2
1 Anah amaneekt ein arki! Au ꞌtui utoon ꞌain rasin reꞌ ia ok-okeꞌ, maut he hi kais ammoin misanab amtein. Mes karu nmuiꞌ tuaf reꞌ nasanab, anmuiꞌ tuaf reꞌ of anpeis kit anbi Uisneno In human ma In matan. In reꞌ naan, Yesus Kristus, es reꞌ Tuaf Akninuꞌ reꞌ Uisneno nreek Ee neem neu pah-pinan ia. 2 In nmaet ma njair fuaꞌ-turuꞌ neu kit, he Uisneno nnoes nain hit sanat ma penu sin. Ka neu kit itmees jah fa, mes neu mansian ii ok-okeꞌ nbi pah-pinan ia msaꞌ.
Tuaf reꞌ nmoni nbi meꞌu, nmoeꞌ natuin Uisneno In aprenat, anneis-neis prenat anmatoom nok rais manekat
3 Hit tahiin tak, hit tahiin tarek-rekoꞌ Uisneno, karu hit tatuin In apreent ein. 4 Tuaf bisa naꞌuab ahaa mnak, “Au uhiin Uisneno” Mes karu in ka nmoeꞌ natuin fa Uisneno In aprenat, in reꞌ naan aputa-kriut reꞌ naꞌuab ate, aꞌtetaꞌ, anmoꞌe te, aꞌtetaꞌ. 5 Mes tuaf reꞌ nmoeꞌ natuin Uisneno In aprenat, naan anjair bukti mnak, in nmanekat neu Uisneno ro batuur. Nok ranan naan, hit tahiin tak, hit reꞌ ia, Uisneno Iin na. 6 Onaim karu tuaf naꞌuab am nak, “Au ꞌmoni ꞌmafuut ꞌok Uisneno” in ro he nmoin nahuum on reꞌ Yesus Kristus.
7 Anah amaneekt ein arki! Prenat reꞌ au ꞌtui je reꞌ ia, ka rais feꞌu fa neu ki. Fin aprenat reꞌ ia matuꞌi ma maꞌbotoꞌ nain anbi Uisneno In Kabin ma Prenat reꞌ hi mneen ma mitniin main je naꞌko unuꞌ.✡Naiꞌ Yohanis 13:34 8 Maski on naan amsaꞌ, mes anmuiꞌ rais feꞌu reꞌ au he ꞌtui, nmatoom nok Naiꞌ Yesus In aprenat. Prenat reꞌ ia nanaob on nok reko nbi Naiꞌ Yesus In aꞌmonin. Ma prenat ia nmurai nanaob on anbi hi ꞌmonim, natuin meisꞌokan reꞌ et hi neekm ein anmurai namneuk, ma meꞌu reꞌ batuur anmurai ntanaꞌ nbi hi ꞌmoinm ein.
9 Atoniꞌ bisa naꞌuab ahaa mnak, “Au ꞌmoni ꞌbi meꞌu.” Mes karu in neekn ee nameen anmatoom nok in aon-bian, naan anjair tanar am nak, in feꞌe nmoni nbi meisꞌokan. 10 Fin atoniꞌ reꞌ nmoni nbi meꞌu, in ro he nneek in aon-bian, ma ka nmuiꞌ fa maufinu saaꞌ-saaꞌ anbi in nekan reꞌ nmoeꞌ je he nmouf. 11 Es naan ate, karu nmuiꞌ tuaf reꞌ in neekn ee nameen anmatoom nok in aon-bian, naan anjair tanar am nak, in anmoni nbi meisꞌokan. In nnao nabre-reo goah, natuin meisꞌookn ii nafoorb ee.
Tuaf reꞌ nmoni nbi meꞌu, ka nmoin natuin fa pah-piin ii in romin
12 Riꞌaan ein! Au ꞌtui surat reꞌ ia ꞌeu ki,
natuin Kristus anmaet neu ki,
rarit Uisneno nnoes nain hi sanat ma penu sin.
13 Mahoint ein! Au ꞌtui surat reꞌ ia ꞌeu ki,
natuin hi mihiin Yesus Kristus,
reꞌ ahunut ma nbi nain naa naꞌko un-unuꞌ.
Muinf ein! Au ꞌtui surat reꞌ ia ꞌeu ki,
natuin hi mmakeen amraban maufiun gui in tuan,
tar antea hi miis.
14 Riꞌaan ein! Au ꞌtui surat reꞌ ia ꞌeu ki,
natuin hi mihiin Aam Uisneno.
Mahoint ein! Au ꞌtui surat reꞌ ia ꞌeu ki,
natuin hi mihiin Yesus Kristus,
reꞌ nbi nain naa naꞌko un-unuꞌ.
Muinf ein! Au ꞌtui surat reꞌ ia ꞌeu ki,
natuin hi mitunuꞌ Uisneno In Kabin ma Prenat anbi hi neekm ein,
tar antea hi miꞌbeiꞌ,
ma hi mmakeen amraban maufiun gui in tuan.
tar antea hi miis.
15 Hi kais amneek pah-piin ii in aꞌromin, ma pah-piin ii in baerꞌ ein. Fin tuaf reꞌ nneek pah-pinan, ka bisa nneek fa Aam Uisneno. 16 Rasi reꞌ nbi pah-pinan ia ka nmafuut fa nok Uisneno. On reꞌ tuaf reꞌ nmoin he nharineb in tuan aa kuun; aparuꞌ ma akomat; ma abeꞌot natuin in aꞌmuꞌin. Areꞌ rasi on reꞌ naan, ka naꞌuun ma naꞌbaꞌan fa nbin Aam Uisneno. Fin sin naꞌuun ma naꞌbaꞌan nbin pah-pinan ia goah. 17 Te kaah pah-pinan ia of namneuk, nabu-bua nok rasin reꞌ atoniꞌ nroim he naim sin. Mes tuaf reꞌ nroim he nmoeꞌ natuin Uisneno In romin, in ka namneuk fa, fin in nmoin nabar-baar.
Tuaf reꞌ nmoni nbi meꞌu ro he npaant on he kais napein poi
18 Riꞌaan ein! Neon amsoupt ein he neman anpaumaakn een. Hi mneen amrair mak, atoniꞌ reꞌ nraban Kristus of anboor. Te kaah, sin anbin nain naan. Fin anmuiꞌ nrair tuaf reꞌ nraban Kristus anbi mee-mee. Naan anjair tanar am nak, neon amsoupt ein anpaumakan he neemn een.✡2 Tesalonika 2:1-12 19 Araabn ein anboor neman naꞌkon hit itnanak ma hit soonk ii kuuk. Te kaah, sin reꞌ naan, ka hit tuaf ein aa fa. Fin karu sin batuur-batuur hit na, ro batuur sin ka nnao nasaitan kit fa, mes sin ntahan piut nabu-buan nok kit. Mes sin anfeen annaon. Onaim batuur, sin reꞌ naan ka hit tuaf ein aa fa.
20 Mes hi ka on sin fa. Fin hi mtoup Uisneno In Tuaf Akninuꞌ In Asmanan. Ma In nturun ma nbaab ki, he hi ok-okeꞌ mihiin saaꞌ reꞌ batuur. 21 Hi mak au ꞌtui surat reꞌ ia, natuin au ꞌak hi ka mihiin fa saaꞌ reꞌ batuur? Kahaf! Fin hi mihini mrair! Hi mihini mrair mee es reꞌ batuur, ma mee es reꞌ puta-kriu.
22 Te kaah, anmuiꞌ aputa-kriut reꞌ neu-mneem et pah-pinan ia. On mee he hit bisa tahiin sin? Sin reꞌ naan, es reꞌ atoniꞌ reꞌ naꞌuab am nak, Naiꞌ Yesus naan ka Kristus fa. Tatuin sin ite, Naiꞌ Yesus naan ka Tuaf Akninuꞌ fa reꞌ Uisneno nbaꞌan nain Je he nreek Ee neem. Tuaf reꞌ naꞌuab on naan, anraban Kristus, fin sin ntorak nain Aam Uisneno nok In Anah. 23 Tuaf reꞌ ntorak Uisneno In Anah, sin ntorak In Aamf ee msaꞌ. Mes karu atoniꞌ nmanakuꞌ Uisneno In Anah, sin njarin Uisneno In aanh ein amsaꞌ.
24 Onaim hi ro he mnaaꞌ miher-heer piut meu saaꞌ reꞌ hi mneen ma mitniin naꞌko unuꞌ. Nok ranan naan, hi bisa mmafuut piut mok Aam Uisneno ma In Anah. 25 Ma In kuun es reꞌ anbaꞌan kit im nak, hit of atmoin tabar-baar tok Ne.
26 Au ꞌtui surat reꞌ ia he hi mihiin anmatoom nok tuaf reꞌ he napoi ki. 27 Hi mtoupu mrair Uisneno In Asmaan Akninuꞌ, ma hi mmoni mmafuut mok Ne msaꞌ. Onaim hi ka mperluu fa tuaf bian he nanoniꞌ ki ntein. Fin Uisneno In Asmaan ahaa kuun nanokab, natuin In bisa nanoniꞌ areꞌ kanan rasi reꞌ batuur. In ka nputa-kriu fa, on reꞌ aputa-kriut ein. Onaim amnaaꞌ miher-heran saaꞌ reꞌ In nanoniꞌ nrair sin, he hi bisa mmoin nekaf meseꞌ piut mok Kristus.
28 On nai, riꞌaan ein! Hi ro he mmoni mmafuut piut mok Kristus. Maut he oras In nkoen On nfain neem, hi kais mimtau ma kais mimaeb om amhake mbi In human ma In matan. 29 Natuin hi mihini mmak, In nmoeꞌ piut saaꞌ reꞌ batuur, etun es hi bisa mihini msaꞌ mak, mansian ii ok-okeꞌ reꞌ bisa nmoeꞌ natuin saaꞌ reꞌ batuur, sin njarin Uisneno In aanh ein amsaꞌ.