1 Chikixoꞌl ri tinamit e aj Israel xekꞌojiꞌ qꞌalajisanelabꞌ xa e sokosoꞌnel; jekꞌulaꞌ chixoꞌlibꞌal ralaq kekꞌojiꞌ e aj kꞌutunel xa e sokosoꞌnel. Waꞌ xa xeꞌlaqꞌay kakikoj pa kijolom ri hermanos kꞌutunik na usukꞌ taj, xa re yojobꞌal ri kibꞌinik kisilabꞌik. Yey e kuꞌana ne ri kakibꞌiꞌij na kakikoj ta chi rubꞌiꞌ ri Qanimajawal, ri xkam kuma rike re kebꞌukolobꞌej. Y ruma kꞌu wa na utz taj kakiꞌano, e kape tan ri qꞌatbꞌal tzij pakiwiꞌ. 2 Yey lik e kꞌi ri kakitaqej ri kibꞌinik wa aj kꞌutunel, ri kiyaꞌom kibꞌ che uꞌanik taq ri kirayibꞌal kꞌixbꞌal uwach. Ruma kꞌu riꞌ waꞌ, taq ri winaq kakijeq kechꞌaꞌt chirij ri bꞌe re ri Qꞌijsaq. 3 Wa aj kꞌutunel e keꞌek kikꞌuꞌx rukꞌ ri puaq; kakesaj kꞌu ukꞌiyal puaq che alaq rukꞌ sokosoꞌnik. Ruma kꞌu taq wa kakiꞌano, ri qꞌatbꞌal tzij xex chi katewun pakiwiꞌ, yey ri sachibꞌal kiwach xa naqaj chi kꞌo wuloq.

4 Ri Dios na xukuy tane kimak ri ángeles xemakunik, ma xebꞌukꞌaq bꞌi pa xibꞌalbꞌaꞌ, xebꞌutzꞌapij pa utum qꞌequꞌm chaꞌ kekꞌojiꞌ na chilaꞌ kꞌa echiriꞌ kaꞌan ri qꞌatbꞌal tzij pakiwiꞌ.*Jud. 6 5 Yey na xukuy tane kimak ri winaq ojertan echiriꞌ xutaq lo runimal jabꞌ pakiwiꞌ. Xew xebꞌukolobꞌej wajxaqibꞌ tikawex; jun chike e ri Noé, ri xtzijon chwi ri jusukꞌ bꞌinik chwach ri Dios.*Gn. 6:9-10; 7:7 6 Jenelaꞌ xuqꞌat tzij pakiwi ri kebꞌ tinamit Sodoma y Gomorra echiriꞌ xusach kiwach rukꞌ aqꞌ, xuꞌan chaaj chike. Xuꞌan kꞌu waꞌ kꞌutubꞌal re saꞌ ri kakikꞌulumaj ri e aj makibꞌ. 7 Pero xukolobꞌej ri Lot, jun achi lik jusukꞌ rubꞌinik usilabꞌik, ri lik okinaq chukꞌuꞌx ri itzel kibꞌinik kisilabꞌik taq ri winaq pa jeqel wi.*Gn. 19:29 8 Yey ruma kꞌu jusukꞌ rubꞌinik rire, ronoje qꞌij lik kubꞌisoj ukꞌuꞌx ri na ubꞌe taj kuto y karil chike waꞌ wa winaq.

9 Rukꞌ taq waꞌ, kaqilo ri Dios lik retaꞌam suꞌanik kebꞌukolobꞌej janipa ri kiyaꞌom kibꞌ puqꞌabꞌ echiriꞌ kakꞌam kipa; yey ekꞌu janipa ri na e ta jusukꞌ, riꞌ e kꞌo chi chuxeꞌ ri qꞌatbꞌal tzij re ri Dios, y waꞌ kape na pakiwiꞌ echiriꞌ kopon ruqꞌijol. 10 Yey wa qꞌatbꞌal tzij e lik taqal chike ri kitaqem taq ri rayibꞌal re ri kitiꞌjil, ri bꞌenaq kikꞌuꞌx che uꞌanik ri chꞌulilaj mak, ri na kakiya ta kibꞌ kataqan junoq pakiwiꞌ, ri na kekꞌix ta che uꞌanik janipa ri kakaj rike, ri e titzꞌitaq, ri na kakixiꞌij tane kibꞌ kechꞌaꞌt rukꞌ itzel chꞌaꞌtem chikij taq ri kꞌo kiwach y kꞌo kichuqꞌabꞌ pakiwiꞌ. 11 Yey ne ri ángeles, tobꞌ lik kꞌo kichuqꞌabꞌ y lik kꞌo kiwach yaꞌtalik, na kakikꞌaq tane bꞌi kiqꞌij ri jujun chik kꞌo kiwach echiriꞌ kakikoj kimak chwach ri Qanimajawal. 12 Noꞌj waꞌ wa aj kꞌutunel e sokosoꞌnel, e kakichꞌaꞌtibꞌej ri na kakimaj tane usukꞌ. Ruma kꞌu riꞌ, kaꞌan chike pachaꞌ kaꞌan chike ri awaj na jinta kinaꞌoj, ri kebꞌalaxik xa re kechapik y re kekamisaxik. 13 Kaꞌan kꞌu kꞌax chike, ukꞌaxel ri kꞌax kiꞌanom rike chike jujun chik. Rike lik bꞌenaq kikꞌuꞌx che uꞌanik ri kirayibꞌal lik kꞌixbꞌal uwach yey kakiꞌan ne waꞌ tobꞌ paqꞌij. Echiriꞌ rike kakimol kibꞌ ukꞌ alaq re kewaꞌ ukꞌ alaq, e jelaꞌ pachaꞌ ri chꞌul kuchꞌulaj juna kꞌul, ma lik kꞌixbꞌal uwach ri kakiꞌan chixoꞌl alaq.

14 Waꞌ waꞌchijabꞌ echiriꞌ kakil juna ixoq, xew kakichꞌobꞌ ri kemakun rukꞌ, na kikꞌow ta kikꞌuꞌx che kemakunik, kekimin pa mak ri na jinta kikowil chwach ri Dios y kiyaꞌom kikꞌuꞌx che urayixik ronoje ri kakilo. Ekꞌu ri Dios uqꞌatom chi tzij pakiwi rike 15 ma xkiya kan ri saqil bꞌe y xkimaj bꞌi jun bꞌe lik na e taj. Kiꞌanom kꞌu ke pachaꞌ ri xuꞌan ri Balaam,*Nm. 22:5 rukꞌajol ri Beor. Waꞌ e lik xcha ranimaꞌ che uchꞌakik puaq ruma ri na jusukꞌ taj xuꞌano. 16 Ruma kꞌu ri mak katajin che uꞌanik, xchꞌaꞌbꞌex upa, yey ri xchꞌaꞌbꞌen upa ¡e jun awaj aj eqaꞌn! Tobꞌ rawaj na kechꞌaw taj, wa jun buru rukꞌ uchꞌawibꞌal achi xchꞌaw che y jelaꞌ xuqꞌatej ruchꞌuꞌjilal ri jun aj qꞌij.*Nm. 22:28-30

17 Waꞌ wa aj kꞌutunel pachaꞌ e akꞌal na jinta chi yaꞌ chupa, pachaꞌ e sutzꞌ xa kekꞌam bꞌi ruma runimal tew. Chike kꞌu konoje riꞌ waꞌ, yijbꞌital chi ri lik qꞌequꞌmalil aqꞌabꞌ chaꞌ na jinta utaqexik kebꞌeꞌkꞌola chupa. 18 Rukꞌ ri kichꞌaꞌtem lik kakiꞌan nim che kibꞌ tobꞌ na jinta ne keꞌelawi ri kakibꞌiꞌij. Yey rike kakibꞌiꞌij utz we e kakiꞌan saꞌ ri kurayij ri kitiꞌjil y kakiya kꞌu kibꞌ che uꞌanik waꞌ. Jekꞌulaꞌ e kekimin tanchi pa mak ri kꞌakꞌ ne ebꞌelinaq lo chikixoꞌl taq ri kakiꞌan ri na utz taj. 19 Kakibꞌiꞌij e puqꞌabꞌ jun kꞌo wi kuꞌan saꞌ ri karaj kuꞌano; yey rike puqꞌabꞌ ne ri mak e kꞌo wi. Ma echiriꞌ junoq na kuchꞌij ta uchuqꞌabꞌ jun chik, riꞌ e kakꞌojiꞌ puqꞌabꞌ ri kasokow re; jekꞌulaꞌ kukꞌulumaj ri jun na kuchꞌij ta uchuqꞌabꞌ ri mak. 20 Ekꞌu ri ebꞌelinaq chi lo chupa ri chꞌulilaj mak re ruwachulew ruma xketaꞌmaj uwach ri Qanimajawal y Qakolobꞌenel Jesucristo, we ketzelej tanchi chupa wa mak y kesokotaj ruma, riꞌ más kꞌax ri kakikꞌisbꞌej wi chwa echiriꞌ kꞌamajaꞌ kaketaꞌmaj uwach ri Qanimajawal. 21 Más utz kꞌu riꞌ chike tamaji xketaꞌmaj ri bꞌe re ri jusukꞌ bꞌinik chwa ri kakesaj kibꞌ che ri Santowilaj Tzij Pixabꞌ re ri Dios, ri xyaꞌtaj chike. 22 Ekꞌu ri kiꞌanom rike, paqatzij wi e pachaꞌ ri jun tzij jewaꞌ kubꞌiꞌij: