15
Ameput tuaf hiut naꞌkon sonaf neno tunan neikin siraak koꞌu humaꞌ hiut neu pah-pinan
1 Rarit au ꞌiit ꞌmoꞌet huum es anbi neon goe tnanan, tar antea au ꞌfeefk ii no mkakan. Anmuiꞌ ameput hiut naꞌkon sonaf neno tunan, es-es ate annaaꞌ kuasa he nfee siraak koꞌu neu pah-pinan. Siraak hiut ein naan, es reꞌ siraak muniꞌ. Karu sin njarin ok-oek een, in oetn ii nak, Uisneno In neekn ee nꞌoe teen een, tar antea In ka natoꞌo ntein fa goen neu mansian.
2 Rarit au ꞌiit tasi npiin on reꞌ ninu reꞌ maseroꞌ nok ai. Au ꞌiit too mfaun anhaken anbin tais je ninin. Sin reꞌ naan, tuaf-tuaf reꞌ ka natuin fa muiꞌ fui apisut naan, ka naꞌbesan fa neu in faut marunaꞌ, ma ka ntoup fa in marak. Sin ar-arsin annaꞌan aꞌrekuꞌ on reꞌ sasando reꞌ sin ntoup sin naꞌkon Uisneno. 3 Rarit sin nsiin siit es naꞌkon kaꞌo Musa, Uisneno In aan renuꞌ-aan rekaꞌ afi unuꞌ. Tuaf ein reꞌ naan amsaꞌ ansiin siit es, reꞌ anpures Naiꞌ Yesus. Natuin afi unuꞌ te, atoniꞌ nroor niis Ne, nahuum on reꞌ anroor ꞌbib-kaes anaꞌ anbi Uisneno In Uim Onen he nꞌoeteneb ma nhainiik In nekan. Sin arsin ansiin am nak,*Kaꞌo Musa ntui siit naan oras Uisneno natuuk too Israꞌel anpoin naꞌkon pah Masir, bare reꞌ anhaꞌmuiꞌ sin.
“Hai mpures ma mboꞌis Uisneno!
Hai maikas ma miꞌratan In kanan!
Natuin In kuasan, ro maꞌtaniꞌ.
Ma In maꞌtanin, ro ansanmakab kit.
Uisneno annaaꞌ aprenat neu areꞌ kanan uuf ma pah anbi pah-pinan.
Uisneno njair Usif neu areꞌ kanan uuf ma kanaf anbi pah-pinan.
Uisneno In aꞌmoꞌen, ro maꞌtaniꞌ!
Uisneno In mepu ma pakaet, ro reok reꞌuf!
Uisneno In ranan, ro namneo ma namnoon!
Uisneno In aꞌmonin, ro batuur-batuur namnoon!✡Anpoin naꞌkon Pah Masir 15:1-18
4 Areꞌ kanan mansian naikas ma naꞌratan Uisneno In kanan,
areꞌ kanan mansian npures ma nboꞌis Uisneno In arekon.
Natuin suma Uisneno kuun es, akninuꞌ.
Suma In kuun es reꞌ ka nmuiꞌ fa sanat ma penu.
Areꞌ kanan pah of naꞌruriꞌ ma naꞌbesan neu Ne.
Areꞌ kanan uuf of neman ntotin makasi neu Ne.
Natuin areꞌ kanan mansian nitan nrarin Uisneno In aꞌmoꞌen arekot.
Ma areꞌ kanan mansian nahinin nrarin Uisneno In nekan amneot.”✡Naiꞌ Yeremias 10:7, Siit Pures-Boꞌis sin 86:9
5 Oras asiit ein ansiin nrarin, au ꞌiit Keꞌen Akninuꞌ nneis-neis anbi Uisneno In Uim Onen et sonaf neno tunan, ma in tai-eonꞌ ee masoitan.✡Anpoin naꞌkon Pah Masir 38:21 6 Rarit au ꞌiit ameput tuaf hiut ein reꞌ neikin siraak hiut naan. Sin npoin naꞌkon Uisneno In Uim Onen. Sin npaken tais reꞌ nariim muit okas, ma nasahan poꞌu mnatuꞌ. 7 Onaim au ꞌiit amsaꞌ muꞌit es naꞌko muiꞌ maꞌtain haaꞌ ein naan reꞌ anfuun naan Uisneno In aꞌtoko prenat naan, annonaꞌ bokor amnatuꞌ hiut neu ameupt tua hiut ein naan. Bokor hiut ein naan es-es ate matuaꞌ nok Uisneno In hukun. In kuun es nabar-baar. In nabarab anrair he nasanut In toꞌos neu pah-pinan. 8 Ka ꞌroo fa te, Uim Onen naan naheun nok masuꞌ reꞌ anpoi naꞌko Uisneno In kuasan ma In pinaꞌ ma krahaꞌ. Ka tiit tain fa tuaf es, reꞌ bisa ntaam neu bare naan. Ameput tuaf hiut ein reꞌ naan, ro he nasanut siraak hiut ein naan neun pah-pinan, he naꞌ tuaf-tuaf bisa ntaman neun naan.✡Anpoin naꞌkon Pah Masir 40:34, 1 Uisf ein sin Retaꞌ 8:10-11, 2 Mapeꞌo ꞌNaof Pah Israꞌel ma Pah Yahuda 5:13-14, Naiꞌ Yesaya 6:4
*15:3 Kaꞌo Musa ntui siit naan oras Uisneno natuuk too Israꞌel anpoin naꞌkon pah Masir, bare reꞌ anhaꞌmuiꞌ sin.
✡15:3 Anpoin naꞌkon Pah Masir 15:1-18
✡15:4 Naiꞌ Yeremias 10:7, Siit Pures-Boꞌis sin 86:9
✡15:5 Anpoin naꞌkon Pah Masir 38:21
✡15:8 Anpoin naꞌkon Pah Masir 40:34, 1 Uisf ein sin Retaꞌ 8:10-11, 2 Mapeꞌo ꞌNaof Pah Israꞌel ma Pah Yahuda 5:13-14, Naiꞌ Yesaya 6:4