7
Ri e aj wach re ri tinamit kakita uchiꞌ ri Esteban
1 Ri kajawal raj chakunel pa Rocho Dios xutzꞌonoj che ri Esteban we qatzij xubꞌiꞌij waꞌ.
2 Ekꞌu rire xubꞌiꞌij:
«Alaq achijabꞌ y alaq nimaq winaq, chinta na pe alaq. Ri Dios, ri Jun lik kꞌo unimal chomalil rukꞌ, xuqꞌalajisaj ribꞌ chwach ri qaqaw Abraham echiriꞌ rire kꞌo pa ri luwar re Mesopotamia, waꞌ e echiriꞌ kꞌamajaꞌ keꞌjeqela pa ri tinamit Harán. 3 Xubꞌiꞌij ri Dios che: “Chatelubꞌi chupa ratinamit y chikixoꞌl rawatz-achaqꞌ; y jat kꞌu chwach rulew pa kankꞌut wi riꞌin chawe”*Gn. 12:1 xchaꞌ. 4 Ekꞌuchiriꞌ, xel bꞌi ri Abraham chwach rulew ke raj Caldea y xjeqiꞌ pa ri tinamit Harán. Chwi kꞌu rukamik ruqaw, xtaq lo ruma ri Dios chupa wa luwar pa jeqel wi alaq woꞌora.
5 »Pero ri Dios na xuya tane che ri Abraham kuꞌan rajaw waꞌ wuꞌlew, tobꞌ tane xa pa kuya wi juna raqan. Noꞌj xubꞌiꞌtisij kꞌu che tobꞌ ne rire kaminaq chik, waꞌ wuꞌlew kuꞌana na re y ke ri ralkꞌoꞌal kanoq; yey echiriꞌ xbꞌiꞌx waꞌ che ri Abraham, kꞌamajaꞌ ne kꞌo juna ralkꞌoꞌal.*Gn. 17:8
6 Ekꞌu ri Dios xubꞌiꞌij che ri Abraham:
Taq rawalkꞌoꞌal kanoq kebꞌeꞌjeqela na pa jun ulew na kulew taj.
Y chiriꞌ kꞌu riꞌ kaꞌaniꞌ nibꞌaꞌibꞌ chike y keyaꞌiꞌ pa kꞌaxlaj chak
kajibꞌ ciento junabꞌ kuma ri tikawex re ri tinamit pa kekꞌojiꞌ wi.
7 Pero In kinqꞌataw tzij pakiwi wa tinamit, ri kakiya pa kꞌaxlaj chak ri nutinamit.
Tekꞌuchiriꞌ, ri nutinamit kebꞌel loq y ketzelej loq Gn. 15:13-14
y kinkiloqꞌnimaj chupa wa luwar at kꞌo wi Éx. 3:12
xchaꞌ.
8 »Ri Dios xuꞌan jun tzij rukꞌ ri Abraham, yey ri kꞌutubꞌal re waꞌ wa tzij e ri retalil re circuncisión. E uwariꞌche ri Abraham xukoj ri retalil re circuncisión che rukꞌajol Isaac echiriꞌ xukꞌis wajxaqibꞌ qꞌij ralaxik.*Gn. 21:3-4 Jekꞌulaꞌ xuꞌan ri Isaac che rukꞌajol Jacob. Y ri Jacob jelaꞌ xuꞌan chike ri kabꞌlajuj ukꞌajol, ri e qamam re ri qatinamit.*Pa ri chꞌaꞌtem hebreo kubꞌiꞌij “patriarcas”.
9 »Ekꞌu rike xok retzelal kꞌuꞌx pa kanimaꞌ chirij ri kichaqꞌ José. Ruma kꞌu riꞌ, xkikꞌayij bꞌi chaꞌ kakꞌam bꞌi Egipto.†Ri xebꞌanaw re waꞌ e ri lajuj e ratzixelabꞌ ri José. Gn. 37:11,28 Pero ri Dios kꞌo rukꞌ ri José*Gn. 39:2-3, 21 10 y xresaj kꞌu chupa ronoje taq ri kꞌaxkꞌobꞌik xikꞌow wi. Xuya unaꞌoj y xuꞌan che lik xukꞌul upuwach ri faraón, ri taqanel re Egipto. Ma ri faraón xuya che ri José kataqan puwi ri tinamit re Egipto y xuya puqꞌabꞌ rire ronoje rubꞌitaq re.*Gn. 41:37-41
11 »Xpe kꞌu jun unimal numik chupa taq ronoje ri luwar re Egipto y re Canaán. Ruma kꞌu waꞌ xpe unimal kꞌaxkꞌobꞌik pakiwi ri qatiꞌ-qamam ma na jinta kakitijo.*Gn. 41:54-57
12 »Echiriꞌ ri Jacob xunaꞌbꞌej chilaꞌ Egipto kꞌo katijik, xebꞌutaq bꞌi rukꞌajol chaꞌ keꞌkiloqꞌo trigo chilaꞌ. Waꞌ e ri nabꞌe bꞌenam xkiꞌan ri qamam chilaꞌ Egipto.*Gn. 42:1-3 13 Ekꞌu che rukalaj kibꞌenam, ri José xuqꞌalajisaj ribꞌ chikiwach ri ratzixelabꞌ. Jekꞌulaꞌ ri faraón xretaꞌmaj china taq ri e ratz-uchaqꞌ ri José.*Gn. 45:1-16
14 »Yey ri José xutaq ukꞌamik ruqaw Jacob y konoje ri e ratz-uchaqꞌ.*Gn. 45:9–47:12 Ri kajlibꞌal rike chi konoje e setenta y cinco. 15 Jekꞌulaꞌ xeꞌjeqela ri Jacob pa ri tinamit Egipto. Chilaꞌ kꞌu riꞌ xkam wi rire y chilaꞌ xekam wi ri qamam.*Gn. 49:33 16 Xkꞌam kꞌu bꞌi ri kibꞌaqil pa ri tinamit Siquem y xeyaꞌ pa ri muqubꞌal uloqꞌom kan ri Abraham rukꞌ ukꞌiyal puaq chike ri ralkꞌoꞌal kan ri Hamor, chilaꞌ Siquem.*Gn. 23:16-18; 50:13; Jos. 24:32
17 »Yey ekꞌuchiriꞌ katajin roponik ri qꞌij echiriꞌ ri Dios kuꞌana na rubꞌiꞌtisim che ri Abraham, taq ri ralkꞌoꞌal rire lik xekꞌiyar chilaꞌ Egipto. 18 Tekꞌuchiriꞌ, xyaktaj jun chik rey chiriꞌ Egipto; ekꞌu rire na xretaꞌmaj ta uwach ri José.‡Ri José kaminaq chik, yey wa jun chik taqanel na xretaꞌmaj ta ri toꞌbꞌal xuya ri José che ri tinamit re Egipto. Éx. 1:7-9 19 Waꞌ wa rey xebꞌusok ri qatinamit ojertan. Lik xebꞌuya ri qatiꞌ-qamam pa kꞌaxkꞌobꞌik, ma xtaqan che kekamisax ri kichꞌutiꞌq e alabꞌo chaꞌ jelaꞌ na kakꞌiyar ta kiwach ri qatinamit.*Éx. 1:10-11, 22
20 »Chupa taq kꞌu riꞌ laꞌ la qꞌij xalax ri Moisés y e jun chomilaj akꞌa chwach ri Dios. Ekꞌu rire oxibꞌ ikꞌ xchajix xa xeꞌlaqꞌay pa rocho ruqaw. 21 Pero echiriꞌ na utz ta chi kewax pa ja, xesax bꞌi§Ri ralko akꞌa Moisés xyaꞌ bꞌi chupa jun chakach puwi yaꞌ. Éx. 2:1-10 y xeꞌriqitaj lo ruma rumiꞌal ri faraón; y waꞌli xukꞌiyisaj y xuꞌan pachaꞌ ralabꞌ che. 22 Jekꞌulaꞌ, ri Moisés xtijox puwi ronoje ri naꞌoj ke ri aj Egipto, y xuꞌana jun achi lik kꞌo uchuqꞌabꞌ che janipa taq ri kubꞌiꞌij y kuꞌano.
23 »Echiriꞌ xukꞌis cuarenta junabꞌ, xalax pa ranimaꞌ keꞌbꞌina kukꞌ ri ratz-uchaqꞌ, ri e aj Israel.*Éx. 2:11-12 24 Y xril kꞌu riꞌ lik kaꞌan kꞌax che jun chike ruma jun aj Egipto. Xutoꞌ kꞌu uwiꞌ ri ratz-uchaqꞌ yey xukamisaj ri aj Egipto. 25 E xuchꞌobꞌ rire, taq ri ratz-uchaqꞌ kakimaj usukꞌ e ruma rire kebꞌeresaj bꞌi ri Dios pakiqꞌabꞌ raj Egipto; noꞌj rike na je ta laꞌ ri xkimaj usukꞌ.
26 »Chukaꞌm qꞌij kꞌut xebꞌuꞌriqa kaꞌibꞌ aj Israel kechꞌoꞌjin chikiwach y xraj kebꞌuya putzil chomal. Xubꞌiꞌij kꞌu chike: “Achijabꞌ, ralaq chaqꞌ ibꞌ alaq. ¿Suꞌchak kꞌu riꞌ kaꞌan kꞌax che ibꞌ alaq chiwach alaq?” xchaꞌ.
27 »Ekꞌuchiriꞌ, ri jun ri kuꞌan kꞌax che ri ratz-uchaqꞌ, xupaqchiꞌij bꞌi ri Moisés y xubꞌiꞌij che: “¿China kojoyom e la re taqanel y re aj qꞌatal tzij paqawi riꞌoj? 28 ¿Kaꞌaj kami la riꞌ kinkamisaj la riꞌin jelaꞌ pachaꞌ xꞌan la iwir echiriꞌ xkamisaj la ri aj Egipto?”*Éx. 2:11-15 xchaꞌ.
29 »Echiriꞌ xuta waꞌ wa chꞌaꞌtem, ri Moisés asu xanimaj bꞌi, xeꞌjeqela pa ri luwar re Madián, tobꞌ rire na aj ta chilaꞌ. Yey chilaꞌ xebꞌalax kaꞌibꞌ ukꞌajol.*Éx. 18:3-4
30 »Ikꞌowinaq chi kꞌu cuarenta junabꞌ kꞌo chilaꞌ echiriꞌ xwinaqir jun ángel chwach chupa rurepebꞌal aqꞌ kꞌo che jumokaj xulukej pa ri luwar katzꞌintzꞌotik, chunaqaj ri juyubꞌ Sinaí. 31 Echiriꞌ xril waꞌ ri Moisés, lik xkam ranimaꞌ che ri katajin ukꞌutik chwach. Yey echiriꞌ xqibꞌ che rilik chi utz, xuta ruqul ri Dios, jewaꞌ xubꞌiꞌij che: 32 “In ri Dios ke ramam ojertan, waꞌ e ri Abraham, ri Isaac y ri Jacob” xchaꞌ.
»Ekꞌu ri Moisés xujeq kabꞌirbꞌotik y ruma xiꞌin ibꞌ na xutzuꞌ ta chi ri jumokaj xulukej.
33 »Ekꞌu ri Dios xubꞌiꞌij che: “Chajolo raxajabꞌ che rawaqan ma wa luwar pa at kꞌo wi lik santo. 34 Paqatzij wi riꞌin wilom lik eyaꞌtal pa kꞌaxkꞌobꞌik ri nutinamit e kꞌo Egipto, yey nutom lik ketunanik. E uwariꞌche in petinaq re kebꞌeꞌnuwesaj loq. Ekꞌu woꞌora chatpetoq; ma katintaq bꞌi Egipto”*Éx. 3:1-10 xchaꞌ.
35 »Ekꞌu Moisés riꞌ waꞌ, ri xkꞌaq bꞌi uqꞌij echiriꞌ xbꞌiꞌx che: “¿China kojoyom e la re taqanel y re aj qꞌatal tzij paqawi riꞌoj?”*Éx. 2:14 Na rukꞌ ta kꞌu riꞌ, e ri Moisés ri xtaq bꞌi ruma ri Dios re kuꞌana kitaqanel rutinamit y re kebꞌeresaj ri tinamit pakiqꞌabꞌ raj Egipto. Xtaq kꞌu che kuꞌan waꞌ ruma ri ángel, ri xwinaqir chwach pa ri jumokaj xulukej. 36 E Moisés riꞌ waꞌ, ri xebꞌeresaj lo rutinamit ri Dios Egipto y lik xuꞌan milagros y taq kꞌutubꞌal re ruchuqꞌabꞌ ri Dios pa ri tinamit Egipto, chupa ri Mar Rojo y chupa ri cuarenta junabꞌ xebꞌin pa ri luwar katzꞌintzꞌotik.*Éx. 7:3; 14:21; Nm. 14:33
37 »Ekꞌu Moisés riꞌ waꞌ, ri xbꞌiꞌn chike raj Israel:
E ri Dios Qajawxel kuyak na lo chikixoꞌl ri qatinamit Israel
jun Qꞌalajisanel jelaꞌ pachaꞌ riꞌin.
Ekꞌu chita janipa ri kubꞌiꞌij Rire chiwe Dt. 18:15
xchaꞌ.
38 »E Moisés riꞌ waꞌ, ri xkꞌojiꞌ chikiwach ri tinamit echiriꞌ kimolom kibꞌ pa ri luwar katzꞌintzꞌotik, y e xesan uchiꞌ ri ángel chikiwa ri qatiꞌ-qamam echiriꞌ xchꞌaꞌt rukꞌ chwi ri juyubꞌ Sinaí. Yey e rire ri xkꞌuluw taq ri chꞌaꞌtem re kꞌaslemal chaꞌ kuqꞌatisaj lo chiqawach riꞌoj.
39 »Pero ri qatiꞌ-qamam na xkaj taj kakikoj utzij; ri xkiꞌano e xkikꞌaq bꞌi uqꞌij y e xchꞌaw kikꞌuꞌx che ri ketzelej tanchi Egipto. 40 Yey xkibꞌiꞌij ne che ri Aarón: “Cheꞌana la qatiox chaꞌ kenabꞌej bꞌi chiqawach; ma wa Moisés, ri xesan lo qeꞌoj chwach rulew re Egipto, na qetaꞌam taj saꞌ ri xukꞌulumaj.”*Éx. 32:1, 23 41 Ekꞌuchiriꞌ, xkiꞌan jun tiox ukꞌaxwach toro. Xekikamisaj kꞌu awaj re kiqasaꞌn chwach wa tiox y xkiꞌan nimaqꞌij chupa rubꞌiꞌ ri tiox, ri xa xkiꞌan rukꞌ ri kiqꞌabꞌ.*Éx. 32:4-6
42 »Ekꞌu ri Dios xebꞌuya kan che uloqꞌnimaxik kiqꞌij ronoje ri kꞌo che ruwa kaj. Xkiꞌan kꞌut jelaꞌ pachaꞌ ri ubꞌiꞌim ri Dios chupa ri tzꞌibꞌital kan kuma ri qꞌalajisanelabꞌ:
Riꞌix ix aj Israel, echiriꞌ xebꞌikamisaj chikop re qasaꞌn chupa ri cuarenta junabꞌ xixbꞌin pa ri luwar katzꞌintzꞌotik, ¿xiloqꞌnimaj nebꞌa nuqꞌij riꞌin rukꞌ waꞌ?
43 Na xiꞌan taj, ma e ne xitelej ri rocho ri tiox Moloc ubꞌiꞌ y ri chꞌumil re ri tiox iweꞌix, Renfán ubꞌiꞌ. Waꞌ e kikꞌaxwach taq ri tiox xebꞌiꞌano re kiloqꞌnimaj kiqꞌij.
Ruma kꞌu laꞌ kixintaq bꞌi kꞌa chwach pana ri tinamit Babilonia Am. 5:25-27
kachaꞌ.
44 »Echiriꞌ ri qatiꞌ-qamam xebꞌin pa ri luwar katzꞌintzꞌotik, kꞌo kukꞌ rike ri jun Rocho Dios xa kakirik, waꞌ e kꞌutubꞌal re kꞌo ri Dios kukꞌ. Yey rike xkiꞌan wa jun Rocho Dios jelaꞌ pachaꞌ ri xtaqan ri Dios che ri Moisés, e lik pachaꞌ ruꞌanikil rilom chi rire.**Chwi ri juyubꞌ Sinaí, ri Dios xukꞌut che ri Moisés suꞌanik kaꞌan ri Rocho Dios xa kakirik. Éx. 25:9,40. 45 Ekꞌu ri qatiꞌ-qamam xkiya kan wa Rocho Dios (ri xa kakirik) pakiqꞌabꞌ ri kalkꞌoꞌal rike. Y wa kalkꞌoꞌal xkikꞌam bꞌi waꞌ echiriꞌ xebꞌok rukꞌ ri Josué chupa ri ulew ke ri na e ta aj Israel, ri xebꞌesax bꞌi ruma ri Dios chaꞌ waꞌ wuꞌlew kakanaj kan pakiqꞌabꞌ rutinamit Rire. Ekꞌu waꞌ wa Rocho Dios xkꞌojiꞌ kukꞌ rutinamit ri Dios kꞌa chupa taq ri qꞌij re ri rey David.
46 »Ekꞌu ri David lik kꞌo rutoꞌbꞌal ri Dios rukꞌ. Rire xutzꞌonoj kꞌut kayaꞌtaj che kuyak jun kꞌakꞌ Rocho ri Dios chaꞌ taq ri ralkꞌoꞌal kan ri Jacob kakiloqꞌnimaj uqꞌij ri Dios chiriꞌ. 47 Noꞌj e ri Salomón ri xyakaw waꞌ wa Rocho Dios; 48 tobꞌ ri Dios Qajawxel na xew ta kajeqiꞌ pa taq ja ꞌanatal xa kuma tikawex, pachaꞌ ri kubꞌiꞌij ri jun qꞌalajisanel:
49 “Ruwa kaj e nutzꞌulibꞌal re taqanik,
yey ruwachulew e utakꞌalibꞌal ri waqan.
¿Saꞌ kꞌu riꞌ ri ja kiyak chwe?” kacha ri Qajawal.
“¿O pachawi kꞌowi ri luwar pa kinuxlan wi?
50 ¿Na e ta nebꞌa ri nuqꞌabꞌ ꞌanayom ronoje waꞌ wa kꞌolik?” Is. 66:1-2
kachaꞌ.
51 »Ekꞌu ralaq lik na jinta kꞌo kata alaq. Ri kꞌuꞌx alaq y ri tanibꞌal alaq e pachaꞌ ke ri winaq na jinta ri Dios kukꞌ, ma na kaꞌaj ta alaq kakoj alaq utzij. Ralaq alaq pachaꞌ ri chuꞌqaw alaq ojertan, ma lik na kaꞌaj ta alaq kata alaq ri kubꞌiꞌij ri Santowilaj Ruxlabꞌixel ri Dios che alaq. 52 ¿China junoq chike ri qꞌalajisanelabꞌ na xternabꞌex ta rukꞌ kꞌax kuma ri chuꞌqaw alaq ojertan? Ma rike e xekamisan ke ri xetzijon lo puwi rukꞌutunik ri Jun lik jusukꞌ. Yey echiriꞌ xkꞌun Rire, ralaq xkꞌayij alaq y xkamisaj alaq. 53 Ralaq xkꞌul alaq Rutzij Upixabꞌ ri Dios kuma taq ri ángeles, noꞌj na xtaqej ta alaq janipa ri kubꞌiꞌij wa Tzij Pixabꞌ» xcha ri Esteban.
Rukamik ri Esteban
54 Echiriꞌ xkita ri xubꞌiꞌij ri Esteban, lik xpe koyowal y xkijeq kaqichꞌichꞌ ruwi keꞌ chirij rire. 55 Pero ri Esteban lik kꞌo ruchuqꞌabꞌ ri Santowilaj Ruxlabꞌixel ri Dios rukꞌ; xtzuꞌn kꞌu pana chikaj y xril runimal uchomalil ri Dios yey xrilo ri Jesús kꞌo puwikiqꞌabꞌ ri Dios. 56 Xubꞌiꞌij kꞌu rire: «¡Riꞌin kanwilo jaqal ruwa kaj y kanwil pana Ralaxel Chikixoꞌl Tikawex kꞌo puwikiqꞌabꞌ ri Dios!» xchaꞌ.
57 Ekꞌuchiriꞌ, ri winaq xkijeqo lik kesikꞌinik, xkitzꞌapij ri kixikin y xa jumul xebꞌek konoje chirij ri Esteban. 58 Xkesaj kꞌu bꞌi chupa ri tinamit y xkijeqo kakiꞌan paꞌbꞌaj. Y ri xkimol kibꞌ chirij, xkiya kan ri kiqꞌuꞌ che jun ala Saulo rubꞌiꞌ chaꞌ kuchajij waꞌ chike.
59 Ekꞌuchiriꞌ ketajin che uꞌanik paꞌbꞌaj ri Esteban, rire xuchꞌaꞌbꞌej ri Qanimajawal, jewaꞌ xubꞌiꞌij: «Wajawal Jesús, kꞌama la ri wanimaꞌ» xchaꞌ.
60 Tekꞌuchiriꞌ, xuxukubꞌaꞌ ribꞌ y ko xsikꞌinik: «Qajawal, kuyu la kimak che wa ketajin che uꞌanik» xchaꞌ. Y rukꞌ waꞌ, xkamik.
*7:3 Gn. 12:1
*7:5 Gn. 17:8
*7:8 Gn. 21:3-4
*7:8 Pa ri chꞌaꞌtem hebreo kubꞌiꞌij “patriarcas”.
†7:9 Ri xebꞌanaw re waꞌ e ri lajuj e ratzixelabꞌ ri José. Gn. 37:11,28
*7:9 Gn. 39:2-3, 21
*7:10 Gn. 41:37-41
*7:11 Gn. 41:54-57
*7:12 Gn. 42:1-3
*7:13 Gn. 45:1-16
*7:14 Gn. 45:9–47:12
*7:15 Gn. 49:33
*7:16 Gn. 23:16-18; 50:13; Jos. 24:32
‡7:18 Ri José kaminaq chik, yey wa jun chik taqanel na xretaꞌmaj ta ri toꞌbꞌal xuya ri José che ri tinamit re Egipto. Éx. 1:7-9
*7:19 Éx. 1:10-11, 22
§7:21 Ri ralko akꞌa Moisés xyaꞌ bꞌi chupa jun chakach puwi yaꞌ. Éx. 2:1-10
*7:23 Éx. 2:11-12
*7:28 Éx. 2:11-15
*7:29 Éx. 18:3-4
*7:34 Éx. 3:1-10
*7:35 Éx. 2:14
*7:36 Éx. 7:3; 14:21; Nm. 14:33
*7:40 Éx. 32:1, 23
*7:41 Éx. 32:4-6
**7:44 Chwi ri juyubꞌ Sinaí, ri Dios xukꞌut che ri Moisés suꞌanik kaꞌan ri Rocho Dios xa kakirik. Éx. 25:9,40.