1 Qetaꞌam kꞌut ri qacuerpo wara che ruwachulew e jelaꞌ pachaꞌ juna rancho na jinta ukowil oj jeqel chupa. Yey echiriꞌ kasach uwach ri qacuerpo, kayaꞌtaj jun qocho chilaꞌ chikaj na jinta utaqexik rukowil, ma na uqꞌabꞌ ta achi ꞌanayom re, e ri Dios ꞌanayom re. 2 Y ruma laꞌ koj-jilow woꞌora, ma lik kaqaj chik kojqꞌax chupa ri qocho chilaꞌ chikaj. 3 Ma echiriꞌ kojqꞌax chupa waꞌ, lik kojchꞌuqutaj chi utz.*“Kojchꞌuqutaj chi utz”: Pa ri chꞌaꞌtem griego kubꞌiꞌij “na oj ta chꞌanalik”. 4 Ruma kꞌu laꞌ, ri oj jeqel chupa ri “qarancho” wara che ruwachulew, koj-jilowik y kabꞌison qakꞌuꞌx; ma na kaqaj taj kaqaya kan ri qacuerpo e laꞌ xa jelaꞌ; ri kaqaj e kaqakꞌul ri qacuerpo chilaꞌ chikaj y jelaꞌ kajalkꞌatix uwach ri na kakowin taj rukꞌ ri na kakam taj. 5 Yey waꞌ e uchꞌobꞌom chi lo ri Dios chiqe; y e Rire yaꞌyom ri Ruxlabꞌixel chiqe, kꞌutubꞌal re kuya na janipa ri ubꞌiꞌtisim. 6 Ruma kꞌu laꞌ, lik kubꞌul qakꞌuꞌx, tobꞌ qetaꞌam echiriꞌ kꞌa oj jeqel pa ri qacuerpo wara che ruwachulew, waꞌ e keꞌelawi kꞌamajaꞌ kojeꞌjeqela pa ri qocho chilaꞌ chikaj rukꞌ ri Qanimajawal Jesucristo. 7 Ronoje kꞌu ri kaqaꞌano e ruma ri kubꞌulibꞌal qakꞌuꞌx rukꞌ Rire, na e ta ruma ri kaqil rukꞌ ri qawach. 8 Lik kubꞌul kꞌu qakꞌuꞌx rukꞌ Rire. Yey e ne lik kaqaj chik kaqaya kan wa qacuerpo chaꞌ jelaꞌ kojeꞌjeqela chilaꞌ rukꞌ ri Qanimajawal.

9 Ruma kꞌu laꞌ, e kaqaya qibꞌ che uꞌanik janipa ri karaj ri Qanimajawal, chaꞌ jelaꞌ kakiꞌkot Rire qukꞌ tobꞌ kꞌa oj kꞌo wara che ruwachulew o echiriꞌ oj kꞌo chi rukꞌ chilaꞌ chikaj. 10 Ma kopon na ri qꞌij echiriꞌ qonoje kojeꞌtakꞌala chwach ri qꞌatbꞌal tzij re ri Cristo, pa kaqꞌalajin wi we ri qaꞌanom wara che ruwachulew kꞌo uchak o na jinta uchak, y kayaꞌtaj kꞌu chiqe chiqajujunal ri tojbꞌal re ri qaꞌanom.

11 Lik qetaꞌam kꞌut, chirajawaxik kꞌo qaxiꞌin ibꞌ chwach ri Qajawal; ruma kꞌu riꞌ, keqapixabꞌaj taq ri tikawex chaꞌ kakiya kibꞌ puqꞌabꞌ ri Dios. Chwach ri Dios lik qꞌalaj saꞌ ri kꞌo pa qanimaꞌ; ekꞌu kaqaj riꞌoj e kaqꞌalajin waꞌ chiwach ralaq. 12 Na kaqabꞌiꞌij ta waꞌ che alaq re yakbꞌal qaqꞌij. Ma e kaqaj kaqatoꞌ alaq che retaꞌmaxik saꞌ ri kaqaꞌano chaꞌ jelaꞌ lik kakiꞌkot alaq chiqe. Jekꞌulaꞌ kꞌo kakꞌulubꞌej wi alaq uwach chike ri xew kebꞌok il che taq ri kilitajik pero na kebꞌok ta il che ri kꞌo pa ranimaꞌ junoq. 13 Ma we pachaꞌ chi oj chꞌuꞌjerinaq, waꞌ e ruma lik qayaꞌom qibꞌ che ruchak ri Dios. Yey we lik kaqachꞌobꞌ chi utz saꞌ ri kaqaꞌano, waꞌ e toꞌbꞌal e alaq. 14 Ri rutzil ukꞌuꞌx ri Cristo kataqan pa qanimaꞌ ma lik qetaꞌam echiriꞌ xkam Rire pakikꞌaxel konoje, e keꞌeloq xekam konoje rukꞌ. 15 Xkam kꞌu ri Cristo pakikꞌaxel konoje ri tikawex chaꞌ e janipa ri e kꞌas ruma rukamik Rire na kakiꞌan ta chi saꞌ ri kakaj rike, ma e kakiꞌan janipa ri karaj ri Jun ri pakikꞌaxel rike xkamik y xkꞌastaj lo chikixoꞌl ri ekaminaq.

16 Woꞌora ri kaqachꞌobꞌ puwi junoq, na e ta ruma ri kaqil che, pachaꞌ ri kakiꞌan ri tikawex re ruwachulew. Tobꞌ ne ojertan jelaꞌ xqachꞌobꞌ lo riꞌoj puwi ri Cristo, pero woꞌora na kaqaꞌan ta chi waꞌ ma xqetaꞌmaj uwach chi utz. 17 Jekꞌulaꞌ we junoq uyaꞌom ribꞌ puqꞌabꞌ ri Cristo, e jun kꞌakꞌ tikawex. Junwi karil ronoje, ma ri re ojertan xkanaj kanoq y ronoje uꞌanom kꞌakꞌ rukꞌ. 18 Ronoje waꞌ rukꞌ ri Dios petinaq wi, ma xojuya chi utzil chomal chwach Rire ruma ri xuꞌan ri Cristo y xuya kꞌu chiqe keqatoꞌ ri tikawex chaꞌ kekꞌojiꞌ chi utzil chomal chwach. 19 Waꞌ e keꞌelawi ruma rukamik ri Cristo, ri Dios kuya chike ri tikawex kekꞌojiꞌ chi utzil chomal chwach Rire ma kukuy ri kimak. Y xuya kꞌu chiqe riꞌoj rubꞌiꞌxikil chikiwach ri tikawex wa tzij re ri utzil chomal. 20 E uwariꞌche oj taqom lo ruma ri Cristo. Ma quma riꞌoj ri Dios lik kelaj chike ri tikawex chaꞌ keqibꞌ rukꞌ. Kojelaj kꞌu pa rubꞌiꞌ ri Cristo, jewaꞌ kaqabꞌiꞌij: «Yijbꞌaꞌ ibꞌ alaq chwach ri Dios chaꞌ kakꞌojiꞌ alaq chi utzil chomal chwach.» 21 Tobꞌ ri Cristo na jinta kꞌana mak xuꞌano, na rukꞌ ta kꞌu riꞌ, quma riꞌoj ri Dios xuꞌan che xreqaj ronoje ri qamak chaꞌ jelaꞌ kojuꞌan jusukꞌ chwach ri Dios ruma xa oj jun rukꞌ Rire.