18
Babilon hokwe papo mon piapay
1 Sohiy so meyki hokwe ha sawk ensel prueyn hiy nonkumey ko se laye se ma-lira. Hiykwe krai aiopey hay hiy-wayr ey non, sa hyo kyai panpaniowni hokwe ki se ma-kanuw-nak-yar nekie nekie. 2 Hiykwe ok aiopey hay senkin lokre me,
“Hokwe papo makuayk! Taun Babilon Seirpey-ar hokwe papo makuayk! Enekwei ohokwe hokekwe sawk niohney piap-araw o, poup o, hmo yier se hieyn lwak. Seyr ahney piap-araw o, ahney, uwrsa hom awnie awnie-aw ma lira o, homkwe yier serey lwayr. *Ais 34:11-14; Jer 50:39
3 Payhokuaw, uwrsa kipay lowpwarowp ko homkwe hoko wain-hu krai non se po lowswa lawk-lawk yay. Wain-hu krai non sohokwe hoko nweyh-kane-yor hok non. King lowpwarowp ki ko homkwe hoke nion yokun po nweyh kane, seyr bisnis-uwr ki ko lowpwarowp homkwe meinowon kraiar po lonokyaw wayr-wayr, hoko lira-way-yor piap-araw non.”
4 Hakwe sawk wouk-ok kamon nonkumey ko hok senkin me se makiy-onuayk,
“Hano uwrsa-om, homkwe hoke kiy-okriy hain nok, kumay mon ar-ousne ha! Homkwe hoko yor piap-araw me peie lon-ondiay ondiay meio o. Low, hoke ma mon piapay ey somokwe, sawk hme nak-mon sapeykyay lak! *Ais 48:20; Jer 51:6; 2 Ko 6:17
5 Payhokuaw, hoko yor piap-araw mokwe papo nuw-mon pipi-yay ie, nonkumey so liy-liy-aw-ar nuw-wak. Seyr God hiykwe hoko yor naway naway mokwe, nanpanan wayr nonaw lwak. *Stt 18:20-21; Jer 51:9
6 Homkwe yor piap-araw hoke kwa ma-sahre mon, hoko yor, hme ma mon me hieyn. Homkwe hoke mawk kreys non kwa sau, yor lowpwarowp piap-araw, hok ma mon somokwe. Homkwe hoko hu-yiawk mon kokwe wain-hu krai non hokwe mawk kreys non kwa ma-sahre nonkawk kow, paraw hok hme ma kow owswa so liy. *Sng 137:8; Jer 50:29; 2 Te 1:6
7 Hunkwe hoke kokwe low, aw kraiar lok ey me kwa nuw-kow, seyr eheyr kraiar kwa nuw-mon lowp-lowp yuk, hok hoko sa-u arian ke ma nak-ie senkin, seyr hoko liwak yor yaprue-ar, hokiaw-ayay ma nak-me-heyr senkin. Payhokuaw, hokwe enekwei enekwei hokiaw-ayay senkin nak-me-heyr, ‘Hakwe kwin ke hieyn erey liwak! Hakwe sa-win korey. Low mokwe hano owh mon liy lousne ley, seyr hakwe eheyr lyuk lopa!’ *Ais 47:7-9
8 Sawk Babilon hok ma me-heyr sokwe hokuaw kokwe, eypok kamon hokwe hoke kokwe low piap-araw senkin hom saw-mon piapay ey, peik senkin senkin, unuaw liwak yuk yor, siowp lokrue yor. Seyr hoke kokwe ya mon nwaws oum-pru kawk lowpway ey, payhokuaw, God Hakamay, hoko yor me ma lira mesor anon anon hiykwe seirpey-ar.” *MHO 17:16
9 King ki ko lowpwarowp hoke nion yokun ma nweyh kane, seyr hoko omeme ihey-ar me ma lira way somokwe, taun sohiy so ya-pi ko yakuw hoke ma nwaws oum-pru kawk ke lira ankin, homkwe hoke unuaw nak-iwak sir yuk kworpakwor ok. *Ese 26:17; 27:30-35 10 Homkwe meiaw-ar hok nakrok ey, payhokuaw, homkwe hoke nion aw liy non-ok ley. Seyr homkwe senkin me ey,
“Woiow woiow, taun Babilon ey, hunkwe yier seirpey, seyr om krai ipey-ar non, sa hne kokwe aua kamon-awaw nonaw po mon piapay, hno yor piap-araw me hokuaw kokwe.”
11 Sa bisnis-uwr ki lowpwarowp ko homkwe Babilon ke unuaw nak-iwak sir yuk kworpakwor ey, seyr hmo uron mokwe low nuw-hei ey, payhokuaw, hmo omeme mokwe uwr pohom ma-nakway ley. *Ese 27:36 12 Hmo omeme mokwe senkin gol, silva, mein ihey-ar, momor ihey-ar, laplap weyspey yaprue, laplap oupuey senkin senkin non, seyr laplap slika, seyr now prawk yaprue non. Seyr omeme senkin senkin, elefan so nays non ma monhre, now ihey-ar meinowon kraiar non ma nakway, bras, ain, puwpuw mey non mey non, sohiy non ma monhre me nak-wayr. *Ese 27:12,13,22 13 Homkwe seyr omeme har mokwe senkin me nak-wayr, sinamon, nayp, ayay non nak-a ey, paura senkin senkin yakuw yaprue ma sway, sanda prawk yaprue non, seyr wain-hu, oliv-won, plaua la ey, wit, bulmakau, sipsip, hos, karis, aw-nweyr-uwrsa, seyr iwar o. Somokwe uwr posokwaw ma-nakway ley.
14 Homkwe hoke senkin me ey, “Omeme lowpwarowp ihey-ar, hwon lonok nak-wayr e ma nan somokwe, papo lira por ha lowpway. Hunkwe ma-lirway lopa, korey law-ar!” 15 Bisnis-uwr omeme kraiar non, yier aiopey hay serey suko me ma meio lonokyaw homkwe hoke meiaw-ar nakrok ira ey. Payhokuaw, homkwe yier aiopey sohiy so aw-nak-ok-yor ke nuw-hok. Homkwe unuaw nak-iwak sir yuk kworpakwor ey. *Ese 27:31,36 16 Homkwe senkin me ey,
“Woiow, woiow, taun Babilon ey. Paraw kokwe hokwe omeme owh ko mokwe yaprue me lie. Seyr laplap oupuey irweyk irweyk eyn me nak-ok-sama-peykyay. Seyr hoko owh mon kokwe, gol, mein ihey-ar, momor ihey-ar, seme nak-howhway. *MHO 17:4
17 Sawk hoko omeme ihey-ar somokwe aua kamon-awaw sokwaw po nuw-mon piapay lowpway!”
Seyr sip me nekie anok anok uwr o, uwrsa sip non ma nakey neyney o, uwr sip me ma hiy-mon nak-anio o, uwrsa har bisnis-mey sip mo meinowon ma meio onokyaw a wayr o, homkwe lowpwarowp meiaw-ar mon nakrok ira ey. *Ais 23:14; Ese 27:27-29 18 Seyr homkwe hoke ma loum-pru kawk ko yakuw ke lira ankin, homkwe senkin kowkow okre me ey, “Yier kamon, taun seirpey sehe hieyn kokwe perey lwak o?” *Ese 27:32 19 Enekwei piap sohokwe homkwe ki-pow me hmo makwey mon louh-say nok, unuaw nak-iwak sir yuk kworpakwor me ok, senkin,
“Woiow, woiow, taun seirpey ey. Yier sohok ko omeme ihey-ar mokwe sip sour-yawp-ar ko mo naykih-nayh hom hoke nion ma non-meio mokwe, meinowon kraiar po lonokyaw lowpway. Woiow, hoke kokwe aua kamon-awaw sokwaw po nuw-mon piapay lowpway.
20 Nonkumey ara, taun sehe ma mon piapay hokwe, kar kwa nakey. Kristen-uwrsa o, profet o, homkwe kar kwa ley. Payhokuaw, God hiykwe Babilon ke papo mon piapay, yor piap-araw, hme ma mon me hokuaw kokwe.” *Ais 44:23; Lo 32:43; Jer 51:48
21 Wo, sa ensel kwaresi hay hiy mein aiopey hay, wit-nam me ma mon nokriy-a-nokriy par-say ey se hieyn se lway nok, sour-yawp-ar mon swakeyn omprok ha nok, kiynak-me,
“Sohokwe taun seirpey Babilon ke kokwe mo senkin seyn peys-ma-peys swasow ha ey, seyr hoke kokwe liy ma-lira ley. *Jer 51:63-64; Ese 26:21
22 Babilon akwa, uwrsa gita me ma lokin o, seik-saw-hu me ma lou o, seyr musik senkin senkin me ma mon nakyas o, somokwe liy ma-lonuayk ley, hmo ompok mon kokwe. Uwr senkin-senkin-mey me ma meio sohom seyn, hme nion manon-wak lopa. Mein aiopey hay ko oksa, wit me ma mon nokriy-a-nokriy par-say mokwe, hmo ompok mon ma-lwoun lopa. *Ais 24:8; Ese 26:13
23 Lam so ya hokwe hmo ompok mon liy ma-lyar ley. Sa hmo yier mon kokwe, uwrsa homkwe sa-huon-enekwei mo kar ley ok me liy ma-lonuayk ley. Paraw hmo bisnis-uwr homkwe hakamay-uwr lwak liok, uwrsa lowpwarowp mo inour mon kokwe. Seyr homkwe mein-hay senkin senkin non, uwrsa kipay lowpwarowp ko me po mon anyan swakreik ha.” *Jer 7:34; 16:9; 25:10
24 Babilon ke kokwe mo senkin ke mon piapay, hokwe profet mo nioh o, kristen-uwrsa mo nioh o, serey lokin kwormakwor non-say. Seyr uwrsa kipay lowpwarowp ko me ma lokin kwormakwor say okrue mo nioh seyn, Babilon mon-aw nuw-wak. *Jer 51:49; MHO 17:6
*18:2: Ais 34:11-14; Jer 50:39
*18:4: Ais 48:20; Jer 51:6; 2 Ko 6:17
*18:5: Stt 18:20-21; Jer 51:9
*18:6: Sng 137:8; Jer 50:29; 2 Te 1:6
*18:7: Ais 47:7-9
*18:9: Ese 26:17; 27:30-35
*18:11: Ese 27:36
*18:12: Ese 27:12,13,22
*18:15: Ese 27:31,36
*18:17: Ais 23:14; Ese 27:27-29
*18:18: Ese 27:32
*18:20: Ais 44:23; Lo 32:43; Jer 51:48
*18:21: Jer 51:63-64; Ese 26:21
*18:22: Ais 24:8; Ese 26:13
*18:23: Jer 7:34; 16:9; 25:10