10
1 Aok-bian arki! Au he utenab saaꞌ ꞌeu atoin Israelas sin? Au ꞌonen he sin nfeen mainuan neun Uisneno he In nsoi nafetin sin naꞌko sin saant ein. Karu njair on naan, naꞌ au ꞌmariin!
2 Au bisa utoon anmatoom nok atoin ein ia sin aꞌmoeꞌk ein: sin nmakoen he natuin Uisneno. Maski sin nmakoen on naan, mes sin ka nahiin fa ranan reꞌ batuur. 3 Natuin sin ka nahinin fa raan aꞌhonis reꞌ batuur, reꞌ nmoeꞌ atoniꞌ bisa nmarameꞌ nok Uisneno, etun sin nasoin ein kuuk ranan he nsobaꞌ he nareok ok nok Ne. Nok ranan naan, sin ka nromin fa he natniin Ee.
4 Karu tuaf suma nmoeꞌ natuin ahaa atoran, he Uisneno ntoup goe, naan ka nanokab fa. Etun Kristus nmoeꞌ namtisib atoorn ein ok-okeꞌ, maut he hit bisa tmarameꞌ tok Uisneno. Rarit oras ia, ansuun tuaf reꞌ npirsain neun Kristus bisa nmarameꞌ nok Uisneno.
Uisneno nroim he nsoi nafetin areꞌ mansian ii naꞌko sin sanat ma penu sin
5 Unuꞌ te, kaꞌo Musa naruruꞌ ma nakriraꞌ nrair ranan anbi Suur Akninuꞌ, he tuaf bisa nmarameꞌ nok Uisneno, asar sin nmoꞌen natuin Uisneno In Atoorn ein ok-okeꞌ. In ntui mnak, “Tuaf reꞌ nmoeꞌ natuin Atoorn ein ok-okeꞌ, sin of napenin aꞌmonit amneot ma amnonot.”✡Aꞌnaak Rais Pirsait ein sin Atoran 18:5
6 Mes Suur Akninuꞌ Uisneno naruruꞌ ma nakriraꞌ ranan bian amsaꞌ am nak, tuaf bisa nmarameꞌ nok Uisneno asar sin npirsain neun Kristus. Matuꞌi msaꞌ am nak, “Kais mitaan am mak, ‘Sekau es reꞌ bisa nsae neu sonaf neno tunan?’ ” (Naan on reꞌ atoniꞌ nsae natoon neu Kristus am nak, hit mansian ii troim he In ansaun he nsoi nafetin kit.) 7 Matuꞌi msaꞌ anbi Suur Akninuꞌ mnak, “Kais mitaan am nak, ‘Sekau es reꞌ he nsaun neu koon ai abar-barat, anbi bare neu amaets ein?’ ” (Naan on reꞌ atoniꞌ nsaun he neik nafaniꞌ Kristus ansae naꞌko In aꞌmaten he nsoi nafetin kit.)
8 Kais on naan, tua! Fin anbi Suur Akninuꞌ Uisneno matuꞌi msaꞌ mnak, “Uisneno In beno et ho humam ma ho matam! Fin beno naan et ho fefam ma ho nekam.” Beno naan reꞌ hit tatoon ee neu tuaf am tak, “Karu ho he mupeni ꞌhonis, ho ro he mpirsai meu Kristus!”✡Surat reꞌ Naretaꞌ Nafaniꞌ Raan Aꞌhonis 30:12-14 9 Karu ho mmanakuꞌ mpaek ho fefam kuum am mak, “Yesus naan, au Usiꞌ,” ma ho mpirsai mbi ho nekam mak, Uisneno namonib nafaniꞌ Yesus Kristus naꞌko In aꞌmaten, es naan ate, Uisneno nsoi nafetin ko msaꞌ naꞌko ho sanat ma ho penu sin. 10 Fin karu ho mpaek ho nekam he mpirsai Kristus, Uisneno nmarak ko nak, atoin neek amneot ma amnonot reꞌ nareko nfain nok Ne. Ma karu ho mpaek ho fefam mak, Naiꞌ Yesus anjair ho Usiꞌ, Uisneno nroim he nafetin ko naꞌko ho sanat ma ho penu sin kuasat. 11 Anbi Suur Akninuꞌ matuꞌi mnak, “Atoniꞌ reꞌ npirsai Uisneno, of ka napein fa rais mae, fin Uisneno of he najarib areꞌ saaꞌ-saaꞌ reꞌ In naꞌuab anrair sin.”✡Naiꞌ Yesaya 28:16 12 Atoin Yahudis ma ka Yahudis sin fa, humaꞌ meseꞌ. Ka nmuiꞌ fa suri. Fin suma nmuꞌi haa Usif meseꞌ, ma In njair Usif neu areꞌ kanan pah ma ꞌpen-pene. In nroim he naruruꞌ ma nakriraꞌ In nekan arekot kouꞌ-koꞌu neu tuaf meseꞌ-meseꞌ reꞌ he ntoit Je he In nturun ma nbaab sin. 13 Fin anbi Suur Akninuꞌ matuꞌi mnak, “Areꞌ mansian reꞌ ntoit turun-babat naꞌko Uisneno, In of ansoi nafetin sin naꞌko sin sanat ma penu sin.”✡Naiꞌ Joel 2:32
14 Mes on mee atoniꞌ bisa ntoit turun-babat, karu atoniꞌ ka npirsai fa tuaf es fa feꞌ? Ma on mee he sin bisa npirsai neun tuaf naan, karu sin ka nneen niit ee fa feꞌ? Ma on mee he sin bisa nneen niit ee, karu ka tiit fa tuaf natoon ee neu sin? 15 On mee tuaf bisa natoon neu sin, karu ka tiit fa tuaf anreek haefan sin he nnao natoon ee on naan? Anbi Suur Akninuꞌ matuꞌi mnak, “Karu atoniꞌ neem neik rais reko, sin amneemk ein naan, reok reꞌuf!”✡Naiꞌ Yesaya 52:7
16 Mes hi mihini mrari mmak, anmuiꞌ atoin Israelas bian reꞌ ka nromin fa he nneen ma natniin Uisneno In Rais Reko. Fin Uisneno In mafefa kninuꞌ naiꞌ Yesaya ntui mnak,
“Koi, Usiꞌ!
Sin ka nromin fa he npirsain neun beno,
reꞌ sin nneen ma natniin anrair je naꞌko kai!”✡Naiꞌ Yesaya 53:1
17 Onaim karu he mpirsai Uisneno, ro he mitniin In Kabin ma Prenat sin feꞌ. Karu he mneen ma mitniin Uisneno In beon goe te, ro he mneen rasi nmatoom nok Kristus feꞌ.
18 Au he utaan ꞌiit, on nai: of oniꞌ hi mitenab, mak, atoin Israelas sin ka nneen ma natniin niit fa anmatoom nok Kristus, aiꞌ? Sin nnenan anrarin! On reꞌ matuꞌi nbi Uisneno In Suur Akninuꞌ naꞌko unuꞌ mnak,
“Mafefa kninuꞌ Uisneno sin beno reꞌ anmatoom nok Usiꞌ
nasiin on ma nabeon on anfuun am nateef anbi pah-pinan;
Sin uabk ein naan,
antea nrair pah-pinan ia in pani-mpain.”✡Siit Pures-Boꞌis sin 19:5
19 Au he utaan aꞌtein rais jes am ꞌak, “Atoin Israelas sin ka nahinin fa Uisneno In raan ee, oo?” Kaꞌo Musa, tuaf ahunut reꞌ ntui rasi naan am nak, Uisneno natoon anrair atoin Israelas sin nak,
“Au he ꞌmoeꞌ rais jes,
neu uuf am pah bian sin.
Rasi naan of anmoeꞌ ki ammasmeruꞌ.
Ma Au he ꞌmoeꞌ rais jes amsaꞌ,
neu tuaf-tuaf reꞌ hi maan ee amonot on reꞌ ukum.
Rasi naan of anmoeꞌ ki ammarau nisin.”✡Surat reꞌ Naretaꞌ Nafaniꞌ Raan Aꞌhonis 32:21
20 Namuni te, kaꞌo Yesaya ntui maat-maat anmatoom nok ka atoin Yahudis fa mnak,
“Anmuiꞌ tuaf reꞌ unuꞌ te ka naim niit Kau fa,
mes sin nateef nok Kau goen.
Anmuiꞌ tuaf reꞌ unuꞌ te ka natenab niit fa he nkius niit Kau,
mes Au ukriir Ok aꞌrair ꞌeu sin.”✡Naiꞌ Yesaya 65:1
21 Mes anmatoom nok atoin Israelas sin, Uisneno naꞌuab anrari mnak,
“Fai-manas, Au ꞌfei ma ꞌpiraꞌ Au ꞌniimk ein,
he ꞌpao atoin Israelas sin he neman neu Kau.
Mes sin ka nromin fa he nneen ma natniin Kau,
ma sin nromin he nraban Kau msaꞌ.”✡Naiꞌ Yesaya 65:2
✡10:5 Aꞌnaak Rais Pirsait ein sin Atoran 18:5
✡10:8 Surat reꞌ Naretaꞌ Nafaniꞌ Raan Aꞌhonis 30:12-14
✡10:11 Naiꞌ Yesaya 28:16
✡10:13 Naiꞌ Joel 2:32
✡10:15 Naiꞌ Yesaya 52:7
✡10:16 Naiꞌ Yesaya 53:1
✡10:18 Siit Pures-Boꞌis sin 19:5
✡10:19 Surat reꞌ Naretaꞌ Nafaniꞌ Raan Aꞌhonis 32:21
✡10:20 Naiꞌ Yesaya 65:1
✡10:21 Naiꞌ Yesaya 65:2