1 ¿Pa taq kape wi ri chꞌaꞌoj y ri oyowal chiwach alaq? Waꞌ pa animaꞌ alaq kape wi, ma ri rayibꞌal e alaq e pachaꞌ kꞌo pa chꞌaꞌoj rukꞌ ri karaj ri Dios che alaq. 2 Lik kꞌo karayij alaq yey waꞌ na kayaꞌtaj ta che alaq. Kakꞌis kꞌu ibꞌ alaq che retzelal kꞌuꞌxaj; ruma kꞌu riꞌ katij alaq uqꞌij che ukꞌulik ri kaꞌaj alaq, kachꞌoꞌjin alaq y kaꞌan ne alaq kamik y chꞌaꞌoj. Pero na kakꞌul ta alaq ri kaꞌaj alaq ma na katzꞌonoj ta alaq waꞌ che ri Dios. 3 Yey ri katzꞌonoj alaq, na kakꞌul ta alaq ma na utz ta utzꞌonoxik kaꞌan alaq. Ma ri katzꞌonoj alaq xa e re katzꞌilaꞌ alaq che ri rayibꞌal alaq.

4 Ralaq ri na jusukꞌ ta ri animaꞌ alaq chwach ri Dios, ¿na etaꞌam ta kami alaq we jun kujunimaj ribꞌ rukꞌ taq ri rayinik xa re ruwachulew, e junam rukꞌ kachꞌoꞌjin chirij ri Dios? China kꞌu ri keꞌek ukꞌuꞌx rukꞌ ri rayinik xa re ruwachulew, riꞌ e kuꞌana aj retzelal kꞌuꞌx chirij ri Dios. 5 Laj kachꞌobꞌ kꞌu alaq raqan na il ta uwach Ruchꞌaꞌtem ri Dios pa kubꞌiꞌij wi: «Ri Ruxlabꞌixel uyaꞌom ri Dios pa qanimaꞌ lik kꞌax kojunaꞌo y lik na kukꞌul ta ukꞌuꞌx we lik e keꞌek qakꞌuꞌx rukꞌ taq ri xa re ruwachulew»* Éx. 20:4-5; Dt. 4:24; Zac. 8:2 kachaꞌ. 6 Pero ri Dios lik nim ri unimal rutzil ukꞌuꞌx kuya chiqe. Ruma laꞌ jewaꞌ tzꞌibꞌital pa Ruchꞌaꞌtem:

7 E uwariꞌche, yaꞌa ibꞌ alaq puqꞌabꞌ ri Dios; chꞌija alaq uchuqꞌabꞌ ritzel winaq y jekꞌulaꞌ rire kanimaj chiwach alaq. 8 Lik qibꞌ alaq rukꞌ ri Dios y jelaꞌ Rire kaqibꞌ ukꞌ ralaq. Ralaq ri kꞌo alaq pa mak, chomaj alaq ri bꞌinik silabꞌik alaq. Ekꞌu ralaq ri xa kebꞌ kꞌuꞌx alaq, ri kaꞌaj alaq kꞌax kanaꞌ alaq ri Dios yey lik keꞌek kꞌuꞌx alaq rukꞌ ri mak re ruwachulew, lik chomaj ri animaꞌ alaq che waꞌ. 9 Chubꞌisoj kꞌuꞌx alaq ri ꞌanom alaq, kꞌax chunaꞌa kꞌuꞌx alaq y choqꞌ alaq ruma waꞌ. Ekꞌu riꞌ ri tzeꞌ alaq chuꞌana oqꞌej y ri kiꞌkotemal alaq chuꞌana bꞌis. 10 ꞌAna kꞌu alaq chꞌutiꞌn che ibꞌ alaq chwach ri Dios; yey we kaꞌan kꞌu alaq waꞌ, Rire kuyak qꞌij alaq.

11 Hermanos, machꞌaꞌtibꞌej ibꞌ alaq chiwach alaq. Ma e ri kachꞌaꞌt chirij ri ratz-uchaqꞌ y kuqꞌat tzij puwiꞌ xa pa re rire, riꞌ e junam rukꞌ e kachꞌaꞌt chirij ri Tzij Pixabꞌ y kuqꞌat tzij puwi waꞌ. Yey we kaꞌan la waꞌ, riꞌ e keꞌeloq na lal ta ꞌanal re ri Tzij Pixabꞌ; ekꞌu kaꞌan che ibꞌ la lal aj qꞌatal tzij puwiꞌ. 12 Ma xa Jun ri yaꞌyom lo re ri Tzij Pixabꞌ y xew Rire kꞌo puqꞌabꞌ kojukolobꞌej o kusach qawach. Noꞌj rilal ¿saꞌ ri wach la chaꞌ xa pa e la kaqꞌat la tzij puwi jun chik?

13 Woꞌora tape alaq, ri jewaꞌ kabꞌiꞌij alaq: «Waqꞌij o chweꞌq kojꞌek pa jun tinamit y kojkꞌojiꞌ chilaꞌ jun junabꞌ; kaqaꞌan kꞌu qakꞌay y kaqachꞌak qarajil» kacha alaq. 14 Yey na etaꞌam tane kꞌana alaq saꞌ ri kakꞌulumaj alaq ri chweꞌq. Ma ¿saꞌ ri unimal uwach ri kꞌaslemal alaq? Paqatzij wi, xa pachaꞌ sutzꞌ, ma xa pa joqꞌotaj kawinaqirik y tekꞌuchiriꞌ kasachik. 15 Yey ri chirajawaxik wi e kabꞌiꞌij alaq waꞌ: «We ri Qaqaw karaj, kojkꞌasiꞌik y kaqaꞌan waꞌririꞌ o kaqaꞌan leleꞌ» kacha alaq. 16 Noꞌj ri kaꞌan ralaq, e lik kaꞌan alaq nim che ibꞌ alaq echiriꞌ katakꞌabꞌaꞌ qꞌij alaq. Yey lik na usukꞌ taj we junoq kutakꞌabꞌaꞌ uqꞌij. 17 E junoq retaꞌam saꞌ ri utz chirajawaxik kaꞌanik yey na kuꞌan taj, riꞌ kamakunik.