1 Tabe ma haan buseet naꞌko au, naiꞌ Yakobus kau. Au reꞌ ia, Uisneno ma hit Usiꞌ, Yesus Kristus Sin aan renuꞌ-aan rekaꞌ.

Au ꞌtui surat reꞌ ia, ma ꞌsoun ee neitin ki atoin Yahudis reꞌ hi mituin amrair Usif Yesus, reꞌ hi mitua et areꞌ pah-pah.*Uab Yunani ntui mnak, “anfee je neu uuf boꞌes am nua reꞌ anmonin boꞌ-baits ok”. Nok ranan naan, hit tahiin tak, naiꞌ Yakobus antui in surat neu atoin Yahudis reꞌ nasranin nrarin. Mes in faineekt ein anbin ia, antoom neu too sraniꞌ ok-okeꞌ. ✡Naiꞌ Mateos 13:55, Naiꞌ Markus 6:3, Haef ein sin Retaꞌ 15:13, Galatia 1:19

2 Aok-bian arki! Au he utoon ki on nai: karu hi miꞌeuk mok susat humaꞌ-humaꞌ te, kais amneek ꞌoer. Amtoup susat naan nok neek marine, natuin namuni te, of reko. 3 Fin hit tahiin tak, karu hi maran ambi susat on naan ate, ma hi msoi maan om miꞌko furit pah-pinan, ma hi mpirsai piut feꞌ meu Uisneno, naan anmoeꞌ hi neekm ein naan antainiin ein, karu hi mipein rais furit pah-pinan bian. 4 Hi kais amtet-koit miꞌko susat. Maut he hi bisa minoniꞌ he maran ambi susat, tar antea hi minokab ma mitiis jom. Nok ranan naan, hi mjair tuaf reꞌ mimnasi mbi ꞌmoꞌet ma ꞌtaos, ma ka mkuran fa saaꞌ es amsaꞌ.

5 Karu naꞌko hi arki, reꞌ amnaben hi tuam ein ka mihiin fa raan aꞌpoꞌi naꞌko susat, hi bisa mitaan meu Uisneno, reꞌ nahiin areꞌ saaꞌ-saaꞌ. In es reꞌ bisa nakriraꞌ raan aꞌpoꞌi neu ki. In es reꞌ anfei ranan nok neek marine, ma In ka natoꞌon ki fa, karu hi mtoit Je. 6 Mes karu amtoit Je, ro he neekm aan kais naꞌoniꞌ. Hi ro he mpirsai batuur-batuur mak, In bisa nfee saaꞌ-saaꞌ reꞌ hi mtoit je naan. Fin karu hi mtoit nok neek aꞌoniꞌ, hi mjair on reꞌ okin reꞌ anpeeꞌ ma nrikraakn ok piut-piut natuin ain koꞌu. 7-8 Tuaf-tuaf reꞌ anꞌaijooꞌ gon, rabah ate in neekn ee ka natea fa nbi areꞌ kanan rasi. In kais anharap ma nafnekan nak, in of napein saaꞌ-saaꞌ naꞌko Uisneno.

9 Atoin amaꞌmuiꞌt ein reꞌ anpirsain nrarin neun Usif Yesus, sin ro he nharineb sin neek ein, natuin Uisneno nait sin anjarin In nonot-asar sin.

10-11 Ma atoin amuiꞌt ein reꞌ anpirsain nrarin neun Usif Yesus, sin ro he nmarinan amsaꞌ, natuin Uisneno nanoniꞌ sin he kais nabeꞌon. Oras ia, sin nahinin batuur nak, sin aꞌmuiꞌk ein of namnekun, on reꞌ fuboon aan, reꞌ nasuuf ate reokn ii kah een, mes ka ꞌroo fa te, maans ee nsae ma ntahaꞌ fubonaꞌ naan, rarit namneen. On naan amsaꞌ, atoin amuiꞌt ein. Maski sin ntaisibun nok sin uruusn ein, mes sin namnekun nkonon amsaꞌ.✡Naiꞌ Yesaya 40:6-7

12 Uisneno anfee tetus-athoen neu tuaf-tuaf reꞌ naran anbi rais furiꞌ pah-pinan tar antea npoi nkoon. Rarit in ntoup in upa ꞌhonis reꞌ Uisneno nbaꞌan anrair he nfee je neu tuaf-tuaf reꞌ anneek Ee. In ntoup in upan on reꞌ atopu kraa mnatuꞌ.†Uab Yunani ntui mnak “in ntoup στέφανος (stefanos) ꞌhonis”. Stefanos naan, aꞌpiru ꞌnakaf reꞌ sin nfee je neu tuaf reꞌ napein juara nahuun anbi ꞌbaꞌet. 13 Mimnau mirek-rekoꞌ! Karu anmuiꞌ tuaf naꞌko hi arki reꞌ napein rais furiꞌ pah-pinan, ma nroim he nmoeꞌ sanat, kais mikuu mmak, “Naan, Uisneno es reꞌ ansobaꞌ kau!” Fin Uisneno ka nroim niit fa he nmoꞌen nsaan. Ma In ka nsobaꞌ niit fa es amsaꞌ, he tuaf naan anroim he nmoꞌe nsaan. 14 Fin saant ii npoi naꞌko atoniꞌ in neekn ee kuun. Nahunu te, in nekan naan anroim he nmoeꞌ amreꞌut, rarit in nmurai natenab neu-mneem he nmoeꞌ rais reꞌuf. 15 Onaim in nmoeꞌ natuin tenab amreꞌut naan. Namuni te, Uisneno nhukun naꞌmaet tuaf-tuaf reꞌ anmoꞌen amreꞌut.

16 Aok-bian manekat arki! Kais tuaf es napoi ki npaek rasin reꞌ ia.

17 Rais maufiun ii ka naꞌuun fa naꞌkon Uisneno. Mes In nfee kit tetus-athoen reko, ma areꞌ saaꞌ-saaꞌ reꞌ kninuꞌ msaꞌ. In es reꞌ anmoeꞌ manas, funan ma kfuun ein. Sin arsin anꞌoins ok et neon goe tnanan, ma nmoeꞌ sin maofk ein naꞌbain ein piut-piut. Suma Uisneno kuun es reꞌ ka naꞌbaniꞌ niit fa. 18 Uisneno nareon ma nabarab anrair neu kit on nai: In nfee In Kabin ma Prenat amneot neu kit. Ma In npaek In Kabin ma Prenat naan, he namonib kit. Naꞌko areꞌ kanan saaꞌ-saaꞌ reꞌ In nmoeꞌ sin anbin pah-pinan ia, In npiri nrair kit he tjair In hau fua unuf.

19 Aok-bian manekat arki! Mimnau! Noniꞌ-taruꞌ areokt ii, on nai: kais miꞌuab ruum-ruum aah. Reko nneis, karu nmuiꞌ tuaf bian naꞌuab reko, hi mneen mirek-rekoꞌ. Ma kais maan aa fa te mitooꞌ. 20 Natuin karu mitooꞌ, atoniꞌ ka neu he nmoeꞌ fa rais reko natuin Uisneno In romin.

21 Onaim hi ro he misnasab hi tuam ein miꞌko ꞌmoeꞌ sanat, nahuum on reꞌ atoin tani antoof in rene, rarit nout makrauf ein naan. Ma hi ro he mtoup Uisneno In Kabin ma Prenat nok neek aꞌparan amsaꞌ. Kabin ma Prenat naan, on reꞌ fini reꞌ anbeben ma ansenan sin et hi neekm ein. Karu hi mmoeꞌ on naan ate, Uisneno of nsoi nafetin nain ki naꞌko hi saant ein ok-okeꞌ, ma In ntoup ki, rarit hi mmoin mok Ne nabar-baar.

22 Ma karu hi mihini mrair Uisneno In Kabin ma Prenat sin ate, hi ro he mmoeꞌ mituin sin. Kais amneen aah! Karu hi mneen ahaa, ma ka mmoeꞌ mituin fa, hi mipoi hi tuam ein kiim. 23-24 Karu atoniꞌ anneen anrair Kabin ma Prenat naan, ma ka nroim he nmoeꞌ natuin sin fa, in on reꞌ tuaf reꞌ ankius in human et ninu. Mes oras anninun nrair ma nasaitan ninu naan ate, in nnikan nain in human. 25 Mes hi kais amnikan he mparikas mirek-rekoꞌ Uisneno In Kabin ma Prenat reꞌ namtiis, reꞌ bisa nsoi nafetin naan atoniꞌ naꞌko in saant ein ok-okeꞌ. Uisneno of anfee tetus-athoen neu ki anbi areꞌ kanan saaꞌ-saaꞌ reꞌ hi mmoeꞌ sin, asar ramu hi mneen ma mituin In Kabin ma Prenat. Kais aar antaam anbi hi rukim aꞌrii, rarit anpoi nkono npeoꞌ hi rukim aꞌneꞌu.

26 Karu tuaf anpaas on nak in atoin amakoet anbi rais Uisneno, mes ka nafreu nahiin fa in fefan, tuaf naan in napoi in tuan aa kuun. In rais pirsait naan, parsuum aah. 27 Natuin rais pirsait reꞌ kniun ii, ka nꞌoemeet kuun fa. Naan es reꞌ anharineb Amaꞌ Uisneno In nekan. Rais pirsait reꞌ batuur on naan, in nmoeꞌ tuaf anroim he nturun ma nbaab bifee baun ein, ma komeꞌ-manat sin. Tuaf reꞌ naꞌkiiꞌ anbi rais pirsait on reꞌ naan, ka nrae natuin fa furit naꞌko rais amreꞌut, ma npanat in kaan foo menin.