Mahampataꞌ Balita tungkul kan Apu Jesu Cristo ibat kan
MARCOS
1
Hay Pangangaral Juan ya Tagapagbawtismu
(Mateo 3:1-12; Lucas 3:1-18; Juan 1:19-28)
1-2 Atiyaꞌ Mahampataꞌ Balita tungkul kan Apu Jesu Cristo*Cristo: Hay kaulugan ha salitan Griego, Tagapagligtas. Ha salitan Hebreoy naman, Mesias., Anak Apu Diyus. Nagꞌumpisay ati hin natupadaꞌ insulat tagapannunghung Apu Diyus ya hi Isaias. Hinlagi, insulat Isaias ya innunghung Apu Diyus kan Apu Jesus. Atiyaꞌ ambala na,
“Ipagtan kuy minsahiru ku. Mauna ya kamu, takay inunghung na ha tawtawung ihanda lay sarili la ha paglatêng mu.
3 Malêngê yuy bungꞌu na ha kalinangan, ya mannunghung,
‘Pakahampatên yuy pusu yu para ha paglatêng Panginuun,
Dapay ha paghandan danan para ha maalagan tawu!’ ”
4-5 Buy natupadaꞌ ati hin nakalatêng hi Juan ya Tagapagbawtismu istu ha kalinangan. Madlan tawtawung naku kana, ibat ha Jerusalem buy iba iban banwa ha Judea. Nangaral ya ha tawtawu, “Magsisi kawuy na ha kayung kawkasalanan ta magpabawtismu kawu takayꞌêmên patawarên kawun Apu Diyus.” Impagtapat lay kanlan kawkasalanan buy binawtismuan hilan Juan ha Ilug Jordan.
6 Hay barun Juan gawa ha labuk kamilyu†kamilyu: Mamhakaꞌ kahanaꞌ ayêp, mas mamhak pun ha kabayu buy baka. Dapay yan bakan mayin mêt bukul ha bukut. Makadangaꞌ bitih na buy bêng. buy hay babat na, gawa ha balat ayêp. Hay kikinan na balanga insiktu buy pulut panilan. 7 Ambala na, “Mayin pun gihay lumatêngaꞌ mas makapangyarian pun kangku. Ah ku man, karapat dapataꞌ maglingkud kana dapay gihay alipên. 8 Bawtismuwan katawu ha lanêm, nuwa bawtismuwan na kawu ha Ispiritun Apu Diyus.”
Hay Pagbawtismu buy Pagtuksu kan Apu Jesus
(Mateo 3:13-4:11; Lucas 3:21-22; 4:1-13)
9 Hin panawên bantu, inlumatêng hi Apu Jesus ibat ha Nazaret, sakup prubinsiyan Galilea, buy nagpabawtismu kan Juan ha Ilug Jordan. 10 Pagkalakat Apu Jesus ha lanêm, nagêangaꞌ langit. Naakit nay nagtabuy kanay Ispiritun Apu Diyus dapay gihay kalapati. 11 Buy mayin busisaꞌ nalêngê ibat ha langit ya nannunghung, “Hakay minamaal kun Anak, ya lubus kun kinatutulꞌan.”
12 Nakun, agad yan pinalakun Ispiritun Apu Diyus ha kalinangan. 13 Namirmi ya istun apatnapuy allêw buy tinuksu yan Satanas. Mayin mangatapangaꞌ ayêp istu. Dilag mêt istuy awꞌanghil Apu Diyus ta pinagsilbiyan hi Apu Jesus.
Binawêg Apu Jesus ya Apataꞌ Mangingisda
(Mateo 4:12-22; Lucas 4:14-15; 5:1-11)
14 Hin nakulung hi Juan ya tagapagbawtismu, naku hi Apu Jesus ha prubinsiyan Galilea. Buy impangaral na baistuy Mahampataꞌ Balitan ibat kan Apu Diyus. 15 Ambala na, “Lumatênganay takdan panawun! Madaniyanay paghaharin Apu Diyus. Pagsisiyan yuy nay kayung kasalanan buy maniwala kawu ha Mahampataꞌ Balita!”
16 Gihay allêw, kaban nalliyaliyaku hi Apu Jesus ha pingit Dagat Galilea ‡Dagat Galilea: Binabawêg mêt Lawan Galilea. Hay Lawan Galilea, mas mamhak buy malalê ha ilug. Matiningaꞌ ati nuwa maalun nu mayin malakasaꞌ bagyu. naakit nay mipatêlaꞌ mangingisda hilan Simon buy Andres. Mamitambuk hilan lambat. 17 Ambalan Apu Jesus kanla, “Humunul kawu kangku ta gawꞌên katawun mamidanin tawu kan Apu Diyus nambuh ha pandakêp yu ha isda.” 18 Intayak la agadaꞌ kanlan lawlambat buy hinumunul kana.
19 Nagpatuluy hi Apu Jesus ha paliyaliyaku. Ha alwan kadayuan naakit nay namêtaꞌ luway anak Zebedeo, hilan Santiago buy Juan. Impapakahampat lay lambat la ha kanlan bangka. 20 Agad hilan binawêg Apu Jesus, “Humunul kawu kangku.” Buy intayak lay kanlan bapan hi Zebedeo ha kanlan bangka, awyunaꞌ kanlan tawtauhan. Ta hinumunul hila kan Apu Jesus.
Hay Tawung Sinuklutan Anitu
(Lucas 4:31-37)
21 Naku hilan Apu Jesus ha Capernaum. Hin nalatêngaꞌ Allêw Pamamahinga, naku hila ha biyag pamititipunan Hawjudio ta istun nanudu hi Apu Jesus. 22 Namanghay tawtawu ha libun tudu na ta nanudu yan mayin kapangyarian, alwan katbuh tawtagapanudun kautuhan.
23 Mayin gihay tawu baistu, sinuklutan anituy biglan nagpahuk buy nagbubungꞌu, 24 “Jesus ya taga Nazaret, hita pakialam mu kanyan? Naku ka kayti taêmên lipuhun kami? Kilala kita. Hakay Banalaꞌ impagtan Apu Diyus!”
25 Nuwa binawalan Apu Jesus ya anitu, “Tênggên ka buy magꞌalih ka kana!” 26 Pinamêgpêg anituy tawu buy nagbungꞌu kaban nagꞌaalihaꞌ ati.
27 Namanghay laataꞌ dilag istu, ta ninununghung hila ha gihat giha, “Hita ati? Gihay bayun tudu, mayin kapangyarian! Hay anitu, nauutuhan na buy napapahunul na!” 28 Kinumalat agadaꞌ balita tungkul kan Apu Jesus ha buun prubinsiyan Galilea.
Madlan Pinagaling hi Apu Jesus
(Mateo 8:14-17; Lucas 4:38-41)
29 Ibat ha biyag pamititipunan Hawjudio, naku hi Apu Jesus ha biyag lan Simon buy Andres, awyun na hilan Santiago buy Juan. 30 Nalatêng la, pakaundagaꞌ ampun Simonaꞌ babaying inlalagnat. Agad lan innunghungaꞌ ati kan Apu Jesus. 31 Dinaninan Apu Jesus ya mayin hakit, dinukpan nay gamêt ati buy impaibangun na. Naalih agadaꞌ kanan lagnat bayu pinagsilbiyan na hilan Apu Jesus.
32 Panlumbug allêw, gintan tawtawu kan Apu Jesus ya laat mayin hakit buy libun sinusuklutan anitu. 33 Buung banway nangapititipun ha luwahan. 34 Madlan mayin hakitaꞌ pinagaling Apu Jesus hitamanaꞌ kanlan karamdaman. Buy pinaalih na mêtaꞌ madlan anitu. Nuwa ah na pinaulayan mipannunghung libun anitu ta tanda lan hiyay Anak Apu Diyus.
Nangaral hi Apu Jesus ha Galilea
(Lucas 4:42-44)
35 Kinadatunan, nibangun hi Apu Jesus, naku ha kalinangan ta baistun nanalangin. 36 Tingkap yan Simon buy kanan kawkaawyun. 37 Hin naakit la hi Apu Jesus, ambala la, “Titingkap kawun laat.”
38 Nuwa innunghung Apu Jesus kanla, “Maku kitamuy na ha kadanin banwa taêmên makapangaralaku mêt baistu. Ta atiyaꞌ dahilan kaya ku naku kayti.” 39 Buy inlibut Apu Jesus ya buung Galilea, nangaral ya ha libun biyag pamititipunan Hawjudio. Buy nagpaalih yan anitu ha tawtawung sinuklutan anitu.
Pinagaling Apu Jesus ya Liyaking Mayin Hakit ha Balat
(Mateo 8:1-4; Lucas 5:12-16)
40 Nagdani kan Apu Jesus ya gihay liyaking mayin hakit ha balat. Nagluhudaꞌ ati kana buy nagmakaingalun pagalingin na. Ambala na, “Nu labay yu, pagalingin yu ku takay luminisaku.”
41 Kinaingalwan yan Apu Jesus ta dinukpan ya. Buy ambala kana, “Labay kun, luminis kay na!” 42 Ginumaling agadaꞌ hakit. 43-44 Pinaalih ya agad Apu Jesus buy imbilin, “Andi mu nunghungunaꞌ ati ha kanayun. Ha halip, maku ka ha pari buy ipaakit muy balat mu ya ala kay nan hakit. Pagkayari, maghandug kan dapay ha inꞌutuh Moises, patunayaꞌ malinis kay na.”
45 Nuwa pagkaalih na, impagnununghung nay nangyari kana. Ta kinumalataꞌ balitan ati, kaya ah yay na basta makalaku ha bawbanwa ta pagkagulwan yan tawtawu. Buy istu ya tanan namirmi ha kalinangan. Nuwa naku pun kanay tawtawu, ibat ha iba iban rugal.
*1:1-2 Cristo: Hay kaulugan ha salitan Griego, Tagapagligtas. Ha salitan Hebreoy naman, Mesias.
†1:6 kamilyu: Mamhakaꞌ kahanaꞌ ayêp, mas mamhak pun ha kabayu buy baka. Dapay yan bakan mayin mêt bukul ha bukut. Makadangaꞌ bitih na buy bêng.
‡1:16 Dagat Galilea: Binabawêg mêt Lawan Galilea. Hay Lawan Galilea, mas mamhak buy malalê ha ilug. Matiningaꞌ ati nuwa maalun nu mayin malakasaꞌ bagyu.