Surat neu
atoin Ibranis sin
reꞌ feꞌ nasaitan sin beꞌi-naꞌi sin rais pirsait
he npirsain neun Yesus Kristus
1
Uisneno nreek haefan In Anah, reꞌ maꞌtaniꞌ nneis naꞌko In mafefaꞌ ahuunt ein
1 Un-unuꞌ te, Uisneno anpaek In mafefa kniunꞌ ein he naꞌuab ein nok hit beꞌi-naꞌi atoin Ibranis sin.*a: Kata Ibrani ia, kanaf es antein neu uuf ma pah Yahudi. Atoin Yahudis reꞌ anpirsain neun Yesus Kristus, atoniꞌ anteek sin ite nak, “atoin Kristen Ibranis”, natuin sin aꞌtetaꞌ naꞌko sin aok-bian Yahudis sin reꞌ annaaꞌ atoran rais pirsait Yahudi mnaaꞌ feꞌ. Sin npaken cara humaꞌ-humaꞌ he naꞌuab ein fani-fani nok sin.†b: Uisneno natoon In rais manbaꞌan sin, anpaek cara humaꞌ-humaꞌ. On reꞌ: In natoon neu kaꞌo Abraham anpaek nahakeꞌ rais manbaꞌan, neu kaꞌo Musa anpaek atoran rais pirsait, neu naiꞌ Daut anpaek siit pures-boꞌis, neu naiꞌ Yermias anpaek uab manfirin ma manꞌisaꞌ. 2 Mes oras ia, In nreek haefan anrair In Anah he naꞌuab nok kit.
Naꞌko un-unuꞌ, Uisneno npiir ma nbetis In Anah reꞌ ia,
he naprenat nabu-bua nok Ne.
Oras In nmoeꞌ neno tunan ma pah-pinan, ma in afan-nesan sin ok-okeꞌ,
In Anah naan anmoeꞌ sin nabu-bua nok Ne msaꞌ.
3 Uisneno In Anah reꞌ ia, nakriraꞌ ma naruruꞌ In Aamf ee In pinan ma krahan,
nahuum on reꞌ maans ee ntoom ninu rarit nabaans on.
Fin In tuan ee masaf meseꞌ on reꞌ In Amaf.
Naꞌko In Kabin ma Prenat reꞌ maꞌtain reꞌuf,
In nanaob sin ok-okeꞌ anbi neon goe tnanan ma pah-pinan.
In nfei enoꞌ-ranan,
he nnoes nain mansian ii sin saant am penu sin,
maut he nakninuꞌ sin.
Rarit In ntebi nfain neu sonaf neno tunan,
he ntoko nbi Uisneno In abnapan aꞌneꞌu,
anbi bareꞌ reꞌ mahormataꞌ anneis-neisi.
Uisneno In Anah reꞌ maꞌtain reꞌuf, anneis naꞌko ameput sonaf neno tunan sin
4 Uisneno In ameput sonaf neno tunan sin ro maꞌtain ein. Mes In Anah maꞌtain reꞌuf, anneis naꞌko sin ok-okeꞌ. Uisneno In pangkat es reꞌ aꞌraat reꞌuf. Ma In nfee In pangkat naan neu In Anah. Etun In Anah, anneis nain In ameupt ein sonaf neno tunan.
5 Uisneno naꞌuab niit neu In Anah naan am nak,
“Neno ia, Au usaeb ꞌpiruꞌ-baru he Ho mnaaꞌ aprenat.”✡Siit Pures-Boꞌis sin 2:7
Uisneno naꞌuab antein am nak,
“Au reꞌ ia, In Amaf.
Ma In reꞌ ia, Au Anah.”✡2 Naiꞌ Samuel 7:14, 1 Mapeꞌo ꞌNaof Pah Israꞌel ma Pah Yahuda 17:13
Uisneno naꞌuab nain on naan anmatoom nok In Anah, mes In ka naꞌuab niit fa on reꞌ naan anmatoom nok In ameupt ein sonaf neno tunan.
6 Oras Uisneno anreek ma nsonuꞌ In Anah maꞌtain reꞌuf naan ate, In naprenat In ameupt ein sonaf neno tunan amsaꞌ am nak,
“Ameupt ein ar-arki!
Hi ro he mhormaat,
ma miꞌbesan Au Anah!”✡Surat reꞌ Naretaꞌ Nafaniꞌ Raan Aꞌhonis 32:43, Naiꞌ Lukas 2:13-14
7 Uisneno naꞌuab anmatoom nok In ameupt ein sonaf neno tunan am nak,
“Au ꞌmoeꞌ Au ameupt ein sonaf neno tunan,
anjarin rabah on reꞌ anin.
Au ꞌmoeꞌ Au ate sin,
anjarin maꞌtaniꞌ on reꞌ ai.”✡Siit Pures-Boꞌis sin 104:4
Uisneno naꞌuab on naan, natuin sin reꞌ naan, suma aan renuꞌ-aan reek ahaa.
8 Mes In naꞌuab anteniꞌ neu In Anah naan aa kuun am nak,
“Ho reꞌ ia, Uisneno.
Ho of amtoko mbi ꞌtoko prenat tar antea nabar-baar.
Ho of amnaaꞌ kuasa he muprenat nok neek amneot ma amnonot.
9 Ho nekam naan anmariin oras Ho mkius tuaf-tuaf anmoni mneꞌo ma namnoon.
Mes Ho nekam naan ansuus oras Ho mkius tuaf-tuaf reꞌ aꞌmoink ein anbeon ma npenun.
Etun Ho neekm aan anmariin,
he Au ꞌoop minaꞌ ꞌeu Ho ꞌnakam,
he usaeb ꞌpiruꞌ-baru he Ho mjair Usif reꞌ Ho maꞌtanim amneis muꞌko biak ein.”✡Siit Pures-Boꞌis sin 45:7-8
10 Uisneno naꞌuab antein neu In Anah am nak,
“Anah!
Ho reꞌ ia, Usif reꞌ naprenat nain naꞌko afi unuꞌ.
Ho reꞌ ia, es reꞌ amreun he neon goe tnanan anjair nain.
Ho reꞌ ia, es reꞌ muprenat he pah-pinan anjair nain.
11-12 Neon goe tnanan ma pah-pinan of anpunu nmaten.
Neon goe tnanan ma pah-pinan of namnekun nkonon.
Mes Ho kuum ammoin mubar-baar.
Ho of mait imporin neon goe tnanan ma pah-pinan,
nahuum on reꞌ tuaf nait inporin tai pake reꞌ nakroe reꞌ-reꞌuf.
Ho of amsenuꞌ ma msekaꞌ neon goe tnanan ma pah-pinan,
nahuum on reꞌ tuaf ansenuꞌ ma nsekaꞌ tai paek feꞌu.
Mes Ho kuum ka on fa naan.
Natuin Ho mmoin mubar-baar.”✡Siit Pures-Boꞌis sin 102:26-28
13 Uisneno naꞌuab antein neu In Anah am nak,
“Anah!
Uum he mtoko mbi ia, ambi bare reꞌ mahormaat reꞌuf,
ambi Au bnapak aꞌneꞌu reꞌ ia.
Au of aꞌmoeꞌ Ho muusn ein,
tar antea naꞌruir ein ma nhuum fousun neun Ko.”✡Siit Pures-Boꞌis sin 110:1
Uisneno naꞌuab nain on naan anmatoom nok In Anah, mes In ka naꞌuab niit fa on reꞌ naan anmatoom nok In ameupt ein sonaf neno tunan. 14 In ameupt ein, pentiing amsaꞌ. Fin In nhaefaꞌ sin, he nnaon nꞌurus Iin na ok-okeꞌ, reꞌ In he nsoi nafetin naan sin naꞌkon sin sanat ma penu sin. Maski on naan amsaꞌ, mes Uisneno In Anah anneis-neis naꞌko sin ok-okeꞌ feꞌ.
*1:1 a: Kata Ibrani ia, kanaf es antein neu uuf ma pah Yahudi. Atoin Yahudis reꞌ anpirsain neun Yesus Kristus, atoniꞌ anteek sin ite nak, “atoin Kristen Ibranis”, natuin sin aꞌtetaꞌ naꞌko sin aok-bian Yahudis sin reꞌ annaaꞌ atoran rais pirsait Yahudi mnaaꞌ feꞌ.
†1:1 b: Uisneno natoon In rais manbaꞌan sin, anpaek cara humaꞌ-humaꞌ. On reꞌ: In natoon neu kaꞌo Abraham anpaek nahakeꞌ rais manbaꞌan, neu kaꞌo Musa anpaek atoran rais pirsait, neu naiꞌ Daut anpaek siit pures-boꞌis, neu naiꞌ Yermias anpaek uab manfirin ma manꞌisaꞌ.
✡1:5 Siit Pures-Boꞌis sin 2:7
✡1:5 2 Naiꞌ Samuel 7:14, 1 Mapeꞌo ꞌNaof Pah Israꞌel ma Pah Yahuda 17:13
✡1:6 Surat reꞌ Naretaꞌ Nafaniꞌ Raan Aꞌhonis 32:43, Naiꞌ Lukas 2:13-14
✡1:7 Siit Pures-Boꞌis sin 104:4
✡1:9 Siit Pures-Boꞌis sin 45:7-8
✡1:11-12 Siit Pures-Boꞌis sin 102:26-28
✡1:13 Siit Pures-Boꞌis sin 110:1