1 Echiriꞌ xtaniꞌ ri ketukuk ri winaq, ri Pablo xebꞌusikꞌij ri kikojom rubꞌiꞌ ri Jesús. Xebꞌupixabꞌaj kꞌut y xebꞌulaqꞌapuj. Echiriꞌ xukꞌisbꞌej kan uchꞌaꞌtem kukꞌ, xel bꞌi y xeꞌela pa taq ri luwar re Macedonia. 2 Xikꞌow kꞌu pa taq wa luwar chaꞌ rukꞌ ukꞌiyal pixabꞌanik kunimarisaj kikꞌuꞌx ri kikojom rubꞌiꞌ ri Cristo.

Tekꞌuchiriꞌ, xeꞌela pa taq ri luwar re Grecia. 3 Oxibꞌ ikꞌ xkanaj kan ri Pablo chiriꞌ. Uchꞌobꞌom chi kꞌut keꞌek Siria pa barco; pero raj judiꞌabꞌ xkiꞌan tzij chikiwach chaꞌ kakiꞌan kꞌax che echiriꞌ kuꞌkojo bꞌi ri barco. Ekꞌu ri Pablo xretaꞌmaj ri kinaꞌoj na utz taj chirij; ruma kꞌu riꞌ, xujalkꞌatij ruchꞌobꞌom chaꞌ katzelej pa taq ri luwar re Macedonia.

4 E kꞌo hermanos xkachbꞌilaj bꞌi kꞌa pa taq ri luwar re Asia. Waꞌ e:

6 Yey riꞌoj,*“Riꞌoj”: Waꞌ keꞌelawi ri Lucas, ri xtzꞌibꞌan re ri libro, kꞌo tanchi kukꞌ. echiriꞌ ikꞌowinaq chi ri nimaqꞌij echiriꞌ katij ri pam na jinta levadura che, xojel pa barco chiriꞌ Filipos y pa woꞌobꞌ qꞌij xojopon kukꞌ pa ri tinamit Troas. Chiriꞌ xojkanaj kan wuqubꞌ qꞌij.

7 Ri nabꞌe qꞌij re ri semana xqamol qibꞌ kukꞌ ri kikojom rubꞌiꞌ ri Cristo chaꞌ kaqatij ri cena re ri Qanimajawal. Ekꞌu ri Pablo kakꞌutun chikiwach konoje. Yey ruma chirajawaxik kel bꞌi rire chukaꞌm qꞌij, xnajtir che ri kꞌutunik kuꞌano. Xtikꞌoj kꞌu riꞌ raqꞌabꞌ y kꞌa kachꞌaꞌtik. 8 Yey pa ri qamolom wi qibꞌ e chupa ruroxleꞌ ja chikaj y ukꞌiyal aqꞌ e tzijitalik.

9 Kꞌo kꞌu jun ala Eutico rubꞌiꞌ tzꞌul chupa ri ventana yey okinaq lo jun uqusil waram che ruma ri lik naj kachꞌaꞌt ri Pablo. Bꞌenaq kꞌu riꞌ ruwaram, xtzaq lo che churox leꞌ ja kꞌa pulew y kaminaq xeꞌyakoq.

10 Ekꞌu ri Pablo xqaj loq, xjupiꞌ puwi rala, xulaqꞌapuj y jekꞌuwaꞌ xubꞌiꞌij: «Maxiꞌij ibꞌ alaq, ma kꞌaslik» xchaꞌ.

11 Tekꞌuchiriꞌ, ri Pablo xaqꞌan tanchik y xujach ri cena re ri Qanimajawal. Ekꞌuchiriꞌ utijom chi ri cena, xujeq tanchi kachꞌaꞌtik y xukꞌisbꞌej waꞌ kꞌa pa rusaqribꞌal. Tekꞌuchiriꞌ, xumaj bꞌi ubꞌe. 12 Ekꞌu ri Eutico e laꞌ kꞌaslik xkikꞌam bꞌi chirocho; ruma kꞌu waꞌ lik xbꞌochiꞌitaj kikꞌuꞌx konoje.

13 Ri Pablo xraj keꞌek chiraqan pa ri tinamit Asón. Yey riꞌoj xojnabꞌej bꞌi pa barco chaꞌ keꞌqakꞌama bꞌi ri Pablo chiriꞌ. Jelaꞌ xqaꞌano ma e oj kanajinaq kan wi rukꞌ rire. 14 Xqariq kꞌu qibꞌ rukꞌ rire pa ri tinamit Asón. Yey junam rukꞌ rire xojꞌek pa barco y xqamaj bꞌi qabꞌe pa ri tinamit Mitilene. 15 Xojel kꞌu bꞌi chiriꞌ pa barco y chukaꞌm qꞌij xojikꞌow chwach ri isla Quío. Che kꞌu ri jun chik qꞌij xojopon Samos, waꞌ e jun tinamit kꞌo chuchiꞌ ri mar. Tekꞌuchiriꞌ, xojopon pa ri tinamit Trogilio y chiriꞌ xojuxlanik. Chukaꞌm qꞌij kꞌu riꞌ xojopon pa ri tinamit Mileto. 16 Jelaꞌ xqaꞌano, ma ri Pablo uchꞌobꞌom chik na kikꞌow ta pa ri tinamit Éfeso chaꞌ na kabꞌayitaj ta chilaꞌ pa taq ri luwar re Asia. Ri rilim wi e ma karaj we kꞌa xaqareꞌ kuꞌmaja ri nimaqꞌij re Pentecostés chilaꞌ Jerusalem.

17 Ekꞌuchiriꞌ oponinaq chi ri Pablo pa ri tinamit Mileto, xutaq kisikꞌixik ri e aj wach re riglesia kꞌo Éfeso. 18 Echiriꞌ xekꞌunik, ri Pablo xubꞌiꞌij chike:

«Ralaq lik ilom alaq saꞌ ri nubꞌinik chiwach alaq chwi lo ri nabꞌe qꞌij echiriꞌ xinkꞌun pa taq wa luwar re Asia. 19 Xinꞌan ruchak ri Dios chixoꞌlibꞌal alaq rukꞌ ronoje uchꞌutiꞌnal nukꞌuꞌx y na xa ta jubꞌiqꞌ ruwaꞌal nuwach elinaq y pa rewi rukꞌiyal kꞌaxkꞌobꞌik nutijom ruma ri itzel kinaꞌoj raj judiꞌabꞌ chwij. 20 Na rukꞌ ta kꞌu riꞌ, na jinta kꞌo wewam chiwach alaq, ma xinqꞌalajisaj ronoje ri kꞌo kutiqoj che ri bꞌinik silabꞌik alaq, yey xinkꞌutun chiwachil y pa taq ocho alaq. 21 Chikiwach kꞌu raj judiꞌabꞌ y ri na e ta aj judiꞌabꞌ, xinqꞌalajisaj lik chirajawaxik chike kakitzelej kitzij chwach ri Dios y kakubꞌiꞌ kikꞌuꞌx rukꞌ ri Qanimajawal Jesucristo.

22 »Ekꞌu woꞌora, ri Ruxlabꞌixel ri Dios xukoj pa wanimaꞌ kinꞌek pa ri tinamit Jerusalem tobꞌ kꞌamajaꞌ wetaꞌam saꞌ ri kankꞌulumaj na chilaꞌ; 23 xew wetaꞌam ri ubꞌiꞌim ri Santowilaj Ruxlabꞌixel ri Dios chwe. Ma pa ronoje taq ri tinamit kinikꞌow wi, kujikibꞌaꞌ uwach chwe ri katajin lo panuwiꞌ; waꞌ e ri kinkꞌam bꞌi pa taq cárcel y kinyaꞌ pa ukꞌiyal kꞌaxkꞌobꞌik. 24 Pero riꞌin na jinta kꞌana kubꞌiꞌij nukꞌuꞌx che, na kanꞌan tane che ri nukꞌaslem pachaꞌ lik kꞌo uwach chinuwach riꞌin; xew kuaj kankꞌis uꞌanikil rukꞌ kiꞌkotemal ri nutaqem pan che ri nuchak, ri xyaꞌ chwe ruma ri Qanimajawal Jesús. Waꞌ e ruqꞌalajisaxik ri Utzilaj Tzij re ri unimal rutzil ukꞌuꞌx ri Dios.

25 »Ekꞌu woꞌora che ralaq ri xtaꞌ alaq chi nuchiꞌ puwi rutaqanik ri Dios, lik wetaꞌam na jinta chi junoq karil tanchi nuwach. 26 Ekꞌu uwariꞌche waqꞌij kambꞌiꞌij chiwach alaq: Lik pawiꞌ alaq kꞌo wi we kꞌo junoq che alaq kasachik. 27 Ma na jinta kꞌo wewam chiwach alaq; e janipa ruchꞌobꞌom lo ri Dios kajawax che alaq, nuqꞌalajisam chi chiwach alaq.

28 »E uwariꞌche, chajij ibꞌ alaq y chechajij alaq janipa ri eyaꞌtal paqꞌabꞌ alaq ruma ri Santowilaj Ruxlabꞌixel ri Dios. Ma alaq aj kꞌamal wach re kebꞌil alaq ri tinamit re ri Qanimajawal, yey waꞌ wa tinamit e ri xebꞌuloqꞌ Rire rukꞌ rukikꞌel. 29 Wetaꞌam kꞌut echiriꞌ riꞌin in bꞌenaq chik, kebꞌok lo chixoꞌlibꞌal alaq jujun chik pachaꞌ e utiw xew kakaj kakisach kiwach taq ri bꞌexex. 30 Yey chixoꞌlibꞌal ne ralaq keyaktaj jujun kakijal ri saqil kꞌutunik chaꞌ ri kikojom rubꞌiꞌ ri Cristo kakesaj bꞌi kibꞌ chupa ri Qꞌijsaq y keterej kꞌu bꞌi chikij rike. 31 E uwariꞌche, lik kꞌuna saq chiwach ralaq. Kꞌuna chikꞌuꞌx alaq: E oxibꞌ junabꞌ waꞌ, chipaqꞌij chichaqꞌabꞌ, na in ta uxlaninaq che pixabꞌaxik chijujunal alaq rukꞌ uwaꞌal nuwach.

32 »Ekꞌu woꞌora hermanos, kanqꞌatisaj kan alaq puqꞌabꞌ ri Dios chaꞌ Rire kuchajij alaq y katikiꞌ kꞌu alaq chupa ri Utzilaj Tzij re ri unimal rutzil ukꞌuꞌx. Ma xew waꞌ kꞌo uchuqꞌabꞌ re kuya ri kꞌiyibꞌal alaq chwach ri Dios y kuya na janipa ri taqal che alaq, jelaꞌ pachaꞌ ri bꞌiꞌtisim chike konoje ri kiyaꞌom kibꞌ puqꞌabꞌ ri Dios.

33 »Riꞌin na nurayim ta oro o plata re junoq chik yey na nurayim tane ruqꞌuꞌ junoq chik. 34 E ne ri nuꞌanom, lik etaꞌam alaq; ma e janipa ri ajawaxinaq chwe riꞌin y chike ri e kꞌo wukꞌ, waꞌ lik nuchꞌakom rukꞌ wa nuqꞌabꞌ. 35 Rukꞌ kꞌu ronoje ri ilom alaq che ri nubꞌinik, nukꞌutum che alaq ri lik chirajawaxik wi kaqaꞌano: Kojchakunik chaꞌ utz keqatoꞌ janipa ri kꞌo kajawax chike. E kꞌuna chiqakꞌuꞌx ruchꞌaꞌtem ri Qanimajawal Jesús echiriꞌ xubꞌiꞌij: “E más nim uqꞌij ralaxik ri jun kasipanik, chwa ri jun xa kukꞌul ri kasipax che”» xchaꞌ.

36 Echiriꞌ xubꞌiꞌij taq kꞌu waꞌ ri Pablo, xuxukubꞌaꞌ ribꞌ y xuꞌan orar kukꞌ konoje ri e kꞌo chiriꞌ rukꞌ.

37 Konoje kꞌu riꞌ xkijeq kebꞌoqꞌik, xkilaqꞌapuj ri Pablo y xkitzꞌubꞌ uchiꞌ. 38 Lik xok unimal bꞌis chikikꞌuꞌx ruma xubꞌiꞌij ri Pablo na kakil ta chi uwach. Jekꞌulaꞌ xkachbꞌilaj bꞌi y xeꞌkijacha kan pa kꞌo wi ri barco.