HIBRU
Mamey, Hibru-uwrsa me ma mey kow ha hok non
Meyamey uwr hokwe: Mamey Hibru kokwe posokwaw po meyamey pak e, nonkway lwak popriy pey.
Yier hiy ma lwayr meyamey hokwe: Hromkwe nonkway lwak pey.
Enekwei hiy ma meyamey hokwe: Uwr mamey Hibru ke ma meyamey hokwe enekwei Yia 60-70 so ompok sok meyamey, Jisas hiy ma lokrue so meyki.
Ok mamey mon ma lwak mokwe senkin: Mamey ipey-ar okukwe kristen-uwrsa Juda ko me meyamey kow, hom hmo sow porih arian me ma-ley mon nakyas ame.
Mamey ohok ko ok ipey-ar kokwe senkin: Krais hiykwe hromo Pris-Makwey-uwr ipey-ar. Hiykwe Moses so eir mon lwak, seyr pris porih ko mo eir mon lwak, seyr hyo naws prawk kow mey kokwe, naws prawk kow mey paraw pris, hom ma meio mo eir mon lwak. Uwr mamey okwe ma mey hiykwe, Juda me senkin me-kupaku, “Homkwe Juda mo naws prawk kow yor arian me peie ma-ley meio o, sawk Krais so lokrue ke-aw nanpanan e. Payhokuaw, Krais so nioh hokwe, ayay ma naws prawk kow mo nioh mo eir mon lwak.”
Mamey ohok ko uron ko ipey-ar hokwe senkin: Uwrsa kraiar ki erey suko homkwe God se kokwe yerki senkin senkin non lanio pawk lokruok. Mamey okukwe senkin sokwe me, Yerki God so owh mon ley ey hokwe, mo Krais so mey ko kueir non-aw ley. Mo Juda-uwr hom sow senkin senkin mamey porih mon ma lwak non pyay hi, homkwe Krais lopa lwak ankin, homkwe God so owh mon liy ley ley.
1
God so ok, hyo Ney so kueir ma me hok non
Paraw kokwe God hiykwe enekwei kraiar, seyr yerki senkin senkin non kokwe hromo iwey-om mokwe profet mo woki mon lohruw-a. Sawk enekwei pariawey omokwe hiykwe hreme kokwe hyo Ney so woki mon lohruw-a. God hiykwe ki o, non o, hyo Ney sohiy so uru so kueir monhre nok, hye kiy-nak-me-iaup, omok enekwei pariawey hiy lousne non omeme sohom mo liaup-uwr lwak e. * Jon 1:3 God so Ney sohokwe God so krai seirpey so panpaniowni, seyr hiykwe orih hiykiaw panapan nuw-wak. Seyr hiykwe non o, ki o, hyo ok ko krai non senkin-aw mesay wayr. Seyr uwrsa mo yor piap me mon mnow-mnow yerki se ma meio kow so meyki hokwe, hiykwe God, Krai Seirpey-ar non so sayar mon kiynak-iwak, nonkumey mon kokwe. * Ap 2:33-34; Kol 1:20; Hi 8:1
God so Ney hiykwe ensel mo eir mon lwak
Ney hiykwe ensel mo eir mon lwak, seyr liy-liy-aw, uru, God hiy hye ma kow hokwe, ensel mo uru mo eir mon lwak. * Fl 2:9 Payhokuaw, God hiykwe hyo ensel prueyn se senkin pase me e,
“Hunkwe hano Ney, enekwei pokon ohokwe hakwe hno Aio po kiy-wak.” Sng 2:7
Seyr God hiykwe ensel prueyn se senkin nanpanan ohruw-a pa, “Hakwe hyo Aio lwak ey, sa hiykwe hano Ney lwak ey.” 2 Sml 7:14; 1 Sto 17:13
Sawk enekwei, God hiy hyo Ney peyrmawk-ar ko se ki erey me-ha menkin, hiykwe senkin nak-me,
“God so ensel lowpwarowp homkwe hye kwa kampueys me-ihey.” Lo 32:43
Sawk hyo ensel me ma lohruw-a hokwe, God hiykwe senkin me,
“God hiykwe hyo ensel me kokwe howniy monhre, sa hyo mey-uwr me kokwe ya-pi monhre.” Sng 104:4
Sawk Ney se kokwe God hiykwe senkin me,
“Hwon king ma lwak hokwe, God ara, senkinaw-aw lwak peyow peyow ey! Hunkwe hno uwrsa me kokwe yerki luw-luw-aw non hiy-wayr.”
Hunkwe yor luw-luw-aw mokwe uron-pi ko-ar nuw-wak, sawk hunkwe yor piap me lono way. Sohiy so hokuaw kokwe God, hno God hiykwe hne hno wayh-om mo eir mon po liaup, hne kar ley wel non ma neyr-a-neyr kow non. Sng 45:6-7
10 God hiykwe seyr hyo ney se senkin nak-me,
“Hakamay ara, peyrmawk-ar kokwe ki hokwe mo hwon monhre, seyr hno iha arian non kokwe hunkwe nonkumey me monhre.
11 Ki o, nonkumey o, hehekwe ya lira por ha a, sawk hunkwe senkin-aw lwayr peyow ey, hohkwe laplap ke hieyn ya sopruw kawk a.
12 Hunkwe hehekwe saket ke hieyn ka-lohon-a-lohon ey, seyr hehe kokwe laplap ke hieyn, liy-liy-aw swahya-sow ey. Sawk hunkwe enekwei enekwei liy-liy-aw lwak, seyr hunkwe senkin-aw lwayr peyow peyow.” Sng 102:25-27
13 God hiykwe hyo ensel prueyn se senkin me pa,
“Erey kiy-iwak, hano sayar mon, omok ha hno awia me hno sune mon now-pay sune ke lyay ey ke hieyn lyay kow sehe.” Sng 110:1
14 Hai, ensel mokwe sawk pay mo? Homkwe niohney yaprue, God so mey me ma meio kow hom non. Hme kokwe seme me-ha, uwrsa God so me-huonok-prosue-yor ke lonok ey me hiymon e. * Sng 34:7; 91:11

*1:2: Jon 1:3

*1:3: Ap 2:33-34; Kol 1:20; Hi 8:1

*1:4: Fl 2:9

*1:14: Sng 34:7; 91:11