14
Ri kechꞌaꞌt pa jujun chik chꞌaꞌtem na kimajom taj
Choka kꞌu alaq il che kakꞌojiꞌ ri rutzil kꞌuꞌxaj pa animaꞌ alaq, yey rayij alaq uriqik janipa ri uyaꞌom ri Ruxlabꞌixel ri Dios chiqe re ꞌanabꞌal ruchak. Y che taq waꞌ wa yaꞌtal chiqe, ri lik kajawaxik e ri qꞌalajisanik re runaꞌoj ri Dios. Ma e ri jun yaꞌtal che ruma ri Ruxlabꞌixel ri Dios kachꞌaꞌt pa juna chik chꞌaꞌtem na umajom taj y na kamajtaj ta usukꞌ, e rukꞌ ri Dios kachꞌaꞌt wi, na e ta kukꞌ ri tikawex. Ma na jinta junoq kamajaw usukꞌ ri kubꞌiꞌij, ma waꞌ ewatal chikiwach ri tikawex. Noꞌj ri jun kuqꞌalajisaj runaꞌoj ri Dios, kubꞌiꞌij waꞌ chike ri tikawex re kikꞌiyibꞌal chwach ri Dios, re pixabꞌanik y re kunimarisaj kikꞌuꞌx.
Ri jun yaꞌtal che kachꞌaꞌt pa juna chꞌaꞌtem na umajom taj, kuꞌan waꞌ re toꞌbꞌal chiribꞌil ribꞌ. Noꞌj kꞌu ri jun yaꞌtal che kuqꞌalajisaj runaꞌoj ri Dios, riꞌ e kebꞌutoꞌ konoje ri ketaw re y jelaꞌ kekꞌiy ri tinamit re ri Cristo.
Chinuwach riꞌin utz we ta kayaꞌiꞌ che onoje alaq ri kachꞌaꞌt alaq pa jujun chik chꞌaꞌtem na majom ta alaq, pero ri lik utz e we ta kayaꞌiꞌ che alaq kaqꞌalajisaj alaq runaꞌoj ri Dios pa ri chꞌaꞌtem alaq. Ma waꞌ más kꞌo kutiqoj che riglesia chwa ri xa kꞌo kabꞌiꞌx pa juna chik chꞌaꞌtem na kamajtaj ta usukꞌ. Yey waꞌ xew kꞌo kutiqoj che riglesia we kꞌo junoq kuqꞌalajisaj saꞌ keꞌelawi ri xbꞌiꞌxik, y kubꞌiꞌij kꞌu waꞌ pa kichꞌaꞌtem ri ketaw re.
Ma we e laꞌ kinopon ukꞌ alaq hermanos y xew kinchꞌaꞌt chiwach alaq pa juna chꞌaꞌtem na kamaj ta alaq usukꞌ, ¿saꞌ kutiqoj riꞌ che alaq? Na jintaj. Noꞌj we pa ri chꞌaꞌtem alaq kantzijoj rukꞌutum ri Dios chwe, kantzijoj ri wetaꞌam puwi ri Qꞌijsaq, kantzijoj ruqꞌalajisam ri Dios chwe o juna kꞌutunik, ronoje taq kꞌu riꞌ waꞌ lik kꞌo kutiqoj che alaq.
Ri jujun chik chꞌaꞌtem na kamajtaj ta usukꞌ kanjunimaj rukꞌ jun suꞌ o jun arpa; ma we na qꞌalaj ta uchꞌawisaxik kaꞌanik, na kamajtaj ta usukꞌ ri kachꞌawisaxik. Y jelaꞌ ri trompeta kachꞌawisaxik chaꞌ ri soldados kakiyijbꞌaꞌ kibꞌ re kebꞌek pa chꞌaꞌoj. Pero we na qꞌalaj ta uchꞌawisaxik kaꞌanik, ri soldados na kebꞌok ta il che. Jekꞌulaꞌ ralaq, we ri chꞌaꞌtem kel lo pachiꞌ alaq na qꞌalaj taj, ¿suꞌanik kꞌu riꞌ kamajtaj usukꞌ ri kabꞌiꞌij alaq? Ma riꞌ xa e pachaꞌ kasach ri chꞌaꞌtem alaq pa ri tew.
10 Qatzij wi ukꞌiyal chꞌaꞌtem kꞌo che ruwachulew y chujujunal lik kꞌo taq ubꞌe chikiwach ri kechꞌaꞌtibꞌen re. 11 Yey we riꞌin na wetaꞌam taj saꞌ keꞌelawi ruchꞌaꞌtem junoq, riꞌ pachaꞌ in juna aj naj chwach ri kachꞌaꞌtik yey rire e juna aj naj chinuwach riꞌin.
12 Ekꞌu ralaq, ruma ri lik karayij alaq ri kuya ri Dios re ꞌanabꞌal ruchak, e lik tzukuj alaq uꞌanik ri lik kebꞌutoꞌ riglesia chaꞌ ketikiꞌ jusukꞌ chwach ri Dios. 13 Ruma kꞌu laꞌ we kꞌo junoq yaꞌtal che ruma ri Ruxlabꞌixel ri Dios kachꞌaꞌt pa juna chꞌaꞌtem na umajom taj, chutzꞌonoj kꞌu riꞌ che ri Dios chaꞌ kayaꞌtaj che kuqꞌalajisaj waꞌ pa kichꞌaꞌtem ri ketaw re. 14 Ma we e laꞌ riꞌin kanꞌan orar pa juna chꞌaꞌtem na kanmaj ta usukꞌ, e ri wanimaꞌ ri kachꞌaꞌt rukꞌ ri Dios, pero ri nunaꞌoj na jinta kꞌo karesaj che.
15 ¿Saꞌ kꞌu riꞌ ri kanꞌano? Kꞌo jutaq laj kanꞌan orar y kambꞌixoj rubꞌiꞌ ri Dios pa juna chꞌaꞌtem na kanmaj ta usukꞌ tobꞌ xew ri wanimaꞌ kachꞌaꞌt rukꞌ Rire, pero también rukꞌ ri nunaꞌoj kanꞌan orar y kambꞌixoj rubꞌiꞌ ri Dios pa ri chꞌaꞌtem kanmaj usukꞌ. 16 Ma we rilal kayak la uqꞌij ri Dios pa juna chik chꞌaꞌtem na kamajtaj ta usukꞌ yey waꞌ uyaꞌom ri Ruxlabꞌixel ri Dios cheꞌla, y ri ketaw re na kakiriq ta kꞌu ri chꞌaꞌtem yaꞌtal cheꞌla, ¿saꞌ kꞌu uꞌanik riꞌ kakibꞌiꞌij rike «Amén» che ri tioxibꞌal xꞌan la we na xkimaj ta usukꞌ ri xbꞌiꞌij la? 17 Y tobꞌ lik chom ri tioxibꞌal kaꞌan rilal, waꞌ na jinta kutiqoj che ri kibꞌinik kisilabꞌik ri ketaw re.
18 Kantioxij che ri Dios ma riꞌin más yaꞌtal chwe chiwach ralaq kinchꞌaꞌt pa jujun chik chꞌaꞌtem na numajom taj. 19 Na rukꞌ ta kꞌu riꞌ, echiriꞌ kimolom kibꞌ ri tinamit re ri Cristo, más kuaj kambꞌiꞌij tobꞌ kebꞌ oxibꞌ chꞌaꞌtem lik kamajtaj usukꞌ chaꞌ jelaꞌ kꞌo kakimaj ri jujun chik che, chwa ri kanwererej lajuj mil chi chꞌaꞌtem pa juna chꞌaꞌtem na qꞌalaj taj.
20 Hermanos, ri naꞌoj alaq chuꞌana pachaꞌ ri kinaꞌoj ri e nimaꞌq chik. Maꞌan e alaq pachaꞌ alaq akꞌalabꞌ puwi ri kachꞌobꞌ alaq, tobꞌ utz we e kaꞌan alaq pachaꞌ akꞌalabꞌ chwach ri mak, ma rakꞌalabꞌ kꞌamajaꞌ kaketaꞌmaj waꞌ. 21 Ma chupa Rutzij Upixabꞌ ri Dios tzꞌibꞌital kanoq:
Pa taq chꞌaꞌtem junwi y kuma taq tikawex e aj naj
kinchꞌaꞌt kukꞌ wa tinamit.* Ri Dios xebꞌutaq e aj naj chaꞌ ketaqan pakiwi rutinamit yey wa e aj naj xechꞌaꞌt kukꞌ pa jun chꞌaꞌtem na kakimaj ta usukꞌ rike.
Yey tobꞌ kꞌu jewaꞌ kanꞌano,
na kakikoj ta nutzij* Dt. 28:47-49 Is. 28:11-12
kacha ri Dios Qajawxel.
22 Echiriꞌ junoq kachꞌaꞌt pa juna chꞌaꞌtem na kamajtaj ta usukꞌ, waꞌ e jun kꞌutubꞌal chike ri na kikojom ta rubꞌiꞌ ri Cristo; noꞌj na je ta laꞌ kukꞌ ri kikojom chi rubꞌiꞌ. Ekꞌu ri qꞌalajisanik re runaꞌoj ri Dios, na e ta ke ri na kikojom ta rubꞌiꞌ ri Cristo, ma e ke ri kikojom chi rubꞌiꞌ.
23 Ma we e laꞌ kimolom kibꞌ ri tinamit re ri Cristo y konoje kꞌut kechꞌaꞌt pa taq chꞌaꞌtem na kamajtaj ta usukꞌ, yey kok kꞌu bꞌi junoq kꞌamajaꞌ kumaj usukꞌ saꞌ waꞌ o junoq kꞌamajaꞌ kukoj rubꞌiꞌ ri Cristo, ¿saꞌ kꞌu ri kuchꞌobꞌ che waꞌ? ¿Na kubꞌiꞌij ta nawi chꞌuꞌjerinaq alaq? 24 Noꞌj we kok bꞌi junoq kꞌamajaꞌ kukoj rubꞌiꞌ ri Cristo o kꞌamajaꞌ kumaj usukꞌ saꞌ waꞌ yey kuto katajin alaq che ubꞌiꞌxikil saꞌ ri uqꞌalajisam ri Dios che alaq; rukꞌ kꞌu ronoje riꞌ ri kabꞌiꞌij alaq, kunaꞌ ribꞌ rire aj mak chwach ri Dios. 25 Kaqꞌalajin kꞌu riꞌ saꞌ ri kꞌo pa ranimaꞌ y jelaꞌ kaqaj umejelem, kuloqꞌnimaj uqꞌij ri Dios y kubꞌiꞌij paqatzij wi kꞌo ri Dios chixoꞌlibꞌal alaq.
Echiriꞌ kaqamol qibꞌ, qaꞌana ronoje chucholaꞌj
26 ¿Saꞌ kꞌu riꞌ rusukꞌ kaꞌan alaq hermanos echiriꞌ kamol ibꞌ alaq? Utz we e kꞌo ri kakibꞌixoj rubꞌiꞌ ri Dios, e kꞌo ri kakiya kꞌutunik, e kꞌo ri keqꞌalajisan juna tzij re ri Dios. Utz we e kꞌo ri kechꞌaꞌt pa juna chik chꞌaꞌtem na kimajom taj yey e kꞌo ri keqꞌalajisan re wa chꞌaꞌtem. ꞌAna kꞌu alaq ronoje waꞌ re ukꞌiyibꞌal ri kibꞌinik kisilabꞌik rutinamit ri Dios.
27 Y echiriꞌ molom ibꞌ alaq, utz we xa e kaꞌibꞌ o e oxibꞌoq kechꞌaꞌt pa chꞌaꞌtem na kamajtaj ta usukꞌ; y kiꞌana kꞌu waꞌ pa jujun, na xa ta jumul. Yey kajawaxik kꞌo junoq kaqꞌalajisan re waꞌ. 28 Pero we chikixoꞌl ri hermanos kimolom kibꞌ chiriꞌ na jinta junoq kariqow uqꞌalajisaxik ri kakibꞌiꞌij, mechꞌaw kꞌu riꞌ; xew chechꞌaꞌta rukꞌ ri Dios pa kanimaꞌ. 29 Jekꞌulaꞌ, utz we xa e kaꞌibꞌ o e oxibꞌoq kakitzijoj saꞌ ri uqꞌalajisam ri Dios chike. Yey ri ketaw re lik kichꞌobꞌo chi utz, we waꞌ e utzij ri Dios che rutinamit.
30 We kꞌo junoq katzijonik yey kꞌo kuqꞌalajisaj ri Dios che junoq chik tzꞌulik, ri katzijonik e chutanabꞌaꞌ ri kubꞌiꞌij; tekꞌuchiriꞌ, ri jun chik utz kujeq ubꞌiꞌxikil ri tzij xuqꞌalajisaj ri Dios che. 31 Ma e taq ri yaꞌtal juna tzij re ri Dios chike, utz we chikijujunal kakiqꞌalajisaj waꞌ, pero kiꞌana kꞌu waꞌ pa jujun, na xa ta jumul, chaꞌ jelaꞌ konoje kꞌo kakimaj che y kepixabꞌax ruma.
32 E junoq yaꞌtal che kuqꞌalajisaj juna tzij re ri Dios, kꞌo puqꞌabꞌ ruchapabꞌexik waꞌ. Ri keꞌelawi e chirajawaxik kuchꞌobꞌ raqan chi utz jampalaꞌ y suꞌanik kuqꞌalajisaj ri tzij uyaꞌom ri Dios che. 33 Ma ri Dios e Dios re utzil chomal, na re ta sachibꞌal naꞌoj.
Ekꞌu taqej alaq ri kakiꞌan taq rutinamit ri Dios echiriꞌ kakimol kibꞌ. 34 Rixoqibꞌ mechꞌaꞌtik echiriꞌ kamol ibꞌ alaq pa rubꞌiꞌ ri Cristo. Ma ri taqal chike rike e kakikoj tzij jelaꞌ pachaꞌ ri kubꞌiꞌij Rutzij Upixabꞌ ri Dios. 35 Rixoqibꞌ we kꞌo kakaj kaketaꞌmaj, kitzꞌonoj kꞌu riꞌ chike ri kachijil chikocho, ma na ubꞌe taj kechꞌaꞌt piglesia. Waꞌ na e ta keꞌelawi rixoq na utz taj kachꞌaꞌt kꞌenoq piglesia. Ma ri Pablo kubꞌiꞌij utz we rixoq kuꞌan qꞌalajisanik o kuꞌan orar echiriꞌ kimolom kibꞌ rutinamit ri Dios. 1 Co. 11:5
36 Kꞌuna chikꞌuꞌx alaq, na ukꞌ ta alaq petinaq wi ri Tzij Pixabꞌ re ri Dios y na xew ta ukꞌ ralaq oponinaq wi. 37 We kꞌo kꞌu junoq che alaq kuchꞌobꞌo kuriq uqꞌalajisaxik Rutzij ri Dios o lik kumaj usukꞌ runaꞌoj ri Dios, riꞌ chirajawaxik karetaꞌmaj waꞌ: Ri kantzꞌibꞌaj che alaq, ronoje e Utzij Upixabꞌ lo ri Qanimajawal. 38 Pero we kꞌo junoq na karaj ta kukoj wa nubꞌiꞌim loq, rukꞌ kꞌu rire kꞌo wi. 39 E uwariꞌche hermanos, yaꞌa ibꞌ alaq che uqꞌalajisaxik ri tzij yaꞌom che alaq ruma ri Dios. Yey meqꞌatej alaq ri kechꞌaꞌt pa jujun chik chꞌaꞌtem yaꞌtal chike ruma ri Ruxlabꞌixel ri Dios. 40 Xew kꞌu lik ꞌana alaq ronoje chi utz y chucholaꞌj e chirij ri taqalik kaꞌanik.

*14:21 Ri Dios xebꞌutaq e aj naj chaꞌ ketaqan pakiwi rutinamit yey wa e aj naj xechꞌaꞌt kukꞌ pa jun chꞌaꞌtem na kakimaj ta usukꞌ rike.

*14:21 Dt. 28:47-49

14:32 Ri keꞌelawi e chirajawaxik kuchꞌobꞌ raqan chi utz jampalaꞌ y suꞌanik kuqꞌalajisaj ri tzij uyaꞌom ri Dios che.

14:35 Waꞌ na e ta keꞌelawi rixoq na utz taj kachꞌaꞌt kꞌenoq piglesia. Ma ri Pablo kubꞌiꞌij utz we rixoq kuꞌan qꞌalajisanik o kuꞌan orar echiriꞌ kimolom kibꞌ rutinamit ri Dios. 1 Co. 11:5