21
Naiꞌ Yohanis ankius niit neno tunan ma pah-pinan mamaas feꞌu
1 Rarit au ꞌkius ꞌiit neno tunan ma pah-pinan huum maas feꞌu, fin neno tunan ma pah-pinan huum maas amnaaꞌ namnekun nrarin. Tais je msaꞌ, ka mamnitaꞌ fa goen.✡Naiꞌ Yesaya 65:17, 66:22, 2 Naiꞌ Petrus 3:13 2 Rarit au ꞌkius ꞌiit Uisneno In kota kninuꞌ, es reꞌ Yerusalem Feꞌu, ansaun neem naꞌko sonaf neno tunan. Kota naan nabarab anrair, on reꞌ baroit bifee reꞌ he nnao nseun in mone.✡Naiꞌ Yesaya 52:1, Rasi Mnitas neu naiꞌ Yohanis 3:12, Naiꞌ Yesaya 61:10 3 Rarit au ꞌneen hanaf maꞌtain es, anpoi naꞌko ꞌtoko prenat naan am nak,
“Amkius mirek-rekoꞌ!
Anmurai oras ia, Uisneno In Umi et mansian ii sin sonak ma sin atnaank ein.
Anmurai neno ia, Uisneno anmoin nabu-bua nok Iin na.
Fin In njair sin Uisneno.
Ma sin anjarin In aanh ein.
In of nok sin piut-piut.
Ma In nabu-bua nok sin nabar-baar.✡Naiꞌ Yeskial 37:27, Aꞌnaak Rais Pirsait ein sin Atoran 26:11,12
4 In of annoes nain sin maat nuu ngguin,
he sin kais ankae npin-piuns ein antein.
Natuin anbi bare naan, ka tiit tain fa amenat antein.
Ma nbi bare naan, ka tiit tain fa amates antein.
Areꞌ kanan rais susat nanaꞌrenat reꞌ un-unuꞌ te, nasusab ma nnanaꞌrenab, ka tiit attein sin fa goen.
Areꞌ kanan haꞌmuꞌit ma maꞌneꞌat reꞌ un-unuꞌ te nhaꞌmuiꞌ, namnekun nrarin.”✡Naiꞌ Yesaya 25:8, 35:10, 65:19
5 Rarit In reꞌ antuun On anbi ꞌtoko prenat naan, naꞌuab am nak, “Amkius mirek-rekoꞌ, natuin Au uꞌfeꞌu areꞌ kanan saaꞌ-saaꞌ.” Rarit In naꞌuab antein neu kau mnak, “Amtui nai! Areꞌ kanan mansian bisa npirsai Au Uabk ein, natuin uab ein naan, ro batuur!”
6 Rarit In natoon antein kau mnak,
“Areꞌ saaꞌ-saaꞌ reꞌ Au ꞌbaꞌan ꞌain sin naꞌko afi unuꞌ naan, njarin nrarin.
Natuin Au reꞌ ia,
Alfa ntea Omega.
Ma Au reꞌ ia,
A ntea Z,
Areꞌ saaꞌ-saaꞌ ii naꞌuun ma naꞌbaꞌan nbin Kau,
anmurai naꞌko ahunut ntea amunit.
Areꞌ kanan mansian ameon oe,
Au of aꞌfeen sin oe ma ninun kuuk ruum-ruum aah,
naꞌko oe mataꞌ reꞌ neiki ꞌhonis, maut he mansian ein anmonin batuur.✡Naiꞌ Yesaya 55:1
7 Areꞌ kanan mansian reꞌ naran ma natuin Uisneno In raan aꞌhonis amneot ma amnonot,
sin of antoup naan kuuk tetus-athoen ein reꞌ ia.
Fin Au of aꞌjair sin Uisneno,
ma sin anjarin Au aanh ein.✡2 Naiꞌ Samuel 7:14, Siit Pures-Boꞌis sin 89:26-27
8 Mes anmuiꞌ tuaf bian reꞌ of anporin napoitan sin,
neun tais ai bariri, reꞌ npiin ka nasnaas niit fa.
Nahuum on reꞌ atoin amtaus,
tuaf reꞌ nkoit Naiꞌ Yesus,
tuaf reꞌ anꞌoemeet,
tuaf reꞌ anmakaken ma nmakonin nok tuaf reꞌ sin ka moen ja fa, aiꞌ ka fee ja fa,
aroor mansian,
afuat neu nitu,
araut,
ma aputa-kriut.
Sin ar-arsin naan of nait inporin sin neu tais ai,
reꞌ anteek ee nak, ‘bareꞌ ꞌmaten no nuan ii.’ ”
Naiꞌ Yohanis ankius niit kota Yerusalem huum maas feꞌu
9 Onaim au ꞌkius ꞌiit tuaf es naꞌko tua hiut ein naꞌkon sonaf neno tunan reꞌ neon goes ii annaꞌan bokor reꞌ matuaꞌ nok Uisneno In toꞌos. In neem nateef nok kau, rarit naꞌuab am nak, “Uum meu ia feꞌ! Natuin au he ukriraꞌ ko baroit bifee reꞌ he nkabin nok ꞌBib-kaes Anaꞌ.”
10 Onaim Uisneno In Asmaan Akninuꞌ ntoom kau. On naan amsaꞌ ameput sonaf neno tunan tuaf es neik kau ꞌsae ꞌeu ꞌtoeꞌf es, reꞌ ꞌraat reꞌuf. Anbi naan, in naꞌkriraꞌ kau kota Yerusalem, es reꞌ Uisneno In kota kninuꞌ naan, reꞌ ansaun neem naꞌko Uisneno nbi sonaf neno tunan.✡Naiꞌ Yeskial 40:2 11 Kota naan reok reꞌuf! Anmuiꞌ meꞌu reꞌ ntanaꞌ npoi naꞌko Uisneno In pinaꞌ ma krahaꞌ, on reꞌ faut intan reꞌ nariim. Tar antea kota naan meꞌu ok-okeꞌ. 12 Anmuiꞌ rameꞌ namteut nfuun natef-tefan kota naan. Anmuiꞌ eon koꞌu boꞌes am nua. Anmuꞌi ameput sonaf neno tunan tuaf boꞌes am nua msaꞌ, reꞌ anpao eonꞌ ein naan. Anbi eonꞌ ein naan, matuꞌi uuf boꞌes am nua naꞌko pah Israꞌel sin kaank ein.*Tatuin atoin ahinit anbi Suur Akninuꞌ, nomer boꞌes am nua naan, nomer reꞌ naruruꞌ mansian reꞌ namtiis ma namkeis. 13 Eon koꞌu teun nbain ein neu pasaꞌ neon-saet. Teun anbain ein neu pasaꞌ neon-teas. Teun anbain ein neu pasaꞌ ponain. Ma tenu ntenin nbain ein neu pasaꞌ haaꞌ-nua.✡Naiꞌ Yeskial 48:30-35 14 Rameꞌ naan nahaek ee nbi faut fanderen kouꞌ-koꞌun fuaꞌ boꞌes am nua. Anbi fatun naan meseꞌ-meseꞌ matuꞌi kanaf tuaf meseꞌ-meseꞌ naꞌko haef tuaf boꞌes am nua. Haef ein naan esan reꞌ antuthae ꞌBib-kaes Anaꞌ oras In nbi pah-pinan.
15 Rarit tuaf ameput reꞌ naꞌuab neu kau naan, annaaꞌ hau ukur amnatuꞌ noon es, he nꞌukur kota naan in eon koꞌun ma in rameꞌ.✡Naiꞌ Yeskial 40:3 16 In nꞌukur nahuun neu kota naan in rameꞌ reꞌ on reꞌ segi empat. In amnanun ma mnaun paran, ꞌratan humaꞌ meseꞌ, es reꞌ kiru nifun nua mnatun nua mboꞌ nua (2.220).†Suur Akninuꞌ uab Yunani antui mnak, stadia nifun boꞌes am nua (12.000). 17 Rarit in nꞌukur rameꞌ naan in mafaun, meter boꞌ nee mniim, natuin mansian ii in hau ukur.‡Suur Akninuꞌ uab Yunani antui nbi reꞌ ia mnak, “peihon nautn es boꞌ haa mhaa”. Peihon es ate, humaꞌ meseꞌ nok rakat nua. Onaim boꞌes am nua anfain no boꞌes am nua, es reꞌ nautn es boꞌ haa mhaa (144). Onaim karu boꞌes am nua in oetn ii nak, namtiis, nautn es boꞌ haa mhaa in oetn ii nak, ro namtisi nfiin. 18 Rameꞌ naan, sin nmoeꞌ je naꞌko faut arimat, reꞌ in kaan ee, yaspis. Ma areꞌ kanan saaꞌ-saaꞌ reꞌ anbi kota naan in nanan, sin nmoeꞌ je naꞌko mnaut afaꞌ reꞌ nrear on reꞌ ninu.
19 Faut fanderen fuaꞌ boꞌes am nua reꞌ naan, anmoeꞌ sin naꞌkon faut arimat humaꞌ-humaꞌ reꞌ maꞌosaꞌ. Faut fuaꞌ ahunut naan, npaek faut yaspis reꞌ anpiin snaa mamateꞌ. Faut fuaꞌ nuan ii, npaek faut nilam reꞌ anpiin snaa biru. Faut fuaꞌ teun ii npaek faut mirah reꞌ anpiin snaa meꞌe. Faut fuaꞌ haan ii npaek faut samrut reꞌ anpiin snaa mamateꞌ. 20 Faut fuaꞌ niim ii, npaek faut unam reꞌ nmarapis soklat-mutiꞌ. Faut fuaꞌ neeꞌ ji, npaek faut sardius reꞌ anpiin snaa meꞌe. Faut fuaꞌ hiutn ii, anpaek faut ratna cempaka reꞌ anpiin snaa moro-mnatuꞌ. Faut fuaꞌ faun ii, anpaek faut beril reꞌ anpiin snaa biur-mamateꞌ. Faut fuaꞌ seoꞌ gui, npaek faut krisolit reꞌ anpiin snaa moroꞌ-moroꞌ. Faut fuaꞌ boꞌ ii, anpaek faut krisopras reꞌ anpiin snaa mamaet mainukiꞌ. Faut fuaꞌ boꞌes am mees ii, anpaek faut lasuardi reꞌ anpiin snaa biru on reꞌ oe tasi. Ma faut fuaꞌ boꞌes am nuaꞌ ii, anpaek faut kecubung reꞌ anpiin snaa umub. 21 Ma eon koꞌu boꞌes am nua naan, anmoeꞌ sin naꞌkon mutiara fuaꞌ boꞌes am nua. Eon es ate anmoeꞌ je nok mutiara fuaꞌ es. Ma kota naan in raan uuf, anmoeꞌ je naꞌko mnaut afaꞌ reꞌ nariim on reꞌ ninu.✡Naiꞌ Yesaya 54:11-12
22 Mes au ꞌkius, ka tiit fa uim onen anbi kota naan, natuin Uisneno akuasat anneis-neis, nok ꞌBib-kaes Anaꞌ anbin naan piut-piut. Etun mansian ein naꞌbesan anꞌani haa Sin. 23 Kota naan amsaꞌ ka nperluu fa manas ma funan he ntanaꞌ, natuin Uisneno In masan ntanaꞌ anbi bare naan. Ma ꞌBib-kaes Anaꞌ naan njair on reꞌ pauk apinat.✡Naiꞌ Yesaya 60:19-20 24 Atoniꞌ naꞌko areꞌ kanan uuf ma pah anbi pah-pinan, of neman ma ntaman neun meꞌu naan. Uisf ein abitan pah-pinan amsaꞌ, neman ma neik sin aꞌmuiꞌk ein reꞌ maꞌtaniꞌ anbin bare naan.✡Naiꞌ Yesaya 60:3 25 Anbi bare naan ka tiit attein fa oras fai. Etun ka nperluu fa he taꞌeek enoꞌ he ttaam teu kota. 26 Sin of antaam neikin neun kota naan, areꞌ kanan saaꞌ-saaꞌ reꞌ arekot, ma areꞌ rais hormaat naꞌkon pah ma ꞌpen-pene nbi pah-pinan.✡Naiꞌ Yesaya 60:11 27 Mes tuaf reꞌ ka bole fa he ntaam neu bare naan, es reꞌ amaufiunt ein ok-okeꞌ, on reꞌ afuat, amakaket, ma aputa-kriut. Tuaf reꞌ bole ntaam, es reꞌ suma tuaf-tuaf reꞌ in kaan ee matuꞌi et ꞌBib-kaes Anaꞌ naan In surat, reꞌ antui kanaf naꞌko tuaf amonit reꞌ natuin Uisneno piut-piut.✡Naiꞌ Yesaya 52:1, Naiꞌ Yeskial 44:9
✡21:1 Naiꞌ Yesaya 65:17, 66:22, 2 Naiꞌ Petrus 3:13
✡21:2 Naiꞌ Yesaya 52:1, Rasi Mnitas neu naiꞌ Yohanis 3:12, Naiꞌ Yesaya 61:10
✡21:3 Naiꞌ Yeskial 37:27, Aꞌnaak Rais Pirsait ein sin Atoran 26:11,12
✡21:4 Naiꞌ Yesaya 25:8, 35:10, 65:19
✡21:6 Naiꞌ Yesaya 55:1
✡21:7 2 Naiꞌ Samuel 7:14, Siit Pures-Boꞌis sin 89:26-27
✡21:10 Naiꞌ Yeskial 40:2
*21:12 Tatuin atoin ahinit anbi Suur Akninuꞌ, nomer boꞌes am nua naan, nomer reꞌ naruruꞌ mansian reꞌ namtiis ma namkeis.
✡21:13 Naiꞌ Yeskial 48:30-35
✡21:15 Naiꞌ Yeskial 40:3
†21:16 Suur Akninuꞌ uab Yunani antui mnak, stadia nifun boꞌes am nua (12.000).
‡21:17 Suur Akninuꞌ uab Yunani antui nbi reꞌ ia mnak, “peihon nautn es boꞌ haa mhaa”. Peihon es ate, humaꞌ meseꞌ nok rakat nua. Onaim boꞌes am nua anfain no boꞌes am nua, es reꞌ nautn es boꞌ haa mhaa (144). Onaim karu boꞌes am nua in oetn ii nak, namtiis, nautn es boꞌ haa mhaa in oetn ii nak, ro namtisi nfiin.
✡21:21 Naiꞌ Yesaya 54:11-12
✡21:23 Naiꞌ Yesaya 60:19-20
✡21:24 Naiꞌ Yesaya 60:3
✡21:26 Naiꞌ Yesaya 60:11
✡21:27 Naiꞌ Yesaya 52:1, Naiꞌ Yeskial 44:9