3 JON
Jon so mamey, Gaius se ma mey kow hok non
Meyamey uwr hokwe: Aposel Jon.
Yier hiy ma lwayr meyamey hokwe: Hiykwe yier Efesus mon lwak se po meyamey pak e, nonkway lopa.
Enekwei hiy ma meyamey hokwe: Hiykwe enekwei Yia 85-96 so ompok sok meyamey, Jisas hiy ma lokrue so meyki.
Ok mamey mon ma lwak mokwe senkin: Mamey haraw-ney okukwe Jon so ok-nopre nopre arian, hiy hyo wayh Gaius se ma meyamey kow hok non. Hiykwe hye hiy-me kraipakrai, uwr God so ok-ihey ke ma lanio mesor nok hom ma le-nene seme non-swahya-sow meio e. Hiykwe seyr Gaius se senkin mekow, hiykwe uwr Diotrefes se kwa nak-ira, payhokuaw Diotrefes hiykwe, uwr God so ok-ihey ke ma lanio mesor me hiymon e mon pey, seyr hiykwe aryar yor non. Wo, Jon hiykwe sawk Demitrius se kar ley, payhokuaw, uwr sohokwe ok-ar weynpaweyn non.
Mamey ohok ko uron ipey-ar hokwe senkin: Kristen homkwe wayh-wayh me nion God so ok-ihey ke mesor nona nona nok e. Kristen homkwe God so ok-ihey ke siraw non-meio wayh-wayh lopa lwak ankin, sohokwe Satan so yerki se kampi kow, hiy nan kiykiy-ay uwrsa me mon piapay ey se.
1
Jon so peyr-mawk-ok
1 Mamey okukwe ha sios-makwey-uwr hiy mey.
Hakwe Gaius, ha ok-ar yor non-aw uron-pi ko-ar ma lwak se mey. *Ap 19:29; Ro 16:23
2 Hano wayh ihey-ar ara, hakwe God se hne senkin hiy-mesopok, hunkwe low lopa ka lwak, seyr hno owh hokwe yaprue ka lwak, hno niohney hiy yaprue ma lwak senkin. 3 Kristen-wayh har hom hane senkin ma le me-sor kow hokwe, hunkwe okar-ok ke-aw nakruok kraiay wayr, seyr okar-ok mon-aw lanio wayr, hakwe kar nuw-ey. *2 Jn 1:4 4 Hakwe ok, hano ney, hom ok-ar-ok mon-aw ma lanio ke lonuayk mokwe, hano kar ley yor kokwe sowpwareney korey, sawk woki nuw-wak prusow.
Gaius so uru se ma lowk nakie hiy non
5 Hano wayh ihey-ar ara, mey, hwon hno kristen-wayh me ma meio kow kokwe, hunkwe nakruok kraiay meio wayr, mo hwon kristen-wayh seme nonkway lopa lwak liok. 6 Kristen-wayh somokwe, hno uron-pi ko-ar yor kokwe, sios erey suko se po mesor kow. Sa hunkwe kristen-wayh sohom mo yerki se hiymon ha ankin, yor God se kar mon ey ey non, suw hunkwe yor yaprue ke meio. *Ta 3:13 7 Uwrsa somokwe hmo yier arian mokwe Hakamay so uru se hokuaw lokriy hain, sawk hmo yerki hokwe, uwrsa God se ma nan kiykiy-ay lopa hom hiymon pa. *1 Ko 9:12 8 Kristen hromkwe uwr senkin somokwe seme hiymon e, hrom hmo mey okar-ok ke ma meio kow me non-waw-waw meio e hokuaw.
Diotrefes o, Demitrius o
9 Hakwe mamey kamon sios se po mey kow ha, sawk Diotrefes, peyrmawk liarok uwr lwak e ma mon hiykwe, ok ha ma me mokwe, hyaw lwak. 10 Enekwei ha le ankin, hakwe yor piap-araw lowpwarowp hiy ma mon seme lohruw-a kumay kow ey. Ok-hiy hiy hreme ma kow o, okrei-ok o, somokwe piap-araw. Sawk hiykwe yor piap-araw seme-aw mon pey. Hiykwe seyr kristen-wayh ma le-nene me liy huonok yawriy ley. Hiykwe seyr uwrsa kristen-wayh seme me-huonok yawriy e ma mon seme me-sous-a-sous, seyr hme sios ko me me-su ha e mon.
11 Hano wayh ihey-ar ara, hunkwe yor piap-araw me peie pyay meio o. Sawk hunkwe yor yaprue me kwa pyay meio. Yor yaprue me posokwaw meio e, hiykwe God so. Yor piap me posokwaw meio e, hiykwe God se lira pa. *1 Jn 3:6-10
12 Uwrsa lowpwarowp homkwe Demitrius se yaprue lohruw-a, mo okar-ok hokiaw seyn. Hrom seyn, hyekwe yaprue lohruw-a, seyr hunkwe nonkway, ok hrom ma me-kumay mokwe okar.
Me-ihey-ok pariawey-ar
13 Hakwe hnekwe ok kraiar mey kow e mon, sawk hakwe mamey non mey e mon pey. *2 Jn 1:12 14 Hakwe hne saw-ira ey hokwe hyohyo lon, sa hrorkwe ine sawksawk non-ohruw-a ey.
15 Liwak marowhway yor hokwe, hno mon ka lwak. Hno wayh erey suko homkwe, hne me-ihey-ok me-ha. Hromo me-ihey-ok me hromo wayh serey ma lwak seme prueyn prueyn-aw kwa mesor kow.