāina hou; kua whakakorea nei hoki mā ō koutou māngai.
JOE 1:6 Kei te haere mai tētahi iwi ki tōku whenua, he kaha, e kore e taea te tatau; ko ōna niho he niho raiona, he niho pūrākau ōna nō te raiona kātua.
JOE 1:7 Kore ake i a ia tāku wāina, ko tāku piki tīhorea ake e ia; poto rawa te peha i a ia, ākiri rawa; ko ōna manga meinga ana kia mā.
JOE 1:8 E tangi, kia rite ki te tamahine kua oti te whītiki ki te kākahu taratara, e tangi ana ki te makau o tōna tamāhinetanga.
JOE 1:9 Kua whakakāhoretia te whakahere totokore me te ringihanga i roto i te whare o Ihowā. Kei te tangi ngā tohunga, ngā minita a Ihowā.
JOE 1:10 Kua hē te māra, kei te tangi te oneone; nō te mea kua mate te wīti, kua maroke te wāina hou, kua kahakore te hinu.
JOE 1:11 Kia whakamā, e ngā kaingaki whenua; auē, e ngā kaimahi wāina, mō te wīti, mō te pārei; kua kore nei hoki ngā hua o te māra.
JOE 1:12 Kua maroke te wāina, kua pūtokitoki te piki; ko te pamekaranete, ko te nīkau, ko te āporo – ko ngā rākau katoa o te whenua, kua maroke; kua maroke nei hoki te koa i roto i ngā tamariki a te tangata.
JOE 1:13 Tātua i a koutou ki te kākahu taratara, e tangi, e koutou e ngā tohunga; auē, e ngā minita o te āta. Haere mai, hei te mea taratara he kākahu mō koutou i te pō, e ngā minita o tōku Atua. Kua kore nei hoki te whakahere totokore me te ringihanga i roto i te whare o tō koutou Atua.
JOE 1:14 Whakatapua he nohopuku, karangatia he hui nui. Whakaminea ngā kaumātua, ngā tāngata katoa o te whenua, ki te whare o Ihowā, o tō koutou Atua, ka karanga ki a Ihowā.
JOE 1:15 Auē te mate o taua rā nei! Kua tata hoki te rā o Ihowā, ka rite hoki tōna putanga mai ki te whakangaromanga a te Kaha Rawa.
JOE 1:16 He teka ianei kua hātepea atu te kai i mua atu i ō tātou kanohi, āe rā, te koa, me te whakamanamana i roto i te whare o tō tātou Atua?
JOE 1:17 Kua pirau te purapura i raro i ngā pōkurukuru; kua takoto kau ngā whare kai, kua pākarukaru ngā whare wīti; nō te mea kua ngingio te wīti.
JOE 1:18 Anō te auē o ngā kararehe! Raruraru ana ngā kāhui kau i te kore wāhi kai mā rātou; āe rā, ko ngā kāhui hipi he noa iho.
JOE 1:19 E Ihowā, ka karanga ahau ki a koe. Kua pau hoki i te ahi ngā wāhi kai o te koraha, kua wera i te mura ngā rākau katoa o te pārae.
JOE 1:20 Āe rā, kei te tangi hoki ngā kararehe o te pārae ki a koe; nō te mea kua maroke ngā awa wai, kua pau hoki i te ahi ngā wāhi kai o te koraha.
JOE 2:1 Whakatangihia te tētere ki Hiona; hei whakaoho ki tōku maunga tapu! Kia wiri ngā tāngata katoa o te whenua; kei te haere mai hoki te rā o Ihowā, kua tata –
JOE 2:2 he rā pōuri, he rā tukupū, he rā kapua, he pōuri kerekere! Ānō ko te ata kua hōrapa noa atu i runga i ngā maunga; he iwi nui, kaha, kāhore ōna rite i mua, kāhore hoki he pērā i ngā wā i muri ā taea noatia ngā tau o ngā whakatupuranga maha.
JOE 2:3 I mua i a rātou ko te ahi e kai ana, i muri i a rātou ko te mura e ngiha ana. Ko te whenua i mua i a rātou me te mea ko te kāri o Erene, ā, i muri i a rātou he koraha ururua; āe rā, kāhore he mea i puta i a rātou.
JOE 2:4 Ko tō rātou āhua kei tō ngā hōiho; ko tā rātou oma rite tonu ki tā te kaieke hōiho.
JOE 2:5 E peke ana rātou, ānō ko te haruru o ngā hāriata i runga i ngā tihi o ngā maunga, ānō ko te haruru o te mura ahi e kai ana i te kakau wīti, ki te iwi kaha kua oti te whakarārangi mō te whawhai.
JOE 2:6 Ka mamae ngā iwi i tō rātou aroaro; ka kōmā ngā kanohi katoa.
JOE 2:7 Ko tā rātou oma rite tonu ki tā ngā mārohirohi; ko tā rātou piki i te taiepa rite tonu ki tā ngā tāngata whawhai. Haere tonu rātou i tōna ara, i tōna ara, kāhore ō rātou ara e korara.
JOE 2:8 Kāhore tētahi e tutetute i tōna hoa; ka haere rātou i tōna ara, i tōna ara; ā, ka huaki rātou mā roto i ngā rākau o te riri, ā, kāhore e tapeka i tō rātou ara.
JOE 2:9 Ka peke rātou ki runga ki te pā; ka oma rātou i runga i te taiepa. Ka piki rātou ki roto ki ngā whare; ka tomo rātou i ngā matapihi, ānō he tāhae.
JOE 2:10 Rū ana te whenua i tō rātou aroaro; wiri ana ngā rangi. Ko te rā me te marama, pōuri tonu, ka mutu anō te titi o ngā whetū.
JOE 2:11 Nā, ka puaki te reo o Ihowā i te aroaro o tāna ope; nui atu hoki tāna puni! He kaha hoki ia e mahi nei i tāna kupu. He nui nei hoki te rā o Ihowā, he wehi rawa; ko wai e kaha ake ki reira?
JOE 2:12 “Otiia ināianei nei anō,” e ai tā Ihowā, “tahuri koutou ki ahau, ō koutou ngākau katoa, i runga anō i te nohopuku, i te tangi, i te auē.”
JOE 2:13 Haea hoki ō koutou ngākau, hāunga ō koutou kākahu. Ā, tahuri ki a Ihowā, ki tō koutou Atua, he aroha hoki tōna, he mahi tohu, he pūhoi ki te riri, he nui tōna atawhai, ā, e rīpenetā ana ia ki te kino.
JOE 2:14 Ko wai ka tohu, tērā pea ka tahuri, ka puta kē ōna whakaaro, ā, ka mahue he manaaki i muri i a ia, arā he whakahere totokore, he ringihanga mā Ihowā, mā tō koutou Atua?
JOE 2:15 Whakatangihia te tētere ki Hiona, whakatapua he nohopuku, karangatia he hui nui;
JOE 2:16 whakaminea te iwi, whakatapua te whakaminenga, tāwhiua mai ngā kaumātua, whakaminea ngā tamariki, rātou ko ngā mea ngote ū. Kia puta te tāne mārena hou i roto i tōna rūma, te wahine mārena hou i roto i tōna whare moenga.
JOE 2:17 Kia tangi ngā tohunga, ngā minita a Ihowā, ki te takiwā o te whakamahau, o te āta. Me te kī atu anō, “Tohungia, e Ihowā, tāu iwi, kaua anō tōu kāinga tupu e tukua ki te ingoa kino, kia meinga ko ngā tauiwi hei rangatira mō rātou. Kia kōrerotia hei aha i roto i ngā iwi, ‘Kei hea tō rātou Atua?’ ”
JOE 2:18 Kātahi ka hae a Ihowā ki tōna whenua, ka manawapā ki tāna iwi.
JOE 2:19 Ā, ka whakahoki mai a Ihowā, ka kī mai ki tāna iwi: “Tēnei ahau te tuku atu nei i te wīti ki a koutou, i te wāina, i te hinu, e mākona ai koutou; e kore anō e tuku i a koutou ā muri nei hei ingoa kino i roto i ngā tauiwi.
JOE 2:20 “Engari, ka mea ahau kia matara atu i a koutou te ope o te raki, ka āia atu anō ia e ahau ki te whenua waikore, maroke rawa; ko tōna mata, anga tonu ki te moana i te rāwhiti, ko tōna tuarā ki te moana i te uru; ā, ka puta ake tōna piro, ka puta ake anō tōna haunga kino, he nui hoki nō āna mahi.”
JOE 2:21 Kaua e wehi, e te oneone; whakamanamana, kia koa; nō te mea he nunui ngā mahi a Ihowā!
JOE 2:22 Kaua e wehi, e ngā kararehe o te pārae; ka pihi hoki ngā tarutaru o te koraha, ka hua te rākau i ōna hua, e tukua mai anō tōna kaha e te piki, e te wāina.
JOE 2:23 Nā, whakamanamana, e ngā tama a Hiona, kia koa ki a Ihowā, ki tō koutou Atua; ka tika hoki tāna hōmai i tō mua ua ki a koutou, ā, ka meinga e ia te ua, tō mua ua, me tō muri ua, kia heke iho mā koutou i te marama tuatahi.
JOE 2:24 Ā, ka kapi ngā patunga wīti i te wīti; ko te wāina anō me te hinu o ngā waka, pūrena tonu.
JOE 2:25 “Ā, ka whakahokia mai e ahau ki a koutou ngā tau i kainga e te māwhitiwhiti, e te tātarakihi, e te moka, e te whangawhanga, e tāku ope nui i tukua atu e ahau ki a koutou.
JOE 2:26 “Ka kai noa atu anō koutou, ka mākona, ka whakamoemiti hoki ki te ingoa o Ihowā, o tō koutou Atua, mō tāna mahi whakamīharo ki a koutou. E kore anō tāku iwi e whakamā ā ake ake.
JOE 2:27 Ā, ka mōhio koutou kei waenga ahau i a Īharaira, ko Ihowā hoki ahau, ko tō koutou Atua, kāhore atu hoki. E kore anō tāku iwi e whakamā, ā ake ake.”
JOE 2:28 “Nā, tēnei ake, ka ringihia e ahau tōku wairua ki ngā kikokiko katoa, ā, e poropiti ā koutou tama, ā koutou tamāhine, ka moemoeā ō koutou kaumātua, ā, ka kitea te kitenga e ā koutou taitamariki.
JOE 2:29 I aua rā anō ka ringihia e ahau tōku wairua ki ngā pononga tāne, ki ngā pononga wāhine.
JOE 2:30 Ka hoatu anō e ahau he mea whakamīharo i te rangi, i te whenua, he toto, he kāpura, he pou paowa.
JOE 2:31 Ka rerekē te rā, ka pōuri, ka whakatoto te marama, i te mea kīanō i puta mai te rā nui, te rā wehi o Ihowā.
JOE 2:32 Nā, ko te hunga katoa e karanga ana ki te ingoa o Ihowā, ka mawhiti. Nō te mea hei Maunga Hiona, hei Hiruhārama, ētahi e mawhiti ana, pērā me tā Ihowā i kī ai, ā, i roto anō i ngā mōrehu ētahi e karangatia ana e Ihowā.”
JOE 3:1 “Nō te mea, nanā, i aua rā, i taua wā e whakahokia ai e ahau a Hūrā rāua ko Hiruhārama i te whakarau,
JOE 3:2 ka huihuia e ahau ngā iwi katoa, ka kawea ki raro ki te raorao o Iehohāpata; ā, ka tohe ahau ki a rātou ki reira mō tāku iwi, mō tōku kāinga tupu, mō Īharaira i whakamararatia nei e rātou ki roto ki ngā iwi, ā, wāwāhia ana e rātou tōku whenua.
JOE 3:3 Ā, kua maka rota rātou mō tāku iwi; ā, kua hoatu e rātou te tama hei utu mō te wahine kairau, ā, kua hokona e rātou he kōtiro ki te wāina, hei inu mā rātou.
JOE 3:4 “Āe rā, he aha koutou ki ahau, e Tāira, e Hairona, e ngā rohe katoa o Pirihitia? E hōmai rānei e koutou he utu ki ahau? Nā, ki te hōmai e koutou, he utu ki ahau, hohoro tonu, kakama tonu tāku whakahoki i te utu ki runga ki tō koutou māhunga.
JOE 3:5 Mō koutou i tango i tāku hiriwa, i tāku kōura, ā, kawea ana e koutou āku mea pai e matenuitia ana ki roto ki ō koutou temepara.
JOE 3:6 Ā, hokona ana e koutou ngā tama a Hūrā, ngā tama o Hiruhārama, ki ngā tama a ngā Kariki, kia matara atu ai rātou i tō rātou rohe.
JOE 3:7 “Nanā, ka ara mai rātou i ahau i te wāhi i hokona atu ai rātou e koutou, ka meinga anō e ahau kia hoki tō koutou utu ki runga ki ō koutou māhunga.
JOE 3:8 Ka hokona anō e ahau ā koutou tama, ā koutou tamāhine, ki te ringa o ngā tama a Hūrā, ā, mā rātou e hoko ki ngā tāngata o Hēpā, ki te iwi i tawhiti.” Nā Ihowā hoki te kupu.
JOE 3:9 Karangatia tēnei e koutou i roto i ngā tauiwi: Kia rite ngā mea mō te whawhai, whakaohokia ngā mārohirohi, kia whakatata mai ngā tāngata whawhai katoa, kia haere mai rātou.
JOE 3:10 Patupatua ā koutou hea parau hei hoari, ā koutou toronaihi hei tao; me kī ake te ngoikore, “He kaha ahau.”
JOE 3:11 Kia hohoro, ka haere mai, e ngā tauiwi katoa tawhio noa, ka huihui i a koutou. Meinga kia heke iho āu mārohirohi ki reira, e Ihowā.
JOE 3:12 “Kia whakaohokia ngā tauiwi, kia haere hoki rātou ki te raorao o Iehohāpata. Ka noho hoki ahau ki reira ki te whakawā mō ngā tauiwi katoa ā taka noa.
JOE 3:13 Kuhua te toronaihi ki roto, kua pakari hoki te wīti. Haere mai, takahia; kua kī hoki te poka wāina, pūrena tonu ngā waka wāina; he nui hoki tō rātou kino.”
JOE 3:14 He tini, he tini whāioio kei te raorao whakaoti tikanga! Kua tata nei hoki te rā o Ihowā i te raorao whakaoti tikanga.
JOE 3:15 Ka pōuri te rā me te marama, ka kore anō te titi o ngā whetū.
JOE 3:16 Ā, ka hāmama a Ihowā i Hiona, ka puaki tōna reo i Hiruhārama; ā, ka wiri ngā rangi me te whenua; otirā ko Ihowā he piringa mō tōna iwi, he pā kaha mō ngā tama a Īharaira.
JOE 3:17 “Ā, ka mōhio koutou ko Ihowā ahau, ko tō koutou Atua e noho nei i Hiona, i tōku maunga tapu: kātahi a Hiruhārama ka tapu, ā, heoi anō hāereerenga o ngā tautāngata i reira.
JOE 3:18 “I taua rā ka māturuturu iho te wāina hou o ngā maunga, ka rerengia ngā pukepuke e te waiū, ka rere ngā wai o ngā awa katoa o Hūrā; ā, ka pupū mai he puna i roto i te whare o Ihowā, hei whakamākūkū i te raorao o Hitimi.
JOE 3:19 Hei ururua a Īhipa, hei koraha a Ēroma, ururua rawa, mō te mahi tutū ki ngā tama a Hūrā, mō tā rātou whakaheke i te toto harakore ki tō rātou whenua.
JOE 3:20 Ka noho tonu ia a Hūrā ake ake, a Hiruhārama, a tērā whakatupuranga, tērā whakatupuranga.
JOE 3:21 Ka mā anō i ahau tō rātou toto kīhai i mā i ahau; e noho ana hoki a Ihowā ki Hiona.”
AMO 1:1 Ko ngā kupu a Āmoho, a tētahi o ngā kaitiaki hipi o Tekoa, ko tāna i kite ai mō Īharaira i ngā rā o Utia kīngi o Hūrā, i ngā rā hoki o Ieropoama tama a Ioaha, kīngi o Īharaira, e rua ngā tau i mua ake o te rū.
AMO 1:2 Ā, i mea ia: “Ka hāmama a Ihowā i Hiona, ka puaki hoki tōna reo i Hiruhārama; ā, ka tangi ngā haerenga hipi a ngā hēpara, ka maroke hoki te tihi o Karamere.”
AMO 1:3 Ko te kupu tēnei a Ihowā: “Ka toru nei ngā pokanga kētanga o Ramahiku, āe rā, ka whā, nā, e kore e whakatahuritia atu e ahau te whiu mōna; kua patua ā-wītitia hoki e rātou a Kireara ki ngā patu rino.
AMO 1:4 Engari, ka tukua atu e ahau he ahi ki te whare o Hataere, ā, ka pau i reira ngā whare kīngi o Pēneharara.
AMO 1:5 Ā, ka whati i ahau te tūtaki tatau o Ramahiku, ka hātepea atu hoki te tangata noho o te raorao o Āwene, me te kaipupuri hēpeta o te whare o Erene; ka whakaraua atu anō te iwi o Hīria ki Kiri,”
AMO 1:6 Ko te kupu tēnei a Ihowā: “Ka toru nei ngā pokanga kētanga o Kaha, āe rā, ka whā, nā, e kore e whakatahuritia atu e ahau te whiu mōna; nō te mea i whakaraua e rātou te iwi katoa, hei tuku atu mā rātou ki Ēroma.
AMO 1:7 Engari ka tukua atu e ahau he ahi ki te taiepa o Kaha, ā, ka pau i reira ōna whare kīngi.
AMO 1:8 Ā, ka hātepea atu e ahau te tangata noho o Aharoro, me te kaipupuri hēpeta i Ahakerono; ka tahuri hoki tōku ringa ki Ekerono, ā, ka ngaro te mōrehu o ngā Pirihitini,”
AMO 1:9 Ko te kupu tēnei a Ihowā: “Ka toru nei ngā pokanga kētanga o Tāira, āe rā, ka whā, nā, e kore e whakatahuritia atu e ahau te whiu mōna; nō te mea i tukua e rātou te iwi katoa ki Ēroma, ā, kīhai i mahara ki te kawenata a te tuakana ki te teina.
AMO 1:10 Engari, ka tukua atu e ahau he ahi ki te taiepa o Tāira, ā, ka pau i reira ōna whare kīngi.”
AMO 1:11 Ko te kupu tēnei a Ihowā: “Ka toru nei ngā pokanga kētanga o Ēroma, āe rā, ka whā, nā, e kore e whakatahuritia atu e ahau te whiu mōna; nō te mea i whāia e ia tōna teina ki te hoari, ā, makā atu ana e ia te aroha katoa, heoi haehae tonu tōna riri, rongoā tonu ia i tōna riri ā ake ake.
AMO 1:12 Engari, ka tukua e ahau he ahi ki Temana, ā, pau ake i reira ngā whare kīngi o Potora.”
AMO 1:13 Ko te kupu tēnei a Ihowā: “Ka toru nei ngā pokanga kētanga o ngā tama a Āmona, āe rā, ka whā, nā, e kore e whakatahuritia atu e ahau te whiu mōna. Nō te mea kua ripiripia e rātou ngā wāhine hapū o Kireara, he mea kia nui ake ai te rohe ki a rātou.
AMO 1:14 Engari, ka ngiha i ahau he ahi ki runga ki te taiepa o Rapa, ā, ka pau i reira ōna whare kīngi, i runga i te hāmama i te rā o te whawhai, i te paroro i te rā o te tūkauati;
AMO 1:15 ā, ka riro tō rātou kīngi i te whakarau, rātou tahi ko āna rangatira,”
AMO 2:1 Ko te kupu tēnei a Ihowā: “Ka toru nei ngā pokanga kētanga o Moapa, āe rā, ka whā, nā, e kore e whakatahuritia atu e ahau te whiu mōna; nō te mea nāna i tahu ngā wheua o te kīngi o Ēroma hei kotakota.
AMO 2:2 Engari, ka tukua atu e ahau he ahi ki Moapa, ā, ka pau i reira ngā whare kīngi o Kirioto; ā, ka mate a Moapa i runga i te ngangau, i te hāmama, i te tangi o te tētere.
AMO 2:3 Ā, ka hātepea atu e ahau te kaiwhakawā i roto i a ia, ka patua rātou tahi ko ngā rangatira katoa o reira,”
AMO 2:4 Ko te kupu tēnei a Ihowā: “Ka toru nei ngā pokanga kētanga o Hūrā, āe rā, ka whā, nā, e kore e whakatahuritia atu e ahau te whiu mōna; nō te mea kua whakahāwea rātou ki te Ture a Ihowā, kīhai hoki i pupuri i āna tikanga, ā, kua meinga rātou e ā rātou kōrero teka kia kotiti kē, i whāia nei e ō rātou mātua.
AMO 2:5 Engari, ka tukua e ahau he ahi ki a Hūrā, ā, pau ake i reira ngā whare kīngi o Hiruhārama.”
AMO 2:6 Ko te kupu tēnei a Ihowā: “Ka toru nei ngā pokanga kētanga o Īharaira, āe rā, ka whā, nā, e kore e whakatahuritia atu e ahau te whiu mōna; nō te mea kua hokona e rātou te tangata tika ki te hiriwa, te rawakore ki ngā hū e rua.
AMO 2:7 E minamina ana rātou ki te puehu o te whenua i runga i te māhunga o ngā ware; ā, whakaparoritia ake e rātou te ara o te hunga māhaki; ā, ka haere te tangata rāua ko tōna pāpā ki te kōtiro kotahi hei whakapoke i tōku ingoa tapu.
AMO 2:8 Nā, takoto ana rātou ki te taha o ngā āta katoa i runga i ngā kākahu i hōmai hei taunaha, ā, i roto i te whare o tō rātou atua kei te inu rātou i te wāina a te hunga i whakataua nei te hē ki a rātou.
AMO 2:9 “Otiia, i whakangaromia e ahau te Amori i tō rātou aroaro, ko tōna roa koia anō kei te roa o te hīta, ā, he kaha ia, pērā i ngā oki. Heoi, whakangaromia ana e ahau ōna hua i runga, ōna pakiaka i raro.
AMO 2:10 “I kawea mai anō hoki koutou e ahau i te whenua o Īhipa, ā, e whā tekau ngā tau i ārahina ai koutou i te koraha, he mea kia riro mai ai te whenua o te Amori.
AMO 2:11 Ā, i whakaarahia ake e ahau ētahi o ā koutou tama hei poropiti, ētahi hoki o ā koutou taitama hei Natari. He teka ianei tēnā, e ngā tama a Īharaira?”
AMO 2:12 “Heoi, i whakainumia e koutou ngā Natari ki te wāina, ā, i ako hoki ki ngā poropiti, i mea, ‘Kaua e poropiti!’
AMO 2:13 “Nanā, ka pēhia koutou e ahau ki tō koutou wāhi, ka pērā i te pēhanga a te kāta e kī ana i ngā paihere.
AMO 2:14 Nā, ka kore te oma i te tangata tere, e kore e nui ake te kaha o te tangata kaha, e kore hoki te mārohirohi e mawhiti i te mate;
AMO 2:15 e kore anō te kaipupuri o te kōpere e tū; e kore hoki te wae tere e whakaora i a ia anō; e kore anō hoki te tangata eke hōiho e mawhiti i te mate.
AMO 2:16 Ā, ko te tangata māia i roto i ngā mārohirohi, ka rere tahanga atu i taua rā,”
AMO 3:1 Whakarongo ki tēnei kupu i kōrerotia e Ihowā mō koutou, e ngā tama a Īharaira, mō te hapū katoa i kawea mai e ahau i te whenua o Īhipa, i mea ahau:
AMO 3:2 “Ko koutou anake tāku i mōhio ai o ngā hapū katoa o te ao. Mō reira ka whiua koutou e ahau mō ō koutou hē katoa.”
AMO 3:3 E haere tahi anō rānei te tokorua, ki te kore e whakaae ki a rāua?
AMO 3:4 E hāmama rānei te raiona i te ngahere i te mea kāhore āna tūpāpaku? E tangi rānei te reo o te kūao raiona i tōna kuhunga, ki te kore tētahi mea e mau i a ia?
AMO 3:5 E taka rānei te manu ki roto ki te māhanga i runga i te whenua i te mea kāhore he āhere mōna? E mokowhiti ake rānei te māhanga i te oneone, ā, hore rawa he mea e mau?
AMO 3:6 E tangi rānei te tētere i roto i tētahi pā, ā, kāhore te iwi e wehi? E puta rānei he kino ki te pā, ā, ehara i a Ihowā nāna i mahi?
AMO 3:7 He pono e kore te Ariki, a Ihowā, e mahi i tētahi mea, engari ka whakakitea e ia tōna whakaaro huna ki āna pononga, ki ngā poropiti.
AMO 3:8 Kua hāmama te raiona; ko wai e kore e wehi? Kua kōrero a Ihowā, te Ariki; ko wai e kore e poropiti?
AMO 3:9 Pānuitia atu i roto i ngā whare kīngi i Aharoro, i ngā whare kīngi hoki i te whenua o Īhipa, mea atu, “Whakamine i a koutou ki runga ki ngā maunga o Hamaria, ka mātakitaki ki ngā ngangau nui i waenga o reira, ki ngā tūkinotanga hoki i waenga o reira.”
AMO 3:10 “Kāhore hoki rātou e mōhio ki te mahi i te tika,” e ai tā Ihowā, “e rongoā nei rātou i te mahi tutū me te pāhua i roto i ō rātou whare kīngi.”
AMO 3:11 Mō reira ko te kupu tēnei a te Ariki, a Ihowā: “He hoariri tērā, ka karapotia e ia te whenua; ā, ka riro iho i a ia tōu kaha, ka pāhuatia hoki ōu whare kīngi.”
AMO 3:12 Ko te kupu tēnei a Ihowā: “Ka rite ki te hēpara e tango mai nei i ngā waewae e rua i te māngai o te raiona, i tētahi wāhi rānei o te taringa; ka pēnā anō te tangohanga mai o ngā tama a Īharaira e noho rā i Hamaria i te pito o te moenga, i runga hoki i ngā urunga o tētahi moenga.”
AMO 3:13 “Whakarongo koutou, whakaaturia hoki he hē mō te whare o Hākopa,” e ai tā te Ariki, tā Ihowā, tā te Atua o ngā mano.
AMO 3:14 “Nō te mea hei te rā e pā ai tāku ki a Īharaira mō ōna poka kē, ka pā anō hoki tāku ki ngā āta o Pētēre, ā, ka pōutoa ngā haona o te āta, ka taka ki te whenua.
AMO 3:15 Ka patua anō e ahau te whare hōtoke me te whare raumati; ā, ka mōtī ngā whare rei, ka kore ngā whare nunui,”
AMO 4:1 Whakarongo ki tēnei kupu, e ngā kau o Pahana, i te maunga o Hamaria, e whakatupu kino nā i ngā ware, e kuru nā i ngā rawakore, e mea nā ki ō rātou ariki, “Kawea mai, kia inu tātou.”
AMO 4:2 Kua oatitia tōna tapu e te Atua, e Ihowā: “Nanā, kei te haere mai ngā rā ki a koutou e mauria ai koutou e rātou ki te matau, ō koutou whakamutunga ki te matau ika.
AMO 4:3 Ka haere atu anō koutou nā ngā pakaru, nā ngā wāhi e hāngai mai ana ki tēnei, ki tēnei; ā, ka ākiri koutou i a koutou ki Haramona,”
AMO 4:4 “Haere mai ki Pētēre, ki reira poka kē ai; ki Kirikara whakanui ai i te poka kē; kawea mai anō ā koutou patunga tapu i tēnei ata, i tēnei ata, ā koutou whakatekau, i te toru o ngā rā.
AMO 4:5 Tāpaea anō he whakahere whakawhetai, he mea kīnaki ki te rēwena, kauwhautia hoki, kārangarangatia ngā whakahere noa ake; ko tā koutou hoki tēnei i pai ai, e ngā tama a Īharaira,”
AMO 4:6 “I tukua anō e ahau he parakore mō ngā niho ki a koutou i roto i ō koutou pā katoa, he tarokore ki ō koutou wāhi katoa; heoi, kīhai koutou i tahuri ki ahau,”
AMO 4:7 “I kaiponuhia anō e ahau te ua ki a koutou i te mea kia toru ake marama ko te kotinga wīti; i meinga anō e ahau kia ua ki runga ki tētahi pā, ā, ki tētahi pā i mea ahau kia kaua e ua. Ko tētahi wāhi i uaina, ā, ko te wāhi kīhai i uaina, maroke noa iho.
AMO 4:8 Nā, kōpiko atu ana ētahi pā e rua, e toru, ki te pā kotahi ki te inu wai, ā, kore ake i mākona; otiia, kīhai koutou i hoki mai ki ahau,”
AMO 4:9 “Kua patua koutou e ahau ki te ngingio, ki te koriri; nui noa ā koutou kāri, ā koutou māra wāina, ā koutou piki, ā koutou ōriwa, pau ake i te whangawhanga; heoi, kīhai koutou i hoki mai ki ahau,”
AMO 4:10 “I tukua e ahau te mate urutā ki a koutou, he pērā tonu me tō Īhipa; ko ā koutou taitama he mea patu nāku ki te hoari, ko ā koutou hōiho riro ana i ahau, ā, meinga ana e ahau te piro o tō koutou puni kia kake ake ki ō koutou ihu rawa; heoi, kīhai koutou i hoki mai ki ahau,”
AMO 4:11 “I hurihia ētahi o koutou e ahau ki raro, i pērātia me tā te Atua hurihanga i Horoma, i Komora, ā, rite tonu koutou ki te mōunga i kapohia mai i roto i te weranga; heoi, kīhai koutou i hoki mai ki ahau,”
AMO 4:12 “Mō reira ka meatia tēnei e ahau ki a koe, e Īharaira; ka meinga nei tēnei e ahau ki a koe, nā, kia rite ōu mea mō tōu tūtaki ki tōu Atua, e Īharaira.”
AMO 4:13 Nō te mea, nā, ko te kaiwhakaahua o ngā maunga, e hanga nei i te hau, e whakaatu nei ki te tangata i tāna i whakaaro ai, e mea nei i te ata kia pōuri, ā, e haere ana i runga i ngā wāhi tiketike o te whenua – ko Ihowā, ko te Atua o ngā mano tōna ingoa.
AMO 5:1 Whakarongo ki tēnei kupu, kua maranga nei i ahau hei tangi ki a koutou, e te whare o Īharaira:
AMO 5:2 “Kua hinga te wāhina a Īharaira, e kore ia e ara i muri; kua whakatakā ia ki runga ki tōna oneone; kāhore he mea hei whakaara ake i a ia.”
AMO 5:3 Nō te mea ko te kupu tēnei a te Ariki, a Ihowā: “Ko te pā kotahi nei te mano i te haerenga atu, kotahi rau e toe, ā, ko tērā kotahi nei te rau i te haerenga atu, kotahi tekau e toe ki te whare o Īharaira.”
AMO 5:4 Ko te kupu hoki tēnei a Ihowā ki te whare o Īharaira: “Rapua ahau, kia ora ai koutou;
AMO 5:5 otiia, kaua e rapu i Pētēre, kaua e haere ki Kirikara, kaua anō e haere ki Peerehepa; nō te mea tērā a Kirikara ka riro i te whakarau, ā, hei kore noa iho a Pētēre.”
AMO 5:6 Rapua a Ihowā, ā, ka ora koutou; kei toro atu ia, ānō he ahi, i roto i te whare o Hōhepa, ā, pau noa, ā, kore noa iho he kaitinei i roto i Pētēre.
AMO 5:7 E te hunga i puta kē ai te whakawā hei taru kawa, i tāia ai te tika ki te whenua.
AMO 5:8 Rapua te kaihanga o Matariki, o Tautoru; e riro kē ana i a ia te ātārangi o te mate hei ata, e whakapōuritia ana e ia te rā hei pō; e karangatia ana e ia ngā wai o te moana, ā, ringihia ana e ia ki runga ki te mata o te whenua, ko Ihowā tōna ingoa;
AMO 5:9 nāna i whakaputa ohorere te whakangaromanga ki te hunga kaha, i tae ai te whakangaromanga ki te pā kaha.
AMO 5:10 E kinongia ana e rātou te kairiri hē i te kūwaha, ā, he mea whakarihariha ki a rātou te tangata kōrero tika.
AMO 5:11 Nā, i te mea he takahi tā koutou i te ware, he tango i te takoha wīti i a ia; he whare kōhatu tārai tā koutou i hanga ai, nā, e kore e nohoia e koutou; he māra wāina e minaminatia ana tā koutou i whakatō ai, otiia e kore te wāina o aua māra e inumia e koutou.
AMO 5:12 E mōhiotia ana hoki e ahau te maha o ō koutou poka kē, me te kaha o ō koutou hara – o koutou e whakatupu kino nei i te tangata tika, e tango nei i te utu whakapati, e whakangau kē nei i tā te rawakore i te kūwaha.
AMO 5:13 Mō reira ka whakarongo puku te tangata tūpato i taua wā; nō te mea he wā kino.
AMO 5:14 Rapua te pai, kauaka hoki te kino, kia ora ai koutou; pēnei ko Ihowā, ko te Atua o ngā mano hei hoa mō koutou, hei pēnā anō me tā koutou e kī nā.
AMO 5:15 Kinongia te kino, arohaina te pai, whakapūmautia te whakawā ki te kūwaha. Tērā pea a Ihowā, te Atua o ngā mano, ka aroha ki te toenga o Hōhepa.
AMO 5:16 Mō reira tēnei kupu a Ihowā, a te Atua o ngā mano, a te Ariki: “I ngā waharoa katoa ko te tangi; ko tā rātou kupu i ngā huarahi katoa, ‘Auē! auē!’ Ka karangatia te kaingaki whenua ki te tangi, me te hunga mātau ki te uhunga, hei auē;
AMO 5:17 ā, he auē i ngā māra wāina katoa, ka tika atu hoki ahau i waenganui i a koe,”
AMO 5:18 Auē te mate mō koutou e hiahia nei ki te rā o Ihowā! Hei aha mā koutou te rā o Ihowā? He pōuri hoki, ehara i te mārama;
AMO 5:19 ka pērā me te tangata i rere atu i te aroaro o te raiona, ā, ka tūtaki te pea ki a ia; i haere rānei ki roto ki te whare, ā, okioki atu ana tōna ringa ki te pakitara, nā, ngaua iho ia e te nākahi.
AMO 5:20 He teka ianei tērā e pōuri te rā o Ihowā, e kore e mārama? Tērā e pōuri kerekere, kāhore hoki he mārama i roto?
AMO 5:21 “E kino ana ahau, e whakarihariha ana ki ā koutou hākari, ā, e kore ahau e āhuareka ki ā koutou huihui nunui.
AMO 5:22 Āe rā, ahakoa whakaeke noa koutou i ngā tahunga tinana, i ā koutou whakahere totokore ki ahau, e kore e manakohia e ahau. E kore anō e tirohia e ahau ngā whakahere mō te pai, arā ā koutou mea mōmona.
AMO 5:23 Maua atu kia matara i ahau te ngangau o āu waiata; e kore hoki ahau e whakarongo ki te rangi o āu hātere.
AMO 5:24 Engari, kia huri mai te whakawā ānō he wai, te tika ānō he awa nui.
AMO 5:25 “I kawea mai koia e koutou ki ahau he patunga tapu, he whakahere totokore, e te whare o Īharaira, i te koraha, i ngā tau e whā tekau?
AMO 5:26 Āe rā, kua maua e koutou a Hikutu, tō koutou kīngi, a Kiunu hoki, ā koutou whakapakoko, te whetū o tō koutou atua, i hangā nei e koutou mā koutou.
AMO 5:27 Nā, ka whakaraua koutou e ahau ki kō atu i Ramahiku,” e ai tā Ihowā nōna nei te ingoa, Ko te Atua o ngā Mano.
AMO 6:1 Auē te mate mō te hunga e noho hūmārie ana i Hiona, mō te hunga hoki e whakawhirinaki ana ki te maunga o Hamaria, ngā tāngata whai ingoa o te tuatahi o ngā iwi, i tae atu nei te whare o Īharaira ki a rātou!
AMO 6:2 Haere tonu ki Karane titiro ai; haere atu i reira ki Hāmata nui; haere tonu atu ki Kāta o ngā Pirihitini. He pai atu rānei i ēnei kīngitanga? Nui atu rānei tō rātou rohe i tō koutou rohe?
AMO 6:3 E te hunga e whakamatara atu nā i te rā kino, e mea nā i te nohoanga o te tutū kia tata mai.
AMO 6:4 E takoto nā i runga i te moenga rei, e whārōrō nā i runga i ō rātou takotoranga. E kai nā i ngā reme o te kāhui, i ngā kūao kau o waenganui i te tūranga kau.
AMO 6:5 E waiata nā i ngā waiata pōauau ki te rangi hātere; e whakaaroa ana hoki e rātou ngā mea whakatangi, e pērā ana me Rāwiri;
AMO 6:6 e inu ana i te wāina o ngā peihana, ā, e whakawahi ana i a rātou ki ngā hinu pai rawa; kāhore ia ō rātou pōuri mō te aituā o Hōhepa,
AMO 6:7 Nā āianei, ko rātou ki mua ka whakaraua atu o te hunga e whakaraua ana, ā, ka kore te hākari a te hunga i whārōrō rā.
AMO 6:8 Kua oatitia te Ariki, a Ihowā, e ia anō, e ai tā Ihowā, tā te Atua o ngā mano: “E whakarihariha ana ahau ki tā Hākopa e whakaī nā, e kino ana ki ōna whare kīngi; mō reira ka tukua atu e ahau te pā me ngā mea i roto.”
AMO 6:9 Nā, ki te toe ngā tāngata kotahi tekau i roto i te whare kotahi, ka mate rātou.
AMO 6:10 Ā, ki te tangohia ake tētahi e tōna matua kēkē, arā e te kaitahu mōna, kia maua mai ai ngā wheua i roto i te whare, ā, ka mea ia ki te tangata i roto rawa i te whare, “He tangata anō rānei tēnā kei a koe nā?” Ā, ka mea ia, “Kāhore!” Kātahi ia ka mea, “Whakarongoa; e kore hoki tātou e whakahua i te ingoa o Ihowā.”
AMO 6:11 Nō te mea, nanā, kei te whakahau a Ihowā, ā, ka patua te whare nui ki ngā pakaru, te whare iti ki ngā ngātata.
AMO 6:12 E rere rānei te hōiho i runga i te kāmaka? E parautia rānei a reira ki te kau? I whakaputaina kētia ai e koutou te whakawā hei au, ngā hua hoki o te tika hei taru kawa –
AMO 6:13 e koa nā hoki koutou ki te kāhore noa iho, e mea nā, “He teka ianei kua riro mai he haona i a tātou, he mea nā tō tātou uaua?
AMO 6:14 “Otiia, nanā, ka ara i ahau tētahi iwi ki a koutou, e te whare o Īharaira,” e ai tā Ihowā, tā te Atua o ngā mano, “ā, ka whakatupuria kinotia koutou e rātou i te haerenga atu ki Hāmata, ā tae noa ki te awa o te Arapa.”
AMO 7:1 Ko tā te Ariki, ko tā Ihowā tēnei i whakaatu ai ki ahau: Nanā, i hangā e ia he māwhitiwhiti i te tīmatanga o te pihinga ake o tō muri tupu; nanā, ko tō muri tupu ia i muri iho i ā te kīngi tapahanga.
AMO 7:2 Nā, ka poto te tarutaru o te whenua te kai, ka mea ahau, “E te Ariki, e Ihowā, tēnā rā, murua te hē. Mā te aha oti a Hākopa ka ara ai? He iti nei hoki ia!”
AMO 7:3 I puta kē tō Ihowā whakaaro mō tēnei: “E kore e meatia,” e ai tā Ihowā.
AMO 7:4 Ko tā te Ariki, ko tā Ihowā tēnei i whakakite ai ki ahau: Nā, kua karangatia e te Ariki, e Ihowā, he whawhai, he mea ahi, ā, ka pau te rire nui, ā, ka mea kia kainga te whenua.
AMO 7:5 Nā, ka mea ahau, “Kāti rā, e te Ariki, e Ihowā! Mā te aha oti a Hākopa ka ara ai? He iti nei hoki ia!”
AMO 7:6 I puta kē tō Ihowā whakaaro mō tēnei; “E kore anō tēnei e meatia,” e ai tā te Ariki, tā Ihowā.
AMO 7:7 I whakakitea tēnei e ia ki ahau: nā, ko te Ariki e tū ana i runga i te taiepa, he mea paramu ki te aho, me te aho paramu i tōna ringa.
AMO 7:8 Nā, ka mea a Ihowā ki ahau, “Ko te aha e kitea ana e koe, e Āmoho?” Anō rā ko ahau, “He aho paramu.” Kātahi te Ariki ka kī mai, “Nanā, ka iri i ahau he aho paramu i waenganui i tāku iwi, i a Īharaira; e kore e whakarērea noatia iho tā rātou e ahau ā muri ake nei.
AMO 7:9 Ā, ka ururuatia ngā wāhi tiketike o Īhaka, ka tūheatia ngā wāhi tapu o Īharaira; ka whakatika atu anō ahau, me te hoari ki te whare o Ieropoama.”
AMO 7:10 Nā, ka unga tāngata a Amatia tohunga o Pētēre ki a Ieropoama kīngi o Īharaira hei kī atu, “Kua whakatakotoria e Āmoho he hē mōu i roto i te whare o Īharaira; kāhore e taea e tēnei whenua te waha āna kupu katoa.
AMO 7:11 Ko te kupu hoki tēnei a Āmoho, ‘Ka mate a Ieropoama i te hoari, ā, ka whakaraua rawatia atu a Īharaira i tō rātou oneone.’ ”
AMO 7:12 I mea anō a Amatia ki a Āmoho, “E te matakite, haere, e rere ki te whenua o Hūrā, ki reira kai ai i te taro māu, ki reira poropiti ai.
AMO 7:13 Engari kāti tāu poropiti ki Pētēre; ko tō te kīngi wāhi tapu hoki ia, he whare hoki nō te kīngitanga.”
AMO 7:14 Nā, ka whakahoki a Āmoho ka mea ki a Amatia, “Ehara ahau, i te poropiti, ehara anō i te tama nā te poropiti; engari he kaitiaki kāhui ahau, he kaikikini hikamora.
AMO 7:15 I tīkina ake hoki ahau e Ihowā i te mea e whai ana i ngā hipi, i kī mai anō a Ihowā ki ahau, ‘Haere, poropiti ki tāku iwi, ki a Īharaira.’
AMO 7:16 Nā, whakarongo ki te kupu a Ihowā. E mea nā koe, ‘Kaua e poropiti ki a Īharaira, kei māturuturu iho anō tētahi kupu āu hei whakahē mō te whare o Īhaka.’
AMO 7:17 Nō reira ko te kupu tēnei a Ihowā, ‘Tērā tāu wahine e kairau i roto i te pā, ā, ka hinga āu tama me āu tamāhine i te hoari, ka wehewehea tōu oneone, mea rawa ki te aho; ka mate koe i runga i te oneone poke, ka whakaraua rawatia atu hoki a Īharaira i tōna oneone.’ ”
AMO 8:1 I whakakitea anō tēnei e te Ariki, e Ihowā, ki ahau – nā, he kete hua raumati.
AMO 8:2 Nā, ka mea ia, “Ko te aha te kitea ana e koe, e Āmoho?” Anō rā ko ahau, “He kete hua raumati.” Anō rā ko Ihowā ki ahau, “Kua tae mai te mutunga ki tāku iwi, ki a Īharaira; e kore tā rātou e whakarērea noatia e ahau ā muri ake nei.
AMO 8:3 “He auē anō ngā waiata o te temepara i taua rā,” e ai tā te Ariki, tā Ihowā; “ka maha ngā tinana mate i ngā wāhi katoa; ka ākiritia pukutia atu.”
AMO 8:4 Whakarongo ki tēnei, e te hunga i horomia ai te rawakore, i meinga ai te hunga iti o te whenua kia ngohe;
AMO 8:5 e kī ana koutou, “Āhea pahemo ai te kōwhititanga marama, kia hoko wīti ai tātou, te hāpati hoki, kia whakaputaia atu ai te wīti e tātou?” Ka meinga te epa kia iti, te hekere kia nui, me te teka ki ngā pāuna tinihanga;
AMO 8:6 kia hokona ai e tātou ngā ware ki te hiriwa, te rawakore ki ngā hū e rua; nā, ko te wīti rukenga me hoko atu.
AMO 8:7 Kua oatitia e Ihowā te nui o Hākopa: “E kore ahau e wareware ki tētahi o ā rātou mahi ā ake ake.
AMO 8:8 E kore ianei te whenua e wiri ki tēnei? E kore ianei te hunga katoa e noho ana i reira e tangi? Āe rā, ka pari katoa ake nei hoki ānō ko te awa; ka ākina e te hau, ka hoki iho anō, ka pērā me te awa o Īhipa.”
AMO 8:9 “Nā, i taua rā,” e ai tā te Ariki, tā Ihowā, “ka meinga e ahau te rā kia toene i te awatea, ā, ka pōuri i ahau te whenua i te mea e mārama ana anō te rā.
AMO 8:10 Ka puta kē anō i ahau ā koutou hākari hei tangihanga, ā koutou waiata katoa hei apakura; he taratara tāku kākahu mō ngā hope katoa; mō ngā māhunga katoa he pākira. Ka rite i ahau ki te tangihanga ki te huatahi, ā, ko tōna mutunga hei rā mamae.
AMO 8:11 “Nanā, kei te haere mai ngā rā,” e ai tā te Ariki, tā Ihowā, “e tukua ai e ahau he hemokai ki te whenua, ehara i te hemokai taro, ehara anō i te matewai; engari he hiahia kia rongo i ngā kupu a Ihowā.
AMO 8:12 Ā, ka ātiutiu atu rātou i tētahi moana ki tētahi moana, i te raki ki te rāwhiti; ka kōpikopiko, he rapu i te kupu a Ihowā; heoi e kore e kitea.
AMO 8:13 “I taua rā ka hemo ngā wāhina ātaahua, me ngā taitama, i te matewai.
AMO 8:14 Nā, ko te hunga e oati ana i te hē o Hamaria, e kī ana, ‘Kei te ora tōu Atua, e Rāna,’ me tēnei, ‘Kei te ora te tikanga o Peerehepa’ – ka taka rawa rātou, e kore anō e ara ā muri ake nei.”
AMO 9:1 I kite ahau i te Ariki e tū ana i te taha o te āta, nā, ka mea ia: “Tāia ngā puku whakapaipai, kia ngarue ai ngā paepae; ākina kia pakaru rikiriki ki runga ki te māhunga o rātou katoa; ā, ka tukitukia e ahau ngā whakamutunga o rātou ki te hoari; e kore rawa tētahi kotahi o rātou e rere, e kore hoki tētahi kotahi e mawhiti.
AMO 9:2 Ahakoa keri noa rātou, ā tae noa ki te rēinga, ka tīkina atu rātou e tōku ringa i reira; ahakoa kake ki te rangi, ka riro iho anō i ahau i reira.
AMO 9:3 Ahakoa piri rātou ki te tihi o Karamere, ka rapua e ahau, ka tangohia mai i reira; ahakoa i huna atu rātou, kei kitea e ahau, ki te takere o te moana, ka whakahaua e ahau te nākahi i reira, ā, ka ngau ia i a rātou.
AMO 9:4 Ahakoa haere rātou he pārau i te aroaro o ō rātou hoariri, ka whakahaua e ahau te hoari i reira hei tukituki i a rātou; ā, ka ū atu ōku kanohi ki a rātou mō te kino, kāhore hoki mō te pai.”
AMO 9:5 Ko te Ariki hoki, ko Ihowā o ngā mano, ko ia te pā ana ki te whenua, rewa tonu iho, tangi ana ngā tāngata katoa o reira, ā, ka pari katoa ake ānō ko te awa; ka hoki iho anō, ka pērā me te awa o Īhipa;
AMO 9:6 ko ia te hanga nei i āna rūma ki runga ki te rangi, tū ana i a ia tāna rua ki te whenua; ko ia te karanga nei ki ngā wai o te moana, ā, ringihia ana e ia ki runga ki te mata o te whenua – ko Ihowā tōna ingoa.
AMO 9:7 “He teka ianei, ki tāku, he rite koutou ki ngā tama a ngā Etiopiana, e ngā tama a Īharaira?” e ai tā Ihowā. “He teka ianei nāku a Īharaira i kawe mai i te whenua o Īhipa, ngā Pirihitini i Kapatoro me ngā Hīriani i Kiri?
AMO 9:8 Nanā, kei runga ngā kanohi o te Ariki, o Ihowā, i te kīngitanga hara, ā, ka poto atu i ahau i runga i te mata o te whenua – e kore ia e poto rawa i ahau te whare o Hākopa,”
AMO 9:9 “Nō te mea, tēnei ahau te whakahau nei, ā, ka tātaria e ahau te whare o Īharaira ki roto ki ngā iwi katoa, ka pērātia me te wīti e tātaria ana ki te tātari, e kore anō tētahi pata ririki e taka ki te whenua.
AMO 9:10 Ka mate i te hoari te hunga hara katoa o tāku iwi, ēnā e kī nā, ‘E kore tātou e mau, e kore anō e haukotia e te kino.’ ”
AMO 9:11 “I taua rā ka ara i ahau te tapenākara o Rāwiri kua hinga nei, ka tūtakina anō e ahau ōna wāhi pakaru; ka ara anō i ahau ōna wāhi i whakahoroa, ka hangā anō e ahau kia rite ki ngā rā o mua;
AMO 9:12 kia riro ai i a rātou te toenga o Ēroma, o ngā iwi katoa anō kua oti tōku ingoa te whakahua mō rātou,” e ai tā Ihowā, nāna nei tēnei mahi.
AMO 9:13 “Nanā, kei te haere mai ngā rā,” e ai tā Ihowā, “e mau ai te kaikokoti i te kaiparau, e mau ai hoki te kaiwhakatō purapura i te kaitakahi karepe; ka māturuturu anō te wāina hou o ngā maunga, ā, ka rewa ngā pukepuke katoa.
AMO 9:14 Ka whakahokia mai anō e ahau tāku iwi, a Īharaira, i te whakarau, ā, ka hangā e rātou ngā pā kua ururuatia, nohoia iho; ka whakatō māra wāina anō rātou, ka inu i te wāina o aua māra; ka mahi kāri anō rātou, ā, ka kai i ngā hua o reira.
AMO 9:15 Ka whakatōkia anō rātou e ahau ki tō rātou oneone; e kore anō rātou e unuhia atu i muri ake nei, i tō rātou oneone i hoatu e ahau ki a rātou,”
OBA 1:1 Ko te kite a Opāria. Ko te kupu tēnei a te Ariki, a Ihowā, mō Ēroma: Kua tae mai he kōrero i a Ihowā, kua oti anō he karere te unga ki ngā tauiwi, hei mea: “Whakatika, kia whakatika atu hoki tātou ki a ia ki te whawhai!”
OBA 1:2 “Nanā, kua oti koe te mea e ahau kia iti i roto i ngā tauiwi; nui atu te whakahāwea ki a koe.
OBA 1:3 Kua oti koe te tinihanga e te whakapehapeha o tōu ngākau, e koe e noho nā i ngā kapiti o te kāmaka, kei runga nā tōna nohoanga. E mea nā i roto i tōna ngākau, ‘Ko wai hei whakahoki iho i ahau ki raro ki te whenua?’
OBA 1:4 Ahakoa i rite tōu kakenga ki tō te ēkara, ahakoa i hangā e koe tōu kōhanga ki ngā whetū, ka whakahokia iho koe e ahau i reira,”
OBA 1:5 “Me i tae he kaitāhae ki a koe, he kaipāhua rānei i te pō – taukiri e, tōu ngaromanga! E kore rānei rātou e tāhae, kia maha rā anō ngā mea mā rātou? Me i tae he kaiwhawhaki karepe ki a koe, e kore rānei ētahi karepe e whakatoea e rātou?
OBA 1:6 Taukiri e, te rapunga atu o ngā mea a Ēhau, te kimihanga o āna mea ngaro!
OBA 1:7 Ko ngā tāngata katoa o tāu kawenata, kua riro koe i a rātou, tae rawa ki te rohe; ko ngā tāngata i mau nei tā rātou rongo ki a koe, kua tinihanga ki a koe, ā, taea ana koe e rātou; ko te hunga i kai i tāu taro kua takoto i a rātou he māhanga ki raro i a koe – kāhore he mātauranga i a ia.
OBA 1:8 “He teka ianei,” e ai tā Ihowā, “ka kore i ahau i taua rā ngā tāngata whakaaro nui i roto i Ēroma, me te mātauranga o te maunga o Ēhau?
OBA 1:9 Ā, ka wehi ōu mārohirohi, e Temana, he mea e hātepea atu ai ngā tāngata katoa o te maunga o Ēhau, tukituki rawa.”
OBA 1:10 “Ka taupokina koe e te whakamā hei utu mō te mahi tutū ki tōu teina, ki a Hākopa, ka hātepea atu anō koe ā ake ake.
OBA 1:11 I te rā i tū hāngai mai ai koe, i te rā i whakaraua ai ōna rawa e ngā tautāngata, i tapoko ai ngā tāngata iwi kē ki ōna kūwaha, i kōkiri nui ai mō Hiruhārama, i rite rawa anō koe ki tētahi o rātou.
OBA 1:12 Otiia, kaua koe e titiro ki te rā o tōu teina, i te rā o tōna aituā, kaua hoki koe e koa ki ngā tama a Hūrā i te rā o tō rātou whakangaromanga; kaua hoki e whakanuia tōu māngai i te rā o te raru.
OBA 1:13 Kaua e tomo ki roto ki te kūwaha o tāku iwi i te rā o tō rātou aituā; āe rā, kaua koe e mātakitaki ki tō rātou matenga i te rā o tō rātou aituā, kaua anō hoki koutou e pā ringaringa ki ō rātou rawa i te rā o tō rātou raru.
OBA 1:14 Ā, kaua koe e tū ki te pekanga o te ara ki te hātepe i ōna mōrehu e mawhiti; kaua hoki e tukua ōna mōrehu i te rā o te raru.”
OBA 1:15 “Kua tata hoki te rā o Ihowā ki ngā tauiwi katoa. Ka rite ki tāu i mea ai ka meatia ki a koe; ka hoki tāu utu ki runga ki tōu māhunga.
OBA 1:16 Ka rite hoki ki tā koutou inumanga i runga i tōku maunga tapu; ka pēnā anō te inu a ngā tauiwi katoa ā ake nei, ake nei; inā, ka inu rātou, ka horomia anō e rātou, ā, me te mea i kore rātou.”
OBA 1:17 “Otiia, tērā anō ngā mea ka mawhiti i Maunga Hiona, ā, ka tapu tērā; ā, ka riro ō rātou wāhi i te whare o Hākopa.
OBA 1:18 Ā hei ahi te whare o Hākopa, hei mura anō te whare o Hōhepa, hei kakau wīti hoki te whare o Ēhau. Ka ngiha rātou i roto i a rātou, ā, pau ake, kāhore hoki he mōrehu o te whare o Ēhau; nā Ihowā nei hoki te kupu.”
OBA 1:19 Nā, ka riro te maunga o Ēhau i te hunga o te tonga; me ngā Pirihitini i te hunga o te mānia; ka riro anō i a rātou ngā māra a Ēparaima me ngā māra o Hamaria; mō Pineamine hoki a Kireara.
OBA 1:20 Nā, ko ngā whakarau o tēnei ope, o ngā tama a Īharaira, ko ērā i roto i ngā Kanaani, ka riro i a rātou tae noa ki Harepata; ā, ko ngā whakarau o Hiruhārama, ko ērā i Teparara, ka riro i a rātou ngā pā o te tonga.
OBA 1:21 Ā, ka tae ake he kaiwhakaora ki Maunga Hiona hei whakawā mō te maunga o Ēhau; ā, ka riro i a Ihowā te kīngitanga.
JON 1:1 Nā, i puta mai te kupu a Ihowā ki a Hona, tama a Amitai, i mea:
JON 1:2 “Whakatika, haere ki Ninewe, ki taua pā nui, karangatia he hē mōna; kua tae ake hoki tō rātou kino ki tōku aroaro.”
JON 1:3 Ko Hona ia i whakatika, he rere ki Tarahihi i te aroaro o Ihowā; haere ana ia ki raro, ki Hopa, ā, ka kitea e ia tētahi kaipuke e rere ana ki Tarahihi. Ka hoatu e ia te utu mō te ekenga ki runga, kia haere atu ai ia i roto i a rātou ki Tarahihi i te aroaro o Ihowā.
JON 1:4 Nā, ka tukua e Ihowā he hau nui ki te moana, ā, he nui te āwhā i te moana, nō ka kīia ka pakaru te kaipuke.
JON 1:5 Nā, ka wehi ngā kaiwhakatere, ka karanga ki tōna atua, ki tōna atua; ā, ākiritia ana e rātou ngā taonga o runga o te kaipuke ki te moana kia māmā ai ki a rātou. Ko Hona ia kua riro ki roto rawa i te kaipuke, ā, ka takoto ia, ka moe, au rawa.
JON 1:6 Nā, ko te haerenga atu o te rangatira o te kaipuke, ka mea ki a ia, “He aha tāu, e te tangata e moe nā? Maranga, karanga ki tōu Atua, me kāhore te Atua e whakaaro ki a tātou, kei ngaro tātou.”
JON 1:7 Nā, ka mea rātou ki tōna hoa, ki tōna hoa, “Haere mai, kia makamaka rota tātou, kia mōhio ai ko wai te take o tēnei hē ki a tātou.” Nā, kei te makamaka rota rātou, ā, ka tau te rota ki a Hona.
JON 1:8 Kātahi rātou ka mea ki a ia, “Tēnā rā, whakaaturia ki a mātou ko wai te take o tēnei hē ki a tātou? He mahi aha tāu? I haere mai koe i hea? Ko hea tōu whenua? Nō tēhea iwi koe?”
JON 1:9 Anō rā ko ia ki a rātou, “He Hiperu ahau; e wehi ana hoki ahau i a Ihowā, i te Atua o ngā rangi, nāna nei i hanga te moana me te whenua maroke.”
JON 1:10 Nā, nui atu te wehi i wehi ai aua tāngata, ka mea rātou ki a ia, “He aha tēnei i meatia nei e koe?” I mōhio hoki aua tāngata e rere ana ia i te aroaro o Ihowā, nāna hoki i whakaatu ki a rātou.
JON 1:11 Nā, ka mea rātou ki a ia, “Me aha mātou ki a koe, kia marino ai te moana ki a tātou?” E nui haere ana hoki te ngaru o te moana.
JON 1:12 Ā, ka mea ia ki a rātou, “Hāpainga ake ahau, makā ki te moana; kātahi ka marino te moana ki a koutou; e mōhio ana hoki ahau he whakaaro ki ahau i puta mai ai tēnei paroro ki a koutou.”
JON 1:13 Heoi, hoe tonu aua tāngata kia ū ai rātou ki uta; otiia kīhai i taea. E nui haere ana hoki te ngaru o te moana hei ārai i a rātou.
JON 1:14 Kātahi aua tāngata ka karanga ki a Ihowā, ka mea, “Auē, e Ihowā, kaua rā mātou e whakangaromia hei utu mō te matenga o tēnei tangata. Kaua anō e utaina he toto harakore ki runga ki a mātou. Kua mahia nā hoki e koe, e Ihowā, tāu i pai ai.”
JON 1:15 Nā, hāpainga ana a Hona e rātou, makā ana ki te moana; ā, mutu ake te riri o te moana.
JON 1:16 Nā, he nui te wehi i wehi ai aua tāngata i a Ihowā; patua iho e rātou he patunga tapu ki a Ihowā, puaki ana ā rātou kupu taurangi.
JON 1:17 Nā, kua rite mai i a Ihowā tētahi ika nui hei horo i a Hona; ā, e toru ngā rā, e toru ngā pō o Hona i roto i te kōpū o te ika.
JON 2:1 Kātahi a Hona ka īnoi ki a Ihowā, ki tōna Atua, i roto i te kōpū o te ika.
JON 2:2 I mea ia: “I karanga ahau, he ngākau mamae nōku, ki a Ihowā; ā, whakahoki mai ana ia ki ahau; i tangi atu ahau i roto i te kōpū o te rēinga, ā, whakarongo ana koe ki tōku reo.
JON 2:3 I makā hoki ahau e koe ki te rire, ki waenga moana, ā, karapotia ana ahau e ngā roma; tika ana āu tūātea katoa me āu ngaru i runga i ahau.
JON 2:4 Nā, ka mea ahau, ‘Kua oti ahau te pei i mua i ōu kanohi; otiia tērā ahau e titiro atu anō ki tōu temepara tapu.’
JON 2:5 Karapotia ana ahau e te wai, tae tonu iho ki te wairua; i ōku taha katoa te rire ā taka noa; he rimu ngā tākai o tōku māhunga.
JON 2:6 I haere ahau ki raro ki ngā take o ngā maunga; kopia ana ahau e te whenua me ōna tūtaki ake ake; heoi whakaputaina ake ana e koe tōku ora i roto i te poka, e Ihowā, e tōku Atua.
JON 2:7 “I te hemonga o tōku wairua i roto i ahau, i mahara ahau ki a Ihowā; i tae atu anō tāku īnoi ki a koe ki tōu temepara tapu.
JON 2:8 “Ko te hunga e pupuri ana i ngā mea tekateka noa e whakarere ana i te atawhai mō rātou.
JON 2:9 Ko ahau ia ka mea patunga tapu ki a koe i runga i te reo whakawhetai; ka whakamanā e ahau āku kupu taurangi. Nā Ihowā te whakaoranga!”
JON 2:10 Nā, ka kōrero a Ihowā ki te ika, ā, ka ruakina e tērā a Hona ki te wāhi maroke.
JON 3:1 Nā, ka puta tuarua mai te kupu a Ihowā ki a Hona, i mea ia,
JON 3:2 “Whakatika, haere ki Ninewe, ki taua pā nui, kauwhautia hoki ki reira te kauwhau e kōrerotia e ahau ki a koe.”
JON 3:3 Nā, whakatika ana a Hona haere ana ki Ninewe, pērā ana me tā Ihowā i kōrero ai. Nā, he pā nui rawa Ninewe, e toru ngā rā e haerea ai.
JON 3:4 Nā, ka tīmata tā Hona haere ki roto ki te pā, kotahi te rā i haere ai, kei te karanga, kei te mea: “Kia whā tekau ake ngā rā, ka hurihia a Ninewe.”
JON 3:5 Ā, whakapono tonu ngā tāngata o Ninewe ki tā te Atua; karangatia ana e rātou he nohopuku, he taratara ō rātou kākahu, o ngā mea rarahi o rātou tae rawa iho ki ngā mea ririki.
JON 3:6 Nā, ka tae he kōrero ki te kīngi o Ninewe, ā, whakatika ana ia i runga i tōna torōna, whakarērea atu ana e ia tōna koroka, kei te hīpoki i a ia ki te kākahu taratara, noho ana i roto i te pungarehu.
JON 3:7 I meinga anō e ia kia karangatia te kōrero i roto i Ninewe: “He mea whakatakoto nā te kīngi rātou ko āna metararahi, i mea ia: “Kaua te tangata, te kararehe rānei, te kau rānei, te hipi rānei e pā ki tētahi aha. Kaua rātou e kai, e inu wai rānei.
JON 3:8 Engari, kia hīpokina te tangata me te kararehe ki te kākahu taratara, kia kaha anō tā rātou karanga ki te Atua. Āe rā, kia hoki anō ngā tāngata i tōna ara kino, i tōna ara kino, i te tutū anō o ō rātou ringa.
JON 3:9 Ko wai ka tohu tērā pea te Atua ka tahuri, ā, ka puta kē tōna whakaaro, ka tahuri atu hoki i te muranga o tōna riri, ā, e kore tātou e ngaro?”
JON 3:10 Ā, ka kite te Atua i ā rātou mahi, kua tahuri atu rātou i tō rātou ara kino; nā, ka puta kē te whakaaro o te Atua mō te kino i kīia e ia kia meatia ki a rātou; ā, kīhai i meatia e ia.
JON 4:1 Otiia ki tā Hona, nui atu te hē, ā, mura ana tōna riri.
JON 4:2 Ā, ka īnoi ia, ki a Ihowā, ka mea, “Auē, e Ihowā, he teka ianei ko tāku tēnei i mea ai i ahau anō i tōku whenua? Nā reira ahau i rere wawe ai ki Tarahihi; i mōhio hoki ahau he Atua atawhai koe, he tohu tangata, he pūhoi ki te riri, he nui te aroha, e puta kē ana te whakaaro mō te kino.
JON 4:3 Nā, tērā rā, e Ihowā, kia mate ahau āianei; he pai atu hoki i te ora te mate mōku.”
JON 4:4 Anō rā ko Ihowā, “He mea pai rānei kia riri koe?”
JON 4:5 Nā, ka puta a Hona i roto i te pā, ā, noho ana i te taha ki te rāwhiti o te pā; kei te hanga i tētahi tīhokahoka mōna ki reira, noho ana i raro i te taumarumarunga iho, kia kite rā anō ka ahatia rānei te pā.
JON 4:6 Nā, kua rite i a Ihowā tētahi hue, meinga ana e ia kia eke ki runga ki a Hona, hei whakamarumaru mō tōna māhunga, hei whakaora mōna i a ia i mamae rā. Nā, nui atu te koa o Hona ki te hue rā.
JON 4:7 Nā, kua rite anō i te Atua he huhu i te aonga ake o te rā, ā, ngaua iho e tērā te hue, nā, kua maroke.
JON 4:8 Nā, i te whitinga o te rā kua rite mai anō i te Atua tētahi hau pūmāhu, he marangai; āki tonu mai te rā ki runga ki te māhunga o Hona, whakaruhi noa iho, ā, īnoi ana mōna kia mate ia, i mea ia, “Pai atu i te ora te mate mōku.”
JON 4:9 Nā, ka mea te Atua ki a Hona, “He pai rānei kia riri koe ki te hue?” Anō rā ko ia, “He pai anō kia riri ahau ā mate noa.”
JON 4:10 Anō rā ko Ihowā, “I manawapā koe ki te hue kīhai nā i mahia e koe, kīhai anō i whakatupuria e koe; kotahi anō te pō i tupu ake ai, kotahi anō te pō i kore ai.
JON 4:11 Ā, kaua ianei ahau e manawapā ki Ninewe ki taua pā nui, he tokomaha nei ōna tāngata i ngā mano e ono tekau tōpū, he hunga kāhore nei e mōhio ki ō rātou ringa matau, ki ō rātou ringa mauī, he maha anō hoki ngā kararehe?”
MIC 1:1 Ko te kupu a Ihowā i puta mai ki a Mika Morahati i ngā rā o ngā kīngi o Hūrā, arā o Iotama, o Ahata, o Hetekia, ko tāna i kite ai mō Hamaria rāua ko Hiruhārama.
MIC 1:2 Whakarongo e ngā iwi, e koutou katoa; kia whai taringa mai, e te whenua, me ngā mea katoa i roto i a koe; ko te Ariki, ko Ihowā hei whakaatu i tō koutou hē, ko te Ariki mai i tōna temepara tapu.
MIC 1:3 Nō te mea, nanā, kei te puta mai a Ihowā i tōna wāhi, ka heke iho ia, ka takahi ki runga ki ngā wāhi tiketike o te whenua.
MIC 1:4 Ā, ka rewa ngā maunga i raro i a ia, ka ngātata ngā raorao, ka rite ki te wāki i mua i te ahi, ki ngā wai i ringihia ki te wāhi paripari.
MIC 1:5 Mō te hē o Hākopa, tēnei katoa, mō ngā hara o te whare o Īharaira. He aha te hē o Hākopa? He teka ianei ko Hamaria? He aha anō hoki ngā wāhi tiketike o Hūrā? He teka ianei ko Hiruhārama?
MIC 1:6 “Mō reira ka meinga e ahau a Hamaria kia rite ki te pūranga o te māra, ki ngā whakatōkanga hoki o te māra wāina; ka ringihia iho anō e ahau ōna kōhatu ki raro ki te raorao, ā, ka hurahia e ahau ōna tūranga.
MIC 1:7 Ā, ka wāwāhia āna whakapakoko, mongamonga ana, ka tahuna hoki ōna utu katoa ki te ahi, ā, ka takoto kau i ahau āna whakapakoko katoa. He mea āmene hoki nāna ki te utu a te wahine kairau, ā, ka hoki atu anō hei utu ki te wahine kairau.”
MIC 1:8 Mō reira ka tangi ahau, ka auē, ka haere ahau, tīhore rawa ngā kākahu, tahanga kau; ka rite tāku tangi ki tā ngā kurī mohoao, tāku uhunga ki tā ngā otereti.
MIC 1:9 Nō te mea ko ōna patunga e kore e mahu; kua tae rawa nei hoki ki a Hūrā; kua tae ki te kūwaha o tāku iwi, arā ki Hiruhārama.
MIC 1:10 Kaua e whakaaturia ki Kāta, kaua rawa e tangi; kua okeoke ahau i roto i te puehu i Pētere Āpara.
MIC 1:11 Haere atu korua, e te wahine e noho ana i Hapiri, i te takoto tahanga, i te whakamā; kāhore anō te wahine e noho ana i Taanana i puta mai; ka tangohia atu i a koutou e te tangihanga o Pete-Etere tōna tūranga.
MIC 1:12 I tatari hoki te wahine e noho ana i Maroto ki te pai, me te mānukanuka anō; nō te mea kua heke iho te kino i a Ihowā ki te kūwaha o Hiruhārama.
MIC 1:13 Whakamaua te hāriata ki te hōiho tere, e te wahine e noho ana i Rakihi. Ko ia te tīmatanga o te hara o te tamāhine a Hiona; kua kitea nā hoki ngā hē o Īharaira i roto i a koe.
MIC 1:14 Mō reira ka hoatu e koe he hākari poroporoaki ki Morehetekata; hei mea teka ngā whare o Akatipi ki ngā kīngi o Īharaira.
MIC 1:15 Tēnei ake ka kawea atu e ahau ki a koe, e te wahine e noho ana i Mareha, te tangata e whiwhi ki a koe; ka tae te korōria o Īharaira ki Aturama rā anō.
MIC 1:16 Moremorea tōu māhunga, kutikutia hoki, mō āu tamariki i āhuareka ai; whakanuia tōu pākira kia rite ki tō te ēkara; kua mawehe atu hoki rātou i a koe, kua whakaraua.
MIC 2:1 Auē te mate mō te hunga e whakaaro nā ki te hē, e mahi nā i te kino i runga i ō rātou moenga! Tākiri rawa ake te ata kua mahia e rātou, nō te mea kei roto i te kaha o tō rātou ringa.
MIC 2:2 E hiahia ana rātou ki ngā māra, tangohia ake; ki ngā whare hoki riro tonu i a rātou. E whakatupuria kinotia ana e rātou tētahi tangata me tōna whare, te tangata rawa nei me tōna wāhi tupu.
MIC 2:3 Mō reira ko te kupu tēnei a Ihowā: “Nanā, ka whakaaroa e ahau he kino mō tēnei hapū, e kore ai e whakawāteatia e koutou ō koutou kakī i reira, e kore anō koutou e haere whakapehapeha; he kino hoki tēnei wā.
MIC 2:4 I taua rā ka ara i a rātou tētahi whakatauki mō koutou, ka tangi hoki i tētahi tangi mamae nui, ā, ka mea, ‘Kua pāhuatia rawatia tātou; kua puta kē i a ia te wāhi o tāku iwi. Auē, tāna wehenga atu i ahau! Wehea ana e ia ā tātou māra mā te hunga whakakeke.’ ”
MIC 2:5 Mō reira kāhore he tangata māu hei maka i te taura a te rota i roto i te whakaminenga a Ihowā.
MIC 2:6 “Kaua koutou e poropiti,” ko tā rātou poropiti tēnei. “E kore rātou e poropiti ki ēnā; e kore ngā taunu e haere atu.”
MIC 2:7 E kīia ianei, e te whare o Hākopa: “Kua kūiti te Wairua o Ihowā? Ko āna mahi ianei ēnei?” “He teka ianei he mahi pai tā āku kupu ki te tangata e tika ana te haere?
MIC 2:8 Otiia, nō ēnei rā nei anō ka whakatika ake tāku iwi ānō he hoariri; e tīhorea atu ana e koutou te koroka i te kākahu o te hunga e haere kore wehi noa atu ana ānō he tangata e ngākaukore ana ki te whawhai.
MIC 2:9 Kua oti ngā wāhine o tāku iwi te pei e koutou i roto i ō rātou whare āhuareka; kua tangohia e koutou tōku korōria i ā rātou tamariki nonohi ā ake ake.
MIC 2:10 Whakatika, haere; ehara hoki tēnei i tō koutou okiokinga; he mea hoki mō te poke e whakangaro ana, e whakangaro kino rawa ana.
MIC 2:11 Ki te kōrero teka tētahi tangata e haere ana i te hau, i te teka, ki te mea, ‘Ka poropiti ahau ki a koe mō te wāina, mō te wai kaha,’ ko ia rawa anō hei poropiti mō tēnei iwi.”
MIC 2:12 “He pono ka kohikohi ahau i a koe katoa, e Hākopa; he pono ka whakawhāititia e ahau ngā mōrehu o Īharaira. Ka huihuia rātou e ahau, ka pērātia me ngā hipi o Potora; ka rite ki te kāhui i waenganui o tō rātou taiepa, ka nui tō rātou ngē i te tini hoki o te tangata.
MIC 2:13 Kua tae ake te kaiwāhi i tō rātou aroaro; kua pakaru mai rātou ki waho, kua tika i roto i te kūwaha, kua puta atu mā reira. Kua haere atu tō rātou kīngi i mua i a rātou, a Ihowā i tō rātou upoko.”
MIC 3:1 Ā, i mea ahau: “Whakarongo mai, e ngā upoko o Hākopa, e ngā ariki o te whare o Īharaira! He teka ianei mō koutou te mātauranga ki te whakawā?
MIC 3:2 E kino nā ki te pai, e aroha nā ki te kino; e tīhore nā i tō rātou kiri i ō rātou tinana, i tō rātou kikokiko i ō rātou wheua;
MIC 3:3 e kai nā hoki i ngā kikokiko o tāku iwi; e tīhore nā i tō rātou kiri i ō rātou tinana, e wāwāhi nā i ō rātou wheua; āe rā, e tapatapahia rawatia ana e rātou, ānō he mea mō te kōhua, ānō he kikokiko i roto i te kōhua nui.”
MIC 3:4 Ko reira rātou karanga ai ki a Ihowā, heoi e kore ia e whakahoki kupu ki a rātou. Āe rā, ka hunā e ia tōna mata ki a rātou i taua wā, ka rite ki tō rātou kino i mahia e rātou.
MIC 3:5 Ko te kupu tēnei a Ihowā: “Mō ngā poropiti e whakapōhēhē nei i tāku iwi, e ngau nei ō rātou niho, me te karanga, ‘He rongo māu’; ā, ki te kāhore e komotia e tētahi he mea ki ō rātou māngai, ka tino anga rātou ki te whakataka whawhai ki a ia.
MIC 3:6 Mō reira ko te pō mō koutou, e kore ai he kite ki a koutou; ā, ka pōuri ki a koutou, e kore ai koutou e kite tikanga; ā, ka tō te rā ki ngā poropiti, ā, ka mangu te awatea ki runga ki a rātou.
MIC 3:7 Ā, tērā e whakamā ngā matakite, e numinumi hoki ngā tohunga tūāhu; āe rā, tērā rātou katoa e ārai i ō rātou ngutu; nō te mea kāhore he kupu whakahoki a te Atua.”
MIC 3:8 Otiia, he pono, kua kī ahau i te kaha, he mea nā te Wairua o Ihowā, i te whakawā hoki, i te mana, kia whakaaturia ai e ahau ki a Hākopa tōna poka kē, ki a Īharaira tōna hara.
MIC 3:9 Tēnā rā, whakarongo ki tēnei, e ngā upoko o te whare o Hākopa, e ngā ariki hoki o te whare o Īharaira, e whakarihariha nā ki te whakawā, e whakapeau kē nā i te tika katoa.
MIC 3:10 E hanga ana rātou i Hiona ki te toto, i Hiruhārama ki te hē.
MIC 3:11 E whakawā ana ōna upoko, he mea nā te patipati, e whakaako ana ōna tohunga, he mea nā te utu; ko ōna poropiti nā te hiriwa i kite tikanga ai; otiia kei te whakawhirinaki rātou ki a Ihowā, kei te mea, “He teka ianei kei roto a Ihowā i a tātou? E kore tētahi hē e pā ki a tātou.”
MIC 3:12 Mō reira ka parautia a Hiona, ānō he māra, he mea mō koutou, ā, ka waiho a Hiruhārama hei pūranga, ka rite hoki te maunga o te whare ki ngā wāhi tiketike o te ngahere.
MIC 4:1 Otiia, tēnei ake kei ngā rā whakamutunga ka whakapūmautia te maunga i tō Ihowā whare ki te tihi o ngā maunga, ā, ka hikitia ki runga ake i ngā pukepuke, ā, ka rere ngā iwi ki reira.
MIC 4:2 Ā, he maha ngā iwi e haere, e mea: “Haere mai koutou, tātou ka haere ki runga ki te maunga o Ihowā, ki te whare o te Atua o Hākopa, ā, māna tātou e whakaako ki āna ara; ka haere hoki tātou i āna huarahi.” Nō te mea ka puta mai te ture i Hiona, te kupu hoki a Ihowā i Hiruhārama.
MIC 4:3 Ā, ka whakarite whakawā ia i waenganui i ngā iwi maha, ka rīria hoki e ia te hē o ngā iwi kaha i tawhiti; ā, ka patupatua e rātou ā rātou hoari hei hea parau, ā rātou tao hei mea tapahi manga. E kore tētahi iwi e hāpai hoari ki tētahi iwi, ā, heoi anō tā rātou ako ki te whawhai.
MIC 4:4 Engari ka noho rātou, ia tangata, ia tangata, i raro i tāna wāina, i raro i tāna piki; ā, kāhore he tangata hei whakawehi i a rātou; nā te māngai hoki o Ihowā o ngā mano te kōrero.
MIC 4:5 Ka haere hoki ngā iwi katoa, ia tangata, ia tangata, i runga i te ingoa o tōna atua, ā, ka haere tātou i runga i te ingoa o Ihowā, o tō tātou Atua ā ake ake.
MIC 4:6 “Ā taua rā,” e ai tā Ihowā, “ka huihuia e ahau te wahine e totitoti ana, ka whakaminea te wahine i peia atu, me ia anō i whakatupuria kinotia e ahau;
MIC 4:7 ā, ka meinga e ahau te wahine e totitoti ana hei mōrehu, me te wahine i makā atu ki tawhiti hei iwi kaha; ā, ka kīngi a Ihowā ki a rātou ki Maunga Hiona āianei ā ake tonu atu.
MIC 4:8 Nā, ka tae mai ki a koe, e koe, e te pourewa o te kāhui, e te taumaihi o te tamāhine a Hiona; āe rā, ka tae mai ki a koe te kīngitanga ō mua rā, te kīngitanga o te tamāhine a Hiruhārama.”
MIC 4:9 Nā, he aha koe i hāmama ai? Kāhore ianei he kīngi i roto i a koe, kua ngaro rānei tōu kaiwhakatakoto whakaaro, i mau pū ai koe i te mamae me te mea he wahine e whānau ana?
MIC 4:10 Whakamamae, e ngana kia puta ki waho, e te tamāhine a Hiona, kia rite ki te wahine e whānau ana. Nō te mea ko āianei koe puta ai i roto i te pā, ā, ka noho ki te pārae, ā, ka tae ki Papurōna rā anō; hei reira koe ka whakaorangia; hei reira a Ihowā hoko ai i a koe i te ringa o ōu hoariri.
MIC 4:11 Nā, tōna maha o ngā iwi kua huihui ki te whawhai ki a koe, e mea ana, “Tukua ia kia whakapokea, kia kite atu tō tātou kanohi i tāna koronga i runga i Hiona.”
MIC 4:12 Otirā, kāhore rātou e mātau ki ngā whakaaro o Ihowā, kāhore hoki e mōhio ki tāna i whakatakoto ai; kua kohikohia hoki rātou e ia ānō he paihere ki te patunga wīti.
MIC 4:13 “Whakatika ki te patu wīti, e te tamāhine a Hiona; ka meinga hoki e ahau tōu haona hei rino, ka meinga hoki e ahau ōu pāua hei parāhi; ā, he maha ngā iwi e patupatua e koe ā mongamonga noa; ā, māu e whakatapu mā Ihowā ngā mea i apohia mai e rātou, ō rātou rawa mā te Ariki o te whenua katoa.”
MIC 5:1 Nā ināianei, ka whakahuihui ā-rōpū koe i a koe, e te tamāhine a ngā rōpū; kua oti tātou te whakapae e ia; ka patua e rātou ki te rākau te pāpāringa o te kaiwhakawā o Īharaira.
MIC 5:2 “Nā, ko koe, e Pēterehema Ēparata, he iti nei i roto i ngā mano o Hūrā, e puta mai i roto i a koe tētahi māku hei kāwana mō Īharaira; ko ōna putanga nōnamata, nō ngā rā o tua iho.”
MIC 5:3 Mō reira rātou ka tukua atu ai e ia, kia tae rā anō ki te wā e whānau ai tēnei e whakamamae nei; hei reira ngā toenga o ōna tuākana hoki ai ki ngā tama a Īharaira.
MIC 5:4 Ā, ka tū ia, ka whāngai i tāna kāhui i runga i te kaha o Ihowā, i runga hoki i te nui o te ingoa o Ihowā, o tōna Atua; ā, ka noho rātou; nō te mea ākuanei ia ka nui, ki ngā pito rā anō o te whenua;
MIC 5:5 ā, ko tēnei tangata hei maunga rongo mō tātou. Ina tae mai te Ahiriana ki tō tātou whenua, ā, ka takahi ki ō tātou whare kīngi, hei reira ara ai i a tātou hei whawhai ki a ia ētahi hēpara tokowhitu me ētahi tāngata rangatira tokowaru.
MIC 5:6 Ā, ka whakamōtītia e rātou te whenua o Ahiria ki te hoari, te whenua hoki o Nimiroro i ōna tomokanga. Nā, ka whakaorangia tātou e ia i te Ahiriana, ina haere mai ia ki tō tātou whenua, ina takahi ia i roto i ō tātou rohe.
MIC 5:7 Ā, ka rite ngā toenga o Hākopa i roto i ngā iwi maha ki te tōmairangi a Ihowā, ki ngā kōuaua i runga i te tarutaru; e kore nei e whanga ki te tangata, e kore anō e tatari ki ngā tama a te tangata.
MIC 5:8 Nā, ka waiho te toenga o Hākopa i roto i ngā tauiwi, i roto i ngā iwi maha; ka rite ki te raiona i roto i ngā kararehe o te ngahere, ki te kūao raiona i roto i ngā kāhui hipi; nā, ki te tika atu ia i waenga, ka takatakahia e ia, ka haehaea, kāhore hoki he kaiwhakaora.
MIC 5:9 Whakaarahia tōu ringa ki runga ake i ōu hoariri, hātepea atu hoki ōu hoariri katoa.
MIC 5:10 “Nā, i taua rā,” e ai tā Ihowā “ka hātepea atu e ahau āu hōiho i roto i a koe, ka kore anō i ahau āu hāriata;
MIC 5:11 ā, ka whakakorea atu e ahau ngā pā o tōu whenua, ka wāwāhia anō e ahau ōu pā kaha katoa;
MIC 5:12 ka hātepea atu hoki e ahau ngā mākutu i roto i tōu ringa, ā, ka kore ngā tohunga māori i roto i a koe.
MIC 5:13 Ka hātepea atu hoki e ahau āu whakapakoko, me āu pou whakaahua i roto i a koe; ā, e kore koe e koropiko i muri nei ki te mahi a ōu ringa.
MIC 5:14 Ka hūtia anō e ahau āu Aherimi i roto i a koe; ā, ka hunā e ahau ōu pā.
MIC 5:15 Ka rapua hoki e ahau he utu i ngā tauiwi i runga i te riri, i te weriweri, kīhai nei rātou i whakarongo.”
MIC 6:1 Whakarongo koutou ināianei ki te kupu i kōrerotia e Ihowā: “Whakatika, totohe ki ngā maunga, kia rangona hoki tōu reo e ngā pukepuke.
MIC 6:2 Whakarongo, e ngā maunga nei, ki tā Ihowā totohe, e koutou hoki, e ngā tūranga kaha o te whenua; he totohe hoki tā Ihowā ki tāna iwi, ā, ka rīria e ia te hē o Īharaira.
MIC 6:3 “E tāku iwi, i aha ahau ki a koe? He ahatanga nāku i hōhā ai koe? Whakaaturia mai tōku hē!
MIC 6:4 Nāku nā hoki koe i kawe mai i te whenua o Īhipa, nāku anō koe i hoko i roto i te whare pononga; ā, i ungā atu e ahau a Mohi, a Ārona, a Miriama ki mua i a koe.
MIC 6:5 Kia mahara, e tāku iwi, ki te whakaaro i whakatakotoria e Pāraka kīngi o Moapa, ki te kupu hoki i whakahokia ki a ia e Paraama tama a Peoro; maharatia i Hitimi tae noa ki Kirikara, kia mōhio ai koutou ki ngā mahi tika a Ihowā.”
MIC 6:6 He aha tāku e haere ai ahau ki te aroaro o Ihowā, e piko ai ki te Atua i runga? He patunga tapu rānei te mea e haere ai ahau ki tōna aroaro, he kūao tau tahi rānei?
MIC 6:7 E manako rānei a Ihowā ki ngā mano o ngā hipi toa, ki ngā mano kotahi tekau rānei o ngā awa hinu? Me hoatu rānei e ahau tāku mātāmua hei utu mō tāku poka kē, te hua o tōku kōpū mō te hara o tōku wairua?
MIC 6:8 Kua whakaaturia e ia ki a koe, e te tangata, te mea pai; ā, he aha tā Ihowā e rapu nei ki a koe, heoi anō ko te whakawā tika, ko te pai ki te tohu tangata, ko te whakaiti me te haere tahi i tōu Atua?
MIC 6:9 E karanga ana te reo o Ihowā ki te pā, ā, ka kite te tangata whakaaro nui i tōu ingoa: “Whakarongo ki te whiu, ki a ia hoki nāna i whakarite.
MIC 6:10 Tērā anō rānei ngā taonga o te kino kei roto i te whare o te tangata kino, me te mēhua iti, whakarihariha anō?
MIC 6:11 Ka mā rānei ahau ki te kino ngā pāuna, ki te tinihanga ngā weti i roto i te pūtea?
MIC 6:12 Kī tonu nā hoki i te tutū ōna tāngata taonga, ā, kua kōrero teka ōna tāngata, kei te tinihanga hoki ō rātou arero i roto i ō rātou māngai.
MIC 6:13 “Mō reira kua whiua hoki koe e ahau ki te mate taimaha; kua meinga koe e ahau kia mokemoke, hei utu mō ōu hara.
MIC 6:14 Ka kai koe, ā, kāhore e mākona; ka waiho anō tōu whakaitinga i waenganui i a koe; ka tangohia atu anō e koe, heoi e kore e haere ora i a koe; ko te mea hoki e mauria atu e koe ka hoatu e ahau ki te hoari.
MIC 6:15 Ka whakatō koe, ā, e kore e kokoti; ka takahi koe i te ōriwa, ā, e kore e whakawahi i a koe ki te hinu; i te wāina hou, ā, e kore e inu i te wāina.
MIC 6:16 Nō te mea e mau ana ngā tikanga a Omori, me ngā mahi katoa a te whare o Āhapa, ā, e haere ana koutou i runga i ō rātou whakaaro; kia meinga ai koe e ahau kia ururua, ā, ko ngā tāngata o konā hei whakahīanga atu; ā, ka mau ki a koutou te ingoa kino o tāku iwi.”
MIC 7:1 Auē te mate i ahau! He rite hoki ahau ki ngā kohikohinga o ngā hua raumati, ki ngā hamunga i te wā e whawhaki karepe ana. Kāhore he tautau hei kai; e hiahia ana tōku wairua ki te hua piki mātāmua.
MIC 7:2 Kua ngaro te tangata tapu i runga i te whenua, kāhore hoki he tangata tika i roto i ngā tāngata; kei te whanga katoa rātou ki te toto; kei te whai rātou i tōna hoa, i tōna hoa ki te kupenga.
MIC 7:3 Kei runga ō rātou ringa i te mea kino kia mahia mārietia e rātou; ka tono te rangatira, kei te tatari hoki te kaiwhakawā kia utua; ā, ko te tangata nui, e puaki ana i a ia te nanakia o tōna wairua; nā, whiria tahitia ake e rātou.
MIC 7:4 Ko te tangata pai o rātou, rite tonu ki te tūmatakuru; ko te mea tino tika, kino atu i te taiepa tātarāmoa. Kua tae mai te rā o āu tūtei, arā te rā e whiua ai koe; ko āianei rātou pōkaikaha ai.
MIC 7:5 Kaua e whakapono ki te hoa, kaua e whakawhirinaki ki te kaiārahi; kaiponuhia ngā tatau o tōu māngai ki te wahine e takoto nā i tōu uma.
MIC 7:6 E whakaiti ana hoki te tama ki te pāpā, e whakatika atu ana te kōtiro ki tōna whaea, te hunaonga ki tōna hungawai wahine; ko ngā hoariri o te tangata ko ngā tāngata o tōna whare.
MIC 7:7 Tēnā ko ahau, ka titiro ahau ki a Ihowā; ka tatari ahau ki te Atua o tōku whakaoranga; tērā tōku Atua e rongo ki ahau.
MIC 7:8 Kei whakamanamana ki ahau e tōku hoariri; ki te hinga ahau, ka ara anō ahau; ki te noho ahau i te pōuri, ko Ihowā hei whakamārama mōku.
MIC 7:9 Māku e waha te riri, o Ihowā, kua hara nei hoki ahau ki a ia; kia tohe rā anō ia i tāku tohe, kia whakarite rā anō i tāku whakawā. Ka whakaputaina ahau e ia ki waho ki te mārama, ā, ka kite ahau i tōna tika.
MIC 7:10 Kātahi tōku hoariri ka kite, ā, ka taupokina e te whakamā; i kī mai rā hoki ia ki ahau, “Kei hea a Ihowā, tōu Atua?” Ka kite ōku kanohi i taua wahine; ākuanei ia takahia ai, pērātia ai me te paru o ngā ara.
MIC 7:11 He rā hei hanganga mō ōu taiepa! Ā taua rā ka matara rawa atu te tikanga i whakatakotoria.
MIC 7:12 Ā taua rā ka haere mai rātou ki a koe, mai i Ahiria me ngā pā o Īhipa, mai i Īhipa ki te awa, mai i tētahi moana ki tētahi, i tētahi maunga ki tētahi maunga.
MIC 7:13 Otiia ka ururuatia te whenua, he mea mō te hunga e noho ana i reira, mō ngā hua hoki o ā rātou mahi.
MIC 7:14 Whāngaia tāu iwi ki tāu rākau, ngā hipi o tōu kāinga tupu, e noho mokemoke nei i te ngahere i waenganui o Karamere; kia kai rātou ki Pahana, ki Kireara, kia pērā me ngā rā o mua.
MIC 7:15 “Ka rite ki ngā rā i haere mai ai koe i te whenua o Īhipa, ka whakaaturia e ahau ki a ia ngā mea whakamīharo.”
MIC 7:16 Ka kite ngā iwi, ka whakamā ki tō rātou mārohirohi katoa; ka kōpania tō rātou māngai ki tō rātou ringa, ā, ka turi ō rātou taringa.
MIC 7:17 Ka mitimiti rātou i te puehu, ānō he nākahi; ka oho wiri mai rātou i ō rātou piringa kōpiri, ānō ko ngā mea ngōkingōki o te whenua; ka haere wehi mai rātou ki a Ihowā, ki tō tātou Atua, ā, ka mataku ki a koe.
MIC 7:18 Ko wai he Atua hei rite mōu, e muru nei i te hē, e whakarere noa nei i te poka kē o ngā mōrehu o tōna wāhi tupu? E kore ia e kawe tonu i tōna riri ā ake ake, nō te mea e ngākau nui ana ia ki te tohu tangata.
MIC 7:19 Tērā ia e tahuri anō, ka aroha ki a tātou; ka pēhia e ia ō tātou kino ki raro ki ōna waewae. Ka pangā anō e koe ō rātou hara ki ngā rire o te moana.
MIC 7:20 Ka whakatutukitia e koe te mea tika ki a Hākopa, te aroha ki a Āperahama, ko tāu i oati ai ki ō mātou mātua i ngā rā ō mua.
NAH 1:1 Ko te poropititanga mō Ninewe. Ko te pukapuka o te kite a Nahumu Erekohi.
NAH 1:2 He Atua hae a Ihowā, he rapu utu; he rapu utu a Ihowā, ā, kī tonu i te riri; e rapu utu ana a Ihowā i ōna hoariri, ā, e rongoātia ana e ia he riri mō ōna hoariri.
NAH 1:3 He pūhoi a Ihowā ki te riri, he nui tōna kaha, e kore rawa e whakaharakoretia e ia te tangata hara. Ko tō Ihowā ara kei te tūkauati, kei te paroro, ko ngā kapua te puehu o ōna waewae.
NAH 1:4 E rīria ana e ia te moana, ā, meinga ana kia maroke, ā, whakamaroketia ana ngā awa katoa. E ngohe ana a Pahana, me Karamere, ā, kahakore noa iho te puāwai o Repanōna.
NAH 1:5 Wiri ana ngā maunga i a ia, rewa ana ngā pukepuke; huamo ake ana te whenua i tōna aroaro, āe rā, te ao, me ngā tāngata katoa e noho ana i reira.
NAH 1:6 Ko wai e kaha ki te tū i mua i tōna āritarita? Ko wai e kaha ki te whakatika, ina mura tōna riri; ko te ringihanga mai o tōna weriweri, ānō he ahi; ko ngā kāmaka wāhia iho e ia.
NAH 1:7 He pai a Ihowā, he pā kaha i te rā o te raru; e mōhio ana hoki ia ki te hunga e whakawhirinaki ana ki a ia.
NAH 1:8 Otiia ka mōtī tō reira wāhi i tāna waipuke e ngawhā ana; ka whāia anō e ia ōna hoariri ki roto ki te pōuri.
NAH 1:9 Ko te aha tā koutou e whakaaro nā ki a Ihowā? Ka mōtī rawa i a ia; e kore e tuaruatia te putanga ake o te aituā.
NAH 1:10 Nō te mea, ahakoa rite rātou ki te tātarāmoa e whiwhi ana, ahakoa ki ngā kōpū anō nā tā rātou wāina, ka tino pau rātou, ānō he kakau wīti kua maroke.
NAH 1:11 Kua puta mai i roto i a koe tētahi e whakaaro ana i te hē mō Ihowā, he kaiwhakatakoto i te whakaaro kino.
NAH 1:12 Ko te kupu tēnei a Ihowā, “Ahakoa tino kaha rātou, ahakoa tini, heoi ka tapahia rātou, ka pahemo ia. Ahakoa i whiua koe e ahau, e kore koe e whiua e ahau ā muri ake nei.
NAH 1:13 Nā, ākuanei ahau wāhi ai i tāna ioka i runga i a koe, momotu ai i ōu here.”
NAH 1:14 He whakahau hoki tā Ihowā mōu, arā: “Kia kaua e whakatōkia tētahi o tōu ingoa ā muri ake nei; ka hātepea atu e ahau te whakapakoko tārai me te whakapakoko whakarewa i roto i te whare o ōu atua. Ka hangā e ahau he urupā mōu; nō te mea he kino koe.”
NAH 1:15 Nanā, kei runga i ngā maunga ngā waewae o te kaikawe mai i te kōrero pai, o te kaikauwhau i te rongo mau! Mahia āu hākari, e Hūrā, whakamanā āu kupu taurangi; nō te mea heoi anō haeretanga atu o te tangata kino nā waenga i a koe; kua hātepea rawatia atu ia.
NAH 2:1 Kua tae ake te kaiwāwāhi ki tōu aroaro. Tiakina te pā, tūteia te ara, kia kaha tōu hope, kia ū rawa tōu kaha.
NAH 2:2 Nō te mea ka whakahokia mai e Ihowā te korōria o Hākopa, me te korōria o Īharaira; kua takoto kau hoki rātou i ngā kaiwhakatakoto kau, kua hē anō ā rātou manga wāina i a rātou.
NAH 2:3 Kua oti te whakangungu rākau a āna mārohirohi te whakawhero, he ngangana te kākahu o ngā māia. Kei te rino e kanapa ana te rite o ngā hāriata i te rā e takatū ai ia, ā, ko ngā tao wiri rawa.
NAH 2:4 Ngana tonu ngā hāriata i ngā ara, taututetute ana ki a rātou anō i ngā waharoa; ko tō rātou āhua ānō he roherohe, e rere ana me he uira.
NAH 2:5 Ka mahara ia ki āna metararahi; ka tapatu rātou i a rātou e haere ana; ka hohoro rātou ki tō reira taiepa, ā, ka rite te ārai.
NAH 2:6 Ka whakatuwheratia ngā kūwaha o ngā awa, ka papahoro te whare kīngi.
NAH 2:7 Nā, kua tū tahanga a Huhapa, kua maua atu ia, ā, ka tangi āna pononga wāhine, ko te reo koia anō kei tō te kūkupa, ko ō rātou uma hei timipera mā rātou.
NAH 2:8 Ko Ninewe ia, ko tōna rite mai onamata, kei te puna wai. Heoi, ka tahuti rātou; ka karanga, “E tū, e tū!” Heoi, e kore tētahi e titiro whakamuri.
NAH 2:9 Pāhuatia te hiriwa, pāhuatia te kōura; kāhore hoki he mutunga o ngā rawa, o te korōria i roto i ngā taonga āhuareka katoa.
NAH 2:10 Kua takoto kau ia, kāhore āna mea, mōtī rawa! Harotu kau te ngākau, kei te āki anō ngā turi ki a rāua, he nui te mamae kei ngā hope katoa, kua kōmā ngā mata o rātou katoa.
NAH 2:11 Kei hea te nohoanga o ngā raiona, te wāhi kai a ngā kūao raiona, te wāhi i hāereere ai te raiona, me te raiona kātua, me te kūao raiona, tē ai he kaiwhakawehi?
NAH 2:12 I haehaea mai e te raiona he mea e mākona ai āna kūao, nōtia ana e ia te kakī hei mea mā āna raiona uha, whakakīia ana e ia ōna rua ki te kai, ōna nohoanga hoki ki te mea i haehaea.
NAH 2:13 “Nanā, hei hoariri tēnei ahau mōu,” e ai tā Ihowā o ngā mano, “ka tahuna anō e ahau ana hāriata i roto i te paowa, ka pau āu kūao raiona i te hoari. Ka kore i ahau he haehaenga māu i runga i te whenua, e kore anō te reo o āu karere e rangona ā muri ake nei.”
NAH 3:1 Auē te mate mō te pā toto! Kua kī katoa i te teka, i te pāhua – kāhore e mutu te muru taonga!
NAH 3:2 Ko te haruru o te whiu, ko te ngaehe o ngā wīra e kekē ana; ko ngā hōiho e takatakahi ana, ko ngā hāriata e tarapekepeke ana.
NAH 3:3 Ko ngā kaieke hōiho e ekeeke ana, ko te wheriko o te hoari, ko te kanapa o te tao; ko te tini o te tūpāpaku, me te pūranga nui o ngā tinana mate – ā, kāhore he mutunga o ngā tinana; tūtuki ana te waewae ki ō rātou tinana.
NAH 3:4 He maha hoki nō ngā kairautanga o te wahine ātaahua i kairau nei; ko te rangatira nei ia o ngā mākutu, e hoko nei i ngā iwi ki āna kairautanga, i ngā hapū anō ki āna mahi mākutu.
NAH 3:5 “Nanā, hei hoariri tēnei ahau mōu,” e ai tā Ihowā o ngā mano, “ka hurahia anō e ahau ngā remu o tōu ki tōu aroaro; ka whakakite anō ahau i a koe e noho tahanga ana ki ngā iwi, me tōu whakamā ki ngā kīngitanga.
NAH 3:6 Ā, ka makā e ahau he mea whakarihariha ki runga ki a koe, ka whakaititia koe e ahau, ka meinga hei tirohanga atu.
NAH 3:7 Nā, ko te hunga katoa e kite ana i a koe ka rere atu i a koe, ā, ka mea, ‘Kua ururuatia a Ninewe; ko wai hei tangi ki a ia?’ Me rapu e ahau ki hea he kaiwhakamārie mōu?”
NAH 3:8 He pai ake rānei koe i Noamono, i tū nei i roto i ngā awa, he mea karapoti e ngā wai, ko tōna pekerangi ko te moana, nō te moana anō tōna taiepa?
NAH 3:9 Ko tōna kaha ko Etiopia, ko Īhipa, kāhore hoki he mutunga; he āwhina nōu a Putu, a Rūpimi.
NAH 3:10 Heoi, kua whakaraua atu ia, kua riro hei pārau. Ko āna kōhungahunga tāia iho i te ahunga mai o ngā ara katoa, mongamonga noa, i maka rota rātou mō ōna tāngata nunui, ko ōna tāngata rarahi katoa here rawa ki te mekameka.
NAH 3:11 Tērā anō koe ka haurangi, ka huna koe; ā, ka rapu koe he wāhi kaha i te wehi o te hoariri.
NAH 3:12 Ko ōu pā taiepa katoa ka rite ki te piki he hua mātāmua nei ōna – ki te rurerurea, ka taka ki roto ki te māngai o te tangata e kai ana.
NAH 3:13 Nanā, he wāhine ōu tāngata i waenganui i a koe. Ko ngā kūwaha o tōu whenua tuwhera pū ki ōu hoariri; ka pau ōu tūtaki i te ahi.
NAH 3:14 Utuhia he wai mōu mō te whakapaenga, whakakahangia ōu pā taiepa; haere ki te mahi paru, takatakahia te mea pokepoke, kia ū te tahunga pereki.
NAH 3:15 Ka pau koe i te ahi i reira, ka hātepea atu koe e te hoari, ko tāna kai i a koe ka rite ki tā te tātarakihi. Whakaraneatia koe, kia rite ki te tātarakihi, whakaraneatia koe, kia rite ki te māwhitiwhiti.
NAH 3:16 Ko āu kaihokohoko whakatokomahatia ake e koe i ngā whetū o te rangi. Ko tā te tātarakihi he pāhua, ā, rere ana.
NAH 3:17 Ko ōu tāngata i te pōtae kīngi, ko tō rātou rite kei te māwhitiwhiti, ko ōu rangatira rite tonu ki ngā pōkai māwhitiwhiti e noho nei i ngā taiepa i te rā māeke i te whitinga o te rā ka rere rātou, kāhore hoki e mōhiotia tō rātou wāhi, kei hea rā?
NAH 3:18 Kei te moe āu hēpara, e te kīngi o Ahiria; ko āu metararahi kei te takoto. Kua marara atu tōu iwi ki runga ki ngā maunga, kāhore hoki he kaihuihui.
NAH 3:19 Kāhore he whakamāhunga i tōu pakaru; he mamae rawa tōu marūtanga. Ko te hunga katoa e rongo ana i te rongo ki a koe, ka papaki ō rātou ringa ki a koe. I kore hoki ki a wai te pānga tonutanga o tōu kino.
HAB 1:1 Ko te poropititanga i kitea e Hapakuku poropiti.
HAB 1:2 Kia pēhea te roa, e Ihowā, o tāku tangi, ā, kāhore koe e rongo? E karanga atu ana ahau ki a koe mō te tutū, ā, kāhore koe e whakaora.
HAB 1:3 He aha koe i whakakite mai ai i te kino ki ahau? He aha koe i titiro ai ki te pakeketanga? He pāhua hoki, he tutū tēnei kei tōku aroaro, nā, he totohe tēnei, ā, kei te oho ake he ngangare.
HAB 1:4 Nā reira kahakore noa iho te ture, kore tonu ake e puta te whakawā; e karapotia ana hoki te tika e te kino – nā reira, te putanga o te whakawā, he parori kē.
HAB 1:5 “Titiro atu ki ngā tauiwi, mātakitaki, kia nui te mīharo! Nō te mea kei te mahi ahau i tētahi mahi i ō koutou rā, he mea e kore e whakaponohia, ki te kōrerotia atu.
HAB 1:6 Nō te mea tēnei ka ara i ahau ngā Karari, taua iwi nanakia rā, taua iwi hīkaka tonu rā, e haerea nei e rātou te whānuitanga o te whenua, kia riro ai i a rātou ngā kāinga ehara nei i a rātou.
HAB 1:7 “He hanga whakamataku rātou, he mea wehi; i ahu tonu ake i a rātou tā rātou nā whakawā, me tō rātou nā rangatiratanga.
HAB 1:8 He tere atu ā rātou hōiho i te reparo, he nanakia atu i te wuruhi o te ahiahi; ka tohatoha noa atu ō rātou kaieke hōiho. Āe rā, ka haere mai anō ā rātou kaieke hōiho i tawhiti; ko tā rātou rere rite tonu ki tā te ēkara e hohoro ana ki te kai.
HAB 1:9 “Ko rātou katoa he mahi nanakia i haere mai ai; ko ō rātou kanohi whakamau tonu me te mea ko te hau marangai, me te mea he kirikiri ngā whakarau e aohia ana e rātou.
HAB 1:10 Āe rā, e taunu ana ia ki ngā kīngi, ā, hei kata māna ngā rangatira. Ka kata ia ki ngā pā taiepa katoa; ka opehia ake hoki he puehu e ia, ā, riro tonu i a ia.
HAB 1:11 Kātahi ia ka wheoro ake ānō he hau, ka whiti atu, ā, ka mahi i te hē; arā a ia, te tangata ko tōna kaha nei tōna atua.”
HAB 1:12 He teka ianei nōnamata riro koe, e Ihowā, e tōku Atua, e tōku Mea Tapu? E kore mātou e mate. Kua waiho ia e koe, e Ihowā, hei whakawā; kua whakapūmautia ia e koe, e te Kāmaka, hei whiu.
HAB 1:13 He kanohi mā rawa ōu, e kore koe e titiro ki te kino, e kore anō e āhei kia mātakitaki koe ki te kino. He aha koe i mātakitaki ai ki te hunga tinihanga, i whakarongo puku ai i te mea ka horomia e te tangata kino te tangata e tika rawa ana i a ia?
HAB 1:14 He aha ngā tāngata i meinga ai e koe kia rite ki ngā ika o te moana, ki ngā mea ngōkingōki kāhore nei ō rātou kaiwhakahaere tikanga?
HAB 1:15 Ko rātou katoa tangohia ake e ia ki te matau, ka mau i a ia ki roto ki tāna kupenga, e kokoa ana ki tāna rou; nā reira koa ana ia, whakamanamana ana.
HAB 1:16 Koia ia i whakahere ai ki tāna kupenga, i tahu whakakakara ai ki tāna rou; nō te mea nā aua mea i whai ngako ai tōna wāhi, i mōmona ai tāna kai.
HAB 1:17 He mea anō rānei tērā e whakawāteatia ai e ia tāna kupenga, ā, kore iho e tohungia ngā iwi e patua tonutia ana?
HAB 2:1 Ka tū ahau ki tāku mahi tiaki, ka whakanoho i ahau ki te taumaihi. Ka tūtei atu, ka titiro atu, ko te aha e kīia mai e ia ki ahau, ā, ko te aha e whakahokia e ahau ina rīria tāku.
HAB 2:2 Nā, ka utua mai tāku e Ihowā, i kī mai ia: “Tuhituhia te kite; kia mārama rawa ki ngā papa, kia tere ai te kaikōrero.
HAB 2:3 Mō tōna wā anō hoki i whakaritea ai te kite, ā, e whawhai ana ia ki te mutunga, ā, e kore e teka. Ahakoa roa ia, tatari atu ki a ia; nō te mea he pono rawa ka puta mai; e kore e whakaroa.
HAB 2:4 “Nanā, kei te whakakake tōna ngākau, kāhore e tika i roto i a ia; mā tōna whakapono ia ka ora ai te tangata tika.
HAB 2:5 Āe rā hoki, he mea nanakia te wāina, he tangata whakakake, kāhore e āta noho i te kāinga. Ko tōna hiahia whakanuia ake e ia ānō ko te rēinga, kei te mate tōna rite, e kore anō e ngata. E tāwhiua ana hoki e ia ngā iwi katoa ki a ia, e taupuatia ana ngā tāngata katoa ki a ia.”
HAB 2:6 “E kore ianei e whakahuatia e ēnei katoa he kupu whakatauki mōna, he whakapeka taunu anō mōna, ā, ka mea, ‘Auē te mate mō te tangata e āmi ana i te mea ehara nei i a ia! He pēhea rā te roa mō te tangata anō e haupū ake ana i te taunaha ki runga ki a ia?’
HAB 2:7 E kore ianei e maranga ohorere ake ngā kaingau mōu? E kore ianei e ara ngā kaiwhakatoi i a koe, ā, ka waiho koe hei taonga pārau mā rātou?
HAB 2:8 Nō te mea he maha ngā iwi i pāhuatia e koe, nā, ka pāhuatia koe e ngā toenga katoa o ngā iwi – he mea hoki mō te toto o ngā tāngata, mō te mahi nanakia ki te whenua, ki te pā, ā, ki ngā tāngata katoa anō i reira.
HAB 2:9 “Auē te mate mō te tangata, he kino nei te apo i apo taonga ai ia mō tōna whare, he mea kia tiketike ake ai tōna kōhanga, kia ora ai ia i te kaha o te kino!”
HAB 2:10 Kua takoto i a koe he whakamā mō tōu whare i tāu hātepenga atu i ngā iwi maha; kua hara anō ki tōu wairua ake.
HAB 2:11 Ka karanga hoki te kōhatu i roto i te pakitara, ka whakahoki kupu anō te kurupae i roto i ngā rākau.
HAB 2:12 “Auē te mate mō te tangata e hanga ana i te pā ki te toto, e whakaū ana hoki i te pā ki te hē!”
HAB 2:13 He teka ianei nā Ihowā o ngā mano i māuiui ai ngā tāngata i roto i te ahi, i ruha ai ngā iwi i te kāhore noa iho?
HAB 2:14 Ka kapi hoki te whenua i te mātauranga ki te korōria o Ihowā, ānō ko ngā wai e taupoki ana i te moana.
HAB 2:15 “Auē te mate mō te tangata e mea ana i tōna hoa kia inu, e āpiti atu ana i te mea nanakia ki tērā, e whakahaurangi ana hoki i a ia, kia titiro ai koe ki a rātou e takoto tahanga ana!”
HAB 2:16 E kī ana koe i te whakamā, kāhore i te korōria. E inu hoki koe, kia waiho ai koe, ānō he mea kokotikore. Ka anga mai ki a koe te kapu a tō Ihowā ringa matau, ā, he whakamā whakarihariha ka tau ki runga ki tōu korōria.
HAB 2:17 Ko te mahi nanakia hoki ki Repanōna hei taupoki mōu, me te whakangaromanga o ngā kararehe i wehingia rā e rātou – mō te toto hoki o ngā tāngata, mō te mahi nanakia ki te whenua, ki te pā, ki ngā tāngata anō o reira.
HAB 2:18 “He aha te pai o te whakapakoko i whaoa ai e tōna kaihanga – o te whakapakoko whakarewa anō, o te kaiwhakaako ki te teka? I whakawhirinaki ai tōna kaihanga ki tāna mahi, ka mahi i ngā whakapakoko wahangū.
HAB 2:19 Auē te mate mō te tangata e mea ana ki te rākau, ‘Maranga!’ Ki te kōhatu reokore, ‘E ara!’ Mā tēnei koia e whakaako? Nanā, kua oti te kōura, te hiriwa, te whakapiri ki a ia, ā, kāhore rawa he wairua i roto.
HAB 2:20 Kei tōna temepara tapu ia a Ihowā. Whakarongoa, e te whenua katoa, i tōna aroaro!”
HAB 3:1 He īnoi nā Hapakuku poropiti, ko Hikionoto te waiata.
HAB 3:2 E Ihowā, kua rongo ahau i tōu rongo, wehi ana ahau, e Ihowā. Kia ora tāu mahi i waenganui o ngā tau, kia mātauria i waenganui o ngā tau; i te mea e riri ana, mahara ki te tohu tangata.
HAB 3:3 I haere mai te Atua i Temana, te Mea Tapu i Maunga Parana. Hera Hei hīpoki tōna korōria mō ngā rangi; kī tonu te whenua i te whakamoemiti ki a ia.
HAB 3:4 Ko tōna tīahotanga ānō ko te mārama; he hihi e puta ana mai i tōna ringa; i reira anō te hunanga o tōna kaha.
HAB 3:5 I mua i a ia te mate urutā e haere ana, i puta anō he mura whānāriki i ōna waewae.
HAB 3:6 Tū ana ia, ā, whanganga ana e ia te whenua; i titiro ia, ā, tītaria ana e ia ngā iwi. Rererere ana ngā maunga onamata, piko ana ngā pukepuke ō mua; ko ōna ara koia anō kei onamata.
HAB 3:7 I kite ahau, kei te tuatea ngā tēneti o Kūhana; wiri ana ngā tauārai o te whenua o Miriana.
HAB 3:8 I riri rānei a Ihowā ki ngā awa? Ki ngā awa rānei tōu riri, ki te moana rānei tōu riri? I haere ai koe i runga i āu hōiho, i āu hāriata whakaora?
HAB 3:9 I meinga tāu kōpere kia noho tahanga; ko ngā oati ki ngā hapū he kupu pono. Hera Wāhia ana e koe te whenua ki ngā awa.
HAB 3:10 I kite ngā maunga i a koe, ā, wehi ana; i pahemo ake te waipuke o ngā wai; i puaki te reo o te rire, ā, ara ana ōna ringa ki runga.
HAB 3:11 Tū ana te rā me te marama i tō rāua kāinga, haere ana rātou i te mārama o āu pere, i te wherikotanga o tāu tao kanapa.
HAB 3:12 Hāereerea ana e koe te whenua i runga i te āritarita, patua ā-wītitia ana e koe ngā iwi i runga i te riri.
HAB 3:13 I puta koe ki te whakaora i tāu iwi, āe rā, ki te whakaora i tāu i whakawahi ai. Pakaru ana i a koe te upoko i roto o te whare o te hunga kino, takoto kau ana te tūranga, ā taea noatia te kakī. Hera
HAB 3:14 Werohia ana e koe te upoko o ōna ariki ki āna tokotoko anō; ānō he paroro rātou e āki mai ana ki te tītaritari i ahau; ko tō rātou koanga ngākau he kai puku i te rawakore.
HAB 3:15 Takahia ana e koe te moana ki ōu hōiho, te haupūranga o ngā wai nunui.
HAB 3:16 I tōku rongonga, wiri ana tōku kōpū; oraora ana ōku ngutu i te reo. Ngoto ana te pirau ki roto ki ōku wheua, ā, wiri ana ahau i tōku wāhi. He mea ia e whai okiokinga ai ahau i te rā o te raru, i te haerenga ake ki te iwi e kōkiri ana mai ki a ia me āna kaieke hōiho.
HAB 3:17 Ahakoa kore te piki e kōpuku, kore ngā wāina e whai hua; ka hē te mahi ōriwa, kāhore hoki ngā māra e whai kai; ko ngā hipi poto ake i roto i ngā taiepa, kāhore hoki he kau i roto i ngā taiepa kau;
HAB 3:18 otiia, ka koa ahau ki a Ihowā, ka whakamanamana ki te Atua o tōku whakaoranga.
HAB 3:19 Ko Ihowā, ko tōku Ariki, tōku kaha, ka meinga e ia ōku waewae kia rite ki ō te hāta, ka meinga anō ahau e ia kia takahi i runga i ōku wāhi tiketike. Ki te tino kaiwaiata i runga i āku mea whakatangi.
ZEP 1:1 Ko te kupu a Ihowā i puta mai ki a Tepania tama a Kuhi, tama a Keraria, tama a Amaria, tama a Hetekia, i ngā rā o Hōhia tama a Amono, kīngi o Hūrā.
ZEP 1:2 “Ka poto rawa i ahau ngā mea katoa i runga i te mata o te oneone,” e ai tā Ihowā.
ZEP 1:3 “Ka poto i ahau te tangata, te kararehe; ka poto i ahau te manu o te rangi, me te ika o te moana, ngā tūtukitanga waewae ngātahi anō ko te hunga kino; ka hātepea atu anō e ahau te tangata i runga i te mata o te oneone,” e ai tā Ihowā.
ZEP 1:4 “Ka totoro anō tōku ringa ki runga ki a Hūrā, ki ngā tāngata katoa anō o Hiruhārama; ka hātepea atu e ahau i tēnei wāhi ngā toenga o Paara, me te ingoa o ngā Kemarimi, rātou ko ngā tohunga;
ZEP 1:5 me te hunga e koropiko ana i runga i ngā tuanui ki te ope o te rangi; rātou ko te hunga e koropiko ana, e oati ana i a Ihowā, me te oati anō rātou i a Marakama.
ZEP 1:6 Me te hunga i tahuri atu nei i te whai i a Ihowā, me te hunga kīhai nei i ui ki a Ihowā, kīhai anō i rapu i a ia.”
ZEP 1:7 Whakarongoa i te aroaro o te Ariki, o Ihowā, ka tata hoki te rā o Ihowā, kua takoto hoki tā Ihowā patunga tapu, kua whakatapua hoki e ia āna manuhiri.
ZEP 1:8 Nā, i te rā o tā Ihowā patunga tapu, ka whiua e ahau ngā rangatira, rātou ko ngā tama a te kīngi, ko te hunga katoa ānō he kākahu kē ō rātou.
ZEP 1:9 Ā taua rā ka whiua e ahau te hunga katoa e tūpekepeke ana i runga i te paepae, e whakakī ana i ngā whare o ō rātou ariki ki te nanakia, ki te tinihanga.
ZEP 1:10 “Ā taua rā,” e ai tā Ihowā, “ka karanga te reo i te Kūwaha Ika, he auē hoki i te wāhi tuarua, ā, he nui te pakaru i ngā pukepuke.
ZEP 1:11 Auē, e ngā tāngata o Makateha, kua mōtī hoki ngā tāngata katoa o Kanaana, kua hātepea atu ngā kaimau hiriwa katoa.
ZEP 1:12 I taua rā ka rapua e ahau tā Hiruhārama, mea rawa ki te rama; ka whiua anō ngā tāngata kua tōtoka i runga i ō rātou nganga, ā, e mea ana i roto i ō rātou ngākau, ‘E kore a Ihowā e mahi i te pai, e kore anō e mahi i te kino.’
ZEP 1:13 Nā, hei mea pārau ō rātou rawa; ō rātou whare hei ururua. Āe rā, ka hanga whare rātou; ā, e kore e nohoia e rātou; ka whakatō i te māra wāina, otiia e kore e inu i te wāina.”
ZEP 1:14 “Ka tata te rā nui o Ihowā, ka tata, nui atu te hohoro, arā te reo o te rā o Ihowā; nui noa atu te tangi o te mārohirohi i reira.
ZEP 1:15 He rā riri taua rā, he rā mamae, he pāwera, he rā whakangaro, whakamōtī, he rā pōuri, he mangu, he rā kapua, he pōuri kerekere;
ZEP 1:16 ko te rā ia o te tētere, o te whakaoho mō ngā pā taiepa, mō ngā taumaihi tiketike.
ZEP 1:17 “Ka mamae anō i ahau ngā ngākau o ngā tāngata, ka rite rātou ki te matapō ina haere, mō rātou i hara ki a Ihowā; ka ringihia ō rātou toto ānō he puehu, ō rātou kikokiko ānō he paru.
ZEP 1:18 E kore anō tā rātou hiriwa, tā rātou kōura, e tau hei whakaora i a rātou i te rā o tō Ihowā riri. Engari, ka pau te whenua katoa i te ahi, arā i tōna hae; ka ohorere hoki, ka poto i a ia ngā tāngata katoa o te whenua.”
ZEP 2:1 Huihui, āe rā, huihui i a koutou, e iwi kāhore nei he whakamā;
ZEP 2:2 i te mea kīanō te ture i whai hua, ā, kīanō i pahemo te rā ānō he pāpapa, i te mea kīanō i tae iho ki a koutou te mura o tō Ihowā riri, i te mea kīanō i tae iho ki a koutou te rā o tō Ihowā riri.
ZEP 2:3 Rapua a Ihowā, e te hunga māhaki katoa o te whenua, e te hunga e mahi ana i tāna i whakarite ai; rapua te tika, rapua te tikanga māhaki; me kāhore koutou e piri i te rā o tō Ihowā riri.
ZEP 2:4 Nō te mea tērā a Kaha ka mahue, ka ururuatia a Ahakerono; ka peia atu a Aharoro i te poutūmārōtanga, ka hūtia atu hoki a Ekerono.
ZEP 2:5 Auē te mate mō ngā tāngata i ngā tahatika o te moana, mō te iwi o ngā Kereti! Kua kōrero a Ihowā i te hē mōu, e Kanaana, e te whenua o ngā Pirihitini; ka ngaro koe i ahau, kāhore he tangata hei noho.
ZEP 2:6 Ā, ka waiho te tahatika o te moana hei haerenga hipi, me ngā whare mō ngā hēpara, me ngā taiepa mō ngā hipi.
ZEP 2:7 Ka waiho anō te tahatika mō ngā toenga o te whare o Hūrā, ka whāngaia e rātou ā rātou hipi ki reira. Ka takoto i te ahiahi i roto i ngā whare o Ahakerono; nō te mea ka tirotirohia rātou e Ihowā, e tō rātou Atua, ā, ka whakahokia mai e ia i te whakarau.
ZEP 2:8 “Kua rongo ahau i tā Moapa tāwai, i ngā taunu a ngā tama a Āmona, i tā rātou tāwai ki tāku iwi, i tā rātou whakatete mō tō rātou rohe kia nui.
ZEP 2:9 Mō reira e ora ana ahau,” e ai tā Ihowā o ngā mano, tā te Atua o Īharaira, “he pono ka rite a Moapa ki Horoma, ngā tama a Āmona ki Komora, hei tupuranga ongaonga, hei rua tote, hei ururua, ā ake ake. Mā ngā toenga o tāku iwi rātou e pāhua, hei kāinga tupu rātou mō ngā mōrehu o āku tāngata.”
ZEP 2:10 Hei utu tēnei ki a rātou mō tō rātou whakapehapeha, mō tā rātou tāwai, mō tā rātou whakakake ki te iwi o Ihowā o ngā mano.
ZEP 2:11 Nā, ka wehingia a Ihowā e rātou, nō te mea ka hīroki i a ia ngā atua katoa o te whenua; ā, ka koropiko ngā tāngata katoa ki a ia i tōna wāhi, i tōna wāhi, arā ngā motu katoa o ngā tauiwi.
ZEP 2:12 “Ko koutou anō, e ngā Etiopiana, ka werohia koutou ki tāku hoari.”
ZEP 2:13 Ka totoro anō tōna ringa ki te raki, ā, ka ngaro a Ahiria i a ia; ā, ka meinga a Ninewe hei ururua, ka maroke, ka pērā i te koraha.
ZEP 2:14 Ā, ka tāpapa ngā kāhui ki waenganui ōna, ngā kīrehe katoa o ngā tauiwi. Ka noho te kawau rāua ko te matuku ki ōna puku whakapaipai; ka puaki tō rāua reo i ngā matapihi; ka ururuatia ngā kūwaha; nō te mea ka tū tahanga ngā mea hīta i a ia.
ZEP 2:15 Ko te pā whakamanamana tēnei i noho wehikore nei, i mea nei i roto i tōna ngākau, “Ko ahau tēnei, kāhore atu hoki, ko ahau anake.” Anō tōna ururuatanga, he tāpapatanga kīrehe! Ko te hunga katoa e tika ana nā reira ka hī atu, ka tawhi i tōna ringa.
ZEP 3:1 Auē te mate mō tēnei e whakakeke nei, kua poke nei, mō te pā tūkino!
ZEP 3:2 Kīhai ia i whakarongo ki te reo, kīhai i pai ki te ako. Kīhai i whakawhirinaki ki a Ihowā, kīhai i whakatata ki tōna Atua.
ZEP 3:3 He raiona e hāmama ana ōna rangatira i roto i a ia, he wuruhi i te ahiahi ōna kaiwhakarite, kāhore ā rātou toenga mō te ata.
ZEP 3:4 Ko ōna poropiti, he wairangi, he hunga tinihanga; kua whakapokea te wāhi tapu e ōna tohunga, kua tūkinotia e rātou te ture.
ZEP 3:5 He tika a Ihowā i roto i a ia; kāhore āna mahi hē. I tēnei ata, i tēnei ata, e puta ana tāna whakawākanga ki te mārama, e kore tāna e ngaro atu; nā, ko te kaimahi i te hē, e kore ia e mōhio ki te whakamā.
ZEP 3:6 “Kua oti ngā iwi te hātepe atu e ahau; tū kau ana ō rātou taumaihi. Kua ururua i ahau ō rātou ara, kāhore e haerea; kua ngaro ō rātou pā, kāhore he tangata, kāhore he kainoho.
ZEP 3:7 I kī ahau, ‘He pono ka wehi koe i ahau, ka pai ki te ako; pēnei kīhai i hātepea atu tōna nohoanga, kīhai i pērā me āku whiunga katoa i a ia.’ Heoi, moata tonu tō rātou maranga, he iho ā rātou mahi katoa.”
ZEP 3:8 “Mō reira tatari mai ki ahau,” e ai tā Ihowā, “ki te rā e whakatika ai ahau ki te taonga parakete. Ko tāku tikanga hoki tēnei, kia huihuia mai ngā tauiwi, kia tāwhiua mai ngā kīngitanga, kia ringihia ki runga ki a rātou tōku riri, tōku āritarita katoa, mura tonu; ka pau hoki te whenua katoa i te ahi, arā i tōku hae.
ZEP 3:9 “Ka puta kē hoki i ahau i reira he reo tino tika mō ngā iwi, e karanga ai rātou katoa ki te ingoa o Ihowā, e kotahi tonu ai te whakaaro e mahi ai ki a ia.
ZEP 3:10 Ka kawea mai he whakahere ki ahau e te hunga e īnoi ana ki ahau, arā e te tamāhine a āku whati, i tērā taha o ngā awa o Etiopia.
ZEP 3:11 “I taua rā e kore koe e whakamā ki tētahi o āu mahi, o ōu hē ki ahau; nō te mea ka tangohia atu e ahau i roto i a koe te hunga e whakamanamana ana, e whakapehapeha ana, e kore anō koe e whakakake ā muri ake nei, i runga i tōku maunga tapu.
ZEP 3:12 Ka whakatoea anō e ahau ētahi i roto i a koe, he ware, he rawakore, ā, ka whakawhirinaki rātou ki te ingoa o Ihowā.
ZEP 3:13 E kore ngā toenga o Īharaira e mahi hē, e kōrero teka rānei; e kore anō e kitea he arero teka i roto ō rātou māngai. Ka kai hoki rātou, ka takoto, tē ai he kaiwhakawehi.”
ZEP 3:14 Waiata, e te tamāhine a Hiona; hāmama, e Īharaira! Whakapaua te ngākau ki te koa, ki te whakamanamana, e te tamāhine a Hiruhārama.
ZEP 3:15 Kua kore i a Ihowā ngā whakawā mōu, kua peia e ia tōu hoariri. Kei roto i a koe te kīngi o Īharaira, arā a Ihowā; e kore koe e kite i te kino ā muri ake nei.
ZEP 3:16 Ko te kōrero tēnei ki Hiruhārama i taua rā: Kaua e wehi; e Hiona, kei ruha ōu ringa.
ZEP 3:17 Kei roto a Ihowā, tōu Atua, i a koe, ā, he nui ia, māna e whakaora; ka koa ia, ka hari ki a koe; ka āta noho ia i runga i tōna aroha, ka whakamanamana ia, ka waiata ki a koe.
ZEP 3:18 “Ka whakaminea e ahau te hunga e pōuri ana ki te huihuinga nui, ērā i roto i a koe, ērā e mau nā tōna ingoa kino ki a rātou.
ZEP 3:19 Nanā, i taua wā, ka mahi ahau ki te hunga katoa e whakatupu kino ana i a koe. Ka whakaora i te wahine e totitoti ana; ka kohikohi i te mea i peia atu, ā, hei whakamoemititanga rātou, hei ingoa i ngā whenua katoa i whakamā ai rātou.
ZEP 3:20 I taua wā ka kawea mai koutou e ahau, ā, i taua wā ka whakaminea mai koutou e ahau; ā, hei ingoa koutou, hei whakamoemititanga i roto i ngā iwi katoa o te whenua, ina whakahokia koutou e ahau i te whakarau me te titiro anō koutou,”
HAG 1:1 I te rua o ngā tau o Kīngi Tariuha, i te ono o ngā marama, i te rā tuatahi o te marama ka puta mai te kupu a Ihowā, he mea nā Hākai poropiti, ki a Herupapera tama a Haratiera, kāwana o Hūrā, rāua ko te tino tohunga, ko Hohua tama a Iohereke; i mea ia:
HAG 1:2 Ko te kupu tēnei a Ihowā o ngā mano, e mea ana ia: “Ki tā tēnei iwi: ‘Kāhore anō kia taea noatia te wā, te wā e hangā ai tō Ihowā whare.’ ”
HAG 1:3 Nā, ka puta mai te kupu a Ihowā, he mea nā Hākai poropiti, i kī ia:
HAG 1:4 “Ko tā koutou wā ianei tēnei, e mea mā, e noho ai i ō koutou whare kua oti nei tō roto hīpoki, i te mea he ururua tēnei whare?”
HAG 1:5 Nā, ko te kupu tēnei a Ihowā o ngā mano: “Whakaaroa ō koutou ara.
HAG 1:6 He nui tā koutou i whakatō ai, he iti tā koutou i mau mai ai; e kai ana, heoi, kāhore e mākona; e inu ana, tē ngata i te wai; e kākahu ana i o koutou, tē mahana tētahi; e riro ana i te kaimahi te moni mō tāna mahi, ā, whaowhina ana e ia ki roto ki te pūtea kōputaputa.”
HAG 1:7 Ko te kupu tēnei a Ihowā o ngā mano: “Whakaaroa ō koutou ara.
HAG 1:8 Pikitia te maunga, maua mai he rākau, hangā hoki te whare; ā, ka manako ahau ki reira, ka whai korōria anō ahau,” e ai tā Ihowā.
HAG 1:9 “I tūmanako hoki koutou kia maha, nanā, he iti noa; tā koutou kawenga mai ki te whare, nā, kua puhipuhia e ahau. Mō te aha?” e ai tā Ihowā o ngā mano. “Mō tōku whare e ururua nei, kei te rere ia koutou ki tōna whare, ki tōna whare.
HAG 1:10 Nā reira i kaiponuhia ai te tōmairangi o te rangi, he mea ki a koutou; nā reira anō i kaiponuhia ai ngā hua o te whenua.
HAG 1:11 Ā, karangatia ana e ahau he tauraki ki runga ki te whenua, ki ngā maunga, ki te wīti, ki te wāina hou, ki te hinu, ki ngā mea e puta mai ana i te whenua, ki te tangata, ki te kararehe, ki ngā mahi katoa a ngā ringa.”
HAG 1:12 Nā, ka rongo a Herupapera te tama a Haratiera rāua ko te tino tohunga, ko Hohua tama a Iohereke, me ngā mōrehu katoa o te iwi, ki te reo o Ihowā, o tō rātou Atua, ki ngā kupu a Hākai poropiti, mō ngā mea i ungā mai ai ia e Ihowā, e tō rātou Atua, nā, ka wehi te iwi i te aroaro o Ihowā.
HAG 1:13 Kātahi a Hākai, te karere a Ihowā, i a ia nei ngā kupu a Ihowā, ka kōrero ki te iwi, ka mea, “Ko ahau hei hoa mō koutou,” e ai tā Ihowā.
HAG 1:14 Nā, ka whakaohokia e Ihowā te wairua o Herupapera tama a Haratiera, o te kāwana o Hūrā, me te wairua o te tino tohunga, o Hohua tama a Iohereke, me te wairua o ngā mōrehu katoa o te iwi, ā, ka haere mai rātou, ka mahi i te mahi o te whare o Ihowā o ngā mano, o tō rātou Atua,
HAG 1:15 i te rua tekau mā whā o ngā rā o te ono o ngā marama, i te rua o ngā tau o Kīngi Tariuha.
HAG 2:1 I te whitu o ngā marama, i te rua tekau mā tahi o ngā rā o te marama, ka puta mai te kupu a Ihowā, he mea nā Hākai poropiti, i kī ia:
HAG 2:2 “Tēnā, kōrero ki a Herupapera tama a Haratiera, kāwana o Hūrā, rāua ko te tino tohunga, ko Hohua tama a Iohereke, ki ngā mōrehu anō o te iwi, mea atu:
HAG 2:3 ‘Ko wai te mōrehu i roto i a koutou i kite i tēnei whare i tōna korōria ō mua? E pēhea ana hoki ki tā koutou titiro ināianei? Ehara rānei ki ō koutou nā kanohi he kāhore noa iho?
HAG 2:4 Nā, kia kaha āianei, e Herupapera,’ e ai tā Ihowā; ‘kia kaha, e te tino tohunga, e Hohua tama a Iohereke; kia kaha hoki, e te iwi katoa o te whenua,’ e ai tā Ihowā, ‘e mahi; ko ahau hoki hei hoa mō koutou,’ e ai tā Ihowā o ngā mano.
HAG 2:5 ‘Ka rite ki te kupu i whakaritea e ahau ki a koutou i tō koutou haerenga mai i Īhipa; ā, i tū tōku wairua i roto i a koutou; kaua e wehi.’
HAG 2:6 “Nō te mea ko te kupu tēnei a Ihowā o ngā mano: ‘Kia kotahi ake anō, he wāhi iti nei, ā, ka whakangāueuetia e ahau te rangi me te whenua, te moana me te wāhi maroke.
HAG 2:7 Ā, ka whakangāueuetia e ahau ngā iwi katoa. Nā, ka haere mai ngā mea āhuareka o ngā iwi katoa; ā, ka whakakīia e ahau tēnei whare ki te korōria,’ e ai tā Ihowā o ngā mano.
HAG 2:8 ‘Nāku te hiriwa, nāku hoki te kōura, e ai tā Ihowā o ngā mano.
HAG 2:9 Tērā te korōria o tēnei whare ō muri nei ka nui atu i tō tērā i mua,’ e ai tā Ihowā o ngā mano; ‘ka hoatu anō e ahau te rongo mau i tēnei wāhi,’ e ai tā Ihowā o ngā mano.”
HAG 2:10 I te rua tekau mā whā o ngā rā o te iwa o ngā marama, i te rua o ngā tau o Tariuha, ka puta mai te kupu a Ihowā, he mea nā Hākai poropiti, i mea ia:
HAG 2:11 “Ko te kupu tēnei a Ihowā o ngā mano: ‘Tēnā rā uia te ture ki ngā tohunga, mea atu:
HAG 2:12 Ki te maua e tētahi tangata he kikokiko tapu i te pito o tōna kākahu, ā, ka pā taua pito ōna ki tētahi taro, ki tētahi mea rānei e kōhuatia ana, ki te wāina, ki te hinu, ki tētahi kai rānei, e tapu rānei?’ ” Nā, ka whakahoki ngā tohunga ka mea, “Kāhore.”
HAG 2:13 Anō rā ko Hākai, “Ki te pā te tangata i poke i te tūpāpaku ki tētahi o ēnei, e poke rānei?” Nā, ka whakahoki ngā tohunga, ka mea, “E poke anō.”
HAG 2:14 Nā, ka oho a Hākai, ka mea: “ ‘He pēnā anō ēnei tāngata, he pēnā anō te iwi i tōku aroaro nei, e ai tā Ihowā, he pēnā anō ngā mahi katoa a ō rātou ringa; ko ngā mea katoa e whakaherea ana e rātou ki reira, he poke.
HAG 2:15 “ ‘Nā, tēnā rā, whakaaroa āianei i tēnei rā, i ērā atu hoki, i te mea kāhore anō i takoto tētahi kōhatu ki runga ki tētahi kōhatu i te temepara o Ihowā;
HAG 2:16 i taua wā puta noa, ki te tae tētahi tangata ki tētahi pūranga e rua tekau nei ōna mēhua, nā, kotahi tonu tekau; ki te haere ki te poka wāina ki te utu mai i ētahi oko e rima tekau, nā, e rua tonu tekau.
HAG 2:17 I patua koutou e ahau, ngā mahi katoa a ō koutou ringa ki te ngingio, ki te koriri, ki te whatu, ā, kīhai koutou i tahuri ki ahau,’ e ai tā Ihowā.
HAG 2:18 ‘Whakaaroa tēnei rā me ērā atu anō, o te rua tekau mā whā o te iwa o ngā marama, o te rā i whakatakotoria ai te tūranga o te temepara o Ihowā, whakaaroa.
HAG 2:19 Kei te whare wīti anō rānei te purapura? Inā, kāhore anō te wāina, te piki, te pamekaranete, te ōriwa, kia hua noa; ka tīmata i tēnei rā tāku manaaki i a koutou.’ ”
HAG 2:20 I tuaruatia anō te puta mai o te kupu a Ihowā ki a Hākai i te rua tekau mā whā o ngā rā o te marama, i mea ia:
HAG 2:21 “Kōrero ki a Herupapera kāwana o Hūrā, mea atu: Ka whakangāueuetia e ahau te rangi me te whenua,
HAG 2:22 ka hurihia ake anō e ahau te torōna o ngā kīngitanga, ka ngaro i ahau te kaha o ngā kīngitanga o ngā tauiwi; ka hurihia ake e ahau ngā hāriata, me ōna kaieke; ka riro iho anō ngā hōiho me ō rātou kaieke, tēnei, tēnei, i te hoari a tōna tuakana.
HAG 2:23 “ ‘I taua rā,’ e ai tā Ihowā o ngā mano, ‘ka mau ahau ki a koe, e tāku pononga, e Herupapera tama a Haratiera,’ e ai tā Ihowā, ‘ka mea i a koe hei hīri; he mea whiriwhiri hoki koe nāku,’ e ai tā Ihowā o ngā mano.”
ZEC 1:1 I te waru o ngā marama, i te rua o ngā tau o Tariuha, ka puta mai te kupu a Ihowā ki a Hakaraia, tama a Perekia, tama a Iro poropiti, i mea ia:
ZEC 1:2 “Nui atu te riri o Ihowā ki ō koutou mātua.
ZEC 1:3 Nā, mea atu ki a rātou: Ko te kupu tēnei a Ihowā o ngā mano: ‘Tahuri mai anō ki ahau,’ e ai tā Ihowā o ngā mano, ‘ā, ka tahuri atu anō hoki ahau ki a koutou,’ e ai tā Ihowā o ngā mano.
ZEC 1:4 Kei rite koutou ki ō koutou mātua, i karanga rā ngā poropiti o mua ki a rātou, i mea, ‘Ko te kupu tēnei a Ihowā o ngā mano, Tahuri mai ināianei i ō koutou ara kino, i ā koutou mahi kino.’ Otiia, kīhai rātou i rongo, kīhai hoki i whai taringa ki ahau, e ai tā Ihowā.
ZEC 1:5 Ko ō koutou mātua, kei hea rātou? Ā, ko ngā poropiti, e ora tonu ana rānei rātou ake ake?
ZEC 1:6 Nā, ko āku kupu me āku tikanga i whakahaua e ahau ki āku pononga, ki ngā poropiti, kīhai rānei ō koutou mātua i rokohanga e ērā? “Ā, hoki mai ana rātou, mea ana, ‘Ka pērā i tā Ihowā o ngā mano i whakaaro ai kia meatia ki a mātou, he mea whakarite ki ō mātou ara, ki ā mātou mahi; ka pērā tonu tāna ki a mātou.’ ”
ZEC 1:7 I te rua tekau mā whā o ngā rā o te tekau mā tahi o ngā marama, arā o te marama Hepata, i te rua o ngā tau o Tariuha, ka puta mai te kupu a Ihowā ki a Hakaraia tama a Perekia, tama a Iro poropiti, i mea ia:
ZEC 1:8 I titiro ahau i te pō, nā, ko tētahi tangata e noho ana i runga i te hōiho whero, ā, tū ana ia i roto i ngā ramarama i te whārua; ā, i muri atu i a ia ko ētahi hōiho, he whero, he kōpurepure, he mā.
ZEC 1:9 Nā, ka mea atu ahau, “E tōku ariki, he aha ēnei?” Ā, ka kī mai te anahera i kōrero ki ahau, “Māku e whakaatu ki a koe te tikanga o ēnei.”
ZEC 1:10 Nā, ka oho mai te tangata i tū rā i roto i ngā ramarama, ka mea, “Ko ngā mea ēnei i ungā atu nei e Ihowā hei hāereere i te whenua.”
ZEC 1:11 Nā, ka whakahoki rātou ki te anahera a Ihowā e tū ana i roto i ngā ramarama, ka mea, “Kua hāereerea e mātou te whenua, nanā, kei te āta noho te whenua katoa, kei te mārie.”
ZEC 1:12 Kātahi ka oho te anahera a Ihowā, ka mea, “E Ihowā o ngā mano, kia pēhea te roa ōu ka kore nei e tohu i Hiruhārama, i ngā pā o Hūrā, e mauāharatia nei e koe i ēnei tau e whitu tekau?”
ZEC 1:13 Nā, ka whakahoki a Ihowā ki te anahera i kōrero nei ki ahau, he kupu pai, arā he kupu whakamārie.
ZEC 1:14 Heoi, ka mea ki ahau te anahera i kōrero nei ki ahau: “Karanga atu koe, mea atu: Ko te kupu tēnei a Ihowā o ngā mano: ‘He nui te hae i hae ai ahau ki Hiruhārama, ki Hiona.
ZEC 1:15 Ā, he tino nui tōku riri ki ngā iwi e noho hūmārie ana; he iti noa rā hoki tōku riri, ā, nā rātou i whakatetere te hē.’
ZEC 1:16 “Mō reira ko te kupu tēnei a Ihowā: ‘Kua hoki mai ahau ki Hiruhārama i runga i te tohu tangata; ka hangā tōku whare ki reira,’ e ai tā Ihowā o ngā mano, ‘ā, ka whakamārōkia he aho ki runga ki Hiruhārama.’
ZEC 1:17 “Karanga atu anō, mea atu: Ko te kupu tēnei a Ihowā o ngā mano: ‘Tērā ōku pā e rauroha noa atu i te pai; ā, tērā a Ihowā ka whakamārie i Hiona, tērā ka whiriwhiri i Hiruhārama.’ ”
ZEC 1:18 Nā, ka maranga ake ōku kanohi, ā, ka kite ahau, nanā, e whā ngā haona.
ZEC 1:19 Nā, ka mea ahau ki te anahera i kōrero nei ki ahau, “He aha ēnei?” Anō rā ko ia ki ahau, “Ko ngā haona ēnei nāna i whakamarara a Hūrā, a Īharaira, a Hiruhārama.”
ZEC 1:20 Nā, ka whakakitea e Ihowā ētahi kāmura ki ahau, tokowhā.
ZEC 1:21 Kātahi ahau ka mea, “I haere mai ēnei ki te aha?” Ā, ka kōrero tērā, ka mea, “Ko ngā haona ēnei nāna i whakamarara a Hūrā, i kore ai e ara te māhunga o tētahi. Otirā, i haere mai ēnei ki te whakawehi i a rātou, ki te whakataka iho i ngā haona o ngā tauiwi, o te hunga i ara nei tō rātou haona ki te whenua o Hūrā, ki te tītaritari i a ia.”
ZEC 2:1 I maranga ake anō ōku kanohi, i titiro, nā, ko tētahi tangata, he aho rūri i tōna ringa.
ZEC 2:2 Nā, ka mea ahau, “E haere ana koe ki hea?” Ā, ka mea ia ki ahau, “Ki te whanganga i Hiruhārama, kia kitea ai he aha tōna whānui, he aha tōna roa.”
ZEC 2:3 Nā, ka haere te anahera i kōrero rā ki ahau, ā, ka puta anō tētahi anahera ki te whakatau i a ia,
ZEC 2:4 ā, ka mea atu ki a ia, “E oma, kōrero atu ki te taitama nei, kī atu: ‘Ka nohoia a Hiruhārama, ka rite ki ngā pā taiepakore, i te tini hoki o te tangata, o ngā kararehe i roto.
ZEC 2:5 Nō te mea ko ahau, ko Ihowā, hei taiepa ahi ahau ki a ia, ā tawhio noa, ā, ko ahau hei korōria i roto i a ia.’ ”
ZEC 2:6 “Hō, hō! Rere mai i te whenua o te raki,” e ai tā Ihowā; “kua whakamararatia atu hoki koutou e ahau me te mea ko ngā hau e whā o te rangi,” e ai tā Ihowā.
ZEC 2:7 “E Hiona, kāwhaki i a koe, e koe e noho mai nā i te tamāhine a Papurōna.”
ZEC 2:8 Ko te kupu hoki tēnei a Ihowā o ngā mano: “Nō muri i te korōria kua ungā ahau e ia ki ngā tauiwi nāna nā koutou i pahua: Ko te tangata hoki e pā ana ki a koutou, e pā ana ki te whatupango o tōna kanohi.
ZEC 2:9 Nā, tēnei ka rūrū tōku ringa ki a rātou, ā, hei taonga pārau rātou mā ā rātou pononga; ā, ka mōhio koutou nā Ihowā o ngā mano ahau i unga mai.
ZEC 2:10 “Waiata, kia koa, e te tamāhine a Hiona; nō te mea, nā, kei te haere atu ahau, ā, ka noho ahau i roto i a koe,” e ai tā Ihowā.
ZEC 2:11 “Ā, he maha ngā iwi e whakauru i a rātou ki a Ihowā i taua rā, ā, ko rātou hei iwi māku; ā, ka noho ahau i roto i a koe, ā, ka mōhio koe nā Ihowā o ngā mano ahau i unga mai ki a koe.
ZEC 2:12 Ā, ka riro i a Ihowā a Hūrā hei wāhi tupu māna i te whenua tapu, tērā anō hoki ia ka whiriwhiri i Hiruhārama.
ZEC 2:13 Whakarongoa, e ngā kikokiko katoa, i te aroaro o Ihowā; kua whakaohokia mai hoki ia i tōna kāinga tapu.”
ZEC 3:1 I whakakitea hoki e ia ki ahau a Hohua, te tino tohunga e tū ana i te aroaro o te anahera a Ihowā, me Hātana e tū ana i tōna matau hei hoariri mōna.
ZEC 3:2 Nā, ka mea atu a Ihowā ki a Hātana, “Kia whakatūpehupehu a Ihowā ki a koe, e Hātana! Āe rā, ko Ihowā nāna nei a Hiruhārama i whiriwhiri, kia whakatūpehupehu a Ihowā ki a koe; he teka ianei he mōunga tēnei kua kapohia mai i roto i te ahi?”
ZEC 3:3 Nā, he whakahouhou ngā kākahu o Hohua, ā, i tū ia i te aroaro o te anahera.
ZEC 3:4 Nā, ka oho ia, ka mea ki te hunga e tū ana i tōna aroaro, ka kī atu, “Tangohia ngā kākahu paru i a ia.” Kātahi ia ka mea ki a ia, “Nanā, kua meinga e ahau tōu hē kia pahemo atu i a koe, ā, ka whakakākahuria koe e ahau ki ngā kākahu whakapaipai.”
ZEC 3:5 Nā, ka mea ahau, “Pōtaea he pōtae ātaahua ki tōna māhunga.” Nā, pōtaea ana e rātou he pōtae ātaahua ki tōna māhunga, ā, whakakākahuria ana ia e rātou; me te tū anō te anahera a Ihowā.
ZEC 3:6 Kātahi te anahera a Ihowā ka kauwhau ki a Hohua, ka mea:
ZEC 3:7 “Ko te kupu tēnei a Ihowā o ngā mano: Ki te haere koe i āku ara, ki te puritia e koe āku mea, nā, māu anō e whakarite mō tōku whare, māu hoki e tiaki ōku marae, ā, ka hoatu e ahau he hāereerenga mōu i roto i te hunga e tū nei.
ZEC 3:8 Whakarongo mai āianei, e Hohua, e te tino tohunga, koutou ko ōu hoa e noho nā i tōu aroaro; hei tohu hoki rātou, aua tāngata: nō te mea, nanā, ka kawea mai e ahau tāku pononga, te Manga.
ZEC 3:9 Nā, ko te kōhatu i hoatu e ahau ki te aroaro o Hohua, e whitu ngā kanohi o taua kōhatu kotahi; nā, māku e whaowhao ōna whakairo, e ai tā Ihowā o ngā mano, ā, ka whakawāteatia atu e ahau te hē o taua whenua i te rā kotahi.
ZEC 3:10 “I taua rā, e ai tā Ihowā o ngā mano, ka karangatia e koutou tōna hoa, tōna hoa, i raro i te wāina, i raro hoki i te piki.”
ZEC 4:1 Nā, ka hoki mai te anahera i kōrero rā ki ahau, ka whakaarahia ahau, ko tōku rite kei te tangata e whakaarahia ana i te moe.
ZEC 4:2 Nā, ka mea ia ki ahau, “Ko te aha e kitea ana e koe?” Anō rā ko ahau, “Kua kite ahau, nā, ko tētahi tūranga rama, he kōura katoa, me tōna peihana i tōna pito ki runga, ko ōna rama e whitu ki runga o tērā; e whitu ngā kōrere o te rama kotahi i tōna pito ki runga.
ZEC 4:3 Nā, e rua ngā ōriwa i tōna taha, ko tētahi i te taha ki matau o te peihana, ko tētahi i tōna taha mauī.”
ZEC 4:4 Nā, ka oho atu ahau, ka mea ki te anahera i kōrero ki ahau, ka kī atu, “He aha ēnei, e tōku ariki?”
ZEC 4:5 Kātahi te anahera i kōrero rā ki ahau ka oho, ka mea ki ahau, “Kāhore rānei koe e mōhio he aha ēnei?” Anō rā ko ahau, “Kāhore, e tōku ariki.”
ZEC 4:6 Nā, ka oho mai ia, ka kōrero ki ahau, ka mea, “Ko te kupu tēnei a Ihowā ki a Herupapera, e kī ana: ‘Ehara i te mea mā te uaua, mā te kaha, engari mā tōku wairua,’ e ai tā Ihowā o ngā mano.
ZEC 4:7 “Ko wai koe, e te maunga nui? I te aroaro o Herupapera hei papatairite koe; ā, ka whakaputaina mai e ia te kōhatu o runga rawa, me te pā anō ngā karanga, ‘He pai, he pai mōna.’ ”
ZEC 4:8 I puta mai anō te kupu a Ihowā ki ahau, i mea:
ZEC 4:9 “Nā ngā ringa o Herupapera i whakatakoto te tūranga mō tēnei whare, mā ōna ringa anō e whakaoti; ā, ka mōhio koe nā Ihowā o ngā mano ahau i unga mai ki a koutou.
ZEC 4:10 “Ko wai oti i whakahāwea ki te rā o ngā mea ririki? Ka koa hoki rātou, ka kite hoki i te kōhatu paramu i roto i te ringa o Herupapera. Arā ēnei e whitu nei, koia nei ngā kanohi o Ihowā; e kōpikopiko ana rātou i te whenua katoa.”
ZEC 4:11 Kātahi ahau ka oho atu, ka mea ki a ia, “He aha ēnei ōriwa e rua i te taha ki matau o te tūranga rama, i te taha hoki ki mauī?”
ZEC 4:12 I whakahoki atu anō ahau, he tuarua, ka mea ki a ia, “He aha ēnei manga ōriwa e rua, e rua ngā kōrere kōura i piri atu ai rāua, i rere atu ai te hinu kōura i roto i aua kōrere rā?”
ZEC 4:13 Kātahi tērā ka kōrero mai ki ahau, ka mea, “Kāhore rānei koe e mōhio ko te aha ēnei?” Anō rā ko ahau, “Kāhore, e tōku ariki.”
ZEC 4:14 Nā, ka kī mai ia, “Ko ēnei e rua ko ngā tama a te hinu, e tū ana i te taha o te Ariki o te whenua katoa.”
ZEC 5:1 Nā, ka maranga ake anō ōku kanohi, ā, ka kite, nā, ko tētahi pukapuka e rere ā-manu ana.
ZEC 5:2 Nā, ka mea ia ki ahau, “Ko te aha tāu e kite nā?” Anō rā ko ahau, “He pukapuka e rere ana tāku e kite nei; ko tōna roa e rua tekau whatīanga, ko tōna whānui kotahi tekau whatīanga.”
ZEC 5:3 Kātahi ia ka mea mai ki ahau: “Ko te kanga tēnei ka puta atu nei ki te mata o te whenua katoa; ko ngā tāngata katoa hoki e tāhae ana ka hātepea atu i tētahi taha, ka rite ki tā tēnei; ā, ko ngā tāngata katoa e oati teka ana, ka hātepea atu i tērā taha, ka rite ki tā tēnei.
ZEC 5:4 ‘Māku anō e mea kia puta atu,’ e ai tā Ihowā o ngā mano, ‘ā, ka uru ki te whare o te tāhae, ki te whare hoki o te tangata i oatitia tekatia ai tōku ingoa; ā, ka noho ki roto ki tōna whare, ā pau noa ōna rākau me ōna kōhatu.’ ”
ZEC 5:5 Kātahi te anahera i kōrero rā ki ahau ka puta, ā, ka mea ki ahau, “Tēnā rā, e ara ōu kanohi, tirohia ko te aha tēnei ka puta nei.”
ZEC 5:6 Anō rā ko ahau, “He aha koia?” Ā, ka kī mai ia, “Ko te epa tēnei e puta nei.” I kī mai anō ia, “Ko tō rātou āhua tēnei i te whenua katoa.”
ZEC 5:7 Nā, ko tētahi taranata matā kua oti te hāpai ake; ā, he wahine tēnei e noho nei i roto i te epa.
ZEC 5:8 Nā, ka kī ia, “Ko te Kino tēnei.” Nā, makā iho ana ia e ia ki roto ki te epa; ā, makā ana e ia te poro matā ki runga ki te ngutu o taua epa.
ZEC 5:9 Kātahi ka maranga ake ōku kanohi, ka kite, nā, ko ngā wāhine tokorua e puta mai ana, i roto hoki te hau i ō rāua parirau. Ko ō rāua parirau hoki koia anō kei o te tāka; ā, hāpainga ake ana e rāua te epa ki te takiwā o te whenua, o te rangi.
ZEC 5:10 Kātahi ahau ka mea atu ki te anahera i kōrero rā ki ahau, “E maua ana e ēnei te epa ki hea?”
ZEC 5:11 Ā, ka kī mai tērā ki ahau, “Hei hanga whare mōna ki te whenua o Hinara; ā, ka pūmau ki reira, ka whakatūria ki tōna tūranga.”
ZEC 6:1 Ā, ka maranga ake anō ōku kanohi, ka kite, nā, e whā ngā hāriata e puta mai ana i waenganui o ngā maunga e rua – nā, ko ngā maunga, he maunga parāhi.
ZEC 6:2 I te hāriata tuatahi he whero ngā hōiho; i te hāriata tuarua he mangu ngā hōiho,
ZEC 6:3 i te toru o ngā hāriata he mā ngā hōiho, i te whā o ngā hāriata he kōpurepure, he pākākā ngā hōiho.
ZEC 6:4 Kātahi ahau ka oho atu, ka mea ki te anahera i kōrero rā ki ahau, “He aha ēnei, e tōku ariki?”
ZEC 6:5 Nā, ka whakahoki mai te anahera, ka mea ki ahau, “Ko ngā hau e whā ēnei o te rangi, e haere mai ana i te tū i te aroaro o te Ariki o te whenua katoa.
ZEC 6:6 Ko te hāriata i ngā hōiho mangu, e haere ana rātou ki te whenua i te raki; ā, i haere ngā mea mā i muri i a rātou; nā, ko ngā mea kōpurepure i ahu pērā ki te whenua ki te tonga.”
ZEC 6:7 I haere atu anō ngā mea pākākā, i whai kia hāereere, kia kōpikopiko rātou i te whenua. Nā, ka mea ia, “Haere atu koe, kōpikopiko i te whenua.” Nā, kei te kōpikopiko rātou i te whenua.
ZEC 6:8 Kātahi tērā ka karanga ki ahau, ka kōrero mai hoki ki ahau, ka mea, “Nanā, ko ēnei i ahu atu nei ki te whenua ki te raki, kua mārie i a rātou tōku wairua i te whenua ki te raki.”
ZEC 6:9 I puta mai anō te kupu a Ihowā ki ahau, i mea:
ZEC 6:10 “Tangohia tā ngā whakarau, arā tā Hererai, tā Tōpia, tā Ieraia – haere mai anō koe i taua rā, ka tomo ki te whare o Hōhia tama a Tepania – ki te whare i tae mai ai rātou i Papurōna.
ZEC 6:11 Āe rā, ka tango i tā rātou hiriwa, kōura hoki, ka hanga ai i ētahi karauna, ā, ka pōtae atu ki te māhunga o te tino tohunga, o Hohua tama a Iohereke;
ZEC 6:12 kōrero atu hoki ki a ia, mea atu: ‘Ko te kupu tēnei a Ihowā o ngā mano, e kī ana: Nanā, te tangata ko tōna ingoa nei ko te Manga: ā, ka tupu ake anō ia i tōna wāhi, ā, māna e hanga te temepara o Ihowā.
ZEC 6:13 Māna rawa e hanga te temepara o Ihowā; ā, māna e waha te korōria, ka noho hoki ia ka whakahaere tikanga i runga i tōna torōna; ā, hei tohunga ia i runga i tōna torōna; ā, ka whakaaro ngātahi rāua mō te rongo mau.’
ZEC 6:14 Ka ai hoki ngā karauna hei whakamahara ki a Hēreme rātou ko Tōpia, ko Ieraia, ko Hene tama a Tepania, i roto i te temepara o Ihowā.
ZEC 6:15 Ka haere mai anō te hunga i tawhiti, ka hanga i roto i te temepara o Ihowā, ā, ka mōhio koutou nā Ihowā o ngā mano ahau i unga mai ki a koutou. Ā, e puta anō tēnei, ki te āta whakarongo koutou ki te reo o Ihowā, o tō koutou Atua.”
ZEC 7:1 Nā, i te whā o ngā tau o Kīngi Tariuha ka puta mai te kupu a Ihowā ki a Hakaraia, i te whā o ngā rā o te iwa o ngā marama, arā o Kihereu.
ZEC 7:2 Nā, kua ungā e te hunga o Pētēre a Harētere rāua ko Rekeme Mereke me ā rāua tāngata, ki te īnoi manaaki i a Ihowā,
ZEC 7:3 ā, hei kōrero hoki ki ngā tohunga o te whare o Ihowā o ngā mano, ki ngā poropiti hoki, hei mea, “Me tangi rānei ahau i te rima o ngā marama, me te wehe i ahau, me pērā me tāku i mea ai i ēnei tau ka maha?”
ZEC 7:4 Nā, ka puta mai te kupu a Ihowā o ngā mano ki ahau, ka mea:
ZEC 7:5 “Kōrero ki ngā tāngata katoa o te whenua, rātou ko ngā tohunga, mea atu: ‘I a koutou i nohopuku rā, i tangi rā, i te rima, i te whitu o ngā marama, arā i ēnei tau e whitu tekau, he nohopuku rānei tā koutou ki ahau, ki ahau koia?
ZEC 7:6 Ā, i a koutou e kai nei, e inu nei, he teka ianei mā koutou anō tā koutou e kai ai, e inu ai?
ZEC 7:7 Ehara ianei i te mea kia rongo koutou i ngā kupu i karangatia e Ihowā, arā e ngā poropiti ō mua, i te mea e nohoia ana a Hiruhārama, e noho rangatira ana, me ōna pā anō ā taka noa, i te mea hoki e nohoia ana te tonga me te mānia?’ ”
ZEC 7:8 I puta mai anō te kupu a Ihowā ki a Hakaraia, i mea:
ZEC 7:9 “Ko te kupu tēnei a Ihowā o ngā mano, e mea ana: ‘Kia pono te whakarite o te whakawā, kia puta te aroha me te tohu tangata ki tōna tuakana, ki tōna teina.
ZEC 7:10 Kaua hoki e tūkinotia te pouaru, te pani, te manene, te ware; kaua hoki e whakaaroa he kino i roto i ō koutou ngākau ki tōna tuakana, ki tōna teina.’
ZEC 7:11 “Heoi, kīhai rātou i pai ki te whakarongo, kei te whakahoki i te pokohiwi, kei te whakapūhoi i ō rātou taringa kei rongo.
ZEC 7:12 Āe rā, i meinga e rātou ō rātou ngākau kia rite ki te taimana kei rongo rātou ki te ture, ki ngā kupu hoki i ungā atu e Ihowā o ngā mano, he mea nā tōna wairua, nā te ringa o ngā poropiti ō mua; nā reira ka puta mai he riri nui i a Ihowā o ngā mano.
ZEC 7:13 “ ‘Nā, i tāna karangatanga, kīhai rātou i rongo; waihoki ka karanga rātou, ā, e kore ahau e rongo,’ e ai tā Ihowā o ngā mano.
ZEC 7:14 ‘Otiia, ka āia atu rātou e ahau ki te paroro ki waenga i ngā iwi katoa kīhai i mōhiotia e rātou. Heoi, ururua ana te whenua i muri i a rātou, tē haerea, tē hokia; nā rātou hoki i mea te whenua āhuareka kia ururua.’ ”
ZEC 8:1 I puta mai anō te kupu a Ihowā o ngā mano ki ahau, i mea:
ZEC 8:2 Ko te kupu tēnei a Ihowā o ngā mano: “Nui atu te hae i hae ai ahau ki Hiona, he nui hoki te riri i hae ai ahau ki a ia.”
ZEC 8:3 Ko te kupu tēnei a Ihowā: “Kua hoki nei ahau ki Hiona, kua noho ki Hiruhārama. Ā, tērā e kīia a Hiruhārama, Ko te Pā o te Pono; ko te maunga o Ihowā o ngā mano, Ko te Maunga Tapu.”
ZEC 8:4 Ko te kupu tēnei a Ihowā o ngā mano: “Tēnei ake ka noho he koroheke, he rūruhi ki ngā waharoa o Hiruhārama, rite rawa te ringa o tēnei, o tēnei, i te tokotoko, he maha hoki nō ngā tau.
ZEC 8:5 Ko ngā waharoa anō o te pā kapi tonu i ngā tamariki tāne, i ngā kōtiro e tākaro ana i ōna waharoa.”
ZEC 8:6 Ko te kupu tēnei a Ihowā o ngā mano: “Ki te pakeke ki te titiro a ngā mōrehu o tēnei iwi i aua rā, e pakeke anō rānei ki tāku titiro? E ai tā Ihowā o ngā mano.
ZEC 8:7 Ko te kupu tēnei a Ihowā o ngā mano: Tēnei ahau te whakaora nei i tāku iwi i te whenua ki te rāwhiti, i te whenua anō hoki ki te hauāuru.
ZEC 8:8 Ka kawea mai anō rātou e ahau, ka noho rātou ki waenganui o Hiruhārama. Ā, hei iwi rātou māku, ko ahau hoki hei Atua mō rātou i runga i te pono, i te tika.”
ZEC 8:9 Ko te kupu tēnei a Ihowā o ngā mano: “Kia kaha ō koutou ringa, e te hunga e rongo ana i ēnei rā ki ēnei kupu o roto i te māngai o ngā poropiti i te rā i whakatakotoria ai te tūranga mō te whare o Ihowā o ngā mano, arā mō te temepara kia hangā ai.
ZEC 8:10 I mua hoki i ēnei rā kāhore he utu mō te mahi a te tangata, kāhore he utu mō tā te kararehe; kāhore hoki he āta noho mō te tangata i haere atu, mō te tangata anō i haere mai, i te hoariri hoki. Nāku hoki i mea ngā tāngata katoa kia whawhai ki tōna hoa, ki tōna hoa.
ZEC 8:11 Nā, e kore tāku ināianei ki ngā mōrehu o tēnei iwi e rite ki tō ngā rā ō mua,” e ai tā Ihowā o ngā mano.
ZEC 8:12 “Nō te mea ka ai te purapura o te rongo mau, ka tukua mai ōna hua e te wāina, ka tukua mai anō ōna mau e te whenua, ka hōmai hoki tō rātou tōmairangi e ngā rangi; māku anō e mea ngā mōrehu o tēnei iwi kia whiwhi ki ēnei mea katoa.
ZEC 8:13 Nā, i mua hei kanga koutou i roto i ngā iwi, e te whare o Hūrā, e te whare o Īharaira, ka pēnā te nui o tāku whakaora i a koutou, ā, hei manaakitanga koutou. Kaua e wehi, kia kaha ō koutou ringa.”
ZEC 8:14 Ko te kupu hoki tēnei a Ihowā o ngā mano: “Ka rite ki tāku meatanga i te hē mō koutou i te whakapātaritaringa a ō koutou mātua ki ahau,” e ai tā Ihowā o ngā mano, “ā, kīhai tōku whakaaro i puta kē;
ZEC 8:15 ka pērā anō te hoki ake o tōku whakaaro i ēnei rā ki te pai kia meatia ki Hiruhārama, ki te whare anō o Hūrā; kaua e wehi.
ZEC 8:16 Ko a koutou ēnei e mea ai: Kōrerotia te pono ki tōna hoa, ki tōna hoa; kia pono, kia whai i te rangimārie tā koutou whakarite whakawā i ō koutou kūwaha;
ZEC 8:17 kaua hoki e whakaaroa he kino i roto i ō koutou ngākau ki tōna hoa, ki tōna hoa; kaua anō e arohaina te oati teka; nō te mea e kinongia ana ēnei mea katoa e ahau,” e ai tā Ihowā.
ZEC 8:18 I puta anō te kupu a Ihowā o ngā mano ki ahau, i mea:
ZEC 8:19 Ko te kupu tēnei a Ihowā o ngā mano: “Ko te nohopuku o te whā o ngā marama, ko te nohopuku o te rima, ko te nohopuku o te whitu, ko te nohopuku o te ngahuru, hei oranga ngākau ēnā ki te whare o Hūrā, hei mea whakahari, hei hākari harakoa; nā, arohaina te pono me te āta noho.”
ZEC 8:20 Ko te kupu tēnei a Ihowā o ngā mano: “Tēnei ake ka tae mai he iwi, he tāngata i ngā pā maha;
ZEC 8:21 ā, ka haere ngā tāngata o tētahi pā ki tētahi pā, ka mea, ‘Hāpainga, tātou ka haere ki te īnoi ki te aroaro o Ihowā, ki te rapu i a Ihowā o ngā mano; ka haere anō hoki ahau.’
ZEC 8:22 Āe rā, he tini ngā iwi, he kaha ngā tauiwi e haere mai ki te rapu i a Ihowā o ngā mano i Hiruhārama, ki te īnoi ki te aroaro o Ihowā.”
ZEC 8:23 Ko te kupu tēnei a Ihowā o ngā mano: “I aua rā ka hopu ngā tāngata kotahi tekau, he hunga nō ngā reo katoa o ngā iwi, ka hopu i te remu o tō tētahi Hūrai, ka mea, ‘Kia haere tahi tātou; kua rongo hoki mātou kei a koutou te Atua.’ ”
ZEC 9:1 Ko te poropititanga o te kupu a Ihowā i te whenua o Hararaka; nā, ko tōna taunga atu kei Ramahiku. E whai kanohi ana hoki te tangata me ngā hapū katoa o Īharaira ki a Ihowā.
ZEC 9:2 Kei Hāmata anō e tata rā ki reira; kei Tāira, kei Hairona nō te mea he pā whakaaro nui rawa ia.
ZEC 9:3 I hangā anō e Tāira he pā kaha mōna, i opehia e ia te hiriwa, ānō he puehu, te kōura parakore, ānō ko te paru o ngā waharoa.
ZEC 9:4 Nanā, mā te Ariki ia e pei, ka patua hoki e ia tōna kaha i te moana; ka pau ia i te ahi.
ZEC 9:5 Ka kite a Ahakerono, ā, ka wehi, a Kaha, nui atu te mamae, me Ekerono anō; nō te mea he whakamā tō tāna i tūmanako ai; ka kore hoki tō Kaha kīngi; e kore anō a Ahakerono e nohoia.
ZEC 9:6 Ā, ka nohoia a Aharoro e te pōriro, ka hātepea atu anō e ahau te whakapehapeha o ngā Pirihitini.
ZEC 9:7 Ka kore anō i ahau ōna toto i roto i tōna māngai, me āna mea whakarihariha i waenganui i ōna niho; nā, hei mōrehu ia mō tō tātou Atua, ka rite anō ki te kāwana i roto i a Hūrā, ka rite anō a Ekerono ki te Iepuhi.
ZEC 9:8 Ka nohoia anō e ahau ngā taha o tōku whare, hei ārai mō te taua, mō te tangata anō e tika ana nā reira, mō te tangata e hoki ana. E kore anō te kaitūkino e tika nā waenga i a rātou ā muri ake nei; kua kite nei hoki ōku kanohi ināianei.
ZEC 9:9 Kia nui te whakamanamana, e te tamāhine a Hiona, hāmama, e te tamāhine a Hiruhārama! Nanā, ko tōu Kīngi e haere nā ki a koe; he tika ia, he whakaora, he ngākau māhaki, e noho ana i runga i te kāihe, i te kūao anō, i te tama a te kāihe.
ZEC 9:10 Ā, ka hātepea atu e ahau te hāriata o Ēparaima, me te hōiho o Hiruhārama; ka hātepea atu anō te kōpere o te whawhai; mō te rongo mau hoki āna kupu ki ngā tauiwi; ka kīngi anō ia i tētahi moana ā tae noa ki tētahi moana, i te awa ā tae noa ki ngā pito o te whenua.
ZEC 9:11 Me koe anō, nā te toto o tāu kawenata i ungā atu ai e ahau ōu herehere i roto i te poka kāhore nei ōna wai.
ZEC 9:12 Tahuri ki te pā kaha, e ngā herehere, e te hunga e tūmanako ana; i tēnei rā nei me whakaatu e ahau e rua āku whakautu ki a koe.
ZEC 9:13 Kua piko hoki i ahau a Hūrā māku, kua whakakīia te kōpere ki a Ēparaima; ā, ka oho i ahau āu tama, e Hiona, ki te whawhai ki āu tama, e Kariki, ka meinga hoki koe e ahau kia rite ki te hoari a te mārohirohi.
ZEC 9:14 Ā, ka kitea a Ihowā i runga i a rātou, ka puta atu anō tāna pere ānō he uira. Ka tangi hoki te tētere a te Ariki, a Ihowā, ā, ka haere ia i runga i ngā tūkauati o te tonga.
ZEC 9:15 Mā Ihowā o ngā mano rātou e tiaki; ā, ka kai rātou, ā, ka takahi i ngā kōhatu o te kōtaha; ka inu anō rātou, ka hāmama me te mea nā te wāina; ka kī rātou ānō he peihana, ānō ko ngā koki o te āta.
ZEC 9:16 Nā, ka whakaora a Ihowā, tō rātou Atua, i a rātou i taua rā, me he kāhui nō tāna iwi; ka rite hoki rātou ki ngā kōhatu o te karauna, maiangi rawa i runga i tōna whenua.
ZEC 9:17 Nā, koia anō tōna pai, koia anō tōna ātaahua! Ka tupu ngā tama i te wīti, ngā kōtiro i te wāina hou.
ZEC 10:1 Īnoia he ua i a Ihowā i te wā o tō muri ua; arā i a Ihowā e hanga nei i ngā uira. He nui anō te ua e hōmai e ia ki a rātou, he tarutaru i te māra mā tēnei mā tēnei.
ZEC 10:2 He tekateka noa hoki te kōrero a ngā terapimi, he teka te kite a ngā tohunga, he horihori ngā moe i kōrerotia e rātou; he hanga noa iho tā rātou whakamārie. Nā reira, haere ana rātou ānō he kāhui hipi; kārangirangi kau ana i te kore hēpara.
ZEC 10:3 “I mura tōku riri ki ngā hēpara, i whiua anō e ahau ngā koati toa; kua tae mai hoki a Ihowā o ngā mano ki tāna kāhui, ki te whare o Hūrā, kua mea i a rātou hei hōiho ātanga mōna i te tatauranga.
ZEC 10:4 “Nō roto i a ia te putanga ake o te kōhatu o te kokonga, nō roto i a ia te whao, nō roto i a ia te kōpere mō te tatauranga, nō roto i a ia ngā kaiakiaki katoa, rūpeke, rūpeke.
ZEC 10:5 Ā, ka rite rātou ki ngā mārohirohi e takatakahi ana i ō rātou hoariri ki te paru o ngā waharoa i te mea e whawhai ana; ka whawhai anō rātou, nō te mea kei a rātou a Ihowā, ā, ka whakamā ngā kaieke hōiho.
ZEC 10:6 “Nā, ka kaha i ahau te whare o Hūrā, ka ora anō i ahau te whare o Hōhepa. Ka whakahokia ki te nohoanga; nō te mea ka tohungia rātou e ahau, ā, me te mea kīhai rātou i peia e ahau; ko ahau hoki, ko Ihowā, tō rātou Atua, ka whakarongo anō ahau ki a rātou.
ZEC 10:7 Nā, ka rite ngā Ēparaimi ki te mārohirohi, ka koa anō tō rātou ngākau me te mea nā te wāina. Ka kite anō ā rātou tamariki, ā, ka koa; ka whakamanamana tō rātou ngākau ki a Ihowā.
ZEC 10:8 “Ka hī ahau ki a rātou, ka huihui i a rātou; kua hokona hoki rātou e ahau; ā, ka tini rātou, ka pērā me rātou i tini rā.
ZEC 10:9 Ā, ka whakatōkia rātou e ahau ki roto ki ngā iwi, ka mahara anō rātou ki ahau i ngā whenua tawhiti, ka ora hoki rātou me ā rātou tamariki, ā, ka hoki.
ZEC 10:10 Ka whakahokia mai anō rātou e ahau i te whenua o Īhipa, ka huihuia mai i Ahiria. Ka kawea anō ki te whenua o Kireara, ki Repanōna, tē kitea he wāhi mō rātou.
ZEC 10:11 Nā, ka tika atu ia i waenga moana, arā i te raruraru, ā, ka patu i ngā ngaru i te moana, ka maroke hoki ngā wāhi hōhonu o te awa. Ā, ka riro iho te whakapehapeha o Ahiria, ka riro kē anō te hēpeta a Īhipa.
ZEC 10:12 Ka whakakahangia anō rātou e ahau i runga i a Ihowā; ka hāereere hoki rātou i runga i tōna ingoa,”
ZEC 11:1 Whakatuwheratia ōu kūwaha, e Repanōna, kia kai ai te ahi i ōu hīta!
ZEC 11:2 Auē, e te kauri; kua hinga hoki te hīta, kua pāhuatia ngā mea ātaahua! Auē, e ngā oki o Pahana, kua riro iho hoki te ngahere kāhore nei e taea atu!
ZEC 11:3 He reo nō ngā hēpara e auē ana; nō te mea kua oti tō rātou korōria te pāhua! He reo nō ngā kūao raiona e ngengere ana; nō te mea kua oti te whakapehapeha o Horano te pāhua!
ZEC 11:4 Ko te kupu tēnei a Ihowā, a tōku Atua: “Whāngaia ngā hipi, ngā mea e patua ana.
ZEC 11:5 E patua ana hoki e ngā tāngata nāna, tē ai he whakahē ake; ko te kī a ō rātou kaihoko, ‘Kia whakapaingia a Ihowā; kua whiwhi hoki ahau ki te taonga’; kāhore hoki he manawapā o ō rātou hēpara ki a rātou.
ZEC 11:6 E kore hoki ahau e manawapā ki ngā tāngata o te whenua ā muri ake nei,” e ai tā Ihowā. “Engari, nā, ka tukua ngā tāngata ki te ringa o tōna hoa, o tōna hoa, ki te ringa anō o tōna kīngi; ā, mā rātou te whenua e patu; e kore anō ahau e whakaora i a rātou i roto i ō rātou ringa.”
ZEC 11:7 Nā, kei te whāngai ahau i ngā hipi e patua ana, i ngā mea iti anō o te kāhui. I tīkina anō e ahau ētahi tokotoko e rua mōku, tapā iho e ahau tētahi ko Ātaahua, tētahi tapā iho e ahau, ko ngā Paihere; nā, kei te whāngai ahau i ngā hipi.
ZEC 11:8 He mea hātepe anō nāku ngā hēpara tokotoru i te marama kotahi; i whakarihariha hoki tōku wairua ki a rātou, ko ō rātou wairua hoki i whakarihariha ki ahau.
ZEC 11:9 Kātahi ahau ka kī atu, “E kore koutou e whāngaia e ahau. Ko te mea mō te mate kia mate, ko te mea e hātepea kia hātepea; kia kai hoki ngā toenga i ngā kikokiko o tōna hoa, o tōna hoa.”
ZEC 11:10 Nā, kua mau ahau ki tōku tokotoko ki a Ātaahua, tapahia pūtia ana e ahau, he whakatakanga i tāku kawenata i whakaritea e ahau ki ngā iwi katoa.
ZEC 11:11 Nā, kua whakatakā i taua rā; ā, mōhio tonu iho ngā mea iti o te kāhui i tatari ki ahau, nā Ihowā taua kupu.
ZEC 11:12 I mea anō ahau ki a rātou, “Ki te mea e pai ana ki tā koutou titiro, hōmai tōku utu; ki te kāhore, kauaka.” Nā, pāunatia mai ana tōku utu e rātou, e toru tekau hiriwa.
ZEC 11:13 Nā, ka kī mai a Ihowā ki ahau, “Makā atu ki te kaihanga rīhi” – te utu pai i whakaritea mōku e rātou. Nā, ka mau ahau ki ngā hiriwa e toru tekau, ā, makā atu ana e ahau ki te kaihanga rīhi i te whare o Ihowā.
ZEC 11:14 Kātahi ka tapahia pūtia e ahau te rua o ōku tokotoko, arā ngā Paihere, kia kore ai te tuākanatanga o Hūrā ki a Īharaira.
ZEC 11:15 I kī mai anō a Ihowā ki ahau: “Tīkina anō ētahi mea a te hēpara wairangi māu.
ZEC 11:16 Nō te mea, nā, ka ara i ahau tētahi hēpara i te whenua; e kore ia e tirotiro i ngā mea ka motuhia atu, e kore e rapu i ngā mea kua marara, e kore e rongoā i te mea he whati tōna, e kore anō e whāngai i te mea e toitū ana; engari ka kainga e ia te kikokiko o te mea mōmona, ko ō rātou matikuku tītaritaria rawatia e ia.
ZEC 11:17 Auē te mate mō te hēpara hauwarea, e whakarere ana i ngā hipi! Ka pā te hoari ki tōna ringa, ki tōna kanohi matau! Ka memenge rawa tōna ringa, ka pōuri rawa tōna kanohi matau!”
ZEC 12:1 Ko te poropititanga, he kupu nā Ihowā mō Īharaira: E ai tā Ihowā, nāna nei ngā rangi i hora, nāna te whenua i whakatū, nāna i whai āhua ai te wairua o te tangata i roto i a ia:
ZEC 12:2 “Tēnei ahau te mea nei i Hiruhārama hei kapu wiri ki ngā iwi katoa ā taka noa; ka pēhi anō i a Hūrā i te whakapaenga o Hiruhārama.
ZEC 12:3 Nā, i taua rā ka meinga e ahau a Hiruhārama hei kōhatu taimaha ki ngā iwi katoa; ko te hunga katoa e hāpai ana ka māruru rawa. Ā, ka huihui ngā iwi katoa o te whenua ki te tū ki a ia.
ZEC 12:4 I taua rā,” e ai tā Ihowā, “ka patua e ahau ki te mīharo ngā hōiho katoa, me ō rātou kaieke ki te haurangi. Ā, ka titiro matatau ōku kanohi ki te whare o Hūrā, ka patua anō e ahau ngā hōiho katoa o ngā iwi ki te matapō.
ZEC 12:5 Ā, ka mea ngā rangatira o Hūrā i roto i ō rātou ngākau, ‘Ko ngā tāngata o Hiruhārama hei kaha mōku i runga i tō rātou Atua, i a Ihowā o ngā mano.’
ZEC 12:6 “I taua rā ka meinga e ahau ngā rangatira o Hūrā kia rite ki te kānga ahi i roto i ngā rākau, kia rite anō ki te rama ahi i roto i te paihere. Ka pau hoki i a rātou ngā iwi katoa i te taha matau, i te taha mauī, ā, karapoi noa; ā tērā a Hiruhārama e noho anō i runga i tōna tūranga, arā i Hiruhārama.
ZEC 12:7 “Nā, ka whakaora a Ihowā i ngā tēneti o Hūrā i te tuatahi, kei whakapehapeha te korōria o te whare o Rāwiri, te korōria rānei o ngā tāngata o Hiruhārama ki a Hūrā.
ZEC 12:8 I taua rā ka tiakina e Ihowā ngā tāngata o Hiruhārama; nā, ko te tangata ngoikore i roto i a rātou, ka rite i taua rā ki a Rāwiri; ko te whare o Rāwiri ki te Atua, ki te anahera a Ihowā i tō rātou aroaro.
ZEC 12:9 I taua rā ka whai ahau kia whakangaromia ngā iwi katoa e haere mai ana ki te whawhai ki Hiruhārama.”
ZEC 12:10 “Ka ringihia anō e ahau te wairua o te aroha noa, o ngā īnoi ki runga ki te whare o Rāwiri, ki ngā tāngata o Hiruhārama, ā, ka titiro rātou ki ahau ki tā rātou i wero ai, ka tangi anō ki a ia, me te mea e tangi ana ki tāna huatahi, ka pōuri anō ki a ia, me te mea e pōuri ana ki tāna mātāmua.
ZEC 12:11 I taua rā ka nui te tangi i roto i Hiruhārama, ka rite ki te tangi i Harararimono i te raorao o Mekirono.
ZEC 12:12 Ā, ka tangi te whenua, tēnei hapū, tēnei hapū, wehe rawa; ko te hapū o te whare o Rāwiri wehe rawa, ko ā rātou wāhine wehi rawa; ko te hapū o te whare o Nātana wehe rawa, ko ā rātou wāhine wehe rawa;
ZEC 12:13 ko te hapū o te whare o Rīwai wehe rawa, ko ā rātou wāhine wehe rawa; ko te hapū o Himei wehe rawa, ko ā rātou wāhine wehe rawa.
ZEC 12:14 Ko ngā hapū katoa e toe ana, ko tēnei hapū, ko tēnei hapū, wehe rawa, me ā rātou wāhine wehe rawa.”
ZEC 13:1 I taua rā ka tuwhera he puna mō te whare o Rāwiri, mō ngā tāngata anō o Hiruhārama, hei mea mō te hara mō te poke.
ZEC 13:2 “I taua rā,” e ai tā Ihowā o ngā mano, “ka hātepea atu e ahau ngā ingoa o ngā whakapakoko i runga i te whenua; e kore anō e maharatia ā muri ake nei; ka kore anō i ahau ngā poropiti, me te wairua poke, i runga i te whenua.
ZEC 13:3 Nā, tēnei ake, ki te poropiti tētahi ā muri ake nei, ka mea tōna pāpā ki a ia, rāua ko tōna whaea i whānau ai ia, ‘E kore koe e ora; kua kōrero teka hoki koe i runga i te ingoa o Ihowā’; nā, ka werohia ia e tōna pāpā rāua ko tōna whaea i whānau ai ia, ina poropiti ia.
ZEC 13:4 “I taua rā ka whakamā ngā poropiti, tēnei, tēnei, ki tāna kite, i te mea ka poropiti ia; e kore anō e kākahuria e rātou he kākahu huruhuru hei mea tinihanga.
ZEC 13:5 Engari ka mea ia, ‘Ehara ahau i te poropiti, he paruauru ahau, he pononga hoki ahau nō tōku taitamarikitanga ake.’
ZEC 13:6 Ā, ka mea tētahi ki a ia, ‘He aha ēnei patunga i ōu ringa?’ ā, ka mea ia, ‘Ko ōku patunga i roto i te whare o ōku hoa aroha.’ ”
ZEC 13:7 “E ara, e te hoari, ki tāku hēpara, ki te tangata i takahoatia ki ahau,” e ai tā Ihowā o ngā mano. “Patua te hēpara, kia marara hoki ngā hipi; ka tahuri atu anō tōku ringa ki ngā mea ririki.
ZEC 13:8 Nā, i te whenua katoa,” e ai tā Ihowā, “e rua ngā wāhi o reira ka hātepea atu, ka mate; ka toe ia te tuatoru o ngā wāhi ki reira.
ZEC 13:9 Ka kawea anō e ahau te tuatoru o ngā wāhi i roto i te ahi, ka tahia hoki te para, ka pērātia me te hiriwa e tahia ana. Ka whakamātautauria anō rātou e ahau, ka pērātia me te kōura. Ka karanga rātou ki tōku ingoa, ā, ka whakarongo ahau ki a rātou. Ka mea ahau, ‘He iwi rātou nāku,’ ā, ka mea rātou, ‘Ko Ihowā tōku Atua.’ ”
ZEC 14:1 Nanā, kei te haere mai te rā o Ihowā, ā, ka wehewehea ōu taonga parakete i roto i a koe.
ZEC 14:2 Nā, ka huihuia e ahau ngā iwi katoa ki te tatau ki Hiruhārama, ā, ka horo te pā, ka pāhuatia ngā whare, ka moea ngā wāhine, ā, ko tētahi hāwhe o te pā ka riro hei whakarau, e kore anō ia te toenga o te iwi e hātepea atu i roto i te pā.
ZEC 14:3 Kātahi a Ihowā ka haere atu, ka whawhai ki aua iwi, ka rite ki te rā i whawhai ai ia i te rā o te tatauranga.
ZEC 14:4 Nā, ka tū ōna waewae i taua rā ki runga ki Maunga Ōriwa, ki tērā i te ritenga atu o Hiruhārama ki te rāwhiti, ā, ka pakaru a Maunga Ōriwa i waenganui ōna ki te rāwhiti; ki te hauāuru, nui atu te awaawa, ā, ka neke atu tētahi hāwhe o te maunga ki te raki, tētahi hāwhe ōna ki te tonga.
ZEC 14:5 Ā, ka oma atu koutou ki te awaawa i ōku maunga; nō te mea ka tutuki atu te takiwā o ngā maunga ki Ātara. Nā, ko tā koutou oma ka rite ki tō koutou omanga atu i te rū i ngā rā o Utia kīngi o Hūrā; tērā anō a Ihowā, tōku Atua, e haere mai, ko te hunga tapu katoa hei hoa mōu.
ZEC 14:6 Nā, i taua rā e kore te mārama e purotu, e kore anō e pōuri.
ZEC 14:7 Erangi kotahi tonu taua rā (he mea e mōhiotia ana e Ihowā), ehara i te rā, ehara i te pō; nā, i ngā wā o te ahiahi ka mārama.
ZEC 14:8 Nā, i taua rā ka puta he wai ora i Hiruhārama, ko tētahi hāwhe ki te moana i te rāwhiti, ko tētahi hāwhe ki te moana i te uru; i te raumati taua hanga, i te hōtoke anō.
ZEC 14:9 Ā, ko Ihowā hei kīngi mō te whenua katoa; i taua rā he kotahi a Ihowā, he kotahi anō tōna ingoa.
ZEC 14:10 Ā hei mānia katoa te whenua ā taka noa, i Kepa tae noa ki Rimono, ki te tonga o Hiruhārama; ā, ka neke ake taua pā, ka noho ki tōna wāhi anō, ki te Kūwaha o Pineamine tae noa ki te wāhi i te Kūwaha Tuatahi, ki te Kūwaha i te Koki, ki te pourewa o Hananēre tae noa ki ngā poka wāina a te kīngi.
ZEC 14:11 Ka nohoia anō a reira, ā, heoi anō whakangaromanga; ā, ka noho a Hiruhārama i runga i te rangimārie.
ZEC 14:12 Ko te whiu anō tēnei e whiua ai e Ihowā ngā iwi katoa i whawhai nei ki Hiruhārama: ka pirau ō rātou kikokiko i te mea e tū ana ō rātou waewae, ka pirau ō rātou kanohi i roto i ngā pae, ka pirau anō ō rātou arero i roto i ō rātou māngai.
ZEC 14:13 I taua rā he nui tā Ihowā whakaoho i roto i a rātou, ā, ka hopu rātou i te ringa o tōna hoa, o tōna hoa, ka ara ake anō ō rātou ringa ki te ringa o tōna hoa, o tōna hoa.
ZEC 14:14 Tērā anō a Hūrā ka whawhai ki Hiruhārama, ā, ka huihuia ngā rawa o ngā iwi katoa ā taka noa – te kōura, te hiriwa, ngā kākahu, nui atu.
ZEC 14:15 Ā, ka pērā anō te mate o te hōiho, o te muera, o te kāmera, o te kāihe, o ngā kararehe katoa i roto i ēnei puni me tēnei whiu.
ZEC 14:16 Tēnei ake, nā, ko ngā mōrehu katoa o ngā iwi katoa i haere mai ki te whawhai ki Hiruhārama, ka haere mai i ia tau, i ia tau, ki te koropiko ki te Kīngi, ki a Ihowā o ngā mano, ki te whakarite hoki i te Hākari Whare Wharau.
ZEC 14:17 Nā, ko te tangata o ngā hapū o te whenua ka kore e haere mai ki Hiruhārama ki te koropiko ki te Kīngi, ki a Ihowā o ngā mano, kāhore he ua mō rātou.
ZEC 14:18 Ā, ki te kāhore te hapū o Īhipa e haere mai, e tae mai, te hunga kāhore nei he ua mō rātou, ka pā anō te whiu e whiua ai e Ihowā ngā iwi kāhore nei e haere mai ki te whakarite i te Hākari Whare Wharau.
ZEC 14:19 Ko te utu hara tēnei mō Īhipa, ko te utu hara anō mō ngā iwi katoa e kore e haere mai ki te whakarite i te Hākari Whare Wharau.
ZEC 14:20 I taua rā ka piri ki ngā pere o ngā hōiho, “HE TAPU KI A IHOWĀ.” Ka rite hoki ngā kōhua i roto i te whare o Ihowā ki ngā peihana i mua i te āta.
ZEC 14:21 Inā, ko ngā kōhua katoa i Hiruhārama, i a Hūrā, he tapu ki a Ihowā o ngā mano, ā, ka haere mai te hunga katoa e patu whakahere ana, ka tango i ētahi hei kōhua mā rātou. Kāhore hoki he Kanaani ā muri ake nei, i roto i te whare o Ihowā o ngā mano i taua rā.
MAL 1:1 Ko te poropititanga, he kupu nā Ihowā ki a Īharaira, he mea nā Maraki.
MAL 1:2 “I aroha ahau ki a koutou,” e ai tā Ihowā. “Heoi, e mea nā koutou, ‘He aroha aha tōu ki a mātou?’ “He teka ianei he tuakana a Ēhau nō Hākopa?” e ai tā Ihowā. “Heoi, i aroha ahau ki a Hākopa,
MAL 1:3 engari, i kino ahau ki a Ēhau, ā, i meinga e ahau ōna maunga hei ururua, ā, hoatu ana tōna kāinga tupu ki ngā kīrehe mohoao o te koraha.”
MAL 1:4 Ko Ēroma ia e kī ana, “Kua pēhia tātou ki raro, otiia ka hoki tātou, ka hanga i ngā tūhea.” Ko te kupu tēnei a Ihowā o ngā mano: “Mā rātou e hanga, ā, māku e wāhi; ā, ka huaina aua wāhi, ko te rohe kino, ko te iwi i riri ai a Ihowā ā ake ake.
MAL 1:5 E kite anō ō koutou kanohi, ā, ka mea koutou, ‘Kia whakanuia a Ihowā i tua i te rohe o Īharaira.’ ”
MAL 1:6 “E whakahōnoretia ana te pāpā e te tama, tōna ariki e te pononga. Ki te mea he matua ahau, kei hea tōku hōnore? Ki te mea he ariki ahau, kei hea te wehi ki ahau?” e ai tā Ihowā o ngā mano ki a koutou, e ngā tohunga e whakahāwea nā ki tōku ingoa. “E mea nā koutou, ‘He whakahāwea aha tā mātou ki tōu ingoa?’
MAL 1:7 “He taro poke tā koutou e tāpae nā i runga i tāku āta, ā, e mea nā koutou, ‘I whakapokea koe e mātou ki te aha?’ “Ki tā koutou e kī nā, Ko te tēpu a Ihowā, he hanga mō te whakahāwea.
MAL 1:8 Ki te tāpaea hoki e koutou te matapō hei patunga tapu, ehara i te mea kino! Ki te tāpaea anō e koutou te mea totitoti, te mea mate, ehara i te kino! Tēnā koa, hoatu āianei ki tōu kāwana; e pai rānei ia ki a koe? E manako rānei ia ki tōu tinana?” e ai tā Ihowā o ngā mano.
MAL 1:9 “Nā, tēnā rā, īnoi ki te Atua kia atawhai ki a tātou. Nā, tā koutou mahi tēnei; e manako rānei ia ki tētahi o koutou?” e ai tā Ihowā o ngā mano.
MAL 1:10 “Auē, me kore noa ake tētahi o koutou hei tūtaki i ngā tatau, kei whakaū kau koutou i te ahi ki runga ki tāku āta! Kāhore ōku ngākau ki a koutou, e ai tā Ihowā o ngā mano, e kore anō ahau e manako ki te whakahere a tō koutou ringa.
MAL 1:11 Ka nui nei hoki tōku ingoa i roto i ngā tauiwi, i te whitinga o te rā ā tae noa ki tōna torengitanga; ā, ka tukua he whakakakara ki tōku ingoa i ngā wāhi katoa, me te whakahere pokekore; ka nui hoki tōku ingoa i roto i ngā tauiwi,” e ai tā Ihowā o ngā mano.
MAL 1:12 “Ko koutou ia kei te whakapoke i taua ingoa, i a koutou e kī nā, ‘Ko te tēpu a Ihowā he poke; ko ōna hua, ko tāna kai, he hanga mō te whakahāwea.’
MAL 1:13 E mea ana anō koutou, ‘Nanā, te whakahōhā!’ Whakatūpererūtia iho e koutou,” e ai tā Ihowā o ngā mano; “ā, maua mai ana e koutou te mea i haea, te mea totitoti, te mea mate. Nā, kei te mau mai i te whakahere; e manakohia rānei tēnei mea a tō koutou ringa?” e ai tā Ihowā.
MAL 1:14 “He kanga ia mō te tangata tinihanga, he toa nei tāna i roto i tāna kāhui, nā, ka puaki tāna kī taurangi, ā, patua ana e ia te mea hē mā te Ariki; he kīngi nui hoki ahau, e ai tā Ihowā o ngā mano, he hanga whakawehi anō tōku ingoa i roto i ngā tauiwi.”
MAL 2:1 “Nā ināianei, he whakahau tēnei mō koutou, e ngā tohunga.
MAL 2:2 Ki te kore koutou e rongo, ki te kore e takoto i ō koutou ngākau kia hōmai he korōria ki tōku ingoa, e ai tā Ihowā o ngā mano, ina ka tukua atu e ahau he kanga ki a koutou, ka kangā anō e ahau ā koutou manaaki. Āe rā, kua oti anō i ahau te kanga, nō te mea kāhore i te ngoto ki ō koutou ngākau.
MAL 2:3 “Nanā, ka rīria e ahau te purapura, he mea mō koutou, ka ākiritia atu hoki he paru kararehe ki runga ki ō koutou mata, arā ko te paru o ā koutou whakahere, ā, ka riro tahi atu koutou me tēnā.
MAL 2:4 Ā, ka mōhio koutou nāku tēnei whakahau i tuku ki a koutou, kia mau ai tāku kawenata ki a Rīwai,” e ai tā Ihowā o ngā mano.
MAL 2:5 “I a ia tāku kawenata mō te ora, mō te rongo mau; he mea hoatu nāku ki a ia kia wehi ai ia, ā, i wehi ia ki ahau, ā, hopohopo ana ki tōku ingoa.
MAL 2:6 I roto i tōna māngai te ture o te pono, kīhai hoki te hē i kitea ki ōna ngutu. I haere tahi ia i ahau i runga i te rongo mau, i te tika, he tini hoki i tahuri mai i a ia i te kino.
MAL 2:7 “Ko te tikanga hoki mā ngā ngutu o te tohunga he tiaki mātauranga, ā, mā rātou e rapu te ture ki tōna māngai; nō te mea ko te karere ia a Ihowā o ngā mano.
MAL 2:8 Ko koutou ia kua peka kē i te ara, kua mea i te ture hei tūtukitanga waewae mō ētahi, he tokomaha; hē iho i a koutou te kawenata ki a Rīwai,” e ai tā Ihowā o ngā mano.
MAL 2:9 “Nā, kua meinga nā koutou e ahau kia whakahāweatia, kia iti, i te aroaro o ngā tāngata katoa, kua rite ki tā koutou kīhai nā i mau ki āku ara, ā, i ngā mea o te ture he whakapai tangata tā koutou.”
MAL 2:10 He teka ianei kotahi anō te pāpā o tātou katoa? He teka ianei kotahi anō te Atua nāna tātou i hanga? He aha tātou i tinihanga ai, te tuakana ki te teina, i whakanoa ai i te kawenata ki ō tātou mātua?
MAL 2:11 Kua tinihanga a Hūrā, e mahia ana hoki te mea whakarihariha i roto i a Īharaira, i Hiruhārama; kua noa hoki i a Hūrā te tapu o Ihowā, tāna hoki i aroha ai, ā, mārenatia ana māna te tamāhine a te atua kē.
MAL 2:12 Ka hātepea atu e Ihowā ki te tangata nāna tēnei mahi te kaiwhakaoho rāua ko te tangata whakaō, i roto i ngā tēneti o Hākopa, rātou anō ko te kaitāpae i te whakahere ki a Ihowā o ngā mano.
MAL 2:13 Nā, kei te mahi anō koutou i tēnei. Kei te hīpoki koutou i te āta a Ihowā ki te roimata, ki te tangi, ki te auē, nāwai ā ka kore ia e aro ki te whakahere i muri atu, kāhore hoki e manako ki te tango mai i tā tō koutou ringa.
MAL 2:14 Heoi, e mea nā koutou, “Nā te aha?” Nō te mea he kaiwhakaatu a Ihowā mō tāu ki te wahine o tōu taitamarikitanga i tinihangatia rā e koe, ahakoa ko ia tōu hoa, ko te wahine o tāu kawenata.
MAL 2:15 He teka ianei kotahi tāna i hanga ai, ahakoa i a ia anō te toenga iho o te wairua? Ā, nā te aha i kotahi ai? I rapu ia i te uri atua. Nā, tiakina tō koutou wairua, kaua hoki tētahi e tinihanga ki te wahine o tōna taitamarikitanga.
MAL 2:16 “E kino ana hoki ahau ki te whakarere,” e ai tā Ihowā, tā te Atua o Īharaira; “ki te hīpoki anō hoki i tōna kākahu ki te tutū,” e ai tā Ihowā o ngā mano. Nō reira, tiakina tō koutou wairua, kia kaua koutou e tinihanga.
MAL 2:17 Kua hōhā a Ihowā i ā koutou kupu, ā, e mea nā koutou, “I whakahōhātia ia e mātou ki te aha?” I a koutou e kī nā, “He pai ki te titiro a Ihowā ngā tāngata katoa e mahi ana i te kino e manako ana hoki ia ki a rātou. Kei hea oti te Atua o te whakawā?”
MAL 3:1 “Tēnei te ungā atu nei e ahau tāku karere, māna e whakapai te ara i mua i ahau, ā, kitea rawatia ake, kua tae te Ariki, e rapua nei e koutou, ki tōna temepara. Nā, ko te anahera o te kawenata, ko tā koutou e ngākau nui nā – nanā, tērā ia ka tae atu,” e ai tā Ihowā o ngā mano.
MAL 3:2 Ā, ko wai e ū i te rā e tae mai ai ia? Ko wai hoki e tū, ina puta mai ia? E rite ana hoki ia ki te ahi a te kaitahi para, ki te mea horoi a te kaihoroi.
MAL 3:3 Ka noho anō ia, ka rite ki te kaitahi para, ki te kaiwhakapai hiriwa, ā, ka whakapaia e ia ngā tama a Rīwai, ka whakahemokia tō rātou para, ānō he kōura, he hiriwa, kia tāpaea ai e rātou he whakahere ki a Ihowā i runga i te tika.
MAL 3:4 Ko reira te whakahere a Hūrā rāua ko Hiruhārama rekaina ai e Ihowā, ka rite ki ngā rā ō mua, ki ngā tau onamata.
MAL 3:5 “Ka whakatata atu anō ahau ki a koutou ki te whakawā; ka hohoro anō ahau hei kaiwhakaatu i te hē o ngā kaimākutu, o te hunga pūremu, o ngā kaioati teka, o te hunga e tāhae ana i ngā utu o te kaimahi, i tā te pouaru, i tā te pani, e whakapeau kē ana i tā te manene, ā, kāhore e wehi i ahau, e ai tā Ihowā o ngā mano.”
MAL 3:6 “Ko ahau hoki, ko Ihowā, kāhore ahau e puta kē; nā reira koutou, e ngā tama a Hākopa, i kore ai e pau.
MAL 3:7 Nō ngā rā o ō koutou mātua i whakarērea ai e koutou āku tikanga, kīhai anō i puritia e koutou. Hoki mai ki ahau, ā, ka hoki atu ahau ki a koutou,” e ai tā Ihowā o ngā mano. “Heoi, kei te mea nā koutou, ‘Kia pēhea tā mātou hoki atu?’
MAL 3:8 “E tāhae rānei te tangata i tā te Atua? Heoi, e tāhae nā koutou i tāku. “Ā, e mea nā koutou, ‘He pēhea tā mātou tāhae i tāu?’ “Ki ngā whakatekau rā, me ngā whakahere!
MAL 3:9 Kua kangā, kua kangā koutou; ko koutou hoki kei te tāhae i tāku, arā ko tēnei iwi katoa.
MAL 3:10 Maua katoatia mai te whakatekau ki roto ki te toa, kia whai kai ai tōku whare, waiho hoki tēnei hei whakamātautau mōku,” e ai tā Ihowā o ngā mano, “me kāhore e tuwhera i ahau ngā matapihi o te rangi ki a koutou, ā, ka ringihia he manaaki ki a koutou, ā, kia kore rā anō he takotoranga.
MAL 3:11 Ā, ka rīria e ahau te kaiwhakapareho, he mea mō koutou, ā, e kore e hunā e ia ngā hua o tō koutou oneone; e kore anō e marere noa ngā hua o tā koutou wāina i te māra,” e ai tā Ihowā o ngā mano.
MAL 3:12 “Ā, ki tā ngā iwi katoa, he manaakitanga koutou; nō te mea he whenua āhuareka koutou,” e ai tā Ihowā o ngā mano.
MAL 3:13 “He kaha ā koutou kupu ki ahau,” e ai tā Ihowā. “Heoi, e kī nā koutou, ‘He aha tā mātou kōrero mōu?’
MAL 3:14 “Kua kī nā koutou, ‘Kāhore he hua o te mahi ki te Atua. He aha hoki te rawa o tā mātou pupuri i āna mea, o tā mātou haere tauā i te aroaro o Ihowā o ngā mano?
MAL 3:15 Nā ināianei, ki tā mātou, ko te hunga whakakake ngā mea koa; āe rā, ko ngā kaimahi i te kino te hunga e hanga ake; āe rā, e whakamātautau ana rātou i te Atua, ā, kua mawhiti.’ ”
MAL 3:16 Nā, ko te hunga i wehi i a Ihowā, kei te kōrerorero rātou ki tōna hoa, ki tōna hoa; ā, ka tahuri a Ihowā, ka whakarongo, nā, ka tuhituhia he pukapuka whakamahara ki tōna aroaro mō te hunga i wehi ki a Ihowā, i whakaaro hoki ki tōna ingoa.
MAL 3:17 “Māku hoki rātou,” e ai tā Ihowā o ngā mano, “i te rā e mahia ai e ahau he taonga motuhake; ka manawapā anō ahau ki a rātou, ka pērā me te tangata e manawapā ana ki tāna tama e mahi ana ki a ia.
MAL 3:18 Ko reira anō koutou hoki ai, kite ai i te rerekētanga o tā te tika, o tā te kino, o tā tērā e mahi ana ki te Atua, o tā tērā kāhore e mahi ki a ia.”
MAL 4:1 “Tā te mea, nanā, kei te haere mai te rā, e ngiha ai ānō he oumu. Nā, ko te hunga whakakake katoa, me te hunga katoa e mahi ana i te kino hei kakau wīti rātou; ā, ka tahuna e te rā meāke nei puta,” e ai tā Ihowā o ngā mano, “e kore anō he pakiaka, he manga e mahue ki a rātou.
MAL 4:2 Ki a koutou ia e wehi nā i tōku ingoa ka ara ake te rā o te tika, he whakaora mate hoki i runga i ōna parirau; ā, ka puta mai koutou, ka tūpekepeke ānō he kūao kau nō te tūranga kau.
MAL 4:3 Ka takatakahia anō e koutou te hunga kino; ka rite hoki rātou ki ngā pungarehu i raro i ngā kapu o ō koutou waewae i te rā e mahi ai ahau,” e ai tā Ihowā o ngā mano.
MAL 4:4 “Kia mahara ki te ture a tāku pononga, a Mohi, ki tāku i whakahau ai ki a ia i Horepa, he mea mō Īharaira katoa, ki ngā tikanga, ki ngā whakaritenga.
MAL 4:5 “Nanā, ka ungā atu e ahau a Irāia poropiti ki a koutou i mua i te taenga mai o te rā nui o Ihowā, o te rā whakamataku.
MAL 4:6 Ā, ka tahuri i a ia ngā ngākau o ngā mātua ki ngā tamariki, me ngā ngākau o ngā tamariki ki ō rātou mātua; kei haere atu ahau, kei patu i te whenua ki te kanga.”
MAT 1:1 Ko te pukapuka o te whakapapa o Īhu Karaiti, tama a Rāwiri, tama a Āperahama.
MAT 1:2 Nā, ko tā Āperahama ko Īhaka; tā Īhaka ko Hākopa; tā Hākopa ko Hūrā rātou ko ōna tuākana, ko ōna tēina;
MAT 1:3 tā Hūrā rāua ko Tāmara ko Parete rāua ko Hara; tā Parete ko Heteromo; tā Heteromo ko Arame;
MAT 1:4 tā Arame ko Aminarapa; tā Aminarapa ko Nāhona; tā Nāhona ko Haramono;
MAT 1:5 tā Haramono rāua ko Rahapa ko Poaha; tā Poaha rāua ko Rutu ko Ōpere; tā Ōpere ko Hehe;
MAT 1:6 tā Hehe ko Rāwiri, ko te kīngi. Tā Rāwiri kīngi rāua ko te wahine a Uria ko Horomona;
MAT 1:7 tā Horomona ko Rehopoama; tā Rehopoama ko Apia; tā Apia ko Aha.
MAT 1:8 Tā Aha ko Iehohāpata; tā Iehohāpata ko Iorama; tā Iorama ko Ohiaha;
MAT 1:9 tā Ohiaha ko Iotama; tā Iotama ko Ahata; tā Ahata ko Hetekia;
MAT 1:10 tā Hetekia ko Mānahi; tā Mānahi ko Amono; tā Amono ko Hōhia;
MAT 1:11 tā Hōhia ko Hekonia rātou ko ōna tēina; i te wā o te whakahekenga ki Papurōna.
MAT 1:12 Ā, i muri i te whakahekenga atu ki Papurōna: ka whānau tā Hekonia ko Haratiera; tā Haratiera ko Herupapera;
MAT 1:13 tā Herupapera ko Apiuru; tā Apiuru ko Eriakimi; tā Eriakimi ko Ātoro;
MAT 1:14 tā Ātoro ko Hāroko; tā Hāroko ko Ākimi; tā Ākimi ko Eriuru;
MAT 1:15 tā Eriuru ko Ereātara; tā Ereātara ko Matana; tā Matana ko Hākopa;
MAT 1:16 tā Hākopa ko Hōhepa, ko te tahu a Meri; whānau ake tā Meri ko Īhu, e kīia nei ko te Karaiti.
MAT 1:17 Heoi, ko ngā whakatupuranga katoa o Āperahama tae noa ki a Rāwiri, tekau mā whā ngā whakatupuranga; o Rāwiri tae noa ki te whakahekenga ki Papurōna tekau mā whā ngā whakatupuranga; ā, nō te whakahekenga ki Papurōna tae noa ki a te Karaiti tekau mā whā ngā whakatupuranga.
MAT 1:18 Nā, ko te whānautanga tēnei o Īhu Karaiti; he mea taumau a Meri, tōna whaea, mā Hōhepa, ā, i te mea kīanō rāua i tata noa ki a rāua, ka kitea kua hapū ia i te Wairua Tapu.
MAT 1:19 Otirā, he tangata tika tāna tahu, a Hōhepa, ā, kāhore ōna ngākau kia whakakitea nuitia ia, ka mea kia whakarērea pukutia.
MAT 1:20 Otiia, i a ia e hurihuri ana i ēnei mea, nā, ka puta moemoeā mai tētahi anahera a te Ariki ki a ia, ka mea, “E Hōhepa, e te tama a Rāwiri, kaua e hopohopo ki te tango i a Meri, i tāu wahine; nā te Wairua Tapu hoki tōna hapū.
MAT 1:21 Ā, e whānau ia he tama, me hua e koe tōna ingoa ko Īhu; nō te mea māna e whakaora tōna iwi i ō rātou hara.”
MAT 1:22 Nā, ka oti tēnei katoa, kātahi ka rite tā te Ariki, i kōrerotia e te poropiti, i mea ai ia,
MAT 1:23 “Nā, ka hapū te wāhina, ka whānau hoki he tama, ā, ka huaina e rātou tōna ingoa ko Emānuera,” ko tōna whakamāoritanga tēnei, “Kei a tātou te Atua.”
MAT 1:24 Ā, ka ara ake a Hōhepa i te moe, ka meatia e ia tā te anahera a te Ariki i whakahau ai ki a ia, ā, tango ana ia i tāna wahine.
MAT 1:25 Ā, kīhai i mōhio ki a ia, whānau noa tāna tama mātāmua; ā, huaina ana e ia tōna ingoa ko Īhu.
MAT 2:1 Nā, i te mea kua whānau nei a Īhu ki Pēterehema o Hūria, i ngā rā o Kīngi Herora, nā, ka haere mai ētahi Maki i te rāwhiti ki Hiruhārama,
MAT 2:2 ka mea, “Kei hea tēnei kua whānau nei hei kīngi mō ngā Hūrai? I kite hoki mātou i tōna whetū i te rāwhiti, ā, ka tae mai nei ki te koropiko ki a ia.”
MAT 2:3 Ā, nō te rongonga o Kīngi Herora, ka ohorere rātou ko Hiruhārama katoa.
MAT 2:4 Nā, whakaminea katoatia ana e ia ngā tohunga nui me ngā karaipi o te iwi, ā, ka ui ki a rātou ki te wāhi e whānau ai a te Karaiti.
MAT 2:5 Ka mea rātou ki a ia, “Ki Pēterehema o Hūria; ko tā te poropiti hoki tēnei i tuhituhi ai:
MAT 2:6 ‘Ā, ko koe, e Pēterehema, whenua o Hūrā, ehara rawa i te iti rawa i roto i ngā kāwana o Hūrā; e puta mai hoki i a koe he kāwana, hei hēpara mō tāku iwi, mō Īharaira.’ ”
MAT 2:7 Nā, ka oti ngā Maki te karanga puku e Herora, ka uia mārietia rātou ki te wā i puta mai ai te whetū.
MAT 2:8 Ā, ungā ana rātou e ia ki Pēterehema, i mea ia, “Haere, rapua mārietia te tamaiti; ā, ka kitea, ka whakahoki mai i te kōrero ki ahau, kia haere ai hoki ahau ki te koropiko ki a ia.”
MAT 2:9 Nā, ka rongo rātou i tā te kīngi, ka haere; nā, ko te whetū, i kite ai rātou i te rāwhiti, e haere ana i mua i a rātou, ā tae noa, tū noa ki runga ake i te takotoranga o te tamaiti.
MAT 2:10 Ā, i tō rātou kitenga i te whetū, ko te tino haringa i hari ai.
MAT 2:11 Ā, ka tae ki roto ki te whare, ka kite i te tamaiti rāua ko tōna whaea, ko Meri, nā, tāpapa ana rātou, koropiko ana ki a ia, ā, nō ka māwhera ō rātou taonga, ka hoatu ētahi mea ki a ia, he kōura, he parakihe, he maira.
MAT 2:12 Ā, i whakatūpatoria rātou e te Atua, he mea moemoeā, kia kaua e hoki ki a Herora; nā, haere ana ki tō rātou kāinga he ara kē.
MAT 2:13 Ā, ka riro atu rātou, nā, ka puta moemoeā tētahi anahera a te Ariki ki a Hōhepa, ka mea, “E ara, tangohia te tamaiti rāua ko tōna whaea, e rere ki Īhipa, ā, hei reira koe kia kōrero rā anō ahau ki a koe; meāke hoki rapu a Herora i te tamaiti kia whakangaromia.”
MAT 2:14 Nā, ka ara ake ia, ka mau ki te tamaiti rāua ko tōna whaea i te pō, ā, haere ana ki Īhipa,
MAT 2:15 ā, noho ana i reira, mate noa a Herora. Nā, ka rite tā te Ariki i kōrerotia e te poropiti, i mea ai ia, “He mea karanga nāku tāku tamaiti i Īhipa.”
MAT 2:16 Ā, nō te kitenga o Herora ka oti ia te tinihanga e ngā Maki, rahi rawa tōna riri, ka tono tāngata, ā, patua iho ngā tamariki katoa, ngā mea e rua nei ō rātou tau, me ō muri iho, i Pēterehema, i ngā wāhi katoa o reira, he mea whakarite ki te tāima i uia mārietia e ia ki ngā Maki.
MAT 2:17 Kātahi, ka rite tā Heremaia poropiti i kōrero ai, i mea ai:
MAT 2:18 “I rangona he reo ki Rama, he uhunga, he tangi, he auē nui. Ko Rahera e tangi ana ki āna tamariki; ā, kīhai i pai kia whakamārietia, nō te mea kua kāhore rātou.”
MAT 2:19 Ā, nō ka mate a Herora, nā, ka puta moemoeā te anahera a te Ariki ki a Hōhepa, ki Īhipa,
MAT 2:20 ka mea, “Ara ake, tangohia te tamaiti rāua ko tōna whaea, ā, haere ki te whenua o Īharaira; kua mate hoki te hunga i whai kia patua te tamaiti.”
MAT 2:21 Ā, ko tōna aranga ake, ka mau ki te tamaiti rāua ko tōna whaea, ka haere ki te whenua o Īharaira.
MAT 2:22 Otirā, ka rongo ia ko Arakerauha te kīngi o Hūria i muri i tōna matua, i a Herora, ka wehi ki te haere ki reira. Otiia, i whakamaharatia ia e te Atua, he mea moemoeā, ā, haere ana ki ngā wāhi o Karirī.
MAT 2:23 Ā, ka tae, ā, ka noho ki tētahi pā, ko Nahareta te ingoa; i rite ai tā ngā poropiti i mea ai, “Me hua ia he tangata nō Nahareta.”
MAT 3:1 Nā, i aua rā, ka puta a Hoani Kaiiriiri, ka kauwhau i te koraha o Hūria,
MAT 3:2 ka mea, “Rīpenetā, kua tata hoki te rangatiratanga o te rangi.”
MAT 3:3 Ko tā Ihāia poropiti hoki tēnei i kōrero ai, i mea ai: “He reo nō tētahi i te koraha e karanga ana: ‘Whakapaia te huarahi o te Ariki, whakatikaia ōna ara.’ ”
MAT 3:4 Ā, ko te kākahu o taua Hoani he huruhuru kāmera, he hiako hoki te whītiki o tōna hope; ko tāna kai he māwhitiwhiti, he honi koraha.
MAT 3:5 Kātahi, ka haere ki a ia a Hiruhārama, me Hūria katoa, me ngā kāinga katoa e tūtata ana ki Horano,
MAT 3:6 ā, iriiria ana rātou e ia ki Horano, me te whāki anō i ō rātou hara.
MAT 3:7 Nō tōna kitenga ia i te tini o ngā Parihi, o ngā Haruki e haere ana ki tāna iriiringa, ka mea ia ki a rātou, “E te uri nākahi, nā wai koutou i whakamahara kia rere i te riri meāke puta?
MAT 3:8 Nā, whakaputaina he hua e rite ana ki ō te rīpenetā.
MAT 3:9 Kei anga koutou kei mea i roto i a koutou, ‘Ko Āperahama tō tātou matua’; ko tāku kupu hoki tēnei ki a koutou, E āhei ana anō i te Atua te whakaara tamariki ake mā Āperahama i ēnei kōhatu.
MAT 3:10 Nā, tēnei ka pā te toki ki te pakiaka o ngā rākau; ā, ki te kāhore tētahi rākau e hua i te hua pai, ka tuaina, ka makā ki te ahi.
MAT 3:11 “Ko ahau nei he iriiri tāku i a koutou ki te wai, hei mea rīpenetā; ko tēnei ia, e haere mai ana i muri i ahau, nui atu tōna mana i tōku, e kore ahau e tau hei mau i ōna hū. Māna koutou e iriiri ki te Wairua Tapu, ki te kāpura.
MAT 3:12 Ko tāna mea tahi kei tōna ringa, ā, e tino tahia e ia tāna patunga wīti, ā, e kohia āna wīti ki roto ki te whare wīti; tēnā ko te pāpapa e tahuna ki te kāpura e kore e tineia.”
MAT 3:13 I reira, ka haere a Īhu i Karirī ki Horano, ki a Hoani, kia iriiria e ia.
MAT 3:14 Otirā, ka whakakāhore a Hoani ki a ia, ka mea, “Ko te tikanga rā ko ahau kia iriiria e koe, ā, e haere mai ana koe ki ahau?”
MAT 3:15 Nā, ka whakahoki a Īhu, ka mea ki a ia, “Tukua rā āianei; ko te tikanga hoki tēnei mā tāua kia whakarite i ngā mea tika katoa.” Nā, tukua ana ia e ia.
MAT 3:16 Ā, nō ka oti a Īhu te iriiri, tika tonu ake ia i te wai; nā, ko te rangi ka tuwhera ki a ia, ā, ka kite ia i te Wairua o te Atua e heke iho ana me he kūkupa, ā, tau ana ki runga ki a ia.
MAT 3:17 Nā, ko tētahi reo nō te rangi e mea ana, “Ko tāku Tama tēnei i aroha ai, ko tāku i āhuareka ai.”
MAT 4:1 Me i reira ka ārahina a Īhu e te Wairua ki te koraha, kia whakamātautauria e te rēwera.
MAT 4:2 Ā, nō ka whā tekau ngā rā, ka whā tekau ngā pō i nohopuku ai, muri iho ka hiakai.
MAT 4:3 Nā, ka tae te kaiwhakamātautau ki a ia, ka mea, “Ki te mea ko te Tama koe a te Atua, kīia iho kia meinga ēnei kōhatu hei taro.”
MAT 4:4 Nā, ka whakahoki ia, ka mea, “Kua oti te tuhituhi, ‘E kore e ora te tangata i te taro kau, engari, i ngā kupu katoa e puta mai ana i te māngai o te Atua.’ ”
MAT 4:5 Me i reira, ka kawe te rēwera i a ia ki te pā tapu, ā, whakatūria ana ia ki runga ki te keokeonga o te temepara,
MAT 4:6 ā, ka mea ki a ia, “Ki te mea ko te Tama koe a te Atua, rere atu ki raro; kua oti hoki te tuhituhi: ‘Ka kōrerotia iho koe e ia ki āna anahera; mā rātou koe e hiki ake ki ō rātou ringa, kei tūtuki tōu waewae ki te kōhatu.’ ”
MAT 4:7 Mea atu ana a Īhu ki a ia, “Ka oti anō hoki te tuhituhi, ‘Kaua e whakamātautau ki te Ariki ki tōu Atua.’ ”
MAT 4:8 Ka kawe anō te rēwera i a ia ki runga ki tētahi maunga tiketike rawa, ā, whakakitea ana ki a ia ngā rangatiratanga katoa o te ao, me te korōria o aua mea;
MAT 4:9 ā, mea ana ki a ia, “Ko ēnei mea katoa e hoatu e ahau ki a koe, ki te tāpapa koe, ki te koropiko ki ahau.”
MAT 4:10 Nā, ka mea a Īhu ki a ia, “Haere atu, e Hātana! Kua oti hoki te tuhituhi; ‘Me koropiko koe ki te Ariki ki tōu Atua, me mahi anō ki a ia anake.’ ”
MAT 4:11 Nā, ka mahue ia i te rēwera, ā, ka haere mai ngā anahera ka mahi mea māna.
MAT 4:12 Ā, nō ka rongo a Īhu kua tukua a Hoani ki te whare herehere, ka haere ia ki Karirī.
MAT 4:13 Ā, ka mahue a Nahareta i a ia, ā, haere ana, ka noho ki Kaperenauma, ki te taha o te moana, ki ngā rohe o Hepurona, o Napatari.
MAT 4:14 I rite ai tā Ihāia poropiti i kōrero ai, i mea ai:
MAT 4:15 “Ko te whenua o Hepurona, me te whenua o Napatari, i te ara o te moana, i tērā taha o Horano, Karirī o ngā tauiwi!
MAT 4:16 Ko te hunga i noho i te pōuri kua kite rātou i te mārama nui, ā, ko te hunga i noho i te wāhi i te ātārangi o te mate, kua puta ake te mārama ki a rātou.”
MAT 4:17 Nō reira anō a Īhu i tīmata ai te kauwhau, te mea, “Rīpenetā, kua tata hoki te rangatiratanga o te rangi.”
MAT 4:18 Ā, i a Īhu e haere ana i te taha o te moana o Karirī, ka kite ia i ētahi tāngata tokorua, he tuakana he teina, i a Haimona, tōna ingoa nei ko Pita, rāua ko tōna teina, ko Anaru, e maka ana i te kupenga ki te moana; he kaihao ika hoki rāua.
MAT 4:19 Nā, ka mea ia ki a rāua, “Arumia mai ahau, ā, māku kōrua e mea hei kaihao tāngata.”
MAT 4:20 Ā, mahue ake i a rāua ngā kupenga, ā, aru ana i a ia.
MAT 4:21 Ā, nō tōna haerenga i reira, tokorua anō āna i kite ai, he tuakana, he teina, ko Hēmi tama a Heperi rāua ko tōna teina, ko Hoani, i te kaipuke i a Heperi i tō rāua matua, e tā ana i ngā korenga o ā rātou kupenga, ā, karangatia ana rāua e ia.
MAT 4:22 Mahue tonu ake i a rāua te kaipuke me tō rāua matua, ā, aru ana i a ia.
MAT 4:23 Nā, ka hāereerea katoatia a Karirī e Īhu, whakaako ana i roto i ō rātou whare karakia, kauwhau ana i te rongopai o te rangatiratanga, me te whakaora i ngā mate katoa, i ngā tūrorotanga katoa o te iwi.
MAT 4:24 Ā, ka haere tōna rongo puta noa i Hīria, ā, kawea ana mai e rātou ki a ia ngā tāngata mate katoa e ngaua ana e te tini o ngā mate, o ngā mamae, me te hunga e nohoia ana e te rēwera, me te hunga haurangi, me ngā pararūtiki, ā, whakaorangia ake rātou e ia.
MAT 4:25 Ā, he rahi te hui i aru i a ia i Karirī, i Rekaporihi, i Hiruhārama, i Hūria, i tērā taha anō o Horano.
MAT 5:1 Ā, i tōna kitenga i te whakaminenga, ka haere ia ki runga ki te maunga; ā, nō ka noho ia, ka haere āna ākonga ki a ia,
MAT 5:2 nā, ka puaki tōna māngai, ā, ka whakaako ia i a rātou, ka mea:
MAT 5:3 “Ka koa te hunga he rawakore nei te wairua; nō rātou hoki te rangatiratanga o te rangi.
MAT 5:4 Ka koa te hunga e tangi ana; ka whakamārietia hoki rātou.
MAT 5:5 Ka koa te hunga ngākau māhaki; ka riro hoki i a rātou te whenua.
MAT 5:6 Ka koa te hunga e hiakai ana, e hiainu ana, ki te tika; e mākona hoki rātou.
MAT 5:7 Ka koa te hunga tohu tangata; e tohungia hoki rātou.
MAT 5:8 Ka koa te hunga ngākau mā; e kite hoki rātou i te Atua.
MAT 5:9 Ka koa te hunga hohou rongo; ka huaina hoki rātou he tamariki nā te Atua.
MAT 5:10 Ka koa te hunga e whakatoia ana mō te tika; nō rātou hoki te rangatiratanga o te rangi.
MAT 5:11 “Ka koa koutou ina tāwai rātou i a koutou, ina whakatoi, ina puaki i a rātou ngā kupu kino katoa mō koutou, he mea teka, he whakaaro hoki ki ahau.
MAT 5:12 Kia hari, kia whakamanamana; he rahi hoki te utu mō koutou i te rangi; he pēnei hoki tā rātou whakatoi i ngā poropiti i mua i a koutou.”
MAT 5:13 “Ko koutou te tote o te whenua; otirā, ki te hemo te hā o te tote, mā te aha e whai tikanga tote ai? Heoi anō tōna painga, nā, ka ākiritia ki waho, ka takahia e ngā tāngata.
MAT 5:14 “Ko koutou te whakamārama o te ao. E kore e ngaro te pā e tū ana i runga i te maunga.
MAT 5:15 E kore hoki e tahuna te rama, e whakatūria ki raro o te mēhua, engari, ki runga ki te tūranga; ā, ka tīaho ki ngā tāngata katoa i roto i te whare.
MAT 5:16 Waihoki, kia tīaho tō koutou mārama ki te aroaro o ngā tāngata, kia kite ai rātou i ā koutou hanga pai, kia whakakorōria ai i tō koutou Matua i te rangi.”
MAT 5:17 “Kei mea koutou i haere mai ahau ki te whakakāhore i te ture, i ngā poropiti rānei; kīhai ahau i haere mai ki te whakakāhore, engari, ki te whakatutuki.
MAT 5:18 He tino pono hoki tāku e mea nei ki a koutou, pahemo noa te rangi me te whenua, e kore tētahi tongi, tētahi tohu rānei o te ture e pahemo, kia rite katoa rā anō.
MAT 5:19 Nā, ki te whakakāhore tētahi i tētahi mea iti rawa o ēnei kupu ako, ā, ka ako i ngā tāngata kia pērā, ka kīia ia ko te iti rawa i te rangatiratanga o te rangi; engari, Ki te whakaritea e tētahi, ki te whakaakona, ka kīia ia he nui i te rangatiratanga o te rangi.
MAT 5:20 Ko tāku kupu hoki tēnei ki a koutou, ki te kore e nui ake tā koutou mahi tika i tā ngā karaipi rātou ko ngā Parihi, e kore rawa koutou e tapoko ki te rangatiratanga o te rangi.”
MAT 5:21 “Kua rongo koutou, i kōrerotia ki ngā tūpuna, ‘Kaua e patu tangata’; ā, ‘ki te patu tangata tētahi, ka tau te hē ki a ia.’
MAT 5:22 Nā, ko tāku kupu tēnei ki a koutou, Ki te riri noa tētahi ki tōna teina, ka tau te hē ki a ia; ā, ki te mea tētahi ki tōna teina, ‘Wairangi!’ ka tika kia komititia. Nā, ki te mea tētahi, ‘Pōauau!’ ka tika mōna te kāpura o Kehena.
MAT 5:23 “Nā reira, ki te mauria e koe tāu whakahere ki te āta, ā, ka mahara i reira i hara koe ki tōu hoa;
MAT 5:24 waiho tāu whakahere i reira, i mua o te āta, ā, haere, mātua houhia te rongo ki tōu teina, ka haere ai, ka mau ai i tāu whakahere.
MAT 5:25 “Kia hohoro te whakarite i tā kōrua kōrero ko tōu hoa tauwhāinga, i a kōrua anō i te ara, kei tukua koe e te hoa tauwhāinga ki te kaiwhakawā, ā, ka tukua e te kaiwhakawā ki te kātipa, ā, ka makā koe ki te whare herehere.
MAT 5:26 He pono tāku e mea atu nei ki a koe, E kore rawa koe e puta i reira, kia utua rā anō te pātene whakamutunga.”
MAT 5:27 “Kua rongo koutou, i kōrerotia, ‘Kaua e pūremu.’
MAT 5:28 Nā, ko tāku kupu tēnei ki a koutou, Ki te titiro tētahi ki te wahine, he hiahia ki a ia, kua pūremu kē ia ki a ia i roto i tōna ngākau.
MAT 5:29 Ki te hē koe i tōu kanohi matau, tīkarohia, makā atu; he pai kē hoki ki a koe ki te ngaro tētahi wāhi ōu, ā, ka kore e makā tōu tinana katoa ki Kehena.
MAT 5:30 Ki te hē anō hoki koe i tōu ringa matau, pōutoa, makā atu; he pai kē ki te mate tētahi wāhi ōu, ā, ka kore e makā tōu tinana katoa ki Kehena.”
MAT 5:31 “I kōrerotia anō, ‘Ki te whakarere tētahi i tāna wahine, me hoatu ki a ia tētahi pukapuka whakarere.’
MAT 5:32 Nā, ko tāku kupu tēnei ki a koutou, Ki te whakarere tētahi i tāna wahine, hāunga mō te take moepuku, e mea ana ia i te wahine kia pūremu; ā, ki te mārena tētahi i te wahine i whakarērea, e pūremu ana ia.”
MAT 5:33 “Kua rongo anō koutou, i kōrerotia ki ngā tūpuna, ‘Kaua e oati teka, engari, me whakamana āu oati ki te Ariki.’
MAT 5:34 Nā, ko tāku kupu tēnei ki a koutou: Kaua rawa tētahi mea e oatitia; kaua te rangi, ko tō te Atua torōna hoki ia,
MAT 5:35 kaua hoki te whenua, ko te tūranga hoki tērā o ōna waewae, kaua hoki a Hiruhārama; ko te pā hoki tērā o te Kīngi nui.
MAT 5:36 Kaua anō e oatitia tōu mātenga, e kore hoki e āhei i a koe te mea kia mā tētahi makawe, kia mangu rānei.
MAT 5:37 Erangi, ko tēnei hei kupu mā koutou, ‘Āe, āe’; ‘Kāhore, kāhore’; nō te mea ki te maha atu i ēnā, nō te kino.”
MAT 5:38 “Kua rongo koutou i kōrerotia, ‘He kanohi mō te kanohi, he niho mō te niho.’
MAT 5:39 Nā, ko tāku kupu tēnei ki a koutou: Kaua e whakauaua atu ki te kino; erangi, ki te pākia tōu pāpāringa matau e tētahi, whakaangahia atu hoki tērā ki a ia.
MAT 5:40 Ā, ki te mea tētahi kia whakawākia koe, ka tangohia tōu koti, tukua atu hoki tōu ngeri ki a ia.
MAT 5:41 Ā, ki te tonoa koe e tētahi kia haere kotahi te māero, kia rua āu e haere tahi ai me ia.
MAT 5:42 Hoatu ki te tangata e tono mea ana i a koe, kaua hoki e tahuri kē i te tangata e mea ana ki te taonga tārewa i a koe.”
MAT 5:43 “Kua rongo koutou i kōrerotia, ‘Kia aroha ki tōu hoa tata, kia kino hoki ki tōu hoa whawhai.’
MAT 5:44 Nā, ko tāku kupu tēnei ki a koutou: Arohaina ō koutou hoa whawhai, manaakitia te hunga e kanga ana i a koutou, kia pai te mahi ki te hunga e kino ana ki a koutou, me īnoi hoki mō te hunga e whakawhiu ana i a koutou, e whakatoi ana i a koutou;
MAT 5:45 kia tupu ai koutou hei tamariki mā tō koutou Matua i te rangi; e mea nei hoki ia i tōna rā kia whiti ki te hunga kino, ki te hunga pai, kia ua hoki te ua ki te hunga tika, ki te hunga hē.
MAT 5:46 Ki te aroha hoki koutou ki te hunga e aroha ana ki a koutou, he aha te utu e riro i a koutou? Kāhore ianei ngā pupirikana e pēnā?
MAT 5:47 Ā, ki te oha koutou ki ō koutou tēina anake, he aha tā koutou mahi i nui ake i tā ētahi? Kāhore ianei ngā tauiwi e pēnā hoki?
MAT 5:48 Nā, kia tika koutou, kia pērā me tō koutou Matua i te rangi e tika ana.”
MAT 6:1 “Kia tūpato kei mahi i tā koutou mea tika i te aroaro o ngā tāngata, hei tirohanga mā rātou; pēnei kāhore he utu ki a koutou a tō koutou Matua i te rangi.
MAT 6:2 “Nā, ka atawhai koe i te rawakore, aua e whakatangihia te tētere i mua i a koe, kei pērā me te hunga tinihanga i roto i ngā whare karakia, i ngā ara, kia whai korōria ai i ngā tāngata. He pono tāku e mea nei ki a koutou, kei a rātou anō te utu mō rātou.
MAT 6:3 Erangi, ka atawhaitia e koe te rawakore, kei mōhio tōu mauī ki tā tōu matau e mea ai;
MAT 6:4 kia ngaro ai tāu atawhainga rawakore; ā, ko tōu Matua e kite nei i te wāhi ngaro, māna koe e utu.”
MAT 6:5 “Ā, ka īnoi koe, kaua e pērā me te hunga tinihanga; ko tā rātou hoki e pai ai ko te īnoi tū i roto i ngā whare karakia, i ngā kokinga o ngā ara, kia kitea ai e te tangata. He pono tāku e mea nei ki a koutou, Kei a rātou anō te utu mō rātou.
MAT 6:6 “Nā, ka īnoi koe, tomo atu ki tōu rūma i roto rawa, ā, nō ka kati tōu tatau, īnoi ki tōu Matua i te wāhi ngaro; ā, ko tōu Matua e kite nei i te wāhi ngaro, māna koe e utu.
MAT 6:7 “Nā, ka īnoi koutou, aua e whakahuatia noatia ko aua kupu anō, kei pērā me ngā tauiwi; ki tā rātou hoki mā ngā kupu maha e rangona ai rātou.
MAT 6:8 Nā, kei rite koutou ki a rātou; e mātau ana hoki tō koutou Matua ki ngā mea e matea ana e koutou, i te mea kīanō koutou i īnoi ki a ia.
MAT 6:9 “Nā, kia pēnei tā koutou īnoi: E tō mātou Matua i te rangi: Kia tapu tōu ingoa;
MAT 6:10 kia tae mai tōu rangatiratanga; kia meatia tāu e pai ai ki runga ki te whenua kia rite anō ki tō te rangi.
MAT 6:11 Hōmai ki a mātou āianei he taro mā mātou mō tēnei rā.
MAT 6:12 Murua ō mātou hara, me mātou hoki e muru nei i ō te hunga e hara ana ki a mātou.
MAT 6:13 Aua hoki mātou e kawea kia whakawaia; engari, whakaorangia mātou i te kino. Nōu hoki te rangatiratanga, te kaha, me te korōria, ake, ake. Āmine.
MAT 6:14 Ki te whakarērea noatia iho hoki e koutou ngā hē o te tangata, ka whakarērea noatia iho anō o koutou e tō koutou Matua i te rangi.
MAT 6:15 Ā, ki te kore e whakarērea noatia iho e koutou ngā hē o ngā tāngata, e kore anō e whakarērea noatia iho ō koutou hē e tō koutou Matua.”
MAT 6:16 “Ka nohopuku hoki koutou, kei rite ki te hunga tinihanga, kaua e whakapoururu te kanohi; e whakaahua kē ana hoki rātou i ō rātou kanohi, kia kitea ai e te tangata, e nohopuku ana. He pono tāku e mea nei ki a koutou, Kei a rātou anō te utu mō rātou.
MAT 6:17 Engari, ka nohopuku koe, kaukauria tōu upoko, horoia hoki tōu kanohi;
MAT 6:18 kei kitea koe e te tangata e nohopuku ana, erangi, e tōu Matua i te wāhi ngaro; ā, ko tōu Matua e kite nei i te wāhi ngaro, māna koe e utu.”
MAT 6:19 “Kaua e pūrangatia he taonga mō koutou ki te whenua, ki te wāhi e whakangaro ai te huhu, te waikura; ki te wāhi hoki e keri ai te tāhae, tāhae ai.
MAT 6:20 Erangi, pūrangatia mō koutou he taonga ki te rangi, ki te wāhi e kore ai e whakangaro te huhu, te waikura, ki te wāhi hoki e kore ai e keri te tāhae, tāhae ai.
MAT 6:21 Ko te wāhi hoki i ō koutou taonga, ko reira anō ō koutou ngākau.”
MAT 6:22 “Ko te kanohi te rama o te tinana. Nā, ki te ātea tōu kanohi, e mārama katoa tōu tinana.
MAT 6:23 Tēnā ki te kino tōu kanohi, ka pōuri katoa tōu tinana. Nā, ki te pōuri te mārama i roto i a koe, anō te nui o tēnā pōuri!”
MAT 6:24 “Kāhore he tangata e pono te mahi ki ngā rangatira tokorua; ka kino hoki ki tētahi, ka aroha ki tētahi; ka ū rānei ki tētahi, ā, ka whakahāwea ki tētahi. E kore e pono i a koutou te mahi ki te Atua, ki te taonga.
MAT 6:25 “Koia ahau ka mea nei ki a koutou, kaua e mānukanuka ki tō koutou ora, ki tā koutou e kai ai, ki tā koutou e inu ai; ki ō koutou tinana rānei, ki tā koutou e kākahu ai. Ehara oti te ora i te rahi atu i te kai, me te tinana i te kākahu?
MAT 6:26 Tirohia ngā manu o te rangi; kāhore rātou e rui, kāhore e kokoti, e kohikohi rānei ki ngā whare wīti; heoi, e whāngainga ana rātou e tō koutou Matua i te rangi. Ehara oti koutou i te mea pai ake i ērā?
MAT 6:27 Ko wai o koutou e taea e ia te whakaaro iho, te hono tētahi wāhi ki tōna roa, kia kotahi te whatīanga?
MAT 6:28 “Ā, he aha koutou i mānukanuka ai ki te kākahu? Maharatia ngā rengarenga o te whenua, te tupu; e kore nei e mahi, e kore nei anō e miro.
MAT 6:29 Ko tāku kupu tēnei ki a koutou, kīhai a Horomona, me tōna korōria katoa, i rite ki tētahi o ēnei te whai kākahu.
MAT 6:30 Ha, ki te pēnei tā te Atua whakakākahu i te tarutaru o te whenua, e tupu nei ināianei, ā, āpōpō ka makā ki te oumu, e kore ianei tāna i a koutou e rahi ake, e te hunga whakapono iti?
MAT 6:31 “Nā, kaua rā e mānukanuka, e mea, ‘He aha tā tātou e kai ai? He aha tā tātou e inu ai? Me whakakākahu tātou ki te aha?’
MAT 6:32 Ko ēnei mea katoa nei hoki tā ngā tauiwi e rapu ai; e mātau ana hoki tō koutou Matua i te rangi e matea ana e koutou ēnei mea katoa.
MAT 6:33 Engari mātua rapua tōna rangatiratanga, me āna mea tika; ā, ka tāpiritia ēnei mea katoa mā koutou.
MAT 6:34 Nō reira, kaua e mānukanuka ki o āpōpō; mā āpōpō anō ia e mānukanuka. Kāti anō i tōna rā tōna kino.”
MAT 7:1 “Kaua e whakawā, kei whakawākia koutou.
MAT 7:2 Nā, ko te whakawākanga e whakawā ai koutou, koia anō hei whakawākanga mō koutou, ā, ko te mēhua e mēhua ai koutou, hei mēhua anō tēnā ki a koutou.
MAT 7:3 “Ā, he aha tāu e titiro ki te otaota i roto i te kanohi o tōu teina, tē mahara ki te kurupae i roto i tōu?
MAT 7:4 Me pēhea rānei tāu kupu ki tōu teina, ‘Iaua, kia kapea atu e ahau te otaota i tōu kanohi,’ ā, he kurupae anō tēnā kei roto i tōu?
MAT 7:5 E te tangata tinihanga! Mātua kapea e koe te kurupae i tōu kanohi, kātahi koe ka mārama ki te kape i te otaota i roto i te kanohi o tōu teina.
MAT 7:6 “Kaua e hoatu te mea tapu ki ngā kurī, kaua anō e makā ā koutou peara ki te aroaro o ngā poaka, kei takatakahia e ō rātou waewae, ā, ka tahuri, ka haehae i a koutou.”
MAT 7:7 “Īnoia, ā, ka hoatu ki a koutou; rapua, ā, ka kitea e koutou; pātōtō, ā, ka uakina ki a koutou.
MAT 7:8 Ka whiwhi hoki te tangata ina īnoi, ka kite ina rapu; ka uakina hoki ki te tangata e pātōtō ana.
MAT 7:9 “Ko tēhea tangata ianei o koutou, ina īnoi tāna tama ki a ia he taro, e hoatu ki a ia he kōhatu?
MAT 7:10 Ā, īnoi rānei he ika, e hoatu ki a ia he nākahi?
MAT 7:11 Nā, ki te mātau koutou, te hunga kino, ki te hoatu mea papai ki ā koutou tamariki, tērā noa ake te hōmaitanga o ngā mea papai e tō koutou Matua i te rangi ki te hunga e īnoi ana ki a ia.
MAT 7:12 “Nā, ko ngā mea katoa, e pai ai koutou kia meatia e ngā tāngata, ki a koutou, meatia hoki e koutou ki a rātou; ko tēnei hoki tā te ture me tā ngā poropiti.”
MAT 7:13 “E tomo mā te kūwaha whāiti; he whārahi hoki te kūwaha, he whānui te ara, e tika ana ki te ngaromanga, ā, he tokomaha e haere ana rā reira.
MAT 7:14 He kūiti hoki te kūwaha, he kikī te ara e tika ana ki te ora, ā, he tokoiti te hunga e kite.”
MAT 7:15 “Kia tūpato ki ngā poropiti teka e haere nei ki a koutou, he hipi te kākahu, ko roto ia he wuruhi kai kino.
MAT 7:16 Mā ō rātou hua ka mōhiotia ai rātou e koutou. E whakia rānei te karepe i runga i te tātarāmoa, te piki rānei i te tūmatakuru?
MAT 7:17 Waihoki he ātaahua ngā hua o te rākau pai, he kino ia ngā hua o te rākau kino.
MAT 7:18 E kore te rākau pai e āhei te hua i te hua kino, e kore anō te rākau kino e hua i te hua ātaahua.
MAT 7:19 Ko ngā rākau katoa e kore nei e hua i te hua ātaahua ka tuaina ki raro, ka makā ki te ahi.
MAT 7:20 Inā, mā ō rātou hua ka mōhiotia ai rātou e koutou.”
MAT 7:21 “E kore e tomo ki te rangatiratanga o te rangi ngā tāngata katoa e mea mai ana ki ahau, ‘E te Ariki, e te Ariki,’ engari, ia e mea ana i tā tōku Matua i te rangi i pai ai.
MAT 7:22 He tokomaha e mea mai ki ahau i taua rā, ‘E te Ariki, e te Ariki; kīhai koia mātou i poropiti i runga i tōu ingoa, i pei rēwera hoki i runga i tōu ingoa, he tini hoki ngā mahi nunui i meatia e mātou i runga i tōu ingoa?’
MAT 7:23 Ko reira ahau mea ai ki a rātou, ‘Kāhore rawa ahau i mōhio ki a koutou; mawehe atu i ahau, e ngā kaimahi i te tutū.’ ”
MAT 7:24 “Nā, ko te tangata e rongo ana ki ēnei kupu āku, e mahi ana hoki, ka whakaritea e ahau ki te tangata mahara, i hanga i tōna whare ki runga ki te kāmaka.
MAT 7:25 Ā, ka ua te ua, ka puta ngā waipuke, ka pupuhi ngā hau, te tino ākinga ki taua whare, kīhai hoki i hinga, nō te mea i hangā ki runga ki te kāmaka.
MAT 7:26 “Ā, ko te tangata e rongo ana ki ēnei kupu āku, ā, kāhore e mahi, ka whakaritea ki te tangata whakaarokore i hanga i tōna whare ki runga ki te onepū.
MAT 7:27 Nā, ka ua te ua, ka puta ngā waipuke, ka pupuhi ngā hau, ā, pā ana ki taua whare, nā, kua hinga. He rahi anō tōna hinganga!”
MAT 7:28 Ā, nō ka mutu ēnei kōrero a Īhu, ka mīharo te whakaminenga ki tāna ako.
MAT 7:29 I rite hoki tāna ako i a rātou ki tā te tangata whai mana, kīhai hoki i rite ki tā ngā karaipi.
MAT 8:1 Ā, nō ka heke iho ia i te maunga, he rahi te hui i aru i a ia.
MAT 8:2 Nā, ka haere tētahi repera, ka koropiko ki a ia, ka mea, “E te Ariki, ki te pai koe, e taea ahau e koe te mea kia mā.”
MAT 8:3 Ā, ka totoro te ringa o Īhu, ka pā ki a ia, ka mea, “E pai ana ahau; kia mā koe!” Ā, mā tonu iho tōna repera.
MAT 8:4 Kātahi, ka mea a Īhu ki a ia, “Kia mahara, kei kōrerotia ki te tangata; erangi haere, kia kite te tohunga i a koe, mauria atu hoki te whakahere i whakaritea e Mohi, hei mea whakaatu ki a rātou.”
MAT 8:5 Ā, nō ka tae a Īhu ki Kaperenauma, ka haere ki a ia tētahi keneturio, ka īnoi ki a ia,
MAT 8:6 ka mea, “E te Ariki, ko tāku pononga kei te whare e takoto ana, he pararūtiki, e ngaua kinotia ana.”
MAT 8:7 Ā, ka mea a Īhu ki a ia, “Ka haere ahau ki te whakaora i a ia.”
MAT 8:8 Nā, ko te whakahokinga a te keneturio, ko te meatanga, “E te Ariki, ehara ahau i te tikanga tangata e haere ake ai koe ki raro i tōku tuanui; engari, kia puaki kau tāu kupu, ā, ka ora tāku pononga.
MAT 8:9 He tangata hoki ahau e whakahaua ana, he hōia anō āku hei whakahaunga māku; ka mea ahau ki tēnei, ‘Haere,’ nā, ka haere ia; ki tētahi, ‘Haere mai,’ ā, ka haere mai; ki tāku pononga hoki, ‘Meatia tēnei,’ ā, ka meatia e ia.”
MAT 8:10 Ā, nō te rongonga o Īhu, ka mīharo, ka mea ki te hunga e aru ana, “He pono tāku e mea nei ki a koutou, Kāhore ahau i kite noa i te whakapono hei rite mō tēnei te nui i roto i a Īharaira.
MAT 8:11 Ko tāku kupu anō tēnei ki a koutou, he tokomaha e haere mai i te rāwhiti, i te hauāuru, ā, e noho tahi i a Āperahama, i a Īhaka, i a Hākopa, ki te rangatiratanga o te rangi.
MAT 8:12 Ko ngā tamariki ia o te rangatiratanga ka makā ki te pōuri i waho; ko te wāhi tērā o te tangi, o te tetēā o ngā niho.”
MAT 8:13 Nā, ka mea a Īhu ki te keneturio, “Haere, kia rite ki tōu whakapono te meatanga ki a koe.” Ā, ora ake ana taua pononga i taua wā pū anō.
MAT 8:14 Ā, nō ka tae a Īhu ki te whare o Pita, ka kite ia i tōna hungawai wahine e takoto mate ana, he kirikā.
MAT 8:15 Nā, ka pā ia ki tōna ringaringa, ā, mutu ake tōna kirikā; ā, ara ake ana ia ki te taka mea mā rātou.
MAT 8:16 Nā, i te ahiahi he tokomaha te hunga e nohoia ana e ngā rēwera i mauria mai ki a ia; nā, ka peia e tāna kupu ngā wairua ki waho, ā, whakaorangia ake e ia te hunga mate katoa.
MAT 8:17 I rite ai tā Ihāia poropiti i kōrero ai, i mea ai, “Nāna i tango ō tātou ngoikore, i waha ō tātou mate.”
MAT 8:18 Nā, i te kitenga o Īhu he rahi te hui e mui ana ki a ia, ka whakahau ia kia whakawhiti ki tāwāhi.
MAT 8:19 Ā, ka haere tētahi karaipi, ka mea ki a ia, “E te Kaiwhakaako, ka aru ahau i a koe ki ngā wāhi katoa e haere ai koe.”
MAT 8:20 Ā, ka mea a Īhu ki a ia, “He rua o ngā pokiha, he kōwhanga o ngā manu o te rangi; tēnā ko te Tama a te tangata, kāhore ōna wāhi e takoto ai tōna mātenga.”
MAT 8:21 Ā, i mea tētahi atu o āna ākonga ki a ia, “E te Ariki tukua ahau kia mātua haere ki te tanu i tōku pāpā.”
MAT 8:22 Nā, ka mea a Īhu ki a ia, “Arumia ahau, ā, waiho mā ngā tūpāpaku e tanu ō rātou tūpāpaku.”
MAT 8:23 Ā, nō ka eke ia ki te kaipuke, ka aru āna ākonga i a ia.
MAT 8:24 Nā, ka tutū te puehu o te moana, ā, ngaro iho te kaipuke i te ngaru; i te moe hoki ia.
MAT 8:25 Ā, ka haere āna ākonga, ka whakaara i a ia, ka mea, “E te Ariki, whakaorangia tātou! Ka ngaro tātou.”
MAT 8:26 Ā, ka mea ia ki a rātou, “He aha tā koutou e wehi, e te hunga whakapono iti?” Me i reira ka ara ia, ā, rīria iho te hau me te moana; ā, takoto ana he marino nui.
MAT 8:27 Ā, mīharo noa ngā tāngata, ka mea, “He tangata aha tēnei? Inā, rongo rawa te hau me te moana ki a ia!”
MAT 8:28 Ā, nō ka whiti ia ki tarawāhi, ki te whenua o ngā Kerekehini, ka tūtaki ki a ia ētahi tāngata tokorua e nohoia ana e te rēwera, e puta ana mai i roto i ngā urupā, he hunga tutū rawa, tē taea taua ara te haere e te tangata.
MAT 8:29 Nā, ka karanga ake rāua, ka mea, “He aha māua nāu, e Īhu, e te Tama a te Atua? Kua tae mai oti koe ki te whakamamae i a māua i te mea kāhore anō i rite te tāima?”
MAT 8:30 Nā, tērā tētahi kāhui poaka i tawhiti atu i a rātou e kai ana, he tini.
MAT 8:31 Ā, ka īnoi ngā rēwera ki a ia, ka mea, “Ki te pei koe i a mātou, tukua mātou kia haere ki roto ki te kāhui poaka.”
MAT 8:32 Nā, ka mea ia ki a rātou, “Haere!” Nā, ko tō rātou putanga ki waho, haere ana ki roto ki te kāhui poaka; nā, ko te tino rerenga o te kāhui poaka katoa rā te pari ki te moana, ā, mate iho ki roto ki te wai.
MAT 8:33 Nā, ka whati ngā kaiwhāngai, ā, haere ana ki te pā, kōrero ana i ngā mea katoa, me te meatanga ki te hunga i nohoia e ngā rēwera.
MAT 8:34 Nā, puta katoa ana te pā ki waho, ki te whakatau i a Īhu; ā, ka kite i a ia, ka tohe kia haere atu ia i ō rātou wāhi.
MAT 9:1 Nā, ka eke ia ki te kaipuke, ka whiti ki tāwāhi, ka haere ki tōna pā.
MAT 9:2 Nā, ka kawea mai e rātou ki a ia tētahi pararūtiki, e takoto ana i runga i te moenga; nō te kitenga o Īhu i tō rātou whakapono ka mea ia ki te pararūtiki, “E tama, kia māia; ka oti ōu hara te muru.”
MAT 9:3 Nā, ka mea ētahi o ngā karaipi ki a rātou anō, “E kohukohu ana tēnei tangata!”
MAT 9:4 Ā, ka kite a Īhu i ō rātou whakaaro, ka mea ia, “He aha i kino ai ngā whakaaro o roto o ō koutou ngākau?
MAT 9:5 Ko tēhea oti te mea takoto noa, ko te mea, ‘Ka oti ōu hara te muru,’ ko te mea rānei, ‘Whakatika, haere’?
MAT 9:6 Otirā, kia mātau ai koutou he mana muru hara tō te Tama a te tangata i runga i te whenua.” Kātahi, ia ka mea ki te pararūtiki, “Whakatika, tangohia ake tōu moenga, ā, haere ki tōu whare.”
MAT 9:7 Nā, whakatika ana ia, haere ana ki tōna whare.
MAT 9:8 Nō te kitenga ia o te hui, ka wehi, ka whakakorōria i te Atua, i hōmai ai tēnei mana ki ngā tāngata.
MAT 9:9 Ā, i a Īhu e haere ana i reira, ka kite ia i tētahi tangata, ko Matiu te ingoa, e noho ana i te wāhi tango takoha; ā, ka mea ki a ia, “Arumia ahau.” Nā, whakatika ana ia, aru ana i a ia.
MAT 9:10 Ā, i a ia e noho ana ki te kai i roto i te whare, nā, he tokomaha ngā pupirikana me ngā tāngata hara i haere mai, i noho tahi ki a Īhu rātou ko āna ākonga.
MAT 9:11 Ā, nō te kitenga o ngā Parihi, ka mea ki āna ākonga, “He aha tō koutou Kaiwhakaako ka kai tahi ai me ngā pupirikana, me ngā tāngata hara?”
MAT 9:12 Otirā, ka rongo a Īhu, ka mea ki a rātou, “Kāhore he aha o ngā tāngata ora e meatia ai e te rata, engari, o te hunga e mate ana.
MAT 9:13 Nā, haere, ākona te tikanga o tēnei, ‘Ko tāku e pai ai ko te tohu tangata, hāunga te patunga tapu.’ Kīhai hoki ahau i haere mai ki te karanga i te hunga tika, engari i te hunga hara, kia rīpenetā.”
MAT 9:14 Me i reira ka haere mai ki a ia ngā ākonga a Hoani, ka mea, “He aha i maha ai o mātou ko ngā Parihi nohoanga pukutanga, ā, kāhore āu ākonga e nohopuku?”
MAT 9:15 Nā, ka mea a Īhu ki a rātou, “E āhei rānei ngā tamariki o te whare mārena te tangi, i te mea kei a rātou te tāne mārena hou? Nā, tērā e tae mai ngā rā, e tangohia ai te tāne mārena hou i a rātou, ā, ko reira nohopuku ai rātou.
MAT 9:16 “E kore e meatia e te tangata tētahi wāhi o te kahu hou hei pāpaki mō te kahu tawhito, nō te mea ka riro tētahi wāhi o taua kākahu i te whakakapi, ā, ka nui rawa te pakaru.
MAT 9:17 E kore e ringihia te wāina hou ki ngā ipu tawhito; kei pakaru ngā ipu, ā, ka maringi te wāina, kore ake ngā ipu; erangi, e ringihia ana te wāina hou ki ngā ipu hou, ā, ka ora taua rua.”
MAT 9:18 I a ia e kōrero ana i ēnei mea ki a rātou, nā, ka haere mai tētahi rangatira, ka koropiko ki a ia, ka mea, “Tēnei kua marere tāku tamāhine; otirā, māu e haere ake, e whakapā tōu ringa ki a ia, ā, ka ora.”
MAT 9:19 Nā, ka whakatika a Īhu rātou ko āna ākonga, ā, aru ana i a ia.
MAT 9:20 Nā, ko te haerenga ki muri i a ia o tētahi wahine, tekau mā rua ngā tau i mate ai i te pākaruhanga toto, ā, ka pā ki te tāniko o tōna kākahu;
MAT 9:21 i mea hoki i roto i a ia, “Kia pā kau oti ahau ki tōna kākahu, ka ora ahau.”
MAT 9:22 Nā, ka tahuri a Īhu, ā, ka kite i a ia, ka mea, “Kia māia, e kō! Nā tōu whakapono koe i ora ai.” Ā, ora ake te wahine i taua wā anō.
MAT 9:23 Nā, i te taenga o Īhu ki te whare o te rangatira, ka kite i ngā kaiwhakatangi pūtōrino, i te huihui hoki e ngangau ana,
MAT 9:24 ka mea ia ki a rātou, “Whakaatea! Kāhore hoki i mate te kōtiro, erangi e moe ana.” Ā, kataina iho ia e rātou.
MAT 9:25 Heoi, ka oti te huihui te pei ki waho, ka tomo ia ki roto, ka mau ki tōna ringa, ā, ara ake ana te kōtiro.
MAT 9:26 Ā, pakū ana tēnei rongo puta noa i taua whenua.
MAT 9:27 Ā, i a Īhu e haere atu ana i reira, tokorua ngā matapō i aru i a ia, ka karanga ake, ka mea, “E te Tama a Rāwiri, kia aroha ki a māua!”
MAT 9:28 Ā, ka tapoko ia ki te whare, ka haere atu ngā matapō ki a ia; nā, ka mea a Īhu ki a rāua, “E whakapono ana rānei kōrua e taea tēnei e ahau?” Ka mea rāua ki a ia, “Āe, e te Ariki.”
MAT 9:29 Me i reira ka pā ia ki ō rāua kanohi, ka mea, “Kia rite ki tō kōrua whakapono te meatanga ki a kōrua.”
MAT 9:30 Nā, kua kite ō rāua kanohi; kātahi ka whakatūpato a Īhu i a rāua ka mea, “Kia mahara kei rangona e te tangata.”
MAT 9:31 Ko rāua ia i puta atu ki waho, ā, kōrerotia nuitia ana ia puta noa i taua whenua.
MAT 9:32 I a rāua e puta ana ki waho, ka kawea mai ki a ia tētahi tangata wahangū, he rēwera tōna.
MAT 9:33 Ā, ka oti te rēwera te pei, ka whai reo te wahangū; ā, mīharo ana te mano, ka mea, “Kāhore anō i kitea te pēnei i roto i a Īharaira.”
MAT 9:34 Otirā, ka mea ngā Parihi, “Nā te rangatira o ngā rēwera tāna peinga rēwera.”
MAT 9:35 Nā, ka hāereerea e Īhu ngā pā katoa me ngā kāinga, ā, ka ako i roto i ō rātou whare karakia, ka kauwhau i te rongopai o te rangatiratanga, me te whakaora i te tini o ngā mate, i te tini o ngā tūrorotanga o te iwi.
MAT 9:36 Ā, nō tōna kitenga i ngā mano, ka toko ake tōna ngākau aroha ki a rātou, e māuiui ana hoki rātou, e marara kē ana, me he hipi hēparakore.
MAT 9:37 Kātahi, ia ka mea ki āna ākonga, “He nui te kotinga, ko ngā kaimahi ia he ruarua.
MAT 9:38 Nā, īnoi atu ki te Ariki nāna te kotinga, kia tonoa e ia he kaimahi ki tāna kotinga.”
MAT 10:1 Ā, ka oti te karanga e ia āna ākonga i tekau mā rua, ka hoatu ki a rātou he mana hei pei i ngā wairua poke, hei whakaora hoki i ngā mate katoa me ngā tūrorotanga katoa.
MAT 10:2 Nā, ko ngā ingoa ēnei o ngā āpōtoro kotahi tekau mā rua; te tuatahi ko Haimona, e kīia nei ko Pita, rāua ko tōna teina ko Anaru; ko Hēmi tama a Heperi rāua ko tōna teina ko Hoani;
MAT 10:3 ko Piripi rāua ko Patoromu; ko Tamati rāua ko Matiu pupirikana; ko Hēmi tama a Arapiu, ko Tariu;
MAT 10:4 ko Haimona Kanaani rāua ko Hūrā Ikariote, nāna nei ia i tuku.
MAT 10:5 Ko tēnei tekau mā rua i tonoa e Īhu, i ako ia i a rātou, i mea: “Kaua e haere ki tētahi ara o ngā tauiwi, kaua anō hoki e tomo ki tētahi pā o ngā Hamari;
MAT 10:6 engari, me haere ki ngā hipi ngaro o te whare o Īharaira.
MAT 10:7 Me kauwhau haere hoki, me kī, ‘Kua tata te rangatiratanga o te rangi.’
MAT 10:8 Whakaorangia ngā tūroro, meinga kia mā ngā repera, whakaarahia ngā tūpāpaku, peia ngā rēwera; ka riro noa nei i a koutou, me hoatu noa e koutou.
MAT 10:9 Kaua he kōura mā koutou, kaua he hiriwa, kaua he parāhi ki roto ki ō koutou whītiki;
MAT 10:10 kaua anō he pūtea mō te ara; kaua e takiruatia ngā koti, kaua he hū, kaua anō he tokotoko. Ka ea hoki i te kaimahi tāna kai.
MAT 10:11 “Ā, ka tomo koutou ki tētahi pā, ki tētahi kāinga rānei, ui atu, ko wai te tangata pai o reira; ā, hei reira noho ai, ā, haere noa.
MAT 10:12 Ā, nō ka tomo ki tētahi whare, me oha atu.
MAT 10:13 Ā, ki te pai te whare, kia tau tā koutou rangimārie ki reira; ā, ki te kāhore e pai, kia hoki tā koutou rangimārie ki a koutou.
MAT 10:14 Ki te kāhore hoki tētahi e manako ki a koutou, ki te kore e whakarongo ki ā koutou kupu, ka haere koutou ki waho o taua whare, o taua pā rānei, ka whakangahoro i te puehu o ō koutou waewae.
MAT 10:15 He pono tāku e mea nei ki a koutou, erangi tō te whenua o Horoma rāua ko Komora ā te rā whakawā e māmā i tō taua pā.”
MAT 10:16 “Nanā, ka tonoa nei koutou e ahau ānō he hipi ki roto ki ngā wuruhi. Nā, kia rite ki te nākahi te mahara, ki te kūkupa hoki te māhaki.
MAT 10:17 Kia tūpato ia i ngā tāngata; tērā hoki koutou e tukua e rātou ki ngā rūnanga, ā, tērā koutou e whiua i roto i ō rātou whare karakia.
MAT 10:18 Ā, ka kawea koutou ki ngā kāwana, ki ngā kīngi, mō te whakaaro ki ahau, hei mea whakaatu ki a rātou, ki ngā tauiwi hoki.
MAT 10:19 Ā, nō ka tukua koutou e rātou, kaua e mānukanuka ki te pēhea, ki te aha, e kōrero ai koutou; ka hoatu ki a koutou i taua wā tā koutou e kōrero ai.
MAT 10:20 Ehara hoki i a koutou ngā kōrero, engari, ko te Wairua o tō koutou Matua te kōrero ana i roto i a koutou.
MAT 10:21 “Nā, ka tukua te tuakana e te teina ki te mate, te tama hoki e te pāpā; ka whakatika ngā tamariki ki ngā mātua, ka mea kia whakamatea;
MAT 10:22 ā, ka kinongia koutou e ngā tāngata katoa, he mea hoki mō tōku ingoa; ko te tangata ia e ū ana ā taea noatia te mutunga, ka ora ia.
MAT 10:23 Nā, ki te whakatoia koutou i tēnei pā, rere atu ki tētahi; he pono hoki tāku e mea nei ki a koutou, e kore e poto i a koutou ngā pā o Īharaira te haere, ko te Tama a te tangata kua tae mai.
MAT 10:24 “Kāhore e nui ake te ākonga i tōna kaiwhakaako, kāhore hoki te pononga e nui ake i tōna rangatira.
MAT 10:25 Heoi, mā te ākonga ko ia kia rite ki tōna kaiwhakaako, mā te pononga kia rite ki tōna rangatira. Ki te kīia e rātou te rangatira o te whare ko Perehepura, tērā noa ake tā rātou mō ngā tāngata o tōna whare.”
MAT 10:26 “Nā, kaua e wehi i a rātou; kāhore hoki he mea i hīpokina e mahue te hura, he mea rānei i huna e mahue te mōhio.
MAT 10:27 Ko tāku e kōrero nei ki a koutou i te pōuri, me kōrero e koutou i te mārama; ko tā ō koutou taringa e rongo ai, me kauwhau ki runga i ngā whare.
MAT 10:28 Ā, kaua e wehi i te hunga e whakamate nei i te tinana, ā, e kore nei e āhei te whakamate i te wairua; engari ia ko tā koutou e wehi ai, ko ia e kaha nei ki te whakangaro i te wairua rāua tahi ko te tinana ki roto ki Kehena.
MAT 10:29 Kāhore ianei e hokona ngā pīhoihoi e rua ki te pātene kotahi? Ā, ki te kāhore tō koutou Matua e mea, e kore tētahi o rāua e taka ki te whenua.
MAT 10:30 Otiia, ko ngā makawe o ō koutou mātenga kua oti katoa te tatau.
MAT 10:31 Nō reira, kaua e wehi; erangi rā koutou i ngā pīhoihoi maha.”
MAT 10:32 “Nā, ki te whakaae tētahi ki ahau i te aroaro o ngā tāngata, ka whakaaetia ia e ahau i te aroaro o tōku Matua i te rangi.
MAT 10:33 Ā, ki te whakakāhore tētahi i ahau i te aroaro o ngā tāngata, ka whakakāhoretia hoki ia e ahau i te aroaro o tōku Matua i te rangi.”
MAT 10:34 “Kei mea i haere mai ahau ki te kawe mai i te rangimārie ki te whenua; kīhai ahau i haere mai ki te kawe mai i te rangimārie, engari i te hoari.
MAT 10:35 I haere mai hoki ahau ki te mea i te tangata kia whawhai ki tōna pāpā, i te tamāhine ki tōna whaea, i te hunaonga wahine ki tōna hungawai wahine;
MAT 10:36 ā, ko ō te tangata hoariri ko ngā tāngata anō o tōna whare.
MAT 10:37 “Ki te nui ake te aroha o tētahi ki tōna pāpā, whaea rānei, i tōna ki ahau, e kore ia e tikangatia māku; ki te nui ake hoki te aroha o tētahi ki tāna tama, tamāhine rānei, i tōna ki ahau, e kore ia e tikangatia māku.
MAT 10:38 Ki te kore hoki tētahi e mau ki tōna rīpeka, e aru i muri i ahau, e kore ia e tikangatia māku.
MAT 10:39 Ko te tangata i whiwhi ki te ora e mate anō ia, ā, ki te mate tētahi mōna i whakaaro ki ahau, ka whiwhi anō ia ki te ora.”
MAT 10:40 “Ki te manako tētahi ki a koutou, e manako ana ia ki ahau, ā, ki te manako tētahi ki ahau, e manako ana ia ki tōku kaitono mai.
MAT 10:41 Ki te manako tētahi ki te poropiti i runga i te ingoa o te poropiti, ka riro i a ia te utu o te poropiti; ā, ki te manako tētahi ki te tangata tika i runga i te ingoa o te tangata tika, e riro i a ia te utu o te tangata tika.
MAT 10:42 Ā, ki te whakainumia e tētahi, tētahi o ēnei mea nonohi, ahakoa kotahi anō te kapu wai mātao, i runga i te ingoa o te ākonga, he pono tāku e mea nei ki a koutou, e kore rawa ia e hapa i tōna utu.”
MAT 11:1 Ā, ka mutu tā Īhu whakarite kōrero ki āna ākonga kotahi tekau mā rua, ka haere atu ia i reira ki te whakaako, ki te kauwhau ki ō rātou pā.
MAT 11:2 Nā, i te rongonga o Hoani i roto i te whare herehere ki ngā mahi a te Karaiti, ka tonoa e ia ētahi o āna ākonga,
MAT 11:3 ka mea ki a ia, “Ko koe rānei tēnei e haere mai nei, me tatari rānei tātou ki tētahi atu?”
MAT 11:4 Nā, ka whakahoki a Īhu, ka mea ki a rāua, “Haere, kōrerotia ki a Hoani ngā mea e rongo nei, e kite nei kōrua:
MAT 11:5 ko ngā matapō e titiro ana, ko ngā kopa e hāereere ana, ko ngā repera e meinga ana kia mā, ko ngā turi e rongo ana, ko ngā tūpāpaku e whakaarahia ana, ā, e kauwhautia ana te rongopai ki te hunga rawakore.
MAT 11:6 Ā, ka koa te tangata e kore e hē ki ahau.”
MAT 11:7 Ā, i a rāua e haere atu ana, ka tīmata a Īhu, ka kōrerotia a Hoani ki te mano: “I haere koutou ki te koraha kia kite i te aha? I te kākaho e whakangāueuetia ana e te hau?
MAT 11:8 Anō rā, i haere koutou kia kite i te aha? I te tangata he kākahu māeneene ōna? Nā, kei ngā whare kīngi te hunga i ngā kākahu māeneene.
MAT 11:9 Anō rā, i haere koutou kia kite i te aha? I te poropiti? Āe rā, ko tāku kupu tēnei ki a koutou, tērā atu anō i te poropiti.
MAT 11:10 Ko ia hoki tēnei mōna te mea i tuhituhia: ‘Nā, ka tonoa e ahau tāku karere ki mua i tōu aroaro, māna e whakapai tōu ara ki mua i a koe.’
MAT 11:11 He pono tāku e mea nei ki a koutou, kāhore anō i maea ake i roto i ngā whānau a te wahine he rahi ake i a Hoani Kaiiriiri; heoi, rahi ake i a ia te iti rawa i te rangatiratanga o te rangi.
MAT 11:12 Ā, nō ngā rā mai anō i a Hoani Kaiiriiri ā mohoa noa nei e tūkinotia ana te rangatiratanga o te rangi, ā, e riro ana ia i te ringa kaha o ngā tāngata taikaha.
MAT 11:13 Nō te mea i poropiti ngā poropiti katoa me te ture ā taea noatia a Hoani.
MAT 11:14 Ā, ki te pai koutou koia rā, ko Irāia tēnei, i meinga rā e haere mai ana.
MAT 11:15 Ki te whai taringa tētahi hei whakarongo, kia rongo ia!
MAT 11:16 “Otiia, me whakarite e ahau tēnei whakatupuranga ki te aha? E rite ana ki ngā tamariki e noho ana i ngā wāhi hokohoko, e karanga ana ki ō rātou hoa,
MAT 11:17 e mea ana, ‘Whakatangi noa mātou i te pūtōrino ki a koutou, ā, kāhore koutou i kanikani mai. Auē noa mātou ki a koutou, ā, kāhore koutou i tangi mai.’
MAT 11:18 I haere mai hoki a Hoani, kīhai i kai, kīhai i inu, heoi e mea ana rātou, ‘He rēwera tōna.’
MAT 11:19 I haere mai te Tama a te tangata me te kai me te inu, ka mea rātou, ‘Nā, he tangata kakai, he tangata inu wāina, he hoa nō ngā pupirikana, nō ngā tāngata hara!’ Otirā, mā āna mahi e whakatika te whakaaro nui.”
MAT 11:20 Kātahi ia ka anga, ka tāwai ki ngā pā i meinga ai te maha o āna merekara, mō rātou kīhai i rīpenetā.
MAT 11:21 “Auē te mate mōu, e Korahina! Auē, te mate mōu, e Petahaira! Me i meatia ki Tāira, ki Hairona ngā merekara kua meatia nei ki a kōrua, kua rīpenetā kē rāua, he taratara te kākahu me te oke i te pungarehu.
MAT 11:22 Ko tāku kupu ia tēnei ki a koutou, Erangi, tō Tāira rāua ko Hairona e māmā i te rā whakawā i tō kōrua.
MAT 11:23 Me koe hoki, e Kaperenauma, e whakateiteitia rānei koe ā tae noa ki te rangi? Ka heke koe ki te rēinga. Me i meatia hoki ki Horoma ngā merekara kua meatia nei ki a koe, kua tū tonu tērā, ā taea noatia tēnei rā.
MAT 11:24 Ko tāku kupu ia tēnei ki a koutou, Erangi, tō te whenua o Horoma e māmā i tōu i te rā whakawā.”
MAT 11:25 I taua wā ka oho a Īhu, ka mea “He whakawhetai atu tāku ki a koe, e Pā, e te Ariki o te rangi o te whenua, nō te mea kua hunā e koe ēnei mea i te hunga mātau, i te hunga mahara, ā, hurahia ana ki ngā kōhungahunga.
MAT 11:26 Āe rā, e Pā, i pai hoki te pēnei ki tāu titiro.
MAT 11:27 “Kua tukua mai ngā mea katoa ki ahau e tōku Matua. Ā, kāhore tētahi e mātau ki te Tama, ko te Matua anake; kāhore hoki tētahi e mātau ki te Matua, ko te Tama anake, me te tangata hoki e pai ai te Tama kia whakakitea ki a ia.
MAT 11:28 “Haere mai ki ahau, e koutou katoa e māuiui ana, e taimaha ana, ā, māku koutou e whakaokioki.
MAT 11:29 Tangohia tāku ioka ki runga ki a koutou, kia whakaakona koutou e ahau; he ngākau māhaki hoki tōku, he ngākau pāpaku; ā, e whiwhi koutou ki te okiokinga mō ō koutou wairua.
MAT 11:30 He ngāwari hoki tāku ioka, he māmā tāku pīkaunga.”
MAT 12:1 I taua wā i haere a Īhu i te hāpati rā waenga wīti; ā, e hiakai ana āna ākonga, nā, ka anga rātou, ka kato i ngā wīti, ka kai.
MAT 12:2 Ā, nō te kitenga o ngā Parihi, ka mea ki a ia, “Nā, āu ākonga e mea nā i te mea e kore e tika kia meinga i te hāpati.”
MAT 12:3 Ka mea ia ki a rātou, “Kāhore koutou i kite i tā Rāwiri i mea ai, i a ia e hiakai ana, rātou ko ōna hoa?
MAT 12:4 I tōna tomokanga ki te whare o te Atua, i tāna kainga i ngā taro aroaro, i ngā mea kīhai nei i tika kia kainga e ia, e ōna hoa rānei, engari, mā ngā tohunga anake?
MAT 12:5 Kāhore anō koutou i kite i roto i te ture, e whakanoatia ana te hāpati e ngā tohunga i roto i te temepara i ngā hāpati, ā, kāhore he hē?
MAT 12:6 Ko tāku kupu ia tēnei ki a koutou, kei konei tētahi, he rahi kē i te temepara.
MAT 12:7 Otiia, me i mātau koutou ki tēnei, ‘Ko tāku e pai ai ko te tohu tangata, hāunga te patunga tapu.’ Kāhore koutou i whakahē i te hunga harakore;
MAT 12:8 ko te Tama nei hoki a te tangata te Ariki o te hāpati.”
MAT 12:9 Nā, ka haere atu ia i reira, ka tomo ki tō rātou whare karakia;
MAT 12:10 nā, he tangata tērā kua memenge te ringa. Ā, ka ui rātou ki a ia, “He tika rānei te whakaora i te hāpati?” He mea hoki kia whakapāngia ai e rātou he hē ki a ia.
MAT 12:11 Nā, ka mea ia ki a rātou, “Ko tēhea tangata o koutou, ki te mea kotahi āna hipi, ā, ka taka ki roto ki te poka i te hāpati, e kore rānei ia e mau ki taua hipi, e hāpai ake?
MAT 12:12 Nā, tērā noa atu tō te tangata pai i tō te hipi. Inā, he tika anō te mahi pai i ngā hāpati.”
MAT 12:13 Me i reira ka mea ia ki taua tangata, “Totoro mai tōu ringa.” Ā, nō te toronga, kua ora anō, kua pērā me tētahi.
MAT 12:14 Nā, ka haere ngā Parihi ki waho, ka rūnanga mōna me pēhea e ngaro ai ia i a rātou.
MAT 12:15 Otirā, i mātau a Īhu, ā, haere atu ana i reira; ā, he rahi te hui i aru i a ia, ā, whakaorangia ana rātou katoa e ia;
MAT 12:16 ā, i whakatūpato anō ia i a rātou kei whakakitea ia.
MAT 12:17 Nā, ka rite tā Ihāia poropiti i kōrero ai, i mea ai:
MAT 12:18 “Nā, tāku pononga, tāku i whiriwhiri ai, tāku i aroha ai, tā tōku Wairua i āhuareka ai. Ka waiho e ahau tōku Wairua ki runga ki a ia, ā, māna e whakapuaki te whakawā ki ngā tauiwi.
MAT 12:19 E kore ia e totohe, e kore ia e hāmama, e kore anō e rangona tōna reo i ngā ara.
MAT 12:20 E kore e whatia porokeretia e ia te kākaho i mangungu, e kore e tineia te muka e whakapaoa ana. Kia puta rā anō i a ia te whakawā ki te wikitōria,
MAT 12:21 ka tūmanako hoki ngā tauiwi ki tōna ingoa.”
MAT 12:22 Me i reira ka kawea mai ki a ia he tangata e nohoia ana e te rēwera, he matapō, he wahangū; ā, whakaorangia ana e ia, nō ka kōrero, ka kite taua matapō, taua wahangū.
MAT 12:23 Ā, ka ohomauri te mano katoa, ka mea, “Ehara ianei tēnei i te Tama a Rāwiri?”
MAT 12:24 Ā, nō te rongonga o ngā Parihi, ka mea, “Ehara i a ia nāna i pei ngā rēwera nei, engari, nā Perehepura, nā te rangatira o ngā rēwera.”
MAT 12:25 Ā, i mātau a Īhu ki ō rātou whakaaro, ka mea ki a rātou, “Ki te tahuri iho tētahi rangatiratanga ki a ia anō, ka kore; ki te tahuri iho hoki ki a ia anō tētahi pā, tētahi whare rānei, e kore e tū.
MAT 12:26 Nā, ki te pei a Hātana i a Hātana anō, e tahuri iho ana ki a ia anō; me pēhea e tū ai tōna rangatiratanga?
MAT 12:27 Ā, ki te mea nā Perehepura tāku peinga rēwera, nā wai te peinga a ā koutou tamariki? Nā, ko rātou hei kaiwhakawā mō koutou.
MAT 12:28 Tēnā, ki te mea nā te Wairua o te Atua tāku peinga rēwera, inā, kua tae noa mai te rangatiratanga o te Atua ki a koutou.
MAT 12:29 “Me pēhea oti ka tomo ai te tangata ki te whare o te tangata kaha, ka pāhua ai i ōna taonga, ki te kore ia e mātua here i taua tangata kaha? Ko reira pāhua ai i tōna whare.
MAT 12:30 “Ko te tangata ehara i te hoa nōku, he hoariri ia ki ahau; ko te tangata kāhore e kohikohi tahi māua, e tītaritari ana.
MAT 12:31 Koia ahau ka mea nei ki a koutou, ko ngā hara katoa me ngā kohukohu a te tangata e murua; tēnā ko te kohukohu ki te Wairua Tapu e kore e murua.
MAT 12:32 Ki te kōrero whakahē hoki tētahi mō te Tama a te tangata, e murua tāna; tēnā ki te kōrero whakahē tētahi mō te Wairua Tapu, e kore e murua tāna i tēnei ao, e kore anō i tērā atu.”
MAT 12:33 “Meinga rānei te rākau kia pai, ā, pai iho ōna hua; meinga rānei te rākau kia kino, ā, kino iho ōna hua; mā ngā hua hoki ka mōhiotia ai te rākau.
MAT 12:34 E te uri nākahi, me pēhea ka kōrero pai ai koutou, te hunga kino? He pūrenatanga hoki nō te ngākau ngā kupu a te māngai.
MAT 12:35 Ko te tangata pai he pai ana e whakaputa ai i roto i ngā taonga pai o te ngākau; ko te tangata kino hoki he kino ana e whakaputa ai i roto i ngā taonga kino.
MAT 12:36 “Nā, ko tāku kupu tēnei ki a koutou, me kōrero e ngā tāngata, i te rā whakawā, te tikanga o ngā kupu pokanoa katoa e puaki i a rātou.
MAT 12:37 Mā āu kupu hoki koe ka whakatikaia ai, mā āu kupu anō ka tau ai te hē ki a koe.”
MAT 12:38 Me i reira ka kī ētahi o ngā karaipi, o ngā Parihi, ka mea, “E te Kaiwhakaako, e mea ana mātou kia kite i tētahi tohu i a koe.”
MAT 12:39 Nā, ka whakahoki ia, ka mea ki a rātou, “E rapu ana te whakatupuranga kino, pūremu, i tētahi tohu; ā, e kore tētahi tohu e hoatu, ko te tohu anake o Hona poropiti.
MAT 12:40 E toru hoki ngā rā o Hona, e toru ngā pō, i roto i te kōpū o te tohorā; waihoki ka toru ngā rā, ka toru ngā pō o te Tama a te tangata ki te manawa o te whenua.
MAT 12:41 E ara ngā tāngata o Ninewe me tēnei whakatupuranga i te whakawākanga, e whakatau i te hē ki a rātou; i rīpenetā hoki rātou i te kauwhau a Hona; ā, tēnei tētahi he nui kē i a Hona.
MAT 12:42 E ara te kuīni o te tonga me tēnei whakatupuranga i te whakawākanga, e whakatau i te hē ki a rātou; i haere mai hoki ia i ngā pito o te whenua ki te whakarongo ki ngā whakaaro nui o Horomona; ā, tēnei tētahi he nui kē i a Horomona.”
MAT 12:43 “Ka puta mai te wairua poke i roto i te tangata, ka hāereere rā ngā wāhi maroke rapu okiokinga ai, ā, tē kitea,
MAT 12:44 ka mea ia, ‘Ka hoki ahau ki tōku whare i puta mai ai ahau.’ Ā, nō te taenga atu, rokohanga atu e takoto kau ana, oti rawa te tahi, te whakapai.
MAT 12:45 Nā, ka haere ia, ka tango i ētahi atu wairua tokowhitu hei hoa mōna, he kino noa atu i a ia, ka tomo rātou, ka noho ki reira; ā, kino atu i te tīmatanga te whakamutunga ki taua tangata. Tērā anō e pērā tēnei whakatupuranga kino.”
MAT 12:46 I a ia anō e kōrero ana ki te mano, nā, ko tōna whaea rātou ko ōna tēina e tū ana i waho, e whai ana kia kōrero ki a ia.
MAT 12:47 Ā, ka mea tētahi ki a ia, “Nā, tōu whaea me ōu tēina te tū mai nei i waho, e whai ana kia kōrero ki a koe.”
MAT 12:48 Nā, ka whakahoki ia, ka mea ki te tangata i kōrero ki a ia, “Ko wai tōku whaea? Ko wai hoki ōku tēina?”
MAT 12:49 Nā, ka totoro tōna ringa ki āna ākonga, ka mea, “Nā, tōku whaea, ōku tēina!
MAT 12:50 Ki te meatia hoki e tētahi tā tōku Matua i te rangi e pai ai, hei teina ia ki ahau, hei tuahine, hei whaea.”
MAT 13:1 I taua rā i haere atu a Īhu i te whare, ka noho ki te taha o te moana.
MAT 13:2 Nā, he rahi te hui i huihui ki a ia, ā, ka eke ia ki te kaipuke noho ai; i te takutai anō te hui katoa e tū ana.
MAT 13:3 Ā, he maha āna kōrero ki a rātou, he mea whakarite; i mea ia: “Nā, i haere te kairui ki te rui.
MAT 13:4 Ā, i a ia e rui ana, ka ngahoro ētahi o ngā purapura ki te taha o te ara, ā, ko te rerenga mai o ngā manu, kainga ake.
MAT 13:5 Ko ētahi i ngahoro ki ngā wāhi kāmaka, ki ngā wāhi kīhai i nui te oneone; nā, pihi tonu ake, kāhore hoki i hōhonu te oneone.
MAT 13:6 Ā, nō te whitinga o te rā, ngaua iho; ā, nō te mea kāhore he pūtake, memenge noa iho.
MAT 13:7 Ko ētahi i ngahoro ki roto ki ngā tātarāmoa; ā, nō te tupunga ake o ngā tātarāmoa, kōwaowaotia ana ngā purapura;
MAT 13:8 Ko ētahi i ngahoro ki te oneone pai, ā, ka hua, nō ētahi kotahi rau, nō ētahi e ono tekau, nō ētahi e toru tekau.
MAT 13:9 “Ki te whai taringa tētahi hei whakarongo, kia rongo ia.”
MAT 13:10 Ā, ka haere ngā ākonga, ka mea ki a ia, “He aha koe i kōrero whakarite tonu ai ki a rātou?”
MAT 13:11 Nā, ka whakahoki ia ki a rātou, ka mea, “Nō te mea kua hoatu ki a koutou te mātauranga ki ngā mea ngaro o te rangatiratanga o te rangi, ki a rātou ia kāhore i hoatu.
MAT 13:12 Ki te whai mea hoki tētahi, ka hoatu anō ki a ia, ā, ka maha atu ana. Ki te kāhore ia he mea a tētahi, ka tangohia i a ia āna ake.
MAT 13:13 Nā reira ēnei kupu whakarite āku ki a rātou; nō te mea ‘kite rawa rātou, ā, kāhore e kite; rongo rawa, kāhore hoki e mātau.’
MAT 13:14 Ā, ka rite i a rātou te poropititanga a Ihāia, e mea nei: ‘Rongo noa koutou, kāhore e mātau; titiro noa koutou, kāhore e kite.
MAT 13:15 Kua mātotoru hoki te ngākau o tēnei iwi, kua pūhoi ngā taringa ki te whakarongo, ko ngā kanohi kua oti te whakamoe e rātou; kei kite ō rātou kanohi, kei rongo ngā taringa, ā, ka mātau te ngākau, nā, ka tahuri rātou, ā, ka whakaorangia e ahau.’
MAT 13:16 Ka koa ia ō koutou kanohi, nō te mea ka kite; ō koutou taringa hoki, nō te mea ka rongo.
MAT 13:17 He pono hoki tāku e mea nei ki a koutou, he tokomaha ngā poropiti me ngā tāngata tika i hiahia kia kite i ngā mea e kite nei koutou, ā, kāhore i kite; kia rongo hoki i ngā mea e rongo nei koutou, ā, kāhore i rongo.”
MAT 13:18 “Nā, whakarongo ki te kupu i whakaritea ki te kairui.
MAT 13:19 Ki te rongo tētahi ki te kupu o te rangatiratanga, ā, e kore e mātau, nā, ka haere mai te wairua kino, ka kapo i te mea ka oti nā te rui ki tōna ngākau. Ko te tangata tēnei i ngā purapura i te taha o te ara.
MAT 13:20 Ko te tangata ia i ngā purapura i ngā wāhi kōhatu, ko te tangata i rongo ki te kupu, ā, hohoro tonu te tango, hari tonu;
MAT 13:21 Otiia, kāhore ōna pakiaka i roto i a ia, e mau noa ana mō te wā poto, ā, nō te pānga o te whakapāwera, o te whakatoi rānei, mō te kupu, nā hē tonu iho.
MAT 13:22 Ko te tangata i ngā purapura i waenga tātarāmoa, ko te tangata tēnā i rongo ki te kupu; ā, ko te whakaaronga ki tēnei ao, me te hangarau o ngā taonga, hei whakakōwaowao i te kupu, ā, kore ake he hua.
MAT 13:23 Ko te tangata ia i ngā purapura i te oneone pai, ko te tangata e rongo ana ki te kupu, ā, e mātau ana; ā, ka whai hua, ea ake, nō tētahi kotahi rau, nō tētahi e ono tekau, nō tētahi e toru tekau.”
MAT 13:24 Tēnei ake anō tētahi kupu whakarite i makā e ia ki a rātou, i mea ia: “Ka rite te rangatiratanga o te rangi ki tētahi tangata i rui i te purapura pai ki tāna māra.
MAT 13:25 Ā, i ngā tāngata e moe ana, ka haere mai tōna hoariri, ruia iho he taru kino ki waenga wīti, ā, haere ana.
MAT 13:26 Ā, nō ka pihi ake te rau, ka hua, kātahi ka kitea hoki ngā taru.
MAT 13:27 Nā, ka haere mai ngā pononga a taua rangatira, ka mea ki a ia, ‘E mara, kīhai ianei koe i rui i te purapura pai ki tāu māra? Nō hea rā ōna taru?’
MAT 13:28 “Nā, ka kī atu ia ki a rātou, ‘Nā te hoariri tēnei i mea.’ Kātahi, ka mea ngā pononga ki a ia, ‘E pai rānei koe kia haere mātou ki te whakawhāiti i aua taru?’
MAT 13:29 Ā, ka mea ia, ‘Kāhore; kei hūtia ngātahitia te wīti ina whakawhāititia ngā taru.
MAT 13:30 Tukua kia tupu tahi, ā taea noatia te kotinga; ā, i te wā o te kotinga ka mea ahau ki ngā kaikokoti, Mātua whakawhāiti i ngā taru, ka paihere ai hei paihere kia tahuna; ko te wīti ia me kohi ki tōku whare wīti.’ ”
MAT 13:31 Tēnei ake anō tētahi kupu whakarite i makā e ia ki a rātou, i mea ia: “He rite te rangatiratanga o te rangi ki te pua nanī, i kawea e te tangata, i ruia ki tāna māra.
MAT 13:32 He iti rawa ia i ngā purapura katoa, ā, ka tupu, ko ia te nui rawa o ngā otaota, ā, whakarākau ana, nō ka rere mai ngā manu o te rangi, ka noho ki ōna manga.”
MAT 13:33 Tēnei ake anō tētahi kupu whakarite i kōrerotia e ia ki a rātou: “He rite te rangatiratanga o te rangi ki te rēwena i tangohia e tētahi wahine, ā, whaongia ana ki roto ki ngā mēhua parāoa e toru, nō ka rēwenatia katoatia.”
MAT 13:34 Ko ēnei mea katoa i kōrerotia e Īhu ki te mano, he mea whakarite; ā, heoi anō āna kupu ki a rātou he kupu whakarite anake.
MAT 13:35 I rite ai tā te poropiti i kōrero ai, i mea ai: “E puaki i tōku māngai ngā kupu whakarite; ka kōrerotia e ahau ngā mea i ngaro nō te tīmatanga rā anō o te ao.”
MAT 13:36 Kātahi ka mahue i a Īhu te mano, ka tomo ia ki te whare. Nā, ka haere mai āna ākonga ki a ia, ka mea, “Whakaaturia mai ki a mātou te kupu i whakaritea ki ngā taru i te māra.”
MAT 13:37 Nā, ka whakahoki ia, ka mea ki a rātou, “Ko te kairui o te purapura pai ko te Tama a te tangata.
MAT 13:38 Ko te māra ko te ao; ko te purapura pai ko ngā tamariki o te rangatiratanga; ngā taru ko ngā tamariki a te kino;
MAT 13:39 ko te hoariri i ruia ai ko te rēwera; te kotinga ko te mutunga o te ao; ngā kaikokoti ko ngā anahera.
MAT 13:40 “Nā, e huihuia ana ngā taru, e tahuna ana ki te ahi; ka pērā anō i te mutunga o tēnei ao.
MAT 13:41 Ka tono te Tama a te tangata i āna anahera ki te huihui i roto i tōna rangatiratanga i ngā mea katoa e tūtuki ai te waewae, i ngā kaimahi anō i te kino;
MAT 13:42 ā, ka makā e rātou ki roto ki te oumu ahi; ko te wāhi tērā o te tangi me te tetēā o ngā niho.
MAT 13:43 Ko reira te hunga tika whiti ai me te rā i te rangatiratanga o tō rātou Matua. Ki te whai taringa tētahi hei whakarongo, kia rongo ia.”
MAT 13:44 “He rite anō te rangatiratanga o te rangi ki te taonga i hunā ki te māra; nō te kitenga a tētahi tangata, nā, ka hunā e ia, ā haere ana, he koa hoki nōna, nā hokona ana āna mea katoa, ā, hokona ana mai taua māra māna.”
MAT 13:45 “He rite anō te rangatiratanga o te rangi ki te kaihokohoko, e rapu ana i ngā peara papai.
MAT 13:46 Ā, nō tōna kitenga i tētahi peara utu nui, haere ana, hokona ana āna mea katoa, ā, hokona ana mai taua peara māna.”
MAT 13:47 “He rite anō te rangatiratanga o te rangi ki te kupenga i tukua ki te moana, ā, haoa ana he ika o ia āhua, o ia āhua.
MAT 13:48 Ā, ka kī, ka kūmea ki uta, ā, noho ana, kohikohia ana ngā ika papai ki ngā kete, ko ngā mea kikino ia i ākiritia ki waho.
MAT 13:49 Ka pērā anō a te mutunga o te ao. Ka haere ngā anahera, ka wehewehe i te hunga kino i roto i te hunga tika,
MAT 13:50 ā, ka maka i a rātou ki roto ki te oumu ahi; ko te wāhi tērā o te tangi, o te tetēā o ngā niho.”
MAT 13:51 Ka mea a Īhu ki a rātou, “Kua mātau rānei koutou ki ēnei mea katoa?” Ka mea rātou ki a ia, “Āe, e te Ariki.”
MAT 13:52 Nā, ka mea ia ki a rātou, “Koia te karaipi, i ākona ki te rangatiratanga o te rangi, i rite ai ki tētahi rangatira whare e whakaputa mai ana i ngā mea hou, i ngā mea tawhito, i roto i tāna toa.”
MAT 13:53 Ā, ka mutu ēnei kupu whakarite a Īhu, ka haere atu ia i reira.
MAT 13:54 Ā, ka tae ki tōna kāinga tupu ka ako i a rātou i roto i tō rātou whare karakia, ā, mīharo noa rātou, ka mea, “Nō hea ēnei whakaaro nui me ngā merekara a tēnei tangata?
MAT 13:55 Ehara ianei tēnei i te tama a te kāmura? He teka ianei ko Meri te ingoa o tōna whaea? Ko Hēmi hoki rātou ko Hōhepa, ko Haimona, ko Hūrā, ōna tēina?
MAT 13:56 Me ōna tuāhine, kāhore ianei rātou katoa i a tātou nei? Nō hea rā ēnei mea katoa a tēnei tangata?”
MAT 13:57 Heoi, ka hē rātou ki a ia. Otirā, ka mea a Īhu ki a rātou, “Kei tōna kāinga, kei tōna whare anake te poropiti hapa ai i te hōnore.”
MAT 13:58 Ā, kīhai i maha ngā merekara i meatia e ia ki reira, i tō rātou whakapono kore hoki.
MAT 14:1 I taua wā, ka rongo a Herora te tetaraki ki te rongo o Īhu,
MAT 14:2 ā, ka mea ki āna pononga, “Ko Hoani Kaiiriiri tēnei; kua ara mai ia i te hunga mate; ā, nā reira i mahi ai ngā merekara i roto i a ia.”
MAT 14:3 I hopukia hoki a Hoani e Herora, ā, hereherea ana e ia, ā, makā ana ki te whare herehere, he mea hoki nā Herōriaha, nā te wahine a tōna tuakana, a Piripi.
MAT 14:4 I mea hoki a Hoani ki a ia, “E kore e tika kia riro ia i a koe.”
MAT 14:5 Ā, i a ia e mea ana ki te whakamate i a ia, ka wehi i te mano; ki tā rātou hoki he poropiti ia.
MAT 14:6 Otirā, i te taenga ki te rā whānau o Herora, ka kanikani te tamāhine a Herōriaha i waenganui i a rātou, ā, ka āhuareka a Herora.
MAT 14:7 Kātahi ia ka mea ki a ia, oati rawa, kia hoatu ki a ia tāna mea e tono ai.
MAT 14:8 Nā, he mea whakakīkī ia nā tōna whaea, ka mea, “Hōmai ki konei ki ahau i runga i te rīhi te mātenga o Hoani Kaiiriiri.”
MAT 14:9 Heoi, ka pōuri te kīngi; otiia, i whakaaro ia ki te oati, ki te hunga hoki e noho tahi ana me ia, ā, ka mea kia hoatu.
MAT 14:10 Nā, ka tono tāngata ia, ā, pōutoa ana te mātenga o Hoani i roto i te whare herehere.
MAT 14:11 Ā, i mauria tōna mātenga i runga i te rīhi, i hoatu ki te kōtiro; kawea atu ana e ia ki tōna whaea.
MAT 14:12 Nā, ka haere āna ākonga, ka tango i te tinana, ā, tanumia ana e rātou, ā, haere ana, kōrero ana ki a Īhu.
MAT 14:13 Nā, i te rongonga o Īhu, ka haere atu ia i reira rā te kaipuke ki te koraha, ki te wāhi motu kē. Ā, nō ka rongo te mano, ka aru i a ia rā uta i roto i ngā pā.
MAT 14:14 Ā, ka puta atu a Īhu, ka kite i te huihuinga nui, ka aroha ia ki a rātou, ā, whakaorangia ana e ia ō rātou tūroro.
MAT 14:15 Ā, nō ka ahiahi, ka haere atu āna ākonga ki a ia, ka mea, “He wāhi koraha tēnei, kua heke noa atu te rā; tonoa atu te mano, kia haere ai rātou ki ngā kāinga, ki te hoko kai mā rātou.”
MAT 14:16 Anō rā ko Īhu ki a rātou, “Kāhore he mea e haere ai rātou; mā koutou e hoatu he kai mā rātou.”
MAT 14:17 Ka mea rātou ki a ia, “Heoi anō a mātou i konei, e rima ngā taro, e rua hoki ngā ika.”
MAT 14:18 Nā, ka mea ia, “Mauria mai ki konei ki ahau.”
MAT 14:19 Nā, ka mea ia ki te mano kia noho ki runga i te tarutaru, ka mau i ngā taro e rima, i ngā ika hoki e rua, ka titiro ki runga ki te rangi, ka whakapai, ka whawhati, ā, hoatu ana e ia ngā taro ki ngā ākonga, ā, nā ngā ākonga ki te mano.
MAT 14:20 Ā, kai katoa ana rātou, ā, ka mākona; ā, kotahi tekau mā rua ngā kete i kohia ake e rātou, kī tonu i ngā whatiwhatinga i toe.
MAT 14:21 Ko te hunga i kai rā me te mea e rima mano ngā tāne, hāunga ngā wāhine me ngā tamariki.
MAT 14:22 Nā, akiaki tonu a Īhu i āna ākonga kia eke ki te kaipuke, kia whakawhiti i mua i a ia ki tāwāhi, i a ia e tuku ana i ngā mano kia haere.
MAT 14:23 Ā, ka oti te mano te tuku, ka kake ia ki runga ki te maunga ki te wāhi motu kē ki te īnoi; nā, kua ahiahi, ā, ko ia anake i reira.
MAT 14:24 Nā, tērā te kaipuke te ākina rā e te ngaru i waenga moana; i hē hoki te i hau.
MAT 14:25 Ā, i te whā o ngā mataaratanga o te pō ka haere a Īhu ki a rātou, i haere māori i runga i te moana.
MAT 14:26 Ā, i te kitenga o ngā ākonga i a ia e haere ana i runga i te moana, ka ihiihi, ka mea, “He wairua!” Ka auē i te wehi.
MAT 14:27 Nā, kua hohoro te kōrero a Īhu ki a rātou, te mea, “Kia manawanui, ko ahau tēnei; aua e wehi.”
MAT 14:28 Nā, ka whakahoki a Pita ki a ia, ka mea, “E te Ariki, ki te mea ko koe tēnā, kīia mai ahau kia haere atu ki a koe i runga i te wai.”
MAT 14:29 Nā, ka mea ia, “Haere mai.” Ā, ka marere atu a Pita i te kaipuke, ka haere i runga i te wai, kia tae ai ki a Īhu.
MAT 14:30 Otirā, ka kite ia i te hau e kaha ana, ka wehi; ā, ka tīmata te totohu, ka karanga ake, ka mea, “Ahau, e te Ariki, whakaorangia.”
MAT 14:31 Hohoro tonu te totoro o te ringa o Īhu, ka hopu i a ia, ka mea ki a ia, “E te tangata whakapono iti, he aha koe i ngākau rua ai?”
MAT 14:32 Anō ka eke rāua ki te kaipuke, mutu pū te hau.
MAT 14:33 Nā, ka haere mai te hunga i runga i te kaipuke, ka koropiko ki a ia, ka mea, “He pono ko te Tama koe a te Atua!”
MAT 14:34 Ā, i tō rātou whitinga atu, ka tae ki te whenua o Kenehareta.
MAT 14:35 Ā, ka mōhio ngā tāngata o taua wāhi ki a ia, ka tono tāngata puta noa i ngā wāhi tūtata katoa o reira, hei kawe mai i ngā tūroro katoa ki a ia.
MAT 14:36 Ka īnoi ki a ia kia pā kau rātou ki te tāniko o tōna kākahu; ā, ora ake ngā tāngata katoa i pā.
MAT 15:1 Nā, ka haere ki a Īhu ētahi karaipi me ētahi Parihi nō Hiruhārama, ka mea,
MAT 15:2 “He aha āu ākonga ka takahi ai i te whakarerenga iho a ngā kaumātua? Kāhore hoki rātou e horoi i ō rātou ringa ina kai taro.”
MAT 15:3 Nā, ka whakahoki ia, ka mea ki a rātou, “He aha hoki i waiho ai e koutou tā koutou whakarerenga iho hei takahi mō tā te Atua kupu ako?
MAT 15:4 I mea hoki te Atua, ‘Whakahōnoretia tōu pāpā me tōu whaea,’ ā, ‘Ki te kohukohu hoki tētahi i tōna pāpā, i tōna whaea rānei kia mate ia, mate rawa.’
MAT 15:5 Ko koutou ia hei mea, Ki te mea tētahi ki tōna pāpā, ki tōna whaea rānei, ‘Ko tāku mea hei atawhainga mōu kua tāpaea atu ki te Atua.’
MAT 15:6 Nā, kaua ia e whakahōnore i tōna pāpā. Heoi, waiho ana e koutou tā koutou whakarerenga iho hei whakakāhore i te kupu a te Atua.
MAT 15:7 E te hunga tinihanga, tika rawa tā Ihāia i poropiti ai mō koutou, i mea ai:
MAT 15:8 “ ‘Te iwi nei ko ō rātou ngutu hei whakahōnore mōku; matara noa atu ia i ahau ō rātou ngākau.
MAT 15:9 Maumau karakia noa rātou ki ahau, ko tā rātou nei hoki e whakaako ai ko ngā whakahau a te tangata.’ ”
MAT 15:10 Ā, karangatia ana e ia te mano ki a ia, ka mea ki a rātou, “Kia rongo, kia mātau:
MAT 15:11 E kore te tangata e poke i te mea e tapoko ana ki te māngai; engari, te mea e puta mai ana i roto i te māngai, mā tēnā e poke ai te tangata.”
MAT 15:12 Me i reira ka haere āna ākonga, ka mea ki a ia, “E mōhio ana rānei koe i hē ngā Parihi i tō rātou rongonga i taua kupu?”
MAT 15:13 Nā, ka whakahoki ia ka mea, “Ka hūtia ngā māhuri katoa kīhai i whakatōkia e tōku Matua i te rangi.
MAT 15:14 Waiho atu rātou; he matapō rātou e ārahi ana i te matapō. Ki te ārahina te matapō e te matapō, ka taka tahi rāua ki te waikeri.”
MAT 15:15 Ka whakahoki a Pita, ka mea ki a ia, “Whakaaturia ki a mātou tēnei kupu whakarite.”
MAT 15:16 Ka mea a Īhu, “Kei te kūware tonu anō koutou?
MAT 15:17 Kīanō koutou i mātau noa, ko ngā mea katoa e tapoko atu ana ki te māngai ka riro ki roto ki te kōpū, ā, e ākiritia ana ki te poka?
MAT 15:18 Tēnā ko ngā mea e puta mai ana i te māngai e haere ake ana i te ngākau; mā ēnā e poke ai te tangata.
MAT 15:19 Nō roto hoki nō te ngākau te putanga ake o ngā whakaaro kino, o ngā kōhuru, o ngā pūremu, o ngā moepuku, o ngā tāhae, o ngā whakapae teka, o ngā kohukohu.
MAT 15:20 Ko ngā mea ēnei e noa ai te tangata; tēnā ko te kai me ngā ringa kīhai i horoia, e kore te tangata e noa i tēnā.”
MAT 15:21 Ā, ka haere atu a Īhu i reira, ka anga ki ngā wāhi o Tāira, o Hairona.
MAT 15:22 Nā, ko te haerenga mai i aua wāhi o tētahi wahine, he Kanaani, ka karanga ki a ia, ka mea, “E te Ariki e te Tama a Rāwiri, kia aroha ki ahau; ko tāku tamāhine e ngaua kinotia ana e te rēwera.”
MAT 15:23 Ā, kāhore āna kupu i whakahoki ai ki a ia. Nā, ka haere mai āna ākonga, ka tohe ki a ia, ka mea, “Tonoa kia haere; e karanga ana hoki i muri i a tātou.”
MAT 15:24 Otirā, ka whakahoki ia, ka mea, “Heoi, ngā mea i tonoa mai ai ahau, ko ngā hipi ngaro o te whare o Īharaira.”
MAT 15:25 Ka haere tonu mai tērā, ka koropiko ki a ia, ka mea, “E te Ariki, kia puta tōu whakaaro ki ahau.”
MAT 15:26 Nā, ka whakahoki ia, ka mea, “Ehara i te tika kia tangohia te taro a ngā tamariki, kia makā mā ngā kurī.”
MAT 15:27 Ka mea tērā, “Āe rā, e te Ariki, e kai ana anō ngā kurī i ngā kongakonga e ngahoro iho ana i te tēpu a ō rātou rangatira.”
MAT 15:28 Kātahi ka whakahoki a Īhu, ka mea ki a ia, “E tai, nui atu tōu whakapono; waiho i tāu i pai ai.” Ā, ora ake tāna tamāhine i taua wā pū anō.
MAT 15:29 Nā, ka whakatika a Īhu i reira, ka haere ki te taha o te moana o Karirī, ā, kake ana ki te maunga, noho ana i reira.
MAT 15:30 He rahi hoki te hui i haere ki a ia, i a rātou anō ngā kopa, ngā matapō, ngā wahangū, ngā mutu, me te tini kē atu, ā, tukua iho e rātou ki ngā waewae o Īhu; ā, whakaorangia ana rātou e ia.
MAT 15:31 Mīharo noa te mano i tō rātou kitenga i ngā wahangū e kōrero ana, i ngā mutu e ora ana, i ngā kopa e haere ana, i ngā matapō e titiro ana; ā, whakakorōriatia ana e rātou te Atua o Īharaira.
MAT 15:32 Nā, ka karangatia e Īhu āna ākonga, ka mea, “E aroha ana ahau ki te huihui nei, ka toru nei hoki ō rātou rā e noho ana ki ahau, kāhore hoki ā rātou kai; e kore ahau e pai kia tonoa pukutia, kei hemo ki te ara.”
MAT 15:33 Nā, ko te meatanga a āna ākonga ki a ia, “Nō hea ā tātou taro i te koraha, e mākona ai tēnei ope nui?”
MAT 15:34 Nā, ka mea a Īhu ki a rātou, “E hia ā koutou taro?” Ka mea rātou, “E whitu, me ngā ika nonohi, torutoru nei.”
MAT 15:35 Nā, ka mea ia ki te mano kia noho ki te whenua;
MAT 15:36 ā, ka mau ia ki ngā taro e whitu ki ngā ika; ka whakawhetai, ka whawhati, ā, hoatu ana e ia ki ngā ākonga, ā, nā ngā ākonga ki te mano.
MAT 15:37 Ā, kai ana rātou katoa, ā, ka mākona; e whitu hoki ngā kete i kohia e rātou, kī tonu i ngā whatiwhatinga i toe.
MAT 15:38 Ā, ko te hunga i kai, e whā mano ngā tāne, hāunga ngā wāhine, ngā tamariki.
MAT 15:39 Ā, ka oti te mano te tono atu e ia, ka eke ia ki te kaipuke; nā, kua ū ki ngā wāhi o Makarana.
MAT 16:1 Nā, ka haere mai ngā Parihi me ngā Haruki, ka whakamātautau ka tono kia whakakitea e ia ki a rātou tētahi tohu i te rangi.
MAT 16:2 Nā, ka whakahoki ia, ka mea ki a rātou: “Ka ahiahi, ka mea koutou, ‘He paki; inā he whero te rangi.’
MAT 16:3 Ā, i te ata, ‘He āwhā āianei; he whero nei te rangi, e tukupū ana.’ E te hunga tinihanga, e mātau ana koutou ki te titiro ki te mata o te rangi; tē taea e koutou ngā tohu o ngā tāima.
MAT 16:4 E rapu tohu ana te whakatupuranga kino, pūremu; ā, heoi anō tohu e hoatu ki a rātou ko te tohu o Hona poropiti.” Nā, whakarērea ana rātou e ia, ā, haere ana.
MAT 16:5 Ā, ka ū ngā ākonga ki tērā taha kua wareware ki te mau taro atu.
MAT 16:6 Nā, ka mea a Īhu ki a rātou, “Kia mahara kia tūpato i te rēwena a ngā Parihi, a ngā Haruki.”
MAT 16:7 Ā, ka kōrerorero rātou ki a rātou anō, ka mea, “Nō te mea kāhore tātou i mau taro mai.”
MAT 16:8 Ā, ka mōhio a Īhu, ka mea ki a rātou: “He aha koutou ka kōrerorero ai ki a koutou, e te hunga whakapono iti, nō te mea kīhai i maua mai he taro e koutou?
MAT 16:9 Kīanō koutou i mātau noa, kīanō koutou i mahara ki ngā taro e rima a ngā mano e rima, ki te maha hoki o ngā kete i riro i a koutou?
MAT 16:10 “Ki ngā taro hoki e whitu a ngā mano e whā, ki te maha anō o ngā kete i riro i a koutou?
MAT 16:11 He aha koutou tē mātau ai, ehara i te mea mō te taro tāku i mea ai ki a koutou, kia tūpato i te rēwena a ngā Parihi, a ngā Haruki?”
MAT 16:12 Kātahi rātou ka mātau kīhai ia i mea kia tūpato i te rēwena o te taro, engari i te ako a ngā Parihi, a ngā Haruki.
MAT 16:13 Ka tae a Īhu ki ngā wāhi o Hiharia Piripai, ka ui ia ki āna ākonga, ka mea, “Ko wai rā ahau te Tama a te tangata, ki tā ngā tāngata kī?”
MAT 16:14 Nā, ka mea rātou, “Ki tā ētahi ko Hoani Kaiiriiri; ki tā ētahi ko Irāia; ki tā ētahi ko Heremaia, ko tētahi rānei o ngā poropiti.”
MAT 16:15 Ka mea ia ki a rātou, “Ā, ki tā koutou ko wai ahau?”
MAT 16:16 Nā, ka whakahoki a Haimona Pita, ka mea, “Ko te Karaiti koe, ko te Tama a te Atua ora.”
MAT 16:17 Nā, ka whakahoki a Īhu, ka mea ki a ia: “Ka koa koe, e Haimona Parahona; ehara hoki i te kikokiko, i te toto, nāna tēnei i whakakite ki a koe, engari, nā tōku Matua i te rangi.
MAT 16:18 Nā, ko tāku kupu anō tēnei ki a koe, Ko Pita koe, ā, ka hangā e ahau tāku hāhi ki runga ki tēnei kāmaka; e kore anō e taea taua hāhi e ngā kūwaha o te rēinga.
MAT 16:19 Ka hoatu anō e ahau ki a koe ngā kī o te rangatiratanga o te rangi; ā, ko āu e here ai i te whenua e herea anō i te rangi; ko āu hoki e wewete ai i te whenua e wetekia anō i te rangi.”
MAT 16:20 Me i reira ka whakatūpato ia i āna ākonga, kia kaua e kōrerotia e rātou ki te tangata ko te Karaiti ia.
MAT 16:21 Nō reira mai anō, i tīmata ai a Īhu te whakaatu ki āna ākonga, kua takoto te tikanga kia haere ia ki Hiruhārama, ā, he maha ngā mamae e mamae ai ia i ngā kaumātua, i ngā tohunga nui, i ngā karaipi, ā, ka whakamatea ia, ā, hei te toru o ngā rā ka ara.
MAT 16:22 Nā, ka mau a Pita ki a ia, ka anga, ka whakahē ki tāna, ka mea, “Auē! Kauaka, e te Ariki! Kauaka rā tēnei e pā ki a koe.”
MAT 16:23 Nā, ka tahuri ia, ka mea ki a Pita, “Haere ki muri i ahau, e Hātana, he tūtukitanga waewae koe ki ahau; kāhore hoki ōu ngākau ki ngā mea a te Atua, engari, ki a te tangata.”
MAT 16:24 Kātahi a Īhu ka mea ki āna ākonga: “Ki te mea tētahi kia haere mai ki te whai i ahau, me whakakāhore ia e ia anō, me amo tōna rīpeka, ka aru ai i ahau.
MAT 16:25 Ki te whai hoki tētahi kia ora, ka mate anō ia; ki te mate tētahi, mōna i whakaaro ki ahau, ka kite anō ia i te ora.
MAT 16:26 He aha hoki te pai ki te tangata, ki te riro i a ia te ao katoa, ā, ka kore he ora mōna? He aha hoki tā te tangata e hoatu ai hei utu mōna kia ora?
MAT 16:27 “Tēnei ake hoki ka haere mai te Tama a te tangata, rātou ko āna anahera, i runga i te korōria o tōna Matua; ā, ko reira hoatu ai e ia ki tēnei, ki tēnei, te utu o tāna mahi.
MAT 16:28 He pono tāku e mea nei ki a koutou, Tēnei anō ētahi e tū nei e kore e pāngia e te mate, kia kite rā anō i te Tama a te tangata e haere mai ana i runga i tōna rangatiratanga.”
MAT 17:1 Ā, ka pahure ngā rā e ono, ka mau a Īhu ki a Pita, ki a Hēmi rāua ko tōna teina ko Hoani, nā, kawea ana rātou e ia ki runga ki tētahi maunga tiketike ki te wāhi motu kē.
MAT 17:2 Ā, ka puta kē tōna āhua i tō rātou aroaro; whiti tonu tōna mata me te rā, mā tonu ōna kākahu me te mārama.
MAT 17:3 Nā, ka kitea e rātou a Mohi rāua ko Irāia e kōrerorero ana ki a ia.
MAT 17:4 Kātahi ka oho a Pita, ka mea ki a Īhu, “E te Ariki, he pai kia noho tātou i konei; ki te pai koe, mā mātou e hanga ētahi wharau ki konei kia toru; kia kotahi mōu, kia kotahi mō Mohi, kia kotahi mō Irāia.”
MAT 17:5 I a ia anō e kōrero ana, nā, ka taumarumaru iho te kapua mārama i runga i a rātou; nā, he reo nō te kapua e mea ana, “Ko tāku Tama tēnei i aroha ai, ko tāku i āhuareka ai; whakarongo ki a ia!”
MAT 17:6 A, nō ka rongo ngā ākonga, ka takoto tāpapa rātou, he nui hoki tō rātou wehi.
MAT 17:7 Nā, ka haere a Īhu, ka pā ki a rātou, ka mea, “Whakatika, kaua e wehi.”
MAT 17:8 Ā, nō ka ara ake ō rātou kanohi, kāhore he tangata i kitea e rātou, ko Īhu anake.
MAT 17:9 Nā, i a rātou e heke iho ana i te maunga, ka whakatūpato a Īhu i a rātou, ka mea, “Kaua e kōrerotia ki te tangata te mea i kitea nei, kia ara ake rā anō te Tama a te tangata i te hunga mate.”
MAT 17:10 Ā, ka ui āna ākonga ki a ia ka mea, “He aha ngā karaipi ka mea ai, ko Irāia kia mātua puta mai?”
MAT 17:11 Nā, ka whakahoki a Īhu, ka mea ki a rātou, “Ko Irāia anō e mātua puta hei whakatika i ngā mea katoa.
MAT 17:12 Ko tāku ia tēnei ki a koutou, kua tae noa mai a Irāia, ā, kīhai rātou i mōhio ki a ia, heoi, meatia ana e rātou ki a ia tā rātou i pai ai. E pērā anō te Tama a te tangata te mamae i a rātou.”
MAT 17:13 Kātahi ka mōhio ngā ākonga ko Hoani Kaiiriiri tāna i kōrero ai ki a rātou.
MAT 17:14 Ā, nō ka tae rātou ki te mano, ka haere mai ki a ia tētahi tangata, ka tūturi ngā turi ki a ia, ka mea,
MAT 17:15 “E te Ariki, kia aroha ki tāku tama; he haurangi hoki ia, he kino tōna mamae; he maha hoki ōna hinganga ki te kāpura, he maha ki te wai.
MAT 17:16 Ā, i kawea ia e ahau ki āu ākonga, heoi, kīhai ia i taea te whakaora e rātou.”
MAT 17:17 Nā, ka oho a Īhu, ka mea, “E te uri whakapono kore, parori kē, kia pēhea te roa o tōku noho ki a koutou? Kia pēhea te roa o tōku manawanui ki a koutou? Kawea mai ia ki konei, ki ahau.”
MAT 17:18 Nā, ka rīria te rēwera e Īhu; ā, puta ana i roto i a ia; ā, ora ake te tamaiti i taua wā pū anō.
MAT 17:19 Me i reira ka haere puku ngā ākonga ki a Īhu, ka mea, “He aha rā tē āhei ai i a mātou te pei i a ia ki waho?”
MAT 17:20 Nā, ka mea a Īhu ki a rātou: “Nā tō koutou whakapono iti; he pono hoki tāku e mea nei ki a koutou, ki te mea he whakapono tō koutou, pērā me tō te pua nanī te rahi, e mea koutou ki tēnei maunga, ‘Neke atu i konei ki tērā wāhi’; ā, ka neke; kāhore hoki he mea e kore e taea e koutou.
MAT 17:21 Otirā, e kore e puta noa te pēnā, mā te īnoi anake mā te nohopuku.”
MAT 17:22 Ā, i a rātou e noho ana i Karirī, ka mea a Īhu ki a rātou, “Meāke tukua te Tama a te tangata ki ngā ringa o ngā tāngata;
MAT 17:23 ā, ka whakamatea e rātou, ā, i te toru o ngā rā ka ara.” Ā, nui atu tō rātou pōuri.
MAT 17:24 Ā, nō tō rātou taenga ki Kaperenauma, ka haere mai ki a Pita ngā kaikohikohi i te hāwhe hekere, ka mea, “E kore ianei tōu Kaiwhakaako e hōmai i te hāwhe hekere?”
MAT 17:25 Ka mea ia, “E hoatu anō.” Ā, nō ka tapoko ia ki te whare, ko Īhu kua kōrero ki a ia, kua mea, “E pēhea ana tōu whakaaro, e Haimona? E tangohia ana e ngā kīngi o te ao ngā takoha taonga me te takoha tangata i a wai? I ā rātou ake tama, i a ngā tāngata kē rānei?”
MAT 17:26 Ka mea a Pita ki a ia, “I a ngā tāngata kē.” Nā, ko te kīanga a Īhu ki a ia, “Ha, pēnā ka haere noa ngā tamariki.
MAT 17:27 Ahakoa rā, kei whai take hē mai rātou ki a tātou, haere ki te moana, piua tētahi matau, ā, ka eke te ika mātāmua, tangohia; nā, ka whakatuwhera i tōna māngai, ka kite ai koe i tētahi moni, tangohia tēnā, ka hoatu ki a rātou, hei mea mōku, mōu.”
MAT 18:1 I taua wā, ka haere mai ngā ākonga ki a Īhu, ka mea, “Ko wai te nui rawa i te rangatiratanga o te rangi?”
MAT 18:2 Nā, ka karangatia e Īhu tētahi tamaiti nohinohi, ka whakatūria e ia ki waenganui i a rātou,
MAT 18:3 ka mea, “He pono tāku e mea nei ki a koutou, ki te kore koutou e tahuri, ā, e pēnei me ngā tamariki nonohi, e kore koutou e tomo ki te rangatiratanga o te rangi.
MAT 18:4 Nā, ki te whakaiti tētahi i a ia, ā, ka rite ki tēnei tamaiti nohinohi, ko ia te nui rawa i te rangatiratanga o te rangi.
MAT 18:5 Ā, ki te manako tētahi ki tētahi tamaiti nohinohi pēnei, he whakaaro hoki ki tōku ingoa, e manako ana ki ahau.”
MAT 18:6 “Tēnā ko tēnei, ka hē i tētahi tangata tētahi o ēnei mea nonohi e whakapono nei ki ahau, nui kē te pai ki a ia me i whakawerewerea ki tōna kakī te kōhatu mira kāihe, me i pungaia ia ki te rire o te moana.
MAT 18:7 Auē te mate mō te ao i ngā take hē! Kua tino takoto rawa hoki he putanga mō ngā take hē; otiia, auē te mate mō tērā tangata e puta ai te take hē!
MAT 18:8 “Ki te hē koe i tōu ringa, i tōu waewae rānei, pōutoa, makā atu; pai kē hoki mōu te tomo ki te ora he kopa, he ringa mutu, i te makā ki te ahi kā tonu, he ringa rua, he waewae rua.
MAT 18:9 Ki te hē hoki koe i tōu kanohi, tīkarohia, makā atu; pai kē hoki mōu te tomo kanohi tahi ki te ora, i te makā kanohi rua ki te kāpura o Kehena.”
MAT 18:10 “Kia mahara kei whakahāwea ki tētahi o ēnei mea nonohi; ko tāku kupu hoki tēnei ki a koutou, E titiro tonu ana ō rātou anahera i te rangi ki te kanohi o tōku Matua i te rangi.
MAT 18:11 I haere mai hoki te Tama a te tangata ki te whakaora i te mea i ngaro.
MAT 18:12 “Pēhea tō koutou whakaaro? Ki te mea he rau ngā hipi a tētahi tangata, ā, ka kotiti kē tētahi, e kore ianei e waiho e ia ngā iwa tekau mā iwa, ka haere i runga i ngā maunga, rapu ai i te mea i kotiti kē?
MAT 18:13 Ā, ki te kitea, he pono tāku e mea nei ki a koutou, tērā atu tōna hari ki taua hipi, i te hari ki ngā iwa tekau mā iwa kīhai i kotiti kē.
MAT 18:14 Waihoki kāhore he ngākau o tō koutou Matua i te rangi kia ngaro tētahi o ēnei mea nonohi.”
MAT 18:15 “Ā, ki te hara tōu teina ki a koe, haere, kōrerotia tōna hara ki a ia, kōrua anake; ki te whakarongo ia ki a koe, ka riro i a koe tōu teina.
MAT 18:16 Ā, ki te kore ia e whakarongo, kawea atu hei hoa mōu kia kotahi, kia tokorua rānei, kia mau ai ngā kupu katoa i ngā māngai o ngā kaiwhakarongo tokorua, tokotoru rānei.
MAT 18:17 Ā, ki te pake ia ki a rāua, kōrerotia ki te hāhi; ā, ki te pake anō ia ki te hāhi, me waiho e koe hei tautangata, hei pupirikana.”
MAT 18:18 “He pono tāku e mea nei ki a koutou, Ko ā koutou e here ai i te whenua e herea anō ki te rangi; ko ā koutou e wewete ai i te whenua e wetekia anō ki te rangi.
MAT 18:19 “Tēnei anō tāku kupu ki a koutou, Ki te mea ka tokorua o koutou e rite tahi ana ngā whakaaro i te whenua mō tētahi mea e īnoi ai rāua, e meinga anō mō rāua e tōku Matua i te rangi.
MAT 18:20 Nā, ko te wāhi e whakaminea ai te hunga tokorua, tokotoru rānei, he whakaaro ki tōku ingoa, kei reira ahau kei waenganui i a rātou.”
MAT 18:21 Kātahi, ka haere a Pita ki a ia, ka mea, “E te Ariki, kia hia ngā haranga o tōku teina ki ahau, me tāku whakarere noa iho i tōna hara? Kia whitu?”
MAT 18:22 Ka mea a Īhu ki a ia, “E kore ahau e mea ki a koe, Kia whitu, engari, kia whitu tekau whitu.”
MAT 18:23 “Koia, ka rite ai te rangatiratanga o te rangi ki tētahi kīngi, i mea kia kōrerotia ki a ia āna moni e āna pononga.
MAT 18:24 Ā, ka tīmata ia te ui, ka kawea ki a ia he tangata, tekau mano ngā taranata i a ia.
MAT 18:25 Ā, tē whai rawa ia hei utu, ka mea tōna ariki kia hokona ia, tāna wahine me āna tamariki, me āna taonga katoa, hei whakautu.
MAT 18:26 “Nā, ka tāpapa iho taua pononga, ka koropiko ki a ia, ka mea, ‘E te Ariki, kia āta hanga ki ahau, ā, ka utua katoatia e ahau ki a koe.’
MAT 18:27 Nā, ka oho i te aroha te ariki o taua pononga, tuku ana i a ia, ā, whakarērea noatia iho e ia āna moni tārewa.
MAT 18:28 “Heoi, te putanga o taua pononga ki waho, ka kite i tētahi o ōna hoa pononga, kotahi rau āna pene i a ia; nā, hopukia ana e ia, nōtia iho te kakī, me te kī anō, ‘Utua tāku nama.’
MAT 18:29 “Heoi, tāpapa ana tōna hoa pononga ki ōna waewae, ka īnoi ki a ia, ka mea, ‘Kia āta hanga ki ahau, ā, ka utua katoatia e ahau ki a koe.’
MAT 18:30 Ā, kīhai ia i pai; heoi haere ana, maka ana i a ia ki te whare herehere, kia utua katoatia rā anō te nama.
MAT 18:31 “Heoi, nō te kitenga o ōna hoa pononga i taua meatanga, nui atu tō rātou pōuri, ā, haere ana, whakaaturia ana ki tō rātou ariki ngā mea katoa i meatia.
MAT 18:32 Kātahi, ka karanga tōna ariki i a ia, ka mea ki a ia, ‘Pononga kino, i whakarērea noatia e ahau taua moni tārewa katoa i a koe, nāu hoki i īnoi ki ahau.
MAT 18:33 Ehara oti i te tika kia tohungia e koe tōu hoa pononga, me ahau hoki i tohu i a koe?’
MAT 18:34 Nā, ka riri tōna ariki, ā, tukua ana ia ki ngā kaiwhakamamae, kia utua katoatia rā anō tāna nama.
MAT 18:35 Tērā anō, e pērā tōku Matua i te rangi ki a koutou, ki te kore e whakarērea noatia i roto i ō koutou ngākau ngā hē o te teina o tēnei, o tēnei, o koutou.”
MAT 19:1 Ā, ka mutu ēnei kupu a Īhu, ka tūria atu e ia i Karirī, ā, ka tae ki ngā wāhi o Hūria, ki tāwāhi atu o Horano.
MAT 19:2 He rahi hoki te hui i aru i a ia; ā, whakaorangia ana rātou e ia i reira.
MAT 19:3 Nā, ka haere mai ngā Parihi ki a ia, ki te whakamātautau i a ia, ka mea ki a ia, “He mea tika rānei kia whakarērea e te tangata tāna wahine mō tētahi take?”
MAT 19:4 Nā, ka whakahoki ia, ka mea ki a rātou, “Kīanō koutou i kite noa i hangā rāua e te Kaihanga i te tīmatanga, he tāne, he wahine?
MAT 19:5 I mea anō ia, ‘Mō konei ka mahue i te tangata tōna pāpā, tōna whaea ka piri ki tāna wahine, ā, hei kikokiko kotahi rāua tokorua’?
MAT 19:6 Nā, heoi anō tō rāua tokoruatanga, engari kotahi anō kikokiko. Nā, ko ā te Atua i hono ai, kaua e wehea e te tangata.”
MAT 19:7 Ka mea rātou ki a ia, “He aha rā a Mohi i ako ai kia hoatu he pukapuka whakarere, ka whakarere ai i a ia?”
MAT 19:8 Ka mea ia ki a rātou, “Nā te pakeke o ō koutou ngākau i tukua ai koutou e Mohi kia whakarere i ā koutou wāhine; i te tīmatanga iho ia kāhore i pēnā.
MAT 19:9 Ā, tēnei tāku kupu ki a koutou, Ki te whakarere tētahi i tāna wahine, ehara nei i te take moepuku, ā, ka mārenatia ki tētahi atu, e pūremu ana ia; ā, ki te mārena tētahi i te wahine i whakarērea, e pūremu ana ia.”
MAT 19:10 Ka mea āna ākonga ki a ia, “Ki te pēnei te tikanga mō te tangata rāua ko tāna wahine, ehara te mārena.”
MAT 19:11 Otirā, ka mea ia ki a rātou, “E kore tēnei kupu e rite i ngā tāngata katoa, engari, i te hunga i hoatu ai.
MAT 19:12 He unaka hoki ētahi nō te whānautanga mai i te kōpū o te whaea; ko ētahi unaka he mea whakaūnaka nā te tangata; ko ētahi unaka he mea whakaūnaka nā rātou anō, he whakaaro hoki ki te rangatiratanga o te rangi. Ki te taea tēnei te whakarite e tētahi, māna e whakarite.”
MAT 19:13 I reira, ka kawea mai he tamariki nonohi ki a ia, kia whakapā ai ia i ōna ringa ki a rātou, kia īnoi; ā, rīria iho rātou e ngā ākonga.
MAT 19:14 Nā, ko te kīanga a Īhu, “Tukua mai ngā tamariki nonohi, aua hoki e āraia atu tā rātou haere mai ki ahau; nō ngā pēnei hoki te rangatiratanga o te rangi.”
MAT 19:15 Ā, whakapākia iho e ia ōna ringa ki a rātou, ā, haere atu ana i reira.
MAT 19:16 Nā, ka haere mai tētahi ki a ia, ka mea, “E te Kaiwhakaako, he aha te mahi pai māku, e whiwhi ai ahau ki te ora tonu?”
MAT 19:17 Nā, ko tāna meatanga ki a ia, “He aha ka ui koe ki ahau mō te mea pai? Tērā anō tētahi i pai, kotahi tonu; ki te mea koe kia tomo ki te ora, whakaritea ngā ture.”
MAT 19:18 Ka mea ia ki a ia, “Ko ēhea?” Nā, ka mea a Īhu, “Kaua e patu tangata; kaua e pūremu; kaua e tāhae; kaua e whakapae teka;
MAT 19:19 Whakahōnoretia tōu pāpā me tōu whaea; me tēnei; kia aroha ki tōu hoa tata ānō ko koe.”
MAT 19:20 Ka mea taua taitama ki a ia, “Kua rite i ahau ēnei mea katoa nō tōku tamarikitanga; tēnā hoki tētahi mea e hapa ana i ahau?”
MAT 19:21 Ka mea a Īhu ki a ia, “Ki te mea koe kia tino tika, haere, hokona ōu taonga, ka hoatu ki ngā rawakore, ā, e whai taonga koe ki te rangi; ā, haere mai i muri i ahau.”
MAT 19:22 Nā, ka rongo taua taitama i taua kupu, haere pōuri ana ia, he maha hoki ōna taonga.
MAT 19:23 Ka mea a Īhu ki āna ākonga, “He pono tāku kupu ki a koutou, e tapoko whakauaua te tangata taonga ki te rangatiratanga o te rangi.
MAT 19:24 Tēnei anō tāku kupu ki a koutou, he ngāwari kē atu te haere o te kāmera rā te kōwhao o te ngira i te haere o te tangata taonga ki roto ki te rangatiratanga o te Atua.”
MAT 19:25 Ā, nō ka rongo āna ākonga, nui rawa tō rātou mīharo, ka mea, “Ko wai rā e ora?”
MAT 19:26 Nā, ka titiro a Īhu ki a rātou, ka mea, “Ki te tangata e kore tēnei e taea, ki te Atua ia e taea ngā mea katoa.”
MAT 19:27 Kātahi, ka whakahoki a Pita, ka mea ki a ia, “Nā, kua mahue nei i a mātou ngā mea katoa, kua aru nei i a koe, he aha rā mā mātou?”
MAT 19:28 Ka kī a Īhu ki a rātou, “He pono tāku e mea nei ki a koutou, ko koutou i aru nei i ahau, kia taea te whānautanga houtanga, te wā e noho ai te Tama a te tangata ki runga ki te torōna o tōna korōria, ka noho anō koutou ki runga ki ētahi torōna kotahi tekau mā rua, ki te whakawā i ngā iwi kotahi tekau mā rua o Īharaira.
MAT 19:29 Ā, ki te mea kua mahue i tētahi he whare, he tēina, he tuāhine rānei, he pāpā, he whaea, he tamariki, he whenua, i tōna whakaaro ki tōku ingoa, ka tātakirau ngā mea e riro i a ia, ā, ka whiwhi ia ki te ora tonu.
MAT 19:30 He tokomaha ia ō mua e waiho ki muri; ko ō muri ki mua.”
MAT 20:1 “He rite hoki te rangatiratanga o te rangi ki tētahi rangatira whare, i haere i te atatū ki te kōrero kaimahi mō tāna māra wāina.
MAT 20:2 Ā, nō ka oti te whakarite ki ngā kaimahi kia kotahi rā he pene, tonoa ana rātou e ia ki tāna māra wāina.
MAT 20:3 “Ā, ka haere atu ia i te toru o ngā hāora, ka kite i ētahi atu e tū māngere ana i te kāinga hokohoko,
MAT 20:4 ka mea ki a rātou, ‘Haere hoki koutou ki te māra wāina, ā, ka hoatu e ahau ki a koutou te mea e tika ana.’ Nā, haere ana rātou.
MAT 20:5 “I haere anō ia i te ono, i te iwa o ngā hāora, ā, pērā ana anō.
MAT 20:6 I te tekau mā tahi o ngā hāora ka haere atu anō ia, ka kite i ētahi atu e tū ana, ka mea ki a rātou, ‘He aha tā koutou e tū māngere i konei i te rā roa nei?’
MAT 20:7 Ka mea rātou ki a ia, ‘Nō te mea rā kāhore he tangata i kōrero ki a mātou ki te mahi.’ Ka mea ia ki a rātou, ‘Haere anō koutou ki te māra wāina.’
MAT 20:8 “Ā, nō te ahiahi ka mea te rangatira o te māra wāina ki tāna kaiwhakahauhau, ‘Karangatia ngā kaimahi, utua hoki rātou, hei ō muri tīmata ai puta noa ki ō mua.’
MAT 20:9 “Ā, nō te taenga mai o te hunga i kōrerotia i te tekau mā tahi o ngā hāora, kotahi te pene i riro i tētahi, i tētahi.
MAT 20:10 Ka tae anō ō mua, hua noa rātou tērā atu te mea e riro i a rātou; heoi, kotahi anō te pene i riro i a rātou.
MAT 20:11 Ā, nō ka riro i a rātou, ka amuamu ki taua rangatira whare,
MAT 20:12 ka mea, ‘Kotahi te hāora i mahi ai ēnei ō muri, ā, ka oti rātou te whakarite ki a mātou, ki te hunga i pēhia nei e te taimaha e te tīkākātanga o te rā.’
MAT 20:13 “Ā, ka whakahoki ia, ka mea ki tētahi o rātou, ‘E hoa, kāhore āku hē ki a koe; kīhai koe i whakarite ki ahau me pene?
MAT 20:14 Tangohia tāu, haere. E pai ana ahau kia rite ki tāu te mea e hoatu ki tēnei ō muri.
MAT 20:15 Ehara ianei i te tika kia meatia e ahau tāku e pai ai ki āku mea? He kino oti tōu kanohi nō te mea he pai ahau?’
MAT 20:16 “Heoi, ko ō muri e meinga ki mua, ko ō mua ki muri; he tokomaha hoki e karangatia, he ruarua ia e whiriwhiria.”
MAT 20:17 Ā, i a Īhu e haere ana ki Hiruhārama, i a rātou i te ara, ka kawea e ia āna ākonga kotahi tekau mā rua ki tahaki, ā, ka mea ki a rātou,
MAT 20:18 “Nā, e haere ana tēnei tātou ki Hiruhārama; ā, ka tukua te Tama a te tangata ki ngā tohunga nui, ki ngā karaipi, ka kīia ia e rātou kia mate,
MAT 20:19 ka tukua ia ki ngā tauiwi kia tāwaia, kia whiua, kia rīpekatia; ā, i te toru o ngā rā ka whakaarahia ake.”
MAT 20:20 Me i reira ka tae ki a ia te whaea o ngā tama a Heperi, rātou ko āna tama, ā, ka koropiko, ka īnoi ki tētahi mea i a ia.
MAT 20:21 Nā, ka mea ia ki a ia, “He hiahia aha tōu?” Ka mea ia ki a ia, “Whakaaetia ēnei tama tokorua āku, kia noho, tētahi ki tōu matau, tētahi ki tōu mauī, i tōu rangatiratanga.”
MAT 20:22 Otirā, ka whakahoki a Īhu, ka mea, “Kāhore kōrua e mōhio ki tā kōrua e īnoi nei. E āhei rānei kōrua te inu i te kapu meāke inumia e ahau, kia iriiria hoki ki te iriiringa ka iriiria nei ahau?” Ka mea rāua ki a ia, “E āhei anō.”
MAT 20:23 Ka mea ia ki a rāua, “E inu anō kōrua i tāku kapu, e iriiria ki te iriiringa e iriiria ai ahau; ko te noho ia ki tōku matau, ki tōku mauī, ehara i ahau māna e hoatu, engari, ka riro i te hunga i whakaritea nei e tōku Matua mō rātou.”
MAT 20:24 Ā, nō ka rongo te tekau, ka riri ki aua hoa tokorua.
MAT 20:25 Otirā, ka karangatia rātou e Īhu, ā, ka mea ia, “E mātau ana koutou, ko ngā kāwana o ngā tauiwi hei whakatupu rangatira ki a rātou, ko ngā tāngata rarahi hei akiaki i a rātou.
MAT 20:26 E kore e pērā i roto i a koutou; engari, ki te mea tētahi kia tupu ia hei tangata nui i roto i a koutou, me whakatupu kaimahi ia mā koutou.
MAT 20:27 Ā, ki te mea tētahi kia tupu ko ia hei tino tangata i roto i a koutou, me whakatupu pononga ia mā koutou;
MAT 20:28 pērā i te Tama a te tangata, kīhai nei i haere mai kia mahia he mea māna, engari, kia mahi ia, ā, kia tuku i a ia kia mate hei whakautu mō ngā tāngata tokomaha.”
MAT 20:29 Ā, i a rātou e haere atu ana i Heriko, he rahi te hui i aru i a ia.
MAT 20:30 Nā, tokorua ngā matapō e noho ana i te taha o te ara; ka rongo rāua ko Īhu tērā e haere atu ana, ka karanga ake, ka mea, “Kia aroha ki a māua, e te Ariki, e te Tama a Rāwiri.”
MAT 20:31 Ā, i rīria rāua e te mano kia noho puku; heoi rahi ake tā rāua karanga, ka mea, “Kia aroha ki a māua, e te Ariki, e te Tama a Rāwiri.”
MAT 20:32 Nā, ka tū a Īhu, ka karanga i a rāua, ka mea, “Kia ahatia kōrua e ahau?”
MAT 20:33 Ka mea rāua ki a ia, “E te Ariki, kia kite ō māua kanohi!”
MAT 20:34 Nā, ka aroha a Īhu, ka pā ki ō rāua kanohi; ā, titiro tonu ake ō rāua kanohi, ā, aru ana rāua i a ia.
MAT 21:1 Ā, nō ka tata rātou ki Hiruhārama, ka tae ki Petapaki, ki Maunga Ōriwa, ka tonoa atu e Īhu ngā ākonga tokorua,
MAT 21:2 ka mea ia ki a rāua “Haere ki te kāinga e anga mai ana ki a kōrua; nā, ka kite tonu kōrua i tētahi kāihe e here ana me tāna kūao; wetekia, ka ārahi mai ki ahau.
MAT 21:3 Ā, ki te whai kupu tētahi tangata ki a kōrua, kī atu, ‘E mea ana te Ariki ki a rāua māna’; nā, ka tukua tonutia mai rāua e ia.”
MAT 21:4 I meinga tēnei katoa hei whakarite mō te kupu a te poropiti, i mea ai:
MAT 21:5 “Mea atu ki te tamāhine o Hiona, ‘Nā, ko tōu kīngi e haere mai nā ki a koe, he ngākau māhaki tōna, e noho ana i runga i te kāihe, i te kūao hoki, i te tama a te kāihe.’ ”
MAT 21:6 Nā, haere ana ngā ākonga, meatia ana tā Īhu i mea ai ki a rāua:
MAT 21:7 ārahina mai ana te kāihe me te kūao, whārikitia ana ki runga ō rāua kākahu, ā, noho ana ia ki runga.
MAT 21:8 Ā, he nui rawa te hui ki te whāriki i ō rātou kākahu ki te ara; ko ētahi i tapahi manga mai i ngā rākau, ā, whārikitia ana ki te ara.
MAT 21:9 Ko ngā mano i haere i mua, me te hunga i haere i muri, kei te karanga, kei te mea, “Ohana ki te Tama a Rāwiri! Ka whakapaingia tēnei e haere mai nei i runga i te ingoa o te Ariki! Ohana i runga rawa!”
MAT 21:10 Ā, nō ka uru ia ki Hiruhārama, ka oho katoa te pā, ka mea, “Ko wai tēnei?”
MAT 21:11 Ka mea te mano, “Ko Īhu tēnei, ko te poropiti o Nahareta o Karirī.”
MAT 21:12 Ā, ka tomo a Īhu ki te temepara o te Atua, nā, peia katoatia ana e ia te hunga e hoko mai ana, e hoko atu ana i roto i te temepara, turakina ake ngā tēpu a ngā kaiwhakawhitiwhiti moni, me ngā nohoanga o te hunga hoko kūkupa.
MAT 21:13 Ā, ka mea ki a rātou, “Kua oti te tuhituhi, ‘Ka kīia tōku whare he whare īnoi’; heoi, kua oti nei te mea e koutou hei ana mō ngā kaipāhua.”
MAT 21:14 Ā, i haere mai ki a ia ki roto ki te temepara ngā matapō me ngā kopa, ā, whakaorangia ake rātou e ia.
MAT 21:15 Nō te kitenga ia o ngā tohunga nui, o ngā karaipi i ngā mea whakamīharo i meatia e ia, i ngā tamariki hoki e karanga ana i te temepara, e mea ana, “Ohana ki te Tama a Rāwiri”; ka riri rātou.
MAT 21:16 Ka mea ki a ia, “E rongo ana koe ki tā ēnei e mea nei?” Ka mea a Īhu ki a rātou, “Āe rā; kīanō koutou i kite noa, ‘Pūmau tonu i a koe te whakamoemiti a te waha o ngā kōhungahunga, o ngā mea ngote ū’?”
MAT 21:17 Ā, ka mahue rātou i a ia, haere ana ia ki waho o te pā, ki Petani, ā, moe ana i reira.
MAT 21:18 Nā, i te ata, i a ia e hoki ana ki te pā, ka hiakai ia.
MAT 21:19 Ā, i tōna kitenga i tētahi piki i te taha o te ara, ka haere ia ki taua rākau, heoi, kīhai i kitea tētahi mea i runga, he rau anake. Ka mea ia ki te rākau, “Kei whai hua koe ā ake ake!” Ā, maroke tonu ake te piki.
MAT 21:20 Ā, nō te kitenga o ngā ākonga, ka mīharo, ka mea, “I pēheatia i hohoro ai te maroke o te piki nei?”
MAT 21:21 Nā, ka whakahoki a Īhu, ka mea ki a rātou, “He pono tāku e mea nei ki a koutou, me he whakapono tō koutou, kāhore i ruarua te whakaaro, e kore e meatia e koutou ko tēnei anake i meatia nei ki te piki, engari, ahakoa mea noa koutou ki tēnei maunga, ‘Kia rangā atu koe, kia whakatakā ki te moana’; ka meatia.
MAT 21:22 Ko ngā mea katoa hoki e tono ai koutou ina īnoi, ki te whakapono, ka riro i a koutou.”
MAT 21:23 Ā, ka tae ia ki roto ki te temepara, ka haere mai ngā tohunga nui me ngā kaumātua o te iwi, i a ia anō e ako ana, ā, ka mea, “Tēnā koa te mana i meatia ai ēnei mea e koe? Nā wai hoatu tēnei mana ki a koe?”
MAT 21:24 Nā, ka whakahoki a Īhu, ka mea ki a rātou, “Māku e ui ki a koutou kia kotahi kupu, ki te kōrerotia e koutou ki ahau, māku hoki e kōrero ki a koutou te mana i mea ai ahau i ēnei mea.
MAT 21:25 Ko te iriiringa a Hoani, nō hea koia? Nō te rangi, nō ngā tāngata rānei?” Ā, ka kōrerorero rātou ki a rātou anō, ka mea, “Ki te mea tātou, ‘Nō te rangi,’ e mea mai ia ki a tātou, ‘Ha, he aha koutou tē whakapono ai ki a ia?’
MAT 21:26 Ā, ki te mea tātou, ‘Nō ngā tāngata’– ka wehi tātou i te mano; ki tā rātou katoa hoki he poropiti a Hoani.”
MAT 21:27 Nā, ka whakahoki rātou ki a Īhu, ka mea, “Kāhore mātou e mōhio.” Nā, ko tāna meatanga ki a rātou, “E kore anō e kōrerotia e ahau ki a koutou te mana i mea ai ahau i ēnei mea.”
MAT 21:28 “Nā, e pēhea ana tō koutou whakaaro? Tokorua ngā tama a tētahi tangata; ā, ka haere ia ki tō mua, ka mea, ‘E tama, haere ki te mahi āianei ki tāku māra wāina.’
MAT 21:29 Nā, ka whakahoki ia, ka mea, ‘Kāhore ahau e pai’; otirā, i muri iho ka puta kē tōna whakaaro, ā, haere ana.
MAT 21:30 Ā, ka haere mai ia ki te tuarua, ka pērā anō tāna kupu. Nō, ka whakahoki tērā, ka mea, ‘E kara, ka haere ahau’; ā, kīhai i tae.
MAT 21:31 Ko wai o taua tokorua i mea i tā tōna matua i pai ai?” Ka mea rātou ki a ia, “Ko tō mua.” Ka mea a Īhu ki a rātou, “He pono tāku e mea nei ki a koutou, ko ngā pupirikana me ngā wāhine kairau e tika ana i mua i a koutou ki te rangatiratanga o te Atua.
MAT 21:32 I haere hoki a Hoani ki a koutou rā te ara o te tika, ā, kīhai koutou i whakapono ki a ia; tēnā ko ngā pupirikana me ngā wāhine kairau i whakapono ki a ia; ko koutou ia, i tō koutou kitenga, kīhai i puta kē ō koutou whakaaro i muri, kīhai i whakapono ki a ia.”
MAT 21:33 “Whakarongo ki tētahi atu kupu whakarite. Tērā tētahi rangatira whare i whakatō i te māra wāina, ā, taiepatia ana, ā taka noa, keria ana e ia te takahanga wāina i roto, hangā ana tētahi whare tiketike, tukua ana e ia ki ngā kaimahi, ā, haere ana ia ki tawhiti.
MAT 21:34 Ā, nō ka tata te pō hua, ka tonoa e ia āna pononga ki ngā kaimahi, ki te tiki i ōna hua.
MAT 21:35 “Nā, ka mau ngā kaimahi ki āna pononga, whiua ana tētahi, whakamatea ana tētahi, ā, ākina ana tētahi ki te kōhatu.
MAT 21:36 Nā, ka tonoa anō e ia ētahi atu pononga, he tokomaha atu i ō mua; heoi, i pērātia anō rātou.
MAT 21:37 Nā, muri rawa iho, ka tono ia i tāna tama ki a rātou, i mea ia, ‘E hopohopo rātou ki tāku tama.’
MAT 21:38 “Nō te kitenga ia o ngā kaimahi i te tama, ka mea ki a rātou anō, ‘Ko te tangata tēnei mōna te kāinga; tēnā, tātou ka whakamate i a ia, ka tango i tōna kāinga.’
MAT 21:39 Nā, ka mau rātou ki a ia, maka ana ki waho o te māra wāina, ā, whakamatea iho.
MAT 21:40 “Nā, ina tae te rangatira o te māra wāina, ka pēheatia e ia aua kaimahi?”
MAT 21:41 Ka mea rātou ki a ia, “Pōuriuri ana āianei tāna whakangaro i taua hunga whakarihariha; ā, ka tukua te māra wāina ki ētahi atu kaimahi, ki te hunga e tukua ai ki a ia ngā hua i ngā pō hua.”
MAT 21:42 Ka mea a Īhu ki a rātou, “Kīanō koutou i kite noa i roto i ngā karaipiture? ‘Ko te kōhatu i kapea e ngā kaihanga, kua meinga tēnei hei upoko mō te kokonga; nā te Ariki tēnei, he mea whakamīharo hoki ki ō tātou kanohi!’
MAT 21:43 “Koia, ahau ka mea nei ki a koutou, Ka tangohia te rangatiratanga o te Atua i a koutou, ā, ka hoatu ki tētahi iwi, e puta ai ngā hua o taua rangatiratanga.
MAT 21:44 Ko te tangata e hinga ki runga ki tēnei kōhatu, nā, mongamonga ana ia; ki te taka ia taua kōhatu ki runga ki tētahi, nā, ngotangota noa ia me he puehu.”
MAT 21:45 Ā, ka rongo ngā tohunga nui me ngā Parihi ki āna kupu whakarite, ka mōhio mō rātou āna kōrero.
MAT 21:46 Nā, i a rātou e whai ana kia hopukia ia, ka wehi i te mano, ki tā rātou hoki he poropiti ia.
MAT 22:1 Ā, ka oho ake a Īhu, ka kōrero kupu whakarite anō ki a rātou, ka mea,
MAT 22:2 “Ka rite te rangatiratanga o te rangi ki tētahi kīngi, i whakatakoto mārena mō tāna tama.
MAT 22:3 Ā, tonoa ana āna pononga, hei karanga i te hunga i kōrerotia ki te mārena; heoi, kīhai rātou i pai ki te haere.
MAT 22:4 “Ka tono anō ia i ērā atu pononga, ka mea, ‘Mea atu ki te hunga i kōrerotia: “Nā, kua rite tāku hākari, kua oti āku pūru, āku mea mōmona te patu, ā, kua rite katoa ngā mea; haere mai ki te mārena.” ’
MAT 22:5 “Otirā, i paopaongia e rātou, haere ana ko tētahi ki tāna māra, ko tētahi ki tāna hokohoko.
MAT 22:6 Nā, hopukina ana āna pononga e ngā mea i mahue, tūkinotia ana rātou, ā, whakamatea iho.
MAT 22:7 Otiia, i riri te kīngi; ā, tonoa atu ana āna taua, whakangaromia ana taua hunga kōhuru, tahuna iho tō rātou pā.
MAT 22:8 “Kātahi, ia ka mea ki āna pononga, ‘E rite ana te mārena, ko te hunga ia i karangatia kīhai i pai.
MAT 22:9 Nā, haere koutou ki ngā pekanga o ngā ara, ā, tonoa mai ki te mārena te hunga katoa e kite ai koutou.’
MAT 22:10 Nā, ka haere aua pononga ki ngā ara, ā, huihuia katoatia ana te hunga i kitea e rātou, āna pai, āna kino; nā, kikī ana te mārena i ngā manuhiri.
MAT 22:11 “Otiia, nō te tapokoranga o te kīngi kia kite i ngā manuhiri, ka kitea e ia i reira he tangata kāhore nei ōna kākahu mārena;
MAT 22:12 ā, ka mea ki a ia, ‘E hoa, he aha koe i tomo mai ai ki konei kāhore nei ōu kahu mārena?’ Heoi, kīhai ia i kuihi.
MAT 22:13 “Nā, ka mea te kīngi ki ngā kaimahi, ‘Herea ōna ringa, ōna waewae, kawea atu, makā ki te pōuri i waho rawa; ko te wāhi tērā o te tangi, o te tetēā o ngā niho.’
MAT 22:14 “He tokomaha hoki e karangatia, he ruarua ia e whiriwhiria.”
MAT 22:15 Me i reira ka haere ngā Parihi, ka rūnanga ki te pēhea e mau ai tētahi kupu āna.
MAT 22:16 Ā, ka tonoa ki a ia ā rātou ākonga me ngā tāngata piri ki a Herora, hei mea, “E te Kaiwhakaako, e mātau ana mātou he pono koe, e whakaako ana koe i te ara a te Atua i runga i te pono, e kore anō tā te tangata, e whakaaroa e koe; e kore nei hoki koe e titiro ki te kanohi tangata.
MAT 22:17 Tēnā, kōrerotia ki a mātou, e pēhea ana tōu whakaaro? He mea tika rānei te hoatu takoha ki a Hīhā, kāhore rānei?”
MAT 22:18 Otiia, i mōhio a Īhu ki tō rātou whakaaro kino, ā, ka mea, “He aha tā koutou e whakamātautau nā i ahau, e te hunga tinihanga?
MAT 22:19 Tēnā koa, kia kite ahau i te moni i takoha.” Ā, mauria mai ana e rātou ki a ia he pene.
MAT 22:20 Nā, ka mea ia ki a rātou, “Nō wai tēnei āhua me te tuhituhinga?”
MAT 22:21 Ka mea rātou ki a ia, “Nō Hīhā.” Kātahi ia ka mea ki a rātou, “Hoatu ki a Hīhā, ngā mea a Hīhā, ki te Atua anō ngā mea a te Atua.”
MAT 22:22 Ka rongo rātou, ka mīharo; ā, mahue ake ia i a rātou, ā, haere ana rātou.
MAT 22:23 I taua rā ka haere mai ki a ia ngā Haruki, e mea nei kāhore he aranga, ka ui ki a ia,
MAT 22:24 ka mea, “E te Kaiwhakaako, i mea a Mohi, ki te mate te tangata, ā, kāhore āna tamariki, mā tōna teina e mārena tāna wahine, e whakatupu ake he uri mō tōna tuakana.
MAT 22:25 Nā, tokowhitu tētahi whānau i a mātou, he tuākana, he tēina; te mārenatanga o te tuatahi, ka mate, ā, hore ōna uri, waiho iho tāna wahine mā tōna teina.
MAT 22:26 Me te tuarua anō, me te tuatoru, puta noa i te tuawhitu.
MAT 22:27 Ā muri iho i a rātou katoa, ka mate te wahine.
MAT 22:28 Nā, i te aranga, mā wai o te tokowhitu te wahine? I a rātou katoa nei hoki ia.”
MAT 22:29 Nā, ka whakahoki a Īhu, ka mea ki a rātou, “E hē ana koutou, tē mōhio ki ngā karaipiture, ki te kaha anō o te Atua.
MAT 22:30 I te aranga hoki e kore rātou e mārena, e kore anō e hoatu kia mārenatia, engari, ka rite ki ngā anahera a te Atua i te rangi.
MAT 22:31 Nā, ko te aranga o te hunga mate, kāhore anō koutou i kite i tā te Atua i kōrero ai ki a koutou, i mea ai,
MAT 22:32 ‘Ko ahau te Atua o Āperahama, te Atua o Īhaka, te Atua o Hākopa’? Ehara te Atua i te Atua nō te hunga mate, engari, nō te hunga ora.”
MAT 22:33 Ā, nō ka rongo te mano, ka mīharo ki tāna ako.
MAT 22:34 Nō te rongonga ia o ngā Parihi, kua kopi i a ia te māngai o ngā Haruki, ka whakamine tahi rātou.
MAT 22:35 Nā, ka ui tētahi o rātou, he kaiako i te ture, ka whakamātautau i a ia, ka mea,
MAT 22:36 “E te Kaiwhakaako, ko tēhea te kupu nui o te ture?”
MAT 22:37 Ka mea a Īhu ki a ia, “ ‘Kia whakapaua tōu ngākau, tōu wairua, tōu hinengaro, ki te aroha ki te Ariki, ki tōu Atua.’
MAT 22:38 Ko te tuatahi tēnei, ko te kupu nui.
MAT 22:39 He rite anō te tuarua ki tēnei, ‘Kia aroha koe ki tōu hoa tata, ānō ko koe.’
MAT 22:40 Kei runga i ēnei kupu e rua e iri ana te ture me ngā poropiti.”
MAT 22:41 Ā, i ngā Parihi e noho huihui ana, ka ui a Īhu ki a rātou,
MAT 22:42 ka mea, “He pēhea ō koutou whakaaro ki a te Karaiti? Nā wai ia tama?” Ka mea rātou ki a ia, “Nā Rāwiri.”
MAT 22:43 Ka mea ia ki a rātou, “He aha rā a Rāwiri, i a ia e nohoia ana e te Wairua, i karanga ai i a ia he Ariki? I mea hoki ia,
MAT 22:44 ‘I mea te Ariki ki tōku Ariki: “Hei tōku matau koe noho ai, kia meinga rā anō e ahau ōu hoariri hei tūranga waewae mōu.” ’
MAT 22:45 Nā, ka kīia nei ia e Rāwiri he Ariki, he pēhea i tama ai ki a ia?”
MAT 22:46 Ā, hore he tangata i āhei te whakahoki kupu ki a ia, kīhai rawa anō tētahi i māia ki te ui ki a ia i taua rā iho anō.
MAT 23:1 Me i reira ka kōrero a Īhu ki te mano, ki āna ākonga hoki,
MAT 23:2 ka mea: “Kei te nohoanga o Mohi ngā karaipi rātou ko ngā Parihi e noho ana;
MAT 23:3 ko ngā mea katoa e mea ai rātou hei pupuri mā koutou, puritia, mahia; kei rite ia ā koutou mahi ki ā rātou mahi; ko tā rātou hoki he kōrero, kāhore he mahi.
MAT 23:4 E hereherea ana hoki e rātou ngā wahanga taimaha, he uaua me ka pīkaua, ā, whakawahā iho ki runga ki ngā pokohiwi o te tangata; heoi, kāhore rātou e pai kia whakakorikoria ki tētahi o ō rātou maihao.
MAT 23:5 “Ko ā rātou mahi katoa e meatia ana hei mātakitaki mā te tangata; e whakawhānuitia ana e rātou ā rātou pairakere; e whakanuia ana anō ngā tāniko o ō rātou kākahu.
MAT 23:6 Ko tā rātou e rawe ai ko ngā nohoanga rangatira i ngā hākari, me ngā nohoanga rangatira i ngā whare karakia,
MAT 23:7 me ngā ohatanga i ngā kāinga hokohoko, ā, kia karangatia e te tangata, ‘E Rapi.’
MAT 23:8 “Otiia, aua koutou e karangatia, ‘E Rapi,’ kotahi hoki tō koutou kaiwhakaako; ā, he tuākana, he tēina, koutou katoa.
MAT 23:9 Kaua anō tētahi e kīia hei matua mō koutou i runga i te whenua; kotahi hoki tō koutou Matua, ko tērā i te rangi.
MAT 23:10 Kaua anō koutou e kīia he kaiārahi, kotahi anō tō koutou kaiārahi, ko te Karaiti.
MAT 23:11 Ko te mea nui rawa hoki o koutou, hei kaimahi ia mā koutou.
MAT 23:12 Ki te whakahira hoki tētahi i a ia, ka whakaititia, ā, ki te whakaiti tētahi i a ia, ka whakahirangia.”
MAT 23:13 “Auē te mate mō koutou, e ngā karaipi, e ngā Parihi, e te hunga tinihanga! E tūtakina ana hoki e koutou te rangatiratanga o te rangi ki ngā tāngata. Kāhore koutou e tomo, kāhore anō e tukua te hunga e tomo ana kia tapoko.
MAT 23:14 Auē te mate mō koutou, e ngā karaipi, e ngā Parihi, e te hunga tinihanga! Nō te mea, ka pau i a koutou ngā whare o ngā pouaru, ā, e māminga ana ki te īnoi roa; mō reira he nui rawa te hē e tau ki a koutou.
MAT 23:15 “Auē te mate mō koutou, e ngā karaipi, e ngā Parihi, e te hunga tinihanga! E taiāwhiotia ana hoki e koutou te moana me te whenua, kia tahuri mai ai tētahi hei porohiraiti, ā, nō ka riro mai, ka meinga ia e koutou hei tamaiti mō Kehena, kino noa atu i a koutou.
MAT 23:16 “Auē te mate mō koutou, e ngā kaiārahi matapō, e mea nei, ‘Ki te oatitia te whare tapu e tētahi, he mea noa anō; otirā, ki te oatitia e tētahi te kōura o te whare tapu, ka mau tāna!’
MAT 23:17 E ngā kūware, e ngā matapō, ko tēhea te mea nui, ko te kōura rānei, ko te whare tapu rānei i tapu ai te kōura?
MAT 23:18 “Me tēnei, ‘Ki te oatitia e tētahi te āta, he mea noa anō; otirā, ki te oatitia te whakahere i runga i te āta, ka mau tāna.’
MAT 23:19 E ngā kūware, e ngā matapō, ko tēhea te mea nui, ko te whakahere, ko te āta rānei, i tapu ai te whakahere?
MAT 23:20 Nā, ki te oatitia e tētahi te āta, e oatitia ana e ia tērā mea, me ngā mea katoa i runga.
MAT 23:21 Ki te oatitia e tētahi te whare tapu, e oatitia ana e ia tērā mea, me te kainoho o roto.
MAT 23:22 Ki te oatitia hoki e tētahi te rangi, e oatitia ana e ia te torōna o te Atua, me te kainoho o runga.
MAT 23:23 “Auē te mate mō koutou, e ngā karaipi, e ngā Parihi, e te hunga tinihanga! E hoatu ana e koutou te wāhi whakatekau o te miniti, o te anihi, o te kumine, ā, kapea ake ngā mea nunui o te ture, te whakawā, te tohu tangata, te whakapono; he tika kia meatia e koutou ēnei, engari kaua tērā rā e kapea.
MAT 23:24 E ngā kaiārahi matapō, e tātari nei i te waeroa, ā, horomia ake te kāmera.
MAT 23:25 “Auē te mate mō koutou e ngā karaipi, e ngā Parihi, e te hunga tinihanga! E horoi nei i waho o te kapu, o te pereti, ko roto ia kī tonu i te pāhua, i te taikaha.
MAT 23:26 E te Parihi matapō, mātua horoia a roto o te kapu, o te pereti, kia mā ai hoki a waho.
MAT 23:27 “Auē te mate mō koutou, e ngā karaipi, e ngā Parihi, e te hunga tinihanga! He rite hoki koutou ki ngā urupā kua oti te pani ki te paru mā, ko waho he ātaahua ki te titiro atu, ko roto ia kī tonu i ngā kōiwi tūpāpaku, i ngā mea poke katoa.
MAT 23:28 He pēnā hoki koutou, ko waho e tika ana ki tā te tangata titiro, ko roto ia e kī ana i te tinihanga, i te kino.”
MAT 23:29 “Auē te mate mō koutou, e ngā karaipi, e ngā Parihi, e te hunga tinihanga! Ko koutou nei hoki hei hanga i ngā tanumanga o ngā poropiti, hei whakapaipai i ngā urupā o ngā tāngata tika,
MAT 23:30 me te kī anō, ‘Me i ngā rā tātou o ō tātou mātua, kīhai tātou i uru tahi me rātou ki te whakaheke i te toto o ngā poropiti.’
MAT 23:31 He whakaatu tērā nā koutou, ko koutou ngā tamariki a te hunga nāna i patu ngā poropiti.
MAT 23:32 Tēnā rā, kia kī i a koutou te mēhua a ō koutou mātua.
MAT 23:33 E ngā neke, e te uri nākahi, me aha ka rere ai koutou i te kupu tuku ki te rēinga?
MAT 23:34 “Nā, ka tonoa atu e ahau ki a koutou ngā poropiti, ngā tāngata mahara, ngā karaipi; ko ētahi o rātou e whakamatea e koutou, e rīpekatia; ko ētahi e whiua i roto i ō koutou whare karakia, e whāia hoki i tētahi pā ki tētahi pā.
MAT 23:35 Ā, ka utaina ki a koutou ngā toto katoa o te hunga tika i whakahekea ki te whenua, nō te toto o Āpera, o te tangata tika tae iho ki te toto o Hakaraia, o te tama a Parakia, i kōhurutia e koutou i waenganui o te whare tapu, o te āta.
MAT 23:36 He pono tāku e mea nei ki a koutou, tērā e pā ēnei mea katoa ki tēnei whakatupuranga.”
MAT 23:37 “E Hiruhārama, e Hiruhārama, e whakamate nei i ngā poropiti, e āki nei ki te kāmaka i te hunga e tonoa ana ki a koe, anō te tini o āku meatanga kia whakaminea āu tamariki, kia pērātia me te heihei e whakamine nei i āna pī ki raro i ōna parirau, ā, kīhai koutou i pai!
MAT 23:38 Nā, ka mahue atu ki a koutou tō koutou whare kia takoto noa ana.
MAT 23:39 Ko tāku kupu hoki tēnei ki a koutou, e kore koutou e kite i ahau ā mua ake nei, kia mea rā anō koutou, ‘Ka whakapaingia ia e haere mai ana i runga i te ingoa o te Ariki.’ ”
MAT 24:1 Ā, ka puta atu a Īhu ki waho o te temepara, ka haere, nā, ka tae mai āna ākonga ki a ia kia whakakitea ki a ia ngā whare i hangā mō te temepara.
MAT 24:2 Otirā, ka mea ia ki a rātou, “Kāhore ianei koutou e kite i ēnei mea katoa? He pono tāku e mea nei ki a koutou, e kore e toe ki konei tētahi kōhatu ki runga ake i tētahi kōhatu, engari ka whakahoroa katoatia.”
MAT 24:3 Ā, i a ia e noho ana i runga i Maunga Ōriwa, ka haere puku mai ngā ākonga ki a ia, ka mea, “Kōrerotia ki a mātou, ko āhea ēnei mea? He aha te tohu o tōu haerenga mai, o te mutunga hoki o te ao?”
MAT 24:4 Nā, ka whakahoki a Īhu, ka mea ki a rātou, “Kia tūpato kei māmingatia koutou e te tangata.
MAT 24:5 He tokomaha hoki e haere mai i runga i tōku ingoa, e mea, ‘Ko te Karaiti ahau,’ ā, he tokomaha e whakapōhēhētia.
MAT 24:6 Ā, tērā koutou e rongo ki ngā pakanga, ki ngā hau kōrero pakanga; kia tūpato kei ohorere koutou; tā te mea kua rite kia puta ēnei mea katoa, taihoa ia te mutunga.
MAT 24:7 E whakatika hoki tētahi iwi ki tētahi iwi, tētahi rangatiratanga ki tētahi rangatiratanga; ā, e puta ngā pō matekai, ngā mate urutā, me ngā rū, ki ngā tini wāhi.
MAT 24:8 Otirā, ko te tīmatanga kau ēnei katoa o ngā mamae.
MAT 24:9 “Ko reira koutou tukua ai kia tūkinotia, ā, e whakamatea koutou; ā, e kino hoki ngā iwi katoa ki a koutou, he whakaaro ki tōku ingoa.
MAT 24:10 Ā, he tokomaha e hē, ā, ka tuku tētahi i tētahi, ka kino anō tētahi ki tētahi.
MAT 24:11 He tokomaha anō ngā poropiti teka e whakatika, ā, he tokomaha e whakapōhēhētia e rātou.
MAT 24:12 Ā, i te kino ka hua, ka mātoke haere te aroha o te tini tāngata.
MAT 24:13 Ko te tangata ia e ū ana, ā, taea noatia te mutunga, ka ora ia.
MAT 24:14 Ā, e kauwhautia tēnei rongopai o te rangatiratanga puta noa i te ao, hei mea whakaatu ki ngā iwi katoa; ā, ko reira puta ai te mutunga.”
MAT 24:15 “Ā, e kite koutou i te mea whakarihariha, i te mea whakangaro, i kōrerotia ai e Raniera poropiti, i a ia e tū ana i te wāhi tapu.” (Kia mātau te kaititiro pukapuka.)
MAT 24:16 Ko reira kia rere te hunga i Hūria ki ngā maunga;
MAT 24:17 ko te tangata i runga i te whare kei heke iho ki te tiki mea i roto i tōna whare.
MAT 24:18 Kauaka anō te tangata i te māra e hoki ki te tiki i ōna kākahu.
MAT 24:19 Auē te mate mō te hunga e hapū ana, mō ngā mea hoki e whāngai ana ki te ū, i aua rā!
MAT 24:20 Me īnoi koutou kei rokohanga koutou e te whati i te hōtoke, i te hāpati rānei.
MAT 24:21 Kei taua wā, hoki te whiu nui, kāhore ōna rite mai o te tīmatanga o te ao ā mohoa noa nei, e kore anō e pērā ā mua ake nei.
MAT 24:22 Ā, me i kāhore aua rā i poroa i waenga, hore he kikokiko e ora; otirā, ka whakaaroa te hunga i whiriwhiria, ā, ka poroa aua rā.
MAT 24:23 “Ki te mea tētahi ki a koutou i reira, ‘Nā, tēnei a te Karaiti’; nā, ‘Tērā’; aua e whakaponohia.
MAT 24:24 E whakatika hoki ngā karaiti teka, me ngā poropiti teka, ā, ka hoatu e rātou ngā tohu nunui, me ngā mea whakamīharo; ā, mehemea e taea, ka māmingatia anō te hunga i whiriwhiria.
MAT 24:25 Nā, kua kōrerotia wawetia nei e ahau ki a koutou.
MAT 24:26 “Nā, ahakoa mea rātou ki a koutou, ‘Nā, kei te koraha ia’; aua e haere atu. ‘Nā, kei ngā rūma o roto rawa’; aua e whakaponohia.
MAT 24:27 Ka rite hoki ki te uira e puta mai nei i te rāwhiti, ā, hiko tonu atu ki te uru, te haerenga mai o te Tama a te tangata.
MAT 24:28 Ko te wāhi hoki i te tūpāpaku, ko reira huihui ai ngā kāhu.”
MAT 24:29 “Ā muri tonu iho i te whakapāwera i aua rā, ‘Ka whakapōuritia te rā, e kore anō e titi te atarau, ka taka iho ngā whetū i te rangi, ā, ka ngāueue ngā mea kaha o ngā rangi.’
MAT 24:30 “Ko reira anō puta ai te tohu o te Tama a te tangata i te rangi; ā, ko reira ngā iwi katoa o te whenua tangi ai, ā, e kite rātou i te Tama a te tangata e haere mai ana i runga i ngā kapua o te rangi me te kaha, me te korōria nui.
MAT 24:31 Ā, e tonoa e ia āna anahera me te tētere tangi nui, ā, ka huihuia e rātou āna i whiriwhiri ai i ngā hau e whā, i tētahi pito o te rangi puta noa i tētahi pito.”
MAT 24:32 “Nā, kia ākona koutou e te piki ki tētahi kupu whakarite. I tōna manga e ngāwari ana anō, ā, ka puta ōna rau, ka mōhio koutou ka tata te raumati.
MAT 24:33 Waihoki ko koutou, ina kite i ēnei mea katoa, ka mātau koutou ka tata ia, kei ngā kūwaha tonu.
MAT 24:34 He pono tāku e mea nei ki a koutou, E kore rawa tēnei whakatupuranga e pahemo, kia puta katoa rā anō ēnei mea.
MAT 24:35 Ko te rangi me te whenua e pahemo, ko āku kupu ia e kore e pahemo.”
MAT 24:36 “Otirā, kāhore tētahi tangata e mōhio ki taua rā, ki taua hāora, kāhore rawa ngā anahera o te rangi, kāhore te Tama a te tangata, ko tōku Matua anake.
MAT 24:37 Ka rite hoki ki ngā rā i a Noa te haerenga mai o te Tama a te tangata.
MAT 24:38 Ka rite hoki ki tā rātou i ngā rā i mua atu o te waipuke; e kai ana, e inu ana, e mārena ana, e hoatu ana kia mārenatia, ā tae noa ki te rā i tomo ai a Noa ki roto ki te āka,
MAT 24:39 ā, kāhore rātou i mōhio, ā, pakaru noa te waipuke, ā, kāhakina ana rātou katoa; e pērā anō te haerenga mai o te Tama a te tangata.
MAT 24:40 I taua wā tokorua ki te māra; kotahi e tangohia, kotahi e waiho.
MAT 24:41 Tokorua wāhine e huri ana i te mira; kotahi e tangohia, kotahi e waiho.
MAT 24:42 “Kia mataara rāpea; e kore hoki koutou e mōhio ki te hāora e puta mai ai tō koutou Ariki.
MAT 24:43 Kia mōhio ki tēnei, me i mātau te tangata o te whare ki te mataaratanga e puta ai te tāhae, kua tautīaki ia, ā, kāhore i tukua tōna whare kia pokaia.
MAT 24:44 Nā, kia mataara hoki koutou; nō te mea ka puta mai te Tama a te tangata i te hāora e kore ai koutou e mahara.”
MAT 24:45 “Ko wai rā te pononga pono, mahara, i meinga e tōna ariki hei rangatira mō āna tāngata, hei hoatu i te kai mā rātou i te wā e tika ai?
MAT 24:46 Ka koa taua pononga ki te rokohanga e tōna ariki, ina haere mai, e pērā ana.
MAT 24:47 He pono tāku e mea nei ki a koutou, Ka meinga ia hei rangatira mō ōna taonga katoa.
MAT 24:48 Otirā, ki te mea taua pononga kino i roto i tōna ngākau, ‘Ka roa te putanga mai o tōku ariki,’
MAT 24:49 ā, ka anga, ka patu i ōna hoa pononga, ka kai, ka inu tahi me te hunga haurangi.
MAT 24:50 E tae mai te ariki o taua pononga i te rā e kore ai ia e mahara, i te hāora e kore ai ia e mōhio.
MAT 24:51 Ka hātepea pūtia ia, ka meinga he wāhi mōna i roto i te hunga tinihanga; ko te wāhi tērā o te tangi, o te tetēā o ngā niho.”
MAT 25:1 “Nā, ka rite te rangatiratanga o te rangi ki ngā wāhina kotahi tekau, i mau i ā rātou rama, ā, haere ana ki te whakatau i te tāne mārena hou.
MAT 25:2 Tokorima o rātou he maharakore, tokorima he mahara.
MAT 25:3 Ko ngā mea maharakore i mau i ā rātou rama, kīhai ia i mau hinu.
MAT 25:4 Ko te hunga mahara i mau hinu atu i roto i ā rātou ipu me ā rātou rama.
MAT 25:5 Ka whakaroa te tāne mārena hou, ka tunewha rātou katoa, ka moe.
MAT 25:6 Nā, i waenganui pō, ka pā te karanga, ‘Ē, ko te tāne mārena hou! Puta mai koutou ki te whakatau i a ia.’
MAT 25:7 “Kātahi ka ara katoa aua wāhina, ka whakapai i ā rātou rama.
MAT 25:8 Nā, ka mea te hunga maharakore ki te hunga mahara, ‘Hōmai ki a mātou tētahi wāhi o tā koutou hinu; ka pirau hoki ā mātou rama.’
MAT 25:9 Nā, ka whakahoki te hunga mahara, ka mea, ‘Kāhore! Kei kore e ranea mā mātou, mā koutou; engari, me haere koutou ki ngā kaihoko, hoko ai i tētahi mā koutou.’
MAT 25:10 “Ā, nō tō rātou haerenga atu ki te hoko, ka tae mai te tāne mārena hou; ā, tomo tahi ana me ia ki te mārena te hunga kua āta rite; ā, tūtakina ana te tatau.
MAT 25:11 Muri iho ka tae ērā wāhina, ka mea, ‘E te ariki, e te ariki, uakina ki a mātou.’
MAT 25:12 Nā, ka whakahoki ia, ka mea, ‘He pono tāku e mea nei ki a koutou, kāhore ahau e mōhio ki a koutou.’
MAT 25:13 “Kia mataara rāpea koutou, e kore hoki koutou e mōhio ki te rā, ki te hāora, e puta mai ai te Tama a te tangata.”
MAT 25:14 “Ka rite hoki ki te tangata e haere ana ki tawhiti, karangatia ana e ia āna pononga ake, ā, hoatu ana ki a rātou āna taonga.
MAT 25:15 Ki tētahi i hoatu e ia e rima taranata, ki tētahi e rua, ki tētahi kotahi; ki ia tangata, ki ia tangata, he mea whakarite ki tō rātou uaua; ā, haere ana ia.
MAT 25:16 Nā, ko te haerenga o te tangata i a ia nei ngā taranata e rima, hokohokona ana aua mea e ia, ā, riro ana i a ia e rima atu ngā taranata.
MAT 25:17 Pērā anō hoki te tangata i ngā mea e rua; e rua atu i riro i a ia.
MAT 25:18 Ko te tangata ia i te mea kotahi, haere ana, kei te keri ki te whenua, ā, hunā ana e ia te moni a tōna ariki.
MAT 25:19 “Ā, roa rawa iho, ka puta te ariki o aua pononga, ka mea kia kōrerotia āna moni e rātou ki a ia.
MAT 25:20 Ā, ko te haerenga o te tangata i a ia nei ngā taranata e rima, ka mauria mai e ia e rima atu ngā taranata, ā, ka mea, ‘E te ariki, e rima āu taranata i hōmai ai ki ahau; nā, e rima atu ngā taranata kua riro mai i ahau hei tāpiri mō ērā.’
MAT 25:21 Ka mea tōna ariki ki a ia, ‘Pai rawa, e te pononga pai, e te pononga pono; pono tāu mahi ki ngā mea ruarua māku koe e mea hei rangatira mō ngā mea maha; uru mai koe ki te hari o tōu ariki.’
MAT 25:22 “Me tērā hoki i a ia nei ngā taranata e rua, ka haere mai, ka mea, ‘E te ariki, e rua āu taranata i hōmai ai ki ahau; nā, e rua atu ngā taranata kua riro mai i ahau hei tāpiri mō ērā.’
MAT 25:23 Ka mea tōna ariki ki a ia, ‘Pai rawa, e te pononga pai, e te pononga pono; pono tonu tāu mahi ki ngā mea ruarua, māku koe e mea hei rangatira mō ngā mea maha; uru mai koe ki te hari o tōu ariki.’
MAT 25:24 “Ā, ko te haerenga mai hoki o te tangata i a ia nei te taranata kotahi, ka mea, ‘E te ariki, i mātau ahau ki a koe he tangata pakeke koe, e kokoti ana i te wāhi kīhai i ruia e koe, e kohikohi ana i te wāhi kīhai i whakatītaria e koe.
MAT 25:25 Nā, ka wehi ahau, ā, haere ana, hunā ana i tāu taranata ki te whenua; nā, tāu nā.’
MAT 25:26 “Nā, ka whakahoki tōna ariki, ka mea ki a ia, ‘Pononga kino, pononga māngere, i mātau koe e kokoti ana ahau i te wāhi kīhai i ruia e ahau, e kohikohi ana i te wāhi kīhai i whakatītaria e ahau.
MAT 25:27 Ko te mea tika hoki kia kawea e koe tāku moni ki ngā rangatira pēke moni, ā, ka tae mai ahau, ka riro mai tāku me ōna hua anō.
MAT 25:28 Ko tēnei, tangohia te taranata i a ia, hoatu ki tērā i ngā taranata kotahi tekau.
MAT 25:29 Ki te whai mea hoki tētahi, ka hoatu anō ki a ia, ā, ka maha atu āna; ā, ki te kāhore he mea a tētahi, ko āna mea ake ka tangohia i a ia.
MAT 25:30 Nā, makā te pononga huakore ki te pōuri i waho; ko te wāhi tērā o te tangi, o te tetēā o ngā niho.’ ”
MAT 25:31 “Nā, hei te taenga mai o te Tama a te tangata me tōna korōria, rātou tahi ko ngā anahera, ko reira ia noho ai ki runga ki te torōna o tōna korōria.
MAT 25:32 Ā, ka whakaminea ki tōna aroaro ngā iwi katoa; ka wehea rātou e ia ētahi i ētahi, ka pērātia me te hēpara e wehe nei i ngā hipi, i ngā koati.
MAT 25:33 Ka whakatūria e ia ngā hipi ki tōna matau, ko ngā koati ki mauī.
MAT 25:34 “Kātahi, te Kīngi ka mea ki te hunga i tōna matau, ‘Haere mai, e te hunga whakapai a tōku Matua, nohoia te rangatiratanga kua rite noa ake mō koutou nō te orokohanganga rā anō o te ao.
MAT 25:35 I hiakai hoki ahau, ā, whāngainga ana e koutou. I matewai ahau, ā, whakainumia ana e koutou; he manene ahau, ā, whakamanuhiritia ana e koutou.
MAT 25:36 I tū tahanga, ā, whakakākahuria ana e koutou; he tūroro, ā, tirotirohia ana ahau e koutou; i te whare herehere ahau, ā, haere mai ana koutou ki ahau.’
MAT 25:37 “Nā, ka whakahoki te hunga tika ki a ia, ka mea, ‘E te Ariki, nōnahea mātou i kite ai i a koe e hiakai ana, ā, whāngai ana i a koe? E mate ana rānei i te wai, ā, whakainu ana i a koe?
MAT 25:38 Nōnahea mātou i kite ai i a koe e manene ana, ā, whakamanuhiri ana i a koe? E tū tahanga ana rānei, ā, whakakākahu ana i a koe?
MAT 25:39 Nōnahea hoki mātou i kite ai i a koe e tūroro ana, i te whare herehere rānei, ā, haere ana ki a koe?’
MAT 25:40 Ko reira whakahoki ai te Kīngi, mea ai ki a rātou, ‘He pono tāku e mea nei ki a koutou, ko tā koutou i mea ai ki tētahi o āku tēina, ahakoa ki te iti rawa, he meatanga tēnā ki ahau.’
MAT 25:41 “Ko reira ia kī atu ai ki te hunga i te taha ki mauī, ‘Mawehe atu i ahau, e te hunga ka oti nei te kanga, ki te ahi kā tonu, kua kā noa ake mō te rēwera rātou ko āna anahera.
MAT 25:42 I hiakai hoki ahau, ā, kīhai i whāngainga e koutou; i mate i te wai, ā, kīhai i whakainumia e koutou.
MAT 25:43 He manene ahau, ā, kīhai i whakamanuhiritia e koutou. I tū tahanga, ā, kīhai i whakakākahuria e koutou; he tūroro ahau, i te whare herehere, ā, kīhai koutou i tirotiro i ahau.’
MAT 25:44 “Ko reira anō rātou whakahoki ai ki a ia, mea ai, ‘E te Ariki, nōnahea mātou i kite ai i a koe e hiakai ana, e matewai ana, e manene ana, e tū tahanga ana, e tūroro ana, i te whare herehere rānei, ā, kīhai i mahi mea māu?’
MAT 25:45 Ko reira whakahoki ai ia ki a rātou, mea ai, ‘He pono tāku e mea nei ki a koutou, I te mea kīhai nei i meatia e koutou ki tētahi o ngā nonohi rawa nei, inā, kīhai i meatia ki ahau.’
MAT 25:46 Nā, ko ēnei e haere ki te whiu utu hara kāhore nei ōna mutunga; ko te hunga tika ia ki te ora tonu.”
MAT 26:1 Ā, ka mutu ēnei kupu katoa a Īhu, ka mea ia ki āna ākonga,
MAT 26:2 “E mātau ana koutou kia rua ake rā ko te Kapenga, ā, ka tukua te Tama a te tangata kia rīpekatia.”
MAT 26:3 Nā, ka whakamine ngā tohunga nui, ngā karaipi, me ngā kaumātua o te iwi, ki te whare o te tohunga nui, ko Kaiapa te ingoa,
MAT 26:4 ka whakatakoto tikanga nanakia e mau ai a Īhu, e whakamatea ai.
MAT 26:5 Otirā, i mea rātou, “Kauaka i te hākari, kei ngangau te iwi.”
MAT 26:6 Nā, i a Īhu i Petani i te whare o Haimona repera,
MAT 26:7 ka haere mai tētahi wahine ki a ia me te pouaka kōhatu, kī tonu i te hinu kakara utu nui, ā, ringihia ana ki runga ki tōna mātenga, i a ia e noho ana ki te kai.
MAT 26:8 Nō te kitenga ia o āna ākonga, ka riri, ka mea, “Hei aha tēnei maumau?
MAT 26:9 He nui hoki te utu me i hokona tēnei hinu kakara, ka hoatu ki te hunga rawakore.”
MAT 26:10 Ā, i mōhio a Īhu, ka mea ki a rātou, “He aha tā koutou e whakapāwerawera i te wahine nei? He mahi pai hoki tāna i mea nei ki ahau.
MAT 26:11 Kei a koutou tonu hoki te hunga rawakore i ngā wā katoa; tēnā ko ahau e kore e noho tonu ki a koutou.
MAT 26:12 I ringihia ai hoki tēnei hinu kakara ki tōku tinana, he mea mō tōku tanumanga.
MAT 26:13 He pono tāku e mea nei ki a koutou, Ko ngā wāhi o te ao katoa e kauwhautia ai tēnei rongopai, ka kōrerotia anō tā tēnei wahine i mea ai, hei whakamahara ki a ia.”
MAT 26:14 Kātahi, ka haere tētahi o te tekau mā rua, ko Hūrā Ikariote te ingoa, ki ngā tohunga nui,
MAT 26:15 ka mea, “He aha tā koutou e pai ai kia hōmai ki ahau, ā, māku ia e tuku ki a koutou?” Ā, ka pāunatia e rātou e toru tekau hiriwa ki a ia.
MAT 26:16 Ā, nō reira mai anō ia i rapu ai i te wā pai e tukua ai ia.
MAT 26:17 Nā, i te rā tuatahi o te Taro Rēwenakore, ka haere ngā ākonga ki a Īhu, ka mea ki a ia, “Ko hea tāu e pai ai kia takā e mātou te Kapenga hei kai māu?”
MAT 26:18 Nā, ka mea ia, “Haere ki te pā, ki a mea, ka kī atu ki a ia, ‘E mea ana te Kaiwhakaako, Ka tata tōku tāima; hei a koe mātou ko āku ākonga mea ai i te Kapenga.’ ”
MAT 26:19 Ā, meatia ana e ngā ākonga tā Īhu i whakarite ai ki a rātou; takā ana e rātou te Kapenga.
MAT 26:20 Ka ahiahi, ka noho ia me te tekau mā rua.
MAT 26:21 Ā, i a rātou e kai ana, ka mea ia, “He pono tāku e mea nei ki a koutou, mā tētahi o koutou ahau e tuku.”
MAT 26:22 Ā, pōuri noa iho rātou, ka anga, ka kōrero takitahi ki a ia, “Ko ahau rānei, e te Ariki?”
MAT 26:23 Ā, ka whakahoki ia, ka mea, “Ko te tangata, e toutou tahi nei ō māua ringa ki te rīhi, māna ahau e tuku.
MAT 26:24 E haere ana hoki te Tama a te tangata, e pērā ana me te mea i tuhituhia mōna. Otiia, auē te mate mō te tangata e tukua ai te Tama a te tangata! He pai mō taua tangata me i kaua ia e whānau.”
MAT 26:25 Kātahi a Hūrā, tōna kaituku, ka oho ake, ka mea, “E te Kaiwhakaako, ko ahau rānei?” Anō rā ko ia ki a ia, “Kua kōrerotia nā e koe.”
MAT 26:26 Ā, i a rātou e kai ana, ka mau a Īhu ki te taro, ā, ka mutu te whakapai, ka whawhati. Ka hoatu ki ngā ākonga, ka mea, “Tangohia, kainga; ko tōku tinana tēnei.”
MAT 26:27 Nā, ka mau ia ki te kapu, ā, ka mutu te whakawhetai, ka hoatu ki a rātou, ka mea, “Inumia tētahi wāhi o tēnei e koutou katoa.
MAT 26:28 Ko ōku toto hoki ēnei, ko o te kawenata hou, e whakahekea ana mō te tini, hei murunga hara.
MAT 26:29 Nā, ko tāku kupu tēnei ki a koutou, e kore ahau e inu i tēnei hua o te wāina ā mua ake nei, kia taea rā anō taua rā e inumia houtia ai e tātou i te rangatiratanga o tōku Matua.”
MAT 26:30 Ā, nō ka mutu tā rātou hīmene, ka haere ki Maunga Ōriwa.
MAT 26:31 Kātahi, a Īhu ka mea ki a rātou, “Ka hē katoa koutou ki ahau i tēnei pō, kua oti hoki te tuhituhi: ‘Ka patua e ahau te hēpara, ā, ka whakamararatia ngā hipi o te kāhui.’
MAT 26:32 Otirā, muri iho i tōku aranga, ka haere ahau i mua i a koutou ki Karirī.”
MAT 26:33 Nā, ka whakahoki a Pita, ka mea ki a ia, “Ahakoa hē noa te katoa ki a koe, e kore rawa ahau e hē.”
MAT 26:34 Ka mea a Īhu ki a ia, “He pono tāku e mea nei ki a koe, ko tēnei pō anō, i te mea kāhore anō i tangi noa te tīkaokao, ka toru āu whakakāhoretanga i ahau.”
MAT 26:35 Ka mea a Pita ki a ia, “Ahakoa kua takoto te tikanga kia mate tahi tāua, e kore ahau e whakakāhore i a koe.” I pērā anō te kī a ngā ākonga katoa.
MAT 26:36 Kātahi, ka haere rātou ko Īhu ki tētahi wāhi, tōna ingoa nei ko Kehemane, ā, ka mea ia ki āna ākonga, “Hei konei koutou noho ai, kia haere ahau ki kōina īnoi ai.”
MAT 26:37 Nā, ka mau ia ki a Pita rātou ko ngā tama tokorua a Heperi, ā, ka tīmata te pōuri, te tūmatatenga.
MAT 26:38 Nā, ka mea ia ki a rātou, “Kī tonu tōku wairua i te pōuri, tata pū ki te mate; hei konei koutou noho ai, kia mataara tahi tātou.”
MAT 26:39 Ā, haere ana ia ki tahaki tata atu, ka takoto tāpapa, ka īnoi, ka mea, “E tōku Matua, ki te mea e āhei, kia pahemo atu tēnei kapu i ahau; otirā, kaua e waiho i tāku e pai ai, engari, i tāu.”
MAT 26:40 Ā, ka haere ia ki āna ākonga, rokohanga atu e moe ana, nā, ka mea ia ki a Pita, “Ha, ko tā koutou tēnei, tē mataara tahi tātou kia kotahi hāora?
MAT 26:41 Kia mataara me te īnoi, kei uru ki te whakamātautauranga. He hihiko te wairua, ko te kikokiko ia he ngoikore.”
MAT 26:42 Ka haere atu anō ia, ko te rua o ōna hokinga, ka īnoi, ka mea, “E tōku Matua, ki te kore e āhei kia pahemo atu tēnei kapu i ahau, ā, me inu anō e ahau, waiho i tāu i pai ai.”
MAT 26:43 Ko tōna haerenga mai anō, nā, rokohanga mai e moe ana anō rātou; i taimaha hoki ō rātou kanohi.
MAT 26:44 Nā, ka waiho anō rātou e ia, ā, haere ana anō, ka īnoi, ko te toru o ngā īnoinga, me te whakahua i taua kupu anō.
MAT 26:45 Kātahi, ia ka haere ki āna ākonga, ka mea ki a rātou, “Moe tonu, takoto mārie. Nā, ka tata te hāora, ka tukua te Tama a te tangata ki ngā ringa o te hunga hara.
MAT 26:46 Maranga, ka haere tātou. Nanā, ka tata te kaituku i ahau.”
MAT 26:47 Ā, i a ia anō e kōrero ana, nā, ka tae mai a Hūrā, tētahi o te tekau mā rua, he tini hoki ngā tāngata i a ia, me ngā hoari, me ngā patu, he mea tono mai nā ngā tohunga nui, nā ngā kaumātua o te iwi.
MAT 26:48 Kua oti hoki tētahi tohu te whakarite ki a rātou e tōna kaituku, i mea ia, “Nā, ko tāku tangata e kihi ai, koia tēnā; hopukia.”
MAT 26:49 Nā, tika tonu ia ki a Īhu, ka mea, “Tēnā koe, e te Kaiwhakaako!” ā, kihi ana i a ia.
MAT 26:50 Nā, ka mea a Īhu ki a ia, “E hoa, meinga tāu i haere mai ai ki te mahi.” Me i reira ka haere mai rātou, ka pā ō rātou ringa ki a Īhu, ā, hopukia ana ia.
MAT 26:51 Nā, ka totoro te ringa o tētahi o ngā hoa o Īhu, ā, unuhia ana tāna hoari, ka hāua iho te pononga a te tino tohunga, tapahia ana tōna taringa.
MAT 26:52 Kātahi, ka mea a Īhu ki a ia, “Whakahokia iho tāu hoari ki tōna pūkoro; ka mate hoki i te hoari te hunga hāpai hoari.
MAT 26:53 E hua koe e kore e āhei i ahau āianei te īnoi ki tōku Matua, ā, e hōmai e ia ki ahau he anahera maha atu i ngā rihiona kotahi tekau mā rua?
MAT 26:54 Nei rā, mā te aha ka rite ai tā ngā karaipiture, arā, ko tēnei kia meatia?”
MAT 26:55 I taua wā, ka mea a Īhu ki ngā mano, “He tāhae ahau i haere mai ai koutou me ngā hoari me ngā patu ki te hopu i ahau? I a koutou ahau e noho ana i te temepara, e ako ana i tēnā rā, i tēnā rā, ā, kīhai koutou i hopu i ahau.
MAT 26:56 Nā, i meatia tēnei katoa hei whakarite mō ngā karaipiture a ngā poropiti.” Nā, ka whakarere ngā ākonga katoa i a ia, ā, oma ana.
MAT 26:57 Kātahi, ka kawea a Īhu e ngā kaihopu ki te whare o Kaiapa, o te tino tohunga, i reira hoki ngā karaipi me ngā kaumātua e huihui ana.
MAT 26:58 Ko Pita ia i aru i a ia i tawhiti ki te marae o te tino tohunga, ā, tomo atu ana, noho tahi ana me ngā kaimahi, kia kite i te mutunga.
MAT 26:59 Nā, ka rapu ngā tohunga nui, me ngā kaumātua, me te rūnanga katoa, ki te whakapae teka mō Īhu, kia mate ai ia.
MAT 26:60 Heoi, kīhai i kitea; ahakoa he tokomaha ngā kaiwhakapae teka i haere mai. Muri iho ka puta ngā kaiwhakapae teka tokorua,
MAT 26:61 ka kī, “I mea ia, ‘E taea e ahau te whakahoro te whare tapu o te Atua, ā, kia toru ngā rā ka oti i ahau te hanga.’ ”
MAT 26:62 Nā, kua whakatika te tino tohunga, ka mea ki a ia, “Kāhore āu kupu? He aha tā ēnei e whakaatu nei mōu?”
MAT 26:63 Heoi, kīhai a Īhu i kuihi. Nā, ka kī anō te tino tohunga, ka mea ki a ia, “Ko te Atua ora tāku whakaoati mōu, nā, kōrero mai ki a mātou, ko te Karaiti rānei koe, ko te Tama a te Atua?”
MAT 26:64 Ka mea a Īhu ki a ia, “Kua kōrerotia mai nā e koe. Otirā, tēnei anō tāku kupu ki a koutou, ‘Tēnei ake ka kite koutou i te Tama a te tangata e noho ana ki matau o te kaha, e haere mai ana i runga i ngā kapua o te rangi.’ ”
MAT 26:65 Kātahi, ka haehae te tino tohunga i ōna kākahu, ka mea, “Kua kohukohu! Hei aha atu mā tātou ngā kaiwhakaatu? Nā, kua rongo nei koutou i tāna kohukohu.
MAT 26:66 E pēhea ana ō koutou whakaaro?” Nā, ka whakahoki rātou, ka mea, “Ka tika kia mate.”
MAT 26:67 Nā, ka tuwhaina tōna mata e rātou, ka kurua ia; ko ētahi i papaki i a ia,
MAT 26:68 i mea, “Poropiti ki a mātou, e te Karaiti! Nā wai koe i papaki?”
MAT 26:69 Nā, i waho a Pita e noho ana, i te marae; ā, ka haere mai tētahi kōtiro ki a ia, ka mea, “Ko koe hoki i a Īhu o Karirī.”
MAT 26:70 Otirā, ka whakakāhore ia i te aroaro o rātou katoa, ka mea, “Kāhore ahau e mōhio ki tāu e kī mai nā.”
MAT 26:71 Ā, ka puta atu ia ki waho ki te whakamahau, ka kite anō tētahi atu kōtiro i a ia, ā, ka mea tērā ki te hunga i reira, “I a Īhu anō o Nahareta tēnei.”
MAT 26:72 Ā, ka whakakāhore anō ia, me te oati anō, “Kāhore ahau e mōhio ki tēnā tangata.”
MAT 26:73 Ā muri tata iho, ka haere mai te hunga e tū ana, ka mea ki a Pita, “Koia anō, ko koe tētahi o rātou; nā tōu reo koe i whakaatu.”
MAT 26:74 Kātahi ia, ka tīmata te kanga, te oati, “Kāhore rawa ahau e mōhio ki tēnā tangata!” Ā, tangi tonu iho te tīkaokao,
MAT 26:75 nā, ka mahara a Pita ki tā Īhu kupu i mea ai ki a ia, “E kore e tangi te tīkaokao, ka toru āu whakakāhoretanga i ahau.” Nā, haere ana ia ki waho, ā, nui atu tōna tangi.
MAT 27:1 Ā, ka tākiri te ata, ka rūnanga ngā tohunga nui katoa me ngā kaumātua o te iwi mō Īhu kia whakamatea.
MAT 27:2 Ā, nō ka oti ia te here, ka ārahina atu, tukua ana ki a Pirato, ki te kāwana.
MAT 27:3 Ā, nō te kitenga o Hūrā, o te kaituku i a ia, kua whakaaetia ia kia whakamatea, ka puta kē tōna whakaaro, whakahokia ana e ia ngā hiriwa e toru tekau ki ngā tohunga nui rātou ko ngā kaumātua,
MAT 27:4 ka mea, “Kua hara ahau i tāku tukunga i te toto harakore.” Ka mea rātou, “Hei aha mā mātou? Māu tēnā e titiro.”
MAT 27:5 Nā, makā iho e ia ngā hiriwa ki te whare tapu, ā, puta ana ki waho, haere ana, tārona ana i a ia.
MAT 27:6 Nā, ka tango ngā tohunga nui i ngā hiriwa, ka mea, “E kore e tika kia pangā ēnei ki te takotoranga moni, he utu toto hoki.”
MAT 27:7 Nō ka rūnanga rātou, ā, hokona ana ki aua mea te māra a te kaihanga rīhi, hei tanumanga mō ngā manene.
MAT 27:8 Nā reira hoki i huaina ai taua māra, “Ko te Māra o te Toto” ā mohoa noa nei.
MAT 27:9 Kātahi, ka rite tā Heremaia poropiti i kōrero ai, i mea ai: “Tangohia ana e rātou ngā hiriwa e toru tekau, te utu mō te tangata i whakaritea nei ōna utu, i whakaritea nei ngā utu e ētahi o ngā tama a Īharaira,
MAT 27:10 ā, hoatu ana mō te māra a te kaihanga rīhi; i pērā anō me tā te Ariki i whakarite ai ki ahau.”
MAT 27:11 Nā, i te tū tērā a Īhu i te aroaro o te kāwana; ka ui te kāwana ki a ia, ka mea, “Ko koe rānei te Kīngi o ngā Hūrai?” Ka mea a Īhu ki a ia, “Kua kōrerotia mai nā e koe.”
MAT 27:12 Ā, i te whakapānga a ngā tohunga nui rātou ko ngā kaumātua i tētahi hē ki a ia, kīhai ia i whakahoki kupu atu.
MAT 27:13 Kātahi, ka mea a Pirato ki a ia, “Kāhore koe e rongo i te tini o ngā mea e kōrerotia nei e rātou mōu?”
MAT 27:14 Heoi, kāhore kia kotahi kupu i whakahokia e ia ki a ia; tino mīharo noa te kāwana.
MAT 27:15 Nā, ko tā te kāwana tikanga i taua hākari he tuku i tētahi herehere ki te iwi, i tā rātou e pai ai.
MAT 27:16 I reira anō i a rātou tētahi herehere ingoa nui, ko Parapa te ingoa.
MAT 27:17 Ā, nō rā ka mine rātou, ka mea a Pirato ki a rātou, “Ko wai tā koutou e pai ai kia tukua e ahau ki a koutou? Ko Parapa, ko Īhu rānei e huaina nei ko te Karaiti?”
MAT 27:18 I mahara hoki ia he hae nō rātou i tukua ai ia.
MAT 27:19 Nā, i a ia e noho ana i runga i te nohoanga whakawā, ka tono tangata mai tāna wahine ki a ia, ka mea, “Kei ahatia e koe taua tangata tika. He maha hoki ngā mea i pā moemoeā mai ki ahau ināianei, he mea mōna.”
MAT 27:20 Otiia, i whakakīkītia e ngā tohunga nui rātou ko ngā kaumātua te mano, kia īnoia a Parapa, kia whakangaromia a Īhu.
MAT 27:21 Nā, ka whakahoki te kāwana ka mea ki a rātou, “Ko tēhea o te tokorua tā koutou e pai ai kia tukua e ahau ki a koutou?” Ka mea rātou, “Ko Parapa!”
MAT 27:22 Ka mea a Pirato ki a rātou, “Me aha oti e ahau a Īhu, e huaina nei ko te Karaiti?” Ka mea rātou katoa ki a ia, “Rīpekatia!”
MAT 27:23 Nā, ka mea te kāwana, “He aha koia tāna kino i mea ai?” Heoi, nui noa atu tā rātou hāmama, ka mea, “Rīpekatia ia!”
MAT 27:24 Ā, i te kitenga o Pirato kāhore ia i whai wāhi, engari, ka nui kē atu te ngangau, ka mau ia ki te wai, ka horoi i ōna ringa i te aroaro o te mano, ka mea, “Kāhore ahau e whai hara i te toto o tēnei tangata tika; mā koutou tēnā e titiro.”
MAT 27:25 Nā, ka whakahoki te iwi katoa, ka mea, “Hei runga ōna toto i a mātou, i ā mātou tamariki.”
MAT 27:26 Nā, ka tukua e ia a Parapa ki a rātou; ā, ka oti a Īhu te whiu, ka tukua kia rīpekatia.
MAT 27:27 Kātahi ka mauria a Īhu e ngā hōia a te kāwana ki te whare whakawā, ā, whakaminea ana ki a ia te rōpū katoa.
MAT 27:28 Nā, ka tangohia e rātou ōna kākahu, ā, whakakākahuria ana ia ki te kākahu whero.
MAT 27:29 Ā, nō ka oti tētahi karauna tātarāmoa te whiri, ka pōtaea ki tōna mātenga, me te kākaho ki tōna ringa matau; ā, ka tukua ngā turi ki a ia, ka taunu ki a ia, ka mea, “Tēnā koe, e te Kīngi o ngā Hūrai!”
MAT 27:30 Ā, ka tuwhaina ia e rātou, ā, ka mau rātou ki te kākaho, ka patua ki tōna mātenga.
MAT 27:31 Nā, ka mutu tā rātou tāwai ki a ia, ka tīhorea atu i runga i a ia te kākahu rā, whakakākahuria ana ōna ki a ia, ā, ārahina ana ia kia rīpekatia.
MAT 27:32 Ā, i a rātou e haere ana ki waho, ka kitea e rātou he tangata nō Hairini, ko Haimona te ingoa; meinga ana ia e rātou kia haere tahi me rātou hei amo i tōna rīpeka.
MAT 27:33 Ā, i tō rātou taenga ki te wāhi e kīia nei ko Korokota, arā, ko “Te Wāhi Angaanga.”
MAT 27:34 Ka hoatu e rātou he wāina ki a ia kia inumia, he mea whakananu ki te au; ā, nō tāna whakamātauranga atu, kīhai i pai ki te inu.
MAT 27:35 Ā, ka oti ia te rīpeka, ka wehewehea ōna kākahu, he mea maka ki te rota; i rite ai te kupu i kōrerotia e te poropiti, “I wehewehea ōku weruweru mō rātou, i maka rota hoki mō tōku kākahu.”
MAT 27:36 Nā, noho ana rātou ki te tiaki i a ia i reira.
MAT 27:37 Ā, whakanohoia ana e rātou ki runga ake i tōna mātenga te mea i whakawākia ai ia, he mea tuhituhi, “KO ĪHU TĒNEI, KO TE KĪNGI O NGĀ HŪRAI.”
MAT 27:38 Nā, tokorua ngā tāhae i rīpekatia ngātahitia me ia, kotahi ki matau, kotahi ki mauī.
MAT 27:39 Ā, ka kohukohu ki a ia te hunga e haere ana rā reira, me te oioi ō rātou mātenga,
MAT 27:40 ka mea, “Ko koe hei whakahoro i te whare tapu, hei hanga anō i ngā rā e toru, whakaorangia koe e koe anō! Ki te mea ko te Tama koe a te Atua, heke iho i te rīpeka.”
MAT 27:41 I pēnā anō te tāwai a ngā tohunga nui, rātou ko ngā karaipi, ko ngā kaumātua, i mea,
MAT 27:42 “Ko ērā atu i whakaorangia e ia; tē taea e ia te whakaora i a ia anō. Ko ia te Kīngi o Īharaira, tēnā kia heke iho oti ia i te rīpeka, ka whakapono mātou ki a ia.
MAT 27:43 I whakawhirinaki ia ki te Atua; mā tērā ia e whakaora āianei, ki te pai ia ki a ia; nāna hoki te kī, ‘Ko te Tama ahau a te Atua.’ ”
MAT 27:44 Me ngā tāhae hoki i rīpekatia tahitia rā me ia, i pērā anō tā rāua tāwai ki a ia.
MAT 27:45 Nā, ka pōuri a runga katoa o te whenua, nō te ono o ngā hāora ā taea noatia te iwa o ngā hāora.
MAT 27:46 Ā, ka tata ki te iwa o ngā hāora, ka karanga a Īhu, he nui te reo, ka mea, “Eri, Eri, rama hapakatani?” arā, “E tōku Atua, e tōku Atua, he aha koe i whakarere ai i ahau?”
MAT 27:47 I te rongonga o ētahi o te hunga e tū ana i reira, ka mea, “E karanga ana te tangata nei ki a Irāia.”
MAT 27:48 Nā, kua rere tētahi o rātou, kua mau ki te hautai, whakakīia ana ki te winika, ā, whakanohoia ana ki runga ki te kākaho, whakainumia ana māna.
MAT 27:49 Ka mea ehinu, “Kāti, kia kite tātou e haere mai rānei a Irāia ki te whakaora i a ia.”
MAT 27:50 Nā, ka karanga anō a Īhu, he nui te reo, ā, tuku atu ana i tōna wairua.
MAT 27:51 Nā, ka wāhia te ārai o te whare tapu i waenganui pū, mai i runga, ā, ki raro. Ka rū te whenua, pakaru ana ngā kāmaka.
MAT 27:52 Ko ngā urupā tuwhera kau; ā, he maha ngā tinana o te hunga tapu kua moe i ara mai.
MAT 27:53 Ko te putanga ake i ngā urupā i muri iho o tōna aranga mai, haere ana ki roto ki te pā tapu, ā, he tokomaha te hunga i kite i a rātou.
MAT 27:54 Nā, i te kitenga o te keneturio rātou ko ōna hoa tiaki i a Īhu i te rū, i ngā mea anō i meatia, nui atu tō rātou wehi, ka mea, “He pono ko te Tama tēnei a te Atua.”
MAT 27:55 Ā, he tokomaha ngā wāhine i reira e mātakitaki ana mai i tawhiti, ngā mea i aru mai i a Īhu i Karirī, i mahi mea māna.
MAT 27:56 I roto i a rātou a Meri Makarini, a Meri whaea o Hēmi rāua ko Hohi, me te whaea hoki o ngā tama a Heperi.
MAT 27:57 Nā, ka ahiahi, ka haere mai tētahi tangata taonga nui o Arimatia, ko Hōhepa te ingoa, he ākonga anō ia nā Īhu.
MAT 27:58 I haere taua tangata ki a Pirato, ā, tonoa ana e ia te tinana o Īhu. Nā, ka mea a Pirato kia hoatu te tinana.
MAT 27:59 Nā, ka tango a Hōhepa i te tinana, ā, takaia ana e ia ki te rīnena mā,
MAT 27:60 whakatakotoria ana ki tāna urupā hou, i hāua e ia ki roto ki te kāmaka. Nā, whakatakā atu ana e ia tētahi kōhatu nui ki te kūwaha o te urupā, ā, haere ana.
MAT 27:61 I reira anō a Meri Makarini, me tērā Meri, e noho ana i te ritenga atu o te tanumanga.
MAT 27:62 Nā, i te aonga ake, i te rā i muri i te Takanga hākari, ka haere ngā tohunga nui me ngā Parihi ki a Pirato,
MAT 27:63 ka mea, “E mara, kei te mahara mātou ki te kōrero a tērā tangata tinihanga i a ia anō e ora ana, ‘Kia taka ngā rā e toru ka ara ahau.’
MAT 27:64 Nā reira, whakahaua atu kia tiakina te tanumanga, ā tae noa ki te toru o ngā rā, kei haere āna ākonga i te pō, ka tāhae i a ia, ka mea ki te iwi, ‘Kua ara ia i te hunga mate,’ pēnei kino atu i tō mua tō muri hē.”
MAT 27:65 Ka mea a Pirato ki a rātou, “He kaitiaki anō a koutou; haere, kia puta ō koutou whakaaro kei taea atu ia.”
MAT 27:66 Nā, haere ana rātou, hīritia ana te kōhatu, me te whakanoho anō i ngā kaitiaki, kei taea atu te tanumanga.
MAT 28:1 I te mutunga o te hāpati i te mea ka tata tonu te pūao te rā tuatahi o te wiki, ka haere a Meri Makarini me tērā Meri kia kite i te tanumanga.
MAT 28:2 Nā, he nui te rū i puta mai; i heke iho hoki tētahi anahera a te Ariki i te rangi, ā, haere ana, whakatakā atu ana e ia te kōhatu i te kūwaha, ā, noho ana i runga.
MAT 28:3 Ko tōna āhua me te mea he uira, mā tonu tōna kākahu ānō he hukarere.
MAT 28:4 Ā, wiri noa iho ngā kaitiaki i te wehi ki a ia, ka rite ki te tūpāpaku.
MAT 28:5 Nā, ka oho te anahera, ka mea ki ngā wāhine, “Kei wehi kōrua; e mātau ana hoki ahau, e rapu ana kōrua i a Īhu i rīpekatia.
MAT 28:6 Kāhore ia i konei; kua ara kē, kua pērā me tāna i mea ai. Haere mai kia kite i te wāhi i takoto ai te Ariki.
MAT 28:7 Ā, hohoro te haere, kōrerotia ki āna ākonga, ‘Kua ara ia i te hunga mate; tēnā ia te haere nā i mua i a koutou ki Karirī; ko reira koutou kite ai i a ia.’ Nā, kua kōrero nei ahau ki a kōrua.”
MAT 28:8 Ā, hohoro tonu tā rāua haere atu i te urupā, me te wehi, me te harakoa nui, ā, oma ana ki te kōrero ki āna ākonga.
MAT 28:9 Nā, ka tūtaki a Īhu ki a rāua, ka mea mai, “E ia mā.” Nā, ka haere atu rāua, ka pupuri i ōna waewae, ka koropiko ki a ia.
MAT 28:10 Kātahi a Īhu ka mea ki a rāua, “Aua e wehi; haere, kī atu ki ōku tēina kia haere ki Karirī, ko reira hoki rātou kite ai i ahau.”
MAT 28:11 Ā, i a rāua e haere ana, nā, kua tae ētahi o ngā kaitiaki ki te pā, kua kōrero ki ngā tohunga nui i ngā mea katoa i meatia.
MAT 28:12 Nā, ka mutu tā rātou huihui ko ngā kaumātua, ā, ka rūnanga, ka hoatu e rātou he moni nui ki ngā hōia,
MAT 28:13 ka mea atu, “Me kī e koutou, ‘I haere āna ākonga i te pō, ā, tāhaetia ana ia, i a mātou e moe ana.’
MAT 28:14 Ā, ki te tae te rongo o tēnei ki te kāwana, mā mātou ia e whakamārie, ā, kāhore he mānukanuka mō koutou.”
MAT 28:15 Nā, ka tango rātou i ngā moni, ā, meinga ana ngā mea i ākona ai rātou. Heoi, kei te kōrerotia tēnei e ngā Hūrai, ā taea noatia tēnei rā.
MAT 28:16 Nā, ka haere ngā ākonga tekau mā tahi ki Karirī, ki te maunga i whakaritea e Īhu ki a rātou.
MAT 28:17 Ā, i tō rātou kitenga i a ia, ka koropiko ki a ia; ko ētahi ia i ruarua.
MAT 28:18 Nā, ka haere mai a Īhu, ka kōrero ki a rātou, ka mea, “Kua tukua katoatia mai ki ahau te mana i te rangi, ā, i runga i te whenua
MAT 28:19 Nā reira haere, meinga hei ākonga ngā iwi katoa, iriiria i runga i te ingoa o te Matua, o te Tama, o te Wairua Tapu,
MAT 28:20 ākona rātou kia mau ki ngā mea katoa i whakahaua, e ahau ki a koutou. Nā, ko ahau tēnā hei hoa mō koutou i ngā rā katoa, ā te mutunga rā anō o te ao.” Āmine.
MAR 1:1 Ko te tīmatanga o te rongopai o Īhu Karaiti, o te Tama a te Atua.
MAR 1:2 Ko te mea ia i tuhituhia i roto i tā Ihāia poropiti: “Nā, ka tonoa e ahau tāku karere i mua i tōu aroaro, māna e whakapai tōu ara i mua i a koe.
MAR 1:3 He reo nō tētahi i te koraha e karanga ana, ‘Whakapaia te huarahi o te Ariki, whakatikaia ōna ara.’ ”
MAR 1:4 I haere mai a Hoani, ka iriiri i te koraha, ka kauwhau i te iriiri rīpenetā hei murunga hara.
MAR 1:5 Nā, ka haere ki a ia te whenua katoa o Hūria, me ngā tāngata o Hiruhārama, ā, iriiria katoatia ana e ia ki te awa ki Horano, me te whāki anō i ō rātou hara.
MAR 1:6 Nā, ko te kākahu o Hoani he huruhuru kāmera, he hiako hoki te whītiki o tōna hope; ko tāna kai he māwhitiwhiti he honi koraha.
MAR 1:7 Ā, i kauwhau ia, i mea, “Tēnei te haere mai nei i muri i ahau tētahi he kaha rawa ake i ahau, e kore ahau e tau ki te piko iho wewete ai i te here o ōna hū.
MAR 1:8 Ko ahau nei, he iriiri tāku i a koutou ki te wai; māna ia koutou e iriiri ki te Wairua Tapu.”
MAR 1:9 Ā, i aua rā ka haere mai a Īhu i Nahareta o Karirī, ka iriiria e Hoani ki Horano.
MAR 1:10 Ā, i taua wā anō i a ia e haere ake ana i te wai, ka kite ia i ngā rangi e wāhia ana kia tuwhera, me te Wairua, ānō he kūkupa, e heke iho ana ki a ia.
MAR 1:11 Ā, ka puta mai he reo nō te rangi, e mea ana, “Ko koe tāku Tama i aroha ai, tāku i āhuareka ai.”
MAR 1:12 Ā, i reira pū anō ka tonoa ia e te Wairua ki te koraha.
MAR 1:13 Ā, e whā tekau ōna rā i reira i te koraha e whakamātautauria ana e Hātana; i roto ia i ngā kararehe mohoao; ko ngā anahera hoki ki te mahi mea māna.
MAR 1:14 Nā, i muri i a Hoani i tukua ai ki te herehere, ka haere a Īhu ki Karirī, ka kauwhau i te rongopai o te Atua,
MAR 1:15 ka mea, “Kua rite tēnei te wā, kua tata hoki te rangatiratanga o te Atua; rīpenetā, whakaponohia te rongopai.”
MAR 1:16 Nā, i a ia e haere ana i te taha o te moana o Karirī, ka kite i a Haimona rāua ko tōna teina, ko Anaru, e maka ana i te kupenga ki te moana, he kaihao ika hoki rāua.
MAR 1:17 Nā, ka mea a Īhu ki a rāua, “Haere mai i muri i ahau, ā, māku kōrua e mea hei kaihao tāngata.”
MAR 1:18 Ā, mahue tonu ake i a rāua, ngā kupenga, aru ana i a ia.
MAR 1:19 Ā, haere tata atu ana i reira, ka kite ia i a Hēmi, tama a Heperi, rāua ko tōna teina ko Hoani, i te kaipuke anō rāua, e tā ana i ngā korenga o ā rātou kupenga.
MAR 1:20 Nā, karanga tonu atu ia i a rāua; ā, mahue ake i a rāua tō rāua matua a Heperi i te kaipuke me ngā kaimahi, ā, haere ana i muri i a ia.
MAR 1:21 Ā, ka tomo rātou ki Kaperenauma; nā, haere tonu ia i te hāpati ki te whare karakia, ka whakaako.
MAR 1:22 Ā, mīharo ana rātou ki tāna ako, i rite hoki tāna ako i a rātou ki tā te tangata whai mana, kīhai i rite ki tā ngā karaipi.
MAR 1:23 Nā, i tō rātou whare karakia tētahi tangata, he wairua poke tōna; ā, ka karanga ia,
MAR 1:24 ka mea, “Kāti rā, he aha tā mātou ki a koe, e Īhu o Nahareta? Kua tae mai rānei koe ki te whakangaro i a mātou? E mātau ana ahau ko wai koe, ko te Mea Tapu a te Atua.”
MAR 1:25 Ā, ka riri a Īhu ki a ia, ka mea, “Kāti te kōrero, puta mai i roto i a ia!”
MAR 1:26 Nā, ka haehae te wairua kino i a ia, nui atu hoki tōna reo ki te karanga, ā, puta ana mai i roto i a ia.
MAR 1:27 Ā, mīharo noa rātou katoa, uiui ana ki a rātou anō, mea ana, “He aha tēnei? He aha tēnei ako hou? Mana tonu tāna nei tono i ngā wairua poke, ā, rongo rawa ki a ia.”
MAR 1:28 Nā, pakū tonu atu tōna rongo ki ngā wāhi katoa e tata ana ki Karirī.
MAR 1:29 Nā, i reira tonu, i tō rātou putanga mai i te whare karakia, tomo tonu atu rātou ko Hēmi, ko Hoani, ki te whare o Haimona rāua, ko Anaru.
MAR 1:30 Nā, i te takoto te hungawai wahine o Haimona, he kirikā, ā, kōrerotia tonutia atu ia e rātou ki a ia.
MAR 1:31 Heoi, i tōna taenga atu, ka mau ki tōna ringa, whakaarahia ana ia; mutu tonu ake tōna kirikā, ka tahuri ki te taka mea mā rātou.
MAR 1:32 Nā, i te ahiahi, i te toenetanga o te rā, ka mauria mai ki a ia ngā tūroro katoa, me te hunga e nohoia ana e ngā rēwera.
MAR 1:33 Ā, huihui katoa ana te pā ki te kūwaha.
MAR 1:34 He tokomaha te hunga e ngaua ana e te tini o ngā mate i whakaorangia e ia, he maha hoki ngā rēwera i peia; ā, kīhai i tukua e ia ngā rēwera kia kōrero, nō te mea i mātau rātou ki a ia.
MAR 1:35 Nā, i te atatū, i mua noa atu o te awatea, ka ara ia, ka puta ki waho, ka haere ki te wāhi koraha, ki reira īnoi ai.
MAR 1:36 Nā, ka whai a Haimona rātou ko ōna hoa i a ia.
MAR 1:37 Ā, ka kitea ia, ka mea ki a ia, “E rapu ana ngā tāngata katoa i a koe.”
MAR 1:38 Kātahi ia ka mea ki a rātou, “Tātou ka haere he wāhi kē ki ngā kāinga tata, ki reira ahau kauwhau ai. Ko tāku hoki tērā i haere mai ai.”
MAR 1:39 Nā, ka tomo ia ki roto i ō rātou whare karakia puta noa i Karirī, ka kauwhau, ka pei hoki i ngā rēwera ki waho.
MAR 1:40 Ā, ka haere mai ki a ia tētahi repera, ka īnoi ki a ia, tuku rawa ngā turi ki a ia, ka mea, “Ki te pai koe, e taea ahau e koe te mea kia mā.”
MAR 1:41 Nā, ka aroha a Īhu, ka totoro tōna ringa, ka pā ki a ia, ka mea ki a ia, “E pai ana ahau; kia mā koe.”
MAR 1:42 Ā, puaki kau tōna reo, kua kore tōna repera, nā, kua mā.
MAR 1:43 Nā, ka whakatūpato ia ki a ia, ā, tonoa tonutia atu,
MAR 1:44 ka mea atu hoki ki a ia, “Kei kōrerotia tētahi mea ki te tangata; engari haere, kia kite te tohunga i a koe, ā, mauria atu mō tōu whakamākanga ngā mea i whakaritea e Mohi, hei mea whakaatu ki a rātou.”
MAR 1:45 Heoi, i tōna putanga atu, ka anga ki te kōrero nui haere, ka whakapuakina taua mea, ā, kīhai a Īhu i āhei te haere nui ki te pā i muri iho. Engari i noho ia i waho i ngā wāhi koraha; ā, haere ana mai rātou ki a ia i ngā wāhi katoa.
MAR 2:1 Ā, i a ia i tomo ai anō ki Kaperenauma i ētahi rā mai, ka rangona kei te whare ia.
MAR 2:2 Nā, ka hui mai te tini o te tangata, kāhore rawa he wāhi e ō ai rātou, hore rawa i te taha o te kūwaha; ā, ka kōrerotia e ia te kupu ki a rātou.
MAR 2:3 Ka haere mai hoki ētahi, ka kawe mai i tētahi pararūtiki ki a ia, tokowhā ki te kauhoa.
MAR 2:4 Ā, tē taea te whakatata ki a ia i te mano hoki, ka pokaia te tuanui o te wāhi i noho ai ia; ā, ka oti te wāwāhi, ka tukua iho te moenga i takoto ai te pararūtiki.
MAR 2:5 Ā, nō te kitenga o Īhu i tō rātou whakapono, ka mea ia ki te pararūtiki, “E tama, ka oti ōu hara te muru.”
MAR 2:6 Nā, i reira ētahi o ngā karaipi e noho ana, e whakaaroaro ana i roto i ō rātou ngākau,
MAR 2:7 “He aha ēnei kupu kohukohu a tēnei tangata? Ko wai hei muru hara, kotahi tonu ko te Atua anake?”
MAR 2:8 Nā, mōhio tonu a Īhu i roto i tōna wairua, e pēnei ana ō rātou whakaaro i roto i a rātou, ā, ka mea ia ki a rātou, “He aha koutou ka whakaaroaro ai i ēnei mea i roto i ō koutou ngākau?
MAR 2:9 Ko tēhea te mea takoto noa, ko te mea ki te pararūtiki, ‘Ka oti ōu hara te muru,’ ko te mea rānei, ‘Whakatika, tangohia ake tōu moenga, haere’?
MAR 2:10 Otirā, kia mātau ai koutou he mana muru hara tō te Tama a te tangata i runga i te whenua.” Ka mea ia ki te pararūtiki,
MAR 2:11 “Ko tāku kupu tēnei ki a koe, whakatika, tangohia ake tōu moenga, haere ki tōu whare.”
MAR 2:12 Nā, whakatika tonu ake ia, ā, tangohia ake ana tōna moenga, haere atu ana i te aroaro o rātou katoa. Nō, ka mīharo rātou katoa ka whakakorōria i te Atua, ka mea, “Kāhore anō tātou i kite noa i te pēnei!”
MAR 2:13 Ā, haere atu ana ia i te taha o te moana; nā, ka tae te mano katoa ki a ia, ā, ka whakaakona rātou e ia.
MAR 2:14 Ā, i a ia e haere ana, ka kite ia i a Rīwai tama a Arapiu e noho ana i te wāhi tango takoha, ka mea ki a ia, Arumia ahau. Nā, whakatika ana ia, aru ana i a ia.
MAR 2:15 Ā, i a ia e noho ana i tōna whare, he tokomaha ngā pupirikana me ngā tāngata hara e noho tahi ana ki a Īhu rātou ko āna ākonga: he tokomaha hoki rātou, ā, i aru i a ia.
MAR 2:16 Ā, nō te kitenga o ngā karaipi a ngā Parihi i a ia e kai tahi ana me ngā pupirikana, me ngā tāngata hara, ka mea ki āna ākonga, “Kei te kai tahi ia, kei te inu tahi me ngā pupirikana me ngā tāngata hara.”
MAR 2:17 Ā, i te rongonga o Īhu, ka mea ia ki a rātou, “Kāhore he aha o ngā tāngata ora e meatia ai e te rata, engari o te hunga e mate ana; kīhai hoki ahau i haere mai ki te karanga i te hunga tika, engari i te hunga hara.”
MAR 2:18 Nā, kei te nohopuku ngā ākonga a Hoani rātou ko ā ngā Parihi; ā, ka haere mai rātou, ka mea ki a ia, “He aha ngā ākonga a Hoani me a ngā Parihi ka nohopuku ai, tēnā ko āu ākonga kāhore e nohopuku?”
MAR 2:19 Nā, ka mea a Īhu ki a rātou, “E āhei rānei ngā tama o te whare mārena te nohopuku i te mea kei a rātou te tāne mārena hou? E kore rātou e āhei te nohopuku i ngā wā kei a rātou nei te tāne mārena hou.
MAR 2:20 Nā, tērā e tae mai ngā rā e tangohia ai te tāne mārena hou i a rātou, kātahi rātou ka nohopuku i aua rā.
MAR 2:21 “E kore e tuia e te tangata tētahi wāhi o te kahu hou, hei pāpaki mō te kahu tawhito; kei riro tētahi wāhi o te kahu tawhito i tōna whakakapi hou, ā, ka nui rawa te pakaru.
MAR 2:22 E kore hoki e ringihia e te tangata te wāina hou ki ngā ipu tawhito; kei pakaru ngā ipu i te wāina hou, ā, ka maringi te wāina, kore ake ngā ipu; engari me riringi te wāina hou ki ngā ipu hou.”
MAR 2:23 Ā, i a ia e haere ana i waenga wīti i te hāpati, ka anga āna ākonga ka kakato haere i ngā puku wīti.
MAR 2:24 Nā, ka mea ngā Parihi ki a ia, “Nā, he aha rātou ka mahi ai i te mea e kore e tika i te hāpati?”
MAR 2:25 Ā, ka mea ia ki a rātou, “Kāhore anō koutou i kite noa i tā Rāwiri i mea ai, i a ia e ngaua ana e te hiakai, rātou ko ōna hoa?
MAR 2:26 I tōna tomokanga ki te whare o te Atua i ngā rā o Apiata tohunga nui, ā, kainga ana e ia ngā taro aroaro, ngā mea kīhai nei i tika kia kainga, mā ngā tohunga anake, ā, hoatu ana e ia ki ōna hoa?”
MAR 2:27 I mea anō ia ki a rātou, “Hei mea mō te tangata te hāpati, ehara i te mea ko te tangata mō te hāpati;
MAR 2:28 waihoki ko te Tama a te tangata te Ariki o te hāpati.”
MAR 3:1 Ā, ka tomo atu anō ia ki te whare karakia, nā, i reira tētahi tangata kua memenge tōna ringa.
MAR 3:2 Ā, ka whakamau tā rātou titiro ki a ia, me kore ia e whakaora i a ia i te hāpati; he mea kia whakapā ai rātou i tētahi hē ki a ia.
MAR 3:3 Nā, ka mea ia ki te tangata i te ringa memenge, “Whakatika ki waenganui.”
MAR 3:4 Nā, ka mea ia ki a rātou, “He mea tika rānei te mahi pai i te hāpati, te mahi kino rānei? Te whakaora rānei, te whakamate rānei?” Heoi, kāhore rātou i kīkī.
MAR 3:5 Nā, ka tirotiro riri ia ki a rātou, he pōuri hoki mō te pakeke o ō rātou ngākau, ka mea ki taua tangata, “Totoro tōu ringa.” Ā, ko te toronga o tōna ringa, kua ora.
MAR 3:6 Nā, ka haere atu ngā Parihi, ka rūnanga tahi me ngā Herōriana mōna, ki te pēhea e whakangaromia ai ia.
MAR 3:7 Nā, ka maunu atu a Īhu rātou ko āna ākonga ki te moana; he nui hoki te tangata i aru i a ia i Karirī, i Hūria,
MAR 3:8 I Hiruhārama, i Irumia, i tāwāhi hoki o Horano; me te hunga hoki e tata ana ki Tāira, ki Hairona, nui atu te huihui; i tō rātou rongonga i ngā mea i mea ai ia, haere ana ki a ia.
MAR 3:9 Nā, ka mea ia ki āna ākonga kia noho tata mai tētahi kaipuke iti ki a ia, i te mano hoki, kei tutetutea ia e rātou.
MAR 3:10 He tokomaha hoki i whakaorangia e ia; nō ka popō mai ki a ia te hunga katoa e mate ana, kia pā ai ki a ia.
MAR 3:11 Me ngā wairua poke hoki, i tō rātou kitenga i a ia, takoto ana ki tōna aroaro, ka karanga, ka mea, “Ko te Tama koe a te Atua!”
MAR 3:12 Ā, he maha āna kupu ki a rātou kia kaua ia e whakaaturia e rātou.
MAR 3:13 Nā, ka kake ia ki te maunga, karangatia ana ki a ia āna i pai ai, ā, ka tae rātou ki a ia.
MAR 3:14 Ā, kotahi tekau mā rua āna i whakarite ai hei hoa mōna, hei tononga hoki māna ki te kauwhau,
MAR 3:15 kia whai mana hoki e ora ai ngā mate, e peia ai ngā rēwera.
MAR 3:16 Ā, huaina iho e ia a Haimona ko Pita;
MAR 3:17 ko Hēmi, tama a Heperi, rāua ko Hoani, teina o Hēmi; ā, huaina iho rāua ko Poaneki, arā, ko ngā Tama a te Whatitiri;
MAR 3:18 ko Anaru, ko Piripi, ko Patoromu, ko Matiu, ko Tamati, ko Hēmi, tama a Arapiu, ko Tariu ko Haimona Kanaani,
MAR 3:19 ko Hūrā Ikariote hoki, nāna nei ia i tuku. Nā, ka tae ia ki te whare.
MAR 3:20 Nā, ka huihui anō te mano, nō kīhai rawa rātou i āhei te kai taro.
MAR 3:21 Ā, nō ka rongo ōna hoa, ka haere ki te pupuri i a ia, i mea hoki, “He pōrewarewa ia.”
MAR 3:22 Nā, ka mea ngā karaipi i haere mai rā i Hiruhārama, “Kei a ia a Perehepura, ā, nā te rangatira o ngā rēwera tāna peinga rēwera.”
MAR 3:23 Nā, ka karangatia rātou e ia, ā, ka kōrero whakarite ki a rātou: “Me pēhea a Hātana ka pei ai i a Hātana?
MAR 3:24 Ki te tahuri iho hoki tētahi rangatiratanga ki a ia anō, e kore taua rangatiratanga e tū.
MAR 3:25 Ki te tahuri iho hoki tētahi whare ki a ia anō, e kore taua whare e tū.
MAR 3:26 Ki te whakatika a Hātana, ā, ka tahuri iho ki a ia anō, e kore ia e tū, engari, he mutunga tōna.
MAR 3:27 “E kore te tangata e āhei te haere ki roto ki te whare o te tangata kaha, pāhua ai i ōna taonga, ki te kāhore e mātua herea te tangata kaha; ko reira pāhua ai i tōna whare.
MAR 3:28 “He pono tāku e mea nei ki a koutou, Ko ngā hara katoa o ngā tama a ngā tāngata e murua, me ngā kohukohu e kohukohu ai rātou.
MAR 3:29 Tēnā ko te tangata e kohukohua ai te Wairua Tapu, e kore e murua tōna hara ā ake ake, engari ka tau te hē ki a ia ā ake ake.”
MAR 3:30 Mō rātou i kī, “He wairua poke tōna.”
MAR 3:31 Ā, ko te taenga mai o ōna tēina rātou ko tōna whaea, ka tū i waho, ka tono tāngata mai ki a ia, ki te karanga i a ia.
MAR 3:32 E noho ana hoki te mano i tētahi taha ōna, i tētahi taha, ā, ka mea rātou ki a ia, “Nā, tōu whaea me ōu tēina kei waho, e rapu ana i a koe.”
MAR 3:33 Nā, ka whakahoki ia ki a rātou, ka mea, “Ko wai tōku whaea, ko wai hoki ōku tēina?”
MAR 3:34 Nā, ka tirotiro ia ki te hunga e noho ana i tētahi taha ōna, i tētahi taha, ka mea, “Nā, tōku whaea, ōku tēina!
MAR 3:35 Ki te meatia hoki e tētahi tā te Atua i pai ai, hei teina ia ki ahau, hei tuahine, hei whaea.”
MAR 4:1 Nā, ka tīmata anō ia te whakaako i te taha o te moana. He nui hoki te tangata i huihui ki a ia, nō ka eke ia ki runga ki te kaipuke, ka noho ki te moana; i uta te mano katoa i te taha o te moana.
MAR 4:2 Ā, he maha āna mea i whakaako ai ki a rātou, he mea whakarite, i mea hoki ki a rātou i a ia e ako ana:
MAR 4:3 “Whakarongo! Nā, i haere atu te kairui ki te rui.
MAR 4:4 Ā, i a ia e rui ana, ka ngahoro ētahi ki te taha o te ara, ā, ko te rerenga mai o ngā manu o te rangi, nā, kainga ake.
MAR 4:5 Ko ētahi i ngahoro ki te wāhi kāmaka, ki te wāhi kīhai i nui te oneone; ā, pīhi tonu ake, kāhore hoki i hōhonu te oneone.
MAR 4:6 Ā, nō te whitinga o te rā, ngaua iho; ā, nō te mea kāhore he pūtake, memenge noa iho.
MAR 4:7 Ko ētahi i ngahoro ki roto ki ngā tātarāmoa, ā, nō te tupunga ake o ngā tātarāmoa, kōwaowaotia ana ngā purapura, ā, kore ake he hua.
MAR 4:8 Ko ētahi i ngahoro ki te oneone pai, ā, whai hua ana; ka tupu, ka nui, ka ea ake, nō ētahi e toru tekau, nō ētahi e ono tekau, nō ētahi kotahi rau.”
MAR 4:9 I mea anō ia ki a rātou, “Ki te whai taringa tētahi hei whakarongo, kia rongo ia.”
MAR 4:10 Nā, ka mahue ko ia anake, ka ui ki a ia ōna hoa me te tekau mā rua ki taua kupu whakarite.
MAR 4:11 Ka mea ia ki a rātou: “Kua hoatu ki a koutou te mātauranga ki te mea ngaro o te rangatiratanga o te Atua; ki te hunga ia o waho e rā rototia ana ngā mea katoa i te kupu whakarite,
MAR 4:12 mō, ‘Te titiro rawa atu rātou, nā, e kore e kite; rongo rawa, nā, e kore e mātau; kei tahuri, ā, ka murua ō rātou hara.’ ”
MAR 4:13 I mea anō ia ki a rātou, “Kāhore rānei koutou e mātau ki tēnei kupu whakarite? Ā, me pēhea ka mātau ai koutou ki ngā kupu whakarite katoa?
MAR 4:14 Ko te kairui e rui ana i te kupu.
MAR 4:15 Ko ēnei te hunga i te taha o te ara, i te wāhi e ruia ana te kupu; i tō rātou rongonga, nā, haere tonu mai a Hātana, kapohia ake te kupu i ruia ki ō rātou ngākau.
MAR 4:16 Ko ēnei anō te hunga i ngā purapura i ngā wāhi kāmaka; ko te hunga, i tō rātou rongonga ai i te kupu, hohoro tonu te tango, hari tonu.
MAR 4:17 Nā, kāhore ō rātou pakiaka, ka whakapakari kau noa; heoi, i te pānga o te whakapāwera, o te whakatoi rānei mō te kupu, hē tonu iho.
MAR 4:18 Nā, ko ēnei te hunga i ngā purapura i roto i ngā tātarāmoa; ko ngā mea i rongo ki te kupu,
MAR 4:19 ā, i te putanga o te whakaaro ki tēnei ao, o te hangarau o ngā taonga, o ngā hiahia ki ērā atu mea, kōwaowaotia iho te kupu, ā, kore ake he hua.
MAR 4:20 Nā, ko ēnei te hunga i ngā purapura i te oneone pai: ko te hunga e rongo ana ki te kupu, ā, tango ana, ā, whai hua ana, o ētahi e toru tekau, o ētahi e ono tekau, o ētahi kotahi rau.”
MAR 4:21 I mea anō ia ki a rātou, “Ko raro koia i te mēhua whakatū ai i te rama, ina mauria mai, ko raro rānei i te moenga? He teka ianei me whakatū ki runga ki te tūranga?
MAR 4:22 E kore hoki tētahi mea i huna e mahue te whakakite; kāhore hoki tētahi mea i huna, engari, kia puta ki te māramatanga.
MAR 4:23 Ki te mea he taringa o tētahi hei whakarongo, kia rongo ia.”
MAR 4:24 I mea anō ia ki a rātou, “Kia tūpato ki tā koutou e rongo ai; ko te mēhua hoki e mēhua ai koutou, hei mēhua anō tēnā ki a koutou; ā, ka tāpiritia anō he mea mā koutou, mā ngā kaiwhakarongo.
MAR 4:25 Ki te whai mea hoki tētahi, ka hoatu anō ki a ia; ki te kāhore he mea a tētahi, ka tangohia i a ia āna ake.”
MAR 4:26 I mea anō ia, “I rite hoki te rangatiratanga o te rangi ki te tangata i makā e ia he purapura ki te oneone;
MAR 4:27 ā, ka moe, ka ara, i te pō, i te ao, me te tupu anō tērā te purapura, tē mātau ia nā te aha.
MAR 4:28 E hua ana hoki te whenua i tōna kaha ake anō; ko te rau ki mua, ko reira te puku, muri iho ko te wīti pakari i roto i te puku.
MAR 4:29 Otirā, ka rite ngā hua, hohoro tonu tāna tuku atu i tāna toronaihi, kua taea hoki te kotinga.”
MAR 4:30 I mea anō ia, “Me whakarite e tātou te rangatiratanga o te Atua ki te aha? He aha oti te kupu whakarite hei whakaahua atu mā tātou?
MAR 4:31 E rite ana ki te pua nanī, i tōna whakatōkanga ki te whenua, ko te iti rawa ia o ngā purapura katoa i runga i te whenua.
MAR 4:32 Otirā, ka oti te whakatō, ka tupu, ka nui ake i ngā otaota katoa, ā, ka nunui ōna manga; nō ka noho ngā manu o te rangi i tōna taumarumarutanga iho.”
MAR 4:33 Nā, he maha āna kupu whakarite pērā, i kōrerotia ai e ia te kupu ki a rātou, ko ā rātou i āhei ai te whakarongo.
MAR 4:34 Ā, heoi āna kupu ki a rātou he kupu whakarite anake; otiia, ka noho ko rātou anake, ka whakaaturia e ia ngā mea katoa ki āna ākonga.
MAR 4:35 Nā, i taua rā, i te ahiahi, ka mea ia ki a rātou, “Tātou ka whakawhiti ki tāwāhi.”
MAR 4:36 Nā, ka mahue iho te mano, ka mauria ia e rātou, i runga tonu anō ia i te kaipuke. I a ia anō ētahi atu kaipuke.
MAR 4:37 Nā, ko te putanga o tētahi hau, he tūpuhi, ā, eke ana ngā ngaru ki runga ki te kaipuke, ā, tomo noa.
MAR 4:38 Nā, ko ia i te kei i runga i te urunga e moe ana; ā, ka whakaara rātou i a ia, ka mea ki a ia, “E te Kaiwhakaako, kāhore ōu manawapā ki a tātou ka ngaro?”
MAR 4:39 Nā, ka ara ia, ā, rīria iho e ia te hau, ka mea ia ki te moana, “Kāti, whakamutua.” Nā, māriri tonu iho te hau, takoto ana he marino nui.
MAR 4:40 Kātahi ia ka mea ki a rātou, “He aha tā koutou e mataku nei? He aha koutou tē whakapono ai?”
MAR 4:41 Nā, ka mataku whakaharahara rātou, ka mea tētahi ki tētahi, “Ko wai tēnei, inā ka rongo rawa te hau me te moana ki a ia?”
MAR 5:1 Ā, ka whiti rātou ki tāwāhi o te moana, ki te whenua o ngā Kararini.
MAR 5:2 Nā, mahuta kau i te kaipuke, ka tūtaki ki a ia tētahi tangata i puta mai i ngā urupā, he wairua poke tōna.
MAR 5:3 Kei ngā urupā nei tōna nohoanga; ā, ahakoa he mekameka, hore rawa ia i taea e tētahi tangata te here.
MAR 5:4 He maha hoki ōna herenga ki ngā here waewae, ki ngā mekameka, heoi motumotuhia ana e ia ngā mekameka, mongamonga noa anō ngā here waewae. Kīhai tētahi tangata i kaha ki te whakamārie i a ia.
MAR 5:5 I ngā urupā tonu ia, i ngā maunga i te pō, i te ao, e hāmama ana, e haehae ana i a ia ki te kōhatu.
MAR 5:6 Ā, i tōna kitenga i a Īhu i tawhiti, oma ana ia, koropiko ana ki a ia.
MAR 5:7 He nui tōna reo ki te karanga, ka mea, “Ko te aha tāku ki a koe, e Īhu, e te Tama a te Atua, a te Runga Rawa? Ko te Atua tāku whakaoati mōu, nā, kaua ahau e whakamamaetia.”
MAR 5:8 He meatanga hoki nāna ki a ia, “Puta mai i tēnei tangata, e te wairua poke.”
MAR 5:9 Nā, ka ui ia ki a ia, “Ko wai tōu ingoa?” Ka whakahokia e tērā, ka mea, “Ko Rihiona tōku ingoa; he tokomaha hoki mātou.”
MAR 5:10 Ā, he nui tāna īnoi ki a ia kia kaua rātou e tonoa atu i taua whenua.
MAR 5:11 Nā, kei reira, kei ngā maunga, tētahi kāhui poaka e kai ana, tōna tini.
MAR 5:12 Nā, ka īnoi ngā rēwera katoa ki a ia, ka mea, “Tonoa mātou ki ngā poaka, kia tomo mātou ki a rātou.”
MAR 5:13 Nā, tukua ana rātou e Īhu. Heoi, ko te putanga o ngā wairua poke, ka tomo ki ngā poaka. Ko te tino rerenga o te kāhui rā te pari ki te moana, ko te maha kei te rua mano, ā, paremo iho ki te moana.
MAR 5:14 Nā, whati ana ngā kaiwhāngai o ngā poaka, ā, kōrerotia ana ki te pā, ki aua whenua. Nā, ka puta rātou kia kite i taua mea kua meatia nei.
MAR 5:15 Ā, nō tō rātou taenga mai ki a Īhu, ka kite i te tangata i nohoia nei e ngā rēwera, tērā i te rihiona, e noho ana, kua oti te whakakākahu, kua tika ngā mahara, ka mataku rātou.
MAR 5:16 Ā, ka kōrerotia ki a rātou, e te hunga i kite, te meatanga ki te tangata i ngā rēwera, ki ngā poaka hoki.
MAR 5:17 Nā, ka anga rātou, ka tohe ki a ia kia haere atu i ō rātou wāhi.
MAR 5:18 Ā, nō ka eke ia ki te kaipuke, ka īnoi ki a ia te tangata i ngā rēwera, kia waiho ia hei hoa mōna.
MAR 5:19 Otirā, kīhai a Īhu i tuku i a ia, engari i mea atu ki a ia, “Haere ki tōu whare, ki ōu whanaunga, ka kōrero ki a rātou i ngā mea nui i meinga e te Ariki ki a koe, i tāna atawhaitanga hoki i a koe.”
MAR 5:20 Nā, ka haere ia, ka anga, ka kōrero ki Rekaporihi, i ngā mea nunui i mea ai a Īhu ki a ia; ā, mīharo ana ngā tāngata katoa.
MAR 5:21 Ā, nō te whitinga atu anō o Īhu ki tāwāhi i runga i te kaipuke, he nui te tangata i huihui ki a ia; i te taha anō ia o te moana.
MAR 5:22 Nā, ko te haerenga mai o tētahi o ngā rangatira o te whare karakia, ko Hairuha tōna ingoa; ka kite i a ia, ka takoto ki ōna waewae,
MAR 5:23 he nui tāna īnoi ki a ia, ka mea, “Ko tāku tamāhine nohinohi kei te whakahemohemo! Kia haere ake koe ki te whakapā i ōu ringa ki a ia kia ora ai, ā, ka ora.”
MAR 5:24 Nā, haere tahi ana rāua; he tini hoki te tangata i aru i a ia, popō tonu ki a ia.
MAR 5:25 Nā, ko tētahi wahine e mate ana i te pākaruhanga toto, ka tekau mā rua ngā tau.
MAR 5:26 He maha ngā meatanga a ngā rata tokomaha ki a ia, hemo noa āna rawa katoa, tē mātūtū ake tētahi wāhi, heoi, kake haere ana te mate.
MAR 5:27 Ā, nō tōna rongonga ki a Īhu, ka haere i muri i roto i te mano, ā, pā ana ki tōna kākahu.
MAR 5:28 I mea hoki, “Ahakoa pā kau ahau ki ōna kākahu, ka ora ahau.”
MAR 5:29 Ā, mimiti tonu ake te puna o ōna toto; nō ka mahara a roto o tōna tinana kua ora ia i te mate.
MAR 5:30 Nā, mōhio tonu a Īhu kua puta he mana i roto i a ia, ka tāhurihuri i roto i te mano, ka mea, “Ko wai tēnei kua pā nei ki ōku kākahu?”
MAR 5:31 Ka mea āna ākonga ki a ia, “E kite ana koe i te mano e popō nei ki a koe, ā, e mea ana koe, ‘Ko wai tēnei kua pā mai ki ahau?’ ”
MAR 5:32 Heoi, tirotiro ana ia kia kite i te wahine i mea nei i tēnei mea.
MAR 5:33 Nā, ka haere mai te wahine me te wehi, me te wiri, i mahara hoki ki te mea i meatia ki a ia, ā, takoto ana ki tōna aroaro, kōrerotia katoatia ana e ia te tikanga ki a ia.
MAR 5:34 Anō rā, ko Īhu ki a ia, “E kō, nā tōu whakapono koe i ora ai; haere mārie, kia ora koe i tōu mate.”
MAR 5:35 I a ia anō e kōrero ana, ka haere mai ētahi o ngā tāngata a te rangatira o te whare karakia, ka mea, “Kua mate tāu tamāhine. Hei aha ake māu te whakararuraru i te Kaiwhakaako?”
MAR 5:36 Otirā, kāhore a Īhu i aro ki te kupu i kōrerotia, ka mea atu ki te rangatira o te whare karakia, “Kaua e wehi, ko te whakapono ia kia whakapono.”
MAR 5:37 Ā, kīhai tētahi tangata i tukua kia haere tahi me ia, ko Pita anake, ko Hēmi, ko Hoani teina o Hēmi.
MAR 5:38 Ā, nō te taenga atu ki te whare o te rangatira o te whare karakia, ka kite ia i te ngangau, i te nui hoki o te tangi, o te auē a ētahi.
MAR 5:39 Ā, i tōna tomokanga ki roto, ka mea ia ki a rātou, “He aha koutou ka ngangau ai, ka tangi ai? Kāhore te kōtiro i mate, engari e moe ana.”
MAR 5:40 Nā, kataina iho ia e rātou. Heoi, ka oti katoa te pei ki waho, ka mau ia ki te pāpā, ki te whaea o te kōtiro, rātou ko ōna hoa, ka tomo ki te wāhi i takoto ai te kōtiro.
MAR 5:41 Nā, ka mau ia ki te ringa o te kōtiro, ka mea ki a ia, “Tarita kumi,” ko tōna whakamāoritanga tēnei, “E kō, ko tāku kupu tēnei ki a koe, e ara.”
MAR 5:42 Nā, whakatika tonu ake te kōtiro, ā, haere ana; kotahi tekau mā rua hoki ōna tau. Nā, ko te tino mīharotanga i mīharo ai rātou.
MAR 5:43 Ā, he nui tāna whakatūpato i a rātou, kia kaua tēnei e mōhiotia e tētahi tangata; ka kī kia hoatu he kai māna.
MAR 6:1 Ā, haere ia i reira, ā, ka tae ki tōna kāinga tupu; me te aru anō āna ākonga i a ia.
MAR 6:2 Ā, ka taka mai te hāpati, ka anga ia, ka whakaako i roto i te whare karakia; ā, he tokomaha hoki, i tō rātou rongonga, i mīharo, i mea, “Nō hea ēnei mea a tēnei tangata? He mātauranga aha tēnei kua hoatu nei ki a ia, ā, he aha te tikanga o ēnei merekara nunui kua oti nei i ōna ringa?
MAR 6:3 Ehara ianei tēnei i te kāmura, i te tama a Meri, i te tuakana o Hēmi, o Hohi, o Hūrā, o Haimona? Kāhore ianei ōna tuāhine i konei, i a tātou nei?” Heoi, hē ana rātou ki a ia.
MAR 6:4 Otirā, ka mea a Īhu ki a rātou, “Kei tōna kāinga anake, kei ōna whanaunga, kei tōna whare, te poropiti hapa ai i te hōnore.”
MAR 6:5 Ā, kīhai ia i āhei te mea i tētahi merekara ki reira, heoi anō, ko te whakapā i ōna ringa ki ētahi tāngata tūroro torutoru kia ora ai.
MAR 6:6 Ā, mīharo ana ia ki tō rātou whakapono kore. Nā, hāereerea ana e ia ngā kāinga ā tawhio noa, whakaako ai.
MAR 6:7 Kātahi ia ka karanga i te tekau mā rua, ka anga, ka tono i a rātou tokorua, tokorua; ā, hoatu ana ki a rātou he mana hei pei i ngā wairua poke.
MAR 6:8 I whakahau ia ki a rātou, kia kaua tētahi mea e mauria ki te ara, he tokotoko anake – kaua he pūtea, kaua he taro, kaua he moni mō roto i te whītiki.
MAR 6:9 Engari ngā hū, e here nā; kaua hoki e takiruatia he koti hei kākahu.
MAR 6:10 I mea anō ia ki a rātou, “Ka tapoko ki tētahi whare, hei reira noho ai, ā, haere noa i reira.
MAR 6:11 Ā, ki te kāhore ētahi e manako ki a koutou, ki te kore e whakarongo ki a koutou, ina haere atu koutou i reira, ruia atu te puehu i raro i ō koutou waewae hei whakaatu ki a rātou.”
MAR 6:12 Nā, ka haere rātou, ka kauwhau kia rīpenetā te tangata.
MAR 6:13 He maha hoki ngā rēwera i peia, he tokomaha anō ngā tūroro i kaukauria ki te hinu, i whakaorangia.
MAR 6:14 Ā, ka rongo a Kīngi Herora ki ēnei mea; kua nui haere hoki tōna ingoa, ā, ka mea ia, “Kua ara a Hoani Kaiiriiri i te hunga mate, nā reira i mahi ai ngā merekara i roto i a ia.”
MAR 6:15 Ko ētahi i mea, “Ko Irāia tēnei.” Ko ētahi, “He poropiti ia, he pērā rānei me tētahi o ngā poropiti.”
MAR 6:16 Heoi, i te rongonga o Herora, ka mea ia, “Ko Hoani tēnei i pōutoa e ahau te mātenga; kua ara ia.”
MAR 6:17 I tono tāngata hoki taua Herora, ā, hopukia ana a Hoani, herea iho ki te whare herehere, he mea mō Herōriaha, mō te wahine a tōna tuakana a Piripi; kua mārenatia hoki e ia.
MAR 6:18 Nā Hoani hoki i mea ki a Herora, “E kore e tika kia riro i a koe te wahine a tōu tuakana.”
MAR 6:19 Nā, ka mauāhara a Herōriaha ki a ia, ka mea kia whakamatea ia; heoi, kīhai i taea.
MAR 6:20 I hopohopo hoki a Herora ki a Hoani, i mōhio hoki ki a ia he tangata tika, he tapu, nā, ka āta tiaki i a ia. I tōna rongonga ki a ia he nui tōna pororaru; ā, i whakaahuareka anō ki te whakarongo ki a ia.
MAR 6:21 Ā, ka tae ki tētahi wā pai, i te takanga ai a Herora i tōna rā whānautanga, he hākari mā āna tāngata nunui, mā ngā rangatira hōia, mā ngā tino tāngata o Karirī.
MAR 6:22 Ā, ka haere te tamāhine a taua Herōriaha ki roto, ka kanikani, ka āhuareka a Herora rātou ko te hunga e noho tahi ana, ā, ka mea te kīngi ki te kōtiro rā, “Māu e tono ki ahau tāu e pai ai, ā, ka hoatu e ahau ki a koe.”
MAR 6:23 Nā, ka oati ia ki a ia, “Ko tāu e tono ai ki ahau, ahakoa ko tētahi taha o tōku rangatiratanga, me hoatu e ahau ki a koe.”
MAR 6:24 Nā, ka haere ia, ka kōrero ki tōna whaea, “Me tono e ahau ki te aha?” Ka mea tērā, “Ki te mātenga o Hoani Kaiiriiri.”
MAR 6:25 Nā, hohoro tonu tōna haere ki te kīngi, ka tono, ka mea, “Ko tāku e pai ai, kia hōmai e koe ki ahau āianei ko te mātenga o Hoani Kaiiriiri i runga i te rīhi.”
MAR 6:26 Nā, nui atu te pōuri o te kīngi; otirā, i te whakaaro ki āna oati, ki te hunga hoki e noho tahi ana me ia, kīhai i pai kia whakakāhoretia tāna.
MAR 6:27 Nā, tonoa tonutia atu e te kīngi tētahi o āna hōia kaitiaki me te whakahau atu kia mauria mai tōna mātenga. Ā, haere ana tērā, pōutoa iho e ia tōna mātenga i roto i te whare herehere,
MAR 6:28 ā, mauria mai ana tōna mātenga i runga i te rīhi, hoatu ana ki te kōtiro. Ā, nā te kōtiro i hoatu ki tōna whaea.
MAR 6:29 Ā, nō ka rongo āna ākonga, ka haere mai ka tangohia tōna tinana, ā, whakatakotoria ana ki te urupā.
MAR 6:30 Nā, ka huihui ngā āpōtoro ki a Īhu, kōrerotia ana e rātou ki a ia ngā mea katoa i mea ai rātou, i whakaako ai.
MAR 6:31 Nā, ka mea ia ki a rātou, “Haere mai koutou nā ki te koraha ki te wāhi motu kē, kia tā ai te manawa. He tokomaha hoki e haere mai ana, e haere atu ana, nō kīhai rawa rātou i wātea ki te kai.”
MAR 6:32 Ā, haere puku ana rātou ki te koraha ki tētahi wāhi motu kē rā te kaipuke.
MAR 6:33 Ā, i kite ngā mano i tō rātou haerenga, he tokomaha i mātau ki a ia, nā, ka oma ā-waewae ki reira i roto i ngā pā katoa, ā, ko rātou kua tae wawe.
MAR 6:34 Ā, ka puta a Īhu, ka kite i te hui nui, ka aroha ki a rātou, nō te mea i rite rātou ki te hipi hēparakore; ā, ka anga ia, ka whakaako i a rātou ki ngā mea maha.
MAR 6:35 Nā, kua heke noa atu te rā, ka haere atu āna ākonga ki a ia, ka mea, “He wāhi koraha tēnei, kua heke noa atu te rā.
MAR 6:36 Tonoa atu rātou kia haere ki ngā whenua, ki ngā kāinga i tētahi taha, i tētahi taha, ki te hoko kai mā rātou.”
MAR 6:37 Nā, ka whakahoki ia, ka mea ki a rātou, “Mā koutou e hoatu he kai mā rātou.” Ka mea rātou ki a ia, “Me haere oti mātou ki te hoko taro ki ngā pene e rua rau, ka hoatu ai hei kai mā rātou?”
MAR 6:38 Ka mea ia ki a rātou, “E hia ā koutou taro? Tīkina tirohia.” Ka mōhio rātou, nā ka mea, “E rima, e rua hoki ngā ika.”
MAR 6:39 Ka mea ia ki a rātou kia meinga rātou katoa kia noho, he nohoanga, he nohoanga, ki runga ki te tarutaru matomato.
MAR 6:40 Nā, ka noho rātou, he rōpū, he rōpū, tātakirau, tātakirima tekau.
MAR 6:41 Ā, ka mau ia ki ngā taro e rima, ki ngā ika hoki e rua, ka titiro ki runga ki te rangi, ka whakapai, ka whawhati i ngā taro, ā, hoatu ana ki āna ākonga kia whakatakotoria mā rātou; i tuwhaina anō hoki e ia ngā ika e rua mā rātou katoa.
MAR 6:42 Ā, kai katoa ana rātou, ā, ka mākona.
MAR 6:43 Ā, kotahi tekau mā rua ngā kete i kohia e rātou, kī tonu i ngā whatiwhatinga, i ngā ika hoki.
MAR 6:44 Ā, me te mea e rima mano ngā tāne i kai taro rā.
MAR 6:45 Ā, akiaki tonu iho ia i āna ākonga kia eke ki te kaipuke, kia whakawhiti i mua i a ia ki tāwāhi, ki Petahaira, i a ia e tono ana i te mano kia haere.
MAR 6:46 Nā, ka mutu tāna poroporoaki, ka haere ia ki te maunga ki te īnoi.
MAR 6:47 Nā, kua ahiahi, i waenga moana te kaipuke, ko ia anake hoki i uta.
MAR 6:48 Nā, ka kite ia i a rātou e ruwha ana i te hoenga; i hē hoki te hau ki a rātou; ā, i te whā o ngā mataaratanga o te pō ka haere atu ia ki a rātou, i haere māori atu i runga i te moana. Me te mea hoki ka pahika kē i a rātou.
MAR 6:49 Ā, nō ka kite rātou i a ia e haere ana i runga i te moana, ka mahara he wairua, ka auē;
MAR 6:50 i kite hoki rātou katoa i a ia, ā, ihiihi ana. Otirā, ka hohoro ia te kōrero ki a rātou, ka mea ki a rātou, “Kia manawanui, ko ahau tēnei; kaua e wehi.”
MAR 6:51 Nā, ka eke ia ki te kaipuke ki a rātou; ā, māriri iho te hau. Ā, nui atu tō rātou ohomauri, mīharo ana.
MAR 6:52 Kīhai hoki i mahara ki ngā taro, he pakeke hoki nō ō rātou ngākau.
MAR 6:53 Ā, nō tō rātou whitinga atu, ka tae ki te whenua o Kenehareta, ka herea te kaipuke ki uta.
MAR 6:54 Nō tō rātou mahutatanga i te kaipuke, mōhio tonu rātou ki a ia,
MAR 6:55 Ā, ka oma puta noa i taua whenua, ā, tawhio noa, ka anga, ka mau mai i ngā tūroro i runga i ngā moenga ki te wāhi, i rongo ai rātou kei reira ia.
MAR 6:56 Ā, i ōna haerenga katoatanga ki ngā kāinga, ki ngā pā, ki ngā whenua rānei, ka whakatakotoria e rātou ngā tūroro ki ngā kāinga hokohoko, ka īnoi ki a ia kia pā kau atu rātou ki te tāniko o tōna kākahu, ā, ora ake ngā tāngata katoa i pā ki a ia.
MAR 7:1 Nā, ka huihui ki a ia ngā Parihi, me ētahi o ngā karaipi i haere mai i Hiruhārama.
MAR 7:2 Ā, nō tō rātou kitenga i ētahi o āna ākonga e kai taro ana me te noa anō ngā ringa, arā, kīhai i horoia, ka whakahē rātou.
MAR 7:3 E kore hoki ngā Parihi me ngā Hūrai katoa e kai, ki te kāhore i āta horoia ngā ringa, e pupuri ana hoki i te whakarerenga iho a ngā kaumātua.
MAR 7:4 E kore anō rātou e kai ina hoki mai i te kāinga hokohoko, ki te mea kāhore i horoi. He maha hoki ērā atu mea tuku iho kia puritia e rātou, ngā horoinga o ngā kapu, o ngā pāta, o ngā mea parāhi, o ngā nohoanga.
MAR 7:5 Kātahi, ka ui ngā Parihi me ngā karaipi ki a ia, “He aha āu ākonga tē haere ai i runga i te whakarerenga iho a ngā kaumātua, ā, kāhore e horoi i ngā ringa ina kai taro?”
MAR 7:6 Nā, ka mea ia ki a rātou: “Tika rawa tā Ihāia i poropiti ai mō koutou, mō te hunga tinihanga, te mea hoki i tuhituhia, ‘Ko te iwi nei, ko ō rātou ngutu hei whakahōnore i ahau, ko ō rātou ngākau ia matara noa atu i ahau.
MAR 7:7 Otirā, maumau karakia noa rātou ki ahau, ko tā rātou nei hoki e whakaako ai ko ngā whakahau a te tāngata.’
MAR 7:8 Kei te whakarere hoki koutou i tā te Atua kupu ako, ka mau ki te waihotanga iho a te tāngata.”
MAR 7:9 Ā, ka mea ia ki a rātou, “Tēnā rā tā koutou hanga ki te whakakāhore i te whakahau a te Atua, kia mau ai koutou ki tā koutou whakarerenga iho.
MAR 7:10 I mea hoki a Mohi, ‘Whakahōnoretia tōu pāpā me tōu whaea’; me tēnei, ‘Ki te kōrero kino tētahi mō tōna pāpā, mō tōna whaea rānei, kia mate ia, mate rawa.’
MAR 7:11 Ko koutou ia hei mea, ‘Ki te mea tētahi ki tōna pāpā, ki tōna whaea rānei, “Ko tāku mea hei atawhainga mōu he Koropana,” ’ (arā, he mea i hoatu ki te Atua).
MAR 7:12 Kāhore koutou āianei i te tuku i a ia ki te mea i tētahi aha mā tōna pāpā, mā tōna whaea rānei;
MAR 7:13 ka waiho e koutou tā koutou whakarerenga iho, i whakarērea iho nei e koutou, hei whakakāhore mō tā te Atua kupu. He maha hoki ngā mea pēnā e meinga ana e koutou.”
MAR 7:14 Nā, karangatia ana anō e ia te mano ki a ia, ā, mea ana ki a rātou, “Whakarongo mai koutou katoa, kia mātau hoki.
MAR 7:15 Kāhore he mea o waho o te tāngata ka tapoko nei ki roto ki a ia hei whakanoa i a ia; engari, ngā mea e puta ana mai i roto i a ia, mā ēnā e noa ai te tāngata.
MAR 7:16 Ki te whai taringa tētahi hei whakarongo, kia rongo ia.”
MAR 7:17 Ā, nō ka mawehe kē ia i te mano ki te whare, ka ui āna ākonga ki a ia ki te tikanga o tēnā kupu whakarite.
MAR 7:18 Nā, ka mea ia ki a rātou, “Ha, he kūware anō koutou? Kāhore koutou i mātau, ko ngā mea katoa o waho e tapoko nei ki te tangata, e kore ia e noa i ērā;
MAR 7:19 Nō te mea e kore e tapoko ki tōna ngākau, engari, ki te kōpū a puta ana ki te poka?” He kōrero tēnei nāna kia kīia ai he mā ngā kai katoa.
MAR 7:20 I mea anō ia, “Ko te mea e puta ake ana i te tangata, mā tērā e noa ai te tangata.
MAR 7:21 Nō roto hoki, nō te ngākau o ngā tāngata te putanga o ngā whakaaro kino, o ngā moepuku,
MAR 7:22 o ngā tāhae, o ngā kōhuru, o ngā pūremu, o ngā hiahia apo, o ngā kino, o te tinihanga, o te hiahia taikaha, o te kanohi kino, o te kohukohu, o te whakapehapeha, o te wairangi.
MAR 7:23 Nō roto te putanga ake o ēnei kino katoa, ā, mā reira e noa ai te tangata.”
MAR 7:24 Nā, ka whakatika atu ia i reira, ka haere ki ngā wāhi o Tāira, o Hairona; ā, tomo ana ki tētahi whare, kīhai hoki ia i pai kia rongo tētahi tangata. Otiia, kīhai ia i ngaro.
MAR 7:25 I reira hoki, ka rangona ia e tētahi wahine, he wairua poke tō tāna kōtiro, ā, haere ana mai, takoto ana ki ōna waewae.
MAR 7:26 He wahine Kariki hoki ia, ko Hairopinihia tōna iwi. Ka īnoi ki a ia kia peia e ia te rēwera i roto i tāna kōtiro.
MAR 7:27 Nā, ka mea a Īhu ki a ia, “Tukua kia mātua mākona ngā tamariki. E kore hoki e pai kia tangohia te taro a ngā tamariki, kia makā mā ngā kurī.”
MAR 7:28 Otirā, ka whakahoki ia, ka mea ki a ia, “Āe rā, e te Ariki, e kai ana anō ngā kurī i raro i te tēpu i ngā kongakonga a ngā tamariki.”
MAR 7:29 Nā, ka mea ia ki a ia, “Koia kei tēnā kupu, haere; kua puta te rēwera i roto i tāu kōtiro.”
MAR 7:30 Ā, ka haere atu ia ki tōna whare, nā, rokohanga atu e takoto ana tāna kōtiro i runga i te moenga, kua puta te rēwera.
MAR 7:31 Ā, i hoki anō ia i ngā wāhi o Tāira, o Hairona, haere ana ki te moana o Karirī, rā waenga o ngā wāhi o Rekaporihi.
MAR 7:32 Nā, ka mauria mai ki a ia he turi e whango ana; ka tohe ki a ia kia whakapākia iho tōna ringa ki a ia.
MAR 7:33 Nā, ka tangohia ia e ia i roto i te mano ki tahaki, ā, kuhua ana ōna maihao ki ōna taringa, nā, ka tuwha, ka whakapā ki tōna arero.
MAR 7:34 Ka titiro ki te rangi, ka whakapūmanawa, ka mea ki a ia, “Epata,” arā, “Kia puare.”
MAR 7:35 Nā, puare tonu iho ōna taringa, korokoro noa ana te here o tōna arero, nā, kua tika āna kōrero.
MAR 7:36 Kātahi ia ka whakatūpato i a rātou kia kaua e kōrerotia ki te tangata. Otirā, ahakoa te nui o tāna whakatūpato i a rātou, nui noa atu tā rātou kōrero haere.
MAR 7:37 Ā, tino mīharo rawa rātou, ka mea, “Pai tonu tāna meatanga i ngā mea katoa; e mea ana ia i ngā turi kia rongo, i ngā wahangū kia kōrero.”
MAR 8:1 I aua rā, i te mea he nui rawa te mano, kāhore hoki he kai mā rātou, ka karanga a Īhu ki āna ākonga, ka mea ki a rātou,
MAR 8:2 “E aroha ana ahau ki ngā tāngata, ka toru nei hoki ō rātou rā e noho ana ki ahau, ā, kāhore ā rātou kai.
MAR 8:3 Ki te tonoa pukutia rātou e ahau ki tō rātou kāinga, ka hemo ki te ara; i haere mai hoki ētahi o rātou i tawhiti.”
MAR 8:4 Nā, ka whakahokia e āna ākonga ki a ia, “Me aha e te tangata ka mākona ai ēnei i te taro i konei, i te koraha?”
MAR 8:5 Ka ui ia ki a rātou, “E hia ā koutou taro?” Ka mea rātou, “E whitu.”
MAR 8:6 Nā, ka mea ia ki te mano kia noho ki te whenua; ā, ka mau ki ngā taro e whitu, ka whakawhetai, ka whawhati, ā, hoatu ana e ia ki āna ākonga kia whakatakotoria ki mua i a rātou; whakatakotoria ana e rātou mā te mano.
MAR 8:7 He ika anō a rātou torutoru nei, he mea nonohi, ā, ka mutu te whakapai, ka mea ia kia whakatakotoria hoki ērā.
MAR 8:8 Nā, kai ana rātou, ā, ka mākona, ā, kohia ake ana o ngā whatiwhatinga i toe e whitu ngā kete.
MAR 8:9 Me te mea e whā mano te hunga i kai, ā, tonoa atu ana rātou e ia.
MAR 8:10 Nā, eke tonu ia rātou ko āna ākonga ki te kaipuke, ā, ka tae ki ngā wāhi o Taramanuta.
MAR 8:11 Nā, ka puta mai ngā Parihi, ka anga, ka totohe ki a ia, ka rapu tohu ki ia i te rangi, hei whakamātautau mōna.
MAR 8:12 Nā, ka hotu tōna wairua, ka mea ia, “He aha tēnei whakatupuranga ka rapu ai ki te tohu? He pono tāku e mea nei ki a koutou, e kore e hoatu he tohu ki tēnei whakatupuranga.”
MAR 8:13 Nā, mahue ake rātou i a ia, ā, eke ana anō ki te kaipuke, rere ana ki tērā taha.
MAR 8:14 Nā, i wareware rātou ki te mau taro, kotahi tonu ā rātou taro i te kaipuke.
MAR 8:15 Nā, ka whakatūpato ia i a rātou, ka mea, “Kia mahara, kia tūpato i te rēwena a ngā Parihi, i te rēwena hoki a Herora.”
MAR 8:16 Ā, ka kōrerorero rātou ki a rātou anō, ka mea, “Nō te mea kāhore ā tātou taro.”
MAR 8:17 Ka mōhio a Īhu, ka mea ki a rātou, “He aha koutou ka kōrerorero ai nō te mea kāhore ā koutou taro? Kīanō koutou i mātau noa, kīanō i mahara? E pakeke tonu ana anō rānei ō koutou ngākau?
MAR 8:18 He kanohi nei ō koutou, ā, kāhore e kite? He taringa nei ō koutou, ā, kāhore e rongo? Kāhore e mahara?
MAR 8:19 I ahau i whawhati i ngā taro e rima mā ngā mano e rima, e hia ngā kete kī o ngā whatiwhatinga i kohia e koutou?” Ka mea rātou ki a ia, “Kotahi tekau mā rua.”
MAR 8:20 “Ā, i ngā taro hoki e whitu mā ngā mano e whā, e hia ngā kete kī o ngā whatiwhatinga i kohia e koutou?” Ka mea rātou, “E whitu.”
MAR 8:21 Nā, ka mea ia ki a rātou, “Kāhore anō ia koutou kia mātau noa?”
MAR 8:22 Ā, ka tae rātou ki Petahaira. Nā, ka kawea mai e rātou he matapō ki a ia, ka īnoi ki a ia kia whakapāngia e ia.
MAR 8:23 Nā, ka mau ia ki te ringa o te matapō, ka ārahi i a ia ki waho o te kāinga; ka tuwha ki ōna kanohi, ā, ka whakapā i ōna ringa ki a ia, ka ui ki a ia me kore ia e kite i tētahi mea.
MAR 8:24 Nā, ka titiro ake ia, ka mea, “E kite ana ahau i ngā tāngata e hāereere ana me te mea he rākau.”
MAR 8:25 Me i reira, ka whakapākia anō ngā ringa ki ōna kanohi, ka mea i a ia kia titiro. Nā, ka ora ia, ā, ka mārama te titiro ki ngā mea katoa.
MAR 8:26 Nā, ka tono ia i a ia ki tōna whare, ka mea atu, “Kaua e tomo ki te kāinga.”
MAR 8:27 Nā, ka haere a Īhu rātou ko āna ākonga ki ngā kāinga o Hiharia Piripai, ā, i te ara ka ui ia ki āna ākonga, ka mea ki a rātou, “Ki tā ngā tāngata kī, ko wai ahau?”
MAR 8:28 Nā, ko tā rātou whakahokinga, “Ko Hoani Kaiiriiri; ki tā ētahi, ko Irāia; ki tā ētahi, ko tētahi o ngā poropiti.”
MAR 8:29 Nā, ka mea ia ki a rātou, “Ki tā koutou nā kī, ko wai ahau?” Nā, ka whakahoki a Pita, ka mea ki a ia, “Ko te Karaiti koe.”
MAR 8:30 Nā, ka whakatūpato ia i a rātou, kia kaua ia e kōrerotia ki te tangata.
MAR 8:31 Kātahi ia ka anga, ka whakaako i a rātou, kua takoto te tikanga kia maha ngā mamae o te Tama a te tangata, kia whakakinongia hoki e ngā kaumātua, e ngā tohunga nui, e ngā karaipi, ā, kia whakamatea, ā, kia ara anō ina pahure ngā rā e toru.
MAR 8:32 I kōrerotia matanuitia anō taua kupu e ia. Nā, ka mau a Pita ki a ia, ka anga, ka whakahē ki tāna.
MAR 8:33 Otirā, ka tahuri ia, ā, i te kitenga i āna ākonga, ka whakahē ki tā Pita, ka mea, “Haere ki muri i ahau, e Hātana. Kāhore hoki ōu ngākau ki ngā mea a te Atua, engari, ki a te tangata.”
MAR 8:34 Nā, ka karangatia e ia te mano, rātou ko āna ākonga, ka mea ki a rātou, “Ki te mea tētahi tangata kia haere mai ki te whai i ahau, me whakakāhore ia i a ia anō, me amo i tōna rīpeka, ka aru ai i ahau.
MAR 8:35 Ki te whai tētahi kia ora, ka mate ia; ki te mate hoki tētahi, mōna i whakaaro ki ahau, ki te rongopai hoki, ka ora ia.
MAR 8:36 Ā, he aha te pai ki te tangata, ki te riro i a ia te ao katoa, ā, ka kore he ora mōna?
MAR 8:37 He aha hoki tā te tangata e hoatu ai hei utu mōna kia ora?
MAR 8:38 Ki te whakamā hoki tētahi ki ahau, ki āku kōrero, i tēnei whakatupuranga pūremu, kino, ka whakamā anō te Tama a te tangata ki a ia, ina haere mai i runga i te korōria o tōna Matua, rātou ko ngā anahera tapu.”
MAR 9:1 I mea anō ia ki a rātou, “He pono tāku e mea nei ki a koutou, tēnei anō ētahi o te hunga e tū nei, e kore e pāngia e te mate, kia kite rā anō i te rangatiratanga o te Atua e haere mai ana i runga i te kaha.”
MAR 9:2 Ā, ka pahure ngā rā e ono, ka mau a Īhu ki a Pita, ki a Hēmi, ki a Hoani, nā, kawea ana rātou e ia ki runga ki tētahi maunga tiketike, ko rātou anake. Ā, ka puta kē tōna āhua i tō rātou aroaro.
MAR 9:3 Nā, kanapa tonu ōna kākahu, mā tonu me te hukarere; e kore e taea e te kaihoroi i runga i te whenua te mea kia pērā te mā.
MAR 9:4 Nā, ka puta mai ki a rātou a Irāia rāua ko Mohi; e kōrerorero ana rāua ki a Īhu.
MAR 9:5 Nā, ka oho a Pita, ka mea ki a Īhu, “E te Kaiwhakaako, he mea pai kia noho tātou ki konei; nā, kia hangā e mātou ētahi wharau kia toru; kia kotahi mōu, kia kotahi mō Mohi, kia kotahi mō Irāia.”
MAR 9:6 Kāhore hoki ia i mātau ki tāna e kōrero ai; i wehi hoki rātou.
MAR 9:7 Nā, ko tētahi kapua e taumarumaru ana ki runga ki a rātou; ā, ka puta he reo i te kapua, e mea ana, “Ko tāku Tama tēnei i aroha ai; whakarongo ki a ia.”
MAR 9:8 Ā, titiro rawa ake rātou ki tētahi taha, ki tētahi taha kāhore ā rātou tāngata i kite ai, ko rātou anake, ko Īhu.
MAR 9:9 Ā, i a rātou e heke iho ana i te maunga, ka whakatūpato ia i a rātou kia kaua e kōrerotia ki te tangata ā rātou i kite ai, kia ara rā anō te Tama a te tangata i te hunga mate.
MAR 9:10 Ā, i puritia taua kupu e rātou, ka uiui ki a rātou anō, he aha rā te aranga ake i te hunga mate.
MAR 9:11 Ā, ka ui rātou ki a ia, ka mea, “He aha ngā karaipi ka mea ai, ko Irāia kia mātua puta mai?”
MAR 9:12 Nā, ka whakahoki ia, ka mea ki a rātou, “E puta ana anō a Irāia i mua ki te whakatika i ngā mea katoa. Kua oti anō te tuhituhi mō te Tama a te tangata, kia maha ōna mamae, kia whakakāhoretia.
MAR 9:13 Ko tāku kupu ia tēnei ki a koutou, Kua tae mai anō a Irāia, heoi, meatia ana e rātou ki a ia tā rātou i pai ai, ngā mea hoki i tuhituhia mōna.”
MAR 9:14 Ā, nō tō rātou taenga ki ngā ākonga, ka kite rātou he rahi te hui e karapoti ana i a rātou, me ngā karaipi e totohe ana ki a rātou.
MAR 9:15 Ā, kite kau te mano katoa i a ia, ka mīharo, ā, oma ana, oha ana ki a ia.
MAR 9:16 Nā, ka ui ia ki a rātou, “He aha tā koutou e totohe nā ki a rātou?”
MAR 9:17 Nā, ka whakahoki tētahi i roto i te mano, ka mea, “E te Kaiwhakaako, i kawea mai e ahau tāku tama ki a koe, he wairua reokore tōna.
MAR 9:18 Ā, i ngā wāhi e hopu ai te wairua i a ia, ka tāia iho. Tutū ana te huka, tetēā ana ōna niho, ā, pakoko haere ana: i mea anō ahau ki āu ākonga kia peia ia ki waho; heoi, kīhai i taea e rātou.”
MAR 9:19 Nā, ko tāna whakahokinga ki a ia, ka mea, “E te uri whakapono kore, kia pēhea te roa o tōku noho ki a koutou? Kia pēhea te roa o tāku manawanui ki a koutou? Kawea mai ki ahau.”
MAR 9:20 Nā, kawea ana mai ia ki a ia. Ā, i tōna kitenga i a ia, nā, haea tonutia iho ia e te wairua; ā, hinga ana ia ki te whenua, ka oke, ka huka.
MAR 9:21 Nā, ka ui ia ki tōna matua, “Ka pēhea te roa o te mea nei ki ia?” Ka mea ia, “Nō te tamarikitanga.
MAR 9:22 He maha āna turakanga i a ia ki te kāpura, ki te wai, kia ngaro ai: otirā ki te taea e koe te aha rānei, arohaina māua, kia puta tōu whakaaro ki a māua.”
MAR 9:23 Ka mea a Īhu ki a ia, “Ki te taea e koe te whakapono, ka taea ngā mea katoa e te tangata whakapono.”
MAR 9:24 Nā, karanga tonu mai te matua o te tama, ka mea, “E whakapono ana ahau, e te Ariki; kia puta tōu whakaaro ki tōku whakapono kore.”
MAR 9:25 Ā, nō te kitenga o Īhu i te mano e oma mai ana, ka rīria e ia te wairua poke, ka mea ki a ia, “E te wairua reokore, turi, ko tāku tēnei ki a koe, Puta mai i roto i a ia, kaua anō e tomo ki roto ki a ia ā muri ake nei.”
MAR 9:26 Nā, hāmama ana tērā, haehae noa iho ana i a ia, ā, puta ana mai ki waho; nō ka pērā taua tangata me te tūpāpaku, ā, he tokomaha i mea, “Kua mate.”
MAR 9:27 Otirā, ka mau a Īhu ki tōna ringa, ka whakaara i a ia, ā, ka whakatika ia.
MAR 9:28 Ā, i a ia ka tomo ki te whare, ka ui puku āna ākonga ki a ia, “He aha mātou tē āhei ai te pei i a ia ki waho?”
MAR 9:29 Anō rā, ko ia ki a rātou, “E kore e puta noa te pēnā, mā te īnoi anake, mā te nohopuku.”
MAR 9:30 Nā, ka hāpainga e rātou i reira, ā, haere ana rā waenganui o Karirī; kīhai hoki ia i pai kia rangona e tētahi.
MAR 9:31 Ko tāna hoki i whakaako ai ki āna ākonga, i mea ai ki a rātou, “Ka tukua te Tama a te tangata ki ngā ringa o ngā tāngata, ā, mā rātou ia e whakamate; ā, ka oti ia te whakamate, ka ara ake i te toru o ngā rā.”
MAR 9:32 Nā, kīhai rātou i mātau ki taua kupu, ka mataku hoki ki te ui ki a ia.
MAR 9:33 Nā, ka tae rātou ki Kaperenauma; ā, i a ia i roto i te whare, ka ui ia ki a rātou, “He aha tā koutou i kōrerorero ai ki a koutou i te ara?”
MAR 9:34 Otiia, kīhai rātou i kīkī; ko tā rātou hoki i kōrerorero ai ki a rātou i te ara, ko wai te mea nui rawa.
MAR 9:35 Nā, ka noho ia, ka karanga i te tekau mā rua, ka mea ki a rātou, “Ki te whai tētahi kia whiti ko ia hei mua, ka waiho ia hei muri i te katoa, hei kaimahi mā te katoa.”
MAR 9:36 Nā, ka mau ia ki tētahi tamaiti nohinohi, ā, whakatūria ana ki waenganui i a rātou; nā, ka okooko i a ia, ka mea ki a rātou,
MAR 9:37 “Ki te manako tētahi ki tētahi o ngā tamariki pēnei, he whakaaro ki tōku ingoa, e manako ana ia ki ahau; ki tē manako hoki tētahi ki ahau, ehara i ahau tāna i manako ai, engari ko tōku kaitono mai.”
MAR 9:38 Nā, ka mea a Hoani ki ia, “E te Kaiwhakaako, i kite mātou i tētahi e pei rēwera ana i runga i tōu ingoa. Nā, rīria iho e mātou, kāhore hoki ia e haere tahi me tātou.”
MAR 9:39 Nā, ka mea a Īhu, “Kaua ia e rīria ki te mea hoki nōku te ingoa e mahi merekara ai tētahi, e kore e hohoro tāna kōrero kino mōku.
MAR 9:40 Ko ia hoki ehara i te hoariri ki a tātou, nō tātou ia.
MAR 9:41 Ki te whakainumia koutou e tētahi ki te kapu wai, he whakaaro ki tōku ingoa, nō te mea nō te Karaiti koutou, he pono tāku e mea nei ki a koutou, e kore ia e hapa i tōna utu.”
MAR 9:42 “Nā, ki te mea tētahi kia hē tētahi o ēnei mea nonohi e whakapono nei ki ahau, he pai kē ki a ia me i whakairia tētahi kōhatu mira ki tōna kakī, ā, ka makā ia ki te moana.
MAR 9:43 Nā, ki te hē koe i tōu ringa, pōutoa; pai kē hoki mōu te tomo mutu ki te ora i te makā ringaruatia ki Kehena, ki te kāpura e kore e tineia.
MAR 9:44 Ki te wāhi e kore ai e mate tō rātou kutukutu, ki te kāpura e kore e tineia.
MAR 9:45 Ki te hē anō koe i tōu waewae, pōutoa; pai kē hoki mōu te tomo kopa ki te ora i te makā waewaeruatia ki Kehena,
MAR 9:46 Ki te wāhi e kore ai e mate tō rātou kutukutu, ki te kāpura e kore e tineia.
MAR 9:47 Ā, ki te hē koe i tōu kanohi, makā atu; pai kē hoki mōu te tomo kanohi tahi ki te rangatiratanga o te Atua i te makā kanohiruatia ki Kehena,
MAR 9:48 ki te wāhi e kore ai e mate tō rātou kutukutu, ki te kāpura e kore e tineia.
MAR 9:49 “Tā te mea ka totea ngā tāngata katoa ki te kāpura.
MAR 9:50 “He pai te tote; otirā, ki te pirau te tote, mā te aha e whai tikanga tote ai? Kia whai tote i roto i a koutou, kia mau hoki te rongo a tētahi ki tētahi.”
MAR 10:1 Nā, ka whakatika ia i reira, haere ana ki ngā wāhi o Hūria ki tērā taha o Horano. Nā, ka huihui mai anō ngā mano ki a ia; ka whakaako anō ia i a rātou, ko tāna tikanga hoki tērā.
MAR 10:2 Nā, ka haere mai ngā Parihi, ka ui ki a ia, “He mea tika rānei kia whakarere te tangata i tāna wahine?” He whakamātautau hoki mōna.
MAR 10:3 Nā, ka whakahoki ia, ka mea ki a rātou, “He aha tā Mohi i mea ai ki a koutou?”
MAR 10:4 Ka kī rātou, “I tukua e Mohi kia tuhituhia he pukapuka whakarere, ka whakarere ai.”
MAR 10:5 Nā, ka whakahoki a Īhu, ka mea ki a rātou, “Nā te pakeke o ō koutou ngākau i tuhituhia ai e ia tēnei kupu ako ki a koutou.
MAR 10:6 I te orokohanganga ia, ‘I hangā rāua e te Atua he tāne, he wahine.’
MAR 10:7 ‘Mō konei ka mahue i te tangata tōna pāpā me tōna whaea, ka piri ki tāna wahine;
MAR 10:8 hei kikokiko kotahi hoki rāua tokorua.’ Nā, heoi anō tō rāua tokoruatanga, engari, kotahi anō kikokiko.
MAR 10:9 Nā, ko ā te Atua i hono ai, kaua e wehea e te tangata.”
MAR 10:10 Ā, i te whare ka ui anō āna ākonga ki a ia ki taua mea.
MAR 10:11 Ka mea ia ki a rātou, “Ki te whakarere tētahi i tāna wahine, ā, ka mārena i tētahi atu, e pūremu ana ia, e hara ana ki tērā.
MAR 10:12 Ki te whakarere hoki te wahine i tāna tāne, ā, ka mārenatia ki tētahi atu, e pūremu ana ia.”
MAR 10:13 Nā, ka kawea mai ki a ia ētahi tamariki nonohi, kia pā ai ia ki a rātou; otirā, ka rīria e ngā ākonga te hunga nāna i kawe mai.
MAR 10:14 Nō te kitenga ia o Īhu, ka riri, ka mea ki a rātou, “Tukua ngā tamariki nonohi kia haere mai ki ahau, kaua hoki rātou e āraia atu; nō ngā pēnei hoki te rangatiratanga o te Atua.
MAR 10:15 He pono tāku e mea nei ki a koutou, ki te kāhore e rite te tango a tētahi i te rangatiratanga o te Atua ki tā te tamaiti nohinohi, e kore ia e tomo ki roto.”
MAR 10:16 Nā, okookona ana rātou e ia, whakapākia iho ōna ringa ki a rātou, manaakitia ana rātou.
MAR 10:17 Nā, i a ia e haere ana i te huarahi, ka oma mai tētahi, ka tuku iho i ngā turi ki a ia, ka ui, “E te Kaiwhakaako pai, me aha ahau ka whiwhi ai ki te ora tonu?”
MAR 10:18 Nā, ka mea a Īhu ki a ia, “He aha ahau i kīia ai e koe he pai? Kāhore tētahi i pai, kotahi anake, ko te Atua.
MAR 10:19 E mātau ana koe ki ngā ture, ‘Kaua e pūremu. Kaua e patu tangata. Kaua e tāhae. Kaua e whakapae teka. Kaua e kaiā. Whakahōnoretia tōu pāpā me tōu whaea.’ ”
MAR 10:20 Nā, ka whakahoki tērā, ka mea ki a ia, “E te Kaiwhakaako, kua rite katoa ēnei mea i ahau nō tōku tamarikitanga ake.”
MAR 10:21 Nā, ka titiro a Īhu ki a ia, ka aroha ki a ia, ka mea ki a ia, “Kotahi te mea kāhore nei i a koe: haere, hokona āu mea, ka hoatu ki ngā rawakore, ā, e whai taonga koe ki te rangi. Kātahi ka haere mai, ka aru i ahau.”
MAR 10:22 Otirā, ka tuku tōna mata i taua kupu, ā, haere pōuri atu ana; he maha hoki ōna taonga.
MAR 10:23 Nā, ka tirotiro a Īhu, ka mea ki āna ākonga, “Anō te whakauaua o te tapoko o te hunga taonga ki te rangatiratanga o te Atua!”
MAR 10:24 Nā, ka mīharo ngā ākonga ki āna kupu. Otirā, ka whakahoki anō a Īhu, ka mea ki a rātou, “E tama mā, anō te whakauaua o te tapoko ki tō te Atua rangatiratanga o te hunga e whakawhirinaki ana ki ngā taonga!
MAR 10:25 Erangi, te haere o te kāmera rā te kōwhao o te ngira he mea takoto noa, he whakauaua rawa ia te haere o te tangata taonga ki roto ki te rangatiratanga o te Atua.”
MAR 10:26 Nā, rahi rawa tō rātou mīharo, ka mea ki a rātou anō, “Ko wai rā e ora?”
MAR 10:27 Nā, ka titiro a Īhu ki a rātou, ka mea, “E kore tēnei e taea e te tangata, ki te Atua ia ka taea; e taea hoki ngā mea katoa e te Atua.”
MAR 10:28 Kātahi, ka anga a Pita, ka mea ki a ia, “Nā, kua mahue nei i a mātou ngā mea katoa, kua aru nei i a koe.”
MAR 10:29 Nā, ka whakahoki a Īhu, ka mea, “He pono tāku e mea nei ki a koutou, ki te whakarērea e tētahi tangata, he whare, he tēina, he tuāhine, he whaea, he pāpā, he tamariki, he māra, he whakaaro nōna ki ahau, ki te rongopai hoki,
MAR 10:30 inā, tātakirau ngā mea e riro i a ia, i tēnei wā, he whare, he tēina, he tuāhine, he whaea, he tamariki, he māra, me te whakatoi; ā, i te ao meāke puta, he ora tonu.
MAR 10:31 He tokomaha ia ō mua e waiho ki muri; ko ō muri hoki ki mua.”
MAR 10:32 Nā, i te huarahi rātou e haere ana ki Hiruhārama; me te haere anō a Īhu i mua i a rātou: nā, e mīharo ana rātou; e aru mataku ana. Heoi, ka mau anō ia i te tekau mā rua, ka anga, ka kōrero ki a rātou i ngā mea meāke pā ki a ia.
MAR 10:33 “Nanā, e haere ana tēnei tātou ki Hiruhārama; ā, ka tukua te Tama a te tangata ki ngā tohunga nui, ki ngā karaipi; ka kīia e rātou kia mate, ka tuku hoki rātou i a ia ki ngā tauiwi;
MAR 10:34 ka tāwaia ia, ka tuwhaina, ka whiua, ka whakamatea, ā, i te toru o ngā rā, ka ara.”
MAR 10:35 Nā, ka whakatata mai ki a ia a Hēmi rāua ko Hoani, ngā tama a Heperi, ka mea, “E te Kaiwhakaako, e hiahia ana māua kia meatia e koe tā māua e īnoi ai.”
MAR 10:36 Nā, ka mea ia ki a rāua, “He aha tā kōrua e hiahia ai kia meatia e ahau mā kōrua?”
MAR 10:37 Ka mea rāua ki a ia, “Tukua ki a māua kia noho, tētahi ki tōu matau, tētahi ki tōu mauī, i tōu korōria.”
MAR 10:38 Nā, ko te meatanga a Īhu ki a rāua, “Kāhore kōrua e mātau ki tā kōrua e īnoi nei; e āhei rānei kōrua te inu i te kapu ka inumia nei e ahau? Kia iriiria ki te iriiringa ka iriiria nei ahau?”
MAR 10:39 Ka mea rāua ki a ia, “E āhei anō.” Ka kī atu a Īhu ki a rāua, “E inu anō kōrua i te kapu ka inumia e ahau; e iriiria kōrua ki te iriiringa e iriiria ai ahau.
MAR 10:40 Tēnā, ko te noho ki tōku matau, ki tōku mauī rānei, ehara i te mea māku e hoatu, engari, ka riro i te hunga i whakaritea nei mō rātou.”
MAR 10:41 Ā, nō te rongonga o te tekau, ka anga ka riri ki a Hēmi rāua ko Hoani.
MAR 10:42 Nā, karangatia ana rātou e Īhu ki a ia, ka mea ki a rātou, “E mahara ana koutou, ko te hunga e kīia ana he kāwana nō ngā tauiwi hei whakatupu rangatira ki a rātou; ko ō rātou tāngata rarahi hoki hei akiaki i a rātou.
MAR 10:43 Otirā, e kore e pērā i roto i a koutou; engari, ki te mea tētahi kia whakatupu tangata rahi i roto i a koutou, me whakatupu kaimahi ia mā koutou.
MAR 10:44 Ki te mea hoki tētahi o koutou kia whakatupu tino tangata, me whakatupu pononga ia mā te katoa.
MAR 10:45 Kīhai nei hoki te Tama a te tangata i haere mai kia mahia he mea māna, engari, kia mahi ia, kia tuku hoki i a ia kia mate hei utu mō ngā tāngata tokomaha.”
MAR 10:46 Nā, ka tae rātou ki Heriko. Ā, i a ia e haere atu ana i roto i Heriko, rātou ko āna ākonga me te mano tini, e noho ana a Paratimiuha, tama a Timiuha, he matapō, i te taha o te ara, ki te tono mea māna.
MAR 10:47 Ā, i tōna rongonga ko Īhu o Nahareta tēnā, ka anga ia, ka karanga, ka mea, “E Īhu, e te Tama a Rāwiri, kia aroha ki ahau.”
MAR 10:48 Ā, he tokomaha ki te riri i a ia kia noho puku, heoi, tino rahi ake tāna karanga, “E te Tama a Rāwiri, kia aroha ki ahau.”
MAR 10:49 Nā, ka tū a Īhu, ka mea kia karangatia ia. Ā, karangatia ana e rātou te matapō, ka mea ki a ia, “Kia māia, whakatika; e karanga ana ia ki a koe.”
MAR 10:50 Nā, ka whakarērea e ia tōna kākahu, ā, whakatika ana, haere ana ki a Īhu.
MAR 10:51 Nā, ka oho a Īhu, ka mea ki a ia, “He aha tāu e hiahia nā kia meatia e ahau māu?” Ka kī te matapō ki a ia, “E te Ariki, kia titiro ahau.”
MAR 10:52 Ka mea a Īhu ki a ia, “Haere; nā tōu whakapono koe i ora ai.” Nā, titiro tonu iho ia, aru ana i a Īhu i te ara.
MAR 11:1 Ā, nō ka tata rātou ki Hiruhārama, ki Petapaki, ki Petani, ā, ka tae ki Maunga Ōriwa, tokorua āna ākonga i tonoa e ia,
MAR 11:2 ā, i mea ia ki a rāua, “Haere ki te kāinga e anga mai ana ki a kōrua; e tomo kau ki reira, ka kite kōrua i tētahi kūao e here ana, kāhore anō kia nohoia e te tangata; wetekina, ārahina mai.
MAR 11:3 Ā, ki te kī mai tētahi tangata ki a kōrua, ‘He aha tēnei ka meinga ai e kōrua?’ Ka mea atu, ‘E mea ana te Ariki ki a ia māna; nā, ka tukua tonutia mai ki konei.’ ”
MAR 11:4 Nā, haere ana rāua, ka kite i te kūao e here ana ki te kūwaha i waho i te ara; ā, wetekina ana e rāua.
MAR 11:5 Ā, ka mea ētahi o te hunga e tū ana i reira ki a rāua, “He aha tā kōrua e wewete nā i te kūao?”
MAR 11:6 Nā, ka kōrerotia e rāua ki a rātou tā Īhu i mea ai; ā, tukua ana rāua e rātou.
MAR 11:7 Ka ārahina te kūao ki a Īhu, nā, whārikitia ana ō rāua kākahu ki runga ki a ia; ā, noho ana ia i runga.
MAR 11:8 Nā, he tokomaha i whāriki i ō rātou kākahu ki te ara. Ko ētahi i kokoti i ngā manga o ngā rākau, whārikitia ana ki te ara.
MAR 11:9 Ko te hunga i haere i mua, me te hunga i haere i muri, i karanga, i mea, “Ohana! Ka whakapaingia ia e haere mai ana i runga i te ingoa o te Ariki!
MAR 11:10 Ka whakapaingia te rangatiratanga e haere mai ana, te rangatiratanga o tō tātou matua o Rāwiri! Ohana i runga rawa!”
MAR 11:11 Nā, ka tomo a Īhu ki Hiruhārama, ki roto hoki ki te temepara; ā, ka mutu tāna tirotiro i ngā mea katoa, ko te wā hoki o te ahiahi, ka haere rātou ko te tekau mā rua ki Petani.
MAR 11:12 Nā, i te aonga ake, i a rātou kua puta i Petani, ka hiakai ia.
MAR 11:13 Ā, i tōna kitenga i tētahi piki i tawhiti, he rau ōna, ka haere ia, me kore e kitea tētahi mea i runga; ā, nō tōna taenga, kīhai i kitea e ia tētahi mea, he rau anake: ehara hoki i te wā o te piki.
MAR 11:14 Nā, ka oho a Īhu, ka mea ki taua rākau, “Kaua rawa te tangata e kai i tētahi hua ōu ake tonu atu.” Me te whakarongo anō āna ākonga.
MAR 11:15 Ā, ka tae rātou ki Hiruhārama. Nā, ka tomo a Īhu ki te temepara, ka anga ki te pei ki waho i te hunga e hoko atu ana, e hoko mai ana i roto i te temepara, ā, whakatahuritia ake ngā tēpu o ngā kaiwhakawhitiwhiti moni, me ngā nohoanga o ngā kaihoko kūkupa.
MAR 11:16 Ā, kīhai i tukua e ia kia mauria tētahi oko e te tangata rā te temepara.
MAR 11:17 Ā, i whakaako ia, i mea ki a rātou, “Kāhore koia i tuhituhia, ‘Ka kīia tōku whare he whare īnoi mō ngā tauiwi katoa’? Otiia, kua meinga nei e koutou hei ana mō ngā kaipāhua.”
MAR 11:18 I rongo hoki ngā tohunga nui me ngā karaipi, ā, ka rapu ki te pēhea e whakangaromia ai ia. I mataku hoki rātou i a ia, nō te mea i mīharo te mano katoa ki tāna ako.
MAR 11:19 Ā, i ngā ahiahi ka haere ia ki waho o te pā.
MAR 11:20 Ā, i te ata i a rātou e haere ana, ka kite i te piki, kua maroke ake i ngā pakiaka.
MAR 11:21 Nā, ka mahara a Pita, ka mea ki a ia, “E te Kaiwhakaako, nā, te piki i kangā rā e koe, kua maroke.”
MAR 11:22 Nā, ka whakahoki a Īhu, ka mea ki a rātou, “Kia mau te whakapono ki te Atua.
MAR 11:23 He pono hoki tāku e mea nei ki a koutou, ki te mea tētahi ki tēnei maunga, ‘Kia rangā atu koe, kia whakatakā ki te moana,’ e kore hoki e ruarua tōna ngākau, engari, ka whakapono ia tērā e puta mai ngā mea i kīia e ia; ka whiwhi ia ki tāna i mea ai.
MAR 11:24 Koia ahau ka mea nei ki a koutou, ko ngā mea katoa e tono ai koutou ina īnoi, me whakapono ka riro mai i a koutou, ā, ka whiwhi koutou.
MAR 11:25 Ā, ka tū koutou, ka karakia, ki te mea he take riri tā koutou ki tētahi, murua; kia murua ai hoki ō koutou hē e tō koutou Matua i te rangi.
MAR 11:26 Nā, ki te kore koutou e muru, e kore anō tō koutou Matua i te rangi e muru i ō koutou hē.”
MAR 11:27 Nā, ka tae anō rātou ki Hiruhārama. Ā, i a ia e hāereere ana i te temepara, ka haere mai ki a ia ngā tohunga nui, me ngā karaipi, me ngā kaumātua;
MAR 11:28 ka mea ki a ia, “Tēnā, te mana i meatia ai ēnei mea e koe? Nā wai hoki tēnei mana i hoatu ki a koe, i mea ai koe i ēnei mea?”
MAR 11:29 Nā, ka whakahoki a Īhu, ka mea ki a rātou, “Māku hoki e ui ki a koutou kia kotahi kupu, mā koutou e whakahoki mai ki ahau, kātahi, ka kōrerotia e ahau ki a koutou te mana i mea ai ahau i ēnei mea.
MAR 11:30 Ko te iriiringa a Hoani, nō te rangi, nō te tangata rānei? Kōrerotia mai ki ahau.”
MAR 11:31 Ā, ka kōrerorero rātou ki a rātou anō, ka mea, “Ki te mea tātou, ‘Nō te rangi’; ka mea ia, ‘Ha, he aha koutou tē whakapono ai ki a ia?’
MAR 11:32 Ā, ki te mea tātou, ‘Nō te tangata.’ ” (Ka mataku rātou i te iwi; ki tā rātou katoa hoki he poropiti pono a Hoani.)
MAR 11:33 Nā, ka whakahoki rātou, ka mea ki a Īhu, “Kāhore mātou e mātau.” Nā, ka mea a Īhu ki a rātou, “E kore anō e kōrerotia e ahau ki a koutou te mana i mea ai ahau i ēnei mea.”
MAR 12:1 Nā, ka tīmata ia ki te kōrero kupu whakarite ki a rātou: “I whakatōkia e tētahi tangata he māra wāina, taiepatia ana ki te taiepa, nā, ka keria te takotoranga wāina, hangā ana tētahi whare tiketike, tukua ana e ia ki ngā kaimahi, nā, ko tōna haerenga ki tawhiti.
MAR 12:2 Ā, i te pō i tika ai ka tonoa e ia he pononga ki ngā kaimahi ki te tiki i ētahi hua o te māra wāina i a rātou.
MAR 12:3 Nā, ka mau rātou ki a ia, ā, whiua ana, tonoa kautia atu ana.
MAR 12:4 Nā, ka tonoa anō e ia ki a rātou tētahi atu pononga; ā, ka ākina ia e rātou ki te kōhatu, ngawhā iho tōna mātenga, ā, ka tūkinotia ia e rātou ka tonoa atu.
MAR 12:5 Nā, ka tonoa anō e ia tētahi atu; ā, whakamatea iho ia e rātou; me ērā atu, tōna tini, ko ētahi i whiua, ko ētahi i whakamatea.
MAR 12:6 “Nā, kotahi ake anō tāna, he tama aroha nāna, ko ia ō muri rawa i tonoa ai e ia ki a rātou, i mea hoki ia, ‘E hopohopo rātou ki tāku tama.’
MAR 12:7 Nā, ka mea aua kaimahi ki a rātou anō, ‘Ko te tangata tēnei mōna te kāinga; tēnā, tātou ka whakamate i a ia, ā, mō tātou te kāinga.’
MAR 12:8 Nā, ka mau rātou ki a ia, whakamatea iho, makā ana ki waho o te māra wāina.
MAR 12:9 “Nā, ka pēhea te rangatira o te māra wāina? Ka haere ia, ka whakangaro i ngā kaimahi, ka hoatu te māra wāina ki ētahi atu.
MAR 12:10 Kāhore koia koutou i kite i tēnei karaipiture: ‘Ko te kōhatu i kapea e ngā kaihanga kua meinga hei upoko mō te kokonga.
MAR 12:11 Nā te Ariki tēnei, ā, he mea whakamīharo hoki ki ō tātou kanohi’?”
MAR 12:12 Nā, ka whai rātou kia hopukina ia, otiia, i mataku i te mano. I mātau hoki rātou mō rātou te kupu whakarite i kōrerotia nei e ia; nā, whakarērea ana ia, haere ana rātou.
MAR 12:13 Nā, ka tonoa mai e rātou ki a ia ētahi o ngā Parihi, rātou ko ngā Herōriana, hei hopu mō tētahi kupu āna.
MAR 12:14 Ā, nō tō rātou taenga mai, ka mea ki a ia, “E te Kaiwhakaako, e mātau ana mātou he kupu pono tāu, e kore anō tā te tangata e whakaaroa e koe; e kore anō koe e titiro ki te kanohi tangata, engari, ka whakaako i te ara a te Atua i runga i te pono. He mea tika rānei te hoatu takoha ki a Hīhā, ehara rānei?
MAR 12:15 Me hoatu rānei e mātou, kaua rānei e hoatu?” Otirā, i mōhio ia ki tō rātou tinihanga, ka mea ki a rātou, “He aha koutou ka whakamātautau ai i ahau? Mauria mai he pene ki ahau, kia kite ahau.”
MAR 12:16 Ā, mauria ana mai. Nā, ko tāna meatanga ki a rātou, “Nō wai tēnei āhua me te tuhituhinga?” Ka mea rātou ki a ia, “Nō Hīhā.”
MAR 12:17 Nā, ka whakahoki a Īhu, ka mea ki a rātou, “Hoatu ki a Hīhā, ngā mea a Hīhā, ki te Atua ngā mea a te Atua.” Ā, mīharo ana rātou ki a ia.
MAR 12:18 Nā, ka haere mai ki a ia ngā Haruki, e mea nei kāhore he aranga; ka ui ki a ia, ka mea,
MAR 12:19 “E te kaiwhakaako, i tuhituhi a Mohi ki a mātou, ‘Ki te mate te tuakana o tētahi tangata, mahue iho tāna wahine, kāhore he tamariki hei waihotanga iho, me tango tāna wahine e tōna teina, ka whakatupu uri ai mō tōna tuakana.’
MAR 12:20 Nā, tērā tētahi whānau, tokowhitu, he tuākana, he tēina: ka tango tō mua i te wahine, ka mate, ā, kāhore he uri hei waihotanga iho.
MAR 12:21 Kātahi, ka tango te tuarua i a ia, ka mate, kāhore anō hoki ōna uri hei waihotanga iho. Pērā tonu anō hoki te tuatoru.
MAR 12:22 I tango anō te tokowhitu i a ia, ā, kāhore ō rātou uri hei waihotanga iho. Muri rawa iho ka mate ko te wahine.
MAR 12:23 Nā, i te aranga, i te mea ka ara rātou, mā wai o rātou te wahine? He wahine hoki ia nā rātou tokowhitu.”
MAR 12:24 Nā, ka whakahoki a Īhu, ka mea ki a rātou, “Ehara ianei tēnei i te mea i hē ai koutou, kāhore nei hoki e mōhio ki ngā karaipiture, ki te kaha hoki o te Atua?
MAR 12:25 I te mea hoki ka ara mai rātou i te hunga mate, e kore e mārena, e kore anō e hoatu kia mārenatia; engari, ka rite ki ngā anahera o te rangi.
MAR 12:26 Nā, mō te hunga mate, mō tō rātou aranga mai; kāhore koutou i kite i roto i te Pukapuka a Mohi, i te wāhi ki te Rākau, i tā te Atua i kī ai ki a ia, i mea ai, ‘Ko te Atua ahau o Āperahama, ko te Atua o Īhaka, ko te Atua o Hākopa’?
MAR 12:27 Ehara ia i te Atua nō te hunga mate, engari, he Atua nō te hunga ora; nā, nui atu tō koutou hē!”
MAR 12:28 Ā, ko te haerenga mai o tētahi o ngā karaipi, ko te rongonga ki a rātou e totohe ana, ka kite he pai tāna whakahoki ki a rātou, ka ui ki a ia, “Ko tēhea te tuatahi o ngā ture katoa?”
MAR 12:29 Nā, ko te whakahokinga a Īhu ki a ia, “Ko te tuatahi o ngā ture katoa, ‘Whakarongo, e Īharaira: Ko te Ariki, ko tō tātou Atua, he Ariki kotahi;
MAR 12:30 kia whakapaua hoki tōu ngākau, tōu wairua, tōu hinengaro, tōu kaha, ki te aroha ki te Ariki, ki tōu Atua. Ko te ture tuatahi tēnei.’
MAR 12:31 Ko te tuarua tēnei, ‘Kia aroha koe ki tōu hoa tata, ānō ko koe.’ Kāhore he ture kē atu e rahi ake ana i ēnei.”
MAR 12:32 Nā, ka mea te karaipi ki a ia, “He pono, e te Kaiwhakaako, he tika tāu kōrero ‘kotahi tonu ia, ā, kāhore tētahi ko ia anake’;
MAR 12:33 ā, ‘Ko te whakapau i te ngākau, i te hinengaro, i te wairua, i te kaha, ki te aroha ki a ia, me te aroha ki tōna hoa tata, ānō ko ia,’ nui atu ēnā i ngā tahunga tinana, i ngā patunga tapu katoa.”
MAR 12:34 Ā, nō te kitenga o Īhu he kupu mōhio tāna i whakahoki ai, ka mea ki a ia, “Kāhore koe i matara atu i te rangatiratanga o te Atua.” Ā, kīhai tētahi tangata i māia ki te ui ki a ia i muri iho.
MAR 12:35 Nā, ka kī a Īhu, ka mea, i a ia e whakaako ana i roto i te temepara, “Nā te aha ngā karaipi ka mea ai, he tama nā Rāwiri a te Karaiti?
MAR 12:36 Nā Rāwiri ake hoki te kupu i roto i te Wairua Tapu: ‘I mea te Ariki ki tōku Ariki: “Hei tōku matau koe noho ai, kia meinga rā anō e ahau ōu hoariri hei tūranga waewae mōu.” ’
MAR 12:37 Ko Rāwiri tonu tēnei e karanga nei ki a ia he Ariki; ā, nō hea ia i tama ai ki a ia?” Ā, āhuareka ana te mano tini ki te whakarongo ki a ia.
MAR 12:38 Nā, i mea anō ia ki a rātou i tāna akoranga, “Kia tūpato ki ngā karaipi, ko tā rātou e rawe ai ko te hāereere i roto i ngā kākahu roroa, me ngā ohatanga i ngā kāinga hokohoko,
MAR 12:39 me ngā nohoanga rangatira i ngā whare karakia, me ngā nohoanga rangatira i ngā hākari.
MAR 12:40 Ka pau nei i a rātou ngā whare o ngā pouaru, ā, ka māminga ki te īnoi roa. He nui rawa te mate e pā ki ēnei.”
MAR 12:41 Ā, ka noho a Īhu i te ritenga atu o te takotoranga moni, ka mātakitaki ki te mano e panga moni ana ki te takotoranga moni; ā, he tokomaha ngā tāngata whai taonga i panga moni maha ki roto.
MAR 12:42 Nā, ko te haerenga mai o tētahi pouaru rawakore, ka maka i ngā mea nonohi e rua, kotahi pātene ki te huia.
MAR 12:43 Nā, ka karangatia e ia āna ākonga, ka mea ki a rātou, “He pono tāku e mea nei ki a koutou, ko tā tēnei pouaru rawakore i maka ai, nui atu i a rātou katoa e maka rā ki te takotoranga moni.
MAR 12:44 Ko rātou katoa hoki, he hira nei ō rātou taonga, i makā ko tētahi wāhi; tēnā ko ia i tōna rawakoretanga i maka i āna mea katoa, arā, i tōna oranga katoa.”
MAR 13:1 Ā, i a ia e haere atu ana i te temepara, ka mea tētahi o āna ākonga ki a ia, “E te Kaiwhakaako, nanā, te tū o ngā kōhatu, te tū o ngā whare!”
MAR 13:2 Nā, ka whakahoki a Īhu, ka mea ki a ia, “Ka kite koe i ēnei whare nunui? E kore tētahi kōhatu e waiho i konei i runga ake i tētahi kōhatu, engari, ka whakahoroa.”
MAR 13:3 Ā, i a ia e noho ana i runga i Maunga Ōriwa i te ritenga atu o te temepara, ka ui puku ki a ia a Pita, a Hēmi, a Hoani, a Anaru,
MAR 13:4 “Kōrerotia mai ki a mātou, ko āhea ēnei mea, ā, he aha te tohu ina tata ēnei mea katoa te rite?”
MAR 13:5 Nā, ka anga ia, ka kōrero ki a rātou, “Kia tūpato kei māmingatia koutou e te tangata.
MAR 13:6 He tokomaha hoki e haere mai i runga i tōku ingoa, e mea, ‘Ko ahau ia!’ ā, he tokomaha e māmingatia.
MAR 13:7 E rongo koutou ki ngā pakanga, ki ngā hau pakanga, kei ohorere. Kua takoto hoki he putanga mō aua mea; taihoa rawa ia te mutunga.
MAR 13:8 Ka whakatika hoki tētahi iwi ki tētahi iwi, tētahi rangatiratanga ki tētahi rangatiratanga; ā, he tini ngā wāhi e puta ai he rū; ka puta anō hoki he pō matekai. Ko te tīmatanga ēnei o ngā mamae.
MAR 13:9 “Nā, kia tūpato ki a koutou. Ka tukua hoki koutou ki ngā rūnanga; ka whiua koutou i roto i ngā whare karakia; ā, ka whakatūria koutou ki te aroaro o ngā kāwana, o ngā kīngi, mō te whakaaro ki ahau, hei mea whakaatu ki a rātou.
MAR 13:10 Kua takoto ia te tikanga kia mātua kauwhautia te rongopai ki ngā tauiwi katoa.
MAR 13:11 Ina, ārahina koutou ki te whakawā, ā, ka tukua atu, kaua e mānukanuka wawe ki tā koutou e kōrero ai: engari, ko te mea e hoatu ki a koutou i taua hāora, ko tēnā tā koutou e kōrero ai: ehara hoki i te mea mā koutou ngā kōrero, engari, mā te Wairua Tapu.
MAR 13:12 Nā, ka tukua te tuakana e te teina ki te mate, te tamaiti hoki e te pāpā; ā, ka whakatika ngā tamariki ki ngā mātua, ka mea kia whakamatea.
MAR 13:13 Ā, ka kinongia koutou e ngā tāngata katoa, he mea mō tōku ingoa. Ko te tangata ia e ū ana ā taea noatia te mutunga, ko ia e ora.”
MAR 13:14 “Ā, ki te kite koutou i te mea whakarihariha, i te mea whakangaro e tū ana i te wāhi e kore e tika, kia mātau te kaititiro pukapuka, ko reira me rere te hunga i Hūria ki ngā maunga.
MAR 13:15 Ko te tangata hoki i runga i te whare kaua e heke iho ki roto ki te whare, kaua hoki e tomo ki te tiki i tētahi mea i roto i tōna whare.
MAR 13:16 Kaua anō te tangata i te māra e hoki ki muri, ki te tiki i tōna kākahu.
MAR 13:17 Auē te mate mō te hunga e hapū ana, mō ngā mea hoki e whāngai ana ki te ū, i aua rā
MAR 13:18 Mā koutou ia e īnoi kei rokohanga koutou e te whati i te hōtoke.
MAR 13:19 He whakapāwera hoki aua rā, kāhore ōna rite o te orokohanganga rā anō i hangā nei e te Atua, ā, mohoa noa nei, kāhore hoki he pērā ā muri ake nei.
MAR 13:20 Me i kāhore hoki aua rā i poroa i waenga e te Ariki, e kore tētahi kikokiko e ora. Otirā, ka whakaaroa te hunga whiriwhiri i whiriwhiria e ia, ā, poroa ana aua rā i waenga.
MAR 13:21 “Ki te mea tētahi ki a koutou i reira, ‘Nā, tēnei a te Karaiti.’ Nā, ‘Tērā!’ kaua e whakaponohia.
MAR 13:22 E whakatika hoki ngā Karaiti teka, me ngā poropiti teka, ka whakaatu i ngā tohu me ngā mea whakamīharo, ā, me i taea, ka māmingatia e rātou te hunga whiriwhiri.
MAR 13:23 Kia tūpato rā koutou. Nā, kua kōrerotia wawetia nei e ahau ngā mea katoa ki a koutou.”
MAR 13:24 “Nā, i aua rā, i muri iho i taua whakapāwera, ka whakapōuritia te rā, e kore hoki e titi te atarau,
MAR 13:25 ka taka iho ngā whetū o te rangi, ka ngāueue ngā mea kaha o ngā rangi.
MAR 13:26 “Nā, ko reira kitea ai te Tama a te tangata e haere mai ana i runga i ngā kapua, me te kaha nui, me te korōria.
MAR 13:27 Ko reira anō ia tono ai i āna anahera, ā, ka huihuia ana i whiriwhiri ai i ngā hau e whā, i te pito o te whenua tae noa ki te pito o te rangi.”
MAR 13:28 “Nā, kia ākona koutou e te piki ki tētahi kupu whakarite. I tōna manga e ngāwari ana, e puta ana hoki ngā rau, ka mōhio koutou ka tata te raumati.
MAR 13:29 Waihoki ko koutou, ina kite i ēnei mea e puta mai ana, ka mātau ka tata ia, kei ngā kūwaha.
MAR 13:30 He pono tāku e mea nei ki a koutou, E kore tēnei whakatupuranga e pahemo, kia puta rā anō ēnei mea katoa.
MAR 13:31 Ko te rangi me te whenua e pahemo, ko āku kupu ia e kore e pahemo.”
MAR 13:32 “Otiia, kāhore tētahi tangata e mātau ki taua rā, ki taua hāora, kāhore ngā anahera o te rangi, kāhore te Tama, ko te Matua anake.
MAR 13:33 Kia tūpato, kia mataara, me te īnoi anō. Kāhore hoki koutou e mātau ki te wā, ko āhea rānei.
MAR 13:34 Ka rite hoki ki te tangata e haere ana ki tawhiti, mahue iho i a ia tōna whare, ā, tukua iho e ia ngā tikanga ki āna pononga, tāna mahi mā tētahi, mā tētahi, ka whakahau iho hoki ki te kaitiaki tatau kia mataara.
MAR 13:35 “Āe rā, kia mataara: kāhore hoki koutou e mātau ki te wā e haere mai ai te rangatira o te whare, ko te ahiahi, ko waenganui pō rānei, ko te tangihanga o te heihei, ko te atatū rānei;
MAR 13:36 kei puta whakarere mai, ka rokohanga koutou e ia e moe ana.
MAR 13:37 Nā, ko tāku ka mea atu nei ki a koutou, e meatia ana anō ki te katoa. ‘Kia mataara!’ ”
MAR 14:1 Nā, kia rua ake ngā rā ko te Kapenga me te Hākari o te Taro Rēwenakore. Nā, ka rapu ngā tohunga nui me ngā karaipi i tētahi tinihanga e mau ai ia, e whakamatea ai.
MAR 14:2 I mea hoki rātou, “Kauaka i te hākari, kei ngangau te iwi.”
MAR 14:3 Ā, i a ia i Petani i te whare o Haimona repera, i a ia anō e noho ana ka haere mai tētahi wahine me tētahi pouaka kōhatu, kī tonu i te hinu kakara, he tino nara, he mea utu nui; ā, wāhia ana e ia te pouaka kōhatu, ringihia ana ki tōna mātenga.
MAR 14:4 I riri anō ētahi i roto i a rātou, i mea, “Hei aha tēnei maumau o te hinu kakara?
MAR 14:5 Maha atu hoki i te toru rau ngā pene te utu me i hokona tēnei hinu, nā, ka hoatu ki te hunga rawakore.” Nā, ka amuamu rātou ki a ia.
MAR 14:6 Ka mea atu a Īhu, “Waiho atu ū āna! He aha tā koutou e whakapāwerawera nā i a ia? He mahi pai tāna i mea nei ki ahau.
MAR 14:7 Kei a koutou tonu hoki te hunga rawakore i ngā wā katoa, hei atawhaitanga hoki rātou mā koutou i ngā wā e pai ai koutou; e kore ia ahau e noho tonu ki a koutou.
MAR 14:8 Kua mahia e ia te mea e taea e ia; kua whakawahia e ia i mua nei tōku tinana mō te tanumanga.
MAR 14:9 He pono tāku e mea nei ki a koutou, Ko ngā wāhi katoa o te ao e kauwhautia ai tēnei rongopai, ka kōrerotia anō tā tēnei wahine i mea ai, hei whakamahara ki a ia.”
MAR 14:10 Nā, ka haere a Hūrā Ikariote, tētahi o te tekau mā rua, ki ngā tohunga nui, ki te tuku i a ia ki a rātou.
MAR 14:11 Ā, nō ka rongo rātou, ka hari, ka whakaae kia hoatu he moni māna. Nā, ka rapu ia ki te wā pai e tukua ai ia.
MAR 14:12 Ā, i te rā tuatahi o te Taro Rēwenakore, i te wā e patua ai te Kapenga, ka mea āna ākonga ki a ia, “Ko hea koe pai ai kia haere mātou ki te taka, kia kai ai koe i te Kapenga?”
MAR 14:13 Nā, ka tonoa e ia tokorua o āna ākonga, ka mea ki a rāua, “Haere ki te pā, ā, ka tūtaki mai ki a kōrua he tangata e mau ana i te tahā wai: haere i muri i a ia.
MAR 14:14 Ā, ka mea ki te tangata o te whare e tomo ai ia, ‘E mea ana te Kaiwhakaako, “Kei hea te rūma e kai ai mātou ko āku ākonga i te Kapenga?” ’
MAR 14:15 Ā, māna tonu e whakaatu ki a kōrua he rūma nui i runga, oti rawa te whāriki, te whakapai. Hei reira taka ai mā tātou.”
MAR 14:16 Nā, haere ana āna ākonga, ā, nō te taenga ki te pā, ka kite i tāna i kōrero ai ki a rāua; ā, takā ana e rāua te Kapenga.
MAR 14:17 Ā, nō ka ahiahi, ka haere atu ia me te tekau mā rua.
MAR 14:18 I a rātou e noho ana, e kai ana, ka mea a Īhu, “He pono tāku e mea nei ki a koutou, Ko tētahi o koutou, kei tōku taha nei e kai ana, māna ahau e tuku.”
MAR 14:19 Nā, ka pā te pōuri ki a rātou, ka kī takitahi ki a ia, “Ko ahau koia?”
MAR 14:20 Nā, ka mea ia ki a rātou, “Ko tētahi o te tekau mā rua, ko ia e toutou tahi nei māua ki te rīhi.
MAR 14:21 E haere ana te Tama a te tangata, e pērā ana me te mea i tuhituhia mōna; otiia, auē te mate mō te tangata e tukua ai te Tama a te tangata! He mea pai kē mō taua tangata me i kaua ia e whānau.”
MAR 14:22 Ā, i a rātou e kai ana, ka mau ia ki te taro, ā, ka mutu te whakapai, ka whawhati, nā, ka hoatu ki a rātou, ka mea, “Tangohia, kainga: ko tōku tinana tēnei.”
MAR 14:23 Nā, ka mau ia ki te kapu, ā, ka mutu te whakawhetai, ka hoatu ki a rātou; ā, ka inumia e rātou katoa.
MAR 14:24 Ā, ka mea ia ki a rātou, “Ko ōku toto ēnei, ko ō te kawenata hou, e whakahekea ana mō te tini.
MAR 14:25 He pono tāku e mea nei ki a koutou, E kore ahau e inu atu anō i te hua o te wāina, kia taea rā anō taua rā e inumia houtia ai e ahau i te rangatiratanga o te Atua.”
MAR 14:26 Ā, nō ka mutu tā rātou hīmene, ka haere rātou ki Maunga Ōriwa.
MAR 14:27 Kātahi a Īhu ka mea ki a rātou, “Ko koutou katoa nā ka hē. Kua oti hoki te tuhituhi: ‘Ka patua e ahau te hēpara, ā, ko ngā hipi ka whakamararatia.’
MAR 14:28 Otirā, muri iho i tōku aranga, ka haere ahau i mua i a koutou ki Karirī.”
MAR 14:29 Nā, ka mea a Pita ki a ia, “Ahakoa hē te katoa, ko ahau e kore!”
MAR 14:30 Ā, ka mea a Īhu ki a ia, “He pono tāku e mea nei ki a koe, ko ākuanei, i tēnei pō anō, i te mea kāhore anō kia rua ngā tangihanga o te tīkaokao, ka toru āu whakakorenga i ahau.”
MAR 14:31 Kātahi, ka tino ārita rawa tāna meatanga atu, “Ahakoa kua takoto te tikanga kia mate tahi au me koe, e kore ahau e whakakāhore i a koe.” I pērā anō te kōrero a rātou katoa.
MAR 14:32 Ā, ka tae rātou ki tētahi wāhi, e huaina ana ko Kehemane. Nā, ka mea atu ia ki āna ākonga, “Hei konei koutou noho ai, kia īnoi ahau.”
MAR 14:33 Nā, ka mau ia ki a Pita rātou ko Hēmi, ko Hoani, ā, ka tīmata te koera, te tūmatatenga;
MAR 14:34 nā, ka mea ia ki a rātou, “Kei te tino pēhia tōku wairua e te pōuri, tata pū ki te mate; noho iho koutou i konei, kia mataara.”
MAR 14:35 Nā, ka haere ia ki pahaki tata atu, ka hinga ki te whenua, ka īnoi, me kāhore e āhei kia pahemo atu tēnei hāora i a ia.
MAR 14:36 Ā, ka mea ia, “E Apa, e Pā, ka taea e koe ngā mea katoa; tangohia atu tēnei kapu i ahau. Otiia, kaua e waiho i tāku e pai ai, engari, i tāu.”
MAR 14:37 Nā, ka haere ia, ka rokohanga atu e moe ana rātou, ā, ka mea ia ki a Pita, “E Haimona, kei te moe ia koe? E kore rānei e taea e koe te mataara kia kotahi hāora?
MAR 14:38 Kia mataara, me te īnoi, kei uru koutou ki te whakamātautauranga. Kei te hihiko te wairua, ko te kikokiko ia kei te ngoikore.”
MAR 14:39 Nā, ka haere atu anō ia, ka īnoi, me te whakahua i aua kupu anō.
MAR 14:40 Nā, ka hoki mai anō ia, ka rokohanga e moe ana rātou, he nui hoki te taimaha o ō rātou kanohi; ā, kīhai rātou i mātau ki tā rātou e whakahoki ai ki a ia.
MAR 14:41 Nā, haere ana anō ia, ko te toru o ngā haerenga, ka mea ki a rātou, “E moe rā, whakatā i a koutou? Heoi rā, kua taea te hāora; nā, ka tukua te Tama a te tangata ki ngā ringa o te hunga hara.
MAR 14:42 Maranga, ka haere tātou; nā, ka tata te kaituku i ahau.”
MAR 14:43 Nā, inamata, i a ia tonu e kōrero ana, kua puta a Hūrā, tētahi o te tekau mā rua, me te tini o te tangata, me ngā hoari, me ngā patu, i ahu mai i ngā tohunga nui, i ngā karaipi, i ngā kaumātua.
MAR 14:44 Nā, kua oti tētahi tohu te whakarite ki a rātou e tōna kaituku; i mea ia, “Ko tāku tangata e kihi ai, ko ia tērā; hopukina, kia mau te ārahi atu.”
MAR 14:45 Nā, i tōna taenga mai, tika tonu ki a ia, ka mea, “E Rapi!” ā, kihi ana i a ia.
MAR 14:46 Nā, ka mau ō rātou ringa ki a ia, ā, hopukina ana ia.
MAR 14:47 Nā, ka unuhia e tētahi o te hunga e tū ana i reira tāna hoari, hāua iho e ia te pononga a te tohunga nui, poroa ana tōna taringa.
MAR 14:48 Nā, ka whakahoki a Īhu, ka mea ki a rātou, “He tāhae ahau, i haere mai ai koutou me ngā hoari, me ngā patu, ki te hopu i ahau?
MAR 14:49 I a koutou ahau e whakaako ana i te temepara i tēnā rā, i tēnā rā, ā, kīhai koutou i hopu i ahau. Otirā, i mahia tēnei mea kia rite ai ngā karaipiture.”
MAR 14:50 Nā, whakarere ana rātou katoa i a ia, oma ana.
MAR 14:51 Nā, tērā tētahi taitamariki i aru tahi mai me ia, takaia ai he kākahu rīnena ki runga ake i tōna kirikau. Nā, ka hopukina ia e rātou,
MAR 14:52 otirā, i whakarērea atu e ia te kākahu rīnena, ā, oma tahanga atu ana.
MAR 14:53 Nā, ka ārahina atu e rātou a Īhu ki te tino tohunga: ā, ka huihui mai ki a ia ngā tohunga nui katoa, ngā kaumātua me ngā karaipi.
MAR 14:54 Nā, tērā a Pita te aru rā i a ia i tawhiti, tae noa ki roto, ki te marae o te tino tohunga; ā, tērā te noho rā me ngā kaimahi, pāinaina ai i a ia i te taha o te ahi.
MAR 14:55 Nā, i rapu ngā tohunga nui me te rūnanga katoa i te kōrero mō Īhu, e whakamatea ai; heoi, kīhai i kitea.
MAR 14:56 He tokomaha hoki ngā kaiwhakapae teka mōna, otiia, kīhai i rite ā rātou kōrero.
MAR 14:57 Nā, ka whakatika ētahi, ka whakapae teka ki a ia, ka mea,
MAR 14:58 “I rongo mātou ki a ia e mea ana, ‘Māku e whakahoro tēnei whare tapu i hangā nei e te ringa, ā, kia toru ngā rā ka hangā e ahau tētahi atu, ehara i te ringa i mahi.’ ”
MAR 14:59 Ā, ahakoa tērā kīhai ā rātou kōrero i riterite.
MAR 14:60 Nā, ka whakatika te tohunga nui i waenganui, ka ui ki a Īhu, ka mea, “Kāhore āu kupu? He aha tā ēnei e whakaatu nei mōu?”
MAR 14:61 Heoi, kīhai ia i kuihi, kāhore hoki he kupu i whakahokia e ia. Nā, ka ui anō te tino tohunga ka mea ki a ia, “Ko koe rānei a te Karaiti, te Tama a tērā e Whakapaingia nei?”
MAR 14:62 Ka mea a Īhu ki a ia, “Ko ahau ia, ā, tērā koutou e kite i te Tama a te tangata e noho ana i te ringa matau o te kaha, e haere mai ana me ngā kapua o te rangi.”
MAR 14:63 Kātahi, ka haehae te tino tohunga i ōna kākahu, ka mea, “Hei aha atu mā tātou ētahi kaiwhakaatu anō?
MAR 14:64 Kua rongo koutou ki te kohukohu. E pēhea ana ō koutou whakaaro?” Nā, ka whakaae rātou katoa ka tika te mate mōna.
MAR 14:65 Kātahi, ka anga ētahi, ka tuwha ki a ia, ka ārai i tōna kanohi, ka kuru i a ia, ā, ka mea ki a ia, “Poropiti mai!” Ā, ka pakipakia ia e ngā kaimahi ki ō rātou ringa.
MAR 14:66 Ā, i a Pita i te marae i raro, ka haere mai tētahi o ngā kōtiro a te tino tohunga.
MAR 14:67 Ā, i tōna kitenga i a Pita e pāinaina ana, ka titiro atu ki a ia, ā, ka mea, “Ko koe anō tētahi i te tangata o Nahareta, arā i a Īhu.”
MAR 14:68 Otirā, ka whakakāhore ia, ka mea, “Kāhore rawa ahau i mātau, i mārama rānei ki tāu e kōrero mai nā.” Nā, ka puta atu ia ki te whakamahau, ā, ka tangi te tīkaokao.
MAR 14:69 Ā, ka kite te kōtiro i a ia, ka anga anō, ka kōrero ki te hunga e tū tata ana, “Nō rātou hoki tēnei.”
MAR 14:70 Otirā, ka whakakāhore anō ia. Ā muri tata iho ka kōrero anō ki a Pita te hunga e tū tata ana, “He pono ko koe tētahi o rātou; nō Karirī hoki koe.”
MAR 14:71 Kātahi ia ka tīmata te kanga, te oati, “Kāhore ahau e mātau ki tēnā tangata e kōrero nā koutou.”
MAR 14:72 I reira ka tangi anō te tīkaokao, ko te tuarua o ngā tangihanga. Nā, ka mahara a Pita ki te kupu i kōrero ai a Īhu ki a ia, “E kore e tuarua te tangi o te tīkaokao, ka toru āu whakakāhoretanga i ahau.” Ā, ka whakaaroa iho e ia, nā, ka tangi.
MAR 15:1 Ā, mea kau ake te ata, ka rūnanga ngā tohunga nui, ngā kaumātua, ngā karaipi, me te rūnanga katoa, ā, ka herea e rātou a Īhu, ka ārahina atu, ā, tukua atu ana ki a Pirato.
MAR 15:2 Ka ui a Pirato ki a ia, “Ko koe rānei te Kīngi o ngā Hūrai?” Ka whakahokia e ia ki a ia, “Kua kōrerotia nā e koe.”
MAR 15:3 He maha hoki ngā mea i whakapaea ki a ia e ngā tohunga nui.
MAR 15:4 Ka ui anō a Pirato ki a ia, ka mea, “Kāhore āu kupu whakahoki? Nā te tini o ngā kupu e kōrero nei rātou mōu.”
MAR 15:5 Heoi, kāhore a Īhu i whakahoki atu anō; nō, ka mīharo a Pirato.
MAR 15:6 Nā, i taua hākari kotahi te herehere e tukua ana e ia ki a rātou, ko tā rātou e īnoi ai.
MAR 15:7 Nā, i reira tētahi tangata ko Parapa te ingoa, e here tahi ana me ōna hoa tutū, he hunga i patu tangata i te ngangaretanga.
MAR 15:8 Nā, ka haere te mano, ka anga, ka tono ki a ia kia pērātia me tāna i mea ai ki a rātou i mua.
MAR 15:9 Nā, ka whakahoki a Pirato ki a rātou, ka mea, “E pai ana rānei koutou kia tukua e ahau ki a koutou te Kīngi o ngā Hūrai?”
MAR 15:10 I mahara hoki ia he hae i tukua ai ia e ngā tohunga nui.
MAR 15:11 Otirā, ka whakatūtehutia e rātou te mano, kia tukua e ia ko Parapa kē ki a rātou.
MAR 15:12 Nā, ka whakahoki anō a Pirato, ka mea ki a rātou, “He aha oti tā koutou e pai ai kia meatia e ahau ki tēnei e huaina nei e koutou ko te Kīngi o ngā Hūrai?”
MAR 15:13 Ka karanga anō rātou, “Rīpekatia!”
MAR 15:14 Nā, ka mea a Pirato ki a rātou, “He aha koia tāna kino i mea ai?” Heoi, nui noa atu tā rātou hāmama, “Rīpekatia ia!”
MAR 15:15 Nā, i tōna hiahia kia whakamārietia te mano, tukua ana e Pirato a Parapa ki a rātou, ā, ka oti a Īhu te whiu, ka tukua kia rīpekatia.
MAR 15:16 Nā, ka ārahina ia e ngā hōia ki te marae, arā, ki te Whare Whakawā, ā, kārangarangatia ana te rōpū katoa.
MAR 15:17 Ka whakakākahuria ia ki te kākahu pāpura, ā, ka oti tētahi karauna tātarāmoa te whiri, ka pōtaea ki a ia.
MAR 15:18 Nā, ka anga rātou, ka oha ki a ia, “Tēnā koe, e te Kīngi o ngā Hūrai!”
MAR 15:19 Patua ana e rātou tōna mātenga ki te kākaho, tuwha ana ki a ia, ka tuku i ngā turi ki a ia, ā, koropiko ana ki a ia.
MAR 15:20 Ā, nō ka mutu tā rātou taunu ki a ia, ka tangohia te kahu pāpura i a ia, nā, whakakākahuria ana ia ki ōna ake kākahu, ā, ārahina ana ia kia rīpekatia.
MAR 15:21 Nā, ka meinga e rātou tētahi tangata e tika ana nā reira, a Haimona o Hairini, i ahu mai i ngā whenua, ko te pāpā o Arēhanera rāua ko Rupuha, kia haere me rātou, kia riro ai māna e amo tōna rīpeka.
MAR 15:22 Nā, ka ārahina ia ki tētahi wāhi, ki Korokota, tōna tikanga ina, whakamāoritia “Ko te Wāhi Angaanga.”
MAR 15:23 Ā, hoatu ana ki a ia he wāina, he mea whakananu ki te maira, kia inumia; otirā, kīhai i tangohia e ia.
MAR 15:24 Ā, rīpekatia ana ia e rātou, ka wehewehea ōna kākahu, he mea maka ki te rota, kia kitea ai ko te aha e riro i tētahi, i tētahi.
MAR 15:25 Nā, ko te toru tērā o ngā hāora, ā, ka rīpekatia ia e rātou.
MAR 15:26 Ko te mea i whakawākia ai ia i tuhituhia ki runga: KO TE KĪNGI O NGĀ HŪRAI.
MAR 15:27 Nā, tokorua ngā tāhae i rīpekatia ngātahitia me ia; ko tētahi ki matau, ko tētahi ki tōna mauī.
MAR 15:28 Nā, ka rite te karaipiture e mea nei, “I tāua ngātahitia ia me te hunga hara.”
MAR 15:29 Ko te hunga e hāereere ana i reira ka tāwai ki a ia, ka rūrū i ō rātou mātenga, ka mea, “Ha, ko koe ka whakahoro nei i te whare tapu, ka hangā nei anō i ngā rā e toru!
MAR 15:30 Whakaora i a koe anō, ka heke iho i te rīpeka!”
MAR 15:31 Waihoki ko ngā tohunga nui ka tāwai i a ia, rātou ko ngā karaipi, ka mea, “Ko ērā atu i whakaorangia e ia, tē taea e ia te whakaora a ia ake anō!
MAR 15:32 Tēnā rā, kia heke iho āianei a te Karaiti, te Kīngi o Īharaira, i te rīpeka, kia kite ai tātou, kia whakapono ai.” I tāwai hoki ki a ia te hunga i rīpekatia ngātahitia me ia.
MAR 15:33 Ā, nō ka tae ki te ono o ngā hāora, ka pōuri a runga o te whenua katoa, taea noatia te iwa o ngā hāora.
MAR 15:34 Ā, i te iwa o ngā hāora ka karanga a Īhu, he nui te reo, ka mea, “Eroi, Eroi, rama hapakatani?” Ko te tikanga tēnei ina whakamāoritia, “E tōku Atua, e tōku Atua, he aha koe i whakarere ai i ahau?”
MAR 15:35 Ā, nō te rongonga o ētahi o te hunga e tū ana i reira, ka mea, “Nanā, e karanga ana ia i a Irāia.”
MAR 15:36 Nā, ka oma tētahi, ka whakakī i tētahi hautai ki te winika, whakanohoia ana ki te kākaho, ka hoatu kia inumia e ia, ka mea, “Kāti; tēnā kia kite tātou me kore a Irāia e haere mai ki te tango i a ia ki raro.”
MAR 15:37 Nā, he nui te reo i puaki i a Īhu, ā, hemo ake.
MAR 15:38 Ā, ka wāhia te ārai o te temepara i waenganui pū mai i runga ki raro.
MAR 15:39 Ā, nō te kitenga o te keneturio, e tū hāngai atu ana ki a ia, i pērā te āhua o tāna tukunga i tōna wairua, ka mea ia, “He pono ko te Tama a te Atua tēnei tangata.”
MAR 15:40 Nā, i reira ētahi wāhine e mātakitaki ana mai i tawhiti; i roto i a rātou a Meri Makarini, a Meri hoki whaea o Hēmi, te mea iti, rāua ko Hohi, me Hāromi;
MAR 15:41 arā, ko ngā wāhine i aru nei i a ia, i a ia i Karirī, i mahi mea nei māna; me ētahi atu wāhine tokomaha i haere tahi mai nei me ia ki Hiruhārama.
MAR 15:42 Nā, ka ahiahi, i te mea ko te rā Takanga, arā, ko te rā i mua ake o te hāpati.
MAR 15:43 Ka haere mai a Hōhepa o Arimatia, he rangatira rūnanga, he tangata nui tonu, e tatari ana anō hoki ia ki te rangatiratanga o te Atua; ā, ka haere māia tonu ki a Pirato, ka īnoi i te tinana o Īhu.
MAR 15:44 Nā, ka mīharo a Pirato, hua noa kāhore anō i mate; ka karangatia e ia te keneturio, ka ui ki a ia, mehemea kua mate atu rā ia.
MAR 15:45 Ā, nō ka rongo ki te keneturio kua mate, ka whakaaetia e ia te tinana ki a Hōhepa.
MAR 15:46 Nā, ka hokona e tērā he rīnena, ka tangohia mai ia ki raro, ā, takaia ana ki te rīnena; whakatakotoria ana ia ki roto ki te urupā kua hāua atu ki te kāmaka, ā, whakatakā atu ana he kōhatu ki te kūwaha o te urupā.
MAR 15:47 I kite a Meri Makarini, rāua ko Meri whaea o Hohi, i te wāhi i whakatakotoria ai ia.
MAR 16:1 Ā, nō te pahemotanga o te hāpati, ka hokona he mea kakara e Meri Makarini, e Meri whaea o Hēmi, e Hāromi, kia haere ai rātou ki te whakawahi i a ia.
MAR 16:2 Nā, i te atatū o te rā tuatahi o te wiki, ka haere rātou ki te urupā i te putanga mai o te rā;
MAR 16:3 ka kōrerorero ki a rātou anō, “Ko wai rā hei whakataka mā tātou i te kōhatu i te kūwaha o te urupā?”
MAR 16:4 Ā, i tā rātou tirohanga ake, ka kite kua hurihia atu te kōhatu; he mea nui whakaharahara hoki.
MAR 16:5 Ā, nō ka tomo rātou ki te urupā, ka kite rātou i tētahi taitamariki e noho ana i te taha matau, he kākahu mā tōna; nā, ka koera rātou.
MAR 16:6 Ā, ka mea ia ki a rātou, “Kaua e koera! E rapu ana koutou i a Īhu o Nahareta i rīpekatia. Kua ara ia; kāhore ia i konei. Tēnā! Titiro ki te wāhi i whakatakotoria ai ia!
MAR 16:7 Engari haere, kōrerotia atu ki āna ākonga, ki a Pita hoki, kei te haere ia i mua i a koutou ki Karirī. Ko reira koutou kite ai i a ia, pērā i tāna i mea ai ki a koutou.”
MAR 16:8 Nā, ka puta atu rātou, ā, oma ana i te urupā; kua tae mai hoki te tūiri, te koera ki a rātou. Kīhai rawa i kōrero ki tētahi tangata; nō te mea i wehi rātou.
MAR 16:9 Nā, i tōna aranga ake i te atatū o te rā tuatahi o te wiki, ka whakakite tuatahi ia ki a Meri Makarini, i peia nei e ia e whitu ngā rēwera i roto i a ia.
MAR 16:10 Nā, ka haere tērā ka kōrero ki te hunga i piri rā ki a ia i mua, i a rātou e pōuri ana, e tangi ana.
MAR 16:11 Ā, ko rātou, i tō rātou rongonga kei te ora ia, ā, kua kitea e ia, kāhore i whakapono.
MAR 16:12 Nā, i muri iho i ēnei mea, ka puta ia, he āhua kē tōna, ki ētahi atu o rātou, tokorua, i a rāua e haere ana, e anga ana ki ngā whenua.
MAR 16:13 Nā, ka haere hoki ēnā ka kōrero ki ētahi atu o rātou; otirā kāhore ērā i whakapono.
MAR 16:14 Muri iho ka puta ia ki te tekau mā tahi, i a rātou e noho ana ki te kai, ā, rīria iho e ia tō rātou whakapono kore, me te pakeke o te ngākau, mō rātou kīhai i whakapono ki te hunga i kite nei i a ia kua ara.
MAR 16:15 Ka mea ki a rātou, “Haere koutou ki te ao katoa, kauwhautia te rongopai ki ngā tāngata katoa.
MAR 16:16 Ko ia e whakapono ana, ka oti te iriiri, ka whakaorangia; otirā, ko te tangata e kore e whakapono, ka whakataua te hē ki a ia.
MAR 16:17 Ka whai tahi hoki ēnei tohu i te hunga e whakapono ana. Mā tōku ingoa rātou ka pei rēwera ai; ka kōrerotia ai e rātou ngā reo hou;
MAR 16:18 ka tango ake ai rātou i ngā nākahi; ā, ki te inu i tētahi mea whakamate, e kore rātou e ahatia; ka pā ō rātou ringa ki ngā tūroro, ā, ka ora.”
MAR 16:19 Nā, i te mutunga o tāna kōrero ki a rātou, ka tangohia atu te Ariki a Īhu ki te rangi, ā, noho ana ki te ringa matau o te Atua.
MAR 16:20 Nā, haere ana rātou, kauwhau ana i ngā wāhi katoa, me te mahi tahi anō te Ariki me rātou, me te whakaū i te kupu ki ngā tohu e whai ana i muri. Āmine.
LUK 1:1 Nā, i te mea he tokomaha kua anga ki te whakakaupapa i te kōrero o ngā mea kua whakatutukitia nei i waenganui i a tātou.
LUK 1:2 He mea whakarite ki ngā mea i hōmai ki a tātou e te hunga i kite ā-kanohi, i mahi hoki i te kupu.
LUK 1:3 Koia ahau i mahara ai, i te mea kua āta whakatakina iho e ahau ngā mea katoa i te tīmatanga mai, kia tuhituhi whakatepe atu ki a koe, e Tiopira, e te tangata pai rawa,
LUK 1:4 kia mātau ai koe ki te tūturutanga o ngā mea i whakaakona ai koe.
LUK 1:5 Nō mua, nō ngā rā o Herora kīngi o Hūria, tērā tohunga, ko Hakaraia te ingoa, nō te wiki o Āpiata. Ko tāna wahine hoki nō ngā tamāhine a Ārona, ko Erihāpeti tōna ingoa.
LUK 1:6 He hunga tika hoki rāua i te aroaro o te Atua, kāhore he hē o tā rāua haere i runga i ngā kupu ako katoa, i ngā tikanga a te Ariki.
LUK 1:7 Nā, kāhore ā rāua tamariki, he pākoko hoki a Erihāpeti, ā, i taua wā kua maha haere rawa ngā rā o tētahi, o tētahi.
LUK 1:8 Nā, tūpono tonu, i a ia e mahi ana i ā te tohunga mahi i te aroaro o te Atua i te takanga o tāna wiki,
LUK 1:9 e whakarite ana i ngā ritenga a ngā tohunga, ka taka māna te haere ki roto ki te whare tapu o te Ariki, tahu ai i te whakakakara.
LUK 1:10 Nā, i waho te nuinga katoa o te iwi e īnoi ana i te hāora whakakakara.
LUK 1:11 Ā, ka puta mai ki a ia tētahi anahera a te Ariki e tū ana i te taha matau o te āta whakakakara.
LUK 1:12 Nā, ka ohorere a Hakaraia i tōna kitenga i a ia, ā, tau ana te wehi ki a ia.
LUK 1:13 Otirā, ka mea te anahera ki a ia, “Kaua e wehi, e Hakaraia. Kua rangona hoki tāu īnoi, ā, ka whānau i tāu wahine, i a Erihāpeti, he tama māu, ā, ka huaina e koe tōna ingoa ko Hoani.
LUK 1:14 Ā, ka whiwhi koe i te hari me te harakoa; ā, he tokomaha hoki e hari i tōna whānautanga.
LUK 1:15 E nui hoki ia i te aroaro o te Atua. E kore ia e inu i te wāina, i te wai whakahaurangi rānei; ā, ka kī ia i te Wairua Tapu, mai anō o te kōpū o tōna whaea.
LUK 1:16 He tokomaha anō hoki o ngā tama a Īharaira ka whakatahuritia e ia ki te Ariki, ki tō rātou Atua.
LUK 1:17 Ka haere anō ia i tōna aroaro i runga i te wairua, i te mana, o Irāia, hei whakatahuri i ngā ngākau o ngā mātua ki ngā tamariki, i te hunga whakatuturi ki ngā whakaaro o te hunga tika; hei whakarite mō te Ariki i tētahi iwi i āta takā mōna.”
LUK 1:18 Nā, ko te meatanga a Hakaraia ki te anahera, “Mā te aha ka mātau ai ahau ki tēnei mea? He koroheke nei hoki ahau, kua maha haere hoki ngā rā o tāku wahine.”
LUK 1:19 Nā, ka whakahoki te anahera, ka mea ki a ia, “Ko Kapariera ahau, kei te aroaro o te Atua tōku tūranga; kua tonoa mai hoki ahau ki te kōrero ki a koe ki te whakapuaki i tēnei rongo pai ki a koe.
LUK 1:20 Nanā, ka noho puku koe, kāhore hoki e puta te kōrero i a koe, kia tae mai rā anō te rā e meatia ai ēnei mea, mōu kīhai i whakapono ki āku kupu, ka mana nei i te wā e rite ai.”
LUK 1:21 Ā, tatari tonu te iwi ki a Hakaraia, me te mīharo anō i a ia e whakaroa ana i roto i te whare tapu.
LUK 1:22 Ā, i tōna putanga mai ki waho, kīhai ia i āhei te kōrero ki a rātou; ā, ka mōhio rātou kua kite ia i tētahi putanga atua ki a ia i roto i te whare tapu. Hono tonu tāna waitohu ki a rātou me te wahangū anō.
LUK 1:23 Ā, ka rite ngā rā hei minitatanga māna, ka hoki ia ki tōna whare.
LUK 1:24 Nā, muri iho i aua rā ka hapū tāna wahine, a Erihāpeti, ā, e rima ngā marama i whakangaro ai i a ia, ā, i mea ia,
LUK 1:25 “Ko tā te Ariki tēnei i mea ai ki ahau, i ngā rā i titiro mai ai ia, ki te whakamutu i tōku tāwainga i roto i ngā tāngata.”
LUK 1:26 Nā, i te ono o ngā marama ka tonoa a Kapariera, te anahera, e te Atua ki tētahi pā o Karirī, ko Nahareta te ingoa,
LUK 1:27 ki tētahi wāhina i taumautia mā tētahi tangata, ko Hōhepa te ingoa, nō te whare o Rāwiri; ko te ingoa o te wāhina ko Meri.
LUK 1:28 Nā, ko tōna haerenga ki roto, ki a ia, ka mea, “Tēnā koe, e te wahine kua manakohia nei; kei a koe te Ariki, ko koe te manaakitia i roto i ngā wāhine.”
LUK 1:29 Otirā, he nui tōna oho ki taua kupu, ka whakaaroaro ki te tikanga o tēnei ohatanga.
LUK 1:30 Nā, ka mea te anahera ki a ia, “Kei wehi koe, e Meri; kua paingia hoki koe e te Atua.
LUK 1:31 Nanā, tērā koe e hapū, ka whānau he tama, ā, ka huaina e koe tōna ingoa ko Īhu.
LUK 1:32 Ka nui ia, ka kīia hoki ko te Tama a te Runga Rawa; ā, ka hoatu ki a ia e te Ariki, e te Atua, te torōna o Rāwiri, o tōna pāpā.
LUK 1:33 Hei kīngi hoki ia mō te whare o Hākopa ake ake; e kore anō e mutu tōna rangatiratanga.”
LUK 1:34 Nā, ka mea a Meri ki te anahera, “E pēheatia tēnei, kāhore nei hoki ahau e mōhio ki te tāne?”
LUK 1:35 Nā, ka whakahoki te anahera, ka mea ki a ia, “Ka tae te Wairua Tapu ki runga ki a koe, ka taumarumaru iho te kaha o te Runga Rawa ki runga ki a koe; nō reira hoki ka kīia te mea e whānau mai he tapu, ko te Tama a te Atua.
LUK 1:36 Nā, ko tōu whanaunga, ko Erihāpeti, kua hapū hoki ia i tōna rūruhitanga, he tama; ā, ko te ono tēnei o ngā marama ki a ia, i kīia rā he pākoko.
LUK 1:37 Kāhore hoki he kupu i ahu mai i te Atua i kore e whai mana!”
LUK 1:38 Anō rā ko Meri, “Inā, te pononga a te Ariki; kia pērātia ahau me tāu i kōrero ai.” Ā, mawehe atu ana te anahera i a ia.
LUK 1:39 Nā, ka whakatika a Meri i aua rā, ā, haere kaikā ana ki te whenua pukepuke ki tētahi pā o Hūrā;
LUK 1:40 ā, ka tomo ki te whare o Hakaraia, ka oha ki a Erihāpeti.
LUK 1:41 Ā, nō te rongonga o Erihāpeti, i te oha a Meri, ka koiri te tamaiti i roto i tōna kōpū; nā, kua kī a Erihāpeti i te Wairua Tapu.
LUK 1:42 Ā, he nui tōna reo ki te karanga, ka mea, “Ka manaakitia koe i roto i ngā wāhine, ka manaakitia anō te hua o tōu kōpū.
LUK 1:43 Nō hea hoki tēnei ki ahau, kia haere mai te whaea o tōku Ariki ki ahau?
LUK 1:44 Nā, pā kau mai te reo o tāu oha ki ōku taringa, ka oho te tamaiti i tōku kōpū i te hari.
LUK 1:45 Ka koa anō ia e whakapono ana, ka whakaritea hoki ngā mea i kōrerotia ki a ia e te Ariki.”
LUK 1:46 Ā, ka mea a Meri, “Ka whakanui tōku wairua i te Ariki;
LUK 1:47 e hari ana tōku wairua ki te Atua, ki tōku Kaiwhakaora;
LUK 1:48 mōna i titiro ki te iti o tāna pononga; tā te mea hoki kātahi ahau ka kīia e ngā whakatupuranga katoa e haere ake nei, he wahine hari.
LUK 1:49 He nui hoki ngā mahi a te Mea Kaha ki ahau. He tapu hoki tōna ingoa;
LUK 1:50 he mahi tohu tāna ki te hunga e wehi ana ki a ia, ki tēnei whakatupuranga, ki tēnei whakatupuranga.
LUK 1:51 Kua whakaputaina he kaha e ia, arā e tōna ringa; nāna te hunga whakakake i marara ai, i te whakaaro o ō rātou ngākau.
LUK 1:52 Kua whakatakā e ia ngā piriniha i ō rātou torōna, ā, whakateiteitia ake ana te hunga iti.
LUK 1:53 Kua whakakīia e ia te hunga mate hiakai ki ngā mea pai; kua tonoa kautia atu te hunga taonga.
LUK 1:54 Kua tautokona e ia a Īharaira, tāna pononga, he whakamahara hoki ki tāna mahi tohu.
LUK 1:55 Ki a Āperahama rātou ko tāna whānau ake tonu atu, pērā hoki me tāna i kōrero ai ki ō tātou mātua.”
LUK 1:56 Nā, tata tonu ki te toru marama a Meri e noho ana ki a ia, ā, hoki ana ki tōna whare.
LUK 1:57 Ā, ka rite te tāima o Erihāpeti, e whānau ai; nā, ka whānau he tama.
LUK 1:58 Ā, ka rongo te hunga e noho tata ana, me ōna whanaunga, kua whakanuia e te Ariki tōna aroha ki a ia; nā, ka hari tahi me ia.
LUK 1:59 Ā, i te waru o ngā rā ka haere mai rātou ki te kokoti i te tamaiti; ka mea kia huaina e rātou ko Hakaraia, ko te ingoa o tōna pāpā.
LUK 1:60 Nā, ka whakahoki tōna whaea, ka mea, “Kāhore; engari me hua ia ko Hoani.”
LUK 1:61 Nā, ko tā rātou meatanga ki a ia, “Arā, kāhore tēnei ingoa i huaina ki tētahi o ōu whanaunga.”
LUK 1:62 Nā, ka ui rātou ki tōna pāpā, he mea waitohu, ko wai tāna e pai ai kia huaina ki a ia.
LUK 1:63 Ka mea ia ki tētahi papa tuhituhi, ā, ka tuhituhi, ka mea, “Ko Hoani hei ingoa mōna.” Ā, mīharo ana rātou katoa.
LUK 1:64 Nā, whai reo tonu iho tōna māngai, ka matara tōna arero, ka kōrero ia, ka whakapai ki te Atua.
LUK 1:65 Ā, tau ana te wehi ki te hunga katoa e noho tata ana ki a rātou, ka kōrerotia ēnei mea katoa puta noa i te whenua pukepuke katoa o Hūria.
LUK 1:66 Nā, ka rongoātia ēnei mea e te hunga katoa i rangona ai ki roto ki ō rātou ngākau, ka mea, “He tamaiti aha ianei tēnei?” I a ia hoki te ringa o te Ariki.
LUK 1:67 Nā, kua kī a Hakaraia, tōna pāpā, i te Wairua Tapu, ka poropiti, ka mea:
LUK 1:68 “Kia whakapaingia te Ariki, te Atua o Īharaira! Kua titiro mai hoki ia, kua hoko i tāna iwi.
LUK 1:69 Kua whakaarahia ake e ia he haona whakaora mō tātou, i roto i te whare o Rāwiri, o tāna pononga.
LUK 1:70 Ko tāna hoki ia i kōrerotia e te māngai o āna poropiti tapu, nō te tīmatanga mai anō o te ao;
LUK 1:71 hei whakaora i a tātou i ō tātou hoa whawhai, i te ringa anō o te hunga katoa e kino ana ki a tātou;
LUK 1:72 hei whakaputa i te mahi tohu ki ō tātou tūpuna, hei whakamahara ki tāna kawenata tapu.
LUK 1:73 Ki te oati i oati ai ia ki a Āperahama, ki tō tātou tupuna,
LUK 1:74 kia tukua mai e ia ki a tātou he ora i te ringa o ō tātou hoa whawhai, kia mahi wehikore tātou ki a ia,
LUK 1:75 i runga i te tapu, i te tika, ki tōna aroaro, i ngā rā katoa e ora ai tātou.
LUK 1:76 “Ā, ko koe, e tama, ka kīia ko te poropiti a te Runga Rawa. E haere hoki koe i te aroaro o te Ariki, hei whakapai i ōna ara;
LUK 1:77 hei whakamātau i tāna iwi ki te ora, i ō rātou hara e murua ana.
LUK 1:78 He mea hoki nā te aroha, nā te mahi tohu a tō tātou Atua; nā reira hoki i puta mai ai te pūaotanga o runga ki a tātou,
LUK 1:79 hei whakamārama i te hunga e noho ana i te pōuri, i te ātārangi hoki o te mate, hei whakatika i ō tātou waewae ki te huarahi o te rangimārie.”
LUK 1:80 Nā, ka tupu taua tamaiti, ā, ka kaha haere tōna wairua; ā, noho ana i ngā koraha, taea noatia te rā e whakakitea ai ia ki a Īharaira.
LUK 2:1 I aua rā ka whakatakotoria he tikanga e Hīhā Ākuhata kia tuhituhia te ao katoa.
LUK 2:2 Ko te tuhituhinga tuatahi tēnei i meatia i te wā ko Kuirinia te kāwana o Hīria.
LUK 2:3 Ā, ka haere ngā tāngata katoa kia tuhituhia, ia tangata, ia tangata, ki tōna ake pā.
LUK 2:4 I haere atu anō a Hōhepa i Karirī, i te pā, i Nahareta, ki Hūria, ki te pā o Rāwiri, ko Pēterehema te ingoa; nō te mea nō te whare ia, nō te kāwei o Rāwiri.
LUK 2:5 Kia tuhituhia ai rāua ko tāna wahine taumau, ko Meri, e hapū ana ia.
LUK 2:6 Ā, i a rāua i reira, ka rite ngā rā e whānau ai ia.
LUK 2:7 Nā, ka whānau tāna mātāmua, ā, takaia ana e ia ki ngā kākahu, ka whakatakotoria ki te takotoranga kai mā ngā kararehe; nō te mea kāhore he wāhi mō rātou i te whare.
LUK 2:8 I taua wāhi hoki ētahi hēpara e noho koraha ana, e tiaki ana i tā rātou kāhui i te pō.
LUK 2:9 Nā, tū ana tētahi anahera a te Ariki i ō rātou taha, ā, whiti ana te korōria o te Ariki ki a rātou, ā, tawhio noa; ā, nui whakaharahara tō rātou wehi.
LUK 2:10 Nā, ka mea te anahera ki a rātou, “Kaua e mataku, tā te mea he kaikauwhau tēnei ahau ki a koutou mō te hari nui, meāke puta mai ki te iwi katoa.
LUK 2:11 Nō nāianei hoki i whānau ai he Kaiwhakaora mō koutou i te pā o Rāwiri, arā a te Karaiti, te Ariki.
LUK 2:12 Ko te tohu tēnei ki a koutou; e kite koutou i te tamaiti ka oti te tākai ki te kākahu, e takoto ana i te takotoranga kai mā ngā kararehe.”
LUK 2:13 Nā, ohorere tonu ko tētahi ope nui o te rangi e tū tahi ana me taua anahera, e whakamoemiti ana ki te Atua, e mea ana:
LUK 2:14 “Kia whai korōria te Atua i runga rawa, kia mau te rongo ki runga ki te whenua, me te whakaaro pai ki ngā tāngata!”
LUK 2:15 Ā, ka mawehe atu ngā anahera i a rātou ki te rangi, ka mea ngā hēpara tētahi ki tētahi, “Tātou ka haere ki Pēterehema, kia kite i tēnei mea kua puta nei, kua whakapuakina mai nei e te Ariki ki a tātou.”
LUK 2:16 Nā, kaikā tonu tā rātou haere, ā, ka kite i a Meri, i a Hōhepa i te tamaiti hoki e takoto ana i te takotoranga kai mā ngā kararehe.
LUK 2:17 Ā, nō ka kite, ka whakapuakina te mea i kōrerotia ki a rātou mō tēnei tamaiti.
LUK 2:18 Ā, mīharo ana ngā kaiwhakarongo katoa ki ēnei mea, i kōrerotia nei ki a rātou e ngā hēpara.
LUK 2:19 Ko Meri ia i āta rongoā i ēnei mea katoa, me te whakaaroaro i roto i tōna ngākau.
LUK 2:20 Nā, ka hoki ngā hēpara, me te whakakorōria, me te whakamoemiti ki te Atua mō ngā mea katoa i rongo nei, i kite nei rātou, i rite nei ki ngā mea i kōrerotia ki a rātou.
LUK 2:21 Ā, nō ka rite ngā rā e waru, e kotia ai te tamaiti, ka huaina tōna ingoa ko Īhu, ko tā te anahera i hua ai i te mea kāhore anō i hapū tōna whaea.
LUK 2:22 Ā, ka rite ngā rā e purea ai te whaea, e whakaritea ai te ture a Mohi, ka kawea ia e rātou ki Hiruhārama, kia tāpaea ki te Ariki.
LUK 2:23 Kia pērātia me te mea i tuhituhia ki te ture a te Ariki: “Ko ngā tāne katoa e oroko puta mai i te kōpū, e kīia he tapu ki te Ariki.”
LUK 2:24 Kia hoatu anō he patunga tapu, te mea i kōrerotia i roto i te ture a te Ariki, kia rua kūkupa, kia rua rānei pī kūkupa.
LUK 2:25 Nā, i Hiruhārama tētahi tangata, ko Himiona te ingoa; he tangata tika, he tangata whakaaro, e tatari ana ki te whakaharinga o Īharaira, kei runga hoki te Wairua Tapu i a ia.
LUK 2:26 Nā, kua whakamaharatia ia e te Wairua Tapu, e kore ia e kite i te mate, kia kite rā anō ia i tā te Ariki Karaiti.
LUK 2:27 Nā, ka haere ia ki te temepara, he meatanga nā te Wairua; ā, i ngā mātua e mau ana i te tamaiti, i a Īhu, kia meatia ai e rāua ki a ia tā te ture i whakarite ai,
LUK 2:28 ka tango ia i a ia ki ōna ringa, ka whakapai ki te Atua, ka mea:
LUK 2:29 “Kātahi, e te Ariki, ka tukua tāu pononga kia haere i runga i te rangimārie, ka pērā me tāu i kōrero ai.
LUK 2:30 Ka kite nei hoki ōku kanohi i tāu whakaoranga,
LUK 2:31 ka whakatakotoria nei e koe ki te aroaro o ngā iwi katoa;
LUK 2:32 hei whakamārama e kite ai ngā tauiwi, hei korōria hoki mō tāu iwi, mō Īharaira.”
LUK 2:33 Ā, mīharo tonu a Hōhepa rāua ko tōna whaea ki ngā kupu i kōrerotia mōna.
LUK 2:34 Nā, ka manaaki a Himiona i a rāua, ā, ka mea ki tōna whaea, ki a Meri, “Nanā, ka waiho tēnei tama hei takanga, hei aranga, mō te tini o te tangata i roto i a Īharaira; hei tohu hoki e kōrerotia kinotia.
LUK 2:35 Āe rā, ka tika atu anō te hoari, ā, puta noa i tōu ake wairua, e hurahia ai ngā whakaaro o ngā ngākau maha.”
LUK 2:36 Ā, tērā hoki tētahi ko Ana, he poropiti, he tamāhine nā Panuera, nō te iwi o Āhera; kua kaumātua ia, e whitu ngā tau o tōna wāhinatanga ake i noho ai i te tāne.
LUK 2:37 He pouaru, kua waru tekau mā whā rawa ōna tau e pērā ana; heoi, kīhai i mahue i a ia te temepara; he karakia tonu tāna, he nohopuku, he īnoi, i te pō, i te ao.
LUK 2:38 Nā, ka tae atu ia i taua hāora anō, ka whakawhetai ki te Ariki, ā, kōrerotia ana ia e ia ki te hunga katoa o Hiruhārama e tatari ana ki te whakaoranga.
LUK 2:39 Ā, nō ka oti ngā mea katoa e rite ana ki tā te Ariki ture, ka hoki rātou ki Karirī, ki tō rātou ake pā, ki Nahareta.
LUK 2:40 Nā, ka tupu te tamaiti, ka pakari haere, ka kī i ngā whakaaro nunui, ā, i runga i a ia te aroha noa o te Atua.
LUK 2:41 Ā, i haere ōna mātua i ia tau, i ia tau ki Hiruhārama i te Hākari o te Kapenga.
LUK 2:42 Ā, ka tekau mā rua ōna tau, ka haere rātou i runga i ngā ritenga o te hākari.
LUK 2:43 Ā, ka rite ngā rā, i a rāua e hoki ana, ka whakaware iho te tamaiti, a Īhu, i Hiruhārama; kīhai hoki ōna mātua i mōhio.
LUK 2:44 I mahara hoki rāua kei roto ia i te tira, nā, ka haere, kotahi te rā ki te ara; ā, ka rapu rāua i a ia i roto i ngā whanaunga, i ā rāua tāngata hoki i mōhio ai.
LUK 2:45 Ā, nō te korenga i kitea ia, hoki ana rāua ki Hiruhārama, ki te rapu i a ia.
LUK 2:46 Ā muri iho i ngā rā e toru ka kitea ia i roto i te temepara, e noho ana i waenganui o ngā kaiwhakaako, e whakarongo ana ki a rātou, e ui ana ki a rātou.
LUK 2:47 Ā, mīharo katoa ki tōna mātauranga, ki āna kōrero, te hunga i rongo ki a ia.
LUK 2:48 Ā, nō ka kite rāua i a ia, ka tino mīharo; ka mea tōna whaea ki a ia, “E tama, he aha koe i pēnei ai ki a māua? Nā, pōuri noa iho māua ko tōu pāpā, i a māua i rapu nei i a koe.”
LUK 2:49 Ka mea ia ki a rāua, “He aha kōrua i rapu ai i ahau? Kīhai kōrua i mahara kia noho ahau i te whare o tōku Matua?”
LUK 2:50 Heoi, kīhai rāua i mātau ki te kupu i kōrerotia rā e ia ki a rāua.
LUK 2:51 Nā, ka haere tahi atu ia me rāua ka tae ki Nahareta, ka ngohengohe ia ki a rāua. Ko tōna whaea ia i rongoā i ēnei kupu katoa i roto i tōna ngākau.
LUK 2:52 Nā, ka kake haere a Īhu te whakaaro nui, te kaumātua, ka paingia anō e te Atua, e te tangata.
LUK 3:1 Nā, i te tekau mā rima o ngā tau o te rangatiratanga o Taipiria Hīhā, i a Ponotia Pirato e kāwana ana i Hūria, i a Herora e tetaraki ana i Karirī, i tōna teina hoki, i a Piripi, e tetaraki ana i Ituria, i te whenua hoki o Tarakonaiti, ko Raihānia, e tetaraki ana i Apirini;
LUK 3:2 ko Anaha rāua ko Kaiapa ngā tohunga nui, ka puta te kupu a te Atua ki a Hoani tama a Hakaraia ki te koraha.
LUK 3:3 Nā, ka haere mai ia ki ngā wāhi katoa e pātata ana ki Horano, ka kauwhau i te iriiri rīpenetā hei murunga hara.
LUK 3:4 I pērā anō ia me te mea i tuhituhia ki te pukapuka o ngā kōrero a Ihāia poropiti: “He reo nō tētahi i te koraha e karanga ana: ‘Whakapaia te huarahi o te Ariki, whakatikaia ōna ara!
LUK 3:5 Ka whakakīia ngā awaawa katoa, ka whakahoroa ngā maunga me ngā pukepuke katoa. E meinga hoki kia tika ngā wāhi kōpikopiko, ko ngā wāhi taratara hei ara māeneene.
LUK 3:6 Ā, e kite ngā kikokiko katoa i te whakaoranga a te Atua!’ ”
LUK 3:7 Nā reira, ka mea ia ki ngā mano i haere kia iriiria e ia, “E te uri nākahi, nā wai koutou i whakamahara kia rere i te riri meāke puta mai?
LUK 3:8 Nā, whakaputaina ngā hua e rite ana ki ō te rīpenetā; kei anga kei mea i roto i a koutou, ‘Ko Āperahama tō tātou matua’; ko tāku kupu hoki tēnei ki a koutou, e āhei ana anō i te Atua te whakaara tamariki ake mā Āperahama i roto i ēnei kōhatu.
LUK 3:9 Nā, ināianei anō kei te pā te toki ki te pakiaka o ngā rākau; ki te kāhore tētahi rākau e hua i te hua pai, ka tuaina, ka makā ki te ahi.”
LUK 3:10 Nā, ka ui ngā mano ki a ia, ka mea, “Me aha rā mātou?”
LUK 3:11 Nā, ka whakahoki ia, ka mea ki a rātou, “Ko te tangata i ngā koti e rua, kia hoatu ki te tangata kāhore ōna; me te tangata he kai tāna, kia pērā anō.”
LUK 3:12 Nā, ka haere mai hoki ngā pupirikana kia iriiria ka mea ki a ia, “E te kaiwhakaako, me aha mātou?”
LUK 3:13 Ka mea ia ki a rātou, “Kei nui ake i ngā mea i whakaritea mā koutou tā koutou e tango ai.”
LUK 3:14 Ka ui anō hoki ngā hōia ki a ia, ka mea, “Me aha hoki mātou?” Nā, ko tāna meatanga ki a rātou, “Kaua e tūkinotia tētahi, kaua e muru noa i tētahi mea; kāti anō mā koutou ko ō koutou utu.”
LUK 3:15 Nā, i te iwi e tatari ana e whakaaroaro katoa ana i roto i ō rātou ngākau ki a Hoani, mehemea ko te Karaiti ia.
LUK 3:16 Ka whakahoki a Hoani, ka mea ki a rātou katoa, “Ko ahau nei, he iriiri tāku i a koutou ki te wai; kei te haere mai ia tētahi he kaha rawa ake i ahau, e kore ahau e tau hei wewete i te here o ōna hū. Māna koutou e iriiri ki te Wairua Tapu, ki te kāpura.
LUK 3:17 Ko tāna mea tahi kei tōna ringa, hei tino tahi i tāna patunga wīti, hei kohi hoki i te wīti ki roto ki tāna whare wīti; ko te pāpapa ia e tahuna ki te kāpura e kore e tineia.”
LUK 3:18 He maha atu anō āna kupu whakahau i kauwhau ai ia i te rongopai ki te iwi.
LUK 3:19 Otirā, nā tōna riringa i a Herora tetaraki mō Herōriaha, mō te wahine a tōna tuakana, a Piripi, ā, mō ngā kino katoa hoki i meinga e Herora;
LUK 3:20 ka āpititia atu e Herora tēnei ki runga i ērā katoa, tūtakina ana e ia a Hoani ki te whare herehere.
LUK 3:21 Nā, ka poto katoa te iwi te iriiri, i a Īhu kua oti te iriiri, ā, i a ia e īnoi ana, ka tuwhera te rangi,
LUK 3:22 ā, ka heke iho te Wairua Tapu, ka heke tinana iho, ānō he kūkupa, ki runga ki a ia, ā, ka puta mai he reo nō te rangi, e mea ana, “Ko koe tāku Tama i aroha ai, tāku i āhuareka ai.”
LUK 3:23 Nā, ko Īhu, i a ia i tīmata ai ki te whakaako, kei te toru tekau ōna tau, ā, ki tā te tangata kī, he tama ia nā Hōhepa tama a Heri,
LUK 3:24 ko ia he tama nā Matata, tama a Rīwai, tama a Mereki, tama a Iana, tama a Hōhepa,
LUK 3:25 tama a Matatiaha, tama a Āmoho, tama a Nahumu, tama a Eheri, tama a Nakai,
LUK 3:26 tama a Māta, tama a Matatiaha, tama a Hemei, tama a Hōhepa, tama a Hūrā,
LUK 3:27 tama a Hoana, tama a Reha, tama a Herupapera, tama a Haratiera, tama a Neri,
LUK 3:28 tama a Mereki, tama a Ari, tama a Kohama, tama a Eremorama, tama a Ere,
LUK 3:29 tama a Hohe, tama a Eriētere, tama a Horimi, tama a Matata, tama a Rīwai,
LUK 3:30 tama a Himiona, tama a Hūrā, tama a Hōhepa, tama a Honana, tama a Eriakimi,
LUK 3:31 tama a Merea, tama a Menana, tama a Matata, tama a Nātana, tama a Rāwiri,
LUK 3:32 tama a Hehe, tama a Ōpere, tama a Poaha, tama a Haramono, tama a Nāhona,
LUK 3:33 tama a Aminarapa, tama a Arame, tama a Heteromo, tama a Parete, tama a Hūrā,
LUK 3:34 tama a Hākopa, tama a Īhaka, tama a Āperahama, tama a Tera, tama a Nahora,
LUK 3:35 tama a Haruku, tama a Rakau, tama a Pereke, tama a Ēpere, tama a Haraha,
LUK 3:36 tama a Kainana, tama a Arapahata, tama a Hema, tama a Noa, tama a Rameka,
LUK 3:37 tama a Matuhara, tama a Ēnoka, tama a Iarere, tama a Marerēre, tama a Kainana,
LUK 3:38 tama a Ēnoha, tama a Heta, tama a Ārama, a te tama a te Atua.
LUK 4:1 Nā, ko Īhu, kī tonu i te Wairua Tapu, hoki atu ana i Horano, ā, ka ārahina e te Wairua i te koraha.
LUK 4:2 Mō ngā rā e whā tekau, whakamātautauria ai e te rēwera. Kīhai ia i kai i tētahi mea i aua rā, ā, nō ka pahemo, ka hiakai ia.
LUK 4:3 Nā, ka mea te rēwera ki a ia, “Ki te mea ko te Tama koe a te Atua, kīia iho tēnei kōhatu kia meinga hei taro.”
LUK 4:4 Nā, ka whakahoki a Īhu ki a ia, ka mea, “Kua oti te tuhituhi, ‘E kore e ora te tangata i te taro kau.’ ”
LUK 4:5 Kātahi ka ārahina ia e ia ki runga, ā, mea kau iho kua whakakitea ki a ia ngā rangatiratanga katoa o te ao.
LUK 4:6 Ka mea te rēwera ki a ia, “Māku e hoatu ki a koe tēnei rangatiratanga katoa, me te korōria o ēnei mea; kua tukua hoki ki ahau, ā, ka hoatu e ahau ki tāku e pai ai.
LUK 4:7 Nā, ki te koropiko koe ki tōku aroaro, mōu katoa.”
LUK 4:8 Nā, ka whakahoki a Īhu ki a ia, ka mea, “Kua oti te tuhituhi, ‘Me koropiko koe ki te Ariki, ki tōu Atua, me mahi anō ki a ia anake!’ ”
LUK 4:9 Nā, ka kawea ia e ia ki Hiruhārama, ā, whakatūria ana ki runga ki te keokeonga o te temepara, nā, ka mea ia ki a ia, “Ki te mea ko te Tama koe a te Atua, rere atu i konei ki raro,
LUK 4:10 kua oti hoki te tuhituhi, ‘Ka kōrerotia iho koe e ia ki āna anahera, kia tiakina koe.’
LUK 4:11 Ā, ‘Mā rātou koe e hiki ake ki ō rātou ringa, kei tūtuki tōu waewae ki te kōhatu.’ ”
LUK 4:12 Nā, ka whakahoki a Īhu, ka mea ki a ia, “Kua takoto te kōrero, ‘Aua e whakamātautau ki te Ariki, ki tōu Atua.’ ”
LUK 4:13 Ā, ka mutu katoa ngā whakamātautauranga a te rēwera, ka mawehe atu i a ia mō tētahi wāhi.
LUK 4:14 Nā, ka hoki a Īhu i runga i te kaha o te Wairua ki Karirī, ā, haere ana tōna rongo, ā, puta noa i ngā wāhi tata katoa.
LUK 4:15 Ka whakaako ia i roto i ō rātou whare karakia, me te whakakorōria te katoa i a ia.
LUK 4:16 Nā, ka haere ia ki Nahareta, ki te wāhi i whāngaia ai ia; ā, ka tomo i te rā hāpati ki te whare karakia, ko tāna hanga hoki ia, ka whakatika ki te kōrero pukapuka.
LUK 4:17 Ā, ka hoatu ki a ia te pukapuka a Ihāia poropiti. Ā, nō ka wherahia te pukapuka, ka kitea e ia te wāhi i tēnei tuhituhinga:
LUK 4:18 “Kei ahau te Wairua o te Ariki, nāna nei hoki ahau i whakawahi, hei kauwhau i te rongopai ki te hunga rawakore. Kua tonoa ahau e ia ki te kauwhau ki ngā herehere, kia haere noa, ki ngā matapō kia titiro; ki te tuku i te hunga e marū ana, kia haere noa atu,
LUK 4:19 ki te kauwhau i te tau manakohanga mai a te Ariki.”
LUK 4:20 Nā, ka kopia e ia te pukapuka, ka hoatu ki te kaitiaki, ā, noho ana. Nā, ka titiro matatau ki a ia ngā kanohi o te hunga katoa i roto i te whare karakia.
LUK 4:21 Kātahi ia ka anga, ka kōrero ki a rātou, “Nō nāianei, i ō koutou taringa e whakarongo mai nei, i mana ai tēnei karaipiture.”
LUK 4:22 Ā, i whakapai rātou katoa ki a ia, i mīharo ki ngā kupu pai i puta i tōna māngai. Ka mea rātou, “Ehara ianei tēnei i te tama a Hōhepa?”
LUK 4:23 Ka mea ia ki a rātou, “Tērā pea e puaki mai i a koutou tēnei kupu whakarite ki ahau, ‘E rata, rongoā koe i a koe anō! Ko ngā mea i rongo ai mātou kua meinga ki Kaperenauma, meinga hoki ki konei, ki tōu whenua.’ ”
LUK 4:24 I mea anō ia, “He pono tāku e mea nei ki a koutou, e kore te poropiti e manakohia i tōna ake whenua.
LUK 4:25 Otirā, he pono tāku e mea nei ki a koutou, he tokomaha ngā pouaru i roto i a Īharaira i ngā rā i a Irāia, i te rangi kua oti te kōpani i ngā tau e toru i ngā marama e ono, i te matekaitanga nui o te whenua katoa.
LUK 4:26 Heoi, kīhai a Irāia i tonoa ki tētahi o rātou, ki a Harepata anake o Hairona, ki te wahine pouaru.
LUK 4:27 He tokomaha hoki ngā repera i roto i a Īharaira, i ngā rā o Eriha poropiti; ā, kīhai tētahi o rātou i whakamākia, ko Naamana anake, ko te Hīriani.”
LUK 4:28 Ā, kī tonu i te riri te hunga katoa i te whare karakia, i te rongonga ki ēnei mea.
LUK 4:29 Nā, ko tō rātou whakatikanga ake, ka maka i a ia ki waho o te pā, ā, ārahina ana ia ki te pari o te puke i hangā ai tō rātou pā, kia whakatakā ai ia ki raro.
LUK 4:30 Otirā, i tika ia rā waenganui o rātou, ā, haere ana.
LUK 4:31 Ā, ka tae ki Kaperenauma, ki tētahi pā o Karirī, ka whakaako i a rātou i te hāpati.
LUK 4:32 Nā, ka mīharo rātou ki tāna ako, i whai mana hoki tāna kupu.
LUK 4:33 Nā, i te whare karakia tētahi tangata he wairua rēwera poke tōna, nui atu tōna reo ki te karanga,
LUK 4:34 ka mea, “Kāti rā; he aha mātou nāu, e Īhu o Nahareta; kua tae mai koe ki te whakangaro i a mātou? E mōhio ana ahau ki a koe, ko wai koe; ko te Mea Tapu a te Atua!”
LUK 4:35 Nā, rīria iho ia e Īhu, ka mea ia, “Kāti te kōrero, puta mai hoki i roto i a ia.” Kātahi te rēwera ka turaki i a ia ki waenganui, ā, puta mai ana i roto i a ia, kīhai hoki tērā i ahatia.
LUK 4:36 Nā tau ana te mīharo ki a rātou katoa, ka kōrerorero tētahi ki tētahi, ka mea, “He aha tēnei kupu? Mana tonu nei hoki tāna tono i ngā wairua poke, kaha tonu, ā, puta mai ana ki waho.”
LUK 4:37 Ā, pakū ana tōna rongo puta noa i ngā wāhi tūtata katoa.
LUK 4:38 Ā, ko tōna whakatikanga i te whare karakia, tomo tonu ki te whare o Haimona. Nā, e mate ana te whaea o te wahine a Haimona, he nui te kirikā; ka īnoi rātou ki a ia mōna.
LUK 4:39 Nā, ka tū ia ki runga i a ia, ā, rīria iho te kirikā; ā, mutu ake, nā, ara tonu ake ia kei te taka mea mā rātou.
LUK 4:40 I te toenetanga o te rā, ka kawea mai ki a ia e ngā tāngata katoa ngā mea o rātou e mate ana i te tini o ngā mate; nā, whakapākia iho e ia ōna ringa ki tēnei, ki tēnei o rātou, ā, ora ake rātou.
LUK 4:41 He tokomaha hoki te hunga i puta mai ngā rēwera i roto i a rātou; i karanga hoki aua wairua i mea, “Ko te Tama koe a te Atua!” Ā, rīria ana rātou e ia, kīhai i tukua kia kōrero, i mātau hoki rātou ko te Karaiti ia.
LUK 4:42 Ka ao te rā, ka puta atu ia, ka haere ki tētahi wāhi koraha; ā, ka rapu ngā mano i a ia, ka tae ki a ia, nā, puritia ana ia, kei whakarērea rātou e ia.
LUK 4:43 Ka mea ia ki a rātou, “Me kauwhau e ahau te rangatiratanga o te Atua ki ērā atu pā anō; koia hoki ahau i tonoa mai ai.”
LUK 4:44 Ā, kauwhau ana ia i ngā whare karakia o Karirī.
LUK 5:1 Ā, i te mano e āki ana ki a ia ki te whakarongo ki te kupu a te Atua, nā, e tū ana ia i te taha o te roto o Kenehareta,
LUK 5:2 nā, ka kite ia i ētahi kaipuke e rua e tū ana i te taha o te roto; ko ngā kaihao ia kua riro i runga, e horoi ana i ā rātou kupenga.
LUK 5:3 Nā, ka eke ia ki tētahi o ngā kaipuke, ki tō Haimona, ka mea ki a ia kia neke atu ki waho tata. Nā, noho ana ia, whakaakona ana e ia te mano i runga i te kaipuke.
LUK 5:4 Ā, ka mutu tāna kōrero, ka mea ia ki a Haimona, “Neke atu ki te wāhi hōhonu, ka tuku ai i ā koutou kupenga ki te hao.”
LUK 5:5 Nā, ka whakahoki a Haimona, ka mea ki a ia, “E kara, mahi noa mātou i te pō roa nei, tē mau tētahi; heoi, nāu nā te kupu me tuku e ahau te kupenga.”
LUK 5:6 Ā, nō tā rātou meatanga i tēnei, he mano tini ngā ika i mau i a rātou; ka whakapakaru tā rātou kupenga.
LUK 5:7 Nā, ka tāwhiri rātou ki ō rātou hoa i tērā o ngā kaipuke kia hoe mai hei hoa mō rātou. Ā, i tō rātou taenga mai, whakakīia ana ngā kaipuke e rua, nō ka whakatotohu.
LUK 5:8 Otiia, nō te kitenga o Haimona Pita, ka hinga iho ki ngā turi o Īhu, ka mea, “Mawehe atu i ahau, e te Ariki, he tangata hara hoki ahau.”
LUK 5:9 Mau tonu hoki tōna mīharo me tō ōna hoa katoa, ki te haonga o ngā ika i haoa nei e rātou;
LUK 5:10 i pērā anō hoki a Hēmi rāua ko Hoani, he tama rāua nā Heperi, he hoa hoki nō Haimona. Nā, ka mea a Īhu ki a Haimona, “Kaua e mataku; i ēnei wā e takoto ake nei ka hao tāngata koe.”
LUK 5:11 Ā, ka whakaūria ngā kaipuke ki uta, mahue ake ngā mea katoa i a rātou, ā, aru ana i a ia.
LUK 5:12 Nā, i a ia i tētahi o ngā pā, nā, ko tētahi tangata kapi tonu i te repera; ā, i tōna kitenga i a Īhu, ka takoto tāpapa, ka īnoi ki a ia, ka mea, “E te Ariki, ki te pai koe, e taea ahau e koe te mea kia mā.”
LUK 5:13 Nā, ka totoro tōna ringa, ka pā ki a ia, ka mea, “E pai ana ahau. Kia mā koe.” Ā, mutu tonu ake tōna repera.
LUK 5:14 Ā, ka whakatūpato ia i a ia kia kaua e kōrerotia ki te tangata, engari “Haere, kia kite te tohunga i a koe, kawea atu hoki mō tōu whakamākanga ngā mea i whakaritea e Mohi, hei mea whakaatu ki a rātou.”
LUK 5:15 Heoi, tino pakū atu ana tōna rongo; he tokomaha noa atu hoki i huihui ki te whakarongo, kia whakaorangia ai e ia ō rātou ngoikoretanga.
LUK 5:16 Otirā, haere ana ia, ko ia anake ki te koraha ki te īnoi.
LUK 5:17 Ā, i tētahi o aua rā, e whakaako ana ia, me te noho anō ngā Parihi me ngā kaiwhakaako o te ture, i haere mai nei i ngā kāinga katoa o Karirī, o Hūria, o Hiruhārama; i reira anō te kaha o te Ariki hei whakaora i a rātou.
LUK 5:18 Nā, ka kawea mai e ētahi tāngata i runga i te moenga tētahi tangata, he pararūtiki; mea noa rātou kia kawea ia ki roto, kia whakatakotoria ki tōna aroaro.
LUK 5:19 Ā, i te korenga e kitea e rātou he huarahi hei kawenga mai i a ia ki roto, i te mano o te tangata, ka kakea te whare, ā, tukua iho ana ia rā ngā taera, me te moenga anō, ki waenganui, ki te aroaro o Īhu.
LUK 5:20 Ā, i tōna kitenga i tō rātou whakapono, ka mea ia ki a ia, “E hoa, ka oti ōu hara te muru.”
LUK 5:21 Nā, ka anga, ka whakaaroaro ngā karaipi me ngā Parihi, ka mea, “Ko wai tēnei nāna ngā kupu kohukohu? Ko wai hei muru hara? Ko te Atua anake.”
LUK 5:22 Otirā, i mōhio a Īhu ki ā rātou whakaaroaronga, ka oho, ka mea ki a rātou, “He aha tā koutou e whakaaroaro nā i roto i ō koutou ngākau?
LUK 5:23 Ko tēhea te mea takoto noa, ko te mea, ‘Ka oti ōu hara te muru,’ ko te mea rānei, ‘Whakatika, haere’?
LUK 5:24 Otiia, kia mātau ai koutou he mana muru hara tō te Tama a te tangata i runga i te whenua.” Ka mea ia ki te pararūtiki, “Ko tāku kupu tēnei ki a koe, whakatika, tangohia ake tōu moenga, haere ki tōu whare.”
LUK 5:25 Nā, whakatika tonu ake ia i tō rātou aroaro, tangohia ake ana te mea i takoto ai ia, haere ana ki tōna whare, me te whakakorōria i te Atua.
LUK 5:26 Nā, mīharo ana rātou katoa, ka whakakorōria i te Atua, kī tonu hoki rātou i te mataku, ka mea, “Puta kē ngā mea i kite nei tātou ināianei!”
LUK 5:27 Ā, i muri i ēnei mea, ka haere ia, ka kite i tētahi pupirikana, ko Rīwai te ingoa, e noho ana i te wāhi tango takoha, ka mea ki a ia, “Arumia mai ahau.”
LUK 5:28 Nā, whakarērea ake e ia ngā mea katoa, whakatika ana, aru ana i a ia.
LUK 5:29 Nā, ka takā e Rīwai he hākari nui māna i tōna whare; he tokomaha hoki ngā pupirikana me ngā tāngata kē i noho tahi rātou.
LUK 5:30 Nā, ka amuamu ngā Parihi me ō rātou karaipi ki āna ākonga, ka mea, “He aha koutou ka kai tahi ai, ka inu tahi ai me ngā pupirikana, me ngā tāngata hara?”
LUK 5:31 Nā, ka whakahoki a Īhu, ka mea ki a rātou, “Kāhore he aha o ngā tāngata ora e meatia ai e te rata, engari o te hunga e mate ana.
LUK 5:32 Kīhai ahau i haere mai ki te karanga i te hunga tika, engari i te hunga hara, kia rīpenetā.”
LUK 5:33 Nā, ka mea rātou ki a ia, “Ko ngā ākonga a Hoani hono tonu te nohopuku, te īnoi, me ngā ākonga anō a ngā Parihi; ko āu ia e kai ana, e inu ana.”
LUK 5:34 Nā, ko te meatanga a Īhu ki a rātou, “E taea rānei e koutou te mea kia nohopuku ngā tama o te whare mārena, i te mea kei a rātou te tāne mārena hou?
LUK 5:35 Nā, tērā e tae mai ngā rā; ā, ina tangohia te tāne mārena hou i a rātou, kātahi rātou ka nohopuku i aua rā.”
LUK 5:36 I kōrerotia anō e ia tētahi kupu whakarite ki a rātou: “E kore e haea e te tangata tētahi wāhi o te kahu hou hei pāpaki mō te kahu tawhito; kei pakaru te mea hou, ā, e kore te pāpaki i tangohia i te mea hou e hāngai ki te mea tawhito.
LUK 5:37 E kore hoki te tangata e riringi i te wāina hou ki ngā ipu tawhito; kei pakaru ngā ipu i te wāina hou, nā, ka maringi, ā, kore ake ngā ipu.
LUK 5:38 Engari me riringi te wāina hou ki ngā ipu hou.
LUK 5:39 Ka inu hoki te tangata i te wāina tawhito, e kore ia e hiahia ki te mea hou, e mea hoki ia, ‘Erangi te mea tawhito.’ ”
LUK 6:1 Nā, i te hāpati ka haere ia rā waenga wīti; ā, katohia ana e āna ākonga ngā puku, wīti, kainga ake, he mea kōmukumuku ki te ringa.
LUK 6:2 Nā, ka mea ētahi o ngā Parihi, “He aha koutou ka mahi ai i te mea e kore e tika kia mahia i te hāpati?”
LUK 6:3 Nā, ka whakahoki a Īhu, ka mea ki a rātou, “Kāhore ianei koutou i kite i tā Rāwiri i mea ai, i a ia e mate ana i te hiakai, rātou ko ōna hoa.
LUK 6:4 I tōna tomokanga ki te whare o te Atua, ka tango ia i ngā taro aroaro, nā, kainga ana e ia, hoatu ana hoki ki ōna hoa; ko ngā mea kīhai nei i tika kia kainga, engari mā ngā tohunga anake?”
LUK 6:5 I mea anō ia ki a rātou, “Ko te Tama a te tangata te Ariki o te hāpati.”
LUK 6:6 Ā, i tētahi atu hāpati ka tomo ia ki te whare karakia, ka whakaako; i reira anō tētahi tangata, ko tōna ringa matau kua memenge.
LUK 6:7 Ka titiro whakamau ngā karaipi me ngā Parihi ki a ia, me kore ia e whakaora i te hāpati; kia whai take ai hei whakawākanga mōna.
LUK 6:8 Nā, ka mōhio ia ki ō rātou whakaaro, ka mea ki te tangata i te ringa memenge, “Whakatika, e tū ki waenganui.” Ā, whakatika ana ia, tū ana.
LUK 6:9 Kātahi ka mea a Īhu ki a rātou, “Māku hoki e ui ki a koutou; he mea tika rānei te mahi pai i te hāpati, te mahi kino rānei? Te whakaora, te whakamate rānei?”
LUK 6:10 Nā, ka tirotiro ia ki a rātou katoa ka mea ki taua tangata, “Totoro mai tōu ringa.” Ā, pērā ana ia; nā, kua ora anō tōna ringa.
LUK 6:11 Nā, kī tonu rātou i te honohonoā ka kōrerorero ki a rātou anō, me aha rānei a Īhu e rātou.
LUK 6:12 Ā, i aua rā ka haere ia ki te maunga ki te īnoi, he īnoi tonu tāna i te roa o te pō ki te Atua.
LUK 6:13 Ā, ka ao te rā, ka karangatia e ia āna ākonga; ka whiriwhiria e ia kotahi tekau mā rua o rātou, ā, huaina ana hoki e ia hei āpōtoro:
LUK 6:14 Ko Haimona (i huaina hoki e ia ko Pita) ko tōna teina ko Anaru; ko Hēmi rāua ko Hoani, ko Piripi rāua ko Patoromu,
LUK 6:15 ko Matiu rāua ko Tamati, ko Hēmi tama a Arapiu, ko Haimona (e kīia nei ko Heroti),
LUK 6:16 ko Hūrā tama a Hēmi, ko Hūrā Ikariote hoki, ko ia nei te kaituku.
LUK 6:17 Nā, ka heke ngātahi iho rātou, tū ana i tētahi wāhi tairite, rātou ko te rōpū o āna ākonga, me te huihuinga nui o te iwi i Hūria katoa, i Hiruhārama, i te taha hoki o te moana o Tāira o Hairona, i haere mai nei ki te whakarongo ki a ia, kia whakaorangia hoki ō rātou mate;
LUK 6:18 me te hunga anō e whakatoia ana e ngā wairua poke, ā, whakaorangia ana rātou.
LUK 6:19 I whai anō te mano katoa kia pā ki a ia; i puta hoki he kaha i a ia, ā, whakaorangia ana rātou katoa.
LUK 6:20 Nā, ka titiro ōna kanohi ki āna ākonga, ka mea ia, “Ka koa koutou, e ngā rawakore; mō koutou hoki te rangatiratanga o te Atua!
LUK 6:21 Ka koa koutou e hiakai nei ināianei; ka mākona hoki koutou! Ka koa koutou e tangi nei ināianei; e kata hoki koutou!
LUK 6:22 Ka koa koutou ina kinongia koutou e ngā tāngata, ina wehea atu i roto i a rātou, ina tāwaia ina rukea atu tō koutou ingoa, ānō he mea kino, mō te whakaaro ki te Tama a te tangata.
LUK 6:23 “Kia hari i taua rā, me te tūpekepeke. He nui hoki tō koutou utu i te rangi; i pērātia hoki ngā poropiti e ō rātou mātua.
LUK 6:24 Otirā, auē te mate mō koutou, mō te hunga taonga; kua riro hoki i a koutou tō koutou whakamārie!
LUK 6:25 Auē te mate mō koutou, mō te hunga e mākona ana ināianei, e mate hoki koutou i te hiakai! Auē te mate mō koutou, mō te hunga e kata ana ināianei, ka auē hoki koutou, ka tangi!
LUK 6:26 Auē te mate mō koutou ua kōrerotia paitia koutou e ngā tāngata katoa! I pērā hoki ō rātou mātua ki ngā poropiti teka.”
LUK 6:27 “Nā, ko tāku kupu tēnei ki a koutou e whakarongo mai nei: arohaina ō koutou hoa whawhai; kia pai te mahi ki te hunga e kino ana ki a koutou.
LUK 6:28 Manaakitia te hunga e kanga ana i a koutou, me īnoi mō te hunga e whakawhiu ana i a koutou.
LUK 6:29 Nā, ki te pākia tōu pāpāringa e tētahi, whakaangahia atu hoki tētahi; ki te tangohia tōu ngeri e tētahi, kaua e kaiponuhia tōu koti.
LUK 6:30 Hoatu ki ngā tāngata katoa e īnoi ana ki a koe; kaua hoki e tonoa āu mea ki te tangohia e te tangata.
LUK 6:31 Ā, ko tā koutou e pai ai kia meatia e ngā tāngata ki a koutou, meatia anō e koutou ki a rātou.
LUK 6:32 “Ki te aroha koutou ki te hunga e aroha ana ki a koutou, kei hea he whakawhetai ki a koutou? E aroha ana hoki te hunga hara ki te hunga e aroha ana ki a rātou.
LUK 6:33 Ki te atawhai hoki koutou i te hunga e atawhai ana i a koutou, kei hea he whakawhetai ki a koutou? E pēnā ana anō te hunga hara.
LUK 6:34 Ki te tuku moni koutou ki te hunga e mea ai koutou ka utua mai rātou, kei hea he whakawhetai ki a koutou? E tuku moni ana hoki te hunga hara ki te hunga hara, mō te pērā kia whakahokia ki a rātou.
LUK 6:35 Engari, kia aroha ki ō koutou hoa whawhai, mahia te pai ki a rātou, ka tuku atu he moni, kaua anō e mutu te tūmanako; ā, tērā e rahi te whakautu ki a koutou, ka tupu koutou hei tamariki mā te Runga Rawa; e atawhai ana hoki ia i te hunga e kore e whakawhetai, i te hunga kino.
LUK 6:36 Kia ngāwari rāpea koutou, kia pērā me tō koutou Matua e ngāwari ana.”
LUK 6:37 “Kaua e whakawā, ā, e kore koutou e whakawākia; kaua e whakatau hē, e kore te hē, a, e whakataua ki a koutou. Houhia te rongo, ā, e houhia anō te rongo ki a koutou.
LUK 6:38 Hoatu, ā, ka hōmai ki a koutou; he mēhua pai, pēhi rawa, oioi rawa, pūrena tonu tā rātou e hōmai ai ki te kokoru o ō koutou kākahu. Ko te mēhua hoki e mēhua ai koutou, hei mēhua anō tēnā ki a koutou.”
LUK 6:39 Ā, ka puaki tāna kupu whakarite ki a rātou: “E āhei rānei te matapō te ārahi i te matapō? E kore rānei e taka tahi rāua ki te poka?
LUK 6:40 E kore te ākonga e rahi ake i tōna kaiwhakaako; engari, ka rite anō ki ō rātou kaiwhakaako ngā tāngata katoa kua tino pūkengatia.
LUK 6:41 “He aha tāu e titiro ki te otaota i roto i te kanohi o tōu teina, tē kite i te kurupae i tōu ake kanohi?
LUK 6:42 Ā, me pēhea e taea ai e koe te kōrero ki tōu teina, ‘E tōku teina, iaua, kia kapea atu e ahau te otaota i roto i tōu kanohi,’ tē kite i te kurupae i roto i tōu kanohi? E te tangata tinihanga, mātua kapea atu e koe te kurupae i roto i tōu kanohi, kātahi koe ka mārama ai ki te kape i te otaota i roto i te kanohi o tōu teina.”
LUK 6:43 “E kore hoki te rākau ātaahua e hua i te hua kino; e kore anō te rākau kino e hua i te hua ātaahua.
LUK 6:44 Mā ōna hua tonu ka mōhiotia ai tēnei rākau, tēnei rākau. E kore hoki e kohia he piki i runga i ngā tātarāmoa, e kore anō e whakia he karepe i runga i te tūmatakuru.
LUK 6:45 He tangata pai, he pai tāna e whakaputa ai i roto i te taonga pai o tōna ngākau. He tangata kino, he kino tāna e whakaputa ai i roto i ngā taonga kino o tōna ngākau. He pūrenatanga hoki nō te ngākau ngā kupu a te māngai.”
LUK 6:46 “He aha koutou ka karanga ai ki ahau, ‘E te Ariki, e te Ariki,’ tē mahi i āku e kōrero ai?
LUK 6:47 Nā, ko te tangata e haere mai ana ki ahau, e rongo ana ki āku kupu, ā, e mahi ana, māku e whakaatu ki a koutou tōna rite.
LUK 6:48 Ka rite ia ki te tangata i hanga i tētahi whare, i keri, i whakahōhonu, ā, whakatakoto ana i te papa ki runga ki te toka. Ā, i te putanga o te waipuke, ka pakaru te roma ki taua whare, heoi kīhai i taea te whakangāueue; nō te mea i ū tōna hanganga.
LUK 6:49 Tēnā ko te tangata i rongo, ā, kīhai i mahi, ka rite ia ki te tangata i hanga i tētahi whare ki runga ki te oneone, tē ai he tūranga; i te pākarutanga o te roma, nā, hinga tonu iho; ā, nui atu te pakaru o taua whare.”
LUK 7:1 Ā, nō ka mutu ēnei kupu katoa āna, me te whakarongo anō te iwi, ka tomo ia ki Kaperenauma.
LUK 7:2 Nā, e mate ana te pononga a tētahi keneturio, meāke marere, ko tāna hoki i matenui ai.
LUK 7:3 Ā, nō tōna rongonga i a Īhu, ka tonoa mai ki a ia ētahi kaumātua o ngā Hūrai, hei mea ki a ia kia haere ki te whakaora i tāna pononga.
LUK 7:4 Ā, i tō rātou taenga ki a Īhu, he kaha tā rātou īnoi, ka mea, “He pai te tangata e meatia ai tēnei e koe,
LUK 7:5 E aroha ana hoki ia ki tō tātou iwi, nāna hoki i hanga te whare karakia mō mātou.”
LUK 7:6 Nā, haere tahi ana a Īhu me rātou. Ā, i a ia kāhore nei i matara i te whare, ka tono te keneturio i ētahi hoa ki a ia, ka mea ki a ia, “E te Ariki, kei maumau ngenge noa koe, ehara hoki ahau i te tikanga tangata e haere ake ai koe ki raro i tōku tuanui;
LUK 7:7 koia tē tae ai tōku aro ki te haere atu ki a koe. Engari kia puaki mai tāu kupu, ā, ka ora tāku pononga.
LUK 7:8 He tangata hoki ahau e whakahaua ana, he hōia anō āku hei whakahaunga māku, nā, ka mea ahau ki tēnei, ‘Haere,’ ā, ka haere; ki tētahi atu hoki, ‘Haere mai,’ ā, ka haere mai; ki tāku pononga anō hoki, ‘Meatia tēnei,’ ā, ka meatia e ia.”
LUK 7:9 Ā, i te rongonga o Īhu ki ēnei mea, ka mīharo ki a ia, ka tahuri, ka mea ki te mano e aru ana i a ia, “Ko tāku kupu tēnei ki a koutou, kāhore anō ahau i kite i te whakapono hei rite mō tēnei te nui, ahakoa i roto i a Īharaira.”
LUK 7:10 Ā, rokohanga atu e te hunga i tonoa, i tō rātou hokinga atu ki te whare, kua ora te pononga rā.
LUK 7:11 Nā, i muri tata iho ka haere ia ki tētahi pā, ko Naina te ingoa; ā, i haere tahi āna ākonga me ia, he rahi hoki te hui.
LUK 7:12 Ā, ka whakatata ia ki te kūwaha o te pā, nā, he tūpāpaku tērā e kauhoatia ana mai, he huatahi nā tōna whaea, ā, he pouaru tērā: he tokomaha o te pā e haere tahi ana me ia.
LUK 7:13 Ā, i te kitenga o te Ariki i a ia, ka aroha ki a ia, ka mea ki a ia, “Kaua e tangi.”
LUK 7:14 Nā, ka whakatata ia, ka pā ki te kauhoa, ā, tū tonu ngā kaikauhoa. Nā, ko tāna meatanga, “E tama, ko tāku kupu tēnei ki a koe, e ara.”
LUK 7:15 Nā, ka noho te tūpāpaku ki runga, ka anga, ka kōrero, ā, hoatu ana ia e ia ki tōna whaea.
LUK 7:16 Nā, ka tau te wehi ki a rātou katoa; ka whakakorōria i te Atua, ka mea, “Kua puta ake i roto i a tātou he poropiti nui!” ā, “Kua titiro mai hoki te Atua ki tāna iwi.”
LUK 7:17 Nā, haere ana tēnei kōrero mōna puta noa i Hūria, i ngā wāhi pātata katoa anō hoki.
LUK 7:18 Ā, ka kōrerotia ēnei mea katoa ki a Hoani e āna ākonga.
LUK 7:19 Nā, ka karangatia e Hoani ētahi o āna ākonga tokorua, ka tonoa ki te Ariki, mea ai, “Ko koe rānei tērā e haere mai ana? Me tatari rānei tātou ki tētahi atu?”
LUK 7:20 Ā, nō te taenga mai o aua tāngata ki a ia, ka mea, “Kua tonoa mai māua e Hoani Kaiiriiri ki a koe, mea ai, Ko koe rānei tērā e haere mai ana? Me tatari rānei tātou ki tētahi atu?”
LUK 7:21 I taua wā pū anō he tokomaha te hunga i whakaorangia e ia i ngā tūrorotanga, i ngā mate, i ngā wairua kino; he tokomaha ngā matapō i meinga kia kite.
LUK 7:22 Ā, ka whakahoki ia, ka mea ki a rāua, “Haere, kōrerotia ki a Hoani ngā mea e kite nei, e rongo nei kōrua; ko ngā matapō e titiro ana, ko ngā kopa e hāereere ana, ko ngā repera kua mā, ko ngā turi e rongo ana, ko ngā tūpāpaku e whakaarahia ana, e kauwhautia ana te rongopai ki te hunga rawakore;
LUK 7:23 nā, ka koa te tangata e kore e hē ki ahau.”
LUK 7:24 Ā, nō te rironga atu o ngā karere a Hoani, ka tīmata ia ki te kōrero ki te mano mō Hoani: “I haere atu koutou ki te koraha kia kite i te aha? I te kākaho e whakangāueuetia ana e te hau?
LUK 7:25 Anō rā, i haere koutou kia kite i te aha? I te tangata he kākahu māeneene ōna? Nā, kei ngā whare kīngi te hunga i ngā kākahu whakapaipai, i ngā kai papai.
LUK 7:26 Anō rā, i haere koutou kia kite i te aha? I te poropiti? Āe rā, ko tāku kupu tēnei ki a koutou, tērā atu i te poropiti.
LUK 7:27 Mōna te mea kua tuhituhia nei, ‘Nā, ka tonoa e ahau tāku karere ki mua i tōu aroaro, māna e whakapai tōu huarahi i mua i a koe.’
LUK 7:28 Ko tāku kupu hoki tēnei ki a koutou, kāhore he poropiti nui atu i a Hoani Kaiiriiri i roto i ngā whānau a te wahine; heoi, rahi ake i a ia te nohinohi rawa o te rangatiratanga o te Atua.”
LUK 7:29 Nā, i tō rātou rongonga ai, whakatikaia ana tā te Atua e te hunga katoa i rongo, e ngā pupirikana anō, i iriiria hoki rātou ki te iriiri a Hoani.
LUK 7:30 Ko ngā Parihi ia rātou ko ngā kaiwhakaako o te ture i whakakāhore i tā te Atua whakaaro ki a rātou, kīhai nei rātou i iriiria e ia.
LUK 7:31 “Me whakarite e ahau ngā tāngata o tēnei whakapaparanga ki te aha? He rite rātou ki te aha?
LUK 7:32 He rite ki ngā tamariki e noho ana i te kāinga hokohoko, e karanga ana ki a rātou anō, e mea ana: ‘Whakatangi noa mātou i te pūtōrino ki a koutou, ā, kāhore koutou i kanikani. Auē noa mātou ki a koutou, nā, kāhore koutou i tangi.’
LUK 7:33 I haere mai hoki a Hoani Kaiiriiri, kīhai i kai taro, kīhai i inu wāina; heoi ka mea koutou, ‘He rēwera tōna.’
LUK 7:34 I haere mai te Tama a te tangata me te kai, me te inu; ā, ka mea koutou, ‘Nā, he tangata kakai, he tangata inu wāina, he hoa nō ngā pupirikana, nō ngā tāngata hara!’
LUK 7:35 Otirā, e whakatikaia ana te whakaaro nui e āna tamariki katoa.”
LUK 7:36 Nā, ka mea tētahi o ngā Parihi ki a ia kia kai tahi rāua. Ā, ka tomo ia ki te whare o te Parihi, ka noho.
LUK 7:37 Nā, tērā tētahi wahine hara o te pā ka mōhio, kei te whare o te Parihi ia e noho ana; nā, ka kawea mai e ia tētahi pouaka kōhatu, he hinu i roto.
LUK 7:38 Ā, tū tangi ana i muri i ōna waewae, ka anga ka whakamākūkū i ōna waewae ki ōna roimata, ka muru ki ngā makawe o tōna mātenga, ka kihi i ōna waewae, ka whakawahi ki te hinu kakara.
LUK 7:39 Nā, i te kitenga o te Parihi nāna rā ia i karanga, ka kōrero i roto i a ia, ka mea, “Me he poropiti tēnei, kua mātau ia ki te wahine e pā nei ki a ia, tōna pēheatanga; he wahine hara hoki.”
LUK 7:40 Nā, ka kōrero a Īhu, ka mea ki a ia, “E Haimona, he kupu tāku ki a koe.” Ka mea ia, “Kōrero, e te Kaiwhakaako.”
LUK 7:41 “Nā, tokorua ngā tāngata i a rāua te moni a tētahi kaituku moni; e rima rau ngā pene i tētahi, e rima tekau i tētahi.
LUK 7:42 I te kore ngā mea a rāua hei whakautu, whakarērea noatia ana e ia ki a rāua; tēnā, ko wai o rāua e tino nui tōna aroha ki a ia?”
LUK 7:43 Nā, ka whakahoki a Haimona, ka mea, “Ki tōku whakaaro, ko te tangata nāna te mea nui i whakarērea noatia atu.” Nā, ko tāna meatanga ki a ia, “Tika rawa tāu.”
LUK 7:44 Nā, ka tahuri ia ki te wahine, ka mea ki a Haimona, “E kite ana koe i tēnei wahine? I haere mai ahau ki roto ki tōu whare, kāhore i hōmai e koe he wai mō ōku waewae; nāna ia i whakamākūkū ōku waewae ki ōna roimata, ā, murua iho ki ngā makawe o tōna mātenga.
LUK 7:45 Kīhai koe i kihi i ahau; tēnā ko ia, mai o tōku taenga mai, kāhore anō i tāmutu te kihi i ōku waewae.
LUK 7:46 Kīhai koe i whakawahi i tōku mātenga ki te hinu; nāna ia ōku waewae i whakawahi ki te hinu.
LUK 7:47 Koia ahau ka mea nei ki a koe, kua murua ōna tini hara; he nui hoki tōna aroha; ko te tangata ia he iti ngā mea i murua ka iti anō tōna aroha.”
LUK 7:48 Ā, ka mea ia ki a ia, “Kua murua ōu hara.”
LUK 7:49 Nā, ka anga ōna hoa noho ka kōrero ki a rātou anō, “Ko wai tēnei, muru rawa hoki i ngā hara?”
LUK 7:50 Nā, ko tāna meatanga ki te wahine, “Nā tōu whakapono koe i ora ai; haere mārie.”
LUK 8:1 Ā muri tata iho ka hāereere anō ia ki ngā pā ki ngā kāinga, ka kauwhau, ka whakapuaki i te rongopai o te rangatiratanga o te Atua. I a ia hoki te tekau mā rua,
LUK 8:2 me ētahi wāhine kua oti nei te whakaora i ngā wairua kino, i ngā ngoikoretanga. Ko Meri (e huaina ana ko Makarini), e whitu nei ngā rēwera i puta mai i roto i a ia,
LUK 8:3 ko Hoana hoki, ko te wahine a Kūha, a te kaiwhakahauhau a Herora, me Huhana, me te tokomaha noa atu. Nā rātou i mahi ētahi o ā rātou taonga hei mea mā rātou.
LUK 8:4 Nā, ka rahi te hui i mine mai, ā, ka haere mai ki a ia o ia pā, o ia pā, ka kōrero kupu whakarite ia:
LUK 8:5 “I haere atu te kairui ki te rui i tāna purapura; ā, i a ia e rui ana, ka ngahoro ētahi ki te taha o te ara; ā, takahia ana ki raro, kainga ake e ngā manu o te rangi.
LUK 8:6 Ko ētahi i ngahoro ki runga ki te toka; ko te tupunga ake, kua maroke, kāhore hoki he mākūkū.
LUK 8:7 Ko ētahi i ngahoro ki roto ki ngā tātarāmoa; ā, tupu tahi ana ngā tātarāmoa, kōwaowaotia iho.
LUK 8:8 Ko ētahi i ngahoro ki te oneone pai; tupu ana, tātakirau ngā hua.” Ka mutu ēnei kōrero, ka karanga ia, “Ko ia he taringa ōna hei whakarongo, kia rongo ia.”
LUK 8:9 Nā, ka ui āna ākonga ki a ia, ka mea, “He aha te tikanga o tēnei kupu whakarite?”
LUK 8:10 Ka mea ia, “Kua hoatu ki a koutou te mātauranga ki ngā mea ngaro o te rangatiratanga o te Atua; ki ērā atu ia, he whakarite ngā kupu. ‘Kia kite ai rātou, ā, e kore e kite, kia rongo ai, ā, kore ake e mātau.’ ”
LUK 8:11 “Nā, tēnei te kupu whakarite: Ko te purapura ko te kupu a te Atua.
LUK 8:12 Ko ērā i te huarahi, ko ngā kaiwhakarongo; me i reira ka haere mai te rēwera, ka kapo i te kupu i roto i ō rātou ngākau, kei whakapono rātou, ā, ka ora.
LUK 8:13 Ko ērā i runga i te toka ko te hunga i tango i te kupu me te hari anō i tō rātou rongonga; otirā kāhore ō rātou pakiaka, ka whakapono mō te wā poto nei, ā, i te wā o te whakamātautau ka taka atu.
LUK 8:14 Ko tērā i ngahoro ki roto ki ngā tātarāmoa, ko te hunga e whakarongo ana, ā, ko te haerenga atu, ka kōwaowaotia e ngā mānukanuka, e ngā taonga, e ngā whakaahuareka o te ao, ā, hore ake e pakari ō rātou hua.
LUK 8:15 Ko tērā i te oneone pai, ko te hunga e tika ana, e pai ana te ngākau, i te rongonga i te kupu, ka pupuri, ā, hua ana ngā hua i runga i te manawanui.”
LUK 8:16 “E kore e tahuna te rama e tētahi, e hīpokina ki te oko, e waiho rānei i raro i te moenga; engari, ka whakatūria ki runga ki te tūranga, kia kitea ai te mārama e te hunga e tomo ana.
LUK 8:17 E kore hoki tētahi mea i huna, e mahue te whakakite; e kore anō tētahi mea i ngaro, e mahue te mōhio, te puta hoki ki te mārama.
LUK 8:18 Nā reira kia tūpato tā koutou whakarongo. Ki te whai mea hoki tētahi, ka hoatu anō ki a ia; ki te kāhore he mea a tētahi, ko te mea i mahara ai ia nāna ake, ka tangohia i a ia.”
LUK 8:19 Nā, ka haere mai ki a ia tōna whaea, me ōna tēina, otirā, kāhore rātou i āhei te tutuki mai ki a ia, i te pipiri o te tangata.
LUK 8:20 Nā, ka kōrerotia ki a ia, “Ko tōu whaea me ōu tēina te tū mai nei i waho, e mea ana kia kite i a koe.”
LUK 8:21 Otirā, ka whakahoki ia, ka mea ki a rātou, “Ko ēnei, e whakarongo nei, ā, e mahi nei i te kupu a te Atua, tōku whaea me ōku tēina.”
LUK 8:22 Nā, i tētahi o aua rā ka eke ia, rātou ko āna ākonga ki te kaipuke, ā, ka mea ia ki a rātou, “Tātou ka whakawhiti ki tāwāhi o te roto.” Nā, rere ana rātou.
LUK 8:23 Otirā, i a rātou e rere ana, ka moe ia. Nā, ko te putanga o tētahi hau, he tūpuhi, ki te roto; ā, ka tomo rātou, tata pū te totohu.
LUK 8:24 Nā, ka haere rātou, ka whakaara i a ia, ka mea, “E kara, e kara, ka mate tātou!” Nā, ka ara ia, ā, rīria ana e ia te hau, me te ngaru o te moana; ā, mutu iho, nā, kua marino.
LUK 8:25 Nā, ka mea ia ki a rātou, “Kei hea tō koutou whakapono?” Mataku ana rātou, mīharo ana, ka mea ki a rātou anō, “Ko wai rā tēnei, ka tapa nei ki ngā hau, ki te moana, ā, rongo rawa ki a ia?”
LUK 8:26 Nā, ka tae rātou ki te whenua o ngā Kararini, ki tāwāhi atu o Karirī.
LUK 8:27 Ā, nō tōna haerenga atu ki uta, ka tūtaki ki a ia he tangata nō te pā, he rēwera ōna, he roa kāhore anō i mau kākahu, kīhai anō i noho i roto i te whare, engari ki ngā urupā.
LUK 8:28 Ā, i tōna kitenga i a Īhu, ka karanga, ka takoto ki tōna aroaro, he nui tōna reo ki te mea, “He aha tāku ki a koe e Īhu, e te Tama a te Atua, a te Runga Rawa? Ē, kaua rā ahau e whakamamaetia.”
LUK 8:29 I mea hoki ia ki te wairua poke kia puta i taua tangata. He maha hoki ngā wā i hopukia ai ia e ia, e tiakina ana hoki ia, he mea here ki ngā mekameka, ki ngā here waewae; heoi, motumotuhia ana e ia ngā here, ā, āia ana ia e te rēwera ki te koraha.
LUK 8:30 Nā, ka ui a Īhu ki a ia, “Ko wai tōu ingoa?” Ka mea ia, “Ko Rihiona”; he tokomaha hoki ngā rēwera i tomo ki roto ki a ia.
LUK 8:31 Kātahi ka īnoi rātou ki a ia kia kaua rātou e tonoa e ia kia haere ki te hōhonu.
LUK 8:32 Nā, i reira tētahi kāhui poaka maha e kai ana i runga i te maunga; ā, ka īnoi rātou ki a ia kia tukua rātou kia tomo ki aua poaka. Ā, tukua ana rātou.
LUK 8:33 Ā, ko te putanga o aua rēwera i roto i te tangata, ka tomo ki roto ki ngā poaka, nā, ko te tino rerenga o te kāhui rā te pari ki te moana, ā, paremo iho.
LUK 8:34 Ā, nō ka kite ngā kaiwhāngai i taua mea i meatia, ka whati, ka haere ka kōrero ki te pā, ki aua whenua hoki.
LUK 8:35 Nā, ka haere rātou kia kite i taua mea i meatia, ā, i tō rātou taenga mai ki a Īhu, ka kite i te tangata i puta nei ngā rēwera i roto i a ia, kua oti te whakakākahu, kua tika ōna whakaaro, e noho ana i ngā waewae o Īhu, ā, ka mataku rātou.
LUK 8:36 Ā, kōrerotia ana ki a rātou e te hunga i kite, te whakaoranga o te tangata i ngā rēwera.
LUK 8:37 Nā, ka mea te huihui katoa o ngā kāinga pātata o ngā Kararini kia mawehe atu ia i a rātou, i mataku whakaharahara hoki rātou; ā, eke ana ia ki te kaipuke, hoki ana.
LUK 8:38 Otirā, ka īnoi ki a ia te tangata i puta rā ngā rēwera i roto i a ia, kia waiho ia hei hoa mōna. Heoi, ka tono atu a Īhu i a ia, ka mea,
LUK 8:39 “Hoki atu ki tōu whare, kōrerotia ngā mea nui kua meinga nei e te Atua ki a koe.” Nā, haere ana ia, kōrerotia ana ki te pā katoa ngā mea nui i mea ai a Īhu ki a ia.
LUK 8:40 Ā, i a Īhu i hoki ai, ka koa te mano, i te tatari katoa hoki rātou ki a ia.
LUK 8:41 Nā, ka haere mai tētahi tangata, ko Hairuha te ingoa, he rangatira nō te whare karakia. Ā, takoto ana ki ngā waewae o Īhu, ka īnoi ki a ia kia tomo ki tōna whare.
LUK 8:42 Kotahi tāna tamāhine, he huatahi kei te tekau mā rua ōna tau, nā, e whakahemohemo ana. Nā, i tōna haerenga atu, ka popō ngā mano ki a ia.
LUK 8:43 Nā, tērā tētahi wahine e mate ana i te pākaruhanga toto, tekau mā rua ngā tau, ā, poto katoa tōna oranga ki ngā rata, kīhai rawa i taea te whakaora e tētahi.
LUK 8:44 Ka haere ia i muri i a ia, ka pā ki te tāniko o tōna kākahu; ā, mutu iho te rere o ōna toto.
LUK 8:45 Nā, ka mea a Īhu, “Ko wai tēnei kua pā nei ki ahau?” Ā, nō ka whakakāhore katoa, ka mea a Pita rātou ko ōna hoa, “E kara, e pipiri ana ngā mano ki a koe, e tutetute ana.”
LUK 8:46 Otirā, i mea a Īhu, “Ehara, kua pā tētahi ki ahau; e mōhio ana ahau, kua puta atu he mana i ahau.”
LUK 8:47 Ā, nō te kitenga o te wahine kīhai ia i ngaro, haere wiri ana, takoto ana i tōna aroaro, kōrerotia ana e ia ki a ia i te aroaro o te iwi katoa te take i pā ai ia ki a ia, me te hohoro o tōna oranga.
LUK 8:48 Nā, ka mea ia ki a ia, “E kō, nā tōu whakapono koe i ora ai; haere mārie.”
LUK 8:49 I a ia anō e kōrero ana, ka haere mai tētahi i te whare o te rangatira o te whare karakia, ka mea ki a ia, “Kua mate tāu tamāhine; kaua e whakararuraru i te Kaiwhakaako.”
LUK 8:50 Otiia, i te rongonga o Īhu, ka whakahoki ki a ia, ka mea, “Kaua e mataku; ko te whakapono ia kia whakapono, ā, ka ora ia.”
LUK 8:51 Ā, i tōna tomokanga ki te whare, kīhai tētahi i tukua e ia kia tapoko, ko Pita anake, ko Hēmi, ko Hoani, me te pāpā rāua ko te whaea o te kōtiro.
LUK 8:52 E tangi ana rātou katoa, e auē ana mōna. Nā, ka mea ia, “Kaua e tangi; kāhore ia i mate, engari e moe ana.”
LUK 8:53 Ā, kataina iho ia e rātou, i mōhio hoki rātou kua mate ia.
LUK 8:54 Otirā, ka mau ia ki tōna ringa, ka karanga, ka mea, “E kō, e ara.”
LUK 8:55 Nā, hoki mai ana tōna wairua, ā, whakatika tonu ake ia. Nā, ka whakahautia e ia kia hoatu he kai māna.
LUK 8:56 Ā, mīharo tonu ōna mātua; nā, ka whakatūpato ia i a rātou kia kaua e kōrerotia taua meatanga ki tētahi.
LUK 9:1 Nā, ka karangatia e ia te tekau mā rua, ka hoatu ki a rātou he kaha, he mana, e peia ai ngā rēwera katoa, e ora ai ngā mate.
LUK 9:2 Ā, tonoa ana rātou e ia ki te kauwhau i te rangatiratanga o te Atua, ki te whakaora hoki i te hunga e mate ana.
LUK 9:3 I mea anō ia ki a rātou, “Kaua tētahi mea e mauria ki te ara, kaua he tokotoko, kaua he pūtea, kaua he taro, kaua he moni; kaua anō e takiruatia he koti.
LUK 9:4 Ā, ka tomo koutou ki tētahi whare, hei reira noho ai, ā, haere noa i reira.
LUK 9:5 Ā, ki te kāhore ētahi e manako ki a koutou, ina haere atu koutou i taua pā, ruia atu te puehu o ō koutou waewae, hei mea whakaatu ki a rātou.”
LUK 9:6 Nā, ko tō rātou mawehetanga atu, ka hāereerea e rātou ngā kāinga, me te kauwhau i te rongopai, me te whakaora i ngā wāhi katoa.
LUK 9:7 Ā, ka rongo a Herora tetaraki i ngā mea katoa i meinga e ia; ā, he nui tōna pororaru, nō te mea ki tā ētahi kī, kua ara mai a Hoani i te hunga mate.
LUK 9:8 Ki tā ētahi, kua puta mai a Irāia; ki tā ētahi, kua ara mai tētahi o ngā poropiti onamata.
LUK 9:9 Nā, ka mea a Herora, “I pōutoa e ahau te mātenga o Hoani; ko wai hoki tēnei mōna nei ēnei kōrero ka rangona nei e ahau?” Ā, ka whai ia kia kite i a ia.
LUK 9:10 Ā, nō te hokinga mai o ngā āpōtoro, ka kōrerotia ki a ia ngā mea katoa i mea ai rātou. Ā, ka tango ia i a rātou, ka haere ko rātou anake ki tētahi pā, ko Petahaira te ingoa.
LUK 9:11 Otirā, i te kitenga o ngā mano, ka aru i a ia; ā, ka manaaki ia i a rātou, ka kōrerotia ki a rātou te rangatiratanga o te Atua, whakaorangia ana hoki e ia te hunga e mea ana kia rongoātia.
LUK 9:12 Nā, kua tītaha haere te rā; ā, ka haere mai te tekau mā rua, ka mea ki a ia, “Tonoa te mano, kia haere ai ki ngā kāinga, ki ngā whenua i tētahi taha, i tētahi taha, moe ai, ki te mea kai hoki mā rātou; he wāhi koraha hoki tēnei i a tātou nei.”
LUK 9:13 Ā, ka mea ia ki a rātou, “Mā koutou e hoatu he kai mā rātou.” Ka mea rātou, “Heoi anō a mātou e rima ngā taro, e rua ngā ika; ki te kāhore anō ia mātou e haere ki te hoko kai mā tēnei iwi katoa.”
LUK 9:14 (Me te mea anō, e rima mano ngā tāne.) Ka mea ia ki āna ākonga, “Meinga rātou kia noho, kia rima tekau ki te nohoanga.”
LUK 9:15 Ā, pērā ana rātou, meinga katoatia ana kia noho.
LUK 9:16 Nā, ka mau ia ki ngā taro e rima, ki ngā ika e rua, ka titiro ake ki te rangi, ka whakapai i aua mea, ka whawhati, ka hoatu ki ngā ākonga kia whakatakotoria atu mā te mano.
LUK 9:17 Nā, ka kai rātou, ka mākona katoa; ā, kotahi tekau mā rua ngā kete i kohia ake e rātou, he toenga nā rātou nō ngā whatiwhatinga.
LUK 9:18 Ā, i a ia e īnoi ana ko ia anake, i a ia anō āna ākonga; nā, ka ui ia ki a rātou, ka mea, “Ko wai ahau ki te kī a te mano?”
LUK 9:19 Nā, ka whakahoki rātou, ka mea, “Ko Hoani Kaiiriiri, ki tā ētahi ia; ko Irāia, ki tā ētahi; kua ara mai tētahi o ngā poropiti onamata.”
LUK 9:20 Nā, ka mea ia ki a rātou, “Ki tā koutou nā kī, ko wai ahau?” Ka whakahoki a Pita, ka mea, “Ko te Karaiti a te Atua.”
LUK 9:21 Kātahi ia ka whakatūpato i a rātou, ka mea, “Kia kaua tēnei e kōrerotia ki te tangata.”
LUK 9:22 I mea anō ia, “Kua takoto te tikanga kia maha ngā mamae o te Tama a te tangata, kia whakakāhoretia anō ia e ngā kaumātua, e ngā tohunga nui, e ngā karaipi, kia whakamatea, ā, i te toru o ngā rā ka whakaarahia.”
LUK 9:23 I mea anō ia ki a rātou katoa, “Ki te mea tētahi kia haere mai i muri i ahau, me whakakāhore ia e ia anō, me amo tōna rīpeka i ngā rā katoa, ka aru ai i ahau.
LUK 9:24 Ki te whai hoki tētahi kia ora, ka mate ia; otirā, ki te mate tētahi, mōna i whakaaro ki ahau, ka ora ia.
LUK 9:25 He aha oti te pai ki te tangata, ki te riro i a ia te ao katoa, ā, ka ngaro ko ia anō, ka riro rānei i te hē?
LUK 9:26 Ki te whakamā hoki tētahi ki ahau, ā, ki āku kōrero, ka whakamā anō te Tama a te tangata ki a ia, ina haere mai ia i runga i tōna ake korōria, i te korōria hoki o te Matua, o ngā anahera tapu.
LUK 9:27 Nā, he pono tāku kōrero ki a koutou, tēnei anō ētahi o te hunga e tū nei e kore e pāngia e te mate, kia kite rā anō i te rangatiratanga o te Atua.”
LUK 9:28 Ā, ka tata ki te waru o ngā rā i muri i ēnei kōrero, ka mau ia ki a Pita, ki a Hoani, ki a Hēmi, ka haere ki runga ki te maunga ki te īnoi.
LUK 9:29 Ā, i a ia e īnoi ana, ka puta kē te āhua o tōna mata, mā tonu tōna kākahu, kanapa tonu.
LUK 9:30 Nā, tokorua ngā tāngata e kōrero tahi ana me ia, ko Mohi rāua ko Irāia,
LUK 9:31 i puta korōria mai, i kōrero anō ki tōna matenga meāke nei rite i a ia ki Hiruhārama.
LUK 9:32 I pēhia hoki a Pita rātou ko ōna hoa e te moe; ā, i tō rātou aranga ake, ka kite i tōna korōria, me ngā tāngata tokorua e tū tahi ana me ia.
LUK 9:33 Ā, i a rāua e mawehe atu ana i a ia, ka mea a Pita ki a Īhu, “E kara, he pai kia noho tātou i konei; nā, kia hangā e mātou ētahi wharau kia toru; kia kotahi mōu, kia kotahi mō Mohi, kia kotahi mō Irāia.” (Kīhai ia i mōhio ki tāna i kōrero ai.)
LUK 9:34 Ā, i a ia e kōrero ana i ēnei mea, ka puta he kapua, ā, taumaru iho ana ki a rātou; ā, mataku ana rātou i tō rātou haerenga ki roto ki te kapua.
LUK 9:35 Nā, ka puta mai he reo i te kapua e mea ana, “Ko tāku Tama tēnei, ko tāku i whiriwhiri ai; whakarongo ki a ia!”
LUK 9:36 Ā, nō te putanga o te reo, ko Īhu anake i kitea. Ā, whakarongo puku ana rātou, kīhai hoki i kōrerotia e rātou ki te tangata i aua rā tētahi o ngā mea i kite ai rātou.
LUK 9:37 Nā, i te aonga ake o te rā, i a rātou kua tatū iho i runga i te maunga, he rahi te hui i tūtaki ki a ia.
LUK 9:38 Nā, ka karanga tētahi tangata i roto i te mano, ka mea, “Tēnā koa, e te Kaiwhakaako, titiro mai ki tāku tama; ko ia anake hoki tāku.
LUK 9:39 Nā, ka hopu te wairua i a ia, inamata ka hāmama. Nā, ka haehae i a ia, tutū ana te huka i a ia. Whakauaua ana te whakarere i a ia, ā, marū iho ia.
LUK 9:40 Ā, i te īnoi ahau ki āu ākonga kia peia ia ki waho; heoi, kīhai i taea e rātou.”
LUK 9:41 Nā, ka whakahoki a Īhu, ka mea, “E te uri whakapono kore, parori kē, kia pēhea te roa o tōku noho ki a koutou, o tōku manawanui ki a koutou? Kawea mai tāu tama ki konei.”
LUK 9:42 Nā, i a ia e haere mai ana, ka tāia iho ia e te rēwera, haehaea iho. Nā, ka rīria te wairua poke e Īhu, ā, whakaorangia ana te tamaiti, hoatu ana ki tōna pāpā.
LUK 9:43 Oho mauri katoa ana rātou ki te nui o te Atua. Ā, i a rātou e mīharo ana ki ngā mea katoa i meinga e Īhu, ka mea ia ki āna ākonga,
LUK 9:44 “Rongoātia ēnei kōrero ki roto ki ō koutou taringa; meāke hoki tukua te Tama a te tangata ki ngā ringa o ngā tāngata.”
LUK 9:45 Otirā, kīhai rātou i mōhio ki tēnei kupu, he mea huna hoki i a rātou, kei kite rātou; i mataku hoki rātou ki te ui ki a ia i taua kupu.
LUK 9:46 Nā, ka puta ake he kōrerorero i roto i a rātou, ko wai o rātou te mea nui rawa.
LUK 9:47 Otirā, i te kitenga o Īhu i te whakaaroaronga a ō rātou ngākau, ka mau ia ki tētahi tamaiti nohinohi, ā, whakatūria ana ki tōna taha,
LUK 9:48 ka mea ki a rātou, “Ki te manako tētahi ki tēnei tamaiti, nā te whakaaro hoki ki tōku ingoa, e manako ana ia ki ahau. Ki te manako hoki tētahi ki ahau, e manako ana ia ki tōku kaitono mai. Nā, ko te iti rawa i roto i a koutou katoa ko ia hei mea nui.”
LUK 9:49 Nā, ka whakahoki a Hoani, ka mea, “E kara, i kite mātou i tētahi e pei rēwera ana i runga i tōu ingoa; ā, rīria iho e mātou, mōna kāhore e haere tahi tātou.”
LUK 9:50 Otirā, i mea a Īhu ki a ia, “Kaua e rīria; ki te mea hoki ehara tētahi i te hoa whawhai nō koutou, nō koutou ia.”
LUK 9:51 Ā, nō ka tata ngā rā mō tōna tangohanga ki runga, ka whakamau tōna kanohi ki te haere ki Hiruhārama,
LUK 9:52 Ā, ka tonoa atu e ia he karere i mua i tōna aroaro; ā, ka haere rātou, ka tomo ki tētahi kāinga o ngā Hamari ki te mea tukunga iho mōna.
LUK 9:53 Heoi, kīhai ērā i manako ki a ia, ko te āhua hoki o tōna kanohi me te mea e haere ana ia ki Hiruhārama.
LUK 9:54 Ā, nō te kitenga o āna ākonga, o Hēmi rāua ko Hoani, ka mea rāua, “E te Ariki, e pai ana rānei koe kia kōrerotia e māua he kāpura kia heke iho i te rangi, hei whakangaro i a rātou?”
LUK 9:55 Otirā, ka tahuri ia, ka rīria rāua, “Kāhore kōrua e mātau nō tēhea wairua kōrua.
LUK 9:56 Kīhai hoki te Tama a te tangata i haere mai ki te whakamate tangata, engari ki te whakaora.” Nā, haere ana rātou he kāinga kē.
LUK 9:57 Ā, i a rātou e haere ana i te ara, ka mea tētahi tangata ki a ia, “Ka aru ahau i a koe ki ngā wāhi katoa e haere ai koe.”
LUK 9:58 Nā, ko te meatanga a Īhu ki a ia, “He rua o ngā pokiha, he kōhanga o ngā manu o te rangi; tēnā ko te Tama a te tangata hore ōna wāhi e takoto ai tōna mātenga.”
LUK 9:59 Ka mea ia ki tētahi atu, “Arumia mai ahau.” Ā, ka mea ia, “E te Ariki, tukua ahau kia mātua haere ki te tanu i tōku pāpā.”
LUK 9:60 Nā, ka mea a Īhu ki a ia, “Waiho mā ngā tūpāpaku e tanu ō rātou nā tūpāpaku. Ko koe ia me haere ki te kauwhau i te rangatiratanga o te Atua.”
LUK 9:61 Ka mea hoki tētahi atu, “E te Ariki, ka aru ahau i a koe; otirā, tukua ahau kia mātua poroporoaki ki te hunga i tōku whare.”
LUK 9:62 Otirā, ka mea a Īhu ki a ia, “Ki te pā te ringa o tētahi ki te parau, ā, ka titiro ki muri, e kore ia e tau mō te rangatiratanga o te Atua.”
LUK 10:1 Nā, i muri i ēnei mea ka whakaritea e te Ariki ētahi atu e whitu tekau, ā, tonoa ana rātou takirua, takirua, i mua i a ia ki ngā pā katoa, ki ngā wāhi meāke nei ia haere ki reira.
LUK 10:2 I mea anō ia ki a rātou, “He nui te kotinga, ko ngā kaimahi ia he ruarua; nā, īnoi atu ki te Ariki nāna te kotinga, kia tonoa e ia he kaimahi ki tāna kotinga.
LUK 10:3 Haere! Nanā, ka tonoa nei koutou e ahau, ānō he reme ki waenganui o ngā wuruhi.
LUK 10:4 Kaua e mauria he takotoranga moni, kaua he pūtea, kaua he hū; kaua anō e oha atu ki tētahi i te huarahi.
LUK 10:5 “Ki te tomo koutou ki tētahi whare, mātua mea atu, ‘Kia tau te rangimārie ki tēnei whare.’
LUK 10:6 Ā, ki te mea kei reira te tama a te rangimārie, ka tau tā koutou rangimārie ki a ia; ki te kāhore, e hoki anō ki a koutou.
LUK 10:7 Nā, hei taua whare koutou noho ai, kai ai, inu ai i tā rātou e hōmai ai; ka tika hoki te utu mō te kaimahi. Kaua e hāereere i tēnei whare ki tērā whare.
LUK 10:8 “Ka tomo koutou ki tētahi pā, ā, ka manako rātou ki a koutou, kainga ngā mea e whakatakotoria ana mā koutou.
LUK 10:9 Me whakaora te hunga mate o reira, ka mea ki a rātou, ‘Kua tata ki a koutou te rangatiratanga o te Atua.’
LUK 10:10 Tēnā, ki te tomo koutou ki tētahi pā, ā, e kore rātou e manako ki a koutou, me haere atu ki ngā huarahi o reira, me kī atu,
LUK 10:11 ‘Nā, ko te puehu o tō koutou pā e piri nei ki a mātou, tēnei ka tahia atu nei e mātou ki a koutou; otirā, kia mōhio koutou ki tēnei, kua tata ki a koutou te rangatiratanga o te Atua.’
LUK 10:12 Ko tāku kupu tēnei ki a koutou, engari tō Horoma i taua rā e māmā i tō taua pā.”
LUK 10:13 “Auē te mate mōu, e Korahina! Auē te mate mōu, e Petahaira! Me i meatia hoki ki Tāira, ki Hairona ngā merekara kua meatia nei ki a kōrua, kua rīpenetā kē rāua, he taratara hoki te kākahu, me te noho i roto i te pungarehu.
LUK 10:14 Otirā, erangi tō Tāira, tō Hairona i te whakawā e māmā i tō kōrua.
LUK 10:15 Ā, ko koe, e Kaperenauma, tērā koe e ikeike, ā tae noa ki te rangi? Ka whakatakā koe ki te rēinga.
LUK 10:16 “Ki te whakarongo tētahi ki a koutou, e whakarongo ana ia ki ahau; ki te whakakāhore tētahi ki a koutou, e whakakāhore ana ia ki ahau; ki te whakakāhore tētahi ki ahau, e whakakāhore ana ki tōku kaitono mai.”
LUK 10:17 Nā, hoki hari ana te whitu tekau, ka mea, “E te Ariki, rongo tonu ngā rēwera nei ki a mātou, he mea nā tōu ingoa!”
LUK 10:18 Ka mea ia ki a rātou, “I kite ahau i a Hātana, me te mea he uira te takanga i te rangi.
LUK 10:19 Nā, ka hoatu nei e ahau ki a koutou he mana e takahi ai koutou i runga i ngā nākahi, i ngā kopiona, i te kaha katoa anō o te hoa whawhai; ā, e kore rawa koutou e mate i tētahi mea.
LUK 10:20 Otirā, kaua e hari ki tēnei, ki ngā wairua ka riro nei ki raro i a koutou; ko tā koutou ia e tino hari ai, ko ō koutou ingoa kua oti te tuhituhi ki te rangi!”
LUK 10:21 I taua wā anō ka hari ia i te Wairua Tapu, ka mea, “Ka whakawhetai ahau ki a koe, e Pā, e te Ariki o te rangi, o te whenua, kua huna nei hoki e koe ēnei mea i te hunga mātau, i te hunga mahara, ā, whakakitea ana ki ngā kōhungahunga; āe rā, e Pā, i pai hoki te pēnei ki tāu titiro.
LUK 10:22 “Kua oti ngā mea katoa te tuku ki ahau e tōku Matua; e kore anō tētahi e mātau ki te Tama ko wai ia, ko te Matua anake; ko wai rānei te Matua, ko te Tama anake, me te tangata anō hoki e pai ai te Tama kia whakakitea ia.”
LUK 10:23 Nā, ka tahuri ia ki ngā ākonga, ka mea puku atu, “Ka hari ngā kanohi e kite ana i ngā mea e kite nei koutou!
LUK 10:24 Ko tāku kupu hoki tēnei ki a koutou, he tokomaha ngā poropiti me ngā kīngi i hiahia kia kite i ngā mea e kite nei koutou, ā, kāhore i kite; kia rongo anō i ngā mea e rongo nei koutou, ā, kāhore i rongo.”
LUK 10:25 Nā, ka whakatika tētahi kaiwhakaako o te ture, ka whakamātautau i a ia, ka mea, “E te Kaiwhakaako, me aha ahau ka whiwhi ai ki te ora tonu?”
LUK 10:26 Ka mea ia ki a ia, “He aha te mea i tuhituhia ki te ture? Ka pēhea tāu kōrero?”
LUK 10:27 Nā, ka whakahoki ia, ka mea, “ ‘Kia whakapaua tōu ngākau, tōu wairua, tōu kaha, tōu hinengaro, ki te aroha ki te Ariki, ki tōu Atua; me aroha hoki ki tōu hoa tata ānō ko koe.’ ”
LUK 10:28 Ka mea ia ki a ia, “Ka tika tāu kōrero; meinga tēnei, ā, ka ora koe.”
LUK 10:29 Otirā, ka mea ia ki te whakatika i a ia, ka kī atu ki a Īhu, “Ko wai rā tōku hoa tata?”
LUK 10:30 Nā, ka whakahoki a Īhu, ka mea, “E haere iho ana tētahi tangata i Hiruhārama ki Heriko, ā, ka tūtaki ki ngā kaipāhua, nā, ka huia ōna e rātou, ka tukitukia ia, ā, haere ana, whakarērea iho ia, me te mea kua mate.
LUK 10:31 Nā, ko tētahi tohunga e haere noa ana i taua ara, ā, i tōna kitenga i a ia, ninihi kē ana nā tahaki.
LUK 10:32 I pēnā hoki tētahi Rīwaiti, tae kau ki taua wāhi, ka haere, ka titiro, ninihi kē ana nā tahaki.
LUK 10:33 Otirā, ko tētahi Hamari e haere ana ki ngā whenua, i te taenga ki a ia, ka kite i a ia, ka aroha.
LUK 10:34 Nā, ka haere, ka takai i ōna patunga, ringihia iho ki te hinu, ki te wāina, ka whakanoho i a ia ki tōna ake kararehe, ā, kawea ana ia ki te whare tira, atawhaitia ana ia.
LUK 10:35 I te aonga ake, i tōna haerenga, ka tangohia e ia e rua ngā pene, hoatu ana ki te tangata i te whare, ka mea ki a ia, ‘Māu ia e tiaki; ā, ki te maha atu āu mea e pau, māku koe e utu ina hoki mai ahau.’
LUK 10:36 “Nā, ki tōu whakaaro, ko wai o tēnei tokotoru te hoa ōna i tūtaki nei ki ngā kaipāhua?”
LUK 10:37 Ka mea ia, “Ko tērā i atawhaitia ai ia.” Nā, ka mea a Īhu ki a ia, “Haere, kia pērā anō tāu mahi.”
LUK 10:38 Ā, i tō rātou haerenga atu, ka tomo ia ki tētahi kāinga, nā, ko tētahi wahine ko Māta te ingoa, i whakamanuhiri i a ia ki tōna whare.
LUK 10:39 He teina anō tōna, ko Meri te ingoa. Nā, ka noho tēnei ki ngā waewae o Īhu, whakarongo ai ki tāna kupu.
LUK 10:40 Nā, raruraru noa iho a Māta i te nui o te mahi tuari, ā, haere ana, ka mea, “E te Ariki, he mea noa oti ki a koe kia waiho e tōku teina māku anake te tuari? Nā, kōrero atu kia haere mai ia hei hoa mōku.”
LUK 10:41 Ka whakahoki te Ariki, ka mea ki a ia, “E Māta, e Māta, e mānukanuka ana koe, e raruraru ana ki ngā mea maha.
LUK 10:42 Kotahi ia te mea e matea ana; ā, kua whiriwhiria e Meri tēnā wāhi pai, e kore nei e tangohia i a ia.”
LUK 11:1 Ā, i a ia e īnoi ana i tētahi wāhi, ā, ka mutu, ka kī atu tētahi o āna ākonga ki a ia, “E te Ariki, whakaakona mātou ki te īnoi, me Hoani hoki i whakaako rā i āna ākonga.”
LUK 11:2 Ka mea ia ki a rātou, “Ka īnoi koutou, mea atu: ‘E tō mātou Matua i te rangi, kia tapu tōu ingoa. Kia tae mai tōu rangatiratanga, kia meatia tāu e pai ai ki runga ki te whenua, kia rite anō ki tō te rangi.
LUK 11:3 Hōmai tā mātou taro ki a mātou, tō tēnei rā, tō tēnei rā.
LUK 11:4 Murua ō mātou hara; e murua ana hoki e mātou o ngā tāngata katoa e hara ana ki a mātou. Aua hoki mātou e kawea kia whakawaia.’ ”
LUK 11:5 I mea anō ia ki a rātou, “Ko wai o koutou ki te mea he hoa tōna, ā, ka tae atu ki a ia i waenganui pō, ka mea ki a ia, ‘E hoa, hōmai ki ahau ētahi taro, kia toru.
LUK 11:6 Kua tae mai hoki tōku hoa ki ahau i te ara, kāhore āku mea e whakatakoto ai ahau māna.’
LUK 11:7 “Ā, ka whakahoki tērā i roto, ka mea, ‘Hōhā kī! Kāti rā; kua tūtakina noatia ake te tatau, kei te moenga mātou ko āku tamariki; e kore e āhei kia whakatika atu ahau ki te hoatu ki a koe.’
LUK 11:8 Ko tāku kupu tēnei ki a koutou, ahakoa kāhore ia i whakatika ki te hoatu ki a ia, nō te mea he hoa nōna, mā tāna tohe anō ka ara ake ai ia, ka hoatu ai ki a ia i ngā mea i tonoa e ia.
LUK 11:9 “Ko tāku kupu anō tēnei ki a koutou; īnoi, ā, ka hoatu ki a koutou; e rapu, ā, ka kite koutou; pātukia, ā, ka uakina ki a koutou.
LUK 11:10 Ka whiwhi hoki ngā tāngata katoa ina īnoi; ka kite ina rapu; ka uakina ki te tangata e pātuki ana.
LUK 11:11 “Ko tēhea matua o koutou ki te īnoia e tāna tama tētahi taro, e hoatu rānei ki a ia he kāmaka? Ki te īnoia he ika, e hoatu rānei ki a ia he nākahi hei ika?
LUK 11:12 Ki te īnoia he hua manu, e hoatu rānei ki a ia he kopiona?
LUK 11:13 Ki te mea ko koutou, hunga kino nei, e mātau ana ki te hoatu mea papai ki ā koutou tamariki; tērā noa ake te hōmaitanga o te Wairua Tapu e tō koutou Matua i te rangi ki te hunga e īnoi ana ki a ia.”
LUK 11:14 Nā, e pei rēwera ana ia, he mea wahangū anō hoki. Ā, nō te putanga o te rēwera ki waho, ka kōrero te wahangū; ā, mīharo ana te mano.
LUK 11:15 Nā, ka mea ētahi o rātou, “Nā te rangatira o ngā rēwera, nā Perehepura, tāna peinga rēwera.”
LUK 11:16 Nā, ka whakamātautau ētahi, ka mea ki tētahi tohu i a ia i te rangi.
LUK 11:17 Otiia, i mātau ia ki ō rātou whakaaro, ā, ka mea ki a rātou, “Ki te tahuri iho tētahi rangatiratanga ki a ia anō, ka kore; ki te tahuri hoki tētahi whare ki tētahi whare, ka hinga.
LUK 11:18 Ā, ki te tahuri iho a Hātana ki a ia anō, me pēhea e tū ai tōna rangatiratanga? E mea nā hoki koutou, nā Perehepura tāku peinga rēwera.
LUK 11:19 Nā, ki te mea nā Perehepura tāku peinga rēwera, nā wai te peinga a ā koutou tama? Mō konei hei kaiwhakawā rātou mō koutou.
LUK 11:20 Tēnā ki te mea nā te ringa o te Atua tāku peinga rēwera, inā, kua tae mai te rangatiratanga o te Atua ki a koutou.
LUK 11:21 “Ki te tiakina e te tangata kaha, he patu nei āna, tōna whare, ka āta takoto āna taonga.
LUK 11:22 Ki te puta mai ia te mea e kaha atu ana i a ia, ā, ka hinga tērā, nā, ka tangohia āna patu i whakamanawa ai ia, ka tuwhatuwhaia ōna taonga.
LUK 11:23 “Ko te tangata ehara i te hoa nōku, he hoariri ia ki ahau, ko te tangata kāhore e kohikohi tahi māua, e tītaritari ana.”
LUK 11:24 “Ka puta te wairua poke i roto i te tangata, ka hāereere ia rā ngā wāhi waikore rapu okiokinga ai; ā, kāhore e kitea, ka mea ia, ‘Ka hoki ahau ki tōku whare i puta mai ai ahau.’
LUK 11:25 Ā, nō te taenga atu, rokohanga atu kua oti te tahitahi, te whakapaipai.
LUK 11:26 Nā, ka haere ia, ka tango i ētahi atu wairua tokowhitu, he kino atu i a ia; ā, ka tomo atu, ka noho i reira; ā, kino atu i te tīmatanga te whakamutunga o taua tangata.”
LUK 11:27 Ā, i a ia e kōrero ana i ēnei mea, ka karanga ake tētahi wahine i roto i te mano, ka mea ki a ia, “Koa tonu te kōpū i kawea ai koe, me ngā ū i ngotea e koe.”
LUK 11:28 Anō rā hoki ko ia, “Engari rā, tino koa te hunga e whakarongo ana ki te kupu a te Atua, ā, e mahi ana.”
LUK 11:29 Ā, nō ka rūpeke te mano, ka anga ia ka kōrero, “He whakatupuranga kino tēnei; e rapu ana ki tētahi tohu, ā, e kore tētahi tohu e hoatu, ko te tohu anake o Hona poropiti.
LUK 11:30 I waiho nei hoki a Hona hei tohu ki ngā tāngata o Ninewe, ka pērā anō te Tama a te tangata ki tēnei whakatupuranga.
LUK 11:31 Ka whakatika ngātahi te kuīni o te tonga i te whakawākanga me ngā tāngata o tēnei whakatupuranga, ka whakatau i te hē ki a rātou; i haere hoki ia i ngā pito o te whenua ki te whakarongo ki te whakaaro nui o Horomona; ā, tēnei tētahi he nui kē atu i a Horomona.
LUK 11:32 Ka whakatika ngātahi ngā tāngata o Ninewe i te whakawākanga me tēnei whakatupuranga, ka whakatau i te hē ki a rātou, i rīpenetā hoki rātou i te kauwhautanga a Hona; ā, tēnei tētahi he nui kē atu i a Hona!”
LUK 11:33 “Ka tahuna te rama, e kore e waiho e te tangata ki te wāhi ngaro, ki raro rānei i te pūhera, engari ki runga ki te tūranga, kia kitea ai te mārama e te hunga e tomo atu ana.
LUK 11:34 Ko te kanohi te rama o te tinana. Nā, ki te ātea tōu kanohi, ka mārama anō tōu tinana katoa; tēnā ki te kino, ka pōuri anō hoki tōu tinana.
LUK 11:35 Nā reira, kia āta titiro mehemea ehara i te pōuri te mārama i roto i a koe.
LUK 11:36 Nā, ki te mārama tōu tinana katoa, ā, ki te kore ōna wāhi pōuri, ka mārama katoa anō, me te mea ko te mura o te rama e whakamārama ana i a koe.”
LUK 11:37 Nā, i a ia e kōrero ana, ka tono tētahi Parihi kia kai ia ki a ia; ā, haere ana ia ki roto, ka noho.
LUK 11:38 Ā, i te kitenga o te Parihi, ka mīharo nō te mea kāhore ia e horoi i mua o te kainga.
LUK 11:39 Ka mea te Ariki ki a ia, “Tēnei koutou, e ngā Parihi, te horoi nei i waho o te kapu, o te rīhi; ko roto ia o koutou e kī ana i te pāhua, i te kino.
LUK 11:40 E te hunga kūware, kīhai ianei i hangā a roto e te kaihanga o waho?
LUK 11:41 Engari, hoatu ngā mea o roto hei atawhainga mō ngā rawakore; ā, ka mā ngā mea katoa ki a koutou.
LUK 11:42 “Otirā, auē, te mate mō koutou, e ngā Parihi! E hoatu ana hoki e koutou te wāhi whakatekau, o te miniti, o te rū, o ngā otaota katoa, ā, kapea ake te whakarite whakawā me te aroha ki te Atua; he tika anō ko ēnei kia meatia kia kaua anō hoki ērā e kapea.
LUK 11:43 “Auē te mate mō koutou, e ngā Parihi! Ko tā koutou hoki e rawe ai ko ngā nohoanga rangatira i ngā whare karakia, me ngā ohatanga i ngā kāinga hokohoko.
LUK 11:44 “Auē te mate mō koutou, e ngā karaipi, e ngā Parihi, e te hunga tinihanga! E rite nā koutou ki ngā urupā ngaro, e kore e kitea e ngā tāngata e hāereere ana i runga.”
LUK 11:45 Nā, ka whakahoki tētahi o ngā kaiwhakaako o te ture, ka mea ki a ia, “E te Kaiwhakaako, he whakahē anō hoki mō mātou ēnei kōrero āu.”
LUK 11:46 Nā, ko tāna meatanga, “Auē te mate mō koutou hoki, e ngā kaiwhakaako o te ture! E whakawaha ana hoki koutou i ngā tāngata ki ngā kawenga taimaha rawa hei pīkaunga, ā, e kore tētahi o ō koutou matihao e pā atu ki aua kawenga.
LUK 11:47 “Auē te mate mō koutou! Ko koutou nei hoki hei hanga i ngā urupā o ngā poropiti, nā ō koutou mātua hoki rātou i whakamate.
LUK 11:48 Nā, he kaiwhakaatu koutou he kaiwhakaae ki ngā mahi a ō koutou mātua; nā rātou hoki rātou i whakamate, ko koutou hoki hei hanga i ō rātou urupā.
LUK 11:49 Nā konei anō te mātauranga o te Atua i mea ai, ‘Māku e tono he poropiti, he āpōtoro ki a rātou, ā, ka whakamate, ka tūkino rātou i ētahi o rātou.’
LUK 11:50 Kia rapua ai he utu i tēnei whakapaparanga mō te toto o ngā poropiti katoa i ringihia nei nō te tīmatanga rā anō o te ao;
LUK 11:51 nō te toto o Āpera, tae noa ki te toto o Hakaraia i mate nei ki waenganui o te āta o te wāhi tapu, āe rā, ka mea atu ahau ki a koutou, E rapua he utu i tēnei whakapaparanga.
LUK 11:52 “Auē te mate mō koutou, e ngā kaiwhakaako o te ture! Kua tangohia hoki e koutou te kī o te mātauranga; kīhai koutou i tomo ki roto, ā, i ārai hoki koutou i te hunga e tomo ana.”
LUK 11:53 Nā, i tōna putanga mai ki waho, ā, ka tīmata te tohetohe kaha a ngā karaipi, a ngā Parihi ki a ia, he mea kia maha atu ai āna kōrero
LUK 11:54 e whakamoho ana hoki, kia mau tētahi kupu a tōna māngai.
LUK 12:1 Nā, kei te huihui anō tērā ngā mano, tōna tini, nō ka takatakahi i a rātou anō, ā, ka anga ia ka kōrero i te tuatahi tonu ki āna ākonga, ka mea, “Kia tūpato i te rēwena o ngā Parihi; arā i te tinihanga.
LUK 12:2 Kāhore hoki he mea i hīpokina e mahue te hura; kāhore hoki tētahi mea ngaro e mahue te mōhio.
LUK 12:3 Mō konei ko tā koutou e kōrero ai i te pōuri, ka rangona i te mārama. Ko tā koutou e kī ai ki te taringa i ngā rūma i roto rawa, ka kauwhautia i runga o ngā whare.”
LUK 12:4 “Nā, ko tāku kupu tēnei ki a koutou, e ōku hoa, kaua e wehi ki te hunga e whakamate nei i te tinana, ā muri iho kāhore he mea e taea e rātou.
LUK 12:5 Engari māku e whakaatu ki a koutou tā koutou e wehi ai. E wehi ki a ia kei a ia nei te mana, i muri i tāna whakamatenga, ki te maka ki Kehena. Āe rā hoki, ko tāku kupu tēnei ki a koutou, e wehi ki a ia!
LUK 12:6 “Kāhore ianei e hokona ngā pīhoihoi e rima ki ngā pātene e rua, ā, kāhore tētahi o rātou e wareware i te Atua?
LUK 12:7 Heoi, kua oti katoa te tatau ngā makawe katoa nei o ō koutou mātenga. Kaua e wehi; engari koutou i ngā pīhoihoi maha.”
LUK 12:8 “Ko tāku kupu tēnei ki a koutou, ki te whakaae tētahi ki ahau i te aroaro o ngā tāngata, ka whakaaetia anō ia e te Tama a te tangata i te aroaro o ngā anahera a te Atua.
LUK 12:9 Ki te whakakāhore tētahi i ahau i te aroaro o ngā tāngata, ka whakakāhoretia anō ia i te aroaro o ngā anahera a te Atua.
LUK 12:10 Ki te kōrero tētahi he whakahē mō te Tama a te tangata, ka murua tōna hara; tēnā ko te tangata e kohukohua ai te Wairua Tapu, e kore tōna e murua.
LUK 12:11 “Ki te kawea koutou ki ngā whare karakia, ki ngā rangatira, ki te hunga whai mana, kaua e mānukanuka ki te pēhea, ki te aha rānei e whakahoki atu ai koutou, ki tā koutou rānei e kōrero ai.
LUK 12:12 Mā te Wairua Tapu hoki koutou e ako i taua hāora anō ki ngā mea e tika ana kia kōrerotia e koutou.”
LUK 12:13 Nā, ka mea tētahi i roto i te mano ki a ia, “E te Kaiwhakaako, mea atu ki tōku tuakana, kia wehea mai mōku tētahi wāhi o te kāinga.”
LUK 12:14 Nā, ko tāna meatanga ki a ia, “E te tangata nei, nā wai ahau i mea hei kaiwhakawā, hei kaiwehewehe i waenganui i a koutou?”
LUK 12:15 I mea anō ia ki a rātou, “Kia mahara, kia tūpato ki te apo; ehara i te mea mā te nui o ngā taonga a te tangata e ora ai ia.”
LUK 12:16 Nā, ka kōrerotia e ia tētahi kupu whakarite ki a rātou, ka mea: “Nā, he nui te hua o te whenua o tētahi tangata whai taonga.
LUK 12:17 Nā, ka whakaaroaro ia i roto i a ia, ‘Me pēhea ahau? Kāhore hoki ōku wāhi hei putunga mō āku hua.’
LUK 12:18 “Ā, ka mea ia, ‘Tēnei tāku e mea ai, ka wāwāhia e ahau ōku whare wīti, ā, ka hangā kia nui. Ā, ka kohikohia ki reira āku hua katoa, me āku taonga.
LUK 12:19 Kātahi ahau ka mea ki tōku wairua, E tōku wairua, ka maha āu mea papai kei te rongoā mō ngā tau e maha; noho noa iho, e kai, e inu, kia koa te ngākau.’
LUK 12:20 “Otiia, ka mea te Atua ki a ia, ‘Kūware, ko ā tēnei pō anō tangohia ai tōu wairua i a koe; ā, mā wai ngā mea kua pae nā i a koe?’
LUK 12:21 “Nā, ka pēnā te tangata e whakapūranga ana i te taonga māna ake, ā, kāhore e hua tāna whaka te Atua.”
LUK 12:22 Nā, ka mea ia ki āna ākonga, “Koia ahau ka mea nei ki a koutou, kaua e mānukanuka ki tō koutou oranga, ki tā koutou e kai ai, ki te tinana rānei, ki tā koutou e kākahu ai.
LUK 12:23 Rahi atu te ora i te kai, me te tinana i te kākahu.
LUK 12:24 Whakaaroa ngā raweni: kāhore nei e whakatō, kāhore e kokoti, kāhore ā rātou pākoro, kāhore he whare wīti, heoi, e whāngaia ana rātou e te Atua. Tērā noa ake koutou i ngā manu?
LUK 12:25 Ā, ko wai o koutou e taea e ia te whakaaro iho, te hono tētahi wāhi ki tōna roa, kia kotahi te whatīanga?
LUK 12:26 Ā, ki te kore e taea e koutou te mea nohinohi rawa, he aha i mānukanuka ai ki tētahi atu?
LUK 12:27 “Whakaaroa ngā rengarenga, tō rātou tupu; e kore nei e mahi, e kore e miro, nā, ko tāku tēnei ki a koutou, kīhai a Horomona me tōna korōria katoa i rite ki tētahi o ēnei te whai kākahu.
LUK 12:28 Nā, ki te pēnei tā te Atua whakakākahu i te tarutaru i te pārae, kei reira āianei, ā, āpōpō ka makā ki te oumu. Tērā noa ake tāna i a koutou, e te hunga whakapono iti.
LUK 12:29 Kaua rā e rapu ki tā koutou e kai ai, ki tā koutou e inu ai, kaua e tīrengi noa te whakaaro.
LUK 12:30 E rapu ana hoki ngā iwi o te ao i ēnei mea katoa, otirā e mātau ana tō koutou Matua e matea ana e koutou ēnei mea.
LUK 12:31 Engari rapua te rangatiratanga o te Atua; ā, ka tāpiritia ēnei mea katoa mā koutou.”
LUK 12:32 “Kaua e mataku, e te kāhui nohinohi; kua pai hoki tō koutou Matua ki te hōmai i te rangatiratanga ki a koutou.
LUK 12:33 Hokona ō koutou taonga, hoatu he mea mā te hunga rawakore. Hangā mā koutou he pēke moni e kore e tawhitotia, he taonga ki te rangi e kore e memeha, ki te wāhi e kore nei e tata atu te tāhae, e kore anō te huhu e kai.
LUK 12:34 Ko te wāhi hoki i tō koutou taonga, ko reira anō ō koutou ngākau.”
LUK 12:35 “Whītikiria ō koutou hope, tahuna ngā rama kia kā;
LUK 12:36 ko tō koutou rite hei ngā tāngata e tatari ana ki tō rātou rangatira, ina hoki mai i te hākari o te mārena, mō tōna tae rawa mai, ka pātōtō, nā uaki tonu atu rātou ki a ia.
LUK 12:37 Ka koa ngā pononga e rokohina mai e tō rātou rangatira, ā tōna taenga mai, e mataara ana. He pono tāku e mea nei ki a koutou, ka whītiki ia i a ia, ā, ka mea i a rātou kia noho, ka haere ki te mahi mea mā rātou.
LUK 12:38 Ā, ki te haere mai ia i te rua o ngā mataaratanga, i te toru rānei, ā, ka rokohina mai e pērā ana anō, ka koa aua pononga.
LUK 12:39 Otirā, kia mōhio koutou ki tēnei, me i mātau te tangata i te whare, ki te wā e haere mai ai te tāhae, kua mataara ia, ā, kāhore i tukua kia pokaia tōna whare.
LUK 12:40 Kia tatanga rā koutou, nō te mea e puta mai te Tama a te tangata i te hāora e kore ai koutou e mahara.”
LUK 12:41 Nā, ka mea a Pita ki a ia, “E te Ariki, ki a mātou tēnei kupu whakarite e kōrero nei koe? Ki te katoa rānei?”
LUK 12:42 Nā, ka mea te Ariki, “Ko wai rā te tuari pono, mahara, e meinga e tōna ariki hei rangatira mō āna tāngata, hei hoatu i te mēhua kai i te wā e tika ai?
LUK 12:43 Ka koa taua pononga, ki te rokohina e tōna rangatira ina tae mai, e pēnā ana.
LUK 12:44 He pono tāku e mea nei ki a koutou, ka meinga ia hei rangatira mō āna taonga katoa.
LUK 12:45 Otirā, ki te mea taua pononga i roto i tōna ngākau, ‘Ka roa te haerenga mai o tōku ariki’; ā, ka anga, ka whiu i ngā pononga tāne, i ngā pononga wāhine, ka kai, ka inu, ka haurangi,
LUK 12:46 ka haere mai te rangatira o taua pononga i te rā e kore ai ia e mahara, i te hāora e kore ai ia e mōhio, ā, ka hautopea ia, ka meinga mōna he wāhi i roto i te hunga whakapono kore.
LUK 12:47 “Nā, ko taua pononga, i mōhio nei ki tā tōna rangatira i pai ai, ā, kīhai i whakaaro wawe, kīhai hoki i mea i tāna i pai ai, he maha ngā whiu mōna.
LUK 12:48 Tēnā, ko ia kīhai i mōhio, ā, i mahi i ngā mea e tika ai kia whiua, he torutoru ngā whiu mōna. Ko te tangata hoki i nui te hoatutanga ki a ia he nui anō hei hōmaitanga māna; ā, ko te tangata i nui te tukunga ki a ia, hira noa atu te mea e tonoa i a ia.”
LUK 12:49 “I haere mai ahau ki te maka kāpura ki te whenua; ā, ka pēhea ahau, mehemea kua kā kē?
LUK 12:50 Otirā, he iriiringa tōku e iriiria ai ahau; anō tōku tākarekare kia oti rā anō!
LUK 12:51 E mea ana rānei koutou, i haere mai ahau ki te hōmai i te rangimārire ki te whenua? Tēnei tāku kupu ki a koutou, kāhore; engari i te wehewehe.
LUK 12:52 Hei ngā rā hoki e takoto ake nei ka tokorima i roto i te whare kotahi, ā, ka tahuri ki a rātou anō, tokotoru ki te tokorua, tokorua ki te tokotoru.
LUK 12:53 Ka tahuri atu te pāpā ki te tama, te tama ki te pāpā, te whaea ki te tamāhine, te tamāhine ki tōna whaea, te hungawai wahine ki tāna hunaonga wahine, me te hunaonga wahine ki tōna hungawai wahine.”
LUK 12:54 Ā, i mea anō ia ki ngā mano, “Ka kite koutou i te kapua e puta mai ana i te hauāuru, nā, mea tonu ake koutou, ‘He ua te haere mai nei,’ ā, ko ia anō ia.
LUK 12:55 Ka kite koutou i te tonga e pupuhi ana, ka mea koutou, ‘Meāke ko te werawera,’ ā, ko ia anō ia.
LUK 12:56 E te hunga tinihanga, e mātau ana koutou ki te titiro ki te mata o te whenua, o te rangi; he aha koutou tē mātau ai ki te titiro ki tēnei tāima?”
LUK 12:57 “Ā, he aha koutou tē whakaaro noa ake ai i te mea tika?
LUK 12:58 I a kōrua ko tōu hoa tauwhāinga e haere ana ki te kaiwhakawā, hei te huarahi anō kia kaha te mea kia makere atu ia i a koe; kei tōia koe e ia ki te kaiwhakawā, ā, ka tukua koe e te kaiwhakawā ki te kātipa, ā, ka makā koe e te kātipa ki te whare herehere.
LUK 12:59 Ko tāku kupu tēnei ki a koe, E kore rawa koe e puta mai i reira, kia poto rā anō ngā moni iti rawa te utu e koe.”
LUK 13:1 Nā, i reira ētahi i taua wā, nāna i kōrero ki a ia ngā tāngata o Karirī, i whakaranua nei ō rātou toto e Pirato ki ā rātou patunga tapu.
LUK 13:2 Nā, ka whakahoki ia, ka mea ki a rātou, “E mea ana rānei koutou, he hara rawa aua tāngata o Karirī i ngā tāngata katoa o Karirī, nō te mea he pērā ō rātou mate?
LUK 13:3 Nā, ko tāku kupu tēnei ki a koutou, kāhore; engari ki te kore koutou e rīpenetā, ka pērā anō hoki koutou katoa te mate.
LUK 13:4 Me taua tekau mā waru i horoa nei e te pourewa o Hiroama, ā, mate iho, e mea ana oti koutou, he hara rawa rātou i ngā tāngata katoa e noho ana i Hiruhārama?
LUK 13:5 Ko tāku tēnei ki a koutou, kāhore; engari ki te kore koutou e rīpenetā, ka pērā anō koutou katoa te mate.”
LUK 13:6 Ā, i kōrerotia e ia tēnei kupu whakarite, “He piki tā tētahi tangata, he mea whakatō ki tāna māra wāina; nā, ka haere mai ia, ka rapu hua i runga, ā, kīhai i kitea.
LUK 13:7 Kātahi ia ka mea ki te kaimahi wāina, ‘Nā, ka toru ēnei ōku tau e haere mai ana ki te rapu hua i runga i tēnei piki, heoi, kāhore i kitea. Tuaina ki raro; hei aha i maumauria ai hoki te whenua?’
LUK 13:8 “Nā, ka whakahoki tērā, ka mea ki a ia, ‘E te ariki, waiho anō hoki i tēnei tau, kia keria rā anō e ahau ngā taha kia makā hoki he wairākau.
LUK 13:9 Ā, ki te whai hua ā houanga, ka waiho; ki te kāhore, māu e tua ki raro.’ ”
LUK 13:10 Ā, i roto ia i tētahi o ngā whare karakia e whakaako ana i te hāpati.
LUK 13:11 Nā, ko tētahi wahine, he wairua ngoikore tōna, kotahi tekau mā waru ngā tau, piko tonu, kīhai rawa i āhei te whakatika ake.
LUK 13:12 Ā, nō te kitenga o Īhu i a ia, ka karanga atu ki a ia, ka mea ki a ia, “E kui, ka oti tōu ngoikore te whakamatara.”
LUK 13:13 Nā, whakapākia iho e ia ōna ringa ki a ia, ā, kīhai i aha kua tika, whakakorōria ana i te Atua.
LUK 13:14 Nā, he riri nōna mō Īhu i whakaora i te hāpati, ka kōrero te rangatira o te whare karakia, ka mea ki te mano, “E ono ngā rā e tika ai te tangata te mahi. Hei reira koutou haere mai ai kia whakaorangia, kauaka i te hāpati.”
LUK 13:15 Nā, ka whakahoki te Ariki ki a ia, ka mea, “E ngā tāngata tinihanga, e kore ianei tēnei tangata, tēnei tangata o koutou e wewete i tāna kau i te hāpati, i tāna kāihe rānei, ka ārahi atu ai i te tūranga ki te whakainu?
LUK 13:16 Kāhore rānei tēnei wahine, he tamāhine nei nā Āperahama, i herea nei e Hātana i ēnei tau tekau mā waru, e tika kia wetekina i tōna here i te rā hāpati?”
LUK 13:17 Ā, nō ka kōrerotia ēnei mea e ia, ka whakamā katoa te hunga e whakahē ana ki a ia, ā, hari katoa te mano ki ngā mea korōria katoa i meinga e ia.
LUK 13:18 Nā, ka mea ia, “He rite te rangatiratanga o te Atua ki te aha? Ā, me whakarite e ahau ki te aha?
LUK 13:19 He rite ki te pua nanī, i kawea e te tangata, i ruia ki tāna kāri; ā, ka tupu, ka whakarākau, nō ka noho ngā manu o te rangi ki ōna manga.”
LUK 13:20 Ā, i mea anō ia, “Me whakarite e ahau te rangatiratanga o te Atua ki te aha?
LUK 13:21 He rite ki te rēwena i tangohia e tētahi wahine, ā, whaongia ana ki roto ki ngā mēhua parāoa e toru, nō ka rēwenatia katoa.”
LUK 13:22 Ā, ka hāereerea e ia ngā pā, ngā kāinga, whakaako ai, me te ahu tonu ki Hiruhārama.
LUK 13:23 Nā, ka mea tētahi ki a ia, “E te Ariki, he torutoru koia te hunga e ora?” Nā, ko tāna meatanga ki a rātou,
LUK 13:24 “Kia kaha te tohe ki te tomo mā te kūwaha kūiti. Ko tāku kupu hoki tēnei ki a koutou, he tokomaha e whai ki te tomo, ā, e kore e taea.
LUK 13:25 Kia whakatika kau te tangata i te whare, kia tūtakina te tatau, kātahi koutou ka anga, ka tū i waho, ka pātuki ki te tatau, ka mea, ‘E te Ariki, uakina ki a mātou,’ nā, ka whakahoki ia, ka mea ki a koutou, ‘Kāhore ahau i mōhio ki a koutou, nō hea rānei.’
LUK 13:26 Ko reira koutou tīmata ai te mea, ‘Kua kai mātou, kua inu i tōu aroaro, i whakaako anō koe i ō mātou huarahi.’
LUK 13:27 Ā, ka kī anō ia, ‘Ka mea atu ahau ki a koutou, kāhore ahau i mātau ki a koutou, nō hea rānei. Mawehe atu i ahau, e ngā kaimahi katoa i te kino.’
LUK 13:28 “Ko te wā tēnā o te tangi, o te tetēā o ngā niho, ina kite koutou i a Āperahama, i a Īhaka, i a Hākopa, i ngā poropiti katoa, kei te rangatiratanga o te Atua, ā, ko koutou kua makā ki waho.
LUK 13:29 Ā, ka haere mai rātou i te rāwhiti, i te hauāuru, i te hauraro, i te tonga, ka noho ki te rangatiratanga o te Atua
LUK 13:30 Nā, tērā ētahi ō muri e meinga ki mua, me ētahi ō mua ki muri.”
LUK 13:31 I taua hāora anō ka tae mai ētahi Parihi, ka mea ki a ia, “Haere, whakarērea a konei; e hiahia ana hoki a Herora kia whakamatea koe.”
LUK 13:32 Ka mea ia ki a rātou, “Haere, mea atu ki taua pokiha, ‘Nā, tēnei ahau te pei rēwera nei, te mahi nei i te mahi whakaora āianei, āpōpō, ā, i te toru o ngā rā ka oti tāku.
LUK 13:33 Otiia, me hāereere ahau āianei, āpōpō, ā tahi rā; e kore hoki e āhei kia mate he poropiti i waho o Hiruhārama.’
LUK 13:34 “E Hiruhārama, e Hiruhārama, e whakamate nei i ngā poropiti, e āki nei ki te kāmaka i te hunga e tonoa ana ki a koe; anō te tini o āku meatanga kia whakaminea āu tamariki, kia pērātia me te heihei e whakamine nei i āna pī ki raro ki ōna parirau, ā, kīhai koutou i pai!
LUK 13:35 Nā, ka mahue atu ki a koutou tō koutou whare kia takoto noa ana. He pono tāku e mea nei ki a koutou, e kore koutou e kite i ahau, kia tae mai rā anō te rā e mea ai koutou, ‘Ka whakapaingia ia e haere mai ana i runga i te ingoa o te Ariki.’ ”
LUK 14:1 Ā, i tōna haerenga ki te whare o tētahi o ngā rangatira, he Parihi, ki te kai taro i te hāpati, nā titiro pū mai ana rātou ki a ia.
LUK 14:2 Nā, ko tētahi tangata i tōna aroaro, he kōpū tetere tōna mate.
LUK 14:3 Nā, ka oho a Īhu, ka kōrero ki ngā kaiwhakaako o te ture, ki ngā Parihi, ka mea, “He mea tika rānei te whakaora i te hāpati?”
LUK 14:4 Ā, kīhai rātou i kīkī. Nā, ka mau ia ki a ia, ā, whakaorangia ana, tukua ana kia haere.
LUK 14:5 Nā, ka whakahoki ia ki a rātou, ka mea, “Ki te taka te kāihe, te kau rānei, a tētahi o koutou ki te poka, e kore ianei e hūtia ake e ia i reira pū anō i te rā hāpati?”
LUK 14:6 Ā, kīhai i taea e rātou te utu ēnei kupu āna.
LUK 14:7 Nā, ka kōrerotia e ia tētahi kupu whakarite ki te hunga i karangatia, i tōna kitenga i a rātou e whiriwhiri ana i ngā nohoanga rangatira; i mea ia ki a rātou,
LUK 14:8 “Ki te karangatia koe e tētahi ki te mārena, kaua e noho ki te nohoanga rangatira, kei karangatia hoki e ia tētahi he nui atu i a koe,
LUK 14:9 ā, ka haere mai te tangata i karangatia ai kōrua, ka mea ki a koe, ‘Tukua he nohoanga mō tēnei,’ ā, ka whakamā koe, ka haere ki tō muri rawa nohoanga noho ai.
LUK 14:10 Engari, ka karangatia koe, haere, e noho ki tō muri rawa nohoanga. Mō te tae rawa mai o te tangata nāna koe i karanga, nā, ka mea ia ki a koe, ‘E hoa, neke ake.’ Ko reira hoki koe whai korōria ai i te aroaro o ngā tāngata e noho tahi ana koutou.
LUK 14:11 Ki te whakanui hoki tētahi i a ia, ka whakaititia; ki te whakaiti tētahi i a ia, ka whakanuia.”
LUK 14:12 Nā, ka mea ia ki te tangata nāna nei ia i karanga, “E taka koe i te tina, i te hapa rānei, kaua e karangatia ōu hoa, kaua hoki ōu tēina, kaua hoki ōu whanaunga, kaua anō ngā tāngata taonga e noho tata ana; kei karangatia anō koe, ā, ka whai utu koe.
LUK 14:13 Engari, ka taka hākari koe, karangatia ngā rawakore, ngā hauā, ngā kopa, ngā matapō.
LUK 14:14 Ā, ka koa koe; kāhore hoki ā rātou utu ki a koe; engari, ka utua koe ā te aranga o te hunga tika.”
LUK 14:15 Ā, nō ka rongo tētahi o te hunga e noho tahi ana ki te kai ki ēnei mea, ka mea ki a ia, “Ka koa te tangata kai taro i te rangatiratanga o te Atua.”
LUK 14:16 Nā, ka mea ia ki a ia, “I takā he hapa nui e tētahi tangata, ā, he tokomaha i karangatia.
LUK 14:17 Ā, ka tonoa tāna pononga i te hāora o te hapa, hei mea ki te hunga i karangatia, ‘Haere mai; kua rite hoki ngā mea katoa.’
LUK 14:18 “Nā, ka anga rātou katoa ka whakakāhore ngātahi. Ka mea tō mua ki a ia, ‘Kua hokona e ahau he māra, me haere ahau kia kite. E mea ana ahau ki a koe, kia tukua ahau kia whakakāhore.’
LUK 14:19 “Nā, ko te meatanga a tētahi, ‘E rima takirua ngā ōkiha kua hokona e ahau, ka haere ahau ki te whakamātau. E mea ana ahau ki a koe, kia tukua ahau kia whakakāhore.’
LUK 14:20 “I mea anō tētahi, ‘Kua mārenatia ahau ki te wahine. He mea tēnei e kore ai ahau e āhei te haere atu.’
LUK 14:21 “Ā, ko te haerenga mai o taua pononga, ka kōrerotia ēnei mea ki tōna rangatira, nā, ka riri te tangata i te whare, ka mea ki tāna pononga, ‘Hohoro te haere ki ngā ara, ki ngā huarahi o te pā, ārahina mai ki konei ngā rawakore, ngā ngongengonge, ngā matapō, me ngā kopa.’
LUK 14:22 Nā, ka mea te pononga, ‘E kara, kua rite tāu i mea ai, ā, tēnei anō he wāhi takoto noa.’
LUK 14:23 “Ā, ka mea te rangatira ki te pononga, ‘Haere ki ngā huarahi, ki ngā taiepa, tōia mai ki roto nei, kia kī ai tōku whare.
LUK 14:24 Ko tāku kupu hoki tēnei ki a koutou, e kore tētahi o aua tāngata i karangatia rā e kai i tāku hapa.’ ”
LUK 14:25 Nā, he tini te tangata i haere tahi me ia, ā, ka tahuri ia, ka mea ki a rātou,
LUK 14:26 “Ki te haere mai tētahi ki ahau, ā, ka kore e whakakino ki tōna pāpā, whaea, wahine, tamariki, tēina, tuāhine, āe rā ki te ora anō mōna ake, e kore ia e āhei hei ākonga māku.
LUK 14:27 Ki te kore tētahi e mau ki tōna rīpeka, e haere mai i muri i ahau, e kore ia e āhei hei ākonga māku.
LUK 14:28 “Ko wai hoki o koutou, ki te mea ia ki te hanga taumaihi, e kore e mātua noho ki te tatau i ngā utu, mehemea e ranea ana āna mea hei whakaoti?
LUK 14:29 Kei whakatakoto ia i te tūranga, ka kore e taea te whakaoti, ā, ka tāwai mai ki a ia te hunga katoa e mātakitaki ana,
LUK 14:30 ka mea, ‘I tīmata te tangata nei te hanga whare, ā, kīhai i taea te i whakaoti.’
LUK 14:31 “Ko tēhea kīngi rānei e haere ana ki te whawhai ki tētahi atu kīngi, e kore e mātua noho, e whakaaro, e taea rānei e ia me ngā mano kotahi tekau te tū ki te riri ki tērā e haere mai rā ki a ia me ngā mano e rua tekau?
LUK 14:32 Ā, ki te kāhore, i te mea i tawhiti anō tērā, ka tukua atu e ia he karere, ka mea ki ngā kaupapa e houhia ai te rongo.
LUK 14:33 Waihoki, ko te tangata o koutou e kore e whakarere i āna mea katoa, e kore e āhei hei ākonga māku.”
LUK 14:34 “Nō reira, he pai te tote; otirā ki te hemo te hā o te tote, mā te aha ka whai hā ai?
LUK 14:35 E kore e pai mō te whenua, e kore anō hei whakawairākau; ā, ka ākiritia ai e te tangata ki waho. “Ko ia he taringa ōna hei whakarongo, kia rongo ia.”
LUK 15:1 Nā, ka whakatata ki a ia ngā pupirikana katoa me ngā tāngata hara, ki te whakarongo ki a ia.
LUK 15:2 Ā, ka amuamu ngā Parihi, me ngā karaipi, ka mea, “E manako ana tēnei tangata ki ngā tāngata hara, e kai tahi ana me rātou.”
LUK 15:3 Nā, ka kōrerotia e ia tēnei kupu whakarite ki a rātou, ā, ka mea:
LUK 15:4 “Ko tēhea tangata o koutou he rau āna hipi, ā, ka ngaro tētahi o rātou, e kore ianei e waiho e ia ngā mea e iwa tekau mā iwa i te koraha, ā, ka haere ki taua mea i ngaro, kia kitea rā anō?
LUK 15:5 Ā, ka kitea, ka waha i runga i ōna pokohiwi, ka koa.
LUK 15:6 Ā, nō ka tae ki te whare, ka karangatia ōna hoa me ngā tāngata e noho tata ana, ka mea ki a rātou, ‘Kia hari tahi tātou; kua kitea hoki tāku hipi i ngaro.’
LUK 15:7 Ko tāku kupu tēnei ki a koutou, ka pērā anō te hari i te rangi mō te tangata hara kotahi ina rīpenetā, nui atu i te hari mō ngā tāngata tika e iwa tekau mā iwa, kāhore nei ō rātou mea e rīpenetā ai.”
LUK 15:8 “Ko tēhea wahine rānei, kotahi tekau nei āna moni hiriwa, ki te ngaro tētahi, e kore ianei ia e tahu i te rama, e tahi i te whare, e rapu mārie, kia kitea rā anō?
LUK 15:9 Ā, nō ka kitea, ka karangatia e ia ōna hoa me te hunga e noho tata ana, ka mea, ‘Kia hari tahi me ahau, kua kitea hoki tāku moni i ngaro rā.’
LUK 15:10 Waihoki, ko tāku kupu tēnei ki a koutou, he hari kei te aroaro o ngā anahera a te Atua mō te tangata hara kotahi ina rīpenetā.”
LUK 15:11 I mea anō ia, “Tokorua ngā tama a tētahi tangata.
LUK 15:12 Ka mea tō muri o rāua ki tōna pāpā, ‘E pā, hōmai ki ahau te wāhi taonga e wehea e koe mōku.’ Nā, ka wehewehea e ia ki a rāua tōna oranga.
LUK 15:13 “Ā, kīhai i maha ngā rā, ka kohikohia e te tama ō muri ngā mea katoa, ā, haere ana ki te whenua tawhiti, maumauria ana ōna taonga ki reira, he tōreretanga ki te kino.
LUK 15:14 Ā, nō ka poto āna mea katoa, ka pā te matekai ki taua whenua, ā, ka tīmata ia te rawakore.
LUK 15:15 Nā, ka haere ia, ka piri ki tētahi o ngā tāngata o taua whenua; ka tonoa e ia ki āna māra ki te whāngai poaka.
LUK 15:16 I hiahia hoki ia kia whakakīia tōna kōpū ki ngā kiri e kainga ana e ngā poaka, heoi, kīhai i hoatu e tētahi ki a ia.
LUK 15:17 “Nō te hokinga ake ia o ōna whakaaro, ka mea ia, ‘Anō te tini o ngā kaimahi a tōku pāpā, he nui noa atu ā rātou taro, ko ahau ia ka ngaro i te kaikore!
LUK 15:18 Ka whakatika ahau, ka haere ki tōku matua, ka mea ki a ia, E pā, kua hara ahau ki te rangi, ki tōu aroaro anō.
LUK 15:19 Ā, heoi anō tikanga kia kīia ahau he tama nāu; meinga ahau kia rite ki tētahi o āu kaimahi.’
LUK 15:20 “Nā, ka whakatika ia, ā, haere ana ki tōna matua. Nā, i a ia anō i tawhiti, ka kite tōna matua i a ia, ka aroha, ka oma, hinga iho ki tōna kakī kihi ana i a ia.
LUK 15:21 Nā, ko te meatanga a te tama ki a ia, ‘E pā, kua hara ahau ki te rangi, ki tōu aroaro anō, ā, heoi anō tikanga kia kīia ahau he tama nāu.’
LUK 15:22 “Nā, ka mea te matua ki āna pononga, ‘Kia hohoro te mau mai i te kākahu pai rawa, ā, ka whakakākahu ki a ia; hōmai hoki he mōwhiti mō tōna ringa, he hū hoki mō ōna waewae.
LUK 15:23 Kawea mai anō te kūao kau, te mea whāngai, patua, kia kai tātou, kia koa te ngākau.
LUK 15:24 Ko tēnei tama hoki āku i mate, ā, kua ora; i ngaro, ā, kua kitea.’ Ā, ka anga rātou ka koa.
LUK 15:25 “Nā, kei te māra tāna tama mātāmua, ā, nō tōna haerenga mai, ka whakatata ki te whare, ka rongo i te waiata, i te kanikani.
LUK 15:26 Nā, karangatia ana e ia tētahi o ngā kaimahi, ka ui atu, ‘He aha rā ēnei mea?’
LUK 15:27 Nā, ka mea mai tērā ki a ia, ‘Kua tae mai tōu teina; kua patua e tōu matua te kūao mōmona a te kau, nō te mea kua tae ora mai ia ki a ia.’
LUK 15:28 “Nā, ka riri ia, kīhai hoki i pai kia haere ki roto; me i reira ka haere atu tōna matua ki waho, ka tohe ki a ia.
LUK 15:29 Nā, ka whakahoki ia, ka mea ki tōna matua, ‘Nanā, te tini o ngā tau i mahi ai ahau ki a koe, kāhore rawa hoki i takatakahi i tāu kupu; heoi, kāhore rawa i hōmai e koe ki ahau he kūao koati, kia koa tahi ai ahau me ōku hoa.
LUK 15:30 Otirā, i te taenga mai o tēnei tama āu, i pau nei tōu oranga i a ia, rātou tahi ko ngā wāhine kairau, kua patua e koe te kūao mōmona a te kau māna.’
LUK 15:31 “Nā, ka mea tērā ki a ia, ‘E tama, kei ahau tonu koe, māu hoki āku mea katoa.
LUK 15:32 He tika ia kia koa tātou, kia hari; i mate hoki tōu teina nei, ā, kua ora, i ngaro, ā, kua kitea.’ ”
LUK 16:1 Ā, i mea anō ia ki āna ākonga, “Tērā tētahi tangata whai rawa i mua, he tuari taonga tōna; ā, ka kōrerotia ki a ia kei te maumauria e ia āna taonga.
LUK 16:2 Nā, karangatia ana ia e ia, ā, ka mea atu ia ki a ia, ‘He aha tēnei e rangona nei e ahau mōu? Kōrerotia mai te tikanga o ngā mea i tuaritia e koe; e kore hoki e āhei kia waiho koe hei tuari.’
LUK 16:3 “Nā, ko te meatanga a taua tuari i roto i a ia, ‘Me aha ahau? E tangohia ana hoki i ahau te tuaritanga e tōku ariki; e kore ahau e kaha ki te keri; e whakamā ana ahau ki te tono mea māku.
LUK 16:4 E mōhio ana ahau ki tāku e mea ai, mō tōku peinga rawatanga atu i te tuaritanga, ka ai ō rātou whare hei tukunga atu mōku.’
LUK 16:5 “Nā, ka karangatia e ia tēnei tangata, tēnei tangata o te hunga i a rātou nei ētahi mea a tōna ariki, ka mea ia ki te tuatahi, ‘E hia ngā mea a tōku ariki i a koe?’
LUK 16:6 Nā, ka mea tērā, ‘Kotahi rau mēhua hinu.’ Nā, ko tāna meatanga ki a ia, ‘Tangohia tāu pukapuka, hohoro te noho, tuhituhia e rima tekau.’
LUK 16:7 “Kātahi ia ka mea ki tētahi, ‘E hia hoki i a koe?’ Ka mea ia, ‘Kotahi rau mēhua wīti.’ Nā, ka mea ia ki a ia, ‘Tangohia tāu pukapuka, tuhituhia e waru tekau.’
LUK 16:8 “Nā, ka mihia te tuari kino e tōna ariki, mōna i whai whakaaro; engari hoki ngā tamariki o tēnei ao, i tō rātou whakapaparanga, nui kē te whakaaro i tō ngā tamariki o te mārama.
LUK 16:9 Nā, ko tāku kupu tēnei ki a koutou, waiho te taonga kino hei mea i ētahi hoa aroha mō koutou; mō te hē rawa iho, ka ai he tukunga atu mō koutou ki ngā whare ora tonu.
LUK 16:10 “Ko ia e pono ana ki te mea nohinohi rawa, e pono anō i te mea nui; ko ia e kore e tika i te mea nohinohi rawa, e kore anō e tika i te mea nui.
LUK 16:11 Nā, ki te kāhore i pono tā koutou mahi ki te taonga hē, mā wai e tuku ki a koutou hei tiaki i te taonga pono?
LUK 16:12 Ki te kāhore koutou i pono i te mea a te tangata kē, mā wai e hoatu he mea mā koutou ake ki a koutou?
LUK 16:13 “E kore e āhei i te pononga te mahi ki ngā rangatira tokorua; ka kino hoki ki tētahi, ka aroha ki tētahi; ka ū rānei ki tētahi, ka whakahāwea ki tētahi. E kore e āhei i a koutou te mahi ki te Atua, ki te taonga.”
LUK 16:14 Ā, ko ngā Parihi, he hunga apoapo moni i rongo ki ēnei mea katoa, ā, ka whakahī rātou ki a ia.
LUK 16:15 Nā, ko tāna meatanga ki a rātou, “Ko koutou te hunga e whakatikatika ana i a koutou anō i te aroaro o ngā tāngata; ko te Atua ia e mātau ana ki ō koutou ngākau; ko te mea hoki e whakanuia ana e ngā tāngata hei mea whakarihariha i te aroaro o te Atua.
LUK 16:16 “I tutuki te ture me ngā poropiti ki a Hoani; nō reira i kauwhautia mai ai te rangatiratanga o te Atua, ā, tāruke ana ngā tāngata katoa ki roto.
LUK 16:17 Erangi te pahemotanga o te rangi, o te whenua e takoto noa ana, e kore ia tētahi tohu o te ture e taka.
LUK 16:18 “Ki te whakarere tētahi i tāna wahine, ā, ka mārena i tētahi atu, e pūremu ana ia; ki te mārena tētahi te wahine kua whakarērea e te tangata, e pūremu ana ia.”
LUK 16:19 “Nā, tērā tētahi tangata whai taonga i mua, he kākahu pāpura ōna, he rīnena pai, ā, ko tāna mahi he kai tonu i ngā kai papai i ngā rā katoa.
LUK 16:20 Nā, ka whakatakotoria ki tōna kūwaha tētahi tangata rawakore, ko Raharuhi te ingoa, he tūwhenua,
LUK 16:21 e hiahia ana hoki kia whāngaia ki ngā kongakonga e ngahoro ana i te tēpu a te tangata taonga; ā, ko ngā kurī rawa hoki i haere mai, ka mitimiti i ōna mate.
LUK 16:22 “Nāwai ā, ka mate te tangata rawakore, ā, kawea ana e ngā anahera ki te uma o Āperahama. Ā, ka mate hoki ko te tangata taonga, ā, tanumia ana.
LUK 16:23 Ā, i te rēinga ka titiro ake ia, i a ia e whakamamaetia ana, ka kite i a Āperahama i tawhiti, me Raharuhi i tōna uma.
LUK 16:24 Nā, ka karanga ia, ka mea, ‘E pā, e Āperahama, kia aroha ki ahau, tonoa mai hoki a Raharuhi ki te tou i te pito o tōna matihao ki te wai, hei whakamātao i tōku arero; e mamae ana hoki ahau i tēnei mura.’
LUK 16:25 “Otirā, ka mea a Āperahama, ‘E tama, kia mahara kua riro i a koe āu mea papai i a koe e ora ana, he kino ia ngā mea i a Raharuhi; nā, ka whakamārietia nei ia, e whakamamaetia ana koe.
LUK 16:26 Hāunga anō ēnei mea katoa, kua oti te whakapūmau tētahi tawhā nui i waenganui o koutou, o mātou. Ā, ki te mea ētahi ki te whakawhiti atu i konei ki a koutou, e kore e āhei; e kore anō e whiti mai i konā ki a mātou.’
LUK 16:27 “Anō rā ko tērā, ‘Koia ahau ka mea nei ki a koe, e pā, kia tonoa ia ki te whare o tōku pāpā;
LUK 16:28 tokorima hoki ōku tēina? Kia kōrero ai ia ki a rātou, kei haere mai hoki rātou ki tēnei wāhi mamae.’
LUK 16:29 “Ka mea a Āperahama ki a ia, ‘Kei a rātou rā a Mohi rātou ko ngā poropiti; me whakarongo ki a rātou.’
LUK 16:30 “Ka mea ia, ‘Kāhore, e pā, e Āperahama, engari ki te haere atu tētahi ki a rātou o te hunga mate, ka rīpenetā rātou.’
LUK 16:31 “Nā, ka mea tērā ki a ia, ‘Ki te kore rātou e whakarongo ki a Mohi, ki ngā poropiti hoki, e kore anō e whakaae ahakoa ara ake te tangata i te hunga mate.’ ”
LUK 17:1 Nā, ka mea ia ki āna ākonga, “E kore e taea te whakakāhore te putanga o ngā take hē; otiia, auē te mate mō te tangata e puta ai!
LUK 17:2 He nui te pai ki a ia ki te whakatārewatia ki tōna kakī te kōhatu mira kāihe, kia makā hoki ia ki te moana, ā, kia kaua e taka i a ia ki te hē tētahi ēnei mea nonohi.
LUK 17:3 Kia tūpato ki a koutou! “Ki te hara tōu teina ki a koe, rīria; ā, ki te rīpenetā, murua tōna.
LUK 17:4 Ā, ki te whitu ngā haranga ki a koe i te rā kotahi, ā, ka whitu ōna hokinga mai ki a koe, ā, ka mea, ‘E rīpenetā ana ahau,’ murua tōna.”
LUK 17:5 Ā, ka mea ngā āpōtoro ki te Ariki, “Whakanuia tō mātou whakapono.”
LUK 17:6 Nā, ka mea te Ariki, “Ki te mea he whakapono tō koutou, me te pua nanī te rahi, ka mea koutou ki tēnei hikamaina, ‘Kia rangā atu koe, kia whakatōkia ki te moana,’ nā, ka rongo ki a koutou.”
LUK 17:7 “Nā, ko wai o koutou he pononga tāna e parau ana, e tiaki ana rānei i ngā hipi, e mea atu ki a ia, i tōna hokinga mai i te māra, ‘Haere tonu mai, ka noho ki te kai’?
LUK 17:8 Ā, e kore e mea ki a ia, ‘Takā he hapa māku, ka whītiki ai i a koe, ka tuari mai ki ahau, kia mutu rā tāku kai, tāku inu; ā muri iho ka kai ai koe, ka inu ai’?
LUK 17:9 E whakawhetai oti ia ki taua pononga, mōna i mea i ngā mea i whakahaua ai ia?
LUK 17:10 Waihoki ko koutou, ka oti ngā mea katoa i whakahaua ai koutou, ka kī atu, ‘He pononga huakore mātou; ko tā mātou i mea ai ko te mea anō i whakaritea kia mahia e mātou.’ ”
LUK 17:11 Nā, i a rātou e haere ana ki Hiruhārama, ka haere ia rā waenganui o Hamaria, o Karirī.
LUK 17:12 Ā, i a ia e tomo ana ki tētahi kāinga, kotahi tekau ngā tāngata i tūtaki ki a ia, he repera, nā, ka tū mai rātou i tawhiti.
LUK 17:13 Ka karanga, ka mea, “E kara, e Īhu, kia aroha ki a mātou.”
LUK 17:14 Ā, i tōna kitenga atu, ka mea ki a rātou, “Haere, kia kite ngā tohunga i a koutou.” Ā, i a rātou e haere ana, nā kua mā.
LUK 17:15 Ā, nō te kitenga o tētahi o rātou kua ora ia, ka hoki, ā, he rahi tōna reo ki te whakakorōria i te Atua.
LUK 17:16 Ā, takoto tāpapa ana ia ki ōna waewae, ka whakawhetai ki a ia. Ā, nō Hamaria ia.
LUK 17:17 Ā, ka oho atu a Īhu, ka mea, “Kīhai rānei te tekau i whakaorangia? Ā, kei hea ngā tokoiwa?
LUK 17:18 Heoi anō, ngā mea i kitea e hoki mai ana ki te hōmai i te korōria ki te Atua, ko tēnei tangata iwi kē.”
LUK 17:19 Nā, ka mea ia ki a ia, “Whakatika, haere; nā tōu whakapono koe i ora ai.”
LUK 17:20 Ā, i te uinga a ngā Parihi ki a ia, ko āhea puta mai ai te rangatiratanga o te Atua, ka whakahoki ia ki a rātou, ka mea, “E kore e kitea te putanga mai o te rangatiratanga o te Atua.
LUK 17:21 E kore anō rātou e mea, ‘Nā, tēnei!’, ‘Nā, tērā!’ Kei roto hoki i a koutou te rangatiratanga o te Atua.”
LUK 17:22 Ā, ka mea ia ki ngā ākonga, “Tērā e tae mai ngā rā e hiahia ai koutou kia kite i tētahi o ngā rā o te Tama a te tangata, ā, e kore koutou e kite.
LUK 17:23 Ā, e mea rātou ki a koutou, ‘Nā, tēnei!’, ‘Nā, tērā!’ Kaua e haere atu, kaua e aru atu.
LUK 17:24 Ka rite hoki ki te uira e hiko mai ana i tētahi wāhi i raro o te rangi; ā, tīaho atu ana ki tētahi atu wāhi i raro o te rangi. E pērā anō te Tama a te tangata ā tōna rā.
LUK 17:25 Otiia, ko te tikanga tēnei kia maha ngā mamae mōna i mua, kia whakakinongia anō hoki e tēnei whakatupuranga.
LUK 17:26 “Ka rite hoki ki ngā rā i a Noa ngā rā o te Tama a te tangata.
LUK 17:27 E kai ana rātou, e inu ana, e mārena ana, e tukua ana ki te mārena, taea noatia te rā i tomo ai a Noa ki te āka, ā, ko te putanga mai o te waipuke, nā, whakangaromia katoatia rātou.
LUK 17:28 “Ka rite anō hoki ki ngā rā i a Rota; e kai ana rātou, e inu ana, e hoko mai ana, e hoko atu ana, e whakatō ana, e hanga whare ana.
LUK 17:29 Heoi, i te rā i puta mai ai a Rota i Horoma, ka uaina he kāpura, he whānāriki i te rangi, nā, whakangaromia katoatia rātou.
LUK 17:30 “Ka pērā anō ā te rā e whakakitea ai te Tama a te tangata.
LUK 17:31 I taua rā, kei runga tētahi i te whare, me ōna taonga hoki i roto i te whare, kaua ia e heke iho ki te tiki i aua mea; ko te tangata hoki i te māra, kaua ia e hoki atu ki ngā mea ō muri.
LUK 17:32 Kia mahara ki te wahine a Rota.
LUK 17:33 Ki te whai tētahi kia ora ia, ka mate anō ia; ki te mate tētahi, ka ora anō ia.
LUK 17:34 Ko tāku kupu tēnei ki a koutou, I taua pō tokorua i te moenga kotahi; kotahi e tangohia, kotahi e waiho.
LUK 17:35 Tokorua ngā wāhine e huri ana; kotahi e tangohia, kotahi e waiho.
LUK 17:36 Tokorua ngā tāngata i te māra; kotahi e tangohia, kotahi e waiho.”
LUK 17:37 Nā, ka whakahoki rātou, ka mea ki ia, “Ko hea, e te Ariki?” Ka mea ia ki a rātou, “Ko te wāhi i te tūpāpaku, ko reira huihui ai ngā ēkara.”
LUK 18:1 Nā, ka kōrero ia i tētahi kupu whakarite ki a rātou mō tēnei, kia īnoi rātou i ngā wā katoa, kia kaua e ngoikore.
LUK 18:2 I mea ia, “I tētahi pā tērā tētahi kaiwhakawā, he tangata kīhai nei i wehi ki te Atua, kīhai anō i hopohopo ki te tangata.
LUK 18:3 I taua pā anō tētahi pouaru; ā, ka haere mai tērā ki a ia, ka mea, ‘Takitakina tōku mate i tōku hoa tauwhāinga.’
LUK 18:4 “Ā, he roa kīhai ia i pai, muri iho ka mea ia i roto i a ia, ‘Ahakoa kāhore ahau e wehi ki te Atua, e hopohopo ki te tangata,
LUK 18:5 heoi, ka pōrearea ahau i te pouaru nei, nā, ka takitakina e ahau tōna mate, kei haere tonu mai ka mate ahau i te hōhā.’ ”
LUK 18:6 Ka mea te Ariki, “Whakarongo ki tā te kaiwhakawā kino i mea rā.
LUK 18:7 Ā, e kore rānei te Atua e ngaki i te mate o āna tāngata i whiriwhiri ai, e karanga nei ki a ia i te ao, i te pō, ahakoa whakaroa noa ia ki a rātou?
LUK 18:8 Ko tāku kupu tēnei ki a koutou, ka hohoro ia te takitaki i tō rātou mate. Otirā, ka tae mai te Tama a te tangata, e rokohina mai rānei e ia he whakapono i runga i te whenua?”
LUK 18:9 Nā, ka kōrero anō ia i tēnei kupu whakarite ki ētahi, i whakamanawa nei ki a rātou anō he tika, i whakakorekore ki ērā atu katoa,
LUK 18:10 “Tokorua ngā tāngata i haere ki te temepara ki te īnoi; he Parihi tētahi, ko tētahi he pupirikana.
LUK 18:11 Tū ana te Parihi ko ia anake, ko tāna karakia tēnei, ‘E te Atua, ka whakawhetai ahau ki a koe, nō te mea kāhore ahau e rite ki ērā atu tāngata, ki te hunga hao taonga, kino, pūremu, mōku hoki tē rite ki tēnei pupirikana.
LUK 18:12 Takirua āku nohoanga pukutanga i te wiki, e hoatu ana e ahau te wāhi whakatekau o āku mea katoa.’
LUK 18:13 “Ko te pupirikana ia i tū mai i tawhiti, kīhai i mea kia anga ake ōna kanohi ki te rangi, heoi, pātuki ana ki tōna uma, ka mea, ‘E te Atua, tohungia ahau, te tangata hara.’
LUK 18:14 Ko tāku kupu tēnei ki a koutou, nui atu te tika o tēnei i tō tērā i te hokinga ki tōna whare; ki te whakanui hoki tētahi i a ia, ka whakaititia; ki te whakaiti tētahi i a ia, ka whakanuia.”
LUK 18:15 Nā, ka kawea mai e rātou ki a ia ā rātou tamariki nonohi, kia pā ai ia ki a rātou; otiia, nō te kitenga o āna ākonga, ka rīria atu rātou.
LUK 18:16 Otirā, ka karangatia atu rātou e Īhu ki a ia, ka mea ia, “Tukua ngā tamariki nonohi kia haere mai ki ahau, kaua hoki rātou e āraia atu; nō ngā pēnei hoki te rangatiratanga o te Atua.
LUK 18:17 He pono tāku e mea nei ki a koutou, ki te kāhore e rite te tango a tētahi i te rangatiratanga o te Atua ki tā te tamaiti nohinohi, e kore rawa ia e tomo ki roto.”
LUK 18:18 Nā, ka ui tētahi rangatira ki a ia, ka mea, “E te kaiwhakaako pai, me aha ahau ka whiwhi ai ki te ora tonu?”
LUK 18:19 Nā, ko te meatanga a Īhu ki a ia, “He aha ahau i kīia ai e koe he pai? Kāhore tētahi i pai, kotahi anake, ko te Atua.
LUK 18:20 E mātau ana koe ki ngā ture, kaua e pūremu, kaua e patu tangata, kaua e tāhae, kaua e whakapae teka, whakahōnoretia tōu pāpā me tōu whaea.”
LUK 18:21 Nā, ka mea ia, “Kua rite i ahau ēnei katoa nō tōku tamarikitanga ake.”
LUK 18:22 Ā, i te rongonga o Īhu ki tēnei, ka mea ki a ia, “Kotahi te mea kāhore anō i rite i a koe; hokona āu mea katoa, ka tuwha atu mā ngā mea rawakore, ā, e whai taonga koe ki te rangi, ā, haere mai i muri i ahau.”
LUK 18:23 Nā, ka rongo ia ki ēnei mea, ka pōuri rawa; he nui hoki ōna taonga.
LUK 18:24 Ā, ka kite a Īhu i a ia, ka mea, “Anō te whakauaua o te tapoko o te hunga taonga ki te rangatiratanga o te Atua!
LUK 18:25 Erangi hoki te haere o te kāmera rā te kōwhao o te ngira e takoto noa ana, he whakauaua rawa ia te tomo o te tangata taonga ki roto ki te rangatiratanga o te Atua.”
LUK 18:26 Nā, ka mea ngā kaiwhakarongo, “Ko wai rā e ora?”
LUK 18:27 Otirā, i mea ia, “Ko ngā mea e kore e taea e te tangata, ka taea e te Atua.”
LUK 18:28 Ā, ka mea a Pita, “Nā, kua whakarērea nei e mātou ā mātou nei mea, ā, kua aru i a koe.”
LUK 18:29 Nā, ka mea ia ki a rātou, “He pono tāku e mea nei ki a koutou, kāhore he tangata i whakarere, he whare, he wahine, he tuākana, he mātua, he tamariki, i te whakaaro ki te rangatiratanga o te Atua,
LUK 18:30 e kore e riro mai i a ia i tēnei wā ngā mea tini noa atu, ā, i te ao meāke puta ko te ora tonu.”
LUK 18:31 Ā, ka mau ia ki te tekau mā rua, ka mea ki a rātou, “Nā, e haere ana tēnei tātou ki Hiruhārama, ā, ka rite katoa ngā mea i tuhituhia e ngā poropiti mō te Tama a te tangata.
LUK 18:32 Ka tukua hoki ia ki ngā tauiwi, ka tāwaia, ka whakatupuria kinotia, ka tuwhaina.
LUK 18:33 Ā, ka oti ia te whiu, ka whakamatea, ā, i te toru o ngā rā ka ara.”
LUK 18:34 Ā, kīhai rātou i mātau ki tētahi o ēnei mea; he mea huna hoki i a rātou tēnei kupu, kīhai rātou i mōhio ki ngā mea i kōrerotia.
LUK 18:35 Ā, i a ia e whakatata ana ki Heriko, tērā tētahi matapō e noho ana i te taha o te huarahi e tono mea ana māna.
LUK 18:36 Ā, i tōna rongonga i te mano e haere ana, ka ui atu, “He aha tēnei?”
LUK 18:37 Ka mea rātou ki a ia, “Ko Īhu o Nahareta e haere ana.”
LUK 18:38 Kātahi ia ka karanga, ka mea, “E Īhu, e te Tama a Rāwiri, kia aroha ki ahau.”
LUK 18:39 Nā, ka rīria ia e te hunga i haere i mua kia noho puku; heoi rahi noa ake tāna karanga, “E te Tama a Rāwiri, kia aroha ki ahau.”
LUK 18:40 Nā, ka tū a Īhu, ka mea kia ārahina mai ki a ia; ā, nō ka tata, ka ui ki a ia,
LUK 18:41 ka mea, “Kia ahatia koe e ahau?” Ka mea ia, “E te Ariki, kia titiro ahau.”
LUK 18:42 Ka mea a Īhu ki a ia, “Titiro; nā tōu whakapono koe i whakaora.”
LUK 18:43 Ā, titiro tonu ake ia, ā, aru ana i a ia, me te whakakorōria i te Atua; ā, nō te kitenga o te iwi katoa, ka whakamoemiti ki te Atua.
LUK 19:1 Ā, ka tomo ia, ā, tika ana rā waenganui o Heriko.
LUK 19:2 Nā, ko tētahi tangata, ko Hakiaha te ingoa i huaina ai, he rangatira pupirikana, he tangata taonga anō.
LUK 19:3 I whai ia kia kite i a Īhu he pēhea rānei ia; heoi, kīhai i taea e ia i te mano, he tangata poto hoki.
LUK 19:4 Nā, ka oma ia ki mua, ā, kake ana ki tētahi hikamora, kia kite i a ia, meāke hoki ia tika rā reira.
LUK 19:5 Ā, nō ka tae a Īhu ki taua wāhi, ka titiro ake, ka mea ki a ia, “E Hakiaha, kia hohoro te heke iho; me noho hoki ahau ki tōu whare āianei.”
LUK 19:6 Ā, hohoro tonu tōna heke iho, ā, ka koa ki a ia hei manuhiri māna.
LUK 19:7 Ā, i tō rātou kitenga, ka amuamu katoa, ka mea, “Kua riro ia ki te tangata hara noho ai.”
LUK 19:8 Nā, ka tū a Hakiaha, ka mea ki te Ariki, “E te Ariki, nā, e hoatu ana e ahau te hāwhe o āku taonga ki te hunga rawakore, ā, ki te mea kua riro hē mai i ahau te mea a tētahi, ka takiwhātia e ahau tāku utu.”
LUK 19:9 Nā, ko te meatanga a Īhu ki a ia, “Nō nāianei te ora i tae mai ai ki tēnei whare, he tama nei hoki ia nā Āperahama.
LUK 19:10 I haere mai hoki te Tama a te tangata ki te rapu, ki te whakaora i te mea i ngaro.”
LUK 19:11 Ā, i a rātou e whakarongo ana ki ēnei mea ka kōrerotia anō e ia tētahi kupu whakarite, nō te mea e tata ana ia ki Hiruhārama, e mea ana hoki rātou, ko taua wā pū anō whakakitea ai te rangatiratanga o te Atua.
LUK 19:12 Nā reira ia ka mea, “I haere tētahi rangatira nui ki tētahi whenua mamao, kia riro mai i a ia tētahi rangatiratanga, ka hoki mai ai.
LUK 19:13 Kotahi tekau āna pononga i karangatia e ia, kotahi tekau ngā pāuna i hoatu e ia ki a rātou, ka mea ki a rātou, ‘Mahia ēnei, kia hoki mai rā anō ahau.’
LUK 19:14 “Otirā, i kino tōna iwi ki a ia, ka tono karere i muri i a ia, ka mea, ‘E kore mātou e pai ki tēnei hei kīngi mō mātou.’
LUK 19:15 “Ā, i tōna hokinga mai, kua riro mai hoki i a ia te rangatiratanga, ka mea kia karangatia ki a ia aua pononga, i hoatu nei e ia te moni ki a rātou, kia kite ai ia i tā tētahi, i tā tētahi i mahi ai.
LUK 19:16 Ka tae mai tō mua, ka mea, ‘E te ariki, ka ngahuru ngā pāuna kua mahia ki tāu pāuna.’
LUK 19:17 Ka mea ia ki a ia, ‘Ka pai, e te pononga pai; pono tonu tāu mahi i te mea nohinohi rawa, nā, hei rangatira koe mō ngā pā kotahi tekau.’
LUK 19:18 “Ā, ko te haerenga mai o te tuarua, ka mea, ‘E te ariki, e rima ngā pāuna kua mahia ki tāu pāuna.’
LUK 19:19 Ka mea ia ki tēnei, ‘Hei rangatira anō koe mō ngā pā e rima.’
LUK 19:20 “Nā, ko te haerenga mai o tētahi, ka mea, ‘E te ariki, nā, tāu pāuna, i te rongoā hoki i ahau i roto i te tauera.
LUK 19:21 I mataku hoki ahau i a koe, nō te mea he tangata uaua koe; e tango ana koe i te mea kīhai i whakatakotoria iho e koe, e kokoti ana i te mea kīhai i ruia e koe.’
LUK 19:22 “Nā, ko tāna meatanga ki a ia, ‘Kei tā tōu māngai he whakahēanga māku i a koe, e te pononga kino. I mōhio koe he tangata uaua ahau, e tango ana i te mea kīhai i whakatakotoria e ahau, e kokoti ana i te mea kīhai i ruia e ahau.
LUK 19:23 He aha koe tē hoatu ai i tāku moni ki te pēke, pēnei kua riro mai taua mea i ahau, me ōna hua anō, i tōku taenga mai?’
LUK 19:24 “Nā, ka mea ia ki te hunga e tū tata ana, ‘Tangohia te pāuna i a ia, hoatu hoki ki tērā i ngā pāuna kotahi tekau.’
LUK 19:25 “Ka mea rātou ki a ia, ‘E te ariki kotahi nei tekau āna pāuna.’
LUK 19:26 “Ko tāku kupu hoki tēnei ki a koutou, ‘Ki te whai mea tētahi, ka hoatu anō ki a ia; ki te kāhore he mea a tētahi, ko āna mea ake ka tangohia i a ia.
LUK 19:27 Tēnā ko aua hoariri ōku kīhai nei i pai ki ahau hei kīngi mō rātou, ārahina mai ki konei, ka patu ki tōku aroaro!’ ”
LUK 19:28 Ā, nō ka mutu ēnei kōrero, ka tūria atu e ia ki mua, ka haere ki Hiruhārama.
LUK 19:29 Ā, nō ka tata ia ki Petapaki, ki Petani, ki te maunga e kīia nei ko tō ngā Ōriwa, nā, tokorua āna ākonga i tonoa e ia.
LUK 19:30 I mea ia, “Haere kōrua ki te kāinga e anga mai ana ki a kōrua; ā, nō ka tomo atu, ka kite kōrua i tētahi kūao kāihe e here ana, he mea kāhore anō i nohoia noatia e te tangata. Wetekina, ārahina mai.
LUK 19:31 Ki te mea hoki tētahi, ki a kōrua, ‘He aha i wetekina ai e kōrua?’ Kia pēnei tā kōrua kī atu, ‘E mea ana te Ariki ki a ia mōna.’ ”
LUK 19:32 Nā, haere atu ana te hunga i tonoa, rokohanga atu, rite tonu ki tāna i kōrero ai ki a rāua.
LUK 19:33 Nā, i a rāua e wewete ana i te kūao, ka mea ōna rangatira ki a rāua “He aha kōrua ka wewete ai i te kūao nā?”
LUK 19:34 Nā, ko tā rāua meatanga atu, “E mea ana te Ariki ki a ia mōna.”
LUK 19:35 Nā, ka ārahina ia ki a Īhu; ā, pangā iho e rāua ō rāua kākahu ki runga ki te kūao, whakanohoia ana a Īhu ki runga.
LUK 19:36 Ā, i a ia e haere ana, ka whārikitia ō rātou kākahu ki te huarahi.
LUK 19:37 Ā, i a ia e whakatata ana ki te heketanga o Maunga Ōriwa, ka koa te huihui katoa o ngā ākonga, ka anga, ka whakamoemiti ki te Atua, he nui hoki te reo, mō ngā merekara katoa i kite ai rātou;
LUK 19:38 ka mea, “Ka whakapaingia te Kīngi e haere mai ana i runga i te ingoa o te Ariki! He rongo mau ki runga ki te rangi, he korōria ki runga rawa!”
LUK 19:39 Nā, ka mea ētahi o ngā Parihi i roto i te mano ki a ia, “E te Kaiwhakaako, rīria āu ākonga!”
LUK 19:40 Nā, ka whakahoki ia, ka mea, “Ko tāku kupu tēnei ki a koutou, me i noho puku ēnei, kua karanga ake ngā kāmaka.”
LUK 19:41 Ā, nō ka tata ia, ka kite i te pā, ka tangihia e ia.
LUK 19:42 Ka mea ia, “Me i mōhio koe, ā, koe anō, ahakoa i tēnei rā nei anō ōu, ki ngā mea e mau ai tōu rongo! Ko tēnei kua huna atu i ōu kanohi.
LUK 19:43 Tērā hoki e tae mai ngā rā ki a koe, e hangā ai e ōu hoariri he parepare mōu ā taka noa, ā, ka karapotia koe, ka kōpania hoki i ngā taha katoa.
LUK 19:44 Ā, ka whakahoroa koe ki raro, me āu tamariki i roto i a koe. E kore anō e waiho tētahi kāmaka i runga i tētahi kāmaka i roto i a koe, nō te mea kīhai koe i mātau ki te wā i tirohia ai koe!”
LUK 19:45 Ā, ka tomo ia ki te temepara, ka anga, ka pei ki waho i te hunga i reira e hoko ana.
LUK 19:46 Ka mea ki a rātou, “Kua oti te tuhituhi, ‘Ko tōku whare hei whare īnoi,’ ā, kua meinga nei e koutou hei ana mō ngā kaipāhua!”
LUK 19:47 Ā, whakaako ana ia i te temepara i ia rā, i ia rā. Otiia, ka rapu ngā tohunga nui me ngā karaipi me ngā rangatira o te iwi kia whakangaromia ia.
LUK 19:48 Heoi, kīhai i kitea tā rātou e mea ai, nō te mea e ū ana ngā tāngata katoa ki a ia, e whakarongo ana.
LUK 20:1 Ā, i tētahi o aua rā, i a ia e whakaako ana i te iwi i roto i te temepara, e kauwhau ana i te rongopai, ka tae mai ngā tohunga nui, ngā karaipi, me ngā kaumātua ki a ia,
LUK 20:2 ka kōrero ki a ia, ka mea, “Kōrerotia mai ki a mātou te mana i mea ai koe i ēnei mea? Nā wai hoki i hoatu tēnā mana ki a koe?”
LUK 20:3 Ka whakahoki ia, ka mea ki a rātou, “Māku hoki e ui ki a koutou kia kotahi kupu; mā koutou e mea mai ki ahau.
LUK 20:4 Ko te iriiringa a Hoani, nō te rangi rānei, nō te tangata rānei?”
LUK 20:5 Ā, ka kōrero rātou ki a rātou anō, ka mea, “Ki te mea tātou, ‘Nō te rangi,’ ka mea mai ia, ‘Ha, he aha koutou tē whakapono ai ki a ia?’
LUK 20:6 Ā, ki te mea tātou, ‘Nō te tangata,’ ka ākina tātou e te iwi katoa ki te kāmaka, e whakapono ana hoki rātou he poropiti a Hoani.”
LUK 20:7 Nā, ka whakahokia e rātou, “E kore e kitea nō hea rānei.”
LUK 20:8 Nā, ko te meatanga a Īhu ki a rātou, “E kore anō e kōrerotia e ahau ki a koutou te mana i mea ai ahau i ēnei mea.”
LUK 20:9 Nā, ka anga ia, ka kōrero i tēnei kupu whakarite ki te iwi: “I whakatōkia tētahi māra wāina e tētahi tangata, ā, tukua ana ki ngā kaimahi, ā, haere ana ki tawhiti, ā, maha noa ngā rā.
LUK 20:10 Ā, i te pō i tika ai ka tonoa e ia he pononga ki ngā kaimahi, kia hoatu ai e rātou ki a ia ētahi o ngā hua o te māra wāina; otirā, ka whiua ia e ngā kaimahi, whakahokia kautia ana.
LUK 20:11 Nā, ka tonoa anō e ia tētahi atu pononga; ā, ka whiua anō ia e rātou, ka tūkinotia, whakahokia kautia ana.
LUK 20:12 Nā, ka tonoa anō hoki tētahi e ia, te tuatoru, ā, tukitukia ana ia e rātou, makā ana ki waho.
LUK 20:13 “Nā, ka mea te rangatira o te māra wāina, ‘Me pēhea ahau? Ka tonoa e ahau tāku tama, tāku e aroha nei, tērā pea rātou e hopohopo ki a ia.’
LUK 20:14 “Otirā, nō te kitenga o ngā kaimahi i a ia, ka kōrerorero ki a rātou anō, ka mea, ‘Ko te rangatira tēnei mōna te kāinga, tēnā, tātou ka whakamate i a ia, kia riro mai ai te kāinga i a tātou.’
LUK 20:15 Nā, makā ana ia ki waho o te māra wāina, whakamatea iho. “Nā, ka aha te rangatira o te māra wāina ki a rātou?
LUK 20:16 Ka haere ia, ka whakangaro i aua kaimahi, ka hoatu te māra wāina ki ētahi atu.” Ā, ka rongo rātou, ka mea, “Kauaka!”
LUK 20:17 Ka titiro ia ki a rātou, ka mea, “He aha rā tēnei kua oti nei te tuhituhi, ‘Ko te kōhatu i kapea e ngā kaihanga, kua meinga tēnei hei upoko mō te kokonga’?
LUK 20:18 Nā, ki te hinga tētahi ki runga ki tēnei kōhatu, mongamonga noa; ki te hinga tēnei kōhatu ki runga ki tētahi, ngotangota noa ia, ānō he puehu.”
LUK 20:19 Nā, ka whai ngā tohunga nui me ngā karaipi kia hopukia ia i taua wā anō, ka mataku rātou i te iwi, i mōhio hoki rātou i kōrerotia e ia tēnei kupu whakarite mō rātou.
LUK 20:20 Nā, ka āta tirohia ia e rātou, ka tonoa mai he kaiwhakarongo, anō te āhua kei tō te hunga tika, hei hopu mō tāna kōrero, kia tukua ai ia ki te rangatiratanga, ki te kaha o te kāwana.
LUK 20:21 Ā, ka ui rātou ki a ia, ka mea, “E te Kaiwhakaako, e mōhio ana mātou he tika tāu e kōrero nei, e whakaako nei, e kore anō e manakohia e koe te kanohi tangata, engari e whakaako pono ana koe i te huarahi o te Atua.
LUK 20:22 He mea tika rānei te hoatu takoha e mātou ki a Hīhā, kāhore rānei?”
LUK 20:23 Otirā, i kitea e ia tō rātou hīanga, ā, ka mea ki a rātou, “He aha koutou ka whakamātautau nei i ahau?
LUK 20:24 Kia kite ahau i tētahi pene. Nō wai tōna āhua me te tuhituhinga?” Nā, ka whakahoki rātou, ka mea, “Nō Hīhā.”
LUK 20:25 Kātahi ia ka mea ki a rātou, “Hoatu rāpea ki a Hīhā ngā mea a Hīhā, ki te Atua anō ngā mea a te Atua.”
LUK 20:26 Heoi, kīhai i taea e rātou te hopu i tētahi kōrero āna i te aroaro o te iwi; nā, ka mīharo rātou ki tāna kupu, ā, whakarongo kau ana.
LUK 20:27 Nā, ka tae mai ētahi o ngā Haruki e mea nei kāhore he aranga; ka ui ki a ia,
LUK 20:28 ka mea, “E te Kaiwhakaako, i tuhituhi a Mohi ki a mātou: ‘Ki te mate te tuakana o tētahi tangata, he wahine anō tāna, ā, ka mate urikore ia, me tango te wahine e tōna teina, ka whakatupu uri ai mō tōna tuakana.’
LUK 20:29 Nā, tokowhitu taua whānau; ka tango tō mua i te wahine, ā, mate urikore āna.
LUK 20:30 Nā, ka tango te tuarua i te wahine, ā, ka mate urikore anō ia.
LUK 20:31 Nā, ka tango te tuatoru i a ia; pēnei anō ngā tokowhitu, kāhore ā rātou tamariki i waiho ai, ā, mate iho rātou.
LUK 20:32 Nā, muri iho i te katoa ka mate hoki te wahine.
LUK 20:33 Nā, i te aranga, mā wai o rātou te wahine? He wahine hoki ia nā te tokowhitu.”
LUK 20:34 Ka whakahoki a Īhu, ka mea ki a rātou, “E mārena ana, e hoatu ana ki te mārena, ngā tamariki o tēnei ao.
LUK 20:35 Tēnā, ko te hunga e paingia ana kia whiwhi ki tērā ao, ki te aranga anō i roto i te hunga mate, e kore e mārena, e kore anō e hoatu ki te mārena.
LUK 20:36 E kore anō rātou e āhei kia mate. E rite ana hoki ki ngā anahera, he tama hoki rātou nā te Atua, he tama nā te aranga.
LUK 20:37 Nā, ko te aranga o te hunga mate, kua whakakitea mai tēnā e Mohi i tāna mō te Rākau, i karangatia ai te Ariki ‘Ko te Atua o Āperahama, ko te Atua o Īhaka, ko te Atua o Hākopa.’
LUK 20:38 Nā, ehara ia i te Atua nō te hunga mate, engari nō te hunga ora, e ora katoa ana hoki i roto i a ia.”
LUK 20:39 Nā, ka whakahoki ētahi o ngā karaipi ka mea, “E te Kaiwhakaako, he pai tāu kōrero.”
LUK 20:40 Kīhai hoki rātou i māia ki te ui anō ki a ia i tētahi mea.
LUK 20:41 Nā, ka mea ia ki a rātou, “Nā te aha rātou i mea ai he tama nā Rāwiri a te Karaiti?
LUK 20:42 Kua mea nei a Rāwiri i te pukapuka o Ngā Waiata: ‘I mea te Ariki ki tōku Ariki, “Hei tōku matau koe noho ai,
LUK 20:43 kia meinga rā anō e ahau ōu hoariri hei tūranga waewae mōu.” ’
LUK 20:44 Nā, ka kīia ia e Rāwiri he Ariki, ā, he pēhea i tama ai ki a ia?”
LUK 20:45 Ā, i te iwi katoa e whakarongo ana, ka mea ia ki āna ākonga,
LUK 20:46 “Kia tūpato ki ngā karaipi, ko tā rātou nei e rawe ai ko ngā kākahu roroa ina hāereere rātou, e matenui ana ki ngā ohatanga i ngā kāinga hokohoko, me ngā nohoanga rangatira i ngā whare karakia me ngā nohoanga rangatira i ngā hākari.
LUK 20:47 Pau ake hoki i a rātou ngā whare o ngā pouaru, e īnoi roa ana hoki, he āhua kau. Nui rawa te hē e tau ki a rātou!”
LUK 21:1 Nā, ka titiro ake ia, ka kite i te hunga taonga, e maka ana i ā rātou moni hoatu noa ki te takotoranga moni.
LUK 21:2 Ā, ka kite ia i tētahi pouaru rawakore, e maka ana i ngā moni nonohi rawa e rua ki reira.
LUK 21:3 Nā, ka mea ia, “He pono tāku e mea nei ki a koutou, nui kē tā tēnei pouaru rawakore i maka ai i a rātou katoa.
LUK 21:4 Ko rātou katoa hoki e makā ana ko tētahi wāhi o ā rātou mea hira noa atu ki roto ki ngā moni tuku noa, ko ia o tōna rawakoretanga e maka ana i tōna oranga katoa.”
LUK 21:5 Ā, i ētahi e kōrero ana ki te temepara, ka oti nei te whakapaipai ki ngā kōhatu papai, ki ngā whakahere, ka mea ia,
LUK 21:6 “Nā, ko ēnei mea e kite nei koutou; tērā e tae mai ngā rā e kore ai e toe tētahi kōhatu i runga i tētahi kōhatu; engari ka whakahoroa.”
LUK 21:7 Nā, ka ui rātou ki a ia, ka mea, “E te Kaiwhakaako, ko āhea ēnei mea? He aha hoki te tohu ina tata ēnei mea te puta?”
LUK 21:8 Ā, ka mea ia, “Kia mahara kei māmingatia koutou; he tokomaha hoki e haere mai i runga i tōku ingoa, e mea, ‘Ko ahau ia, kua tata te tāima.’ Nā, kei whai i muri i a rātou.
LUK 21:9 Nā, ka rongo koutou ki ngā taua, ki ngā whakaoho, kaua e mataku. Kua takoto hoki te tikanga mō ēnei mea kia mātua puta mai; taihoa ia te mutunga.”
LUK 21:10 Kātahi ia ka mea ki a rātou, “Ka whakatika tētahi iwi ki tētahi iwi, tētahi rangatiratanga ki tētahi rangatiratanga.
LUK 21:11 Tērā hoki e puta ngā rū nunui, ā, i ngā tini wāhi ka pā te matekai me ngā mate urutā, me ngā mea whakamataku hoki, me ngā tohu nunui o te rangi.
LUK 21:12 “Ā, ko mua ake i ēnei mea katoa pā ai ō rātou ringa ki a koutou, tūkino ai i a koutou, tuku ai i a koutou ki ngā whare whakawā, ki ngā whare herehere, me te ārahi i a koutou ki ngā kīngi, ki ngā kāwana, mō tōku ingoa.
LUK 21:13 Ā, ka waiho ki a koutou hei tohu whakaatu.
LUK 21:14 Nā, whakatatūtia iho ki ō koutou ngākau, kia kaua e whakaaroa wawetia tā koutou kupu e whakahoki atu ai.
LUK 21:15 Māku hoki e hoatu ki a koutou he māngai, he mātauranga, e kore e taea te whakakāhore, te pēhi, e ō koutou hoa whawhai katoa.
LUK 21:16 Ā, ka tukua atu koutou e ngā mātua, e ngā tēina, e ngā whanaunga, e ngā hoa. Ka whakamatea anō ētahi o koutou.
LUK 21:17 Ka kino anō ngā tāngata katoa ki a koutou, he whakaaro ki tōku ingoa.
LUK 21:18 Otiia, e kore e ngaro tētahi makawe o ō koutou upoko.
LUK 21:19 Mā te manawanui e mau ai ō koutou wairua.”
LUK 21:20 “Otirā, ka kite koutou i Hiruhārama e karapotia ana e ngā taua, ko reira koutou mōhio ai, kua tata tōna whakangaromanga.
LUK 21:21 Hei reira kia oma te hunga i Hūria ki ngā maunga; me te hunga i waenganui ōna kia haere atu ki waho, kei haere hoki ki reira te hunga i ngā tuawhenua.
LUK 21:22 Ko ngā rā hoki ēnei o te rapunga utu, e rite ai ngā mea katoa kua oti te tuhituhi.
LUK 21:23 Otirā, auē te mate o te hunga e hapū ana, o ngā mea e whāngai ana ki te ū, i aua rā! E nui hoki te aituā ki te whenua, me te riri ki tēnei iwi.
LUK 21:24 Ā, ka hinga rātou i te mata o te hoari, ka riro pārau ki ngā iwi katoa. Ā, ka takahia Hiruhārama e ngā tauiwi, kia rite rā anō ngā wā o ngā tauiwi.”
LUK 21:25 “Ā, ka whai tohu te rā, te marama, me ngā whetū, ā, ki runga ki te whenua he pāwera nō ngā tauiwi, he tūmatatenga ki te haruru o te moana, o te ngaru.
LUK 21:26 Ka whiti ngā tāngata i te mataku, i te manawapā ki ngā mea e puta mai ana ki te ao, e ngāueue hoki ngā mea kaha o ngā rangi.
LUK 21:27 Ko reira rātou kite ai i te Tama a te tangata e haere mai ana i runga i te kapua, me te kaha, me te korōria nui.
LUK 21:28 Ā, nō ka tīmata ēnei mea te puta, titiro ake, kia ara hoki ō koutou mātenga; ka tata hoki tō koutou whakaoranga.”
LUK 21:29 Nā, ka kōrerotia e ia tētahi kupu whakarite ki a rātou: “Titiro ki te piki, ki ngā rākau katoa.
LUK 21:30 I te mea e pihi ana, nā, ka kite koutou, ka mātau noa ake, kua tata te raumati.
LUK 21:31 Waihoki, ko koutou, ina kite i ēnei mea e puta ana, ka mātau kua tata te rangatiratanga o te Atua.
LUK 21:32 “He pono tāku e mea nei ki a koutou, e kore rawa e pahemo tēnei whakatupuranga, kia puta rā anō ēnei mea katoa.
LUK 21:33 E pahemo te rangi me te whenua; ko āku kupu ia e kore e pahemo.”
LUK 21:34 “Otirā, kia tūpato ki a koutou anō, kei taimaha ō koutou ngākau i te kakai, i te haurangi, i ngā raruraru o te ao, ā, ka puta whakarere mai taua rā, ānō he reti, ki a koutou.
LUK 21:35 Ka puta hoki ki ngā tāngata katoa e noho ana i te mata o te whenua katoa.
LUK 21:36 Mō konei rā kia mataara, i ngā wā katoa kia īnoi tonu, kia paingia ai koutou kia mawhiti i ēnei mea katoa meāke nei puta, kia tū hoki i te aroaro o te Tama a te tangata.”
LUK 21:37 Ā, i ia rā e whakaako ana ia i roto i te temepara, ā, i ia pō e haere ana, ka noho i te maunga e kīia nei ko te Maunga o ngā Ōriwa.
LUK 21:38 Ā, i te atatū ka haere mai ngā tāngata ki a ia ki te temepara, ki te whakarongo ki a ia.
LUK 22:1 Nā, kua tata te Hākari Taro Rēwenakore e kīia nei ko te Kapenga.
LUK 22:2 Ā, ka rapu ngā tohunga nui me ngā karaipi ki te pēhea e whakamate ai rātou i a ia, i mataku hoki rātou i te iwi.
LUK 22:3 Nā, ka uru a Hātana ki a Hūrā, tōna ingoa nei ko Ikariote, ko ia nei tētahi o te tekau mā rua.
LUK 22:4 Ā, ka haere ia, ka kōrero ki ngā tohunga nui, ki ngā rangatira hōia, me pēhea e tukua ai ia e ia ki a rātou.
LUK 22:5 Ā, ka hari rātou, ka whakaae kia hoatu he moni ki a ia.
LUK 22:6 Nā, ka whakaae ia, ka rapu i te wā pai hei tukunga i a ia ki a rātou i te mea e ngaro atu ana te mano.
LUK 22:7 Nā, ka taka mai te rā o te Taro Rēwenakore i tika nei kia patua te Kapenga.
LUK 22:8 Ka tonoa e ia a Pita rāua ko Hoani ka mea, “Tīkina, takā te Kapenga mā tātou, kia kai ai tātou.”
LUK 22:9 Nā, ka mea rāua ki a ia, “Ko hea koe pai ai kia takā e māua?”
LUK 22:10 Ka mea ia ki a rāua “Nā, ka tomo kōrua ki te pā, ka tūtaki he tangata ki a kōrua e mau ana i te kāhaka wai, e aru kōrua i a ia ki te whare e tomo ai ia.
LUK 22:11 Ka kī atu ki te tangata i te whare, ‘E mea ana te Kaiwhakaako ki a koe, “Kei hea te rūma e kai ai mātou ko āku ākonga i te Kapenga?” ’
LUK 22:12 Ā, ka whakaaturia e ia ki a kōrua he rūma nui i runga, oti rawa te whāriki; me taka e kōrua ki reira.”
LUK 22:13 Nā, haere ana rāua, ā, rokohanga atu rite tonu ki tāna i kōrero ai ki a rāua, ā, takā ana e rāua te Kapenga.
LUK 22:14 Ā, ka rite te hāora, ka noho ia, rātou ko ngā āpōtoro kotahi tekau mā rua.
LUK 22:15 Nā, ka mea ia ki a rātou, “Nui atu tōku hiahia kia kai tahi tātou i tēnei Kapenga, i te mea kāhore anō ahau i mate noa.
LUK 22:16 Ko tāku kupu hoki tēnei ki a koutou, e kore ahau e kai i tēnei ā muri ake nei, kia tino rite rā anō i te rangatiratanga o te Atua.”
LUK 22:17 Nā, ka mau ia ki te kapu, ka mutu te whakawhetai, ka mea ia, “Tangohia tēnei, tuwhaina mā koutou,
LUK 22:18 ko tāku kupu hoki tēnei ki a koutou, e kore ahau e inu i te hua o te wāina, kia tae mai rā anō te rangatiratanga o te Atua.”
LUK 22:19 Nā, ka mau ia ki te taro, ka mutu te whakawhetai, ka whawhati, ka hoatu e ia ki a rātou, ka mea, “Ko tōku tinana tēnei e hoatu ana mō koutou; meinga tēnei hei whakamahara ki ahau.”
LUK 22:20 I pērātia anō hoki te kapu, i muri iho i te hapa, ā, i mea ia, “Ko te kawenata hou tēnei kapu i runga i ōku toto e ringihia nei mō koutou.
LUK 22:21 Otirā, tēnei kei ahau nei, kei te tēpu, te ringa o te kaituku i ahau.
LUK 22:22 E haere ana hoki rā te Tama a te tangata, e pērā ana me te mea i whakaritea; otirā, auē mō te tangata e tukua ai ia!”
LUK 22:23 Nā, ka anga rātou, ka rapu ki a rātou anō, mā wai o rātou tēnei e mea.
LUK 22:24 Ā, ka ara anō he tautohe a rātou, ko wai o rātou e meinga ko te tangata tino nui.
LUK 22:25 Nā, ka mea ia ki a rātou, “Ko ngā kīngi o ngā tauiwi e whakarangatira ana ki a rātou; ko te hunga whai mana ki runga i a rātou ka kīia, He hunga atawhai.
LUK 22:26 Otiia, kaua koutou e pērā; engari, kia rite ki tō muri te mea nui o koutou kia rite anō te tino tangata ki te kaimahi.
LUK 22:27 Ko wai hoki te mea nui, ko ia e noho ana ki te kai, ko te kaimahi rānei? Ehara rānei te tangata e noho ana ki te kai? Tēnei rāia ahau i roto i a koutou te rite nei ki te kaimahi.
LUK 22:28 “Otirā, ko koutou te hunga i noho tahi tonu me ahau i ōku whakamātautauranga.
LUK 22:29 Ā, ka whakarite ahau i te rangatiratanga mō koutou, i te pērā me tā tōku Matua i whakarite ai mōku;
LUK 22:30 kia kai ai, kia inu ai koutou ki tāku tēpu i tōku rangatiratanga, ā, ka noho koutou ki runga ki ngā torōna, whakawā ai i ngā iwi kotahi tekau mā rua o Īharaira.”
LUK 22:31 “E Haimona, e Haimona, nā, kua īnoi a Hātana kia riro koe i a ia, kia tātaritia ai koutou e ia, ānō he wīti.
LUK 22:32 Otiia, kua īnoi ahau mōu, kei hemo tōu whakapono, ā, ki te tahuri mai anō koe, whakakahangia ōu tēina.”
LUK 22:33 Nā, ka mea tērā ki a ia, “E te Ariki, e pai ana ahau kia haere hei hoa mōu ki te whare herehere, ki te mate hoki.”
LUK 22:34 Anō rā ko ia, “Tēnei tāku kupu ki a koe, e Pita, e kore te tīkaokao e tangi āianei, ka toru āu whakakāhoretanga i tōu mātau ki ahau.”
LUK 22:35 Ā, ka mea ia ki a rātou, “I tāku tononga i a koutou, kāhore he pēke moni, kāhore he pūtea, kāhore he hū, i hapa rānei koutou i tētahi mea?” Ka mea rātou, “Kāhore.”
LUK 22:36 Anō rā ko ia ki a rātou, “Tēnā ko tēnei, ki te mea he pēke moni tā tētahi, mauria atu, me te pūtea anō; me ia hoki kāhore āna hoari, hokona atu tōna kākahu, ka hoko mai ai i tētahi.
LUK 22:37 Ko tāku kupu hoki tēnei ki a koutou, ko te tikanga tēnei, kia rite i ahau te mea kua oti nei te tuhituhi, arā, ‘Kua huihuia ia ki te hunga hara,’ he tutukitanga hoki tō ngā mea mōku.”
LUK 22:38 Nā, ka mea rātou, “E te Ariki, nā, e rua ēnei hoari.” Ka mea ia ki a rātou, “Kāti anō.”
LUK 22:39 Nā, ka puta atu ia, ka haere ki Maunga Ōriwa, ko tāna hanga hoki tērā; me te aru anō āna ākonga i a ia.
LUK 22:40 Ā, i a ia i taua wāhi, ka mea ia ki a rātou, “Me īnoi kei uru koutou ki te whakamātautauranga.”
LUK 22:41 Nā, ka mawehe atu ia i a rātou, kei tō te taunga kāmaka te matara, ā, ka tuku i ōna turi ka īnoi,
LUK 22:42 ka mea, “E Pā, ki te pai koe, tangohia atu tēnei kapu i ahau; otirā kauaka e waiho i tāku e pai ai, engari i tāu.”
LUK 22:43 Nā, ka puta mai ki a ia tētahi anahera i te rangi, e whakakaha ana i a ia.
LUK 22:44 Ā, i te oke o tōna wairua, ka hōhonu ake tāna īnoi; ko tōna kakawa ka pēnā i te tepe toto e turuturu iho ana ki te whenua.
LUK 22:45 Nā, ka ara ia i te īnoi, ā, ka tae ki āna ākonga, rokohanga atu e moe ana rātou, he ngākau pōuri hoki.
LUK 22:46 Nā, ko tāna meatanga ki a rātou, “He aha koutou ka moe ai? Whakatika ki te īnoi, kei uru koutou ki te whakamātautauranga.”
LUK 22:47 I a ia e kōrero ana, nā, ko te huihuinga tāngata, ā, ko tērā e huaina rā ko Hūrā, ko tētahi o te tekau mā rua, e haere ana i mua i a rātou; ā, ka whakatata ia ki a Īhu ki te kihi i a ia.
LUK 22:48 Anō rā ko Īhu ki a ia, “E Hūrā, he kihi tāu hei tuku mō te Tama a te tangata?”
LUK 22:49 Ā, nō te kitenga o te hunga i tōna taha i ngā mea tērā e tūpono, ka mea rātou, “E te Ariki, me patu rānei e mātou ki te hoari?”
LUK 22:50 Nā, hāua iho e tētahi o rātou te pononga a te tohunga nui, poroa ana tōna taringa matau.
LUK 22:51 Nā, ka oho a Īhu, ka mea, “Kāti rā i tēnei.” Whakapākia ana tōna taringa, nā kua ora.
LUK 22:52 Kātahi a Īhu ka mea ki ngā tohunga nui, ki ngā rangatira o te temepara, ki ngā kaumātua, i haere atu ki a ia, “He tāhae ahau i haere mai ai koutou me ngā hoari, me ngā patu?
LUK 22:53 I ahau e noho ana i a koutou i te temepara i ia rā, i ia rā, kīhai i totoro mai ō koutou ringa ki ahau. Otirā, nō koutou tēnei hāora, ko te kahanga hoki o te pōuri.”
LUK 22:54 Nā, ka hopukina ia e rātou, ka ārahina atu, ā, kawea ana ki roto ki te whare o te tino tohunga. Ko Pita ia i aru mai i tawhiti.
LUK 22:55 Ā, nō ka oti i a rātou he kāpura te tahu ki waenga marae, i a rātou e noho tahi ana, ka noho hoki a Pita i waenganui o rātou.
LUK 22:56 Nā, ka kitea ia e tētahi kōtiro, i a ia e noho ana i te mārama o te kāpura; ā, matatau tonu te titiro ki a ia, ka mea, “I a ia anō hoki tēnei.”
LUK 22:57 Nā, ka whakakāhore ia ki a ia, ka mea, “E kō, kāhore ahau e mōhio ki a ia.”
LUK 22:58 Ā, taro kau iho ka kite tētahi atu i a ia, ka mea, “Nō rātou hoki koe.” Nā, ka mea a Pita, “E mara, kāhore.”
LUK 22:59 Ā, me te mea kotahi te hāora i muri iho, ka tohe anō tētahi atu, ka mea, “He pono i a ia anō hoki tēnei; nō Karirī hoki.”
LUK 22:60 Ā, ka mea a Pita, “E mara, kāhore ahau e mātau ki tāu e mea nā.” Ā, i reira pū anō, i a ia e kōrero ana, ka tangi te tīkaokao.
LUK 22:61 Nā, ka tahuri te Ariki, ka titiro ki a Pita. Ā, ka mahara a Pita ki te kupu a te Ariki, ki tāna meatanga ki a ia, “E kore e tangi te tīkaokao, ka toru āu whakakāhoretanga i ahau.”
LUK 22:62 Nā, haere atu ana a Pita ki waho, ā, nui atu tōna tangi.
LUK 22:63 Nā, ka taunu ngā kaipupuri o Īhu ki a ia, ka whiu i a ia.
LUK 22:64 Ka kōparea ōna kanohi, ā, ka ui rātou ki a ia, ka mea, “Poropiti mai, nā wai koe i papaki?”
LUK 22:65 He maha hoki ērā atu kupu kino i kōrero ai rātou ki a ia.
LUK 22:66 Ā, i te aonga tonutanga o te rā, ka huihui ngā kaumātua o te iwi, ngā tohunga nui, me ngā karaipi, ā, ārahina atu ana ia ki tō rātou rūnanga, ka mea rātou,
LUK 22:67 “Ki te mea ko te Karaiti koe, kōrerotia mai ki a mātou.” Anō rā ko ia ki a rātou, “Ki te kōrerotia e ahau ki a koutou, e kore koutou e whakapono;
LUK 22:68 ki te ui ahau, e kore koutou e whakahoki kupu mai ki ahau.
LUK 22:69 Haere ake nei ka noho te Tama a te tangata ki matau o te kaha o te Atua.”
LUK 22:70 Nā, ka mea rātou katoa, “Ko te Tama rānei koe a te Atua?” Anō rā ko ia ki a rātou, “Kua kōrerotia mai nā e koutou ko ahau ia.”
LUK 22:71 Nā, ka mea rātou, “Hei aha ake he kaiwhakaatu mā tātou? Kua rongo nei hoki tātou i tā tōna māngai.”
LUK 23:1 Kātahi ka whakatika tō rātou huihui katoa, ā, ārahina ana ia ki a Pirato.
LUK 23:2 Nā, ka anga rātou, ka whakapā hē ki a ia, ka mea, “Kua mau i a mātou tēnei tangata e kukume kē ana i te iwi, e mea ana kia kaua e hoatu te takoha ki a Hīhā, e kī ana he kīngi ia, ko te Karaiti.”
LUK 23:3 Nā, ka ui a Pirato ki a ia, ka mea, “Ko koe rānei te kīngi o ngā Hūrai?” Ka whakahoki ia ki a ia, ka mea, “Kua kōrerotia mai nā e koe.”
LUK 23:4 Nā, ko te meatanga a Pirato ki ngā tohunga nui, ki ngā mano, “Kāhore tētahi hē o tēnei tangata i mau i ahau.”
LUK 23:5 Ā, nui atu tā rātou tohe ka mea, “E whakatūtehu ana ia i te iwi, e whakaako ana puta noa i Hūria, tīmata mai i Karirī, ā tae noa mai ki konei.”
LUK 23:6 I te rongonga ia o Pirato ki Karirī, ka ui, “Nō Karirī rānei tēnei tangata?”
LUK 23:7 Ā, i tōna mōhiotanga nō te rangatiratanga ia o Herora, ka tonoa ia ki a Herora, i Hiruhārama hoki ia i aua rā.
LUK 23:8 Nā, i te kitenga o Herora i a Īhu, nui rawa tōna hari, kua roa ia e hiahia ana kia kite i a ia, he maha hoki ngā mea i rangona e ia mōna. Nā, ka tūmanako ia kia kite i tētahi merekara e meinga ana e ia.
LUK 23:9 Nā, he maha ngā kupu i ui ai ia ki a ia; heoi, kāhore kau he kupu i whakahokia e ia.
LUK 23:10 Nā, tū ana ngā tohunga nui me ngā karaipi, kaha rawa hoki tā rātou whakapā hē ki a ia.
LUK 23:11 Nā, ka whākorekore a Herora rātou ko āna hōia ki a ia, ka taunu, ā, ka oti ia te whakakākahu ki te kahu whakapaipai, ka whakahokia atu ki a Pirato.
LUK 23:12 I taua rangi anō ka houhia te rongo a Pirato rāua ko Herora; i mua hoki e mauāhara ana ki a rāua.
LUK 23:13 Nā, ka karangatia e Pirato ngā tohunga nui, ngā rangatira, me te iwi anō,
LUK 23:14 ka mea ia ki a rātou, “Kua kawea mai nei e koutou tēnei tangata ki ahau, me te kī anō kei te kukume kē ia i te iwi; ā, ka oti nei ia te uiui e ahau i tō koutou aroaro, nā, kīhai i mau i ahau tētahi hē o tēnei tangata i roto i ngā mea i whakapāngia nei e koutou ki a ia.
LUK 23:15 Ā, kīhai anō hoki a Herora, nāna ia i whakahoki mai ki a tātou, nā, kāhore āna mahi e tika ai kia mate ia.
LUK 23:16 Nā, me whiu ia e ahau, ka tuku atu ai.”
LUK 23:17 Kua takoto hoki te tikanga kia tukua atu tētahi ki a rātou i te hākari.
LUK 23:18 Nā, ka pānui rātou ki te karanga, ka mea, “Whakamatea tēnei, ko Parapa te tuku mai ki a mātou.”
LUK 23:19 (Ko tēnei hoki i makā ki te whare herehere mō te nananga i nanā ai ia i roto i te pā, mō te patu tangata.)
LUK 23:20 Nā, ka mea atu anō a Pirato, he mea hoki nāna kia tukua a Īhu.
LUK 23:21 Heoi, hāmama ana rātou, mea ana, “Rīpekatia ia, rīpekatia!”
LUK 23:22 Ka mea anō ia ki a rātou, ko te toru o ngā meatanga, “He aha rā te kino i meinga e tēnei tangata? Kāhore anō i mau i ahau tētahi hē ōna e mate ai; māku ia e whiu, ka tuku atu ai.”
LUK 23:23 Otirā, nui atu ō rātou reo ki te tohe e tono ana kia rīpekatia ia. Ā, riro rawa i tā ō rātou reo.
LUK 23:24 Nā, ka whakaōtia e Pirato kia waiho i tā rātou i tono ai.
LUK 23:25 Nā, ka tukua anō ki a rātou te tangata i makā ki te whare herehere mō te nananga, mō te patu tangata, tā rātou hoki i tono ai; ko Īhu ia i tukua ki tā rātou i pai ai.
LUK 23:26 Ā, i a rātou e ārahi ana i a ia, ka mau rātou ki tētahi tangata o Hairini, ki a Haimona, e haere mai ana i ngā whenua, ā, utaina ana ki a ia te rīpeka, kia amohia i muri i a Īhu.
LUK 23:27 Nā, he nui te huihuinga o te iwi i aru i a ia, me ngā wāhine hoki e tangi ana, e auē ana ki a ia.
LUK 23:28 Nā, ka tahuri a Īhu ki a rātou, ka mea, “E ngā tamāhine o Hiruhārama, kaua e tangi ki ahau, engari me tangi ki a koutou anō, ki ā koutou tamariki.
LUK 23:29 Tērā hoki e puta ngā rā e mea ai rātou, ‘Koa tonu ngā pākoko, me ngā kōpū kāhore i whānau, me ngā ū kāhore i ngotea.’
LUK 23:30 Ko reira tīmata ai rātou te mea ki ngā maunga, ‘Horo iho ki runga ki a mātou,’ ki ngā pukepuke hoki, ‘Hīpokina mātou.’
LUK 23:31 Ki te meinga hoki ēnei mea e rātou i te rākau e kaimata ana, ko te aha e meatia i te rākau ka maroke?”
LUK 23:32 Nā, tērā atu ētahi tokorua, he hunga mahi kino, e ārahina ngātahitia ana me ia kia whakamatea.
LUK 23:33 Ā, ka tae rātou ki te wāhi e kīia nei ko te Angaanga, ka rīpekatia ia ki reira, me aua kaimahi kino, kotahi ki matau, kotahi ki mauī.
LUK 23:34 Nā, ka mea a Īhu, “E Pā, houhia te rongo ki a rātou; kāhore hoki rātou e mōhio ki tā rātou e mea nei.” Ā, wehewehea ana ōna kākahu e rātou he mea maka ki te rota.
LUK 23:35 Me te tū anō te iwi mātakitaki ai. Ko ngā rangatira hoki ka tāwai ki a ia, ka mea, “Ko ērā atu i whakaorangia e ia, māna anō ia e whakaora, ki te mea ia ko te Karaiti a te Atua, ko tāna i whiriwhiri ai!”
LUK 23:36 Ko ngā hōia ētahi i taunu ki a ia, ka haere mai me te kawe mai he winika ki a ia,
LUK 23:37 ka mea, “Ki te mea ko koe te Kīngi o ngā Hūrai, whakaora i a koe.”
LUK 23:38 Ā, tērā te mea i tuhituhia ki runga ake i a ia, “Ko te Kīngi tēnei o ngā Hūrai.”
LUK 23:39 Nā, ko tētahi o ngā kaimahi kino i whakairia rā i kohukohu ki a ia, i mea, “Ki te mea ko te Karaiti koe, whakaorangia koe, māua hoki.”
LUK 23:40 Nā, ka whakahoki tētahi, ka riri ki a ia, ka mea, “E kore rānei koe e wehi ki te Atua, kei tēnei mate tahi nei hoki koe?
LUK 23:41 Ka tika rāia tō tāua; ka whiwhi hoki tāua ki ngā mea e tika ana mō ā tāua hanga; ko tēnei ia kāhore āna mahi hē.”
LUK 23:42 Nā, ko tāna meatanga ki a Īhu, “E te Ariki, kia mahara koe ki ahau ina haere mai koe i runga i tōu rangatiratanga.”
LUK 23:43 Anō rā ko Īhu ki a ia, “He pono tāku e mea nei ki a koe, ko āianei koe noho ai ki ahau ki Pararaiha.”
LUK 23:44 Nā, kua tata ki te ono o ngā hāora, ā, ka pōuri a runga o te whenua katoa, tae noa ki te iwa o ngā hāora.
LUK 23:45 I pōuri hoki te rā, ā, i wāhia te ārai o te whare tapu i waenganui pū.
LUK 23:46 Ā, nui atu te reo o Īhu ki te karanga; i mea ia, “E Pā, tēnei tōku wairua ka tukua atu nei ki ōu ringa.” Ka mutu ēnei kupu, ka hemo ia.
LUK 23:47 Ā, i te kitenga o te keneturio i taua mea, ka whakakorōria ia i te Atua, ka mea, “He pono he tangata tika tēnei.”
LUK 23:48 Me te hunga katoa hoki i huihui mai ki te mātakitaki, i tō rātou kitenga i aua mea i meatia rā, ka pātuki i ō rātou uma, ā, hoki ana.
LUK 23:49 Ā, ko te hunga katoa i mōhio ki a ia, rātou ko ngā wāhine i aru mai i a ia i Karirī, i tū mai i tawhiti, mātakitaki ai ki ēnei mea.
LUK 23:50 Nā, tērā tētahi tangata, ko Hōhepa te ingoa, he tangata noho rūnanga; he tangata pai, he tangata tika.
LUK 23:51 Kīhai ia i whakaae ki tō rātou whakaaro, ki tā rātou mahi, nō Arimatia ia, nō tētahi pā o ngā Hūrai, ā, he tangata ia e tatari ana ki te rangatiratanga o te Atua.
LUK 23:52 I haere ia ki a Pirato, ā, tonoa ana e ia te tinana o Īhu.
LUK 23:53 Nā, ka tangohia iho e ia taua tinana, ā, takaia ana ki te rīnena, ka waiho ki te rua i hāua ki roto ki te kōhatu, kāhore hoki i takoto noa tētahi tangata ki reira.
LUK 23:54 Nā, ko te rā Takanga hākari ia, ā, meāke pūao te hāpati.
LUK 23:55 I aru anō ngā wāhine i haere tahi mai nei me ia i Karirī, ā, kite ana i te urupā, i te whakatakotoranga anō o tōna tinana.
LUK 23:56 Nā, ka hoki rātou, ka mahi i ngā mea kakara, i ngā hinu. Ā, noho ana i te hāpati, he whakaaro hoki ki te ture.
LUK 24:1 Nā, i te rā tuatahi o te wiki, i te tino ata pō, ka haere mai rātou ki te urupā, me te mau mai i ngā mea kakara kua mahia nei e rātou.
LUK 24:2 Ā, rokohanga atu e rātou kua hurihia te kāmaka i te urupā.
LUK 24:3 Ā, ka tomo rātou ki roto, kīhai i kitea te tinana o te Ariki, o Īhu.
LUK 24:4 Nā, i a rātou e pōkaikaha ana ki tēnei, nā, tū ana ngā tāngata tokorua i ō rātou taha, uira tonu ngā kākahu.
LUK 24:5 Nā, i a rātou e mataku ana, e kūpapa iho ana ō rātou kanohi ki te whenua, ka mea rāua ki a rātou, “He aha koutou ka rapu ai i te tangata ora i roto i te hunga mate?
LUK 24:6 Kāhore ia i konei, engari kua ara. Kia mahara ki tāna i mea ai ki a koutou i a ia anō i Karirī,
LUK 24:7 ki tāna meatanga, ‘Kua takoto te tikanga kia tukua te Tama a te tangata ki ngā ringa o te hunga hara, kia rīpekatia, ā, i te toru o ngā rā ka ara.’ ”
LUK 24:8 Nā, ka mahara rātou ki āna kupu,
LUK 24:9 ā, hoki mai ana i te urupā, ka kōrero i ēnei mea katoa ki te tekau mā tahi, ki a rātou ko ērā atu katoa.
LUK 24:10 Nā, ko Meri Makarini rātou ko Hoana, ko Meri whaea o Hēmi, ko ō rātou hoa wāhine, ngā kaikōrero i ēnei mea ki ngā āpōtoro.
LUK 24:11 Ā, ko te āhua o aua kupu ki tā rātou whakaaro he mea tito noa; kīhai i whakaponohia e rātou.
LUK 24:12 Kātahi ka whakatika a Pita, ka oma ki te urupā. Ā, ko tōna pikonga iho ka kite, ko ngā kākahu tākai anake e takoto ana; ā, hoki ana ki tōna whare me te mīharo anō i roto i a ia ki taua mea i meatia.
LUK 24:13 Nā, tokorua o rātou e haere ana i taua rā ki tētahi kāinga, e ono tekau pāronga te matara i Hiruhārama, ko Emāuha te ingoa.
LUK 24:14 E kōrerorero ana hoki rāua tētahi ki tētahi ki ēnei mea katoa i meinga.
LUK 24:15 Ā, i a rāua e kōrerorero ana, e uiui ana ki a rāua, nā ko Īhu, ko ia tonu, kua whakatata, ā, haere tahi ana me rāua.
LUK 24:16 I puritia hoki ō rāua kanohi, i kore ai rāua e mōhio ki a ia.
LUK 24:17 Nā, ka mea ia ki a rāua, “He aha ēnei kupu e kōrero nei kōrua ki a kōrua, i a kōrua e haere nei?” Nā, ka tū rāua, kīhai i korikori, me te āhua pōuri.
LUK 24:18 Nā, ka whakahoki tētahi, ko Kereopa te ingoa, ka mea ki a ia, “I Hiruhārama koe e noho ana, ā, ko koe anake kāhore i mōhio ki ngā mea kua meinga nei ki reira i ēnei rā?”
LUK 24:19 Ka mea ia ki a rāua, “Ki ēhea mea?” Ka mea rāua ki a ia, “Ki ngā mea o Īhu o Nahareta, he poropiti hoki ia, he kaha tāna mahi, tāna kupu, i te aroaro o te Atua, o te iwi katoa.
LUK 24:20 Ki tōna hoatutanga e ngā tohunga nui, e ō mātou rangatira hoki kia tukua ki te mate, ā, rīpekatia ana ia.
LUK 24:21 I tūmanako anō mātou ki a ia, māna e whakaora a Īharaira. Nā, i te taha o ēnei mea katoa, ko te toru tēnei o ngā rā i meinga ai ēnei mea.
LUK 24:22 Ā, mīharo noa iho mātou ki ētahi wāhine o mātou, i haere i te atatū ki te urupā;
LUK 24:23 heoi, i te korenga i kitea e rātou tōna tinana, ka hoki mai, ka mea, i kitea anō e rātou he putanga anahera, e kī ana mai kei te ora ia.
LUK 24:24 Nā, ka haere atu ētahi o ō māua hoa ki te urupā, ā, rokohanga atu, rite tonu ki tā ngā wāhine i kōrero ai; otirā, kīhai ia i kitea.”
LUK 24:25 Nā, ko tāna meatanga ki a rāua, “E te hunga whakaarokore, ngākau pūhoi ki te whakapono ki ngā mea katoa i kōrero ai ngā poropiti.
LUK 24:26 Kāhore ianei i takoto te tikanga kia pā ēnei mea ki a te Karaiti, kia tomo ia ki tōna korōria?”
LUK 24:27 Nā, ka tīmata ia ki tā Mohi, ki tā ngā poropiti katoa, whakaaturia ana ki a rāua ngā mea mōna o ngā karaipiture katoa.
LUK 24:28 Ā, ka tata ki te kāinga i haere ai rāua, nā, ka ahu atu ia, me te mea e haere tonu ana ia.
LUK 24:29 Nā, ka tohe rāua ki a ia, ka mea “E noho ki a māua; kua ahiahi hoki, kua tītaha te rā.” Nā, ka tomo atu ia, ka noho ki a rāua.
LUK 24:30 Ā, i tōna nohoanga iho ki a rāua ki te kai, ka mau ia ki te taro, ka whakapai, ka whawhati, ā, hoatu ana ki a rāua.
LUK 24:31 Nā, kua kite ō rāua kanohi, ā, ka mōhio ki a ia; ā, ngaro whakarere atu ia i a rāua.
LUK 24:32 Ā, ka mea rāua ki a rāua, “Kīhai koia ō tāua ngākau i mumura i roto i a tāua, i a ia e kōrero ana ki a tāua i te ara, e whakaatu ana i ngā karaipiture ki a tāua?”
LUK 24:33 Nā, ka whakatika rāua i taua hāora anō, ā, hoki ana ki Hiruhārama, ā, rokohanga atu kua huihui te tekau mā tahi me ō rātou hoa.
LUK 24:34 E mea ana, “Koia rawa anō! Kua ara te Ariki, kua puta ki a Haimona.”
LUK 24:35 Nā, ka kōrerotia e rāua ngā meatanga i te ara, tō rāua mōhiotanga hoki ki a ia i te whatiwhatinga o te taro.
LUK 24:36 Ā, i a rāua e kōrero ana i ēnei mea, nā tērā ia tū ana i waenganui o rātou, mea ana ki a rātou, “Kia tau te rangimārie ki a koutou.”
LUK 24:37 Otirā, koera ana rātou, wehi ana; i mahara hoki he wairua tā rātou i kite ai.
LUK 24:38 Nā, ko tāna meatanga ki a rātou, “He aha koutou ka pororaru ai? Nā te aha hoki i puta ake ai ngā whakaaroaronga i roto i ō koutou ngākau?
LUK 24:39 Tirohia ōku ringa me ōku waewae, ko ahau tonu tēnei; whāwhākia ahau, kia kite ai koutou; kāhore hoki o te wairua kikokiko, wheua rānei, pēnei i ōku e kitea mai nā e koutou.”
LUK 24:40 Ā, nō ka kōrerotia e ia tēnei, ka whakakitea e ia ki a rātou ōna ringa me ōna waewae.
LUK 24:41 Ā, i a rātou kāhore nei i whakapono i te hari, e mīharo ana hoki, ka mea ia ki a rātou, “He kai rānei tā koutou kei konei?”
LUK 24:42 Nā, ka hoatu e rātou ki a ia tētahi ika, he mea tunutunu.
LUK 24:43 Nā, ka tango ia, ā, kainga ana e ia i tō rātou aroaro.
LUK 24:44 I mea anō ia ki a rātou, “Ko ngā kupu ēnei i kōrero ai ahau ki a koutou, i ahau anō i a koutou, me whakarite ngā mea katoa kua oti te tuhituhi i roto i te ture a Mohi, i ngā poropiti, i ngā waiata, mōku.”
LUK 24:45 Kātahi ia ka whakamakoha i ō rātou hinengaro, kia mātau ai ki ngā karaipiture,
LUK 24:46 ka mea ki a rātou, “Ko te mea tēnei i tuhituhia: ko te tikanga anō tēnei, ko te Karaiti kia whakamamaetia, kia ara anō i te hunga mate i te toru o ngā rā;
LUK 24:47 kia kauwhautia hoki te rīpenetā me te murunga hara i runga i tōna ingoa ki ngā tauiwi katoa, ki Hiruhārama tīmata ai.
LUK 24:48 Nā, ko koutou hei kaiwhakaatu mō ēnei mea.
LUK 24:49 Nanā, māku e tuku ki a koutou te mea i kōrerotia i mua e tōku Matua; otiia, e noho koutou ki te pā, ki Hiruhārama, kia whiwhi rā anō ki te kaha i runga.”
LUK 24:50 Nā, ārahina ana rātou e ia ki waho, ki Petani, nā, kua ara ōna ringa, whakapaingia ana rātou e ia.
LUK 24:51 Ā, i a ia e whakapai ana i a rātou, ka mawehe atu ia i a rātou, kāhakina atu ana ki te rangi.
LUK 24:52 Nā, ka koropiko rātou ki a ia, ā, hoki ana ki Hiruhārama, he nui hoki te koa.
LUK 24:53 Ā, noho tonu ai rātou i te temepara, me te whakapai ki te Atua. Āmine.
JOH 1:1 I te tīmatanga te Kupu, i te Atua te Kupu, ko te Atua anō te Kupu.
JOH 1:2 I te Atua anō tēnei Kupu i te tīmatanga.
JOH 1:3 Nāna ngā mea katoa i hanga; kāhore hoki tētahi mea i kore te hanga e ia o ngā mea i hangā.
JOH 1:4 I a ia te ora; ko te ora te mārama mō ngā tāngata.
JOH 1:5 I roto i te pōuri te mārama e whiti ana; heoi, kīhai i mau i te pōuri.
JOH 1:6 I tonoa mai he tangata e te Atua, ko Hoani tōna ingoa.
JOH 1:7 I haere mai ia hei kaiwhakaatu, hei whakaatu mō te mārama, kia meinga ai e ia ngā tāngata katoa kia whakapono.
JOH 1:8 Ehara ia i te mārama, engari, i haere mai hei kaiwhakaatu mō te mārama.
JOH 1:9 Ko te mārama pono tērā, arā, ko te mārama e mārama ai ngā tāngata katoa e haere mai ana ki te ao.
JOH 1:10 I te ao ia, i hangā anō e ia te ao, ā, kīhai te ao i mōhio ki a ia.
JOH 1:11 I haere mai ia ki ōna, ā, kīhai ōna i manako ki a ia.
JOH 1:12 Tēnā ko te hunga i manako ki a ia i tukua e ia ki a rātou ngā tikanga e meinga ai rātou hei tamariki mā te Atua, arā ki te hunga e whakapono ana ki tōna ingoa.
JOH 1:13 Ki te hunga ehara nei i te toto, ehara i tā te kikokiko i pai ai, ehara i tā te tangata i pai ai, engari, nā te Atua i whānau ai.
JOH 1:14 I whakakikokikotia te Kupu, ā, noho ana i a mātou, i kite anō mātou i tōna korōria he korōria e rite ana ki tō te Tama kotahi a te Matua, kī tonu i te aroha noa, i te pono.
JOH 1:15 I kōrerotia ia e Hoani; i karanga tērā, i mea, “Ko ia tēnei i kōrerotia rā e ahau, ‘Ko ia e haere mai ana i muri i ahau e meinga ana ki mua i ahau; nō mua hoki ia i ahau.’ ”
JOH 1:16 Kua riro hoki i a tātou katoa tētahi wāhi o tōna raneatanga, te aroha noa hono iho ki te aroha noa.
JOH 1:17 Nā Mohi hoki i hōmai te ture; ko te aroha noa me te pono i ahu mai i a Īhu Karaiti.
JOH 1:18 Kāhore anō he tangata i kite noa i te Atua; ko te Tama kotahi, kei te uma nei o te Matua, nāna ia i whakapuaki.
JOH 1:19 Nā, ko te kōrero tēnei a Hoani, i te tononga mai a ngā Hūrai i Hiruhārama i ngā tohunga nui rātou ko ngā Rīwaiti hei ui ki a ia, “Ko wai koe?”
JOH 1:20 Nā, ka whākina e ia, kīhai i whakakāhore, i whāki hoki, “Ehara ahau i a te Karaiti.”
JOH 1:21 Ā, ka ui rātou ki a ia, “Tēnā, pēhea? Ko Irāia koe?” Ka mea ia, “Kāhore.” “Ko te poropiti oti koe?” Ka whakahokia e ia, “Kāhore.”
JOH 1:22 Nā, ka mea rātou ki a ia, “Ko wai koia koe? Hei kupu whakahoki mā mātou ki te hunga i tonoa mai ai mātou. E pēhea ana koe ki a koe?”
JOH 1:23 Ka mea ia: “He reo ahau nō tētahi e karanga ana i te koraha, ‘Whakatikaia te huarahi o te Ariki!’ ” He pērā me tā Ihāia poropiti i mea ai.
JOH 1:24 Nō ngā Parihi hoki te hunga i tonoa mai rā.
JOH 1:25 Nā, ka ui rātou ki a ia, ka mea ki a ia, “He aha oti koe i iriiri ai, ki te mea ehara koe i a te Karaiti, ehara i a Irāia, ehara i te poropiti?”
JOH 1:26 Nā, ka whakahoki a Hoani ki a rātou, ka mea, “He iriiri tāku ki te wai; otiia tēnā te tū nā i waenganui i a koutou tētahi kāhore e mōhiotia e koutou.
JOH 1:27 Ko ia tēnei e haere mai ana i muri i ahau kāhore hoki ahau e tau hei wewete i te here o tōna hū.”
JOH 1:28 I meatia ēnei mea ki Petapara, ki tāwāhi atu o Horano, ki te wāhi e iriiri ana a Hoani.
JOH 1:29 I te aonga ake, ka kite ia i a Īhu e haere ana mai ki a ia, ka mea, “Nā te Reme a te Atua, hei waha atu i te hara o te ao!
JOH 1:30 Ko ia tēnei i kōrero ai ahau, ‘Kei te haere mai i muri i ahau tētahi tangata kua meinga ki mua i ahau; nō mua hoki ia i ahau.’
JOH 1:31 Ā, kāhore ahau i mātau ki a ia; heoi, hei whakakite i a ia ki a Īharaira, i haere mai ai ahau me tāku iriiri ki te wai.”
JOH 1:32 Nā, ka whakaatu a Hoani, ka mea, “I kite ahau i te Wairua e heke iho ana i te rangi, ānō he kūkupa, ā, noho ana i runga i a ia.
JOH 1:33 Ā, kāhore ahau i mātau ki a ia; engari i kī mai ki ahau te kaitono mai i ahau ki te iriiri ki te wai, ‘Ko te tangata e kite ai koe i te Wairua e heke iho ana, e noho ana ki runga ki a ia, ko ia tēnā te kaiiriiri ki te Wairua Tapu.’
JOH 1:34 Ā, kua kite ahau, kua whakaatu nei hoki, ko te Tama tēnei a te Atua.”
JOH 1:35 I te aonga ake i te tū anō a Hoani me āna ākonga tokorua;
JOH 1:36 nā, ka titiro ia ki a Īhu e haere ana, ka mea, “Nā, te Reme a te Atua!”
JOH 1:37 Ā, ka rongo ngā ākonga tokorua ki a ia e kōrero ana, ā, aru ana rāua i a Īhu.
JOH 1:38 Ā, ka tahuri a Īhu, ka kite i a rāua e aru ana, ka mea ia ki a rāua “E rapu ana kōrua i te aha?” Nā, ko tā rāua meatanga ki a ia, “E Rapi” (ko te tikanga tēnei ina whakamāoritia, e te Kaiwhakaako), “kei hea tōu kāinga?”
JOH 1:39 Ka mea ia ki a rāua, “Haere mai kia kite.” Haere ana rāua, ā, ka kite i tōna wāhi i noho ai, ā, noho ana i a ia i taua rā; ko te tekau hoki ia o ngā hāora.
JOH 1:40 Ko Anaru, teina o Haimona Pita tētahi o taua tokorua i rongo nei ki a Hoani e kōrero ana, ā, aru ana i a ia.
JOH 1:41 Ko ia kua kite wawe i tōna tuakana ake, i a Haimona, ka mea ki a ia, “Kua kitea e māua te Mīhaia.” (Ko te tikanga tēnei ina whakamāoritia, ko te Karaiti).
JOH 1:42 Nā, ka ārahina mai ia e ia ki a Īhu. Ā, ka titiro a Īhu ki a ia, ka mea, “Ko Haimona koe, ko te tama a Hona, me hua koe ko Kipa.” (Tōna whakamāoritanga ko Pita, arā ko Kōhatu).
JOH 1:43 I te aonga ake ka mea a Īhu kia haere ki Karirī, ā, ka kite i a Piripi; ā, ka mea a Īhu ki a ia, “E aru i ahau.”
JOH 1:44 Nā, ko Piripi nō Petahaira, nō te pā o Anaru rāua ko Pita.
JOH 1:45 Ka kite a Piripi i a Natanahira, ka mea ki a ia, “Kua kitea e mātou a ia, mōna nei te tuhituhi a Mohi i roto i te ture, tā ngā poropiti hoki, a Īhu o Nahareta te tama a Hōhepa.”
JOH 1:46 Nā, ka mea a Natanahira ki a ia, “E puta koia tētahi mea pai i Nahareta?” Ka mea a Piripi ki a ia, “Haere mai kia kite.”
JOH 1:47 Ka kite a Īhu i a Natanahira e haere ana mai ki a ia, ka puaki tāna kupu mōna, “Nā, he tino tangata nō Īharaira, kāhore ōna tinihanga.”
JOH 1:48 Ka mea a Natanahira ki a ia, “Nō hea koe i mātau ai ki ahau?” Ka whakahoki a Īhu ki a ia, ka mea, “I te mea kīanō koe i karangatia e Piripi, i a koe anō i raro i te piki, i kite ahau i a koe.”
JOH 1:49 Nā, ka whakahoki a Natanahira, ka mea ki a ia, “E Rapi, ko te Tama koe a te Atua, ko te Kīngi koe o Īharaira!”
JOH 1:50 Nā, ka whakahoki a Īhu, ka mea ki a ia, “Nō tāku meatanga ki a koe, ‘I kite ahau i a koe i raro i te piki,’ i whakapono ai koe? Rahi atu i ēnei ngā mea e kitea e koe.”
JOH 1:51 I mea anō ia ki a ia, “He pono, he pono tēnei kupu āku ki a koutou, tērā koutou e kite i te rangi e tuwhera ana, i ngā anahera a te Atua e piki ake ana, e heke iho ana ki te Tama a te tangata.”
JOH 2:1 Nā, i te toru o ngā rā he mārena i Kana o Karirī, ā, i reira te whaea o Īhu.
JOH 2:2 I karangatia anō a Īhu rātou ko āna ākonga ki te mārena.
JOH 2:3 Ā, i te paunga o te wāina, ka mea te whaea o Īhu ki a ia, “Kāhore ā rātou wāina.”
JOH 2:4 Ka mea a Īhu ki a ia, “E tai, he aha tāku ki a koe? Kāhore anō kia taea noatia tōku hāora.”
JOH 2:5 Ka mea tōna whaea ki ngā kaimahi, “Ko tāna e mea ai ki a koutou, meatia.”
JOH 2:6 Nā, i reira ētahi ipu kōhatu e ono e tū ana, he tikanga nā ngā Hūrai mō te horoi, e rua, e toru ngā mēhua o tētahi, o tētahi, ina kī.
JOH 2:7 Ka mea a Īhu ki a rātou, “Whakakīia ngā ipu ki te wai.” Ā, whakakīia ana e rātou, pūrena noa.
JOH 2:8 Nā, ka mea ia ki a rātou, “Tēnā, utuhia, kawea atu ki te rangatira o te hākari.” Ā, kawea ana e rātou.
JOH 2:9 Ā, nō ka whakamātau te rangatira o te hākari i te wai i whakawāinatia, ā, kīhai i mōhio nō hea rānei (ko ngā pononga ia i utuhia ai te wai i mōhio), ka karanga te rangatira o te hākari ki te tāne mārena hou,
JOH 2:10 ka mea ki a ia, “E whakatakotoria ana e ngā tāngata katoa te wāina pai i te tīmatanga; ā, ka roa te inumanga, mō reira te wāina he iti iho nei te pai ko koe ia, kua tohu i te wāina pai mō nāianei.”
JOH 2:11 I meatia tēnei tīmatanga merekara e Īhu ki Kana o Karirī, i whakakitea e ia tōna korōria; ā, whakapono ana āna ākonga ki a ia.
JOH 2:12 Muri iho i tēnei ka haere iho ia ki Kaperenauma, ā, ia, tōna whaea, ōna tēina, me āna ākonga; ā, kīhai i maha ngā rā i noho ai rātou ki reira.
JOH 2:13 Nā, kua tata te Kapenga o ngā Hūrai, ā, ka haere a Īhu ki Hiruhārama.
JOH 2:14 Nā, rokohanga atu e ia i roto i te temepara e noho ana ngā kaihoko kau, hipi, kūkupa, me ngā kaiwhakawhitiwhiti moni.
JOH 2:15 Ā, ka hangā e ia he whiu ki ngā aho nonohi, ka whiua katoatia e ia ki waho i te temepara, ngā hipi, me ngā kau; ringihia ana hoki te moni a ngā kaiwhakawhitiwhiti moni, turakina ake ngā tēpu.
JOH 2:16 I mea anō ia ki ngā kaihoko kūkupa, “Tangohia atu ēnei i konei; aua te whare o tōku Matua e meinga hei whare hokohoko.”
JOH 2:17 Ā, ka mahara āna ākonga ki te mea i tuhituhia, “Ka pau ahau i te aroha ki tōu whare.”
JOH 2:18 Nā, ka whakahoki ngā Hūrai, ka mea ki a ia, “He aha te tohu e whakakitea ana e koe ki a mātou, inā koe ka mea nei i ēnei mea?”
JOH 2:19 Nā, ka whakahoki a Īhu, ka mea ki a rātou, “Wāwāhia tēnei whare tapu, ā, kia toru ngā rā ka ara anō i ahau.”
JOH 2:20 Anō rā ko ngā Hūrai, “E whā tekau mā ono ngā tau i hangā ai tēnei whare tapu, e oti rānei te hanga e koe i ngā rā e toru?”
JOH 2:21 Otirā, ko te whare tapu o tōna tinana tāna i kōrero ai.
JOH 2:22 Nā reira, i tōna aranga ake i te hunga mate, ka mahara āna ākonga ki tāna kōrerotanga i tēnei; ā, whakapono ana rātou ki te karaipiture, ki te kupu hoki i kōrerotia e Īhu.
JOH 2:23 Nā, i a ia i Hiruhārama, i te Kapenga, i te hākari, he tokomaha i whakapono ki tōna ingoa, i tō rātou kitenga i āna merekara i meatia e ia.
JOH 2:24 Otirā, kīhai a Īhu i tuku atu i a ia ki a rātou, i mōhio hoki ia ki ngā tāngata katoa.
JOH 2:25 Ā, kāhore āna meatanga kia whakaaturia te tangata e tētahi; i mātau hoki ia ki te mea i roto i te tangata.
JOH 3:1 Nā, he tangata tērā nō ngā Parihi, ko Nikorima tōna ingoa, he rangatira nō ngā Hūrai.
JOH 3:2 Ka haere mai tēnei ki a Īhu i te pō, ka mea ki a ia, “E Rapi, e mātau ana mātou i haere mai koe i te Atua hei kaiwhakaako, inā hoki e kore tētahi tangata e āhei te mea i ēnei merekara e meatia nei e koe, ki te kāhore te Atua i a ia.”
JOH 3:3 Ka whakahoki a Īhu, ka mea ki a ia, “He pono, he pono, tāku e mea nei ki a koe, ki te kāhore te tangata e whānau hou, e kore ia e āhei te kite i te rangatiratanga o te Atua.”
JOH 3:4 Ka mea a Nikorima ki a ia, “Me pēhea ka whānau ai te tangata i tōna koroheketanga? E taea rānei te tuarua o ngā haerenga ki roto ki te kōpū o tōna whaea, whānau mai ai?”
JOH 3:5 Ka whakahokia e Īhu, “He pono, he pono tāku e mea nei ki a koe, Ki te kāhore te tangata e whānau i te wai, i te Wairua hoki, e kore ia e āhei te tomo ki te rangatiratanga o te Atua.
JOH 3:6 Ko tā te kikokiko e whānau ai he kikokiko; ko tā te Wairua e whānau ai he wairua.
JOH 3:7 Aua rā e mīharo ki tāku i mea nei ki a koe, ‘He mea tūturu tēnei kia whānau hou koutou.’
JOH 3:8 E pupuhi ana te hau ki tāna wāhi e pai ai, ka rongo hoki koe ki tōna haruru otiia e kore e mōhiotia e koe te wāhi i puta mai ai, e tae atu ai rānei. Ko te ritenga tēnei ki te hunga katoa ka whānau i te Wairua.”
JOH 3:9 Ka whakahoki a Nikorima, ka mea ki a ia, “Me pēhea ka taea ai ēnei mea?”
JOH 3:10 Ka whakahoki a Īhu, ka mea ki a ia, “Ko koe te Kaiwhakaako o Īharaira, ā, kāhore i mātau ki ēnei mea?
JOH 3:11 He pono, he pono tāku e mea nei ki a koe, e kōrerotia ana e mātou tā mātou i mātau ai, e whakaaturia ana tā mātou i kite ai; heoi, e kore koutou e tango ki tā mātou whakaaturanga.
JOH 3:12 Ki te mea kua kōrerotia e ahau ki a koutou ngā mea o te whenua, ā, kāhore koutou e whakapono, me pēhea ka whakapono ai ki te kōrerotia e ahau ki a koutou ngā mea o te rangi?
JOH 3:13 Kāhore hoki he tangata i kake noa ki te rangi, ko ia anake i heke iho i te rangi, arā ko te Tama a te tangata, e noho mai nei i te rangi.
JOH 3:14 “Ka rite hoki ki tā Mohi whakairinga i te nākahi i te koraha, kua takoto te tikanga kia pērā te whakairinga o te Tama a te tangata.
JOH 3:15 Kia kāhore ai e ngaro te tangata e whakapono ana ki a ia, engari kia whiwhi ai ki te ora tonu.
JOH 3:16 “Koia anō te aroha o te Atua ki te ao, hōmai ana e ia tāna Tama kotahi, kia kāhore ai e ngaro te tangata e whakapono ana ki a ia, engari kia whiwhi ai ki te ora tonu.
JOH 3:17 Kīhai hoki te Atua i tono mai i tāna Tama ki te ao ki te whakahē i te ao; engari kia ora ai te ao i a ia.
JOH 3:18 “Ko ia e whakapono ana ki a ia, e kore e tau te hē ki a ia; tēnā ko ia e kore e whakapono, kua whakahēngia noatia ake, mōna kīhai i whakapono ki te ingoa o te Tama kotahi a te Atua.
JOH 3:19 Ko te whakahēnga hoki tēnei, nō te mea kua tae mai nei te mārama ki te ao, ā, nui atu tō ngā tāngata aroha ki te pōuri i tō rātou ki te mārama, he kino hoki nō ā rātou mahi.
JOH 3:20 E kino ana hoki ki te mārama ngā kaimahi katoa i te kino, e kore anō hoki e haere mai ki te mārama, kei whakakitea ā rātou mahi.
JOH 3:21 Tēnā ko te kaimahi i te pono, e haere mai ana ki te mārama, kia kitea ai āna mahi, he mea mahi i roto i te Atua.”
JOH 3:22 Ā, nō muri i ēnei mea ka haere a Īhu, rātou ko āna ākonga, ki te whenua o Hūria; ā, noho tahi ana rātou ki reira, me tāna iriiri anō.
JOH 3:23 Nā, i te iriiri anō hoki a Hoani ki Ēnona, ki tētahi wāhi e tata ana ki Harema, nō te mea he nui te wai o reira; ā, ka haere mai rātou, ka iriiria.
JOH 3:24 Kāhore anō hoki a Hoani i pangā ki te whare herehere.
JOH 3:25 Nā, ka ara he totohe a ngā ākonga a Hoani ki tētahi Hūrai mō te purenga.
JOH 3:26 Ā, ka haere rātou ki a Hoani, ka mea ki a ia, “E Rapi, ko te tangata i tāwāhi nā kōrua o Horano, ko tāu i whakaatu mai nā, nanā, kei te iriiri ia, e haere ana hoki te katoa ki a ia.”
JOH 3:27 Ka whakahoki a Hoani, ka mea, “E kore tētahi mea e riro i te tangata, ki te kore e hōmai ki a ia i te rangi.
JOH 3:28 Ko koutou hei kaiwhakaae ki ahau, ki tāku meatanga, ‘Ehara ahau i a te Karaiti, engari i tonoa mai ahau i mua i a ia.’
JOH 3:29 Ko te tangata i te wahine mārena hou, ko ia te tāne mārena hou. Nā, ko te hoa o te tāne mārena hou, e tū ana, e rongo ana ki a ia, ka hari pū ki te reo o te tāne mārena hou. Nā reira i tutuki ai tēnei hari ōku.
JOH 3:30 Ko te tikanga tēnei, ko ia kia nui haere, ko ahau kia iti haere.”
JOH 3:31 “Ko ia e haere mai ana i runga, kei runga ake ia i te katoa; ko tō te whenua nō te whenua ia, nō te whenua anō āna kōrero. Ko ia e haere mai ana i te rangi, kei runga ake ia i te katoa.
JOH 3:32 Ā, ko tāna i kite ai, i rongo ai, ko ia tāna e whakaatu ai; kāhore hoki tētahi tangata e tango atu ki tāna whakaaturanga.
JOH 3:33 Ki te manako tētahi ki tāna whakaaturanga, kua piri tāna tohu ki te pono o tā te Atua.
JOH 3:34 Ko tā te Atua i tono mai ai, e kōrero ana ia i ngā kupu a te Atua; kāhore hoki te Wairua e hōmai e te Atua i runga i te mēhua.
JOH 3:35 E aroha ana te Matua ki te Tama, kua hoatu anō ngā mea katoa ki tōna ringa.
JOH 3:36 Ko ia e whakapono ana ki te Tama, he ora tonu tōna; ko ia e kore e whakapono ki te Tama, e kore e kite i te ora, engari ka mau tonu te riri a te Atua ki a ia.”
JOH 4:1 Ā, nō ka mōhio te Ariki, kua rongo ngā Parihi, ko ngā ākonga a Īhu i mea ai, i iriiri ai, he tokomaha atu i a Hoani.
JOH 4:2 (He ahakoa rā ehara i a Īhu nāna i iriiri, nā āna ākonga ia.)
JOH 4:3 Ka mahue a Hūria i a ia, ā, hoki ana anō ki Karirī.
JOH 4:4 Nā, ko te ara mōna i tika nā Hamaria.
JOH 4:5 Ā, ka haere ia ki tētahi pā o Hamaria, ko Haika te ingoa, e pātata ana ki te wāhi i hoatu e Hākopa ki tāna tama, ki a Hōhepa.
JOH 4:6 Kei reira hoki te puna a Hākopa. Nā, kua ngenge a Īhu i te haerenga, heoi noho ana ia ki te taha o te puna, ā, meāke ko te ono o ngā hāora.
JOH 4:7 Ka haere mai tētahi wahine o Hamaria ki te utu wai. Ka mea a Īhu ki a ia, “Hōmai he wai mōku.”
JOH 4:8 (Kua riro hoki āna ākonga ki te pā, ki te hoko kai.)
JOH 4:9 Nā, ko te meatanga a te wahine o Hamaria ki a ia, “He aha koe, he Hūrai nā koe, ka tono mai ai i te wai i ahau, he wahine nei ahau nō Hamaria?” (Kāhore hoki e tātata ana ngā Hūrai ki ngā Hamari.)
JOH 4:10 Ka whakahoki a Īhu, ka mea ki a ia, “Me i mātau koe ki tā te Atua e hōmai ai, ki tēnei hoki e mea nei ki a koe, ‘Hōmai he wai mōku,’ pēnei kua tono koe ki a ia, ā, kua hoatu e ia te wai ora ki a koe.”
JOH 4:11 Ka mea te wahine ki a ia, “E kara, kāhore āu mea hei utu wai, he hōhonu anō te puna. Nō hea tēnā wai ora āu?
JOH 4:12 He nui oti koe i tō mātou matua, i a Hākopa, i hōmai ai te puna ki a mātou, inu ana ia i konei, rātou ko āna tamariki, me āna kararehe?”
JOH 4:13 Ka whakahoki a Īhu, ka mea ki a ia, “E mate anō i te wai te tangata e inu ana i tēnei wai;
JOH 4:14 tēnā ko te tangata e inu ana i te wai e hoatu e ahau ki a ia, e kore ia e mate i te wai ā ake ake. Engari, te wai e hoatu e ahau ki a ia, hei puna wai tēnā i roto i a ia e pupū ake ana, ā te ora tonu rā anō.”
JOH 4:15 Ka mea te wahine ki a ia, “E kara, hōmai ki ahau tēnei wai, kei mate ahau i te wai, kei haere mai hoki ki konei rawa utu ai.”
JOH 4:16 Ka mea a Īhu ki a ia, “Tīkina, karangatia tō tahu, ka hoki mai ai.”
JOH 4:17 Ka whakahoki te wahine, ka mea, “Kāhore āku tahu.” Ka mea a Īhu ki a ia, “He kōrero tika tāu, ‘Kāhore āku tahu’;
JOH 4:18 inā hoki kua tokorima āu tahu, ko ia i a koe nei ehara i te tahu nāu. He pono tēnei kōrero āu.”
JOH 4:19 Ka mea te wahine ki a ia, “E kara, e kite ana ahau he poropiti koe.
JOH 4:20 I karakia ō mātou mātua i runga i tēnei maunga; ā, e mea ana koutou, Ko Hiruhārama te wāhi e tika ai te karakia.”
JOH 4:21 Ka mea a Īhu ki a ia, “E tai, whakapono ki ahau, meāke puta te wā, e kore ai koutou e karakia ki te Matua i runga i tēnei maunga, e kore anō i Hiruhārama.
JOH 4:22 Kāhore koutou e mōhio ki tā koutou e karakia nei; e mātau ana mātou ki tā mātou e karakia nei; nō ngā Hūrai nei hoki te ora.
JOH 4:23 Otirā, meāke puta te wā, ā, tēnei anō, e karakia ai ngā kaikarakia pono ki te Matua i runga i te wairua, i te pono; e rapu ana hoki te Matua ki te pērā hei karakia ki a ia.
JOH 4:24 He Wairua te Atua; me karakia hoki ngā kaikarakia ki a ia i runga i te wairua, i te pono.”
JOH 4:25 Ka mea te wahine ki a ia, “E mātau ana ahau kei te haere mai te Mīhaia” (e kīia nei ko te Karaiti) “ka tae mai ia, māna ngā mea katoa e kōrero ki a tātou.”
JOH 4:26 Ka mea a Īhu ki a ia, “Ko ahau anō ia e kōrero nei ki a koe.”
JOH 4:27 Nā, ka puta i reira āna ākonga, ka mīharo ki tāna kōrerotanga ki te wahine; heoi, kīhai tētahi i mea, “He aha tāu e rapu? He aha koe ka kōrero ai ki a ia?”
JOH 4:28 Nā, ka whakarērea e te wahine tāna ipu, ā, haere ana ki te pā, ka mea ki ngā tāngata,
JOH 4:29 “Haere mai, kia kite i te tangata i kōrerotia mai ai ki ahau ngā mea katoa i mea ai ahau. Ehara rānei tēnei i a te Karaiti?”
JOH 4:30 Ka puta rātou ki waho o te pā, ā, ka ahu mai ki a ia.
JOH 4:31 I taua takiwā anō ka tohe ngā ākonga ki a ia, ka mea, “E te Kaiwhakaako, e kai rā.”
JOH 4:32 Otirā, ka mea ia ki a rātou, “He kai anō tāku hei kai māku, kāhore koutou e mātau.”
JOH 4:33 Nā, ka mea ngā ākonga tētahi ki tētahi, “I kawea mai rānei e tētahi he kai māna?”
JOH 4:34 Ka mea a Īhu ki a rātou, “Ko tāku kai tēnei, ko te mea i tā tōku kaitono e pai ai, kia whakaotia hoki tāna mahi.
JOH 4:35 E kore ianei koutou e mea, ‘Kia whā atu ngā marama, ā, ka taea te kotinga?’ Nanā, ko tāku kupu tēnei ki a koutou, kia ara ake ō koutou kanohi, titiro ki ngā māra; kua mā noa ake; ko te kotinga tēnei.
JOH 4:36 Ka whiwhi te kaikokoti ki te utu, ka kohia anō hoki e ia ngā hua mō te ora tonu; kia hari tahi ai te kairui rāua ko te kaikokoti.
JOH 4:37 Nā, konei hoki i pono ai taua kī, ‘E rui ana tētahi, e kokoti ana tētahi.’
JOH 4:38 I tonoa koutou e ahau ki te kokoti i te mea kīhai i mahia e koutou. He tangata kē nāna i mahi, ā, kua uru koutou ki ā rātou mahi.”
JOH 4:39 Ā, he tokomaha ngā Hamari o taua pā i whakapono ki a ia, mō te kī a te wahine i mea rā, “I kōrerotia mai e ia ki ahau ngā mea katoa i mea ai ahau.”
JOH 4:40 Ā, nō ka tae ngā Hamari ki a ia, ka mea kia noho ia ki a rātou; ā, e rua ngā rā i noho ai ia ki reira.
JOH 4:41 Nā, hira noa ake ngā tāngata i whakapono, he mea hoki nā tāna kupu.
JOH 4:42 I mea anō ki te wahine, “Ehara i te mea nā tāu kupu i whakapono ai mātou ināianei; kua rongo nei hoki mātou ake, ā, ka mātau, ko te Karaiti pū tēnei, ko te Kaiwhakaora o te ao.”
JOH 4:43 Ka pahure aua rā e rua, ka tūria atu e ia i reira, ā, haere ana ki Karirī.
JOH 4:44 Ko Īhu tonu hoki nāna te kī, kāhore he hōnore o te poropiti i tōna kāinga ake.
JOH 4:45 Heoi, i tōna taenga ki Karirī, ka whakamanuhiritia, ia e ngā tāngata o Karirī, i kite hoki rātou i ngā mea katoa i meatia e ia ki Hiruhārama i te hākari; i haere hoki rātou ki te hākari.
JOH 4:46 Ā, ka tae anō a Īhu ki Kana o Karirī, ki te wāhi i meatia ai e ia te wai hei wāina. Nā, ko tētahi tangata a te kīngi, kei Kaperenauma tāna tama e mate ana.
JOH 4:47 Ā, nō ka rongo ia kua tae mai a Īhu i Hūria ki Karirī, ka haere ki a ia, ka īnoi ki a ia kia haere ia ki te whakaora i tāna tama; meāke hoki marere.
JOH 4:48 Nā, ko te meatanga a Īhu ki a ia, “Ki te kāhore koutou e kite i ngā tohu, i ngā merekara, e kore rawa koutou e whakapono.”
JOH 4:49 Ka mea te tangata a te kīngi ki a ia, “E te Ariki, haere iho i te mea kāhore anō kia mate noa tāku tamaiti.”
JOH 4:50 Ka mea a Īhu ki a ia, “Haere; kua ora tāu tama.” Nā, whakapono ana te tangata ki te kupu i kōrerotia e Īhu ki a ia, ā, haere ana.
JOH 4:51 Ā, i a ia e haere ana, ka tūtaki āna pononga ki a ia, ka kōrero, “Kua ora tāu tamaiti.”
JOH 4:52 Nā, ka ui ia ki a rātou ki te hāora i mātūtū ake ai ia. Ka mea rātou ki a ia, “Nōnanahi, nō te whitu o ngā hāora, i mutu ai tōna kā.”
JOH 4:53 Nā, ka mōhio te pāpā, ko te tino hāora ia i mea ai a Īhu ki a ia, “Kua ora tāu tama”; ā, whakapono ana ia, rātou ko tōna whare katoa.
JOH 4:54 Ko te rua anō tēnei o ngā merekara i meatia e Īhu, i muri i tōna haerenga i Hūria ki Karirī.
JOH 5:1 Muri iho i ēnei mea he hākari tā ngā Hūrai, ā, haere ana a Īhu ki Hiruhārama.
JOH 5:2 Nā, kei Hiruhārama tētahi wai kaukauranga kei te tatau hipi, tōna ingoa Hiperu ko Petehera; e rima ōna whakamahau.
JOH 5:3 Nā, kei roto i ēnei e takoto ana tōna tini o ngā tūroro, o ngā matapō, o ngā kopa, o ngā memenge, e tatari ana ki te pōkarekarenga o te wai.
JOH 5:4 Heke iho ai hoki tētahi anahera i te wā i rite ai ki te kaukauranga, whakapōkarekare ai i te wai; ā, ko ia kua tae wawe i muri iho o te pōkarekarenga o te wai i ora i tōna mate, ahakoa he aha, he aha.
JOH 5:5 Nā, kei reira tētahi tangata, e toru tekau mā waru ngā tau e mate ana.
JOH 5:6 Nō te kitenga o Īhu i a ia e takoto ana, ka mātau kua roa kē te wā ōna e mate ana, ka mea ki a ia, “E pai ana rānei koe kia whakaorangia?”
JOH 5:7 Ka whakahokia e taua tūroro ki a ia, “E te Ariki, kāhore āku tāngata hei tuku i ahau ki te kaukauranga, ina whakapōkarekarea te wai; heoi, i ahau e haere ana, ka heke iho tētahi i mua i ahau.”
JOH 5:8 Ka mea a Īhu ki a ia, “Whakatika, tangohia ake tōu moenga, haere.”
JOH 5:9 Ā, ora tonu ake taua tangata, ā, tangohia ake ana e ia tōna moenga, haere ana. Ko te hāpati anō taua rā.
JOH 5:10 Nā, ka mea ngā Hūrai ki taua tangata i whakaorangia rā, “Ko te hāpati tēnei; e kore e tika kia mauria e koe tōu moenga.”
JOH 5:11 Ka whakahokia e ia ki a rātou, “Ko te tangata i whakaorangia ai ahau, nāna i mea ki ahau, ‘Tangohia ake tōu moenga, haere.’ ”
JOH 5:12 Nā, ka ui rātou ki a ia, “Ko wai tēnā tangata i mea nā ki a koe, ‘Tangohia ake tōu moenga, haere’?”
JOH 5:13 Otirā, kīhai taua tangata i whakaorangia rā i mōhio ko wai ia; i paheno atu hoki a Īhu, he tokomaha hoki ngā tāngata i taua wāhi.
JOH 5:14 Muri iho i ēnei mea ka kite a Īhu i a ia i roto i te temepara, ka mea ki a ia, “Nā, ka oti nei koe te whakaora. Kāti te hara kei kino rawa iho te mea e pā ki a koe.”
JOH 5:15 Haere ana taua tangata, kōrero ana ki ngā Hūrai, nā Īhu ia i whakaora.
JOH 5:16 Koia ngā Hūrai i whai ai ki te tūkino i a Īhu, mōna i mea i ēnei mea i te hāpati.
JOH 5:17 Nā, ka whakahokia e Īhu ki a rātou, “E mahi ana tōku Matua ā taea noatia tēnei rā; e mahi ana anō ahau.”
JOH 5:18 Koia ngā Hūrai i tino whai rawa ai kia patua ia, ehara hoki i te mea ko tāna takahi anake i te hāpati, engari, mōna i mea ko te Atua tōna Matua ake, i mea he rite ia ki te Atua te nui.
JOH 5:19 Nā, ka whakahoki a Īhu, ka mea ki a rātou, “He pono, he pono tāku e mea nei ki a koutou, e kore e taea e te Tama te mea tētahi mea e ia anake, engari ngā mea e kite ai ia e meatia ana e te Matua; ko tāna hoki e mea ai, e meatia ana hoki e te Tama.
JOH 5:20 E aroha ana hoki te Matua ki te Tama, e whakakitea ana hoki ki a ia ngā mea katoa e mea ai ia; he nui atu i ēnei ngā mahi e whakakitea e ia ki a ia, kia mīharo ai koutou.
JOH 5:21 Ko tā te Matua hoki, he whakaara, he whakaora i ngā tūpāpaku; ka pērā anō te Tama, ka whakaora i āna e pai ai.
JOH 5:22 E kore hoki te Matua e whakawā i tētahi, engari, kua tukua e ia ngā whakawā katoa ki te Tama;
JOH 5:23 kia rite ai te whakahōnore a ngā tāngata katoa i te Tama ki tā rātou whakahōnore i te Matua. Ki te kāhore tētahi e whakahōnore i te Tama, e whakakāhore ana ia i te hōnore mō te Matua nāna nei ia i tono mai.
JOH 5:24 “He pono, he pono tāku e mea atu nei ki a koutou, ko te tangata e rongo ana ki tāku kōrero, e whakapono ana hoki ki tōku kaitono mai, he ora tonu tōna; e kore anō ia e riro ki te whakawā, engari, kua whiti i te mate ki te ora.
JOH 5:25 He pono, he pono tāku e mea nei ki a koutou, meāke puta te wā, ā, tēnei anō ināianei, e rongo ai ngā tūpāpaku i te reo o tā te Atua Tama; ā, ko te hunga e rongo ana ka ora.
JOH 5:26 Tā te mea he ora tō te Matua kei roto i a ia; waihoki kua hōmai e ia ki te Tama, kia whai ora i roto i a ia;
JOH 5:27 ā, kua hōmai anō ki a ia he tikanga mō te whakawā, nō te mea ko ia te Tama a te tangata.
JOH 5:28 “Kaua e mīharo ki tēnei; nō te mea meāke puta te wā, e rongo ai i tōna reo ngā tāngata katoa i roto i ngā urupā,
JOH 5:29 ā, ka puta; ko ngā kaimahi i te pai ki te aranga o te ora; ko ngā kaimahi i te kino ki te aranga o te whakawā.”
JOH 5:30 “E kore e āhei i ahau te mea tētahi mea e ahau anake; rite tonu tāku whakawā ki tāku e rongo ai. He tika hoki tāku whakawā; kāhore hoki ahau e rapu i tāku i pai ai, engari, i tā tōku kaitono i pai ai.”
JOH 5:31 “Mehemea ko ahau hei whakaatu i āku aha, i āku aha, ehara tāku i te whakaatu pono.
JOH 5:32 Tērā atu anō tētahi kaiwhakaatu mōku; e mōhio ana anō ahau he whakaatu pono tāna e whakaatu nei mōku.
JOH 5:33 I tono tāngata koutou ki a Hoani, ā, i whakaaturia e ia te pono.
JOH 5:34 Kāhore ahau e manako ki tā te tangata whakaatu; engari, e kōrerotia ana e ahau ēnei mea kia ora ai koutou.
JOH 5:35 He rama kā tērā, he rama mārama tonu; he wā anō i pai ai koutou kia hari ki tōna mārama.
JOH 5:36 “Otiia, he kaiwhakaatu anō tōku, nui atu i a Hoani. Ko ngā mahi hoki i hōmai e te Matua kia whakaotia e ahau, ko aua mahi e mahia nei e ahau, hei whakaatu mōku, i tonoa mai ahau e te Matua.
JOH 5:37 Nā, ko te Matua nāna nei ahau i tono mai, kua oti ahau te whakaatu e ia. Kāhore anō koutou i rongo noa i tōna reo, kāhore anō i kite i tōna āhua.
JOH 5:38 Kāhore anō hoki i mau tāna kupu i roto i a koutou; inā kāhore anō koutou i whakapono ki tēnei i tonoa mai nei e ia.
JOH 5:39 Whakatakina ai e koutou ngā tikanga o ngā karaipiture; e mea ana hoki koutou kei reira te ora tonu mō koutou; ko ēnei hei kaiwhakaatu mōku.
JOH 5:40 Heoi, kāhore koutou e pai kia haere mai ki ahau, kia whiwhi ai ki te ora.
JOH 5:41 “He korōria tāngata, kāhore ahau e manako atu.
JOH 5:42 Nā, kua mātau ahau ki a koutou, kāhore te aroha o te Atua i roto i a koutou.
JOH 5:43 Kua tae mai nei ahau i runga i te ingoa o tōku Matua, ā, kāhore koutou e manako mai ki ahau; ki te haere mai tētahi i runga i tōna ake ingoa, ka manako koutou ki a ia.
JOH 5:44 Me pēhea koutou ka whakapono ai, ka riro nei i a koutou te korōria e puta ana i a koutou anō, ā, kāhore e rapu i te korōria e puta ana i te Atua kotahi?
JOH 5:45 “Kei mea koutou e kōrerotia tō koutou hē e ahau ki te Matua; tērā te kaikōrero mō tō koutou hē, ko Mohi, ko tā koutou e tūmanako nei.
JOH 5:46 Me i whakapono hoki koutou ki a Mohi, kua whakapono anō ki ahau; ko tāna hoki i tuhituhi ai he mea mōku.
JOH 5:47 Otirā, ki te kāhore koutou e whakapono ki āna i tuhituhi ai, me pēhea ka whakapono ai ki āku kōrero?”
JOH 6:1 Muri iho i ēnei mea ka whiti atu a Īhu i te moana o Karirī, (arā i te moana o Taipiria.)
JOH 6:2 Ā, he rahi te hui i aru i a ia, i kite hoki rātou i āna merekara i mea ai ia ki ngā tūroro.
JOH 6:3 Nā, ka haere a Īhu ki runga i te maunga, ā, noho ana i reira rātou ko āna ākonga.
JOH 6:4 Kua tata hoki te Kapenga, te hākari a ngā Hūrai.
JOH 6:5 Ā, nō te marangatanga ake o ngā kanohi o Īhu, ka kite i te rahi o te hui e haere mai ana ki a ia; ka mea ia ki a Piripi, “Ko hea tātou hoko ai i ētahi taro, kia kai ai ēnei?”
JOH 6:6 I pēnei ai tāna kī hei whakamātau mōna; i mōhio hoki ia ki tāna e mea ai.
JOH 6:7 Ka mea a Piripi ki a ia, “E kore e ranea mā rātou ngā taro o ngā pene e rua rau, kia whiwhi ai tēnei, tēnei o rātou i tētahi wāhi iti.”
JOH 6:8 Ka mea tētahi o āna ākonga ki a ia, a Anaru, teina o Haimona Pita,
JOH 6:9 “He tamaiti tēnei, e rima āna taro pāre, e rua ika nonohi. Heoi, hei aha ēnei mā tēnei ope nui?”
JOH 6:10 Nā, ka mea a Īhu, “Meinga ngā tāngata kia noho.” (He nui hoki te tarutaru i taua wāhi.) Nā, noho ana ngā tāne ki raro, te tokomaha me te mea e rima mano.
JOH 6:11 Nā, ka mau a Īhu ki ngā taro; ā, ka mutu te whakawhetai, ka tuwha atu ki te hunga e noho rā; me ngā ika anō, tā rātou i pai ai.
JOH 6:12 Ā, nō ka mākona rātou, ka mea ia ki āna ākonga, “Kohikohia ngā toenga o ngā whatiwhatinga, kei maumauria tētahi wāhi.”
JOH 6:13 Nā, kohikohia ana e rātou, ā, whakakīia ana ngā kete tekau mā rua ki ngā whatiwhatinga o ngā taro pāre e rima, ki ngā toenga a ngā tāngata i kai rā.
JOH 6:14 Ā, i te kitenga o aua tāngata i te merekara i meatia e Īhu, ka kī rātou, “Ko ia anō tēnei, ko te poropiti e haere mai ana ki te ao.”
JOH 6:15 Nā, ka mahara a Īhu, meāke rātou haere mai ki te tango i a ia, ki te whakakīngi i a ia, nā, maunu ana anō ia ki te maunga, ko ia anake.
JOH 6:16 Ā, nō ka ahiahi, ka haere āna ākonga ki te moana.
JOH 6:17 Nā, ka eke rātou ki te kaipuke, ka whakawhiti ki tāwāhi o te moana, ki Kaperenauma. Ā, kua pōuri noa ake, kāhore anō a Īhu kia tae noa mai ki a rātou.
JOH 6:18 Nā, ko te tūranga o te moana, he nui hoki nō te pūhanga o te hau.
JOH 6:19 Nā, i tō rātou hoenga atu, e rua tekau mā rima, e toru tekau rānei pāronga, ka kite i a Īhu e haere māori ana i runga i te moana, e whakatata ana ki te kaipuke; nā ka mataku rātou.
JOH 6:20 Nā, ka mea ia ki a rātou, “Ko ahau tēnei, aua e wehi.”
JOH 6:21 Nā, ka mea rātou kia eke ia ki te kaipuke; ā, kīhai i aha kua ū te kaipuke ki te wāhi i hoe ai rātou.
JOH 6:22 I te aonga ake, ka mahara te mano e tū ana ki tērā taha o te moana, kāhore he poti kē atu o reira, ko tērā anake i eke ai āna ākonga, kīhai hoki a Īhu i eke tahi rātou ko āna ākonga ki te poti, engari, ko āna ākonga anake i haere.
JOH 6:23 He poti kē rā ia i ū mai i Taipiria ki pahaki atu o te wāhi i kai ai rātou i te taro i tā te Ariki whakawhetainga.
JOH 6:24 Ā, i te kitenga o te mano kāhore a Īhu i reira, kāhore anō hoki āna ākonga, ka eke hoki rātou ki ngā kaipuke, ka rere ki Kaperenauma ki te rapu i a Īhu.
JOH 6:25 Ā, nō tō rātou kitenga i a ia i tāwāhi o te moana, ka mea ki a ia, “E Rapi, nōnahea koe i tae mai ai ki konei?”
JOH 6:26 Ka whakahoki a Īhu ki a rātou, ka mea, “He pono, he pono tāku e mea nei ki a koutou, ehara i te mea he kitenga nō koutou i ngā merekara i rapu ai koutou i ahau, engari, nō te mea i kai koutou i ngā taro, ā, ka mākona.
JOH 6:27 Aua e mahia te kai memeha, engari, te kai e mau tonu ana ā te ora tonu rā anō, ko tā te Tama hoki a te tangata e hoatu ai ki a koutou. Kua oti hoki ia te whai tohu e te Atua, e te Matua.”
JOH 6:28 Nā, ka mea rātou ki a ia, “Me aha mātou e mahi ai i ngā mahi a te Atua?”
JOH 6:29 Ka whakahoki a Īhu, ka mea ki a rātou, “Ko tā te Atua mahi tēnei, kia whakapono koutou ki tāna i tono mai ai.”
JOH 6:30 Nā, ka mea rātou ki a ia, “Ko tēhea tohu te meatia ana e koe kia kite ai mātou, kia whakapono ai ki a koe? Tēnā koa tāu mahi?
JOH 6:31 I kai ō tātou mātua i te mana i te koraha; ko te mea hoki tēnā i tuhituhia, ‘I hōmai e ia he taro i te rangi hei kai mā rātou.’ ”
JOH 6:32 Nā, ko te meatanga a Īhu ki a rātou, “He pono, he pono tāku e mea nei ki a koutou, ehara i a Mohi nāna i hoatu tēnā taro ki a koutou i te rangi. Engari, tēnei te hoatu nei e tōku Matua ki a koutou te taro pono o te rangi.
JOH 6:33 Ko te taro hoki a te Atua ko ia e heke iho ana i te rangi, e hōmai ana i te ora ki te ao.”
JOH 6:34 Nā, ka mea rātou ki a ia, “E te Ariki, hōmai tēnei taro ki a mātou i ngā wā katoa.”
JOH 6:35 Ka mea a Īhu ki a rātou, “Ko ahau te taro o te ora. Ki te haere mai tētahi ki ahau, e kore rawa ia e hiakai; ki te whakapono hoki tētahi ki ahau, e kore rawa ia e matewai.
JOH 6:36 Otirā, i mea anō ahau ki a koutou, kua kite koutou i ahau, ā, kāhore i whakapono.
JOH 6:37 Ko ā te Matua e hōmai ai ki ahau ka haere katoa mai ki ahau; ā, ki te haere mai tētahi ki ahau, e kore rawa e pangā e ahau ki waho,
JOH 6:38 i heke iho hoki ahau i te rangi, ehara i te mea hei mahi i tāku i pai ai, engari, i tā tōku kaitono mai i pai ai.
JOH 6:39 Ko tā te Matua i pai ai, nāna nei ahau i tono mai, koia tēnei, kia kaua e ngaro i ahau tētahi wāhi o ngā mea katoa i hōmai e ia ki ahau; engari, kia whakaarahia ake e ahau ā te rā whakamutunga.
JOH 6:40 Ko tā tōku Matua hoki tēnei i pai ai, ko te tangata e kite ana i te Tama, e whakapono ana anō ki a ia, kia whiwhi ia ki te ora tonu; māku anō ia e whakaara ake ā te rā whakamutunga.”
JOH 6:41 Nā, ka kōrero kōmuhumuhu ngā Hūrai ki a ia, mōna i mea, “Ko ahau te taro i heke iho i te rangi.”
JOH 6:42 Ka mea rātou, “Ehara oti tēnei i a Īhu, tama a Hōhepa, e mōhio nei tātou ki tōna pāpā rāua ko tōna whaea? Ha! He pēhea tāna e kī nei, ‘I heke iho ahau i te rangi’?”
JOH 6:43 Nā, ka whakahoki a Īhu, ka mea ki a rātou, “Kāti te kōmuhumuhu i roto i a koutou.
JOH 6:44 Kāhore he tangata e āhei te haere mai ki ahau, ki te kāhore ia e kūmea mai e te Matua, nāna nei ahau i tono mai. Ā, māku anō ia e whakaara ake ā te rā whakamutunga.
JOH 6:45 Kua oti te tuhituhi i roto i ngā poropiti, ‘Ā, ka whakaakona rātou katoa e te Atua.’ Nā, ko te tangata kua rongo ki te Matua, kua ākona hoki, ka haere mai ki ahau.
JOH 6:46 Ehara i te mea kua kite tētahi i te Matua; ko ia anake i puta mai i te Atua, ko ia kua kite i te Matua.
JOH 6:47 He pono, he pono tāku, e mea nei ki a koutou, Ki te whakapono tētahi, he ora tonu tōna.
JOH 6:48 Ko ahau te taro o te ora.
JOH 6:49 I kai rā ō koutou mātua i te mana i te koraha, ā, i mate rātou.
JOH 6:50 Ko te taro tēnei e heke iho ana i te rangi, kia kai ai te tangata i a ia, ā, kia kaua e mate.
JOH 6:51 Ko ahau te taro ora i heke iho i te rangi; ki te kai tētahi i tēnei taro, e ora tonu ia. Āe rā, ko te taro e hoatu e ahau ko ōku kikokiko, e hoatu e ahau hei oranga mō te ao.”
JOH 6:52 Nā, ka totohe ngā Hūrai tētahi ki tētahi, ka mea, “Me pēhea e hōmai ai e tēnei tangata ōna kikokiko kia kainga e tātou?”
JOH 6:53 Nā, ko te meatanga a Īhu ki a rātou, “He pono, he pono tāku e mea nei ki a koutou, ki te kāhore koutou e kai i ngā kikokiko o te Tama a te tangata, e inu i ōna toto, kāhore he ora i roto i a koutou ake.
JOH 6:54 Ko ia e kai ana i ōku kikokiko, e inu ana i ōku toto, he ora tonu tōna; ā, māku ia e whakaara ake ā te rā whakamutunga.
JOH 6:55 He kai pono hoki ōku kikokiko, he mea pono ōku toto hei inumanga.
JOH 6:56 Ko ia e kai ana i ōku kikokiko, e inu ana i ōku toto, e noho ana i roto i ahau, me ahau hoki i roto i a ia.
JOH 6:57 Nā te Matua ora hoki ahau i tono mai, nō te Matua anō tōku ora; waihoki ki te kai tētahi i ahau, kei ahau he ora mōna.
JOH 6:58 Ko te taro tēnei i heke iho i te rangi. E kore e pērā i tā ō koutou mātua i kai rā, ā, mate ana. Ki te kai tētahi i tēnei taro, e ora tonu ia.”
JOH 6:59 I kōrerotia ēnei mea e ia i roto i te whare karakia, i a ia e whakaako ana i Kaperenauma.
JOH 6:60 Nā, he tokomaha āna ākonga i te rongonga, i mea, “He kupu pakeke tēnei; ko wai e āhei te whakarongo atu?”
JOH 6:61 Ka mōhio ia a Īhu i roto i a ia, e kōmuhumuhu ana āna ākonga ki tēnei, ka mea ia ki a rātou, “E hē ana koutou ki tēnei?
JOH 6:62 Ka pēhea rā ki te kite koutou i te Tama a te tangata e kake atu ana ki te wāhi i noho ai ia i mua?
JOH 6:63 Ko te wairua te whakaora ana; kāhore a te kikokiko wāhi. Ko ngā kupu e kōrero nei ahau ki a koutou he wairua, he ora.
JOH 6:64 Tēnei anō ia ētahi o koutou kāhore ō rātou whakapono.” (I mātau hoki a Īhu nō te tīmatanga ki ngā mea kāhore ō rātou whakapono, ki te tangata anō e tukua ai ia.)
JOH 6:65 Ā, ka mea ia, “Nā, konei ahau i mea ai ki a koutou, kāhore he tangata e āhei te haere mai ki ahau, ki te kāhore e hoatu ki a ia e tōku Matua.”
JOH 6:66 I taua wā, he tokomaha āna ākonga i hoki ki muri, ā, mutu ake tā rātou haere tahi me ia.
JOH 6:67 Nā, ka mea a Īhu ki te tekau mā rua, “E mea ana anō rānei koutou kia haere?”
JOH 6:68 Nā, ka whakahokia e Haimona Pita ki a ia, “E te Ariki, me haere mātou ki a wai? Kei a koe ngā kupu o te ora tonu.
JOH 6:69 Kua whakapono mātou, kua mātau, ko te Karaiti koe, ko te Tama a te Atua ora.”
JOH 6:70 Ka whakahokia e Īhu ki a rātou, “He teka ianei kotahi tekau mā rua koutou i whiriwhiria e ahau, he rēwera anō tētahi o koutou?”
JOH 6:71 Ko Hūrā Ikariote tama a Haimona tāna i kōrero ai; ko te tangata hoki ia meāke nei tuku i a ia; ko tētahi hoki ia o te tekau mā rua.
JOH 7:1 I muri i ēnei mea ka hāereere a Īhu i Karirī; kāhore hoki ia i pai ki te hāereere i Hūria, e rapu ana hoki ngā Hūrai kia whakamatea ia.
JOH 7:2 Nā, kua tata te hākari a ngā Hūrai, te Hākari Whare Wharau.
JOH 7:3 Nā, ka mea ōna tēina ki a ia, “Haere atu i konei, anga atu ki Hūria, kia kite ai hoki āu ākonga i āu mahi e mahi nei koe.
JOH 7:4 E kore hoki tētahi tangata e mea huna i tētahi mea, ki te whai ia kia ara tōna ingoa. Ki te mea koe i ēnei mea, kia kite te ao i a koe.”
JOH 7:5 (Ko ōna tēina tonu hoki kīhai i whakapono ki a ia.)
JOH 7:6 Nā, ka mea a Īhu ki a rātou, “Kāhore anō kia taea noatia tōku tāima; ko tō koutou tāima ia kei ngā wā katoa.
JOH 7:7 E kore e āhei kia kino te ao ki a koutou; engari ka kino ki ahau, nō te mea e whakaaturia ana e ahau te kino o āna mahi.
JOH 7:8 Haere koutou ki tēnei hākari; e kore ahau e haere wawe ki tēnei hākari; kāhore hoki tōku tāima kia āta rite noa.”
JOH 7:9 Ā, ka mutu tēnei kōrero āna ki a rātou, ka noho tonu ia ki Karirī.
JOH 7:10 Ā, nō ka riro ōna tēina ki te hākari, ka haere anō hoki ia, ehara i te mea whakakite nui, engari i tū-ā-huna.
JOH 7:11 Heoi, i rapu ngā Hūrai i a ia i te hākari, i mea, “Kei hea ia?”
JOH 7:12 He nui hoki te kōrero kōmuhumuhu mōna i roto i te mano. Ko ētahi i mea, “He tangata pai ia,” ko ētahi i mea, “Kāhore, engari e whakapōhēhē ana ia i te iwi.”
JOH 7:13 Heoi, kīhai i rahi te kōrero a tētahi tangata mōna, he wehi ki ngā Hūrai.
JOH 7:14 Nā, i waenganui o te hākari, ka haere a Īhu ki roto ki te temepara whakaako ai.
JOH 7:15 Ā, ka mīharo ngā Hūrai, ka mea, “Nā te aha i hua ai te mōhio o tēnei tangata, ehara nei hoki ia i te mea whakaako?”
JOH 7:16 Ka whakahoki a Īhu ki a rātou, ka mea, “Ehara i te mea nāku ake tāku e whakaako nei, engari, nā tōku kaitono mai.
JOH 7:17 Ki te pai tētahi tangata ki te mea i tāna e pai ai, e mātau ia ki te whakaakoranga, nā te Atua rānei, he kōrero nāku ake rānei.
JOH 7:18 Ko te tangata nāna ake tāna kōrero, e whai ana ia i tōna ake korōria; tēnā ki te whai tētahi i te korōria o tōna kaitono, e pono ana ia, ā, kāhore ōna hē.
JOH 7:19 He teka ianei nā Mohi te ture i hoatu ki a koutou, ā, kāhore e whakaritea te ture e tētahi o koutou? He aha koutou ka whai nei kia whakamatea ahau?”
JOH 7:20 Nā, ka whakahoki te mano ka mea, “He rēwera tōu! Ko wai te whai ana kia whakamatea koe?”
JOH 7:21 Ka whakahoki a Īhu, ka mea ki a rātou, “Kotahi āku mahi i mahi ai, ā, e mīharotia ana e koutou katoa.
JOH 7:22 I hōmai e Mohi te kotinga ki a koutou (ehara anō ia i te mea nā Mohi ake, engari nā ngā tūpuna), e kokoti ana hoki koutou i te tangata i te hāpati.
JOH 7:23 Ki te kotia te tangata i te hāpati, kei takahia te ture a Mohi; e riri ana oti koutou ki ahau, mōku i whakaora rawa i te tangata i te hāpati?
JOH 7:24 Kaua e waiho te whakawā i runga i tā te kanohi, engari kia tika tā koutou whakawā.”
JOH 7:25 Me i reira ka mea ētahi o ngā tāngata o Hiruhārama, “Ehara oti tēnei i a ia e whāia nei e rātou kia whakamatea?
JOH 7:26 Nā, māia tonu tāna kōrero, ā, kāhore ā rātou kupu ki a ia. E tino mātau ana rānei ngā rangatira, ko te Karaiti pū tēnei?
JOH 7:27 Otiia, e mātau ana tātou ki te wāhi i puta mai ai tēnei; tēnā ka tae mai a te Karaiti, kāhore he tangata e mātau ki te wāhi e puta mai ai ia.”
JOH 7:28 Nā, ka karanga a Īhu i te temepara i a ia e whakaako ana, ka mea, “E mātau ana koutou ki ahau, e mātau ana anō ki te wāhi i haere mai ai ahau. Ehara i ahau ake tāku haere mai, engari, e pono ana te kaitono mai i ahau; kāhore nei koutou i mātau ki a ia.
JOH 7:29 E mātau ana ahau ki a ia; i puta mai hoki ahau i a ia, nāna anō ahau i tono mai.”
JOH 7:30 Ā, i whai rātou kia hopukia ia; otiia, kīhai i pā te ringa o tētahi ki a ia, kāhore hoki tōna hāora i taka noa.
JOH 7:31 Ā, he tokomaha o te mano whakapono ki a ia, i mea, “Ka tae mai a te Karaiti, tērā rānei e maha atu āna merekara e mea ai i a tēnei e mea nei?”
JOH 7:32 I rongo ngā Parihi i te mano e kōrerorero ana i ēnei mea mōna; nā, ka tonoa mai e ngā Parihi rātou ko ngā tohunga nui he kātipa ki te hopu i a ia.
JOH 7:33 Nā, ka mea a Īhu ki a rātou, “He iti noa ake te wāhi e noho ai ahau ki a koutou, kātahi ahau ka haere ki tōku kaitono mai.
JOH 7:34 Tērā koutou e rapu i ahau, heoi, e kore koutou e kite; e kore hoki koutou e āhei te haere ake ki te wāhi e noho ai ahau.”
JOH 7:35 Nā, ka mea ngā Hūrai ki a rātou anō, “E haere oti te tangata nei ki hea, e kore ai e kitea e tātou? E haere oti ia ki ngā manene i roto i ngā Kariki, ako ai i ngā Kariki?
JOH 7:36 He kī aha tēnei e kī nei ia, ‘Tērā koutou e rapu i ahau, ā, e kore e kite. E kore hoki koutou e āhei te haere ake ki te wāhi e noho ai ahau’?”
JOH 7:37 I te rā whakamutunga, i te rā nui o te hākari, ka tū a Īhu, ka karanga, ka mea, “Ki te matewai tētahi, haere mai ia ki ahau, kia inu.
JOH 7:38 Ki te whakapono tētahi ki ahau, ka rite ki tā te karaipiture, ‘ka rere mai ngā wai ora i roto i tōna kōpū.’ ”
JOH 7:39 I kōrerotia tēnei e ia mō te Wairua, meāke nei riro i te hunga e whakapono ana ki a ia; kāhore anō hoki te Wairua Tapu kia hōmai noa; nō te mea kīanō a Īhu i whakakorōriatia noatia.
JOH 7:40 Ko ētahi o te mano i tō rātou rongonga i tēnei kupu, i mea, “He pono ko te Poropiti tēnei.”
JOH 7:41 Ka mea ētahi, “Ko te Karaiti tēnei.” Ko ētahi i mea, “E puta mai rānei a te Karaiti i Karirī?
JOH 7:42 Kāhore koia te karaipiture i mea, e puta mai a te Karaiti i te uri o Rāwiri, i Pēterehema, i te kāinga i noho ai a Rāwiri?”
JOH 7:43 Nā, ka waiho ia hei take wehewehenga mā te mano.
JOH 7:44 Ko ētahi o rātou i mea kia hopukia ia; otirā, kīhai i pā ngā ringa o tētahi ki a ia.
JOH 7:45 Nā, ko te taenga atu o ngā kātipa ki ngā tohunga nui rātou ko ngā Parihi; ka mea atu ēnei ki a rātou, “He aha ia tē kawea mai ai e koutou?”
JOH 7:46 Ka whakahokia e ngā kātipa, “Kāhore rawa he tangata i rite āna kōrero ki a tēnei.”
JOH 7:47 Nā, ka whakahokia tā rātou e ngā Parihi, “Kua tinihangatia anō hoki koutou?
JOH 7:48 Kua whakapono koia tētahi o ngā rangatira, o ngā Parihi rānei ki a ia?
JOH 7:49 Ko tēnei hunga ia e kore nei e mātau ki te ture, ka oti rātou te kanga.”
JOH 7:50 Ka mea a Nikorima ki a rātou, tērā i haere mai rā ki a ia i mua, ko ia hoki tētahi o rātou,
JOH 7:51 “Ka whakahēngia rānei te tangata e tō tātou ture, i te mea kāhore anō i whakarongo noa ki a ia, i mātau hoki ki tāna mahi?”
JOH 7:52 Nā, ka whakahoki rātou, ka mea ki a ia, “Ko koe hoki tētahi nō Karirī? Tēnā rapua, ka kite koe, kāhore kia ara noa tētahi poropiti i Karirī.”
JOH 7:53 Nā, hoki ana rātou ki tōna whare, ki tōna whare.
JOH 8:1 Ko Īhu ia i haere ki Maunga Ōriwa.
JOH 8:2 Ā, i te atatū ka hoki anō ia ki te temepara, ā, tae katoa ana te iwi ki a ia. Nā, ka noho ia, ka whakaako i a rātou.
JOH 8:3 Kātahi, ka ārahina mai ki a ia e ngā karaipi rātou ko ngā Parihi tētahi wahine i hopukia e pūremu ana; ā, whakatūria ana ki waenganui.
JOH 8:4 Ka mea rātou ki a ia, “E te Kaiwhakaako, i hopukia pūtia te wahine nei e pūremu ana.
JOH 8:5 I whakahau a Mohi ki a mātou i roto i te ture, kia ākina ngā pēnei ki te kōhatu. Tēnā koa tāu kī?”
JOH 8:6 I pēnei ai rātou he whakamātautau mōna, kia whai take ai rātou e whakapāngia ai he hē ki a ia. Ka piko a Īhu, ā, tuhituhi ana tōna ringa ki te whenua.
JOH 8:7 Ā, ka tohe tonu rātou ki te ui ki a ia ka whakatika ake ia, ka mea ki a rātou, “Ko te tangata o koutou kāhore ōna hara, māna te kōhatu mātāmua e āki ki a ia.”
JOH 8:8 Nā, ka piko anō ia, ka tuhituhi ki te whenua.
JOH 8:9 Ā, i tō rātou rongonga, ka haere takitahi atu ki waho, nā ngā kaumātua i tīmata, ā poto noa ō muri rawa. Ā, ko Īhu anake i mahue, me te wahine e tū ana i waenganui.
JOH 8:10 Ā, ko te marangatanga ake o Īhu, ka mea ki a ia, “E tai, kei hea rātou? Kāhore he tangata i whakatau hē ki a koe?”
JOH 8:11 Anō rā ko tērā, “Kāhore, e te Ariki.” Ka mea a Īhu ki a ia, “Kāhore anō hoki ahau e whakatau i te hē ki a koe; haere, kāti te hara.”
JOH 8:12 I kī atu anō a Īhu ki a rātou, i mea, “Ko ahau te whakamārama o te ao; ki te aru tētahi i ahau, e kore ia e haere i te pōuri, engari, ka whiwhi ki te mārama o te ora.”
JOH 8:13 Nā, ka mea ngā Parihi ki a ia, “Ko koe anō tōu kaiwhakaatu; ehara tāu i te whakaatu pono.”
JOH 8:14 Ka whakahoki a Īhu, ka mea ki a rātou, “Ahakoa ko ahau anō tōku kaiwhakaatu, he pono tāku whakaatu; nō te mea e mātau ana ahau ki te wāhi i haere mai ai ahau, ki te wāhi hoki e haere atu nei ahau; ko koutou ia kāhore e mātau ki te wāhi i haere mai ai ahau, ki te wāhi anō e haere atu nei ahau.
JOH 8:15 Nā te kikokiko tā koutou tikanga whakawā; e kore ahau e whakawā i tētahi.
JOH 8:16 Ā, ki te whakawā ahau, he tika tāku whakawā; ehara hoki i te mea ko ahau anake, engari, ko māua ko te Matua nāna nei ahau i tono mai.
JOH 8:17 Āe, kua oti anō te tuhituhi i roto i tō koutou ture, He pono te whakaatu a ngā tāngata tokorua.
JOH 8:18 Ko ahau tēnei hei kaiwhakaatu mōku anō, hei kaiwhakaatu anō mōku te Matua, nāna nei ahau i tono mai.”
JOH 8:19 Nā, ka mea rātou ki a ia, “Kei hea tōu Matua?” Ka whakahokia e Īhu, “Kāhore koutou e mātau ki ahau, kāhore anō ki tōku Matua; me i mātau koutou ki ahau, kua mātau anō ki tōku Matua.”
JOH 8:20 I kōrerotia ēnei kupu e Īhu i te whare takotoranga taonga, i a ia e whakaako ana i roto i te temepara; ā, kāhore tētahi i hopu i a ia; kīanō hoki tōna hāora i taka noa.
JOH 8:21 Me i reira ka kī atu anō a Īhu ki a rātou, “E haere atu ana ahau, ā, tērā koutou e rapu i ahau, e mate anō hoki i roto i tō koutou hara. E kore koutou e āhei te haere ake ki te wāhi e haere ai ahau.”
JOH 8:22 Nā, ka mea ngā Hūrai, “E whakamate oti ia i a ia anō? Inā ia ka mea, ‘E kore koutou e āhei te haere ake ki te wāhi e haere ai ahau.’ ”
JOH 8:23 Anō rā ko ia ki a rātou, “Nō raro nei koutou; nō runga ahau; nō tēnei ao koutou; ehara ahau i tēnei ao.
JOH 8:24 Koia ahau i mea ai ki a koutou, e mate koutou i roto i ō koutou hara; ki te kore hoki koutou e whakapono ko ahau ia, e mate koutou i roto i ō koutou hara.”
JOH 8:25 Kātahi rātou ka mea ki a ia, “Ko wai koe?” Nā, ka mea a Īhu ki a rātou, “Ko tāku anō kōrero ai ki a koutou i te tīmatanga.
JOH 8:26 He maha āku mea e kōrero ai, e whakawā ai mō koutou; otirā, e pono ana tōku kaitono mai; e kōrerotia ana hoki e ahau ki te ao ngā mea i rongo ai ahau ki a ia.”
JOH 8:27 Kīhai rātou i mātau ko te Matua tāna i kōrero ai ki a rātou.
JOH 8:28 Kātahi a Īhu ka mea ki a rātou, “Kia oti te Tama a te tangata te whakairi e koutou, ko reira koutou mātau ai ko ahau ia, ā, e kore e meatia tētahi mea e ahau ake; engari, ko ā tōku Matua i whakaako mai ai ki ahau, ko ēnei āku e kōrero nei.
JOH 8:29 Kei ahau nei anō tōku kaitono mai; kīhai ahau i waiho e te Matua ko ahau anake, nō te mea e mahi tonu ana ahau i ngā mea e paingia ana e ia.”
JOH 8:30 Nā, i a ia e kōrero ana i ēnei mea, he tokomaha i whakapono ki a ia.
JOH 8:31 Me i reira ka mea a Īhu ki ngā Hūrai i whakapono ki a ia, “Ki te mau tonu koutou ki tāku kupu, he tino ākonga koutou nāku;
JOH 8:32 ā, e mātau koutou ki te pono, mā te pono anō koutou ka rangatira ai.”
JOH 8:33 Ka whakahokia e rātou ki a ia, “He whānau mātou nā Āperahama, kāhore mātou i waiho noa hei pononga mā tētahi tangata. He aha tāu e mea, ‘Ka rangatira koutou’?”
JOH 8:34 Ka whakahokia e Īhu ki a rātou, “He pono, he pono tāku e mea nei ki a koutou, he pononga nā te hara ngā kaimahi katoa i te hara.
JOH 8:35 E kore te pononga e noho tonu i te whare; ko te Tama ia e noho tonu ana.
JOH 8:36 Nā, i te mea ka whakarangatiratia koutou e te Tama, he tino rangatira koutou.
JOH 8:37 E mātau ana anō ahau, he whānau koutou nā Āperahama; heoi, e whai ana koutou kia whakamatea ahau, he kore hoki nō tāku kupu e mau i roto i a koutou.
JOH 8:38 E kōrerotia ana e ahau tāku i kite ai ki tōku Matua; e mahia ana e koutou tā koutou i kite ai ki tō koutou matua.”
JOH 8:39 Ka whakahoki rātou, ka mea ki a ia, “Ko Āperahama tō mātou matua.” Ka mea a Īhu ki a rātou, “Me he tamariki koutou nā Āperahama, kua mahia e koutou ngā mahi a Āperahama.
JOH 8:40 Tēnā ko tēnei, e whai ana koutou kia whakamatea ahau, te tangata nāna i kōrero te pono ki a koutou, tāku hoki i rongo ai ki te Atua. Kīhai a Āperahama i pēnā.
JOH 8:41 E mahi ana koutou i ngā mahi a tō koutou matua.” Kātahi rātou ka mea ki a ia, “Kīhai mātou i whānau pōriro; kotahi tō mātou Matua, ko te Atua.”
JOH 8:42 Ka mea anō a Īhu ki a rātou, “Mehemea ko te Atua tō koutou Matua, kua aroha koutou ki ahau; i haere mai hoki ahau i te Atua, ā, kua tae mai nei. Kīhai hoki ahau i haere noa mai, engari, nāna ahau i tono mai.
JOH 8:43 He aha rā koutou tē mātau ai ki tāku kōrero? Nō te mea e kore koutou e āhei te whakarongo ki tāku kupu.
JOH 8:44 Nā tō koutou matua koutou, nā te rēwera, e pai ana hoki kia mea i tā tō koutou matua i hiahia ai. He kaikōhuru ia nō te tīmatanga, kīhai hoki i tū i roto i te pono, nō te mea kāhore he pono i roto i a ia. Ki te kōrero teka ia, e kōrero ana i āna; he kōrero teka hoki ia, ko te matua o te teka.
JOH 8:45 I tāku kōrerotanga i te pono, kāhore koutou e whakapono ki ahau.
JOH 8:46 Ko wai o koutou hei whakaatu he hara tōku? Ki te pono tāku kōrero, he aha koutou tē whakapono ai ki ahau?
JOH 8:47 E whakarongo ana te tangata a te Atua ki ngā kōrero a te Atua; koia koutou tē whakarongo ai, nō te mea ehara koutou i te Atua.”
JOH 8:48 Nā, ka whakahoki ngā Hūrai, ka mea ki a ia, “Kāhore koia i tika tā mātou i mea rā, nō Hamaria koe, ā, he rēwera tōu?”
JOH 8:49 Ka whakahokia e Īhu, “Kāhore ōku rēwera; engari e whakahōnore ana ahau i tōku Matua, ko koutou ia te whakakāhore ana i te hōnore mōku.
JOH 8:50 Kāhore āku whai i te korōria mōku; tērā anō te kaiwhai, te kaiwhakatikatika.
JOH 8:51 He pono, he pono tāku e mea nei ki a koutou, ki te pupuri tētahi i tāku kupu, e kore rawa ia e kite i te mate.”
JOH 8:52 Ka mea ngā Hūrai ki a ia, “Kātahi mātou ka mōhio he rēwera tōu. Kua mate a Āperahama rātou ko ngā poropiti, ā, e mea ana koe, ‘Ki te pupuri tētahi i tāku kupu, e kore rawa ia e pāngia e te mate.’
JOH 8:53 He nui oti koe i tō mātou matua, i a Āperahama kua mate nei? Kua mate anō ngā poropiti. Ki tāu ko wai koe?”
JOH 8:54 Ka whakahokia e Īhu, “Ki te whakahōnore ahau i ahau anō, he hōnore noa tōku. Ko tōku Matua hei whakahōnore i ahau; ko tā koutou e mea nei ko ia tō koutou Atua.
JOH 8:55 Heoi, kāhore koutou i mātau ki a ia, ko ahau ia e mātau ana ki a ia, ā, ki te mea ahau, ‘Kāhore ahau e mātau ki a ia,’ he tangata teka ahau, he pēnā me koutou. Otirā, e mātau ana ahau ki a ia, e pupuri ana i tāna kupu.
JOH 8:56 I hari tō koutou matua, a Āperahama, mōna ka kite i tōku rā; i kite ia, ā, koa ake.”
JOH 8:57 Kātahi, ka mea ngā Hūrai ki a ia “Kāhore noa i rima tekau noa ōu tau, ā, kua kite koe i a Āperahama?”
JOH 8:58 Ka mea a Īhu ki a rātou, “He pono, he pono tāku e mea nei ki a koutou, kāhore noa anō a Āperahama, ko ahau tēnei.”
JOH 8:59 Nā, ka mau rātou ki ētahi kōhatu hei epa ki a ia, heoi, huna ana a Īhu i a ia, puta ana i roto i te temepara.
JOH 9:1 Nā, i a Īhu e haere ana, ka kite ia i tētahi tangata i matapō, nō tōna whānautanga mai anō.
JOH 9:2 Nā, ka ui āna ākonga ki a ia, ka mea, “E te Kaiwhakaako, ko wai i hara, ko tēnei, ko ōna mātua rānei i whānau matapō ai ia?”
JOH 9:3 Ka whakahokia e Īhu, “Ehara i te mea ko tēnei kua hara, ko ōna mātua rānei; engari, kia ai ia hei whakakitenga mō ngā mahi a te Atua.
JOH 9:4 Me mahi e tātou ngā mahi a tōku kaitono mai i te mea e ao ana; meāke ko te pō e kore ai e taea he mahi e tētahi tangata.
JOH 9:5 I ahau i te ao nei, ko ahau te mārama o te ao.”
JOH 9:6 Ka mutu ēnei kōrero āna, ka tūwha ia ki te whenua, ā, pokepokea ana tētahi paru ki te hūware, pania atu ana te paru ki ngā kanohi o te matapō,
JOH 9:7 nā, ka mea ki a ia, “Haere ki te horoi ki te kaukauranga i Hiroama” (ko Tono te whakamāoritanga). Nā, haere ana ia, horoi ana, ā, hoki titiro ana mai.
JOH 9:8 Nā, ka mea ngā tāngata e noho tata ana, rātou ko ngā tāngata i kite i tōna matapōtanga i mua, “Ehara ianei tēnei i taua tangata i noho rā, i tono mea rā māna?”
JOH 9:9 Ka mea ētahi, “Ko ia tēnei.” Ko ētahi i mea, “Kāhore, engari rite tonu ki a ia te āhua.” Ka mea ia, “Ko ahau rā ia.”
JOH 9:10 Kātahi rātou ka mea ki a ia, “Nā te aha rā i kite ai ōu kanohi?”
JOH 9:11 Ka whakahoki ia ka mea, “Nā te tangata, e huaina nei ko Īhu, i pokepoke he paru, pania ana e ia ki ōku kanohi, ka mea mai ki ahau, ‘Haere ki Hiroama horoi ai.’ Nā, ko tōku haerenga atu, ko tāku horoinga, kite ana ahau.”
JOH 9:12 Nā, ka mea rātou ki a ia, “Kei hea ia?” Ka mea ia, “E kore ahau e mōhio.”
JOH 9:13 Ka kawea atu ki ngā Parihi taua tangata i matapō i mua rā.
JOH 9:14 Nā, nō te hāpati i pokepokea ai e Īhu te paru, i meinga ai ōna kanohi kia kite.
JOH 9:15 Nā, ka ui anō ngā Parihi ki a ia, ki te pēhea i kite ai ia. Ka mea ia ki a rātou, “I pania e ia he paru ki ōku kanohi, nā, horoi ana ahau, kite ana.”
JOH 9:16 Nā, ka mea ētahi o ngā Parihi, “Ehara tēnei i te tangata nā te Atua, inā hoki tē whakarite ia i te hāpati.” Ka mea ētahi, “Mā te aha e taea ai ēnei merekara e te tangata hara?” Nā, ka wehewehea rātou.
JOH 9:17 Ka mea anō rātou ki te matapō, “E pēhea ana koe ki a ia, ki tāna meatanga i ōu kanohi kia kite?” Ka mea ia, “He poropiti ia.”
JOH 9:18 Heoi, kāhore ngā Hūrai i whakapono i matapō taua tangata, kua meinga anō kia kite, karangatia noatia e rātou ngā mātua ōna i meinga nei kia kite,
JOH 9:19 ā, ka ui rātou ki a rāua, ka mea, “Ko tā kōrua tama tēnei, e mea nei kōrua i whānau matapō mai? Nā te aha rā ia i titiro ai ināianei?”
JOH 9:20 Ka whakahoki ōna mātua ki a rātou, ka mea, “E mōhio ana māua, ko tā māua tama tēnei, i whānau matapō mai anō.
JOH 9:21 Ko te mea ia i kite ai ia ināianei, kāhore i mōhiotia e māua; kāhore hoki māua e mōhio nā wai i mea ōna kanohi kia kite. He kaumātua ia; ui atu ki a ia, māna ia e kōrero.”
JOH 9:22 I pēnei ōna mātua, nō te mea i mataku rāua i ngā Hūrai. Kua takoto noa ake hoki tā ngā Hūrai tikanga, nā, ki te whakaae tētahi, ko te Karaiti ia, me pei ki waho o te whare karakia.
JOH 9:23 Koia ōna mātua i mea ai, “He kaumātua ia; ui atu ki a ia.”
JOH 9:24 Nā, ka karanga tuarua rātou ki te tangata i matapō i mua rā, ka mea ki a ia, “Hoatu he korōria ki te Atua; e mātau ana mātou he tangata hara tēnei.”
JOH 9:25 Nā, ka whakahoki ia, ka mea, “Kāhore ahau e mātau he tangata hara rānei ia; kotahi anō tāku e mātau nei, he matapō ahau i mua, ā, inā kua kite.”
JOH 9:26 Ka mea anō rātou ki a ia, “I aha ia ki a koe? I pēheatia ōu kanohi i meinga ai e ia kia kite?”
JOH 9:27 Ka whakahokia e ia ki a rātou, “Kua kōrerotia anō e ahau ki a koutou inā tonu nei, ā, kīhai koutou i whakarongo. He aha koutou i hiahia ai kia rongo anō? E mea ana oti koutou kia meinga hei ākonga māna?”
JOH 9:28 Nā, whakahī ana rātou ki a ia, ka mea, “Ko tāna ākonga koe; ko mātou ia he ākonga nā Mohi.
JOH 9:29 E mātau ana mātou i kōrero te Atua ki a Mohi; ko tēnei tangata ia kāhore mātou e mātau ki tōna wāhi i haere mai ai.”
JOH 9:30 Nā, ka whakahoki taua tangata, ka mea ki a rātou, “Ha! He mea whakamīharo rā tēnei kāhore koutou i mātau ki tōna wāhi i haere mai ai, otirā, kua meinga e ia ōku kanohi kia kite.
JOH 9:31 E mātau ana rā tātou, e kore te Atua e whakarongo ki ngā tāngata hara; tēnā ki te mea he tangata karakia tētahi ki te Atua, he mea i tāna e pai ai, ka whakarongo ia ki a ia.
JOH 9:32 Kāhore rawa i rangona nō te tīmatanga rā anō o te ao, i whakatirohia e tētahi ngā kanohi o te tangata i whānau matapō.
JOH 9:33 Ki te mea kīhai i puta mai tēnei tangata i te Atua, e kore e taea e ia tētahi mea.”
JOH 9:34 Nā, ka whakahoki rātou, ka mea ki a ia, “I whānau pū koe i roto i ngā hara, ko koe rānei hei whakaako i a mātou?” Nā, peia ana ia e rātou ki waho.
JOH 9:35 I rongo a Īhu kua oti ia te pei e rātou ki waho; ā, i tōna kitenga i a ia, ka mea ki a ia, “E whakapono ana rānei koe ki te Tama a te Atua?”
JOH 9:36 Ka whakahoki ia, ka mea, “Ko wai ia, e te Ariki, kia whakapono ai ahau ki a ia?”
JOH 9:37 Ka mea a Īhu ki a ia, “Kua kite koe i a ia, ko ia hoki tēnei e kōrero nei ki a koe.”
JOH 9:38 Nā, ko tāna meatanga, “E te Ariki, e whakapono ana ahau.” Nā, koropiko ana ia ki a ia.
JOH 9:39 Kātahi a Īhu ka mea, “I haere mai ahau ki tēnei ao ki te whakarite whakawā, he mea e kite ai te hunga kāhore nei i kite; e whakamatapōtia ai hoki te hunga e kite ana.”
JOH 9:40 Ā, ka rangona ēnei mea e ētahi o ngā Parihi e tū tahi ana me ia, ka mea rātou ki a ia, “E matapō ana anō rānei mātou?”
JOH 9:41 Ka mea a Īhu ki a rātou, “Me i matapō koutou, kāhore ō koutou hara. Tēnā ka mea nā koutou, ‘E kite ana mātou’; nā, e mau nā tō koutou hara.”
JOH 10:1 “He pono, he pono tāku e mea nei ki a koutou, ki te kāhore tētahi e tomo rā te kūwaha ki te kāinga hipi, ki te piki kē, he tāhae ia, he tangata pāhua.
JOH 10:2 Tēnā ko te tangata e tomo ana rā te kūwaha, ko te hēpara ia o ngā hipi.
JOH 10:3 Ka uaki te kaitiaki tatau ki a ia; ka rongo anō ngā hipi ki tōna reo. Nā, ka karangatia e ia āna hipi ake, tō tēnei ingoa, tō tēnei ingoa, ka ārahina ki waho.
JOH 10:4 Ā, ka oti āna ake hipi te tuku ki waho, ka haere ia i mua i a rātou, ka aru ngā hipi i a ia; e mātau ana hoki rātou ki tōna reo.
JOH 10:5 E kore ia rātou e aru i te tauhou, engari ka oma i a ia; e kore hoki e mātau ki te reo o ngā tauhou.”
JOH 10:6 I kōrerotia tēnei kupu whakarite e Īhu ki a rātou; heoi, kīhai rātou i mōhio ki ngā mea i kōrerotia e ia ki a rātou.
JOH 10:7 Nā, ka mea anō a Īhu ki a rātou, “He pono, he pono tāku e mea nei ki a koutou, Ko ahau te tatau o ngā hipi.
JOH 10:8 He tāhae, he kaipāhua te hunga katoa i haere mai i mua i ahau; heoi kīhai ngā hipi i whakarongo ki a rātou.
JOH 10:9 Ko ahau te tatau; ki te waiho ahau hei huarahi tomokanga mō tētahi, e ora ia, ā, ka haere ki roto, ka haere ki waho, ka kite hoki i te kai.
JOH 10:10 Heoi anō tā te tāhae e haere mai ai, he tāhae, he patu, he whakamōtī hoki. I haere mai ahau kia whiwhi ai rātou ki te ora, inā, tōna nui noa atu.
JOH 10:11 “Ko ahau te hēpara pai, he hēpara pai, ka tuku i a ia anō kia mate mō ngā hipi.
JOH 10:12 Tēnā ko te tangata e utua ana, ehara nei i te hēpara, ehara nei i a ia ngā hipi, i tōna kitenga i te wuruhi e haere mai ana, whakarērea ake e ia ngā hipi, oma ana; nā, ka hopukia rātou e te wuruhi, ā, whakamararatia ana ngā hipi.
JOH 10:13 Ka oma te tangata e utua ana, nō te mea e utua ana ia, kāhore hoki ōna whakaaro ki ngā hipi.
JOH 10:14 Ko ahau te hēpara pai, e mātau ana hoki ki āku, ā, e mātau ana āku ki ahau.
JOH 10:15 Pērā tonu me tō te Matua mātau ki ahau, me tōku mātau hoki ki te Matua. E tuku ana hoki ahau i ahau ki te mate mō ngā hipi.
JOH 10:16 He hipi atu anō āku, ehara nei i tēnei kāinga. Me ārahi mai rātou e ahau, ā, ka rongo rātou ki tōku reo; ā, e whakakotahitia te kāhui, kotahi anō hoki hēpara.
JOH 10:17 “Koia te Matua ka aroha mai ai ki ahau, nō te mea e tuku ana ahau i ahau kia mate, kia whakaora ake ai anō ahau i ahau.
JOH 10:18 Ehara i te mea mā tētahi tangata ahau e whakamate, engari, māku anō ahau e tuku ki te mate. Kei ahau te tikanga mō te tuku atu, kei ahau anō te tikanga mō te whakaora. Nā tōku Matua tēnei ture kua riro mai nei i ahau.”
JOH 10:19 Kātahi, ka wehewehea ngā Hūrai, nā ēnei kupu.
JOH 10:20 He tokomaha o rātou i mea, “He rēwera tōna, e haurangi ana; he aha koutou ka whakarongo ai ki a ia?”
JOH 10:21 Ko ētahi i mea, “Ehara ēnei i ngā kupu a te tangata e nohoia ana e te rēwera. E āhei koia i te rēwera te mea i ngā kanohi o ngā matapō kia kite?”
JOH 10:22 Nā, i Hiruhārama tēnei, i te Hākari Horohoronga. He hōtoke;
JOH 10:23 ā, e hāereere ana a Īhu i te temepara, i te whakamahau o Horomona.
JOH 10:24 Nā, ka karapotia ia e ngā Hūrai, ka mea rātou ki a ia, “Kia pēhea te roa o tāu waiho i ō mātou ngākau i hikirangi ana? Ki te mea ko te Karaiti koe, kōrerotia matanuitia mai ki a mātou.”
JOH 10:25 Ka whakahoki a Īhu ki a rātou, “Kua kōrerotia e ahau ki a koutou, ā, kāhore koutou e whakapono. Ko ngā mahi e mahi nei ahau i runga i te ingoa o tōku Matua, ko ēnei hei kaiwhakaatu mōku.
JOH 10:26 Otirā, e kore koutou e whakapono, nō te mea ehara koutou i te hipi nāku.
JOH 10:27 E rongo ana āku hipi ki tōku reo, e mātau ana ahau ki a rātou, e aru ana hoki rātou i ahau.
JOH 10:28 E hoatu ana e ahau ki a rātou he ora tonu; e kore rātou e ngaro ake ake, e kore anō hoki tētahi e kapo atu i a rātou i roto i tōku ringa.
JOH 10:29 Ko tōku Matua, nāna nei rātou i hōmai ki ahau, nui ake i te katoa; e kore anō rātou e taea e tētahi te kapo atu i roto i te ringa o tōku Matua.
JOH 10:30 Ko ahau, ko te Matua, kotahi māua.”
JOH 10:31 Kātahi, ka mau anō ngā Hūrai ki te kōhatu hei āki ki a ia.
JOH 10:32 Ka whakahokia e Īhu ki a rātou, “He maha ngā mahi pai kua whakakitea nei e ahau ki a koutou, he mea nā tōku Matua. Mō tēhea o aua mahi ka ākina ai ahau e koutou?”
JOH 10:33 Ka whakahoki ngā Hūrai ki a ia, ka mea, “Ehara te mahi pai i te mea e ākina ai koe; engari, mō te kohukohu, mō te mea hoki ko koe, tangata nei anō, e whakaatua ana i a koe.”
JOH 10:34 Ka whakahokia e Īhu ki a rātou, “Kāhore rānei i tuhituhia i roto i tō koutou ture, ‘I mea ahau, He atua koutou’?
JOH 10:35 Ki te huaina e ia he atua te hunga i tae mai nei te kupu a te Atua ki a rātou, ā, e kore hoki e taea te whakakāhore te karaipiture.
JOH 10:36 E mea ana oti koutou ki tā te Matua i whakatapu ai, i tono mai ai hoki ki te ao, ‘E kohukohu ana koe’; nōku i mea, ‘Ko te Tama ahau a te Atua’?
JOH 10:37 Ki te kore ahau e mahi i ngā mahi a tōku Matua, aua ahau e whakaponohia.
JOH 10:38 Tēnā, ki te mahi ahau, ahakoa kāhore koutou e whakapono ki ahau, whakaponohia ngā mahi; kia mātau ai koutou kia whakapono ai, ko te Matua kei roto i ahau, me ahau hoki kei roto i a ia.”
JOH 10:39 Nā, ka whai anō rātou kia hopukia ia; heoi, puta ana ia i ō rātou ringa.
JOH 10:40 Nā, ka haere anō ia ki tāwāhi o Horano, ki te wāhi i mātua iriiri ai a Hoani; ā, noho ana i reira.
JOH 10:41 Ā, tokomaha hoki i haere ki a ia; i mea rātou “Kīhai a Hoani i mahi i tētahi merekara; he pono ia ngā mea katoa i kōrerotia e Hoani mō tēnei.”
JOH 10:42 Ā, he tokomaha o reira i whakapono ki a ia.
JOH 11:1 Nā, kei te mate tētahi tangata a Raharuhi o Petani, te kāinga o Meri rāua ko tōna tuakana, ko Māta.
JOH 11:2 Ko taua Meri tēnei nāna nei i whakawahi te Ariki ki te hinu, i muru hoki i ōna waewae ki ōna makawe; ā, he tungāne nōna a Raharuhi i mate nei.
JOH 11:3 Nā, ka tono tāngata ngā tuāhine ki a ia, ka mea, “E te Ariki, tēnei kei te mate tāu tangata e aroha nei.”
JOH 11:4 I te rongonga ia o Īhu, ka mea ia, “Ehara tēnei i te mate e mate rawa ai ia, engari, hei mea mō te korōria o te Atua; mā tēnei hoki ka whai korōria ai te Tama a te Atua.”
JOH 11:5 Nā, i aroha a Īhu ki a Māta rāua ko tōna teina, ki a Raharuhi hoki.
JOH 11:6 Ā, nō ka rongo ia ki tōna matenga, e rua ōna rā i noho ai ki taua wāhi rā anō.
JOH 11:7 Muri iho i tēnei, ka mea ia ki āna ākonga, “Tātou ka haere anō ki Hūria.”
JOH 11:8 Ka mea ngā ākonga ki a ia, “E te Kaiwhakaako, i whai ngā Hūrai i mua tata ake nei kia ākina koe ki te kōhatu; ā, e haere atu ana koe ki reira?”
JOH 11:9 Ka whakahokia e Īhu, “He teka ianei tekau mā rua ngā hāora o te rā? I te haere tētahi i te awatea, e kore ia e tūtuki, nō te mea e kite ana ia i te mārama o tēnei ao.
JOH 11:10 Tēnā, ka haere tētahi i te pō, ka tūtuki ia, nō te mea kāhore he mārama roto i a ia.”
JOH 11:11 Ka kōrerotia ēnei mea e ia, nā, muri iho ka mea ia ki a rātou, “Kei te moe tō tātou hoa a Raharuhi, otiia, ka haere ahau ki te whakaara i a ia i te moe.”
JOH 11:12 Nā, ko te meatanga a āna ākonga, “E te Ariki, ki te mea kei te moe ia, tērā ia e ora.”
JOH 11:13 Kāhore, ko tōna matenga tā Īhu i kōrero ai; ko rātou ia i mahara, i kōrero ia mō te takotoranga ina moe.
JOH 11:14 Kātahi, ka mea nui a Īhu ki a rātou, “Kua mate a Raharuhi.
JOH 11:15 Ā, e hari ana ahau, he whakaaro hoki ki a koutou, nōku kāhore i reira, kia whakapono ai koutou. Ahakoa rā kia haere tātou ki a ia.”
JOH 11:16 Nā, ka mea a Tamati (e huaina nei ko Ririmu) ki ōna hoa ākonga, “Kia haere anō tātou, kia mate tahi me ia.”
JOH 11:17 Heoi, i te taenga atu o Īhu, rokohanga atu kua whā kē ōna rā i roto i te urupā.
JOH 11:18 Nā, e tata ana Petani ki Hiruhārama, kotahi pea tekau mā rima pāronga,
JOH 11:19 he tokomaha anō ngā Hūrai i tae ki a Māta rāua ko Meri, ki te whakamārie i a rāua mō tō rāua tungāne.
JOH 11:20 Ā, nō te rongonga o Māta, tēnā a Īhu te haere mai nā, ka whakatau i a ia; ko Meri ia i noho i roto i te whare.
JOH 11:21 Nā, ka mea a Māta ki a Īhu, “E te Ariki, me i konei koe, kīhai i mate tōku tungāne.
JOH 11:22 Heoi, e mātau nei anō ahau, ko tāu e īnoi ai ki te Atua, e hōmai e te Atua ki a koe.”
JOH 11:23 Ka mea a Īhu ki a ia, “E ara anō tōu tungāne.”
JOH 11:24 Ka mea a Māta ki a ia, “E mātau ana ahau e ara anō ia i te aranga ā te rā whakamutunga.”
JOH 11:25 Ka mea a Īhu ki a ia, “Ko ahau te aranga, te ora. Ko ia e whakapono ana ki ahau, ahakoa kua mate, e ora anō;
JOH 11:26 e kore anō e mate ake ake ngā tāngata katoa e ora ana, e whakapono ana ki ahau. E whakapono ana rānei koe ki tēnei?”
JOH 11:27 Ka mea ia ki a ia, “Āe, e te Ariki, e whakapono ana ahau, ko te Karaiti koe, ko te Tama a te Atua, e haere mai ana ki te ao.”
JOH 11:28 Ā, ka mutu ēnei kōrero āna, ka haere ka karanga puku ki tōna teina, ki a Meri, ka mea, “Kua tae mai te Kaiwhakaako, e karanga ana hoki ki a koe.”
JOH 11:29 Ā, nō ka rongo ia, hohoro tonu te whakatika, ā, haere ana ki a ia.
JOH 11:30 (Nā, kāhore a Īhu i tomo noa ki te kāinga; heoi, kei taua wāhi anō ia i tūtaki ai a Māta ki a ia.)
JOH 11:31 I te kitenga o ngā Hūrai e noho ana ki a ia i roto i te whare, e whakamārie ana i a ia, ka hohoro a Meri te whakatika, te puta ki waho. Ka aru rātou i a ia, ka mea, “E haere ana ia ki te urupā, ki reira tangi ai.”
JOH 11:32 Ā, nō ka tae a Meri ki te wāhi kei reira nei a Īhu, ka kite i a ia, ka takoto ki ōna waewae, ka mea ki a ia, “E te Ariki, me i konei koe, kīhai i mate tōku tungāne.”
JOH 11:33 Ā, nō ka kite a Īhu i a ia e tangi ana, i ngā Hūrai hoki i haere tahi me ia e tangi ana, ka ngunguru ia, arā tōna wairua, ka kōingo.
JOH 11:34 Nā mea, “I whakatakotoria ia e koutou ki hea?” Ka mea rātou ki a ia, “E te Ariki, haere mai kia kite.”
JOH 11:35 Tangi ana a Īhu.
JOH 11:36 Nā, ka mea ngā Hūrai, “Nanā, tōna aroha ki a ia!”
JOH 11:37 Nā, ka mea ētahi o rātou, “Kāhore rānei i taea e tēnei tangata, nāna nei i whakatitiro ngā kanohi o te matapō, te mea i tēnei tangata hoki kia kaua e mate?”
JOH 11:38 Nā, ka ngunguru anō a Īhu i roto i a ia, ka haere ki te urupā. He ana ia, kua oti te pā ki te kōhatu.
JOH 11:39 Ka mea a Īhu, “Tangohia atu e koutou te kōhatu.” Ka mea ki a ia a Māta tuahine o te tūpāpaku, “E te Ariki, kua piro noa ake ia; ko tōna pō whā hoki tēnei.”
JOH 11:40 Anō rā, ko Īhu ki a ia, “Kīhai koia ahau i mea ki a koe, ki te whakapono koe, e kite koe i te korōria o te Atua?”
JOH 11:41 Nā, ka tangohia e rātou te kōhatu i te wāhi i takoto ai te tūpāpaku. Nā, ka ara ake ngā kanohi o Īhu, ka mea ia, “E Pā, ko tāku whakawhetai tēnei ki a koe, mōu i whakarongo ki ahau.
JOH 11:42 I mahara anō ahau e rongo tonu ana koe ki ahau; heoi, he whakaaro ki te hunga e tū mai nei i kōrero ai ahau, kia whakapono ai rātou, nāu ahau i tono mai.”
JOH 11:43 Ā, nō ka pēnei tāna kī, he nui tōna reo ki te karanga, “E Raharuhi, puta mai!”
JOH 11:44 Nā, ko te putanga mai o te tūpāpaku, he mea here ngā ringa me ngā waewae ki ngā tākai; he mea takai tōna mata ki te tauera. Ka mea a Īhu ki a rātou, “Wetekia, tukua kia haere.”
JOH 11:45 Nā, he tokomaha ngā Hūrai haere nei ki a Meri, ā, i tō rātou kitenga i ngā mea i mea ai a Īhu, ka whakapono ki a ia.
JOH 11:46 Ko ētahi o rātou i haere ki ngā Parihi, i kōrero ki a rātou i ngā mea i mahia e Īhu.
JOH 11:47 Nā, ka whakaminea he rūnanga e ngā tohunga nui rātou ko ngā Parihi, ka mea, “Kei te aha tātou nei? He maha hoki ngā merekara e meatia nei e tēnei tangata.
JOH 11:48 Ki te pēnei tā tātou tuku i a ia, ka whakapono katoa ki a ia; ā, ka haere mai ngā Rōma, ka tango i tō tātou kāinga, i tō tātou iwi.”
JOH 11:49 Nā, ko tētahi o rātou ko Kaiapa, ko te tohunga nui o taua tau, ka mea ki a rātou, “Kāhore koutou e mātau ki tētahi mea.
JOH 11:50 Tē whakaaro, he pai mō tātou ki te mate te tangata kotahi mō te iwi, ā, kāhore e ngaro te iwi katoa.”
JOH 11:51 Nā, ehara tēnei kōrero i te mea nāna ake, engari, ko te tohunga nui ia mō tērā tau, heoi, ka poropiti kia mate a Īhu mō taua iwi.
JOH 11:52 Hāunga anō taua iwi anake, engari, kia whakaminea kia kotahi ngā tamariki a te Atua kua marara noa atu.
JOH 11:53 Nō taua rā ake anō, ka rūnanga rātou kia whakamatea ia.
JOH 11:54 Koia i mutu ai te haere matanui o Īhu i roto i ngā Hūrai. Heoi, haere atu ana ia i reira ki te wāhi e tata ana ki te koraha, ki tētahi pā, ko Ēparaima te ingoa, ā, noho ana i reira rātou ko āna ākonga.
JOH 11:55 Nā, kua tata te Kapenga a ngā Hūrai; he tokomaha hoki i haere atu i taua whenua i mua o te Kapenga ki Hiruhārama ki te pure i a rātou.
JOH 11:56 Nā, ka rapu rātou i a Īhu ka kōrerorero ki a rātou anō, i a rātou e tū ana i te temepara, “E pēhea ana ō koutou whakaaro? E kore rānei ia e haere mai ki te hākari?”
JOH 11:57 Nā, kua takoto te tikanga a ngā tohunga nui rātou ko ngā Parihi, ki te mātau tētahi tangata ki te wāhi e noho ai ia, me whakaatu, kia hopukia ai ia e rātou.
JOH 12:1 Nā, e ono ngā rā i mua ake o te Kapenga ka haere a Īhu ki Petani, kei reira nei a Raharuhi, i whakaarahia ake nei e ia i te hunga mate.
JOH 12:2 Ā, takā ana e rātou he hapa māna i reira; ko Māta te kaitaka, ko Raharuhi tētahi o te hunga i noho tahi me ia.
JOH 12:3 Nā, ka mau a Meri ki tētahi pāuna hinu kakara he tino nara, he mea utu nui, whakawahia ana e ia ngā waewae o Īhu, me te muru anō i ōna waewae ki ōna makawe; kī noa te whare i te kakara o te hinu.
JOH 12:4 Nā, ka mea tētahi o āna ākonga, a Hūrā Ikariote, tēnei meāke nei tuku a ia,
JOH 12:5 “He aha tēnei hinu tē hokona ai ki ngā pene e toru rau, ka hoatu ai ki te hunga rawakore?”
JOH 12:6 I kōrerotia ai tēnei e ia, ehara i te mea he whakaaro nōna ki te hunga rawakore; erangi, nō te mea he tāhae ia, i a ia hoki te pūtea, ko ia hoki hei mau i ngā mea i whaongia ki roto.
JOH 12:7 Nā, ko te meatanga a Īhu, “Waiho rā ū āna; i tohungia tēnei e ia mō te rā o tōku tanumanga.
JOH 12:8 Kei a koutou hoki ngā rawakore i ngā wā katoa; ko ahau ia e kore e noho tonu i a koutou.”
JOH 12:9 He tokomaha o ngā Hūrai i mātau kei reira a Īhu; ā, haere mai ana, ehara i te mea mō Īhu anake, erangi, kia kite hoki i a Raharuhi, i whakaarahia nei e ia i te hunga mate.
JOH 12:10 Otirā, kua takoto te whakaaro o ngā tohunga nui kia whakamatea anō a Raharuhi;
JOH 12:11 nāna hoki i tokomaha ai ngā Hūrai i haere, i whakapono ki a Īhu.
JOH 12:12 I te aonga ake ka rongo te mano tini i haere nei ki te hākari, e haere ana a Īhu ki Hiruhārama.
JOH 12:13 Ka mau rātou ki ngā manga nīkau, haere ana ki te whakatau i a ia, me te karanga, “Ohana! Ka whakapaingia ia, e haere mai nei i runga i te ingoa o te Ariki, te Kīngi o Īharaira!”
JOH 12:14 Ā, nō ka kite a Īhu i tētahi kūao kāihe, ka noho ia i runga; ka pērā anō me te mea i tuhituhia,
JOH 12:15 “Kaua e mataku, e te tamāhine a Hiona. Nā, kei te haere mai tōu Kīngi, e noho ana i runga i te kūao kāihe.”
JOH 12:16 Otiia, kīhai āna ākonga i mātau wawe ki ēnei mea; engari, ka oti a Īhu te whakakorōria, kātahi rātou ka mahara kua tuhituhia ēnei mea mōna, kua meinga anō ēnei mea ki a ia.
JOH 12:17 I whakaae anō te hunga i tōna taha i tāna karangatanga i a Raharuhi i roto i te urupā, i tāna whakaarahanga hoki i a ia i te hunga mate.
JOH 12:18 Nā konei hoki te mano i whakatau ai i a ia, i rongo hoki rātou, kua meinga tēnei merekara e ia.
JOH 12:19 Nā, ka mea ngā Parihi ki a rātou anō, “Ka kite rānei koutou kāhore ā koutou wāhi? Nā, kua riro te ao ki te whai i a ia.”
JOH 12:20 Nā, he Kariki ētahi o te hunga i haere ki te hākari ki te karakia.
JOH 12:21 Ā, haere ana ēnei ki a Piripi o Petahaira o Karirī, kōrero ana ki a ia, mea atu ana, “E kara, e hiahia ana mātou kia kite i a Īhu.”
JOH 12:22 Haere ana a Piripi, ka kōrero ki a Anaru; ka haere a Anaru, a Piripi, ka kōrero ki a Īhu.
JOH 12:23 Ka kī a Īhu ki a rāua, ka mea, “Kua tae mai te hāora e whakakorōriatia ai te Tama a te tangata.
JOH 12:24 He pono, he pono tāku e mea nei ki a koutou, ki te kore tētahi pata wīti e marere ki te oneone, e pirau, ka takoto ko ia anake; tēnā ki te pirau, he nui ōna hua.
JOH 12:25 Ki te aroha tētahi ki tōna ora, ka mate anō ia; ki te kino tētahi ki te ora i tēnei ao, ka tūturu ki a ia te ora ake ake.
JOH 12:26 Ki te mea tētahi ko ia hei kaimahi māku, me aru ia i ahau; ko te wāhi e noho ai ahau, ko reira anō tāku kaimahi. Ki te mahi tētahi i āku mahi, mā tōku Matua ia e whakahōnore.”
JOH 12:27 “Kua pōuri tēnei tōku wairua; ā, kia pēhea atu ahau? E Pā, whakaorangia ahau i tēnei wā. Otirā, ko te mea tēnei i haere mai ai ahau ki tēnei wā.
JOH 12:28 E Pā, whakakorōriatia tōu ingoa.” Nā, ka puta he reo i te rangi, “Kua whakakorōriatia e ahau, e whakakorōriatia anō.”
JOH 12:29 I te rongonga o ngā tāngata e tū ana i reira, ka mea, “He whatitiri.” Ko ētahi i mea, “Kua kōrero tētahi anahera ki a ia.”
JOH 12:30 Ka whakahoki a Īhu, ka mea, “Ehara tēnei reo i puta mai nei i te mea mōku, engari mō koutou.
JOH 12:31 Ko āianei te whakawā mō tēnei ao; ko āianei makā ai te rangatira o tēnei ao ki waho.
JOH 12:32 Ā, ki te whakairihia ake ahau ki runga ake i te whenua, māku ngā tāngata katoa e kukume ki ahau.”
JOH 12:33 (I pēnei ai ia hei whakaatu i te mate e mate ai ia.)
JOH 12:34 Ka whakahokia e te mano ki a ia, “Kua rongo mātou ki tā te ture, e ora tonu ana a te Karaiti. He aha tāu e mea, ‘Me whakairi te Tama a te tangata?’ Ko wai koia tēnei Tama a te tangata?”
JOH 12:35 Anō rā, ko Īhu ki a rātou, “He wāhi iti nei te maunga o te mārama i roto i a koutou. Haere rā i te mea e whai mārama ana koutou, kei rokohina koutou e te pōuri. Ko ia hoki e haere ana i te pōuri e kore e kite i te wāhi e haere ai ia.
JOH 12:36 I te mea kei a koutou te mārama, me whakapono ki te mārama, kia meinga ai koutou he tamariki nā te mārama.” I kōrerotia e Īhu ēnei mea, ā, haere ana, huna ana i a ia, kei kitea e rātou.
JOH 12:37 Heoi, ahakoa i meatia e ia aua merekara maha ki tō rātou aroaro, kīhai rātou i whakapono ki a ia.
JOH 12:38 I rite ai te kōrero a Ihāia poropiti, tāna i mea ai: “E te Ariki, ko wai i whakapono ki tā mātou kōrero? I whakakitea hoki ki a wai te ringa o te Ariki?”
JOH 12:39 Koia hoki rātou tē āhei ai te whakapono, kua mea nei hoki a Ihāia,
JOH 12:40 “I whakamatapōtia e ia ō rātou kanohi, i whakapakeketia ō rātou ngākau; kei kite ō rātou kanohi, kei mātau hoki ō rātou ngākau, kei tahuri rātou, ā, ka whakaorangia e ahau.”
JOH 12:41 I kōrerotia ēnei mea e Ihāia, i te wā i kite ai ia i tōna korōria, i puaki ai hoki tāna kupu mōna.
JOH 12:42 He ahakoa rā he tokomaha anō ngā rangatira i whakapono ki a ia. Otirā, kīhai i whakaae ki a ia, he whakaaro hoki ki ngā Parihi, kei peia rātou ki waho o te whare karakia;
JOH 12:43 rawe ake hoki ki a rātou tā te tangata korōria i tā te Atua.
JOH 12:44 Nā, ka karanga a Īhu, ka mea, “Ki te whakapono tētahi ki ahau, ehara ahau i tāna i whakapono mai ai, engari, ko tōku kaitono mai.
JOH 12:45 Ko ia e kite ana i ahau, e kite ana hoki i tōku kaitono mai.
JOH 12:46 Kua tae mai nei ahau hei whakamārama mō te ao, kei noho i te pōuri tētahi e whakapono ana ki ahau.
JOH 12:47 “Nā, ki te rongo tētahi ki āku kupu, ki te kore hoki e puritia e ia, e kore ahau e whakahē i a ia; kīhai hoki ahau i haere mai ki te whakahē i te ao, engari, ki te whakaora i te ao.
JOH 12:48 Ko ia e whakakāhore ana ki ahau e kore hoki e tango ki āku kupu, tēnā anō te kaiwhakahē mōna; ko te kupu i kōrerotia e ahau, ko tēnā hei whakahē mōna ā te rā whakamutunga.
JOH 12:49 Nō te mea ehara i ahau ake āku kōrero; engari, nā te Matua i tonoa mai ai ahau, nāna i tuku mai te ture ki ahau, mō tāku e kōrero ai, mō tāku e kī ai.
JOH 12:50 Ā, e mātau ana ahau he ora tonu tāna ture. Nā, ko āku e kōrero nei rite tonu ki tā te Matua i mea mai ai ki ahau tāku kōrero.”
JOH 13:1 Nā, i mua ake o te Hākari o te Kapenga, ka mahara a Īhu kua taka tōna wā e haere atu ai ia i tēnei ao ki te Matua; aroha ana ia ki ōna o te ao nei, arohaina ana rātou taea noatia te mutunga.
JOH 13:2 Ā, i te mutunga o te hapa, kua whakamaharatia noatia ake anō hoki e te rēwera te ngākau o Hūrā Ikariote, tama a Haimona, kia tukua ia.
JOH 13:3 Ā, ka mahara a Īhu kua oti ngā mea katoa te hōmai e te Matua ki ōna ringa, i haere mai ia i te Atua, e hoki atu ana ki te Atua;
JOH 13:4 ka whakatika ia i te hapa, ka whakarere i ōna kākahu, ka mau ki te tauera, ka whītiki i a ia.
JOH 13:5 Me i reira, ka ringihia e ia he wai ki te peihana, ā, ka anga ka horoi i ngā waewae o ngā ākonga, ka muru hoki ki te tauera i whītikiria ai ia.
JOH 13:6 Ā, ka tae ia ki a Haimona Pita, ka mea tērā ki a ia, “E te Ariki, e horoi ana koe i ōku waewae?”
JOH 13:7 Ka whakahoki a Īhu, ka mea ki a ia, “E kore koe e mātau āianei ki tāku e mea nei; otirā, e mātau koe ā mua ake nei.”
JOH 13:8 Ka mea a Pita ki a ia, “E kore rawa koe e horoi i ōku waewae.” Ka whakahokia e Īhu ki a ia, “Ki te kore ahau e horoi i a koe, kāhore āu wāhi i roto i ahau.”
JOH 13:9 Ka mea a Haimona Pita ki a ia, “E te Ariki, aua rā ko ōku waewae anake, engari, ko ōku ringa me tōku mātenga.”
JOH 13:10 Ka mea a Īhu ki a ia, “Ki te mea i te kaukau tētahi, kāhore atu he aha māna, ko te horoi anake i ōna waewae, e mā katoa ana hoki ia. E mā ana koutou, otirā kāhore katoa.”
JOH 13:11 I mōhio hoki ia ki te tangata e tukua ai ia; koia ia i mea ai, “Kāhore koutou katoa i mā.”
JOH 13:12 Ā, ka oti ō rātou waewae te horoi, ka mau ia ki ōna kākahu, ka noho anō, nā, ka mea ki a rātou, “E mātau ana i rānei koutou ki tāku i mea nei ki a koutou?
JOH 13:13 E karangatia ana ahau e koutou, ‘E te Kaiwhakaako, E te Ariki,’ ā, he tika tā koutou kōrero, ko ahau hoki ia.
JOH 13:14 Nā, kua horoia nei ō koutou waewae e ahau, e tō koutou Ariki, e tō koutou Kaiwhakaako me horoi anō hoki e koutou ngā waewae o tētahi, o tētahi o koutou.
JOH 13:15 Kua hoatu nei hoki e ahau he tauira mō koutou, kia rite ai tā koutou mahi ki tāku i mea nei ki a koutou.
JOH 13:16 He pono, he pono tāku e mea nei ki a koutou, kāhore te pononga e nui ake i tōna rangatira; e kore anō te tangata i tonoa e nui atu i tōna kaitono.
JOH 13:17 Ki te mātau koutou ki ēnei mea, ka koa ki te meatia e koutou.
JOH 13:18 “Ehara tāku i te kōrero mō koutou katoa; e mātau ana ahau ki āku i whiriwhiri ai. Otirā, kia rite ai te karaipiture, ‘Ko ia e kai taro tahi nei māua kua hiki ake tōna rekereke ki ahau.’
JOH 13:19 “Nā, ka kōrerotia nei e ahau ki a koutou i te mea kāhore anō i puta noa, mō te puta rawa mai, kia whakapono ai koutou, ko ahau ia.
JOH 13:20 He pono, he pono tāku e mea atu nei ki a koutou, ki te tango tētahi ki tāku e tono ai, e tango ana ia i ahau; ā, ki te tango tētahi i ahau, e tango ana ki tōku kaitono mai.”
JOH 13:21 Ā, nō ka kōrerotia e Īhu ēnei mea, ka pōuri tōna wairua, ka kōrero ia, ka mea, “He pono, he pono tāku e mea nei ki a koutou, mā tētahi o koutou ahau e tuku.”
JOH 13:22 Nā, ka titiro ngā ākonga tētahi ki tētahi, ka pōhēhē ko wai rānei tāna i kōrero ai.
JOH 13:23 Nā, i te whakawhirinaki ki te uma o Īhu tētahi o āna ākonga, ko tā Īhu hoki i aroha ai.
JOH 13:24 Nā, ka tāwhiri atu a Haimona Pita ki a ia, ka mea atu, “Kōrerotia mai ki a mātou, ko wai tāna e kōrero nei.”
JOH 13:25 Nā, ka takoto atu ia ki te uma o Īhu, ka mea ki a ia, “E te Ariki, ko wai koia?”
JOH 13:26 Ka whakahokia e Īhu, “Ko te tangata e hoatu ai e ahau te maramara taro ki a ia, ina toua iho e ahau.” Ā, nō ka toua iho e ia te maramara taro, ka hoatu ki a Hūrā, tama a Haimona Ikariote.
JOH 13:27 Ā muri iho i te maramara taro, ka tomo a Hātana ki roto ki a ia. Nā, ka mea a Īhu ki a ia, “Hohoro te mea i tāu e mea ai.”
JOH 13:28 Kāhore ia tētahi o te hunga i taua hapa i mātau mō te aha tēnei i kōrerotia nei e ia ki a ia.
JOH 13:29 I mahara ētahi, nō te mea i a Hūrā te pūtea, tērā a Īhu te mea rā ki a ia, “Hokona ngā mea mā tātou mō te hākari; kia hoatu rānei tētahi mea mā ngā rawakore.”
JOH 13:30 Nā, ka tangohia e ia te maramara taro, haere tonu atu ki waho. He pō anō hoki.
JOH 13:31 Nō tōna rironga atu ki waho, ka mea a Īhu, “Kātahi te Tama a te tangata ka whakakorōriatia, ka whai korōria anō te Atua i a ia.
JOH 13:32 Ā, ka whakakorōria te Atua i a ia i roto i a ia ake, inā, ka hohoro tāna whakakorōria i a ia.
JOH 13:33 “E ngā tamariki, poto kau nei tāku noho i a koutou, tērā koutou e rapu i ahau, ko tāku hoki i mea ai ki ngā Hūrai, E kore koutou e āhei te haere ake ki te wāhi e haere ai ahau; ko tāku kupu anō tēnā ki a koutou.
JOH 13:34 “He ture hou tāku ka hoatu nei ki a koutou, kia aroha koutou tētahi ki tētahi; kia rite ki tōku aroha ki a koutou, waihoki kia aroha koutou tētahi ki tētahi.
JOH 13:35 Mā konei ka mātau ai te katoa, he ākonga koutou nāku, me ka aroha koutou tētahi ki tētahi.”
JOH 13:36 Ka mea a Haimona Pita ki a ia, “E te Ariki, e haere ana koe ki hea?” Ka whakahokia e Īhu ki a ia, “E kore koe e āhei te aru i ahau āianei ki te wāhi e haere atu nei ahau; ā mua ia ka aru koe i ahau.”
JOH 13:37 Ka mea a Pita ki a ia, “E te Ariki, he aha ahau tē aru ai i a koe āianei nei anō? Ka tuku ahau i ahau kia mate, he whakaaro nāku ki a koe.”
JOH 13:38 Ka whakahokia e Īhu ki a ia, “E tuku oti koe i a koe ki te mate, he whakaaro nāu ki ahau? He pono, he pono tāku e mea nei ki a koe, e kore e tangi te tīkaokao, kia toru rā anō āu whakakāhoretanga ki ahau.”
JOH 14:1 “Kei pōuri ō koutou ngākau; e whakapono ana koutou ki te Atua, whakapono hoki ki ahau.
JOH 14:2 He maha ngā nohoanga i roto i te whare o tōku Matua; me he kāhore, kua kōrerotia e ahau ki a koutou. Ka haere hoki ahau ki te mea i tētahi wāhi hei tukunga ake mō koutou.
JOH 14:3 Ā, ki te haere ahau ki te mea wāhi hei tukunga ake mō koutou, ka haere mai anō ahau, ā, ka tango i a koutou ki ahau; kia noho ai hoki koutou ki te wāhi e noho ai ahau.
JOH 14:4 Nā, e mātau ana koutou ki te huarahi ki te wāhi e haere atu nei ahau.”
JOH 14:5 Nā, ka mea a Tamati ki a ia, “E te Ariki, kāhore mātou e mātau ki te wāhi e haere nā koe; me pēhea ka mātau ai mātou ki te huarahi?”
JOH 14:6 Ka mea a Īhu ki a ia, “Ko ahau te huarahi, te pono, te ora; e kore rawa tētahi tangata e haere ake ki te Matua, ki te kāhore ahau.
JOH 14:7 Me i mātau koutou ki ahau, kua mātau anō ki tōku Matua. Nā i ēnei ake wā ka mōhio koutou ki a ia, kua kite anō hoki i a ia.”
JOH 14:8 Ka mea a Piripi ki a ia, “E te Ariki, whakakitea te Matua ki a mātou, ā, ka tatū ō mātou ngākau.”
JOH 14:9 Ka mea a Īhu ki a ia, “Roa noa atu tōku noho ki a koutou, ā, kāhore anō koe i mātau noa ki ahau, e Piripi? Ko ia kua kite i ahau kua kite hoki i te Matua; he aha koe ka mea ai, ‘Whakakitea mai te Matua ki a mātou?’
JOH 14:10 E kore ianei koe e whakapono, ko ahau kei roto i te Matua, ko te Matua kei roto i ahau? Ko ngā kupu e kōrero nei ahau ki a koutou, ehara i te kōrero nāku ake; engari, nā te Matua e noho ana i roto i ahau, ko ia te mea ana i ngā mahi.
JOH 14:11 Whakapono mai ki ahau, kei roto ahau i te Matua, ko te Matua hoki kei roto i ahau; ki te kāhore, whakaaro ki ngā mahi, ka whakapono ai ki ahau.
JOH 14:12 He pono, he pono tāku e mea atu nei ki a koutou, ki te whakapono tētahi ki ahau, ko ngā mahi e mea nei ahau, e meinga anō e ia; ā, nui atu i ēnei āna e mea ai; nō te mea e haere ana ahau ki tōku Matua.
JOH 14:13 Ā, ko tā koutou e īnoi ai i runga i tōku ingoa, e meatia tēnei e ahau, kia whai korōria ai te Matua i te Tama.
JOH 14:14 Ki te īnoia e koutou tētahi mea i ahau i runga i tōku ingoa, māku e whakamana.”
JOH 14:15 “Ki te aroha koutou ki ahau, kia mau ki āku ture.
JOH 14:16 Ka īnoi ahau ki te Matua, ā, māna e hoatu ki a koutou tētahi atu Kaiwhakamārie, hei noho tonu ki a koutou.
JOH 14:17 Ko te Wairua o te pono; e kore nei e riro i te ao, nō te mea e kore e kite i a ia, e kore anō e mātau ki a ia. Kei a koutou hoki ia e noho ana, ā, ka noho anō i roto i a koutou.
JOH 14:18 “E kore koutou e waiho pani e ahau. E haere mai anō ahau ki a koutou.
JOH 14:19 Taro ake, ā, heoi anō kitenga o te ao i ahau; ko koutou ia e kite i ahau; e ora ana ahau, ka ora anō koutou.
JOH 14:20 Ā taua rā koutou mātau ai kei roto ahau i tōku Matua, ko koutou anō kei roto i ahau, me ahau hoki kei roto i a koutou.
JOH 14:21 “Ko te tangata kei a ia nei āku ture, e puritia ana hoki e ia, ko ia te aroha ana ki ahau: ki te aroha tētahi ki ahau, ka arohaina ia e tōku Matua, ā, ka aroha ahau ki a ia, ka whakaatu i ahau ki a ia.”
JOH 14:22 Ka mea a Hūrā ki a ia (hāunga a Ikariote) “E te Ariki, he pēhea i whakaatu ai koe i a koe ki a mātou, ā, kāhore ki te ao?”
JOH 14:23 Ka whakahoki a Īhu, ka mea ki a ia, “Ki te aroha tētahi ki ahau, e puritia e ia tāku kupu, ā, ka arohaina ia e tōku Matua, ka haere atu māua ki a ia, ka noho tonu ki a ia.
JOH 14:24 Ki te kāhore tētahi e aroha ki ahau, e kore e puritia e ia āku kupu. Nā, ehara i ahau ake te kupu e rongo nei koutou, engari, nā te Matua i tonoa mai ai ahau.
JOH 14:25 “Kua kōrerotia nei e ahau ēnei mea ki a koutou, i ahau e noho nei i a koutou.
JOH 14:26 Nā, ko te kaiwhakamārie, arā ko te Wairua Tapu, e tonoa mai e te Matua i runga i tōku ingoa, māna koutou e whakaako ki ngā mea katoa, māna koutou e whakamahara ki ngā mea katoa kua kōrerotia nei e ahau ki a koutou.
JOH 14:27 He rangimārie tāku e waiho nei ki a koutou, tēnei tāku rangimārie te hoatu nei e ahau ki a koutou. E kore e rite ki tā te ao hoatu tāku hoatu ki a koutou. Kei pōuri ō koutou ngākau, kei mataku.
JOH 14:28 “Kua rongo nā koutou ki tāku i mea ai ki a koutou, ‘E haere ana ahau, ā, ka hoki mai anō ki a koutou.’ Me i aroha koutou ki ahau, kua hari koutou, nōku i mea, ‘E haere ana ahau ki te Matua.’ He nui ake hoki tōku Matua i ahau.
JOH 14:29 Nā, kua kōrero nei ahau ki a koutou; i te mea kāhore anō i puta, mō te puta rawa mai, ka whakapono koutou.
JOH 14:30 E kore e maha ake āku kōrero ki a koutou. E haere mai ana hoki te ariki o tēnei ao, kāhore hoki āna wāhi i roto i ahau;
JOH 14:31 otirā, kia mātau ai te ao, e aroha ana ahau ki te Matua; ko tā te Matua anō i whakahau mai ai ki ahau, ko tāku tēnā e mea nei. “Whakatika, ka haere atu tātou i konei.”
JOH 15:1 “Ko ahau te wāina pono, ko tōku Matua te kaimahi.
JOH 15:2 Ko ngā manga katoa i roto i ahau e kore e whai hua, e tangohia e ia. Ko ngā mea katoa hoki e whai hua ana, ka whakapaia e ia, kia maha atu ai ōna hua.
JOH 15:3 Nā, kua mā tēnei koutou i te kupu i kōrerotia e ahau ki a koutou.
JOH 15:4 Kia ū koutou ki roto ki ahau, me ahau hoki ki roto ki a koutou. Ka rite hoki ki te manga e kore e whai hua ko ia anake, ki te kāhore e ū ki te wāina; e kore anō hoki koutou, ki te kore e ū ki roto ki ahau.
JOH 15:5 “Ko ahau te wāina, ko koutou ngā manga. Ki te ū tētahi ki roto ki ahau, me ahau hoki ki roto ki a ia, ka maha o tērā hua; ki te motu kē hoki i ahau, e kore tētahi mea e taea e koutou.
JOH 15:6 Ki te kore e ū tētahi ki roto ki ahau, ka makā atu ia, ānō he manga, ā, ka maroke; nā, ka kohikohia, ka makā ki te kāpura, ka tahuna.
JOH 15:7 Ki te ū koutou ki roto ki ahau, ki te ū anō āku kupu ki roto ki a koutou, īnoia e koutou tā koutou e pai ai, ā, ka meatia mā koutou.
JOH 15:8 Ka whakakorōriatia tōku Matua ki te pēnei, ki te whai hua maha koutou, ā, ka meinga koutou he ākonga nāku.
JOH 15:9 “Rite tonu ki tō te Matua aroha ki ahau tōku aroha ki a koutou; kia ū ki tōku aroha.
JOH 15:10 Ki te pupuri koutou i āku ture, ka ū koutou ki tōku aroha; me ahau hoki kua pupuri nei i ngā ture a tōku Matua, ka ū nei ki tōna aroha.
JOH 15:11 Kua kōrerotia ēnei mea e ahau ki a koutou, kia pūmau ai tōku koa i roto i a koutou, kia tino kī ai tō koutou koa.
JOH 15:12 Ko tāku ture tēnei, kia aroha koutou tētahi ki tētahi, me ahau hoki kua aroha nei ki a koutou.
JOH 15:13 Kāhore he aroha o tētahi i rahi ake i tēnei, arā, kia tuku te tangata i a ia anō kia mate mō ōna hoa.
JOH 15:14 Ko koutou ōku hoa, ki te meatia e koutou āku e whakahau nei ki a koutou.
JOH 15:15 Heoi anō tāku meatanga he pononga koutou; e kore hoki te pononga e mōhio ki tā tōna ariki e mea ai; engari, kua oti koutou te hua e ahau he hoa; ko āku mea katoa hoki i rongo ai ahau ki tōku Matua, kua oti te whakakite e ahau ki a koutou.
JOH 15:16 Kāhore koutou i whiriwhiri i ahau, engari, nāku koutou i whiriwhiri, nāku anō koutou i mea kia haere, kia whai hua, kia mau tonu hoki ō koutou hua; ā, ko tā koutou e īnoi ai ki te Matua i runga i tōku ingoa, ka hoatu e ia ki a koutou.
JOH 15:17 Ko āku whakahau ēnei ki a koutou, kia aroha koutou tētahi ki tētahi.”
JOH 15:18 “Ki te mea e kinongia ana koutou e te ao, e mōhio ana koutou i kinongia ahau i mua i a koutou.
JOH 15:19 Mehemea nō te ao koutou, e arohaina e te ao ōna. Tēnā ko tēnei, ehara nei koutou i te ao, nāku koutou i whiriwhiri i roto i te ao, koia te ao ka kino ai ki a koutou.
JOH 15:20 Kia mahara ki te kupu i kōrero ai ahau ki a koutou, kāhore te pononga e rahi ake i tōna ariki. Ki te mea i whakatoia ahau e rātou, ka whakatoia anō koutou; ki te mea i pupuri rātou i tāku kupu, ka pupuri anō rātou i tā koutou.
JOH 15:21 Otirā, e meatia katoatia ēnei mea e rātou ki a koutou he whakaaro ki tōku ingoa, nō te mea kāhore rātou i mōhio ki tōku kaitono mai.
JOH 15:22 Me i kaua ahau te haere mai, te kōrero ki a rātou, pēnei kāhore ō rātou hara. Tēnā ko tēnei, kāhore ō rātou whakaoraora mō tō rātou hara.
JOH 15:23 Ko te tangata e whakakino ana ki ahau, e whakakino ana hoki ki tōku Matua.
JOH 15:24 Me i kaua te mahia e ahau i roto i a rātou ngā mahi kāhore i mahia e tētahi atu, pēnei kāhore ō rātou hara. Tēnā ko tēnei, kua kite rātou, kua whakakino anō hoki ki a māua tahi ko tōku Matua.
JOH 15:25 Mā tēnei ia ka rite ai te kupu i tuhituhia ki tā rātou ture, ‘Kua kino noa rātou ki ahau.’
JOH 15:26 “Otiia, ka tae mai te Kaiwhakamārie e tonoa mai e ahau ki a koutou i te Matua, te Wairua o te pono, e puta mai ana i te Matua, ko ia hei kaiwhakaatu mōku:
JOH 15:27 ko koutou anō hoki hei kaiwhakaatu, nō te mea i ahau koutou nō te tīmatanga iho rā anō.”
JOH 16:1 “Kua kōrerotia e ahau ēnei mea ki a koutou, kei hē koutou.
JOH 16:2 Ka peia atu koutou i roto i ngā whare karakia; ā, meāke puta te wā e mea ai te kaiwhakamate i a koutou, he mahi pai tāna ki te Atua.
JOH 16:3 Nā, e meatia ēnei mea, nō te mea kāhore rātou i mōhio ki te Matua, kāhore hoki ki ahau.
JOH 16:4 Otiia, kua kōrerotia ēnei mea e ahau ki a koutou, mō te puta rawa mai o taua wā, ka mahara koutou ki aua mea, he mea kōrero nāku ki a koutou.” “Nā, kīhai ēnei mea i kōrerotia e ahau ki a koutou i te tīmatanga, nō te mea e noho ana ahau i a koutou.”
JOH 16:5 “Nā, e haere ana tēnei ahau ki tōku kaitono mai; ā, kāhore tētahi o koutou i ui mai ki ahau, ‘Ko hea koe?’
JOH 16:6 Otirā, i tāku kōrerotanga i ēnei mea ki a koutou, ka kī ō koutou ngākau i te pōuri.
JOH 16:7 He pono ia tāku kōrero ki a koutou; nui atu te pai mō koutou ki te haere ahau; ki te kāhore hoki ahau e haere, e kore te Kaiwhakamārie e tae mai ki a koutou; ā, ki te haere ahau, māku ia e tono mai ki a koutou.
JOH 16:8 Nā, ka tae mai ia, māna e whakaatu ki te ao te hara, te tika, me te whakawā.
JOH 16:9 Te hara, mō rātou kāhore e whakapono ki ahau;
JOH 16:10 te tika, nō te mea e haere ana ahau ki tōku Matua, ā, heoi anō tō koutou kitenga i ahau;
JOH 16:11 te whakawā, nō te mea kua whakatikaia te whakawā mō te rangatira o tēnei ao.
JOH 16:12 “He maha atu anō ngā mea hei kōrero māku ki a koutou, otirā, e kore e taea e koutou te mau āianei.
JOH 16:13 Otirā, kia tae mai ia, te Wairua o te pono, māna koutou e ārahi ki te pono katoa; ehara hoki tāna i te kōrero nāna ake; engari, ka kōrerotia e ia ngā mea e rongo ai ia; māna hoki e whakakite ki a koutou ngā mea e puta mai ana.
JOH 16:14 Ka whakakorōriatia ahau e ia; ka tango hoki ia i āku mea, ā, ka whakaaturia ki a koutou.
JOH 16:15 Ko ngā mea katoa a te Matua, nāku. Koia ahau i mea ai, ka tangohia e ia āku mea, ā, ka whakaaturia ki a koutou.”
JOH 16:16 “Taro ake, ā, e kore koutou e kite anō i ahau; ā, taro ake anō, ka kite koutou i ahau, nō te mea ka haere ahau ki te Matua.”
JOH 16:17 Nā, ka mea ētahi o āna ākonga tētahi ki tētahi, “He aha tēnei e mea nei ia ki a tātou, ‘Taro ake, ā, e kore koutou e kite i ahau; ā, taro ake anō, ka kite koutou i ahau’; me tēnei, ‘Nō te mea e haere ana ahau ki te Matua’?”
JOH 16:18 Nā, ka mea rātou, “He aha tēnei e mea nei ia, ‘Taro ake?’ E kore tātou e mātau ki tāna e mea nei.”
JOH 16:19 Ā, i mōhio a Īhu e hiahia ana rātou ki te ui ki a ia, ka mea ki a rātou, “E rapu ana koutou ki a koutou anō ki tāku i mea rā, ‘Taro ake, ā, e kore koutou e kite i ahau; ā, taro ake anō ka kite koutou i ahau’?
JOH 16:20 He pono, he pono tāku e mea nei ki a koutou, Ka tangi koutou, ka auē, ko te ao ia ka hari; e pōuri anō koutou, otirā ka meinga tō koutou pōuri hei hari.
JOH 16:21 I te mea ka whakamamae te wahine, ka pōuri, nō te mea ka tae tōna wā. Ka whānau tāna tamaiti, heoi anō, mahara ki te mamae, i te hari hoki, nō te mea ka whānau he tangata ki te ao.
JOH 16:22 Nā tēnei koutou te pōuri nei; e kite anō ia ahau i a koutou, ā, ka hari ō koutou ngākau, e kore hoki e tangohia i a koutou tō koutou hari e tētahi.
JOH 16:23 “Nā, ā taua rā e kore koutou e ui ki tētahi mea i ahau. He pono, he pono tāku e mea nei ki a koutou, ko ā koutou e īnoi ai ki te Matua i runga i tōku ingoa, e hoatu e ia ki a koutou.
JOH 16:24 Kāhore anō i īnoia noatia e koutou tētahi mea i runga i tōku ingoa. Īnoia, ā, ka whiwhi koutou, kia tino nui ai tō koutou koa.”
JOH 16:25 “He mea whakarite tāku kōrero i ēnei mea ki a koutou. Otiia, meāke puta te wā e kore ai ahau e kōrero kupu whakarite ki a koutou, engari, ka mārama tonu tāku kōrero ki a koutou mō te Matua.
JOH 16:26 Ā taua rā, ka īnoi koutou i runga i tōku ingoa; ā, e kore ahau e mea ki a koutou e īnoi ahau ki te Matua mō koutou.
JOH 16:27 E aroha ana hoki te Matua ake anō ki a koutou, mō koutou i aroha ki ahau, i whakapono hoki i haere mai ahau i te Matua.
JOH 16:28 I haere mai ahau i te Matua, ā, kua tae mai nei ki te ao; ka mahue anō i ahau te ao, ā, ka haere ki te Matua.”
JOH 16:29 Ka mea āna ākonga ki a ia, “Nā, kua mārama tāu kōrero, ehara tāu kōrero i te kupu whakarite.
JOH 16:30 Kātahi mātou ka mōhio, tēnei koe te mōhio nei ki ngā mea katoa, e kore anō e mea mā tētahi e ui ki a koe; nā konei mātou i whakapono ai i haere mai koe i te Atua.”
JOH 16:31 Ka whakahokia e Īhu ki a rātou, “Kātahi koutou ka whakapono?”
JOH 16:32 Nā, meāke puta te wā, ā, kua puta nei anō, e whakamararatia ai koutou ki tōna wāhi, ki tōna wāhi, ā, ka waiho ko ahau anake. Otiia, he teka ko ahau anake, nō te mea kei ahau nei te Matua.
JOH 16:33 “Kua kōrerotia e ahau ēnei mea ki a koutou, kia whai mārietanga ai koutou i roto i ahau. Ko tā koutou i te ao nei, he mamate. Otirā, kia māia; kua taea e ahau te ao!”
JOH 17:1 Ka kōrerotia ēnei mea e Īhu, nā, ka anga ake ōna kanohi ki te rangi, ka mea: “E Pā, kua taea te hāora; whakakorōriatia tāu Tama, kia whakakorōriatia ai anō hoki koe e tāu Tama.
JOH 17:2 Kua tukua mai nei hoki e koe ki a ia ngā tikanga mō ngā kikokiko katoa, kia hoatu e ia te ora tonu ki te hunga katoa kua hōmai nei e koe ki a ia.
JOH 17:3 Ko te ora tonu hoki tēnei, kia mātau rātou ki a koe, ko koe anake te Atua pono, ki a Īhu Karaiti anō hoki i tonoa mai nei e koe.
JOH 17:4 Kua whakakorōriatia koe e ahau i runga i te whenua; ka oti i ahau te mahi i hōmai e koe kia mahia e ahau.
JOH 17:5 Nā, kia whai korōria ahau āianei i a koe ake, e Pā, hei te korōria i whiwhi ai ahau i a koe i mua atu o te ao.
JOH 17:6 “Kua whakapuakina e ahau tōu ingoa ki ngā tāngata i hōmai nei e koe ki ahau i roto i te ao. Nōu rātou, nāu anō hoki rātou i hōmai ki ahau, ā, kua puritia e rātou tāu kupu.
JOH 17:7 Kātahi rātou ka mātau nāu ngā mea katoa i hōmai nei e koe ki ahau.
JOH 17:8 Nō te mea kua hoatu e ahau ki a rātou ngā kupu i hōmai nei e koe ki ahau; ā, kua tango rātou, kua tino mātau anō, i haere mai ahau i a koe, kua whakapono rātou, nāu ahau i tono mai.
JOH 17:9 “Mō rātou tāku īnoi; kāhore āku īnoi mō te ao, engari, mō āu i hōmai ai ki ahau; nāu hoki rātou.
JOH 17:10 Ko āku mea katoa nāu, nāku hoki āu; ā, ka whai korōria ahau i a rātou.
JOH 17:11 Nā, heoi anō tōku noho ki te ao; kei te ao nei anō ēnei, ko ahau ia ka haere atu ki a koe. E te Matua tapu, puritia i runga i tōu ingoa te hunga kua hōmai nei e koe ki ahau, kia kotahi ai rātou, me tāua nei.
JOH 17:12 I ahau anō e noho ana i a rātou i te ao, i puritia rātou e ahau i runga i tōu ingoa. Kua tiakina e ahau āu i hōmai ai ki ahau, ā, kāhore tētahi o rātou i ngaro, ko te tama anake o te ngaromanga; kia rite ai te karaipiture.
JOH 17:13 “Nā, ka haere atu nei ahau ki a koe; ā, e kōrerotia ana e ahau ēnei mea i te ao nei, kia tino nui ai tōku koa i roto i a rātou.
JOH 17:14 Kua hoatu e ahau tāu kupu ki a rātou; e kino ana hoki te ao ki a rātou, nō te mea ehara rātou i te ao, me ahau hoki ehara i te ao.
JOH 17:15 Kāhore āku īnoi kia tangohia atu rātou e koe i te ao, engari, kia tiakina rātou e koe kei kino.
JOH 17:16 Ehara rātou i te ao, me ahau hoki ehara i te ao.
JOH 17:17 Whakatapua rātou e koe i runga i tōu pono; ko tāu kupu te pono.
JOH 17:18 Nāu ahau i tono mai ki te ao, he pēnā anō tāku tono i a rātou ki te ao.
JOH 17:19 He whakaaro hoki ki a rātou i whakatapu ai ahau i ahau, kia tapu ai hoki rātou i te pono.
JOH 17:20 “Ehara tāku i te īnoi mō ēnei anake, engari, mō te hunga e meinga e tā rātou kupu kia whakapono ki ahau.
JOH 17:21 Kia kotahi ai rātou katoa; me koe hoki, e Pā, i roto i ahau, me ahau anō i roto i a koe, kia kotahi ai hoki rātou i roto i a tāua; kia whakapono ai te ao, nāu ahau i tono mai.
JOH 17:22 “Kua hoatu anō e ahau ki a rātou te korōria i hōmai e koe ki ahau; kia kotahi ai rātou, me tāua nei hoki he kotahi.
JOH 17:23 Ko ahau i roto i a rātou, ko koe hoki i roto i ahau, kia tino tutuki ai rātou ki te kotahitanga; kia mōhio ai anō te ao, nāu ahau i tono mai, he rite hoki tōu aroha ki a rātou ki tōu aroha ki ahau.
JOH 17:24 “E Pā, e mea ana ahau kia noho tahi ki ahau, ki te wāhi e noho ai ahau, āu i hōmai ai ki ahau; kia kite ai rātou i tōku korōria kua hōmai nei e koe ki ahau; nō mua atu hoki i te hanganga o te ao tōu aroha ki ahau.
JOH 17:25 “E te Matua tika, ahakoa te ao tē mōhio ki a koe, e mōhio ana ahau ki a koe, ā, kua mōhio anō ēnei, nāu ahau i tono mai.
JOH 17:26 Kua whakapuakina anō tōu ingoa e ahau ki a rātou, ā, ka whakapuakina anō; kia mau ai i roto i a rātou te aroha i arohaina ai ahau e koe, me ahau anō i roto i a rātou.”
JOH 18:1 Ka mutu ēnei kōrero a Īhu ka haere ia, rātou ko āna ākonga, ki tāwāhi o te manga wai, arā o Kerono. Nā, he kāri kei reira, ā, tapoko atu ana ia, rātou ko āna ākonga.
JOH 18:2 I mātauria anō taua wāhi e Hūrā, e te tangata e tukua ai ia; he maha hoki ngā hokinga o Īhu, rātou ko āna ākonga ki reira.
JOH 18:3 Nā, ka hoatu ki a Hūrā tētahi mātua me ētahi kātipa e ngā tohunga nui rātou ko ngā Parihi, ā, haere ana ki reira, me ngā roherohe, me ngā rama, me ngā patu.
JOH 18:4 Heoi, i mātau a Īhu ki ngā mea katoa meāke pā ki a ia, ka puta atu, ka mea ki a rātou, “Ko wai tā koutou e rapu?”
JOH 18:5 Ka whakahokia e rātou ki a ia, “Ko Īhu o Nahareta.” Ka mea a Īhu ki a rātou, “Ko ahau ia.” Ā, i te tū anō i roto i a rātou a Hūrā, tōna kaituku.
JOH 18:6 Nā, i tāna kōrerotanga ki a rātou, “Ko ahau ia,” hoki ana rātou ki muri, hinga ana ki te whenua.
JOH 18:7 Nā, ka ui anō ia ki a rātou, “Ko wai tā koutou e rapu?” Ka mea rātou, “Ko Īhu o Nahareta.”
JOH 18:8 Ka whakahokia e Īhu, “Kua mea ahau ki a koutou, ‘Ko ahau ia,’ ki te mea e rapu ana koutou i ahau, tukua ēnei kia haere.”
JOH 18:9 Kia rite ai te kupu i kōrerotia e ia: “Kāhore i ngaro tētahi o te hunga i hōmai e koe ki ahau.”
JOH 18:10 Nā, he hoari tā Haimona Pita, unuhia ana e ia, ā, hāua iho te pononga a te tohunga nui, tapahia ana tōna taringa matau. Ko te ingoa o taua pononga ko Maraku.
JOH 18:11 Ka mea a Īhu ki a Pita, “Kuhua tāu hoari ki te takotoranga. Ko te kapu i hōmai nei e tōku Matua ki ahau auaka rānei e inumia e ahau?”
JOH 18:12 Heoi, ka hopukina a Īhu e taua ope, e te rangatira rātou ko ngā kātipa o ngā Hūrai, ā, hereherea ana ia.
JOH 18:13 Ā, ka ārahina ki a Anaha i te tuatahi; ko ia hoki te hungawai o Kaiapa, o te tohunga nui mō taua tau.
JOH 18:14 Nā, ko Kaiapa tēnei nāna rā i whakatakoto te whakaaro ki ngā Hūrai, he pai kē ki te mate te tangata kotahi mō te iwi.
JOH 18:15 Nā, ka aru a Haimona Pita i a Īhu, ā, ka aru anō hoki tētahi atu o ngā ākonga; nā, i mōhiotia taua ākonga e te tohunga nui, ā, tomo tahi ana me Īhu ki te whare o te tohunga nui;
JOH 18:16 ko Pita ia i tū i te kūwaha i waho. Nā, ka puta atu taua ākonga i mōhiotia nei e te tohunga nui, ka kōrero ki te kaitiaki o te tatau, ā, ārahina ana a Pita ki roto.
JOH 18:17 Nā, ko te meatanga a te kōtiro tiaki o te tatau ki a Pita, “Ehara ianei koe i tētahi o ngā ākonga a tēnei tangata?” Ka mea ia, “Ehara!”
JOH 18:18 Nā, i reira ngā pononga me ngā kātipa e tū ana, kua whakaūngia hoki e rātou te kāpura waro; he makariri hoki; ā, e inaina ana rātou. Ko Pita hoki tētahi o rātou, e tū tahi ana e inaina ana.
JOH 18:19 Nā, ka ui te tohunga nui ki a Īhu, ki āna ākonga, ki tāna ako.
JOH 18:20 Ka whakahokia e Īhu ki a ia, “I mārama tonu tāku kōrero ki te ao; i ako tonu ahau i roto i te whare karakia, i te temepara hoki, i te wāhi huihui o ngā Hūrai katoa; kāhore hoki tētahi mea i kōrerotia pukutia e ahau.
JOH 18:21 He aha koe ka ui ai ki ahau? Ui atu ki te hunga i rongo ki tāku i mea ai ki a rātou; nanā, e mōhio ana rātou ki āku i kōrero ai.”
JOH 18:22 Nā, i tāna kōrerotanga i ēnei kupu, ka papaki tētahi o ngā kātipa i tū rā i a Īhu, ka mea, “E pēnā ana koe ki te tohunga nui?”
JOH 18:23 Ka whakahokia e Īhu ki a ia, “Ki te kino āku kōrero, whakaaturia te kino. Ki te pai ia, he aha koe i papaki ai i ahau?”
JOH 18:24 Nā, ka tukua hereheretia atu ia e Anaha ki a Kaiapa tohunga nui.
JOH 18:25 Nā, tērā a Haimona Pita te tū rā me te inaina. Nā, ka mea rātou ki a ia, “Ehara ianei koe i tētahi o āna ākonga?” Ka whakakāhore ia, ka mea, “Ehara!”
JOH 18:26 Ka mea tētahi o ngā pononga a te tohunga nui, he whanaunga nōna i tapahia nei te taringa e Pita, “Kīhai ianei ahau i kite i a koe, kōrua tahi i te kāri?”
JOH 18:27 Nā, ka whakakāhore anō a Pita; ā, tangi tonu iho te tīkaokao.
JOH 18:28 Kātahi, ka ārahina atu e rātou a Īhu i a Kaiapa ki te whare whakawā. He atatū. Ko rātou ia kīhai i tomo ki te whare whakawā, kei poke rātou, engari, kia kai ai rātou i te Kapenga.
JOH 18:29 Nā, ka puta atu a Pirato ki a rātou, ka mea, “He aha tā koutou whakapae ki tēnei tangata?”
JOH 18:30 Ka whakahoki rātou, ka mea ki a ia, “Me i kaua ia te mahi i te kino, kīhai i kawea mai e mātou ki a koe.”
JOH 18:31 Nā, ko te meatanga a Pirato ki a rātou, “Mauria atu ia, whakawākia ki tō koutou nā ture.” Ka mea ngā Hūrai ki a ia, “E kore e tika kia whakamatea tētahi tangata e mātou.”
JOH 18:32 Kia rite ai tā Īhu kupu i kōrero ai, hei whakaatu i te mate e mate ai ia.
JOH 18:33 Me i reira ka tomo anō a Pirato ki te whare whakawā, ka karanga i a Īhu, ka mea ki a ia, “Ko te Kīngi rānei koe o ngā Hūrā?”
JOH 18:34 Ka whakahokia e Īhu ki a ia, “Nāu ake anō tēnei kupu, he kōrero rānei mōku nā te tangata kē ki a koe?”
JOH 18:35 Ka mea a Pirato, “He Hūrai koia ahau? Nā tōu iwi, nā ngā tohunga nui anō hoki, koe i kawe mai ki ahau; i aha koia koe?”
JOH 18:36 Ka whakahokia e Īhu, “Ehara tōku rangatiratanga i tēnei ao; mehemea nō tēnei ao tōku rangatiratanga, kua tatau āku pononga, kei tukua ahau ki ngā Hūrai. Tēnā ko tēnei, ehara tōku rangatiratanga i konei.”
JOH 18:37 Nā, ka mea a Pirato ki a ia, “He kīngi oti koe?” Ka whakahokia e Īhu, “Kua kōrerotia mai nā e koe he kīngi ahau. Ko te mea tēnei i whānau ai ahau; nā tēnei hoki ahau i haere mai ai ki te ao, hei kaiwhakaatu mō te pono. E whakarongo ana ki tōku reo ngā tāngata katoa o te pono.”
JOH 18:38 Ka mea a Pirato ki a ia, “He aha te pono?” Ā, nō te puakanga o tēnei kī, hoki ana ia ki waho, ki ngā Hūrai, ka mea ki a rātou, “Kāhore tētahi hē o tēnei tangata i mau i ahau.
JOH 18:39 Otiia, he ritenga tēnei nā koutou, kia tukua e ahau ki a koutou tētahi tangata i te Kapenga. E pai ana rānei koutou kia tukua e ahau ki a koutou te Kīngi o ngā Hūrai?”
JOH 18:40 Heoi, karanga katoa ana anō rātou, ka mea, “Auaka tēnei, engari a Parapa.” Nā, he tāhae a Parapa.
JOH 19:1 Kātahi, ka mau a Pirato ki a Īhu, ka whiu i a ia.
JOH 19:2 Ā, ka whiria e ngā hōia he karauna tātarāmoa, pōtaea ana ki tōna mātenga, whakakākahuria ana hoki ia ki te kahu pāpura.
JOH 19:3 Nā, ka mea rātou, “Tēnā koe, e te Kīngi o ngā Hūrai!” Ā, pākia ana ia ki ō rātou ringa.
JOH 19:4 Ka haere anō a Pirato, ka mea ki a rātou, “Nā tēnei te ārahina atu nei ia e ahau ki a koutou, kia mōhio ai koutou, kāhore rawa i mau i ahau tētahi hē ōna.”
JOH 19:5 Nā, ka puta a Īhu ki waho, me te karauna tātarāmoa i runga i a ia, me te kākahu pāpura. Ka mea a Pirato ki a rātou, “Nā, te tangata nei!”
JOH 19:6 Ā, nō te kitenga o ngā tohunga nui rātou ko ngā kātipa i a ia, ka karanga rātou, ka mea, “Rīpekatia, rīpekatia.” Ka kī a Pirato ki a rātou, “Tangohia atu ia e koutou, rīpekatia; kāhore hoki i mau i ahau tētahi hē ōna.”
JOH 19:7 Ka whakahokia e ngā Hūrai ki a ia, “He ture tō mātou, ā, ki tō mātou ture he mea tika kia mate ia, mōna i mea ko te Tama ia a te Atua.”
JOH 19:8 Nō te rongonga o Pirato i tēnei kī, nui rawa tōna wehi;
JOH 19:9 ka tomo anō ia ki te whare whakawā, ka mea ki a Īhu, “Nō hea koe?” Heoi, kāhore a Īhu kupu whakahoki ki a ia.
JOH 19:10 Nā, ka mea a Pirato ki a ia, “E kore koe e kōrero ki ahau? Kāhore koe e mōhio kei ahau te tikanga mō te rīpeka i a koe, kei ahau anō te tikanga mō te tuku i a koe kia haere?”
JOH 19:11 Ka whakahokia e Īhu, “Kāhore āu tikanga ki ahau, me kāhore i hōmai ki a koe i runga. Koia i nui rawa ai te hara o te kaituku i ahau ki a koe.”
JOH 19:12 Nā, i reira anō ka whai a Pirato kia tukua ia kia haere; otiia, ka karanga ngā Hūrai, ka mea, “Ki te tukua tēnei e koe, ehara koe i te hoa nō Hīhā. Ki te whakakīngi tētahi tangata i a ia, he whakakāhore tāna i a Hīhā.”
JOH 19:13 Ā, nō ka rongo a Pirato i tēnei kōrero, ka ārahina e ia a Īhu ki waho, ā, noho ana ki runga ki te nohoanga whakawā, ki te wāhi e kīia nei ko te Whāriki Kōhatu, ki te reo Hiperu, ko Kapata.
JOH 19:14 Ko te takanga ia o te Kapenga, i tata pū ki te ono o ngā hāora. Ka mea ia ki ngā Hūrai, “Nā, tō koutou Kīngi!”
JOH 19:15 Nā, ko tā rātou karangatanga, “Whakamatea, whakamatea, rīpekatia!” Ka mea a Pirato ki a rātou, “Kia rīpeka koia ahau i tō koutou Kīngi?” Ka whakahokia e ngā tohunga nui, “Kāhore ō mātou kīngi, ko Hīhā anake.”
JOH 19:16 Nō reira, ka hoatu ia e ia ki a rātou kia rīpekatia. Ā, ka mau rātou ki a Īhu.
JOH 19:17 Ā, amo ana ia i tōna rīpeka, haere ana ki te wāhi e kīia nei ko te wāhi o te angaanga, tōna ingoa ki te reo Hiperu, ko “Korokota.”
JOH 19:18 Nā, rīpekatia ana ia e rātou ki reira, ā, ia me ētahi atu tokorua, kotahi ki tētahi taha, kotahi ki tētahi taha, ko Īhu ki waenganui.
JOH 19:19 Nā, tuhituhia ana e Pirato tētahi ingoa, whakapiritia ana ki te rīpeka. Ko te tuhituhi tēnei, “Ko Īhu o Nahareta ko te Kīngi o ngā Hūrai.”
JOH 19:20 Ā, he tokomaha ngā Hūrai i kite i tēnei ingoa; i tata hoki ki te pā te wāhi i rīpekatia ai a Īhu; ā, i tuhituhia taua mea ki te reo Hiperu, ki te reo Kariki, ki te reo Rōma.
JOH 19:21 Nā, ka mea ngā tohunga nui o ngā Hūrai ki a Pirato, “Aua e tuhituhia, ‘Ko te Kīngi o ngā Hūrai,’ engari, ‘Nāna i mea, Ko te Kīngi ahau o ngā Hūrai.’ ”
JOH 19:22 Ka whakahokia e Pirato, “Ko tāku i tuhituhi ai kua tuhituhia.”
JOH 19:23 Ā, ka oti a Īhu te rīpeka e ngā hōia, ka mau rātou ki ōna kākahu, wehea ake kia whā ngā wāhi, ki ia hōia he wāhi; me te koti anō. Nā, kāhore he tui o te koti, he mea whatu iho i runga ā puta noa.
JOH 19:24 Nā, ka mea rātou tētahi ki tētahi, “Kaua e haea e tātou, engari, me maka ki te rota kia kitea ai, mō wai rānei.” Nā, ka rite te karaipiture e mea nei: “I wehewehea ōku kākahu mō rātou, i maka rota hoki mō tōku weruweru.” Ko tā ngā hōia tēnei i mea ai.
JOH 19:25 Nā, i te taha o te rīpeka o Īhu tōna whaea e tū ana, rātou ko te teina o tōna whaea, ko Meri wahine a Kereopa, ko Meri Makarini.
JOH 19:26 Ā, nō te kitenga o Īhu i tōna whaea, i te ākonga hoki i aroha ai ia e tū tahi ana, ka mea ia ki tōna whaea, “E tai, nanā, tāu tama!”
JOH 19:27 Kātahi, ia ka mea ki taua ākonga, “Nā, tōu whaea!” Ā, nō taua hāora ka mau taua ākonga i a ia ki tōna whare.
JOH 19:28 Muri iho i tēnei ka mōhio a Īhu ka oti ngā mea katoa, nā, ka mea ia, hei whakaritenga mō te karaipiture, “He matewai tōku.”
JOH 19:29 Nā, tērā e tū rā tētahi oko, kī tonu i te winika; ā, ka whakakīia e rātou tētahi hautai ki te winika, whakanohoia ana ki runga ki te hihopa, hoatu ana ki tōna māngai.
JOH 19:30 Ā, nō te inumanga o Īhu i te winika, ka mea ia, “Kua oti.” Nā, ka tuohu tōna mātenga, tukua ana tōna wairua.
JOH 19:31 Nā, i mea ngā Hūrai kia kaua e mau ngā tinana ki te rīpeka i te hāpati, ko te Takanga hoki tērā, he rā nui hoki taua hāpati, ka mea rātou ki a Pirato kia whatia ō rātou waewae, kia tangohia atu hoki.
JOH 19:32 Nā, ka haere ngā hōia, ka whawhati i ngā waewae o tō mua, me o tērā i rīpekatia ngātahitia me ia.
JOH 19:33 I tō rātou taenga ia ki a Īhu, ka kite kua mate noa ake ia, kīhai i whatia e rātou ōna waewae.
JOH 19:34 Engari, i werohia tōna kaokao e tētahi o ngā hōia ki te mātia, ā, puta tonu he toto, he wai.
JOH 19:35 Ā, ko te tangata i kite, ko ia anō te kaiwhakaatu, ā, he pono tāna whakaatu; e mōhio ana ia he kōrero pono tāna, he mea rā kia whakapono ai koutou.
JOH 19:36 I meatia hoki ēnei mea, kia rite ai te karaipiture, “E kore tētahi iwi ōna e whatia.”
JOH 19:37 E mea ana anō tētahi atu karaipiture, “Ka titiro rātou ki tā rātou i wero ai.”
JOH 19:38 Muri iho i ēnei mea, ka īnoi a Hōhepa o Arimatia ki a Pirato kia tangohia e ia te tinana o Īhu. (He ākonga ia nā Īhu, otiia, he mea huna i te wehi ki ngā Hūrai.) Ā, whakaae ana a Pirato. Nō, ka haere ia, ka tango i te tinana o Īhu.
JOH 19:39 I haere mai anō a Nikorima, tērā i haere rā i mua ki a Īhu i te pō, me te mau mai anō i te maira, i te aroe, he mea whakananu, kia kotahi pea rau pāuna.
JOH 19:40 Nā, ka tango rāua i te tinana o Īhu, takaia ana ki ngā kākahu rīnena me ngā mea kakara, ko tā ngā Hūrai ritenga hoki tērā mō te tanu.
JOH 19:41 Nā, he kāri kei te wāhi i rīpekatia ai ia; i roto anō i taua kāri tētahi urupā hou, he mea kāhore anō i takotoria noatia e tētahi.
JOH 19:42 Nā, ka whakatakotoria a Īhu e rāua ki reira, nō te mea he rā Takanga tērā nō ngā Hūrai; he tata hoki te urupā.
JOH 20:1 I te rā tuatahi o te wiki ka haere a Meri Makarini ki te urupā i te atatū, i te mea e pōuri tonu ana, ā, ka kite i te kōhatu kua tangohia atu i te urupā.
JOH 20:2 Nā, ka oma ia, ka haere ki a Haimona Pita rāua ko tērā ākonga i aroha ai a Īhu, ka mea ki a rāua, “Kua tangohia e rātou te Ariki i te urupā, ā, kāhore mātou e mōhio ki te wāhi i waiho ai ia e rātou.”
JOH 20:3 Nā, ka puta atu a Pita, me taua ākonga, ka haere ki te urupā.
JOH 20:4 Ā, oma ngātahi ana rāua; otiia, i hohoro tērā ākonga i a Pita, ko ia anō kua tae wawe ki te urupā.
JOH 20:5 Nā, piko iho ana ia, ka kite i ngā tākai rīnena e takoto ana; heoi, kīhai i tomo ki roto.
JOH 20:6 Nā, ka haere anō a Haimona Pita i muri i a ia, ā, ko tōna tomokanga ki te urupā, ka kite i ngā tākai rīnena e takoto ana.
JOH 20:7 Me te tauera i takaia ai tōna mātenga, kīhai i takoto tahi me ngā tākai rīnena, he mea whakakopa ia ki tētahi wāhi i tahaki.
JOH 20:8 Kātahi, ka tomo tērā ākonga, i tae wawe nei ki te urupā, kite ana, whakapono ana.
JOH 20:9 (Kīanō hoki rātou i mōhio noa ki te karaipiture, kua takoto te tikanga kia ara ake ia i te hunga mate.)
JOH 20:10 Nā, hoki ana anō ngā ākonga ki tō rāua kāinga.
JOH 20:11 Ko Meri ia tū tonu i waho o te urupā tangi ai. Ā, i a ia e tangi ana, ka piko iho ki te urupā.
JOH 20:12 Ka kite i ngā anahera tokorua, he mā ngā kākahu, e noho ana, ko tētahi ki te mātenga, ko tētahi ki ngā waewae, i te wāhi i takoto ai te tinana o Īhu.
JOH 20:13 Ka mea rāua ki a ia, “E tai, he aha tāu e tangi?” Ka mea ia ki a rāua, “Kua tangohia e rātou tōku Ariki, e kore hoki ahau e mātau ki te wāhi i whakatakotoria ai ia.”
JOH 20:14 Ka pēnei āna kōrero, ka tahuri whakamuri, ka kite i a Īhu e tū ana, otiia, kīhai i mōhio ko Īhu ia.
JOH 20:15 Ka mea a Īhu ki a ia, “E tai, he aha tāu e tangi? Ko wai tāu e rapu?” Hua noa ia ko te kaingaki kāri, nā, ko tāna meatanga ki a ia, “E mara, ki te mea kua mauria atu ia e koe, kōrerotia ki ahau te wāhi i whakatakotoria ai ia, ā, māku ia e tango atu.”
JOH 20:16 Ka mea a Īhu ki a ia, “E Meri!” Ka tahuri atu tērā, ka mea ki a ia, “E Rāponi!” Ko te tikanga tēnei, “E te Kaiwhakaako.”
JOH 20:17 Ka mea a Īhu ki a ia, “Kei pā ki ahau; kīanō hoki ahau i kake noa ki tōku Matua. Engari, haere ki ōku tēina, ka mea atu ki a rātou, ‘Ka kake ahau ki tōku Matua, ki tō koutou Matua; ki tōku Atua, ki tō koutou Atua.’ ”
JOH 20:18 Haere ana a Meri Makarini, kōrero ana ki ngā ākonga, “Kua kite ia i te Ariki.” Kua kōrerotia hoki e ia ēnei mea ki a ia.
JOH 20:19 I taua rā tuatahi anō o te wiki, i te ahiahi, i ngā tatau e kati ana o te wāhi i huihui ai ngā ākonga i te wehi i ngā Hūrai, ka haere mai a Īhu, ka tū i waenganui, ka mea ki a rātou, “Kia tau te rangimārie ki a koutou.”
JOH 20:20 Ā, ka puaki tēnei kupu āna, ka whakakitea e ia ōna ringa me tōna kaokao ki a rātou. Nā, hari tonu ngā ākonga, i tō rātou kitenga i te Ariki.
JOH 20:21 Ka mea anō a Īhu ki a rātou, “Kia tau te rangimārie ki a koutou. I tonoa mai ahau e te Matua, ka pērā anō tāku tono i a koutou.”
JOH 20:22 Ka kōrerotia tēnei e ia, ka whakahā ia, ka mea ki a rātou, “Kia riro te Wairua Tapu i a koutou.
JOH 20:23 Ki te whakarērea noatia e koutou ngā hara o ētahi, ka whakarērea o rātou; ki te whakamaua anō o ētahi e koutou, ka mau anō.”
JOH 20:24 Ko Tamati ia, ko tētahi o te tekau mā rua, tētahi o ōna ingoa ko Ririmu, kāhore i a rātou i te taenga mai o Īhu.
JOH 20:25 Ā, ko te meatanga a ērā ākonga ki a ia, “Kua kite mātou i te Ariki!” Ka mea ia ki a rātou, “Ki te kāhore ahau e kite i te ngaunga o ngā whao i ōna ringa, e kuhu i tōku matihao ki te ngaunga a ngā whao, e kuhu hoki i tōku ringa ki tōna kaokao, e kore ahau e whakapono.”
JOH 20:26 Ā, ka pahemo ngā rā e waru, nā, kei roto anō āna ākonga, rātou ko Tamati. Ka haere mai a Īhu i te mea e kati ana ngā tatau, ka tū ki waenganui, ka mea, “Kia tau te rangimārie ki a koutou.”
JOH 20:27 Kātahi ia ka mea ki a Tamati, “Totoro mai tōu matihao, kia kite hoki koe i ōku ringa. Totoro mai hoki tōu ringa, ka kuhu ki tōku kaokao. Aua e whakateka, engari, me whakapono.”
JOH 20:28 Nā, ka whakahoki a Tamati, ka mea ki a ia, “E tōku Ariki, e tōku Atua!”
JOH 20:29 Ka mea a Īhu ki a ia, “Nō tōu kitenga i ahau, i whakapono ai koe, e Tamati. Ka koa te hunga kāhore i kite, ā, kua whakapono.”
JOH 20:30 He maha anō ērā atu tohu i oti i a Īhu, i te aroaro o āna ākonga, kāhore nei i tuhituhia ki tēnei pukapuka.
JOH 20:31 Otiia, kua tuhituhia ēnei, kia whakapono ai koutou ko te Karaiti a Īhu, ko te Tama a te Atua; kia whiwhi ai hoki ki te ora i runga i tōna ingoa, ina whakapono.
JOH 21:1 Muri iho i ēnei mea ka whakakite a Īhu i a ia ki ngā ākonga i te moana o Taipiria; ko tāna whakakitenga tēnei.
JOH 21:2 E noho tahi ana a Haimona Pita, a Tamati, ko Ririmu nei tōna ingoa, a Natanahira o Kana o Karirī, ngā tama a Heperi, me tētahi tokorua atu anō o āna ākonga.
JOH 21:3 Ka mea a Haimona Pita ki a rātou, “Ka haere ahau ki te hao.” Ka mea rātou ki a ia, “Ko tātou tahi e haere.” Haere ana rātou, eke ana ki runga ki te kaipuke; ā, i taua pō kīhai i mau tētahi mea.
JOH 21:4 Nā, ka pūao te ata, ko Īhu e tū ana i tātahi; otiia, kīhai ngā ākonga i mōhio ko Īhu ia.
JOH 21:5 Nā, ko te meatanga a Īhu ki a rātou, “E tama mā, kāhore ā koutou kai?” Ka whakahokia e rātou ki a ia, “Kāhore.”
JOH 21:6 Ka mea ia ki a rātou, “Makā te kupenga ki te taha matau o te kaipuke, ā, ka mau ētahi.” Nā, i tā rātou makanga atu, kīhai i taea te kukume i te tini o ngā ika.
JOH 21:7 Kātahi, ka mea te ākonga i arohaina e Īhu ki a Pita, “Ko te Ariki!” Ā, nō te rongonga o Haimona Pita, ko te Ariki, ka whītikiria tōna kākahu, e tū kau ana hoki ia, ā, rere ana ki te moana.
JOH 21:8 Ko ērā ākonga ia i hoe i runga i te poti, kīhai hoki i mamao atu i te whenua, me te mea e rua rau whatīanga, e kukume ana i te kupenga, i ngā ika.
JOH 21:9 Heoi, nō tō rātou ūnga ki uta, ka kite i te kāpura waro me ngā ika e takoto ana i runga, me tētahi taro.
JOH 21:10 Ka mea a Īhu ki a rātou, “Hōmai ētahi o ngā ika kua mau nā i a koutou.”
JOH 21:11 Nā, haere ana a Haimona Pita, ā, kūmea ana e ia te kupenga ki uta, kī tonu i ngā ika nunui, kotahi rau e rima tekau mā toru; ā, ahakoa tini, kīhai i pakaru te kupenga.
JOH 21:12 Ka mea a Īhu ki a rātou, “Haere mai ki te kai.” Heoi, kīhai tētahi o ngā ākonga i māia ki te ui ki a ia, “Ko wai koe?” I mōhio hoki ko te Ariki.
JOH 21:13 Nā, ka haere a Īhu, ka mau ki te taro, ā, hoatu ana e ia ki a rātou, me ngā ika.
JOH 21:14 Ko te toru tēnei o ngā putanga o Īhu ki āna ākonga, i muri i tōna aranga ake i te hunga mate.
JOH 21:15 Ā, ka mutu tā rātou kai, ka mea a Īhu ki a Haimona Pita, “E Haimona, tama a Hona, rahi atu rānei tōu aroha ki ahau i tō ēnei?” Ka mea tērā ki a ia, “Āe, e te Ariki; e mōhio ana koe e aroha ana ahau ki a koe.” Ka mea ia ki a ia, “Whāngainga āku reme.”
JOH 21:16 Ka mea anō ia ki a ia, ko te rua o ngā meatanga, “E Haimona, tama a Hona, e aroha ana koe ki ahau?” Ka mea tērā ki a ia, “Āe, e te Ariki; e mōhio ana koe e aroha ana ahau ki a koe.” Ka mea ia ki a ia, “Hēparatia āku hipi.”
JOH 21:17 Ka mea ia ki a ia, ko te toru o ngā meatanga, “E Haimona, tama a Hona, e aroha ana koe ki ahau?” Ka pōuri a Pita nō te mea ka toru rawa āna meatanga ki a ia, “E aroha ana koe ki ahau?” Ka mea anō ki a ia, “E te Ariki, e mōhio ana koe ki ngā mea katoa; e mōhio ana koe e aroha ana ahau ki a koe.” Ka mea a Īhu ki a ia, “Whāngainga āku hipi.
JOH 21:18 He pono, he pono tāku e mea nei ki a koe, i tōu tamarikitanga, i whītiki koe i a koe, i haere ki tāu wāhi i pai ai. Ka koroheketia koe, ka whakamārōtia e koe ōu ringa, he tangata kē hoki māna koe e whītiki, e kawe ki te wāhi e kore ai koe e pai.”
JOH 21:19 (I kōrerotia tēnei e ia, hei tohu mō te mate e whakakorōria ai ia i te Atua.) Ā, ka puaki tēnei kupu ana, ka mea ia ki a ia, “Haere mai i muri i ahau.”
JOH 21:20 Nō te tahuritanga, o Pita, ka kite i te ākonga i aroha ai a Īhu e aru ana; ko tērā hoki i whakawhirinaki rā ki tōna uma i te hapa, i mea rā, “E te Ariki, ko wai te kaituku mōu?”
JOH 21:21 Ā, i te kitenga o Pita i a ia, ka mea ki a Īhu, “E te Ariki, e aha rā tēnei?”
JOH 21:22 Ka mea a Īhu ki a ia, “Ki te pai ahau kia noho tonu ia kia tae mai rā anō ahau, hei aha māu? Haere mai koe i muri i ahau.”
JOH 21:23 Heoi, ka puta atu tēnei kupu ki ngā hoa, e kore taua ākonga e mate. Otiia, kīhai a Īhu i mea ki a ia, “E kore ia e mate”; engari, “Ki te pai ahau kia noho tonu ia kia tae mai rā anō ahau, hei aha māu?”
JOH 21:24 Ko taua ākonga tēnei e whakaatu nei i ēnei mea, ko te kaituhituhi hoki ia i ēnei mea; e mōhio ana anō mātou e tika ana tāna whakaatu.
JOH 21:25 Nā, tērā atu anō tōna tini o ngā mea i mea ai a Īhu me i tuhia katoatia, e mea ana ahau, e kore pea te ao nei e whai takotoranga mō ngā pukapuka e tuhia.
ACT 1:1 Ko te pukapuka tuatahi rā he mea tuhituhi nāku, e Tiopira, mō ngā mea katoa i tīmata ai a Īhu te mahi, te ako,
ACT 1:2 taea noatia te rā i tangohia atu ai ia, i muri i tāna whakaakoranga, arā i tā te Wairua Tapu, ki ngā āpōtoro i whiriwhiria e ia.
ACT 1:3 He maha hoki ngā tohu i whakakite ora ai ia i a ia ki a rātou, i muri i tōna whakamamaetanga, e whā tekau hoki ngā rā i kitea ai e rātou, kōrerotia ai e ia ngā mea o te rangatiratanga o te Atua.
ACT 1:4 Ā, i a rātou ka huihui tahi me ia, ka whai kupu ia kia kaua rātou e haere atu i Hiruhārama, ā, ka mea, “Engari, kia tāria te mea i kōrerotia i mua e te Matua, i rongo rā koutou ki ahau.
ACT 1:5 I iriiri hoki a Hoani ki te wai; ko koutou ia, e kore e maha ake ngā rā, ka iriiria ki te Wairua Tapu.”
ACT 1:6 Nō reira, i a rātou ka tāmene, ka ui rātou ki a ia, “E te Ariki, ko te wā ianei tēnei e whakahoki ai koe i te rangatiratanga ki a Īharaira?”
ACT 1:7 Nā, ko tāna meatanga ki a rātou, “Ehara mā koutou te mōhio ki ngā tāima, ki ngā wā rānei, kua whakaritea e te Matua māna ake te tikanga.
ACT 1:8 Otiia, ka riro he kaha i a koutou, ina haere mai te Wairua Tapu ki runga ki a koutou, ā, hei kaiwhakaatu koutou mōku ki Hiruhārama, ki Hūria katoa, ki Hamaria hoki, ā tae noa ki te pito whakamutunga o te ao.”
ACT 1:9 Ā, nō ka mutu tāna kōrero i ēnei mea, i a rātou anō e titiro atu ana, ka tangohia atu ia, ā, nā te kapua i kōpaki atu i ō rātou kanohi.
ACT 1:10 Ā, i a rātou e titiro matatau atu ana ki te rangi, i a ia e haere ana, nā, ko ngā tāngata tokorua e tū ana i tō rātou taha, he mā ngā kākahu.
ACT 1:11 E mea ana, “E ngā tāngata o Karirī, he aha tā koutou e tū, e mātakitaki atu nā ki te rangi? Ko tēnā Īhu kua tangohia atu nā i a koutou ki te rangi, ka pērā anō tōna haerenga mai me ia i tirohia atu nā e koutou e haere ana ki te rangi.”
ACT 1:12 Nā, hoki ana rātou ki Hiruhārama i te maunga e huaina nei ko Ōriwa, he wāhi e tata ana ki Hiruhārama, he haerenga hāpati.
ACT 1:13 Ā, ka tomo rātou, ka kake ki te rūma i runga, ki te wāhi i noho ai rātou; arā a Pita, a Hēmi, a Hoani, a Anaru, a Piripi, a Tamati, a Patoromu, a Matiu, a Hēmi tama a Arapiu, a Haimona Heroti, a Hūrā te teina o Hēmi.
ACT 1:14 Ko ēnei katoa kotahi tonu te whakaaro i ū ai ki te īnoi, ki te karakia, me ngā wāhine; me te whaea o Īhu, me Meri; me ōna tēina.
ACT 1:15 I aua rā, ka whakatika a Pita i waenganui o ngā ākonga; ā, he tokomaha ngā tāngata i huihui, kei te kotahi rau e rua tekau; ā, ka mea,
ACT 1:16 “E hoa mā, e ōku tēina, i tika anō kia whakaritea tēnei karaipiture, tā te Wairua Tapu i kōrerotia rā i mua e te māngai o Rāwiri mō Hūrā, mō te kaiārahi i te hunga nāna i hopu a Īhu.
ACT 1:17 I huihuia tahitia hoki ia ki a tātou, i a ia anō tētahi wāhi o tēnei mahi.”
ACT 1:18 (Nā, hokona ana e taua tangata tētahi māra ki te utu o tōna hara; ā, taka tūpou iho, kōara pū i waenganui, pakaru katoa ki waho ōna whēkau.
ACT 1:19 I mōhiotia tēnei e te hunga katoa e noho ana i Hiruhārama; nā reira taua wāhi i huaina ai ki tō tātou reo ko Akērama, arā ko te Māra o te Toto.)
ACT 1:20 “Kua oti hoki te tuhituhi ki te pukapuka o ngā Waiata, ‘Kia ururuatia tōna nohoanga, kaua hoki tētahi tangata e noho ki reira’; me tēnei: ‘Kia riro tāna mahi tirotiro i tētahi atu.’
ACT 1:21 Nō reira, ko ngā tāngata i haere tahi nei tātou, i ngā wā katoa i hāereere mai ai, i hāereere atu ai te Ariki, a Īhu i roto i a tātou,
ACT 1:22 hei te iriiringa a Hoani tīmata ai, ā tae noa ki te rā i tangohia atu ai ia i a tātou, me whakatū tētahi o ērā hei hoa mō tātou ki te whakaatu i tōna aranga mai.”
ACT 1:23 Ā, tokorua a rātou i whakarite ai, ko Hōhepa i huaina nei ko Pāhapa, ko tētahi o ōna ingoa ko Hutuha, rāua ko Matiaha.
ACT 1:24 Nā, ka īnoi rātou, ka mea, “Ko koe, e te Ariki, e mōhio ana ki ngā ngākau o te katoa, māu e whakaatu ko wai o tēnei tokorua tāu i whiriwhiri ai,
ACT 1:25 hei tango i te wāhi i tēnei mahi minita, i te tūranga āpōtoro hoki, i taka atu a Hūrā, he mea kia haere ai ia ki tōna wāhi.
ACT 1:26 Nā, ka makā e rātou ō rāua rota; ā, ka tau te rota ki a Matiaha; ā, uru ana ia ki ngā āpōtoro tekau mā tahi.”
ACT 2:1 Ā, nō ka taka mai te rā o te Petekoha, e noho tahi ana rātou katoa i te wāhi kotahi.
ACT 2:2 Nā, puta whakarere mai ana he haruru nui nō te rangi, ānō he hau nui e keri ana, ā, kī katoa te whare i noho ai rātou.
ACT 2:3 Heoi, puta mai ana ki a rātou ētahi arero he mea manganga, ānō he ahi, ā, tau iho ana ki runga ki tēnei, ki tēnei o rātou.
ACT 2:4 Nā, kī katoa rātou i te Wairua Tapu, ā, ka tīmata te kōrero rerekē ana ngā reo, rite tonu ki tā te Wairua i hoatu ai ki a rātou kia kōrerotia.
ACT 2:5 I Hiruhārama anō e noho ana ētahi Hūrai, he hunga whakaaro, nō ngā iwi katoa i raro o te rangi.
ACT 2:6 Nā, i te wā i rangona ai taua haruru, ka whakarāpopoto te mano, ka pororaru, nō te mea ka rangona e tērā, e tērā, tōna reo e kōrerotia ana e rātou.
ACT 2:7 Nā, ka oho rātou katoa, ka mīharo, ka mea, “Nā, ehara ianei ēnei katoa e kōrero nei i te hunga nō Karirī?
ACT 2:8 He aha tātou ka rongo nei, ia tangata, ia tangata, i ō tātou reo o tō tātou whānautanga?
ACT 2:9 Ko te hunga o Patia, o Meria, o Erama, ko ngā mea e noho ana i Mehopotamia, i Hūria, i Kaparokia, i Ponoto, i Āhia,
ACT 2:10 i Perikia, i Pamapuria, i Īhipa, i ngā wāhi o Ripia e pātata ana ki Hairini, me ngā manuhiri o Rōma, ngā Hūrai, ngā porohiraiti,
ACT 2:11 ngā Kariti, ngā Ārapi, e rongo ana tātou i a rātou e whakapuaki ana i ngā mahi tohu a te Atua, nō tātou anō ngā reo.”
ACT 2:12 Ā, mīharo katoa ana rātou, pōhēhē ana, ka mea tētahi ki tētahi, “He aha tēnei?”
ACT 2:13 Ko ētahi i tāwai, i mea, “E kī ana rātou i te wāina hou!”
ACT 2:14 Otirā, ka whakatika a Pita me te tekau mā tahi, ka hikitia tōna reo, ka whai kupu ki a rātou, “E ngā tāngata o Hūria, me koutou katoa e noho nei i Hiruhārama, kia mōhio koutou ki tēnei, kia whai taringa mai ki āku kupu.
ACT 2:15 Kāhore hoki o ēnei haurangi me tā koutou e whakaaro nei, ko te toru noa hoki tēnei o ngā hāora o te rā.
ACT 2:16 Engari, ko te mea tēnei i kōrerotia e Hoera poropiti:
ACT 2:17 ‘Ā tēnei ake kei ngā rā whakamutunga, e ai tā te Atua, ka ringihia e ahau tōku Wairua ki ngā kikokiko katoa; ka poropiti hoki ā koutou tama, ā koutou tamāhine, ka moemoeā hoki ō koutou kaumātua.
ACT 2:18 Āe, ka ringihia anō e ahau tōku Wairua i aua rā, ki āku pononga tāne, ki āku pononga wāhine; ā, ka poropiti rātou.
ACT 2:19 Ka whakakitea anō e ahau ngā mea whakamīharo i te rangi i runga, me ngā tohu ki te whenua i raro; he toto, he kāpura, he paowa pongere.
ACT 2:20 Ko te rā ka huri hei pōuri, ko te marama hoki hei toto, i mua o te putanga mai o te rā o te Ariki, taua rā nui whakaharahara, rongonui.
ACT 2:21 Nā, ko reira ora ai te hunga katoa e karanga ana ki te ingoa o te Ariki.’
ACT 2:22 “E ngā tāngata o Īharaira, kia rongo koutou ki ēnei kupu; Ko Īhu o Nahareta, he tangata i tino whaitohungia e te Atua ki a koutou i runga i ngā merekara, i ngā mea whakamīharo, i ngā tohu i mea ai te Atua kia mahia e ia i waenganui o koutou, e mōhio ana anō rā koutou.
ACT 2:23 Ko tēnei tangata i tukua atu, he mea i āta whakaaroa, ā, i mōhiotia noatia ake e te Atua, tangohia ana e koutou, whakamatea iho, he mea rīpeka nā te ringa o ngā tāngata kino.
ACT 2:24 Nā te Atua ia i whakaara ake, nāna i wewete ngā mamae o te mate; nō te mea e kore ia e taea te pupuri e taua mate.
ACT 2:25 Ko tā Rāwiri kōrero hoki tēnei mōna: ‘I kite ahau i te Ariki i mua i tōku aroaro i ngā rā katoa; kei tōku ringa matau nei ia, e kore ai ahau e whakakorikoria.
ACT 2:26 Koia i koa ai tōku ngākau, i whakamanamana ai tōku arero; i takoto tūmanako ai anō ōku kikokiko.
ACT 2:27 Nō te mea e kore e waiho e koe tōku wairua i te rēinga, e kore anō e tukua tāu Mea Tapu kia kite i te pirau.
ACT 2:28 Kua whakakitea e koe ki ahau ngā huarahi o te ora; ka meinga e koe kia kī tonu tōku koa i tōu aroaro.’
ACT 2:29 “E ōku tēina, e tika ana kia aronui he kupu ki a koutou mō te tupuna nei mō Rāwiri, arā kua mate ia, kua tanumia, kei a tātou anō tōna urupā, ā, taea noatia tēnei rā.
ACT 2:30 I te mea he poropiti ia, ā, i mōhio kua oati te Atua i te oati ki a ia, ka whakaputaina ake tētahi, he hua nō tōna hope, hei noho ki runga ki tōna torōna.
ACT 2:31 Ā, i tāna kite wawe i tēnei, kōrerotia ana e ia te aranga o te Karaiti, arā: ‘Kīhai tōna wairua i waiho i te rēinga, kīhai anō tōna kikokiko i kite i te pirau.’
ACT 2:32 “Kua whakaarahia ake tēnei Īhu e te Atua: ko mātou katoa ngā kaiwhakaatu.
ACT 2:33 Ā, ka oti nei ia te whakanui e te ringa matau o te Atua, ā, ka hōmai nei ki a ia e te Matua te Wairua Tapu i kōrerotia rā i mua, nā, kua ringihia mai e ia tēnei, e kite nei, e rongo nei koutou.
ACT 2:34 Kāhore hoki a Rāwiri i kake ki te rangi; heoi, e mea ana ia: ‘I mea te Ariki ki tōku Ariki, “Hei tōku matau koe noho ai,
ACT 2:35 kia meinga rā anō e ahau ōu hoariri hei tūranga waewae mōu.” ’
ACT 2:36 “Nō reira rā, kia mātau pū te whare katoa o Īharaira, kua meinga e te Atua hei Ariki, hei Karaiti, taua Īhu i rīpekatia nā e koutou.”
ACT 2:37 Nō rātou ka rongo, ka werowero i roto i ō rātou ngākau, ka mea ki a Pita rātou ko ērā atu āpōtoro, “E ngā tuākana, me aha mātou?”
ACT 2:38 Nā, ko te meatanga a Pita ki a rātou, “Rīpenetā, kia iriiria, tēnā tangata, tēnā tangata o koutou i runga i te ingoa o Īhu Karaiti, hei murunga hara; ā, ka riro i a koutou te mea hōmai, arā te Wairua Tapu.
ACT 2:39 Ki a koutou hoki, ki ā koutou tamariki, te kupu hōmai, ki te hunga katoa anō o tawhiti, ki ngā mea e karangatia e te Ariki, e tō tātou Atua, ki a ia.”
ACT 2:40 He maha atu anō ngā kupu i kōrero ai, i kauwhau ai ia, i mea ai, “Me whakaora koutou i a koutou i tēnei whakatupuranga parori kē.”
ACT 2:41 Nā, ko ngā mea tonu i tango i tāna kupu i iriiria, me te mea e toru mano ngā wairua i honoa mai ki a rātou i taua rā.
ACT 2:42 Ā, i ū tonu rātou ki te whakaakoranga a ngā āpōtoro, ki te kotahitanga, ki te whawhati taro, ā, ki te īnoi.
ACT 2:43 Tau iho ana te wehi ki ngā wairua katoa; he maha hoki ngā mea whakamīharo me ngā tohu i meinga e ngā āpōtoro.
ACT 2:44 I noho tahi anō te hunga whakapono katoa, i huihuia anō hoki ā rātou mea katoa;
ACT 2:45 i hokona atu hoki ā rātou rawa me ngā taonga, tuwhaina ana mā te katoa, rite tonu, ki te mate o tēnei, o tēnei.
ACT 2:46 Haere tonu ana hoki rātou i tēnei rā, i tēnei rā ki te temepara, kotahi tonu anō te whakaaro; whawhati taro ana i ō rātou kāinga, kai ana i ā rātou kai i runga i te koa, i te ngākau tapatahi;
ACT 2:47 e whakamoemiti ana ki te Atua, e paingia ana hoki e te iwi katoa. Ā, honoa mai ana e te Ariki ki a rātou i tēnā rā, i tēnā rā, i tēnā rā, te hunga e whakaorangia ana.
ACT 3:1 Nā, e haere tahi atu ana a Pita rāua ko Hoani ki te temepara i te hāora īnoi, i te iwa o ngā hāora.
ACT 3:2 Nā, ka kawea mai tētahi tangata, he kopa nō te kōpū mai anō o tōna whaea, he mea whakatakoto i ngā rā katoa ki te kūwaha o te temepara i huaina nei ko Ātaahua, ki te tono mea māna i te hunga e tomo ana ki te temepara.
ACT 3:3 Nō tōna kitenga i a Pita rāua ko Hoani meāke tomo ki te temepara, ka tono ia i tētahi mea māna.
ACT 3:4 Nā, ka whakamau atu ngā kanohi o Pita rāua ko Hoani ki a ia, ka mea, “Titiro mai ki a māua.”
ACT 3:5 Ka whakarongo ia ki a rāua, hua noa e riro mai tētahi mea a rāua māna.
ACT 3:6 Anō rā ko Pita, “Ko te hiriwa me te kōura kāhore i ahau; ko te mea ia kei ahau, māku tēnā e hoatu ki a koe; i runga i te ingoa o Īhu Karaiti o Nahareta, whakatika, haere.”
ACT 3:7 Kātahi ia ka hopu i tōna ringa matau ka whakaara ake i a ia. I reira tonu kua whai kaha ōna waewae me ngā pona.
ACT 3:8 Ā, ko tōna mawhititanga ake, ka tū, ka tīmata te haere, tomo tahi ana me rāua ki te temepara, e haere ana, tūpeke ana, e whakamoemiti ana ki te Atua.
ACT 3:9 Ā, i kite te iwi katoa i a ia e haere ana, e whakamoemiti ana ki te Atua.
ACT 3:10 Kātahi rātou ka mōhio ki a ia, ko ia anō tērā i noho rā ki te tatau Ātaahua o te temepara, tono mea ai māna; nā, nui atu tō rātou mīharo me te ihiihi ki taua mea i pā ki a ia.
ACT 3:11 I a ia e pupuri ana ki a Pita rāua ko Hoani, ka oma atu te iwi katoa ki a rātou i te whakamahau i huaina nei ko tā Horomona, nui rawa te whakamīharo.
ACT 3:12 Ā, i te kitenga o Pita, ka whai kupu atu ia ki te iwi, “E ngā tāngata o Īharaira, he aha tā koutou e mīharo nei ki tēnei tangata? He aha hoki koutou ka whakamau ai te titiro ki a māua, me te mea he mana nō māua ake he ngākau karakia rānei i meatia ai ia kia haere?
ACT 3:13 Nā te Atua o Āperahama, o Īhaka, o Hākopa, nā te Atua o ō tātou mātua, i whakakorōria tāna Tama a Īhu; ko tā koutou i tuku nā, i whakakāhore nā i te aroaro o Pirato, kua oti rā i a ia kia tukua ia.
ACT 3:14 Otirā, whakakāhoretia ana e koutou te Mea Tapu, te Mea Tika, tonoa ana ko te tangata kōhuru kia hōmai ki a koutou.
ACT 3:15 Patua ana hoki e koutou te Take o te Ora; kua whakaarahia nei ia e te Atua i te hunga mate, ko mātou nei ōna kaiwhakaatu.
ACT 3:16 Ā, nā te whakapono ki tōna ingoa i meinga ai e tōna ingoa tēnei tangata kia kaha, e kite nei, e mātau nei koutou; āe rā, ko te whakapono ki a ia te mea nāna i hoatu tēnei ora nui ki tēnei i te aroaro o koutou katoa.
ACT 3:17 “Nā, e ōku tēina, e mahara ana ahau nā te kūware tēnā mahi a koutou, pērā i tā ō koutou rangatira.
ACT 3:18 Engari, ko ngā mea a te Atua i whakakitea i mua e te māngai o ngā poropiti katoa, mō tāna Karaiti kia whakamamaetia, kua rite ēnei i a ia.
ACT 3:19 Nō reira, rīpenetā, ā, tahuri mai anō koutou, kia murua ai ō koutou hara, kia puta mai ai i te aroaro o te Ariki he wā whakahauora.
ACT 3:20 Ā, kia tonoa mai ai e ia te Karaiti i whakaritea nei mō koutou, arā a Īhu.
ACT 3:21 Kua takoto nei te tikanga kia noho ia ki te rangi ā taea noatia ngā wā o te whakahokinga mai o ngā mea katoa, i kōrero ai te Atua rā te māngai o āna poropiti tapu nō te tīmatanga mai anō o te ao.
ACT 3:22 I mea rā hoki a Mohi, ‘Mā te Ariki, mā te Atua, e whakaara ake he poropiti mō koutou i roto i ō koutou tēina, he pēnei anō me ahau. Ko ia tā koutou e whakarongo ai i ngā mea katoa e mea ai ia ki a koutou.
ACT 3:23 Ā taua wā, ko ngā wairua katoa e kore e whakarongo ki taua poropiti, ka whakamatea rawatia i roto i te iwi.’
ACT 3:24 “Āe rā, ko ngā poropiti katoa o Hamuera iho anō, tae mai ki ō muri nei, ko te hunga katoa i kōrero, i whakaatu anō hoki rātou i ngā rā nei.
ACT 3:25 Ko koutou aua tama a ngā poropiti, a te kawenata hoki i whakatakotoria e te Atua ki ō koutou mātua, i mea rā ia ki a Āperahama, ‘Mā tōu uri ka manaakitia ai ngā hapū katoa o te ao.’
ACT 3:26 Mō koutou kē hoki i te tuatahi, i tāna whakaaranga ake ai i tāna Tama, i te tononga mai nei a te Atua i a ia ki a koutou hei manaaki i a koutou, hei i whakatahuri i tēnei, i tēnei o koutou i ō koutou kino.”
ACT 4:1 Ā, i a rāua e kōrero ana ki te iwi, ka puta ohorere mai ki a rāua ngā tohunga, te rangatira o te temepara me ngā Haruki
ACT 4:2 he nui te pāwera mō tā rāua ako i te iwi, mō te kauwhau hoki i runga i a Īhu i te aranga mai i te hunga mate.
ACT 4:3 Nā, ka mau ō rātou ringa ki a rāua, meinga ana kia tiakina kia ao rā anō te rā, i te mea hoki kua ahiahi.
ACT 4:4 Otirā, he tokomaha o te hunga i rongo i te kupu i whakapono, ā, ko te tokomaha o ngā tāngata me te mea e rima mano.
ACT 4:5 Nā, i te aonga ake ka huihui ō rātou rangatira, ngā kaumātua, me ngā karaipi ki Hiruhārama,
ACT 4:6 rātou ko te tino tohunga, ko Anaha, ko Kaiapa, ko Hoani, ko Arehānara, me ngā whanaunga katoa o te tohunga nui.
ACT 4:7 Ā, nō ka whakatūria rāua ki waenganui, ka ui rātou, “Tēnā koa te mana, te ingoa rānei, i meatia ai tēnei e kōrua?”
ACT 4:8 Kātahi a Pita, kī tonu i te Wairua Tapu, ka mea ki a rātou, “E ngā rangatira o te iwi, e ngā kaumātua:
ACT 4:9 mehemea ki te uiuia māua āianei mō te mahi pai i mahia ki te tangata hauā, i pēheatia taua tangata i ora ai.
ACT 4:10 Kia mōhio koutou katoa, me te iwi katoa o Īharaira, nā te ingoa o Īhu Karaiti o Nahareta, i rīpekatia nā e koutou, i whakaarahia rā e te Atua i te hunga mate, nāna tēnei i tū ora ai i tō koutou aroaro.
ACT 4:11 ‘Ko ia te kōhatu i whakakāhoretia nā e koutou, e ngā kaihanga, ā, kua meinga nei hei upoko mō te kokonga.’
ACT 4:12 Kāhore hoki he ora i tētahi atu; kāhore hoki he ingoa kē atu i raro o te rangi kua hōmai ki ngā tāngata, e ora ai tātou.”
ACT 4:13 Nā, ka kite rātou i te māia o Pita rāua ko Hoani, ā, ka mātau ki a rāua ehara i te mea whakaako, engari, he hunga kūware, ka mīharo rātou; ka mōhio hoki he hoa rāua nō Īhu.
ACT 4:14 Ka kite hoki i te tangata i whakaorangia e tū tahi ana rātou, kāhore rawa i taea tētahi kupu whakahē mā rātou.
ACT 4:15 Nā, ka tono rātou i a rāua kia haere ki waho o te rūnanga, ā, ka kōrerorero ki a rātou anō,
ACT 4:16 ka mea, “Me aha e tātou ēnei tāngata? Ka kite katoa nei hoki te hunga e noho ana i Hiruhārama, he merekara nui kua meinga nei, ā, e kore e āhei te whākorekore e tātou.
ACT 4:17 Otiia, kia kaua ai e hōrapa atu ki roto ki te iwi, kia kaha tā tātou whakawehi i a rāua kei kōrero ki tētahi tangata ā muri nei i runga i tēnei ingoa.”
ACT 4:18 Ā, karangatia ana rāua e rātou, ka mea ki a rāua “Kia kaua rawa e kōrero, kia kaua e whakaako, i runga i te ingoa o Īhu.”
ACT 4:19 Nā, ka whakahoki a Pita rāua ko Hoani ki a rātou, ka mea, “Whakaaroa e koutou, ka tika rānei ki te aroaro o te Atua ko koutou kia whakarangona, kaua te Atua?
ACT 4:20 E kore hoki e āhei kia kaua e kōrerotia e māua ngā mea i kite ai, i rongo ai mātou.”
ACT 4:21 Heoi, whakawehi ana anō rātou i a rāua, ā, tukua ana kia haere, kīhai hoki i kitea he mea e whiua ai rāua, i wehi i te iwi; i whakakorōria katoa nei ngā tāngata i te Atua mō taua mea i meatia.
ACT 4:22 Nō te mea kua neke atu i te whā tekau ngā tau o te tangata i meinga nei ki a ia tēnei merekara whakaora.
ACT 4:23 Ā, ka oti rāua te tuku, ka haere ki ō rāua hoa, ā, kōrerotia ana ngā mea katoa i kōrero ai ngā tohunga nui me ngā kaumātua ki a rāua.
ACT 4:24 Ā, i tō rātou rongonga, ka karanga ake rātou ki te Atua, he kotahi te reo, ka mea: “E te Ariki, nāu nei i hanga te rangi me te whenua, te moana, me ō reira mea katoa;
ACT 4:25 nāu te kupu i kōrerotia e te Wairua Tapu, nā te māngai o tō mātou matua, o tāu pononga, o Rāwiri: ‘He aha ka nana ai ngā tauiwi, ka whakaaro horihori ai ngā iwi?
ACT 4:26 I whakatika ake ngā kīngi o te whenua, i huihui ngātahi ngā rangatira, ki te whawhai ki te Ariki rāua ko tāna Karaiti.’
ACT 4:27 He pono nei hoki te huihuinga ki tēnei pā o Herora, o Ponotio Pirato, o ngā tauiwi, rātou ko te iwi o Īharaira, ki tāu tama tapu, ki a Īhu i whakawahia nei e koe,
ACT 4:28 ki te mea i tā tōu ringa, i tā tōu whakaaro i whakatakoto ai i mua kia meatia.
ACT 4:29 Nā, titiro iho, e te Ariki, āianei ki ā rātou kupu whakawehi. Tukua mai hoki ki au pononga kia tino māia te kōrero i tāu kupu.
ACT 4:30 Ko koe ia e totoro mai ana tōu ringa ki te whakaora; kia meatia hoki he tohu, he mea whakamīharo i runga i te ingoa o tāu Pononga tapu, o Īhu.”
ACT 4:31 I te mutunga o tā rātou īnoi, ka ngāueue te wāhi i mine ai rātou, ā, kī katoa rātou i te Wairua Tapu, nā, māia noa atu rātou ki te kōrero i te kupu a te Atua.
ACT 4:32 Kotahi anō ngākau, kotahi anō wairua o te mano o te hunga whakapono. Kīhai anō tētahi o rātou i mea, māna ake tētahi o āna taonga; heoi he mea huihui ā rātou mea katoa.
ACT 4:33 Ā, nui atu te kaha i whakapuakina ai e ngā āpōtoro te aranga o te Ariki, o Īhu; he nui anō te aroha noa i runga i a rātou katoa.
ACT 4:34 Kāhore hoki tētahi o rātou i hapa; ko te hunga hoki he kāinga, he whare ō rātou, hokona atu ana e rātou, ā, mauria ana mai ngā utu o ngā mea i hokona,
ACT 4:35 whakatakotoria ana ki ngā waewae o ngā āpōtoro. Nā, ka tuwhaina mā ia tangata, mā ia tangata, he mea whakarite ki te mate o ia tangata.
ACT 4:36 Ā, ko Hohi i huaina e ngā āpōtoro ko Pānapa, (ko te tikanga tēnei ina whakamāoritia, ko te Tama a te Whakamārietanga,) he Rīwaiti, ko Kaiperu tōna kāinga.
ACT 4:37 He wāhi whenua tōna, nā, hokona atu ana, mauria ana ngā moni, whakatakotoria ana ki ngā waewae o ngā āpōtoro.
ACT 5:1 Nā, ko tētahi tangata ko Anania tōna ingoa, rāua ko tāna wahine, ko Hapaira, i hoko atu i tētahi whenua.
ACT 5:2 Ā, puritia ana e ia tētahi wāhi o te utu, ko tāna wahine hoki i mōhio ki taua mea huna, mauria ana tētahi wāhi, whakatakotoria ana ki ngā waewae o ngā āpōtoro.
ACT 5:3 Nā, ko te meatanga atu a Pita, “E Anania, nā te aha i whakakīia ai tōu ngākau e Hātana kia teka koe ki te Wairua Tapu, kia puritia atu ai tētahi wāhi o te utu o te whenua?
ACT 5:4 I te mea kāhore anō i riro, he teka ianei nāu ake tāu mea? Ā, ka oti te hoko atu he teka ianei kei a koe tonu te tikanga? Nā te aha tēnei mea i whakaaroa ai i roto i tōu ngākau? Kīhai hoki koe i teka ki te tangata, engari ki te Atua.”
ACT 5:5 Ā, nō te rongonga o Anania i ēnei kupu, hinga ana ki raro, mate rawa. He nui anō te wehi i tau ki te hunga katoa i rongo i ēnei mea.
ACT 5:6 Nā, ka whakatika ngā taitamariki, takai ana i a ia, ā, maua atu ana ia ki waho, tanumia ana.
ACT 5:7 Ā, pātata ki te toru hāora i muri, ka tomo mai tāna wahine, kīhai hoki i mōhio he aha te mea kua meatia.
ACT 5:8 Nā, ko te meatanga a Pita ki a ia, “Kōrero mai ki ahau, ko te utu rānei tērā i hokona atu ai e kōrua te whenua?” Ka mea ia, “Āe, koia tēnā.”
ACT 5:9 Ka mea a Pita ki a ia, “He aha kōrua i whakaaro tahi ai ki te whakamātautau i te Wairua o te Ariki? Nanā, kei te kūwaha ngā waewae o te hunga i tanumia ai tāu tāne, mā rātou koe e kawe ki waho.”
ACT 5:10 Nā, hinga tonu iho ia ki ōna waewae, hemo rawa. Ā, ko te tomonga mai o ngā taitamariki, rokohanga mai kua mate, nā kawea ana ia ki waho, tanumia ana ki te taha o tāna tāne.
ACT 5:11 Ā, nui atu te wehi o te hāhi katoa, o te hunga katoa anō i rangona ai ēnei mea.
ACT 5:12 Ā, nā ngā ringa o ngā āpōtoro i mahi ngā tohu maha, me ngā mea whakamīharo, i roto i te iwi; i noho hoki rātou katoa ki te whakamahau o Horomona, kotahi anō te whakaaro.
ACT 5:13 Tēnā ko ērā atu tāngata kīhai rawa tētahi i māia ki te whakauru mai ki a rātou; otirā, whakanuia ana rātou e te iwi.
ACT 5:14 Ā, he nui noa atu te hunga whakapono i honoa mai ki te Ariki, tōna tini o te tāne, o te wāhine.
ACT 5:15 Nā reira hoki, ka mauria e rātou ngā tūroro ki ngā ara, whakatakotoria ana ki runga i ngā moenga, i ngā whāriki, me kore noa e taumarumaru iho ki tētahi o rātou te ātārangi o Pita, i a ia e haere ana.
ACT 5:16 I hui katoa mai anō te mano i ngā pā katoa e pātata ana ki Hiruhārama, me te mau mai i ngā tūroro, i te hunga e whakapōreareatia ana e ngā wairua poke; ā, whakaorangia ana rātou katoa.
ACT 5:17 Me i reira ka whakatika te tohunga nui rātou ko ōna hoa katoa, arā te wehenga ki ngā Haruki, kī tonu hoki rātou i te hae,
ACT 5:18 ā, ka pā ō rātou ringa ki ngā āpōtoro, makā ana rātou ki te whare herehere nui.
ACT 5:19 Otirā, nā tētahi anahera a te Ariki i uaki ngā tatau o te whare herehere i te pō; ārahina mai ana rātou e ia ki waho, ka mea,
ACT 5:20 “Haere, e tū i roto i te temepara, ka kōrero ki te iwi i ngā kupu katoa o tēnei ora.”
ACT 5:21 Ā, ka rongo rātou i tēnei, ka tomo ki te temepara i te atatū, ka whakaako. Nā, ko te haerenga o te tohunga nui rātou ko ōna hoa, karangatia ana kia huihui te rūnanga me ngā kaumātua katoa o ngā tama a Īharaira, ā, tonoa ana he tangata ki te whare herehere hei tiki i a rātou.
ACT 5:22 Otirā, ko ngā kātipa i tae mai, kīhai i kite i a rātou i roto i te whare herehere, nā, ka hoki mai, ka kōrero.
ACT 5:23 Ka mea, “Rokohina atu e mātou e tūtaki tonu ana te whare herehere ū tonu, me ngā kaitiaki e tū ana i waho o ngā tatau; nō te huakanga atu, kāhore he tangata i kitea e mātou i roto.”
ACT 5:24 Ā, nō ka rongo te rangatira o te temepara rātou ko ngā tohunga nui ki ēnei kupu, ka pororaru rātou, he aha rā te tukunga iho o taua mea.
ACT 5:25 Nā, ko te haerenga mai o tētahi, ka kōrero ki a rātou, ka mea, “Nanā, ko te hunga i makā rā e koutou ki te whare herehere, e tū mai nei i te temepara, e whakaako ana i te iwi!”
ACT 5:26 Kātahi, ka haere te rangatira rātou ko ngā kātipa, ā, ārahina mai ana rātou, otirā, kīhai i takakinotia; i wehi hoki rātou i te iwi, kei ākina rātou ki te kōhatu.
ACT 5:27 Ā, ka oti rātou te ārahi mai, ka whakatūria ki mua i te rūnanga. Nā, ka ui te tohunga nui ki a rātou,
ACT 5:28 ka mea, “Kīhai ianei mātou i āta whakatūpato i a koutou kia kaua e whakaako i runga i tēnei ingoa? Nā, kua kī nei Hiruhārama i tā koutou whakaakoranga, ā, e mea ana koutou kia whakairia ngā toto o tēnei tangata ki runga i a mātou.”
ACT 5:29 Nā, ka whakahoki a Pita rātou ko ngā āpōtoro, ka mea, “Me whakarongo rā mātou ki te Atua, kaua ki te tangata.
ACT 5:30 Nā te Atua o ō tātou tūpuna i whakaara ake a Īhu, i whakamatea nā e koutou, he mea whakairi ki te rākau.
ACT 5:31 Kua oti ia te whakanoho e te ringa matau o te Atua ki runga, hei Piriniha, hei Kaiwhakaora, hei hōmai i te rīpenetā, i te murunga hara ki a Īharaira.
ACT 5:32 Ko mātou anō ngā kaiwhakaatu i ēnei mea; ko te Wairua Tapu hoki, i hōmai nei e te Atua ki te hunga e rongo ana ki a ia.”
ACT 5:33 Otirā, i tō rātou rongonga i tēnei, tū tonu ki ō rātou ngākau, ā, ka whakaaro kia whakamatea rātou.
ACT 5:34 Nā, ka whakatika tētahi o ngā Parihi i roto i te rūnanga, ko Kamariera te ingoa, he kaiwhakaako i te ture, he tangata e whakanuia ana e te iwi katoa, ka mea, kia nekehia atu aua tāngata ki waho mō tētahi wā poto nei.
ACT 5:35 Nā, ko tāna meatanga ki a rātou, “E ngā tāngata o Īharaira, kia tūpato ki tā koutou e mea ai ki ēnei tāngata.
ACT 5:36 I ngā rā ki muri ka whakatika ake a Teura, me te whakaari i a ia, ko ia he tangata nui; piri atu ana ki a ia ētahi tāngata, pātata ki te whā rau. Nā patua iho ia; ā, ko te hunga katoa i whakarongo ki a ia, whakamararatia atu ana, ā, kore ake.
ACT 5:37 Ā muri iho i taua tangata ka whakatika ake ko Hūrā o Karirī i ngā rā o te tatauranga, ā, kūmea atu ana e ia ētahi o te iwi ki te whai i a ia; i ngaro anō hoki tēnā; ā, ko te hunga katoa i whakarongo ki a ia, whakamararatia atu ana.
ACT 5:38 Nā, ko tāku kupu tēnei ki a koutou, kāti te mea ki ēnei tāngata. Waiho noa iho rātou! Ki te mea hoki nā te tangata tēnei whakaaro, tēnei mahi, tērā e whakakāhoretia,
ACT 5:39 otirā, mehemea nā te Atua, e kore rawa e taea e koutou te whakakāhore. Kei tūpono hoki e whawhai kē ana koutou ki te Atua!”
ACT 5:40 Ā, whakaae ana rātou ki a ia; nā, ka karangatia ngā āpōtoro ki a rātou, ka whiua, ka whakatūpatoria kia kaua rawa e kōrero i runga i te ingoa o Īhu, ā, tukua ana rātou kia haere.
ACT 5:41 Heoi, haere hari atu ana rātou i te aroaro o te rūnanga, mō rātou kua meinga e pai ana kia whakataurekarekatia mō te Ingoa.
ACT 5:42 Ā, i ngā rā katoa, i roto i te temepara, i ngā kāinga rānei, kāhore e mutu ana tā rātou whakaako, tā rātou kauwhau i a Īhu, ko te Karaiti ia.
ACT 6:1 Nā, i aua rā, i te mea ka tokomaha haere ngā ākonga ka amuamu ngā Hūrai Kariki ki ngā Hiperu, nō te mea i mahue ō rātou pouaru i ngā tūwhanga mea o tēnei rā, o tēnei rā.
ACT 6:2 Kātahi, ka karangatia e te tekau mā rua te mano o ngā ākonga, ka mea, “E kore e pai kia whakarērea e mātou te kupu a te Atua, ā, kia mahi tēpu.
ACT 6:3 Nō reira, e ngā tēina, tirohia mai i roto i a koutou kia tokowhitu ngā tāngata e kōrerotia paitia ana, e kī ana i te Wairua Tapu, i te mātauranga, ā, mā mātou rātou e whakatū ki tēnei mahi.
ACT 6:4 Ko mātou ia ka ū tonu ki te īnoi, ki te mahi i te kupu.”
ACT 6:5 Ā, pai katoa te mano ki taua kōrero; nā, whiriwhiria ana e rātou a Tepene, he tangata e kī ana i te whakapono, i te Wairua Tapu, rātou ko Piripi, ko Porokoru, ko Nikanora, ko Timona, ko Paramena, ko Nīkora, he porohiraiti nō Anatioka.
ACT 6:6 Nā, whakatūria ana rātou ki te aroaro o ngā āpōtoro; ka īnoi ērā, ka whakapā i ngā ringa ki runga ki a rātou.
ACT 6:7 Heoi, tupu ana te kupu a te Atua. Tino nui haere ana te tokomaha o ngā ākonga i Hiruhārama; ā, he ope nui o ngā tohunga i tahuri mai ki te whakapono.
ACT 6:8 Ā, ko Tepene, kī tonu i te whakapono, i te mana, nui atu ngā merekara me ngā tohu i meatia e ia i roto i te iwi.
ACT 6:9 Nā, ka whakatika ētahi o te whakaminenga, e kīia nei ko te whakaminenga o ngā Riperetini, ētahi hoki o te whakaminenga o te hunga o Hairini, o te hunga o Arēhānaria, o te hunga hoki o Kirikia, o Āhia, ka totohe ki a Tepene.
ACT 6:10 Otirā, kīhai i taea e rātou te tū atu ki tōna mātauranga me te wairua i kōrero ai ia.
ACT 6:11 Nā, ka whakakīkī rātou i ētahi tāngata hei mea, “I rongo mātou i a ia e kōrero kohukohu ana mō Mohi, mō te Atua anō hoki.”
ACT 6:12 Nā, ka tahuri rātou ki te whakaohooho i te iwi, i ngā kaumātua, me ngā karaipi hoki, nā, ka mau ia i a rātou, hopukia ana, kawea atu ana ki te rūnanga.
ACT 6:13 Ā, whakatūria ana e rātou ētahi kaiwhakapae teka, nāna i mea, “Kāhore e mutu te kōrero kino a tēnei tangata mō tēnei kāinga tapu, mō te ture hoki;
ACT 6:14 i rongo hoki mātou ki a ia e mea ana, Mā tēnei Īhu o Nahareta e whakangaro te kāinga nei, e whakaputa kē hoki ngā ritenga i hōmai e Mohi ki a tātou.”
ACT 6:15 Ā, ko te hunga katoa e noho ana i te rūnanga, ka titiro pū ki a ia, ka kite i tōna mata, ānō he mata nō te anahera.
ACT 7:1 Kātahi, ka mea te tohunga nui, “He pono rānei ēnei mea?”
ACT 7:2 Nā, ka mea ia, “E ngā tēina, e ngā mātua, whakarongo mai. I puta te Atua o te korōria ki tō tātou matua, ki a Āperahama, i a ia i Mehopotamia, ā, kīanō i noho ki Harana,
ACT 7:3 ka mea ki a ia, ‘Haere atu i tōu whenua, i ōu whanaunga, ā, e tomo ki te whenua e whakakitea e ahau ki a koe.’
ACT 7:4 “Nā, puta mai ana ia i te whenua o ngā Karari, noho ana ki Harana. Ā, nō te matenga o tōna pāpā, ka whakahekea mai ia i reira e te Atua ki tēnei whenua e noho nei koutou.
ACT 7:5 Ā, kīhai i hoatu tētahi kāinga mōna i konei, kore rawa, ahakoa he tūranga waewae noa; heoi, i oati ia, tērā e hōmai a konei hei kāinga mōna, mō tōna uri hoki i muri i a ia, ahakoa rā i taua wā kāhore āna tamariki.
ACT 7:6 Ā, i pēnei te kōrero a te Atua, tērā tōna uri e noho manene ki te whenua kē; ka meinga hoki hei pononga, ā, e whā rau tau e tūkinotia ana.
ACT 7:7 ‘Nā, ko te iwi e meinga ai rātou hei pononga, ka whakawākia e ahau,’ e ai tā te Atua, ‘muri iho i tēnei ka puta mai rātou, ā, ka mahi ki ahau i tēnei wāhi.’
ACT 7:8 Ā, i hōmai anō e ia ki a ia te kawenata o te kotinga. Ā, whānau ake tā Āperahama ko Īhaka, ā, i te waru o ngā rā ka kotia; ā, nā Īhaka ko Hākopa; nā Hākopa hoki ngā tūpuna kotahi tekau mā rua.
ACT 7:9 “Nā, ka hae ngā tūpuna ki a Hōhepa, ā, hokona ana ia ki Īhipa; otirā i a ia te Atua;
ACT 7:10 nāna ia i whakaora i ōna matenga katoa, ā, hoatu ana ki a ia he pai, he mātauranga i te aroaro o Parao kīngi o Īhipa; ā, meinga ana ia e tērā hei kāwana mō Īhipa, mō tōna whare katoa hoki.
ACT 7:11 “Nā, i reira ka puta he matekai ki te whenua katoa o Īhipa, o Kanaana, ā, he mate nui; kīhai rawa i kitea he oranga e ō tātou mātua.
ACT 7:12 Ā, nō te rongonga o Hākopa, e whai wīti ana a Īhipa, ka tonoa e ia ō tātou mātua, ko te tononga tuatahi.
ACT 7:13 Ā, nō te tononga tuarua, ka whakamōhiotia a Hōhepa ki ōna tuākana; ā, ka whakaaturia ki a Parao te iwi o Hōhepa.
ACT 7:14 Nā, ka tono tāngata a Hōhepa ki te karanga i tōna pāpā, i a Hākopa ki a ia, i ōna huānga katoa hoki, e whitu tekau mā rima ngā wairua.
ACT 7:15 Nā, heke ana a Hākopa ki Īhipa, ā, ka mate a ia, me ō tātou mātua.
ACT 7:16 Ā, kawea atu ana rātou ki Hekeme, whakatakotoria ana ki te urupā i hokona mai rā e Āperahama, he moni hiriwa te utu, i ngā tama a Hāmora i Hekeme.
ACT 7:17 “Ā, nō ka tata mai te wā mō te mea i kōrerotia rā i mua, i oatitia rā e te Atua ki a Āperahama, ka tupu te iwi, ka tini haere ki Īhipa,
ACT 7:18 ā tae noa ki te putanga ake o tētahi atu kīngi mō Īhipa, kīhai nei i mōhio ki a Hōhepa.
ACT 7:19 Ko ia te mea nāna i tinihanga tō tātou iwi, i whakatupu kino ō tātou mātua, i meatia ai kia makā atu ā rātou tamariki kei puta ki te ora.
ACT 7:20 “Nō taua wā, ka whānau a Mohi, he tangata tino ātaahua. E toru ngā marama i whakatupuria ai ia i roto i te whare o tōna pāpā,
ACT 7:21 ā, nō ka makā atu ia, ka tangohia ake ia e te tamāhine a Parao, ā, atawhaitia ana hei tamaiti ake māna.
ACT 7:22 Nā, i āta whakaakona a Mohi ki ngā mea katoa o te mātauranga o ngā Īhipiana; ā, he mana rawa ia, i te kupu, i te mahi.
ACT 7:23 “Ā, ka tata ōna tau ki te whā tekau, ka uru mai te whakaaro ki tōna ngākau kia haere ia ki ōna tuākana, ki ngā tama a Īharaira.
ACT 7:24 Ā, i tōna kitenga i tētahi o rātou e tūkinotia ana, ka āwhina ia i a ia, a patua iho e ia te Īhipiana, ā, ka whai utu mōna i tūkinotia rā.
ACT 7:25 Hua noa e mōhio ōna tuākana, nōna te ringa e hōmai ai e te Atua te whakaoranga mō rātou, heoi, kīhai rātou i mōhio.
ACT 7:26 Nā, i te aonga ake ka puta atu ia ki ētahi e whawhai ana ki a rāua, ka tahuri ki te wawao i a rāua, ka mea, ‘E hoa mā, he teina, he tuakana kōrua; he aha kōrua ka kino ai ki a kōrua anō?’
ACT 7:27 “Otirā, peia atu ana ia e te tangata nāna te hē ki tōna hoa; i mea ia, ‘Nā wai koe i mea hei rangatira, hei kaiwhakawā mō māua?
ACT 7:28 E mea ana koe ki te whakamate i ahau, me koe i whakamate rā i te Īhipiana inanahi?’
ACT 7:29 Nā, ka tahuti a Mohi i taua kōrero, ā, noho manene ana i Miriana. Ā, tokorua āna tama i whānau ki reira.
ACT 7:30 “Ā, nō ka tutuki ngā tau e whā tekau, ka puta ki a ia tētahi anahera a te Ariki i te koraha o Maunga Hinai, i roto i te mura ahi i te rākau.
ACT 7:31 Ā, nō te kitenga o Mohi, ka mīharo ki taua whakakitenga; ā, i a ia ka whakatata atu ki te mātakitaki, ka puaki mai te reo o te Ariki ki a ia,
ACT 7:32 ‘Ko te Atua ahau o ōu mātua, ko te Atua o Āperahama, o Īhaka, o Hākopa.’ Nā, wiri ana a Mohi, kore rawa i kaha ki te titiro atu.
ACT 7:33 “Ā, ka mea mai te Ariki ki a ia, ‘Wetekia atu ngā hū i ōu waewae; ko te wāhi hoki e tū nā koe he oneone tapu.
ACT 7:34 Kua tino kite hoki ahau i te mate o tōku iwi e noho nei i Īhipa, kua rongo hoki i tā rātou auē, ā, kua heke iho nei ahau ki te whakaora i a rātou. Nā, haere mai, ka tonoa koe e ahau ki Īhipa.’
ACT 7:35 “Nā ko taua Mohi i whakakāhoretia rā e rātou, i mea rā rātou, ‘Nā wai koe i mea hei rangatira, hei kaiwhakawā?’ Ko ia anō i tonoa e te Atua hei rangatira, hei kaiwhakaora, he mea nā te ringa o te anahera i puta mai rā ki a ia i te rākau.
ACT 7:36 Nā, taua tangata rātou i ārahi atu, i muri iho i tāna mahinga i ngā mea whakamīharo, i ngā tohu, ki te whenua o Īhipa, ki te Moana Whero, ki te koraha hoki i ngā tau e whā tekau.
ACT 7:37 “Ko taua Mohi anō tēnei i mea atu rā ki ngā tamariki a Īharaira, ‘Mā te Atua e whakaara ake he poropiti mō koutou i roto i ō koutou tēina, he pēnei me ahau.’
ACT 7:38 Ko ia anō tēnei i te whakaminenga i te koraha, rāua ko te anahera i kōrero rā ki a ia i Maunga Hinai, ko ō tātou mātua hoki; i riro mai ai i a ia ngā kupu ora hei hōmai ki a tātou.
ACT 7:39 “Kīhai nei ō tātou mātua i pai ki te whakarongo ki a ia, heoi, peia atu ana ia e rātou, ā, hoki ana ō rātou ngākau ki Īhipa.
ACT 7:40 Ā, mea ana rātou ki a Ārona, ‘Hangā mā tātou ētahi atua hei haere ki mua i a tātou; ko tēnei Mohi hoki i ārahina mai nei tātou i te whenua o Īhipa, kāhore tātou e mātau kua ahatia rānei.’
ACT 7:41 Heoi, hangā ana e rātou he kūao kau i aua rā, tāpaea ana he patunga tapu mā taua whakapakoko, ā, koa ana ō rātou ngākau ki ngā mahi a ō rātou ringa.
ACT 7:42 Nā, ka tahuri kē te Atua, tukua atu ana rātou kia karakia ki te ope o te rangi; kia pērā me te mea i tuhia ki te pukapuka a ngā poropiti: ‘I hōmai koia e koutou ki ahau ngā patunga tapu me ngā whakahere i ngā tau e whā tekau i te koraha, e te whare o Īharaira?
ACT 7:43 Nā, kua mau koutou ki te tapenākara o Moroko, ki te whetū o tō koutou atua o Reipana, ki ngā whakapakoko i hangā e koutou hei koropiko atu; nā, māku koutou e kawe atu ki tāwāhi o Papurōna.’
ACT 7:44 “I ō tātou mātua te tapenākara o te whakaaturanga i te koraha, tāna hoki i whakarite ai, i mea ai ki a Mohi kia hangā e ia, kia rite ki te tauira i kite ai ia.
ACT 7:45 Ā, i ō rātou nā rā, nā ō tātou mātua i mau mai, i a rātou ko Hohua i haere mai ai ki te noho i te whenua o ngā tauiwi, i peia atu nei e te Atua i te aroaro o ō tātou mātua, ā, taea noatia ngā rā i a Rāwiri;
ACT 7:46 i paingia nei ia e te Atua, ā, i īnoi hoki māna e rapu he nohoanga mō te Atua o Hākopa.
ACT 7:47 Nā, Horomona ia i hanga he whare mōna.
ACT 7:48 “He ahakoa rā, e kore te Runga Rawa e noho ki ngā whare i hangā e te ringa; ko tā te poropiti hoki tēnā i mea ai:
ACT 7:49 ‘Ko te rangi tōku torōna, ko te whenua tōku tūranga waewae. He whare pēhea tā koutou e hanga ai mōku?’ e ai tā te Ariki; ‘ā, ko tēhea te wāhi e okioki ai ahau?
ACT 7:50 Ehara ianei i tōku ringa nāna ēnei mea katoa i hanga?’
ACT 7:51 “E te hunga kakī mārō, kāhore nei i kotia te ngākau me ngā taringa, he whakakeke tonu tā koutou ki te Wairua Tapu; rite tonu tā koutou ki tā ō koutou mātua.
ACT 7:52 Ko tēhea o ngā poropiti kīhai i whakatupuria kinotia e ō koutou mātua? Whakamatea iho e rātou te hunga i poropititia ai te haerenga mai o te Mea Tika; ko koutou nei ōna kaituku, ōna kaikōhuru.
ACT 7:53 Ko koutou, kua riro nā i a koutou te ture, i tā ngā anahera i whakatakoto mai ai, heoi, kīhai i puritia e koutou.”
ACT 7:54 Ā, ka rongo rātou ki ēnei mea, nā tū rawa ki roto ki ō rātou ngākau, tetēā ana ō rātou niho ki a ia.
ACT 7:55 Otiia ko ia, kī tonu i te Wairua Tapu, titiro matatau atu ana ki te rangi, ka kite i te korōria o te Atua, i a Īhu hoki e tū ana i te ringa matau o te Atua.
ACT 7:56 Ā, ka mea, “Nanā, e kite ana ahau ko ngā rangi e tūhāhā ana, ā, ko te Tama a te tangata e tū ana i te ringa matau o te Atua!”
ACT 7:57 Kātahi, rātou ka hāmama, he nui te reo, ka puru i ō rātou taringa, ā, kotahi tonu te omanga atu ki a ia,
ACT 7:58 ka makā ia e rātou ki waho o te pā, ā, ākina ana ki te kōhatu. Ko ngā kaititiro i whakatakoto i ō rātou kākahu ki ngā waewae o tētahi taitama, ko Haora te ingoa.
ACT 7:59 Heoi, ākina ana e rātou a Tepene ki te kōhatu, me ia e karanga ana ki te Ariki, e mea ana, “E te Ariki, e Īhu, tōku wairua ki a koe.”
ACT 7:60 Kātahi, ia ka tūturi ki raro, ka karanga, he nui te reo, “E te Ariki, kaua tēnei mea e whakairia ki a rātou.” Ā, i tāna kōrerotanga i tēnei, ka moe.
ACT 8:1 Ā, i reira a Haora e whakaae ana ki tōna matenga. Nā, i taua rā ka oho he whakatoinga nui ki te hāhi i Hiruhārama, ā, marara katoa ana rātou, puta noa i ngā wāhi o Hūria, o Hamaria; kāhore ia ngā āpōtoro.
ACT 8:2 Ā, nā te hunga whakaaro a Tepene i tanu, ā, he nui tā rātou tangihanga mōna.
ACT 8:3 Ko Haora ia, tāhoroa ana e ia te hāhi, tomo ana ki tēnā whare, ki tēnā whare, tōia atu ana ngā tāne me ngā wāhine, hoatu ana ki roto ki te whare herehere.
ACT 8:4 Nō reira ko rātou tonu, ko ngā mea i whakamararatia rā, i hāereere ki te kauwhau i te kupu.
ACT 8:5 Nā, ko Piripi i heke atu ki te pā o Hamaria, ā, kauwhau ana i a te Karaiti ki a rātou.
ACT 8:6 Ā, kotahi tonu te whakaaro o ngā mano ki te whakarongo ki ngā mea i kōrero ai a Piripi, i a rātou e rongo ana, e kite ana i ngā tohu i mea ai ia.
ACT 8:7 I puta mai hoki ngā wairua poke i roto i te tini o ngā mea e nohoia ana, he nui te reo ki te karanga. He tokomaha anō ngā pararūtiki, ngā kopa i whakaorangia.
ACT 8:8 Ā, nui atu te hari o taua pā.
ACT 8:9 Nā, i reira tētahi tangata, ko Haimona te ingoa, he mahi mākutu tāna i mua atu i roto i taua pā, ā, mīharo ana te iwi o Hamaria, i mea hoki ia i a ia he tangata nui.
ACT 8:10 I whakarongo katoa hoki rātou ki a ia te iti me te rahi, i mea, “Ko taua kaha o te Atua tēnei tangata, e kīia nei ‘ko te Nui.’ ”
ACT 8:11 Ā, i whakarongo rātou ki a ia, nō te mea kua roa kē rātou e mīharo ana ki āna mahi mākutu.
ACT 8:12 Ā, nō rātou ka whakapono ki a Piripi; e kauwhau ana i te rongopai o te rangatiratanga o te Atua, i te ingoa hoki o Īhu Karaiti, ka iriiria rātou, ngā tāne me ngā wāhine.
ACT 8:13 Ko Haimona tonu tētahi i whakapono. Ā, ka iriiria ka piri tahi ki a Piripi; ā, nō tōna kitenga i ngā tohu me ngā merekara nunui i mahia, ka mīharo.
ACT 8:14 Ā, i te rongonga o ngā āpōtoro i Hiruhārama kua tango a Hamaria i te kupu a te Atua, ka tonoa atu e rātou a Pita rāua ko Hoani ki a rātou.
ACT 8:15 Nō tō rāua taenga iho, ka īnoi mō rātou, kia riro te Wairua Tapu i a rātou.
ACT 8:16 Kāhore anō hoki ia i tau noa ki tētahi o rātou; he mea iriiri kau i runga i te ingoa o te Ariki, o Īhu.
ACT 8:17 Me i reira ka whakapākia iho ō rātou ringa ki a rātou, ā, ka riro mai te Wairua Tapu i a rātou.
ACT 8:18 Ā, nō te kitenga o Haimona, nā te whakapānga iho o ngā ringa o ngā āpōtoro i hōmai ai te Wairua Tapu, ka mea ki te hoatu moni ki a rāua,
ACT 8:19 ka kī, “Hōmai hoki ki ahau tēnei mana, kia riro ai te Wairua Tapu i te tangata e whakapākia iho ai e ahau ōku ringa.”
ACT 8:20 Nā, ko te meatanga a Pita ki a ia, “Kia pirau ngātahi kōrua ko tāu moni, ina koe ka whakaaro mā te moni ka whiwhi ai ki te mea hōmai noa a te Atua!
ACT 8:21 Kāhore he wāhi māu, kāhore he taunga mōu i tēnei mea; kāhore hoki i tika tōu ngākau i te aroaro o te Atua.
ACT 8:22 Nā, rīpenetātia tēnei kino ōu, ā, īnoi ki te Atua, me kore noa e murua te whakaaro o tōu ngākau.
ACT 8:23 Kua kite hoki ahau i a koe, kei roto koe i te au kawa, kei te here o te kino.”
ACT 8:24 Nā, ka whakahoki a Haimona, ka mea, “Mā kōrua e īnoi mōku ki te Ariki, kei pā ki ahau tētahi o ngā mea kua kōrerotia mai nā e kōrua.”
ACT 8:25 Ā, ka mutu tā rāua whakaatu, tā rāua kauwhau i te kupu a te Ariki, ka hoki ki Hiruhārama, he maha hoki ngā kāinga o ngā Hamari i kauwhautia ai e rāua te rongopai.
ACT 8:26 Nā, ka kōrero tētahi anahera a te Ariki ki a Piripi, ka mea, “Whakatika, haere ki te tonga, ki te ara e heke atu ana i Hiruhārama ki Kaha”; he koraha tērā.
ACT 8:27 Whakatika ana ia, haere ana. Nā, ko tētahi tangata o Etiopia, he unaka, he tangata nui nā Kanarahi, kuīni o ngā Etiopiana, ko te kaitiaki ia o āna taonga katoa, i haere ki Hiruhārama ki te karakia;
ACT 8:28 ā, e hoki mai ana, e noho ana i runga i tōna hāriata, e kōrero ana i a Ihāia poropiti.
ACT 8:29 Nā, ka mea te Wairua ki a Piripi, “Whakatata atu, ka haere atu koe ki te hāriata rā.”
ACT 8:30 Kātahi a Piripi ka oma atu ki a ia, ka rongo i a ia e kōrero ana i a Ihāia poropiti, ka mea atu, “E mātau ana rānei koe ki tāu e kōrero nā?”
ACT 8:31 Anō rā ko ia, “Me pēhea koia, ki te kore tētahi hei arataki i ahau?” Nā, ka mea ia ki a Piripi kia eke ki runga kia noho tahi me ia.
ACT 8:32 Nā, ko te wāhi o te karaipiture e kōrero nei ia, ko tēnei: “I ārahina ia ānō he hipi kia patua; ā, me te reme e wahangū ana i te aroaro o tōna kaikutikuti, kīhai i kuihi tōna waha.
ACT 8:33 I tōna whakaitinga i whakakorea he whakawā mōna. Mā wai hoki tōna whakatupuranga e kōrero? Kua tangohia atu nei tōna ora i te whenua.”
ACT 8:34 Nā, ka whakahoki te unaka ki a Piripi, ka mea, “Tēnā koa, mō wai tēnei kōrero a te poropiti? Mōna ake anō, mō tētahi atu rānei?”
ACT 8:35 Nā, ka puaki te māngai o Piripi, ā, tīmata mai i taua karaipiture, kauwhautia ana e ia a Īhu ki a ia.
ACT 8:36 Ā, i a rāua e haere ana i te ara, ka tae atu rāua ki tētahi wai, ka mea te unaka, “Nā, he wai tēnei! He aha te mea e kore ai ahau e iriiria?”
ACT 8:37 Mea atu ana a Piripi, “Ki te whakapono tōu ngākau katoa, e āhei anō koe.” Nā, ka whakahoki ia, ka mea, “E whakapono ana ahau ko Īhu Karaiti te Tama a te Atua.”
ACT 8:38 Kātahi ia ka whakahau i te hāriata kia tū; ka haere atu rāua tokorua ki roto i te wai, a Piripi rāua ko te unaka; ā, iriiria ana ia e ia.
ACT 8:39 Ā, i tō rāua putanga ake i te wai, kāhakina atu ana a Piripi e te Wairua o te Ariki; ā, mutu tonu te kitenga atu o te unaka i a ia, heoi, haere hari atu ana ia i tōna ara.
ACT 8:40 Ko Piripi ia i kitea ki Ahota; ā, i a ia e haere ana, kauwhautia ana e ia te rongopai ki ngā pā katoa, ā tae noa ia ki Hiharia.
ACT 9:1 Ko Haora ia kei te kupukupu tonu i te whakawehi, i te mate mō ngā ākonga a te Ariki, ā, haere ana ki te tohunga nui,
ACT 9:2 kei te tono pukapuka i a ia ki ngā whakaminenga i Ramahiku, ina kitea e ia tētahi nō te Huarahi, ahakoa tāne, wāhine rānei, kia mauria hereheretia mai e ia ki Hiruhārama.
ACT 9:3 Nā, i a ia e haere ana, ka whakatata ia ki Ramahiku; nā, ohorere ana te whitinga mai ki a ia, huri noa, o tētahi mārama nō te rangi.
ACT 9:4 Ā, hinga ana ia ki te whenua, ka rongo ake i tētahi reo e mea ana ki a ia, “E Haora, e Haora, he aha tāu e whakatoi nei i ahau?”
ACT 9:5 Anō rā ko ia, “Ko wai koe, e te Ariki?” Ka mea ia, “Ko Īhu ahau, e whakatoia nei e koe; ehara tāu, te whana ki ngā koikoi.”
ACT 9:6 Nā, wiri ana ia, ihiihi ana, ka mea, “E te Ariki, kia aha ahau?” Anō rā ko te Ariki ki a ia, “Whakatika, tomo atu ki te pā, ā, ka kōrerotia ki a koe tāu e mea ai.”
ACT 9:7 Nā, ko ngā tāngata i haere tahi i a ia, tū reokore ana, rongo kau ana ki te reo, kāhore ia i kite tangata.
ACT 9:8 Nā, ka whakatika ake a Haora i te whenua, ā, i te tuwheratanga o ōna kanohi, kīhai rawa ia i kite aha; nā, ārahina ā ringatia ana ia e rātou, mauria ana ia ki Ramahiku.
ACT 9:9 Ā, e toru ōna rā e kore ana e kite, kīhai hoki i kai, kīhai i inu.
ACT 9:10 Nā, i Ramahiku tētahi ākonga, ko Anania te ingoa; ka mea te Ariki ki a ia, he kite, “E Anania.” Ka mea tērā, “Tēnei ahau, e te Ariki.”
ACT 9:11 Anō rā ko te Ariki ki a ia, “Whakatika, haere ki te ara e kīia nei ko Torotika, ka ui i te whare o Hūrā mō tētahi ko Haora te ingoa, nō Tarahu. Nā, kei te īnoi ia.
ACT 9:12 Ā, kua kite ia i tētahi tangata, ko Anania te ingoa, e tomo mai ana, e whakapā ana i ōna ringa ki a ia, kia kite ai ia.”
ACT 9:13 Otirā, ka whakahoki a Anania, “E te Ariki, he tokomaha āku i rongo ai mō tēnei tangata, ki te nui o te kino i mea ai ia ki tāu hunga tapu i Hiruhārama;
ACT 9:14 ā, tēnei anō kei a ia he mana nā ngā tohunga nui, kia herea te hunga katoa e karanga ana ki tōu ingoa.”
ACT 9:15 Heoi, ka mea te Ariki ki a ia, “Haere; nō te mea he kaupapa whiriwhiri ia nāku, hei mau i tōku ingoa ki te aroaro o ngā tauiwi, o ngā kīngi, o ngā tama hoki a Īharaira.
ACT 9:16 Ka whakakitea hoki e ahau ki a ia te nui o ngā mea e mamae ai ia mō tōku ingoa.”
ACT 9:17 Nā, haere ana a Anania, tomo ana ki roto ki te whare. Ka whakapā i ōna ringa ki a ia, ka mea, “E tōku teina, e Haora, nā te Ariki, nā Īhu, i puta rā ki a koe i te ara i haere mai nā koe, nāna ahau i tono mai, kia kite ai koe, ā, kia kī ai hoki i te Wairua Tapu.”
ACT 9:18 Nā, marere tonu iho ētahi mea, ānō he unahi, i ōna kanohi, ā, kite ana ia, ka whakatika, ka iriiria.
ACT 9:19 Nā, ka kai ia, ka whai kaha. Nā, noho ana a Haora ki ngā ākonga i Ramahiku mō ētahi rā.
ACT 9:20 Ā, i reira tonu kauwhautia ana e ia a te Karaiti i roto i ngā whare karakia, ko te Tama ia a te Atua.
ACT 9:21 Ā, mīharo ana te hunga katoa i rongo, ka mea, “Ehara ianei tēnei i te kaitūkino o te hunga i karanga ki tēnei ingoa i Hiruhārama? Ā, ko te mea anō tēnei i haere mai ai ia, kia herea rātou, kia ārahina ki ngā tohunga nui?”
ACT 9:22 Ko Haora ia ka nui haere kē atu tōna kaha, ā, whakapororarutia ana e ia ngā Hūrai e noho ana i Ramahiku, i a ia e whakakite ana ko te Karaiti tēnei.
ACT 9:23 Ā, ka maha ngā rā ka pahure, ka rūnanga ngā Hūrai kia whakamatea ia.
ACT 9:24 Heoi, i mātau a Haora ki tā rātou whakapāpānga mōna. Ā, whanga ana rātou ki ngā tatau i te ao, i te pō, kia whakamatea ia;
ACT 9:25 otiia, i mau ngā ākonga ki a ia i te pō, tukua iho ana e rātou rā te taiepa i roto i te kete.
ACT 9:26 Ā, nō tōna taenga mai ki Hiruhārama, ka whai ia kia uru atu ia ki ngā ākonga; heoi, wehi katoa ana rātou i a ia, kīhai i whakapono he ākonga ia.
ACT 9:27 Ko Pānapa ia i tango i a ia, ā, mauria ana ia ki ngā āpōtoro, kōrerotia ana e ia ki a rātou tōna kitenga i te Ariki i te ara, tāna kōrerotanga ki a ia, tōna māia hoki ki te kauwhau i Ramahiku i runga i te ingoa o Īhu.
ACT 9:28 Nā, ka noho ia ki a rātou, hāereere atu ana, hāereere mai ana i Hiruhārama,
ACT 9:29 me te māia hoki ki te kauwhau i runga i te ingoa o te Ariki; ā, kōrero ana ia, totohe ana ki ngā Hūrai Kariki; otirā ka whakangākau rātou kia whakamatea ia.
ACT 9:30 Nō te mōhiotanga o ngā tuākana, ka mauria ia e rātou ki raro ki Hiharia, ā, tonoa atu ana ia ki Tarahu.
ACT 9:31 Nā, ka whai tānga manawa te hāhi, puta noa i Hūria katoa, i Karirī, i Hamaria, ā, tupu ana; haere ana i runga i te wehi o te Ariki, i te whakamārie hoki a te Wairua Tapu, nō ka whakaroaka.
ACT 9:32 Nā, i a Pita e hāereere ana puta noa ngā wāhi katoa, ka tae iho hoki ia ki te hunga tapu e noho ana i Raira.
ACT 9:33 Ka kitea e ia i reira tētahi tangata ko Inia te ingoa, kua waru ōna tau e takoto ana i runga i tōna moenga; he pararūtiki hoki ia.
ACT 9:34 Nā, ko te meatanga a Pita ki a ia, “E Inia, ka ora koe i a Īhu Karaiti; whakatika, whārikitia tōu moenga.” Nā, whakatika tonu ake ia.
ACT 9:35 I kite katoa hoki i a ia te hunga e noho ana i Raira, i Harona, ā, tahuri ana ki te Ariki.
ACT 9:36 Nā, tērā tētahi ākonga i Hopa e noho ana, ko Tapita te ingoa, ko te whakamāoritanga ko Roka. He wahine tēnei i aro nui ki ngā mahi pai, ki ngā mahi atawhai rawakore.
ACT 9:37 Ā, i aua rā ka tūrorotia ia, ka mate. Ā, ka oti ia te horoi e rātou, ka whakatakotoria ia ki tētahi rūma i runga.
ACT 9:38 Nā, i te mea e tata atu ana a Raira ki Hopa, ka rongo ngā ākonga kei reira a Pita, ā, ka tonoa e rātou tokorua ngā tāngata ki a ia, hei mea, “Kaua e whakaroa te haere mai ki a mātou.”
ACT 9:39 Nā, whakatika ana a Pita, haere ana i a rāua. Ā, i tōna taenga atu ka ārahina e rātou ki te rūma i runga. Ā, tū ana ngā pouaru katoa i tōna taha, tangi ana, ka whakakite ki a ia i ngā koti, i ngā kākahu i hangā e Roka, i a ia e noho ana i a rātou.
ACT 9:40 Otiia, ka tonoa rātou katoa e Pita ki waho, ka tuku ia i ōna turi, ka īnoi; kātahi ka tahuri ake ia ki te tūpāpaku, ka mea, “Tapita, e ara.” Nā, ka titiro ōna kanohi, ā, i tōna kitenga i a Pita, ka noho ia ki runga.
ACT 9:41 Kātahi, ka hoatu e ia tōna ringa ki a ia, ka whakaara ake i a ia. Ā, karangatia ana e ia te hunga tapu me ngā pouaru, ā, tukua oratia atu ana ia.
ACT 9:42 Ā, i mōhiotia tēnei mea puta noa i Hopa katoa; he tokomaha hoki i whakapono ki te Ariki.
ACT 9:43 Ā, he maha ōna rā i noho ai ia ki Hopa, ki a Haimona kaimahi hiako.
ACT 10:1 Nā, i Hiharia tētahi tangata, ko Koroniria te ingoa, he keneturio nō te pū i kīia nei ko tō Itari.
ACT 10:2 He tangata karakia ia, e wehi ana i te Atua, rātou ko tōna whare katoa, he maha āna mahi atawhai ki te iwi, me te īnoi tonu ki te Atua.
ACT 10:3 I kite nui ia, he whakarehu, i te mea ka tata ki te iwa o ngā hāora o te rā, i tētahi anahera a te Atua, e haere mai ana ki a ia, e mea ana hoki ki a ia, “E Koroniria!”
ACT 10:4 Nā, ka titiro matatau atu ia ki a ia, ka wehi, ka mea, “He aha, e te Ariki?” Ka kī tērā ki a ia, “Kua puta ake āu īnoi me āu mahi atawhai, hei whakamahara ki te aroaro o te Atua.
ACT 10:5 Nā, tonoa āianei he tangata ki Hopa, ki te tiki i a Haimona, ko te rua nei o ōna ingoa ko Pita.
ACT 10:6 He manuhiri ia nā Haimona kaimahi hiako, i te taha nei o te moana tōna whare.”
ACT 10:7 Ā, nō te rironga atu o te anahera i kōrero nei ki a ia, ka karangatia e ia tokorua o āna pononga tāne, me tētahi hōia karakia nō te hunga e mahi tonu ana ki a ia;
ACT 10:8 ā, ka oti ngā mea katoa te kōrero ki a rātou, ka tonoa rātou e ia ki Hopa.
ACT 10:9 Nā i te aonga ake, i a rātou e haere ana, e whakatata atu ana ki te pā, ka kake a Pita ki runga ki te tuanui, i te ono o ngā hāora, ki te īnoi.
ACT 10:10 Nā ka pā ki a ia te matekai, ka mea ki te kai; otirā, i a rātou e taka mai ana, ka tau iho te wairua matakite ki a ia.
ACT 10:11 Nā, ka kite ia i te rangi kua tuwhera, me tētahi mea e heke iho ana, he mea tuku iho mā ngā pito e whā, ki te whenua.
ACT 10:12 I roto i taua mea ngā momo kararehe waewae whā katoa, ngā mea ngōkingōki katoa o te whenua, me ngā manu o te rangi.
ACT 10:13 I reira, ka puta mai he reo ki a ia, “Whakatika, e Pita; patua, kainga.”
ACT 10:14 Ko Pita ia i mea, “Kāhore, e te Ariki; kīanō ahau i kai i te mea noa, i te mea poke rānei.”
ACT 10:15 Ka puta mai anō he reo ki a ia, ka tuaruatia, “Ko ā te Atua i mea ai kia mā, kaua e whakanoatia e koe.”
ACT 10:16 E toru meatanga o tēnei; ā, i reira tonu ka tangohia atu taua mea ki te rangi.
ACT 10:17 I taua wā tonu, i a Pita e whakaaroaro ana i roto i a ia ki te tikanga o tēnei whakakitenga, nā, ko ngā tāngata i tonoa mai rā e Koroniria, tērā kua uiui ki te whare o Haimona, tū ana i mua i te kūwaha.
ACT 10:18 Karanga ana mai, ui ana, kei reira rānei e noho ana a Pita, te rua nei o ōna ingoa ko Haimona.
ACT 10:19 Ā, i a Pita e whakaaro ana mō taua whakakitenga, ka mea te Wairua ki a ia, “Nanā, tokotoru ēnei tāngata e rapu ana i a koe.
ACT 10:20 Nā, whakatika, heke atu, haere tahi koutou, kei ruarua; nāku hoki rātou i tono mai.”
ACT 10:21 Nā, ka heke atu a Pita ki aua tāngata, ka mea, “Nā, ko ahau tēnei e rapu nei koutou. He aha te take o tā koutou haere mai?”
ACT 10:22 Nā, ka mea rātou, “Ko Koroniria rā, he keneturio, he tangata tika, e wehi ana i te Atua, e kōrerotia paitia ana e te iwi katoa o ngā Hūrai, kua whakamaharatia ia e te Atua nā tētahi anahera tapu kia tīkina atu koe ki tōna whare, kia rongo ia ki ētahi kupu i a koe.”
ACT 10:23 Nā, karanga ana ia i a rātou ki roto hei manuhiri māna. Ā, i te aonga ake, ka whakatika ia ka haere atu me rātou, ā, ko ētahi o ngā tēina nō Hopa i haere tahi me ia.
ACT 10:24 Ā, ao ake ka tomo rātou ki Hiharia. Nā, ko Koroniria e tatari mai ana ki a rātou, he mea karanga nāna kia huihui mai ōna whanaunga me ōna hoa tupu.
ACT 10:25 Ā, nō ka tomo atu a Pita, ka tūtaki a Koroniria ki a ia, ka hinga ki ōna waewae, ka koropiko ki a ia.
ACT 10:26 Otirā, ka whakaara ake a Pita i a ia, ka mea, “E tū ki runga; he tangata nei anō ahau.”
ACT 10:27 Nā, i a ia e kōrero ana ki a ia, ka tomo atu ia ki roto, ka kite i te menenga tokomaha,
ACT 10:28 ka mea atu ki a rātou, “E mātau ana koutou e kore e tika kia huihui te tangata o ngā Hūrai, kia haere atu rānei ki te tangata iwi kē; otiia, kua whakakitea e te Atua ki ahau kia kaua e kīia tētahi tangata he noa, he poke.
ACT 10:29 Koia ahau i haere mai ai, kīhai i aha i te tikinga ake i ahau. Nā, ka ui nei ahau, he aha te take i tīkina ake ai ahau?”
ACT 10:30 Ka mea a Koroniria, “Ka whā ngā rā ināianei tae mai ki tēnei hāora, e whakarite ana ahau i te īnoinga o te iwa o ngā hāora i roto i tōku whare; nā, ko te tangata e tū ana i tōku aroaro, kanapa tonu te kākahu,
ACT 10:31 e mea ana, ‘E Koroniria, kua rangona tāu īnoi, ā, e maharatia ana āu mahi atawhai i te aroaro o te Atua.
ACT 10:32 Nā, tonoa he tangata ki Hopa, ka karanga ki a koe i a Haimona, te rua nei o ōna ingoa ko Pita; he manuhiri ia i roto i te whare o Haimona kaimahi hiako, i te taha moana.’
ACT 10:33 I reira tonu ka tono tāngata atu ahau ki a koe; nā, he pai rawa tōu haerenga mai. Nō reira, kei konei katoa mātou kei te aroaro o te Atua, whakarongo ai ki ngā mea katoa kua whakahaua e te Ariki ki a koe.”
ACT 10:34 Nā, ka puaki te māngai o Pita, ka mea: “He pono ka kite ahau kāhore a te Atua whakapai kanohi;
ACT 10:35 otiia, i roto i ngā tini iwi ko te tangata e wehi ana ki a ia, ā, e mahi ana i te tika, ka paingia e ia.
ACT 10:36 Ko te kupu i tukua mai e ia ki ngā tamariki a Īharaira, he kauwhau i te rongopai o te rangimārie nā Īhu Karaiti; ko ia nei te Ariki o te katoa.
ACT 10:37 Ko taua kupu, kei te mōhio koutou, i kauwhautia rā puta noa i Hūria katoa, i tīmata mai i Karirī, i muri o te iriiri i kauwhautia e Hoani;
ACT 10:38 arā, ko Īhu o Nahareta, tā te Atua whakawahinga i a ia ki te Wairua Tapu, ki te kaha; ā, hāereere ana ia ki te mahi i te pai, ki te whakaora i te hunga katoa i pēhia e te rēwera; nō te mea i a ia te Atua.
ACT 10:39 “Ko mātou hoki ngā kaiwhakaatu o ngā mea katoa i mea ai ia ki te whenua o ngā Hūrai, ki Hiruhārama hoki. Ā, whakamatea ana ia e rātou, he mea whakairi ki runga ki te rākau.
ACT 10:40 Nā, ko ia i whakaarahia ake e te Atua i te toru o ngā rā, ā, meinga ana ia kia kitea nuitia,
ACT 10:41 ehara i te mea e te iwi katoa, engari e te hunga i whiriwhiria i mua e te Atua, arā e mātou, i kai tahi nei, i inu tahi nei me ia, i muri i tōna aranga ake i te hunga mate.
ACT 10:42 I whai kupu hoki ia ki a mātou kia kauwhau ki te iwi, kia whakaatu, ko ia tā te Atua i whakarite ai hei Kaiwhakawā mō ngā tāngata ora, mō ngā tāngata mate.
ACT 10:43 He kaiwhakaatu ngā poropiti katoa mōna, arā mā tōna ingoa ka whiwhi ai ki te murunga hara ngā tāngata katoa e whakarongo, ana ki a ia.”
ACT 10:44 I a Pita anō e kōrero ana i ēnei kupu, ka tau iho te Wairua Tapu ki te hunga katoa e whakarongo ana ki te kupu.
ACT 10:45 Ā, ko te hunga o te kotinga i whakapono nei, ko ngā mea i haere tahi mai me Pita, mīharo ana nō te mea kua ringihia tahitia iho te Wairua Tapu ki ngā tauiwi.
ACT 10:46 I rongo hoki rātou ki ngā reo i kōrero ai rātou, i whakanui ai i te Atua. I reira ka whakahoki a Pita,
ACT 10:47 “E āhei rānei te whakakāhore e tētahi te wai, kei iriiria ēnei kua whiwhi tahi nei me tātou ki te Wairua Tapu?”
ACT 10:48 Nā, ka whakahau ia kia iriiria rātou i runga i te ingoa o Īhu Karaiti. I reira ka tohe rātou ki a ia kia noho mō ētahi rā.
ACT 11:1 Ā, ka rongo ngā āpōtoro me ngā tuākana i Hūria, kua tango hoki ngā tauiwi i te kupu a te Atua.
ACT 11:2 Ā, nō te taenga ake o Pita ki Hiruhārama, ka whakawākia ia e te hunga o te kotinga,
ACT 11:3 i mea rātou, “I haere koe ki roto ki ngā tāngata kīhai i kotia, i kai tahi me rātou!”
ACT 11:4 Nā, ka tīmata a Pita, ka kōrero whakatepe atu ki a rātou, ka mea:
ACT 11:5 “I te pā ahau, i Hopa, e īnoi ana; ā, ka kite moemoeā ahau i tētahi whakakitenga, ko tētahi mea e heke iho ana, ānō he kākahu nui, he mea tuku iho i te rangi mā ngā pito e whā; ā, tae tonu mai ki ahau.
ACT 11:6 Nō te whakamaunga atu o ōku kanohi ki taua mea, ka whakaaro ahau, ā, ka kite i ngā kararehe waewae whā o te whenua, i ngā kararehe mohoao me ngā mea ngōkingōki me ngā manu o te rangi.
ACT 11:7 Ā, ka rongo hoki ahau he reo e mea mai ana ki ahau, ‘E ara, e Pita; patua, kainga.’
ACT 11:8 “Otirā, ka kī atu ahau, ‘Kāhore, e te Ariki; kīanō hoki tētahi mea noa, poke rānei, i tapoko noa ki tōku māngai.’
ACT 11:9 “Nā, ka whakahoki tuarua mai he reo nō te rangi, ‘Ko ā te Atua i mea ai kia mā, kaua e meinga e koe kia noa.’
ACT 11:10 “E toru ngā meatanga o tēnei; ka hūtia katoatia atu anō ki te rangi.
ACT 11:11 Nā, i taua wā anō kua tū ngā tāngata tokotoru ki mua i te whare i noho ai ahau, he mea tono mai nō Hiharia ki ahau.
ACT 11:12 Nā, ka mea te Wairua ki ahau kia haere tahi mātou, kia kaua ahau e ruarua. I haere tahi anō i ahau ēnei tēina tokoono, ā, tomo ana mātou ki te whare o taua tangata.
ACT 11:13 Nā, ka kōrerotia mai e ia ki a mātou tōna kitenga i te anahera i tōna whare e tū ana, e mea ana ki a ia, ‘Tonoa ētahi tāngata ki Hopa, tīkina a Haimona, te rua nei o ōna ingoa ko Pita;
ACT 11:14 māna e kōrero ki a koe ētahi kupu, e ora ai koutou ko tōu whare katoa.’
ACT 11:15 “Ā, nōku ka tīmata ki te kōrero, ka tau iho te Wairua Tapu ki a rātou, ka pērā anō me ia ki a tātou i te tīmatanga.
ACT 11:16 Kātahi ahau ka mahara ki te kupu a te Ariki, ki tāna i mea ai, ‘I iriiri rā a Hoani ki te wai; ko koutou ia ka iriiria ki te Wairua Tapu.’
ACT 11:17 Nā, mehemea rite tonu tā te Atua mea i hoatu ai ki a rātou ki tāna i hōmai ai hoki ki a tātou, i a tātou i whakapono ai ki te Ariki, ki a Īhu Karaiti; ko wai ahau, kia āhei te tū atu ki te Atua?”
ACT 11:18 Ā, nō ka rongo rātou ki ēnei mea, mutu pū tā rātou kōrero, heoi, ka whakakorōria i te Atua, ka mea, “Koia anō, kua hōmai hoki e te Atua ki ngā tauiwi te rīpenetā e ora ai.”
ACT 11:19 Nā, ko te iwi i whakamararatia atu i runga i te tūkinotanga i puta ake i tō Tepene, hāereere ana rātou ā tae noa ki Pinikia, ki Kaiperu, ki Anatioka, me te kauwhau anō i te kupu ki ngā Hūrai anake, kāhore ki ētahi atu.
ACT 11:20 Otirā, ko ētahi o rātou, he tāngata nō Kaiperu, nō Hairini, i tō rātou taenga ki Anatioka, ka kōrero ki ngā Kariki hoki, ka kauwhau i te Ariki, i a Īhu.
ACT 11:21 Ko te ringa hoki o te Ariki i a rātou; ā, he tokomaha rawa i whakapono, i tahuri ki te Ariki.
ACT 11:22 Nā, ka tae tō rātou rongo ki ngā taringa o te hāhi i Hiruhārama; ā, ka tonoa e rātou a Pānapa kia haere ki Anatioka.
ACT 11:23 Nō tōna taenga atu, ka kite i te aroha noa o te Atua, ka hari, ka whakahau i a rātou katoa kia ū te ngākau, kia piri ki te Ariki.
ACT 11:24 He tangata pai hoki ia, kī tonu i te Wairua Tapu, i te whakapono. He nui anō te hunga i honoa ki te Ariki.
ACT 11:25 Me i reira ka haere atu a Pānapa ki Tarahu, ki te rapu i a Haora;
ACT 11:26 ā, nō ka kitea ia e ia, ka kawea mai ia e ia ki Anatioka. Ā, kotahi tino tau i huihui tahi ai rāua ki te hāhi, ā, he nui te hunga i whakaakona. I mātua huaina hoki ngā ākonga he Karaitiana ki Anatioka.
ACT 11:27 Nā, i aua rā ka heke mai ētahi poropiti i Hiruhārama ki Anatioka.
ACT 11:28 Ā, ka tū ake tētahi o rātou, ko Akapu te ingoa, ka whakakite, he mea nā te Wairua, tērā ka pā he mate nui i te hiakai ki te whenua katoa; i puta anō tēnei i ngā rā o Karauria.
ACT 11:29 Nā, ka whakatakoto tikanga ngā ākonga i runga i te mea e taea e tēnā, e tēnā, kia tukua atu he āwhina mō ngā tuākana e noho ana i Hūria;
ACT 11:30 pērā ana hoki rātou, tukua atu ana ki ngā kaumātua mā te ringa o Pānapa rāua ko Haora.
ACT 12:1 Nā, i taua wā, ka totoro atu ngā ringa o Kīngi Herora ki te tūkino i ētahi o te hāhi.
ACT 12:2 Ā, whakamatea ana e ia ki te hoari a Hēmi, te tuakana o Hoani.
ACT 12:3 Ā, nō tōna kitenga e pai ana ki ngā Hūrai, ka anga ia ki te hopu hoki i a Pita. Nā, ko ngā rā ēnā o te Taro Rēwenakore.
ACT 12:4 Ā, nō ka mau ia, ka makā ki te whare herehere, ka tukua ki ngā hōia kotahi tekau mā ono kia tiakina; ko te whakaaro mō muri iho i te Kapenga ka whakaputa mai ai i a ia ki te iwi.
ACT 12:5 Nā, ka puritia a Pita ki roto ki te whare herehere; otiia, kīhai i mutumutu te īnoi a te hāhi ki te Atua mōna.
ACT 12:6 Ā, nō ka tata a Herora te whakaputa mai i a ia, i taua pō anō e moe ana a Pita i waenganui o ngā hōia tokorua, he mea here ki ngā mekameka e rua; me ngā kaitiaki i mua i te tatau e tiaki ana i te whare herehere.
ACT 12:7 Nā, tū ana tētahi anahera nā te Ariki i tōna taha, ā, tīaho ana te mārama i roto i te rūma. Nā, ka papaki ia i te kaokao o Pita, ka whakaara i a ia, ka mea, “E ara, hohoro!” Ā, marere iho ōna mekameka i ōna ringa.
ACT 12:8 Ka mea atu anō te anahera ki a ia, “Whītiki i a koe, ka here i ōu pārekereke.” Ā, meinga ana e ia. Ka mea anō ki a ia, “Kākahuria tōu kākahu, haere mai i muri i ahau.”
ACT 12:9 Nā, ka haere ia ki waho, ka aru i a ia; ā, kīhai ia i mahara he pono tā te anahera i mea ai; hua noa he rekanga kanohi tāna i kite ai.
ACT 12:10 Ā, nō ka mahue i a rāua te tuatahi, te tuarua o ngā kaitiaki, ka tae rāua ki te tatau rino i te putanga atu ki te pā; tuwhera noa ana tērā ki a rāua. Puta ana rāua ki waho, haere ana, puta rawa i tētahi ara, mawehe tonu atu te anahera i a ia.
ACT 12:11 Ā, i te hokinga ake o ngā whakaaro o Pita, ka mea ia, “Kātahi ahau ka tino mōhio, kua tono mai te Ariki i tāna anahera, hei tango i ahau i roto i te ringa o Herora, i ngā mea katoa hoki e tāria nei e te iwi o ngā Hūrai.”
ACT 12:12 Ā, nō ka whakaaroaro ia ki taua mea, ka haere ia ki te whare o Meri, whaea o Hoani, ko te rua nei o ōna ingoa ko Māka; he tokomaha hoki kua huihui ki reira ki te īnoi.
ACT 12:13 Ā, nō te pātōtōtanga a Pita i te tatau o te whatitoka, ka tae mai he kōtiro ki te whakarongo, ko Rora te ingoa.
ACT 12:14 Ā, nō ka mōhio ia ki te reo o Pita, kīhai i uakina te tatau i te hari, heoi, oma ana ki roto, ki te kōrero kei te tatau a Pita e tū ana.
ACT 12:15 Nā, ka mea rātou ki a ia, “E haurangi ana koe!” Heoi, ka tohe tonu ia he pono. Nā, ka mea rātou, “Ko tōna anahera.”
ACT 12:16 Me te pātuki tonu anō tērā a Pita; ā, i tā rātou uakanga, ka kite i a ia, ka mīharo.
ACT 12:17 Nā, ka pēpehi atu tōna ringa i a rātou kia kaua e kuihi, ka kōrerotia ki a rātou tōna whakaputanga mai e te Ariki i te whare herehere. Ka mea, “Kōrerotia ēnei mea ki a Hēmi rātou ko ngā tēina.” Nā, ka puta ia ki waho, haere ana he wāhi kē.
ACT 12:18 Nā, i te aonga ake anō o te rā, kīhai i iti te pororaru o ngā hōia, i ahatia rānei a Pita.
ACT 12:19 Nā, ka rapu a Herora i a ia, ā, nō te korenga i kitea, ka whakawā i ngā kaitiaki, ka whakahau kia whakamatea. Nā, haere atu ana ia i Hūria ki raro ki Hiharia noho ai.
ACT 12:20 Nā, tino nui te riri o Herora ki te hunga o Tāira, o Hairona. Otirā, ka huihui mai rātou ki a ia, ā, ka oti a Parahitu, te kaitiaki o te whare moenga o te kīngi, te whakakīkī e rātou, ka tono rātou kia houhia te rongo, nō te mea ko ngā kai i whāngaia ai tō rātou whenua nō te whenua o te kīngi.
ACT 12:21 Ā, i tētahi rā i whakaritea ka kākahu a Herora i te kākahu kīngi, ka noho ki runga ki te torōna, ā, whakatū ana ki a rātou.
ACT 12:22 Nā, ko te karangatanga a te huihui, “He reo atua, ehara i tō te tangata!”
ACT 12:23 I reira, pū anō ka patua ia e tētahi anahera a te Ariki, nō te mea kīhai i hoatu e ia te korōria ki te Atua; ā, kainga ana ia e te kutukutu, hemo ake.
ACT 12:24 Ko te kupu ia a te Atua i tupu, i nui haere.
ACT 12:25 Ā, ka hoki a Pānapa rāua ko Haora i Hiruhārama, i te otinga o tā rāua mahi, ka mauria a Hoani, ko te rua nei o ōna ingoa ko Māka.
ACT 13:1 Nā, tērā ētahi poropiti me ētahi kaiwhakaako i Anatioka, i te hāhi i reira, ko Pānapa, ko Himiona i huaina nei ko Nikera, ko Rukiu nō Hairini, ko Manaena, he mea whakatupu ngātahi nei rāua ko Herora tetaraki, me Haora.
ACT 13:2 Ā, i a rātou e karakia ana ki te Ariki, e nohopuku ana, ka mea te Wairua Tapu, “Motuhia mai ki ahau a Pānapa rāua ko Haora ki te mahi i karangatia ai rāua e ahau.”
ACT 13:3 Nā, ka mutu tā rātou nohopuku me te īnoi, ā, ka popoki iho i ō rātou ringa ki a rāua ka tonoa atu rāua kia haere.
ACT 13:4 Nā, ka tonoa nei rāua e te Wairua Tapu, ka haere ki Herukia; ā, rere atu ana i reira ki Kaiperu.
ACT 13:5 Nā, i a rāua i Harami, ka kauwhautia e rāua te kupu a te Atua i roto i ngā whare karakia o ngā Hūrai. I a rāua anō a Hoani hei kaimahi.
ACT 13:6 Ā, nō tō rātou putanga i te motu katoa ki Papaho, ka kitea tētahi tangata mākutu, he poropiti teka, he Hūrai, ko Paraīhu te ingoa.
ACT 13:7 I te tino kāwana ia, i a Herekiu Pāora; he tangata mahara a Herekiu. Ā, karangatia ana e ia a Pānapa rāua ko Haora, ā, ka whai kia rongo i te kupu a te Atua.
ACT 13:8 Otirā, i tautohe ki a rāua a Erima te kaimākutu, ko te whakamāoritanga hoki tēnei o tōna ingoa, i mea kia tahuri kē te tino kāwana i te whakapono.
ACT 13:9 Otirā, ko Haora, e huaina nei anō ko Pāora, kī tonu i te Wairua Tapu, i whakamau i ōna kanohi ki a ia,
ACT 13:10 ā, i mea, “E te tangata kī tonu i te tinihanga, i ngā tini mahi pokanoa, e te tama a te rēwera, hoariri o ngā mahi tika katoa, e kore ianei e mutu tāu whakaputa kē i ngā ara tika a te Ariki?
ACT 13:11 Nanā, āianei pā ai te ringa o te Ariki ki a koe, ka matapōtia koe, e kore e kite i te rā ā taka noa tētahi wā.” Nā, taka tonu iho ki a ia he kohu, he pōuri; ā, hāereere noa ia ki te rapu kaiārahi mōna.
ACT 13:12 Ā, nō te kitenga o te tino kāwana i taua meatanga, ka whakapono ia, i mīharo hoki ki te ako a te Ariki.
ACT 13:13 Nā, ka rere atu a Pāora rātou ko ōna hoa i Papaho, ka ū ki Pereka i Pamapuria. Ā, whakarere ana a Hoani i a rāua, hoki ana ki Hiruhārama.
ACT 13:14 Ko rāua ia haere atu ana i Pereka, tae tonu atu ki Anatioka i Pihiria, ā, tomo ana ki te whare karakia i te rā hāpati, noho ana.
ACT 13:15 Ā, ka mutu te kōrerotanga o te ture, o ngā poropiti, ka tono tāngata ngā rangatira o te whare karakia ki a rāua, ka mea, “E hoa mā, ki te mea he kupu whakaako tā kōrua ki te hunga nei, kōrerotia.”
ACT 13:16 Nā, ka tū a Pāora ki runga, ka tāwhiri tōna ringa, ka mea: “E ngā tāngata o Īharaira, e te hunga e wehi ana ki te Atua, whakarongo mai.
ACT 13:17 Nā te Atua o tēnei iwi, o Īharaira i whiriwhiri ō tātou mātua, ā, whakanuia ana e ia tēnei iwi, i a rātou e noho manene ana i te whenua o Īhipa, i runga tonu anō te ringa i ārahina mai ai rātou e ia i reira.
ACT 13:18 Nā, me te mea e whā tekau ngā tau i whakamanawanui ai ki tō rātou āhua i te koraha.
ACT 13:19 Ā, ka whitu ngā iwi ka ngaro i a ia i te whenua o Kanaana, ka hoatu e ia ki a rātou tō rātou whenua hei whenua pūmau, mō ngā tau me te mea e whā rau e rima tekau.
ACT 13:20 “Ā muri iho i ēnei mea, ka hoatu e ia ki a rātou he kaiwhakawā, taea noatia a Hamuera poropiti.
ACT 13:21 Ā muri iho ka tono rātou ki tētahi kīngi; ā, hoatu ana e te Atua ki a rātou a Haora, tama a Kihi, he tangata nō te pū o Pineamine, ā, e whā tekau ngā tau.
ACT 13:22 Ā, ka oti ia te whakataka, ka whakaarahia ake e ia a Rāwiri hei kīngi mō rātou; i whakaaturia hoki ia e ia, i kōrerotia, ‘Kua kitea e ahau a Rāwiri tama a Hehe, he tangata e whakaaetia ana e tōku ngākau; ka meatia e ia ngā mea katoa e pai ai ahau.’
ACT 13:23 He uri nō tēnei tangata tā te Atua i hōmai ai ki a Īharaira, he Kaiwhakaora, ko Īhu, hei whakarite i te mea i kōrerotia ai i mua;
ACT 13:24 nō mua tata anō hoki i tōna haerenga mai te kauwhautanga a Hoani i te iriiri rīpenetā, ki te iwi katoa o Īharaira.
ACT 13:25 Ā, ka tutuki a Hoani ki tōna tutukitanga, ka mea ia, ‘Ko wai koia ahau ki tō koutou whakaaro? Ehara rā ahau i a ia. Engari, tērā te haere mai ana tētahi i muri i ahau, ko ōna hū e kore ahau e tau hei wewete.’
ACT 13:26 “E ōku tuākana, e ngā tama o te kāwei o Āperahama, e te hunga i roto i a koutou e wehi ana ki te Atua, kua hōmai te kupu o tēnei ora kia whakapuakina ki a tātou.
ACT 13:27 Nā, ko te hunga e noho ana Hiruhārama, me ō rātou rangatira, i te mea kīhai rātou i mōhio ki a ia, ki ngā reo rānei o ngā poropiti e kōrerotia ana i ngā hāpati katoa, nā rātou i whakarite aua reo, i a rātou i tuku i a ia ki te mate.
ACT 13:28 Ahakoa kīhai i kitea e rātou he mea e mate ai ia, ka tohe rātou ki a Pirato kia whakamatea ia.
ACT 13:29 Ā, nō ka rite i a rātou ngā mea katoa i tuhituhia mōna, tangohia iho ana ia i te rākau, whakatakotoria ana ki roto ki te urupā.
ACT 13:30 Heoi, nā te Atua ia i whakaara ake i te hunga mate.
ACT 13:31 Ā, he maha ngā rā i kitea ai ia e te hunga i haere tahi i a ia i Karirī ki Hiruhārama, ko rātou nei ngā kaiwhakaatu mōna ki te iwi.
ACT 13:32 “Nā, he kauwhau tēnei nā māua ki a koutou i te rongopai, i kōrerotia i mua ki ngā mātua,
ACT 13:33 arā, kua mana tēnei i te Atua, hei mea mā ā tātou tamariki, i a ia whakaara nei i a Īhu; ko te mea hoki tēnā i tuhituhia i te rua o ngā waiata: ‘Ko tāku Tama koe; nō nāianei koe whakatupuria ai e ahau.’
ACT 13:34 Ko tāna kōrero anō tēnei mōna whakaarahia nei e ia i te hunga mate, tē hoki anō ki te pirau i muri iho: ‘Ka hoatu e ahau ki a koutou ngā mea tapu, ngā manaakitanga pono o Rāwiri.’
ACT 13:35 Koia hoki ia i mea ai i tētahi atu waiata, ‘E kore koe e tuku i tāu Mea Tapu kia kite i te pirau.’
ACT 13:36 “Ko Rāwiri hoki i mahi i tā te Atua i pai ai i tōna whakatupuranga anō, ā, moe iho, whakatakotoria ana ki ōna mātua, kite ana i te pirau.
ACT 13:37 Ko tēnei ia i whakaarahia ake nei e te Atua, kīhai ia i kite i te pirau.
ACT 13:38 “Nā, kia mōhio koutou, e ōku tuākana, nā tēnei tangata te murunga hara e kauwhautia nei ki a koutou;
ACT 13:39 māna hoki ngā tāngata katoa e whakapono ana, ka whakatikaia ai i ngā mea katoa, e kore nei koutou e whakatikaia i runga i tā Mohi ture.
ACT 13:40 Nā, kia mahara, kei pā ki a koutou te mea i kōrerotia rā e ngā poropiti:
ACT 13:41 ‘Titiro mai, e te hunga whakahāwea, ka mīharo ai, ā, whakangaromia iho! Ka mahia hoki e ahau he mahi i ō koutou rā, he mahi e kore e whakaponohia e koutou, ki te whakapuakina e te tangata ki a koutou!’ ”
ACT 13:42 Nā, i a rātou e puta ana ki waho, ka tohe rātou kia kauwhautia anō aua kupu ki a rātou i tō muri iho hāpati.
ACT 13:43 Heoi, ka pākarukaru te huihui, he tokomaha ngā Hūrai me ngā porohiraiti karakia i aru i a Pāora rāua ko Pānapa; ā, ka kōrero rāua ki a rātou, ka ako kia mau tonu rātou ki te aroha noa o te Atua.
ACT 13:44 Nā, i tō muri iho hāpati ka huihui mai te pā, me te mea ko rātou katoa, ki te whakarongo ki te kupu a te Atua.
ACT 13:45 Nō te kitenga ia o ngā Hūrai i te huihui, ka kī rātou i te hae, ka whakakāhore ki ngā mea i kōrerotia e Pāora, ka whakateka, ka kohukohu.
ACT 13:46 Kātahi a Pāora rāua ko Pānapa ka kōrero māia atu, ka mea: “I takoto te tikanga kia mātua kōrerotia te kupu a te Atua ki a koutou. Nā, ka peia nei e koutou, ka whakaaro koutou e kore koutou e tau mō te ora tonu, nā, ka tahuri atu nei māua ki ngā tauiwi.
ACT 13:47 I pēnei hoki te ako a te Ariki ki a mātou: ‘Kua waiho koe e ahau hei mārama ki ngā tauiwi, kia ai koe hei oranga puta noa i ngā pito o te whenua.’ ”
ACT 13:48 Nā, i te rongonga o ngā tauiwi, ka hari, ka whakakorōria i te kupu a te Ariki; ka whakapono anō te hunga i rite mō te ora tonu.
ACT 13:49 Ā, pakū ana te kupu a te Ariki puta noa i taua whenua.
ACT 13:50 Otirā, i whakaohokia e ngā Hūrai ngā wāhine karakia, rangatira, me ngā tāngata nunui o te pā, ā, ara ana i a rātou he whakatoi mō Pāora rāua ko Pānapa, peia ana rāua i ō rātou wāhi.
ACT 13:51 Heoi, ruia atu ana e rāua te puehu o ō rāua waewae ki a rātou, ā, haere ana ki Ikoniuma.
ACT 13:52 Nā, kī tonu ngā ākonga i te hari, i te Wairua Tapu.
ACT 14:1 Ā, i Ikoniuma ka haere tahi rāua ki roto ki te whare karakia o ngā Hūrai, ā, ka kōrero, nō ka whakapono tōna tini o ngā Hūrai, o ngā Kariki.
ACT 14:2 Nā ngā Hūrai whakateka ia i whakaoho, i whakakino ngā ngākau o ngā tauiwi ki ngā tēina.
ACT 14:3 Nā, he nui te wā i noho ai rāua i reira, i māia ai te kōrero i ngā mea a te Ariki, nāna i whakaae te kupu o tōna aroha noa, me te hōmai anō e ia ngā tohu me ngā mea whakamīharo kia meatia e ō rāua ringa.
ACT 14:4 Otiia, i wehewehea ngā tāngata o te pā; ko ētahi i ū ki ngā Hūrai, ko ētahi ki ngā āpōtoro.
ACT 14:5 Ā, i ngā tauiwi rātou ko ngā Hūrai, ko ō rātou rangatira hoki e huaki ana ki te whakatupu kino, ki te āki i a rāua ki te kōhatu.
ACT 14:6 Ka tūpato rāua, ā, rere ana ki Raihitara, ki Rerepe, ki ngā pā o Raikaonia, ki pahaki tata atu anō hoki.
ACT 14:7 Ā, kauwhautia ana e rāua te rongopai ki reira.
ACT 14:8 I Raihitara hoki e noho ana tētahi tangata waewae ngoikore, he kopa nō te kōpū mai o tōna whaea, kāhore i haere i mua iho.
ACT 14:9 I rongo tēnei i a Pāora e kōrero ana; ko te tirohanga putanga atu o tērā ki a ia, ka kite he whakapono tōna e ora ai,
ACT 14:10 he nui noa atu tōna reo ki te karanga atu, “E tū ōu waewae ki runga.” Nā, mokowhiti ake ana ia, haere ana.
ACT 14:11 Nō te kitenga o ngā tāngata i tā Pāora i mea ai, ka ara tō rātou reo, ka mea i te reo o Raikaonia, “Kua heke iho ngā atua ki a tātou, nō ngā tāngata te āhua!”
ACT 14:12 Ā, huaina ana e rātou a Pānapa ko Hupita, a Pāora ko Merekurai, nō te mea ko ia te pū kōrero.
ACT 14:13 Nā, ka kawea mai e te tohunga o Hupita, i te ngutu nei o te pā tōna temepara, he pūru, he tūpare ki ngā kūwaha, ka mea kia patua he whakahere e rātou ko ngā mano.
ACT 14:14 Otirā, i te rongonga o ngā āpōtoro, o Pānapa rāua ko Pāora, ka haehae i ō rāua kākahu, ā, rere ana ki roto ki ngā tāngata, ka karanga atu,
ACT 14:15 ka mea, “E mara mā, he aha koutou ka mea ai i ēnei mea? He tāngata anō māua, he rite tahi ki a koutou te tū, e kauwhau ana hoki i te rongopai, kia tahuri kē koutou i ēnei mea tekateka noa ki te Atua ora, nāna nei i hanga te rangi me te whenua, te moana me ō reira mea katoa.
ACT 14:16 I ngā whakatupuranga hoki kua pahemo atu, i tukua e ia ngā iwi katoa kia haere i ō rātou ake ara.
ACT 14:17 Otiia, kīhai i tukua e ia kia kāhore he kaiwhakaatu mōna; i atawhai hoki ia, i hōmai anō e ia ki a koutou te ua o te rangi, me ngā pō hua, i mākona ai ō koutou ngākau i te kai, i te koa.”
ACT 14:18 Ā, ka kōrerotia ēnei kupu, nā, mutu whakauaua i a rāua te mea a ngā tāngata ki te patu whakahere mā rāua.
ACT 14:19 Otirā, ka haere mai ētahi Hūrai i Anatioka, i Ikoniuma; ā, ka whakakīkī rātou i ngā mano, ā, ākina ana a Pāora ki te kōhatu, tōia ana ki waho o te pā, hua noa kua mate.
ACT 14:20 Otiia, i ngā ākonga e tū ana i tōna taha, ka whakatika ia, haere ana ki roto ki te pā. Ā, i te aonga ake ka haere rāua ko Pānapa ki Rerepe.
ACT 14:21 Ā, nō ka kauwhau rāua i te rongopai ki taua pā, ā, he tokomaha ka meinga hei ākonga, ka hoki rāua ki Raihitara, ki Ikoniuma, ki Anatioka;
ACT 14:22 whakaū ana i ngā wairua o ngā ākonga, whakahau ana i a rātou kia mau tonu ki te whakapono, kua takoto hoki te tikanga, me nā runga i ngā matenga maha he ara atu mō tātou ki te rangatiratanga o te Atua.
ACT 14:23 Ā, nō ka whakaritea e rāua he kaumātua mō rātou i tēnei hāhi, i tēnei hāhi, me te īnoi anō rāua me te nohopuku, ka tukua atu rātou e rāua ki te Ariki, i whakapono nei rātou.
ACT 14:24 Nā, ka haere rāua nā waenganui o Pihiria, tae tonu atu ki Pamapuria.
ACT 14:25 Ā, ka oti te kauwhau e rāua te kupu ki Pereka, ka haere rāua ki raro ki Ataria.
ACT 14:26 Ā, rere atu ana i reira ki Anatioka, ki te wāhi i tukua ai rāua ki te aroha noa o te Atua, mō te mahi ka oti nei i a rāua.
ACT 14:27 Nā, ka tae rāua ka huihuia te hāhi, ka kōrerotia ngā mea i mahi tahi ai te Atua me rāua ko tāna uakanga hoki i te tatau o te whakapono ki ngā tauiwi.
ACT 14:28 Ā, kīhai i iti te wā i noho ai rāua i reira ki ngā ākonga.
ACT 15:1 Nā, ka tae iho ētahi tāngata i Hūria ka whakaako i ngā tēina, “Ki te kore koutou e kotia, kia rite ki tā Mohi, e kore koutou e taea te whakaora.”
ACT 15:2 Nā, kīhai i iti te whawhai, te uiui a Pāora rāua ko Pānapa ki a rātou, ka whakaritea ko Pāora, ko Pānapa, ko ētahi atu hoki o rātou, e haere ki ngā āpōtoro, ki ngā kaumātua ki Hiruhārama, mō tēnei pūtake.
ACT 15:3 Heoi, ārahina ana rātou e te hāhi haere ana rā Pinikia, rā Hamaria kōrero ana i te tahuritanga o ngā tauiwi, ā, hoatu ana e rāua he hari nui ki ngā tēina katoa.
ACT 15:4 Ā, nō tō rāua taenga ki Hiruhārama ka whakamanuhiritia rāua e te hāhi, e ngā āpōtoro hoki rātou ko ngā kaumātua, ka kōrerotia ngā mea i mahi tahi ai te Atua me rāua.
ACT 15:5 Nā, ko te whakatikanga o ētahi tāngata whakapono nō te tītorehanga ki ngā Parihi, ka mea, “Me kokoti rātou, me ako hoki kia whakaritea te ture a Mohi.”
ACT 15:6 Nā, ka huihui ngā āpōtoro rātou ko ngā kaumātua ki te whakaaro ki tēnei mea.
ACT 15:7 Ā, ka nui te tautohetohe, ka whakatika a Pita, ka mea ki a rātou, “E ngā tuākana, e mātau ana koutou ki te whiriwhiringa a te Atua i mua rawa i roto i a koutou, ko tōku māngai e rongo ai ngā tauiwi i te kupu o te rongopai, e whakapono ai hoki.
ACT 15:8 I whakaae hoki ki a rātou te Atua e mātau nei ki ngā ngākau, i a ia i hoatu ai i te Wairua Tapu ki a rātou, rite tahi ki tāna ki a tātou;
ACT 15:9 kāhore hoki i puta kē tōna whakaaro ki a tātou, ki a rātou, i ō rātou ngākau kua mā i a ia i runga i te whakapono.
ACT 15:10 Ko tēnei, he aha koutou ka whakamātautau ai i te Atua, ka whakatakoto ioka ai ki te kakī o ngā ākonga, he mea kīhai nei i taea te mau e ō tātou mātua, e tātou rānei?
ACT 15:11 Heoi, ka whakapono nei tātou, tērā tātou e ora i runga i te aroha noa o te Ariki, o Īhu Karaiti, ka pērā tahi hoki me rātou.”
ACT 15:12 Nā, noho puku ana te mano katoa, whakarongo ana ki a Pānapa rāua ko Pāora e kōrero ana i ngā tohu, i ngā mea whakamīharo i mea ai te Atua kia mahia e rāua i roto i ngā tauiwi.
ACT 15:13 Ā, ka mutu tā rāua ka whakahoki a Hēmi, ka mea: “E ngā tuākana, whakarongo ki ahau!
ACT 15:14 Kua kōrerotia e Himiona tā te Atua tirohanga mai i mua, tāna tangohanga i tētahi iwi i roto i ngā tauiwi mō tōna ingoa.
ACT 15:15 E rite ana anō ki tēnei ngā kōrero a ngā poropiti; i tuhituhia rā:
ACT 15:16 ‘I muri o ēnei mea ka hoki mai ahau, ka hangā anō e ahau te Tapenākara o Rāwiri, kua hinga nei; ka hangā anō e ahau ōna wāhi kua horoa, ā, ka whakaarahia e ahau.
ACT 15:17 Kia rapu ai ngā toenga o ngā tāngata ki te Ariki, me ngā tauiwi katoa hoki i karangatia nei tōku ingoa ki runga ki a rātou, e ai tā te Ariki, e mahi nei i ēnei mea katoa.
ACT 15:18 Nāna nei i mea kia mōhiotia ēnei mea katoa nō te tīmatanga rā anō o te ao.’
ACT 15:19 “Nā, ko tōku whakaaro tēnei; kia kaua e whakararua te hunga e tahuri ana mai ki te Atua i roto i ngā tauiwi;
ACT 15:20 engari, kia tuhi atu tātou ki a rātou, kia mawehe atu rātou i ngā poke o ngā whakapakoko, i te moe tāhae, i te mea kua nōtia te kakī, i te toto.
ACT 15:21 Nō ngā whakatupuranga hoki ō mua ngā kaikauwhau i a Mohi i tēnei pā, i tēnei pā, he mea kōrero i roto i ngā whare karakia i ngā hāpati katoa.”
ACT 15:22 Kātahi, ka pai ngā āpōtoro rātou ko ngā kaumātua me te hāhi katoa, kia whiriwhiria ētahi tāngata i roto i a rātou kia tonoa hei hoa mō Pāora rāua ko Pānapa ki Anatioka; a Hūrā, i huaina nei ko Pāhapa, rāua ko Hira, he hunga ingoa nui i roto i ngā tēina;
ACT 15:23 ka tuhia hoki ēnei mea hei mauranga: Nā ngā āpōtoro rātou ko ngā kaumātua, ko ngā tuākana, ki ngā tēina o roto i ngā tauiwi, i Anatioka, i Hīria, i Kirikia. Tēnā koutou.
ACT 15:24 Nā, ka rongo nei mātou, tērā ētahi i haere atu nei i a mātou, i whakararu i a koutou ki ngā kōrero, i whakapōhēhē i ō koutou ngākau, kāhore nei ā mātou kupu ki a rātou.
ACT 15:25 Kotahi tonu tō mātou whakaaro he pai kia whiriwhiria ētahi tāngata, kia tonoa atu ki a koutou, hei hoa mō ā mātou tāngata e aroha nei, mō Pānapa rāua ko Pāora;
ACT 15:26 he hunga i tuku nei i a rāua ki te mate hei mea mō te ingoa o tō tātou Ariki, o Īhu Karaiti.
ACT 15:27 Nā, kua tonoa atu nei e mātou a Hūrā rāua ko Hira, mā rāua hoki e kōrero a kupu atu aua mea anō.
ACT 15:28 I pai hoki ki te Wairua Tapu, ki a mātou hoki, kia kaua e utaina ki a koutou tētahi atu whakataimaha, ko ēnei mea tika anake;
ACT 15:29 kia mawehe koutou i ngā mea e patua ana mā ngā whakapakoko, i te toto, i te mea kua nōtia te kakī, i te moe tāhae. Ka tiaki koutou i a koutou i ēnei mea, ka pai tā koutou mahi. Kia ora koutou.
ACT 15:30 Ā, nō tō rātou tukunga atu, ka haere ki Anatioka. Nā, ka huihuia te mano, ka hoatu te pukapuka.
ACT 15:31 Ā, ka oti te kōrero, ka koa rātou mō te kupu whakahauora.
ACT 15:32 Nā, he maha ngā kupu a Hūrā rāua ko Hira i whakahau ai, i whakaū ai i ngā tēina; he poropiti hoki rāua.
ACT 15:33 Ā, ka roa iho rāua ki reira, ka tukua rāua e ngā tēina i runga i te rangimārie ki te hunga nāna rāua i tono atu.
ACT 15:34 Heoi, i pai a Hira kia noho ki reira.
ACT 15:35 Ko Pāora ia rāua ko Pānapa i noho i Anatioka, i whakaako, i kauwhau i te kupu a te Ariki, rātou tahi ko tērā hunga tokomaha.
ACT 15:36 Nā, muri iho i ētahi rā ka kī atu a Pāora ki a Pānapa, “Tāua ka hoki, ka tirotiro i ngā tēina i ngā pā katoa i kauwhautia ai e tāua te kupu a te Ariki, i tō rātou pēheatanga.”
ACT 15:37 Ā, ka mea a Pānapa kia mauria hei hoa a Hoani, e huaina nei ko Māka.
ACT 15:38 Otiia, kīhai a Pāora i pai kia haere i tō rāua tira te tangata i whakarere rā i a rāua i Pamapuria, kīhai hoki i haere tahi me rāua ki te mahi.
ACT 15:39 Heoi, nui atu tō rāua ngangare, mawehe ai rāua i a rāua; ā, mauria ana e Pānapa a Māka, rere ana ki Kaiperu.
ACT 15:40 Nā, tango ana a Pāora i a Hira, haere ana, he mea tuku ki te aroha noa o te Atua e ngā tēina.
ACT 15:41 Ā, haere ana ia rā Hīria, rā Kirikia, whakaū ana i ngā hāhi.
ACT 16:1 Nā, ka tae atu hoki ia ki Rerepe, ki Raihitara; ā, i reira tētahi ākonga, ko Tīmoti te ingoa, he tama nā tētahi wahine whakapono, he Hūrai, ko tōna pāpā ia he Kariki.
ACT 16:2 He pai te kōrero mōna a ngā tēina i Raihitara, i Ikoniuma.
ACT 16:3 I mea a Pāora kia haere ia hei hoa mōna; ā tangohia ana ia, kotia ana, he mea hoki mō ngā Hūrai e noho ana i aua wāhi; i mātau hoki rātou katoa he Kariki tōna pāpā.
ACT 16:4 Ā, i a rātou e hāereere ana i ngā pā, ka tukua e rātou hei pupuri mā rātou ngā tikanga i whakaritea e ngā āpōtoro, e ngā kaumātua, i Hiruhārama.
ACT 16:5 Nā, ka whakaūkia ngā hāhi ki te whakapono, ka nui haere hoki i tēnei rā, i tēnei rā.
ACT 16:6 Nā, haere ana rātou nā waenganui o te whenua o Pirikia, o Karatia, kua āraia hoki e te Wairua Tapu kei kōrero i te kupu ki Āhia.
ACT 16:7 Ā, i te taenga atu ki Maihia, ka whakamātau rātou ki te haere ki Pitinia; heoi, kīhai i tukua e te Wairua o Īhu;
ACT 16:8 nā, kapea ana Maihia, ka haere ki Toroa.
ACT 16:9 Ā, ka kitea e Pāora he kitenga i te pō: He tangata nō Makeronia e tū ana, e tohe ana ki a ia, e mea ana, “Whiti mai ki Makeronia, āwhinatia mātou.”
ACT 16:10 Ā, nō ka kitea te kitenga, ka mea tonu mātou kia haere ki Makeronia, i whakaaro hoki, nā te Atua mātou i karanga ki te kauwhau i te rongopai ki a rātou.
ACT 16:11 Heoi, ko te rerenga atu i Toroa, ka tika tonu mātou ki Hamotarakia, ā, ao ake te rā ki Neapori.
ACT 16:12 I reira atu ki Piripai, ko te pā nui ia o taua wāhi o Makeronia, he koroni nō Rōma. Ā, noho ana mātou i taua pā ā taka noa ētahi rā.
ACT 16:13 Nā, i te rā hāpati ka haere mātou ki waho o te pā, ki te taha o tētahi awa, he whakaaro ko te wāhi tērā hei karakiatanga; ā, ka noho, ka kōrero ki ngā wāhine i haere tahi ake.
ACT 16:14 Nā, ka whakarongo tētahi wahine, ko Riria te ingoa, he kaihoko pāpura, nō te pā o Taiataira, he wahine karakia ki te Atua. He mea whakapuare tōna ngākau e te Ariki, i rongo ai ia ki ngā mea i kōrerotia e Pāora.
ACT 16:15 Ā, nō ka oti ia te iriiri, rātou ko tōna whare, ka tohe ia, ka mea, “Ki te mea kua Whakaaro koutou he pono tāku mahi ki te Ariki, tomo mai koutou, e noho ki tōku whare.” Nā, ka tohea mātou e ia.
ACT 16:16 Nā, i a mātou e haere ana ki te wāhi īnoi, ka tūtaki ki a mātou tētahi kōtiro, he wairua matakite nei tōna, he nui te utu i riro i a ia mā ōna rangatira, i a ia e poropiti ana.
ACT 16:17 Ka whai ia i a mātou ko Pāora, ka karanga, ka mea, “He pononga ēnei tāngata nā te Atua, nā te Runga Rawa, e whakapuakina ana e rātou te ara o te ora ki a koutou.”
ACT 16:18 Nā, he maha ngā rā i mea ai ia tēnei. Otiia, ka hōhā a Pāora, ka tahuri, ka mea ki te wairua, “Ko tāku kupu tēnei ki a koe i runga i te ingoa Īhu Karaiti, puta mai i roto i a ia.” Puta mai ana i taua hāora anō.
ACT 16:19 Otirā, nō te kitenga o ōna rangatira kua kore he mahinga moni mā rātou, ka mau ki a Pāora rāua ko Hira, ka tōia ki te kāinga hoko ki ngā rangatira;
ACT 16:20 ā, ka oti rāua te mau ki ngā kaiwhakawā, ka mea, “Ko ēnei tāngata he Hūrai nei, e tino whakararuraru ana i tō tātou pā,
ACT 16:21 e whakapuakina ana hoki e rāua he ritenga e kore nei e tika kia whakaaetia, kia mahia e tātou, e ngā tāngata o Rōma.”
ACT 16:22 Nā, ko te whakatikanga o te mano ki a rāua. Ka huhua ō rāua kākahu e ngā kaiwhakawā, ka mea kia whiua ki te rākau.
ACT 16:23 Ā, ka maha ō rāua whiunga e rātou, ka makā rāua ki te whare herehere, ka tohutohutia te kaitiaki herehere, kia mau tāna pupuri i a rāua.
ACT 16:24 Nō te rironga i a ia o taua kupu, ka makā rāua e ia ki te whare herehere i roto rawa, ka whakaūria ō rāua waewae ki te rākau.
ACT 16:25 Nā, i waenganui pō ka īnoi a Pāora rāua ko Hira, ka waiata atu ki te Atua, me te whakarongo anō ngā herehere ki a rāua.
ACT 16:26 Nā, ka pā whakarere he rū nui, i ngarue ai ngā tūranga o te whare herehere; ā, puare tonu atu ngā tatau katoa, whakakorokoroa ana ngā herenga o ngā tāngata katoa.
ACT 16:27 Ā, ka oho te kaitiaki herehere i te moe, ka kite i ngā tatau o te whare herehere e puare ana, nā, ka unu i tāna hoari, ka mea ki te patu i a ia anō, hua noa kua oma ngā herehere.
ACT 16:28 Nā, ka nui te reo o Pāora ki te karanga, ka mea, “Kauaka tētahi mea kino e meatia ki a koe; ina tonu hoki mātou katoa.”
ACT 16:29 Ā, karangatia ana e ia he rama, ka rere ki roto, ka haere wiri, ka takoto ki te aroaro o Pāora rāua ko Hira.
ACT 16:30 Ka ārahina hoki rāua ki waho, ka mea, “E hoa mā, me aha ka ora ai ahau?”
ACT 16:31 Ka mea rāua “Me whakapono ki te Ariki, ki a Īhu Karaiti, ka ora ai koe, koutou tahi ko tōu whare.”
ACT 16:32 Nā, ka kōrerotia te kupu a te Ariki ki a ia, ki ngā tāngata katoa hoki i roto tōna whare.
ACT 16:33 Ā, ka mauria rāua e ia i taua hāora o te pō, ka horoia ō rāua whiunga; nā, iriiria tonutia iho, a ia me āna tāngata katoa.
ACT 16:34 Ā, ka ārahina rāua e ia ki tōna whare, ka whakatūria he tēpu kai ki mua i a rāua, ā, nui atu tōna hari, me tōna whare katoa, i te mea kua whakapono nei ki te Atua.
ACT 16:35 I te aonga ake ia o te rā, ka tonoa, ngā kātipa e ngā kaiwhakawā, i mea, “Tukua aua tāngata kia haere.”
ACT 16:36 Nā, ka kōrerotia e te kaitiaki herehere ēnei kupu ki a Pāora, ka mea, “Kua tono tāngata mai ngā kaiwhakawā, kia tukua kōrua; tēnā rā puta mai, haere i runga i te rangimārie.”
ACT 16:37 Nā, ko te kīanga atu a Pāora, “Kua whiua nuitia nei māua e rātou, ahakoa kāhore i whakawākia, he tāngata hoki nō Rōma, ā, kua makā māua ki te whare herehere; ā, kei te makā pukutia atu māua āianei e rātou? Kāhore rāpea; engari, mā rātou tonu e haere mai, e whakaputa i a māua ki waho.”
ACT 16:38 Nā, ka kōrerotia ēnei kupu e ngā kātipa ki ngā kaiwhakawā; ā, ka wehi, i tō rātou rongonga nō Rōma rāua.
ACT 16:39 Nā, ka haere mai rātou, ka tohe ki a rāua, ā, ka oti rāua te ārahi ki waho, ka mea rātou kia haere atu rāua i te pā.
ACT 16:40 Ā, ka puta atu rāua i te whare herehere, ka tomo ki te whare o Riria; ā, nō ka kite rāua i ngā tēina, ka whakamārie i a rātou, ka haere.
ACT 17:1 Nā, ka hāereere rāua i Amapipori, Aporonia, ka tae ki Teharonika; he whare karakia nō ngā Hūrai i reira.
ACT 17:2 Ā, ka tomo atu a Pāora ki a rātou, he tikanga hoki nāna, ā, e toru ngā hāpati i kōrerorero ai ki a rātou i roto i ngā karaipiture,
ACT 17:3 i whakapuaki ai, i kōrero ai, kua takoto hoki te tikanga kia mamae a te Karaiti, kia ara mai hoki i te hunga mate; ā, “Ko tēnei Īhu, e kauwhautia nei e ahau ki a koutou, ko ia te Karaiti.”
ACT 17:4 Nā, ka whakapono ētahi o rātou, ka piri hoki ki a Pāora rāua ko Hira; he tokomaha hoki o ngā Kariki karakia, kīhai hoki i ruarua ngā wāhine rangatira.
ACT 17:5 Heoi, ka hae ngā Hūrai, ka tango ki a rātou i ētahi tāngata kikino o te hunga māngere, ka huihuia ngā tāngata, ka whakaohotia te pā; nā, ko te huakanga ki te whare o Hahona, ka mea kia whakaputaina rāua ki te iwi.
ACT 17:6 Ā, nō te korenga i kitea rāua ka tōia e rātou a Hahona rātou ko ētahi tēina ki ngā rangatira o te pā, ka karanga, “Kua tae mai ki konei ngā tāngata i whakatutūngia ai te ao;
ACT 17:7 kua puritia hoki e Hahona; e tika kē ana ngā mahi a tēnei hunga katoa i ngā ture a Hīhā, e mea ana, tērā atu tētahi kīngi, ko Īhu.”
ACT 17:8 Nā, ka rongo te mano rātou ko ngā rangatira o te pā ki ēnei mea, ka pororaru.
ACT 17:9 Nā, ka tango rātou i ētahi moni pupuri i a Hahona rātou ko ērā atu, ā, tukua atu ana rātou.
ACT 17:10 Nā, tonoa tonutia atu e ngā tēina a Pāora rāua ko Hira i te pō ki Peria; i tō rāua taenga atu, ka haere ki te whare karakia o ngā Hūrai.
ACT 17:11 Engari, ēnei i nui atu te āhua rangatira i tō ngā tāngata o Teharonika, i hohoro tonu rātou te tango i te kupu, ā, i tēnei rā, i tēnei rā, i rapu i roto i ngā karaipiture i te tikanga o ēnei mea.
ACT 17:12 Nā, he tokomaha o rātou i whakapono; kīhai hoki i tokoiti ngā wāhine rangatira o ngā Kariki, me ngā tāne hoki.
ACT 17:13 Otirā, i te mōhiotanga o ngā Hūrai o Teharonika, tērā te kupu a te Atua te kauwhautia ana e Pāora ki Peria, ka haere hoki rātou ki reira ki te whakaoho, ki te whakararuraru i ngā mano.
ACT 17:14 Nā, tonoa tonutia atu e ngā tēina a Pāora kia haere tae noa ki te moana; ko Hira ia rāua ko Tīmoti i noho ki reira.
ACT 17:15 Nā, ka kawea a Pāora e ōna kaiārahi ki Atene; ā, ka riro he kupu ki a Hira rāua ko Tīmoti kia hohoro te haere ki a ia, ka hoki rātou.
ACT 17:16 Nā, i a Pāora e tatari ana ki a rāua i Atene, ka oho tōna wairua i roto i a ia, i tāna kitenga i te pā e kī ana i te whakapakoko.
ACT 17:17 Nā, totohe ana ia i roto i te whare karakia ki ngā Hūrai rātou ko ngā tāngata karakia, i te kāinga hoko hoki i ngā rā katoa ki ngā tāngata i pono ki a ia.
ACT 17:18 Ā, ka ngangare ki a ia ētahi tohunga o ngā Epikureana, o ngā Toika. Ko ētahi i mea, “He aha tā tēnei tangata kōrerorero e mea nei?” I mea ētahi, “Me te mea he kaiwhakapuaki ia i ētahi atua tauhou.” Mō tāna kauwhau i a Īhu, i te aranga, ki a rātou.
ACT 17:19 Nā, ka mau rātou ki a ia, ka kawea ki Areopaka, ka mea, “Kia mōhio mātou, he aha rānei tēnei ako hou e kōrerotia nei e koe?
ACT 17:20 Poka kē hoki ngā mea e mauria mai nei e koe ki ō mātou taringa; koia mātou i mea ai kia mōhio, he aha ēnei mea.”
ACT 17:21 Ka mutu hoki tā ngā tāngata katoa o Atene, rātou ko ngā manuhiri e noho ana i reira, e wātea ai, ko te kōrero rānei, ko te whakarongo rānei ki tētahi mea hou.
ACT 17:22 Nā, ka tū a Pāora i waenganui o Areopaka, ka mea, “E ngā tāngata o Atene, i ngā mea katoa ka kite ahau he āhua nui kē tō koutou wehi ki ngā atua māori.
ACT 17:23 I ahau hoki e hāereere ana, e mātakitaki ana i ngā mea e karakia nei koutou, ka kite ahau i tētahi āta, i tuhia nei a runga, ‘Ki te Atua Ngaro.’ Heoi, ko tā koutou e karakia kūware nei, ko ia tāku e whakaatu nei ki a koutou.
ACT 17:24 “Ko te Atua, nāna nei i hangā te ao me ngā mea katoa i roto, ko ia nei te Ariki o te rangi, o te whenua, e kore ia e noho ki ngā whare i hangā e te ringa;
ACT 17:25 e kore anō e mahia he mea māna e te ringa tāngata, me te mea he mate nōna ki tētahi aha rānei, ko ia hoki hei hōmai i te ora, i te manawa, i ngā mea katoa, ki ngā tāngata katoa.
ACT 17:26 Kotahi anō te toto i hangā ai e ia ngā iwi katoa o ngā tāngata, hei noho ki te mata katoa o te whenua, nāna hoki i whakatakoto ō rātou wā i whakaritea i mua, me ngā kaha o tō rātou nohoanga;
ACT 17:27 kia rapu ai rātou i te Atua, me kore e whāwhā, e kite i a ia, ahakoa rā kāhore ia i matara atu i a tātou katoa.
ACT 17:28 ‘Nāna hoki tātou i ora ai, i korikori ai, i noho ai.’ I pērā hoki te kōrero a ētahi o ō koutou kaitito, ‘Ko tātou hoki tōna uri.’
ACT 17:29 “Nā, he uri nei tātou nō te Atua, e kore e tika kia mea tātou, kei te rite te Atua ki te kōura, ki te hiriwa, ki te kōhatu, ki te mea i whakairoa e te mōhio, e te whakaaro o te tangata.
ACT 17:30 Nā, kāhore i whakaaroa e te Atua ngā wā o te kūwaretanga; ināianei ia kua whakahau ia i ngā tāngata katoa o ngā wāhi katoa kia rīpenetā.
ACT 17:31 Kua rite hoki i a ia he rā e whakawā ai ia i te ao i runga i te tika, arā mā te tangata kua whakaritea nei e ia; kua tukua nei hoki he tohu ki ngā tāngata katoa, i tāna whakaarahanga i a ia i te hunga mate!”
ACT 17:32 Nā, ka rangona e rātou te aranga o te hunga mate, ka tāwai ētahi; ko ētahi i mea, “Taihoa mātou e whakarongo anō ki tēnei mea i a koe.”
ACT 17:33 Heoi, puta atu ana a Pāora i waenganui i a rātou.
ACT 17:34 Ko ētahi tāngata ia i piri ki a ia, i whakapono; i roto i a rātou a Rionaihia nō Areopaka, ko tētahi wahine, ko Ramari te ingoa, rātou ko ētahi atu.
ACT 18:1 Muri iho i ēnei mea ka haere atu a Pāora i Atene, ka tae ki Koriniti.
ACT 18:2 Nā, ka kite ia i tētahi Hūrai ko Akuira te ingoa, i whānau ki Ponoto, he mea tae hou mai i Itari, rāua ko tāna wahine, ko Pirihira; kua whakahaua hoki e Karauria kia haere atu ngā Hūrai katoa i Rōma; ā, ka haere ia ki a rāua.
ACT 18:3 Ā, nō te mea kotahi tā rātou mahi, ka noho ia ki a rāua ka mahi rātou; he tui tēneti hoki tā rāua mahi.
ACT 18:4 Nā, ka kōrerorero ia i roto i te whare karakia i ngā hāpati katoa, e tohe ana ki ngā Hūrai rātou ko ngā Kariki.
ACT 18:5 Nō te taenga mai ia o Hira rāua ko Tīmoti i Makeronia, ka tākare te ngākau o Pāora, ka whakapuaki ki ngā Hūrai ko Īhu te Karaiti.
ACT 18:6 Heoi, i a rātou ka whakatika, ka kohukohu, ka ruia e ia ōna kākahu, ka mea ki a rātou, “Hei runga i ō koutou mātenga ō koutou toto; ka mā ahau. Ko tēnei ka haere ahau ki ngā tauiwi.”
ACT 18:7 Nā, ka haere atu ia i reira, ka tomo ki te whare o tētahi tangata, ko Taituha Hutuha te ingoa, he tangata karakia ki te Atua; ko tōna whare i tata tonu ki te whare karakia.
ACT 18:8 Nā, ka whakapono a Kirihipu, te rangatira o te whare karakia, me tōna whare katoa ki te Ariki; he tokomaha hoki ngā Koriniti, i a rātou ka rongo, i whakapono, i iriiria hoki.
ACT 18:9 Ā, ka kōrero moemoeā te Ariki ki a Pāora i te pō, “Kaua e wehi, engari me kōrero, kei noho puku;
ACT 18:10 kei a koe hoki ahau, e kore hoki tētahi tangata e pā ki a koe, e hoatu i te kino ki a koe. He nui hoki āku tāngata i tēnei pā.”
ACT 18:11 Nā, kotahi te tau e ono marama i noho ai ia i reira, i whakaako ai i te kupu a te Atua i roto i a rātou.
ACT 18:12 Nā, i a Kario e noho ana hei kāwana mō Akāia, kotahi tonu whakatikanga o ngā Hūrai ki a Pāora, ā, kawea ana ia ki te nohoanga whakawā,
ACT 18:13 ka mea, “E kukume ana tēnei i ngā tāngata ki tētahi karakia ki te Atua e poka kē ana i tā te ture.”
ACT 18:14 Ā, e mea tonu ana te māngai o Pāora ki te puaki, ka mea a Kario ki ngā Hūrai, “E ngā Hūrai, mehemea ko tētahi hanga hē, ko tētahi mahi kino rānei, he tika kia āta whakarongo ahau ki a koutou.
ACT 18:15 Ko tēnei he totohe kōrero, he mea ki ngā ingoa, ki tā koutou ture, kei a koutou te whakaaro; e kore hoki ahau e pai kia waiho ahau hei kaiwhakawā mō ēnā mea.”
ACT 18:16 Nā, peia atu ana rātou e ia i te nohoanga whakawā.
ACT 18:17 Nā, ka mau ngā Kariki katoa ki a Hotene, rangatira o te whare karakia, ā, whiua ana ia i mua o te nohoanga whakawā. Heoi, kīhai a Kario i whakaaro ki tētahi o ēnei mea.
ACT 18:18 Ā, ka maha ngā rā i noho ai a Pāora, ka poroporoaki ia ki ngā tēina, ā, rere ana ki Hīria, rātou ko Pirihira ko Akuira; he mea moremore tōna upoko i Kenekerea; he kī taurangi hoki nāna.
ACT 18:19 Ā, ka tae rātou ki Epeha, ka mahue rāua i a ia ki reira; ko ia i tomo ki te whare karakia, kōrerorero ai ki ngā Hūrai.
ACT 18:20 Ā, i tā rātou meatanga kia roa atu te wā e noho ai ia ki a rātou, kīhai ia i whakaae;
ACT 18:21 heoi, poroporoaki ana ki a rātou, ka mea, “E hoki mai anō ahau ki a koutou, ki te pai te Atua.” Ā, rere atu ana ia i Epeha.
ACT 18:22 Ā, nō ka ū ia ki Hiharia, ka haere atu ka oha ki te hāhi, ā, haere ana ki Anatioka.
ACT 18:23 Ā, roaroa iho ki reira, ka haere, ā, hāereerea mārietia ana e ia te whenua Karatia, o Pirikia, me te whakaū i ngā ākonga katoa.
ACT 18:24 Nā, ka haere mai tētahi Hūrai ki Epeha, ko Aporo te ingoa, i whānau ki Arēhānaria, he pū kōrero, he tangata kaha ki ngā karaipiture.
ACT 18:25 I whakaakona tēnei tangata ki te ara o te Ariki; he tangata ia e toko tonu ake ana te ngākau, ka kōrero ia, tika tonu hoki tāna whakaako i ngā mea mō Īhu; heoi anō, tāna i mātau ai ko te iriiri a Hoani.
ACT 18:26 Ka anga ia ka kōrero nui i roto i te whare karakia. Nō te rongonga o Akuira rāua ko Pirihia ki a ia, ka mau rāua ki a ia, ka āta whakaatu ki a ia i te ara o te Atua.
ACT 18:27 Ā, nō ka mea ia kia haere ki Akāia, ka tautokona ia e ngā tēina, ā, ka tuhituhi rātou ki ngā ākonga kia whakamanuhiritia ia e rātou. Ā, nō tōna taenga atu, ka whakakahangia e ia te hunga i meinga nei e te aroha noa kia whakapono;
ACT 18:28 kaha rawa hoki tāna whawhati i tā ngā Hūrai i roto i te huihui; whakaaturia ana e ia tā ngā karaipiture mō Īhu, ko te Karaiti ia.
ACT 19:1 I a Aporo i Koriniti, ka puta atu a Pāora nā ngā wāhi o runga, ka tae ki Epeha, ā, tūpono atu ko ētahi ākonga.
ACT 19:2 Ā, ka mea ki a rātou, “I riro rānei te Wairua Tapu i a koutou i tō koutou whakaponotanga?” Anō rā, ko rātou ki a ia, “Kāhore, kīanō mātou i rongo noa mehemea te Wairua Tapu i hōmai.”
ACT 19:3 Ka mea ia ki a rātou, “I iriiria oti koutou ki roto ki te aha?” Ka mea rātou, “Ki roto ki tā Hoani iriiri.”
ACT 19:4 Nā, ka mea a Pāora, “Ko tā Hoani iriiri he iriiri rīpenetā. I mea ia ki te iwi, kia whakapono rātou ki tētahi e haere mai ana i muri i a ia, arā ki a Īhu.”
ACT 19:5 Ā, ka rongo rātou i tēnei, ka iriiria i runga i te ingoa o te Ariki, o Īhu.
ACT 19:6 Nā, ka oti te whakapā e Pāora ōna ringa ki runga ki a rātou, ka tae mai te Wairua Tapu ki a rātou; nā, ka kōrerotia e rātou ngā reo, ka poropiti hoki.
ACT 19:7 Ā, ko tō rātou tokomaha kei te tekau mā rua.
ACT 19:8 Nā, ka tomo ia ki te whare karakia, ka kōrero māia atu, e toru ngā marama i kōrerorero ai, i kukume ai ki ngā mea o te rangatiratanga o te Atua.
ACT 19:9 Ā, ka pakeke ētahi, ka whakateka, ka whakahāwea ki taua ritenga i te aroaro o te mano, ka mawehe atu ia i roto i a rātou, ka wehea kētia ngā ākonga, ka kōrerorero i tēnei rā, i tēnei rā, i roto i te kura o Tairanu.
ACT 19:10 Nā, e rua ōna tau i pēnei ai; ā, ka rongo katoa te hunga e noho ana i Āhia, ngā Hūrai, ngā Kariki, i te kupu a te Ariki, a Īhu.
ACT 19:11 Nā, ehara i te merekara noa ake a te Atua i mea ai kia meatia e ngā ringa o Pāora;
ACT 19:12 ina hoki, i te mauranga atu i ngā aikiha me ngā ārai i tōna tinana ki te hunga mate, mutu ake ō rātou mate, ā, puta atu ana ngā wairua kino i roto i a rātou.
ACT 19:13 Kātahi, ka anga ētahi o ngā Hūrai hāereere noa, he hunga pei wairua, ka whakahua i te ingoa o te Ariki, o Īhu ki runga ki ētahi i ngā wairua kino, ka mea, “He whakahua tēnei nā mātou ki a koutou i a Īhu, i tā Pāora e kauwhau nei.”
ACT 19:14 Nā, i pērā anō ngā tama tokowhitu a tētahi Hūrai, a Hewa, he tohunga nui ia.
ACT 19:15 Nā, ka whakahoki te wairua kino, ka mea ki a rātou, “E mōhio ana ahau ki a Īhu, e mātau ana ki a Pāora; ko koutou ia, ko wai rā?”
ACT 19:16 Nā, ko te tūpeketanga o te tangata i a ia nei te wairua kino ki a rātou, kua kaha i a rātou, taea ana rātou e ia, nō ka oma tahanga rātou, ka oma mamae atu i taua whare.
ACT 19:17 Ā, ka mōhiotia tēnei e ngā tāngata katoa e noho ana i Epeha, e ngā Hūrai rātou tahi ko ngā Kariki; ā, ka tau te wehi ki a rātou katoa, ā, whakanuia ana te ingoa o te Ariki, o Īhu.
ACT 19:18 Ā, he tokomaha o te hunga whakapono i haere mai, i whāki, i whakakite i ā rātou mahi.
ACT 19:19 He tokomaha anō o te hunga i mahi i ngā mahi tinihanga, i huihui i ā rātou pukapuka, ā, tahuna ana i te aroaro o te katoa. Ā, ka taua ngā utu o aua pukapuka, ka kitea e rima tekau mano hiriwa.
ACT 19:20 Koia anō te nui o te tupu o te kupu a te Atua, te kaha.
ACT 19:21 Ā, nō ka rite ēnei mea, ka mea a Pāora i roto i tōna wairua, kia tika nā Makeronia, nā Akāia, kia haere ki Hiruhārama; i mea ia, “Ka tae ahau ki reira, ko Rōma anō tāku e tiki ai e titiro.”
ACT 19:22 Ā, tokorua āna i tono ai ki Makeronia o te hunga e mahi ana ki a ia, ko Tīmoti rāua ko Eratu; ko ia i noho iho i Āhia mō tētahi wā.
ACT 19:23 Nā, i taua wā kīhai i nohinohi te ngangau i puta ake mō taua Ara.
ACT 19:24 Tērā hoki tētahi tangata, ko Rimitiriu te ingoa, he kaimahi hiriwa, nāna nei i hanga ngā temepara hiriwa o Riana, kīhai hoki i nonohi ngā utu i tika mai i tāna mahi ki ngā kaihanga.
ACT 19:25 Nā, ka whakaminea rātou e ia me ērā kaimahi o ngā pērā, ā, ka mea, “E mara mā, e mātau ana koutou, nō tēnei mahi ā tātou rawa.
ACT 19:26 Nā, e kite ana, e rongo ana koutou, ehara i te mea ko Epeha anake, engari he iti te wāhi o Āhia katoa kua mahue nei i tēnei Pāora te kukume, te whakapeau kē i te tini o te tangata, e mea ana ia, ‘Ehara ēnei i te atua, e hangā nei e te ringa.’
ACT 19:27 Nā, ehara i te mea ko tō tātou nei wāhi anake ka tata te kore noa iho; tērā anō hoki e whakakāhoretia te temepara o te atua nui, o Riana, ā, meāke memeha noa iho tōna nui, e karakiatia nei e Āhia katoa, e te ao.”
ACT 19:28 Ā, nō tō rātou rongonga, ā, ka kī i te riri, ka karanga ake, ka mea, “He nui a Riana o ngā Epehi!”
ACT 19:29 Nā, ka tutū te puehu o te pā katoa, ā, ka oti te hopu e rātou a Kaiu rāua ko Aritaku, he hunga nō Makeronia, he hoa haere nō Pāora, nā, kotahi tonu tā rātou kōkiritanga ki te whare mātakitaki.
ACT 19:30 Ā, i a Pāora e mea ana kia tomo ki roto ki te iwi, kīhai ia i tukua e ngā ākonga.
ACT 19:31 Nā, ka unga tāngata mai ētahi o ngā rangatira o Āhia, i pai nei ki a ia, ka mea kia kaua ia e tuku i a ia ki roto ki te whare mātakitaki.
ACT 19:32 Heoi, puta kē te karanga a ētahi, puta kē a ētahi; tino raruraru hoki taua whakaminenga; ko te nuinga kīhai i mātau ki te mea i huihui ai rātou.
ACT 19:33 Nā, ka mauria e rātou a Arēhanara i roto i te hui, nā ngā Hūrai ia i mea kia whakatika atu. Ā, tāwhiri ana te ringa o Arēhanara, i mea hoki kia kōrerotia e ia tā rātou ki te iwi.
ACT 19:34 Heoi, ka mātau rātou he Hūrai ia, kotahi tonu te reo o te katoa ki te karanga, ā tata noa ki te rua ngā hāora, “He nui a Riana o ngā Epehi!”
ACT 19:35 Ā, ka māriri iho te huihui i te kaiwhakawā, ka mea ia, “E ngā Epehi, ko wai te tangata kāhore e mōhio ko te pā o ngā Epehi te kaitiaki temepara o te atua nui, o Riana, o te whakapakoko anō hoki i taka iho i a Hupita?
ACT 19:36 Nā, ka kore nei ēnei mea e taea te whākorekore, heoi, kia āta noho, kaua hoki e hīkaka te mahi.
ACT 19:37 Kua ārahina mai nei hoki e koutou ēnei tāngata ki konei, ehara nei i te hunga tāhae mea tapu, ehara hoki i te hunga kohukohu ki tō tātou atua.
ACT 19:38 Nā, ki te mea he kupu tā Rimitiriu rātou ko ōna hoa mahi mō tētahi tangata, e taea te whakawā, ā, tēnei anō ngā kāwana; mā rātou rātou e whakawā.
ACT 19:39 Nā, ki te mea he mea kē tā koutou e whai nā, waiho mā te rūnanga tika te ritenga.
ACT 19:40 Ko wai hoki ka tohu? Tērā pea tātou e whakawākia mō tēnei ngangautanga o nāianei, kāhore nei ōna take; kāhore hoki he take e tika ai tā tātou kōrero mō tēnei huihui.”
ACT 19:41 Ā, nō ka puaki ēnei kupu āna, ka tonoa atu e ia te whakaminenga.
ACT 20:1 Ā, nō te mutunga o te ngangau, ka karangatia e Pāora ngā ākonga, ka tohutohu i a rātou, ka poroporoaki, ā, tūria atu ana e ia, haere ana ki Makeronia.
ACT 20:2 Ā, ka hāereerea e ia aua wāhi, me te whakahau i a rātou ki ngā kupu maha, ā, haere ana ia ki Kariki;
ACT 20:3 ā, ka toru ōna marama ki reira. I ngā Hūrai anō e whakatakoto whakaaro ana mōna, i a ia meāke rere ki Hīria, ka whakaaro ia kia hoki mā Makeronia.
ACT 20:4 Ā, i haere tahi i a ia tae noa ki Āhia, a Hopate o Peria, te tama a Piru; a Aritaku rāua ko Hekunu o Teharonika; a Kaiu o Rerepe; a Tīmoti hoki rātou ko Tikiku, ko Toropimu o Āhia.
ACT 20:5 Otirā, kua haere atu ēnei i mua, ā, e tatari mai ana ki a mātou i Toroa.
ACT 20:6 Nā, i te mutunga o ngā rā o te Taro Rēwenakore ka rere atu mātou i Piripai, ā, pō rima ka tae atu ki a rātou ki Toroa; ā, e whitu ngā rā i noho ai ki reira.
ACT 20:7 Nā, i te rā tuatahi o te wiki, i te mea kua huihui mātou ki te whawhati taro, ka kauwhau a Pāora ki a rātou, e mea ana hoki ki te haere i te aonga ake; ā, ka kūmea roatia tāna kōrero ā waenganui pō rā anō.
ACT 20:8 Ā, he maha ngā rama i te rūma i runga, i te wāhi i huihui ai mātou.
ACT 20:9 Nā, tērā tētahi taitamariki, ko Ūtiku te ingoa, i te matapihi e noho ana, kua tino parangia e te moe; ā, ka roa tonu te kauwhau a Pāora, nā, ka pēhia rawatia ia e te moe, nā, ka taka iho i te toru o ngā whakapaparanga o ngā rūma, tangohia rawatia ake kua mate.
ACT 20:10 Nā, ka heke iho a Pāora, ā, hinga ana ki runga ki a ia, awhi ana i a ia, ka mea, “Kei ngangau koutou; kei roto hoki i a ia tōna wairua.”
ACT 20:11 Nā, ka kake atu anō ia, ka whawhati taro, ka kai, ā, ka roa rawa te kōrero ā pūao noa, ka haere.
ACT 20:12 Heoi, ārahina oratia atu ana e rātou taua taitama, kīhai hoki i nohinohi te koa.
ACT 20:13 Nā, ko mātou kua riro i mua ki te kaipuke, ā, rere ana ki Aho, i mea kia utaina a Pāora i reira; nāna hoki i whakarite, i mea hoki ko ia me rā uta.
ACT 20:14 Ā, ka tūtaki ki a mātou ki Aho, ka utaina ia, ā, rere ana mātou ki Mitirini.
ACT 20:15 Rere atu ana mātou i reira, ā, i te aonga ake ka taea te ritenga atu o Kio; ao ake anō ka ū ki Hamo, ā, noho ana ki Torokiriuma; ao ake anō ka ū ki Miretu.
ACT 20:16 I mea hoki a Pāora kia rere i waho ake o Epeha, kei roa ia ki Āhia; i pōrangi hoki me kore e rokohanga atu ia e te rā o te Petekoha ki Hiruhārama.
ACT 20:17 Nā, ka tono tāngata atu ia i Miretu ki Epeha, hei tiki i ngā kaumātua o te hāhi.
ACT 20:18 Ā, nō tō rātou taenga mai ki a ia, ka mea ia ki a rātou, “E mātau ana koutou ki tāku tikanga i roto i a koutou i ngā rā katoa, nō te rā tuatahi iho anō o tōku taenga mai ki Āhia,
ACT 20:19 pāpaku noa iho te ngākau i mahi ai ahau ki te Ariki, he maha ia ngā roimata me ngā whakamātautau i pā ki ahau, i ngā Hūrai e whakatakoto whakaaro ana mōku.
ACT 20:20 Kīhai i puritia e ahau tētahi o ngā mea pai i whakakitea atu anō ki a koutou i ākona nuitia ki a koutou, i tēnei whare, i tēnei whare;
ACT 20:21 i kauwhautia hoki ki ngā Hūrai ki ngā Kariki, te rīpenetā whaka te Atua, me te whakapono ki tō tātou Ariki, ki a Īhu Karaiti.
ACT 20:22 “Nā, tēnei ahau te haere nei ki Hiruhārama, he hereherenga nā te wairua, kāhore hoki e mōhio ki ngā mea e pā ki ahau i reira;
ACT 20:23 heoi anō, ko tā te Wairua Tapu e whakaatu nei ki ahau i tēnei pā, i tēnei pā, e mea ana, kei te tāria mai ahau e ngā mekameka, e ngā mate.
ACT 20:24 Otirā, kāhore ahau e ihupuku ki te ora, hei painga ki ahau ake, engari, kia taea tāku e whai nei, me te mahi i hōmai ki ahau e te Ariki, e Īhu, arā kia whakaaturia te rongopai o te aroha noa o te Atua.
ACT 20:25 “Nā, e mōhio ana tēnei ahau, heoi anō, kitenga o tōku mata e tētahi o koutou, e te hunga i kauwhau haere nei ahau i te rangatiratanga o te Atua i roto i a koutou.
ACT 20:26 Koia ahau ka mea nei ki a koutou āianei, kāhore ōku poke i ngā toto o tētahi tangata.
ACT 20:27 Kīhai hoki ahau i manawapā ki te kauwhau i te whakaaro katoa o te Atua ki a koutou.
ACT 20:28 Nā, kia tūpato ki a koutou, ki te kāhui katoa anō i meinga ai koutou e te Wairua Tapu hei kaitirotiro, whāngaia te hāhi a te Atua i hokona nei e ia ki ōna ake toto.
ACT 20:29 E mōhio ana hoki ahau ki tēnei ka riro ahau tērā e puta mai ki a koutou he wuruhi nanakia, e kore nei e tohu i te kāhui;
ACT 20:30 ā, ka whakatika ake ētahi tāngata i roto i a koutou anō, kōrero ai i ngā mea parori kē, hei kukume i ngā ākonga kia whai i a rātou.
ACT 20:31 Nā reira, kia mataara, kia mahara anō ki ngā tau e toru kīhai nei ahau i māngere i te pō, i te ao, ki te whakatūpato i tēnei, i tēnei o koutou, me te tangi anō ahau.
ACT 20:32 “Nā, tēnei ahau, te tuku nei i a koutou ki te Atua, ki te kupu hoki o tōna aroha noa, e kaha nei ki te whakatupu ake, ki te hoatu hoki i tētahi wāhi ki a koutou i roto i te hunga katoa kua oti te whakatapu.
ACT 20:33 Kīhai i hiahiatia e ahau te hiriwa, te kōura, te kākahu rānei, o tētahi.
ACT 20:34 E mōhio ana anō koutou, nā ēnei ringa i mahi ngā mea i matea e ahau, e ōku hoa hoki.
ACT 20:35 I ngā mea katoa i hoatu ahau he tauira ki a koutou, kia pēnei tā koutou mahi kia atawhaitia ai e koutou te hunga ngoikore, me te mahara ki ngā kupu a te Ariki, a Īhu, i mea rā ia, ‘Ko te whakawhiwhi, nui atu te hari i tō te whiwhi.’ ”
ACT 20:36 I te mutunga o tēnei whai kupu āna ka tukua ōna turi ki raro, ka īnoi tahi ia me rātou katoa.
ACT 20:37 He nui hoki te tangi o te katoa; hinga iho rātou ki runga ki te kakī o Pāora, ka kihi i a ia;
ACT 20:38 i tino mamae pū hoki rātou i te kupu i mea ai ia, heoi anō, tō rātou kitenga i tōna mata. Nā, ka ārahi rātou i a ia ki te kaipuke.
ACT 21:1 Heoi, ka wehe mātou i a rātou, ka rere, ā, tika tonu atu, tae noa ki Koha, ā, ao ake te rā kei Roro, i reira atu ki Pātara.
ACT 21:2 Nā, ka rokohanga tētahi kaipuke e whakawhiti atu ana ki Pinikia, ā, eke ana mātou ki runga, rere ana.
ACT 21:3 Ā, ka kitea Kaiperu, ka mahue ake i te taha ki mauī, ka rere atu mātou ki Hīria, ā, ka ū ki Tāira; hei reira hoki te kaipuke ruke ai i tōna utanga.
ACT 21:4 Ā, ka kitea ngā ākonga, e whitu ngā rā i noho ai mātou ki reira. Ka kōrero hoki rātou ki a Pāora, he mea nā te Wairua, kia kaua ia e haere ki Hiruhārama.
ACT 21:5 Ā, ka rite aua rā o mātou, ka puta atu mātou, ka haere; me te kawe anō rātou katoa, me ngā wāhine, me ngā tamariki, i a mātou ā waho rā anō o te pā. Nā, ka tukua ō mātou turi ki te tahatai, ka īnoi;
ACT 21:6 kātahi ka poroporoaki mātou tētahi ki tētahi; ā, eke ana mātou ki te kaipuke; ko rātou ia i hoki ki ō rātou kāinga.
ACT 21:7 Ā, ka tutuki tō mātou rerenga atu i Tāira, ka tae ki Toromai, nā, ka oha atu ki ngā tēina, ā, kotahi te rā i noho ai ki a rātou.
ACT 21:8 I te aonga ake ka tūria atu e mātou, ka haere ki Hiharia; ā, tomo ana ki te whare o Piripi kaikauwhau, ko ia nei tētahi o ngā tokowhitu; noho ana i a ia.
ACT 21:9 Nā, tokowhā ngā tamāhine a taua tangata, he wāhina, he poropiti.
ACT 21:10 Ā, ka maha ō mātou rā i noho ai, ka haere mai tētahi poropiti i Hūria, ko Akapu te ingoa.
ACT 21:11 Ā, nō tō rātou taenga mai ki a mātou, ka mau ki te whītiki o Pāora, herea iho e ia ōna ake ringa me ōna waewae, ka mea, “Ko tā te Wairua Tapu kōrero tēnei, E pēneitia te here te tangata nōna tēnei whītiki e ngā Hūrai i Hiruhārama, e tukua atu anō ia ki ngā ringa o ngā tauiwi.”
ACT 21:12 Heoi, i tō mātou rongonga i ēnei mea, ka tohe mātou ko ngā tāngata o taua kāinga, kia kaua ia e haere ki Hiruhārama.
ACT 21:13 Nā, ko te whakahokinga a Pāora, “He aha tā koutou e tangi, e whakangākaukore nei i ahau? Ehara hoki i te mea ko te here anake tāku e pai ai, engari ko te mate anō hoki ki Hiruhārama, mō te ingoa o te Ariki, o Īhu.”
ACT 21:14 Ā, nō tōna korenga i rongo, ka mutu tā mātou, ka mea, “Kia meatia tā te Ariki e pai ai.”
ACT 21:15 Ā, ka pahemo ēnei rā, ka takai mātou i ā mātou mea, ā, haere ana ki Hiruhārama.
ACT 21:16 I haere tahi anō i a mātou ētahi o ngā ākonga o Hiharia; nā rātou i mau ake a Nahona o Kaiperu, he ākonga tawhito hei tukunga atu mō mātou.
ACT 21:17 Ā, i tō mātou taenga ki Hiruhārama, ka koa ngā tēina ki a mātou.
ACT 21:18 I te aonga ake, ka haere tahi mātou ko Pāora ki a Hēmi; i reira anō ngā kaumātua katoa.
ACT 21:19 Nā, ka oha ia ki a rātou, ka kōrerotia takitahitia ngā mea i mea ai te Atua kia mahia e ia i roto i ngā tauiwi.
ACT 21:20 Nō tō rātou rongonga, ka whakakorōria i te Atua, ka mea ki a ia, “Kua kite koe, e tō mātou teina, i ngā mano tini o ngā Hūrai kua whakapono nei; e uaua katoa ana hoki ki te ture.
ACT 21:21 Kua rongo anō hoki rātou ki a koe, e whakaako ana koe i ngā Hūrai katoa i roto i ngā tauiwi, kia whakarērea a Mohi, e mea ana kia kaua rātou e kokoti i ngā tamariki, kia kaua anō e haere i runga i ngā ritenga o mua.
ACT 21:22 Nā, me pēhea? E kore hoki e kore ka rongo rātou ki tōu taenga mai.
ACT 21:23 Nā, me mea e koe tēnei e kōrerotia nei e mātou ki a koe. Tokowhā e mātou tāngata, he kupu taurangi tā rātou.
ACT 21:24 Tangohia ēnei, kia purea ngātahitia koutou, māu anō e utu ā rātou mea, kia waruhia ai ō rātou mātenga. Ā, ka kite rātou katoa he teka noa ngā mea i kōrerotia mōu; engari ko koe, he tika tāu haere, kei te whakarite anō koe i te ture.
ACT 21:25 Tēnā ko ngā tauiwi kua whakapono, kua tuhituhi atu mātou, kua whakatakoto tikanga atu, kia tūpato rātou i ngā mea e patua ana mā ngā whakapakoko, i te toto, i te mea kua nōtia te kakī, i te moe tāhae.”
ACT 21:26 Nā, ka mau a Pāora ki aua tāngata, ā, i te aonga ake ka pure tahi, ka haere tahi rātou ki roto ki te temepara, hei whakaatu ka whakaritea ngā rā mō te purenga, kia whakaherea rā anō he whakahere mō tētahi, mō tētahi o rātou.
ACT 21:27 Heoi, ka tata ngā rā e whitu te taka, ka kitea ia i roto i te temepara e ētahi Hūrai o Āhia; nā rātou i whakaoho te mano katoa, ā, ka pā ō rātou ringa ki a ia,
ACT 21:28 ka karanga, “E ngā tāngata o Īharaira, āwhinatia mai! Ko te tangata tēnei e whakaako nei i ngā tāngata katoa o ngā wāhi katoa ki ngā mea whakahē mō te iwi, mō te ture, mō tēnei kāinga hoki. Kua kawea mai anō e ia ētahi Kariki ki roto ki te temepara, ā, ka noa nei i a ia tēnei wāhi tapu.”
ACT 21:29 I kite hoki rātou i mua he hoa nōna i roto i te pā, ko Toropimu o Epeha; tohu noa rātou, kua mauria mai ia e Pāora ki roto ki te temepara.
ACT 21:30 Nā, ka oho te pā katoa, ka oma ngā tāngata. Ā, ka mau rātou ki a Pāora, tōia ana ia ki waho o te temepara; tūtakina tonutia atu ngā tatau.
ACT 21:31 Nā, i a rātou e whai ana kia patua ia, ka tae te rongo ki te rangatira mano o te hapū hōia, kua tutū te puehu i Hiruhārama katoa.
ACT 21:32 Nā, hohoro tonu tāna mau ki ētahi hōia, ki ētahi keneturio, ā, oma iho ana ki a rātou. Ā, nō tō rātou kitenga i te rangatira mano, i ngā hōia hoki, ka mutu te patu i a Pāora.
ACT 21:33 Nā, ka whakatata mai te rangatira mano, ka tango i a ia, ka mea kia herea ia ki ngā mekameka e rua; ā, ka ui ko wai ia, i aha hoki ia.
ACT 21:34 Nā, he karanga anō tā ētahi, he karanga kē tā ētahi, i roto i te mano. Nā, kīhai ia i mōhio ki te tino tikanga, i te ngangau hoki, ā, whakahaua ana kia ārahina ia ki te pā.
ACT 21:35 Ā, nō tōna taenga ki te pikitanga, ka hikitia ia e ngā hōia i te taututetutenga hoki a te tāngata;
ACT 21:36 i aru hoki te huihui o te iwi, me te karanga, “Whakamatea ia!”
ACT 21:37 Ā, nō ka whano a Pāora te kawea ki roto ki te pā, ka mea ia ki te rangatira mano, “E pai ana rānei kia kōrero ahau i tētahi kupu ki a koe?” Ka mea ia, “E mātau ana rānei koe ki te reo Kariki?
ACT 21:38 Ehara oti koe i te Īhipiana, nāna nei i whakatupu te tutū i mua ake rā, ā, mauria ana e ia ngā tāngata kōhuru e whā mano ki te koraha?”
ACT 21:39 Ka mea a Pāora, “He Hūrai ahau, nō Tarahu o Kirikia, he tangata tupu nō taua pā, ehara hoki i te pā ingoakore. Nā, ko tāku īnoi tēnei ki a koe, tukua ahau kia kōrero ki te iwi.”
ACT 21:40 Nā, tukua ana e ia, ā tū ana a Pāora ki te pikitanga, ka tāwhiri tōna ringa ki te iwi. Nā, mutu pū te turituri, ka kōrero ia, nō ngā Hiperu te reo, ka mea:
ACT 22:1 “E ōku tuākana, e ōku mātua, whakarongo ki tēnei kōrero āku ki a koutou.”
ACT 22:2 Ā, ka rongo rātou ko te reo Hiperu tāna i kōrero ai ki a rātou, kātahi ka mutu rawa te kīkī. Ā, ka mea ia:
ACT 22:3 “He Hūrai ahau, i whānau ki Tarahu o Kirikia, i whakatupuria i roto i tēnei pā ki ngā waewae o Kamariere, i āta whakaakona ki te tino tikanga o te ture o ngā mātua, i uaua anō ahau mō te Atua, i pēnā me koutou katoa ināianei.
ACT 22:4 Ā, whakatoia ana e ahau ngā tāngata o tēnei Tikanga, tae ana ki te mate; herea ana e ahau ngā tāne me ngā wāhine, ā, tukua ana ki ngā whare herehere.
ACT 22:5 Mā te tohunga, nui tēnei kōrero āku e whakatika, mā te huihui hoki o ngā kaumātua katoa. I riro mai hoki i ahau ā rātou pukapuka ki ngā tēina, ā, haere ana ahau ki Ramahiku, kia herea, kia ārahina mai hoki te hunga o reira ki Hiruhārama kia whakamamaetia.”
ACT 22:6 “Nā, i ahau e haere ana, e whakatata ana ki Ramahiku, i te poutūmārōtanga, ka whiti whakarere mai ki ahau he mārama nui nō te rangi.
ACT 22:7 Ā, hinga ana ahau ki te whenua, ka rangona he reo e mea ana ki ahau, ‘E Haora, e Haora, he aha tāu e whakatoi nei i ahau?’
ACT 22:8 Nā, ka whakahokia e ahau, ‘Ko wai koe, e te Ariki?’ Ka mea ia ki ahau, ‘Ko Īhu ahau o Nahareta, e whakatoia nei e koe.’
ACT 22:9 I kite anō ōku hoa i te mārama, otirā kīhai i rongo i te reo ōna i kōrero ki ahau.
ACT 22:10 Ka mea ahau, ‘Me aha ahau, e te Ariki?’ Ka mea te Ariki ki ahau, ‘Whakatika, haere ki Ramahiku; ā, ka kōrerotia ki a koe i reira ngā mea katoa kua whakaritea kia meinga e koe.’
ACT 22:11 Heoi, i te mea kāhore ahau i kite, nā te korōria hoki o taua mārama, ka ārahina-ā-ringatia ahau e ōku hoa haere, ka tae ki Ramahiku.
ACT 22:12 “Nā, ko tētahi tangata, ko Anania, he tangata karakia, i rite tonu nei ki tā te ture āna mahi, ā, e kōrerotia paitia ana e ngā Hūrai katoa e noho ana i reira,
ACT 22:13 haere mai ana ia ki ahau, ā tū ana i tōku taha, ka mea mai ki ahau, ‘E tōku teina, e Haora, titiro ake!’ Ā, i taua hāora anō ka titiro ahau ki a ia.
ACT 22:14 I mea anō ia, ‘Nā te Atua o ō tātou mātua koe i whiriwhiri, kia mātau ki tāna e pai ai, kia kite i a te Tika, kia rongo hoki i te reo o tōna māngai.
ACT 22:15 Nō te mea ko koe hei kaiwhakaatu māna ki ngā tāngata katoa, mō ngā mea i kite ai, i rongo ai koe.
ACT 22:16 Nā, he aha tāu e whakaroa nei? Whakatika, kia iriiria koe, kia horoia ōu hara, me te karanga anō ki te ingoa o te Ariki.’ ”
ACT 22:17 “Ā, nō tōku hokinga mai ki Hiruhārama, i ahau e īnoi ana i roto i te temepara, ka puta te ngākau matakite ki ahau;
ACT 22:18 ā, ka kite ahau i a ia e mea ana mai ki ahau, ‘E āhua, kia hohoro te haere atu i Hiruhārama; e kore hoki rātou e tango i tāu kōrero mōku.’
ACT 22:19 Nā, ko tāku meatanga, ‘E te Ariki, e mātau ana rātou, he kaiherehere ahau, he kaiwhiu i roto i ngā whare karakia, i te hunga i whakapono ki a koe.
ACT 22:20 Ā, i te whakahekenga o ngā toto o tōu kaiwhakaatu, o Tepene, i reira ahau e tū ana, e whakaae ana, e tiaki ana hoki i ngā kākahu o ōna kaiwhakamate.’
ACT 22:21 Nā, ko tāna meatanga ki ahau, ‘Haere. Ka ungā hoki koe e ahau ki tawhiti ki ngā tauiwi.’ ”
ACT 22:22 Ā, whakarongo ana rātou ki a ia taea noatia tēnei kupu, nā, ka hāmama rātou, ka mea, “Whakamatea atu te korokē nei i runga i te whenua! E kore hoki e pai kia ora ia.”
ACT 22:23 Heoi, i a rātou e karanga ana, e rukeruke ana i ō rātou kākahu, e ākiri ana i te puehu ki te rangi.
ACT 22:24 Ka whakahau te rangatira kia kawea ia ki te pā, ka mea kia whiua, kia uia; kia mātau ai ia ki te mea i pēnei ai rātou te karanga ki a ia.
ACT 22:25 Ā, ka oti ia te here e rātou ki ngā here, ka mea a Pāora ki te keneturio e tū ana i reira, “He mea tika rānei kia whiua e koutou te tangata, he tangata nō Rōma, i te mea kāhore anō i mau noa tōna hē?”
ACT 22:26 Ā, nō te rongonga o te keneturio, ka haere, ka kōrero ki te rangatira mano, ka mea, “He aha tāu e mea ai? Nō Rōma hoki te tangata nei.”
ACT 22:27 Nā, ka haere mai te rangatira mano, ka mea ki a ia, “Kōrero mai ki ahau, nō Rōma koe?” Ka mea ia, “Āe.”
ACT 22:28 Nā, ka whakahoki te rangatira mano, “Nā te moni nui i whiwhi ai ahau ki tēnei taonga, hei tangata whenua nō Rōma.” Ka mea a Pāora, “Ko ahau i whānau tonu nō Rōma.”
ACT 22:29 Nā whakarērea tonutia iho ia e te hunga e mea ana ki te ui ki a ia; i mataku hoki te rangatira mano, tōna rongonga nō Rōma ia, mōna hoki i here i a ia.
ACT 22:30 Nā, i te aonga ake ka mea ia kia mātau ki te tikanga, ki te mea i whakawākia ai ia e ngā Hūrai, ka wewete i ōna here, ka whakahau kia haere mai ngā tohunga nui, me tō rātou rūnanga katoa, ā, ārahina iho ana a Pāora, whakatūria ana ki tō rātou aroaro.
ACT 23:1 Nā, ka titiro pū a Pāora ki te rūnanga, ka mea, “E ōku tuākana, tika tonu ki tōku mahara tāku whakahaere i te aroaro o te Atua, ā taea noatia tēnei rā.”
ACT 23:2 Nā, ka mea a Anania tohunga nui ki te hunga e tū ana i tōna taha, kia pākia tōna māngai.
ACT 23:3 Anō rā, ko Pāora ki a ia, “Tēnei ake ka papaki te Atua i a koe, e te pakitara kua oti te pani ki te paru mā! Ā, ka noho mai koe hei whakawā i ahau i tā te ture i whakatakoto ai, me te whakahau anō kia pākia ahau, e hē nei tēnā ki te ture?”
ACT 23:4 Nā, ka mea te hunga e tū tata ana, “E whakamanumanu ana koe ki te tohunga nui a te Atua?”
ACT 23:5 Anō rā ko Pāora, “Kīhai ahau i mātau, e ōku tuākana, ko ia te tohunga nui; kua oti hoki te tuhituhi, ‘Aua e kōrerotia kinotia te rangatira o tōu iwi.’ ”
ACT 23:6 Ā, nō ka kite a Pāora nō ngā Haruki ētahi, ko ētahi nō ngā Parihi, ka karanga ia i roto i te rūnanga, “E ōku tuākana, he Parihi ahau, he tama nā ngā Parihi. Ko te aranga o te hunga mate e tūmanakohia nei te mea e whakawākia nei ahau.”
ACT 23:7 Ā, nō tāna kōrerotanga i tēnei, ka tohetohe ngā Parihi rātou ko ngā Haruki; ka wahirua hoki te huihui.
ACT 23:8 E mea ana hoki ngā Haruki, kāhore he aranga, kāhore he anahera, he wairua rānei; ko ngā Parihi ia e whakaae ana ki aua mea e rua.
ACT 23:9 Ā, ka nui te ngangare; ka whakatika ētahi o ngā karaipi o tō ngā Parihi taha, ka totohe, ka mea, “Kāhore anō i mau i a mātou te hē o tēnei tangata. Tēnā, ka pēhea, mehemea kua kōrero tētahi wairua ki a ia, tētahi anahera rānei?”
ACT 23:10 Ā, nō ka nui te ngangau, ka mataku te rangatira mano kei motumotuhia a Pāora e rātou, nā, ungā ana e ia ngā hōia kia heke atu, ki te tango mai i a ia i roto i a rātou, kia ārahina hoki ki te pā.
ACT 23:11 Ā, i taua pō ka tū te Ariki ki tōna taha, ka mea, “Kia māia! Kia pēnā i a koe i whakaatu nā mōku i Hiruhārama, tāu whakaatu hoki ki Rōma.”
ACT 23:12 Ao ake te rā, ka huihui ētahi o ngā Hūrai, ka maka oati ki a rātou anō, ka mea, kia kaua rātou e kai, kia kaua e inu, kia whakamatea rā anō e rātou a Pāora.
ACT 23:13 Ā, e whā tekau ngahoro ngā tāngata nāna tēnei oatitanga.
ACT 23:14 Nā, ka haere rātou ki ngā tohunga nui rātou ko ngā kaumātua, ka mea, “Kua oati mātou i tētahi oati nui, kia kaua e pā kai, kia mate rā anō a Pāora i a mātou.
ACT 23:15 Nā, mā koutou tahi ko te rūnanga e kī atu ki te rangatira mano kia ārahina iho ia ki a koutou āpōpō, me te mea nei e mea ana koutou kia āta mōhiotia te take ki a ia. Ko mātou ia, i te mea kīanō ia i tata noa, ka noho rite ki te whakamate i a ia.”
ACT 23:16 Otirā, ka rongo te tama a te tuahine o Pāora ki tō rātou whakaaro whakapapa, ka haere ia, ka tomo ki te pā, ka kōrero ki a Pāora.
ACT 23:17 Kātahi, ka karanga a Pāora ki tētahi keneturio, ka mea, “Ārahina atu te tamaiti nei ki te rangatira mano; he kōrero hoki tāna ki a ia.”
ACT 23:18 Nā, ka mau ia ki a ia, ka ārahi i a ia ki te rangatira mano, ka mea, “I karanga te herehere, a Pāora, i ahau, i mea kia ārahina mai tēnei tamaiti ki a koe, he kōrero hoki tāna ki a koe.”
ACT 23:19 Nā, ka mau te rangatira mano ki tōna ringa, ka haere ki tahaki, ka ui atu, “He aha tāu mea hei kōrero ki ahau?”
ACT 23:20 Anō rā ko tērā, “Kua whakatakoto whakaaro ngā Hūrai kia mea ki a koe kia ārahina iho a Pāora āpōpō ki te rūnanga, ānō e āta uia anō e koe tētahi atu mea mōna.
ACT 23:21 Nā, aua koe e rongo ki a rātou; e whā hoki tekau ngahoro tāngata o rātou e whanga ana ki a ia. Kua puaki tā rātou oati, kia kaua e kai, kia kaua e inu, kia mate rā anō ia i a rātou. Nā, kua rite tēnei rātou, e tatari ana ki te kupu whakaae i a koe.”
ACT 23:22 Kātahi, ka tukua atu taua tamaiti e te rangatira mano, ka mea ia, “Kaua e kōrerotia ki tētahi tāu whakaaturanga mai i ēnei mea ki ahau.”
ACT 23:23 Nā, tokorua ngā keneturio i karangatia e ia; i mea ia, “Kia rite mai ētahi hōia kia rua rau hei haere ki Hiharia, me ētahi hōia eke hōiho kia whitu tekau, me tētahi hunga mau mātia kia rua rau, i te toru o ngā hāora o te pō.
ACT 23:24 Ā, ka whakahau ia ki a rāua, kia whakaritea mai he kararehe, hei whakanohoanga iho mō Pāora ki runga, kia kawea oratia ai ia ki a Pirika, ki te kāwana.”
ACT 23:25 Ā, i tuhituhia e ia he pukapuka, ka pēnei:
ACT 23:26 “Nā Karauria Raihia ki a Pirika, ki te kāwana pai rawa: Tēnā koe.
ACT 23:27 “I hopukia tēnei tangata e ngā Hūrai, ā, i a ia ka tata te whakamatea e rātou, ka puta atu ahau me ngā hōia, ā, tangohia mai ana ia; i rongo hoki ahau nō Rōma ia.
ACT 23:28 I mea anō ahau kia rongo i te take i whakawākia ai ia e rātou, ā ārahina ana ia e ahau ki tō rātou rūnanga.
ACT 23:29 Nā, ka kite ahau he kupu tautohe nō tō rātou ture i whakawākia ai ia, kāhore hoki ōna hē i tika ai te mate, te here rānei.
ACT 23:30 Ā, nō te whakaaturanga mai ki ahau, kei te whakapapatia he mate mō te tangata nei, tonoa tonutia ia e ahau ki a koe, i mea hoki ahau ki ōna kaiwhakapae, kia kōrerotia ki a koe ngā mea mōna.”
ACT 23:31 Nā, ka mau ngā hōia ki a Pāora, ka pērā me te mea i kōrerotia ki a rātou, ā, ārahina ana ia i te pō ki Anatipatari.
ACT 23:32 Ao ake te rā ka tukua atu ngā tāngata eke hōiho hei hoa haere mōna, ā, hoki ana rātou ki te pā.
ACT 23:33 Ā, nō te taenga o ērā ki Hiharia, ka hoatu te pukapuka ki te kāwana, ā, whakatūria ana a Pāora ki tōna aroaro.
ACT 23:34 Ā, nō te tirohanga iho o te kāwana, ka ui, nō tēhea kāwanatanga ia; ā, i tōna rongonga nō Kirikia ia,
ACT 23:35 ka mea ia, “Ka whakarongo ahau ki a koe, ina tae mai anō hoki ōu kaiwhakapae.” Ā, i whakahau ia, kia tiakina ia i roto i te whare whakawā o Herora.
ACT 24:1 Nā, ka pahure ngā rā e rima, ka haere atu a Anania, te tohunga nui rātou ko ētahi kaumātua, ko tētahi kaikōrero hoki, ko Tereturu, whakakite ai i ngā hē o Pāora ki te kāwana.
ACT 24:2 Ā, ka oti ia te karanga, ka tīmata a Tereturu te whakawā, ka mea: “I te mea nāu i hua ai te rangimārie ki a mātou, he āta ngārahu hoki nāu i whakatikatikaina ai ngā kino ki tēnei iwi.
ACT 24:3 Nui atu tā mātou whakawhetai mō aua mea ka riro mai nei i a mātou, i ngā wā katoa, i ngā wāhi katoa, e Pirika, e te tangata pai rawa.
ACT 24:4 Otiia, e kore e nui atu tāku whakaware i a koe, koia ka īnoi atu ki a koe kia pai koe ki te whakarongo mai ki ētahi kupu torutoru a mātou.
ACT 24:5 I mau hoki i a mātou te korokē nei, he tangata whakatūtehu, e whakaoho ana i ngā Hūrai katoa o te ao, ko ia hoki te tino take o te tītorehanga ki tā ngā Nahareti.
ACT 24:6 I mea hoki ia kia whakanoatia te temepara: nā ka hopu mātou i a ia, ka mea kia whakawākia ia ki tā tō mātou ture i whakatakoto ai.
ACT 24:7 Otirā, i puta mai a Raihia, te rangatira mano, ā, tangohia kinotia atu ana ia i ō mātou ringa.
ACT 24:8 Ā, ungā ana ōna kaiwhakapae kia haere mai ki a koe: māu e ui ki a ia, kia rongo ai koe ki ēnei mea katoa e whakawākia nei ia e mātou.”
ACT 24:9 Ā, i whakaae hoki ngā Hūrai ki taua whakapae, i mea, “Koia tērā ko aua mea.”
ACT 24:10 Ā, ka tohu atu te kāwana ki a ia kia kōrero, ka whakahokia e Pāora: “E mātau ana ahau, ka maha ōu tau e whakawā nei koe i tēnei iwi, koia i pai ai tōku ngākau ki te tohe i te tika o āku mea.
ACT 24:11 E takoto kau ana hoki hei mōhiotanga mōu, kāhore i maha ake i te tekau mā rua ngā rā ōku i haere nei ki Hiruhārama, ki te karakia.
ACT 24:12 Kīhai anō ahau i mau i a rātou i roto i te temepara e totohe ana ki tētahi, e mea ana rānei i te mano kia tutū, kāhore i ngā whare karakia, kāhore anō hoki i te pā.
ACT 24:13 E kore anō e taea e rātou te whakatau ki ahau i tōu aroaro ngā mea e whakawākia nei ahau e rātou.
ACT 24:14 Otirā, me whāki tēnei e ahau ki a koe, ko te Ara e kīia nei e rātou he tītorehanga, ko tāku tēnā i ahau e karakia nei ki te Atua o ōku mātua; e whakapono ana hoki ahau ki ngā mea katoa kua oti te whakarite i roto i te ture, kua oti hoki te tuhituhi ki tā ngā poropiti.
ACT 24:15 E tūmanako ana ki tā te Atua, ki tā ēnei anō hoki e whakaae nei, arā tēnei ake ka ara te hunga mate, ngā tāngata tika, ngā tāngata hē.
ACT 24:16 Tēnei anō tāku e whai nei, kia harakore tonu tōku hinengaro i te aroaro o te Atua, o ngā tāngata.
ACT 24:17 “Nā, muri iho i ngā tau e maha, ka tae mai ahau ki te kawe mai i ngā mea atawhai rawakore ki tōku iwi, me ngā whakahere.
ACT 24:18 I kitea ahau i reira e rātou, e purea ana i roto i te temepara, kāhore he huihui, kāhore he ngangau.
ACT 24:19 Tērā anō rā ētahi Hūrai nō Āhia; ko te tikanga kia haere mai rātou ki a koe ki te whakawā, ki te mea he mea tā rātou mōku.
ACT 24:20 Tēnei rānei mā ēnei tāngata tonu e kōrero, me i kitea e rātou he hē tōku, i ahau e tū ana i mua i te rūnanga,
ACT 24:21 ko taua kupu kotahi pea i karanga ai ahau, i ahau e tū ana i roto i a rātou, ‘Ko te aranga o te hunga mate te mea e whakawākia nei ahau e koutou ināianei.’ ”
ACT 24:22 Otirā, i te mea he nui atu tōna mōhio ki taua Ritenga, ka ungā rātou e Pirika, ka mea ia, “Kia tae mai a Raihia, te rangatira mano, ka tino rapu ahau ki te tikanga o ā koutou mea.”
ACT 24:23 Nā, ka mea ia ki te keneturio kia tiakina a Pāora, kia waiho noa anō ia, kia kaua e rīria ōna hoa ina mahi ki a ia.
ACT 24:24 Nā, muri iho i ētahi rā ka tae mai a Pirika rāua ko tāna wahine ko Ruruhira, he Hūrai, ka mea ia kia tīkina atu a Pāora, ā, ka whakarongo ki a ia ki te whakapono ki a te Karaiti.
ACT 24:25 Ā, i a ia e kōrero ana ki ngā mea o te tika, ki te hiahia kia pēhia, ki te whakawākanga kei te haere mai, ka wiri a Pirika, ka mea, “Haere āianei; kia wātea ahau, ka karanga atu ai anō i a koe.”
ACT 24:26 Tohu noa hoki ka hoatu ki a ia he moni e Pāora; koia i hono ai te tiki atu i a ia, te kōrero ki a ia.
ACT 24:27 Otirā, ka pahure ngā tau e rua, ka whakakapia a Pirika e Porohia Petuha; ā, i tōna hiahia ki te whakamānawareka i ngā Hūrai, ka waiho e Pirika a Pāora kia here ana.
ACT 25:1 Nō te taenga mai o Petuha ki te kāwanatanga, ka toru ngā rā, ka haere atu ia i Hiharia ki Hiruhārama.
ACT 25:2 Nā, ka kōrero te tohunga nui me ngā rangatira o ngā Hūrai ki a ia mō Pāora, ka tohe ki a ia,
ACT 25:3 kia whakaaetia tā rātou mōna, kia tīkina atu ia ki Hiruhārama, he whanga hoki tō rātou mōna kia whakamatea ki te ara.
ACT 25:4 Otirā, ka whakahokia e Petuha, kei Hiharia a Pāora e pupuri ana, ā, tērā e hohoro tōna haere ki reira.
ACT 25:5 I mea anō ia, “Me haere tahi anō i ahau ki raro ngā mea ō koutou e whai mana ana, ki te whakawā i taua tangata, ki te mea he kino tōna.”
ACT 25:6 Ā, ka noho ia i a rātou mō ngā rā e waru, ngahuru rānei, nā, ka haere ki Hiharia; ao ake te rā ka noho ki te nohoanga whakawā, ā, ka mea kia ārahina mai a Pāora.
ACT 25:7 Ā, nō tōna taenga atu, e tū ana tērā ngā Hūrai i haere mai i Hiruhārama, he maha, he nui ngā hē i whakapāngia e rātou ki a Pāora; heoi kīhai i ū tā rātou.
ACT 25:8 Ā, ka utua e Pāora, “Kāhore rawa ōku hara ki te ture a ngā Hūrai, kāhore hoki ki te temepara, kāhore anō ki a Hīhā.”
ACT 25:9 Heoi, ka mea a Petuha ki a Pāora, i tōna hiahia kia paingia e ngā Hūrai, “E pai ana rānei koe kia haere ki Hiruhārama, ki reira whakawākia ai mō ēnei mea ki tōku aroaro?”
ACT 25:10 Anō rā ko Pāora, “E tū ana ahau ki te nohoanga whakawā o Hīhā, hei reira tonu ahau whakawākia ai; kāhore ōku hē ki ngā Hūrai, kua tino kitea nā hoki e koe.
ACT 25:11 Me he hē tōku, kua meinga rānei e ahau tētahi mea e tika ai te mate, e kore ahau e kino kia mate; tēnā ko tēnei, he teka ngā mea e whakapāngia nei e rātou ki ahau, e kore e āhei kia tukua ahau e tētahi ki a rātou. He karanga tēnei nāku ki a Hīhā.”
ACT 25:12 Nā, ka kōrerorero a Petuha ki te rūnanga, ā, ka mea, “Kua karanga koe ki a Hīhā; nā me haere koe ki a Hīhā.”
ACT 25:13 Ā muri iho i ētahi rā, ka tae atu a Kīngi Akaripa, rāua ko Pereniki ki Hiharia, ā, ka oha ki a Petuha.
ACT 25:14 Ā, ka pō maha rāua e noho ana i reira, ka kōrerotia e Petuha ki te kīngi te take mō Pāora, ka mea, “Tēnei tētahi tangata i waiho iho e Pirika e here ana.
ACT 25:15 Ā, i ahau i Hiruhārama, ka kōrerotia mai ia ki ahau e ngā tohunga nui, e ngā kaumātua o ngā Hūrai, ka tono rātou kia whakawākia ia.
ACT 25:16 “Nā, ko tāku whakahokinga atu ki a rātou, ‘Ehara i te ritenga nā ngā tāngata o Rōma kia tukua he tangata kia mate i te mea kīanō i tūtataki noa te tangata e whakawākia ana ki ngā kaiwhakapae, i whai wāhi rānei ki te whakahoki kupu ki te kupu whakawā mōna.’
ACT 25:17 Nō reira, i tō rātou minenga mai ki konei, kīhai ahau i whakaroa; ao ake te rā ka noho ahau ki te nohoanga whakawā, ka mea kia ārahina mai taua tangata.
ACT 25:18 Ā, i te tūranga o ngā kaiwhakapae, kīhai tētahi hē o āku i whakaaro ai i kōrerotia e rātou mōna.
ACT 25:19 Heoi, he kupu tautohetohe nō tā rātou karakia tā rātou i mea ai ki a ia, ko tētahi Īhu anō i mate, e kīia ana hoki e Pāora kei te ora.
ACT 25:20 Heoi, pōhewa noa iho ahau ki taua tautohe, ka mea hoki me kore ia e pai kia haere ki Hiruhārama, ki reira whakawākia ai mō aua mea.
ACT 25:21 Nō te karangatanga a Pāora kia waiho ia kia whakarangona tāna e te emepara, ka whakahaua e ahau kia puritia ia, kia tukua rā anō ia e ahau ki a Hīhā.”
ACT 25:22 Ka mea a Akaripa ki a Petuha, “E hiahia ana anō ahau kia rongo i taua tangata.” Ka mea ia, “Ko āpōpō koe rongo ai ki a ia.”
ACT 25:23 Heoi, i te aonga ake, ka tae atu a Akaripa rāua ko Pereniki, me ngā whakapaipai maha, ā, tomo ana ki te whare whakarongo, rātou ko ngā rangatira mano, ko ngā tāngata nunui o te pā, ā, ka whakahaua e Petuha, ka mauria mai a Pāora.
ACT 25:24 Nā, ka mea a Petuha, “E Kīngi Akaripa, e ngā tāngata katoa hoki e noho nei tātou, ka kite koutou i tēnei tangata, i tohe mai ai ki ahau te huihui katoa o ngā Hūrai i Hiruhārama, i konei anō hoki, i karanga ai, ehara rawa i te tika kia waiho ia kia ora ana.
ACT 25:25 Otirā, i kite ahau, kāhore āna mahi e tika ai te mate; ā, i te mea nāna anō i karanga ki te emepara, ka mea ahau kia ungā atu ia.
ACT 25:26 Kāhore ia āku tino mea e tuhituhi atu ai ahau mōna ki tōku ariki. Koia ahau ka ārahi mai nei i a ia ki a koutou, ki a koe rawa anō, e Kīngi Akaripa, kia whai mea ai ahau hei tuhituhinga atu, ua mutu te uiui.
ACT 25:27 Ki tāku hoki he mea hē kia ungā atu he herehere, ā, kia kaua hoki e kōrerotia te mea i whakawākia ai ia.”
ACT 26:1 Nā, ko te meatanga a Akaripa ki a Pāora, “E āhei ana koe kia kōrero i āu kōrero.” Kātahi, ka totoro te ringa o Pāora, ā, ka kōrero ia:
ACT 26:2 “He koa ngā ngākau tēnei ki ahau, e Kīngi Akaripa, kia kōrerotia e ahau ki a koe āianei ngā mea katoa e whakawākia nei ahau e ngā Hūrai;
ACT 26:3 he mōhio rawa hoki koe ki ngā ritenga katoa, ki ngā tautohe hoki anō a ngā Hūrai; nā reira, kia pai koe ki te whakarongo mārie ki ahau.
ACT 26:4 “Ko tāku whakahaere mai o tōku tamarikitanga, nō te tīmatanga mai rā anō i roto i tōku iwi, i Hiruhārama hoki, e mōhio ana ngā Hūrai katoa.
ACT 26:5 Mōhio tonu rātou ki ahau ō mua iho, me i pai rātou ki te whakaatu; ko tāku mahi, i whai i tā te tītorehanga pakeke rawa o tō tātou karakia, i tā te Parihi.
ACT 26:6 Tēnei ahau te tū nei i konei, te whakawākia nei mō te tūmanako ki te mea i kōrerotia e te Atua i mua ki ō tātou mātua.
ACT 26:7 E tūmanako nei ō tātou iwi kotahi tekau mā rua kia uru ki tēnei, i a rātou e mahi tonu nei ki te Atua i te ao, i te pō. Ko tēnei e tūmanakohia atu nei e te kīngi, te mea e whakawākia nei ahau e ngā Hūrai.
ACT 26:8 He aha rawa kia kore e whakaponohia e koutou, ki te mea ka whakaara ake te Atua i te hunga mate?
ACT 26:9 “Ko ahau nei, i whakaaro ahau kia maha tonu ngā mea e mahia e ahau hei pēhi mō te ingoa o Īhu o Nahareta.
ACT 26:10 Āe, i meinga anō tēnei e ahau ki Hiruhārama; he tokomaha anō te hunga tapu i uakina e ahau ki ngā whare herehere, he mea tuku mai hoki ngā tikanga nā ngā tohunga nui ki ahau; ā, i te whakamatenga i a rātou, i whakaae ahau kia pērātia rātou.
ACT 26:11 He maha anō āku whiunga i a rātou i roto i ngā whare karakia katoa, i meinga anō rātou e ahau kia kohukohu; heoi, haurangi noa iho ahau ki a rātou, whāia ana e ahau, ā taea noatia ngā pā o tawhiti.”
ACT 26:12 “Nāwai ā, i ahau e haere ana ki Ramahiku, me ngā tikanga, me te kupu whakaae a ngā tohunga nui,
ACT 26:13 i te poutūmārōtanga, e te kīngi, ka kitea e ahau i te ara he mārama i te rangi e tīaho ana ki ahau, ki ōku hoa haere anō, tērā atu i te mārama o te rā.
ACT 26:14 Heoi, hinga ana mātou katoa ki te whenua, ka rongo ahau i te reo e kōrero ana ki ahau, nō ngā Hiperu anō hoki te reo, e mea ana, ‘E Haora, e Haora, he aha tāu e whakatoi nei i ahau? Ehara tāu te whana ki ngā koikoi.’
ACT 26:15 Anō rā ko ahau, ‘Ko wai koe, e te Ariki?’ Ka mea ia, ‘Ko Īhu ahau e whakatoia nei e koe.
ACT 26:16 Otirā, whakatika, e tū ōu waewae ki runga. Ko te mea tēnei i puta ai ahau ki a koe, kia meinga koe hei kaimahi, hei kaiwhakaatu mō ngā mea i kite nei koe, mō ngā mea anō e kitea ai ahau e koe.
ACT 26:17 Ka whakaorangia koe i te iwi, i ngā tauiwi, ka tonoa nei koe e ahau ki a rātou,
ACT 26:18 hei whakatitiro i ō rātou kanohi, hei whakatahuri i a rātou i te pōuri ki te mārama, i te kaha o Hātana ki te Atua, kia whiwhi ai rātou ki te murunga hara, ki tētahi wāhi anō i roto i te hunga ka oti te whakatapu i runga i te whakapono ki ahau.’ ”
ACT 26:19 “Nō reira, kīhai ahau i whakatuturi, e Kīngi Akaripa, ki tō te rangi kitenga.
ACT 26:20 Heoi, i kōrero ahau ki te hunga i Ramahiku i te tuatahi, ā, i Hiruhārama, ki te whenua katoa anō o Hūria, ki ngā tauiwi hoki, kia rīpenetā, kia tahuri ki te Atua, me te mahi anō i ngā mahi tika o te rīpenetā.
ACT 26:21 Nō reira ngā Hūrai i hopu ai i ahau i te temepara, i whai ai ki te whakamate i ahau.
ACT 26:22 Heoi, ka āwhinatia mai ahau e te Atua, ka tū tonu nei ahau, ā, mohoa noa nei, me te kōrero ki te iti, ki te rahi, kāhore āku kupu kē ake i tā ngā poropiti rātou ko Mohi i mea ai meāke puta:
ACT 26:23 arā ko te Karaiti kia mate, ko ia te mātāmua o te aranga o te hunga mate, māna anō e whakapuaki te mārama ki te iwi, ki ngā tauiwi.”
ACT 26:24 I a ia e kōrero ana i ēnei mea, nui atu te reo o Petuha ki te karanga, “E Pāora, he haurangi koe; nā te nui o tāu kōrero pukapuka i haurangi ai koe!”
ACT 26:25 Anō rā ko ia, “Kāhore ōku haurangi, e Petuha, e te tangata pai rawa; engari he pono, he whai whakaaro, āku kupu e whakapuaki nei.
ACT 26:26 E mātau ana hoki te kīngi ki ēnei mea, i māia ai ahau ki te kōrero ki a ia. E mea ana hoki ahau, kāhore tētahi o ēnei mea i ngaro i a ia; kīhai hoki tēnei mea i mahia i te kokonga.
ACT 26:27 E whakapono ana rānei koe ki ngā poropiti, e Kīngi Akaripa? E mea ana ahau, tēnei koe te whakapono nei.”
ACT 26:28 Anō rā ko Akaripa ki a Pāora, “Wāhi iti kua riro atu ahau ki tāu, ki tā te Karaiti tikanga.”
ACT 26:29 Nā, ko te meatanga a Pāora, “Pai tonu kia īnoi ahau ki te Atua kia kaua e iti, engari kia tino nui, kia kaua anō e waiho i tōu kotahi, engari, kia tino rite ki ahau te hunga katoa e whakarongo nei ki ahau ināianei; ko ēnei mekameka ia kia kore.”
ACT 26:30 Nā, ka whakatika te kīngi, me te kāwana, me Pereniki, me te hunga i noho tahi rātou.
ACT 26:31 Nā, i a rātou ka wehe kē, ka kōrerorero ki a rātou anō, ka mea, “Kāhore he hanga a tēnei tangata e tika ai te mate, te here rānei.”
ACT 26:32 Kātahi, ka mea a Akaripa ki a Petuha, “Ka tukua tēnei tangata kia haere, me i kaua ia te karanga ki a Hīhā.”
ACT 27:1 Ā, nō ka takoto te tikanga kia rere mātou ki Itari, ka tukua a Pāora me ērā atu herehere ki tētahi keneturio ko Huriu te ingoa, nō te hapū o Ākuhata.
ACT 27:2 Nā, eke ana mātou ki tētahi kaipuke o Ataramitiuma, e tika ana rā ngā kāinga o Āhia, rere ana mātou; ko Aritaku o Teharonika, he tangata nō Makeronia, tō mātou hoa.
ACT 27:3 Pō tahi ka ū mātou ki Hairona. Nā, ka ngāwari te mahi a Huriu ki a Pāora, tukua ana ia kia haere ki ōna hoa kia atawhaitia.
ACT 27:4 Rere atu ana i reira, ka miri haere mātou i te taha o Kaiperu, nō te mea i hē te hau.
ACT 27:5 Whiti ana mātou i te moana o Kirikia, o Pamapuria, ka ū ki Maira, he pā nō Raikia.
ACT 27:6 Nā, ka mau i te keneturio he kaipuke ki reira nō Arēhānaria, e rere ana ki Itari; ka utaina mātou e ia ki runga.
ACT 27:7 Ā, ka pō maha i pūhoi ai te rere, ka whiti whakauaua ki te ritenga atu o Hiniru, ā, tē tukua mātou e te hau, ka miri haere mātou i te taha o Kariti i te ritenga atu o Haramone;
ACT 27:8 ā, ka pahemo whakauaua a reira, ka ū mātou ki tētahi kāinga, ko Ngā Kokoru Ātaahua te ingoa; e tata ana a reira ki te pā o Rāhia.
ACT 27:9 Ā, ka maha ngā rā ka pahemo, nā, kua kino te rerenga, nō te mea kua pahemo kē te Pō Nohopuku, ā, ka whakatūpato a Pāora,
ACT 27:10 ka mea ki a rātou, “E mara mā, e kite ana ahau i te kino, i te nui o te mate e pā mai i tēnei rerenga, ehara i te mea ko te utanga anake me te kaipuke, engari, ko tātou anō.”
ACT 27:11 Otirā, nui kē atu te aro o te keneturio ki te kāpene rāua ko te tangata nōna te kaipuke i tāna ki ngā mea i kōrero ai a Pāora.
ACT 27:12 Ā, i te mea kīhai i pai taua kokoru hei tūnga i te hōtoke, ka mea te tokomaha kia rere atu anō i reira, me kore e ū ki Pinike, ki reira tū ai i te hōtoke; he kokoru ia nō Kariti, e anga ana ki te uru mā tonga, ki te uru mā raki.
ACT 27:13 Ā, ka pā rekareka te tonga, ka mea rātou kua taea tā rātou i whakaaro ai, ka hūtia te punga; ā, miri haere ana i Kariti.
ACT 27:14 Nā, kīhai i roa ka puta he hau nui whakaharahara, ko Urokarairona te ingoa.
ACT 27:15 Ā, ka kāhakina te kaipuke, tē ngongo ki te hau, nā, ka tukua e mātou ki tāna, ā, ka pāea.
ACT 27:16 Nā, ka miri i te taha ruru o tētahi motu, tōna ingoa ko Karaura; ka riro whakauaua mai te poti i a mātou.
ACT 27:17 Ā, ka hūtia ake, ka hanga ki te whakaū, meatia he awhi mō te tangere o te puke; ā, nō ka mataku kei eke ki te tahuna, ki Hatihi, ka tukua te rā, ā, ka pāea haeretia.
ACT 27:18 Ā, nō ka tino ākina mātou e te tūpuhi, i te aonga ake ka ākiritia ngā utanga;
ACT 27:19 ā, i te toru o ngā rā ka makā atu e rātou ki ō rātou ringa ngā mea ake o te kaipuke.
ACT 27:20 Ā, he maha ngā rā i kore ai e puta te rā me ngā whetū, kīhai anō i iti te tūpuhi i ākina ai mātou, nā, ka mahue katoa tō mātou whakaaro ki te ora.
ACT 27:21 Heoi, ka roa te nohopuku, nā, ka tū a Pāora i waenganui o rātou, ka mea, “E mara mā, engari rā me i rongo koutou ki ahau, kia kaua e rere mai i Kariti, kei pā mai tēnei kino, tēnei mate.
ACT 27:22 Nā, ko tāku kupu tēnei ki a koutou, Kia mārama te ngākau; e kore hoki e mate tētahi o koutou, ko te kaipuke anake.
ACT 27:23 I tū hoki ki tōku taha i tēnei pō he anahera nā te Atua, nāna nei ahau, ko ia tāku e karakia atu nei,
ACT 27:24 i mea mai, ‘Aua e mataku, e Pāora; me tū koe ki te aroaro o Hīhā; nāna, kua hoatu ki a koe e te Atua te hunga katoa e rere tahi nā koutou.’
ACT 27:25 Nā, kia mārama te ngākau, e mara mā; e whakapono ana hoki ahau ki te Atua, e rite anō ki tāna i kōrero mai ai ki ahau.
ACT 27:26 Otirā, kua takoto te tikanga kia eke tātou ki tētahi motu.”
ACT 27:27 Nā, i te tekau mā whā o ngā pō, i a mātou e kāhakihakina ana i te moana o Aria, i waenganui pō, ka mea ngā hēramana kei te whakatata rātou ki tētahi whenua.
ACT 27:28 Nā, ka whakatātūtū rātou, ka kite e rua tekau mārō, ā, ka neke tata atu, ka whakatātūtū anō, ka kite kotahi tekau mā rima mārō.
ACT 27:29 Nā, ka mataku kei pāea mātou ki ngā toka, ka tukua ngā punga e whā i te kei, ka hiahia ki te awatea.
ACT 27:30 Ā, i ngā hēramana e mea ana kia oma atu i te kaipuke, e tuku ana hoki i te poti ki te moana, he whakaware, kia kīia ai e tukua ana ētahi punga i te ihu.
ACT 27:31 Ka mea a Pāora ki te keneturio rātou ko ngā hōia, “Ki te kore ēnei e noho ki te kaipuke, e kore koutou e taea te whakaora.”
ACT 27:32 Kātahi, ka tapahia ngā whakaheke o te poti e ngā hōia, ā, tukua ana kia taka atu.
ACT 27:33 Ā, i te mea meāke pūao te rā, ka tohe a Pāora ki a rātou katoa kia kai, ka mea, “Ko te tekau mā whā tēnei o ngā rā e tatari nei koutou, e nohopuku nei, tē ō te kai.
ACT 27:34 Koia ahau ka tohe nei kia kai; ko tētahi mea hoki tēnei e ora ai koutou. E kore hoki e ngahoro tētahi huruhuru o te upoko o tētahi o koutou.”
ACT 27:35 Ā, nō tāna kōrerotanga i ēnei kupu, ka mau ki te taro, ka whakawhetai ki te Atua i te aroaro o te katoa; ā, ka whawhati, ka tīmata te kai.
ACT 27:36 Nā, ka mārama ngā ngākau o rātou katoa, ka kai anō rātou.
ACT 27:37 Nā, e rua rau e whitu tekau mā ono mātou katoa i te kaipuke.
ACT 27:38 Ā, nō ka mākona i te kai, ka whakamāmā rātou i te kaipuke, ka ākiritia te wīti ki te moana.
ACT 27:39 Ā, ka ao te rā kīhai rātou i mōhio ki tērā whenua; engari, i kite rātou i tētahi kokoru he one tō reira, ā, ka mea rātou me kore e āhei te āki atu i te kaipuke ki roto.
ACT 27:40 Nā, tapahia ana e rātou ngā punga, tukua ana ki te moana, i whakakorokoroa anō ngā here o te urungi, ka hūtia anō te rā nui ki te hau, ka tika atu ki te one.
ACT 27:41 Ā, ka puta atu ki tētahi wāhi, he tai papakirua, ka whakaekea te kaipuke; ā, titi tonu te ihu, mau tonu, ko te kei i pakaru i te kaha o te ngaru.
ACT 27:42 Ā, ki tā ngā hōia whakaaro, me whakamate ngā herehere, kei kau tētahi ki uta, kei oma.
ACT 27:43 Ko te keneturio ia i mea kia whakaorangia a Pāora, kīhai hoki i tukua ki tā rātou i whakaaro ai; nā, ka mea ia, kia mātua peke atu te hunga e mātau ana ki te kau, kia kau ki uta;
ACT 27:44 ko ērā atu, ko ētahi i runga i ngā papa, ko ētahi i runga i ētahi o ngā mea o te kaipuke. Heoi, tae ora katoa ana rātou ki uta.
ACT 28:1 Ā, ka ora mātou, kātahi ka mōhio ko Merita te ingoa o te motu.
ACT 28:2 Nā, kīhai i nohinohi te atawhai a ngā tāngata māori ki a mātou. Ka tahuna he kāpura, whakamanuhiritia ana mātou katoa, nō te mea e ua ana te ua, nō te mātao hoki.
ACT 28:3 Nā, ka kohikohia e Pāora he pūpū wahie, ā, makā ana e ia ki te kāpura; heoi puta mai ana he neke i te wera, ka mau ki tōna ringa.
ACT 28:4 Ā, i te kitenga o ngā tāngata māori i te ngārara e werewere ana ki tōna ringa, ka mea rātou tētahi ki tētahi, “Koia, he tangata kōhuru tēnei, ka ora nei ia i te moana, nā, kīhai i tukua e te tika kia ora.”
ACT 28:5 Otiia, i ruia atu e ia te ngārara ki te kāpura, ā, kīhai ia i mate, kīhai i aha.
ACT 28:6 Nā, whanga noa rātou kia tetere ia, kia hinga whakarere rānei, kia mate; heoi, ka roa noa tō rātou whanganga, ā, i te kitenga kāhore he aha i pā ki a ia, ka puta kē ō rātou whakaaro, ka mea, he atua ia.
ACT 28:7 I taua wāhi te kāinga o te tino rangatira o te motu, ko Pupiriu te ingoa. He manuhiri mātou nāna; e toru ngā rā i atawhaitia ai mātou e ia.
ACT 28:8 Nā, i te takoto te papa o Pupiriu e mate ana i te kirikā, i te kōripi. Heoi, ka tomo a Pāora ki a ia, ka īnoi, ka whakapā i ōna ringa ki a ia, ā, ora ake ia.
ACT 28:9 Ā, i te meatanga o tēnei, nā, ka haere mai anō ērā atu o te motu he mate o rātou, ā, whakaorangia ana.
ACT 28:10 Nui atu anō te hōnore i whakahōnoretia ai mātou e rātou; ā, i tō mātou rerenga ka utaina ngā mea e rite ana mā mātou.
ACT 28:11 Ā muri iho i ngā marama e toru, ka rere mātou i runga i tētahi kaipuke o Arēhānaria, i tū nei ki taua motu i te hōtoke, ko Katoro rāua ko Poruku te tohu.
ACT 28:12 Nā, ka ū ki Hairakuha, ā, e toru ō mātou rā i noho ai ki reira.
ACT 28:13 Nā, ka āwhio ake mātou i reira, ka ū ki Rekiuma. Ka pō tahi ka pā te tonga, ā, i te rua o ngā rā ka ū ki Puteori.
ACT 28:14 Ā, nō ka kitea ngā tuākana i reira, ka tohea mātou kia noho i a rātou, kia whitu ngā rā. Heoi, haere ana mātou ki Rōma.
ACT 28:15 Ā, ka rongo ngā tuākana o reira ki a mātou, ka haere ake ki te whakatau i a mātou ki Te Mākete o Apiu, ki Wharetoru. Ā, i te kitenga o Pāora i a rātou, ka whakawhetai ki te Atua, ka ora te ngākau.
ACT 28:16 Nā, ka tae mātou ki Rōma, ka hoatu ngā herehere e te keneturio ki te rangatira hōia. Ko Pāora ia i tukua kia noho motu kē rāua ko tētahi hōia hei tiaki i a ia.
ACT 28:17 Ā, i muri i ngā rā e toru, ka huihuia e Pāora ngā tino tāngata o ngā Hūrai; ā, nō tō rātou minenga mai, ka mea ia ki a rātou, “E ōku tuākana, ko ahau kāhore ōku hara ki te iwi, ki ngā ritenga rānei a ngā mātua, i tukua ai ahau i Hiruhārama hei herehere ki ngā ringa o ngā tāngata o Rōma.
ACT 28:18 Ā, i mea rātou, i tā rātou whakawākanga i ahau kia tukua ahau, nō te mea kāhore he take e mate ai ahau.
ACT 28:19 Heoi, ka whakahē tonu ngā Hūrai; e taea hoki te aha? Karanga ana ahau ki a Hīhā; kāhore ia āku mea e whakawā ai ahau i tōku iwi.
ACT 28:20 Koia ahau i karanga ai i a koutou kia kite, kia kōrero ki ahau. Nō te mea hoki ko tā Īharaira e tūmanako nei te mea i herea ai ahau ki tēnei mekameka.”
ACT 28:21 Nā, ko tā rātou meatanga ki a ia, “Kāhore he pukapuka mōu i tae mai ki a mātou i Hūria, kāhore anō tētahi o ngā tuākana i haere mai nei i kawe kupu mai, i kōrero mai rānei i tētahi kino mōu.
ACT 28:22 Otirā, e mea ana mātou kia rongo ki a koe ki ōu whakaaro. E mōhio ana hoki mātou ki tēnei wehenga, e kōrerotia kinotia ana i ngā wāhi katoa.”
ACT 28:23 Ā, ka oti te whakarite he rā ki a ia, he tokomaha i haere mai ki a ia ki tōna whare; ā, whakakitea ana e ia ki a rātou, whakaaturia ana te rangatiratanga o te Atua, ā, ka kukume i a rātou ki ngā mea o Īhu, tiki atu ai i tā te ture a Mohi, i tā ngā poropiti, nō te ata ā ahiahi noa.
ACT 28:24 Ko ētahi i whakapono ki ngā mea i kōrerotia, ko ētahi kīhai i whakapono.
ACT 28:25 Ā, te rite ā rātou kōrero, ka puta atu rātou, i muri i te kōrerotanga a Pāora i tētahi kupu, “Tika tonu te kōrero a te Wairua Tapu i a Ihāia poropiti ki ō koutou mātua,
ACT 28:26 i mea nei, ‘Haere ki tēnei iwi, mea atu, Rongo noa koutou, e kore e mātau; titiro noa koutou, e kore e kite.
ACT 28:27 Kua mātotoru hoki te ngākau o tēnei iwi, he pūhoi ngā taringa ki te whakarongo, ō rātou kanohi kua whakamoea e rātou; kei kite ngā kanohi, kei rongo ngā taringa, kei mātau te ngākau, ā, ka tahuri rātou, ka ora i ahau.’
ACT 28:28 “Nā, kia mōhio koutou, ka tukua tēnei whakaoranga a te Atua ki ngā tauiwi, ā ka rongo rātou.
ACT 28:29 Ā, ka mutu ēnei kōrero āna, ka haere ngā Hūrai, he nui hoki tā rātou tautohetohe ki a rātou anō.”
ACT 28:30 Ā, e rua tino tau i noho ai a Pāora ki tōna whare i utua e ia, ā, manaakitia ana e ia te hunga katoa e tomo ana ki a ia;
ACT 28:31 ā, māia tonu ia ki te kauwhau i te rangatiratanga o te Atua, ki te whakaako i ngā mea o te Ariki, o Īhu Karaiti, kīhai anō i rīria.
ROM 1:1 Nā Pāora, nā te pononga a Īhu Karaiti, i karangatia hei āpōtoro, i motuhia ki te rongopai a te Atua,
ROM 1:2 i kōrerotia rā e ia i mua, arā e āna poropiti i roto i ngā karaipiture tapu,
ROM 1:3 mō tāna Tama, i whānau nei he uri nō Rāwiri, nō te wāhi ki te kikokiko;
ROM 1:4 i whakapuakina mai nei ko te Tama a te Atua i runga i te kaha, i runga i tā te Wairua o te tapu, i te mea ka whakaarahia i te hunga mate; arā a Īhu Karaiti, tō tātou Ariki.
ROM 1:5 Nāna nei mātou i whiwhi ai ki te aroha noa, ki te mahi āpōtoro, kia ngohengohe ai, kia whakapono ai ngā iwi katoa, hei mea mō tōna ingoa.
ROM 1:6 Nō rātou nei hoki koutou, he mea karanga hei hunga mō Īhu Karaiti.
ROM 1:7 Ki te hunga katoa i Rōma, e arohaina nei e te Atua, ka oti nei te karanga hei hunga tapu. Kia tau ki a koutou te aroha noa me te rangimārie, he mea nā te Atua, nā tō tātou Matua, nā te Ariki hoki, nā Īhu Karaiti.
ROM 1:8 Ko tāku mea tuatahi, he whakawhetai ki tōku Atua i roto i a Īhu Karaiti mō koutou katoa, nō te mea e kōrerotia ana tō koutou whakapono i te ao katoa.
ROM 1:9 Ko te Atua, e mahi nei tōku wairua ki a ia i roto i te rongopai o tāna Tama, hei kaiwhakaatu mōku, mō te mau tonu o tāku whakahuahua i a koutou, ā, i āku karakiatanga i ngā wā katoa,
ROM 1:10 e īnoi ana me kore e pai te Atua kia whakatikaia tāku haere atu ki a koutou.
ROM 1:11 Nui atu hoki tōku hiahia kia kite i a koutou, kia whakawhiwhi ai ahau i a koutou ki tētahi mea hōmai, he mea wairua, kia whakaūngia ai koutou;
ROM 1:12 arā, kia ora ngātahi ō tātou ngākau, tōku i tō koutou whakapono, ō koutou i tōku.
ROM 1:13 Nā, e kore ahau e pai, e ōku tēina kia ngaro i a koutou te maha o āku meatanga kia haere atu ki a koutou, heoi, āraia mai ana ahau, ā, mohoa noa nei, kia whiwhi ai ahau ki tētahi hua i roto i a koutou hoki, kia pērā me te mea i ērā atu tauiwi.
ROM 1:14 He nama kei runga i ahau nā ngā Kariki, ā, nā ngā tautangata, nā te hunga mōhio, ā, nā te hunga whakaarokore.
ROM 1:15 Nā reira, e ngākau nui ana ahau kia whakapaua tāku ki te kauwhau hoki i te rongopai ki a koutou i Rōma.
ROM 1:16 Kāhore hoki ōku whakamā ki te rongopai; ko te kaha hoki ia o te Atua hei whakaora mō ngā tāngata katoa e whakapono ana; mō te Hūrai ki mua, mō te Kariki anō hoki.
ROM 1:17 Ā, kei reira e whakakitea ana tā te Atua tika, he mea nō te whakapono ki te whakapono; kua oti nei hoki te tuhituhi, “Mā te whakapono e ora ai te tangata tika.”
ROM 1:18 E whakakitea iho ana hoki i te rangi tō te Atua riri ki ngā karakiakoretanga katoa, ki ngā hē o ngā tāngata e pēhi ana i te pono i runga i te hē.
ROM 1:19 Kei roto nei i a rātou e mārama ana ngā mea o te Atua e taea te mōhio; kua whakamāramatia hoki e te Atua ki a rātou.
ROM 1:20 E kitea nuitia ana hoki ngā mea ōna, kāhore nei i kitea, nō te hanganga iho rā o te ao, e mōhiotia ana ki ngā mea i hangā, arā tōna kaha mau tonu, me tōna atuatanga; kia kore ai he kupu whakahoki mā rātou;
ROM 1:21 i a rātou hoki e mātau ana ki te Atua, kīhai rātou i whakakorōria i a ia hei Atua, kīhai hoki i whakawhetai; heoi, kua kūware ō rātou whakaaro, ā, whakapōuritia ana tō rātou ngākau pōhēhē.
ROM 1:22 I a rātou e mea ana he mōhio rātou, nā, ka wairangi,
ROM 1:23 ā, whakaputaia kētia ake te korōria o te Atua e kore nei e pirau, kia rite ki te āhua o te tangata pirau noa, o ngā manu hoki, o ngā kararehe waewae whā, o ngā mea ngōkingōki.
ROM 1:24 Koia rātou i tukua ai e te Atua ki te mahi poke, i runga i ngā hiahia o ō rātou ngākau, kia whakatūtūātia iho ai ō rātou tinana e rātou anō, tō tētahi e tētahi;
ROM 1:25 i te mea kua whakawhiti rātou i tō te Atua pono mō te teka, ā, karakia ana, mahi ana ki te mea hanga, kapea ake te Kaihanga, ko ia nei te whakapaingia ake ake. Āmine.
ROM 1:26 Koia rātou i tukua ai e te Atua ki ngā hiahia tūtūā. Ko ā rātou wāhine hoki, mahue ake i a rātou te tikanga māori, kei te ngau kē noa atu;
ROM 1:27 me ngā tāne anō, whakarērea ake e rātou te tikanga māori ki te wahine, ānō he ahi te kānga o tō rātou hiahia ki a rātou anō; ngā tāne ki ngā tāne, mahi ai i te mea whakamā, me te whiwhi anō ki te utu e rite ana mō tō rātou ngaunga kētanga.
ROM 1:28 Ā, i a rātou kīhai nei i pai kia mau tonu te Atua ki ō rātou mahara, tukua ana rātou e te Atua ki te hinengaro hē kia mahia ngā mea kāhore e tau kia mahia.
ROM 1:29 Kī tonu rātou i ngā mahi hē katoa, i te kino, i te apo, i te mauāhara; whawhao rawa i te hae, i te kōhuru, i te totohe, i te hīanga, i te whanokē; he hunga kōhumuhumu,
ROM 1:30 he hunga ngautuarā, kino ki te Atua, he hunga whakahīhī, whakakake, whakapehapeha, he kaitito i ngā mea kino. E turi ana ki ngā mātua,
ROM 1:31 kāhore ō rātou mātauranga, he hunga kupu taka, kāhore nei he aroha, kāhore e tohu tangata.
ROM 1:32 Ahakoa e mātau ana anō rātou ki tā te Atua tikanga, he tika te mate mō ngā kaimahi i ēnei mea, heoi, ka mahi tonu rātou i aua mea me te whakaae hoki ki te hunga e pērā ana te mahi.
ROM 2:1 Nā, kāhore he kupu whakahoki māu, e koe, e te tangata e whakahē ana; i a koe hoki e whakahē nā i tērā, e whakatau ana koe i te hē ki a koe anō; kei te mahi hoki koe, te kaiwhakahē, i aua mea nā anō.
ROM 2:2 Nā, e mātau ana tātou kei runga i te pono te whakahēnga a te Atua mō ngā kaimahi i aua mea.
ROM 2:3 Ko tōu whakaaro rānei tēnei, e te tangata e whakahē ana ki ngā kaimahi i aua mea, e mahi nā anō koe i aua mea, ko koe e ora i tā te Atua whakahē?
ROM 2:4 E whakahāwea ana rānei koe ki ngā rawa o tōna ngāwari, o tāna tikanga māhaki, o tōna manawanui, e ranea tonu nei; tē mahara ko te ngāwari o te Atua hei ārahi i a koe ki te rīpenetā?
ROM 2:5 Heoi, pakeke tonu koe, kāhore e rīpenetā tōu ngākau, e pūranga ana koe i te riri mōu, mō te rā o te riri, o te whakakitenga mai anō i tā te Atua whakawākanga tika;
ROM 2:6 “Māna e hōmai ki tētahi, ki tētahi, kia rite ki ā rātou mahi.”
ROM 2:7 Ki te hunga e whai ana ki te korōria, ki te hōnore, ki te piraukore, me te mau anō ki te mahi pai, he ora tonu.
ROM 2:8 Ki te hunga ia e totohe ana, e turi ana ki te pono, e whakarongo ana hoki ki te hē, he riri, he āritarita.
ROM 2:9 He pāwera, he raru, mō ngā wairua tangata katoa e mahi ana i te kino, mō te Hūrai ki mua, mō te Kariki anō hoki,
ROM 2:10 he korōria ia, he hōnore, he rangimārie, mō ngā tāngata katoa e mahi ana i te pai, mō te Hūrai ki mua, mō te Kariki anō hoki.
ROM 2:11 Kāhore hoki a te Atua whakapai kanohi.
ROM 2:12 Ko te hunga hoki i hara turekore, ka ngaro turekore anō hoki; me te hunga i hara i runga i te ture, kei te ture anō he whakahē mō rātou.
ROM 2:13 He teka hoki ko ngā kaiwhakarongo o te ture e tika ki tā te Atua; engari, ko ngā kaimahi o te ture e whakatikaia.
ROM 2:14 I te mea hoki e mahia māoritia ana ngā mea o te ture e ngā tauiwi, kāhore nei ō rātou ture, ko ēnei, kāhore nei ō rātou ture, hei ture ki a rātou anō.
ROM 2:15 I te mea ka whakakite rātou i te mahi a te ture, he mea tuhituhi ki ō rātou ngākau, me te whakaae tahi anō ō rātou hinengaro, ko ō rātou whakaaro kei te whakahēhē, kei te whakatikatika rānei i a rātou;
ROM 2:16 i te rā e whakawā ai te Atua i ngā mea ngaro a ngā tāngata, he mea whakarite tonu ki tāku rongopai, he meatanga nā Īhu Karaiti.
ROM 2:17 Otirā, mehemea e tapaina ana koe he Hūrai, ā, e whakawhirinaki ana koe ki te ture, e whakamanamana ana ki te Atua,
ROM 2:18 ā, e mōhio ana ki tāna e pai ai, ā, e kitea ana e koe ngā mea e tino pai ana, he mea whakaako hoki koe nā te ture,
ROM 2:19 ā, e ū ana tōu whakaaro, ko koe hei kaiārahi mō ngā matapō, hei mārama mō te hunga i roto i te pōuri,
ROM 2:20 hei kaiwhakatikatika mō ngā kūware, hei kaiwhakaako mō ngā kōhungahunga; kei a koe hoki te āhua o te mātauranga, o te pono i runga i te ture.
ROM 2:21 He kaiwhakaako koe i tērā atu, e kore ianei koe e whakaako i a koe anō? E kauwhau nā koe kia kaua e tāhae, e tāhae ana rānei koe?
ROM 2:22 Ā, koe e mea nā, Kaua e pūremu, e pūremu ana rānei koe? Ā, koe e whakarihariha nā ki ngā whakapakoko, e tāhae ana rānei koe i ngā mea o ngā temepara?
ROM 2:23 Ā, koe e whakamanamana nā ki te ture, kei te whakaiti rānei koe i te Atua i te mea ka takahi koe i te ture?
ROM 2:24 “Nā koutou hoki i kohukohua ai te ingoa o te Atua i roto i ngā tauiwi, i pērātia ai me te mea kua oti te tuhituhi.”
ROM 2:25 E whai tikanga ana hoki te kotinga, ki te mahia e koe te ture; tēnā ki te takahi koe i te ture, ka riro tōu kotinga hei kotingakore.
ROM 2:26 Nā, ki te mau i te kotingakore ngā tikanga o te ture, e kore ianei tōna kotingakore e kīia hei kotinga?
ROM 2:27 Ā, ki te rite te ture i te mea kīhai kotia māoritia, e kore ianei ia e whakahē i a koe, e whiwhi nā ki te kupu tuhituhi me te kotinga, i a koe e takahi nā i te ture?
ROM 2:28 Ehara hoki i te Hūrai te mea ko waho noa iho tōna āhua Hūrai; ehara anō i te kotinga te mea nō waho, nō te kikokiko.
ROM 2:29 Engari, he Hūrai ia, nō roto tōna āhua Hūrai; ā, ko te kotinga, nō te ngākau, he mea wairua, he teka nā te kupu tuhituhi; ehara hoki i te mea e whakamoemititia ana e te tangata, engari e te Atua.
ROM 3:1 Ha, he aha rā te painga i hua ki te Hūrai? He aha te rawa o te kotinga?
ROM 3:2 He nui rā i ngā mea katoa. Ko te tuatahi, kua ākona rātou ki ngā kupu a te Atua.
ROM 3:3 Ka pēhea, mehemea kāhore he whakapono o ētahi? E taka rānei tō te Atua pono i tō rātou whakapono kore?
ROM 3:4 Kāhore rāpea! Engari ko te Atua kia kitea he pono, ko ngā tāngata katoa he teka kau; ko te mea hoki ia i tuhituhia, “Kia tika ai tāu i tāu kōrerotanga, kia puta ai tāu ina whakawākia koe.”
ROM 3:5 Ha, ki te mea nā tō tātou hē i kitea nuitia ai tō te Atua tika, me pēhea he kupu mā tātou? E hē ana rānei te Atua i a ia e whakapā ana i te riri? (He kupu tangata tēnei nāku.)
ROM 3:6 Kāhore rāpea! Pēnei me pēhea te Atua e whakawā ai i te ao?
ROM 3:7 Nā, ki te mea nā tōku teka i hira rawa ai tō te Atua pono hei korōria mōna; he aha ahau i whakahēngia tonutia ai ānō hei tangata hara?
ROM 3:8 He aha hoki tē pēnei ai, ā, ko te kupu whakapae teka tēnei mō mātou, ā, ki tā ētahi ko tā mātou kupu tēnei, “Tātou ka mahi i te kino, kia puta ai he pai”? Tika tonu te tau o te hē ki a rātou.
ROM 3:9 He aha koia? He pai ake rānei tō mātou wāhi i tō rātou? Kāhore rā hoki; kua oti hoki te whakapā e mātou i mua he hē ki ngā Hūrai, ki ngā Kariki, kei raro katoa rātou i te hara;
ROM 3:10 ko te mea hoki ia i tuhituhia: “Kāhore he tangata tika, kāhore kia kotahi;
ROM 3:11 kāhore he tangata e mātau ana, kāhore he tangata e rapu ana i te Atua.
ROM 3:12 Kua peka kē rātou katoa, kua kino ngātahi; kāhore he tangata e mahi ana i te pai, kāhore rawa kia kotahi.
ROM 3:13 He urupā puare noa tō rātou korokoro; e patipati ana ō rātou arero; kei roto i ō rātou ngutu te wai whakamate o ngā nākahi;
ROM 3:14 kī tonu ō rātou māngai i te kanga, i te nanakia.
ROM 3:15 Ko ō rātou waewae, hohoro tonu ki te whakaheke toto;
ROM 3:16 he whakangaro, he ngākau pōuri, kei ō rātou ara;
ROM 3:17 kāhore hoki rātou i mōhio ki te ara o te rangimārie.
ROM 3:18 Kāhore he wehi o te Atua i mua i ō rātou kanohi.”
ROM 3:19 Nā, e mātau ana tātou ki ngā kupu o te ture, e kōrero ana ki te hunga i te ture, kia kopia ai ngā māngai katoa, kia whakawākia ai te ao katoa e te Atua.
ROM 3:20 Nō te mea kāhore he mahi o te ture e tika ai tētahi kikokiko i tōna aroaro; mā roto mai i te ture te mātauranga ki te hara.
ROM 3:21 Otiia, kua whakakitea ināianei he tika a te Atua, motu kē i te ture, he mea whakaatu nā te ture, nā ngā poropiti;
ROM 3:22 arā, ko te tika a te Atua e nā runga mai ana i te whakapono ki a Īhu Karaiti ki te hunga katoa e whakapono ana. Kāhore hoki he pokanga kētanga;
ROM 3:23 kua hara katoa hoki, ā, kāhore e taea e rātou te korōria o te Atua;
ROM 3:24 he mea whakatika utukore nā tōna aroha noa, i runga i tā Karaiti Īhu hokonga;
ROM 3:25 ko ia hoki tā te Atua i whakaari ai hei whakamārie, i runga i te whakapono, he mea nā ōna toto. Kia whakakitea ai tōna tika, i te mea ka whakapahemotia atu ngā hara ō mua, he mea hoki nā te manawanui o te Atua;
ROM 3:26 hei whakakite i tōna tika i tēnei wā nei anō; he mea kia tika ai ia anō, me te kaiwhakatika i te tangata e whakapono ana ki a Īhu.
ROM 3:27 Nā, kei hea te whakamanamana? Kua āraia atu. E tēhea ritenga ture? E tō ngā mahi? Kāhore, engari, e te ture o te whakapono.
ROM 3:28 Koia mātou ka mea ai, kei te whakapono he tika mō te tangata, motu kē i ngā mahi o te ture.
ROM 3:29 Ko te Atua oti te Atua o ngā Hūrai anake? Ehara rānei ia i te Atua o ngā tauiwi hoki? Āe rā, o ngā tauiwi anō hoki;
ROM 3:30 ki te mea ia he kotahi te Atua, ā, māna e whakatika te kotinga i runga i te whakapono, me te kotingakore ina whakapono.
ROM 3:31 E taka rānei te ture i tā mātou, arā i te whakapono? Kāhore rāpea! Engari, nā tā mātou i ū ai te ture.
ROM 4:1 He aha rā, ki tā tātou, te mea i riro i a Āperahama, i tō tātou tupuna i runga i te kikokiko?
ROM 4:2 Mehemea hoki nā ngā mahi i tika ai a Āperahama, he mea tāna e whakamanamana ai ia; otirā, kāhore ki te Atua.
ROM 4:3 E pēhea ana oti tā te karaipiture? “I whakapono a Āperahama ki te Atua, ā, whakairia ana hei tika mōna.”
ROM 4:4 Nā, he tangata e mahi ana, e kore e kīia te utu mōna he mea aroha noa, engari, he mea mō tāna.
ROM 4:5 Otirā, ko te tangata kāhore e mahi, engari, e whakapono ana ki te kaiwhakatika i te tangata karakiakore, ka whakairia tōna whakapono hei tika mōna.
ROM 4:6 Pērā hoki me tā Rāwiri kōrero i te manaaki ki te tangata, ka whakairia nei e te Atua he tika ki a ia, motu kē i ngā mahi.
ROM 4:7 I kī ai ia: “Ka hari te hunga kua oti ā rātou mahi tutū te muru, ō rātou hara te hīpoki!
ROM 4:8 Ka hari te tangata e kore nei e whakairia e te Ariki he hara ki a ia.”
ROM 4:9 E kōrerotia ana rānei tēnei haringa mō te kotinga, mō te kotingakore anō rānei? E mea ana hoki tātou, “I whakairia tōna whakapono hei tika mō Āperahama.”
ROM 4:10 He pēhea rā te whakairinga? I a ia i te kotinga, i te kotingakore rānei? He teka i a ia i te kotinga, engari, i te kotingakore,
ROM 4:11 ā, riro ana i a ia te kotinga hei tohu, hei hīri mō te tika o tōna whakapono, i a ia i te kotingakore. Kia waiho ai ia hei matua ki te hunga katoa e whakapono ana, ahakoa kāhore rātou i kotia, kia whakairia ai te tika ki a rātou;
ROM 4:12 hei matua anō mō te kotinga ki te hunga ehara i te mea nō te kotinga anake, engari, e takahi ana hoki i runga i ngā tapuae o taua whakapono o tō tātou matua, o Āperahama, i a ia kāhore anō i kotia.
ROM 4:13 Ehara i te mea i nā runga mai i te ture te kupu ki a Āperahama rātou ko ōna uri mō te ao ka riro i a ia; engari, i nā runga mai i te tika o te whakapono.
ROM 4:14 Mehemea hoki ka riro i te hunga ture, kua tikangakore te whakapono, kua taka te kupu whakaari.
ROM 4:15 Ko tā te ture hoki e mahi ai, he riri; engari, ki te kāhore he ture, kāhore hoki he hara.
ROM 4:16 Koia i nā rototia ai i te whakapono, kia waiho ai mā te aroha noa; kia ū ai te kupu whakaari ki te whānau katoa; ehara i te mea ki tō te ture anake, engari, ki tō te whakapono anō o Āperahama, ko ia nei hoki te matua o tātou katoa,
ROM 4:17 ko te mea hoki ia i tuhituhia, “Kua waiho koe e ahau hei matua ki ngā iwi maha,” he matua i te aroaro o tāna i whakapono ai, arā o te Atua, e whakaora nei i ngā tūpāpaku, e karanga nei i ngā mea kua kāhore me te mea kei konei nei anō.
ROM 4:18 Ahakoa kāhore he rawa, ū tonu tōna mānakonako ki a ia, kia meinga ai ia hei matua mō ngā iwi maha, pērā me te mea i kōrerotia, “Ka pēnei tāu whānau.”
ROM 4:19 Kīhai anō i ngoikore tōna whakapono, i mahara iho ia ki tōna tinana, he pēnei me te mea kua tūpāpakutia, wāhi iti hoki kua kotahi rau ōna tau, ki te tūpāpakutanga hoki o te kōpū o Hera.
ROM 4:20 Āe, i titiro ia ki te kupu whakaari a te Atua, kīhai ia i ruarua i runga i te whakapono kore, engari, ka kaha tonu tōna whakapono, me te whakakorōria ki te Atua.
ROM 4:21 Ū tonu hoki tōna whakaaro e taea e ia te mea tāna i kōrero ai.
ROM 4:22 Koia hoki “I whakairia ai ki a ia hei tika.”
ROM 4:23 Otirā, ehara i te mea he whakaaro ki a ia anake i tuhituhia ai taua whakairinga ki a ia;
ROM 4:24 engari, he whakaaro ki a tātou anō hoki; ka whakairia ki a tātou e whakapono nei ki te kaiwhakaara i a Īhu, i tō tātou Ariki, i te hunga mate.
ROM 4:25 I tukua nei mō ō tātou hē, i whakaarahia mō tātou kia whakatikaia.
ROM 5:1 Nā, i te mea ka tika nei i te whakapono, kia mau tā tātou maunga rongo ki te Atua, he mea nā tō tātou Ariki, nā Īhu Karaiti;
ROM 5:2 nāna nei te whakatatanga i a tātou i runga i te whakapono ki tēnei aroha noa e tū nei tātou; ā, kia hari tātou i te mea ka tūmanako nei tātou ki te korōria o te Atua.
ROM 5:3 Ā, ehara i te mea ko tērā anake, engari, kia whakamanamana anō tātou ki ō tātou mamae; e mōhio ana hoki ko tā te mamae e mahi ai he manawanui;
ROM 5:4 ko tā te manawanui he mātauranga; ko tā te mātauranga he tūmanako;
ROM 5:5 e kore anō e whakamā i te mea ka tūmanako nei. Kua ringihia hoki te aroha o te Atua ki ō tātou ngākau e te Wairua Tapu kua hōmai nei ki a tātou.
ROM 5:6 I a tātou hoki e ngoikore tonu ana, i te wā i rite ai, ka mate a te Karaiti mō te hunga karakiakore.
ROM 5:7 E mate whakauaua hoki tētahi mō te tangata tika; tērā pea ia tētahi e māia rawa kia mate mō te tangata pai.
ROM 5:8 Heoi, e whakakitea nuitia ana e te Atua tōna aroha ki a tātou, i te mea, i a tātou anō e hara ana, ka mate a te Karaiti mō tātou.
ROM 5:9 Nā, i a tātou ka tika nei i ōna toto, tērā noa ake he whakaoranga māna i a tātou i te riri o te Atua.
ROM 5:10 Mehemea hoki, i te wā he hoa whawhai tātou, ka houhia tā tātou rongo ki te Atua i runga i te matenga o tāna Tama, tērā noa ake, i te mea ka mau nei te rongo, he whakaoranga mō tātou, i a ia kua ora nei.
ROM 5:11 Ehara hoki i te mea ko tērā anake, engari, e whakamanamana ana anō tātou ki te Atua, he mea nā tō tātou Ariki, nā Īhu Karaiti, nāna nei tēnei houhanga rongo ki a tātou.
ROM 5:12 Nā, ka rite ki te putanga mai o te hara ki te ao, he mea nā te tangata kotahi, me te mate anō i runga i te hara; ka hōrapa te mate ki ngā tāngata katoa; nō te mea kua hara katoa.
ROM 5:13 I te ao nei hoki te hara, ā tae noa mai te ture; otirā, e kore e whakairia te hara i te mea kāhore he ture.
ROM 5:14 Ahakoa rā he mana kīngi tō te mate nō Ārama iho anō taea noatia a Mohi, ki te hunga rawa kīhai nei i rite tō rātou hara ki tō Ārama poka kē. He āhua nei hoki ia nō tēnei i tāria nei.
ROM 5:15 Otirā, kīhai i rite ki te hara te mea i hōmai noa mai. Mehemea hoki nā te hara o te kotahi i mate ai te tokomaha, waihoki tērā noa atu te huanga ki te tokomaha o tō te Atua aroha noa, o te mea hōmai hoki i runga i te aroha noa o te tangata kotahi, o Īhu Karaiti.
ROM 5:16 Kīhai anō hoki i rite te mea i hōmai ki tō te kotahi i hara. Nō te kotahi hoki te whakawā i tau ai te hē; nō ngā hara maha ia te mea i hōmai noa mai hei whakatika.
ROM 5:17 Mehemea hoki nā te hara o te kotahi i kīngi ai te mate, he mea nā te tangata kotahi; waihoki tērā noa ake he kīngitanga i runga i te ora mō te hunga ka riro nei i a rātou te aroha noa e hua tonu nei, me te tika i hōmai noa nei, he mea nā te kotahi, arā, nā Īhu Karaiti.
ROM 5:18 Āe rā, i te mea nā te hara kotahi i tau ai te hē ki ngā tāngata katoa, waihoki nā te tika kotahi i puta ai te mea hōmai noa ki ngā tāngata katoa, e tika ai, e ora ai.
ROM 5:19 Nā, i te mea nā te tutū o te tangata kotahi i whai hara ai te tokomaha, waihoki nā te ngohengohe o te kotahi, ka meinga te tokomaha kia tika.
ROM 5:20 I puta mai te ture kia nui ai te hara; heoi i te hara e nui noa ana, kua hua noa ake te aroha noa;
ROM 5:21 he mea hoki, i te hanga ko te hara te kīngi i roto i te mate, kia kīngi hoki ko te aroha noa i runga o te tika ki te ora tonu, he meatanga nā Īhu Karaiti, nā tō tātou Ariki.
ROM 6:1 Ha, kia pēhea he kōrero mā tātou? Kia mau tonu oti tātou ki te hara, kia hua ai te aroha noa?
ROM 6:2 Kāhore rāpea. Ko tātou kua whakatūpāpakutia nei ki te hara, me pēhea tātou e noho tonu atu ai anō i roto i taua hara?
ROM 6:3 Kāhore ianei koutou i mōhio, ko tātou kua iriiria nei ki roto ki a Karaiti Īhu, kua iriiria ki roto ki tōna matenga?
ROM 6:4 Nā, kua tanumia ngātahitia tātou me ia ki roto ki te matenga, he mea nā te iriiri; kia rite ai ki a te Karaiti i whakaarahia ake nei i te hunga mate e te korōria o te Matua, waihoki ko tātou kia haere i roto i te houtanga o te ora.
ROM 6:5 Ki te mea hoki kua honoa tātou ki a ia i runga i te āhua o tōna matenga, ka honoa anō tātou ki a ia i runga i te āhua o tōna aranga.
ROM 6:6 E mōhio ana hoki ki tēnei, kua rīpekatia ngātahitia me ia tō tātou tangata tawhito, kia hemo ai te tinana o te hara, kia mutu ai tō tātou ponongatanga ki te hara.
ROM 6:7 Ko te mea hoki kua mate, kua mawheto ia i te hara.
ROM 6:8 Ki te mea kua mate tahi tātou ko te Karaiti, e whakapono ana tātou e ora tahi anō tātou me ia.
ROM 6:9 E mātau ana hoki tātou, ka ara nei a te Karaiti i te hunga mate, heoi anō ōna matenga; kāhore he kīngitanga o te mate ki a ia ā mua tonu atu.
ROM 6:10 Ko tōna matenga hoki i mate ai ia, he mate kotahi ki te hara; ko tōna oranga ia, he ora ki te Atua.
ROM 6:11 Waihoki mahara iho ki a koutou, kua whakatūpāpakutia koutou ki te hara, e ora ana ia ki te Atua, i roto i a Īhu Karaiti.
ROM 6:12 Mō konei rā aua te hara e kīngi i roto i tō koutou tinana mate, e ngohengohe ai koutou ki tā ngā hiahia poke o taua tinana nei.
ROM 6:13 Kaua hoki e tukua ō koutou wāhi ki te hara hei kaimahi i te hē; engari, tukua atu koutou ki te Atua, he hunga kua ora i roto i te hunga mate, me ō koutou wāhi hoki hei kaimahi i te tika ki te Atua.
ROM 6:14 E kore hoki te hara e waiho hei rangatira mō koutou. Ehara i te mea kei raro koutou i te ture, engari, kei raro kē i te aroha noa.
ROM 6:15 He aha koia? Kia hara oti tātou, nō te mea ehara tātou i te ture, engari, nō te aroha noa? Kāhore rāpea!
ROM 6:16 Kāhore oti koutou i mātau, ki te tuku koutou i a koutou ki tētahi hei pononga, he pononga koutou nā tērā kua ngohengohe nā koutou ki tāna; nā te hara rānei, ā, mate iho, nā te ngohengohe rānei, ā, tika ake?
ROM 6:17 Ko tēnei me whakawhetai ki te Atua, ahakoa he pononga koutou nā te hara i mua, kua meinga ō koutou ngākau kia ngohengohe ki te ako i whakaakona ai koutou.
ROM 6:18 Nā, ka ātea nei koutou i te hara, ka meinga koutou he pononga nā te tika.
ROM 6:19 He kupu tangata tēnei nāku, nā te ngoikore o tō koutou kikokiko. Nā, i tukua rā ō koutou wāhi hei pononga mā te poke, mā te tutū, ki te mahi tutū; waihoki me tuku ō koutou wāhi āianei hei pononga mā te tika, puta ake he tapu.
ROM 6:20 I a koutou hoki e pononga ana ki te hara, e ātea ana koutou i te tika.
ROM 6:21 Nā, i taua wā, he aha ngā hua i a koutou o ngā mea e whakamā nā koutou ināianei? He mate hoki te mutunga o aua mea.
ROM 6:22 Tēnā ko tēnei, ka ātea nei koutou i te hara, ā, ka meinga hei pononga mā te Atua, ko ngā hua ki a koutou he tapu, ā, ko te tukunga iho he ora tonu.
ROM 6:23 Ko ngā utu hoki o te hara he mate; ko tā te Atua ia i hōmai ai he ora tonu, i roto i a Karaiti Īhu, i tō tātou Ariki.
ROM 7:1 Kāhore anō koutou kia mātau, e ōku tēina, e kōrero ana hoki ahau ki te hunga mātau ki te ture, hei rangatira te ture mō te tangata i te wā e ora ai ia?
ROM 7:2 Ko te wahine whai tāne hoki, e mau ana anō ia i te ture ki te tāne i a ia e ora ana; ki te mate ia te tāne, kua mawheto ia i te ture a te tāne.
ROM 7:3 Nā, ki te riro ia i te tangata kē i tāna tāne e ora ana anō, ka kīia ia he wahine pūremu. Tēnā, ka mate te tāne, e ātea ana ia i te ture, ka kore ia e pūremu ahakoa riro i te tangata kē.
ROM 7:4 Heoi, ko koutou anō hoki, e ōku tēina, kua meinga kia tūpāpaku ki te ture, nā te tinana o te Karaiti; kia riro ai koutou i tētahi atu, arā i tērā i whakaarahia i te hunga mate, kia whai hua ai tātou ki te Atua.
ROM 7:5 I a tātou hoki i te kikokiko, e mahi ana ngā hihiritanga o ngā hara, e whakaohokia nei e te ture, i roto i ō tātou wāhi, ā, hua ake ko te mate.
ROM 7:6 Ko tēnei kua mawheto mai tātou i te ture, kua mate hoki tātou ki te mea i puritia ai tātou; nō reira e mahi ana tātou i runga i te houtanga o te wairua, kāhore i runga i te tawhitotanga o te kupu tuhituhi.
ROM 7:7 Kia pēhea rā he kupu mā tātou? He hara rānei te ture? Kāhore rāpea! Engari, kīhai ahau i mātau ki te hara, me i kaua te ture; kāhore hoki ahau i mōhio ki te hiahia apo, me i kaua te ture te mea mai, “Aua koe e hiahia apo.”
ROM 7:8 Nā, ka mau te hara ki tēnei, ā, ka mahi i ngā hiahia apo katoa i roto i ahau, he mea nā te ture. Ki te kore hoki te ture ka mate te hara.
ROM 7:9 I ora hoki ahau i mua i te korenga o te ture. Nō te taenga mai ia o te kupu whakahau, ka ora ake te hara, ā, mate iho ahau.
ROM 7:10 Nā, ko te kupu whakahau i meinga rā hei ora, kitea kētia ana tēnei hei mate mōku.
ROM 7:11 Ka mau te hara ki tēnei, ka whakawai hoki i ahau i runga i te kupu whakahau, nāna ahau i mate ai.
ROM 7:12 Āe rā, he tapu te ture, me te kupu whakahau anō he tapu, he tika, he pai.
ROM 7:13 I riro koia te mea pai hei mate mōku? Kāhore rāpea! Engari, nā te hara i mea te mea pai hei mate mōku, kia whakakitea ai he hara te hara. Nā, ka ai te kupu whakahau hei mea kia tino nui noa atu.
ROM 7:14 E mātau ana hoki tātou nō te wairua te ture; ko ahau ia nō te kikokiko, kua hokona hei pārau mā te hara.
ROM 7:15 Ko tāku hoki e mahi nei kāhore e mōhiotia iho e ahau. Kāhore hoki e mahia e ahau tāku i pai ai; heoi ko tāku i kino ai, meatia ana tēnei e ahau.
ROM 7:16 Ki te mahia ia e ahau taua mea kīhai nei ahau i pai atu, e whakaae ana ahau ki te ture he pai.
ROM 7:17 Ko tēnei ehara i ahau i mahi, engari, nā te hara e noho nei i roto i ahau.
ROM 7:18 E mātau ana hoki ahau, kāhore he mea pai e noho ana i roto i ahau, arā i roto i tōku kikokiko. Ko te hiahia hoki kei ahau, ko te mea ia i te pai kāhore i ahau.
ROM 7:19 Ko te pai hoki e hiahiatia ana e ahau, kāhore e mahia e ahau. Engari te kino kīhai nei ahau i pai, mahia ana tēnei e ahau.
ROM 7:20 Ki te mahia ia e ahau taua mea pū kīhai nei ahau i pai atu, ehara i ahau nāna taua mea i mahi, engari, nā te hara e noho nei i roto i ahau.
ROM 7:21 Nā, kua kitea e ahau te ture, arā, kei te tata tonu te kino ki ahau e hiahia nei kia mea i te pai.
ROM 7:22 E āhuareka ana hoki ahau ki te ture a te Atua, arā tō roto tangata.
ROM 7:23 Otirā, kua kitea e ahau tētahi atu ture i roto i ōku wāhi, e whawhai ana ki te ture a tōku hinengaro, e mea ana i ahau hei taurekareka mā te ture a te hara, mā tēnei i roto nei i ōku wāhi.
ROM 7:24 Auē te mate i ahau! Mā wai ahau e whakaora i te tinana o tēnei mate?
ROM 7:25 Mā te Atua! E whakawhetai tonu ana ahau ki a ia i runga i a Īhu Karaiti, i tō tātou Ariki. Nā, e mahi ana ahau anō nei, arā, tōku hinengaro, ki te ture a te Atua, ko tōku kikokiko ia ki te ture a te hara.
ROM 8:1 Nā, kāhore e tau te hē ināianei ki te hunga i roto i a Karaiti Īhu.
ROM 8:2 Nā te ture hoki a te Wairua o te ora i roto i a Karaiti Īhu ahau i ātea ai i te ture a te hara, a te mate.
ROM 8:3 Ko te mea kīhai i taea e te ture, he ngoikore nōna i te kikokiko, tonoa mai ana e te Atua tāna Tama, i te āhua o te kikokiko hara, hei whakahere anō mō te hara, ā, whakataua ana e ia te hē ki te hara i roto i te kikokiko.
ROM 8:4 Kia rite ai tō te ture tikanga i roto i a tātou, kāhore nei e haere i runga i tā te kikokiko, engari, i tā te Wairua.
ROM 8:5 Ko te hunga hoki i runga i tā te kikokiko, whakaaro ana rātou ki ō te kikokiko; ko te hunga ia i runga i tā te Wairua, ki ō te Wairua.
ROM 8:6 Ko tō te kikokiko whakaaro hoki he mate, ko tō te Wairua ia he ora, he rangimārie.
ROM 8:7 He tikanga whawhai hoki ki te Atua te whakaaro ki te kikokiko e kore nei hoki e ngāwari ki te ture a te Atua, kāhore anō e āhei kia ngāwari;
ROM 8:8 ā, e kore e taea e te hunga i te kikokiko te whakamānawareka ki te Atua.
ROM 8:9 Otiia, kāhore koutou i te kikokiko, engari, i te Wairua, ki te mea e noho ana te Wairua o te Atua i roto i a koutou. Ki te kāhore ia te Wairua o te Karaiti i tētahi, ehara tēnei i a ia.
ROM 8:10 Tēnā, ki te mea kei roto a te Karaiti i a koutou, he tūpāpaku te tinana i te hara, he ora ia te wairua i te tika.
ROM 8:11 Ki te noho ia i roto i a koutou te Wairua o te kaiwhakaara o Īhu i te hunga mate, māna, mā te kaiwhakaara o Karaiti Īhu i roto i te hunga mate, e whakaora ake anō ō koutou tinana mate ki tōna Wairua e noho nā i roto i a koutou.
ROM 8:12 Nā reira, e ōku tēina, kāhore he tikanga o te kikokiko kei runga i a tātou, kia whai tātou i tāna.
ROM 8:13 Ki te noho hoki koutou i runga i tā te kikokiko, ka mate koutou; ki te mea ia ka whakamate koutou i ngā mahi a te tinana, he mea nā te Wairua, ka ora koutou.
ROM 8:14 Ko te hunga hoki e ārahina ana e te Wairua o te Atua, he tama rātou nā te Atua.
ROM 8:15 He teka hoki he wairua pononga kua riro nei i a koutou, e mataku ai anō koutou; engari, kua riro i a koutou te Wairua e mea ana i a koutou hei tamariki ake, e karanga ai koutou, “E Apa, e Pā!”
ROM 8:16 Ko taua Wairua rā anō hei whakaae ake ki ō tātou wairua, he tamariki tātou nā te Atua.
ROM 8:17 Ki te mea hoki he tamariki, kāti mō tātou te kāinga; mō tātou te kāinga o te Atua, mō tātou tahi ko te Karaiti; kia mamae rawa ake ai tātou tahi me ia, ka whakakorōriatia ngātahitia tātou me ia.
ROM 8:18 Ki tōku whakaaro iho hoki, he kore noa iho ngā mamae o tēnei wā, ki te whakaritea ki te korōria e whakakitea mai ki a tātou ā mua.
ROM 8:19 Ko te tūmanako hoki o te mea i hangā e tatari ana ki te whakakitenga mai o ngā tama a te Atua.
ROM 8:20 Kua meinga hoki te tekateka noa hei rangatira mō te mea i hangā, ehara i te mea nā tēnei ake i whakaae, engari, nā tā te kaiwhakarite i pai ai, i runga i te tūmanako,
ROM 8:21 tērā taua mea i hangā e whakaateatia mai i te whakataurekarekatanga a te pirau, whakarangatiratia ake ki roto ki te korōria o ngā tamariki a te Atua.
ROM 8:22 E mōhio ana hoki tātou, kei te ngunguru tahi, kei te mamae tahi, ngā mea hanga katoa taea noatia tēnei rā.
ROM 8:23 Ehara i te mea ko tērā anake, engari, ko tātou anō hoki kua whiwhi nei ki te hua mātāmua, arā ki te Wairua, inā, e auē ana hoki tātou i roto i a tātou, e tatari ana ki te whakatamarikitanga, arā ki te whakaoranga o ō tātou tinana.
ROM 8:24 Nā te tūmanako hoki tātou i ora ai. Tēnā, ka kitea te mea e tūmanakohia atu ana, kore ake te tūmanako. Ko wai oti e tūmanako ki te mea e kitea nei e ia?
ROM 8:25 Ki te tūmanako atu ia tātou ki te mea kāhore nei e kitea, kātahi ka āta tāria māriretia atu e tātou.
ROM 8:26 Waihoki ko te wairua hei hoa mō tātou e ngoikore nei. Kāhore hoki tātou e mātau me pēhea e tika ai tā tātou īnoi; otiia, ko te Wairua tonu anō te īnoi ana mō tātou ki ōna auē e kore nei e taea te whakahua.
ROM 8:27 Ā, ko te kaititiro i ngā ngākau, e mōhio ana ki te hinengaro o te Wairua, ko tērā hoki e īnoi ana mō te hunga tapu i runga i tā te Atua i pai ai.
ROM 8:28 Nā, e mātau ana tātou, kei te mahi tahi ngā mea katoa i te pai mō te hunga e aroha ana ki te Atua, arā mō te hunga i karangatia i runga i tāna i whakatakoto ai.
ROM 8:29 Ko āna hoki i mōhio ai i mua, i whakaritea anō e ia i mua kia rite ki te āhua o tāna Tama, kia ai ia hei muanga i roto i ngā tēina tokomaha.
ROM 8:30 Ā, ko āna i whakarite ai i mua, ko ēnā anō i karangatia e ia; ā, ko āna i karanga ai, ko ēnā anō i whakatikaia e ia; ā, ko āna i whakatika ai, ko ēnā anō i whakakorōriatia e ia.
ROM 8:31 Nā, kia pēhea tā tātou kōrero ki ēnei mea? Ki te mea ko te Atua hei hoa mō tātou, ko wai hei whawhai ki a tātou?
ROM 8:32 Ko ia kīhai nei i kaiponu i tāna ake Tama, heoi, tukua mai ana e ia mō tātou katoa, e kore ianei ia e tāpiri noa mai ki a ia i ngā mea katoa mō tātou?
ROM 8:33 Ko wai hei whakapā hē ki ā te Atua i whiriwhiri ai? Ko te Atua rā hei whakatika.
ROM 8:34 Ko wai ianei hei whakatau hē? Ko Karaiti Īhu rā, i mate nei, āe rawa hoki, ko ia rā kua whakaarahia ake nei i te mate, ā, kei te ringa matau o te Atua, ko ia hoki kei te īnoi mō tātou.
ROM 8:35 Mā wai tātou e momotu kē i te aroha o te Karaiti? Mā te whakapāwera rānei, mā te mamae, mā te whakatoi, mā te matekai, mā te kākahukore, mā te mate ka tata, mā te hoari rānei?
ROM 8:36 Ko te mea hoki ia i tuhituhia: “Nā te whakaaro ki a koe mātou i whakamatea ai i te rā roa nei; kīia ana mātou hei hipi e patua ana.”
ROM 8:37 Engari, i ēnei mea katoa hira ake te wikitōria i a tātou, he mea nāna i aroha nei ki a tātou.
ROM 8:38 Ū tonu hoki tōku whakaaro, e kore te mate, te ora rānei, e kore ngā anahera, ngā rangatiratanga rānei, e kore ngā mea onāianei, e kore ngā mea e puta mai ā mua, e kore ngā mana,
ROM 8:39 e kore te tiketike, e kore te hōhonu, e kore tētahi atu mea hangā, e kaha ki te momotu i a tātou i te aroha o te Atua, i tērā i roto nei i a Karaiti Īhu, i tō tātou Ariki.
ROM 9:1 He pono tāku kōrero i roto i a te Karaiti, kāhore āku teka, ā, e whakaae ana tōku hinengaro ki ahau i roto i te Wairua Tapu,
ROM 9:2 he nui atu tōku pōuri, mau tonu te mamae o tōku ngākau.
ROM 9:3 He pai hoki ki ahau me i kangā ahau, me i motuhia i a te Karaiti, he whakaaro ki ōku tēina, arā, ki ōku whanaunga o te wāhi ki te kikokiko.
ROM 9:4 Nō Īharaira nei rātou; nō rātou nei te whakatamarikitanga, te korōria, ngā kawenata, te hōmaitanga o te ture, te karakia ki te Atua, me ngā kupu whakaari;
ROM 9:5 nō rātou nei ngā mātua, nō rātou anō a te Karaiti i te wāhi ki te kikokiko, ko ia nei kei runga ake i ngā mea katoa, ko te Atua e whakapaingia ana ake ake. Āmine.
ROM 9:6 Ehara ia i te mea kua taka te kupu a te Atua. Ko te hunga hoki o Īharaira, ehara i te mea nō Īharaira katoa;
ROM 9:7 ahakoa he uri nō Āperahama, ehara rātou katoa i te tamariki; engari, “Kei a Īhaka te whakaingoatanga mō ōu uri.”
ROM 9:8 Arā, ehara i te mea ko ngā tamariki a te kikokiko ngā tamariki a te Atua, engari, ko ngā tamariki a te kupu whakaari, ko rātou ka kīia he uri.
ROM 9:9 He kupu whakaari hoki tēnei, “Kia taka tēnei wā ka haere mai ahau, ā, ka whānau he tama mā Hera.”
ROM 9:10 Nā, ehara i te mea ko tēnei anake; i a Ripeka anō ia kua hapū i tētahi, arā i a Īhaka, i tō mātou matua.
ROM 9:11 I ngā tama hoki kāhore anō i whānau noa, kāhore anō hoki i mahi te pai, i te kino rānei, he mea kia ū ai tā te Atua i whakatakoto ai mō te whiriwhiringa, ehara i ngā mahi, engari, nā te kaikaranga;
ROM 9:12 ka kōrerotia ki a ia, “Ko te tuakana hei pononga mā te teina.”
ROM 9:13 Ko te mea ia i tuhituhia, “Kua aroha ahau ki a Hākopa, kua kino ki a Ēhau.”
ROM 9:14 Ka pēhea ai i konā tā tātou kōrero? He tikanga hē koia kei te Atua? Kāhore rāpea!
ROM 9:15 I mea hoki ia ki a Mohi, “E tohu ahau i tāku e tohu ai, e atawhai ahau ki tāku e atawhai ai.”
ROM 9:16 Nō reira, ehara i te mea nā te hiahia o te tangata, nā te oma rānei o te tangata, engari, nā te Atua, ko ia e tohu nei.
ROM 9:17 E mea nei hoki te karaipiture ki a Parao, Mō konei pū anō koe i whakaarahia ai e ahau, kia ai koe hei whakakite i tōku kaha, kia kōrerotia hoki tōku ingoa ki te whenua katoa.
ROM 9:18 Nā konā, e tohungia ana e ia, ko tāna e pai ai, ko tāna hoki e pai ai e whakapakeketia ana e ia.
ROM 9:19 Nā, tērā koe e mea mai ki ahau, “He aha ia i riri tonu ai? Ko wai hoki e whakakeke ana ki tāna i pai ai?”
ROM 9:20 Ha, e te tangata nei, ko wai koe hei whakahoki kupu ki te Atua? Mā te mea hanga koia e mea ki tōna kaihanga, “He aha ahau i hangā ai e koe kia pēnei?”
ROM 9:21 He teka ianei kei te kaihanga rīhi te tikanga mō te paru, kia hangā tētahi wāhi o taua mea kotahi i pokepokea hei oko rangatira, tētahi wāhi hei mea ware?
ROM 9:22 He aha hoki, mehemea, i tōna whakaaro kia whakakitea tōna riri, ā, kia whakaputaina tōna kaha, ka whakaririka te Atua i runga i te manawanui ki ngā oko o te riri, e rite rawa nei mō te whakangaro?
ROM 9:23 Kia whakakitea anō hoki e ia ngā rawa o tōna korōria ki ngā oko o te mahi tohu, kua rite noa ake nei i a ia mō te korōria,
ROM 9:24 arā ki a tātou, i karangatia e ia, ehara i te mea nō ngā Hūrai anake, engari, nō ngā tauiwi anō hoki?
ROM 9:25 Ko tāna kupu anō tēnā i tā Hohea, “Ka kīia e ahau tērā ko tōku iwi, ehara nei i te iwi nōku; ā, he wahine e arohaina ana te wahine kīhai i arohaina.
ROM 9:26 Ā tēnei ake, i te wāhi i kōrerotia ai ki a rātou, ‘Ehara koutou i te iwi nōku’; ko reira rātou kīia ai ‘he tama nā te Atua ora.’ ”
ROM 9:27 Ko tā Ihāia karanga hoki mō Īharaira, “Ahakoa i rite te tokomaha o ngā tama a Īharaira ki te onepū o te moana, ko te toenga kau e ora.
ROM 9:28 Mā te Ariki hoki e whakatutuki tāna kupu ki runga i te whenua, māna e whakaoti, māna e poro tata.”
ROM 9:29 Ā, e kī rā a Ihāia i mua rā, “Me kāhore te toe i te Atua o ngā mano he whānau mō tātou, kua pērā tātou me Horoma, kua rite anō hoki ki Komora.”
ROM 9:30 Nā, kia pēhea tā tātou kōrero? Ko ngā tauiwi, kīhai nei i whai i te tika, kua tae rātou ki te tika, arā, ki te tika, nā te whakapono.
ROM 9:31 Ko Īharaira ia, whai ana i tētahi ture o te tika, kīhai rātou i tae ki taua ture.
ROM 9:32 Nā te aha? Nā te mea kīhai rātou i whai i runga i te whakapono, engari, ānō nā runga i ngā mahi. I tūtuki hoki ō rātou waewae ki te kāmaka tūtukitanga;
ROM 9:33 ko te mea hoki ia i tuhituhia: “Nanā, ka whakatakotoria e ahau ki Hiona he kāmaka tūtukitanga, he kōhatu whakahinga. Nā, ko te tangata e whakapono ana ki a ia, e kore e meinga kia whakamā.”
ROM 10:1 E ōku tēina, ko tā tōku ngākau i wawata ai, ko tōku īnoi hoki ki te Atua mō rātou, kia whakaorangia rātou.
ROM 10:2 E whakaae ana hoki ahau ki a rātou, he ngākau nui tō rātou ki te Atua, otiia, ehara i te mea mōhio.
ROM 10:3 I a rātou hoki e kūware ana ki tā te Atua tika, e whai ana kia whakaūkia ko tō rātou ake, kīhai rātou i ngohengohe ki te tika a te Atua.
ROM 10:4 Ko te Karaiti hoki te tukunga iho o te ture hei tika mō ngā tāngata whakapono katoa.
ROM 10:5 Kua tuhituhia hoki e Mohi, “Ko te tangata e whakarite ana i tā te ture tika, ka ora ia i reira.”
ROM 10:6 Ko te kupu ia tēnei o tō te whakapono tika, “Aua e mea i roto i tōu ngākau, ‘Ko wai hei kake ki te rangi?’ ” (Arā, ki te tiki atu i a te Karaiti ki raro).
ROM 10:7 “ ‘Ko wai rānei hei heke iho ki te hōhonu?’ ” (Arā, ki te tiki atu i a te Karaiti i roto i te hunga mate).
ROM 10:8 E pēhea ana oti? “E tata ana ki a koe te kupu, kei tōu māngai, kei tōu ngākau.” Ko ia tēnei, ko te kupu o te whakapono e kauwhau nei mātou;
ROM 10:9 arā, ki te whakaae tōu māngai ko Īhu te Ariki, ā, ki te whakapono tōu ngākau nā te Atua ia i whakaara ake i te hunga mate, e ora koe.
ROM 10:10 Mā te ngākau hoki kia whakapono ka tika ai; mā te māngai kia whakaae ka ora ai.
ROM 10:11 E mea ana hoki te karaipiture, “Ko ngā tāngata katoa e whakapono ana ki a ia e kore e meinga kia whakamā.”
ROM 10:12 Kāhore hoki he rerekētanga o te Hūrai, o te Kariki; ā, ko taua Ariki anō te Ariki o te katoa, ā, e hua ana āna taonga ki te hunga katoa e karanga ana ki a ia.
ROM 10:13 “E ora hoki ngā tāngata katoa e karanga ana ki te ingoa o te Ariki.”
ROM 10:14 Nā, me pēhea tā rātou karanga ki a ia, ki te kāhore i whakapono ki a ia? Me pēhea hoki tā rātou whakapono ki a ia, ki te kāhore i rongo ki a ia? Me pēhea hoki e rongo ai, ki te kāhore he kaikauwhau?
ROM 10:15 Ā, me pēhea e kauwhau ai, ki te kāhore e tonoa? Ko te mea ia i tuhituhia, “Anō te ātaahua o ngā waewae o te hunga kawe mai i te rongo whakahari o ngā mea papai!”
ROM 10:16 Otirā, kāhore rātou katoa i ngohengohe ki ngā rongo whakahari. E mea ana hoki a Ihāia, “E te Ariki, ko wai i whakapono ki tā mātou whakaatu?”
ROM 10:17 Inā, nā te rongo te whakapono, ā, ko te rongo nā te kupu a te Karaiti.
ROM 10:18 Otiia, ko tāku kupu tēnei, “Kāhore rānei rātou i rongo?” Koia rā ia: “Kua puta atu tō rātou reo ki te whenua katoa, ā rātou kupu hoki ki ngā tōpito o te ao.”
ROM 10:19 Ko tāku kupu ia tēnei: Kāhore ianei a Īharaira i mōhio? Nā Mohi te kupu tuatahi: “Māku koutou e whakaoho kia hae ki te hunga ehara i te iwi; ka meinga e ahau te iwi pōauau hei whakaoho i a koutou ki te riri.”
ROM 10:20 Ā, ka māia rawa a Ihāia, ka mea, “Kua kitea ahau e te hunga kīhai i rapu i ahau; kua whakakitea ahau ki te hunga kīhai nei i ui ki ahau.”
ROM 10:21 Ko tāna kupu ia mō Īharaira, “Pau noa te rā i totoro atu ai ōku ringa ki te iwi tutū ki te iwi whakahāwea.”
ROM 11:1 Nā, ko tāku kupu tēnei: kua peia oti e te Atua tāna iwi? Kāhore rāpea! Nō Īharaira anō hoki ahau, nō te uri o Āperahama, nō tō Pineamine iwi.
ROM 11:2 Kāhore hoki te Atua i pei i tāna iwi i mōhio ai i mua. Kāhore oti koutou i mātau ki te kōrero a te karaipiture i tā Irāia? I īnoi rā hoki ia ki te Atua, i whakahē i a Īharaira, i mea,
ROM 11:3 “E te Ariki, kua patua e rātou āu poropiti, kua whakahoroa āu āta; ko ahau anake hoki, kua mahue nei, ā, e whai ana rātou kia patua ahau.”
ROM 11:4 Heoi, e pēhea ana te whakahoki a te Atua ki a ia? “E whitu mano tāngata kua waiho e ahau māku, kāhore nei i piko te turi ki a Paara.”
ROM 11:5 Waihoki i te wā nei anō, tērā anō he toenga, he whiriwhiringa nā te aroha noa.
ROM 11:6 Ki te mea ia nā te aroha noa, ehara i te mea nā ngā mahi; pēnei ehara te aroha noa i te aroha noa.
ROM 11:7 Ha, he pēhea rā? Ko tā Īharaira e rapu nei, kīhai tēnei i taea e ia; otirā kua taea e te hunga whiriwhiri, ko ērā atu ia i whakapakeketia;
ROM 11:8 ko te mea hoki ia i tuhituhia, “Kua hoatu ki a rātou e te Atua he wairua hiamoe, he kanohi e kore ai rātou e kite, he taringa e kore ai e rongo; ā taea noatia tēnei rā.”
ROM 11:9 E mea ana hoki a Rāwiri, “Kia whakatupu māhanga tō rātou tēpu, hei rore hoki, hei tūtukitanga waewae, hei utu anō ki a rātou;
ROM 11:10 kia whakapōuritia ō rātou kanohi, kia kaua rātou e kite, ā, kia whakapikoa tonutia iho e koe tō rātou tuarā.”
ROM 11:11 Nā, ko tāku kupu tēnei, he tūtuki rānei tō rātou e hinga rawa ai? Kāhore rāpea! Engari, nā tō rātou hinga i puta ai te ora ki ngā tauiwi, he mea kia hae ai rātou.
ROM 11:12 Nā, ki te mea hei taonga mō te ao tō rātou hinganga, hei taonga anō mō ngā tauiwi tō rātou whakaitinga; tērā noa ake i tō rātou whakanuinga?
ROM 11:13 Ki a koutou, ki ngā tauiwi tēnei kupu āku, i te mea he āpōtoro ahau ki ngā tauiwi, e whakanui ana ahau i tāku mahi minita,
ROM 11:14 me kore e hae ngā tāngata o tōku kikokiko, kia ora ai ētahi o rātou i ahau.
ROM 11:15 Mehemea hoki ko tō rātou makanga atu hei houhanga rongo mō te ao, ka aha tō rātou tangohanga mai? He teka ianei he oranga ake i roto i te hunga mate?
ROM 11:16 Ki te mea hoki he tapu te mea mātāmua, ka pērā anō te pūranga; ki te tapu hoki te pakiaka, e pērā anō ngā manga.
ROM 11:17 Engari, ki te mea kua whatia atu ētahi o ngā manga, ā, ka honoa mai koe, te ōriwa ngahere, ki roto i ngā manga, ka whiwhi ngātahi ki te pakiaka o te mōmonatanga o te ōriwa;
ROM 11:18 aua e whakapehapeha ki ngā manga. Ki te whakapehapeha ia koe, ehara i te mea nāu i mau ake ai te pakiaka, engari, nā te pakiaka koe.
ROM 11:19 Nā, tērā koe e mea, “I whatia atu ngā manga, kia honoa iho ai ahau.”
ROM 11:20 Āe rā; nā te whakapono kore rātou i whatia atu ai, nā tōu whakapono koe i tū ai. Aua e whakakake, engari kia wehi.
ROM 11:21 Nā, ki te mea kīhai i tohungia ngā manga tupu e te Atua, e kore anō ia e tohu i a koe.
ROM 11:22 Nā, tirohia iho te ngāwari me te pakeke o te Atua: pakeke ki te hunga i hinga; ngāwari ki a koe, ki te ū koe ki tāna tikanga ngāwari; ki te kāhore, ka tapahia hoki koe.
ROM 11:23 Me rātou anō, ki te kore e ū ki tō rātou whakapono kore, ka honoa anō; e taea hoki rātou e te Atua te hono mai anō.
ROM 11:24 Mehemea hoki ka tapahia mai koe i te ōriwa ngahere, ā, ka honoa mai ki te ōriwa pai, he mea rerekē i te tikanga; tērā noa ake te honoa o ēnei, o ngā manga tupu, ki tō rātou ōriwa anō.
ROM 11:25 E kore hoki ahau e pai, e ōku tēina, kia kūware koutou ki tēnei mea ngaro, kei mea noa koutou he mātau koutou, kua tau tētahi wāhi o te whakapakeketanga ki a Īharaira, kia riro mai rā anō te tokomahatanga o ngā tauiwi.
ROM 11:26 Ko reira a Īharaira katoa ora ai; ko te mea hoki ia i tuhituhia: “Tērā e puta mai te Kaiwhakaora i Hiona, māna e kaupare te karakiakore i a Hākopa.
ROM 11:27 Ko tāku kawenata hoki tēnei ki a rātou, ina tangohia atu e ahau ō rātou hara.”
ROM 11:28 Nā, i runga i te rongopai he hoariri rātou, he whakaaro ki a koutou; i runga ia i te whiriwhiringa, e arohaina ana rātou, he whakaaro ki ngā mātua.
ROM 11:29 I ā te Atua hōmaitanga hoki, i tāna karangatanga, kāhore e puta kē te whakaaro.
ROM 11:30 Ka rite hoki ki a koutou kīhai i whakapono i mua ki te Atua, ināianei ia kua tohungia, he mea nā tō rātou whakapono kore;
ROM 11:31 waihoki kua kāhore ēnei i whakapono ināianei, kia tohungia ai anō rātou i runga i te mahi tohu i whiwhi nei koutou.
ROM 11:32 Kua oti hoki te katoa te kōpani e te Atua ki roto ki te whakateka, he mea kia tohungia ai e ia te katoa.
ROM 11:33 Anō te hōhonu, te hua ngātahi hoki o te whakaaro o te Atua me tōna mōhio! E kore āna tikanga e taea te rapu, ōna huarahi te whakataki!
ROM 11:34 “Ko wai hoki te mōhio ana ki te hinengaro o te Ariki? Ko wai hoki tōna hoa whakatakoto whakaaro?
ROM 11:35 Ko tā wai hoki kua mātua hoatu ki a ia, ā, ka whakahokia mai he utu ki a ia?”
ROM 11:36 Ko ngā mea katoa nei hoki, nāna, ā kei runga anō i a ia, ā, e ahu ana hoki ki a ia. Mōna te korōria ake tonu atu! Āmine.
ROM 12:1 Koia ahau ka īnoi nei ki a koutou, e ōku tēina, kia whakaaroa ngā mahi a te Atua, kia tāpaea atu ō koutou tinana hei whakahere ora, tapu, e manakohia ana e te Atua, he mahi nā tō koutou hinengaro.
ROM 12:2 Kaua hoki tō koutou āhua e rite ki tō tēnei ao; engari, kia puta kē, arā kia whakahoutia ō koutou hinengaro, kia whakamātautauria ai e koutou tā te Atua e pai ai, te mea e pai ana, e manakohia ana, e tino rite ana.
ROM 12:3 Ko tāku kupu hoki tēnei ki ngā tāngata katoa i roto i a koutou, he mea nā te aroha noa i hōmai nei ki ahau, kaua e hira ake te whakaaro o tētahi ki a ia anō i te mea i tika kia whakaaroa e ia; engari kia āta whakaaro, kia rite ki te wāhi o te whakapono i tuwhaina e te Atua ki tēnā, ki tēnā.
ROM 12:4 E rite ana hoki ki ō tātou wāhi ka maha nei i te tinana kotahi, kīhai ia i kotahi te mahi mā aua wāhi katoa.
ROM 12:5 Waihoki ko tātou tokomaha nei, he tinana kotahi i roto i a te Karaiti, ko tātou takitahi ia, he wāhi tētahi nō tētahi.
ROM 12:6 Nā, ka rerekē nei ngā mea i hōmai ki a tātou, he mea e rite ana ki te aroha noa i hōmai ki a tātou, ki te mea he mahi poropiti, me poropiti, kia rite anō ki te rahi o tō tātou whakapono;
ROM 12:7 he mahi minita, kia ū tātou ki tā tātou mahi minita; ko te kaiwhakaako, kia ū ki tāna mahi whakaako;
ROM 12:8 ko te kaiwhakahauhau, kia ū ki tāna whakahauhau; ko te kaihoatu, kia māhorahora te ngākau; ko te kaiwhakahaere kia uaua ki tāna mahi, ā, ko te kaiatawhai kia ngahau te āhua.
ROM 12:9 Ko te aroha, hei te mea tinihangakore. Kia whakarihariha ki te kino; kia ū ki te pai.
ROM 12:10 Ka aroha ki ngā tēina, kia tino pono te aroha tētahi ki tētahi; ka whakahōnore, kia nui tā tētahi i tētahi.
ROM 12:11 Kia uaua, kaua e māngere; kia toko tonu ake te wairua; me te mahi anō ki te Ariki.
ROM 12:12 Kia hari i runga i te tūmanako; kia manawanui ki te whakapāwera; kia ū ki te īnoi.
ROM 12:13 Whakawhiwhia te hunga tapu ina rawakore; kia mau ki te atawhai manuhiri.
ROM 12:14 Manaakitia te hunga e tūkino ana i ā koutou; manaakitia, kaua e kangā.
ROM 12:15 Kia hari tahi me te hunga hari, kia tangi tahi me te hunga tangi.
ROM 12:16 Kia kotahi te whakaaro o koutou tētahi ki tētahi. Kaua e whakakake te whakaaro, engari me whakaiti ki ngā mea pāpaku. Kei mea ake koutou he mōhio koutou.
ROM 12:17 Kaua e utua tā tētahi kino ki te kino. Whakaaroa ko ngā mea e pai ana ki mua i te aroaro o ngā tāngata katoa.
ROM 12:18 Ki te taea, whakapaua tā koutou kia mau te rongo ki ngā tāngata katoa.
ROM 12:19 Aua e rapu utu mō koutou, e ōku hoa aroha, engari, whakaatea atu i te riri: kua oti hoki te tuhituhi, “Māku te rapu utu; māku te hoatu utu,” e ai tā te Ariki.
ROM 12:20 “Nā, ki te matekai tōu hoariri; whāngainga; ki te matewai; whakainumia. Ki te pēnei hoki tāu mahi, ka pūrangatia e koe he waro kāpura ki tōna mātenga.”
ROM 12:21 Kei hinga koe i te kino, engari kia hinga te kino i tōu pai.
ROM 13:1 Kia ngohengohe ngā wairua katoa ki ngā mana nunui. Kāhore hoki he mana, nō te Atua anake; ko ngā mana o tēnei wā he mea whakarite nā te Atua.
ROM 13:2 Nā, ki te whakakeke tētahi ki te mana, e whakakeke ana ia ki tā te Atua i whakarite ai; ā, ko te mea hoki mō te hunga e whakakeke ana, he whakatau hē.
ROM 13:3 Ehara hoki ngā rangatira i te whakawehi mō ngā mahi pai, engari mō ngā mahi kino. E mea ana koe kia kaua e wehi i te mana? Meatia te pai, ā, he whakamoemiti tāna e hōmai ai ki a koe;
ROM 13:4 he minita hoki ia nā te Atua ki a koe mō te pai. Tēnā, ki te mahi koe i te kino, e wehi rā; ehara hoki tāna i te mau noa i te hoari. He minita hoki ia nā te Atua, he kairapu utu mō te riri ki te kaimahi i te kino.
ROM 13:5 Koia i takoto ai te tikanga kia ngohengohe koutou, ehara i te mea he whakaaro kau ki te riri, engari, ki tā te hinengaro anō hoki.
ROM 13:6 Nā konei hoki koutou i hoatu ai i te takoha. He minita hoki rātou nā te Atua, he hunga hoki e mau tonu ana ki tēnei mea pū anō.
ROM 13:7 Hoatu ngā mea i tika ki te katoa: he takoha tangata ki te tangata i tika ai te takoha tangata; he takoha taonga ki te tangata i tika ai te takoha taonga; he wehi ki te tangata i tika ai te wehi; he hōnore ki te tangata i tika ai te hōnore.
ROM 13:8 Kaua e nama ki tētahi, ko te aroha anake o tētahi ki tētahi; ko te tangata hoki e aroha ana ki tōna hoa tata, kua whakaritea e ia te ture.
ROM 13:9 Ko tēnei hoki, “Kaua e pūremu, Kaua e patu tangata, Kaua e tāhae, Kaua e hiahia ki tā te tangata”; ā, ki te mea tērā atu anō tētahi kupu ako, ka whakarāpopototia ki roto ki tēnei kupu, arā, “Kia aroha ki tōu hoa tata, ānō ko koe.”
ROM 13:10 E kore te aroha e kino ki tōna hoa; nō reira ko te aroha te whakaritenga o te ture.
ROM 13:11 Tēnei anō hoki tētahi, e mōhio ana tātou ki te tāima, kua taka noa ake tēnei te wā e ara ake ai koutou i te moe. Kua tata kē hoki ināianei tō tātou whakaoranga i tō te wā i whakapono tuatahi ai tātou.
ROM 13:12 Kua aua atu te pō, ka tata te ao. Mō konei rā kia whakarērea e tātou ngā mahi o te pōuri, kia kākahuria iho ngā kākahu whawhai o te mārama.
ROM 13:13 Kia pai tā tātou haere, kia rite ki tō te awatea; kauaka i ngā kakainga, i ngā haurangitanga, kaua i te pūremu, i ngā hiahia taikaha, kaua i te ngangau, i te hae.
ROM 13:14 Engari, kākahuria iho te Ariki, a Īhu Karaiti, kaua hoki e whakaaroa wawetia te kikokiko kia mahia ko ōna hiahia.
ROM 14:1 Ko te tangata he ngoikore te whakapono, manakohia, kauaka ia ki ngā tautohe whakaaro.
ROM 14:2 Ko tētahi hoki e whakapono ana he pai ngā mea katoa hei kai māna. Ko te tangata ia he ngoikore tōna whakapono e kai otaota ana.
ROM 14:3 Kaua te tangata e kai ana e whakahāwea ki te tangata kāhore e kai, kaua hoki te tangata kāhore e kai e whakahē i te tangata e kai ana. Kua manakohia hoki ia e te Atua.
ROM 14:4 Ko wai koe e whakahē nā i te pononga a tērā? Mā tōna rangatira ia e whakatū, e whakahinga rānei. Inā, ka whakatūria anō ia, e taea hoki ia e te Atua te whakatū.
ROM 14:5 Ki te whakaaro o tētahi, nui atu tētahi rā i tētahi, ki tō tētahi whakaaro ia he rite katoa ngā rā. Kia ū mārire ngā whakaaro o tētahi, o tētahi.
ROM 14:6 Ko te tangata e whakaaro ana ki te rā, he whakaaro ki te Ariki tōna whakaaro; ko te tangata e kai ana, he whakaaro ki te Ariki tāna kai, e whakawhetai atu ana hoki ia ki te Atua; ko te tangata kāhore e kai, he whakaaro ki te Ariki tāna kore e kai, e whakawhetai ana anō ia ki te Atua.
ROM 14:7 Ehara hoki i te mea ki a ia ake anō te ora o tētahi o tātou, ehara hoki i te mea ki a ia ake te mate o tētahi.
ROM 14:8 Tā te mea, ahakoa ora, e ora ana tātou ki te Ariki; ahakoa mate, e mate ana tātou ki te Ariki. Nā, ahakoa ora tātou, mate rānei, nā te Ariki tātou.
ROM 14:9 Ko te mea hoki tēnei i mate ai a te Karaiti, i ara ake ai anō, i ora ai anō, kia waiho ai ia hei Ariki ngātahi mō te hunga mate, mō te hunga ora.
ROM 14:10 Ko koe nā, he aha koe i whakahē ai i tōu teina? Me koe nā hoki, he aha koe i whakahāwea ai ki tōu teina? E tū katoa hoki tātou ki te nohoanga whakawā o te Atua.
ROM 14:11 Kua oti hoki te tuhituhi: “ ‘E ora ana ahau,’ e ai tā te Ariki, ‘e piko katoa ngā turi ki ahau, e whakaae anō hoki ngā arero katoa ki te Atua.’ ”
ROM 14:12 Āe rā, ka kōrerotia e tēnei, e tēnei o tātou te tikanga o āna mahi ki te Atua.
ROM 14:13 Nā, kāti tā tātou whakahē tētahi i tētahi. Engari, ko tēnei kia rite i a koutou, kia kaua e whakatakotoria he tūtukitanga waewae, he take whakahinga rānei mō tōna teina.
ROM 14:14 E mōhio ana ahau, ū tonu tōku whakaaro i roto i te Ariki, i a Īhu, kāhore he mea nōna ake anō tōna noa. Hāunga ia ki te mea tētahi he noa tētahi mea, e noa anō ki a ia.
ROM 14:15 Ki te mea hoki nā te kai i pōuri ai tōu teina, kāhore e mau ana tāu haere i runga i te aroha. Kei mate i tāu kai te tangata i mate nei a te Karaiti mōna.
ROM 14:16 Nā, kei kōrerotia kinotia tō koutou pai.
ROM 14:17 Ehara hoki te rangatiratanga o te Atua i te kai, i te inu; engari he tika, he rangimārie, he hari i roto i te Wairua Tapu.
ROM 14:18 Ko te tangata hoki ko ēnei hei mahinga māna ki a te Karaiti, ka āhuarekatia ia e te Atua, ka paingia hoki e ngā tāngata.
ROM 14:19 Nā, kia whai tātou i ngā mea e mau ai te rongo, i ngā mea anō hoki e hangā ai te pai o tētahi, o tētahi.
ROM 14:20 Kaua e waiho te kai hei whakahoro mō tā te Atua mahi. He mā hoki ngā mea katoa; otiia, he kino ki te tangata e kai ana me te whakahē tōna ngākau.
ROM 14:21 He mea pai tonu kia kaua e kai kikokiko, kia kaua e inu wāina, aha rānei e tūtuki ai tōu teina.
ROM 14:22 Ko te whakapono i a koe nā, waiho i a koe anō i te aroaro o te Atua. Ka hari te tangata kāhore e whakatau i te hē ki a ia anō mō te mea i whakapaia e ia māna.
ROM 14:23 Ki te ruarua ia tētahi, ka tau te hē ki a ia ki te kai ia; nō te mea ehara i te kai whakapono. He hara hoki ngā mea katoa kīhai nei i puta ake i te whakapono.
ROM 15:1 Ko te mahi tika mā tātou, mā te hunga kaha, he pīkau i ngā ngoikoretanga o te hunga kaha kore; kaua hoki e whai i tā tātou ake i āhuareka ai.
ROM 15:2 Me whai tēnā, tēnā o tātou kia āhuareka mai tōna hoa, tōna hoa mō te mea e pai ana hei hanga i tōna whakapono.
ROM 15:3 Kīhai hoki a te Karaiti i whai ki tāna ake i āhuareka ai; engari, i rite ki te mea kua oti te tuhituhi, “Ko ngā tāwainga a te hunga e tāwai ana i a koe kua tau ki ahau.”
ROM 15:4 Ko ngā mea katoa hoki i tuhituhia i mua he mea tuhituhi hei whakaako i a tātou, kia whai tūmanakohanga ai tātou, i te mea ka whakamanawanui ka whakamārietia hoki e ngā karaipiture.
ROM 15:5 Heoi, mā te Atua o te manawanui, o te whakamārie, e hoatu ki a koutou kia kotahi te whakaaro o tētahi ki tētahi, kia rite ki tā Karaiti Īhu;
ROM 15:6 kia kotahi ai te whakaaro, kia kotahi ai te māngai, e whakakorōria ai koutou i te Atua, arā i te Matua o tō tātou Ariki, o Īhu Karaiti.
ROM 15:7 Nā, me whakahoa koutou tētahi ki tētahi, kia rite ki a te Karaiti i mea nei i a tātou hei hoa mōna, kia whai korōria ai te Atua.
ROM 15:8 Ko tāku kupu hoki tēnei, i meinga a te Karaiti hei minita ki te kotinga, he whakaaro ki te pono o te Atua, kia ū ai ngā mea i whakaaria ki ngā mātua.
ROM 15:9 Kia whakakorōria ai hoki ngā tauiwi i te Atua mō tāna mahi tohu, kia pērā ai me te mea i tuhituhia: “Mō konei ka whakawhetai ahau ki a koe i waenganui o ngā tauiwi, ka hīmene ki tōu ingoa.”
ROM 15:10 Tēnei anō tētahi kupu ana, “Kia hari tahi, e ngā tauiwi, me tāna iwi.”
ROM 15:11 Tēnei anō hoki, “Whakamoemititia te Ariki, e ngā tauiwi katoa; whakamoemititia anō ia, e ngā iwi katoa.”
ROM 15:12 E mea ana hoki a Ihāia, “Tērā e whai pakiaka a Hehe, me tētahi e whakatika ake ana hei rangatira mō ngā tauiwi; ko ia hei tūmanakohanga mā ngā tauiwi.”
ROM 15:13 Nā, mā te Atua, nāna nei te tūmanako, e whakakī koutou ki te hari katoa, ki te rangimārie, i runga i te whakapono, kia hua ai tō koutou tūmanako, i runga i te kaha o te Wairua Tapu.
ROM 15:14 Nā, e ū ana tōku ake whakaaro ki a koutou, e ōku tēina, e kī ana koutou i te pai, whawhao rawa ki te mātauranga katoa, ā, e taea anō e koutou te tohutohu tētahi i tētahi.
ROM 15:15 Otiia, i nui ake ai tōku māia ki te tuhituhi pēnei ki a koutou, e ōku tēina, he whakamahara anō i a koutou, he mea nā te aroha noa kua hōmai nei ki ahau e te Atua.
ROM 15:16 I meinga ai ahau hei minita mā Īhu Karaiti ki ngā tauiwi, hei minita i te rongopai o te Atua, kia manakohia ai te whakahere o ngā tauiwi, he mea whakatapu nā te Wairua Tapu.
ROM 15:17 Nā, kua whai whakamanamanatanga nei ahau i roto i a Karaiti Īhu i ngā mea a te Atua.
ROM 15:18 E kore hoki ahau e māia ki te kōrero ki ētahi mea, ko ngā mea anake kua mahia e te Karaiti nā roto i ahau, hei mea kia ngohengohe mai ngā tauiwi, arā, nā tāku kupu, nā tāku mahi,
ROM 15:19 i runga i te kaha o ngā tohu, o ngā mea whakamīharo, i runga i te kaha o te Wairua Tapu; nō ka whakapaua e ahau te kauwhau i te rongopai o te Karaiti atu i Hiruhārama, ā taka noa, ki Iririkuma rawa.
ROM 15:20 Āe rā, ko ia tēnei tāku tohe ki te kauwhau i te rongopai, ehara i te mea ki ngā wāhi kua whakahuatia nei a te Karaiti ki reira, kei hanga whare ahau ki runga ki a tētahi atu tūranga.
ROM 15:21 Engari, kia rite ki te mea i tuhituhia: “E kite te hunga kīhai nei i kōrerotia ia ki a rātou, ā, e mātau te hunga kīhai i rongo.”
ROM 15:22 Nā, konei anō i maha ai ōku whakawarenga, te tae atu ai ahau ki a koutou.
ROM 15:23 Otiia ināianei, kua kore nei he wāhi mōku i ēnei whenua, ā, i te mea he maha ngā tau i wawata ai ahau kia tae atu ki a koutou,
ROM 15:24 ina tūpono tāku haere ki Hipania. E tūmanako ana hoki ahau kia kite i a koutou i taua haerenga ōku, ā, kia kawea pērātia atu ahau e koutou, ina anō ia kia mātua rite tētahi wāhi o tōku ngākau i te kitenga i a koutou.
ROM 15:25 Ināianei ia, e mea ana ahau, e haere ana tēnei ahau ki Hiruhārama, ki te mahi mea mā te hunga tapu.
ROM 15:26 Kua pai hoki a Makeronia rāua ko Akāia kia meinga tētahi kohikohi mā ngā mea rawakore o te hunga tapu i Hiruhārama.
ROM 15:27 Āe rā, i pai anō rātou ki te pērā, ā, e tika ana anō kia hoatu ki a rātou. I te mea kua uru nei ngā tauiwi ki ā rātou mea o te wairua, waihoki he tika anō kia mahia e ēnei ētahi mea o te kikokiko mā rātou.
ROM 15:28 Nā, kia oti tēnei i ahau, ā, hīri rawa tēnei hua hei mea mā rātou, ka tika atu ahau mā koutou nā ki Hipania.
ROM 15:29 Ā, e mātau ana ahau, ka haere atu ahau ki a koutou, tērā ahau e haere atu i runga i te hua noa iho o te manaakitanga o te rongopai o te Karaiti.
ROM 15:30 Nā, he tohe tēnei nāku ki a koutou, e ōku tēina, he whakaaro ki tō tātou Ariki, ki a Īhu Karaiti, nā te aroha hoki o te Wairua, kia tohe tahi koutou me ahau i ā koutou īnoi ki te Atua mōku;
ROM 15:31 kia whakaorangia ahau i te hunga whakateka i Hūria; kia manakohia anō e te hunga tapu tāku minitatanga mō Hiruhārama;
ROM 15:32 kia haere hari atu ai ahau ki a koutou, ki te pai te Atua, kia whakatā tahi ai me koutou.
ROM 15:33 Nā, kia noho te Atua o te rangimārie ki a koutou katoa. Āmine.
ROM 16:1 Tēnā tō mātou tuahine, a Pīpī, te tukua atu nā e ahau ki a koutou, he kaimahi ia nā te hāhi i Kenekerea.
ROM 16:2 Hei manuhiri ia mā koutou i roto i te Ariki, kia rite ki tā te hunga tapu tikanga, ā, kia āwhina koutou i a ia ki ngā mea e matea e ia. He tokomaha hoki āna i atawhai ai, ahau anō hoki.
ROM 16:3 Oha atu ki a Pirihira rāua ko Akuira, ki ōku hoa mahi i roto i a Karaiti Īhu,
ROM 16:4 nā rāua nei hoki ō rāua nā kakī i tāku kia ora ai ahau. Ehara i te mea ko ahau anake e whakawhetai ana ki a rāua, engari, ko ngā hāhi katoa hoki o ngā tauiwi.
ROM 16:5 Oha atu anō ki te hāhi i tō rāua whare. Oha atu ki a Epainetu, ki tāku i aroha ai, ko ia hoki tā te Karaiti mātāmua o Āhia.
ROM 16:6 Oha atu ki a Meri, he nui tāna mahi ki a mātou.
ROM 16:7 Oha atu ki a Anaroniku rāua ko Hunia, ōku whanaunga, ōku hoa herehere anō hoki, he ingoa nunui nei o rāua i roto i ngā āpōtoro, nō mua nei i ahau tō rāua urunga ki a te Karaiti.
ROM 16:8 Oha atu ki a Amapiria, ki tāku i aroha ai i roto i te Ariki.
ROM 16:9 Oha atu ki a Urupane, ki tō mātou hoa mahi i roto i a te Karaiti, ki a Takuha anō hoki, ki tāku i aroha ai.
ROM 16:10 Oha atu ki a Apere, e paingia ana i roto i a te Karaiti. Oha atu ki a Aritopuru mā.
ROM 16:11 Oha atu ki a Herōriona, ki tōku whanaunga. Oha atu ki a Nakihu mā, ki ngā mea i roto i te Ariki.
ROM 16:12 Oha atu ki a Taraipine rāua ko Taraipoha, e mahi nei i roto i te Ariki. Oha atu ki a Perahi, e arohaina nei, he nui nei tāna mahi i roto i te Ariki.
ROM 16:13 Oha atu ki a Rupuha, i whiriwhiria i roto i te Ariki, ki tōna whaea, arā, ki tō māua tahi.
ROM 16:14 Oha atu ki a Ahunikiritu, rātou ko Perekona, ko Herama, ko Pataropa, ko Herami, ki ngā tēina anō e noho ana i a rātou.
ROM 16:15 Oha atu ki a Piroroku rāua ko Hūria, ki a Nireu rāua ko tōna tuahine, ki a Orimapa rātou ko te hunga tapu katoa e noho ana i a rātou.
ROM 16:16 Oha atu tētahi ki tētahi, hei te kihi tapu anō. Tēnei te oha atu nei ngā hāhi katoa a te Karaiti ki a koutou.
ROM 16:17 Nā, he tohe tēnei nāku ki a koutou, e ōku tēina, tirohia iho te hunga e mahi ana i ngā wehewehenga, i ngā tūtukitanga waewae, he mea puta kē i te whakaakoranga i whakaakona ai koutou. Tahuri atu i a rātou!
ROM 16:18 Ko te hunga pērā hoki kāhore i te mahi ki tō tātou Ariki, ki a Īhu Karaiti, engari ki tō rātou ake kōpū. E tinihanga ana hoki rātou i ngā ngākau o te hunga kinokore ki ā rātou kōrero māeneene, ki ā rātou kupu whakapaipai.
ROM 16:19 Kua pakū hoki ki ngā tāngata katoa te rongo o tō koutou ngohengohe. Koia ahau ka hari nei ki a koutou; e mea ana hoki ahau kia whai whakaaro koutou ki te pai, kia kūware ki te mea kino.
ROM 16:20 Nā tērā te Atua o te rangimārie e hohoro te kuru i a Hātana ki raro i ō koutou waewae. Kia tau ki a koutou te aroha noa o tō tātou Ariki, o Īhu Karaiti.
ROM 16:21 Tēnei te oha atu nei ki a koutou a Tīmoti, tōku hoa mahi a Rūhiu, a Hahona, a Hohipate, ōku whanaunga.
ROM 16:22 Ko ahau tēnei, ko Teretiu, ko te kaituhituhi o tēnei pukapuka, te oha atu nei ki a koutou i roto i te Ariki.
ROM 16:23 Tēnei te oha atu nei ki a koutou a Kaiu te kaiatawhai ōku, o te hāhi katoa. Tēnei te oha atu nei a Eratu, kaitiaki o ngā mea o te pā, rāua ko te teina, ko Kuaratu.
ROM 16:24 Kia tau ki a koutou katoa te aroha noa o tō tātou Ariki, o Īhu Karaiti. Āmine.
ROM 16:25 Nā, he kaha nei te Atua ki te whakaū i a koutou, i runga i ngā ritenga o tāku rongopai, o te kauwhautanga hoki o Īhu Karaiti, o te whakakitenga mai anō o te mea ngaro, kīhai nei i rangona nō te tīmatanga rā anō o te ao,
ROM 16:26 ā, kua whakamāramatia mai ināianei e ngā karaipiture a ngā poropiti, he mea whakarite mai nā te Atua ora tonu, ā, whakapuakina mai ana ki ngā tauiwi katoa kia ngohengohe ai rātou ki tā te whakapono.
ROM 16:27 Waiho atu i te Atua, ko ia nei anake te Mea mātau, te korōria i roto i a Īhu Karaiti, ake ake, Āmine.
1CO 1:1 Nā Pāora, i pai nei te Atua kia karangatia hei āpōtoro mā Īhu Karaiti, nā te teina hoki, nā Hotene:
1CO 1:2 Ki te hāhi a te Atua i Koriniti, ki te hunga kua oti te whakatapu i roto i a Karaiti Īhu, kua karangatia hei hunga tapu, rātou ko te hunga katoa i ngā wāhi katoa e karanga ana ki te ingoa o tō tātou Ariki, o Īhu Karaiti, o tō rātou Ariki, o tō tātou:
1CO 1:3 Kia tau ki a koutou te aroha noa me te rangimārie, he mea nā te Atua, nā tō tātou Matua, nā te Ariki hoki, nā Īhu Karaiti.
1CO 1:4 He whakawhetai tonu tāku mahi ki tōku Atua mō koutou, mō te aroha noa o te Atua kua hōmai nei ki a koutou i roto i a Karaiti Īhu;
1CO 1:5 kua meinga hoki kia hua ngā mea katoa mā koutou i roto i a ia, te whakapuaki kōrero, te mātauranga;
1CO 1:6 pēnā hoki me te whakaaturanga i a te Karaiti kua ū nā i roto i a koutou:
1CO 1:7 i kore ai koutou e hapa i tētahi mea hōmai; i a koutou e tatari nā ki te whakakitenga mai o tō tātou Ariki, o Īhu Karaiti.
1CO 1:8 Māna hoki koutou e whakaū ā taea noatia te mutunga, kia kore ai koutou e ekengia e te kupu i te rā o tō tātou Ariki, o Īhu Karaiti.
1CO 1:9 He pono te Atua, nāna nei koutou i karanga kia uru tahi ki tāna Tama, ki a Īhu Karaiti, ki tō tātou Ariki.
1CO 1:10 Nā, he tohe tēnei nāku ki a koutou, e ōku tēina, i runga i te ingoa o tō tātou Ariki, o Īhu Karaiti, kia kotahi tā koutou kōrero katoa, ā, kia kaua he wehewehenga i roto i a koutou; engari, kia tuituia koutou i runga i te ngākau kotahi, i te whakaaro kotahi.
1CO 1:11 Kua oti hoki koutou te tohutohu mai, e ōku tēina, e te hunga o te whare o Koroi, tēnā ngā tautohetohe kei roto i a koutou.
1CO 1:12 Anei te tikanga o tāku kōrero, kei te kī tēnā o koutou nā, “Nō Pāora ahau,” ā, “Nō Aporo ahau,” ā, “Ko ahau nō Kipa. Ko ahau nō te Karaiti.”
1CO 1:13 Kua oti koia a te Karaiti te wāhi? I rīpekatia rānei a Pāora mō koutou? I iriiria rānei koutou i runga i te ingoa o Pāora?
1CO 1:14 E whakawhetai ana ahau ki te Atua, mōku kīhai i iriiri i tētahi o koutou, ko Kirihipu anake rāua ko Kaiu;
1CO 1:15 kei waiho e te tangata hei kōrero, nāku koutou i iriiri i runga i tōku ingoa.
1CO 1:16 (Nāku anō i iriiri ngā tāngata o te whare o Tepana; i kō ake, kāhore ahau i te mahara ki tāku iriiringa i tētahi atu.)
1CO 1:17 Kīhai hoki ahau i tonoa e te Karaiti ki te iriiri, engari, ki te kauwhau i te rongopai; ehara i te mea i runga i te mōhio ki ngā kupu, kei whakakāhoretia te rīpeka o te Karaiti.
1CO 1:18 Ko te kōrero hoki o te rīpeka ki te hunga e whakangaromia ana he mea wawau; ki a tātou ia, ki te hunga e whakaorangia ana, ko te kaha tērā o te Atua.
1CO 1:19 Ka oti hoki te tuhituhi: “Ka ngaro i ahau te whakaaro nui o te hunga whakaaro, ka kore hoki i ahau te mahara o te hunga mahara.”
1CO 1:20 Kei hea te tangata whakaaro? Kei hea te karaipi? Kei hea te tangata tohe o tēnei ao? Kāhore anō koia i whakakūwaretia e te Atua te whakaaro nui o tēnei ao?
1CO 1:21 I te mea hoki i runga i tō te Atua whakaaro nui, kīhai ngā whakaaro nui o te ao i mōhio ki te Atua. Nā, ka pai te Atua kia meinga te kūware o te kupu kauwhau hei whakaora i te hunga e whakapono ana.
1CO 1:22 Inā hoki ko tā ngā Hūrai he tono tohu, ko tā ngā Kariki he rapu whakaaro nui;
1CO 1:23 ko tā mātou ia he kauwhau i a te Karaiti i rīpekatia, he tūtukitanga waewae ki ngā Hūrai, he mea kūware ki ngā Kariki;
1CO 1:24 ki te hunga ia e karangatia ana, ahakoa Hūrai, ahakoa Kariki, ko te Karaiti, ko te kaha o te Atua, ko te whakaaro mōhio o te Atua.
1CO 1:25 Nō te mea he kūware nō te Atua nui atu te mōhio i ngā tāngata; he ngoikore nō te Atua kaha atu i ngā tāngata.
1CO 1:26 Titiro oti ki tō koutou karangatanga, e ōku tēina, kīhai i tokomaha te hunga whakaaro o te wāhi ki te kikokiko, kīhai i tokomaha te hunga nunui, kīhai i tokomaha ngā rangatira, e karangatia ana.
1CO 1:27 Engari, i whiriwhiria e te Atua ko ngā mea kūware o te ao, hei mea e whakamā ai te hunga whakaaro; i whiriwhiria anō e te Atua ko ngā mea ngoikore o te ao, hei mea e whakamā ai ngā mea kaha.
1CO 1:28 Ko ngā mea ware o te ao, ko ngā mea e whakahāweatia ana, ko ēnā i whiriwhiria e te Atua, āe, ko ngā mea kāhore noa iho, kia whakakāhoretia ai e ia ngā tino mea ake;
1CO 1:29 kia kore ai tētahi kikokiko e whakamanamana i te aroaro o te Atua.
1CO 1:30 Nāna hoki koutou i roto i a Karaiti Īhu, kua meinga nei ia hei take whakaaro nui mō tātou, he mea nā te Atua, hei tika, hei whakatapu, hei hoko.
1CO 1:31 Kia rite ai ki te mea kua oti te tuhituhi, “Ki te whakamanamana tētahi, me whakamanamana ia ki te Ariki.”
1CO 2:1 Ko ahau, e ōku tēina, i ahau i haere atu ai ki a koutou, kīhai ahau i haere atu me te pai kupu, me te hua rānei o te whakaaro, i ahau i kauwhau ai ki a koutou i te mea ngaro a te Atua.
1CO 2:2 I takoto hoki tōku whakaaro, kia kaua ahau e mātau ki tētahi mea i roto i a koutou, ko Īhu Karaiti anake, ko ia hoki i rīpekatia.
1CO 2:3 Ā, i a koutou ahau me te ngoikore, me te wehi, me te tūiri nui.
1CO 2:4 Ko tāku kōrero me tāku kauwhau ehara i te kupu whakapati nā tō te tangata whakaaro nui, engari, he whakakitenga nā te Wairua, nā te kaha,
1CO 2:5 kia kore ai tō koutou whakapono e tū i runga i o te tangata whakaaro nui, engari, i tō te Atua kaha.
1CO 2:6 He ahakoa rā e kōrero ana mātou i te whakaaro nui ki waenganui i te hunga tino tika. Ehara anō ia i te whakaaro mōhio nō tēnei ao, nō ngā rangatira rānei o tēnei ao, e memeha haere nei.
1CO 2:7 Engari, e kōrero ana mātou i te whakaaro nui o te Atua i roto i te mea ngaro, i te whakaaro mōhio i huna rā, ko tā te Atua i whakatakoto ai i mua o ngā ao, hei whakakorōria mō tātou.
1CO 2:8 Kīhai nei tētahi o ngā rangatira o tēnei ao i mātau; me i mātau hoki rātou, kua kāhore e rīpekatia e rātou te Ariki o te korōria.
1CO 2:9 Engari, ka rite ki te mea i tuhituhia rā: “Ko ngā mea kāhore te kanohi i kite, kāhore te taringa i rongo, kāhore anō i tapoko noa ki te ngākau o te tangata, ko ngā mea kua rite i te Atua mō te hunga e aroha ana ki a ia.”
1CO 2:10 Otiia, kua whakakitea mai aua mea ki a tātou e te Atua mā tōna Wairua. E rapu ana hoki te Wairua i ngā mea katoa, āe, i ngā mea hōhonu a te Atua.
1CO 2:11 Ko wai oti o ngā tāngata e mātau ana ki ngā mea a te tangata? Ko te wairua anake o te tangata i roto i a ia? Waihoki ko ngā mea a te Atua e kore e mātauria e tētahi, engari e te Wairua o te Atua.
1CO 2:12 Otiia, ko te wairua i riro mai nei i a tātou, ehara i te wairua o te ao, engari, ko te Wairua e ahu mai nei i te Atua; kia mātau ai tātou ki ngā mea kua oti nei te hōmai e te Atua ki a tātou.
1CO 2:13 Nā, ka kōrero mātou i aua mea, ehara ngā kupu i te whakaaro mōhio o te tangata i whakaako mai, engari, he mea whakaako nā te Wairua Tapu; e whakariterite ana i ngā mea wairua ki ngā mea wairua.
1CO 2:14 Nā, e kore te tangata i te ngākau māori e tango i ngā mea o te Wairua o te Atua. Ki a ia he mea kūware ērā, ā, e kore ia e āhei te mātau, he mea mā te Wairua ka kitea ai.
1CO 2:15 Otiia, ki te mea kei tētahi te Wairua, ka kitea e ia ngā mea katoa, e kore anō ia e kitea e tētahi.
1CO 2:16 “Ko wai hoki te mātau ana ki te hinengaro o te Ariki, e whakaako ai ia i a ia?” Kei a tātou ia te hinengaro o te Karaiti.
1CO 3:1 Nā, ko ahau, e ōku tēina, kīhai i āhei te kōrero ki a koutou me tāku ki te hunga i te Wairua, engari, i te kikokiko, ānō ki ngā kōhungahunga i roto i a te Karaiti.
1CO 3:2 He waiū tāku i whāngai atu nā mā koutou, ehara i te kai mārō. Kīanō hoki i taea e koutou te kai mārō, ā, kāhore nei anō i taea e koutou ināianei.
1CO 3:3 Kei te kikokiko tonu hoki koutou. I te mea kei a koutou tonu te hae, te totohe, te wehewehe, ehara oti koutou i te hunga i te kikokiko, e haere ana i runga i tā te tangata ritenga?
1CO 3:4 I tētahi hoki ka kī nei, “Ko ahau nō Pāora,” me tētahi atu, “Ko ahau nō Aporo,” ehara oti koutou i te hunga i te kikokiko?
1CO 3:5 Tēnā ko wai a Aporo? Ā, ko wai a Pāora? He minita i whakapono ai koutou; ki ia tangata i tā te Ariki i hōmai ai.
1CO 3:6 Nāku i whakatō, nā Aporo i whakamākūkū; nā te Atua ia i mea kia tupu.
1CO 3:7 Heoi, he kore noa iho te kaiwhakatō, he kore noa iho te kaiwhakamākūkū, engari, te Atua nāna nei i mea kia tupu.
1CO 3:8 Nā, ko te kaiwhakatō, ko te kaiwhakamākūkū, kotahi tonu rāua. Otirā, ka rite ki tāna ake mahi, te utu e riro mai i tēnā, i tēnā o rāua.
1CO 3:9 He hoa mahi hoki mātou nō te Atua; he māra koutou nā te Atua. He whare hanga nā te Atua.
1CO 3:10 Kei te ritenga o te aroha noa o te Atua i hōmai nei ki ahau, kua whakatakotoria e ahau te tūnga, he pērā me tā te tohunga; ā, ko tētahi atu kei te hanga whare ki runga. Otirā, kia tūpato ia tangata ki tāna whare e hanga ai ki runga.
1CO 3:11 E kore hoki tētahi tangata e āhei te whakatakoto i tētahi tūnga kē atu i tērā kua oti nei te whakatakoto, arā, i a Īhu Karaiti.
1CO 3:12 Engari, ki te hanga tētahi ki runga ki te tūnga he kōura, he hiriwa, he kōhatu utu nui, he rākau, he tarutaru, he otaota;
1CO 3:13 ka whakakitea te mahi a tētahi, a tētahi; mā te rā hoki e whakaatu, nō te mea ka whakakitea e te kāpura; ā, mā te kāpura tonu e whakamātautau te mahi a tēnā, a tēnā, he pēhea tōna āhua.
1CO 3:14 Ki te mau tonu te mahi a tētahi e hanga ai ki runga, ka riro i a ia he utu.
1CO 3:15 Ki te wera te mahi a tētahi ka maumauria tāna; ko ia, ia ka ora; otirā me te mea mā roto i te ahi.
1CO 3:16 Kāhore oti koutou i mātau, he whare tapu koutou nō te Atua, ā, kei roto i a koutou te Wairua o te Atua e noho ana?
1CO 3:17 Ki te whakangaromia e tētahi te whare tapu o te Atua, ka whakangaromia hoki ia e te Atua; he tapu hoki te whare o te Atua, ā, ko koutou taua whare.
1CO 3:18 Kei hangarau tētahi ki a ia anō. Ki te mea tētahi he tangata mōhio ia i roto i a koutou i tēnei ao, tukua ia hei kūware kia tupu ai hei tangata whakaaro.
1CO 3:19 Ki te Atua hoki he kūware noa ngā whakaaro mōhio o tēnei ao. Kua oti hoki te tuhituhi, “Ka mau i a ia te hunga whakaaro i runga i tō rātou tinihanga,”
1CO 3:20 me tēnei hoki, “E mātau ana te Ariki ki ngā whakaaro o te hunga whakaaro, he tekateka noa.”
1CO 3:21 Nō reira, kei whakamanamana tētahi ki te tangata. Nō koutou hoki ngā mea katoa;
1CO 3:22 ahakoa a Pāora, a Aporo, a Kipa, te ao, te ora, te mate rānei, ngā mea o nāianei, ngā mea rānei e takoto mai nei, nō koutou katoa;
1CO 3:23 ā, ko koutou nō te Karaiti, ko te Karaiti nō te Atua.
1CO 4:1 Me pēnei te whakaaro o te tangata ki a mātou nā, he kaimahi nā te Karaiti, he tuari hoki nō ngā mea ngaro a te Atua.
1CO 4:2 Nā, hei konei ko te mea o te tuari e matenuitia ana, kia kitea he tangata pono ia.
1CO 4:3 Ki ahau ia he mea nohinohi rawa kia whai kupu koutou mōku, te tangata rānei; kāhore nei hoki āku kupu mōku anō.
1CO 4:4 Kāhore hoki ahau i mātau ki tētahi aha ōku; heoi, e kore tēnā e ai hei whakatika mōku. Otirā, ko te Ariki hei whai kupu mōku.
1CO 4:5 Nā reira, kaua e whakawākia wawetia tētahi mea, kia tae mai rā anō te Ariki, māna e whakamārama ngā mea huna o te pōuri, e whakakite hoki ngā whakaaro o ngā ngākau; hei reira ia tangata whakamoemititia ai e te Atua.
1CO 4:6 Nā, ko ēnei mea, e ōku tēina, nāku i huri mai te āhua ki a māua ko Aporo, he whakaaro ki a koutou, kia ai māua hei whakaako i a koutou, kia kaua te whakaaro e hipa atu i te mea i tuhituhia; kia kaua tētahi o koutou e whakapehapeha mō tētahi ki runga atu i tētahi.
1CO 4:7 Ko wai kei te mea kia rerekē koe? Ko tēhea mea hoki āu ehara i te mea hoatu ki a koe? Nā, he mea i hoatu ki a koe, he aha koe ka whakamanamana ai, me te mea nei ehara i te mea hoatu?
1CO 4:8 Kua mākona kē nā hoki koutou! Kua hua kē ō koutou taonga! Kua kīngi koutou ahakoa motu mai mātou! Āe rā, e pai ana ki ahau kia kīngi tonu koutou, kia kīngi tahi ai tātou.
1CO 4:9 Ki tōku whakaaro hoki kua waiho mātou, ngā āpōtoro, e te Atua mō muri rawa, ānō he hunga mō te mate; kua meinga hoki mātou hei mātakitakinga mā te ao, mā ngā anahera, ā, mā ngā tāngata.
1CO 4:10 Ko mātou he kūware mō tā te Karaiti, ko koutou ia he hunga whai whakaaro i roto i a te Karaiti; ko mātou he ngoikore, ko koutou ia he hunga kaha; tō koutou he korōria, tō mātou ia he hōnorekore.
1CO 4:11 Tae tonu mai ki tēnei hāora nei e matekai ana mātou, e matewai ana, e haere tahanga ana, e kurua ana, kāhore hoki ō mātou kāinga tūmau.
1CO 4:12 E māuiui ana mātou, ko ō mātou ringa ake hei mahi. E taunutia ana, manaaki tonu mātou; e whakatoia ana, whakaririka kau mātou;
1CO 4:13 ka kōrerotia kinotia, ka whakangāwari atu mātou. Kua meinga mātou kia rite ki te paru rukenga o te ao, ki te para o ngā mea katoa, taea noatia tēnei rā.
1CO 4:14 Kāhore ahau i te tuhituhi atu i ēnei mea kia whakamā ai koutou, engari, hei whakatūpato i a koutou, i āku tamariki aroha.
1CO 4:15 Nō te mea ahakoa whiwhi koutou i ngā kaiwhakaako tekau mano i roto i a te Karaiti, kāhore i tokomaha ō koutou mātua; he whānau hoki koutou nāku i roto i a Karaiti Īhu i runga i te rongopai.
1CO 4:16 Koia ahau ka tohe nei ki a koutou, kia rite tā koutou ki tāku.
1CO 4:17 Nā reira i tonoa atu ai e ahau ki a koutou a Tīmoti, tāku tama aroha, tama pono i roto i te Ariki, māna koutou e whakamahara ki ōku ara i roto i a te Karaiti, ki tāku e whakaako nei i ngā wāhi katoa i roto i ngā hāhi katoa.
1CO 4:18 Nā, ko ētahi e whakapehapeha ana, e mea ana e kore ahau e haere atu ki a koutou.
1CO 4:19 Otirā, e kore e roa ka haere atu ahau ki a koutou, ki te pai te Ariki; ā hei reira, ehara i te kupu, engari, ko te kaha o te hunga e whakapehapeha ana, tāku e titiro ai.
1CO 4:20 Nō te mea, ehara te rangatiratanga o te Atua i te kupu, engari he kaha.
1CO 4:21 Ko tēhea tā koutou e pai ai? Kia haere atu ahau ki a koutou me te whiu, i runga rānei i te aroha me te wairua māhaki?
1CO 5:1 Kua pakū noa atu te rongo he pūremu kei roto i a koutou, he tū pūremu kāhore nei i roto i ngā tauiwi, arā, kua riro i tētahi o koutou te wahine a tōna pāpā.
1CO 5:2 Ā, e whakapehapeha ana koutou, tē pōuri koutou, te mea kia tangohia atu i roto i a koutou te tangata nāna tēnei mahi.
1CO 5:3 Nā, ko ahau, ahakoa tawhiti i te tinana kei konā te wairua, kua whakahē noa ake i te tangata nāna tēnei mahi i runga i te ingoa o tō tātou Ariki, o Īhu, me te mea kei konā anō ahau;
1CO 5:4 e noho huihui ana koutou me tōku wairua, i runga i te kaha o tō tātou Ariki, o Īhu.
1CO 5:5 Ka tuku atu ai i tēnā tū tangata ki a Hātana, hei whakangaro mō te kikokiko, kia ora ai te wairua i te rā o te Ariki, o Īhu.
1CO 5:6 Kāhore e pai tā koutou whakapehapeha. Kāhore koutou e mātau he iti nei te rēwena, rēwenatia ake te pūranga katoa?
1CO 5:7 Kokoa ki waho te rēwena tawhito, kia ai koutou he pūranga hou, me koutou e rēwenakore nā. Kua patua hoki mō tātou a te Karaiti, tō tātou Kapenga.
1CO 5:8 Nā, kia kai tātou i te hākari, auaka te rēwena tawhito, auaka hoki te rēwena o te mauāhara, o te kino, engari, hei te taro rēwenakore o te tinihangakore, o te pono.
1CO 5:9 I tuhituhi atu ahau ki a koutou i roto i te pukapuka, kia kaua e whakahoa ki ngā tāngata pūremu.
1CO 5:10 Ehara ia i te mea rawa mō te hunga pūremu o tēnei ao, mō te hunga apo, hao taonga, karakia whakapakoko; pēnei me haere atu koutou ki waho o te ao.
1CO 5:11 Engari, ināianei ka tuhituhi atu ahau ki a koutou, kia kaua e whakahoa, ki te mea tētahi e kīia nei he teina he tangata moepuku, he apo rānei, e karakia ana rānei ki te whakapakoko, he tangata taunu rānei, he haurangi, he hao taonga rānei; kaua rawa koutou ko taua tū tangata e kai tahi.
1CO 5:12 Hei aha rā māku te whakawā i te hunga o waho? E kore koia koutou e whakawā i te hunga o roto?
1CO 5:13 Ā, ko te hunga o waho mā te Atua rātou e whakawā? “Nā, motuhia atu taua tangata kino i roto i a koutou.”
1CO 6:1 Ka kaha rānei tētahi o koutou, mehemea he tautohe tāna ki tōna hoa, ki te haere ki te whakawā i te aroaro o te hunga hē, ā, kauaka ki te aroaro o te hunga tapu?
1CO 6:2 Kāhore oti koutou i mātau mā te hunga tapu e whakawā te ao? Ki te riro mā koutou e whakawā te ao, e kore rānei koutou e tau hei whakarite i ngā mea iti rawa?
1CO 6:3 Kāhore koutou i mātau ko tātou hei whakawā mō ngā anahera? Kauaka oti ngā mea o tēnei ao?
1CO 6:4 Nā, ki te mea he whakawā a koutou ki ngā mea o tēnei ao, whakanohoia ai rānei e koutou ko te hunga iti o te hāhi hei whakarite?
1CO 6:5 I kōrero atu ai ahau i tēnei kia whakamā ai koutou. Koia rānei, kāhore rawa e kitea kia kotahi he tangata whakaaro i roto i a koutou, hei whakarite ina whakawā ōna tēina i a rāua.
1CO 6:6 Kei te whakawā ia te tuakana i te teina, ā, i te aroaro rawa o te hunga whakapono kore?
1CO 6:7 Ehara, kua waiho kē tēnā hei hē i roto i a koutou, tā koutou whakawā tētahi i tētahi. He aha tē whakaririka kau ai ina ahatia koutou? He aha tē tangohia noatia atu ai ā koutou mea?
1CO 6:8 Ehara, ko koutou tonu kei te mahi i te hē, ā, kei te tango pokanoa, ko ō koutou tēina anō te meatanga.
1CO 6:9 Tēnā rānei kāhore koutou i te mātau, e kore te hunga whakahaere hē e whiwhi ki te rangatiratanga o te Atua? Kei tinihangatia koutou; e kore te hunga moepuku, te hunga karakia whakapakoko rānei, te hunga pūremu, te hunga whakawahine, te hunga rānei e mea ana i te tāne hei wahine,
1CO 6:10 ngā tāngata tāhae, ngā tāngata apo, ngā haurangi, te hunga taunu, te hunga hao taonga rānei, e whiwhi ki te rangatiratanga o te Atua.
1CO 6:11 He pērā hoki ētahi o koutou i mua; otirā, kua horoia koutou, kua whakatapua, kua whakatikaia i runga i te ingoa o te Ariki, o Īhu Karaiti, he meatanga nā te Wairua o tō tātou Atua.
1CO 6:12 “He tika ngā mea katoa māku,” otirā, e kore e pai katoa. “He tika ngā mea katoa māku,” otirā, e kore ahau e pai ki tētahi mea hei rangatira mōku.
1CO 6:13 “Ko ngā kai mō te kōpū, ko te kōpū mō ngā kai,” heoi, ka ngaro tēnei i te Atua me ērā hoki. Ehara hoki te tinana i te mea mō te moepuku, engari, mā te Ariki, ko te Ariki hoki hei Ariki mō te tinana.
1CO 6:14 Ā, nā te Atua i ara ai te Ariki waihoki māna tātou ka ara ai, mā tōna kaha.
1CO 6:15 Kāhore oti koutou i mātau, he wāhi ō koutou tinana nō te Karaiti? Me tango koia e ahau ngā wāhi o te Karaiti, ā, ka mea i a rātou hei wāhi mō te wahine kairau? Kāhore rāpea!
1CO 6:16 Ā, kāhore rānei koutou i mātau, ko te tangata e honoa ki te wahine kairau he tinana kotahi? E kī ana hoki ia, “Hei kikokiko kotahi rāua tokorua.”
1CO 6:17 Otiia, ko te tangata e honoa ki te Ariki, kotahi tonu te wairua.
1CO 6:18 Rere atu rā i te moepuku. Nō waho o te tinana ngā hara katoa e hara ai te tangata; ko te tangata ia e moepuku ana, e hara ana ia ki tōna ake tinana.
1CO 6:19 Ā, kāhore rānei koutou i mātau, he whare tapu tō koutou tinana nō te Wairua Tapu i roto nā i a koutou, i hōmai nei e te Atua? Ā, ehara i te mea nō koutou ake koutou.
1CO 6:20 Kua oti hoki koutou te hoko ki te utu; whakakorōriatia te Atua ki ō koutou tinana.
1CO 7:1 Nā, mō ngā mea i tuhituhi mai nā koutou. He mea pai anō mō te tangata kia kaua e pā ki te wahine.
1CO 7:2 Otiia, he whakaaro kei moepuku, kia rite mā te tāne he wahine māna ake, ā, mā te wahine he tāne māna ake.
1CO 7:3 Kia puta te whakaaro pai o te tāne ki te wahine, hei te mea e tika ana; me tō te wahine hoki ki te tāne.
1CO 7:4 Ehara te wahine i te rangatira o tōna tinana ake, engari, te tāne; me te tāne anō, ehara ia i te rangatira o tōna ake tinana, engari, te wahine.
1CO 7:5 Kaua e kaiponu tētahi i tētahi; hāunga ia ki te āta whakaritea mō tētahi wā, kia ātea ai kōrua ki te nohopuku, ki te īnoi, ka hoki ai anō ki a kōrua, kei ai tō kōrua hiahia taikaha hei whakawai mā Hātana i a kōrua.
1CO 7:6 Otirā, ko tēnei kōrero āku he mea whakaae noa, ehara i te tikanga whakatakoto.
1CO 7:7 Ko tāku ia i pai ai, kia pēnei ngā tāngata katoa i ahau nei. Otirā, e hōmai ana e te Atua te āhua mōna ki ia tangata, ki ia tangata, ki tētahi ko tēnei, ki tētahi ko tērā.
1CO 7:8 Ko tāku kupu ia tēnei ki ngā takakau, ki ngā wāhine pouaru, he mea pai mō rātou kia kāti tonu me ahau nei.
1CO 7:9 Otirā, ki te kore e taea e rāua te whakamanawanui, me mārena. He pai ake hoki te mārena i te kakā o te ngākau.
1CO 7:10 Ko tāku whakahau ia tēnei ki te hunga whai hoa, ehara i ahau, engari ko te Ariki, “Aua te wahine e mawehe kē i tāna tāne.”
1CO 7:11 Engari, ki te mawehe ia, me noho hoakore, me hohou rānei te rongo ki tāna tāne. Kaua hoki te tāne e whakarere i tāna wahine.
1CO 7:12 Ki ērā atu ia ko tāku kupu tēnei, ehara i te Ariki. Ki te mea he wahine kore whakapono tā tētahi o ngā tēina, ā, ka whakaae taua wahine kia noho tahi rāua, kaua ia e whakarērea e ia.
1CO 7:13 Ā, ko te wahine, he tāne kore whakapono tāna, ā, ka whakaae kia noho tahi rāua, kaua ia e whakarere tāna tāne.
1CO 7:14 Nō te mea e whakatapua ana te tāne whakapono kore e te wahine e whakatapua ana hoki te wahine e whakapono kore e te tāne. Me he kāhore, kua poke ā kōrua tamariki, tēnā ko tēnei, he tapu rātou.
1CO 7:15 Ki te mawehe kē ia te whakapono kore, māna e mawehe kē. E kore tētahi teina, tuahine rānei, e mau te here e ngā mea pēnā. Otirā, kua karangatia tātou e te Atua ki te rangimārie.
1CO 7:16 Mā te aha koe e mōhio ai, e tai, ka ora rānei i a koe tāu tāne? Ā, koe rānei, e te tāne, mā te aha ka mōhio ai, ka ora i a koe tāu wahine?
1CO 7:17 Heoi anake, kia rite ki tā te Atua tūwhanga ki tēnā, ki tēnā, ki tāna karangatanga hoki ki tēnā, ki tēnā, kia pērā tāna haere. Nā, ko tāku whakatakoto tēnā i roto i ngā hāhi katoa.
1CO 7:18 He mea kokoti tētahi i tōna karangatanga? Kaua e whakakāhoretia tōna kotinga. He mea kokotikore tētahi i tōna karangatanga? Kaua ia e kotia.
1CO 7:19 He mea kore noa iho te kotinga, he mea kore noa iho anō te kotingakore, engari ia te pupuri i ā te Atua ture.
1CO 7:20 Kia mau ia tangata ki tōna karangatanga, i karangatia ai ia.
1CO 7:21 He pononga koe i tōu karangatanga? Kaua e mānukanuka. Otirā, ki te wātea he haerenga noatanga atu mōu, me pēnā.
1CO 7:22 Ko te tangata hoki he pononga i tōna karangatanga i roto i te Ariki, he tangata tuku noa ia nā te Ariki. Waihoki ko te tangata ehara nei i te pononga i tōna karangatanga, he pononga ia nā te Karaiti.
1CO 7:23 Kua oti koutou te hoko ki te utu; aua e meinga hei pononga koutou mā te tangata.
1CO 7:24 E ōku tēina, ko te mahi a tēnei, a tēnei, i tōna karangatanga kia mau ia ki tēnā me te whakaaro anō ki te Atua.
1CO 7:25 Nā, mō ngā wāhina, kāhore a te Ariki tikanga ki ahau; tēnei ia tōku whakaaro, arā, tō te tangata i a ia nei tō te Ariki atawhai, i pono ai.
1CO 7:26 Nā reira, ki tōku whakaaro he pai tēnei mō te whakararu a tēnei wā, arā, he pai kia kāti tonu te tangata i a ia nei.
1CO 7:27 Kua herea koe ki te wahine? Kaua e whai kia wetekia. Ka oti koe te wewete i te wahine? Kaua e whāia he wahine.
1CO 7:28 Otiia, ki te mārena koe, kāhore ōu hara; ā, ki te mārena te wāhina, kāhore ōna hara. Otiia, tērā e pā mai he whakararu i te kikokiko ki taua hunga pēnā; heoi, me āta hanga ahau ki a koutou.
1CO 7:29 Ko tāku kupu ia tēnei, e ōku tēina, e tūtata ana te wā. Heoi, ināianei tērā e rite te hunga whai wāhine ki te hunga kāhore nei a rātou;
1CO 7:30 me te hunga e tangi ana, ānō kāhore rātou i te tangi; me te hunga e hari ana, ānō kāhore rātou i te hari; me te hunga e hoko ana, ānō kāhore ā rātou taonga;
1CO 7:31 me te hunga i a rātou tēnei ao, ānō kāhore ā rātou hē ki te ao. E memeha haere ana hoki te āhua o tēnei ao.
1CO 7:32 Otiia, ko tāku mea tēnei kia kaua koutou e mānukanuka. Ko tā te takakau e mānukanuka ai ko ngā mea a te Ariki, me pēhea tāna whakamānawareka ki te Ariki.
1CO 7:33 Ko te tangata whai hoa ia, e mānukanuka ana ki ngā mea o te ao, me pēhea tāna whakamānawareka ki tāna wahine.
1CO 7:34 Nā tērā anō te mea i rerekē ai te wahine whai hoa i te wāhina. Ko te wahine takakau, tāna e mānukanuka ai ko ngā mea a te Ariki, kia tapu tahi ai te tinana me te wairua. Ko te wahine whai hoa ia ka mānukanuka ki ngā mea o te ao, me pēhea tāna whakamānawareka ki tāna tāne.
1CO 7:35 Ko tēnei kōrero āku he mea kia hua ai he pai mō koutou anō; ehara i te mea kia māhangatia ai koutou, engari, mō te mea e haratau ana, kia ū ai koutou ki te Ariki, kāhore he mea hei rorona kē.
1CO 7:36 Nā, ki te whakaaro tētahi tangata e hē ana tāna tikanga ki tāna wāhina, mehemea kua pahure tōna taiohinga, ā, heoi anō tikanga, māna e mea tāna e pai ai, kāhore ōna hara; me mārena rāua.
1CO 7:37 Ko te tangata ia e ū ana i tōna ngākau, ā, kāhore he mea hei akiaki i a ia, kei a ia ake anō te tikanga mō tāna e pai ai, ā, kua oti tēnei te whakatakoto e tōna ngākau, kia waiho tāna wāhina, kei te pai tāna mahi.
1CO 7:38 Nā, he pai te mahi a te tangata e tuku ana kia mārenatia tāna wāhina; pai ake ia te mahi a te tangata kāhore e tuku kia mārenatia.
1CO 7:39 E herea ana te wahine e te ture i te mea e ora ana tāna tāne; ki te mate ia te tāne, kua wātea ia ki te mārena ki tāna e pai ai; otirā i roto i te Ariki.
1CO 7:40 Ki tōku whakaaro ia, nui kē atu tōna hari ki te kāti tonu ia. Ā, ki tāku mahara kei ahau anō hoki te Wairua o te Atua.
1CO 8:1 Nā, mō ngā mea e patua ana mā ngā whakapakoko: E mōhio ana tātou kei a tātou katoa te mātauranga. Ko tā te mātauranga he whakapupuhi; ko tā te aroha ia he waihanga.
1CO 8:2 Ki te mea tētahi e mātau ana ia ki tētahi mea, kāhore tōna mātauranga kia rite noa ki tō te mātauranga tikanga;
1CO 8:3 ki te aroha ia tētahi ki te Atua, kua mātauria tēnei e ia.
1CO 8:4 Nā reira, mō te kai i ngā mea e patua ana mā ngā whakapakoko, e mōhio ana tātou he kore noa iho te whakapakoko i te ao, kāhore hoki he Atua kē, kotahi anake.
1CO 8:5 Ahakoa hoki tērā ngā mea e kīia nei he atua, i te rangi rānei, i te whenua rānei; he tini nei hoki ngā atua, he tini ngā ariki;
1CO 8:6 ki a tātou ia kotahi anō Atua, ko te Matua, i ahu mai i a ia ngā mea katoa, ko tātou ki a ia; kotahi hoki Ariki, ko Īhu Karaiti, nāna nei ngā mea katoa, nāna hoki tātou.
1CO 8:7 Otirā, kāhore tērā mātauranga i ngā tāngata katoa. Engari tērā anō ētahi, i te mea kua taunga ki te whakapakoko tae mai ki nāianei, e kai ana i te mea i patua mā te whakapakoko; ā, ka poke tō rātou hinengaro ngoikore.
1CO 8:8 Ehara rāia te kai i te mea e paingia ai tātou e te Atua. Nō te mea ahakoa kāhore tātou e kai, e kore e heke iho tō tātou pai; ā, ahakoa kai tātou, e kore e kake tō tātou pai.
1CO 8:9 Engari, kia tūpato ki tēnei wāhi i tukua nei ki a koutou, kei waiho hei whakahinga mō te hunga ngoikore.
1CO 8:10 Ki te mea hoki ka kite tētahi i a koe, i te mea mōhio, e noho ana ki te kai i roto i te temepara o te whakapakoko, e kore koia e kakama ake tōna hinengaro, mehemea ia he ngoikore, e kakama ake ki te kai i ngā mea e patua ana mā te whakapakoko?
1CO 8:11 Mā tōu mātauranga hoki ka ngaro ai te mea ngoikore, te teina he whakaaro nei ki a ia i mate ai a te Karaiti.
1CO 8:12 Nā, i a koutou ka hara nei ki ngā tēina, ka patu nei i tō rātou hinengaro ngoikore, e hara ana koutou ki a te Karaiti.
1CO 8:13 Mō konei, ki te hē tōku teina i te kai, e kore rawa ahau e kai kikokiko ake tonu atu, kei hē i ahau tōku teina.
1CO 9:1 He teka ianei kei ahau anō ngā tikanga mōku? He teka ianei he āpōtoro ahau? Kīhai ianei ahau i kite i a Īhu Karaiti, i tō tātou Ariki? Ehara oti koutou i tāku mahi i roto i te Ariki?
1CO 9:2 Ahakoa ehara ahau i te āpōtoro ki ērā atu, engari rawa ia he āpōtoro ki a koutou, ko koutou hoki te hīri o tōku āpōtorotanga i roto i te Ariki.
1CO 9:3 Ko tāku utu tēnei ki ōku kaiui;
1CO 9:4 kāhore rānei i a mātou anō te tikanga mō te kai, mō te inu?
1CO 9:5 Kāhore rānei i a mātou anō te tikanga ki te whakahāereere i te hoa wahine, he wahine whakapono, pērā i ērā atu āpōtoro me ngā tēina o te Ariki, rātou ko Kipa?
1CO 9:6 Ko māua anake rānei ko Pānapa, kāhore rānei i a māua te tikanga kia kaua e mahi?
1CO 9:7 Ko wai ka haere hei hōia, ā, nāna ake anō ngā utu mōna? Ko wai e whakatō ana i te māra wāina, ā, kāhore ō reira hua e kainga e ia? Ko wai hoki e whāngai ana i te kāhui, ā, kāhore e kai i te waiū o te kāhui?
1CO 9:8 E kōrero ana rānei ahau i ēnei mea i te tikanga tangata? He pērā anō rānei tā te ture kōrero?
1CO 9:9 Kua oti hoki te tuhituhi i roto i te ture a Mohi, “Kaua e whakamōkātia te māngai o te kau i te mea e patu wīti ana. Ko ngā kau koia tā te Atua i whakaaro ai?”
1CO 9:10 Mō tātou rānei te tino tikanga o āna kōrero? Āe, he whakaaro ki a tātou i tuhituhi ai; he tika hoki kia parau te kaiparau i runga i te tūmanako, kia patu wīti anō te kaipatu i runga i te tūmanako ki tētahi wāhi māna.
1CO 9:11 I te mea kua ruia e mātou ngā mea wairua mā koutou, he mea nui ianei ki te kotia e mātou ā koutou mea o te kikokiko?
1CO 9:12 Kua uru nei ētahi atu ki tēnei tikanga a koutou, ko mātou anō ētahi kia hira ake? Otirā, kīhai mātou i mea ki tēnei tikanga, engari, e whakamanawanui ana ki ngā mea katoa, kei ai tā mātou hei ārai mō te rongopai o te Karaiti.
1CO 9:13 Kāhore oti koutou i mātau, ko te hunga e mahi ana i ngā mea tapu, e kai ana i ngā mea o te temepara? Ā, ko ngā kaitiaki o te āta, mā rātou anō tētahi wāhi o tō te āta?
1CO 9:14 Pērā tonu anō tā te Ariki i whakatakoto ai mō ngā kaikauwhau o te rongopai, hei runga i te rongopai he oranga mō rātou.
1CO 9:15 Otiia, kīhai ahau i mea ki tētahi o ēnei mea; kāhore hoki ahau i tuhituhi i ēnei mea kia pēnātia mai ai ahau. Ki ahau hoki he pai kē te mate, i te riro mā te tangata tāku whakamanamana e whakakāhore.
1CO 9:16 Nō te mea ki te kauwhau ahau i te rongopai, kāhore māku whakamanamana; kua takoto hoki tēnei hei mahi māku; he auē ia māku ki te kore ahau e kauwhau i te rongopai.
1CO 9:17 Ki te mea hoki nōku te ngākau ki tēnei mahi, he utu tōku. Ki te kore ia he ngākau, he mahi tuari tēnei kua tukua ki ahau.
1CO 9:18 Nā, he aha koia te utu mōku? Arā, ki te kauwhau ahau i te rongopai, ka meinga e ahau kia kore e utua te rongopai. Kia kore ai ahau e mea i te wāhi e tika ana māku i roto i te rongopai.
1CO 9:19 Ahakoa hoki ehara ahau i te pononga nā te tangata, heoi, kua waiho ahau e ahau anō hei pononga mā te katoa, kia tokomaha atu ai e riro mai i ahau.
1CO 9:20 Nā, ki ngā Hūrai whakahūrai ana ahau, kia riro ai i ahau ngā Hūrai; ki te hunga i raro i te ture me te mea i raro ahau i te ture, ahakoa rā kāhore ahau i raro i te ture, kia riro ai i ahau te hunga i raro i te ture;
1CO 9:21 ki te hunga turekore me he tangata turekore ahau, ehara i te mea he turekore ki te Atua, engari, i raro i te ture ki a te Karaiti, kia riro ai i ahau te hunga turekore.
1CO 9:22 Ki te hunga ngoikore me he ngoikore ahau, kia riro ai i ahau te i hunga ngoikore; waiho ana ahau hei mea katoa ki te katoa, kia taea ai e i ahau ngā mea katoa hei whakaora i ētahi.
1CO 9:23 I meinga ai tēnei e ahau he whakaaro ki te rongopai, kia whiwhi tahi ai ahau ki tōna pai.
1CO 9:24 Kāhore oti koutou i mātau ki te hunga e oma whakataetae ana, e oma katoa ana, kotahi anō ia mōna te utu whakahōnore? Kia pēnā tā koutou oma, kia whiwhi ai koutou.
1CO 9:25 Nā, ko ngā tāngata katoa e whakataetae ana i ngā tākaro e whakakoromaki ana i ngā hiahia katoa. Nā, e pērā ana rātou kia whiwhi ai ki te karauna pirau; ko tātou ia ki te mea e kore e pirau.
1CO 9:26 Ko ahau nei hoki, kāhore i ngaro tāku oma; e kuru ana ahau, kāhore ia e rite ki te kaipatu o te hau.
1CO 9:27 Engari, e pēhia ana e ahau tōku tinana, meinga ana hoki hei pononga māku; kei kauwhau pea ahau ki ētahi atu, ko ahau ia ka ākiritia atu.
1CO 10:1 E kore ahau e pai, e ōku tēina, kia kūware koutou, i raro katoa ō mātou mātua i te kapua, i haere katoa anō hoki rā roto i te moana;
1CO 10:2 i iriiria anō rātou katoa ki a Mohi i roto i te kapua, i roto hoki i te moana;
1CO 10:3 ā, i kai rātou i te kai kotahi, he mea wairua;
1CO 10:4 i inu hoki rātou katoa i te wai kotahi, he mea wairua. Nō te mea i inu rātou i tā te mea wairua, arā i tā te toka i whai nei i a rātou; ā, ko taua toka rā ko te Karaiti.
1CO 10:5 Otiia, kīhai te Atua i āhuareka ki te nuinga o rātou; i turakina iho hoki rātou i te koraha.
1CO 10:6 Nā, hei tohu ēnei mea ki a tātou, kia kaua tātou e hiahia, ki ngā mea kino, kei pērā me rātou i hiahia rā.
1CO 10:7 Kaua anō koutou e karakia ki ngā whakapakoko, kei pērā me ētahi o rātou; kua oti rā hoki te tuhituhi, “I noho te iwi ki te kai, ki te inu, ā, whakatika ana ki te tākaro.”
1CO 10:8 Kaua hoki tātou e moepuku, kei pērā me ētahi o rātou i moepuku, ā, hinga ana e rua tekau mā toru ngā mano i te rā kotahi.
1CO 10:9 Kaua hoki tātou e whakamātautau a te Karaiti, kei pērā me ētahi o rātou i whakamātautau rā, ā, ngaro ana te nākahi.
1CO 10:10 Kaua hoki koutou e amuamu, kei pērā me ētahi o rātou i amuamu, ā, ngaro ana rātou i te kaiwhakangaro.
1CO 10:11 Nā, i pā ēnei mea ki a rātou hei tohu; kua tuhituhia nei hoki hei whakatūpato i a tātou, i te hunga ka tae nei ki ngā whakamutunga o te ao.
1CO 10:12 Nā reira, ko te tangata e mea ana e tū ana ia, kia tūpato ia kei hinga.
1CO 10:13 Kāhore anō kia pono ki a koutou tētahi whakamātautau e rerekē ana i tō te tangata. He pono hoki te Atua, e kore nei e tuku kia nui ake i tō koutou kaha te whakamātautau mō koutou; engari, tahi me te whakamātautau ka meatia e ia he putanga, kia ū ake ai koutou.
1CO 10:14 Nā reira, e ōku hoa aroha, rere atu i te karakia whakapakoko.
1CO 10:15 Ko tāku kōrero nei he mea ki te hunga mahara; whakaaroa tāku e mea nei.
1CO 10:16 Ko te kapu whakapainga e whakapai nei tātou, ehara koia i te inu tahi i ngā toto o te Karaiti? Ko te taro e whatiwhatia nei e tātou, ehara ianei i te kai tahi i te tinana o te Karaiti?
1CO 10:17 Inā hoki ko tātou tokomaha nei, kotahi anō taro, kotahi anō tinana; kotahi tonu nei hoki taua taro e kainga nei e tātou katoa.
1CO 10:18 Whakaaroa a Īharaira o te kikokiko; he teka ianei ko te hunga e kai ana i ngā patunga tapu, e uru tahi ana ki tō te āta?
1CO 10:19 Nā, he pēhea rā tāku kōrero? He tikanga mea rānei te mea e patua ana mā te whakapakoko? He tikanga mea rānei te whakapakoko?
1CO 10:20 Otirā, e kī ana ahau, ko ngā mea e i patua ana e ngā tauiwi, e patua ana mā ngā rēwera, he teka mā te Atua. E kore hoki ahau e pai kia uru tahi koutou ko ngā rēwera.
1CO 10:21 E kore koutou e āhei te inu i te kapu a te Ariki, i te kapu anō a ngā rēwera. E kore koutou e āhei te kai i te tēpu a te Ariki, i te tēpu hoki a ngā rēwera.
1CO 10:22 E mea ana rānei tātou kia hae mai te Ariki? He kaha koia tātou i a ia?
1CO 10:23 “He tika ngā mea katoa,” otirā, e kore e pai katoa. “He tika ngā mea katoa,” otirā, e kore e oti te waihanga e ngā mea katoa.
1CO 10:24 Kaua tētahi e rapu ki tāna ake, engari, me rapu katoa i te pai mō tērā, mō tērā.
1CO 10:25 Ko ngā mea katoa e hokona ana i te mākete, kainga, kaua e uiui, kei hē te hinengaro.
1CO 10:26 “Nō te Ariki hoki te whenua me ōna tini mea.”
1CO 10:27 Ki te karangatia koutou e tētahi o te hunga whakapono kore, ā, ka pai koutou kia haere; ko ngā mea katoa e whakatakotoria mai ki tō koutou aroaro, kainga, kaua e uiui, kei hē te hinengaro.
1CO 10:28 Ki te mea ia tētahi ki a koutou, “I patua tēnei mā te whakapakoko,” kaua e kai, me whakaaro ki te kaiwhakaatu, ki te hinengaro hoki –
1CO 10:29 ko te hinengaro, e kī ana ahau, ehara i tōu, engari, ko tō tētahi; he aha tōku herekoretanga kia whakakorea e tērā atu hinengaro?
1CO 10:30 Ki te mea hoki nā te aroha noa ahau i kai ai, he aha ahau i kōrerotia kinotia ai mō te mea i whakawhetai ai ahau?
1CO 10:31 Nā reira, ahakoa kai, ahakoa inu, aha rānei, meinga katoatia hei whakakorōria mō te Atua.
1CO 10:32 Kei waiho koutou hei tūtukitanga waewae ki ngā Hūrai, ki ngā Kariki rānei, ki te hāhi rānei a te Atua;
1CO 10:33 kia pēnei me ahau e whakamānawareka nei i te katoa i ngā mea katoa, i ahau kāhore nei e rapu i te pai mōku ake, engari i tō te tokomaha, kia ora ai rātou.
1CO 11:1 Kia rite tā koutou ki tāku, me tāku ka rite nei ki tā te Karaiti.
1CO 11:2 Nā, e whakamoemiti ana ahau ki a koutou, mō koutou ka mahara ki ahau i ngā mea katoa, ka pupuri hoki i ngā whakarerenga iho, i āku i tuku atu nā ki a koutou.
1CO 11:3 Nā, e mea ana ahau kia mātau koutou, ko te Karaiti te upoko o ngā tāne katoa; ko te tāne te upoko o te wahine; ko te Atua anō te upoko o te Karaiti.
1CO 11:4 Ko te tangata e īnoi ana, e poropiti ana, me te hīpoki anō te upoko, e whakaiti ana ia i tōna upoko.
1CO 11:5 Ko te wahine ia e īnoi ana e poropiti ana rānei, kāhore nei he hīpoki o te upoko, e whakaiti ana ia i tōna upoko. E rite tonu ana tēnā ānō kua oti tōna upoko te heu.
1CO 11:6 Ki te kāhore hoki te wahine e hīpokina, kia waruhia hoki ia. Ki te mea he mea whakamā ki te wahine kia waruhia, kia heua rānei, me hīpoki ia.
1CO 11:7 E kore hoki e tika mō te tāne kia hīpokina tōna upoko, ko te āhua hoki ia, ko te korōria o te Atua. Ko te wahine ia te korōria o te tāne.
1CO 11:8 Ehara hoki i te mea nō te wahine te tāne, engari, nō te tāne te wahine.
1CO 11:9 Kīhai anō te tāne i hangā mā te wahine, engari, ko te wahine mā te tāne.
1CO 11:10 Koia i tika ai hei runga i te upoko o te wahine te tohu o te mana, he mea mō ngā anahera.
1CO 11:11 Ahakoa rā, e kore te tāne e motuhia kētia i te wahine, e kore anō te wahine e motuhia kētia i te tāne, i roto i te Ariki.
1CO 11:12 Nō roto hoki i te tāne te wahine, waihoki, i nā te wahine mai te tāne; nā te Atua anō ia ngā mea katoa.
1CO 11:13 Mā koutou tonu e whakaaro: he mea pai rānei kia īnoi hīpokikore te wahine ki te Atua?
1CO 11:14 E kore rānei te whakaaro māori nei anō e ako i a koutou, ki te mea he makawe roroa o te tāne, he mea whakatūtūa tērā mōna?
1CO 11:15 Tēnā, ki te mea he makawe roroa o te wahine, he mea whakakorōria tērā mōna. Kua hoatu hoki ōna makawe ki a ia hei hīpoki.
1CO 11:16 Otirā, ki te mea he āhua totohe tētahi, kāhore ō mātou ritenga pērā, kāhore hoki o ngā hāhi a te Atua.
1CO 11:17 I ahau ia e kōrero nei i tēnei ki a koutou, kāhore āku whakamoemiti ki a koutou, kāhore hoki koutou e whakamine mō te pai, engari mō te kino.
1CO 11:18 Nā, ko te tuatahi, i a koutou ka whakamine ki roto ki te hāhi, ka rongo ahau he wehewehenga kei roto i a koutou; ā, e whakapono ana ahau ki tētahi wāhi.
1CO 11:19 Kua takoto hoki kia whai tītorehanga koutou, kia kitea ai te hunga e paingia ana i roto i a koutou.
1CO 11:20 Nā, ka huihui koutou ki te wāhi kotahi, e kore e taea kia kai i te hapa a te Ariki.
1CO 11:21 I te mea hoki e kai ana koutou, ka kai tēnā, tēnā, i tāna hapa i mua atu i tētahi; ā, ka hiakai tētahi, ka haurangi tētahi.
1CO 11:22 He aha? Kāhore koia ō koutou whare e kai ai, e inu ai koutou? E whakahāwea ana rānei koutou ki te hāhi a te Atua, e mea ana hoki kia whakamā te hunga kāhore nei ā rātou mea? Kia pēhea atu tāku kupu ki a koutou? Kia whakamoemiti oti ahau ki a koutou mō tēnei mea? E kore rā ahau e whakamoemiti.
1CO 11:23 Kua riro mai hoki i ahau i te Ariki tāku i tuku atu rā ki a koutou, arā, i taua pō i tukua ai ia, i tangohia e te Ariki, e Īhu, te taro,
1CO 11:24 ā, ka mutu te whakawhetai, ka whatia e ia, nā ka mea ia, “Tangohia, kainga; ko tōku tinana tēnei ka whatiwhatia nei mō koutou. Meinga tēnei hei whakamahara ki ahau.”
1CO 11:25 Me te kapu anō i te mutunga o te hapa, me tāna mea anō, “Ko te kawenata hou tēnei kapu i runga i ōku toto. Meinga tēnei i ngā inumanga katoa hei whakamahara ki ahau.”
1CO 11:26 I ngā wā katoa hoki e kai ai koutou i tēnei taro, e inu ai i tēnei kapu, e whakakitea ana e koutou te matenga o te Ariki, kia tae mai rā anō ia.
1CO 11:27 Mō reira ki te kai hē tētahi, ki te inu hē i te kapu a te Ariki, ka whai hara ia i te tinana, i ngā toto, o te Ariki.
1CO 11:28 Engari, kia uiui te tangata ki a ia anō, ka kai ai i taua taro, ka inu ai i taua kapu.
1CO 11:29 Nō te mea ki te kai hē, ki te inu hē tētahi, e kai ana, e inu ana i te whakawā mōna, tē whakaaro ko te tinana o te Ariki.
1CO 11:30 Nō konei hoki he tokomaha i roto i a koutou e ngoikore ana, e mate ana, he tokomaha, anō kua moe.
1CO 11:31 Me i whakawā hoki tātou i a tātou anō, kīhai i whakataua te hē ki a tātou.
1CO 11:32 Ki te whakawākia ia tātou, he mea whakaako tātou nā te Ariki, kei tukua ngātahitia tātou me te ao ki te hē.
1CO 11:33 Heoi, e ōku tēina, ka huihui koutou ki te kai, me tatari tētahi ki tētahi.
1CO 11:34 Ki te hiakai tētahi, hei roto i tōna whare kai ai; kei ai tō koutou huihuinga hei take whakawā. Ko ērā atu mea hoki, māku e whakatika ina tae atu ahau.
1CO 12:1 Nā, mō ngā mea wairua, e ōku tēina, kāhore ahau e pai kia kūware koutou.
1CO 12:2 E mātau ana koutou, i a koutou e tauiwi ana, he mea kāhaki koutou ki ngā whakapakoko reokore, me koutou i kāhakina rā.
1CO 12:3 Koia ahau ka whakakite nei ki a koutou, e kore tētahi tangata, nā te Wairua nei o te Atua āna kōrero, e kī, “He mea kanga a Īhu!” E kore anō e taea e tētahi te mea, “Ko Īhu te Ariki” ki te kāhore te Wairua Tapu.
1CO 12:4 Nā, he maha ngā wehewehenga o ngā mea e hōmai ana, kotahi anō ia Wairua,
1CO 12:5 ā, he maha ngā wehewehenga o ngā minitatanga, kotahi anō ia Ariki.
1CO 12:6 He maha anō hoki ngā tū āhua o ngā mahi; kotahi anō ia Atua hei mahi i ngā mea katoa i roto i te katoa.
1CO 12:7 Otirā, e hōmai ana ki tēnā, ki tēnā, te whakakitenga a te Wairua hei pai.
1CO 12:8 E hōmai ana hoki ki tētahi e te Wairua te kupu whakaaro; ki tētahi atu ko te kupu mātau, he mea nā taua Wairua anō;
1CO 12:9 ki tētahi atu ko te whakapono, nā taua Wairua rā anō; ki tētahi atu ko ngā mana whakaora, nā taua Wairua anō;
1CO 12:10 ki tētahi atu ko ngā mahi merekara; ki tētahi atu ko te mahi poropiti; ki tētahi atu ko te mātauranga ki ngā wairua; ki tētahi atu ko ngā reo huhua; ki tētahi atu ko te whakamāoritanga i ngā reo.
1CO 12:11 Nā, ko ēnei mea katoa, he mea mahi nā taua Wairua kotahi rā anō, ko ia hei tuwha i tāna e pai ai ki tētahi, ki tētahi.
1CO 12:12 Pērā hoki i te tinana e kotahi ana, he tini anō ōna wāhi, ā, ko ngā wāhi katoa o taua tinana kotahi, ahakoa tini, kotahi anō tinana; he pērā hoki a te Karaiti.
1CO 12:13 Kotahi nei hoki te Wairua i iriiria ai tātou katoa ki roto ki te tinana kotahi, ahakoa ngā Hūrai, ahakoa ngā Kariki, ahakoa herehere, ahakoa rangatira; kotahi tonu te Wairua i whakainumia mai ai tātou katoa.
1CO 12:14 Ehara hoki te tinana i te wāhi kotahi, engari he tini.
1CO 12:15 Ki te mea te waewae, “He teka nō te tinana ahau, ehara hoki ahau i te ringa”; ehara mā tēnā e kāhore ai ia hei wāhi mō te tinana?
1CO 12:16 Ki te mea te taringa, “He teka nō te tinana ahau, ehara hoki ahau i te kanohi”; ehara mā tēnā e kāhore ai ia hei wāhi mō te tinana?
1CO 12:17 Mehemea hoki he kanohi te tinana katoa, kei hea te wāhi hei whakarongo? Mehemea he whakarongo tā te katoa, kei hea te wāhi hei hongi?
1CO 12:18 Ko tēnei, kua oti i te Atua te whakanoho tēnei wāhi, tēnei wāhi, ki roto ki te tinana, āna hoki i pai ai.
1CO 12:19 Mehemea hoki kotahi anō wāhi rātou katoa, kei hea te tinana?
1CO 12:20 Ko tēnei, he tini ngā wāhi, kotahi anō te tinana.
1CO 12:21 E kore hoki te kanohi e āhei te mea ki te ringa, “Kāhore āku mahi māu”; te māhunga rānei ki ngā waewae, “Kāhore āku mahi mā kōrua.”
1CO 12:22 Engari, ko ngā wāhi o te tinana e kīia ana he ngoikore, nui rawa te mahi, mā ērā;
1CO 12:23 ko ngā wāhi hoki o te tinana e kīia ana e tātou he iti te hōnore, nui atu te hōnore e whakataua iho ana e tātou ki ērā; nui atu hoki te ātaahua ki ō tātou wāhi marutuna;
1CO 12:24 ko ō tātou wāhi ātaahua ia kāhore he aha e meatia ai; heoi he mea huihui mārire nā te Atua ngā wāhi o te tinana, he mea whakarite mārie, nui atu hoki te hōnore i hoatu e ia ki te wāhi i hapa;
1CO 12:25 kia kore ai he wehewehenga o te tinana; engari kia kotahi tonu te whakaaro o ngā wāhi mō tētahi, mō tētahi.
1CO 12:26 Ā, ki te mamae tētahi wāhi, mamae tahi ana ngā wāhi katoa; ki te whakahōnoretia tētahi wāhi, hari tahi ana ngā wāhi katoa.
1CO 12:27 Nā, ko koutou te tinana o te Karaiti, he wāhi anō nōna tēnei, tēnei.
1CO 12:28 Ā, kua whakanohoia e te Atua ētahi i roto i te hāhi, ko ngā āpōtoro ki mua, tuarua ko ngā poropiti, tuatoru ko ngā kaiwhakaako, muri iho ko ngā merekara, me i reira ko ngā mana whakaora, ko ngā hoa mahi, ko ngā kaiwhakahaere tikanga, ko ngā reo huhua.
1CO 12:29 He āpōtoro oti katoa? He poropiti oti katoa? He kaiwhakaako katoa? He kaimahi katoa i te merekara?
1CO 12:30 Kei te katoa oti ngā mana whakaora? E kōrero katoa ana oti i ngā reo? He kaiwhakamāori anake rānei?
1CO 12:31 Nā, whāia ngā mea hōmai papai rawa. Tēnei ia te ara tino pai rawa, māku e whakaatu ki a koutou.
1CO 13:1 Ahakoa kōrero noa ahau i ngā reo o ngā tāngata, o ngā anahera, ki te kāhore ōku aroha, ka rite ahau ki te parāhi tangi, ki te himipora tatangi.
1CO 13:2 Ahakoa kei ahau te mahi poropiti, ā, kitea ana e ahau ngā mea ngaro katoa, me te mātauranga katoa; ahakoa kei ahau katoa te whakapono, e taea ai te whakaneke i ngā maunga, ki te kāhore ōku aroha, ehara rawa ahau.
1CO 13:3 Ahakoa ka hoatu e ahau āku taonga katoa hei whāngai i te hunga rawakore, ahakoa ka tukua e ahau tōku tinana kia tahuna, ki te kāhore ōku aroha, kāhore rawa he pai ki ahau.
1CO 13:4 He manawanui te aroha, ā, he atawhai; e kore te aroha e hae; e kore te aroha e whakaī, e kore e whakapehapeha,
1CO 13:5 kāhore ōna tikanga whanokē, e kore e whai ki āna ake, e kore e riri wawe, e kore e whakairi kino;
1CO 13:6 e kore e hari ki te hē, engari ka hari tahi me te pono;
1CO 13:7 e whakamanawanui ana ki ngā mea katoa, e whakapono ana ki ngā mea katoa, e tūmanako ana ki ngā mea katoa, e whakaririka kau ana ki ngā mea katoa.
1CO 13:8 E kore rawa te aroha e taka. Nā, ahakoa mahi poropiti, e memeha; ahakoa reo kē, e mutu; ahakoa mātauranga, e memeha.
1CO 13:9 E mātau ana hoki tātou ko tētahi wāhi anake, e poropiti ana tātou ko tētahi wāhi anake.
1CO 13:10 Otirā, ka tae mai te tino mea, ko reira memeha ai taua wāhi.
1CO 13:11 I tōku tamarikitanga i rite āku kōrero ki ā te tamariki, i rite tōku ngākau ki tō te tamariki, i rite ōku whakaaro ki ō te tamariki; nō tōku kaumātuatanga nei, whakarērea ake e ahau ngā mea tamariki.
1CO 13:12 Ināianei hoki he titiro pōuriuri tā tātou i roto i te whakaata, ko reira ia he kanohi, he kanohi. Ināianei e mātau ana ahau ko tētahi wāhi anake; ko reira ia ahau e mōhio ai me ahau i mōhiotia rā.
1CO 13:13 Nā tēnei te mau nei te whakapono, te tūmanako, te aroha, ēnei e toru; ko te mea nui rawa ia o ēnei ko te aroha.
1CO 14:1 Whāia te aroha; kia matenui ki ngā mea wairua, ko te mea nui rawa ia kia poropiti koutou.
1CO 14:2 Ki te mea he reo kē te kōrero a tētahi, ehara tāna i te kōrero ki ngā tāngata, engari ki te Atua. E kore hoki te tangata e mātau; heoi e kōrero ana ia, arā te wairua, i ngā mea ngaro.
1CO 14:3 Ko te tangata ia e poropiti ana, e kōrero ana ia ki ngā tāngata hei hanga i te pai, hei whakahirihiri, hei whakamārie.
1CO 14:4 Ko te tangata e kōrero ana he reo kē, e hanga ana i te pai mōna ake; ko te tangata ia e poropiti ana e hanga ana i te hāhi.
1CO 14:5 He pai tonu ki ahau me i kōrero koutou i ngā reo kē, erangi ia kia poropiti koutou. Nui atu hoki te poropiti i te tangata kōrero i ngā reo, ki te kore ia e whakamāori, hei hanga mō te whare, arā mō te hāhi.
1CO 14:6 Nā, e ōku tēina, ki te haere atu ahau ki a koutou me te kōrero i ngā reo kē, mā te aha ka whiwhi ai koutou i te pai i ahau, ki te mea ehara tāku kōrero ki a koutou i te whakakite, i te mātauranga, i te mahi poropiti, i te whakaako rānei?
1CO 14:7 Nā, ahakoa ngā mea kāhore he ora, he reo tōna, he pūtōrino rānei, he hāpa rānei, ki te kore e puta kē te tangi, me pēhea e mōhiotia ai te rangi o te pūtōrino, o te hāpa rānei?
1CO 14:8 Ki te kāhore hoki e mārama te tangi o te tētere, ko wai e takatū ki te whawhai?
1CO 14:9 Waihoki ko koutou, ki te kāhore ō koutou arero e kōrero i te kupu mārama, me pēhea ka mōhiotia ai te mea i kōrerotia? E kōrero hoki koutou ki te hau.
1CO 14:10 Tēnā pea kei te ao aua reo maha, heoi kāhore he reo tikangakore.
1CO 14:11 Nā, ki te kore e kitea e ahau te tikanga o te reo, ka meinga ahau e te tangata e kōrero ana he tautangata; hei tautangata anō ki ahau taua tangata e kōrero ana.
1CO 14:12 Me koutou anō, ka matenui nā koutou ki ngā mea wairua, me whai kia hira tō koutou pai hei hanga i te whare, arā i te hāhi.
1CO 14:13 Nā, ko te tangata e kōrero ana i te reo kē, me īnoi kia taea e ia te whakamāori.
1CO 14:14 Ki te mea hoki he reo kē tōku ina īnoi, ko tōku wairua te īnoi ana; ko tōku mahara ia kāhore he hua.
1CO 14:15 Me pēhea rā? Ka īnoi ahau i runga i te wairua, ā, ka īnoi anō i runga i te mahara; ka waiata ahau i runga i te wairua, ka waiata anō i runga i te mahara.
1CO 14:16 Pēnei, mehemea ki te whakapai koe i runga i te wairua, me pēhea te tangata e noho ana i te wāhi o te kūware ka mea ai, “Āmine” ki tāu whakawhetai? E kore hoki ia e mōhio ki tāu e kōrero ai.
1CO 14:17 He pono ka pai tāu whakawhetai, otiia e kore e hangā te pai o tērā.
1CO 14:18 E whakawhetai ana ahau ki te Atua, mōku i kōrero i ngā reo maha atu i o koutou katoa;
1CO 14:19 otiia, i roto i te hāhi, pai kē atu ki ahau te kōrero i ngā kupu e rima i runga i te mahara, hei ako mō ērā atu, i te kōrero i ngā kupu tekau mano i te reo kē.
1CO 14:20 E ōku tēina, aua ō koutou mahara e whakatupu tamariki; ko te mauāhara ia, tēnā hei kōhungahunga koutou, engari ko ngā mahara kia kaumātua.
1CO 14:21 Ka oti te tuhituhi i roto i te ture: “He tangata reo kē, he ngutu kē hei kaikōrero māku ki tēnei iwi; heoi e kore tonu rātou e rongo ki ahau,”
1CO 14:22 Nō reira, hei tohu ngā reo kē, ehara ki te hunga whakapono, engari ki te hunga kāhore e whakapono. Ko te mahi poropiti ia he tohu, ehara ki te hunga kāhore e whakapono, engari ki te hunga e whakapono ana.
1CO 14:23 Nā, ki te huihui te hāhi katoa ki te wāhi kotahi, ā, ka kōrero te katoa i ngā reo, ā, ka tomo mai te hunga kūware, te hunga whakapono kore, e kore rānei rātou e mea he pōrangi koutou?
1CO 14:24 Tēnā, ka poropiti katoa, ā, ka tapoko mai tētahi tangata whakapono kore, kūware rānei, ka mau tōna hē i te katoa, ka whakawākia e te katoa.
1CO 14:25 Ka whakakitea ngā mea ngaro o tōna ngākau; nā, ka takoto tāpapa ia, ka koropiko ki te Atua, me tāna kī ake anō, “He pono kei roto i a koutou te Atua!”
1CO 14:26 Nā, e pēhea ana tēnā, e ōku tēina? Ka huihui koutou, he waiata tā tētahi o koutou, he whakaako tā tētahi, he reo tā tētahi, he whakakitenga tā tētahi, he whakamāoritanga tā tētahi. Meinga ngā mea katoa hei hanga mō te whare.
1CO 14:27 Ki te kōrero tētahi i te reo kē, kia tokorua, kei neke ake i te tokotoru ki te kōrero, me takikotahi; kia kotahi hoki hei whakamāori.
1CO 14:28 Ki te kāhore ia he kaiwhakamāori, kaua ia e kōrero i roto i te hāhi; engari me kōrero ki a ia anō, ki te Atua hoki.
1CO 14:29 Kia tokorua, kia tokotoru ngā poropiti hei kōrero, mā ētahi e hurihuri atu.
1CO 14:30 Ki te whakakitea mai ia he mea ki tētahi e noho noa ana, me noho puku tō mua.
1CO 14:31 E āhei hoki koutou katoa te poropiti takitahi, kia ako ai te katoa, kia whakamārietia ai te katoa.
1CO 14:32 E ngohengohe ana hoki ki ngā poropiti ngā wairua o ngā poropiti.
1CO 14:33 Ehara hoki te Atua i te Atua o te whakararuraru, engari nō te rangimārie. E pērā ana hoki i roto i ngā hāhi katoa o te hunga tapu.
1CO 14:34 Kaua ngā wāhine e kōrero i roto i ngā hāhi. E kore hoki rātou e tukua kia kōrero; engari me whakarongo mārie, ko tā te ture hoki tēnā e mea nei.
1CO 14:35 Ki te hiahia hoki rātou ki te ako i tētahi mea, me ui ki ā rātou tahu i roto i te whare. He mea whakamā hoki kia kōrero te wāhine i roto i te hāhi.
1CO 14:36 He aha? I puta mai koia te kupu a te Atua i a koutou? I tae atu rānei ki a koutou anake?
1CO 14:37 Ki te mea tētahi he poropiti ia, he tangata rānei i te Wairua, māna e whakaae ki āku e tuhituhi atu nei ki a koutou, he ture ēnā nā te Ariki.
1CO 14:38 Otirā, ki te kūware tētahi, waiho atu kia kūware ana.
1CO 14:39 Nā, e ōku tēina, matenuitia te mahi poropiti, kaua hoki e rīria te kōrero i ngā reo kē.
1CO 14:40 Otirā, kia ātanga te mahi i ngā mea katoa, kia tōtika.
1CO 15:1 Nā, me whakaatu e ahau ki a koutou, e ōku tēina, te rongopai i kauwhautia e ahau ki a koutou, tā koutou hoki i whakaae nā, tā koutou hoki e tū nā,
1CO 15:2 te mea hoki e ora nā koutou; ka whakaatu ahau ki a koutou i ngā kupu i kauwhau ai ahau ki a koutou, ki te mau tērā i a koutou, ki te mea ehara tō koutou i te whakapono noa.
1CO 15:3 I hoatu nā hoki e ahau ki a koutou i te tuatahi te mea i riro mai i ahau, arā: I mate a te Karaiti mō ō tātou hara, i pērā me tā ngā karaipiture;
1CO 15:4 ā, i tanumia; ā, i ara ake anō i te toru o ngā rā, i pērā me tā ngā karaipiture;
1CO 15:5 ā, ka whakakite ki a Kipa; muri iho ki te tekau mā rua.
1CO 15:6 Muri iho ka whakakite ki ngā hoa tokomaha ake i te rima rau i te kitenga kotahi, e ora nei anō te nuinga o rātou, ko ētahi ia kua moe;
1CO 15:7 muri iho ka whakakite ki a Hēmi; muri iho ki ngā āpōtoro katoa.
1CO 15:8 Ā muri rawa iho ka whakakite hoki ia ki ahau, me te mea i whānau tōmuri nei ahau.
1CO 15:9 Ko te iti rawa hoki ahau o ngā āpōtoro, kāhore e tau kia kīia he āpōtoro, mōku i whakatoi i te hāhi a te Atua.
1CO 15:10 Heoi, nā te aroha noa o te Atua tēnei āhua ōku. Kīhai anō tōna aroha noa ki ahau i maumauria; heoi, nui atu tāku mahi i tā rātou katoa. Ehara ia i te mea nāku, engari, nā te aroha noa o te Atua i mahi tahi me ahau.
1CO 15:11 Nā, ahakoa nāku, ahakoa nā rātou, ko tā mātou kauwhau tēnei, ko tā koutou anō tēnei i whakapono ai.
1CO 15:12 Nā, e kauwhautia nei a te Karaiti, tōna aranga ake i te hunga mate, he pēhea te kupu a ētahi o koutou, kāhore he aranga ake o te hunga mate?
1CO 15:13 Mehemea hoki kāhore he aranga o te hunga mate, kīhai anō a te Karaiti i ara.
1CO 15:14 Mehemea hoki kāhore a te Karaiti i ara, maumau noa tā mātou kauwhau, maumau noa tō koutou whakapono.
1CO 15:15 Āe rā, ka kitea hoki mātou he kaiwhakaatu teka i tā te Atua; nō te mea ka whakaaturia nei e mātou te Atua, nāna i whakaara ake a te Karaiti; kīhai nei i whakaarahia e ia, ki te kāhore te hunga mate e ara.
1CO 15:16 Ki te kāhore hoki te hunga mate e whakaarahia, kīhai anō a te Karaiti i whakaarahia.
1CO 15:17 Ā, mehemea kāhore a te Karaiti i ara, he mea hanga noa tō koutou whakapono; kei roto tonu koutou i ō koutou hara.
1CO 15:18 Me te hunga hoki kua moe atu i roto i a te Karaiti, kua ngaro rātou.
1CO 15:19 Ki te mea hei tēnei ao anake he tūmanako mā tātou ki a te Karaiti, nui atu te pōuri mō tātou i ō ngā tāngata katoa.
1CO 15:20 Ko tēnei kua ara a te Karaiti i te hunga mate, kua waiho hei mātāmua mō te hunga kua moe.
1CO 15:21 Nā te tangata nei hoki te mate, waihoki nā te tangata te aranga o te hunga mate.
1CO 15:22 I roto hoki i a Ārama ka mate katoa ngā tāngata, waihoki i roto i a te Karaiti ka whakaorangia katoatia.
1CO 15:23 Otiia ko tēnei, ko tēnei, i tōna ake tūranga. Ko te Karaiti te mātāmua; muri iho ko te hunga a te Karaiti ā tōna haerenga mai.
1CO 15:24 Ko reira te mutunga, ina oti te rangatiratanga te hoatu e ia ki te Atua, arā ki te Matua; ina memeha i a ia ngā kāwanatanga katoa, ngā mana katoa, me te kaha.
1CO 15:25 Kua takoto hoki te tikanga kia kīngi ia, kia meinga katoatia rā anō e ia ōna hoariri ki raro i ōna waewae.
1CO 15:26 Ko te hoariri whakamutunga e whakakāhoretia ko te mate.
1CO 15:27 Nō te mea, “Ka oti ngā mea katoa te pēhi e ia ki raro i ōna waewae.” Otirā, i tāna kīanga, “Ka oti ngā mea katoa te pēhi ki raro i a ia,” e mārama ana kua waiho i waho te kaipēhi o ngā mea katoa ki raro i a ia.
1CO 15:28 Ā, ka oti ngā mea katoa te pēhi e ia ki raro i a ia, ko reira hoki te Tama riro ai ki raro i te kaipēhi o ngā mea katoa ki raro i a ia, kia katoa ai te Atua i roto i te katoa.
1CO 15:29 Pēnei, ka aha te hunga e iriiria ana hei whakakapi mō te hunga mate? Ki te kāhore rawa te hunga mate e ara, he aha hoki rātou ka iriiria ai hei whakakapi mō te hunga mate?
1CO 15:30 He aha anō tātou ka tū wehi ai i ngā wā katoa?
1CO 15:31 Nā, ko tāku oati, nā tōku whakamanamana ki a koutou e ōku tēina, i roto i a Karaiti Īhu, inā, mō te mate ahau i ia rā, i ia rā.
1CO 15:32 Ha, mehemea ahau i whawhai ki te kararehe i Epeha, pērā ana me te tangata, he aha te pai ki ahau? Ki te kāhore te hunga mate e ara, “E kai tātou, e inu, ko āpōpō hoki tātou mate ai.”
1CO 15:33 Kei whakapōhēhētia koutou: “Ki te kino ngā hoa, ka heke ki te kino ngā tikanga pai.”
1CO 15:34 Oha ake ki te tika, ā, kaua e hara; kāhore hoki o ētahi mātauranga ki te Atua. I kōrero ai ahau kia whakamā ai koutou.
1CO 15:35 Otirā, tērā tētahi e kī mai, “Pēheatia ai te whakaarahanga o te hunga mate? He tinana aha hoki tō rātou ina haere mai?”
1CO 15:36 Kūware! Ko tāu e whakatō nā, e kore e puta ki te ora, ki te kāhore e mate.
1CO 15:37 Ā, ko tāu e whakatō nā, ehara i te tinana e puta ake ā mua tāu e whakatō nā, engari he kākano kau nō te wīti rānei, nō tētahi atu mea rānei.
1CO 15:38 E hoatu ana hoki e te Atua ki taua kākano he tinana, ko tāna i pai ai, ā, ki tēnei kākano, ki tēnei kākano, tōna ake tinana.
1CO 15:39 Ehara i te kikokiko kotahi ngā kikokiko katoa; engari, tērā anō tō te tangata kikokiko, ā, rerekē anō tō te kararehe kikokiko, rerekē tō te manu, rerekē tō te ika.
1CO 15:40 Ko ētahi tinana nō te rangi, ko ētahi tinana nō te whenua. Otiia, rerekē te korōria o ngā mea o te rangi, rerekē tō ngā mea o te whenua.
1CO 15:41 He korōria kē tō te rā, he korōria kē tō te marama, he korōria kē hoki tō ngā whetū; nā, poka kē te korōria o tētahi whetū i tō tētahi whetū.
1CO 15:42 He pērā anō te aranga o te hunga mate. E whakatōkia pirautia ana; e whakaarahia piraukoretia ana.
1CO 15:43 E whakatōkia hōnorekoretia ana; e whakaarahia korōriatia ana. E whakatōkia ngoikoretia ana; e whakaarahia kahatia ana.
1CO 15:44 E whakatōkia ana he tinana māori; e whakaarahia ana he tinana wairua. Mehemea tērā he tinana māori, tērā anō hoki he tinana wairua.
1CO 15:45 He pēnei hoki te mea i tuhituhia, “Ko te tangata tuatahi, ko Ārama, i meinga hei tangata ora”; ko te Ārama whakamutunga ka waiho hei wairua whakaora.
1CO 15:46 He ahakoa rā ehara te mea wairua i te tuatahi, engari, te mea māori; nō muri te mea wairua.
1CO 15:47 Ko te tangata tuatahi nō te whenua, he mea oneone; ko te tangata tuarua nō te rangi.
1CO 15:48 Ko ngā mea oneone rite tonu ki te mea oneone; ko ngā mea o te rangi rite tonu ki te mea o te rangi.
1CO 15:49 Nā, kua mau nei ki a tātou te āhua o te mea oneone, waihoki ka mau anō ki a tātou te āhua o tō te rangi.
1CO 15:50 Ko tāku kōrero tēnei, e ōku tēina, e kore e tāu kia riro te rangatiratanga o te Atua i te kikokiko, i te toto; e kore anō te piraukore e riro i te pirau.
1CO 15:51 Nā, he mea huna tēnei ka kōrerotia nei e ahau ki a koutou. E kore tātou katoa e moe, engari, e whakaahuatia kētia tātou katoa.
1CO 15:52 E kore e aha, kimo kau te kanohi, i te tētere whakamutunga. E tangi hoki te tētere, ā, e whakaarahia ngā tūpāpaku, he mea piraukore, ā, ka whakaahuatia kētia tātou.
1CO 15:53 Kua takoto hoki te tikanga kia kākahuria te piraukore e tēnei pirau, kia kākahuria hoki te matekore e tēnei hanga matemate nei.
1CO 15:54 Heoi, ka oti tēnei pirau te whakakākahu ki te piraukore, me tēnei hanga matemate nei te whakakākahu ki te matekore, ko reira rite ai te kōrero i tuhituhia: “Horomia ake te mate e te wikitōria!”
1CO 15:55 “E te mate kei hea tōu wero? I te rēinga kei hea tōu wikitōria?”
1CO 15:56 Ko te hara tō te mate wero; nā te ture hoki i kaha ai te hara.
1CO 15:57 Ki te Atua ia te whakawhetai nāna nei i hōmai te wikitōria ki a tātou, he meatanga nā tō tātou Ariki nā Īhu Karaiti.
1CO 15:58 Heoi, e ōku tēina aroha, kia ū, kei taea te whakakorikori, kia hira te mahi ki te Ariki i ngā wā katoa, e mātau ana hoki koutou, ehara i te maumau tō koutou māuiui i roto i te Ariki.
1CO 16:1 Nā, mō te kohikohi mō te hunga tapu, pērātia me tāku i whakarite ai ki ngā hāhi o Karatia.
1CO 16:2 Hei te rā tuatahi o te wiki ka whakatakoto ia tangata, ia tangata o koutou ki te taha tohu ai, kei te āhua o te manaakitanga i a ia, kei waiho ngā kohikohi mō te wā e tae atu ai ahau.
1CO 16:3 Ā, ka tae atu ahau, māku e tono te hunga e whakapaingia ana e ā koutou pukapuka hei mau i tā koutou aroha noa ki Hiruhārama.
1CO 16:4 Ā, ki te tika kia haere atu anō hoki ahau, ko mātou tahi e haere.
1CO 16:5 Nā, ka haere atu ahau ki a koutou, ina tika ahau rā Makeronia: e tika ana hoki ahau rā Makeronia.
1CO 16:6 Ā, tērā pea ahau e noho roa ki a koutou, taka noa pea te hōtoke, kia ai koutou, hei ārahi i ahau ki te wāhi e haere atu ai ahau.
1CO 16:7 E kore hoki ahau e pai kia titiro haere noa ahau i a koutou āianei; e tūmanako ana hoki ahau kia whakatau iho ahau ki a koutou, ki te tukua e te Ariki.
1CO 16:8 Engari, ka noho ahau ki Epeha taea noatia te Petekoha.
1CO 16:9 Kua tuwhera mai nei he kūwaha rahi ki ahau, he mahi nui, ā, tērā anō te tokomaha o te hunga tautohe.
1CO 16:10 Nā, ki te tae atu a Tīmoti, meinga kia kaua ia e noho wehi i roto i a koutou. E mahi ana hoki ia i te mahi a te Ariki, e pēnei ana me ahau nei.
1CO 16:11 Nā reira, kei whakahāwea tētahi ki a ia; engari, āta ārahina ia i runga i te rangimārie, kia haere mai ai ki ahau; e tatari ana hoki ahau ki a ia, rātou ko ngā tēina.
1CO 16:12 Nā, ko tō tātou teina, ko Aporo, nui atu tāku tohe ki a ia kia haere atu rātou ko ngā tēina ki a koutou; otirā, kīhai rawa ia i pai kia haere atu i tēnei wā. Otirā, māna e haere atu ā te wā e wātea ai.
1CO 16:13 Kia mataara, e tū i runga i te whakapono, whakatāne, kia kaha.
1CO 16:14 Kia meatia ā koutou mea katoa i runga i te aroha.
1CO 16:15 He tohe tēnei nāku ki a koutou, e ōku tēina; e mōhio ana koutou ki ngā tāngata o te whare o Tepana ko te mātāmua tērā o Akāia, kua tuku anō i a rātou hei kaimahi mō te hunga tapu;
1CO 16:16 kia ngohengohe hoki koutou ki ngā tāngata pērā, ki te hunga katoa anō e mahi tahi ana, e uaua ana.
1CO 16:17 Hari tonu hoki ahau ki te haerenga mai o Tepana rātou ko Porotunatu, ko Akāiku. Nā rātou hoki i rite ai ngā mea i kore i a koutou.
1CO 16:18 I ora hoki i a rātou tōku wairua, o koutou hoki. Nā, kia mōhio koutou ki te hunga pērā.
1CO 16:19 Tēnei ngā hāhi o Āhia te oha atu nei ki a koutou. He maha hoki ngā mihi atu a Akuira rāua ko Pirihira i roto i te Ariki, a te hāhi hoki i tō rāua whare.
1CO 16:20 Tēnei ngā tēina katoa te oha atu nei ki a koutou. Oha atu ki a koutou anō, kei te kihi tapu.
1CO 16:21 Ko te oha tēnei āku, a Pāora, he mea nā tōku ringa ake.
1CO 16:22 Ki te kore tētahi e aroha ki te Ariki, kia waiho ia hei anatema. Maranāta.
1CO 16:23 Kia tau te aroha noa o te Ariki, o Īhu Karaiti, ki a koutou.
1CO 16:24 Hei a koutou katoa tōku aroha i roto i a Karaiti Īhu. Āmine.
2CO 1:1 Nā Pāora, i paingia e te Atua hei āpōtoro mā Īhu Karaiti, nā te teina hoki, nā Tīmoti, Ki te hāhi a te Atua i Koriniti, rātou ko te hunga tapu katoa i Akāia puta noa:
2CO 1:2 Kia tau ki a koutou te aroha noa me te rangimārie, he mea nā te Atua, nā tō tātou Matua, nā te Ariki hoki, nā Īhu Karaiti.
2CO 1:3 Kia whakapaingia te Atua, te Matua o tō tātou Ariki, o Īhu Karaiti, te Matua o ngā mahi tohu, te Atua o te whakamārie katoa;
2CO 1:4 ko ia hoki te kaiwhakamārie i a mātou i ō mātou pāweratanga katoa, e taea ai e mātou te whakamārie te hunga e pēhia ana e te aha, e te aha, mā te whakamārie e whakamārie nei te Atua i a mātou.
2CO 1:5 I te mea kei te hira tonu ngā mamae o te Karaiti i roto i a mātou, kei te pērā anō te hira o tō mātou whakamārietanga i roto i a te Karaiti.
2CO 1:6 Nā, ahakoa tūkinotia mātou, he mea tēnā kia whakamārietia ai, kia whakaorangia ai koutou; ahakoa rānei whakamārietia mātou, he mea tēnā kia whakamārietia ai koutou, koia tēnā e mahi nā, i a koutou ka whakaririka kau nā ki aua mamae e mamae nei hoki mātou.
2CO 1:7 E ū ana hoki tō mātou whakaaro ki a koutou, i te mōhio iho, ka uru nā koutou ki ngā mamae, ka uru anō hoki koutou ki te whakamārietanga.
2CO 1:8 Kāhore hoki mātou e pai kia ngaro i a koutou, e ōku tēina, te pāweratanga i tūpono ki a mātou i Āhia, te tino taimaha o te pēhanga i a mātou, nuku noa atu i tō mātou kaha, nā poroporoaki ana mātou ki te ora.
2CO 1:9 Āe, i roto anō i a mātou te kupu mō te mate, kia kaua ō mātou whakaaro e ū ki a mātou anō, engari ki te Atua, ki te kaiwhakaara i te hunga mate.
2CO 1:10 Nāna mātou i whakaora i taua mate nui, ā, e whakaora anō ia. E ū ana ō mātou whakaaro ki a ia, tērā ia e whakaora tonu i a mātou;
2CO 1:11 me koutou hoki ka āwhina tahi nā, ki tā koutou īnoi mō mātou; kia whakawhetai te tokomaha mō mātou, mō te aroha noa nā te tokomaha i hōmai ki a mātou.
2CO 1:12 Ko tā mātou whakamanamana hoki ko tēnei, ko te whakaaetanga ake o tō mātou hinengaro, kei runga i te tapu, i te tapatahi o te Atua, ehara i te mea kei runga i tō te kikokiko mōhio, engari i tō te Atua aroha noa, tā mātou whakahaere i te ao, ki a koutou rawa anō ia.
2CO 1:13 Ehara hoki tā mātou e tuhituhi atu nei ki a koutou i te mea kē i tā koutou e kōrero nā i te pukapuka, e whakaae nā; ā, e ū ana tōku whakaaro, e whakaae koutou taea noatia te mutunga;
2CO 1:14 me koutou anō i whakaae mai nā ko tētahi wāhi ki a mātou, ko mātou tā koutou e whakamanamana ai, pērā hoki me koutou, ko koutou tā mātou e whakamanamana ai i te rā o tō tātou Ariki, o Īhu.
2CO 1:15 Nā, i tōku whakapono ki tēnei, i mea ahau kia haere atu i mua rā ki a koutou, kia rua ai painga ki a koutou;
2CO 1:16 kia tika atu mā koutou nā ki Makeronia, ā, kia hoki mai i Makeronia ki a koutou, ā, mā koutou e whakatika atu tāku haere ki Hūria.
2CO 1:17 Nā, i ahau ka whakaaro i tēnei, i hanga noa iho rānei tōku ngākau? He whakaaro rānei nō te kikokiko ōku whakaaro e mea ai ahau, “Āe, āe, kāhore, kāhore?”
2CO 1:18 Otirā, i te mea he pono te Atua, ehara tā mātou kupu ki a koutou i te “Āe,” i te “Kāhore.”
2CO 1:19 Ko te Tama hoki a te Atua, ko Īhu Karaiti, i kauwhautia rā e mātou i roto i a koutou, arā e ahau, e Hirawanu, e Tīmoti, ehara i te “Āe,” i te “Kāhore” rānei, engari he “Āe” i roto i a ia.
2CO 1:20 Pēwhea ake hoki te maha o ngā kupu hōmai a te Atua, kei roto tonu i a ia te “Āe”; ā, mā roto mai hoki i a ia te “Āmine,” hei korōria mō te Atua i roto i a tātou.
2CO 1:21 Nā, ko te kaiwhakaū i a mātou me koutou i roto i a te Karaiti, ko te kaiwhakawahi i a tātou, ko te Atua;
2CO 1:22 nāna tātou i hīri, nāna hoki i hōmai te wāhi tuatahi, arā te Wairua ki roto ki ō tātou ngākau.
2CO 1:23 Nā, ka karanga ahau ki te Atua hei kaititiro mō tōku wairua, he tohu nāku i a koutou tē haere wawe atu ai ahau ki Koriniti.
2CO 1:24 Ehara i te mea hei rangatira mātou mō tō koutou whakapono, engari hei hoa mahi mātou i te hari mō koutou; nā te whakapono hoki koutou i tū ai.
2CO 2:1 Otirā, kua takoto tēnei i roto i ahau, kia kaua tōku hokinga atu ki a koutou e waiho i runga i te pōuri.
2CO 2:2 Nā, ki te whakapōuri hoki ahau i a koutou, ko wai hoki hei whakaora i tōku ngākau? Ko ia anake e whakapōuritia nei e ahau.
2CO 2:3 Ā, i tuhituhi atu ahau i taua mea nei anō ki a koutou, kei tae atu ahau, ka whakapōuritia ahau e te hunga i tika nei mā rātou ahau e whakahari; i te ū o tōku whakaaro ki a koutou katoa, ko tōku hari te hari o koutou katoa.
2CO 2:4 He nui hoki nō te pōuri, nō te mamae o te ngākau, i tuhituhi atu ai ahau ki a koutou me ngā roimata maha; ehara i te mea hei whakapōuri i a koutou, engari kia mātau ai koutou ki tōku aroha e hira rawa nei ki a koutou.
2CO 2:5 Mehemea nā tētahi i whakapōuri, ehara i te mea e whakapōuri ana ia i ahau, engari i a koutou katoa; i tētahi wāhi ia, e kore nei ahau e mea rawa he nui.
2CO 2:6 E rahi ana mō taua tū tangata ko tēnei whiu i whakapāngia nei e te tokomaha.
2CO 2:7 Engari rawa ia me whakarere noa iho tāna e koutou, ka whakamārie i a ia, kei tūpono ka horomia ia e tōna pōuri nui rawa.
2CO 2:8 Koia ahau ka īnoi ki a koutou kia whakaūkia tō koutou aroha ki a ia.
2CO 2:9 Nā, konei anō hoki ahau i tuhituhi atu ai, hei whakamātau i a koutou, mehemea e ngohengohe ana koutou i ngā mea katoa.
2CO 2:10 Ko te tangata e whakarērea ai e koutou tāna, ka whakarērea anō e ahau; ko tāku hoki i whakarere noa ai mehemea i pērā ahau, he whakaaro ki a koutou, i whakarērea noatia e ahau i te aroaro o te Karaiti.
2CO 2:11 Kei rā rungatia mai tātou e Hātana; ehara hoki tātou i te kūware ki āna rauhanga.
2CO 2:12 Nā, i tōku taenga ki Toroa ki te kauwhau i te rongopai o te Karaiti, ā, ka puare mai ki ahau tētahi kūwaha, he mea nā te Ariki,
2CO 2:13 kāhore he tānga mō tōku wairua, he kore i kite i tōku teina, i a Taituha. Heoi, ka poroporoaki ahau ki a rātou, ka haere ki Makeronia.
2CO 2:14 Nā, me whakawhetai ki te Atua e mea tonu nei i a mātou kia whakamanamana i roto i a te Karaiti, e whakaatu nei mā roto i a mātou i te hā o tōna mātauranga i ngā wāhi katoa.
2CO 2:15 He kakara pai hoki mātou nō te Karaiti ki te Atua, i runga i te hunga e whakaorangia ana, i runga anō i te hunga e whakangaromia ana;
2CO 2:16 ki tētahi he kakara nō te mate ki te mate; ki tētahi he kakara nō te ora ki te ora. Ā, ko wai e tau mō ēnei mea?
2CO 2:17 Kāhore hoki mātou e pērā i te tokomaha e whakatūtūa nei i te kupu a te Atua; engari he pērā i tā te pono, he pērā i tā te Atua, e kōrero ana mātou i te aroaro o te Atua i roto i a te Karaiti.
2CO 3:1 E tīmata ana anō rānei mātou te whakapai ki a mātou anō? E pērā ana rānei me ētahi atu, e mea ana mātou ki ētahi pukapuka whakapai mā mātou ki a koutou, mā koutou rānei ki a mātou?
2CO 3:2 Ko koutou tā mātou pukapuka, he mea tuhituhi ki ō mātou ngākau, e kitea ana, e kōrerotia ana e ngā tāngata katoa;
2CO 3:3 kua mārama nā hoki, ko koutou he pukapuka nā te Karaiti, he mea minita nā mātou, ehara i te mea tuhituhi ki te mangumangu, engari ki te Wairua o te Atua ora; he teka ki ngā papa kōhatu, engari ki runga ki ngā papa kikokiko o te ngākau.
2CO 3:4 Ko tēnei tū whakaaro ō mātou ū tonu ki tā te Atua, he mea nā te Karaiti.
2CO 3:5 He teka kei a mātou ake te tikanga mō te whakaaro ki tētahi aha, me te mea nā mātou ake anō; engari, nā te Atua mātou i whai tikanga ai;
2CO 3:6 nāna hoki mātou i tau ai hei minita mō te kawenata hou; he teka nō te reta, engari nō te Wairua; he whakamate hoki tā te reta, he whakaora ia tā te Wairua.
2CO 3:7 Nā, mehemea te minitatanga o te mate i tuhituhia nei, i whaoa nei ki ngā kōhatu, i puta korōria mai, i kore ai e taea e ngā tama a Īharaira te titiro matatau atu ki te mata o Mohi i te korōria o tōna mata; he korōria ia e memeha ana.
2CO 3:8 E kore ianei e nui noa atu te korōria o te minitatanga o te Wairua?
2CO 3:9 Nā, mehemea te minitatanga o te whakatau hē, he korōria, heoi hira rawa atu te korōria o te minitatanga o te tika.
2CO 3:10 He pono hoki, kāhore te mea i whakakorōriatia i whai korōria i tēnei wāhi, arā, nā te korōria e hira rawa nei.
2CO 3:11 Mehemea hoki he korōria tō te mea e memeha ana, nui noa atu te korōria o te mea pūmau.
2CO 3:12 Nā, i a mātou ka tūmanako nei ki tēnei, nui atu tō mātou māia ki te kōrero.
2CO 3:13 Kāhore anō e pērā me Mohi i maka nei i te hīpoki ki tōna mata, kei titiro matatau atu ngā tama a Īharaira ki te tukunga iho o te mea e memeha haere ana.
2CO 3:14 Otirā, i whakapakeketia ō rātou hinengaro. Nō te mea taea noatia mai tēnei rā i te kōrerotanga o te kawenata tawhito e mau tonu ana taua hīpoki rā anō, kāhore anō i hurahia; i roto ia i a te Karaiti ka whakakāhoretia.
2CO 3:15 Nā, tae noa mai ki tēnei rā, ki te kōrerotia a Mohi, e takoto ana he hīpoki ki runga i tō rātou ngākau.
2CO 3:16 Nā, kia huri ki te Ariki, ka tangohia te hīpoki.
2CO 3:17 Nā, ko te Ariki, ko te Wairua ia; ko te wāhi i noho ai te Wairua o te Ariki, kei reira te tikanga herekore.
2CO 3:18 Ko tātou katoa ia kāhore he hīpoki mō te mata, e whakaahua ana i te korōria o te Atua, ānō kei roto i te whakaata, ā, e whakaputaia kētia ana kia rite ki taua āhua anō, he korōria hono iho ki te korōria, i runga i tā te Wairua o te Ariki.
2CO 4:1 Nā konei, i te mea kei a mātou tēnei mahi minita, i te mea ka tohungia nei mātou, kāhore mātou e ngākaukore,
2CO 4:2 Engari kua whakarērea e mātou ngā mea huna o te whakamā, kore ake mātou e haere i runga i te tinihanga, kāhore hoki e māminga ki te kupu a te Atua; ka waiho ia ko te whakapuakanga o te pono hei whakaatu i tō mātou pai ki te hinengaro tangata i te aroaro o te Atua.
2CO 4:3 Nā, ki te mea he mea hīpoki tā mātou rongopai, he mea hīpoki ki te hunga e whakangaromia ana.
2CO 4:4 I roto nei i a rātou te atua o tēnei ao, e whakamatapō ana i ngā whakaaro o te hunga kore whakapono, kei whitingia rātou e te mārama o te rongopai o te korōria o te Karaiti, ko ia nei te āhua o te Atua.
2CO 4:5 He teka hoki ko mātou te kauwhautia nei e mātou, engari, ko Karaiti Īhu hei Ariki, ā, ko mātou nei hei pononga mā koutou, he whakaaro ki a Īhu.
2CO 4:6 Ko te Atua hoki nāna nei i kī te mārama kia whiti i roto i te pōuri, kua whiti ki roto ki ō mātou ngākau, hei hōmai i te mārama o te mātauranga o te korōria o te Atua i te mata o Īhu Karaiti.
2CO 4:7 Ko tēnei taonga ia o mātou kei roto i te oko oneone, kia kīia ai te kaha nui whakaharahara nō te Atua, ehara hoki i a mātou.
2CO 4:8 E ākina ana mātou i ngā taha katoa, heoi kāhore e pau te whakaaro; e raruraru ana, heoi kāhore e ngākaukore;
2CO 4:9 e whakatoia ana, heoi kāhore i whakarērea; e tāia ana ki raro, heoi kāhore i whakangaromia;
2CO 4:10 e mau tonu ana hoki te matenga o Īhu ki ō mātou tinana, i a mātou e hāereere nei; kia mārama ai tō Īhu ora i roto i ō mātou tinana.
2CO 4:11 Ko mātou hoki e ora nei, e tukua tonutia ana ki te mate mō te whakaaro ki a Īhu, kia mārama ai hoki tō Īhu ora i roto i ō mātou kikokiko matemate.
2CO 4:12 Nā, ko te mate te mahi ana i roto i a mātou, ko te ora ia i roto i a koutou.
2CO 4:13 Otirā, i te mea kei a mātou taua wairua rā anō o te whakapono, te mea i tuhituhia rā, “I whakapono ahau, koia ahau i kōrero ai,” whakapono ana anō mātou, koia hoki mātou ka kōrero nei;
2CO 4:14 e mātau ana hoki mātou, tērā te kaiwhakaara o te Ariki, o Īhu, e whakaara anō hoki i a mātou me Īhu, e whakatū ngātahi anō i a mātou me koutou.
2CO 4:15 Hei painga hoki ki a koutou ngā mea katoa, kia waiho ai mā te aroha noa, e whakanuia nei e te tokomaha, e whakawhetai, kia hira rawa ai te korōria o te Atua.
2CO 4:16 Koia hoki tātou tē ngākaukore ai; heoi, ahakoa haere iho tātou ki te pirau, arā tō waho tangata, e whakahoutia ana anō tō roto i tēnei rā, i tēnei rā.
2CO 4:17 Ko tō tātou mamae māmā nei hoki, rangitahi kau nei, hei whakawhiwhi i a tātou kia tino nui haere rawa atu te taimaha o te korōria, he mea mau tonu;
2CO 4:18 i a tātou kāhore nei e titiro ki ngā mea e kitea ana, engari ki ngā mea kāhore e kitea. He mea nō nāianei noa hoki ngā mea e kitea ana; he mea mau tonu ia ngā mea kāhore e kitea.
2CO 5:1 E mātau ana hoki tātou, ki te wāhia tō tātou whare wharau, te mea whenua nei, he whare anō tō tātou, he mea hanga nā te Atua, ehara i te whare hanga e te ringa, he mea mau tonu, i ngā rangi.
2CO 5:2 He pono hoki i tēnei e auē ana tātou, e hiahia ana ki tō tātou whare o te rangi hei kākahu mō tātou.
2CO 5:3 Mehemea ia ki te whai kākahu tātou, e kore e rokohanga mai e noho tahanga ana.
2CO 5:4 Kei te auē hoki tātou, te hunga i tēnei whare wharau, i te taimaha; ehara i te mea e hiahia ana kia unuhia ō tātou nei, engari, kia kākahuria iho kia horomia ai te mea matemate e te ora.
2CO 5:5 Nā, ko te kaihanga i a tātou mō taua mea nei anō, ko te Atua, nāna nei hoki i hōmai ki a tātou te wāhi tuatahi, arā te Wairua.
2CO 5:6 Nō reira i te mea e māia tonu ana tātou, e mātau ana hoki, i a tātou e noho nei i te tinana, he mea motu kē mai i te Ariki tā tātou noho.
2CO 5:7 Ko tā tātou haere hoki kei runga i te whakapono, kāhore i runga i te titiro.
2CO 5:8 E mea ana ahau, e māia ana anō tātou, ko tā tātou hoki e tino pai ai, kia noho motu kē i te tinana, kia noho ai i te Ariki.
2CO 5:9 Koia hoki tātou ka whai nei, ahakoa i konei e noho ana, ahakoa e noho kē ana, kia āhuarekaina mai tātou e ia.
2CO 5:10 Kua takoto hoki te tikanga kia kitea tātou katoa ki mua i te nohoanga whakawā o te Karaiti; kia riro mai ai i tēnei, i tēnei, ngā mea i mahia i te tinana, kia rite hoki ki tāna i mahi ai, ahakoa pai, ahakoa kino.
2CO 5:11 Nā, ka mātau nei mātou ki te wehi o te Atua, ka kukume mātou i ngā tāngata, otirā, e kitea ana anō mātou e te Atua; ā, e ū ana tōku whakaaro, kua kitea anō mātou e ō koutou hinengaro.
2CO 5:12 Ehara i te mea e whakapai ana anō mātou i a mātou ki a koutou, engari e kōrero ana hei hoatu i te take ki a koutou e whakamanamana ai koutou ki a mātou, kia ai ai he mea hei whakautu mā koutou ki te hunga e whakamanamana ana ki tō te kanohi, kāhore ki tō te ngākau.
2CO 5:13 Ahakoa hoki pōrangi mātou, hei mea ia mō te Atua; ahakoa rānei tika ō mātou mahara, hei mea mō koutou.
2CO 5:14 E akiakina ana hoki mātou e te aroha o te Karaiti; i a mātou e whakaaro ana i tēnei, kotahi i mate mō te katoa, nō reira, he hunga mate te katoa.
2CO 5:15 I mate hoki ia mō te katoa, kia kaua ai te hunga e ora ana e ora mō rātou anō ā muri ake nei, engari mō tēnei i mate nei mō rātou, ā, i ara ake anō.
2CO 5:16 Nō reira, ā mua ake nei e kore mātou e mātau ki te tangata, arā, ki tōna kikokiko; āe rā, ahakoa mātau mātou ki a te Karaiti, arā ki tōna kikokiko, otiia e kore mātou e mātau pēnā ki a ia ā mua ake nei.
2CO 5:17 Nā, ki te mea kei roto i a te Karaiti tētahi, he mahinga hou ia; kua pahemo ngā mea tawhito, nā, kua hou ngā mea katoa.
2CO 5:18 Ko te pūtake ia o ngā mea katoa ko te Atua, i hohou nei i tā tātou rongo ki a ia i runga i a te Karaiti, ā, hōmai ana e ia ki a mātou te minitatanga o te houhanga rongo.
2CO 5:19 Arā, i roto te Atua i a te Karaiti e hohou ana i tā te ao rongo ki a ia, kore ake e whakairia ki a rātou ō rātou hē; ā, kua tukua mai ki a mātou te kupu mō te houhanga rongo.
2CO 5:20 Nā, he karere mātou nā te Karaiti, me te mea anō ko te Atua tēnei kei roto i a mātou e karanga ana; ko mātou hei whakakapi mō te Karaiti ki te tohe atu ki a koutou, kia houhia tā koutou rongo ki te Atua.
2CO 5:21 Ko ia, kīhai nei i mātau ki te hara, meinga ana hei hara mō tātou, kia meinga ai tātou ko te tika o te Atua i roto i a ia.
2CO 6:1 Nā, tēnei mātou ōna hoa mahi te tohe atu nei i a koutou, kia kaua e kore hua te rironga mai o te aroha noa o te Atua i a koutou.
2CO 6:2 E mea ana hoki ia, “Nō te wā manakohanga atu i whakarongo ai ahau ki a koe, āwhinatia ana hoki koe e ahau i te rā o te whakaoranga.” Nanā, tēnei te wā manakohanga mai; nanā, tēnei te rā o te whakaoranga!
2CO 6:3 E kore hoki e hoatu e mātou tētahi take e hē ai, ahakoa i te aha, kei whakahēngia tā mātou mahi minita;
2CO 6:4 engari, i ngā mea katoa e whakakite ana i a mātou, he minita nā te Atua, i runga i te hua o te manawanui, i ngā tūkinotanga, i ngā aituā, i ngā rarunga,
2CO 6:5 i ngā whiunga, i ngā hereheretanga, i ngā ngangaretanga, i ngā māuiuitanga, i ngā mataaratanga, i ngā nohoanga pukutanga;
2CO 6:6 i runga i te kinokore, i te mātauranga, i te manawanui, i te ngākau ngāwari, i te Wairua Tapu, i te aroha tinihangakore,
2CO 6:7 i runga i te kupu o te pono, i te kaha o te Atua, i ngā mea whawhai o te tika ki matau, ki mauī,
2CO 6:8 i runga i te korōria, i te hōnorekore, i te kupu kino, i te kupu pai; me te mea he hunga tinihanga, ā, he hunga pono anō.
2CO 6:9 Me te mea kāhore e mōhiotia, otiia e mōhiotia nuitia ana; me te mea ka mate, heoi, tēnei anō mātou te ora nei; me te mea e pākia ana, heoi kāhore e whakamatea;
2CO 6:10 me te mea e pōuri ana, heoi, e hari tonu ana; me te mea e rawakore ana, heoi, e mea ana i te tokomaha kia whai taonga; me te mea kāhore ā mātou aha, otiia, kei a mātou ngā mea katoa.
2CO 6:11 Tuwhera tonu ō mātou māngai ki a koutou, e ngā Koriniti, kua nui tō mātou ngākau.
2CO 6:12 Ehara i te mea nō mātou te kūiti i a koutou, engari, nō ō koutou ngākau te kūiti.
2CO 6:13 Nā, hei utu e rite ana, he kupu tēnei nāku ki āku tamariki, kia whakanuia anō hoki koutou.
2CO 6:14 Kei iokatia kētia koutou ki te hunga whakapono kore. Nō hea hoki te whakahoatanga o te tika rāua ko te tutū? Nō hea hoki te huihuinga tahitanga o te mārama ki te pōuri?
2CO 6:15 Ko ēhea mea a te Karaiti i huihuia ki a Periara? Nā tēhea wāhi rānei i huanga ai te tangata whakapono ki te tangata whakapono kore?
2CO 6:16 Ā, kei hea he tatanga mō te whare tapu o te Atua ki ngā whakapakoko? He whare tapu hoki koutou nō te Atua ora; ko tā te Atua hoki tēnā i mea ai: “Ka noho ahau i roto i a rātou, ka hāereere ahau i roto i a rātou; ā, ko ahau hei Atua mō rātou, ko rātou hoki hei iwi māku.”
2CO 6:17 Mō konei, “Puta mai i roto i a rātou, kia motu kē, e ai tā te Ariki. Kaua hoki e pā ki te mea poke; ā, ka riro mai koutou i ahau;
2CO 6:18 Ko ahau anō hoki hei Matua mō koutou, ko koutou hoki hei tama hei tamāhine ki ahau, e ai tā te Ariki Kaha Rawa.”
2CO 7:1 Nā, i a tātou ka whiwhi nei ki ēnei kupu whakaari, e ōku hoa aroha, tahuri tātou ki te horoi atu i a tātou i ngā mea poke katoa o te kikokiko, o te wairua, me te whai anō ki te tino tapu i runga i te wehi ki te Atua.
2CO 7:2 Manako mai ki a mātou; kāhore ā mātou whakahaere hē ki tētahi, kāhore mātou i kukume i tētahi ki te kino, kāhore ā mātou whakapati i ngā taonga a tētahi.
2CO 7:3 Ehara tāku kupu nei i te mea hei whakatau hē ki a koutou. Kua mea atu nā hoki ahau, kei ō mātou ngākau koutou mō te mate tahi, mō te ora tahi.
2CO 7:4 Nui atu tōku māia ki te kōrero ki a koutou, nui atu tōku whakamanamana mō koutou; kī tonu ahau i te whakamārie, hira ake tōku koa i ō mātou matenga katoa.
2CO 7:5 I tō mātou taenga mai hoki ki Makeronia, kīhai i whai okiokinga tō mātou kikokiko, heoi, mate ana mātou i ngā taha katoa; i waho ko ngā whawhai, i roto ko ngā mataku.
2CO 7:6 Otirā, nā te kaiwhakamārie o te hunga e whakaititia ana, arā nā te Atua, nāna mātou i whakamārie, i a Taituha ka tae mai nei;
2CO 7:7 ehara i te mea nā tōna taenga mai anake, engari, nā te whakamārietanga anō hoki i whakamārietia ai ia e koutou, i tāna kōrerotanga mai ki a mātou i tō koutou hiahia nui, i tō koutou tangi, i tō koutou ngākau nui ki ahau; ā, ka koa rawa ahau.
2CO 7:8 Ahakoa hoki i whakapōuritia koutou e ahau ki tāku pukapuka, kāhore ahau i te mea e hē ana ahau, ahakoa i mahara pērā i mua rā. Kua kite nei hoki ahau nā taua pukapuka koutou i mea kia pōuri, arā, pōuri potopoto nei.
2CO 7:9 E hari ana tēnei ahau, ehara i te mea mō te whakapōuritanga i a koutou, engari, nō te mea i whakapōuritia koutou ā rīpenetā iho. Ko tō koutou pōuri hoki nō tā te Atua, e kore noa iho ai koutou e whai hē i a mātou.
2CO 7:10 E meinga ana hoki e tā te Atua pōuri he rīpenetā e ora ai, he rīpenetā kāhore ōna haku; ko tā te pōuri ia o te ao e mahi ai he mate.
2CO 7:11 Titiro hoki, ko taua mea nei anō, ko tā te Atua whakapōuritanga i a koutou, nā, tāna mahinga nui i roto i a koutou, āe rā, ngā kupu whakatikatika i a koutou, te riri, te wehi, te hiahia, te ngākau nui, te whakapā riri! I ngā mea katoa kua whakakite nui koutou, kāhore ō koutou hara i tēnei mea.
2CO 7:12 Nō reira, ahakoa i tuhituhi ahau ki a koutou, kāhore ahau i tuhituhi atu mō te tangata nāna te hē, mō te tangata rānei ki a ia nei te hē, engari, kia whakakitea ai ki a koutou i te aroaro o te Atua te nui o tō koutou matapopore ki a mātou.
2CO 7:13 Koia mātou i whai mārietanga ai. Ā, i tō mātou whakamārietanga hira noa ake tō mātou koa i te koa hoki o Taituha, nō te mea kua whakahauoratia tōna wairua e koutou katoa.
2CO 7:14 Mehemea hoki ahau i whakamanamana ki a ia ki tētahi mea a koutou, kāhore ahau i meinga kia whakamā; nō te mea i kōrerotia e mātou ngā mea katoa ki a koutou i runga i te pono, waihoki ko tō mātou whakamanamana, i meinga nei e ahau i te aroaro o Taituha, kua kitea he pono.
2CO 7:15 Ā, hira ake anō hoki tōna ngākau aroha ki a koutou, i a ia e mahara ana ki te ngohengohe o koutou katoa, ki te wehi me te wiri i manako ai koutou ki a ia.
2CO 7:16 E hari ana ahau, nō te mea ka mārama tōku whakaaro ki a koutou ngā mea katoa.
2CO 8:1 Nā, he whakarite atu tēnei nā mātou ki a koutou, e ōku tēina, i te aroha noa o te Atua kua hōmai nei ki ngā hāhi o Makeronia;
2CO 8:2 ahakoa he nui te whakamātautauranga a ngā mate, whakaputaina nuitia ana mai e te nui o tō rātou koa, i roto i tō rātou tino rawakoretanga, ngā tahua o tā rātou manaaki.
2CO 8:3 Ko ahau hei kaiwhakaatu, hihiko tonu rātou ki te tāpae i ngā mea i taea e rātou, āe rā, i ngā mea anō kīhai i taea e rātou;
2CO 8:4 me te nui o tā rātou tohe ki a mātou, kia manako mātou ki tēnei aroha noa, kia uru tahi hoki ki te mahi ki te hunga tapu.
2CO 8:5 Kīhai hoki rātou i pērā me tā mātou i whakaaro ai, engari i te tuatahi tuku ana rātou i a rātou anō ki te Ariki, ki a mātou hoki i runga i tā te Atua i pai ai.
2CO 8:6 Koia mātou i whakahau ai i a Taituha, nāna hoki tēnā mahi i tīmata, māna anō e whakaoti tēnei aroha noa hoki i roto i a koutou.
2CO 8:7 Nā, e hua nā i a koutou ngā mea katoa, te whakapono, te whai kupu, te mātauranga, te whakaaro hōhonu, me tō koutou aroha anō ki a mātou, kia hua anō hoki tēnei mahi aroha noa a koutou.
2CO 8:8 Ehara tāku i te kōrero ā-ture, engari he mea i te kakama o ērā atu, hei whakamātautau anō i te pono o tō koutou aroha.
2CO 8:9 E mātau ana hoki koutou ki te aroha noa o tō tātou Ariki, o Īhu Karaiti, arā, i a ia e whai taonga ana, whakarawakoretia iho ana ia, he whakaaro ki a koutou, kia whai taonga ai koutou i tōna rawakoretanga.
2CO 8:10 Ā, ka hoatu nei ahau i tōku whakaaro mō tēnei. He mea pai hoki tēnei mō koutou, ko koutou nā te tuatahi ki te tīmata i tērā tau, ehara i te mea ko te mahi anake, engari ko te hiahia anō hoki.
2CO 8:11 Nā, ināianei whakaotia hoki te mahi; i hihiko nā te whakaaro i mua, kia whai otinga hoki i roto i tō koutou kaha.
2CO 8:12 Ki te mea hoki kei konā te ngākau hihiko, ka whakaaroa ko ngā mea i te tangata, hāunga ngā mea kāhore i a ia.
2CO 8:13 Ehara tāku kōrero i tēnei, kia māmā ai ētahi, ā, ko koutou kia taimaha,
2CO 8:14 engari kia taurite; ko ngā mea a koutou i hira i tēnei wā hei mea mō tō rātou hapa, ā, ko ngā mea a rātou e hira hei mea mā koutou ina hapa; kia rite ai.
2CO 8:15 Kia pērā me te mea i tuhituhia, “Ko te tangata i nui tāna whakaemi kāhore he tuhene; ko te tangata i nohinohi tāna kīhai i hapa.”
2CO 8:16 Otiia, me whakawhetai atu ki te Atua, nāna nei i hōmai ki roto ki te ngākau o Taituha taua kakama mō koutou.
2CO 8:17 I tahuri mai hoki ia ki tā mātou whakahau; he nui nō tōna kakama i hihiko ai ia ki te haere atu ki a koutou.
2CO 8:18 Ā, nā mātou i tono tahi atu me ia te teina, kua pakū nei ki ngā hāhi katoa te whakamoemiti ki a ia i roto i te rongopai;
2CO 8:19 ā, ehara i te mea ko tērā anake, engari i whiriwhiria anō hoki ia hei hoa haere mō mātou, ki te kawe i tēnei aroha noa e mahia nei e mātou hei whakakorōria mō te Ariki, hei whakakite hoki i tō mātou hihiko.
2CO 8:20 Me te tūpato anō, kei whai kupu tētahi tangata ki a mātou mō ēnei taonga maha e whakahaerea nei e mātou;
2CO 8:21 e whakaaro ana hoki mātou ki ngā mea rangatira, ehara i te mea i te aroaro anake o te Ariki, engari i te aroaro anō o ngā tāngata.
2CO 8:22 Ā, kua tonoa atu anō e mātou hei hoa mō rāua tō mātou teina, kua maha nei ō mātou kitenga i tōna uaua i ngā mea maha, heoi nui kē atu tōna uaua ināianei, nā te nui o te ū o tōna whakaaro ki a koutou.
2CO 8:23 Ki te ui tētahi mō Taituha ko ia tōku hoa, he hoa mahi nōku ki a koutou; ki te ui rānei mō ō mātou tēina, he karere rātou nā ngā hāhi, he korōria nō te Karaiti.
2CO 8:24 Nā, whakakitea e koutou ki a rātou i te aroaro o ngā hāhi te tohu o tō koutou aroha, o tā mātou whakamanamana hoki mō koutou.
2CO 9:1 Nā, mō te minitatanga ki te hunga tapu, kāhore noa he tikanga i tuhituhi atu ai ahau ki a koutou.
2CO 9:2 E mōhio ana hoki ahau ki tō koutou ngākau hihiko, i whakamanamanatia ai koutou e ahau ki ngā tāngata o Makeronia, arā, ko tā Akāia kua rite noa ake i tērā tau rā anō; ā, he tokomaha o rātou i oho i tō koutou ngākau hihiri.
2CO 9:3 Heoi, kua tonoa atu nei e ahau ngā tēina, kei whakakāhoretia tēnei wāhi o tāku whakamanamana ki tā koutou mahi; kia rite ai tā koutou, kia pērā ai me tāku i mea ai.
2CO 9:4 Kei tūpono, ka haere atu i ahau ētahi o Makeronia, ā, ka rokohanga atu kāhore anō kia rite noa tā koutou, nā, ko te whakamā mō mātou, e kore mātou e kī mō koutou, i tēnei whakamanamana e kaha nei.
2CO 9:5 Koia ahau i whakaaro ai he tika kia whakahaua ngā tēina, kia haere atu rātou i mua ki a koutou, kia wawe te rite i a rātou tēnei manaaki a koutou kua kōrerotia rā, kia noho rite, kia tū-ā-manaaki ai, kei rite ki te mea e manawapātia ana.
2CO 9:6 Ko tāku ia tēnei, he torutoru a tētahi i rui ai, he torutoru anō āna e kokoti ai; ā, ko te mea he maha āna i rui ai, he maha anō āna e kokoti ai.
2CO 9:7 Kia rite te mahi a ia tangata ki tāna i whakaaro ai i roto i tōna ngākau; kaua e tū-ā-pōuri, kaua e whakauaua. Ko tā te Atua hoki e aroha ai, ko te tangata ringa māhorahora.
2CO 9:8 E taea anō hoki e te Atua te mea kia hira ngā aroha noa katoa ki a koutou; nā, i te mea ka ranea nā ō koutou taonga i ngā mea katoa i ngā wā katoa, kia hira anō ā koutou mahi pai katoa.
2CO 9:9 Kia rite ai ki te mea i tuhituhia: “Kua tītaritaria e ia, kua hoatu e ia ki te hunga rawakore; he pūmau tonu tōna tika ake ake.”
2CO 9:10 Nā, mā te kaihōmai i te purapura ki te kaiwhakatō, i te taro hoki hei kai, e hōmai, e mea kia maha tā koutou e whakatō ai, e whakanui hoki ngā hua o tō koutou tika;
2CO 9:11 me te hua anō ō koutou taonga i ngā mea katoa hei ohaoha, e puta ai i a mātou ngā whakawhetai ki te Atua.
2CO 9:12 Nā tēnei mahi hoki e minitatia nei i whiwhi ai te hunga tapu ki ngā mea i kore i a rātou, ā, nā reira anō i hua noa atu ai ngā whakawhetai ki te Atua.
2CO 9:13 Nā te mea hoki ka kitea koutou i tēnei mahi minita, ka whakakorōria rātou i te Atua mō koutou kua whakaae nei, kua ngohengohe nei ki te rongopai o te Karaiti, ā, mō tō koutou pono ki ā koutou ohaoha ki a rātou me te katoa;
2CO 9:14 i a rātou anō e īnoi ana mō koutou, me te kōingo anō rātou ki a koutou, he whakaaro hoki ki te aroha noa o te Atua ka nui rawa nei ki a koutou.
2CO 9:15 Me whakawhetai ki te Atua mō tāna mea hōmai noa, e kore nei e taea te kōrero!
2CO 10:1 Nā, nāku ake, nā Pāora, tēnei tohe ki a koutou nā te tikanga māhaki me te ngākau ngāwari o te Karaiti, he mea iti nei ahau i ahau i konā i roto i a koutou, i tawhiti nei ia e māia ana ki a koutou.
2CO 10:2 Āe rā, e tohe ana ahau ki a koutou, kia kaua ahau ina tae atu e mārō ki te whakaputa i te māia, pērā me tāku e mea nei kia māia ki ētahi, e whakaaro nei ki a mātou, ānō ko tā mātou whakahaere nō te kikokiko.
2CO 10:3 Nō te mea ahakoa hāereere mātou i roto i te kikokiko, ehara i te kikokiko tā mātou whawhai;
2CO 10:4 ehara hoki ngā rākau o tā mātou pakanga i te mea nō te kikokiko, engari he kaha i roto i te Atua hei whakahoro i ngā pā kaha;
2CO 10:5 horo ana i a mātou ngā whakaaroaronga me ngā mea ikeike katoa e whakakake ana ki te mātauranga ki te Atua, ā, riro pārau mai ana ngā whakaaro katoa, ka meinga kia ngohengohe ki a te Karaiti;
2CO 10:6 me te noho rite anō ki te whakapā riri mō ngā mahi tutū katoa, ina tino ngohengohe rawa koutou.
2CO 10:7 E titiro ana koutou ki ngā mea kei mua i tō koutou mata. Ki te ū te whakaaro o tētahi nō te Karaiti ia, me mahara ia ki tēnei mea anō hoki, nō te Karaiti ia, pēnā anō hoki mātou.
2CO 10:8 Ahakoa hoki āhua rahi ake tāku whakamanamana mō ngā tikanga i a mātou nei, nā te Ariki nei i hōmai hei hanga ake i a koutou, ehara i te mea hei tuku i a koutou ki raro, e kore ahau e meinga kia whakamā.
2CO 10:9 Kia kaua ahau e meatia e whakawehi ana i a koutou ki āku pukapuka.
2CO 10:10 Ko āna pukapuka hoki, e ai ki tā rātou, he taimaha, he kaha; ko tōna tinana ia i a ia i konei he ngoikore, ko tāna kōrero he korekore noa iho.
2CO 10:11 Kia mahara taua tū tangata ki tēnei, nā, ko tō mātou āhua i ngā kupu o ngā pukapuka i a mātou e ngaro mai nei, koia anō tō mātou rite ki ngā mahi me i konā mātou.
2CO 10:12 E kore hoki mātou e māia ki te whakauru atu, ki te whakariterite rānei i a mātou ki ētahi e whakapai nei ki a rātou anō. I a rātou ia e mēhua nei i a rātou ki a rātou anō, e whakariterite nei i a rātou ki a rātou anō, kāhore ō rātou mātauranga.
2CO 10:13 E kore hoki mātou e whakamanamana ki tua atu i tō mātou mēhua, engari ka rite ki te mēhua o te wāhanga i whakaritea mai e te Atua mā mātou, e tae atu ai ki a koutou rawa.
2CO 10:14 Kāhore hoki ā mātou totoro noa atu, e kīia ai kāhore he taenga atu mō mātou ki a koutou. I tae atu nā hoki mātou ki a koutou rawa nā i runga i te rongopai o te Karaiti.
2CO 10:15 E kore hoki mātou e whakamanamana ki kō atu i tō mātou mēhua, arā, ki ngā mahi a ētahi atu; engari e ū ana tō mātou whakaaro, ka tupu haere tō koutou whakapono, ka ai koutou hei whakanui i a mātou, e tino rite rawa ai ki tō mātou rūri;
2CO 10:16 kia kauwhautia ai te rongopai ki ngā wāhi i kō atu i a koutou, kia kaua hoki e whakamanamana i runga i tō te tangata kē rūri ki ngā mea e noho tata ana ki tō mātou ringa.
2CO 10:17 “Ki te whakamanamana ia tētahi, me whakamanamana ia ki te Ariki.”
2CO 10:18 He teka hoki ko te tangata e whakapai ana ki a ia anō ka tikangatia, engari ko tā te Ariki e whakapai ai.
2CO 11:1 Ko tāku e hiahia nei kia āta hanga mai koutou ki ahau, kia iti nei, i ahau e wairangi nei. Āe rā, kia āta hanga mai anō ki ahau.
2CO 11:2 Nui atu hoki tōku ngākau ki a koutou, he ngākau nō te Atua. Kua oti hoki koutou te taumau e ahau mā te tāne kotahi, kia tāpaea atu ai hei wāhina kore hē ki a te Karaiti.
2CO 11:3 E wehi ana ia ahau, kei pērā me Iwi i whakawaia e te tinihanga o te nākahi, kei kūmea atu ō koutou whakaaro ki te hē, kei mahue te tapatahi o te ngākau ki a te Karaiti.
2CO 11:4 Ki te tae atu hoki te tangata, me te kauwhau i tētahi Īhu e rerekē ana i tā mātou i kauwhau ai, ki te whiwhi rānei koutou i tētahi wairua kē atu i tēnā i whiwhi nā koutou, ki tētahi rongopai rānei e rerekē ana i tā koutou i whakaae ai, e tika ana koutou kia āta hanga ki a ia.
2CO 11:5 Ki ahau hoki kāhore rawa ahau i hoki iho i ngā tino āpōtoro.
2CO 11:6 Nā, ahakoa tangata ware ahau ki te kōrero, kāhore ia ki te mātauranga; heoi i ngā mea katoa kua tino kitea tēnei i roto i a koutou.
2CO 11:7 I hara oti ahau i ahau i whakaiti rā i ahau kia kake ai koutou, i kauwhau utukore rā i te rongopai o te Atua ki a koutou?
2CO 11:8 I pāhuatia e ahau ērā atu hāhi, i tango utu ahau i a rātou kia minita ai ahau ki a koutou.
2CO 11:9 Ā, i ahau i a koutou nā, ā, i kore tētahi mea māku, kāhore ahau i taimaha ki tētahi; nā ngā tēina hoki, i tō rātou haerenga mai i Makeronia, i whakawhiwhi ahau ki ngā mea i kore i ahau. I ngā mea katoa hoki i tiaki ahau i ahau kei taimaha iho ki a koutou; inā, ka tiaki pērā anō ahau i ahau.
2CO 11:10 I te mea kei ahau te pono o te Karaiti, e kore tēnei whakamanamana āku e āraia e tētahi i ngā wāhi o Akāia.
2CO 11:11 Nā te aha? Nā te mea koia kāhore ōku aroha ki a koutou? E mātau ana te Atua.
2CO 11:12 Ko tāku ia e mea nei, e meinga anō e ahau, kia motuhia atu ai e ahau te take a te hunga e hiahia ana ki te take; kia kitea ai rātou i runga i tā rātou e whakamanamana nei e rite tahi ana anō ki a mātou nei.
2CO 11:13 He āpōtoro teka hoki ngā pērā, he kaimahi i te tinihanga, e whakaahua ana i a rātou kia rite ki ngā āpōtoro a te Karaiti.
2CO 11:14 Ā, ehara i te mea whakamīharo rawa; inā hoki a Hātana, e whakaahua kē ana i a ia hei anahera mō te mārama,
2CO 11:15 heoi, ehara i te mea nui ki te whakaahua kē anō āna minita i a rātou kia rite ki ngā minita o te tika; nā, ko tō rātou whakamutunga e rite ki ā rātou mahi.
2CO 11:16 Me kī atu anō e ahau, kaua tētahi e mea he wairangi ahau; ā, ahakoa pēnā, heoi tahuri mai ki ahau, ki te wairangi, kia whakamanamana ai anō ahau, he mea iti nei.
2CO 11:17 Ko tāku e kōrero nei, ehara i te kōrero i runga i tā te Ariki, engari me te mea i runga i te wairangi, i tēnei whakamanamana ka kaha nei.
2CO 11:18 Nā, ka tokomaha nei e whakamanamana i runga i tō te kikokiko, ka whakamanamana anō hoki ahau.
2CO 11:19 E pai ana hoki koutou, e āta hanga ana ki te hunga wairangi, he hunga whakaaro hoki koutou.
2CO 11:20 Ka āta hanga hoki koutou ki te whakataurekareka tētahi i a koutou, ki te pau ā koutou mea i tētahi, ki te tangohia e ia hei herehere, ki te whakakake ia, ki te pāhiatia e ia tō koutou mata.
2CO 11:21 He kōrero whakaiti tāku, ānō he ngoikore mātou. Nā, ki te māia tētahi ki tētahi mea; he kōrero wairangi nei tāku, ka māia anō ahau.
2CO 11:22 He Hiperu rātou? Ahau anō hoki. Nō Īharaira rātou? Ahau anō hoki. He whānau rātou nā Āperahama? Pērā anō hoki ahau.
2CO 11:23 He minita rātou nā te Karaiti? He kōrero pōrangi tāku nei, tērā atu anō tōku; hira atu ōku māuiuitanga, maha noa atu ōku meatanga ki roto ki ngā whare herehere, nui noa atu ōku whiunga, maha atu ōku mate.
2CO 11:24 E rima ngā wā i whiua ai ahau e ngā Hūrai, e whā tekau pānga o te whiu, hāunga te kotahi.
2CO 11:25 E toru ōku whiunga ki te rākau, kotahi tōku ākinga ki te kōhatu, tuatoru ahau ki te kaipuke pakaru, kotahi ōku pō, kotahi ōku rā i te rire;
2CO 11:26 i ngā hāereerenga maha, i ngā oranga noatanga i ngā awa, i ngā oranga noatanga i ngā kaipāhua, i ngā oranga noatanga i ōku whanaunga, i ngā oranga noatanga i ngā tauiwi, i ngā oranga noatanga i te pā, i ngā oranga noatanga i te koraha, i ngā oranga noatanga i te moana, i ngā oranga noatanga i ngā tēina teka.
2CO 11:27 Māuiui ana, ngenge ana, he maha ngā mataaratanga, ngā matekaitanga, ngā matewaitanga, he maha ngā wā i nohopuku ai, i mātao ai, i kore ai he kākahu.
2CO 11:28 Hei tāpiri mō ngā mea o waho, ko te mea e pēhi nei i ahau i tēnei rā, i tēnei rā, ko te mānukanuka ki ngā hāhi katoa.
2CO 11:29 Ko wai te ngoikore ana, ā, kāhore ahau e ngoikore? Ko wai kua tūtuki te waewae, ā, kāhore ahau e pāwerawera?
2CO 11:30 Ki te takoto te tikanga kia whakamanamana ahau, me whakamanamana ahau ki tōku ngoikoretanga.
2CO 11:31 E mātau ana te Atua, te Matua o tō tātou Ariki, o Īhu, ko ia nei te whakapaingia ana ake tonu atu, kāhore āku teka.
2CO 11:32 I Ramahiku e tiakina ana e te kāwana i raro i a Kīngi Areta te pā o ngā tāngata o Ramahiku, he mea kia hopukina ai ahau.
2CO 11:33 Heoi, tukua iho ana ahau i roto i te kete, rā te matapihi, rā te taiepa kōhatu, ā, mawhiti atu ana i roto i ōna ringa.
2CO 12:1 Ehara hoki i te pai kia whakamanamana ahau; heoi, me neke atu ahau ki ngā putanga, ki ngā whakakitenga mai a te Ariki.
2CO 12:2 E mātau ana ahau ki tētahi tangata i roto i a te Karaiti, ka tekau mā whā ēnei tau, i roto rānei i te tinana, kāhore ahau e mātau; i waho rānei o te tinana, kāhore ahau e mātau; ko te Atua te mātau ana; kāhakina atu ana taua tangata ki te tuatoru rā anō o ngā rangi.
2CO 12:3 Heoi, mātau tonu ahau ki taua tangata, i roto rānei i te tinana, i waho rānei o te tinana, kāhore ahau e mātau; ko te Atua te mātau ana;
2CO 12:4 kāhakina atu ana ia ki Pararaiha, ā, rongo ana i ngā mea e kore e taea te kōrero, e kore anō e tika kia kōrerotia e te tangata.
2CO 12:5 Ka whakamanamana ahau ki taua tangata; otiia, e kore ahau e whakamanamana ki ahau ake, engari ki ōku ngoikoretanga.
2CO 12:6 Ki te hiahia hoki ahau kia whakamanamana, e kore ahau e wairangi; ka kōrero tonu ahau i te mea pono. Heoi, ka waiho e ahau, kei nui atu tā tētahi e whakaaro ai ki ahau i tāna e kite nei i ahau, i tāna rānei e rongo ai ki ahau.
2CO 12:7 Nā, i te tino nui rawa o ngā whakakitenga mai, he mea kei kake rawa ake ahau, kua hōmai ki ahau he koikoi i te kikokiko, he anahera nā Hātana hei kuru i ahau, kia kaua ai ahau e kake rawa.
2CO 12:8 E toru āku īnoinga ki te Atua mō tēnei mea kia neke atu i ahau.
2CO 12:9 Ā, kua mea mai ia ki ahau, “E ranea ana tōku atawhai hei mea mōu; mana tonu hoki tōku kaha i runga i te ngoikore.” Nā, pai rawa atu ki ahau te whakamanamana ki ōku ngoikore, kia ai ai te kaha o te Karaiti hei taupoki mōku.
2CO 12:10 Mō reira āhuareka tonu ahau ki ngā ngoikoretanga, ki ngā tūkinotanga, ki ngā aituā, ki ngā whakatoinga, ki ngā rarunga, mō te Karaiti; i ahau hoki e ngoikore ana ko reira ahau kaha ai.
2CO 12:11 Nā, kua wairangi ahau! He kaha nō tā koutou ki ahau. I tika kē hoki mā koutou ahau e whakapai; kāhore hoki ahau i hoki iho i ngā tino āpōtoro i te aha, i te aha, ahakoa rā he kāhore noa iho ahau nei.
2CO 12:12 He pono i mahia i roto i a koutou ngā tohu o te āpōtoro, pau rawa anō hoki te manawanui, i runga i ngā tohu, i ngā mea whakamīharo, i ngā merekara.
2CO 12:13 He aha koia te mea i iti iho ai koutou i ērā atu hāhi, ko tēnei anake pea, ko tōku korenga e taimaha ki a koutou? Whakarērea noatia iho tēnei hē ōku.
2CO 12:14 Nā, ko te tuatoru tēnei o ngā wā ka takatū nei ahau ki te haere atu ki a koutou. E kore anō koutou e pēhia e ahau ki tētahi mea māku; ehara hoki i te mea ko tā koutou tāku e rapu nei, engari ko koutou. Nā, ehara mā ngā tamariki te whakapūranga taonga mā ngā mātua, engari mā ngā mātua mā ngā tamariki.
2CO 12:15 Nā, ka tino pai ahau ki te whakapau i āku, kia whakapaua hoki ahau i te meatanga mō ō koutou wairua. Mehemea i hira ake tōku, aroha ki a koutou, e hoki iho rānei te aroha mōku?
2CO 12:16 Heoi rā, kīhai ahau i whakataimaha i a koutou; engari i tōku korokē, hopukina ana koutou e ahau ki te tinihanga.
2CO 12:17 I meinga rānei e ahau tētahi o te hunga i tonoa atu e ahau ki a koutou hei whakapati i ā koutou taonga mōku?
2CO 12:18 I whakahaua atu e ahau a Taituha, i tonoa atu hoki tētahi teina hei hoa mōna. I whakapati rānei a Taituha i ā koutou taonga mōna? He teka ianei i runga i te wairua kotahi tā māua haere? He teka rānei i haere tahi māua ko aua tapuwae rā anō?
2CO 12:19 Tēnei koutou te mahara nei i ēnei wā katoa he whakatikatika mō mātou tā mātou ki a koutou. I te aroaro o te Atua e kōrero ana mātou i roto i a te Karaiti. Otiia, ko ēnei mea katoa, e ōku hoa aroha, hei pai mō koutou, hei hanga mō te whare.
2CO 12:20 E wehi ana hoki ahau, kei rokohanga atu koutou e ahau, ina tae atu, kāhore e rite ki tāku e pai nei, kei kitea hoki ahau e koutou, kāhore e rite ki tā koutou e pai ai. Kei rokohanga atu he whawhai, he hae, he riri, he totohe, he ngautuarā, he kōmuhumuhu, he whakaputa, he tutū;
2CO 12:21 kei whakaititia ahau e tōku Atua i ō koutou aroaro, ina tae atu anō ahau, ā, kei tokomaha hoki e tangihia e ahau o te hunga i hara i mua, ā, kāhore anō i rīpenetā mō te poke, mō te moepuku, mō te hiahia taikaha, i mahia nei e rātou.
2CO 13:1 Hei tuatoru tēnei mō ōku haerenga atu ki a koutou. “Mā te māngai o ngā kaiwhakaatu tokorua, tokotoru rānei, ka ū ai ngā kupu katoa.”
2CO 13:2 Kua kōrero anō ahau i mua, ka kōrero anō ināianei, pērā i te tuarua o ōku wā i konā, ā, i ahau e ngaro mai nei, ki te hunga i hara i mua, ki ērā katoa anō hoki, nā, ki te tae atu anō ahau, e kore e tohungia e ahau;
2CO 13:3 e rapu tohu nā hoki koutou o te Karaiti e kōrero ana i roto i ahau; kāhore nei ia e ngoikore ki a koutou, engari e kaha ana i roto i a koutou.
2CO 13:4 I rīpekatia hoki ia i te mea e ngoikore ana, otiia kei te ora ia, nā te kaha o te Atua. He ngoikore hoki mātou i roto i a ia, heoi ka ora tahi anō me ia, he meatanga nā te kaha o te Atua ki a koutou.
2CO 13:5 Whakamātauria iho koutou anō, mehemea rānei koutou kei roto i te whakapono; tirohia iho ō koutou tohu e koutou anō. Tēnā rānei kāhore koutou e mātau ana ki a koutou anō, kei roto i a koutou a Īhu Karaiti? Ki te mea ia ehara koutou i te mea ākiri.
2CO 13:6 Otirā, e ū ana tōku whakaaro, e mātau ana anō koutou, ehara mātou i te mea ākiri.
2CO 13:7 Nā, ko tā mātou īnoi tēnei ki te Atua, kia kaua koutou e mea i tētahi kino; ehara i te mea mō mātou kia kitea e paingia ana, engari mō koutou kia mahi i te pai, ahakoa ko mātou hei mea ākiri.
2CO 13:8 E kore hoki e taea e mātou tētahi mea e hē ai te pono, engari te mea e ū ai te pono.
2CO 13:9 E hari ana hoki mātou ina ngoikore mātou, ina kaha koutou. Ko tā mātou hoki tēnei e īnoi nei, ko koutou kia tino tika.
2CO 13:10 Koia ahau ka tuhituhi atu nei i ēnei mea, i ahau e ngaro mai nei, kei tae atu ahau ki konā, ka koi tāku i runga i te mana kua tukua mai nei e te Ariki ki ahau hei hanga mō te whare, ehara i te mea hei wāhi.
2CO 13:11 Kāti rā, e ōku tēina, hei konā. Kia tino tika; kia mārie te ngākau; kia kotahi te whakaaro; kia mau te rongo; ā, tērā te Atua o te aroha, o te maunga rongo e noho ki a koutou.
2CO 13:12 Oha atu tētahi ki tētahi, hei te kihi tapu anō.
2CO 13:13 Tēnei te hunga tapu katoa te oha atu nei ki a koutou.
2CO 13:14 Kia tau ki a koutou katoa te atawhai o te Ariki, o Īhu Karaiti, me te aroha o te Atua, me te whiwhinga tahitanga ki te Wairua Tapu.
GAL 1:1 Nāku, nā Pāora, nā te āpōtoro, kīhai nei i tonoa e te tangata, kīhai anō hoki mā roto i te tangata, engari, mā roto i a Īhu Karaiti, i te Atua Matua anō hoki, nāna nei ia i whakaara i te hunga mate;
GAL 1:2 nā ngā tēina katoa hoki i ahau nei, ki ngā hāhi o Karatia:
GAL 1:3 Kia tau ki a koutou te aroha noa me te rangimārie, he mea nā te Atua Matua, nā tō tātou Ariki hoki, nā Īhu Karaiti.
GAL 1:4 I tuku nei i a ia anō mō ō tātou hara, kia whakaorangia ai tātou e ia i tēnei ao kino, i runga i tā te Atua, i tā tō tātou Matua i pai ai.
GAL 1:5 Waiho atu i a ia te korōria ake ake! Āmine.
GAL 1:6 Mīharo tonu ahau ki te hohoro o tō koutou nekehanga atu i te kaikaranga o koutou i runga i te aroha noa o te Karaiti ki tētahi rongopai kē.
GAL 1:7 Ehara nei ia i te mea kē atu; engari, tēnā tētahi hunga e whakararuraru ana i a koutou, e mea ana kia whakaputaia kētia te rongopai o te Karaiti.
GAL 1:8 Otirā, ahakoa ko mātou, ko tētahi anahera rānei o te rangi, ki te kauwhau i te rongopai ki a koutou, i te mea rerekē i tā mātou i kauwhau ai ki a koutou, kia kangā ia.
GAL 1:9 Kia rite ki tā mātou i kī ai i mua, ka kī anō ahau ināianei, ki te puta kē te kauwhau a tētahi ki a koutou i tērā kua riro i a koutou, kia kangā ia.
GAL 1:10 He tangata rānei, ko te Atua rānei, tāku e kukume nei? He tangata rānei āku e whai nei kia whakamānawarekatia? Mehemea kei runga tonu ahau i te whakamānawareka tāngata, ehara ahau i te pononga nā te Karaiti.
GAL 1:11 Nā, kia mōhio mai koutou, e ōku tēina, ko te rongopai i kauwhautia e ahau, ehara i te tangata.
GAL 1:12 Ehara hoki nā te tangata i riro mai ai i ahau, nāna rānei i whakaako ki ahau, engari i haere mai ki ahau rā te whakakitenga mai a Īhu Karaiti.
GAL 1:13 Kua rongo nā hoki koutou ki tāku whakahaere i mua i runga i tā ngā Hūrai tikanga, nui atu hoki tāku tūkino i te hāhi a te Atua, mongamonga ana i ahau.
GAL 1:14 I hipa noa atu ahau ki mua i ētahi tokomaha tonu o mātou, rite ngā tau ki ōku, i waenganui i tōku iwi ki te tikanga a ngā Hūrai, hira noa atu hoki tōku ngākau ki ngā whakarerenga iho a ōku mātua.
GAL 1:15 Otirā, i te mea ka pai te Atua, nāna nei ahau i momotu mai i roto tonu i te kōpū o tōku whaea, i karanga hoki, he meatanga nā tōna aroha noa,
GAL 1:16 ki te whakakite i tāna Tama i roto i ahau, kia kauwhautia ai ia e ahau ki ngā tauiwi; i reira tonu iho kīhai ahau i kōrerorero ki te kikokiko, ki te toto;
GAL 1:17 kīhai anō ahau i haere atu ki Hiruhārama, ki te hunga i āpōtoro i mua i ahau; heoi haere ana ahau ki Arāpia, ā, hoki ana mai ki Ramahiku.
GAL 1:18 Ā muri iho i te takanga o ngā tau e toru ka haere ake ahau ki Hiruhārama kia kite i a Kipa, ā, tekau mā rima ngā rā i noho ai ahau ki a ia.
GAL 1:19 Engari, kīhai ahau i kite i tētahi atu o ngā āpōtoro, ko Hēmi anake, ko te teina o te Ariki.
GAL 1:20 Nā, ko ngā mea e tuhituhia atu nei e ahau ki a koutou, nanā, kei te aroaro tēnei o te Atua, kāhore āku teka.
GAL 1:21 Muri iho ka haere ahau ki ngā wāhi o Hīria, o Kirikia;
GAL 1:22 kīhai anō tōku mata i mōhiotia e ngā hāhi o Hūria i roto i a te Karaiti;
GAL 1:23 i rongo kau rātou, “Ko te tangata tūkino i a mātou i mua, e kauwhautia ana e ia ināianei te whakapono i whakangaromia rā e ia.”
GAL 1:24 Ā, whakakorōria ana rātou i te Atua mō tāna ki ahau.
GAL 2:1 Muri iho, kia pahure ngā tau tekau mā whā, ka haere anō ahau ki Hiruhārama māua ko Pānapa, me te mau anō i a Taituha hei hoa mōku.
GAL 2:2 Nā te whakakitenga mai hoki ahau i haere ai, ā, whakatakotoria ana e ahau ki a rātou te rongopai e kauwhautia nei e ahau ki ngā tauiwi; otiia, i meatia pukutia ki te hunga whai ingoa, kei maumau kau tāku oma onāianei, ō mua rā rānei.
GAL 2:3 Kīhai ia a Taituha tōku hoa, he Kariki nei ia, i meinga kia kotia.
GAL 2:4 Mō ngā tēina teka hoki i whakaurua pukutia mai, i haere puku mai nei ki te tirotiro i tō mātou āhua, he herekore i roto i a Karaiti Īhu, kia whakataurekareka ai rātou i a mātou.
GAL 2:5 Kīhai rawa mātou i whakangāwari iho, i rongo ki a rātou, ahakoa kotahi hāora; he mea kia mau ai te pono o te rongopai ki a koutou.
GAL 2:6 Otirā, ko te hunga whai ingoa – ahakoa he aha rātou, kāhore tahi he tikanga ki ahau: kāhore a te Atua whakapai ki te kanohi tangata – kīhai rātou, te hunga whai ingoa, i whakaatu mea ki ahau.
GAL 2:7 Engari i tō rātou kitenga kua tukua ki ahau te rongopai ki te kotingakore, pērā hoki me tērā ki te kotinga kua tukua rā ki a Pita;
GAL 2:8 ko te kaimahi hoki i roto i a Pita hei āpōtoro ki te kotinga, mahi ana anō ia i roto i ahau ki ngā tauiwi.
GAL 2:9 Nā, nō rātou ka mātau ki te aroha noa kua hōmai ki ahau, ka hōmai e Hēmi, e Kipa, e Hoani, i meinga nei hei pou, ngā ringa matau hei whakahoatanga ki a māua ko Pānapa, mō māua kia haere ki ngā tauiwi, ko rātou ia ki te kotinga.
GAL 2:10 Otiia, me mahara māua ki te hunga rawakore; he mea anō hoki tēnā i hihiko ai ahau.
GAL 2:11 Nā, i te taenga mai o Kipa ki Anatioka, ka whakatika atu ahau ki a ia he kanohi, he kanohi, nō te mea kua tika kia whakahēngia ia.
GAL 2:12 I mua hoki o te taenga mai o ētahi i a Hēmi, e kai tahi ana ia me ngā tauiwi. Nō tō rātou taenga mai ia, neke atu ana ia, momotu kē ana i a ia; i mataku hoki ki te hunga o te kotinga.
GAL 2:13 I uru anō ērā atu Hūrai ki tōna tinihanga; heoi, riro pū a Pānapa i tō rātou tinihanga.
GAL 2:14 Otirā, i tōku kitenga kīhai rātou i haere tika i runga i te pono o te rongopai, ka mea ahau ki a Kipa i te aroaro o rātou katoa, ki te mea, “Ko koe, he Hūrai, ka whakatauiwi i a koe, ā, kāhore e whakahūrai, me pēhea e taea ai e koe te mea ngā tauiwi kia Hūrai?”
GAL 2:15 “Ko tātou, ko ngā Hūrai tupu nei, ehara nei i te hunga hara nō ngā tauiwi,
GAL 2:16 kua mōhio nei ehara ngā mahi a te ture i te mea e tika ai te tangata, engari ko te whakapono ki a Īhu Karaiti; kua whakapono anō tātou ki a Īhu Karaiti, kia meinga ai te whakapono ki a te Karaiti hei tika mō tātou, kāhore ia ngā mahi a te ture; nō te mea kāhore rawa he kikokiko e tika i ngā mahi o te ture.
GAL 2:17 “Nā, i a tātou e whai nei kia whakatikaia i roto i a te Karaiti, ki te kitea tātou nei he hunga hara, he minita rānei a te Karaiti ki te hara? Kāhore rāpea.
GAL 2:18 Ki te mea hoki ka hangā anō e ahau ngā mea i wāhia e ahau, e whakakite ana ahau i ahau anō, he tangata hara.
GAL 2:19 Nā te ture hoki ahau i tūpāpaku ai ki te ture, kia ora ai ahau ki te Atua.
GAL 2:20 Kua rīpekatia tahitia ahau me te Karaiti; ā, e ora nei, ehara i te mea ko ahau, engari ko te Karaiti e ora ana i roto i ahau. E ora nei hoki ahau i roto i te kikokiko, he oranga nā te whakapono ki te Tama a te Atua, i aroha nei ki ahau, i tuku nei i a ia mōku.
GAL 2:21 Kāhore āku whakakāhore i te aroha noa o te Atua; mehemea hoki i nā runga mai te tika i te ture, maumau mate noa a te Karaiti.”
GAL 3:1 E ngā Karatia whakaarokore, nā wai koutou i whaiwhaiā, i whakakitea nuitia nā a Īhu Karaiti ki ō koutou kanohi, he mea rīpeka?
GAL 3:2 Heoi, tāku e mea ana kia whakaakona mai e koutou: Nō ngā mahi rānei o te ture i riro mai ai te Wairua i a koutou, nā te mea rānei ka rongo ki te whakapono?
GAL 3:3 Ha, kia pēnā koutou te whakaarokore? I runga i te Wairua tā koutou tīmatanga, ā, me whakaoti rānei e koutou i runga i te kikokiko?
GAL 3:4 He huakore noa iho rānei ō koutou matenga maha? Ki te mea rā he mea huakore.
GAL 3:5 Nā, ko te kaiwhakawhiwhi i a koutou ki te Wairua, e mahi nei hoki i ngā merekara i roto i a koutou, nō ngā mahi rānei o te ture tāna, nō te rongo rānei ki te whakapono?
GAL 3:6 Ka rite hoki ki a Āperahama “I whakapono ki te Atua, ā, whakairia ana ki a ia hei tika.”
GAL 3:7 Nā, kia mātau koutou, ko te hunga o te whakapono, he tamariki ēnei nā Āperahama.
GAL 3:8 Ā, i te kitenga o te karaipiture i mua, he whakapono tā te Atua hei whakatika mō ngā tauiwi, ka kauwhautia wawetia te rongopai ki a Āperahama, “Māu ka manaakitia ai ngā iwi katoa.”
GAL 3:9 Inā, ko te hunga o te whakapono, e manaakitia ngātahitia ana me Āperahama i whakapono rā.
GAL 3:10 Ko te hunga katoa hoki o ngā mahi o te ture, kei raro rātou i te kanga: kua oti hoki te tuhituhi, “Ka kangā ngā tāngata katoa kāhore e mau ki ngā mea katoa kua oti te tuhituhi ki te Pukapuka o te Ture, hei mahi mā rātou.”
GAL 3:11 He hanga mārama anō tēnei, e kore e tika i te ture tētahi tangata ki te aroaro o te Atua: “Mā te whakapono hoki e ora ai te tangata tika.”
GAL 3:12 He teka hoki nō te whakapono te ture; engari, “Ki te mahia aua mea e te tangata, mā aua mea ia e ora ai.”
GAL 3:13 Kua hokona tātou e te Karaiti i roto i te kanga a te ture, i a ia nei i meinga hei kanga mō tātou – kua oti hoki te tuhituhi, “He mea kanga ngā tāngata katoa e whakairia ki runga ki te rākau.”
GAL 3:14 Kia tae ai ki ngā tauiwi te manaaki o Āperahama i roto i a Karaiti Īhu; kia riro mai ai i a tātou te kupu hōmai o te Wairua, he mea mā roto i te whakapono.
GAL 3:15 E ōku tēina, he kupu tangata tāku nei. Ahakoa he kawenata nā te tangata, ki te mea ka oti te whakaū, kāhore he tangata hei turaki, hei tāpiri rānei.
GAL 3:16 Nā, i kōrerotia ngā kupu whakaari ki a Āperahama, ki tana whānau anō hoki. Kīhai ia i mea, “Ki ngā whānau,” me te mea he tokomaha; engari me te mea he kotahi, “Ki tāu whānau,” ko te Karaiti hoki ia.
GAL 3:17 Nā, ko tāku kupu tēnei; ko te kawenata i whakaūkia e te Atua i mua rā, e kore e āhei te ture, nō muri iho nei o ngā tau e whā rau e toru tekau i tae mai ai, ki te turaki, hei whakakāhore i te kupu whakaari.
GAL 3:18 Mehemea hoki nā te ture i riro mai ai te kāinga, heoi, ehara i te mea nā te kupu whakaari; otirā i nā runga mai i te kupu whakaari tā te Atua hōmaitanga ki a Āperahama.
GAL 3:19 Hei aha rā te ture? I tāpiritia mai mō ngā pokanga kētanga, kia tae mai rā anō te whānau mōna nei te kupu whakaari; he mahinga nā ngā anahera, i roto i te ringa o te takawaenga.
GAL 3:20 Nā, he teka mō te kotahi te takawaenga; kotahi ia te Atua.
GAL 3:21 He turaki rānei tā te ture i ā te Atua kupu whakaari? Kāhore rāpea! Me i hōmai hoki he ture, he mea kaha ki te whakaora, inā, kua puta ake te tika i te ture.
GAL 3:22 Heoi, kua kōpania ngā mea katoa e te karaipiture ki raro o te hara, kia hōmai ai ki te hunga e whakapono ana te mea i whakaaria mai i runga i te whakapono ki a Īhu Karaiti.
GAL 3:23 I mua ia o te taenga mai o te whakapono, e puritia ana tātou i raro i te ture, he mea kōpani, kia taea rā anō te whakapono e whakapuakina nei i muri.
GAL 3:24 Heoi, kua meinga nei te ture hei kaiwhakaako mō tātou, hei ārahi ki a te Karaiti, kia tika ai tātou i te whakapono.
GAL 3:25 Otirā, ka tae mai nei te whakapono, mutu ake tō tātou meatanga mai e te kaiwhakaako.
GAL 3:26 He tamariki katoa hoki koutou nā te Atua, he mea nā te whakapono ki a Karaiti Īhu.
GAL 3:27 Ko te hunga katoa hoki o koutou kua iriiria ki roto ki a te Karaiti, kua kākahuria e koutou a te Karaiti.
GAL 3:28 Kāhore he Hūrai, kāhore he Kariki, kāhore he pononga, kāhore he rangatira, kāhore he tāne, wahine rānei; he tangata kotahi tonu hoki koutou katoa i roto i a Karaiti Īhu.
GAL 3:29 Ā, ki te mea nā te Karaiti koutou, he whānau nā Āperahama, mō koutou hoki te kāinga i runga i te kupu whakaari.
GAL 4:1 Ko tāku kupu ia tēnei: I te mea he tamariki tonu te tangata mōna te kāinga, kāhore ia e rerekē i te pononga, ahakoa ko te rangatira ia o ngā mea katoa;
GAL 4:2 engari, e meatia ana e ngā kaitohutohu, e ngā kaititiro, kia taea rā anō te wā i whakaritea e te pāpā.
GAL 4:3 Waihoki ko tātou, i te mea e tamariki ana, he pononga tātou nā ngā mea tīmatanga o te ao.
GAL 4:4 Ā, nō ka tutuki te tāima, ka tonoa mai e te Atua tāna Tama, i whānau i te wahine, i whānau i raro i te ture,
GAL 4:5 hei hoko i te hunga i raro i te ture, kia whiwhi ai tātou ki te whakatamarikitanga.
GAL 4:6 Nā, i te mea he tamariki koutou, kua tonoa mai e te Atua te Wairua o tāna Tama ki roto ki ō koutou ngākau, e karanga ana, “E Apa, e Pā!”
GAL 4:7 Heoi, kua mutu tōu ponongatanga, engari kua tama koe; ā, ki te mea he tama, nā mōu ngā mea i roto i te Atua.
GAL 4:8 Heoi i reira, i te mea kīhai koutou i mātau ki te Atua, he pononga koutou nā ngā mea ehara nei i te atua tupu.
GAL 4:9 Ināianei ia, i te mea ka mātau nei koutou ki te Atua, arā, ka mātauria nei koutou e te Atua, he aha koutou ka tahuri ai anō ki aua mea ngoikore, rawakore, ki ngā mea tīmatanga, e hokia nā e tō koutou hiahia, kia waiho koutou hei pononga mā aua mea?
GAL 4:10 E mau ana koutou ki ngā rā, ki ngā marama, ki ngā wā, ki ngā tau.
GAL 4:11 E manawapā ana ahau ki a koutou, kei kore he hua mō tāku i mahi ai i roto i a koutou.
GAL 4:12 E ōku tēina, ko tāku tohe tēnei ki a koutou, kia rite ki ahau; e rite ana hoki ahau ki a koutou. Kāhore ā koutou mahi hē ki ahau.
GAL 4:13 E mātau ana koutou he mea nā te ngoikore e tōku kikokiko tāku kauwhau i te rongopai ki a koutou i te tuatahi.
GAL 4:14 Heoi, kīhai koutou i whakahāwea, i whakakino ki tōku whakamātautauranga i tōku kikokiko; nā, tahuri mai ana koutou ki ahau, ānō he anahera ahau nā te Atua, me te mea ānō ko Īhu Karaiti.
GAL 4:15 Kei hea rā tērā hari o koutou? He kaiwhakaatu hoki ahau mō tā koutou, me i taea kua tīkarohia e koutou ō koutou kanohi, ā, kua hōmai ki ahau.
GAL 4:16 Koia, kua hoariritia rānei ahau ki a koutou, mōku i kōrero i te pono ki a koutou?
GAL 4:17 Ko tā rātou whaiwhai i a koutou ehara i te pai; engari, e mea ana rātou kia tūtakina mai koutou, kia whai ai ko koutou ki a rātou.
GAL 4:18 He mea pai ia kia matenuitia i runga i te pai i ngā wā katoa, kauaka hoki i tōku nohoanga anake ki a koutou.
GAL 4:19 E āku tamariki, ka mamae nei anō ahau mō koutou, kia whai āhua rā anō a te Karaiti i roto i a koutou,
GAL 4:20 ko tāku hiahia me i konā ahau i a koutou nā āianei, kia puta kē anō tōku reo; nō te mea e ruarua ana ahau ki a koutou.
GAL 4:21 Kī mai ki ahau, e te hunga e hiahia ana kia noho i raro i te ture, kāhore ianei koutou e rongo ki tā te ture?
GAL 4:22 Kua oti hoki te tuhituhi, tokorua ngā tama a Āperahama, kotahi nā te wahine pononga, kotahi nā te wahine rangatira.
GAL 4:23 Ko tā te pononga nō te kikokiko tōna whānautanga. Ko tā te wahine rangatira ia he mea kōrero mai i mua.
GAL 4:24 He mea whakarite aua mea: ko ngā wāhine nei ngā kawenata e rua; kotahi nō Maunga Hinai, whānau ake ana hei taurekareka, ko Hakara tēnei.
GAL 4:25 Nā, ko tēnei Hakara ko Maunga Hinai i Arāpia, e rite ana hoki ki Hiruhārama onāianei, he pononga nei hoki ia, rātou ko āna tamariki.
GAL 4:26 Tēnā, ko te Hiruhārama i runga he mea herekore, ko ia tō tātou whaea.
GAL 4:27 Kua oti hoki te tuhituhi: “Kia hari, e te pākoko kāhore nei e whānau! Hāmama, karanga, e te mea kāhore nei kia whakamamae; he tini kē hoki ngā tamariki a te mea mahue i ā te mea whai tāne.”
GAL 4:28 Nā, ko tātou nei, e ōku tēina, e rite ana ki a Īhaka, he tamariki nā te kupu whakaari.
GAL 4:29 Engari e rite ana anō ki tō mua, ko te mea nō te kikokiko nei tōna whānautanga, whakatoia ana e ia te tama nō te Wairua nei tōna; e pērā ana anō ināianei.
GAL 4:30 Heoi, e pēhea ana tā te karaipiture? “Peia atu te wahine pononga rāua ko tāna tama; e kore hoki te tama a te wahine pononga e whiwhi tahi me te tama a te wahine rangatira ki te taonga.”
GAL 4:31 Nā, ehara tātou, e ōku tēina, i te tamariki nā te wahine pononga, engari nā te wahine rangatira.
GAL 5:1 Nā te Karaiti i wewete te here i a tātou. Nā reira, kia ū te tū, kei mau hoki ki roto ki te ioka pononga.
GAL 5:2 Nanā, tēnei ahau, a Pāora te mea nei ki a koutou, ki te kotia koutou, e kore koutou e whai pai i a te Karaiti.
GAL 5:3 He whakaatu tuarua tēnei nāku ki ngā tāngata katoa e kotia ana, kua mau rātou i te ture kia mahia katoatia.
GAL 5:4 Kua wehea atu koutou i a te Karaiti, e te hunga e whakatikaia ana e te ture, kua taka iho koutou i runga i te aroha noa.
GAL 5:5 Ko tātou hoki, nā te Wairua tā tātou tatari ki te tika e tūmanakohia atu nei, e ahu mai nei i te whakapono.
GAL 5:6 I roto hoki i a Karaiti Īhu kāhore o te kotinga wāhi, kāhore o te kotingakore; engari, ko te whakapono e mahi ana i runga i te aroha.
GAL 5:7 I pai tā koutou oma; nā wai koutou i whakaware, i kore ai koutou e rongo ki te pono?
GAL 5:8 Ehara tēnei whakaaro i te mea nā te kaikaranga i a koutou.
GAL 5:9 He iti te rēwena, rēwenatia ake te pūranga katoa.
GAL 5:10 E whakapono ana ahau ki a koutou i roto i te Ariki, e kore e rerekē ō koutou whakaaro. Ko te kaiwhakararu ia i a koutou, ahakoa ko wai, māna anō tōna whakawākanga e pīkau.
GAL 5:11 Me ahau anō, e ōku tēina, ki te mea he kauwhau tonu nei tāku i te kotinga, he aha ahau ka whakatoia tonutia ai? Pēnei kua kore tō te rīpeka tūtukitanga waewae.
GAL 5:12 Pai kau ki ahau me i motuhia atu te hunga e whakararu nā i a koutou.
GAL 5:13 Kua karangatia nei hoki koutou, e ōku tēina, ki te tikanga herekore; kaua ia tā koutou tikanga herekore e waiho hei whakaoho i te kikokiko, engari me mahi koutou tētahi ki tētahi i runga i te aroha.
GAL 5:14 E takoto tōpū ana hoki te ture katoa i roto i te kupu kotahi, arā, “Kia aroha koe ki tōu hoa tata, ānō ko koe.”
GAL 5:15 Ki te ngau ia koutou, ki te kai tētahi i tētahi, kia tūpato kei pareho tētahi i tētahi.
GAL 5:16 Ko tāku kupu ia tēnei, haere i roto i te Wairua, ā, e kore e whakaritea e koutou te hiahia o te kikokiko.
GAL 5:17 E hiahia ana hoki te kikokiko tika kē i te Wairua, me te Wairua tika kē i te kikokiko; e whawhai ana hoki ēnei tētahi ki tētahi; tē taea ngā mea i hiahia ai koutou.
GAL 5:18 Ki te ārahina ia koutou e te Wairua, kāhore koutou i raro i te ture.
GAL 5:19 Nā, e kitea ana ngā mahi a te kikokiko, arā, he moe tāhae, he poke, he hiahia taikaha,
GAL 5:20 he karakia whakapakoko, he mākutu, he pakanga, he totohe, he hae, he riri, he wāwāhi, he wehewehe, he tītore,
GAL 5:21 he hao, he haurangi, he kakai, me ngā mea e rite ana ki ēnei. Me kōrero wawe e ahau ēnei mea ki a koutou, me pērā me tāku i kōrero ai i mua, ko te hunga e mahi ana i ngā mea pēnei, e kore e whiwhi ki te rangatiratanga o te Atua.
GAL 5:22 Ko te hua ia o te Wairua, he aroha, he hari, he rangimārie, he manawanui, he ngāwari, he ngākau pai, he whakapono,
GAL 5:23 he ngākau māhaki, he ngākau kua taea te pēhi. Kāhore he ture e rīria ai ēnei mea.
GAL 5:24 Ko te hunga ia o te Karaiti, kua rīpekatia e rātou te kikokiko, me ōna hihiritanga, me ōna hiahia.
GAL 5:25 Ki te mea e ora ana tātou i roto i te Wairua, kia haere anō tātou i roto i te Wairua.
GAL 5:26 Kei whāia e tātou te korōria huakore, te whakapātaritari tētahi ki tētahi, te hae tētahi ki tētahi.
GAL 6:1 E ōku tēina, ahakoa rā i rokohanga te tangata e tētahi hē, mā koutou, mā te hunga i te Wairua, e whakaara ake ia i runga i te wairua māhaki; me te titiro iho anō ki a koe, kei whakamātautauria hoki ko koe.
GAL 6:2 Pīkaua e tētahi ngā whakataimaha o tētahi, hei whakarite i tā te Karaiti ture.
GAL 6:3 Ki te mahara hoki tētahi tangata ki a ia anō he mea nui ia, i te mea he kore noa iho ia, e nuka ana ia ki a ia anō.
GAL 6:4 Engari mā ia tangata e whakamātau tāna ake mahi, ka ai ai he mea hei whakamanamanatanga mōna ki tāna anake, kāhore ki tā tētahi atu.
GAL 6:5 Ka riro hoki mā ia tangata e pīkau tāna kawenga.
GAL 6:6 Ko te tangata e whakaakona ana ki te kupu, me whakawhiwhi e ia tōna kaiwhakaako ki ngā mea pai katoa.
GAL 6:7 Kei whakapōhēhētia koutou; kāhore te Atua e tinihangatia; ko tā te tangata hoki e rui ai, ko tēnā tāna e kokoti ai.
GAL 6:8 Ko te tangata hoki e rui ana, he whakaaro ki tōna kikokiko, he pirau tāna e kokoti ai o te kikokiko; ko te tangata ia e rui ana, he whakaaro ki te Wairua, ko te ora tonu tāna e kokoti ai o te Wairua,
GAL 6:9 ā, kaua tātou e ngākaukore ki te mahi i te pai. Tēnā tōna wā e rite ai ka kokoti tātou ki te kāhore tātou e ngoikore.
GAL 6:10 Nā reira, i te mea e whai takiwā ana tātou, kia mahi tātou i te pai ki ngā tāngata katoa, ā tērā noa ake ki te hunga o te whare o te whakapono.
GAL 6:11 Titiro ki te nui o ngā reta e tuhituhi nei tōku ringa ake ki a koutou.
GAL 6:12 Ko te hunga e hiahia ana ko te āhua o te kikokiko kia pai, ko rātou hei mea i a koutou kia kotia; he mea kau kei whakatoia rātou mō te rīpeka o te Karaiti.
GAL 6:13 Kāhore hoki taua hunga i kotia nā e mau ki te ture; engari e hiahia ana kia kotia koutou, kia whakamanamana ai rātou ki tō koutou kikokiko.
GAL 6:14 Ki ahau ia kaua rawa he whakamanamana, ko te rīpeka anake o tō tātou Ariki, o Īhu Karaiti, i rīpekatia ai te ao ki ahau, me ahau hoki ki te ao.
GAL 6:15 Kāhore he aha o te kotinga, kāhore o te kotingakore, engari ko te mea hanga hou.
GAL 6:16 Nā, ko te hunga e haere ana i runga i tēnei tikanga, kia tau te rangimārie me te mahi tohu ki a rātou, ki te Īharaira hoki a te Atua.
GAL 6:17 Ā muri ake nei, kaua tētahi e whakararuraru i ahau; e mau ana hoki ki tōku tinana ngā tohu a Īhu.
GAL 6:18 E ōku tēina, kia tau te aroha noa o tō tātou Ariki, o Īhu Karaiti, ki ō koutou wairua. Āmine.
EPH 1:1 Nāku, nā Pāora, i paingia e te Atua hei āpōtoro mā Īhu Karaiti, Ki te hunga tapu e noho ana i Epeha, arā ki te hunga whakapono i roto i a Karaiti Īhu:
EPH 1:2 Kia tau ki a koutou te aroha noa me te rangimārie, he mea nā te Atua, nā tō tātou Matua, nā te Ariki hoki, nā Īhu Karaiti.
EPH 1:3 Kia whakapaingia te Atua, te Matua o tō tātou Ariki, o Īhu Karaiti, nāna nei tātou i manaaki ki ngā manaaki katoa o te wairua ki ngā wāhi o te rangi, i roto i a te Karaiti;
EPH 1:4 i runga i te tikanga i whiriwhiria ai tātou e ia i roto i a ia i mua i te orokohanganga o te ao, hei hunga tapu, kohakore i tōna aroaro. I runga i te aroha
EPH 1:5 he mea whakarite hoki tātou nāna i mua, hei tama māna, i roto i a Īhu Karaiti, ko tā tōna whakaaro hoki i pai ai,
EPH 1:6 hei whakamoemiti mō te korōria o tōna aroha noa, i atawhaitia ai tātou i roto i tāna i aroha ai.
EPH 1:7 Kei roto nei i a ia tō tātou whakaoranga i runga i ōna toto, arā te murunga o ngā hē; he hua hoki nō tōna aroha noa,
EPH 1:8 i hira rawa nei ki a tātou i runga i ngā whakaaro nui. I ngā whakaaro mōhio katoa;
EPH 1:9 whakakitea mai ana hoki e ia ki a tātou tāna whakaaro ngaro, tāna hoki i āhuareka ai, tāna i whakatakoto ai i mua i roto i a ia,
EPH 1:10 mō te tikanga ina rite ngā wā, kia huihuia ngā mea katoa i roto i a te Karaiti, ngā mea i te rangi, me ngā mea i te whenua; i roto anō i a ia.
EPH 1:11 I whakawhiwhia nei mātou i roto i a ia, he mea whakarite i mua i runga i tāna i whakatakoto ai, e mahia ana hoki e ia ngā mea katoa i runga i tā tōna whakaaro i pai ai;
EPH 1:12 kia ai mātou hei whakamoemiti mō tōna korōria, arā mātou, te hunga kua tūmanako wawe ki a te Karaiti.
EPH 1:13 Me koutou hoki tūmanako ana anō koutou ki a ia, i tō koutou rongonga ki te kupu o te pono, ki te rongopai o tō koutou ora; ā, i tō koutou whakaponotanga ki a ia, nā, hīritia ana koutou e te Wairua Tapu i kōrerotia mai i mua;
EPH 1:14 hei taumau i ngā taonga mō tātou, kia whakaorangia rā anō tā te Atua mea i hokona, hei whakamoemiti mō tōna korōria!
EPH 1:15 Nā konei ahau, i tōku rongonga ki tō koutou whakapono ki te Ariki, ki a Īhu, ki te aroha anō hoki ki te hunga tapu katoa,
EPH 1:16 kāhore e mutu tāku whakawhetai mō koutou, me te whakahua anō i a koutou i āku īnoinga;
EPH 1:17 kia hōmai ki a koutou e te Atua o tō tātou Ariki, o Īhu Karaiti, e te Matua o te korōria, te wairua o te whakaaro nui, o te whakakitenga i runga i te mōhio ki a ia.
EPH 1:18 Kia whakamāramatia ngā kanohi o tō koutou hinengaro; kia mātau ai koutou ki te mea o tāna karanga e tūmanakohia atu nei, ki te korōria nui hoki o tōna taonga i roto i te hunga tapu,
EPH 1:19 ki te nui whakaharahara hoki o tōna kaha ki a tātou ki te hunga e whakapono nei, i runga i te mahinga a te mana o tōna kaha,
EPH 1:20 i mahi ai ia i roto i a te Karaiti i tāna whakaarahanga i a ia i te hunga mate, ā, whakanohoia ana ia ki tōna matau, ki ngā wāhi i te rangi,
EPH 1:21 ki runga ake i ngā kāwanatanga katoa, i te mana, i te kaha, i te rangatiratanga, i ngā ingoa katoa hoki e whakahuatia ana, ehara i te mea ko o tēnei ao anake, ko o tērā ao anō hoki.
EPH 1:22 Ā, tukua ana e ia ngā mea katoa ki raro i ōna waewae, meinga ana hoki ia hei upoko i runga i ngā mea katoa mō te hāhi,
EPH 1:23 arā, mō tōna tinana, e kī tonu nei i a ia, i te kaiwhakakī o ngā mea katoa i roto i te katoa.
EPH 2:1 Me koutou anō nāna i whakaora, i te mea he tūpāpaku i ngā hē, i ngā hara,
EPH 2:2 i hāereerea rā e koutou i mua i runga i tā tēnei ao tikanga, i tā te rangatira o te kaha o ngā kapua, o te wairua e mahi nei ināianei i roto i ngā tama a te tutū.
EPH 2:3 Arā, i ērā hoa o tātou katoa i mua, i a tātou e noho ana i runga i ngā hiahia o tō tātou kikokiko, e mahi ana i ngā mea e paingia ana e te kikokiko, e te whakaaro, i te māoritanga hoki he tamariki nā te riri, he pērā me ērā atu.
EPH 2:4 Ko tā te Atua ia tēnei, ranea rawa hoki tāna mahi tohu, nui atu tōna aroha i arohaina mai ai tātou e ia,
EPH 2:5 i te mea he tūpāpaku tātou i ngā hē, whakaorangia ngātahitia ana tātou e ia me te Karaiti, he aroha noa i whakaorangia ai koutou;
EPH 2:6 ā, whakaarahia ngātahitia ana e ia, whakanohoia ngātahitia ana ki ngā wāhi o te rangi i roto i a Karaiti Īhu;
EPH 2:7 kia whakakitea ai e ia i ngā wā e haere ake nei te hira o te taonga a tōna aroha noa, i a ia ka manaaki i a tātou i roto i a Karaiti Īhu.
EPH 2:8 Nā te aroha noa hoki koutou i whakaorangia ai i runga i te whakapono; ehara anō hoki tēnei i te mea nō koutou; he mea hōmai noa nā te Atua.
EPH 2:9 Ehara i ngā mahi, kei whakamanamana te tangata.
EPH 2:10 He mahinga hoki tātou nāna, he mea hanga i roto i a Karaiti Īhu mō ngā mahi pai i whakaritea e te Atua i mua hei hāereerenga mō tātou.
EPH 2:11 Nā, kia mahara he tauiwi koutou i mua nō te wāhi ki te kikokiko, e kīia ana hoki ko “te Kotingakore” e tēnei e kīia nei ko “te Kotinga” – arā tō te kikokiko, he mea nā te ringa –
EPH 2:12 i taua wā he mea motu kē atu koutou i a te Karaiti, ehara i te tangata whenua nō Īharaira, he tangata kē ki ngā kawenata o te mea i whakaaria mai i mua, kāhore he tūmanakotanga atu, he hunga Atuakore i te ao.
EPH 2:13 Nā, ināianei i roto i a Karaiti Īhu, ko koutou, ko te hunga i tawhiti i mua, kua meinga e ngā toto o te Karaiti kia tata.
EPH 2:14 Ko ia hoki tō tātou maunga rongo, nāna i mea ngā mea e rua kia kotahi, whakahoroa iho e ia te pātū e ārai ana i waenga.
EPH 2:15 Whaka­kāhore­tia ana hoki e ia ki tōna kiko­kiko te mauā­hara, arā te ture i ngā kupu ako, i ngā tikanga; kia hangā ai i roto i a ia te toko­rua hei tangata kotahi, hei tangata hou, kia mau ai te rongo i a ia;
EPH 2:16 kia houhia ai anō hoki e ia te rongo a te toko­rua ki te Atua i roto i te tinana kotahi, he mea­tanga nā te rīpeka, mā reira hoki e whaka­mate te mauā­hara.
EPH 2:17 Ā, haere mai ana ia, kauwhau ana i te maunga rongo ki a koutou i tawhiti, ki te hunga hoki e tata ana.
EPH 2:18 Nāna hoki tātou, te toko­rua nei, i whai ta­ta­nga atu ai i roto i te Wairua kotahi ki te Matua.
EPH 2:19 Nā reira, ehara koutou i te tāngata kē, i te manene rānei; engari he tāngata whenua koutou tahi ko te hunga tapu, nō te whare hoki o te Atua;
EPH 2:20 he mea hanga ki runga ki te tū­ranga o ngā āpō­toro rātou ko ngā poro­piti, ko Īhu Karaiti anō hei tino kāmaka mō te koko­nga;
EPH 2:21 kei roto nei i a ia tēnā whare, tēnā whare, he mea āta tātai mārie, ka tupu hei whare tapu i roto i te Ariki;
EPH 2:22 me koutou anō e hangā tahi­tia ana i roto i a ia, hei nohoa­nga mō te Atua, he mea nā te Wairua.
EPH 3:1 Nā konei tāku, tā Pāora, he herehere nei ahau nā Karaiti Īhu, hei mahi ki a koutou ki ngā tauiwi;
EPH 3:2 kua rongo pea koutou ki te mahi tuari i te aroha noa o te Atua kua hōmai nei ki ahau, hei mea ki a koutou,
EPH 3:3 arā, tāna whakakitenga, tāna whakaaturanga i te mea ngaro ki ahau. (He pērā hoki me ēnā kupu torutoru i tuhituhia nā e ahau i mua;
EPH 3:4 ka oti i a koutou tēnā te kōrero, ka mōhio koutou ki tōku mātauranga ki te mea ngaro a te Karaiti.)
EPH 3:5 Kīhai nei i whakakitea i ērā atu whakatupuranga ki ngā tama a te tangata, kīhai i pēnei me te whakakitenga ināianei e te Wairua ki āna āpōtoro tapu rātou ko ngā poropiti;
EPH 3:6 arā, mō ngā tauiwi kia uru tahi ki ngā taonga, kia tinana kotahi, kia whiwhi ngātahi ki āna mea i whakaari i mua i roto i a te Karaiti, he meatanga nā te rongopai.
EPH 3:7 Mō reira ahau i meinga nei hei minita, i runga i tā te aroha noa o te Atua, i hōmai nei ki ahau, he mahinga nā tōna kaha.
EPH 3:8 I hōmai ki ahau, ki te mea iti iho i te iti rawa o te hunga tapu katoa, tēnei aroha noa, kia kauwhautia e ahau i roto i ngā tauiwi te taonga o te Karaiti e kore nei e taea te rapu;
EPH 3:9 kia whakakitea anō hoki e ahau ki ngā tāngata katoa te whiwhinga tahitanga ki te mea ngaro, ki te mea i huna nei inamata noa atu i roto i te Atua, nāna nei i hanga ngā mea katoa;
EPH 3:10 kia ai te hāhi ināianei hei whakaatu ki ngā rangatiratanga, ki ngā mana i ngā wāhi o te rangi, i te maha o ngā whakaaro nui o te Atua.
EPH 3:11 I runga i tāna i whakatakoto ai i mua noa atu, he mea mahi nāna i roto i tō tātou Ariki, i a Karaiti Īhu;
EPH 3:12 kei roto nei i a ia tō tātou māiatanga me tō tātou whakatatanga atu i te mea e ū nei te whakaaro, he meatanga nā te whakapono ki a ia.
EPH 3:13 Koia ahau ka mea nei kia kaua koutou e ngākaukore i ōku tūkinotanga mō koutou; ko tō koutou korōria hoki tēnei.
EPH 3:14 Nō konei i tūturi ai ōku turi ki te Matua,
EPH 3:15 nōna nei te ingoa e huaina ana ki ngā hapū katoa i te rangi, i te whenua.
EPH 3:16 Kia rite ki te nui rawa o tōna korōria he hōmaitanga māna ki a koutou, kia pakari ai a roto i a koutou i te kaha o tōna Wairua;
EPH 3:17 kia noho ai a te Karaiti ki roto ki ō koutou ngākau, he mea whakapono; ā, i te mea kua whai pakiaka, me te whai tūranga mō koutou i roto i te aroha.
EPH 3:18 Kia kaha ai koutou me te hunga tapu katoa ki te whakaaro i te whānui, i te roa, i te hōhonu, i te tiketike,
EPH 3:19 ā, kia mōhio ki te aroha o te Karaiti, e kore nei e taea te whakaaro; kia tino kī rawa ai koutou i te Atua.
EPH 3:20 Nā, ki a ia, e kaha nei ki te mahi i ngā mea nui whakaharahara, nui noa atu i ngā mea katoa e īnoi ai, e whakaaro ai tātou, he pēnei anō me te kaha e mahi nei i roto i a tātou,
EPH 3:21 waiho atu i a ia te korōria i roto i te hāhi i runga i a Karaiti Īhu, ā taea noatia ngā whakatupuranga katoa, ake ake. Āmine.
EPH 4:1 Koia ahau, tā te Ariki herehere, ka whakahau nei i a koutou kia rite tā koutou haere ki te karangatanga i karangatia ai koutou,
EPH 4:2 kia pāpaku rawa te ngākau, kia māhaki, kia manawanui, kia āta hanga tētahi ki tētahi, i runga i te aroha;
EPH 4:3 me whai kia mau te kotahitanga o te Wairua, he mea paihere nā te rangimārie.
EPH 4:4 Kotahi tonu te tinana, kotahi te Wairua, pērā hoki me tō koutou karangatanga, kotahi tonu te mea o tō koutou karangatanga hei tūmanakotanga atu;
EPH 4:5 kotahi Ariki, kotahi whakapono, kotahi iriiri,
EPH 4:6 kotahi Atua, ko te Matua o ngā mea katoa, kei runga nei ia i ngā mea katoa, puta noa ia i ngā mea katoa, kei roto hoki i te katoa.
EPH 4:7 Kua oti ia te aroha noa te hōmai ki tēnei, ki tēnei, o tātou, i runga i te mēhua o tā te Karaiti hōmaitanga.
EPH 4:8 Nā reira hoki ia i mea ai: “I tōna kakenga ki runga, whakaraua ana e ia ngā whakarau, ā, hoatu mea ana ia mā ngā tāngata.”
EPH 4:9 (Nā, ko tēnei, “I kake ia ki runga,” he aha, mehemea kāhore ia i mātua heke ki ngā wāhi o raro rawa o te whenua?
EPH 4:10 Tērā i heke rā, ko ia anō i kake atu nei ki runga ake i ngā rangi katoa, kia kī ai ngā mea katoa i a ia.)
EPH 4:11 Ā, hōmai ana e ia ko ētahi hei āpōtoro; ko ētahi hei poropiti; ko ētahi hei kaikauwhau i te rongopai; ko ētahi hei hēpara, hei kaiwhakaako;
EPH 4:12 kia tino rite ai te hunga tapu mō te mahi minita, mō te hanga i te whare, arā i te tinana o te Karaiti;
EPH 4:13 kia tae katoa rā anō tātou ki te kotahitanga o te whakapono, o te mātauranga hoki ki te Tama a te Atua, kia tino tangata, kia eke ki te mēhua o te tino kaumātuatanga e tutuki ai ki tō te Karaiti.
EPH 4:14 Kia mutu ai tō tātou tamarikitanga, te ākina, te kāhakihakina e ngā hau katoa o te whakaako, he whakawiringa kē nā te tangata, he māminga, he whakapōhēhē.
EPH 4:15 Engari, kia kōrero pono ai i runga i te aroha, kia tupu ai tātou ki roto ki a ia i ngā mea katoa, ko te upoko nei ia, ko te Karaiti;
EPH 4:16 nōna nei te tinana katoa, he mea whakapiri mārie, he mea āta hono e ngā meatanga a ngā hononga katoa, whakarite rawa ki te nui o te mahinga a ia wāhi, a ia wāhi, e mea ana i te tinana kia neke ake, hei whare e hanga ana i a ia i runga i te aroha.
EPH 4:17 Nā, ko tāku tēnei e kī nei, e whakaatu nei i roto i te Ariki, kia kāti tā koutou haere pērā me ērā atu tauiwi, e haere nei i roto i te whakahīhī o tō rātou hinengaro,
EPH 4:18 kua oti nei te whakapōuri ō rātou whakaaro, kua tangata kē ki tō te Atua ora, i te kūware o roto i a rātou, he pakeke hoki nō ō rātou ngākau.
EPH 4:19 Kāhore ō rātou ohoohonga, ā, tukua ana rātou e rātou anō ki te hiahia taikaha; riro pū rātou ki te mahi i ngā mea poke katoa.
EPH 4:20 Ko koutou ia kīhai i pērā tō koutou ako i a te Karaiti,
EPH 4:21 ki te mea kua rongo koutou ki a ia, kua whakaakona e ia ki ngā mea e rite ana ki te pono i roto i a Īhu.
EPH 4:22 Kia whakarērea e koutou te tangata tawhito, he āhua nō tō koutou whakahaere ō mua; he mea pirau nei hoki ia i runga i ngā hiahia tinihanga;
EPH 4:23 kia whakahoutia te wairua o tō koutou hinengaro;
EPH 4:24 kia kākahuria iho hoki ki a koutou te tangata hou, nō tā te Atua nei te hanganga i runga i te tika, i te tapu o te pono.
EPH 4:25 Heoi, whakarērea atu te teka; kia pono te kōrero ki tōna hoa, ki tōna hoa; he wāhi hoki tātou tētahi nō tētahi.
EPH 4:26 “Kia riri, ā, kaua e hara”: kei toene te rā ki tō koutou riri,
EPH 4:27 kaua hoki tētahi wāhi e tukua ki te rēwera.
EPH 4:28 Ko te tangata tāhae, me whakamutu tāna tāhae; engari me mahi ko ōna ringa anō hei mahi i te mea pai, kia whai rawa ai ia hei hoatutanga māna ki te rawakore.
EPH 4:29 Kei puta tētahi kupu kino i ō koutou māngai, engari hei te mea e tau ana hei hanga i te pai, kia whiwhi ai ki te pai ngā tāngata e rongo ana.
EPH 4:30 Kaua hoki e whakapōuritia te Wairua Tapu o te Atua, nāna nei koutou i hīri mō te rā o te whakaoranga.
EPH 4:31 Kia wehea rawatia atu i roto i a koutou te nanakia, te riri, te āritarita, te ngangau, te kōrero kino, me te mauāhara katoa;
EPH 4:32 kia ngāwari tō koutou tikanga tētahi ki tētahi, kia pai te ngākau, me te hohou noa iho i te rongo tētahi ki tētahi, kia pērā anō me te Atua i hohou nei i te rongo ki a koutou i roto i a te Karaiti.
EPH 5:1 Nā, kia rite tā koutou ki tā te Atua, kia pērā me tā ngā tamariki e arohaina ana;
EPH 5:2 haere hoki i runga i te aroha, kia pērā me te Karaiti i aroha ki a tātou, i tuku i a ia anō mō tātou hei whakahere, hei patunga tapu ki te Atua, hei kakara pai.
EPH 5:3 Ko te moepuku ia, me ngā mahi poke katoa, me te apo, kaua ēnā e whakahuatia i roto i a koutou, kia rite ki tā te hunga tapu tikanga.
EPH 5:4 Kaua hoki te mea paru­paru, te kōrero wai­rangi, te kōrero māminga, kāhore nei i tika, erangi ia te whaka­whetai.
EPH 5:5 E tino mātau ana hoki koutou ki tēnei, e kore tētahi tangata moe­puku, poke rānei, apo rānei, he kai­karakia nei hoki ia ki te whaka­pakoko, e whai wāhi ki te ranga­tira­tanga o te Karaiti, ā, o te Atua.
EPH 5:6 Kei tini­hanga­tia koutou e te tangata ki ngā kupu teka­teka noa; nā ēnei mea hoki te riri o te Atua e puta nei ki ngā tama­riki a te tutū.
EPH 5:7 Nā, kaua koutou e uru ki tā rātou.
EPH 5:8 He pōuri hoki koutou i mua, tēnā ko tēnei, he mārama i roto i te Ariki. Kia rite tā koutou haere ki tā ngā tamariki o te mārama –
EPH 5:9 kei runga hoki te hua o te mārama i te pai katoa, i te tika, i te pono.
EPH 5:10 Me whakamātau anō e koutou tā te Ariki e pai ai.
EPH 5:11 Kei uru koutou ki ngā mahi huakore o te pōuri, engari whakahēngia.
EPH 5:12 He mea whakamā hoki te whakahua kau i ngā mea e meinga ngarotia nei e rātou.
EPH 5:13 Ko ngā mea katoa hoki e whakahēngia ana, mā te mārama e whakakite; he mārama hoki ngā mea katoa e whakakitea ana.
EPH 5:14 Koia hoki tāna kupu nei: “Maranga, e tēnei e moe nei, ara ake i roto i te hunga mate, ā, ka whiti a te Karaiti ki runga ki a koe.”
EPH 5:15 Nā reira, kia āta tirotiro i tā koutou haere, kei rite ki tā ngā whakaarokore, engari ki tā ngā whakaaro nui;
EPH 5:16 hokona te tāima mā koutou, he kino hoki ngā rā.
EPH 5:17 Mō konei rā kei whakaarokore koutou, engari kia mātau ki tā te Ariki e pai ai.
EPH 5:18 Kaua hoki e haurangi i te wāina, he tōreretanga hoki tēnā ki te hē; engari kia kī i te Wairua;
EPH 5:19 ko tā koutou kōrero ki a koutou anō, hei te waiata tapu, hei te hīmene, hei te waiata wairua; waiata, hīmene atu, i roto i ō koutou ngākau ki te Ariki;
EPH 5:20 me te whakawhetai ki te Atua, arā ki te Matua i ngā wā katoa, mō ngā mea katoa, i runga i te ingoa o tō tātou Ariki, o Īhu Karaiti.
EPH 5:21 Kia ngohengohe tētahi ki tētahi i runga i te wehi ki a te Karaiti.
EPH 5:22 E ngā wāhine, kia ngohengohe ki ā koutou tāne ake, hei mea ki te Ariki.
EPH 5:23 Nō te mea ko te tāne te upoko o te wahine, e rite ana hoki ki a te Karaiti, ko te upoko ia o te hāhi; ko te kaiwhakaora anō ia o te tinana.
EPH 5:24 Otiia, e ngohengohe ana te hāhi ki tā te Karaiti, kia pērā anō ngā wāhine ki ā rātou tāne i ngā mea katoa.
EPH 5:25 E ngā tāne, arohaina ā koutou wāhine, kia pērā hoki me te Karaiti i aroha nei ki te hāhi, i hoatu hoki i a ia anō mō taua hāhi;
EPH 5:26 hei whakatapunga māna, mā rawa i a ia i te horoinga ki te wai, i runga i te kupu,
EPH 5:27 hei hāhi tāpae māna ki a ia anō, he hāhi korōria rawa, kāhore he ira, kāhore he korukoru, tētahi atu mea pērā rānei, engari kia tapu, kia kohakore.
EPH 5:28 Me aroha e ngā tāne ā rātou wāhine me te mea ko ō rātou tinana ake anō. Ko te tangata e aroha ana ki tāna wahine ake, e aroha ana ki a ia ake anō.
EPH 5:29 Kāhore hoki tētahi kia kino noa ki tōna kikokiko ake; engari e atawhai ana, e whakaahuru ana, e pērā tonu ana me tā te Karaiti ki te hāhi;
EPH 5:30 he wāhi hoki tātou nō tōna tinana.
EPH 5:31 “Mō konei rā ka whakarērea ai e te tangata tōna pāpā me tōna whaea, ā, ka piri ki tāna wahine, ka kikokiko kotahi tō rāua tokorua.”
EPH 5:32 He nui tēnei mea ngaro; otiia, mō te Karaiti rāua ko te hāhi tāku kōrero.
EPH 5:33 Engari, kia rite ki tōna aroha ki a ia ake anō tō koutou aroha, tō tēnei, tō tēnei, ki tāna wahine, ki tāna wahine; me te wahine anō, kia hopohopo ia ki tāna tāne.
EPH 6:1 E ngā tamariki, kia ngohengohe ki ō koutou mātua i roto i te Ariki: ko te mea tika hoki tēnei.
EPH 6:2 “Whakahōnoretia tōu pāpā me tōu whaea”– ko te ture tuatahi tēnei i runga i te kupu whakaari –
EPH 6:3 “Kia hua ai te pai ki a koe, kia roa ai hoki tōu noho i te whenua.”
EPH 6:4 Me koutou hoki, e ngā mātua, kei whakapātaritari i ā koutou tamariki kia riri; engari whakatupuria ake rātou i runga i te whakaako, i te whakatūpato a te Ariki.
EPH 6:5 E ngā pononga, kia ngohengohe ki ō koutou rangatira o te wāhi ki te kikokiko, me te wehi, me te wiri, i runga i te ngākau tapatahi, ānō ki a te Karaiti;
EPH 6:6 kaua hei tā te kanohi mahi, hei whakamānawareka tāngata noa; engari hei tā ngā pononga a te Karaiti, e mahi ā-ngākau ana i tā te Atua i pai ai.
EPH 6:7 Kia mahi i runga i te whakaaro pai, ānō ki te Ariki, kāhore ki te tangata;
EPH 6:8 kia mātau hoki, ko te pai e mea ai te tangata, ka whakawhiwhia mai anō ia ki tēnei e te Ariki, ahakoa pononga, ahakoa rangatira.
EPH 6:9 E ngā rangatira, kia pērā anō hoki tā koutou ki a rātou; kāti te whakawehi; kia mātau hoki ko tō koutou Ariki me tō rātou kei te rangi; kāhore hoki āna whakapai kanohi.
EPH 6:10 Heoi, kia kaha i roto i te Ariki, i te mana hoki o tōna kaha.
EPH 6:11 Kākahuria iho ngā mea whawhai katoa a te Atua, kia taea ai e koutou ngā mahi tinihanga a te rēwera te tū ki te riri.
EPH 6:12 Ehara hoki tā tātou i te pakanga ki te kikokiko, ki ngā toto, engari ki ngā rangatiratanga, ki ngā mana, ki ngā ariki o te pōuri o tēnei ao, ki ngā taua wairua kino o ngā wāhi i te rangi.
EPH 6:13 Mō konei kia mau ki ngā mea whawhai katoa a te Atua, kia taea ai e koutou te tū atu ki te riri i te rā kino, ā, ka poto i a koutou ngā mea katoa te mahi, kia tū.
EPH 6:14 E tū rā, he mea whītiki ō koutou hope ki te pono, kākahuria iho anō hoki ko te tika hei pukupuku;
EPH 6:15 herea iho te rongopai o te rangimārie hei hū mō ō koutou waewae, kia takatū ai.
EPH 6:16 Mō waho i ēnei mea katoa e mau ki te whakapono hei whakangungu rākau, e taea ai e koutou te tinei ngā mātia muramura katoa a te wairua kino.
EPH 6:17 E mau hoki ki te ora hei pōtae, ki te hoari hoki a te Wairua, arā ki te kupu a te Atua.
EPH 6:18 Kia pau te īnoi me te tohe, me īnoi i ngā wā katoa i roto i te Wairua, kia mataara hoki koutou ki taua mea, me te ū tonu ki te tohe mō te hunga tapu katoa.
EPH 6:19 Mōku anō hoki, kia hōmai he kupu ki ahau, kia māia ai te puaki o tōku māngai, ki te whakaatu i te mea ngaro, arā i te rongopai;
EPH 6:20 ko tāna karere nei ahau, he mea mekameka. Kia māia ai ahau ki taua kōrero, kia rite ai tāku kōrero ki te mea i tika.
EPH 6:21 Nā, kia mātau ai koutou ki āku mea, ki āku mahi, mā Tikiku e whakaatu ngā mea katoa ki a koutou, he teina aroha nei ia, he minita pono i roto i te Ariki.
EPH 6:22 Mō reira i tonoa atu ai ia e ahau ki a koutou, kia mātau ai koutou ki tō mātou āhua, ā, kia whakamārietia ai e ia ō koutou ngākau.
EPH 6:23 Kia tau ki ngā tēina te rangimārie, te aroha, me te whakapono he mea nā te Atua Matua, nā te Ariki hoki, nā Īhu Karaiti.
EPH 6:24 Kia tau te aroha noa ki te hunga katoa e aroha ana, he aroha parakore, ki tō tātou Ariki, ki a Īhu Karaiti. Āmine.
PHI 1:1 Nā Pāora, rāua ko Tīmoti, nā ngā pononga a Īhu Karaiti, Ki te hunga tapu katoa i roto i a Karaiti Īhu e noho ana i Piripai, rātou ko ngā pīhopa, ko ngā rīkona:
PHI 1:2 Kia tau ki a koutou te aroha noa, me te rangimārie, he mea nā te Atua, nā tō tātou Matua, nā te Ariki hoki, nā Īhu Karaiti.
PHI 1:3 E whakawhetai ana ahau ki tōku Atua i ōku maharatanga katoa ki a koutou,
PHI 1:4 i āku īnoinga katoa, e puta ana tāku īnoi mō koutou i ngā wā katoa i runga i te hari,
PHI 1:5 mō koutou i uru tahi mai hei tautoko i te rongopai, mai o te rā tuatahi ā moroki noa nei.
PHI 1:6 Pūmau tonu tōku whakaaro ki tēnei mea nei anō, tērā te kaitīmata o te mahi pai i roto i a koutou e whakaoti, taea noatia te rā o Īhu Karaiti.
PHI 1:7 He tika hoki kia pēnei ōku whakaaro ki a koutou katoa, nō te mea kei roto koutou i tōku ngākau; arā, ahakoa i ahau nei i te here, ahakoa i ahau e kōrero whakaara nei, e whakaū nei i te rongopai, ka uru tahi koutou katoa me ahau ki te aroha noa.
PHI 1:8 Ko te Atua hoki hei kaiwhakaatu mōku, mō te nui o tōku kōinga ki a koutou katoa, i runga i te ngākau aroha o Īhu Karaiti.
PHI 1:9 Ko tāku īnoi anō tēnei, kia nui haere tonu tō koutou aroha i runga i te mātauranga, i ngā mahara mōhio katoa;
PHI 1:10 kia whakaaetia ai e koutou ngā mea papai; kia kore ai ō koutou tinihanga, ō koutou hē, ā taea noatia te rā o te Karaiti;
PHI 1:11 kia kī ai hoki i ngā hua o te tika, e puta mai ana i a Īhu Karaiti, hei korōria, hei whakamoemiti i te Atua.
PHI 1:12 Nā, e mea ana ahau kia mātau koutou, e ōku tēina, ki te tukunga iho o ngā mea i pā ki ahau, pai tonu hei whakaneke ake i te rongopai;
PHI 1:13 kua kitea hoki ōku mekameka mō tā te Karaiti, puta noa i te wāhi katoa o ngā hōia tiaki i te kīngi, i ērā atu wāhi katoa anō hoki.
PHI 1:14 Kua ngākau nui hoki te tokomaha o ngā tēina i roto i te Ariki, i ōku mekameka nei, hira rawa anō hoki tō rātou māia ki te kōrero i te kupu, kāhore he mataku.
PHI 1:15 Ko ētahi nā te hae, nā te totohe, i kauwhau ai i a te Karaiti; ko ētahi nā te whakaaro pai;
PHI 1:16 ko ētahi nā te aroha, e mahara ana kua waiho ahau hei kōrero whakaara i te rongopai;
PHI 1:17 ko ētahi nā te totohe tā rātou kauwhau i a te Karaiti, ehara i te whakaaro pono, e mea ana ki te whakatupu mamae mōku e mekameka nei.
PHI 1:18 Ā, tēnā pēhea iho? Anei rā, ahakoa tinihanga, ahakoa pono, e kauwhautia ana a te Karaiti; ā, e hari ana ahau ki tēnei, āe rā, ka hari anō ahau.
PHI 1:19 E mātau ana hoki ahau ka ai tēnei hei whakaora mōku, i a koutou nā ka īnoi, i te Wairua anō hoki o Īhu Karaiti ka hōmai.
PHI 1:20 Ko tāku hoki tēnei e whakamau tonu nei, e tūmanako atu nei, e kore ahau e whakamā i tētahi mea, engari ka tino māia ahau, ā, ka pērā me tō ngā wā katoa, ka whakanuia anō a te Karaiti āianei e tōku tinana, ahakoa i te ora, ahakoa i te mate.
PHI 1:21 Ki ahau hoki ko te ora ko te Karaiti, ko te mate he taonga.
PHI 1:22 Ki te ora ia ahau i te kikokiko, mehemea ko te hua tēnei o tāku mahi, heoi, kāhore ahau e mōhio ko te aha tāku e whiriwhiri ai.
PHI 1:23 E karapitia mai ana hoki ahau e ngā mea e rua, he hiahia nei tōku ki te haere, kia noho ai ahau ki a te Karaiti; ko te mea tino pai rawa hoki tērā.
PHI 1:24 Ko te noho rānei i te kikokiko, ko te mea pai ake hoki tēnā mō koutou.
PHI 1:25 Nā, ka ū nei tōku whakaaro ki tēnei, e mātau ana ahau tērā ahau e noho, āe rā, ka noho iho ahau ki a koutou katoa, hei whakaneke ake, hei whakahari i a koutou i runga i te whakapono;
PHI 1:26 kia hira rawa ai tō koutou whakamanamana i roto i a Karaiti Īhu ki ahau, mōku ka noho tahi anō me koutou.
PHI 1:27 Engari, kia tika tā koutou whakahaere, kia rite ki tā te rongopai o te Karaiti. Nā, ahakoa tae atu ahau kia kite i a koutou, ngaro mai rānei, kia rongo tonu atu ahau ki tō koutou āhua, kei te tū koutou i runga i te wairua kotahi, i te ngākau kotahi, me te tohe tahi anō ki te whakapono o te rongopai.
PHI 1:28 Kāhore hoki he wehi ki tētahi mea a ō koutou hoariri. He tohu hoki tēnei ki a rātou mō te whakangaromanga, ki a koutou ia mō te ora, i ahu mai i te Atua.
PHI 1:29 Nō te mea kua hoatu ki a koutou hei meatanga mā koutou ki a te Karaiti, ehara i te mea ko te whakapono anake ki a ia, engari ko te mate anō hoki mō te whakaaro ki a ia;
PHI 1:30 kei a koutou hoki taua pakanga i kite rā koutou ki ahau, ā, ka rongo nei ināianei kei ahau.
PHI 2:1 Nā, ki te mea he whakamārie kei roto i a te Karaiti, ki te mea he pēhi mamae tō te aroha, ki te mea he whiwhinga tahitanga ki te Wairua, ki te mea he ngākau aroha, he mahi tohu,
PHI 2:2 kia rite tōku hari i a koutou, kia kotahi te whakaaro, kia kotahi te aroha, huihuia ngā ngākau i runga i te whakaaro kotahi.
PHI 2:3 Kei meinga tētahi mea i runga i te wehewehe, i te whakapehapeha rānei, engari i runga i te ngākau pāpaku, me te whakanui a tētahi i tētahi ki runga ake i a ia.
PHI 2:4 Kaua tēnā o koutou nā, e titiro ki ōna mea anake, engari me titiro anō tēnā, tēnā o koutou ki ngā mea a ētahi atu.
PHI 2:5 Ko tēnei hei whakaaro mō koutou, ko tērā i a Karaiti Īhu:
PHI 2:6 Ahakoa hoki i a ia te āhua o te Atua, kīhai i meinga e ia te rite ki te Atua hei taonga kapo mai.
PHI 2:7 Engari i mea i a ia anō kia pōaha, ka mau ki te āhua o te pononga, ka meinga kia rite ki te tangata;
PHI 2:8 ā, ka kitea nei tōna āhua e rite ana ki tō te tangata, ka whakapāpaku ia i a ia, ka meinga kia ngohengohe, ahakoa ki te mate, āe rā, ki te mate o te rīpeka.
PHI 2:9 Nā konei whakateiteitia ake ana ia e te Atua, ā, hoatu ana ki a ia te ingoa nui atu i ngā ingoa katoa;
PHI 2:10 kia tuku ai i runga i te ingoa o Īhu ngā turi katoa, o ngā mea i te rangi, o ngā mea i te whenua, o ngā mea i raro i te whenua;
PHI 2:11 ā, kia whakaae ngā arero katoa ko Īhu Karaiti te Ariki, hei whakakorōria i te Atua Matua.
PHI 2:12 Heoi, e ōku tēina aroha, he mea tonu ia nā koutou te ngohengohe ki ahau i ngā wā katoa, ehara i te mea i ōku wā anake i konā, engari rawa ia ināianei i ahau kāhore i konā, nā, whakaotia tō koutou whakaoranga i runga i te wehi, i te wiri;
PHI 2:13 ko te Atua hoki te kaimahi i roto i a koutou o te hiahia, o te mahi, hei mea i tāna i pai ai.
PHI 2:14 I ā koutou mahi katoa kaua te amuamu, te tautohetohe;
PHI 2:15 kia kore ai koutou e whaikupuria, kia tapatahi ai, he tamariki kohakore nā te Atua, i waenganui o te whakatupuranga tutū, parori kē, kei roto nei koutou i a rātou e tīaho ana hei rama i te ao;
PHI 2:16 kia mau pū ki te kupu o te ora; kia hari ai ahau ā te rā o te Karaiti, kīhai ahau i oma noa, kīhai i mahi noa.
PHI 2:17 Nā, ki te ringihia ahau ki runga ki te patunga tapu, ki ngā mahi a tō koutou whakapono, ka hari ahau, inā, ka hari tahi me koutou katoa.
PHI 2:18 Waihoki ko koutou, kia hari, hari tahi me ahau.
PHI 2:19 Otiia, e mea ana ahau i roto i te Ariki, i a Īhu, ki te tono tata atu i a Tīmoti ki a koutou, kia ora ai hoki tōku ngākau, ina mōhio ahau ki tō koutou āhua.
PHI 2:20 Kāhore hoki ōku tāngata rite te ngākau ki tōna, hei mahara pono ki ā koutou mea.
PHI 2:21 Ko tā te katoa hoki e rapu nei, ko tā rātou ake, kāhore ngā mea a Īhu Karaiti.
PHI 2:22 Ko koutou ia e mātau ana ki ōna tohu, he pērā tāna me tā te tamaiti ki te matua, ko tōku hoa ia ki te kawe haere i te rongopai.
PHI 2:23 Ko ia tāku e mea nei kia tonoa wawetia atu, ina kite ahau i te tukunga iho ki ahau.
PHI 2:24 Otiia, e ū ana tōku whakaaro i roto te Ariki, ka hohoro tōku tae atu.
PHI 2:25 I mea anō ia ahau me tono atu ki a koutou a Epaporitu, tōku teina, tōku hoa mahi, tōku hoa hōia, nā koutou ia karere, he kaimahi anō hoki i ngā mea i matea e ahau.
PHI 2:26 Kōingo tonu hoki ia ki a koutou katoa, kōnohi rawa, nō te mea i rongo koutou he tūroro ia.
PHI 2:27 He tūroro rā hoki ia, tata pū ki te mate. Otirā, i tohungia ia e te Atua; ehara anō i te mea ko ia anake, ko ahau anō hoki, kei tāpiritia he pōuri ki tōku pōuri.
PHI 2:28 Koia i nui rawa ai tōku ngākau ki te tono atu i a ia, kia kite ai anō koutou i a ia, kia hari ai, kia tāharahara iho ai hoki tōku pōuri.
PHI 2:29 Kia nui te hari i runga i te Ariki, ina tae atu ia; whakahōnoretia anō hoki ngā pērā;
PHI 2:30 nō te mea nā te mahi ki a te Karaiti i tata ai ia ki te mate, te ihupuku ki te ora, kia rite ai i a ia ngā mahi ki ahau, kīhai nei i rite i a koutou.
PHI 3:1 Heoi, e ōku tēina kia hari i roto i te Ariki. Ki ahau kāhore he hōhā o te tuhituhi atu i aua mea nei anō ki a koutou; ki a koutou ia hei mea e ū ai.
PHI 3:2 Kia tūpato ki ngā kurī, kia tūpato ki ngā kaimahi i te kino, kia tūpato ki te tapahanga.
PHI 3:3 Ko tātou hoki te kotinga, e mahi nei ki te Atua i runga i te wairua, e whakamanamana nei ki a Karaiti Īhu, kāhore nei e ū te whakaaro ki te kikokiko.
PHI 3:4 Otirā, tērā anō ahau e ū te whakaaro ki te kikokiko ki te whakaaro tētahi atu tangata he mea tāna e ū ai tōna whakaaro ki te kikokiko, tērā atu anō tāku.
PHI 3:5 Ko te kotinga i te rā tuawaru, nō te whānau a Īharaira, nō te hapū o Pineamine, he Hiperu nō ngā Hiperu; ki tō te ture he Parihi;
PHI 3:6 mō te ngākau nui ki te Atua, i whakatoi ahau i te hāhi; mō te tika, arā mō tērā i te ture, kāhore he kupu mōku.
PHI 3:7 He ahakoa rā, ko ngā mea i waiho rā e ahau hei taonga ki ahau, kua kīia ake e ahau hei rukenga, i te mea ka whakaaro nei ki a te Karaiti.
PHI 3:8 Āe rā, kīia iho e ahau ngā mea katoa hei rukenga, i te mea ka whakaaro nei ki te pai whakaharahara o te mātauranga ki a Karaiti Īhu, ki tōku Ariki. He whakaaro nei ki a ia i riro ai ēnā mea katoa ōku ki te kore, āe rā, kīia iho e ahau hei paru, kia whiwhi ai ahau ki a te Karaiti;
PHI 3:9 kia kitea ai hoki kei roto ahau i a ia, kāhore he tika ōku ake, arā he tika i te ture, engari ko tērā e nā runga ana mai i te whakapono ki a te Karaiti, ko te tika a te Atua nā te whakapono.
PHI 3:10 Kia mātau ai ahau ki a ia, ki te kaha hoki o tōna aranga mai, ki te urunga tahitanga hoki ki ōna mamae, he mea whakaahua kia rite ki tōna matenga;
PHI 3:11 me kore ahau e tutuki ki te aranga mai i roto i te hunga mate.
PHI 3:12 Ehara i te mea kua mau rawa ahau, kua tino rite rānei ahau; engari e whāia atu ana e ahau, me kore e mau i ahau te mea i mau ai ahau i a Karaiti Īhu.
PHI 3:13 E ōku tēina, kāhore āku kīanga ake kua mau i ahau, kotahi ia tāku, wareware ake i ahau ngā mea ō muri, whātoro tonu atu ki ngā mea i mua,
PHI 3:14 ka tāwhai tonu ahau ki te tohu, ki te utu whakahōnore o tō runga karangatanga a te Atua, i roto i a Karaiti Īhu.
PHI 3:15 Nā reira, ko te hunga o tātou kua tino rite, kia pēnei ō tātou whakaaro; ā, ki te rerekē ō koutou whakaaro ki tētahi mea, mā te Atua anō tēnei e whakakite ki a koutou.
PHI 3:16 Engari, ko te wāhi kua taea atu e tātou ko tērā anō hei tikanga mō tā tātou haere.
PHI 3:17 Kia rite tō koutou ki tōku, e ōku tēina, tirohia hoki te hunga e rite ana te haere ki tā mātou kua waiho nei hei tauira mō koutou.
PHI 3:18 He tokomaha hoki kei te haere, ka maha nei ngā wā i kōrerotia ai rātou e ahau ki a koutou, ā, ka kōrerotia nei ināianei me te tangi anō ahau, he hoa whawhai rātou ki te rīpeka o te Karaiti.
PHI 3:19 Ko te tukunga iho ki a rātou he whakangaro, tō rātou atua ko te kōpū, tō rātou korōria hoki kei runga i tō rātou whakamā, ko ngā mea o te whenua tā rātou e whakaaro ai.
PHI 3:20 Ko te rangi ia te wāhi i tangata whenua ai tātou; kei reira hoki te Kaiwhakaora e tāria atu nei e tātou, te Ariki, a Īhu Karaiti.
PHI 3:21 Māna nei e whakaahua kē tō tātou tinana tūtūā nei, kia rite ki tōna tinana korōria, i runga i te mahinga a tōna kaha e taea ai e ia te pēhi ngā mea katoa ki raro i a ia.
PHI 4:1 Heoi, e ōku tēina aroha, e hiahiatia atu nei, e tōku haringa, e tōku karauna, tēnā rā, e tū i runga i te Ariki, e ōku hoa aroha.
PHI 4:2 He kupu tēnei nāku ki a Ūoria, he kupu anō tēnei ki a Hinatiki, kia kotahi tō rāua whakaaro i roto i te Ariki.
PHI 4:3 Nā, he tohe tēnei nāku ki a koe, e tōku hoa pono ki te mahi, ko koe hei whakamāmā i aua wāhine, he hunga rāua i uru tahi me ahau ki te tohe ki ngā mea o te rongopai, me Keremeneta anō, me ērā atu hoki o ōku hoa mahi, kei roto nei i te pukapuka o te ora ō rātou ingoa.
PHI 4:4 Kia hari tonu i roto i te Ariki; ko tāku kupu anō tēnei, Kia hari!
PHI 4:5 Kia mōhiotia tō koutou ngākau ngāwari e ngā tāngata katoa. Kua tata te Ariki.
PHI 4:6 Kaua e mānukanuka ki tētahi mea; engari i ngā mea katoa whakaaturia ki te Atua ngā mea e matea ai e koutou, i runga i te karakia, i te īnoi, me te whakawhetai hoki.
PHI 4:7 Ā, mā te mārie o te Atua, e kore nei e taea te whakaaro, e tiaki ō koutou ngākau, ō koutou hinengaro, i roto i a Karaiti Īhu.
PHI 4:8 Heoi, e ōku tēina, ko ngā mea e pono ana, ko ngā mea e whai hōnore ana, ko ngā mea e tika ana, ko ngā mea e kinokore ana, ko ngā mea e ātaahua ana, ko ngā mea e kōrerotia paitia ana; ki te mea he pai, ki te mea he whakamoemiti; whakaaroa ēnei mea.
PHI 4:9 Ko ngā mea i whakaakona ki a koutou, i riro i a koutou, i rongo ai, i kite ai rānei ki ahau, mahia ēnei; ā, ka noho te Atua o te rangimārie ki a koutou.
PHI 4:10 Nui atu ia tōku hari i roto i te Ariki mō tō koutou whakaaro ki ahau kātahi nei ka pihi ake anō; he mea anō ia i whakaaroa e koutou i mua, otiia, kīhai i whai meatanga.
PHI 4:11 Ehara tāku e kōrero nei i te mea mō te rawakore; kua ako hoki ahau, ahakoa kei hea ahau e noho ana, kia tatū tōku ngākau i reira.
PHI 4:12 Ko te whakahoki i ahau ki raro, mātau tonu i ahau; ko te whai rawa, mātau tonu i ahau; i ngā wāhi katoa, i ngā mea katoa, ka oti ahau te whakaako, kia mākona, ā, kia mate i te kai, kia whai rawa, ā, kia rawakore rānei.
PHI 4:13 Ka taea e ahau ngā mea katoa i roto i a te Karaiti e whakakaha nei i ahau.
PHI 4:14 He ahakoa rā, he pai tā koutou mahi, i a koutou i uru nei ki tōku mate.
PHI 4:15 Nā, e mātau ana anō rā koutou e ngā Piripai, i te tīmatanga o te rongopai, i ahau i haere atu ai i Makeronia, kāhore he hāhi i uru ki tāku tikanga; arā mō tētahi mea kia tukua atu, kia hōmai rānei, ko koutou anake.
PHI 4:16 I Teharonika anō hoki kotahi, e rua, ā, koutou hōmaitanga i ngā mea i matea e ahau, kia kawea ake māku.
PHI 4:17 Ehara i te mea e whai ana ahau i tētahi mea kia hōmai; engari e whai ana ahau kia maha ake ngā hua hei mea mā koutou.
PHI 4:18 Otiia, kei te whiwhi ahau i ngā mea katoa, hira noa ake hoki āku; kua kī ahau, kua tae mai nei i a Epaporitu ngā mea i ahu mai i a koutou, he kakara reka, he patunga tapu e manakohia ana, ko tā te Atua e āhuareka mai ai.
PHI 4:19 Ā, mā tōku Atua e mea kia hua ngā mea katoa e matea ana e koutou, kia rite ki te nui o tōna korōria, i roto i a Karaiti Īhu.
PHI 4:20 Nā, waiho i te Atua, arā i tō tātou Matua, te korōria ake ake. Āmine.
PHI 4:21 Oha atu ki te hunga tapu katoa i roto i a Karaiti Īhu. He oha atu tēnei ki a koutou nā ngā tēina i ahau nei.
PHI 4:22 He oha atu tēnei ki a koutou nā te hunga tapu katoa, tēnei rawa ia tā te hunga o te whare o Hīhā.
PHI 4:23 Kia tau te aroha noa o tō tātou Ariki, o Īhu Karaiti ki a koutou katoa. Āmine.
COL 1:1 Nā Pāora, i paingia nei e te Atua hei āpōtoro mā Karaiti Īhu, nā tō tātou teina hoki, nā Tīmoti,
COL 1:2 Ki te hunga tapu, ki ngā tēina whakapono hoki i roto i a te Karaiti, i Korohe: kia tau ki a koutou te aroha noa, me te rangimārie, he mea nā te Atua, nā tō tātou Matua.
COL 1:3 Tēnei mātou te whakawhetai atu nei ki te Atua, arā ki te Matua o tō tātou Ariki, o Īhu Karaiti, me te īnoi tonu anō mātou mō koutou,
COL 1:4 nō mātou ka rongo nei ki tō koutou whakapono ki a Karaiti Īhu, ki tō koutou aroha hoki ki te hunga tapu katoa;
COL 1:5 mō te mea e tāria atu nei, e takoto mai nei mā koutou i te rangi. Ko tā koutou i rongo ai i mua ki te kupu o te pono o te rongopai,
COL 1:6 kua tae atu nā ki a koutou; kua whai hua hoki, ā, kua nui haere ki te ao katoa, pēnā hoki i roto i a koutou, nō te rā anō i rongo ai, i mātau ai koutou ki te aroha noa o te Atua i roto i te pono.
COL 1:7 I whakaakona atu nā hoki koutou ki tēnā e Epapara, e tō mātou hoa pononga e arohaina nei; he minita pono nei ia nā te Karaiti ki a koutou.
COL 1:8 Nāna hoki i whakakite mai ki a mātou tō koutou aroha i runga i te Wairua.
COL 1:9 Nō konei hoki, mai o te rā i rongo ai mātou, kāhore e mutu tā mātou karakia me tā mātou īnoi mō koutou, kia whakakīia koutou ki te mōhio ki tāna e pai ai, i runga i ngā whakaaro nui katoa, i te mahara wairua anō hoki.
COL 1:10 Kia tika ai tā koutou haere, kia rite ai ki tā te Ariki, āhuareka rawa, hua rawa i runga i ngā mahi pai katoa, tupu tonu i runga i te mōhio ki te Atua.
COL 1:11 Kia whakanuia te kaha hei whakakaha mō koutou, kia rite ki tā te mana o tōna korōria, e ū tonu ai, e whakamanawanui ai i runga i te hari.
COL 1:12 Me te whakawhetai atu anō ki te Matua, nāna nei tātou i whai tikanga ai ki tētahi wāhi o te kāinga o te hunga tapu i roto i te mārama.
COL 1:13 Nāna nei tātou i whakaora mai i te kaha o te pōuri, ā, whakawhitia ake tātou e ia ki te rangatiratanga o tāna Tama aroha.
COL 1:14 Kei roto nei i a ia tō tātou whakaoranga i runga i ōna toto, arā te murunga o ngā hara.
COL 1:15 Ko ia nei te āhua o te Atua e kore nei e kitea atu, ko te whānau mātāmua o ngā mea hanga katoa.
COL 1:16 Nāna hoki ngā mea katoa i hanga, ngā mea i te rangi me ngā mea i te whenua, ngā mea e kitea ana me ngā mea kāhore e kitea, ahakoa torōna, ahakoa kāwanatanga, ahakoa rangatiratanga, ahakoa mana. Nāna, ā, mōna te hanganga o ngā mea katoa.
COL 1:17 Nō mua anō hoki ia i ngā mea katoa, nāna anō hoki ngā mea katoa i mau ai.
COL 1:18 Ko ia anō te upoko o te tinana, arā o te hāhi. Ko ia te tīmatanga, ko te whānau mātāmua i roto i te hunga mate; kia waiho ai ia hei tuatahi i roto i ngā mea katoa.
COL 1:19 Ko tā te Matua tērā i pai ai, kia noho te huanga o ngā mea katoa ki roto ki a ia;
COL 1:20 kia mā roto ai i a ia he houhanga rongo mō ngā mea katoa ki a ia, kua mau nei i a ia te rongo i ngā toto o tōna rīpeka; āe rā, mā roto i a ia, ahakoa he mea nō te whenua, ahakoa he mea nō te rangi.
COL 1:21 Me koutou hoki he tāngata kē i mua, he hoariri te hinengaro i ngā mahi kino, nā, kua meinga nei e ia kia houhia tā koutou rongo,
COL 1:22 i runga i te tinana o tōna kikokiko, he mea nā te mate; mō koutou anō kia tāpaea atu ki tōna aroaro, he hunga tapu, kāhore nei he koha, kāhore he hē;
COL 1:23 ki te pūmau koutou ki te whakapono, ū tonu, mau tonu, tē taea te whakaneke atu i te tūmanako ki tā te rongopai i rongo ai koutou, kua kauwhautia atu nei ki ngā mea hanga katoa i raro o te rangi. Mō reira nei ahau, a Pāora, i meinga ai hei minita.
COL 1:24 Tēnei ahau te hari nei ki ōku mamae mō koutou, ka kapi hoki i ōku kikokiko ngā mate o te Karaiti kāhore anō i rite noa, hei mea mō tōna tinana, arā mō te hāhi.
COL 1:25 Mō reira nei ahau i meinga ai hei minita, rite tonu ki tā te Atua tikanga ki a koutou i hōmai nei ki ahau, kia whakapaua te kauwhau o te kupu a te Atua,
COL 1:26 o te mea ngaro i huna i ērā wā noa atu, i ērā whakatupuranga; ā, kua whakakitea ināianei ki tāna hunga tapu,
COL 1:27 he meatanga nā te Atua, kia whakaaturia ki a rātou te taonga nui o te korōria o tēnei mea ngaro ki roto ki ngā tauiwi, arā, a te Karaiti i roto i a koutou, e tūmanako atu ai ki te korōria.
COL 1:28 E kauwhautia nei e mātou, me te whakatūpato i ngā tāngata katoa me te whakaako i ngā tāngata katoa i runga i ngā whakaaro mōhio katoa, kia tāpaea atu ai e mātou ngā tāngata katoa, he mea tino tika i roto i a te Karaiti.
COL 1:29 Ko tāku tēnei e uaua nei, e tohe nei i runga i tāna mahinga e kaha nei te mahi i roto i ahau.
COL 2:1 E mea ana hoki ahau kia mōhio koutou ki te nui o tōku uaua mō koutou, mō te hunga anō hoki o Raorikia, ā, mō te hunga katoa hoki kāhore nei i kite noa i tōku mata i te kikokiko.
COL 2:2 Kia whakamārietia ō rātou ngākau, kia tūhonohonoa i runga i te aroha, kia taea ai ngā taonga katoa o te tino whakaūnga o te ngākau mahara, kia mātau ai rātou ki te mea ngaro a te Atua, arā ki a te Karaiti;
COL 2:3 kei roto nei i a ia ngā taonga katoa o te mahara, o te mātauranga e huna ana.
COL 2:4 Nā, i kōrero ai ahau i tēnei, kei kūmea kētia koutou e te kōrero reka a te tangata.
COL 2:5 Nō te mea ahakoa kei tawhiti tōku kikokiko, kei a koutou nā tōku wairua, e hari ana, e titiro ana ki ā koutou ritenga tika, ki te ū anō hoki o tō koutou whakapono ki a te Karaiti.
COL 2:6 Nā, kua riro nā te Ariki, a Karaiti Īhu i a koutou, kia pēnā anō tā koutou haere i roto i a ia;
COL 2:7 kia whai pakiaka, ānō he whare i hangā ki runga ki a ia, whakapūmau rawa ki runga ki tō koutou whakapono, kia pērā me koutou i whakaakona rā, kia hira rawa ai te whakawhetai.
COL 2:8 Kia tūpato kei riro pārau koutou i tō te tangata whakaaro mōhio, i te tinihanga huakore, e rite nei ki te whakarerenga iho a te tangata, ki ngā mea tīmatanga o te ao, ā, kāhore ki a te Karaiti.
COL 2:9 Kei roto katoa hoki i a ia te tino o te Atua e noho-ā-tinana ana.
COL 2:10 Ā, kua tino tangata anō koutou i roto i a ia, ko te upoko nei ia o ngā rangatiratanga, o ngā mana katoa.
COL 2:11 He mea kokoti koutou i roto i a ia, he kotinga kīhai i meatia e te ringaringa, i te unuhanga atu i te tinana o ngā hara o te kikokiko, i tō te Karaiti kotinga;
COL 2:12 he mea tanu tahi koutou me ia i te iriiringa, he mea whakaara ngātahi anō hoki me ia i reira, nō te mea ka whakapono nei ki te mahi a te Atua, nāna nei ia i whakaara ake i te hunga mate.
COL 2:13 He tūpāpaku nā hoki koutou i ngā hē, i te kotingakore hoki o tō koutou kikokiko, nā, whakaorangia ngātahitia ana koutou me ia, he mea whakarere noa atu nāna ō koutou hē katoa.
COL 2:14 Murua ake e ia ngā tikanga i tuhituhia e te ringaringa, ngā tikanga i hoariri ki a tātou, i tū kē mai i ā tātou; tangohia ake e ia ki rahaki, he mea titi nāna ki te rīpeka;
COL 2:15 pāuhua ake e ia ki raro ngā rangatiratanga me ngā mana, whakakitea nuitia ana e ia, ā, waiho ana e ia taua rīpeka hei mea whakataka māna i a rātou.
COL 2:16 Nā, kaua tētahi e whakawā i a koutou mō te kai, mō te inu, mō ngā meatanga ki te hākari, ki te kōwhititanga marama, ki ngā hāpati;
COL 2:17 he ātārangi ēnei nō ngā mea i kīia e puta ana i muri; nō te Karaiti ia te tinana.
COL 2:18 Kei riro tā koutou taonga i te māminga a te tangata e mea ana ki te whakaiti i a ia, ki te karakia ki ngā anahera, ka noho i roto i ngā mea e kitea ana e ia, ka whakapehapeha kau noa, he mea nā tōna ngākau kikokiko;
COL 2:19 ā, kāhore e mau ki te Upoko, nō roto nei i a ia te tinana katoa, he mea atawhai, he mea tūhonohono e ngā hononga, e ngā here, ka tupu ai, he tupu nā te Atua.
COL 2:20 Ki te mea kua tūpāpaku ngātahi koutou ko te Karaiti ki ngā mea tīmatanga o te ao, he aha koutou, ānō e ora ana ki te ao, ka pupuri tonu ai i ngā tikanga,
COL 2:21 “Kei pā ringaringa, kei pā kai, kei rahurahu.”
COL 2:22 He mea pirau katoa nei aua mea i te meatanga iho anō, he whakahau, he ako nā te tangata?
COL 2:23 Ko te āhua o aua mea i whakaritea ki tō te whakaaro nui, he karakia pokanoa, he whakaiti i a ia ake, he atawhaikore i te tinana; otirā kāhore he painga hei pēhi i te kikokiko e tōrere ana kia mākona ia.
COL 3:1 Nā, ki te mea kua ara ngātahi koutou me te Karaiti, rapua ngā mea o runga, o te wāhi e noho mai nei ā te Karaiti i te ringa matau o te Atua.
COL 3:2 Kia anga atu tō koutou whakaaro ki ngā mea o runga, kaua ki ngā mea kei te whenua.
COL 3:3 Kua mate hoki koutou, ā, kua oti tō koutou ora te huna ki a te Karaiti i roto i te Atua.
COL 3:4 I te whakakitenga mai o te Karaiti, o tō tātou ora, ko reira hoki koutou whakakitea tahitia ai me ia i runga i te korōria.
COL 3:5 Nā, whakamatea ō koutou wāhi i runga i te whenua; te moe tāhae, te poke, te minamina ki te hē, te hiahia kino, me te apo, he karakia whakapakoko hoki tēnā.
COL 3:6 He mea hoki ēnei e puta mai ai te riri o te Atua ki ngā tamariki a te tutū.
COL 3:7 I roto hoki koutou i ēnei mea e haere ana i mua, i a koutou e noho ana i roto i aua mea.
COL 3:8 Tēnā ko tēnei, whakarērea ēnei mea katoa; te āritarita, te riri, te mauāhara, te kōrero kino, te kōrero whakarihariha, i roto i ō koutou māngai.
COL 3:9 Kaua e teka tētahi ki tētahi, kua unuhia atu hoki i a koutou te tangata tawhito me āna hanga.
COL 3:10 Kua kākahuria nei te tangata hou, e whakahoutia nei i runga i te mātauranga kia rite ki te āhua o tōna kaihanga.
COL 3:11 Kei reira kāhore he Kariki, he Hūrai rānei, he kotinga, he kotingakore rānei, he tautangata, Haitiana, pononga, he rangatira rānei; engari ko te Karaiti te katoa, i roto anō i te katoa.
COL 3:12 Nā, kia rite ki te hunga whiriwhiri a te Atua, ki te hunga tapu e arohaina ana, kākahuria iho hoki te ngākau tohu tangata, te ngāwari, te ngākau pāpaku, te ngākau māhaki, te manawanui.
COL 3:13 Kia āta hanga koutou tētahi ki tētahi, me te hohou i te rongo tētahi ki tētahi, ki te mea kei tētahi he take riri ki tētahi; kia rite ki tā te Ariki i hohou nei i te rongo ki a koutou, kia pērā anō hoki koutou.
COL 3:14 Ā, hei waho i ēnei mea katoa uhia ko te aroha, ko te tauhere tika rawa ia.
COL 3:15 Ā, waiho mā te rangimārie a te Karaiti te whakahaere tikanga i roto i ō koutou ngākau. I karangatia hoki koutou ki tēnei i roto i te tinana kotahi; kia whakawhetai hoki koutou.
COL 3:16 Kia noho nui te kupu a te Karaiti i roto i a koutou i runga i te mātauranga katoa; me whakaako, me whakatūpato tētahi e tētahi ki ngā waiata tapu, ki ngā hīmene, ki ngā waiata wairua, me te waiata anō ki te Atua i runga i te aroha noa, i roto i ō koutou ngākau.
COL 3:17 Ko ngā mea katoa hoki e mea ai koutou, ko ngā kupu, ko ngā mahi rānei, kia meinga katoatia i runga i te ingoa o te Ariki, o Īhu, me te whakawhetai anō ki te Atua, arā ki te Matua i roto i a ia.
COL 3:18 E ngā wāhine, kia ngohengohe ki ā koutou tāne ake, kia rite ai tā te Ariki tikanga.
COL 3:19 E ngā tāne, arohaina ā koutou wāhine, kei kaha hoki te riri ki a rātou.
COL 3:20 E ngā tamariki, whakarongo ki ō koutou mātua i ngā mea katoa: he mea pai hoki tēnei ki te Ariki.
COL 3:21 E ngā mātua, kei ārita noa ki ā koutou tamariki, kei ngākaukore rātou.
COL 3:22 E ngā pononga, kia whakarongo ki ō koutou rangatira o te wāhi ki te kikokiko i ngā mea katoa. Kaua hei tā te kanohi mahi, he whakamānawareka tāngata hoki tērā; engari hei runga i te ngākau tapatahi, me te wehi anō ki te Atua.
COL 3:23 Ko ngā mea katoa e mea ai koutou mahia-ā-ngākautia, hei mea ki te Ariki, ā, ehara i te mea ki ngā tāngata;
COL 3:24 me te mātau anō, ka hōmai e te Ariki ki a koutou te utu, arā te kāinga; he pononga hoki koutou nā te Ariki, nā te Karaiti.
COL 3:25 Ko te tangata hoki e hē ana te mahi, ka whakawhiwhia anō ia ki tāna hē i mahi ai; kāhore hoki he whakapai kanohi.
COL 4:1 E ngā rangatira, hoatu ki ngā pononga te mea e tika ana, te mea e rite ana; e mōhio ana hoki koutou he Rangatira tō koutou kei te rangi.
COL 4:2 Kia ū ki te īnoi, kia mataara tonu ki taua mea i runga i te whakawhetai;
COL 4:3 me te īnoi anō mō mātou, kia whakapuaretia e te Atua he kūwaha kōrero ki a mātou, hei kōrerotanga i te mea ngaro a te Karaiti i hereherea ai ahau.
COL 4:4 Kia whakakitea atu ai e ahau, kia rite ai tāku kōrero ki te mea i tika.
COL 4:5 Hei runga i te whakaaro mōhio tō koutou whakahaere ki te hunga o waho, hokona te tāima.
COL 4:6 Hei runga i te aroha noa tā koutou kōrero i ngā wā katoa, he mea kīnaki ki te tote, kia mātau ai koutou ki te tikanga mō te whakahoki kupu atu ki tēnei tangata, ki tēnei tangata.
COL 4:7 Mā Tikiku e whakaatu āku mea katoa ki a koutou; he teina aroha ia, he minita pono, he hoa pononga i roto i te Ariki.
COL 4:8 Ko te tino pūtake tēnei i tonoa atu ai ia e ahau ki a koutou, kia mātau ai koutou ki tō mātou āhua, ā, kia whakamārietia ai ō koutou ngākau;
COL 4:9 rāua ko Onehimu, he teina pono, e arohaina ana, ā, nō koutou hoki ia. Mā rāua e whakaatu ki a koutou ngā mahi katoa o konei.
COL 4:10 He oha tēnei ki a koutou nā Aritaku, nā tōku hoa herehere, rāua ko Māka irāmutu o Pānapa; kua tae atu nā hoki ngā tikanga mōna ki a koutou; ki te tae atu ia ki a koutou, manaakitia;
COL 4:11 me Īhu anō hoki, tētahi ingoa ōna ko Hutuha; nō te kotinga rātou. Ko ēnei anake ōku hoa mahi ki te rangatiratanga o te Atua, he oranga ngākau anō rātou ki ahau.
COL 4:12 Tēnei te oha atu nei ki a koutou a Epapara; nō koutou ia, he pononga nā te Karaiti. He tohe tonu tāna ki te īnoi mō koutou, kia tū koutou, he hunga tino tika, pūmau tonu ki ngā mea katoa i pai ai te Atua.
COL 4:13 Ko ahau hoki tōna pono mō tāna mahi nui mō koutou, mō te hunga hoki i Raorikia, ā, mō te hunga i Hierapori.
COL 4:14 Tēnei te oha atu nei ki a koutou a Ruka, te rata aroha, rāua ko Rīmaha.
COL 4:15 Oha atu ki ngā tēina i Raorikia, ki a Naimapa hoki, ki te hāhi anō hoki i tō rātou whare.
COL 4:16 Ā, ka kōrerotia tēnei pukapuka ki a koutou, meinga kia kōrerotia anō hoki i roto i te hāhi o ngā Raorikia; kōrerotia anō hoki e koutou tērā i tuhia mai i Raorikia.
COL 4:17 Mea atu hoki ki a Arakipu, “Kia mahara ki te mahi minita kua riro nā i a koe i roto i te Ariki, kia āta mahia mārietia.”
COL 4:18 Ko te oha āku, a Pāora, nā tōku ringaringa ake. Kia mahara ki ōku mekameka. Kia tau te aroha noa ki a koutou.
1TH 1:1 Nā Pāora, nā rātou ko Hirawanu, ko Tīmoti, Ki te hāhi o te hunga o Teharonika i roto i te Atua Matua, i te Ariki hoki, i a Īhu Karaiti: Kia tau te aroha noa ki a koutou me te rangimārie.
1TH 1:2 Whakawhetai tonu mātou ki te Atua i ngā wā katoa mō koutou katoa, me te whakahua i a koutou i ā mātou īnoi;
1TH 1:3 mau tonu tō mātou mahara ki tā koutou mahi whakapono, ki te uaua o tō koutou aroha, ki te ū o te tūmanako ki tō tātou Ariki, ki a Īhu Karaiti, i te aroaro o te Atua, arā o tō tātou Matua.
1TH 1:4 E mōhio ana hoki mātou, e ngā tēina e arohaina nei e te Atua, ki tō koutou whiriwhiringa.
1TH 1:5 Kīhai hoki tā mātou rongopai i tae atu ki a koutou i runga i te kupu anake, engari i te kaha, i te Wairua Tapu, nui atu hoki te ū o te ngākau; pērā anō me koutou e mātau nā ki tō mātou āhua i roto i a koutou, he whakaaro ki a koutou.
1TH 1:6 Ā, ka whai koutou i tā mātou tauira, i tā te Ariki hoki, i riro uaua atu nā i a koutou te kupu, me te whakahari anō ia a te Wairua Tapu.
1TH 1:7 Nō ka waiho koutou hei tauira ki te hunga whakapono katoa o Makeronia, o Akāia.
1TH 1:8 I pakū haere atu nā hoki i a koutou te kupu a te Ariki, ehara i te mea i Makeronia, i Akāia anake, engari i puta atu tō koutou whakapono ki te Atua ki ngā wāhi katoa; nō reira kāhore he rawa e puaki ai tētahi kupu a mātou.
1TH 1:9 Ko rātou nei hoki kei te kōrero mō mātou, mō tō mātou taenga atu ki a koutou, mō tō koutou tahuritanga mai hoki i ngā whakapakoko ki te Atua, ki te mahi ki te Atua ora, ki te Atua pono;
1TH 1:10 ki te tatari anō hoki ki tāna Tama i te rangi, i whakaarahia ake nei e ia i te hunga mate, ki a Īhu, e whakaora nei i a tātou i te riri meāke nei puta.
1TH 2:1 E mātau ana hoki koutou, e ōku tēina, ki tō mātou haerenga atu ki a koutou, ehara i te mea i kore tikanga;
1TH 2:2 heoi mate ana mātou i mua rā, tūkinotia ana i Piripai, e mātau nā koutou, otirā, māia tonu mātou i roto i tō tātou Atua ki te kōrero i te rongopai o te Atua ki a koutou i roto i te uaua nui.
1TH 2:3 Ko tā mātou whakahauhau nā hoki, ehara i te mea nā te tinihanga, nā te poke rānei, ehara anō hoki i te mea hangareka.
1TH 2:4 Engari, ka pai nei te Atua kia tukua ki a mātou te rongopai, ka pērā tā mātou kōrero; ehara i te mea kia whakamānawarekatia te tāngata, engari te Atua, e whakamātautau nei i ō tātou ngākau.
1TH 2:5 Kāhore hoki mātou i kitea e kōrero ana i te kupu whakapati, e mātau nā anō hoki koutou, e huna ana rānei i te ngākau apo; ko te Atua te kaititiro mai.
1TH 2:6 Kīhai anō mātou i rapu korōria i te tangata, i a koutou rānei, i ērā atu rānei, ahakoa i tika mātou, he āpōtoro nei nā te Karaiti, kia mea he tangata whai tikanga mātou.
1TH 2:7 Engari i ngāwari mātou i waenganui i a koutou, i rite ki te kaiatawhai e whakaahuru ana i āna tamariki ake.
1TH 2:8 Pērā tonu tō mātou matenui ki a koutou, ehara i te mea ko te rongopai anake o te Atua tā mātou i pai ai kia hoatu ki a koutou, engari ko ō mātou ake wairua, i te mea kua aroha nui mātou ki a koutou.
1TH 2:9 E mahara ana hoki koutou, e ōku tēina, ki tā mātou mahi, ki tō mātou māuiui; mahi ana mātou i te pō, i te ao, kei taimaha ki tētahi o koutou, kauwhautia ana hoki e mātou te rongopai o te Atua ki a koutou.
1TH 2:10 Ko koutou ngā kaititiro, ko te Atua hoki, ki te tapu, ki te tika, ki te kore hē o tā mātou whakahaere ki a koutou e whakapono nā.
1TH 2:11 Ā, e mātau ana anō koutou ki tā mātou mahi ki tētahi, ki tētahi o koutou, pērā i tā te matua ki āna tamariki ake, te whakahauhau, te whakahihiri i a koutou, te tohutohu,
1TH 2:12 mō tā koutou haere kia rite ki tā te Atua, nāna nei koutou i karanga ki tōna rangatiratanga, ki tōna korōria.
1TH 2:13 Mō konei mātou ka whakawhetai tonu nei ki te Atua, nō te mea i tō koutou tahuritanga ki te kupu a te Atua i rongo rā koutou ki a mātou, ehara i te mea he tahuri nō koutou ki te kupu tangata, engari ki te kupu a te Atua, ko ia pū nā hoki ia e mahi nā i roto i a koutou, i te hunga e whakapono nā.
1TH 2:14 Kua whai nā hoki koutou, e ōku tēina, i te tauira a ngā hāhi a te Atua i Hūria i roto i a Karaiti Īhu. Ko ō koutou matenga hoki i ngā tāngata o tō koutou ake iwi kua rite ki o ērā matenga i ngā Hūrai.
1TH 2:15 Nā rātou hoki i whakamate te Ariki, a Īhu, me ngā poropiti, ā, i panā mātou ki waho; kāhore ā rātou whakamānawareka ki te Atua, ā, he hoariri rātou nō ngā tāngata katoa.
1TH 2:16 E ārai mai ana i a mātou kei kōrero ki ngā tauiwi kia ora ai, he mea tēnei e tutuki ai ō rātou hara i ngā wā katoa; otirā, ka whakapaua rawatia te riri ki a rātou.
1TH 2:17 Ko mātou ia, e ōku tēina, he iti nei te wāhi kua wehea mai nei mātou i a koutou, ko ngā tinana, kāhore te ngākau, hira rawa tō mātou tākare kia kite i tō koutou kanohi, nui atu te hiahia.
1TH 2:18 Nō reira, i te whai kia tae atu ki a koutou, ko ahau, ko Pāora, i tuatahi, ā, i tuarua; heoi, nā Hātana mātou i whakaware.
1TH 2:19 He aha hoki tā mātou e tūmanako atu ai, e hari ai, he aha oti te karauna e whakamanamana ai mātou? He teka ianei ko koutou i te aroaro o tō tātou Ariki, o Īhu Karaiti, ā tōna taenga mai?
1TH 2:20 Ko koutou hoki tō mātou korōria, tō mātou hari.
1TH 3:1 Nā, i te kore e taea te ngākau te pēhi tonu, i pai mātou kia mahue ko mātou anake i Atene;
1TH 3:2 ā, tonoa ana e mātou a Tīmoti, tō mātou teina, he minita nā te Atua, he hoa mahi nō mātou ki te rongopai o te Karaiti, hei whakaū i a koutou, hei kōrero whakamārie ki a koutou mō ngā mea o tō koutou whakapono.
1TH 3:3 Kei whakangāueuetia tētahi e ēnei tūkinotanga. E mātau ana anō hoki koutou he mea momotu kē tātou mō tēnei mea.
1TH 3:4 I a mātou hoki e noho ana i a koutou, i kōrero wawe anō mātou ki a koutou, tērā tātou e tūkinotia; koia anō tēnei, ka mātau nei koutou.
1TH 3:5 Nā reira, i te mea tē taea tōku ngākau te pēhi tonu, ka tono tāngata atu ahau kia mōhio ai ahau ki tō koutou whakapono, kei whakawaia pea koutou e te kaiwhakawai, ā, maumau kau tā mātou mahi.
1TH 3:6 Tēnā ko tēnei, ka tae mai nei a Tīmoti ki a mātou i a koutou, ka pai hoki tāna kōrero ki a mātou mō tō koutou whakapono, mō tō koutou aroha, mō koutou hoki e whai mahara pai ana ki a mātou i ngā wā katoa, e hiahia ana kia kite i a mātou, he pērā anō me tō mātou ki a koutou.
1TH 3:7 Nā, kua whai whakamārietanga mātou i a koutou, e ōku tēina, i ō mātou tūkinotanga katoa, i ō mātou matenga, he mea nā tō koutou whakapono.
1TH 3:8 Ko tō mātou ora nei hoki tēnei, arā, kia tū tonu koutou i runga i te Ariki.
1TH 3:9 Me aha hoki he whakawhetai mā mātou ki te Atua mō koutou, mō ngā hari katoa e hari nei mātou ki a koutou, i te aroaro o tō tātou Atua?
1TH 3:10 Nui atu tā mātou īnoi i te pō, i te ao, kia kite i ō koutou kanohi, kia whakaotia anō hoki e mātou ngā wāhi o tō koutou whakapono i hapa.
1TH 3:11 Nā, mā te Atua ake anō, arā mā tō tātou Matua, mā tō tātou Ariki hoki, mā Īhu Karaiti, e whakatika tō mātou ara ki a koutou.
1TH 3:12 Mā te Ariki anō hoki e mea kia nui, kia hira tō koutou aroha tētahi, ki tētahi, ki ngā tāngata katoa hoki, kia pēnei anō me tō mātou ki a koutou.
1TH 3:13 Kia whakaūkia ai ō koutou ngākau he mea kāhore he hē i runga i te tapu i te aroaro o te Atua, o tō tātou Matua, i te taenga mai o tō tātou Ariki, o Īhu Karaiti, rātou ko tāna hunga tapu katoa.
1TH 4:1 Heoi, e ōku tēina, he mea tēnei nā mātou, he whakahau ki a koutou i roto i te Ariki, i a Īhu, kua riro atu nā hoki tā mātou i a koutou, ā, e meinga nā hoki e koutou, arā te tikanga mō tā koutou haere, mō tā koutou whakamānawareka atu ki te Atua, nā, kia tino hira rawa tērā a koutou.
1TH 4:2 E mātau ana hoki koutou ki ngā tikanga i whakatakotoria atu e mātou ki a koutou i roto i te Ariki, i a Īhu.
1TH 4:3 Ko tā te Atua hoki tēnei e pai ai, arā, ko tō koutou whakatapunga, kia mawehe koutou i te moepuku.
1TH 4:4 Kia mātau koutou katoa ki tōna tinana, ki tōna tinana, kia mau i runga i te tapu, i te hōnore.
1TH 4:5 Kaua i runga i te toronga o te hiahia, kei rite ki ngā tauiwi kāhore nei e mātau ki te Atua.
1TH 4:6 Kia kaua tētahi e tinihanga, e whakapati i te mea a tōna teina; nō te mea ko te Ariki te kairapu utu mō ērā mahi katoa; ko tā mātou hoki ia i kōrero ai i mua, i whakaatu atu ai ki a koutou.
1TH 4:7 Kīhai hoki tātou i karangatia e te Atua ki te poke, engari ki te tapu.
1TH 4:8 Nā, ko te tangata e whakakorekore ana, ehara tāna i te whakakorekore ki te tangata, engari ki te Atua, nāna nei i hōmai tōna Wairua Tapu ki a tātou.
1TH 4:9 Ko te aroha ia ki ngā tēina, kāhore ā koutou mea e tuhituhi atu ai ahau ki a koutou; he mea whakaako hoki koutou nā anō e te Atua ki te aroha tētahi ki tētahi.
1TH 4:10 Ko tā koutou hoki tēnā e mea nā ki ngā tēina katoa ā puta noa i Makeronia. Heoi, he whakahau anō tēnei nā mātou ki a koutou, e ōku tēina, kia hira rawa tēnā a koutou.
1TH 4:11 Me whai hoki kia āta noho, kia mahi i a koutou nā ake mahi, kia mahi ko ō koutou ringaringa, kia rite ki tā mātou i ako ai ki a koutou;
1TH 4:12 kia ātaahua ai tā koutou haere ki te hunga o waho, kia kaua ai e hapa tētahi mea.
1TH 4:13 E kore ia mātou e pai, e ōku tēina, kia kūware koutou ki te hunga kua moe, kei kōingo koutou, kei pērā me ērā atu kāhore nei ō rātou tūmanakotanga atu.
1TH 4:14 Ki te whakapono hoki tātou kua mate a Īhu, kua ara ake anō, waihoki ko te hunga e moe ana i roto i a Īhu, ka ārahina tahitia mai rātou me ia e te Atua.
1TH 4:15 Ko tā mātou kōrero hoki tēnei ki a koutou, he mea kī mai nā te Ariki, ko tātou ko te hunga kua mahue ki te ora, ki te taenga mai o te Ariki, e kore e pahika atu ki mua o te hunga kua moe.
1TH 4:16 Nō te mea ko te Ariki pū anō e heke iho i te rangi me te karanga, me te reo o te tino anahera, me te tētere a te Atua; ā, ko te hunga kua mate i roto a te Karaiti e ara i mua.
1TH 4:17 Ko reira tātou, te hunga kua mahue ki te ora, kāhakina ngātahitia atu ai me rātou i runga i ngā kapua, ki te whakatau ki te Ariki i te rangi. Nā, ka noho tonu tātou ki te Ariki.
1TH 4:18 Nā, he kupu ēnei hei whakamārie mā koutou tētahi i tētahi.
1TH 5:1 Ko ngā wā ia me ngā tāima, e ōku tēina, kāhore he take e tuhituhi atu ai ahau ki a koutou.
1TH 5:2 E mātau pū ana hoki koutou, tērā e haere mai te rā o te Ariki, ānō he tāhae i te pō.
1TH 5:3 I a rātou hoki e kī ana, “He rangimārie, he ora”; ko reira te mate huaki tata ai ki a rātou, ka pērā me te mamae ki te wahine hapū, e kore hoki rātou e mawhiti.
1TH 5:4 Ko koutou ia, e ōku tēina, kāhore i roto i te pōuri, e rite ai ki tā te tāhae te hopu ā taua rā i a koutou.
1TH 5:5 He tama koutou katoa nō te mārama, he tama nō te rā: ehara tātou i te pō, ehara i te pōuri.
1TH 5:6 Heoi, aua tātou e moe, kei pērā me ērā atu; engari kia mataara tātou, kia whai whakaaro.
1TH 5:7 Ko te hunga hoki e moe ana, e moe ana i te pō; ko te hunga e haurangi ana, e haurangi ana i te pō.
1TH 5:8 Kia whai whakaaro tātou, ko tātou nei te hunga o te rā, kia kākahuria iho te whakapono me te aroha hei pukupuku; hei pōtae hoki, ko te tūmanako atu ki te ora.
1TH 5:9 Kīhai hoki tātou i meinga e te Atua mō te riri engari kia whiwhi ai ki te ora mā roto i tō tātou Ariki, i a Īhu Karaiti;
1TH 5:10 i mate nei mō tātou, ahakoa tātou mataara, moe rānei, kia ora tahi ai me ia.
1TH 5:11 Nā, whakamārie koutou tētahi i tētahi, hangā hoki te pai o tētahi e tētahi; pērātia me tā koutou e mea mai nā.
1TH 5:12 He mea ia tēnei nā mātou ki a koutou, e ōku tēina, kia mātau ki te hunga e mahi ana i roto i a koutou, e tohutohu ana i a koutou i roto i te Ariki, e whakatūpato ana i a koutou;
1TH 5:13 kia nui whakaharahara anō ō koutou whakaaro ki a rātou i runga i te aroha, me whakaaro ki tā rātou mahi. Kia mau tā koutou rongo ki a koutou anō.
1TH 5:14 Nā, ko tā mātou whakahau tēnei ki a koutou, e ōku tēina, whakatūpatoria te hunga whakakeke, whakamārietia te hunga ngākau rahirahi, tautokona ake te hunga ngoikore, kia manawanui ki ngā tāngata katoa.
1TH 5:15 Kia tūpato kei hoatu he kino mō te kino e tētahi ki tētahi; engari, i ngā wā katoa whāia he pai mō tētahi, mō tētahi, mō ngā tāngata katoa anō hoki.
1TH 5:16 Kia hari i ngā wā katoa.
1TH 5:17 Kei whakamutua te īnoi.
1TH 5:18 I ngā mea katoa me whakawhetai atu; ko tā te Atua hoki tēnei i pai ai i roto i a Karaiti Īhu hei mahi mā koutou.
1TH 5:19 Kei tineia te Wairua.
1TH 5:20 Kaua e whakahāwea atu ki ngā poropititanga.
1TH 5:21 Whakamātautauria ngā mea katoa; kia ū ki te pai;
1TH 5:22 mawehe atu i ngā āhua katoa o te kino.
1TH 5:23 Ā, mā te Atua pū anō o te rangimārie e tino whakatapu rawa koutou; kia tiakina hoki ō koutou wairua, ō koutou ngākau, ō koutou tinana, kia toitū, kia hēkore, i te taenga mai o tō tātou Ariki, o Īhu Karaiti.
1TH 5:24 He pono te kaikaranga i a koutou, māna anō hoki e whakaoti.
1TH 5:25 E ōku tēina, īnoi mō mātou.
1TH 5:26 Oha atu ki ngā tēina katoa, hei te kihi tapu.
1TH 5:27 He tohe atu tēnei nāku ki a koutou i runga i te Ariki, kia kōrerotia tēnei pukapuka ki ngā tēina tapu katoa.
1TH 5:28 Kia tau ki a koutou te aroha noa o tō tātou Ariki, o Īhu Karaiti.
2TH 1:1 Nā Pāora, nā rātou ko Hirawanu, ko Tīmoti, Ki te hāhi o te hunga o Teharonika i roto i te Atua, i tō tātou Matua, i te Ariki hoki, i a Īhu Karaiti:
2TH 1:2 Kia tau ki a koutou te aroha noa me te rangimārie, he mea nā te Atua, nā tō tātou Matua, nā te Ariki hoki, nā Īhu Karaiti.
2TH 1:3 He tika rawa kia whakawhetai mātou ki te Atua i ngā wā katoa mō koutou, e ōku tēina, he mea pai rā hoki ia, nō te mea e neke ake ana tō koutou whakapono, he nui rawa hoki te aroha o koutou katoa, o tētahi ki tētahi.
2TH 1:4 I whakamanamana ai mātou ki a koutou i roto i ngā hāhi a te Atua, ki tō koutou ū, ki tō koutou whakapono i ngā whakatoinga katoa i a koutou, i ngā tūkinotanga hoki e whakaririka kau nā koutou.
2TH 1:5 He tohu tēnei mō te tika o tā te Atua whakawā, kia kīia ai koutou he tau mō te kīngitanga o te Atua, e mate nei koutou he whakaaro ki tērā.
2TH 1:6 Mehemea ia he tika ki te Atua kia utua ki te kino te hunga e tūkino ana i a koutou;
2TH 1:7 ā, ki a koutou hoki e tūkinotia nā, kia okioki tahi me mātou, i te whakakitenga mai o te Ariki, o Īhu, i runga i te rangi me ngā anahera o tōna kaha,
2TH 1:8 i roto i te mura ahi e rapu utu ana i te hunga kāhore e mātau ki te Atua, kāhore nei hoki e ngohengohe ki te rongopai o tō tātou Ariki, o Īhu Karaiti.
2TH 1:9 Ko te utu hoki e whakapāngia ki a rātou he whakangaromanga, he mea mutungakore i te aroaro anō o te Ariki, i te korōria anō hoki o tōna kaha.
2TH 1:10 Ina haere mai ia kia whakakorōriatia i roto i tāna hunga tapu, kia whakamoemititia i roto i te hunga whakapono katoa i taua rā; i whakapono nā hoki koutou ki tā mātou whakaatu i roto i a koutou.
2TH 1:11 Koia nei mātou ka īnoi tonu nei mō koutou, kia meinga koutou e tō tātou Atua he tau mō tēnei karangatanga, kia whakaotia anō hoki e ia i runga i te kaha ngā mea katoa i āhuareka ai tōna pai, me te mahi anō hoki o te whakapono,
2TH 1:12 kia whakakorōriatia ai te ingoa o tō tātou Ariki, o Īhu Karaiti, i roto i a koutou, me koutou hoki i roto i a ia, kia rite ai ki tā te aroha noa o tō tātou Atua, o te Ariki hoki, o Īhu Karaiti.
2TH 2:1 Nā, he mea tēnei nā mātou ki a koutou, e ōku tēina, mō te taenga mai a tō tātou Ariki, o Īhu Karaiti, mō tō tātou huihuinga atu anō ki a ia;
2TH 2:2 kei hohoro te rurea o ō koutou hinengaro, kei ohorere rānei i tā te wairua, i tā te kupu, i tā te pukapuka rānei e kīia ana nā mātou, e mea ana kua tae tonu mai ināianei te rā o te Ariki.
2TH 2:3 Kei tinihangatia koutou i tētahi mea e te tangata. E kore hoki e tae wawe mai, kia mātua tae mai te takanga atu, kia whakakitea mai anō hoki te tangata o te hara, te tama a te whakangaro.
2TH 2:4 He hoariri nei ia, e whakakake ana i a ia ki runga ake i ngā mea katoa e kīia ana he Atua, e karakiatia ana; kia noho ai ia i te whare tapu o te Atua, kia whakaatu ai i a ia ko ia te Atua.
2TH 2:5 Kāhore rānei koutou e mahara i ahau anō i a koutou, i kōrerotia e ahau ēnei mea ki a koutou?
2TH 2:6 Nā, ka mātau koutou ināianei ki te mea e ārai ana, kia whakakitea mai rā anō ia a tōna tāima.
2TH 2:7 Nō te mea kei te mahi ināianei te mea huna o te kino, otirā, tērā tētahi kei te ārai ināianei, kia whakawāteatia rawatia anō ia.
2TH 2:8 Ko reira whakakitea mai ai taua tangata kino, e whakangaromia e te Ariki ki te hā o tōna māngai, e whakakāhoretia ki te putanga nui o tōna taenga mai.
2TH 2:9 Arā a ia pū, i rite nei tōna taenga mai ki te mahinga a Hātana, i runga i te mana, i ngā tohu, i ngā merekara teka,
2TH 2:10 i ngā mahi tinihanga katoa hoki o te hē, i roto i te hunga e whakangaromia ana; nō te mea kīhai i riro i a rātou te aroha o te pono, kia ora ai rātou.
2TH 2:11 Mō konei hoki ka tukua atu e te Atua ki a rātou he pōhēhē e mahi ana, kia whakapono ai rātou ki te teka;
2TH 2:12 kia tukua ai ki te hē te hunga katoa kāhore i whakapono ki te pono, i āhuareka kē ki te hē.
2TH 2:13 Tika tonu ia kia whakawhetai atu mātou ki te Atua mō koutou i ngā wā katoa, e ōku tēina e arohaina nei e te Ariki, he mea whiriwhiri nā hoki koutou nā te Atua nō te tīmatanga rā anō mō te ora, i runga i te whakatapu a te Wairua, i runga anō i te whakapono ki te pono.
2TH 2:14 Ko te mea tēnā i karangatia ai koutou e ia, he mea nā tō mātou rongopai, arā kia whiwhi ki te korōria o tō tātou Ariki, o Īhu Karaiti.
2TH 2:15 Heoi, e ōku tēina, e tū koutou; kia mau ki ngā whakarerenga iho i whakaakona ai koutou e te kupu, e tā mātou pukapuka rānei.
2TH 2:16 Nā, mā tō tātou Ariki, mā Īhu Karaiti pū anō, mā te Atua, mā tō tātou Matua, i aroha mai nei ki a tātou, i hōmai nei i te whakamārie mutungakore, me te mea pai e tūmanakohia atu nei, he meatanga nā te aroha noa,
2TH 2:17 māna e whakamārie ō koutou ngākau, māna koutou e whakaū ki runga ki ngā kupu, ki ngā mahi pai katoa.
2TH 3:1 Heoi, e ōku tēina, īnoi mō mātou, kia rere te kupu a te Ariki, kia whai korōria, kia pēnā me tēnā i a koutou;
2TH 3:2 kia whakaorangia hoki mātou i ngā tāngata pōauau, i ngā tāngata kino; kāhore hoki ngā tāngata katoa e whakapono.
2TH 3:3 Otiia, e pono ana te Atua, māna koutou e whakaū, e tiaki i te tangata kino.
2TH 3:4 Nā, e ū ana tō mātou whakaaro i roto i te Ariki ki a koutou, kei te mahi koutou, ā, ka mahi anō i a mātou e whakaako nei ki a koutou.
2TH 3:5 Mā te Ariki hoki e whakatika ō koutou ngākau ki te aroha o te Atua, ki te ngākau āta tatari o te Karaiti.
2TH 3:6 Nā, ko tā mātou whakahau atu tēnei ki a koutou, e ōku tēina, i runga i te ingoa o tō tātou Ariki, o Īhu Karaiti, mawehe kē i ngā tēina katoa e hē ana te whakahaere, kāhore nei e rite ki ā mātou whakarerenga iho i roto i a rātou.
2TH 3:7 E mātau nā hoki koutou ki ngā mea e tika ai tā koutou whakarite ki a mātou; kīhai hoki i hē tā mātou whakahaere i roto i a koutou;
2TH 3:8 kīhai hoki mātou i kai noa i te taro i te ringa o tētahi tangata, engari i roto i te mahi nui, i te uaua, me te mahi tonu i te ao, i te pō, kei whakataimahatia e mātou tētahi o koutou.
2TH 3:9 Ehara rā i te mea kāhore ō mātou take, engari, kia meinga ai mātou hei tauira mō koutou, kia rite ai tā koutou ki tā mātou.
2TH 3:10 Anā hoki i a mātou e noho ana i a koutou, ko tā mātou whakahau tēnei ki a koutou: “Ki te kore tētahi e pai ki te mahi, kaua ia e tukua kia kai.”
2TH 3:11 Kei te rongo hoki mātou tērā ētahi e hē ana te whakahaere i roto i a koutou, kāhore rawa e mahi, engari e pokanoa ana ki a ētahi.
2TH 3:12 Nā, ko tā mātou ako, ko tā mātou whakahau tēnei ki aua tāngata pērā, i roto i tō tātou Ariki, i a Īhu Karaiti, me mahi mārie rātou, ka kai i ā rātou nā ake kai.
2TH 3:13 Ko koutou ia, e ōku tēina, kei ngākaukore ki te mahi pai.
2TH 3:14 Nā, ki te kore tētahi e ngohengohe ki tā mātou kupu i tēnei pukapuka, kia mārama te tohu i a ia, kei piri koutou ki a ia, kia whakamā ai ia.
2TH 3:15 Otiia, kaua e mea he hoariri ia, engari, whakatūpatoria, ānō he teina.
2TH 3:16 Nā, mā te Ariki pū o te rangimārie e hoatu te rangimārie ki a koutou i ngā wā katoa, i ngā mea katoa. Kia noho te Ariki ki a koutou katoa.
2TH 3:17 Ko te oha āku, a Pāora, nā tōku ringaringa ake, ko te tohu ia i ngā pukapuka katoa; he pēnā tāku tuhituhi.
2TH 3:18 Kia tau te aroha noa o tō tātou Ariki, o Īhu Karaiti ki a koutou katoa.
1TI 1:1 Nā Pāora, nā te āpōtoro a Īhu Karaiti, he mea whakarite e te Atua, e tō tātou Kaiwhakaora, e Īhu Karaiti hoki, ko ia tā tātou e tūmanako atu nei:
1TI 1:2 Ki a Tīmoti, ki tāku tamaiti pono i roto i te whakapono: Kia tau atu te aroha noa, te mahi tohu, te rangimārie, he mea nā te Atua, nā tō tātou Matua, nā Karaiti Īhu hoki, nā tō tātou Ariki.
1TI 1:3 I whakahau atu rā ahau ki a koe, i ahau e haere ana ki Makeronia, kia noho koe i Epeha, ako ai i ētahi kia kaua e rerekē te whakaako,
1TI 1:4 kia kaua e whakarongo ki ngā kōrero tito noa, ki ngā whakapapa tūpuna kāhore nei e whai mutunga; ko ngā putanga ake o ēnā, he tautohetohe, kāhore he whakatupu mō te tikanga a te Atua i runga i te whakapono; ka pērā anō ahau ināianei.
1TI 1:5 Ko te tukunga iho ia mō te ako, ko te aroha, nō roto i te ngākau mā, i te hinengaro pai, i te whakapono tinihangakore.
1TI 1:6 Kapea ake ēnei e ētahi, kotiti kē ana ki ngā kōrero teka noa;
1TI 1:7 ki tā rātou hei kaiwhakaako rātou i te ture, heoi, kāhore e mātau ki tā rātou e kōrero nei, ki ngā mea rānei e kauwhautia nei e rātou.
1TI 1:8 Otirā, e mātau ana tātou he mea pai te ture, ki te rite te meatanga e te tangata ki tā te ture tikanga;
1TI 1:9 e mātau ana hoki ki tēnei, kīhai te ture i whakatakotoria mō te tangata tika, engari mō te hunga turekore, tutū, karakiakore, hara, tapukore, whakarihariha, mō ngā kaipatu i ngā pāpā, mō ngā kaipatu i ngā whaea, mō ngā kaikōhuru tangata,
1TI 1:10 mō te hunga moepuku, moe kino i te tāne, tāhae tangata, kōrero teka, oati teka, ā, ki te mea tērā atu tētahi mea kāhore nei e rite ki te whakaako tika;
1TI 1:11 rite tonu tēnei ki te rongopai o te korōria o te Atua hari, ki te mea kua tukua mai nei ki ahau.
1TI 1:12 E whakawhetai atu nei ahau ki a Karaiti Īhu, ki tō tātou Ariki, nāna nei ahau i whakakaha; i whakaaro hoki ia he tangata pono ahau, ā, meinga ana ahau hei minita;
1TI 1:13 ahau nei, te tangata kohukohu i mua, te kaiwhakatoi, whakatupu kino. Heoi, i tohungia ahau, nō te me i meinga kūwaretia e ahau i runga i te whakapono kore;
1TI 1:14 tino nui rawa hoki te aroha noa o tō tātou Ariki, hui tahi ki te whakapono, ki te aroha i roto i a Karaiti Īhu.
1TI 1:15 He pono te kōrero, he pai hoki kia tangohia rawatia, i haere mai a Karaiti Īhu ki te ao ki te whakaora i te hunga hara; ko te tino tangata hara o rātou ko ahau.
1TI 1:16 Heoi, nā konei ahau i tohungia ai, kia ai ko ahau ki mua hei whakaaturanga mā Īhu Karaiti i ngā manawanui maha, hei tohu ki te hunga e whakapono ki a ia ā muri ake nei, kia ora tonu ai rātou.
1TI 1:17 Nā, ki te Kīngi ora tonu, e kore nei e pirau, e kore nei e kitea, ko ia nei anake te Atua mātau, waiho atu i a ia te hōnore me te korōria ake ake. Āmine.
1TI 1:18 Ka tukua atu nei e ahau tēnei kupu ako ki a koe, e tāku tamaiti, e Tīmoti, ko te poropititanga anō tēnei i puta mai i mua mōu, hei mea i a koe kia whawhai i te whawhai pai;
1TI 1:19 kia mau ki te whakapono me te hinengaro pai; he mea nei ēnā kua ākiritia atu e ētahi, ka meinga tō rātou whakapono he kaipuke pakaru;
1TI 1:20 nō rātou a Haimeniu rāua ko Arehānera, kua tukua nei e ahau ki a Hātana, kia whakaakona ai kia kaua e kohukohu.
1TI 2:1 Nā, ko tāku whakahau tēnei i te tuatahi o ngā mea katoa, kia puta ngā īnoi, ngā karakia, ngā īnoi wawao, ngā whakawhetai, mō ngā tāngata katoa;
1TI 2:2 mō ngā kīngi, mō te hunga whai mana katoa hoki; kia āta noho mārie ai tātou i runga i ngā whakaaro karakia, i ngā tikanga mahara katoa.
1TI 2:3 He mea pai tēnei, he mea e manakohia ana i te aroaro o te Atua, o tō tātou Kaiwhakaora;
1TI 2:4 ko tāna nei e pai ai ko ngā tāngata katoa kia ora, kia haere mai hoki ki te mātauranga ki te pono.
1TI 2:5 Kotahi tonu te Atua, kotahi te takawaenga o te Atua, o ngā tāngata, ko ia anō he tangata, arā ko Karaiti Īhu;
1TI 2:6 i hoatu nei i a ia hei utu mō te katoa; he mea kia whakaaturia i ōna wā ake.
1TI 2:7 Ā, meinga ana ahau hei karere, hei āpōtoro mō taua mea; he pono tāku kōrero i roto i a te Karaiti, kāhore āku teka; hei kaiwhakaako mō ngā tauiwi i runga i te whakapono, i te pono.
1TI 2:8 Nā, ko tāku e pai ai, ko ngā tāne kia īnoi i ngā wāhi katoa, kia tapu ngā ringa ina ara, kaua he riri, he tautohetohe.
1TI 2:9 Ko ngā wāhine hoki kia mau i te kākahu ātaahua, kia tū whakamā, kia whai whakaaro; kauaka te makawe whiri, te kōura, te peara, te kākahu utu nui,
1TI 2:10 engari, ko te mea e tau ana mō ngā wāhine e whakaae ana ki te karakia, arā, ko ngā mahi pai.
1TI 2:11 Me ako mārie te wahine kia nui te ngohengohe.
1TI 2:12 E kore hoki e tukua e ahau te wahine kia whakaako, kia neke ake rānei tāna tikanga i tā te tāne, engari, me āta noho.
1TI 2:13 Ko Ārama hoki kua hangā i mua, muri iho ko Iwi.
1TI 2:14 Ā, kīhai a Ārama i tinihangatia, ko te wahine ia i tinihangatia, ā, taka ana ki te hē.
1TI 2:15 Otirā, ka ora ia i te whānautanga tamariki, ki te mau tonu tō rātou whakapono, aroha, tapu, whakaaro.
1TI 3:1 He pono te kōrero: ki te hiahia tētahi ki te mahi pīhopa, e hiahia ana ia ki te mahi pai.
1TI 3:2 Nā, ko te tikanga tēnei, kia kaua te pīhopa e ekengia e te kupu, he tahu nō te wahine kotahi, kia ngāwari, kia whai whakaaro, kia mārama āna tikanga, kia atawhai ki ngā manuhiri, kia whai ngākau ki te whakaako;
1TI 3:3 kia kaua e kakai wāina, kia kaua e patu; engari kia ngāwari, kaua e totohe, kaua e matenui ki te moni.
1TI 3:4 Kia pai tāna tohutohu i tōna whare; e mea ana i āna tamariki kia ngohengohe ki a ia, kia nui te mahara.
1TI 3:5 Ki te kore hoki tētahi tangata e mātau ki te tohutohu i tōna whare ake, me pēhea ka tiaki ai ia i te hāhi a te Atua?
1TI 3:6 Kauaka i te tauhou, kei whakakake, ā, ka tau tō te rēwera hē ki a ia.
1TI 3:7 Ā, kia pai te kōrero mōna a te hunga o waho; kei taka ia ki te whakahāwea, ki roto hoki ki te māhanga a te rēwera.
1TI 3:8 Waihoki ko ngā rīkona kia tū kaumātua, kaua e arero rua, kaua e matenui ki te wāina, kaua e whai ki te taonga paruparu;
1TI 3:9 kia mā ō rātou hinengaro e mau ai ki te mea ngaro o te whakapono.
1TI 3:10 Nā, kia mātua whakamātautauria ēnei; kātahi ka tuku ai kia mahi i ā te rīkona mahi, ki te kore he whakahē mō rātou.
1TI 3:11 Ko ngā wāhine hoki kia āhua kaumātua, kaua e ngautuarā, kia whai mahara, kia pono i ngā mea katoa.
1TI 3:12 Ko ngā rīkona, kia kotahi te hoa wahine; kia pai te tohutohu i ā rātou tamariki, i ō rātou whare ake anō hoki.
1TI 3:13 Ki te pai hoki tā rātou mahi rīkona, ka whiwhi rātou ki te tūranga pai mō rātou, ka nui hoki tō rātou māia i runga i te whakapono ki a Karaiti Īhu.
1TI 3:14 He tuhituhi atu tēnei nāku i ēnei mea ki a koe, e mea ana hoki tērā ahau e haere wawe atu ki a koe;
1TI 3:15 ki te roa ia ahau, kia mātau ai koe ki te tikanga mō tāu mahi i roto i te whare o te Atua, ko te hāhi nei ia a te Atua ora, ko te pou, ko te tūranga o te pono.
1TI 3:16 Nā, kāhore rawa e tautohetia te nui o te mea ngaro e karakiatia nei: Ko ia i whakakitea mai i roto i te kikokiko, he mea whakatika nā te Wairua, i kitea e ngā anahera. I kauwhautia nei i roto i ngā tauiwi, i whakaponohia nei i te ao, i tangohia atu ki te korōria.
1TI 4:1 Otirā, he kōrero tino hāngai tā te Wairua, ko ā ngā wā o muri nei ka kotiti kē atu ētahi i te whakapono, ka whakarongo ki ngā wairua tinihanga, ki ngā whakaakoranga a ngā rēwera,
1TI 4:2 he mea nā te hīanga o te hunga kōrero teka; ō rātou hinengaro, anō he mea tahu ki te rino wera.
1TI 4:3 E riri ana kia kaua e mārena, kia kaua e pā ki ngā kai i hangā e te Atua hei mea mā te hunga e whakapono ana, e mātau ana hoki ki te pono, me te whakawhetai anō rātou.
1TI 4:4 He pai hoki ngā mea katoa i hangā e te Atua, kāhore he mea hei rukenga, ina tangohia i runga i te whakawhetai;
1TI 4:5 he mea hoki i whakatapua, nā te kupu a te Atua, nā te īnoi.
1TI 4:6 Ki te whakamahara koe i ngā tēina ki ēnei mea, he minita pai koe nā Īhu Karaiti, he mea whakatupu ake i runga i ngā kupu o te whakapono, o te whakaako pai kua whāia nei e koe ā tae noa mai ki nāianei.
1TI 4:7 Ko ngā kōrero whakarihariha ia, ko ngā mea tito noa a te rūruhi, whakarērea. Ko ngā mahi māu ko ngā mea o te ngākau karakia.
1TI 4:8 He pai iti nei tō te whakamahi i te tinana; tēnā ko te ngākau karakia e pai ana mō ngā mea katoa, kei reira hoki ngā kōrero mō te ora ināianei, mō tērā hoki kei te haere mai.
1TI 4:9 He pono tēnei kōrero, he pai hoki kia tangohia rawatia.
1TI 4:10 Koia hoki mātou ka mahi, ka tohe, nō te mea kua whakamau tō mātou tūmanako ki te Atua ora, ko ia nei te Kaiwhakaora o ngā tāngata katoa, engari rawa ia o te hunga whakapono.
1TI 4:11 Me kauwhau ēnei mea e koe, me whakaako.
1TI 4:12 Kei whakahāwea tētahi ki a koe, he taitamariki nōu; engari hei tauira koe ki te hunga whakapono, tāu kupu, tāu whakahaere, tōu aroha, tōu whakapono, tōu ngākau mā.
1TI 4:13 Kia aro nui koe ki te kōrero pukapuka, ki te whakahauhau, ki te whakaako, kia tae atu rā anō ahau.
1TI 4:14 Kei waiho noa te mea hōmai noa kei roto nā i a koe, i hōmai rā ki a koe he mea poropiti, i te whakapānga ai o ngā ringaringa o ngā kaumātua.
1TI 4:15 Āta whakaaroa ēnei mea; kia pau tōu kaha ki reira; kia kitea ai e te katoa tōu nekehanga ake.
1TI 4:16 Kia mahara ki a koe anō, ki te whakaakoranga hoki; kia ū ki ēnei mea. Ki te mea hoki koe i tēnei, ka whakaora koe i a koe anō, i te hunga anō hoki e whakarongo ana ki a koe.
1TI 5:1 Kaua e whakatūpehupehu ki te kaumātua; engari āta kōrerotia atu ānō he matua; ko ngā taitamariki hoki ānō he tēina;
1TI 5:2 ko ngā rūruhi ānō he whaea; ko ngā wāhine taitamariki ānō he tuāhine, i runga i ngā whakaaro mā katoa.
1TI 5:3 Whakahōnoretia ngā pouaru, arā ngā tino pouaru.
1TI 5:4 Ki te mea ia he tamariki, he mokopuna rānei a tētahi pouaru, kia whakaakona rātou i te tuatahi kia whakaaro tika ki tō rātou whare ake, kia utua hoki tā ngā mātua; he mea pai hoki tēnei, he mea e manakohia ana i te aroaro o te Atua.
1TI 5:5 Nā, ko te tino pouaru, ko te mea mokemoke, e tūmanako ana ia ki te Atua, e mau tonu ana ki ngā īnoi, ki ngā karakia, i te pō, i te ao.
1TI 5:6 Ko te pouaru ia e whai ana ki ngā āhuareka a te tinana he tūpāpaku ia, ahakoa ora.
1TI 5:7 Ākona atu ēnei mea, kei ekengia rātou e te kupu.
1TI 5:8 Engari ki te kore tētahi e whakaaro ki ōna ake, ā, ki te hunga rawa anō o tōna whare, kua whakakāhoretia e ia te whakapono, ā, he kino atu tāna i tā te tangata whakapono kore.
1TI 5:9 Kaua tētahi e whakaurua ki te rārangi o ngā pouaru i te mea kāhore anō ōna tau i ono tekau, hei te wahine i tūturu ki te tāne kotahi,
1TI 5:10 hei te mea e whakaaetia ana āna mahi pai; mehemea ia i whakatupu tamariki, mehemea ia i atawhai manuhiri, mehemea i horoi i ngā waewae o te hunga tapu, mehemea i manaaki i te hunga e tūkinotia ana, mehemea ia i whai ki ngā mahi pai katoa.
1TI 5:11 Ko ngā pouaru taitamariki ia me whakarere; ki te tupu hoki tō rātou whakaaro pōauau takahi i tā te Karaiti, ka hiahia ki te mārena;
1TI 5:12 ka tau te hē ki a rātou, nō te mea kua whakarērea e rātou tō rātou whakapono tuatahi.
1TI 5:13 Ka ako anō hoki rātou ki te noho māngere, ki te hāereere noa ki tētahi whare, ki tētahi whare; ā, ehara i te mea ko te māngere kau, he mate kōrerorero anō ia tō rātou, he pokanoa ki tā tērā, ki tā tērā, ko tā rātou e kōrero ai ko ngā mea e kore e tika.
1TI 5:14 Koia ahau ka mea ai kia mārena ngā pouaru taitamariki, kia whānau tamariki, kia tohutohu i ngā mea o te whare, kia kaua e hoatu ki te hoariri tētahi take tāwai.
1TI 5:15 Kua tahuri kē nei hoki ētahi ki te whai i a Hātana.
1TI 5:16 Ki te mea he pouaru a tētahi tangata whakapono a tētahi wahine whakapono rānei, māna anō rātou e atawhai, kaua hoki te hāhi e whakataimahatia; ko āna hoki e atawhai ai ko ngā tino pouaru.
1TI 5:17 Kia nui ake te hōnore mō ngā kaumātua e tohutohu pai ana; engari rawa ia mō te hunga ko tā rātou nei mahi ko te kupu, ko te whakaako.
1TI 5:18 E mea ana hoki te karaipiture, “Kaua e whakamōkātia te māngai o te kau patu wīti;” me tēnei hoki, “Ka tika te utu mō te kaimahi.”
1TI 5:19 Kaua e whakarongo ki te whakawā mō te kaumātua, kia puta rā anō i ngā māngai o ētahi kaiwhakaatu tokorua, tokotoru rānei.
1TI 5:20 Ko te hunga hara rīria i te aroaro o te katoa, kia mataku ai hoki ērā atu.
1TI 5:21 Ko tāku kupu nui tēnei ki a koe i te aroaro o te Atua, o Karaiti Īhu hoki, ā, o ngā anahera whiriwhiri, puritia ēnei mea, kaua e pokaia he tikanga, kaua e mahi i runga i te whakahoa.
1TI 5:22 Kei hohoro te whakapā i ngā ringaringa ki tētahi tangata. Kaua anō e uru ki ngā hara o te tangata kē; kia mau tōu harakore.
1TI 5:23 Kāti tōu inu wai; engari hei te wāina māu, kia iti, hei mea mō tōu puku, mō ōu mate e honohono nā.
1TI 5:24 Ko ngā hara o ētahi tāngata mārama noa ake, e haere ana i mua ki te whakawākanga; ko o ētahi ia e whai mai ana i muri i a rātou.
1TI 5:25 Waihoki ko ngā mahi pai e mārama noa ake ana; ā, ko ngā mea e rerekē ana e kore e taea te huna.
1TI 6:1 Kīia iho e ngā pononga whai rangatira katoa he mea tika mō ō rātou rangatira ake ngā hōnore katoa, kei kōrerotia kinotia te ingoa o te Atua me tāna ako.
1TI 6:2 Kaua ērā i ngā rangatira whakapono e whakahāwea ki a rātou, nō te mea he tēina rātou; engari kia nui rawa te mahi, nō te mea e whakapono ana rātou, e arohaina ana, e uru ngātahi ana ki te mahi pai. Me whakaako ēnei mea e koe, me whakahau atu.
1TI 6:3 Ki te whakaako kē tētahi, ki te kore e tahuri ki ngā kupu ora, ki ngā kupu a tō tātou Ariki, a Īhu Karaiti, ki te ako anō hoki e rite ai te karakia pai,
1TI 6:4 e whakakake ana ia, kāhore ōna mātauranga ki tētahi mea, heoi e hāwata ana ki ngā uiuinga, ki ngā tautohetohenga, nō reira nei te hae, te whawhai, ngā kōrero kino, ngā whakaaro kino,
1TI 6:5 ngā whakahokihoki kupu a ngā tāngata ngākau kino, kāhore nei he pono i a rātou. E mahara ana ki te karakia pai he huarahi e whiwhi ai ki te taonga.
1TI 6:6 He taonga nui anō ia te karakia pai hui tahi ki te ngākau tatū;
1TI 6:7 kāhore hoki he mea i mauria mai e tātou ki te ao, e kore hoki e āhei te mau atu e tātou tētahi mea.
1TI 6:8 Ki te mea ia he kai tā tātou, he hīpoki, ka mākona tātou i ēnā.
1TI 6:9 Ko te hunga ia e hiahia ana kia whai taonga, ka taka rātou ki te whakamātautauranga, ki te māhanga, ki te tini o ngā hiahia kūware e raru ai, e totohu ai ngā tāngata ki te whakangaromanga, ā, huna iho.
1TI 6:10 He pūtake hoki nō ngā kino katoa te aroha ki te moni; he minamina ki tēnei i kotiti kē ai ētahi i te whakapono, ā, werohia pūtia iho rātou e ngā mamae maha.
1TI 6:11 Ko koe ia, e tā te Atua tangata, oma atu i ēnei; whāia te tika, te karakia pai, te whakapono, te aroha, te manawanui, te ngākau māhaki.
1TI 6:12 Whawhaitia te whawhai pai o te whakapono, hopukia atu te ora tonu, ko te mea hoki tēnā i karangatia ai koe, ā, whakaaetia ana e koe te whakaaetanga pai i te aroaro o ngā kaititiro tokomaha.
1TI 6:13 Ko tāku ako atu tēnei ki a koe i te aroaro o te Atua, nāna nei ngā mea katoa i whai ora ai, o Karaiti Īhu anō hoki, nāna nei i whakapuaki te whakaaetanga pai i te aroaro o Ponotio Pirato;
1TI 6:14 puritia tēnei ture, kei whai koha, kei whai hē, ā taea noatia te putanga mai, o tō tātou Ariki, o Īhu Karaiti.
1TI 6:15 Māna e whakakite mai ā ōna ake wā, ko ia anake nei hoki te Mea kaha, te Mea koa, te Kīngi o ngā kīngi, te Ariki o ngā ariki.
1TI 6:16 Ko ia anake e kore e mate, e noho ana ia i te mārama e kore e taea atu e tētahi tangata, kāhore anō hoki e āhei kia kitea. Waiho atu i a ia te hōnore me te kaha ake ake. Āmine.
1TI 6:17 Ākona te hunga i ngā taonga o tēnei ao kia kaua e whakakake te ngākau, kia kaua e whakawhirinaki ki ngā taonga pahuhu noa, engari ki te Atua ora, ko ia hoki hei hōmai nui i ngā mea pai katoa hei mea mā tātou.
1TI 6:18 Kia mahi rātou i te pai, kia hua ā rātou mahi pai, kia tatanga ki te ohaoha, ki te whakawhiwhi i ētahi;
1TI 6:19 me te whakatakoto anō he kaupapa pai mō rātou mō ngā rā ki mua, kia mau-ā-ringa ai rātou ki te ora, arā ki te ora tūturu.
1TI 6:20 E Tīmoti, tiakina te mea kua tukua nā ki a koe; tahuri kē i ngā kōrero whakarihariha, i ngā kupu teka noa, i ngā whakaputanga kētanga a te mea e tekaia nei he mātauranga;
1TI 6:21 kua waiho nei hei tikanga mā ētahi, ā, hē ake rātou ki te whakapono. Kia tau te aroha noa ki a koe. Āmine.
2TI 1:1 Nā Pāora, i paingia e te Atua hei āpōtoro mā Īhu Karaiti, mō te ora i whakaaria mai i roto i a Karaiti Īhu,
2TI 1:2 Ki a Tīmoti, ki tāku tamaiti aroha: Kia tau te aroha noa, te mahi tohu, te rangimārie, he mea nā te Atua Matua, nā Karaiti Īhu hoki, nā tō tātou Ariki.
2TI 1:3 E whakawhetai ana ahau ki te Atua, e mahi atu nei ahau ki a ia, he mea nō ōku tūpuna iho i runga i te hinengaro mā, nō te mea kāhore e mutu tōku mahara ki a koe i āku īnoinga i te pō, i te ao.
2TI 1:4 Nui atu tōku hiahia kia kite i a koe, i ahau e mahara ana ki ōu roimata, kia kī ai ahau i te hari.
2TI 1:5 Ka hoki ake nei tōku mahara ki te whakapono tinihangakore i roto i a koe; i noho tuatahi rā i roto i tōu tupuna wahine, i a Roihi, i tōu whaea hoki, i a Ūnihi; ā, e tino mōhio ana ahau kei roto anō i a koe.
2TI 1:6 Koia ahau ka whakamahara nei i a koe, kia whakaūngia anō te ahi, te mea i hoatu nā e te Atua, tēnā kei roto i a koe, he mea nā te whakapānga atu o ōku ringaringa.
2TI 1:7 Kāhore hoki i hōmai e te Atua ki a tātou te wairua o te wehi; engari tō te kaha, tō te aroha, tō te ngākau mahara.
2TI 1:8 Nā, kei whakamā koe ki te whakaatu i tō tātou Ariki, ki ahau rānei, ki tōna herehere; engari uru atu koe ki ngā mate o te rongopai, kia rite ki tā te Atua whakakahanga.
2TI 1:9 Nāna nei tātou i whakaora, nāna hoki tātou i karanga ki te karangatanga tapu; kīhai i rite ki ā tātou mahi, engari ki tāna ake tikanga i whakatakoto ai i mua, ki te aroha noa hoki i hōmai nei ki a tātou i roto i a Karaiti Īhu, i mua atu o te tīmatanga o te ao;
2TI 1:10 ā, kua whakakitea mai nei ināianei i te putanga nui mai o tō tātou Kaiwhakaora, o Īhu Karaiti, i whakakāhore nei i te mate, ā, whakakitea mai ana e ia te ora me te matengakore, he mea nā te rongopai.
2TI 1:11 Meinga iho nei ahau hei kaikauwhau mō tēnei, hei āpōtoro, hei kaiwhakaako.
2TI 1:12 Ko te mea hoki tēnei i pāngia ai ahau e ēnei mate. He ahakoa rā kāhore ahau e whakamā; e mātau ana hoki ahau ki tāku i whakapono ai, e ū ana tōku whakaaro e taea e ia te tiaki tāku i tuku atu ai ki a ia, ā taea noatia taua rā.
2TI 1:13 Kia mau ki te tauira mō ngā kupu tika i rongo rā koe ki ahau, puritia i runga i te whakapono, i te aroha i roto i a Karaiti Īhu.
2TI 1:14 Ko te mea pai i tukua rā ki a koe, me tiaki e koe, arā e te Wairua Tapu e noho ana i roto i a tātou.
2TI 1:15 E mātau ana koe ki tēnei, i tahuri kē i ahau te hunga katoa i Āhia; nō rātou a Paikeru rāua ko Heremokeni.
2TI 1:16 Kia tohungia e te Ariki ngā tāngata o te whare o Onehipora; he maha hoki ōku oranga ngākau i a ia, kīhai hoki ia i whakamā ki tōku mekameka.
2TI 1:17 Ā, i a ia i Rōma, i rapua mārietia ahau e ia, ā, kitea ana.
2TI 1:18 Mā te Ariki e tuku ki a ia kia kite i te mahi tohu a te Ariki ā taua rā. Ko āna mahinga mea hoki māku i Epeha, erangi koe e mōhio ana.
2TI 2:1 Nā, ko koe, e tāku tamaiti, kia kaha i runga i te aroha noa i roto i a Īhu.
2TI 2:2 Ko ngā mea hoki i rongo rā koe ki ahau i ngā kaiwhakaatu tokomaha, tukua ēnā ki ētahi tāngata pono, e pai ana hei whakaako ki ērā atu hoki.
2TI 2:3 Tukua atu ngā mamae ki a koe, kia rite ki te hōia pai a Īhu Karaiti.
2TI 2:4 Ki te whakahōia tētahi tangata, e kore ia e whakararurarutia e ngā mea o te ao; kia āhuareka ai ki a ia te kaiwhakatū i a ia hei hōia.
2TI 2:5 Ki te whakataetae anō tētahi e kore ia e karaunatia, ki te kore e rite ki te tikanga tāna whakataetae.
2TI 2:6 Ko te tikanga tēnei, ko te kaingaki e mahi ana kia kai wawe i ngā hua.
2TI 2:7 Whakaaroa āku e kōrero nei; ā, mā te Ariki e hōmai ki a koe he ngākau mahara i ngā mea katoa.
2TI 2:8 Kia mahara ki a Īhu Karaiti, i whakaarahia nei i te hunga mate, he uri nō Rāwiri, e ai ki tāku rongopai;
2TI 2:9 ko te mea anō ia i pāngia ai ahau e ngā mamae, ā hereherea noatia iho, ānō he tangata mahi kino; otirā, e kore tā te Atua kupu e herea.
2TI 2:10 Koia hoki ahau i whakaririka kau ai ki ngā mea katoa he mea mō te hunga whiriwhiri; kia whiwhi ai rātou ki te ora i roto i a Karaiti Īhu, ki te korōria mutungakore anō hoki.
2TI 2:11 E pono ana hoki te kōrero: Ki te mate tahi tātou me ia, ka ora tahi anō hoki tātou me ia.
2TI 2:12 Ki te manawanui tātou, ka whakakīngitia ngātahitia tātou me ia. Ki te whakakāhore tātou, ka whakakāhoretia hoki tātou e ia.
2TI 2:13 Ki te kore tātou e whakapono, e mau ana anō tōna pono: e kore e āhei kia whakakāhore ia i a ia anō.
2TI 2:14 Whakamaharatia rātou ki ēnei mea, me kauwhau i te aroaro o te Ariki, kia kaua e tautohetohe ki ngā kupu huakore, ki ngā mea whakaputa kē i ngā kaiwhakarongo.
2TI 2:15 Kia puta tāu tohe mōu kia tū ki te aroaro o te Atua, he mea e manakohia ana, he kaimahi e kore e whakamā, e whāwhā tika ana i te kupu o te pono.
2TI 2:16 Mawehe kē i ngā kōrero whakarihariha, teka noa; ka neke ake hoki te karakiakore o ērā;
2TI 2:17 ā, ka kaikai tā rātou kupu, ānō he mea kua kikohungatia. Nō rātou a Himeniu rāua ko Piritu;
2TI 2:18 kua hē nei ki te pono, e mea ana, kua pahemo kē te aranga mai; ā, whakaputaia kētia ake e rātou te whakapono o ētahi.
2TI 2:19 E ū ana ia te mau o tā te Atua tūranga, ko tōna hīri hoki tēnei, “E mātau ana te Ariki ki āna ake,” me tēnei hoki, “Kia mawehe kē i te hē ngā tāngata katoa e whakahua ana i te ingoa o te Karaiti.”
2TI 2:20 Otiia, i te whare nui ehara i te mea he kōura kau, he hiriwa kau rānei ngā oko, tērā anō ētahi he mea rākau, he mea oneone; ētahi hei mea hōnore, ētahi hei mea hōnorekore.
2TI 2:21 Nā, ki te mea te tangata i a ia kia mā i ēnā mea, hei oko ia mō te hōnore, kua oti te whakatapu, te whakapai mō a te rangatira tikanga, rite rawa mō ngā mahi pai katoa.
2TI 2:22 Oma atu i ngā hiahia taitamariki; whāia te tika, te whakapono, te aroha, te rangimārie, e koutou tahi ko te hunga e karanga ana ki te Ariki i roto i te ngākau mā.
2TI 2:23 Āraia atu anō ngā uiuinga wairangi, kūware, kia mahara hoki ko aua mea hei whakatupu whawhai.
2TI 2:24 Nā, e kore e pai kia ririhau te pononga a te Ariki; engari kia ngāwari ki ngā tāngata katoa, kia whai ngākau ki te whakaako, kia manawanui.
2TI 2:25 Kia whakaako mārie i te hunga e totohe ana; me kore e hoatu e te Atua ki a rātou he rīpenetā e whakaae ai ki te pono;
2TI 2:26 kia ara ake ai hoki i roto i te māhanga a te rēwera te hunga i hopukia oratia e te pononga a te Ariki hei mahi i tā te Atua i pai ai.
2TI 3:1 Kia mātau koe ki tēnei, ko ā ngā rā o te whakamutunga puta mai ai ngā wā o te hē.
2TI 3:2 E aroha hoki ngā tāngata ki a rātou anō, e aroha ki te moni, e whakapehapeha, e whakakake, e kohukohu, e tutū ki ngā mātua, kāhore he whakawhetai, kāhore he tapu,
2TI 3:3 kāhore he aroha, he upoko mārō, he ngautuarā, e kore e pēhi i te ngākau, he hunga nanakia, kāhore e aroha ki te pai,
2TI 3:4 he hunga tuku tangata, he hunga hīkaka, whakakake, tō rātou aroha kei ngā mahi tākaro kāhore ia ki te Atua;
2TI 3:5 ko te āhua o te karakia kei a rātou, tōna kaha ia whakakāhoretia iho. Tahuri kē koe i ngā tāngata pērā.
2TI 3:6 Nō rātou hoki te hunga e kuhu nei ki ngā whare, ā, riro pārau ana i a rātou ngā wāhine heahea, e taimaha nei i te hara, he mea kāwhaki nā ngā hiahia maha,
2TI 3:7 e ako tonu ana, heoi kāhore rawa kia tae ki te mātauranga o te pono.
2TI 3:8 E rite ana ki a Hāni rāua ko Hamapiri i totohe ki a Mohi; waihoki ko ēnei tāngata e totohe ana ki te pono. He hunga kua kino kē te hinengaro, he rukenga atu i roto i te whakapono.
2TI 3:9 Heoi, e kore rātou e kake haere. Ka kitea hoki tō rātou kūwaretanga e te katoa, ka pērā hoki me tō rāua.
2TI 3:10 Otirā, kua mau nā i a koe tāku whakaako, tāku whakahaere, tōku whakaaro whakatakoto, tōku whakapono, tōku pūhoi ki te riri, tōku aroha, tōku manawanui,
2TI 3:11 ōku whakatoinga, ōku matenga i mate ai ahau i Anatioka, i Ikoniuma, i Raihitara; ngā whakatoinga i whakatoia ai ahau. Heoi, whakaorangia ake ahau e te Ariki i roto i te katoa.
2TI 3:12 Ā, e whakatoia anō te hunga katoa e hiahia ana kia noho i runga i te karakia i roto i a Karaiti Īhu.
2TI 3:13 Ko te hunga kino ia, me te hunga māminga, ka kake haere te kino, ka tinihanga, ā, ka tinihangatia.
2TI 3:14 Tēnā, ko koe kia mau ki ngā mea i ako rā koe, i whakaaetia rā e koe, e mātau nā hoki koe ki tōu kaiwhakaako ki ēnā mea.
2TI 3:15 Ki a koe anō i mōhio o tōu tamarikitanga ake, ki ngā karaipiture tapu, ko ngā mea ērā e whai mātauranga ai koe, e ora ai, i runga i te whakapono ki a Karaiti Īhu.
2TI 3:16 Nō te hā o te Atua ngā karaipiture katoa, he pai hoki hei whakaako, hei riri i te hē, hei whakatikatika, hei whakaako ki te tika;
2TI 3:17 kia tino rite ai te tangata a te Atua, rite rawa mō ngā mahi pai katoa.
2TI 4:1 Ko tāku kupu tēnei ki a koe i te aroaro o te Atua, o Karaiti Īhu hoki, māna nei e whakawā te hunga ora me te hunga mate, i te āhua o tōna putanga mai me tōna rangatiratanga,
2TI 4:2 kauwhautia te kupu; tohea i ngā wā pai, i ngā wā kino; rīria te hē, whakahēngia iho, whakahaua, whakapaua te manawanui me te whakaako.
2TI 4:3 Tēnei ake hoki te wā e kore ai rātou e whakarongo ki te whakaako tika; heoi, i te mea he taringa minamina ō rātou, ka apohia e rātou he kaiwhakaako e rite ana ki ō rātou nā hiahia.
2TI 4:4 Ka tahuri kē ō rātou taringa i te pono, ka anga atu ki ngā kōrero tito noa.
2TI 4:5 Kia mau ia koe i ngā mea katoa; tukua atu ngā mamae ki a koe; mahia te mahi a te kaikauwhau i te rongopai; whakapaua tāu mahi minita.
2TI 4:6 Tēnei hoki ahau kei te ringihia, kua rite anō te wā hei haerenga mōku.
2TI 4:7 Kua whawhaitia e ahau te whawhai pai, kua omakia tōku omanga, kua rite i ahau te whakapono.
2TI 4:8 Kei te takoto mai mōku i ngā wā ō muri nei te karauna o te tika, e hōmai ki ahau ā taua rā e te Ariki, e te kaiwhakawā tika. He teka ki ahau anake, engari ki te hunga katoa anō hoki kua matenui ki tōna putanga mai.
2TI 4:9 Kia puta tōu uaua ki te haere wawe mai ki ahau;
2TI 4:10 kua whakarērea ahau e Rīmaha, he aroha nōna ki tēnei ao, ā, haere ana ia ki Teharonika; kua riro atu a Kerekena ki Karatia, a Taituha ki Raramatia.
2TI 4:11 Ko Ruka anake kei ahau. Tēnā a Māka mauria mai hei hoa mōu; he pai hoki ia mō tāku mahi minita.
2TI 4:12 Kua tonoa e ahau a Tikiku, ki Epeha.
2TI 4:13 Ka haere mai koe, mauria mai te koroka i mahue atu i ahau ki Toroa, ki a Karapu, me ngā pukapuka; tēnā rawa ia ngā kirihipi.
2TI 4:14 He maha ngā kino i meatia mai e Arehānera, e te kaimahi parāhi ki ahau. Mā te Ariki e hoatu ki a ia he utu e rite ana ki āna mahi.
2TI 4:15 Kia tūpato hoki koe ki a ia; he rahi rawa hoki tāna totohe ki ā mātou kupu.
2TI 4:16 I tāku kōrerotanga tuatahi, i karo ai i ahau, kāhore he tangata hei tuarā mōku, heoi, whakarērea ake ahau e te katoa. Kaua tēnei e whakairia ki a rātou.
2TI 4:17 I tū ia te Ariki ki tōku taha, nāna hoki ahau i whakakaha; kia whakapaua rawatia ai e ahau te kauwhau, kia rongo katoa ai ngā tauiwi. Ā, tōia mai ana ahau i roto i te māngai o te raiona.
2TI 4:18 Tērā ahau e tōia mai e te Ariki i roto i ngā mahi kino katoa, e whakaorangia hoki tae noa ki tōna rangatiratanga i te rangi. Waiho atu i a ia te korōria ake ake. Āmine.
2TI 4:19 Oha atu ki a Pirihira rāua ko Akuira, ki te hunga anō hoki o te whare o Onehipora.
2TI 4:20 I noho atu a Eratu i Koriniti; ko Toropimu i mahue atu, i ahau ki Miretu, he mate.
2TI 4:21 Kia puta tōu uaua ki te haere mai i mua o te hōtoke. Tēnei te oha atu nei ki a koe a Ūpuru, a Purena, a Rinuha, a Karauria, me ngā tēina katoa.
2TI 4:22 Kia noho te Ariki ki tōu wairua. Kia tau te aroha noa ki a koutou.
TIT 1:1 Nā Pāora, he pononga nā te Atua, he āpōtoro nā Īhu Karaiti. I runga i te whakapono o te hunga whiriwhiri a te Atua, i te mātauranga hoki ki tā te pono e rite ai te karakia;
TIT 1:2 i runga anō i te tūmanako atu ki te ora tonu, i whakaaria mai nei i mua atu o te ao e te Atua e kore nei e teka;
TIT 1:3 nāna nei i whakakite mai tāna kupu i ōna wā, rā te kupu i tukua mai ki ahau, he mea whakarite mai nā te Atua, nā tō tātou Kaiwhakaora.
TIT 1:4 Ki a Taituha, ki tāku tamaiti pono i runga i tō tātou whakapono tahi: Kia tau te aroha noa me te rangimārie, he mea nā te Atua Matua, nā Karaiti Īhu, nā tō tātou Kaiwhakaora.
TIT 1:5 Ko te mea tēnei i waiho atu ai koe e ahau ki Kariti, kia whakatikaia ai e koe ngā mea i mahue, kia whakaritea ai anō hoki he kaumātua ki ia pā, ki ia pā, kia pērā ai me tāku i whakatakoto atu ai ki a koe.
TIT 1:6 Ki te mea he tangata kāhore e ekengia e te kupu, he tahu nō te wahine kotahi, he tamariki whakapono ana, kāhore e kōrerotia tō rātou tōreretanga ki te kino, kāhore e tutū.
TIT 1:7 Ko te tikanga hoki mō te pīhopa, kia kaua e ekengia e te kupu, kia rite ki tā te Atua tuari; ehara i te mea tohe ki tāna ake, kāhore ōna āritarita kāhore āna kakai wāina kāhore āna papatu, kāhore e whai i te taonga hē;
TIT 1:8 engari e atawhai ana i te manuhiri, e aroha ana ki te pai, e whai whakaaro ana, e tika ana, e tapu ana, e pēhi ana i ōna hiahia.
TIT 1:9 E ū ana te pupuri i te kupu pono i whakaakona atu nā, kia taea ai e ia, i te mea ka tika nei tāna whakaako, te whakahauhau, te turaki anō i tā te hunga e totohe mai ana.
TIT 1:10 He tokomaha hoki te hunga tutū, kōrero teka noa, tinihanga; nui atu ia o te hunga o te kotinga,
TIT 1:11 me kuku ō rātou waha; riro pū hoki ētahi whare te whakaputa kē e rātou, e whakaako ana i ngā mea e kore e tika, he whakaaro hoki ki te taonga hē.
TIT 1:12 I mea tētahi o rātou, he poropiti nō rātou ake, “He teka tonu tā ngā Kariti, he kararehe kino, he pukukai, he māngere.”
TIT 1:13 Ka pono tēnei kōrero. Nā reira, kia koi tāu kupu riri ki a rātou; kia ora ai tō rātou whakapono;
TIT 1:14 kei tahuri hoki rātou ki ngā kupu tito a ngā Hūrai, ki ngā ture a ngā tāngata e whakaputa kē ana i te pono.
TIT 1:15 He mā ngā mea katoa ki te hunga mā. Tēnā, ki te hunga poke, kāhore nei ō rātou whakapono, kāhore he mea mā. Heoi, he mea poke ō rātou whakaaro, ō rātou hinengaro.
TIT 1:16 Ki tā rātou kī, kua mātau rātou ki te Atua; heoi, ko ā rātou mahi hei whakakāhore ki a ia, he hunga whakarihariha rātou, he hunga tutū, e kore anō e tikangatia mō tētahi mahi pai.
TIT 2:1 Ko koe ia, kōrerotia ngā mea e rite ana ki tō te whakaako ora.
TIT 2:2 Ko ngā kaumātua kia āta whakahaere i a rātou, kia tū kaumātua, kia whai whakaaro, kia ora te whakapono, te aroha, te manawanui.
TIT 2:3 Me ngā wāhine taikaumātua hoki, kia rite ngā tikanga ki ā te hunga e whakaaro ana ki te tapu, kia kaua e ngautuarā, kia kaua e riro hei pononga mā te wāina, kia whakaako i ngā mea pai;
TIT 2:4 kia meinga e rātou ngā wāhine taitamariki kia whai whakaaro, kia aroha ki ā rātou tāne, kia aroha ki ā rātou tamariki.
TIT 2:5 Kia whai whakaaro, kia tika, kia pukumahi i te kāinga, kia atawhai, kia ngohengohe ki ā rātou tāne, kei kōrerotia kinotia te kupu a te Atua.
TIT 2:6 Me whakahau atu hoki ngā taitamariki kia whai whakaaro.
TIT 2:7 I ngā mea katoa kia kitea koe he tauira mō ngā mahi pai; ko tāu whakaako kia tapatahi, kia tū kaumātua,
TIT 2:8 kia ora te kupu, kei taea te whakahē; kia whakamā ai te tangata tikanga kē, tē ai he mea e kōrerotia kinotia ai tātou e ia.
TIT 2:9 Ko ngā pononga kia ngohengohe ki ō rātou rangatira, kia whakamānawarekatia rātou i ngā mea katoa; kaua e whakahoki kupu;
TIT 2:10 kaua e kaiā, engari kia kitea he pai he nui tō rātou pono; kia ai rātou i ngā mea katoa hei whakapaipai i te whakaako a te Atua, a tō tātou Kaiwhakaora.
TIT 2:11 Kua puta mai hoki te aroha noa o te Atua e ora ai ngā tāngata katoa,
TIT 2:12 hei whakaako i a tātou, kia whakakāhoretia e tātou te karakiakore me ngā hiahia o te ao, kia noho whakaaro tātou, i runga anō i te tika, i te karakia pai, i tēnei ao;
TIT 2:13 me te tatari anō ki te mea whakahari e tūmanakohia atu nei, ki te putanga korōria mai o tō tātou Atua nui, o tō tātou Kaiwhakaora anō hoki, o Īhu Karaiti.
TIT 2:14 I tuku nei i a ia mō tātou, hei hoko i a tātou i roto i ngā kino katoa, hei horoi hoki i a tātou hei iwi māna ake, e ngākau nui ana ki ngā mahi pai.
TIT 2:15 Kōrerotia ēnei mea, whakahaua; kia nui tōu māia ki te riri i te hē. Kei whakahāwea tētahi ki a koe.
TIT 3:1 Whakamaharatia rātou kia ngohengohe ki ngā rangatiratanga, ki ngā mana, kia rongo ki ngā rangatira, kia takatū ki ngā mahi pai katoa;
TIT 3:2 kia kaua e kōrero kino ki tētahi tangata, kia kaua e whawhai, kia ngākau ngāwari, kia nui te māhaki o te ngākau e whakaputaina ki ngā tāngata katoa.
TIT 3:3 He whakaarokore hoki tātou i mua, he tutū, e tinihangatia ana, he pononga nā ngā hiahia, nā ngā whakaahuareka maha, e noho ana i runga i te nanakia, i te hae, he hunga whakarihariha, e mauāhara ana tētahi ki tētahi.
TIT 3:4 Otirā, i te mea ka puta mai nei te tikanga ngāwari me te aroha o te Atua, o tō tātou Kaiwhakaora ki ngā tāngata.
TIT 3:5 Ehara i te mea, nā ngā mahi tika i mahia e tātou, engari, nā tāna mahi tohu i whakaorangia ai tātou e ia, he meatanga nā te horoinga o te whānautanga houtanga, nā te whakahoutanga a te Wairua Tapu,
TIT 3:6 i ringihia nuitia mai nei e ia ki runga ki a tātou, he mea nā Īhu Karaiti, nā tō tātou Kaiwhakaora.
TIT 3:7 Kia whakatikaia ai tātou e tōna aroha noa, kia whiwhi ai ki te taonga, arā ki te ora tonu e tūmanakohia atu nei.
TIT 3:8 He kōrero pono tēnei. E mea ana hoki ahau kia kaha tāu kauwhau i ēnei mea, kia mahara ai te hunga kua whakapono ki te Atua ki te mahi i ngā mahi pai. Ko ngā mea ēnei e ātaahua ana, e whai pai ana mō ngā tāngata.
TIT 3:9 Ko ngā uiuinga kūware ia, me ngā whakapapa tūpuna, whakarērea atu, me ngā totohe, me ngā whawhai ki ngā mea o te ture, kāhore hoki he pai o aua mea, he mea hanga noa.
TIT 3:10 Ko te tangata whakapono hē, ka kotahi, ka rua ngā whakatūpatotanga, whakarērea atu.
TIT 3:11 E mātau ana hoki koe kua whakaputaia kētia taua tangata pērā, kei te hara anō hoki, kua mau tōna hē i a ia anō.
TIT 3:12 Ka tonoa atu e ahau ki a koe a Aretema, a Tikiku rānei, kia puta tōu uaua ki te haere mai ki ahau ki Nikopori; kua takoto hoki tāku tikanga kia noho ki reira i te hōtoke.
TIT 3:13 Kia puta tōu whakaaro kia kawea mai a Hina kaiako ture, rāua ko Aporo; kei hapa tētahi mea mō rāua.
TIT 3:14 Me ako hoki ō tātou ki te mahi i ngā mahi pai mō ngā wā o te rawakore kei huakore rātou.
TIT 3:15 Tēnei te oha atu nei ki a koe ōku hoa katoa. Oha atu ki te hunga e aroha ana ki a mātou i runga i te whakapono. Kia tau te aroha noa ki a koutou katoa.
PHM 1:1 Nā Pāora, nā te herehere a Karaiti Īhu, nā tō tāua teina hoki, nā Tīmoti, Ki tā māua e aroha nei ki tō māua hoa mahi, ki a Pirimona,
PHM 1:2 ki a Apia hoki, ki tō māua tuahine, ki tō māua hoa hōia, ki a Arakipu, ki te hāhi hoki i tōu whare:
PHM 1:3 Kia tau te aroha noa ki a koutou, me te rangimārie, he mea nā te Atua, nā tō tātou Matua, nā te Ariki hoki, nā Īhu Karaiti.
PHM 1:4 Tēnei ahau te whakawhetai atu nei ki tōku Atua, mau tonu tōku mahara ki a koe i āku karakiatanga.
PHM 1:5 He rongo nōku ki tōu aroha, ki tōu whakapono ki te Ariki, ki a Īhu, ā, ki te hunga tapu katoa.
PHM 1:6 Mō te whakahoatanga mai o tōu whakapono kia whai mana, i runga i te mātauranga ki ngā pai katoa i roto i a koutou, he mea ki a Karaiti Īhu.
PHM 1:7 He nui hoki tō mātou koa, mārie ana hoki te ngākau i tōu aroha, nō te mea e ora ana ngā ngākau o te hunga tapu i a koe, e tōku teina.
PHM 1:8 Heoi, ahakoa he nui tōku māia i roto i a te Karaiti ki te whakatakoto atu i te mea tika ki a koe.
PHM 1:9 Nā te aroha kē tāku ka īnoi atu nei, arā tāku, tā te koroheke, tā Pāora, he herehere nei ināianei nā Īhu Karaiti.
PHM 1:10 He kupu tēnei nāku ki a koe mō tāku tamaiti, mō Onehimu, he mea whānau nāku i ahau nei i te herehere.
PHM 1:11 I mua, kāhore tētahi mea pai ana ki a koe; ināianei ia, kua whai pai koe i a ia, ahau anō hoki.
PHM 1:12 Kua whakahokia atu nei ia e ahau, tōna tinana tonu, ko tōku manawa ake ia.
PHM 1:13 I mea anō ahau kia puritia ia ki ahau, hei whakakapi mōu ki te mahi ki ahau i roto i ngā mekameka o te rongopai.
PHM 1:14 Otirā, kāhore nei tāu kupu, kīhai ahau i pai kia meatia tētahi mea; kei riro whakauaua mai tōu pai; engari i roto anō i te ngākau.
PHM 1:15 Ko te mea anō pea tēnei i motuhia mai ai ia i a koe mō tētahi wā, kia mau pū ai ia i a koe ake ake.
PHM 1:16 Ehara i te mea hei pono­nga ia i ēnei wā, engari tērā atu i te pono­nga, he teina i nui rawa ai tōku aroha, tērā ia e nui rawa atu tōu, i te kiko­kiko, i te Ariki anō hoki.
PHM 1:17 Nā, ki te mea kua waiho ahau hei hoa mōu, manako mai ki a ia me te mea ko ahau.
PHM 1:18 Ki te mea ia kua hē ia ki tētahi mea āu, kei a ia rānei tētahi mea āu, waiho mai māku tēnā e whaka­aro.
PHM 1:19 He tuhi­tuhi tēnei nāku, nā Pāora, nā tōku ringa­ringa ake; māku e whaka­utu. Nā, kāhore āku mea­tanga atu ki a koe, tērā anō tāku taonga kei a koe, ko koe anō.
PHM 1:20 Āe rā, e tōku teina, kia whai pai ahau i a koe i roto i te Ariki; kia ora tōku ngākau i roto i te Ariki.
PHM 1:21 He ū nō tōku whaka­aro ki a koe ka ngohe­ngohe, i tuhi­tuhi atu ai ahau ki a koe, e mōhio ana hoki, tērā e nui atu tāu e mea ai i tāku e kōrero atu nei.
PHM 1:22 Tēnei anō hoki, kia rite mai i a koe tētahi whare mōku; e mea ana hoki ahau tērā e mana ā koutou īnoi, ā, ka tukua atu ahau ki a koutou.
PHM 1:23 Tēnei te oha atu nei ki a koe a Epapara, tōku hoa herehere i roto i a Karaiti Īhu,
PHM 1:24 rātou tahi ko Māka, ko Aritaku, ko Rīmaha, ko Ruka, ōku hoa mahi.
PHM 1:25 Kia tau te aroha noa o tō tātou Ariki, o Īhu Karaiti ki ō koutou wairua. Āmine.
HEB 1:1 He maha ngā wāhi, he maha ngā huarahi i kōrero ai te Atua i mua, arā ngā poropiti, ki ngā mātua,
HEB 1:2 i ēnei rā whakamutunga nā tāna Tama āna kōrero ki a tātou, ko tāna hoki tērā i mea ai māna ngā mea katoa, ko tāna kaihanga hoki tērā o ngā ao.
HEB 1:3 Ko ia te kānapatanga o tōna korōria, te tino āhua o tōna pūmautanga, e whakaū nei i ngā mea katoa ki te kupu o tōna kaha, ka oti i a ia ake anō te horoi ō tātou hara, nā noho ana ia i te ringa matau o te Nui i runga rawa.
HEB 1:4 Ā, meinga ana ia kia pai ake i ngā anahera, kia pērā me te ingoa i riro i a ia he nui atu i tō rātou.
HEB 1:5 Ki a wai hoki o ngā anahera tāna meatanga i mua, “Ko koe tāku Tama, nō nāianei koe i whakatupuria ai e ahau”? Me tēnei anō, “Ko ahau hei Matua ki a ia, ko ia hei Tama ki ahau?”
HEB 1:6 I tāna kawenga mai anō hoki i te whānau mātāmua ki te ao, ka mea ia, “Kia koropiko ngā anahera katoa a te Atua ki a ia.”
HEB 1:7 Ko tāna kupu ia mō ngā anahera, “Meinga ana e ia āna anahera hei wairua, āna kaimahi hei mura ahi.”
HEB 1:8 Mō te Tama ia, i kī ia, “Pūmau tonu tōu torōna, e te Atua, ake, ake; ā, ko te hēpeta o te tika te hēpeta o tōu kīngitanga.
HEB 1:9 I arohaina e koe te tika, i kinongia e koe te hara; nō reira nui atu i tō ōu hoa te whakawahinga a te Atua, a tōu Atua, i a koe ki te hinu o te hari.”
HEB 1:10 Me tēnei anō, “Nāu, e te Ariki, i te tīmatanga i whakatakoto te whenua; he mahi anō ngā rangi nā ōu ringa.
HEB 1:11 Ko ērā e hemo atu, ko koe ia e mau tonu: ka tawhitotia katoatia hoki ērā me he kākahu.
HEB 1:12 Ka pōkaitia e koe, ānō he koheka, ka whakaputaia kētia. Ko koe tonu anō ia koe, kāhore hoki he mutunga o ōu tau.”
HEB 1:13 Ki tēhea hoki o ngā anahera tāna meatanga i mua, “Hei tōku ringa matau koe noho ai, kia meinga rā anō e ahau ōu hoariri hei tūranga waewae mōu”?
HEB 1:14 He teka ianei he wairua kaimahi rātou katoa, he mea tonotono hei minita, he whakaaro ki te hunga mō rātou nei te ora?
HEB 2:1 Nā, ko te tikanga tēnei, kia kaha ake tō tātou whakaaro ki ngā mea kua rangona, kei pahuhu atu i a tātou.
HEB 2:2 Mehemea hoki te kupu i whakapuakina e ngā anahera he pūmau, ā, he tika tonu te utu i whakahokia mō ngā pokanga kētanga katoa, mō ngā mahi tutū;
HEB 2:3 me pēhea ka mawhiti ai tātou ki te paopao tātou ki tēnei ora nui; i tīmataia nei te kōrero e te Ariki, ā, kua whakaūkia mai ki a tātou e te hunga i rangona ai;
HEB 2:4 me te whakaatu anō te Atua ki tā rātou, i runga i ngā tohu, i ngā mea whakamīharo, i tōna tini o ngā merekara, i ngā tūwhanga mai anō hoki o te Wairua Tapu, he pērā anō me tāna i pai ai.
HEB 2:5 Kāhore hoki i waiho e ia ki raro i ngā anahera te ao meāke nei puta, tā mātou e kōrero nei.
HEB 2:6 Heoi, i whakaaturia mai e tētahi i tētahi wāhi, i mea mai: “He aha te tangata, i mahara ai koe ki a ia? Te tama rānei a te tangata, i tirohia ai ia e koe?
HEB 2:7 Nohinohi nei te whai i whakaititia iho ai ia e koe i ngā anahera; kua karaunatia ia e koe ki te korōria, ki te hōnore, kua waiho anō ia e koe hei rangatira mō ngā mahi a ōu ringa.
HEB 2:8 Kua waiho nei e koe ngā mea katoa ki raro i ōna waewae.” Nā, i ngā mea katoa ka waiho nei i raro i a ia, kāhore i mahue tētahi mea kīhai nei i waiho i raro i a ia. Otirā, kāhore anō tātou kia kite noa i ngā mea katoa kua oti te waiho i raro i a ia.
HEB 2:9 Ka kite rāia tātou i a Īhu, he nohinohi nei te wāhi i whakaititia iho ai ia i ngā anahera ka oti nei te karauna ki te korōria, ki te hōnore, i muri nei i tōna ngaunga e te mate; he meatanga nā tō te Atua aroha noa kia pāngia ia e te mate mō ngā tāngata katoa.
HEB 2:10 Ko tāna tikanga tika hoki ia, māna nei ngā mea katoa, nāna anō hoki ngā mea katoa i a ia e ārahi ana i ngā tama tokomaha ki te korōria, kia waiho ngā mamae hei mea e tino rite ai te take o tō rātou whakaoranga.
HEB 2:11 Ko te kaiwhakatapu hoki, rātou ko te hunga e whakatapua ana, nō te pū kotahi rātou katoa. Koia ia tē whakamā ai ki te hua i a rātou he tēina;
HEB 2:12 e mea nei ia, “Māku e kōrero tōu ingoa ki ōku tēina; ka hīmene atu ahau ki a koe i waenganui o te whakaminenga.”
HEB 2:13 Me tēnei anō hoki, “Ka ū pū ahau ki a ia.” Me tēnei anō, “Nanā, ahau nei me ngā tamariki i hōmai e te Atua ki ahau.”
HEB 2:14 Nā, kei ngā tamariki he kikokiko, he toto, koia hoki ia i whakawhiwhia ai anō hoki ki aua mea; kia ai ai tōna matenga hei whakakāhore mō te rangatira o te mate, arā mō te rēwera;
HEB 2:15 kia whakaputaina mai ai hoki e ia ki waho te hunga i meinga e te wehi o te mate hei taurekareka i ngā wā katoa i ora ai rātou.
HEB 2:16 Kīhai hoki ia i mau ki ngā anahera; engari i mau ia ki te uri o Āperahama.
HEB 2:17 Nā konei i tika ai kia whakaritea ia ki ōna tēina i ngā mea katoa, kia waiho ai ia hei tohunga nui e atawhai ana, e pono ana i ngā meatanga ki te Atua, hei whakamārie mō ngā hara o te iwi.
HEB 2:18 I te mea hoki ka whakamātautauria ia, ā, mamae iho, e taea e ia te āwhina te hunga e whakamātautauria ana.
HEB 3:1 Nā, e ōku tēina tapu, e te hunga kua uru nei ki tā te rangi karanga, whakaaroa a Īhu Karaiti, te Āpōtoro, te Tohunga Nui o te tikanga kua whakaaetia nei e tātou;
HEB 3:2 i pono nei ki tōna kaiwhakarite mai, i pērā anō me Mohi i tōna whare katoa.
HEB 3:3 I tika hoki kia nui ake te korōria mō tēnei tangata i tō Mohi, nō te mea nui ake i tō te whare te hōnore o te kaihanga.
HEB 3:4 He mea hanga hoki nā tētahi ngā whare katoa; ko te Atua ia te kaihanga o ngā mea katoa.
HEB 3:5 Ā, i pono anō a Mohi i roto i tōna whare katoa, i pērā me te pononga, hei whakaatu mō ngā mea ka kōrerotia i muri;
HEB 3:6 ko te Karaiti ia i rite ki te tama i tōna whare anō; ko tōna whare tonu hoki tātou, ki te ū tō tātou māia me te whakamanamana ki te mea e tūmanakohia atu nei, ā taea noatia te mutunga.
HEB 3:7 Nā, kia rite ki tā te Wairua Tapu i mea ai: “Ki te rongo koutou ki tōna reo āianei,
HEB 3:8 kaua e whakapakeketia ō koutou ngākau, kei pērā me o te whakatoinga, i te rā o te whakamātautauranga i te koraha.
HEB 3:9 I ahau i whakamātautauria e ō koutou mātua, i ahau i āta mōhiotia, e whā tekau ngā tau i kite ai rātou i āku mahi.
HEB 3:10 Nā, ka hōhā ahau ki taua whakatupuranga, ka mea, ‘Kotiti kē tonu ō rātou ngākau; kāhore rātou e mōhio ki āku ara.’
HEB 3:11 Nā reira i riri ai ahau, i oati ai hoki: ‘E kore rātou e tae ki tōku okiokinga.’ ”
HEB 3:12 Kia tūpato, e ōku tēina, kei noho te ngākau kino, whakapono kore i roto i tētahi o koutou; kei whakarērea te Atua ora.
HEB 3:13 Engari, me whakahau koutou tētahi i tētahi i tēnei rā, i tēnei rā, i te mea e kīia ana “Ko tēnei rā,” kei whakapakeketia tētahi o koutou e te tinihanga o te hara.
HEB 3:14 Ka uru hoki tātou ki tā te Karaiti, ki te mea ka mau i a tātou te tīmatanga o te whakaaro pūmau, taea noatia te mutunga.
HEB 3:15 I te mea hoki e kōrerotia ana: “Ki te rongo koutou ki tōna reo āianei, kaua e whakapakeketia ō koutou ngākau, kei pērā me o te whakatoinga.”
HEB 3:16 Ko wai hoki i whakatoi i tō rātou rongonga? He teka ianei ko te hunga katoa i haere mai i Īhipa, a Mohi i ārahi rā?
HEB 3:17 I riri hoki ia ki a wai i ngā tau e whā tekau? He teka ianei ki te hunga i hara, i hinga rā ō rātou tinana ki te koraha?
HEB 3:18 I oati anō ia ki a wai, e kore rātou e tae ki tōna okiokinga? He teka ianei ki te hunga kīhai nei i whakapono?
HEB 3:19 Nā, ka kite nei tātou kīhai rātou i āhei te tae atu i te kore o te whakapono.
HEB 4:1 Nā, kia mataku tātou, i te mea ka tukua iho nei he kōrero pai mō tātou kia tae atu ki tōna okiokinga, kei tirohia mai tētahi o koutou kua mahue ki muri.
HEB 4:2 He mea kauwhau hoki te rongopai ki a tātou, he pērā anō me tērā i a rātou. Heoi, kīhai te kupu i rangona i whai pai ki a rātou; nō te mea kīhai i whakananua ki te whakapono i roto i te hunga i rangona ai.
HEB 4:3 Ka taea hoki te okiokinga e tātou kua whakapono nei; ka rite ki tāna i kī rā: “Nā reira i riri ai ahau, i oati ai hoki, ‘E kore rātou e tae ki tōku okiokinga!’ ” Kua oti nā hoki ngā mahi i te tīmatanga rā anō o te ao.
HEB 4:4 Ko tāna kupu hoki tēnei i tētahi wāhi mō te rā whitu, “Ā, ka okioki te Atua i te rā whitu i āna mahi katoa.”
HEB 4:5 I tēnei wāhi anō hoki, “E kore rātou e tae ki tōku okiokinga.”
HEB 4:6 Nā, tērā atu anō he taenga mō ētahi ki reira; kīhai hoki te hunga i kauwhautia ai te rongopai ki a rātou i mua i tae, nō te mea kāhore ō rātou whakapono;
HEB 4:7 ā, ka motuhia mai e ia tētahi rā, i a ia i mea rā i tā Rāwiri, Hei āianei, i muri i taua wā roa rā; ko te kupu hoki tēnei: “Hei āianei, ki te rongo koutou ki tōna reo, kaua e whakapakeketia ō koutou ngākau.”
HEB 4:8 Mehemea hoki i whai okiokinga rātou i a Hohua, e kore e kōrerotia e ia tētahi atu rā i muri iho.
HEB 4:9 Inā, tērā atu anō he hāpati okiokinga mō te iwi o te Atua.
HEB 4:10 Ki te tae hoki te tangata ki tōna okiokinga, ka okioki anō ia i āna mahi ake, ka pērā me te Atua i okioki i āna mahi ake.
HEB 4:11 Nā, kia puta tō tātou uaua ki te tomo ki taua okiokinga, kei pērā te whakapono kore o tētahi, ā, ka hinga.
HEB 4:12 Ora tonu hoki te kupu a te Atua, mana tonu, koi rawa atu i tētahi hoari matarua, ngoto tonu, ā, wehea noatia te ngākau me te wairua, ngā ponapona me te hinu wheua, e wawae ana anō i ngā whakaaro, i ngā hihiritanga o te ngākau.
HEB 4:13 Kāhore hoki he mea hanga i ngaro ki tōna aroaro. Heoi, e takoto kau ana, e tuwhera ana ngā mea katoa ki ōna kanohi, kei a ia nei he kupu mō tātou.
HEB 4:14 Nā, he tino tohunga nui tō tātou, kua tomo ki ngā rangi, a Īhu, te Tama a te Atua, kia mau pū tātou ki te tikanga i whakaaetia e tātou.
HEB 4:15 Ehara hoki tō tātou i te tohunga nui e kore e āhei kia mamae tahi me tātou e ngoikore nei; i whakamātautauria nei hoki ia i ngā mea katoa, i pēneitia me tātou, kāhore ia he hara.
HEB 4:16 Nā, kia haere māia atu tātou ki te torōna o te aroha noa, kia puta mai ai ki a tātou te mahi tohu, kia kitea ai e tātou tā te aroha noa hei āwhina mai mō ngā wā e mate ai.
HEB 5:1 Ko ia tohunga nui hoki e tangohia nei i roto i ngā tāngata, he mea whakatū rātou mō ngā mea a ngā tāngata ki te Atua, hei tāpae i ngā whakahere, i ngā patunga tapu mō ngā hara.
HEB 5:2 E taea e ia te āta hanga ki te hunga e kūware ana, e kotiti kē ana; nō te mea e muia ana anō ia e te ngoikore;
HEB 5:3 nā konei i tika ai, kia rite ki tāna mō te iwi tāna e tāpae ai mōna ake, hei whakahere mō ngā hara.
HEB 5:4 E kore anō hoki tētahi e tango i tēnei hōnore ki a ia anō, engari te tangata e karangatia ana e te Atua, e pērātia ana me Ārona.
HEB 5:5 Waihoki ko te Karaiti kāhore āna whakanui i a ia hei tohunga nui; nā tērā kē i kī rā ki a ia: “Ko koe tāku Tama, nō nāianei koe i whakatupuria ai e ahau.”
HEB 5:6 Pērā hoki me tāna i kī ai i tētahi atu wāhi, “Hei tohunga koe ake ake i runga i te ritenga o Merekihereke.”
HEB 5:7 I ngā rā o tōna kikokiko, i tukua e ia he īnoi, he karakia, i runga i te kārangaranga kaha, i te roimata, ki te Mea kaha ki te whakaora i a ia i te mate, ā, whakarangona ana mōna i wehi ki te Atua;
HEB 5:8 ahakoa he Tama ia, i whakaakona ia ki te ngohengohe e ōna mamae.
HEB 5:9 Ā, ka meinga nei ia kia tino rite, ka waiho ia hei take mō te ora tonu ki te hunga katoa e ngohengohe ana ki a ia;
HEB 5:10 he mea karanga nā te Atua hei tohunga nui i runga i te ritenga o Merekihereke.
HEB 5:11 He maha nei ā mātou kōrero mō tēnei, he uaua ki te whakamārama, he pūhoi hoki nō koutou ki te whakarongo.
HEB 5:12 I te mea hoki ka tika kia waiho koutou hei kaiwhakaako nō te mea ka roa nei, nā, me tuarua te whakaako i a koutou ki ngā tīmatanga rawatanga o ngā kupu a te Atua; me waiū hoki he kai mā koutou, kauaka te kai pakeke.
HEB 5:13 Ko ngā tāngata katoa hoki e kai ana i te waiū, he kūware rātou ki te kupu o te tika, he kōhungahunga hoki.
HEB 5:14 Mā ngā pakeke e tika ai te kai mārō kua taungatia nei ō rātou hinengaro e ngā meatanga maha, e wehe ai i te pai, i te kino.
HEB 6:1 Nā, kāti tātou te kōrero i ngā tīmatanga o tā te Karaiti ako, hoake tātou ki te tino tikanga; kaua e tuaruatia te whakatakoto i te tūranga, arā i te rīpenetā ki ngā mahi mate, i te whakapono hoki ki te Atua,
HEB 6:2 i te whakaako ki ngā iriiri, ki te whakapānga o ngā ringaringa, ki te aranga o ngā tāngata mate, ki te whakawākanga mutungakore.
HEB 6:3 Ā, ka meatia anō tēnei e tātou ki te tukua e te Atua.
HEB 6:4 Ko te hunga hoki kua oti te whakamārama, kua pā ki te mea i hōmai i runga i te rangi, kua whiwhi ki te Wairua Tapu,
HEB 6:5 kua kitea anō te pai o tā te Atua kupu, me ngā mea kaha o te ao meāke nei puta;
HEB 6:6 ki te taka atu rātou, e kore rātou e taea te whakahou ake ki te rīpenetā; ka rīpekatia houtia hoki te Tama a te Atua e rātou nei anō, ka meinga hoki kia tāwaia nuitia.
HEB 6:7 Ko te whenua hoki e inu nei i te ua honohono te heke ki runga ki a ia, ā, e mea ana i te otaota pai kia tupu ake mā te hunga i mahia ai, ka whiwhi ki tā te Atua manaaki.
HEB 6:8 Ki te tupuria ia e te tātarāmoa, e te tūmatakuru, ka whakakinoa, ka tata ki te kanga: ko tōna whakamutunga ka tahuna.
HEB 6:9 Otiia, ahakoa pēnei noa tā mātou kōrero, e ū ana anō tō mātou whakaaro, e ōku hoa aroha, ki ngā mea pai kē atu kei a koutou, he mea hoki mō te whakaoranga.
HEB 6:10 E kore hoki te Atua e hē, e wareware ki tā koutou mahi, ki te uaua o tō koutou aroha, i whakakitea mai e koutou ki tōna ingoa, i a koutou i atawhai i te hunga tapu, ā, ka atawhai nei anō.
HEB 6:11 Otiia, e hiahia ana mātou kia whakakitea taua uaua nā anō e tēnei, e tēnei o koutou, kia taea rawatia te pūmautanga o te whakaaro i tūmanako ai koutou ā te mutunga rā anō.
HEB 6:12 Kia kaua e pūhoi, engari kia rite ki tā te hunga i whakapono, i whakamanawanui, ā, riro mai ana i a rātou ngā mea i whakaaria mai.
HEB 6:13 I tā te Atua whakaaringa mea ki a Āperahama, i te mea kāhore tētahi i nui ake hei oatitanga, ka oatitia e ia a ia ake anō,
HEB 6:14 ka mea, “Inā, ka manaakitia rawatia koe e ahau, ka whakanuia rawatia anō hoki koe.”
HEB 6:15 Heoi, whakamanawanui ana ia, ā, riro ana i a ia te kupu whakaari.
HEB 6:16 Ko te mea nui ake hoki tā ngā tāngata e waiho ai hei oati; ā, ki a rātou hei mutunga mō ngā whakahokihoki kupu katoa te oati whakaū.
HEB 6:17 Nō reira, i te mahara o te Atua kia tino whakakitea ki te hunga mō rātou nei te kupu whakaari te pūmau o tōna whakaaro, ka whakaurua mai e ia he oati,
HEB 6:18 kia rua ai ngā mea pūmau, he mea e kore ai e āhei kia teka te Atua. Mā reira ka kaha ai he whakamārie mō tātou, mō te hunga kua rere ki te pupuri i te mea e takoto mai nei i te aroaro, e tūmanakohia atu nei.
HEB 6:19 Hei punga anō tēnei mā tātou mō te wairua, he tūmanako mau tonu, ū tonu, tae tonu atu anō hoki ki te mea i roto i te ārai;
HEB 6:20 ki te wāhi kua tapoko atu nei a Īhu ki reira, hei mātāmua mō tātou, i a ia i meinga hei tohunga nui mō ā mua tonu atu, i runga i te ritenga o Merekihereke.
HEB 7:1 Ko tēnei Merekihereke hoki, kīngi o Harema, tohunga o te Atua o te Runga Rawa, i tūtaki nei ki a Āperahama i a ia e hoki ana i te patunga i ngā kīngi, i manaaki nei i a ia,
HEB 7:2 ā, hoatu ana e Āperahama ki a ia ngā whakatekau o ngā mea katoa. Ko te whakamāoritanga o tōna ingoa i te tuatahi ko te Kīngi o te tika, i tō muri hoki ko te Kīngi o Harema, arā ko te Kīngi o te rangimārie.
HEB 7:3 He mea matuakore, whaeakore, kāhore nei ōna whakapapa tūpuna, kāhore he tīmatanga o ōna rā, kāhore he mutunga o tōna ora; he tangata kua whakaritea ki te Tama a te Atua, mau tonu ana ia hei tohunga.
HEB 7:4 Nā, whakaaroa te nui o tēnei tangata i hoatu nei ki a ia e te tupuna nui, e Āperahama, ngā whakatekau o ngā taonga parakete.
HEB 7:5 Ko ngā tama hoki a Rīwai, arā ngā mea kua riro nei i a rātou te mahi tohunga, he ture kei a rātou kia tangohia tā te ture i whakarite ai, ngā whakatekau a te iwi, he mea nā ō rātou tēina i puta mai nei anō i te hope o Āperahama.
HEB 7:6 Ko tēnei tangata ia, ehara nei i te mea nō tō rātou kāwai, riro ana i a ia ngā whakatekau a Āperahama, ā, manaakitia ana e ia te tangata i a ia nei ngā kupu whakaari.
HEB 7:7 E kore rawa ia tēnei e taea te whakateka, arā ko te mea iti e manaakitia ana e te mea nui.
HEB 7:8 I konei e riro ana ngā whakatekau i ngā tāngata, he matemate nei; i reira ia, i tērā e kīia nei kei te ora ia.
HEB 7:9 Me pēnei anō te kī, ko Rīwai e tango whakatekau nei, hoatu ana e ia he whakatekau i tā Āperahama meatanga rā.
HEB 7:10 I roto tonu hoki ia i te hope o tōna pāpā i te tūtakitanga o Merekihereke ki a ia.
HEB 7:11 Nā, ki te mea nā tā te Rīwai mahi tohunga i tino rite ai, ā, i nā runga hoki i tērā te rironga o te ture i te iwi, he aha atu te mea e whakatika ake ai tētahi atu tohunga i runga i tō Merekihereke ritenga; tē kīia ai i runga i tō Ārona ritenga?
HEB 7:12 Ka whakaputaia kētia nei hoki te mahi tohunga, ina kua puta kē anō hoki te ture.
HEB 7:13 Ko te tangata hoki mōna ēnei kōrero, he hapū kē tōna, kāhore nei tētahi o rātou i whakatata ki te āta.
HEB 7:14 He mea takoto mārama hoki tēnei, i puta ake tō tātou Ariki i roto i a Hūrā: hore rawa he kupu a Mohi mō te mahi tohunga a tērā iwi.
HEB 7:15 Ā, ka tino mārama rawa tā mātou i kōrero ai, ina whakatika ake tētahi atu tohunga i te ritenga o Merekihereke;
HEB 7:16 ko tōna whakatohungatanga nei hoki ehara i te mea nō runga i te ture o ngā tikanga o te kikokiko, engari nō runga i te kaha o te ora e kore e mutu.
HEB 7:17 Kua whakaaturia mai nei hoki e ia: “Hei tohunga koe ake ake i runga i te ritenga o Merekihereke.”
HEB 7:18 Kua whakakāhoretia hoki te ture i whakatakotoria i mua, nō te mea kāhore ōna kaha, kāhore ōna hua,
HEB 7:19 (kāhore hoki he mea i tino tika i te ture), kua mauria mai anō he mea e hira ake ai te tūmanako, nā reira nei tātou ka whakatata atu ki te Atua.
HEB 7:20 Nā, kīhai nei i mahue te oati;
HEB 7:21 ko ērā hoki kāhore he oati i tō rātou whakatohungatanga; he oati ia i tō tēnei, nā tērā i kī mai rā ki a ia: “Kua oati te Ariki, ā, e kore e puta kē tōna whakaaro: ‘Hei tohunga koe ake ake i runga i te ritenga o Merekihereke.’ ”
HEB 7:22 Koia i nui kē ai te pai o te kawenata ko Īhu nei tōna kaiwhakamau.
HEB 7:23 He tokomaha hoki rātou i whakatohungatia, tā te mea kīhai i tukua e te mate kia tū tonu;
HEB 7:24 ko tēnei ia, e mau tonu ana ake ake, e kore anō e puta kē tāna mahi tohunga.
HEB 7:25 Nā, e taea anō e ia te tino whakaora te hunga e nā runga atu ana i a ia ki te Atua; e ora tonu ana hoki ia hei īnoi mō rātou.
HEB 7:26 He pai rawa hoki tēnei tū tohunga nui mō tātou, te tapu, te kinokore, te poke kore, he mea motu kē i te hunga hara, kua whakanekehia ake anō hoki ki runga ake i ngā rangi.
HEB 7:27 Kāhore āna mea e pērā ai ia me ngā tohunga nui, e whakaeke patunga tapu ai ia i ia rā, mō ōna hara ake i te tuatahi, muri iho mō o te iwi; kotahi tonu hoki tāna meatanga i tēnei, i tāna whakaekenga atu i a ia ake.
HEB 7:28 Ko ngā tohunga nui hoki e whakatūria ana e te ture, he tāngata e pēhia ana e te ngoikore; ko tā te kupu ia o te oati, i muri nei i te ture, ko te Tama kua oti nei te mea kia tino tika ake ake.
HEB 8:1 Nā, ko te tino tēnei o ēnei kōrero; he tohunga pērā tō tātou, kua noho ki matau o te torōna o te Nui i ngā rangi;
HEB 8:2 he minita mō te wāhi tapu, mō te tapenākara pono, tōna kaiwhakaara nei ko te Ariki, ehara i te tangata.
HEB 8:3 Ko ngā tohunga nui katoa hoki, he mea whakarite hei tāpae atu i ngā whakahere, i ngā patunga tapu; nā konei hoki i tika ai kia whai mea anō tēnei tohunga nui hei tāpaenga atu māna.
HEB 8:4 Me i runga hoki ia i te whenua, kāhore ōna tohungatanga; tēnei hoki ngā tohunga hei tāpae i ngā whakahere i runga i tā te ture.
HEB 8:5 Ko tā rātou mahi he ritenga, he ātārangi nō ngā mea i te rangi, he pērā anō me te mea i tohutohungia ki a Mohi, i a ia meāke hanga i te tapenākara, i mea hoki ia, “Kia mahara kia hangā e koe ngā mea katoa kia rite ki te tauira i whakakitea ki a koe i runga i te maunga.”
HEB 8:6 Tēnā ko tēnei, he nui kē te mahi minita kua riro nei i a ia, he pai rawa hoki te kawenata ko tōna takawaenga nei ko ia, he pai rawa anō hoki ngā kupu whakaari, i whakatakotoria ai taua kawenata.
HEB 8:7 Mehemea hoki kīhai i whai hē taua kawenata ō mua, e kore e rapua he wāhi mō te tuarua.
HEB 8:8 I a ia hoki e whakahē ana, i mea ia ki a rātou: “Nanā, tēnei ake ko ngā rā, e ai tā te Ariki, e whakaritea ai e ahau he kawenata hou ki te whare o Īharaira, ki te whare anō hoki o Hūrā.
HEB 8:9 E kore e rite ki te kawenata i whakaritea e ahau ki ō rātou mātua, i te rā i mau ai ahau ki ō rātou ringaringa, i ārahi mai ai i a rātou i te whenua o Īhipa. Kīhai nei hoki rātou i ū ki tāku kawenata, ā, kore ake ōku whakaaro ki a rātou,
HEB 8:10 Ko te kawenata hoki tēnei e whakarite ai ahau ki te whare o Īharaira i muri iho i aua rā, e ai tā te Ariki: Ka hoatu e ahau āku ture ki ō rātou hinengaro, ka tuhituhia anō hoki ki ō rātou ngākau. Ko ahau hei Atua mō rātou ko rātou hoki hei iwi māku.
HEB 8:11 I kore anō hoki rātou e whakaako i tōna hoa, i tōna hoa, i tōna teina, i tōna tuakana, e mea, ‘Kia mātau koe ki te Ariki,’ e mātau katoa hoki rātou ki ahau, te nohinohi o rātou, te nui anō hoki o rātou.
HEB 8:12 Ka mahi tohu hoki ahau ki ō rātou kino, e kore anō hoki e maharatia e ahau ō rātou hara ā mua ake nei.”
HEB 8:13 I a ia i mea, “He kawenata hou,” kua whakatawhitotia e ia te mea tuatahi. Nā, ko te mea kua tawhitotia, kua koroheketia, ka tata te memeha.
HEB 9:1 Nā, ko te kawenata tuatahi he tikanga karakia anō ōna, me tētahi wāhi tapu, he mea nō te ao nei.
HEB 9:2 I hangā hoki tētahi tapenākara, te tuatahi, i reira te tūranga rama, me te tēpu, me te taro aroaro, tōna ingoa ko te Wāhi Tapu.
HEB 9:3 I tua atu hoki o te rua o ngā ārai, ko te tapenākara, e huaina ana ko te Wāhi Tino Tapu.
HEB 9:4 He tahu kakara kōura i reira me te āka o te kawenata, he mea whakakikorua ngā wāhi katoa ki te kōura, i roto anō i taua mea ko te oko kōura i te mana, ko te tokotoko o Ārona i pihi rā, ko ngā papa o te kawenata.
HEB 9:5 I runga atu i tēnei ko ngā Kerupima o te korōria, e whakamarumaru ana i te taumata o te whakamārietanga. E kore aua mea e taea te kōrero takitahi ināianei.
HEB 9:6 Heoi, ka āta rite nei ēnei mea, ka hāereere ngā tohunga i ngā wā katoa ki te tapenākara tuatahi, i a rātou e mahi ana i ngā ritenga karakia;
HEB 9:7 ki te tuarua ia kotahi anō te haerenga atu i te tau, o te tohunga nui anake, kīhai anō i mahue ngā toto; i tāpaea atu hoki mōna, mō ngā hē anō o te iwi.
HEB 9:8 Ko tā te Wairua Tapu hoki tēnei i whakaatu ai, kīanō te huarahi ki te Wāhi Tino Tapu i whakakitea mai, i te mea e tū ana anō te tapenākara tuatahi.
HEB 9:9 He āhua tērā mō tēnei wā nei, e tāpaea ai ngā whakahere me ngā patunga tapu, kāhore nei e tau hei mea i te tangata nāna tērā mahi kia tino tika te hinengaro;
HEB 9:10 heoi anō o ērā he kainga, he inumanga, he horoinga maha, he tikanga nā te kikokiko, he mea whakarite mai, ā taea noatia te wā whakatikatika.
HEB 9:11 I te taenga mai ia o te Karaiti hei tohunga nui mō ngā mea pai e whai mai ana i muri, he nui atu anō hoki, he tino tika te tapenākara, ehara i te mea hangā nā te ringaringa, arā ehara i te mea nō tēnei hanganga.
HEB 9:12 Ehara anō hoki i te mea nō ngā koati ngā toto, nō ngā kūao kau rānei, engari nōna ake ngā toto i haere atu ai ia, kotahi tonu te haerenga, ki roto ki te Wāhi Tino Tapu, i te mea ka whiwhi ki tāna mea hei hoko mai i a tātou mō ake tonu atu.
HEB 9:13 Ki te mea hoki mā ngā toto o ngā pūru, o ngā koati, mā ngā pungarehu rānei o te kūao kau, he mea tāuhiuhi ki te hunga kua poke, ka tapu ai, ka mā ai te kikokiko.
HEB 9:14 Tērā atu tō ngā toto o te Karaiti, nāna nei i tāpae atu a ia anō, he mea kohakore, ki te Atua, i runga i tā te Wairua ora tonu; mā ērā e mā ai ō koutou hinengaro i ngā mahi mate, e mahi ai koutou ki te Atua ora.
HEB 9:15 Mō konei anō ia i meinga ai hei Takawaenga mō te kawenata hou, kia mate ai ia hei utu mō ngā hē i raro i te kawenata tuatahi, kia riro ai i te hunga e karangatia ana te wāhi tūturu mō rātou i kōrerotia i mua.
HEB 9:16 He ōhākī hoki, ko te mea e whai tikanga ai ko te matenga o te tangata nāna i whakatakoto.
HEB 9:17 Kia mate hoki te tangata, kātahi ka whai mana te ōhākī; ka ū tonu rānei i te mea e ora ana te tangata nāna i whakatakoto?
HEB 9:18 Koia hoki te mahue ai te toto i te whakatapunga o te kawenata tuatahi.
HEB 9:19 I te mutunga hoki o tā Mohi kōrero i ngā tikanga katoa ki te iwi katoa, hei whakarite i tā te ture, ka mau ia ki ngā toto o ngā kūao kau, o ngā koati, ki te wai, ki te huruhuru whero, ki te hihopa, ā, tāuhiuhia ana e ia te pukapuka, me te iwi katoa;
HEB 9:20 me tāna kī anō, “Ko ngā toto ēnei o te kawenata kua whakaakona mai nei e te Atua ki a koutou.”
HEB 9:21 I tāuhiuhia anō hoki e ia ki ngā toto te tapenākara, me ngā oko katoa mō te mahi minita.
HEB 9:22 I runga hoki i te ture, e tata ana ka kīia, e purea ana ngā mea katoa ki te toto; ki te kāhore hoki he ringihanga toto, kāhore he murunga hara.
HEB 9:23 Koia, i tika ai kia purea ki ēnei ngā ritenga o ngā mea i te rangi; ko ngā tino mea ia o te rangi ki ngā patunga tapu, pai rawa atu i ēnei.
HEB 9:24 Ehara hoki i te mea kua tomo a te Karaiti ki te wāhi tapu i hanga e te ringaringa, ki te tauira o te tino wāhi; engari ki te tino rangi pū anō, puta ai ki te aroaro o te Atua, mō tātou.
HEB 9:25 Ehara anō i te mea kia maha āna tāpaenga i a ia, kia pērā me te tohunga nui e haere nei ki roto ki te Wāhi Tino Tapu i tēnei tau, i tēnei tau, nō ētahi atu anō hoki ngā toto;
HEB 9:26 pēnei kia maha he mamaetanga mōna, he mea tīmata i te hanganga rā anō o te ao. Tēnā ko tēnei, kotahi tonu tōna whakakitenga mai i te mutunga o ngā wā, hei whakakāhore i te hara, i a ia ka meinga hei patunga tapu.
HEB 9:27 Nā, kua takoto nei te tikanga mō ngā tāngata kia kotahi tonu te matenga, ā muri iho i tēnei ko te whakawā;
HEB 9:28 waihoki ko te Karaiti, kotahi tonu tōna tāpaenga atu hei pīkau i ngā hara o te tini, ā, tēnei ake ko te rua o ōna whakakitenga mai, kāhore anō he hara, hei whakaora i te hunga e tatari ana ki a ia.
HEB 10:1 I te mea ko tō te ture he ātārangi nō ngā mea pai e puta ana mai i muri, ehara i te āhua pū o aua mea, e kore e whai mana i aua patunga tapu e whakaeketia tonutia ana e rātou i tēnei tau, i tēnei tau, e tino tika ai te hunga e whakatata ana.
HEB 10:2 Pēnei e kore rānei e mutu te whakaeke? Me i oti hoki te hunga nāna taua karakia te mea kia mā, kua kore ō rātou mahara ki ngā hara?
HEB 10:3 I aua patunga tapu ia e hokihoki ana te mahara ki ngā hara i ia tau, i ia tau.
HEB 10:4 E kore hoki e tau mā ngā toto o ngā pūru, o ngā koati e whakakāhore ngā hara.
HEB 10:5 Nā reira i a ia e haere mai ana ki te ao, ka mea ia: “Kīhai i matenuitia e koe te patunga tapu me te whakahere, kua rite mai i a koe he tinana mōku.
HEB 10:6 Kīhai koe i āhuareka ki ngā tahunga tinana, ki ngā whakahere hara.
HEB 10:7 Kātahi ahau ka mea atu, ‘Tēnei ahau te haere atu nei, kei roto i te upoko o te pukapuka te tuhituhinga mōku, ki te mea i tāu i pai ai, e te Atua.’ ”
HEB 10:8 I tāna meatanga i mua ake, “Kīhai koe i matenui ki te patunga tapu, ki te whakahere, ki ngā tahunga tinana, ki ngā whakahere hara, kāhore anō hoki ōu āhuareka mai,” he mea nei e tāpaea ana i runga i te ture.
HEB 10:9 Kātahi ia ka mea, “Tēnei ahau te haere atu nei ki te mea i tāu i pai ai, e te Atua.” E tangohia ana e ia te tuatahi, kia whakatūria ai e ia te tuarua.
HEB 10:10 Nā taua pai nei i oti ai tātou te whakatapu, he meatanga nā te tāpaenga atu kotahi o te tinana o Īhu Karaiti.
HEB 10:11 Nā, ko ngā tohunga katoa, e tū ana rātou, e minita ana i tēnei rā, i tēnei rā, he maha anō hoki ā rātou whakaekenga atu i aua patunga tapu rā anō, e kore rawa nei e tau hei tango i ngā hara.
HEB 10:12 Ko tēnei ia, kotahi nei tāna patunga tapu i whakaeke atu ai mō ngā hara, noho tonu atu i te ringa matau o te Atua
HEB 10:13 i muri nei he tatari tāna kia waiho rā anō ōna hoariri hei takahanga mō ōna waewae.
HEB 10:14 Kotahi nei hoki tāna whakahere, ā, tika tonu i a ia ake ake te hunga ka oti te whakatapu.
HEB 10:15 Hei kaiwhakaatu anō te Wairua Tapu mō tēnei ki a tātou; i muri mai i tāna kīanga mai,
HEB 10:16 “Ko te kawenata tēnei e whakaritea e ahau ki a rātou i muri i aua rā, e kī ana te Ariki: Ka hoatu e ahau āku ture ki ō rātou ngākau, ka tuhituhia hoki e ahau ki ō rātou hinengaro,” ā, ka mea anō ia,
HEB 10:17 “E kore hoki e maharatia e ahau ō rātou hara, ō rātou kino ā mua ake.”
HEB 10:18 Nā, ki te murua ēnei, kāhore he whakahere mō ngā hara i muri iho.
HEB 10:19 Nā, e ōku tēina, ka ai nei ngā toto o Īhu hei take e māia ai tātou te tomo ki te Tino Wāhi Tapu,
HEB 10:20 hei ara hou mō tātou, arā hei ara ora, he mea whakatapu nāna, e tika atu ana nā te ārai, arā nā tōna kikokiko.
HEB 10:21 Ā, i te mea he nui tō tātou tohunga mō te whare o te Atua,
HEB 10:22 kia whakatata atu tātou, i runga i te ngākau pono, i te whakapono e tino ū ana, he mea tāuhiuhi te ngākau, kia kore ai te hinengaro kino, he mea horoi anō hoki te tinana ki te wai mārama.
HEB 10:23 Kia mau tā tātou whakaae ki te mea e tūmanakohia atu nei, kei ngāueue; he pono hoki tā te kaiwhakaari mai.
HEB 10:24 Kia whai whakaaro anō tātou tētahi ki tētahi, kia whakaohokia te aroha me ngā mahi pai,
HEB 10:25 kei mahue te huihui i a tātou anō, kei pērā me te hanga a ētahi. Engari me whakahauhau tētahi i tētahi, kia nui rawa anō hoki i te mea ka kite koutou ka tata te rā.
HEB 10:26 Ki te hara hoki tātou i muri iho i tō tātou whiwhinga ki te mātauranga ki te pono, kāhore atu hoki he patunga tapu i mahue mō ngā hara;
HEB 10:27 engari, ka tatari āhua mataku ki te whakawā, ki te riri kino anō nā te ahi, e whakangaromia ai ngā hoariri.
HEB 10:28 Ko te tangata i takahi i te ture a Mohi kīhai i tohungia, ka mate i runga i te kupu a ngā kaiwhakaatu tokorua, tokotoru rānei.
HEB 10:29 Ki tō koutou whakaaro, e kore rānei e tika kia rahi ake te whiu mō te tangata i takahia ai te Tama a te Atua, i meinga ai hei mea noa ngā toto o te kawenata i whakatapua ai ia, ā, whakaiti ana i te Wairua o te aroha noa?
HEB 10:30 E mātau ana hoki tātou nā wai tēnei kupu, “Māku te rapu utu; māku te hoatu utu, e ai tā te Ariki”; me tēnei anō, “E whakawā te Ariki mō tāna iwi.”
HEB 10:31 He mea mataku te taka ki roto ki ngā ringaringa o te Atua ora.
HEB 10:32 Engari, kia mahara ki ngā rā ō mua, i a koutou i whakamāramatia rā, he nui noa atu ngā rauhanga a te mate, i whakaririka kau nā koutou.
HEB 10:33 Ko tētahi wāhi, i a koutou i meinga e ngā tāwainga, e ngā tūkinotanga hei mea mātakitaki; ko tētahi wāhi, i a koutou i meinga hei hoa mō te hunga i pērātia.
HEB 10:34 I mamae tahi hoki koutou me te hunga i te herehere, i hari hoki ki te pāhuatanga o ō koutou taonga, i mahara hoki tērā atu he taonga mō koutou, he mea pai ake, he mea pūmau tonu.
HEB 10:35 Nā, kaua e whakarērea tō koutou māia, he rahi hoki tōna utu.
HEB 10:36 Ko te mea hoki hei matenuitanga mā koutou he manawanui; kia oti ai i a koutou te mahi tā te Atua i pai ai, e riro tonu ai i a koutou ngā mea i whakaaria mai rā.
HEB 10:37 “Potopoto kau ake hoki, ā, ka tae mai tēnei e haere mai nei, e kore anō e whakaroa.
HEB 10:38 Mā te whakapono ia e ora ai te tangata tika; ā, ki te hoki tētahi ki muri, e kore tōku wairua e āhuareka ki a ia.”
HEB 10:39 Otiia, ehara tātou i te hunga e hoki ana ki muri, ki te whakangaromanga, engari nō te hunga e whakapono ana, ā, ora ana te wairua.
HEB 11:1 Nā, ko te whakapono, he whakapūmautanga i ngā mea e tūmanakohia atu ana, he whakakitenga i ngā mea kāhore nei e kitea.
HEB 11:2 Nā konei hoki ngā kaumātua i kōrerotia paitia ai.
HEB 11:3 Nā te whakapono i mātau ai tātou he mea hanga ngā ao e te kupu a te Atua, ā, ko ngā mea e tirohia atu nei kīhai i puta ake i roto i ngā mea e kitea ana.
HEB 11:4 Nā te whakapono i pai ake ai i tā Kaina te patunga tapu i tāpaea e Āpera ki te Atua, nā tēnā hoki i whakaatu tōna tika, i whakaatu hoki te Atua mō āna whakahere; nā tēnā anō ia i whai kupu ai, ahakoa mate.
HEB 11:5 Nā te whakapono a Ēnoka i kawea kētia ai, tē kite i te mate. Nā, kāhore ia i kitea, nō te mea kua kawea kētia ia e te Atua; i mua atu hoki i tōna kawenga kētanga i whakaaturia mai ia, e āhuareka ana te Atua ki a ia.
HEB 11:6 Ki te kāhore hoki he whakapono, e kore e taea he mea e āhuareka mai ai ia. Ki te haere hoki tētahi ki te Atua, me whakapono ko ia anō tēnei ko te Atua, e hōmai ana e ia he utu ki te hunga e āta rapu ana i a ia.
HEB 11:7 Nā te whakapono a Noa, i tōna whakamaharatanga e te Atua ki ngā mea kāhore i kitea noatia, i oho ai, he wehi ki te Atua, ā, hangā ana e ia te āka hei whakaora mō tōna whare; he whakataunga tēnā nāna i te hē ki te ao, ā, uru ana ki te tika o te whakapono.
HEB 11:8 Nā te whakapono a Āperahama i ngohengohe ai, i tōna karangatanga kia haere ki te wāhi meāke riro i a ia hei kāinga; ā, haere ana ia, tē mātau ki te wāhi e haere ai ia.
HEB 11:9 Nā te whakapono ia i noho manene ai ki te whenua i whakaaria mai, he whenua tangata kē anō ki a ia, ā, noho tēneti ana ia, rātou ko Īhaka, ko Hākopa, ōna hoa kua uru tahi nei rātou ki taua mea i whakaaria mai rā.
HEB 11:10 I tatari hoki ia ki te pā whai tūranga, ko te Atua nei te kaihanga, te kaimahi.
HEB 11:11 Me Hera anō hoki, nā te whakapono ia i whai kaha ai, i hapū ai, ā, whānau ana tāna tama i te mea kua taka kē ōna tau; i mahara hoki ia he pono tā te kaiwhakaari mai.
HEB 11:12 Nā, whānau ake i te kotahi, he tangata anō hoki ia kua whakatūpāpakutia ki ēnei mea, me te mea ko ngā whetū o te rangi te tini, koia anō kei te onepū i te taha o te moana e kore nei e taea te tatau.
HEB 11:13 I mate katoa ēnei i runga i te whakapono, kīhai i whiwhi ki ngā mea i whakaaria mai rā, engari he mea kite atu nā rātou i tawhiti, ā, whakaponohia atu ana e rātou, awhitia atu ana, whakaae ana rātou he manene rātou, he noho noa iho i runga i te whenua.
HEB 11:14 Ko te hunga hoki he pēnei ā rātou kōrero, e whakakite pū ana rātou he whenua tupu tā rātou e rapu nei.
HEB 11:15 Me i mahara hoki rātou ki taua kāinga i haere mai nei rātou i reira, pēnei kua ātea he hokinga atu mō rātou.
HEB 11:16 Tēnā ko tēnei, e hiahia ana rātou ki tētahi kāinga pai ake, ki tērā i te rangi. Koia te Atua tē whakamā ai ki a rātou, kia kīia ko tō rātou Atua; kua rite hoki i a ia tētahi pā mō rātou.
HEB 11:17 Nā te whakapono a Āperahama i tāpae ai i a Īhaka, i tōna whakamātautauranga; āe rā, ko te tangata i a ia nei ngā kupu whakaari, tāpaea ana e ia tāna huatahi,
HEB 11:18 mōna nei te kupu, “Kei a Īhaka he huānga mō tāu whānau.”
HEB 11:19 I whakaaro hoki ia, ahakoa i roto nei anō i te hunga mate, e taea ia e te Atua te whakaara ake; ā, riro mai ana ia i reira, he mea whakaahua.
HEB 11:20 Nā te whakapono tā Īhaka kupu manaaki mō Hākopa rāua ko Ēhau; he meatanga ki ngā mea ō muri nei.
HEB 11:21 Nā te whakapono a Hākopa, i a ia ka tata te mate, i manaaki ai i ngā tama tokorua a Hōhepa; ā, koropiko ana i runga i tāna tokotoko.
HEB 11:22 Nā te whakapono a Hōhepa, i a ia e whakahemohemo ana i whakahua ai i te haerenga mai o ngā tamariki a Īharaira; i whakatakoto tikanga ai anō mō ōna wheua.
HEB 11:23 Nā te whakapono a Mohi, i tōna whānautanga, i hunā ai e ōna mātua e toru ngā marama, i kite hoki rāua he tamaiti ātaahua ia; kīhai hoki rāua i mataku ki te ture a te kīngi.
HEB 11:24 Nā te whakapono a Mohi, i tōna kaumātuatanga, kīhai i pai kia kīia he tama nā te tamāhine a Parao;
HEB 11:25 ki tāna hoki, ko te mamae tahi me tā te Atua iwi, he mea pai kē atu i ngā āhuareka o te hara kia riro mō tētahi wā.
HEB 11:26 Ki tōna whakaaro, ko te tāwainga mō te Karaiti, he taonga nui kē atu i ngā taonga o Īhipa; i titiro atu hoki ia ki te utu ka hōmai.
HEB 11:27 Nā te whakapono ia i haere atu ai i Īhipa, kīhai hoki i mataku i te riri a te kīngi; i ū tonu hoki ia, he titiro nōna ki te Atua e kore nei e kitea.
HEB 11:28 Nā te whakapono ia i whakarite ai i te Kapenga, i te ringihanga toto, kei pā ki a rātou te kaiwhakamate i ngā whānau mātāmua.
HEB 11:29 Nā te whakapono rātou i haere ai rā te Moana Whero me te mea e nā runga ana i te whenua maroke; ā, i te whakamātauranga a ngā Īhipiana, ki te pērā horomia ake rātou.
HEB 11:30 Nā te whakapono ngā taiepa o Heriko i whenuku ai, i te mea e whitu ngā rā e taiāwhiotia ana.
HEB 11:31 Nā te whakapono a Rahapa, te wahine kairau, i kore ai e whakangaromia ngātahitia me te hunga whakapono kore, mōna i whakamanuhiri i ngā tūtei i runga i te rangimārie.
HEB 11:32 Kia pēhea ake anō hoki āku kōrero? E kore hoki e ranea te tāima hei kōrerotanga māku i ngā mea a Kiriona, a Paraka, a Hamahona, a Iepeta, a Rāwiri, a Hamuera, a ngā poropiti.
HEB 11:33 Nā te whakapono nei i hinga ai i a rātou ngā rangatiratanga, i mahia ai e rātou te tika, i whiwhi ai rātou ki ngā mea i whakaaria mai i mua, i tūtakina ai e rātou ngā waha o ngā raiona,
HEB 11:34 i tineia ai e rātou te kaha o te ahi, i mawhiti ai i te mata o te hoari, i haere atu ai i te ngoikore ki te kaha, i meinga ai kia kaha i te whawhaitanga, whati ana i a rātou ngā taua a ngā tauiwi.
HEB 11:35 Riro ana i ngā wāhine ā rātou tūpāpaku, he mea whakaara ake. Ko ētahi i whakamamaetia, kīhai anō i whakaae atu kia whakaorangia; kia whiwhi ai rātou ki te whakaarahanga pai kē atu.
HEB 11:36 Ko ētahi i whakamātau i ngā tāwainga, i ngā whiunga, i ngā mekameka anō hoki, i te whare herehere.
HEB 11:37 I ākina rātou ki te kōhatu, i wāhia ki te kani, i whakawaia, i mate i te patunga a te hoari. I hāereere rātou, he hiako hipi te kākahu, he hiako koati; he hunga rawakore rātou, e tūkinotia ana, e whakatupuria kinotia ana;
HEB 11:38 kīhai nei te ao i pai mō rātou! Ātiutiu noa ana rātou i waenga tahora, i ngā maunga, i ngā ana, i ngā poka o te whenua.
HEB 11:39 Nā, pai tonu te kōrero mō ēnei katoa, he mea nā te whakapono, heoi kīhai rātou i whiwhi ki te mea i whakaaria mai.
HEB 11:40 Kua whakaaroa wawetia hoki e te Atua tētahi mea pai atu mō tātou, kei tino tika rātou i te mea kāhore nei tātou.
HEB 12:1 Nā, i tēnei kapua nui o ngā kaiwhakaatu e karapoti nei i a tātou, whakarērea e tātou ngā whakataimaha katoa, me te hara whakaeke tata, kia manawanui hoki tātou ki te oma i te omanga e takoto nei i tō tātou aroaro.
HEB 12:2 Me te titiro pū anō ki a Īhu, ki te kaitīmata, ki te kaiwhakaoti i te whakapono; i whakaaro hoki ia ki te hari i tōna aroaro, ā, whakamanawanui ana ki te rīpeka, whakahāwea ana ki te whakamā, nā, kua noho ki matau o te torōna o te Atua.
HEB 12:3 Whakaaroa hoki ia i whakamanawanui nei ki taua totohe nui a te hunga hara ki a ia, kei hōhā ō koutou ngākau, kei ngākaukore koutou.
HEB 12:4 Ko tā koutou pakanga, kāhore anō kia tae noa ki te toto i a koutou e whawhai nā ki te hara.
HEB 12:5 Ā, kua wareware koutou ki te kupu whakahau e kōrero nei ki a koutou, me te mea he tama koutou, “E tāku tama, kaua e whakahāwea ki tā te Ariki papaki; kei ngākaukore hoki ina rīria e ia.
HEB 12:6 E papaki ana hoki te Ariki ki tāna e aroha ai, e whiua ana hoki e ia ngā tama katoa e whakatamarikitia ana ki a ia.”
HEB 12:7 Hei pakinga tā koutou e manawanui ai; e rite ana tā te Atua meatanga ki a koutou ki tāna ki ngā tama tupu. Ko wai hoki te tama e kore e pākia e tōna pāpā?
HEB 12:8 Ki te kāhore ia ō koutou pakinga, te mea e whakawhiwhia ana ki te katoa, he pōriro koutou, ehara i te tama.
HEB 12:9 Tētahi, he mātua anō ō tātou nō te wāhi ki te kikokiko, he mea papaki tātou nā rātou; i hopohopo anō tātou ki a rātou. Kaua ianei e nui noa atu tō tātou ngohengohe ki te Matua o ngā wairua, kia ora ai?
HEB 12:10 Ko tā rātou papaki hoki he torutoru nei ngā rā, he mea anō nā tā rātou ake i whakaaro ai; ko tā tēnei ia hei pai mō tātou, kia whiwhi ai tātou ki tōna tapu.
HEB 12:11 Ko ngā pakinga katoa, e kore e kīia ināianei hei whakahari, engari hei whakapōuri; muri iho ia ka puta mai te hua rangimārie o te tika, ki te hunga e whakamahia ana ki taua mea.
HEB 12:12 Heoi, kia ara ngā ringaringa kua tukua iho, me ngā turi ngoikore,
HEB 12:13 hangā hoki ētahi huarahi tika mō ō koutou waewae, kei whakapeaua kētia atu te kopa; engari kia ora ake i te mate.
HEB 12:14 Whāia te rongo kia mau ki te katoa, me te tapu hoki, ki te kāhore hoki tēnei e kore tētahi tangata e kite i te Ariki.
HEB 12:15 Me te titiro mārie kei hapa tētahi i tō te Atua aroha noa; kei pihi ake tētahi pakiaka o te kawa hei whakararuraru, e poke ai te tokomaha.
HEB 12:16 Kei moepuku tētahi, kei whakarihariha rānei, kei pērā me Ēhau; i hokona rā e ia tōna mātāmuatanga ki te kainga kotahi.
HEB 12:17 E mātau ana hoki koutou ki tōna hiahia i muri kia riro i a ia te manaaki, ā, kapea ana ia. Kīhai hoki i kitea he wāhi mō te rīpenetā; i rapua mārietia anō e ia me te heke anō o ngā roimata.
HEB 12:18 Ehara hoki i te mea kua tae koutou ki te maunga e taea te whakapā atu, ki te ahi e kā ana, ki te pango kerekere, ki te pōuri, ki te tūpuhi,
HEB 12:19 ki te tangi o te tētere, ki te reo e kōrero ana; i īnoi rā te hunga i rangona ai kia kaua he kupu ki a rātou i muri iho.
HEB 12:20 Kīhai hoki rātou i kaha ake ki te mea i whakaritea mai, “Nā, ahakoa he kararehe e pā atu ki te maunga, me āki ki te kōhatu.”
HEB 12:21 Koia anō te mataku o te mea i puta mai rā, i mea ai a Mohi, “Mataku rawa ahau, wiri rawa.”
HEB 12:22 Engari kua tae nei koutou ki Maunga Hiona, ki te pā o te Atua ora, ki Hiruhārama i te rangi, ki ngā mano tini o ngā anahera,
HEB 12:23 ki te huihui nui, ki te hāhi o ngā mātāmua, kua oti te tuhituhi ki te rangi, ki te Atua hoki, ki te kaiwhakawā o ngā tāngata katoa, ki ngā wairua anō o te hunga tika kua oti te mea kia tino tika,
HEB 12:24 ki a Īhu anō hoki, ki te takawaenga o te kawenata hou, ki ngā toto o te tāuhiuhinga, he pai ake nei ngā kōrero i tō Āpera.
HEB 12:25 Kia mahara kei whakarere koutou i tēnei e kōrero mai nei. Ki te mea hoki kīhai i mawhiti te hunga i paopao ki tērā i kōrero rā i runga i te whenua, inā e kore rawa anō tātou, ki te tahuri kē atu i tēnei kua kōrero mai nei i te rangi.
HEB 12:26 Ngāueue ana te whenua i tōna reo i reira; ināianei ia kua puaki tāna kupu whakaari, kua mea ia, “Kia kotahi anō meatanga, ā, ehara i te mea ko te whenua anake, ko te rangi anō hoki tāku e whakangāueue ai.”
HEB 12:27 Ko taua kupu nei hoki, “Kia kotahi meatanga,” hei whakakite i te putanga kētanga o ngā mea ka whakangāueuetia rā, he mea hanga hoki, mau tonu iho ai ngā mea e kore nei e whakangāueuetia.
HEB 12:28 Nā, ka riro nei i a tātou he kīngitanga e kore e taea te whakangāueue, kia whiwhi tātou ki te aroha noa e manakohia mai ai tā tātou e mahi nei ki te Atua i runga i te hopohopo, i te wehi;
HEB 12:29 he ahi hoki e kai ana tō tātou Atua.
HEB 13:1 Kia mau tonu te aroha ki ngā tēina.
HEB 13:2 Kei wareware ki te atawhai manuhiri; nā tēnei hoki i whakamanuhiri anahera ai ētahi, kīhai anō i mātau atu.
HEB 13:3 Maharatia ngā herehere, me te mea nō koutou tahi te hereherenga; me te hunga hoki e whakatupuria kinotia ana, kei te tinana nā hoki koutou.
HEB 13:4 Meinga te mārena hei mea hōnore mā te katoa, ā, kaua te moenga e tukua kia poke. Ko te hunga moepuku ia, me te hunga pūremu, e whakataua e te Atua te hē ki a rātou.
HEB 13:5 Whakakāhoretia atu te mahi apo taonga; kāti anō ngā mea mā koutou ko ngā mea i a koutou nā. Kua mea mai hoki ia, “E kore ahau e whakarere i a koe, e kore anō hoki e mawehe i a koe.”
HEB 13:6 Heoi, ka māia tātou ki te kī ake: “Kei tōku taha te Ariki, e kore ahau e mataku ki tā te tangata e mea ai ki ahau.”
HEB 13:7 Kia mahara ki te hunga e tohutohu ana i a koutou, kua kōrero nei i te kupu a te Atua ki a koutou. Tirohia te tukunga iho o tā rātou whakahaere, kia rite tō koutou ki tō rātou whakapono.
HEB 13:8 Tūturu tonu a Īhu Karaiti inanahi, ināianei, ā ake ake.
HEB 13:9 Kei kāhakihakina koutou e ngā whakaakoranga maha, e ngā mea poka hou ake. He mea pai hoki kia whakaūkia te ngākau ki runga i te aroha noa; ehara i te mea ki ngā kai, kāhore hoki he pai o ēnā mea mō te hunga nā rātou nei tērā mahi.
HEB 13:10 He āta anō tā tātou, e kore nei e tika kia kainga tōna e te hunga e mahi ana i tā te tapenākara.
HEB 13:11 Nā, ko ngā kararehe nō rātou nei ngā toto e mauria ana e te tohunga nei mō te hara ki roto ki te Wāhi Tino Tapu, e tahuna ana ngā tinana o ērā ki waho o te puni.
HEB 13:12 Nā reira hoki a Īhu, i tāna whakatapunga i te iwi ki ōna toto ake anō, i mamae ai ki waho o te kūwaha.
HEB 13:13 Nā, kia haere atu tātou ki a ia ki waho o te puni, me te mau anō tātou i tōna tāwainga.
HEB 13:14 Kāhore hoki he pā tūmau mō tātou i konei, engari e rapu ana tātou i tētahi i roto i ngā wā ā muri nei.
HEB 13:15 Nā, kia tāpaea atu e tātou ki runga ki a ia i ngā wā katoa te whakamoemiti ki te Atua hei whakahere, arā te hua o ngā ngutu e whakawhetai ana ki tōna ingoa.
HEB 13:16 Kei wareware hoki ki te mahi pai, ki te atawhai. E manakohia ana hoki e te Atua ngā patunga tapu pērā.
HEB 13:17 Kia ngohengohe ki ō koutou kaitohutohu, kia ngāwari ki tā rātou kupu; e mataara ana hoki rātou ki ō koutou wairua, ā, me kōrero anō e rātou ā mua te tikanga o ā rātou mahi. Kia hari ai rātou ina mea i tēnei, kia kaua hoki e pōuri; kāhore hoki he pai o tēnei mō koutou.
HEB 13:18 Īnoi mō mātou; ū tonu hoki tō mātou whakaaro ki tō mātou hinengaro he pai, e hiahia ana hoki mātou kia tika tā mātou whakahaere i ngā mea katoa.
HEB 13:19 I kaha rawa ai tāku whakahau ki a koutou kia meatia tēnei, he mea kia wawe ai ahau te whakahokia atu ki a koutou.
HEB 13:20 Nā, mā te Atua o te rangimārie, nāna nei i whakahoki mai i roto i te hunga mate tō tātou Ariki, a Īhu, taua Hēpara nui o ngā hipi, he meatanga nā ngā toto o te kawenata mutungakore,
HEB 13:21 māna koutou e mea kia tino tika i runga i ngā mahi pai katoa, kia mahia anō e koutou tāna i pai ai. Māna e mahi i roto i a koutou te mea e āhuareka ana ki tāna titiro, i roto anō i a Īhu Karaiti; waiho atu i a ia te korōria ake ake. Āmine.
HEB 13:22 He kupu anō tēnei nāku ki a koutou, e ōku tēina, āta whakarangona mai te kupu whakahau; he torutoru nei hoki ngā kupu kua tuhituhia atu nei e ahau ki a koutou.
HEB 13:23 Kia mātau koutou kua tukua ki waho tō tātou teina, a Tīmoti. Ki te haere wawe mai ia, ko māua tahi e kite i a koutou.
HEB 13:24 Oha atu ki te hunga katoa e tohutohu ana i a koutou, ki te hunga tapu katoa anō hoki. Tēnei te oha atu nei ki a koutou te hunga o Itari.
HEB 13:25 Kia tau te aroha noa ki a koutou katoa. Āmine.
JAM 1:1 Nā Hēmi, nā te pononga a te Atua, a te Ariki hoki, a Īhu Karaiti, Ki ngā hapū kotahi tekau mā rua e noho marara ana: Tēnā koutou.
JAM 1:2 Kīia iho, e ōku tēina, he mea hari nui ina taka koutou ki ngā whakamātautauranga maha;
JAM 1:3 e mātau ana hoki koutou, ko te whakamātautauranga o tō koutou whakapono hei mahi i te manawanui.
JAM 1:4 Nā, kia puta rawa te mahi a te manawanui, kia tino tika ai koutou, kia toitū ai, tē hapa i tētahi mea.
JAM 1:5 Ki te hapa tētahi o koutou i te mātauranga, me īnoi ia ki te Atua, e hōmai nui nei ki te katoa, kāhore hoki āna tāwai mai; ā, ka hōmai ki a ia.
JAM 1:6 Otirā, me īnoi whakapono ia, kaua e ruarua. Ko te tangata ruarua hoki, tōna rite kei te ngaru o te moana, e pūhia ana e te hau, e ākina ana.
JAM 1:7 Kaua hoki taua tangata e mea, e whiwhi ia ki tētahi mea i te Ariki.
JAM 1:8 E kore te tangata ngākau rua e ū i āna hanga katoa.
JAM 1:9 Ko te teina iti, kia whakamanamana ia i te mea ka whakanekehia ake ia,
JAM 1:10 me te tangata taonga anō, i te mea ka whakaititia. Ka memeha atu hoki ia, ānō he puāwai tarutaru.
JAM 1:11 Ko te putanga mai hoki o te rā me te hau wera anō, nā, kua maroke te tarutaru, kua ngahoro tōna puāwai, ā, ngaro iho te ātanga o tōna āhua. Ka pērā anō te tangata taonga, ka memeha atu i ōna hāereerenga.
JAM 1:12 Ka hari te tangata e ū ake ana ki te whakamātautauranga. Nō te mea hoki ka oti ia te whakamātautau, ka whiwhi ia ki te karauna o te ora, kua whakaaria mai nei e te Ariki mō te hunga e aroha ana ki a ia.
JAM 1:13 Kaua tētahi e mea ina whakamātautauria, “E whakamātautauria ana ahau e te Atua.” E kore hoki te Atua e taea te whakamātautau e te kino, e kore anō hoki ia e whakamātautau i tētahi.
JAM 1:14 Engari he mea whakamātautau te tangata, i a ia e kūmea ana, e poaina ana e tōna hiahia ake anō.
JAM 1:15 Nā, i te hapūtanga o te hiahia, ka whānau ko te hara; ā, i te otinga o te hara, ka whānau ko te mate.
JAM 1:16 Kei whakapōhēhētia koutou, e ōku tēina aroha.
JAM 1:17 Nō runga ngā hōmaitanga papai katoa, ngā mea katoa e tino tika ana, he mea heke iho nō te Matua o ngā whakamārama, kāhore nei ōna putanga kētanga, kāhore hoki he ātārangi o te tahuri.
JAM 1:18 Nā tōna hiahia ake anō tātou whānau ai, he meatanga nā te kupu o te pono, kia meinga ai tātou me he mātāmua mō āna mea i hanga ai.
JAM 1:19 Kei te mōhio koutou ki tēnei, e ōku hoa aroha, kia hohoro ngā tāngata katoa ki te whakarongo, kia pūhoi ki te kōrero, kia pūhoi ki te riri.
JAM 1:20 E kore hoki tā te Atua tika e mahia e tō te tangata riri.
JAM 1:21 Heoi, me whakarere katoa atu ngā tikanga poke, me te hara e hua tonu nei, me tahuri mārire ki te kupu kua oti te whakatō iho; e taea hoki e tēnei te whakaora ō koutou wairua.
JAM 1:22 Hei kaimahi anō koutou i te kupu, kaua hei kaiwhakarongo anake, kei tinihangatia koutou e koutou anō.
JAM 1:23 Ki te mea hoki he kaiwhakarongo tētahi i te kupu, ehara nei i te kaimahi, he rite ia ki te tangata e mātakitaki ana ki tōna kanohi māori i roto i te whakaata:
JAM 1:24 i tōna mātakitakinga hoki i a ia anō, haere ana, wareware tonu ake he āhua pēhea rānei tōna.
JAM 1:25 Tēnā ko te tangata e āta titiro iho ana ki te ture tino tika, ki te mea herekore, ā, ka ū tonu, he kaiwhakarongo anō ia e kore e wareware, engari, e mahi ana i te mahi, e hari anō tēnei i tāna mahi.
JAM 1:26 Ki te mea he āhua karakia tō tētahi i roto i a koutou, ki te kore e parairetia e ia tōna arero, he tinihanga hoki tāna ki tōna ngākau, he maumau karakia tāna.
JAM 1:27 Ko te karakia pono, ko te mea poke kore ki te aroaro o te Atua Matua, ko ia tēnei: Ko te tirotiro i ngā pani i ngā pouaru i ō rātou mate, ko te tiaki i a ia ake kei poke i te ao.
JAM 2:1 E ōku tēina, kaua e waiho i runga i te whakapai kanohi te whakapono ki tō tātou Ariki korōria, ki a Īhu Karaiti.
JAM 2:2 Ki te tomo mai hoki tētahi tangata ki tō koutou whare karakia he mōwhiti kōura nei tōna, he kākahu pai; ā, ka tomo mai anō he rawakore, he kākahu paru nei tōna;
JAM 2:3 ā, ka titiro atu koutou ki te tangata i te kākahu pai, ka mea ki a ia, “E noho koe ki konei, ki te wāhi pai,” ā, ka mea ki te rawakore, “E tū koe ki konā, e noho rānei ki konei, ki raro i tōku tūranga waewae.”
JAM 2:4 He teka ianei he tikanga tahatahi tā koutou, kua hē hoki ngā whakaaro o koutou, o ngā kaiwhakawā?
JAM 2:5 Whakarongo, e ōku tēina aroha. Kāhore anō koia te Atua i whiriwhiri i ngā rawakore o tēnei ao, kia whiwhi ki te taonga, arā ki te whakapono, kia riro hoki i a rātou te rangatiratanga kua whakaaria mai e ia mō te hunga e aroha ana ki a ia?
JAM 2:6 Heoi, ka whakakino nā koutou ki te rawakore. He teka ianei ko ngā tāngata taonga hei whakatupu rangatira ki a koutou, hei tōtō i a koutou ki ngā whakawākanga?
JAM 2:7 He teka ianei he hunga kohukohu rātou i te ingoa pai kua whakahuatia nā ki a koutou?
JAM 2:8 Engari, ki te rite i a koutou te ture kīngi, tō te karaipiture, “Me aroha e koe tōu hoa, ānō ko koe,” ka pai tā koutou hanga.
JAM 2:9 Tēnā ki te whakapai kanohi koutou, e mahi ana koutou i te hara, ka mau hoki i te ture he hunga hē.
JAM 2:10 Ki te mau hoki te ture katoa i tētahi tangata, ā, ka kotahi anō te mea e tapepa ai ia, kua hē ia ki te katoa.
JAM 2:11 I tāna kīanga mai hoki, “Kaua e pūremu,” i kī mai anō ia, “Kaua e patu tangata.” Nā, ahakoa kāhore koe e pūremu, ki te patu tangata koe, kua takahia e koe te ture.
JAM 2:12 Kia rite tā koutou kōrero, tā koutou mahi, ki tā te hunga e whakawākia ā mua i runga i ngā tikanga o te ture herekore.
JAM 2:13 Ko te tangata hoki kāhore ōna ngākau tohu, e kore e tohungia ina whakawākia; ka whakapehapeha ia te ngākau tohu ki te whakawā.
JAM 2:14 He aha te pai, e ōku tēina, ki te mea tētahi he whakapono tōna, ā, kāhore āna mahi? E taea rānei ia te whakaora e taua whakapono?
JAM 2:15 Ki te mea e noho tahanga ana tētahi teina, tuahine rānei, ki te mea rānei kua kore he kai māna mō tēnei rā, mō tēnei rā,
JAM 2:16 ā, ka mea atu tētahi o koutou ki a rātou, “Haere mārie, kia mahana, kia mākona,” ā, kāhore e hoatu e koutou ki a rātou ngā mea e matea ana e te tinana; he aha te pai?
JAM 2:17 Waihoki ko te whakapono, ki te kāhore āna mahi, he mea mate i roto anō i a ia.
JAM 2:18 Nā, he kī tēnei mā tētahi, “He whakapono tōu, he mahi āku.” Whakakitea mai ki ahau tōu whakapono motu kē i āu mahi, ā, māku, arā mā āku mahi, e whakakite atu tōku whakapono ki a koe.
JAM 2:19 E whakapono ana koe kotahi tonu te Atua; he pai tāu meatanga. E whakapono ana hoki ngā rēwera, me te wiri anō.
JAM 2:20 Heoi, e pai ana rānei koe kia mātau, e te kūware, he mea huakore te whakapono ki te kāhore he mahi?
JAM 2:21 Kīhai ianei a Āperahama, tō tātou matua, i tika i ngā mahi, i a ia i whakaeke atu ai i tāna tama, i a Īhaka, ki runga ki te āta?
JAM 2:22 Ka kite rānei koe i mahi tahi te whakapono me āna mahi, nā ngā mahi hoki i tino rite ai te whakapono?
JAM 2:23 Ā, i rite anō tā te karaipiture e mea nei, “I whakapono a Āperahama ki te Atua, ā, ka whakairia ki a ia hei tika,” ka huaina anō hoki ia, “Ko te hoa o te Atua.”
JAM 2:24 Heoi, ka kite koutou kei ngā mahi he tika mō te tangata, ehara i te mea kei te whakapono anake.
JAM 2:25 Waihoki ko Rahapa, te wahine kairau, kīhai ianei ia i whakatikaia e ngā mahi, i a ia i whakamanuhiri ai i ngā karere, ā, tukua atu ana rāua e ia rā tētahi ara kē?
JAM 2:26 Ka rite hoki ki te tinana ka mate nei ki te kāhore te manawa ora, waihoki ko te whakapono, ki te kāhore he mahi, he mea mate.
JAM 3:1 Kei tokomaha koutou ki te whakaako, e ōku tēina, e mātau ana hoki koutou rahi ake te hē e tau ki a tātou.
JAM 3:2 He maha hoki ngā mea e tapepa ai tātou katoa. Ki te kore tētahi e tapepa i te kupu, he tino tika tēnā tangata, e taea anō e ia te paraire te tinana katoa.
JAM 3:3 Nā, ka pangā nei e tātou ngā paraire ki ngā māngai o ngā hōiho, kia rongo ai rātou ki a tātou; ā, pareparea ana e tātou tō rātou tinana katoa.
JAM 3:4 Whakaaroa ngā kaipuke, ngā mea nunui rawa nei, he mea āki nei e ngā hau kaha, heoi, e pareparea ana e te urungi nohinohi rawa ki te wāhi e hiahia ai te hinengaro o te kaiurungi.
JAM 3:5 Waihoki ko te arero he wāhi nohinohi ia, nui atu hoki tōna whakapehapeha. Nanā, te nui o te wahie e whakaūngia ana e te ahi nohinohi!
JAM 3:6 He kāpura anō hoki te arero, ko te ao māori o te kino; pērā tonu te arero i roto i ō tātou wāhi, poke iho i a ia te tinana katoa, ngiha ana i a ia huri noa ngā mea katoa o te tangata, he mea whakaū anō ia nā te rēinga.
JAM 3:7 Ko ngā momo kararehe katoa hoki, ko ngā manu, ko ngā mea ngōkingōki, ko ngā mea i te moana, e whakararatatia ana, kua whakararatatia anō hoki i mua e te tangata.
JAM 3:8 Ko te arero ia e kore tēnā e taea e tētahi tangata te whakarata; he kino ia e kore e taea te pēhi, kī tonu i te wai whakamate.
JAM 3:9 Ko tā tātou mea ia hei whakapai i te Atua, i te Matua; ko tā tātou mea anō ia hei kanga i ngā tāngata, i hangā kia rite ki te Atua.
JAM 3:10 Kotahi tonu te māngai puta ake ana i roto ko te manaaki, ko te kanga. Ehara i te pai, e ōku tēina, kia pēnei ēnei mea.
JAM 3:11 E pupū ake ana rānei i te puna ko te reka, ko te kawa, i roto i te poka kotahi?
JAM 3:12 E hua rānei he ōriwa mā te piki, e ōku tēina, he piki rānei mā te wāina? E kore anō hoki e pupū ake i te wai tai he wai reka.
JAM 3:13 Ko wai te tangata whakaaro nui, te tangata mātau i roto i a koutou? Mā tōna whakahaere pai e whakaatu āna mahi, kei runga i te māhaki o te whakaaro nui.
JAM 3:14 Tēnā ko tēnei, he hae nanakia tō koutou, he totohe i roto i ō koutou ngākau, kaua e whakamanamana, kaua hoki e teka ki te pono.
JAM 3:15 Ehara tēnei mātauranga i te mea e heke iho ana i runga; nō te whenua ia, nō te ngākau māori, nō te rēwera.
JAM 3:16 I te wāhi hoki e noho ai te hae me te totohe, ko reira anō te noho kino me ngā mahi hē katoa.
JAM 3:17 Ko te mātauranga ia o runga, he mea kinokore i te tuatahi, muri iho he rangimārie, he ngāwari, he hohoro ki te whakarongo, kī tonu i te mahi tohu, i ngā hua pai, kāhore āna whiriwhiringa i te tangata, kāhore ōna tinihanga.
JAM 3:18 Ā, e ruia ana ngā hua o te tika i roto i te rangimārie mā te hunga hohou rongo.
JAM 4:1 Nō hea ngā pakanga me ngā ngangaretanga i roto i a koutou? He teka ianei nō tēnei, nō ō koutou hiahia e whawhai ana i roto i ō koutou wāhi?
JAM 4:2 E hiahia ana koutou, heoi, kāhore e whai rawa; e patu ana koutou. E minamina ana, ā, kāhore e whiwhi. E ngangare ana, e whawhai ana, heoi, kāhore e whai rawa, nō te mea kāhore koutou e īnoi.
JAM 4:3 E īnoi ana koutou, ā, kāhore e riro i a koutou, nō te mea e īnoi hē ana koutou, kia whakapaua ai ki ō koutou hiahia.
JAM 4:4 E ngā tāngata pūremu, e ngā wāhine pūremu, kāhore ianei koutou e mātau ko te aroha o te ao he hoariritanga ki te Atua? Nā, ko te tangata e hiahia ana kia meinga hei hoa aroha mō te ao, e mea ana i a ia hei hoariri ki te Atua.
JAM 4:5 Ki tō koutou whakaaro he kōrero noa rānei tā te karaipiture, “E hiahia ana rānei te Wairua, i meinga nei e ia kia noho i roto i a tātou, kia tae rawa ki te hae”?
JAM 4:6 Nui atu ia tāna hōmai i te aroha noa; koia tāna e mea nei, “Ka pakeke te Atua ki tā te hunga whakapehapeha, ka hōmai ia i te aroha noa ki te hunga ngākau pāpaku.”
JAM 4:7 Nā, kia ngohengohe koutou ki tā te Atua. Tūria atu te rēwera, ā, ka oma atu ia i a koutou.
JAM 4:8 Whakatata atu ki te Atua, ā, ka whakatata mai ia ki a koutou. Horoia ō koutou ringaringa, e te hunga hara. Meinga ō koutou ngākau kia hēkore, e te hunga ngākau rua.
JAM 4:9 Kia pōuri koutou, kia puta te auē, te tangi. Kia puta kē tō koutou kata hei auē, tō koutou hari hei āhua whakapoururu.
JAM 4:10 Whakapāpaku koutou ki te aroaro o te Ariki, ā, māna koutou e whakateitei ake.
JAM 4:11 Kāti te ngautuarā tētahi ki tētahi, e ōku tēina. Ko te tangata e ngautuarā ana ki tōna teina, e whakahē ana hoki i tōna teina, e ngautuarā ana ia ki te ture, e whakahē ana i te ture; ki te whakahē ia koe i te ture, ehara koe i te kaimahi i te ture, engari he kaiwhakawā.
JAM 4:12 Kotahi tonu te kaiwhakatakoto ture, kei a ia te kaha hei whakaora, hei whakangaro. Ko wai rā koe e whakahē nā i tērā atu?
JAM 4:13 Tēnā, e te hunga e mea nei, “Hei āianei, hei āpōpō, ka haere mātou ki te pā rā, ā, ka noho ki reira, kia kotahi tau, ka hokohoko, ka whiwhi ki te taonga!”
JAM 4:14 Kāhore nā hoki koutou e mātau ki ngā mea o āpōpō. He aha oti tō koutou ora? He kohu rā, he iti nei te wā e puta mai ai, ā, kua memeha atu.
JAM 4:15 Te mea rā koutou, “Ki te pai te Ariki, ā, ka ora mātou, ka mea i tēnei mea, i tērā mea rānei.”
JAM 4:16 Tēnei ia koutou te whakamanamana nei ki ā koutou kupu whakaputa; he kino taua tū whakamanamana katoa.
JAM 4:17 Nā, ko te tangata e mātau ana ki te mea i te pai, ā, kāhore e meatia e ia he hara tērā nōna.
JAM 5:1 Tēnā, e te hunga taonga, e tangi koutou, auē ki ō koutou mate meāke nei puta mai.
JAM 5:2 Kua pirau ō koutou taonga, kua kainga ō koutou kākahu e te huhu.
JAM 5:3 Kua waikuratia tā koutou kōura, me tā koutou hiriwa; ko te waikura anō o aua mea hei kaiwhakaatu i tō koutou hē, hei kai hoki i ō koutou kikokiko, ānō he kāpura. Kua pae nā i a koutou he taonga mō ngā rā whakamutunga.
JAM 5:4 Nanā, kei te karanga te utu i kaiponuhia e koutou mā ngā kaimahi nāna i kokoti ā koutou māra, kua tae atu anō hoki ngā karanga a ngā kaikokoti ki ngā taringa o te Ariki o ngā Mano Tini.
JAM 5:5 Kua kai koutou i ngā kai papai i runga i te whenua, whāia ana e koutou a te tinana whakaahuareka; atawhaitia ana e koutou ō koutou ngākau, me te mea anō ko te rā okanga tēnei.
JAM 5:6 Whakatakā ana e koutou ki te hē, patua iho te mea tika, kīhai anō ia i pēhi atu i tā koutou.
JAM 5:7 Nā, tatari mārie koutou, e ōku tēina, ki te haerenga mai o te Ariki. Nā, tūmanako tonu te kaingaki ki ngā hua utu nui o te whenua, he mea tatari mārie atu nāna, kia tae mai rā anō tō mua me tō muri ua.
JAM 5:8 Tatari mārie anō hoki koutou. Kia ū ō koutou ngākau; kua tata hoki te haerenga mai o te Ariki.
JAM 5:9 Kaua e amuamu tētahi ki tētahi, e ōku tēina; kei whakatakā koutou ki te hē. Nanā, kei ngā tatau te kaiwhakawā e tū ana.
JAM 5:10 Ko ngā poropiti i kōrero nei i runga i te ingoa o te Ariki, waiho rātou, e ōku tēina, hei tauira mō te whakamanawanui ki ngā kino, mō te tatari mārie.
JAM 5:11 Nanā, ki tā tātou he hari te hunga e whakamanawanui ana. Kua rongo koutou ki te manawanui o Hopa, kua kite hoki i tō te Ariki whakamutunga, he nui tō te Ariki aroha, me tāna mahi tohu.
JAM 5:12 Ko te tuatahi ia o ngā mea katoa, e ōku tēina, kaua te rangi, kaua te whenua, kaua tētahi atu oati, e oatitia e koutou; engari me “Āe” tā koutou “Āe”, me “Kāhore” tā koutou “Kāhore,” kei taka koutou ki te whakawā.
JAM 5:13 Ki te pāngia tētahi o koutou e te mamae, me īnoi. Ki te koa te ngākau o tētahi, me waiata.
JAM 5:14 Ki te tūroro tētahi i roto i a koutou, me karanga e ia ki ngā kaumātua o te hāhi; ā, mā rātou e īnoi ki runga ki a ia, me te whakawahi anō i a ia ki te hinu i runga i te ingoa o te Ariki.
JAM 5:15 Ā, e ora te tūroro i te īnoi whakapono, mā te Ariki anō ia e whakaara ake; ki te mea hoki kua mahi hara ia, ka murua tōna hara.
JAM 5:16 Whākina ō koutou hē tētahi ki tētahi, me īnoi anō koutou tētahi mō tētahi, kia ora ai ō koutou mate. Nui atu te mana o te īnoi kaha a te tangata tika.
JAM 5:17 He tangata a Irāia, he rite tahi te ngākau ki ō tātou, heoi, ka kaha nei tāna īnoi kia kaua e ua; kore ake he ua ki runga ki te whenua, ā, e toru ngā tau, e ono ngā marama.
JAM 5:18 Īnoi ana anō ia, ā, ka hōmai he ua e te rangi, nā, hua ana ngā hua o te whenua.
JAM 5:19 E ōku tēina, ki te kotiti kē tētahi o koutou i te pono, ā, ka meinga e tētahi kia tahuri mai anō,
JAM 5:20 kia mātau ia, ko te tangata i tahuri ai te tangata hara i te hē o tōna ara, e ora i a ia he wairua kei mate, he tini anō ngā hara ka hīpokina e ia.
1PE 1:1 Nā Pita, he āpōtoro nā Īhu Karaiti, Ki te hunga whiriwhiri e noho manene ana i Ponoto, i Karatia, i Kaporokia, i Āhia, i Pitinia.
1PE 1:2 He hunga kua oti te whiriwhiri, te pērā anō me tā te Atua Matua i mātau ai i mua, i runga i te whakatapunga a te Wairua, kia ngohengohe, kia tāuhiuhia ki ngā toto o Īhu Karaiti. Kia whakanuia ki a koutou te aroha noa, me te rangimārie.
1PE 1:3 Kia whakapaingia te Atua, te Matua o tō tātou Ariki, o Īhu Karaiti, nāna nei, nā tāna mahi tohu e nui nei, tātou i whānau hou ai ki te tūmanako ora, i a Īhu Karaiti ka ara ake nei i te hunga mate,
1PE 1:4 ki te kāinga kāhore ōna pirau, kāhore ōna poke, e kore anō hoki e memeha, e puritia mai nei i te rangi mō koutou.
1PE 1:5 Mō te hunga e tiakina nei e te kaha o te Atua i runga i te whakapono, kia taea rā anō te whakaoranga kua rite noa ake nei, ā, ka whakakitea mai ā te wā whakamutunga.
1PE 1:6 Nui atu tō koutou koa ki tēnei, ahakoa pōuri mō te wā iti nei, ki te ai he pōuri, i ngā whakamātautauranga maha.
1PE 1:7 Nā, ko te whakamātautauranga o tō koutou whakapono, nui atu tōna pai i tō te kōura e memeha nei, āe rā, i te mea kua oti te whakamātautau ki te kāpura, ā, ka kitea tōna tukunga iho, he whakamoemiti, he hōnore, he korōria, ā te whakakitenga mai o Īhu Karaiti.
1PE 1:8 Kāhore nei ia e kitea e koutou, heoi, arohaina ana e koutou; ahakoa kāhore koutou e kite ināianei, heoi, i a koutou ka whakapono nei ki a ia, nui atu te koa, he koa korōria, e kore e taea te kōrero;
1PE 1:9 i te mea, ka whiwhi ki te tukunga iho o tō koutou whakapono, ki te whakaoranga o ō koutou wairua.
1PE 1:10 Ko taua whakaora, he mea āta rapu he mea whakataki iho nā ngā poropiti i poropititia ai te aroha noa, arā tēnei i a koutou nei.
1PE 1:11 I a rātou i rapu ai ko tēhea wā, he wā pēhea hoki, tā te Wairua o te Karaiti i roto i a rātou i whakapuaki ai, i a ia e whakaatu ana i mua i ngā mamae o te Karaiti, i te korōria anō hoki ō muri iho.
1PE 1:12 I whakakitea mai nei anō ki a rātou, ehara i te mea mō rātou ake, engari mō tātou, ngā mea i minitatia rā e rātou, kua kōrerotia nei hoki ki a koutou ināianei e te hunga i kauwhautia ai te rongopai ki a koutou, he meatanga nā te Wairua Tapu i tonoa mai nei i te rangi. Hiahia tonu ngā anahera ki te mātakitaki ki aua mea.
1PE 1:13 Heoi, whītikiria ngā hope o ō koutou hinengaro, kia mataara, tūmanako atu, ā taea noatia te mutunga, ki te aroha noa e kawea mai ki a koutou ā te whakakitenga mai o Īhu Karaiti.
1PE 1:14 Kia rite ki ngā tamariki ngohengohe; kei rite te āhua ki ngā hiahia taikaha ō mua i a koutou e kūware ana.
1PE 1:15 Engari kia rite ki te kaikaranga i a koutou, he tapu hoki ia; kia tapu anō hoki tā koutou whakahaere katoa;
1PE 1:16 kua tuhituhia nā hoki, “Kia tapu koutou; he tapu hoki ahau.”
1PE 1:17 Nā, ki te karanga koutou ki te Matua, ko ia nei hei whakawā mō te mahi a tēnei, a tēnei, kāhore anō hoki āna whakapai kanohi, e noho i runga i te mataku i a koutou e noho manene nei.
1PE 1:18 Kia mahara ehara ngā mea pirau, te hiriwa, te kōura, i te utu mō koutou, i puta mai ai i ā koutou ritenga tekateka i whakarērea mai e ō koutou mātua;
1PE 1:19 engari he toto utu nui me te mea nō te reme kohakore, poke kore, arā nō te Karaiti.
1PE 1:20 I whakaritea nei i mua o te orokohanganga o te ao, ā, kua whakakitea mai nei i te mutunga o ngā wā, he whakaaro hoki ki a koutou,
1PE 1:21 kua meinga nei e ia kia whakapono ki te Atua, nāna nei ia i whakaara ake i te mate, ā, hoatu ana ki a ia he korōria; kia whai whakapono ai koutou, kia whai tūmanakotanga atu ai ki te Atua.
1PE 1:22 Kua horoia nei e koutou ō koutou wairua, i a koutou kua meinga nei e te Wairua kia ngohengohe ki te pono, e kore iho ai he tinihanga o te aroha ki ngā tēina, nā, kia nui te aroha o tētahi ki tētahi, he aroha-ā-ngākau.
1PE 1:23 He mea whānau hou hoki koutou, ehara i te mea nō te purapura pirau, engari nō te mea piraukore, nā te kupu a te Atua, e ora nei, e ū tonu nei, ake ake.
1PE 1:24 “Rite tonu hoki ki te tarutaru ngā kikokiko katoa; ko te korōria katoa anō hoki o te tangata, ānō he puāwai tarutaru. E maroke te tarutaru, e ngahoro tōna puāwai;
1PE 1:25 ko te kupu ia a te Ariki, mau tonu ake ake.” Ko te kupu anō tēnei o te rongopai e kauwhautia atu nei ki a koutou.
1PE 2:1 Nā, whakarērea atu ngā mauāhara katoa, ngā hīanga katoa, ngā tinihanga, ngā hae, me ngā kupu ngautuarā katoa.
1PE 2:2 Kia rite ki ngā tamariki whānau hou, hiahiatia atu te waiū kore tinihanga o te kupu, ko te mea hoki ia e tupu ai koutou ki te ora tonu;
1PE 2:3 ki te mea kua whakamātautau koutou he tikanga ngāwari tā te Ariki.
1PE 2:4 Ko tō koutou haerenga mai ki a ia ki te kōhatu ora, i whakakāhoretia nei e ngā tāngata, he mea whiriwhiri ia nā te Atua, he mea utu nui;
1PE 2:5 ka hangā hoki koutou, ānō he kōhatu ora hei whare, arā hei mea wairua, hei tohungatanga tapu, hei tāpae atu i ngā patunga tapu, arā i ngā mea wairua, he mea e manakohia ana e te Atua i runga i a Īhu Karaiti.
1PE 2:6 Mō reira, tērā wāhi o te karaipiture: “Nā, ka whakatakotoria e ahau ki Hiona te tino kāmaka o te kokonga, he mea whiriwhiri, he mea utu nui, ā, ko te tangata e whakapono ana ki a ia e kore e tukua kia whakamā.”
1PE 2:7 Ki a koutou e whakapono nā he mea utu nui ia; ki te hunga whakapono kore ia, “Ko te kāmaka i kapea e ngā kaihanga, kua meinga tēnei hei upoko mō te kokonga.
1PE 2:8 Hei kāmaka tūtukitanga waewae ia, hei toka whakahinga.” Ki te hunga e tūtuki ana ki te kupu, ki te hunga whakapono kore; i whakaritea mai hoki rātou hei pēnei.
1PE 2:9 Ko koutou ia he iwi whiriwhiri, he tohungatanga kīngi, he iwi tapu, he iwi kua riro pū mai mā te Atua; hei whakapuaki i ngā pai o te kaikaranga i a koutou i roto i te pōuri ki tōna mārama whakamīharo.
1PE 2:10 I mua ehara i te iwi, ināianei ia he iwi nā te Atua: kīhai nei i tohungia i mua, ināianei ia ka tohungia.
1PE 2:11 E ōku hoa aroha, ko tāku whakahau atu tēnei, he hunga noho noa, he manene hoki koutou, kia mawehe i ngā hiahia kikokiko e whawhai nei ki te wairua.
1PE 2:12 Kia pai tā koutou whakahaere i roto i ngā tauiwi, mō tā rātou whakapae ki a koutou, he kaimahi koutou i te kino, nā, kia whakakorōria rātou i te Atua ā te rā o te tirohanga mai, ina kite i ā koutou mahi pai.
1PE 2:13 Kia ngohengohe koutou ki ngā tikanga katoa a te tangata, he whakaaro ki te Ariki; ahakoa ki te kīngi, ki te mea nui rawa;
1PE 2:14 ki ngā kāwana rānei, ki te hunga i tonoa mai e ia hei whiu i ngā kaimahi i te kino, hei whakamoemiti ia mō te hunga e mahi ana i te pai.
1PE 2:15 Ko tā te Atua hoki tēnei i pai ai, kia ai ā koutou mahi pai hei puru mō ngā māngai kūware o ngā tāngata whakaarokore.
1PE 2:16 He hunga ehara nei i te herehere, otiia e kore e waiho tō koutou herekoretanga hei hīpoki mō te mauāhara, engari kia rite ki ngā pononga a te Atua.
1PE 2:17 Whakahōnoretia ngā tāngata katoa. Arohaina ngā tēina, ngā tuākana. E wehi ki te Atua. Whakahōnoretia te kīngi.
1PE 2:18 E ngā pononga, kia ngohengohe ki ō koutou rangatira, kia nui te wehi; he teka ki te hunga pai, ki te hunga ngāwari anake, ki te hunga whanokē anō hoki.
1PE 2:19 He mea whai whakapainga hoki tēnei, ki te mea nā te mahara ki te Atua ka whakamanawanui ai tētahi ki ngā mea whakapōuri, i a ia e whakamamaetia hētia ana.
1PE 2:20 He aha hoki te korōria, ki te mea ka whakamanawanui, i te mea kua hara koutou, ā, ka motokia? Tēnā ka whakamanawanui, i te mea ka mahi pai, ā, ka whakamamaetia, he mea whai whakapainga tēnei ki te Atua.
1PE 2:21 Nō te mea i karangatia koutou ki tēnei, i whakamamaetia hoki a te Karaiti mō koutou, waiho iho ana e ia he tauira mō koutou, kia aru ai koutou i ōna tapuwae.
1PE 2:22 “Kīhai nei ia i mea i te hara, kāhore anō hoki i kitea te tinihanga i tōna māngai.”
1PE 2:23 Ka taunutia, kīhai ia i taunu atu; ka whakamamaetia, kīhai ia i whakatuma; engari, i tuku i a ia ki te kaiwhakawā tika.
1PE 2:24 Nāna ake i waha ō tātou hara, nā tōna tinana ake, i runga i te rākau, kia whakatūpāpaku ai tātou ki te hara, kia ora ai ki te tika. Nā ōna kārawarawa, i ora ai ō koutou mate.
1PE 2:25 I rite hoki koutou ki te hipi kua kotiti kē; heoi, kua hoki tēnei koutou ki te Hēpara, ki te Pīhopa, o ō koutou wairua.
1PE 3:1 Waihoki e ngā wāhine, kia ngohengohe ki ā koutou tāne ake; ā, ki te turi ētahi ki te kupu, nā, i kore i te kupu, ko te whakahaere a ngā wāhine hei mea e riro mai ai rātou;
1PE 3:2 i a rātou e titiro ana ki te hēkore o tā koutou whakahaere me te hopohopo.
1PE 3:3 Ko te whakapaipai mō koutou, kauaka hei tō waho, kauaka hei te makawe i whiria, kauaka hei te whakapiringa o ngā mea kōura, kauaka hei te whakakākahuranga o ngā kākahu;
1PE 3:4 engari, hei te tangata ngaro o te ngākau, hei te kākahu e kore e pirau, arā te wairua māhaki, te wairua rangimārie, he mea utu nui hoki tēnei i te aroaro o te Atua.
1PE 3:5 He pēnei hoki i mua tā ngā wāhine tapu whakapaipai mō rātou, tā te hunga i whakaaro ki te Atua, ngohengohe tonu rātou ki ā rātou tāne ake.
1PE 3:6 Me Hera hoki i ngohengohe ki a Āperahama, ko te ariki hoki tāna ingoa mōna. Nāna hoki koutou tamariki, i a koutou e mahi pai ana, kāhore hoki e mataku i tētahi whakapāwera.
1PE 3:7 E ngā tāne hoki, kia rite ki tō te mātauranga tō koutou noho ki a rātou, whakawhiwhia te wahine ki te hōnore, ko te mea kaha kore hoki ia, ka uru tahi nei anō hoki kōrua ki te oranga ka hōmai noa nei; he mea kei āraia ā kōrua īnoi.
1PE 3:8 Nā, ko te whakamutunga nei o tāku, kia kotahi te whakaaro o te katoa, kia kotahi te ngākau, kia rite te aroha ki tō te tuakana, ki tō te teina, kia pai te ngākau, kia ngāwari.
1PE 3:9 Kaua e utua he kino ki te kino, he taunu ki te taunu; engari me manaaki; me te mahara anō kua karangatia koutou ki tēnei, arā, kia whiwhi koutou ki te manaaki.
1PE 3:10 Ki te mea hoki: “Tētahi kia aroha ki te ora, kia kite i ngā rā pai, me pēhi e ia tōna arero kei kino, ōna ngutu hoki kei kōrero tinihanga.
1PE 3:11 Me peka kē i te kino, me mahi i te pai; ko te rangimārie hei rapunga māna, hei whāinga atu māna.
1PE 3:12 Nō te mea hoki kei runga i te hunga tika ngā kanohi o te Ariki, me ōna taringa kei te tuwhera ki ā rātou īnoi. E hē mai ana ia te mata o te Ariki ki te hunga e mahi ana i te kino.”
1PE 3:13 Ko wai hoki hei hōmai i te hē ki a koutou, ki te aru koutou i te pai?
1PE 3:14 Otiia, ki te mea nā te whakaaro ki te tika i whakamamaetia ai koutou, ka hari koutou. Aua rā e mataku i tā rātou whakamataku, kaua e pāwera;
1PE 3:15 engari, whakatapua a te Karaiti hei Ariki i roto i ō koutou ngākau. Kia rite tonu hoki te kupu i a koutou i ngā wā katoa, hei whakahokinga atu mā koutou ki ngā tāngata katoa, e ui ana ki a koutou ki te mea e tūmanakohia atu nei e koutou; kia māhaki anō ia te ngākau, kia wehi.
1PE 3:16 Kia pai ō koutou hinengaro; mō tā rātou ngautuarā ki a koutou, e kī nei he kaimahi koutou i te kino, kia whakamā taua hunga e whakapae teka nā ki tā koutou whakahaere pai i roto i a te Karaiti.
1PE 3:17 Ki te mea hoki i a tātou e mahi ana i te pai ka takoto i te Atua he mamae mō tātou, erangi tērā i te mamae i a tātou e mahi ana i te kino.
1PE 3:18 Kotahi hoki whakamamaetanga o te Karaiti mō ngā hara, te tika mō te hunga hē, kia ārahina ai tātou e ia ki te Atua, i whakamatea ko te kikokiko, i whakaorangia ia ko te wairua.
1PE 3:19 Ko tōna anō tēnā i tōna haerenga ki te kauwhau ki ngā wairua i te whare herehere;
1PE 3:20 i turi nei i mua, i te mea e tatari ana te manawanui o te Atua i ngā rā i a Noa, i te mea e hangā ana te āka, ko te mea i ora ai ētahi wairua torutoru nei, arā tokowaru, i roto i te wai.
1PE 3:21 He mea whakarite ki tēnei te mea e whakaora nei i a koutou ināianei, arā te iriiri, ehara i te whakawāteatanga atu i te poke o te kikokiko, engari he whakaaetanga ake nā te hinengaro pai ki te Atua, he meatanga nā te aranga mai o Īhu Karaiti;
1PE 3:22 kua riro nei ki te rangi, kei te ringa matau anō ia o te Atua; kei raro hoki i a ia ngā anahera, ngā rangatiratanga, ngā kaha.
1PE 4:1 Nā, kua mamae nei o te Karaiti kikokiko mō tātou, e mau koutou ki ngā mea whawhai, arā ki taua whakaaro pū rā anō; ko te tangata hoki, kua mamae te kikokiko kua mutu te hara;
1PE 4:2 mō te wā e toe nei o te noho ki te kikokiko kia kaua i runga i ngā hiahia o te tangata, engari i tā te Atua i pai ai.
1PE 4:3 Kāti hoki mā tātou ko te wāhi o tō tātou ora kua pahemo nei, hei mahinga mā tātou i tā ngā tauiwi i pai ai, i a tātou i haere i runga i te hiahia taikaha, i ngā minamina, i te haurangi wāina, i te kakai, i te inu, i te karakia whakarihariha ki ngā whakapakoko.
1PE 4:4 He mea hou tēnei ki a rātou, arā tō koutou kāhore e rere tahi, e tōrere ki taua kino; ā, kōrero kino iho mō koutou.
1PE 4:5 Me kōrero anō rātou i ā rātou mahi ki a ia, e noho rite nei ki te whakawā i te hunga ora, i te hunga mate.
1PE 4:6 Mō konei rā i kauwhautia ai anō te rongopai ki te hunga kua mate, kia whakahēngia rātou, arā te kikokiko i runga i tā te tāngata, kia ora ia rātou, arā te wairua i runga i tā te Atua.
1PE 4:7 Kua tata ia te whakamutunga o ngā mea katoa; nā, kia whai whakaaro koutou, kia mataara, kia īnoi.
1PE 4:8 I te tuatahi o ngā mea katoa arohaina pūtia koutou e koutou anō; he tini hoki ngā hara ka hīpokina e te aroha.
1PE 4:9 Whakamanuhiritia tētahi e tētahi; kaua e amuamu.
1PE 4:10 Ko te mea kua riro noa i tētahi, i tētahi, meatia atu anō e koutou mā tētahi, mā tētahi, kia rite ki tā ngā tuari pai o ngā hōmaitanga maha a te Atua.
1PE 4:11 Ki te kōrero tētahi, kia rite tāna ki tā ngā kupu a te Atua. Ki te minita tētahi, kia rite tāna ki tō te kaha e hōmai ana e te Atua; kia whai korōria ai te Atua i ngā mea katoa i roto i a Īhu Karaiti; kei a ia te korōria me te mana ake ake. Āmine.
1PE 4:12 E ōku hoa aroha, kaua e kīia he hanga hou te tahunga i roto i a koutou hei whakamātautau i a koutou; ānō he mea hou tēnei kua pā ki a koutou.
1PE 4:13 Engari, ka uru nei koutou ki ngā mamae o te Karaiti, kia hari koutou; he mea hoki e hari ai koutou, whakamanamana rawa, ā te whakakitenga mai o tōna korōria.
1PE 4:14 Ki te tāwaia koutou mō te ingoa o te Karaiti, ka hari koutou; nō te mea e tau ana te Wairua o te korōria, me te Wairua o te Atua ki runga ki a koutou.
1PE 4:15 Kaua ia tētahi o koutou e whakamamaetia mō te mahi patu tangata, mō te tāhae, mō te mahi i te kino, mō te pokanoa ki a ērā meatanga.
1PE 4:16 Ki te whakamamaetia ia tētahi mō te kī he Karaitiana ia, kaua ia e whakamā; engari he mea tēnei e whakakorōria ai ia i te Atua.
1PE 4:17 Ko te wā hoki tēnei e tīmata ai te whakawā ki te whare o te Atua; ki te mea hoki kei a tātou te tuatahi, he pēhea rā te whakamutunga ki te hunga e kore e tahuri ki te rongopai o te Atua?
1PE 4:18 Ā, “Ki te mea ka ora noa te tangata tika, kei hea he putanga mō te tangata karakiakore, mō te tangata hara?”
1PE 4:19 Nā, ko te hunga anō kua pai nei te Atua kia whakamamaetia rātou, me tuku e rātou ō rātou wairua ki a ia, arā ki te Kaihanga pono, me te mahi anō ia i te pai.
1PE 5:1 He whakahau tēnei nāku ki ngā kaumātua i roto i a koutou, he hoa kaumātua hoki ahau, he kaiwhakaatu mō ngā mamae o te Karaiti, kua whiwhi tahi nei hoki ki te korōria e whakakitea mai i muri.
1PE 5:2 Whāngainga te kāhui a te Atua i roto i a koutou; kaua e ngākaukore ina tirotiro, engari kia hihiko; kaua, mō te taonga hē, engari i runga i te ngākau nui.
1PE 5:3 Kaua anō hoki e whakatupu rangatira ki tā te Atua wāhi, engari hei tauira koutou ki te kāhui.
1PE 5:4 Ā, kia puta mai te Tino Hēpara, ka whiwhi koutou ki te karauna korōria e kore e pirau.
1PE 5:5 Me koutou anō hoki, e ngā taitamariki, kia ngohengohe ki ngā kaumātua. Kia ngohengohe anō hoki, koutou katoa, tētahi ki tētahi, ko te ngākau pāpaku anō hei whītiki mō koutou; nō te mea hoki, “E pakeke ana te Atua ki te hunga whakapehapeha, ka hoatu ia e ia he aroha noa ki te hunga pāpaku.”
1PE 5:6 Nā, whakapāpaku iho koutou i raro i te ringaringa kaha o te Atua, kia whakateiteitia ake ai koutou e ia i te, wā e pai ai.
1PE 5:7 Makā atu ō koutou mānukanuka katoa ki runga ki a ia; e whakaaro ana hoki ia ki a koutou.
1PE 5:8 Kia mataara, kia matapopore; kei te hāereere hoki tō koutou hoa whawhai, te rēwera, ānō he raiona e ngengere ana, e rapu ana i te tangata hei horomanga māna.
1PE 5:9 Kia ū ki te whakapono, ka tū atu ai ki a ia; me te mahara anō ka rite aua mamae nei anō i ō koutou tēina i te ao.
1PE 5:10 Nā, mā te Atua o ngā mahi aroha noa katoa, i karangatia ai koutou ki tōna korōria mutungakore i roto i a Karaiti Īhu, ka oti koutou te whakamamae i tēnei wā iti nei, māna koutou e mea kia tino rite, māna e whakaū, māna e whakakaha, māna e whakapūmau.
1PE 5:11 Waiho atu i a ia te korōria me te kaha ake ake. Āmine.
1PE 5:12 Kua tuhituhia atu nei e ahau ētahi kupu torutoru, hei maunga atu mā Hirawanu; he teina pono ia nō koutou ki tōku whakaaro. He whakahau atu tēnei, he whakaatu nāku, ko te tino aroha noa tēnei o te Atua e tū nei koutou.
1PE 5:13 Tēnei te oha atu nei ki a koutou te hāhi i Papurōna, i whiriwhiria ngātahitia nei koutou; me tāku tamaiti anō hoki me Māka.
1PE 5:14 Oha atu tētahi ki tētahi, hei te kihi aroha anō. Kia tau te rangimārie ki a koutou katoa i roto i a Karaiti Īhu.
2PE 1:1 Nā Haimona Pita, he pononga, ā, he āpōtoro nā Īhu Karaiti, Ki te hunga kua whiwhi tahi nei tātou ki te whakapono utu nui, i runga o te tika o tō tātou Atua, o Īhu Karaiti, o te Kaiwhakaora:
2PE 1:2 Kia whakanuia te aroha noa me te rangimārie ki a koutou, i runga i te mātauranga ki te Atua, ki a Īhu hoki, ki tō tātou Ariki.
2PE 1:3 Kua hōmai nā hoki e tōna kaha Atua ki a tātou ngā mea katoa mō te ora, mō te karakia pai, i te mea ka mātau nei ki te Kaikaranga i a tātou i runga i te korōria, i te pai.
2PE 1:4 Nā ēnei hoki i riro mai ai i a tātou ngā kupu whakaari, he mea nui whakaharahara, he mea utu nui; mā ēnei hoki koutou ka whiwhi ai ki te āhua Atua, i a koutou ka mawhiti nei i te pirau i te ao, arā i tō te hiahia.
2PE 1:5 Mā reira nei hoki, me whakapau rawa tō koutou uaua, honoa iho anō te pai ki runga ki tō koutou whakapono; ki runga hoki ki te pai ko te mātauranga;
2PE 1:6 ki runga ki te mātauranga ko te pēhi o te hiahia; ki runga ki te pēhi o te hiahia ko te manawanui; ki runga ki te manawanui ko te karakia pai;
2PE 1:7 ki runga ki te karakia pai ko te atawhai ki ngā tēina; ki runga ki te atawhai ki ngā tēina ko te aroha.
2PE 1:8 Ki te mea hoki kei a koutou ēnei mea, ki te nui haere hoki, ka meinga koutou kia kaua e māngere, kia kaua e huakore i runga i te mātauranga ki tō tātou Ariki, ki a Īhu Karaiti.
2PE 1:9 Ko te tangata hoki kāhore nei i a ia ēnei mea, he matapō, he atarua, kua wareware ki te horoinga o ōna hara ō mua.
2PE 1:10 Mō konei, e ōku tēina, kia puta tō koutou uaua ki te whakapūmau i tō koutou karangatanga, i tō koutou whiriwhiringa. Ki te pēnei hoki tā koutou mahi e kore rawa koutou e tapepa.
2PE 1:11 Pēnei hoki ka whiwhi nui koutou ki te huarahi tomo atu ki te rangatiratanga mutungakore o tō tātou Ariki, arā o te Kaiwhakaora, o Īhu Karaiti.
2PE 1:12 Mō reira anō e kore ahau e māngere ki te whakamahara tonu i a koutou ki ēnei mea, e mātau ana rāia koutou, kua oti anō te whakaū ki runga ki te mea pono, kei a koutou nā.
2PE 1:13 Ki tōku whakaaro hoki, i ahau e noho ana i tēnei tapenākara, he mea tika anō kia whakaoho ahau i a koutou, kia whakamahara;
2PE 1:14 e mōhio ana hoki ahau e kore e wheau ka mahue tēnei tapenākara ōku, ka pērā anō me tā tō tātou Ariki, me tā Īhu Karaiti, i whakakite mai ai ki ahau.
2PE 1:15 Ka puta anō hoki tōku uaua kia mau tonu tō koutou mahara ki ēnei mea i muri i tōku matenga.
2PE 1:16 Ehara hoki i te mea he whai tā mātou i ngā kupu i titoa e te whakaaro tinihanga, i te whakapuakanga o te kaha, o te haerenga mai o tō tātou Ariki, o Īhu Karaiti ki a koutou; engari he kaititiro anō mātou ki tōna nui.
2PE 1:17 I riro hoki i a ia he hōnore, he korōria nā te Atua Matua, i te putanga mai o taua reo ki a ia i roto i te korōria nui rawa, “Ko tāku Tama tēnei i aroha ai, ko tāku i āhuareka ai.”
2PE 1:18 I rongo anō mātou ki tēnei reo e puta mai ana i te rangi, i a mātou i tōna taha i runga i te maunga tapu.
2PE 1:19 Kātahi ka ū rawa te kupu poropiti ki a tātou ināianei; pai tonu ki te anga tō koutou whakaaro ki reira, he rama hoki e tīaho ana i te wāhi pōuri, kia pūao rā anō te rā, kia ara rā anō te whetū o te ata i roto i ō koutou ngākau.
2PE 1:20 Kia mōhio hoki i te tuatahi, kāhore he poropititanga o te karaipiture nōna ake ōna tikanga.
2PE 1:21 Ehara hoki i te mea nā te whakaaro o te tangata i puta mai ai te poropititanga i mua, engari he mea whakamahara nā te Wairua Tapu i kōrero ai ngā tāngata tapu a te Atua.
2PE 2:1 Otirā, i ara ake anō he poropiti teka i mua i roto i te iwi, he pērā me ngā kaiwhakaako teka e puta ake ā mua i roto i a koutou; mā ēnei e mau puku mai ngā tītorehanga whakangaro. He whakakāhore nā rātou i te Ariki rawa, nāna nei rātou i hoko, ka hohoro tonu tā rātou taki mai i te whakangaromanga ki a rātou anō.
2PE 2:2 Ā, he tokomaha e aru i ā rātou tikanga whakarihariha; mā reira e kōrerotia kinotia ai te ara o te pono.
2PE 2:3 He apo moni hoki e tito kupu ai rātou kia whai taonga ai rātou i a koutou. Nōnamata te tukunga mō rātou ki te hē, e kore anō e whakaroa; kāhore hoki he moe o tō rātou whakangaromanga.
2PE 2:4 Mehemea kīhai i tohungia e te Atua ngā anahera i hara, engari i peia rātou e ia ki te pō, he mea herehere i te waro pōuri, he mea tiaki mō te whakawā;
2PE 2:5 ā, kīhai i tohungia te ao tawhito, he mea tiaki ia nāna a Noa, te kaikauwhau i te tika, rātou ko ētahi atu tokowhitu, i tāna kawenga mai i te waipuke ki te ao o te hunga karakiakore.
2PE 2:6 Ā, meinga ana ngā pā, a Horoma, a Komora, kia pungarehu rawa, ko tāna whakataunga hē he hurihanga, waiho iho hei tohu ki te hunga e noho karakiakore i ngā wā i muri.
2PE 2:7 Ko Rota ia, ko te tangata tika, whakaorangia ake e ia, i a ia e whakapōuritia ana e ngā ritenga whakarihariha a te hunga kino;
2PE 2:8 i taua tangata tika e noho ana i roto i a rātou, mamae ana tōna ngākau tika i ā rātou mahi kino, i tāna i kite ai, i tāna i rongo ai i tēnei rā, i tēnei rā.
2PE 2:9 Mātau tonu te Ariki ki te whakaora i te hunga karakia i roto i te whakamātautauranga, kia waiho ko te hunga hē mō ā te rā whakawā whiu ai.
2PE 2:10 Tērā rawa ia tāna mō te hunga e whai ana i tā te kikokiko, e haere ana i runga i te hiahia poke, e whakahāwea ana ki te rangatiratanga. He hunga hīkaka, e whai ana i tā rātou ake; kāhore hoki e wehi ki te kōrero kino ki ngā tāngata nunui.
2PE 2:11 Tēnā ko ngā anahera, ahakoa nui ake tō rātou kaha, tō rātou mana, kāhore e puaki i a rātou he kupu whakatoi mō ērā i te aroaro o te Atua ina whakawā.
2PE 2:12 Ko ērā hoki, rite tonu rātou ki te kararehe kāhore nei he whakaaro, he mea māori anake, i hangā nei hei hopukanga, hei whakangaromanga. Kōrero kino ana rātou ki ngā mea kāhore nei e mōhiotia e rātou; ā, ka ngaro i runga i tā rātou tikanga whakamate;
2PE 2:13 ka whiwhi ki te utu o te hē. He tangata e āhuareka ana ki te kakai awatea, he ira rātou, he makenu, e ruku ana ki ā rātou hākari ngahau i a rātou e hākari tahi ana me koutou.
2PE 2:14 Ko ō rātou kanohi kī tonu i te pūremu, kāhore hoki e mutu tō rātou hara; e poaina ana e rātou ngā hinengaro kāhore i ū. He ngākau tō rātou kua oti te whakamahi ki te apo. He tamariki kua oti te kanga.
2PE 2:15 Mahue ake i a rātou te ara tika, kotiti kē ana rātou, whai tonu ana i te ara o Paraama tama a Peoro, i whakapai nei ki te utu o te hē;
2PE 2:16 otirā, i rīria anō ia mō tōna hē. I kōrero te kararehe reokore, nō te tangata te reo, pēhia ana e ia te wairangi o te poropiti.
2PE 2:17 He puna waikore ēnei tāngata, he kapua e ākina ana e te tūpuhi; pōuri kerekere te wāhi kua rite mō rātou mō ake tonu atu.
2PE 2:18 E kōrero ana i ngā kōrero tetere rawa, he mea teka noa, ka poaina e rātou ki ngā hiahia o te kikokiko, ki ngā hiahia taikaha, te hunga e mawhiti mai ana i ērā e noho rā i roto i te hē.
2PE 2:19 He herekore tā rātou e whakaari nei ki a rātou, heoi, he pononga rātou nā te pirau; ki te taea hoki te tangata e te hoariri, hei pononga ia māna.
2PE 2:20 Ka mawhiti mai nei rātou i ngā poke o te ao, i a rātou ka mātau nei ki te Ariki, arā ki te Kaiwhakaora, ki a Īhu Karaiti, nā, ki te rorea rātou, ki te hinga rawa i aua mea, kino noa atu tō rātou whakamutunga i te tīmatanga.
2PE 2:21 He pai kē mō rātou me i kore e mātau ki te ara o te tika, i te mātau, ā, hei muri ka tahuri kē atu i te ture tapu kua tukua nei ki a rātou.
2PE 2:22 Heoi, te tukunga iho ki a rātou rite tonu ki tā te whakatauki pono, “Kua hoki te kurī ki tōna ruaki” me “Te poaka i horoi rā, kua okeoke anō i te paru.”
2PE 3:1 Ko te rua tēnei o āku pukapuka, e ōku hoa aroha, ka tuhituhia atu nei ki a koutou; hei whakaoho taua rua i ō koutou hinengaro tinihangakore kia mahara.
2PE 3:2 Kia mahara ai koutou ki ngā kupu i kōrerotia i mua e ngā poropiti tapu, ki tā mātou hoki, ki tā ngā āpōtoro a te Ariki, a te Kaiwhakaora.
2PE 3:3 Ko tēnei tā koutou e mātau ai i te tuatahi, tērā e puta mai ētahi kaiwhakamanumanu i ngā rā whakamutunga, e haere ana i runga i ngā ritenga o ō rātou hiahia ake,
2PE 3:4 e mea ana, “Kei hea te kōrero o tōna haerenga mai? Mau tonu hoki ngā mea katoa nō te moenga rā anō o ngā mātua, pērā tonu me tō te orokohanganga.”
2PE 3:5 Nā rātou tonu i whakakūware ki tēnei, nā te kupu a te Atua ngā rangi i mua, me te whenua anō tōtoka tonu i roto i te wai, nā te wai anō hoki.
2PE 3:6 He hurihanga nā ēnei i ngaro ai i te wai te ao o tērā wā.
2PE 3:7 Ko ngā rangi onāianei ia me te whenua, he mea rongoā nā taua kupu rā anō, he mea waiho mārire mō te ahi, ina taea te rā o te whakawākanga, o te whakangaromanga o ngā tāngata karakiakore.
2PE 3:8 Kei kūware ia koutou, e ōku hoa aroha, ki tēnei mea kotahi, ki tā te Ariki he rā kotahi rite tonu ki ngā tau kotahi mano, ngā tau kotahi mano rite tonu ki te rā kotahi.
2PE 3:9 Kāhore he whakaroa o te Ariki ki tāna kupu whakaari, kāhore e rite ki tā ētahi e kī nei he whakaroa; engari e manawanui ana ki a tātou, kāhore ōna whakaaro mō te tangata kia ngaro; engari kia tae katoa ki te rīpenetā.
2PE 3:10 E puta mai hoki te rā o te Ariki ānō he tāhae i te pō; ko reira pahemo atu ai ngā rangi, tōna nui hoki o te tangi; nā, ka ngiha ngā mea tīmatanga i te ahi, ka rewa; ā, pau ake i te ahi te whenua me āna mahi.
2PE 3:11 Heoi, mō te rewa nei ēnei mea katoa, kia pēhea rā he tikanga mā koutou i runga i te whakahaere tapu, i te karakia;
2PE 3:12 me te tūmanako, me te tākare anō koutou ki te taenga mai o te rā o te Atua, e rewa ai ngā rangi i te ahi, e ngiha ai ngā mea tīmatanga, e memeha ai?
2PE 3:13 Heoi, kei te tūmanako tātou ki ngā rangi hou, ki te whenua hou, ki tāna i whakaari mai ai, kei reira te tika e noho ana.
2PE 3:14 Mō konei rā, e ōku hoa aroha, i a koutou ka tūmanako nā ki ēnei mea, kia puta tō koutou uaua kia rokohina e ia i runga i te rangimārie, tē whai ira, tē whai koha i tōna aroaro.
2PE 3:15 Kia mahara anō ki te manawanui o tō tātou Ariki, he whakaora; ko te mea hoki ia i tuhituhia ki a koutou e tō tātou teina aroha, e Pāora, he mea i rite tonu ki te mātauranga kua hōmai nei ki a ia;
2PE 3:16 i pērā anō i āna pukapuka katoa, i kōrerotia hoki ēnei mea ki reira. Kei reira anō hoki ētahi mea he pakeke nei ki te whakaaro, whakawiria kētia ake e te hunga kūware, e te hunga kāhore anō i ū; ko tā rātou hanga anō ia ki ērā atu karaipiture, ā, ngaro iho rātou.
2PE 3:17 Nā, e ōku hoa aroha, ka mātau wawe nei koutou ki ēnei mea, kia tūpato kei kāhakina atu koutou e te hē o te hunga kino, kei taka atu, kei kore e ū.
2PE 3:18 Engari kia neke ake i runga i te aroha noa, i te mātauranga o tō tātou Ariki, arā, o te Kaiwhakaora, o Īhu Karaiti. Waiho atu i a ia te korōria, āianei, ā ake tonu atu. Āmine.
1JO 1:1 Ko te mea o te tīmatanga, ko tā mātou i rongo ai, ko tā ō mātou kanohi i kite ai, ko tā mātou i titiro atu ai, ko tā ō mātou ringaringa i whāwhā atu ai, ko ngā mea o te Kupu o te ora.
1JO 1:2 I whakakitea mai hoki te ora, ā, kite ana mātou, nā, ka whakaatu nei, ka kauwhau nei ki a koutou i te ora tonu, i tērā i te Matua i mua, ā, kua whakakitea mai nei ki a mātou
1JO 1:3 Ko tā mātou rā i kite ai, i rongo ai, e kauwhautia atu nei e mātou ki a koutou, kia whakahoatia ai koutou ki a mātou. Nā, ko tō tātou whakahoanga kei te Matua, kei tāna Tama hoki, kei a Īhu Karaiti.
1JO 1:4 Nā, ka tuhituhia atu nei ēnei mea e mātou ki a koutou, kia tino nui ai tō koutou hari.
1JO 1:5 Ko te kōrero anō tēnei i rongo ai mātou ki a ia, ā, ka kōrerotia atu nei e mātou ki a koutou, nā, he mārama te Atua, kāhore rawa hoki he pōuri i a ia.
1JO 1:6 Ki te mea tātou e whakahoa ana tātou ki a ia, me te haere anō tātou i te pōuri, e kōrero teka ana tātou, ehara hoki i te pono tā tātou e mahi nei.
1JO 1:7 Ki te haere ia tātou i te mārama, me ia hoki e noho nei i te mārama, nā, ka whakahoa tātou tētahi ki tētahi, e horoia ana anō ō tātou hara katoa e ngā toto o tāna Tama, o Īhu Karaiti.
1JO 1:8 Ki te mea tātou kāhore ō tātou hara, e whakapōhēhē ana tātou i a tātou anō, ā, kāhore te pono i roto i a tātou.
1JO 1:9 Ki te whāki tātou i ō tātou hara, e pono ana ia, e tika ana, ā, ka murua e ia ō tātou hara, ka horoia atu hoki ō tātou hē katoa.
1JO 1:10 Ki te mea tātou kāhore tātou i hara, ka meinga ia he kaikōrero teka, kāhore hoki tāna kupu i roto i a tātou.
1JO 2:1 E āku tamariki nonohi, ka tuhituhi atu nei ahau i ēnei mea ki a koutou, kia kaua ai koutou e hara. Ā, ki te hara tētahi, he kaikōrero mō tātou kei te Matua, ko Īhu Karaiti, ko te tika.
1JO 2:2 Ko ia anō te whakamārie mō ō tātou hara; ehara i te mea mō ō tātou anake, engari mō ō te ao katoa.
1JO 2:3 Mā konei hoki tātou ka mātau ai kua mātau tātou ki a ia, ki te puritia e tātou āna ture.
1JO 2:4 Ki te mea tētahi, “Kua mātau ahau ki a ia,” ā, kāhore e pupuri i āna ture, he tangata teka ia, kāhore hoki te pono i roto i a ia.
1JO 2:5 Ko te tangata e pupuri ana i tāna kupu, kua tino rite pū i a ia te aroha o te Atua. Mā konei tātou ka mātau ai kei roto tātou i a ia.
1JO 2:6 Ko te tangata e mea ana e noho ana ia i roto i a ia, ko te tikanga tēnei māna, kia rite tāna haere ki tā tērā.
1JO 2:7 E ōku tēina, ehara i te ture hou tāku e tuhituhi atu nei ki a koutou, engari he ture tawhito, ko tērā i a koutou o te tīmatanga iho rā anō. Ko te ture tawhito ko te kupu kua rongo rā koutou.
1JO 2:8 Nā, he ture hou tāku e tuhituhi atu nei, he mea pono i a ia, i a koutou hoki, e mahea atu ana hoki te pōuri, ā, kua whiti kē mai te mārama pono.
1JO 2:9 Ko te tangata e mea ana kei te mārama ia, ā, e mauāhara ana ki tōna teina, kei roto ia i te pōuri ā tae noa mai nei.
1JO 2:10 Ko te tangata e aroha ana ki tōna teina, e noho ana ia i roto i te mārama, kāhore hoki he tūtukitanga waewae i roto i a ia.
1JO 2:11 Ko te tangata ia e mauāhara ana ki tōna teina, kei te pōuri ia, e haere ana ia i roto i te pōuri, kāhore hoki ōna mātauranga e haere ana ia ki hea, nō te mea kua matapōtia ōna kanohi e te pōuri.
1JO 2:12 Ka tuhituhi atu nei ahau ki a koutou, e ngā tamariki nonohi, nō te mea kua murua ō koutou hara, he whakaaro hoki ki tōna ingoa.
1JO 2:13 Ka tuhituhi atu nei ahau ki a koutou, e ngā mātua, nō te mea kua mātau koutou ki a ia, arā, ki tō te tīmatanga. Ka tuhituhi atu ahau ki a koutou, e ngā taitamariki, nō te mea kua hinga i a koutou te wairua kino. Ka tuhituhi atu ahau ki a koutou, e ngā tamariki nonohi, nō te mea kua mātau koutou ki te Matua.
1JO 2:14 I tuhituhi atu ai ahau ki a koutou, e ngā mātua, nō te mea kua mātau koutou ki a ia, arā, ki tō te tīmatanga. I tuhituhi atu ai ahau ki a koutou, e ngā taitamariki, nō te mea he kaha koutou, e mau ana hoki te kupu a te Atua i roto i a koutou, ā, kua hinga i a koutou te wairua kino.
1JO 2:15 Kaua e aroha ki te ao, kaua anō hoki ki ngā mea o te ao. Ki te aroha tētahi ki te ao, kāhore te aroha o te Matua i roto i a ia.
1JO 2:16 Ko ngā mea katoa hoki i te ao, te hiahia o te kikokiko, te hiahia o ngā kanohi, me te whakapehapeha ki ō te ao mea, ehara i te Matua, engari nō te ao.
1JO 2:17 E pahemo atu ana hoki te ao, me tōna hiahia. Tēnā ko te tangata e mea ana i tā te Atua e pai ai, e noho tonu ana ia ā ake ake.
1JO 2:18 E ngā tamariki nonohi, ko te hāora whakamutunga tēnei. Ka rite hoki ki tā koutou i rongo ai, e haere mai ana te anatikaraiti; nā, kua tokomaha nei ngā anatikaraiti. Mā konei tātou ka mātau ai ko te hāora whakamutunga tēnei.
1JO 2:19 I haere atu rātou i roto i a tātou, ehara ia i te mea nō tātou rātou; mehemea hoki nō tātou rātou, kua noho tonu ki a tātou. Otiia, kua haere atu rātou kia whakakitea ai ehara rātou katoa i a tātou.
1JO 2:20 Nā, he whakawahinga anō tō koutou nā te Mea Tapu, e mātau ana anō hoki koutou ki ngā mea katoa.
1JO 2:21 Ehara i te mea i tuhituhi atu ai ahau ki a koutou nō te mea kāhore koutou e mātau ki te pono, engari, nō te mea e mātau ana koutou, nō te mea hoki kāhore he teka i puta ake i te pono.
1JO 2:22 Ko wai koia te tangata teka? He teka ianei ko te tangata e mea ana, “Ehara a Īhu i te Karaiti”? Ko te anatikaraiti tēnei, ko te tangata e whakakāhore ana ki te Matua, ki te Tama.
1JO 2:23 Ko ngā tāngata katoa e whakakāhore ana ki te Tama, kāhore te Matua i a rātou. Ko te tangata e whakaae ana ki te Tama, kei a ia anō hoki te Matua.
1JO 2:24 Nā, kia mau ki roto ki a koutou tā koutou i rongo ai nō te tīmatanga rā anō. Ki te mea ka mau i roto i a koutou tā koutou i rongo ai nō te tīmatanga rā anō, e mau anō koutou i roto i te Tama, i roto anō hoki i te Matua.
1JO 2:25 Ko te mea anō hoki tēnei i whakaaria mai nei e ia ki a tātou, ko te ora tonu.
1JO 2:26 I tuhituhia atu e ahau ēnei mea ki a koutou, mō te hunga e mea ana ki te whakapōhēhē i a koutou.
1JO 2:27 Otiia, e mau ana anō i roto i a koutou tāna whakawahinga kua riro nā i a koutou. Kāhore hoki ō koutou mea e whakaakona ai koutou e tētahi. Ko tāna whakawahinga ia e whakaako nā i a koutou ki ngā mea katoa, he pono tonu, kāhore hoki he teka, kia rite rā ki tāna i whakaako ai i a koutou tō koutou mau ki roto ki a ia.
1JO 2:28 Nā, ināianei, e ngā tamariki nonohi, kia mau ki roto ki a ia; kia whai māiatanga ai tātou ina puta mai ia, kei whakamā hoki ki a ia ina tae mai ia.
1JO 2:29 Ki te mātau koutou he tika ia, ka mātau koutou he mea whānau nāna ngā tāngata katoa e mea ana i te tika.
1JO 3:1 Kia kite koutou i te tikanga o te aroha i hōmai nei e te Matua ki a tātou, arā kia huaina tātou he tamariki nā te Atua! He pērā hoki tātou, koia te ao tē mātau ai ki a tātou, kāhore hoki i mātau ki a ia.
1JO 3:2 E ngā hoa aroha, he tamariki tātou nā te Atua ināianei; ā, kāhore anō i kitea noatia he aha rānei tātou ā mua. Otirā, e mōhio ana tātou, ki te puta mai ia, ka rite tātou ki a ia. Ka kite hoki tātou i a ia, i tōna āhua ake anō.
1JO 3:3 Nā, ki te mea kei tētahi tēnei tūmanako ki a ia, ka tahia atu e ia ōna hē, kia rite ai ki a ia kāhore nei he hē.
1JO 3:4 Ko te tangata e mea ana i te hara, he takahi tāna i te ture; he takahi hoki te hara i te ture.
1JO 3:5 E mātau ana anō koutou i whakakitea mai ia hei waha atu i ō tātou hara; kāhore anō hoki he hara i roto i a ia.
1JO 3:6 Ko te tangata e mau ana i roto i a ia e kore e hara: ko te tangata e hara ana, kāhore i kite i a ia, kāhore anō i mātau ki a ia.
1JO 3:7 E āku tamariki nonohi, kei whakapōhēhētia koutou e tētahi. Ko te tangata e mea ana i te tika, he tika anō ia, pērā hoki me tērā e tika ana.
1JO 3:8 Ko te tangata e mea ana i te hara, nō te rēwera ia; he hara hoki tō te rēwera nō te tīmatanga rā anō. Mō konei te Tama a te Atua i whakakitea mai ai, kia whakakāhoretia ai e ia ngā mahi a te rēwera.
1JO 3:9 Ko te tangata kua whānau i te Atua e kore e mea i te hara; nō te mea e mau ana tana purapura i roto i a ia. E kore hoki e āhei i a ia te hara, nō te mea kua whānau ia i te Atua.
1JO 3:10 Mā konei ka kitea ai ngā tamariki a te Atua me ngā tamariki a te rēwera. Ko te tangata e kore e mahi i te tika, ehara ia i te Atua, me ia anō hoki e kore e aroha ki tōna teina.
1JO 3:11 Ko te kōrero hoki tēnei i rongo ai koutou nō te tīmatanga, kia aroha tātou tētahi ki tētahi.
1JO 3:12 Kaua rā e pērā me Kaina; nō te wairua kino nei ia, ā, kōhurutia ana e ia tōna teina. Nā te aha hoki ia i kōhuru ai i a ia? Nō te mea he kino āna mahi, ko ā tōna teina ia he tika.
1JO 3:13 Kaua e mīharo, e ōku tēina, ki te kino te ao ki a koutou.
1JO 3:14 E mātau ana tātou kua whiti tātou i te mate ki te ora, nō te mea e aroha ana tātou ki ngā tēina. Ko te tangata kāhore e aroha ki te teina, e noho ana ia i roto i te mate.
1JO 3:15 Ko te tangata e mauāhara ana ki tōna teina, he kaipatu tangata ia; ka mātau hoki koutou, ko te kaipatu tangata kāhore he ora tonu e mau ana i roto i a ia.
1JO 3:16 Nā konei tātou i mātau ai ki te aroha, i tuku atu hoki ia i a ia kia mate mō tātou. He tika anō kia tukua tātou e tātou anō ki te mate mō ngā tēina.
1JO 3:17 Ko te tangata ia i a ia nei ngā oranga o tēnei ao, ā, ka kite e matea ana tētahi mea e tōna teina, nā, ka tūtakina iho e ia tōna ngākau aroha ki a ia, e mau pēhea ana te aroha o te Atua i roto i a ia?
1JO 3:18 E āku tamariki nonohi, kaua e waiho mā te kupu, mā te arero te aroha; engari mā te mahi, mā te pono.
1JO 3:19 Mā konei hoki tātou ka mātau ai nō te pono tātou, ka whakaū ai hoki i ō tātou ngākau i tōna aroaro.
1JO 3:20 Ki te mea ka whakahē mai ō tātou ngākau i a tātou, nui atu te Atua i ō tātou ngākau; e mātau ana anō ia ki ngā mea katoa.
1JO 3:21 E ngā hoa aroha, ki te kore ō tātou ngākau e whakahē i a tātou, ka māia tātou ki te Atua;
1JO 3:22 ā, ko te mea e īnoia ana e tātou, ka hōmai e ia ki a tātou, nō te mea e pupuri ana tātou i āna ture, e mea ana hoki i ngā mea e āhuareka ana ki tāna titiro.
1JO 3:23 Ko tāna ture anō tēnei, kia whakapono tātou ki te ingoa o tāna Tama, o Īhu Karaiti, kia aroha anō tētahi ki tētahi, kia rite anō ki te ture i hōmai e ia ki a tātou.
1JO 3:24 Nā, ko te tangata e pupuri ana i āna ture, e mau ana i roto i a ia me ia anō i roto i a ia. Nā konei anō tātou i mātau ai e mau ana ia i roto i a tātou, nā te Wairua kua hōmai nei e ia ki a tātou.
1JO 4:1 E ngā hoa aroha, kaua e whakapono atu ki ngā wairua katoa, engari me whakamātau ngā wairua nō te Atua rānei; he tokomaha hoki ngā poropiti teka kua haere mai ki te ao.
1JO 4:2 Mā konei koutou ka mātau ai ki te Wairua o te Atua. Ko ngā wairua katoa e whakaae ana i haere mai a Īhu Karaiti i te kikokiko, nō te Atua ērā.
1JO 4:3 Ko ngā wairua katoa hoki kāhore e whakaae i haere mai a Īhu Karaiti i te kikokiko, ehara i te mea nō te Atua. Ko tō te anatikaraiti wairua anō tēnei, i rongo nei koutou e haere mai ana; ā, tēnei anō kei te ao nei ināianei.
1JO 4:4 Nō te Atua koutou, e āku tamariki nonohi, kua kaha anō koutou i a rātou. Nō te mea nui atu tēnei i roto i a koutou, i tērā i roto i te ao.
1JO 4:5 Nō te ao rātou; nā reira nō te ao nei anō ā rātou kōrero, ā, e whakarongo ana te ao ki a rātou.
1JO 4:6 Nō te Atua tātou; ko te tangata e mātau ana ki te Atua, e whakarongo ana ia ki a tātou; ko te tangata ehara nei i tā te Atua, e kore ia e whakarongo ki a tātou. Mā konei tātou ka mātau ai ki te wairua o te pono, ki te wairua o te hē.
1JO 4:7 E ngā hoa aroha, kia aroha tātou tētahi ki tētahi, nō te Atua hoki te aroha; ko te hunga katoa hoki e aroha ana, kua whānau i te Atua, e mātau ana hoki ki te Atua.
1JO 4:8 Ko te tangata kāhore e aroha, kāhore ia e mātau ki te Atua; he aroha hoki te Atua.
1JO 4:9 Nā konei i kitea mai ai te aroha o te Atua ki a tātou, nā te mea kua tonoa mai e te Atua tāna Tama kotahi ki te ao, kia ora ai tātou i a ia.
1JO 4:10 Ko te aroha tēnei, ehara i te mea ko tātou kua aroha ki te Atua, engari, ko ia kua aroha ki a tātou, ā, tonoa mai ana e ia tāna Tama hei whakamārie mō ō tātou hara.
1JO 4:11 E ngā hoa aroha, ki te mea i pēnei te aroha o te Atua ki a tātou, he tika anō hoki kia aroha tātou tētahi ki tētahi.
1JO 4:12 Kāhore he wā i kite ai tētahi i te Atua. Ki te aroha tātou tētahi ki tētahi, e noho ana te Atua i roto i a tātou, kua rite pū anō tōna aroha i roto i a tātou.
1JO 4:13 Nā konei tātou i mātau ai e noho ana tātou i roto i a ia, me ia i roto i a tātou, nā te mea kua hōmai e ia tā tōna Wairua ki a tātou.
1JO 4:14 Kua kite anō mātou, ka whakaatu nei anō hoki, i tonoa mai te Tama e te Matua hei Kaiwhakaora mō te ao.
1JO 4:15 Ko te tangata e whakaae ana ko Īhu te Tama a te Atua, e noho ana te Atua i roto i a ia, me ia anō hoki i roto i te Atua.
1JO 4:16 Kua mātau nei anō hoki tātou, kua whakapono ki te aroha o te Atua ki a tātou. He aroha te Atua, ko te tangata hoki e noho ana i runga i te aroha e noho ana i roto i te Atua, me te Atua anō hoki i roto i a ia.
1JO 4:17 Nā konei te aroha i roto i a tātou i rite pū ai, ā, ka whai māiatanga anō tātou ā te rā whakawā; nā te mea e rite ana ki a ia tātou e noho nei i tēnei ao.
1JO 4:18 Kāhore he mataku i roto i te aroha; engari, ka makā te mataku ki waho e te aroha ina tino rite; nō te mea he mamae tō te mataku. Ko te tangata hoki e mataku ana, kāhore ia i tino rite i roto i te aroha.
1JO 4:19 E aroha ana tātou ki a ia, nō te mea ko ia kua mātua aroha ki a tātou.
1JO 4:20 Ki te mea tētahi, “E aroha ana ahau ki te Atua,” ā, e mauāhara ana ki tōna teina, he tangata teka ia. Ko te tangata hoki kāhore e aroha ki tōna teina i kitea nei e ia, me pēhea ka aroha ai ia ki te Atua kāhore nei i kitea e ia?
1JO 4:21 Kei a tātou anō hoki tēnei ture, he mea nāna, “Ko te tangata e aroha ana ki te Atua, kia aroha hoki ki tōna teina.”
1JO 5:1 Ko ngā tāngata katoa e whakapono ana ko Īhu te Karaiti, kua whānau i te Atua. Ko ngā tāngata katoa anō hoki e aroha ana ki te pāpā, e aroha ana anō ki tāna whānau.
1JO 5:2 Mā konei tātou ka mātau ai e aroha ana tātou ki ngā tamariki a te Atua, mā te mea ka aroha tātou ki te Atua, ka pupuri anō i āna ture.
1JO 5:3 Ko te aroha hoki tēnei ki te Atua, kia pupuri tātou i āna ture; ehara hoki āna ture i te mea taimaha.
1JO 5:4 Ko ngā mea katoa hoki kua whānau i te Atua e kaha ana i te ao. Ko te wikitōria hoki tēnei e taea ai te ao, ko tō tātou whakapono.
1JO 5:5 Ko wai i kaha i te ao? Ehara ianei i te tangata e whakapono ana ko Īhu te Tama a te Atua?
1JO 5:6 Ko ia tēnei i haere mai nei i runga i te wai, i te toto, ko Īhu Karaiti; ehara i te mea i runga i te wai anake, engari i runga i te wai, i te toto. Ko te Wairua hoki te kaiwhakaatu, he pono hoki te Wairua.
1JO 5:7 Tokotoru hoki ngā kaiwhakaatu i te rangi, ko te Matua, ko te Kupu, ko te Wairua Tapu; kotahi anō ēnei tokotoru.
1JO 5:8 Tokotoru hoki ngā kaiwhakaatu, i te whenua, ko te Wairua, ko te wai, ko te toto; kotahi anō tō rātou tokotoru.
1JO 5:9 Ki te whakaae atu tātou ki tā ngā tāngata whakaatu, he nui kē tā te Atua whakaatu. Ko tā te Atua whakaatu hoki tēnei, kua whakaaturia nei e ia mō tāna Tama.
1JO 5:10 Ko te tangata e whakapono ana ki te Tama a te Atua, kei roto i a ia te whakaatu. Ko te tangata kāhore e whakapono ki te Atua, he whakateka tāna ki a ia; nō te mea kāhore ia i whakapono ki te whakaatu i whakaaturia mai nei e te Atua mō tāna Tama.
1JO 5:11 Ko te whakaatu hoki tēnei, arā kua hōmai e te Atua ki a tātou te ora tonu; kei roto anō i tāna Tama tēnei ora.
1JO 5:12 Ko te tangata kei a ia te Tama, kei a ia anō te ora; ko te tangata kāhore nei i a ia te Tama a te Atua, kāhore i a ia te ora.
1JO 5:13 I tuhituhia atu ai e ahau ēnei mea ki a koutou, kia mātau ai koutou kei a koutou te ora tonu, arā ki a koutou e whakapono nei ki te ingoa o te Tama a te Atua.
1JO 5:14 Ko tō tātou māia anō tēnei ki a ia, nā, ki te īnoia e tātou tētahi mea i a ia, tāna i pai ai, ka whakarongo, mai ia ki a tātou.
1JO 5:15 Ki te mea hoki ka mātau tātou e whakarongo ana ia ki tā tātou e īnoi ai, ka mātau tātou kei a tātou ngā mea i īnoia e tātou i a ia.
1JO 5:16 Ki te mea ka kite tētahi i tōna teina e hara ana, hāunga te hara e mate ai ia, me īnoi ia, ā, e hōmai he ora ki a ia mō te hunga ehara nei tō rātou i te hara e mate ai. Tērā anō te hara e mate ai; e kore ahau e mea kia īnoi ia mō tērā.
1JO 5:17 He hara ngā hē katoa; tēnei anō tētahi hara ehara nei i te mea e mate ai.
1JO 5:18 E mātau ana tātou, nā, ko te tangata kua whānau ai te Atua kāhore e hara; engari ka tiaki te tangata kua whānau i te Atua i a ia anō, e kore hoki te wairua kino e pā ki a ia.
1JO 5:19 E mātau ana tātou nō te Atua tātou, kei te takoto hoki te ao katoa i roto i te wairua kino.
1JO 5:20 Nā, e mātau ana anō tātou kua tae mai te Tama a te Atua, kua hōmai e ia ki a tātou he mātauranga, kia mōhio ai tātou ki a ia, ki te mea pono; kei roto anō hoki tātou i a ia, i te mea pono, arā i tāna Tama, i a Īhu Karaiti. Ko te Atua pono tēnei, ko te ora tonu.
1JO 5:21 E āku tamariki nonohi, kia tūpato koutou ki ngā whakapakoko.
2JO 1:1 Nā te kaumātua, Ki te wahine rangatira whiriwhiri rātou ko āna tamariki, e arohatia ponotia nei e ahau. Ehara i te mea e ahau anake, engari e ngā tāngata katoa kua mātau ki te pono,
2JO 1:2 he whakaaro hoki ki te pono e mau nei i roto i a tātou, ā e mau anō ki a tātou ake ake.
2JO 1:3 Kia tau ki a koutou te aroha noa, te mahi tohu, me te rangimārie, he mea nā te Atua Matua, nā te Ariki hoki, nā Īhu Karaiti, nā te Tama a te Matua, i runga anō i te pono, i te aroha.
2JO 1:4 Hari pū ahau nōku i kite i ētahi o āu tamariki e haere ana i runga i te pono, e whakarite ana i te ture kua hōmai ki a tātou e te Matua.
2JO 1:5 Nā, tēnei anō tāku kupu ki a koe, e tai, ehara i te ture hou tāku e tuhituhi atu nei ki a koe, engari, ko tērā i a tātou nō te tīmatanga, kia aroha tātou tētahi ki tētahi.
2JO 1:6 Ko te aroha hoki tēnei, kia haere tātou i runga i āna ture. Ko te ture anō tēnei, kia rite ki tā koutou i rongo ai i te tīmatanga, hei runga i tērā he haerenga mō koutou.
2JO 1:7 He tokomaha hoki te hunga whakapōhēhē kua tae mai ki te ao, kāhore nei i whakaae i haere mai a Īhu Karaiti i te kikokiko. Ko te kaiwhakapōhēhē tēnei, ko te anatikaraiti.
2JO 1:8 Kia whai whakaaro ki a koutou anō, kei maumauria ā tātou mahi, engari, kia tino nui te utu e riro i a tātou.
2JO 1:9 Ko te tangata e poka kē ana, kāhore nei e mau ki te ako a te Karaiti, kāhore te Atua i a ia. Ko te tangata e mau ana ki te ako a te Karaiti, kei tēnei te Matua me te Tama.
2JO 1:10 Ki te tae atu tētahi ki a koutou, ki te kore tēnei ako e kawea e ia, kaua ia e puritia ki te whare, kaua anō hoki e oha ki a ia;
2JO 1:11 ki te oha hoki tētahi ki a ia, ka uru ia ki āna mahi kino.
2JO 1:12 He maha ngā mea hei tuhituhinga atu māku ki a koutou, heoi kīhai ahau i pai kia tuhia atu ki te pepa, ki te mangumangu. Engari, e mea ana ahau tērā ahau e haere atu ki a koutou, ā, ka kōrero atu, he māngai, he māngai, kia tino nui ai tō tātou hari.
2JO 1:13 Tēnei te oha atu nei ki a koe, ngā tamariki a tōu teina whiriwhiri.
3JO 1:1 Nā te kaumātua, Ki a Kaiu, ki te hoa aroha, ki tāku e aroha atu nei i runga i te pono.
3JO 1:2 E te hoa aroha, nui atu i ngā mea katoa tāku īnoi kia kake koe ki te pai, kia ora. Kia pērā anō me tōu wairua kua kake ki te pai.
3JO 1:3 Hari pū hoki ahau i ngā tēina i haere mai nei, i whakaatu mai i te pono i roto i a koe, arā i tāu haere i runga i te pono.
3JO 1:4 Kāhore ōku hari e nui atu ana i tēnei, arā kia rongo ahau e haere ana āku tamariki i runga i te pono.
3JO 1:5 E te hoa aroha, pono tonu tāu mahi e mea nā koe mō ngā tēina, mō ngā tāngata iwi kē anō hoki.
3JO 1:6 E whakaatu nā i tōu aroha i te aroaro o te hāhi. Nā, kia rite ki tā te Atua tāu kawe i a rātou, ā, ka pai tāu mahi.
3JO 1:7 He whakaaro hoki ki tōna ingoa i haere atu ai rātou, kīhai anō i riro i a rātou tētahi mea a ngā tauiwi.
3JO 1:8 Koia i tika ai kia whakamanuhiri tātou i ngā tāngata pēnei kia ai hoki tātou hei hoa mahi mō te pono.
3JO 1:9 I tuhituhi atu ahau ki te hāhi; otirā, kāhore mātou e manakohia mai e Rioterepi, ko tāna hoki e pai ai ko ia kia meinga hei tuatahi mō rātou.
3JO 1:10 Mō konei ki te haere atu ahau, ka whakamahara ahau i āna mahi e mea nei ia, ki te kino o āna kupu i a ia e komeme mai nei mō mātou; kāhore hoki tāna i mutu i konei, kāhore ia e manako ki ngā tēina, e rīria ana hoki e ia ngā tāngata e pai ana kia pērā, e peia ana i roto i te hāhi.
3JO 1:11 E te hoa aroha, kaua e arumia te kino, engari te pai. Ko te tangata e mahi pai ana, nō te Atua ia; tēnā, ko te kaimahi i te kino, kāhore anō ia kia kite i te Atua.
3JO 1:12 E kōrerotia paitia ana a Rimitiriu e te katoa, e te pono anō hoki. Āe rā, ko mātou anō ētahi hei kaiwhakaatu; e mōhio ana koutou he pono tā mātou whakaatu.
3JO 1:13 He maha ngā mea hei tuhituhinga atu māku, otirā, e kore ahau e pai kia tuhituhi atu ki a koe ki te mangumangu, ki te pene.
3JO 1:14 E mea ana hoki ahau tērā ahau e kite wawe i a koe, ā, e kōrero tāua, he māngai, he māngai.
3JO 1:15 Kia tau te rangimārie ki a koe! Tēnei ngā hoa aroha te oha atu nei ki a koe. Oha atu ki ngā hoa aroha me te whakahua anō i te ingoa o tērā, o tērā.
JUD 1:1 Nā Hūrā, he pononga nā Īhu Karaiti, he teina nō Hēmi, Ki te hunga kua oti te whakatapu e te Atua Matua, he mea tiaki i roto i a Īhu Karaiti, he hunga karanga:
JUD 1:2 Kia whakanuia ki a koutou te mahi tohu, te rangimārie me te aroha.
JUD 1:3 E ngā hoa aroha, i ahau e tākare tonu ana ki te tuhituhi ki a koutou mō tō tātou whakaoranga tahi, i mea ahau me tuhituhi ki a koutou, me whakahauhau kia kaha te tohe ki te whakapono kua oti nei te tuku mai ki te hunga tapu.
JUD 1:4 Kua tomo puku mai hoki ētahi tāngata, ko ērā anō i tuhituhia i mua mō tēnei whakataunga hē, he hunga karakiakore, e whakaputa kē ana rātou i te aroha noa o tō tātou Atua hei mea mō ngā hiahia taikaha, ā, whakakāhore ana rātou ki tō tātou Ariki, ki a Īhu Karaiti, ko ia anake tō tātou Ariki.
JUD 1:5 Nā, e mea ana ahau kia whakamaharatia koutou, kua mātau noa ake anō ia koutou ki tēnei, i whakaorangia mai e te Ariki te iwi i te whenua o Īhipa, muri iho whakangaromia ana e ia te hunga kīhai nei i whakapono.
JUD 1:6 Nā, ko ngā anahera, kīhai nei i mau ki tō rātou ake rohe, heoi, whakarērea ana tō rātou nohoanga ake, kua waiho e ia i raro i te pōuri, mau tonu te here ki ngā mekameka, mō te whakawā o te rā nui.
JUD 1:7 Ka rite ki Horoma, ki Komora, ki ngā pā hoki i tata ki reira, i pērā me ēnei, te moepuku, te whai i ngā kikokiko kē. Kua waiho rātou hei tohu, pāngia ana rātou e te whiu, arā e te ahi kā tonu.
JUD 1:8 Ko tā tēnei hunga moemoeā anō hoki tēnā; e whakapoke ana i te kikokiko, e whakahāwea ana ki te kāwanatanga, e kōrero kino ana ki ngā rangatira.
JUD 1:9 Ko Mikaera ia, ko te tino anahera, i tā rāua ngangautanga ko te rēwera, i a ia e tohe ana ki te tinana o Mohi, kīhai i tae tōna aro ki te kupu kanga i te whakawākanga; i mea kau ia, “Mā te Ariki koe e riri.”
JUD 1:10 Ko ēnei ia, e kōrerotia kinotia ana e rātou ngā mea kāhore nei rātou i mātau; nā, ko ngā mea e mātauria noatia ake nei e rātou pērā i ngā kararehe whakaarokore, he iho rātou i aua mea.
JUD 1:11 Auē te mate mō rātou! Kua haere nei hoki rātou i te ara o Kaina, kua tōrere rawa hoki ki te hē, arā ki tō Paraama utu, nā, ko tō Koraha totohe hei whakangaromanga mō rātou.
JUD 1:12 He toka moana rātou i roto i ā koutou hākari aroha, i a rātou e hākari tahi ana me koutou, he hēpara e whāngai ana i a rātou anō, kāhore hoki e mataku; he kapua waikore e ākina ana e ngā hau; he rākau kua ngahoro nei ngā rau, he mea huakore, ka rua nei ngā matenga, he mea kua unuhia ake i ngā pakiaka;
JUD 1:13 he ngaru pua nō te moana, e whakatūtū ana i te huka o tō rātou whakamā; he whetū ātiutiu noa, pōuri kerekere te wāhi kua rite mō rātou mō ake tonu atu.
JUD 1:14 I poropititia anō hoki ēnei e Ēnoka, e te tuawhitu i muri i a Ārama, i a ia i mea, “Nā, kei te haere mai te Ariki me ngā mano tini o tāna hunga tapu,
JUD 1:15 kia whakaritea he whakawā mō ngā tāngata katoa, kia rīria hoki te hunga karakiakore o rātou mō ā rātou mahi takahi i te karakia katoa. I hē ai rātou ki te karakia, mō ngā kupu pakeke katoa i kōrerotia e te hunga hara, e te hunga karakiakore, mōna.”
JUD 1:16 He hunga amuamu rātou, he kōwhetewhete, e haere ana i runga i ō rātou hiahia ake, tetere rawa anō hoki ngā kupu e kōrero nei ō rātou māngai, he hunga whakapai kanohi rātou, he mea kia riro ai he mea mā rātou.
JUD 1:17 E ngā hoa aroha, kia mahara koutou ki ngā kupu i kōrerotia i mua e ngā āpōtoro a tō tātou Ariki, a Īhu Karaiti;
JUD 1:18 i mea hoki rātou ki a koutou, “Tērā e puta mai te hunga whakamanumanu a te wā whakamutunga, e haere ana i runga i ō rātou hiahia karakiakore.”
JUD 1:19 Nā ēnei ngā tītorehanga, he hunga hiahia hoki ki te kikokiko kāhore nei i a rātou te Wairua.
JUD 1:20 Ko koutou ia, e ngā hoa aroha, hangā ake koutou hei whare ki runga ki tō koutou whakapono tapu rawa, me te īnoi anō i roto i te Wairua Tapu,
JUD 1:21 me te tiaki anō i a koutou i runga i te aroha o te Atua, me te tatari anō ki te mahi tohu a tō tātou Ariki, a Īhu Karaiti, ā te ora tonu rā anō.
JUD 1:22 Ko ētahi anō tohungia, e ruarua tonu nei ngā whakaaro.
JUD 1:23 Ko ētahi me whakaora, ka tō mai i roto i te kāpura; ā, ko ētahi tohungia, i runga i te mataku; me te weriweri rawa ki te kākahu i poke i te kikokiko.
JUD 1:24 Nā, ki te mea kaha ki te tiaki i a koutou kei hinga, ki te whakatū hoki i a koutou ki te aroaro o tōna korōria, he mea kohakore i runga i te hari whakaharahara,
JUD 1:25 ki a ia, ko ia anake nei te Atua, ki tō tātou Kaiwhakaora, i roto i a Īhu Karaiti, i tō tātou Ariki, waiho atu i a ia te korōria, te nui, te kaha, te mana, i mua atu o ngā wā katoa, āianei, ā ake ake. Āmine.
REV 1:1 Ko te whakakitenga a Īhu Karaiti, i hōmai nei e te Atua ki a ia, kia whakapuakina ki āna pononga ngā mea meāke nei rite; nā whakaaturia mai ana e ia, arā e tāna anahera i tonoa mai e ia, ki tāna pononga, ki a Hoani.
REV 1:2 Ko ia nei te pono o te kupu a te Atua, o te whakaaturanga hoki a Īhu Karaiti, arā o ngā mea katoa i kite ai ia.
REV 1:3 Ka hari te tangata e titiro ana i te pukapuka, me te hunga anō hoki e whakarongo ana ki ngā kupu o te poropititanga, e pupuri ana hoki i ngā mea kua oti te tuhituhi ki reira; kua tata hoki te tāima.
REV 1:4 Nā Hoani ki ngā hāhi e whitu i Āhia: Kia tau ki a koutou te aroha noa me te rangimārie, he mea nāna e ora nei ia, i mua anō ia, ā, kei te haere mai anō; he mea hoki nā ngā wairua e whitu i mua i tōna torōna.
REV 1:5 He mea anō nā Īhu Karaiti, nā te kaiwhakaatu pono, ko ia nei te putanga mātāmua o te hunga mate, te rangatira o ngā kīngi o te whenua. Ki a ia, i arohaina nei tātou e ia, i horoia anō hoki ō tātou hara ki ōna toto,
REV 1:6 ā, meinga ana tātou e ia hei kīngi, hei tohunga ki te Atua, arā ki tōna Matua; waiho atu ki a ia te korōria me te kaha ake tonu atu. Āmine.
REV 1:7 Tēnei ia te haere mai nei me ngā kapua, e kite hoki i a ia ngā kanohi katoa, me te hunga hoki i wero i a ia. Ka auē anō hoki ngā hapū katoa o te whenua ki a ia.
REV 1:8 “Ko ahau te Ārepa, te Ōmeka, te tīmatanga, te whakamutunga,” e ai tā te Ariki, “e ora nei, i mua anō ia, ā, kei te haere mai anō, ko te Kaha Rawa nei ia.”
REV 1:9 Ko ahau tēnei, ko Hoani, ko tō koutou tuakana, kua uru tahi nei ki te tūkinotanga, ki te rangatiratanga anō hoki, ki te manawanui kei roto i a Īhu, i te motu ahau e huaina nei ko Pātamo, he mea hoki mō te kupu a te Atua, mō te whakaatu hoki i a Īhu.
REV 1:10 I te Wairua ahau i te rā o te Ariki, ā, ka rongo ahau i te reo nui i muri i ahau, me te mea nō te tētere,
REV 1:11 e mea ana, “Tuhituhia ki te pukapuka tāu e kite nei, tukua atu hoki ki ngā hāhi e whitu i Āhia; ki Epeha, ki Hamurana, ki Perekamu, ki Taiataira, ki Harariha, ki Pirarerepia, ki Raorikia.”
REV 1:12 Nā, ka tahuri ake ahau kia kite i te reo i kōrero nei ki ahau. Ā, i tāku tahuritanga ake, ka kite ahau i ngā tūranga rama kōura e whitu;
REV 1:13 ā, i waenganui o ngā tūranga rama ko tētahi e rite ana ki te Tama a te tangata, ko tōna kākahu tatū noa ki ngā waewae, he mea whītiki te uma ki te whītiki kōura.
REV 1:14 Ā, ko tōna mātenga me ngā makawe mā tonu, ānō he wūru mā, he hukarere; ko ōna kanohi, ānō he mura ahi;
REV 1:15 ā, ko ōna waewae rite tonu ki te parāhi pai, ānō e kā ana i roto i te oumu; ko tōna reo, ānō ko te tangi a ngā wai maha.
REV 1:16 E whitu hoki ngā whetū i tōna ringa matau, ā, i puta mai i tōna māngai he hoari matarua, he mea koi. Ko tōna kanohi, ānō kei te rā ina kaha te whiti mai.
REV 1:17 Ā, nō tōku kitenga i a ia, hinga ana ahau ki ōna waewae, ānō he tangata kua mate. Nā, ka whakapāngia mai e ia tōna ringaringa matau ki ahau, ka mea ki ahau, “Kaua e mataku; ko ahau te tuatahi, te whakamutunga;
REV 1:18 ko ahau te Mea Ora; i mate hoki ahau i mua, nā, e ora nei ā ake tonu atu, kei ahau anō ngā kī o te mate rāua ko te rēinga.
REV 1:19 “Nā reira tuhituhia ngā mea kua kite nei koe, ngā mea onāianei nei, me ngā mea e puta mai ā muri ake nei.
REV 1:20 Ko te mea ngaro, ko ngā whetū e whitu i kite nei koe i tōku matau, me ngā tūranga rama kōura e whitu. Ko ngā whetū e whitu, ko ngā anahera o ngā hāhi e whitu; ko ngā tūranga rama e whitu, ko ngā hāhi e whitu.”
REV 2:1 “Tuhituhi atu ki te anahera o te hāhi i Epeha: “Ko ngā kupu ēnei a te kaipupuri i ngā whetū e whitu i tōna matau, e hāereere ana i waenganui o ngā tūranga rama kōura e whitu.
REV 2:2 Ka mātau ahau ki āu mahi, ki tōu uaua, ki tōu manawanui, e kore hoki koe e āta hanga ki te hunga kino. Kua whakamātautauria hoki e koe te hunga e mea nei he āpōtoro rātou, ā, ehara, kua mau i a koe he hunga teka rātou.
REV 2:3 I whakamanawanui koe, i mahi tonu, ahakoa pēhia, he whakaaro ki tōku ingoa, kāhore hoki i hōhā.
REV 2:4 “Otirā, he mea anō tāku ki a koe, kua whakarērea e koe tōu aroha tuatahi.
REV 2:5 Nā, kia mahara ki te wāhi i taka iho ai koe, rīpenetā, mahia hoki ngā mahi ō mua; ki te kāhore, ka hohoro tāku haere atu ki a koe, ka nekehia atu e ahau tōu tūranga rama i tōna wāhi ki te kore koe e rīpenetā.
REV 2:6 Ko tēnei ia tāu nā, e kino ana koe ki ngā hanga a ngā Nīkoraiti, e kinongia nei hoki e ahau.
REV 2:7 “Ko te tangata he taringa tōna, kia rongo ia ki tā te Wairua e mea nei ki ngā hāhi. Ko te tangata i a ia te wikitōria, ka hoatu e ahau māna e kai tō te rākau o te ora, e tū ana i waenganui o te Pararaiha o te Atua.”
REV 2:8 “Tuhituhi atu hoki ki te anahera o te hāhi i Hamurana: “Ko ngā kupu ēnei a te Tuatahi, a te Whakamutunga, i mate nei, ā, kua ora anō.
REV 2:9 Ka mātau ahau ki tōu tūkinotanga ki tōu rawakoretanga; engari he whai rawa tonu koe. E mātau ana anō ahau ki ngā hahani a te hunga e mea nei he Hūrai rātou, ā, ehara, engari ko te whakamenenga rātou a Hātana.
REV 2:10 Kaua e wehi ki ngā mamae meāke nei pā ki a koe. Nā, tērā e makā ētahi o koutou e te rēwera ki te whare herehere, kia whakamātautauria ai koutou; ā, ka whakamamaetia koutou kotahi tekau ngā rā. Kia pono koe ā mate noa, ā, māku e hoatu ki a koe te karauna o te ora.
REV 2:11 “Ko te tangata he taringa tōna, kia rongo ia ki tā te Wairua e mea nei ki ngā hāhi. Ko te tangata i a ia te wikitōria, e kore ia e hē i te matenga tuarua.”
REV 2:12 “Tuhituhi atu hoki ki te anahera o te hāhi i Perekamu: “Ko ngā kupu ēnei a te kaimau i te hoari koi, i te mea matarua.
REV 2:13 Ka mātau ahau ki te wāhi e noho nā koe, ko te wāhi ia i te torōna o Hātana. E mau ana hoki koe ki tōku ingoa, kāhore hoki koe i whakakāhore ki tōku whakapono, i ngā rā iara i tāku kaiwhakaatu pono, i a Anatipa, i whakamatea nei i roto i a koutou i te wāhi e noho nā a Hātana.
REV 2:14 “Tēnei ia ētahi mea āku ki a koe, nō te mea kei a koe te hunga e mau ana ki te ako a Paraama, nāna nei i whakaako a Paraka ki te maka tūtukitanga waewae ki te aroaro o ngā tama a Īharaira, i kai ai rātou i ngā mea i patua mā te whakapakoko, i moepuku ai hoki.
REV 2:15 Kei a koe anō hoki te hunga e mau ana ki te ako a ngā Nīkoraiti, pērā anō.
REV 2:16 Nō reira, rīpenetā; nā, ki te kāhore, ka hohoro tāku haere atu ki a koe, ā, ka whawhaitia rātou e ahau ki te hoari a tōku māngai.
REV 2:17 “Ko te tangata he taringa tōna, kia rongo ia ki tā te Wairua e mea nei ki ngā hāhi. Ko te tangata i a ia te wikitōria, ka hoatu e ahau te mana huna, ka hoatu anō e ahau ki a ia he kōhatu mā, me te ingoa hou, he mea tuhituhi ki te kōhatu, e kore nei e mātauria e tētahi, ko te tangata anake e whiwhi ana.”
REV 2:18 “Tuhituhi atu hoki ki te anahera te hāhi o Taiataira: “Ko ngā kupu ēnei a te Tama a te Atua, ko ōna kanohi nei me te mea he mura ahi, ōna waewae rite tonu ki te parāhi pīata.
REV 2:19 E mātau ana ahau ki āu mahi, ki tōu aroha, ki tāu mahi minita, ki tōu whakapono, ki tōu manawanui, ā, nui atu āu mahi ō muri nei i ngā mea ō mua.
REV 2:20 “Tēnei anō ia ētahi mea āku ki a koe, nō te mea e tukua ana e koe taua wahine a Ietēpere, e mea nei he poropiti ia; kei te whakaako, kei te kukume i āku pononga kia moepuku, kia kai anō hoki i ngā mea e patua ana mā ngā whakapakoko.
REV 2:21 Ā, i hoatu e ahau ki a ia he tāima e rīpenetā ai ia; otirā, kāhore ia e pai kia rīpenetā i tāna moepuku.
REV 2:22 Nā, ka makā ia e ahau ki tētahi moenga, me te hunga e pūremu ana ki a ia, ki roto ki te whiu taimaha, mehemea kāhore rātou e rīpenetā ki ā rātou mahi.
REV 2:23 Ka whakamatea hoki e ahau āna tamariki kia mate rawa; ā, ka mātau ngā hāhi katoa ko ahau te kairapu i tā ngā whatumanawa, i tā ngā ngākau. Ka rite hoki ki ā koutou mahi tāku e hoatu ai ki tēnei, ki tēnei o koutou.
REV 2:24 Ko tāku kupu ia tēnei ki a koutou, ki ērā atu hoki i Taiataira, ki te hunga kāhore nei i a rātou tēnei ako, kāhore anō kia mātau ki ngā mea hōhonu a Hātana, ki tā rātou e kōrero nei; e kore e whakawahā e ahau tētahi atu mea taimaha ki a koutou.
REV 2:25 Ko te mea ia i a koutou, puritia kia mau kia tae atu rā anō ahau.
REV 2:26 “Nā, ko te tangata i a ia te wikitōria, ko te tangata hoki e puritia e ia āku mahi taea noatia te mutunga, māku e hoatu ki a ia he mana rangatira ki ngā tauiwi.
REV 2:27 He rino hoki te tokotoko e whakahaere tikanga ai ia mō rātou, ka pērā i ngā oko a te kaipokepoke paru, ka pakaru rikiriki; ka rite ki tā tōku Matua i hōmai ai ki ahau.
REV 2:28 Ā, ka hoatu e ahau ki a ia te whetū o te ata.
REV 2:29 Ko te tangata he taringa tōna, kia rongo ia ki tā te Wairua e mea nei ki ngā hāhi.”
REV 3:1 “Tuhituhi atu hoki ki te anahera o te hāhi i Harariha: “Ko ngā kupu āna, kei a ia nei ngā wairua e whitu o te Atua, me ngā whetū e whitu. Ka mātau ahau ki āu mahi, nā, he ingoa tōu, e ora ana koe, heoi, he tūpāpaku anō koe.
REV 3:2 Kia mataara, whakaūkia ngā mea e toe nei, ka tata nei te mate; kāhore hoki ahau i kite i āu mahi kia tino rite ki te aroaro o tōku Atua.
REV 3:3 Kia mahara rā ki te rironga o ngā mea i a koe, ki āu i rongo ai, ā, puritia, rīpenetā hoki. Nā, ki te kore koe e mataara, ka tae atu ahau ki a koe, ānō he tāhae; e kore hoki koe e mātau ki te hāora e tae atu ai ahau ki a koe.
REV 3:4 “Tēnā anō kei a koe ētahi ingoa ouou nei i Harariha; kāhore nei i poke ō rātou kākahu. Ka hāereere tahi ēnā me ahau, he mā ngā kākahu; nō te mea he pai rātou.
REV 3:5 Ko te tangata i a ia te wikitōria, ka whakakākahuria ia ki te kākahu mā; e kore anō hoki e ūkuia e ahau tōna ingoa i te pukapuka o te ora, ā, ka whakaaetia e ahau tōna ingoa ki te aroaro o tōku Matua, ki te aroaro anō hoki o āna anahera.
REV 3:6 Ko te tangata he taringa tōna, kia rongo ia ki tā te Wairua e mea nei ki ngā hāhi.”
REV 3:7 “Tuhituhi atu hoki ki te anahera o te hāhi i Pirarerepia: “Ko ngā kupu ēnei a te tapu, a te pono, kei a ia nei te kī o Rāwiri, ko ia hei whakapuare, ā, kāhore tētahi hei tūtaki; māna hoki e tūtaki, ā, kāhore tētahi hei whakapuare.
REV 3:8 E mātau ana ahau ki āu mahi. Nā, kua hoatu e ahau ki tōu aroaro he tatau puare, e kore nei e taea te tūtaki e tētahi. He kaha hoki tōu, he mea iti nei, kua puritia anō e koe tāku kupu, kāhore anō hoki koe i whakakāhore ki tōku ingoa.
REV 3:9 Nā, māku e mea te hunga o te whakamenenga a Hātana, e mea nei he Hūrai rātou, ā, ehara, he teka hoki nā rātou; nā, māku rātou e mea kia haere mai, kia koropiko ki mua i ōu waewae, ā, kia mātau kua arohaina koe e ahau.
REV 3:10 Nō te mea kua puritia e koe te kupu o tāku manawanui, waihoki ka puritia koe e ahau i te hāora o te whakamātautauranga, i taua hāora meāke nei puta ki te ao katoa, hei whakamātautau i te hunga e noho ana i te whenua.
REV 3:11 “Ka hohoro tāku haere atu; kia mau ki tāu, kei tangohia tōu karauna e tētahi.
REV 3:12 Ko te tangata i a ia te wikitōria, māku ia e mea hei pou i roto i te whare o tōku Atua, ā, e kore ia e haere atu i konā ki waho ā muri atu; māku hoki e tuhituhi ki runga ki a ia te ingoa o tōku Atua, te ingoa hoki o te pā o tōku Atua, o Hiruhārama hou, ka heke iho nei i te rangi i tōku Atua, me tōku ingoa hou anō hoki.
REV 3:13 Ko te tangata he taringa tōna, kia rongo ia ki tā te Wairua e mea nei ki ngā hāhi.”
REV 3:14 “Tuhituhi atu hoki ki te anahera o te hāhi i Raorikia: “Ko ngā kupu ēnei a te Āmine, a te kaiwhakaatu pono, tika, a te tīmatanga o tā te Atua hanganga:
REV 3:15 E mātau ana ahau ki āu mahi, ehara koe i te mātao, ehara koe i te wera. Ka pai ahau me i mātao koe, me i wera rānei.
REV 3:16 Heoi, i te mea he mahanahana kau koe, ehara i te mātao, ehara i te wera, ka ruakina atu koe e ahau i roto i tōku māngai.
REV 3:17 Nō te mea e kī ana koe, ‘Kua whai taonga ahau, kua tini āku rawa, kāhore hoki tētahi mea e matea ana e ahau.’ Kāhore hoki e mātau he waikorohuhū noa iho koe, he hē noa iho, he rawakore, he matapō, he mea kākahukore.
REV 3:18 Ko tāku kupu tēnei ki a koe, kia hokona e koe i ahau he kōura kua oti te tahu ki te ahi, kia whai rawa ai koe; he kākahu mā hoki, hei kākahu ki a koe, kia kaua ai e kitea te whakamā o tōu tūnga kautanga; he rongoā hoki hei pani ki ōu kanohi, kia kite ai koe.
REV 3:19 “Ko āku e aroha nei, ka rīria e ahau, ka whiua; nā, kia ngākau nui koe, rīpenetā hoki.
REV 3:20 Nā, tēnei ahau te tū nei i te tatau, te pātukituki nei; ki te whakarongo tētahi ki tōku reo, ā, ka uaki i te tatau, ka tomo atu ahau ki a ia, hei hoa kai mōna, ko ia hoki hei hoa kai mōku.
REV 3:21 “Ko te tangata i a ia te wikitōria, ka hoatu e ahau ki a ia kia noho ki tōku taha ki runga ki tōku torōna, pēnei me ahau i ahau nei te wikitōria, kua noho ki te taha o tōku Matua i runga i tōna torōna.
REV 3:22 Ko te tangata he taringa tōna, kia rongo ia ki tā te Wairua e mea nei ki ngā hāhi.”
REV 4:1 Muri iho i ēnei mea ka kite ahau, nā, he tatau kua oti te whakapuare i te rangi, ā, ko te reo tuatahi i rongo ai ahau me te mea he reo nō tētahi tētere e kī mai ana ki ahau, e mea ana, “Haere mai ki runga nei, ā, ka whakakitea e ahau ki a koe ngā mea kua takoto mō muri i ēnei.”
REV 4:2 I reira pū anō kua nohoia ahau e te Wairua; nā, he torōna kua tū ki te rangi, ā, ko tētahi i runga i te torōna e noho ana.
REV 4:3 Ā, ko tērā i noho rā rite tonu ki te titiro atu ki te kōhatu hahapa, ki te harariu. He āniwaniwa hoki i ngā taha katoa o te torōna, ko te āhua ki te titiro atu kei tō te emerara.
REV 4:4 Nā, i ngā taha katoa o te torōna ētahi torōna e rua tekau mā whā, ā, ka kite ahau i runga i ngā torōna ko ngā kaumātua e rua tekau mā whā e noho ana, he mea whakakākahu ki te kākahu mā; he karauna kōura i runga ō rātou mātenga.
REV 4:5 Nā, ka puta mai i roto i te torōna he uira, he reo, he whatitiri. Ā, tērā ngā rama ahi e whitu e kā ana i mua i te torōna; ko ngā Wairua e whitu ēnei o te Atua.
REV 4:6 I mua, i te torōna anō he moana karaihe, te rite kei te haupapa. Ā, i waenganui o te torōna, i ngā taha katoa anō o te torōna, ko ngā mea ora e whā, kapi tonu ā mua, ā muri o rātou i te kanohi.
REV 4:7 Ko te tuatahi o ngā mea ora i rite ki te raiona, ko te tuarua o ngā mea ora i rite ki te kūao kau, ko te mata o te tuatoru o ngā mea ora i rite ki tō te tangata, ā, ko te tuawhā o ngā mea ora i rite ki te ēkara e rere ana.
REV 4:8 Nā, ko aua mea ora e whā, he parirau ō rātou, e ono o tēnā, o tēnā, i ngā taha katoa; kī tonu hoki a roto o rātou me ngā taha i te kanohi. Ā, kāhore he tānga i te ao, i te pō, he mea tonu tā rātou, “Tapu, tapu, tapu, te Ariki, te Atua Kaha Rawa, i mua nei ia, tēnei anō ināianei, ā, e haere mai nei.”
REV 4:9 Ā, i te mea ka hoatu e ngā mea ora te korōria, te hōnore, te whakawhetai ki tērā e noho ana i runga i te torōna, e ora ana ake ake,
REV 4:10 ka hinga iho ngā kaumātua e rua tekau mā whā ki te aroaro o tērā e noho rā i runga i te torōna, nā, ka koropiko ki a ia e ora tonu nei ake ake, ka panga hoki i ō rātou karauna ki mua o te torōna, ka mea,
REV 4:11 “Tika tonu, e te Ariki, kia riro i a koe te korōria, me te hōnore, me te kaha. Nāu hoki i hanga ngā mea katoa, ā, nāu i pai i takoto ai aua mea, i hangā ai.”
REV 5:1 Ā, i kite anō ahau i te ringa matau o tērā e noho rā i runga i te torōna, he pukapuka kua oti te tuhituhi ā-roto, ā-tua hoki, he mea hīri ki ngā hīri e whitu.
REV 5:2 Ā, i kite ahau i tētahi anahera kaha e karanga ana, he nui te reo, “Ko wai e tika ana hei whakatuwhera i te pukapuka, hei wāwāhi i ōna hīri?”
REV 5:3 Ā, kīhai i taea e tētahi i te rangi, i te whenua rānei, i raro rānei i te whenua, te whewhera i te pukapuka, te titiro rānei ki reira.
REV 5:4 Nā, nui atu tōku tangi, nō te mea kīhai i kitea tētahi e tika ana hei whewhera i te pukapuka, hei titiro iho rānei ki reira.
REV 5:5 Nā, ka mea mai tētahi o ngā kaumātua ki ahau, “Kaua e tangi, nā, kua riro te wikitōria i te Raiona o te hapū o Hūrā, i te Pūtake o Rāwiri, māna e whakatuwhera te pukapuka, e wāwāhi ōna hīri e whitu.”
REV 5:6 Ā, i kite anō ahau, nā, i waenganui o te torōna, o ngā mea ora hoki e whā, i waenganui anō hoki o ngā kaumātua, he Reme e tū ana, te āhua kei tō te mea i whakamatea, e whitu ōna haona, e whitu ngā kanohi; ko ngā Wairua e whitu ēnei o te Atua, kua tonoa nei puta noa i te ao.
REV 5:7 Nā, ka haere atu ia, ka tango i te pukapuka i roto i te matau o tērā e noho rā i runga i te torōna.
REV 5:8 Ā, nō ka tango ia i te pukapuka, ka hinga iho ngā mea ora e whā, me ngā kaumātua e rua tekau mā whā, ki te aroaro o te Reme, he hāpa i tētahi, i tētahi o rātou, me ngā oko kōura kī tonu i ngā mea kakara, ko ngā īnoi ērā a te hunga tapu.
REV 5:9 Nā, ka waiata rātou i te waiata hou, ka mea: “Pai tonu koe hei tango i te pukapuka, hei wāhi i ōna hīri; i whakamatea hoki koe, ā, hokona ana mātou e koe hei hunga mā te Atua ki ōu toto, i roto i ngā hapū, i ngā reo, i ngā huihuinga tāngata, i ngā iwi katoa;
REV 5:10 ā, meinga ana rātou e koe hei kīngi, hei tohunga ki tō mātou Atua; ka kīngi anō rātou ki runga ki te whenua.”
REV 5:11 Nā, i kite ahau, i rongo hoki ahau i te reo o ngā anahera maha i ngā taha katoa o te torōna, o ngā mea ora hoki, o ngā kaumātua. Nā, ko tō rātou tokomaha kei ngā mano tekau mano tekau, me ngā mano mano;
REV 5:12 nui atu tō rātou reo ki te mea mai: “Pai tonu te Reme i whakamatea hei tango i te kaha, i te taonga, i te mātauranga, i te mana, i te hōnore, i te korōria, i te whakapai!”
REV 5:13 I rongo anō ahau ki ngā mea hanga katoa o te rangi, o te whenua, i raro anō hoki i te whenua, ki ērā hoki i te moana, ki ngā mea katoa o reira, e mea ana: “Waiho atu i tēnei e noho nei i runga i te torōna, i te Reme hoki, te whakapai, te hōnore, te korōria, te kaha ā ake ake!”
REV 5:14 Nā, ka mea ngā mea ora e whā, “Āmine!” Ā, ka hinga iho ngā kaumātua, ka koropiko.
REV 6:1 Ā, i kite ahau i te wāhanga o tētahi o ngā hīri e te Reme, i rongo hoki i tētahi o ngā mea ora e whā e mea mai ana, ānō he reo whatitiri, “Haere mai!”
REV 6:2 I kite anō ahau, nā, he hōiho mā; ā, ko te tangata e noho ana i runga he kōpere tāna; ā, ka hoatu he karauna ki a ia. Ā, haere atu ana ia i runga i te wikitōria ki te wikitōria.
REV 6:3 Ā, i tāna wāhanga i te rua o ngā hīri ka rongo ahau i te rua o ngā mea ora e mea ana, “Haere mai!”
REV 6:4 Nā, ka puta mai tētahi hōiho anō, he hōiho whero; ā, i hoatu ki te kainoho i runga kia tangohia atu e ia te rangimārie i runga i te whenua, kia patu ai rātou tētahi i tētahi. I hoatu anō hoki he hoari nui ki a ia.
REV 6:5 Ā, i tāna wāhanga i te toru o ngā hīri ka rongo ahau i te toru o ngā mea ora e mea ana, “Haere mai!” Ā, i kite ahau, nā, he hōiho mangu; me te kainoho i runga he pāuna taimaha tāna kei tōna ringaringa.
REV 6:6 Ā, ka rongo ahau i te reo, anō i waenganui o ngā mea ora e whā, e mea ana, “He koata wīti mō te pene, e toru koata pārei mō te pene; kei kino hoki tāu mahi ki te hinu, ki te wāina.”
REV 6:7 Ā, i tāna wāhanga i te whā o ngā hīri, ka rongo ahau i te reo o te whā o ngā mea ora, e mea ana, “Haere mai!”
REV 6:8 Ā, ka kite ahau, nā, he hōiho hāmā; ā, ko te kainoho i runga, tōna ingoa ko te Mate, me te aru anō te Rēinga i a ia. Nā, i hoatu ki a rāua te tikanga ki te tuawhā o ngā wāhi o te whenua, kia whakamatea ki te hoari, ki te matekai, ki te mate tūroro, ki ngā kararehe hoki o te whenua.
REV 6:9 Ā, i tāna wāhanga i te rima o ngā hīri, ka kitea e ahau i raro i te āta ngā wairua o te hunga i whakamatea mō te kupu a te Atua, mō tā rātou whakaatu hoki.
REV 6:10 Nui atu tō rātou reo ki te karanga, ki te mea, “Kia pēhea te roa, e te Ariki, e te tapu, e te pono, ā, kore ana koe e whakawā, e rapu utu mō ō mātou toto, i te hunga e noho ana i runga i te whenua?”
REV 6:11 Ā, i hoatu he kākahu mā ki tēnei, ki tēnei o rātou; ā, i kīia atu ki a rātou, kia okioki rātou he wā iti nei, kia rite rā anō ō rātou hoa pononga me ō rātou tēina, i meinga nei kia patua, kia pērātia me rātou.
REV 6:12 Ā, ka kite ahau i tāna wāhanga i te ono o ngā hīri, nā, ko te rū nui; ā, ka mangu te rā ānō he kākahu taratara, pūhuruhuru, ā, ko te marama pēnā katoa i te toto;
REV 6:13 ā, ka taka iho ngā whetū o te rangi, ānō he piki e whakangahoro nei i ōna hua kōriri, ina rurea ia i te hau nui.
REV 6:14 Nā, ka tahia atu te rangi me te pukapuka e whakakopaia ana; ā, ka nekehia atu ngā maunga katoa me ngā motu i ō rātou tūranga.
REV 6:15 Nā, ko ngā kīngi o te whenua, ko ngā tāngata nunui, ko ngā tāngata taonga, ko ngā rangatira mano, ko ngā tāngata kaha, ko ngā pononga katoa, me ngā rangatira katoa, piri ana rātou ki roto ki ngā ana, ki ngā toka o ngā maunga;
REV 6:16 me te kī ake anō rātou ki ngā maunga, ki ngā toka, “E hinga ki runga ki a mātou, hei huna i a mātou i te kanohi o tērā e noho rā i runga i te torōna, i te riri hoki o te Reme;
REV 6:17 kua taea hoki te rā nui o tōna riri; ā, ko wai e tū?”
REV 7:1 Muri iho i ēnei mea ka kite ahau ngā anahera tokowhā, e tū ana i ngā pito e whā o te whenua, e pupuri ana i ngā hau e whā o te whenua, kia kaua e pupuhi te hau ki runga ki te whenua, kia kaua ki te moana, kia kaua rānei ki runga ki tētahi rākau.
REV 7:2 I kite anō ahau i tētahi atu anahera e haere ake ana i te rāwhiti, i a ia te hīri a te Atua ora; nā, nui atu tōna reo ki te karanga ki ngā anahera tokowhā, i tukua nei mā rātou e mea he kino ki te whenua, ki te moana,
REV 7:3 e mea ana, “Kaua e meatia he kino ki te whenua, kaua ki te moana, kaua hoki ki ngā rākau; kia hīritia rā anō e mātou ngā rae o ngā pononga a tō tātou Atua.”
REV 7:4 Ā, i rongo ahau ki te tokomaha o te hunga i hīritia, kotahi rau e whā tekau mā whā ngā mano i hīritia, nō ngā pū katoa o ngā tama a Īharaira:
REV 7:5 o te pū o Hūrā kotahi tekau mā rua ngā mano i hīritia, o te pū o Reupena kotahi tekau mā rua ngā mano, o te pū o Kara kotahi tekau mā rua ngā mano,
REV 7:6 o te pū o Āhera kotahi tekau mā rua ngā mano, o te pū o Nepetarima kotahi tekau mā rua ngā mano, o te pū o Mānahi kotahi tekau mā rua ngā mano,
REV 7:7 o te pū o Himiona kotahi tekau mā rua ngā mano, o te pū o Rīwai kotahi tekau mā rua ngā mano, o te pū o Ihākara kotahi tekau mā rua ngā mano,
REV 7:8 o te pū o Hepurona kotahi tekau mā rua ngā mano, o te pū o Hōhepa kotahi tekau mā rua ngā mano, o te pū o Pineamine kotahi tekau mā rua ngā mano i hīritia.
REV 7:9 Muri iho i ēnei mea ka kite ahau, nā, he mano tini, e kore nei e taea e tētahi te tatau, nō ngā iwi katoa, nō ngā hapū, nō ngā huihuinga tāngata, nō ngā reo, e tū ana i mua i te torōna, i mua hoki i te Reme, he mea whakakākahu ki ngā kākahu mā, he nīkau hoki ki ō rātou ringaringa.
REV 7:10 Nui atu tō rātou reo ki te karanga, ki te mea: “Ko te whakaoranga ki tō tātou Atua, e noho nei i runga i te torōna, ki te Reme hoki.”
REV 7:11 Nā, ko ngā anahera katoa e tū ana i ngā taha katoa o te torōna, i ngā taha hoki o ngā kaumātua, o ngā mea ora e whā; ā, ka tāpapa rātou ki mua i te torōna, ka koropiko ki te Atua,
REV 7:12 me te kī ake anō: “Āmine! Ko te whakapai, ko te korōria, ko te mātauranga, ko te whakawhetai, ko te hōnore, ko te mana, ko te kaha, kei tō tātou Atua ake ake! Āmine!”
REV 7:13 Ā, ka oho mai tētahi o ngā kaumātua, ka mea mai ki ahau, “Ko ēnei i whakakākahuria nei ki ngā kākahu mā, ko wai rā? Ā, i haere mai rātou i hea?”
REV 7:14 Anō rā ko ahau ki a ia, “E kara, e mātau ana koe.” Ka mea mai ia ki ahau, “Ko te hunga tēnei i puta mai i te tūkinotanga nui, ko ō rātou kākahu he mea horoi nā rātou, he mea whakamā ki ngā toto o te Reme.
REV 7:15 Koia rātou e noho nei i mua i te torōna o te Atua, e mahi nei ki a ia i te ao, i te pō, i roto i tōna whare; ā, mā tērā e noho rā i runga i te torōna e hīpoki tōna tapenākara ki runga i a rātou.
REV 7:16 Kore ake ō rātou matekai, kore ake ō rātou matewai; e kore anō hoki te rā e pā iho ki a rātou, tētahi wera rānei;
REV 7:17 ko te Reme hoki i waenganui o te torōna hei hēpara mō rātou, ā, māna rātou e ārahi ki ngā puna wai o te ora; ā, mā te Atua e muru atu ngā roimata katoa i ō rātou kanohi.”
REV 8:1 Ā, i tāna wāhanga i te whitu o ngā hīri, kāhore he aha i rangona i te rangi me te mea kotahi te hāwhe hāora.
REV 8:2 Ā, ka kite ahau i ngā anahera tokowhitu e tū rā i te aroaro o te Atua; ā, e whitu ngā tētere i hoatu ki a rātou.
REV 8:3 Ā, ka haere mai tētahi atu anahera, ka tū ki runga o te āta, he tahu kōura tāna; ā, he maha ngā whakakakara i hoatu ki a ia, hei tāpiri māna ki ngā īnoi a te hunga tapu katoa ki runga ki te āta kōura i mua i te torōna.
REV 8:4 Ā, ko te paoa o ngā whakakakara me ngā īnoi a te hunga tapu, ka kake atu i te ringaringa o te anahera ki te aroaro o te Atua.
REV 8:5 Ā, ka mau te anahera ki te tahu whakakakara, ka whakakīia ki te kāpura o te āta, pangā ana e ia ki te whenua. Nā, ko te putanga mai o ngā whatitiri, o ngā reo, o ngā uira, o te rū.
REV 8:6 Nā, kua takatū ngā anahera tokowhitu i ngā tētere e whitu, ka mea ki te whakatangi.
REV 8:7 Whakatangi ana te anahera tuatahi, nā, he whatu tērā, he kāpura, he toto anō hoki i roto, ka pangā ki te whenua. Nā, kua pau i te ahi te wāhi tuatoru o te whenua, kua pau i te ahi te wāhi tuatoru o ngā rākau, ā, pau ake hoki i te ahi ngā tarutaru matomato katoa.
REV 8:8 Ā, ka whakatangi te rua o ngā anahera, nā, me te mea he maunga nui tērā, e kāia ana e te ahi, kua makā ki te moana; ā, ka meinga te wāhi tuatoru o te moana hei toto.
REV 8:9 Ā, mate iho te wāhi tuatoru o ngā mea hanga i roto i te moana, o ngā mea whai ora; ngaro iho hoki te wāhi tuatoru o ngā kaipuke.
REV 8:10 Ā, ka whakatangi te toru o ngā anahera, nā, kua taka iho i te rangi he whetū nui e kā ana, ānō he rama, ā, taka ana ki te wāhi tuatoru o ngā awa, ki ngā puna hoki o ngā wai.
REV 8:11 Ā, ko te ingoa o te whetū ko Tarukawa; ā, ka meinga te wāhi tuatoru o ngā wai hei taru kawa; ā, he tokomaha ngā tāngata i mate i ngā wai, nō te mea kua kawa.
REV 8:12 Ā, ka whakatangi te whā o ngā anahera, nā, kua patua te wāhi tuatoru o te rā, me te wāhi tuatoru o te marama, me te wāhi tuatoru hoki o ngā whetū; kia pōuri ai te wāhi tuatoru o aua mea, kia kore ai e mārama te wāhi tuatoru o te rā, o te pō anō hoki.
REV 8:13 Ā, i kite ahau, i rongo hoki i tētahi ēkara e rere ana i waenganui o te rangi, he nui tōna reo ki te mea mai, “Auē, auē, auē, te mate mō te hunga e noho ana i runga i te whenua, i ērā reo o te tētere a ngā anahera tokotoru, meāke nei tangi!”
REV 9:1 Ā, ka whakatangi te rima o ngā anahera, ā, ka kite ahau i tētahi whetū nō te rangi kua taka iho ki te whenua. Ā, ka hoatu ki a ia te kī o te poka tōrere.
REV 9:2 Ā, uakina ana e ia te poka tōrere; ā, ka puta ake he paoa i te poka, ānō he paoa nō tētahi kāpura nui; ā, pōuri iho te rā me te rangi i te paoa o te poka.
REV 9:3 Ā, ka puta mai i te paoa he māwhitiwhiti ki runga ki te whenua; i hoatu hoki ki a rātou he kaha, he pērā me te kaha o ngā kopiona o te whenua.
REV 9:4 I kōrerotia hoki ki a rātou kia kaua e kino i a rātou te tarutaru o te whenua, tētahi mea matomato rānei, tētahi rākau rānei; ko ngā tāngata anake kāhore nei te hīri a te Atua i ō rātou rae.
REV 9:5 I tukua anō hoki ki a rātou kia kaua e whakamate i ērā, engari me whakamamae kia rima rā anō ngā marama; ā, ko tā rātou whakamamae kia pērā me te whakamamae a te kopiona, ina wero i te tangata.
REV 9:6 Ā, i aua rā tērā ngā tāngata e rapu i te mate, ā, e kore rawa e kitea; e hiahia anō rātou kia mate, heoi, ka oma te mate i a rātou.
REV 9:7 Nā, ko te waihanga o ngā māwhitiwhiti rite tonu ki ngā hōiho kua oti te whakanoho mō te pakanga. Ā, i runga i ō rātou mātenga he mea e rite ana ki ngā karauna kōura, ā, ko ō rātou kanohi ānō he kanohi tāngata.
REV 9:8 He makawe anō tō rātou rite tonu ki te makawe wahine, ko ō rātou niho me te mea nō te raiona.
REV 9:9 He pukupuku hoki ō rātou, ānō he pukupuku rino; ā, ko te haruru o ō rātou pākau, ānō ko te haruru o ngā hāriata, o ngā hōiho maha e rere ana ki te tatauranga.
REV 9:10 He hiku ō rātou pērā i ō ngā kopiona, he wero hoki; ā, kei ō rātou hiku tō rātou kaha ki te whakamamae tāngata mō ngā marama e rima.
REV 9:11 He kīngi anō tō rātou, ko te anahera o te poka tōrere; ko tōna ingoa i te reo Hiperu ko Aparona, ā, i te reo Kariki ko Aporiona tōna ingoa.
REV 9:12 Kua pahemo te tuatahi o ngā auē; nā, e rua ake ngā auē kei te haere mai i muri.
REV 9:13 Nā, ka whakatangi te ono o ngā anahera, ā, ka rongo ahau ki tētahi reo, e ahu mai ana i ngā haona e whā o te āta kōura i te aroaro o te Atua,
REV 9:14 e mea ana ki te ono o ngā anahera, kei a ia nei te tētere, “Wetekina ngā anahera tokowhā e here rā i te awa nui, i Uparati.”
REV 9:15 Nā, ka wetekina aua anahera tokowhā, kua noho rite noa ake nei mō te hāora, me te rā, me te marama, me te tau, e whakamate ai rātou i te wāhi tuatoru o ngā tāngata.
REV 9:16 Ā, ko te tokomaha o ngā taua o ngā hōia eke hōiho e rua tekau mano ngā tekau mano; i rongo hoki ahau ki tō rātou tokomaha.
REV 9:17 Ko tāku tēnei i kite ai i ahau e titiro matakite ana, ko ngā hōiho me ngā kainoho i runga he pukupuku o rātou, ānō he ahi, he hakiniti, he whānāriki. Nā, ko ngā upoko o ngā hōiho, ānō he upoko raiona; e puta mai ana hoki i ō rātou māngai he kāpura, he paoa, he whānāriki.
REV 9:18 Nā ēnei mate e toru i patu te wāhi tuatoru o ngā tāngata, nā te kāpura, nā te paoa, nā te whānāriki, i puta mai i ō rātou māngai.
REV 9:19 Ko te kaha hoki o ngā hōiho kei ō rātou māngai, kei ō rātou waero; ko ō rātou waero koia anō kei te nākahi, he upoko ō rātou; ko ā rātou mea tūkino ēnei.
REV 9:20 Nā, ko ērā atu tāngata, kīhai nei i whakamatea e ēnei mate, kāhore rātou i rīpenetā ki ngā mahi a ō rātou ringaringa, kīhai hoki i mutu tō rātou koropiko ki ngā rēwera, ki ngā whakapakoko kōura, hiriwa, parāhi, kōhatu, rākau rānei; ki ngā mea kāhore nei e kite, kāhore e rongo, kāhore e hāereere.
REV 9:21 Kāhore anō hoki rātou i rīpenetā ki ā rātou kōhuru, ki ā rātou mahi mākutu, ki ā rātou moepuku, ki ā rātou tāhae.
REV 10:1 Ā, ka kite ahau i tētahi atu anahera kaha e heke iho ana i te rangi, he mea whakakākahu ki te kapua; ko te āniwaniwa i runga i tōna mātenga, ko tōna kanohi rite tonu ki te rā, ōna waewae ki te pou kāpura.
REV 10:2 I tōna ringaringa hoki tētahi pukapuka nohinohi e tuwhera ana. Ā, ko tōna waewae matau e takahi ana ki te moana, ko tōna mauī ki te whenua.
REV 10:3 He nui anō tōna reo ki te karanga, ānō he raiona e tangi ana. Ā, i te mea ka karanga ia, ka puaki ngā reo o ngā whatitiri e whitu.
REV 10:4 Ā, nō ka puaki ngā reo o ngā whatitiri e whitu, ka mea ahau ki te tuhituhi. Nā, ka rangona e ahau he reo i te rangi e mea mai ana ki ahau, “Hīritia ngā mea kua whakapuakina nei e ngā whatitiri e whitu, kaua hoki ēnei e tuhituhia.”
REV 10:5 Nā, ko te anahera i kitea rā e ahau e tū ana i runga i te moana i runga hoki i te whenua, whakaara ana i tōna ringa matau ki te rangi,
REV 10:6 ā, oatitia ana e ia te Mea ora tonu ake ake, nāna nei i hanga te rangi me ōna mea, te whenua me ōna mea, te moana me ōna mea, “Kāhore ake he tāima,
REV 10:7 engari i ngā rā o te reo o te whitu o ngā anahera, ina mea ia ki te whakatangi, ka whakaotia te mea ngaro a te Atua, tāna rongopai i kauwhau ai ki āna pononga, ki ngā poropiti.”
REV 10:8 Ā, ka kōrero anō ki ahau te reo i rongo ai ahau i te rangi, ka mea, “Tīkina atu te pukapuka nohinohi e tuwhera nā i te ringaringa o te anahera e tū nā i runga i te moana, i runga anō i te whenua.”
REV 10:9 Nā, ka haere ahau ki te anahera, ka mea ki a ia, “Hōmai ki ahau te pukapuka nohinohi nā.” Ka mea mai ia ki ahau, “Tangohia, kainga; ā, ka kawa tōu kōpū, ka reka ia ki tōu māngai, ānō he honi.”
REV 10:10 Nā, ka tango ahau i te pukapuka nohinohi i te ringaringa o te anahera, kainga ana e ahau; ā, i reka anō ki tōku māngai, ānō he honi. Nō tāku kainga kua kawa tōku kōpū.
REV 10:11 Ā, ka mea mai rātou ki ahau, “Me poropiti anō koe mō ngā huihuinga tokomaha o ngā tāngata, o ngā iwi, o ngā reo, o ngā kīngi.”
REV 11:1 Nā, kua hōmai ki ahau he kākaho e rite ana ki te tokotoko, ā, ka mea mai tētahi, “E ara, ka whanganga i te whare o te Atua, me te āta, me te hunga e koropiko ana i roto.
REV 11:2 Me whakarere ia ki waho te marae i te taha ki waho o te whare tapu, kaua tērā e whangangatia; kua hoatu hoki ki ngā tauiwi; ā, e takatakahia e rātou te pā tapu, e whā tekau mā rua ngā marama.
REV 11:3 Ā, māku e hoatu he tikanga ki āku kaiwhakaatu tokorua, e poropiti hoki rāua, kotahi mano e rua rau e ono tekau ngā rā, he taratara anō te kākahu.”
REV 11:4 Ko ngā ōriwa e rua ēnei, me ngā tūranga rama e rua, e tū nei i te aroaro o te Ariki o te whenua.
REV 11:5 Ā, ki te mea tētahi ki te tūkino i a rāua, ka puta mai he kāpura i ō rāua māngai, e pau ai ō rāua hoariri. Ki te mea hoki tētahi ki te tūkino i a rāua, ko te whakamatenga tēnei mōna.
REV 11:6 Kei a rāua te tikanga mō te kōpani i te rangi, kia kaua e ua te ua i ngā rā o tā rāua poropititanga. Kei a rāua anō te tikanga mō te whakaputa kē i ngā wai hei toto, mō te patu anō i te whenua ki ngā patunga katoa, i ngā wā e pai ai rāua.
REV 11:7 Ā, nō ka mutu tā rāua whakaatu, ka whawhai ki a rāua te kararehe e haere ake ana i roto i te poka tōrere, ā, e taea rāua e ia, e whakamatea rāua.
REV 11:8 Ka takoto anō ō rāua tinana ki te huarahi o te pā nui, e huaina wairuatia nei ko Horoma, ko Īhipa, ki te wāhi hoki i rīpekatia ai tō rāua Ariki.
REV 11:9 Ā, e toru ngā rā me te hāwhe e tirohia ai ō rāua tinana e ngā huihuinga tāngata, e ngā hapū, e ngā reo, e ngā iwi, e kore anō hoki e tukua ō rāua tinana kia hoatu ki te urupā.
REV 11:10 Ka koa hoki ki a rāua te hunga e noho ana i te whenua, ka harakoa, ka tāpae taonga tētahi ki tētahi; nō te mea i whakamamae ēnei poropiti tokorua i te hunga e noho ana ki te whenua.
REV 11:11 Ā muri iho i aua rā e toru me te hāwhe, ka uru te manawa ora ki a rāua, he mea nā te Atua, ā, ka tū ō rāua waewae ki runga; nui atu hoki te wehi i pā ki te hunga e titiro ana ki a rāua.
REV 11:12 Ā, ka rongo rāua i te reo nui i te rangi e mea ana ki a rāua, “Haere ake kōrua ki konei.” Nā, haere atu ana rāua ki te rangi i roto i te kapua; me te mātakitaki anō ō rāua hoariri ki a rāua.
REV 11:13 I taua hāora anō ka puta he rū nui, ka hinga te wāhi whakatekau o te pā; ko ngā tāngata i mate i taua rū e whitu mano; ā, ka wehi ērā atu, ā, hoatu ana e rātou he korōria ki te Atua o te rangi.
REV 11:14 Kua pahemo te rua o ngā Auē! Nā, ka hohoro te toru o ngā Auē te haere mai!
REV 11:15 Nā, ka whakatangi te whitu o ngā anahera; ā, ka whai i muri ngā reo nunui i te rangi, e mea ana: “Kua riro te rangatiratanga o te ao hei rangatiratanga mō tō tātou Ariki, mō tāna Karaiti hoki; ko ia anō hei kīngi ake ake.”
REV 11:16 Nā, ko ngā kaumātua e rua tekau mā whā, e noho rā i te aroaro o te Atua i runga i ō rātou torōna, ka takoto rātou, ko ō rātou kanohi ki raro, ka koropiko ki te Atua,
REV 11:17 ka mea: “Ko tā mātou whakawhetai tēnei ki a koe, e te Ariki, e te Atua Kaha Rawa; tēnei koe ināianei, ā, i mua anō koe, ā, kei te haere mai anō; nō te mea kua riro i a koe tōu mana nui, kua kīngi anō koe.
REV 11:18 I riri hoki ngā iwi, ā, kua tae mai tōu riri me te wā mō ngā tūpāpaku e whakawākia ai. Te wā hoki e hoatu ai e koe he utu ki āu pononga, ki ngā poropiti, ki te hunga tapu anō hoki, ki te hunga anō e wehi ana i tōu ingoa, ki te hunga nonohi, ki te hunga nunui; e whakangaromia ai hoki te hunga e whakangaro nei i te whenua.”
REV 11:19 Ā, i whakapuaretia anō te whare o te Atua i roto i te rangi, ā, ka kitea te āka o tāna kawenata i roto i tōna whare; nā, he uira tērā, me ngā reo, me ngā whatitiri, me te rū, me te whatu nui.
REV 12:1 Nā, ka kitea he tohu nui i te rangi; he wahine, ko te rā tōna kākahu, ko te marama kei raro i ōna waewae, i runga anō i tōna mātenga ko ngā whetū kotahi tekau mā rua hei karauna.
REV 12:2 Kua hapū hoki ia, nā, karanga ana, oke ana, he mamae whānautanga.
REV 12:3 Ā, ka kitea tētahi atu tohu i te rangi, nā, he tarakona nui, he mea whero, e whitu ōna māhunga, tekau ōna haona, e whitu anō ngā karauna i runga i ōna māhunga.
REV 12:4 Ā, e kūmea ana e tōna hiku te wāhi tuatoru o ngā whetū o te rangi, makā ana e ia ki te whenua. Ā, ka tū te tarakona i te aroaro o te wahine i mea nei ki te whānau, hei kai i tāna tamaiti ina whānau.
REV 12:5 Nā, ka whānau te tamaiti a te wahine rā, he tāne, ko ia hei whakahaere tikanga mō ngā iwi katoa ki te tokotoko rino. Nā, kua kāhakina atu tāna tamaiti ki te Atua, ki tōna torōna hoki.
REV 12:6 Ā, ka oma te wahine rā ki te koraha, kua rite noa ake hoki i te Atua he kāinga mōna ki reira, ki reira whāngainga ai ia, kia taka rā anō ngā rā kotahi mano e rua rau e ono tekau.
REV 12:7 Nā, he whawhai tērā kei te rangi. Ko Mikaera rātou ko āna anahera e whawhai ana ki te tarakona; whawhai ana hoki te tarakona rātou ko āna anahera.
REV 12:8 Ā, kīhai rātou i toa; kīhai anō hoki tō rātou wāhi i kitea i te rangi i muri iho.
REV 12:9 Nā, ka makā te tarakona nui, te nākahi onamata, e huaina nei ko te Rēwera, ko Hātana hoki, e whakapōhēhē nei i te ao katoa. Ka makā ia ki te whenua, ā, i maka tahitia āna anahera me ia.
REV 12:10 Ā, ka rongo ahau i te reo nui i te rangi e kī ana: “Tēnei kua tae mai te whakaoranga, te kaha, me te rangatiratanga o tō tātou Atua, me te mana hoki o tāna Karaiti; nō te mea kua whakatakā te kaiwhakapae ki ō tātou tēina, e whakapae nei ki a rātou i te ao, i te pō, i te aroaro o tō tātou Atua.
REV 12:11 Hinga ana ia i a rātou, he meatanga nā ngā toto o te Reme, nā te kupu hoki o tā rātou whakaatu; kīhai rātou i aroha ki te ora mō rātou, ā mate noa.
REV 12:12 Kia hari koutou ki tēnei, e ngā rangi, e te hunga hoki e noho ana i reira. Auē te mate mō te whenua, mō te moana hoki! Kua heke atu hoki ki a koutou te rēwera, nui atu hoki tōna riri, nō te mea kua mātau ia he poto tōna tāima.”
REV 12:13 Ā, nō ka kite te tarakona kua makā ia ki te whenua, ka whakatoia e ia te wahine nāna te tamaiti tāne i whānau nei.
REV 12:14 Nā, e rua ngā pākau o te ēkara nui kua hoatu ki te wahine, kia rere ai ia ki te koraha, ki tōna kāinga, ki reira whāngainga ai ā taka noa he tāima, ētahi tāima, me te hāwhe tāima, kei kitea mai e te nākahi.
REV 12:15 Nā, ka whakaruakina mai e te nākahi i tōna māngai i muri i te wahine rā he wai, ānō he awa, kia kāhakina atu ai ia e te awa.
REV 12:16 Ā, ka āwhinatia mai te wahine e te whenua, ka hāmama te māngai o te whenua, inumia ake te awa i whakaruakina nei e te tarakona i roto i tōna māngai.
REV 12:17 Ā, riri ana te tarakona ki te wahine; haere ana ia ki te whawhai ki ērā atu o tāna whānau, ki te hunga e pupuri ana i ngā ture a te Atua, kei a rātou nei te whakaatu o Īhu Karaiti.
REV 13:1 Nā, i te tū ahau i te one o te moana. Ā, ka kite ahau i tētahi kararehe e haere ake ana i te moana, e whitu ōna māhunga, tekau ngā haona, tekau hoki ngā karauna i runga i ōna haona, i runga anō i ōna māhunga ko te ingoa kohukohu.
REV 13:2 Rite tonu hoki te kararehe i kite ai ahau ki te reparo, ko ōna waewae kei o te pea, ko tōna māngai kei te māngai o te raiona. Ā, ka hoatu e te tarakona tōna kaha ki a ia, tōna torōna, me te mana nui.
REV 13:3 I kite anō ahau i tētahi o ōna mātenga me te mea kua marū, he mea e mate rawa ai; heoi, kua ora ia i tōna patunga e mate ai ia. Nā, kei te mīharo te ao katoa i muri mai i te kararehe;
REV 13:4 nā, koropiko ana rātou ki te tarakona nāna nei i hoatu te mana ki te kararehe. Koropiko ana hoki ki te kararehe; i mea rātou, “Ko wai te rite ana ki te kararehe? Ko wai te kaha ana ki te whawhai ki a ia?”
REV 13:5 Ā, i hoatu ki a ia he māngai, e kōrero ana i ngā kōrero nunui, i ngā kohukohu; i hoatu hoki ki a ia he kaha, e mahi ai ia ā taka noa ngā marama e whā tekau mā rua.
REV 13:6 Ā, ka puaki i tōna māngai he kohukohu ki te Atua, he kohukohu ki tōna ingoa, ki tōna nohoanga, ki te hunga hoki e noho ana i te rangi.
REV 13:7 I tukua anō ki a ia kia whawhai ki te hunga tapu, kia taea hoki rātou e ia. I hoatu anō ki a ia he mana ki ngā hapū katoa, ki ngā reo, ki ngā iwi.
REV 13:8 Ā, ko te hunga katoa e noho ana i te whenua, ka koropiko ki a ia, ngā tāngata katoa kāhore nei ō rātou ingoa i tuhituhia ki te pukapuka ora a te Reme, nō te tīmatanga iho rā anō o te ao tōna whakamatenga.
REV 13:9 Ki te mea he taringa tō tētahi, kia rongo ia!
REV 13:10 Ko te tangata hopu taurekareka, ka riro anō ia hei taurekareka; ko te tangata e patu ana ki te hoari, ka patua anō ia ki te hoari. Ko tēnei te manawanui me te whakapono o te hunga tapu.
REV 13:11 I kite anō ahau i tētahi atu kararehe e haere ake ana i te whenua; e rua ōna haona rite tonu ki ō te reme, ko tāna kōrero hoki i rite ki tā te tarakona.
REV 13:12 Kei a ia anō ngā mana katoa o te kararehe tuatahi hei mahi ki tōna aroaro, e mea ana hoki ia i te whenua me te hunga hoki e noho ana i reira kia koropiko ki te kararehe tuatahi, kua ora nei tōna patunga e mate ai ia.
REV 13:13 He nui hoki ngā tohu e meatia ana e ia, e mea ana ia i te kāpura kia heke iho i te rangi ki te whenua i te tirohanga a ngā tāngata.
REV 13:14 E whakapōhēhē ana hoki ia i te hunga e noho ana i te whenua, ki ngā tohu ka hoatu nei ki a ia kia mahia ki te aroaro o te kararehe; e mea ana ia ki te hunga e noho ana i te whenua, kia hangā he whakapakoko mō te kararehe i patua nei ki te hoari, ā, kua ora nei anō.
REV 13:15 I hoatu anō ki a ia kia hoatu he wairua ora ki te whakapakoko o te kararehe, e kōrero ai te whakapakoko o te kararehe, e mea ai hoki i te hunga e kore e koropiko ki te whakapakoko o te kararehe kia whakamatea.
REV 13:16 I mea anō hoki ia i te hunga katoa, i te iti, i te rahi, i te hunga whai taonga, i te hunga rawakore, i ngā rangatira, i ngā pononga, kia meatia ki a rātou he tohu ki ō rātou ringaringa matau, ki ō rātou rae rānei.
REV 13:17 Kia kaua hoki tētahi e āhei te hoko mai te hoko atu rānei, ko te tangata anake kei a ia nei te tohu, te ingoa rānei o te kararehe, te whika rānei o tōna ingoa.
REV 13:18 Tēnei te mātauranga. Mā te tangata whai whakaaro e tatau te whika o te kararehe! He whika tangata hoki. Nā, ko tōna whika, e ono rau e ono tekau mā ono.
REV 14:1 Ā, i kite anō ahau, nā, ko te Reme e tū ana i Maunga Hiona, kotahi rau e whā tekau mā whā mano ōna hoa, ko tōna ingoa, me te ingoa o tōna Matua, he mea tuhituhi ki ō rātou rae.
REV 14:2 Nā, ka rongo ahau i te reo i te rangi, tōna rite kei te haruru o ngā wai maha, kei te haruru anō o te whatitiri nui; ā, ko te reo i rongo ai ahau, ānō ko te reo o ngā kaiwhakatangi hāpa e whakatangi ana i ā rātou hāpa;
REV 14:3 ā, ko tā rātou waiata me te mea he waiata hou i mua i te torōna, i mua hoki i ngā mea ora e whā, i ngā kaumātua anō hoki. E kore hoki e taea e tētahi te ako taua waiata, ko ngā mano anake kotahi rau e whā tekau mā whā, kua oti nei te hoko i runga i te whenua.
REV 14:4 Ko te hunga tēnei kāhore nei i poke i te wahine; he wāhina hoki rātou. Ko te hunga tēnei e aru ana i te Reme ki ngā wāhi katoa e haere ai ia. He mea hoko ēnei i roto i ngā tāngata, he mātāmua ki te Atua, ki te Reme hoki.
REV 14:5 Kāhore hoki he tinihanga i mau i ō rātou māngai; he kohakore rātou.
REV 14:6 I kite anō ahau i tētahi atu anahera e rere ana i waenganui o te rangi, kei a ia te rongopai mau tonu hei kauwhau māna ki te hunga e noho ana i te whenua, ki ngā iwi katoa, ki ngā hapū, ki ngā reo, ki ngā huihuinga tāngata.
REV 14:7 Ā, he nui tōna reo ki te mea, “Kia wehi koutou ki te Atua, hoatu ki a ia he korōria; kua tae mai hoki te hāora o tāna whakawā. Koropiko atu hoki ki a ia, ki te Kaihanga o te rangi, o te whenua, o te moana, o ngā puna wai.”
REV 14:8 I aru mai anō tētahi atu anahera, i mea, “Kua horo, kua horo a Papurōna, te pā nui, i whakainu nei i ngā tauiwi katoa ki te wāina, o te riri o tōna moepuku.”
REV 14:9 I aru mai anō te toru o ngā anahera i a rāua, nui atu tōna reo ki te mea mai, “Ki te koropiko tētahi ki te kararehe, ki tōna whakapakoko hoki, ka tango hoki i te tohu ki tōna rae, ki tōna ringaringa rānei,
REV 14:10 e inu anō ia i te wāina o te riri o te Atua, e ringihia nei, he mea kāhore i whakananua, ki roto ki te kapu o tōna riri; e whakamamaetia hoki ia i roto i te kāpura, i te whānāriki i te aroaro o ngā anahera tapu, i te aroaro hoki o te Reme.
REV 14:11 Ā, kake ana te paoa o tō rātou whakamamaetanga ake ake. Kāhore hoki he okiokinga i te ao, i te pō, mō te hunga e koropiko ana ki te kararehe, ki tōna whakapakoko hoki, mō te tangata hoki e tango ana i te tohu o tōna ingoa.”
REV 14:12 Tēnei te manawanui o te hunga tapu, o te hunga e pupuri ana i ngā ture a te Atua, i te whakapono hoki o Īhu.
REV 14:13 Ā, ka rongo ahau i tētahi reo i te rangi e mea ana, “Tuhituhia: Ka hari ngā tūpāpaku e mate nei i roto i te Ariki i ngā wā i muri nei.” “Āe rā!” e ai tā te Wairua, “kia okioki ai rātou i ā rātou mahi; e aru tahi hoki ā rātou mahi i a rātou.”
REV 14:14 Ā, ka kite anō ahau, nā, he kapua mā; ā, i runga i te kapua e noho ana tētahi, tōna rite kei te Tama a te tangata, i runga anō i tōna māhunga he karauna kōura, i roto i tōna ringaringa he toronaihi koi.
REV 14:15 Nā, ka puta mai tētahi atu anahera i te whare tapu, he nui tōna reo ki te karanga ki tērā e noho rā i runga i te kapua, “Ākina iho tāu toronaihi, kotia! Kua tae hoki te wā e kokoti ai. Kua maroke kē hoki te wīti o te ao.”
REV 14:16 Kātahi tērā e noho rā i runga i te kapua ka āki iho i tāna toronaihi ki te whenua, ā, ka kotia te whenua.
REV 14:17 Ā, ka puta mai anō he anahera i roto i te whare tapu i te rangi, he toronaihi koi anō hoki tāna.
REV 14:18 Nā, ka puta mai anō tētahi atu anahera i roto i te āta, kei a ia he mana ki te kāpura; he nui tōna reo ki te karanga ki tērā i te toronaihi koi, i mea ia, “Ākina iho tāu toronaihi koi, tapahia ngā tautau wāina o te whenua; kua maoa hoki ōna karepe.”
REV 14:19 Nā, ākina iho ana tāna toronaihi e te anahera ki te whenua, tapahia ana e ia te wāina o te whenua, pangā ana e ia, ki te takahanga nui o te riri o te Atua.
REV 14:20 Nā, ka takahia te takahanga wāina i waho o te pā, ā, puta ake ana he toto i roto i te takahanga, tae noa ake ki ngā paraire o ngā hōiho, ā taea noatia ngā pāronga kotahi mano e ono rau.
REV 15:1 Ā, i kite ahau i tētahi atu tohu i te rangi, he mea nui, he mea whakamīharo, tokowhitu ngā anahera kei a rātou ngā whiu whakamutunga e whitu; ko te whakaotinga hoki ēnei o te riri a te Atua.
REV 15:2 Ā, ka kite ahau he mea e rite ana ki te moana karaihe, he mea whakananu ki te kāpura; me te hunga i kaha i te kararehe, i tōna whakapakoko hoki, i tāna tohu, i te whika anō hoki o tōna ingoa, e tū ana i runga i te moana karaihe, kei a rātou anō ngā hāpa a te Atua.
REV 15:3 Kei te waiata hoki rātou i te waiata a Mohi, pononga a te Atua, me te waiata anō a te Reme; i mea rātou: “He nui āu mahi, e mīharotia ana, e te Ariki, e te Atua Kaha Rawa! Tika tonu ōu ara, pono tonu, e te Kīngi o ngā whakatupuranga!
REV 15:4 Ko wai e kore e wehi i a koe, e te Ariki? E kore hoki e whakakorōria i tōu ingoa? Ko koe anake hoki te tapu ana; Ka haere mai hoki ngā tauiwi katoa, ka koropiko ki tōu aroaro; kua whakakitea hoki āu tikanga tika.”
REV 15:5 Ā, i muri iho i ēnei mea ka kite ahau, nā, kua puare te whare tapu o te tapenākara o te whakaaturanga i te rangi.
REV 15:6 Nā, ka puta mai i roto i te whare tapu ngā anahera e whitu, i a rātou nei ngā whiu e whitu, he mea tātai ki te kōhatu utu nui, kāhore he koha, kanapa tonu, ā, ko ō rātou uma he mea whītiki ki te whītiki kōura.
REV 15:7 Ā, ka hoatu e tētahi o ngā mea ora e whā ki ngā anahera e whitu ētahi oko kōura e whitu, kī tonu i te riri o te Atua e ora nei ā ake ake.
REV 15:8 Nā, kua kī te whare tapu i te paoa, he mea nā te korōria o te Atua, nā tōna kaha hoki. Kīhai hoki tētahi tangata i āhei te tomo ki te whare tapu, kia mutu rā anō ngā whiu e whitu a ngā anahera e whitu.
REV 16:1 Ā, ka rongo ahau i te reo nui he mea nō roto i te whare tapu e mea ana ki ngā anahera e whitu, “Haere koutou, ringihia ngā oko e whitu o te riri o te Atua ki te whenua!”
REV 16:2 Nā, haere ana te tuatahi, ringihia ana e ia tāna oko ki te whenua; ā, kua pā he mariao kino whakarihariha ki ngā tāngata kei a rātou nei te tohu a te kararehe, ki te hunga hoki e koropiko ana ki tōna whakapakoko.
REV 16:3 Nā, ka ringihia e te tuarua o ngā anahera tāna oko ki te moana; ā, ka meinga hei toto, ānō nō te tūpāpaku; ā, ka mate ngā wairua ora katoa i roto i te moana.
REV 16:4 Nā, ka ringihia e te tuatoru o ngā anahera tāna oko ki ngā awa, ki ngā puna wai; ā, ka meinga hei toto.
REV 16:5 Ā, ka rongo ahau i te anahera o ngā wai e mea ana, “Tika tonu koe, e te Ariki, tēnei koe ināianei, i mua anō koe, ko te Mea Tapu hoki koe, nāu hoki ēnei whakawā.
REV 16:6 I ringihia hoki e rātou ngā toto o te hunga tapu, o ngā poropiti, ā, hoatu ana e koe he toto ki a rātou kia inumia; he mea tika hoki mā rātou.”
REV 16:7 I rongo hoki ahau i te āta e mea ana, “Āe rā, e te Ariki, e te Atua Kaha Rawa, pono tonu, tika tonu āu whakawā.”
REV 16:8 Nā, ka ringihia e te tuawhā o ngā anahera tāna oko ki te rā; ā, ka hoatu ki a ia kia tunua ngā tāngata ki te ahi.
REV 16:9 Nā, hunuhunua ana ngā tāngata e te wera nui; ā, ka kohukohu rātou ki te ingoa o te Atua, kei a ia nei te tikanga mō ēnei whiu. Kīhai hoki rātou i rīpenetā, i hoatu i te korōria ki a ia.
REV 16:10 Nā, ka ringihia e te tuarima o ngā anahera tāna oko ki te torōna o te kararehe; ā, ka whakapōuritia tōna rangatiratanga; ā, ngaua ana e ngā tāngata ō rātou arero i te mamae,
REV 16:11 kohukohua ana hoki e rātou te Atua o te rangi mō ō rātou mamae, mō ō rātou mariao, kīhai anō rātou i rīpenetā ki ā rātou mahi.
REV 16:12 Nā, ka ringihia e te tuaono o ngā anahera tāna oko ki te awa nui, ki Uparati; ā, mimiti ake tōna wai, he mea kia rite ai te huarahi o ngā kīngi e haere mai i te rāwhiti.
REV 16:13 Ā, i kite ahau i ngā wairua poke e toru, te rite kei te poroka, e puta mai ana i te māngai o te tarakona, i te māngai hoki o te kararehe, i te māngai anō hoki o te poropiti teka.
REV 16:14 Ko ngā wairua hoki rātou o ngā rēwera, e mahi ana i ngā tohu, e haere atu ana ki ngā kīngi o te whenua, o te ao katoa, ki te huihui i a rātou ki te whawhai i taua rā nui o te Atua Kaha Rawa.
REV 16:15 “Nanā, ka haere atu ahau, ānō he tāhae. Ka hari te tangata e mataara ana, e tiaki ana i ōna kākahu, kei haere tahanga ia, kei kitea tōna whakamā!”
REV 16:16 Nā, ka huihuia rātou e ia ki te wāhi e huaina nei i te reo Hiperu ko Aramakerona.
REV 16:17 Nā, ka ringihia e te anahera tuawhitu tāna oko ki te takiwā o te rangi, ā, ka puta mai he reo nui i te whare tapu o te rangi, i te torōna, e mea ana, “Kua oti!”
REV 16:18 Ā, ka puta mai he uira, he reo, he whatitiri, ā, ka puta he rū nui, kāhore anō he rū i pērā mai o te nohoanga o te tangata ki te whenua, tōna nui, tōna kaha.
REV 16:19 Nā, ka wehea te pā nui, e toru ngā wāhi, ā, ka horo ngā pā o ngā tauiwi. Ka maharatia hoki Papurōna nui i te aroaro o te Atua, hoatu ana ki a ia te kapu o te wāina o te āritarita o tōna riri.
REV 16:20 Ā, rere atu ana ngā motu katoa, kīhai hoki i kitea ngā maunga.
REV 16:21 I heke iho anō hoki i te rangi he whatu nui, ki runga ki ngā tāngata, kei tō te taranata te taimaha o te whatu kotahi; ā, ka kohukohu ngā tāngata i te Atua mō te whiu a te whatu; he nui rawa hoki tāna whiu.
REV 17:1 Nā, ka haere mai tētahi o ngā anahera e whitu, kei a rātou nei ngā oko e whitu, ā, ka kōrero mai ki ahau, ka mea, “Haere mai; māku e whakakite ki a koe te whakawākanga o te wahine kairau, o te mea nui e noho ana i runga i ngā wai maha.
REV 17:2 Kua moea pukutia nei e ngā kīngi o te whenua, ā, haurangi iho te hunga e noho ana i te whenua i te wāina o tōna moepuku.”
REV 17:3 Nā, ka ārahina ahau i roto i te Wairua e ia ki te koraha; ā, ka kite ahau i tētahi wahine e noho ana i runga i tētahi kararehe whero, kapi tonu i te ingoa kohukohu, e whitu ōna māhunga, tekau ngā haona.
REV 17:4 Nā, ko te kākahu o te wahine rā he mea pāpura, he mea whero, he mea whakapaipai ki te kōura, ki te kōhatu utu nui, ki te peara, he kapu kōura hoki kei tōna ringa kī tonu i te mea whakarihariha, i te poke hoki o tōna moepuku.
REV 17:5 I tōna rae anō hoki tētahi ingoa tuhituhi rawa: KO TE MEA NGARO KO PAPURŌNA NUI, KO TE WHAEA O NGĀ WĀHINE KAIRAU, O NGĀ MEA WHAKARIHARIHA HOKI O TE AO.
REV 17:6 I kite anō ahau i taua wahine nei e haurangi ana i ngā toto o te hunga tapu, i ngā toto hoki o ngā kaiwhakaatu i a Īhu. Ā, nō tōku kitenga i a ia, nui atu te mīharo i mīharo ai ahau.
REV 17:7 Ā, ka mea mai te anahera ki ahau, “He aha koe i mīharo ai? Māku e kōrero ki a koe taua mea ngaro, te wahine, me te kararehe hoki e waha rā i a ia, nōna nei ngā mātenga e whitu me ngā haona kotahi tekau.
REV 17:8 Ko te kararehe i kite rā koe, i mua ia, kāhore hoki ināianei. Ka puta ake anō hoki ia ā mua i roto i te poka tōrere, ā, ka riro atu ki te whakangaromanga. Nā, ko te hunga e noho ana ki te whenua, kāhore nei ō rātou ingoa i tuhituhia ki te pukapuka o te ora o te orokohanganga rā anō o te ao, ka mīharo rātou ina kite i te kararehe i ora i mua, ā, kāhore nei ināianei, ā tēnei ake ka puta.
REV 17:9 “Tēnei te hinengaro whai mahara. Ko ngā mātenga e whitu he maunga, e whitu, kei runga te wahine i ērā e noho ana.
REV 17:10 Nā, e whitu ērā kīngi; tokorima kua hinga, kotahi tēnei, ko tētahi kāhore anō i tae noa mai; ā, ka tae mai ia, me noho ia, he wā iti nei.
REV 17:11 Nā, ko te kararehe, ko te mea i mua rā, ā, kāhore nei ināianei, he tuawaru anō ia, nō ngā tokowhitu anō hoki; ā, e riro ana ia ki te whakangaromanga.
REV 17:12 “Nā, ko ngā haona kotahi tekau i kite rā koe, kotahi tekau ērā kīngi, kāhore anō kia whiwhi noa ki tētahi rangatiratanga; heoi, kotahi te hāora e whiwhi tahi ai rātou ko te kararehe ki te mana, me te mea he kīngi.
REV 17:13 Kotahi tonu te whakaaro nui a ēnei, e hoatu anō e rātou tō rātou kaha, tō rātou mana ki te kararehe.
REV 17:14 E whawhai anō ēnei ki te Reme, e taea anō rātou e te Reme. Nō te mea ko te Ariki ia o ngā ariki, ko te Kīngi o ngā kīngi. Ā, ka taea anō hoki e rātou ko ōna hoa, ko te hunga he mea karanga, he mea whiriwhiri, he hunga pono.”
REV 17:15 I mea mai anō ia ki ahau, “Ko ngā wai i kitea e koe i te nohoanga o te wahine kairau rā, ko ngā huihuinga tāngata rātou, ko ngā mano, ko ngā iwi, ko ngā reo.
REV 17:16 Nā, ko ngā haona kotahi tekau i kitea e koe, me te kararehe, e kino anō ēnei ki te wahine kairau, ka meinga ia e rātou kia mōtī rawa iho, kia noho tahanga, e kai anō rātou i ōna kikokiko, e tahu hoki i a ia kia pau rawa i te ahi.
REV 17:17 Kua hoatu hoki e te Atua ki ō rātou ngākau kia whakarite i tāna i pai ai, kia kotahi anō hoki ō rātou whakaaro, kia hoatu hoki e rātou tō rātou rangatiratanga ki te kararehe, kia rite rā anō ngā kupu a te Atua.
REV 17:18 “Nā, ko te wahine i kite nā koe, ko te pā nui ia, kei a ia nei te kīngitanga i runga i ngā kīngi o te ao.”
REV 18:1 Ā muri iho i ēnei mea ka kite ahau i tētahi atu anahera e heke iho ana i te rangi, he mana nui tōna; mārama tonu hoki te ao i tōna korōria.
REV 18:2 He nui hoki tōna reo ki te karanga, ki te mea: “Kua horo, kua horo a Papurōna nui. Kua meinga hei kāinga rēwera, hei whare herehere hoki mō ngā wairua poke katoa, hei whare herehere mō ngā manu poke katoa, mō ngā manu whakarihariha.
REV 18:3 Nā te wāina hoki o te riri o tōna moepuku i horo ai ngā tauiwi katoa; i moepuku hoki ngā kīngi o te whenua ki a ia, ā, kua whiwhi nui ngā kaihoko o te ao i te taonga i te nui o āna mea whakaahuareka.”
REV 18:4 I rongo anō ahau i tētahi atu reo i te rangi, e mea ana: “Puta mai koutou i roto i a ia, e tōku iwi, kei uru tahi koutou ki ōna hara, kei pāngia koutou e ōna whiu.
REV 18:5 Kua tutuki hoki ōna hara ki te rangi, kua mahara te Atua ki āna mahi hē.
REV 18:6 Hoatu ki a ia tāna i hōmai ai ki a koutou, takiruatia ngā mea mōna, kia rite ki āna mahi. Ko te kapu i whakakīia e ia kia rua ā koutou whakakīnga mōna.
REV 18:7 Nā, kia rite ki tāna whakanuinga i a ia, ki tōna tōreretanga ki āna mea whakaahuareka, kia pērā anō te mamae me te pōuri e hoatu e koutou ki a ia. E mea ana hoki ia i tōna ngākau: ‘E noho ana ahau hei kuīni! Ehara hoki ahau i te pouaru, e kore anō hoki ahau e kite i te pōuri.’
REV 18:8 Mō konei anō ka tae mai ōna whiu i te rā kotahi, te mate, te pōuri, te matekai; ā, ka tahuna ia kia pau rawa i te ahi. He kaha hoki te Ariki, te Atua, e whakawā nei i a ia.”
REV 18:9 Ā, ko ngā kīngi o te ao i moepuku nei ki a ia, i tōrere ngātahi nei ki āna mea whakaahuareka, tērā e tangi ki a ia, e auē ki a ia, ina kite rātou i te paoa o tōna tahunga.
REV 18:10 Ka tū mai rātou i tawhiti i te wehi ki tōna whakamamae, ka mea, “Auē, auē, te pā nui, Papurōna, te pā kaha! Kua tae mai hoki tōu whakawā i te hāora kotahi.”
REV 18:11 Ka tangi anō hoki ngā kaihoko o te whenua, ka auē ki a ia; nō te mea kāhore atu he tangata hei hoko i tā rātou utanga;
REV 18:12 i te utanga o te kōura, o te hiriwa, o te kōhatu utu nui, o te peara, o te rīnena pai, o te pāpura, o te hiraka, o te kahu whero; me ngā rākau taina katoa, me ngā tini oko rei, me ngā tini oko rākau utu nui whakaharahara, oko parāhi, rino, mapere,
REV 18:13 me te hinamona, me ngā mea kakara, me te hinu kakara, me te parakihe, me te wāina, me te hinu, me te parāoa pai, me te wīti, me ngā kararehe, me ngā hipi; me te utanga o ngā hōiho, o ngā hāriata, o ngā pononga; me ngā wairua tāngata.
REV 18:14 “Heoi, ko ngā hua i matea nuitia e tōu ngākau kua mawehe atu i a koe, ā, kua mahue hoki koe i ngā mea reka katoa, i ngā mea papai, ā, heoi anō te kitenga o aua mea e te tangata.”
REV 18:15 Ko ngā kaihoko o ēnei mea, kua whai taonga nei i a ia, ka tū mai rātou i tawhiti i te wehi ki tōna whakamamae, me te tangi, me te auē anō rātou,
REV 18:16 me te kī: “Auē, auē, te pā nui, i kākahuria ki te rīnena pai, ki te pāpura, ki te whero, i tātaitia ki te kōura, ki te kōhatu utu nui, ki ngā peara!
REV 18:17 Kotahi tonu hoki te hāora a mōtī rawa iho taua taonga nui.” Nā, ko ngā rangatira kaipuke katoa, ko te hunga katoa e rere ana rā te kaipuke ki ia wāhi, ko ngā kaiwhakatere kaipuke, me te hunga katoa anō kei te moana ā rātou mahi, tū mai ana rātou i tawhiti,
REV 18:18 me te karanga anō rātou i tō rātou kitenga i te paoa o tōna tahunga, me te kī, “Ko tēhea pā i rite ki tēnei pā nui?”
REV 18:19 Opehia ana hoki e rātou he puehu ki ō rātou māhunga, kei te karanga rātou, me te tangi, me te auē, kei te mea, “Auē, auē, te pā nui, i whai taonga ai i ōna utu nui te hunga katoa he kaipuke a rātou i te moana! Kotahi tonu nei hoki te hāora ā mōtī rawa iho!
REV 18:20 Kia hari ki a ia, e te rangi, e te hunga tapu, e ngā āpōtoro, e ngā poropiti anō hoki; kua whakaritea nei hoki e te Atua tā koutou whakawā i a ia!”
REV 18:21 Kātahi, ka hāpaingia ake e tētahi anahera kaha he kāmaka i rite nei ki tētahi kāmaka rahi nō te mira, ā, makā ana e ia ki te moana, me te kī anō ia: “Ka pēneitia a Papurōna, te pā nui, ka makā whakareretia atu, e kore anō hoki e kitea i muri nei.
REV 18:22 Nā, heoi anō, rongonga i roto i a koe ki te reo o ngā kaiwhakatangi hāpa, o ngā kaiwhakatakoto rangi waiata, o ngā kaiwhakatangi i ngā pūtōrino, i ngā tētere; e kore anō hoki e kitea i ngā wā i muri nei tētahi kaimahi o ngā tini mahi i roto i a koe; e kore anō hoki e rangona i ngā wā i muri nei te haruru o te kōhatu mira i roto i a koe.
REV 18:23 E kore anō hoki e whiti i ngā wā i muri nei te mārama o te rama i roto i a koe; e kore anō hoki e rangona i ngā wā i muri nei te reo o te tāne mārena hou, o te wahine mārena hou, i roto i a koe; ōu kaihokohoko hoki ko ngā tāngata nunui o te ao; nā āu mahi mākutu anō hoki i pōhēhē ai ngā iwi katoa.
REV 18:24 I kitea anō hoki i roto i a ia ngā toto o ngā poropiti, o te hunga tapu, o te hunga katoa hoki i whakamatea ki runga ki te whenua.”
REV 19:1 Nā, muri iho i ēnei mea ka rangona e ahau he reo nui me te mea nō te mano tini i te rangi, e mea ana, “Areruia! Ko te whakaoranga, ko te korōria, ko te hōnore, ko te kaha, kei te Ariki, kei tō tātou Atua;
REV 19:2 he pono hoki, he tika āna whakawā. Kua whakawākia hoki e ia te wahine kairau, te mea nui, i hē ai te whenua i tōna moepuku, kua rapua anō e ia he utu i a ia mō ngā toto o āna pononga.”
REV 19:3 Nā, ka tuaruatia anō ā rātou meatanga, “Areruia! Heoi, kake ake ana te paoa o taua pā ake ake.”
REV 19:4 Ā, takoto ana ngā kaumātua e rua tekau mā whā me ngā mea ora e whā, koropiko ana ki te Atua e noho ana i runga i te torōna, mea ana, “Āmine. Areruia!”
REV 19:5 Ā, ka puta mai he reo i te torōna, e mea ana, “Whakamoemiti ki tō tātou Atua, e āna pononga katoa, e te hunga hoki e wehi ana i a ia, e te hunga iti, e te hunga nunui.”
REV 19:6 Nā, ka rangona e ahau me te mea he reo nō te mano tini, me te mea he haruru nō ngā wai maha, me te mea he haruru nō ngā whatitiri kaha, e mea ana, “Areruia! Ka kīngi hoki te Ariki, tō tātou Atua, te Kaha Rawa.
REV 19:7 Kia hari tātou, kia nui rawa te koa, kia hoatu he korōria ki a ia. Kua taea hoki te mārena o te Reme, kua oti anō te whakapai a tāna wahine i a ia anō.
REV 19:8 I tukua hoki ki a ia kia whakakākahuria ia ki te rīnena pai, ki te rīnena kanapa, parukore.” (Nā, ko te rīnena pai rā, ko ngā mahi tika a te hunga tapu.)
REV 19:9 I mea mai anō ia ki ahau, “Tuhituhia: Ka hari te hunga kua karangatia ki te hapa o te mārena o te Reme.” Ka mea mai anō ia ki ahau, “Ko ngā kupu pono ēnei a te Atua.”
REV 19:10 Nā, ka takoto ahau ki mua i ōna waewae, ka mea kia koropiko ki a ia. Ā, ka mea mai ia ki ahau, “Kauaka! He hoa pononga hoki ahau nō koutou ko ōu tuākana kei a rātou nei te whakaatu o Īhu. Me koropiko ki te Atua.” Ko te whakaatu hoki i a Īhu tā te wairua o te poropititanga.
REV 19:11 Ā, ka kite ahau i te rangi e tuwhera ana, nā, he hōiho mā. Ko te ingoa hoki o tōna kainoho ko te Pono, ko te Tika, kei runga i te tika tāna whakawā, tāna whawhai.
REV 19:12 Ā, ko ōna kanohi, ānō he mura ahi, ā, i runga i tōna mātenga ngā karauna maha. He ingoa hoki tōna kua oti te tuhituhi, e kore nei tētahi e mātau, ko ia anake.
REV 19:13 Ko te kākahu i kākahuria e ia he mea tuku ki te toto, ko te ingoa i huaina ai ia ko “Te Kupu a te Atua.”
REV 19:14 Ā, ko ngā taua kei te rangi e aru ana i a ia i runga i ngā hōiho mā, he mea whakakākahu rātou ki te rīnena pai, he mea mā, parukore.
REV 19:15 E puta mai ana hoki i roto i tōna māngai he hoari koi, hei patu māna i ngā tauiwi. He rino anō hoki te tokotoko e tohutohu ai ia i a rātou. E takahi ana hoki ia i te takahanga wāina o te āritarita o te riri o te Atua Kaha Rawa.
REV 19:16 He ingoa anō tōna, tuhituhi rawa ki tōna kākahu, ki tōna hūhā: KO TE KĪNGI O NGĀ KĪNGI, KO TE ARIKI O NGĀ ARIKI.
REV 19:17 I kite anō ahau i tētahi anahera e tū ana i te rā; he nui anō tōna reo ki te karanga, i mea ia ki ngā manu katoa e rere ana i waenganui o te rangi, “Haere mai, me huihui mai ki te hapa nui a te Atua;
REV 19:18 ki te kai i ngā kikokiko o ngā kīngi, i ngā kikokiko o ngā rangatira mano, i ngā kikokiko o te hunga kaha, i ngā kikokiko o ngā hōiho, o ō rātou kainoho hoki, i ngā kikokiko o ngā tāngata katoa, o ngā mea ehara nei i te pononga, o ngā pononga anō hoki, o te hunga nonohi, o te hunga nunui.”
REV 19:19 Ā, ka kite ahau i te kararehe, me ngā kīngi o te whenua, me ā rātou taua, kua huihuia ki te whawhai ki tērā e noho rā i runga i te hōiho, ki tāna taua hoki.
REV 19:20 Nā, ka hopukina te kararehe rāua tahi ko te poropiti teka i mahi rā i ngā tohu ki tōna aroaro, i pōhēhē ai te hunga i tango i te tohu a te kararehe, i koropiko hoki ki tōna whakapakoko. Nā, pangā oratia ana rāua tokorua ki te roto kāpura e kā ana i te whānāriki.
REV 19:21 Nā, ko te hunga i toe, i whakamatea ki te hoari a tērā e noho rā i runga i te hōiho, ki te hoari e puta mai nei i roto i tōna māngai. Ā, mākona ana ngā manu katoa i ō rātou kikokiko.
REV 20:1 Ā, ka kite ahau i tētahi anahera e heke iho ana i te rangi, kei a ia te kī o te poka tōrere, me tētahi mekameka nui i tōna ringaringa.
REV 20:2 Nā, ka mau ia ki te tarakona, ki te nākahi onamata, ko te Rēwera nei ia, ko Hātana hoki, ka herehere i a ia kotahi mano ngā tau.
REV 20:3 Ka maka i a ia ki te poka tōrere, uakina ana, whakapiri rawa te hīri ki runga ki a ia, kei whakapōhēhē ia i ngā tauiwi i muri iho, kia taka rā anō ngā tau kotahi mano, ā muri iho i ēnei mea me wewete ia, he tāima iti kau ia.
REV 20:4 I kite anō ahau i ngā torōna, e noho ana hoki rātou i runga, i hoatu anō hoki te whakawā ki a rātou. I ngā wairua hoki o te hunga i pōutoa mō te whakaaturanga i a Īhu, mō te kupu hoki a te Atua, te hunga kāhore i koropiko ki te kararehe, ki tōna whakapakoko rānei, kīhai hoki i meatia te tohu ki ō rātou rae, ki ō rātou ringaringa. Nā, ka ora rātou, ka kīngi tahi me te Karaiti, kotahi mano tau.
REV 20:5 (Kīhai ia i ora ake te toenga o ngā tūpāpaku, ā taka noa ngā tau kotahi mano.) Ko te aranga tuatahi tēnei.
REV 20:6 Hari tonu, tapu tonu te tangata he wāhi nei tōna i te aranga tuatahi. E kore te matenga tuarua e whai mana ki a rātou; engari hei tohunga rātou mā te Atua, mā te Karaiti hoki, ā, kotahi mano ngā tau e kīngi tahi ai rātou me ia.
REV 20:7 Ā, nō ka pahemo ngā tau kotahi mano, ka wetekina a Hātana i roto i tōna whare herehere.
REV 20:8 Ā, ka haere ia ki te whakapōhēhē i ngā tauiwi i ngā pito e whā o te whenua, i a Koka rāua ko Makoko, e huihui ai rātou ki te taua; ko te tokomaha o rātou rite tonu ki te onepū o te moana.
REV 20:9 Nā, haere ana rātou ki te whānui o te whenua, karapotia ana e rātou te nohoanga o te hunga tapu, me te pā e arohaina ana. Nā, ko te hekenga iho o te kāpura i te Atua i te rangi, pau ake rātou.
REV 20:10 Nā, ko te rēwera i whakapōhēhē nei i a rātou, pangā ana ia ki te roto kāpura whānāriki, ki te wāhi kei reira nei te kararehe me te poropiti teka, ā, ka whakamamaetia rātou i te ao, i te pō, ake ake.
REV 20:11 Ā, ka kite ahau i tētahi torōna nui, mā, i tētahi hoki e noho ana i runga, rere ana te whenua me te rangi i tōna kanohi; kāhore hoki i kitea he wāhi mō rāua.
REV 20:12 I kite anō ahau i te hunga mate, i te hunga nunui, i te hunga ririki, e tū ana i mua o te torōna. Nā, kua whakatuwheratia ngā pukapuka; kua whakatuwheratia anō hoki tētahi atu pukapuka, ko te pukapuka o te ora. Kei ngā mea hoki i tuhituhia ki aua pukapuka he whakawā mō te hunga mate, he mea whakarite tonu ki ā rātou mahi.
REV 20:13 I tukua mai anō e te moana te hunga mate i roto i a ia; i tukua mai hoki e te mate, e te pō, te hunga mate i roto i a rāua. Nā, ka whakawākia tēnā tangata, tēnā, he mea whakarite ki ā rātou mahi.
REV 20:14 Nā, ka pangā te mate me te pō ki te roto ahi. Ko te tuarua tēnei o ngā mate, arā ko te roto ahi.
REV 20:15 Ā, ki te kitea tētahi kīhai i tuhituhia ki te pukapuka o te ora, i pangā ia ki te roto ahi.
REV 21:1 Ā, i kite ahau i te rangi hou, i te whenua hou. Kua pahemo hoki te rangi tuatahi, me te whenua tuatahi, ā, kāhore atu he moana.
REV 21:2 I kite anō ahau i te pā tapu, i Hiruhārama hou, e heke iho ana i te rangi i te Atua, rite rawa, ānō he wahine mārena hou kua oti te whakapaipai mō tāna tāne.
REV 21:3 I rongo anō ahau i te reo nui i te rangi e mea ana: “Nā, kei ngā tāngata te tapenākara o te Atua, ā, e noho ia ki a rātou; ko rātou hoki hei iwi māna, ko te Atua nei anō hei a rātou, hei Atua mō rātou.
REV 21:4 Ka murua hoki e ia ngā roimata katoa i ō rātou kanohi; ā, kore ake he mate; kāhore hoki he auē, kāhore he tangi, kāhore he mamae, i ngā wā i muri nei. Kua pahemo atu hoki ngā mea ō mua.”
REV 21:5 Ā, ka kōrero mai tērā e noho rā i runga i te torōna: “Nā, ka hangā houtia e ahau ngā mea katoa.” I mea mai anō ia ki ahau, “Tuhituhia. Nō te mea he pono, he tika ēnei kupu.”
REV 21:6 I mea mai anō ia ki ahau, “Kua oti ēnei mea. Ko ahau te Ārepa, te Ōmeka, te tīmatanga, te whakamutunga. Ka hoatu noa e ahau ki te tangata matewai he wai i te puna o te wai o te ora.
REV 21:7 Ko te tangata i a ia te wikitōria, e whiwhi ia ki ēnei mea; ko ahau hoki hei Atua mōna, ko ia hei tama māku.
REV 21:8 Nā, ko te hunga wehi, ko te hunga whakateka, ko te hunga whakarihariha, ko ngā kaikōhuru, ko te hunga moepuku, ko te hunga mākutu, ko te hunga karakia ki te whakapakoko, ko te hunga teka katoa, ko te wāhi mō rātou kei te roto e kā ana i te ahi, i te whānāriki. Ko te matenga tuarua tēnei.”
REV 21:9 Nā, ka haere mai ki ahau tētahi o ngā anahera e whitu, kei a rātou nei ngā oko e whitu e kī ana i ngā whiu whakamutunga e whitu; ka kī mai ki ahau, ka mea, “Haere mai, māku e whakakite ki a koe te wahine mārena hou, te wahine a te Reme.”
REV 21:10 Nā, haria ana ahau e ia i roto i te wairua ki tētahi maunga nui, tiketike, ā, ka whakakitea mai ki ahau te pā tapu, a Hiruhārama, e heke iho ana i te rangi i te Atua.
REV 21:11 Kei taua pā anō te korōria o te Atua. Rite tonu tōna mārama ki tō te kōhatu utu nui whakaharahara, ānō he kōhatu hahapa, mārama tonu me he karaihe;
REV 21:12 he taiepa kōhatu anō tōna, he mea nui, tiketike, tekau mā rua ngā tatau, kotahi tekau mā rua anō ngā anahera i ngā tatau, tuhituhi rawa ki te ingoa, arā ki ngā ingoa o ngā hapū kotahi tekau mā rua o ngā tama a Īharaira.
REV 21:13 I te rāwhiti e toru ngā tatau; i te hauraro e toru ngā tatau; i te tonga e toru ngā tatau; i te hauāuru e toru ngā tatau.
REV 21:14 Ā, ko te taiepa o te pā, kotahi tekau mā rua ōna tūranga, kei aua tūranga anō ngā ingoa o ngā āpōtoro a te Reme, kotahi tekau mā rua.
REV 21:15 Nā, ko tērā i kōrero rā ki ahau, he kākaho kōura tāna hei whanganga māna i te pā, i ōna tatau, i tōna taiepa kōhatu.
REV 21:16 Nā, ko te takoto o te pā, e whā ngā poti, tōna roa rite tonu ki tōna whānui. Nā, ka whangangatia e ia te pā ki te kākaho, kotahi tekau mā rua mano ngā pāronga. Ko tōna roa, ko te whānui, ko te ikeike, rite tonu.
REV 21:17 Nā, ka whangangatia anō e ia tōna taiepa, kotahi rau e whā tekau mā whā ngā whatīanga, he rūri nā te tangata, arā nā te anahera.
REV 21:18 Nā, ko te mea i hangā ai tōna taiepa he hahapa, he kōura parakore anō hoki te pā, rite tonu ki te karaihe mārama.
REV 21:19 Ko ngā tūranga o te taiepa o te pā he mea whakapaipai ki ngā kōhatu utu nui katoa. Ko te tūranga tuatahi he hahapa, ko te tuarua, he hapaira, ko te tuatoru, he karakeroni, ko te tuawhā, he emerara,
REV 21:20 ko te tuarima, he hararonika, ko te tuaono, he harariu, ko te tuawhitu, he karihorita, ko te tuawaru, he perira, ko te tuaiwa, he tōpaha, ko te ngahuru, he karihoparaha, ko te tekau mā tahi, he hakiniti, ko te tekau mā rua, he ametihita.
REV 21:21 Nā, ko ngā tatau kotahi tekau mā rua, kotahi tekau mā rua peara. Ko tēnei tatau, ko tēnei tatau, kotahi tonu peara. Ko te huarahi hoki o te pā he kōura parakore, ko ia ānō kei te karaihe pīata.
REV 21:22 Nā, kīhai ahau i kite i tētahi whare tapu i reira. Ko te Ariki hoki, ko te Atua Kaha Rawa rāua ko te Reme te whare tapu o reira.
REV 21:23 Kāhore hoki taua pā i mea ki te rā mōna, ki te marama rānei, hei whiti ki roto. E whakamāramatia ana hoki a reira e te korōria o te Atua, ko te Reme hoki tōna mārama.
REV 21:24 E haere hoki ngā tauiwi i waenganui o tōna mārama, ā, e kawea mai anō hoki e ngā kīngi o te ao tō rātou korōria ki reira.
REV 21:25 E kore hoki ōna tatau e tūtakina i te awatea; kore ake hoki o reira pō.
REV 21:26 Ā, e kawea mai hoki te korōria me te hōnore o ngā tauiwi ki reira.
REV 21:27 E kore anō e tomo ki roto tētahi mea whakanoa, te tangata rānei e mahi ana i te whakarihariha, i te teka rānei. Ko te hunga anake kua oti te tuhituhi ki tā te Reme pukapuka o te ora.
REV 22:1 Nā, ka whakakitea mai e ia ki ahau he awa wai ora, pīata tonu me te karaihe, e puta mai ana i te torōna o te Atua rāua ko te Reme,
REV 22:2 i waenganui o tōna huarahi. Nā, i tēnei taha o te awa, ā, i tērā taha, ko te rākau o te ora, kotahi tekau mā rua ōna momo hua, e hua ana ōna hua i tētahi marama, i tētahi marama, ā, ko ngā rau o te rākau hei whakaora mō ngā tauiwi.
REV 22:3 Ā, kore ake he kanga i muri nei. Ko reira anō hoki te torōna o te Atua rāua ko te Reme; ā, ka mahi āna pononga ki a ia.
REV 22:4 E kite hoki rātou i tōna kanohi; ka mau hoki tōna ingoa ki ō rātou rae.
REV 22:5 Ā, kore ake o reira pō, kore ake ō rātou meatanga ki te mārama o te rama, ki te mārama hoki o te rā. E mārama hoki rātou i te Ariki, i te Atua, ā, e kīngi rātou ake ake.
REV 22:6 I mea mai anō ia ki ahau: “He pono, he tika ēnei kupu; kua tonoa hoki e te Ariki, e te Atua o ngā poropiti tapu, tāna anahera, hei whakakite mai ki āna pononga i ngā mea ka hohoro nei te meinga.”
REV 22:7 “Nā, ka hohoro tāku haere atu; ka hari te tangata e whakarite ana i ngā kupu o te poropititanga o tēnei pukapuka.”
REV 22:8 Ā, ko ahau, ko Hoani, tēnei i rongo nei, i kite nei i ēnei mea. Ā, nō tōku rongonga, nō tōku kitenga, ka hinga ahau ki raro, ka mea kia koropiko ki mua i ngā waewae o te anahera i whakakitea mai ai ēnei mea ki ahau.
REV 22:9 Nā, ko tāna meatanga mai ki ahau, “Kauaka. He hoa pononga hoki ahau nōu, nō ōu tuākana hoki, nō ngā poropiti, nō te hunga anō e pupuri ana i ngā kupu o tēnei pukapuka. Me koropiko ki te Atua.”
REV 22:10 Nā, ka mea mai anō ia ki ahau, “Kaua e hīritia ngā kupu o te poropititanga o tēnei pukapuka; e tata ana hoki te tāima.
REV 22:11 Ko te tangata e hē ana te whakahaere, kia hē anō te whakahaere. Ko te tangata e poke ana, kia poke anō ia. Ko te tangata e tika ana, kia tika anō ia. Ko te tangata e tapu ana, kia tapu anō ia.
REV 22:12 “Nā, ka hohoro tāku haere atu; kei ahau anō tāku utu, ā, ka rite ki āna mahi ake ngā mea e hoatu ki tētahi, ki tētahi.
REV 22:13 Ko ahau te Ārepa, te Ōmeka, te tuatahi, te whakaotinga, te tīmatanga, te whakamutunga.”
REV 22:14 Ka hari te hunga e horoi ana i ō rātou kākahu, kia taunga ai rātou te haere mai ki te rākau o te ora, ka tomo anō ki te pā rā ngā tatau.
REV 22:15 Kei waho ngā kurī, me te hunga mākutu, me te hunga moepuku, me ngā kaikōhuru, me te hunga karakia ki te whakapakoko, me te hunga katoa e pai ana, e mahi ana i te teka.
REV 22:16 “Kua tonoa e ahau, e Īhu, tāku anahera, hei whakaatu i ēnei mea ki a koutou i roto i ngā hāhi. Ko ahau te Pakiaka, te Uri o Rāwiri, te Whetū mārama o te Ata.”
REV 22:17 E mea ana hoki te Wairua me te wahine mārena hou, “Haere mai!” Me kī ake anō e te tangata e rongo ana, “Haere mai!” Kia haere mai hoki te tangata e hiainu ana. Kia tangohia noatia anō te wai ora e te tangata e hiahia ana.
REV 22:18 He whakaatu hoki nāku tēnei ki te hunga katoa e rongo ana ki ngā kupu o te poropititanga o tēnei pukapuka: Ki te tāpiritia mai e tētahi ki ēnei mea, ka tāpiritia atu anō e te Atua mōna ngā whiu kua oti te tuhituhi ki tēnei pukapuka.
REV 22:19 Ā, ki te tangohia atu e tētahi he kupu i te pukapuka o tēnei poropititanga, ka tangohia e te Atua tōna wāhi i roto i te pukapuka o te ora, i te pā tapu hoki, i ngā mea hoki kua oti te tuhituhi ki tēnei pukapuka.
REV 22:20 Tēnei te kī nei te kaiwhakaatu o ēnei mea, “Nā, ka hohoro anō tāku haere atu!” Āmine. Āe rā, haere mai, e te Ariki, e Īhu!
REV 22:21 Kia tau ki te hunga tapu katoa te atawhai o tō tātou Ariki, o Īhu Karaiti. Āmine.
